Đo bǐbɛ́mɛ ɔ́, hwenu e Mawu ɖó wɛ̌kɛ́ ɔ́, ayǐkúngban ɔ́ ɖo mɔ̌ kpowun bɔ nǔ ɖěbǔ ɖo jǐ tɔn ǎ. Zǐnflú cyɔ́n xu ayǐjɛ ɔ́, bɔ Yɛ Mawu tɔn nɔ́ ɖo yiyi wɛ ɖo sin ɔ́ ta nu. Mawu ɖɔ: “Wěziza ní tíin”, bɔ wěziza ɔ́ tíin. Mawu mɔ ɖɔ wěziza ɔ́, nǔ ɖagbe wɛ, lobo ɖe wěziza ɔ́ ɖó vo nú ablu. É ylɔ́ wěziza ɔ́ ɖɔ kéze, bó ylɔ́ ablu ɔ́ ɖɔ zǎn. Zǎn kú, bɔ ayǐ hɔ́n; azǎn nukɔntɔn ɔ́ nɛ́. Mawu ɖɔ: “Tɛnmɛ vɔ́tɔ́ ɖaxó ɖé ní tíin bó má sin ɔ́, nú ɖokpó ná ɖo jǐnukúnsin aga, nú ɖokpó ná ɖo ayǐkúngban jí.” Nǔ nyí mɔ̌ nǔgbó: Mawu bló tɛnmɛ ɔ́, bó má sin ɔ́ ɖó we; ɖokpó ɖo aga bɔ ɖokpó ɖo do. É ylɔ́ tɛnmɛ vɔ́tɔ́ ɖaxó ɔ́ ɖɔ jǐnukúnsin. Zǎn kú, bɔ ayǐ hɔ́n. Azǎn wegɔ́ ɔ́ nɛ́. Mawu lɛ́ ɖɔ: “Sin e ɖo do ɔ́ ní kplé cí fí ɖokpó, bónú fí xúxú ní jɛ wě.” Bɔ nǔ nyí mɔ̌ nǔgbó. Bɔ é ylɔ́ fí xúxú ɔ́ ɖɔ ayǐkúngban, lobo ylɔ́ fí e sin ɔ́ kplé cí ɔ́ ɖɔ xu. Mawu mɔ ɖɔ nǔ ɖagbe wɛ. Énɛ́ ɔ́ gúdo ɔ́, Mawu ɖɔ: “Gběhan kpó atín kpó ní wú kpé ayǐkúngban ɔ́ bǐ jí: Yě ní nɔ́ ná kwín yětɔn yětɔn, bó nɔ́ ná sínsɛ́n yětɔn yětɔn.” Bɔ nǔ nyǐ mɔ̌ nǔgbó. Gběhan wú ɖo ayǐkúngban ɔ́ jí, gběhan tɛnmɛ tɛnmɛ lɛ́ɛ wú, atín tɛnmɛ tɛnmɛ lɛ́ɛ wú, bɔ yě ná sínsɛ́n yětɔn yětɔn, bó ná kwín yětɔn yětɔn. Mawu mɔ ɖɔ nǔ ɖagbe wɛ. Zǎn kú, bɔ ayǐ hɔ́n; azǎn atɔngɔ́ ɔ́ nɛ́. Mawu ɖɔ: “Nǔ e nɔ́ ná wěziza lɛ́ɛ ní tíin gbɔn fí bǐ ɖo jǐnukúnsin bó ɖe kéze ɖó vo nú zǎn. Yě ná nyí wuntun ɖé bɔ è nǎ nɔ́ xwédo dó tunwun hwenu lɛ́ɛ, azǎn lɛ́ɛ kpódó xwe lɛ́ɛ kpó. Yě ná nɔ jǐnukúnsin, bó ná nɔ́ ná wěziza dó ayǐkúngban ɔ́ jí”; bɔ nǔ nyí mɔ̌ nǔgbó. Énɛ́ ɔ́, Mawu bló nǔ we e ná nɔ́ ná wěziza lɛ́ɛ: ɖaxó ɔ́ wɛ nyí hwe. Éyɛ́ ná nɔ́ kpa acɛ nú kéze. Kpɛví ɔ́ wɛ nyí sun, bó ná nɔ́ kpa acɛ nú zǎn. É lɛ́ bló sunví lɛ́ɛ lɔmɔ̌. Mawu bɛ́ yě ɖó jǐnukúnsin, bónú yě ná nɔ́ ná wěziza dó ayǐkúngban ɔ́ jí. Yě ná nɔ́ kpa acɛ nú kéze, bó ná nɔ́ kpa acɛ nú zǎn, bó ná nɔ́ ɖe wěziza ɖó vo nú zǐnflú. Zǎn kú, bɔ ayǐ hɔ́n. Azǎn ɛnɛgɔ́ ɔ́ nɛ́. Mawu ɖɔ: “Kanlin tɛnmɛ tɛnmɛ ní gɔ́ tɔ lɛ́ɛ mɛ winnini; xɛ lɛ́ɛ ní tíin, bó nɔ́ zɔn gbɔn jɔhɔn mɛ.” Nǔgbó ɔ́, Mawu ɖǒ xumɛkanlin ɖaxó ɖaxó lɛ́ɛ kpódó kanlin tɛnmɛ tɛnmɛ e nɔ lin tɔ lɛ́ɛ bǐ kpó, bɔ yě kpé tɔ lɛ́ɛ mɛ winnini. É lɛ́ bló xɛ tɛnmɛ tɛnmɛ lɛ́ɛ. Bɔ Mawu mɔ ɖɔ nǔ ɖagbe wɛ. Mawu xo ɖɛ dó yě jí, bó ɖɔ: “Mi ji, mi gba kún, bó kpé tɔ lɛ́ɛ mɛ, bónú xɛ lɛ́ɛ ní gba kún kpé gbɛ ɔ́ mɛ.” Zǎn kú, bɔ ayǐ hɔ́n. Azǎn atɔ́ɔ́ngɔ́ ɔ́ nɛ́. Mawu ɖɔ: “Ayǐkúngban ní ná xwé kanlin tɛnmɛ tɛnmɛ lɛ́ɛ, gběkanlin tɛnmɛ tɛnmɛ lɛ́ɛ, kpó kanlin tɛnmɛ tɛnmɛ e nɔ sá lɛ́ɛ kpó.” Bɔ nǔ nyí mɔ̌ nǔgbó. Nǔgbó ɔ́, Mawu bló gběkanlin tɛnmɛ tɛnmɛ lɛ́ɛ, xwé gbe kanlin tɛnmɛ tɛnmɛ lɛ́ɛ, kpó kanlin tɛnmɛ tɛnmɛ e nɔ sá lɛ́ɛ kpó, bó mɔ ɖɔ nǔ ɖagbe wɛ. Énɛ́ ɔ́ gúdo ɔ́, Mawu ɖɔ: “Mǐ ní bló gbɛtɔ́ ɖó mǐ ɖésúnɔ sín akpajlɛ́ mɛ, nú yě ní cí mǐ ɖésúnɔ ɖɔhun; yě ní kpa acɛ nú hweví lɛ́ɛ, bó kpa acɛ nú xɛ lɛ́ɛ, bó kpa acɛ nú xwé gbe kanlin lɛ́ɛ, kanlin e nɔ sá lɛ́ɛ; yě ní kpa acɛ nú ayǐkúngban ɔ́ bǐ.” Mawu ɖó gbɛtɔ́ ɖó akpajlɛ́ é ɖésúnɔ tɔn mɛ. É ɖó gbɛtɔ́ akpajlɛ́ é ɖésúnɔ tɔn ɖɔhun. É ɖó súnnu kpódó nyɔ̌nu kpó. Énɛ́ ɔ́ gúdo ɔ́, é xo ɖɛ dó yě jí bó ɖɔ: “Mi ji, mi gba kún, bó kpé ayǐkúngban ɔ́ jí, bó sɔ́ ɛ ɖó acɛ mitɔn glɔ́. Mi sɔ́ hweví lɛ́ɛ ɖó acɛ mitɔn glɔ́, bó sɔ́ xɛ lɛ́ɛ ɖó acɛ mitɔn glɔ́, bó sɔ́ kanlin e ɖo ayǐkúngban jí lɛ́ɛ bǐ ɖó acɛ mitɔn glɔ́.” É lɛ́ ɖɔ nú yě ɖɔ: “Gběhan e ɖo ayǐkúngban jí, bó nɔ́ ɖó kwín lɛ́ɛ ɔ́, un ná bǐ mi, bó ná atín e ɖo ayǐkúngban jí, bó nɔ́ sɛ́n bɔ sínsɛ́n yětɔn nɔ́ ɖó kwín lɛ́ɛ bǐ mi; yě ná nyí nǔɖuɖu mitɔn. Mɔ̌ ɖokpó ɔ́, un ná ama lɛ́ɛ, bɔ yě ná nyí nǔɖuɖu nú kanlin e ɖo ayǐkúngban jí lɛ́ɛ bǐ; yě ná nyí nǔɖuɖu nú xɛ lɛ́ɛ bǐ, yě ná nyí nǔɖuɖu nú kanlin e nɔ sá lɛ́ɛ bǐ, yě ná nyí nǔɖuɖu nú nǔ e ɖo gbɛ lɛ́ɛ bǐ.” Bɔ nǔ nyí mɔ̌ nǔgbó. Mawu mɔ ɖɔ nǔ e émí bló lɛ́ɛ bǐ ɔ́, nǔ ɖagbe wɛ yě nyí tawun. Zǎn kú, bɔ ayǐ hɔ́n. Azǎn ayizɛ́ngɔ́ ɔ́ nɛ́. Lě e Mawu ɖó wɛ̌kɛ́ ɔ́ kpó nǔ e ɖ'é mɛ lɛ́ɛ bǐ kpó gbɔn ɔ́ nɛ́. Hǔn, azǎn ayizɛ́ngɔ́ ɔ́ gbe ɔ́, Mawu wa azɔ̌ tɔn lɛ́ɛ bǐ fó bó gbɔjɛ́ azǎn tɛ́nwegɔ́ ɔ́ gbe. É xo ɖɛ dó azǎn tɛ́nwegɔ́ ɔ́ jí, bó ɖe ɖó vo, ɖó ée é wa azɔ̌ tɔn lɛ́ɛ bǐ fó ɔ́, azǎn énɛ́ ɔ́ gbe wɛ é gbɔjɛ́. Lě e Mawu ɖó wɛ̌kɛ́ ɔ́ gbɔn ɔ́ nɛ́. Hwenu e Mawu Mavɔmavɔ ɖó wɛ̌kɛ́ ɔ́ tlóló ɔ́, zunkan ɖěbǔ kó ɖo ayǐkúngban ɔ́ jí ǎ, gběhan ɖěbǔ ká kó wú ǎ, ɖó Mawu Mavɔmavɔ kó sɛ́ jǐ dó ayǐkúngban ɔ́ jí ǎ, gbɛtɔ́ ɖě ká kó ɖo ayǐkúngban ɔ́ jí bó ná lɛ ǎ. Ahǔn nɔ́ tɔ́n sín kɔ́ glɔ́ bó nɔ́ ja dó ayǐkúngban ɔ́ bǐ jí. Mawu Mavɔmavɔ kán kɔ́ dó mɛ gbɛtɔ́, bó fún funfún e nɔ ná gbɛ mɛ ɔ́ dó awɔntín tɔn mɛ, bɔ gbɛtɔ́ ɔ́ húzú mɛ gbɛɖe. Mawu Mavɔmavɔ ɖó jikpá ɖokpó ɖó Edɛ́ni, ɖo zǎnzǎnhwe jí wa jí, bó zé gbɛtɔ́ e è mɛ ɔ́ d'é mɛ. É bló bɔ atín alɔkpa alɔkpa e nyɔ́ kpɔ́n, bɔ sínsɛ́n yětɔn nyɔ́ ɖu lɛ́ɛ wú ɖo jikpá ɔ́ mɛ. É bló bɔ atín e sínsɛ́n tɔn nɔ́ ná gbɛ mɛ ɔ́, kpódó atín e sínsɛ́n tɔn nɔ́ zɔ́n, bɔ è nɔ tunwun nǔ ɖagbe kpódó nǔ nyanya kpó ɔ́ wú ɖo jikpá ɔ́ tɛ́ntin. Tɔ ɖé jɔ ɖo Edɛ́ni, bó nɔ sa wá hú sin nú jikpá ɔ́, bó zɛ ala ɛnɛ sín fínɛ́. Ala nukɔntɔn ɔ́ nɔ́ nyí Picɔ́ni. É nɔ́ sa lɛ́ lɛ̌ dó Hawíla. È nɔ mɔ siká ɖo Hawíla to ɔ́ mɛ. Siká akú wɛ ɖo fínɛ́. È nɔ lɛ́ mɔ atínhúnhɔ́n wǎnɖagbenɔ ɖé ɖo fínɛ́, bɔ è nɔ ylɔ́ ɖɔ budeliyɔ́mu; è nɔ lɛ́ mɔ awǐnnya ɖagbe ɖagbe e è nɔ ylɔ́ ɖɔ Onísi ɔ́. Ala wegɔ́ ɔ́ nɔ́ nyí Gixɔ́ni; éyɛ́ wɛ nɔ́ sa lɛ́ lɛ̌ dó Kúci sín to ɔ́ bǐ. Ala atɔngɔ́ ɔ́ nɔ́ nyí Tígli; éyɛ́ nɔ́ sa yi Asilíi sín zǎnzǎnhwe jí; ala ɛnɛgɔ́ ɔ́ nɔ nyí Efláti. Mawu Mavɔmavɔ sɔ́ gbɛtɔ́ ɔ́ ɖó jikpá Edɛ́ni tɔn ɔ́ mɛ, bónú é ná nɔ́ lɛ, bó ná nɔ́ kpé nukún d'é wú. Mawu Mavɔmavɔ ɖɔ nú gbɛtɔ́ ɔ́ ɖɔ: “A sixú ɖu atín e ɖo jikpá ɔ́ mɛ ɔ́ bǐ sín sínsɛ́n. Amɔ̌, atín e sín sínsɛ́n è nɔ ɖu bó nɔ tunwun nǔ ɖagbe kpódó nǔ nyanya kpó ɔ́ kɛ́ɖɛ́ jɛ́n a ma ná ɖu ǎ, ɖó gbe e gbe a nǎ ɖu ɔ́, a nǎ kú.” Mawu Mavɔmavɔ ɖɔ: “É nyɔ́ bónú gbɛtɔ́ ná nɔ é ɖokpónɔ ǎ. Un ná bló alɔgɔ́númɛtɔ́ ɖokpó n'i, bɔ é ná jɛ xá ɛ.” Mawu Mavɔmavɔ kán kɔ́ dó bló kanlin e ɖo ayǐkúngban jí lɛ́ɛ bǐ, kpódó xɛ lɛ́ɛ bǐ kpó, bó kplá yě wá gbɛtɔ́ ɔ́ gɔ́n, bó ná kpɔ́n nyǐkɔ e é ná ná yě ɔ́. Nyǐkɔ e é ná ná yě ɔ́ wɛ yě ná nɔ́ nyí. Énɛ́ ɔ́, gbɛtɔ́ ɔ́ ɖó nyǐkɔ nú kanlin xwé gbe tɔn lɛ́ɛ bǐ, bó ɖó nú gběkanlin lɛ́ɛ bǐ, lobo ɖó nú xɛ lɛ́ɛ bǐ. Lo ɔ́, é mɔ mɛ e ná jɛ xá ɛ, bó ná gɔ́ alɔ n'i ɔ́ ǎ. Hwe énɛ́ ɔ́ nu ɔ́, Mawu Mavɔmavɔ ɖó sɛnmlɔ nú gbɛtɔ́ ɔ́, bó ɖe ajajaxú tɔn ɖokpó, bó lɛ́ sú lanti ɔ́ ɖó tɛn tɔn mɛ. Mawu Mavɔmavɔ zé ajajaxú ɔ́ dó bló nyɔ̌nu ɖokpó bó kplá ɛ yi jó nú súnnu ɔ́. Ée súnnu ɔ́ mɔ nyɔ̌nu ɔ́ lě tlóló ɔ́, é sú xó bó ɖɔ: “Áahɛɛnnɛ́! Nyi ɖɔhun ɖokpó ɖíe lo. Xú tɔn lɛ́ɛ cí xú ce ɖɔhun, agbaza tɔn cí agbaza ce ɖɔhun!” È nǎ nɔ́ ylɔ́ ɛ ɖɔ nyɔ̌nu, ɖó súnnu sín lanmɛ wɛ è ɖe e sín. Énɛ́ ɔ́ wú wɛ súnnu ná jó tɔ́ tɔn kpó nɔ tɔn kpó dó, bó ná jɛ kpɔ́ xá asi tɔn, bɔ yě mɛ we lɛ́ɛ ná húzú ɖokpó géé. Súnnu ɔ́ kpó asi tɔn kpó bǐ wɛ ɖo mɛ̌, có é ká nɔ́ hu winnyá nú yě ǎ. Lo ɔ́, dan wɛ nyí kanlin e sɛ́ hú gběkanlin e Mawu Mavɔmavɔ bló lɛ́ɛ bǐ é. Dan ɔ́ kanbyɔ́ nyɔ̌nu ɔ́ ɖɔ: “Mawu ɖɔ mi kún ɖó ná ɖu atínsínsɛ́n e ɖo jikpá ɔ́ mɛ lɛ́ɛ ɖěbǔ ó nǔgbó a?” Bɔ nyɔ̌nu ɔ́ yí gbe n'i ɖɔ: “Mǐ hɛn ɔ́, mǐ nǎ ɖu atínsínsɛ́n e ɖo jikpá ɔ́ mɛ lɛ́ɛ, amɔ̌, atín e ɖo jikpá ɔ́ tɛ́ntin ɔ́, Mawu ɖɔ nú mǐ ɖɔ mǐ ní má ɖu sínsɛ́n tɔn ó, mǐ ní má ɖ'alɔ wú lɔ vɔ́vɔ́ ó, mǐ táá kú.” Dan lɛ́ yí xó bó ɖɔ: “Gbeɖé kpɔ́n, mi ná kú ɖě ǎ, lo ɔ́, Mawu tunwun ɖɔ gbe e gbe mi ná ɖu ɔ́, mi ná mɔ nukúnnú jɛ lě e nǔ lɛ́ɛ ɖe gbɔn ɔ́ wú, é ɖésúnɔ Mawu ɔ́ ɖɔhun, bó ná tunwun nǔ ɖagbe kpódó nǔ nyanya kpó.” Énɛ́ ɔ́, nyɔ̌nu ɔ́ mɔ ɖɔ atín ɔ́ nyɔ́ kpɔ́n, bɔ sínsɛ́n tɔn ná nyɔ́ ɖu. É mɔ ɖɔ nú è ɖu nǔgbó ɔ́, è nǎ ɖó nukúnnú mɔ jɛ nǔ mɛ. Énɛ́ ɔ́, é ba bó ɖu; asú tɔn ɖo akpá tɔn, bɔ é ná ɛ bɔ élɔ́ ɖu. Ée yě ɖu ɔ́, yě mɛ we lɛ́ɛ mɔ nukúnnú jɛ lě e yě ɖe gbɔn ɔ́ wú, bó mɔ ɖɔ émí ɖo mɛ̌. Hwe énɛ́ ɔ́ nu ɔ́, yě ba fígima bó sin ɖě dó ɖě wú, lobo sɔ́ sin dó alin avɔ ɖɔhun. Gbadanu wá su, bɔ Mawu Mavɔmavɔ ɖo sa ɖi gbɔn jikpá ɔ́ mɛ wɛ, bɔ yě se afɔ tɔn gbe. Énɛ́ ɔ́, yě yi hɔn hwlá dó atín e ɖo jikpá ɔ́ mɛ lɛ́ɛ tɛ́ntin. Mawu Mavɔmavɔ ká ylɔ́ súnnu ɔ́, bó ɖɔ: “Fítɛ́ wɛ a ɖe?” Bɔ súnnu ɔ́ yí gbe n'i ɖɔ: “Afɔ towe gbe wɛ un se ɖo jikpá ɔ́ mɛ bɔ xɛsi ɖi mì bɔ un hɔn hwlá, ɖó mɛ̌ wɛ un ɖe.” Mawu Mavɔmavɔ ká kanbyɔ́ ɛ ɖɔ: “Mɛ̌ wɛ ɖɔ nú we ɖɔ a ɖo mɛ̌? Atín e sín sínsɛ́n un gbɛ́ nú we ɖɔ hwi ní má ɖu ó ɔ́, a ɖu wɛ a?” Bɔ é yí gbe n'i ɖɔ: “Nyɔ̌nu e a sɔ́ ɖó akpá ce ɔ́ wɛ ná mì bɔ un ɖu.” Énɛ́ ɔ́, Mawu Mavɔmavɔ kanbyɔ́ nyɔ̌nu ɔ́ ɖɔ: “Étɛ́ a wa mɔ̌ nɛ́?” Bɔ é yí gbe n'i ɖɔ: “Dan wɛ blɛ́ mì bɔ un ɖu atín ɔ́ sín sínsɛ́n.” Ée é ɖɔ mɔ̌ ɔ́, Mawu Mavɔmavɔ ɖɔ nú dan ɔ́ ɖɔ: “Đó nǔ énɛ́ ɔ́ e a wa ɔ́ wútu ɔ́, bɛ́ sín égbé ɔ́, a nǎ nɔ́ sá gbɔn adɔgo jí, bó ná nɔ́ ɖu kɔ́ ɖo gbɛzán towe bǐ mɛ. Nu wɛ un dó we ɖo kanlin lɛ́ɛ bǐ mɛ. Un ná bló bɔ hwi kpó nyɔ̌nu ɔ́ kpó ɔ́, mi ná nɔ́ mɔ miɖée gbɔ gbeɖé ǎ; kúnkan towe kpó kún tɔn kpó ɔ́, yě ná nɔ́ mɔ yěɖée gbɔ gbeɖé ǎ. Kúnkan tɔn ná nɔ́ nyínyɛ́ ta nú we, bɔ hwɛ ká ná nɔ́ gblé wǔ éyɛ́ tɔn dó afɔgbɛnnu.” Énɛ́ ɔ́ gúdo ɔ́, Mawu Mavɔmavɔ ɖɔ nú nyɔ̌nu ɔ́ ɖɔ: “Un ná bló bɔ a mɔ xo ɔ́, a nǎ nɔ́ mɔ wǔvɛ́ ɖésú; a yi ajidonu ɔ́, a nǎ mɔ wǔvɛ́; asú towe ná nɔ́ jló we, éyɛ́ ká ná ɖu gǎn ɖo jǐ towe.” Mawu Mavɔmavɔ ká wá ɖɔ nú Adámu ɖɔ: “Ée a se asi towe xó, bó ɖu atín e sín sínsɛ́n un gbɛ́ ɖɔ hwi ní má ɖu ó ɔ́ wútu ɔ́, un ná dó nu ayǐkúngban ɔ́ ɖó hwi wú. A nǎ nɔ́ jɛ tagba ɖésú, cóbɔ ayǐkúngban ɔ́ ná nɔ́ ná we nǔɖuɖu ɖo gbɛzán towe lɛ́ɛ bǐ mɛ. Wunkan lɛ́ɛ kpódó gběhan kpó wɛ ná nɔ́ wú ɖo ayǐkúngban ɔ́ jí; gběhan e wú ɖo gle lɛ́ɛ mɛ ɔ́ wɛ a nǎ nɔ́ ɖu. A nǎ nɔ́ xwá dɛ̌n ɖo nukɔn cóbó ná nɔ́ mɔ nǔ ɖu. Mɔ̌ wɛ é ná nyí gbɔn nú we káká bɔ a nǎ yi kɔ́ e è dǒ bló we ná ɔ́ glɔ́. Nǔgbó ɔ́, kɔ́ wɛ a nyǐ, bó ka ná lɛ́ húzú kɔ́.” Súnnu ɔ́ ɖó nyǐkɔ n'i ɖɔ Ɛvu, ɖó é wɛ ná nyí gbɛtɔ́ lɛ́ɛ bǐ sín nɔ. Mawu Mavɔmavɔ sɔ́ anyǔ dó bló avɔ bó dó nú Adámu kpódó asi tɔn kpó. Énɛ́ ɔ́ gúdo ɔ́, Mawu Mavɔmavɔ ɖɔ: “Gbɛtɔ́ ɖíe wá cí mǐ ɖésúnɔ ɖɔhun, bó nɔ tunwun nǔ ɖagbe kpódó nǔ nyanya kpó e; din ɔ́, mǐ nǎ lɔn bɔ é ná ba atín e nɔ ná gbɛ mɛ ɔ́ sín sínsɛ́n bó ɖu ǎ; é táá nɔ gbɛ káká sɔ́yi.” Ée Mawu Mavɔmavɔ ɖɔ mɔ̌ ɔ́, é nya gbɛtɔ́ ɔ́ sín jikpá Edɛ́ni tɔn ɔ́ mɛ, bónú é ná lɛ ayǐkúngban e mɛ è ɖe e sín ɔ́. Ée Mawu Mavɔmavɔ nya gbɛtɔ́ sín jikpá ɔ́ mɛ ɔ́, é fɔ wɛnsagun susunɔ lɛ́ɛ ɖó jikpá Edɛ́ni tɔn ɔ́ sín zǎnzǎnhwe jí. Wɛnsagun lɛ́ɛ hɛn hwǐ, bó ɖo mimi wɛ, bɔ é nɔ́ ɖo myɔ kán wɛ, bó ɖo ali e yi atín e nɔ ná gbɛ mɛ ɔ́ kɔn ɔ́ cɔ́ wɛ. Adámu ɖó xó xá asi tɔn Ɛvu, bɔ Ɛvu mɔ xo bó ji vǐ súnnu ɖokpó, bɔ è nɔ ylɔ́ vǐ ɔ́ ɖɔ Kanyɛ́ɛ. Ée é ji vǐ ɔ́ é ɔ́, é ɖɔ: “Mawu Mavɔmavɔ d'alɔ mì bɔ un ji vǐ ɖokpó.” É lɛ́ ji vǐ súnnu ɖokpó dó Kanyɛ́ɛ nɛgbé, bɔ è nɔ ylɔ́ ɛ ɖɔ Abɛ́li. Abɛ́li wá nyí lɛ̌ngbɔ́nyitɔ́, bɔ Kanyɛ́ɛ wá nyí glesi. É wá su gbe ɖokpó, bɔ Kanyɛ́ɛ hɛn nǔ e gle tɔn ná ɔ́ wá xwlé Mawu Mavɔmavɔ. Abɛ́li éyɛ́ ɔ́, é hɛn gbɔ̌ tɔn lɛ́ɛ sín nukɔn ví lɛ́ɛ wá sá vɔ̌ nú Mawu Mavɔmavɔ, bó xwlé e akpáxwé ɖagbe ɖagbe lɛ́ɛ. Mawu Mavɔmavɔ sɔ́ nukún ɖagbe dó kpɔ́n Abɛ́li kpó vɔ̌sánú tɔn kpó. É ká ɖe kɔ dó Kanyɛ́ɛ kpódó vɔ̌sánú tɔn kpó. Nǔ énɛ́ ɔ́ sin xomɛ nú Kanyɛ́ɛ ɖésú, bɔ é nylá nukún mɛ. Ée é sin xomɛ mɔ̌ ɔ́, Mawu Mavɔmavɔ kanbyɔ́ ɛ ɖɔ: “Nɛ̌ wɛ gbɔn bɔ a sin xomɛ bó nylá nukún mɛ sɔ mɔ̌? Nú nǔ ɖagbe wɛ a ko wa ɔ́, a nǎ zé ta dó jǐ; ée a ma ka wa nǔ ɖagbe ǎ ɔ́, hwɛhuhu ɖo ayǐjínjɔ́n ɖo hɔn towe ta, bó jló ná ɖu ɖo jǐ towe; ma ka lɔn ó.” Mawu Mavɔmavɔ ɖɔ mɔ̌ nú Kanyɛ́ɛ có, Kanyɛ́ɛ ɖɔ nú nɔví tɔn Abɛ́li ɖɔ ní wá mǐ yi gle mɛ. Ée yě yi jɛ dɔ̌n ɔ́, Kanyɛ́ɛ zɔn nɔví tɔn Abɛ́li jí bó hu. Ée é hu i ɔ́, Mawu Mavɔmavɔ kanbyɔ́ Kanyɛ́ɛ ɖɔ: “Fítɛ́ nɔví towe Abɛ́li ɔ́ ɖe?” Bɔ é yí gbe n'i ɖɔ: “Un tunwun ǎ! Nyɛ wɛ nɔ cɔ́ nɔví ce a?” Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Étɛ́ a wa mɔ̌ nɛ́? Nɔví towe sín hun ɖo xó sú sín ayǐkúngban jí wá gɔ̌n ce wɛ, bó ɖo byɔ̌byɔ́ wɛ ɖɔ má ba hlɔn. Bɛ́ sín din ɔ́, a nǎ gosín ayǐkúngban e kɛ nu, bó nu nɔví towe e a hu ɔ́ sín hun ɔ́ jí. Nu wɛ un dó we. Nú a lɛ gle ɔ́, ayǐkúngban sɔ́ ná ná dɔkun tɔn we ǎ; a nǎ nɔ fí ɖokpó ɖo ayǐkúngban ɔ́ jí ǎ; a nǎ nɔ́ ɖo flúflú kpé wɛ.” Ée Mawu Mavɔmavɔ ɖɔ mɔ̌ ɔ́, Kanyɛ́ɛ ɖɔ: “Hwɛ e un hu ɔ́ d'agba dín; é nyí agban ɖé wɛ é nyí ɔ́, un sixú hɛn ǎ. Áo! Hwi ɖíe nya mì sín ayǐkúngban élɔ́ jí égbé din, bɔ un ná yi hɔn hwlá cí fí ɖé, ɖo zɔ nú we e. Un ná mɔ fí ɖé nɔ ɖo ayǐkúngban jí ǎ, bó ná nɔ́ ɖo flúflú kpé wɛ, bɔ mɛ ɖěbǔ mɔ mì ɔ́, mɛ ɔ́ ná hu mì.” Mawu Mavɔmavɔ ká ɖɔ n'i ɖɔ: “Nú mɛ ɖé hu we ɔ́, azɔn tɛ́nwe wɛ è nǎ ba hlɔn towe.” Ée Mawu Mavɔmavɔ ɖɔ mɔ̌ ɔ́, é ɖó wuntun i, bónú mɛ ɖěbǔ mɔ ɛ ɔ́, mɛ ɔ́ má hu i ó. Énɛ́ ɔ́ gúdo ɔ́, Kanyɛ́ɛ hɔn yi cí zɔ nú Mawu Mavɔmavɔ; é yi cí Nɔdu yíkúngban jí, ɖo Edɛ́ni sín zǎnzǎnhwe jí. Kanyɛ́ɛ ɖó xó xá asi tɔn, bɔ é mɔ xo, bó ji vǐ súnnu ɖokpó, bɔ è nɔ ylɔ́ vǐ ɔ́ ɖɔ Henɔki. Kanyɛ́ɛ ɖó toxo ɖokpó ayǐ bó ɖó vǐ tɔn Henɔki sín nyǐkɔ ná. Henɔki ji Iladi, Iladi ji Mɛhuyaɛ́li, Mɛhuyaɛ́li ji Mɛtucaɛ́li, bɔ Mɛtucaɛ́li ji Lamɛki. Lamɛki da asi we. Asi tɔn lɛ́ɛ ɖokpó nɔ́ nyí Ada, wegɔ́ ɔ́ nɔ́ nyí Sila. Ada ɔ́ ji Yabalu; Yabalu wɛ nyí kanlinnyitɔ́ nukɔntɔn; é wɛ nyí yě mɛ e nɔ ɖo kanlin nyi wɛ, bó nɔ́ ɖo yiyi wɛ lɛ́ɛ sín tɔ́gbó. Nɔví tɔn nɔ́ nyí Yubalu. É wɛ dó kanhún xixo kpó kpete kúnkún kpó wá. Sila ɔ́ ji Tubalu-Kanyɛ́ɛ. Tubalu-Kanyɛ́ɛ wɛ nɔ zé ganvɔ abǐ gan dó tun alǐnnyánú ɖíɖá lɛ́ɛ bǐ ná. É wɛ dó nǔtunwuntunwun wá. É ɖó nɔví nyɔ̌nu ɖokpó bɔ é nɔ́ nyí Naama. Lamɛki ɖɔ nú asi tɔn lɛ́ɛ gbe ɖokpó ɖɔ: “Ada, Sila, mi ɖótó mì! Asi ce lɛ́ɛ e mi, mi ɖótó xó ce. Nú è dǒ nǔ mì ɔ́, un nɔ hu súnnu mɛxó ɖokpó; è ka d'akpa wǔ ce ɔ́, un nɔ hu yɔkpɔ́vú ɖokpó. Ényí è hu gbɛtɔ́ tɛ́nwe dó ba Kanyɛ́ɛ sín hlɔn ɔ́, gbɛtɔ́ kanɖé gbantɔ́n-nukún-we (77) wɛ è nǎ hu dó ba nyɛ Lamɛki sín hlɔn.” Adámu lɛ́ ɖó xó xá asi tɔn, bɔ é mɔ xo bó ji vǐ súnnu ɖokpó, bó sun nyǐ i ɖɔ Sɛ́ti. É ɖo ɖiɖɔ wɛ ɖɔ Mawu ná émí vǐ ɖěvo dó Abɛ́li e Kanyɛ́ɛ hu ɔ́ sín tɛnmɛ. Sɛ́ti lɔ ji vǐ ɖokpó, bó sun nyǐ i ɖɔ Enɔci. Sín hwenɛ́nu wɛ è nɔ xomlá Mawu bó nɔ́ ylɔ́ ɛ ɖɔ Mawu Mavɔmavɔ. Kúnkan Adámu tɔn lɛ́ɛ sín nyǐkɔ ɖíe: Gbe e gbe Mawu ɖǒ Adámu ɔ́, é bló e bɔ é cí é ɖésúnɔ ɖɔhun. É ɖó súnnu ɖokpó nyɔ̌nu ɖokpó, bó xo ɖɛ dó yě jí. Hwenu e é ɖó yě ɔ́, é ɖó nyǐkɔ nú yě ɖɔ Adámu; Adámu sín tínmɛ wɛ nyí gbɛtɔ́. Ée Adámu ɖó xwe kantɔn wǒ (130) ɔ́, é ji vǐ súnnu ɖokpó, bɔ vǐ ɔ́ cí é ɖɔhun; akpajlɛ́ tɔn wɛ é nyí. É ɖó nyǐkɔ n'i ɖɔ Sɛ́ti. Ée Adámu ji Sɛ́ti gúdo ɔ́, é dɔ́ ji xɔ xwe afɛnɛ (800). É lɛ́ ji vǐ súnnu, bó ji nyɔ̌nu. Xwe afɛnɛ kantɔn wǒ (930) wɛ Adámu ɖó bó kú. Ée Sɛ́ti ɖó xwe kanwe koatɔ́n (105) ɔ́, é ji Enɔci. Ée Sɛ́ti ji Enɔci gúdo ɔ́, é lɛ́ nɔ gbɛ xɔ xwe afɛnɛ tɛ́nwe (807). É lɛ́ ji vǐ súnnu bó ji nyɔ̌nu. Xwe afɛnɛ kanwe gban-nukún-we (912) wɛ Sɛ́ti ɖó bó kú. Ée Enɔci ɖó xwe kanwe wǒ (90) ɔ́, é ji Kenáni. Ée Enɔci ji Kenáni gúdo ɔ́, é lɛ́ nɔ gbɛ xɔ xwe afɛnɛ afɔtɔn (815); é lɛ́ ji vǐ súnnu bó ji nyɔ̌nu. Xwe afɛnɛ kanwe koatɔ́n (905) wɛ Enɔci ɖó bó kú. Ée Kenáni ɖó xwe kanɖé gban (70) ɔ́, é ji Maxalalɛ́li. Ée é ji Maxalalɛ́li gúdo ɔ́, é lɛ́ nɔ gbɛ xɔ xwe afɛnɛ kanɖé (840). É lɛ́ ji vǐ súnnu bó ji nyɔ̌nu. Xwe afɛnɛ kanwe gban (910) wɛ Kenáni ɖó bó kú. Ée Maxalalɛ́li ɖó xwe kanɖé koatɔ́n (65) ɔ́, é ji Yɛlɛ́di. Ée Maxalalɛ́li ji Yɛlɛ́di gúdo ɔ́, é lɛ́ nɔ gbɛ xɔ xwe afɛnɛ gban (830). É lɛ́ ji vǐ súnnu bó ji nyɔ̌nu. Xwe afɛnɛ kanwe afɔtɔn (895) wɛ Maxalalɛ́li ɖó bó kú. Ée Yɛlɛ́di ɖó xwe kɛnnɛ-nukún-we (162) ɔ́, é ji Henɔci. Ée é ji Henɔci gúdo ɔ́, é lɛ́ nɔ gbɛ xɔ xwe afɛnɛ (800). É lɛ́ ji vǐ súnnu bó ji nyɔ̌nu. Xwe afɛnɛ kɛnnɛ-nukún-we (962) wɛ Yɛlɛ́di ɖó bó kú. Ée Henɔci ɖó xwe kanɖé koatɔ́n (65) ɔ́, é ji Mɛtucɛláxi. Ée é ji Mɛtucɛláxi gúdo ɔ́, é nɔ gbɛ xɔ xwe afɔɖé kanwe ko (300). É nɔ́ yi xá Mawu. É lɛ́ ji vǐ súnnu bó ji nyɔ̌nu. Xwe afɔɖé kɛnnɛ atɔ́ɔ́n (365) wɛ Henɔci nɔ gbɛ xɔ. Henɔci nɔ yi xá Mawu. Mɛɖé ká sɔ́ mɔ ɛ ǎ, ɖó Mawu sɔ́ ɛ yi. Ée Mɛtucɛláxi ɖó xwe kɛnnɛ koatɔ́n-nukún-we (187) ɔ́, é ji Lamɛki. Ée é ji Lamɛki gúdo ɔ́, é lɛ́ nɔ gbɛ xɔ xwe nǔwɔntɔn kɛnnɛ ko-nukún-we (782). É lɛ́ ji vǐ súnnu bó ji nyɔ̌nu. Xwe afɛnɛ kɛnnɛ tɛ́nnɛ (969) wɛ Mɛtucɛláxi ɖó bó kú. Ée Lamɛki ɖó xwe kɛnnɛ ko-nukún-we (182) ɔ́, é ji vǐ súnnu ɖokpó. É ɖó nyǐkɔ nú vǐ ɔ́ ɖɔ Nɔwée, ɖó é ɖo ɖiɖɔ wɛ ɖɔ: Vǐ élɔ́ ná ɖe mǐ sín wǔvɛ́ e mɔ wɛ mǐ ɖe ɖo azɔ̌ syɛ́nsyɛ́n lɛ́ɛ mɛ lɛ́ɛ mɛ; wǔvɛ́ e mɔ wɛ mǐ ɖe ɖo ayǐkúngban e Mawu Mavɔmavɔ dó nu ɔ́ jí é, bó ná ná vivo mǐ. Ée Lamɛki ji Nɔwée gúdo ɔ́, é lɛ́ nɔ gbɛ xɔ xwe afɔwe kɛnnɛ gbantɔ́n (595). É lɛ́ ji vǐ súnnu bó ji nyɔ̌nu. Xwe nǔwɔntɔn kɛnnɛ afɔtɔn-nukún-we (777) wɛ Lamɛki ɖó bó kú. Ée Nɔwée ɖó xwe afɔwe kanwe ko (500) ɔ́, é ji Sɛ́mu, bó ji Cámu, bó ji Jafɛ́ti. Hwenu e gbɛtɔ́ lɛ́ɛ jɛ kún gba jí ɖo ayǐkúngban ɔ́ jí ɔ́, nǔɖíɖó e ɖo sɛ́xwé lɛ́ɛ mɔ ɖɔ vǐ yětɔn nyɔ̌nu lɛ́ɛ nyɔ́ ɖɛkpɛ ɖésú, bɔ yě kpɔ́n éé jló yě lɛ́ɛ ɖo nyɔ̌nuví énɛ́ lɛ́ɛ mɛ bó da. Ée yě bló mɔ̌ ɔ́, Mawu Mavɔmavɔ ɖɔ émí kún ná jó gbɛtɔ́ nyi gbɛ káká sɔ́yi ó, ɖó nǔ e yě wa nyi do ɔ́ wú. Agbaza kpowun wɛ gbɛtɔ́ nyí; xwe kantɔn (120) jɛ́n é ná nɔ́ nɔ gbɛ xɔ. Ée vǐ nǔɖíɖó e ɖo sɛ́xwé lɛ́ɛ tɔn lɛ́ɛ ɖó xó xá vǐ nyɔ̌nu gbɛtɔ́ tɔn lɛ́ɛ ɔ́, yě ji vǐ nú yě. Vǐ énɛ́ lɛ́ɛ wɛ nyí gbɛtɔ́ sakasaka e tíin ɖo ayǐkúngban ɔ́ jí hwenɛ́nu lɛ́ɛ. Yě wɛ nyí ahwanfuntɔ́ syɛ́nsyɛ́n hwexónu tɔn lɛ́ɛ; yě lɛ́ kpo ɖo ayǐkúngban jí káká jɛ égbé. Mawu Mavɔmavɔ mɔ ɖɔ dǎka xixo gbɛtɔ́ tɔn sukpɔ́, bɔ gbɛtɔ́ nɔ́ ɖo nǔ nyanya kɛ́ɖɛ́ lin wɛ hwebǐnu. Ée Mawu Mavɔmavɔ mɔ mɔ̌ ɔ́, gbɛtɔ́ e é bló ɔ́ wá vɛ́ n'i, bɔ akpɔ ɖó e. Bɔ é ɖɔ: “Un ná sú gbɛtɔ́ e un bló ɔ́ sín kún dó sín ayǐkúngban ɔ́ jí. Un ná sú gbɛtɔ́ kpó kanlin kpó, kanlin e nɔ sá lɛ́ɛ kpódó xɛ lɛ́ɛ kpó bǐ sín kún dó, ɖó blǒ e un bló yě ɔ́ wá vɛ́ nú mì.” Mawu Mavɔmavɔ ká nyɔ́ xomɛ dó nya ɖé wú; nya ɔ́ nɔ́ nyí Nɔwée. Nɔwée ɔ́, mɛɖé wɛ é nyí bó nɔ́ wa nǔ jlɔ́jlɔ́, ɖo mɛ e kpó é kpó ɖo gbɛ hwenɛ́nu lɛ́ɛ tɛ́ntin. È nɔ mɔ nǔ jɛ do ɖě ɖɔ dó éyɛ́ wú ǎ; é nɔ́ yi xá Mawu. Vǐ tɔn lɛ́ɛ ɖíe: Vǐ súnnu atɔn wɛ é ji: Sɛ́mu, Cámu kpódó Jafɛ́ti kpó. Mawu mɔ ɖɔ gbɛtɔ́ lɛ́ɛ ɖě kún sɔ́ ɖo jlǒ émítɔn wa wɛ ó; yě bǐ wɛ nyí nǔ baɖabaɖa, bɔ dǎka kpé ayǐkúngban ɔ́ bǐ jí. É kpɔ́n ayǐkúngban ɔ́ jí bó mɔ ɖɔ gbɛtɔ́ lɛ́ɛ bǐ wɛ nyí nǔ baɖabaɖa; yě bǐ wɛ. Ée nǔ nyí mɔ̌ ɔ́, Mawu ɖɔ nú Nɔwée ɖɔ: “Un ná gbɔ bó hu gbɛtɔ́ lɛ́ɛ bǐ, ɖó yě ɖo dǎka xo gbɔn ayǐkúngban ɔ́ bǐ jí wɛ. Un ná sú gbɛtɔ́ kpó nǔ e ɖo ayǐkúngban ɔ́ jí lɛ́ɛ bǐ kpó sín kún dó. A nǎ zé gofɛ́ɛtín dó bló tɔjíhún ɖokpó ná. A nǎ gbo tɔjíhún ɔ́ mɛ, bɔ é ná ɖó xɔ mɛ gěgé, bó ná sá awɔn dó ɖo xomɛ kpódó gǔdo kpó. Lě e a nǎ bló tɔjíhún ɔ́ gbɔn ɔ́ ɖíe: ga tɔn ná ɖó mɛ̌tlu kantɔn gban (150), gblǒ tɔn ná ɖó mɛ̌tlu koatɔ́n (25), bɔ jǐ yiyi tɔn ná ɖó mɛ̌tlu afɔtɔn. A nǎ bló pinyɔ́ɔ ɖó tɔjíhún ɔ́ ta, bó ná gbá xɔ ɖ'é jí, bɔ xɔ ɔ́ ná ɖó mɛ̌tlu vlɔ́ dó tɔjíhún ɔ́. A nǎ ɖe ali dó tɔjíhún ɔ́ wú ɖo akpá ɖokpó bó dó hɔn nu. Tɔjíhún ɔ́, síngbó atɔnnɔ wɛ é ná nyí. Đó nyɛ ná bló bɔ tɔ ná ɖi sín kpé fí bǐ, bɔ nǔ e kó sixú ɖo gbɛ ɖo ayǐkúngban jí é bǐ ná kú. Un ná sú nǔ e ɖó funfún ɖo ayǐkúngban jí é bǐ sín kún dó. Amɔ̌, hwɛ ɔ́, un ná jɛ akɔ xá we; a nǎ byɔ́ tɔjíhún ɔ́ mɛ, hwi kpó vǐ towe lɛ́ɛ kpó, kpó asi towe kpó, kpódó vǐ towe lɛ́ɛ sín asi lɛ́ɛ kpó. Nǔ e ɖo gbɛ lɛ́ɛ bǐ ɔ́, a nǎ zé we we; a nǎ zé asú ɖokpó asi ɖokpó dó tɔjíhún ɔ́ mɛ, bɔ yě ná nɔ fínɛ́ xá we, bónú mi kpó yě kpó ná nɔ gbɛ. Kanlin alɔkpa alɔkpa lɛ́ɛ, xɛ alɔkpa alɔkpa lɛ́ɛ, kpó kanlin alɔkpa alɔkpa e nɔ sá gbɔn kɔ́ mɛ lɛ́ɛ kpó, asú ɖokpó asi ɖokpó ná wá gɔ̌n towe, bó ná nɔ gbɛ. Hwɛ ɔ́, a nǎ hɛn nǔ e è ko nɔ ɖu ɔ́ bǐ dó hwiɖée jí, bɔ hwi kpó yě kpó ná nɔ́ ɖu.” Nǔ e Nɔwée wa ɔ́ nɛ́. É bló lě e Mawu ɖɔ n'i gbɔn ɔ́ pɛ́pɛ́pɛ́. Mawu Mavɔmavɔ ɖɔ nú Nɔwée ɖɔ: “Byɔ̌ tɔjíhún ɔ́ mɛ, hwi kpó xwédo towe bǐ kpó, ɖó un mɔ ɖɔ hwi ɖokpónɔ géé wɛ nɔ́ wa nǔ jlɔ́jlɔ́ ɖo mɛ e ɖo ayǐkúngban jí lɛ́ɛ mɛ. A nǎ fɔ kanlin e ma vɛ́ mɛ ǎ lɛ́ɛ, asú ɖokpó asi ɖokpó donu tɛ́nwe, bó ná zé éé vɛ́ mɛ lɛ́ɛ asú ɖokpó asi ɖokpó. A nǎ fɔ xɛ lɛ́ɛ lɔ asú ɖokpó asi ɖokpó donu tɛ́nwe. A nǎ bɛ́ kanlin énɛ́ lɛ́ɛ kpó xɛ énɛ́ lɛ́ɛ kpó dó tɔjíhún ɔ́ mɛ; énɛ́ ɔ́, a nǎ hɛn kún yětɔn ɖó te ɖo ayǐkúngban ɔ́ jí. Đó é kpo azǎn tɛ́nwe din bɔ un ná sɛ́ jǐ dó, bɔ é ná ja kɔn nyi ayǐkúngban ɔ́ jí xɔ kéze kanɖé (40) zǎn kanɖé (40), bɔ un ná vɔ nǔ e ɖo gbɛ ɖo ayǐkúngban ɔ́ jí bɔ un bló lɛ́ɛ bǐ.” Nɔwée bló nǔ e Mawu Mavɔmavɔ ɖɔ n'i lɛ́ɛ bǐ nǔgbó. Xwe nǔwɔntɔn (600) wɛ Nɔwée ɖó hwenu e tɔ ɖaxó ɔ́ gba mɛ ɖo ayǐkúngban ɔ́ jí é. Nɔwée kpó vǐ tɔn lɛ́ɛ kpó asi tɔn lɛ́ɛ kpó, kpódó vǐ tɔn sín asi lɛ́ɛ kpó byɔ́ tɔjíhún ɔ́ mɛ, bó ná gán ɖo tɔ sí. Kanlin e vɛ́ mɛ lɛ́ɛ kpó éé má vɛ́ mɛ ǎ lɛ́ɛ kpó, kpó xɛ lɛ́ɛ kpó, kpódó nǔ e nɔ́ sá gbɔn kɔ́ mɛ lɛ́ɛ kpó ɔ́, yě nɔ́ zɔn webɔ webɔ asú ɖokpó asi ɖokpó wá Nɔwée gɔ́n lě e Mawu kó ɖɔ gbɔn nú Nɔwée é. Azǎn tɛ́nwegɔ́ ɔ́ gbe ɔ́, tɔ gba gbɛ ɔ́ bǐ. Hwenu e Nɔwée ɖo xwe nǔwɔntɔn (600) ɖó wɛ ɔ́, sun wegɔ́ ɔ́ sín azǎn afɔtɔn-nukún-we gbe ɔ́, sin e ɖo domaɖó-azan mɛ ɔ́ gba wu, bɔ hɔn e hɛn sin e ɖo jǐnukúnsin ɔ́ ɖó te ɔ́ hun. Bɔ jǐ jɛ jija jí, bó ja xɔ kéze kanɖé (40) zǎn kanɖé (40). Gbe énɛ́ ɔ́ gbe wɛ Nɔwée kpódó asi tɔn kpó vǐ tɔn Sɛ́mu, Cámu kpódó Jafɛ́ti kpó, kpódó asi yětɔn lɛ́ɛ kpó byɔ́ tɔjíhún ɔ́ mɛ. Yě kpó gběkanlin tɛnmɛ tɛnmɛ lɛ́ɛ kpó, xwé gbe kanlin tɛnmɛ tɛnmɛ lɛ́ɛ kpó, kpó nǔ tɛnmɛ tɛnmɛ e nɔ sá gbɔn kɔ́ mɛ lɛ́ɛ kpó xɛ tɛnmɛ tɛnmɛ lɛ́ɛ kpó, kpó nǔ e kó sixú nɔ́ zɔn lɛ́ɛ bǐ kpó. Nǔ e kó sixú ɖó funfún lɛ́ɛ bǐ zɔn webɔ webɔ, asú ɖokpó asi ɖokpó, bó yi Nɔwée gɔ́n, ɖo tɔjíhún ɔ́ mɛ. Nǔ e ɖo gbɛ lɛ́ɛ bǐ byɔ́ tɔjíhún ɔ́ mɛ, asú kpó asi kpó lě e Mawu Mavɔmavɔ ɖɔ gbɔn nú Nɔwée é. Énɛ́ ɔ́ gúdo ɔ́, Mawu Mavɔmavɔ sú tɔjíhún ɔ́ sín hɔn ɔ́ dó Nɔwée. Jǐ ɔ́ ja xɔ azǎn kanɖé (40). Sin ɔ́ nɔ́ ɖo jǐ yi wɛ, bó nɔ́ ɖo tɔjíhún ɔ́ zé dó jǐ wɛ, bɔ tɔjíhún ɔ́ ɖo sin nukún mɛ. Sin ɔ́ ɖo jijɛ jí wɛ, bó ɖo jǐ yi wɛ mɔ̌hunkɔtɔn, bɔ tɔjíhún ɔ́ ɖo sin nukún mɛ bó ɖo yiyi wɛ. Sin ɔ́ ɖo jijɛ jí wɛ káká bó bú só ɖaxó ɖaxó e ɖo hwe glɔ́ lɛ́ɛ bǐ. Sin ɔ́ bú só lɛ́ɛ, káká bó ɖó mɛ̌tlu tɛ́nwe adaɖé ɖo só lɛ́ɛ ta nu. Nǔ e ɖo gbɛ ɖo ayǐkúngban ɔ́ jí lɛ́ɛ bǐ wɛ kú: xɛ lɛ́ɛ, xwé gbe kanlin lɛ́ɛ, gběkanlin lɛ́ɛ, bǐ wɛ kú. Nǔ e gɔ́ ayǐkúngban jí lɛ́ɛ kpódó gbɛtɔ́ lɛ́ɛ kpó bǐ wɛ kú. Nǔ e kó sixú ɖó funfún, nǔ e kó sixú ɖo gbɛ ɖo ayǐkúngban jí lɛ́ɛ bǐ wɛ kú. Énɛ́ ɔ́, Mawu Mavɔmavɔ sú nǔ e ɖo gbɛ ɖo ayǐkúngban ɔ́ jí lɛ́ɛ bǐ sín kún dó. É sú yě bǐ sín kún dó sín ayǐkúngban jí. Nɔwée kɛ́ɖɛ́ jɛ́n gán, éé kpó mɛ tɔn lɛ́ɛ kpó, kpó kanlin e byɔ́ tɔjíhún ɔ́ mɛ xá ɛ lɛ́ɛ kpó. Tɔ ɔ́ nɔ gǐgɔ́ mɔ̌ káká nú azǎn kantɔn gban (150). Mawu ká wɔn Nɔwée kpódó kanlin e kpó é kpó ɖo tɔjíhún ɔ́ mɛ lɛ́ɛ kpó ǎ. É wɔn gběkanlin lɛ́ɛ ǎ, é wɔn xwé gbe kanlin lɛ́ɛ ǎ. É sɛ́ jɔhɔn ɖé dó bɔ é nyi dó ayǐkúngban ɔ́ jí bɔ sin ɔ́ jɛ mimɛ jí. Domaɖó-azan e hun ɔ́ sú, bɔ hɔn e ɖo hunhun ɖo jǐnukúnsin lɛ́ɛ sú; énɛ́ ɔ́, jǐ ɔ́ kɛn, bɔ sin ɔ́ jɛ yiyi jí kpɛɖé kpɛɖé. Azǎn kantɔn gban (150) gúdo ɔ́, é yi do, bɔ ɖo sun tɛ́nwegɔ́ ɔ́ sín azǎn afɔtɔn-nukún-wegɔ́ ɔ́ gbe ɔ́, tɔjíhún ɔ́ yi glín ɖó só Alaláti tɔn lɛ́ɛ wú. Sin ɔ́ ɖo yiyi wɛ káká nú sun wǒ. Đo sun wǒgɔ́ ɔ́ sín azǎn nukɔntɔn ɔ́ gbe ɔ́, è jɛ só lɛ́ɛ sín ta nu mɔ jí. Azǎn kanɖégɔ́ ɔ́ (40) gbe ɔ́, Nɔwée hun flɛtɛ́li e é ɖe dó tɔjíhún ɔ́ wú ɔ́, bó jó avǔnsákɔwó ɖokpó dó bɔ é yi. Ée é yi ɔ́, é lɛ́ kɔ wá tlóló, bó nɔ́ ɖo yiyi wɛ, bó nɔ́ ɖo wǐwá wɛ káká bɔ sin ɔ́ bǐ vɔ ɖo ayǐkúngban ɔ́ jí. É lɛ́ jó xwelé ɖokpó dó bɔ é yi; é bló mɔ̌, bó ná kpɔ́n ɖɔ sin ɔ́ kó ɖe kpo a jí. Xwelé ɔ́ ká mɔ fí e é ná ɖó jɛ ɔ́ ɖěbǔ ǎ, bó gbɔ bó lɛ́ kɔ wá Nɔwée gɔ́n, ɖó sin lɛ́ kpo ɖo ayǐkúngban ɔ́ bǐ jí. Nɔwée ka dlɛ́n alɔ bó wlí i, bó sɔ́ ɛ dó tɔjíhún ɔ́ mɛ. Nɔwée nɔ te nú azǎn tɛ́nwe, bó lɛ́ jó xwelé ɔ́ dó bɔ é yi. Énɛ́ ɔ́ tɔn ɔ́, xwelé ɔ́ wá lɛ́ kɔ wá gɔ̌n tɔn gbadanu, bó ba olívuma zínzɔ́n ɖokpó hɛn nu. Énɛ́ ɔ́, Nɔwée mɔ ɖɔ sin ɔ́ kó ɖe kpo ɖo ayǐkúngban ɔ́ jí. Nɔwée lɛ́ kú hǔn bó nɔ te nú azǎn tɛ́nwe ɖěvo, bó lɛ́ jó xwelé ɔ́ dó bɔ é yi; é ká sɔ́ lɛ́ kɔ wá gɔ̌n tɔn ǎ. Hwenu e Nɔwée ɖo xwe nǔwɔntɔn-nukún-ɖokpó (601) ɖó wɛ ɔ́, sun tɔn nukɔntɔn sín azǎn nukɔntɔn ɔ́ gbe ɔ́, sin ɔ́ xú sín ayǐkúngban ɔ́ jí. Nɔwée ɖe nǔ e é bú dó tɔjíhún ɔ́ síin bó kpɔ́n. É ná mɔ nǔɖé kpowun ɔ́, sin ɔ́ kó xú sín ayǐkúngban ɔ́ jí. Đo sun wegɔ́ ɔ́ sín azǎn koatɔ́n-nukún-wegɔ́ (27) ɔ́ mɛ ɔ́, ayǐkúngban ɔ́ xú bǐ. Énɛ́ ɔ́, Mawu ɖɔ nú Nɔwée ɖɔ: “Tɔ́n sín tɔjíhún ɔ́ mɛ hwi kpó asi towe kpó, vǐ towe lɛ́ɛ kpó, kpódó vǐ towe lɛ́ɛ sín asi lɛ́ɛ kpó. Đe kanlin tɛnmɛ tɛnmɛ e ɖo tɔjíhún ɔ́ mɛ xá we lɛ́ɛ bǐ tɔ́n. Đe xɛ kpó kanlin kpó, kpó nǔ e nɔ́ sá gbɔn kɔ́ mɛ lɛ́ɛ bǐ kpó tɔ́n. Yě nǐ kpé ayǐkúngban ɔ́ jí bó gba kún bó ji gba.” Ée Mawu ɖɔ mɔ̌ ɔ́, Nɔwée tɔ́n sín tɔjíhún ɔ́ mɛ, é kpó asi tɔn kpó vǐ tɔn lɛ́ɛ kpó, kpódó vǐ tɔn lɛ́ɛ sín asi lɛ́ɛ kpó. Énɛ́ ɔ́ gúdo ɔ́, kanlin tɛnmɛ tɛnmɛ lɛ́ɛ, xɛ tɛnmɛ tɛnmɛ lɛ́ɛ, kpó nǔ tɛnmɛ tɛnmɛ e nɔ sá gbɔn kɔ́ mɛ lɛ́ɛ bǐ kpó tɔ́n sín tɔjíhún ɔ́ mɛ, ɖě jɛ ɖě gúdo. Ée yě tɔ́n ɔ́, Nɔwée bló vɔ̌sákpe ɖokpó nú Mawu Mavɔmavɔ, bó fɔ kanlin tɛnmɛ tɛnmɛ e ma vɛ́ mɛ ǎ lɛ́ɛ ɖokpó ɖokpó, xɛ tɛnmɛ tɛnmɛ e ma vɛ́ mɛ ǎ lɛ́ɛ ɖokpó ɖokpó, bó bɛ́ bǐ dó sá vɔ̌ e è nɔ dó zo ɔ́ nú Mawu Mavɔmavɔ ɖo vɔ̌sákpe ɔ́ jí. Bɔ Mawu Mavɔmavɔ se vɔ̌ ɔ́ sín wǎn, bɔ é nyɔ́ se n'i, bɔ é ɖɔ nú éɖée ɖɔ: “Un sɔ́ ná dó nu ayǐkúngban ɔ́ ɖě gbeɖé, ɖó dǎka xixo gbɛtɔ́ lɛ́ɛ tɔn wú ǎ, ɖó sín do wɛ gbɛtɔ́ kó ɖó ayi nyanya sín. Un ka sɔ́ ná vɔ nǔ e ɖo gbɛ ɖo ayǐkúngban ɔ́ jí lɛ́ɛ bǐ ɖě lě e un bló gbɔn din é ǎ. Nú ayǐkúngban ɔ́ ɖo te jɛ́n wɛ ɔ́, jinukún e è nǎ dó é kpó ée è nǎ ya é kpó ná tíin; avivɔ kpódó yǒzo kpó ná tíin, alǔun kpódó jǐ hwenu kpó ná tíin, zǎn kpódó kéze kpó ná tíin.” Mawu xo ɖɛ dó Nɔwée kpódó vǐ tɔn lɛ́ɛ kpó jí, bó ɖɔ nú yě ɖɔ: “Mi gba kún, mi ji gba, bó kpé ayǐkúngban ɔ́ bǐ jí. Kanlin e ɖo ayǐkúngban jí lɛ́ɛ, xɛ lɛ́ɛ, nǔ e kó nɔ́ sá gbɔn kɔ́ mɛ lɛ́ɛ kpó hweví lɛ́ɛ kpó bǐ ná nɔ́ ɖi xɛsi nú mi. Yě ɖo alɔ mitɔn mɛ. Nǔ e kó sixú nɔ́ dán wǔ ɖo ayǐkúngban ɔ́ jí, bó ɖo gbɛ lɛ́ɛ bǐ wɛ ná nyí nǔɖuɖu nú mi. Un ná nǔ énɛ́ lɛ́ɛ bǐ mi lě e un ko ná gběhan mi gbɔn é. Amɔ̌, nǔ ɖokpó e ɖ'é mɛ ɔ́, mi ɖó ná ɖu lan e mɛ hun kpo ɖe ɔ́ ǎ. Mɔ̌ ɖokpó ɔ́, un ná kan hun mitɔn byɔ́. Un ná kan hun mitɔn byɔ́ kanlin e ná hu gbɛtɔ́ é bǐ, bó ná kanbyɔ́ gbɛtɔ́ e ná hu nɔzo tɔn é bǐ. Nyɛ Mawu bló gbɛtɔ́ bɔ é nyí akpajlɛ́ ce; énɛ́ wú ɔ́, mɛ e kɔn gbɛtɔ́ sín hun kɔn nyi ayǐ ɔ́, gbɛtɔ́ wɛ ná kɔn hun tɔn kɔn nyi ayǐ. Midɛɛ lɛ́ɛ ɔ́, mi gba kún, mi ji gba, mi ji kpé ayǐkúngban ɔ́ bǐ jí.” Mawu lɛ́ ɖɔ nú Nɔwée kpó vǐ tɔn lɛ́ɛ kpó ɖɔ: “Nyɛ ɔ́, un jɛ akɔ xá mi, bó jɛ xá kúnkan mitɔn lɛ́ɛ, bó jɛ xá nǔ e ɖo gbɛ, bó ɖo ayǐkúngban ɔ́ jí xá mi lɛ́ɛ: xɛ lɛ́ɛ, xwé gbe kanlin lɛ́ɛ, gběkanlin lɛ́ɛ, nǔ e tɔ́n sín tɔjíhún ɔ́ mɛ lɛ́ɛ, kanlin e ɖo ayǐkúngban ɔ́ jí lɛ́ɛ bǐ. Un jɛ akɔ xá mi ɖɔ: tɔ ɖě sɔ́ ná gba gbɛ ɔ́, bó hu nǔ e ɖo gbɛ ɖo ayǐkúngban jí lɛ́ɛ ɖě gbeɖé ǎ. Tɔ ɖě sɔ́ ná gba nǔ e ɖo gbɛ ɖo ayǐkúngban jí lɛ́ɛ ɖě gbeɖé nǔgbó ǎ.” Mawu lɛ́ ɖɔ: “Akɔ e un jɛ xá mi ɔ́, nǔ e ná ɖe xlɛ́ nyi kpó mi kpó, kpódó nǔ e ɖo gbɛ ɖo ayǐkúngban jí lɛ́ɛ bǐ kpó káká sɔ́yi ɔ́ ɖíe: Un sɔ́ nyǐ ce ɖó akpɔ́kpɔ́ mɛ bɔ é ná nyí akɔ e un jɛ xá mi ɔ́ sín wuntun ɖo nyɛ kpó gbɛ ɔ́ kpó tɛ́ntin. Nú un kplé akpɔ́kpɔ́ lɛ́ɛ ɖó jǐnukúnsin hweɖěbǔnu ɔ́, nyǐ ɔ́ ná nɔ́ ɖi ɖo akpɔ́kpɔ́ ɔ́ mɛ, bó ná nyí flǐn nú mì, nú akɔ e un jɛ xá mi, bó jɛ xá nǔ e ɖo gbɛ ɔ́ mɛ lɛ́ɛ bǐ é, bɔ tɔ sɔ́ ná gba gbɛ ɔ́, bó vɔ nǔ e ɖo gbɛ lɛ́ɛ ɖěbǔ ǎ. Nyǐ ɔ́ ná ɖo akpɔ́kpɔ́ ɔ́ mɛ, bɔ un nǎ nɔ́ mɔ, bɔ é ná nyí flǐn nú mì nú akɔ e un jɛ xá mi bó jɛ xá nǔ e ɖo gbɛ ɖo ayǐkúngban jí lɛ́ɛ bǐ káká sɔ́yi é.” Mawu lɛ́ vɔ́ ɖɔ nú Nɔwée ɖɔ: “Wuntun e nyí xlɛ̌ nú akɔ e un jɛ xá nǔ e ɖo gbɛ ɖo ayǐkúngban jí lɛ́ɛ bǐ ɔ́ nɛ́.” Nɔwée ɔ́, vǐ tɔn atɔn lɛ́ɛ kpó é kpó tɔ́n sín tɔjíhún ɔ́ mɛ; nyǐkɔ yětɔn ɖíe: Sɛ́mu, Cámu kpódó Jafɛ́ti kpó. Cámu ɔ́ wɛ nyí Kanáa sín tɔ́. Nɔwée sín vǐ atɔn énɛ́ lɛ́ɛ wɛ gba kún, bó kpé ayǐkúngban ɔ́ bǐ jí. Nɔwée wɛ nyí glesi nukɔntɔn e dó vǐwun é. É nu vɛ̌ɛn mú gbe ɖokpó, bó jɛ mɛ̌ jɔgbe ɖo goxɔ tɔn mɛ. Bɔ Cámu, Kanáa tɔ́ ɔ́ mɔ tɔ́ ɔ́ ɖo mɛ̌, bó yi ɖɔ nú nɔví tɔn we ɖě lɛ́ɛ ɖo kɔ́xo. Énɛ́ ɔ́, Sɛ́mu kpódó Jafɛ́ti kpó sɔ́ awu ɖaxó ɖokpó nyi abɔ̌ yětɔn ta, bó zɔn gǔdo agɔ káká byɔ́ goxɔ e mɛ tɔ́ yětɔn ɖe ɔ́ mɛ, bó sɔ́ cyɔ́n n'i. Yě ká sɔ́ kɔ ɖó zɔ; yě mɔ tɔ́ yětɔn sín mɛ̌ ǎ. Ée ahan wá hɔ́n nú Nɔwée ɔ́, é se nǔ e vǐ tɔn kpɛví ɔ́ bló n'i é, bó ɖɔ: “Nǔɖé ná nyɔ́ nú Kanáa ǎ; é wɛ ná nyí kannumɔ kannumɔ lɛ́ɛ tɔn nú nɔví tɔn lɛ́ɛ.” Nu wɛ un dó e. É lɛ́ ɖɔ: “Susu nú Mawu Mavɔmavɔ, Mawu Sɛ́mu tɔn! Kanáa ní ká nyí kannumɔ nú Sɛ́mu. Mawu ní bló bónú Jafɛ́ti ní gba kún. Sɛ́mu sín goxɔ sá wɛ é ká ná nɔ, bɔ Kanáa ka ná nyí kannumɔ nú yě.” Ée tɔ gba gbɛ ɔ́ gúdo ɔ́, Nɔwée lɛ́ nɔ gbɛ xɔ xwe afɔɖé kantɔn gban (350). Nɔwée nɔ gbɛ xɔ xwe afɛnɛ kantɔn gban (950) bó kú. Ée tɔ gba gbɛ ɔ́ gúdo ɔ́, Nɔwée sín vǐ lɛ́ɛ: Sɛ́mu, Cámu kpódó Jafɛ́ti kpó ji vǐ. Vǐ yětɔn lɛ́ɛ sín nyǐkɔ ɖíe: Jafɛ́ti ɔ́, vǐ tɔn súnnu lɛ́ɛ sín nyǐkɔ ɖíe: Gomɛ́ɛ, Magɔ́gi, Madayi, Yaváni, Tubalu, Mɛcɛ́ki kpódó Tilaasi kpó. Gomɛ́ɛ ɔ́, vǐ tɔn súnnu lɛ́ɛ sín nyǐkɔ ɖíe: Acikenázi, Hlifáti kpódó Togáama kpó. Yaváni ɔ́, vǐ tɔn súnnu lɛ́ɛ sín nyǐkɔ ɖíe: Elica, Taasísi, Kitímu kpódó Hlodanímu kpó. Jafɛ́ti kúnkan énɛ́ lɛ́ɛ wɛ dó akɔta e gbɔn xutó xutó lɛ́ɛ sín kún, bɔ yě ɖo xwédo yětɔn yětɔn mɛ, ɖo akɔta yětɔn yětɔn mɛ, ɖo to yětɔn yětɔn mɛ, bó nɔ́ dó gbe yětɔn yětɔn. Cámu ɔ́, vǐ tɔn súnnu lɛ́ɛ sín nyǐkɔ ɖíe: Kúci, Misilayimu, Púti kpódó Kanáa kpó. Kúci ɔ́, vǐ tɔn súnnu lɛ́ɛ sín nyǐkɔ ɖíe: Seva, Hawíla, Savuta, Hlaema, kpódó Savuteka kpó. Hlaema ɔ́, vǐ tɔn súnnu lɛ́ɛ sín nyǐkɔ ɖíe: Saba kpódó Dedáni kpó. Kúci wɛ lɛ́ nyí Nɛmulɔ́di sín tɔ́. Nɛmulɔ́di ɔ́ wɛ nyí gǎn ɖaxó nukɔntɔn ɖo ayǐkúngban jí. Gbětɔ́ ɖaxó ɖokpó wɛ é nyí. Énɛ́ ɔ́ wú wɛ è nɔ ɖɔ: “É nyí gbětɔ́ ɖaxó Nɛmulɔ́di ɖɔhun.” Toxo e mɛ Nimulodi ɖu axɔ́sú ɖe jɛ nukɔn lɛ́ɛ wɛ nyí: Babɛ́li, Elɛ́ki, Akadi kpó Kalunɛ́ɛ kpó ɖo Mɛzopotamíi yíkúngban jí. Fínɛ́ wɛ Asilíi gosín, bó yi ɖó Ninívu toxo ɔ́ ayǐ kpódó Hlexɔvɔ́ti-Ii toxo ɔ́ kpó, kpódó Kalaxi toxo ɔ́ kpó, kpódó Hlɛsɛ́ni toxo ɔ́ kpó; Hlɛsɛ́ni ɔ́, toxo ɖé wɛ, bó ɖo Ninívu kpódó toxo ɖaxó Kalaxi kpó tɛ́ntin. Misilayimu wɛ nyí tɔ́gbó Lǔdinu lɛ́ɛ tɔn, Eyinamunu lɛ́ɛ tɔn, Lexávu lɛ́ɛ tɔn, Nafutwaxi lɛ́ɛ tɔn, Patlɔ́sinu lɛ́ɛ tɔn, Kafutɔ́ɔnu lɛ́ɛ tɔn, kpódó Kasluaxinu lɛ́ɛ tɔn kpó. Yě wɛ dó Filisitɛ́ɛn lɛ́ɛ sín kún. Kanáa ji Sidɔ́ɔn kpódó Xɛti kpó. Sidɔ́ɔn wɛ nyí nukɔn ví tɔn. É wɛ lɛ́ nyí tɔ́gbó nú Jebuzinu lɛ́ɛ, Amɔliti lɛ́ɛ, Giigacíti lɛ́ɛ, Hivíti lɛ́ɛ, Aakíti lɛ́ɛ, Sini ví lɛ́ɛ, Aavadinu lɛ́ɛ, Semáa ví lɛ́ɛ kpódó Hamáti ví lɛ́ɛ kpó. Énɛ́ ɔ́ gúdo ɔ́, Kanáanu lɛ́ɛ sín hɛ̌nnu lɛ́ɛ gbadó. Đo Geláa wa jí ɔ́, Kanáanu lɛ́ɛ sín dogbó bɛ́ sín Sidɔ́ɔn káká yi Gaza; bɔ ɖo Sodɔ́mu wa jí ɔ́, é bɛ́ sín Gomɔ́ɔ bó gbɔn Adima kpó Sevoyímu kpó káká yi Lɛca. Cámu ɔ́, vǐ tɔn súnnu lɛ́ɛ nɛ́. Yě ɖo xwédo yětɔn yětɔn mɛ, bó nɔ́ dó gbe yětɔn yětɔn ɖo akɔta yětɔn yětɔn mɛ ɖo to yětɔn yětɔn mɛ. Sɛ́mu, Jafɛ́ti sín fofó ɔ́ lɔ ji vǐ súnnu. É wɛ nyí tɔ́gbó nú Ebɛ́ɛ kpó vǐ tɔn lɛ́ɛ bǐ kpó. Sɛ́mu ví súnnu lɛ́ɛ sín nyǐkɔ ɖíe: Elámu, Asúu, Aapakisadu, Lǔdi kpódó Alamu kpó. Alamu ɔ́, vǐ tɔn súnnu lɛ́ɛ sín nyǐkɔ ɖíe: Wúsi, Huli, Gɛtɛ́ɛ kpódó Maci kpó. Aapakisadu ji Cɛláxi, bɔ Cɛláxi ji Ebɛ́ɛ. Ebɛ́ɛ ɔ́, vǐ súnnu we wɛ é ji: vǐ nukɔntɔn ɔ́ nɔ́ nyí Pɛlɛ́gi. Pɛlɛ́gi sín tínmɛ wɛ nyí “Mǐmá”, ɖó hwe éyɛ́ tɔn nu wɛ gbɛtɔ́ lɛ́ɛ gba kpé ayǐkúngban ɔ́ jí. Vǐ wegɔ́ ɔ́ nɔ́ nyí Yokitáni. Yokitáni ji Alumɔdadi, Cɛlɛ́fu, Hasáamawɛ́ti, Yeláxi, Hadolámu, Wuzálu, Dikla, Ovalu, Avimayɛ́li, Saba, Ofíi, Hawíla kpódó Yovavu kpó. Yokitáni wɛ ji mɛ énɛ́ lɛ́ɛ bǐ. Yě nɔ́ nɔ Mɛca ɖo Sefáa wa jí káká yi só e ɖo zǎnzǎnhwe jí lɛ́ɛ kɔn. Sɛ́mu ví lɛ́ɛ nɛ́. Yě ɖo xwédo yětɔn yětɔn mɛ, bó nɔ́ dó gbe yětɔn yětɔn, ɖo akɔta yětɔn yětɔn mɛ ɖo to yětɔn yětɔn mɛ. Hɛ̌nnu e Nɔwée ví lɛ́ɛ ɖó ayǐ lɛ́ɛ nɛ́. È wlǎn nyǐkɔ vǐ yětɔn lɛ́ɛ ɖokpó ɖokpó tɔn gbɔn akɔta yětɔn yětɔn mɛ. Ée tɔ gba gbɛ ɔ́ gúdo ɔ́, yě wɛ dó akɔta e gba kpé ayǐkúngban ɔ́ jí lɛ́ɛ bǐ sín kún. Xóxó hwenu ɔ́, gbe ɖokpó ɔ́ wɛ gbɛtɔ́ lɛ́ɛ bǐ nɔ́ dó, bó nɔ́ zán xógbe ɖokpó lɛ́ɛ. Zǎnzǎnhwe jí wɛ gbɛtɔ́ lɛ́ɛ gosín, bó yi mɔ tɔdo ɖé ɖo Mɛzopotamíi, bó jɛ agban nyi fínɛ́. Yě ɖɔ nú yěɖée ɖɔ: “Éénɛ́! Din ɔ́, mǐ ní sún blǐki, bó xo zo dó ɖo kpó mɛ.” Yě sɔ́ blǐki lɛ́ɛ dó ɖó awǐnnya, bó sɔ́ gudlɔ́n dó ɖó kɔ́ nyinya. Yě lɛ́ ɖɔ: “Din ɔ́, mǐ ní gbá toxo ɖaxó ɖokpó, síngbó ɖaxó ɖokpó, bɔ é ná yi jǐ yi sɔ́ jǐnukúnsin. Énɛ́ ɔ́, nyǐkɔ mǐtɔn ná yi jǐ, bɔ mǐ ná gba kpé ayǐkúngban ɔ́ bǐ jí ǎ.” Énɛ́ ɔ́, Mawu Mavɔmavɔ jɛ te bó wá kpɔ́n toxo ɔ́ kpódó síngbó ɖaxó e gbá wɛ gbɛtɔ́ lɛ́ɛ ɖe ɔ́ kpó, bó ɖɔ: “Yě bǐ nyí togun ɖokpó, bó ɖo gbe ɖokpó ɔ́ dó wɛ. Nǔ e yě ká sí te din bó ɖɔ émí ná bló é nɛ́. Yě lɛ́n nǔɖé bó ná wa din ɔ́, nǔɖé sɔ́ ɖe bó ná hɛn yě ɖó te ǎ. Ée é nyí mɔ̌ din ɔ́, mǐ ní jɛ te, bó ná sɔ́ gbe vovo dó nu nú yě; énɛ́ ɔ́, mɛ ɖě ɔ́ sɔ́ ná mɔ nǔ jɛ xó e ɖɔ wɛ mɛ ɖě ɔ́ ɖe ɔ́ mɛ ǎ.” Nǔgbó ɔ́, Mawu Mavɔmavɔ gba yě dó sín fínɛ́, bɔ yě gba kpé ayǐkúngban ɔ́ bǐ jí, bó jó toxo e gbá wɛ yě ɖe ɔ́ dó. Énɛ́ ɔ́ wú wɛ toxo ɔ́ nɔ́ nyí Babɛ́li; tínmɛ tɔn wɛ nyí hannyahannya, ɖó fínɛ́ wɛ Mawu Mavɔmavɔ sɔ́ gbe vovo e è nɔ dó ɖo ayǐkúngban jí lɛ́ɛ dó nu nú yě ɖe; fínɛ́ wɛ Mawu Mavɔmavɔ ka lɛ́ gba yě dó kpé ayǐkúngban ɔ́ bǐ jí ɖe. Sɛ́mu ví lɛ́ɛ sín nyǐkɔ ɖíe: ée tɔ gba gbɛ ɔ́ bɔ é ɖó xwe we ɔ́, Sɛ́mu ji Aapakisadu. Xwe kanwe ko (100) ɖó wɛ é ɖe hwenɛ́nu. Ée Sɛ́mu ji Aapakisadu gúdo ɔ́, é nɔ gbɛ xɔ xwe afɔwe kanwe ko (500), bó lɛ́ ji vǐ súnnu bó ji nyɔ̌nu. Aapakisadu ɖó xwe gbantɔ́n (35), bó ji Cɛláxi. Ée Aapakisadu ji Cɛláxi gúdo ɔ́, é lɛ́ nɔ gbɛ xɔ xwe afɔwe-nukún-atɔn (403), bó lɛ́ ji vǐ súnnu, bó ji nyɔ̌nu. Cɛláxi ɔ́, xwe gban wɛ é ɖó, bó ji Ebɛ́ɛ. Ée Cɛláxi ji Ebɛ́ɛ gúdo ɔ́, é lɛ́ nɔ gbɛ xɔ xwe afɔwe-nukún-atɔn (403), bó lɛ́ ji vǐ súnnu bó ji nyɔ̌nu. Ebɛ́ɛ ɔ́, xwe gban-nukún-ɛnɛ (34) wɛ é ɖó, bó ji Pɛlɛ́gi. Ée Ebɛ́ɛ ji Pɛlɛ́gi gúdo ɔ́, é lɛ́ nɔ gbɛ xɔ xwe afɔwe gban (430), bó lɛ́ ji vǐ súnnu bó lɛ́ ji nyɔ̌nu. Pɛlɛ́gi ɔ́, xwe gban (30) wɛ é ɖó, bó ji Hlewu. Ée é ji Hlewu gúdo ɔ́, é lɛ́ nɔ gbɛ xɔ xwe afɔɖé tɛ́nnɛ (209), bó lɛ́ ji vǐ súnnu bó ji nyɔ̌nu. Hlewu ɔ́, xwe gban-nukún-we (32) wɛ é ɖó, bó ji Selúgi. Ée é ji Selúgi gúdo ɔ́, é lɛ́ nɔ gbɛ xɔ xwe afɔɖé tɛ́nwe (207), bó lɛ́ ji vǐ súnnu bó ji nyɔ̌nu. Selúgi ɔ́, xwe gban (30) wɛ é ɖó, bó ji Naxɔ́ɔ. Ée é ji Naxɔ́ɔ gúdo ɔ́, é lɛ́ nɔ gbɛ xɔ xwe afɔɖé (200), bó ji vǐ súnnu bó ji nyɔ̌nu. Naxɔ́ɔ ɔ́, xwe koatɔ́n-nukún-ɛnɛ (29) wɛ é ɖó, bó ji Tɛláxi. Ée é ji Tɛláxi gúdo ɔ́, é lɛ́ nɔ gbɛ xɔ xwe kanwe gbantɔ́n-nukún-ɛnɛ (119), bó lɛ́ ji vǐ súnnu bó ji nyɔ̌nu. Tɛláxi ɔ́, xwe kanɖé gban (70) wɛ é ɖó, bó ji Ablámu, Naxɔ́ɔ kpó Halani kpó. Tɛláxi ví lɛ́ɛ ɖíe: Tɛláxi ji Ablámu, Naxɔ́ɔ kpódó Halani kpó. Halani ka ji Lɔ̌ti. Halani ɔ́ ká kú jɛ nukɔn nú tɔ́ tɔn Tɛláxi, ɖo to e mɛ è ji i ɖe ɔ́, ɖo Wúu, Kaludéenu lɛ́ɛ yíkúngban jí. Ablámu kpó Naxɔ́ɔ kpó wá da asi. Ablámu sín asi nɔ nyí Salayíi, bɔ Naxɔ́ɔ tɔn ɔ́ nɔ́ nyí Miluka. Tɔ́ tɔn nɔ́ nyí Halani. Halani wɛ lɛ́ nyí Yisika sín tɔ́. Ablámu sín asi Salayíi ɔ́, wɛnsinɔ wɛ; é ji vǐ ɖě ǎ. Tɛláxi kplá vǐ tɔn Ablámu kpó vǐvú tɔn Lɔ̌ti Halani ví ɔ́ kpó, kpódó vǐ tɔn Ablámu ɔ́ sín asi Salayíi kpó, bɔ yě gosín Wúu, ɖo Kaludéenu lɛ́ɛ yíkúngban jí, bó ɖidó Kanáa. Yě yi jɛ Haláani bó cí fínɛ́. Tɛláxi nɔ gbɛ xɔ xwe afɔɖé atɔ́ɔ́n (205), bó kú ɖo Haláani. Mawu Mavɔmavɔ ɖɔ nú Ablámu ɖɔ: “Tɔ́n sín to towe mɛ, mɛ towe lɛ́ɛ mɛ, tɔ́ towe xwé, lobo yi to e un ná xlɛ́ we ɔ́ mɛ. Un ná zé we dó bló akɔta ɖaxó ɖokpó ná, bó ná xo ɖɛ dó jǐ towe. Un ná bló bɔ nyǐkɔ towe ná yi jǐ, bɔ a nǎ nyí nyɔ̌ná nú mɛ ɖě lɛ́ɛ bǐ. Un ná xo ɖɛ dó mɛ e ná xo ɖɛ dó jǐ towe lɛ́ɛ jí; un ná dó nu mɛ e ná dó nu we lɛ́ɛ. Hwi jí wɛ un ná gbɔn bó ná xo ɖɛ dó hɛ̌nnu e ɖo gbɛ ɔ́ mɛ lɛ́ɛ bǐ jí.” Énɛ́ ɔ́, Ablámu sɔ́ nǔ bó ɖidó lě e Mawu Mavɔmavɔ kó ɖɔ gbɔn n'i é, bɔ Lɔ̌ti xwedó e. Xwe kanɖé gbantɔ́n (75) ɖó wɛ Ablámu ɖe, bó gosín Haláani hwenɛ́nu. Ablámu kplá asi tɔn Salayíi kpódó Lɔ̌ti nɔví tɔn súnnu ví ɔ́ kpó. É bɛ́ dɔkun tɔn lɛ́ɛ bǐ bó kplá mɛsɛntɔ́ e é xɔ ɖo Haláani lɛ́ɛ. Yě wlí ali ɖidó Kanáa. Ée Ablámu kpó mɛ tɔn lɛ́ɛ kpó jɛ Kanáa ɔ́, yě gbɔn to ɔ́ mɛ dín, bó yi zun Mɔlée tɔn kɔn, ɖo to e è nɔ ylɔ́ ɖɔ Sikɛ́mu ɔ́ mɛ. Kanáanu lɛ́ɛ ká ɖo to ɔ́ mɛ hwenɛ́nu. Mawu Mavɔmavɔ tɔ́n dó Ablámu jí ɖo fínɛ́, bó ɖɔ n'i ɖɔ: “Un ná ná to élɔ́ kúnkan towe.” Bɔ Ablámu mɛ vɔ̌sákpe ɖokpó nú Mawu Mavɔmavɔ nyi fí e é tɔ́n dó jǐ tɔn ɖe ɔ́. Énɛ́ ɔ́ gúdo ɔ́, Ablámu gosín Sikɛ́mu, bó yi sókan mɛ, ɖo Betɛ́li sín zǎnzǎnhwe jí, bó ɖó gɔnu nyi fínɛ́. Betɛ́li ɔ́ ɖo gbadahwe jí n'i, bɔ Ayíi ɖo zǎnzǎnhwe jí n'i. É lɛ́ mɛ vɔ̌sákpe ɖěvo ɖó fínɛ́ nú Mawu Mavɔmavɔ, lobo nɔ xomlá nyǐkɔ tɔn. Ablámu lɛ́ wlí ali ɖidó Nɛgɛ́vu. Adɔ wá tɔ́n ɖo Kanáa to ɔ́ mɛ, bɔ Ablámu yi Ejípu bó ná nɔ fínɛ́, ɖó adɔ e tɔ́n ɖo to ɔ́ mɛ ɔ́ syɛ́n ɖésú. Ée é ɖo Ejípu tomɛ ná byɔ́ wɛ ɔ́, é ɖɔ nú asi tɔn Salayíi ɖɔ: “Đǒtó mì, un tunwun ɖɔ a nyɔ̌ ɖɛkpɛ; Ejípunu lɛ́ɛ mɔ we ɔ́, yě ná ɖɔ hwi wɛ nyí asi ce, bó ná hu mì, lobo ka ná yí we. Ényí yě ɖɔ mɔ̌ hǔn, kɛnklɛ́n ɖɔ nú yě ɖɔ nɔví ce wɛ a nyǐ, bónú yě ná kpé nukún dó wǔ ce ganjí ɖó hwɛ wú; énɛ́ ɔ́, é ná sín hwɛ wú bɔ un ná gán.” Nǔgbó ɔ́, ée Ablámu byɔ́ Ejípu to ɔ́ mɛ ɔ́, Ejípunu lɛ́ɛ mɔ ɖɔ nyɔ̌nu ɔ́ nyɔ́ ɖɛkpɛ ɖésú. Axɔ́sú Ejípu tɔn ɔ́ sín gǎn hɔn-yitɔ́ lɛ́ɛ lɔ mɔ nyɔ̌nu ɔ́, bó yi kpa ɖɛkpɛ tɔn nú axɔ́sú ɔ́. Énɛ́ ɔ́, è kplá nyɔ̌nu ɔ́ yi dó hɔn nú axɔ́sú ɔ́. Axɔ́sú ɔ́ wa ɖagbe nú Ablámu ɖésú ɖó nyɔ̌nu ɔ́ wú. É ná ɛ lɛ̌ngbɔ́, nyibú, tócí, mɛsɛntɔ́ súnnu, nyɔ̌nu, tócí asi kpó lǎkúnmí kpó. Lo ɔ́, Mawu Mavɔmavɔ dó azɔn baɖabaɖa ɖé lɛ́ɛ axɔ́sú ɔ́ kpó xwédo tɔn kpó ɖó Ablámu sín asi Salayíi wú. Ée nǔ cí mɔ̌ ɔ́, axɔ́sú ɔ́ ylɔ́ Ablámu bó ɖɔ n'i ɖɔ: “Nɛ̌ gbɔn bɔ a wa mɔ̌ xá mì? Étɛ́wú wɛ a ma ɖɔ nú mì ɖɔ asi émítɔn wɛ ǎ? Étɛ́wú wɛ a ɖɔ nú mì ɖɔ nɔví émítɔn wɛ? Énɛ́ wɛ zɔ́n bɔ un zé e dó ɖó asi ná hǔn. Din ɔ́, asi towe ɖíe, kplá ɛ bó ɖidó!” Énɛ́ ɔ́, axɔ́sú ɔ́ ná gbe mɛsɛntɔ́ tɔn lɛ́ɛ ɖɔ yě ní kplá Ablámu kpó asi tɔn kpó, kpódó nǔ e é ɖó lɛ́ɛ bǐ kpó káká yi to ɔ́ sín dogbó jí. Ée axɔ́sú ɔ́ ɖɔ mɔ̌ ɔ́, Ablámu kplá asi tɔn, bó bɛ́ nǔ e nyí étɔn lɛ́ɛ bǐ bó tɔ́n sín Ejípu bó ɖidó Nɛgɛ́vu. Lɔ̌ti lɔ xwedó e. Ablámu jɛ dɔkun ɖésú; é ɖó kanlin kpó kpatágan kpó, kpódó siká kpó kpɔ́ gégé. É ɖo fí lɛ́ɛ fí lɛ́ɛ gbɔn wɛ ɖo Nɛgɛ́vu káká wá jɛ Betɛ́li, fí e é kó ɖó gɔnu ɖó ɖ'ayǐ é, ɖo Betɛ́li kpó Ayíi kpó tɛ́ntin, ɖo fí e é mɛ vɔ̌sákpe ɖó ɖ'ayǐ é. Ée é jɛ fínɛ́ ɔ́, é xomlá Mawu Mavɔmavɔ sín nyǐkɔ. Lɔ̌ti lɔmɔ̌ ɖó gbɔ̌ kpó nyibú kpó gěgé, lobo ɖó goxɔ é ɖésúnɔ tɔn gěgé. É xwedó Ablámu. To e mɛ yě ká jɛ ɔ́ gbló bónú yě mɛ we lɛ́ɛ ná nɔ kpɔ́ ǎ, ɖó kanlin yětɔn lɛ́ɛ sukpɔ́. Énɛ́ ɔ́ wɛ zɔ́n, bɔ kanlinnyitɔ́ Ablámu tɔn lɛ́ɛ kpó Lɔ̌ti tɔn lɛ́ɛ kpó ɖɔ jlɛ. Kanáanu lɛ́ɛ kpó Pɛliziti lɛ́ɛ kpó ká ɖo to ɔ́ mɛ hwenɛ́nu. Énɛ́ ɔ́, Ablámu ɖɔ nú Lɔ̌ti ɖɔ: “Kɛnklɛ́n, tagba ɖó ná tíin ɖo nyɛ kpó hwi kpó tɛ́ntin ǎ; tagba ka ɖó ná tíin ɖo kanlinnyitɔ́ ce lɛ́ɛ kpó towe lɛ́ɛ kpó tɛ́ntin ǎ, ɖó nɔví wɛ mǐ nyǐ. To ɔ́ bǐ nɛ́ ɖo nukɔn towe nɛ́; gbɔ nú mǐ ná jɛ vovo. Sɔ́ fí e jló we é: ényí a ɖidó amyɔxwé ɔ́, nyɛ ná ɖidó ɖisíxwé; ényí a ka ɖidó ɖisíxwé ɔ́, nyɛ ná ɖidó amyɔxwé.” Ée Ablámu ɖɔ mɔ̌ ɔ́, Lɔ̌ti zé ta bó mɔ ayǐkúngban wɛnjɛ Judɛ́ɛn tɔn ɔ́ bǐ, bɔ sin kpé fí bǐ. Má ɖɔ nú mi, fí énɛ́ ɔ́ kó cí jikpá Mawu Mavɔmavɔ tɔn ɖɔhun káká yi Sowáa, bó cí Ejípu to ɖɔhun cóbɔ Mawu Mavɔmavɔ wá gba Sodɔ́mu kpó Gomɔ́ɔ kpó. Ée Lɔ̌ti mɔ mɔ̌ ɔ́, é sɔ́ ayǐkúngban wɛnjɛ Judɛ́ɛn tɔn ɔ́ bǐ, lobo bɛ́ nǔ bó yi jɛ zǎnzǎnhwe jí. Lě e yě jɛ vovo gbɔn ɔ́ nɛ́. Énɛ́ ɔ́, Ablámu yi nɔ ayǐkúngban Kanáa tɔn ɔ́ jí; Lɔ̌ti ka yi jɛ toxo e ɖo ayǐkúngban wɛnjɛ ɔ́ jí lɛ́ɛ kpá, lobo ján goxɔ tɔn lɛ́ɛ káká yi Sodɔ́mu. Sodɔ́munu lɛ́ɛ ɔ́, yě dá ɖésú; yě nɔ́ hu hwɛ dó Mawu Mavɔmavɔ ɖésú. Ée Lɔ̌ti jó Ablámu dó ɔ́, Mawu Mavɔmavɔ ɖɔ nú Ablámu ɖɔ: “Sí te, zě ta d'aga, bó kpɔ́n totaligbé, tofɔligbé, zǎnzǎnhwe jí kpódó gbadahwe jí kpó sɛ́ dó. To e mɔ wɛ a ɖe nɛ́ lɛ́ɛ ɔ́, un ná ná bǐ hwi kpó vǐvú towe lɛ́ɛ kpó káká sɔ́yi. Un ná bló bɔ vǐvú towe lɛ́ɛ ná sukpɔ́ kɔ́gúdu ɖɔhun. Yě ná sukpɔ́ káká bɔ mɛɖé ná sixú xa yě ǎ, lě e è ma sixú xa kɔ́ e ɖo ayǐkúngban jí ɔ́ ǎ é ɖɔhun. Sí te bó ɖi sa gbɔn to ɔ́ bǐ mɛ, ɖó hwi wɛ un ná ná to ɔ́ bǐ.” Ablámu tún goxɔ tɔn lɛ́ɛ bó yi ján yě ɖó zun Mamulée tɔn lɛ́ɛ mɛ, ɖo Eblɔ́n kpá. É mɛ vɔ̌sákpe ɖokpó nyi fínɛ́ nú Mawu Mavɔmavɔ. Hwenɛ́nu ɔ́, axɔ́sú ɛnɛ tíin; yě wɛ nyí: Amulafɛ́lu, Mɛzopotamíi sín axɔ́sú ɔ́; Alyɔki Ɛlasáa sín axɔ́sú ɔ́; Kedɔ́laomɛ́ɛ, Elámu sín axɔ́sú ɔ́ kpódó Tidealu, Goyímu sín axɔ́sú ɔ́ kpó; yě fun ahwan xá axɔ́sú atɔ́ɔ́n; yě wɛ nyí Bɛ́la, Sodɔ́mu sín axɔ́sú ɔ́, Bíica, Gomɔ́ɔ sín axɔ́sú ɔ́, Cinɛyavu, Adima sín axɔ́sú ɔ́, Cɛmɛvɛ́ɛ, Sevoyímu sín axɔ́sú ɔ́, lobo fun xá axɔ́sú Bɛ́la tɔn; to nɛ́ ɔ́ wɛ è nɔ lɛ́ ylɔ́ ɖɔ Sowáa. Axɔ́sú nɛ́ lɛ́ɛ e è fun ahwan xá lɛ́ɛ bǐ kplé ɖo tɔdo Sidímu tɔn e nyí Xu Kúkú ɔ́ mɛ. Axɔ́sú nɛ́ lɛ́ɛ kó nɔ axɔ́sú Kedɔ́laomɛ́ɛ glɔ́ nú xwe wěwe, bó fɔ́n gǔ ɖo xwe wǒ-atɔngɔ́ ɔ́ mɛ. Lo ɔ́, ɖo xwe wǒ-ɛnɛgɔ́ ɔ́ mɛ ɔ́, axɔ́sú Kedɔ́laomɛ́ɛ, kpó axɔ́sú e ɖo jǐ tɔn lɛ́ɛ kpó sɔ́ ahwannú, bó yi ɖu ɖo Hlafa ví lɛ́ɛ jí ɖo Acitalɔ́ti-Kaanayímu, bó ɖu ɖo Zuzi ví lɛ́ɛ jí ɖo Hamu, bó ɖu ɖo Emíti lɛ́ɛ jí ɖo ayǐkúngban wɛnjɛ Cawée-Kiliyatayímu tɔn jí, lobo ɖu ɖo Holiti lɛ́ɛ jí, ɖo Seyíi só kanmɛ, bó jɛ yě gúdo káká yi Eyilu-Paláni ɖo gbětótló ɔ́ kpá. Énɛ́ ɔ́ gúdo ɔ́, yě lɛ́ kɔ wá Eyinu-Micipáti e nyí Kadɛ́ci é, lobo ɖu ɖo Amalɛ́ki ví lɛ́ɛ bǐ jí, bó lɛ́ ɖu ɖo Amɔliti ɖo Hasasɔ́ni-Tamáa lɛ́ɛ jí. Énɛ́ ɔ́, axɔ́sú Sodɔ́mu tɔn ɔ́ kpó Gomɔ́ɔ tɔn ɔ́ kpó, kpó Adima tɔn ɔ́ kpó, kpó Sevoyímu tɔn ɔ́ kpó, kpódó Bɛ́la e è nɔ lɛ́ ylɔ́ ɖɔ Sowáa tɔn ɔ́ kpó sɔ́ ahwannú; yě yi tɔ́n ahwan yě ɖo tɔdo Sidímu tɔn ɔ́ mɛ. Yě yi fun ahwan xá Kedɔ́laomɛ́ɛ, axɔ́sú Elámu tɔn ɔ́, kpó Tidealu, axɔ́sú Goyímu tɔn ɔ́ kpó, kpó Amulafɛ́lu, axɔ́sú Mɛzopotamíi tɔn ɔ́ kpó, kpódó Alyɔki, axɔ́sú Ɛlasáa tɔn ɔ́ kpó: hǔn axɔ́sú ɛnɛ nɛ́ húzú kpan nukɔn axɔ́sú atɔ́ɔ́n nɛ́. Lo ɔ́, sin gɔ́ dotɔ e ɖo tɔdo Sidímu tɔn mɛ lɛ́ɛ bǐ mɛ, bɔ hwenu e axɔ́sú Sodɔ́mu tɔn ɔ́ kpó Gomɔ́ɔ tɔn ɔ́ kpó ɖo hinhɔn wɛ é ɔ́, yě mɛ ɖě lɛ́ɛ jɛ dotɔ mɛ, bɔ mɛ e kpo lɛ́ɛ hɔn ɖidó sókan mɛ. Bɔ mɛ e ɖu ɖo yě jí lɛ́ɛ bɛ́ dɔkun e ɖo Sodɔ́mu kpó Gomɔ́ɔ kpó lɛ́ɛ bǐ kpódó nǔɖuɖu e yě kplé ɖ'ayǐ lɛ́ɛ bǐ kpó, lobo yi. Lɔ̌ti Ablámu nɔví ví ɔ́ ɖíe ká ɖo Sodɔ́mu hwenɛ́nu e. Yě mɛ e ɖo hinhɔn wɛ lɛ́ɛ ɖokpó wá ɖɔ nǔ e jɛ nɛ́ ɔ́ nú Ablámu. Ablámu Eblée ɔ́, nɔ́ nɔ zun Mamulée tɔn lɛ́ɛ mɛ. Mamulée ɔ́, Amɔliti wɛ. Ɛcikɔ́lu kpó Anɛ́ɛ kpó sín nɔví súnnu wɛ. Yě mɛ énɛ́ lɛ́ɛ jɛ akɔ xá Ablámu. Ée Ablámu se lě tlóló ɖɔ è wlǐ vǐ émítɔn bó zé yi ɔ́, é sɔ́ ahwannú nú mɛsɛntɔ́ tɔn e nyɔ́ ahwan fun ganjí, bó jɔ ɖo kún tɔn mɛ lɛ́ɛ afɔɖé kanwe gbantɔ́n-nukún-atɔn (318), lobo jɛ axɔ́sú lɛ́ɛ gúdo káká yi Dan. Ée yě yi jɛ dɔ̌n ɔ́, Ablámu má ahwangɔnu tɔn, bɔ é kpó mɛsɛntɔ́ lɛ́ɛ kpó ná tɔ́n ahwan axɔ́sú lɛ́ɛ zǎn mɛ. É ɖu ɖo yě jí, bó jɛ gǔdo yětɔn káká yi Hova. Hova ɔ́, toxo ɖé wɛ, bó ɖo totaligbé nú Damási. Ée é ɖu ɖo yě jí ɔ́, é bɛ́ dɔkun lɛ́ɛ bǐ wá yi. É lɛ́ kplá vǐ tɔn Lɔ̌ti ɔ́ lɔmɔ̌ wá kpó dɔkun tɔn lɛ́ɛ bǐ kpó, bó kplá nyɔ̌nu lɛ́ɛ kpó togun ɔ́ bǐ kpó. Ée Ablámu ɖu ɖo Kedɔ́laomɛ́ɛ kpó axɔ́sú e ɖo jǐ tɔn lɛ́ɛ kpó jí, bó lɛ́ kɔ jǎwe ɔ́, axɔ́sú Sodɔ́mu tɔn ɔ́ tɔ́n, bó yi kpé e ɖo tɔdo Cawée tɔn ɔ́ mɛ. Tɔdo Cawée tɔn ɔ́, è nɔ lɛ́ ylɔ́ ɖɔ tɔdo Axɔ́sú tɔn. Lo ɔ́, Mɛlukisedɛ́ki, axɔ́sú Salɛ́mu tɔn ɔ́, éyɛ́ hɛn wɔ̌xúxú kpó vɛ̌ɛn kpó wá nú Ablámu. Mawu Ajalɔ̌nlɔn ɔ́ sín vɔ̌sánú-xwlémawutɔ́ wɛ é kó nyí ɖ'ayǐ. É xo ɖɛ dó Ablámu jí, bó ɖɔ: “Mawu Ajalɔ̌nlɔn ní kɔn nyɔ̌ná dó Ablámu jí. Mawu Ajalɔ̌nlɔn e bló jǐnukúnsin kpó ayǐkúngban kpó é ní kɔn nyɔ̌ná dó jǐ we. Susu nú Mawu Ajalɔ̌nlɔn. É jó kɛntɔ́ towe lɛ́ɛ nú we.” Ablámu ná ɛ nǔ e é bɛ́ wá lɛ́ɛ bǐ sín mǎɖówǒ. Axɔ́sú Sodɔ́mu tɔn ɔ́ ɖɔ nú Ablámu ɖɔ: “Nǎ gbɛtɔ́ lɛ́ɛ mì, bó bɛ́ dɔkun lɛ́ɛ bǐ.” Ablámu ka ɖɔ n'i ɖɔ: “Un xwlé Mawu Mavɔmavɔ, Mawu Ajalɔ̌nlɔn e bló jǐnukúnsin kpó ayǐkúngban kpó é: Un ná zé nǔ towe ɖěbǔ ǎ; un ná ɖ'alɔ nyɛ̌ví vɔ́vɔ́ wú ǎ. Énɛ́ ɔ́, sɔ wá su ɔ́, a sɔ́ ná ɖɔ émí wɛ dó dɔkun nú mì ǎ. Nyɛ ɖésúnɔ ɔ́, un ba nǔ ɖěbǔ ǎ. Un ba nǔ ɖěbǔ zɛ nǔ e mɛ ce lɛ́ɛ ɖu ɔ́ kpódó kanta e Anɛ́ɛ kpódó Ɛcikɔ́lu kpó, kpó Mamulée kpó ná yí é wú ǎ. Yě wɛ xwedó mì, yě ká ɖó ná yí kanta yětɔn.” Ée nǔ énɛ́ lɛ́ɛ jɛ wá yi gúdo ɔ́, Ablámu mɔ nǔ. É mɔ Mawu Mavɔmavɔ bɔ é ɖɔ xó n'i; é ɖɔ n'i ɖɔ: “Ablámu! Ma ɖi xɛsi ó; nyɛ wɛ nyí gǎglónú towe; un ná ná we ajɔ bɔ é ná d'agba ɖésú.” Bɔ Ablámu ɖɔ: “Aklúnɔ Mavɔmavɔ! Un ɖó vǐ ɖěbǔ ǎ, a nǎ nǔ mì ɔ́, étɛ́ un ná wa ná? Un ná kú ma ɖó vǐ donu. Eliezɛ́ɛ Damásinu ɔ́ wɛ ná ɖu nǔ e un ɖó lɛ́ɛ sín gǔ.” Ablámu lɛ́ ɖɔ: “Áo, kpɔ́n! A nǎ vǐ mì ǎ, bɔ vǐ e ɖo gɔ̌n ce ɔ́ wɛ ná wá nyí gǔɖutɔ́ ce.” Lo ɔ́, Mawu Mavɔmavɔ ɖɔ xó n'i; é ɖɔ n'i ɖɔ: “É wɛ ná nyí gǔɖutɔ́ towe ǎ. Vǐ e hwi ɖésúnɔ ná ji ɔ́ wɛ ná nyí gǔɖutɔ́ towe.” Ée Mawu Mavɔmavɔ ɖɔ mɔ̌ nú Ablámu ɔ́, é kplá ɛ sín goxɔ tɔn mɛ, bó ɖɔ n'i ɖɔ: “Kpɔ́n jǐnukúnsin; nú a sixú xa sunví lɛ́ɛ hǔn, xa.” É lɛ́ ɖɔ n'i ɖɔ: “Lě e vǐ towe lɛ́ɛ ná sukpɔ́ gbɔn ɔ́ nɛ́.” Ablámu ka ɖi nǔ nú Mawu Mavɔmavɔ, bɔ Mawu Mavɔmavɔ mɔ ɛ dó mɔ hwɛjijɔnɔ. Mawu Mavɔmavɔ lɛ́ ɖɔ nú Ablámu ɖɔ: “Nyɛ wɛ nyí Mawu Mavɔmavɔ e ɖe we tɔ́n sín Wúu, ɖo Kaludée é. Un ná ná to élɔ́ e mɛ a ɖe ɔ́ we, bɔ é ná nyí towe.” Bɔ Ablámu kanbyɔ́ Mawu Mavɔmavɔ ɖɔ: “Aklúnɔ Mavɔmavɔ, ani wɛ ná ɖe xlɛ́ mì ɖɔ to élɔ́ ná nyí ce?” Mawu Mavɔmavɔ ká ɖɔ n'i ɖɔ: “Zě nyibúsixwɛ e ɖó xwe atɔn ɔ́ ɖokpó, gbɔ̌ e ɖó xwe atɔn ɔ́ ɖokpó, agbo e ɖó xwe atɔn ɔ́ ɖokpó, xwelé ɖokpó, kpódó ahwannɛ́ ɖokpó kpó wá nú mì.” Ablámu fɔ kanlin énɛ́ lɛ́ɛ wá. É vlɔ́ kanlin lɛ́ɛ; é sɔ́ ɖokpó ɔ́, é nɔ́ vlɔ́ ɖó we bó nɔ́ sɔ́ ɖě kpé dó ɖě nu; é ká vlɔ́ xɛ lɛ́ɛ ɖě ǎ. Aklasú lɛ́ɛ ká wá zɔn kanlin kúkú lɛ́ɛ jí, bɔ Ablámu nya yě. Ée hwe ɖo xɔ yi wɛ ɔ́, Ablámu byɔ́ sɛnmlɔ ɖé mɛ, zǐnflú gɔngɔn ɖé dó dó e, bó dó xɛsi. Bɔ Mawu Mavɔmavɔ ɖɔ n'i ɖɔ: “Tunwun ɖɔ vǐ towe lɛ́ɛ ná wá nyí jǒnɔ ɖo mɛ ɖěvo tomɛ. Yě ná nɔ mɛ kannu ɖo fínɛ́ bɔ è nǎ dó tagba nú yě xɔ xwe afɔwe (400). Lo ɔ́, un ná ɖɔ hwɛ xá akɔta e yě ná nyí kannumɔ ná é. Énɛ́ ɔ́ gúdo ɔ́, yě ná tɔ́n sín fínɛ́, bó ná bɛ́ dɔkun gěgé wá yi. Amɔ̌, hwɛ ɔ́, kpikpoxɔmɛ ná nyɔ́ nú we. A nǎ kú dó fífá mɛ, bɔ è nǎ ɖi we. Vitikli towe lɛ́ɛ ná lɛ́ kɔ wá fí, ɖó Amɔliti lɛ́ɛ kó hu hwɛ sɔ mɔ̌ din bónú má nya yě sín fí ǎ.” Ée hwe yi xɔ, bɔ zǐnflú dó bǐ ɔ́, myɔ hɛhɛ ɖé nɔ́ gbɔn kanlin e è vlɔ̌ lɛ́ɛ tɛ́ntin dín kpó azizɔ kpó. Gbe énɛ́ ɔ́ gbe ɔ́, Mawu Mavɔmavɔ jɛ akɔ xá Ablámu bó ɖɔ: “Un ná to élɔ́ kúnkan towe, bɛ́ sín tɔsisa Ejípu tɔn ɔ́ kɔn káká yi tɔsisa ɖaxó Efláti ɔ́ kɔn.” To énɛ́ ɔ́, Keni ví lɛ́ɛ, Kenázi ví lɛ́ɛ, kpó Kadimɔniti lɛ́ɛ kpó tɔn wɛ. Hitíti lɛ́ɛ, Pɛliziti lɛ́ɛ, Hlafa ví lɛ́ɛ, Amɔliti lɛ́ɛ, Kanáanu lɛ́ɛ, Giigacíti lɛ́ɛ kpódó Jebuzinu lɛ́ɛ kpó tɔn wɛ. Ablámu sín asi Salayíi ɔ́ ji vǐ ɖěbǔ n'i ǎ. Salayíi ka ɖó mɛsɛntɔ́ nyɔ̌nu Ejípunu ɖokpó, bɔ è nɔ ylɔ́ ɛ ɖɔ Hagáa. Salayíi ɖɔ nú Ablámu ɖɔ: “Mawu Mavɔmavɔ ba nú má ɖó vǐ ǎ; gbɔ bó ɖó xó xá mɛsɛntɔ́ ce. Afɔ nyɔ́ ɔ́, un sixú ɖó vǐ gbɔn gbla tɔn mɛ.” Ablámu yí gbe nú xó e Salayíi ɖɔ é. Énɛ́ ɔ́, Salayíi sɔ́ mɛsɛntɔ́ tɔn Hagáa Ejípunu ɔ́ da nú asú tɔn. Ablámu ka ko bló xwe wǒ ɖo Kanáa hwenɛ́nu. É ɖó xó xá Hagáa bɔ é mɔ xo. Ée Hagáa mɔ ɖɔ kɛ́n jɛ émí wú ɔ́, é sɔ́ nɔ́ mɔ gǎn tɔn dó mɔ nǔɖé ǎ. Bɔ Salayíi ɖɔ nú Ablámu ɖɔ: “Zun e zun mì wɛ é ɖe ɔ́, nú é ji nǔɖé ɔ́, hwi wɛ ná kpan. Nyɛ wɛ sɔ́ mɛsɛntɔ́ ce ná we nǔgbó, amɔ̌, sín hwenu e é mɔ ɖɔ kɛ́n jɛ émí wú ɔ́, é sɔ́ nɔ mɔ mì dó mɔ nǔɖé ǎ. Mawu Mavɔmavɔ ní gbo hwɛ nú nyɛ kpó hwi kpó.” Lo ɔ́, Ablámu ɖɔ nú Salayíi ɖɔ: “Mɛsɛntɔ́ towe wɛ é nyí, bó ɖo acɛ towe glɔ́. Nǔɖé jló we hǔn, wa xá ɛ.” Ée é ɖɔ mɔ̌ ɔ́, Salayíi jɛ ya dó nú Hagáa jí káká bɔ é hɔn yi. Wɛnsagun Mawu Mavɔmavɔ tɔn mɔ Hagáa ɖo tɔjɔtɛn ɖé kɔn, ɖo gbětótló mɛ ɖo Cúu sín ali jí. Wɛnsagun ɔ́ kanbyɔ́ Hagáa ɖɔ: “Hagáa, mɛsɛntɔ́ Salayíi tɔn, fítɛ́ a gosín? Fítɛ́ a xwe?” Bɔ é yí gbe n'i ɖɔ: “Gǎn ce Salayíi hɔn ná wɛ un ɖe.” Bɔ wɛnsagun Mawu Mavɔmavɔ tɔn ɔ́ ɖɔ n'i ɖɔ: “Lɛ̌ kɔ yi gǎn towe gɔ́n bó hwíhwɛ́ hwiɖée ɖó glɔ̌ tɔn. Un ná bló bɔ vǐ towe lɛ́ɛ ná sukpɔ́ káká bɔ è nǎ sixú xa yě ǎ. Xo wɛ a ɖe din, bó ná ji vǐ súnnu ɖokpó, lobo ná sun nyǐ i ɖɔ Isimayɛ́li; ɖó un se nǔwamɛ ví e ya wɛ a ɖe é. Vǐ ɔ́ ná cí tócí gbě tɔn ɖɔhun. É ná fun ahwan xá mɛ bǐ, bɔ mɛ bǐ ná fun ahwan xá ɛ; é ná nɔ zɔ nú mɛ bǐ, é ɖokpónɔ wɛ ná nɔ ayǐ.” Bɔ Hagáa ylɔ́ wɛnsagun Mawu Mavɔmavɔ tɔn e wá ɖɔ xó n'i ɔ́ ɖɔ: “Ata-Ɛli-Hlɔyi.” Đó é ɖo ɖiɖɔ dó xomɛ wɛ ɖɔ: “Un ka ba ɖɔ má kpɔ́n mɛ e ɖo mimɔ mì wɛ ɔ́ a?” Nǔ e wú è nɔ ylɔ́ dotɔ énɛ́ ɔ́ ɖɔ dotɔ Laxáyi-Hlɔyi tɔn ɔ́ nɛ́. Dotɔ énɛ́ ɔ́ ɖo Kadɛ́ci kpó Bɛlɛ́di kpó tɛ́ntin. Hagáa ji vǐ súnnu ɖokpó nú Ablámu; bɔ Ablámu sun nyǐ vǐ ɔ́ ɖɔ Isimayɛ́li. Xwe kanwe ayizɛ́n (86) wɛ Ablámu ɖó hwenu e Hagáa ji Isimayɛ́li n'i é. Hwenu e Ablámu ɖo xwe kanwe afɔtɔn-nukún-ɛnɛ (99) ɖó wɛ ɔ́, Mawu Mavɔmavɔ tɔ́n dó jǐ tɔn, bó ɖɔ n'i ɖɔ: “Nyɛ wɛ nyí Mawu Nǔbǐwúkpétɔ́ ɔ́. Nɔ nɔ ali ce jí; è nǐ má nɔ́ mɔ nǔjɛdo ɖé ɖɔ dó wǔ towe ó. Un ná jɛ akɔ xá we; un ná bló bɔ a nǎ gba kún bɔ é ná vɛ́ jlɛ́.” Ée Ablámu se mɔ̌ ɔ́, é xwe agbɔ̌nnusú do, bɔ Mawu ɖɔ n'i ɖɔ: “Nyɛ ɔ́, akɔ e un jɛ xá we ɔ́ ɖíe: A nǎ húzú tɔ́gbó nú akɔta wɔ̌buwɔ́bú. È sɔ́ ná nɔ́ ylɔ́ we ɖɔ Ablámu ǎ, lo ɔ́, è nǎ nɔ́ ylɔ́ we ɖɔ Ablaxámu, ɖó un sɔ́ we dó húzú tɔ́gbó nú akɔta wɔ̌buwɔ́bú. Un ná bló bɔ vǐ towe lɛ́ɛ ná sukpɔ́, bó ná húzú akɔta gěgé; axɔ́sú gěgé ná tɔ́n ɖo vǐ towe lɛ́ɛ mɛ. Un ná jɛ akɔ xá we, bó ná jɛ xá vǐ towe e ná jɛ do towe mɛ lɛ́ɛ, jijimɛ ɖě jɛ ɖě gúdo. Akɔjijɛ mavɔ mavɔ ɖé wɛ é ná nyí, bó ná zɔ́n bɔ un ná nyí Mawu towe, bó ná nyí Mawu vǐ towe e ná jɛ do towe mɛ lɛ́ɛ tɔn. Un ná ná to élɔ́ e mɛ a nyǐ jǒnɔ ɖe din ɔ́ hwi kpódó vǐ towe e ná jɛ do towe mɛ lɛ́ɛ kpó. To ɔ́ wɛ nyí Kanáa; un ná bǐ yě. É ná nyí yětɔn káká sɔ́yi, bɔ un ná nyí Mawu yětɔn.” Mawu lɛ́ ɖɔ nú Ablaxámu ɖɔ: “Hwɛ ɔ́, a nǎ ɖó sísí nú akɔ e un jɛ xá we ɔ́. Hwi kpó vǐ towe e ná jɛ do towe mɛ lɛ́ɛ kpó ná ɖó sísí nú akɔ e un jɛ xá mi é, jijimɛ ɖě jɛ ɖě gúdo. Akɔ e jɛ xá hwi kpó kúnkan towe lɛ́ɛ bǐ kpó wɛ un ɖe bɔ mi ɖó ná nɔ́ xwedó ɔ́ ɖíe: È ɖǒ ná nɔ́ gbo ada nú súnnu e ɖo mi mɛ lɛ́ɛ bǐ. Mi ná nɔ́ gbo ada. Adagbigbo ɔ́ wɛ ná nyí akɔjijɛ e ɖo nyɛ kpó mi kpó tɛ́ntin ɔ́ sín wuntun. Mi ji vǐ súnnu ɖěbǔ, bónú é ɖó azǎn tántɔn ɔ́, mi ɖó ná gbo ada n'i. Mɔ̌ wɛ mi nǎ bló nú kannumɔ e è ji ɖo to mitɔn mɛ lɛ́ɛ, bó ná lɛ́ bló nú kannumɔ e mi zé akwɛ́ dó xɔ bɔ yě má nyí akɔta mitɔn ǎ lɛ́ɛ bǐ. Mɔ̌ wɛ mi ná bló gbɔn ɖo jijimɛ lɛ́ɛ bǐ mɛ. Hǔn, è ɖǒ nǎ gbo ada nú xwéví kpó kannumɔ e è xɔ lɛ́ɛ kpó, bónú akɔ e un jɛ xá mi ɔ́ ná nyí wuntun ɖé ɖo agbaza mitɔn wú káká sɔ́yi. Súnnu e má ná gbo ada ǎ ɔ́, è nǎ ɖe e sín tɛ́ntin mitɔn, ɖó é gba akɔ e un jɛ xá mi é.” Mawu lɛ́ ɖɔ nú Ablaxámu ɖɔ: “A sɔ́ ná nɔ́ ylɔ́ asi towe ɖɔ Salayíi ǎ; lo ɔ́, a nǎ nɔ́ ylɔ́ ɛ ɖɔ Sala. Un ná xo ɖɛ dó jǐ tɔn, bó ná ná vǐ súnnu ɖokpó we gbɔn jǐ tɔn; un ná xo ɖɛ dó jǐ tɔn, bɔ é ná dó akɔta gěgé sín kún. Axɔ́sú gěgé ná tɔ́n ɖo vǐ tɔn lɛ́ɛ mɛ.” Ée Ablaxámu se mɔ̌ ɔ́, é xwe agbɔ̌nnusú do; é ko nǔ, bó ɖɔ dó xomɛ ɖɔ: “Nyɛ mɛ e ko ɖó xwe kanwe ko (100) ɔ́ wɛ è nǎ sixú ji vǐ ná a? Sala lɔmɔ̌ e kó ɖó xwe kanwe wǒ (90) ɔ́ wɛ ná lɛ́ ji vǐ a?” Énɛ́ ɔ́, é ɖɔ nú Mawu ɖɔ: “Mawu ce, Isimayɛ́li ní vɛ́ kó nɔ gbɛ, bónú a xo ɖɛ dó jǐ tɔn kpowun.” Bɔ Mawu ɖɔ nú Ablaxámu ɖɔ: “Éeǒ! Asi towe Sala ná ji vǐ súnnu ɖokpó nú we dandan. A nǎ sun nyǐ vǐ ɔ́ ɖɔ Izáki. Un ná jɛ akɔ xá ɛ, bɔ é ná nyí akɔjijɛ mavɔ mavɔ nú é kpó vǐ tɔn e ná jɛ do tɔn mɛ lɛ́ɛ kpó. Un se nǔ e a byɔ́ nú Isimayɛ́li é; un ná xo ɖɛ dó jǐ tɔn; un ná bló bɔ é ná gba kún; vǐ tɔn lɛ́ɛ ná sukpɔ́ ɖésú. É ná ji axɔ́ví wěwe bó ná nyí tɔ́gbó togun ɖaxó ɖé tɔn. Amɔ̌, Izáki e Sala ná ji nú we ɖo xwe ɖě ɔ́ mɛ lěhwenu ɔ́, é wɛ un ná jɛ akɔ xá.” Ée Mawu ɖɔ xó nú Ablaxámu fó ɔ́, é ɖidó jǐ. Gbe nɛ́ gbe ɔ́, Ablaxámu gbo ada nú vǐ tɔn Isimayɛ́li ɔ́, bó gbo nú kannumɔ tɔn lɛ́ɛ bǐ: ée è ji ɖo xwé tɔn gbe lɛ́ɛ kpó ée é xɔ lɛ́ɛ bǐ kpó; nú è nǎ ɖɔ ɔ́, é gbo ada nú súnnu e kó ɖo xwé tɔn gbe lɛ́ɛ bǐ. É gbo ada nú yě bǐ lě e Mawu zɔ́n gbɔn é. È gbo ada nú Ablaxámu lɔmɔ̌ gbe nɛ́ gbe. Xwe kanwe afɔtɔn-nukún-ɛnɛ (99) wɛ é ɖó. Vǐ tɔn Isimayɛ́li ɔ́, xwe wǒ-atɔn wɛ éyɛ́ ɖó bɔ è gbo ada n'i. Gbe nɛ́ gbe ɖokpó ɔ́ wɛ Ablaxámu kpó vǐ tɔn Isimayɛ́li kpó gbo ada. Gbe nɛ́ gbe ɖokpó ɔ́ wɛ kannumɔ tɔn lɛ́ɛ bǐ gbo ada; kannumɔ e è ji ɖo xwé tɔn gbe lɛ́ɛ kpó ée é xɔ ɖo jǒnɔ lɛ́ɛ sí lɛ́ɛ bǐ kpó. Mawu Mavɔmavɔ tɔ́n dó Ablaxámu jí ɖo zun Mamulée tɔn mɛ gbe ɖokpó. Gbe nɛ́ gbe ɔ́, Ablaxámu ɖo ayǐjínjɔ́n ɖo goxɔ tɔn sín alihɛ́nnu hwemɛ cíɖíɖí. É zé ta d'aga bó ná mɔ nǔɖé kpowun ɔ́, é mɔ súnnu atɔn ɖo te ɖo nukɔn tɔn; yě lín dó e ǎ. Ée é mɔ yě ɔ́, é kán wezun sín goxɔ tɔn nukɔn bó yi kpé yě, bó ɖe kɔ́ nú yě. Énɛ́ ɔ́ gúdo ɔ́, é ɖɔ nú mɛ ɖokpó ɖo yě mɛ ɖɔ: “Mɛɖaxó, un jló ná byɔ́ nǔɖé we. Kɛnklɛ́n, ma nɔ zɔ nú nyɛ mɛsɛntɔ́ towe ó. È nǎ hɛn sin kpɛɖé wá, bó ná dó klɔ́ afɔ ná nú mi, bɔ mi ná gbɔjɛ́ ɖo atín élɔ́ sá. Un ná ba nǔɖé wá nú mi, bɔ mi ná ɖu, bó ná mɔ hlɔ̌nhlɔ́n. Énɛ́ ɔ́ gúdo ɔ́, mi ná lɛ́ wlí ali mitɔn. Énɛ́ ɔ́, gɔ̌n ce e mi wá gbɔn ɔ́ sɔ́ ná nyí nǔ yǎyá ǎ.” Ée Ablaxámu ɖɔ mɔ̌ ɔ́, súnnu atɔn lɛ́ɛ ɖɔ n'i ɖɔ: “É nyɔ́, bó bló lě e a ɖɔ gbɔn é.” Énɛ́ ɔ́, Ablaxámu fyá yi goxɔ tɔn mɛ, bó ɖɔ nú Sala ɖɔ: “Yǎ wǔ jlɛ́ linfín gannú atɔn, bó nya, bó dó ɖa acɔnmɔ.” Ée é ɖɔ mɔ̌ nú Sala ɔ́, é kán wezun yi wutó tɔn mɛ, bó wlí nyibúví e su ɖuɖu bó dó jǒ ɔ́ ɖokpó, bó zé nú mɛsɛntɔ́ tɔn lɛ́ɛ ɖokpó ɖɔ é ní wa azɔ̌ tɔn. Bɔ mɛsɛntɔ́ ɔ́ yá wǔ wa azɔ̌ tɔn. Ée lan ɔ́ bí ɔ́, Ablaxámu zé wǎgací kpó nyibúnɔ́sin kpó d'é jí, bó sɔ́ yi nú yě. Yě ɖo nǔ ɔ́ ɖu wɛ bɔ Ablaxámu ɖo te ɖo yě gɔ́n ɖo atín ɔ́ sá. Mɛ lɛ́ɛ ɖokpó kanbyɔ́ Ablaxámu ɖɔ: “Fítɛ́ asi towe Sala ɔ́ ɖe?” Bɔ é yí gbe n'i ɖɔ: “É ɖo goxɔ mɛ.” É lɛ́ ɖɔ nú Ablaxámu ɖɔ: “Đǒtó mì, xwe ɖě ɔ́ mɛ lěhwenu ɔ́, un ná lɛ́ kɔ wá gɔ̌n towe; asi towe Sala ná kó ɖó vǐ súnnu ɖokpó hwenɛ́nu.” Goxɔ ɖé ká ɖo mɛ e ɖo xó ɖɔ wɛ ɔ́ gǔdo, bɔ asi tɔn Sala ɖo goxɔ ɔ́ sín alihɛ́nnu, bó ɖo xó e ɖɔ wɛ yě ɖe ɔ́ se wɛ. Ablaxámu kpó Sala kpó ká ko kpo, xwe yětɔn kó sɛ yi. Sala ko kpo lǎ. Ée Sala se xó e nya ɔ́ ɖɔ ɔ́, é ko nǔ dó ayi mɛ, bó lin ɖɔ: “Nyɛ ná ko kpo sɔ lě din, bɔ súnnu ná lɛ́ jló mì a? Sɛ́ ce lɔmɔ̌ ká ko kpo.” Mawu Mavɔmavɔ ká kanbyɔ́ Ablaxámu ɖɔ: “Nɛ̌ gbɔn bɔ Sala ka ko nǔ bó ɖɔ émí ko kpo dín, bó kún sɔ́ sixú ji vǐ ó? Nǔɖé gló Mawu Mavɔmavɔ wɛ a? Xwe ɖě ɔ́ mɛ lěhwenu ɔ́, un ná lɛ́ wá gɔ̌n towe lě e un ɖɔ gbɔn ɔ́. Sala ná kó ɖó vǐ súnnu ɖokpó nɛ́.” Sala ka gbɛ́ ɖɔ émí kún ko nǔ ó, ɖó xɛsi jɛ jǐ tɔn. Lo ɔ́, Mawu Mavɔmavɔ ɖɔ n'i ɖɔ: “A ko nǔ ján.” Énɛ́ ɔ́, mɛ lɛ́ɛ sí te bó wlí ali ɖidó, bó ɖo Sodɔ́mu kpɔ́n sɛ́ dó wɛ. Ablaxámu nyi yě kpɛɖé. Mawu Mavɔmavɔ ɖɔ dó ayi mɛ ɖɔ: “Un jló ná zé nǔ e wa gbé un ja ɔ́ hwlá dó Ablaxámu ǎ. Ablaxámu ná wá húzú tɔ́gbó akɔta ɖaxó hlɔ̌nhlɔ́nnɔ ɖé tɔn dandan. Éyɛ́ jí wɛ un ná gbɔn bó xo ɖɛ dó akɔta e ɖo ayǐkúngban ɔ́ jí lɛ́ɛ bǐ jí. Un sɔ́ ɛ, bónú é ná ɖɔ nú vǐ súnnu tɔn lɛ́ɛ kpó vǐvú vivu tɔn e ná jɔ sɔ lɛ́ɛ kpó ɖɔ yě ní nyi sɛ́n ce lɛ́ɛ: yě ní zán gbɛ ɖagbe, bó zán gbɛ jlɔ́jlɔ́. Énɛ́ ɔ́, nyɛ Mawu Mavɔmavɔ ɔ́ ná ɖe akpá e un dó nú Ablaxámu lɛ́ɛ.” Mawu Mavɔmavɔ lɛ́ ɖɔ nú Ablaxámu ɖɔ: “Hwɛ e dó Sodɔ́munu lɛ́ɛ kpó Gomɔ́ɔnu lɛ́ɛ kpó wɛ è ɖe lɛ́ɛ sukpɔ́ dín; hwɛ e hu wɛ yě ɖe lɛ́ɛ vɛ́ jlɛ́. Énɛ́ ɔ́ wú wɛ un ná jɛ te bó ná wá kpɔ́n ɖɔ hwɛ e dó yě wɛ è ɖe lɛ́ɛ ɔ́, mɔ̌ jɛ́n wa nǔ gbɔn wɛ yě ɖe nǔgbó a jí, abǐ adingban wɛ. Un jló ná tunwun.” Nya lɛ́ɛ gosín fínɛ́, bó tunta Sodɔ́mu. Ablaxámu ka kpo ɖo te ɖo Mawu Mavɔmavɔ nukɔn fínɛ́. Ablaxámu sɛkpɔ́ ɛ, bó ɖɔ: “A nǎ sú mɛ ɖagbe kpó mɛ nyanya kpó sín kún dó ɖó kpɔ́ wɛ a? Afɔ nyɔ́ din ɔ́, mɛ ɖagbe kanɖé wǒ (50) kó sixú ɖo Sodɔ́mu; a nǎ sú yě lɔmɔ̌ sín kún dó wɛ a? A nǎ kpɔ́n dó mɛ ɖagbe kanɖé wǒ (50) e ɖo to ɔ́ mɛ lɛ́ɛ wú, bó sɔ́ hwɛ kɛ to ɔ́ ǎ cé? A nǎ hu mɛ ɖagbe kpó mɛ nyanya kpó. A nǎ bló mɔ̌ bɔ é ná nyí ɖɔ nǔ ɖokpó ɔ́ wɛ ɖo te kpɔ́n mɛ ɖagbe kpó mɛ nyanya kpó wɛ a? Ma wa nǔ gbɔn mɔ̌ ó; hwi mɛ e nyí hwɛɖɔtɔ́ gbɛ ɔ́ bǐ tɔn ɔ́ ná gɔn hwɛjijɔ xwedó dó wa nǔ wɛ a?” Bɔ Mawu Mavɔmavɔ ɖɔ: “Nú un mɔ mɛ ɖagbe kanɖé wǒ (50) ɖo Sodɔ́mu toxo ɔ́ mɛ ɔ́, un ná kpɔ́n dó mɛ ɖagbe énɛ́ lɛ́ɛ wú, bó sɔ́ hwɛ kɛ toxo ɔ́ bǐ.” Ablaxámu lɛ́ yí xó bó ɖɔ: “Aklúnɔ, kɛnklɛ́n, ta wɛ un syɛ́n bó ɖɔ xó nú we, ɖó kɔ́ kpó afín kpó yǎyá wɛ un nyí. Din ɔ́, mǐ ní ɖɔ mɛ atɔ́ɔ́n hwe ɖo mɛ ɖagbe kanɖé wǒ (50) lɛ́ɛ mɛ. A nǎ gba toxo ɔ́ bǐ ɖó mɛ atɔ́ɔ́n énɛ́ lɛ́ɛ wú wɛ a?” Bɔ Mawu Mavɔmavɔ ɖɔ: “Nú un mɔ mɛ ɖagbe kanɖé atɔ́ɔ́n (45) ɖo to ɔ́ mɛ ɔ́, un sɔ́ ná gba toxo ɔ́ ǎ.” Ablaxámu lɛ́ ɖɔ: “Afɔ nyɔ́ ɔ́, è sixú mɔ mɛ ɖagbe kanɖé (40) ɖo toxo ɔ́ mɛ.” Bɔ Mawu Mavɔmavɔ ɖɔ: “Nú un mɔ mɛ ɖagbe kanɖé (40) ɖo toxo ɔ́ mɛ ɔ́, un ná gba toxo ɔ́ ǎ, ɖó yědɛɛ lɛ́ɛ wú.” Ée Mawu Mavɔmavɔ ɖɔ mɔ̌ ɔ́, Ablaxámu ɖɔ: “Aklúnɔ, nú un lɛ́ kpo ɖo xó ɖɔ wɛ hǔn, kɛnklɛ́n bó má sin xomɛ ó; un ná lɛ́ ɖɔ xó; afɔ nyɔ́ ɔ́, è sixú mɔ mɛ ɖagbe gban (30).” “Nú un mɔ mɛ ɖagbe gban (30) ɖo toxo ɔ́ mɛ ɔ́, un ná gba toxo ɔ́ ǎ.” Ablaxámu ɖɔ: “Aklúnɔ kɛnklɛ́n, ta wɛ un syɛ́n bó ɖɔ xó nú we. Afɔ nyɔ́ ɔ́, è sixú mɔ mɛ ɖagbe ko ɖo toxo ɔ́ mɛ.” Mawu Mavɔmavɔ ká ɖɔ: “Un ná gba toxo ɔ́ ǎ, ɖó mɛ ɖagbe ko énɛ́ lɛ́ɛ wú.” Ablaxámu lɛ́ ɖɔ: “Aklúnɔ, kɛnklɛ́n bó ma sin xomɛ ó; xó gǔdo gúdo tɔn ɖíe ɖɔ gbé un ja e. Afɔ nyɔ́ ɔ́, è sixú mɔ mɛ ɖagbe wǒ ɖo toxo ɔ́ mɛ.” Mawu Mavɔmavɔ ka ɖɔ: “Un ná gba toxo ɔ́ ǎ, ɖó mɛ ɖagbe wǒ énɛ́ lɛ́ɛ wú.” Ée Mawu Mavɔmavɔ ɖɔ xó nú Ablaxámu fó ɔ́, Mawu Mavɔmavɔ yi. Bɔ Ablaxámu lɛ́ kɔ yi xwé tɔn gbe. Wɛnsagun Mawu tɔn we lɛ́ɛ wá Sodɔ́mu gbe nɛ́ gbe gbadanu. Lɔ̌ti ko ɖo ayǐjínjɔ́n ɖo hɔntogbó Sodɔ́mu tɔn ɔ́ jí hwenɛ́nu. Ée é mɔ wɛnsagun lɛ́ɛ ɔ́, é sí te bó yi kpé yě bó xwe agbɔ̌nnusú do. Énɛ́ ɔ́ gúdo ɔ́, é ɖɔ: “Mɛɖaxó ce lɛ́ɛ e mi, mi kɛnklɛ́n, mi wá mǐ yi nyɛ mɛsɛntɔ́ mitɔn ɔ́ sín xwé gbe. Mi ná klɔ́ afɔ bó dɔ́ ayǐ. Énɛ́ ɔ́, mi ná fɔ́n zǎn sɔ bó ná lɛ́ wlí ali mitɔn ɖidó.” Yě ká gbɛ́ bó ɖɔ: “Éeǒ, mǐ ná dɔ́ xwé towe gbe ǎ, alixo fí wɛ mǐ ná dɔ́.” Lo ɔ́, Lɔ̌ti dó tagba tɔn nú yě káká, bɔ yě gbɔ bó yi xwé tɔn gbe. Énɛ́ ɔ́, é yí jǒnɔ yětɔn, bó ɖa wɔ̌xúxú e mɛ è ma dó tɔ́n ǎ é, bɔ yě ɖu. Yě kó mlɔ́ ayǐ cóbɔ Sodɔ́munu lɛ́ɛ wá xá xwé ɔ́ ǎ; súnnu e ɖo to ɔ́ mɛ lɛ́ɛ bǐ wɛ wá, bɛ́ sín yɔkpɔ́vú lɛ́ɛ jí káká yi degénɔ kpikpoe lɛ́ɛ jí. To ɔ́ bǐ wɛ xo zǐn bó wá. Ée mɛ lɛ́ɛ wá ɔ́, yě ylɔ́ Lɔ̌ti bó kanbyɔ́ ɛ ɖɔ: “Fítɛ́ mɛ e wá gɔ̌n towe zǎn élɔ́ mɛ lɛ́ɛ ɖe? Đe yě tɔ́n bónú mǐ ná zé yě dó ɖu gbɛ.” Lɔ̌ti ka tɔ́n bó yi mɔ yě ɖo hɔnto, bó sú hɔn dó éɖée ɖo gǔdo, bó ɖɔ nú yě ɖɔ: “Nɔví ce lɛ́ɛ e mi, mi kɛnklɛ́n, mi ma dó nǔ mɔ̌hunkɔtɔn sin ó. Mi ɖótó mì. Un ɖó vǐ nyɔ̌nu we bɔ yě kpo ɖo alɔjí; un ná kplá yě wá nú mi, bɔ nǔɖé jló mi ɔ́, mi ná zé yě dó wa. Amɔ̌, mi ma wa nǔ ɖěbǔ nú mɛ énɛ́ lɛ́ɛ ó, ɖó jǒnɔ ce lɛ́ɛ wɛ yě nyǐ.” Ée Lɔ̌ti ɖɔ mɔ̌ nú yě ɔ́, yě ɖɔ n'i ɖɔ: “Bɛ̌ hwiɖée sín fínɛ́. Jǒnɔ wɛ a nyǐ bó ká ja acɛ kpa nú mǐ gbé. É nyɔ́, mǐ nǎ wa nǔ towe bɔ é ná syɛ́n hú nǔ e mǐ nǎ wa xá yědɛɛ lɛ́ɛ é.” Ée yě ɖɔ mɔ̌ ɔ́, yě sísɛ́ Lɔ̌ti kpó hlɔ̌nhlɔ́n kpó, bó ɖidó hɔn ɔ́ fó gbé. Énɛ́ ɔ́, wɛnsagun we lɛ́ɛ dlɛ́n alɔ bó dɔn Lɔ̌ti byɔ́ xwé ɔ́ gbe, bó sú hɔn ɔ́, bó va nukún yě mɛ e ɖo hɔn ɔ́ ta lɛ́ɛ bǐ, bɛ́ sín mɛ e nyí yɔkpɔ́vú bǐ ɔ́ jí káká yi jɛ mɛ e nyí mɛxó bǐ ɔ́ jí, bɔ yě jɛ avi dlá jí, bó sɔ́ sixú mɔ hɔn ɔ́ ǎ. Wɛnsagun we lɛ́ɛ ɖɔ nú Lɔ̌ti ɖɔ: “Mɛ towe lɛ́ɛ ɖě sɔ́ kpo ɖo fí a? Vǐ towe sín asú wɛ a, vǐ towe súnnu abǐ nyɔ̌nu wɛ a, mɛ ɖěbǔ nyí towe ɖo to ɔ́ mɛ hǔn, ɖe bǐ tɔ́n sín fí. Đó mǐ ná gba to élɔ́. To ɔ́ mɛ nu lɛ́ɛ sín hwɛ e jɛ nú Mawu Mavɔmavɔ wɛ è ɖe lɛ́ɛ wá sukpɔ́ dín, bɔ é sɛ́ mǐ dó ɖɔ mǐ ní wá gba to ɔ́ hánnyá.” Énɛ́ ɔ́, Lɔ̌ti yi ɖɔ nú vǐ tɔn sín asúxɔ́ntɔn lɛ́ɛ ɖɔ: “Mi yá wǔ gosín fí, ɖó Mawu Mavɔmavɔ ná gba to ɔ́.” Lo ɔ́, yě vɛdó ɖɔ ayihún da wɛ é ɖe sín. Ée é jɛ ayǐtéhɔ̌nnu ɔ́, wɛnsagun Mawu tɔn lɛ́ɛ jɛ Lɔ̌ti kplɔ́ jí ɖɔ: “Yǎ wǔ kplá asi towe bó kplá vǐ towe nyɔ̌nu we lɛ́ɛ, bó gosín fí; é má nyí mɔ̌ ǎ ɔ́, hwenu e mǐ ná gba toxo ɔ́, ɖó hwɛ e é hu lɛ́ɛ wú ɔ́, mi ná kú kú e má nyí mitɔn ǎ é.” Yě ɖɔ mɔ̌ có Lɔ̌ti ka ɖo afɔ dɔn dó ayǐ wɛ, bɔ wɛnsagun lɛ́ɛ gbɔ bó hɛn éé kpó asi tɔn kpó, kpódó vǐ tɔn lɛ́ɛ kpó sín alɔ, bó dɔn yě tɔ́n sín toxo ɔ́ mɛ, ɖó Mawu Mavɔmavɔ jló ná hwlɛ́n ɛ gán. Ée wɛnsagun lɛ́ɛ ɖe yě tɔ́n ɔ́, yě mɛ ɖokpó ɖɔ nú Lɔ̌ti ɖɔ: “Hɔn yi bó ná nɔ gbɛ. Ma kpɔ́n gǔdo ó, ma nɔ te fí ɖěbǔ ɖo ayǐkúngban wɛnjɛ ɔ́ jí ó, hɔn yi cí sókan mɛ; é má nyí mɔ̌ ǎ ɔ́, a nǎ kú.” Bɔ Lɔ̌ti ɖɔ nú yě ɖɔ: “Mɛɖaxó, kɛnklɛ́n gbɔ. A ko nyɔ́ xomɛ dó nyɛ mɛsɛntɔ́ towe ɔ́ wú, bó kó hɛn mì ɖó gbɛ dó ɖe wǎn yíyí ɖaxó e a ɖǒ nú mì ɔ́ xlɛ́ mì. Amɔ̌, un ná sixú hɔn yi sókan ɔ́ mɛ, cóbónú nyladó ɔ́ ná kó wá mɔ mì ǎ, bɔ un ná kú. A mɔ toxo kpɛví énɛ́ ɔ́ a? É yá fí ganjí bɔ un hɛn ɔ́, un ná kán wezun yi fínɛ́ bó ná gán; toxo kpɛví ɖé wɛ.” Bɔ wɛnsagun ɔ́ ɖɔ n'i ɖɔ: “É nyɔ́, un ná bló énɛ́ lɔ nú we; un ná kpɔ́n dó hwi wú, bó ná sɔ́ toxo e xó ɖɔ wɛ a ɖe ɔ́, bó húzú xwe ǎ. Hǔn, bó yá wǔ hɔn yi cí fínɛ́, ɖó a ma ko yi dɔ̌n ǎ ɔ́, un ná sixú wa nǔ ɖěbǔ ǎ.” Énɛ́ ɔ́ wú wɛ è nɔ ylɔ́ toxo énɛ́ ɔ́ ɖɔ Sowáa. Sowáa sín tínmɛ wɛ nyí toxo kpɛví. Cóbónú Lɔ̌ti ná byɔ́ Sowáa toxo ɔ́ mɛ ɔ́, wun ko ɖo kinkɛn wɛ. Énɛ́ ɔ́, Mawu Mavɔmavɔ ɖésú sɛ́ hwemí kpó zo kpó dó sín jǐxwé bɔ yě ja kɔn nyi Sodɔ́mu kpó Gomɔ́ɔ kpó jí. Mawu Mavɔmavɔ sɔ́ toxo énɛ́ lɛ́ɛ bǐ, bó húzú yě xwe; é sú mɛ e ɖo toxo énɛ́ lɛ́ɛ mɛ lɛ́ɛ sín kún dó, bó sɔ́ ayǐkúngban wɛnjɛ ɔ́ bǐ, kpó nǔ e wú ɖ'é jí lɛ́ɛ bǐ kpó bó húzú yě xwe. Lɔ̌ti sín asi ka kpɔ́n gǔdo, bó húzú jɛ sín bǒcyɔ. Ablaxámu fɔ́n zǎn bó yi fí e é nɔ Mawu Mavɔmavɔ nukɔn ɖe é. É kpɔ́n Sodɔ́mu kpó Gomɔ́ɔ kpó sɛ́ dó, bó kpɔ́n to e ɖo ayǐkúngban wɛnjɛ ɔ́ jí lɛ́ɛ bǐ sɛ́ dó, bó mɔ ɖɔ azɔ ɖo sisi wɛ myɔkpó ɖɔhun. Énɛ́ ɔ́, ée Mawu sɔ́ toxo e ɖo gbě e jí Lɔ̌ti nɔ nɔ lɛ́ɛ bó húzú xwe ɔ́, é wɔn Ablaxámu ǎ, bó ɖe Lɔ̌ti sín nǔ baɖabaɖa e jɛ nɛ́ ɔ́ mɛ. Lɔ̌ti gosín Sowáa bó yi cí sókan mɛ kpó vǐ tɔn nyɔ̌nu we lɛ́ɛ kpó, ɖó é ɖo xɛsi ɖi wɛ ɖo toxo ɔ́ mɛ. É kpó vǐ tɔn we lɛ́ɛ kpó yi nɔ sónu mɛ. É su gbe ɖokpó, bɔ vǐ mɛxó ɔ́ ɖɔ nú kpɛví ɔ́ ɖɔ: “Tɔ́ mǐtɔn kó kpo; súnnu ɖě ká ɖo gbě jí fí bó ná wá ɖó xó xá mǐ lě e è nɔ bló gbɔn é ǎ. Wǎ nú mǐ ná ɖó vɛ̌ɛn kɔ jí nú tɔ́ mǐtɔn, bɔ é ná nu mú bó ɖó xó xá mǐ, bɔ mǐ ná ji vǐ n'i dó hɛn kún tɔn ɖó te.” Yě ɖǒ vɛ̌ɛn kɔ jí nú tɔ́ yětɔn nǔgbó ɖo zǎn énɛ́ ɔ́ mɛ, bɔ vǐ nyɔ̌nu mɛxó ɔ́ yi mlɔ́ akpá tɔn. Tɔ́ yětɔn ká tunwun nǔ e jɛ lɛ́ɛ ɖě ǎ; é tlɛ tunwun hwenu e vǐ tɔn wá mlɔ́ akpá tɔn dó ɔ́, kpó hwenu e é fɔ́n dó ɔ́ kpó ǎ. Ayǐhɔ́ngbe tɔn ɔ́, mɛxó ɔ́ ɖɔ nú mɛ kpɛví ɔ́ ɖɔ: “Nyɛ kpó tɔ́ mǐtɔn kpó ɖɔ éé ɖo mɔ̌ é zǎn mɛ. É jɛ zǎn mɛ ɔ́, mǐ ná lɛ́ ɖó vɛ̌ɛn kɔ jí n'i, bɔ é ná nu mú, bɔ a nǎ yi mlɔ́ akpá tɔn, bɔ hwi lɔ ná sixú hɛn tɔ́ mǐtɔn sín kún ɖó te.” Bɔ yě lɛ́ ɖó vɛ̌ɛn kɔ jí nú tɔ́ yětɔn ɖo zǎn énɛ́ ɔ́ mɛ, bɔ é nu mú, bɔ vǐ kpɛví ɔ́ yi mlɔ́ akpá tɔn. Tɔ́ yětɔn ká tunwun nǔ e jɛ lɛ́ɛ ɖě ǎ; é tlɛ tunwun hwenu e vǐ tɔn yi mlɔ́ akpá tɔn dó ɔ́ kpó hwenu e é fɔ́n dó ɔ́ kpó ǎ. Énɛ́ ɔ́, Lɔ̌ti sín vǐ nyɔ̌nu we lɛ́ɛ mɔ xo nú tɔ́ yětɔn. Mɛxó ɔ́ ja vǐ ji gbé bó ji vǐ súnnu ɖokpó, bó sun nyǐ i ɖɔ Mɔwabu. É wɛ nyí Mɔwabunu lɛ́ɛ sín tɔ́gbó. Togun yětɔn kpo ɖo te káká wá jɛ égbé. Mɛ kpɛví ɔ́ lɔmɔ̌ ja vǐ ji gbé bó ji vǐ súnnu ɖokpó, bó sun nyǐ i ɖɔ Bɛni-Amíi; é wɛ nyí Amumɔ́ɔ ví lɛ́ɛ sín tɔ́gbó. Togun yětɔn kpo ɖo te káká wá jɛ égbé. Ablaxámu gosín Mamulée, bó ɖidó Nɛgɛ́vu, bó yi sá xwé ɖó Kadɛ́ci kpó Cúu kpó tɛ́ntin, bó yi nɔ Geláa. Đo Geláa dɔ̌n ɔ́, Ablaxámu nɔ ɖɔ Sala ɔ́, nɔví émítɔn wɛ; asi tɔn ka wɛ. Bɔ Abimɛlɛ́ki axɔ́sú Geláa tɔn ɔ́ sɛ́ mɛ dó bɔ è yi zé Sala wá n'i. Énɛ́ ɔ́, Mawu xo dlɔ̌ Abimɛlɛ́ki zǎn mɛ, bó ɖɔ n'i ɖɔ: “Mɛkúkú wɛ a ko nyí ɖo te, ɖó nyɔ̌nu ɖěe a ɖɔ bɔ è yi zé wá nú we ɔ́ wú, ɖó é kó ɖó asú.” Abimɛlɛ́ki ka ko ɖó xó xá nyɔ̌nu ɔ́ hwenɛ́nu ǎ; énɛ́ ɔ́, é ɖɔ nú Mawu ɖɔ: “Aklúnɔ, xomɛvɔ́nɔ wɛ mǐ nyǐ; a nǎ sú akɔta xomɛvɔ́nɔ ɔ́ sín kún dó wɛ a? Ablaxámu ɖésú wɛ ɖɔ nú mì ɖɔ nɔví émítɔn wɛ, bɔ nyɔ̌nu ɔ́ lɔmɔ̌ yí gbe ná ɖɔ nɔví émítɔn wɛ Ablaxámu nyí. Nǔ e un wa ɔ́, un wa ɖó sɛ́nxwi jí, un hu hwɛ ɖé ǎ.” Bɔ Mawu ɖɔ n'i ɖo dlɔ̌ mɛ ɖɔ: “Nyɛ ɖésú tunwun ɖɔ nǔ a wa ɔ́, a wa ɖó sɛ́nxwi jí. Nyɛ wɛ bló bɔ a ma hu hwɛ dó mì ǎ; nǔ e wú un ma lɔn bɔ a ɖǒ alɔ nyɔ̌nu ɔ́ wú ǎ é nɛ́. Hǔn din ɔ́, jǒ nyɔ̌nu ɔ́ dó nú nya ɔ́, ɖó gbeyíɖɔ ce wɛ; é ná xo ɖɛ nú we bɔ a nǎ nɔ gbɛ. Amɔ̌, nú a ma jó nyɔ̌nu ɔ́ dó ǎ ɔ́, tunwun ɖɔ a nǎ kú, hwi kpó mɛ towe lɛ́ɛ kpó.” Énɛ́ ɔ́, Abimɛlɛ́ki fɔ́n zǎn, bó ylɔ́ gǎn hɔn-yitɔ́ tɔn lɛ́ɛ, lobo wlí xó énɛ́ lɛ́ɛ bǐ ɖɔ nú yě, bɔ xɛsi ɖaxó ɖé jɛ yě jí. Abimɛlɛ́ki wá ylɔ́ Ablaxámu, bó kanbyɔ́ ɛ ɖɔ: “Étɛ́ wɛ a wa xá mǐ nɛ́? Nǔ tɛ́ un wa nyi do nú we, bɔ a dǒ nǔ nyanya mɔ̌hunkɔtɔn sin xá nyɛ kpó axɔ́súɖuto ce kpó? Nǔ e è ma ɖó ná wa xá mɛ ǎ wɛ a wa xá mì. Linlin tɛ́ wɛ a ɖǒ bó wa nǔ gbɔn mɔ̌?” Bɔ Ablaxámu yí gbe n'i ɖɔ: “Un mɔ ɖɔ mɛ e ɖo to élɔ́ mɛ lɛ́ɛ kún ná ɖó sísí ɖěbǔ nú Mawu ó; yě ná hu mì ɖó asi ce wú. Nú è nǎ ɖɔ ɔ́, nɔví ce wɛ é nyí nǔgbó, ɖó tɔ́ ɖokpó ɔ́ ví wɛ mǐ nyǐ, bó nyí nɔ vovo; amɔ̌, é wá húzú asi ce. Hwenu e Mawu ɖɔ nú mì ɖɔ má gosín tɔ́ ce xwé ɔ́, un ɖɔ nú asi ce Sala ɖɔ: ‘Đagbe e a nǎ wa nú mì ɔ́ wɛ nyí ɖɔ mǐ jɛ fí ɖěbǔ hǔn, nɔ ɖɔ nú mɛ lɛ́ɛ ɖɔ nɔví towe wɛ un nyí.’ ” Ée Ablaxámu ɖɔ mɔ̌ ɔ́, Abimɛlɛ́ki sɔ́ asi tɔn Sala ɔ́ jó n'i, bó ná ɛ gbɔ̌, nyibú, mɛsɛntɔ́ súnnu kpó nyɔ̌nu kpó d'é jí. Abimɛlɛ́ki ɖɔ nú Ablaxámu ɖɔ: “To ce ɔ́, to towe wɛ; fí ɖěbǔ jló we hǔn, yi nɔ.” Bó ɖɔ nú Sala ɖɔ: “A mɔ a, gankwɛ́ afatɔ́n (1.000) sɔ́ nú nɔví towe wɛ un ɖe; nǔ e ná ɖe xlɛ́ mɛ towe lɛ́ɛ bǐ ɖɔ a mɛ̌ bǐ ɖo xó énɛ́ ɔ́ mɛ é nɛ́.” Ablaxámu ka sa vo nú Mawu bɔ é gbɔ azɔn nú Abimɛlɛ́ki kpó asi tɔn kpó, kpó mɛsɛntɔ́ tɔn nyɔ̌nu lɛ́ɛ kpó, bɔ yě lɛ́ jɛ vǐ ji jí. Đó Mawu Mavɔmavɔ ko zɔ́n bɔ nyɔ̌nu e ɖo Abimɛlɛ́ki sín xwé gbe lɛ́ɛ bǐ húzú wɛnsinɔ, ɖó nǔ e jɛ dó Sala Ablaxámu si ɔ́ jí é wú. Mawu Mavɔmavɔ wa ɖagbe nú Sala lě e é ɖɔ gbɔn é; é ɖe akpá e é dó n'i é. Sala mɔ xo bó ji vǐ súnnu ɖokpó nú Ablaxámu ɖo hwenu e Mawu ɖɔ dó é. Ablaxámu ka ko ɖo kpikpoxɔmɛ hwenɛ́nu. Ablaxámu sun nyǐ vǐ e Sala ji n'i ɔ́ ɖɔ Izáki. Ée vǐ ɔ́ ɖó azǎn tántɔn ɔ́, Ablaxámu gbo ada n'i lě e Mawu kó ɖɔ gbɔn n'i ɖ'ayǐ é. Xwe kanwe ko (100) ɖó wɛ Ablaxámu ɖe hwenu e Sala ji Izáki é. Bɔ Sala ɖɔ: “Mawu dó nǔkiko nú mì; mɛ ɖěbǔ se ɔ́, mɛ ɔ́ ná ko mì.” Sala lɛ́ ɖɔ: “Ényí mɛ ɖé ɖɔ nú Ablaxámu ɖɔ nyɛ Sala ná ná anɔ̌ vǐ ɔ́, é ná ɖi ǎ. Din ɔ́ ɖíe é ko kpo bǐ bɔ un ji vǐ súnnu ɖokpó n'i e.” Izáki su bɔ Sala ɖe anɔ̌ n'i. Gbe e gbe é ɖe anɔ̌ n'i ɔ́, Ablaxámu ylɔ́ agɔ̌ ɖaxó ɖokpó. Sala mɔ vǐ súnnu e Hagáa Ejípunu ɔ́ ji nú Ablaxámu ɔ́ ɖo nǔ ko wɛ, bó ɖɔ nú Ablaxámu ɖɔ: “Nya mɛsɛntɔ́ nyɔ̌nu élɔ́ tɔ́n kpó vǐ tɔn kpó, ɖó mɛsɛntɔ́ nɛ́ ɔ́ sín vǐ ná ɖu gǔ xá vǐ ce ǎ.” Xó énɛ́ ɔ́ e Sala ɖɔ ɔ́ nylá Ablaxámu nukún mɛ ɖésú, ɖó vǐ tɔn wɛ Isimayɛ́li lɔmɔ̌ nyí. Lo ɔ́, Mawu ɖɔ nú Ablaxámu ɖɔ: “Ma nú xó énɛ́ ɔ́ e è ɖɔ dó vǐ ɔ́ kpó mɛsɛntɔ́ towe nyɔ̌nu ɔ́ kpó wú ɔ́ ní nylá nukún towe mɛ ó. Yǐ gbe nú nǔ e Sala ná byɔ́ we lɛ́ɛ bǐ, ɖó kún e sín akpá un dó nú we ɔ́, Izáki jí wɛ a nǎ gba kún ɔ́ gbɔn. Un na bo bló mɔ̌ ɔ́, un ná bló akɔta ɖokpó gbɔn mɛsɛntɔ́ towe nyɔ̌nu ɔ́ sín vǐ súnnu lɔmɔ̌ jí, ɖó vǐ towe wɛ é nyí.” Ayǐhɔ́ngbe tɔn ɔ́, Ablaxámu fɔ́n zǎn bó zé nǔɖuɖu, bó wún sin dó anyǔglo mɛ, bó sɔ́ nú Hagáa, bó zé ɖó abɔ̌ta n'i, bó zé vǐ ɔ́ lɔ n'i, bó nya ɛ tɔ́n. Hagáa ka ɖidó, bó ɖo flúflú wɛ ɖo Bɛ̌-Ceva sín gbětótló ɔ́ mɛ. Ée sin e ɖo anyǔglo ɔ́ mɛ ɔ́ vɔ ɔ́, Hagáa jó vǐ ɔ́ dó nyi atínvú ɖé sá, bó yi jínjɔ́n zɔ zaan; è nyi hwǎn ɔ́, fí e é sixú yi jɛ ɔ́ wɛ é ɖe dó vǐ ɔ́. Đó é ɖo ɖiɖɔ wɛ ɖɔ: “Un sixú ɖo vǐ ce kpɔ́n wɛ bɔ é ná kú ǎ.” É jínjɔ́n ayǐ ɖo zɔ zaan, bó sú xó lobo wlí avǐ. Mawu se vǐ ɔ́ sín gbe, bɔ wɛnsagun Mawu tɔn ylɔ́ Hagáa sín jǐxwé bó ɖɔ n'i ɖɔ: “Hagáa, étɛ́ wɛ ɖo wiwa we wɛ? Ma ɖi xɛsi ó, ɖó Mawu se vǐ ɔ́ sín gbe ɖo fí e é ɖe ɔ́. Sí te; zě vǐ ɔ́ bó hɛn ɛ ganjí, ɖó un ná zé e dó bló akɔta ɖaxó ɖokpó.” Bɔ Mawu hun nukún nú Hagáa bɔ é mɔ dotɔ ɖokpó, bó yi wún sin gɔ́ anyǔglo ɔ́, bó ná sin vǐ tɔn. Vǐ ɔ́ ɖo susu wɛ, bɔ Mawu ɖo kpɔ́ xá ɛ, bɔ é yi nɔ gbětótló mɛ, bó húzú gǎdatɔ́. Gbětótló Paláni tɔn ɔ́ mɛ wɛ é nɔ́ bɔ nɔ tɔn da Ejípunu ɖokpó n'i. Hwenɛ́nu ɔ́, Abimɛlɛ́ki wá Ablaxámu gɔ́n, é kpó Pikɔ́lu ahwangán tɔn ɔ́ kpó, bó ɖɔ n'i ɖɔ: “Mawu ɖo kpɔ́ xá we ɖo nǔ e wa wɛ a ɖe lɛ́ɛ bǐ mɛ. Énɛ́ ɔ́ wú ɔ́, xwlé Mawu nú mì ɖo fí din ɖɔ émí kún ná blɛ́ nyɛ kpó vǐ ce lɛ́ɛ kpó, kpódó vǐvú ce lɛ́ɛ kpó ó. Xwlé Mawu nú mì ɖɔ émí ná nyɔ́ xomɛ dó nyɛ kpó to e mɛ a nɔ ɔ́ kpó wú lě e nyɛ nyɔ́ xomɛ dó wǔ towe gbɔn é.” Ée é ɖɔ mɔ̌ ɔ́, Ablaxámu ɖɔ: “Un xwlé Mawu nú we.” Amɔ̌, Ablaxámu gbɛ́ nǔ nú Abimɛlɛ́ki, ɖó dotɔ e mɛsɛntɔ́ tɔn lɛ́ɛ fán asú bó yí ɔ́ wú. Abimɛlɛ́ki ka ɖɔ n'i ɖɔ: “Un ka tunwun mɛ e wa mɔ̌ é ǎ mɛ. Hwi lɔ ka ɖɔ xó ɖěbǔ nú mì ɖ'ayǐ ǎ; sise wɛ jɛ́n un ɖe nɛ́.” Énɛ́ ɔ́, Ablaxámu ná gbɔ̌ kpó nyibú kpó Abimɛlɛ́ki, bɔ yě mɛ we lɛ́ɛ nu alɛ. Ablaxámu zé gbɔ̌ví asi tɛ́nwe ɖó vo, bɔ Abimɛlɛ́ki kanbyɔ́ Ablaxámu ɖɔ: “Nɛ̌ gbɔn bɔ a zě gbɔ̌ví asi tɛ́nwe énɛ́ lɛ́ɛ ɖó vo?” Ablaxámu ka yí gbe n'i ɖɔ: “Hwi ɖésú wɛ ná yí gbɔ̌ví tɛ́nwe élɔ́ lɛ́ɛ ɖo alɔ ce mɛ, bɔ é ná xlɛ́ ɖɔ nyɛ wɛ kun dotɔ ɔ́.” Nǔ e wú è nɔ ylɔ́ tɛn énɛ́ ɔ́ mɛ ɖɔ Bɛ̌-Ceva ɔ́ nɛ́. Bɛ̌-Ceva sín tínmɛ wɛ nyí alɛnutɔ; ɖó fínɛ́ wɛ yě mɛ ɖokpó ɖokpó xwlé Mawu nú yěɖée ɖe. Lě e yě nu alɛ gbɔn ɖo Bɛ̌-Ceva ɔ́ nɛ́. Énɛ́ ɔ́ gúdo ɔ́, Abimɛlɛ́ki sɔ́ nǔ, é kpódó Pikɔ́lu ahwangán tɔn ɔ́ kpó, bɔ yě lɛ́ kɔ yi Filisitɛ́ɛn lɛ́ɛ sín tomɛ. Ablaxámu ka tun atín e è nɔ ylɔ́ ɖɔ tamalisi ɔ́ ɖó Bɛ̌-Ceva, bó nɔ xomlá Mawu Mavɔmavɔ, Mawu tɛgbɛ tɔn ɔ́ sín nyǐkɔ ɖo fínɛ́. Ablaxámu nɔ Filisitɛ́ɛn lɛ́ɛ sín tomɛ dɔ̌n ɖésú. Ée nǔ énɛ́ lɛ́ɛ jɛ wá yi ɔ́, Mawu dǒ Ablaxámu kpɔ́n; é ylɔ́ Ablaxámu bɔ é yí gbe n'i bó ɖɔ: “Wěyi! Un ɖo tó ɖó we wɛ!” Bɔ Mawu ɖɔ n'i ɖɔ: “Zě vǐɖokpónɔ towe Izáki; vǐ énɛ́ ɔ́ e a yǐ wǎn ná sɔ mɔ̌ ɔ́, zě e, bó yi Mɔliya; un ná xlɛ́ we só ɖé ɖo to énɛ́ ɔ́ mɛ, bɔ a nǎ zě vǐ ɔ́ dó sá vɔ̌ nú mì, ɖo só ɔ́ jí.” Énɛ́ ɔ́, ayǐhɔ́ngbe tɔn ɔ́, Ablaxámu fɔ́n zǎn, bó zɛ nakí e é ná dó dó vɔ̌ ɔ́ zo ná ɔ́. É blá akpa nú tócí tɔn, lobo kplá mɛsɛntɔ́ tɔn we, bó zé vǐ tɔn Izáki, bɔ yě jɛ ali bó ɖidó fí e Mawu ɖɔ n'i é. Azǎn tɔn atɔngɔ́ ɔ́ gbe ɔ́, Ablaxámu mɔ só e kɔn é xwe ɔ́ sɛ́ dó, lobo ɖɔ nú mɛsɛntɔ́ tɔn lɛ́ɛ ɖɔ: “Mi kpó tócí ɔ́ kpó ní nɔ fí, bónú nyɛ kpó vǐ ɔ́ kpó ná yi sɛn Mawu ɖo só ɔ́ jí bó wá.” Ablaxámu ɖíɖá nakí e é ná dó dó vɔ̌ zo ɔ́ vǐ tɔn Izáki, bó hɛn myɔ kpódó jǐví kpó alɔ mɛ, bɔ yě mɛ we lɛ́ɛ zɔn kpɔ́ ɖidó. Ée yě ɖo yiyi wɛ ɔ́, Izáki ylɔ́ tɔ́ tɔn Ablaxámu bó ɖɔ: “Daá!” Bɔ tɔ́ ɔ́ yí gbe n'i ɖɔ: “Vǐ ce, nɛ̌ gbɔn?” Bɔ Izáki lɛ́ yí xó bó ɖɔ: “Myɔ kpó nakí kpó ɖíe mǐ hɛn e; fítɛ́ lɛ̌ngbɔ́ví e è nǎ dó sá vɔ̌ ɔ́ ká ɖe?” Ablaxámu ka yí gbe n'i ɖɔ: “Vǐ ce, Mawu ɖésú ná ná lɛ̌ngbɔ́ví e è nǎ dó sá vɔ̌ ɔ́ ná é.” Yě mɛ we lɛ́ɛ ká ɖo yiyi wɛ. Ée yě jɛ fí e xó Mawu ɖɔ ɔ́, Ablaxámu bló vɔ̌sákpe ɖokpó, bó to nakí ɔ́ ɖ'é jí, lobo blá vǐ tɔn Izáki ɔ́, bó zé e ɖó nakí ɔ́ jí ɖo vɔ̌sákpe ɔ́ jí. Ablaxámu dlɛ́n alɔ bó zé jǐví, bó ná gbo gbe vǐ tɔn. Kpowun ɔ́, wɛnsagun Mawu Mavɔmavɔ tɔn ɖokpó jɛ́n ylɔ́ ɛ sín jǐxwé, bó ɖɔ: “Ablaxámu! Ablaxámu!” Bɔ Ablaxámu yí gbe n'i bó ɖɔ: “Wěyi! Un ɖo tó ɖó we wɛ!” Bɔ Mawu Mavɔmavɔ ɖɔ nú Ablaxámu ɖɔ: “Ma wa nǔɖé nú vǐ ɔ́ ó; alɔ towe ma jɛ wǔ tɔn ó. Un tunwun din ɖɔ a nɔ sí mì, bɔ a tɛ vǐ ɖokpónɔ towe mì ǎ.” Hwe énɛ́ ɔ́ nu ɔ́, Ablaxámu mɔ agbo ɖokpó sɛ́ dó ɖo zunkan mɛ, bɔ zo tɔn dɔ́ dó zunkan mɛ. Ablaxámu yi zé agbo ɔ́, bó dó wá sá vɔ̌ nú Mawu ɖó vǐ tɔn tɛnmɛ. Ablaxámu sun nyǐkɔ tɛn énɛ́ ɔ́ ɖɔ “Mawu Mavɔmavɔ ná ná”. Énɛ́ ɔ́ wú wɛ káká jɛ égbé ɔ́, è nɔ ɖɔ: “Mawu Mavɔmavɔ ná ná ɖo só ɔ́ jí.” Wɛnsagun ɔ́ nɔ jǐxwé, bó ylɔ́ Ablaxámu azɔn wegɔ́ ɔ́, bó ɖɔ: “Xó e Mawu Mavɔmavɔ ɖɔ ɔ́ ɖíe: ‘A tɛ vǐɖokpónɔ towe mì ǎ. Đó a wa nǔ gbɔn mɔ̌ wútu ɔ́, un xwlé nyɛɖée nú we, un ná xo ɖɛ dó jǐ we, bɔ vǐ towe lɛ́ɛ ná sukpɔ́ sunví e ɖo jǐnukúnsin lɛ́ɛ ɖɔhun; yě ná sukpɔ́ nyɛ̌kɛ́n e ɖo xutó ɔ́ ɖɔhun. Lě e vǐ towe lɛ́ɛ ná sukpɔ́ gbɔn ɔ́ nɛ́. Vǐ towe lɛ́ɛ ná ɖu ɖo kɛntɔ́ yětɔn lɛ́ɛ jí. Đó a se tónú nú mì wútu ɔ́, un ná wa ɖagbe nú akɔta e ɖo ayǐkúngban jí lɛ́ɛ gbɔn vǐ towe lɛ́ɛ jí.’ ” Énɛ́ ɔ́ gúdo ɔ́, Ablaxámu lɛ́ kɔ wá mɛsɛntɔ́ tɔn lɛ́ɛ gɔ́n, bɔ yě ɖidó Bɛ̌-Ceva, ɖó fínɛ́ wɛ Ablaxámu nɔ nɔ. Ée nǔ énɛ́ lɛ́ɛ jɛ wá yi ɔ́, Ablaxámu se ɖɔ Miluka lɔ ji vǐ nú nɔví émítɔn Naxɔ́ɔ. Vǐ lɛ́ɛ sín nyǐkɔ ɖíe: Vǐ tɔn nukɔntɔn ɔ́ nɔ́ nyí Wúsi, nɔví tɔn nɔ́ nyí Buzu, Kemuwɛ́li; Kemuwɛ́li ɔ́ wɛ nyí Alamu sín tɔ́. Kɛsɛ́di, Hazɔ́ɔ, Piludáci, Yidlafu kpódó Betuwɛ́li kpó. Vǐ súnnu tántɔn e Miluka ji nú Ablaxámu sín nɔví Naxɔ́ɔ lɛ́ɛ sín nyǐkɔ nɛ́. Betuwɛ́li ɔ́ wɛ wá nyí Hlebeka sín tɔ́. Naxɔ́ɔ lɛ́ ɖó asi ɖěvo, bɔ é nɔ́ nyí Hlewúma. É lɔmɔ̌ ji vǐ n'i. Vǐ lɛ́ɛ sín nyǐkɔ ɖíe: Tɛváxi, Gaxámu, Taxáci kpódó Maaka kpó. Sala nɔ gbɛ xɔ xwe kantɔn tɛ́nwe (127). É kú ɖo Kiliyati-Aaba. Toxo énɛ́ ɔ́ wɛ nyí Eblɔ́n bó ɖo Kanáa yíkúngban jí. Ablaxámu wa asi tɔn sín nǔ lɛ́ɛ, bó ví i. É gosín fí e cyɔ ɔ́ ɖe ɔ́, bó yi ɖɔ xó nú Hitíti lɛ́ɛ. É ɖɔ nú yě ɖɔ: “Jǒnɔ wɛ un nyí ɖo tɛ́ntin mitɔn. Mi bo ná mì yɔdo ɖé ɖo mi gɔ́n, bónú má sɔ́ asi ce sín cyɔ yi ɖi d'é mɛ.” Hitíti lɛ́ɛ yí gbe n'i bó ɖɔ: “Daá, ɖǒtó mǐ. Axɔ́ví Mawu tɔn ɖokpó wɛ a nyǐ ɖo tɛ́ntin mǐtɔn. Đi asi towe dó yɔdo e nyɔ́ hú yɔdo lɛ́ɛ bǐ ɖo yɔdo mǐtɔn lɛ́ɛ mɛ ɔ́ mɛ, mɛ ɖěbǔ ɖo mǐ mɛ bó ná gbɛ́ nú we ɖɔ hwi ní má ɖi mɛ towe dó yɔdo émítɔn mɛ ó ǎ.” Ablaxámu sí te bó ɖe kɔ́ nú Hitíti e ɖo to ɔ́ mɛ lɛ́ɛ, bó ɖɔ nú yě ɖɔ: “Ényí mi ná gbe mì ɖɔ má ɖi mɛ ce ɖó fí hǔn, mi bo ɖótó mì, bó ná yi sa vo nú Eflɔ́ni, Soháa ví ɔ́ nú mì, bónú é ná jó yɔdo tɔn e ɖo sóxo mɛ ɖo Makipela, ɖo gle tɔn tó ɔ́ nú mì. Un ná sú i akwɛ́ nabí e é ɖó ná xɔ é, bɔ é ná nyí yɔdo ce ɖo mitɔn lɛ́ɛ mɛ.” Eflɔ́ni ɖésú ká ɖo yě mɛ fínɛ́ hwenɛ́nu; Hitíti wɛ é lɔmɔ̌ nyí. É yí gbe nú Ablaxámu ɖo nɔví tɔn e wá kplé ɖo toxo ɔ́ sín hɔntogbó jí lɛ́ɛ nukɔn ɖɔ: “Éeǒ sɛ́mɛɖó! Đǒtó mì! Un ná we gle ɔ́ kpó yɔdo e ɖo sóxo mɛ é kpó d'é jí. Un ná we nǔ énɛ́ lɛ́ɛ ɖo mɛ ce lɛ́ɛ bǐ nukɔn. Đi asi towe.” Ablaxámu lɛ́ ɖe kɔ́ ɖo mɛ e ɖo to ɔ́ mɛ lɛ́ɛ bǐ nukɔn, bó ɖɔ nú Eflɔ́ni ɖo yě bǐ nukɔn ɖɔ: “Đǒtó mì! Kɛnklɛ́n gbɔ nú má sú gle ɔ́ sín axɔ́ we. Yǐ akwɛ́ tɔn ɖo así ce bónú má ɖi asi ce nyi fínɛ́.” Eflɔ́ni ka yí gbe nú Ablaxámu bó ɖɔ: “Sɛ́mɛɖó, ayǐkúngban e è nǎ da kpatágankwɛ́ kilóo ɛnɛ adaɖé mɔ̌ dó xɔ ɔ́, ani wɛ énɛ́ ɔ́ nyí ɖo nyɛ kpó hwi kpó tɛ́ntin? Đi mɛ towe kpowun.” Ablaxámu yí gbe bó da kpatágankwɛ́ kilóo ɛnɛ adaɖé e xó Eflɔ́ni ɖɔ ɖo mɛ bǐ nukɔn ɔ́ n'i. Kpatágankwɛ́ énɛ́ ɔ́ wɛ ɖo to jí hwenɛ́nu. Énɛ́ ɔ́, sín gbe nɛ́ gbe ɔ́, Eflɔ́ni sín gle e ɖo Makipela ɖo Mamulée sín zǎnzǎnhwe jí ɔ́ húzú Ablaxámu tɔn. Gle ɔ́ kpó yɔdo e ɖo sóxo mɛ ɔ́ kpó, kpó atín e ɖo gle ɔ́ jí lɛ́ɛ bǐ kpó húzú Ablaxámu tɔn, ɖo Hitíti e wá kplé ɖo toxo ɔ́ sín hɔntogbó jí lɛ́ɛ nukún mɛ. Énɛ́ ɔ́ gúdo ɔ́, Ablaxámu ɖi asi tɔn Sala ɔ́ dó yɔdo ɔ́ mɛ ɖo Makipela, ɖo Mamulée kpá. Toxo énɛ́ ɔ́ wɛ nyí Eblɔ́n ɖo Kanáa yíkúngban jí. Gle ɔ́ kpó yɔdo e ɖo sóxo mɛ ɔ́ kpó sɔ́ nyí Hitíti lɛ́ɛ tɔn ǎ; yě ná gbe bɔ é húzú Ablaxámu tɔn, bɔ é ná nɔ ɖi cyɔ tɔn lɛ́ɛ nyi jí. Ablaxámu ko kpo bǐ; xwe tɔn ko sɛ yi; Mawu Mavɔmavɔ ka kɔn nyɔ̌ná dó jǐ tɔn ɖo nǔ bǐ mɛ. Ablaxámu ɖɔ nú mɛsɛntɔ́ tɔn e nyí gǎn nú mɛsɛntɔ́ tɔn ɖě lɛ́ɛ bǐ, bó nɔ́ kpɔ́n nǔ tɔn lɛ́ɛ bǐ jí ɔ́ ɖɔ: “Sɔ́ alɔ towe dó asá ce glɔ́. Énɛ́ ɔ́, un ná ɖɔ bɔ a nǎ xwlé Mawu Mavɔmavɔ, Mawu e ɖó jǐnukúnsin kpódó ayǐkúngban kpó ɔ́ ɖɔ émí kún ná da Kanáanu e mɛ un ɖe lɛ́ɛ sín vǐ nyɔ̌nu nú vǐ ce ó. Lo ɔ́, émí ná yi to e mɛ è ji mì ɖe ɔ́ mɛ, bó ná yi da asi sín dɔ̌n wá nú vǐ ce Izáki, ɖo hɛ̌nnu ce mɛ.” Mɛsɛntɔ́ ɔ́ ká yí gbe n'i ɖɔ: “Nú nyɔ̌nu ɔ́ ká gbɛ́ ɖɔ émí kún ná xwedó mì wá tomɛ fí ó ɔ́, vǐ towe ɔ́ wɛ un nǎ kplá yi dɔ̌n a?” Bɔ Ablaxámu ɖɔ n'i ɖɔ: “Gbeɖé, ma kplá vǐ ce hɛn yi dɔ̌n ó. Mawu Mavɔmavɔ wɛ ɖó jǐnukúnsin; é wɛ kplá mì sín tɔ́ ce xwé; é kplá mì sín to ce mɛ; é wɛ ɖɔ xó nú mì, bó xwlé nǔ nú mì ɖɔ émí ná ná to élɔ́ kúnkan ce lɛ́ɛ; é ɖésúnɔ ná sɛ́ wɛnsagun tɔn dó, bɔ é ná nɔ nukɔn nú we, bɔ a nǎ yi da asi wá nú vǐ ce. Ényí nyɔ̌nu ɔ́ má jló ná xwedó we ǎ hǔn, nǔ e un ɖɔ bɔ a xwlé ɔ́ sɔ́ ɖo kɔ nú we ǎ. Nǔ ɖokpó e ɖ'é mɛ ɔ́, ma kplá vǐ ce hɛn yi dɔ̌n ó.” Hwe énɛ́ ɔ́ nu ɔ́, mɛsɛntɔ́ ɔ́ sɔ́ alɔ tɔn dó gǎn tɔn sín asá glɔ́, bó xwlé nǔ n'i ɖɔ émí ná bló nǔ e é ɖɔ é. Mɛsɛntɔ́ ɔ́ fɔ lǎkúnmí wǒ ɖo gǎn tɔn sín lǎkúnmí lɛ́ɛ mɛ, bó hɛn nǔ ɖagbe ɖagbe tɛnmɛ tɛnmɛ e ɖo gǎn tɔn sín dɔkun mɛ lɛ́ɛ, bó ɖidó gǎn tɔn nɔví Naxɔ́ɔ sín tomɛ, ɖo Mɛzopotamíi. Hwenu e é ɖo toxo e mɛ é xwe ɔ́ sɛkpɔ́ wɛ ɔ́, é yi jɛ dotɔ ɖé kɔn, ɖo toxo ɔ́ kpá, bó ɖɔ bɔ lǎkúnmí lɛ́ɛ jɛ kpo ɖo fínɛ́. Hwe ko lɛ́ kɔ hwenɛ́nu, bɔ hwenu e nyɔ̌nu lɛ́ɛ nɔ́ wá dun sin dó ɔ́ kó su. Mɛsɛntɔ́ ɔ́ xo ɖɛ ɖɔ: “Mawu Mavɔmavɔ, Mawu gǎn ce Ablaxámu tɔn, kɛnklɛ́n bló bónú má mɔ mɛ e gbé un tɔ́n ɔ́ égbé; ɖe xomɛnyínyɔ́ towe xlɛ́ gǎn ce Ablaxámu. Nyɛ ɖíe ɖo dotɔ ɔ́ kɔn e; ɖyɔ̌vǐ e ɖo toxo ɔ́ mɛ lɛ́ɛ ná wá dun sin. Un ná byɔ́ ɖyɔ̌vǐ lɛ́ɛ ɖokpó ɖɔ é ní nya tɔyizɛ́n tɔn, bónú má nu sin. Nú é yí gbe nú mì ɖɔ: ‘Nu bónú má lɛ́ ná lǎkúnmí towe lɛ́ɛ lɔ nú yě ná nu’ ɔ́, ní nyí mɛ e a sɔ́ ɖó te nú mɛsɛntɔ́ towe Izáki é! Énɛ́ ɔ́, un ná tunwun ɖɔ a nyɔ̌ xomɛ dó gǎn ce wú.” Mɛsɛntɔ́ ɔ́ kó ɖɔ xó ɔ́ fó có bó mɔ Hlebeka Betuwɛ́li ví ɔ́ jǎwe ǎ. Hlebeka ɔ́, Naxɔ́ɔ kpó asi tɔn Miluka ɔ́ kpó sín vǐvú wɛ. É hɛn tɔyizɛ́n tɔn abɔ̌ta. Betuwɛ́li ɔ́, Ablaxámu nɔví ká wɛ. Hlebeka ɔ́, ɖyɔ̌vǐ ɖagbe ɖagbe ɖé wɛ; é ɖo alɔ jí; é tunwun súnnu kpɔ́n ǎ. É jɛ te wá tɔ ɔ́ nu bó dun sin gɔ́ tɔyizɛ́n tɔn bó ɖidó. Bɔ mɛsɛntɔ́ ɔ́ kán wezun yi gɔ̌n tɔn, bó ɖɔ n'i ɖɔ: “Kɛnklɛ́n nǎ sin e ɖo tɔyizɛ́n towe mɛ ɔ́ kpɛɖé mì nú má nu.” Bɔ ɖyɔ̌vǐ ɔ́ yí gbe n'i ɖɔ: “Nu sɛ́ ce.” Énɛ́ ɔ́, é nya tɔyizɛ́n ɔ́ ɖó kɛ́n bléwún, bó ná ɛ sin ɔ́ bɔ é nu. Ée é ná ɛ sin ɔ́ bɔ é nu fó ɔ́, é ɖɔ n'i ɖɔ: “Un ná dun sin nú lǎkúnmí towe lɛ́ɛ lɔmɔ̌ bɔ yě ná nu bɔ é ná kpé yě.” É húzú sin e ɖo tɔyizɛ́n tɔn mɛ ɔ́ kɔn dó nǔ e mɛ kanlin lɛ́ɛ nɔ́ nu sin ɖe ɔ́ mɛ bléwún, bó lɛ́ kán wezun yi tɔ ɔ́ nu, bó lɛ́ dun sin ɔ́ ɖěvo. Énɛ́ ɔ́, é dun sin nú lǎkúnmí lɛ́ɛ bǐ. Nya ɔ́ ká ɖo xwíí, bó ɖo kpínkpɔ́n ɛ wɛ, bó ɖo te bó ɖo kpínkpɔ́n wɛ ɖɔ Mawu Mavɔmavɔ ná bló bɔ to mɛ e émí wá ɔ́ ná kpa émí abǐ é ná gbɔ a jí. Ée lǎkúnmí lɛ́ɛ nu sin fó ɔ́, nya ɔ́ zé sikálɔkɛ́ ɖokpó, bɔ é da glǎmu ayizɛ́n, bó zé sikálɔgan we, bɔ ɖokpó ɖokpó da hú glǎmu kanwe ko (100). É fɔ nǔ énɛ́ lɛ́ɛ bǐ jó nú ɖyɔ̌vǐ ɔ́, bó kanbyɔ́ ɛ ɖɔ: “Mɛ̌ ví ká nú we? Kɛnklɛ́n ɖɔ nú mì; tɛn ka ɖo tɔ́ towe xwé bɔ nyɛ kpó mɛ ce lɛ́ɛ kpó ná dɔ́ fínɛ́ a?” Bɔ ɖyɔ̌vǐ ɔ́ yí gbe n'i ɖɔ: “Betuwɛ́li ví wɛ nú mì. Miluka wɛ ji tɔ́ ce nú Naxɔ́ɔ.” É lɛ́ ɖɔ n'i ɖɔ: “Gběhan kpódó ama kpó e kanlin lɛ́ɛ ná ɖu ɔ́ ɖo xwé mǐtɔn gbe bó túnflá; fí e è nǎ dɔ́ ɔ́ lɛ́ ɖe.” Énɛ́ ɔ́, nya ɔ́ yi do bó ɖe kɔ́ nú Mawu Mavɔmavɔ, bó ɖɔ: “Un dó kú nú Mawu Mavɔmavɔ, Mawu gǎn ce Ablaxámu tɔn. É nɔ́ gɔn xomɛnyínyɔ́ tɔn kpódó gbejíninɔ tɔn kpó ɖe xlɛ́ gǎn ce ǎ. Mawu Mavɔmavɔ xlɛ́ ali mì, bó kplá mì káká wá gǎn ce nɔví lɛ́ɛ xwé.” Đyɔ̌vǐ ɔ́ ká kán wezun yi nɔ tɔn gɔ́n, bó wlí nǔ énɛ́ lɛ́ɛ bǐ ɖɔ n'i. Hlebeka ka ɖó nɔví súnnu ɖokpó bɔ é nɔ́ nyí Labáan. Labáan kán wezun tɔ́n sín xwé ɔ́ gbe, bó yi nya ɔ́ gɔ́n ɖo tɔ ɔ́ kɔn. Labáan mɔ alɔkɛ́ kpódó alɔgan kpó ɖo nɔví tɔn sín alɔ, bó se xó e nɔví tɔn Hlebeka ɖɔ nya ɔ́ wɛ ɖɔ nú émí ɔ́ bǐ. Ée é mɔ mɔ̌ ɔ́, é yi nya ɔ́ gɔ́n, bɔ nya ɔ́ ɖo te ɖo lǎkúnmí tɔn lɛ́ɛ kpá ɖo tɔ ɔ́ kɔn. É ɖɔ n'i ɖɔ: “Wǎ, Mawu Mavɔmavɔ xo ɖɛ dó jǐ towe. Étɛ́wú a ka gbɛ́ xwé gbe wá, bó ɖo te gblǒlǒ mɛ? Un ko jlá tɛnmɛ ɖó ɖ'ayǐ nú we, bó kó jlá fí e lǎkúnmí towe lɛ́ɛ ná nɔ é ɖó.” Énɛ́ ɔ́, nya ɔ́ xwedó Labáan yi xwé gbe, bɔ Labáan ɖe agban tɔn lɛ́ɛ sín lǎkúnmí lɛ́ɛ jí, bó ná yě gběhan kpó ama kpó. É wún sin bó klɔ́ afɔ nú nya ɔ́ kpódó mɛ e xwedó e lɛ́ɛ kpó. Énɛ́ ɔ́, è sɔ́ nǔɖuɖu wá nú nya ɔ́; é ká gbɛ́ bó ɖɔ émí kún ɖo nǔ ná ɖu wɛ cóbó ná ɖɔ xó e ɖo nu émítɔn ɔ́ ó. Bɔ Labáan ɖɔ ní bó ɖɔ xó. Bɔ nya ɔ́ ɖɔ: “Mɛsɛntɔ́ Ablaxámu tɔn wɛ un nyí. Mawu Mavɔmavɔ kɔn nyɔ̌ná dó gǎn ce jí ɖésú, bɔ é jɛ dɔkun. Mawu Mavɔmavɔ ná ɛ gbɔ̌ kpɔ́, bó ná ɛ nyibú kpɔ́, é ná ɛ kpatágan, bó ná ɛ siká; é ná ɛ mɛsɛntɔ́ súnnu kpó nyɔ̌nu kpó, é ná ɛ lǎkúnmí kpó tócí kpó. Asi tɔn Sala ɔ́ ji vǐ súnnu ɖokpó n'i ɖo kpikpo hwenu tɔn; vǐ énɛ́ ɔ́ tɔn wɛ nyí nǔ e é ɖó lɛ́ɛ bǐ. Gǎn ce ɖɔ nú mì ɖɔ nyɛ ní má da asi nú vǐ émítɔn ɖo Kanáanu e sín to mɛ émí ɖe lɛ́ɛ sín vǐ lɛ́ɛ mɛ ó, lé nyɛ ní xwlé nǔ d'é jí, ɖɔ tɔ́ émítɔn xwé wɛ nyɛ ná yi, ɖo hɛ̌nnu émítɔn mɛ, bó ná da asi nú vǐ émítɔn. Bɔ un kanbyɔ́ ɛ ɖɔ nú nyɔ̌nu ɔ́ gbɛ́ ɖɔ émí kún ná xwedó mì ó ɔ́ lo? É ká ɖɔ nú mì ɖɔ: ‘Mawu Mavɔmavɔ wɛ un nɔ xwedó; é ná sɛ́ wɛnsagun tɔn dó, bɔ é ná kplá we yi. É ná bló bɔ to ɔ́ mɛ ná kpa we, bɔ a nǎ da asi nú vǐ ce ɖo hɛ̌nnu ce mɛ, ɖo tɔ́ ce xwé. Nú a yi hɛ̌nnu ce mɛ bónú è ma ná nyɔ̌nu we ǎ hǔn, nǔ e un ɖɔ bɔ a xwlé ɔ́ sɔ́ ɖo kɔ nú we ǎ.’ Égbé wɛ un wá tɔ ɔ́ nu bó xo ɖɛ ɖɔ: ‘Mawu Mavɔmavɔ, Mawu gǎn ce Ablaxámu tɔn, kɛnklɛ́n bó bló bónú to e mɛ un wá ɔ́ ní kpa mì. Nyɛ ɖíe ɖo tɔ kɔn e; ɖyɔ̌vǐ e ná wá sin dun gbé, bɔ un ná ɖɔ n'i ɖɔ é ní kɛnklɛ́n bó ná sin e ɖo tɔyizɛ́n tɔn mɛ ɔ́ kpɛɖé mì má nu, bɔ é ná yí gbe nú mì ɖɔ nyɛ ní nu, bónú émí ná dun nú lǎkúnmí ce lɛ́ɛ lɔmɔ̌ ɔ́, ɖyɔ̌vǐ énɛ́ ɔ́ ní nyí asi e Mawu Mavɔmavɔ sɔ́ ɖó te nú gǎn ce sín vǐ é.’ Cóbónú un ná ɖɔ xó énɛ́ ɔ́ dó xomɛ fó ɔ́, Hlebeka jɛ́n un mɔ tɔ́n sín dɔ̌n jǎwe, bɔ tɔyizɛ́n tɔn ɖo abɔ̌ tɔn ta; é wá jɛ te tɔ ɔ́ kɔn bó dun sin, bɔ un ɖɔ n'i ɖɔ: ‘Kɛnklɛ́n nǎ sin mì má nu.’ É ká nya tɔyizɛ́n e ɖo abɔ̌ tɔn ta ɔ́ dó kɛ́n bléwún bó ɖɔ: ‘Nu bónú má ná lǎkúnmí towe lɛ́ɛ lɔ nú yě ná nu.’ Bɔ un nu, bɔ é ná lǎkúnmí ce lɛ́ɛ lɔ bɔ yě nu. Énɛ́ ɔ́, un kanbyɔ́ ɛ ɖɔ: ‘Mɛ̌ ví ká nú we?’ Bɔ é yí gbe nú mì ɖɔ: ‘Betuwɛ́li ví wɛ un nyí, bó nyí Naxɔ́ɔ kpó asi tɔn Miluka kpó sín vǐvú.’ Ée é ɖɔ mɔ̌ ɔ́, un dó alɔkɛ́ awɔntín n'i, bó dó alɔgan alɔ n'i. Énɛ́ ɔ́ gúdo ɔ́, un yi do bó ɖe kɔ́ nú Mawu Mavɔmavɔ, Mawu gǎn ce Ablaxámu tɔn, bó dó kú n'i, ɖó é wɛ xlɛ́ ali mì bɔ un wá da asi nú gǎn ce sín vǐ; gǎn ce nɔví sín vǐ wɛ un wá da n'i. Din ɔ́, ényí mi jló ná ɖe xomɛnyínyɔ́ mitɔn kpódó gbejíninɔ mitɔn kpó xlɛ́ gǎn ce hǔn, mi ɖɔ nú mì; mi ma ka jló ná bló mɔ̌ ǎ hǔn, mi lɛ́ ɖɔ nú mì. Énɛ́ ɔ́, un ná tunwun lě e un ná wa nǔ gbɔn é.” Labáan kpó Betuwɛ́li kpó ká yí gbe n'i ɖɔ: “Mawu Mavɔmavɔ gɔ́n wɛ xó énɛ́ ɔ́ gosín, mǐ sixú gbɛ́ ǎ. Hlebeka ɔ́ nɛ́ ɖo nukɔn towe nɛ́; mǐ sixú gbɛ́ xó e Mawu Mavɔmavɔ ɖɔ ɔ́ ǎ; kplá ɛ nú mi yi, bónú é ní nyí asi nú gǎn towe sín vǐ lě e Mawu Mavɔmavɔ ɖɔ gbɔn é.” Ée mɛsɛntɔ́ Ablaxámu tɔn se xó e yě ɖɔ lɛ́ɛ ɔ́, é ɖe kɔ́ nú Mawu Mavɔmavɔ, bó ɖe nǔ e è sɔ́ kpatágan dó bló ná lɛ́ɛ, ée è sɔ́ siká dó bló ná lɛ́ɛ, kpódó avɔ kpó tɔ́n, bó ná Hlebeka; é lɛ́ ná nǔ Hlebeka sín nɔví kpó nɔ tɔn kpó bɔ é fɛ́ wǔ. Énɛ́ ɔ́ gúdo ɔ́, mɛsɛntɔ́ Ablaxámu tɔn ɔ́ kpódó mɛ e kplá ɛ wá lɛ́ɛ kpó ɖu nǔ bó nu ahan, lobo dɔ́ ayǐ. Ée yě fɔ́n zǎnzǎn ɔ́, mɛsɛntɔ́ ɔ́ ɖɔ nú yě ɖɔ: “Mi ná gbe mì nú má lɛ́ kɔ yi gǎn ce gɔ́n.” Bɔ Hlebeka sín nɔví kpó nɔ tɔn kpó yí gbe n'i ɖɔ: “Nyɔ̌nu ɔ́ ní lɛ́ nɔ mǐ gɔ́n kpɛɖé; é ní nɔ mǐ gɔ́n nú azǎn wǒ ɖé, énɛ́ ɔ́, a nǎ yi.” Bɔ é yí gbe nú yě ɖɔ: “Mi ma hɛn mì ɖó te ó, ɖó Mawu Mavɔmavɔ ko bló bɔ tomɛ e un wá ɔ́ kpa mì, mi jó mì dó má yi gǎn ce gɔ́n.” Énɛ́ ɔ́, yě yí gbe n'i ɖɔ: “Mǐ ní bó ylɔ́ vǐ ɔ́ bó ná kan nǔ byɔ́ ɛ.” Bɔ yě ylɔ́ Hlebeka nǔgbó, bó kanbyɔ́ ɛ ɖɔ: “A jlǒ ná xwedó nya élɔ́ yi a?” Bɔ é yí gbe nú yě ɖɔ: “Ɛɛn, un nǎ yi.” Énɛ́ ɔ́, yě ná gbe Hlebeka nɔví yětɔn ɔ́, bɔ é kpódó mɛsɛntɔ́ nyɔ̌nu e hɛn ɛ ɖo vǔ ɔ́ kpó ná xwedó mɛsɛntɔ́ Ablaxámu tɔn ɔ́ kpódó mɛ e kpó é kpó zɔn wá lɛ́ɛ kpó, bɔ yě ná yi. Yě xo ɖɛ dó Hlebeka jí bó ɖɔ: “Hwi nɔví mǐtɔn ɔ́ ní húzú gbɛtɔ́ wɔ̌buwɔ́bú sín nɔ. Kúnkan towe lɛ́ɛ ní ɖu ɖo mɛ e gbɛ́ wǎn nú we lɛ́ɛ jí.” Énɛ́ ɔ́, Hlebeka sɔ́ nǔ, é kpódó nyɔ̌nu mɛsɛntɔ́ tɔn lɛ́ɛ kpó, bɔ yě xá lǎkúnmí lɛ́ɛ jí, bɔ mɛsɛntɔ́ Ablaxámu tɔn ɔ́ kplá Hlebeka, bɔ yě ɖidó. Izáki ka ko gosín Laxáyi-Hlɔyi tɔ ɔ́ kɔn hwenɛ́nu, bó wá ɖo Nɛgɛ́vu gbé jí. É tɔ́n gbe nɛ́ gbe gbadanu, bó ɖo sa ɖi wɛ, bɔ ajijimɛ kpowun ɔ́, é mɔ lǎkúnmí lɛ́ɛ sɛ́ dó jǎwe. Hlebeka lɔ mɔ Izáki sɛ́ dó, bó lɔ́n jɛ te sín lǎkúnmí tɔn jí, bó kanbyɔ́ mɛsɛntɔ́ Ablaxámu tɔn ɔ́ ɖɔ: “Mɛ̌ ká nyí mɛ énɛ́ ɔ́ e ja mǐ kpé gbé ɖo gblǒlǒ mɛ fí é?” Bɔ mɛsɛntɔ́ ɔ́ yí gbe n'i ɖɔ: “Gǎn ce wɛ.” Énɛ́ ɔ́, Hlebeka sɔ́ avɔ tɔn cyɔ́n ta. Ée yě wá ɔ́, mɛsɛntɔ́ ɔ́ wlí nǔ e é wa lɛ́ɛ bǐ ɖɔ nú Izáki. Izáki ka kplá Hlebeka yi goxɔ e mɛ nɔ tɔn Sala ko nɔ nɔ é mɛ, bɔ é húzú asi tɔn. É yí wǎn n'i. Ée é nyí ɖɔ Izáki sín nɔ ko kú ɔ́, lě e é zé Hlebeka dó dó gbɔ nú éɖée gbɔn é nɛ́. Ablaxámu lɛ́ da nyɔ̌nu ɖěvo bɔ é nɔ́ nyí Ketúla. Nyɔ̌nu énɛ́ ɔ́ ji Zimulani, Yokicáni, Mɛdani, Madiáani, Yicibaku kpódó Cuwáxi kpó. Yokicáni ɔ́ ji Saba kpódó Dedáni kpó. Dedáni ɔ́, kúnkan tɔn lɛ́ɛ wɛ nyí Acúu ví lɛ́ɛ, Lɛtucíti lɛ́ɛ kpódó Lewumíti lɛ́ɛ kpó. Madiáani ví lɛ́ɛ wɛ nyí Eyifa, Efɛ́ɛ, Hanɔki, Avida kpódó Ɛlidáa kpó. Yě mɛ énɛ́ lɛ́ɛ bǐ wɛ nyí vǐ súnnu Ketúla tɔn. Ablaxámu jó nǔ e é ɖó lɛ́ɛ bǐ dó nú Izáki. Lo ɔ́, hwenu e Ablaxámu ɖo gbɛ ɔ́, é ná nǔ asi tɔn ɖěvo lɛ́ɛ sín vǐ lɛ́ɛ, có bó nya yě yi zǎnzǎnhwe jí, dó zɔga nú vǐ tɔn Izáki. Xwe kɛnnɛ afɔtɔn (175) wɛ Ablaxámu ɖó bɔ gbɔjɛ tɔn xwɛ. Hǔn é nɔ kpikpoxɔmɛ ɖésú có gbɛ nyɔ́ n'i. É dɔ́ ji ɖésú cóbó yi mɔ tɔ́gbó tɔn lɛ́ɛ. Vǐ tɔn Izáki kpódó Isimayɛ́li kpó ɖi i dó yɔdo e ɖo sóxo mɛ ɖo Makipela ɔ́ mɛ. Yɔdo ɔ́ ɖo Eflɔ́ni, Soháa ví ɔ́ sín gle mɛ, ɖo Mamulée kpá. Hitíti kún mɛ wɛ Eflɔ́ni jɔ ɖe. Gle e Ablaxámu xɔ ɖo Hitíti lɛ́ɛ sí ɖ'ayǐ ɔ́ wɛ; gle ɔ́ mɛ wɛ è ɖi asi tɔn Sala lɔ dó. Ée Ablaxámu kú ɔ́, Mawu xo ɖɛ dó vǐ tɔn Izáki jí. Izáki ɔ́, Laxáyi-Hlɔyi sín tɔ ɔ́ kpá wɛ é nɔ́ nɔ. Hagáa nyɔ̌nu Ejípunu e nyí Sala sín mɛsɛntɔ́ ɔ́ lɔ ji vǐ nú Ablaxámu. Vǐ ɔ́ nɔ́ nyí Isimayɛ́li. Isimayɛ́li ɔ́, vǐ tɔn lɛ́ɛ sín nyǐkɔ ɖíe: lě e è ji yě gbɔn ɖě bɔ dó ɖě wú ɔ́ wɛ è xwedó bó wlán nyǐkɔ lɛ́ɛ: Nɛbayɔ́ti, Kedáa, Adibeɛli, Mivusámu, Micima, Duma, Masa, Hadádi, Téma, Yetúu, Nafíci kpó Kedúma kpó. Isimayɛ́li sín vǐ súnnu wěwe lɛ́ɛ sín nyǐkɔ nɛ́. Yě mɛ ɖokpó ɖokpó nyí akɔta ɖokpó ɖokpó sín gǎn. Yě ɖó nyǐkɔ yětɔn nú gletoxo yětɔn lɛ́ɛ kpódó fí e yě nɔ́ ɖó gɔnu gbɔn lɛ́ɛ kpó. Xwe kantɔn afɔtɔn-nukún-we (137) wɛ Isimayɛ́li ɖó, bɔ gbɔjɛ tɔn xwɛ, bɔ é yi mɔ tɔ́gbó tɔn lɛ́ɛ. Kúnkan tɔn lɛ́ɛ nɔ́ nɔ gbě ɖé jí ɖo Hawíla kpódó Cúu kpó tɛ́ntin. Cúu ɔ́ ɖo Ejípu kpá, ɖo zǎnzǎnhwe jí, ɖo Acúu wají. Yě ján dó kúnkan Ablaxámu tɔn ɖě lɛ́ɛ mɛ ǎ. Izáki Ablaxámu ví ɔ́ sín tan ɖíe: Xwe kanɖé (40) wɛ Izáki ɖó bó da Hlebeka; Hlebeka ɔ́, Labáan sín nɔví wɛ, bó nyí Betuwɛ́li ví. Betuwɛ́li ɔ́, Alamunu wɛ é nyí. É nɔ́ nɔ Mɛzopotamíi taligbé tɔn. Hlebeka ji vǐ nú Izáki ǎ; énɛ́ ɔ́, Izáki sa vo nú Mawu Mavɔmavɔ ɖó ta tɔn mɛ, bɔ Mawu Mavɔmavɔ yí ɖɛ tɔn, bɔ Hlebeka mɔ xo. Vǐ e ɖo Hlebeka xomɛ lɛ́ɛ nɔ́ ɖo glǒ ya yěɖée wɛ, bɔ é ɖɔ: “Étɛ́ ká ɖo jijɛ wɛ?” Bɔ é yi kan nǔ byɔ́ Mawu Mavɔmavɔ. Bɔ Mawu Mavɔmavɔ yí gbe n'i ɖɔ: “Akɔta we wɛ ɖo adɔgo towe mɛ. Togun vovo we wɛ ná tɔ́n sín xo towe mɛ; togun ɔ́ ɖokpó ná ɖó hlɔ̌nhlɔ́n hú ɖokpó; mɛxó ɔ́ wɛ ká ná nɔ mɛ kpɛví ɔ́ glɔ́.” Nǔgbó ɔ́, ée é ja vǐ ji gbé ɔ́, é ji hǒxo. Vǐ nukɔntɔn e tɔ́n ɔ́ nyí vɔvɔ, bɔ fún kpé wǔ tɔn bǐ, awu ɖaxó fúnnɔ mɛ wɛ é ɖe ɖɔhun. È nɔ ylɔ́ vǐ ɔ́ ɖɔ Esawu. Ée éyɛ́ tɔ́n ɔ́, nɔví tɔn tɔ́n, bɔ alɔ tɔn hɛn Esawu sín afɔgbɛnnu. È nɔ ylɔ́ vǐ ɔ́ ɖɔ Jakɔ́bu. Xwe kanɖé ko (60) wɛ Izáki ɖó hwenu e é ji vǐ énɛ́ lɛ́ɛ é. Vǐ lɛ́ɛ ɖo susu wɛ. Esawu húzú gběnyatɔ́, bɔ alɔ tɔn se kpɛ́n ɖésú. É yí wǎn nú nǔkan mɛ gbingbɔn. Jakɔ́bu ɔ́ ká nyí mɛɖé bó nɔ nɔ xwíí xwíí; goxɔ mɛ jɛ́n é nɔ́ ɖe. Izáki yí wǎn nú Esawu, ɖó é yí wǎn nú gbělan; Hlebeka ká yí wǎn nú Jakɔ́bu. Jakɔ́bu ka ɖo nǔ ɖa wɛ gbe ɖokpó, bɔ Esawu gosín gbě wá; nǔ kó cikɔ n'i ɖésú. É ɖɔ nú Jakɔ́bu ɖɔ: “Gbɔ nú má yá wǔ nu nǔsúnnú towe vɔvɔ élɔ́ ɖě, ɖó nǔ cikɔ nú mì.” Énɛ́ ɔ́ wú wɛ è ɖǒ nyǐkɔ nú Esawu ɖɔ Edɔ́mu. Edɔ́mu sín tínmɛ wɛ nyí vɔvɔ. Jakɔ́bu ka yí gbe n'i ɖɔ: “Bo to jó mɛxó e a nyǐ ɔ́ sín acɛ lɛ́ɛ nú mì hwɛ̌.” Bɔ Esawu ɖɔ n'i ɖɔ: “Xovɛ́ ɖo nǎ hu mì wɛ; ani un nǎ sɔ́ mɛxó e un nyí ɔ́ sín acɛ dó wa?” Jakɔ́bu lɛ́ yí xó bó ɖɔ: “Xwlé nǔ hwɛ̌.” Énɛ́ ɔ́, Esawu xwlé nǔ bó ɖɔ émí jó mɛxó e émí nyí ɔ́ sín acɛ n'i. Bɔ Jakɔ́bu ná ɛ wɔ̌xúxú kpódó ayikún-núsúnnú ɔ́ kpó, bɔ é ɖu bó nu, bó sí te ɖidó. Lě e é dó vɛ̌ nú mɛxó e é nyí ɔ́ sín acɛ gbɔn ɔ́ nɛ́. Adɔ ɖěvo lɛ́ tɔ́n ɖo to ɔ́ mɛ, ɖo éé tɔ́n ɖo Ablaxámu hwenu ɔ́ gúdo, bɔ Izáki yi axɔ́sú Filisitɛ́ɛn lɛ́ɛ tɔn Abimɛlɛ́ki gɔ́n ɖo Geláa. Mawu Mavɔmavɔ tɔ́n dó jǐ tɔn, bó ɖɔ n'i ɖɔ: “Ma yi Ejípu ó; to e xó un ná ɖɔ nú we ɔ́ mɛ wɛ a nǎ nɔ. Nɔ to élɔ́ mɛ fí; un ná nɔ kpɔ́ xá we, bó ná xo ɖɛ dó jǐ towe, ɖó hwi kpó kúnkan towe lɛ́ɛ kpó wɛ un ná ayǐkúngban élɔ́ bǐ, bɔ akpá e un dó nú tɔ́ towe Ablaxámu, bó xwlé nyɛ ɖésú d'é jí ɔ́, un ná ɖe. Un ná bló bɔ kúnkan towe ná sukpɔ́ sunví e ɖo jǐnukúnsin lɛ́ɛ ɖɔhun. Un ná ná ayǐkúngban élɔ́ bǐ kúnkan towe lɛ́ɛ, bó ná xo ɖɛ dó akɔta e ɖo ayǐkúngban jí lɛ́ɛ bǐ jí gbɔn yě jí. Đó Ablaxámu se tónú nú mì; é xwedó nǔ e un ɖɔ lɛ́ɛ; é bló nǔ e un zɔ́n lɛ́ɛ; é xwedó tito ce lɛ́ɛ; é nyi sɛ́n ce lɛ́ɛ.” Énɛ́ ɔ́, Izáki cí Geláa. Nú mɛ e ɖo fínɛ́ lɛ́ɛ kan nǔ byɔ́ ɛ dó asi tɔn wú ɔ́, é nɔ́ ɖɔ nú yě ɖɔ nɔví émítɔn wɛ, ɖó é ɖo xɛsi ɖi wɛ ɖɔ nú émí ɖɔ nú yě ɖɔ asi émítɔn wɛ ɔ́, yě táá hu émí, ɖó Hlebeka nyɔ́ ɖɛkpɛ ɖésú. Ée Izáki ka ɖo to ɔ́ mɛ bɔ é lín ɔ́, é wá ɖo ayihún da xá asi tɔn wɛ gbe ɖokpó, bɔ axɔ́sú Filisitɛ́ɛn lɛ́ɛ tɔn Abimɛlɛ́ki mɔ ɛ gbɔn flɛtɛ́li nu. Bɔ Abimɛlɛ́ki ylɔ́ Izáki bó ɖɔ n'i ɖɔ: “Hǔn nyɔ̌nu ɔ́, asi towe wɛ! Bɔ a ka ɖɔ nɔví émítɔn wɛ.” Bɔ é yí gbe n'i ɖɔ: “Un ɖɔ mɔ̌, ɖó un ɖo xɛsi ɖi wɛ ɖɔ yě táá hu mì ɖó éyɛ́ wú.” Abimɛlɛ́ki ɖɔ: “Étɛ́ wɛ a wa xá mǐ nɛ́? Kpɛví ɖé wɛ kpo bɔ toví ce lɛ́ɛ ɖě ná kó ɖó xó xá asi towe ɖo to ɔ́ mɛ, bɔ a nǎ kó dɔn mǐ dó hwɛ mɛ.” Bɔ Abimɛlɛ́ki ɖe gbeta élɔ́ tɔ́n ɖɔ: “Mɛ ɖěbǔ ɖ'alɔ nya élɔ́ abǐ asi tɔn wú ɔ́, è nǎ hu i.” Xwe énɛ́ ɔ́ xwe ɔ́, Izáki dó nǔkún ɖo to ɔ́ mɛ, bó ya nǔ e é dó ɔ́ mɔ̌hunkɔtɔn donu kanwe ko, ɖó Mawu Mavɔmavɔ xo ɖɛ dó jǐ tɔn. Dɔkun ɖo dɔkun jí jɛ n'i wɛ káká bɔ é húzú dɔkunnɔ ɖaxó. É ɖó gbɔ̌ kpó nyibú kpó kɔn nyi kpɔ́, bó ɖó mɛsɛntɔ́ kpɔ́ gégé. Énɛ́ ɔ́, nǔ tɔn jɛ Filisitɛ́ɛn lɛ́ɛ nukún mɛ su jí. Tɔ e tɔ́ tɔn Ablaxámu sín mɛsɛntɔ́ lɛ́ɛ kó kun ɖ'ayǐ hwenu e tɔ́ ɔ́ ɖo gbɛ lɛ́ɛ ɔ́, Filisitɛ́ɛn lɛ́ɛ bɛ́ kɔ́ dó sú bǐ. Énɛ́ ɔ́, Abimɛlɛ́ki ɖɔ nú Izáki ɖɔ: “Gosín to mǐtɔn mɛ, ɖó a hǔ gǎn mǐ dín.” Bɔ Izáki gosín fínɛ́, bó yi ɖó gɔnu ɖó tɔdo Geláa tɔn ɔ́ mɛ, bó nɔ fínɛ́. Bɔ tɔ e tɔ́ tɔn Ablaxámu kun hwenu e é ɖo gbɛ bɔ Filisitɛ́ɛn lɛ́ɛ sú ɖo kú tɔn gúdo lɛ́ɛ ɔ́, é vɔ́ bǐ kun. Nyǐkɔ e tɔ́ tɔn kó ɖó nú tɔ énɛ́ lɛ́ɛ ɖ'ayǐ ɔ́ jɛ́n é nɔ́ lɛ́ ylɔ́ yě. Mɛsɛntɔ́ Izáki tɔn lɛ́ɛ lɛ́ kun tɔ ɖokpó dó tɔdo ɔ́ mɛ, bó mɔ sin ɖ'é mɛ, bɔ sin ɔ́ nɔ́ sa. Lɛ̌ngbɔ́nyitɔ́ Geláa tɔn lɛ́ɛ ká wá jɛ nǔ dɔn xá lɛ̌ngbɔ́nyitɔ́ Izáki tɔn lɛ́ɛ jí ɖɔ émítɔn wɛ nyí sin ɔ́, bɔ Izáki ɖó nyǐkɔ nú tɔ ɔ́ ɖɔ: “Esɛ́ki” tínmɛ tɔn wɛ nyí “adɔn”, ɖó yě dɔn nǔ xá ɛ. Mɛsɛntɔ́ Izáki tɔn lɛ́ɛ lɛ́ kun tɔ ɖěvo; yě lɛ́ dɔn nǔ xá ɛ ɖó tɔ énɛ́ ɔ́ lɔ wú, bɔ é ɖó nyǐkɔ nú tɔ ɔ́ ɖɔ “Sitina”; tínmɛ tɔn wɛ nyí “zalili”. Énɛ́ ɔ́ wú wɛ é gosín fínɛ́, bó lɛ́ kun tɔ ɖěvo. È sɔ́ dɔn nǔ xá ɛ ɖo tɔ énɛ́ ɔ́ kɔn ǎ, bɔ é ɖó nyǐkɔ nú tɔ ɔ́ ɖɔ “Hlexɔvɔ́ti”; tínmɛ tɔn wɛ nyí “Tɛnmɛ”; ɖó é ɖɔ: “Mawu Mavɔmavɔ ná tɛnmɛ mǐ ɖo fí lo, bɔ nǔ e wa wɛ mǐ ɖe lɛ́ɛ ná yi nukɔn ɖo to ɔ́ mɛ.” É wá gosín fínɛ́ bó yi Bɛ̌-Ceva. Mawu Mavɔmavɔ tɔ́n dó jǐ tɔn zǎn mɛ bó ɖɔ n'i ɖɔ: “Mawu tɔ́ towe Ablaxámu tɔn wɛ un nyí; ma ɖi xɛsi ó, ɖó un ɖo kpɔ́ xá we; un ná xo ɖɛ dó jǐ we, bó ná bló bɔ kúnkan towe ná sukpɔ́ ɖó mɛsɛntɔ́ ce Ablaxámu wú.” Ée Mawu Mavɔmavɔ ɖɔ mɔ̌ ɔ́, é mɛ vɔ̌sákpe ɖokpó nyi fínɛ́, bó xomlá Mawu Mavɔmavɔ, bó dó goxɔ tɔn ɖó fínɛ́; bɔ mɛsɛntɔ́ tɔn lɛ́ɛ jɛ dotɔ ɖokpó kun jí ɖó fínɛ́. É su gbe ɖokpó, bɔ Abimɛlɛ́ki gosín Geláa wá gɔ̌n tɔn, é kpódó xɔ́ntɔn tɔn Ahuzáti kpó, kpódó ahwangán tɔn Pikɔ́lu kpó. Izáki kanbyɔ́ yě ɖɔ: “Aniwú mi wá gɔ̌n ce? Mi ɖíe gbɛ́ wǎn nú mì bó nya mì sín gɔ̌n mitɔn e.” Bɔ yě yí gbe n'i ɖɔ: “Mǐ mɔ ɖɔ Mawu Mavɔmavɔ ɖo kpɔ́ xá we; énɛ́ ɔ́ wú wɛ mǐ ɖɔ mǐ ná xwlé nǔ ɖo mǐɖée tɛ́ntin, bɔ hwi kpó mǐ kpó ná nu alɛ. Énɛ́ ɔ́, a nǎ wa nǔ nyanya ɖěbǔ xá mǐ ǎ, lě e mǐ lɔ ma dó tagba nú we ǎ, bó wa ɖagbe kɛ́ɖɛ́ nú we, lobo jó we dó bɔ a wa yi dó fífá mɛ ɔ́ ɖɔhun. Égbé din ɔ́, Mawu Mavɔmavɔ ka xo ɖɛ dó jǐ we.” Izáki ylɔ́ agɔ̌ ɖokpó ɖó ta yětɔn mɛ, bɔ yě ɖu nǔ bó nu ahan. Yě fɔ́n zǎnzǎn tɛɛn bó xwlé nǔ nú yěɖée. Bɔ Izáki nyi yě, bɔ yě yi dó fífá mɛ. Gbe énɛ́ ɔ́ gbe ɖokpó ɔ́, mɛsɛntɔ́ Izáki tɔn lɛ́ɛ wá ɖɔ tɔ e kun wɛ yě ɖe ɔ́ sín xó n'i ɖɔ: “Mǐ mɔ sin”. É ɖó nyǐkɔ nú tɔ ɔ́ ɖɔ: “Civɛa”; tínmɛ tɔn wɛ nyí “È xwlé nǔ”. Énɛ́ ɔ́ wú wɛ è nɔ ylɔ́ toxo ɔ́ ɖɔ Bɛ̌-Ceva káká wá jɛ égbé. Bɛ̌-Ceva sín tínmɛ wɛ nyí “tɔ”. Esawu ɖó xwe kanɖé (40) bó da asi we. É da Yexuditi, Beeli sín vǐ kpódó Basimáti, Elɔ́ni sín vǐ ɔ́ kpó. Nyɔ̌nu we lɛ́ɛ bǐ wɛ jɔ ɖo Hitíti kún mɛ. Nyɔ̌nu énɛ́ lɛ́ɛ e Esawu da ɔ́ nyí akpɔ nú Izáki kpó Hlebeka kpó. Izáki ko kpo, bɔ nukún tɔn vɔ́ da bǐ káká bɔ é sɔ́ nɔ́ mɔ nukúnnú ǎ. É ylɔ́ Esawu e tɔ́n jɛ nukɔn ɔ́, bó ɖɔ: “Vǐ ce!” Bɔ vǐ ɔ́ yí gbe n'i ɖɔ: “Wěyi, un ɖo tó ɖó we wɛ!” Bɔ é ɖɔ n'i ɖɔ: “A mɔ din a? Un ko kpo; un ka tunwun gbe e gbe ná kú wɛ un ɖe ɔ́ ǎ. Hǔn din ɔ́, sɔ́ nǔ, bó ná yi gbě; zě nǔ e mɛ gǎ towe lɛ́ɛ nɔ́ nɔ ɔ́, bó zé gǎ towe, bó yi hu lan wá nú mì. A nǎ ɖa nǔɖuɖu ɖagbe lě e un nɔ ba gbɔn ɔ́, bó ná zé wá nú mì, bɔ un nǎ ɖu bó xo ɖɛ nú we cóbó kú.” Hwenu e Izáki ka ɖo xó ɖɔ nú vǐ tɔn Esawu wɛ ɔ́, Hlebeka ɖo sise wɛ. Esawu ka sɔ́ nǔ bó ɖidó gbě bó ná yi hu lan wá nú tɔ́ ɔ́. Ée é ɖidó ɔ́, Hlebeka ɖɔ nú vǐ tɔn Jakɔ́bu ɖɔ: “Un se bɔ tɔ́ towe ɖo ɖiɖɔ nú nɔví towe Esawu wɛ ɖɔ: ‘Yi gbě bó hu lan bó dó ɖa nǔɖuɖu ɖagbe wá nú mì, bónú má ɖu bó xo ɖɛ nú we ɖo Mawu Mavɔmavɔ nukɔn có bó kú.’ Din ɔ́, vǐ ce, ɖǒtó mì ganjí, bó bló nǔ e ná zɔ́n we wɛ un ɖe é. Yi gbɔ̌kpó mɛ, bó fɔ gbɔ̌ví ɖagbe ɖagbe we wá nú mì. Un ná dó ɖa nǔɖuɖu ɖagbe lě e tɔ́ towe nɔ́ ba gbɔn é, bɔ a nǎ zé yi jó n'i, bɔ é ná ɖu bó ná xo ɖɛ nú we có bó kú.” Jakɔ́bu ka yí gbe nú nɔ tɔn ɖɔ: “É nyɔ́, nɔví ce Esawu ɔ́ ɖíe ká wú fún gbɔn fí bǐ e; fún ɖě ká ɖo nyɛ wú ǎ. Tɔ́ ce sixú ɖ'alɔ wǔtu ce, bó ná mɔ ɖɔ nyɛ wɛ ɖo émí blɛ́ wɛ. Énɛ́ ɔ́, nyɛ ɖésú wɛ ná zɔ́n bɔ é ná dó nu mì; é sɔ́ ná nyí nyɔ̌ná ɖɛ ǎ.” Nɔ tɔn ka ɖɔ n'i ɖɔ: “Vǐ ce, ényí mɔ̌ jɛ́n é ná nyí hǔn, nu e é dó we ɔ́ ní ɖi wǔ ce. Vɛ̌ kó se xó ce, bó yi wlí gbɔ̌ví we lɛ́ɛ wá nú mì.” Jakɔ́bu ka yi wlí gbɔ̌ví lɛ́ɛ wá nú nɔ tɔn, bɔ é ɖa nǔɖuɖu ɖagbe lě e tɔ́ tɔn nɔ́ ba gbɔn é. Énɛ́ ɔ́ gúdo ɔ́, Hlebeka bɛ́ vǐ tɔn Esawu e jɛ nukɔn ɔ́ sín awu e nyɔ́ ɖɛkpɛ tawun bɔ é mɔ ɖo xwé ɔ́ gbe ɔ́, bó bɛ́ dó nú Jakɔ́bu vǐ tɔn e bɔ dó nukɔntɔn ɔ́ wú é. É zé gbɔ̌ví e é hu lɛ́ɛ sín anyǔ bú dó alɔ tɔn lɛ́ɛ, kpódó kɔ tɔn kpó, ɖó fún ɖě ɖo fí énɛ́ lɛ́ɛ ǎ. É bɛ́ nǔɖuɖu ɖagbe e é ɖa ɔ́ kpódó wɔ̌xúxú kpó nú vǐ tɔn Jakɔ́bu. Bɔ Jakɔ́bu yi tɔ́ tɔn gɔ́n, bó ɖɔ: “Daá!” Bɔ tɔ́ tɔn yí gbe n'i ɖɔ: “Vǐ ce, un ɖo tó ɖó we wɛ. Hwi mɛ̌ ká wɛ?” Jakɔ́bu ka yí gbe nú tɔ́ ɔ́ ɖɔ: “Nyɛ nukɔngbéví towe Esawu wɛ; un ko bló nǔ e a zɔ̌n mì ɔ́. Kɛnklɛ́n fɔ́n jínjɔ́n ayǐ bó ná ɖu gbělan e un ɖa wá nú we é, bó xo ɖɛ nú mì hwi ɖésú.” Izáki ka ɖɔ n'i ɖɔ: “Étɛ́, vǐ ce, a ko yi hu bó wá din nɛ́ a?” Bɔ Jakɔ́bu yí gbe n'i ɖɔ: “Mawu Mavɔmavɔ, Mawu towe wɛ ɖe lan ɔ́ wá nú mì bɔ un hu.” Bɔ Izáki ɖɔ nú Jakɔ́bu ɖɔ: “Vǐ ce, wǎ nú má ɖ'alɔ wǔ towe, bó ná kpɔ́n ɖɔ hwi vǐ ce Esawu ɔ́ wɛ nǔgbó a jí.” Jakɔ́bu sɛ yi tɔ́ tɔn gɔ́n, bɔ é ɖ'alɔ wǔ tɔn, bó ɖɔ: “Gbe ɔ́ ɖi Jakɔ́bu sín gbe, alɔ lɛ́ɛ ká nyí Esawu tɔn lɛ́ɛ.” Izáki tunwun ɖɔ Jakɔ́bu wɛ ǎ, ɖó fún kpé alɔ tɔn lɛ́ɛ nɔví tɔn Esawu ɖɔhun. Cóbónú é ná xo ɖɛ n'i ɔ́, é kanbyɔ́ ɛ ɖɔ: “É má nyí hwi vǐ ce Esawu ɔ́ jɛ́n wɛ a?” Bɔ Jakɔ́bu yí gbe n'i ɖɔ: “Nyɛ wɛ.” Bɔ Izáki ɖɔ n'i ɖɔ: “Vǐ ce, bo ná nǔɖuɖu ɔ́ mì bónú má ɖu gbělan e a hɛn wá nú mì é bó ná xo ɖɛ nú we.” Jakɔ́bu ka sɔ́ nǔɖuɖu ɔ́ n'i, bɔ é ɖu; é lɛ́ hɛn vɛ̌ɛn wá n'i bɔ é nu. Énɛ́ ɔ́ gúdo ɔ́, tɔ́ tɔn Izáki ɖɔ n'i ɖɔ: “Vǐ ce, bo sɛ wá bó kí si nú mì.” Bɔ Jakɔ́bu sɛ yi gɔ̌n tɔn, bó kí si n'i, bɔ Izáki se awu e é dó lɛ́ɛ sín wǎn, bó xo ɖɛ n'i bó ɖɔ: “Vǐ ce sín wǎn ɖíe; é cí gle e jí Mawu Mavɔmavɔ xo ɖɛ dó ɔ́ sín wǎn ɖɔhun. Mawu ní sɛ́ amyɔsun dó we sín jǐxwé; ní ná we ayǐkúngban ɖagbe lɛ́ɛ; ní ná we jinukún kpó vɛ̌ɛn yɔ̌yɔ́ kpó kɔn nyi kpɔ́. Togun ɖě lɛ́ɛ ní nɔ glɔ̌ towe; akɔta ɖě lɛ́ɛ ní nɔ́ ɖe kɔ́ nú we! Nyǐ gǎn nú nɔví towe lɛ́ɛ, nɔ towe xomɛ ví lɛ́ɛ ní nɔ́ ɖe kɔ́ nú we. Mɛ ɖěbǔ dó nu we ɔ́, è nǎ dó nu mɛ ɔ́; mɛ ɖěbǔ xo ɖɛ dó jǐ we ɔ́, è nǎ xo ɖɛ dó mɛ ɔ́ jí.” Đɛ ɔ́ wɛ Izáki xo nú Jakɔ́bu fó, bɔ Jakɔ́bu ɖidó kɛ́ɖɛ́ bɔ nɔví tɔn Esawu lɛ́ kɔ sín gbě nya gbé wá. É lɔ bló nǔɖuɖu bó sɔ́ yi nú tɔ́ tɔn, bó ɖɔ n'i ɖɔ: “Daá, fɔ́n bó ɖu lan e vǐ towe yi gbě bó hɛn wá nú we é, bó xo ɖɛ nú mì hwi ɖésúnɔ.” Bɔ tɔ́ ɔ́ kanbyɔ́ ɖɔ: “Hwi mɛ̌ ká wɛ?” Bɔ é yí gbe n'i ɖɔ: “Nyɛ nukɔngbéví towe Esawu wɛ.” Bɔ avivɔfún blá Izáki; avivɔfún ɖaxó ɖé blá ɛ bɔ é ɖɔ: “Mɛ̌ ká nyí mɛ e nya gbě bó hɛn lan wá nú mì ɖ'ayǐ ɔ́? Đu wɛ un ɖu fó kɛ́ɖɛ́, bó xo ɖɛ n'i, bɔ a wǎ, bɔ ɖɛ ɔ́ ká ɖó ná nɔ jǐ tɔn.” Ée Esawu se xó énɛ́ e tɔ́ tɔn ɖɔ ɔ́, é sú xó ɖaxó ɖé, bó ɖɔ kpó xomɛsin ɖaxó ɖé kpó ɖɔ: “Daá, xo ɖɛ nú nyɛ lɔmɔ̌!” Bɔ Izáki ɖɔ n'i ɖɔ: “Nɔví towe kó sɔ́ sísɛ́ ɖó nukɔn bó wá yí ɖɛ towe.” Énɛ́ ɔ́, Esawu ɖɔ: “Jakɔ́bu jɛ́n é nyí nǔgbó, ɖó azɔn we nɛ́ é kó táfú mì nɛ́. É kó yí nukɔngbéví sín acɛ e un ɖó ɔ́, bó kó lɛ́ wá yí ɖɛ ce din!” É ká wá kanbyɔ́ tɔ́ tɔn ɖɔ: “Đɛ ɔ́ ɖě sɔ́ kpo ɖo así towe bɔ a nǎ xo nú mì ǎ cé?” Bɔ é yí gbe n'i ɖɔ: “Vǐ ce, un ko sɔ́ ɛ dó ɖó gǎn towe, bɔ nɔví tɔn lɛ́ɛ bǐ ná nyí mɛsɛntɔ́ tɔn. Un ná ɛ jinukún, bó ná ɛ vɛ̌ɛn yɔ̌yɔ́. Nɛ̌ un ka sɔ́ sixú bló gbɔn nú we din vǐ ce?” Esawu ka ɖɔ nú tɔ́ tɔn ɖɔ: “Daá! Đɛ ɖokpó énɛ́ ɔ́ jɛ́n a ɖǒ a? Xo ɖɛ nú nyɛ lɔ.” Ée é ɖɔ mɔ̌ ɔ́, é wlí avǐ. Tɔ́ tɔn ka ɖɔ n'i ɖɔ: “Ayǐkúngban e jí a nǎ yi nɔ ɔ́ ná nɔ́ ná jinukún ǎ, amyɔsun ka ná nɔ́ ja sín jǐxwé d'é jí ǎ. Dǎka xixo towe wɛ a nǎ ɖu. A nǎ nɔ nɔví towe glɔ́. Amɔ̌, a ɖo flúflú wɛ bó ɖo yiyi wɛ káká ɔ́, a nǎ zlɔ́n agban kpinkpɛn e é ɖíɖá we é.” Jakɔ́bu sín nǔ nɔ vɛ́ Esawu wú ɖó ɖɛ e tɔ́ tɔn xo dó jǐ tɔn ɔ́ wú, bɔ Esawu nɔ ɖo ɖiɖɔ dó ayi mɛ wɛ ɖɔ: “Tɔ́ mǐtɔn kó ɖo nǎ kú wɛ; gbe e gbe é ná kú ɔ́, un ná hu nɔví ce Jakɔ́bu.” Xó e ɖɔ wɛ nukɔngbéví tɔn Esawu ɖe ɔ́, è wǎ gba kpá tɔn nú Hlebeka. Énɛ́ ɔ́, é ylɔ́ vǐ tɔn Jakɔ́bu e jɛ vǐ tɔn nukɔntɔn ɔ́ nɛgbé ɔ́, bó ɖɔ: “Đǒtó! Fofó towe Esawu jló ná hu we, bó dó ba hlɔn. Vǐ ce, din ɔ́ ɖǒtó mì! Sɔ́ nǔ bó hɔn yi nɔví ce Labáan gɔ́n ɖo Haláani. A nǎ nɔ gɔ̌n tɔn káká jɛ hwenu e nɔví towe sín xomɛ ná fá dó é. Hwenu e nɔví towe ná jó xomɛ e sin dó we wɛ é ɖe ɔ́ dó, bó ná wɔn nǔ e a wa xá ɛ ɔ́, un ná sɛ́ mɛ dó we bɔ è nǎ kplá we wá. Un jló ná ba mi mɛ we lɛ́ɛ bǐ kpo gbe ɖokpó ɔ́ ǎ.” Hlebeka ɖɔ nú Izáki ɖɔ: “Gbɛ ɔ́ cikɔ nú mì, ɖó Hitíti e vǐ ce Esawu da lɛ́ɛ wú. Ényí Jakɔ́bu lɔ wá da asi ɖo tomɛ fí din ɔ́, nǔ e wú un ɖo gbɛ ɔ́ ná bú dó mì bǐ.” Énɛ́ ɔ́, Izáki ylɔ́ Jakɔ́bu bó xo ɖɛ dó jǐ tɔn, bó gbɛ́ n'i ɖɔ: “Ma da Kanáanu ɖě ó. Yi Mɛzopotamíi taligbé tɔn, ɖo nɔ towe tɔ́ Betuwɛ́li xwé, bó da asi ɖo dɔ̌n. A nǎ da nɔ towe nɔví Labáan ví nyɔ̌nu ɖokpó. Mawu Nǔbǐwúkpétɔ́ ɔ́ ní xo ɖɛ dó jǐ towe; ní bló bónú a nǐ ji bó gba kún. A nǐ nyí tɔ́gbó nú togun wɔ̌buwɔ́bú. Đɛ e Mawu xo dó Ablaxámu jí ɔ́ ní nɔ hwi kpódó vǐ towe lɛ́ɛ kpó jí, bónú to e é ná Ablaxámu ɔ́, to énɛ́ e mɛ a ɖo jǒnɔ nyí ɖe wɛ din ɔ́ ní nyí towe.” Ée Izáki ɖɔ mɔ̌ ɔ́, é sɛ́ Jakɔ́bu dó, bɔ é ɖidó Labáan gɔ́n ɖo Mɛzopotamíi taligbé tɔn. Labáan ɔ́, Betuwɛ́li ví wɛ é nyí. Betuwɛ́li ka nyí Alamunu, bɔ Labáan nyí Hlebeka nɔví. Hlebeka ɔ́ wɛ nyí Jakɔ́bu kpódó Esawu kpó sín nɔ. Esawu mɔ ɖɔ Izáki xo ɖɛ dó Jakɔ́bu jí, bó sɛ́ ɛ dó Mɛzopotamíi taligbé tɔn, bɔ é ná yi da asi ɖo dɔ̌n, bɔ ée é ɖo ɖɛ xo dó jǐ tɔn wɛ ɔ́, é gbɛ́ n'i ɖɔ ní má da Kanáanu lɛ́ɛ ɖě ó. É lɔmɔ̌ mɔ ɖɔ Jakɔ́bu se tónú nú tɔ́ tɔn kpódó nɔ tɔn kpó, bó yi Mɛzopotamíi taligbé tɔn. Énɛ́ ɔ́, Esawu mɔ nukúnnú jɛ wú ɖɔ tɔ́ émítɔn Izáki gbɛ́ wǎn nú Kanáanu lɛ́ɛ. Énɛ́ ɔ́ wú ɔ́, é yi Ablaxámu ví Isimayɛ́li gɔ́n, bó da vǐ tɔn Maxaláti, Nɛbayɔ́ti nɔví ɔ́ gɔ́ nú asi e é kó da ɖ'ayǐ lɛ́ɛ. Jakɔ́bu gosín Bɛ̌-Ceva bó ɖidó Haláani. É wá jɛ fí ɖé bó dɔ́ fí ɔ́, ɖó hwe ko yi xɔ. É zé awǐnnya e ɖo fínɛ́ lɛ́ɛ ɖokpó, bó ɖó kɔ bó dɔ́ fínɛ́. É kú dlɔ̌; é ná mɔ nǔɖé ɔ́, é mɔ alyá ɖokpó ɖo te, bó gosín kɔ́ mɛ káká yi sɔ́ jǐnukúnsin. Kpowun ɔ́, wɛnsagun Mawu tɔn lɛ́ɛ nɔ́ ɖo alyá ɔ́ jí gbɔn yi jǐ wɛ, bó nɔ́ ɖo te jɛ wɛ. Bɔ Mawu Mavɔmavɔ nɔ alyá ɔ́ sín aga, bó ɖɔ: “Mawu Mavɔmavɔ wɛ un nyí; Mawu tɔ́gbó towe Ablaxámu tɔn wɛ un nyí, Mawu Izáki tɔn wɛ un nyí. Un ná ná ayǐkúngban e jí a mlɔ̌ ɔ́ hwi kpó vǐ towe lɛ́ɛ kpó. Vǐ towe lɛ́ɛ ná sukpɔ́ kɔ́gúdu ɖɔhun. Yě ná gba kpé ayǐkúngban ɔ́ jí sín zǎnzǎnhwe jí káká yi gbadahwe jí; sín totaligbé wá tofɔligbé, bɔ un ná xo ɖɛ dó akɔta e ɖo ayǐkúngban jí lɛ́ɛ bǐ jí, gbɔn hwi kpódó vǐ towe lɛ́ɛ kpó jí. Đǒtó ganjí. Nyi ɖésú ɖo kpɔ́ xá we; un ná kpé nukún wǔ we gbɔn fí e a nǎ gbɔn lɛ́ɛ bǐ, bó ná lɛ́ kplá we wá to élɔ́ mɛ. Un ná jó we dó ǎ; un ná ɖe akpá e un dó nú we ɔ́ bǐ.” Ée Jakɔ́bu fɔ́n sín amlɔ mɛ ɔ́, é ɖɔ: “Mawu Mavɔmavɔ ɖo tɛn élɔ́ mɛ dandan, bɔ nyɛ ka tunwun ɖ'ayǐ ǎ.” Xɛsi ɖi i, bɔ é ɖɔ: “Tɛn élɔ́ mɛ dó xɛsi ɖésú; é ná nyí nǔɖé zɛ xwé Mawu tɔn kpó sɛ́xwé hɔn kpó wú ǎ.” Jakɔ́bu fɔ́n zǎn, bó zé awǐnnya e é ɖó kɔ ɔ́ tun te, bó dó bló awǐnnya e è nǎ nɔ́ sɛn é, bó kɔn ami d'é jí. É sun nyǐ tɛn ɔ́ mɛ ɖɔ Betɛ́li; tínmɛ tɔn wɛ nyí “Xwé Mawu tɔn”. Lǔzi wɛ toxo ɔ́ ká nɔ́ nyí ɖ'ayǐ. Ée Jakɔ́bu bló mɔ̌ ɔ́, é d'akpá ɖɔ: “Ényí Mawu nɔ kpɔ́ xá mì ɔ́, nú é kpé nukún wǔ ce ɖo ali jí ɔ́, ényí é ná nǔɖuɖu mì bó ná nǔ e un ná dó ɔ́ mì ɔ́, ényí un lɛ́ kɔ wá tɔ́ ce xwé wǔyɛ́yɛ́ afɔyɛ́yɛ́ ɔ́, Mawu Mavɔmavɔ ná nyí Mawu ce. Awǐnnya élɔ́ e un sɔ́ tun te dó bló awǐnnya e è nǎ nɔ́ sɛn ɔ́ ná nyí Mawu xwé.” Bɔ é ɖɔ nú Mawu ɖɔ: “Nǔ e a nǎ ná mì lɛ́ɛ ɔ́, un ná ná we bǐ sín mǎɖówǒ.” Jakɔ́bu wlí ali, bó yi mɛ e ɖo zǎnzǎnhwe jí lɛ́ɛ sín tomɛ. Ée é ɖo yiyi wɛ ɔ́, é wá jɛ gbe ɖokpó bɔ é mɔ tɔ ɖokpó ɖo gbě ɔ́ jí. Gbɔ̌hwan atɔn ɖo tɔ ɔ́ nu, bó ɖo gbigbɔjɛ́ wɛ; tɔ énɛ́ ɔ́ sín sin wɛ è nɔ ná kanlin lɛ́ɛ. È zě awǐnnya ɖaxó ɖé dó sú tɔ ɔ́. Kanlin lɛ́ɛ bǐ nɔ́ kplé ɖo fínɛ́, bɔ è nɔ blí awǐnnya ɔ́ sín tɔ ɔ́ nu, bó nɔ́ ná sin yě, bó nɔ́ lɛ́ blí ɖ'é nu. Jakɔ́bu kanbyɔ́ lɛ̌ngbɔ́nyitɔ́ lɛ́ɛ ɖɔ: “Nɔví ce lɛ́ɛ e mi, fítɛ́ nu wɛ mi nyí?” Bɔ yě yí gbe n'i ɖɔ: “Haláaninu wɛ mǐ nyǐ.” É lɛ́ kanbyɔ́ yě ɖɔ: “Mi tunwun Labáan Naxɔ́ɔ ví ɔ́ a?” Bɔ yě yí gbe n'i ɖɔ: “Ɛɛn, mǐ tunwun i.” É lɛ́ kanbyɔ́ yě ɖɔ: “É ɖo ɖagbe a?” Bɔ yě yí gbe n'i ɖɔ: “Ɛɛn, é ɖo ɖagbe. Kpɔ́n! Vǐ tɔn Hlacɛ́li ɔ́ nɛ́ kplá gbɔ̌ tɔn lɛ́ɛ jǎwe nɛ́.” Jakɔ́bu lɛ́ ɖɔ: “Kéze kpo ɖo te; hwenu e è nǎ kplé kanlin lɛ́ɛ dó ɔ́ kó su ǎ. Mi ná sin yě, bó kplá yě yi nǔ ɖu gbé.” Bɔ yě yí gbe n'i ɖɔ: “Mǐ sixú ǎ; kanlin lɛ́ɛ bǐ jɛ́n ná wá kplé hwɛ̌ cóbɔ è nǎ blí awǐnnya ɔ́ sín tɔ ɔ́ nu, bó ná ná sin yě.” Xó ɔ́ ɖɔ nú yě wɛ é ɖe, bɔ Hlacɛ́li kplá tɔ́ tɔn sín gbɔ̌ lɛ́ɛ wá; kanlin wɛ é nɔ́ nyi. Ée Jakɔ́bu mɔ nylɔ tɔn Labáan sín vǐ Hlacɛ́li, lobo mɔ gbɔ̌ tɔn lɛ́ɛ tlóló ɔ́, é sɛ yi tɔ ɔ́ kɔn, bó blí awǐnnya ɔ́ sín tɔ ɔ́ nu, bó ná sin gbɔ̌ tɔn lɛ́ɛ. Énɛ́ ɔ́ gúdo ɔ́, é kí si nú Hlacɛ́li, lobo wlí avǐ. Jakɔ́bu ɖɔ nú Hlacɛ́li ɖɔ tɔ́ tɔn sín mɛ wɛ émí nyí; Hlebeka sín vǐ wɛ émí nyí, bɔ Hlacɛ́li kán wezun bó yi ɖɔ nú tɔ́ tɔn. Ée Labáan se nɔví tɔn nyɔ̌nu sín vǐ Jakɔ́bu sín xó lě tlóló ɔ́, é kán wezun bó yi kpé e, bó zunfán ɛ, bó kí si n'i, bó kplá ɛ yi xwé tɔn gbe. Jakɔ́bu ka wlí nǔ e jɛ lɛ́ɛ bǐ ɖɔ nú Labáan. Bɔ Labáan ɖɔ nú Jakɔ́bu ɖɔ: “Mɛ ce wɛ a nyǐ nǔgbó; hun ce ɖíe.” Ée Jakɔ́bu bló sun ɖokpó ɖo Labáan xwé ɔ́, Labáan ɖɔ n'i gbe ɖokpó ɖɔ: “Ée a nyǐ mɛ ce ɔ́ wú wɛ a nǎ wa azɔ̌ nú mì yǎyá ǎ. Đɔ nabí e un nǎ nɔ́ sú we ɔ́ nú mì.” Labáan ka ɖó nyɔ̌nuví we: nukɔngbéví tɔn nyí Lěya, mɛ e jɛ Lěya nɛgbé ɔ́ nɔ nyí Hlacɛ́li. Lěya ɔ́ ɖó nukún fítíí, Hlacɛ́li ka nyɔ́ ɖɛkpɛ ɖésú. Jakɔ́bu ká yí wǎn nú Hlacɛ́li; énɛ́ ɔ́, é yí gbe nú Labáan ɖɔ: “Un ná wa azɔ̌ nú we nú xwe tɛ́nwe, bɔ a nǎ ná vǐ towe Hlacɛ́li ɔ́ mì, bɔ un ná da.” Bɔ Labáan ɖɔ: “Un sɔ́ ɛ ná we ɔ́, é nyɔ́ nú mì hú má sɔ́ ɛ ná mɛ ɖěvo; bó nɔ gɔ̌n ce.” Énɛ́ ɔ́, Jakɔ́bu wa azɔ̌ nú xwe tɛ́nwe bɔ Hlacɛ́li ná nyí étɔn. Đó Jakɔ́bu yí wǎn nú Hlacɛ́li wútu ɔ́, é mɔ xwe tɛ́nwe nɛ́ lɛ́ɛ dó mɔ azǎn ywɛywɛ ɖé ná. Énɛ́ ɔ́ gúdo ɔ́, Jakɔ́bu ɖɔ nú Labáan ɖɔ: “Jǒ asi ce nú mì, nú nyɛ kpó é kpó ná ɖɔ éé ɖo mɔ̌ é, ɖó un ko bló xwe nabí e un ɖó ná bló ɔ́.” Bɔ Labáan ylɔ́ agɔ̌ ɖaxó ɖokpó; é kplé mɛ e ɖo fínɛ́ lɛ́ɛ bǐ bɔ yě ɖu agɔ̌. Lo ɔ́, ée gbadanu su ɔ́, vǐ tɔn Lěya ɔ́ wɛ è kplá nú Jakɔ́bu bɔ é ɖó xó xá ɛ. Hwenu e Labáan kplá Lěya nú Jakɔ́bu ɔ́, é lɛ́ kplá mɛsɛntɔ́ tɔn Zilupa jó nú Lěya, bɔ é ná nyí mɛsɛntɔ́ tɔn. Ée ayǐ hɔ́n ɔ́, Jakɔ́bu wá mɔ ɖɔ Lěya wɛ, bó ɖɔ: “Lěya wɛ a?” Énɛ́ ɔ́, é kanbyɔ́ Labáan ɖɔ: “Étɛ́ a blǒ xá mì nɛ́? Hlacɛ́li wú wɛ un wa azɔ̌ nú we ǎ cé? Aniwú wɛ a flú mì?” Bɔ Labáan yí gbe n'i ɖɔ: “È nɔ bló mɔ̌ ɖo gbě mǐtɔn jí fí ǎ. È nɔ sɔ́ vǐ e gbɔn gǔdo ɔ́ ná asú jɛ nukɔn nú nukɔngbéví ɔ́ ǎ. Mǐ ní tó ɖu alɔwlíwlíxwe ɔ́ hwɛ̌; énɛ́ ɔ́ gúdo ɔ́, un nǎ ná mɛ ɖě ɔ́ lɔ we; amɔ̌, a nǎ lɛ́ wa azɔ̌ nú mì nú xwe tɛ́nwe ɖěvo.” Bɔ Jakɔ́bu fó alɔwlíwlíxwe ɔ́ xá Lěya, bɔ Labáan sɔ́ Hlacɛ́li n'i bɔ é húzú asi tɔn. Labáan kplá mɛsɛntɔ́ tɔn Biluha nú Hlacɛ́li, bɔ é ná nyí mɛsɛntɔ́ tɔn. Jakɔ́bu ɖó xó xá Hlacɛ́li lɔ. É yí wǎn n'i hú Lěya, bó lɛ́ wa azɔ̌ nú Labáan nú xwe tɛ́nwe ɖěvo. Ée Mawu Mavɔmavɔ mɔ ɖɔ Jakɔ́bu kún yí wǎn nú Lěya ó ɔ́, é ná vǐ i, bɔ é nɔ ji; Hlacɛ́li ka nɔ ji ɖě ǎ. Énɛ́ ɔ́, Lěya mɔ xo bó ji vǐ súnnu ɖokpó, bó sun nyǐ i ɖɔ Hwlibɛ́ni, Hwlibɛ́ni sín tínmɛ wɛ nyí “É mɔ”, ɖó é ɖo ɖiɖɔ wɛ ɖɔ: “Mawu Mavɔmavɔ mɔ ɖɔ è ɖe mì kpo nǔgbó. Asú ce ná yí wǎn nú mì lo.” É lɛ́ mɔ xo ɖěvo bó ji vǐ súnnu ɖokpó. É ɖɔ: “Mawu Mavɔmavɔ mɔ ɖɔ è kún yí wǎn nú mì ɖ'ayǐ ó, bó lɛ́ ná vǐ élɔ́ mì.” É sun nyǐ vǐ ɔ́ ɖɔ Sinmɛnyɔ́ɔ; Sinmɛnyɔ́ɔ sín tínmɛ wɛ nyí “é se”. É lɛ́ mɔ xo ɖěvo, bó ji vǐ súnnu ɖokpó, bó ɖɔ: “Din ɔ́, asú ce ná tɛ́ dó wǔ ce, ɖó un ji vǐ súnnu atɔn n'i.” Énɛ́ wú wɛ é sun nyǐ vǐ ɔ́ ɖɔ Levíi. Levíi sín tínmɛ wɛ nyí “é tɛ́ dó”. É lɛ́ mɔ xo ɖěvo, bó ji vǐ súnnu ɖokpó, bó ɖɔ: “Din tɔn ɔ́, un ná kpa Mawu Mavɔmavɔ.” Énɛ́ wú wɛ é sun nyǐ vǐ ɔ́ ɖɔ Judáa; Judáa sín tínmɛ wɛ nyí “kpikpa”. Énɛ́ ɔ́ gúdo ɔ́, é sɔ́ ji vǐ ɖě ǎ. Ée Hlacɛ́li mɔ ɖɔ émí kún ɖo vǐ ji nú Jakɔ́bu wɛ ó ɔ́, é jɛ wǔ hwan nɔví tɔn jí, bó ɖɔ nú Jakɔ́bu ɖɔ: “A ma ji vǐ nú mì ǎ ɔ́, un ná kú.” Bɔ xomɛ tɔn sin Jakɔ́bu bɔ é ɖɔ: “Nyɛ wɛ ka nyí Mawu e má ná vǐ we ǎ é a?” Bɔ Hlacɛ́li ɖɔ n'i ɖɔ: “Mɛsɛntɔ́ ce Biluha ɔ́ ɖíe; ɖǒ xó xá ɛ, bónú é ná ji vǐ, bɔ un ná hɛn akɔn, bɔ yě ná nyí vǐ nú nyɛ lɔmɔ̌.” Énɛ́ ɔ́, é sɔ́ mɛsɛntɔ́ tɔn Biluha ɔ́ jó nú Jakɔ́bu, bɔ Jakɔ́bu ɖó xó xá ɛ. Bɔ Biluha mɔ xo bó ji vǐ súnnu ɖokpó nú Jakɔ́bu, bɔ Hlacɛ́li ɖɔ: “Mawu dó hwɛ gbɔ nú mì; é se vosisa ce bó ná vǐ súnnu ɖokpó mì.” Énɛ́ ɔ́ wú wɛ é sun nyǐ vǐ ɔ́ ɖɔ Dan. Dan sín tínmɛ wɛ nyí “Mawu gbo hwɛ”. Mɛsɛntɔ́ ɔ́ lɛ́ mɔ xo ɖěvo bó ji vǐ súnnu wegɔ́ ɔ́ nú Jakɔ́bu. Bɔ Hlacɛ́li ɖɔ: “Un li za xá nɔví ce bɔ é vɛ́ jlɛ́, bó ɖu ɖ'é jí.” Bɔ é sun nyǐ vǐ ɔ́ ɖɔ Nɛfutali. Nɛfutali sín tínmɛ wɛ nyí “Un li za”. Lěya ɔ́, ée é mɔ ɖɔ émí kún sɔ́ ɖo vǐ ji wɛ ó ɔ́, é zé mɛsɛntɔ́ tɔn Zilupa jó nú Jakɔ́bu. Mɛsɛntɔ́ Lěya tɔn Zilupa ji vǐ súnnu ɖokpó nú Jakɔ́bu, bɔ Lěya ɖɔ: “Nyɔ̌ná jɛ́n wá lě a?” Bó sun nyǐ vǐ ɔ́ ɖɔ Gadi. Gadi sín tínmɛ wɛ nyí “Nyɔ̌ná”. Mɛsɛntɔ́ ɔ́ lɛ́ ji vǐ súnnu wegɔ́ ɔ́ nú Jakɔ́bu. Bɔ Lěya ɖɔ: “Nǔ nyɔ́ nú mì mɛ nya! Nǔgbó ɔ́, nyɔ̌nu lɛ́ɛ ná nɔ́ ylɔ́ mì ɖɔ nyɔ̌nánɔ.” Bó sun nyǐ vǐ ɔ́ ɖɔ Acɛ́ɛ. Acɛ́ɛ sín tínmɛ wɛ nyí “Nyɔ̌ná”. Hwlibɛ́ni ka wá tɔ́n yi gle mɛ gbe ɖokpó nǔkún-yiya hwenu, bó mɔ atínsínsɛ́n e è nɔ ylɔ́ ɖɔ atínsínsɛ́n wǎn yíyí tɔn ɔ́, bó ba wá nú nɔ tɔn Lěya, bɔ Hlacɛ́li ɖɔ nú Lěya ɖɔ: “Kɛnklɛ́n bó ná atínsínsɛ́n wǎn yíyí tɔn vǐ towe tɔn ɔ́ ɖě mì.” Bɔ Lěya yí gbe n'i ɖɔ: “Asú ce e a yǐ ɔ́ kpé we ǎ, bɔ a nǎ lɛ́ yí atínsínsɛ́n wǎn yíyí tɔn vǐ ce tɔn ɔ́ wɛ a?” Bɔ Hlacɛ́li yí gbe n'i ɖɔ: “É nyɔ́! Égbé zǎn mɛ ɔ́, asú towe ná wá xɔ nú we, ɖó atínsínsɛ́n wǎn yíyí tɔn vǐ towe tɔn e a nǎ ná mì ɔ́ nu.” É jɛ gbadanu, bɔ Jakɔ́bu lɛ́ kɔ sín gle mɛ jǎwe, bɔ Lěya tɔ́n bó yi kpé e, bó ɖɔ n'i ɖɔ: “Xɔ ce mɛ wɛ a nǎ dɔ́ égbé; un ko zé atínsínsɛ́n wǎn yíyí tɔn vǐ ce tɔn ɔ́ jó ɖ'é nu.” Jakɔ́bu ɖó xó xá ɛ zǎn énɛ́ ɔ́ mɛ. Bɔ Mawu yí Lěya sín ɖɛ, bɔ é mɔ xo bó ji vǐ súnnu atɔ́ɔ́ngɔ́ ɔ́ nú Jakɔ́bu. Lěya ɖɔ: “Ée un zé mɛsɛntɔ́ ce jó nú asú ce ɔ́, Mawu sú axɔ́ mì, bó ná vǐ élɔ́ mì, bó sun nyǐ vǐ ɔ́ ɖɔ Isakáa.” Isakáa sín tínmɛ wɛ nyí “Le ɖo ajɔ̌ jí”. Lěya lɛ́ mɔ xo bó ji vǐ súnnu ayizɛ́ngɔ́ ɔ́ nú Jakɔ́bu, bó ɖɔ: “Mawu ná nǔ ɖagbe ɖokpó mì; élɔ́ tɔn din ɔ́, asú ce ná nɔ́ wlí yɛ̌yi nú mì, ɖó vǐ súnnu ayizɛ́n nɛ́ un ji n'i nɛ́.” Bó sun nyǐ vǐ ɔ́ ɖɔ Zabulɔ́ɔn. Zabulɔ́ɔn sín tínmɛ wɛ nyí “Asú ce ná nɔ wlí yɛ̌yi nú mì”. Énɛ́ ɔ́ gúdo ɔ́, é ji nyɔ̌nuví ɖokpó, bó sun nyǐ i ɖɔ Dina. Mawu flín Hlacɛ́li, bó yí ɖɛ tɔn, bó bló bɔ é ná jɛ vǐ ji jí. É mɔ xo, bó ji vǐ súnnu ɖokpó, bó ɖɔ: “Mawu ɖe winnyá nú mì.” É sun nyǐ vǐ ɔ́ ɖɔ Jozɛ́fu; Jozɛ́fu sín tínmɛ wɛ nyí “Mawu Mavɔmavɔ ná gɔ́ ná”, bó ɖɔ: “Mawu Mavɔmavɔ ní ná súnnuví ɖěvo mì gɔ́ ná.” Hwenu e Hlacɛ́li ji Jozɛ́fu ɔ́, Jakɔ́bu ɖɔ nú Labáan ɖɔ: “Jǒ mì dó má yi xwé, to ce mɛ. Jǒ asi ce lɛ́ɛ kpó vǐ ce lɛ́ɛ kpó nú mì bónú má yi. Yě wú wɛ un wa azɔ̌ nú we. Hwi ɖésú tunwun azɔ̌ e un wa nú we ɔ́ ganjí.” Bɔ Labáan ɖɔ n'i ɖɔ: “Kɛnklɛ́n se xó ce! Un kan nǔ, bó se ɖɔ Mawu Mavɔmavɔ xo ɖɛ dó jǐ ce ɖó hwi wú. Đɔ axɔ́ e un nǎ sú we ɔ́ bónú má sú we.” Jakɔ́bu ka ɖɔ n'i ɖɔ: “A tunwun lě e un wa azɔ̌ nú we gbɔn ɔ́; a mɔ lě e kanlin towe lɛ́ɛ wá sukpɔ́ gbɔn ɖó nyɛ wútu é. Đó kpɛ e ɖo así towe có nyɛ wá ɔ́, wá ji d'é jí kpɔ́ gégé. Mawu Mavɔmavɔ xo ɖɛ dó jǐ towe sín gbe e gbe un tɛ afɔ xwé towe gbe é. Hwenu su, nú má yi bló nyɛ ɖésúnɔ tɔn ɖě dó hɛn mɛ ce lɛ́ɛ ná ǎ cé?” Labáan kanbyɔ́ Jakɔ́bu ɖɔ: “Étɛ́ wɛ un nǎ sú we?” Bɔ Jakɔ́bu yí gbe n'i ɖɔ: “A nǎ sú axɔ́ ɖěbǔ mì ǎ. Nú a yǐ gbe nú xó e ɖɔ nú we gbé un ja ɔ́, un ná lɛ́ nyi gbɔ̌ towe lɛ́ɛ, bó ná kpé nukún yě wú nú we. Égbé ɔ́, un nǎ gbɔn gbɔ̌ towe lɛ́ɛ bǐ jí, bó ná ɖe lɛ̌ngbɔ́ e nǔɖé va dó wǔ tɔn téwún téwún, abǐ gblogblo tɔn lɛ́ɛ ɖó vo; un ná ɖe éé nǔɖé kó va dó wǔ tɔn lɛ́ɛ, kpó gbɔ̌ e nǔɖé kó va dó wǔ tɔn téwún téwún, abǐ gblogblo tɔn lɛ́ɛ bǐ ɖó vo, bɔ é ná nyí axɔ́ e a sú mì é.” É kó wá yá ɔ́, a nǎ mɔ ɖɔ un kún nɔ́ hízí nǔ ó. Nú a wǎ mɔ gbɔ̌ e nǔɖé má va dó wǔ tɔn ǎ lɛ́ɛ ɖě ɖo gbɔ̌ e un ɖe ɖó vo lɛ́ɛ mɛ hǔn, tunwun ɖɔ ajo wɛ un ja. Bɔ Labáan ɖɔ n'i ɖɔ: “É nyɔ́! Ní bó nɔ lě e a ɖɔ ɖó é.” Gbe nɛ́ gbe ɔ́, Labáan gbɔn gǔdo, bɔ gbǎgbá e nǔɖé va dó wǔ yětɔn lɛ́ɛ, gbɔ̌ e nǔɖé va dó wǔ yětɔn lɛ́ɛ, lɛ̌ngbɔ́ e wiwi gbɔn mɛ lɛ́ɛ, ée wěwé gbɔn mɛ lɛ́ɛ ɔ́, é ɖe bǐ ɖó vo bó bɛ́ jó nú vǐ tɔn lɛ́ɛ. Bó sɛ́ yě dó zɔ nú Jakɔ́bu. Fí e yě ɖe ɔ́, è nǎ ɖi zɔnlin nú azǎn atɔn cóbó yi fí ɔ́. Jakɔ́bu ka ɖo Labáan sín kanlin e kpo lɛ́ɛ wú kpé nukún wɛ. É ba pepliyée kpó amadi kpó, kpódó platáni kpó sín ala. Atín lɛ́ɛ ɖo mǔ, bɔ é kɔ́n fló sín atín lɛ́ɛ wú gbɔn mɛ gbɔn mɛ, bɔ bǐ wlán, bɔ è mɔ fló ɔ́ ɖo fí ɖé ɔ́, é nɔ mɔ atín ɔ́ ɖésú ɖo fí ɖě. É to atín e sín wǔtu wlán lɛ́ɛ dó nǔ e mɛ kanlin lɛ́ɛ nɔ́ nu sin ɖe ɔ́ mɛ, bɔ kanlin lɛ́ɛ nɔ́ ɖo mimɔ wɛ. Hwenu e gbɔ̌ lɛ́ɛ wá sin nu gbé ɔ́ wɛ avadídó nɔ́ jló yě. Bɔ yě nɔ́ dó ava nú yěɖée ɖo fí e atín lɛ́ɛ ɖe é; énɛ́ ɔ́, yě nɔ́ ji vǐ hwɛkannɔ, bó nɔ́ ji vǐ wlanwlan, bɔ Jakɔ́bu nɔ ɖe yě ɖó vo. Gbɔ̌ e Jakɔ́bu ɖe ɖó vo lɛ́ɛ ɔ́, é nɔ bɛ́ yě ɖó Labáan sín kanlin e ɖó hwɛkan lɛ́ɛ nukɔn. É ɖe kanlin éyɛ́ tɔn lɛ́ɛ ɖó vo, bó nɔ́ lɔn bɔ yě nɔ́ byɔ́ Labáan sín kanlin lɛ́ɛ mɛ ǎ. Nú avadídó jló gbɔ̌sú e dó ganjí lɛ́ɛ hweɖěbǔnu ɔ́, Jakɔ́bu nɔ to atín lɛ́ɛ dó nǔ e mɛ kanlin lɛ́ɛ nɔ́ nu sin ɖe ɔ́ mɛ, bónú yě ná dó ava ɖo atín lɛ́ɛ kɔn. Nú é ká nyí ɖɔ gbɔ̌sú gǒxúxú lɛ́ɛ wɛ ɔ́, é nɔ́ bɛ́ atín lɛ́ɛ dó nǔ e mɛ kanlin lɛ́ɛ nɔ́ nu sin ɖe ɔ́ mɛ ǎ. Énɛ́ ɔ́, kanlin e xú gǒ lɛ́ɛ nɔ́ nyí Labáan tɔn, bɔ éé kló lɛ́ɛ nɔ́ nyí Jakɔ́bu tɔn. Énɛ́ ɔ́, Jakɔ́bu jɛ dɔkun ɖésú. É ɖó lɛ̌ngbɔ́ kpódó gbɔ̌ kpó kɔn nyi kpɔ́, bó ɖó mɛsɛntɔ́ nyɔ̌nu kpó súnnu kpó, bó ɖó lǎkúnmí kpó tócí kpó. Gbe ɖokpó ká wá su bɔ Jakɔ́bu se ɖɔ Labáan sín vǐ lɛ́ɛ ɖo ɖiɖɔ wɛ ɖɔ: “Jakɔ́bu bɛ́ tɔ́ mǐtɔn sín nǔ lɛ́ɛ bǐ; nǔ énɛ́ lɛ́ɛ wɛ é dó jɛ dɔkun ná sɔ mɔ̌.” Jakɔ́bu lɔ ka mɔ ɖɔ Labáan kún sɔ́ nɔ́ sɔ́ nukún ɖagbe dó kpɔ́n émí ná ó. Labáan sɔ́ ɖó ninɔmɛ xóxó ɔ́ dó wǔ tɔn ǎ. Énɛ́ ɔ́, Mawu Mavɔmavɔ ɖɔ nú Jakɔ́bu ɖɔ: “Lɛ̌ kɔ yi mɛ towe lɛ́ɛ gɔ́n, ɖo fí e è ji we ɖe ɔ́. Un ná nɔ kpɔ́ xá we.” Jakɔ́bu sɛ́ mɛ dó bɔ è yi ylɔ́ Hlacɛ́li kpó Lěya kpó wá n'i ɖo gle mɛ ɖo gbɔ̌ tɔn lɛ́ɛ kɔn, ɖo amagbo mɛ. Ée yě wá ɔ́, é ɖɔ nú yě ɖɔ: “Un mɔ ɖɔ tɔ́ mitɔn kún sɔ́ nɔ́ sɔ́ nukún ɖagbe dó kpɔ́n mì ná ó. Un mɔ ɖɔ é kún sɔ́ ɖó ninɔmɛ xóxó ɔ́ dó wǔ ce ó. Amɔ̌, Mawu tɔ́ ce tɔn ká ɖo kpɔ́ xá mì. Mi ɖésú mi tunwun ɖɔ un zán hlɔ̌nhlɔ́n ce bǐ dó wa azɔ̌ nú tɔ́ mitɔn. Bɔ tɔ́ mitɔn hízí mì, bó húzú axɔ́ e é ná sú mì ɔ́ azɔn mɔ̌kpán. Lo ɔ́, Mawu lɔn bɔ é wa nǔ nyanya ɖé xá mì ǎ. Nú é ɖɔ: ‘Kanlin wlanwlan lɛ́ɛ wɛ ná nyí axɔ́ e un ná sú we’ ɔ́, vǐ e kanlin lɛ́ɛ nɔ ji lɛ́ɛ bǐ nɔ́ wlán; nú é ká ɖɔ kanlin hwɛkannɔ lɛ́ɛ wɛ ná nyí axɔ́ e un ná sú we ɔ́, vǐ e kanlin lɛ́ɛ nɔ ji lɛ́ɛ bǐ nɔ́ ɖó hwɛkan. Énɛ́ ɔ́, Mawu yǐ tɔ́ mitɔn sín kanlin lɛ́ɛ bó ná mì. Hwenu e gbɔ̌ lɛ́ɛ nɔ́ dó ava dó ɔ́ su ɔ́, nǔ e un nɔ mɔ ɖo dlɔ̌ mɛ ɔ́ ɖíe: gbǎgbá e nɔ́ dó ava nú gbɔ̌ lɛ́ɛ nɔ́ nyí hwɛkannɔ; yě nɔ́ nyí wlanwlan, yě nɔ́ kpa alǎwó. Bɔ wɛnsagun Mawu tɔn ylɔ́ mì ɖo dlɔ̌ mɛ, bó ɖɔ: ‘Jakɔ́bu!’ Bɔ un yí gbe n'i ɖɔ: ‘Wěyi!’ Bɔ é ɖɔ nú mì ɖɔ: ‘Kpɔ́n! Gbǎgbá e ɖo ava dó nú gbɔ̌ asi lɛ́ɛ wɛ ɔ́, nɔ nyí hwɛkannɔ; yě nɔ́ nyí wlanwlan, yě nɔ́ kpa alǎwó, ɖó un mɔ nǔ e wa xá we wɛ Labáan ɖe ɔ́ bǐ. Nyɛ wɛ nyí Mawu e a kɔn ami dó awǐnnya jí ná ɖo Betɛ́li, bó d'akpá ná é. Din ɔ́, sɔ́ nǔ bó tɔ́n sín to élɔ́ mɛ, bó lɛ́ kɔ yi to e mɛ è ji we ɖe ɔ́ mɛ.’ ” Hlacɛ́li kpódó Lěya kpó yí gbe n'i bó ɖɔ: “Nǔɖé sɔ́ kpo nú mǐ ɖo tɔ́ mǐtɔn xwé fí wɛ a? Mǐ sɔ́ ɖó gǔ ɖé ɖo fí bó ɖo nǎ ɖu wɛ a? Jǒnɔ wɛ é nɔ sɔ́ mǐ dó mɔ ná din, ɖó è ko fɔ mǐ sa, bó kó ɖu akwɛ́ tɔn bǐ. Dɔkun e Mawu yí sín tɔ́ mǐtɔn sí lɛ́ɛ bǐ wɛ nyí mǐ kpó vǐ mǐtɔn lɛ́ɛ kpó tɔn. Amɔ̌, égbé din ɔ́, blǒ nǔ e Mawu ɖɔ nú we ɔ́ bǐ.” Jakɔ́bu sɔ́ nǔ bó bɛ́ vǐ tɔn lɛ́ɛ kpódó asi tɔn lɛ́ɛ kpó ɖó lǎkúnmí jí. É kplá kanlin tɔn lɛ́ɛ bǐ, bó bɛ́ nǔ e é wa nǔ bó mɔ lɛ́ɛ bǐ, kanlin e é wa nǔ bó mɔ ɖo Mɛzopotamíi taligbé tɔn lɛ́ɛ bǐ, bó ɖidó tɔ́ tɔn xwé ɖo Kanáa. Labáan ka ɖo fínɛ́ hwenɛ́nu ǎ; é yi fún kpa nú gbɔ̌ tɔn lɛ́ɛ gbé, bɔ vǐ tɔn Hlacɛ́li fin bǒcyɔ tɔn lɛ́ɛ. Jakɔ́bu gblé ɖo Labáan Alamunu ɔ́ sí, ɖó é ɖɔ xó ɖé n'i cóbó hɔn wá yi ǎ. Énɛ́ ɔ́, Jakɔ́bu bɛ́ nǔ e é ɖó lɛ́ɛ bǐ bó hɔn. É sɔ́ nǔ bó zlɛ́ Efláti tɔ ɔ́, bó ɖidó Galadi só ɔ́ kɔn. Azǎn tɔn atɔngɔ́ ɔ́ gbe ɔ́, è yi ɖɔ nú Labáan ɖɔ Jakɔ́bu hɔn. Bɔ Labáan kplá mɛ tɔn lɛ́ɛ, bɔ yě jɛ Jakɔ́bu gbé mɛ. Yě ɖi zɔnlin xɔ azǎn tɛ́nwe, bó xwedó Jakɔ́bu wú, ɖo Galadi só ɔ́ kɔn. Lo ɔ́, Mawu xo dlɔ̌ Labáan Alamunu ɔ́ zǎn énɛ́ ɔ́ mɛ, bó ɖɔ n'i ɖɔ: “Cɔ́ hwiɖée dó Jakɔ́bu wú; ma kɛ nu dó wǔ tɔn vɔ́vɔ́ ó.” Ée Labáan xwedó Jakɔ́bu wú ɔ́, Jakɔ́bu kó dó goxɔ tɔn nyi Galadi só ɔ́ jí, bɔ Labáan kpó mɛ tɔn lɛ́ɛ kpó dó yětɔn nyi fínɛ́. Énɛ́ ɔ́, Labáan ylɔ́ Jakɔ́bu bó kanbyɔ́ ɛ ɖɔ: “Étɛ́ a ka wa mɔ̌ nɛ́? Étɛ́wú a kplá vǐ ce lɛ́ɛ ahwanwlíkannumɔ ɖɔhun? Nǔ énɛ́ e a blǒ ɔ́, a gblě ɖo así ce. Étɛ́wú wɛ a ka bɛ bó hɔn wá yi? Étɛ́wú a ma ɖɔ xó ɖé nú mì ǎ bó hɔn? Nú ɖɔ wɛ a ko ɖɔ nú mì ɔ́, un ná jó we dó bɔ a nǎ yi; awǎjijɛ mɛ wɛ a nǎ zɔn. È nǎ ɖo han ji wɛ, bó ɖo hǔn xo wɛ, bó ɖo agǐdigbo xo wɛ. A sɔ́ gbɔ nú má kplá así kɔ nú vǐ ce lɛ́ɛ kpó vǐ ce ví lɛ́ɛ kpó hwɛ̌ ǎ. A wa nǔ xlonɔ ɖɔhun. Un ɖó hlɔ̌nhlɔ́n bó ná wa nǔ nyanya xá mi, lo ɔ́, Mawu tɔ́ towe tɔn ɖɔ nú mì ɖɔ nyɛ ní cɔ́ nyɛɖée, bó má kɛ nu dó wǔ towe vɔ́vɔ́ ó. Din e a xweyǐgbe bǐ ɖó tɔ́ towe xwé ɖo jlǒjló we wɛ dín ɔ́, aniwú a ka fin bǒcyɔ ce lɛ́ɛ?” Jakɔ́bu yí gbe nú Labáan ɖɔ: “Xɛsi wɛ ɖi mì, ɖó un lin ɖɔ afɔ nyɔ́ ɔ́, a nǎ yí vǐ towe lɛ́ɛ sín así ce; énɛ́ ɔ́ wú wɛ un hɔn. Amɔ̌, mɛ e sí a nǎ mɔ bǒcyɔ towe lɛ́ɛ ɖe ɔ́ ná sɔ́ ta d'é mɛ. Wǎ kíjé nǔ ce lɛ́ɛ kpɔ́n ɖo mɛ mǐtɔn lɛ́ɛ nukún mɛ, nú a mɔ nǔ towe ɖě ɖ'é mɛ hǔn, sɔ́.” Jakɔ́bu ɖɔ mɔ̌ ɖó é tunwun ɖɔ Hlacɛ́li wɛ fin bǒcyɔ lɛ́ɛ ǎ. Énɛ́ ɔ́, Labáan kíjé Jakɔ́bu sín goxɔ, bó kíjé Lěya sín goxɔ, bó kíjé mɛsɛntɔ́ we lɛ́ɛ sín goxɔ, é ka mɔ nǔ ɖěbǔ ǎ. É gosín Lěya sín goxɔ mɛ, bó wá yi Hlacɛ́li tɔn mɛ lo. Hlacɛ́li wɛ ka fin bǒcyɔ lɛ́ɛ, bó bɛ́ dó zinkpo e nɔ nɔ lǎkúnmí jí ɔ́ glɔ́, lobo jínjɔ́n jí. Labáan kíjé goxɔ tɔn bǐ, bó mɔ nǔ ɖěbǔ ǎ. Hlacɛ́li ɖɔ nú tɔ́ tɔn ɖɔ: “Daá! Ma sin xomɛ ó; un jɛ gle gbe wú wɛ un mɔ we bó ma sixú sí te ǎ.” Labáan ba bǒcyɔ lɛ́ɛ káká bó ba kpo. Énɛ́ ɔ́, Jakɔ́bu sin xomɛ, bó jɛ jlɛ ɖɔ xá Labáan jí bó ɖɔ: “Hwɛ tɛ́ wɛ un hu? Ani wɛ un wa nyi do bɔ a jɛ gbě ce mɛ, bɔ zǐngídi ɖ'é nu sɔ mɔ̌? Ée a kíjé nǔ ce lɛ́ɛ bǐ ɔ́, a mɔ nǔ towe ɖě ɖ'é mɛ a? Nú a mɔ nǔ towe ɖě ɖ'é mɛ hǔn, zě xlɛ́ mɛ ce lɛ́ɛ kpódó mɛ towe lɛ́ɛ kpó, bónú yě ní gbo hwɛ nú mǐ. Xwe ko wɛ un bló ɖo gɔ̌n towe; gbɔ̌ towe lɛ́ɛ kpódó lɛ̌ngbɔ́ towe lɛ́ɛ kpó ɖě gblé xo kpɔ́n gbeɖé ǎ; un ka ɖu agbo towe lɛ́ɛ ɖě kpɔ́n gbeɖé ǎ. Nǔ wlí kanlin towe lɛ́ɛ ɖě ɖu bɔ un zé ɖukpo tɔn wá xlɛ́ we kpɔ́n gbeɖé ǎ; axɔ́ tɔn wɛ un nɔ sú we. È fin kanlin towe lɛ́ɛ ɖě dó mì kéze abǐ zǎn mɛ ɔ́, akwɛ́ tɔn wɛ a nɔ yí ɖo así ce. Kéze ɔ́, hwesivɔ́ gbe wɛ un nɔ nɔ, bɔ zǎn mɛ ɔ́, un nɔ nɔ avivɔ nu; un nɔ sixú dɔ́ amlɔ ǎ. Xwe ko wɛ un bló ɖo xwé towe gbe; un wa azɔ̌ nú we xɔ xwe wǒ-ɛnɛ ɖó vǐ towe we e un da lɛ́ɛ tamɛ, bó wa azɔ̌ nú we xɔ xwe ayizɛ́n ɖó gbɔ̌ towe lɛ́ɛ tamɛ. Azɔn mɔ̌kpán wɛ a hǐzí mì bó ɖe axɔ́ e a nǎ sú mì ɔ́ kpo. Nú é má nyí Mawu tɔ́ ce Ablaxámu tɔn, Mawu e nukɔn tɔ́ ce Izáki nɔ sísɔ́ ɖe ɔ́ wɛ ɖo gǔdo ce ǎ ɔ́, a nǎ kó nya mì din asígbá alɔgbá. É ká mɔ ya e un ji lɛ́ɛ, bó mɔ azɔ̌ e un wa ɔ́, bó gbo hwɛ nú mǐ sɔ zǎn mɛ.” Labáan ɖɔ nú Jakɔ́bu ɖɔ: “Nyɔ̌nuví nɛ́ lɛ́ɛ ɔ́, vǐ ce lɛ́ɛ wɛ yě nyǐ; kanlin nɛ́ lɛ́ɛ ɔ́, kanlin ce lɛ́ɛ wɛ; nǔ e mɔ wɛ a ɖe nɛ́ lɛ́ɛ bǐ wɛ nyí ce. Ani wɛ un sɔ́ sixú wa xá vǐ ce lɛ́ɛ, abǐ vǐ e yě ji lɛ́ɛ égbé din? Din ɔ́, nyɛ kpó hwi kpó ná nu alɛ, bɔ mǐ ná sɔ́ nǔɖé ɖó te bɔ é ná nɔ́ flín alɛ e mǐ nu ɔ́ mǐ.” Énɛ́ ɔ́, Jakɔ́bu sɔ́ awǐnnya ɖokpó tun te, bónú é ná nyí flǐn nú yě. Énɛ́ ɔ́ gúdo ɔ́, Jakɔ́bu ɖɔ nú mɛ tɔn lɛ́ɛ ɖɔ yě ní cyán awǐnnya, bó kplé ɖó fí ɖokpó, bɔ yě ɖu nǔ ɖo awǐnnya e yě bɛ́ kplé ɔ́ jí. Labáan sun nyǐ fínɛ́ ɖɔ “Yegáa Saxaduta”. Jakɔ́bu ɔ́ ká sun nyǐ fínɛ́ ɖɔ “Galeɛdi”. Labáan ɖɔ: “Awǐnnya nɛ́ lɛ́ɛ e è bɛ̌ kplé ɔ́ ɖe kúnnu nú hwi kpódó nyɛ kpó égbé.” Énɛ́ ɔ́ wú wɛ è sun nyǐ fí ɔ́ ɖɔ “Galeɛdi”. Galeɛdi sín tínmɛ wɛ nyí “Awǐnnya kplékplé kúnnuɖiɖe tɔn”. È nɔ lɛ́ ylɔ́ fínɛ́ ɖɔ “Misipa”; ɖó Labáan ɖɔ: “Mawu Mavɔmavɔ ní cɔ́ nyɛ kpó hwi kpó hwenu e mǐ má sɔ́ ná mɔ mǐɖée ǎ é. Misipa sín tínmɛ wɛ nyí ‘Tɛn e mɛ è nɔ cɔ́ mɛ ɖe ɔ́’. Nú a dǒ ya nú vǐ ce lɛ́ɛ ɔ́, nú a da nyɔ̌nu ɖěvo lɛ́ɛ dó yě jí ɔ́, é sɔ́ ná nyí ɖɔ gbɛtɔ́ wɛ ná ɖɔ gbo nú mǐ ǎ; nɔ flín ɖɔ Mawu ɖo mǐ mɔ wɛ.” Labáan lɛ́ ɖɔ nú Jakɔ́bu ɖɔ: “Awǐnnya e è bɛ̌ kplé ɔ́ nɛ́; awǐnnya e è tun te ɖo nyɛ kpó hwi kpó tɛ́ntin ɔ́ nɛ́. Awǐnnya e è bɛ̌ kplé ɔ́ kpó ée è sɔ́ tun te ɔ́ kpó wɛ nyí xlɛ́ ɖɔ nyɛ kún ná zɛ awǐnnya kplékplé énɛ́ wú, kpódó ée è tun te ɔ́ kpó wú wá gɔ̌n towe, bó wa nyanya nú we ó. Hwi lɔ kún ká ná zɛ awǐnnya kplékplé ɔ́, kpódó ée è tun te ɔ́ kpó wú wá gɔ̌n ce, bó wa nyanya nú mì ó. Mawu Ablaxámu tɔn, Mawu Naxɔ́ɔ tɔn ní nɔ́ dó hwɛ gbɔ nú mǐ.” Bɔ Jakɔ́bu xwlé Mawu e nukɔn Izáki tɔ́ tɔn nɔ́ sísɔ́ ɖe é. Jakɔ́bu sá vɔ̌ ɖokpó nú Mawu ɖo só ɔ́ jí, bó ylɔ́ mɛ tɔn lɛ́ɛ ɖɔ yě ní wá ɖu nǔ, bɔ yě ɖu nǔ ɔ́ ɖo só ɔ́ ta nǔgbó, bó dɔ́ fínɛ́. Bɔ Labáan fɔ́n zǎnzǎn tɛɛn, bó kí si nú vǐ tɔn lɛ́ɛ kpó vǐ tɔn ví lɛ́ɛ kpó, bó xo ɖɛ dó yě jí. Énɛ́ ɔ́ gúdo ɔ́, é lɛ́ kɔ yi xwé. Jakɔ́bu wlí ali tɔn ɖidó, bɔ wɛnsagun Mawu tɔn lɛ́ɛ wá kpé e. Ée é mɔ yě ɔ́, é ɖɔ: “Gɔnu Mawu tɔn wɛ.” Bó sun nyǐ fínɛ́ ɖɔ “Maxanayímu”. Maxanayímu sín tínmɛ wɛ nyí “Ahwankpá”. É sɛ́ mɛ tɔn lɛ́ɛ dó bɔ yě jɛ nukɔn n'i, bó yi nɔví tɔn Esawu gɔ́n ɖo Seyíi, ɖo Edɔ́mu gbé jí. Cóbónú yě ná yi ɔ́, é ɖɔ nú yě ɖɔ: “Mi ná ɖɔ nú fofó ce Esawu ɖɔ: ‘Mɛsɛntɔ́ towe Jakɔ́bu ɖɔ: Labáan gɔ́n wɛ un yi; gɔ̌n tɔn wɛ un nɔ káká jɛ din. Un ɖó nyibú gěgé, tócí kpó gbɔ̌ kpó kpɔ́ gégé. Un ɖó mɛsɛntɔ́ súnnu kpó nyɔ̌nu kpó kpɔ́ gégé, bó sɛ́ mɛ dó ɖɔ è nǐ wá ɖɔ nú mɛɖaxó ce bónú a nǎ nyɔ́ xomɛ dó wǔ ce.’ ” Ée mɛ lɛ́ɛ lɛ́ kɔ wá ɔ́, yě ɖɔ nú Jakɔ́bu ɖɔ: “Mǐ yi fofó towe Esawu gɔ́n, bɔ é kpó súnnu afɔwe (400) kpó jǎwe bó ná kpé we.” Ée Jakɔ́bu se mɔ̌ ɔ́, xɛsi ɖaxó ɖé jɛ jǐ tɔn, bɔ awakanmɛ kú i, bɔ é má mɛ e kpó é kpó zɔn lɛ́ɛ, gbɔ̌ tɔn lɛ́ɛ, nyibú tɔn lɛ́ɛ, kpódó lǎkúnmí tɔn lɛ́ɛ kpó ɖó donu we, bó ɖo ɖiɖɔ wɛ ɖɔ: “Din ɔ́, nú Esawu wá tɔ́n ahwan gbɛ̌ta ɖokpó, bó ɖu ɖo jǐ tɔn ɔ́, gbɛ̌ta ɖě ɔ́ ná hɔn.” Énɛ́ ɔ́ gúdo ɔ́, Jakɔ́bu xo ɖɛ ɖɔ: “Mawu Mavɔmavɔ! Mawu tɔ́gbó ce Ablaxámu tɔn, Mawu tɔ́gbó ce Izáki tɔn, a ɖɔ nú mì ɖɔ má lɛ́ kɔ yi to ce mɛ, fí e è ji mì ɖe ɔ́, bónú émí ná wa ɖagbe nú mì! Mawu Mavɔmavɔ! Nyɛ mɛsɛntɔ́ towe ɔ́, un hwe dó wǔjɔmɛ towe kpó gbejíninɔ towe kpó mɛ, ɖó kpogɛ ce jɛ́n un hɛn bó dó asá Judɛ́ɛn tɔ ɔ́. Din ɔ́, un ka ɖó nǔ káká bó ɖó gbɛtɔ́ gbɛ̌ta we. Bo kɛnklɛ́n bó hwlɛ́n mì ɖo fofó ce Esawu sí. Un ɖo xɛsi ɖi wɛ ɖɔ ní má wá hu mì ó. É má wá hu nyi kpó asi ce lɛ́ɛ kpó vǐ ce lɛ́ɛ kpó ó. Flín ɖɔ hwi ɖésú wɛ ɖɔ nú mì ɖɔ émí ná wa ɖagbe nú mì, émí ná bló bɔ vǐ ce lɛ́ɛ ná sukpɔ́ bɔ è nǎ sixú xa yě ǎ, nyɛ̌kɛ́n e ɖo xutó ɔ́ ɖɔhun.” Tɛn énɛ́ ɔ́ mɛ wɛ Jakɔ́bu jló ná dɔ́. Lo ɔ́, gbe nɛ́ gbe zǎn mɛ ɔ́, é ɖe nǔ e é hɛn lɛ́ɛ ɖě, bó ná ná fofó tɔn Esawu. É ɖe lɛ̌ngbɔ́ afɔɖé (200), gbǎgbá ko, gbɔ̌ afɔɖé (200), agbo ko. Lǎkúnmí asi gban (30), kpódó lǎkúnmí ví e ɖo anɔ̌ nu lɛ́ɛ kpó, nyibú asi kanɖé (40), nyibúsú wǒ, tócí asi ko, tócí asú wǒ. É kplé yě ɖó sonu sonu, bó bɛ́ jó nú mɛsɛntɔ́ tɔn lɛ́ɛ, bó ɖɔ nú yě ɖɔ: “Mi jɛ nukɔn nú mì; mi jó ali dó nyi kanlinhwan ɖokpó ɖokpó tɛ́ntin.” É ɖɔ nú mɛsɛntɔ́ e ɖo kanlin nukɔntɔn lɛ́ɛ nu ɔ́ ɖɔ nú fofó émítɔn Esawu kpé e, bó kan mɛ e sín mɛ é nyí ɔ́ byɔ́, bó kan fí e é xwe ɔ́ byɔ́, lobo kan mɛ e tɔn kanlin lɛ́ɛ nyí ɔ́ byɔ́ ɛ hǔn, ní yí gbe n'i ɖɔ: “Mɛsɛntɔ́ towe Jakɔ́bu tɔn wɛ. É wɛ sɛ́ dó hwi fofó tɔn Esawu, bó ná we. É ɖésúnɔ ká ɖo gǔdo jǎwe.” É ɖɔ nú mɛ wegɔ́ ɔ́ kpó mɛ atɔngɔ́ ɔ́ kpó, kpódó mɛ e xwedó kanlin lɛ́ɛ bǐ kpó ɖɔ nú yě kpé fofó émítɔn Esawu ɔ́, xó e yě ná ɖɔ n'i ɔ́ nɛ́. Yě ná ɖɔ n'i ɖɔ: “Mɛsɛntɔ́ towe Jakɔ́bu lɔ ɖo gǔdo mǐtɔn jǎwe.” É bló mɔ̌, bó ɖo ɖiɖɔ wɛ ɖɔ: “Un ná zé nǔ e un ná ɛ ɔ́ dó fá xomɛ n'i; énɛ́ ɔ́, nyɛ ɖésúnɔ ná wá yi gɔ̌n tɔn. Afɔ nyɔ́ ɔ́, é ná hun xomɛ bó yí mì kpó xomɛ fífá kpó.” Énɛ́ ɔ́, mɛsɛntɔ́ lɛ́ɛ jɛ nukɔn nú Jakɔ́bu, bó bɛ́ nǔ e é ná fofó tɔn lɛ́ɛ ɖidó. Jakɔ́bu ɖésú dɔ́ fí e yě ɖó gɔnu ɖó ɔ́ zǎn énɛ́ ɔ́ mɛ. Zǎn énɛ́ ɔ́ mɛ ɔ́, Jakɔ́bu sɔ́ nǔ bó kplá asi tɔn we lɛ́ɛ, mɛsɛntɔ́ tɔn nyɔ̌nu we lɛ́ɛ, kpódó vǐ tɔn wǒ-ɖokpó lɛ́ɛ kpó, bɔ yě dó asá Yabɔ́ku tɔ ɔ́ ɖo fí e é má yi do ɖe ǎ é. Mɛ tɔn lɛ́ɛ dó asá tɔ ɔ́ kpó nǔ e é ɖó lɛ́ɛ bǐ kpó. É wá kpo Jakɔ́bu ɖokpónɔ, bɔ nya ɖé wá dó alɔ xá ɛ káká jɛ ayǐtéhɔ̌nnu. Ée nya ɔ́ mɔ ɖɔ émí kún kpé Jakɔ́bu wú ó ɔ́, é dó nǔ alinmɛ nú Jakɔ́bu, bɔ alin tɔn sɛ. Nya ɔ́ ɖɔ: “Jǒ mì dó nú má yi, ɖó ayǐ ɖo hǐnhɔ́n wɛ.” Bɔ Jakɔ́bu ɖɔ n'i ɖɔ: “Nú a ma xo ɖɛ dó jǐ ce ǎ ɔ́, un ná jó we dó bɔ a nǎ yi ǎ.” Nya ɔ́ kanbyɔ́ Jakɔ́bu ɖɔ: “Nɛ̌ a nɔ nyí?” Bɔ é yí gbe n'i ɖɔ: “Un nɔ nyí Jakɔ́bu.” Nya ɔ́ ɖɔ n'i ɖɔ: “È sɔ́ ná nɔ́ ylɔ́ we ɖɔ Jakɔ́bu ǎ; bɛ́ sín din ɔ́, Izlayɛ́li wɛ è nǎ nɔ́ ylɔ́ we ɖɔ, ɖó a dǒ alɔ xá Mawu, bó dó alɔ xá gbɛtɔ́ lɛ́ɛ bó ɖu ɖ'é jí.” Ée nya ɔ́ ɖɔ mɔ̌ ɔ́, Jakɔ́bu ɖɔ n'i ɖɔ: “Kɛnklɛ́n bó ɖɔ nyǐkɔ towe nú mì.” Bɔ nya ɔ́ kanbyɔ́ ɛ ɖɔ: “A tunwun nyǐkɔ ce ǎ wɛ a?” Ée é ɖɔ mɔ̌ ɔ́, é xo ɖɛ dó jǐ tɔn ɖo fínɛ́. Jakɔ́bu sun nyǐ tɛn énɛ́ ɔ́ ɖɔ “Pɛnuwɛ́li”. Pɛnuwɛ́li sín tínmɛ wɛ nyí “Mawu sín nukún mɛ”. Đó é ɖo ɖiɖɔ wɛ ɖɔ: “Un mɔ Mawu nukún mɛ, bó lɛ́ kpo ɖo gbɛ.” Hwenu e hwe ɖo tíntɔ́n wɛ é wɛ Jakɔ́bu ɖo Pɛnuwɛ́li gosín wɛ; é ká nɔ́ tɔn, ɖó alin tɔn wútu. Nǔ e wú Izlayɛ́li ví lɛ́ɛ má nɔ́ ɖu lan e ɖo alingó jí ɔ́ káká jɛ égbé ǎ ɔ́ nɛ́. Đó Mawu dó nǔ Jakɔ́bu dó alin. Jakɔ́bu zé ta bo mɔ Esawu sɛ́ dó, bɔ gbɛtɔ́ afɔwe (400) ɖo gǔdo tɔn. Énɛ́ ɔ́, Jakɔ́bu má vǐ lɛ́ɛ. É bɛ́ vǐ e Lěya ji lɛ́ɛ nú Lěya, bó bɛ́ ée Hlacɛ́li ji lɛ́ɛ nú Hlacɛ́li, bó bɛ́ ée mɛsɛntɔ́ we lɛ́ɛ ji lɛ́ɛ nú yě mɛ ɖokpó ɖokpó. É bɛ́ mɛsɛntɔ́ we lɛ́ɛ kpó vǐ yětɔn lɛ́ɛ kpó ɖó nukɔn, bɔ Lěya kpó vǐ tɔn lɛ́ɛ kpó bɔ dó yě wǔ, bɔ Hlacɛ́li kpódó Jozɛ́fu kpó ɖo gǔdo. É ɖésúnɔ jɛ nukɔn nú yě, bó ɖo kɔ́ ɖe wɛ káká yi fofó tɔn gɔ́n. Azɔn tɛ́nwe wɛ é ɖe kɔ́ ɔ́. Esawu ka kán wezun yi kpé e, bó zunfán ɛ, bó kplá así kɔ n'i, bó kí si n'i, bɔ yě mɛ we lɛ́ɛ bɛ́ avǐ. Esawu zé ta bo mɔ nyɔ̌nu lɛ́ɛ kpó vǐ yětɔn lɛ́ɛ kpó, bó kanbyɔ́ Jakɔ́bu ɖɔ: “Mɛ̌ ká nyí mɛ élɔ́ lɛ́ɛ?” Bɔ Jakɔ́bu yí gbe n'i ɖɔ: “Vǐ e Mawu jɔwǔ mì, bó ná nyɛ mɛsɛntɔ́ towe ɔ́ lɛ́ɛ wɛ.” Mɛsɛntɔ́ nyɔ̌nu lɛ́ɛ kpó vǐ yětɔn lɛ́ɛ kpó sɛ wá, bó ɖe kɔ́. Lěya lɔ kpó vǐ tɔn lɛ́ɛ kpó sɛ wá, bó ɖe kɔ́. Jozɛ́fu kpó Hlacɛ́li kpó wá sɛ wá bó ɖe kɔ́. Bɔ Esawu kanbyɔ́ Jakɔ́bu ɖɔ: “Kanlin tobutóbú e un kpé nɛ́ lɛ́ɛ ɔ́, étɛ́ ná dó wa ná wɛ a ɖe?” Bɔ Jakɔ́bu yí gbe n'i ɖɔ: “Mɛɖaxó ce, hwi wɛ un hɛn wá ná, bónú a nǎ nyɔ́ xomɛ dó wǔ ce.” Bɔ Esawu ɖɔ n'i ɖɔ: “Nɔví ce, nǔ e un ɖó lɛ́ɛ kpé mì kpo. Hɛn towe lɛ́ɛ.” Bɔ Jakɔ́bu yí gbe n'i ɖɔ: “Éeǒ! Kɛnklɛ́n, a nyɔ̌ xomɛ dó wǔ ce nǔgbó hǔn, yǐ nǔ e un hɛn wá nú we lɛ́ɛ. Mɔ e un wá mɔ we ɔ́ cí Mawu wɛ un mɔ ɖɔhun. A yǐ mì tawun. Hǔn bo yí nǔ e è hɛn wá nú we lɛ́ɛ, ɖó Mawu jɔwǔ mì ɖésú, bɔ nǔ ɖěbǔ hwedó mì ǎ.” Jakɔ́bu jɛ kɔ nú Esawu káká bɔ é gbɔ bó yí nǔ lɛ́ɛ, bó ɖɔ nú Jakɔ́bu ɖɔ: “Wǎ mǐ yi; mǐ ní jɛ ali. Un ná nɔ nukɔn nú we.” Jakɔ́bu yí gbe n'i ɖɔ: “Mɛɖaxó ce, a tunwun ɖɔ vǐ lɛ́ɛ ɔ́, kɛ́ɖɛ́ kɛ́ɖɛ́ wɛ è nɔ hɛn yě. Un ka lɛ́ ɖó gbɔ̌ví kpó nyibúví kpó, bɔ yě kpo ɖo anɔ̌ nu. È zun zɔnlin dó yě jí syɛ́nsyɛ́n mɔ̌ nú kéze ɖokpó ɔ́, yě bǐ ná kú. Hǔn mɛɖaxó ce! Bo zɔn mǐ yi, bónú nyɛ mɛsɛntɔ́ towe ná xwedó zɔnlin yětɔn, bó ná zɔn dɛ̌dɛ̌ xá yě, káká wá hwi mɛɖaxó ce xwé ɖo Seyíi.” Esawu ɖɔ: “Un jló ɖɔ má jó mɛ ce lɛ́ɛ ɖě dó nú we.” Bɔ Jakɔ́bu yí gbe n'i ɖɔ: “Mɛɖaxó ce, étɛ́wú wɛ a ka ná bló mɔ̌? Vɛ̌ kó jɔwǔ mì kpowun!” Gbe nɛ́ gbe ɖokpó ɔ́, Esawu wlí ali ɖidó Seyíi, bɔ Jakɔ́bu ka ɖidó Sukɔ́tu. É gbá xɔ ɖokpó nú é ɖésúnɔ, bó dó azava nú kanlin tɔn lɛ́ɛ. Énɛ́ ɔ́ wú wɛ é ɖó nyǐkɔ nú tɛn énɛ́ ɔ́ mɛ ɖɔ Sukɔ́tu. Tínmɛ tɔn wɛ nyí azava lɛ́ɛ. Ée Jakɔ́bu lɛ́ kɔ sín Mɛzopotamíi taligbé tɔn ɔ́, é wá Sikɛ́mu ɖo Kanáa, wǔyɛ́yɛ́ afɔyɛ́yɛ́. É ɖó gɔnu ɖó toxo ɔ́ nukɔn. É xɔ ayǐkúngban e jí é dó goxɔ tɔn nyi ɔ́ ɖo Hamɔ́ɔ ví lɛ́ɛ sí. Tɔ́ yětɔn wɛ ɖó Sikɛ́mu toxo ɔ́ ayǐ. Gankwɛ́ kanwe ko (100) wɛ é xɔ ayǐkúngban ɔ́ yí. É mɛ vɔ̌sákpe ɖokpó nyi fínɛ́, bó sun nyǐ ɖɔ Ɛli-Elohe-Izlayɛ́li. Tínmɛ tɔn wɛ nyí Mawu, Mawu Izlayɛ́li tɔn. Vǐ nyɔ̌nu e Lěya ji nú Jakɔ́bu bɔ é nɔ́ nyí Dina ɔ́, xwe gbɛ̌ tɔn e ɖo to ɔ́ mɛ lɛ́ɛ ba kpɔ́n gbé gbe ɖokpó. Bɔ Sikɛ́mu mɔ ɛ, bó xo e sɔ́, bó hwlɛ́n kan xá ɛ, bó gbá vɔ n'i. Sikɛ́mu ɔ́, Hamɔ́ɔ e nyí Hivíti lɛ́ɛ sín gǎn ɔ́ sín vǐ wɛ. Ayi tɔn bǐ ɖo Dina Jakɔ́bu ví ɔ́ wú. É yí wǎn n'i, bɔ wǎn e é yí n'i ɔ́ nɔ́ ɖo jijɛ jí wɛ, bɔ é nɔ́ ɖo xó ɖagbe ɖagbe ɖɔ n'i wɛ. Énɛ́ ɔ́, Sikɛ́mu ɖɔ nú tɔ́ tɔn Hamɔ́ɔ ɖɔ ní byɔ́ vǐ ɔ́ nú émí, bónú émí ná da. Jakɔ́bu se ɖɔ è gbǎ avɔ nú vǐ émítɔn Dina ɔ́. Vǐ tɔn súnnu lɛ́ɛ ká kplá kanlin tɔn lɛ́ɛ yi amagbomɛ hwenɛ́nu. Énɛ́ ɔ́, é ɖɔ xó ɖě ǎ káká bɔ yě lɛ́ kɔ wá xwé gbe. Hamɔ́ɔ Sikɛ́mu sín tɔ́ ɔ́ yi Jakɔ́bu gɔ́n, bó ná ɖɔ xó n'i. Jakɔ́bu ví lɛ́ɛ kplá kanlin lɛ́ɛ sín amagbo mɛ ja xwé gbe, bó se nǔ e jɛ é, bɔ ahwi xo yě. Xomɛ sin yě ɖésú, ɖó xó e Sikɛ́mu ɖó xá Jakɔ́bu ví ɔ́, hɛ̌nnú wɛ é wa; è nɔ bló mɔ̌ ɖo Izlayɛ́li ǎ. Hamɔ́ɔ ɖɔ xó xá yě bó ɖɔ nú yě ɖɔ: “Vǐ ce Sikɛ́mu yí wǎn nú vǐ mitɔn; é yí wǎn n'i ɖésú; mi kɛnklɛ́n bó ná ɛ, bónú é ná da. Mǐ nǎ jɛ akɔ; mi ná nɔ́ ná vǐ mitɔn lɛ́ɛ mǐ bɔ mǐ ná nɔ́ da, bɔ mǐdɛɛ lɛ́ɛ ná nɔ́ ná mǐtɔn lɛ́ɛ e mi, bɔ mi ná nɔ́ da. Mi ná nɔ akpá mǐtɔn; to ɔ́ ɖo wɛn nú mi; mi ná nɔ fí, bó ná wa ajɔ̌, bó ná ɖó nǔkan.” Sikɛ́mu ɔ́ ka ɖɔ nú Dina sín tɔ́ kpó Dina sín nɔví lɛ́ɛ kpó ɖɔ: “Ényí mi byɔ́ nǔɖé mì bó ná dó jɔwǔ mì ɔ́, un ná ná mi. Mi byɔ́ agban mì, bónú é ní tlí, mi byɔ́ nǔ gěgé mì. Un ná ná nǔ e mi ná byɔ́ ɔ́ bǐ. Mi ní vɛ́ kó ná vǐ ɔ́ mì nú má da.” Lo ɔ́, ée Sikɛ́mu ko dó winnyá Jakɔ́bu ví súnnu lɛ́ɛ sín nɔví Dina ɔ́, yě sɔ́ sísɛ́ ɖó nukɔn dó yí gbe nú Sikɛ́mu kpódó tɔ́ tɔn Hamɔ́ɔ kpó. Yě ɖɔ nú yě ɖɔ: “Mǐ sixú da nɔví mǐtɔn nú mɛ e ma gbo ada ǎ é ǎ, ɖó winnyá wɛ é ná nyí nú mǐ. Nǔ e mi ná bló bɔ mǐ ná yí gbe nú xó mitɔn ɔ́ ɖíe; súnnu e ɖo mi mɛ lɛ́ɛ bǐ ná gbo ada mǐ ɖɔhun. Énɛ́ ɔ́, mǐ ná ná vǐ mǐtɔn lɛ́ɛ mi, bɔ mi ná da, bɔ mi lɔ ná ná vǐ mitɔn lɛ́ɛ mǐ bɔ mǐ ná da. Mǐ ná nɔ akpá mitɔn, bɔ mǐ ná kplé bó nyí togun ɖokpó. Nú mi ma ka se xó mǐtɔn bó gbo ada ǎ ɔ́, mǐ ná kplá vǐ mǐtɔn bó ɖidó.” Ée yě ɖɔ mɔ̌ ɔ́, Hamɔ́ɔ kpódó vǐ tɔn Sikɛ́mu kpó yí gbe nú xó yětɔn. Nyaví ɔ́ ká sɔ́ ɖó adagbigbo xó ɔ́ te ǎ, ɖó é yí wǎn nú Jakɔ́bu ví ɔ́ ɖésú; é wɛ è ka nɔ sí hú mɛ bǐ ɖo tɔ́ tɔn xwé. Hamɔ́ɔ kpó vǐ tɔn Sikɛ́mu kpó yi toxo ɔ́ sín hɔntogbó jí, bó kplé mɛ yětɔn lɛ́ɛ, bó ɖɔ nú yě ɖɔ: “Jakɔ́bu kpó mɛ tɔn lɛ́ɛ kpó ɔ́, mɛɖé wɛ yě nyí bó nyɔ́ xomɛ dó mǐ wú; yě ní nɔ to ɔ́ mɛ bó wa ajɔ̌; to ɔ́ gbló ganjí, bɔ yě ná mɔ tɛn ɖ'é mɛ. Mǐ nǎ nɔ́ da vǐ yětɔn nyɔ̌nu lɛ́ɛ, bɔ yě lɔ ná nɔ́ da mǐtɔn lɛ́ɛ. Lo ɔ́, cóbónú yě ná yí gbe bó nɔ akpá mǐtɔn, bɔ mǐ ná bló togun ɖokpó ɔ́, nǔ ɖokpó tíin bɔ mǐ ná to bló hwɛ̌; é wɛ nyí ɖɔ súnnu e ɖo mǐ mɛ lɛ́ɛ ɖó ná gbo ada yě ɖésúnɔ ɖɔhun. Ényí mǐ bló nǔ e yě byɔ́ mǐ, cóbó ná sixú nɔ akpá mǐtɔn ɔ́, kanlin yětɔn lɛ́ɛ kpó dɔkun yětɔn lɛ́ɛ bǐ kpó ma ná nyí mǐtɔn a?” Mɛ e wá kplé ɖo tɛn ɔ́ mɛ lɛ́ɛ bǐ yí gbe nú xó e Hamɔ́ɔ kpódó vǐ tɔn Sikɛ́mu kpó ɖɔ ɔ́, bɔ súnnu e ɖo yě mɛ, bó wá fínɛ́ lɛ́ɛ bǐ gbo ada. Azǎn tɔn atɔngɔ́ ɔ́ gbe, gbe e gbe ada ɔ́ ɖo nǔ wa xá yě wɛ ganjí ɔ́, Jakɔ́bu ví súnnu we, Sinmɛnyɔ́ɔ kpódó Levíi kpó sún hwǐ, bó byɔ́ toxo ɔ́ mɛ, bó hu súnnu e ɖo toxo ɔ́ mɛ lɛ́ɛ bǐ; mɛɖé lɛ́n nǔ mɔ̌hunkɔ dó yě wú ǎ. Sinmɛnyɔ́ɔ kpó Levíi kpó ɔ́, Dina sín nɔví wɛ yě nyí. Yě hu Hamɔ́ɔ lɔ, kpódó vǐ tɔn Sikɛ́mu kpó, bó kplá Dina sín Sikɛ́mu xɔ mɛ, bó tɔ́n. Jakɔ́bu ví súnnu e kpo lɛ́ɛ bɛ́ nǔ e ɖo cyɔ lɛ́ɛ wú lɛ́ɛ bǐ, bó fɔ nǔ e ɖo toxo ɔ́ mɛ lɛ́ɛ bǐ, ɖó è dǒ winnyá nɔví yětɔn. Yě bɛ̌ gbɔ̌ yětɔn lɛ́ɛ, bó bɛ́ nyibú yětɔn lɛ́ɛ kpódó tócí yětɔn lɛ́ɛ kpó. Yě bɛ̌ nǔ e ɖo toxo ɔ́ mɛ lɛ́ɛ bǐ kpódó nǔ e ɖo gletoxo mɛ lɛ́ɛ kpó. Yě bɛ̌ dɔkun yětɔn lɛ́ɛ bǐ, bó bɛ́ vǐ yětɔn lɛ́ɛ kpó asi yětɔn lɛ́ɛ kpó, bó bɛ́ nǔ e ɖo xwé yětɔn gbe lɛ́ɛ bǐ. Énɛ́ ɔ́, Jakɔ́bu ɖɔ nú Levíi kpó Sinmɛnyɔ́ɔ kpó ɖɔ: “Nǔ énɛ́ e mi bló din bɔ un húzú nǔ gbɛ́hɛn nú to ɔ́ mɛ nu lɛ́ɛ, Kanáanu lɛ́ɛ, kpó Pɛliziti lɛ́ɛ kpó ɔ́, kɛn wɛ mi ba nú mì. Yě ná xísí dó mì, bó tɔ́n ahwan mì bo ɖu ɖo jǐ ce, bó sú nyɛ kpódó xwédo ce kpó sín kún dó, ɖó mɛ kwín we ɖé jɛ́n un ɖó.” Bɔ vǐ lɛ́ɛ yí gbe n'i ɖɔ: “È nǎ wa nǔ xá nɔví mǐtɔn agalɛtɔ́ ɖɔhun mɔ̌ bɔ mǐdɛɛ lɛ́ɛ ná xwɛ wɛ a?” Énɛ́ ɔ́ gúdo ɔ́, Mawu ɖɔ nú Jakɔ́bu ɖɔ: “Sɔ́ nǔ bó yi Betɛ́li, bó nɔ fínɛ́. A nǎ mɛ vɔ̌sákpe ɖokpó ɖó fínɛ́ nú nyɛ Mawu e tɔ́n dó jǐ towe hwenu e a ɖo hinhɔn nú nɔví towe Esawu wɛ é.” Bɔ Jakɔ́bu ɖɔ nú xwédo tɔn kpódó mɛ e ɖo kpɔ́ xá ɛ lɛ́ɛ bǐ kpó ɖɔ: “Mi bɛ́ vodún mitɔn lɛ́ɛ bǐ síin. Mi slá wǔ bó ɖyɔ́ awu. Mǐ ná sɔ́ nǔ bó ná yi Betɛ́li. Un ná mɛ vɔ̌sákpe ɖokpó nú Mawu ɖó fínɛ́. É wɛ yí ɖɛ ce gbe e gbe adǎn gbo mì é. É wɛ nɔ gǔdo ce bɔ un yi tomɛ bó wá.” Énɛ́ ɔ́, yě bɛ̌ vodún yětɔn lɛ́ɛ bǐ, kpódó tógbé e ɖo tó yětɔn mɛ lɛ́ɛ bǐ kpó jó nú Jakɔ́bu, bɔ Jakɔ́bu dó bǐ do ɖó cɛ́nitín e ɖo Sikɛ́mu kpá ɔ́ sá. Énɛ́ ɔ́ gúdo ɔ́, yě ɖidó. Toxo e lɛ́ lɛ̌ dó yě lɛ́ɛ jɛ xɛsi ɖi nú Mawu jí; énɛ́ ɔ́, mɛɖé sɔ́ jɛ Jakɔ́bu ví lɛ́ɛ gbé mɛ ǎ. Jakɔ́bu kpódó mɛ e kpó é kpó zɔn lɛ́ɛ bǐ kpó wá Lǔzi. Lǔzi ɔ́ wɛ ɖo Betɛ́li nyí wɛ ɖo Kanáa tomɛ. É mɛ vɔ̌sákpe ɖokpó ɖó fínɛ́, bó sun nyǐ tɛn énɛ́ ɔ́ mɛ ɖɔ: “Ɛli-Betɛ́li”. Ɛli-Betɛ́li sín tínmɛ wɛ nyí “Mawu Betɛ́li tɔn”, ɖó fínɛ́ wɛ Mawu tɔ́n dó jǐ tɔn ɖe hwenu e é ɖo hinhɔn nú nɔví tɔn wɛ é. Debola kú bɔ è ɖi i ɖó cɛ́nitín ɖé sá, ɖo Betɛ́li sín afɔligbé, bó nɔ́ ylɔ́ atín ɔ́ ɖɔ avǐcɛ́nitín. Debola wɛ nɔ ná anɔ̌ Hlebeka. Ée Jakɔ́bu lɛ́ kɔ sín Mɛzopotamíi taligbé tɔn ɔ́, Mawu lɛ́ tɔ́n dó jǐ tɔn, bó xo ɖɛ dó jǐ tɔn, bó ɖɔ n'i ɖɔ: “Jakɔ́bu wɛ a nɔ nyí; amɔ̌, din ɔ́, è sɔ́ nǎ nɔ́ ylɔ́ we ɖɔ mɔ̌ ǎ; Izlayɛ́li wɛ a nǎ nɔ́ nyí.” Lě e Mawu sun nyǐ i ɖɔ Izlayɛ́li gbɔn ɔ́ nɛ́. Mawu lɛ́ ɖɔ n'i ɖɔ: “Mawu Nǔbǐwúkpétɔ́ wɛ un nyí. Ji bó gba kún. Vǐ towe lɛ́ɛ ná sukpɔ́ káká bó ná nyí akɔta ɖokpó. Akɔta wɔ̌buwɔ́bú wɛ yě ná tlɛ nyí, lobɔ axɔ́sú ná tɔ́n ɖo vǐ towe lɛ́ɛ mɛ. Un ná ná we to e un ná Ablaxámu kpódó Izáki kpó ɔ́, bó ná ná vǐ e ná nɔ do towe mɛ lɛ́ɛ.” Ée Mawu ɖɔ xó nú Jakɔ́bu gúdo ɔ́, é gosín fí e é ɖɔ xó n'i ɖe é. Bɔ Jakɔ́bu sɔ́ awǐnnya ɖokpó tun te fí e Mawu ɖɔ xó n'i ɖe ɔ́, bó kɔn vɛ̌ɛn kpó ami kpó d'é jí. Jakɔ́bu sun nyǐ fí e Mawu tɔ́n dó jǐ tɔn ɖe ɔ́ ɖɔ Betɛ́li. Énɛ́ ɔ́ gúdo ɔ́, Jakɔ́bu kpó hɛ̌nnu tɔn kpó gosín Betɛ́li ɖidó. Fí e yě kpo ɖe dó Efláta ɔ́ hwe ǎ, bɔ Hlacɛ́li ji vǐ. Vǐjiji ɔ́ syɛ́n dó e. Hwenu e vǐnú ɖo wiwa ɛ wɛ ɔ́, nyɔ̌nu e ɖo aji n'i ɔ́ nɔ́ ɖɔ n'i ɖɔ: “Ma ɖi xɛsi ó. Súnnu ná ji wɛ a lɛ̌ ɖe.” Hlacɛ́li ɖo nǎ kú wɛ, bɔ cóbónú gbɔjɛ tɔn ná xwɛ ɔ́, é sun nyǐ vǐ ɔ́ ɖɔ Bɛni-Oníi; Bɛni-Oníi sín tínmɛ wɛ nyí wǔvɛ́sise sín vǐ. Lo ɔ́, vǐ tɔ́ ɔ́ sun nyǐ i ɖɔ Bɛnjamɛ́ɛ. Bɛnjamɛ́ɛ sín tínmɛ wɛ nyí ɖisílɔ ce sín vǐ. Hlacɛ́li kú bɔ è ɖi i dó Efláta lixo. To énɛ́ ɔ́ wɛ nyí Bɛteleyɛ́mu. Jakɔ́bu zé awǐnnya ɖokpó tun te yɔ tɔn jí. Awǐnnya énɛ́ kpo ɖo Hlacɛ́li yɔta káká wá jɛ égbé. Énɛ́ ɔ́ gúdo ɔ́, Izlayɛ́li yi bó yi dó goxɔ tɔn ɖó Migidalu-Edɛ́ɛ gúdo. Hwenu e Izlayɛ́li kpo ɖo gbě énɛ́ ɔ́ jí ɔ́, Hwlibɛ́ni yi ɖó xó xá Biluha tɔ́ tɔn sín asi ɖokpó, bɔ tɔ́ ɔ́ se. Vǐ súnnu wěwe wɛ Jakɔ́bu ɖó. Vǐ súnnu e Lěya ji n'i lɛ́ɛ ɖíe: Hwlibɛ́ni, Sinmɛnyɔ́ɔ, Levíi, Judáa, Isakáa, kpó Zabulɔ́ɔn kpó. Hwlibɛ́ni wɛ nyí nukɔngbéví Jakɔ́bu tɔn. Hlacɛ́li sín vǐ súnnu lɛ́ɛ ɖíe: Jozɛ́fu kpó Bɛnjamɛ́ɛ kpó. Mɛsɛntɔ́ Hlacɛ́li tɔn Biluha sín vǐ súnnu lɛ́ɛ ɖíe: Dan kpódó Nɛfutali kpó. Mɛsɛntɔ́ Lěya tɔn Zilupa tɔn lɛ́ɛ ɖíe: Gadi kpódó Acɛ́ɛ kpó. Jakɔ́bu sín vǐ súnnu e è ji n'i ɖo Mɛzopotamíi taligbé tɔn lɛ́ɛ sín nyǐkɔ lɛ́ɛ nɛ́. Jakɔ́bu wá tɔ́ tɔn Izáki gɔ́n, ɖo Mamulée, ɖo Kiliyati-Aaba. To énɛ́ ɔ́ wɛ ɖo Eblɔ́n nyí wɛ din. Fínɛ́ wɛ Ablaxámu kpó Izáki kpó nɔ ɖ'ayǐ. Izáki nɔ gbɛ xɔ xwe kɛnnɛ ko (180). Izáki nɔ kpikpoxɔmɛ ɖésú. É wá kú, bó yi su tɔ́gbó tɔn lɛ́ɛ. Vǐ tɔn Esawu kpó Jakɔ́bu kpó ɖi i. Esawu e è nɔ lɛ́ ylɔ́ ɖɔ Edɔ́mu ɔ́ sín vǐ lɛ́ɛ ɖíe: É da asi tɔn lɛ́ɛ ɖo Kanáanu lɛ́ɛ mɛ: é da Ada, Elɔ́ni Hitíti ɔ́ sín vǐ, bó da Oxoliváma Ana ví ɔ́. Ana ɔ́, Siveɔ́ni Hivíti ɔ́ sín vǐ wɛ. É lɛ́ da Basimáti, Isimayɛ́li ví ɔ́; Basimáti ɔ́, Nɛbayɔ́ti nɔví wɛ. Ada ɔ́ ji Elifázi; Basimáti ɔ́ ji Hlewuyɛ́li. Oxoliváma ɔ́ ka ji Yewúci, Yaelámu, kpódó Koláxi kpó. Vǐ súnnu e è ji nú Esawu ɖo Kanáa lɛ́ɛ nɛ́. É su gbe ɖokpó bɔ Esawu kplá asi tɔn lɛ́ɛ, bó kplá vǐ tɔn súnnu lɛ́ɛ kpó nyɔ̌nu lɛ́ɛ kpó, kpódó mɛsɛntɔ́ tɔn lɛ́ɛ bǐ kpó. É bɛ́ gbɔ̌hwan tɔn lɛ́ɛ kpódó kanlin tɔn lɛ́ɛ kpó, kpódó dɔkun e é jɛ ɖo Kanáa ɔ́ bǐ kpó, bó yi to ɖěvo mɛ, bó lín dó nɔví tɔn Jakɔ́bu. Đó dɔkun e yě jɛ lɛ́ɛ sukpɔ́ káká, bɔ yě sixú nɔ kpɔ́ ǎ. Ayǐkúngban e jí yě ɖe ɔ́ sɔ́ kpé bónú kanlin yětɔn lɛ́ɛ ná mɔ nǔ ɖu ǎ. Énɛ́ ɔ́, Esawu jɛ agban nyi sókan mɛ ɖo Eyíi. Esawu wɛ nɔ lɛ́ nyí Edɔ́mu. Esawu ví lɛ́ɛ sín nyǐkɔ ɖíe: è nɔ lɛ́ ylɔ́ yě ɖɔ Edɔ́munu lɛ́ɛ; yě nɔ́ nɔ sókan mɛ ɖo Seyíi. Vǐ tɔn we sín nyǐkɔ ɖíe: Elifázi, asi tɔn Ada ví ɔ́, Hlewuyɛ́li, asi tɔn Basimáti ví ɔ́. Elifázi ɔ́, vǐ tɔn lɛ́ɛ wɛ nyí Temani, Omáa, Sefóo, Gayetámu kpódó Kenázi kpó. Elifázi lɛ́ ɖó asi ɖokpó, bɔ é nɔ́ nyí Timuna; éyɛ́ ji vǐ súnnu ɖokpó n'i, bɔ vǐ ɔ́ nɔ́ nyí Amalɛ́ki. Esawu kpó asi tɔn Ada kpó sín vǐvú lɛ́ɛ nɛ́. Hlewuyɛ́li sín vǐ súnnu lɛ́ɛ wɛ nyí Naxáti, Zeláxi, Camúma kpódó Miziza kpó. Esawu kpódó asi tɔn Basimáti kpó sín vǐvú lɛ́ɛ nɛ́. Esawu sín asi Oxoliváma e nyí Ana ví, bó nyí Siveɔ́ni sín vǐvú ɔ́ ji Yewúci, Yaelámu kpódó Koláxi kpó. Mɛ e jɔ ɖo Esawu kún mɛ, bó nyí gǎn ɖo akɔta lɛ́ɛ nu lɛ́ɛ sín nyǐkɔ ɖíe: Nukɔngbéví Esawu tɔn Elifázi ɔ́, vǐ tɔn e nyí gǎn lɛ́ɛ sín nyǐkɔ ɖíe: Temani, Omáa, Sefóo, Kenázi, Koláxi, Gayetámu, Amalɛ́ki. Elifázi sín vǐ e nyí gǎn ɖo Edɔ́mu lɛ́ɛ nɛ́. Ada wɛ nyí nɔ yětɔn. Hlewuyɛ́li Esawu ví ɔ́ sín vǐ e nyí gǎn lɛ́ɛ sín nyǐkɔ ɖíe: Naxáti, Zeláxi, Camúma, Miziza. Hlewuyɛ́li sín vǐ e nyí gǎn ɖo Edɔ́mu lɛ́ɛ nɛ́. Esawu sín asi Basimáti ɔ́ sín vǐvú lɛ́ɛ wɛ. Esawu sín vǐ e nyí gǎn lɛ́ɛ ɖíe: Yewúci, Yaelámu, Koláxi. Asi tɔn Oxoliváma, Ana ví ɔ́ wɛ ji yě n'i. Hǔn Esawu vívú e nyí gǎn ɖo akɔta lɛ́ɛ nu ɖo Edɔ́mu lɛ́ɛ sín nyǐkɔ nɛ́. Seyíi Holiti ɔ́ sín vǐ e nyí gǎn lɛ́ɛ sín nyǐkɔ ɖíe: yě wɛ kó ɖo Edɔ́mu to ɔ́ mɛ cóbɔ Esawu wá; yě wɛ nyí Lotáni, Covalu, Siveɔ́ni, Ana, Dicɔ́ni, Esɛ́ɛ kpódó Dicáni kpó; Seyíi sín vǐ wɛ yě nyǐ, bɔ è ji yě ɖo Edɔ́mu. Lotáni ɔ́, vǐ tɔn lɛ́ɛ sín nyǐkɔ ɖíe: Holi kpódó Hemamu kpó; Lotáni ɖó nɔví nyɔ̌nu ɖokpó, bɔ è nɔ ylɔ́ ɛ ɖɔ Timuna. Covalu ɔ́, vǐ tɔn lɛ́ɛ sín nyǐkɔ ɖíe: Aluwáni, Manaxáti, Evalu, Cefó kpódó Ɔnámu kpó. Siveɔ́ni ɔ́, vǐ tɔn súnnu lɛ́ɛ sín nyǐkɔ ɖíe: Aya kpódó Ana kpó. Ana ɔ́ wɛ mɔ sin zozo sín jɔtɛn ɖo gbětótló mɛ, hwenu e é ɖo tɔ́ tɔn sín tócí lɛ́ɛ nyi wɛ é. Ana ɔ́, vǐ tɔn súnnu ɔ́ nɔ́ nyí Dicɔ́ni, bɔ nyɔ̌nu ɔ́ nɔ́ nyí Oxoliváma. Dicáni ɔ́, vǐ tɔn súnnu lɛ́ɛ sín nyǐkɔ ɖíe: Hɛmudani, Ɛcibáni, Yitlani kpódó Keláni kpó. Esɛ́ɛ ɔ́, vǐ tɔn súnnu lɛ́ɛ sín nyǐkɔ ɖíe: Biluháni, Zaawani kpódó Akáni kpó. Dicáni ɔ́, vǐ tɔn súnnu lɛ́ɛ sín nyǐkɔ ɖíe: Wúsi kpó Alani kpó. Holiti lɛ́ɛ sín akɔtagán lɛ́ɛ ɖíe: Lotáni, Covalu, Siveɔ́ni, Ana, Dicɔ́ni, Esɛ́ɛ kpó Dicáni kpó. Holiti lɛ́ɛ sín gǎn lɛ́ɛ nɛ́. Yě wɛ nyí gǎn e nɔ Seyíi é. Axɔ́sú e kpa acɛ ɖo Edɔ́mu ɖě jɛ ɖě gúdo cóbɔ axɔ́sú ɖokpó wá ɖu gǎn ɖo Izlayɛ́li ví lɛ́ɛ nu ɔ́, nyǐkɔ yětɔn ɖíe: Bɛ́la, Beɔ́ɔ ví ɔ́; toxo e mɛ é nɔ ɔ́ nɔ́ nyí Dinava. Bɛ́la wá kú, bɔ Yovavu Zeláxi ví Boslanu ɔ́ ɖu axɔ́sú ɖo tɛn tɔn mɛ. Yovavu kú bɔ Hucámu Temaninu ɔ́ ɖu axɔ́sú ɖo tɛn tɔn mɛ. Hucámu kú, bɔ Hadádi, Bedádi ví ɔ́ ɖu axɔ́sú ɖo tɛn tɔn mɛ. É wɛ ɖu ɖo Madiáani ví lɛ́ɛ jí ɖo Mɔwabu gbé jí. Toxo e mɛ é jɔ ɖe ɔ́ nɔ́ nyí Awíti. Hadádi kú, bɔ Samula, Maslekanu ɔ́ ɖu axɔ́sú ɖo tɛn tɔn mɛ. Samula kú, bɔ Cawúlu Hlexɔvɔ́tinu ɔ́ ɖu axɔ́sú ɖo tɛn tɔn mɛ. Hlexɔvɔ́ti ɔ́ ɖo Efláti tɔ ɔ́ kpá. Cawúlu kú, bɔ Baalu-Hanáni Akubɔ́ɔ ví ɔ́ ɖu axɔ́sú ɖo tɛn tɔn mɛ. Baalu-Hanáni ɔ́ kú, bɔ Hadáa ɖu axɔ́sú ɖo tɛn tɔn mɛ. Toxo e mɛ é jɔ ɖe ɔ́ nɔ́ nyí Pawu. Asi tɔn nɔ nyí Mɛxetaveyɛ́li. Asi tɔn ɔ́, Matlɛ́di ví wɛ; Matlɛ́di ɔ́ ká nyí Mɛ-Zahavu vívú. Esawu ví e nyí gǎn ɖo akɔta yětɔn yětɔn mɛ, ɖo to yětɔn yětɔn mɛ lɛ́ɛ sín nyǐkɔ ɖíe: Timuna, Aluwa, Yetɛ́ti, Oxoliváma, Ela, Pinɔ́nu, Kenázi, Temani, Mivusáa, Magidiɛ́li kpó Ilamu kpó. Hǔn Esawu ví e nyí gǎn ɖo Edɔ́mu lɛ́ɛ nɛ́. Yě ɖǒ xwé yětɔn yětɔn ɖo to yětɔn yětɔn mɛ. Esawu wɛ nyí Edɔ́munu lɛ́ɛ sín tɔ́gbó. Jakɔ́bu nɔ Kanáa. Fínɛ́ wɛ tɔ́ tɔn kó nɔ ɖ'ayǐ. Jakɔ́bu ví lɛ́ɛ sín tan ɖíe: Jozɛ́fu ɔ́, nyaví dɔ̌nkpɛvú ɖé wɛ, bó ɖó xwe afɔtɔn-nukún-we. Kanlin wɛ é kpó nɔví tɔn lɛ́ɛ kpó nɔ́ nyi. Nɔví tɔn énɛ́ lɛ́ɛ ɔ́, tɔ́ tɔn sín asi Biluha kpó Zilupa kpó sín vǐ lɛ́ɛ wɛ. Jozɛ́fu nɔ wá ɖɔ xó nyanya e mɛ lɛ́ɛ nɔ ɖɔ dó yě wú ɔ́ nú tɔ́ yětɔn. Izlayɛ́li ka yí wǎn nú Jozɛ́fu hú vǐ tɔn ɖě lɛ́ɛ bǐ, ɖó kpikpoxɔmɛ wɛ é ɖe bó ji i. É tɔ awu ɖaxó ɖokpó n'i, bɔ é ɖó hwɛkan gěgé. Jozɛ́fu sín nɔví lɛ́ɛ mɔ ɖɔ tɔ́ émítɔn yí wǎn nú éyɛ́ hú émí bǐ, lobo gbɛ́ wǎn n'i káká bó sɔ́ nɔ ɖɔ xó xá ɛ kpó wǎn yíyí kpó ǎ. Jozɛ́fu kú dlɔ̌ gbe ɖokpó, bó ɖɔ dlɔ̌ e é kú ɔ́ nú nɔví tɔn lɛ́ɛ bɔ yě lɛ́ gbɛ́ wǎn n'i d'é jí. É ɖɔ nú yě ɖɔ: “Mi ɖótó dlɔ̌ e un kú ɔ́. Un kú dlɔ̌ bɔ mǐ ɖo gle mɛ, bó ɖo nǔkún e mǐ ya lɛ́ɛ blá wɛ, bɔ un ná mɔ nǔɖé kpowun ɔ́, nǔkúnkɔ e nyɛ blá ɔ́ fɔ́n xwete, bɔ midɛɛ lɛ́ɛ tɔn e mi blá lɛ́ɛ wá lɛ́ lɛ̌ dó e, bó yi do n'i.” Ée é ɖɔ mɔ̌ ɔ́, nɔví tɔn lɛ́ɛ kanbyɔ́ ɛ ɖɔ: “A nǎ wá ɖu axɔ́sú nú mǐ ɖɔ wɛ a ɖe nɛ́ hǔn?” Bɔ dlɔ̌ e é kú ɔ́ kpó xó e é nɔ́ ɖɔ lɛ́ɛ kpó zɔ́n bɔ yě lɛ́ gbɛ́ wǎn n'i d'é jí. Jozɛ́fu lɛ́ kú dlɔ̌ ɖěvo bó lɛ́ wlí ɖɔ nú nɔví tɔn lɛ́ɛ. É ɖɔ nú yě ɖɔ: “Un lɛ́ kú dlɔ̌ ɖěvo. Un kú dlɔ̌, bɔ hwe kpó sun kpó sunví wǒ-ɖokpó kpó yi do nú mì.” Ée Jozɛ́fu ɖɔ dlɔ̌ e é kú ɔ́ nú tɔ́ tɔn kpó nɔví tɔn lɛ́ɛ kpó mɔ̌ ɔ́, tɔ́ tɔn bɛ́ adǎn dó jǐ tɔn, bó kanbyɔ́ ɛ ɖɔ: “Dlɔ̌ tɛ́ nyí dlɔ̌ énɛ́ ɔ́ bɔ a kú? Nyɛ kpó nɔ towe kpó nɔví towe lɛ́ɛ kpó ɔ́, mǐ ɖó ná yi do nú we ɖɔ wɛ a ɖe nɛ́ hǔn!” Nɔví tɔn lɛ́ɛ nɔ́ hwan wǔ dó e. Tɔ́ tɔn ká hɛn nǔ nɛ́ ɔ́ e jɛ ɔ́ ayi mɛ. Jozɛ́fu sín nɔví lɛ́ɛ yi tɔ́ yětɔn sín gbɔ̌ lɛ́ɛ nyi gbé ɖo Sikɛ́mu. É wá su gbe ɖokpó, bɔ Izlayɛ́li ɖɔ nú Jozɛ́fu ɖɔ: “Nɔví towe lɛ́ɛ ɖo kanlin lɛ́ɛ nyi wɛ ɖo Sikɛ́mu. Wǎ nú má sɛ́ we dó gɔ̌n yětɔn.” Jozɛ́fu ka ɖɔ n'i ɖɔ: “É nyɔ́!” Énɛ́ ɔ́, Izlayɛ́li ɖɔ n'i ɖɔ: “Yi kpɔ́n ɖɔ nɔví towe lɛ́ɛ ɖo ganjí a jí, kanlin lɛ́ɛ lɔmɔ̌ ɖo ganjí a jí. Nú a ko yi ɔ́, a nǎ wá ɖɔ lě e yě ɖe gbɔn ɔ́ nú mì.” Tɔdo Eblɔ́n tɔn ɔ́ mɛ wɛ Izlayɛ́li nɔ bó sɛ́ Jozɛ́fu dó Sikɛ́mu. Ée Jozɛ́fu yi Sikɛ́mu ɔ́, é ɖo flúflú wɛ gbɔn gle ta gle ta, bɔ nya ɖé mɔ ɛ, bó kanbyɔ́ ɛ ɖɔ: “Étɛ́ ba wɛ a ɖe?” Bɔ Jozɛ́fu yí gbe nú nya ɔ́ ɖɔ: “Nɔví ce lɛ́ɛ ba wɛ un ɖe; kɛnklɛ́n bó ɖɔ fí e nyi kanlin yětɔn lɛ́ɛ gbɔn wɛ yě ɖe ɔ́ nú mì.” Bɔ nya ɔ́ ɖɔ: “Yě kó gosín fí, un se bɔ yě ɖo ɖiɖɔ wɛ ɖɔ émí ná yi Dotáni.” Ée Jozɛ́fu se mɔ̌ ɔ́, é dó mɔ̌ nú nɔví tɔn lɛ́ɛ, bó yi mɔ yě ɖo Dotáni. Jozɛ́fu sín nɔví lɛ́ɛ mɔ ɛ jǎwe. Cóbónú é ná wá gɔ̌n yětɔn ɔ́, yě blǎ gbě ɖɔ émí ná hu i. Yě jɛ ɖiɖɔ nú yěɖée jí ɖɔ: “Hǐn! Mi kpɔ́n! Dlɔ̌kútɔ́ mǐtɔn nɛ́ jǎwe nɛ́! Din ɔ́, mi nú mǐ ná hu i, bó ná sɔ́ cyɔ tɔn nyi dó dotɔ mɛ, bó ná yi ɖɔ adǎnkanlin wɛ wlí i ɖu. Énɛ́ ɔ́, mǐ ná kpɔ́n ɖɔ dlɔ̌ e é kú lɛ́ɛ ná ɖi nǔgbó ají.” Hwlibɛ́ni se gbě e blá wɛ yě ɖe ɔ́, bó hwlɛ́n Jozɛ́fu ɖo yě sí. É ɖɔ nú yě ɖɔ: “Mǐ ní má hu i ó.” Hwlibɛ́ni lɛ́ ɖɔ: “Mǐ ní ma kɔn hun nyi ayǐ ó. Mǐ ní sɔ́ ɛ nyi dó dotɔ e ɖo gbětótló mɛ fí ɔ́ mɛ kpowun. Mǐ ní ma hu i ó.” É ɖɔ mɔ̌ ɖó é jló ná hwlɛ́n Jozɛ́fu ɖo yě sí, bó ná lɛ́ kɔ n'i sɛ́ dó tɔ́ tɔn wú wɛ é ɖɔ mɔ̌. Ée Jozɛ́fu wá nɔví tɔn lɛ́ɛ gɔ́n lě tlóló ɔ́, yě zɔn jǐ tɔn, bó ɖe awu gaga hwɛkannɔ e ɖo kɔ n'i ɔ́, lobo sɔ́ ɛ nyi dó dotɔ ɔ́ mɛ; dotɔ ɔ́ ká kó mɛ bǐ; sin ɖěbǔ ɖ'é mɛ ǎ. Ée yě bló mɔ̌ ɔ́, yě wǎ jínjɔ́n ayǐ, bó ná ɖu nǔ. Hwenu e yě ɖo nǔ ɖu wɛ ɔ́, yě mɔ Isimayɛ́li ví lɛ́ɛ sín sɔ́ lɛ́ɛ gosín Galadi jǎwe. Isimayɛ́li ví lɛ́ɛ dó nǔsáwǔ wǎnɖagbenɔ kpó célu kpó, kpódó atínhúnhɔ́n wǎnɖagbenɔ kpó sín agban nú lǎkúnmí yětɔn lɛ́ɛ, bó xwe Ejípu. Énɛ́ ɔ́, Judáa ɖɔ nú nɔví tɔn lɛ́ɛ ɖɔ: “Nú mǐ hu nɔví mǐtɔn bó sɔ́ cyɔ tɔn hwlá ɔ́, le tɛ́ wɛ ɖ'é mɛ nú mǐ? Mi gbɔ nú mǐ ná sɔ́ ɛ sa nú Isimayɛ́li ví lɛ́ɛ. Mǐ ní má hu i ó, ɖó nɔví mǐtɔn wɛ é nyí; hun mǐtɔn wɛ.” Bɔ nɔví tɔn lɛ́ɛ yí gbe nú xó e é ɖɔ ɔ́. Ée ajɔ̌tɔ́ Madiáani ví lɛ́ɛ jɛ fínɛ́ ɔ́, Jozɛ́fu sín nɔví lɛ́ɛ ɖe e tɔ́n sín dotɔ ɔ́ mɛ, bó sɔ́ ɛ sa. Yě sɔ́ ɛ sa nú Isimayɛ́li ví lɛ́ɛ yí gankwɛ́ ko, bɔ yě kplá ɛ yi Ejípu. Hwlibɛ́ni ka ɖo fínɛ́ hwenɛ́nu ǎ. Ée é lɛ́ kɔ wá dotɔ ɔ́ kɔn ɔ́, é mɔ ɖɔ Jozɛ́fu kún sɔ́ ɖ'é mɛ ó. Ée é mɔ mɔ̌ ɔ́, wǔ kú i, bɔ é vún awu dó kɔ nú éɖée, bó lɛ́ kɔ yi nɔví tɔn lɛ́ɛ gɔ́n bó ɖɔ: “Jozɛ́fu sɔ́ ɖo dotɔ ɔ́ mɛ ǎ. Nɛ̌ un ná wa nǔ gbɔn din?” Ée Hwlibɛ́ni ɖɔ mɔ̌ ɔ́, yě zě Jozɛ́fu sín awu ɖaxó ɔ́, bó hu gbǎgbá ɖokpó, lobo zé awu ɔ́ nylɔ́ dó hun tɔn mɛ. Ée yě bló fó ɔ́, yě zé awu ɔ́ sɛ́ dó tɔ́ yětɔn bó ɖɔ sɛ́ dó e ɖɔ: “Nǔ e mǐ mɔ ɔ́ ɖíe mɛ! Kpɔ́n ɖɔ vǐ towe sín awu ɖaxó ɔ́ wɛ, abǐ mɛ ɖěvo tɔn wɛ a jí.” Ée Jakɔ́bu mɔ awu ɔ́, é tunwun, bó ɖɔ: “Vǐ ce sín awu ɖíe! Kanlin ɖíe wlí vǐ ce ɖu e! Kanlin ɖíe vúnvún i e!” Énɛ́ ɔ́, é vún awu dó kɔ nú éɖée, bó sɔ́ nǔwamɛwu dó, lobo byɔ́ vǐ tɔn sín aluwɛ mɛ, bó nɔ mɛ xɔ azǎn. Vǐ tɔn súnnu lɛ́ɛ kpó nyɔ̌nu lɛ́ɛ kpó bǐ wá dó gbɔ n'i, có é ká se ǎ. É nɔ́ ɖo ɖiɖɔ wɛ ɖɔ: “Un ná nɔ aluwɛ mɛ mɔ̌ káká bó ná yi mɔ vǐ ce ɖo kútomɛ.” É nɔ́ ɖo vǐ tɔn ví wɛ. Madiáani ví lɛ́ɛ ká kplá Jozɛ́fu yi Ejípu, bó sɔ́ ɛ sa xá nya ɖé; è nɔ ylɔ́ nya ɔ́ ɖɔ Potifáa. Potifáa ɔ́ wú wɛ Ejípu xɔ́sú ɔ́ nɔ́ ɖeji dó. É wɛ nyí sɔ́ja e nɔ cɔ́ axɔ́sú ɔ́ lɛ́ɛ sín gǎn. Hwenɛ́nu ɔ́, Judáa gosín nɔví tɔn lɛ́ɛ gɔ́n, bó yi nya ɖé gɔ́n ɖo Adulámu; è nɔ ylɔ́ nya ɔ́ ɖɔ Ila. Judáa mɔ nya Kanáanu ɖé sín vǐ nyɔ̌nu; è nɔ ylɔ́ nya ɔ́ ɖɔ Cuwa. É da vǐ ɔ́ bó ɖó xó xá ɛ. Bɔ é mɔ xo bó ji vǐ súnnu ɖokpó lobo sun nyǐ i ɖɔ Ɛ́ɛ. Nyɔ̌nu énɛ́ ɔ́ lɛ́ mɔ xo bó ji vǐ súnnu ɖokpó, bó sun nyǐ i ɖɔ Ɔɔnáni. É lɛ́ ji vǐ súnnu ɖěvo bó sun nyǐ i ɖɔ Cela. Kezívu wɛ Judáa ɖe hwenu e é ji Cela é. Judáa da asi nú Ɛ́ɛ nukɔngbéví tɔn ɔ́. Nyɔ̌nu ɔ́ nɔ́ nyí Tamáa. Ɛ́ɛ nukɔngbéví Judáa tɔn ɔ́, jijɔ tɔn nyɔ́ Mawu Mavɔmavɔ nukún mɛ ǎ, bɔ é hu i. Énɛ́ ɔ́, Judáa ɖɔ nú Ɔɔnáni ɖɔ: “Sɔ́ fofó towe sín asi ɔ́ da, ɖó asú tɔn nɔví wɛ a nyǐ. Đǒ xó xá ɛ, bó ná ɖó vǐ donu nú fofó towe.” Ɔɔnáni ka tunwun ɖɔ vǐ e émí ná ji n'i ɔ́ kún ná nyí vǐ émítɔn ó; énɛ́ ɔ́ wú ɔ́, nú é ɖó xó xá fofó tɔn sín asi ɔ́, é nɔ́ ná afɔ kɔn nyi kɔ́ mɛ, bónú fofó tɔn ní má ɖó vǐ ɖé donu ó. Nǔ énɛ́ ɔ́ e bló wɛ Ɔɔnáni ɖe ɔ́ nyɔ́ Mawu Mavɔmavɔ nukún mɛ ǎ, bɔ é hu é lɔmɔ̌. Énɛ́ ɔ́, Judáa ɖɔ nú Tamáa vǐ tɔn sín asi ɔ́ ɖɔ: “Yi nɔ asúkúkúxɔmɛ ɖo tɔ́ towe xwé, káká jɛ hwenu e vǐ ce Cela ná su asi da é.” É ɖɔ mɔ̌, ɖó é ɖo linlin wɛ ɖɔ nú Cela da Tamáa gbeɖé ɔ́, é lɔmɔ̌ ná kú fofó tɔn lɛ́ɛ ɖɔhun. Bɔ Tamáa yi cí tɔ́ tɔn xwé nǔgbó. Ée yě ɖo fínɛ́ káká ɔ́, Cuwa ví, Judáa sín asi ɔ́ wá kú. Ée azǎn nabí e è nǎ nɔ nǔwamɛxɔmɛ ná lɛ́ɛ wá yi ɔ́, Judáa yi Timuna é kpó xɔ́ntɔn tɔn Ila Adulámunu ɔ́ kpó, bó ná yi kpɔ́n mɛ e ɖo fún kpa nú lɛ̌ngbɔ́ tɔn lɛ́ɛ wɛ é. Énɛ́ ɔ́, è yi ɖɔ nú Tamáa ɖɔ: “Asú towe tɔ́ xwe Timuna bó ná yi kpa fún nú lɛ̌ngbɔ́ tɔn lɛ́ɛ.” Ée Tamáa se mɔ̌ ɔ́, é ɖe asúkúsiwu sín kɔ; é cyɔ́n avɔ nukún mɛ, bó sɔ́ nǔ agalɛtɔ́ ɖɔhun, lobo yi jínjɔ́n fí e è nɔ gbɔn byɔ́ Eyinayímu toxo mɛ é, ɖo Timuna sín alixo; é mɔ ɖɔ Cela ko su asi da, è kún ká sɔ́ émí da n'i ó. Judáa mɔ Tamáa; ée é cyɔ́n avɔ nukún mɛ ɔ́, é vɛdó ɖɔ agalɛtɔ́ ɖé wɛ sín. Ée é má tunwun ɖɔ vǐ émítɔn sín asi ɔ́ wɛ ǎ ɔ́, é sɛ yi gɔ̌n tɔn, bó ɖɔ n'i ɖɔ: “Wǎ mlɔ́ kpɔ́ xá mì.” Nyɔ̌nu ɔ́ ká kanbyɔ́ ɛ ɖɔ: “Étɛ́ a nǎ ná mì bɔ un ná wá mlɔ́ kpɔ́ xá we?” Bɔ Judáa yí gbe n'i ɖɔ: “Un ná zé lɛ̌ngbɔ́ví ɖokpó ɖo lɛ̌ngbɔ́ ce lɛ́ɛ mɛ sɛ́ dó we.” Nyɔ̌nu ɔ́ ká ɖɔ n'i ɖɔ: “É nyɔ́, amɔ̌, a nǎ tó zé nǔɖé nú mì ɖó gbanu hwɛ̌, káká jɛ hwenu e a nǎ sɛ́ lɛ̌ngbɔ́ví ɔ́ dó mì é.” Judáa ka kanbyɔ́ ɛ ɖɔ: “Nǔ tɛ́ un ná zé nú we ɖó gbanu?” Bɔ é yí gbe n'i ɖɔ: “Nǔ e a nɔ dó ɖó wuntun nǔ ná ɔ́ kpó kan tɔn kpó, kpódó kpo e a hɛn ɔ́ kpó.” Ée nyɔ̌nu ɔ́ ɖɔ mɔ̌ ɔ́, Judáa zé nǔ e é xa lɛ́ɛ n'i, bó mlɔ́ kpɔ́ xá ɛ. Gbe énɛ́ ɔ́ gbe e é ɖó xó xá ɛ ɔ́, sun jɛ́n kó nɔ te n'i nɛ́. Énɛ́ ɔ́ gúdo ɔ́, Tamáa sí te, bó yi xwé. É ɖe avɔ sín nukún mɛ, bó lɛ́ sɔ́ asúkúsiwu tɔn dó. Judáa wá sɛ́ lɛ̌ngbɔ́ví ɔ́ dó gbɔn xɔ́ntɔn tɔn Adulámunu ɔ́ jí, bɔ é ná yí nǔ e é fɔ ɖó gbanu lɛ́ɛ ɖo nyɔ̌nu ɔ́ sí. Lo ɔ́, xɔ́ntɔn tɔn ɔ́ sɔ́ wá mɔ nyɔ̌nu ɔ́ ǎ. É kanbyɔ́ mɛ e ɖo fínɛ́ lɛ́ɛ ɖɔ: “Fítɛ́ nyɔ̌nu agalɛtɔ́ e ɖo Eyinayímu lixo fí ɔ́ ɖe?” Bɔ mɛ lɛ́ɛ yí gbe n'i ɖɔ: “Agalɛtɔ́ ɖé nɔ fí kpɔ́n gbeɖé ǎ mɛ.” Bɔ xɔ́ntɔn ɔ́ lɛ́ kɔ wá Judáa gɔ́n, bó ɖɔ n'i ɖɔ: “Un mɔ ɛ ǎ; mɛ e ɖo fínɛ́ lɛ́ɛ tlɛ ɖɔ nú mì ɖɔ agalɛtɔ́ ɖé kún nɔ fínɛ́ kpɔ́n gbeɖé ó.” Ée Judáa se mɔ̌ ɔ́, é ɖɔ: “É ní bó hɛn nǔ e un bɛ́ n'i lɛ́ɛ! Mǐ ní má húzú nǔkiko ó. Nyɛ ko sɛ́ lɛ̌ngbɔ́ví e xó é ɖɔ ɔ́ dó e din, bɔ hwɛ ka yi ba ɛ kpo. Nǔɖé sɔ́ nyí ce ɖ'é mɛ ǎ.” É ná bló sun atɔn mɔ̌ bɔ è wǎ ɖɔ nú Judáa ɖɔ: “Vǐ towe sín asi Tamáa lɛ aga bó tlɛ ɖo xo din.” Bɔ Judáa ɖɔ è nǐ ɖe e tɔ́n, bó dó e zo. Hwenu e è kplá ɛ xweyǐgbe ɔ́, é ɖɔ sɛ́ dó asú tɔn tɔ́ ɖɔ: “Mɛ e tɔn nǔ élɔ́ lɛ́ɛ nyí ɔ́ wɛ un mɔ xo ná. Kpɔ́n nǔ e è nɔ dó ɖó wuntun nǔ ná é, bó kpɔ́n kan e ɖ'é wú é, kpó kpo élɔ́ kpó. Tɛ́nkpɔ́n bó tunwun mɛ e tɔn yě nyí é.” Ée Judáa mɔ nǔ lɛ́ɛ ɔ́, é tunwun, bó ɖɔ: “Hwɛ tɔn jɔ. Nǔ e un ɖó ná wa ɔ́, un wa ǎ, ɖó un sɔ́ sɔ́ ɛ da nú vǐ ce Cela ǎ.” Énɛ́ ɔ́ gúdo ɔ́, Judáa sɔ́ ɖó xó ɖě xá ɛ ǎ. Ée Tamáa sín vǐjiji hwenu wá su ɔ́, è mɔ ɖɔ hǒxo wɛ ɖo xo tɔn mɛ. Hwenu e é ɖo vǐ ji wɛ ɔ́, vǐ lɛ́ɛ ɖokpó ɖe alɔ tɔ́n. Nyɔ̌nu-ajinɔtɔ́ ɔ́ ká sin kan vɔvɔ dó alɔ ɔ́ bó ɖɔ: “Nukɔngbéví ɔ́ ɖíe!” Lo ɔ́, vǐ énɛ́ ɔ́ wún alɔ tɔn bɔ wegɔ́ tɔn tɔ́n jɛ nukɔn. Énɛ́ ɔ́, nyɔ̌nu-ajinɔtɔ́ ɔ́ sú xó ɖɔ: “Nɛ̌ wɛ a wa gbɔn bo ɖe ali nú hwiɖée?” Bɔ é sun nyǐ vǐ ɔ́ ɖɔ “Pɛlɛ́si”. Pɛlɛ́si sín tínmɛ wɛ nyí ali. Énɛ́ ɔ́ gúdo ɔ́, éyɛ́ wá tɔ́n bɔ kan vɔvɔ ɔ́ ɖo alɔ tɔn. È ka sun nyǐ éyɛ́ ɖɔ Zeláxi. Isimayɛ́li ví lɛ́ɛ kplá Jozɛ́fu yi Ejípu, bó sɔ́ ɛ sa xá nya Ejípunu ɖé; è nɔ ylɔ́ nya ɔ́ ɖɔ Potifáa. Potifáa ɔ́ wú wɛ axɔ́sú Ejípu tɔn nɔ ɖeji dó. É wɛ nyí sɔ́ja e nɔ cɔ́ axɔ́sú ɔ́ lɛ́ɛ sín gǎn. Mawu Mavɔmavɔ ka ɖo kpɔ́ xá Jozɛ́fu, bɔ nǔ bǐ ɖo yiyi n'i wɛ. Gǎn tɔn Ejípunu ɔ́ sín xwé gbe wɛ é nɔ́ nɔ. Jozɛ́fu sín gǎn ɔ́ mɔ ɖɔ Mawu Mavɔmavɔ ɖo kpɔ́ xá ɛ; é mɔ ɖɔ Mawu Mavɔmavɔ nɔ bló bɔ nǔ e wa wɛ é ɖe lɛ́ɛ bǐ nɔ́ ɖo yiyi n'i wɛ. Énɛ́ ɔ́, Potifáa gǎn tɔn ɔ́ yí wǎn n'i, bó sɔ́ ɛ dó ɖó azɔ̌watɔ́ é ɖésúnɔ tɔn; é sɔ́ ɛ gǎn ɖó xwé tɔn nu, bó sɔ́ nǔ tɔn lɛ́ɛ bǐ dó alɔ mɛ n'i. Ée Potifáa sɔ́ Jozɛ́fu ɖó xwé tɔn nu bó sɔ́ nǔ tɔn lɛ́ɛ dó alɔ mɛ n'i lě tlóló ɔ́, Mawu Mavɔmavɔ kɔn nyɔ̌ná tɔn dó xwé tɔn jí ɖó Jozɛ́fu wú; énɛ́ ɔ́, nyɔ̌ná Mawu Mavɔmavɔ tɔn ɖo nǔ tɔn lɛ́ɛ bǐ jí, éé ɖo xwé tɔn gbe lɛ́ɛ kpó éé ɖo gle tɔn mɛ lɛ́ɛ bǐ kpó jí. Ée Potifáa zé nǔ tɔn lɛ́ɛ bǐ dó alɔ mɛ nú Jozɛ́fu ɔ́, é sɔ́ nɔ́ wa nǔ ɖěbǔ ɖo xwé tɔn gbe ǎ; nǔ jɛ́n é nɔ́ wá ɖu. Jozɛ́fu ɔ́, mɛɖé wɛ, bó nyɔ́ ɖɛkpɛ, bó nyɔ́ kpɔ́n. Ée yě ɖo fínɛ́ ɔ́, Jozɛ́fu sín gǎn sín asi wá jɛ ɖɛkpɛ tɔn mɔ jí, bó ɖɔ n'i ɖɔ: “Wǎ mlɔ́ kpɔ́ xá mì!” Jozɛ́fu ka gbɛ́ bó ɖɔ nú gǎn tɔn sín asi ɔ́ ɖɔ: “Đǒtó mì, gǎn ce sɔ́ nǔ tɔn lɛ́ɛ bǐ dó alɔ ce mɛ, bó ɖeji dó wǔtu ce, lobo sɔ́ byɔ́ ɖɔ é ná wa nǔ ɖěbǔ ɖo xwé tɔn gbe ǎ. Mɛɖé ɖó acɛ hú mì ɖo xwé tɔn gbe ǎ, é ká gbɛ́ nǔɖé nú mì ɖo xwé ɔ́ gbe ǎ. Hwi ɖokpónɔ wú jɛ́n un ma ná ɖó alɔ ǎ, ɖó asi tɔn wɛ a nyǐ. Un sixú dó nǔ baɖabaɖa mɔ̌hun sin, bó hu hwɛ dó Mawu ce ǎ.” Xó ɖokpó ɔ́ ɖɔ n'i wɛ jɛ́n nyɔ̌nu ɔ́ nɔ́ ɖe ayǐhɔ́ngbe ayǐhɔ́ngbe; Jozɛ́fu ka nɔ ɖótó e ǎ. É wá su gbe ɖokpó, bɔ Jozɛ́fu byɔ́ xɔ mɛ, bó ná wa azɔ̌ tɔn lě e é kó nɔ́ bló gbɔn é; mɛ ɖěbǔ ká ɖo fínɛ́ gbe nɛ́ gbe ǎ, bɔ nyɔ̌nu ɔ́ wlí Jozɛ́fu sín awu bó ɖɔ: “Wǎ mǐ yi mlɔ́ ayǐ.” Jozɛ́fu ka jó awu ɔ́ dó n'i, bó hɔn tɔ́n sín xwé ɔ́ gbe. Ée é mɔ ɖɔ Jozɛ́fu jó awu dó alɔmɛ nú émí bó hɔn tɔ́n ɔ́, é ylɔ́ mɛ e nɔ nɔ xwé ɔ́ gbe lɛ́ɛ, bó ɖɔ nú yě ɖɔ: “Mi wá kpɔ́n! Nyaví Eblée e asú ce kplá wá nú mǐ ɔ́ jló ná ba hǎ mǐ. Nyaví ɔ́ wá gɔ̌n ce bó jló ná ɖó xó xá mì, bɔ un wlí xósúsú. Ée é mɔ ɖɔ un ɖo xó sú wɛ bɔ gbe ce ɖo jǐ yi wɛ ɔ́, é jó awu tɔn dó nú mì, bó hɔn tɔ́n.” Énɛ́ ɔ́, é sɔ́ Jozɛ́fu sín awu ɔ́ ɖó akpá, bó nɔ te káká bɔ asú tɔn wá xwé gbe. Ée asú tɔn wá xwé gbe ɔ́, é ɖɔ n'i ɖɔ: “Kannumɔ Eblée e a kplá wá nú mǐ ɔ́ wá gɔ̌n ce bó jló ná ba hǎ mì. Un ka wlí xósúsú, bɔ ée gbe ce ɖo jǐ yi wɛ ɔ́, é jó awu tɔn dó bó hɔn tɔ́n.” Ée Jozɛ́fu sín gǎn ɔ́ se xó e asi tɔn ɖɔ n'i lɛ́ɛ ɔ́, xomɛ sin i ɖésú, bɔ é wlí Jozɛ́fu sú dó gankpá mɛ, fí e axɔ́sú ɔ́ sín gantɔ́ lɛ́ɛ nɔ́ nɔ é, bɔ é sɛn gan ɖo fínɛ́. Jozɛ́fu ɖo gankpá mɛ fínɛ́, có Mawu Mavɔmavɔ ɖo kpɔ́ xá ɛ, bó kɔn nyɔ̌ná tɔn dó jǐ tɔn. Mawu Mavɔmavɔ bló bɔ gankpácɔ́tɔ́ ɔ́ yí wǎn nú Jozɛ́fu. Énɛ́ ɔ́, é bɛ́ gantɔ́ e ɖo fínɛ́ lɛ́ɛ bǐ dó Jozɛ́fu sín alɔ mɛ. Nú è nǎ wa nǔ ɖěbǔ ɖo gankpá mɛ fínɛ́ ɔ́, éyɛ́ jɛ́n è nǎ mɔ. Gantɔ́ lɛ́ɛ sín gǎn ɔ́ sɔ́ nɔ́ kpé nukún dó nǔ e é sɔ́ dó alɔmɛ nú Jozɛ́fu lɛ́ɛ ɖěbǔ wú ǎ, ɖó Mawu Mavɔmavɔ ɖo kpɔ́ xá Jozɛ́fu, bó nɔ́ bló, bɔ nǔ e é nɔ́ wa lɛ́ɛ bǐ nɔ́ ɖo yiyi n'i wɛ. Ée nǔ énɛ́ lɛ́ɛ jɛ wá yi ɔ́, é wá jɛ gbe ɖokpó, bɔ axɔ́sú Ejípu tɔn ɔ́ sín azɔ̌watɔ́ ɖaxó ɖaxó we wa nǔ nyi do nú axɔ́sú ɔ́. Yě wɛ nyí mɛ e nɔ hɛn sinnuká n'i lɛ́ɛ sín gǎn, kpó mɛ e nɔ ɖa wɔ̌xúxú n'i lɛ́ɛ sín gǎn ɔ́ kpó. Axɔ́sú ɔ́ sin xomɛ dó yě, bó bɛ́ yě yi dó sɔ́ja e nɔ cɔ́ axɔ́sú ɔ́ lɛ́ɛ sín gǎn xwé ɖo gankpá mɛ fí e è sú Jozɛ́fu dó é. Énɛ́ ɔ́, sɔ́ja e nɔ cɔ́ axɔ́sú ɔ́ lɛ́ɛ sín gǎn zé yě ɖó Jozɛ́fu kpá, bɔ é ná nɔ́ kpé nukún dó yě wú. Yě nɔ́ gankpá mɛ fínɛ́ xɔ azǎn kpɛɖé. É wá jɛ zǎn mɛ gbe ɖokpó, bɔ mɛ e nɔ hɛn sinnuká nú axɔ́sú ɔ́ lɛ́ɛ sín gǎn kpó mɛ e nɔ ɖa wɔ̌xúxú n'i lɛ́ɛ sín gǎn ɔ́ kpó kú dlɔ̌ ɖo gankpá ɔ́ mɛ. Dlɔ̌ e yě mɛ ɖokpó ɖokpó kú ɔ́ ɖó tínmɛ vovo. Jozɛ́fu wá kpɔ́n yě zǎnzǎn, bó mɔ yě ɖo aluwɛ mɛ. É kanbyɔ́ yě ɖɔ: “Nɛ̌ ká gbɔn bɔ wǔ kú mi bǐ mɔ̌?” Bɔ yě yí gbe n'i ɖɔ: “Dlɔ̌ ɖé wɛ mǐ kú, bɔ mǐ mɔ mɛɖé bɔ é ná tínmɛ nú mǐ ǎ.” Jozɛ́fu ka ɖɔ nú yě ɖɔ: “Mawu wɛ nɔ́ tín nǔ mɛ nú mɛ. Mi bo ɖɔ dlɔ̌ e mi kú ɔ́ nú mì.” Ée Jozɛ́fu ɖɔ mɔ̌ ɔ́, mɛ e nɔ hɛn sinnuká nú axɔ́sú ɔ́ lɛ́ɛ sín gǎn ɔ́ ɖɔ dlɔ̌ éyɛ́ tɔn nú Jozɛ́fu. É ɖɔ: “Un kú dlɔ̌ ɖokpó, bó mɔ vǐwuntín ɖo nukɔn ce. Ala atɔn wɛ vǐwuntín ɔ́ ɖó. Ée é tɔ́n kun lě tlóló ɔ́, é gba sɛ́ bó sɛ́n, bɔ sínsɛ́n tɔn lɛ́ɛ bǐ myá. Axɔ́sú ɔ́ sín kɔ́fu ka ɖo alɔ ce mɛ, bɔ un gbɛ vǐwun lɛ́ɛ, bó fyɔ́n yě dó kɔ́fu ɔ́ mɛ, lobo zé jó nú axɔ́sú ɔ́.” Ée é ɖɔ mɔ̌ ɔ́, Jozɛ́fu ɖɔ n'i ɖɔ: “Dlɔ̌ e a kú ɔ́, tínmɛ tɔn ɖíe: ala atɔn lɛ́ɛ ɔ́, azǎn atɔn wɛ. É jɛ azǎn atɔn gbe ɔ́, axɔ́sú ɔ́ ná wa nǔ ɖaxó ɖé nú we; é ná lɛ́ yí we dó azɔ̌ towe xóxó ɔ́ mɛ. A nǎ lɛ́ jɛ kɔ́fu zé n'i jí, lě e a nɔ ko bló gbɔn ɖ'ayǐ é. Amɔ̌, nǔ wá nyɔ́ nú we hǔn, kɛnklɛ́n bó flín mì, bó nyɔ́ xomɛ dó wǔ ce. Đɔ xó ce ɖagbe nú axɔ́sú ɔ́, bónú má tɔ́n sín gankpá mɛ fí, ɖó Eblée tomɛ wɛ è kplá mì sín gǎnnugǎnnu wá fí; un ka wa nǔɖé nyi do ɖo fí cóbɔ è wlǐ mì dó gan ǎ.” Ée mɛ e nɔ ɖa wɔ̌xúxú nú axɔ́sú ɔ́ lɛ́ɛ sín gǎn ɔ́ mɔ ɖɔ tínmɛ e Jozɛ́fu ná ɔ́ nyɔ́ ɔ́, é ɖɔ: “Nyi lɔmɔ̌ kú dlɔ̌, bó hɛn wɔ̌xúxú xasun atɔn ɖó ta. Nǔɖuɖu tɛnmɛ tɛnmɛ e è nɔ ɖa ɖo kpó mɛ bɔ axɔ́sú ɔ́ nɔ́ yí wǎn ná tawun lɛ́ɛ wɛ gɔ́ xasun e ɖo aga ɔ́, bɔ xɛ lɛ́ɛ wá ɖo ɖuɖu wɛ ɖo xasun ɔ́ mɛ ɖo ta ce.” Jozɛ́fu yí xó bó ɖɔ n'i ɖɔ: “Dlɔ̌ e a kú ɔ́, tínmɛ tɔn ɖíe: xasun atɔn lɛ́ɛ ɔ́, azǎn atɔn wɛ. É jɛ azǎn atɔn gbe ɔ́, axɔ́sú ɔ́ ná wa nǔ ɖaxó ɖé nú we; nǔ e a ma ɖó nukún tɔn ǎ ɔ́, é ná wa nú we: è nǎ dó kan kɔ nú we dó atín wú, bɔ xɛ lɛ́ɛ ná ɖu lan towe.” Azǎn atɔngɔ́ ɔ́ gbe nǔgbó ɔ́, axɔ́sú ɔ́ ɖo jijizán tɔn sín xwe ɖu wɛ, bó ylɔ́ agɔ̌ ɖaxó ɖokpó, bó kplé azɔ̌watɔ́ tɔn lɛ́ɛ bǐ. Axɔ́sú ɔ́ ká zé mɛ e nɔ hɛn sinnuká n'i lɛ́ɛ sín gǎn ɔ́ kpó mɛ e nɔ ɖa wɔ̌xúxú n'i lɛ́ɛ sín gǎn ɔ́ kpó ɖó tɛn ɖaxó ɖaxó ɖé mɛ, ɖo azɔ̌watɔ́ tɔn lɛ́ɛ bǐ nukún mɛ. É lɛ́ yí mɛ e nɔ hɛn sinnuká n'i lɛ́ɛ sín gǎn ɔ́, ɖó tɛn e mɛ é kó ɖe ɖ'ayǐ é, bónú é ná nɔ́ zé kɔ́fu n'i Lo ɔ́, é dó kan kɔ nú mɛ e nɔ ɖa wɔ̌xúxú n'i lɛ́ɛ sín gǎn ɔ́ dó atín wú; nǔ lɛ́ɛ jɛ lě e Jozɛ́fu ko tínmɛ nú yě gbɔn é. Nǔ nyí mɔ̌, có mɛ e nɔ hɛn sinnuká nú axɔ́sú ɔ́ lɛ́ɛ sín gǎn ɔ́ wɔn Jozɛ́fu bǐ sésé. Xwe tɔn we gúdo ɔ́, é wá su gbe ɖokpó zǎn mɛ, bɔ axɔ́sú Ejípu tɔn ɔ́ kú dlɔ̌, bó mɔ éɖée ɖo Nilu tɔ ɔ́ tó. É ná mɔ nǔɖé ɔ́, nyibú asi kloklo ɖɛkpɛ ɖɛkpɛ tɛ́nwe jɛ́n tɔ́n sín tɔ ɔ́ mɛ bó jɛ gběhan ɖu jí ɖo tɔ ɔ́ tó. É lɛ́ mɔ nyibú asi gǒ xúxú kannylámɔnɔ tɛ́nwe tɔ́n sín tɔ ɔ́ mɛ, bó jɛ ɖě lɛ́ɛ gúdo, bó yi nɔ te akpá yětɔn ɖo tɔ ɔ́ tó. Nyibú asi gǒ xúxú kannylámɔnɔ lɛ́ɛ fɔ nyibú asi kloklo ɖɛkpɛ ɖɛkpɛ tɛ́nwe lɛ́ɛ ɖu. Hwenɛ́nu ɔ́, axɔ́sú ɔ́ nyí sín amlɔ mɛ. Axɔ́sú ɔ́ wlí amlɔ bó lɛ́ kú dlɔ̌ ɖěvo. É kú dlɔ̌ bó mɔ blěe tɛ́nwe ɖo hankán ɖokpó ɔ́ wú. Blěe tɛ́nwe lɛ́ɛ bǐ hwán, bó kló bó nyɔ́ ɖɛkpɛ. É lɛ́ mɔ blěe tɛ́nwe ɖěvo tɔ́n ɖo ɖě lɛ́ɛ kpá. Yědɛɛ lɛ́ɛ ɖi be ǎ bɔ jɔhɔn zǎnzǎnhwe jí tɔn ko hɛn bǐ fyɔ́. Blěe e má ɖi be ǎ lɛ́ɛ ká fɔ blěe e hwán, bó dó kwín ganjí lɛ́ɛ mi; hwenɛ́nu ɔ́, axɔ́sú ɔ́ nyí sín amlɔ mɛ, bó mɔ ɖɔ dlɔ̌ kú wɛ émí ɖe. Ayi tɔn gbadó ayǐhɔ́ngbe tɔn zǎnzǎn, bɔ é dó wɛn sɛ́ dó majíkiblótɔ́ lɛ́ɛ bǐ kpó nǔnywɛ́tɔ́ Ejípu tɔn lɛ́ɛ bǐ kpó ɖɔ yě ní wá. Ée mɛ lɛ́ɛ wá ɔ́, é wlí dlɔ̌ e é kú lɛ́ɛ ɖɔ nú yě. Lo ɔ́, yě mɛ ɖěbǔ kpé wú bó tín nǔ e ɖɔ wɛ dlɔ̌ lɛ́ɛ ɖe ɔ́ mɛ nú axɔ́sú ɔ́ ǎ. Énɛ́ ɔ́, mɛ e nɔ ɖa wɔ̌xúxú nú axɔ́sú ɔ́ lɛ́ɛ sín gǎn ɔ́ yí xó, bó ɖɔ nú axɔ́sú ɔ́ ɖɔ: “Sɛ́mɛɖó, nǔ e un wa nyi do ɖ'ayǐ lɛ́ɛ ɔ́, un ná flín dó ɖɔ xó nú mɛ égbé. A sin xomɛ dó mǐ mɛsɛntɔ́ towe lɛ́ɛ gbe ɖokpó, bó wlí nyɛ kpó mɛ e nɔ ɖa wɔ̌xúxú nú mɛ é sín gǎn ɔ́ kpó dó ganxó, ɖo mɛ e nɔ cɔ́ we lɛ́ɛ sín gǎn xwé. Mǐ mɛ we lɛ́ɛ kú dlɔ̌ ɖo zǎn ɖokpó ɔ́ mɛ, bɔ dlɔ̌ e mǐ kú lɛ́ɛ ɖokpó ɖokpó ɖó tínmɛ tɔn. Dɔ̌nkpɛvú ɖé kpó mǐ kpó wɛ ɖo gankpá ɔ́ mɛ fínɛ́; Eblée wɛ, bó nyí kannumɔ nú mɛ e nɔ cɔ́ mɛ é sín gǎn ɔ́. Éyɛ́ wɛ mǐ wlí dlɔ̌ e mǐ kú lɛ́ɛ ɖɔ ná, bɔ é tín dlɔ̌ mǐtɔn mǐtɔn mɛ nú mǐ. Nǔ e é ɖɔ nú mǐ lɛ́ɛ ká jɛ nǔgbó. Sɛ́mɛɖó lɛ́ sɔ́ mì ɖó tɛn ce mɛ, bó ká ɖɔ bɔ è dǒ kan kɔ nú mɛ e nɔ ɖa wɔ̌xúxú nú mɛ é sín gǎn ɔ́ dó atín wú.” Ée axɔ́sú ɔ́ se mɔ̌ ɔ́, é dó wɛn sɛ́ dó Jozɛ́fu, bɔ è yi ɖe e tɔ́n sín gankpá ɔ́ mɛ tlóló. Ée Jozɛ́fu tɔ́n ɔ́, è xwlɛ́ ta n'i, bó ɖyɔ́ awu n'i, bɔ é ɖidó axɔ́sú ɔ́ gɔ́n. Ée Jozɛ́fu wá ɔ́, axɔ́sú ɔ́ ɖɔ nú Jozɛ́fu ɖɔ: “Un kú dlɔ̌ ɖokpó; mɛ ɖěbǔ ká kpé wú bó tín nǔ e ɖɔ wɛ dlɔ̌ ɔ́ ɖe ɔ́ mɛ nú mì ǎ. Un ka se ɖɔ nú è kú dlɔ̌ bó ɖɔ nú we ɔ́, a nɔ tínmɛ nú mɛ tlóló.” Jozɛ́fu ka yí gbe n'i ɖɔ: “Nyɛ wɛ ǎ; gbeɖé kpɔ́n! Mawu wɛ ná ná tínmɛ tɔn nǔgbó ɔ́ we.” Énɛ́ ɔ́, axɔ́sú ɔ́ ɖɔ nú Jozɛ́fu ɖɔ: “Un kú dlɔ̌ bó mɔ nyɛɖée ɖo te ɖo Nilu tɔ ɔ́ tó. Un ná mɔ nǔɖé ɔ́, nyibú asi kloklo ɖɛkpɛ ɖɛkpɛ tɛ́nwe jɛ́n tɔ́n sín tɔ ɔ́ mɛ bó jɛ gběhan ɖu jí ɖo tɔ ɔ́ tó. Un lɛ́ mɔ nyibú asi tɛ́nwe ɖěvo tɔ́n sín tɔ ɔ́ mɛ, bó jɛ ɖě lɛ́ɛ gúdo. Yědɛɛ lɛ́ɛ ká xú gǒ kácɛ́kácɛ́, bó nylá kan káká; un mɔ nyibú kannylámɔnɔ mɔ̌hunkɔtɔn kpɔ́n gbeɖé ɖo Ejípu to ɔ́ mɛ ǎ. Nyibú gǒxúxú kannylámɔnɔ lɛ́ɛ wlí nyibú kloklo tɛ́nwe nukɔntɔn lɛ́ɛ ɖu. Yě fɔ nyibú kloklo énɛ́ lɛ́ɛ mi, có mɛɖé tunwun ɖɔ nǔɖé ɖo adɔgo yětɔn mɛ ǎ. Lě e yě nylá kan gbɔn ɖ'ayǐ ɔ́ jɛ́n yě lɛ́ kpo ɖe. Hwenɛ́nu wɛ un nyí sín amlɔ mɛ. Énɛ́ ɔ́ gúdo ɔ́, un lɛ́ kú dlɔ̌ ɖěvo bó mɔ blěe ɖɛkpɛ ɖɛkpɛ tɛ́nwe ɖo hankán ɖokpó ɔ́ wú, bɔ yě kló ganjí. Un lɛ́ mɔ blěe xúxú e má ɖi be ǎ bɔ jɔhɔn zǎnzǎnhwe jí tɔn kó hɛn fyɔ́ lɛ́ɛ tɛ́nwe tɔ́n ɖo ɖě lɛ́ɛ kpá. Blěe e má ɖi be ǎ lɛ́ɛ ká fɔ blěe ɖɛkpɛ ɖɛkpɛ tɛ́nwe lɛ́ɛ mi. Un ko wlí ɖɔ nú majíkiblótɔ́ lɛ́ɛ, yě mɛ ɖěbǔ ká ɖɔ tínmɛ tɔn nú mì ǎ.” Jozɛ́fu ka ɖɔ nú axɔ́sú ɔ́ ɖɔ: “Dlɔ̌ we e mɛ kú lɛ́ɛ ɔ́, nǔ ɖokpó ɔ́ ɖɔ wɛ yě ɖe. Nǔ e wa gbé Mawu ja ɔ́ wɛ é ɖe xlɛ́ mɛ. Nyibú asi ɖɛkpɛ ɖɛkpɛ tɛ́nwe lɛ́ɛ ɔ́, xwe tɛ́nwe wɛ. Blěe ɖɛkpɛ ɖɛkpɛ tɛ́nwe lɛ́ɛ ɔ́, xwe tɛ́nwe wɛ. Hǔn nǔ ɖokpó ɔ́ ɖɔ wɛ dlɔ̌ we lɛ́ɛ ɖe. Nyibú asi gǒxúxú, kannylámɔnɔ tɛ́nwe e jɛ nukɔntɔn lɛ́ɛ gúdo lɛ́ɛ kpódó blěe tófwe e jɔhɔn zǎnzǎnhwe jí tɔn kó hɛn fyɔ́ lɛ́ɛ kpó ɔ́, nǔ e ɖɔ wɛ yě ɖe ɔ́ wɛ nyí ɖɔ adɔ ná tɔ́n nú xwe tɛ́nwe. Sɛ́mɛɖó, nǔ e un ko ɖɔ nú mɛ zaanɖé din ɔ́ wɛ; nǔ e wa gbé Mawu ja ɔ́ wɛ é zé xlɛ́ mɛ. Xwe tɛ́nwe ja bɔ nǔɖuɖu ná tíin kɔn nyi kpɔ́ gégé gbɔn Ejípu to ɔ́ bǐ mɛ. Xwe tɛ́nwe e ná jɛ xwe tɛ́nwe nukɔntɔn lɛ́ɛ gúdo ɔ́, adɔ ná tɔ́n bɔ è sɔ́ ná flín ɖɔ nǔɖuɖu kó tíin bó túnflá ɖo to ɔ́ mɛ kpɔ́n ǎ. Adɔ ɔ́ ná zɔ́n bɔ to ɔ́ bǐ ná jɛ vɔ̌. Adɔ énɛ́ e ná tɔ́n ɔ́ ná syɛ́n káká bɔ mɛɖé sɔ́ ná tunwun ɖɔ nǔɖuɖu kó tíin, bó túnflá ɖo to ɔ́ mɛ kpɔ́n ǎ. Ée è blǒ bɔ mɛ kú nǔ ɖokpó ɔ́ sín dlɔ̌ dó azɔn we jí mɔ̌ ɔ́, é ɖe xlɛ́ ɖɔ nǔ e Mawu lin ɖɔ émí ná wa ɔ́, wa jɛ́n é ná wa dandan; é ká ná lín cóbó wa nǔ ɔ́ ǎ. Sɛ́mɛɖó, nǔ e mɛ ná wa din ɔ́, mɛ ná ba gbɛtɔ́ e bí ganjí, bó ɖó nǔnywɛ́ ɔ́ ɖokpó, bó ná sɔ́ ɖó Ejípu to ɔ́ nu. Mɛ ná lɛ́ sɔ́ gǎn ɖé lɛ́ɛ ɖo to ɔ́ mɛ, bɔ yě ná nɔ́ yí blěe e ná tíin ɖo Ejípu nú xwe tɛ́nwe lɛ́ɛ sín atɔ́ɔ́nvlɔ́ɖó. Jinukún e è nǎ mɔ ɖo xwe ɖagbe e jǎwe nɛ́ lɛ́ɛ mɛ lɛ́ɛ ɔ́, yě ní sɛ bǐ xwe. Mɛ ɖésúnɔ ná ná gbe bɔ yě ná kplé blěe ɖ'ayǐ ɖo toxo ɖaxó ɖaxó lɛ́ɛ mɛ, lobo ná nɔ́ cɔ́. Énɛ́ ɔ́, nǔɖuɖu énɛ́ lɛ́ɛ ná nɔ ayǐ nú to ɔ́, bɔ adɔ e ná tɔ́n nú xwe tɛ́nwe ɔ́ wá ɔ́, adɔ sɔ́ ná hu toví lɛ́ɛ ǎ.” Xó énɛ́ e Jozɛ́fu ɖɔ ɔ́ nyɔ́ axɔ́sú ɔ́ kpódó gǎn hɔn-yitɔ́ tɔn lɛ́ɛ bǐ kpó nukún mɛ. Énɛ́ ɔ́, axɔ́sú ɔ́ ɖɔ nú gǎn hɔn-yitɔ́ tɔn lɛ́ɛ ɖɔ: “Nya élɔ́ ɔ́, Yɛ Mawu tɔn ɖo jǐ tɔn. Mǐ ná sixú mɔ étɔn ɖɔhun a?” É ká ɖɔ nú Jozɛ́fu ɖɔ: “Ée é nyí hwi wɛ Mawu zé nǔ énɛ́ lɛ́ɛ bǐ xlɛ́ din é ɔ́, mǐ sɔ́ sixú mɔ mɛɖé bɔ é ná bí ganjí, bó ɖó nǔnywɛ́ hwi ɖɔhun ǎ. Hǔn hwi wɛ un ná sɔ́ gǎn ɖó axɔ́súɖuto ce nu, bɔ toví ce lɛ́ɛ bǐ ná se tónú nú we. Axɔ́súzinkpo e jí un ɖe ɔ́ kɛ́ɖɛ́ wɛ ná zɔ́n bɔ un ná ɖó acɛ hú we. Din ɔ́, un sɔ́ we ɖó Ejípu to ɔ́ bǐ nu.” Ée axɔ́sú ɔ́ ɖɔ mɔ̌ ɔ́, é ɖe alɔkɛ́ e ɖe acɛ tɔn xlɛ́ ɔ́, bó sɔ́ dó alɔ nú Jozɛ́fu; é zé akwɛ́núwu ɖagbe ɖagbe dó n'i, lobo zé sikáwlɔ dó kɔ n'i. É ɖɔ bɔ è zě e dó ahwankɛkɛ́ mɛ; mɛ e xo kpó ɖó n'i tlóló ɔ́ wɛ è zě ɖ'ayǐ ná. Mɛ lɛ́ɛ nɔ ɖo awǒbóbó kpa wɛ ɖo nukɔn tɔn ɖɔ: “Mɛ bǐ ní jɛ kpo, mɛ bǐ ní jɛ kpo.” Lě e axɔ́sú ɔ́ sɔ́ Jozɛ́fu gǎn ɖó Ejípu to ɔ́ bǐ nu gbɔn ɔ́ nɛ́. Axɔ́sú ɔ́ lɛ́ ɖɔ nú Jozɛ́fu ɖɔ: “Nyɛ wɛ nyí Ejípu xɔ́sú ɔ́; amɔ̌, nú mɛɖé ja nǔ ɖěbǔ wa gbé ɖo to ɔ́ mɛ, bónú a ma ná gbe tɔn ǎ ɔ́, mɛ ɔ́ ná sixú bló ǎ.” Axɔ́sú ɔ́ sun nyǐ Jozɛ́fu ɖɔ Safunáti-Panɛ́yaxi. É zé Asenáti da n'i; Asenáti ɔ́, Poti-Fela, hunnɔ Ɔnu toxo ɔ́ tɔn ɔ́ sín vǐ wɛ. Bɔ Jozɛ́fu sɔ́ nǔ bó yi gbɔn Ejípu to ɔ́ mɛ. Xwe gban (30) ɖó wɛ Jozɛ́fu ɖe hwenu e è kplá ɛ wá axɔ́sú Ejípu tɔn ɔ́ gɔ́n é. Jozɛ́fu ka gosín axɔ́sú ɔ́ gɔ́n, bó yi gbɔn Ejípu to ɔ́ bǐ mɛ. Xwe tɛ́nwe e mɛ nǔɖuɖu ná tíin kɔn nyi kpɔ́ gégé lɛ́ɛ sín hwenu ɔ́, ayǐkúngban ɔ́ nyɔ́ blěe ɖésú. Énɛ́ ɔ́, Jozɛ́fu sɛ jinukún e è mɔ ɖo xwe tɛ́nwe lɛ́ɛ mɛ lɛ́ɛ bǐ xwe. É ɖó jinukúngɔ́ gbɔn toxo lɛ́ɛ mɛ. É nɔ́ bɛ́ blěe e è nɔ mɔ ɖo gle lɛ́ɛ mɛ lɛ́ɛ dó agɔ̌ mɛ, ɖo toxo e sɛkpɔ́ yě ɔ́ mɛ. Jozɛ́fu kplé blěe ɖ'ayǐ, ɖo xwe tɛ́nwe énɛ́ lɛ́ɛ mɛ, bɔ é sukpɔ́ káká, bó cí kɔ́ e ɖo xutó ɔ́ ɖɔhun; blěe ɔ́ sukpɔ́ káká bɔ è sɔ́ sixú xa ǎ. Cóbónú adɔ ɔ́ ná tɔ́n ɔ́, Jozɛ́fu sín asi Asenáti, Poti-Fela, hunnɔ Ɔnu toxo ɔ́ tɔn ɔ́ sín vǐ ɔ́ kó ji vǐ súnnu we n'i. Jozɛ́fu sun nyǐ nukɔngbéví ɔ́ ɖɔ Manasée bó ɖɔ: “Mawu bló bɔ un wɔn ya e un ji lɛ́ɛ bǐ, bó wɔn ɖɔ un ɖo zɔ nú mɛ ce lɛ́ɛ.” É sun nyǐ vǐ wegɔ́ ɔ́ ɖɔ Eflayímu bó ɖɔ: “Mawu bló bɔ un ji vǐ ɖo to e mɛ è ko dó ya nú mì ɖe ɔ́ mɛ.” Xwe tɛ́nwe e nǔɖuɖu ná tíin xɔ, ɖo Ejípu lɛ́ɛ wá yi. Bɔ xwe tɛ́nwe e adɔ ná tɔ́n ná lɛ́ɛ bɛ́ lě e Jozɛ́fu ɖɔ gbɔn é. Adɔ tɔ́n ɖo to lɛ́ɛ bǐ mɛ. Lo ɔ́, nǔɖuɖu tíin ɖo Ejípu to ɔ́ bǐ mɛ. Ée adɔ wá syɛ́n bǐ ɖo Ejípu to ɔ́ mɛ ɔ́, togun ɔ́ bǐ wlí xósúsú bó yi axɔ́sú ɔ́ gɔ́n, bó byɔ́ nǔɖuɖu. Axɔ́sú ɔ́ ká ɖɔ nú yě bǐ ɖɔ: “Mi yi Jozɛ́fu gɔ́n, bó bló nǔ e é ná ɖɔ nú mi é bǐ.” Adɔ kpa zinkpo bó jínjɔ́n ayǐ ɖo to ɔ́ bǐ mɛ. Énɛ́ ɔ́, Jozɛ́fu hun blěe lɛ́ɛ bǐ bó sa blěe nú Ejípunu lɛ́ɛ. Adɔ ɔ́ ká lɛ́ ɖo syɛ́nsyɛ́n d'é jí wɛ ɖo Ejípu. Bɔ mɛ lɛ́ɛ nɔ gosín to lɛ́ɛ mɛ to lɛ́ɛ mɛ, bó nɔ́ wá xɔ blěe ɖo Jozɛ́fu sí; ɖó adɔ ɔ́ syɛ́n ɖésú ɖo gbɛ ɔ́ bǐ mɛ. Jakɔ́bu se ɖɔ blěe tíin ɖo Ejípu, lobo ɖɔ nú vǐ tɔn súnnu lɛ́ɛ ɖɔ: “Nɛ̌ gbɔn bɔ mi ka cí fí bó nɔ́ ɖo miɖée kpɔ́n wɛ? Un se ɖɔ blěe tíin ɖo Ejípu. Mi wá yi dɔ̌n, bó ná xɔ ɖě wá nú mǐ, bónú mǐ ná mɔ nǔ ɖu, bɔ adɔ sɔ́ ná hu mǐ ǎ.” Ée Jakɔ́bu ɖɔ mɔ̌ ɔ́, Jozɛ́fu sín nɔví súnnu wǒ ɖidó Ejípu, bó ná yi xɔ blěe. Jakɔ́bu lɔn bɔ Bɛnjamɛ́ɛ, Jozɛ́fu sín nɔví kpɛví ɔ́ xwedó yě yi ǎ; ɖó é ɖo xɛsi ɖi wɛ ɖɔ nǔ baɖabaɖa ɖé táá jɛ dó jǐ tɔn. Jakɔ́bu ví lɛ́ɛ wá Ejípu bɔ yě kpó nǔxɔtɔ́ ɖěvo lɛ́ɛ kpó wá kplé afɔ, ɖó adɔ tɔ́n ɖo Kanáa to ɔ́ bǐ mɛ. Jozɛ́fu wɛ nyí tokpɔngán ɖo to ɔ́ mɛ; é wɛ nɔ́ sa blěe nú mɛ bǐ. Nɔví tɔn lɛ́ɛ ká wá, bó ɖe kɔ́ n'i. Jozɛ́fu mɔ nɔví tɔn lɛ́ɛ bó tunwun; amɔ̌, é bló nǔ mɛ ma tunwun yě ɖɔhun; é kanbyɔ́ yě kpó adǎn kpó ɖɔ: “Fítɛ́ mi gosín?” Bɔ yě yí gbe n'i ɖɔ: “ Kanáa wɛ mǐ gosín, bó wá nǔɖuɖu xɔ gbé.” Jozɛ́fu tunwun nɔví tɔn lɛ́ɛ, amɔ̌, yědɛɛ lɛ́ɛ tunwun i ǎ. É flín dlɔ̌ e é kú dó yě wú lɛ́ɛ, bó ɖɔ nú yě ɖɔ: “Nǔdobatɔ́ wɛ mi nyí; fí e to ɔ́ ɖo nuvo ɖe lɛ́ɛ ba do ná gbé wɛ mi tɔ́n.” Yě ká gbɛ́ bó ɖɔ: “Mɔ̌ wɛ ǎ mɛ gǎn, blěe xɔ gbé wɛ mǐ mɛsɛntɔ́ towe lɛ́ɛ ja. Tɔ́ ɖokpó ɔ́ ví wɛ mǐ nyǐ. Mǐ nyǐ adingbannɔ ǎ; mǐ mɛsɛntɔ́ towe lɛ́ɛ nyí nǔdobatɔ́ ǎ.” Bɔ Jozɛ́fu ɖɔ nú yě ɖɔ: “Mi tɔ́n blěe kɛ́ɖɛ́ xɔ gbé ǎ. Fí e to ɔ́ ɖo nuvo ɖe lɛ́ɛ ba do ná gbé wɛ mi tɔ́n.” Yě ká ɖɔ n'i ɖɔ: “Mǐ mɛ mɛsɛntɔ́ towe lɛ́ɛ ɔ́, tɔ́ ɖokpó ɔ́ sín vǐ súnnu wěwe wɛ mǐ nyí ɖo Kanáa. Mɛ e nyí yɔkpɔ́vú bǐ ɖo mǐ mɛ ɔ́ ɖo tɔ́ mǐtɔn gɔ́n din, bɔ nɔví mǐtɔn ɖokpó ká tíin bó sɔ́ ɖe ǎ.” Bɔ Jozɛ́fu ɖɔ nú yě ɖɔ: “Nǔ e ɖɔ nú mi wɛ un ɖe ɔ́ nɛ́; nǔdobatɔ́ wɛ mi nyí. Un ná tɛ́n mi kpɔ́n: un xwlé axɔ́sú Ejípu tɔn ɔ́ nú mi. Cóbónú mi ná gosín fí ɔ́, nɔví mitɔn kpɛví bǐ ɔ́ jɛ́n mi ná yi kplá wá. Mi sɛ́ mɛ ɖokpó dó nú é ní yi kplá nɔví mitɔn ɔ́ wá. Midɛɛ lɛ́ɛ ɔ́, un nǎ wlí mi dó gan ɖo fí. Un ná ba do nú xó mitɔn kpɔ́n, bó ná kpɔ́n ɖɔ xó nǔgbó ɖɔ wɛ mi ɖe a jí; é má nyí mɔ̌ ǎ hǔn, nǔdobatɔ́ wɛ mi nyí; axɔ́sú Ejípu tɔn ɔ́ wɛ un xwlé nú mi.” Ée Jozɛ́fu ɖɔ mɔ̌ ɔ́, é bɛ́ yě dó gankpá mɛ nú azǎn atɔn. Azǎn tɔn atɔngɔ́ ɔ́ gbe ɔ́, Jozɛ́fu ɖɔ nú yě ɖɔ: “Đó nyɛ ɖó sísí nú Mawu wútu ɔ́, nǔ e mi ná wa bó ná gán ɔ́ ɖíe: Ényí xó nǔgbó ɖɔ wɛ jɛ́n mi ɖe hǔn, mi mɛ ɖokpó ní cí gankpá ɔ́ mɛ, bónú mɛ e kpo lɛ́ɛ ná zé blěe yi jó nú mɛ mitɔn e xovɛ́ ɖo sinsin wɛ ɖo xwé lɛ́ɛ, bó ná kplá nɔví mitɔn kpɛví ɔ́ wá nú mì. Énɛ́ ɔ́, un ná tunwun ɖɔ xó nǔgbó ɖɔ wɛ mi ɖe, bɔ mi sɔ́ ná kú ǎ.” Bɔ yě yí gbe nú nǔ e Jozɛ́fu ɖɔ nú yě ɔ́. Énɛ́ ɔ́, yě jɛ ɖiɖɔ nú yěɖée jí ɖɔ: “Agɔ ɖésú wɛ mǐ jɛ dó nɔví mǐtɔn mɛ, ɖó hwenu e é ɖo kɛnklɛ́n dó nú mǐ wɛ bɔ mǐ gbɛ́ bǐ ɔ́, mǐ mɔ ya e ji wɛ é ɖe ɔ́ hǔn. Nǔ énɛ́ ɔ́ wɛ zɔ́n bɔ mǐ lɔ wá ɖo hwɛ xɔ́ sú wɛ.” Hwlibɛ́ni ka yí xó, bó ɖɔ nú yě ɖɔ: “Un ma gbɛ́ nú mi hwenɛ́nu ɖɔ mi ní má wa nǔ nyanya ɖé xá nyaví ɔ́ ó a? Un gbɛ́ nú mi, mi ka ba ná se ǎ. Hun tɔn ɖíe ɖo axɔ́ byɔ́ mǐ wɛ e.” Yě ká tunwun ɖɔ Jozɛ́fu se gbe e dó wɛ émí ɖe ɔ́ ǎ, ɖó nú é ja xó ɖɔ xá yě gbé ɔ́, gbesetɔ́ wɛ é nɔ́ ba. Ée Jozɛ́fu se xó e ɖɔ wɛ yě ɖe ɔ́, é gosín yě gɔ́n bó bɛ́ avǐ. Jozɛ́fu lɛ́ kɔ wá yě gɔ́n, bó ɖɔ xó xá yě. Énɛ́ ɔ́ gúdo ɔ́, é wlí mɛ e nɔ nyí Sinmɛnyɔ́ɔ ɖo yě mɛ ɔ́, bó dó wlɔ ɛ ɖo nukún yětɔn mɛ. Énɛ́ ɔ́ gúdo ɔ́, Jozɛ́fu ná gbe ɖɔ è nǐ dó blěe dó ati yětɔn lɛ́ɛ mɛ, bónú é ní gɔ́, bónú è nǐ zé mɛ ɖokpó ɖokpó sín akwɛ́ dó ati tɔn mɛ, lobo ná nǔ e yě ná ɖu ɖo alixo ɔ́ yě; bɔ è blǒ lě e Jozɛ́fu ɖɔ gbɔn ɔ́. Énɛ́ ɔ́, yě dó blěegban nú tócí yětɔn lɛ́ɛ bó ɖidó. Zǎn kú dó yě ɖo fí ɖé, bɔ yě ná dɔ́ fínɛ́. Mɛ ɖokpó ká ɖo yě mɛ, bó tún ati tɔn, bó ná ná nǔɖuɖu tócí tɔn; é ná mɔ nǔɖé ɔ́, é mɔ akwɛ́ ɖo blěe ɔ́ jí aga. Ée é mɔ mɔ̌ ɔ́, é ɖɔ nú nɔví tɔn lɛ́ɛ ɖɔ: “È lɛ̌ kɔ nú akwɛ́ nyɛtɔn; é ɖíe ɖo ati ce mɛ e.” Bɔ ayi yětɔn gbadó, bɔ yě jɛ sísɔ́sísɔ́ jí, lobo nɔ ɖɔ nú yěɖée ɖɔ: “Étɛ́ ɖíe Mawu wa xá mǐ e?” Ée yě yi mɔ tɔ́ yětɔn Jakɔ́bu ɖo Kanáa ɔ́, yě wlí nǔ e jɛ lɛ́ɛ bǐ ɖɔ n'i. Yě ɖɔ n'i ɖɔ: “Ée mǐ yi ɔ́, dǎwe e nyí gǎn ɖo to ɔ́ nu ɔ́ bɛ́ zǐngídi dó mǐ jí, bó mɔ mǐ dó mɔ nǔdobatɔ́. Bɔ mǐ ɖɔ n'i ɖɔ: ‘Mǐ nyǐ nǔdobatɔ́ ǎ. Mǐ nyǐ adingbannɔ ǎ. Mǐ mɛ wěwe wɛ nyí tɔ́ ɖokpó ɔ́ ví, bɔ mɛ ɖokpó ɖo mǐ mɛ, bó sɔ́ ɖe ǎ. Mɛ kpɛví bǐ e ká ɖo mǐ mɛ ɔ́ ɖo tɔ́ mǐtɔn gɔ́n ɖo Kanáa.’ Mɛ e nyí gǎn ɖo to ɔ́ nu ɔ́ ká ɖɔ nú mǐ ɖɔ: ‘Ényí nǔgbó ɖɔ wɛ jɛ́n mi ɖe din ɔ́, fí e un ná tunwun ɖe ɔ́ ɖíe: mi ná jó nɔví mitɔn ɖokpó dó nú mì, bó ná yí blěe e mi ná yi ná mɛ mitɔn e xovɛ́ ɖo sinsin wɛ ɖo xwé lɛ́ɛ, bó ná yi, lobo ná kplá nɔví mitɔn kpɛví ɔ́ wá nú mì. Énɛ́ ɔ́, un ná tunwun ɖɔ xó nǔgbó ɖɔ wɛ mi ɖe; mi kún nyí nǔdobatɔ́ ó. Nú mi lɛ́ kɔ wá ɔ́, un ná jó nɔví mitɔn dó nú mi, bɔ mi ná vo bó wa ajɔ̌ ɖo to ɔ́ mɛ.’ ” Ée yě ɖɔ xó énɛ́ ɔ́, bó húzú ati yětɔn lɛ́ɛ ɔ́, mɛ ɖokpó ɖokpó mɔ akwɛ́ tɔn ɖo blǎblá ɖo ati tɔn mɛ. Yě kpó tɔ́ yětɔn kpó mɔ akwɛ́ bláblá lɛ́ɛ bɔ xɛsi jɛ yě jí. Bɔ tɔ́ yětɔn ɖɔ nú yě ɖɔ: “Mi ɖo vǐ ce lɛ́ɛ yí sín así ce wɛ: Jozɛ́fu sɔ́ ɖe ǎ, Sinmɛnyɔ́ɔ sɔ́ ɖe ǎ, bɔ din ɔ́, mi lɛ́ jló ná zé Bɛnjamɛ́ɛ yi. Nyɛ ɖokpónɔ jɛ́n nǔ wa.” Hwlibɛ́ni ɖɔ nú tɔ́ tɔn ɖɔ: “Daá, jǒ Bɛnjamɛ́ɛ dó nú mì; un ná kplá ɛ wá nú we; nú un ma kplá ɛ wá nú we ǎ hǔn, hu vǐ ce súnnu we lɛ́ɛ.” Bɔ Jakɔ́bu ɖɔ: “Vǐ ce ná xwedó mi ǎ; ɖó fofó tɔn kó kú, bɔ é kpo éyɛ́ ɖokpónɔ. Ényí é xwedó mi bónú nǔɖé wa ɛ ɖo alixo ɔ́, é ná sín nǔ énɛ́ ɔ́ wú, bɔ un ná kú; lě e un ko kpo sɔ din é ɔ́, un ná nɔ aluwɛ mɛ káká bó ná kú.” Adɔ e tɔ́n ɔ́ lɛ́ ɖo syɛ́nsyɛ́n d'é jí wɛ ɖo Kanáa. Ée Jakɔ́bu kpó mɛ tɔn lɛ́ɛ kpó ɖu blěe e yě hɛn wá sín Ejípu ɔ́ bǐ ɔ́, é ɖɔ nú vǐ tɔn lɛ́ɛ ɖɔ: “Mi sɔ́ nǔ bó ná lɛ́ yi xɔ blěe kpɛɖé wá nú mǐ.” Judáa ka ɖɔ n'i ɖɔ: “Nya e nyí gǎn ɖo dɔ̌n ɔ́ ɖɔ nú mǐ tawun ɖɔ nú mǐ má kplá nɔví mǐtɔn kpɛví ɔ́ wá ǎ ɔ́, émí kún ná yí mǐ gbeɖé ó. Énɛ́ ɔ́ wú ɔ́, nú a yǐ gbe bɔ Bɛnjamɛ́ɛ ná xwedó mǐ yi ɔ́, mǐ ná yi xɔ blěe wá nú we. Amɔ̌, nú a gbɛ̌ ɔ́, mǐ ná yi ǎ, ɖó nya ɔ́ kó ɖɔ nú mǐ ɖɔ nú mǐ má kplá nɔví mǐtɔn kpɛví ɔ́ wá ǎ ɔ́, émí kún ná yí mǐ gbeɖé ó.” Ée Judáa ɖɔ mɔ̌ ɔ́, Jakɔ́bu kanbyɔ́ yě ɖɔ: “Nɛ̌ gbɔn bɔ mi lɔ ka ɖɔ nú nya ɔ́ ɖɔ émí ɖó nɔví kpɛví tawun? Nǔ wɛ mi wa dó mì hǔn.” Vǐ lɛ́ɛ ká yí gbe n'i ɖɔ: “Nya ɔ́ wɛ tɛ́n hǔn dó xo nú mǐ, bó kan nǔ byɔ́ mǐ dó mǐ ɖésúnɔ kpó mɛ mǐtɔn lɛ́ɛ kpó wú; é kanbyɔ́ mǐ ɖɔ tɔ́ mǐtɔn kpo ɖo gbɛ a jí, mǐ ɖó nɔví ɖěvo a jí, bɔ mǐ ká yí gbe nú nǔ e é kanbyɔ́ mǐ lɛ́ɛ. Mǐ má tunwun ɖɔ é ná ɖɔ nú mǐ ɖɔ mǐ ní yi kplá nɔví mǐtɔn ɔ́ wá nɛ́.” Judáa ɖɔ nú tɔ́ tɔn ɖɔ: “Daá, gbɔ nú Bɛnjamɛ́ɛ ní xwedó mì; mǐ ná sɔ́ nǔ bó ná ɖidó. Énɛ́ ɔ́, hwi kpó mǐ kpó, kpó vǐ mǐtɔn lɛ́ɛ kpó sɔ́ ná kú adɔ ǎ; mǐ ná nɔ gbɛ. É ɖo alɔ ce mɛ; nyɛ wɛ a nǎ kan ɛ byɔ́. Ényí un ma kplá ɛ wá nú we ǎ hǔn, hwɛ tɔn ní nɔ kɔ ce káká sɔ́yi. Nú é má nyí ɖɔ mǐ kó nɔ te dín wɛ ǎ ɔ́, mǐ ná kó yi dɔ̌n, bó wá azɔn we din.” Énɛ́ ɔ́, tɔ́ yětɔn Jakɔ́bu ɖɔ nú yě ɖɔ: “Ényí mɔ̌ wɛ hǔn, nǔ e mi ná bló ɔ́ ɖíe: nú mi xweyǐgbe ɔ́, mi ná hɛn nǔ e nyɔ́ hú nǔ bǐ ɖo to mǐtɔn mɛ lɛ́ɛ ati mɛ, bó ná yi ná nya ɔ́: mi ná hɛn célu kpɛɖé, wǐin kpɛɖé, bó ná hɛn nǔsáwǔ wǎnɖagbenɔ, atínhúnhɔ́n kpɛɖé, pitáci kpɛɖé, kpódó amadi kpɛɖé kpó. Mi ná hɛn akwɛ́ e mi ná dó xɔ nǔ ná ɔ́, bó ná lɛ́ hɛn akwɛ́ e mi wá mɔ ɖo ati mitɔn lɛ́ɛ mɛ ɔ́ yi. É sixú nyí wɔn wɛ yě wɔn jó dó nyi ati mitɔn lɛ́ɛ mɛ. Mi bo sɔ́ nǔ bó kplá nɔví mitɔn, lobo yi nya ɔ́ gɔ́n. Mawu Nǔbǐwúkpétɔ́ ɔ́ ní bló bónú nya ɔ́ ní kú nǔbláwǔ nú mi, bó jó Sinmɛnyɔ́ɔ kpó Bɛnjamɛ́ɛ kpó dó, nú yě ní lɛ́ kɔ xwedó mi wá xwé. Nyɛ ɔ́, nú é byɔ́ ɖɔ má ba vǐ ce lɛ́ɛ kpo hǔn, má ba yě kpo.” Jakɔ́bu ví lɛ́ɛ bɛ́ nǔ e yě ná yi ná Jozɛ́fu lɛ́ɛ, bó zé akwɛ́ e yě ná yi xɔ jinukún ná é kpó akwɛ́ e yě wá mɔ ɖo ati yětɔn lɛ́ɛ mɛ ɔ́ kpó. Yě sɔ́ nǔ, bó kplá Bɛnjamɛ́ɛ, bó yi Ejípu ɖo Jozɛ́fu gɔ́n. Ée Jozɛ́fu mɔ ɖɔ Bɛnjamɛ́ɛ kpó yě kpó wɛ wá ɔ́, é ɖɔ nú nǔjíkpɔ́ntɔ́ tɔn ɖɔ: “Kplá mɛ élɔ́ lɛ́ɛ yi xwé ce gbe; a nǎ hu kanlin ɖokpó, bó ná bló nǔɖuɖu ɖ'ayǐ, ɖó é jɛ hwemɛ ɔ́, yě ná ɖu nǔ xá mì.” Nya nǔjíkpɔ́ntɔ́ ɔ́ ká bló nǔ e Jozɛ́fu ɖɔ n'i é; é kplá yě yi gǎn tɔn xwé. Ée é kplá yě xwe xwé ɔ́ gbe ɔ́, xɛsi jɛ yě jí, bɔ yě ɖɔ: “Akwɛ́ e è sɔ́ dó ati mǐtɔn lɛ́ɛ mɛ azǎn nabí ɖé ɖíe ɔ́ wú wɛ è kplá mǐ xweyǐgbe. È jlǒ ná zɔn jǐ mǐtɔn, bó dó ya nú mǐ; è nǎ sɔ́ mǐ dó ɖó kannumɔ, bó ná yí tócí mǐtɔn lɛ́ɛ.” Hwenu e yě jló ná byɔ́ xwé ɔ́ gbe ɔ́, yě sɛ yi nǔjíkpɔ́ntɔ́ ɔ́ gɔ́n, bó ɖɔ n'i ɖɔ: “Kɛnklɛ́n! Mǐ kó wá fí ɖokpó kpɔ́n, bó wá xɔ nǔɖuɖu. Ée mǐ lɛ́ kɔ bo jɛ fí e mǐ ɖó ná dɔ́ ɔ́, mǐ hun ati mǐtɔn lɛ́ɛ, bó mɔ ɖɔ akwɛ́ e ɖokpó ɖokpó mǐtɔn lɛ́ɛ dó xɔ nǔ ná ɔ́ ɖo ati mǐtɔn mǐtɔn mɛ. Amɔ̌, mǐ hɛn akwɛ́ lɛ́ɛ wá; akwɛ́ lɛ́ɛ ɖíe. Đě hwe ǎ. Mǐ tunwun mɛ e bɛ́ akwɛ́ ɔ́ dó ati mǐtɔn lɛ́ɛ mɛ ɔ́ ǎ. Mǐ hɛn akwɛ́ ɖěvo wá din bó ná lɛ́ dó xɔ nǔɖuɖu ɖěvo ná.” Nǔjíkpɔ́ntɔ́ ɔ́ ká ɖɔ nú yě ɖɔ: “Ayi mitɔn ní jɛ ayǐ; mi ma ɖi xɛsi ó. Mawu mitɔn, Mawu tɔ́gbó mitɔn tɔn ɔ́ wɛ zé dɔkun dó ati mitɔn lɛ́ɛ mɛ. Nyɛ yí akwɛ́ e mi dó xɔ nǔ ná ɔ́ dó gbǎ mɛ.” Ée é ɖɔ mɔ̌ ɔ́, é yi kplá Sinmɛnyɔ́ɔ wá nú yě, bó kplá yě mɛ bǐ byɔ́ Jozɛ́fu sín xwé gbe. É wún sin nú yě bɔ yě dó klɔ́ afɔ ná. É ná nǔɖuɖu tócí yětɔn lɛ́ɛ lɔmɔ̌. Yě se ɖɔ fínɛ́ wɛ Jozɛ́fu kpó yě kpó ná ɖu nǔ ɖe; énɛ́ ɔ́, yě sɔ́ nǔ e yě ná ná Jozɛ́fu lɛ́ɛ ɖó alɔ jí cóbɔ é ná wá xwé gbe hwemɛ. Ée Jozɛ́fu wá xwé gbe ɔ́, yě bɛ̌ nǔ e yě hɛn bó ná ná ɛ lɛ́ɛ n'i, bó ɖe kɔ́ n'i. Jozɛ́fu ka kan lě e yě ɖe gbɔn ɔ́ byɔ́; é kan byɔ́ yě ɖɔ: “Tɔ́ mitɔn ɖíe ko kpo bǐ bɔ mi ɖɔ e; é ɖo ɖagbe a? É kpo ɖo gbɛ a?” Bɔ yě yí gbe n'i ɖɔ: “Tɔ́ mǐtɔn mɛsɛntɔ́ towe ɔ́ ɖo ɖagbe; é kpo ɖo gbɛ.” Ée yě ɖɔ mɔ̌ ɔ́, yě yi do lobo ɖe kɔ́. Jozɛ́fu zé ta bó mɔ Bɛnjamɛ́ɛ nɔví tɔn, nɔ tɔn ví ɔ́, bó ɖɔ: “Tɔ́ mitɔn ví kpodé e xó mi ɖɔ nú mì ɔ́ ɖíe a?” É lɛ́ ɖɔ: “Mawu ní kú nǔbláwǔ nú we se a vǐ ce!” Ée Jozɛ́fu mɔ nɔví tɔn mɔ̌ ɔ́, tamɛ tɔn kɔ́yi, bɔ ɖasin wá yi dó e; é gbɔ bó yá wǔ byɔ́ xɔ mɛ bó ya avǐ. Ée é ya avǐ fó ɔ́, é fún nukún mɛ bó tɔ́n wá gɔ̌n yětɔn. É ɖo gǎn dó wɛ bó ná ɖu ɖo éɖée jí, bó ɖɔ è nǐ bɛ́ nǔɖuɖu lɛ́ɛ wá. È nǎ nǔɖuɖu Jozɛ́fu ɖó vo, bó ná nɔví tɔn lɛ́ɛ ɖó vo; è nǎ Ejípunu e nɔ ɖu nǔ xá ɛ lɛ́ɛ lɔmɔ̌ ɖó vo, ɖó Ejípunu lɛ́ɛ sixú dó alɔ kpɔ́ xá Eblée lɛ́ɛ ǎ; su wɛ é nyí nú yě. Jozɛ́fu sín nɔví lɛ́ɛ jínjɔ́n nukɔn tɔn. È to yě ɖě bɔ dó ɖě wú, bɛ́ sín mɛ e nyí mɛxó yětɔn ɔ́ jí káká yi jɛ mɛ e nyí yɔkpɔ́vú yětɔn bǐ ɔ́ jí. Lě e è to yě gbɔn ɔ́ kpácá yě bɔ yě nɔ́ kpɔ́n yěɖée. Nǔ e ɖu wɛ Jozɛ́fu ɖe ɔ́ wɛ é ɖɔ bɔ è nǎ yě. Nǔɖuɖu e Jozɛ́fu ɖɔ bɔ è nǎ Bɛnjamɛ́ɛ ɔ́ hú nɔví tɔn ɖě lɛ́ɛ tɔn azɔn atɔ́ɔ́n. Yě kpó é kpó nu ahan, bɔ é kpé yě. Énɛ́ ɔ́ gúdo ɔ́, Jozɛ́fu zɔ́n nǔjíkpɔ́ntɔ́ tɔn ɖɔ: “Dǒ blěe dó mɛ élɔ́ lɛ́ɛ ɖokpó ɖokpó sín ati mɛ ní gɔ́, lě e yě ná sixú hɛn gbɔn é, bó fɔ akwɛ́ yětɔn yětɔn ɖó blěe ɔ́ jí ɖo ati ɔ́ mɛ. A nǎ lɛ́ zé kɔ́fu ce e è sɔ́ kpatágan dó bló ná ɔ́ dó mɛ kpɛví bǐ ɔ́ sín ati mɛ, ɖo akwɛ́ e é hɛn bó ná dó xɔ blěe ná é kpá.” Nǔjíkpɔ́ntɔ́ ɔ́ ká bló nǔ e Jozɛ́fu ɖɔ n'i ɔ́. Ayǐhɔ́ngbe tɔn ɔ́, ée wun kɛn lě tlóló ɔ́, é ná gbe Jakɔ́bu ví lɛ́ɛ, bɔ yě ɖidó, yě kpó tócí yětɔn lɛ́ɛ kpó. Toxo ɔ́ mɛ wɛ yě tɔ́n sín kɛ́ɖɛ́, yě kó jɛ fí ɖé ǎ, bɔ Jozɛ́fu ɖɔ nú nǔjíkpɔ́ntɔ́ tɔn ɖɔ: “Sí te bó jɛ mɛ énɛ́ lɛ́ɛ gúdo. Nú a sun yě dó ɔ́, a nǎ kanbyɔ́ yě ɖɔ: ‘Nɛ̌ wɛ gbɔn bɔ mi zé nǔ nyanya dó sú nǔ ɖagbe xɔ́ ná? Kpatágan kɔ́fu e mɛ gǎn ce nɔ́ nu sin ɖe, bó nɔ́ lɛ́ dó tunwun sɔ e ja é ná ɔ́ ɖo así mitɔn a cé? Nǔ énɛ́ ɔ́ e mi wa ɔ́ nyɔ́ ɖěbǔ ǎ.’ ” Nǔjíkpɔ́ntɔ́ ɔ́ ká jɛ gǔdo yětɔn nǔgbó, bó yi sun yě dó, lobo ɖɔ xó e gǎn tɔn ɖɔ ní ɖɔ lɛ́ɛ nú yě. Jakɔ́bu ví lɛ́ɛ ká yí gbe n'i ɖɔ: “Nɛ̌ wɛ gbɔn bɔ gǎn mǐtɔn ká ɖo xó ɖɔ gbɔn mɔ̌ wɛ? Mǐ mɛsɛntɔ́ towe lɛ́ɛ ná wa mɔ̌ gbeɖé ǎ. Akwɛ́ e mǐ mɔ ɖo ati mǐtɔn lɛ́ɛ mɛ ɖo Kanáa ɔ́, mǐ lɛ́ kɔ ná wá nú we. Aniwú mǐ ká ná fin kpatágan abǐ siká ɖo gǎn towe xwé? Mɛ e sí a nǎ mɔ kɔ́fu ɔ́ ɖe ɖo mǐ mɛsɛntɔ́ towe lɛ́ɛ mɛ ɔ́, mɛ ɔ́ ní kú, bónú mǐ lɔmɔ̌ ní húzú kannumɔ towe.” Nǔjíkpɔ́ntɔ́ ɔ́ ɖɔ nú yě ɖɔ: “É nyɔ́! Lě e mi ɖɔ gbɔn ɔ́ wɛ un ná xwedó. Mɛ e sí un ná mɔ kɔ́fu ɔ́ ɖe ɔ́ ná nyí kannumɔ ce. Un ka ná jó mɛ e kpo lɛ́ɛ dó.” Ée é ɖɔ mɔ̌ tlóló ɔ́, mɛ ɖokpó ɖokpó ɖe agban tɔn sín tócí tɔn jí, bó hun ɖó nuvo. Nǔjíkpɔ́ntɔ́ ɔ́ ká kíjé ati lɛ́ɛ. É bɛ́ sín mɛ e nyí mɛxó nú yě ɔ́ jí, bó wá fó dó mɛ e nyí yɔkpɔ́vú bǐ ɔ́ jí, bó wá mɔ kɔ́fu ɔ́ ɖo Bɛnjamɛ́ɛ yɔkpɔ́vú bǐ ɔ́ sín ati mɛ. Ée nǔ cí mɔ̌ ɔ́, ahwi xo yě, bɔ yě vún awu yětɔn lɛ́ɛ dó kɔ nú yěɖée, bɔ mɛ ɖokpó ɖokpó lɛ́ dó agban nú tócí tɔn, bó lɛ́ kɔ yi toxo ɔ́ mɛ. Judáa kpó nɔví tɔn lɛ́ɛ kpó wá Jozɛ́fu xwé. Jozɛ́fu ka kpo ɖo xwé gbe, bɔ yě jɛ kpo bó ɖe kɔ́. Jozɛ́fu ka kanbyɔ́ yě ɖɔ: “Nɛ̌ gbɔn bɔ mi wa nǔ gbɔn mɔ̌? Mi tunwun ɖɔ gbɛtɔ́ nyɛ ɖɔhun ɔ́, ɖó acɛ bó nɔ tunwun nǔ e ɖo jijɛ wɛ ɔ́ bǐ ǎ cé?” Judáa ka yí gbe ɖɔ: “Xó tɛ́ mǐ nǎ ɖɔ? Nɛ̌ mǐ nǎ wa gbɔn bó mɛ́ ɖ'é mɛ? Mawu mɔ hwɛ e mǐ mɛsɛntɔ́ towe lɛ́ɛ hu é. Hǔn mǐ kpó mɛ e sí è mɔ kɔ́fu ɔ́ ɖe ɔ́ kpó húzú hwi gǎn ce ɔ́ sín kannumɔ.” Bɔ Jozɛ́fu ɖɔ: “Un sixú bló mɔ̌ gbeɖé ǎ. Mɛ e sí è mɔ kɔ́fu ɔ́ ɖe ɔ́ wɛ ná nyí kannumɔ ce. Midɛɛ lɛ́ɛ mi lɛ́ kɔ yi tɔ́ mitɔn gɔ́n dó fífá mɛ.” Ée Jozɛ́fu ɖɔ mɔ̌ ɔ́, Judáa sɛkpɔ́ ɛ bó ɖɔ: “Kɛnklɛ́n gǎn ce, nú nyɛ mɛsɛntɔ́ towe ná ɖɔ xó ɖokpó nú we. Un tunwun ɖɔ acɛ ɖokpó ɔ́ wɛ hwi kpó axɔ́sú ɔ́ kpó ɖó; nǔ ɖo mɔ̌ có, ma sin xomɛ dó nyɛ mɛsɛntɔ́ towe ɔ́ ó. Azɔn nukɔn nukɔntɔn ɔ́, a kanbyɔ́ mǐ ɖɔ tɔ́ mǐtɔn kpo ɖo gbɛ a jí, abǐ mǐ lɛ́ ɖó nɔví ɖěvo a jí. Mǐ ká yí gbe ɖɔ tɔ́ mǐtɔn kpo ɖo gbɛ, bó ká kó kpo. Mǐ ká ɖó nɔví súnnu kpɛví ɖokpó, bɔ tɔ́ mǐtɔn ji ɖo kpikpoxɔmɛ. Nɔví mǐtɔn énɛ́ ɔ́ ɖó fofó ɖokpó bɔ é nyí nɔ tɔn sín vǐ; é ká kó kú. É wá kpo é ɖokpónɔ bɔ tɔ́ mǐtɔn yí wǎn n'i. Ée mǐ ɖɔ mɔ̌ ɔ́, a ɖɔ nú mǐ mɛsɛntɔ́ towe lɛ́ɛ ɖɔ mǐ ní yi kplá nɔví mǐtɔn énɛ́ ɔ́ wá bónú émí ná mɔ ɛ ɖó nukún wú. Bɔ mǐ ká yí gbe nú we ɖɔ nyaví ɔ́ kún sixú jó tɔ́ tɔn dó ó, ɖó nú é jó e dó ɔ́, tɔ́ ɔ́ ná kú. Bɔ a ɖɔ nú mǐ mɛsɛntɔ́ towe lɛ́ɛ ɖɔ nú mǐ má kplá nɔví mǐtɔn kpɛví ɔ́ wá ǎ ɔ́, émí kún ná yí mǐ gbeɖé ó. Énɛ́ ɔ́, ée mǐ lɛ́ kɔ yi mɛsɛntɔ́ towe, tɔ́ mǐtɔn ɔ́ gɔ́n ɔ́, mǐ ɖɔ xó e a ɖɔ lɛ́ɛ n'i. Énɛ́ ɔ́ wú wɛ hwenu e tɔ́ mǐtɔn ɖɔ nú mǐ ɖɔ mǐ ní lɛ́ kɔ wá xɔ nǔɖuɖu kpɛɖé wá nú émí ɔ́, mǐ ɖɔ n'i ɖɔ nú mǐ má kplá nɔví mǐtɔn kpɛví ɔ́ ǎ ɔ́, mǐ kún ná yi ó, ɖó nú mǐ má kplá ɛ hɛn yi ǎ ɔ́, nya e nyí gǎn ɖo dɔ̌n ɔ́ kún ná yí mǐ gbeɖé ó; nɔví mǐtɔn kpɛví ɔ́ jɛ́n mǐ ná kplá. Bɔ mɛsɛntɔ́ towe tɔ́ mǐtɔn ɖɔ nú mǐ ɖɔ: ‘Mi tunwun ganjí ɖɔ asi ce ɔ́, vǐ súnnu we wɛ é ji nú mì. Mɛ ɖokpó tíin bó bú. Un ɖi ɖɔ adǎnkanlin ɖé wɛ ná kó wlí i ɖu, ɖó un sɔ́ mɔ ɛ gbeɖé káká wá jɛ din ǎ. Ényí mi lɛ́ kplá mɛ élɔ́ sín así ce din bónú nǔɖé wa ɛ hǔn, mi tunwun ɖɔ lě e un ko kpo sɔ élɔ́ ɔ́, un ná nɔ aluwɛ mɛ káká bó ná kú. Mi wɛ ka ná zɔ́n.’ Énɛ́ ɔ́ wú ɔ́, ényí un lɛ́ kɔ yi gɔ̌n tɔn, bó má kplá vǐ ɔ́ yi ǎ ɔ́, éyɛ́ mɛ e vǐ tɔn vɛ́ n'i sɔ mɔ̌ ɔ́, ényí é mɔ ɖɔ vǐ ɔ́ kún wá ó ɔ́, é ná kú. É ká kú mɔ̌ ɔ́, é ná nyí ɖɔ mǐ mɛsɛntɔ́ towe lɛ́ɛ wɛ zɔ́n bɔ é ná nɔ aluwɛ mɛ ɖo kpikpoxɔmɛ káká bó kú. Nyɛ mɛsɛntɔ́ towe ɔ́ wɛ ká lɛ zin alɔ dó akɔ́n bó ɖɔ nú tɔ́ ce ɖɔ: ‘Ényí un ma kplá vǐ towe wá nú we ǎ hǔn, hwɛ tɔn ní nɔ kɔ ce káká sɔ́yi.’ Hǔn bo kɛnklɛ́n bó yí gbe, bónú nyɛ mɛsɛntɔ́ towe ɔ́ ná nyí kannumɔ towe ɖó vǐ ɔ́ tɛnmɛ; énɛ́ ɔ́, é ná lɛ́ kɔ xwedó fofó tɔn lɛ́ɛ yi xwé. Ényí nyɛ kpó vǐ ɔ́ kpó má zɔn yi ǎ ɔ́, nɛ̌ un ná sixú yi tɔ́ ce gɔ́n gbɔn? Étɛ́! Tɔ́ ce jɛ aluwɛ mɛ ɔ́, é ná nyɔ́ mɔ nú mì ǎ.” Ée Judáa ɖɔ xó fó ɔ́, Jozɛ́fu sɔ́ sixú ɖu ɖo éɖée jí ɖo mɛ e lɛ́ dó e lɛ́ɛ nukɔn ǎ, bó gbɔ bó ɖɔ nú mɛsɛntɔ́ lɛ́ɛ ɖɔ yě bǐ ní tɔ́n. Ée yě tɔ́n ɔ́, é wá kpo é kpó nɔví tɔn lɛ́ɛ kpó, bɔ é ɖe éɖée xlɛ́ yě. É ɖo avǐ ya wɛ, bɔ gbe tɔn ɖo jǐ yi wɛ káká bɔ Ejípunu lɛ́ɛ se; mɛ e ɖo hɔnmɛ lɛ́ɛ lɔ se nǔ e ɖo jijɛ wɛ ɔ́. Jozɛ́fu ɖɔ nú nɔví tɔn lɛ́ɛ ɖɔ: “Nyɛ wɛ nyí Jozɛ́fu ɔ́. Tɔ́ ce kpo ɖo gbɛ a?” Lo ɔ́, nɔví tɔn lɛ́ɛ sixú yí gbe n'i ǎ, ɖó ayi yětɔn gbadó. É lɛ́ ɖɔ nú yě ɖɔ: “Mi sɛkpɔ́ mì, mi wá”, bɔ yě sɛkpɔ́ ɛ, bɔ é ɖɔ: “Nyɛ wɛ nyí nɔví mitɔn Jozɛ́fu e mi sa, bɔ è kplá yi Ejípu é. Amɔ̌, din ɔ́, énɛ́ kó wá yi; ado ní má hu mi ó. Sa e mi sa mì bɔ è kplá mì wá fí ɔ́ ní má vɛ́ nú mi ó. Mawu wɛ sɛ́ mì dó fí jɛ nukɔn nú mi, bónú má hwlɛ́n mi gán. Adɔ tɔ́n ɖo to ɔ́ mɛ din ɔ́, xwe we ɖíe; amɔ̌, é lɛ́ kpo xwe atɔ́ɔ́n sín gǔdo din bɔ è nǎ sixú lɛ gle ǎ, è nǎ ya nǔkún ǎ. Mawu sɛ́ mì dó fí jɛ nukɔn nú mi, bónú mi ná gán ɖo to ɔ́ mɛ; é sɛ́ mì dó bónú má hwlɛ́n mi mɛ gěgé gán. Hǔn mi wɛ zɔ́n bɔ un wá fí ǎ, Mawu wɛ zɔ́n bɔ un wá fí. É wɛ sɔ́ mì dó ɖó gǎn hɔn-yitɔ́ gán nú axɔ́sú ɔ́, bɔ un kpa acɛ dó axɔ́sú ɔ́ sín hɔn nu, bó ɖo Ejípu to ɔ́ bǐ nu. Din ɔ́, mi yá wǔ yi tɔ́ ce gɔ́n, bó yi ɖɔ n'i ɖɔ: ‘Vǐ towe Jozɛ́fu ɖɔ: Mawu sɔ́ mì gǎn nú Ejípu to ɔ́ bǐ; yǎ wǔ wá gɔ̌n ce. A nǎ wá sá xwé ɖó Gocɛ́ni, bó ná nɔ akpá ce, hwi kpó vǐ towe lɛ́ɛ kpó, kpó vǐvú towe lɛ́ɛ kpó, gbɔ̌ towe lɛ́ɛ, kpó nyibú towe lɛ́ɛ kpó, kpódó nǔ e a ɖǒ lɛ́ɛ bǐ kpó. Nú a wǎ jɛ fí ɔ́, un ná nɔ́ ná nǔɖuɖu we; un ná nɔ́ ná nǔɖuɖu hwi kpó mɛ towe lɛ́ɛ kpó, kpódó kanlin towe lɛ́ɛ kpó; énɛ́ ɔ́, nǔɖé sɔ́ ná hwedó mi ǎ. Đó adɔ ná lɛ́ nɔ te xɔ xwe atɔ́ɔ́n.’ ” Jozɛ́fu lɛ́ ɖɔ: “Mi ɖésúnɔ mɔ kpó nukún mitɔn kpó din ɖɔ nyɛ nɔví mitɔn ɔ́ wɛ ɖo xó ɖɔ nú mi wɛ; nɔví ce Bɛnjamɛ́ɛ lɔ mɔ din. Hǔn mi bo yi ɖɔ susu e un xɔ ɖo Ejípu fí ɔ́ bǐ kpódó nǔ e mi mɔ lɛ́ɛ bǐ kpó nú tɔ́ ce. Mi ka ná yá wǔ kplá ɛ wá fí nú mì.” Ée Jozɛ́fu ɖɔ mɔ̌ ɔ́, é kplá así kɔ nú nɔví tɔn Bɛnjamɛ́ɛ bó wlí avǐ, bɔ Bɛnjamɛ́ɛ lɔ nɔ awa tɔn mɛ bó wlí avǐ. Jozɛ́fu lɛ́ kplá así kɔ nú nɔví tɔn ɖě lɛ́ɛ bǐ kpó avǐ kpó. Hwenɛ́nu wɛ nɔví tɔn lɛ́ɛ wá glá, bó jɛ xó ɖɔ xá ɛ jí. È se ɖo axɔ́sú Ejípu tɔn ɔ́ sín hɔnmɛ ɖɔ Jozɛ́fu sín nɔví lɛ́ɛ wá. Nǔ énɛ́ ɔ́ ká nyɔ́ axɔ́sú ɔ́ sín nukún mɛ; é nyɔ́ gǎn hɔn-yitɔ́ tɔn lɛ́ɛ lɔ sín nukún mɛ. Bɔ axɔ́sú ɔ́ ɖɔ nú Jozɛ́fu ɖɔ: “Đɔ nú nɔví towe lɛ́ɛ ɖɔ yě ní dó agban nú kanlin yětɔn lɛ́ɛ, bó yi Kanáa, bó kplá tɔ́ mitɔn kpó mɛ mitɔn lɛ́ɛ kpó, bó wá nɔ gɔ̌n ce. Énɛ́ ɔ́, un ná ná ayǐkúngban e nyɔ́ hú ɖě lɛ́ɛ bǐ ɖo Ejípu ɔ́ mi, bɔ mi ná ɖu jinukún ɖagbe e ɖo to ɔ́ mɛ lɛ́ɛ. A nǎ lɛ́ ɖɔ nú yě ɖɔ yě ní hɛn kɛkɛ́ví sín fí, bó ná bɛ́ asi yětɔn lɛ́ɛ, vǐ yětɔn lɛ́ɛ kpódó tɔ́ mitɔn lɔ kpó d'é mɛ, bó wá. Nǔ e mi ná jó dó lɛ́ɛ ní má vɛ́ nú mi ó, ɖó ayǐkúngban e nyɔ́ hú ɖě lɛ́ɛ bǐ ɖo Ejípu to ɔ́ mɛ ɔ́, ná nyí mitɔn.” Jakɔ́bu vǐ lɛ́ɛ ká bló nǔ e è ɖɔ nú yě lɛ́ɛ. Jozɛ́fu ná kɛkɛ́ví yě lě e axɔ́sú ɔ́ ɖɔ gbɔn é. É lɛ́ ná nǔ e yě ná ɖu ɖo alixo ɔ́ yě. É ná awu xɔ akwɛ́ yě mɛ ɖokpó ɖokpó, bó ná awu xɔ akwɛ́ atɔ́ɔ́n kpó gankwɛ́ afɔɖé kanwe ko (300) kpó Bɛnjamɛ́ɛ. Jozɛ́fu dó nǔ e nyɔ́ hú nǔ bǐ ɖo Ejípu lɛ́ɛ sín agban nú tócí wǒ, bó dó blěe kpó wɔ̌xúxú kpó, kpódó nǔɖuɖu ɖěvo lɛ́ɛ kpó sín agban nú tócí asi wǒ, bó sɛ́ dó tɔ́ tɔn bɔ é ná zán dó ali wá. Énɛ́ ɔ́ gúdo ɔ́, é ɖɔ nú nɔví tɔn lɛ́ɛ ɖɔ yě ní má ɖɔ jlɛ ɖo alixo ó. Ée é ɖɔ mɔ̌ nú yě ɔ́, é ná gbe yě ɖɔ yě ní ɖidó. Énɛ́ ɔ́, yě gosín Ejípu bó yi Kanáa ɖo tɔ́ yětɔn Jakɔ́bu ɔ́ gɔ́n. Ée yě jɛ tɔ́ yětɔn gɔ́n ɔ́, yě ɖɔ n'i ɖɔ: “Jozɛ́fu kpo ɖo gbɛ; é wɛ tlɛ kpa acɛ nú Ejípu to ɔ́ bǐ.” Yě ɖɔ mɔ̌ nú Jakɔ́bu có é ɖɔ nǔɖé n'i ǎ, ɖó é ɖi nǔ nú yě ǎ. Yě ká wlí xó e Jozɛ́fu ɖɔ nú yě lɛ́ɛ bǐ ɖɔ n'i. Jakɔ́bu mɔ kɛkɛ́ví e Jozɛ́fu sɛ́ dó e bɔ è nǎ zé e d'é mɛ lɛ́ɛ. Hwenɛ́nu wɛ tɔ́ yětɔn sín ayi wá j'ayǐ. Énɛ́ ɔ́, Jakɔ́bu ɖɔ: “Un sɔ́ ɖo nǔɖé ba hú mɔ̌ wɛ ǎ! Vǐ ce Jozɛ́fu kpo ɖo gbɛ. Un ná yi mɔ ɛ có bó ná kú.” Jakɔ́bu sɔ́ nǔ bó jɛ ali kpó nǔ e é ɖó lɛ́ɛ bǐ kpó. É wá jɛ Bɛ̌-Ceva bó sá vɔ̌ nú Mawu, Mawu tɔ́ tɔn Izáki tɔn. Mawu ɖɔ xó nú Jakɔ́bu zǎn mɛ ɖo nǔmimɔ ɖé mɛ, bó ɖɔ: “Jakɔ́bu! Jakɔ́bu!” Bɔ Jakɔ́bu yí gbe ɖɔ: “Nyɛ ɖíe!” Bɔ Mawu ɖɔ: “Nyɛ wɛ nyí Mawu, Mawu tɔ́ towe tɔn. Ma nú Ejípu e a xwe ɔ́ hu ado nú we ó, ɖó fínɛ́ wɛ un ná sɔ́ we dó ɖó akɔta ɖaxó ɖokpó ɖe. Nyɛ ɖésúnɔ wɛ ná kplá we yi Ejípu ɔ́, bó ná lɛ́ kplá we wá. É sixú gló ǎ. Jozɛ́fu sín alɔ mɛ wɛ a nǎ bɔnu dó.” Énɛ́ ɔ́ gúdo ɔ́, Jakɔ́bu gosín Bɛ̌-Ceva. Vǐ tɔn lɛ́ɛ wɛ bɛ́ é kpó asi tɔn lɛ́ɛ kpó, vǐ yětɔn lɛ́ɛ kpó dó kɛkɛ́ví mɛ. Axɔ́sú Ejípu tɔn ɔ́ wɛ sɛ́ kɛkɛ́ví nɛ́ lɛ́ɛ dó ɖɔ è wǎ kplá yě. Yě bɛ̌ kanlin yětɔn lɛ́ɛ kpó dɔkun e yě jɛ ɖo Kanáa lɛ́ɛ lɔmɔ̌ kpó yi, bɔ Jakɔ́bu yi Ejípu é kpó mɛ tɔn lɛ́ɛ bǐ kpó. É kplá mɛ tɔn lɛ́ɛ bǐ: vǐ tɔn súnnu kpó nyɔ̌nu kpó, vǐvú tɔn súnnu kpó nyɔ̌nu kpó; é kplá yě bǐ bɔ yě yi Ejípu. Jakɔ́bu e è nɔ ylɔ́ ɖɔ Izlayɛ́li ɔ́ wá Ejípu, é kpó vǐ tɔn lɛ́ɛ kpó vǐvú tɔn lɛ́ɛ kpó. Nyǐkɔ yětɔn ɖíe: Jakɔ́bu ví nukɔntɔn ɔ́ nyí Hwlibɛ́ni. Hwlibɛ́ni wá, é kpó vǐ tɔn lɛ́ɛ kpó; vǐ lɛ́ɛ sín nyǐkɔ ɖíe: Hanɔki, Palúu, Ɛslɔ́ni kpó Kaamíi kpó. Sinmɛnyɔ́ɔ wá, é kpó vǐ tɔn lɛ́ɛ kpó. Vǐ tɔn lɛ́ɛ sín nyǐkɔ ɖíe: Yemúwɛli, Yamini, Oxádi, Yakíni, Soháa kpó Cawúlu kpó. Cawúlu ɔ́, nɔ tɔn ɔ́ Kanáanu wɛ. Levíi wá, é kpó vǐ tɔn lɛ́ɛ kpó; vǐ tɔn lɛ́ɛ sín nyǐkɔ ɖíe: Gɛɛcɔ́ni, Kexáti kpó Mɛlali kpó. Judáa wá, é kpó vǐ tɔn lɛ́ɛ kpó. Vǐ tɔn lɛ́ɛ sín nyǐkɔ ɖíe: Ɛ́ɛ, Ɔɔnáni, Cela, Pɛlɛ́si kpó Zeláxi kpó. Amɔ̌, Ɛ́ɛ kpó Ɔɔnáni kpó wá ǎ; yědɛɛ lɛ́ɛ kú ɖo Kanáa. Pɛlɛ́si wá, é kpó vǐ tɔn lɛ́ɛ kpó; vǐ tɔn lɛ́ɛ sín nyǐkɔ ɖíe: Ɛslɔ́ni kpó Hamúlu kpó. Isakáa wá, é kpó vǐ tɔn lɛ́ɛ kpó. Vǐ tɔn lɛ́ɛ sín nyǐkɔ ɖíe: Tola, Púwa, Yovu kpó Cimulɔ́ni kpó. Zabulɔ́ɔn wá, é kpó vǐ tɔn lɛ́ɛ kpó. Vǐ tɔn lɛ́ɛ sín nyǐkɔ ɖíe: Sɛlɛ́di, Elɔ́ni kpó Yaxileɛ́li kpó. Vǐ súnnu e Lěya ji nú Jakɔ́bu ɖo Mɛzopotamíi taligbé tɔn lɛ́ɛ nɛ́, kpó vǐ tɔn nyɔ̌nu Dina kpó. Vǐ e Jakɔ́bu ji nú Lěya lɛ́ɛ kpódó vǐ yětɔn lɛ́ɛ kpó ɔ́, yě bǐ bló gbɛtɔ́ gban-nukún-atɔn (33). Gadi wá, é kpó vǐ tɔn lɛ́ɛ kpó. Vǐ tɔn lɛ́ɛ sín nyǐkɔ ɖíe: Sifiyɔ́nu, Hagíi, Cúni, Ɛsibɔ́ni, Ehli, Alɔdi kpó Aleli kpó. Acɛ́ɛ lɔ wá, é kpó vǐ tɔn lɛ́ɛ kpó. Vǐ tɔn lɛ́ɛ sín nyǐkɔ ɖíe: Yimuna, Yiciwa, Yicíwi kpó Beliya kpó, kpó Sɛláxi nɔví yětɔn nyɔ̌nu ɔ́ kpó. Beliya ɔ́, vǐ tɔn lɛ́ɛ sín nyǐkɔ ɖíe. Hebɛ́ɛ kpó Malukiyɛ́li kpó. Zilupa sín vǐ lɛ́ɛ nɛ́. Zilupa ɔ́, Labáan wɛ sɔ́ ɛ ná vǐ nyɔ̌nu tɔn Lěya, bɔ é nyí mɛsɛntɔ́ tɔn. Zilupa ɔ́ kpó Jakɔ́bu kpó ji vǐ afɔtɔn-nukún-ɖokpó. Vǐ súnnu Hlacɛ́li, Jakɔ́bu sín asi ɔ́ tɔn lɛ́ɛ lɔ wá; nyǐkɔ yětɔn ɖíe: Jozɛ́fu kpó Bɛnjamɛ́ɛ kpó. Asenáti, vǐ nyɔ̌nu Poti-Fela hunnɔ Ɔnu toxo ɔ́ tɔn ɔ́, vǐ súnnu we wɛ é ji nú Jozɛ́fu ɖo Ejípu; nyǐkɔ yětɔn ɖíe: Manasée kpó Eflayímu kpó. Bɛnjamɛ́ɛ lɔ wá, é kpó vǐ tɔn súnnu lɛ́ɛ kpó; vǐ tɔn lɛ́ɛ sín nyǐkɔ ɖíe: Bɛ́la, Bɛkɛ́ɛ, Acibɛ́li, Gela, Naamáni, Ehi, Hlɔci, Mupímu, Hupímu kpó Aadi kpó. Jakɔ́bu kpó Hlacɛ́li kpó sín vǐ, kpó vǐvú lɛ́ɛ kpó nɛ́. Yě mɛ bǐ bló gbɛtɔ́ wǒ-ɛnɛ. Dan lɔ wá, é kpó vǐ tɔn kpó; vǐ ɔ́ nɔ́ nyí Hucímu. Nɛfutali lɔ wá, é kpó vǐ tɔn lɛ́ɛ kpó; vǐ tɔn lɛ́ɛ sín nyǐkɔ ɖíe: Yaxiseɛ́li, Gúni, Yesɛ́ɛ kpó Cilɛ́mu kpó. Jakɔ́bu kpó Biluha kpó sín vǐ lɛ́ɛ nɛ́. Biluha ɔ́, Labáan wɛ sɔ́ ɛ ná vǐ nyɔ̌nu tɔn Hlacɛ́li, bɔ é nyí mɛsɛntɔ́ tɔn. Vǐ lɛ́ɛ bǐ bló tɛ́nwe. Mɛ e xwedó Jakɔ́bu wá Ejípu bó nyí vǐ tɔn kpó vǐvú tɔn kpó lɛ́ɛ ɔ́ bǐ bló gbɛtɔ́ kanɖé koatɔ́n-nukún-ɖokpó (66); è ka xa vǐ tɔn sín asi lɛ́ɛ d'é mɛ ǎ. Jozɛ́fu ka ji vǐ súnnu we ɖo Ejípu. Hǔn Jakɔ́bu sín hɛ̌nnu e wá nɔ Ejípu lɛ́ɛ bǐ bló kanɖé gban (70). Jakɔ́bu sɛ́ Judáa dó Jozɛ́fu gɔ́n, ɖɔ é ní yi ɖɔ n'i ɖɔ émí ja Gocɛ́ni; é ní wá kpé émí ɖo fínɛ́. Ée Jakɔ́bu kpó mɛ tɔn lɛ́ɛ kpó ɖo Gocɛ́ni sɛkpɔ́ wɛ ɔ́, Jozɛ́fu sɔ́ kɛkɛ́ví tɔn sin dó sɔ́ tɔn wú, bó byɔ́ mɛ, lobo ɖidó Gocɛ́ni, bó ná yi kpé tɔ́ tɔn Jakɔ́bu. Ée é mɔ ɛ lě tlóló ɔ́, é zunfán ɛ, bó ya avǐ káká. Jakɔ́bu ɖɔ nú Jozɛ́fu ɖɔ: “Un hɛn din ɔ́, un ná kú lo, ɖó a kpo ɖo gbɛ bɔ un lɛ́ wá mɔ nukún towe mɛ.” Énɛ́ ɔ́, Jozɛ́fu ɖɔ nú nɔví tɔn lɛ́ɛ kpó tɔ́ tɔn sín mɛ lɛ́ɛ kpó ɖɔ: “Un ná yi ɖɔ nú axɔ́sú ɔ́ ɖɔ nɔví ce lɛ́ɛ kpó tɔ́ ce sín mɛ lɛ́ɛ kpó gosín Kanáa wá gɔ̌n ce. Un ná ɖɔ n'i ɖɔ gbɔ̌nyitɔ́ wɛ mi nyí, bɔ mi bɛ́ gbɔ̌ mitɔn lɛ́ɛ, nyibú mitɔn lɛ́ɛ, kpódó nǔ e mi ɖó lɛ́ɛ bǐ kpó wá fí. Ényí axɔ́sú ɔ́ ylɔ́ mi, bó kan nǔ e mi nɔ wa ɔ́ byɔ́ mi hǔn, mi yí gbe n'i ɖɔ gbɔ̌ wɛ émí nɔ́ nyi sín vǔ káká wá jɛ din tɔ́gbó émítɔn lɛ́ɛ ɖɔhun. Énɛ́ ɔ́, axɔ́sú ɔ́ ná ná gbe mi bɔ mi ná nɔ Gocɛ́ni, ɖó Ejípunu lɛ́ɛ nɔ́ mɔ gbɔ̌nyitɔ́ lɛ́ɛ gbɔ ɖěbǔ ǎ.” Énɛ́ ɔ́, Jozɛ́fu yi axɔ́sú Ejípu tɔn ɔ́ gɔ́n, bó ɖɔ n'i ɖɔ: “Nɔví ce lɛ́ɛ kpó tɔ́ ce kpó gosín Kanáa bó wá gɔ̌n ce kpó lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó nyibú yětɔn lɛ́ɛ kpó, kpó nǔ e yě ɖó lɛ́ɛ bǐ kpó. Gocɛ́ni wɛ yě jɛ.” Jozɛ́fu kplá nɔví tɔn atɔ́ɔ́n, bó zé yě xlɛ́ axɔ́sú ɔ́. Axɔ́sú ɔ́ kanbyɔ́ yě ɖɔ: “Azɔ̌ tɛ́ wɛ mi nɔ wa?” Yě yí gbe n'i ɖɔ: “Mǐ mɛsɛntɔ́ towe lɛ́ɛ ɔ́, gbɔ̌ wɛ mǐ nɔ́ nyi tɔ́gbó mǐtɔn lɛ́ɛ ɖɔhun.” Yě lɛ́ ɖɔ nú axɔ́sú ɔ́ ɖɔ: “Mǐ wá bó ná nɔ to mɛ fí ɖó nǔɖuɖu sɔ́ tíin nú mǐ mɛsɛntɔ́ towe lɛ́ɛ sín lɛ̌ngbɔ́ lɛ́ɛ ǎ, ɖó adɔ e tɔ́n ɖo Kanáa ɔ́ syɛ́n ɖésú. Kɛnklɛ́n bó ná gbe mǐ mɛsɛntɔ́ towe lɛ́ɛ, nú mǐ ná nɔ Gocɛ́ni.” Axɔ́sú ɔ́ ɖɔ nú Jozɛ́fu ɖɔ: “Tɔ́ towe kpó nɔví towe lɛ́ɛ kpó wá gɔ̌n towe. Ejípu to ɔ́ bǐ wɛ ɖo alɔ towe mɛ. Đǒ tɛnmɛ nú tɔ́ towe kpó nɔví towe lɛ́ɛ kpó ɖó fí e nyɔ́ hú fí bǐ ɖo to ɔ́ mɛ é. Yě ní nɔ Gocɛ́ni. Nú a mɔ mɛ e ná sixú kpé nukún dó kanlin ce lɛ́ɛ wú ɖo yě mɛ ɔ́ hǔn, sɔ́ yě ɖó kanlinhwan ce lɛ́ɛ nu.” Jozɛ́fu kplá tɔ́ tɔn yi xlɛ́ axɔ́sú ɔ́, bɔ Jakɔ́bu xo ɖɛ dó axɔ́sú ɔ́ jí. Axɔ́sú ɔ́ kanbyɔ́ Jakɔ́bu ɖɔ: “È sixú tunwun xwe nabí e ɖo mɛ ta é a?” Bɔ Jakɔ́bu yí gbe n'i ɖɔ: “Un gbɔn gbě jí gbě jí káká nú xwe kantɔn wǒ (130). Un ɖó xwe nabí ɖé ǎ; nǔ e ká gbo mì ɔ́ syɛ́n. Xwe ce sɔ tɔ́gbó ce lɛ́ɛ tɔn ǎ. Gbě jí gbě jí jɛ́n yě lɔ ka gbɔn.” Ée Jakɔ́bu ɖɔ mɔ̌ ɔ́, é lɛ́ xo ɖɛ dó axɔ́sú ɔ́ jí, lobo tɔ́n sín hɔn ɔ́ mɛ. Énɛ́ ɔ́, Jozɛ́fu ɖó tɛnmɛ nú tɔ́ tɔn kpó nɔví tɔn lɛ́ɛ kpó, bó ná ayǐkúngban yě ɖó to ɔ́ mɛ fí e nyɔ́ hú fí bǐ é, ɖo Hlamusɛ́si gbé jí, lě e axɔ́sú ɔ́ ɖɔ gbɔn é. Jozɛ́fu ná nǔɖuɖu tɔ́ tɔn kpó nɔví tɔn lɛ́ɛ kpó, kpó mɛ yětɔn lɛ́ɛ bǐ kpó. Lě e yě sukpɔ́ gbɔn ɔ́ wɛ é kpɔ́n bó dó ná nǔɖuɖu ɔ́ yě. Adɔ e tɔ́n ɔ́ syɛ́n káká bɔ nǔɖuɖu wá hán ɖo to ɔ́ bǐ mɛ, bɔ mɛ e ɖo Ejípu lɛ́ɛ kpódó mɛ e ɖo Kanáa lɛ́ɛ bǐ kpó xú gǒ. Jozɛ́fu kplé akwɛ́ e Ejípunu lɛ́ɛ kpó Kanáanu lɛ́ɛ kpó dó xɔ blěe ná ɔ́ bǐ, bó ɖɔ bɔ è bɛ̌ yi ɖó axɔ́sú ɔ́ sín hɔnmɛ. Ée akwɛ́ ɖě má sɔ́ tíin ɖo Ejípu kpó Kanáa kpó ǎ é ɔ́, Ejípunu lɛ́ɛ bǐ wá ɖɔ nú Jozɛ́fu ɖɔ: “Nǎ nǔɖuɖu mǐ, mǐ sɔ́ ɖó akwɛ́ ɖě ǎ. A nǎ lɔn bɔ mǐ ná kú adɔ ɖo nukún towe mɛ wɛ a?” Énɛ́ ɔ́, Jozɛ́fu ɖɔ nú yě ɖɔ: “Ényí mi ma ɖó akwɛ́ ǎ hǔn, mi ná kanlin mitɔn lɛ́ɛ mì nú má ná nǔɖuɖu mi ɖ'é nu.” Ée nǔ ɖo mɔ̌ ɔ́, yě bɛ̌ kanlin yětɔn lɛ́ɛ wá nú Jozɛ́fu, bɔ é ná nǔɖuɖu yě ɖ'é nu. É ná nǔɖuɖu yě ɖó sɔ́ yětɔn lɛ́ɛ, gbɔ̌ yětɔn lɛ́ɛ, nyibú yětɔn lɛ́ɛ, kpódó tócí yětɔn lɛ́ɛ kpó nu. Bɔ xwe énɛ́ ɔ́ xwe ɔ́, Jozɛ́fu ná nǔɖuɖu yě ɖó kanlin yětɔn lɛ́ɛ bǐ nu. Ée xwe ɔ́ fó ɔ́, yě lɛ́ wá Jozɛ́fu gɔ́n xwe e jɛ fínɛ́ ɔ́ mɛ, bó ɖɔ n'i ɖɔ: “Gǎn mǐtɔn, mǐ sixú wa yɛ nú we ǎ; akwɛ́ mǐtɔn bǐ kpó kanlin mǐtɔn lɛ́ɛ bǐ kpó kó vɔ; mǐ ɖésúnɔ lɛ́ɛ kpó ayǐkúngban mǐtɔn lɛ́ɛ kpó kɛ́ɖɛ́ wɛ kpo nú we din. A nǎ lɔn bɔ mǐ ná kú adɔ ɖo nukún towe mɛ bó ná jó ayǐkúngban mǐtɔn lɛ́ɛ dó wɛ a? Xɔ mǐ kpó ayǐkúngban mǐtɔn lɛ́ɛ kpó, bó ná nǔɖuɖu mǐ. Énɛ́ ɔ́, mǐ kpó ayǐkúngban mǐtɔn lɛ́ɛ kpó ná nyí axɔ́sú ɔ́ tɔn. Nǎ nǔkún e mǐ ná dó lɛ́ɛ mǐ, bónú mǐ ná nɔ gbɛ bó sɔ́ ná jó ayǐkúngban mǐtɔn lɛ́ɛ dó ǎ.” Ée yě ɖɔ mɔ̌ ɔ́, Jozɛ́fu xɔ ayǐkúngban e ɖo Ejípu lɛ́ɛ bǐ nú axɔ́sú Ejípu tɔn ɔ́; ɖó Ejípunu ɖokpó ɖokpó wɛ sa gle tɔn ɖó adɔ e tɔ́n bó ɖo cɔcɔ dó nú yě wɛ ɔ́ wú. Ée nǔ nyí mɔ̌ ɔ́, to ɔ́ bǐ húzú axɔ́sú ɔ́ tɔn. Bɔ Jozɛ́fu zé mɛ e ɖo to ɔ́ mɛ lɛ́ɛ dó húzú kannumɔ, sín fí e Ejípu bɛ́ sín ɔ́ káká yi fí e é fó dó é. Amɔ̌, Jozɛ́fu xɔ hunnɔ lɛ́ɛ sín ayǐkúngban lɛ́ɛ ɖě ǎ, ɖó hunnɔ lɛ́ɛ ɖó nǔɖé bó nɔ́ yí ɖo axɔ́sú ɔ́ sí. Nǔ e wú yědɛɛ lɛ́ɛ má sa ayǐkúngban yětɔn ǎ ɔ́ nɛ́. Jozɛ́fu ɖɔ nú togun ɔ́ ɖɔ: “Din e un xɔ mi kpó ayǐkúngban mitɔn lɛ́ɛ kpó nú axɔ́sú ɔ́, mi yí nǔkún, bó yi dó ɖó gle lɛ́ɛ mɛ. Amɔ̌, nú mi ya jinukún lɛ́ɛ ɔ́, mi ná ná atɔ́ɔ́nvlɔ́ɖó axɔ́sú ɔ́; do ɛnɛ e kpo ɔ́ mɛ wɛ mi kpó vǐ mitɔn lɛ́ɛ kpó, mɛ e ɖo xwé mitɔn gbe lɛ́ɛ kpó ná ɖu ɖe, bɔ mi ná lɛ́ dó ɖó gle lɛ́ɛ mɛ.” Ée é ɖɔ mɔ̌ ɔ́, yě ɖɔ n'i ɖɔ: “A hwlɛ́n gbɛ nú mǐ! Ée a nyɔ̌ xomɛ dó mǐ wú din nɛ́ é ɔ́, mǐ yí gbe bó ná nyí axɔ́sú ɔ́ sín kannumɔ.” Nǔ énɛ́ e Jozɛ́fu ɖó ayǐ ɔ́ húzú sɛ́n bɔ Jozɛ́fu ɖe tɔ́n, bɔ é kpo ɖo te káká jɛ égbé: ɖo Ejípu ɔ́, atɔ́ɔ́nvlɔ́ɖó jinukún e è ya lɛ́ɛ tɔn nɔ́ nyí axɔ́sú ɔ́ tɔn. Hunnɔ lɛ́ɛ kɛ́ɖɛ́ sín ayǐkúngban wɛ ma nyí axɔ́sú ɔ́ tɔn ǎ. Izlayɛ́li ví lɛ́ɛ nɔ Ejípu, ɖo Gocɛ́ni gbé jí. Yě ɖǒ ayǐkúngban ɖo fínɛ́; yě gba kún bó sukpɔ́ ɖésú. Xwe afɔtɔn nukún we wɛ Jakɔ́bu nɔ Ejípu xɔ. Xwe nabí e é nɔ gbɛ xɔ ɔ́ bǐ bló xwe kantɔn koatɔ́n-nukún-we (147). Ée Jakɔ́bu sín kúzán ɖo sisɛkpɔ́ wɛ ɔ́, é ylɔ́ vǐ tɔn Jozɛ́fu bó ɖɔ n'i ɖɔ: “Nú a nyɔ̌ xomɛ dó wǔ ce hǔn, ma ɖi mì ɖó Ejípu ó, bó ná ɖe xlɛ́ ɖɔ a yǐ wǎn nú mì, bó ɖo gbejí nú mì nǔgbó. Zě alɔ towe ɖó asá ce glɔ́, bó dó akpá tɔn nú mì. Nú un kú ɔ́, a nǎ zě cyɔ ce sín Ejípu bó yi ɖi dó tɔ́gbó ce lɛ́ɛ sín yɔdo mɛ.” Bɔ Jozɛ́fu ɖɔ n'i ɖɔ: “Un ná bló lě e a ɖɔ gbɔn ɔ́.” Jakɔ́bu lɛ́ tɛ ɖɛ̌ jí ɖɔ: “Bó xwlé nǔ nú mì.” Bɔ Jozɛ́fu xwlé nǔ ɖɔ émí ná bló. Énɛ́ ɔ́ gúdo ɔ́, Jakɔ́bu ɖe kɔ́ ɖo zan tɔn sín taligbé. Ée azǎn ɖé ná jɛ ɔ́, è wǎ ɖɔ nú Jozɛ́fu ɖɔ tɔ́ tɔn ɖo azɔn jɛ wɛ. Ée é se mɔ̌ ɔ́, é kplá vǐ tɔn we lɛ́ɛ, Manasée kpó Eflayímu kpó, bó ɖidó tɔ́ tɔn gɔ́n. Jakɔ́bu se ɖɔ vǐ tɔn Jozɛ́fu ɔ́ jǎwe gɔ̌n tɔn. Ée é se mɔ̌ ɔ́, é dó gǎn, bó fɔ́n jínjɔ́n ayǐ zan tɔn jí. Ée Jozɛ́fu wá ɔ́, Jakɔ́bu ɖɔ n'i ɖɔ: “Mawu Nǔbǐwúkpétɔ́ ɔ́ tɔ́n dó jǐ ce ɖo Lǔzi, ɖo Kanáa tomɛ, bó xo ɖɛ dó jǐ ce, bó ɖɔ nú mì ɖɔ: ‘Đǒtó mì! Un ná bló bɔ a nǎ ji, a nǎ gba kún; un ná zé we dó bló togun gěgé. Un ná zé to élɔ́ ná kúnkan towe lɛ́ɛ, bɔ é ná nyí yětɔn káká sɔ́yi.’ ” Jakɔ́bu lɛ́ ɖɔ nú Jozɛ́fu ɖɔ: “Din ɔ́, vǐ súnnu we e a ko ji ɖo Ejípu fí cóbɔ un wá gɔ̌n towe lɛ́ɛ ɔ́, vǐ ce lɛ́ɛ wɛ yě nyí, Hwlibɛ́ni kpó Sinmɛnyɔ́ɔ kpó ɖɔhun. Amɔ̌, nú a wǎ ji vǐ ɖěvo dó yědɛɛ lɛ́ɛ gúdo ɔ́, yě ná nyí towe. Fofó yětɔn lɛ́ɛ sín ayǐkúngban ɔ́ mɛ wɛ è nǎ má gǔ yětɔn nú yě ɖe. Hwenu e un gosín Padani ɔ́, nɔ towe Hlacɛ́li kú ɖo nukún ce mɛ ɖo alixo, ɖo malín málín mɛ dó Efláta, ɖo Kanáa tomɛ, bɔ un ɖi i ɖó fínɛ́, ɖo Efláta e è nɔ lɛ́ ylɔ́ ɖɔ Bɛteleyɛ́mu ɔ́ sín alitó.” Hwenɛ́nu ɔ́, Jakɔ́bu mɔ Jozɛ́fu ví lɛ́ɛ, bó kanbyɔ́ ɖɔ: “Mɛ̌ ká nyí mɛ élɔ́ lɛ́ɛ?” Bɔ Jozɛ́fu yí gbe nú tɔ́ ɔ́ ɖɔ: “Vǐ e Mawu ná mì ɖo fí lɛ́ɛ wɛ.” Bɔ Jakɔ́bu ɖɔ: “Kɛnklɛ́n, kplá yě nú mì, nú má xo ɖɛ dó yě jí.” Jakɔ́bu sín nukún ɖo te, é ká sɔ́ ɖo nǔ mɔ wɛ ǎ, ɖó é kó kpo. Jozɛ́fu ka kplá vǐ lɛ́ɛ n'i, bɔ é kí si nú yě, bó kplá así kɔ nú yě. Jakɔ́bu ɖɔ nú Jozɛ́fu ɖɔ: “Un sɔ́ lɛ́n ɖɔ un ná lɛ́ wá mɔ nukún towe mɛ ǎ; éɖíe Mawu ká bló bɔ é sɔ́ nyí hwi kɛ́ɖɛ́ wɛ un wá mɔ ǎ, un lɛ́ mɔ vǐ towe.” Ée Jakɔ́bu ɖɔ mɔ̌ ɔ́, Jozɛ́fu ɖe vǐ lɛ́ɛ sín akɔn n'i, bó xwe agbɔ̌nnusú do ɖo nukɔn tɔn. Énɛ́ ɔ́ gúdo ɔ́, Jozɛ́fu hɛn vǐ tɔn we lɛ́ɛ sín alɔ: é sɔ́ alɔ tɔn ɖisí ɔ́ dó hɛn Eflayímu bó dɔn ɛ ɖó amyɔxwé nú Jakɔ́bu, bó sɔ́ alɔ tɔn amyɔ ɔ́ dó hɛn Manasée, bó dɔn ɛ ɖó ɖisíxwé nú Jakɔ́bu, bó dɔn yě sɛkpɔ́ tɔ́ tɔn. Jakɔ́bu ka zé alɔ ɖě gbɔn ɖě jí, bó sɔ́ alɔ tɔn ɖisí ɔ́ ɖó ta nú Eflayímu yɔkpɔ́vú ɔ́, bó sɔ́ amyɔ ɔ́ ɖó ta nú Manasée, có Manasée wɛ nyí nukɔngbéví. Jakɔ́bu xo ɖɛ dó Jozɛ́fu jí bó ɖɔ: “Mawu e nukɔn tɔ́gbó ce Ablaxámu kpó Izáki kpó zán gbɛ ɖe ɔ́, Mawu e nyí Lɛ̌ngbɔ́nyitɔ́ ce sín hwenu e un jɔ ɔ́ káká wá jɛ égbé ɔ́, wɛnsagun Mawu tɔn e hwlɛ́n mì sín nǔ nyanya lɛ́ɛ bǐ mɛ ɔ́, ní xo ɖɛ dó nyaví élɔ́ lɛ́ɛ jí. Nyǐkɔ ce kpó tɔ́gbó ce Ablaxámu tɔn kpó Izáki tɔn kpó ní nɔ yě wú. Yě ní ji; yě ní gba kún ɖo ayǐkúngban jí.” Ée Jakɔ́bu sɔ́ alɔ tɔn ɖisí ɔ́ ɖó ta nú Eflayímu ɔ́, é nyɔ́ Jozɛ́fu nukún mɛ ǎ. Énɛ́ ɔ́, Jozɛ́fu hɛn tɔ́ tɔn sín alɔ, bó ɖe sín Eflayímu ta, lobo jló ná zé ɖó Manasée ta. Bó ɖɔ: “Mɔ̌ wɛ ǎ daá ce, ɖó mɛ élɔ́ wɛ nyí nukɔngbéví ɔ́; sɔ́ alɔ towe ɖisí ɔ́ ɖó ta n'i.” Tɔ́ tɔn ká gbɛ́, bó ɖɔ: “Un tunwun mɔ̌ hǔn, vǐ ce, un tunwun ganjí; é ɖésú ná wá nyí togun ɖokpó, é ɖésú ná nyí togun ɖaxó. Amɔ̌, nɔví tɔn kpɛví ɔ́ sín togun ná hú gǎn éyɛ́ tɔn, bɔ vǐ tɔn lɛ́ɛ ná húzú akɔta wɔ̌buwɔ́bú ɖé.” Jakɔ́bu xo ɖɛ dó yě jí gbe énɛ́ ɔ́ gbe bó ɖɔ: “Hwi jí wɛ Izlayɛ́li ví lɛ́ɛ ná nɔ́ xo ɖɛ dó mɛ jí gbɔn, bó ná nɔ́ ɖɔ: ‘Mawu ní bló bónú a nǐ cí Eflayímu kpó Manasée kpó ɖɔhun.’ ” Lě e Jakɔ́bu sɔ́ Eflayímu ɖó nukɔn nú Manasée gbɔn é nɛ́. Jakɔ́bu ɖɔ nú Jozɛ́fu ɖɔ: “Nyɛ ɖíe ɖo nǎ kú wɛ e; amɔ̌, Mawu ná nɔ kpɔ́ xá mi, bó ná lɛ́ kɔ nú mi yi tɔ́gbó mitɔn lɛ́ɛ sín tomɛ. Sikɛ́mu to ɔ́, hwi wɛ un ná ná; nɔví towe lɛ́ɛ wɛ un ná ná ǎ. To énɛ́ ɔ́, ahwan wɛ un fun bó yí ɖo Amɔliti lɛ́ɛ sí. Un ná ná we, bɔ é ná nyí to ɖé bɔ a nǎ ɖó hú nɔví towe lɛ́ɛ.” Jakɔ́bu ylɔ́ vǐ tɔn lɛ́ɛ; ée yě wǎ ɔ́, é ɖɔ nú yě ɖɔ: “Mi sɛkpɔ́ mì, bónú má ɖɔ lě e sɔ ná cí gbɔn ɔ́ nú mi. Vǐ ce lɛ́ɛ e mi, mi kplé miɖée, bó ɖótó mì. Mi ɖótó nyɛ tɔ́ mitɔn Jakɔ́bu. Hwlibɛ́ni, hwɛ ɔ́, hwi wɛ nyí nukɔngbéví ce, hwi wɛ nyí vǐ nukɔntɔn e un ji, hwenu e hlɔ̌nhlɔ́n kpo ɖo wǔ ce ɔ́. A ɖǒ susu bó ɖó acɛ hú nɔví towe lɛ́ɛ. Tɔsisa e ɖo adǎn jí é ɖɔhun wɛ a cí. Nǔ ɖo mɔ̌ có nukɔngbéví e a nyǐ ɔ́ sín acɛ ɔ́, a sɔ́ ná ɖó ǎ, ɖó a ɖǒ xó xá asi ce ɖo zan ce jí. A mlɔ̌ zan ce jí, bó ɖu su ná. Sinmɛnyɔ́ɔ kpó Levíi kpó ɔ́, nɔví nɔví wɛ yě nyǐ. Yě ɖǒ gbe kpɔ́ bó xo dǎka. Amɔ̌, un jló ná nɔ gbě e blá wɛ yě ɖe ɔ́ mɛ ǎ. Un jló ná nɔ kplé yětɔn lɛ́ɛ tɛnmɛ ǎ, ɖó yě hu gbɛtɔ́ gěgé kpó xomɛsin kpó, yě sɛ́n dɔn nú nyibúsú gěgé; yě ká tunwun cóbó bló ǎ. Un dó nu xomɛsin yětɔn, ɖó é syɛ́n dín. Un dó nu adǎnwiwa yětɔn, ɖó adǎnwiwa énɛ́ ɔ́, mɛ wɛ yě dó hu. Un ná gba vǐ yětɔn lɛ́ɛ dó gbɔn Izlayɛ́li. Un ná fúnfún yě gbɔn to ɔ́ bǐ mɛ. Judáa, hwɛ ɔ́, nɔví towe lɛ́ɛ ná nɔ́ sɔ́ we su. A nǎ tɛ afɔ kɛntɔ́ towe lɛ́ɛ jí. Nɔví towe lɛ́ɛ ɖésú ná nɔ́ yi do nú we. Judáa, vǐ ce, kinnikínní wínnyáwínnyá e wlí lan ɖu, bó lɛ́ kɔ wá nɔtɛn tɔn ɔ́ ɖɔhun wɛ a cí; kinnikínní ɔ́ mlɔ́ ayǐ, bó ɖo gbigbɔjɛ́ wɛ; mɛ̌ ná glá ba nǔɖɔ ɛ? Axɔ́sú kpogɛ ɔ́ ná nɔ Judáa hɛ́nnu mɛ, gǎn kpogɛ ɔ́ ná nɔ vǐ tɔn lɛ́ɛ sín alɔmɛ, káká jɛ hwenu e mɛ e tɔn é nyí ɔ́ ná wá, bɔ togun lɛ́ɛ ná se tónú n'i é. Énɛ́ ɔ́, vǐwungbo mɛ ná d'agba káká bɔ é ná nɔ́ sin tócí tɔn nyi mɛ. É ná nɔ́ nya awu tɔn ɖo vɛ̌ɛn mɛ, bó ná nɔ́ nya awu tɔn gaga ɔ́ ɖo vǐwun sin mɛ. É nu vɛ̌ɛn káká bɔ nukún tɔn myá vɛ̌ɛn ɖɔhun. É nu nyibúnɔ́sin káká bɔ aɖǔ tɔn cí nyibúnɔ́sin ɖɔhun. Zabulɔ́ɔn ɔ́, xutó wɛ é ná nɔ́ nɔ. É ná nɔ fí e tɔjíhún lɛ́ɛ nɔ́ glín ɖó é. Ayǐkúngban tɔn ná yi káká Sidɔ́ɔn. Isakáa ɔ́, tócí e dó hlɔ̌nhlɔ́n ganjí, bó mlɔ́ ayǐ ɖo kpó mɛ ɔ́ ɖɔhun wɛ é cí. É mɔ ɖɔ fí e gbɔjɛ́ ɖe wɛ émí ɖe ɔ́ nyɔ́, bó mɔ ɖɔ to ɔ́ nyɔ́ ɖɛkpɛ. É xá kpó, bó ná hɛn agban. É jó éɖée dó nú kannumɔzɔ́. Dan ná ɖu gǎn ɖo togun tɔn nu akɔta Izlayɛ́li tɔn ɖě lɛ́ɛ ɖɔhun. Dan ná nyí dan bó ɖo ali jí. É ná nyí amanɔnú jakpata ɖo aliswɛ́ɛ́n jí, bó ná nɔ́ xú aɖǔ sɔ́ dó afɔ, bɔ sɔ́xátɔ́ ná jɛ ayǐ wɛn. Mawu Mavɔmavɔ, un ɖo nukún ɖó hwlɛngán towe wɛ. Gadi ɔ́, mɛ wɔ̌buwɔ́bú ɖé lɛ́ɛ ná hɛn ahwanfunnú, bó ná wá tɔ́n ahwan ɛ. Amɔ̌, é wɛ ná zun dó yě jǐ. Acɛ́ɛ ɔ́, nǔɖuɖu ɖagbe ná tíin ɖo gɔ́n tɔn. Nǔ ɖagbe e axɔ́sú ná nɔ́ ɖu ɔ́, é gɔ́n wɛ è nǎ nɔ́ mɔ ɖe. Nɛfutali ɔ́, agbanlín e è ɖe nyi te ɔ́ wɛ é nyí. É nɔ́ ji vǐ ɖɛkpɛ ɖɛkpɛ. Jozɛ́fu ɔ́, atín e nɔ sɛ́n ganjí bó ɖo tɔjɔtɛn ɖé tó ɔ́ wɛ é nyí. Atínla lɛ́ɛ yi jǐ káká bó dín zɛ ahohó ɔ́ wú. Gǎdatɔ́ lɛ́ɛ ɔ́, yě ɖo cícɔ́ ɛ wɛ. Yě ba xó e, yě da gǎ ɛ. Amɔ̌, é hɛn gǎ tɔn syɛ́nsyɛ́n. Nǔbǐwúkpétɔ́ nyɛ Jakɔ́bu tɔn sín hlɔ̌nhlɔ́n zɔ́n, bɔ alɔ tɔn lɛ́ɛ syɛ́n; énɛ́ ɔ́, é húzú lɛ̌ngbɔ́nyitɔ́ Izlayɛ́li tɔn, só Izlayɛ́li tɔn. Gbɔn Mawu nyɛ tɔ́ towe tɔn jí ɔ́, gbɔn Mawu Nǔbǐwúkpétɔ́ ɔ́ jí ɔ́, a nǎ mɔ sin sín jǐxwé, a nǎ mɔ sin sín ayǐkúngban glɔ́. Nyɔ̌nu lɛ́ɛ ná ji vǐ, kanlin lɛ́ɛ ná ji vǐ. Đɛ e xo dó jǐ towe wɛ nyɛ tɔ́ towe ɖe lɛ́ɛ ɔ́, yě hú gǎn ɖagbe e só tɛgbɛ tɔn lɛ́ɛ nɔ wa é, yě hú gǎn ɖagbe e só kpɛví kpɛví xóxó hwenu tɔn lɛ́ɛ nɔ́ wa é. Nyɔ̌ná nyɛ tɔ́ towe tɔn ní kɔn dó jǐ towe, ní kɔn dó mɛ e nyí gǎn nú nɔví towe lɛ́ɛ jí. Bɛnjamɛ́ɛ ɔ́, hla lanwlíɖutɔ́ wɛ é nyí. É nɔ́ wlí lan ɖu zǎnzǎn, bɔ é jɛ gbadanu ɔ́, é nɔ́ má nǔ e é wlí lɛ́ɛ.” Mɛ e wá húzú akɔta Izlayɛ́li tɔn wěwe lɛ́ɛ ɔ́, xó e tɔ́ yětɔn ɖɔ nú yě, hwenu e é xo ɖɛ dó yě jí lɛ́ɛ é nɛ́. Đɛ vovo wɛ é xo dó mɛ ɖokpó ɖokpó jí. Énɛ́ ɔ́ gúdo ɔ́, Jakɔ́bu ɖɔ lě e nǔ lɛ́ɛ ná nyí gbɔn ɔ́ nú vǐ tɔn lɛ́ɛ ɖɔ: “Un ná yi su tɔ́gbó ce lɛ́ɛ; nǔ nyí mɔ̌ hǔn, mi ɖi mì dó tɔ́gbó ce lɛ́ɛ kpá, ɖo sóxo e ɖo Eflɔ́ni Hetíi ví ɔ́ sín gle mɛ ɔ́ mɛ. Đo Makipela sín gle e ɖo Mamulée nukɔn ɖo Kanáa é. Gle e Ablaxámu xɔ ɖo Eflɔ́ni Hetíi ví ɔ́ sí, bó sɔ́ dó ɖó kúxwé tɔn ná é wɛ. Fínɛ́ wɛ è ɖi Ablaxámu kpó asi tɔn Sala kpó ɖó; fínɛ́ wɛ è lɛ̌ wá ɖi Izáki kpó asi tɔn Hlebeka kpó ɖó. Fínɛ́ wɛ nyɛ ɖésúnɔ ɖi Lěya ɖó. Gle ɔ́ kpó sóxo e ɖo gle ɔ́ mɛ ɔ́ kpó ɔ́, Hitíti lɛ́ɛ sí wɛ è xɔ ɖe.” Ée Jakɔ́bu ɖɔ xó énɛ́ lɛ́ɛ nú vǐ tɔn lɛ́ɛ fó ɔ́, é mlɔ́ ayǐ, bɔ gbɔjɛ tɔn xwɛ, bɔ é yi su tɔ́gbó tɔn lɛ́ɛ. Bɔ Jozɛ́fu zɔn tɔ́ tɔn sín cyɔ jí kpó avǐ kpó, bó ja ɖasin kɔn nyi nukún mɛ n'i, bó kí si n'i. É ɖe gbe nú mɛsɛntɔ́ tɔn e nyí dotóogán lɛ́ɛ ɖɔ yě ní sá ami nú tɔ́ émítɔn, bɔ yě sá ami nú Jakɔ́bu. Yě sá ami nú cyɔ ɔ́ xɔ azǎn kanɖé (40). Ejípunu lɛ́ɛ ká nɔ aluwɛ mɛ xɔ azǎn kanɖé gban (70). Ée azǎn nabí e è ɖǒ ná nɔ aluwɛ mɛ ná ɔ́ vɔ ɔ́, Jozɛ́fu ɖɔ nú azɔ̌watɔ́ e ɖo hɔnmɛ lɛ́ɛ ɖɔ: “Ényí mi yí wǎn nú mì hǔn, mi yi ɖɔ xó e un ná ɖɔ nú mi din lɛ́ɛ nú axɔ́sú ɔ́ nú mì. Mi ná ɖɔ n'i ɖɔ: ‘Cóbónú tɔ́ ce ná kú ɔ́, é kó ɖɔ nú mì ɖɔ nyɛ ní xwlé nǔ ɖɔ nyɛ ná yi ɖi émí ɖó yɔdo émítɔn e émí kó kun ɖ'ayǐ ɖo Kanáa ɔ́ mɛ. Hǔn un jló ná yi Kanáa, bó ná yi ɖi tɔ́ ce. Un ɖi i fó ɔ́, un ná lɛ́ kɔ wá.’ ” Ée axɔ́sú ɔ́ se mɔ̌ ɔ́, é ná gbe Jozɛ́fu ɖɔ: “Bo yi ɖi tɔ́ towe lě e é ɖɔ bɔ a xwlé nǔ d'é jí n'i gbɔn é.” Ée axɔ́sú ɔ́ ɖɔ mɔ̌ ɔ́, Jozɛ́fu ɖidó Kanáa, bó ná yi ɖi tɔ́ tɔn. Axɔ́sú ɔ́ sín azɔ̌watɔ́ lɛ́ɛ bǐ, mɛxó e ɖo hɔnmɛ lɛ́ɛ bǐ, kpó tomɛxó Ejípu tɔn lɛ́ɛ bǐ kpó wɛ kplá Jozɛ́fu yi. Jozɛ́fu sín mɛ lɛ́ɛ bǐ: nɔví tɔn súnnu lɛ́ɛ kpódó tɔ́ tɔn sín mɛ e kpo lɛ́ɛ bǐ kpó xwedó e. Yɔkpɔ́vú lɛ́ɛ kpó kanlin lɛ́ɛ kpó kɛ́ɖɛ́ wɛ è jǒ dó nyi Gocɛ́ni. Jozɛ́fu lɛ́ hɛn kɛkɛ́ví lɛ́ɛ kpó sɔ́xátɔ́ lɛ́ɛ kpó. Mɛ e kplá ɛ lɛ́ɛ sukpɔ́ ɖésú. Ée yě jɛ Golɛnu-Atadi ɖo Judɛ́ɛn tɔ ɔ́ gúdo ɔ́, yě wa cyɔnú ɖo fínɛ́ bɔ é fɛ́ wǔ titewungbe. Énɛ́ ɔ́, Jozɛ́fu nɔ aluwɛ mɛ xɔ azǎn tɛ́nwe nú tɔ́ tɔn. Kanáanu e ɖo gbě ɔ́ jí fínɛ́ lɛ́ɛ sín nukún mɛ wɛ è blǒ nǔwiwa lɛ́ɛ ɖe, ɖo Golɛnu-Atadi fínɛ́. Énɛ́ ɔ́, yě ɖɔ: “Aluwɛ ɖaxó ɖé mɛ wɛ Ejípunu lɛ́ɛ ɖe mɛ!” Nǔ e wú è nɔ ylɔ́ tɛn énɛ́ ɔ́ e ɖo Judɛ́ɛn tɔ ɔ́ gúdo ɔ́ ɖɔ Avɛ́li-Mislayimu ɔ́ nɛ́; tínmɛ tɔn wɛ nyí “Aluwɛ Ejípu tɔn”. Énɛ́ ɔ́ gúdo ɔ́, Jakɔ́bu vǐ lɛ́ɛ wa nǔ e tɔ́ yětɔn ɖɔ nú yě ɔ́. Yě zé cyɔ tɔn yi Kanáa, bó ɖi dó yɔdo e ɖo sóxo mɛ ɖo Makipela sín gle mɛ ɔ́ mɛ, ɖo Mamulée kpá. Ablaxámu wɛ ka ko xɔ fí énɛ́ ɔ́ ɖo Eflɔ́ni, Hitíti ɔ́ sí, bó dó ɖó kúxwé tɔn. Ée Jozɛ́fu ɖi tɔ́ tɔn fó ɔ́, é lɛ́ kɔ yi Ejípu kpó nɔví tɔn lɛ́ɛ kpó, kpódó mɛ e kplá ɛ yi tɔ́ tɔn ɖi gbé lɛ́ɛ bǐ kpó. Ée Jozɛ́fu sín nɔví lɛ́ɛ mɔ ɖɔ tɔ́ yětɔn kó kú ɔ́, yě jɛ ɖiɖɔ nú yěɖée jí ɖɔ: “Din e tɔ́ mǐtɔn kú ɔ́, Jozɛ́fu ná húzú kpan nukɔn mǐ, bó sú nǔ nyanya e mǐ wa n'i lɛ́ɛ bǐ sín axɔ́ mǐ.” Énɛ́ ɔ́, yě ɖɔ sɛ́ dó Jozɛ́fu ɖɔ: “Cóbónú tɔ́ towe ná kú ɔ́, é ɖɔ mǐ ní ɖɔ nú we ɖɔ: ‘Kɛnklɛ́n bó sɔ́ nǔ e nɔví towe lɛ́ɛ wa xá we lɛ́ɛ, kpó hwɛ e yě hu dó we lɛ́ɛ kpó kɛ yě. Sɔ́ nǔ nyanya e yě wa nú we ɔ́ bǐ kɛ yě.’ Hǔn bo kɛnklɛ́n sɔ́ hwɛ énɛ́ ɔ́ e mǐ hu ɔ́ kɛ mǐ, ɖó Mawu ɖokpó ɔ́ wɛ mǐ kpó tɔ́ towe kpó nɔ́ sɛn.” Hwenu e è ɖo xó énɛ́ lɛ́ɛ ɖɔ nú Jozɛ́fu wɛ ɔ́, é wlí avǐ. Nɔví tɔn lɛ́ɛ ɖésúnɔ wá gɔ̌n tɔn, bó jɛ kpo asá tɔn mɛ, bó ɖɔ: “Mɛsɛntɔ́ towe wɛ mǐ nyǐ.” Jozɛ́fu ka ɖɔ nú yě ɖɔ: “Mi ma ɖi xɛsi ó, ɖó un sixú sɔ́ nyɛɖée ɖó Mawu tɛnmɛ ǎ. Nǔ nyanya wɛ mi lin ná wa dó wǔtu ce, Mawu ká zé dó húzú nǔ ɖagbe ná, bónú nǔ e ɖo jijɛ wɛ égbé ɔ́ ná dó sixú jɛ, bónú mɛ gěgé ná gán. Hǔn xɛsi ní má ɖi mi ó; un ná kpé nukún dó mi kpó mɛ mitɔn lɛ́ɛ kpó wú.” Énɛ́ ɔ́, Jozɛ́fu ɖɔ xó nú yě kpó wǎn yíyí kpó bó dó ná akɔ́nkpinkpan yě. Jozɛ́fu nɔ Ejípu, é kpódó tɔ́ tɔn sín hɛ̌nnu ɔ́ kpó. É nɔ gbɛ xɔ xwe kanwe gban (110). Jozɛ́fu mɔ vǐ tɔn Eflayímu sín vǐ lɛ́ɛ, bó mɔ vǐvú tɔn lɛ́ɛ. É sɔ́ vǐvú tɔn Makíi, Manasée ví ɔ́ dó ɖó vǐ. Jozɛ́fu ɖɔ nú nɔví tɔn lɛ́ɛ gbe ɖokpó ɖɔ: “Un ná kú, amɔ̌, Mawu ná wá gɔ́ alɔ nú mi dandan. É ná kplá mi sín Ejípu fí yi to e sín akpá é kó dó nú Ablaxámu, Izáki kpó Jakɔ́bu kpó ɔ́ mɛ.” Jozɛ́fu ɖɔ nú nɔví tɔn lɛ́ɛ ɖɔ: “Mi xwlé nǔ nú mì ɖɔ hwenu e Mawu ná kplá mi ɔ́, mi ná bɛ́ xú ce lɛ́ɛ sín fí hɛn yi.” Xwe kanwe gban (110) wɛ Jozɛ́fu ɖó bó kú. È sá ami nú cyɔ tɔn bó dó gbǎ ɖo Ejípu. Jakɔ́bu e è nɔ lɛ́ ylɔ́ ɖɔ Izlayɛ́li ɔ́ kpó vǐ tɔn lɛ́ɛ kpó wá Ejípu. Mɛ ɖokpó ɖokpó wá kpódó xwédo tɔn kpó. Vǐ lɛ́ɛ sín nyǐkɔ ɖíe: Hwlibɛ́ni, Sinmɛnyɔ́ɔ, Levíi, Judáa, Isakáa, Zabulɔ́ɔn, Bɛnjamɛ́ɛ, Dan, Nɛfutali, Gadi kpódó Acɛ́ɛ kpó. Jakɔ́bu ví e wá Ejípu lɛ́ɛ bǐ bló kanɖé gban (70). Vǐ tɔn Jozɛ́fu ɔ́ ká kó ɖo Ejípu hwenɛ́nu nɛ́. Jozɛ́fu wá kú, nɔví tɔn lɛ́ɛ kpódó mɛ e nyí gbɛ̌ yětɔn lɛ́ɛ kpó bǐ wá kú. Izlayɛ́li ví lɛ́ɛ ɖo jiji wɛ, yě ɖo kún gba wɛ, yě fɔ́n ɔ́, yě nɔ́ ɖo jijɛ jí wɛ, bó nɔ́ ɖo hlɔ̌nhlɔ́n dó d'é jí wɛ. Yě sukpɔ́ káká bó kpé to ɔ́ mɛ bǐ. Nǔ ɖo mɔ̌ káká bɔ axɔ́sú yɔ̌yɔ́ ɖé wá xɔ to ɖo Ejípu. Éyɛ́ ká tunwun Jozɛ́fu sín tan ɖěbǔ ǎ. Axɔ́sú ɔ́ ɖɔ nú togun tɔn ɖɔ: “Mi kpɔ́n; togun Izlayɛ́li ví lɛ́ɛ tɔn ɔ́, yě sukpɔ́ hú mǐ, yě hú gǎn mǐ. Mi wá mǐ ɖe wě dó yě wú, bó ná ɖó ji e ji wɛ yě ɖe ɔ́ te. É má nyí mɔ̌ ǎ ɔ́, nú ahwan wá tɔ́n mǐ ɔ́, yě táá wá jɛ kɛntɔ́ mǐtɔn lɛ́ɛ jí, bó ná fun ahwan xá mǐ, lobo ná tɔ́n sín to ɔ́ mɛ.” Ée axɔ́sú ɔ́ ɖɔ mɔ̌ ɔ́, è ɖe azɔ̌gán ɖé lɛ́ɛ ɖó yě nu, bónú yě ná nɔ́ ɖó azɔ̌ syɛ́nsyɛ́n lɛ́ɛ kɔ jí nú Izlayɛ́li ví lɛ́ɛ dó dó ya nú yě. Lě e yě bló gbɔn bɔ Izlayɛ́li ví lɛ́ɛ ɖó Pitɔ́mu toxo kpó Hlamusɛ́si toxo kpó ayǐ ɔ́ nɛ́. Toxo énɛ́ lɛ́ɛ mɛ wɛ è nɔ bɛ́ axɔ́sú sín jinukún lɛ́ɛ ɖó. Lo ɔ́, è ɖo ya dó nú yě wɛ ɔ́, lo wɛ yě nɔ́ lɛ́ ɖo jiji d'é jí wɛ, bó nɔ́ ɖo kún gba d'é jí wɛ ɔ́ nɛ́. Nǔ énɛ́ ɔ́ zɔ́n bɔ è mɔ Izlayɛ́li ví lɛ́ɛ lě ɔ́, ado nɔ hu mɛ. Énɛ́ ɔ́, Ejípunu lɛ́ɛ sɔ́ Izlayɛ́li ví lɛ́ɛ dó ɖó kannumɔ, bó hɛn yě syɛ́nsyɛ́n. Yě nɔ́ ɖó azɔ̌ syɛ́nsyɛ́n lɛ́ɛ kɔ jí nú yě, káká bɔ gbɛ nɔ vlɛ́ nu nú yě: yě nɔ́ wa kozɔ́, yě nɔ́ sún blǐki, bó nɔ́ wa glezɔ́ tɛnmɛ tɛnmɛ lɛ́ɛ bǐ. Yě nɔ́ ɖó azɔ̌ syɛ́nsyɛ́n alɔkpa alɔkpa énɛ́ lɛ́ɛ kɔ jí nú yě. Nǔ yětɔn nɔ́ blá wǔ nú yě ǎ. Axɔ́sú Ejípu tɔn ɔ́ ylɔ́ nyɔ̌nu e nɔ́ nɔ aji nú nyɔ̌nu Eblée lɛ́ɛ bó ɖɔ xó nú yě lɔmɔ̌; nyɔ̌nu énɛ́ lɛ́ɛ ɖokpó nɔ́ nyí Ciflá bɔ ɖokpó nɔ́ nyí Púwa. É ɖɔ nú yě ɖɔ: “Nú mi nɔ aji nú nyɔ̌nu Eblée lɛ́ɛ ɖě hǔn, mi kpɔ́n vǐ e é ji ɔ́: ényí súnnu wɛ hǔn, mi hu, é ká nyí nyɔ̌nu wɛ hǔn, mi jó e dó nyi gbɛ.” Lo ɔ́, ajinɔtɔ́ lɛ́ɛ ɖó sísí nú Mawu, bó bló nǔ e axɔ́sú ɔ́ ɖɔ yě ní bló ɔ́ ǎ; yě jó vǐ lɛ́ɛ bǐ dó nyi gbɛ. Énɛ́ ɔ́, axɔ́sú Ejípu tɔn ɔ́ wá ylɔ́ ajinɔtɔ́ lɛ́ɛ gbe ɖokpó, bó ɖɔ nú yě ɖɔ: “Aniwú mi nɔ jó vǐ lɛ́ɛ dó nyi gbɛ? Étɛ́wú wɛ mi ɖo nǔ wa gbɔn mɔ̌ wɛ?” Bɔ ajinɔtɔ́ lɛ́ɛ yí gbe n'i ɖɔ: “Nyɔ̌nu Eblée lɛ́ɛ cí nyɔ̌nu Ejípunu lɛ́ɛ ɖɔhun ǎ, yědɛɛ lɛ́ɛ dó hlɔ̌nhlɔ́n; yě nɔ́ kó ji vǐ cóbɔ mǐ mɛ ajinɔtɔ́ lɛ́ɛ nɔ́ wá.” Énɛ́ wú ɔ́, Mawu wa ɖagbe nú ajinɔtɔ́ lɛ́ɛ. Izlayɛ́li ví lɛ́ɛ ká fɔ́n bó ɖo jiji wɛ, bó sukpɔ́ ɖésú. Sísí e nyɔ̌nu ajinɔtɔ́ lɛ́ɛ ɖó nú Mawu ɔ́ zɔ́n, bɔ Mawu ná vǐ yě dó wa ɖagbe nú yě. Axɔ́sú Ejípu tɔn ɔ́ ká ná gbe togun tɔn ɔ́ bǐ ɖɔ: “È ji vǐ súnnu Eblée ɖěbǔ hǔn, mi sɔ́ ɛ nyi dó Nilu mɛ, mi ka ná jó nyɔ̌nu lɛ́ɛ bǐ dó nyi gbɛ.” Dǎwe ɖé ɖo Levíi sín hɛ̌nnu ɔ́ mɛ, bó da Levíi ví ɖokpó. Nyɔ̌nu ɔ́ mɔ xo bó ji vǐ súnnu ɖokpó. É mɔ ɖɔ vǐ ɔ́ nyɔ́ ɖɛkpɛ, bó sɔ́ ɛ hwlá nú sun atɔn. Ée é mɔ ɖɔ vǐ ɔ́ kún sɔ́ sixú nɔ hwlǎhwlá ó ɔ́, é sɔ́ fánxasun ɖokpó, bó sá gudlɔ́n kpó awɔn kpó dó, bó sɔ́ vǐ ɔ́ d'é mɛ, lobo sɔ́ yi ɖó fánkan mɛ ɖo Nilu tɔ ɔ́ mɛ. Vǐ ɔ́ sín dadá ká cí zɔ bó ná kpɔ́n nǔ e ná jɛ dó jǐ tɔn é. Axɔ́sú Ejípu tɔn sín vǐ nyɔ̌nu ká wá wǔ lɛ gbé; hǎgbɛ́ tɔn e kplá ɛ lɛ́ɛ ɖo sa ɖi gbɔn Nilu tɔ ɔ́ tó wɛ. Éyɛ́ ká mɔ xasun ɔ́ sɛ́ dó ɖo fánkan mɛ, bó sɛ́ mɛsɛntɔ́ tɔn dó ɖɔ é ní yi zé wá. Ée mɛsɛntɔ́ ɔ́ yi zé xasun ɔ́ wá ɔ́, axɔ́sú ɔ́ sín vǐ hun, bó mɔ vǐ ɖokpó ɖ'é mɛ. Vǐ súnnu wɛ bó ɖo avǐ ya wɛ. Nǔ tɔn blá wǔ n'i bɔ é ɖɔ: “Á! Eblée lɛ́ɛ sín vǐ ɖíe hǔn.” Énɛ́ ɔ́, vǐ ɔ́ sín dadá sɛkpɔ́ ɛ, bó ɖɔ n'i ɖɔ: “Má yi ba vǐnɔ ɖokpó wá nú we ɖo Eblée lɛ́ɛ mɛ, bónú é ná nɔ́ ná anɔ̌ vǐ ɔ́ nú we a?” Bɔ axɔ́ví nyɔ̌nu ɔ́ yí gbe n'i ɖɔ: “Bo yi ba bo wá.” Bɔ é yi kplá vǐ ɔ́ sín nɔ wá. Ée nyɔ̌nu ɔ́ wá ɔ́, axɔ́ví nyɔ̌nu ɔ́ ɖɔ n'i ɖɔ: “Kplá vǐ élɔ́ yi xwé, bó nɔ́ ná ɛ anɔ̌ nú mì; un ná nɔ́ sú axɔ́ we.” Bɔ nyɔ̌nu ɔ́ yí vǐ ɔ́, bó nɔ́ ná anɔ̌ ɛ. Ée vǐ ɔ́ wá su ɔ́, é kplá ɛ wá jó nú axɔ́ví nyɔ̌nu ɔ́, bɔ é sɔ́ ɛ dó ɖó vǐ. É sun nyǐkɔ ɛ ɖɔ Mɔyízi. Đó é ɖɔ: “Tɔ mɛ wɛ un ɖe e tɔ́n sín.” Hwenu e Mɔyízi wá nyí mɛxó ɔ́, é wá su gbe ɖokpó, bɔ é tɔ́n bó yi kpɔ́n nɔví tɔn e kpó é kpó nyí akɔ ɖokpó ɔ́ lɛ́ɛ, bó mɔ azɔ̌ syɛ́nsyɛ́n e wa wɛ yě ɖe lɛ́ɛ. É mɔ Ejípunu ɖé ɖo nɔví tɔn Eblée lɛ́ɛ ɖokpó xo wɛ. Ée é mɔ mɔ̌ ɔ́, é kpɔ́n ɖisí bó kpɔ́n amyɔ, bó mɔ ɖɔ mɛɖé kún ɖo fínɛ́ ó. Énɛ́ ɔ́, é xo Ejípunu ɔ́ hu, bó kplé kɔ́ dó jǐ tɔn. É lɛ́ tɔ́n ayǐhɔ́ngbe tɔn, bó mɔ Eblée we ɖo hun xo wɛ. É kpácá ɛ bɔ é kanbyɔ́ mɛ e sín hwɛ ma nyɔ́ ǎ ɔ́ ɖɔ: “Aniwú a ɖo nɔzo towe xo wɛ mɔ̌?” Bɔ mɛ ɔ́ yí gbe n'i ɖɔ: “Mɛ̌ wɛ sɔ́ we gǎn abǐ hwɛɖɔtɔ́ ɖó mǐ nu? A jló ná hu mì lě e a hu Ejípunu ɔ́ gbɔn é wɛ a?” Ée Mɔyízi se mɔ̌ ɔ́, ado hu i, bɔ é ɖɔ: “Yě tunwun nǔ e un dó sin ɔ́ lɔ mɛ!” Axɔ́sú Ejípu tɔn ɔ́ se nǔ e jɛ ɔ́, bó ɖo Mɔyízi ba ná hu wɛ. Énɛ́ ɔ́, Mɔyízi hɔn sín fínɛ́, bó ná yi nɔ Madiáani. Ée é wá Madiáani ɔ́, é jínjɔ́n dotɔ ɖé tó. Vɔ̌sánú-xwlémawutɔ́ ɖé ká ɖo Madiáani fínɛ́. É ɖó vǐ nyɔ̌nu tɛ́nwe. Vǐ lɛ́ɛ wá sin dun gɔ́ nǔ e mɛ gbɔ̌ lɛ́ɛ nɔ́ nu sin ɖe lɛ́ɛ gbé lě e yě kó nɔ́ bló gbɔn é, bónú tɔ́ yětɔn sín gbɔ̌ lɛ́ɛ ná wá nu. Gbɔ̌nyitɔ́ ɖé lɛ́ɛ ká wá bó nya yě, énɛ́ ɔ́, Mɔyízi sí te bó jɛ ahwan ɖyɔ̌vǐ lɛ́ɛ jí, bó ná sin gbɔ̌ yědɛɛ tɔn lɛ́ɛ. Ée yě lɛ́ kɔ yi tɔ́ yětɔn Hlewuyɛ́li gɔ́n ɔ́, é kanbyɔ́ yě ɖɔ: “Nɛ̌ ká gbɔn bɔ mi ka yá wǔ wá sɔ mɔ̌ égbé?” Bɔ yě yí gbe n'i ɖɔ: “Ejípunu ɖé wɛ hwlɛ́n mǐ ɖo gbɔ̌nyitɔ́ lɛ́ɛ sí; é tlɛ lɛ́ dun sin nú mǐ, bó ná sin kanlin lɛ́ɛ.” Tɔ́ yětɔn ká kanbyɔ́ yě ɖɔ: “Fítɛ́ mɛ ɔ́ ɖe? Nɛ̌ ká gbɔn bɔ mi jó é dó? Mi yi ylɔ́ ɛ wá bónú é ná ɖu nǔ.” Ée ɖyɔ̌vǐ lɛ́ɛ yi ylɔ́ Mɔyízi ɔ́, é yí gbe bó wá nɔ nya ɔ́ gɔ́n. Nya ɔ́ ká ná ɛ vǐ tɔn Sipɔ́la bɔ é da. Nyɔ̌nu ɔ́ ji vǐ súnnu ɖokpó, bɔ é sun nyǐkɔ ɛ ɖɔ Gɛɛcɔ́mu; ɖó é ɖo ɖiɖɔ wɛ ɖɔ: “Jǒnɔ wɛ un nyí ɖo mɛ ɖěvo tomɛ.” Nǔ énɛ́ lɛ́ɛ jɛ ɔ́, xwe tɔn ko sɛ yi, bɔ Ejípu xɔ́sú ɔ́ wá kú. Izlayɛ́li ví lɛ́ɛ kpo ɖo azɔn wɛn wɛ ɖo kannumɔzɔ́ e wa wɛ yě ɖe ɔ́ glɔ́, bó ɖo xó sú wɛ. Xó e sú wɛ yě ɖe ɖo kannumɔgbénu ɔ́ hun káká yi Mawu gɔ́n. Mawu se azɔn e wɛn wɛ Izlayɛ́li ví lɛ́ɛ ɖe ɔ́, bó ka tunwun ɖɔ akɔ e émí jɛ xá Ablaxámu kpó Izáki kpó Jakɔ́bu kpó é kpo ɖo te. É mɔ nǔ e ɖo Izlayɛ́li ví lɛ́ɛ gbo wɛ ɔ́ bɔ nǔ yětɔn blá wǔ n'i. Hwenɛ́nu ɔ́, Mɔyízi ka ɖo nukún kpé dó asi tɔn tɔ́ Jetlo, vɔ̌sánú-xwlémawutɔ́ Madiáani tɔn ɔ́ sín gbɔ̌ lɛ́ɛ wú wɛ. É wá jɛ gbe ɖokpó, bɔ é kplá gbɔ̌ lɛ́ɛ gbɔn gbětótló gúdo, bó yi jɛ Mawu só ɔ́ kɔn ɖo Holɛ́bu. Fínɛ́ wɛ wɛnsagun Mawu Mavɔmavɔ tɔn ɖo myɔ mɛ bó tɔ́n dó jǐ tɔn, ɖo zungodwe ɖé mɛ. Mɔyízi mɔ ɖɔ zungodwe ɔ́ bǐ nyí myɔ. Zungodwe ɔ́ ɖésú ka ɖo jiji wɛ ǎ. Bɔ Mɔyízi ɖɔ: “Un ná lɛ́ kɔ yi kpɔ́n nǔ baɖabaɖa élɔ́ e mɔ wɛ un ɖe é. Un ná kpɔ́n nǔ e wú zungodwe ɔ́ má ɖo jiji wɛ ǎ é.” Mawu Mavɔmavɔ mɔ ɖɔ Mɔyízi lɛ́ kɔ bó ja nǔ e ɖo jijɛ wɛ ɔ́ kpɔ́n gbé, lobo nɔ zungodwe ɔ́ mɛ, bó ylɔ́ ɛ. É ɖɔ: “Mɔyízi! Mɔyízi!” Bɔ Mɔyízi yí gbe ɖɔ: “Wěyi!” Bɔ Mawu ɖɔ: “Ma sɛkpɔ́ fí ó. Đe afɔkpa sín afɔ, ɖó ayǐkúngban e jí a ɖe ɔ́, ayǐkúngban ɖeɖóvo wɛ.” Mawu lɛ́ ɖɔ: “Nyɛ wɛ nyí Mawu. Nyɛ wɛ tɔ́gbó Ablaxámu, Izáki, Jakɔ́bu kpó tɔ́ towe kpó nɔ sɛn.” Ée Mɔyízi se mɔ̌ ɔ́, é sɔ́ nǔ cyɔ́n nukún mɛ, ɖó é ɖo xɛsi ɖi wɛ ɖɔ émí táá mɔ Mawu. Mawu Mavɔmavɔ ɖɔ: “Un mɔ ya e ji wɛ togun ce Izlayɛ́li ɖe ɖo Ejípu ɔ́. Un se xó e sú wɛ é ɖe ɖó nǔ e wa xá ɛ wɛ azɔ̌gán lɛ́ɛ ɖe ɔ́ wú é. Un tunwun wǔvɛ́ e mɔ wɛ é ɖe ɔ́ ganjí. Énɛ́ ɔ́ wú wɛ un jɛ te bó ná hwlɛ́n ɛ ɖo Ejípunu lɛ́ɛ sí, bó ná kplá ɛ sín Ejípu yi to ɖaxó ɖagbe ɖagbe ɖé mɛ. Un ná kplá ɛ yi to e mɛ nyibúnɔ́sin kpó wǐin kpó nɔ́ sa tɔ ɖe ɔ́ mɛ, ɖo fí e Kanáa ví lɛ́ɛ, Hitíti lɛ́ɛ, Amɔliti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó nɔ́ nɔ lɛ́ɛ é. Đó xó e sú wɛ Izlayɛ́li ví lɛ́ɛ ɖe ɔ́ hun káká wá gɔ̌n ce, un mɔ ya e dó nú yě wɛ Ejípunu lɛ́ɛ ɖe ɔ́. Din ɔ́, yi, un sɛ́ we dó axɔ́sú Ejípu tɔn ɔ́ gɔ́n. Đe togun ce Izlayɛ́li tɔ́n sín to tɔn mɛ.” Mɔyízi ka ɖɔ nú Mawu ɖɔ: “Ani wɛ nyɛ nyí bó ná yi axɔ́sú Ejípu tɔn ɔ́ gɔ́n, bó ná ɖe Izlayɛ́li ví lɛ́ɛ tɔ́n sín to tɔn mɛ?” Mawu ká ɖɔ n'i ɖɔ: “Un ɖo kpɔ́ xá we. Nǔ e ná ɖe xlɛ́ we ɖɔ nyɛ wɛ sɛ́ we dó ɔ́ ɖíe: a ɖe togun ɔ́ tɔ́n sín Ejípu ɔ́, mi ná wá sɛn mì ɖo só élɔ́ jí.” Bɔ Mɔyízi ɖɔ nú Mawu ɖɔ: “Hǔn un ná yi Izlayɛ́li ví lɛ́ɛ gɔ́n, bó ná ɖɔ nú yě ɖɔ Mawu wɛ sɛ́ mì dó, Mawu e tɔ́gbó yětɔn lɛ́ɛ nɔ sɛn é wɛ sɛ́ mì dó gɔ̌n yětɔn. Nú yě ká kanbyɔ́ mì ɖɔ nɛ̌ nyǐkɔ tɔn nɔ́ nyí a jí ɔ́, nɛ̌ wɛ un ná ɖɔ nú yě?” Énɛ́ ɔ́, Mawu ɖɔ nú Mɔyízi ɖɔ: “UN NYÍ MƐ E UN NYÍ É.” Hǔn nǔ e a nǎ ɖɔ nú Izlayɛ́li ví lɛ́ɛ ɔ́ ɖíe: mɛ e nyǐkɔ tɔn nyí “UN NYÍ” ɔ́ wɛ sɛ́ mì dó gɔ̌n mitɔn. Mawu lɛ́ ɖɔ nú Mɔyízi ɖɔ: “A nǎ ɖɔ nú Izlayɛ́li ví lɛ́ɛ ɖɔ Mawu Mavɔmavɔ, Mawu e tɔ́gbó yětɔn lɛ́ɛ nɔ sɛn ɔ́ wɛ sɛ́ émí dó. Mawu e Ablaxámu, Izáki, kpó Jakɔ́bu kpó nɔ sɛn ɔ́ wɛ sɛ́ émí dó yě gɔ̌n. Nyǐkɔ ce nɛ́ káká sɔ́yi; nyǐkɔ ce nɛ́ nú hwe lɛ́ɛ bǐ nu.” Yi kplé tomɛxó Izlayɛ́li tɔn lɛ́ɛ bó ɖɔ nú yě ɖɔ: “Mawu Mavɔmavɔ, Mawu e tɔ́gbó mitɔn lɛ́ɛ nɔ sɛn ɔ́, Mawu Ablaxámu, Izáki, kpó Jakɔ́bu kpó nɔ sɛn ɔ́ tɔ́n dó jǐ ce, bó ɖɔ nú mì ɖɔ: ‘Un mɔ nǔ e wa xá mi wɛ è ɖe ɖo Ejípu ɔ́, bó wá bó ná hwlɛ́n mi gán, un ná kplá mi sín Ejípu tomɛ fí e mi ɖo ya ji ɖe wɛ é, bó ná kplá mi yi Kanáa ví lɛ́ɛ, Hitíti lɛ́ɛ, Amɔliti lɛ́ɛ, Pɛliziti lɛ́ɛ, Hivíti lɛ́ɛ kpó Jebuzinu lɛ́ɛ kpó sín to mɛ. Un ná kplá mi yi to e mɛ nyibúnɔ́sin kpó wǐin kpó nɔ́ sa tɔ ɖe ɔ́ mɛ.’ “Izlayɛ́li ví lɛ́ɛ ná ɖótó we. Bɔ hwi kpó Izlayɛ́li sín tomɛxó lɛ́ɛ kpó ná yi axɔ́sú Ejípu tɔn ɔ́ gɔ́n, bó ná ɖɔ n'i ɖɔ: ‘Mawu Mavɔmavɔ, Mawu mǐ Eblée lɛ́ɛ tɔn ɔ́ tɔ́n dó mǐ jí. Din ɔ́, nǎ gbe mǐ, nú mǐ nǎ ɖi zɔnlin xɔ azǎn atɔn ɖo gbětótló mɛ, bó ná yi sá vɔ̌ nú Mavɔmavɔ Mawu mǐtɔn.’ Nyɛ ka tunwun ganjí ɖɔ axɔ́sú ɔ́ kún ná jó mi dó bɔ mi ná yi ó, è na bó hɛn ɛ syɛ́nsyɛ́n ɔ́, é ná jó mi dó ǎ. É ka ɖo mɔ̌ có un ná sí te dó to tɔn jí kpó hlɔ̌nhlɔ́n kpó, bó ná jlɛ́ nǔ tɛnmɛ tɛnmɛ dó to ɔ́ wú, bɔ ado ná hu i bɔ é ná jó mi dó bɔ mi ná yi. Un ná lɛ́ bló bɔ Ejípunu lɛ́ɛ ná nyɔ́ xomɛ dó mi wú, bɔ mi sɔ́ nǔ bó ná yi ɔ́, mi ná zɔn agbǎ ǎ. Izlayɛ́li nyɔ̌nu lɛ́ɛ ɖokpó ɖokpó ná byɔ́ nǔ e è sɔ́ kpatágan dó bló ná lɛ́ɛ, bó ná byɔ́ sikánú kpó nǔzínzán kpó nyɔ̌nu e ɖo xwé yětɔn kpá lɛ́ɛ, kpó ée ɖo xwé yětɔn gbe lɛ́ɛ kpó; mi ná dó agban tɔn nú vǐ mitɔn súnnu kpó nyɔ̌nu kpó. Énɛ́ ɔ́, mi ná vɔ Ejípunu lɛ́ɛ.” Mɔyízi ɖɔ nú Mawu Mavɔmavɔ ɖɔ: “Nú Izlayɛ́li ví lɛ́ɛ ma ka ɖi nǔ nú mì ǎ, nú yě ma ɖótó mì ǎ, bó ɖɔ Mawu Mavɔmavɔ kún tɔ́n dó jǐ ce ɖě ó ɔ́, nɛ̌ un ná wa nǔ gbɔn?” Mawu Mavɔmavɔ ká kanbyɔ́ ɛ ɖɔ: “Étɛ́ wɛ ɖo alɔ towe mɛ?” Bɔ é yí gbe ɖɔ: “Kpo wɛ.” Mawu Mavɔmavɔ ɖɔ: “Sɔ́ nyi kɔ́ mɛ.” Bɔ é sɔ́ kpo ɔ́ nyi kɔ́ mɛ, bɔ é húzú dan, bɔ Mɔyízi lɔ́n jɛ zɔ. Mawu Mavɔmavɔ lɛ́ ɖɔ nú Mɔyízi ɖɔ: “Dlɛ̌n alɔ bó hɛn dan ɔ́ sín avɔnu.” Mɔyízi ka dlɛ́n alɔ bó hɛn, bɔ é lɛ́ húzú kpo ɖo alɔ tɔn mɛ. Bɔ Mawu Mavɔmavɔ ɖɔ: “Nǔ e a nǎ bló ɔ́ nɛ́, énɛ́ ɔ́, yě ná ɖi nǔ ɖɔ Mawu Mavɔmavɔ, Mawu e tɔ́gbó émítɔn lɛ́ɛ nɔ sɛn ɔ́, Mawu e Ablaxámu, Izáki, kpó Jakɔ́bu kpó nɔ sɛn ɔ́ wɛ tɔ́n dó jǐ towe nǔgbó.” Mawu Mavɔmavɔ lɛ́ ɖɔ nú Mɔyízi ɖɔ é ní zé alɔ gbɔn awu tɔn mɛ, bó zé ɖó akɔ́nnu, bɔ é zé ɖó, bó ɖe síin. É ná mɔ nǔɖé ɔ́, gudu jɛ́n kpé alɔ tɔn, bó wé tété kɛ́njí ɖɔhun. Bɔ Mawu Mavɔmavɔ ɖɔ: “Lɛ̌ zé alɔ towe ɖó akɔ́nnu.” Bɔ é lɛ́ zé ɖó, bó ɖe síin. É ná mɔ nǔɖé ɔ́, alɔ tɔn jɛ́n lɛ́ jɛ tɛn tɔn mɛ. Mawu Mavɔmavɔ ká ɖɔ n'i ɖɔ: “Nú a blǒ nǔ nukɔntɔn ɔ́ bónú yě má ɖi nǔ nú we, bó ɖótó we ǎ ɔ́, a blǒ gǔdo tɔn ɔ́, yě ná ɖi. Nú a ka bló nǔ we énɛ́ lɛ́ɛ, bónú yě má ɖi nǔ nú we bó ɖótó we ǎ jɛ́n wɛ ɔ́, a nǎ wún sin ɖo Nilu tɔ ɔ́ mɛ, bó ná kɔn nyi kɔ́ mɛ; sin e a wǔn ɖo tɔ ɔ́ mɛ ɔ́ ná húzú kanjɔ ɖo ayǐkúngban.” Mɔyízi ɖɔ nú Mawu Mavɔmavɔ ɖɔ: “Nǔ sixú nyí mɔ̌ ǎ Aklúnɔ, un ɖi ɖɛ̌ ǎ; un nyɔ́ xó ɖɔ sín do ǎ. Sín hwenu e a ɖo xó ɖɔ nú mì wɛ káká jɛ din ɔ́, lě e un ɖe ɔ́ jɛ́n un ɖe. Xóɖiɖɔ kó nɔ nyí tagba nú mì ɖ'ayǐ.” Mawu Mavɔmavɔ ká ɖɔ n'i ɖɔ: “Mɛ̌ wɛ ná nu gbɛtɔ́? Mɛ̌ wɛ nɔ́ zɔ́n bɔ ɖɛ̌ nɔ́ tɛ́? Mɛ̌ wɛ nɔ́ zɔ́n bɔ tó nɔ́ kú? Mɛ̌ wɛ nɔ́ zɔ́n bɔ è nɔ mɔ nukúnnú? Mɛ̌ wɛ nɔ́ zɔ́n bɔ nukún nɔ́ tɔ́n? Nyɛ Mawu Mavɔmavɔ ɔ́ wɛ ǎ cé? Hǔn bo yi. Nyi ɖésúnɔ ná ɖo kpɔ́ xá we. A ja xó ɖɔ gbé ɔ́, un ná ɖɔ xó e a ɖǒ ná ɖɔ ɔ́ nú we.” Mɔyízi ka ɖɔ: “Óo! Aklúnɔ, kɛnklɛ́n bó sɛ́ mɛ ɖěvo dó!” Énɛ́ ɔ́, Mawu Mavɔmavɔ sin xomɛ dó Mɔyízi bó ɖɔ: “Nɔví towe Aalɔ́ɔn Levíi ví ɔ́ ɖo fínɛ́ ǎ cé? Un tunwun ɖɔ éyɛ́ nyɔ́ xó ɖɔ. Kpɔ́n, é ɖésú nɛ́ ja gɔ̌n towe lɔ nɛ́; nú é wá mɔ we ɔ́, xomɛ ná hun i. A nǎ ɖɔ xó n'i, a nǎ ɖɔ xó e é ɖó ná ɖɔ ɔ́ n'i. Bɔ nyɛ ɔ́, nú mi ɖo xó ɖɔ wɛ ɔ́, un ná ɖo kpɔ́ xá mi mɛ ɖokpó ɖokpó, bó ná ɖɔ nǔ e mi ɖó ná wa ɔ́ nú mi. Éyɛ́ wɛ ná ɖɔ xó nú togun ɔ́ ɖó tɛn towe mɛ. É wɛ ná nyí gbeyíɖɔ towe, bɔ un ná nɔ ɖɔ xó e é ná nɔ́ ɖɔ lɛ́ɛ gbɔn jǐ towe. A nǎ hɛn kpo towe élɔ́ alɔnu; é wɛ a nǎ nɔ́ dó bló nǔjíwǔ lɛ́ɛ ná.” Mɔyízi lɛ́ kɔ yi Jetlo asi tɔn tɔ́ ɔ́ gɔ́n, bó ɖɔ n'i ɖɔ: “Kɛnklɛ́n ná gbe mì nú má lɛ́ kɔ yi nɔví ce lɛ́ɛ gɔ́n ɖo Ejípu, bó ná kpɔ́n ɖɔ yě kpo ɖo gbɛ a jí.” Jetlo ka ɖɔ nú Mɔyízi ɖɔ é ná yi ɖagbe. Énɛ́ ɔ́, cóbónú Mɔyízi ná gosín Madiáani ɔ́, Mawu Mavɔmavɔ ɖɔ n'i ɖɔ: “Lɛ̌ kɔ yi Ejípu, ɖó mɛ e jló ná hu we lɛ́ɛ bǐ kó kú.” Ée Mɔyízi se mɔ̌ ɔ́, é kplá asi tɔn kpó vǐ tɔn lɛ́ɛ kpó, bó bɛ́ yě ɖó tócí jí bó ná lɛ́ kɔ yi Ejípu. É hɛn kpo Mawu tɔn ɔ́ alɔ mɛ. Mawu Mavɔmavɔ ka lɛ́ ɖɔ n'i ɖɔ: “A lɛ̌ kɔ yi Ejípu hǔn, ɖǒ ayi nǔjíwǔ e un ná we bɔ a nǎ bló lɛ́ɛ bǐ jí. A nǎ jlɛ́ nǔ énɛ́ lɛ́ɛ ɖo axɔ́sú Ejípu tɔn ɔ́ nukún mɛ. Nyɛ ka ná zɔ́n bɔ é ná tlí tó, bó ná jó togun ɔ́ dó bɔ é ná yi ǎ. Énɛ́ ɔ́, a nǎ ɖɔ n'i ɖɔ: Xó e Mawu Mavɔmavɔ ɖɔ ɔ́ ɖíe; é ɖɔ: ‘Togun Izlayɛ́li tɔn ɔ́, vǐ súnnu ce wɛ é nyí; nukɔngbéví ce wɛ. Jǒ vǐ súnnu ce dó ní yi, bó ná yi sɛn mì; é ɖó ɖɔ a gbɛ̌ ǎ. Nú a gbɛ̌ ɖɔ é kún ná yi ó ɔ́, un ná hu vǐ súnnu towe nukɔngbéví towe ɔ́.’ ” Hwenu e Mɔyízi jɛ ali bó ɖo yiyi wɛ ɔ́, é dɔ́ fí ɖé, bɔ Mawu Mavɔmavɔ zɔn jǐ tɔn bó ja huhu i gbé. Sipɔ́la ka zé awǐnnya ɖíɖá ɖé bó dó sɛ́n vǐ tɔn sín atɔtɔ, bó zé sɔ́ Mɔyízi sín súnnuxwé bó ɖɔ: “Asú hun mɛ tɔn wɛ a nyǐ nú mì ɖó adagbigbo ɔ́ wú.” Énɛ́ ɔ́, Mawu Mavɔmavɔ jó Mɔyízi dó, bɔ Sipɔ́la ɖɔ: “Asú hun mɛ tɔn wɛ a nyǐ nú mì.” Mawu Mavɔmavɔ ɖɔ nú Aalɔ́ɔn ɖó adagbigbo ɔ́ wú ɖɔ: “Yi kpé Mɔyízi ɖo gbětótló mɛ.” Ée Aalɔ́ɔn se mɔ̌ ɔ́, é yi nǔgbó, bó yi kpé Mɔyízi ɖo Mawu sín só ɔ́ kɔn, bó zunfán ɛ, bó kí si n'i. Énɛ́ ɔ́, Mɔyízi ɖɔ xó e Mawu Mavɔmavɔ e sɛ́ ɛ dó ɔ́ ɖɔ n'i lɛ́ɛ bǐ nú Aalɔ́ɔn, bó lɛ́ ɖɔ nǔjíwǔ e Mawu Mavɔmavɔ ɖɔ é ní bló lɛ́ɛ bǐ n'i. Bɔ Mɔyízi kpó Aalɔ́ɔn kpó wlí ali bó ɖidó. Ée yě yi ɔ́, yě kplé tomɛxó Izlayɛ́li tɔn lɛ́ɛ bǐ. Aalɔ́ɔn ka ɖɔ xó e Mawu Mavɔmavɔ ɖɔ nú Mɔyízi lɛ́ɛ bǐ nú yě, bɔ Mɔyízi bló nǔjíwǔ lɛ́ɛ ɖo togun ɔ́ nukún mɛ. Bɔ togun ɔ́ ɖi nǔ ná. Yě mɔ nǔ jɛ wú ɖɔ Mawu Mavɔmavɔ mɔ lě e è ɖo ya dó nú émí mɛ Izlayɛ́li ví lɛ́ɛ gbɔn wɛ ɔ́, bó wá ba yě kpɔ́n, bó ná hwlɛ́n yě gán. Énɛ́ ɔ́, yě jɛ kpo bó ɖe kɔ́ nú Mawu Mavɔmavɔ. Ée nǔ énɛ́ lɛ́ɛ jɛ gúdo ɔ́, Mɔyízi kpó Aalɔ́ɔn kpó yi axɔ́sú Ejípu tɔn ɔ́ gɔ́n bó ɖɔ n'i ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Jǒ togun ce dó bónú é yi ɖu xwe ɖokpó dó kpa susu nú mì ɖo gbětótló mɛ.’ ” Bɔ axɔ́sú ɔ́ ɖɔ: “Mɛ nǎhún wɛ Mawu Mavɔmavɔ nyí bɔ un ná se tó nú n'i, bó ná jó Izlayɛ́li ví lɛ́ɛ dó bɔ yě ná yi ɔ́? Un tunwun Mawu Mavɔmavɔ ɖé ǎ, un ka ɖo Izlayɛ́li ví lɛ́ɛ ná jó dó wɛ ǎ.” Mɔyízi kpó Aalɔ́ɔn kpó ká yí xó bó ɖɔ: “Mawu mǐ Eblée lɛ́ɛ tɔn ɔ́ tɔ́n dó mǐ jí. Nǎ gbe mǐ nú mǐ ná ɖi zɔnlin xɔ azǎn atɔn ɖo gbětótló mɛ, bó ná yi sá vɔ̌ nú Mawu Mavɔmavɔ, bónú é má zé jɛmɛjí abǐ ahwanfunfun dó hu mǐ ná ó.” Bɔ axɔ́sú Ejípu tɔn ɔ́ ɖɔ nú Mɔyízi kpó Aalɔ́ɔn kpó ɖɔ: “Aniwú mi ɖo tasyɛ́n ná Izlayɛ́li ví lɛ́ɛ wɛ, bɔ yě ná jó azɔ̌ e wa wɛ yě ɖe ɔ́ dó? Mi yi azɔ̌ e wa wɛ mi ɖe lɛ́ɛ kɔn. Din e Izlayɛ́li ví lɛ́ɛ sukpɔ́ ganjí ɖo to ɔ́ mɛ ɔ́ wɛ midɛɛ lɛ́ɛ jló ná ɖó azɔ̌ yětɔn lɛ́ɛ te a?” Gbe énɛ́ ɔ́ gbe ɖokpó ɔ́, axɔ́sú Ejípu tɔn ɖɔ nú Ejípunu azɔ̌gán lɛ́ɛ kpó Izlayɛ́li ví azɔ̌jíkpɔ́ntɔ́ lɛ́ɛ kpó ɖɔ: “Mi ma sɔ́ ná gběhan e Izlayɛ́li ví lɛ́ɛ ná nɔ́ dó sún blǐki ná ɔ́ ɖě yě lě e mǐ kó nɔ bló gbɔn ɖ'ayǐ ɔ́ ó, yě ɖésúnɔ ní nɔ́ yi ba. Amɔ̌ blǐki nabí e yě kó nɔ sún ɖ'ayǐ ɔ́ jɛ́n mi ná lɛ́ byɔ́ yě ɖɔ yě ní sún dandan; é ná hwe ɖokpó ǎ. Đó fɔnlínnɔ wɛ yě nyí. Nǔ e wú wɛ yě ɖo xó sú wɛ bó ɖo ɖiɖɔ wɛ ɖɔ émí ná yi sá vɔ̌ nú Mawu émítɔn ɔ́ nɛ́. Mi dó azɔ̌ azɔ̌ jí nú yě, nú yě ní ɖo wiwa wɛ, énɛ́ ɔ́, yě sɔ́ ná mɔ agbɔ̌n bó ná ɖo adingban ɖó wɛ ǎ.” Azɔ̌gán lɛ́ɛ kpó azɔ̌jíkpɔ́ntɔ́ lɛ́ɛ kpó wá ɖɔ nú Izlayɛ́li ví lɛ́ɛ ɖɔ: “Axɔ́sú ɔ́ ɖɔ è nǐ má sɔ́ ná gběhan ɖě mi ó. É ɖɔ mi ɖésúnɔ ní yi ba ɖo fí e mi ná sixú mɔ ɖe lɛ́ɛ. Mi ní ká tunwun ɖɔ è kún ɖo azɔ̌ e mi nɔ wa ɖ'ayǐ lɛ́ɛ ɖěbǔ ná ɖe kpo wɛ ó.” Énɛ́ ɔ́, Izlayɛ́li ví lɛ́ɛ gba kpé Ejípu to ɔ́ bǐ mɛ, bó ná yi ba hankán ɖó gběhan tɛnmɛ. É ka ɖo mɔ̌ có azɔ̌gán lɛ́ɛ ka nɔ́ lɛ́ ɖo cɔcɔ dó nú yě wɛ, bó nɔ́ ɖɔ: “Azɔ̌ e mi nɔ wa ayǐhɔ́ngbe ayǐhɔ́ngbe hwenu e è nɔ ba gběhan wá nú mi ɔ́ ɖokpó ɔ́ jɛ́n mi ɖó ná nɔ́ wa gbe ɖokpó.” Énɛ́ víví hwe, bɔ è lɛ̌ jɛ Izlayɛ́li ví azɔ̌jíkpɔ́ntɔ́ e azɔ̌gán axɔ́sú ɔ́ tɔn lɛ́ɛ zé ɖó yě nu lɛ́ɛ xo jí lɔ; è nɔ kanbyɔ́ yě ɖɔ: “Blǐki nabí e mi ɖó ná sún gbe ɖokpó ɔ́, aniwú wɛ sɔ tɔn kpó égbé tɔn kpó má sɔgbe lě e mi nɔ bló gbɔn ɖ'ayǐ é ǎ?” Énɛ́ ɔ́, Izlayɛ́li ví azɔ̌jíkpɔ́ntɔ́ lɛ́ɛ yi jɛ hwɛ nú axɔ́sú ɔ́ bó kanbyɔ́ ɛ ɖɔ: “Sɛ́mɛɖó, nɛ̌ ká gbɔn bɔ a ɖo mǐ mɛsɛntɔ́ towe lɛ́ɛ hɛn gbɔn mɔ̌ wɛ? È sɔ́ nɔ ná gběhan mǐ ǎ, bó ká nɔ́ ɖɔ nú mǐ ɖɔ mǐ ní sún blǐki. È nɔ lɛ́ xo mǐ; nǔ e wa wɛ togun towe ɖe ɔ́ nyɔ́ ǎ mɛ!” Ée yě ɖɔ mɔ̌ ɔ́, axɔ́sú ɔ́ ɖɔ nú yě ɖɔ: “Kpɔ́n nǔ fɔnlínnɔ nɛ́ lɛ́ɛ, fɔnlín wɛ ɖo tagba dó nú mi wɛ, nǔ e wú mi ɖɔ émí ná yi sá vɔ̌ nú Mawu Mavɔmavɔ ɔ́ nɛ́ Din ɔ́, mi ɖidó azɔ̌ wa gbé; mɛ ɖé sɔ́ ná ná gběhan mi ǎ, blǐki nabí e mi ká ɖó ná sún gbe ɖokpó é jɛ́n mi ná sún.” Ée è ɖɔ nú Izlayɛ́li ví azɔ̌jíkpɔ́ntɔ́ lɛ́ɛ ɖɔ è kún ná ɖe blǐki nabí e yě nɔ́ sún ɖ'ayǐ gbe ɖokpó ɔ́ kpo ó ɔ́, yě mɔ ɖɔ adǎn ɖíe gbo émí e. Ée yě gosín axɔ́sú ɔ́ gɔ́n bó mɔ Mɔyízi kpó Aalɔ́ɔn kpó ɖo te kpɔ́n yě, bó kplɔ́ dó yě, bó ɖɔ nú yě ɖɔ: “Mawu Mavɔmavɔ ní kpɔ́n nǔ e mi wa ɔ́, bó ɖɔ hwɛ tɔn xá mi. Mi wɛ zɔ́n bɔ axɔ́sú Ejípu tɔn ɔ́ kpó azaglɔ́gán tɔn lɛ́ɛ kpó gbɛ́ wǎn nú mǐ. Mi wɛ sɔ́ ahwanfunnú e yě ná dó hu mǐ ɔ́ dó alɔ mɛ nú yě.” Ée yě ɖɔ mɔ̌ ɔ́, Mɔyízi lɛ́ kɔ bó yi ɖɔ nú Mawu Mavɔmavɔ ɖɔ: “Aklúnɔ, étɛ́wú a wa nǔ xá togun élɔ́? Étɛ́wú a sɛ́ mì dó Ejípu xɔ́sú ɔ́ gɔ́n? Sín gbe e gbe un yi axɔ́sú Ejípu tɔn ɔ́ gɔ́n bó ɖɔ xó e a ɖɔ nú mì ɔ́ n'i ɔ́ jɛ́n é jɛ nǔ wa xá togun towe jí, a ka hwlɛ́n togun towe gán ǎ.” Mawu Mavɔmavɔ ɖɔ nú Mɔyízi ɖɔ: “A nǎ mɔ nǔ e un ná wa xá axɔ́sú Ejípu tɔn ɔ́ din é. Un ná ɖe hlɔ̌nhlɔ́n ce xlɛ́ ɛ, bɔ é ná jó Izlayɛ́li ví lɛ́ɛ dó bɔ yě ná yi. Un ná wa nǔ xá ɛ, bɔ é ná nya yě tɔ́n sín to tɔn mɛ.” Mawu lɛ́ ɖɔ nú Mɔyízi ɖɔ: “Nyɛ wɛ nyí Mawu Mavɔmavɔ. Un tɔ́n dó Ablaxámu kpó Izáki kpó Jakɔ́bu kpó jí, bó ɖe xlɛ́ yě ɖɔ un nyí Mawu Nǔbǐwúkpétɔ́. Amɔ̌, un ka ɖe xlɛ́ yě ɖɔ un nɔ lɛ́ nyí Mawu Mavɔmavɔ ǎ. Un lɛ́ jɛ akɔ xá yě, bó ná ná yě Kanáa; to énɛ́ e mɛ yě yi nɔ ɖ'ayǐ é, to énɛ́ e mɛ yě hɔn yi cí é. Nyi ɖésúnɔ wɛ se azɔn e wɛn wɛ Izlayɛ́li ví lɛ́ɛ ɖe ɖó kannumɔzɔ́ e ɖó kɔ jí nú yě wɛ Ejípunu lɛ́ɛ ɖe ɔ́ wú é, bɔ un tunwun ɖɔ akɔ e un jɛ xá yě ɔ́ kpo ɖo te. Énɛ́ ɔ́ wú ɔ́, a nǎ ɖɔ nú Izlayɛ́li ví lɛ́ɛ ɖɔ nyɛ wɛ nyí Mawu Mavɔmavɔ; a nǎ ɖɔ nú yě ɖɔ un ná ɖe yě sín azɔ̌ syɛ́nsyɛ́n e Ejípunu lɛ́ɛ ɖó kɔ jí nú yě lɛ́ɛ mɛ. Mɛ kannu wɛ yě ɖe, un ka ná ɖe yě sín mɛ kannu. Un ná zán hlɔ̌nhlɔ́n ce dó dɔn tó nú Ejípunu lɛ́ɛ bɔ é ná syɛ́n ɖésú, bó dó ɖe yě tɔ́n. Mɛ ɖé nɔ́ nɔ te hlɔ̌nhlɔ́n ce nukɔn ǎ. Un ná zé mi dó ɖó togun ce ná; un ná nyí Mawu mitɔn, bɔ mi ná tunwun ɖɔ nyɛ Mawu Mavɔmavɔ, Mawu mitɔn ɔ́ wɛ ɖe mi sín azɔ̌ syɛ́nsyɛ́n e Ejípunu lɛ́ɛ ɖó kɔ jí nú mi lɛ́ɛ mɛ. Un ná kplá mi yi to e sín akpá un dó, bó xwlé nǔ d'é jí ɖɔ un ná ná Ablaxámu, Izáki kpódó Jakɔ́bu kpó ɔ́ mɛ. Un ná ná to ɔ́ mi, bɔ é ná nyí mitɔn. Nyɛ Mawu Mavɔmavɔ wɛ ɖɔ mɔ̌.” Mɔyízi ka yi wlí xó énɛ́ lɛ́ɛ bǐ ɖɔ nú Izlayɛ́li ví lɛ́ɛ. Lo ɔ́, ayi ma jɛ ayǐ kpó kannumɔzɔ́ e Ejípunu lɛ́ɛ ɖó kɔ jí nú yě lɛ́ɛ kpó lɔn bónú yě ná ɖótó Mɔyízi ǎ. É ká ɖo mɔ̌ có Mawu Mavɔmavɔ lɛ́ ɖɔ nú Mɔyízi ɖɔ: “Yi ɖɔ xó nú axɔ́sú Ejípu tɔn ɔ́ bónú é ná jó Izlayɛ́li ví lɛ́ɛ dó nú yě ná tɔ́n sín to tɔn mɛ.” Mɔyízi ɖɔ nú Mawu Mavɔmavɔ ɖɔ: “Ée Izlayɛ́li ví lɛ́ɛ má ká ɖo tó ɖó mì wɛ din ǎ ɔ́, nɛ̌ axɔ́sú Ejípu tɔn ɔ́ ká ná ɖótó mì gbɔn? Nyi ɖíe má nyɔ́ xó ɖɔ ǎ e!” Énɛ́ ɔ́, Mawu Mavɔmavɔ ɖe gbe nú Mɔyízi kpó Aalɔ́ɔn kpó ɖɔ yě ní zɔn kpɔ́ bó yi mɔ Izlayɛ́li ví lɛ́ɛ kpó axɔ́sú Ejípu tɔn ɔ́ kpó, bó ná ɖe Izlayɛ́li ví lɛ́ɛ tɔ́n sín Ejípu. Izlayɛ́li ví lɛ́ɛ ɔ́, hɛ̌nnugán yětɔn lɛ́ɛ sín nyǐkɔ ɖíe: Jakɔ́bu ví nukɔntɔn Hwlibɛ́ni ɔ́, vǐ tɔn lɛ́ɛ sín nyǐkɔ ɖíe: Hanɔki, Palúu, Ɛslɔ́ni kpó Kaamíi kpó. Xwédo Hwlibɛ́ni tɔn lɛ́ɛ nɛ́. Sinmɛnyɔ́ɔ ví lɛ́ɛ sín nyǐkɔ ɖíe: Yemúwɛli, Yamini, Oxádi, Yakíni kpódó Soháa kpó, kpó Cawúlu e nyí nyɔ̌nu Kanáanu ɔ́ sín vǐ ɔ́ kpó. Xwédo Sinmɛnyɔ́ɔ tɔn lɛ́ɛ nɛ́. Levíi ví lɛ́ɛ sín nyǐkɔ kpó kúnkan yětɔn lɛ́ɛ kpó ɖíe: Gɛɛcɔ́ni, Kexáti kpó Mɛlali kpó. Xwe kantɔn afɔtɔn-nukún-we (137) wɛ Levíi nɔ gbɛ xɔ. Gɛɛcɔ́ni ví lɛ́ɛ sín nyǐkɔ ɖíe: Livuni kpó Cimɛ́yi kpó, xwédo yětɔn lɛ́ɛ kpó sín nyǐkɔ nɛ́. Kexáti ví lɛ́ɛ ɖíe: Amulámu, Yisexáa, Eblɔ́n kpó Wuziyɛ́li kpó. Xwe kantɔn wǎtɔn (133) wɛ Kexáti nɔ gbɛ xɔ. Mɛlali ví lɛ́ɛ ɖíe: Maxli kpó Muci kpó. Levíi sín xwédo lɛ́ɛ kpó kúnkan yětɔn lɛ́ɛ kpó nɛ́. Amulámu da daányɔ̌nu tɔn Yokɛvɛ́di bɔ é ji Aalɔ́ɔn ɔ́ kpó Mɔyízi ɔ́ kpó n'i. Xwe kantɔn afɔtɔn-nukún-we (137) wɛ Amulámu nɔ gbɛ xɔ. Yisexáa ví lɛ́ɛ sín nyǐkɔ ɖíe: Kolée, Nɛfɛ́gi kpódó Zikli kpó. Wuziyɛ́li ví lɛ́ɛ sín nyǐkɔ ɖíe: Micaɛ́li, Ɛlisafáni kpó Sitli kpó. Aalɔ́ɔn da Aminadabu ví Elizabɛ́ti, Naxicɔ́ni nɔví ɔ́, bɔ é ji Nadavu, Avihu, Eleazáa kpódó Itamáa kpó n'i. Kolée ví lɛ́ɛ sín nyǐkɔ ɖíe: Asíi, Ɛlukana kpódó Aviasáfu kpó; xwédo Kolée tɔn nɛ́. Eleazáa Aalɔ́ɔn ví ɔ́ da Putiyɛli sín vǐ nyɔ̌nu ɖokpó, bɔ é ji Pínxási n'i. Levíi ví lɛ́ɛ sín hɛ̌nnugán lɛ́ɛ kpó xwédo yětɔn lɛ́ɛ kpó nɛ́. Aalɔ́ɔn kpó Mɔyízi kpó wɛ nyí mɛ e Mawu Mavɔmavɔ ɖɔ ná ɖɔ yě ní ɖe Izlayɛ́li ví lɛ́ɛ tɔ́n sín Ejípu sonu sonu é. Mɔyízi kpó Aalɔ́ɔn kpó wɛ nyí mɛ e ɖɔ xó nú axɔ́sú Ejípu tɔn ɔ́, bó ná ɖe Izlayɛ́li ví lɛ́ɛ tɔ́n sín Ejípu é. Hwenu e Mawu Mavɔmavɔ ɖɔ xó nú Mɔyízi ɖo Ejípu ɔ́, é ɖɔ n'i ɖɔ: “Nyɛ wɛ nyí Mawu Mavɔmavɔ. Đɔ xó e un ɖɔ nú we lɛ́ɛ bǐ nú axɔ́sú Ejípu tɔn ɔ́.” Bɔ Mɔyízi ɖɔ nú Mawu Mavɔmavɔ ɖɔ: “Nyɛ ɖíe má nyɔ́ xó ɖɔ ǎ e, nɛ̌ axɔ́sú ɔ́ ná ɖótó mì gbɔn?” Énɛ́ ɔ́, Mawu Mavɔmavɔ ɖɔ nú Mɔyízi ɖɔ: “Đǒtó mì, un sɔ́ we dó ɖó Mawu nú axɔ́sú Ejípu tɔn ɔ́; nɔví towe Aalɔ́ɔn ka ná nyí gbeyíɖɔ towe. Hwɛ ɔ́, a nǎ ɖɔ xó e un ná ɖɔ nú we lɛ́ɛ bǐ nú nɔví towe Aalɔ́ɔn, bɔ éyɛ́ ná wlí bǐ ɖɔ nú axɔ́sú Ejípu tɔn ɔ́, bónú é ná jó Izlayɛ́li ví lɛ́ɛ dó, bɔ yě ná gosín to tɔn mɛ. Nyɛ ɔ́, un ka ná zɔ́n bɔ axɔ́sú Ejípu tɔn ɔ́ ná tlí tó bɔ un ná ɖo nǔjíwǔ ce lɛ́ɛ kpó nǔdábaɖa ce lɛ́ɛ kpó ɖe tɔ́n wɛ ɖě jɛ ɖě gúdo, ɖo to tɔn mɛ. Axɔ́sú ɔ́ ná ɖótó mi ǎ. Alɔ ce ka ná jɛ to tɔn Ejípu ɔ́ wú, bɔ un ná dɔn tó nú to ɔ́ bɔ é ná syɛ́n ɖésú, bó ná dó ɖe togun ce Izlayɛ́li ɔ́ tɔ́n, é wɛ nyí ahwangɔnu ce. Hwenu e alɔ ce ná jɛ Ejípunu lɛ́ɛ wú, bɔ un ná ɖe Izlayɛ́li ví lɛ́ɛ tɔ́n sín yě mɛ ɔ́, Ejípunu lɛ́ɛ ná tunwun ɖɔ nyɛ wɛ nyí Mawu Mavɔmavɔ.” Mɔyízi kpó Aalɔ́ɔn kpó ká bló nǔ e Mawu Mavɔmavɔ ɖɔ nú yě lɛ́ɛ pɛ́pɛ́pɛ́. Hwenu e Mɔyízi kpó Aalɔ́ɔn kpó yi ɖɔ xó nú axɔ́sú Ejípu tɔn ɔ́, xwe kanwe (80) ɖó wɛ Mɔyízi ɖe, bɔ Aalɔ́ɔn ɖo xwe kanwe-nukún-atɔn (83) ɖó wɛ. Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Ényí axɔ́sú Ejípu tɔn ɔ́ ɖɔ nú mi ɖɔ mi ní jlɛ́ nǔɖé dó ɖe xlɛ́ ɖɔ nyi wɛ sɛ́ mi dó hǔn, hwɛ Mɔyízi ɔ́, a nǎ ɖɔ nú Aalɔ́ɔn ɖɔ é ní zé kpo tɔn nyi kɔ́ mɛ ɖo axɔ́sú ɔ́ nukɔn. Énɛ́ ɔ́, kpo ɔ́ ná húzú dan.” Mɔyízi kpó Aalɔ́ɔn kpó ká yi axɔ́sú Ejípu tɔn ɔ́ gɔ́n, bó bló nǔ e Mawu Mavɔmavɔ ɖɔ yě ní bló é. Aalɔ́ɔn zé kpo tɔn nyi kɔ́ mɛ ɖo axɔ́sú ɔ́ kpó gǎn hɔn-yitɔ́ tɔn lɛ́ɛ kpó nukɔn, bɔ kpo ɔ́ húzú dan. Axɔ́sú ɔ́ ká ylɔ́ bokɔ́nɔ lɛ́ɛ kpó azɔnɖatɔ́ lɛ́ɛ kpó, bɔ yě ná sɔ́ azě yětɔn dó bló nǔ ɖokpó ɔ́. Yě mɛ bǐ zé kpo yětɔn lɛ́ɛ nyi kɔ́ mɛ bɔ kpo lɛ́ɛ húzú dan. Aalɔ́ɔn sín kpo ɔ́ ká fɔ kpo yědɛɛ lɛ́ɛ tɔn lɛ́ɛ mi. Nǔ ɖo mɔ̌ có, axɔ́sú ɔ́ lɛ́ kpo ɖo tó tlí wɛ, bó gɔn tó ɖó Mɔyízi kpó Aalɔ́ɔn kpó, lě e Mawu Mavɔmavɔ kó ɖɔ gbɔn ɖ'ayǐ é. Mawu Mavɔmavɔ ɖɔ nú Mɔyízi ɖɔ: “Axɔ́sú Ejípu tɔn ɔ́ tlí tó bó gbɛ́ ɖɔ émí kún ná jó Izlayɛ́li ví lɛ́ɛ dó bɔ yě ná yi ó. Fɔ́n zǎn bó yi axɔ́sú Ejípu tɔn ɔ́ gɔ́n; hwenu e é ná tɔ́n bó ná xwe Nilu tɔ nu ɔ́, a nǎ yi kpé e ɖo Nilu tɔ ɔ́ tó, bɔ kpo e húzú dan ɖ'ayǐ ɔ́ ná ɖo alɔ towe mɛ. A nǎ ɖɔ nú axɔ́sú ɔ́ ɖɔ: ‘Mawu Mavɔmavɔ, Mawu Eblée lɛ́ɛ tɔn sɛ́ mì dó gɔ̌n towe ɖɔ má wá ɖɔ nú we ɖɔ hwi ní jó togun émítɔn dó nú yě ná yi sɛn émí ɖo gbětótló mɛ. Hwi ɖíe má ká ɖi nǔ nú xó énɛ́ ɔ́ káká wá jɛ din ǎ e. Énɛ́ ɔ́ wú ɔ́, Mawu Mavɔmavɔ ɖɔ nǔ e ná jlɛ́ wɛ émí ɖe din ɔ́ ná ɖe xlɛ́ we ɖɔ Mawu Mavɔmavɔ wɛ émí nyí. Din ɔ́, kpɔ́n ganjí, un ná zin kpo e ɖo alɔ ce mɛ ɔ́ dó Nilu tɔ ɔ́ mɛ, bɔ é ná húzú kanjɔ. Hweví e ɖo tɔ ɔ́ mɛ lɛ́ɛ ná kú; tɔ ɔ́ ná gblé bɔ Ejípunu lɛ́ɛ ná wa nǔ bǐ ɖɔ émí ná nu sin tɔn. Yě ká ná sixú nu ǎ.’ ” Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn ɖɔ ní zé kpo tɔn bó dlɛ́n dó sin e ɖo Ejípu lɛ́ɛ bǐ: tɔsisa lɛ́ɛ, tɔdo lɛ́ɛ kpódó tán lɛ́ɛ kpó bǐ jí, énɛ́ ɔ́, sin lɛ́ɛ bǐ ná húzú kanjɔ, bɔ kanjɔ ná gbɔn Ejípu to ɔ́ bǐ mɛ, bó ná gbɔn atínká lɛ́ɛ kpó awǐnnyaká lɛ́ɛ kpó mɛ.” Mɔyízi kpó Aalɔ́ɔn kpó ká bló nǔ e Mawu Mavɔmavɔ ɖɔ nú yě lɛ́ɛ: Aalɔ́ɔn zé kpo ɔ́ dó jǐ bó zin dó tɔ ɔ́ mɛ ɖo axɔ́sú ɔ́ kpó azaglɔ́gán tɔn lɛ́ɛ kpó nukún mɛ. Ée Aalɔ́ɔn bló mɔ̌ ɔ́, tɔsisa ɔ́ bǐ húzú kanjɔ. Hweví e ɖo tɔ ɔ́ mɛ lɛ́ɛ bǐ kú, bɔ tɔ ɔ́ gblé, bɔ Ejípunu lɛ́ɛ sɔ́ sixú nu sin tɔn ǎ; Ejípu to ɔ́ bǐ nyí kanjɔ. Lo ɔ́, bokɔ́nɔ Ejípu tɔn lɛ́ɛ lɔ zé azě yětɔn dó bló nǔ ɖokpó ɔ́; énɛ́ ɔ́, axɔ́sú ɔ́ lɛ́ tlí tó; é wa nǔ e Mɔyízi kpó Aalɔ́ɔn kpó ɖɔ é ǎ, lě e Mawu Mavɔmavɔ kó ɖɔ gbɔn ɖ'ayǐ é. Axɔ́sú ɔ́ lɛ́ kɔ yi hɔnmɛ; é ké ya nú nǔ énɛ́ lɛ́ɛ e jɛ ɔ́ lɔ ǎ. Ée nǔ cí mɔ̌ ɔ́, Ejípunu lɛ́ɛ sɔ́ sixú nu tɔsisa ɔ́ ǎ; énɛ́ ɔ́, yě bǐ kun tɔ ɖó tɔsisa ɔ́ kpá bó ná mɔ sin nu. Mawu Mavɔmavɔ zé tɔsisa ɔ́ dó húzú kanjɔ, bɔ é nɔ mɔ̌ káká nú azǎn tɛ́nwe. Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Yi axɔ́sú Ejípu tɔn ɔ́ gɔ́n, bó ɖɔ n'i ɖɔ: ‘Mawu Mavɔmavɔ ɖɔ: Jǒ togun ce dó bónú é ní yi sɛn mì. Ényí a gbɛ̌ ɖɔ émí kún ná jó yě dó bɔ yě ná yi ó ɔ́, un ná sɛ́ běsé dó, bɔ yě ná vun blá to towe, bó ná hɛn nǔ e ɖ'é mɛ lɛ́ɛ bǐ gblé. Běsé ná gɔ́ tɔsisa ɔ́ mɛ; yě ná nɔ gosín tɔ ɔ́ mɛ, bó ná nɔ byɔ́ xwé towe gbe, xɔnɔnɔ towe mɛ, bó ná nɔ́ hun káká yi akánma towe jí; yě ná nɔ́ byɔ́ gǎn hɔn-yitɔ́ towe lɛ́ɛ kpó toví towe lɛ́ɛ kpó sín xwé gbe; yě ná nɔ byɔ́ myɔkpó towe lɛ́ɛ kpó nǔ e mɛ è nɔ nya linfín ɖe lɛ́ɛ kpó mɛ. Běsé lɛ́ɛ ná nɔ́ xá hwi kpó mɛ e ɖo to towe mɛ lɛ́ɛ kpó, kpó gǎn hɔn-yitɔ́ towe lɛ́ɛ bǐ kpó jí.’ ” Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn ɖɔ ní dlɛ́n alɔ tɔn lɛ́ɛ dó tɔsisa lɛ́ɛ, tɔdo lɛ́ɛ kpó tán lɛ́ɛ kpó jí, bó ɖe běsé lɛ́ɛ tɔ́n kɔn nyi Ejípu to ɔ́ mɛ.” Aalɔ́ɔn ka dlɛ́n kpo tɔn ɖó tɔ e ɖo Ejípu lɛ́ɛ jí, bɔ běsé lɛ́ɛ tɔ́n bó vun blá Ejípu to ɔ́. Lo ɔ́, majíkiblótɔ́ lɛ́ɛ lɔ zé majíki yětɔn dó bló nǔ ɖokpó ɔ́, bɔ běsé lɛ́ɛ tɔ́n bó vun blá Ejípu to ɔ́. Énɛ́ ɔ́, axɔ́sú ɔ́ ylɔ́ Mɔyízi kpó Aalɔ́ɔn kpó, bó ɖɔ nú yě ɖɔ: “Mi sa vo nú Mawu Mavɔmavɔ, bónú é ná nya běsé lɛ́ɛ sín nyɛ kpó togun ce kpó gɔ́n; énɛ́ ɔ́, un ná jó Izlayɛ́li ví lɛ́ɛ dó, bɔ yě ná yi sá vɔ̌ n'i.” Mɔyízi ka ɖɔ nú axɔ́sú ɔ́ ɖɔ: “Axɔ́sú susunɔ, vɛ̌ kó ná gbe mì! Hwe tɛ́ nu wɛ a jlǒ ɖɔ má sa vo nú Mawu Mavɔmavɔ dó hwi kpó gǎn hɔn-yitɔ́ towe lɛ́ɛ kpó togun towe kpó ta mɛ dó? Sɛ́mɛɖó, hwi ɖésú ní ɖɔ hwe ɔ́ nu. Énɛ́ ɔ́, é jɛ hwe ɔ́ nu ɔ́, un ná sa vo n'i bɔ é ná sú běsé e ɖo xɔ towe mɛ lɛ́ɛ kpó éé ɖo hɔnmɛ lɛ́ɛ kpó sín kún dó; éé ɖo tɔsisa ɔ́ mɛ lɛ́ɛ kɛ́ɖɛ́ wɛ ná kpo.” Bɔ axɔ́sú ɔ́ ɖɔ n'i ɖɔ: “É jɛ sɔ hǔn, bo bló.” Mɔyízi ka ɖɔ n'i ɖɔ: “É nyɔ́; é jɛ sɔ ɔ́, un ná bló bɔ a nǎ tunwun ɖɔ è kún sixú jlɛ́ Mawu Mavɔmavɔ, Mawu mǐtɔn dó mɛ ɖěbǔ wú ó. Běsé lɛ́ɛ ná gosín xwé towe lɛ́ɛ gbe, bó ná gosín gǎn hɔn-yitɔ́ towe lɛ́ɛ kpó mɛ é ɖo to towe mɛ lɛ́ɛ kpó sín xwé gbe; tɔsisa ɔ́ mɛ kɛ́ɖɛ́ jɛ́n yě ná kpo ɖe.” Énɛ́ ɔ́ gúdo ɔ́, Mɔyízi kpó Aalɔ́ɔn kpó tɔ́n sín axɔ́sú ɔ́ xwé. Bɔ Mɔyízi sa vo nú Mawu Mavɔmavɔ ɖɔ é ní hwlɛ́n axɔ́sú ɔ́ ɖo běsé e é sɛ́ dó lɛ́ɛ sí. Mawu Mavɔmavɔ ká bló nǔ e Mɔyízi byɔ́ ɛ ɔ́: běsé lɛ́ɛ bǐ kú gbɔn xwé gbe, kɔ́xota kɔ́xota, gbɔn gle mɛ gle mɛ. Bɔ è bɛ̌ yě kplé ɖó sonu sonu, bɔ wǎn kpé to ɔ́ bǐ mɛ. Ée axɔ́sú ɔ́ sín ayi jɛ ayǐ kpɛɖé ɔ́, é lɛ́ tlí tó lě e Mawu Mavɔmavɔ ko ɖɔ gbɔn ɖ'ayǐ é; é wa nǔ e Mɔyízi kpó Aalɔ́ɔn kpó ɖɔ ɔ́ ǎ. Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn ɖɔ ní dlɛ́n kpo tɔn bó zin dó kɔ́gúdu mɛ, bónú kɔ́gúdu ɔ́ ná húzú jɔ̌ gbɔn Ejípu to ɔ́ bǐ mɛ.” Mɔyízi kpó Aalɔ́ɔn kpó ká bló nǔ e Mawu Mavɔmavɔ ɖɔ é: Aalɔ́ɔn dlɛ́n kpo tɔn bó zin dó kɔ́gúdu mɛ; bɔ kɔ́gúdu ɔ́ húzú jɔ̌ bó kpé gbɛtɔ́ kpó kanlin kpó wú. Kɔ́gúdu e ɖo Ejípu to ɔ́ mɛ ɔ́ bǐ húzú jɔ̌. Majíkiblótɔ́ lɛ́ɛ lɔ bló majíki bónú jɔ̌ lɛ́ɛ ná tɔ́n, yě ká kpé wú ǎ. Jɔ̌ kpé gbɛtɔ́ kpó kanlin kpó wú. Énɛ́ ɔ́, majíkiblótɔ́ lɛ́ɛ ɖɔ nú axɔ́sú ɔ́ ɖɔ: “Hlɔ̌nhlɔ́n Mawu tɔn wɛ ɖo nǔ wa wɛ ɖo fínɛ́.” Axɔ́sú ɔ́ ká lɛ́ tlí tó lě e Mawu Mavɔmavɔ kó ɖɔ gbɔn ɖ'ayǐ é; é wa nǔ e Mɔyízi kpó Aalɔ́ɔn kpó ɖɔ é ǎ. Mawu Mavɔmavɔ ɖɔ nu Mɔyízi ɖɔ: “A nǎ fɔ́n zǎn, bɔ hwenu e axɔ́sú Ejípu tɔn ná tɔ́n bó ná xwe tɔ nu ɔ́, a nǎ ɖɔ n'i ɖɔ: ‘Mawu Mavɔmavɔ ɖɔ: jǒ togun ce dó bónú é ní yi sɛn mì. Đǒtó! Nú a ma jó togun ce dó nú é yi ǎ ɔ́, un ná sɛ́ asɔfin dó we, un ná sɛ́ dó gǎn hɔn-yitɔ́ towe lɛ́ɛ, bó ná sɛ́ do togun towe kpó mɛ e ɖo xwé towe gbe lɛ́ɛ kpó. Asɔfin lɛ́ɛ ná gɔ́ Ejípunu lɛ́ɛ sín xwé gbe, bó ná kpé ayǐkúngban e jí yě ɖe ɔ́ bǐ jí. Amɔ̌, gbe énɛ́ ɔ́ gbe ɔ́, un ná xásá Gocɛ́ni to e mɛ togun ce nɔ nɔ ɔ́ ɖó, bɔ asɔfin ɖě ná tíin ɖo fínɛ́ ǎ, bónú a nǎ dó tunwun ɖɔ nyɛ Mawu Mavɔmavɔ ɖo to ɔ́ mɛ. Un ná bló bɔ vogbingbɔn ɖé ná tíin ɖo togun ce kpó togun towe kpó tɛ́ntin. Sɔ wɛ nǔ énɛ́ ɔ́ ná jɛ.’ ” Mawu Mavɔmavɔ ká bló nǔ e é ɖɔ ɔ́. Asɔfin vun blá axɔ́sú ɔ́ sín hɔnmɛ, bó vun blá gǎn hɔn-yitɔ́ tɔn lɛ́ɛ sín xwé gbe, bó hɛn nǔ e ɖo to ɔ́ mɛ lɛ́ɛ bǐ gblé. Axɔ́sú ɔ́ ká ylɔ́ Mɔyízi kpó Aalɔ́ɔn kpó, bó ɖɔ nú yě ɖɔ: “Mi sá vɔ̌ nú Mawu mitɔn ɖo to mɛ fí.” Bɔ Mɔyízi ɖɔ n'i ɖɔ: “É nyɔ́ bónú mǐ ná bló mɔ̌ ǎ, ɖó vɔ̌sánú e mǐ nɔ xwlé Mawu Mavɔmavɔ, Mawu mǐtɔn ɔ́ lɛ́ɛ ɔ́, suɖunú wɛ Ejípunu lɛ́ɛ nɔ́ dó mɔ. Ényí mǐ sɔ́ nǔ e yě nɔ́ mɔ dó mɔ suɖunú ná lɛ́ɛ dó sá vɔ̌ ná ɖo nukún yětɔn mɛ ɔ́, yě ná nyi awǐnnyaglo dó hu mǐ. Hǔn, mǐ ná zun zɔnlin ɖo gbětótló mɛ xɔ azǎn atɔn, bɔ vɔ̌ e Mawu Mavɔmavɔ, Mawu mǐtɔn ná ɖɔ nú mǐ ɔ́, mǐ nǎ sá n'i ɖo fínɛ́.” Bɔ axɔ́sú ɔ́ ɖɔ: “É nyɔ́, un ná jó mi dó bɔ mi ná yi xwlé vɔ̌sánú Mawu Mavɔmavɔ, Mawu mitɔn ɔ́ ɖo gbětótló mɛ. Amɔ̌, mi ma yi fí línlín ó, mi ka xo ɖɛ nú mì.” Mɔyízi ka ɖɔ n'i ɖɔ: “Nú un gosín gɔ̌n towe din tlóló ɔ́, un ná sa vo nú Mawu Mavɔmavɔ. É jɛ sɔ ɔ́, é ná bló bɔ hwi kpó gǎn hɔn-yitɔ́ towe lɛ́ɛ kpó, kpó togun towe kpó sɔ́ ná mɔ asɔfin lɛ́ɛ ɖě ǎ. Amɔ̌, è ma sɔ́ blɛ́ mǐ ɖě ó, è ma sɔ́ gbɛ́ ɖě ɖɔ émí kún ná jó togun ɔ́ dó nú é ná yi sá vɔ̌ nú Mawu Mavɔmavɔ ó.” Ée Mɔyízi ɖɔ mɔ̌ ɔ́, é gosín axɔ́sú ɔ́ gɔ́n, bó sa vo nú Mawu Mavɔmavɔ. Mawu Mavɔmavɔ ká bló nǔ e Mɔyízi byɔ́ ɛ é, bɔ axɔ́sú ɔ́ kpó gǎn hɔn-yitɔ́ tɔn lɛ́ɛ kpó, kpó togun ɔ́ kpó ba asɔfin lɛ́ɛ kpo; é sɔ́ kpo ɖokpó géé ǎ. Nǔ énɛ́ ɔ́ jɛ có, axɔ́sú ɔ́ lɛ́ tlí tó; é jó togun ɔ́ dó bɔ é yi ǎ. Mawu Mavɔmavɔ ɖɔ nú Mɔyízi ɖɔ: “Yi axɔ́sú Ejípu tɔn ɔ́ gɔ́n, bó ɖɔ n'i ɖɔ: ‘Mawu Mavɔmavɔ, Mawu Eblée lɛ́ɛ tɔn ɔ́ ɖɔ: Jǒ togun ce dó bónú é ní yi sɛn mì. Ényí a gbɛ́ ɖɔ émí kún ná jó e dó bónú é ná yi ó, bó hɛn ɛ ɖó te ɔ́, Mawu Mavɔmavɔ ná wa nǔ xá kanlin towe e ɖo amagbo mɛ lɛ́ɛ, azɔn nyanya ɖé ná byɔ́ sɔ́ towe lɛ́ɛ, tócí towe lɛ́ɛ, lǎkúnmí towe lɛ́ɛ, nyibú towe lɛ́ɛ kpódó lɛ̌ngbɔ́ towe lɛ́ɛ kpó mɛ, bɔ yě ná kú kpɔ́ gěgé. Mawu Mavɔmavɔ ká ná tunwun Izlayɛ́li ví lɛ́ɛ sín kanlin lɛ́ɛ ɖo Ejípunu lɛ́ɛ tɔn mɛ, bɔ Izlayɛ́li ví lɛ́ɛ sín kanlin ɖěbǔ ná kú ǎ.’ ” É lɛ́ ɖɔ: “Mawu Mavɔmavɔ ɖɔ hwenu e nǔ énɛ́ ɔ́ ná jɛ dó ɔ́, é ɖɔ: ‘Sɔ wɛ un ná jlɛ́ nǔdábaɖa énɛ́ ɔ́ ɖo Ejípu to ɔ́ mɛ.’ ” Ée ayǐ hɔ́n tlóló ɔ́, Mawu Mavɔmavɔ bló nǔ e é ɖɔ ɔ́ nǔgbó; Ejípunu lɛ́ɛ sín kanlin lɛ́ɛ bǐ kú; Izlayɛ́li ví lɛ́ɛ sín kanlin ɖokpó géé ká kú ǎ. Axɔ́sú Ejípu tɔn ɔ́ sɛ́ mɛ dó ɖɔ è nǐ yi ba do nú nǔ e jɛ ɔ́; bɔ mɛ lɛ́ɛ wá ɖɔ n'i ɖɔ Izlayɛ́li ví lɛ́ɛ sín kanlin ɖokpó kún kú ó, bɔ é kpácá ɛ; é se mɔ̌ có, é lɛ́ tlí tó bó gbɛ́ ɖɔ togun ɔ́ kún ná yi ó. Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Mi wún myɔkpó sín avi gɔ́ alɔgogo, bónú Mɔyízi ní nyi dó jǐ ɖo axɔ́sú ɔ́ nukún mɛ. Avi ɔ́ ná húzú afúntúntún bó ná vun kpé Ejípu to ɔ́ bǐ mɛ, bó ná zɔ́n bɔ nǔtitɛ ná tɔ́n ɖo gbɛtɔ́ kpó kanlin kpó wú gbɔn Ejípu to ɔ́ bǐ mɛ. Nǔtitɛ lɛ́ɛ ná dó sin bó ná wú, lobo ná bló agadá.” Mɔyízi kpó Aalɔ́ɔn kpó wún avi, bó yi mɔ axɔ́sú ɔ́; Mɔyízi nyi avi ɔ́ dó jǐ, bɔ é húzú nǔtitɛ ɖo gbɛtɔ́ kpó kanlin kpó wú, bó nɔ́ dó sin bó nɔ wú, bó nɔ bló agadá. Majíkiblótɔ́ Ejípu tɔn lɛ́ɛ sɔ́ sixú wá Mɔyízi gɔ́n ǎ, ɖó agadá ɖo yě ɖésúnɔ wú, Ejípunu ɖe lɛ́ɛ bǐ ɖɔhun. Lo ɔ́, Mawu Mavɔmavɔ zɔ́n bɔ axɔ́sú ɔ́ lɛ́ tlí tó; é wa nǔ e Mɔyízi kpó Aalɔ́ɔn kpó ɖɔ ɔ́ ǎ, lě e Mawu Mavɔmavɔ kó ɖɔ gbɔn nú Mɔyízi ɖ'ayǐ é. Mawu Mavɔmavɔ ɖɔ nú Mɔyízi ɖɔ: “Fɔ́n zǎn yi axɔ́sú Ejípu tɔn ɔ́ gɔ́n, bó ɖɔ n'i ɖɔ: ‘Mawu Mavɔmavɔ, Mawu Eblée lɛ́ɛ tɔn ɔ́ ɖɔ: Jǒ togun ce dó, bónú é ní yi sɛn mì. Đó din tɔn ɔ́, un ná sɛ́ nǔ nyanya e ɖo así ce lɛ́ɛ bǐ dó hwi kpó gǎn hɔn-yitɔ́ towe lɛ́ɛ kpó, kpó togun towe kpó, bónú a nǎ dó tunwun ɖɔ è kún sixú jlɛ́ mì dó mɛ ɖěbǔ wú ɖo ayǐkúngban ɔ́ jí ó. Nú un ko wa nǔ xá we, bó dɔn azɔn baɖabaɖa byɔ́ hwi kpó togun towe kpó tɛ́ntin din ɔ́, mi bǐ ná kú sín ayǐkúngban ɔ́ jí. Lo ɔ́, un jó we dó nyi gbɛ bó ná ɖe hlɔ̌nhlɔ́n ce xlɛ́ we, lobɔ nyǐkɔ ce ná gba kpé ayǐkúngban ɔ́ bǐ jí. Káká jɛ din ɔ́, a ɖo nǔ e jló we ɔ́ wa xá togun ce wɛ, bó gbɛ́ ɖɔ émí kún ná jó e dó bɔ é ná yi ó. Énɛ́ ɔ́ wú ɔ́, un ná bló bɔ sɔ ɖo gan élɔ́ mɛ ɔ́, kɛ́njí ná ja ɖésú; sín gbe e gbe è ɖǒ Ejípu to ɔ́ ayǐ káká wá jɛ égbé ɔ́, kɛ́njí mɔ̌hunkɔtɔn kó ja ɖo Ejípu ǎ. Hǔn, sɛ kanlin towe lɛ́ɛ kpó nǔ e a ɖǒ ɖo gleta lɛ́ɛ bǐ kpó xwe. Đó kɛ́njí ná ja kɔn nyi gbɛtɔ́ kpó kanlin kpó e má ná ɖo xɔ mɛ ǎ, bó ná ɖo gle mɛ lɛ́ɛ bǐ jí, bɔ yě ná kú.’ ” Yě mɛ e ɖo gǎn hɔn-yitɔ́ axɔ́sú ɔ́ tɔn lɛ́ɛ mɛ, bó mɔ Mawu Mavɔmavɔ xó ɔ́ dó mɔ nǔjɔnǔ lɛ́ɛ kplá mɛsɛntɔ́ yětɔn lɛ́ɛ kpó kanlin yětɔn lɛ́ɛ kpó dó xɔ mɛ. Lo ɔ́, yě mɛ e ma ké ya nú Mawu Mavɔmavɔ xó ɔ́ ǎ lɛ́ɛ jó mɛsɛntɔ́ yětɔn lɛ́ɛ kpó kanlin yětɔn lɛ́ɛ kpó dó nyi gle mɛ. Mawu Mavɔmavɔ ká ɖɔ nú Mɔyízi ɖɔ: “Dlɛ̌n alɔ dó jǐnukúnsin, bónú kɛ́njí ní ja ɖo Ejípu to ɔ́ bǐ mɛ kɔn nyi gbɛtɔ́ kpó kanlin kpó gběhan kpó bǐ jǐ.” Énɛ́ ɔ́, Mɔyízi dlɛ́n kpo tɔn dó jǐnukúnsin, Mawu Mavɔmavɔ ɖɔ bɔ jǐ nɔ́ dó gbe, kɛ́njí ja; jǐ dó gbe bó nɔ́ nyí awǎn. Mawu Mavɔmavɔ ɖɔ bɔ kɛ́njí ja kɔn nyi Ejípu to ɔ́ mɛ. Kɛ́njí ja bɔ jǐ dó gbe lobo nɔ nyí awǎn gbɔn mɛ. Kɛ́njí ɔ́ ja ɖésú; é ja káká bɔ è ko mɔ mɔ̌hunkɔtɔn ɖě kpɔ́n gbeɖé ɖo Ejípu to ɔ́ bǐ mɛ, sín hwenu e é kó nyí to dó é ǎ. Kɛ́njí ɔ́ ja gbɔn Ejípu to ɔ́ bǐ mɛ, bó xo nǔ e kó ɖo gle mɛ lɛ́ɛ bǐ, gbɛtɔ́ kpó kanlin kpó bɔ bǐ kú; é ja kɔn nyi gběhan e ɖo gle mɛ lɛ́ɛ lɔ jí, bó lɔ́ atín e ɖo zunkan mɛ lɛ́ɛ. Gocɛ́ni tomɛ fí e Izlayɛ́li ví lɛ́ɛ ɖe ɔ́ kɛ́ɖɛ́ jɛ́n kɛ́njí ɔ́ má ja ɖe ǎ. Bɔ axɔ́sú ɔ́ ylɔ́ Mɔyízi kpó Aalɔ́ɔn kpó bó ɖɔ nú yě ɖɔ: “Din tɔn ɔ́, nyɛ wɛ hu hwɛ; Mawu Mavɔmavɔ wɛ nyí hwɛjijɔnɔ, nyɛ kpó togun ce kpó wɛ wa nǔ nyi do. Mi sa vo nú Mawu Mavɔmavɔ, bónú é ma sɔ́ dó gbe ɖě ó, kɛ́njí ní má sɔ́ ja ɖě ó. Énɛ́ ɔ́, un ná jó mi dó, bɔ mi ná yi; è sɔ́ ná hɛn mi ɖó te ɖě ǎ.” Énɛ́ ɔ́, Mɔyízi ɖɔ n'i ɖɔ: “Un tɔ́n sín toxo ɔ́ mɛ ɔ́, un ná dlɛ́n alɔ sɛ́ dó Mawu Mavɔmavɔ, bɔ jǐ sɔ́ ná dó gbe ɖě ǎ, kɛ́njí ká sɔ́ ná ja ɖě ǎ; énɛ́ ɔ́, a nǎ tunwun ɖɔ Mawu Mavɔmavɔ tɔn wɛ nyí ayǐkúngban ɔ́. Lo ɔ́, un tunwun ɖɔ hwi kpó gǎn hɔn-yitɔ́ towe lɛ́ɛ kpó kún ɖó sísí nú Mawu Mavɔmavɔ ó.” “Kɛ́njí ɔ́ hɛn ɔ́ji ɔ́ bǐ gblé, é lɛ́ hɛn lɛ̌ɛnkantín lɔ bǐ gblé; ɖó ɔ́ji ɔ́ kó sɛ́n, bɔ lɛ̌ɛnkantín ɔ́ kó wlí sɛ́; kɛ́njí ka wa nǔɖé nú jinukún e è nɔ ylɔ́ ɖɔ blěe ɔ́, kpó éé è nɔ ylɔ́ ɖɔ epotlu ɔ́ kpó ǎ; ɖó yě nɔ́ yá wǔ sɛ́n ǎ.” Mɔyízi ka tɔ́n sín axɔ́sú ɔ́ xwé, bó gosín toxo ɔ́ mɛ; é dlɛ́n alɔ sɛ́ dó Mawu Mavɔmavɔ, bɔ jǐ e ɖo gbe dó wɛ ɔ́ kpó kɛ́njí e ɖo jija wɛ ɔ́ kpó xwɛ; bɔ jǐ sɔ́ ja ɖě ǎ. Ée axɔ́sú ɔ́ mɔ ɖɔ jǐ kpó kɛ́njí kpó, kpó jǐ e ɖo gbe dó wɛ ɔ́ kpó bǐ xwɛ ɔ́, é lɛ́ jɛ hwɛ hu jí bɔ é kpó gǎn hɔn-yitɔ́ tɔn lɛ́ɛ kpó lɛ́ jɛ tó tlí jí. Axɔ́sú ɔ́ lɛ́ tlí tó bó gbɛ́ ɖɔ Izlayɛ́li ví lɛ́ɛ kún ná yi ó, lě e Mawu Mavɔmavɔ kó ɖɔ gbɔn ɖ'ayǐ gbɔn Mɔyízi jí é. Mawu Mavɔmavɔ ɖɔ nú Mɔyízi ɖɔ: “Yi axɔ́sú ɔ́ gɔ́n. Nyɛ wɛ zɔ́n bɔ é kpó gǎn hɔn-yitɔ́ tɔn lɛ́ɛ kpó ɖo tó tlí wɛ, bónú má jlɛ́ nǔdábaɖa énɛ́ lɛ́ɛ ɖo tɛ́ntin yětɔn. Énɛ́ ɔ́, a nǎ sixú ɖɔ lě e un wa Ejípunu lɛ́ɛ sín nǔ gbɔn ɔ́ kpódó nǔdábaɖa e un jlɛ́ ɖo tɛ́ntin yětɔn lɛ́ɛ kpó sín xó nú vǐ towe lɛ́ɛ kpó vǐvú towe lɛ́ɛ kpó. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.” Mɔyízi kpó Aalɔ́ɔn kpó yi axɔ́sú ɔ́ gɔ́n, bó ɖɔ n'i ɖɔ: “Mawu Mavɔmavɔ, Mawu Eblée lɛ́ɛ tɔn ɔ́ ɖɔ: ‘Káká jɛ hwetɛ́nu wɛ a nǎ gbɛ́ hwiɖée zé hwe ɖo nukɔn ce dó? Jǒ togun ce dó bónú é ní yi sɛn mì. Ényí a gbɛ̌ ɖɔ émí kún ná jó togun ce dó bɔ é ná yi ó ɔ́, é jɛ sɔ ɔ́, un ná dɔn wɛn lɛ́ɛ byɔ́ to towe mɛ. Yě ná kpé ayǐkúngban ɔ́ bǐ jí, bɔ è sɔ́ ná sixú mɔ ayǐkúngban ǎ; yě ná ɖu nǔ e kpo bɔ kɛ́njí má hɛn gblé ǎ lɛ́ɛ bǐ; yě ná ɖu atín e ɖo wǔwú wɛ ɖo gle mitɔn mɛ lɛ́ɛ bǐ. Yě ná gɔ́ xwé towe lɛ́ɛ gbe, bó ná gɔ́ gǎn hɔn-yitɔ́ towe lɛ́ɛ bǐ kpó Ejípunu lɛ́ɛ bǐ kpó sín xwé gbe. Sín tɔ́gbó tɔgbo towe lɛ́ɛ hwenu káká wá jɛ égbé ɔ́, nǔ mɔ̌hunkɔtɔn ko jɛ kpɔ́n gbeɖé ǎ.’ ” Énɛ́ ɔ́, Mɔyízi sí te sín axɔ́sú Ejípu tɔn ɔ́ gɔ́n bó tɔ́n. Bɔ gǎn hɔn-yitɔ́ lɛ́ɛ kanbyɔ́ axɔ́sú ɔ́ ɖɔ: “Káká jɛ hwetɛ́nu wɛ nya élɔ́ ná ɖó mɔ nú mǐ yi jɛ? Jǒ mɛ lɛ́ɛ dó nú yě ní yi sɛn Mawu Mavɔmavɔ, Mawu yětɔn. A mɔ ɖɔ Ejípu to ɔ́ ɖo kún sú dó wɛ a cé?” Énɛ́ ɔ́, è ylɔ̌ Mɔyízi kpó Aalɔ́ɔn kpó wá axɔ́sú ɔ́ gɔ́n, bɔ é ɖɔ nú yě ɖɔ: “Mi bo yi sɛn Mawu Mavɔmavɔ, Mawu mitɔn. Mɛ̌ lɛ́ɛ wɛ ná yi?” Bɔ Mɔyízi yí gbe n'i ɖɔ: “Mǐ mɛ bǐ wɛ ná yi; mǐ ná kplá mɛ wínnyáwínnyá mǐtɔn lɛ́ɛ, mǐ ná kplá nyɔ̌ɖaxóví mǐtɔn lɛ́ɛ, súnnu kpó nyɔ̌nu kpó, lobo ná kplá lɛ̌ngbɔ́ mǐtɔn lɛ́ɛ, kpó nyibú mǐtɔn lɛ́ɛ kpó, ɖó xwe ɔ́, Mawu Mavɔmavɔ tamɛ wɛ mǐ ná yi ɖu dó.” Axɔ́sú Ejípu tɔn ɔ́ ɖɔ nú yě ɖɔ: “Mawu Mavɔmavɔ ní bó nɔ kpɔ́ xá mi bó. Un ná ná gbe mi bɔ mi kpó hɛ̌nnu mitɔn lɛ́ɛ kpó ná yi nǔgbó. É ɖo wɛn din ɖɔ linlin nyanya wɛ mi ɖó. Xó énɛ́ e ɖɔ wɛ mi ɖe ɔ́ nyí xó bɔ è nǎ ɖɔ ǎ, súnnu lɛ́ɛ kɛ́ɖɛ́ wɛ ná yi sɛn Mawu Mavɔmavɔ, ɖó nǔ e mi sixú byɔ́ ɔ́ bǐ jɛ́n nɛ́.” Bɔ è nya yě tɔ́n sín axɔ́sú ɔ́ gɔ́n. Mawu Mavɔmavɔ ɖɔ nú Mɔyízi ɖɔ: “Dlɛ̌n alɔ towe ɖó Ejípu to ɔ́ jí, bónú wɛn lɛ́ɛ ní tɔ́n ɖo to ɔ́ mɛ; yě ní ɖu gběhan e ɖo ayǐkúngban ɔ́ jí lɛ́ɛ bǐ; yě ní ɖu nǔ e kɛ́njí ma hɛn gblé ǎ lɛ́ɛ bǐ.” Mɔyízi ka dlɛ́n kpo tɔn dó Ejípu to ɔ́ jí, bɔ Mawu Mavɔmavɔ ɖɔ bɔ jɔhɔn ɖé nyi sín zǎnzǎnhwe jí dó to ɔ́ jí bó nyi káká bɔ zǎn kú, bɔ ayǐ hɔ́n. Ée é wá jɛ zǎnzǎn ɔ́, jɔhɔn énɛ́ e ɖo nyinyi wɛ ɔ́ dɔn wɛn lɛ́ɛ wá. Wɛn lɛ́ɛ vun blá Ejípu to ɔ́, bó ɖó gbɔn ayǐkúngban ɔ́ bǐ jí. Yě sukpɔ́ káká bɔ è ko mɔ mɔ̌hunkɔtɔn kpɔ́n gbeɖé ǎ, è ka ná lɛ́ mɔ mɔ̌ kpɔ́n gbeɖé ǎ. Yě kpé ayǐkúngban ɔ́ bǐ jí, bɔ ayǐkúngban ɔ́ dó ablu. Yě ɖu gběhan e ɖo ayǐkúngban ɔ́ jí lɛ́ɛ bǐ, bó ɖu atínsínsɛ́n lɛ́ɛ bǐ; yě ɖu nǔ e kɛ́njí ɔ́ ma hɛn gblé ǎ lɛ́ɛ bǐ, bɔ é sɔ́ kpo ama ɖěbǔ ɖo atín lɛ́ɛ jí ǎ, é ká sɔ́ kpo gběhan ɖěbǔ ɖo gle lɛ́ɛ mɛ ɖo Ejípu to ɔ́ mɛ ǎ. Énɛ́ ɔ́, axɔ́sú ɔ́ ylɔ́ Mɔyízi kpó Aalɔ́ɔn kpó tlóló bó ɖɔ nú yě ɖɔ: “Un hu hwɛ dó Mawu Mavɔmavɔ, Mawu mitɔn, bó hu hwɛ dó mi. Hǔn mi bo lɛ́ sɔ́ hwɛ ce kɛ mì ɖo élɔ́ mɛ; gǔdo tɔn ɖíe. Mi sa vo nú Mawu Mavɔmavɔ, Mawu mitɔn bónú é ní lɛ́ sɛ nǔ nyanya élɔ́ e ná dɔn mɛ yi kú ɔ́ dó zɔ nú mì.” Ée axɔ́sú ɔ́ ɖɔ mɔ̌ ɔ́, Mɔyízi gosín gɔ̌n tɔn, bó yi sa vo nú Mawu Mavɔmavɔ. Énɛ́ ɔ́, Mawu Mavɔmavɔ ɖɔ bɔ jɔhɔn ɖaxó ɖé nyi sín gbadahwe jí bó kplɔ́ wɛn lɛ́ɛ yi kɔn nyi Xu Vɔvɔ ɔ́ mɛ, bɔ é sɔ́ kpo kwín ɖokpó géé ɖo Ejípu to ɔ́ mɛ ǎ. Lo ɔ́, Mawu Mavɔmavɔ bló bɔ axɔ́sú ɔ́ lɛ́ tlí tó bó gbɛ́ ɖɔ Izlayɛ́li ví lɛ́ɛ kún ná yi ó. Mawu Mavɔmavɔ ɖɔ nú Mɔyízi ɖɔ: “Dlɛ̌n alɔ towe dó jǐnukúnsin, bónú ablu ní dó ɖo Ejípu to ɔ́ mɛ; ablu ɔ́ ní dó káká bó cí è hɛn ɔ́, è nǎ ɖó alɔ wú ɖɔhun.” Bɔ Mɔyízi dlɛ́n alɔ tɔn dó jǐnukúnsin, bɔ ablu gɔngɔn ɖé dó ɖo Ejípu to ɔ́ bǐ mɛ xɔ azǎn atɔn. È nɔ sixú mɔ mɛɖée ǎ; énɛ́ ɔ́, mɛ ɖěbǔ sɛ tɛn sín fí e é ɖe ɔ́ ǎ káká nú azǎn atɔn. Wěziza ká ɖo fí e Izlayɛ́li ví lɛ́ɛ nɔ́ nɔ lɛ́ɛ bǐ. Bɔ axɔ́sú Ejípu tɔn ɔ́ ylɔ́ Mɔyízi bó ɖɔ n'i ɖɔ: “Mi yi sɛn Mawu Mavɔmavɔ; mi sixú kplá vǐ mitɔn lɛ́ɛ yi. Lɛ̌ngbɔ́ mitɔn lɛ́ɛ kpó nyibú mitɔn lɛ́ɛ kpó jɛ́n mi ná jó dó.” Mɔyízi ɖɔ n'i ɖɔ: “Nǔ e mǐ ná dó yi sá kɔnɖókpɔ́ sín vɔ̌ lɛ́ɛ kpó vɔ̌ e è nɔ dó zo lɛ́ɛ kpó ná nú Mawu Mavɔmavɔ, Mawu mǐtɔn ɔ́, hwi ɖésúnɔ wɛ ná zé dó alɔ mitɔn mɛ nɛ́ hǔn? Nǔ sixú nyí mɔ̌ ǎ. Mǐ ná kplá kanlin mǐtɔn lɛ́ɛ yi, é ná kpo kwín ɖokpó ǎ, ɖó yě mɛ wɛ mǐ ná sɔ́ ɖě ɖe dó sɛn Mawu Mavɔmavɔ, Mawu mǐtɔn ná. Dɔ̌n jɛ́n mǐ ka ná jɛ hwɛ̌ cóbó ná tunwun ée mǐ ná sɔ́ xwlé Mawu Mavɔmavɔ lɛ́ɛ é.” Mawu Mavɔmavɔ bló bɔ axɔ́sú ɔ́ lɛ́ tlí tó bó sɔ́ ba ná jó yě dó nú yě ná yi ǎ. Axɔ́sú ɔ́ ɖɔ nú Mɔyízi ɖɔ: “Tɔ́n sín xwé ce gbe! Ma sɔ́ tɛ afɔ xwé ce gbe ɖě ó; ɖó a sɔ́ wá gɔ̌n ce gbeɖé ɔ́, a nǎ kú gbe énɛ́ gbe.” Mɔyízi ka ɖɔ n'i ɖɔ: “É nyɔ́, a ɖɔ nǔgbó. Lě e a ko ɖɔ gbɔn ɔ́, un sɔ́ ná wá gɔ̌n towe ɖě ǎ.” Mawu Mavɔmavɔ ko ɖɔ nú Mɔyízi ɖ'ayǐ ɖɔ: “Un ná ɖɔ bɔ nǔ nyanya ɖokpó ná lɛ́ jɛ dó axɔ́sú Ejípu tɔn ɔ́ kpó Ejípu to ɔ́ kpó jí; énɛ́ ɔ́ gúdo ɔ́, é ná jó mi dó bɔ mi ná gosín fí. Nya wɛ é ná nya mi sín fí bǐ gbídígbídí lɔ. Đɔ xó nú togun ɔ́, bónú súnnu ɖokpó ɖokpó ní byɔ́ nǔ e è sɔ́ kpatágan dó bló ná lɛ́ɛ kpó sikánú lɛ́ɛ kpó súnnu e ɖo xwé tɔn kpá lɛ́ɛ. Nyɔ̌nu ɖokpó ɖokpó ní byɔ́ nǔ énɛ́ lɛ́ɛ nyɔ̌nu e ɖo xwé tɔn kpá é.” Mawu Mavɔmavɔ bló bɔ Ejípunu lɛ́ɛ yí wǎn nú Izlayɛ́li ví lɛ́ɛ káká bɔ Mɔyízi ɖésúnɔ ɔ́, è nɔ ɖó sísí n'i ɖésú ɖo Ejípu to ɔ́ mɛ: axɔ́sú ɔ́ sín gǎn hɔn-yitɔ́ lɛ́ɛ kpó togun ɔ́ bǐ kpó wɛ nɔ́ ɖó sísí n'i. Cóbónú Mɔyízi ná gosín axɔ́sú ɔ́ gɔ́n ɔ́, Mɔyízi ɖɔ: “Đǒtó xó e Mawu Mavɔmavɔ ɖɔ é, é ɖɔ: ‘Zǎnvlɔ́ɖówe mɔ̌ ɔ́, un ná gbɔn Ejípu to ɔ́ mɛ, bɔ nukɔngbéví lɛ́ɛ bǐ ná kú ɖo to ɔ́ mɛ; axɔ́sú Ejípu tɔn e ɖo zinkpo jí ɔ́ sín nukɔngbéví ɔ́ ná kú; mɛsɛntɔ́ nyɔ̌nu e ɖo sé kɔn ɔ́ sín nukɔngbéví ná kú, kanlin lɛ́ɛ sín nukɔngbéví ná kú. Cáxóxowǒóo ná kpé Ejípu to ɔ́ bǐ mɛ; è ko se xósúsú mɔ̌hunkɔtɔn kpɔ́n gbeɖé ǎ, è ka sɔ́ ná lɛ́ se mɔ̌ kpɔ́n gbeɖé ǎ. Lo ɔ́, ɖo Izlayɛ́li ví lɛ́ɛ bǐ mɛ ɔ́, cukú vɔ́vɔ́ ná hó gbɛtɔ́ abǐ kanlin ǎ, bónú mi ná dó tunwun vogbingbɔn e Mawu Mavɔmavɔ sɔ́ ɖó Ejípu kpó Izlayɛ́li kpó tɛ́ntin é.’ Hwenɛ́nu ɔ́, gǎn hɔn-yitɔ́ towe lɛ́ɛ bǐ ná wá jɛ kpo ɖo nukɔn ce, bó ná ɖɔ: ‘Tɔ́n sín tomɛ fí! Hwi kpó mɛ e xwedó we lɛ́ɛ bǐ kpó ní tɔ́n!’ Énɛ́ ɔ́ gúdo ɔ́, un ka ná tɔ́n. Bɔ Mɔyízi gosín axɔ́sú Ejípu tɔn ɔ́ sín xwé gbe kpó xomɛsin ɖaxó ɖé kpó.” Mawu Mavɔmavɔ ɖɔ nú Mɔyízi ɖɔ: “Axɔ́sú Ejípu tɔn ɔ́ ná bló nǔ e mi ɖɔ lɛ́ɛ ǎ; énɛ́ ɔ́, un ná ɖo nǔ jlɛ́ wɛ ɖě jɛ ɖě gúdo ɖo Ejípu to ɔ́ mɛ.” Mɔyízi kpó Aalɔ́ɔn kpó jlɛ́ nǔ énɛ́ lɛ́ɛ bǐ ɖo axɔ́sú Ejípu tɔn ɔ́ nukún mɛ, lo ɔ́, Mawu Mavɔmavɔ bló bɔ axɔ́sú ɔ́ lɛ́ tlí tó, bó gbɛ́ ɖɔ Izlayɛ́li ví lɛ́ɛ kún ná yi ó. Mawu Mavɔmavɔ ɖɔ nú Mɔyízi kpó Aalɔ́ɔn kpó ɖo Ejípu ɖɔ: “Sun e mɛ mi ɖe ɔ́ ná nyí sun e jɛ nukɔn ɖo sun lɛ́ɛ mɛ ɔ́ nú mi; sun e jɛ nukɔn ɖo sun lɛ́ɛ mɛ ɖo xwe ɔ́ mɛ ɔ́ wɛ é ná nyí nú mi. Mi yi ɖɔ nú Izlayɛ́li ví lɛ́ɛ bǐ ɖɔ: ɖo sun élɔ́ ɔ́ sín azǎn wǒgɔ́ ɔ́ gbe ɔ́, hɛ̌nnu ɖokpó ɖokpó abǐ xwédo ɖokpó ɖokpó ná ná gbɔ̌ví ɖokpó. Ényí gbɛtɔ́ má sukpɔ́ ɖo hɛ̌nnu ɖé mɛ, bó ná sixú ɖu kanlin ɖokpó ɔ́ bǐ ǎ ɔ́, è nǎ kpɔ́n xwé e yá xwé énɛ́ ɔ́ gbe, bó ná ba mɛ gɔ́ nú yě. Nǔ e mɛ ɖokpó ɖokpó ná sixú ɖu ɔ́ wɛ è nǎ kpɔ́n dó zé kanlin ɔ́. Gbɔ̌ví asú e ko ɖó xwe ɖokpó bɔ blɔ̌ ɖé má ɖo wǔ tɔn ǎ ɔ́ wɛ è nǎ zé; é sixú nyí lɛ̌ngbɔ́ví abǐ gbɔ̌ví. Mi ná zé kanlin ɔ́ ɖ'ayǐ káká jɛ sun élɔ́ ɔ́ sín azǎn wǒ-ɛnɛgɔ́ ɔ́ gbe, bɔ Izlayɛ́li ví lɛ́ɛ bǐ ná hu gbe énɛ́ ɔ́ gbe gbadanu. È nǎ yǐ kanlin ɔ́ sín hun, bɔ xwé e gbe è nǎ ɖu lan tɔn ɖe lɛ́ɛ ɔ́, è nǎ sá dó xwé lɛ́ɛ ɖokpó ɖokpó sín hɔntogbó; hɔntogbó lɛ́ɛ sín hɔnkpo we lɛ́ɛ kpó agba yětɔn kpó wú wɛ è ka ná sá dó. Zǎn ɖokpó énɛ́ ɔ́ mɛ ɔ́, è nǎ mɛ lan tɔn bó ɖu; è nǎ zé wɔ̌xúxú e mɛ è ma dó tɔ́n ǎ é kpó ama e vɛ́ ɔ́ kpó dó ɖu ná. Mi ma nú é kpo ɖo mǔ, bónú mi ɖu ó; mi ma zé sin dó ɖa ná ó; lo ɔ́, mi mɛ ta tɔn kpó afɔ tɔn lɛ́ɛ kpó, kpódó xomɛnú tɔn lɛ́ɛ kpó. Mi ma jó ɖěbǔ dó bónú ayǐ ní hɔ́n dó ó; nú é ká kpo bɔ ayǐ ná hɔ́n dó jɛ́n wɛ hǔn, mi dó bǐ zo. Ényí mi ja lan ɔ́ ɖu gbé hǔn, mi sɔ́ to e mɛ mi xwe ɔ́ sín nǔ: mi ná blá gǒ, afɔkpa ná ɖo afɔ mitɔn, bɔ kpo mitɔn ná ɖo alɔ mitɔn mɛ; mi ná hwlɛ́ndó bó ɖu. Nyɛ Mawu Mavɔmavɔ ɔ́ sín Dǐndínwáyi wɛ. “Zǎn énɛ́ ɔ́ mɛ ɔ́, un ná gbɔn Ejípu to ɔ́ mɛ, bó ná hu nukɔngbéví súnnu e ɖo to ɔ́ mɛ lɛ́ɛ bǐ, un ná hu gbɛtɔ́ kpó kanlin kpó sín nukɔngbéví bǐ. Un ná ɖó hwɛ nú vodún e ɖo Ejípu lɛ́ɛ bǐ. Nyɛ wɛ nyí Mawu Mavɔmavɔ. Hun ɔ́ ná nyí wuntun ɖé nú mì ɖo xwé e gbe mi ná ɖe lɛ́ɛ sín hɔntogbó wú; nú un mɔ hun ɔ́, un ná gbɔn xwé ɔ́ ta nu dín, bɔ hwenu e un ná dɔn tó nú Ejípunu lɛ́ɛ ɔ́, mǐdɛɛ lɛ́ɛ ná gló awě e ná vívá kún yětɔn é. “Mi ná hɛn nǔ e ná jɛ gbe énɛ́ ɔ́ gbe ɔ́ ayi mɛ, bó ná nɔ́ ɖu xwe dó ta ce mɛ dó flín ná; é ná nyí sɛ́n nú kúnkan mitɔn lɛ́ɛ káká sɔ́yi.” Mawu Mavɔmavɔ lɛ́ ɖɔ: “Mi ná ɖu wɔ̌xúxú e mɛ è ma dó tɔ́n ǎ ɔ́ nú azǎn tɛ́nwe. Bɛ́ sín azǎn nukɔntɔn ɔ́ gbe ɔ́, tɔ́n ɖěbǔ ná nɔ xwé mitɔn lɛ́ɛ ɖě gbe ǎ. Bɛ́ sín azǎn nukɔntɔn ɔ́ gbe yi azǎn tɛ́nwegɔ́ ɔ́ gbe ɔ́, ényí mɛ ɖěbǔ ɖu wɔ̌xúxú e mɛ è dǒ tɔ́n ɔ́, è nǎ ɖe mɛ ɔ́ sín togun Izlayɛ́li tɔn ɔ́ mɛ. Mi ná bló kplé ɖaxó ɖokpó ɖo azǎn nukɔntɔn ɔ́ kpó azǎn tɛ́nwegɔ́ ɔ́ kpó gbe; è nǎ wa azɔ̌ ɖěbǔ azǎn énɛ́ lɛ́ɛ gbe ǎ, nǔɖuɖu e mɛ ɖokpó ɖokpó ná ɖu ɔ́ jɛ́n mi ná ɖa. “Mi ná ɖu wɔ̌xúxú e mɛ è ma dó tɔ́n ǎ ɔ́ sín xwe énɛ́ ɔ́ xwewú xwewú; ɖó gbe énɛ́ ɔ́ gbe wɛ un ɖe mi tɔ́n sín Ejípu. Mi ná nɔ́ flín azǎn énɛ́ ɔ́, bó ná nɔ́ nyi ɖo jijimɛ ɖokpó ɖokpó mɛ; é ná nyí sɛ́n nú vǐ mitɔn lɛ́ɛ. Bɛ́ sín sun nukɔntɔn ɔ́ sín azǎn wǒ-ɛnɛgɔ́ ɔ́ gbe gbadanu káká yi sun ɔ́ sín azǎn ko-nukún-ɖokpógɔ́ ɔ́ gbe gbadanu ɔ́, wɔ̌xúxú e mɛ è ma dó tɔ́n ǎ ɔ́ wɛ mi ná ɖu. Tɔ́n ɖěbǔ ná ɖo xwé mitɔn lɛ́ɛ ɖě gbe ǎ nú azǎn tɛ́nwe. Đó mɛ ɖěbǔ e ná ɖu wɔ̌xúxú e mɛ è dǒ tɔ́n ɔ́, è nǎ ɖe mɛ ɔ́ sín togun Izlayɛ́li tɔn ɔ́ mɛ, mɛ ɔ́ sixú nyí jǒnɔ, é ká sixú nyí toví. Fí ɖěbǔ e mi ná ɖe ɔ́, wɔ̌xúxú e mɛ è ma dó tɔ́n ǎ ɔ́ wɛ mi ná nɔ́ ɖu.” Ée Mɔyízi se mɔ̌ ɔ́, é ylɔ́ tomɛxó Izlayɛ́li tɔn lɛ́ɛ bǐ, bó ɖɔ nú yě ɖɔ: “Mi mɛ ɖokpó ɖokpó ní yi wlí lɛ̌ngbɔ́ví abǐ gbɔ̌ví bó hu dó xwé mitɔn lɛ́ɛ tamɛ, bó ná dó ɖu Dǐndínwáyixwe ɔ́ ná. Énɛ́ ɔ́ gúdo ɔ́, mi ná blá izɔ́puma, bó ná sɔ́ dó hun e mi yí dó gannú mɛ ɔ́ mɛ, bó ná sá d'agba ɔ́ kpó hɔntogbó ɔ́ sín hɔnkpo we lɛ́ɛ kpó wú. Mɛ ɖěbǔ ní má ká tɔ́n sín xwé tɔn gbe káká jɛ zǎnzǎn ó. Hwenu e Mawu Mavɔmavɔ ná wá tó dɔn nú Ejípu to ɔ́ gbé ɔ́, nú é mɔ hun ɖo agba ɔ́ kpó hɔnkpo we lɛ́ɛ kpó wú ɔ́, é ná dín gbɔn hɔntogbó ɔ́ ta nu; é ná lɔn bɔ nǔhɛngblétɔ́ ɔ́ ná byɔ́ xwé mitɔn lɛ́ɛ gbe bó hu mi ǎ. Mi ná nɔ́ xwedó nǔ énɛ́ e Mawu Mavɔmavɔ ɖɔ nú mi ɔ́, bɔ é ná nyí sɛ́n nú mi kpó kúnkan mitɔn lɛ́ɛ kpó káká sɔ́yi. Hwenu e mi ná byɔ́ to e Mawu Mavɔmavɔ dó akpá ɖɔ émí ná ná mi ɔ́ mɛ ɔ́, mi ná nɔ́ fɔ yɛsu énɛ́ lɛ́ɛ. Ényí vǐ mitɔn lɛ́ɛ kanbyɔ́ mi ɖɔ étɛ́ wú mi nɔ fɔ yɛsu énɛ́ ɔ́ a jí ɔ́, mi ná yí gbe nú yě ɖɔ: ‘Vɔ̌ e mǐ nɔ sá nú Mawu Mavɔmavɔ ɖo Dǐndínwáyixwe ɔ́ hwenu ɔ́ wɛ. Hwenu e mǐ mɛ Izlayɛ́li ví lɛ́ɛ ɖo Ejípu ɔ́, Mawu Mavɔmavɔ dɔn tó nú Ejípu to ɔ́; lo ɔ́, é gbɔn xwé mǐtɔn lɛ́ɛ nukɔn dín bó hwlɛ́n xwédo mǐtɔn lɛ́ɛ gán.’ ” Ée Mɔyízi ɖɔ xó fó ɔ́, Izlayɛ́li ví lɛ́ɛ jɛ kpo bó ɖe kɔ́. Yě yi bló nǔ e Mawu Mavɔmavɔ ɖɔ nú Mɔyízi kpó Aalɔ́ɔn kpó lɛ́ɛ bǐ pɛ́pɛ́pɛ́. Zǎn vlɔ́ ɖó we, bɔ Mawu Mavɔmavɔ hu nukɔngbéví súnnu e ɖo Ejípu lɛ́ɛ bǐ. É bɛ́ sín axɔ́sú Ejípu tɔn ɔ́ sín nukɔngbéví e ná nɔ tɛn tɔn mɛ ɔ́ jí, káká yi gantɔ́ kpó kanlin kpó sín nukɔngbéví jí. Axɔ́sú Ejípu tɔn ɔ́ fɔ́n zǎn énɛ́ ɔ́ mɛ, gǎn hɔn-yitɔ́ tɔn lɛ́ɛ bǐ fɔ́n, Ejípunu lɛ́ɛ bǐ fɔ́n, bɔ xósúsú mlí ɖo Ejípu to ɔ́ mɛ, ɖó xwé ɖě gbe ɖe bɔ mɛ ma kú ɖe ǎ. Axɔ́sú ɔ́ ylɔ́ Mɔyízi kpó Aalɔ́ɔn kpó zǎn ɔ́ mɛ, bó ɖɔ nú yě ɖɔ: “Mi sɔ́ nǔ bó gosín to ce mɛ; mi kpó Izlayɛ́li ví lɛ́ɛ kpó ní yi. Mi yi sɛn Mawu Mavɔmavɔ lě e mi ɖɔ gbɔn é. Mi bɛ́ gbɔ̌ mitɔn lɛ́ɛ kpó nyibú mitɔn lɛ́ɛ kpó lě e mi ɖɔ gbɔn é. Mi yi bó byɔ́ ɖagbe nú mì ɖo Mawu mitɔn gɔ́n.” Ée axɔ́sú ɔ́ ɖɔ mɔ̌ ɔ́, Ejípunu lɛ́ɛ jɛ cɔcɔ dó nú Izlayɛ́li ví lɛ́ɛ jí ɖɔ yě ní yá wǔ gosín to émítɔn mɛ, ɖó yě mɔ ɖɔ émí mɛ bǐ wɛ ɖo nǎ kú wɛ. Énɛ́ ɔ́ wú wɛ Izlayɛ́li ví lɛ́ɛ má dó tɔ́n linfín e yě nya ɔ́ mɛ cóbó ɖidó ǎ. Yě bǔ avɔ dó nǔ e mɛ yě nɔ́ nya linfín ɖe lɛ́ɛ, bó zé ɖó abɔ̌ta. Izlayɛ́li ví lɛ́ɛ kó bló nǔ e Mɔyízi ɖɔ nú yě ɖ'ayǐ lɛ́ɛ: yě kó byɔ́ nǔ e è sɔ́ kpatágan dó bló ná lɛ́ɛ kpó sikánú lɛ́ɛ kpó, kpódó avɔ kpó Ejípunu lɛ́ɛ. Mawu Mavɔmavɔ ko bló bɔ Ejípunu lɛ́ɛ kó nyɔ́ xomɛ dó Izlayɛ́li ví lɛ́ɛ wú, bó kó ná nǔ e yě byɔ́ lɛ́ɛ yě. Izlayɛ́li ví lɛ́ɛ vɔ Ejípunu lɛ́ɛ bǐ. Hwenu e Izlayɛ́li ví lɛ́ɛ ɖo Ejípu ná tɔ́n sín wɛ ɔ́, yě sí te sín Hlamusɛ́si bó ɖidó Sukɔ́tu; yě yi súnnu adɔ̌kpo gban mɔ̌ (600.000), è ka xa yɔkpɔ́vú lɛ́ɛ ǎ. Akɔta tɛnmɛ tɛnmɛ lɛ́ɛ nyi ahwan xwedó yě. Gbɔ̌ kpó nyibú kpó e yě kplá lɛ́ɛ sukpɔ́ ɖésú. Yě zě linfín nyinya e yě hɛn sín Ejípu, bɔ è ma dó tɔ́n mɛ ǎ é dó ɖa wɔ̌xúxú ná; ɖó nya wɛ è nya yě sín Ejípu bɔ yě sɔ́ sixú nɔ te nú linfín nyinya ɔ́ ná fɔ́n ǎ, yě ká kpé wú bó hɛn nǔɖuɖu dó yěɖée jí ǎ. Xwe afɔwe gban (430) wɛ Izlayɛ́li ví lɛ́ɛ nɔ Ejípu xɔ. Đo xwe afɔwe gban (430) énɛ́ lɛ́ɛ sín vivɔnu e nyí Dǐndínwáyi Mawu Mavɔmavɔ tɔn sín azǎn ɔ́, togun Mawu Mavɔmavɔ tɔn ɔ́ bǐ tɔ́n sín Ejípu. Izlayɛ́li ví lɛ́ɛ ɖó ná nɔ́ nɔ wunzɛn zǎn énɛ́ ɔ́ mɛ, jijimɛ ɖě jɛ ɖě gúdo, ɖó Mawu Mavɔmavɔ tɔn wɛ zǎn énɛ́ ɔ́ nyí. Đó zǎn énɛ́ ɔ́ mɛ wɛ Mawu Mavɔmavɔ nɔ wunzɛn, bó ɖe togun tɔn tɔ́n sín Ejípu. Mawu Mavɔmavɔ lɛ́ ɖɔ nú Mɔyízi kpó Aalɔ́ɔn kpó ɖɔ: “Sɛ́n e kan Dǐndínwáyixwe ɔ́ lɛ́ɛ ɖíe: Mɛ e ɖo akɔta ɖěvo mɛ lɛ́ɛ ɖěbǔ ná ɖu xwe ɔ́ sín nǔɖuɖu ǎ. È nǎ gbo ada nú kannumɔ e è xɔ lɛ́ɛ bǐ; énɛ́ ɔ́, yě ná ɖu xwe ɔ́ sín nǔɖuɖu. Jǒnɔ e ɖo to ɔ́ mɛ nú hwenu kpɛɖé lɛ́ɛ, abǐ mɛ e wá bó ɖo azɔ̌ wa wɛ ɖo to ɔ́ mɛ kpowun lɛ́ɛ, ná ɖu xwe ɔ́ sín nǔɖuɖu ǎ. Xwé e gbe è hu kanlin ɔ́ ɖe ɔ́ jɛ́n è nǎ ɖu ɖe; mi ná zé lan ɖěbǔ tɔ́n sín xwé gbe ǎ, mi ka ná gba xú lɛ́ɛ ɖěbǔ ǎ. Izlayɛ́li ví lɛ́ɛ sín togun ɔ́ bǐ wɛ ná nɔ ɖu Dǐndínwáyixwe ɔ́. Ényí jǒnɔ ɖé ɖo to mitɔn mɛ, bó jló ná ɖu Dǐndínwáyixwe ɔ́ dó Mawu Mavɔmavɔ tamɛ ɔ́, é kpó súnnu e ɖo xwé tɔn gbe é bǐ kpó ɖó ná gbo ada. Énɛ́ ɔ́, é ná húzú toví, bó ná ɖu xwe ɔ́ xá mi. Lo ɔ́, atɔtɔnɔ ɖěbǔ ná ɖu xwe ɔ́ ǎ. “Sɛ́n énɛ́ e ɖɔ xó dó Dǐndínwáyixwe ɔ́ wú ɔ́, ɖokpó ɔ́ wɛ mi mɛ e nyí xwénu lɛ́ɛ kpódó mɛ e nyí jǒnɔ ɖo tɛ́ntin mitɔn lɛ́ɛ kpó ná nɔ xwedó.” Izlayɛ́li ví lɛ́ɛ bǐ blǒ nǔ e Mawu Mavɔmavɔ ɖɔ nú Mɔyízi kpó Aalɔ́ɔn kpó lɛ́ɛ bǐ. Yě ɖe ɖěbǔ kpo ǎ. Gbe énɛ́ ɔ́ gbe ɖokpó ɔ́, Mawu Mavɔmavɔ ɖe Izlayɛ́li togun ɔ́ tɔ́n sín Ejípu sonu sonu. Mawu Mavɔmavɔ ɖɔ nú Mɔyízi ɖɔ: “Sɔ́ nukɔngbéví bǐ ɖó vo nú mì ɖo Izlayɛ́li: Nukɔngbéví súnnu e nyɔ̌nu ji ɔ́, ce wɛ; nukɔngbéví asú e kanlin ji ɔ́, ce wɛ.” Énɛ́ ɔ́ gúdo ɔ́, Mɔyízi ɖɔ nú togun ɔ́ ɖɔ: “Mi flín azǎn élɔ́ e gbe mi tɔ́n sín Ejípu bó gosín mɛ kannu é; ɖó Mawu Mavɔmavɔ wɛ ɖe mi tɔ́n sín Ejípu kpó hlɔ̌nhlɔ́n tɔn kpó; mɛɖé nɔ́ sixú nɔ te ɖo hlɔ̌nhlɔ́n tɔn nukɔn ǎ. Hǔn, mi ja nǔ e jɛ nɛ́ ɔ́ sín xwe ɖu gbé ɔ́, mi ɖó ná ɖu wɔ̌xúxú e mɛ è dǒ tɔ́n ɔ́ ǎ. Égbé wɛ mi tɔ́n sín Ejípu, ɖo Abibu sun ɔ́ mɛ. Ényí Mawu Mavɔmavɔ kó kplá mi yi Kanáanu lɛ́ɛ kpó Hitíti lɛ́ɛ kpó Amɔliti lɛ́ɛ kpó Hivíti lɛ́ɛ kpó, kpódó Jebuzinu lɛ́ɛ kpó sín to mɛ ɔ́, mi ná nɔ́ ɖu xwe tɔn ɖo sun ɖokpó énɛ́ ɔ́ mɛ xwewú xwewú. To énɛ́ ɔ́ sín akpá wɛ Mawu Mavɔmavɔ kó dó nú tɔ́gbó mitɔn lɛ́ɛ; nyibúnɔ́sin kpó wǐin kpó nɔ́ sa ɖo to énɛ́ ɔ́ mɛ. Mi ná ɖu wɔ̌xúxú e mɛ è ma dó tɔ́n ǎ é nú azǎn tɛ́nwe; azǎn tɛ́nwegɔ́ ɔ́ gbe ɔ́, è nǎ ɖu xwe dó Mawu Mavɔmavɔ ɔ́ ta mɛ. È nǎ ɖu wɔ̌xúxú e mɛ è ma dó tɔ́n ǎ é nú azǎn tɛ́nwe énɛ́ lɛ́ɛ; wɔ̌xúxú e mɛ è dǒ tɔ́n ɔ́ ɖěbǔ ná nɔ xwé mitɔn lɛ́ɛ ɖě gbe, ɖo to mitɔn mɛ ǎ; tɔ́n ɖěbǔ ka ná nɔ xwé mitɔn lɛ́ɛ ɖě gbe ǎ. Xwe ɔ́ hwenu ɔ́, mi ná tínmɛ nú vǐ mitɔn lɛ́ɛ ɖɔ nǔ e Mawu Mavɔmavɔ wa nú émí hwenu e émí tɔ́n sín Ejípu ɔ́ flín wɛ émí ɖe, bó dó ɖo nǔ wa gbɔn mɔ̌ wɛ. Xwe ɔ́ ná cí wuntun ɖé ɖɔhun nú mi ɖo awa mitɔn lɛ́ɛ wú, bó ná nyí flǐn ɖé sín wuntun nú mi ɖo nukɔn mitɔn, bónú mi ná jlá nǔ e Mawu Mavɔmavɔ kplɔ́n mi é. Đó Mawu Mavɔmavɔ wɛ ɖe mi tɔ́n sín Ejípu kpó hlɔ̌nhlɔ́n tɔn kpó; mɛɖé nɔ sixú nɔ te ɖo hlɔ̌nhlɔ́n tɔn nukɔn ǎ. Mi ná nɔ́ nyi sɛ́n énɛ́ ɔ́ xwewú xwewú ɖo hwenu e è ɖǒ dó é.” Mɔyízi lɛ́ ɖɔ: “Hwenu e Mawu Mavɔmavɔ ná kplá mi yi Kanáa to ɔ́ mɛ bó ná ná to ɔ́ mi lě e é kó dó akpá tɔn, bó xwlé nyǐkɔ tɔn d'é jí nú tɔ́gbó mitɔn lɛ́ɛ bó dó nú mi lɔ gbɔn ɔ́. Mi ná ɖe nukɔngbéví lɛ́ɛ bǐ ɖó vo nú Mawu Mavɔmavɔ. É ná bó nyí kanlin wɛ ɔ́, mi ná ɖe nukɔngbéví yětɔn lɛ́ɛ bǐ ɖó vo n'i. Mawu Mavɔmavɔ tɔn wɛ nukɔngbéví bǐ nyǐ. Lo ɔ́, mi ná zé lɛ̌ngbɔ́ví ɖokpó dó xɔ gbɛ nú tócí sín nukɔngbéví bǐ ná; ényí mi ma ka xɔ gbɛ nú yě ǎ hǔn, mi gba zogúdo yětɔn, bó ná hu yě. Ényí vǐ mitɔn lɛ́ɛ kanbyɔ́ mi gbe ɖokpó ɖɔ étɛ́wú wɛ mi nɔ bló mɔ̌ a jí ɔ́, mi ná yí gbe nú yě ɖɔ: ‘Mawu Mavɔmavɔ wɛ ɖe mǐ tɔ́n sín Ejípu kpó hlɔ̌nhlɔ́n tɔn kpó, bɔ mǐ gosín mɛ kannu; mɛɖé nɔ́ nɔ te hlɔ̌nhlɔ́n tɔn nukɔn ǎ. Axɔ́sú Ejípu tɔn ɔ́ nɔ́ gbɛ́ ɖɔ émí kún ná jó mǐ dó bɔ mǐ ná yi ó; énɛ́ ɔ́ wú ɔ́, Mawu Mavɔmavɔ hu nukɔngbéví gbɛtɔ́ kpó kanlin kpó bǐ tɔn ɖo Ejípu. Nǔ e wútu mǐ nɔ zé kanlin lɛ́ɛ sín nukɔngbéví asú lɛ́ɛ bǐ dó sá vɔ̌ ná nú Mawu Mavɔmavɔ bó ká nɔ́ sɔ́ akwɛ́ dó xɔ gbɛ nú nukɔngbéví gbɛtɔ́ lɛ́ɛ tɔn ɔ́ nɛ́.’ Vɔ̌sísá énɛ́ lɛ́ɛ ná nɔ́ nyí flǐn ɖé nú mi, bó ná nɔ lɛ́ nyí wuntun ɖé ɖo awa mitɔn abǐ nukɔn mitɔn. Yě ná nɔ́ flín mi ɖɔ Mawu Mavɔmavɔ wɛ ɖe mi tɔ́n sín Ejípu kpó hlɔ̌nhlɔ́n tɔn kpó; mɛɖé nɔ́ sixú nɔ te ɖo hlɔ̌nhlɔ́n tɔn nukɔn ǎ.” Hwenu e axɔ́sú Ejípu tɔn ɔ́ jó Izlayɛ́li ví lɛ́ɛ dó bɔ yě ɖidó ɔ́, Mawu kplá yě gbɔn ali e gbɔn Mɛditɛlanɛ́ɛ xu ɔ́ tó yi Filisitɛ́ɛn lɛ́ɛ sín tomɛ ɔ́ ǎ, có ali énɛ́ ɔ́ wɛ yá. Đó Mawu ɖɔ: “Nú ahwanfunfun wá ba Izlayɛ́li ví lɛ́ɛ ɔ́, yě sixú húzú gbe, bó lɛ́ kɔ yi Ejípu.” Nǔ e wútu Mawu lɛ́ kɔ nú yě, bɔ yě gbɔn gbětótló mɛ ɖidó Xu Vɔvɔ ɔ́ kɔn ɔ́ nɛ́. Izlayɛ́li ví lɛ́ɛ to yěɖée ganjí, bó gosín Ejípu. Mɔyízi bɛ́ Jozɛ́fu sín xú lɛ́ɛ, ɖó Jozɛ́fu ko ɖɔ nú nɔví tɔn lɛ́ɛ ɖɔ: “Mawu ná wá dó alɔ mi dandan. Mi xwlé nǔ nú mì ɖɔ mi ná bɛ́ xú ce lɛ́ɛ yi.” Yě gosín Sukɔ́tu bó ɖó gɔnu ɖó Etámu ɖo gbětótló ɔ́ tó. Mawu Mavɔmavɔ nɔ́ ɖo nukɔn yětɔn ɖo akpɔ́kpɔ́ ɖaxó ɖé mɛ kéze, bó nɔ́ xlɛ́ ali yě; é jɛ zǎn mɛ ɔ́, é nɔ́ ɖo nukɔn yětɔn ɖo myɔ ɖé mɛ, bó nɔ́ ná wěziza yě, bónú yě ná nɔ sixú ɖo yiyi wɛ zǎn kpó kéze kpó. Akpɔ́kpɔ́ ɔ́ nɔ́ gosín togun ɔ́ nukɔn kéze ǎ; myɔ ɔ́ ká nɔ gosín nukɔn yětɔn zǎn mɛ ǎ. Mawu Mavɔmavɔ ɖɔ nú Mɔyízi ɖɔ: “Đɔ nú Izlayɛ́li ví lɛ́ɛ ɖɔ yě ní zɛ bó yi ɖó gɔnu ɖó Pi-Haxilɔ́ti nukɔn, ɖo Migidɔ́lu kpó xu ɔ́ kpó tɛ́ntin, ɖo Baalu-Cefɔ́ni nukɔn; fínɛ́ wɛ mi ná nɔ, ɖo xu ɔ́ kpá. Axɔ́sú Ejípu tɔn ɔ́ ná vɛdó ɖɔ mi ɖo bǔbú wɛ, bó ná dɔn cí gbětótló mɛ wɛ sín. Un ná bló bɔ axɔ́sú ɔ́ ná tlí tó; é ná jɛ mi gúdo. Lo ɔ́, un ná hu axɔ́sú ɔ́ kpó ahwangɔnu tɔn lɛ́ɛ bǐ kpó, bó ná dó ɖe susu ce xlɛ́, bɔ Ejípunu lɛ́ɛ ná tunwun ɖɔ nyɛ wɛ nyí Mawu Mavɔmavɔ.” Izlayɛ́li ví lɛ́ɛ bló nǔ e Mawu Mavɔmavɔ ɖɔ é. È wǎ ɖɔ nú axɔ́sú Ejípu tɔn ɔ́ ɖɔ Izlayɛ́li ví lɛ́ɛ hɔn. Énɛ́ ɔ́, axɔ́sú ɔ́ kpó gǎn hɔn-yitɔ́ tɔn lɛ́ɛ kpó sín ayixa húzú dó yě wú, bɔ yě ɖɔ: “Étɛ́ ɖíe mǐ wa e? Aniwú wɛ mǐ jó yě dó bɔ yě yi? Mǐ sɔ́ ná mɔ mɛɖé, bɔ é ná nɔ́ wa azɔ̌ nú mǐ din a?” Axɔ́sú ɔ́ byɔ́ ahwankɛkɛ́ví tɔn mɛ, bɔ é kpó ahwangɔnu tɔn kpó ɖidó. Ée yě xweyǐgbe ɔ́, é fɔ ahwankɛkɛ́ví e ɖo Ejípu lɛ́ɛ bǐ; nǔwɔntɔn (600) wɛ ɖo ée é bɛ́ lɛ́ɛ mɛ bó nyɔ́ hú ɖě lɛ́ɛ bǐ, bɔ sɔ́ja atɔn atɔn ɖo ahwankɛkɛ́ví lɛ́ɛ ɖokpó ɖokpó mɛ. Mawu Mavɔmavɔ bló bɔ axɔ́sú Ejípu tɔn ɔ́ tlí tó, bó jɛ Izlayɛ́li ví lɛ́ɛ gúdo. Izlayɛ́li ví lɛ́ɛ ká kó tɔ́n sín to ɔ́ mɛ, mɛ e ko jɛ yěɖée sí lɛ́ɛ ɖɔhun, bó vo bó ɖo yiyi wɛ. Ejípunu lɛ́ɛ ká jɛ yě gúdo; bɔ axɔ́sú ɔ́ sín sɔ́ lɛ́ɛ bǐ, ahwankɛkɛ́ví tɔn lɛ́ɛ, sɔ́xátɔ́ tɔn lɛ́ɛ kpódó ahwangɔnu tɔn kpó yi xwedó yě wú, bɔ yě kó ɖó gɔnu ɖó xu ɔ́ tó, ɖo Pi-Haxilɔ́ti kpáxwé, ɖo Baalu-Cefɔ́ni nukɔn. Izlayɛ́li ví lɛ́ɛ mɔ nǔɖé kpowun ɔ́, yě mɔ ɖɔ Ejípunu lɛ́ɛ jɛ gǔdo émítɔn bɔ axɔ́sú ɔ́ ko sɛkpɔ́ émí, énɛ́ ɔ́, xɛsi ɖaxó ɖé jɛ yě jí, bɔ yě sú xó ylɔ́ Mawu Mavɔmavɔ. Yě kanbyɔ́ Mɔyízi ɖɔ: “Yɔdo ɖo Ejípu ǎ wú wɛ a kplá mǐ bɔ mǐ ná wá kú jɛ gbětótló mɛ fí lě a? Aniwú wɛ a kplá mǐ sín Ejípu? Hwenu e mǐ kpo ɖo dɔ̌n ɔ́, mǐ ka ɖɔ nú we ganjí mɛ. Mǐ ɖɔ nú we ɖɔ hwi ní ná agbɔ̌n mǐ; mǐ ɖɔ nú we ɖɔ mǐ ɖǒ jlǒ bó ná wa azɔ̌ nú Ejípunu lɛ́ɛ. Énɛ́ ɔ́ nyɔ́ nú mǐ hú mǐ ní kú jɛ gbětótló mɛ.” Mɔyízi ka yí gbe nú yě ɖɔ: “Mi ma ɖi xɛsi ó, mi ma hɔn ó, bó ná kpɔ́n lě e Mawu Mavɔmavɔ ná hwlɛ́n mi gán gbɔn égbé din é; Ejípunu e mɔ wɛ mi ɖe din lɛ́ɛ ɔ́, mi sɔ́ ná mɔ yě ɖě gbeɖé ǎ. Mawu Mavɔmavɔ ná fun ahwan ɖó tɛn mitɔn mɛ; mi nɔ xwíí kpowun.” Mawu Mavɔmavɔ ɖɔ nú Mɔyízi ɖɔ: “Nɛ̌ gbɔn bɔ a ɖo xó sú ylɔ́ mì wɛ? Đɔ nú Izlayɛ́li ví lɛ́ɛ ɖɔ yě ní jɛ ali. Zě kpo towe bó dlɛ́n ɖó xu ɔ́ jí, bó ɖe ali gbɔn xu ɔ́ mɛ, bónú Izlayɛ́li ví lɛ́ɛ ná zɔn afɔ gbɔn ayǐkúngban jí dó asá xu ɔ́. Bɔ nyɛ ɔ́, un ná bló bɔ Ejípunu lɛ́ɛ ná tlí tó, bó ná jɛ gǔdo mitɔn byɔ́ xu ɔ́ mɛ. Énɛ́ ɔ́, un ná sɔ́ axɔ́sú Ejípu tɔn ɔ́ kpó ahwangɔnu tɔn bǐ kpó, kpó ahwankɛkɛ́ví tɔn lɛ́ɛ kpó, kpódó sɔ́xátɔ́ tɔn lɛ́ɛ kpó dó ɖe susu ce xlɛ́. Hwenu e un ná ɖe susu ce xlɛ́ axɔ́sú ɔ́ gbɔn mɔ̌ ɔ́, Ejípunu lɛ́ɛ ná tunwun ɖɔ nyɛ wɛ nyí Mawu Mavɔmavɔ.” Énɛ́ ɔ́ gúdo ɔ́, wɛnsagun Mawu tɔn e ɖo nukɔn nú Izlayɛ́li ví lɛ́ɛ ɔ́, yi jɛ gǔdo yětɔn. Mɔ̌ ɖokpó ɔ́, akpɔ́kpɔ́ ɖaxó e ɖo nukɔn nú yě ɔ́ yi jɛ gǔdo yětɔn. Akpɔ́kpɔ́ ɔ́ nɔ te ɖo fí e Izlayɛ́li ví lɛ́ɛ ɖó gɔnu ɖó ɔ́ kpó fí e Ejípunu lɛ́ɛ ɖe é kpó tɛ́ntin. Akpɔ́kpɔ́ énɛ́ dó ablu ɖo akpá ɖokpó bɔ akpá ɖě ɔ́ xwé ká nɔ za wě zǎn mɛ. Énɛ́ ɔ́, yě sɛkpɔ́ yěɖée ɖo zǎn ɔ́ mɛ ǎ. Mɔyízi dlɛ́n alɔ dó xu ɔ́ jí. Énɛ́ ɔ́, Mawu Mavɔmavɔ bló bɔ jɔhɔn ɖaxó zǎnzǎnhwe jí tɔn ɖé nyi zǎn ɔ́ mɛ káká bɔ ayǐ hɔ́n, bɔ xu ɔ́ má. Énɛ́ ɔ́, Izlayɛ́li ví lɛ́ɛ gbɔn ayǐkúngban xúxú jí byɔ́ xu ɔ́ tɛ́ntin, bɔ xu ɔ́ cí ahohó ɖɔhun ɖo ɖisí kpó amyɔ kpó nú yě. Ejípunu lɛ́ɛ kpó axɔ́sú ɔ́ sín sɔ́ lɛ́ɛ bǐ kpó ahwankɛkɛ́ví lɛ́ɛ kpó, kpódó sɔ́xátɔ́ lɛ́ɛ kpó jɛ Izlayɛ́li ví lɛ́ɛ gúdo byɔ́ xu ɔ́ tɛ́ntin. Ayǐtéhɔ̌nnu ɔ́, Mawu Mavɔmavɔ nɔ akpɔ́kpɔ́ ɖaxó ɔ́ kpó myɔ ɔ́ kpó mɛ, bó ɖo Ejípunu lɛ́ɛ kpɔ́n wɛ, bó bló bɔ ahwangɔnu Ejípunu lɛ́ɛ tɔn wlú. Mawu Mavɔmavɔ blá ahwankɛkɛ́ví yětɔn lɛ́ɛ sín afɔ, bɔ nukɔn yiyi vɛ́ wǔ nú yě. Énɛ́ ɔ́, Ejípunu lɛ́ɛ ɖɔ: “Mi wá mǐ ní hɔn yi zɔ nú Izlayɛ́li ví lɛ́ɛ, ɖó Mawu Mavɔmavɔ ɖo yě jí bó ɖo ahwan fun xá mǐ wɛ ɖó tɛn yětɔn mɛ.” Mawu Mavɔmavɔ ɖɔ nú Mɔyízi ɖɔ: “Dlɛ̌n alɔ dó xu ɔ́ jí, énɛ́ ɔ́ sin ná nyɛ́sú Ejípunu lɛ́ɛ, é ná nyɛ́ sú ahwankɛkɛ́ yětɔn lɛ́ɛ kpó sɔ́xátɔ́ yětɔn lɛ́ɛ kpó.” Bɔ Mɔyízi dlɛ́n alɔ ɖó xu ɔ́ jí. Énɛ́ ɔ́, ée ayǐ ɖo hǐnhɔ́n wɛ ɔ́, xu ɔ́ jɛ tɛn tɔn mɛ wá jí. Ée sin ɔ́ jɛ sisɛkpɔ́ Ejípunu lɛ́ɛ jí ɔ́, yě jɛ hinhɔn jí. Lo ɔ́, Mawu Mavɔmavɔ kpíkpé yě dó xu ɔ́ mɛ. Sin ɔ́ wá tɛn tɔn mɛ, é nyɛ́sú ahwankɛkɛ́ví lɛ́ɛ kpó sɔ́xátɔ́ e byɔ́ xu ɔ́ mɛ jɛ Izlayɛ́li ví lɛ́ɛ gúdo lɛ́ɛ kpó. Mɛ ɖokpó gán ɖo yě mɛ ǎ. Izlayɛ́li ví lɛ́ɛ ká gbɔn ayǐkúngban xúxú jí ɖo xu ɔ́ tɛ́ntin, bɔ sin ɔ́ cí ahohó ɖɔhun ɖo ɖisí kpó amyɔ kpó nú yě. Mawu Mavɔmavɔ hwlɛ́n Izlayɛ́li ví lɛ́ɛ ɖo Ejípunu lɛ́ɛ sí gbe énɛ́ ɔ́ gbe. Bɔ Izlayɛ́li ví lɛ́ɛ mɔ Ejípunu lɛ́ɛ sín cyɔ ɖo xu ɔ́ tó. Énɛ́ ɔ́, Izlayɛ́li ví lɛ́ɛ mɔ hlɔ̌nhlɔ́n alɔkpa e Mawu Mavɔmavɔ zé dó wa nǔ xá Ejípunu lɛ́ɛ é. Énɛ́ ɔ́, yě ɖó sísí nú Mawu Mavɔmavɔ, bó ɖi nǔ n'i, lobo ɖi nǔ nú mɛsɛntɔ́ tɔn Mɔyízi. Énɛ́ ɔ́, Mɔyízi kpó Izlayɛ́li ví lɛ́ɛ kpó ji han nú Mawu Mavɔmavɔ. Han e yě ji ɔ́ ɖíe: Un ná ji han nú Mawu Mavɔmavɔ, ɖó é ɖe susu tɔn xlɛ́, é kpíkpé sɔ́ kpó sɔ́xátɔ́ kpó nyi xu mɛ. Mawu Mavɔmavɔ wɛ nyí hlɔ̌nhlɔ́n ce, é wɛ un ná nɔ́ ji han mlá. É wɛ hwlɛ́n mì gán. É wɛ nyí Mawu ce: un ná nɔ kpa ɛ. É wɛ nyí Mawu tɔ́ ce tɔn: un ná nɔ́ mlá ɛ Mawu Mavɔmavɔ ɔ́, ahwanfuntɔ́ wɛ é nyí. Mawu Mavɔmavɔ wɛ nyǐkɔ tɔn nyí. É kpíkpé axɔ́sú Ejípu tɔn ɔ́ sín ahwankɛkɛ́ví lɛ́ɛ kpó ahwangɔnu tɔn ɔ́ kpó nyi xu mɛ. Xu Vɔvɔ ɔ́ cyɔ́n ahwangán ɖaxó Ejípu xɔ́sú ɔ́ tɔn lɛ́ɛ. Sin ɔ́ ɖi bú yě; yě yi xuzan jí awǐnnya ɖɔhun. Óo! Mawu Mavɔmavɔ, a zě alɔ towe ɖisí ɔ́, alɔ towe hlɔ̌nhlɔ́nnɔ ɔ́ dó ɖe hlɔ̌nhlɔ́n towe susunɔ ɔ́ xlɛ́! Óo! Mawu Mavɔmavɔ, alɔ towe ɖisí ɔ́ wɛ a dǒ nyínyɛ́ kɛntɔ́. Susu towe d'agba. A flí mɛ e ɖo za li xá we lɛ́ɛ xwe, bó dó ɖe susu towe xlɛ́. A ɖe xomɛsin towe xlɛ́. É fyɔ́ yě lě e myɔ nɔ fyɔ́ nǔywɛ́ é ɖɔhun. Funfún tɔ́n sín awɔntín towe mɛ bó dɔn sin ɔ́ kplé ɖó fí ɖokpó. Sin e ɖo sisa wɛ ɔ́ kplé yi jǐ ahohó ɖɔhun. Aslɔkɛ́ lɛ́ɛ xú dó te ɖo xu ɔ́ tɛ́ntin. Kɛntɔ́ lɛ́ɛ ɖo ɖiɖɔ wɛ ɖɔ: “Mǐ ná jɛ yě gúdo. Mǐ ná xwedó yě wú. Mǐ ná má nǔ e mǐ ná yí sín yě sí lɛ́ɛ. Mǐ nǎ má, bɔ é ná jɛ mɛ nú mǐ ganjí. Mǐ ná sún hwǐ sín akún mɛ, alɔ mǐtɔn ná sú kún yětɔn dó.” Amɔ̌, hwɛ Mawu Mavɔmavɔ ɔ́, a fún funfún bɔ xu ɔ́ ɖi bú yě. Óo! Mawu Mavɔmavɔ, nǔmɛsɛn tɛ́ wɛ cí hwɛ ɖɔhun? Nǔmɛsɛn tɛ́ wɛ ɖó susu, bó nyí mǐmɛ́, bó nɔ́ bló nǔjíwǔ lɛ́ɛ, bɔ kpikpa jɛ xá hwɛ ɖɔhun? A dlɛ̌n alɔ towe ɖisí ɔ́, bɔ ayǐkúngban fɔ yě mi. Đo xomɛnyínyɔ́ towe mɛ ɔ́, a kplá togun élɔ́ e a hwlɛ̌n gán é. Đo nǔwúkpíkpé towe mɛ ɔ́, a kplá togun élɔ́ yi tɛn mímɛ́ towe mɛ. Togun lɛ́ɛ se mɔ̌, bó nɔ́ sísɔ́; xɛsi jɛ Filisitɛ́ɛn lɛ́ɛ jí. Ado hu Edɔ́mu sín gǎn lɛ́ɛ; Mɔwabu sín ahwanfuntɔ́ lɛ́ɛ jɛ sísɔ́sísɔ́ jí Kanáanu lɛ́ɛ ɖěbǔ sɔ́ ɖó akɔ́nkpinkpan ǎ. Xɛsi ɖaxó ɖé jɛ yě jí, ado hu yě. Gbɔn hlɔ̌nhlɔ́n ɖaxó e a ɖǒ ɔ́ gbla mɛ ɔ́, yě ná cí cúɖúɖú awǐnnya ɖɔhun, káká bɔ togun towe ná dín, togun e a xɔ gbɛ ná é. A nǎ kplá yě wá, bó ná ɖó tɛnmɛ nú yě, ɖó só towe jí, ɖo fí e a blǒ ɖ'ayǐ, bɔ é nyí nɔtɛn towe é, óo! Mawu Mavɔmavɔ, ɖo goxɔ towe e a ɖó ayǐ ɔ́ mɛ, óo! Aklúnɔ. Mawu Mavɔmavɔ ná ɖu axɔ́sú tɛgbɛ káká sɔ́yi. Đó axɔ́sú Ejípu tɔn ɔ́ sín sɔ́ lɛ́ɛ, ahwankɛkɛ́ví tɔn lɛ́ɛ kpó sɔ́xátɔ́ tɔn lɛ́ɛ kpó byɔ́ xu mɛ. Bɔ Mawu Mavɔmavɔ dɔn xu ɔ́ cyɔ́n yě. Lo ɔ́, Izlayɛ́li ví lɛ́ɛ zin zɔnlin gbɔn ayǐkúngban xúxú jí, gbɔn xu ɔ́ tɛ́ntin. Miliamu, gbeyíɖɔ Mawu tɔn, Aalɔ́ɔn nɔví ɔ́ zé hǔn, bɔ nyɔ̌nu e ɖo Izlayɛ́li lɛ́ɛ bǐ xwedó e, bó ɖo hun xo wɛ, bó ɖo xwe ɖu wɛ. Miliamu ɖo gbe yí nú Izlayɛ́li ví lɛ́ɛ wɛ ɖɔ: Mi ji han nú Mawu Mavɔmavɔ, ɖó é ɖe susu tɔn xlɛ́. É kpíkpé sɔ́ kpó sɔ́xátɔ́ kpó nyi xu mɛ. Mɔyízi kplá Izlayɛ́li ví lɛ́ɛ tɔ́n sín Xu Vɔvɔ ɔ́ mɛ, bɔ yě ɖidó gbětótló Cúu tɔn ɔ́ gbé jí. Yě zun zɔnlin ɖo gbětótló ɔ́ mɛ nú azǎn atɔn, bó mɔ sin ǎ. Yě wǎ Mala, bɔ sin ɖo fínɛ́; lo ɔ́, yě sixú nu Mala sin ɔ́ ǎ, ɖó é vɛ́. Nǔ e wú è nɔ ylɔ́ fínɛ́ ɖɔ Mala ɔ́ nɛ́. (Mala sín tínmɛ wɛ nyí nǔvívɛ́). Énɛ́ ɔ́, togun ɔ́ jɛ nǔ hlún ɖɔ dó Mɔyízi wú jí ɖɔ: “Étɛ́ wɛ mǐ nǎ nu?” Mɔyízi ka sú xó ylɔ́ Mawu Mavɔmavɔ, bɔ é xlɛ́ ɛ kpo ɖé, bɔ é sɔ́ nyi tɔ ɔ́ mɛ. Bɔ sin ɔ́ húzú sin ɖagbe. Fínɛ́ wɛ Mawu Mavɔmavɔ ná sɛ́n lɛ́ɛ kpó gbeta lɛ́ɛ kpó togun ɔ́ ɖe. Fínɛ́ ɖokpó ɔ́ wɛ é tɛ́n yě kpɔ́n ɖe. É ɖɔ nú yě ɖɔ: “Nú mi ɖótó nyɛ Mawu Mavɔmavɔ, Mawu mitɔn ɔ́ sín gbe ganjí ɔ́, nú mi wa nǔ e jlɔ́ ɖo nukún ce mɛ lɛ́ɛ ɔ́, nú mi se nǔ e un zɔ́n mi lɛ́ɛ ganjí, bó nyi sɛ́n ce lɛ́ɛ bǐ ɔ́, un ná dó azɔn e un dó Ejípunu lɛ́ɛ ɔ́ ɖěbǔ mi ǎ. Nyɛ wɛ nyí Mawu Mavɔmavɔ e nɔ gbɔ azɔn nú mi é.” Énɛ́ ɔ́ gúdo ɔ́, Izlayɛ́li ví lɛ́ɛ gosín fínɛ́, bó wá Elimu; tɔjɔtɛn wěwe kpó dětín kanɖé gban (70) kpó ɖo fínɛ́. Énɛ́ ɔ́, yě ɖǒ gɔnu ɖó fínɛ́, ɖo tɔ lɛ́ɛ kpá. Izlayɛ́li togun ɔ́ bǐ gosín Elimu; yě tɔ́n sín Ejípu ɔ́, sun tɔn wegɔ́ ɔ́ sín azǎn afɔtɔngɔ́ ɔ́ gbe wɛ yě wǎ Sínu sín gbětótló ɔ́ mɛ, ɖo Elimu kpódó Sinayíi kpó tɛ́ntin. Izlayɛ́li togun ɔ́ bǐ jɛ nǔ hlún ɖɔ dó Mɔyízi kpó Aalɔ́ɔn kpó wú jí. Izlayɛ́li ví lɛ́ɛ ɖɔ nú yě ɖɔ: “Hwenu e mǐ nɔ xá dó lanzɛ́n bó nɔ́ ɖu nǔ gɔ́ xo ɖo Ejípu ɔ́, é nyí Mawu Mavɔmavɔ ko hu mǐ hwenɛ́nu wɛ ɔ́, é nyɔ́ hú. Đó mi kplá mǐ wá gbětótló élɔ́ mɛ, bó ná jó mǐ mɛ tobutóbú élɔ́ lɛ́ɛ dó, bɔ mǐ ná kú adɔ.” Mawu Mavɔmavɔ ká ɖɔ nú Mɔyízi ɖɔ: “Đǒtó mì. Un ná bló bɔ nǔɖuɖu ná ja kɔn nyi ayǐ nú mi sín jǐxwé. Togun ɔ́ ná nɔ tɔ́n ayǐhɔ́ngbe ayǐhɔ́ngbe, bó ná nɔ́ bɛ́ nǔɖuɖu e ná kpé gbe ɖokpó é. Un ná bló mɔ̌, bó dó tɛ́n ɛ kpɔ́n, bó ná kpɔ́n ɖɔ é ná xwedó nǔ e un ɖɔ n'i ɔ́, abǐ é ná gbɔ ají? Azǎn ayizɛ́ngɔ́ ɔ́ gbe ɔ́, mi ná bɛ́ ée mi nɔ bɛ́ ayǐhɔ́ngbe ayǐhɔ́ngbe ɔ́ donu we, bó ná ɖa gbe énɛ́ ɔ́ gbe.” Mɔyízi kpó Aalɔ́ɔn kpó ɖɔ nú Izlayɛ́li ví lɛ́ɛ ɖɔ: “Égbé gbadanu ɔ́, mi ná mɔ nukúnnú jɛ wú ɖɔ Mawu Mavɔmavɔ wɛ ɖe mi tɔ́n sín Ejípu. É jɛ zǎnzǎn ɔ́, mi ná mɔ lě e Mawu Mavɔmavɔ ná ɖe nǔwúkpíkpé tɔn xlɛ́ mi gbɔn é, ɖó é se nǔ e hlún ɖɔ dó wǔtu tɔn wɛ mi ɖe é. Étɛ́ mǐdɛɛ lɛ́ɛ nyí, bɔ mi ná nɔ hlún nǔ ɖɔ dó mǐ jí?” Mɔyízi ɖɔ: “Égbé gbadanu ɔ́, Mawu Mavɔmavɔ ná ná lan mi, bɔ mi ná ɖu; é jɛ sɔ zǎnzǎn ɔ́, é ná ná wɔ̌xúxú mi bɔ mi ná ɖu gɔ́ xo, ɖó Mawu Mavɔmavɔ se nǔ e mi hlún ɖɔ dó wǔ tɔn é; étɛ́ wɛ mǐdɛɛ lɛ́ɛ nyí? É nyí mǐdɛɛ lɛ́ɛ jí hlún nǔ ɖɔ dó wɛ mi ɖe ǎ, Mawu Mavɔmavɔ jí hlún nǔ ɖɔ dó wɛ mi ɖe.” Mɔyízi ɖɔ nú Aalɔ́ɔn ɖɔ: “Đɔ nú Izlayɛ́li togun ɔ́ bǐ ɖɔ yě ní sɛkpɔ́ Mawu Mavɔmavɔ, ɖó é se nǔ e hlún ɖɔ dó wǔ tɔn wɛ yě ɖe é.” Hwenu e Aalɔ́ɔn ɖo xó ɖɔ nú Izlayɛ́li ví lɛ́ɛ wɛ ɔ́, yě lílɛ́ kpan nukɔn gbětótló ɔ́, yě ná mɔ nǔɖé kpowun ɔ́, susu Mawu Mavɔmavɔ tɔn jɛ́n tɔ́n ɖo akpɔ́kpɔ́ mɛ. Mawu Mavɔmavɔ ɖɔ nú Mɔyízi ɖɔ: “Un se nǔ e hlún ɖɔ wɛ Izlayɛ́li ví lɛ́ɛ ɖe é. Đɔ nú yě ɖɔ: ‘É jɛ égbé gbadanu ɔ́, mi ná ɖu lan, bɔ sɔ zǎnzǎn ɔ́, mi ná ɖu wɔ̌xúxú gɔ́ xo. Énɛ́ ɔ́, gbɔn nǔwiwa ce lɛ́ɛ mɛ ɔ́, mi ná tunwun ɖɔ nyɛ wɛ nyí Mawu Mavɔmavɔ mitɔn.’ ” Nǔgbó ɔ́, ée gbadanu su ɔ́, káyi lɛ́ɛ wá ɖó, bó kpé fí e yě ɖǒ gɔnu ɖó é; ée é jɛ zǎnzǎn ɔ́, ahǔn lɛ́ dó fí e yě ɖǒ gɔnu ɖó. Ée ahǔn ɔ́ gbadó ɔ́, nǔ atínkwín ɖɔhun cíkícíkí ɖé kpé fí bǐ, bó wé kɛ́njí ɖɔhun, bó kpé ayǐkúngban. Izlayɛ́li ví lɛ́ɛ mɔ, yě ká tunwun nǔ alɔkpa e wɛ ɔ́ ǎ, bó jɛ kinkanbyɔ́ yěɖée jí ɖɔ: “Étɛ́ ká nyí énɛ́?” Mɔyízi ka yí gbe nú yě ɖɔ: “Wɔ̌xúxú e Mawu Mavɔmavɔ ná mi bɔ mi ná ɖu ɔ́ wɛ. Nǔ e Mawu Mavɔmavɔ ká ɖɔ è nǐ bló ɔ́ ɖíe: Mɛ ɖokpó ɖokpó ní bɛ́ ée ná kpé e ɔ́: lǐtli ɛnɛ mɔ̌ wɛ mɛ ɖokpó ɖokpó ná bɛ́; è nǎ kpɔ́n mɛ nabí e ɖo goxɔ mɛtɔn mɛ ɔ́, bó bɛ́ dó kanta yětɔn.” Bɔ Izlayɛ́li ví lɛ́ɛ bló lě e è ɖɔ gbɔn nú yě é: mɛ ɖé lɛ́ɛ bɛ́ gěgé, mɛɖé lɛ́ɛ ká bɛ́ kpɛɖé. Énɛ́ ɔ́ gúdo ɔ́, è jlɛ̌; mɛ e bɛ́ gěgé ɔ́, é ká sɔ́ wá sukpɔ́ dín ɖo así tɔn ǎ; mɛ e ka bɛ́ kpɛɖé ɔ́, é hwe dó mɛ ɔ́ ǎ. Mɛ ɖokpó ɖokpó mɔ éé ná kpé é. Mɔyízi ɖɔ nú Izlayɛ́li ví lɛ́ɛ ɖɔ: “Mɛ ɖěbǔ ní má zé nǔɖuɖu ɔ́ ɖě ɖ'ayǐ nú sɔ zǎnzǎn ó.” Lo ɔ́, mɛ ɖé lɛ́ɛ ɖo yě mɛ bó ɖótó Mɔyízi ǎ, bó zé ɖě ɖ'ayǐ jɛ zǎnzǎn. Wǎnvú ká byɔ́ ɛ mɛ, bɔ é gblé. Bɔ Mɔyízi sín xomɛ dó yě mɛ énɛ́ lɛ́ɛ. Zǎnzǎn tɛgbɛ ɔ́, mɛ ɖokpó ɖokpó nɔ́ bɛ́ nǔɖuɖu e é ná ɖu bɔ é ná kpé é ɔ́; ényí hwesivɔ́ hun bɔ yǒzo gbɛ́ ɔ́, nǔɖuɖu e kpo ɖo kɔ́ mɛ é nɔ́ sínsín. Azǎn ayizɛ́ngɔ́ ɔ́ gbe ɔ́, mɛ ɖokpó ɖokpó nɔ́ bɛ́ ée é nɔ́ bɛ́ ɖ'ayǐ ɔ́ donu we. Hǔn, mɛ ɖokpó ɖokpó nɔ́ bɛ́ lǐtli tántɔn. Togun ɔ́ sín nukɔntɔ́ lɛ́ɛ wá ɖɔ nǔ e mɛ lɛ́ɛ bló ɔ́ nú Mɔyízi. Bɔ Mɔyízi ɖɔ nú yě ɖɔ: “Mɔ̌ wɛ Mawu Mavɔmavɔ ɖɔ. Sɔ wɛ nyí gbɔjɛzán, azǎn e è zě ɖó vo nú Mawu Mavɔmavɔ é; mi ná ɖa ɖě hǔn, mi ɖa; mi ka ná fyɔ́ sin ɖě hǔn, mi fyɔ́ sin, lobo zé ée ná kpo ɔ́ bǐ ɖ'ayǐ nú sɔ zǎnzǎn.” Énɛ́ ɔ́, yě zě ɖě ɖ'ayǐ nú sɔ zǎnzǎn, lě e Mɔyízi ko ɖɔ gbɔn nú yě é. Đě gblé ǎ. Wǎnvú ká byɔ́ yě mɛ ǎ. Mɔyízi ɖɔ nú yě ɖɔ: “Mi ɖu énɛ́ ɔ́ égbé, ɖó égbé ɔ́, gbɔjɛzán Mawu Mavɔmavɔ tɔn gbe wɛ. Mi ɖo ɖě ná mɔ bɛ́ wɛ égbé ǎ. Azǎn ayizɛ́n wɛ mi ná nɔ́ bɛ́ xɔ. Mi ná mɔ ɖě bɛ́ azǎn tɛ́nwegɔ́ ɔ́ gbe ǎ, ɖó gbɔjɛzán wɛ azǎn énɛ́ ɔ́ nyí.” Azǎn tɛ́nwegɔ́ ɔ́ gbe ɔ́, mɛ ɖé lɛ́ɛ ɖo togun ɔ́ mɛ, bó tɔ́n bó ná yi bɛ́, lo ɔ́, yě mɔ ɖěbǔ bɛ́ ǎ. Énɛ́ ɔ́, Mawu Mavɔmavɔ ɖɔ nú Mɔyízi ɖɔ: “Káká jɛ hwetɛ́nu wɛ mi ná gɔn nǔ e un ɖɔ lɛ́ɛ wa dó? Káká jɛ hwetɛ́nu wɛ mi ná gɔn sɛ́n ce lɛ́ɛ nyi? Mi ní tunwun ganjí ɖɔ mi ná gbɔjɛ́ wútu wɛ un ná gbɔjɛzán ɔ́ mi; nǔ e wútu un nɔ ná nǔ e mi ná ɖu ɔ́ azǎn we tɔn mi ɖo azǎn ayizɛ́ngɔ́ ɔ́ gbe ɔ́ nɛ́. Hǔn mɛ ɖokpó ɖokpó ní bó nɔ́ nɔ fí e é ɖe ɔ́, mɛɖé ní má nɔ́ tɔ́n ɖo azǎn tɛ́nwegɔ́ ɔ́ gbe ó.” Énɛ́ ɔ́, togun ɔ́ gbɔjɛ́ azǎn tɛ́nwegɔ́ ɔ́ gbe. Izlayɛ́li ví lɛ́ɛ ylɔ́ nǔɖuɖu énɛ́ ɔ́ ɖɔ mǎna; é cí atín e è nɔ ylɔ́ ɖɔ kolyandli ɔ́ sín kwín ɖɔhun: é wé bó víví wɔ̌xúxú e mɛ è dǒ wǐin ɔ́ ɖɔhun. Mɔyízi ɖɔ: “Nǔ e Mawu Mavɔmavɔ ɖɔ è nǐ bló ɔ́ ɖíe: É ɖɔ: ‘Mi bɛ́ mǎna gɔ́ nǔ ɖokpó, bó zé ɖ'ayǐ nú vǐ mitɔn lɛ́ɛ; énɛ́ ɔ́, yě ná mɔ wɔ̌xúxú alɔkpa e un ná mi, bɔ mi ɖu ɖo gbětótló mɛ hwenu e un ɖe mi tɔ́n sín Ejípu é.’ ” Énɛ́ ɔ́ gúdo ɔ́, Mɔyízi ɖɔ nú Aalɔ́ɔn ɖɔ: “Zě zɛ̌n ɖokpó bó bɛ́ mǎna e mɛ ɖokpó ná ɖu ɔ́ d'é mɛ, bó zé ɖó Mawu Mavɔmavɔ nukɔn, bónú é ná sixú nɔ ayǐ nú vǐ mitɔn lɛ́ɛ.” Đi lě e Mawu Mavɔmavɔ kó ɖɔ nú Mɔyízi gbɔn ɔ́, Aalɔ́ɔn zé zɛ̌n ɔ́ ɖó akɔjijɛgbá ɔ́ nukɔn, bónú é ná sixú nɔ ayǐ. Izlayɛ́li ví lɛ́ɛ ɖu mǎna xɔ xwe kanɖé (40) cóbó wá jɛ to e mɛ gbɛtɔ́ ɖe ɔ́ mɛ. Yě ɖu mǎna káká wá Kanáa to ɔ́ sín dogbó lɛ́ɛ jí. Mǎna e nɔ kpé mɛ ɖokpó gbe ɖokpó ɔ́ yi lǐtli ɛnɛ mɔ̌ bó nyí nǔ e yě nɔ́ dó jlɛ́ nǔ ná ɔ́ sín mǎɖówǒ. Mawu Mavɔmavɔ ná gbe Izlayɛ́li ví lɛ́ɛ bɔ yě bǐ gosín Sínu sín gbětótló ɔ́ mɛ, bó ɖo yiyi wɛ kpɛɖé kpɛɖé káká bó yi jɛ Hlefidímu, bó ɖó gɔnu ɖó fínɛ́. Yě ká mɔ sin nu ɖo fínɛ́ ǎ. Énɛ́ ɔ́, togun ɔ́ ba xó Mɔyízi. Yě ɖɔ n'i ɖɔ: “Nǎ sin mǐ, nú mǐ ná nu.” Bɔ Mɔyízi ɖɔ nú yě ɖɔ: “Aniwú mi ɖo xó ba mì wɛ? Étɛ́wú mi ɖo Mawu Mavɔmavɔ tɛ́n kpɔ́n wɛ?” Kɔ ɖo Izlayɛ́li ví lɛ́ɛ xú wɛ ɖésú, bɔ yě ɖo nǔ hlún ɖɔ dó Mɔyízi jí wɛ ɖɔ: “Étɛ́wú a kplá mǐ sín Ejípu, bó ná jó mǐ kpó vǐ mǐtɔn lɛ́ɛ kpó, kpódó kanlin mǐtɔn lɛ́ɛ kpó dó bɔ mǐ ná wɛ́n vɛ̌?” Énɛ́ ɔ́, Mɔyízi sú xó ylɔ́ Mawu Mavɔmavɔ bó ɖɔ: “Étɛ́ wɛ un ná wa nú togun élɔ́? É hú mɔ̌ kpɛɖé din ɔ́, yě ná nyi awǐnnya dó hu mì ná.” Bɔ Mawu Mavɔmavɔ ɖɔ nú Mɔyízi ɖɔ: “Jɛ nukɔn nú togun ɔ́, cyán tomɛxó Izlayɛ́li tɔn ɖé lɛ́ɛ bónú yě ní kplá we. A nǎ zě kpo towe e a zin dó Nilu tɔ ɔ́ mɛ ɔ́ hɛn alɔ mɛ bó ɖidó. Nyɛ ka ná nɔ te ɖo nukɔn towe ɖo Holɛ́bu só ɔ́ jí; a nǎ zin kpo ɔ́ dó só ɔ́ wú; énɛ́ ɔ́, sin ná tɔ́n, bɔ togun ɔ́ ná nu.” Mɔyízi bló nǔ e Mawu Mavɔmavɔ ɖɔ ɔ́, ɖo tomɛxó Izlayɛ́li tɔn lɛ́ɛ nukún mɛ. È ɖǒ nyǐkɔ nú fí énɛ́ ɔ́ ɖɔ Masa kpó Mɛliba kpó; tínmɛ tɔn wɛ nyí “tɛ́nkpɔ́n” kpó “xóbiba” kpó, ɖó Izlayɛ́li ví lɛ́ɛ ba xó Mɔyízi bó tɛ́n Mawu Mavɔmavɔ kpɔ́n bó ɖɔ: “Mawu Mavɔmavɔ ɖo tɛ́ntin mǐtɔn a? Abǐ é ɖo tɛ́ntin mǐtɔn ǎ?” Amalɛ́ki ví lɛ́ɛ wá tɔ́n ahwan Izlayɛ́li ví lɛ́ɛ ɖo Hlefidímu. Énɛ́ ɔ́, Mɔyízi ɖɔ nú Jozuwée ɖɔ: “Jozuwée, cyán súnnu e ná sixú fun ahwan nú mǐ lɛ́ɛ, bó yi fun ahwan xá Amalɛ́ki ví lɛ́ɛ; é jɛ sɔ ɔ́, un ná cí só ɔ́ ta bɔ Mawu sín kpo ɔ́ ná ɖo alɔ ce mɛ.” Jozuwée ka bló nǔ e Mɔyízi ɖɔ n'i é, bó yi fun ahwan xá Amalɛ́ki ví lɛ́ɛ. Bɔ Mɔyízi kpó Aalɔ́ɔn kpó, kpódó mɛ ɖěvo kpó yi só ɔ́ ta; è nɔ ylɔ́ mɛ ɔ́ ɖɔ Húu. Nú alɔ Mɔyízi tɔn ɖo jǐ ɔ́, Izlayɛ́li ví lɛ́ɛ nɔ́ hú gǎn Amalɛ́ki ví lɛ́ɛ, amɔ̌, nú é zé alɔ dó do ɔ́, Amalɛ́ki ví lɛ́ɛ nɔ́ hú gǎn Izlayɛ́li ví lɛ́ɛ. Awa ka wá kú Mɔyízi, bɔ Aalɔ́ɔn kpó Húu kpó zé awǐnnya ɖokpó ɖó Mɔyízi kpá, bɔ Mɔyízi jínjɔ́n ɛ jí. Aalɔ́ɔn kpó Húu kpó hɛn awa tɔn lɛ́ɛ ɖó te; mɛ ɖokpó ɖo ɖisí, mɛ ɖokpó ɖo amyɔ, bɔ awa tɔn lɛ́ɛ nɔ dlɛ̌ndlɛ́n mɔ̌ káká bɔ hwe yi xɔ. Énɛ́ ɔ́, Jozuwée ɖu ɖo Amalɛ́ki ví lɛ́ɛ jí bǐ dégbédégbé. Mawu Mavɔmavɔ ɖɔ nú Mɔyízi ɖɔ: “Wlǎn nǔ e jɛ lɛ́ɛ bǐ dó wěma mɛ, bónú è ma wɔn ó. Đɔ nú Jozuwée ɖɔ un ná sú Amalɛ́ki ví lɛ́ɛ sín kún dó, mɛ ɖěbǔ sɔ́ ná flín yě ɖo ayǐkúngban ɔ́ jí ǎ.” Mɔyízi mɛ vɔ̌sákpe ɖokpó bó ɖó nyǐkɔ ná ɖɔ: “Mawu Mavɔmavɔ wɛ nyí ahwansyá ce.” É ɖɔ: “Ée Amalɛ́ki ví lɛ́ɛ glá bó dlɛ́n alɔ dó axɔ́súzinkpo Mawu Mavɔmavɔ tɔn ɔ́, Mawu Mavɔmavɔ ná ɖo ahwan fun xá yě wɛ káká sɔ́yi.” Jetlo e nyí vɔ̌sánú-xwlémawutɔ́ Madiáani tɔn, bó nyí Mɔyízi sín asitɔ́ ɔ́, se nǔ e Mawu wa nú Mɔyízi kpó togun tɔn Izlayɛ́li ɔ́ kpó é bǐ; é se lě e Mawu Mavɔmavɔ ɖe Izlayɛ́li ví lɛ́ɛ tɔ́n sín Ejípu gbɔn é. Mɔyízi sín asitɔ́ Jetlo yí vǐ tɔn Sipɔ́la e nyí Mɔyízi sín asi bɔ Mɔyízi nyi i sɛ́ dó e. É lɛ́ yí Sipɔ́la sín vǐ súnnu we lɛ́ɛ; mɛ ɖokpó nɔ́ nyí Gɛɛcɔ́mu, ɖó Mɔyízi ko ɖɔ jǒnɔ wɛ émí nyí ɖo mɛ ɖěvo tomɛ. Mɛ wegɔ́ ɔ́ nɔ́ nyí Eliezɛ́ɛ, ɖó Mɔyízi ko ɖɔ Mawu tɔ́ émítɔn dó alɔ émí, bó hwlɛ́n émí ɖo ahwan e axɔ́sú Ejípu tɔn ɔ́ fun xá émí ɔ́ mɛ. Jetlo kpó Mɔyízi sín asi kpó, kpódó vǐ tɔn lɛ́ɛ kpó wá gbětótló mɛ fí e Mɔyízi jɛ agban nyi ɖo Mawu só ɔ́ kɔn é. É ɖɔ sɛ́ dó Mɔyízi ɖɔ: “Nyɛ asi towe tɔ́ Jetlo wɛ ja gɔ̌n towe kpó asi towe kpó, kpódó vǐ tɔn we lɛ́ɛ kpó.” Mɔyízi ka sɛ yi asi tɔn tɔ́ ɔ́ gɔ́n, bó jɛ kpo bó ɖe kɔ́ n'i lobo kí si n'i. Yě kan lě e yě ɖe gbɔn ɔ́ byɔ́ yěɖée, bó byɔ́ Mɔyízi sín goxɔ mɛ. Nǔ e Mawu Mavɔmavɔ wa xá axɔ́sú Ejípu tɔn ɔ́ kpó Ejípunu lɛ́ɛ kpó ɖó Izlayɛ́li ví lɛ́ɛ wú ɔ́, ya e yě ji ɖo alixo bɔ Mawu Mavɔmavɔ hwlɛ́n yě ɖ'é mɛ lɛ́ɛ ɔ́, Mɔyízi wlí bǐ ɖɔ nú asi tɔn tɔ́. Đagbe e Mawu Mavɔmavɔ wa nú Izlayɛ́li ví lɛ́ɛ bǐ, kpó hwlɛ̌n e é hwlɛ́n yě sín Ejípunu lɛ́ɛ sí ɔ́ kpó hun xomɛ nú Jetlo. Bɔ é ɖɔ: “Susu nú Mawu Mavɔmavɔ e hwlɛ́n mi sín Ejípunu lɛ́ɛ kpó axɔ́sú yětɔn ɔ́ kpó sí é, susu nú Mawu Mavɔmavɔ e ɖe togun tɔn sín Ejípunu lɛ́ɛ sín acɛ mɛ é. Un mɔ din ɖɔ Mawu Mavɔmavɔ hú gǎn nǔmɛsɛn lɛ́ɛ bǐ. É ɖe hwenu e Ejípunu lɛ́ɛ ɖo acɛ gannaganna kpa nú Izlayɛ́li ví lɛ́ɛ wɛ é xlɛ́.” Jetlo, Mɔyízi sín asitɔ́ ɔ́ sá vɔ̌ e è nɔ dó zo ɔ́ kpódó kɔnɖókpɔ́ sín vɔ̌ lɛ́ɛ kpó nú Mawu. Aalɔ́ɔn kpódó tomɛxó lɛ́ɛ bǐ kpó wá ɖu kɔnɖókpɔ́ nǔɖuɖu ɔ́ xá Mɔyízi sín asitɔ́ ɔ́, ɖo Mawu nukɔn. Ayǐhɔ́ngbe tɔn ɔ́, Mɔyízi jínjɔ́n ayǐ bó ná ɖɔ hwɛgbe e ɖo togun ɔ́ tɛ́ntin ɔ́ gbo, bɔ togun ɔ́ wá nɔ te ɖo nukɔn tɔn sín zǎnzǎn káká jɛ gbadanu. Mɔyízi sín asitɔ́ mɔ nǔ e bló nú togun ɔ́ wɛ é ɖe é bǐ, bó kanbyɔ́ ɛ ɖɔ: “Étɛ́ wa wɛ a ɖe ɖo fínɛ́ kpó togun ɔ́ kpó? Nɛ̌ ká gbɔn bɔ hwi ɖokpónɔ ɖo azɔ̌ énɛ́ ɔ́ wa wɛ? Bɔ togun ɔ́ bǐ ɖo te ɖo nukɔn towe sín zǎnzǎn káká jɛ gbadanu?” Bɔ Mɔyízi yí gbe nú asi tɔn tɔ́ ɖɔ: “Togun ɔ́ wɛ wá gɔ̌n ce, bó ná kan nǔ byɔ́ Mawu. Ényí tagba ɖé ɖo tɛ́ntin yětɔn ɔ́, yě nɔ́ wá mɔ mì, bɔ un nɔ ɖɔ gbo nú yě, bó nɔ tín nǔ e Mawu zɔ́n lɛ́ɛ kpó kplɔ́n tɔn lɛ́ɛ kpó mɛ nú yě.” Mɔyízi sín asitɔ́ ɖɔ n'i ɖɔ: “Nǔ e wa wɛ a ɖe ɔ́ nyɔ́ ǎ. Nǔ ná ci kɔ nú hwi kpó togun e wá gɔ̌n towe ɔ́ kpó, ɖó azɔ̌ ɔ́ hú gǎn we, hwi ɖokpónɔ sixú bló ǎ. Bo ɖótó xó e ná ɖɔ nú we wɛ un ɖe é; Mawu ní ka nɔ kpɔ́ xá we. Nyǐ ɖɛ̌mɛnu togun ɔ́ tɔn ɖo Mawu nukɔn, bó zé tagba e ɖe lɛ́ɛ ɖó nukɔn tɔn. Kplɔ́n nǔ e Mawu zɔ́n lɛ́ɛ kpó kplɔ́n tɔn lɛ́ɛ kpó yě, bó xlɛ́ ali e yě ɖó ná gbɔn lɛ́ɛ kpódó nǔ e yě ɖó ná wa lɛ́ɛ kpó yě. Kpɔ́n togun ɔ́ bǐ mɛ, bó cyán súnnu nukúnɖéjí e nɔ ɖó sísí nú Mawu, bó yí wǎn nú nǔgbó ɖiɖɔ lobo ma nɔ yí wǎn nú nǔ ɖu ɖo nǔ mɛ ǎ lɛ́ɛ; sɔ́ yě dó ɖó gǎn ɖo togun ɔ́ nu: a nǎ sɔ́ mɛɖě ɖó gbɛtɔ́ afatɔ́n (1.000) nu, bó ná sɔ́ mɛɖě ɖó gbɛtɔ́ kanwe ko (100) nu, bó ná sɔ́ mɛɖě ɖó gbɛtɔ́ kanɖé wǒ (50) nu, bó ná sɔ́ mɛɖě ɖó gbɛtɔ́ wǒ nu. Yě ní nɔ́ ɖɔ hwɛ gbo nú togun ɔ́ hwebǐnu; yě ní nɔ́ zé xó e syɛ́n lɛ́ɛ wá gɔ̌n towe, bónú yě ɖésúnɔ ní nɔ́ ɖɔ xó kléwún kléwún lɛ́ɛ gbo. Đe agban kpo nú hwiɖée, nú yě ní hɛn xá we. Ényí a blǒ mɔ̌ bónú Mawu ɖɔ hwi ní wa nǔɖé ɔ́, a nǎ kpé wú bó bló; énɛ́ ɔ́, togun ɔ́ bǐ ná yi xwé wǔyɛ́yɛ́ afɔyɛ́yɛ́.” Mɔyízi se xó e asi tɔn tɔ́ ɖɔ ɔ́, bó bló nǔ e é ɖɔ lɛ́ɛ bǐ. É cyán gbɛtɔ́ nukúnɖéjí lɛ́ɛ ɖo togun ɔ́ mɛ, bó zé yě ɖó togun ɔ́ nu: é zé mɛɖě ɖó gbɛtɔ́ afatɔ́n (1.000) nu, bó zé mɛɖě ɖó gbɛtɔ́ kanwe ko (100) nu, bó zé mɛɖě ɖó gbɛtɔ́ kanɖé wǒ (50) nu, lobo zé mɛɖě ɖó gbɛtɔ́ wǒ nu. Bɔ yě nɔ́ ɖo hwɛ ɖɔ gbo nú togun ɔ́ wɛ hwebǐnu; yě nɔ́ zé xó e syɛ́n lɛ́ɛ wá Mɔyízi gɔ́n, bɔ yě ɖésúnɔ nɔ́ ɖɔ xó kléwún kléwún lɛ́ɛ gbo. Mɔyízi jɛ nukɔn nú asi tɔn tɔ́, bɔ é lɛ́ kɔ yi to tɔn mɛ. Izlayɛ́li ví lɛ́ɛ gosín Ejípu ɔ́, sun atɔn pɛ́pɛ́pɛ́ wɛ yě bló bó wá Sinayíi sín gbětótló ɔ́ mɛ azǎn énɛ́ ɔ́ gbe. Gbětótló Hlefidímu tɔn ɔ́ mɛ wɛ yě gosín bó wá gbětótló mɛ fí, ɖo Sinayíi só ɔ́ kpá, bó ɖó gɔnu ɖó fínɛ́. Mɔyízi fán só ɖidó Mawu gɔ̌n. Mawu Mavɔmavɔ ɖo só ɔ́ jí, bó sú xó ylɔ́ ɛ sɛ́ dó, bó ɖɔ n'i ɖɔ: “Xó e a nǎ ɖɔ nú Jakɔ́bu sín kúnkan Izlayɛ́li ví lɛ́ɛ ɔ́ ɖíe: Mi ɖésúnɔ ɔ́, mi mɔ nǔ e un wa xá Ejípunu lɛ́ɛ é; bó ká mɔ lě e un bɛ́ midɛɛ lɛ́ɛ, lě e gangan nɔ zé vǐ tɔn dó awa jí ɔ́ ɖɔhun, bó kplá mi wá fí gbɔn é. Din ɔ́, ényí mi ɖótó mì ɔ́, ényí mi hɛn akɔ e un jɛ xá mi ɔ́, mi ná nyí togun ce vívɛ́ná ɖo togun ɖě lɛ́ɛ bǐ mɛ; nǔgbó ɔ́, ayǐkúngban ɔ́ bǐ wɛ nyí ce. Amɔ̌, midɛɛ lɛ́ɛ ɔ́, mi ná nyí vɔ̌sánú-xwlémawutɔ́ lɛ́ɛ sín axɔ́súɖuto ɖokpó, bó ná nyí akɔta ɖe ɖó vo ɖé. Xó e a nǎ ɖɔ nú Izlayɛ́li ví lɛ́ɛ ɔ́ nɛ́.” Ée Mawu Mavɔmavɔ ɖɔ xó nú Mɔyízi fó ɔ́, Mɔyízi lɛ́ kɔ wá fí e yě ɖǒ gɔnu ɖó ɔ́, bó ylɔ́ mɛxó e ɖo togun ɔ́ mɛ lɛ́ɛ, bó ɖó xó énɛ́ lɛ́ɛ bǐ te nú yě, lě e Mawu Mavɔmavɔ ɖɔ n'i gbɔn é, bɔ togun ɔ́ bǐ ɖó gbe kpɔ́, bó ɖɔ: “Mǐ ná bló nǔ e Mawu Mavɔmavɔ ɖɔ lɛ́ɛ bǐ.” Bɔ Mɔyízi ɖidó xó e togun ɔ́ ɖɔ lɛ́ɛ ɖɔ nú Mawu Mavɔmavɔ gbé. Ée é yi ɔ́, Mawu Mavɔmavɔ ɖɔ n'i ɖɔ: “Un ná zɔn akpɔ́kpɔ́ wiwi ɖé mɛ wá gɔ̌n towe, bónú Izlayɛ́li ví lɛ́ɛ ná se gbe ce hwenu e un ná ɖo xó ɖɔ xá we wɛ é, bó ná nɔ ɖeji dó wǔ towe hwebǐnu.” Mɔyízi ɖɔ xó e togun ɔ́ ɖɔ lɛ́ɛ nú Mawu Mavɔmavɔ. Mawu Mavɔmavɔ lɛ́ ɖɔ nú Mɔyízi ɖɔ: “Yi Izlayɛ́li ví lɛ́ɛ gɔ́n; slá wǔ nú yě égbé kpó sɔ kpó, yě ní nya avɔ yětɔn lɛ́ɛ. Yě ní sɔ́ nǔ ɖ'ayǐ nú azǎn atɔngɔ́ ɔ́ gbe, ɖó azǎn atɔn gbe ɔ́, nyɛ Mawu Mavɔmavɔ ná jɛ te wá Sinayíi só ɔ́ jí ɖo togun ɔ́ bǐ nukún mɛ. A nǎ ɖǒ dogbó nú yě lɛ́ lɛ̌ dó só ɔ́, bó ná dó sɛ́n nú yě ɖɔ yě nǐ má xá só ɔ́ jí ó, yě nǐ má ká ɖó alɔ wú ó. Mɛ ɖěbǔ ɖó alɔ wú ɔ́, mɛ ɔ́ ná kú. È nǎ jó mɛ ɔ́ dó nyi gbɛ ǎ; é sixú nyí gbɛtɔ́, é sixú nyí kanlin; è nǎ sɛkpɔ́ mɛ ɔ́ ǎ, amɔ̌, è nǎ nyi awǐnnya dó hu i, abǐ è nǎ da gǎ dó hu i ná. Hwenu e lanzo ná ɖɔ nǔ ɔ́ jɛ́n mɛ ɖé lɛ́ɛ ná sixú xá só ɔ́ jí.” Énɛ́ ɔ́ gúdo ɔ́, Mɔyízi jɛ te sín só ɔ́ jí bó wá togun ɔ́ gɔ́n. È slá wǔ nú yě, bɔ yě nya avɔ yětɔn lɛ́ɛ. Mɔyízi ɖɔ nú Izlayɛ́li ví lɛ́ɛ ɖɔ: “Káká nú azǎn ná yi atɔn hǔn, mi sɔ́ nǔ ɖ'ayǐ, mi ma ɖó xó xá nyɔ̌nu ɖěbǔ ó.” Azǎn atɔn gbe zǎnzǎn ɔ́, jǐ jɛ gbe dó jí, bó jɛ wun kɛ jí, bɔ akpɔ́kpɔ́ wiwi ɖé dó ɖo só ɔ́ jí. Lanzo ɖɔ nǔ syɛ́nsyɛ́n, bɔ ado hu Izlayɛ́li ví lɛ́ɛ bǐ, ɖo fí e yě ɖó gɔnu ɖó é. Mɔyízi ɖe togun ɔ́ tɔ́n sín fí e yě ɖǒ gɔnu ɖó é, bónú yě ná yi kpé Mawu. Yě wǎ cí só ɔ́ kpá. Sinayíi só ɔ́ bǐ ɖo azɔ tún wɛ, ɖó Mawu Mavɔmavɔ ɖo te jɛ wɛ ɖo só ɔ́ jí ɖo myɔ tɛ́ntin. Azizɔ ɔ́ ɖo jǐ yi wɛ ɖi azizɔ ɖo tíntɔ́n sín myɔkpó mɛ wɛ ɖɔhun, bɔ só ɔ́ bǐ ɖo hǔnhúnhúnhún wɛ kpó zǐngídi kpó. Lanzo ɔ́ sín gbe lɛ́ ɖo syɛ́nsyɛ́n d'é jí wɛ. Mɔyízi ɖo xó ɖɔ wɛ, bɔ Mawu zé gbe yi jǐ, bó ɖo gbe yí n'i wɛ. Ée Mawu Mavɔmavɔ jɛ te wá Sinayíi só ɔ́ jí aga ɔ́, é ylɔ́ Mɔyízi, bɔ é yi só ɔ́ jí aga, bɔ Mawu Mavɔmavɔ ɖɔ n'i ɖɔ: “Jɛ te bo gbɛ́ nú Izlayɛ́li ví lɛ́ɛ ɖɔ yě ní má syɛ́n ta bo wá ba nǔ do ó; mɛ gěgé táá kú ɖo yě mɛ. Vɔ̌sánú-xwlémawutɔ́ lɛ́ɛ ɖésú e kó nɔ́ sɛkpɔ́ nyɛ Mawu Mavɔmavɔ lɛ́ɛ lɔ ní slá wǔ nú yěɖée; é má nyí mɔ̌ ǎ ɔ́, nyɛ Mawu Mavɔmavɔ ɔ́, un táá wa nǔ xá yě.” Énɛ́ ɔ́, Mɔyízi ɖɔ nú Mawu Mavɔmavɔ ɖɔ: “Izlayɛ́li ví lɛ́ɛ ná sixú xá Sinayíi só ɔ́ jí ǎ, ɖó a ko ɖɔ nú mì ɖɔ: ‘Đǒ dogbó lɛ́ lɛ̌ dó só ɔ́, bó dó ɖe ɖó vo nú mì.’ ” Bɔ Mawu Mavɔmavɔ ɖɔ nú Mɔyízi ɖɔ: “Jɛ te yi fí e togun ɔ́ ɖó gɔnu ɖó ɔ́; énɛ́ ɔ́ gúdo ɔ́, hwi kpó Aalɔ́ɔn kpó ná xá só ɔ́ jí. Amɔ̌, vɔ̌sánú-xwlémawutɔ́ lɛ́ɛ kpó togun ɔ́ kpó ní má syɛ́n ta bo wá ba nǔ do ó, é má nyí mɔ̌ ǎ ɔ́, un táá wa nǔ xá yě.” Bɔ Mɔyízi lɛ́ jɛ te yi togun ɔ́ gɔ́n, bó ɖɔ xó énɛ́ lɛ́ɛ nú yě. Énɛ́ ɔ́ gúdo ɔ́, Mawu ɖɔ xó élɔ́ lɛ́ɛ nú togun ɔ́; é ɖɔ: “Nyɛ wɛ nyí Mawu Mavɔmavɔ, Mawu towe e ɖe we tɔ́n sín Ejípu fí e a nyǐ kannumɔ ɖe é. Ma sɛn nǔ ɖěvo zɛ nyɛ wú ó. Ma kpa bǒcyɔ ó; ma ka kpa nǔ e ɖo jǐnukúnsin aga lɛ́ɛ, nǔ e ɖo ayǐkúngban jí ɖo do lɛ́ɛ, nǔ e ɖo sin mɛ ɖo ayǐkúngban glɔ́ lɛ́ɛ ɖě sín akpajlɛ́ ó. Ma jɛ kpo bo ɖe kɔ́ nú yě ó; ma sɛn yě ó, ɖó nyɛ Mawu Mavɔmavɔ, Mawu towe ɔ́, un nɔ ba gbeɖé ɖɔ a nǐ sɛn nǔ ɖěvo zɛ nyɛ wú ǎ; ényí mɛɖé gbɛ́ wǎn nú mì ɔ́, vǐ tɔn lɛ́ɛ ná sún sin tɔn, vǐvú tɔn lɛ́ɛ, vitikli tɔn lɛ́ɛ kpódó kpaba tɔn lɛ́ɛ kpó ná sún sin tɔn. Lo ɔ́, mɛ e yí wǎn nú mì bó nɔ nyi sɛ́n ce lɛ́ɛ ɔ́, un nɔ nyɔ́ xomɛ dó mɛ ɔ́ wú káká yi jijimɛ afatɔ́n. Ma zé nyɛ Mawu Mavɔmavɔ, Mawu towe ɔ́ sín nyǐkɔ dó da ayihún ó, ɖó nyɛ Mawu Mavɔmavɔ ɔ́ nɔ́ gɔn tó dɔn nú mɛ e ná zé nyǐkɔ ce dó da ayihún ná ɔ́ ǎ. Ma wɔn gbɔjɛzán ɔ́ ó, nɔ sɔ́ ɖó vo nú nyɛ Mawu Mavɔmavɔ. Azǎn ayizɛ́n wɛ ɖo te nú we ɖo aklúnɔzángbla ɖokpó mɛ, bɔ a nǎ dó wa azɔ̌ towe lɛ́ɛ bǐ ná. Lo ɔ́, azǎn tɛ́nwegɔ́ ɔ́, gbɔjɛzán wɛ; gbɔjɛzán ɔ́, nyɛ Mawu Mavɔmavɔ, Mawu towe ɔ́ tɔn wɛ. Ma wa azɔ̌ ɖěbǔ gbe énɛ́ ɔ́ gbe ó; vǐ towe súnnu kpó nyɔ̌nu kpó ɖě ní má wa azɔ̌ ó; mɛsɛntɔ́ towe súnnu kpó nyɔ̌nu kpó ɖě ní má wa ó; jǒnɔ e ɖo xwé towe gbe lɛ́ɛ ɖě ní má wa azɔ̌ ó. Kanlin towe lɛ́ɛ lɔmɔ̌ ní má wa azɔ̌ ó. Đó azǎn ayizɛ́n wɛ nyɛ Mawu Mavɔmavɔ ɔ́ zé ɖó te bó bló jǐnukúnsin kpó nǔ e ɖo jǐnukúnsin lɛ́ɛ bǐ kpó, ayǐkúngban kpó nǔ e ɖ'é jí lɛ́ɛ bǐ kpó, xu kpó nǔ e ɖ'é mɛ lɛ́ɛ bǐ kpó, bó gbɔjɛ́ azǎn tɛ́nwegɔ́ ɔ́ gbe. Nǔ e wú nyɛ Mawu Mavɔmavɔ ɔ́ xo ɖɛ dó gbɔjɛzán ɔ́ jí, bó sɔ́ ɖó vo ɔ́ nɛ́. Sí tɔ́ towe kpó nɔ towe kpó, énɛ́ ɔ́, a nǎ dɔ́ ji ɖo to e nyɛ Mawu Mavɔmavɔ, Mawu towe ná ná we ɔ́ mɛ. Ma hu mɛ ó. Ma lɛ aga ó. Ma ja ajo ó. Ma ɖe kúnnu agɔ dó nɔzo towe wú ó. Nukún towe ma nɔ nɔzo towe sín xwé wú ó; nukún towe má nɔ asi tɔn wú ó; nukún towe má nɔ mɛsɛntɔ́ tɔn súnnu wú ó; nukún towe má nɔ mɛsɛntɔ́ tɔn nyɔ̌nu wú ó; nukún towe má nɔ nyibú tɔn wú ó; nukún towe má nɔ tócí tɔn wú ó; nukún towe má nɔ nǔ e nyí étɔn lɛ́ɛ ɖěbǔ wú ó.” Togun Izlayɛ́li tɔn ɔ́ bǐ ɖo jǐ e ɖo gbe dó wɛ ɔ́ se wɛ bó ɖo lanzo sín gbe se wɛ. Yě mɛ bǐ mɔ jǐ e ɖo wun kɛ wɛ ɔ́ bó mɔ azɔ e tún wɛ só ɔ́ ɖe é. Ée togun ɔ́ mɔ nǔ énɛ́ lɛ́ɛ sɛ́ dó ɔ́, xɛsi jɛ jǐ tɔn, bɔ é jɛ sísɔ́sísɔ́ jí. Bó ɖɔ nú Mɔyízi ɖɔ: “Hwi ɖésúnɔ ní nɔ́ ɖɔ xó nú mǐ; mǐ ná ɖótó we. Mawu ɖésú ní má sɔ́ ɖɔ xó nú mǐ ɖě ó, é má nyí mɔ̌ ǎ ɔ́, mǐ táá kú.” Mɔyízi ka ɖɔ nú yě ɖɔ: “Mi ma ɖi xɛsi ó. Mawu jló ná dó mi kpɔ́n wú wɛ é sɛkpɔ́ mi; é jló ɖɔ mi ní ɖó sísí nú émí, bó má hu hwɛ ó.” Énɛ́ ɔ́, Izlayɛ́li ví lɛ́ɛ nɔ zɔ bɔ Mɔyízi sɛkpɔ́ akpɔ́kpɔ́ wiwi e mɛ Mawu ɖe é. Mawu Mavɔmavɔ ɖɔ nú Mɔyízi ɖɔ: “A nǎ ɖɔ nú Izlayɛ́li ví lɛ́ɛ ɖɔ nyɛ Mawu Mavɔmavɔ ɖɔ: ‘Mi mɔ din ɖɔ jǐxwé wɛ un nɔ bó ɖɔ xó nú mi. Mi ma sɔ́ kpatágan abǐ siká dó bló nǔmɛsɛn ɖě, bó sɛn gɔ́ nú mì ó. Mi ná nɔ sɔ́ kɔ́ dó mɛ vɔ̌sákpe ɖokpó nú mì, bó ná nɔ sá vɔ̌ e è nɔ dó zo lɛ́ɛ kpó kɔnɖókpɔ́ vɔ́ lɛ́ɛ kpó ɖ'é jí; mi ná nɔ zé gbɔ̌ mitɔn lɛ́ɛ kpó nyibú mitɔn lɛ́ɛ kpó dó sá vɔ̌ nú mì ɖ'é jí. Énɛ́ ɔ́, un sɔ́ fí ɖěbǔ ɖó vo nú mi, bónú mi ná nɔ́ sɛn mì ɖe ɔ́, un ná nɔ́ wá gɔ̌n mitɔn ɖo fínɛ́, bó ná xo ɖɛ dó mi jí. Amɔ̌, ényí mi ná zé awǐnnya dó mɛ vɔ̌sákpe ná nú mì hǔn, mi ma kpa awǐnnya lɛ́ɛ ó; ɖó nú alǐnnyánú jɛ awǐnnya ɔ́ wú hǔn, mi ɖu su n'i. Mi ma mɛ vɔ̌sákpe e è ɖǒ ná fán kpekán cóbó yi jí ɔ́ nú mì ó; é má nyí mɔ̌ ǎ ɔ́, è táá mɔ mɛ e xwe jí ɔ́ sín mɛ̌.’ ” Mawu Mavɔmavɔ lɛ́ ɖɔ nú Mɔyízi ɖɔ: “Sɛ́n e Izlayɛ́li ví lɛ́ɛ ná xwedó dó hɛn mɛsɛntɔ́ Eblée lɛ́ɛ, bɔ a nǎ ɖɔ nú yě ɔ́ ɖíe: Nú mi xɔ kannumɔ ɖé bɔ é nyí Eblée ɔ́, é ná wa azɔ̌ nú mi xɔ xwe ayizɛ́n; xwe tɛ́nwegɔ́ ɔ́, é ná jɛ éɖée sí, bó hɛn ɔ́, é ná yi. É ná sú axɔ́ ɖěbǔ ǎ. Nú kannumɔ ɔ́ ɖokpónɔ wɛ wá ɔ́, é ɖokpónɔ géé ná yi, nú é ká ko da asi có bó wá ɔ́, é kpódó asi tɔn kpó ná yi. Nú é ká nyí ɖɔ gǎn tɔn ɔ́ wɛ da asi n'i, bɔ asi ɔ́ ji vǐ súnnu abǐ nyɔ̌nu n'i ɔ́, asi ɔ́ kpódó vǐ lɛ́ɛ kpó ná nyí gǎn ɔ́ tɔn, bɔ éyɛ́ ɖokpónɔ ná yi. Lo ɔ́, nú kannumɔ ɔ́ ɖɔ bó tɛ ɖɛ̌ jí ɖɔ émí yí wǎn nú gǎn émítɔn, kpódó asi émítɔn kpó, kpódó vǐ émítɔn lɛ́ɛ kpó, bó má jló ná jó yě dó, bó ná jɛ yěɖée sí ǎ ɔ́, gǎn ɔ́ ná sɔ́ Mawu dó ɖó kúnnuɖetɔ́, bó ná sɔ́ nya ɔ́ ɖó hɔn tɔn wú, abǐ é ná sɔ́ ɛ ɖó hɔn tɔn sín kpo wú, bó ná sɔ́ swe dó tɔ́n tó n'i dó hɔn ɔ́ wú. Énɛ́ ɔ́, bɛ́ sín gbe énɛ́ ɔ́ gbe ɔ́, nya ɔ́ ná nyí mɛsɛntɔ́ tɔn káká sɔ́yi. “Nú súnnu ɖé ká sɔ́ vǐ tɔn nyɔ̌nu sa, bɔ é ná nyí kannumɔ ɔ́, nyɔ̌nu énɛ́ ɔ́ ná jɛ éɖée sí kannumɔ súnnu lɛ́ɛ ɖɔhun ǎ. Nú gǎn tɔn ɔ́, xɔ wɛ é xɔ ɛ, bó ná dó ɖó asi ná, bɔ nǔ tɔn má sɔ́ wá nyɔ́ nukún tɔn mɛ ǎ ɔ́, é ná lɛ́ sɔ́ ɛ sa xá nyɔ̌nu ɔ́ sín tɔ́; é ɖó acɛ bó ná sɔ́ ɛ sa xá to ɖěvo mɛ nu ǎ. Nú é wa mɔ̌ ɔ́, acɛ wɛ é gba wǔ tɔn. Nú é ká nyí vǐ tɔn ná zé jó ná wɛ é ɖe ɔ́, é ɖó ná hɛn ɛ lě e è nɔ́ hɛn vǐ mɛtɔn nyɔ̌nu gbɔn é. Nú gǎn ɔ́ da asi ɖěvo ɔ́, nǔ ɖěbǔ ná hwe sín nǔ e sín acɛ nyɔ̌nu nukɔntɔn ɔ́ ɖó lɛ́ɛ mɛ ǎ; é wɛ nyí: é ná nɔ́ ná ɛ nǔɖuɖu, é ná nɔ́ xɔ avɔ n'i, é ná nɔ́ ɖó xó xá ɛ. Nú é ma nɔ bló nǔ atɔn énɛ́ lɛ́ɛ n'i ǎ ɔ́, nyɔ̌nu ɔ́ sixú lɛ́ jɛ éɖée sí, é ka ná sú axɔ́ ɖěbǔ mɛɖé ǎ.” Mawu ɖɔ: “Nú mɛɖé xo mɛ hu ɔ́, è ɖó nǎ hu mɛ ɔ́, nú é má ká nyí é ɖésúnɔ wɛ jló bó hu mɛ ǎ, bɔ ényí nyɛ Mawu wɛ yí gbe ná bɔ é jɛ ɔ́, un ná xlɛ́ fí ɖé mi, bɔ mɛ e hu mɛ ɔ́ ná hɔn yi cí. Amɔ̌, nú mɛɖé tunwun, lobo sɔ́ sísɛ́ ɖó nukɔn bó hu mɛ ɔ́, nú mɛ énɛ́ ɔ́ ná bo hɔn yi cí vɔ̌sákpe ce kpá ɔ́, mi ná yi dɔn ɛ tɔ́n, bó hu i. “Mɛ e ná xo tɔ́ tɔn abǐ nɔ tɔn ɔ́, è ɖǒ ná hu i. “Mɛ e ná fin gbɛtɔ́ ɔ́, è nǎ hu i; é sixú nyí sa wɛ è ko yi sa, é ká sixú hɛn ɛ ɖó xwé tɔn gbe, è ɖǒ ná hu i. “Mɛ e dó nu tɔ́ tɔn abǐ nɔ tɔn ɔ́, è ɖǒ ná hu i.” Mawu ɖɔ: “Nú mɛ ɖé lɛ́ɛ ɖo jlɛ ɖɔ wɛ, bɔ mɛ ɖokpó dó awǐnnya abǐ akpotokwín mɛ ɖě ɔ́, bɔ mɛ e è dǒ nǔ ɔ́ má kú ǎ, bó ká jɛ xɔ ɔ́, ényí é sixú sí te bó zé kpo bo ɖi sa jɛ kɔ́xo ɔ́, è nǎ wa nǔɖé nú mɛ e dó nǔ i ɔ́ ǎ. Amɔ̌, azǎn nabí e mɛ e é dó nǔ ɔ́ ná nɔ xɔ mɛ xɔ, bó má sɔ́ ná sixú wa nǔɖé ǎ ɔ́, é ná sú xɔ e é jɛ ɔ́ sín axɔ́ ɛ, bó ná lɛ́ ná akwɛ́ ɛ, bɔ é ná dó kpé nukún dó wǔ tɔn káká bɔ azɔn tɔn ná gbɔ. “Nú gǎn ɖé sɔ́ kpo dó xo kannumɔ tɔn súnnu abǐ nyɔ̌nu bɔ é kú ɔ́, è ɖǒ ná ba hlɔn n'i. Nú kannumɔ ɔ́ ká nɔ gbɛ gbe ɖokpó abǐ azǎn we ɔ́, è sɔ́ ɖó ná ba hlɔn n'i ǎ, ɖó étɔn wɛ é nyí. “Ényí ɖɔ mɛɖé lɛ́ɛ ɖo jlɛ ɖɔ wɛ, bó xo za nú nyɔ̌nu xoxónɔ ɖé, bɔ nyɔ̌nu ɔ́ gblé xo, nú nǔ nyanya ɖé má sɔ́ wa ɛ ǎ ɔ́, yě ná yi ɖɔ xó ɔ́ ɖo hwɛɖɔtɔ́ gɔ́n, é jló asisúnɔ ɔ́, é ná byɔ́ akwɛ́ ɖé, nú hwɛɖɔtɔ́ ɔ́ yí gbe ná ɔ́, mɛ e dó nǔ ɔ́ sin ɔ́ ná sú. Lo ɔ́, nú nǔ nyanya ɖé wa nyɔ̌nu ɔ́, è nǎ dɔn tó nú mɛ e dó nǔ ɔ́ sin ɔ́, lě e sɛ́n ɔ́ zɔ́n gbɔn é wɛ nyí ɖɔ: a hu mɛ ɔ́, è nǎ hu we. A tɔ́n nukún mɛ ɔ́, è nǎ tɔ́n nukún we. A sún aɖǔ mɛ ɔ́, è nǎ sún aɖǔ we; a wɛ̌n alɔ mɛ ɔ́, è nǎ wɛ̌n alɔ we; a wɛ̌n afɔ mɛ ɔ́, è nǎ wɛ̌n afɔ we. A sí myɔ mɛ ɔ́, è nǎ sí myɔ we; a gblě wǔ mɛ ɔ́, è nǎ gblé wǔ we; a dǒ nǔ mɛ ɔ́, è nǎ dǒ nǔ we. “Nú mɛɖé xo kannumɔ tɔn súnnu abǐ nyɔ̌nu, bó gba nukún i ɔ́, é ná jó kannumɔ ɔ́ dó bɔ é ná jɛ éɖée sí; nǔ énɛ́ ɔ́ e é wa ɔ́ wɛ ná nyí axɔ́ e é ná sú é. Ényí aɖǔ wɛ é sún kannumɔ ɔ́, é ná jó kannumɔ ɔ́ dó bɔ é ná jɛ éɖée sí; nǔ énɛ́ e é ná wa ɔ́ wɛ ná nyí axɔ́ e ná sú é. “Nú nyibú ɖé sɔ́ zo súnnu ɖé abǐ nyɔ̌nu ɖé bɔ é kú ɔ́, è ɖǒ ná nyi hwǎn dó hu nyibú ɔ́ ná, è ka ná ɖu lan tɔn ǎ, è ka ná wa nǔɖé nú nyibúnɔ ɔ́ ǎ. Amɔ̌, nú ényí ɖɔ mɔ̌ wɛ nyibú ɔ́ kó nɔ́ bló, bɔ è ko nɔ ɖɔ nú nyibúnɔ ɔ́, bɔ éyɛ́ má ké ya ná ǎ, bɔ nyibú ɔ́ hu mɛ ɔ́, è nǎ nyi hwǎn dó hu nyibú ɔ́, bó ná hu mɛ e ɖó e ɔ́ lɔmɔ̌. Nú è ka mɔ ɖɔ nyibúnɔ ɔ́ ná ná akwɛ́ ɖé, bó ná dó xɔ gbɛ nú éɖée ɔ́, é ná ná akwɛ́ e è byɔ́ ɛ ɔ́ bǐ dandan. Nú nyibú ɔ́ sɔ́ zo súnnuví ɖé abǐ nyɔ̌nuví ɖé bɔ é kú ɔ́, sɛ́n ɖokpó énɛ́ ɔ́ wɛ è nǎ dó wa azɔ̌ ná. Nú é ká nyí ɖɔ kannumɔ súnnu abǐ nyɔ̌nu ɖé wɛ nyibú ɔ́ sɔ́ zo bɔ é kú ɔ́, nyibúnɔ ɔ́ ɖó ná sú gankwɛ́ gban (30) kannumɔ ɔ́ sín gǎn; è ka ná nyi hwǎn dó hu nyibú ɔ́. “Nú mɛɖé hun tɔ tɔn nyi nuvo, abǐ è kun, bó má sɔ́ nusú ɖ'é nu ǎ, bɔ nyibú abǐ tócí ɖé jɛ mɛ ɔ́, mɛ e tɔn nyí tɔ ɔ́ ná sú kanlin e jɛ tɔ ɔ́ mɛ ɔ́ sín axɔ́ kanlinnɔ ɔ́; kanlin kúkú ɔ́ ká ná húzú étɔn. “Nú nyibú mɛɖé tɔn sɔ́ zo mɛ ɖě ɔ́ tɔn bɔ é kú ɔ́, è nǎ sa nyibú e ɖo gbɛ ɔ́, bɔ nyibúnɔ we lɛ́ɛ ná má akwɛ́ tɔn, bó ná lɛ́ má nyibú e kú ɔ́. Nú é ká nyí ɖɔ mɔ̌ wɛ nyibú ɔ́ kó nɔ́ bló, bɔ nyibúnɔ ɔ́ má ká nɔ́ kpé nukún wǔ tɔn ǎ ɔ́, è nǎ zé nyibú gbɛɖe ɔ́ dó ɖyɔ́ éé kú ɔ́ ná; énɛ́ ɔ́, nyibú e kú ɔ́ ná húzú étɔn.” Mawu ɖɔ: “Mǐ nǐ ɖɔ mɛɖé fin nyibú, abǐ lɛ̌ngbɔ́ bó hu, abǐ é sa; ényí nyibú ɖokpó wɛ é fin ɔ́, é ná ná nyibú atɔn dó sú axɔ́; é ka nyí lɛ̌ngbɔ́ ɖokpó wɛ é fin ɔ́, é ná ná lɛ̌ngbɔ́ ɛnɛ dó sú axɔ́.” “Nú è gbo ajotɔ́ dó bɔ é ɖo dǒ tɔ́n wɛ, abǐ é ɖo hɔn fó wɛ zǎn mɛ, bɔ è dǒ nǔ i bɔ é kú ɔ́, kú tɔn ɖo kɔ nú mɛ e hu i ɔ́ ǎ. Nú é ká nyí ɖɔ kéze wɛ nǔ énɛ́ ɔ́ jɛ ɔ́, kú tɔn ɖo kɔ nú mɛ e hu i é. Nú mɛ ɖé ja ajo ɔ́, é ɖó ná sú nǔ e é fin ɔ́ sín axɔ́ mɛ e é ja ajo dó ɔ́; nú é má ká ɖó nǔɖé bó ná sú axɔ́ ɔ́ ná ǎ ɔ́, è nǎ sɔ́ ɛ sa, ɖó ajo e é ja ɔ́ nu. “Nú kanlin wɛ é fin bɔ é kpo ɖo gbɛ ɔ́, é ɖó ná zé kanlin ɔ́ jó, bó ná lɛ́ zé mɔ̌hunkɔtɔn ɖokpó gɔ́ ná dó sú axɔ́ tɔn ná. É sixú nyí nyibú abǐ tócí abǐ gbɔ̌.” Mawu ɖɔ: “Mǐ ní ɖɔ mɛ ɖé jó kanlin tɔn lɛ́ɛ dó, bɔ yě yi ɖu nǔ ɖo mɛ ɖě ɔ́ sín gle mɛ abǐ vǐwungbo tɔn mɛ, bó hɛn nǔ tɔn lɛ́ɛ gblé; nú nǔ nyí mɔ̌ ɔ́, kanlinnɔ ɔ́ ɖó ná sɔ́ nǔkún e nyɔ́ hú ɖě lɛ́ɛ bǐ ɖo gle tɔn mɛ abǐ vǐwungbo tɔn mɛ lɛ́ɛ dó sú nǔ e kanlin lɛ́ɛ hɛn gblé lɛ́ɛ sín axɔ́. “Mǐ nǐ ɖɔ mɛɖé ɖo zunkan dó zo wɛ, bɔ myɔ ɔ́ yi fyɔ́ blěe e mɛ ɖě ɔ́ kplé ɖó kpɔ́ lɛ́ɛ, abǐ éé kpo ɖo te lɛ́ɛ, abǐ gle ɔ́ bǐ; nú nǔ nyí mɔ̌ ɔ́, mɛ e dó zunkan zo ɔ́ ɖó ná sú mɛ ɖě ɔ́ sín nǔ e fyɔ́ lɛ́ɛ bǐ sésé sín axɔ́. “Nú è sɔ́ akwɛ́ abǐ nǔɖé ɖó mɛ ɖé gɔ́n, bɔ ajotɔ́ wá fin ɖo mɛ ɔ́ sín xwé gbe ɔ́, nú è wlǐ ajotɔ́ ɔ́, é ɖó nǎ zé nǔ e é fin ɔ́ we dó sú axɔ́ ná. Nú è ma ka wlí ajotɔ́ ɔ́ ǎ ɔ́, mɛ e gɔ́n è bɛ̌ nǔ lɛ́ɛ ɖó ɔ́ ná sɔ́ Mawu dó ɖó kúnnuɖetɔ́ ná, bó ná zin alɔ dó akɔ́n ɖɔ é kún nyí émí wɛ sɔ́ ó. Nú mɛ we ɖo nǔ dɔn wɛ ɖó nyibú, tócí, lɛ̌ngbɔ́ abǐ gbɔ̌ yǎyá, awu ɖaxó abǐ nǔ e bú ɔ́ ɖěbǔ wútu ɔ́, yě mɛ we e ɖo kanlin ɔ́ abǐ nǔ ɔ́ hwlɛ́n wɛ lɛ́ɛ ɖó ná sɔ́ Mawu dó ɖó kúnnuɖetɔ́ ná. Énɛ́ ɔ́, nú mɛɖé wɛ ɖo nǔvú ɖó wɛ bɔ Mawu ɖe xlɛ́ ɔ́, mɛ ɔ́ ɖó ná zé nǔ e hwlɛ́n wɛ yě ɖe ɔ́ we dó sú axɔ́ mɛ ɖě ɔ́. “Mǐ ní ɖɔ mɛɖé zɔ́n tócí, abǐ nyibú, abǐ lɛ̌ngbɔ́, abǐ gbɔ̌ yǎyá, abǐ kanlin ɖěbǔ hɛn mɛɖé bɔ é kú, abǐ é wɛ́n afɔ abǐ ajotɔ́ lɛ́ɛ wá fin, bɔ mɛ ɖé ka mɔ mɛ e fin lɛ́ɛ ǎ; nú nǔ nyí mɔ̌ ɔ́, mɛ e è zɔ̌n nǔ ɔ́ hɛn ɔ́ ɖó ná ɖɔ ɖo Mawu Mavɔmavɔ nukɔn ɖɔ é kún nyí émí wɛ sɔ́ ó. Mɛ e zɔ́n kanlin hɛn mɛ ɔ́ ná ɖi nǔ nú xó énɛ́ ɔ́; mɛ e è zɔ̌n kanlin hɛn ɔ́ ká ná sú axɔ́ ɖěbǔ ǎ. Nú é ká nyí gɔ̌n tɔn wɛ è fin kanlin ɔ́ ɖe ɔ́, é ɖó ná sú axɔ́ tɔn kanlinnɔ ɔ́. Nú é ká nyí ɖɔ gběkanlin ɖé wɛ wlí kanlin ɔ́ bó ɖu kpo ɔ́, mɛ ɔ́ ɖó ná zé kanlin e kpo ɔ́ wá xlɛ́ kanlinnɔ ɔ́; énɛ́ ɔ́, é ná sú axɔ́ ɖě ǎ. “Nú mɛ ɖé hwé kanlin ɖé nú nɔzo tɔn, bɔ kanlinnɔ ɔ́ ɖo fínɛ́ ǎ, bɔ kanlin ɔ́ wɛ́n afɔ abǐ é kú ɔ́, mɛ e è hwě kanlin ɔ́ ná ɔ́ ɖó ná sú kanlin ɔ́ sín axɔ́. Nú kanlinnɔ ɔ́ ká ɖo fínɛ́ ɔ́, mɛ ɔ́ ná sú axɔ́ ɖě ǎ. Nú é ká nyí ɖɔ é xáya kanlin ɔ́ wɛ ɔ́, axɔ́ e é ná sú ɔ́ kó ɖo akwɛ́ e é dó xáya kanlin ɔ́ ná ɔ́ mɛ.” Mawu ɖɔ: “Nú súnnu ɖé ɖɔ xó víví nú nyɔ̌nu e ɖo alɔ jí bó má kó ɖó xɔ́ntɔn ǎ é, bó ɖó xó xá ɛ ɔ́, súnnu ɔ́ ɖó ná ná agban nú vǐ ɔ́, bó ná da. Nú vǐ tɔ́ ɔ́ ká gbɛ́ bǐ ɖɔ émí kún ná ná ɛ vǐ ɔ́ ó ɔ́, é ná ná agban e è nɔ ná nú nyɔ̌nu ɖo alɔ jí ɔ́ sín akwɛ́ dó sú axɔ́. “Mi ɖó ná jó nyɔ̌nu azětɔ́ dó nyi gbɛ ǎ. Mɛ e nɔ ɖó xó xá kanlin ɔ́, mi ɖó ná hu i. Mɛ e ma nɔ xwlé vɔ̌sánú Mawu Mavɔmavɔ ɔ́ kɛ́ɖɛ́ ǎ, lobo nɔ lɛ́ xwlé vodún lɛ́ɛ ɔ́, è ɖǒ ná sú kún tɔn dó. “Mi ɖó ná dó ya nú toɖévomɛnu e ɖo to mitɔn mɛ ɔ́ ǎ, mi ma táfú i ó; mi flín ɖɔ émí lɔ ko nyí jǒnɔ ɖo Ejípu mɛ ɖěvo to mɛ kpɔ́n. Mi ma dó akpɔ nú asúkúsi lɛ́ɛ lɔ ó, mi ma dó akpɔ nú tɔ́cyɔvǐ nɔcyɔvǐ lɛ́ɛ lɔ ó. Nú mi dó akpɔ nú yě ɔ́, yě ná sú xó ylɔ́ mì; un ka ɖó ná yí gbe nú yě. Xomɛ ná sin mì, bɔ un ná hu mi ɖo ahwangbénu; énɛ́ ɔ́, asi mitɔn lɛ́ɛ ná húzú asúkúsi, bɔ vǐ mitɔn lɛ́ɛ ná húzú tɔ́cyɔvǐ nɔcyɔvǐ. “Nú mi nya akwɛ́ nú mɛɖé ɖo togun ce mɛ, wamamɔnɔ e ɖo kpɔ́ xá mi ɔ́ ɖě hǔn, mi ma wa nǔ xá ɛ akwɛ́satɔ́ lɛ́ɛ ɖɔhun ó; mi ma yí akwɛ́ví ó. “Nú mi yí nɔzo mitɔn sín awu ɖaxó ɔ́ ɖó gbanu hǔn, mi lɛ́ sɔ́ jó n'i có bónú hwe ní yi xɔ; ɖó awu ɖokpó géé énɛ́ ɔ́ wɛ é ɖó bó ná dó, nú é ká ba kpo ɔ́, ani wɛ é ná dó bó mlɔ́ ayǐ? É ná sú xó ylɔ́ mì ɖɔ nyɛ ní d'alɔ émí, bɔ un ka ná yí gbe n'i, ɖó mɛ nú nɔ́ blá wǔ nú mì. “Mi ɖó ná nylá nu dó Nyɛ Mawu mitɔn ǎ, mi ka ɖó ná dó nu togán mitɔn ǎ. “Nǔkún e mi ya lɛ́ɛ kpódó vǐwun e mi gbɛ lɛ́ɛ kpó ɔ́, mi ná zé éé nyí ce lɛ́ɛ wá nú mì, mi ma ɖó hwenu ná ó; mi ná nukɔngbéví mitɔn lɛ́ɛ mì. “Vǐ nukɔntɔn e nyibú, abǐ lɛ̌ngbɔ́, abǐ gbɔ̌ yǎyá ná ji ɔ́, è ɖǒ ná jó e dó nyi nɔ tɔn kɔn nú azǎn tɛ́nwe; azǎn tántɔngɔ́ ɔ́ gbe ɔ́, è nǎ sɔ́ ɛ ná mì. “Nyɛ ɖokpónɔ géé tɔn wɛ mi ná nyí; hǔn mi ɖó ná ɖu kanlin e gběkanlin lɛ́ɛ vún lan tɔn ɖu kpo ɔ́ ǎ; mi zé nyi dó cukú lɛ́ɛ.” Mawu ɖɔ: “Mi má dó funfún to mɛ ó. Mi ma ɖe kúnnu agɔ dó nɔ nǔnyanyawatɔ́ jí ó. Mi ma kpɔ́n ɖɔ mɛ e ɖo nǔ nyanya wa wɛ lɛ́ɛ sukpɔ́, bó wa nǔ yě ɖɔhun ó. Nú è ɖo hwɛ ɖɔ wɛ hǔn, mi ma kpɔ́n ɖɔ mɛ e ɖo bɔnyijí ɖɔ wɛ lɛ́ɛ sukpɔ́, bó nɔ yě jí ó. Nú è ɖo hwɛ ɖɔ wɛ hǔn, mi ma nɔ mɛɖé jí ó; mɛ ɔ́ ná bó nyí wamamɔnɔ hǔn, mi ma nɔ jǐ tɔn ó. “Ényí kɛntɔ́ towe sín nyibú bú abǐ tócí tɔn bú bɔ a mɔ ɔ́, a ɖǒ ná kplá yi jó n'i. Nú a mɔ kɛntɔ́ towe kpó tócí tɔn kpó, bɔ tócí tɔn ɔ́ ɖo ayǐ jɛ wɛ ɖo agban e é dó n'i ɔ́ glɔ́ hǔn, ma ɖe kɔ dó ó; dǒ alɔ ɛ bónú é ní fɔ́n ɛ sí te. “Mi ma táfú wamamɔnɔ e ɖo to mitɔn mɛ lɛ́ɛ ɖo hwɛ nukɔn ó. Ma dó hwɛ mɛ dó acɛ jí ó, ma hu xomɛvɔ́nɔ, abǐ hwɛjijɔnɔ ó; ɖó mɛ e gba acɛ mɔ̌ ɔ́, nyɛ nɔ mɔ ɛ dó mɔ xomɛvɔ́nɔ ǎ. Ma ɖu kpa ó, ɖó nú è ɖu kpa ɔ́, nukún mɛtɔn nɔ ɖo te có è nɔ tɔ́n nukún. Kpaɖuɖu ɔ́, xó gblégblé wɛ é nɔ́ sɔ́ dó nu mɛ nú mɛ e nɔ ɖɔ nǔgbó é. “Mi ma dó ya nú toɖévomɛnu e ɖo to mitɔn mɛ lɛ́ɛ ó; mi tunwun nǔ e nɔ gbo toɖévomɛnu é; mi flín ɖɔ émí lɔ ko nyí jǒnɔ ɖo Ejípu, mɛ ɖěvo to mɛ kpɔ́n.” “Mi ná nɔ́ lɛ gle mitɔn, bó ná nɔ́ ya nǔ e mi dó ɖ'é jí lɛ́ɛ xɔ xwe ayizɛ́n. Amɔ̌, xwe tɛ́nwegɔ́ ɔ́ mɛ ɔ́, mi ná jó gle lɛ́ɛ dó bǐ, mi ná lɛ ǎ. Hwe énɛ́ ɔ́ nu ɔ́, wamamɔnɔ e ɖo to mitɔn mɛ lɛ́ɛ ná mɔ nǔkúnflá lɛ́ɛ ɖu, bɔ gběkanlin lɛ́ɛ ná ɖu ée ná kpo ɔ́. Mɔ̌ ɖokpó ɔ́, mi ná lɛ́ jó vǐwungbo mitɔn lɛ́ɛ kpódó olívugbo mitɔn lɛ́ɛ kpo dó xwe énɛ́ ɔ́ xwe. “Mi ná wa azɔ̌ nú azǎn ayizɛ́n ɖo Mawu Mavɔmavɔ zán gbla ɔ́ mɛ; amɔ̌, azǎn tɛ́nwegɔ́ ɔ́ gbe ɔ́, mi ná gbɔjɛ́, bɔ nyibú mitɔn kpó tócí mitɔn kpó ná gbɔjɛ́, bɔ kannumɔ kpó toɖévomɛnu kpó ná mɔ agbɔ̌n. “Mi xwedó nǔ e un ɖɔ nú mi ɔ́ bǐ sésé; mi ma sɛn nǔ ɖěvo gbeɖé ó, è ma se nyǐkɔ yětɔn ɖo nu mitɔn vɔ́vɔ́ ó.” Mawu ɖɔ xwe atɔn wɛ mi ná nɔ́ ɖu ɖo xwe ɖokpó mɛ dó kpa susu nú mì. Xwe nukɔntɔn e mi ná ɖu ɔ́ wɛ nyí wɔ̌xúxú e mɛ è ma dó tɔ́n ǎ sín xwe. Mi ná ɖu wɔ̌xúxú e mɛ è ma dó tɔ́n ǎ, xɔ azǎn tɛ́nwe, ɖo Abibu sun ɔ́ mɛ, hwenu e un ɖó nú mi dó é, lě e un ɖɔ nú mi gbɔn ɔ́; ɖó sun énɛ́ ɔ́ mɛ wɛ mi gosín Ejípu. Mi ka ná wá gɔ̌n ce asígbá alɔgbá ǎ. Énɛ́ ɔ́ gúdo ɔ́, mi ná ɖu nǔkún-yiya sín xwe, hwenu e mi ná ya nǔkún nukɔntɔn e nyɔ́ ɖo gle mitɔn jí é. Mɔ̌ ɖokpó ɔ́, mi ná ɖu nǔkún dó agɔ̌ sín xwe, hwenu e mi ná gbɛ atínsínsɛ́n e ɖo gle mitɔn mɛ lɛ́ɛ fó dó ɖo xwe fífó ɔ́. Hǔn xwewú xwewú ɔ́, súnnu e ɖo togun mitɔn mɛ lɛ́ɛ bǐ ná nɔ́ wá nyɛ Mawu Mavɔmavɔ, Mawu mitɔn nukɔn azɔn atɔn. Kanlin e mi ná dó sá vɔ̌ nú mì ɔ́, mi ma hɛn wɔ̌xúxú e mɛ è dǒ tɔ́n ɔ́ dó jǐ tɔn ó. Ayǐ ká ná hɔ́n dó kanlin e è dǒ sá vɔ̌ nú mì ɔ́ sín jǒ ǎ. Nyɛ wɛ nyí Mawu Mavɔmavɔ, Mawu mitɔn; énɛ́ ɔ́ wú ɔ́, mi ná zé nǔ nukɔntɔn e gle mitɔn lɛ́ɛ ná ɔ́ wá xwé ce gbe. Mi ka ná ɖa gbɔ̌ví ɖo nɔ tɔn sín anɔ̌sin mɛ ǎ. Mawu lɛ́ ɖɔ: “Mi ɖótó, un ná sɛ́ wɛnsagun ɖokpó dó bɔ é ná nɔ nukɔn nú mi, é ná nya xɛ ɖo jǐ mitɔn ɖo alixo, bó ná kplá mi yi to e un blóɖó ɖ'ayǐ nú mi ɔ́ mɛ. Mi nɔ sí i, bó nɔ́ se tónú n'i; mi ma gbɛ́ gbe n'i ó, mi fɔ́n gǔ do jǐ tɔn ɔ́, é ná sɔ́ kɛ mi ǎ, ɖó nyǐkɔ ce mɛ wa azɔ̌ dó wɛ é ɖe. Lo ɔ́, nú mi se tónú n'i, bó bló nǔ e un ná ɖɔ nú mi lɛ́ɛ bǐ ɔ́, un ná nyí kɛntɔ́ mitɔn lɛ́ɛ sín kɛntɔ́, un ná li za xá mɛ e ɖo za li xá mi wɛ lɛ́ɛ. “Wɛnsagun ce ná nɔ nukɔn nú mi, bó ná kplá mi yi Amɔliti ví lɛ́ɛ, Hitíti ví lɛ́ɛ, Pɛliziti lɛ́ɛ, Kanáa ví lɛ́ɛ, Hivíti lɛ́ɛ kpódó Jebuzinu lɛ́ɛ kpó sín to mɛ, bɔ un ná sú kún yětɔn dó. Mi ma jɛ kpo nú vodún yětɔn lɛ́ɛ ó, mi ma sɛn vodún yětɔn lɛ́ɛ ó, mi ma wa nǔ yě ɖɔhun ó. Lo ɔ́, mi ná gba vodún yětɔn lɛ́ɛ, bó ná gba awǐnnya e yě nɔ́ tun te bó nɔ́ sɛn lɛ́ɛ. Nyɛ Mawu Mavɔmavɔ, Mawu mitɔn wɛ mi ná sɛn; énɛ́ ɔ́, un ná ná nǔɖuɖu mi, bó ná ná sin mi, bó ná hwlɛ́n mi ɖo azɔn sí. Nyɔ̌nu ɖé sɔ́ ná nɔ́ gblé xo ɖo to mitɔn mɛ ǎ; nyɔ̌nu ɖé ká ná nyí wɛnsinɔ ɖo to mitɔn mɛ ǎ. Un ná ná jidɔ́ mi. “Un ná dó xɛsi to lɛ́ɛ bǐ káká bɔ mi byɔ́ to ɖěbǔ mɛ ɔ́, mɛ e ɖo to ɔ́ mɛ lɛ́ɛ bǐ ná hɔn gbadó, un ná bló bɔ kɛntɔ́ mitɔn lɛ́ɛ bǐ ná hɔn ɖo nukɔn mitɔn. Un ná sɛ́ gbɔ̌nvɛ dó bɔ yě ná jɛ nukɔn mitɔn, bó ná nya Hivíti lɛ́ɛ, Kanáa ví lɛ́ɛ kpódó Hitíti lɛ́ɛ kpó dó zɔ nú mi. É ká nyí ɖɔ xwe ɖokpó ɔ́ mɛ wɛ un ná nya togun énɛ́ lɛ́ɛ bǐ dó zɔ nú mi ǎ. Nú un bló mɔ̌ ɔ́, to ɔ́ ná jɛ vɔ̌, bɔ gběkanlin lɛ́ɛ ná wá gba kún ɖo to ɔ́ mɛ, bó ná sukpɔ́, lobo ná wá wa nǔ dó mi wú. Kpɛɖé kpɛɖé wɛ un ná ɖo yě nya wɛ, bɔ midɛɛ lɛ́ɛ ná ɖo kpɔ́ su d'é jí wɛ, káká bó ná yí to ɔ́ bǐ. Bɔ un ná ɖó dogbó nú mi, sín Xu Vɔvɔ ɔ́ tó, káká yi Mɛditɛlanɛ́ɛ xu ɔ́ tó; dogbó mitɔn ná lɛ́ bɛ́ sín gbětótló mɛ, káká yi Efláti tɔ ɔ́ tó. Đó un ná jó to ɔ́ mɛ nu lɛ́ɛ nú mi, bɔ mi ná nya yě. Mi ná jɛ akɔ xá yě ǎ, mi ka ná jɛ xá vodún yětɔn lɛ́ɛ ǎ. Mi ná lɔn bɔ yě ná nɔ to mitɔn mɛ ǎ, yě táá wá dɔn mi, bónú mi ná hu hwɛ dó mì. Mi táá wá sɛn vodún yětɔn lɛ́ɛ, bɔ é ká ná nyí mɔ nú mi.” Mawu Mavɔmavɔ ɖɔ nú Mɔyízi ɖɔ: “Wǎ gɔ̌n ce ɖo só ɔ́ jí; hwi kpó mɛ e ná wá lɛ́ɛ kpó ɖíe: Aalɔ́ɔn, Nadavu, Avihu, kpódó tomɛxó Izlayɛ́li tɔn kanɖé gban (70) kpó. Mi ná nɔ zɔ bó ná ɖe kɔ́ nú mì. Mɔyízi, hwɛ ɔ́, hwi ɖokpónɔ géé ná sɛkpɔ́ mì, mɛ ɖě lɛ́ɛ ɖě ní má sɛkpɔ́ mì ó; togun ɔ́ ní má ká xwedó mi wá só ɔ́ jí ó.” Mɔyízi yi wlí nǔ e Mawu Mavɔmavɔ ɖɔ n'i lɛ́ɛ bǐ ɖɔ nú togun ɔ́; yě ká ɖó gbe kpɔ́, bó yí gbe ɖɔ: “Mi ná bló nǔ e Mawu Mavɔmavɔ ɖɔ ɔ́ bǐ.” Mɔyízi wlán nǔ e Mawu Mavɔmavɔ ɖɔ n'i lɛ́ɛ bǐ. Ayǐhɔ́ngbe tɔn ɔ́, é fɔ́n zǎn, bó bló vɔ̌sákpe ɖokpó ɖó só ɔ́ kpá, bó fɔ awǐnnya wěwe tun te nyi fínɛ́. Awǐnnya lɛ́ɛ ɖokpó ɖokpó nyi Izlayɛ́li sín akɔta wěwe lɛ́ɛ ɖokpó ɖokpó tɔn. Énɛ́ ɔ́ gúdo ɔ́, é ɖɔ nú dɔ̌nkpɛvú Izlayɛ́li tɔn lɛ́ɛ ɖɔ yě ní wá xwlé vɔ̌sánú e è nɔ dó zo ɔ́ Mawu Mavɔmavɔ ɖo fínɛ́, lobo xwlé nyibúsú lɛ́ɛ, dó sá kɔnɖókpɔ́ vɔ́ n'i. Mɔyízi kɔn kanlin e è hu lɛ́ɛ sín hun vlɔ̌ dó gannú mɛ gannú mɛ, bó mi vlɔ̌ e kpo ɔ́ dó vɔ̌sákpe ɔ́ wú. Énɛ́ ɔ́ gúdo ɔ́, é zé akɔjijɛwéma ɔ́, bó zé gbe dó jǐ, lobo xa nú togun ɔ́, bɔ yě ɖɔ: “Mǐ ná bló nǔ e Mawu Mavɔmavɔ ɖɔ lɛ́ɛ bǐ, mi ná se tónú n'i.” Ée yě ɖɔ mɔ̌ ɔ́, Mɔyízi mi hun e é kɔn dó gannú mɛ lɛ́ɛ dó togun ɔ́ wú bó ɖɔ: “Mi ɖótó! Hun élɔ́ wɛ sɔ́ akɔ e Mawu Mavɔmavɔ ɖɔ xó nú mi bó dó jɛ xá mi ɔ́ sín afɔ ɖó te.” Énɛ́ ɔ́ gúdo ɔ́, Mɔyízi xá só ɔ́ jí; é kpódó Aalɔ́ɔn, kpó Nadavu, kpó Avihu, kpódó tomɛxó Izlayɛ́li tɔn kanɖé gban (70) lɛ́ɛ kpó. Yě mɔ Mawu Izlayɛ́li tɔn ɔ́. Awǐnnya fɛ́sinnɔ kpaba kpaba safíi ɖɔhun ɖé ɖo afɔ tɔn lɛ́ɛ glɔ́. Mawu ká wa nǔ nyanya ɖěbǔ nú tonukún Izlayɛ́li tɔn nɛ́ lɛ́ɛ ǎ; yě mɔ ɛ ganjí, bó ɖu nǔ, bó nu ahan. Mawu Mavɔmavɔ ɖɔ nú Mɔyízi ɖɔ: “Sɛ wá akpá ce ɖo só ɔ́ jí, bó nɔ fínɛ́, bónú má zé awǐnnyatɛ e jí un wlán sɛ́n lɛ́ɛ dó ɔ́ nú we, nú a nǎ kplɔ́n Izlayɛ́li ví lɛ́ɛ.” Énɛ́ ɔ́, Mɔyízi sɔ́ nǔ, bó ná yi só Mawu tɔn ɔ́ jí, éé kpódó Jozuwée e nɔ wa azɔ̌ xá ɛ ɔ́ kpó. Cóbónú yě ná yi ɔ́, Mɔyízi ɖɔ nú tomɛxó lɛ́ɛ ɖɔ: “Mi nɔ te kpɔ́n mǐ ɖo fí káká bónú mǐ ná lɛ́ kɔ wá. Aalɔ́ɔn kpó Húu kpó ná nɔ fí xá mi; nú mɛɖé ɖó xó ɖé ɔ́, ní mɔ yě.” Ée Mɔyízi ɖɔ mɔ̌ ɔ́, é xá só ɔ́ jí bɔ akpɔ́kpɔ́ cyɔ́n só ɔ́. Énɛ́ ɔ́, susu Mawu Mavɔmavɔ tɔn nɔ Sinayíi só ɔ́ jí, bɔ akpɔ́kpɔ́ cyɔ́n só ɔ́ káká nú azǎn ayizɛ́n. Azǎn tɛ́nwegɔ́ ɔ́ gbe ɔ́, Mawu Mavɔmavɔ nɔ akpɔ́kpɔ́ tɛ́ntin, bó ylɔ́ Mɔyízi. Izlayɛ́li ví lɛ́ɛ mɔ susu Mawu Mavɔmavɔ tɔn; é cí myɔ e ɖo jiji wɛ ɔ́ ɖɔhun, ɖo só ɔ́ jí. Lo ɔ́, Mɔyízi ɔ́, éyɛ́ byɔ́ akpɔ́kpɔ́ ɔ́ mɛ, ɖo só ɔ́ jí, bó ɖo yiyi wɛ. É nɔ só ɔ́ jí xɔ kéze kanɖé (40), zǎn kanɖé (40). Mawu Mavɔmavɔ ɖɔ nú Mɔyízi ɖɔ: “Đɔ nú Izlayɛ́li ví lɛ́ɛ ɖɔ yě ní hɛn nǔ wá ná mì. Mɛ e ɖó jlǒ bó hɛn nǔ wá nú mì lɛ́ɛ sí wɛ mi ná yí ɖe. Nǔ e mi ná yí ɖo yě sí lɛ́ɛ ɖíe: siká, kpatágan, ganvɔ, avɔ kwlésinnɔ, avɔ vɔvɔ, avɔ vɔvɔ cɛ́cɛ́, lɛ̌ɛnkanvɔ ɖagbe ɖagbe kpódó gbɔ̌fúnvɔ kpó. Mi ná yí agbonyú e è sá nǔ vɔvɔ dó ɔ́, anyǔ tlitli, kasyatín, ami e è nǎ dó tá zogbɛ́n ná ɔ́, nǔhwɛ́nkún e è nǎ nɔ kɔn dó nǔsáwǔ e è nɔ ɖó ta nú mɛ é, kpódó ée è nǎ nɔ́ kɔn dó célu mɛ ɔ́ kpó ɖo yě sí. Mi ná yí awǐnnya ɖagbe ɖagbe e è nɔ ylɔ́ ɖɔ Onísi ɔ́ kpódó awǐnnya ɖagbe ɖagbe ɖěvo lɛ́ɛ kpó ɖo yě sí. Awǐnnya énɛ́ lɛ́ɛ wɛ è nǎ nɔ́ dó ɖó acɔ́ nú vɔ̌sánú-xwlémawutɔ́ ɖaxó ɔ́ sín awu kpódó awu e é nɔ dó ɖó akɔ́nnu ɔ́ kpó. Yě ná bló goxɔ ɖokpó nú mì, bɔ un ná nɔ yě mɛ. Yě ná bló goxɔ ɔ́ kpódó nǔ e ná nɔ mɛ lɛ́ɛ bǐ kpó, bɔ é ná sɔgbe xá ée un ná xlɛ́ we é.” “Izlayɛ́li ví lɛ́ɛ ná zé kasyatín dó bló gbǎ ɖokpó ná; gbǎ ɔ́ ga tɔn ná ɖó mɛ̌tlu ɖokpó ɛnɛvlɔ́ɖó jɛ jí, bɔ gblǒ tɔn ná ɖó mɛ̌tlu ɖokpó é hwe ɛnɛvlɔ́ɖó, bɔ jǐ yiyi tɔn ná ɖó mɛ̌tlu ɖokpó é hwe ɛnɛvlɔ́ɖó. A nǎ kɔn siká akú dó; a nǎ kɔn siká gbɔn xomɛ kpódó gǔdo kpó, bó ná kɔn gbɔn tó tɔn. A nǎ blǒ sikálɔgan ɛnɛ, bó ná fɔ ɖó zwe ɛnɛ lɛ́ɛ jí ɖo do; we ná nɔ akpá ɖokpó xwé, bɔ we ná nɔ akpá ɖě ɔ́ xwé. A nǎ kpa kasyatín sín kpo gaga we, bó ná kɔn siká dó. A nǎ zě kpo lɛ́ɛ gbɔn alɔgan lɛ́ɛ mɛ ɖo gbǎ ɔ́ sín akpá xwé lɛ́ɛ, bɔ è nǎ nɔ dó zé. Kpo lɛ́ɛ ná nɔ alɔgan lɛ́ɛ mɛ; è nǎ nɔ́ ɖe yě síin ǎ. Un ná ná we atɛ we e jí sɛ́n e un dó jɛ akɔ xá mi lɛ́ɛ ɖe é, bɔ a nǎ bɛ́ dó gbǎ ɔ́ mɛ. “A nǎ zé siká akú dó bló nusú dó gbǎ ɔ́ nu, nusú ɔ́, ga tɔn ná ɖó mɛ̌tlu ɖokpó ɛnɛvlɔ́ɖó jɛ jí, bɔ gblǒ tɔn ná ɖó mɛ̌tlu ɖokpó é hwe ɛnɛvlɔ́ɖó. A nǎ zé siká dó tun wɛnsagun susunɔ we ɖó nusú ɔ́ sín tó we jí, ɖo gblǒ we lɛ́ɛ jí. Wɛnsagun susunɔ ɔ́ ɖokpó ná ɖo gbǎnusú ɔ́ jí ɖo gblǒ ɖokpó jí, bɔ wegɔ́ ɔ́ ná ɖo gblǒ ɖě ɔ́ jí. Wɛnsagun susunɔ lɛ́ɛ ná kpan nukɔn yěɖée, ɖo nusú ɔ́ ta nu bó ná ɖo nusú ɔ́ kpɔ́n wɛ, bó ná kɛ awa yětɔn lɛ́ɛ ɖó jɔ mɛ. Un ná ná we atɛ we e jí sɛ́n e un dó jɛ akɔ xá mi lɛ́ɛ ɖe é, bɔ a nǎ bɛ́ dó gbǎ ɔ́ mɛ, bó ná sɔ́ nusú ɔ́ ɖ'é nu. Fínɛ́ wɛ un ná nɔ́ kpé we ɖe, ɖo gbǎ ɔ́ sín nusú jí, ɖo wɛnsagun we lɛ́ɛ tɛ́ntin. Sɛ́n e a nǎ dó nú Izlayɛ́li ví lɛ́ɛ ɔ́, fínɛ́ wɛ un ná ɖɔ bǐ sɛ́ dó we sín.” “A nǎ zě kasyatín dó bló távo ɖokpó ná. Ga tɔn ná ɖó mɛ̌tlu ɖokpó, gblǒ tɔn ná ɖó mɛ̌tlu vlɔ́, bɔ jǐ yiyi tɔn ná ɖó mɛ̌tlu ɖokpó é hwe ɛnɛvlɔ́ɖó. A nǎ kɔn siká akú dó távo ɔ́ bǐ, bó ná zé siká akú dó ɖótó ná lɛ́ lɛ̌ dó bǐ. A nǎ ɖótó n'i lɛ́ lɛ̌ dó, bɔ tó ɔ́ sín gblǒ ná nyí alɔví ɛnɛ sín gblǒ, bɔ a nǎ kɔn siká lɛ́ lɛ̌ dó bǐ. A nǎ bló sikálɔgan ɛnɛ, bó ná fɔ ɖó távo ɔ́ sín zwe ɛnɛ lɛ́ɛ jí ɖo afɔ tɔn ɛnɛ lɛ́ɛ wú. Alɔgan lɛ́ɛ ná nɔ tó lɛ́ɛ kpá, bɔ è nǎ bɛ́ kasyakpo gaga we d'é mɛ, bó ná nɔ dó zé távo ɔ́ ná. A nǎ kpa kasyakpo lɛ́ɛ, bó ná kɔn siká dó, bɔ è nǎ nɔ́ dó zé távo ɔ́ ná. A nǎ zé siká akú dó bló nǔ e è nǎ nɔ́ zán ɖo távo ɔ́ jí lɛ́ɛ: gannúgbɛ́jɛ́, kɔ́fu, zɛ̌n, kpódó sinnugannú kpó, bɔ è nǎ nɔ́ zán yě ahan biba hwenu. A nǎ nɔ́ bɛ́ wɔ̌xúxú e è nɔ ná mì lɛ́ɛ ɖó távo ɔ́ jí; wɔ̌xúxú ná nɔ́ hán ɖo távo ɔ́ jí gbeɖé ǎ.” “A nǎ zě siká akú dó bló zogbɛ́nhɛnnú ɖokpó ná, bɔ é ná ɖó ala tɛ́nwe. É ná ɖó cícá ǎ, bǐ ná ɖo bǔte; afɔ tɔn, ala tɔn lɛ́ɛ, folówa tɔn lɛ́ɛ, nǔ e mɛ folówa nɔ tɔ́n sín lɛ́ɛ kpódó folówa e ma tɔ́n ǎ lɛ́ɛ kpó bǐ ná ɖo bǔte. Ala ayizɛ́n ná gosín zogbɛ́nhɛnnú dodó ɔ́ wú; atɔn ná ɖo akpá ɖokpó xwé, bɔ atɔn ná ɖo akpá ɖě ɔ́ xwé. Nǔ e mɛ folówa nɔ tɔ́n sín lɛ́ɛ atɔn, kpódó folówa e ma tɔ́n ǎ lɛ́ɛ kpó, kpódó folówa lɛ́ɛ kpó ná nɔ ala lɛ́ɛ ɖokpó ɖokpó jí. Nǔ e mɛ folówa nɔ tɔ́n sín lɛ́ɛ ná cí atínsínsɛ́n e è nɔ ylɔ́ ɖɔ amadi ɔ́ ɖɔhun. Folówa ɛnɛ ná cí atínsínsɛ́n e è nɔ ylɔ́ ɖɔ amadi ɔ́ ɖɔhun, bó ná ɖo zogbɛ́nhɛnnú dodó ɔ́ wú, bɔ nǔ e mɛ folówa nɔ tɔ́n sín lɛ́ɛ kpó folówa tɔn lɛ́ɛ kpó ná ɖo yě wú. Nǔ e mɛ folówa nɔ tɔ́n sín ɔ́ ɖokpó ɖokpó ná nɔ ala ayizɛ́n e tɔ́n sín zogbɛ́nhɛnnú dodó ɔ́ wú lɛ́ɛ ɖokpó ɖokpó glɔ́. Nǔ e mɛ folówa nɔ tɔ́n sín lɛ́ɛ kpó ala lɛ́ɛ kpó ná ɖo bǔte. Siká akú wɛ è nǎ dó tun bǐ ná. A nǎ bló zogbɛ́n tɛ́nwe, bɔ è nǎ bɛ́ yě ɖó zogbɛ́nhɛnnú ɔ́ jí; è nǎ tá zogbɛ́n lɛ́ɛ bɔ yě ná nɔ́ ɖi ɖɛ̌ dó nukɔn. Nǔ e è nɔ dó bló myɔ ɔ́ ɖó ná lɛ́ɛ kpódó nǔ e mɛ afín nɔ kɔn nyi lɛ́ɛ kpó bǐ wɛ è nǎ sɔ́ siká akú dó bló. Siká akú kilóo gban wɛ è nǎ dó bló zogbɛ́nhɛnnú ɔ́, kpódó nǔ e ɖ'é wú lɛ́ɛ bǐ kpó. Mɔyízi, kpɔ́n ganjí bó bló, bónú é sɔgbe xá ée un xlɛ́ we ɖo só jí fí din é.” “Goxɔ ɔ́, lɛ̌ɛnkanvɔxwɛ gaga wǒ wɛ a nǎ dó bló ná. Avɔxwɛ lɛ́ɛ ɔ́, avɔlɔntɔ́ e alɔnu yětɔn mɛ́ ganjí lɛ́ɛ ná zé kan didɛ kwlésinnɔ, vɔvɔ, kpódó vɔvɔ cɛ́cɛ́ kpó dó lɔn ná, bó ná lɔn wɛnsagun susunɔ lɛ́ɛ gbɔn mɛ, dó ba acɔ́ ná. Avɔxwɛ lɛ́ɛ bǐ ná ɖó jlɛ̌ ɖokpó ɔ́; ga yětɔn ná nyí mɛ̌tlu wɛ̌nɛ; bɔ gblǒ yětɔn ná nyí mɛ̌tlu we. È nǎ cá avɔxwɛ lɛ́ɛ atɔ́ɔ́n atɔ́ɔ́n ɖó kpɔ́. Avɔxwɛ atɔ́ɔ́n nukɔntɔn e a cá ɖó kpɔ́ lɛ́ɛ ɔ́, a nǎ ɖó kan kwlésinnɔ gbɔn tó nú avɔxwɛ e gbɔn gǔdo ɔ́, bó ná lɛ́ ɖó gbɔn tó nú avɔxwɛ e ɖo nukɔn nú atɔ́ɔ́n wegɔ́ ɔ́ e a cá ɖó kpɔ́ é. Kan kanɖé wǒ (50) wɛ ná nɔ cícá nukɔntɔn ɔ́ tó, bɔ kanɖé wǒ (50) ná nɔ wegɔ́ ɔ́ tó. Kan énɛ́ lɛ́ɛ ɖě ná kpé nu xá ɖě. A nǎ zé siká dó bló nǔhɛnnú kanɖé wǒ (50) ná, bó ná dó hɛn avɔ lɛ́ɛ ɖě dó ɖě wú, bó bú dó goxɔ ɔ́ bǐ; énɛ́ ɔ́, goxɔ ɔ́ bǐ ná nɔ bǔ. “Mɔ̌ ɖokpó ɔ́, a nǎ zé gbɔ̌fún dó lɔn avɔxwɛ gaga wǒ-ɖokpó ná, bó ná cyɔ́n goxɔ ɔ́. Avɔxwɛ lɛ́ɛ sín ga ná nyí mɛ̌tlu afɔtɔn, bɔ gblǒ yětɔn ná nyí mɛ̌tlu we. Jlɛ̌ ɖokpó ɔ́ wɛ wǒ-ɖokpó lɛ́ɛ bǐ ná ɖó. A nǎ cá avɔxwɛ nɛ́ lɛ́ɛ atɔ́ɔ́n ɖo kpɔ́, bó ná cá ayizɛ́n e kpo lɛ́ɛ ɖo kpɔ́. A nǎ nyɛ́ ayizɛ́ngɔ́ ɔ́ nyi jí ɖo goxɔ ɔ́ ta ɖo nukɔn, bó ná dó kan kanɖé wǒ (50) gbɔn tó nú avɔxwɛ e ɖo tó nú avɔxwɛ atɔ́ɔ́n nukɔntɔn e è cá ɖó kpɔ́ é, bó ná dó kan kanɖé wǒ (50) gbɔn tó nú avɔxwɛ ayizɛ́n ɖě lɛ́ɛ e è cá ɖó kpɔ́ é. Mɔ̌ ɖokpó ɔ́, a nǎ zé ganvɔ dó bló nǔhɛnnú kanɖé wǒ (50) ná, bó ná dó hɛn kan lɛ́ɛ, bó ná dó hɛn goxɔ ɔ́ bǐ ɖó bǔ. Avɔ e è cyɔ́n dó goxɔ ɔ́ ná gbló hú ée è dǒ gbá goxɔ ɔ́ ná é, bɔ éé lán ɖ'é jí ɔ́ nyí cícá ɖokpó sín vlɔ̌, bó kɔn nyi goxɔ ɔ́ gúdo. Mɔ̌ ɖokpó ɔ́, avɔ énɛ́ ɔ́ ná ɖi ga hú éé è dǒ gbá goxɔ ɔ́ ná é, bɔ éé lán ɖ'é jí ɔ́ nyí cícá ɖokpó sín vlɔ̌ bó kɔn nyi goxɔ ɔ́ sín ga jí ɖo akpá ɖokpó ɖokpó xwé. Bó ná fó ɔ́, a nǎ zé agbonyú e è sá nǔ vɔvɔ dó bó cyɔ́n goxɔ ɔ́, bó ná zé anyǔ tlitli bó bú dó. “A nǎ zé kasyatín dó bló xwlɛ ná, bó tun te lɛ́ lɛ̌ dó goxɔ ɔ́ dǒ ɖɔhun. Xwlɛ lɛ́ɛ ɖokpó ɖokpó sín ga ná nyí mɛ̌tlu atɔ́ɔ́n, bɔ gblǒ tɔn ná nyí mɛ̌tlu ɖokpó é hwe ɛnɛvlɔ́ɖó. A nǎ kpa sóví we dó xwlɛ ɖokpó ɖokpó glɔ́, bɔ sóví lɛ́ɛ ná jlɔ́ ganjí. Mɔ̌ wɛ a nǎ bló gbɔn nú xwlɛ lɛ́ɛ bǐ. Énɛ́ ɔ́, a nǎ bló xwlɛ ko nú goxɔ ɔ́ ɖo afɔligbé. A nǎ zé kpatágan dó bló afɔ kanɖé (40) ná, bó ná bɛ́ dó xwlɛ ko lɛ́ɛ glɔ́; we we wɛ a nǎ dó xwlɛ ɖokpó ɖokpó glɔ́, bɔ é ná sɔgbe xá sóví nabí e a kpa dó xwlɛ lɛ́ɛ glɔ́ é. Mɔ̌ ɖokpó ɔ́, a nǎ bló xwlɛ ko nú goxɔ ɔ́ ɖo taligbé, bó ná zé kpatágan dó bló afɔ yětɔn kanɖé (40) lɛ́ɛ, bó ná xwe we we dó xwlɛ ɖokpó ɖokpó glɔ́. Mɔ̌ ɖokpó ɔ́, a nǎ bló xwlɛ ayizɛ́n nú goxɔ ɔ́ ɖo gǔdo, ɖo gbadahwe jí. A nǎ bló dotín we nú goxɔ ɔ́, gbɔn zwe lɛ́ɛ jí, ɖo gǔdo. Dotín we lɛ́ɛ ná zɔn bǔ sín do, bɔ è nǎ zě gan tobotobo dó cá ná ɖo aga. Mɔ̌ wɛ è nǎ bló gbɔn nú dotín e ɖo goxɔ ɔ́ sín zwe we lɛ́ɛ mɛ é bǐ. A nǎ bló dotín tántɔn kpódó sóví yětɔn afɔtɔn-nukún-ɖokpó lɛ́ɛ kpó. Sóví we we wɛ ná nɔ dotín ɖokpó ɖokpó glɔ́. “A nǎ fɔ kasyakpo gaga atɔ́ɔ́n dó blá wɛ̌n dó dotín lɛ́ɛ wú, ɖo goxɔ ɔ́ sín akpá ɖokpó xwé. Kpo gaga atɔ́ɔ́n ná blá wɛ̌n ɖo goxɔ ɔ́ sín akpáxwé wegɔ́ ɔ́, bɔ atɔ́ɔ́n ná blá ɖo goxɔ ɔ́ sín gǔdo ɖo gbadahwe jí. Kpo gaga e è nǎ dó blá wɛ̌n ná ɖo tɛ́ntin ɔ́, nǎ gosín tó ɖě yi tó ɖě ɔ́. A nǎ kɔn siká dó dotín lɛ́ɛ, bó ná zé siká dó bló gan tobotobo e mɛ kpo gaga e è dǒ blá wɛ̌n ná lɛ́ɛ ná gbɔn lɛ́ɛ ná, bó ná kɔn siká dó kpo gaga lɛ́ɛ. A nǎ bló goxɔ ɔ́, bɔ é ná sɔgbe xá xlɛ̌ e un ná we ɖo só élɔ́ jí fí din é. “A nǎ zé lɛ̌ɛnkanvɔ e dɛ kan ɔ́ dó bló xɔmɛgbovɔ ɖokpó ná, bɔ é ná ɖó hwɛkan kwlésinnɔ, vɔvɔ kpódó vɔvɔ cɛ́cɛ́ kpó. Avɔlɔntɔ́ lɛ́ɛ ná wa azɔ̌ tɔn ganjí, bó ná ɖe wɛnsagun susunɔ lɛ́ɛ d'é mɛ dó ba acɔ́ ná. A nǎ sin dó dotín kasya tɔn ɛnɛ wú. È nǎ kɔn siká dó dotín lɛ́ɛ, siká klɔcée lɛ́ɛ ná ɖo dotín lɛ́ɛ wú, bó ná jínjɔ́n kpatágan dodó ɛnɛ jí. A nǎ zé xɔmɛgbovɔ ɔ́ gbɔn nǔhɛnnú lɛ́ɛ glɔ́. “Xɔmɛgbovɔ énɛ́ ɔ́ gúdo wɛ è nǎ sɔ́ akɔjijɛgbá ɔ́ ɖó. Xɔmɛgbovɔ ɔ́ wɛ ná gbo Tɛn mímɛ́ ɔ́ kpó tɛn mímɛ́ bǐ ɔ́ kpó. A nǎ zé akɔjijɛgbá ɔ́ sín nusú sú d'é nu, ɖo Tɛn mímɛ́ bǐ ɔ́ mɛ. A nǎ zé távo ɔ́ kpó zogbɛ́nhɛnnú ɔ́ kpó ɖó xɔmɛgbovɔ ɔ́ gúdo: Zogbɛ́nhɛnnú ná ɖo afɔligbé, bɔ távo ɔ́ ná ɖo taligbé. “A nǎ bló avɔ ɖokpó, bó dó ɖó Tɛn mímɛ́ ɔ́ sín ali nu, bɔ é ná ɖó hwɛkan kwlésinnɔ vɔvɔ kpódó vɔvɔ cɛ́cɛ́ kpó. Lɛ̌ɛnkanvɔ e dɛ kan ɔ́ wɛ è ka ná dó bló ná. Mɛ e nɔ kó avɔ lɛ́ɛ wɛ ká ná kó ganjí. A nǎ zé kasya dó bló dotín atɔ́ɔ́n ná nú avɔ e a dǒ ɖó tɛn mímɛ́ ɔ́ sín ali nu é, a nǎ kɔn siká dó dotín lɛ́ɛ, bɔ siká klɔcée ná nɔ yě wú. A nǎ sínsín ganvɔ dó bló afɔ atɔ́ɔ́n nú dotín lɛ́ɛ.” “A nǎ zé kasyatín dó bló vɔ̌sákpe ná. Akpáxwé tɔn lɛ́ɛ bǐ ná ɖó jlɛ̌ ɖokpó ɔ́; akpáxwé ɖokpó ɖokpó sín ga ná nyí mɛ̌tlu we adaɖé, jǐ yiyi tɔn ná nyí mɛ̌tlu ɖokpó adaɖé. A nǎ bló vɔ̌sákpe ɔ́ bɔ é ná ɖó zo ɖo zwe tɔn ɛnɛ lɛ́ɛ ɖokpó ɖokpó jí; zo lɛ́ɛ ná tɔ́n ganjí, bɔ zwe lɛ́ɛ kpó vɔ̌sákpe ɔ́ kpó ná nɔ bǔ, bɔ a nǎ kɔn ganvɔ dó. A nǎ zé ganvɔ dó bló nǔ e è nǎ zǎn ɖo vɔ̌sákpe ɔ́ jí lɛ́ɛ: gannú e mɛ afín ná nɔ́ kɔn dó lɛ́ɛ, pɛ́li lɛ́ɛ, gannú lɛ́ɛ, gǎfu lɛ́ɛ, kpódó nǔ e mɛ è nǎ nɔ́ dó zǎlínkpɔ́n zo ɖe lɛ́ɛ kpó. A nǎ bló ganvɔganja ɖokpó nú vɔ̌sákpe ɔ́, bó ná bló ganvɔlɔgan ɛnɛ dó ganja ɔ́ sín zwe ɛnɛ lɛ́ɛ jí. È nǎ sɔ́ ganja ɔ́ dó vɔ̌sákpe ɔ́ glɔ́, bɔ jǐ yiyi tɔn ná wá vɔ̌sákpe ɔ́ sín vlɔ̌. A nǎ kpa kasyakpo gaga we bɔ è nǎ nɔ́ dó zé vɔ̌sákpe ɔ́, bó ná kɔn ganvɔ dó. È nǎ fɔ kpo gaga lɛ́ɛ gbɔn alɔgan lɛ́ɛ mɛ, ɖo vɔ̌sákpe ɔ́ sín akpá we lɛ́ɛ xwé, bɔ è nǎ nɔ dó zé vɔ̌sákpe ɔ́. Xwlɛ ɔ́ wɛ a nǎ zé dó bló vɔ̌sákpe ɔ́ ná, nǔ ɖěbǔ ná ɖo xo tɔn mɛ ǎ, bɔ é ná sɔgbe xá ée un xlɛ́ we ɖo só jí fí din é. “A nǎ ɖǒ kɔ́xota lɛ́ lɛ̌ dó goxɔ ɔ́, bó ná zé lɛ̌ɛnkanvɔ e dɛ kan ganjí ɔ́ dó xá. Avɔ e è nǎ dó xá kɔ́xota ɔ́ ná ɔ́ sín ga ná nyí mɛ̌tlu kanɖé wǒ (50) ɖo goxɔ ɔ́ sín afɔligbé. Dotín ko wú wɛ è nǎ sin avɔ lɛ́ɛ dó, bɔ dotín lɛ́ɛ ɖokpó ɖokpó ná jínjɔ́n afɔ ɖokpó ɖokpó jí. Ganvɔ wɛ è nǎ dó bló dotín lɛ́ɛ kpó afɔ lɛ́ɛ kpó. Kpatágan wɛ è nǎ dó bló klɔcée e ɖo dotín lɛ́ɛ wú lɛ́ɛ kpó gankpo ɖěɖě è nǎ dó hɛn dotín lɛ́ɛ ná lɛ́ɛ kpó. Mɔ̌ ɖokpó ɔ́, ɖo goxɔ ɔ́ sín taligbé ɔ́, avɔ ɔ́ ná ɖó ga ɖokpó ɔ́, bɔ è nǎ sin gbɔn alɔkpa ɖokpó ɔ́. Klɔcée lɛ́ɛ kpó gankpo lɛ́ɛ kpó ɔ́, kpatágan wɛ è dǒ bló. Avɔ e è nǎ dó ɖó kɔ́xota ɔ́ sín gblǒ jí, ɖo goxɔ ɔ́ sín gbadahwe jí ɔ́ sín ga ná nyí mɛ̌tlu koatɔ́n (25). Dotín wǒ wú wɛ è nǎ sin avɔ ɔ́ dó, bɔ dotín ɖokpó ɖokpó ná jínjɔ́n afɔ ɖokpó ɖokpó jí. Klɔcée lɛ́ɛ kpó gankpo lɛ́ɛ kpó ɔ́, kpatágan wɛ è dǒ bló yě. Akpá e xwé xwé ɔ́ sín hɔntogbó ɖe ɖo goxɔ ɔ́ sín zǎnzǎnhwe jí ɔ́ lɔ sín ga ná nyí mɛ̌tlu koatɔ́n (25). Avɔ e è nǎ dó ɖó ɖisí nú hɔntogbó ɔ́ ná ɖó mɛ̌tlu tɛ́nwe adaɖé (7,5), bɔ dotín lɛ́ɛ ná nyí atɔn, bó ná ɖó afɔ ɖokpó ɖokpó. Mɔ̌ ɖokpó ɔ́, avɔ e è nǎ dó ɖó amyɔxwé nú hɔntogbó ɔ́ lɔ ná ɖó mɛ̌tlu tɛ́nwe adaɖé (7,5), bɔ dotín lɛ́ɛ lɔ ná nyí atɔn, bó ná ɖó afɔ ɖokpó ɖokpó. Lɛ̌ɛnkanvɔ e dɛ kan ganjí ɔ́ wɛ ná nyí avɔ e a nǎ dó ɖó hɔntogbó ɔ́ nu; xɔmɛgbovɔ ɔ́ ná ɖó mɛ̌tlu wǒ, bó ná nyí fɛ́sinnɔ, vɔvɔ kpódó vɔvɔ cɛ́cɛ́ kpó, bɔ mɛ e nɔ kó avɔ lɛ́ɛ ná kó; é ná ɖó dotín ɛnɛ, bɔ bǐ ná ɖó afɔ ɖokpó ɖokpó. È nǎ sɔ́ kpatágan dó bló gankpo dó hɛn dotín e è tunwun lɛ́ lɛ̌ dó kɔ́xota ɔ́ lɛ́ɛ; kpatágan wɛ è nǎ dó bló klɔcée yětɔn lɛ́ɛ ná, bó ná zé ganvɔ dó bló afɔ yětɔn lɛ́ɛ. Hǔn, kɔ́xota ɔ́ sín ga ná nyí mɛ̌tlu kanɖé wǒ (50), gblǒ tɔn ná nyí mɛ̌tlu koatɔ́n (25). Avɔ ɔ́ sín jǐ yiyi ná nyí mɛ̌tlu we adaɖé (2,5). Lɛ̌ɛn e dɛ kan ganjí ɔ́ wɛ ná nyí avɔ lɛ́ɛ. Afɔ e jí dotín lɛ́ɛ ná jínjɔ́n lɛ́ɛ ná nyí ganvɔ. Ganvɔ wɛ è nǎ dó bló nǔ e è nǎ zán ɖo xɔ ɔ́ mɛ lɛ́ɛ bǐ ná. Ganvɔ wɛ è nǎ lɛ̌ dó bló goxɔ ɔ́ kpódó kɔ́xota ɔ́ kpó sín só lɛ́ɛ bǐ nǎ. “A nǎ ɖɔ nú Izlayɛ́li ví lɛ́ɛ ɖɔ yě ní hɛn olívu sín ami akú wá nú we. Ami énɛ́ wɛ mi ná dó zogbɛ́n lɛ́ɛ mɛ, bɔ zogbɛ́n lɛ́ɛ ná nɔ títá hwebǐnu. Aalɔ́ɔn kpódó vǐ tɔn lɛ́ɛ kpó ná nɔ́ kpé nukún dó zogbɛ́n lɛ́ɛ wú ɖo goxɔ ɔ́ mɛ, ɖo xɔmɛgbovɔ e gúdo akɔjijɛgbá ɔ́ ɖe ɔ́ nukɔn; zogbɛ́n lɛ́ɛ ná ɖo títá ɖo nukɔn ce zǎn kéze. Izlayɛ́li ví lɛ́ɛ ɖó ná nyi sɛ́n énɛ́ ɔ́ káká sɔ́yi, sín jijimɛ ɖě yi ɖě jí.” Mawu Mavɔmavɔ lɛ́ ɖɔ nú Mɔyízi ɖɔ: “Mɔyízi, ylɔ̌ nɔví towe Aalɔ́ɔn ní wá gɔ̌n towe, é kpódó vǐ tɔn Nadavu, Avihu, Eleazáa kpódó Itamáa kpó. A nǎ ɖe yě ɖó vo nú Izlayɛ́li ví ɖě lɛ́ɛ, bɔ yě ná nɔ wa vɔ̌sánú-xwlémawutɔ́zɔ́ nú mì. A nǎ tɔ vɔ̌sánú-xwlémawutɔ́ sín awu nú nɔví towe Aalɔ́ɔn, bó ná dó ɖe tɛn e mɛ é ɖe ɔ́ kpó susu e é ɖó ɔ́ kpó xlɛ́. A nǎ ɖɔ nú avɔlɔntɔ́ e un bló bɔ alɔnu yětɔn mɛ́ ganjí lɛ́ɛ bǐ, bɔ yě ná tɔ awu lɛ́ɛ nú Aalɔ́ɔn; è nǎ sɔ́ ɛ ɖó vo nú mì, bɔ é ná nɔ́ wa vɔ̌sánú-xwlémawutɔ́zɔ́ nú mì. Nǔ e yě ná tɔ nú nɔví towe Aalɔ́ɔn kpó vǐ tɔn lɛ́ɛ kpó, bɔ yě ná nɔ́ nɔ mɛ, bó ná nɔ́ wa vɔ̌sánú-xwlémawutɔ́zɔ́ yětɔn lɛ́ɛ é ɖíe: akɔ́ntakpo, efódu, awu ɖaxó, dowu gaga bɔ è nǎ kó, tablá kpó gǒjíblánú kpó. Yě ná nɔ́ zán kan gansinnɔ, bó ná nɔ́ zán avɔ fɛ́sinnɔ, vɔvɔ, vɔvɔ cɛ́cɛ́, kpódó lɛ̌ɛnkanvɔ ɖagbe ɖagbe kpó.” “Avɔlɔntɔ́ e alɔnu yětɔn mɛ́ ganjí lɛ́ɛ ná zé kan didɛ e è nɔ dó lɔn lɛ̌ɛnkanvɔ ná ɔ́ dó lɔn efódu ná, bɔ kan kwlésinnɔ, kan vɔvɔ, kpó kan vɔvɔ cɛ́cɛ́ kpó ná gbɔn mɛ, bɔ yě ná zé kan gansinnɔ dó kó ná. È nǎ lɔn abɔ̌tavɔ we bɔ è nǎ tɔ dó efódu ɔ́ sín tó we lɛ́ɛ wú dó hɛn ɖó te. Efódu ɔ́ kpó kan tɔn kpó bǐ wɛ è lɔn ɖó bǔ. Kan gansinnɔ, kan kwlésinnɔ, kan vɔvɔ, kan vɔvɔ cɛ́cɛ́, kpódó kan didɛ e è nɔ dó lɔn lɛ̌ɛnkanvɔ ná ɔ́ kpó wɛ è nǎ dó lɔn ná. A nǎ fɔ awǐnnya e è nɔ ylɔ́ ɖɔ onísi ɔ́ we, bó ná wlán Jakɔ́bu ví súnnu lɛ́ɛ sín nyǐkɔ dó yě jí. A nǎ xwedó lě e è ji yě gbɔn ɖě jɛ ɖě gúdo ɔ́, bó ná wlán mɛ ayizɛ́n sín nyǐkɔ dó awǐnnya ɔ́ ɖokpó jí, bó ná wlán mɛ ayizɛ́n ɖé lɛ́ɛ sín nyǐkɔ dó awǐnnya wegɔ́ ɔ́ jí. A nǎ wlán Jakɔ́bu ví súnnu lɛ́ɛ sín nyǐkɔ ɖó awǐnnyatɛ we lɛ́ɛ jí, lě e awǐnnyazɔ́watɔ́ nɔ́ kun nǔ dó awǐnnya jí gbɔn ɔ́. A nǎ kɔn siká lɛ́ lɛ̌ dó awǐnnyatɛ we lɛ́ɛ. A nǎ bɛ́ awǐnnyatɛ we lɛ́ɛ dó efódu ɔ́ sín abɔ̌tavɔ lɛ́ɛ jí, dó ná akɔta Izlayɛ́li tɔn wěwe lɛ́ɛ sín xlɛ̌. Énɛ́ ɔ́, Aalɔ́ɔn ná hɛn nyǐkɔ yětɔn abɔ̌ta ɖo sinsɛnxɔ ɔ́ mɛ, bɔ nyɛ Mawu Mavɔmavɔ ɔ́, un ɖo mimɔ wɛ ɔ́, un ná wɔn mi Izlayɛ́li ví lɛ́ɛ ǎ. Din e a kɔn siká lɛ́ lɛ̌ dó awǐnnyatɛ we lɛ́ɛ ɔ́, a nǎ zé siká akú dó bló wlɔ kpɛví kpɛví we ná, bó ná gbɛ kan ɖɔhun, bó ná sin dó awǐnnyatɛ ɖokpó ɖokpó wú.” “Avɔlɔntɔ́ e alɔnu yětɔn mɛ́ ganjí lɛ́ɛ ná zé kan didɛ e è nɔ dó lɔn lɛ̌ɛnkanvɔ ná ɔ́ dó lɔn akɔ́ntakpo e è nɔ sin dó akɔ́nta, dó ɖɔ hwɛ é, bɔ kan kwlésinnɔ, vɔvɔ, kpó vɔvɔ cɛ́cɛ́ kpó ná gbɔn mɛ, bɔ yě ná zé kan gansinnɔ dó kó ná, lě e è lɔn efódu ɔ́ gbɔn é. Akpo wɛ é ná nyí, bó ná ɖó gblǒ zɛ̌ɛ́n ga zɛ̌ɛ́n, bó ná nyí mɛ̌tlu ɖokpó sín ɛnɛvlɔ́ɖó. A nǎ to awǐnnya ɖagbe ɖagbe d'é wú dó ba acɔ́ ná; hǎ ɛnɛ jí wɛ a nǎ to ɖó. A nǎ to awǐnnya sadwáni ɖokpó, tokpázi ɖokpó kpó emɛlodu ɖokpó kpó ɖó hǎ nukɔntɔn ɔ́ jí. Bó ná to awǐnnya ɛsikabukli ɖokpó, safíi ɖokpó kpó dyamáa ɖokpó kpó ɖó hǎ wegɔ́ ɔ́ jí. A nǎ to awǐnnya okpálu ɖokpó, agáti ɖokpó kpó amɛtisi ɖokpó kpó ɖó hǎ atɔngɔ́ ɔ́ jí. Bó ná to awǐnnya klizolíti ɖokpó, onísi ɖokpó kpó jasipée ɖokpó kpó ɖó hǎ ɛnɛgɔ́ ɔ́ jí. Siká wɛ è nǎ kɔn lɛ́ lɛ̌ dó awǐnnya énɛ́ lɛ́ɛ. È nǎ wlán Jakɔ́bu ví lɛ́ɛ ɖokpó ɖokpó sín nyǐkɔ ɖó awǐnnya lɛ́ɛ ɖokpó ɖokpó wú, lě e awǐnnyazɔ́watɔ́ nɔ́ kun nǔ dó awǐnnya wú gbɔn é. Bɔ awǐnnya énɛ́ lɛ́ɛ nyí xlɛ̌ akɔta Izlayɛ́li tɔn wěwe lɛ́ɛ tɔn. “A nǎ zé siká akú dó bló wlɔ kpɛví kpɛví ná, bó ná gbɛ kan ɖɔhun nú akɔ́ntakpo ɔ́. A nǎ bló sikálɔgan we, bó fɔ ɖó akɔ́ntakpo ɔ́ sín tó we e ɖo aga lɛ́ɛ wú. A nǎ fɔ sikáwlɔ we nɛ́ lɛ́ɛ gbɔn alɔgan e ɖo akɔ́ntakpo ɔ́ sín tó e ɖo aga lɛ́ɛ mɛ. A nǎ zé wlɔ ɔ́ sín nu we ɖě lɛ́ɛ gbɔn efódu ɔ́ sín abɔ̌tavɔ ɔ́ glɔ́, gbɔn nukɔn, dó hɛn efódu ɔ́ dó abɔ̌tavɔ ɔ́ wú. A nǎ lɛ́ bló sikálɔgan we, bó ná fɔ yě ɖó akɔ́ntakpo ɔ́ sín tó we lɛ́ɛ tó, ɖo do bɔdó awu gaga ɔ́ wú ɖo xomɛ. A nǎ lɛ́ bló sikálɔgan we ɖó efódu ɔ́ sín abɔ̌tavɔ we lɛ́ɛ sín do, ɖo nukɔn, ɖo fí e è tɔ gbɔn lɛ́ɛ, ɖo gǒjíblánú e ɖo efódu ɔ́ wú ɔ́ sín ta nu. A nǎ zé kan kwlésinnɔ gbɔn alɔgan lɛ́ɛ mɛ, bó dó sin akɔ́ntakpo ɔ́ ná, dó gǒjíblánú e ɖo efódu ɔ́ jí ɔ́ wú, bónú é má gosín efódu ɔ́ wú ó. “Nú Aalɔ́ɔn xwe goxɔ ɔ́ mɛ ɔ́, akɔ́ntakpo e è nɔ sin dó akɔ́ntakpo bó nɔ́ ɖɔ hwɛ ɔ́ mɛ wɛ é ná ɖe, bɔ akɔta Izlayɛ́li tɔn lɛ́ɛ sín nyǐkɔ ná ɖo akɔ́nnu tɔn bó ná nyí flǐnnú tɛgbɛ tɔn ɖo Mawu Mavɔmavɔ nukɔn. A nǎ bɛ̌ Wulímu kpó Tumímu kpó dó akɔ́ntakpo ɔ́ mɛ, bɔ Aalɔ́ɔn xwe nyɛ Mawu Mavɔmavɔ nukɔn ɔ́, yě ná nɔ́ ɖo akɔ́n tɔn ta. Énɛ́ ɔ́, Wulímu kpó Tumímu kpó ná ɖo akɔ́nta n'i hwebǐnu, ɖo nyɛ Mawu Mavɔmavɔ nukɔn, bɔ é ná sixú tunwun nǔ e ba nú Izlayɛ́li ví lɛ́ɛ wɛ un ɖe é.” “Avɔ kwlésinnɔ kɛ́ɖɛ́ wɛ a nǎ dó tɔ awu e ná nɔ do nú efódu ɔ́ ná. A nǎ ɖe ali d'é mɛ gbɔn tɛ́ntin, bɔ è nǎ nɔ́ zé ta gbɔn mɛ. A nǎ kó kɔ mɛ ná, bɔ é ná tlí bó má wá vún ó. A nǎ zé kan kwlésinnɔ, kan vɔvɔ kpódó kan vɔvɔ cɛ́cɛ́ kpó dó bló atínsínsɛ́n e è nɔ ylɔ́ ɖɔ glenádi ɔ́ gbɔn awu ɔ́ tó lɛ́ lɛ̌ dó, ɖo do, bó dó ba acɔ́ ná, bó ná zé siká dó bló gan e è nɔ xúxú ɔ́ kpɛví kpɛví ɖé lɛ́ɛ lɛ́ lɛ̌ dó gbɔn glenádi lɛ́ɛ tɛ́ntin. Hǔn, è mɔ gan ɖokpó ɔ́, è nǎ mɔ glenádi ɖokpó, bɔ é ná nɔ mɔ̌ lɛ́ lɛ̌ dó awu ɔ́ bǐ. Awu énɛ́ ɔ́ wɛ Aalɔ́ɔn ná nɔ́ dó dó wa vɔ̌sánú-xwlémawutɔ́zɔ́ tɔn. Hwenu e é ná ɖo Tɛn mímɛ́ ɔ́ mɛ byɔ́ wɛ ɔ́ kpódó hwenu e é ná ɖo tíntɔ́n sín mɛ wɛ ɔ́ kpó ɔ́, è nǎ nɔ se gan e ɖo awu ɔ́ tó lɛ́ɛ sín gbe; énɛ́ ɔ́, nú gan ɔ́ ɖo nǔ ɖɔ wɛ ɔ́, é ná kú ǎ. “Mɔ̌ ɖokpó ɔ́, a nǎ zé siká akú dó bló gan gbajagbaja ɖokpó ná, bó ná ɖe d'é ji ɖɔ: ‘Mɛɖeɖóvo Mawu Mavɔmavɔ tɔn’. A nǎ ɖe lě e awǐnnyazɔ́watɔ́ nɔ́ kun nǔ dó awǐnnya jí gbɔn é. A nǎ zé kan kwlésinnɔ dó blá ɛ ganjí dó tablá ɔ́ wú ɖo nukɔn. Hwenu e é ná wá nyɛ Mawu Mavɔmavɔ ɔ́ nukɔn, bó ná xwlé vɔ̌sánú Izlayɛ́li ví lɛ́ɛ tɔn mì ɔ́, nǔwlánwlán énɛ́ ɔ́ ná ɖo nukɔn tɔn. Énɛ́ ɔ́, nú Izlayɛ́li ví lɛ́ɛ ná bó xwlé vɔ̌sánú mì nyi do ɔ́, un ná kpɔ́n dó nǔwlánwlán énɛ́ ɔ́ e ɖo Aalɔ́ɔn nukɔn ɔ́ wú, bó yí vɔ̌sánú yětɔn lɛ́ɛ. “Mɔ̌ ɖokpó ɔ́, a nǎ zé kan didɛ e è nɔ dó lɔn lɛ̌ɛnkanvɔ ná ɔ́ dó tɔ dowu gaga, bɔ è nǎ kó tablá kpó gǒjíblánú kpó nú Aalɔ́ɔn. “A nǎ tɔ awu gaga nú Aalɔ́ɔn sín vǐ súnnu lɛ́ɛ lɔmɔ̌, bó ná bló gǒjíblánú nú yě, bó ná tɔ gbǎkún nú yě. Nǔ énɛ́ lɛ́ɛ ná ɖe tɛn e mɛ yě ɖe ɔ́ kpó susu e yě ɖó ɔ́ kpó xlɛ́. “A nǎ dó awu énɛ́ lɛ́ɛ nú nɔví towe Aalɔ́ɔn kpódó vǐ tɔn súnnu lɛ́ɛ kpó. A nǎ kɔn ami dó ta nú yě, a nǎ zé azɔ̌ yětɔn dó así nú yě, a nǎ ɖe yě ɖó vo, bɔ yě ná nɔ wa vɔ̌sánú-xwlémawutɔ́ sín azɔ̌ ɔ́ nú mì. A nǎ zé lɛ̌ɛnkanvɔ dó tɔ cokoto kpɛví kpɛví nú yě, bɔ yě ná nɔ́ dó ɖó do dó hwlá mɛ̌. Cokoto énɛ́ ɔ́ ná gosín alin wa yi asá. Nú Aalɔ́ɔn kpódó vǐ tɔn súnnu lɛ́ɛ kpó xwe goxɔ ɔ́ mɛ, bó ná kpé nyɛ Mawu, abǐ nú yě xwe vɔ̌sákpe ɔ́ kɔn, bó ná wa vɔ̌sánú-xwlémawutɔ́zɔ́ yětɔn ɔ́, yě ɖó ná dó cokoto kpɛví énɛ́ ɔ́ dó do. É má nyí mɔ̌ ǎ ɔ́, un ná mɔ ɖɔ yě wa nǔ nyi do, bɔ yě ná kú. Sɛ́n ɖé wɛ sɛ́n énɛ́ ɔ́ nyí, bó ɖo te káká sɔ́yi nú Aalɔ́ɔn kpódó kúnkan tɔn lɛ́ɛ kpó.” “Lě e a nǎ bló gbɔn nú Aalɔ́ɔn kpó vǐ tɔn súnnu lɛ́ɛ kpó, bó ná ɖe yě ɖó vo, bɔ yě ná nɔ́ wa vɔ̌sánú-xwlémawutɔ́ sín azɔ̌ ɔ́ nú mì ɔ́ ɖíe: “Zě nyibúsú wínnyáwínnyá ɖokpó, bó zé agbo we; blɔ̌ ɖěbǔ má ɖo yě wú ó. A nǎ lɛ́ zé blěelinfín dó ɖa wɔ̌xúxú e mɛ è ma dó tɔ́n ǎ é ná. A nǎ zé ami dó nya blěelinfín dó ɖa atá e mɛ è ma dó tɔ́n ǎ é. A nǎ zé blěelinfín dó bló acɔnmɔ e mɛ è ma dó tɔ́n ǎ é, bó sá ami dó. A nǎ bɛ́ nǔ énɛ́ lɛ́ɛ e a ɖa ɔ́ dó xasun mɛ, bó ná zé kpódó nyibúsú wínnyáwínnyá ɔ́ kpó, kpódó agbo we lɛ́ɛ kpó wá xwé ce gbe. “Mɔ̌ ɖokpó ɔ́, a nǎ kplá Aalɔ́ɔn kpódó vǐ tɔn súnnu lɛ́ɛ kpó wá goxɔ ɔ́ nukɔn; fínɛ́ wɛ un ná ɖɔ xó xá togun ɔ́ ɖe, bó ná zé sin dó slá wǔ nú yě. Énɛ́ ɔ́ gúdo ɔ́, a nǎ fɔ vɔ̌sánú-xwlémawutɔ́ sín awu lɛ́ɛ dó nú Aalɔ́ɔn. Awu lɛ́ɛ wɛ nyí: Awu ɖaxó ɔ́, dowu gaga ɔ́, efódu ɔ́ kpódó akɔ́ntakpo ɔ́ kpó, bó ná sin efódukan ɔ́. A nǎ sɔ́ tablá ɔ́ ɖó ta n'i, bó ná zé sikánú e wú è wlǎn mɛɖeɖóvo Mawu Mavɔmavɔ tɔn dó ɔ́ ɖ'é wú. A nǎ zé ami ɔ́ bó kɔn dó ta n'i, bó ná dó ɖe e ɖó vo. Énɛ́ ɔ́ gúdo ɔ́, a nǎ ylɔ́ vǐ tɔn súnnu lɛ́ɛ, bó ná dó awu gaga lɛ́ɛ nú yě. A nǎ sin gǒjíblánú yětɔn lɛ́ɛ nú yě, bó ná xwe gbǎkún yětɔn lɛ́ɛ nú yě. Bɛ́ sín gbe énɛ́ ɔ́ gbe ɔ́, yě ná nyí vɔ̌sánú-xwlémawutɔ́ káká sɔ́yi lě e un ɖɔ gbɔn é. “Énɛ́ ɔ́ gúdo ɔ́, a nǎ zé nyibúsú ɔ́ wá goxɔ ɔ́ nukɔn, bɔ Aalɔ́ɔn kpódó vǐ tɔn súnnu lɛ́ɛ kpó ná fɔ alɔ ɖó ta tɔn, bɔ a nǎ gbo gbe nyibúsú ɔ́ ɖo nyɛ Mawu Mavɔmavɔ nukɔn, ɖo goxɔ ɔ́ sín alihɛ́nnu. A nǎ yǐ nyibúsú ɔ́ sín hun ɖě, bó sɔ́ alɔví d'é mɛ, bó ɖá dó vɔ̌sákpe e ɖo goxɔ ɔ́ nukɔn ɔ́ sín zo lɛ́ɛ wú, bó ná húzú hun e kpo ɔ́ kɔn nyi vɔ̌sákpe ɔ́ sín afɔ wú. A nǎ ɖe jǒ e ɖo kanlin ɔ́ sín xomɛnú lɛ́ɛ wú ɔ́ bǐ, bó ná ɖe alǐnnuvínu ɔ́ kpódó ayi we lɛ́ɛ kpó, bó ná dó bǐ zo ɖo vɔ̌sákpe ɔ́ jí, ɖo goxɔ ɔ́ nukɔn. Amɔ̌, kanlin ɔ́ sín lan kpódó anyǔ tɔn kpó, kpódó mǐ tɔn kpó ɔ́, a nǎ ɖe sín fí e mi ɖó gɔnu ɖó ɔ́, bó dó zo. É ná nyí hwɛsɔ́kɛmɛvɔ́. “Énɛ́ ɔ́ gúdo ɔ́, a nǎ zé agbo lɛ́ɛ ɖokpó, bɔ Aalɔ́ɔn kpódó vǐ tɔn súnnu lɛ́ɛ kpó ná fɔ alɔ ɖó ta tɔn. Bɔ a nǎ gbo gbe agbo ɔ́. A nǎ yí hun tɔn, bó ná mi dó vɔ̌sákpe ɔ́ wú lɛ́ lɛ̌ dó. A nǎ já agbo ɔ́. A nǎ klɔ́ xomɛnú lɛ́ɛ kpódó afɔ lɛ́ɛ kpó, lobo ná bɛ́ dó lan ɔ́ kpó ta ɔ́ kpó jí. A nǎ dó bǐ zo ɖo vɔ̌sákpe ɔ́ jí. Vɔ̌ e è nɔ dó zo nú mì ɔ́ wɛ. Vɔ̌sísá ɖé wɛ é nyí bɔ wǎn tɔn nɔ nyɔ́ se nú nyɛ Mawu Mavɔmavɔ. “Énɛ́ ɔ́ gúdo ɔ́, a nǎ zé agbo wegɔ́ ɔ́, bɔ Aalɔ́ɔn kpódó vǐ tɔn súnnu lɛ́ɛ kpó ná fɔ alɔ ɖó ta tɔn, a nǎ gbo gbe e. A nǎ yǐ hun tɔn ɖě, bó ná ɖá dó Aalɔ́ɔn kpó vǐ tɔn lɛ́ɛ kpó sín tó ɖisíxwé tɔn ɔ́ nuvínu. A nǎ lɛ́ ɖá dó alɔsú yětɔn ɖisíxwé tɔn ɔ́ wú, bó ná lɛ́ ɖá dó afɔsú yětɔn ɖisíxwé tɔn ɔ́ wú. Énɛ́ ɔ́ gúdo ɔ́, a nǎ mi hun e kpo ɔ́ dó vɔ̌sákpe ɔ́ wú lɛ́ lɛ̌ dó. Énɛ́ ɔ́ gúdo ɔ́, a nǎ wǔn hun e ɖo vɔ̌sákpe ɔ́ jí ɔ́ kpódó ami e è nɔ kɔn dó ta nú mɛ ɔ́ kpó kpɛɖé kpɛɖé, bó ná mi dó Aalɔ́ɔn kpódó vǐ tɔn lɛ́ɛ kpó sín awu wú. Lě e a nǎ ɖe Aalɔ́ɔn kpódó vǐ tɔn lɛ́ɛ kpó, kpódó awu yětɔn lɛ́ɛ kpó ɖó vo nú nyɛ Mawu Mavɔmavɔ gbɔn ɔ́ nɛ́. Din ɔ́, agbo wegɔ́ e è hu ɔ́ ná ɖe xlɛ́ ɖɔ vɔ̌sánú-xwlémawutɔ́ lɛ́ɛ bɛ́ azɔ̌; a nǎ ɖe agbo énɛ́ ɔ́ sín sí, kpó jǒ e ɖ'é wú ɔ́ kpó; jǒ e ɖo xomɛnú lɛ́ɛ wú ɔ́, alǐnnuvínu ɔ́, ayi we lɛ́ɛ, kpódó jǒ e bú dó yě ɔ́ kpó, bó ná ɖe asá ɖisíxwé tɔn ɔ́ d'é jí. A nǎ lɛ́ zé wɔ̌xúxú e mɛ è ma dó tɔ́n ǎ é ɖokpó, atá ɖokpó, acɔnmɔ ɖokpó ɖo xasun e ɖo nyɛ Mawu Mavɔmavɔ nukɔn ɔ́ mɛ. A nǎ bɛ́ nǔ énɛ́ lɛ́ɛ bǐ dó Aalɔ́ɔn kpó vǐ tɔn súnnu lɛ́ɛ kpó sín alɔ mɛ, bó ná ɖɔ nú yě ɖɔ yě ní fɔ yě xwlé mì, lě e è nɔ xwlé vɔ̌sánú mì gbɔn é. Énɛ́ ɔ́ gúdo ɔ́, a nǎ yǐ nǔ lɛ́ɛ sín alɔ yětɔn mɛ, bó ná zé dó vɔ̌ e è nɔ dó zo ɔ́ jí ɖo vɔ̌sákpe ɔ́ jí, bó ná dó zo. Vɔ̌sánú wɛ é nyí bɔ wǎn tɔn nɔ́ nyɔ́ se nú mì. A nǎ zé agbo wegɔ́ énɛ́ sín akɔ́n, bó ná xwlé mì lě e è nɔ xwlé vɔ̌sánú mì gbɔn é, bɔ énɛ́ ɔ́ ná nyí kanta towe. “A nǎ ɖe xlɛ́ ɖɔ agbo ɔ́ sín akɔ́n kpó asá tɔn kpó e è ɖe, bó xwlé nyɛ Mawu Mavɔmavɔ gbɔn mɔ̌ ɔ́, lan e è sɔ́ ɖó vo nú mì ɔ́ wɛ. Énɛ́ ɔ́ wú wɛ Izlayɛ́li ví lɛ́ɛ ná nɔ́ ɖe akpáxwé énɛ́ lɛ́ɛ ɖo kanlin e yě dó sá kɔnɖókpɔ́ vɔ́ nú mì lɛ́ɛ wú hwebǐnu, bó ná nɔ́ bɛ́ jó nú Aalɔ́ɔn kpódó vǐ tɔn lɛ́ɛ kpó. “Nú Aalɔ́ɔn wá kú ɔ́, è nǎ bɛ́ vɔ̌sánú-xwlémawutɔ́ sín awu tɔn lɛ́ɛ jó nú vǐ tɔn súnnu lɛ́ɛ, bɔ hwenu e è nǎ kɔn ami dó ta nú mɛ ɖokpó ɖo yě mɛ bó ná sɔ́ vɔ̌sánú-xwlémawutɔ́zɔ́ dó así n'i ɔ́, é ná dó. Vǐ tɔn e ná jɛ do tɔn mɛ, bó ná jɛ vɔ̌sánú-xwlémawutɔ́zɔ́ ɔ́ wa jí ɔ́ ná dó awu lɛ́ɛ xɔ azǎn tɛ́nwe, hwenu e é ná byɔ́ goxɔ ɔ́ mɛ, bó ná wa vɔ̌sánú-xwlémawutɔ́zɔ́ ɖo tɛn mímɛ́ ɔ́ mɛ é. “A nǎ zé agbo wegɔ́ e è dǒ sɔ́ vɔ̌sánú-xwlémawutɔ́zɔ́ ɔ́ dó así nú yě ɔ́, bó ná ɖa lan tɔn ɖo tɛn mímɛ́ ɖé mɛ. Bɔ Aalɔ́ɔn kpó vǐ tɔn súnnu lɛ́ɛ kpó ná ɖu lan tɔn kpódó wɔ̌xúxú e ɖo xasun ɔ́ mɛ ɔ́ kpó ɖo goxɔ e mɛ un ɖe ɔ́ sín ali hɛ́nnu. Yědɛɛ lɛ́ɛ ɖokpónɔ wɛ ná ɖu nǔ énɛ́ lɛ́ɛ, ɖó nǔ énɛ́ lɛ́ɛ wɛ è zǎn dó súnsún hwɛ yětɔn lɛ́ɛ, bó ɖe yě ɖó vo bó sɔ́ vɔ̌sánú-xwlémawutɔ́zɔ́ ɔ́ dó así nú yě. Mɛ ɖěvo ɖěbǔ ná ɖu ǎ, ɖó nǔ mímɛ́ wɛ. Nǔ é kpo lan ɔ́ ɖě kpódó wɔ̌xúxú ɔ́ ɖě kpó bɔ ayǐ hɔ́n dó ɔ́, a nǎ dó zo. È sɔ́ ná ɖu ǎ, ɖó nǔ mímɛ́ wɛ. “A nǎ xwedó nǔ énɛ́ lɛ́ɛ e un ɖɔ nú we dó Aalɔ́ɔn kpó vǐ tɔn súnnu lɛ́ɛ kpó wú lɛ́ɛ bǐ. Azǎn tɛ́nwe wɛ a nǎ sɔ́ ɖó te, dó sɔ́ yě vɔ̌sánú-xwlémawutɔ́. “A nǎ nɔ́ zé nyibúsú ɖokpó dó sá vɔ̌ nú mì ayǐhɔ́ngbe ayǐhɔ́ngbe xɔ azǎn tɛ́nwe lɛ́ɛ, bó ná dó mɔ hwɛsɔ́kɛ yí. Énɛ́ ɔ́, a nǎ wa mɔ̌ dó slá wǔ nú vɔ̌sákpe ɔ́; énɛ́ ɔ́ gúdo ɔ́, a nǎ kɔn ami d'é jí, bó dó ɖe e ɖó vo nú mì. Énɛ́ ɔ́, a nǎ slá wǔ nú vɔ̌sákpe ɔ́ xɔ azǎn tɛ́nwe, bó dó ɖe e ɖó vo, bɔ vɔ̌sákpe ɔ́ ná nyí nǔ mímɛ́ bǐ, bɔ nǔ ɖěbǔ jɛ vɔ̌sákpe ɔ́ wú ɔ́ ná húzú nǔ mímɛ́.” “Ayǐhɔ́ngbe ayǐhɔ́ngbe ɔ́, a nǎ nɔ́ xwlé mì lɛ̌ngbɔ́ví e ɖó xwe ɖokpó ɔ́ we ɖo vɔ̌sákpe ɔ́ jí. A nǎ nɔ́ bló mɔ̌ káká sɔ́yi. A nǎ nɔ́ xwlé mì lɛ̌ngbɔ́ví ɔ́ ɖokpó zǎnzǎn, ɖokpó gbada. Lɛ̌ngbɔ́ví zǎnzǎn tɔn ɔ́, linfín nyinya kilóo atɔn, olívu sín ami lǐtli ɖokpó adaɖé kpódó vɛ̌ɛn lǐtli ɖokpó adaɖé kpó, bɔ a nǎ xwlé mì. A nǎ zě vɛ̌ɛn lǐtli ɖokpó adaɖé, bó ná ba. Nǔ ɖokpó ɔ́ lɛ́ɛ wɛ ná jɛ lɛ̌ngbɔ́ví e a nǎ xwlé mì gbadanu ɔ́ jí. Vɔ̌ e è nɔ dó zo lɛ́ɛ wɛ, bɔ wǎn yětɔn nɔ́ nyɔ́ se nú nyɛ Mawu Mavɔmavɔ. Bɛ́ sín din káká sɔ́yi ɔ́, è nǎ gɔn vɔ̌ e è nɔ dó zo ɔ́ sá nú mì ɖo goxɔ e mɛ un ɖe ɔ́ nukɔn gbeɖé ǎ. Fínɛ́ wɛ un ná nɔ́ wá kpé mi ɖe, bó ná nɔ́ ɖɔ xó nú we ɖe. “Un ná nɔ́ wá kpé Izlayɛ́li ví lɛ́ɛ ɖo fínɛ́, bɔ tɛn énɛ́ ɔ́ ná húzú tɛn mǐmɛ́, ɖó susu ce wú. Un ná ɖe goxɔ ɔ́ kpódó vɔ̌sákpe ɔ́ kpó ɖó vo. Un ná ɖe Aalɔ́ɔn kpódó vǐ tɔn súnnu lɛ́ɛ kpó ɖó vo, bɔ yě ná nɔ́ wa vɔ̌sánú-xwlémawutɔ́zɔ́ nú mì. Un ná nɔ Izlayɛ́li ví lɛ́ɛ tɛ́ntin, bó ná nyí Mawu yětɔn. Yě ná tunwun ɖɔ nyɛ wɛ nyí Mawu Mavɔmavɔ. Mawu yětɔn e ɖe yě tɔ́n sín Ejípu, bó ná nɔ tɛ́ntin yětɔn é. “Mawu Mavɔmavɔ, Mawu yětɔn wɛ un nyí.” “A nǎ zé kasyatín dó bló vɔ̌sákpe ɖokpó bó ná nɔ́ dó zǎlínkpɔ́n zo ɖ'é jí. Akpáxwé tɔn lɛ́ɛ bǐ ná ɖó jlɛ̌ ɖokpó ɔ́; ɖokpó ɖokpó sín ga ná nyí mɛ̌tlu vlɔ̌; vɔ̌sákpe ɔ́ sín jǐ yiyi ná nyí mɛ̌tlu ɖokpó. Zo tɔn ɛnɛ lɛ́ɛ ná tɔ́n ganjí, bɔ zo lɛ́ɛ kpó vɔ̌sákpe ɔ́ kpó ná nɔ bǔ. A nǎ kɔn siká akú dó gbɔn fí bǐ, a nǎ kɔn dó tó tɔn ɖo aga, bó ná kɔn dó zo tɔn e tɔ́n lɛ́ɛ, bó ná kɔn dó akpáxwé tɔn ɛnɛ lɛ́ɛ. A nǎ kɔn siká gbɔn tó tɔn lɛ́ lɛ̌ dó. A nǎ bló sikálɔgan we we ɖó ɖisí amyɔ nú vɔ̌sákpe ɔ́ ɖo do. A nǎ fɔ kpo gaga gbɔn alɔgan lɛ́ɛ mɛ, bɔ è ná dó nɔ́ zé vɔ̌sákpe ɔ́ ná. Kasyatín wɛ a nǎ kpa dó bló kpo gaga lɛ́ɛ ná, bó ná kɔn siká dó. A nǎ zé vɔ̌sákpe ɔ́ ɖó xɔmɛgbovɔ ɔ́ nukɔn; xɔmɛgbovɔ e gúdo akɔjijɛgbá e mɛ awǐnnyatɛ ɖe ɔ́ nukɔn, ɖo fí e un ná nɔ́ wá kpé we ɖe é. Aalɔ́ɔn ná nɔ́ dó atínkɛn wǎnnɔ zo ɖo vɔ̌sákpe énɛ́ ɔ́ jí. Nú é yi zogbɛ́n lɛ́ɛ blóɖó gbé zǎnzǎn tɛgbɛ ɔ́, é ná nɔ́ dó zǎlínkpɔ́n zo. Nú é yi zogbɛ́n lɛ́ɛ blóɖó gbé gbadanu ɔ́, é ná nɔ́ lɛ́ dó zǎlínkpɔ́n zo; mɔ̌ wɛ è nǎ nɔ́ dó zo nú mì gbɔn káká sɔ́yi sín jijimɛ ɖě jí yi ɖě jí. Mi ná nɔ́ dó zǎlínkpɔ́n ɖěvo zo ɖo vɔ̌sákpe ɔ́ jí ǎ, mi ka ná nɔ́ dó vɔ̌ zo ɖ'é jí ǎ, mi ka ná dó nǔníná jinukún tɔn zo ɖ'é jí ǎ, mi ká ná ba ahan kɔn d'é jí ǎ. Aalɔ́ɔn ná nɔ́ sá hwɛsɔ́kɛmɛvɔ́ azɔn ɖokpó ɖo xwe ɖokpó mɛ. É ná kɔn kanlin e è hu dó sá vɔ̌ énɛ́ ɔ́ ná, bó ná mɔ hwɛsɔ́kɛmɛ yí ɔ́, sín hun dó vɔ̌sákpe ɔ́ sín zo e tɔ́n lɛ́ɛ jí. Xwewú xwewú wɛ è nǎ nɔ́ sá vɔ̌ énɛ́ ɔ́, sín jijimɛ ɖě jí yi ɖě jí. È ná zé vɔ̌sákpe ɔ́ ɖó vo nú mì, bɔ é ná nyí nǔ mímɛ́ titewungbe ɖé.” Mawu Mavɔmavɔ lɛ́ ɖɔ nú Mɔyízi ɖɔ: “Hwenu e a nǎ sɔ́ Izlayɛ́li ví lɛ́ɛ sín kɛ́n ɔ́, mɛ ɖokpó ɖokpó ná sú takwɛ́ ɖé mì dó hwlɛ́n gbɛ éɖée tɔn gán, bónú awě ɖěbǔ ní má xo mi ɖo kɛ́nsísɔ́ énɛ́ ɔ́ hwenu ó. Mɛ e sín kɛ́n a nǎ sɔ́ lɛ́ɛ ɖokpó ɖokpó ná ná gankwɛ́ glǎmu atɔ́ɔ́n, bɔ kpinkpɛn tɔn ná sɔgbe xá akwɛ́ e è nɔ zán ɖo Mawu xwé gbe ɔ́ sín vlɔ̌. É wɛ a nǎ yǐ ɖo mɛ ɖokpó ɖokpó sí nú mì. Izlayɛ́li ví súnnu e kó ɖó xwe ko abǐ éé kó ɖó hú mɔ̌ bɔ a sɔ́ kɛ́n yětɔn lɛ́ɛ bǐ wɛ ná sú akwɛ́ énɛ́. Dɔkunnɔ ná ná hú mɔ̌ ǎ, wamamɔnɔ lɔ ka ná ná bɔ é ná hwe hú mɔ̌ ǎ, mɛ ɖokpó ɖokpó ná ná nabí e è byɔ̌ ɔ́, bó ná dó xɔ gbɛ nú éɖée. Nú a yǐ akwɛ́ énɛ́ ɔ́ bǐ ɖo Izlayɛ́li ví lɛ́ɛ sí ɔ́, a nǎ zé dó wa goxɔ ɔ́ sín azɔ̌. Énɛ́ ɔ́, un ná nɔ́ flín Izlayɛ́li ví lɛ́ɛ, bó ná nɔ́ nya xɛ ɖo yě jǐ.” Mawu Mavɔmavɔ lɛ́ ɖɔ nú Mɔyízi ɖɔ: “A nǎ zé ganvɔ dó bló zɛ̌n ɖokpó ná, bó ná zé ganvɔ dó bló afɔ n'i, bɔ è nǎ nɔ́ slá wǔ ɖ'é mɛ. È ná sɔ́ ɖó goxɔ ɔ́ kpó vɔ̌sákpe e jí è nɔ dó vɔ̌ zo ɖe ɔ́ kpó tɛ́ntin, bó ná dun sin ɖ'é mɛ bɔ é ná gɔ́, bɔ è nǎ nɔ zé dó slá wǔ. Aalɔ́ɔn kpódó vǐ tɔn súnnu lɛ́ɛ kpó ná nɔ́ zé sin e ɖ'é mɛ ɔ́ dó klɔ́ alɔ kpódó afɔ kpó, có bó ná nɔ́ byɔ́ goxɔ ɔ́ mɛ, abǐ có bó ná wá vɔ̌sákpe e jí è nɔ dó vɔ̌ zo ɖe ɔ́ kɔn, bó ná xwlé vɔ̌sánú mì. Énɛ́ ɔ́, yě sɔ́ ná kú ǎ. Nǔgbó ɔ́, yě ɖó ná nɔ́ klɔ́ alɔ kpódó afɔ kpó, bó má wá kú ó. Sɛ́n énɛ́ ɔ́ ɖo te nú yě kpódó kúnkan yětɔn lɛ́ɛ kpó káká sɔ́yi.” Mawu Mavɔmavɔ lɛ́ ɖɔ nú Mɔyízi ɖɔ: “A nǎ zé ami wǎnɖagbenɔ e nyɔ́ hú ɖě lɛ́ɛ bǐ é: a nǎ zé mǐlami kilóo atɔ́ɔ́n, sinnamɔmi wǎnɖagbenɔ kilóo we adaɖé. Kanɛ́lu wǎnnɔ kilóo we adaɖé. Kasi kilóo atɔn; gan e è nɔ dó da nǔ ɖo Mawu xwé gbe ɔ́ wɛ è nǎ zé dó da. Olívumi lǐtli ayizɛ́n ná jɛ jí. A nǎ zé dó ɖa ami e è nɔ sá dó ɖe mɛ ɖó vo ɔ́ ná lě e céluɖatɔ́ nɔ́ ɖa célu gbɔn é. Ami mímɛ́ wɛ é ná nyí bɔ è nǎ nɔ́ zán hwenu e è nǎ ɖo mɛ ɖe ɖó vo nú mì wɛ é. A nǎ mi ami ɔ́ dó goxɔ ɔ́ kpódó akɔjijɛgbá ɔ́ kpó wú. A nǎ mi dó távo ɔ́, zogbɛ́nhɛnnú ɔ́, kpódó nǔ e ɖo yě wú lɛ́ɛ bǐ kpó wú. A nǎ mi dó vɔ̌sákpe e jí è nɔ dó ami wǎnɖagbenɔ zo ɖe ɔ́ wú. A nǎ mi dó vɔ̌sákpe e jí è nɔ dó vɔ̌ zo ɖe ɔ́ wú, bó ná mi dó nǔ e è nɔ zán ɖo vɔ̌sákpe ɔ́ kɔn lɛ́ɛ bǐ wú. A nǎ mi dó ganzɛ́n ɔ́ kpódó nǔ e jí è sɔ́ ɖó ɔ́ kpó wú. A nǎ ɖe nǔ énɛ́ lɛ́ɛ ɖó vo, bɔ yě ná nyí nǔ mímɛ́ bǐ yi fó, gbɛtɔ́ abǐ nǔ ɖěbǔ jɛ yě wú ɔ́ é ná húzú nyɛ Mawu Mavɔmavɔ tɔn. Ami énɛ́ ɔ́ wɛ a nǎ kɔn dó ta nú Aalɔ́ɔn kpódó vǐ tɔn súnnu lɛ́ɛ kpó, bó ná dó ɖe yě ɖó vo, bɔ yě ná nɔ́ wa vɔ̌sánú-xwlémawutɔ́zɔ́ nú mì. “A nǎ ɖɔ nú Izlayɛ́li ví lɛ́ɛ ɖɔ: ‘Ami mímɛ́ wɛ é nyí, bɔ è nǎ nɔ́ kɔn dó ta nú mɛ. É jɛ́n è nǎ nɔ́ zán dó wa azɔ̌ nú mì tɛgbɛ. È nǎ sá kpowun ǎ, mɛɖé ká ná zé nǔ e è cáká dó bló ná lɛ́ɛ dó bló mɔ̌hunkɔtɔn ɖěvo ná ǎ. Ami e è nɔ kɔn dó ta nú mɛ dó ɖe mɛ ɖó vo nú Mawu é wɛ é nyí, bɔ mi ná nɔ́ mɔ dó mɔ nǔ mímɛ́. Mɛ ɖěbǔ bló mɔ̌hunkɔtɔn ɖě bó ná sá nú mɛ kpaa ɖé ɔ́, è nǎ ɖe mɛ ɔ́ sín togun tɔn mɛ.’ ” Mawu Mavɔmavɔ lɛ́ ɖɔ nú Mɔyízi ɖɔ: “A nǎ zě nǔ wǎnɖagbenɔ élɔ́ lɛ́ɛ: atínhúnhɔ́n, onísi kpódó galubanumu kpó, bó zé zǎlínkpɔ́n akú gɔ́ ná. Nǔ énɛ́ lɛ́ɛ ɖě ná hú ɖě ǎ. A nǎ bɛ̌ dó bló célu ná. A nǎ cáká yě lě e céluɖatɔ́ lɛ́ɛ nɔ́ cáká gbɔn é. È nǎ dó jɛ mɛ, bɔ é ná nyí nǔ akú, bó ná nyí nǔ mímɛ́. A nǎ li ɖě kpɔ́ɖɔ́kpɔ́ɖɔ́, bó ná sɔ́ ɖó akɔjijɛgbá ɔ́ nukɔn ɖo goxɔ ɔ́ mɛ fí e un ná nɔ́ wá kpé we ɖe ɔ́, bɔ mi ná nɔ́ mɔ dó mɔ nǔ mímɛ́ titewungbe ɖé. Mi ná zé nǔ e è cáká dó bló ná lɛ́ɛ dó bló mɔ̌hunkɔtɔn ɖě nú mi ɖésúnɔ ǎ. Mi ná mɔ dó mɔ nǔ mímɛ́ e è sɔ́ ɖ'ayǐ nú nyɛ Mawu Mavɔmavɔ ɖokpónɔ géé é. Mɛ ɖěbǔ bló mɔ̌hunkɔtɔn ɖě, bó ná nɔ́ se wǎn tɔn ɔ́, è nǎ ɖe mɛ ɔ́ sín togun tɔn mɛ.” Mawu Mavɔmavɔ lɛ́ ɖɔ nú Mɔyízi ɖɔ: “Đǒtó! Un sɔ́ Besalɛli Wulíi vǐ, Húu vǐvú ɔ́; akɔta Judáa tɔn ɔ́ mɛ wɛ é jɔ ɖe; un ná ɛ Yɛ ce bɔ é gɔ́ ayi tɔn mɛ, bɔ é bí, bó mɔ nukúnnú jɛ nǔ mɛ titewungbe. É tunwun azɔ̌ xwítíxwítí alɔkpa bǐ. É nyɔ́ tito lɛ́ɛ bló; é nyɔ́ siká sín azɔ̌ wa, bó nyɔ́ kpatágan kpó ganvɔ kpó sín azɔ̌ wa. É nyɔ́ awǐnnya ɖagbe ɖagbe lɛ́ɛ kpa, bó nyɔ́ to dó nǔ mɛ; é nyɔ́ atín kpa; mǐ ná ɖɔ kpowun ɔ́, é nyɔ́ nǔ bǐ wa. Un sɔ́ Oxoliyavu Axisamaki ví ɔ́ gɔ́ n'i; akɔta Dan tɔn ɔ́ mɛ wɛ é jɔ ɖe; un ná alɔlyɛ́nwiwa alɔnuzɔ́watɔ́ ɖěvo lɛ́ɛ. Yě ná nɔ kpɔ́, bó ná bló nǔ e un ɖɔ hwi ní bló lɛ́ɛ bǐ: yě ná bló goxɔ e mɛ un ná nɔ́ wá kpé yě ɖe ɔ́, bó ná bló akɔjijɛgbá ɔ́, bó ná bló nusú tɔn, bó ná bló nǔ e è nɔ zán ɖo goxɔ ɔ́ mɛ lɛ́ɛ bǐ, bó ná bló távo mímɛ́ ɔ́ kpódó sikázogbɛ́nhɛnnú ɔ́ kpó, bó ná bló nǔ e è nɔ zán ɖo yě kɔn lɛ́ɛ bǐ, bó ná bló éé jí è nǎ nɔ́ dó atínkɛn wǎnɖagbenɔ lɛ́ɛ zo ɖe ɔ́, bó ná bló vɔ̌sákpe e jí è nǎ nɔ́ dó vɔ̌sánú lɛ́ɛ zo ɖe ɔ́ kpódó nǔ e è nǎ nɔ́ zán ɖ'é kɔn lɛ́ɛ kpó, bó ná bló ganzɛ́n kpó afɔ tɔn kpó, bó ná bló azɔ̌wu lɛ́ɛ kpódó vɔ̌sánú-xwlémawutɔ́ sín awu kpó nú Aalɔ́ɔn, bó ná bló vǐ tɔn súnnu lɛ́ɛ sín awu lɛ́ɛ, bɔ yě ná nɔ́ dó, bó dó wa sinsɛnzɔ́ yětɔn lɛ́ɛ. Ami mímɛ́ wǎnɖagbenɔ e è nǎ nɔ́ zán dó ɖe mɛ ɖó vo nú mì ɔ́ kpódó célu wǎnɖagbenɔ e è nǎ nɔ́ zán ɖo goxɔ ɔ́ mɛ ɔ́ kpó. Alɔnuzɔ́watɔ́ lɛ́ɛ ná bló lě e un ɖɔ nú we gbɔn é.” Mawu Mavɔmavɔ lɛ́ ɖɔ nú Mɔyízi ɖɔ: “Đɔ nú Izlayɛ́li ví lɛ́ɛ ɖɔ yě ní ma gɔn gbɔjɛzán ce nyí gbeɖé ó: azǎn ɖé wɛ é nyí bɔ un sɔ́ ɖó vo; ɖó wuntun ɖé wɛ é ná nyí ɖo nyɛ kpó mi kpódó kúnkan mitɔn lɛ́ɛ kpó tɛ́ntin, bɔ è ná dó tunwun ɖɔ nyɛ Mawu Mavɔmavɔ ɔ́ wɛ sɔ́ mi bɔ mi ná nyí togun ce. Hǔn, mi bo nyi gbɔjɛzán ɔ́, mi ma zé dó mɔ azǎn yǎyá ɖé ná ó. Mɛ e ma ná ɖó sísí nú azǎn énɛ́ ɔ́, bó má ná mɔ ɖɔ sinsɛn sín azǎn wɛ é nyí ǎ ɔ́, è nǎ hu i; mɛ ɖěbǔ wa azɔ̌ gbe énɛ́ ɔ́ gbe ɔ́, è nǎ ɖe e sín togun tɔn mɛ bó ná hu i. Mawu Mavɔmavɔ zán gbla ɖokpó mɛ ɔ́, mi ɖó azǎn ayizɛ́n bó ná dó wa azɔ̌ ná; azǎn tɛ́nwegɔ́ ɔ́ wɛ nyí gbɔjɛzán, azǎn énɛ́ ɔ́, azǎn ɖé wɛ é nyí, bó ɖo vo nú nyɛ Mawu Mavɔmavɔ, bɔ è nǎ nɔ́ gbɔjɛ́. Mɛ ɖěbǔ wa azɔ̌ gbɔjɛzán gbe ɔ́, è nǎ hu i dandan. Izlayɛ́li ví lɛ́ɛ ɖó ná nɔ́ nyi gbɔjɛzán énɛ́ ɔ́, bɔ nǔ bǐ ná vɔ ɖ'é wú, jijimɛ ɖě jɛ ɖě gúdo, ɖó akɔjijɛ ɖé wɛ é nyí, bó ɖ'ayǐ káká sɔ́yi. Azǎn énɛ́ ɔ́ ɖó ná nyí kɔnɖókpɔ́ e ɖo nyɛ kpódó Izlayɛ́li ví lɛ́ɛ kpó tɛ́ntin ɔ́ sín xlɛ̌ káká sɔ́yi. Đó azǎn ayizɛ́n wɛ un sɔ́ ɖó te dó bló jǐnukúnsin kpódó ayǐkúngban kpó; amɔ̌, azǎn tɛ́nwegɔ́ ɔ́ gbe ɔ́, un ɖó azɔ̌ te bo gbɔjɛ́.” Ée Mawu ɖɔ xó xá Mɔyízi fó ɖo Sinayíi só ɔ́ jí ɔ́, é bɛ́ awǐnnyatɛ we e jí é ɖésúnɔ sɔ́ alɔví tɔn dó wlán sɛ́n lɛ́ɛ dó ɔ́ n'i. Izlayɛ́li togun ɔ́ mɔ ɖɔ hwenu e Mɔyízi ná jɛ te sín só ɔ́ jí ɔ́ ɖo lǐnlín wɛ, bó kplé lɛ́ lɛ̌ dó Aalɔ́ɔn, bó ɖɔ n'i ɖɔ: “Đǒtó! Blǒ vodún ɖokpó nú mǐ, bónú é ná nɔ nukɔn nú mǐ. Đó Mɔyízi ɔ́, nya énɛ́ ɔ́ e kplá mǐ tɔ́n sín Ejípu ɔ́, mǐ tunwun nǔ e jɛ dó jǐ tɔn ɔ́ ǎ.” Aalɔ́ɔn ɖɔ nú yě ɖɔ: “Mi bó yí siká tógbé e asi mitɔn lɛ́ɛ dó lɛ́ɛ, kpó éé vǐ mitɔn súnnu kpódó nyɔ̌nu kpó dó lɛ́ɛ kpó, bó bɛ́ yě wá nú mì.” Ée é ɖɔ mɔ̌ ɔ́, Izlayɛ́li ví lɛ́ɛ bǐ ɖe siká tógbé yětɔn lɛ́ɛ bǐ, bó bɛ́ nú Aalɔ́ɔn. Bɔ é yí, bó sínsín yě, bó kɔn dó to mɛ, bó dó bló nyibúví ná. Énɛ́ ɔ́ gúdo ɔ́, yě jɛ xó sú jí ɖɔ: “Izlayɛ́li ví lɛ́ɛ e mi, vodún mǐtɔn e ɖe mǐ tɔ́n sín Ejípu ɔ́ ɖíe!” Ée Aalɔ́ɔn mɔ mɔ̌ ɔ́, é mɛ vɔ̌sákpe ɖokpó ɖó nyibúví ɔ́ nukɔn, bó ɖɔ: “Sɔ ɔ́, mǐ ná ɖu xwe dó kpa susu nú Mawu Mavɔmavɔ!” Ayǐhɔ́ngbe tɔn ɔ́, Izlayɛ́li togun ɔ́ fɔ́n zǎn bó sá vɔ̌ e è nɔ dó zo ɔ́ kpódó kɔnɖókpɔ́ vɔ́ kpó ɖo vɔ̌sákpe ɔ́ jí, bɔ togun ɔ́ jínjɔ́n ayǐ bó ɖu nǔ, bó nu ahan; énɛ́ ɔ́ gúdo ɔ́, yě sí te bó j'awǎ. Hwe énɛ́ ɔ́ nu ɔ́, Mawu Mavɔmavɔ ɖɔ nú Mɔyízi ɖɔ: “Jɛ te din tlóló, ɖó togun e a ɖe tɔ́n sín Ejípu ɔ́, wa nǔ gblégblé. Yě yá wǔ lɛ́ kɔ sín ali e un ɖɔ yě ní gbɔn ɔ́ jí; yě sínsín siká bó dó bló nyibúví ná, bó jɛ kpo ɖo nukɔn tɔn, bó ɖe kɔ́ n'i, bó xwlé vɔ̌sánú i, bó ɖɔ: ‘Izlayɛ́li ví lɛ́ɛ e mi, vodún mǐtɔn e ɖe mǐ tɔ́n sín Ejípu ɔ́ ɖíe!’ Un mɔ nǔ e wa nú togun ɔ́ nyí ɔ́; yě bǐ wɛ tlí tó. Din ɔ́, gbɔ nú má zé xomɛsin dó wa nǔ xá yě; un ná hu yě bǐ; amɔ̌, hwɛ ɔ́, un ná zé we dó bló akɔta ɖaxó ɖé ná.” Mɔyízi ka sa vo nú Mawu Mavɔmavɔ, Mawu tɔn ɖɔ ní fá xomɛ; é ɖɔ n'i ɖɔ: “Mawu Mavɔmavɔ, aniwú wɛ a nǎ zé xomɛsin towe dó wa nǔ xá togun towe e a zǎn hlɔ̌nhlɔ́n towe, lobo zán nǔwúkpíkpé towe dó ɖe e tɔ́n sín Ejípu ɔ́? Nú a blǒ gbɔn mɔ̌ ɔ́, Ejípunu lɛ́ɛ ná ɖɔ dǎ wɛ hwi dá Izlayɛ́li ví lɛ́ɛ wú, bó dó ɖe yě tɔ́n sín to émítɔn mɛ, bó ná hu yě kɔn nyi sókan mɛ, bó ná sú kún yětɔn dó sín ayǐkúngban jí. Mawu Mavɔmavɔ, fá xomɛ bó jó nǔ nyanya e a jlǒ ná wa xá togun towe ɔ́ dó. Flín mɛsɛntɔ́ towe Ablaxámu, Izáki kpódó Jakɔ́bu kpó e a dó akpá ná ɖɔ émí ná bló bɔ kúnkan yětɔn lɛ́ɛ ná sukpɔ́ sunví ɖɔhun bɔ émí ná ná to e sín akpá émí dó ɔ́ kúnkan yětɔn lɛ́ɛ, bɔ é ná nyí yětɔn káká sɔ́yi é.” Ée Mɔyízi ɖɔ mɔ̌ ɔ́, Mawu Mavɔmavɔ sɔ́ wa nǔ nyanya e sín adǎn e é gblɔ́n ɔ́ xá togun tɔn ǎ. Énɛ́ ɔ́ gúdo ɔ́, Mɔyízi jɛ te sín só ɔ́ jí. Awǐnnyatɛ we lɛ́ɛ ɖo alɔ tɔn mɛ. Awǐnnyatɛ we énɛ́ lɛ́ɛ jí wɛ Mawu wlǎn sɛ́n tɔn lɛ́ɛ dó gǔdo nukɔn. Mawu wɛ wa awǐnnyatɛ énɛ́ lɛ́ɛ sín azɔ̌. É ɖésúnɔ wɛ zé alɔ tɔn dó wlán sɛ́n lɛ́ɛ d'é jí. Jozuwée se xó e sú wɛ togun ɔ́ ɖe ɔ́, bó ɖɔ nú Mɔyízi ɖɔ: “È ɖo ahwanfunfun sín xósúsú se wɛ ɖo fí e mǐ ɖó gɔnu ɖó é.” Bɔ Mɔyízi ɖɔ: “Éeǒ! Ényí ɖuɖéjí sín xósúsú wɛ ǎ. É ká nyí ayǐjijɛ sín xósúsú wɛ ǎ, lo ɔ́, awǎjijɛ sín xósúsú se wɛ un ɖe.” Ée yě sɛkpɔ́ fí e togun ɔ́ ɖó gɔnu ɖó ɔ́ tlóló ɔ́, Mɔyízi mɔ nyibúví ɔ́ sɛ́ dó, bó mɔ togun ɔ́ ɖo we ɖú wɛ. Ée Mɔyízi mɔ mɔ̌ ɔ́, xomɛ sin i káká, bɔ é bɛ́ awǐnnyatɛ e ɖo alɔ tɔn mɛ lɛ́ɛ nyi gbě, bɔ yě wá gba ɖo só ɔ́ kpá. É zé nyibúví e yě bló ɔ́, bó dó zo, bó li éé kpo ɔ́ kpɔ́ɖɔ́kpɔ́ɖɔ́, bó fúnfún gbɔn sin nukún mɛ, bó ná Izlayɛ́li ví lɛ́ɛ bɔ yě nu. Énɛ́ ɔ́ gúdo ɔ́, Mɔyízi kanbyɔ́ Aalɔ́ɔn ɖɔ: “Ani wɛ togun ɔ́ wa nú we bɔ a jǒ e dó bɔ é hu hwɛ ɖaxó élɔ́?” Bɔ Aalɔ́ɔn yí gbe n'i ɖɔ: “Gǎn ce, ma sin xomɛ ó; hwi ɖésúnɔ ɔ́, a tunwun ɖɔ togun élɔ́ ɔ́, nǔ nyanya wiwa wɛ nɔ yá alɔ n'i. Yě ɖɔ nú mì ɖɔ: ‘Blǒ vodún ɖokpó nú mǐ, bónú é ná nɔ nukɔn nú mǐ, ɖó Mɔyízi ɔ́, nya énɛ́ ɔ́ e ɖe mǐ tɔ́n sín Ejípu ɔ́, mǐ tunwun nǔ e jɛ dó jǐ tɔn ɔ́ ǎ.’ Bɔ un ɖɔ nú yě ɖɔ mɛ e ɖó siká lɛ́ɛ ní bɛ́ wá, bɔ yě bɛ́ nú mì, bɔ un bɛ́ kɔn nyi myɔ mɛ bɔ é húzú nyibúví élɔ́.” Mɔyízi mɔ ɖɔ Aalɔ́ɔn jó togun ɔ́ dó, bɔ é wa nǔ e jló e ɔ́, bɔ kɛntɔ́ yětɔn lɛ́ɛ ná dó mɔ tɛn bó ɖɔ slǎmɛ yě wú. Énɛ́ ɔ́, é yi cí fí e yě ɖǒ gɔnu ɖó ɔ́ sín hɔnlinu, bó sú xó ɖɔ: “Mɛ e yí wǎn nú Mawu Mavɔmavɔ lɛ́ɛ ní wá gɔ̌n ce!” Énɛ́ ɔ́, mɛ e ɖo akɔta Levíi tɔn mɛ lɛ́ɛ wá kplé lɛ́ lɛ̌ dó e. Bɔ é ɖɔ nú yě ɖɔ: “Nǔ e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe: ‘Mɛ ɖokpó ɖokpó ní zé hwǐ tɔn. Mi gbɔn fí e togun ɔ́ ɖó gɔnu ɖó ɔ́ bǐ, sín hɔntogbó ɖě jí yi ɖěvo jí. Mi gbɔn ɔ́, mi ná nɔ́ lɛ́ vɔ́ gbɔn. Mɛ ɖokpó ɖokpó ní hu nɔví tɔn, xɔ́ntɔn tɔn, mɛ e kpó é kpó ɖo kpɔ́ é.’ ” Levíi ví lɛ́ɛ bló nǔ e Mɔyízi ɖɔ ɔ́, bɔ gbɛtɔ́ afɔwó-afatɔ́n (3.000) mɔ̌ kú ɖo togun ɔ́ mɛ gbe énɛ́ ɔ́ gbe. Bɔ Mɔyízi ɖɔ: “Égbé din ɔ́, mi zé miɖée jó nú Mawu Mavɔmavɔ, ɖó mi xo kpɔ́n có bó hu nɔví mitɔn ɖésú abǐ xɔ́ntɔn mitɔn lɛ́ɛ, abǐ mɛ e kpó mi kpó ɖo kpɔ́ é ǎ. Mawu Mavɔmavɔ ní bó kɔn nyɔ̌ná tɔn dó mi jí égbé.” Ayǐhɔ́ngbe tɔn ɔ́, Mɔyízi ɖɔ nú togun ɔ́ ɖɔ: “Hwɛ ɖaxó wɛ mi hu. Din ɔ́, un ná lɛ́ kɔ yi Mawu Mavɔmavɔ gɔ́n ɖo só ɔ́ jí; afɔ nyɔ́ ɔ́, é sixú yí gbe nú vosisa ce lɛ́ɛ, bó sɔ́ hwɛ mitɔn lɛ́ɛ kɛ mi.” Énɛ́ ɔ́, Mɔyízi lɛ́ kɔ yi Mawu Mavɔmavɔ gɔ́n, bó ɖɔ n'i ɖɔ: “Mawu Mavɔmavɔ, togun élɔ́ hu hwɛ ɖaxó. Yě zé siká dó bló vodún ɖokpó ná. Din ɔ́, kɛnklɛ́n sɔ́ hwɛ yětɔn kɛ yě, é má ká nyí mɔ̌ ǎ hǔn, bo súnsún nyǐkɔ ce e a wlǎn dó gbɛwéma mɛ ɔ́ síin.” Lo ɔ́, Mawu Mavɔmavɔ ɖɔ nú Mɔyízi ɖɔ: “Mɛ e hu hwɛ dó mì ɔ́ sín nyǐkɔ jɛ́n un ná súnsún sín wěma ce mɛ. Hǔn bo yi, bó kplá togun ɔ́ yi fí e un ɖɔ nú we ɔ́; wɛnsagun ce ka ná nɔ nukɔn towe. Amɔ̌, gbe e gbe un ná ba hlɔn ɔ́, un ná dɔn tó nú yě, ɖó hwɛ e yě hu ɔ́ wú.” Mawu Mavɔmavɔ dɔn tó nú togun ɔ́, ɖó togun ɔ́ wɛ ɖɔ nú Aalɔ́ɔn ɖɔ ní bló bǒcyɔ nyibúví tɔn ɖokpó nú émí. Mawu Mavɔmavɔ ɖe gbe nú Mɔyízi ɖɔ: “Jɛ ali, gosín fí, hwi kpódó togun e a ɖe tɔ́n sín Ejípu ɔ́ kpó. Jɛ ali bó yi to e sín akpá un dó nú Ablaxámu, Izáki kpódó Jakɔ́bu kpó ɖɔ un ná ná kúnkan yětɔn lɛ́ɛ ɔ́ mɛ. Un ná sɛ́ wɛnsagun ce dó, bɔ é ná nɔ nukɔn nú mi, bó ná nya Kanáa ví lɛ́ɛ, Amɔliti lɛ́ɛ, Hitíti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó. Mi ɖidó to énɛ́ ɔ́ mɛ; nyibúnɔ́sin kpódó wǐin kpó nɔ́ sa tɔ ɖ'é mɛ. Lo ɔ́, un sɔ́ ná nɔ tɛ́ntin mitɔn ǎ, un táá hu mi ɖo alixo, ɖó mi tlí tó dín.” Hwenu e togun ɔ́ se adǎn énɛ́ ɔ́ e Mawu Mavɔmavɔ gblɔ́n n'i ɔ́, wǔ kú i, káká bɔ mɛ ɖěbǔ sɔ́ ba acɔ́ ǎ. Nǔgbó ɔ́, Mawu Mavɔmavɔ kó ɖɔ nú Mɔyízi ɖɔ ní ɖɔ nú Izlayɛ́li ví lɛ́ɛ ɖɔ: “Mi tlí tó, nú un nɔ tɛ́ntin mitɔn kpɛví ɖé ɔ́, un ná ɖibla hu mi. Hǔn, mi bo ɖe nǔ e mi dó ba acɔ́ ná lɛ́ɛ bǐ nyi ayǐ. Énɛ́ ɔ́ gúdo ɔ́, un ná tunwun lě e nǎ wa nǔ mitɔn gbɔn é.” Énɛ́ ɔ́, bɛ́ sín Holɛ́bu só ɔ́ kɔn ɔ́, Izlayɛ́li ví lɛ́ɛ ɖe nǔ e yě dǒ, bó dó ba acɔ́ ná lɛ́ɛ bǐ. Hwenu e Izlayɛ́li ví lɛ́ɛ ɖo goxɔ e mɛ yě ná nɔ lɛ́ɛ bló wɛ ɔ́, Mɔyízi zé goxɔ tɔn, bó tɔ́n sín fí e yě ɖe ɔ́ bó kɛ́, bɔ é lín dó fí ɔ́ zaan. É nɔ́ ylɔ́ goxɔ ɔ́ ɖɔ goxɔ e mɛ Mawu Mavɔmavɔ ná nɔ́ kpé togun ɔ́ ɖe é. Mɛ e jló ná kan nǔ byɔ́ Mawu Mavɔmavɔ lɛ́ɛ bǐ nɔ́ tɔ́n sín fí e yě ɖǒ gɔnu ɖó ɔ́, bó nɔ́ ɖidó goxɔ ɔ́ kɔn. Nú Mɔyízi xwe goxɔ ɔ́ kɔn ɔ́, togun ɔ́ bǐ nɔ́ sí te, bɔ mɛ ɖokpó ɖokpó nɔ́ nɔ te goxɔ é ɖésúnɔ tɔn sín alihɛ́nnu, bó nɔ́ ɖo Mɔyízi kpɔ́n sɛ́ dó wɛ káká bɔ é nɔ́ byɔ́ goxɔ e mɛ Mawu Mavɔmavɔ ná nɔ́ kpé togun ɔ́ ɖe ɔ́ mɛ. Mɔyízi byɔ́ goxɔ ɔ́ mɛ ɔ́, akpɔ́kpɔ́ nɔ́ jɛ te wá goxɔ ɔ́ lihɛ́nnu, bɔ Mawu Mavɔmavɔ nɔ́ ɖo xó ɖɔ xá Mɔyízi wɛ. Nú Izlayɛ́li ví lɛ́ɛ mɔ akpɔ́kpɔ́ ɔ́ lě tlóló ɔ́, yě mɛ ɖokpó ɖokpó nɔ́ sí te bó nɔ́ ɖe kɔ́ kpódó sísí kpó, ɖo goxɔ é ɖésúnɔ tɔn sín alihɛ́nnu. Mawu Mavɔmavɔ kpó Mɔyízi kpó nɔ́ kpé nu bó nɔ́ ɖɔ xó, lě e xɔ́ntɔn xɔ́ntɔn nɔ́ kpé nu bó nɔ́ ɖɔ xó ɔ́ ɖɔhun. Énɛ́ ɔ́ gúdo ɔ́, Mɔyízi nɔ lɛ́ kɔ wá fí e yě ɖǒ gɔnu ɖó ɔ́; lo ɔ́, azɔ̌ví tɔn Jozuwée Nuni ví ɔ́ cí goxɔ e mɛ Mawu Mavɔmavɔ nɔ wá kpé togun ɔ́ ɖe ɔ́ mɛ. Mɔyízi ɖɔ nú Mawu Mavɔmavɔ ɖɔ: “Éɖíe, Mawu Mavɔmavɔ! A ɖe gbe nú mì ɖɔ má kplá togun élɔ́ hɛn yi; a ka ɖɔ mɛ e a jlǒ ná sɛ́ dó bɔ é ná dó alɔ mì ɔ́ nú mì ǎ. Có a ɖɔ nú mì ɖɔ émí tunwun mì ganjí bó ná fɛ́nú mì. Din ɔ́, a nǎ fɛ́nú towe mì nǔgbó hǔn, blǒ bónú má tunwun linlin towe lɛ́ɛ; énɛ́ ɔ́, un ná tunwun we nǔgbó nǔgbó, bɔ a nǎ lɛ́ ná fɛ́nú towe mì yi fó. Ma wɔn ɖɔ émítɔn wɛ togun élɔ́ nyí ó.” Mawu Mavɔmavɔ yí gbe nú Mɔyízi ɖɔ: “Nyɛ ɖésúnɔ kpódó hwi kpó wɛ xweyǐgbe, ado ní má hu we ó.” Mɔyízi ɖɔ nú Mawu Mavɔmavɔ ɖɔ: “Nú hwi ɖésúnɔ kpó mǐ kpó má ná zɔn yi ǎ hǔn, ma ɖɔ nú mǐ ɖɔ mǐ nǐ yi ó. Đó nú hwi ɖésú kpó mǐ kpó má zɔn ǎ ɔ́, nɛ̌ wɛ è ka ná tunwun ɖɔ a nǎ fɛ́nú towe nyɛ kpó togun towe kpó gbɔn? Nú a ɖo kpɔ́ xá mǐ ɔ́ wɛ ná ɖe xlɛ́ ɖɔ mǐ gbɔn vo nú togun ɖě lɛ́ɛ e ɖo ayǐkúngban jí lɛ́ɛ.” Mawu Mavɔmavɔ ka yí gbe nú Mɔyízi ɖɔ: “Un ná bló nǔ e a ɖɔ din é lɔ; ɖó un ná fɛ́nú ce we, ɖó hwi wɛ nyí mɛ e un tunwun tawun é.” Énɛ́ ɔ́, Mɔyízi ɖɔ nú Mawu Mavɔmavɔ ɖɔ: “Bo ɖe susu towe xlɛ́ mì!” Bɔ Mawu Mavɔmavɔ ɖɔ n'i ɖɔ: “Un ná ɖe xomɛnyínyɔ́ ce bǐ xlɛ́ ɖo nukɔn towe, bó ná jlá nyɛ Mawu Mavɔmavɔ sín nyǐkɔ ɖo nukɔn towe. Un nɔ ná fɛ́nú ce mɛ e jló mì ɔ́, bó nɔ́ kú nǔbláwǔ nú mɛ e jló mì ɔ́.” É lɛ́ ɖɔ nú Mɔyízi ɖɔ: “Nǔ ɖo mɔ̌ có a sixú mɔ nukún ce mɛ ǎ, ɖó mɛ ɖěbǔ nɔ́ mɔ nukún ce mɛ bó nɔ́ gán ǎ. Tɛn ɖokpó ɖíe ɖo akpá ce fí e; awǐnnya wɛ, bɔ a nǎ nɔ jí. Hwenu e un ná ɖo susu ce mɛ bó ɖo dǐndín wɛ ɔ́, un ná zé we hwlá dó awǐnnya ɔ́ sín nu ɖé mɛ, bó ná bú alɔ dó we káká bó ná dín. Hwenu e un ná ɖe alɔ ce síin ɔ́, a nǎ mɔ gǔdo ce sɛ́ dó; a nǎ mɔ nukún ce mɛ ǎ.” Mawu Mavɔmavɔ ɖɔ nú Mɔyízi ɖɔ: “Kpa awǐnnyatɛ we nú yě ní cí nukɔntɔn lɛ́ɛ ɖɔhun. Un ná wlán sɛ́n e ɖo nukɔntɔn e a hɛn gba lɛ́ɛ jí ɔ́ dó yě jí. Sɔ́ nǔ ɖ'ayǐ nú sɔ zǎnzǎn; a nǎ fɔ́n zǎn bó ná xá Sinayíi só ɔ́ jí, bó nɔ te kpɔ́n mì ɖo fínɛ́. Mɛ ɖěbǔ ní má xwedó we ó, è ma ka mɔ mɛ ɖěbǔ ɖo só ɔ́ jí ó, è ma mɔ kanlin ɖěbǔ ɖo fínɛ́: gbɔ̌ kpó nyibú kpó ɖě ní má wá ɖu nǔ ɖo só ɔ́ kpá ó.” Énɛ́ ɔ́, Mɔyízi kpa awǐnnyatɛ we nukɔntɔn lɛ́ɛ ɖɔhun, é fɔ́n zǎn bó xá Sinayíi só ɔ́ jí lě e Mawu Mavɔmavɔ ɖɔ gbɔn n'i é; é hɛn awǐnnyatɛ we lɛ́ɛ alɔ mɛ. Mawu Mavɔmavɔ jɛ te ɖo akpɔ́kpɔ́ mɛ, bó wá nɔ te akpá tɔn, bó ɖɔ mɛ e é nyí ɔ́ nú Mɔyízi. Mawu Mavɔmavɔ nɔ gbɔn Mɔyízi nukɔn, bó nɔ́ ɖɔ: “Un nyí Mawu Mavɔmavɔ, un nyí Mawu nǔbláwǔkúnúmɛtɔ́, Mawu xomɛfátɔ́, un nɔ yá wǔ sin xomɛ ǎ, un nyí Mawu xomɛnyɔ́tɔ́, un nyí Mawu gbejínɔtɔ́. Un nɔ nyɔ́ xomɛ dó gbɛtɔ́ lɛ́ɛ wú káká yi jijimɛ afatɔ́n (1.000) jí, un nɔ sɔ́ nǔ nyanya e è wa lɛ́ɛ, tónú e è ma se ǎ lɛ́ɛ, kpódó hwɛ e è hu lɛ́ɛ kpó kɛ mɛ. Un ka nɔ mɔ mɛ e hu hwɛ ɔ́ dó mɔ hwɛjijɔnɔ ǎ. Hwɛ e vǐ tɔ́ lɛ́ɛ hu ɔ́ vǐ yětɔn lɛ́ɛ ná sún sin tɔn, vǐvú yětɔn lɛ́ɛ, vitikli yětɔn lɛ́ɛ kpó kpaba yětɔn lɛ́ɛ kpó ná sún sin tɔn.” Ée Mɔyízi se xó énɛ́ lɛ́ɛ tlóló ɔ́, é jɛ kpo bo ɖe kɔ́, bó ɖɔ: “Aklúnɔ, nú a nǎ fɛ́nú towe mì nǔgbó hǔn, kɛnklɛ́n bó wá nɔ tɛ́ntin mǐtɔn; togun élɔ́ ɔ́, tótlítɔ́ wɛ é nyí. Lo ɔ́, sɔ́ hwɛ e mǐ hu lɛ́ɛ kpódó nǔ e mǐ wa nyi do lɛ́ɛ kpó kɛ mǐ, bó yí mǐ dó yí togun towe.” Mawu Mavɔmavɔ ɖɔ nú Mɔyízi ɖɔ: “Đǒtó! Un ná jɛ akɔ xá mi; un ná bló nǔjíwǔ lɛ́ɛ ɖo togun ɔ́ bǐ nukún mɛ; nǔjíwǔ e è ma mɔ ɖo fí ɖěbǔ ɖo ayǐkúngban ɔ́ jí kpɔ́n gbeɖé ǎ, bó má ká mɔ ɖo akɔta ɖěbǔ mɛ kpɔ́n gbeɖé ǎ wɛ nǎ bló. Énɛ́ ɔ́, togun e tɛ́ntin a ɖe ɔ́ ná mɔ nyɛ Mawu Mavɔmavɔ ɔ́ sín nǔwiwa lɛ́ɛ; hwi jí wɛ un ka ná bló nǔdábaɖa lɛ́ɛ gbɔn. “Mi xwedó nǔ e ɖɔ nú mi wɛ un ɖe égbé ɔ́ ganjí ɔ́, un ná nya Amɔliti lɛ́ɛ, Kanáa ví lɛ́ɛ, Hitíti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó ɖo nukɔn mitɔn. Mi cɔ́ miɖée, bó má jɛ akɔ xá to e mɛ ná byɔ́ wɛ mi ɖe ɔ́ mɛ nu lɛ́ɛ ó, yě táá wá nyí mɔ nú mi. É nyɔ́ wa ɔ́, mi ná flí vɔ̌sákpe yětɔn lɛ́ɛ xwe, mi ná gba awǐnnya e yě tun te bó nɔ sɛn lɛ́ɛ, bó ná sɛ́n vodún Acela yětɔn lɛ́ɛ. Mi ná ɖe kɔ́ nú vodún ɖě ǎ, ɖó nyɛ Mawu Mavɔmavɔ sín nyǐkɔ nyí ‘Wǔhwinhwan’, un jló ɖɔ mɛ e nyí ce lɛ́ɛ ní sɛn nǔ ɖěvo ǎ. Mi cɔ́ miɖée, bó má jɛ akɔ xá to ɔ́ mɛ nu lɛ́ɛ ó, yě táá wá dɔn mi bɔ mi ná ɖidó vodún yětɔn lɛ́ɛ sɛn gbé, bó ná nɔ́ xwlé vɔ̌sánú vodún yětɔn lɛ́ɛ, bó ná nɔ́ ɖu kanlin e yě hu nú vodún lɛ́ɛ sín lan. Mi táá wá da vǐ yětɔn nyɔ̌nu lɛ́ɛ nú vǐ mitɔn súnnu lɛ́ɛ, bɔ nú vǐ yětɔn nyɔ̌nu lɛ́ɛ ɖo vodún yětɔn lɛ́ɛ sɛn wɛ ɔ́, yě ná dɔn vǐ mitɔn súnnu lɛ́ɛ, bɔ yě ná sɛn vodún yětɔn lɛ́ɛ xá yě. “Mi ma sínsín gan dó bló vodún ɖě ná bó sɛn ó. “Mi ná ɖu wɔ̌xúxú e mɛ è ma dó tɔ́n ǎ é sín xwe. Azǎn tɛ́nwe wɛ è sɔ́ ɖó te ɖo Abibu sun ɔ́ mɛ bɔ mi ná ɖu xwe ɔ́ ná ɔ́. Mi ná ɖu wɔ̌xúxú e mɛ è ma dó tɔ́n ǎ é lě e un ɖɔ gbɔn nú mi é. Đó Abibu sun ɔ́ mɛ wɛ mi tɔ́n sín Ejípu. “Nukɔngbéví súnnu lɛ́ɛ bǐ wɛ nyí ce; nukɔngbéví asú kanlin mitɔn lɛ́ɛ tɔn lɔ ɖ'é mɛ; nyibú, gbɔ̌ abǐ lɛ̌ngbɔ́ sín nukɔngbéví asú lɛ́ɛ bǐ wɛ è nǎ sɔ́ ɖó vo nú mì. Nú é ká nyí tócí sín nukɔngbéví wɛ ɔ́, mi ná zé gbɔ̌ví dó ɖyɔ́ ná, nú mi ma ka ɖyɔ́ ǎ ɔ́, mi ná gba zogúdo n'i, bó hu i, nukɔngbéví súnnu e ɖo mi mɛ lɛ́ɛ ɔ́, mi ná xɔ gbɛ nú yě. “Mi ná zɔn asígbá alɔgbá wá gɔ̌n ce ǎ. “Mi ná nɔ wa azɔ̌ nú azǎn ayizɛ́n, amɔ̌, azǎn tɛ́nwegɔ́ ɔ́ gbe ɔ́, mi ná gbɔjɛ́. É ná bó nyí gle hwenu, abǐ nǔkún-yiya hwenu ɔ́, mi ná gbɔjɛ́. “Mi ná ɖu Pantekótuxwe ɔ́ ɖo blěe nukɔntɔn ɔ́ yiya hwenu, bɔ xwe fífó ɔ́, mi ná ɖu nǔkún-yiya sín xwe. “Xwewú xwewú ɔ́, súnnu e ɖo togun ɔ́ mɛ lɛ́ɛ bǐ ná nɔ wá nyɛ Mawu Mavɔmavɔ, Mawu Izlayɛ́li tɔn ɔ́ nukɔn azɔn atɔn. Un ná yí ayǐkúngban sín akɔta e lɛ́ dó mi lɛ́ɛ sí, bɔ to mitɔn ná gbló ada. Azɔn atɔn e mi ná wá gɔ̌n ce ɖo xwe ɖokpó mɛ ɔ́, mɛ ɖěbǔ ná glá ɖɔ émí ná klá jɛ to mitɔn nu hwe énɛ́ ɔ́ nu ǎ. “Mi ná zé wɔ̌xúxú e mɛ è dǒ tɔ́n é gɔ́ nú kanlin e è hu nú mì ɔ́ sín hun, bó ná xwlé mì ǎ. Ayǐ ná hɔ́n dó kanlin e è hu dó sá vɔ̌ nú mì ɖó Dǐndínwáyixwe ɔ́ tamɛ ɔ́ sín lan ǎ. Mi ná zé nǔ nukɔntɔn e gle mitɔn lɛ́ɛ ná ɔ́ wá nyɛ Mawu Mavɔmavɔ, Mawu mitɔn xwé gbe. Mi ka ná ɖa gbɔ̌ví ɖo nɔ tɔn sín anɔ̌sin mɛ ǎ.” Mawu Mavɔmavɔ lɛ́ ɖɔ nú Mɔyízi ɖɔ: “Wlǎn xó énɛ́ lɛ́ɛ, ɖó xó énɛ́ lɛ́ɛ wɛ un ná xwedó bó ná jɛ akɔ xá hwi kpódó Izlayɛ́li togun ɔ́ kpó.” Mɔyízi nɔ fínɛ́ kpódó Mawu Mavɔmavɔ kpó xɔ kéze kanɖé (40) zǎn kanɖé (40). É ɖu nǔ ǎ, é ká nu sin ǎ. Mawu Mavɔmavɔ wlán sɛ́n wǒ lɛ́ɛ ɖó awǐnnyatɛ lɛ́ɛ jí. Nǔ e jí akɔjijɛ ɔ́ jínjɔ́n lɛ́ɛ nɛ́. Mɔyízi jɛ te sín Sinayíi só ɔ́ jí, bó hɛn awǐnnyatɛ akɔjijɛ tɔn lɛ́ɛ alɔ mɛ. Ée é ɖɔ xó xá Mawu ɔ́, nukún mɛ tɔn ɖo kínkɔ́n wɛ, é ká tunwun ǎ. Aalɔ́ɔn kpódó Izlayɛ́li ví lɛ́ɛ bǐ kpó mɔ ɖɔ Mɔyízi sín nukún mɛ ɖo kínkɔ́n wɛ; énɛ́ ɔ́ wú wɛ yě ma sɛkpɔ́ ɛ ǎ. Lo ɔ́, Mɔyízi ylɔ́ yě, bɔ Aalɔ́ɔn kpódó gǎn e ɖo togun ɔ́ nu lɛ́ɛ bǐ kpó yi gɔ̌n tɔn, bɔ é ɖɔ xó nú yě. Énɛ́ ɔ́ gúdo ɔ́, Izlayɛ́li ví ɖě lɛ́ɛ bǐ sɛkpɔ́ ɛ, bɔ é ɖɔ nǔ e Mawu Mavɔmavɔ ɖɔ n'i ɖo Sinayíi só jí lɛ́ɛ bǐ nú yě. Ée Mɔyízi ɖɔ xó nú yě fó ɔ́, é sɔ́ avɔ bo cyɔ́n nukún mɛ. Bɛ́ sín hwenɛ́nu ɔ́, nú Mɔyízi xwe Mawu Mavɔmavɔ gɔ́n, bó ná ɖɔ xó xá ɛ ɔ́, é nɔ́ ɖe avɔ ɔ́ sín nukún mɛ. Nú é lɛ́ kɔ sín Mawu Mavɔmavɔ gɔ́n bó ɖo nǔ e Mawu Mavɔmavɔ ɖɔ yě ní wa ɔ́ wlí ɖɔ nú Izlayɛ́li ví lɛ́ɛ wɛ ɔ́, yě nɔ́ ɖo kɔ́n e kɔ́n wɛ nukún mɛ tɔn ɖe ɔ́ kpɔ́n wɛ. Énɛ́ ɔ́ gúdo ɔ́, é nɔ́ sɔ́ avɔ ɔ́ cyɔ́n nukún mɛ, bó nɔ́ nɔ mɔ̌ káká jɛ gbe e gbe é ná lɛ́ kɔ yi ɖɔ xó xá Mawu Mavɔmavɔ é. Mɔyízi kplé Izlayɛ́li ví lɛ́ɛ bǐ, bó ɖɔ nú yě ɖɔ: “Nǔ e Mawu Mavɔmavɔ ɖɔ mi ɖó ná nɔ́ wa lɛ́ɛ ɖíe: Azǎn ayizɛ́n wɛ è nǎ nɔ́ dó wa azɔ̌ ná, amɔ̌, azǎn tɛ́nwegɔ́ ɔ́ ná nyí Sabáa, gbɔjɛzán ɔ́, bɔ mi ɖó ná zé ɖó vo nú Mawu Mavɔmavɔ. Mɛ ɖé wa azɔ̌ gbe énɛ́ gbe ɔ́, è nǎ hu mɛ ɔ́. Mi ná ɖa nǔ vɔ́vɔ́ ɖo gbɔjɛzán ɔ́ gbe ɖo fí e mi ná ɖe lɛ́ɛ ɖěbǔ ǎ.” Mɔyízi lɛ́ ɖɔ nú Izlayɛ́li ví lɛ́ɛ bǐ ɖɔ: “Nǔ e Mawu Mavɔmavɔ ɖɔ mi ɖó ná nɔ́ wa lɛ́ɛ ɖíe: Nǔ e mi ɖó lɛ́ɛ ɔ́, mi ná sɔ́ ɖě, bó ná ná Mawu Mavɔmavɔ. Mɛ e ɖó jlǒ ɖagbe, bó ná bló lɛ́ɛ ɔ́, yě ná hɛn nǔ alɔkpa alɔkpa wá nú Mawu Mavɔmavɔ. Yě ná hɛn siká, kpatágan, ganvɔ. Avɔ kwlésinnɔ, avɔ vɔvɔ, avɔ vɔvɔ cɛ́cɛ́, lɛ̌ɛnkanvɔ ɖagbe ɖagbe kpódó gbɔ̌fúnvɔ kpó. Yě ná hɛn agbonyú e è sá nǔ vɔvɔ dó é, anyǔ tlitli lɛ́ɛ kpó kasyatín kpó. Ami e è nǎ dó zogbɛ́n lɛ́ɛ mɛ é, atínkɛn wǎnɖagbenɔ e è nǎ dǒ bló ami mímɛ́ wǎnɖagbenɔ e è nǎ sá nú mɛ, dó ɖe mɛ ɖó vo nú mì é, bó ná lɛ́ hɛn zǎlínkpɔ́n. Yě ná lɛ́ hɛn awǐnnya ɖagbe ɖagbe e è nɔ ylɔ́ ɖɔ Onísi ɔ́, kpódó awǐnnya ɖěvo lɛ́ɛ kpó, bɔ è nǎ to ɖó efódu ɔ́ kpódó akɔ́ntakpo ɔ́ kpó wú. Alɔnuzɔ́watɔ́ e ɖo mi mɛ, bɔ alɔnu yětɔn mɛ́ ganjí lɛ́ɛ bǐ ná kplé, bó ná bló nǔ e Mawu Mavɔmavɔ ɖɔ è nǐ bló lɛ́ɛ bǐ. Nǔ élɔ́ lɛ́ɛ wɛ nyí Mawu xwé ɔ́: goxɔ ɔ́, avɔ e è nǎ cyɔ́n dó lɛ́ɛ, nǔhɛnnú lɛ́ɛ, xwlɛ lɛ́ɛ, wɛ̌n lɛ́ɛ, dotín lɛ́ɛ kpódó afɔ lɛ́ɛ kpó. Akɔjijɛgbá ɔ́, kpo tɔn lɛ́ɛ, nusú tɔn kpó xɔmɛgbovɔ ɔ́ kpó. Távo ɔ́, kpo tɔn lɛ́ɛ, nǔ e è nɔ zán ɖo távo ɔ́ jí lɛ́ɛ bǐ kpódó wɔ̌xúxú e è xwlé Mawu lɛ́ɛ kpó. Zogbɛ́nhɛnnú ɔ́ kpó nǔ e è nɔ bló myɔ ɖó ná lɛ́ɛ kpó, zogbɛ́n lɛ́ɛ kpó ami e è nǎ dó tá myɔ ná ɔ́ kpó. Vɔ̌sákpe e jí è nɔ dó zǎlínkpɔ́n zo ɖe é, kpo tɔn lɛ́ɛ, ami e è nɔ sá nú mɛ dó ɖe mɛ ɖó vo nú mì é, célu wǎnɖagbenɔ kpó avɔ e è dǒ ɖó goxɔ ɔ́ sín hɔnlinu é kpó. Vɔ̌sákpe e jí è nɔ dó vɔ̌ zo ɖe é, kpó ganja tɔn e è zě ganvɔ dó bló ná é kpó, gankpo tɔn lɛ́ɛ kpódó nǔ e è nɔ zán ɖo vɔ̌sákpe ɔ́ kɔn lɛ́ɛ bǐ kpó, basya ɔ́ kpó nǔ e jí é nɔ́ nɔ ɔ́ kpó. Avɔ e è ɖe nǔ d'é mɛ bɔ è dǒ xá xwé ɔ́ lɛ́ɛ kpó dotín yětɔn lɛ́ɛ kpó, afɔ yětɔn lɛ́ɛ kpó avɔ e è dǒ ɖó xwé ɔ́ sín hɔntogbó nu ɔ́ kpó. Goxɔ ɔ́ sín só lɛ́ɛ kpó ée è xá xwé ɔ́ ná lɛ́ɛ kpó, kpódó kan yětɔn lɛ́ɛ kpó, kpó azɔ̌wu e nyí vɔ̌sánú-xwlémawutɔ́ Aalɔ́ɔn tɔn lɛ́ɛ kpó, kpódó awu e nyí Aalɔ́ɔn sín vǐ súnnu lɛ́ɛ tɔn bɔ yě nɔ́ dó dó wa sinsɛnzɔ́ yětɔn ná lɛ́ɛ kpó.” Ée Mɔyízi ɖɔ xó fó ɔ́, Izlayɛ́li ví lɛ́ɛ bǐ gosín gɔ̌n tɔn. Énɛ́ ɔ́ gúdo ɔ́, Izlayɛ́li ví e ayi ɖɔ xó ná, bɔ yě ɖǒ jlǒ ɖagbe lɛ́ɛ bǐ wá bó hɛn nǔ wá nú Mawu Mavɔmavɔ nú è nǎ dó bló goxɔ e mɛ Mawu nǎ nɔ́ wá kpé yě ɖe ɔ́ ná, kpó nǔ e è nǎ nɔ́ dó sɛn ɛ ná lɛ́ɛ kpó, kpódó nǔ e è nǎ dǒ tɔ vɔ̌sánú-xwlémawutɔ́ sín awu lɛ́ɛ ná lɛ́ɛ kpó. Súnnu kpó nyɔ̌nu kpó wɛ wá; yě mɛ e ɖó jlǒ ɖagbe lɛ́ɛ bǐ wɛ hɛn nǔ e è nɔ sɔ́ ɖó awu wú lɛ́ɛ, tógbé lɛ́ɛ, alɔgan lɛ́ɛ kpódó kɔjɛ́ lɛ́ɛ kpó wá nú Mawu Mavɔmavɔ. Nǔ é nɛ́ lɛ́ɛ bǐ wɛ nyí sikánú. Mɛ ɖokpó ɖokpó nɔ́ sɔ́ jó lě e è nɔ bló gbɔn bó nɔ́ sɔ́ nǔ jó nú Mawu Mavɔmavɔ é. Mɛ e ɖó avɔ kwlésinnɔ, avɔ vɔvɔ, avɔ vɔvɔ cɛ́cɛ́, lɛ̌ɛnkanvɔ ɖagbe ɖagbe, gbɔ̌fúnvɔ, agbonyú e è sá nǔ vɔvɔ dó lɛ́ɛ kpódó anyǔ tlitli lɛ́ɛ kpó bǐ hɛn wá. Mɛ e zé kpatágan abǐ ganvɔ ɖó vo nú Mawu Mavɔmavɔ lɛ́ɛ bǐ bɛ́ wá. Mɛ e ɖó kasyatín bɔ è hɛn ɔ́, è nǎ zán nú xɔzɔ́ ɔ́ lɛ́ɛ bɛ́ wá. Nyɔ̌nu e alɔnu yětɔn mɛ́ ganjí lɛ́ɛ bǐ hɛn avɔ e yě lɔn lɛ́ɛ wá: yě hɛn avɔ kwlésinnɔ, avɔ vɔvɔ, avɔ vɔvɔ cɛ́cɛ́, kpó lɛ̌ɛnkanvɔ ɖagbe ɖagbe kpó. Nyɔ̌nu ɖěvo e alɔnu yětɔn mɛ́ ganjí bɔ yě tunwun acɔ́ ɖó jlǒ ɖagbe, bó nyɔ́ avɔ lɔn ganjí lɛ́ɛ bǐ lɔn gbɔ̌fúnvɔ. Gǎn e ɖo togun ɔ́ mɛ lɛ́ɛ hɛn awǐnnya ɖagbe ɖagbe e è nɔ ylɔ́ ɖɔ Onísi ɔ́ lɛ́ɛ, kpódó awǐnnya ɖagbe ɖagbe ɖěvo lɛ́ɛ kpó wá nú è nǎ to ɖó efódu ɔ́ kpó akɔ́ntakpo ɔ́ kpó wú. Yě hɛn atínkɛn wǎnɖagbenɔ lɛ́ɛ kpó ami kpó, bɔ è nǎ dǒ bló ami e è nɔ dó zogbɛ́n mɛ é kpó ami e è nɔ sá nú mɛ dó ɖe mɛ ɖó vo nú mì é kpó zǎlínkpɔ́n kpó. Izlayɛ́li ví súnnu kpó nyɔ̌nu kpó e ɖó jlǒ ɖagbe bó ná jɔ fún dó azɔ̌ e Mawu Mavɔmavɔ zɔ́n gbɔn Mɔyízi jí lɛ́ɛ mɛ lɛ́ɛ bǐ hɛn nǔ wá nú Mawu Mavɔmavɔ kpó yě ɖésúnɔ sín jlǒ kpó. Mɔyízi ɖɔ nú Izlayɛ́li ví lɛ́ɛ ɖɔ: “Mi ní tunwun ɖɔ Mawu Mavɔmavɔ sɔ́ mɛ ɖé nú azɔ̌ énɛ́ ɔ́: Besalɛli, Wulíi ví, Húu vívú ɔ́ wɛ; akɔta Judáa tɔn ɔ́ mɛ wɛ é jɔ ɖe. É ná ɛ Yɛ tɔn bɔ é gɔ́ ayi tɔn mɛ, bɔ é bí bó ná mɔ nukúnnú jɛ nǔ mɛ titewungbe. É ná tunwun azɔ̌ xwítíxwítí alɔkpa bǐ. Mawu Mavɔmavɔ bló bɔ é nyɔ́ tito lɛ́ɛ bló, é nyɔ́ siká sín azɔ̌ wa, bó nyɔ́ kpatágan kpó ganvɔ kpó sín azɔ̌ wa; é nyɔ́ awǐnnya ɖagbe ɖagbe lɛ́ɛ kpa, bó nyɔ́ to dó nǔ mɛ; é nyɔ́ atín kpa; nú mǐ nǎ ɖɔ ɔ́, Mawu Mavɔmavɔ bló bɔ é nyɔ́ nǔ bǐ wa. Besalɛli nɛ́ ɔ́ wɛ Mawu Mavɔmavɔ ná Yɛ e nɔ kplɔ́n nǔ mɛ é; é ná Yɛ ɖokpó énɛ́ ɔ́ Oxoliyavu; Oxoliyavu ɔ́ Axisamaki ví wɛ. Akɔta Dan tɔn ɔ́ mɛ wɛ é jɔ ɖe. Ée Mawu Mavɔmavɔ ná nǔnywɛ́ yě bɔ é gɔ́ ayi yětɔn mɛ mɔ̌ ɔ́, yě ná nɔ wa azɔ̌ alɔkpa alɔkpa lɛ́ɛ bǐ: yě ná nɔ kpa awǐnnya ɖagbe ɖagbe lɛ́ɛ, yě ná nɔ ɖe nǔ dó avɔ mɛ, yě ná nɔ́ kó avɔ kwlésinnɔ, avɔ vɔvɔ, avɔ vɔvɔ cɛ́cɛ́; yě ná nɔ kó lɛ̌ɛnkanvɔ, yě ná nɔ́ lɔn avɔ, bó ná nɔ́ wa azɔ̌ tɛnmɛ tɛnmɛ lɛ́ɛ abǐ yě ná nɔ́ dó nǔ lɛ́ɛ wá. “Mawu Mavɔmavɔ ná nǔnywɛ́ kpó nukúnnú-mɔjɛnǔmɛ kpó Besalɛli, Oxoliyavu kpódó súnnu e alɔnu yětɔn mɛ́ ganjí lɛ́ɛ kpó. É ná yě, bɔ yě ná bló nǔ e è nǎ zǎn nú Mawu xwé ɔ́ lɛ́ɛ bǐ, lě e Mawu Mavɔmavɔ ɔ́ zɔ́n gbɔn é.” Mɔyízi ylɔ́ Besalɛli kpó Oxoliyavu kpó, bó ylɔ́ súnnu ɖě lɛ́ɛ e alɔnu yětɔn mɛ́ ganjí bɔ Mawu Mavɔmavɔ kó sɔ́ nukúnnú-mɔjɛnǔmɛ dó ayi mɛ ná bɔ yě ɖǒ jlǒ ɖagbe bo ná wa azɔ̌ ɔ́ lɛ́ɛ bǐ, bɔ yě wá azɔ̌ wa gbé. Ée é ylɔ́ yě ɔ́, é bɛ́ nǔ e Izlayɛ́li ví lɛ́ɛ hɛn wá bɔ è nǎ gbá Mawu xwé ɔ́ ná lɛ́ɛ bǐ nú yě, bɔ yě bɛ̌ azɔ̌. Zǎnzǎn tɛgbɛ ɔ́, mɛ lɛ́ɛ nɔ́ lɛ́ hɛn nǔ wá nú Mɔyízi kpó yě ɖésúnɔ sín jlǒ kpó. Énɛ́ ɔ́, azɔ̌watɔ́ e ɖo Mawu xwé ɔ́ sín azɔ̌ wa lɛ́ɛ bǐ ɖǒ azɔ̌ yětɔn lɛ́ɛ te, bó wá Mɔyízi gɔ́n, bó ɖɔ n'i ɖɔ: “Nǔ e hɛn wá wɛ togun ɔ́ ɖe ɔ́ sukpɔ́ hú nǔ e è ɖo ná mɔ, bó dó wa azɔ̌ e Mawu Mavɔmavɔ zɔ́n lɛ́ɛ é.” Énɛ́ ɔ́, Mɔyízi ɖɔ bɔ è ɖǒ gan gbɔn fí e yě ɖǒ gɔnu ɖó ɔ́ ɖɔ mɛ ɖěbǔ, súnnu abǐ nyɔ̌nu ní má sɔ́ bló nǔɖé bó hɛn wá nú Mawu xwé ɔ́ sín azɔ̌ ɔ́ ó. Bɔ mɛɖé sɔ́ hɛn nǔɖé wá ǎ. Đó azɔ̌ e ná wa wɛ è ɖe lɛ́ɛ ɔ́, nǔ e mɛ lɛ́ɛ ko hɛn wá lɛ́ɛ kpé kpo. Avɔlɔntɔ́ e alɔnu yětɔn mɛ́ ganjí lɛ́ɛ zé lɛ̌ɛnkanvɔ xwɛ gaga wǒ dó bló goxɔ ɔ́ ná. Avɔxwɛ lɛ́ɛ ɔ́, kan didɛ kwlésinnɔ vɔvɔ kpó vɔvɔ cɛ́cɛ́ kpó wɛ avɔlɔntɔ́ lɛ́ɛ dó lɔn ná, bó ɖe wɛnsagun susunɔ lɛ́ɛ gbɔn mɛ, dó ba acɔ́ ná. Avɔxwɛ lɛ́ɛ bǐ wɛ nyí nǔ ɖokpó ɔ́: ga yětɔn nyí mɛ̌tlu wɛ̌nɛ, bɔ gblǒ yětɔn nyí mɛ̌tlu we. È cá avɔxwɛ lɛ́ɛ atɔ́ɔ́n atɔ́ɔ́n ɖó kpɔ́. Avɔxwɛ atɔ́ɔ́n nukɔntɔn e è cá ɖó kpɔ́ lɛ́ɛ ɔ́, è ɖǒ kan kwlésinnɔ gbɔn tó nú avɔxwɛ e gbɔn gúdo ɔ́, bó lɛ́ ɖó gbɔn tó nú avɔxwɛ e ɖo nukɔn nú atɔ́ɔ́n wegɔ́ ɔ́ e è cá ɖó kpɔ́ é. É bló kan kanɖé wǒ (50) gbɔn cícá nukɔntɔn ɔ́ tó, bó bló kanɖé wǒ (50) gbɔn wegɔ́ ɔ́ tó. Kan énɛ́ lɛ́ɛ ɖě kpé nu xá ɖě. È zě siká dó bló nǔhɛnnú kanɖé wǒ (50) ná, bó dó hɛn avɔ lɛ́ɛ ɖě dó ɖě wǔ, bó bú dó goxɔ ɔ́ bǐ; énɛ́ ɔ́ goxɔ ɔ́ nɔ bǔ. Mɔ ɖokpó ɔ́, é zé gbɔ̌fún dó lɔn avɔxwɛ gaga wǒ-ɖokpó ná, bó cyɔ́n goxɔ. Avɔxwɛ wǒ-ɖokpó lɛ́ɛ bǐ wɛ ɖó jlɛ̌ ɖokpó ɔ́: ga yětɔn nyí mɛ̌tlu afɔtɔn, bɔ gblǒ yětɔn nyí mɛ̌tlu we. È cá avɔxwɛ énɛ́ lɛ́ɛ atɔ́ɔ́n ɖó kpɔ́, bó cá ayizɛ́n e kpo lɛ́ɛ ɖó kpɔ́. È dǒ kan kanɖé wǒ (50) gbɔn tó nú avɔxwɛ e ɖo tó nú avɔxwɛ atɔ́ɔ́n nukɔntɔn e è cá ɖó kpɔ́ é, bó dó kan kanɖé wǒ (50) gbɔn tó nú avɔxwɛ ayizɛ́n ɖě lɛ́ɛ e è cá ɖó kpɔ́ é. Mɔ̌ ɖokpó ɔ́, è zě ganvɔ dó bló nǔhɛnnú kanɖé wǒ (50) ná, bó dó hɛn kan lɛ́ɛ bónú goxɔ ɔ́ bǐ ná nɔ bǔ. Ée è blǒ fó ɔ́, è zě agbonyú e è sá nǔ vɔvɔ dó ɔ́ bó cyɔ́n goxɔ ɔ́, bó zé anyǔ tlitli bó bú dó. È zě kasyatín dó bló xwlɛ ná, bó tun te lɛ́ lɛ̌ dó goxɔ ɔ́, dǒ ɖɔhun. Xwlɛ lɛ́ɛ ɖokpó ɖokpó sín ga nyí mɛ̌tlu atɔ́ɔ́n bɔ gblǒ tɔn nyí mɛ̌tlu ɖokpó é hwe ɛnɛvlɔ́ɖó. È kpa sóví we we dó xwlɛ ɖokpó ɖokpó glɔ́, bɔ sóví lɛ́ɛ jlɔ́ ganjí. Mɔ̌ wɛ è blǒ gbɔn nú xwlɛ lɛ́ɛ bǐ. Énɛ́ ɔ́, è blǒ xwlɛ ko nú goxɔ ɔ́ ɖo afɔligbé. È zě kpatágan dó bló afɔ kanɖé (40) ná, bó bɛ́ dó xwlɛ ko lɛ́ɛ glɔ́; we wɛ é dó xwlɛ ɖokpó ɖokpó glɔ́, bɔ é sɔgbe xá nabí e è kpa dó xwlɛ lɛ́ɛ glɔ́ é. Mɔ̌ ɖokpó ɔ́, è blǒ xwlɛ ko nú goxɔ ɔ́ ɖo taligbé. Bó zé kpatágan dó bló afɔ yětɔn kanɖé (40) lɛ́ɛ ná, bó xwe we we dó xwlɛ ɖokpó ɖokpó glɔ́. È blǒ dotín ayizɛ́n nú goxɔ ɔ́ ɖo gǔdo, ɖo gbadahwe jí. È blǒ xwlɛ we gɔ́ ná nú goxɔ ɔ́ sín zwe we lɛ́ɛ ɖo gǔdo. Xwlɛ we énɛ́ lɛ́ɛ ɖó xwlɛ we we, bɔ è cá xwlɛ lɛ́ɛ ɖě bɔ dó ɖě wú sín do káká yi aga. Mɔ̌ wɛ è blǒ gbɔn nú xwlɛ e ɖo goxɔ ɔ́ sín zwe we lɛ́ɛ mɛ é. Hǔn xwlɛ lɛ́ɛ bǐ blǒ tántɔn kpó afɔ yětɔn afɔtɔn-nukún-ɖokpó kpó. Afɔ lɛ́ɛ ɔ́, kpatágan wɛ è dǒ bló, bɔ we we ɖo xwlɛ ɖokpó ɖokpó glɔ́. Énɛ́ ɔ́ gúdo ɔ́, è zě kasyakpo gaga atɔ́ɔ́n dó blá wɛ̌n dó xwlɛ lɛ́ɛ wú, ɖo goxɔ ɔ́ sín akpáxwé ɖokpó. Mɔ̌ ɖokpó ɔ́, è zě kpo gaga atɔ́ɔ́n dó blá wɛ̌n ɖo goxɔ ɔ́ sín akpáxwé wegɔ́ ɔ́, bɔ atɔ́ɔ́n blá ɖo goxɔ ɔ́ gǔdo ɖo gbadahwe jí. Kpo gaga e è blǎ wɛ̌n ná ɖo tɛ́ntin ɔ́ gosín tó ɖě jí yi tó ɖě jí. È kɔn siká dó xwlɛ lɛ́ɛ, bó zé siká dó bló gan tobotobo e mɛ kpo gaga e è dǒ blá wɛ̌n ná lɛ́ɛ gbɔn lɛ́ɛ ná, bó kɔn siká dó kpo gaga nɛ́ lɛ́ɛ. È zě lɛ̌ɛnkanvɔ e dɛ kan ɔ́ dó bló xɔmɛgbovɔ ɖokpó ná, bɔ é ɖó hwɛkan kwlésinnɔ vɔvɔ kpó vɔvɔ cɛ́cɛ́ kpó. Avɔlɔntɔ́ e alɔnu yětɔn mɛ́ ganjí lɛ́ɛ ɖe wɛnsagun susunɔ lɛ́ɛ d'é mɛ dó ba acɔ́ ná. È sin lɛ̌ɛnkanvɔ ɔ́ dó dotín kasya tɔn ɛnɛ wú; è kɔn siká dó dotín lɛ́ɛ, siká klɔcée lɛ́ɛ ɖo dotín lɛ́ɛ wú, bó jínjɔ́n kpatágan sín afɔ ɖokpó ɖokpó jí. È blǒ avɔ ɖokpó, bó dó ɖó goxɔ ɔ́ sín ali nu, bɔ é ɖó hwɛkan kwlésinnɔ, vɔvɔ kpó vɔvɔ cɛ́cɛ́ kpó. Lɛ̌ɛnkanvɔ e dɛ kan ɔ́ wɛ è dǒ bló ná. Mɛ e nɔ kó avɔ lɛ́ɛ wɛ ka kó ganjí. È blǒ dotín atɔ́ɔ́n n'i kpó klɔcée yětɔn lɛ́ɛ kpó, bó kɔn siká dó ata yětɔn lɛ́ɛ kpó gankpo yětɔn lɛ́ɛ kpó. Ganvɔ wɛ è sɔ́ dó bló afɔ atɔ́ɔ́n e jí yě jínjɔ́n lɛ́ɛ ná. Besalɛli zé kasyatín dó bló gbǎ ɖokpó ná; ga tɔn ɖó mɛ̌tlu ɖokpó ɛnɛvlɔ́ɖó, bɔ gblǒ tɔn ɖó mɛ̌tlu ɖokpó é hwe ɛnɛvlɔ́ɖó jɛ jí, bɔ jǐ yiyi tɔn ɖó mɛ̌tlu ɖokpó é hwe ɛnɛvlɔ́ɖó. É kɔn siká akú dó; é kɔn siká gbɔn xomɛ kpó gǔdo kpó, bó kɔn gbɔn tó tɔn. É bló sikálɔgan ɛnɛ, bó fɔ ɖó zwe ɛnɛ lɛ́ɛ jí ɖo do; we ɖo akpá ɖokpó xwé, bɔ we ɖo akpá ɖě ɔ́ xwé. É kpa kasyatín sín kpo gaga we bó kɔn siká dó. É zé kpo lɛ́ɛ gbɔn alɔgan lɛ́ɛ mɛ, ɖo gbǎ ɔ́ sín akpáxwé lɛ́ɛ, bó nɔ́ dó zé gbǎ ɔ́ ná. É zé siká akú dó bló nusú bó sɔ́ ɖó gbǎ ɔ́ nu, ga tɔn ɖó mɛ̌tlu ɖokpó ɛnɛvlɔ́ɖó jɛ jí, bɔ gblǒ tɔn ɖó mɛ̌tlu ɖokpó é hwe ɛnɛvlɔ́ɖó. É zé siká dó tun wɛnsagun susunɔ we ɖó nusú ɔ́ sín tó we jí ɖo gblǒ we lɛ́ɛ jí. Wɛnsagun susunɔ we lɛ́ɛ kpó nusú ɔ́ kpó ɖo bǔ; wɛnsagun susunɔ ɔ́ ɖokpó ɖo gbǎ nusú ɔ́ jí ɖo gblǒ ɖokpó jí, bɔ wegɔ́ ɔ́ ɖo gblǒ ɖě ɔ́ jí. Wɛnsagun susunɔ lɛ́ɛ kpan nukɔn yěɖée ɖo nusú ɔ́ ta nu, bó ɖo nusú ɔ́ kpɔ́n wɛ, bó kɛ awa yětɔn dó jɔ mɛ. Besalɛli zé kasyatín dó bló távo ɖokpó ná; ga tɔn ɖó mɛ̌tlu ɖokpó, gblǒ tɔn ɖó mɛ̌tlu vlɔ́ bɔ jǐ yiyi tɔn ɖó mɛ̌tlu ɖokpó é hwe ɛnɛvlɔ́ɖó. É kɔn siká akú dó távo ɔ́ bǐ, bó zé siká akú dó bló tó ná lɛ́ɛ lɛ́ lɛ̌ dó bǐ. É bló tó n'i lɛ́ lɛ̌ dó, bɔ tó ɔ́ sín gblǒ nyí alɔví ɛnɛ sín gblǒ, bɔ é kɔn siká lɛ́ lɛ̌ dó bǐ. É bló sikálɔgan ɛnɛ, bó fɔ ɖó távo ɔ́ sín zwe ɛnɛ lɛ́ɛ jí, ɖo afɔ tɔn ɛnɛ lɛ́ɛ wú. Alɔgan lɛ́ɛ nɔ tó lɛ́ɛ kpá, bɔ è bɛ̌ kasyakpo we lɛ́ɛ d'é mɛ, bó nɔ́ dó zé távo ɔ́ ná. É kpa kasyakpo lɛ́ɛ bó kɔn siká dó, bɔ è nɔ dó zé távo ɔ́ ná. É bló nǔzínzán e è ɖǒ ná bɛ́ ɖó távo ɔ́ jí lɛ́ɛ: gannúgbɛ́jɛ́, kɔ́fu, zɛ̌n kpódó sinnugannú kpó, bɔ è nɔ zán ahan biba hwenu. Siká akú wɛ é sɔ́ dó bló nǔzínzán énɛ́ lɛ́ɛ ná. Besalɛli zé siká akú dó bló zogbɛ́nhɛnnú ɖokpó ná, bɔ é ɖó ala tɛ́nwe; é ɖó cícá ǎ, bǐ ɖo bǔte bɔ afɔ tɔn, ala tɔn, folówa tɔn lɛ́ɛ, nǔ e mɛ folówa nɔ tɔ́n sín lɛ́ɛ, folówa tɔn lɛ́ɛ kpódó folówa e ma tɔ́n ǎ lɛ́ɛ kpó bǐ ɖo bǔte. Ala ayizɛ́n gosín zogbɛ́nhɛnnú dodó ɔ́ wú; atɔn ɖo akpá ɖokpó xwé, bɔ atɔn ɖo akpá ɖě ɔ́ xwé. Nǔ e mɛ folówa nɔ tɔ́n sín lɛ́ɛ atɔn kpó folówa e ma tɔ́n ǎ lɛ́ɛ kpó, kpó folówa lɛ́ɛ kpó nɔ ala lɛ́ɛ ɖokpó ɖokpó jí. Nǔ e mɛ folówa tɔ́n sín lɛ́ɛ cí atínsínsɛ́n e è nɔ ylɔ́ ɖɔ amadi ɔ́ ɖɔhun. Folówa ɛnɛ cí atínsínsɛ́n e è nɔ ylɔ́ ɖɔ amadi ɔ́ ɖɔhun, bó ɖo zogbɛ́nhɛnnú dodó ɔ́ wú, bɔ nǔ e mɛ folówa nɔ tɔ́n sín lɛ́ɛ kpó folówa tɔn lɛ́ɛ kpó ɖo yě wú. Nǔ e mɛ folówa nɔ tɔ́n sín ɔ́ ɖokpó ɖokpó nɔ ala ayizɛ́n e tɔ́n sín zogbɛ́nhɛnnú dodó ɔ́ wú lɛ́ɛ ɖokpó ɖokpó glɔ́. Nǔ e mɛ folówa nɔ tɔ́n sín lɛ́ɛ kpó ala lɛ́ɛ kpó ɖo bǔte; siká akú wɛ è dǒ tun bǐ ná. É zé siká akú dó bló zogbɛ́nhɛnnú ɔ́ sín zogbɛ́n tɛ́nwe lɛ́ɛ kpó nǔ e è nɔ dó bló myɔ ɔ́ ɖó ná lɛ́ɛ kpó, kpódó nǔ e mɛ afín nɔ kɔn nyi lɛ́ɛ kpó. Siká akú kilóo gban wɛ é dó bló zogbɛ́nhɛnnú ɔ́ kpódó nǔ e ɖ'é wú lɛ́ɛ bǐ kpó. Besalɛli zé kasyatín dó bló vɔ̌sákpe ɖokpó, bó nɔ́ dó zǎlínkpɔ́n zo ɖ'é jí. Akpáxwé tɔn lɛ́ɛ bǐ ɖó jlɛ̌ ɖokpó ɔ́; ɖokpó ɖokpó sín ga nyí mɛ̌tlu vlɔ́; vɔ̌sákpe ɔ́ sín jǐ yiyi nyí mɛ̌tlu ɖokpó; zo tɔn ɛnɛ lɛ́ɛ tɔ́n ganjí, bɔ zo lɛ́ɛ kpó vɔ̌sákpe ɔ́ kpó ɖo bǔ. É kɔn siká akú dó gbɔn fí bǐ; é kɔn dó tó tɔn ɖo aga, bó kɔn dó zo tɔn e tɔ́n lɛ́ɛ, bó kɔn dó akpáxwé tɔn ɛnɛ lɛ́ɛ lɛ́ dó. É kɔn siká dó tó n'i lɛ́ lɛ̌ dó. É bló sikálɔgan we we ɖó ɖisí amyɔ nú vɔ̌sákpe ɔ́, ɖo do. É fɔ kpo gaga gbɔn alɔgan lɛ́ɛ mɛ, bɔ è nɔ dó zé vɔ̌sákpe ɔ́ ná. Kasyatín wɛ é kpa dó bló kpo gaga lɛ́ɛ ná, bó kɔn siká dó. É ɖa ami e è nɔ sá nú mɛ dó ɖe mɛ ɖó vo nú Mawu ɔ́ kpódó nǔsáwǔ wǎnɖagbenɔ akú kpó; é ɖa lě e céluɖatɔ́ nɔ́ ɖa célu gbɔn é. Besalɛli zé kasyatín dó bló vɔ̌sákpe ná. Akpáxwé tɔn lɛ́ɛ bǐ ɖǒ jlɛ̌ ɖokpó ɔ́. Akpáxwé ɖokpó ɖokpó sín ga nyí mɛ̌tlu we adaɖé, jǐ yiyi tɔn nyí mɛ̌tlu ɖokpó adaɖé. É bló vɔ̌sákpe ɔ́, bɔ é ɖó zo ɖo zwe ɛnɛ lɛ́ɛ ɖokpó ɖokpó tɔ́n ganjí, bɔ zwe lɛ́ɛ kpó vɔ̌sákpe ɔ́ kpó ɖo bǔ, bɔ é kɔn ganvɔ dó. É zé ganvɔ dó bló nǔ e è nɔ zán ɖo vɔ̌sákpe ɔ́ jí lɛ́ɛ: gannú e mɛ afín nɔ kɔn dó lɛ́ɛ, pɛ́li lɛ́ɛ, gannú lɛ́ɛ, gǎfu lɛ́ɛ kpódó nǔ e mɛ è nɔ dó zǎlínkpɔ́n zo ɖe lɛ́ɛ kpó. É bló ganvɔganja ɖokpó nú vɔ̌sákpe ɔ́; é sɔ́ ganja ɔ́ dó vɔ̌sákpe ɔ́ glɔ́, bɔ jǐ yiyi tɔn wá vɔ̌sákpe ɔ́ sín vlɔ̌. É bló ganvɔlɔgan ɛnɛ ɖó ganja ɔ́ sín zwe ɛnɛ lɛ́ɛ jí, bó fɔ kpo gaga lɛ́ɛ gbɔn mɛ. É kpa kasyatín sín kpo gaga we, bó kɔn ganvɔ dó, bɔ è nɔ dó zé vɔ̌sákpe ɔ́. É fɔ kpo gaga lɛ́ɛ gbɔn alɔgan lɛ́ɛ mɛ, ɖo vɔ̌sákpe ɔ́ sín akpá we lɛ́ɛ xwé, bɔ è nɔ dó zé vɔ̌sákpe ɔ́ ná. É zé xwlɛ dó bló vɔ̌sákpe ɔ́ ná; nǔ ɖěbǔ ɖo xo tɔn mɛ ǎ. É zé ganvɔ dó bló gannú ɖokpó kpó afɔ e jí è sɔ́ ɖó ɔ́ kpó; nyɔ̌nu e nɔ kplé ɖo goxɔ ɔ́ lihɛ́nnu lɛ́ɛ sín wě wɛ è sɔ́ dó bló nǔ énɛ́ lɛ́ɛ ná. É ɖó kɔ́xota lɛ́ lɛ̌ dó goxɔ ɔ́, bó zé lɛ̌ɛnkanvɔ e dɛ kan ganjí ɔ́ dó xá. Avɔ e è dǒ xá kɔ́xota ɔ́ ná ɔ́ sín ga nyí mɛ̌tlu kanɖé wǒ ɖo goxɔ ɔ́ sín afɔligbé. Dotín ko wú wɛ é sin avɔ lɛ́ɛ dó, bɔ dotín ɖokpó ɖokpó lɛ́ɛ jínjɔ́n afɔ ɖokpó ɖokpó jí. Ganvɔ wɛ é dó bló dotín lɛ́ɛ kpó afɔ lɛ́ɛ kpó. Kpatágan wɛ è dǒ bló klɔcée e ɖo dotín lɛ́ɛ wú lɛ́ɛ kpó gankpo ɖěɖě è nǎ hɛn dotín lɛ́ɛ kpó. Mɔ̌ ɖokpó ɔ́, ɖo goxɔ ɔ́ sín taligbé ɔ́, avɔ ɔ́ ɖó ga ɖokpó ɔ́, bɔ è sin gbɔn alɔkpa ɖokpó ɔ́; klɔcée lɛ́ɛ kpó gankpo lɛ́ɛ kpó ɔ́, kpatágan wɛ é dó bló. Đo goxɔ ɔ́ sín gbadahwe jí ɔ́, avɔ e è dǒ ɖó kɔ́xota ɔ́ sín gblǒ jí ɔ́, ga tɔn nyí mɛ̌tlu koatɔ́n (25). Dotín wǒ wú wɛ é sin avɔ ɔ́ dó, bɔ dotín lɛ́ɛ ɖokpó ɖokpó jínjɔ́n afɔ ɖokpó ɖokpó jí. Klɔcée lɛ́ɛ kpó gankpo lɛ́ɛ ɔ́, kpatágan wɛ é dó bló. Akpá e xwé xwé ɔ́ sín hɔntogbó ɔ́ ɖe, ɖo goxɔ ɔ́ sín zǎnzǎnhwe jí ɔ́ lɔ sín ga nyí mɛ̌tlu koatɔ́n (25). Avɔ e é dó ɖó ɖisí nú hɔntogbó ɔ́ ɖó mɛ̌tlu tɛ́nwe adaɖé; dotín lɛ́ɛ nyí atɔn bó ɖo afɔ ɖokpó ɖokpó jí, Mɔ̌ ɖokpó ɔ́, avɔ e è dǒ ɖó amyɔxwé nú hɔntogbó ɔ́ lɔ ɖó mɛ̌tlu tɛ́nwe adaɖé; bɔ dotín lɛ́ɛ lɔ nyí atɔn, bó ɖo afɔ ɖokpó ɖokpó jí. Avɔ e è xá kɔ́xota ɔ́ ná ɔ́, bǐ wɛ é zé lɛ̌ɛnkanvɔ e dɛ kan ganjí ɔ́ dó bló. Ganvɔ wɛ é sɔ́ dó bló afɔ e jí dotín lɛ́ɛ jínjɔ́n lɛ́ɛ ná bó sɔ́ kpatágan dó bló dotín lɛ́ɛ sín klɔcée lɛ́ɛ kpó kpo yětɔn lɛ́ɛ kpó ná; kpatágan wɛ é kɔn dó dotín lɛ́ɛ sín ata. Kɔ́xota ɔ́ sín dotín lɛ́ɛ bǐ ɔ́, kpo e é sɔ́ kpatágan dó bló ná lɛ́ɛ wɛ dɔn yě cá. Avɔ e é dó ɖó xwé ɔ́ sín hɔntogbó nu ɔ́, kan kwlésinnɔ, vɔvɔ, vɔvɔ cɛ́cɛ́ kpó lɛ̌ɛnkanvɔ kan didɛ kpó wɛ è dǒ kó ná; ga tɔn nyí mɛ̌tlu wǒ, jǐ yiyi tɔn nyí mɛ̌tlu we adaɖé avɔ e è dǒ xá kɔ́xota ɔ́ sín gblǒ ɖɔhun. Ganvɔ wɛ é sɔ́ dó bló dotín ɛnɛ lɛ́ɛ kpó afɔ ɛnɛ e jí dotín lɛ́ɛ jínjɔ́n lɛ́ɛ kpó. Kpatágan wɛ è sɔ́ dó bló klɔcée lɛ́ɛ kpó afɔ yětɔn lɛ́ɛ kpó ná, bó kɔn kpatágan dó dotín lɛ́ɛ sín ata. Ganvɔ wɛ é sɔ́ dó bló goxɔ ɔ́ kpódó kɔ́xota ɔ́ kpó sín só lɛ́ɛ bǐ ná. Gan e è zǎn dó goxɔ e mɛ è ɖǒ ná zé akɔjijɛwéma ɔ́ ɖó ɔ́ lɛ́ɛ ɖíe. Levíi ví lɛ́ɛ wɛ lɛ́n gan lɛ́ɛ lě e Mɔyízi ɖɔ gbɔn é. Itamáa, vɔ̌sánú-xwlémawutɔ́ Aalɔ́ɔn ví ɔ́ wɛ nɔ ɛ nu. Besalɛli Wulíi ví, Húu vívú ɔ́ bló nǔ e Mawu Mavɔmavɔ ɖɔ nú Mɔyízi lɛ́ɛ bǐ. Judáa sín akɔta ɔ́ mɛ wɛ é jɔ ɖe. Oxoliyavu, Axisamaki ví ɔ́ wɛ dó alɔ ɛ; akɔta Dan tɔn ɔ́ mɛ wɛ é jɔ ɖe; é nɔ́ kpa awǐnnya ɖagbe ɖagbe lɛ́ɛ, é nɔ́ ɖe nǔ dó avɔ mɛ; é nɔ́ kó avɔ kwlésinnɔ, avɔ vɔvɔ, avɔ vɔvɔ cɛ́cɛ́, kpó lɛ̌ɛnkanvɔ kpó. Siká e è zǎn dó wa goxɔ ɔ́ sín azɔ̌ lɛ́ɛ ná ɔ́ bǐ bló kilóo afɛnɛ kanɖé gbantɔ́n-nukún-we (877) bɔ glǎmu afɔɖé kanwe ko (300) jɛjí; gan e è nɔ dó da nǔ ná ɖo sinsɛnxɔ mɛ ɔ́ wɛ è zě dó da. Kpatágan e mɛ e sín kɛ́n è sɔ́ lɛ́ɛ ná ɔ́, bǐ bló kilóo afɔwó-afatɔ́n afɔtɔn-nukún-we (3.017) kpó glǎmu nǔwɔntɔn kantɔn gban (750) kpó; gan e è nɔ dó da nǔ ná ɖo Mawu xwé gbe ɔ́ wɛ è zě dó da. Súnnu e ɖó xwe ko abǐ xwe ko jɛjí bɔ è sɔ́ kɛ́n yětɔn lɛ́ɛ ɖokpó ɖokpó ná kpatágan glǎmu atɔ́ɔ́n; yě mɛ e ná lɛ́ɛ bǐ kplékplé yi adɔ̌kpo gban afɔwó afɔ tɛ́nwe kantɔn gban jɛjí (603.550). Kpatágan kilóo afɔwó-afatɔ́n (3.000) wɛ è zǎn dó bló afɔ kanwe ko (100) e jí dotín goxɔ ɔ́ tɔn lɛ́ɛ jínjɔ́n lɛ́ɛ kpódó afɔ e jí xɔmɛgbovɔ ɔ́ jínjɔ́n lɛ́ɛ kpó; nǔ lɛ́ɛ ɖokpó ɖokpó nɔ́ da kilóo gban (30). È zě kpatágan kilóo afɔtɔn-nukún-we glǎmu nǔwɔntɔn kantɔn gban (750) e kpo lɛ́ɛ dó bló dotín lɛ́ɛ sín klɔcée lɛ́ɛ, gankpo yětɔn lɛ́ɛ, kpó ata yětɔn lɛ́ɛ kpó. Ganvɔ e Izlayɛ́li ví lɛ́ɛ ná ɔ́ bǐ bló kilóo afɔwó kantɔn-nukún-ɛnɛ (2.124). Ganvɔ énɛ́ ɔ́ wɛ è zǎn dó bló só e ɖo goxɔ ɔ́ sín ali nu lɛ́ɛ ná, bó bló vɔ̌sákpe ɔ́ kpó ganja tɔn kpó, kpódó nǔ e è nɔ zán ɖo vɔ̌sákpe ɔ́ kɔn lɛ́ɛ bǐ kpó. É wɛ è zě dó bló dotín e è dǒ xá kɔ́xota ɔ́ sín afɔ lɛ́ɛ, hɔntogbó ɔ́ sín dotín lɛ́ɛ sín afɔ lɛ́ɛ, goxɔ ɔ́ sín só lɛ́ɛ kpódó dotín e è dǒ xá kɔ́xota ɔ́ sín só lɛ́ɛ kpó. È zě avɔ kwlésinnɔ, avɔ vɔvɔ kpó avɔ vɔvɔ cɛ́cɛ́ kpó dó tɔ sinsɛnwu e è nǎ dó wa azɔ̌ ɖo goxɔ ɔ́ mɛ lɛ́ɛ. È tɔ vɔ̌sánú-xwlémawutɔ́ sín awu lɛ́ɛ nú Aalɔ́ɔn lě e Mawu Mavɔmavɔ ɖɔ gbɔn nú Mɔyízi é. È zě kan didɛ e è nɔ dó lɔn lɛ̌ɛnkanvɔ ná ɔ́ dó lɔn efódu ná bɔ kan kwlésinnɔ vɔvɔ kpó vɔvɔ cɛ́cɛ́ kpó gbɔn mɛ, bɔ è zě kan gansinnɔ dó kó ná. È zě siká akú dó gan gbajagbaja bó sɛ́n kan tɔn bó gbɛ kan ɖɔhun, bó ján gbɔn kan kwlésinnɔ ɔ́, vɔvɔ ɔ́, vɔvɔ cɛ́cɛ́ ɔ́, kpó kan didɛ e è nɔ dó lɔn lɛ̌ɛnkanvɔ ná ɔ́ kpó mɛ; è blǒ bɔ é mɛ́ sin. È blǒ abɔ̌tavɔ we bó tɔ dó efódu ɔ́ sín tó we lɛ́ɛ wú, dó hɛn ɖó te. Efódu kpó gǒjíblánú ɔ́ kpó bǐ wɛ è lɔn ɖó bǔ; kan gansinnɔ, kwlésinnɔ, vɔvɔ, vɔvɔ cɛ́cɛ́ kpó kan didɛ e è nɔ dó lɔn lɛ̌ɛnkanvɔ ná ɔ́ kpó wɛ è dǒ lɔn ná, lě e Mawu Mavɔmavɔ ɖɔ nú Mɔyízi gbɔn é. È kpa awǐnnya e è nɔ ylɔ́ ɖɔ Onísi ɔ́ we bó kɔn siká lɛ́ lɛ̌ dó, lobo wlán Izlayɛ́li ví lɛ́ɛ sín nyǐkɔ dó yě wú lě e awǐnnyazɔ́watɔ́ nɔ kun nǔ dó awǐnnya wú gbɔn é. È bɛ̌ awǐnnyatɛ we lɛ́ɛ ɖó efódu ɔ́ sín abɔ̌tavɔ lɛ́ɛ jí dó ná akɔta Izlayɛ́li tɔn wěwe lɛ́ɛ sín xlɛ̌, lě e Mawu Mavɔmavɔ ɖɔ nú Mɔyízi gbɔn é. Avɔlɔntɔ́ e alɔnu yětɔn mɛ́ ganjí lɛ́ɛ zé kan didɛ e è nɔ dó lɔn lɛ̌ɛnkanvɔ ná ɔ́ dó lɔn akɔ́ntakpo e è nɔ sin dó akɔ́nta dó ɖɔ hwɛ é, bɔ kan kwlésinnɔ vɔvɔ kpó vɔvɔ cɛ́cɛ́ kpó gbɔn mɛ; yě zé kan gansinnɔ dó kó ná, lě e è lɔn efódu ɔ́ gbɔn é. Akpo wɛ é nyí bó ɖó gblǒ zɛ̌ɛ́n, ga zɛ̌ɛ́n; gblǒ ɔ́ nyí mɛ̌tlu ɖokpó sín ɛnɛvlɔ́ɖó, bɔ ga ɔ́ lɔ nyí mɛ̌tlu ɖokpó sín ɛnɛvlɔ́ɖó. È to awǐnnya ɖagbe ɖagbe d'é wú dó ba acɔ́ ná; hǎ ɛnɛ jí wɛ è to ɖó: è to awǐnnya sadwáni ɖokpó, tokpázi ɖokpó, kpó emɛlodu ɖokpó kpó ɖó hǎ nukɔntɔn ɔ́ jí. È to awǐnnya ɛsikabukli ɖokpó, safíi ɖokpó kpó dyamáa ɖokpó kpó ɖó hǎ wegɔ́ ɔ́ jí, bó to awǐnnya okpálu ɖokpó, agáti ɖokpó, kpó amɛtisi ɖokpó kpó ɖó hǎ atɔngɔ́ ɔ́ jí. È to awǐnnya klizolíti ɖokpó, onísi ɖokpó, kpó jasipée ɖokpó kpó ɖó hǎ ɛnɛgɔ́ ɔ́ jí. Siká wɛ è kɔn lɛ́ lɛ̌ dó awǐnnya énɛ́ lɛ́ɛ. È wlǎn Jakɔ́bu ví lɛ́ɛ ɖokpó ɖokpó sín nyǐkɔ ɖó awǐnnya lɛ́ɛ ɖokpó ɖokpó wú, lě e awǐnnyazɔ́watɔ́ nɔ kun nǔ dó awǐnnya wú gbɔn é. Awǐnnya énɛ́ lɛ́ɛ nyí xlɛ́ akɔta Izlayɛ́li wěwe lɛ́ɛ tɔn. È zě siká akú dó bló wlɔ kpɛví kpɛví ná, bó gbɛ kan ɖɔhun nú akɔ́ntakpo ɔ́. È kɔn siká lɛ́ lɛ̌ dó awǐnnyatɛ we bó bló sikálɔgan we, bó fɔ ɖó akɔ́ntakpo ɔ́ sín tó we lɛ́ɛ wú. È zě sikáwlɔ we lɛ́ɛ gbɔn alɔgan we e ɖo akɔ́ntakpo ɔ́ sín tó lɛ́ɛ mɛ. È zě wlɔ ɔ́ sín nu we ɖě lɛ́ɛ gbɔn efódu ɔ́ sín abɔ̌tavɔ ɔ́ glɔ́ gbɔn nukɔn dó hɛn efódu ɔ́ dó abɔ̌tavɔ ɔ́ wú. È lɛ̌ blǒ sikálɔgan we, bó fɔ yě ɖó akɔ́ntakpo ɔ́ sín tó we lɛ́ɛ tó ɖo do, bɔdó awu gaga ɔ́ wú, ɖo xomɛ. È lɛ̌ bló sikálɔgan we ɖó efódu ɔ́ sín abɔ̌tavɔ we lɛ́ɛ sín do, ɖo nukɔn, ɖo fí e è tɔ gbɔn lɛ́ɛ, ɖo gǒjíblánú e ɖo efódu ɔ́ wú ɔ́ sín ta nu. È zě kan kwlésinnɔ gbɔn alɔgan lɛ́ɛ mɛ, bó dó sin akɔ́ntakpo ɔ́ ná dó gǒjíblánú e ɖo efódu ɔ́ jí ɔ́ wú, bónú é má gosín efódu ɔ́ wú ó. Lě e Mawu Mavɔmavɔ ɖɔ nú Mɔyízi gbɔn ɔ́ nɛ́. Avɔ kwlésinnɔ kɛ́ɖɛ́ wɛ è dǒ tɔ awu e ná nɔ do nú efódu ɔ́. È ɖe ali d'é mɛ gbɔn tɛ́ntin bɔ è nɔ zé ta gbɔn mɛ. È kó kɔ mɛ ná bɔ é tlí, bó má wá vún ó. È zě kan kwlésinnɔ, vɔvɔ, vɔvɔ cɛ́cɛ́ kpó kan didɛ e è nɔ dó lɔn lɛ̌ɛnkanvɔ ná ɔ́ kpó dó bló atínsínsɛ́n e è nɔ ylɔ́ ɖɔ glenádi ɔ́ gbɔn awu ɔ́ tó, lɛ́ lɛ̌ dó ɖo do, bó dó ba acɔ́ ná. È zě siká akú dó bló gan e è nɔ xúxú ɔ́ kpɛví kpɛví bó to gbɔn awu ɔ́ tó, lɛ́ lɛ̌ dó ɖo do, gbɔn glenádi lɛ́ɛ tɛ́ntin. Hǔn è mɔ gan ɖokpó ɔ́, è nǎ mɔ glenádi ɖokpó, bɔ è nǎ dǒ wa sinsɛnzɔ́ ná, lě e Mawu Mavɔmavɔ ɖɔ nú Mɔyízi gbɔn é. È zě kan didɛ e è nɔ dó lɔn lɛ̌ɛnkanvɔ ná ɔ́ dó lɔn awu gaga nú Aalɔ́ɔn kpó vǐ tɔn lɛ́ɛ kpó. È zě kan didɛ e è nɔ dó lɔn lɛ̌ɛnkanvɔ ná ɔ́ dó bló tablá kpó gbǎkún ɖé kpó nú yě, bó dó ɖe susu e yě ɖǒ ɔ́ xlɛ́; è lɛ̌ zé kan didɛ e è nɔ dó lɔn lɛ̌ɛnkanvɔ ná ɔ́ dó tɔ cokoto kpɛví kpɛví nú yě. È zě kan didɛ e è nɔ dó lɔn lɛ̌ɛnkanvɔ ná ɔ́ dó bló gǒjíblánú ná bó kó, bɔ kan kwlésinnɔ vɔvɔ kpó vɔvɔ cɛ́cɛ́ kpó gbɔn mɛ, lě e Mawu Mavɔmavɔ kó ɖɔ nú Mɔyízi gbɔn é. Énɛ́ ɔ́ gúdo ɔ́, è zě siká akú dó bló gan gbajagbaja ɖokpó ná, bó ɖé d'é jí ɖɔ: “Mɛɖeɖóvo Mawu Mavɔmavɔ tɔn.” È ɖe lě e awǐnnyazɔ́watɔ́ nɔ́ kun nǔ dó awǐnnya jí gbɔn é. È zě kan kwlésinnɔ dó hɛn gan gbajagbaja ɔ́ dó tablá ɔ́ wú ɖo aga lě e Mawu Mavɔmavɔ kó ɖɔ nú Mɔyízi gbɔn é. Lě e è fó Mawu xwé, nɔtɛn Mawu Mavɔmavɔ tɔn ɔ́ sín azɔ̌ lɛ́ɛ bǐ gbɔn ɔ́ nɛ́. Izlayɛ́li ví lɛ́ɛ bló nǔ e Mawu Mavɔmavɔ ɖɔ nú Mɔyízi ɖ'ayǐ lɛ́ɛ bǐ. Izlayɛ́li ví lɛ́ɛ bɛ́ nǔ e è nǎ dó bló nɔtɛn Mawu Mavɔmavɔ tɔn ɔ́ ná lɛ́ɛ bǐ wá nú Mɔyízi: goxɔ ɔ́ kpó nǔ e ɖo wǔ tɔn lɛ́ɛ bǐ kpó; nǔ lɛ́ɛ wɛ nyí nǔhɛnnú lɛ́ɛ, xwlɛ lɛ́ɛ, wɛ̌n lɛ́ɛ, dotín lɛ́ɛ kpódó afɔ lɛ́ɛ kpó, kpó agbonyú e è sá nǔ vɔvɔ dó lɛ́ɛ kpó, anyǔ tlitli lɛ́ɛ kpó, kpó xɔmɛgbovɔ ɔ́ kpó, kpó gbǎ e mɛ akɔjijɛwéma ɔ́ ɖe ɔ́ kpó, kpó kpo e è nɔ dó sɔ́ ná lɛ́ɛ kpó, kpódó nusú tɔn kpó; távo e jí akɔjijɛgbá ɔ́ nɔ́ nɔ ɔ́ kpó nǔ e è nɔ zán ɖ'é jí lɛ́ɛ kpó, kpó wɔ̌xúxú e è nɔ ná Mawu lɛ́ɛ kpó. Zogbɛ́nhɛnnú e è sɔ́ siká akú dó bló ná é, kpó zogbɛ́n tɔn lɛ́ɛ kpó, kpódó nǔ e è nɔ zán ɖo zogbɛ́nhɛnnú ɔ́ kɔn lɛ́ɛ bǐ kpó ami e è nǎ tá myɔ ɔ́ ná é kpó. Vɔ̌sákpe e è sɔ́ siká dó bló ná é, ami e è nǎ sá dó ɖe mɛ ɖó vo é kpó atínkɛn wǎnɖagbenɔ ɔ́ kpó, kpódó avɔ e è dǒ ɖó goxɔ ɔ́ sín ali nu é kpó. Vɔ̌sákpe e è sɔ́ ganvɔ dó bló ná é, ganja tɔn e è sɔ́ ganvɔ dó bló ná é, kpo e è nɔ dó sɔ́ ná lɛ́ɛ kpó nǔ e è nɔ zǎn ɖo vɔ̌sákpe ɔ́ kɔn lɛ́ɛ bǐ kpó; ganzɛ́n ɔ́ kpó nǔ e jí è sɔ́ ɖó ɔ́ kpó. Avɔ e è nǎ dǒ xá xwé ɔ́ ná lɛ́ɛ, dotín lɛ́ɛ kpó afɔ lɛ́ɛ kpó, avɔ e è nǎ dǒ xwé ɔ́ sín hɔntogbó nu é, kan e è nǎ dǒ hɛn nǔ lɛ́ɛ ɖó te lɛ́ɛ, só lɛ́ɛ, nǔ e è nǎ zǎn dó wa azɔ̌ ɖo Mawu xwé ɔ́ gbe kpó éé è nǎ zán ɖo goxɔ ɔ́ mɛ lɛ́ɛ kpó. Sinsɛnwu e è nɔ dó wa azɔ̌ ná ɖo goxɔ ɔ́ mɛ lɛ́ɛ; vɔ̌sánú-xwlémawutɔ́ sín awu lɛ́ɛ vɔ̌sánú-xwlémawutɔ́ Aalɔ́ɔn tɔn lɛ́ɛ, kpó awu e vǐ tɔn lɛ́ɛ ná dó dó wa azɔ̌ lɛ́ɛ kpó. Izlayɛ́li ví lɛ́ɛ bló nǔ énɛ́ lɛ́ɛ bɔ é sɔgbe xá lě e Mawu Mavɔmavɔ ɖɔ nú Mɔyízi gbɔn lɛ́ɛ bǐ. Mɔyízi kpɔ́n azɔ̌ e yě wa lɛ́ɛ bǐ bó mɔ ɖɔ yě bló nǔ lɛ́ɛ bǐ lě e Mawu Mavɔmavɔ ɖɔ gbɔn é. Énɛ́ ɔ́, é xo ɖɛ dó yě jí. Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Sun nukɔntɔn ɔ́ sín azǎn nukɔntɔn ɔ́ gbe ɔ́, a nǎ blǒ goxɔ e mɛ un ná nɔ wá kpé togun ɔ́ ɖe ɔ́, nɔtɛn ce ɔ́. A nǎ zě gbǎ e mɛ akɔjijɛwéma ɔ́ ɖe ɔ́ d'é mɛ, bó ná sɔ́ ɖó xɔmɛgbovɔ ɔ́ gúdo, bónú mɛɖé ní má mɔ ó. A nǎ zé távo ɔ́ wá, bó ná to wɔ̌xúxú e è nǎ mì lɛ́ɛ ɖ'é jí, a nǎ zé zogbɛ́nhɛnnú ɔ́ wá, bó ná to zogbɛ́n lɛ́ɛ ɖ'é jí. A nǎ zé vɔ̌sákpe e è sɔ́ siká dó bló ná bó ná nɔ́ dó zǎlínkpɔ́n zo ɖ'é jí ɔ́ ɖó gbǎ e mɛ akɔjijɛwéma ɔ́ ɖe ɔ́ nukɔn, ɖo xɔmɛgbovɔ ɔ́ gúdo; a nǎ dǒ avɔ ɖó goxɔ ɔ́ sín ali nu. A nǎ zě vɔ̌sákpe e jí è nɔ dó vɔ̌ zo ɖe ɔ́ ɖó goxɔ ɔ́ sín alihɛ́nnu. A nǎ zě ganzɛ́n ɔ́ ɖó nɔtɛn Mawu Mavɔmavɔ tɔn ɔ́ kpó vɔ̌sákpe énɛ́ ɔ́ kpó tɛ́ntin, bó ná kɔn sin d'é mɛ. A nǎ zé avɔ dó xá kɔ́xota ɔ́ lɛ́ dó goxɔ ɔ́, bó ná dó avɔ ɖó xwé ɔ́ sín hɔntogbó nu. “A nǎ zě ami mímɛ́ ɔ́, bó ná sá dó goxɔ ɔ́ kpó nǔ e ɖ'é mɛ lɛ́ɛ bǐ kpó wú, bó ná dó ɖe yě ɖó vo nú mì. A nǎ sá ami mímɛ́ ɔ́ dó vɔ̌sákpe e jí è nɔ dó vɔ̌ zo ɖe ɔ́ kpó nǔ e è nǎ zán ɖ'é jí lɛ́ɛ bǐ kpó wú, bó ná ɖe vɔ̌sákpe ɔ́ ɖó vo nú mì; bɔ é ná nyí nǔ mímɛ́ titewungbe. A nǎ sá ami dó ganzɛ́n ɔ́ kpó afɔ e jí è nɔ sɔ́ ganzɛ́n ɖó ɔ́ kpó, bó ná dó sɔ́ ganzɛ́n ɔ́ ɖó vo nú mì. “A nǎ kplá Aalɔ́ɔn kpó vǐ tɔn lɛ́ɛ kpó yi goxɔ ce lihɛ́nnu, bó ná zé sin dó slá wǔ nú yě. A nǎ fɔ vɔ̌sánú-xwlémawutɔ́ sín awu dó nú Aalɔ́ɔn, bó ná kɔn ami dó ta n'i, bó dó ɖe e ɖó vo bɔ é ná wa vɔ̌sánú-xwlémawutɔ́ sín azɔ̌ nú mì. A nǎ ylɔ́ Aalɔ́ɔn ví lɛ́ɛ bɔ yě ná sɛkpɔ́ we bɔ a nǎ dó awu gaga lɛ́ɛ nú yě. A nǎ kɔn ami dó ta nú yě lě e a kɔn dó ta nú tɔ́ yětɔn gbɔn é, bɔ yě ná nɔ wa vɔ̌sánú-xwlémawutɔ́zɔ́ nú mì. Ami énɛ́ ɔ́ e a nǎ kɔn dó ta nú yě ɔ́ ná zɔ́n bɔ yě kpó vǐ yětɔn lɛ́ɛ kpó ná nyí vɔ̌sánú-xwlémawutɔ́ nú mì káká sɔ́yi.” Mɔyízi bló nǔ e Mawu Mavɔmavɔ ɖɔ n'i lɛ́ɛ bǐ tɛ́nwínlɛnwín: Yě gosín Ejípu ɔ́, é bló xwe ɖokpó, bɔ sun nukɔntɔn e ɖo xwe énɛ́ ɔ́ mɛ ɔ́ sín azǎn nukɔntɔn ɔ́ gbe ɔ́, è blǒ goxɔ ɔ́. Mɔyízi ján xwé ɔ́; é dó afɔ lɛ́ɛ do, é ká xwlɛ lɛ́ɛ, bó ɖó wɛ̌n lɛ́ɛ, lobo dó dotín lɛ́ɛ do. É fɔ avɔ cyɔ́n dó goxɔ ɔ́, bó zé anyǔ cyɔ́n jí, lě e Mawu Mavɔmavɔ ɖɔ n'i gbɔn é. É zé awǐnnyatɛ lɛ́ɛ dó gbǎ ɔ́ mɛ; é fɔ kpo gaga e è nɔ dó zé gbǎ ɔ́ ná ɔ́ dó alɔgan e ɖo gbǎ ɔ́ wú lɛ́ɛ mɛ, bó zé gbǎ ɔ́ sín nusú ɖ'é nu. É zé gbǎ ɔ́ wá goxɔ ɔ́ mɛ; é dó xɔmɛgbovɔ ɔ́, dó gbo fí e gbǎ e mɛ awǐnnyatɛ lɛ́ɛ ɔ́ ɖe ɔ́ ɖó vo, bónú mɛɖé má mɔ ó, lě e Mawu Mavɔmavɔ kó ɖɔ n'i gbɔn é. É zé távo ɔ́ ɖó goxɔ ɔ́ mɛ, ɖo goxɔ ɔ́ sín taligbé, ɖo xɔmɛgbovɔ ɔ́ nukɔn. Bó to wɔ̌xúxú lɛ́ɛ ɖó távo ɔ́ jí, ɖo Mawu Mavɔmavɔ nukɔn, lě e Mawu Mavɔmavɔ kó ɖɔ n'i gbɔn é. É zé zogbɛ́nhɛnnú ɔ́ ɖó goxɔ ɔ́ mɛ, ɖo távo ɔ́ nukɔn, bɔ é ɖo Tɛn mímɛ́ ɔ́ sín afɔligbé. É tá zogbɛ́n lɛ́ɛ ɖ'é jí, ɖo Mawu Mavɔmavɔ nukɔn, lě e Mawu Mavɔmavɔ kó ɖɔ n'i gbɔn é. É zé vɔ̌sákpe e è sɔ́ siká dó bló ná ɔ́ ɖó goxɔ ɔ́ mɛ, ɖo xɔmɛgbovɔ ɔ́ nukɔn, bó dó atínkɛn wǎnɖagbenɔ zo ɖ'é jí, lě e Mawu Mavɔmavɔ kó ɖɔ n'i gbɔn é. É dó avɔ ɖó goxɔ ɔ́ sín ali nu. É zé vɔ̌sákpe e jí è nɔ dó vɔ̌ zo ɖe ɔ́ ɖó goxɔ ɔ́ sín alihɛ́nnu; é sá vɔ̌ e è nɔ dó zo ɔ́ kpó jinukúnvɔ́ kpó ɖ'é jí, lě e Mawu Mavɔmavɔ kó ɖɔ n'i gbɔn ɖ'ayǐ é. É zé ganzɛ́n ɔ́ ɖó goxɔ ɔ́ kpó vɔ̌sákpe ɔ́ kpó tɛ́ntin, bó kɔn sin d'é mɛ bónú è nǎ nɔ́ dó slá wǔ ná. Mɔyízi kpó Aalɔ́ɔn kpó, kpó Aalɔ́ɔn ví lɛ́ɛ kpó nɔ́ dó klɔ́ afɔ kpó alɔ kpó. Hǔn, yě ja goxɔ ɔ́ mɛ byɔ́ gbé, abǐ yě ná yi vɔ̌sákpe e jí è nɔ dó vɔ̌ zo ɖe ɔ́ kɔn hweɖěbǔnu ɔ́, yě nɔ́ slá wǔ, lě e Mawu Mavɔmavɔ kó ɖɔ nú Mɔyízi gbɔn é. Mɔyízi dó avɔ dó xá kɔ́xota ɔ́ lɛ́ dó goxɔ kpó vɔ̌sákpe ɔ́ kpó, bó dó avɔ ɖó hɔntogbó ɔ́ nu. Lě e Mɔyízi fó azɔ̌ ɔ́ gbɔn ɔ́ nɛ́. Hwenɛ́nu ɔ́, akpɔ́kpɔ́ cyɔ́n goxɔ ɔ́, bɔ susu Mawu Mavɔmavɔ tɔn gɔ́ goxɔ ɔ́, káká bɔ Mɔyízi sɔ́ sixú byɔ́ goxɔ ɔ́ mɛ ǎ. Cóbónú Izlayɛ́li ví lɛ́ɛ ná jɛ ali ɔ́, akpɔ́kpɔ́ ɔ́ jɛ́n nɔ́ sí te sín goxɔ ɔ́ jí cóbɔ yě nɔ́ ɖidó. Ényí akpɔ́kpɔ́ ɔ́ má sí te ǎ ɔ́, yě nɔ́ yi ǎ; yě nɔ́ nɔ te káká jɛ gbe e gbe é ná sí te é. Akpɔ́kpɔ́ Mawu Mavɔmavɔ tɔn ɔ́ nɔ́ nɔ goxɔ ɔ́ ta kéze, bɔ myɔ nɔ ɖo akpɔ́kpɔ́ ɔ́ mɛ zǎn mɛ, bɔ Izlayɛ́li ví lɛ́ɛ bǐ nɔ ɖo mimɔ wɛ, gbɔn fí e yě nɔ́ lɛ́ɛ bǐ. Mawu Mavɔmavɔ nɔ goxɔ e mɛ é nɔ́ kpé togun tɔn ɖe ɔ́ mɛ, bó ylɔ́ Mɔyízi, bó ɖɔ n'i ɖɔ é ní ɖɔ nú Izlayɛ́li ví lɛ́ɛ ɖɔ: “Ényí mɛɖé ɖo mi mɛ, bó jló ná zé kanlin ɖé dó sá vɔ̌ ná nú Mawu Mavɔmavɔ ɔ́, é ná zé nyibú ɖokpó abǐ gbɔ̌ ɖokpó dó sá ná. “Nú nyibú wɛ mɛ ɔ́ jló ná zé dó sá vɔ̌ e è nɔ dó zo ɔ́ ná ɔ́, nyibúsú e má ɖó blɔ̌ ɖěbǔ ǎ ɔ́ wɛ mɛ ɔ́ ná dó sá vɔ̌ ɔ́; é ná kplá wá goxɔ ɔ́ sín alihɛ́nnu, bónú Mawu Mavɔmavɔ ná wa ɖagbe nú mɛ ɔ́. Mɛ ɔ́ ná sɔ́ alɔ ɖó kanlin ɔ́ ta; énɛ́ ɔ́, Mawu Mavɔmavɔ ná yí kanlin ɔ́, bó ná súnsún hwɛ e é hu lɛ́ɛ. Énɛ́ ɔ́ gúdo ɔ́, é ná gbo gbe kanlin ɔ́ ɖo nyɛ Mawu Mavɔmavɔ nukɔn, bɔ Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ ná xwlé hun tɔn nyɛ Mawu Mavɔmavɔ. Yě ná mi hun ɔ́ gbɔn vɔ̌sákpe e ɖo goxɔ ɔ́ sín ali nu ɔ́ wú lɛ́ lɛ̌ dó. Yě bló mɔ̌ fó ɔ́, mɛ ɔ́ ná kɔ́n kanlin ɔ́ sín anyǔ, bó ná já lan tɔn, bɔ vɔ̌sánú-xwlémawutɔ́ lɛ́ɛ ná flɔ́ myɔ ɖó vɔ̌sákpe ɔ́ jí, bó ná to nakí d'é mɛ, bó ná bɛ́ lan e è jǎ lɛ́ɛ kpó ta ɔ́ kpó, kpódó jǒ ɔ́ kpó ɖó nakí lɛ́ɛ jí. È nǎ klɔ́ xomɛnú lɛ́ɛ kpó afɔ lɛ́ɛ kpó bɔ vɔ̌sánú-xwlémawutɔ́ lɛ́ɛ ɖokpó ná dó bǐ zo ɖo vɔ̌sákpe ɔ́ jí. Énɛ́ wɛ nyí vɔ̌ e è nɔ́ dó zo bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é. “Nú é ká nyí gbɔ̌ wɛ mɛ ɔ́ jló ná zé dó sá vɔ̌ e è nɔ dó zo ɔ́ ná ɔ́, gbɔ̌sú e má ɖó blɔ̌ ɖěbǔ ǎ é wɛ é ná dó sá vɔ̌ ɔ́ ná. É sixú nyí agbo abǐ gbǎgbá. Mɛ ɔ́ ná gbo gbe kanlin ɔ́ ɖo vɔ̌sákpe ɔ́ sín taligbé, ɖo Mawu Mavɔmavɔ nukɔn, bɔ Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ lɛ̌ dó. È nǎ jǎ kanlin ɔ́ bǐ, bɔ vɔ̌sánú-xwlémawutɔ́ lɛ́ɛ ɖokpó ná to lan e è jǎ lɛ́ɛ kpó ta ɔ́ kpó, kpódó jǒ ɔ́ kpó ɖó nakí e ɖo myɔ mɛ ɖo vɔ̌sákpe ɔ́ jí lɛ́ɛ jí. È nǎ klɔ́ xomɛnú lɛ́ɛ kpó afɔ lɛ́ɛ kpó, bɔ vɔ̌sánú-xwlémawutɔ́ ɔ́ ná bɛ́ bǐ xwlé Mawu Mavɔmavɔ, bó ná dó yě zo ɖo vɔ̌sákpe ɔ́ jí. Énɛ́ wɛ nyí vɔ̌ e è nɔ dó zo bɔ é nɔ́ fyɔ́ bǐ, bɔ wǎn tɔn nɔ yi Mawu Mavɔmavɔ gɔ́n, bó nɔ́ nyɔ́ se n'i é. “Nú é ká nyí xɛ wɛ mɛ ɔ́ jló ná zé dó sá vɔ̌ e è nɔ dó zo ɔ́ ná nú Mawu Mavɔmavɔ ɔ́, xwelé, abǐ ahwannɛ́ví wɛ é ná dó sá vɔ̌ ɔ́ ná. Vɔ̌sánú-xwlémawutɔ́ ɔ́ ná zé xɛ ɔ́ xwlé Mawu Mavɔmavɔ, ɖo vɔ̌sákpe ɔ́ jí; é ná zé fɛn dó sun ta tɔn, bó ná fyɔ́n xɛ ɔ́, bɔ hun tɔn ná kun dó vɔ̌sákpe ɔ́ wú ɖo akpá ɖokpó, bɔ é ná dó zo ɖo vɔ̌sákpe ɔ́ jí. É ná ɖe funfúngwe ɔ́, bó ná zé é kpódó nǔ e ɖ'é mɛ ɔ́ kpó bǐ nyi gbě, ɖo zǎnzǎnhwe jí, ɖo fí e è nɔ bɛ́ afín ɖó é. È nǎ hɛn awa lɛ́ɛ, bó ná kɛ́ xɛ ɔ́, bɔ vɔ̌sánú-xwlémawutɔ́ ɔ́ ná dó zo ɖo vɔ̌sákpe ɔ́ jí, ɖo nakí e ɖo myɔ ɔ́ mɛ lɛ́ɛ jí. Énɛ́ wɛ nyí vɔ̌ e è nɔ dó zo bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é.” Mawu Mavɔmavɔ ɖɔ: “Ényí mɛ ɖé jló ná hɛn nǔníná jinukún tɔn ɖé wá nú Mawu Mavɔmavɔ ɔ́, mɛ ɔ́ ní hɛn linfín; é ní kɔn ami dó linfín ɔ́ jí, bó hɛn zǎlínkpɔ́n d'é jí, bó ná zé wá nú Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ. È nǎ wún linfín e jí è kɔn ami dó ɔ́ alɔgogo ɖokpó, bɔ zǎlínkpɔ́n ɔ́ bǐ ná jɛ jí, bɔ vɔ̌sánú-xwlémawutɔ́ lɛ́ɛ ɖokpó ná dó zo ɖo vɔ̌sákpe ɔ́ jí, bɔ é ná nyí flǐnnú ɖé nú Mawu Mavɔmavɔ. Énɛ́ wɛ nyí vɔ̌ e è nɔ dó zo, bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é. Nǔníná e ná kpo ɔ́ ná nyí Aalɔ́ɔn kpó vǐ tɔn súnnu lɛ́ɛ kpó tɔn. Nǔ mímɛ́ ɖaxó ɖé wɛ é nyí, ɖó vɔ̌ e è xwlé Mawu Mavɔmavɔ ɔ́ mɛ wɛ è ɖe sín. “Nú é ká nyí nǔ e è ɖa ɖo myɔkpó mɛ ɔ́ ná ná Mawu Mavɔmavɔ wɛ è ɖe ɔ́, è nǎ zé linfín e mɛ è ma dó tɔ́n ǎ é dó ɖa atá tɔ́n má ɖ'é mɛ, bɔ è zě ami dó nya ná, abǐ acɔnmɔ e mɛ tɔ́n má ɖe ǎ é, bɔ è nǎ sá ami dó. Nú é ká nyí nǔ e è ɖa ɖo ganzɛ́n wɛnjɛ mɛ ɔ́ ná ná Mawu Mavɔmavɔ wɛ è ɖe ɔ́, é ní nyí linfín e è nya kpó ami kpó bɔ tɔ́n má ɖ'é mɛ ǎ é. È nǎ já, bó ná lɛ́ kɔn ami d'é jí. Nǔníná jinukún tɔn ɖokpó wɛ é nyí. Nú é ká nyí nǔ e è ɖa ɖo ganzɛ́n mɛ ɔ́ ná ná Mawu Mavɔmavɔ wɛ è ɖe ɔ́, linfín e è nya kpó ami kpó ɔ́ wɛ è nǎ dó ɖa ná. È nǎ hɛn nǔníná e è ɖa ɔ́ wá nú Mawu Mavɔmavɔ. Vɔ̌sánú-xwlémawutɔ́ ɔ́ wɛ è nǎ zé ná, bɔ é ná zé yi vɔ̌sákpe ɔ́ jí. Nǔ e è jlǒ ná xwlé Mawu Mavɔmavɔ bɔ é ná nyí flǐnnú n'i ɔ́, vɔ̌sánú-xwlémawutɔ́ ɔ́ ná ɖe ɖ'é mɛ, bó ná dó zo ɖo vɔ̌sákpe ɔ́ jí. Énɛ́ wɛ nyí vɔ̌ e è nɔ dó zo bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é. Nǔníná e ná kpo ɔ́, ná nyí Aalɔ́ɔn kpó vǐ tɔn súnnu lɛ́ɛ kpó tɔn. Nǔ mímɛ́ ɖaxó ɖé wɛ é nyí, ɖó vɔ̌ e è xwlé Mawu Mavɔmavɔ ɔ́ mɛ wɛ è ɖe sín. “Tɔ́n ná ɖo nǔníná e mi ná xwlé Mawu Mavɔmavɔ lɛ́ɛ ɖěbǔ mɛ ǎ; nǔgbó ɔ́, nǔníná e è nǎ dó zo ɖo Mawu Mavɔmavɔ nukɔn lɛ́ɛ ɔ́, mi ná dó tɔ́n abǐ wǐin ɖěbǔ mɛ gbeɖé ǎ. É ka ɖo mɔ̌ có mi sixú dó tɔ́n abǐ wǐin jinukún nukɔntɔn sín nǔníná e mi hɛn wá nú Mawu Mavɔmavɔ ɔ́ mɛ. Lo ɔ́, è sixú sɔ́ dó sá vɔ̌ e è nɔ dó zo ɔ́ ná ɖo vɔ̌sákpe jí, bɔ é ná nyí nǔníná wǎnɖagbenɔ ǎ. “È nǎ dó jɛ nǔníná jinukún tɔn lɛ́ɛ bǐ mɛ. È nǎ dó vɛ̌ ná gbeɖé, bó gɔn dǐd'é mɛ ǎ, ɖó é wɛ nyí akɔ e Mawu jɛ xá mi ɔ́ sín xlɛ̌. Énɛ́ ɔ́ wú wɛ è nǎ hɛn jɛ dó nǔníná lɛ́ɛ bǐ jí. “Ényí jinukún mitɔn nukɔntɔn lɛ́ɛ wɛ nyí nǔníná jinukún tɔn e mi ná ná Mawu Mavɔmavɔ ɔ́, jinukún yɔ̌yɔ́ e ɖo gotín nu lɛ́ɛ wɛ mi ná mɛ bó ná glín. Có bó ná zé yi ɔ́, mi ná kɔn ami d'é jí, bó ná zé zǎlínkpɔ́n gɔ́ ná. Nǔníná jinukún tɔn ɖokpó wɛ é ná nyí. Vɔ̌sánú-xwlémawutɔ́ ɔ́ ná dó jinukún e è glǐn ɔ́ ɖě zo kpó zǎlínkpɔ́n ɔ́ bǐ kpó, bɔ é ná nyí flǐnnú ɖé nú Mawu Mavɔmavɔ. Nǔníná e è nɔ dó zo ɖo Mawu Mavɔmavɔ nukɔn ɔ́ ɖokpó wɛ é nyí.” Mawu Mavɔmavɔ ɖɔ: “Ényí mɛ ɖé jló ná sá kɔnɖókpɔ́ vɔ́ ɔ́, ényí nyibúsú abǐ asi wɛ é jló ná zé dó sá vɔ̌ ɔ́ ná ɔ́, kanlin e ma ɖó blɔ̌ ɖěbǔ ǎ ɔ́ wɛ é ná zé dó sá ɖo Mawu Mavɔmavɔ nukɔn. Mɛ ɔ́ ná sɔ́ alɔ ɖó kanlin ɔ́ ta, bó ná gbo gbe e ɖo goxɔ e mɛ Mawu Mavɔmavɔ nɔ kpé togun tɔn ɖe ɔ́ sín alihɛ́nnu, bɔ Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ lɛ̌ dó. Kanlin e è dǒ sá kɔnɖókpɔ́ vɔ́ ɔ́, nǔ e è nǎ ɖe ɖ'é wú nú Mawu Mavɔmavɔ, bó ná dó zo ɖo nukɔn tɔn ɔ́ ɖíe: jǒ e lɛ́ dó xomɛnú lɛ́ɛ kpó éé ɖo xomɛnú lɛ́ɛ wú é kpó. Ayi we lɛ́ɛ, kpó jǒ e lɛ́ dó ayi lɛ́ɛ kpó, kpó jǒ e ɖo ajaja mɛ é kpó, kpódó alǐnnuvínu ɔ́ kpó, bɔ è nǎ ɖe kpó ayi we lɛ́ɛ kpó ɖó kpɔ́. Vɔ̌sánú-xwlémawutɔ́ lɛ́ɛ ná dó nǔ énɛ́ lɛ́ɛ bǐ zo ɖo vɔ̌sákpe ɔ́ jí, ɖo vɔ̌ zǎnzǎn tɔn e ɖo jiji wɛ ɔ́ jí. Vɔ̌ ɖé wɛ, bɔ wǎn tɔn nɔ yi Mawu Mavɔmavɔ gɔ́n, bó nɔ́ nyɔ́ se n'i. “Nú é ká nyí mɛɖé wɛ jló ná zé gbɔ̌ asú abǐ asi dó sá kɔnɖókpɔ́ vɔ́ ná ɔ́, kanlin e ma ɖó blɔ̌ ɖěbǔ ǎ é wɛ mɛ ɔ́ ná zé dó sá. Ényí lɛ̌ngbɔ́ wɛ é ná dó sá vɔ̌ ɔ́ ná ɔ́, ní zé wá Mawu Mavɔmavɔ nukɔn. É ná sɔ́ alɔ ɖó lɛ̌ngbɔ́ ɔ́ ta, bó ná gbo gbe e ɖo goxɔ ɔ́ nukɔn, bɔ vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ dó. Kanlin e é dó sá kɔnɖókpɔ́ vɔ́ ɔ́, nǔ e é ná ɖe ɖ'é wú nú Mawu Mavɔmavɔ, bó ná dó zo ɖo nukɔn tɔn ɔ́ ɖíe: sí ɔ́ kpó jǒ e ɖ'é wú ɔ́ kpó, bɔ è nǎ sɛ́n sín nɛgbé xú ɔ́ wú, jǒ e ɖo xomɛnú lɛ́ɛ wú é bǐ. Ayi we lɛ́ɛ kpó jǒ e ɖo yě wú lɛ́ɛ kpó, kpó jǒ e gbɔn ajaja mɛ lɛ́ɛ kpó, kpódó alǐnnuvínu ɔ́ kpó, bɔ é ná ɖe kpó ayi we lɛ́ɛ kpó ɖó kpɔ́. Vɔ̌sánú-xwlémawutɔ́ ɔ́ ná dó nǔ énɛ́ lɛ́ɛ bǐ zo ɖo vɔ̌sákpe ɔ́ jí. Nǔɖuɖu ɖé wɛ, bɔ è nɔ dó zo nú Mawu Mavɔmavɔ. “Nú é ká nyí gbɔ̌ wɛ mɛ ɔ́ ná dó sá vɔ̌ ɔ́, é ná zé wá Mawu Mavɔmavɔ nukɔn. É ná sɔ́ alɔ ɖó kanlin ɔ́ ta, bó ná gbo gbe e ɖo goxɔ ɔ́ nukɔn. Bɔ vɔ̌sánú-xwlémawutɔ́ lɛ́ɛ ná mi hun tɔn gbɔn vɔ̌sákpe ɔ́ wú lɛ́ dó. É ná ɖe nǔ élɔ́ lɛ́ɛ ɖo kanlin ɔ́ wú nú Mawu Mavɔmavɔ, bó dó zo ɖo nukɔn tɔn: jǒ e ɖo xomɛnú lɛ́ɛ wú é bǐ. Ayi we lɛ́ɛ kpó jǒ e ɖo yě wú lɛ́ɛ kpó, kpó jǒ e ɖo ajaja mɛ lɛ́ɛ kpó, kpódó alǐnnuvínu ɔ́ kpó, bɔ é ná ɖe kpó ayi we lɛ́ɛ kpó ɖó kpɔ́. Vɔ̌sánú-xwlémawutɔ́ ɔ́ ná dó nǔ énɛ́ lɛ́ɛ bǐ zo ɖo vɔ̌sákpe ɔ́ jí. Nǔɖuɖu ɖé wɛ, bɔ è nɔ dó zo nú Mawu Mavɔmavɔ, bɔ wǎn tɔn nɔ nyɔ́ se n'i. “Jǒ ɔ́ bǐ wɛ nyí Mawu Mavɔmavɔ tɔn. Sɛ́n ɖé wɛ é nyí nú kúnkan mitɔn lɛ́ɛ káká sɔ́yi, gbɔn fí e mi ná nɔ lɛ́ɛ bǐ: mi ná ɖu jǒ ǎ, mi ná ɖu hun ǎ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Ényí mɛɖé má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě, bó dó hu hwɛ ɔ́, nǔ e è nǎ wa ɔ́ ɖíe: “Ényí vɔ̌sánú-xwlémawutɔ́ ɖaxó ɔ́ wɛ hu hwɛ, bɔ é sín éyɛ́ wú, bɔ togun ɔ́ bǐ nyí nǔwanyidotɔ́ ɔ́, é ní zé nyibúsú wínnyáwínnyá e má ɖó blɔ̌ ɖěbǔ ǎ é ɖokpó dó sá vɔ̌ ná nú Mawu Mavɔmavɔ, bónú Mawu Mavɔmavɔ ná sɔ́ hwɛ e é hu lɛ́ɛ kɛ ɛ. É ná zé nyibúsú ɔ́ wá goxɔ e mɛ Mawu Mavɔmavɔ nɔ́ kpé togun tɔn ɖe ɔ́ sín alihɛ́nnu, ɖo Mawu Mavɔmavɔ nukɔn. É ná sɔ́ alɔ ɖó kanlin ɔ́ ta, bó ná gbo gbe e ɖo Mawu Mavɔmavɔ nukɔn. Bó ná yí kanlin ɔ́ sín hun ɔ́ ɖě, bó ná zé wá goxɔ ɔ́ mɛ. É ná zé alɔví dó hun ɔ́ mɛ, bó ná mi azɔn tɛ́nwe dó tɛn mímɛ́ bǐ ɔ́ sín xɔmɛgbovɔ ɔ́ wú, ɖo Mawu Mavɔmavɔ nukɔn. É ná sá hun ɔ́ dó vɔ̌sákpe e jí è nɔ dó zǎlínkpɔ́n zo ɖe, bɔ é ɖo Mawu Mavɔmavɔ nukɔn, ɖo goxɔ ɔ́ mɛ fínɛ́ ɔ́ sín zo lɛ́ɛ wú. Énɛ́ ɔ́ gúdo ɔ́, é ná tɔ́n, bó ná kɔn nyibúsú ɔ́ sín hun e kpo ɔ́ bǐ nyi vɔ̌sákpe e jí è nɔ dó vɔ̌ lɛ́ɛ zo ɖe, bɔ é ɖo goxɔ ɔ́ sín alihɛ́nnu ɔ́ sín dodó wú. É ná ɖe nyibúsú e é dó ɖo hwɛsɔ́kɛmɛvɔ́ sá ná wɛ ɔ́ sín jǒ ɔ́ bǐ: jǒ e ɖo xomɛnú lɛ́ɛ wú é bǐ. Ayi we lɛ́ɛ kpó jǒ e ɖo yě wú lɛ́ɛ kpó, kpódó jǒ e gbɔn ajaja mɛ é bǐ kpó alǐnnuvínu ɔ́ kpó, bɔ é ná ɖe kpó ayi lɛ́ɛ kpó ɖó kpɔ́. Vɔ̌sánú-xwlémawutɔ́ ɔ́ ná ɖe nǔ énɛ́ lɛ́ɛ ɖo kanlin ɔ́ wú, lě e è ko nɔ bló gbɔn ɖo nyibúsú e è dǒ sá kɔnɖókpɔ́ vɔ́ ná ɔ́ wú gbɔn é, bó ná dó zo ɖo vɔ̌sákpe e jí è nɔ dó vɔ̌ zo ɖe é jí. Lo ɔ́, nyibúsú ɔ́ sín anyǔ ɔ́ kpó lan tɔn bǐ kpó, kpó ta tɔn kpó, kpó afɔ tɔn lɛ́ɛ kpó, xomɛnú tɔn lɛ́ɛ kpódó mǐ tɔn lɛ́ɛ kpó ɔ́, nyibúsú ɔ́ sín nǔ e kpo lɛ́ɛ ɔ́, é ná ɖe sín fí e yě ɖó gɔnu ɖó ɔ́, bó ná zé yi tɛn mímɛ́ e mɛ è nɔ kɔn afín nyi é, bó ná dó zo ɖo nakí myɔ jí. Fínɛ́ wɛ é ná dó zo ɖe.” Mawu Mavɔmavɔ ɖɔ: “Ényí Izlayɛ́li togun ɔ́ bǐ wɛ má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě ɔ́, hwɛ wɛ yě hu; yě tunwun bo bló ǎ, có hwɛ wɛ é nyí bɔ yě hu. Hwenu e è nǎ wá mɔ nǔ jɛ wú ɖɔ togun ɔ́ hu hwɛ ɔ́, agun ɔ́ ná ná nyibúsú wínnyáwínnyá ɖokpó, bɔ è nǎ dó sá hwɛsɔ́kɛmɛvɔ́ ná; è nǎ zé nyibúsú ɔ́ wá goxɔ e mɛ Mawu nɔ́ kpé yě ɖe ɔ́ sín alihɛ́nnu. Tomɛxó Izlayɛ́li tɔn lɛ́ɛ ná zé alɔ yětɔn ɖó nyibúsú ɔ́ ta, bɔ è nǎ gbo gbe e ɖo Mawu Mavɔmavɔ nukɔn. Vɔ̌sánú-xwlémawutɔ́ ɖaxó ɔ́ ná hɛn nyibúsú ɔ́ sín hun ɖě wá goxɔ ɔ́ mɛ. É ná sɔ́ alɔví tɔn dó hun ɔ́ mɛ, bó ná mi azɔn tɛ́nwe dó xɔmɛgbovɔ ɔ́ wú, ɖo Mawu Mavɔmavɔ nukɔn. É ná sá hun ɔ́ ɖě dó vɔ̌sákpe e ɖo Mawu Mavɔmavɔ nukɔn, ɖo goxɔ ɔ́ mɛ fínɛ́ ɔ́ sín zo lɛ́ɛ wú. Énɛ́ ɔ́ gúdo ɔ́, é ná tɔ́n, bó ná kɔn hun e kpo ɔ́ bǐ nyi vɔ̌sákpe e jí è nɔ dó vɔ lɛ́ɛ zo ɖe, bɔ é ɖo goxɔ ɔ́ nukɔn ɔ́ sín dodó wú. É ná ɖe nyibúsú ɔ́ sín jǒ lɛ́ɛ bǐ, bó ná dó zo ɖo vɔ̌sákpe ɔ́ jí. Lě e é ná wa nyibúsú e é sɔ́ dó sá hwɛsɔ́kɛmɛvɔ́ nú é ɖésúnɔ ɔ́ sín nǔ gbɔn ɔ́ wɛ é ná wa nyibúsú énɛ́ sín nǔ gbɔn. Nú é bló lě e è nɔ bló gbɔn bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ nú yě ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e yě hu lɛ́ɛ kɛ yě. Énɛ́ ɔ́ gúdo ɔ́, é ná ɖe nyibúsú ɔ́ sín fí e yě ɖǒ gɔnu ɖó ɔ́, bó ná dó zo lě e é dó nyibúsú e é dó sá hwɛsɔ́kɛmɛvɔ́ nú é ɖésúnɔ ɔ́ zo gbɔn ɔ́. Hwɛsɔ́kɛmɛ vɔ́ e è nǎ nɔ́ sá dó togun ɔ́ tamɛ é wɛ.” Mawu Mavɔmavɔ ɖɔ: “Ényí togun ɔ́ sín gǎn lɛ́ɛ ɖě má tunwun ǎ, bó gba sɛ́n e Mawu Mavɔmavɔ, Mawu tɔn dó lɛ́ɛ ɖě, bó dó hu hwɛ ɔ́, nú é wá mɔ nǔ jɛ hwɛ e é hu ɔ́ wú ɔ́, é ná zé gbɔ̌sú e má ɖó blɔ̌ ɖěbǔ ǎ é dó sá vɔ̌ ná. É ná sɔ́ alɔ ɖó kanlin ɔ́ ta, bó ná gbo gbe e ɖo fí e è nɔ gbo gbe kanlin e è nɔ dó sá vɔ̌ e è nɔ dó zo lɛ́ɛ ɖe é, ɖo Mawu Mavɔmavɔ nukɔn, bónú Mawu Mavɔmavɔ ná sɔ́ hwɛ e é hu ɔ́ kɛ ɛ. Vɔ̌sánú-xwlémawutɔ́ ɔ́ ná sɔ́ alɔví tɔn dó kanlin ɔ́ sín hun mɛ, bó ná sá ɖě dó vɔ̌sákpe e jí è nɔ dó vɔ̌ lɛ́ɛ zo ɖe ɔ́ sín zo lɛ́ɛ wú, bó ná kɔn hun e kpo ɔ́ nyi vɔ̌sákpe ɔ́ sín dodó wú. É ná dó kanlin jó ɔ́ bǐ zo ɖo vɔ̌sákpe ɔ́ jí, lě e è nɔ dó kanlin e è nɔ dó sá kɔnɖókpɔ́ vɔ́ ná ɔ́ sín jǒ zo gbɔn é. Nú vɔ̌sánú-xwlémawutɔ́ ɔ́ bló lě e è nɔ bló gbɔn bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ.” Mawu Mavɔmavɔ ɖɔ: “Ényí toví ɖé má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě, bó dó hu hwɛ ɔ́, nú é wá mɔ nǔ jɛ hwɛ e é hu ɔ́ wú ɔ́, é ná ná gbɔ̌ asi e ma ɖó blɔ̌ ɖěbǔ ǎ é ɖokpó, bó ná dó sá vɔ̌ ná dó hwɛ e é hu ɔ́ tamɛ. É ná sɔ́ alɔ ɖó kanlin ɔ́ ta, bó ná gbo gbe e ɖo fí e è nɔ gbo gbe kanlin e è nɔ dó sá vɔ̌ e è nɔ dó zo lɛ́ɛ ɖe é. Vɔ̌sánú-xwlémawutɔ́ ɔ́ ná zé alɔví tɔn dó kanlin ɔ́ sín hun mɛ, bó ná sá dó vɔ̌sákpe e jí è nɔ dó vɔ̌ lɛ́ɛ zo ɖe ɔ́ sín zo lɛ́ɛ wú, bó ná kɔn hun e kpo ɔ́ bǐ nyi vɔ̌sákpe ɔ́ sín dodó wú. Vɔ̌sánú-xwlémawutɔ́ ɔ́ ná ɖe kanlin ɔ́ sín jǒ lɛ́ɛ bǐ, lě e è nɔ ɖe kanlin e è dǒ sá kɔnɖókpɔ́ vɔ́ lɛ́ɛ sín jǒ gbɔn é, bó ná dó zo ɖo vɔ̌sákpe ɔ́ jí, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i. Nú vɔ̌sánú-xwlémawutɔ́ ɔ́ bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ. “Nú é ká nyí lɛ̌ngbɔ́ ná dó sá hwɛsɔ́kɛmɛvɔ́ ɔ́ ná wɛ é ɖe hǔn, é ní nyí lɛ̌ngbɔ́ asi e ma ɖó blɔ̌ ɖěbǔ ǎ é. É ná sɔ́ alɔ ɖó kanlin ɔ́ ta, bó ná gbo gbe e, ɖo fí e è nɔ gbo gbe kanlin e è nɔ dó sá vɔ̌ e è nɔ dó zo lɛ́ɛ ɖe é. Vɔ̌sánú-xwlémawutɔ́ ɔ́ ná zé alɔví tɔn dó kanlin ɔ́ sín hun mɛ, bó ná sá dó vɔ̌sákpe e jí è nɔ dó vɔ̌ lɛ́ɛ zo ɖe ɔ́ sín zo lɛ́ɛ wú, bó ná kɔn hun e kpo ɔ́ bǐ nyi vɔ̌sákpe ɔ́ sín dodó wú. É ná ɖe kanlin ɔ́ sín jǒ lɛ́ɛ bǐ lě e è nɔ ɖe kanlin e è nɔ dó sá kɔnɖókpɔ́ vɔ́ ná ɔ́ sín jǒ gbɔn é, bó ná dó zo ɖo vɔ̌sákpe ɔ́ jí, ɖo vɔ̌ ɖě lɛ́ɛ e dó zo wɛ è ɖe lɛ́ɛ jí, bɔ é ná nyí vɔ̌ e è nɔ dó zo ɖo Mawu Mavɔmavɔ nukɔn é. Nú vɔ̌sánú-xwlémawutɔ́ ɔ́ bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ.” Mawu Mavɔmavɔ ɖɔ: “Ényí nǔɖé jɛ bɔ mɛɖé ɖo tɛn tɔn mɛ, abǐ é se, bónú hwɛɖɔtɔ́ lɛ́ɛ ylɔ́ mɛ ɔ́ ɖɔ é ní wá ɖɔ lě e nǔ ɔ́ jɛ gbɔn ɔ́, bónú é má ɖɔ nǔ e é mɔ ɔ́, abǐ nǔ e é se ɔ́ ǎ ɔ́, hwɛ wɛ é hu, bɔ é ji nǔɖé ɔ́, é ná kpan. “Kpɔ́ndéwú ɖěvo: Ényí mɛɖé ɖó alɔ nǔ blíblí ɖěbǔ wú: kanlin blíblí ɖé sín kúkú wú, é sixú nyí gběkanlin, abǐ xwé gbe kanlin, abǐ nǔvínúví ɖěbǔ wú ɔ́, é húzú mɛ blíblí; é ná bó má tunwun ǎ bó ɖó alɔ wú ɔ́, mɛ blíblí wɛ é húzú, bɔ é ji nǔɖé ɔ́, é ná kpan. “Kpɔ́ndéwú ɖěvo: Ényí mɛɖé ɖó alɔ mɛ e ɖu su alɔkpa ɖěbǔ ɔ́ wú ɔ́, mɛ ɔ́ má tunwun tɛn tɔn mɛ ǎ, bó ka wá tunwun hweɖénu ɔ́, é ji nǔɖé ɔ́, é ná kpan. “Kpɔ́ndéwú ɖěvo: Ényí mɛɖé ɖo alisá ɖó wɛ, bó xwlé nǔ ɖɔ émí ná wa nǔ ɖagbe abǐ nǔ nyanya ɔ́, nú é ná bó má tunwun cóbó ɖɔ ǎ, bó ká wá tunwun hweɖénu ɔ́, é ji nǔɖé ɔ́, é ná kpan. “Hǔn mɛ e ná jɛ sɛ́n mɛ ɖo nǔ énɛ́ lɛ́ɛ ɖě sín alixo ɔ́, mɛ ɔ́ ɖó ná ɖɔ hwɛ e é hu ɔ́. Énɛ́ ɔ́ gúdo ɔ́, é ná zé lɛ̌ngbɔ́ asi ɖokpó, abǐ gbɔ̌ asi ɖokpó dó sá hwɛsɔ́kɛmɛvɔ́ ná nú Mawu Mavɔmavɔ, bɔ é ná nyí hwɛ e é hu ɔ́ sín vɔ̌. Énɛ́ ɔ́, vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ súnsún hwɛ sín kɔ nú mɛ ɔ́ n'i.” Mawu Mavɔmavɔ ɖɔ: “Ényí mɛɖé má ɖó akwɛ́ e é ná dó xɔ gbɔ̌ ná ɔ́ ǎ ɔ́, é ná zé xwelé we abǐ ahwannɛ́ wínnyáwínnyá we dó sá vɔ̌ ná nú Mawu Mavɔmavɔ, bɔ é ná nyí hwɛ e é hu ɔ́ sín vɔ̌. É ná zé ɖokpó dó sá hwɛsɔ́kɛmɛvɔ́, bó ná zé wegɔ́ ɔ́ dó sá vɔ̌ e è nɔ dó zo ɔ́. É ná bɛ́ xɛ we lɛ́ɛ wá nú vɔ̌sánú-xwlémawutɔ́ ɔ́, bɔ é ná to xwlé éé ná sá hwɛsɔ́kɛmɛvɔ́ ná wɛ è ɖe ɔ́ Mawu Mavɔmavɔ hwɛ̌. Vɔ̌sánú-xwlémawutɔ́ ɔ́ ná zé fɛn dó hun ahɔn xɛ ɔ́. É ká ná ɖe ta ɔ́ sín kɔ ɔ́ nu ǎ. É ná mi xɛ ɔ́ sín hun ɖě ɖó vɔ̌sákpe ɔ́ wú ɖo akpá ɖokpó, bó ná fyɔ́n xɛ ɔ́ bɔ hun e kpo ɔ́ ná kun dó vɔ̌sákpe ɔ́ sín dodó wú: hwɛsɔ́kɛmɛvɔ́ wɛ. É ná zé xɛ wegɔ́ ɔ́ dó sá vɔ̌ e è nɔ dó zo ɔ́ ná lě e é jɛ xá gbɔn é. Lě e vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá hwɛsɔ́kɛmɛvɔ́ ɔ́ gbɔn nú nya énɛ́ ɔ́, bɔ Mawu Mavɔmavɔ ná súnsún hwɛ e é hu ɔ́ nɛ́. “Ényí mɛ ɔ́ má ká lɛ́ ɖó akwɛ́ e é ná dó xɔ xwelé we lɛ́ɛ, abǐ ahwannɛ́ wínnyáwínnyá we lɛ́ɛ ná ǎ ɔ́, é ná hɛn linfín kilóo ɛnɛ wá ɖó hwɛ e é hu ɔ́ wú, bɔ é ná nyí nǔníná hwɛsɔ́kɛmɛ tɔn. É ná zé ami d'é jí ǎ, é ká ná zé zǎlínkpɔ́n d'é jí ǎ, ɖó nǔníná hwɛsɔ́kɛmɛ tɔn wɛ. É ná zé linfín ɔ́ wá nú vɔ̌sánú-xwlémawutɔ́ ɔ́, bɔ é ná wún alɔgogo ɖokpó, bɔ é ná nyí flǐnnú ɖé nú Mawu Mavɔmavɔ, bɔ vɔ̌sánú-xwlémawutɔ́ ɔ́ ná dó zo ɖo vɔ̌sákpe ɔ́ jí ɖo vɔ̌ ɖě lɛ́ɛ e dó zo wɛ è ɖe lɛ́ɛ jí: hwɛ e é hu ɔ́ sín vɔ̌ wɛ. Nú vɔ̌sánú-xwlémawutɔ́ ɔ́ bló lě e è nɔ bló gbɔn, bó nɔ́ xwlé vɔ̌sánú mì ɔ́, bó sá vɔ̌ e nɔ́ súnsún hwɛ sín kɔ nú mɛ ɔ́ gbɔn mɔ̌ ɔ́, Mawu Mavɔmavɔ ná sɔ́ hwɛ e é hu lɛ́ɛ kɛ ɛ. “Ée kpo ɔ́ ná nyí vɔ̌sánú-xwlémawutɔ́ ɔ́ tɔn, nǔníná jinukún tɔn lɛ́ɛ ɖɔhun.” Mawu Mavɔmavɔ ɖɔ nú Mɔyízi ɖɔ: “Ényí mɛɖé má tunwun ǎ, bó hu hwɛ ɖaxó ɖé, ɖó é ɖe nǔ ɖo nǔ e è sɔ́ ɖó vo nú Mawu Mavɔmavɔ lɛ́ɛ ɔ́ mɛ ɔ́, nǔ e mɛ ɔ́ ɖó ná wa ɔ́ ɖíe: é ná kpɔ́n kanlin tɔn lɛ́ɛ mɛ, bó ná zé agbo e ma ɖó blɔ̌ ɖěbǔ ǎ é ɖokpó wá, bó ná dó sá hwɛxɔ́súsú vɔ́ ɔ́ ná nú Mawu Mavɔmavɔ. Agbo ɔ́ ɖó ná xɔ kpatágan nabí ɖé, bɔ kpatágan ɔ́ sín kpinkpɛn ɖó ná sɔgbe xá kpatágan e è nɔ zán ɖo sinsɛnxɔ mɛ ɔ́. Mɛ ɔ́ ná ná agbo kɛ́ɖɛ́ ǎ; é ná sú nǔ e é ɖe ɖo nǔ e é sɔ́ ɖó vo nú Mawu Mavɔmavɔ lɛ́ɛ mɛ ɔ́ sín axɔ́, bó ná lɛ́ sú atɔ́ɔ́nvlɔ́ɖó tɔn d'é jí, bó ná zé nú vɔ̌sánú-xwlémawutɔ́ ɔ́, bɔ é ná zé agbo e é ná nú hwɛxɔ́súsú vɔ́ ɔ́, bó ná bló lě e è nɔ bló gbɔn dó xwlé vɔ̌sánú mì ɔ́ dó sá hwɛsɔ́kɛmɛvɔ́ ná dó ta tɔn mɛ, bɔ Mawu Mavɔmavɔ ná súnsún hwɛ tɔn lɛ́ɛ. “Ényí mɛɖé má tunwun ǎ, bó gba sɛ́n e Mawu Mavɔmavɔ dó lɛ́ɛ ɖě, bó dó hu hwɛ ɔ́, mɛ ɔ́ ná húzú nǔwanyidotɔ́, bɔ nǔ e é wa nyi do ɔ́ sín agban ná nɔ kɔ n'i. É ná zé agbo e ma ɖó blɔ̌ ɖěbǔ ǎ, bɔ è nɔ dó sá hwɛxɔ́súsú vɔ́ ná ɔ́ ɖokpó wá nú vɔ̌sánú-xwlémawutɔ́ ɔ́. Agbo ɔ́ ɖó ná xɔ akwɛ́ nabí e è ɖɔ é. Vɔ̌sánú-xwlémawutɔ́ ɔ́ ná bló lě e è nɔ bló gbɔn bó nɔ́ xwlé vɔ̌sánú mì ɔ́ dó sá hwɛxɔ́súsú vɔ́ ná dó ta tɔn mɛ, bɔ Mawu Mavɔmavɔ ná sɔ́ nǔ e é má tunwun ǎ bó wa ɔ́ kɛ ɛ. Hwɛxɔ́súsú vɔ́ wɛ. Nǔ wɛ nya énɛ́ ɔ́ wa nyi do nú Mawu Mavɔmavɔ nǔgbó.” Mawu Mavɔmavɔ ɖɔ nú Mɔyízi ɖɔ: “Mǐ ní ɖɔ mɛɖé hu hwɛ ɖaxó ɖé dó Mawu Mavɔmavɔ: é ɖó adingban nú nɔzo tɔn, ɖó nǔ e è zě ɖó gɔ̌n tɔn ɔ́ wú, abǐ ɖó nǔ e è hwě n'i ɔ́ wú, abǐ ɖó nǔ e é fin ɔ́ wú, abǐ ɖó nǔ e é hízí, abǐ é mɔ nǔɖé sɔ́ bó mɔ́, abǐ é wa nǔ alɔkpa mɔ̌hunkɔtɔn ɖěvo bó mɔ́, bó xwlé nǔ d'é jí; mɛ e wa nǔ gbɔn mɔ̌ ɔ́, hwɛ wɛ é hu, bɔ hwɛ tɔn ɖo kɔ n'i. Énɛ́ ɔ́ wú ɔ́, mɛ ɔ́ ɖó ná zé nǔ e é fin ɔ́, abǐ nǔ e é hízí ɔ́, abǐ nǔ e è zě ɖó gɔ̌n tɔn ɔ́, abǐ nǔ e é mɔ sɔ́ ɔ́ jó. É ná zé nǔ e wú é ɖe kúnnu agɔ bó xwlé nǔ d'é jí ɔ́ jó. É ná zé jó kpowun bɔ xó fó wɛ ǎ; é ná lɛ́ zé akwɛ́ e nǔ ɔ́ xɔ ɔ́ sín mǎ ɖó atɔ́ɔ́n d'é jí, bó ná zé nú mɛ e tɔn wɛ ɔ́, ɖo gbe e gbe è nǎ mɔ nǔ jɛ wú ɖɔ hwɛ ɖo kɔ n'i é. É ná kpɔ́n kanlin tɔn lɛ́ɛ mɛ, bó ná zé agbo e ma ɖó blɔ̌ ɖěbǔ ǎ, bɔ è nɔ́ dó sá hwɛxɔ́súsú vɔ́ ɔ́ wá nú vɔ̌sánú-xwlémawutɔ́ ɔ́, bɔ é ná dó sá hwɛxɔ́súsú vɔ́ ɔ́ ná nú hwɛ e é hu lɛ́ɛ. Agbo ɔ́ ɖó ná xɔ akwɛ́ nabí e è ɖɔ é. Bɔ vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú mì ɔ́ dó sá vɔ̌ e nɔ́ súnsún hwɛ sín kɔ nú mɛ ɔ́ dó ta tɔn mɛ, ɖo Mawu Mavɔmavɔ nukɔn, bɔ Mawu Mavɔmavɔ ná sɔ́ hwɛ tɔn kɛ ɛ. É ná bó nyí nǔ ɖěbǔ wɛ é wa nyi do ɔ́, Mawu Mavɔmavɔ ná sɔ́ kɛ ɛ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn kpó vǐ tɔn súnnu lɛ́ɛ kpó ɖɔ: “Sɛ́n e ɖɔ xó dó vɔ̌ e è nɔ dó zo ɔ́ wú ɔ́ ɖíe: Vɔ̌ e è nɔ dó zo ɔ́ ná nɔ vɔ̌sákpe e jí è nɔ dó vɔ̌ zo ɖe ɔ́ jí zǎn mɛ, káká bɔ ayǐ ná hɔ́n, bɔ myɔ ɔ́ ɖó ná ɖo jiji wɛ ɖo vɔ̌sákpe ɔ́ jí. Vɔ̌sánú-xwlémawutɔ́ ɔ́ ná dó awu tɔn gaga ɔ́, bó ná dó gbagwé; lɛ̌ɛnkanvɔ wɛ è dǒ tɔ awu ɔ́. Myɔ e mɛ è dǒ vɔ̌ ɔ́ zo ɖe, ɖo vɔ̌sákpe ɔ́ jí ɔ́, é ná bɛ́ afín tɔn, bó ná kɔn ɖó vɔ̌sákpe ɔ́ kpá. Énɛ́ ɔ́ gúdo ɔ́, é ná ɖe awu tɔn lɛ́ɛ, bó ná dó ɖěvo lɛ́ɛ, bó ná ɖe afín ɔ́ sín fí e yě ɖó gɔnu ɖó é, bó sɔ́ ɖó tɛn mímɛ́ ɖé mɛ. Myɔ ɔ́ ná ɖo jiji wɛ ɖo vɔ̌sákpe ɔ́ jí; é ɖó ná cí ǎ. Zǎnzǎn tɛgbɛ lɛ́ɛ bǐ ɔ́, vɔ̌sánú-xwlémawutɔ́ ɔ́ ná nɔ́ to nakí d'é mɛ, bó ná nɔ́ to vɔ̌ e è nɔ dó zo lɛ́ɛ d'é jí, lobo ná dó kanlin e è dǒ sá kɔnɖókpɔ́ vɔ́ lɛ́ɛ sín jǒ lɛ́ɛ zo. Myɔ ná ɖo jiji wɛ hwebǐnu ɖo vɔ̌sákpe ɔ́ jí; é ɖó ná cí gbeɖé ǎ.” Mawu Mavɔmavɔ ɖɔ: “Sɛ́n e ɖɔ xó dó nǔníná jinukún tɔn lɛ́ɛ wú ɔ́ ɖíe: Aalɔ́ɔn sín vǐ súnnu lɛ́ɛ ná nɔ́ zé nǔníná jinukún tɔn lɛ́ɛ wá nú Mawu Mavɔmavɔ ɖo vɔ̌sákpe ɔ́ nukɔn. Vɔ̌sánú-xwlémawutɔ́ ɔ́ ná wún nǔníná ɔ́ sín linfín alɔgogo ɖokpó, bɔ è nǎ kó zé ami dó nya linfín ɔ́, bó ná zé zǎlínkpɔ́n e ɖo nǔníná ɔ́ jí é bǐ, bó ná dó bǐ zo ɖo vɔ̌sákpe ɔ́ jí, bɔ é ná nyí vɔ̌ wǎnɖagbenɔ e nyí flǐnnú nú Mawu Mavɔmavɔ é. Aalɔ́ɔn kpó vǐ tɔn súnnu lɛ́ɛ kpó ná ɖu nǔníná e ná kpo ɔ́. Yě ná dǒ tɔ́n mɛ có bó ɖu ǎ. Yě ná ɖu ɖo goxɔ ɔ́ sín kɔ́xota; ɖó tɛn mímɛ́ wɛ. Hǔn è nǎ dǒ tɔ́n mɛ có bó ɖa ǎ. Kanta e un ná yě ɖo nǔ e è nǎ mì bɔ è dǒ zo ɔ́ mɛ ɔ́ nɛ́. Nǔ mímɛ́ titewungbe ɖokpó wɛ nǔ énɛ́ ɔ́ nyí hwɛsɔ́kɛmɛvɔ́ abǐ hwɛxɔ́súsú vɔ́ ɖɔhun. Aalɔ́ɔn ví súnnu lɛ́ɛ kɛ́ɖɛ́ wɛ ná ɖu, ɖó nǔníná énɛ́ ɔ́ e kpo ɔ́ wɛ nyí yětɔn káká sɔ́yi. Énɛ́ ɔ́ wú ɔ́, mɛ ɖěvo ɖěbǔ ɖ'alɔ wú ɔ́, mɛ ɔ́ ná húzú mɛ mímɛ́.” Mawu Mavɔmavɔ ɖɔ nú Mɔyízi ɖɔ: “Bɛ́ sín gbe e gbe è nǎ kɔn ami dó ta nú Aalɔ́ɔn kpó vǐ tɔn súnnu lɛ́ɛ kpó ɔ́, nǔníná jinukún tɔn sín linfín kilóo atɔn wɛ yě ná nɔ dó sá vɔ̌ ná gbe ɖokpó; yě ná nɔ́ zán linfín ɔ́ vlɔ̌ zǎnzǎn, vlɔ̌ gbadanu. Ami wɛ è nǎ dǒ nya linfín ɔ́ ná, bó dó ɖa wɔ̌xúxú tɔn ɖo nǔɖazɛ́n wɛnjɛ mɛ, bó ná hɛn wá. A nǎ fɛ́n wínníwínní, cóbó zé wá xwlé Mawu Mavɔmavɔ, bɔ é ná nyí nǔníná e sín wǎn nɔ́ nyɔ́ se n'i é. “Aalɔ́ɔn ví súnnu e è nǎ kɔn ami dó ta ná, bɔ é ná nɔ tɛn tɔn mɛ ɔ́, ná nɔ́ sá vɔ̌ énɛ́. Sɛ́n tɛgbɛ tɔn ɖé wɛ é nyí. Vɔ̌ ɔ́ blěbǔ tɔn wɛ è nǎ dó zo ɖo Mawu Mavɔmavɔ nukɔn. Hǔn, vɔ̌sánú-xwlémawutɔ́ sá nǔníná jinukún tɔn vɔ́ ɖěbǔ dó é ɖésúnɔ tamɛ ɔ́, blěbǔ tɔn wɛ è nǎ dó zo; è nǎ ɖu ɖěbǔ ǎ.” Mawu Mavɔmavɔ ɖɔ nú Mɔyízi ɖɔ, ní ɖɔ nú Aalɔ́ɔn kpó vǐ tɔn súnnu lɛ́ɛ kpó ɖɔ: “Sɛ́n e ɖɔ xó dó hwɛsɔ́kɛmɛvɔ́ wú ɔ́ ɖíe: fí e è nɔ gbo gbe kanlin e è nǎ dó sá vɔ̌ e è nɔ dó zo ɔ́ ɖe ɔ́, wɛ è nǎ gbo gbe kanlin e è nǎ dó sá hwɛsɔ́kɛmɛvɔ́ ɔ́ ɖe, ɖo Mawu Mavɔmavɔ nukɔn: nǔ mímɛ́ titewungbe ɖokpó wɛ é nyí. Vɔ̌sánú-xwlémawutɔ́ e ná xwlé kanlin e è dǒ sá hwɛsɔ́kɛmɛvɔ́ ɔ́ ná ɔ́ ná ɖu lan tɔn. É ná ɖu ɖo goxɔ ɔ́ sín kɔ́xota, ɖó tɛn mímɛ́ wɛ. Nǔ ɖěbǔ yagba kanlin ɔ́ sín lan wú ɔ́, é ná húzú nǔ mímɛ́. Ényí kanlin ɔ́ sín hun kɔn nyi awu ɖé mɛ ɔ́, tɛn mímɛ́ mɛ wɛ è nǎ gbo fí e hun ɔ́ kɔn nyi ɔ́ nya ɖe. È nǎ gba kozɛ́n e mɛ è ɖa kanlin ɔ́ ɖe ɔ́. É ká nyí ganvɔzɛ́n mɛ wɛ è ɖa ɖe ɔ́, è nǎ sɔn ganjí, bó klɔ́ ganjí. Mɛ e nyí súnnu ɖo hɛ̌nnu e nɔ wa vɔ̌sánú-xwlémawutɔ́ zɔ́ lɛ́ɛ mɛ lɛ́ɛ kɛ́ɖɛ́ wɛ ná ɖu kanlin ɔ́ sín lan. Nǔ mímɛ́ titewungbe ɖokpó wɛ é nyí. Amɔ̌, kanlin e è nǎ dó sá hwɛsɔ́kɛmɛvɔ́ ná, bó ná hɛn hun tɔn wá goxɔ ɔ́ mɛ, bó ná dó súnsún hwɛ sín kɔ nú mɛ ɖo tɛn mímɛ́ ɔ́ mɛ ɔ́, è nǎ ɖu lan tɔn ɖěbǔ ǎ; zo wɛ è nǎ dó, bɔ é ná fyɔ́ bǐ.” Mawu Mavɔmavɔ ɖɔ: “Sɛ́n e ɖɔ xó dó hwɛxɔ́súsú vɔ́ wú ɔ́ ɖíe: nǔ mímɛ́ titewungbe ɖokpó wɛ é nyí. Fí e è nɔ gbo gbe kanlin e è nɔ dó sá vɔ̌ e è nɔ dó zo ɔ́ ɖe ɔ́ wɛ è nǎ gbo gbe kanlin e è nɔ dó sá hwɛxɔ́súsú vɔ́ ná ɔ́ ɖe. È nǎ mi hun tɔn gbɔn vɔ̌sákpe ɔ́ wú lɛ́ lɛ̌ dó. Nǔ e è nǎ ɖe ɖo kanlin ɔ́ wú bó xwlé Mawu Mavɔmavɔ ɔ́ lɛ́ɛ ɖíe: sí ɔ́ kpó jǒ e ɖ'é wú ɔ́ kpó; jǒ e ɖo xomɛnú lɛ́ɛ wú é bǐ. Ayi we lɛ́ɛ kpó jǒ e ɖo yě wú lɛ́ɛ kpó, kpó jǒ e gbɔn ajaja mɛ é bǐ kpó, kpó alǐnnuvínu ɔ́ kpó, bɔ è nǎ ɖe kpó ayi we lɛ́ɛ kpó ɖó kpɔ́. Énɛ́ ɔ́, vɔ̌sánú-xwlémawutɔ́ ɔ́ ná fyɔ́ nǔ énɛ́ lɛ́ɛ bǐ ɖo vɔ̌sákpe ɔ́ jí, bɔ é ná nyí vɔ̌ e è nɔ dó zo nú Mawu Mavɔmavɔ é. Hwɛxɔ́súsú vɔ́ wɛ. Mɛ e nyí súnnu ɖo hɛ̌nnu e nɔ wa vɔ̌sánú-xwlémawutɔ́ sín azɔ̌ lɛ́ɛ mɛ lɛ́ɛ kɛ́ɖɛ́ wɛ ná ɖu kanlin ɔ́ sín lan. Tɛn mímɛ́ ɖé mɛ wɛ yě ná ɖu ɖe; nǔ mímɛ́ titewungbe ɖokpó wɛ é nyí. Lě e è nǎ sá hwɛxɔ́súsú vɔ́ ɔ́ gbɔn ɔ́ ɖokpó ɔ́ jɛ́n è nǎ sá hwɛsɔ́kɛmɛvɔ́ ɔ́ lɔ gbɔn: sɛ́n ɖokpó ɔ́ wɛ ɖɔ xó dó vɔ̌sísá we énɛ́ lɛ́ɛ wú; kanlin e è dǒ sá vɔ̌ ɔ́ ná ɔ́, ná nyí vɔ̌sánú-xwlémawutɔ́ e nɔ hwɛsɔ́kɛmɛvɔ́ ɔ́ nu, bó sá ɔ́ tɔn.” Mawu Mavɔmavɔ ɖɔ: “Ényí mɛɖé hɛn kanlin e è nǎ dó sá vɔ̌ e è nɔ dó zo ɔ́ wá nú Mawu Mavɔmavɔ ɔ́, vɔ̌sánú-xwlémawutɔ́ e ná xwlé vɔ̌ ɔ́ Mawu Mavɔmavɔ ɔ́ tɔn wɛ kanlin ɔ́ sín anyǔ ná nyí. Nǔníná jinukún tɔn ɖěbǔ e è nǎ ɖa ɖo myɔkpó mɛ, ɖo ganzɛ́n mɛ, abǐ ganzɛ́n wɛnjɛ mɛ ɔ́, ná nyí vɔ̌sánú-xwlémawutɔ́ e xwlé vɔ̌ ɔ́ Mawu Mavɔmavɔ ɔ́ tɔn. Nǔníná jinukún tɔn ɖěbǔ e è nǎ zé ami dó nya, abǐ éé è ma zé ami dó nya ǎ ɔ́, ná nyí Aalɔ́ɔn sín vǐ súnnu lɛ́ɛ bǐ tɔn, bɔ yě ná yí ɖó zɛ̌nzɛ̌n.” Mawu Mavɔmavɔ ɖɔ: “Kɔnɖókpɔ́ vɔ́ e è nǎ nɔ́ xwlé Mawu Mavɔmavɔ ɔ́, sɛ́n e ɖɔ xó d'é wú ɔ́ ɖíe: Nú mɛ ɖé ná sá kɔnɖókpɔ́ vɔ́, bó ná dó kpa susu nú Mawu Mavɔmavɔ ɔ́, mɛ ɔ́ ná hɛn wɔ̌xúxú e mɛ è ma dó tɔ́n ǎ, bɔ è zě ami dó nya é, acɔnmɔ e mɛ è ma dó tɔ́n ǎ, bɔ è sá ami dó é, kpódó wɔ̌xúxú e è sɔ́ ami dó nya linfín ná ganjí bó ɖa ɔ́ kpó gɔ́ nú kanlin e ná dó sá kɔnɖókpɔ́ vɔ́ ɔ́ ná wɛ è ɖe é. É ná ná wɔ̌xúxú e mɛ tɔ́n ɖe ɔ́ gɔ́ nú nǔɖuɖu e é hɛn wá, bɔ tɔ́n ma ɖ'é mɛ ǎ é; é ná bló mɔ̌ dó kpa susu nú Mawu Mavɔmavɔ. Nǔ énɛ́ lɛ́ɛ e é ná ɔ́, è nǎ ɖe ɖokpó ɖokpó, bó ná xwlé Mawu Mavɔmavɔ, bɔ é ná nyí vɔ̌sánú-xwlémawutɔ́ e mi kanlin e è dǒ sá kɔnɖókpɔ́ vɔ́ sín hun gbɔn vɔ̌sákpe ɔ́ wú é tɔn. Kanlin e è nǎ dó sá kɔnɖókpɔ́ vɔ́ ná dó kpa susu nú Mawu Mavɔmavɔ gbɔn mɔ̌ ɔ́, è nǎ ɖu lan tɔn bǐ gbe e gbe è sá vɔ̌ ɔ́ é; ayǐ ná hɔ́n dó ɖěbǔ ǎ. “Nú é ka nyí ɖɔ mɛɖé wɛ jló bó sá kɔnɖókpɔ́ vɔ́ ɔ́, abǐ é sá bó ná dó ɖe akpá e é dó ɔ́ ná ɔ́, è nǎ ɖu kanlin e è dǒ sá vɔ̌ ɔ́ ná ɔ́ sín lan gbe e gbe é sá vɔ̌ ɔ́ é. Ényí è ɖu bɔ é kpo ɔ́, è nǎ ɖu éé kpo ɔ́ ayǐhɔ́ngbe. Ényí è ɖu kanlin ɔ́ sín lan e kpo ɔ́ ayǐhɔ́ngbe, bónú é lɛ́ kpo jɛ azǎn atɔngɔ́ ɔ́ gbe ɔ́, è nǎ dó zo. Ényí kanlin e è dǒ sá vɔ̌ ná ɔ́ kpo jɛ azǎn tɔn atɔngɔ́ ɔ́ gbe, bɔ mɛɖé ɖu ɔ́, Mawu Mavɔmavɔ ná yí vɔ̌ tɔn ǎ; vɔ̌ énɛ́ e è sá dó ta tɔn mɛ ɔ́ húzú suɖunú. Mɛ ɖěbǔ ɖu azǎn tɔn atɔngbe tɔn ɔ́, hwɛ tɔn ná nɔ kɔ n'i. È ɖǒ ná ɖu lan e wú nǔblíblí ɖé ná jɛ é ǎ; zo wɛ è nǎ dó. “Mǐmɛ́ jí wɛ è nǎ ɖe, bó ná sixú ɖu kanlin e è nǎ dó sá vɔ̌ ná ɔ́ sín lan. Amɔ̌, mɛ e ma ná ɖo mǐmɛ́ jí ǎ, bó ná ɖu kanlin e è dǒ sá kɔnɖókpɔ́ vɔ́ ná nú Mawu Mavɔmavɔ ɔ́ sín lan ɔ́, è nǎ ɖe mɛ ɔ́ sín togun Izlayɛ́li tɔn mɛ. Mɔ̌ ɖokpó ɔ́, mɛ e ná ɖó alɔ nǔblíblí ɖé wú: gbɛtɔ́ wɛ a, kanlin wɛ a, abǐ nǔ ɖěbǔ e nyí nǔblíblí é wú, bó ná ɖu kanlin e è dǒ sá kɔnɖókpɔ́ vɔ́ ná nú Mawu Mavɔmavɔ ɔ́ sín lan ɔ́, è nǎ ɖe mɛ énɛ́ sín togun Izlayɛ́li tɔn mɛ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Mi ma ɖu nyibú sín jǒ ó. Mi ma ɖu gbɔ̌ abǐ lɛ̌ngbɔ́ sín jǒ ó. Mi ma ɖu kanlin e kú é, abǐ kanlin e gběkanlin wlí ɖu é sín jǒ ó; mi sixú zé dó bló nǔ alɔkpa bǐ ná; amɔ̌, mi ma ɖu ó. Hǔn nú mɛɖé ɖu kanlin e è xwlé Mawu Mavɔmavɔ dó sá vɔ̌ e è nɔ dó zo ɔ́ sín jǒ ɔ́, è nǎ ɖe mɛ énɛ́ sín togun Izlayɛ́li tɔn mɛ. Mɔ̌ ɖokpó ɔ́, mi ɖó ná ɖu xɛ abǐ kanlin sín hun ɖo fí ɖěbǔ e mi ná ɖe é ǎ. Mɛ e ná ɖu kanlin alɔkpa ɖěbǔ sín hun ɔ́, è nǎ ɖe mɛ énɛ́ sín togun Izlayɛ́li tɔn mɛ.” Mawu Mavɔmavɔ ɖɔ nú Mɔyízi ɖɔ, ní ɖɔ nú Izlayɛ́li ví lɛ́ɛ ɖɔ: “Nú mɛɖé xwlé kɔnɖókpɔ́ vɔ́ Mawu Mavɔmavɔ hǔn, mɛ ɔ́ ní hɛn akpáxwé e nyí Mawu Mavɔmavɔ tɔn ɔ́ wá. Mɛ ɔ́ ɖésú wɛ ná hɛn nǔ e è ɖe ɖó vo nú Mawu Mavɔmavɔ, bó ná dó zo ɔ́ wá; hǔn é ná hɛn kanlin ɔ́ sín jǒ kpó akɔ́n tɔn kpó wá, lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ wɛ è nǎ bló ɖo Mawu Mavɔmavɔ nukɔn. Vɔ̌sánú-xwlémawutɔ́ ɔ́ ná dó jǒ ɔ́ zo ɖo vɔ̌sákpe ɔ́ jí, bɔ akɔ́n ɔ́ ná nyí Aalɔ́ɔn kpó vǐ tɔn súnnu lɛ́ɛ kpó tɔn. Ényí mi sá kɔnɖókpɔ́ vɔ́ mɔ̌ ɔ́, mi ná ná kanlin e è dǒ sá vɔ̌ ɔ́ ná ɔ́ sín asá ɖisí ɔ́ vɔ̌sánú-xwlémawutɔ́ ɔ́. Vɔ̌sánú-xwlémawutɔ́ e ná xwlé kanlin e è dǒ sá kɔnɖókpɔ́ vɔ́ ná ɔ́ sín hun kpó jǒ kpó Mawu Mavɔmavɔ ɔ́ sín kanta wɛ asá énɛ́ nyí. Đó kɔnɖókpɔ́ vɔ́ e Izlayɛ́li ví lɛ́ɛ ná nɔ́ xwlé mì lɛ́ɛ ɔ́, un ná nɔ́ ɖe kanlin e yě dǒ sá vɔ̌ ná ɔ́ sín akɔ́n kpó asá ɔ́ kpó, bó ná vɔ̌sánú-xwlémawutɔ́ Aalɔ́ɔn kpódó vǐ tɔn súnnu lɛ́ɛ kpó, bɔ é nyí sɛ́n tɛgbɛ tɔn ɖé bɔ Izlayɛ́li ví lɛ́ɛ ná nɔ́ nyi.” Ée ná nyí Aalɔ́ɔn kpó vǐ tɔn súnnu lɛ́ɛ kpó sín kanta ɖo vɔ̌sánú e è nǎ dó zo ɖo Mawu Mavɔmavɔ nukɔn lɛ́ɛ mɛ é nɛ́, bɛ́ sín gbe e gbe è nǎ kɔn ami dó ta nú yě bɔ yě ná bɛ́ vɔ̌sánú-xwlémawutɔ́ sín azɔ̌ é. Nǔ e Mawu Mavɔmavɔ ná gbe Izlayɛ́li ví lɛ́ɛ ɖɔ è ní ná yě bɛ́ sín gbe e gbe è kɔn ami dó ta nú yě ɔ́ nɛ́. Sɛ́n ɖé wɛ é nyí, bó ná nɔ ayǐ káká sɔ́yi nú vǐ yětɔn lɛ́ɛ. Sɛ́n e ɖɔ xó dó vɔ̌ e è nɔ dó zo ɔ́ wú, bó ɖɔ xó dó nǔníná jinukún tɔn wú, bó ɖɔ dó hwɛsɔ́kɛmɛvɔ́ wú, bó ɖɔ dó hwɛxɔ́súsú vɔ́ wú, bó ɖɔ dó ami ɖó ta nú mɛ wú, lobo ɖɔ dó kɔnɖókpɔ́ vɔ́ wú ɔ́ nɛ́. Mawu Mavɔmavɔ wɛ ná sɛ́n énɛ́ ɔ́ Mɔyízi ɖo Sinayíi só jí, ɖo gbětótló mɛ gbe e gbe é ná gbe Izlayɛ́li ví lɛ́ɛ ɖɔ yě ní xwlé vɔ̌sánú yětɔn lɛ́ɛ émí é. Mawu Mavɔmavɔ ɖɔ nú Mɔyízi ɖɔ: “Kplá Aalɔ́ɔn kpó vǐ tɔn súnnu lɛ́ɛ kpó, bó hɛn awu lɛ́ɛ, ami e è nɔ ɖó ta nú mɛ é, nyibúsú e è nǎ dǒ sá hwɛsɔ́kɛmɛvɔ́ ná é, agbo we lɛ́ɛ, kpódó xasun e mɛ è bɛ̌ wɔ̌xúxú e mɛ è ma dó tɔ́n ǎ é kpó dó é. Kplé togun Izlayɛ́li tɔn ɔ́ bǐ ɖó goxɔ e mɛ un nɔ kpé mi ɖe é nukɔn.” Mɔyízi bló nǔ e Mawu Mavɔmavɔ zɔ́n ɛ é, bɔ togun ɔ́ bǐ kplé ɖó goxɔ ɔ́ nukɔn. Ée togun ɔ́ kplé ɔ́, Mɔyízi ɖɔ nú yě ɖɔ: “Nǔ e Mawu Mavɔmavɔ zɔ́n mì ɔ́ wa gbé un ja.” Ée Mɔyízi ɖɔ mɔ̌ ɔ́, é ylɔ́ Aalɔ́ɔn kpó vǐ tɔn súnnu lɛ́ɛ kpó, bɔ yě sɛkpɔ́ ɛ, bɔ é slá wǔ nú yě. É zé awu ɖaxó ɔ́ dó nú Aalɔ́ɔn, bó sin gǒjíblánú n'i; é dó dowu gaga ɔ́ n'i, bó sɔ́ efódu dó n'i d'é jí, lobo sin kan tɔn lɛ́ɛ dó nɛgbé. É sɔ́ akɔ́ntakpo ɔ́ dó kɔ n'i, bó sɔ́ Wulímu kpó Tumímu kpó dó akɔ́ntakpo ɔ́ mɛ. É sɔ́ tablá ɖó ta n'i, bó sɔ́ sikágan gbajagbaja e ɖe xlɛ́ ɖɔ è ɖe Aalɔ́ɔn ɖó vo nú Mawu Mavɔmavɔ ɔ́ ɖó tablá ɔ́ wú, ɖo nukɔn lě e Mawu Mavɔmavɔ ɖɔ gbɔn é. Énɛ́ ɔ́ gúdo ɔ́, Mɔyízi zé ami mímɛ́ ɔ́ bó dó ɖe goxɔ ɔ́ kpódó nǔ e ɖ'é mɛ lɛ́ɛ bǐ kpó ɖó vo. É wá mi ami ɔ́ dó vɔ̌sákpe ɔ́ wú azɔn tɛ́nwe, bó sá ɖě dó vɔ̌sákpe ɔ́ wú, bó sá dó nǔ e è nɔ zán ɖ'é jí lɛ́ɛ wú, bó sá dó basya ɔ́ kpódó nǔ e jí è sɔ́ basya ɔ́ ɖó ɔ́ kpó wú, bó dó ɖe yě ɖó vo. É kɔn ami mímɛ́ ɔ́ dó Aalɔ́ɔn ta, bó dó ɖe e ɖó vo. Mɔyízi ylɔ́ Aalɔ́ɔn ví súnnu lɛ́ɛ, bɔ yě sɛkpɔ́ ɛ; é dó awu gaga ɔ́ nú yě, bó sin gǒjíblánú nú yě, bó xwe vɔ̌sánú-xwlémawutɔ́ gbákún nú yě, lě e Mawu Mavɔmavɔ ko ɖɔ gbɔn é. Énɛ́ ɔ́ gúdo ɔ́, Mɔyízi dɔn nyibúsú e è nǎ dó sá hwɛsɔ́kɛmɛvɔ́ ná ɔ́ wá, bɔ Aalɔ́ɔn kpó vǐ tɔn súnnu lɛ́ɛ kpó fɔ alɔ ɖó nyibúsú ɔ́ ta. Mɔyízi gbo gbe nyibúsú ɔ́, bó yí hun tɔn bó sɔ́ alɔví tɔn d'é mɛ, bó sá dó vɔ̌sákpe ɔ́ sín zo lɛ́ɛ wú lɛ́ lɛ̌ dó, bó dó slá wǔ nú vɔ̌sákpe ɔ́. É kɔn hun e kpo ɔ́ nyi vɔ̌sákpe ɔ́ sín dodó wú; lě e é slá wǔ nú vɔ̌sákpe ɔ́, bó ɖe ɖó vo bɔ è nǎ nɔ́ sá vɔ̌ e nɔ súnsún hwɛ sín kɔ nú mɛ ɔ́ ɖ'é jí gbɔn ɔ́ nɛ́. É ɖe jǒ e ɖo xomɛnú lɛ́ɛ wú ɔ́ bǐ, kpó alǐnnuvínu ɔ́ kpó, kpó ayi we lɛ́ɛ kpó, kpó jǒ e ɖo ayi lɛ́ɛ wú é kpó, bó dó zo ɖo vɔ̌sákpe ɔ́ jí. Lo ɔ́, é bɛ́ nyibúsú ɔ́ sín lan, anyǔ tɔn kpó mǐ tɔn kpó, bó ɖe sín fí e yě ɖó gɔnu ɖó ɔ́, bó dó zo lě e Mawu Mavɔmavɔ ɖɔ gbɔn nú Mɔyízi é. Énɛ́ ɔ́ gúdo ɔ́, Mɔyízi dɔn agbo e è nǎ dó sá vɔ̌ e è nɔ dó zo ɔ́ wá, bɔ Aalɔ́ɔn kpó vǐ tɔn súnnu lɛ́ɛ kpó fɔ alɔ ɖó agbo ɔ́ ta. É gbo gbe agbo ɔ́, bó mi hun tɔn gbɔn vɔ̌sákpe ɔ́ wú lɛ́ lɛ̌ dó. Énɛ́ gúdo ɔ́, é já agbo ɔ́, bó ná dó ta tɔn kpó lan e é já ɔ́ kpó, kpó jǒ ɔ́ kpó zo. Xomɛnú lɛ́ɛ kpó afɔ lɛ́ɛ kpó ɔ́, é klɔ́ yě, bó dó yě kpó ɖě lɛ́ɛ bǐ kpó zo ɖo vɔ̌sákpe ɔ́ jí: vɔ̌ e è nɔ dó zo ɔ́ wɛ; vɔ̌ e è nɔ fyɔ́ ɔ́ bǐ nú Mawu Mavɔmavɔ, bɔ wǎn tɔn nɔ́ yi gɔ̌n tɔn, bó nɔ́ nyɔ́ se n'i ɔ́ wɛ. Énɛ́ ɔ́, é bló lě e Mawu Mavɔmavɔ ko ɖɔ gbɔn n'i é. Mɔyízi dɔn agbo wegɔ́ ɔ́ wá, agbo e è nǎ dó sá vɔ̌ ná, bɔ é ná nyí wuntun e ɖe xlɛ́ ɖɔ Aalɔ́ɔn kpó vǐ tɔn súnnu lɛ́ɛ kpó bɛ́ azɔ̌ é. Énɛ́ ɔ́, Aalɔ́ɔn kpó vǐ tɔn súnnu lɛ́ɛ kpó fɔ alɔ ɖó agbo ɔ́ ta. Bɔ Mɔyízi gbo gbe agbo ɔ́, bó yí hun tɔn ɖě bó sá dó Aalɔ́ɔn sín tó ɖisíxwé tɔn ɔ́ sín nuvínu, bó sá dó alɔ tɔn ɖisí ɔ́ sín alɔsú wú, bó sá dó afɔ tɔn ɖisí ɔ́ sín afɔsú wú. Énɛ́ ɔ́ gúdo ɔ́, é ylɔ́ Aalɔ́ɔn ví súnnu lɛ́ɛ, bɔ yě sɛkpɔ́ ɛ, bɔ é sá hun ɔ́ ɖě dó tó yětɔn ɖisíxwé tɔn ɔ́ sín nuvínu, bó sá dó alɔ yětɔn ɖisí ɔ́ sín alɔsú wú, bó sá dó afɔ yětɔn ɖisí ɔ́ sín afɔsú wú, lobo mi hun e kpo ɔ́ gbɔn vɔ̌sákpe ɔ́ wú lɛ́ dó. É zé jǒ ɔ́, sí ɔ́, kpó jǒ e ɖ'é wú ɔ́ kpó, jǒ e ɖo xomɛnú lɛ́ɛ wú ɔ́ bǐ, alǐnnuvínu ɔ́, ayi we lɛ́ɛ, kpó jǒ e ɖo ayi lɛ́ɛ wú ɔ́ kpó, kpódó asá ɖisíxwé tɔn ɔ́ kpó. É zé atá e mɛ tɔ́n má ɖe ǎ é ɖokpó, kpó amitá ɖokpó kpó, kpódó acɔnmɔ ɖokpó kpó ɖo xasun e mɛ wɔ̌xúxú e mɛ è ma dó tɔ́n ǎ é ɖe, bɔ è sɔ́ ɖó Mawu Mavɔmavɔ nukɔn ɔ́ mɛ. É bɛ́ nǔ énɛ́ lɛ́ɛ ɖó jǒ ɔ́ kpó asá ɔ́ kpó jí. Mɔyízi bɛ́ nǔ énɛ́ lɛ́ɛ bǐ dó alɔ mɛ nú Aalɔ́ɔn kpó vǐ tɔn súnnu lɛ́ɛ kpó, bó ɖɔ nú yě ɖɔ yě ní bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ. Énɛ́ ɔ́ gúdo ɔ́, Mɔyízi fɔ nǔ lɛ́ɛ sín alɔ yětɔn mɛ, bó dó zo ɖo vɔ̌sákpe ɔ́ jí, ɖo vɔ̌ zǎnzǎn tɔn e ɖo jiji wɛ ɔ́ jí. Vɔ̌ e nɔ́ ɖe xlɛ́ ɖɔ vɔ̌sánú-xwlémawutɔ́ lɛ́ɛ bɛ́ azɔ̌ ɔ́, lě e è sá gbɔn ɔ́ nɛ́. Vɔ̌ e è nɔ dó zo ɔ́ wɛ; vɔ̌ e è nɔ fyɔ́ bǐ nú Mawu Mavɔmavɔ, bɔ wǎn tɔn nɔ́ yi gɔ̌n tɔn, bó nɔ́ nyɔ́ se n'i ɔ́ wɛ. Mɔyízi zé agbo e è dǒ sá vɔ̌ ɔ́ ná ɔ́ sín akɔ́n, bó bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ: éé nyí kanta Mɔyízi tɔn ɔ́ nɛ́, lě e Mawu Mavɔmavɔ ko ɖɔ n'i gbɔn é. Mɔyízi wún ami mímɛ́ ɔ́ kpódó hun e ɖo vɔ̌sákpe ɔ́ jí é kpɛɖé kpó, bó mi dó Aalɔ́ɔn kpó awu tɔn lɛ́ɛ kpó wú, bó mi dó vǐ tɔn súnnu lɛ́ɛ kpó awu yětɔn lɛ́ɛ kpó wú, bó dó ɖe yě kpó awu yětɔn lɛ́ɛ kpó ɖó vo nú Mawu Mavɔmavɔ. É ɖɔ nú Aalɔ́ɔn kpó vǐ tɔn súnnu lɛ́ɛ kpó ɖɔ: “Mi ɖa kanlin ɔ́ sín lan ɖo goxɔ ɔ́ nukɔn; fínɛ́ wɛ mi ná ɖu lan tɔn ɖe kpó wɔ̌xúxú e è dǒ sá vɔ̌ ɔ́ ná lɛ́ɛ kpó, lě e Mawu Mavɔmavɔ ko ɖɔ gbɔn é. Mi ná dó lan e ná kpo ɔ́ kpódó wɔ̌xúxú e ná kpo ɔ́ kpó zo. Mi ná nɔ goxɔ ɔ́ nukɔn xɔ azǎn tɛ́nwe. Mi ná nɔ fínɛ́ káká bɔ azǎn nabí e è nǎ dó bló nǔwiwa e è nǎ dó sɔ́ azɔ̌ dó así nú mi ɔ́ ná sɔgbe é; ɖó azǎn tɛ́nwe wɛ è nǎ sɔ́ ɖó te dó sɔ́ azɔ̌ dó así nú mi. Nǔ e è blǒ égbé din ɔ́, Mawu Mavɔmavɔ wɛ ná gbe ɖɔ è nǐ bló, bónú é ná súnsún hwɛ e mi hu lɛ́ɛ. Hǔn mi ná nɔ goxɔ ɔ́ nukɔn xɔ azǎn tɛ́nwe; mi ná nɔ fínɛ́ zǎn kpó kéze kpó, bó ná bló nǔ e Mawu Mavɔmavɔ ɖɔ è nǐ bló lɛ́ɛ, bó má wá kú ó; ɖó nǔ e Mawu Mavɔmavɔ ɖɔ nú mì ɔ́ nɛ́.” Aalɔ́ɔn kpó vǐ tɔn súnnu lɛ́ɛ kpó bló nǔ e Mawu Mavɔmavɔ ɖɔ gbɔn Mɔyízi jí lɛ́ɛ bǐ. Azǎn tántɔngɔ́ ɔ́ gbe ɔ́, Mɔyízi ylɔ́ Aalɔ́ɔn kpó vǐ tɔn súnnu lɛ́ɛ kpó, kpódó tomɛxó Izlayɛ́li tɔn lɛ́ɛ kpó, bó ɖɔ nú Aalɔ́ɔn ɖɔ: “Zě nyibúví ɖokpó nú è nǎ dó sá hwɛsɔ́kɛmɛvɔ́ ná, bó zé agbo ɖokpó nú è nǎ dó sá vɔ̌ e è nɔ dó zo ɔ́ ná. Blɔ̌ ɖěbǔ ní má ɖo kanlin we lɛ́ɛ ɖě wú ó. Sɔ́ yě xwlé Mawu Mavɔmavɔ. A nǎ ɖɔ nú Izlayɛ́li ví lɛ́ɛ ɖɔ yě ní zé gbǎgbá ɖokpó, nú è nǎ dó sá hwɛsɔ́kɛmɛvɔ́ ná, bó sɔ́ nyibúví e ɖó xwe ɖokpó ɔ́ ɖokpó, bó zé lɛ̌ngbɔ́ e ɖó xwe ɖokpó ɔ́ ɖokpó dó sá vɔ̌ e è nɔ dó zo ɔ́ ná. Kanlin we lɛ́ɛ ɖě ná ɖó blɔ̌ ɖo wǔ ǎ. Yě ní zé nyibúsú ɖokpó, kpó agbo ɖokpó kpó, nú è nǎ sɔ́ yě dó sá kɔnɖókpɔ́ vɔ́ ná, bó ná xwlé Mawu Mavɔmavɔ; yě ní sɔ́ nǔníná linfín tɔn e è nǎ zé ami dó nya ɔ́ gɔ́ ná. Yě ná bló mɔ̌, ɖó Mawu Mavɔmavɔ ná tɔ́n dó yě jí égbé.” Izlayɛ́li ví lɛ́ɛ bǐ hɛn nǔ e Mɔyízi xa lɛ́ɛ wá goxɔ ɔ́ nukɔn nǔgbó, bɔ agun ɔ́ bǐ sɛ wá, bó wá nɔ te Mawu Mavɔmavɔ nukɔn. Bɔ Mɔyízi ɖɔ nú Aalɔ́ɔn ɖɔ: “Nǔ e Mawu Mavɔmavɔ zɔ́n mi lɛ́ɛ nɛ́; mi bló bónú Mawu Mavɔmavɔ ná ɖe éɖée xlɛ́ mi ɖo susu tɔn mɛ.” Mɔyízi lɛ́ ɖɔ nú Aalɔ́ɔn ɖɔ: “Sɛkpɔ́ vɔ̌sákpe ɔ́; blǒ lě e è nɔ bló gbɔn, bó nɔ́ xwlé vɔ̌sánú mì ɔ́, bó sá hwɛsɔ́kɛmɛvɔ́, bó sá vɔ̌ e è nɔ dó zo é, bó dó súnsún hwi kpó togun ɔ́ kpó sín hwɛ. Sá vɔ̌ togun ɔ́ tɔn lɔ, bó dó súnsún hwɛ sín kɔ n'i lě e Mawu Mavɔmavɔ zɔ́n gbɔn é.” Aalɔ́ɔn sɛkpɔ́ vɔ̌sákpe ɔ́, bó gbo gbe nyibúví ɔ́ dó hwɛ é ɖésúnɔ tɔn tamɛ, Vǐ tɔn súnnu lɛ́ɛ sɔ́ kanlin ɔ́ sín hun n'i, bɔ é sɔ́ alɔví tɔn dó hun ɔ́ mɛ, bó sá dó vɔ̌sákpe ɔ́ sín zo lɛ́ɛ wú, bó kɔn éé kpo ɔ́ kɔn nyi vɔ̌sákpe ɔ́ sín dodó wú. É dó kanlin e è dǒ sá hwɛsɔ́kɛmɛvɔ́ ná ɔ́ sín jǒ kpó ayi lɛ́ɛ kpó, kpó alǐnnuvínu ɔ́ kpó zo, lě e Mawu Mavɔmavɔ ɖɔ gbɔn nú Mɔyízi é. Lo ɔ́, é ɖe kanlin ɔ́ sín lan kpó anyǔ tɔn kpó sín fí e yě ɖǒ gɔnu ɖó ɔ́, bó dó zo. É gbo gbe kanlin e è nǎ dó sá vɔ̌ e è nɔ dó zo ɔ́ ná é. Vǐ tɔn súnnu lɛ́ɛ sɔ́ hun ɔ́ n'i, bɔ é kɔn nyi vɔ̌sákpe ɔ́ wú lɛ́ dó. È jǎ kanlin ɔ́ sín lan bɔ vǐ tɔn lɛ́ɛ bɛ́, bó zé ta tɔn d'é jí, bó sɔ́ wá n'i, bɔ é dó zo ɖo vɔ̌sákpe ɔ́ jí. É klɔ́ xomɛnú lɛ́ɛ kpó afɔ lɛ́ɛ kpó bó dó zo ɖo vɔ̌sákpe ɔ́ jí, ɖo vɔ̌ zǎnzǎn tɔn e ɖo jiji wɛ ɔ́ jí. Énɛ́ ɔ́ gúdo ɔ́, Aalɔ́ɔn xwlé vɔ̌ e togun ɔ́ hɛn wá ɔ́ Mawu Mavɔmavɔ. É gbo gbe gbǎgbá ɔ́ dó hwɛ e togun ɔ́ hu é tamɛ, bó dó sá hwɛsɔ́kɛmɛvɔ́ lě e é bló nyibúví ɔ́ tɔn gbɔn é. É lɛ́ sá vɔ̌ e è nɔ dó zo ɔ́ ɖěvo, lě e sɛ́n ɔ́ zɔ́n gbɔn é: É zé nǔníná jinukún tɔn ɔ́, bó wún alɔgogo ɖokpó, bó dó zo ɖo vɔ̌sákpe ɔ́ jí gɔ́ nú vɔ̌ zǎnzǎn tɔn e nɔ́ ɖo jiji wɛ é. Énɛ́ ɔ́ gúdo ɔ́, é gbo gbe nyibúsú kpó agbo kpó e togun ɔ́ hɛn wá é, bó dó sá kɔnɖókpɔ́ vɔ́ ná. Aalɔ́ɔn sín vǐ súnnu lɛ́ɛ sɔ́ kanlin ɔ́ sín hun n'i, bɔ é mi gbɔn vɔ̌sákpe ɔ́ wú lɛ́ dó. Yě zě nyibúsú ɔ́ sin jǒ lɛ́ɛ, bó zé agbo ɔ́ sín sí kpó jǒ e ɖ'é wú ɔ́ kpó, jǒ e ɖo xomɛnú lɛ́ɛ wú é, ayi lɛ́ɛ kpódó alǐnnuvínu ɔ́ kpó, bó bɛ́ n'i. Yě zé jǒ lɛ́ɛ ɖó akɔ́n lɛ́ɛ jí, bɔ é bɛ́ jǒ lɛ́ɛ, bó dó zo ɖo vɔ̌sákpe ɔ́ jí. Aalɔ́ɔn zé kanlin lɛ́ɛ sín akɔ́n lɛ́ɛ kpó asá ɖisíxwé tɔn lɛ́ɛ kpó, bó bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ. Ée Aalɔ́ɔn sá hwɛsɔ́kɛmɛvɔ́ lɛ́ɛ, vɔ̌ e è nɔ dó zo lɛ́ɛ kpó kɔnɖókpɔ́ vɔ́ lɛ́ɛ kpó mɔ̌ ɔ́, é dlɛ́n alɔ tɔn dó togun ɔ́ jí, bó xo ɖɛ dó jǐ tɔn, bó jɛ te. Bɔ Mɔyízi kpó Aalɔ́ɔn kpó byɔ́ goxɔ ɔ́ mɛ. Ée yě wá tɔ́n ɔ́, yě xo ɖɛ dó togun ɔ́ jí. Énɛ́ ɔ́, susu Mawu Mavɔmavɔ tɔn ɖe éɖée xlɛ́ togun Izlayɛ́li tɔn ɔ́ bǐ. Myɔ ɖé tɔ́n ɖo Mawu Mavɔmavɔ nukɔn, bó fyɔ́ vɔ̌ e è nɔ dó zo ɔ́ kpó jǒ lɛ́ɛ kpó ɖo vɔ̌sákpe ɔ́ jí. Togun ɔ́ bǐ wɛ mɔ, bɔ yě kpa awǒbóbó, bó xwe agbɔ̌nnusú do. Aalɔ́ɔn ví súnnu we, Nadavu kpó Avihu kpó zé zǎlínkpɔ́nfyɔ́nú ɖokpó ɖokpó, bó bɛ́ myɔkán d'é mɛ, bó zé zǎlínkpɔ́n ɖ'é jí. Yě hɛn myɔ yi Mawu Mavɔmavɔ nukɔn; Mawu Mavɔmavɔ ka ɖɔ gbɔn mɔ̌ nú yě ǎ. Énɛ́ ɔ́, myɔ tɔ́n ɖo Mawu Mavɔmavɔ nukɔn, bó fyɔ́ yě, bɔ yě bǐ kú ɖo Mawu Mavɔmavɔ nukɔn. Énɛ́ ɔ́, Mɔyízi ɖɔ nú Aalɔ́ɔn ɖɔ: “Nǔ e Mawu Mavɔmavɔ kó ɖɔ ɖ'ayǐ gbɔn xógbe élɔ́ lɛ́ɛ jí ɔ́ nɛ́. É ɖɔ: ‘Un jló ɖɔ mɛ e nɔ wa azɔ̌ nú mì lɛ́ɛ ní nɔ́ ɖó sísí nú mǐmɛ́ e un nyí ɔ́; énɛ́ ɔ́, togun ɔ́ bǐ ná nɔ́ kpa susu nú mì.’ ” Aalɔ́ɔn ka kɛ nu ǎ. Mɔyízi ylɔ́ Micaɛ́li kpó Ɛlisafáni kpó, bó ɖɔ nú yě ɖɔ: “Mi sɛ wá fí! Mi zé nɔví mitɔn lɛ́ɛ sín cyɔ sín goxɔ ɔ́ nukɔn. Mi ɖe cyɔ yětɔn sín fí e mǐ ɖó gɔnu ɖó ɔ́!” Micaɛ́li kpó Ɛlisafáni kpó ɔ́, Wuziyɛ́li ví wɛ yě nyǐ; Wuziyɛ́li ka nyí Aalɔ́ɔn sín tɔ́ nɔví súnnu. Énɛ́ ɔ́, yě sɛ wá, bó bɛ́ cyɔ lɛ́ɛ síin, lě e Mɔyízi ko ɖɔ gbɔn é. Mɛ e kú lɛ́ɛ ká ɖo azɔ̌wu yětɔn mɛ. Énɛ́ ɔ́ gúdo ɔ́, Mɔyízi ɖɔ nú Aalɔ́ɔn kpó vǐ súnnu tɔn Eleazáa kpó Itamáa kpó ɖɔ: “Mi ma jó ɖa mitɔn dó nyi kannyaa ó, mi ma vún awu mitɔn lɛ́ɛ ó. É má nyí mɔ̌ ǎ ɔ́, mi táá kú, Mawu Mavɔmavɔ táá wá sin xomɛ dó togun ɔ́ bǐ. Mi jó Izlayɛ́li ví nɔví súnnu mitɔn lɛ́ɛ bǐ dó nú yě ní ví mɛ e Mawu Mavɔmavɔ zé myɔ dó hu lɛ́ɛ. Mi lɔmɔ̌ ɖó ná gosín goxɔ ɔ́ nukɔn ǎ, é má nyí mɔ̌ ǎ ɔ́, mi táá kú; ɖó è ko kɔn ami dó ta nú mi, bɔ mi ná wa azɔ̌ nú Mawu Mavɔmavɔ.” Énɛ́ ɔ́, Aalɔ́ɔn kpó vǐ tɔn súnnu lɛ́ɛ kpó bló nǔ e Mɔyízi ɖɔ é. Mawu Mavɔmavɔ ɖɔ nú Aalɔ́ɔn ɖɔ: “Hwi kpó vǐ towe súnnu lɛ́ɛ kpó ɔ́, nú mi ná yi Mawu Mavɔmavɔ xwé gbe hǔn, mi ma nu vɛ̌ɛn ó, mi ma nu ahan syɛ́nsyɛ́n ɖěbǔ ó. É má nyí mɔ̌ ǎ ɔ́, mi táá kú. Sɛ́n tɛgbɛ tɔn ɖé wɛ é ná nyí nú kúnkan mitɔn lɛ́ɛ, bónú mi ná sixú tunwun vogbingbɔn e ɖo nǔ e è ɖe ɖó vo nú Mawu Mavɔmavɔ é kpó nǔ e è ma ɖe ɖó vo nú Mawu Mavɔmavɔ ǎ é kpó mɛ é, bó ná tunwun vogbingbɔn e ɖo nǔ e nyí nǔ mímɛ́ é, kpó nǔ e nyí nǔblíblí é kpó mɛ é. Énɛ́ ɔ́, mi ná sixú kplɔ́n sɛ́n e Mawu Mavɔmavɔ dó nú Izlayɛ́li ví lɛ́ɛ gbɔn Mɔyízi jí lɛ́ɛ bǐ yě.” Mɔyízi ɖɔ nú Aalɔ́ɔn kpó vǐ súnnu tɔn Eleazáa kpó Itamáa kpó ɖɔ: “Mi ná nɔ́ zé nǔníná linfín tɔn e kpo hwenu e è ɖe éé è fyɔ́ bó xwlé Mawu Mavɔmavɔ ɔ́ síin ɔ́; mi zé dó ɖa wɔ̌xúxú e mɛ è ma dó tɔ́n ǎ é ná, bó ɖu ɖo vɔ̌sákpe ɔ́ kpá: ɖó nǔɖuɖu mímɛ́ titewungbe ɖokpó wɛ. Tɛn mímɛ́ ɖé mɛ wɛ mi ná ɖu wɔ̌xúxú énɛ́ ɔ́ ɖe: énɛ́ ɔ́ wɛ nyí hwi Aalɔ́ɔn kpó vǐ towe súnnu lɛ́ɛ kpó sín kanta, ɖo vɔ̌sánú e è fyɔ́, bó xwlé Mawu Mavɔmavɔ lɛ́ɛ é mɛ. Mɔ̌ wɛ Mawu Mavɔmavɔ ko ɖɔ nú mì gbɔn. Kanlin e Izlayɛ́li ví lɛ́ɛ zé dó wá sá kɔnɖókpɔ́ vɔ́ ɔ́ ná ɔ́, hwi kpó vǐ towe súnnu kpó nyɔ̌nu kpó ná ɖu akɔ́n tɔn kpó asá tɔn kpó. Mi ná nɔ tɛn mímɛ́ mɛ, bó ná ɖu. Kanta mitɔn wɛ nyí akpáxwé énɛ́ lɛ́ɛ. Lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ wɛ yě bló d'é jí. Izlayɛ́li ví lɛ́ɛ ná bɛ́ akpáxwé énɛ́ lɛ́ɛ wá dó jǒ e è nɔ dó zo lɛ́ɛ jí, bɔ è nǎ bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bɔ bǐ ná húzú hwi kpó vǐ towe súnnu lɛ́ɛ kpó tɔn káká sɔ́yi lě e Mawu Mavɔmavɔ ɖɔ gbɔn é.” Mɔyízi ba do nú gbɔ̌sú e è nǎ dó sá hwɛsɔ́kɛmɛvɔ́ ná é, bó se ɖɔ è ko fyɔ́ ɛ. Énɛ́ ɔ́, xomɛ sin i dó Eleazáa kpó Itamáa kpó wú, bɔ é kanbyɔ́ yě ɖɔ: “Étɛ́wú wɛ mi ma ɖu kanlin e è dǒ sá hwɛsɔ́kɛmɛvɔ́ ná ɔ́ sín lan ɖo tɛn mímɛ́ ɖé mɛ ǎ? Nǔ mímɛ́ titewungbe ɖokpó wɛ é nyí, bɔ Mawu Mavɔmavɔ ná mi, bónú mi ná dó ɖe hwɛ e togun ɔ́ hu lɛ́ɛ sín kɔ n'i, bónú mi ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó hwɛsɔ́kɛmɛvɔ́ ɔ́ jí ɖo Mawu Mavɔmavɔ nukɔn é. Mi tunwun ɖɔ è kún nɔ́ hɛn kanlin ɔ́ sín hun yi goxɔ ɔ́ mɛ ó. Hǔn tɛn mímɛ́ ɖé mɛ wɛ mi ɖó ná ɖu lan tɔn ɖe, lě e un ɖɔ nú mi gbɔn é.” Lo ɔ́, Aalɔ́ɔn ɖɔ nú Mɔyízi ɖɔ: “Đǒtó mì; égbé din e Izlayɛ́li ví lɛ́ɛ wá xwlé hwɛsɔ́kɛmɛvɔ́ yětɔn lɛ́ɛ kpódó vɔ̌ e è nɔ dó zo lɛ́ɛ kpó Mawu Mavɔmavɔ ɔ́, a tunwun nǔ e gbo mì ɔ́ ganjí. Ényí un ɖu kanlin e è dǒ sá hwɛsɔ́kɛmɛvɔ́ ná ɔ́ sín lan égbé ɔ́, é ná nyɔ́ Mawu Mavɔmavɔ nukún mɛ a?” Xó énɛ́ ɔ́ e Aalɔ́ɔn ɖɔ ɔ́ fá xomɛ nú Mɔyízi. Mawu Mavɔmavɔ ɖɔ nú Mɔyízi kpódó Aalɔ́ɔn kpó ɖɔ yě ní ɖɔ nú Izlayɛ́li ví lɛ́ɛ ɖɔ: “Đo kanlin lɛ́ɛ bǐ mɛ ɔ́, éé mi ná nɔ́ ɖu lɛ́ɛ ɖíe: Mi ná ɖu kanlin e sín afɔkpa zɛ bǐ, bɔ é nɔ́ tún nǔ ɖu lɛ́ɛ. Amɔ̌, kanlin e nɔ tún nǔ ɖu bɔ afɔkpa tɔn ma zɛ ǎ, abǐ éé afɔkpa tɔn zɛ bɔ é má nɔ́ tún nǔ ɖu ǎ ɔ́, mi ɖó ná ɖu ǎ. Hǔn kanlin élɔ́ lɛ́ɛ ɔ́, mi ɖó ná nɔ́ ɖu ǎ: lǎkúnmí, ɖó éyɛ́ nɔ́ tún nǔ ɖu, afɔkpa tɔn ka zɛ ǎ. Agidigbǎnwún, ɖó éyɛ́ nɔ́ tún nǔ ɖu, é ká ɖó afɔkpa ǎ; kanlin blíblí nɛ́. Azwi, ɖó éyɛ́ nɔ́ tún nǔ ɖu, é ká ɖó afɔkpa ǎ; kanlin blíblí nɛ́. Aglǔza, ɖó afɔkpa tɔn zɛ, é ká nɔ́ tún nǔ ɖu ǎ; kanlin blíblí nɛ́. Mi ma ɖu kanlin énɛ́ lɛ́ɛ sín lan ó, mi ma ka ɖ'alɔ kúkú yětɔn wú vɔ́vɔ́ ó. Mi mɔ yě dó mɔ kanlin blíblí. “Đo kanlin e nɔ́ nɔ sin mɛ, gba mɛ, xu mɛ abǐ tɔ mɛ lɛ́ɛ mɛ ɔ́, mi sixú ɖu éé ɖó kɛn kpódó zǎ kpó lɛ́ɛ bǐ. Amɔ̌, mi ma ɖu éé má ɖó kɛn ǎ, bó má ká ɖó zǎ ǎ ɖě ó. É sixú nyí kanlin kpɛví kpɛví e ɖo tɔ mɛ lɛ́ɛ, abǐ tɔ kanlin ɖěvo lɛ́ɛ. Yě vɛ́ mi. Mi gbɛ́ wǎn nú yě; mi ma ɖu lan yětɔn ó, mi ma ɖ'alɔ kúkú yětɔn wú vɔ́vɔ́ ó. Yě vɛ́ mi. Hǔn tɔ kanlin ɖěbǔ e má ɖó kɛn ǎ, bó má ká ɖó zǎ ǎ lɛ́ɛ ɔ́, mi ma ɖu lan yětɔn ó. Yě vɛ́ mi. “Đo xɛ lɛ́ɛ mɛ ɔ́, éé vɛ́ mi bɔ mi ná gbɛ́ wǎn ná, bó má ná ɖu ǎ lɛ́ɛ ɖíe: gangan, hɔ̌n, gangan xu mɛ tɔn, gɛ̌nkpákpɛ, aklasú alɔkpa alɔkpa, avǔnsákɔwó, gowungo, klolwe, aɖɔwé xu mɛ tɔn, gɛ̌n alɔkpa alɔkpa, klolwe, avǔnsákɔwó xu mɛ tɔn, sɔ́wáyi, klolwe zonɔ, avǔnsákɔwó kpɛví kpɛví, lanɖuxɛ, tɔxɛ, aɖɔwé alɔkpa alɔkpa lɛ́ɛ, ahlǐnhǎn, afluiflui. “Xɛ énɛ́ lɛ́ɛ bǐ vɛ́ mi; nǔvínúví e ɖó awa bó ɖó afɔ lɛ́ɛ vɛ́ mi. Amɔ̌, mi ná ɖu éé ɖó afɔ bó nɔ lɔ́n lɛ́ɛ; yě wɛ nyí: wɛn alɔkpa alɔkpa lɛ́ɛ kpódó bɔ alɔkpa alɔkpa lɛ́ɛ kpó. Amɔ̌, nǔvínúví ɖě lɛ́ɛ éé ɖó awa, bó ɖó afɔ lɛ́ɛ vɛ́ mi.” “Kanlin ɖé lɛ́ɛ tíin, bɔ mɛɖé ɖó alɔ kúkú yětɔn wú ɔ́, mɛ ɔ́ ná húzú mɛ blíblí káká jɛ gbadanu. Mɛ ɖěbǔ zé kúkú yětɔn ɔ́, mɛ ɔ́ ɖó ná nya avɔ tɔn lɛ́ɛ; é lɔmɔ̌ ká ná húzú mɛ blíblí káká jɛ gbadanu. Kanlin e sín afɔkpa ma zɛ ǎ, kpó éé má nɔ́ tún nǔ ɖu ǎ lɛ́ɛ kpó ɔ́, mi ná mɔ yě dó mɔ kanlin blíblí. Mɛ ɖěbǔ ɖ'alɔ yě wú ɔ́, mɛ ɔ́ ná nyí mɛ blíblí. Mɔ̌ ɖokpó ɔ́, kanlin e ɖó afɔ ɛnɛ, bó nɔ́ tɛ afɔxomɛ ayǐ dó ɖi zɔnlin ná lɛ́ɛ bǐ ɔ́, mi ná mɔ yě dó mɔ kanlin blíblí. Mɛ ɖěbǔ ɖ'alɔ kúkú yětɔn wú ɔ́, mɛ ɔ́ ná húzú mɛ blíblí káká jɛ gbadanu. Mɛ ɖěbǔ zé kúkú yětɔn ɔ́, mɛ ɔ́ ɖó ná nya avɔ tɔn lɛ́ɛ, bó ká ná nyí mɛ blíblí káká jɛ gbadanu. Mi ná mɔ kanlin énɛ́ lɛ́ɛ dó mɔ kanlin blíblí. Kanlin kpɛví kpɛví e mi ná mɔ dó mɔ kanlin blíblí ɖo kanlin e gba kpé ayǐkúngban ɔ́ jí lɛ́ɛ mɛ lɛ́ɛ ɖíe: wɔ, ajaka, alɔ̌tlɔ tɛnmɛ tɛnmɛ lɛ́ɛ bǐ, nyɔxwenyɔxwe, dǔdúbeɖe, danlyɛ́nlyɛn, vɛ̌, aganma. Mi ná mɔ yě dó mɔ kanlin blíblí. Mɛ ɖěbǔ ɖ'alɔ kúkú yětɔn wú ɔ́, mɛ ɔ́ ná nyí mɛ blíblí káká jɛ gbadanu. Nú kúkú yětɔn jɛ nǔ ɖěbǔ jí ɔ́, nǔ ɔ́ ná nyí nǔblíblí; é sixú nyí atínká, é sixú nyí avɔ, é sixú nyí anyǔ, é sixú nyí glo, é sixú nyí nǔ ɖěbǔ. È nǎ sɔ́ dó sin mɛ, bɔ é ná húzú nǔblíblí káká jɛ gbadanu; énɛ́ ɔ́ gúdo ɔ́, é ná lɛ́ húzú nǔ mímɛ́. Ényí nǔɖé ɖo kogbán ɖé mɛ, bɔ kanlin énɛ́ lɛ́ɛ ɖě jɛ mɛ ɔ́, nǔ e ɖo kogbán ɔ́ mɛ ɔ́ húzú nǔblíblí; è ɖǒ ná hɛn kogbán ɔ́ gba. Nú sin ɔ́ jɛ nǔɖuɖu ɖěbǔ jí ɔ́, nǔɖuɖu énɛ́ ɔ́ húzú nǔɖuɖu blíblí. Ényí nǔ e è hɛn ɔ́ è nǎ nu ɔ́ ɖo nǔ ɖěbǔ mɛ, bɔ sin ɔ́ jɛ jí ɔ́, nǔ nunu énɛ́ ɔ́ ná bó ɖo gannú ɖěbǔ mɛ ɔ́, é húzú nǔblíblí. Nú kanlin énɛ́ lɛ́ɛ kú, bó jɛ nǔ ɖěbǔ jí ɔ́, nǔ énɛ́ ɔ́ húzú nǔblíblí. Nú adogwle abǐ kpó wɛ ɔ́, mi ní hɛn gba hánnyá, ɖó mi ɖó ná mɔ dó mɔ nǔblíblí. Amɔ̌, nú kúkú yětɔn jɛ tɔjɔtɛn ɖé abǐ dotɔ ɖé mɛ ɔ́, nǔ mímɛ́ jɛ́n sin ɔ́ nyí; lo ɔ́, mɛ e ná ɖe kanlin kúkú ɔ́ sín sin ɔ́ mɛ ɔ́, mɛ ɔ́ ná húzú mɛ blíblí. Nú kúkú yětɔn jɛ nǔkún e è sɔ́ ɖ'ayǐ, bó ná wá dó ɔ́ jí ɔ́, nǔ mímɛ́ jɛ́n nǔkún ɔ́ nyí. Amɔ̌, nú è nylɔ̌ nǔkún, bɔ kúkú yětɔn jɛ mɛ ɔ́, hǔn mi ná mɔ nǔkún énɛ́ lɛ́ɛ dó mɔ nǔblíblí. “Nú kanlin e mi hɛn ɔ́, mi ná ɖu lɛ́ɛ ɖě kú ɔ́, mɛ e ná ɖ'alɔ kúkú tɔn wú ɔ́, ná nyí mɛ blíblí káká jɛ gbadanu. Mɛ e ná ɖu kúkú tɔn sín lan ɔ́ ná nya avɔ tɔn lɛ́ɛ, bó ká ná nyí mɛ blíblí káká jɛ gbadanu. Mɛ e ná zé kúkú tɔn ɔ́ ná nya avɔ tɔn lɛ́ɛ; é lɔmɔ̌ ká ná nyí mɛ blíblí káká jɛ gbadanu. “Kanlin kpɛví kpɛví e nɔ́ sá gbɔn kɔ́ mɛ lɛ́ɛ bǐ vɛ́ mi; mi ná ɖu ɖě ǎ. Hǔn mi ná ɖu kanlin kpɛví kpɛví e nɔ́ sá gbɔn kɔ́ mɛ lɛ́ɛ ɖě ǎ; mi ka ná ɖu éé nɔ́ gbɔn adɔgo jí lɛ́ɛ ɖě ǎ; mi ka ná ɖu éé nɔ́ zɔn afɔ ɛnɛ jí abǐ afɔ gěgé jí lɛ́ɛ ɖě ǎ; kanlin kpɛví kpɛví énɛ́ lɛ́ɛ bǐ vɛ́ mi. Mi ma ɖ'alɔ kanlin énɛ́ lɛ́ɛ wú, bó dó hɛn miɖée blí ó. Mi ma jó miɖée dó, bónú yě ní hɛn mi blí ó; yě táá zɔ́n bɔ mi ná nyí mɛ blíblí. Đó nyɛ wɛ nyí Mawu Mavɔmavɔ, Mawu mitɔn; mi ní nɔ́ zán walɔ mímɛ́, ɖó nyɛ ɔ́, mǐmɛ́ wɛ un nyí, mi bó ma ɖ'alɔ kanlin kpɛví kpɛví énɛ́ lɛ́ɛ e nɔ sá gbɔn kɔ́ mɛ lɛ́ɛ wú, bó dó hɛn miɖée blí ó. Đó nyɛ wɛ nyí Mawu Mavɔmavɔ, nyɛ wɛ ɖe mi tɔ́n sín Ejípu. Un ɖe mi tɔ́n, bó ná nyí Mawu mitɔn, mi ná nyí mɛ mímɛ́, ɖó mǐmɛ́ wɛ un nyí.” Kanlin lɛ́ɛ, xɛ lɛ́ɛ, kanlin e nɔ nɔ tɔ mɛ lɛ́ɛ, kpódó éé nɔ́ sá gbɔn kɔ́ mɛ lɛ́ɛ bǐ kpó ɔ́, sɛ́n e ɖɔ xó dó yě wú lɛ́ɛ nɛ́. Sɛ́n énɛ́ lɛ́ɛ ná zɔ́n bɔ è nǎ tunwun kanlin e è hɛn ɔ́, è nǎ ɖu lɛ́ɛ kpódó éé è ma sixú ɖu ǎ lɛ́ɛ kpó. Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Nú nyɔ̌nu ɖé ji vǐ súnnu ɔ́, é ná nyí mɛ blíblí xɔ aklúnɔzángbla ɖokpó, hwenu e é jɛ glegbe ɔ́ ɖɔhun. Azǎn tántɔngɔ́ ɔ́ gbe ɔ́, è nǎ gbo ada nú vǐ ɔ́. È gbo ada nú vǐ nú é bló azǎn gban-nukún-atɔn (33) ɔ́, è nǎ slá wǔ nú vǐnɔ ɔ́, ɖó hun e wá yi sín wǔ tɔn hwenu e é ji vǐ ɔ́ wú. É ná ɖ'alɔ nǔ e è sɔ́ ɖó vo nú Mawu lɛ́ɛ ɖěbǔ wú ǎ; é ká ná yi Mawu xwé gbe káká cóbɔ azǎn nabí e é ɖó ná nɔ te xɔ, bó ná nyí mɛ mímɛ́ ɔ́ ná wá ǎ. “Nú é ká nyí ɖɔ nyɔ̌nu wɛ é ji ɔ́, é ná nyí mɛ blíblí xɔ aklúnɔzángbla we, hwenu e é jɛ glegbe ɔ́ ɖɔhun. Énɛ́ ɔ́ gúdo ɔ́, é ná bló azǎn kanɖé koatɔ́n-nukún-ɖokpó (66), bɔ è nǎ slá wǔ n'i, ɖó hun e wá yi sín wǔ tɔn hwenu e é ji vǐ ɔ́ wú. “Nyɔ̌nu e ji vǐ súnnu abǐ vǐ nyɔ̌nu ɔ́ ná nɔ te xɔ azǎn nabí e é ɖó ná bló, bó ná húzú mɛ mímɛ́ é; énɛ́ gúdo ɔ́, é ná yi vɔ̌sánú-xwlémawutɔ́ ɔ́ gɔ́n, ɖo goxɔ ɔ́ nukɔn. É ná hɛn lɛ̌ngbɔ́ví e ɖó xwe ɖokpó ɔ́ yi n'i, bɔ é ná dó sá vɔ̌ e è nɔ dó zo ɔ́ ná. É ná lɛ́ hɛn ahwannɛ́ ɖokpó abǐ xwelé ɖokpó yi n'i, bɔ é nǎ dó sá hwɛsɔ́kɛmɛvɔ́ ɔ́ ná. Vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná xwlé vɔ̌sánú lɛ́ɛ Mawu Mavɔmavɔ, dó súnsún hwɛ sín kɔ nú vǐnɔ ɔ́. Bɛ́ sín hwenɛ́nu ɔ́, è slá wǔ n'i ɖó hun e wá yi sín wǔ tɔn hwenu e é ji vǐ ɔ́ wú.” Sɛ́n e ɖɔ xó dó nyɔ̌nu e ji vǐ súnnu abǐ vǐ nyɔ̌nu ɔ́ wú ɔ́ nɛ́. Nú vǐnɔ ɔ́ má ɖó nǔɖé bó ná dó xɔ lɛ̌ngbɔ́ví ɔ́ ná ǎ ɔ́, é sixú hɛn xwelé we abǐ ahwannɛ́ we wá. É ná zé ɖokpó dó sá vɔ̌ e è nɔ dó zo ɔ́ ná, bó ná sɔ́ ɖokpó dó sá hwɛsɔ́kɛmɛvɔ́ ɔ́ ná. Vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i, bɔ é ná húzú mɛ mímɛ́. Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Hwenu e nǔtitɛ ɖé abǐ gun, abǐ nǔ alɔkpa ɖé ná tɔ́n ɖo mɛ ɖé wú, bɔ è nǎ mɔ ɖɔ gudu wɛ ɔ́, è nǎ kplá mɛ énɛ́ ɔ́ yi vɔ̌sánú-xwlémawutɔ́ Aalɔ́ɔn, abǐ vǐ tɔn súnnu lɛ́ɛ ɖokpó gɔ́n. Vɔ̌sánú-xwlémawutɔ́ ɔ́ ná kpɔ́n fí e nǔ ɔ́ ɖe ɖo wǔ tɔn ɔ́. Nú fún e ɖo fí ɔ́ é wé, bɔ fí ɔ́ jɛ do wán jí hǔn, gudu wɛ. Énɛ́ ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ. Nú é ká nyí ɖɔ nǔ wěwé ɖé wɛ tɔ́n ɖo wǔ tɔn, bɔ fí ɔ́ má wán do ǎ, bɔ fún lɛ́ɛ má wé ǎ ɔ́, vɔ̌sánú-xwlémawutɔ́ ɔ́ ná ɖe mɛ e wú nǔ ɔ́ tɔ́n ɖe ɔ́ ɖó vo xɔ azǎn tɛ́nwe. Azǎn tɛ́nwegɔ́ ɔ́ gbe ɔ́, é ná wá, bɔ vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lě e nǔ ɔ́ ɖe ɔ́ jɛ́n é ɖe, bó má sɔ́ gbló d'é jí ǎ ɔ́, é ná lɛ́ kɔ nú azunzɔnnɔ ɔ́ yi fí e é ɖe ɔ́ bɔ é ná lɛ́ nɔ fínɛ́ xɔ azǎn tɛ́nwe ɖěvo. Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ vɔ́ kpɔ́n ɛ. Nú nǔ e tɔ́n ɖo wǔ tɔn ɔ́ sín nukún mɛ xú, bó má sɔ́ gbló d'é jí ǎ ɔ́, vɔ̌sánú-xwlémawutɔ́ ɔ́ ná ɖɔ mɛ mímɛ́ wɛ mɛ ɔ́ nyí; é ná ɖɔ gun kpowun wɛ ɖo wǔ tɔn. Nǔ e mɛ ɔ́ ná wa kpowun ɔ́ wɛ nyí ɖɔ é ná nya avɔ tɔn lɛ́ɛ, bó ná nyí mɛ mímɛ́. Lo ɔ́, éé vɔ̌sánú-xwlémawutɔ́ ɔ́ kpɔ́n mɛ ɔ́, bó ɖɔ é nyí mɛ mímɛ́, bɔ énɛ́ ɔ́ gúdo ɔ́ gun e ɖo wǔ tɔn ɔ́ jɛ gblǒgbló jí ɔ́, mɛ ɔ́ ná lɛ́ lɛ́ kɔ wá vɔ̌sánú-xwlémawutɔ́ ɔ́ gɔ́n, bɔ vɔ̌sánú-xwlémawutɔ́ ɔ́ ná lɛ́ vɔ́ kpɔ́n ɛ. Nú é mɔ ɖɔ gun ɔ́ lɛ́ vɔ́ gbló d'é jí ɔ́, é ná ɖɔ mɛ blíblí wɛ. Nǔ e ɖo wǔ tɔn ɔ́ gudu wɛ. “Hǔn, nú gudu tɔ́n ɖo mɛɖé wú ɔ́, è nǎ kplá mɛ ɔ́ yi vɔ̌sánú-xwlémawutɔ́ ɔ́ gɔ́n. Bɔ vɔ̌sánú-xwlémawutɔ́ ɔ́ ná kpɔ́n ɛ. Nú nǔtitɛ wěwé ɖé wɛ ɖo wǔ tɔn, bɔ fún lɛ́ɛ wé, bɔ lanti tɔ́n ɖ'é mɛ ɔ́, hǔn gudu ɔ́ kó dó ve nɛ́. Vɔ̌sánú-xwlémawutɔ́ ɔ́ ná ɖɔ mɛ blíblí wɛ. É sɔ́ byɔ́ ɖɔ è nǎ ɖe e ɖó vo, bɔ è nǎ ɖo kpínkpɔ́n wɛ ǎ, ɖó é kó ɖo gaan ɖɔ mɛ blíblí wɛ. É ká ɖo mɔ̌ có, nú vɔ̌sánú-xwlémawutɔ́ ɔ́ mɔ ɖɔ gudu kpé mɛ ɔ́ wú bǐ sín ta káká wá yi afɔ ɔ́, hǔn, é ná lɛ́ vɔ́ mɛ ɔ́ kpɔ́n xéɖéxéɖé. Nú é mɔ ɖɔ gudu ɔ́ kpé wǔ tɔn bǐ nǔgbó ɔ́, é ná ɖɔ ɖɔ mɛ ɔ́, mɛ mímɛ́ wɛ, ɖó wǔtu tɔn bǐ wɛ wé. Amɔ̌, gbe e gbe lanti ɖé ná tɔ́n ɖo mɛ ɔ́ wú ɔ́, mɛ ɔ́ húzú mɛ blíblí. Vɔ̌sánú-xwlémawutɔ́ ɔ́ ná kpɔ́n mɛ ɔ́; nú é mɔ ɖɔ lanti tɔ́n ɔ́, é ná ɖɔ ɖɔ mɛ ɔ́ mɛ blíblí wɛ. Lanti e tɔ́n ɔ́, nǔblíblí wɛ, gudu wɛ. Nú fí e lanti ɔ́ tɔ́n ɖe ɔ́ lɛ́ wé ɔ́, mɛ ɔ́ ná lɛ́ kɔ yi vɔ̌sánú-xwlémawutɔ́ ɔ́ gɔ́n. Vɔ̌sánú-xwlémawutɔ́ ɔ́ ná kpɔ́n ɛ. Nú é kpɔ́n ɛ bó mɔ ɖɔ akpa ɔ́ wé nǔgbó ɔ́, é ná ɖɔ ɖɔ mɛ ɔ́ mɛ mímɛ́ wɛ. “Nú akpa ɖo mɛɖé wú bó kó kú, bɔ nǔtitɛ wěwé abǐ nǔ tɔ́n ɖo wǔ wěwé ɖé tɔ́n ɖo akpa do ɔ́ mɛ, bó myá d'é mɛ ɔ́, mɛ ɔ́ ná yi mɔ vɔ̌sánú-xwlémawutɔ́. Bɔ vɔ̌sánú-xwlémawutɔ́ ɔ́ ná kpɔ́n fí e nǔ ɔ́ ɖe ɔ́. Nú é mɔ ɖɔ nǔ tɔ́n ɖo wǔ e tɔ́n ɖo akpa do ɔ́ mɛ ɔ́ wán do, bɔ fún e ɖ'é mɛ ɔ́ wé ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ mɛ ɔ́ nyí, ɖó gudu sín akpa wɛ tɔ́n ɖo akpa do ɔ́ mɛ. Amɔ̌, nú vɔ̌sánú-xwlémawutɔ́ ɔ́ má mɔ fún wěwé ɖé ɖ'é mɛ ǎ, nú nǔ tɔ́n ɖo wǔ ɔ́ má wán do ǎ, bónú nukún mɛ tɔn kó xú ɔ́, vɔ̌sánú-xwlémawutɔ́ ɔ́ ná ɖe azinzɔnnɔ ɔ́ ɖó vo xɔ azǎn tɛ́nwe. Énɛ́ ɔ́ gúdo ɔ́, ényí ɖɔ nǔ tɔ́n ɖo wǔ ɔ́ gbló ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ mɛ ɔ́ nyí, ɖó gudu wɛ. Lo ɔ́, nú fí e nǔ tɔ́n ɖo wǔ ɔ́ ɖe ɔ́ jɛ́n é ɖe, bɔ é má sɔ́ gbló d'é jí ǎ ɔ́, hǔn gudu sín akpado kpowun wɛ. Énɛ́ ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ ɔ́, mɛ mímɛ́ wɛ. “Mǐ ní ɖɔ myɔkpa ɖo mɛɖé wú, bɔ nǔ tɔ́n ɖo wǔ wěwé ɖé tɔ́n ɖ'é mɛ, abǐ nú nǔ tɔ́n ɖo wǔ ɔ́ wé, bó myá d'é mɛ ɔ́, vɔ̌sánú-xwlémawutɔ́ ɔ́ ná kpɔ́n ɛ. Nú é mɔ ɖɔ fún e ɖo nǔ tɔ́n ɖo wǔ ɔ́ mɛ ɔ́ wé, bɔ nǔ tɔ́n ɖo wǔ ɔ́ wán do ɔ́, hǔn gudu wɛ tɔ́n ɖo myɔkpa ɔ́ mɛ. Vɔ̌sánú-xwlémawutɔ́ ɔ́ ná ɖɔ ɖɔ mɛ ɔ́ mɛ blíblí wɛ, ɖó gudu wɛ. Nú vɔ̌sánú-xwlémawutɔ́ ɔ́ mɔ ɖɔ fún wěwé kún tɔ́n ɖo nǔ tɔ́n ɖo wǔ ɔ́ mɛ ó, bɔ nǔ tɔ́n ɖo wǔ ɔ́ má wán do ǎ, bɔ nukún mɛ tɔn kó fyɔ́ ɔ́, vɔ̌sánú-xwlémawutɔ́ ɔ́ ná ɖe mɛ ɔ́ ɖó vo xɔ azǎn tɛ́nwe. Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná kpɔ́n ɛ. Nú é mɔ ɖɔ nǔ tɔ́n ɖo wǔ ɔ́ gbló ɔ́, é ná ɖɔ ɖɔ mɛ ɔ́, mɛ blíblí wɛ, ɖó gudu wɛ. Lo ɔ́, nú nǔ tɔ́n ɖo wǔ ɔ́ nɔ tɛn ɖokpó ɔ́ mɛ, bó má gbló ǎ, bɔ nukún mɛ tɔn fyɔ́ hǔn, myɔkpa kpowun wɛ. Vɔ̌sánú-xwlémawutɔ́ ɔ́ ná ɖɔ ɖɔ mɛ mímɛ́ wɛ mɛ ɔ́ nyí, ɖó myɔ sín akpado wɛ. “Nú akpa ɖo ta abǐ gbakɔ nú súnnu ɖé, abǐ nyɔ̌nu ɖé ɔ́, vɔ̌sánú-xwlémawutɔ́ ɔ́ ná kpɔ́n akpa ɔ́. Nú é mɔ ɖɔ akpa ɔ́ wán do, bɔ fún wínníwínní koklójónɔ ɖé ɖ'é mɛ ɔ́, vɔ̌sánú-xwlémawutɔ́ ɔ́ ná ɖɔ mɛ blíblí wɛ mɛ ɔ́ nyí, ɖó lakpálakpá wɛ ɖo ta abǐ gbakɔ n'i. Nú é ká mɔ ɖɔ lakpálakpá sín akpa ɔ́ kún wán do ó, bɔ fún wiwi kún ɖ'é mɛ ó ɔ́, é ná ɖe mɛ ɔ́ ɖó vo xɔ azǎn tɛ́nwe. Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lakpálakpá ɔ́ kún gbló d'é jí ó, bɔ fún koklójónɔ kún tɔ́n ɖ'é mɛ ó, bɔ é kún wán do ó ɔ́, mɛ e wú lakpálakpá ɔ́ ɖe ɔ́ ná xwlɛ́ ta; é ká ná xwlɛ́ fí e lakpálakpá ɔ́ ɖe ɔ́ ǎ, bɔ vɔ̌sánú-xwlémawutɔ́ ɔ́ ná lɛ́ ɖe e ɖó vo azɔn wegɔ́ ɔ́ xɔ azǎn tɛ́nwe. Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lakpálakpá ɔ́ kún sɔ́ gbló d'é jí ó, é kún ká sɔ́ wán do ó ɔ́, vɔ̌sánú-xwlémawutɔ́ ɔ́ ná ɖɔ ɖɔ mɛ mímɛ́ wɛ mɛ ɔ́ nyí. É ná nya avɔ tɔn lɛ́ɛ, bó ná nyí mɛ mímɛ́. Amɔ̌, nú vɔ̌sánú-xwlémawutɔ́ ɔ́ ɖɔ é nyí mɛ mímɛ́ bɔ énɛ́ ɔ́ gúdo ɔ́, lakpálakpá ɔ́ lɛ́ wá gbló d'é jí ɔ́, vɔ̌sánú-xwlémawutɔ́ ɔ́ ná lɛ́ kpɔ́n ɛ. Nú é mɔ ɖɔ lakpálakpá ɔ́ gbló d'é jí ɔ́, énɛ́ ɔ́, é sɔ́ ná xa ji bo kpɔ́n ɖɔ fún koklójónɔ tɔ́n ɖ'é mɛ a jí ǎ; mɛ blíblí wɛ mɛ ɔ́ nyí. Nú é ká cí n'i ɖɔ lakpálakpá ɔ́ kún gbló ó, bɔ fún wiwi tɔ́n ɖ'é mɛ ɔ́, hǔn lakpálakpá ɔ́ kó fyɔ́; mɛ mímɛ́ wɛ mɛ ɔ́ nyí; vɔ̌sánú-xwlémawutɔ́ ɔ́ ná ɖɔ ɖɔ é nyí mɛ mímɛ́. “Nú nǔ tɔ́n ɖo wǔ wěwé ɖé lɛ́ɛ tɔ́n ɖo súnnu ɖé abǐ nyɔ̌nu ɖé wú ɔ́, vɔ̌sánú-xwlémawutɔ́ ɔ́ ná kpɔ́n ɛ. Nú é mɔ ɖɔ nǔ tɔ́n ɖo wǔ wěwé ɖo mɛ ɔ́ wú, bɔ nukún mɛ tɔn ká kó ɖo fyɔ́fyɔ́ wɛ ɔ́, hǔn nǔ tɔ́n ɖo wǔ ɖé lɛ́ɛ wɛ tɔ́n ɖo wǔ tɔn kpowun; mɛ mímɛ́ wɛ é nyí. “Nú ɖa vɔ sín ta nú mɛ ɖé ɔ́, ta tɔn wɛ ɖo mɔ̌ kpowun; mɛ mímɛ́ wɛ é nyí. Nú é nyí ɖɔ nukɔn wɛ ɖa vɔ ɖe n'i ɔ́, ɖa ma ɖo nukɔn kpowun wɛ é nyí; mɛ mímɛ́ wɛ é nyí. Amɔ̌, nú akpa ɖé tɔ́n ɖo fí e ɖa ma ɖe ɖo nukɔn abǐ zogúdo ɔ́, bɔ akpa ɔ́ wé, bó myá d'é mɛ ɔ́, hǔn gudu wɛ tɔ́n ɖo fí e ɖa ma ɖe ɖo zogúdo, abǐ nukɔn ǎ é. Vɔ̌sánú-xwlémawutɔ́ ɔ́ ná kpɔ́n ɛ. Nú é mɔ akpa ɔ́ ɖo fí e ɖa ma ɖe ɖo zogúdo abǐ nukɔn ǎ é, bɔ é wé, bó myá d'é mɛ, bó cí gudu ɖɔhun ɔ́, hǔn gudunɔ wɛ mɛ ɔ́ nyí; vɔ̌sánú-xwlémawutɔ́ ɔ́ ná ɖɔ ɖɔ mɛ blíblí wɛ é nyí, ɖó akpa e tɔ́n ɖo ta n'i ɔ́ wú. “Mɛ e wú gudu ɖe mɔ̌ ɔ́, ɖó ná dó awu vúnvún. É ná vún ɖa ǎ; é ná cyɔ́n alɔ nu, bó ná nɔ́ sú xó ɖɔ: ‘Un nyí mɛ blíblí! Un nyí mɛ blíblí.’ Nú azɔn ɔ́ kpo ɖo wǔtu tɔn jɛ́n wɛ ɔ́, mɛ blíblí nyí wɛ jɛ́n é ná ɖe; énɛ́ ɔ́ wú ɔ́, é ná nɔ vo; é ná nɔ fí e è ɖǒ gɔnu ɖó é ǎ.” Mawu Mavɔmavɔ ɖɔ: “Mǐ ní ɖɔ nǔzínzán ɖé fun hwa: é sixú nyí gbɔ̌fúnvɔ, abǐ lɛ̌ɛnkanvɔ, abǐ avɔ, abǐ awu e è sɔ́ gbɔ̌fúnvɔ abǐ lɛ̌ɛnkanvɔ dó tɔ ná ɔ́, é sixú nyí anyǔ, abǐ nǔ e è sɔ́ anyǔ dó bló ná lɛ́ɛ ɖě wɛ fun hwa. Nú nǔ e tɔ́n ɖ'é mɛ lɛ́ɛ vlɛ́ amamú abǐ vɔvɔ ɔ́, hǔn hwa wɛ nǔ ɔ́ fun; è ɖǒ ná zé yi xlɛ́ vɔ̌sánú-xwlémawutɔ́, bɔ é ná kpɔ́n. Nú vɔ̌sánú-xwlémawutɔ́ ɔ́ kpɔ́n gúdo ɔ́, é ná sú hɔn dó nǔ e fun hwa ɔ́ xɔ azǎn tɛ́nwe. Azǎn tɛ́nwegɔ́ ɔ́ gbe ɔ́, é ná vɔ́ kpɔ́n. Nú é mɔ ɖɔ nǔ e tɔ́n ɖ'é wú ɔ́ gbló d'é jí ɔ́, hǔn, hwafunfun baɖabaɖa ɖé wɛ, bɔ è nɔ sixú ɖe síin ǎ; nǔ ɔ́ nyí nǔblíblí. Énɛ́ ɔ́, vɔ̌sánú-xwlémawutɔ́ ɔ́ ná dó nǔ e fun hwa ɔ́ zo. É sixú nyí avɔ, é sixú nyí awu e è zě gbɔ̌fúnvɔ abǐ lɛ̌ɛnkanvɔ dó tɔ é, abǐ nǔ e è sɔ́ anyǔ dó bló ná lɛ́ɛ ɖě, é ná dó zo; ɖó è sixú ɖe nǔ e tɔ́n ɖ'é mɛ ɔ́ síin ǎ. Hǔn è ɖǒ ná dó nǔ e fun hwa ɔ́ zo. Amɔ̌, nú vɔ̌sánú-xwlémawutɔ́ ɔ́ mɔ ɖɔ nǔ e tɔ́n ɖo nǔ ɔ́ mɛ ɔ́ kún gbló d'é jí ó ɔ́, é ná ná gbe bɔ è nǎ nya nǔ e fun hwa ɔ́, bɔ è nǎ lɛ́ sú hɔn dó xɔ azǎn tɛ́nwe ɖěvo. Énɛ́ ɔ́ gúdo ɔ́, vɔ̌sánú-xwlémawutɔ́ ɔ́ ná vɔ́ nǔ énɛ́ ɔ́ e è ko nya ɔ́ kpɔ́n. Nú é mɔ ɖɔ nǔ e tɔ́n ɖ'é mɛ ɔ́ kún húzú ó ɔ́, é ná bó má gbló d'é jí ǎ ɔ́, nǔ e fun hwa ɔ́ ná nyí nǔblíblí. È ɖǒ ná dó zo. Nú fí e nǔ ɔ́ tɔ́n ɖe ɔ́ ɖu ɖo wěxo, abǐ gǔdo ɔ́, è ɖǒ ná dó zo. Amɔ̌, nú é mɔ ɖɔ nǔ e tɔ́n ɖo nǔ énɛ́ lɛ́ɛ mɛ ɔ́ ko nylɔ́ wi ɔ́, é ná sɛ́n fí e fun hwa ɔ́ síin; é ná sɛ́n sín nǔzínzán ɔ́ wú, abǐ anyǔ ɔ́ wú, abǐ avɔ ɔ́ wú, abǐ awu ɔ́ wú. Nú é lín xóó, bónú nǔ ɔ́ lɛ́ tɔ́n ɖo nǔ énɛ́ lɛ́ɛ mɛ ɔ́, hǔn é lɛ́ jɛ gblǒgbló d'é jí jí nɛ́. Hwe énɛ́ ɔ́ nu ɔ́, è ɖǒ ná dó nǔ e fun hwa ɔ́ zo. “Nú è nya nǔ énɛ́ lɛ́ɛ e fun hwa ɔ́, nú nǔ e tɔ́n ɖ'é mɛ ɔ́ wá yi ɔ́, è nǎ vɔ́ nǔ e mɛ nǔ tɔ́n ɖe ɔ́ nya azɔn wegɔ́ ɔ́, bɔ é ná húzú nǔ mímɛ́.” Sɛ́n e ɖɔ xó dó nǔ tɔ́n ɖo nǔzínzán mɛ, gbɔ̌fúnvɔ mɛ, abǐ lɛ̌ɛnkanvɔ mɛ, abǐ avɔ mɛ, abǐ awu mɛ, abǐ nǔ e è sɔ́ anyǔ dó bló ná lɛ́ɛ mɛ ɔ́ wú ɔ́ nɛ́. Sɛ́n énɛ́ lɛ́ɛ ná zɔ́n bɔ è nǎ ɖɔ nǔ e fun hwa ɔ́ nyí nǔ mímɛ́, abǐ é nyí nǔblíblí. Mawu Mavɔmavɔ ɖɔ nú Mɔyízi ɖɔ: “Gbe e gbe è nǎ slá wǔ nú gudunɔ ɔ́, sɛ́n e ɖɔ xó d'é wú ɔ́ ɖíe. Gbe e gbe è nǎ slá wǔ n'i ɔ́, è nǎ yi ɖɔ xó tɔn nú vɔ̌sánú-xwlémawutɔ́ ɔ́. Bɔ vɔ̌sánú-xwlémawutɔ́ ɔ́ ná tɔ́n sín fí e yě ɖó gɔnu ɖó ɔ́, bó ná kpɔ́n ɛ. Nú é mɔ ɖɔ gudu ɔ́ kó gbɔ n'i ɔ́, é ná ná gbe ɖɔ è nǐ zé xɛ e ma vɛ́ mɛ ǎ ɔ́ gbɛɖe we ɖó mɛ e slá wǔ ná gbé è ja ɔ́ tamɛ, bó ná zé sɛ́dlukpo, bó ná zé kan vɔvɔ cɛ́cɛ́, bó ná zé izɔ́puma sín ala gɔ́ ná. Vɔ̌sánú-xwlémawutɔ́ ɔ́ ná ná gbe bɔ è nǎ gbo gbe xɛ lɛ́ɛ ɖokpó, bɔ sin ná ɖo kogbán ɖé mɛ, bɔ è nǎ kun hun tɔn kɔn dó sin ɔ́ mɛ. É ná zé xɛ wegɔ́ e ɖo gbɛ ɔ́, kpó sɛ́dlukpo ɔ́ kpó, kpódó avɔxwɛ vɔvɔ cɛ́cɛ́ ɔ́ kpó, kpódó izɔ́puma ɔ́ kpó, bó ná nylɔ́ dó xɛ nukɔntɔn e è gbo gbe bɔ hun tɔn kɔn dó sin mɛ, ɖo kogbán mɛ ɔ́ mɛ, bó ná mi dó mɛ e slá wǔ ná gbé è ja ɔ́ wú azɔn tɛ́nwe, bó ná ɖɔ ɖɔ mɛ ɔ́ nyí mɛ mímɛ́, lobo ná yi gběhan mɛ, bó ná jó xɛ gbɛɖe ɔ́ dó, bɔ é ná zɔn yi. Mɛ e slá wǔ ná wɛ è ɖe ɔ́ ná nya avɔ tɔn lɛ́ɛ, bó ná xwlɛ́ fún e ɖo wǔtu tɔn ɔ́ bǐ, bó ná lɛ wǔ, bó húzú mɛ mímɛ́. Énɛ́ ɔ́ gúdo ɔ́, é sixú byɔ́ fí e yě ɖǒ gɔnu ɖó ɔ́. É ká ná byɔ́ goxɔ tɔn mɛ ǎ nú azǎn tɛ́nwe. Azǎn tɔn tɛ́nwegɔ́ ɔ́ gbe ɔ́, é ná lɛ́ xwlɛ́ fún e ɖo wǔtu tɔn lɛ́ɛ bǐ; é ná lɛ́ xwlɛ́ ta, bó ná lɛ́ xwlɛ́ atán, bó ná lɛ́ xwlɛ́ wunda tɔn lɛ́ɛ. É ná xwlɛ́ nǔ e kó sixú nyí fún ɖo wǔ tɔn ɔ́ bǐ. É ná nya avɔ tɔn lɛ́ɛ, bó ná lɛ wǔ, bó ná húzú mɛ mímɛ́. “Azǎn tántɔngɔ́ ɔ́ gbe ɔ́, é ná ná lɛ̌ngbɔ́ví asú e má ɖó blɔ̌ ɖěbǔ ǎ é we, bó ná ná lɛ̌ngbɔ́ asi e kó ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ é ɖokpó, bó ná ná linfín kilóo tɛ́nnɛ, bɔ è nǎ zé ami dó nya, bó ná lɛ́ ná ami lǐtli vlɔ̌. Vɔ̌sánú-xwlémawutɔ́ e ɖo nǔwiwa lɛ́ɛ nu ɔ́ ná kplá mɛ e slá wǔ ná wɛ è ɖe ɔ́ kpó nǔ e é ná lɛ́ɛ kpó wá Mawu Mavɔmavɔ nukɔn, ɖo goxɔ e mɛ Mawu Mavɔmavɔ nɔ kpé togun tɔn ɖe ɔ́ nukɔn. Vɔ̌sánú-xwlémawutɔ́ ɔ́ ná zé lɛ̌ngbɔ́ví asú we lɛ́ɛ ɖokpó, bó ná dó sá hwɛxɔ́súsú vɔ́ ná, bó ná zé ami lǐtli vlɔ́ ɔ́, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó xwlé Mawu Mavɔmavɔ. É ná gbo gbe lɛ̌ngbɔ́ví ɔ́ ɖo fí e è nɔ gbo gbe kanlin e è nɔ dó sá hwɛsɔ́kɛmɛvɔ́ ɔ́, kpódó ée è nɔ dó zo ɔ́ kpó ɖe ɔ́ ɖo tɛn mímɛ́ ɖé mɛ. Đó hwɛxɔ́súsú vɔ́ ɔ́ kpódó hwɛsɔ́kɛmɛvɔ́ ɔ́ kpó ɔ́, vɔ̌sánú-xwlémawutɔ́ ɔ́ tɔn wɛ, bó nyí nǔ mímɛ́ ɖaxó ɖé. Vɔ̌sánú-xwlémawutɔ́ ɔ́ ná wún kanlin ɔ́ sín hun, bó ná ɖá dó mɛ ɔ́ sín tó ɖisíxwé tɔn ɔ́ sín nuvínu wú, bó ná ɖá dó alɔsú tɔn ɖisíxwé tɔn ɔ́ wú, kpódó afɔsú tɔn ɖisíxwé tɔn ɔ́ kpó wú. Énɛ́ ɔ́ gúdo ɔ́, é ná zé ami ɔ́, bó wún dó amyɔlɔ mɛ, bó ná zé nǔxlɛ́mɛlɔví ɖisíxwé tɔn ɔ́ d'é mɛ, bó mi azɔn tɛ́nwe ɖo Mawu Mavɔmavɔ nukɔn. Énɛ́ ɔ́ gúdo ɔ́, é ná ɖá kpɛɖé dó mɛ ɔ́ sín tó ɖisíxwé tɔn ɔ́ sín nuvínu wú, bó ná ɖá dó alɔsú ɖisíxwé tɔn ɔ́ wú, kpódó afɔsú ɖisíxwé tɔn ɔ́ kpó wú, dó fí e é kó ɖá hun ɖó ɖ'ayǐ é. É ná húzú ami e kpo ɖo alɔ tɔn mɛ ɔ́ dó ta nú mɛ ɔ́; énɛ́ ɔ́, é ná súnsún hwɛ tɔn ɖo Mawu Mavɔmavɔ nukɔn. Vɔ̌sánú-xwlémawutɔ́ ɔ́ ná sá hwɛsɔ́kɛmɛvɔ́ ɔ́, bó ná súnsún mɛ e slá wǔ nǎ wɛ è ɖe ɔ́ sín hwɛ; énɛ́ gúdo ɔ́, é ná gbo gbe kanlin e è nǎ dó sá vɔ̌ e è nɔ dó zo é, bó ná dó kanlin ɔ́ blěbǔ tɔn zo ɖo vɔ̌sákpe jí, kpódó linfín e é ná ɔ́ kpó. Énɛ́ ɔ́, é ná súnsún mɛ e slá wǔ ná wɛ è ɖe ɔ́ sín hwɛ bɔ é ná húzú mɛ mímɛ́.” Mawu Mavɔmavɔ ɖɔ: “Nú gudunɔ ɖé nyí wamamɔnɔ, bó má mɔ nǔ e é ɖó ná ná lɛ́ɛ bǐ ǎ ɔ́, é ná ná lɛ̌ngbɔ́ví asú ɖokpó géé, bɔ è nǎ zé ɖó te nú hwɛxɔ́súsú vɔ́ ɔ́. È ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ tɔn lɛ́ɛ; é ná ná linfín kilóo atɔn, bɔ è nǎ zé ami dó nya; é ná lɛ́ ná ami lǐtli vlɔ́. É ná lɛ́ ná xwelé we, abǐ ahwannɛ́ví we, lě e é kpé wú gbɔn é. É ná zé ɖokpó ɖó te nú hwɛsɔ́kɛmɛvɔ́ ɔ́, bó ná zé wegɔ́ ɔ́ ɖó te nú vɔ̌ e è nɔ dó zo é. Azǎn tántɔngɔ́ ɔ́ gbe ɔ́, é ná bɛ́ nǔníná énɛ́ lɛ́ɛ bǐ wá nú vɔ̌sánú-xwlémawutɔ́ ɔ́ ɖo goxɔ ɔ́ nukɔn, ɖo Mawu Mavɔmavɔ nukɔn, bɔ è nǎ slá wǔ n'i. Vɔ̌sánú-xwlémawutɔ́ ɔ́ ná zé lɛ̌ngbɔ́ví asú ɔ́ kpódó ami ɔ́ kpó, bó ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ. É ná gbo gbe lɛ̌ngbɔ́ví ɔ́, bó ná ɖá hun tɔn dó mɛ ɔ́ sín tó ɖisíxwé tɔn ɔ́ sín nuvínu, bó ná lɛ́ ɖá dó alɔsú tɔn ɖisíxwé tɔn ɔ́ wú, bó ná lɛ́ ɖá dó afɔsú tɔn ɖisíxwé tɔn ɔ́ wú. É ná wún ami ɔ́ dó alɔgogo tɔn amyɔ ɔ́ mɛ, bó ná sɔ́ nǔxlɛ́mɛlɔví tɔn ɖisíxwé tɔn d'é mɛ, bó mi azɔn tɛ́nwe ɖo Mawu Mavɔmavɔ nukɔn. Énɛ́ ɔ́ gúdo ɔ́, é ná ɖá kpɛɖé dó mɛ ɔ́ sín tó ɖisíxwé tɔn ɔ́ sín nuvínu, bó ná ɖá kpɛɖé dó alɔsú tɔn ɖisíxwé tɔn ɔ́ wú, bó ná ɖá dó afɔsú tɔn ɖisíxwé tɔn ɔ́ wú, dó fí e é kó ɖá hun ɖó ɖ'ayǐ é. É ná húzú ami e kpo ɖo alɔgogo tɔn mɛ ɔ́ dó ta nú mɛ ɔ́, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i, ɖo Mawu Mavɔmavɔ nukɔn. Vɔ̌sánú-xwlémawutɔ́ ɔ́ ná zé xwelé we abǐ ahwannɛ́ we e mɛ ɔ́ ná lɛ́ɛ ɖokpó, bó dó sá hwɛsɔ́kɛmɛvɔ́ ná, bó ná sɔ́ wegɔ́ ɔ́ kpó linfín e mɛ ɔ́ ná ɔ́ kpó dó sá vɔ̌ e è nɔ dó zo ɔ́ ná, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i ɖo Mawu Mavɔmavɔ nukɔn.” Sɛ́n e ɖɔ xó dó gudunɔ wamamɔnɔ e azɔn gbɔ ná ɔ́ wú ɔ́ nɛ́. Mawu Mavɔmavɔ ɖɔ nú Mɔyízi kpódó Aalɔ́ɔn kpó ɖɔ: “Nú mi byɔ́ Kanáa to e un ná ná mi, bɔ é ná nyí mitɔn ɔ́ mɛ ɔ́, nú un bló bónú xɔ ɖé sín dǒ fun hwa ɖo to e ná nyí mitɔn ɔ́ mɛ ɔ́, xwétɔ́ ɔ́ ná yi mɔ vɔ̌sánú-xwlémawutɔ́ ɔ́, bó ná ɖɔ n'i ɖɔ: ‘Un mɔ nǔɖé tɔ́n ɖo xɔ ce sín dǒ wú!’ Cóbónú vɔ̌sánú-xwlémawutɔ́ ɔ́ ná yi kpɔ́n nǔ e tɔ́n ɖo xɔ ɔ́ sín dǒ wú ɔ́, é ná ná gbe ɖɔ é ní bɛ́ nǔ e ɖo xɔ ɔ́ mɛ lɛ́ɛ bǐ tɔ́n, bónú nǔ lɛ́ɛ ɖěbǔ ní má wá húzú nǔblíblí ó. Nú é bɛ́ nǔ lɛ́ɛ tɔ́n gúdo ɔ́, vɔ̌sánú-xwlémawutɔ́ ɔ́ ná byɔ́ xɔ ɔ́ mɛ, bó ná kpɔ́n xɔ ɔ́. É ná kpɔ́n nǔ e tɔ́n ɖo dǒ ɔ́ wú é. Nú é cí ɖɔ nǔ e tɔ́n ɖo dǒ ɔ́ wú ɔ́ kun so dó dǒ ɔ́ mɛ, bó vlɛ́ amamú abǐ vɔvɔ ɔ́, vɔ̌sánú-xwlémawutɔ́ ɔ́ ná tɔ́n sín xɔ ɔ́ mɛ, bó ná sú xɔ ɔ́ sín hɔn nú azǎn tɛ́nwe. Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ kɔ yi xɔ ɔ́ mɛ, bó ná vɔ́ nǔ ɔ́ kpɔ́n. Nú nǔ e tɔ́n ɖo dǒ ɔ́ wú ɔ́ gbló d'é jí ɔ́, vɔ̌sánú-xwlémawutɔ́ ɔ́ ná ná gbe ɖɔ è nǐ ɖe awǐnnya e wú nǔ tɔ́n ɖe lɛ́ɛ síin, bó bɛ́ sín toxo ɔ́ mɛ, bó bɛ́ kɔn nyi tɛn e ma nyí tɛn mímɛ́ ǎ é mɛ. É ná ɖɔ bɔ è nǎ xwlɛ́ dǒ ɔ́ wú gbɔn xɔ ɔ́ bǐ mɛ, bó ná bɛ́ sín toxo ɔ́ mɛ, bó bɛ́ kɔn nyi tɛn e ma nyí tɛn mímɛ́ ǎ é mɛ. Énɛ́ ɔ́ gúdo ɔ́, è nǎ zé awǐnnya ɖěvo lɛ́ɛ dó ɖyɔ́ éé è ɖe síin lɛ́ɛ, bó ná vɔ́ xɔ ɔ́ sín dǒ lɛ́ɛ tlɛ́ gbɔn xɔ ɔ́ mɛ. “Ényí è ko ɖe awǐnnya e wú nǔ tɔ́n ɖe lɛ́ɛ síin, bó ká xwlɛ́ dǒ ɔ́ bó vɔ́ tlɛ́, bɔ nǔ ɔ́ lɛ́ wá tɔ́n ɔ́, vɔ̌sánú-xwlémawutɔ́ ɔ́ ná lɛ́ yi kpɔ́n dǒ ɔ́. Nú é mɔ ɖɔ nǔ ɔ́ lɛ́ tɔ́n gbɔn xɔ ɔ́ mɛ bǐ ɔ́, hǔn, hwafunfun baɖabaɖa ɖé wɛ, bɔ è nɔ sixú ɖe síin ǎ. Xɔ ɔ́ ná húzú nǔblíblí. È nǎ gba xɔ ɔ́ bó ná bɛ́ awǐnnya lɛ́ɛ, atín lɛ́ɛ, kpódó nǔ e è dǒ tlɛ́ dǒ ɔ́ ná ɔ́ kpó sín toxo ɔ́ mɛ, bó bɛ́ kɔn nyi fí e nyí fí blíblí é. “Hwenu e hɔn ɔ́ ná ɖo súsú ɔ́, mɛ e ná byɔ́ xɔ ɔ́ mɛ ɔ́ ná nyí mɛ blíblí káká jɛ gbadanu. Mɛ e ná mlɔ́ xɔ mɔ̌hunkɔtɔn mɛ, abǐ é ná ɖu nǔ ɖ'é mɛ ɔ́, mɛ ɔ́ ɖó ná nya avɔ tɔn lɛ́ɛ. “Ée é vɔ́ dǒ ɔ́ tlɛ́ ɔ́, nú vɔ̌sánú-xwlémawutɔ́ ɔ́ lɛ́ kɔ yi xɔ ɔ́ mɛ, bó mɔ ɖɔ nǔ ɔ́ ɖě kún sɔ́ tɔ́n ɖo dǒ ɔ́ wú ó ɔ́, é ná ɖɔ xɔ ɔ́ nyí nǔ mímɛ́, ɖó è sú nǔ e tɔ́n ɖo dǒ ɔ́ wú ɔ́ sín kún dó. “Bónú è nǎ dó slá wǔ nú xɔ ɔ́, vɔ̌sánú-xwlémawutɔ́ ɔ́ ná yí xɛ we, bó ná yí sɛ́dlukpo, bó ná yí avɔxwɛ vɔvɔ cɛ́cɛ́, kpódó izɔ́puma kpó. É ná gbo gbe xɛ lɛ́ɛ ɖokpó, bɔ sin ná ɖo kogbán ɖé mɛ, bɔ è nǎ kun hun tɔn kɔn dó sin ɔ́ mɛ. É ná zé sɛ́dlukpo ɔ́, izɔ́puma ɔ́, avɔxwɛ vɔvɔ cɛ́cɛ́ ɔ́, kpódó xɛ e ɖo gbɛ ɔ́ kpó, bó ná nylɔ́ dó xɛ nukɔntɔn e è hu dó sin mɛ, ɖo kogbán mɛ ɔ́ sín hun mɛ, bó ná mi azɔn tɛ́nwe dó xɔ ɔ́ wú. Énɛ́ ɔ́, é ná zé xɛ sín hun ɔ́, sin ɖiɖi ɔ́, xɛ gbɛɖe ɔ́, sɛ́dlukpo ɔ́, kpódó avɔxwɛ vɔvɔ cɛ́cɛ́ ɔ́ kpó dó slá wǔ nú xɔ ɔ́. É ná tɔ́n sín toxo ɔ́ mɛ, bó ná yi gběhan mɛ, bó ná jó xɛ gbɛɖe ɔ́ dó, bɔ é ná zɔn yi. Lě e é ná bló gbɔn bó ná slá wǔ nú xɔ ɔ́, bɔ é ná húzú nǔ mímɛ́ ɔ́ nɛ́.” Sɛ́n e ɖɔ xó dó gudu tɛnmɛ tɛnmɛ lɛ́ɛ, lakpálakpá lɛ́ɛ, nǔ tɛnmɛ tɛnmɛ e nɔ tɔ́n ɖo avɔ mɛ, éé nɔ́ tɔ́n ɖo dǒ wú, nǔtitɛ, gun kpódó nǔ tɔ́n ɖo wǔ kpó lɛ́ɛ wú ɔ́ nɛ́. Sɛ́n énɛ́ ná zɔ́n bɔ è nǎ tunwun hwenu e mɛɖé abǐ nǔɖé ná nyí nǔblíblí abǐ nǔ mímɛ́ dó é. Sɛ́n e ɖɔ xó dó gudu wú ɔ́ nɛ́. Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ yě ní ɖɔ nú Izlayɛ́li ví lɛ́ɛ ɖɔ: “Nú súnnu ɖé bɛ́ azɔn dó súnnuxwé tɔn, bɔ sin nɔ wá yi ɔ́, sin ɔ́ nyí nǔblíblí. Azɔn énɛ́ ɔ́ wɛ zɔ́n bɔ é húzú mɛ blíblí. Sin ɖo súnnuxwé tɔn gosín wɛ kpó é glɔ́n cí mɛ kpó ɔ́, mɛ blíblí wɛ é nyí. Mɛ e sín súnnuxwé gosín wɛ sin ɖe ɔ́, é mlɔ́ zan ɖěbǔ jí ɔ́, zan ɔ́ ná húzú nǔblíblí. É jínjɔ́n nǔ ɖěbǔ jí ɔ́, nǔ ɔ́ ná húzú nǔblíblí. Mɛ e ná ɖ'alɔ zan ɔ́ wú ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Mɛ e ná jínjɔ́n nǔ e jí é jínjɔ́n ɔ́ jí ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Mɛ e ná ɖ'alɔ wǔ tɔn ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Nú é tún atán dó mɛɖé wú, bɔ mɛ ɔ́ nyí mɛ mímɛ́ ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Nǔ e jí é ná jínjɔ́n yi tomɛ ɔ́ bǐ ná húzú nǔblíblí. Mɛ e ná ɖ'alɔ nǔ e jí é jínjɔ́n ɔ́ wú ɔ́ ná húzú mɛ blíblí káká jɛ gbadanu. Mɛ e ka ná sɔ́ nǔ e jí é jínjɔ́n ɔ́, ná nya avɔ tɔn lɛ́ɛ, bó ná lɛ wǔ, bó ká ná nyí mɛ blíblí káká jɛ gbadanu. Nú azinzɔnnɔ ɔ́ má klɔ́ alɔ có bó ɖ'alɔ mɛ ɖé wú ǎ ɔ́, mɛ e wú é ɖ'alɔ ɔ́ ná nya avɔ tɔn lɛ́ɛ, bó ná lɛ wǔ, bó ká ná nyí mɛ blíblí káká jɛ gbadanu. Nú é ɖ'alɔ kogbán ɖěbǔ wú ɔ́, è nǎ hɛn kogbán ɔ́ gba. Nú é ɖ'alɔ nǔ e è zě atín dó bló ná ɔ́ ɖěbǔ wú ɔ́, è nǎ klɔ́ nǔ ɔ́ ganjí. “Nú azɔn gbɔ nú mɛ e ɖo azɔn ɔ́ jɛ wɛ ɔ́, é ná nɔ te nú azǎn tɛ́nwe cóbó ná slá wǔ. É ná nya avɔ tɔn lɛ́ɛ, bó ná zé sin dó lɛ wǔ. Énɛ́ ɔ́ gúdo ɔ́, é ná nyí mɛ mímɛ́. Azǎn tántɔngɔ́ ɔ́ gbe ɔ́, é ná zé xwelé we, abǐ ahwannɛ́ví we, bó ná yi Mawu Mavɔmavɔ nukɔn, ɖo goxɔ ɔ́ sín alihɛ́nnu, bó ná bɛ́ jó nú vɔ̌sánú-xwlémawutɔ́ ɔ́, bɔ vɔ̌sánú-xwlémawutɔ́ ɔ́ ná zé ɖokpó dó sá hwɛsɔ́kɛmɛvɔ́ ná, bó ná zé ɖokpó dó sá vɔ̌ e è nɔ dó zo ɔ́ ná; énɛ́ ɔ́, é ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, lobo ná súnsún hwɛ sín kɔ n'i ɖo Mawu Mavɔmavɔ nukɔn, ɖó sin e wá yi sín wǔ tɔn ɔ́ wú. “Ényí súnnusin wá yi sín mɛ ɖé wú ɔ́, mɛ ɔ́ ɖó ná lɛ wǔ; é ká ná nyí mɛ blíblí káká jɛ gbadanu. Avɔ abǐ anyǔ ɖěbǔ e wú súnnusin ɔ́ ná kɔn nyi ɔ́, è ɖǒ ná nya, bɔ é ká ná nyí nǔblíblí káká jɛ gbadanu. “Nú súnnu ɖé ɖó xó xá nyɔ̌nu ɖé ɔ́, yě mɛ we lɛ́ɛ ɖó ná lɛ wǔ; yě ká ná nyí mɛ blíblí káká jɛ gbadanu.” Mawu Mavɔmavɔ ɖɔ: “Nú nyɔ̌nu ɖé jɛ glegbe ɔ́, nyɔ̌nu énɛ́ ɔ́ ná nyí mɛ blíblí xɔ azǎn tɛ́nwe. Mɛ e ná ɖ'alɔ wǔ tɔn ɔ́ ná nyí mɛ blíblí káká jɛ gbadanu. Hwenu e nyɔ̌nu énɛ́ ɔ́ ná ɖo mɔ̌, bó ná mlɔ́ zan ɖěbǔ jí, abǐ é ná jínjɔ́n nǔ ɖěbǔ jí ɔ́, nǔ énɛ́ lɛ́ɛ húzú nǔblíblí. Mɛ ɖěbǔ ɖ'alɔ zan ɔ́ wú ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Mɛ ɖěbǔ ɖ'alɔ nǔ e jí é jínjɔ́n ɔ́ wú ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Nú nǔɖé ɖo zan e jí é mlɔ́ ɔ́, abǐ nǔ e jí é jínjɔ́n ɔ́, nú mɛ ɖé ɖ'alɔ wú ɔ́, mɛ ɔ́ ná nyí mɛ blíblí káká jɛ gbadanu. Nú súnnu ɖé ɖó xó xá nyɔ̌nu mɔ̌hun bónú hun va dó wǔ tɔn ɔ́, é ná nyí mɛ blíblí nyɔ̌nu ɔ́ ɖɔhun xɔ azǎn tɛ́nwe. Bɔ nǔ ɖěbǔ e jí é ná mlɔ́ ɔ́ ná nyí nǔblíblí. “Nú nyɔ̌nu ɖé má jɛ glegbe ǎ, bɔ hun ka wá yi sín wǔ tɔn xɔ azǎn gěgé abǐ nú glegbe tɔn dín zɛ azǎn e é ɖó ná bló ɔ́ wú ɔ́, é ná nyí mɛ blíblí káká jɛ hwenu e hun ɔ́ ná nɔ te dó é, hwenu e é jɛ glegbe ɔ́ ɖɔhun. Nú hun ɔ́ ɖo wǐwá yi sín wǔ tɔn wɛ, bónú é mlɔ́ zan ɖé jí ɔ́, zan ɔ́ ná húzú nǔblíblí hwenu e é jɛ glegbe ɔ́ ɖɔhun. É jínjɔ́n nǔɖé jí ɔ́, nǔ ɔ́ ná húzú nǔblíblí hwenu e é jɛ glegbe ɔ́ ɖɔhun. Mɛ e ná ɖ'alɔ nǔ énɛ́ lɛ́ɛ ɖě wú ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. “Nú hun e ɖo wǐwá yi sín wǔ tɔn wɛ ɔ́ gbo ɔ́, é ná nɔ te nú azǎn tɛ́nwe bó ná húzú mɛ mímɛ́. Azǎn tántɔngɔ́ ɔ́ gbe ɔ́, é ná zé xwelé we, abǐ ahwannɛ́ví we, bó ná bɛ́ yi jó nú vɔ̌sánú-xwlémawutɔ́ ɔ́ ɖo goxɔ ɔ́ sín alihɛ́nnu, bɔ vɔ̌sánú-xwlémawutɔ́ ɔ́ ná zé ɖokpó dó sá hwɛsɔ́kɛmɛvɔ́ ná; bó ná sɔ́ wegɔ́ ɔ́ dó sá vɔ̌ e è nɔ dó zo ɔ́ ná; énɛ́ ɔ́, vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i, ɖo Mawu Mavɔmavɔ nukɔn, ɖó hun e wá yi sín wǔ tɔn, bó zɔ́n bɔ é nyí mɛ blíblí ɔ́ wú. “Mi ná ɖɔ nú Izlayɛ́li ví lɛ́ɛ ɖɔ nú yě húzú mɛ blíblí hǔn, yě ní nɔ zɔ nú goxɔ ce; nú yě bló mɔ̌ ɔ́, yě ná kú ɖó mɛ blíblí e yě nyí ɔ́ wú ǎ. É wɛ nyí ɖɔ yě ná kú ɖó yě hɛn goxɔ e mɛ un nɔ nɔ ɖo tɛ́ntin yětɔn ɔ́ blí wú ǎ.” Sɛ́n e ɖɔ xó dó súnnu e bɛ́ azɔn dó súnnuxwé tɔn, abǐ súnnu e wú súnnusin wá yi sín, bɔ é húzú mɛ blíblí é wú ɔ́ nɛ́. É wɛ lɛ́ ɖɔ xó dó nyɔ̌nu e jɛ glegbe ɔ́ wú, bó ɖɔ dó súnnu abǐ nyɔ̌nu e wú sin wá yi sín ɔ́ wú, bó ɖɔ dó súnnu e ɖó xó xá nyɔ̌nu e má ɖo mǐmɛ́ jí ǎ é wú. Hwenu e Aalɔ́ɔn sín vǐ súnnu we hɛn myɔ yi Mawu Mavɔmavɔ nukɔn bó kú ɔ́, Mawu Mavɔmavɔ ɖɔ xó nú Mɔyízi. É ɖɔ n'i ɖɔ: “Đɔ nú nɔví towe Aalɔ́ɔn ɖɔ ní má nɔ byɔ́ tɛn mímɛ́ bǐ ɔ́ mɛ, ɖo xɔmɛgbovɔ ɔ́ gúdo hwebǐnu, ɖo fí e akɔjijɛgbá ɔ́ kpódó nusú tɔn kpó ɖe ɔ́ ó. É má nyí mɔ̌ ǎ ɔ́, é ná kú hwenu e un ná tɔ́n ɖo akpɔ́kpɔ́ mɛ, ɖo akɔjijɛgbá ɔ́ sín nusú jí é. “Cóbónú Aalɔ́ɔn ka ná byɔ́ tɛn mímɛ́ bǐ ɔ́ mɛ ɔ́, é ná to zé nyibúsú wínnyáwínnyá ɖokpó, bó ná dó sá vɔ̌ e nɔ́ súnsún hwɛ sín kɔ nú mɛ ɔ́ ná, bó ná zé agbo ɖokpó, bó ná dó sá vɔ̌ e è nɔ dó zo ɔ́ ná hwɛ̌. É ná lɛ wǔ, bó ná dó awu gaga, bó ná dó gbagwé, bó ná sin gǒjíblánú, bó ná sɔ́ tablá ɖó ta; lɛ̌ɛnkanvɔ wɛ è dǒ tɔ nǔ énɛ́ lɛ́ɛ bǐ. Nǔ énɛ́ lɛ́ɛ bǐ wɛ è sɔ́ ɖó vo nú Mawu Mavɔmavɔ. Izlayɛ́li togun ɔ́ ɖó ná ná gbǎgbá we, bɔ è nǎ dó sá hwɛsɔ́kɛmɛvɔ́ ɔ́, bó ná ná agbo ɖokpó, bɔ è nǎ dó sá vɔ̌ e è nɔ dó zo ɔ́ ná. “Aalɔ́ɔn ná zé nyibúsú ɔ́ dó sá hwɛsɔ́kɛmɛvɔ́, bó ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ é ɖésúnɔ tɔn kpódó xwédo tɔn lɛ́ɛ tɔn kpó. Énɛ́ ɔ́ gúdo ɔ́, é ná zé gbǎgbá we lɛ́ɛ wá Mawu Mavɔmavɔ nukɔn, ɖo goxɔ ɔ́ lihɛ́nnu. É ná nyi akɔ dó gbǎgbá we lɛ́ɛ, bó ná tunwun éé nyí Mawu Mavɔmavɔ tɔn é kpó éé nyí Azazɛ́li tɔn é kpó. É ná sɔ́ gbǎgbá e akɔ ɖe ɖɔ é nyí Mawu Mavɔmavɔ tɔn ɔ́ wá Mawu Mavɔmavɔ gɔ́n, bó dó sá hwɛsɔ́kɛmɛvɔ́ ɔ́ ná. Gbǎgbá e akɔ ɖe ɖɔ é nyí Azazɛ́li tɔn ɔ́, é ná zé gbɛɖe tɔn wá Mawu Mavɔmavɔ nukɔn; è nǎ nya ɛ sɛ́ dó gbětótló mɛ, dó súnsún hwɛ sín kɔ nú togun ɔ́. “Aalɔ́ɔn ná gbo gbe nyibúsú ɔ́ dó sá hwɛsɔ́kɛmɛvɔ́, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ é ɖésúnɔ tɔn kpó xwédo tɔn lɛ́ɛ tɔn kpó. É gbo gbe nyibúsú ɔ́ mɔ̌ ɔ́, é ná ɖe myɔkán ɖo vɔ̌sákpe e ɖo goxɔ Mawu Mavɔmavɔ tɔn nukɔn é jí, dó zǎlínkpɔ́nfyɔ́nú ɖé mɛ, bɔ é ná gɔ́, bó ná wún atínkɛn wǎnnɔ lili alɔgogo we, bó ná sɔ́ bǐ hɛn yi xɔmɛgbovɔ ɔ́ gúdo. Bó ná kɔn atínkɛn wǎnnɔ ɔ́ dó myɔkán ɔ́ jí ɖo zǎlínkpɔ́nfyɔ́nú ɔ́ mɛ, ɖo Mawu Mavɔmavɔ nukɔn fínɛ́; azizɔ e ná tɔ́n sín mɛ ɔ́ ná cyɔ́n akɔjijɛgbá ɔ́ kpó nusú tɔn kpó; énɛ́ ɔ́, Aalɔ́ɔn sɔ́ ná kú ǎ. É ná zé alɔví dó nyibúsú ɔ́ sín hun mɛ, bó ná mi dó akɔjɛgbánusú ɔ́ wú ɖo nukɔn azɔn ɖokpó, bó ná mi dó kɔ́ mɛ azɔn tɛ́nwe ɖo akɔjijɛgbá ɔ́ nukɔn. Énɛ́ ɔ́ gúdo ɔ́, é ná gbo gbe gbǎgbá e è sɔ́ ɖó te nú togun ɔ́ sín hwɛsɔ́kɛmɛ ɔ́, bó ná zé hun tɔn yi xɔmɛgbovɔ ɔ́ gúdo, bó ná zán lě e é zán nyibúsú ɔ́ sín hun gbɔn é. Mɔ̌ wɛ é ná bló lě e è nɔ bló gbɔn ɔ́ dó slá wǔ nú tɛn mímɛ́ bǐ ɔ́, ɖó nǔblíblí e Izlayɛ́li ví lɛ́ɛ wa é kpó sɛ́n e yě gba lɛ́ɛ kpó wú káká jɛ hwɛ e yě hu lɛ́ɛ bǐ jí. É ná slá wǔ nú fí e kpo ɖo goxɔ ɔ́ mɛ ɔ́ lɔ, ɖó mɛ blíblí lɛ́ɛ tɛ́ntin wɛ goxɔ ɔ́ ɖe. Sín hwenu e Aalɔ́ɔn ná yi slá wǔ nú tɛn mímɛ́ bǐ ɔ́ káká jɛ hwenu e é ná tɔ́n dó ɔ́, mɛ ɖěbǔ ɖó ná ɖo goxɔ ɔ́ mɛ ǎ. É ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ dó sá vɔ̌ e nɔ́ súnsún hwɛ sín kɔ nú mɛ ɔ́ dó é ɖésúnɔ ta mɛ, bó ná sá dó xwédo tɔn ta mɛ, bó sá dó Izlayɛ́li togun ɔ́ bǐ ta mɛ. É ná tɔ́n sín goxɔ ɔ́ mɛ bó ná yi vɔ̌sákpe e ɖo Mawu Mavɔmavɔ nukɔn ɔ́ kɔn, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó slá wǔ nú vɔ̌sákpe ɔ́. É ná wún nyibúsú ɔ́ kpódó gbǎgbá ɔ́ kpó sín hun, bó ná sá dó vɔ̌sákpe ɔ́ sín zo lɛ́ɛ wú lɛ́ lɛ̌ dó. É ná zé alɔví tɔn dó hun ɔ́ mɛ, bó ná mi dó vɔ̌sákpe ɔ́ wú azɔn tɛ́nwe; énɛ́ ɔ́, é ná slá wǔ n'i, bɔ é ná húzú nǔ mímɛ́, ɖó Izlayɛ́li ví lɛ́ɛ hɛn ɛ blí, ɖó hwɛ e yě hu lɛ́ɛ wú. “Nú Aalɔ́ɔn slá wǔ nú tɛn mímɛ́ bǐ ɔ́ fó, bó slá wǔ nú fí e ɖo goxɔ ɔ́ mɛ ɔ́ fó, lobo slá wǔ nú vɔ̌sákpe ɔ́ fó ɔ́, é ná ɖɔ bɔ è nǎ dɔn gbǎgbá e kpo ɖo gbɛ ɔ́ sɛ wá. É ná fɔ alɔ tɔn we lɛ́ɛ ɖó ta nú gbǎgbá ɔ́, bó ná ɖɔ nǔblíblí e Izlayɛ́li ví lɛ́ɛ wa lɛ́ɛ bǐ, kpó sɛ́n e yě gba lɛ́ɛ bǐ kpó, káká jɛ hwɛ e yě hu lɛ́ɛ bǐ jí, dó gbǎgbá ɔ́ jí, bó ná ɖíɖá hwɛgban tɔn ɛ, lobo ná ɖe mɛ ɖokpó, bɔ é ná kplá gbǎgbá ɔ́ yi gbětótló mɛ, bó ná jó e dó. Lě e gbǎgbá ɔ́ ná bɛ́ hwɛ e Izlayɛ́li ví lɛ́ɛ hu lɛ́ɛ bǐ yi axéko ɖé jí gbɔn ɔ́ nɛ́. “Nú è kplá gbǎgbá ɔ́ ɖidó gbětótló mɛ tlóló ɔ́, Aalɔ́ɔn ná lɛ́ kɔ wá goxɔ ɔ́ kɔn, bó ná ɖe awu e é dó bó byɔ́ tɛn mímɛ́ bǐ ɔ́ mɛ lɛ́ɛ kɔn nyi fínɛ́. É ná lɛ wǔ ɖo tɛn mímɛ́ ɖé mɛ, bó ná fɔ avɔ tɔn lɛ́ɛ dó. Énɛ́ ɔ́ gúdo ɔ́, é ná tɔ́n, bó ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ dó sá vɔ̌ e è nɔ dó zo ɔ́ dó é ɖésúnɔ ta mɛ, bó sá dó togun ɔ́ ta mɛ, bɔ é ná súnsún hwɛ sín kɔ nú é ɖésúnɔ kpó togun ɔ́ kpó. Énɛ́ ɔ́ gúdo ɔ́, é ná dó kanlin e è dǒ sá hwɛsɔ́kɛmɛvɔ́ ná ɔ́ sín jǒ zo ɖo vɔ̌sákpe ɔ́ jí. “Mɛ e kplá gbǎgbá e nyí Azazɛ́li tɔn ɔ́ yi gbětótló mɛ ɔ́ ɖó ná nya avɔ tɔn lɛ́ɛ, bó ná lɛ wǔ, cóbó ná byɔ́ fí e yě ɖǒ gɔnu ɖó é. Nyibúsú kpó gbǎgbá kpó e è dǒ sá hwɛsɔ́kɛmɛvɔ́ ɔ́ ná, bó zé hun yětɔn yi goxɔ ɔ́ mɛ, bó dó súnsún hwɛ sín kɔ nú togun ɔ́ lɛ́ɛ ɔ́, è ɖǒ ná bɛ́ yě sín fí e yě ɖǒ gɔnu ɖó ɔ́, bó ná fyɔ́ anyǔ yětɔn kpódó lan yětɔn kpó, kpódó mǐ yětɔn kpó. Mɛ e fyɔ́ nǔ énɛ́ lɛ́ɛ ɔ́ ɖó ná nya avɔ tɔn lɛ́ɛ, bó ná lɛ wǔ, cóbó ná byɔ́ fí e yě ɖǒ gɔnu ɖó é. “Sɛ́n ɖokpó wɛ nyí sɛ́n énɛ́ ɔ́, bɔ mi ná nɔ́ nyi; hǔn azǎn wǒgɔ́ ɔ́ e ɖo sun tɛ́nwegɔ́ ɔ́ mɛ ɔ́ gbe ɔ́, mi kpódó Izlayɛ́li ví lɛ́ɛ kpó, kpódó jǒnɔ e ɖo to mitɔn mɛ lɛ́ɛ kpó ná blá nu. Mi ná wa azɔ̌ ɖěbǔ ǎ. Mi ná nyi sɛ́n énɛ́ ɔ́ káká sɔ́yi. Gbe énɛ́ ɔ́ gbe wɛ è nǎ bló lě e è nɔ bló gbɔn dó súnsún hwɛ bǐ sín kɔ nú mɛ ɔ́, bɔ mi ná húzú mɛ mímɛ́ ɖo Mawu Mavɔmavɔ nukɔn. Mi ɖó ná zé azǎn énɛ́ ɔ́ dó ɖó gbɔjɛzán ná; mi ná wa nǔ ɖěbǔ ǎ; mi ná blá nu. Mi ná nyi sɛ́n énɛ́ ɔ́ káká sɔ́yi. “Mɛ e è nǎ dó ami ta ná, bó ná sɔ́ ɛ ɖó tɔ́ tɔn tɛnmɛ, bɔ é ná wa vɔ̌sánú-xwlémawutɔ́ ɖaxó zɔ́ ɔ́ wɛ ná nɔ́ bló lě e è nɔ bló gbɔn dó súnsún hwɛ sín kɔ nú mɛ é. É ná nɔ́ dó nǔ e è sɔ́ ɖó vo nú Mawu Mavɔmavɔ lɛ́ɛ; lɛ̌ɛnkanvɔ wɛ è dǒ tɔ nǔ énɛ́ lɛ́ɛ ná. É ná slá wǔ nú tɛn mímɛ́ bǐ ɔ́, bó ná slá wǔ nú fí e kpo ɖo goxɔ ɔ́ mɛ ɔ́, bó ná slá wǔ nú vɔ̌sákpe ɔ́, bó ná bló lě e è nɔ bló gbɔn ɔ́ dó súnsún hwɛ sín kɔ nú vɔ̌sánú-xwlémawutɔ́ lɛ́ɛ kpó togun ɔ́ bǐ kpó. “Sɛ́n ɖé wɛ sɛ́n énɛ́ ɔ́ nyí, bɔ mi ná nɔ́ nyi káká sɔ́yi, bɔ azɔn ɖokpó ɖo xwe ɖokpó mɛ ɔ́, è nǎ nɔ́ sá vɔ̌ e nɔ súnsún hwɛ sín kɔ nú mɛ ɔ́ dó Izlayɛ́li togun ɔ́ bǐ ta mɛ.” Ée Mɔyízi ɖɔ xó énɛ́ lɛ́ɛ nú Aalɔ́ɔn ɔ́, Aalɔ́ɔn bló nǔ e Mawu Mavɔmavɔ ɖɔ nú Mɔyízi é. Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn kpódó vǐ tɔn súnnu lɛ́ɛ kpó, kpódó Izlayɛ́li ví lɛ́ɛ bǐ kpó ɖɔ: “Izlayɛ́li ví ɖé jló ná zé nyibú, abǐ lɛ̌ngbɔ́, abǐ gbɔ̌ dó sá vɔ̌ ná ɖo fí e yě ɖó gɔnu ɖó ɔ́, abǐ é ná tɔ́n sín fí e yě ɖó gɔnu ɖó ɔ́, bó má to zé wá goxɔ ɔ́ lihɛ́nnu, bó zé xwlé Mawu Mavɔmavɔ hwɛ̌ ǎ ɔ́, é hu hwɛ, ɖó hun e é kɔn nyi ayǐ é wú; è nǎ ɖe e sín togun ɔ́ mɛ. Sɛ́n énɛ́ ɔ́ ná zɔ́n bɔ Izlayɛ́li ví lɛ́ɛ ná nɔ́ gbo gbe kanlin lɛ́ɛ ɖo fí ɖé kpowun ǎ; lo ɔ́, yě ná nɔ́ kplá yě wá nú vɔ̌sánú-xwlémawutɔ́ ɔ́, ɖo goxɔ ɔ́ lihɛ́nnu, bɔ é ná dó sá kɔnɖókpɔ́ vɔ́ ɔ́ nú Mawu Mavɔmavɔ. Vɔ̌sánú-xwlémawutɔ́ ɔ́ ná mi hun ɔ́ dó vɔ̌sákpe e ɖo goxɔ ɔ́ nukɔn ɔ́ wú, bó ná dó jǒ ɔ́ zo, bɔ wǎn tɔn ná nyɔ́ se nú Mawu Mavɔmavɔ. Énɛ́ ɔ́, yě sɔ́ ná nɔ́ sá vɔ̌ nú nǔɖoyɛswímɛ e ɖo gběhan mɛ, bɔ yě nɔ́ sɛn gɔ́ nú mì lɛ́ɛ ǎ. Sɛ́n énɛ́ ɔ́ ná nɔ ayǐ nú yě kpódó kúnkan yětɔn lɛ́ɛ kpó káká sɔ́yi. “Hǔn, a nǎ ɖɔ nú yě ɖɔ nú Izlayɛ́li ví ɖé, abǐ jǒnɔ e ɖo mi mɛ lɛ́ɛ ɖě ná sá vɔ̌ e è nɔ dó zo ɔ́, abǐ vɔ̌ ɖěvo ɔ́, é ɖó ná zé wá goxɔ ɔ́ nukɔn, bɔ è nǎ xwlé Mawu Mavɔmavɔ; é má bló mɔ̌ ǎ ɔ́, è nǎ ɖe e sín mi mɛ. “Nú Izlayɛ́li ví ɖé abǐ jǒnɔ e ɖo mi mɛ lɛ́ɛ ɖě ɖu hun ɔ́, é ná bó nyí hun alɔkpa ɖěbǔ wɛ ɔ́, nyɛ Mawu Mavɔmavɔ ná húzú kpan nukɔn ɛ, bó ná ɖe e sín Izlayɛ́li togun ɔ́ mɛ. Đó hun mɛ wɛ gbɛ ɖe. Nyɛ Mawu Mavɔmavɔ ɔ́, un ná mi bɔ mi ná zán ɖo vɔ̌sákpe jí, bɔ é ná súnsún hwɛ sín kɔ nú mi, bɔ mi ná nɔ gbɛ. Nǔgbó ɔ́, hun wɛ è nɔ dó súnsún hwɛ sín kɔ nú mɛ, ɖó é mɛ wɛ gbɛ ɖe. Énɛ́ ɔ́ wú wɛ nyɛ Mawu Mavɔmavɔ ɔ́ ɖo ɖiɖɔ nú mi Izlayɛ́li ví lɛ́ɛ wɛ ɖɔ, mi mɛ ɖěbǔ ní má ɖu hun ó, jǒnɔ e ɖo mi mɛ lɛ́ɛ lɔ ɖěbǔ ní má ɖu ó. “Nú Izlayɛ́li ví ɖé, abǐ jǒnɔ e ɖo mi mɛ lɛ́ɛ ɖě nya gbě, bó hu kanlin abǐ xɛ e má vɛ́ mɛ ǎ ɔ́ ɖě ɔ́, é ná lúlú hun tɔn kɔn nyi kɔ́ mɛ, bó kplɔ́ kɔ́ d'é jí. Đó nǔ ɖo gbɛ lɛ́ɛ ɔ́, hun e ɖo lan yětɔn mɛ ɔ́ mɛ wɛ gbɛ yětɔn ɖe. Énɛ́ ɔ́ wú wɛ nyɛ Mawu Mavɔmavɔ ɔ́, un ɖɔ nú Izlayɛ́li ví lɛ́ɛ ɖɔ yě kún ɖó ná ɖu nǔ ɖo gbɛ ɖěbǔ sín hun ó, ɖó hun e ɖo nǔ ɖo gbɛ ɖěbǔ sín lanmɛ ɔ́ mɛ wɛ gbɛ tɔn ɖe. Mɛ ɖěbǔ ɖu hun ɔ́, è nǎ ɖe e sín Izlayɛ́li togun ɔ́ mɛ. “Nú Izlayɛ́li ví lɛ́ɛ ɖě, abǐ jǒnɔ e ɖo mi mɛ lɛ́ɛ ɖě ɖu kanlin e nɔ é ɖóɖó bó kú, abǐ éé gběkanlin ɖé vún ɖu ɔ́ sín lan ɔ́, mɛ ɔ́ ɖó ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Énɛ́ ɔ́ gúdo ɔ́, é ná húzú mɛ mímɛ́. Nú é má ka nya avɔ tɔn lɛ́ɛ, bó lɛ wǔ ǎ ɔ́, hwɛ tɔn ná nɔ kɔ n'i.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Nyɛ wɛ nyí Mawu Mavɔmavɔ, Mawu mitɔn! Mi ma nɔ wa nǔ e è nɔ wa ɖo Ejípu fí e mi nɔ é ó. Mi ma ka wa nǔ e è nɔ wa ɖo Kanáa fí e un kplá mi xwe ɔ́ ó. Mi ma xwedó walɔ yětɔn lɛ́ɛ ó. Nǔ e un zɔ́n lɛ́ɛ wɛ mi ná nɔ́ bló. Sɛ́n ce lɛ́ɛ wɛ mi ná nɔ́ nyi. Nyɛ wɛ nyí Mawu Mavɔmavɔ, Mawu mitɔn. “Hǔn, mi ná nɔ́ nyi sɛ́n ce lɛ́ɛ; mi ná nɔ́ wa nǔ e un zɔ́n lɛ́ɛ. Mɛ e ná bló mɔ̌ ɔ́ ná nɔ gbɛ. Nyɛ wɛ nyí Mawu Mavɔmavɔ. “Izlayɛ́li ví ɖěbǔ ɖó ná ɖó xó xá nyɔ̌nu e nyí mɛ tɔn é ǎ. Nyɛ wɛ nyí Mawu Mavɔmavɔ. “Mi ɖó ná ɖó xó xá nɔ mitɔn, bó dó kɔ́n tɔ́ mitɔn wi ǎ. Nú mi bló mɔ̌ ɔ́, mi ná kɔ́n nɔ mitɔn lɔ sín wi, ɖó é wɛ ji mi. “Mi ɖó ná ɖó xó xá tɔ́ mitɔn sín asi ǎ; nú mi bló mɔ̌ ɔ́, mi kɔ́n tɔ́ mitɔn sín wi. “Mi ɖó ná ɖó xó xá tɔ́ mitɔn, abǐ nɔ mitɔn sín vǐ ǎ. Nú é ná bó má nɔ hɛ̌nnu ɖokpó ɔ́ mɛ xá mi bó su ǎ ɔ́, mi ɖó ná ɖó xó xá ɛ ǎ. “Mi ɖó ná ɖó xó xá vǐ mitɔn súnnu abǐ nyɔ̌nu sín vǐ ǎ. Nú mi bló mɔ̌ ɔ́, mi kɔ́n miɖée wi. “Mi ɖó ná ɖó xó xá tɔ́ mitɔn sín asi ɖé sín vǐ ǎ; é va dó tɔ́ mitɔn wú; hǔn nɔví mitɔn wɛ é nyí. “Mi ɖó ná ɖó xó xá daányɔ̌nu ɖé ǎ, ɖó tɔ́ mitɔn nɔví wɛ é nyí. “Mi ɖó ná ɖó xó xá nafí abǐ nagán ɖé ǎ, ɖó nɔ mitɔn nɔví wɛ é nyí. “Mi ɖó ná ɖó xó xá atagán mitɔn abǐ ataví mitɔn sín asi, bó dó kɔ́n tɔ́ mitɔn sín wi ǎ; ɖó tɔ́ mitɔn nɔví sín asi wɛ é nyí. “Mi ɖó ná ɖó xó xá vǐ mitɔn sín asi ǎ. “Mi ɖó ná ɖó xó xá nɔví mitɔn sín asi bó dó kɔ́n nɔví mitɔn sín wi ǎ. “Mi ɖó ná ɖó xó xá nyɔ̌nu ɖé, bó lɛ́ ɖó xó xá vǐ tɔn ǎ; mi ka ɖó ná ɖó xá vǐvú tɔn nyɔ̌nu ǎ. Nú mi blǒ mɔ̌ hǔn, nǔblíblí tawun wɛ mi wa; ɖó mɛ mitɔn tawun wɛ yě nyí. “Nú asi mitɔn kpo ɖo gbɛ ɔ́, mi ɖó ná da nɔví tɔn ǎ. Nú mi bló mɔ̌ ɔ́, mi ná dɔn hunnyahunnya byɔ́ tɛ́ntin yětɔn. “Mi ɖó ná ɖó xó xá nyɔ̌nu ɖé hwenu e é jɛ glegbe ɔ́ ǎ; ɖó mɛ blíblí wɛ nyɔ̌nu ɔ́ nyí hwenɛ́nu. “Mi ɖó ná ɖó xó xá gbɛ̌ mitɔn ɖé sín asi ǎ; nú mi bló mɔ̌ ɔ́, é ná hɛn mi blí. “Mi ɖó ná zé vǐ mitɔn lɛ́ɛ dó sá vɔ̌ nú vodún Mɔlɛ́ki ǎ. Nú mi bló mɔ̌ ɔ́, mi ná hɛn nyǐkɔ ce blí; nyɛ wɛ nyí Mawu Mavɔmavɔ. “Súnnu súnnu ɖó ná ɖó xó xá yěɖée ǎ; yě nyí súnnu kpó nyɔ̌nu kpó ǎ. Mi bló mɔ̌ hǔn, su wɛ mi ɖu. “Mi ɖó ná ɖó xó xá kanlin ǎ, ɖó é ná hɛn mi blí. Mɔ̌ ɖokpó ɔ́, nyɔ̌nu ɖěbǔ ɖó ná jó éɖée nú kanlin bɔ é ná ɖó xó xá ɛ ǎ; é bló mɔ̌ hǔn, nǔ e è ma ɖó ná wa gbeɖé ǎ ɔ́ wɛ é wa. “Mi ma zán walɔ énɛ́ lɛ́ɛ ɖěbǔ ó; mi bló mɔ̌ ɔ́, mi ná hɛn miɖée blí; mɔ̌ wɛ togun e nya gbé un ja, bɔ mi ná yí tɛn yětɔn lɛ́ɛ wa nǔ gbɔn, bó húzú mɛ blíblí. To ɔ́ ɖésú húzú to blíblí; un dɔn tó n'i bɔ é slú to ɔ́ mɛ nu lɛ́ɛ. “Hǔn, mi Izlayɛ́li ví lɛ́ɛ, kpódó mi jǒnɔ e ɖo Izlayɛ́li ví lɛ́ɛ mɛ lɛ́ɛ kpó ní nyi sɛ́n ce lɛ́ɛ, bó nɔ́ wa nǔ e un zɔ́n lɛ́ɛ. Mi gbɛ́ walɔ gblégblé énɛ́ lɛ́ɛ bǐ; su wɛ. Nǔ énɛ́ lɛ́ɛ wɛ mɛ e nɔ to ɔ́ mɛ jɛ nukɔn nú mi lɛ́ɛ dó sin, bɔ to ɔ́ húzú to blíblí. Mi ma hɛn to ɔ́ blí, bónú to ɔ́ wá slú mi lě e é slú mɛ e jɛ nukɔn nú mi lɛ́ɛ gbɔn é ó. Nǔgbó ɔ́, mɛ e nɔ wa nǔ e è ma ɖó ná bló gbeɖé ǎ lɛ́ɛ ɔ́, è nǎ ɖe yě bǐ sín Izlayɛ́li togun ɔ́ mɛ. “Mi xwedó nǔ e un ɖɔ nú mi lɛ́ɛ, bó nɔ gbejí ná. Mi ma xwedó walɔ gblégblé e ko ɖo to ɔ́ mɛ ɖ'ayǐ có mi wa ɔ́ ó; mi bló mɔ̌ ɔ́, mi ná hɛn miɖée blí. Nyɛ wɛ nyí Mawu Mavɔmavɔ, Mawu mitɔn.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ bǐ ɖɔ: “Mi nyí mɛ mímɛ́, ɖó nyɛ Mawu Mavɔmavɔ, Mawu mitɔn ɔ́, mǐmɛ́ wɛ un nyí. “Mi ɖokpó ɖokpó ɖó ná nɔ́ sí tɔ́ mitɔn kpódó nɔ mitɔn kpó, bó ná nɔ́ nyi gbɔjɛzán ɔ́; nyɛ wɛ nyí Mawu Mavɔmavɔ, Mawu mitɔn. “Mi ma lɛ́ kɔ yi vodún lɛ́ɛ kɔn ó; mi ma ka sínsín gan dó kɔn bǒcyɔ ná ó. Nyɛ wɛ nyí Mawu Mavɔmavɔ, Mawu mitɔn. “Mi ɖo kɔnɖókpɔ́ vɔ́ ná sá nú nyɛ Mawu Mavɔmavɔ wɛ hǔn, mi sá lě e mi ná sá gbɔn bɔ un ná yí é. Kanlin e mi ná dó sá vɔ̌ ɔ́ ná ɔ́, mi ná ɖu lan tɔn gbe énɛ́ gbe, bó ɖu ayǐhɔ́ngbe. É lɛ́ kpo jɛ azǎn atɔn gbe ɔ́, mi ná dó zo. Ényí mɛɖé ɖu lan énɛ́ ɔ́ azǎn tɔn atɔngɔ́ ɔ́ gbe ɔ́, un ná yí mɛ énɛ́ ɔ́ sín vɔ̌ ǎ, ɖó lan énɛ́ ɔ́ húzú suɖunú. Mɛ e ná ɖu ɔ́, hwɛ tɔn ná nɔ kɔ n'i, ɖó é ɖu su nú nǔ e nyí nyɛ Mawu Mavɔmavɔ ɔ́ tɔn é. È nǎ ɖe mɛ énɛ́ ɔ́ sín togun ɔ́ mɛ. “Nú mi ɖo nǔkún ya wɛ hǔn, mi ma ya éé wú gbɔn gle mitɔn lɛ́ɛ tó é ó. Mi ka ya nǔkún ɔ́, mi ná lɛ́ kɔ wá cyán nǔkún e mi blɛ́ lɛ́ɛ ǎ. Mɔ̌ ɖokpó ɔ́, mi ma lɛ́ kɔ yi gbɛ vǐwun e mi blɛ́ gbɔn vǐwungbo mitɔn lɛ́ɛ mɛ lɛ́ɛ ó; mi ma ka cyán éé kɔn nyi kɔ́ mɛ lɛ́ɛ ó; mi ná jó dó nú wamamɔnɔ lɛ́ɛ, kpódó jǒnɔ lɛ́ɛ kpó. Nyɛ wɛ nyí Mawu Mavɔmavɔ, Mawu mitɔn. “Mi ma jɛ ajo dó miɖée ó; mi ma hízí miɖée ó; mi ma ka ɖó adingban nú miɖée ó. Mi ma ɖó adingban bó xwlé nyǐkɔ ce d'é jí ó, ɖó nú mi bló mɔ̌ ɔ́, mi ná sɔ́ nyɛ Mawu mitɔn sín nyǐkɔ xo kɔ́. Nyɛ wɛ nyí Mawu Mavɔmavɔ. “Mi ma táfú nɔzo mitɔn ó; mi ma ka fin mɛɖé nú ó; mi ma gɔn axɔ́ sú mɛ e wa azɔ̌ nú mi é, bónú ayǐ hɔ́n dó ó. Mi ma zun tókúnɔ ó, mi ma ka sɔ́ nǔ ɖó alixo nú nukúntíntɔ́nnɔ bónú é wá klɛ́n afɔ d'é wú ó. Mi ná ɖi xɛsi nú nyɛ Mawu mitɔn. Nyɛ wɛ nyí Mawu Mavɔmavɔ. “Mi ma dó hwɛ agɔ ó. Mi ɖo hwɛ ɖɔ wɛ hǔn, mi ma kpɔ́n wamamɔnɔ nukún ta dó ɖɔ hwɛ ó, mi ma ka kpɔ́n dɔkunnɔ nukún ta dó ɖɔ hwɛ ó. Mi xwedó hwɛjijɔ dó ɖɔ hwɛ. Mi ma ɖo hɛ̌n dó nɔzo mitɔn kpé wɛ ó; mi ma ka dó hwɛ nɔzo mitɔn dó acɛ jí, bónú é sín énɛ́ wú, bɔ è ɖǒ kúhwɛ n'i ó. Nyɛ wɛ nyí Mawu Mavɔmavɔ. “Mi ma gbɛ́ wǎn nú nɔzo mitɔn ó; é wa nǔ nyi do hǔn, mi gbɛ́ n'i; amɔ̌, mi ma hɛn ɛ dó xomɛ, bó wá hu hwɛ ó. Mi ma ba hlɔn ó; mi ma ka hɛn to mitɔn mɛ nu lɛ́ɛ dó xomɛ ó. Lo ɔ́, mɛ ɖokpó ɖokpó ɖó ná yí wǎn nú nɔzo tɔn é ɖésúnɔ ɖɔhun. Nyɛ wɛ nyí Mawu Mavɔmavɔ. “Mi ná nyi sɛ́n ce lɛ́ɛ. Mi ma dɔn kanlin alɔkpa vovo we kplé, bónú yě dó ava nú yěɖée ó. Mi ma dó nǔkún alɔkpa vovo we dó gle ɖokpó ɔ́ mɛ ó; mi ma dó avɔ e è sɔ́ kan alɔkpa vovo we dó lɔn ná ɔ́ sín awu ó. “Nú nyɔ̌nu ɖé nyí kannumɔ bó má ko jɛ éɖée sí ǎ, bɔ è ma ko vɔ́ ɛ xɔ ǎ, bɔ é ká kó ɖó asú xɔ́ntɔn, bónú súnnu ɖé ɖó xó xá ɛ ɔ́, è nǎ dɔn tó nú yě mɛ we lɛ́ɛ bǐ; amɔ̌, è nǎ hu yě, ɖó nyɔ̌nu ɔ́ kpo ɖo mɛ kannu wú ǎ. Súnnu ɔ́ ná hɛn agbo e é ná dó sú hwɛ xɔ́ é ɖokpó wá nú Mawu Mavɔmavɔ ɖo goxɔ ɔ́ nukɔn, bɔ è nǎ dó sá hwɛxɔ́súsú vɔ́. Vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó sá hwɛxɔ́súsú vɔ́ ɔ́, bó ná súnsún hwɛ sín kɔ n'i, ɖo Mawu Mavɔmavɔ nukɔn, bɔ Mawu Mavɔmavɔ ná sɔ́ hwɛ tɔn kɛ ɛ. “Nú mi yi Kanáa, bó dó atínsínsɛ́n tɛnmɛ tɛnmɛ lɛ́ɛ bǐ ɔ́, mi ná mɔ sínsɛ́n lɛ́ɛ dó mɔ nǔ vɛ́ mɛ káká nú xwe atɔn; mi ná ɖu ǎ. Xwe ɛnɛgɔ́ ɔ́ mɛ ɔ́, sínsɛ́n e yě ná ná lɛ́ɛ ɔ́, mi ná sɔ́ ɖó vo dó kpa susu nú nyɛ Mawu Mavɔmavɔ. Xwe atɔ́ɔ́ngɔ́ ɔ́ mɛ ɔ́, sínsɛ́n e mi ná gbɛ lɛ́ɛ ná nyí mi ɖésúnɔ tɔn. Mi bló mɔ̌ ɔ́, ji ná nɔ́ ɖo jijɛ nú mi d'é jí wɛ. Nyɛ wɛ nyí Mawu Mavɔmavɔ, Mawu mitɔn. “Mi ma ɖu lan hunmú ɖo nu ó. Mi ma bló majíki ó; mi ma kan nǔ ó. Mi ma sín ɖa ɖó ta toboo ó; mi ma xwlɛ́ gekplá mitɔn lɛ́ɛ ó. Mi ma já wǔtu miɖée tɔn ó; mi ma ka gbo hwɛ ó; mi ma wa nǔ énɛ́ lɛ́ɛ dó ɖe xlɛ́ ɖɔ émí ɖo aluwɛ mɛ ó. Nyɛ wɛ nyí Mawu Mavɔmavɔ. “Mi ma jó nyɔ̌nuví mitɔn lɛ́ɛ dó, bónú yě ní lɛ aga dó sɛn hun, bɔ wi ná kɔ́n sín ta nú yě ó; é má nyí mɔ̌ ǎ ɔ́, to ɔ́ bǐ táá bɛ́ aga, bɔ hɛ̌nnú ná kpé to ɔ́ mɛ. Mi nyi gbɔjɛzán ɔ́, bó ɖó sísí nú goxɔ ce. Nyɛ wɛ nyí Mawu Mavɔmavɔ. “Mi ma kan bo ó; mi ma ka kan nǔ ó; é má nyí mɔ̌ ǎ ɔ́, mi táá hɛn miɖée blí. Nyɛ wɛ nyí Mawu Mavɔmavɔ, Mawu mitɔn. “Mi mɔ mɛxó, hwa ɖo ta ɔ́, mi ná nɔ́ sí te kpó sísí kpó. Mi ná ɖó sísí nú nyɛ Mawu mitɔn. Nyɛ wɛ nyí Mawu Mavɔmavɔ. “Nú jǒnɔ ɖé wá jɛ to mitɔn mɛ hǔn, mi ma blɛ́ ɛ ɖu ó. É nyɔ́ wa ɔ́, mi ní hɛn ɛ ɖi to mitɔn mɛ nu wɛ é nyí ɖɔhun; mi ɖó ná yí wǎn n'i mi ɖésúnɔ ɖɔhun; mi ní flín ɖɔ émí ɖésúnɔ kó nyí jǒnɔ ɖo Ejípu tomɛ kpɔ́n. Nyɛ wɛ nyí Mawu Mavɔmavɔ, Mawu mitɔn. “Mi ɖo hwɛ ɖɔ wɛ hǔn, mi má dó hwɛ agɔ ó. Mi ma zé nǔjlɛ́kpo e má sɔgbe é ǎ dó jlɛ́ nǔ ó; mi ma zé nǔdagan e ma sɔgbe ǎ é dó da nǔ ó; mi ma ka zé nǔjlɛ́ká e ma sɔgbe ǎ é dó jlɛ́ nǔ ó. É nyɔ́ wa ɔ́, nǔdagan e sɔgbe ɔ́ wɛ mi ná nɔ́ zán; kilóo e sɔgbe ɔ́ wɛ mi ná nɔ́ zán, nǔjlɛ́nú e sɔgbe ɔ́ wɛ mi ná nɔ́ zán. Nyɛ wɛ nyí Mawu Mavɔmavɔ, Mawu mitɔn e ɖe mi tɔ́n sín Ejípu é. “Mi ná nyi sɛ́n ce lɛ́ɛ bǐ, bó ná xwedó nǔ e un ɖɔ lɛ́ɛ bǐ. Mi ná nɔ xwedó yě dó wa nǔ. Nyɛ wɛ nyí Mawu Mavɔmavɔ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Nú Izlayɛ́li ví abǐ jǒnɔ e ɖo Izlayɛ́li lɛ́ɛ ɖě sɔ́ vǐ tɔn lɛ́ɛ ɖě dó sá vɔ̌ nú vodún Mɔlɛ́ki ɔ́, è nǎ ɖó kúhwɛ n'i; togun ɔ́ ná nyi hwǎn dó hu i. Nyɛ ɖésú ná húzú kpan nukɔn ɛ; un ná ɖe e sín Izlayɛ́li togun ɔ́ mɛ, ɖó é ná vǐ tɔn lɛ́ɛ ɖě vodún Mɔlɛ́ki. Nǔ énɛ́ ɔ́ hɛn goxɔ ce blí, bó zé nyǐkɔ ce xo kɔ́. Nú Izlayɛ́li ví lɛ́ɛ myɔ́ nukún dó nǔ énɛ́ lɛ́ɛ, bó má hu mɛ ɔ́ ǎ ɔ́, nyɛ Mawu Mavɔmavɔ ɔ́ ɖésú ná sí te dó mɛ ɔ́ jí, bó ná sí te dó xwédo tɔn jí. Un ná ɖe e sín Izlayɛ́li togun ɔ́ mɛ; un ná ɖe mɛ e kpó é kpó nɔ́ sɛn vodún Mɔlɛ́ki lɛ́ɛ bǐ sín Izlayɛ́li togun ɔ́ mɛ. “Nú mɛɖé nɔ́ kan bo, abǐ nɔ́ kan nǔ ɔ́, nyɛ Mawu Mavɔmavɔ ɔ́, un ná húzú kpan nukɔn mɛ ɔ́; un ná ɖe e sín Izlayɛ́li togun ɔ́ mɛ; ɖó mɛ e nɔ wa nǔ gbɔn mɔ̌ ɔ́, ɖo gbejí nú mì ǎ. “Mi sɔ́ miɖée ɖó vo bó ná nyí ce, ɖó Mawu Mavɔmavɔ, Mawu mitɔn wɛ un nyí.” “Mi kpé nukún dó sɛ́n ce lɛ́ɛ wú bó nyi ganjí. Nyɛ wɛ nyí Mawu Mavɔmavɔ e sɔ́ mi ɖó vo, bɔ mi ná nyí togun ce é. “Nú mɛɖé dó nu tɔ́ tɔn abǐ nɔ tɔn ɔ́, è ɖǒ ná hu i dandan. É ɖésúnɔ wɛ kú tɔn kan, ɖó é dó nu mɛjitɔ́ tɔn lɛ́ɛ. “Nú súnnu ɖé ba mɛsi ɔ́, nú súnnu ɖé ba nɔzo tɔn sín asi mɔ̌ ɔ́, è nǎ hu súnnu e ba mɛsi ɔ́ kpódó nyɔ̌nu e dó afɔ gbě ɔ́ kpó dandan. “Nú súnnu ɖé ba tɔ́ tɔn sín asi ɔ́, wi wɛ é kɔ́n nú tɔ́ tɔn. È ɖǒ ná hu súnnu ɔ́ kpó nyɔ̌nu ɔ́ kpó dandan. Yě ɖésúnɔ kɔ wɛ kú yětɔn ná nɔ. “Nú súnnu ɖé ba vǐ tɔn sín asi ɔ́, è nǎ hu súnnu ɔ́ kpódó nyɔ̌nu ɔ́ kpó dandan, ɖó hɛ̌nnú wɛ yě wa. Yě ɖésúnɔ kɔ wɛ kú yětɔn ná nɔ. “Nú súnnu súnnu ɖó xó xá yěɖée ɔ́, su wɛ yě ɖu. È nǎ hu yě mɛ we lɛ́ɛ dandan. Yě nyí súnnu kpó nyɔ̌nu kpó ǎ. Yě ɖésúnɔ kɔ wɛ kú yětɔn ná nɔ. “Nú súnnu ɖé da vǐ kpódó nɔ kpó ɔ́, hɛ̌nnú wɛ yě wa; è ɖǒ ná dó súnnu ɔ́ kpó nyɔ̌nu we lɛ́ɛ bǐ kpó zo gbɛɖe gbɛɖe, bónú walɔ énɛ́ ɖě má sɔ́ tíin ɖo tɛ́ntin mitɔn ó. “Nú súnnu ɖé ɖó xó xá kanlin ɔ́, è ɖǒ ná hu i dandan, bó ná hu kanlin ɔ́ lɔmɔ̌ dandan. “Nú nyɔ̌nu ɖé jó éɖée nú kanlin bɔ é ɖó xó xá ɛ ɔ́, è nǎ hu nyɔ̌nu ɔ́ kpódó kanlin ɔ́ kpó. È ɖǒ ná hu yě dandan; yě ɖésúnɔ kɔ wɛ kú yětɔn ná nɔ. “Nú súnnu ɖé da tɔ́ ví, abǐ nɔ tɔn ví, bó ɖó xó xá ɛ ɔ́, wunhínhɔ́nnú wɛ yě wa. È nǎ ɖe yě sín togun ɔ́ mɛ, ɖo mɛ bǐ nukún mɛ; xó wɛ é ɖó xá nɔví tɔn, hwɛ tɔn ná nɔ kɔ n'i. “Nú súnnu ɖé ɖó xó xá nyɔ̌nu e jɛ glegbe ɔ́, è nǎ ɖe yě mɛ we lɛ́ɛ bǐ tɔ́n sín Izlayɛ́li togun ɔ́ mɛ; ɖó yě ɖó gbe kpɔ́, bó mɔ fí e hun nɔ tɔ́n sín é. “Mi ɖó ná ɖó xó xá daányɔ̌nu mitɔn ǎ, mi ka ɖó ná ɖó xó xá nafí abǐ nagán mitɔn ǎ. Nú súnnu ɖé ɖó xó xá hɛ̌nnumɔ tɔn e sɛkpɔ́ ɛ mɔ̌ ɔ́, hwɛ yě mɛ we lɛ́ɛ tɔn ná nɔ kɔ nú yě. “Nú súnnu ɖé ɖó xó xá atagán tɔn, ataví tɔn, abǐ nylɔ tɔn sín asi ɔ́, wi wɛ é kɔ́n nú mɛ e sín asi é ɖó xó xá é; hwɛ súnnu ɔ́ tɔn kpó nyɔ̌nu ɔ́ tɔn kpó ná nɔ kɔ nú yě, bɔ yě ná kú ma ɖó vǐ. “Nú súnnu ɖé yí nɔví tɔn sín asi ɔ́, winnyánú wɛ yě mɛ we lɛ́ɛ wa; yě ná ɖó vǐ ǎ, ɖó súnnu ɔ́ kɔ́n nɔví tɔn sín wi. “Mi kpé nukún dó sɛ́n ce lɛ́ɛ wú bó nyi ganjí, bó kpé nukún dó nǔ e un zɔ́n lɛ́ɛ wú, bó bló gbɔn jí, bónú to e mɛ ná kplá mi yi wɛ un ɖe ɔ́ má wá slú mi sín kɔ ó. Mi ma xwedó togun e nya sín to lɛ́ɛ mɛ gbé wɛ un ja lɛ́ɛ sín walɔ lɛ́ɛ ó. Nǔ énɛ́ e yě wa nyi do ɔ́ wú wɛ un gbɛ́ wǎn nú yě. Bó ɖɔ nú yě ɖɔ: ‘Mitɔn wɛ ayǐkúngban yětɔn ná nyí; to énɛ́ e mɛ anɔ̌sin kpódó wǐin kpó gɔ́ ɔ́, nyɛ wɛ ná mi.’ Nyɛ wɛ nyí Mawu Mavɔmavɔ, Mawu mitɔn e ɖe mi ɖó vo nú togun ɖě lɛ́ɛ é. Énɛ́ ɔ́ wú wɛ mi ɖó ná tunwun kanlin e vɛ́ mi lɛ́ɛ kpódó éé má vɛ́ mi ǎ lɛ́ɛ kpó; mi ɖó ná tunwun xɛ e vɛ́ mi lɛ́ɛ, kpódó éé má vɛ́ mi ǎ lɛ́ɛ kpó; mi ɖó ná ɖ'alɔ kanlin énɛ́ lɛ́ɛ, xɛ énɛ́ lɛ́ɛ, abǐ nǔvínúví énɛ́ lɛ́ɛ e vɛ́ mi lɛ́ɛ wú, bó dó hɛn miɖée blí ǎ. Un ɖe ɖě ɖó vo nú ɖě bónú mi ná tunwun éé vɛ́ mi lɛ́ɛ. “Mi nyí nyɛ ɖokpónɔ géé tɔn, bó ná nyí mɛ mímɛ́, ɖó nyɛ Mawu Mavɔmavɔ ɔ́, mǐmɛ́ wɛ un nyí. Un ɖe mi ɖó vo nú akɔta ɖě lɛ́ɛ, bónú mi ná nyí ce. “Nú súnnu ɖé, abǐ nyɔ̌nu ɖé, nɔ́ kan bo, bó nɔ́ kan nǔ byɔ́ mɛkúkú lɛ́ɛ nú mɛ ɔ́, è ɖǒ ná hu yě; hwǎn wɛ è nǎ nyi dó hu yě ná. Yě ɖésúnɔ kɔ wɛ kú yětɔn ná nɔ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn ví súnnu vɔ̌sánú-xwlémawutɔ́ lɛ́ɛ ɖɔ: “Vɔ̌sánú-xwlémawutɔ́ ɖó ná sɛkpɔ́ mɛ tɔn ɖé sín cyɔ ǎ; é táá hɛn éɖée blí. Afi nú mɛ e kú ɔ́ nyí mɛ tɔn jɔnwun; é sixú nyí nɔ tɔn, abǐ tɔ́ tɔn, abǐ vǐ tɔn, abǐ nɔví tɔn súnnu. É ká nyí nɔví tɔn nyɔ̌nu wɛ, bó kpo ɖo alɔ jí ɔ́, é sixú ɖ'alɔ cyɔ tɔn wú, ɖó éyɛ́ kó yi asú ɖé xwé ǎ. Gǎn wɛ vɔ̌sánú-xwlémawutɔ́ nyí ɖo mɛ tɔn lɛ́ɛ mɛ; é ɖó ná hɛn éɖée blí ǎ; é táá sɔ́ éɖée xo kɔ́. “Nú cyɔ kú ɔ́, vɔ̌sánú-xwlémawutɔ́ lɛ́ɛ ɖó ná xwlɛ́ ahɔnxlomɛ ǎ; yě ɖó ná xwlɛ́ gekplá yětɔn ǎ; yě ká ɖó ná já wǔtu ǎ. Yě ɖó ná sɔ́ yěɖée ɖó vo nú azɔ̌ ce, bó ná lɔn bɔ nyǐkɔ ce ná xo kɔ́ ǎ. Yě wɛ nɔ́ xwlé vɔ̌ e è dó zo ɔ́ nyɛ Mawu Mavɔmavɔ, Mawu yětɔn; nǔɖuɖu ce wɛ. Énɛ́ wútu wɛ yě ɖó ná sɔ́ yěɖée ɖó vo nú mì. “Vɔ̌sánú-xwlémawutɔ́ ɖó ná da nyɔ̌nu agalɛtɔ́, abǐ nyɔ̌nu e súnnu ɖěvo ko ɖó xó xá é ǎ; é ká ɖó ná da nyɔ̌nu e asú tɔn kó gbɛ́ é ǎ, ɖó mɛɖeɖóvo wɛ vɔ̌sánú-xwlémawutɔ́ bǐ nyí nú Mawu Mavɔmavɔ tɔn. Izlayɛ́li ví ɖokpó ɖokpó ɖó ná tunwun mɛɖeɖóvo Mawu tɔn e vɔ̌sánú-xwlémawutɔ́ lɛ́ɛ nyí ɔ́ sín tɛnmɛ nú yě, ɖó yě wɛ nɔ xwlé nǔɖuɖu e mi nɔ ná nyɛ Mawu mitɔn ɔ́ mì. Mɛ ɖěbǔ ní bó má hɛn mɛ mímɛ́ e yě nyí ɔ́ gblé ó. Nyɛ Mawu Mavɔmavɔ e sɔ́ mi Izlayɛ́li ví lɛ́ɛ, bónú mi ná nyí togun ɖe ɖó vo ɔ́, mǐmɛ́ wɛ un nyí. “Nú vɔ̌sánú-xwlémawutɔ́ ɖé sín vǐ nyɔ̌nu sɔ́ aga dó kɔ́n wi nú éɖée ɔ́, tɔ́ tɔn ɖésú wɛ é kɔ́n wi ná; è ɖǒ ná dó e zo gbɛɖe gbɛɖe. “Vɔ̌sánú-xwlémawutɔ́ ɖaxó ɔ́ wɛ kpa acɛ nú vɔ̌sánú-xwlémawutɔ́ lɛ́ɛ; ami wɛ è ɖǒ ta n'i, bó dó ɖe e ɖó vo nú Mawu, gbe e gbe é yí azɔ̌, bó dó vɔ̌sánú-xwlémawutɔ́ sín awu lɛ́ɛ é. Énɛ́ ɔ́ wú ɔ́, é ná ɖe tablá sín ta ǎ; é ná vún awu dó kɔ nú éɖée, dó ɖe xlɛ́ ɖɔ émí ɖo aluwɛ mɛ ǎ; é ká ɖó ná sɛkpɔ́ mɛkúkú ɖěbǔ ǎ; é táá hɛn éɖée blí. É ná bó nyí tɔ́ tɔn abǐ nɔ tɔn wɛ kú ɔ́, é ná sɛkpɔ́ ǎ. É ɖo goxɔ énɛ́ ɔ́ mɛ, bónú cyɔ ɖé kú ɔ́, é ɖó ná tɔ́n, bó yi wa cyɔnú ǎ; é táá wá ɖu su nú nyɛ Mawu tɔn sín goxɔ, ɖó ami mímɛ́ wɛ è kɔn dó ta n'i, bó dó ɖe e ɖó vo nú azɔ̌ ce. Nyɛ wɛ nyí Mawu Mavɔmavɔ. “Nyɔ̌nu e kpo ɖo alɔ jí é jɛ́n vɔ̌sánú-xwlémawutɔ́ ɔ́ ná da. É ɖó ná da asúkúsi ǎ; é ɖó ná da nyɔ̌nu e asú tɔn gbɛ́ ɔ́ ǎ; é ɖó ná da agalɛtɔ́ abǐ mɛ e hɛn éɖée blí é ǎ; ɖyɔ̌vǐ e ɖo alɔ jí é ɖokpó wɛ é ná da ɖo mɛ tɔn lɛ́ɛ mɛ, bó má wá dɔn kún ɖěvo byɔ́ mɛ tɔn lɛ́ɛ mɛ ó. Nyɛ wɛ nyí Mawu Mavɔmavɔ e ɖe e ɖó vo nú azɔ̌ ce é.” Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn ɖɔ: “Mɛ ɖěbǔ ɖo vǐ towe lɛ́ɛ mɛ, bó ɖó blɔ̌ ɖo wǔ ɔ́, mɛ ɔ́ ná sɛkpɔ́ vɔ̌sákpe ɔ́, bó ná xwlé nǔɖuɖu nyɛ Mawu tɔn ǎ. Hǔn, mɛ e ɖó blɔ̌ ɖo wǔ ɔ́ ɖěbǔ sixú wa azɔ̌ énɛ́ ǎ; mɛ ɔ́ sixú nyí nukúntíntɔ́nnɔ, é sixú nyí afɔkponɔ, é sixú nyí awɔngbonɔ, abǐ wǔjɔnú tɔn ɖě ná kó cí alɔkpa ɖé. Mɛ e lɔ́ afɔ abǐ awa ɔ́ sixú wa azɔ̌ énɛ́ ǎ. Mɛ e nyí kpótɔ́nɔ abǐ mɛ e xú gǒ ɔ́, mɛ e ɖó sí nukún jí é, mɛ e jɛ akli, abǐ mɛ e jɛ gun é, abǐ mɛ e nǔɖé hwe ɖo súnnuxwé tɔn ɔ́ ná sixú wa azɔ̌ énɛ́ ɔ́ ǎ. Hǔn mɛ e ɖo vǐ towe lɛ́ɛ mɛ, bó ɖó blɔ̌ ɖo wǔ ɔ́ ɖěbǔ ná sixú sɛkpɔ́ vɔ̌sákpe ɔ́, bó xwlé vɔ̌ e è nɔ dó zo ɔ́ mì ǎ; nǔɖuɖu ce wɛ. Blɔ̌ e ɖo wǔ tɔn ɔ́ ná zɔ́n bɔ é ná wa vɔ̌sánú-xwlémawutɔ́ zɔ́ ǎ. É sixú ɖu nǔɖuɖu e è ɖe ɖó vo nú mì lɛ́ɛ; é wɛ nyí nǔɖuɖu mímɛ́ titewungbe lɛ́ɛ, kpódó nǔɖuɖu mímɛ́ lɛ́ɛ kpó. Amɔ̌, é sixú sɛkpɔ́ avɔ e è dǒ goxɔ ɔ́ nu ɔ́ ǎ; é ka ná sɛkpɔ́ vɔ̌sákpe e ɖo goxɔ ɔ́ nukɔn ɔ́ ǎ, ɖó wɔ̌n e é gblé ɔ́ wú. É ɖó ná ɖu su nú goxɔ ce ǎ, ɖó nyɛ wɛ nyí Mawu Mavɔmavɔ. Nyɛ wɛ nɔ ɖe vɔ̌sánú-xwlémawutɔ́ lɛ́ɛ ɖó vo nú azɔ̌ ce.” Lě e Mɔyízi dó sɛ́n énɛ́ lɛ́ɛ nú Aalɔ́ɔn kpó vǐ tɔn lɛ́ɛ kpó, kpódó Izlayɛ́li ví lɛ́ɛ bǐ kpó gbɔn ɔ́ nɛ́. Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn kpó vǐ tɔn súnnu lɛ́ɛ kpó ɖɔ yě ní cɔ́ yěɖée dó nǔ e Izlayɛ́li ví lɛ́ɛ ɖe ɖó vo nú mì lɛ́ɛ wú; yě táá hɛn nyǐkɔ ce blí. Nyɛ wɛ nyí Mawu Mavɔmavɔ. Đɔ nú yě ɖɔ: “Mɛ ɖěbǔ e ná ɖo vǐ mitɔn lɛ́ɛ mɛ ɖo jijimɛ lɛ́ɛ bǐ mɛ, bó ná ɖo mɛ blíblí lɔ jí, bó ná sɛkpɔ́ nǔ e Izlayɛ́li ví lɛ́ɛ ɖe ɖó vo nú nyɛ Mawu Mavɔmavɔ ɔ́, è nǎ ɖe mɛ énɛ́ ɔ́ sín nukɔn ce. Nyɛ wɛ nyí Mawu Mavɔmavɔ. Mɛ e ná ɖo yě mɛ, bɔ gudu ná ɖo wǔ tɔn, abǐ é ná ɖo glɔ̌ zɔn ɖé jɛ wɛ ɔ́, mɛ ɔ́ ɖó ná ɖu nǔ e è ɖe ɖó vo nú mì lɛ́ɛ ɖě káká jɛ hwenu e é ná húzú mɛ mímɛ́ dó é ǎ. Mɔ̌ ɖokpó ɔ́ wɛ é ná nyí nú mɛ e ɖ'alɔ cyɔ ɖé wú, bó húzú mɛ blíblí é; mɔ̌ ɖokpó ɔ́ wɛ é ná lɛ́ nyí nú mɛ e súnnusin nɔ́ wá yi sín glɔ̌ ná é. Mɔ̌ ɖokpó ɔ́ wɛ é ná nyí nú mɛ e ná ɖ'alɔ nǔvínúví, abǐ mɛ blíblí alɔkpa ɖěbǔ wǔ, bó húzú mɛ blíblí é. Mɛ e ná ɖ'alɔ nǔ énɛ́ lɛ́ɛ ɖě wú ɔ́ ná nyí mɛ blíblí káká jɛ gbadanu; wǔ jɛ́n é ná lɛ bǐ hwɛ̌, cóbó ná sixú ɖu nǔ e è ɖe ɖó vo nú mì lɛ́ɛ. Nú hwe yi xɔ tlóló ɔ́, é ná húzú mɛ mímɛ́, bó ná ɖu nǔ e è ɖe ɖó vo nú mì lɛ́ɛ, ɖó nǔ tɔn ɖuɖu wɛ. Vɔ̌sánú-xwlémawutɔ́ ɖó ná ɖu kanlin e kú ɔ́, abǐ éé gběkanlin ɖé vún ɖu ɔ́ sín lan ǎ. É táá húzú mɛ blíblí. Nyɛ wɛ nyí Mawu Mavɔmavɔ. “Vɔ̌sánú-xwlémawutɔ́ lɛ́ɛ ɖó ná nyi sɛ́n ce; yě má gba sɛ́n ce bó dɔn hwɛ dó kɔ nú yěɖée bó kú ó. Mawu Mavɔmavɔ wɛ un nyí; nyɛ wɛ ɖe yě ɖó vo nú azɔ̌ ce. “Mɛ yǎyá ɖěbǔ ɖó ná ɖu nǔ e è ɖe ɖó vo nú mì ɔ́ ǎ; é sixú nyí ylɔ̌ wɛ è ylɔ̌ ɛ, abǐ é sixú nyí mɛ e nɔ wa azɔ̌ nú vɔ̌sánú-xwlémawutɔ́ ɔ́ bɔ è nɔ sú axɔ́ é ɖě; é ná ɖu ǎ. Amɔ̌, nú vɔ̌sánú-xwlémawutɔ́ xɔ kannumɔ ɖé, abǐ è ji i ɖo xwé tɔn gbe ɔ́, kannumɔ ɔ́ sixú ɖu nǔɖuɖu e nyí vɔ̌sánú-xwlémawutɔ́ ɔ́ tɔn é. Mɔ̌ ɖokpó ɔ́, mɛsɛntɔ́ e è ji ɖo vɔ̌sánú-xwlémawutɔ́ ɔ́ xwé ɔ́ lɔmɔ̌ ná ɖu. Nú vɔ̌sánú-xwlémawutɔ́ ɔ́ sín vǐ nyɔ̌nu ɖé da mɛ yǎyá ɖé ɔ́, é sixú ɖu nǔ e è jɔ ɖo nǔ e è ɖe ɖó vo nú mì lɛ́ɛ jí ɔ́ ǎ. Lo ɔ́, vɔ̌sánú-xwlémawutɔ́ ɔ́ sín vǐ nyɔ̌nu e nyí asúkúsi, abǐ éé asú tɔn gbɛ́, bɔ é má ɖó vǐ ǎ bó lɛ́ wá jɛ tɔ́ tɔn xwé, lě e é kó ɖe gbɔn ɖ'ayǐ cóbó yi da asú ɔ́, é sixú ɖu tɔ́ tɔn sín nǔɖuɖu. Mɛ yǎyá ɖěbǔ sixú ɖu ǎ. “Nú mɛɖé má tunwun ǎ, bó ɖu nǔ e è ɖe ɖó vo nú mì ɔ́, mɛ ɔ́ ná sú nǔ e é ɖu ɔ́ sín axɔ́ vɔ̌sánú-xwlémawutɔ́ ɔ́, bó ná ná vlɔ̌ ɖó atɔ́ɔ́n tɔn d'é jí. “Nǔníná e Izlayɛ́li ví lɛ́ɛ sɔ́ ɖó vo nú nyɛ Mawu Mavɔmavɔ lɛ́ɛ ɔ́, vɔ̌sánú-xwlémawutɔ́ lɛ́ɛ ɖó ná ɖu su nú nǔ e yě jɔ ɖ'é mɛ lɛ́ɛ ǎ. Hǔn nú vɔ̌sánú-xwlémawutɔ́ lɛ́ɛ má nɔ lě e yě ɖó ná nɔ cóbó ɖu nǔɖuɖu mɔ̌hun ɔ́ ǎ, lobo ɖu ɔ́, hwɛ wɛ yě dó kɔ nú Izlayɛ́li ví lɛ́ɛ. Nyɛ wɛ nyí Mawu Mavɔmavɔ. Nyɛ wɛ ɖe yě ɖó vo nú azɔ̌ ce.” Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn kpó vǐ tɔn lɛ́ɛ kpó, kpódó Izlayɛ́li ví lɛ́ɛ bǐ kpó ɖɔ: “Mǐ ní ɖɔ mɛ ɖé ɖo mi mɛ, bó jló ná xwlé vɔ̌ e è nɔ dó zo ɔ́ mì; mɛ ɔ́ sixú nyí Izlayɛ́li ví, abǐ é sixú nyí jǒnɔ bó ɖo Izlayɛ́li; é sixú nyí ɖɔ akpá ɖé wɛ é jló ná dó ɖe ná, abǐ é jló ná xwlé mì kpó jlǒ é ɖésúnɔ tɔn kpó. É nyí mɔ̌ wɛ ɔ́, kanlin asú e má ɖó blɔ̌ ɖo wǔ ǎ é wɛ é ná dó sá ná; é sixú nyí nyibú, lɛ̌ngbɔ́, abǐ gbɔ̌ yǎyá; blɔ̌ ɖó ná nɔ wǔ tɔn ǎ; énɛ́ ɔ́, un ná yí kanlin ɔ́. Mi ná zé kanlin e wú blɔ̌ ɖe ɔ́ ɖěbǔ dó sá vɔ̌ ná ǎ; ɖó nú mi bló mɔ̌ ɔ́, un ná yí vɔ̌ ɔ́ ǎ. Mǐ ní lɛ́ ɖɔ mɛɖé jló ná sɔ́ nyibú abǐ gbɔ̌ dó sá kɔnɖókpɔ́ vɔ́ nú nyɛ Mawu Mavɔmavɔ; é sixú nyí ɖɔ akpá ɖé wɛ é jló ná dó ɖe ná, abǐ é jló ná xwlé mì kpó jlǒ é ɖésúnɔ tɔn kpó; blɔ̌ ɖěbǔ ɖó ná nɔ kanlin ɔ́ wú ǎ; énɛ́ ɔ́, un ná yí vɔ̌ tɔn. Mi bó ma hɛn kanlin nukúntíntɔ́nnɔ, abǐ afɔkponɔ, abǐ éé gblé wǔ é, abǐ éé ɖó akli, abǐ éé nǔ tɔ́n ɖo wǔ tɔn é ɖě wá vɔ̌sákpe ce jí dó sá vɔ̌ e è nɔ dó zo ɔ́ ná nú mì ó. Nú ényí ɖɔ a nǎ sá vɔ̌ ɖé nú mì kpódó hwi ɖésúnɔ sín jlǒ kpó ɔ́, a sixú zé nyibú, abǐ lɛ̌ngbɔ́ e wǔjɔnú tɔn ɖě ɖi ga hú ɖě, abǐ ée ɖě hwe gli hú ɖě ɔ́ dó sá ná. Amɔ̌, a nǎ zé kanlin mɔ̌hunkɔtɔn dó ɖe akpá ná ǎ. Nyɛ Mawu Mavɔmavɔ ná yí ǎ. Kanlin e è gba ajiglokwín ná é, abǐ éé sín ajiglokwín li é, abǐ kanlin e è sá ɔ́, abǐ éé sín ajiglokwín e è sɛ́n síin ɔ́, mi ma hɛn ɖě wá nú nyɛ Mawu Mavɔmavɔ gbeɖé ó. È nǎ bló nǔ mɔ̌hunkɔtɔn ɖo to mitɔn mɛ ǎ. Mi ma ka yí kanlin mɔ̌hunkɔ lɛ́ɛ ɖě ɖo jǒnɔ ɖé sí, bó dó sá vɔ̌ nú nyɛ Mawu mitɔn ó. Wǔ énɛ́ ɔ́ e è gblě yě ɔ́, blɔ̌ wɛ nyí ɖo yě wú. Nú mi zé kanlin mɔ̌hunkɔtɔn ɖé dó sá vɔ̌ nú mì ɔ́, un ná yí ǎ.” Mawu Mavɔmavɔ ɖɔ nú Mɔyízi ɖɔ: “Nú è ji nyibúví, abǐ gbɔ̌ví ɖé ɔ́, è nǎ jó e dó nyi nɔ tɔn gɔ́n nú azǎn tɛ́nwe. Bɛ́ sín azǎn tántɔngɔ́ ɔ́ gbe ɔ́, è sixú zé dó sá vɔ̌ e è nɔ dó zo ɔ́ nú mì. Mi ma ka hu nyibú asi, abǐ gbɔ̌ asi kpó vǐ tɔn kpó gbe ɖokpó ɔ́ ó. “Nú mi ɖo vɔ̌ sá nú mì wɛ, bó ɖo han ji dó kpa susu nú mì wɛ ɔ́, mi nɔ bló bónú é ní sɔgbe xá tito ɔ́; énɛ́ ɔ́, un ná yí. Mi ɖu kanlin e mi sá vɔ̌ ná ɔ́ sín lan gbe e gbe mi hu é; mi ma jó ɖě dó nú ayǐ hɔ́n dó ó. Nyɛ wɛ nyí Mawu Mavɔmavɔ. “Mi kpé nukún dó sɛ́n ce lɛ́ɛ wú bó nyi ganjí; nyɛ wɛ nyí Mawu Mavɔmavɔ. Mi ma hɛn nyǐkɔ ce blí ó. Un jló ɖɔ mi Izlayɛ́li ví lɛ́ɛ ní tunwun ɖɔ mɛ mǐmɛ́ wɛ un nyí. Nyɛ wɛ nyí Mawu Mavɔmavɔ e sɔ́ mi bɔ mi ná nyí togun ɖe ɖó vo é. Un ɖe mi tɔ́n sín Ejípu, bó ná nyí Mawu mitɔn. Nyɛ wɛ nyí Mawu Mavɔmavɔ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná nɔ́ kplé bó ɖu xwe dó kpa susu nú mì lɛ́ɛ su ɔ́, mi ná nɔ́ sɛn mì. Hwenu e un ɖó bɔ mi ná nɔ́ xwedó lɛ́ɛ ɖíe: “Azǎn ayizɛ́n wɛ mi ná nɔ́ dó wa azɔ̌ ná aklúnɔzángbla ɖokpó mɛ. Amɔ̌, azǎn tɛ́nwegɔ́ ɔ́, gbɔjɛzán wɛ; mi ná wa azɔ̌ ǎ; mi ná nɔ́ kplé bó sɛn mì; mi ná wa azɔ̌ ɖěbǔ gbe énɛ́ ɔ́ gbe ǎ. Gbɔjɛzán wɛ é nyí, bó ɖo vo nú nyɛ Mawu Mavɔmavɔ, bɔ mi ná nɔ́ nyi gbɔn fí e mi ná nɔ lɛ́ɛ bǐ. “Hǔn, xwe ɖěvo e nyɛ Mawu Mavɔmavɔ ɖó, bɔ hwe yětɔn nu su ɔ́, mi ná nɔ́ kplé bó ɖu lɛ́ɛ ɖíe: “Đo sun nukɔntɔn e ɖo xwe ɔ́ mɛ ɔ́ sín azǎn wǒ-ɛnɛgɔ́ ɔ́ gbe ɔ́, gbadanu cawun ɔ́, mi ná nɔ́ ɖu Dǐndínwáyixwe ɔ́ dó kpa susu nú nyɛ Mawu Mavɔmavɔ. “Sun ɖokpó énɛ́ ɔ́ sín azǎn afɔtɔngɔ́ ɔ́ gbe ɔ́, wɔ̌xúxú e mɛ è ma dó tɔ́n ǎ é sín xwe ɔ́ ná bɛ́. Aklúnɔzángbla ɖokpó wɛ mi ná ɖu xwe ɔ́ xɔ; mi ná ɖu wɔ̌xúxú e mɛ è ma dó tɔ́n ǎ é sín xwe ɔ́ dó kpa susu nú nyɛ Mawu Mavɔmavɔ. Đo azǎn nukɔntɔn e ɖo aklúnɔzángbla énɛ́ ɔ́ mɛ ɔ́ gbe ɔ́, mi ná nɔ́ kplé miɖée, bó ná nɔ́ sɛn mì. Mi ná nɔ́ wa azɔ̌ e mi ko nɔ wa lɛ́ɛ ɖě azǎn énɛ́ ɔ́ gbe ǎ. Đo aklúnɔzángbla énɛ́ ɔ́ bǐ mɛ ɔ́, mi ná nɔ́ sá vɔ̌ e è nɔ dó zo ɔ́ nú mì ayǐhɔ́ngbe ayǐhɔ́ngbe. Azǎn tɛ́nwegɔ́ ɔ́ gbe ɔ́, mi ná lɛ́ kplé, bó ná sɛn mì. Azǎn énɛ́ ɔ́ lɔ ɔ́, mi ná nɔ́ wa azɔ̌ e mi ko nɔ wa lɛ́ɛ ɖěbǔ ǎ.” Mawu Mavɔmavɔ lɛ́ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná yi to e ná mi wɛ un ɖe ɔ́ mɛ, bó ná lɛ gle ɔ́, jinukún e nyɔ́ dó nukɔn ɔ́, kɔ nukɔntɔn e mi ná blá ɔ́, mi ná zé yi jó nú vɔ̌sánú-xwlémawutɔ́ ɔ́. Bɔ é ná bló lě e è nɔ bló gbɔn bó nɔ́ xwlé jinukún nyɛ Mawu Mavɔmavɔ é. Énɛ́ ɔ́, un ná yí jinukún mitɔn. È ɖu gbɔjɛzán ɔ́ nú ayǐ hɔ́n ɔ́ wɛ vɔ̌sánú-xwlémawutɔ́ ɔ́ ná xwlé mì. Azǎn ɖokpó énɛ́ ɔ́ gbe ɔ́, mi ná zé lɛ̌ngbɔ́ví e ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ dó sá vɔ̌ e è nɔ dó zo ɔ́ nú mì. Mi ná zé ami dó nya linfín kilóo ayizɛ́n ná, bó dó sá vɔ̌ e è nɔ dó zo ɔ́ gɔ́ ná, bɔ azizɔ tɔn sín wǎn ná nyɔ́ se nú mì, bɔ vɛ̌ɛn lǐtli ɖokpó adaɖé ná jɛ jí. Jinukúnkɔ nukɔntɔn énɛ́ ɔ́, mi ná dó nu ǎ, mi ná ɖu wɔ̌xúxú tɔn ǎ; mi ná ɖu mimɛ tɔn ǎ, mi ná ɖu fɔ́ tɔn ǎ, mi ná ɖu nǔ tɔn ɖě cóbónú gbe e gbe è nǎ sɔ́ wá dó sá vɔ̌ ɔ́ nú nyɛ Mawu mitɔn ɔ́ ná su ǎ. Sɛ́n énɛ́ ɔ́ ɖ'ayǐ káká sɔ́yi nú kúnkan mitɔn lɛ́ɛ, ɖo fí ɖěbǔ e mi ná ɖe é.” Mawu Mavɔmavɔ ɖɔ: “Gbɔjɛzán jɛ nú ayǐ hɔ́n ɔ́, gbe énɛ́ gbe e mi ná bló lě e è nɔ bló gbɔn dó xwlé jinukúnkɔ nukɔntɔn ɔ́ mì ɔ́, mi ná xa aklúnɔzángbla tɛ́nwe kpíkpé. Azǎn kanɖé wǒ (50) wɛ mi ná xa, bɔ é ná nyí gbɔjɛzán tɛ́nwegɔ́ ɔ́ sín ayǐhɔ́ngbe. Gbe énɛ́ gbe ɔ́, mi ná xwlé jinukún yɔ̌yɔ́ mì. Mi ná hɛn wɔ̌xúxú we sín xwé mitɔn lɛ́ɛ gbe, bó ná xwlé mì, lě e è nɔ xwlé vɔ̌ mì gbɔn é. Linfín kilóo atɔn wɛ è nǎ dó ɖa wɔ̌xúxú ɔ́ ɖokpó ná, bó ná dó tɔ́n mɛ. Nǔkún nukɔntɔn e è ya ɔ́ mɛ wɛ è nǎ ɖe ɖe, bó dó xwlé vɔ̌sánú énɛ́ ɔ́ mì. Mi ná hɛn lɛ̌ngbɔ́ví e ɖó xwe ɖokpó, bó má ɖó blɔ̌ ɖo wǔ ǎ ɔ́ tɛ́nwe, nyibúsú wínnyáwínnyá ɖokpó, agbo we, bɔ linfín kpódó vɛ̌ɛn kpó e ná sɔgbe xá ɔ́ ná jɛ jí, bɔ mi ná dó sá vɔ̌ e è nɔ dó zo ɔ́ nú mì gɔ́ ná, bɔ wǎn tɔn ná nyɔ́ se nú nyɛ Mawu Mavɔmavɔ. Énɛ́ ɔ́ gúdo ɔ́, mi ná zé gbǎgbá ɖokpó dó sá hwɛsɔ́kɛmɛvɔ́ ná, bó ná zé lɛ̌ngbɔ́ví e ɖó xwe ɖokpó ɔ́ we dó sá kɔnɖókpɔ́ vɔ́ ná. Vɔ̌sánú-xwlémawutɔ́ ɔ́ ná bló lě e è nɔ bló gbɔn bó nɔ́ xwlé vɔ̌sánú mì ɔ́, bó xwlé yě mì. É ná xwlé yě mì gɔ́ nú wɔ̌xúxú e è zě jinukún nukɔntɔn ɔ́ dó ɖa ná, bó xwlé mì é kpó lɛ̌ngbɔ́ví we e è xwlé mì lɛ́ɛ kpó. È nǎ fɔ yě ɖó vo nú nyɛ Mawu Mavɔmavɔ, bɔ yě ná nyí vɔ̌sánú-xwlémawutɔ́ ɔ́ tɔn. Azǎn énɛ́ ɔ́ gbe ɔ́, mi ná kplé, bó ná sɛn mì. Mi ná wa azɔ̌ e mi ko nɔ wa lɛ́ɛ ɖě gbe énɛ́ ɔ́ gbe ǎ. Mi ná nɔ́ nyi sɛ́n énɛ́ ɔ́ hwebǐnu, ɖo fí ɖěbǔ e mi ná ɖe é. “Nú mi ɖo nǔkún ya wɛ hǔn, mi ma ya éé wú gbɔn gle mitɔn lɛ́ɛ tó é ó. Mi ka ya nǔkún ɔ́, mi ná lɛ́ kɔ wá cyán nǔkún e mi blɛ́ lɛ́ɛ ǎ. Mi ná jó dó nú wamamɔnɔ lɛ́ɛ kpódó jǒnɔ lɛ́ɛ kpó. Nyɛ wɛ nyí Mawu Mavɔmavɔ, Mawu mitɔn.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Sun tɛ́nwegɔ́ ɔ́ sín azǎn nukɔntɔn ɔ́ ná nyí gbɔjɛzán nú mi. Flǐn kpódó lanzo kúnkún kpó sín azǎn wɛ azǎn énɛ́ ɔ́ ná nyí nú mi; mi ná kplé bó sɛn mì. Mi ná wa azɔ̌ e mi ko nɔ wa lɛ́ɛ ɖě gbe énɛ́ ɔ́ gbe ǎ; mi ná sá vɔ̌ e è nɔ dó zɔ ɔ́ nú mì.” Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ ɔ́ sín azǎn wǒgɔ́ ɔ́ ná nyí azǎn ɖaxó e gbe è nɔ súnsún hwɛ sín kɔ nú mɛ ɔ́. Azǎn énɛ́ ɔ́ gbe ɔ́, mi ná kplé bó sɛn mì. Mi ná blá nu, bó ná sá vɔ̌ e è nɔ dó zo ɔ́. Mi ɖó ná wa azɔ̌ ɖěbǔ gbe énɛ́ ɔ́ gbe ǎ, ɖó azǎn e gbe è nɔ bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ, bó nɔ́ dó súnsún hwɛ sín kɔ nú mɛ é wɛ, bɔ è nǎ súnsún hwɛ mitɔn lɛ́ɛ sín kɔ nú mi, ɖo Mawu Mavɔmavɔ, Mawu mitɔn nukɔn. Mɛ e ma ná blá nu gbe énɛ́ ɔ́ gbe ǎ ɔ́, è nǎ ɖe e sín Izlayɛ́li togun ɔ́ mɛ. Mɛ e ná wa azɔ̌ ɖěbǔ gbe énɛ́ ɔ́ gbe ɔ́, nyɛ Mawu Mavɔmavɔ ɔ́ ɖésú ná hu i sín Izlayɛ́li togun ɔ́ mɛ. Mi ná wa azɔ̌ ɖěbǔ gbe énɛ́ ɔ́ gbe ǎ; mi ná nyi sɛ́n énɛ́ ɔ́ káká sɔ́yi, ɖo fí ɖěbǔ e mi ná ɖe ɔ́. Azǎn énɛ́ ɔ́ ná nyí gbɔjɛzán nú mi; mi ná wa azɔ̌ ǎ; mi ná blá nu. Mi ná nyi gbɔjɛzánsɛ́n énɛ́ ɔ́ bɛ́ sín azǎn tɛ́nnɛgɔ́ ɔ́ gbe gbadanu, sɔ́yi ayǐhɔ́ngbe tɔn gbadanu.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Bɛ́ sín sun tɛ́nwegɔ́ ɔ́ sín azǎn afɔtɔngɔ́ ɔ́ gbe ɔ́, mi ná ɖu azavaxwe dó kpa susu nú nyɛ Mawu Mavɔmavɔ. Azǎn tɛ́nwe wɛ mi ná ɖu xwe ɔ́ xɔ. Azǎn nukɔntɔn ɔ́ gbe ɔ́, mi ná kplé bó sɛn mì. Mi ná wa azɔ̌ e mi ko nɔ wa lɛ́ɛ ɖě gbe nɛ́ gbe ǎ. Mi ná nɔ́ sá vɔ̌ e è nɔ dó zo ɔ́ nú nyɛ Mawu Mavɔmavɔ xɔ azǎn tɛ́nwe. Azǎn tántɔngɔ́ ɔ́ gbe ɔ́, mi ná kplé bó sɛn mì, bó ná lɛ́ sá vɔ̌ e è nɔ dó zo ɔ́ nú mì. Xwe ɔ́ sín azǎn gǔdo gúdo tɔn ɔ́ wɛ. Mi ná wa azɔ̌ e mi ko nɔ wa lɛ́ɛ ɖě gbe énɛ́ gbe ǎ. “Xwe gɛnnyigɛnnyi e è nɔ ɖu nú nyɛ Mawu Mavɔmavɔ lɛ́ɛ nɛ́. Mi ná nɔ́ kplé, bó ná nɔ́ bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, bó ná nɔ́ xwlé vɔ̌ e è nɔ fyɔ́ bǐ ɔ́ nyɛ Mawu Mavɔmavɔ: é sixú nyí vɔ̌ è nɔ dó zo ɔ́, é sixú nyí jinukún vɔ́, é sixú nyí kɔnɖókpɔ́ vɔ́, é ka sixú nyí ahan biba, bɔ mi ná bló lě e xwe ɖokpó ɖokpó byɔ́ gbɔn é. Vɔ̌ énɛ́ lɛ́ɛ ná gɔ́ nú éé mi nɔ sá nú mì gbɔjɛzán gbe lɛ́ɛ, nǔ e mi nɔ ná mì lɛ́ɛ, nǔ e mi nɔ dó akpá bó nɔ́ ná mì lɛ́ɛ, kpódó éé mi ɖésú nɔ́ jló bó nɔ́ ná mì lɛ́ɛ kpó. “Azavaxwe ɔ́, azǎn afɔtɔngɔ́ e ɖo sun tɛ́nwegɔ́ énɛ́ ɔ́ mɛ ɔ́ wɛ mi ná ɖu dó kpa susu nú mì; mi ka ná kó ya jinukún mitɔn lɛ́ɛ fó, có bó ɖu; mi ná ɖu xwe ɔ́ xɔ azǎn tɛ́nwe. Azǎn nukɔntɔn ɔ́ kpódó tántɔngɔ́ ɔ́ kpó ná nyí gbɔjɛzán. Azǎn nukɔntɔn ɔ́ gbe ɔ́, mi ná hɛn atínsínsɛ́n ɖagbe ɖagbe lɛ́ɛ, bó ná ba děma, bó ná ba atín e dó ama ganjí lɛ́ɛ, kpó atín e wú ɖo tɔ tó lɛ́ɛ kpó sín ama hɛn, bó ná j'awǎ ɖo nyɛ Mawu Mavɔmavɔ, Mawu mitɔn nukɔn xɔ azǎn tɛ́nwe. Xwe wú xwe wú ɔ́, mi ná nɔ́ ɖu xwe énɛ́ ɔ́ dó kpa susu nú mì xɔ azǎn tɛ́nwe ɖo sun tɛ́nwegɔ́ ɔ́ mɛ; mi ná nɔ́ nyi sɛ́n énɛ́ káká sɔ́yi. Xwe énɛ́ ɔ́ hwenu ɔ́, mi Izlayɛ́li ví jiji lɛ́ɛ ɔ́, azava glɔ́ wɛ mi bǐ ɖó ná nɔ xɔ azǎn tɛ́nwe, bónú kúnkan mitɔn lɛ́ɛ ná tunwun ɖɔ nyɛ wɛ nyí Mawu Mavɔmavɔ ɔ́. Un ɖó tɛnmɛ nú tɔ́gbó tɔgbo yětɔn lɛ́ɛ ɖó azava sá hwenu e è kplá yě sín Ejípu ɔ́. Nyɛ wɛ nyí Mawu Mavɔmavɔ, Mawu mitɔn.” Xwe tɛnmɛ tɛnmɛ e è nǎ nɔ́ ɖu dó kpa susu nú Mawu Mavɔmavɔ ɔ́ lě e Mɔyízi xa nú Izlayɛ́li ví lɛ́ɛ gbɔn ɔ́ nɛ́. Mawu Mavɔmavɔ ɖɔ nú Mɔyízi ɖɔ: “Đɔ nú Izlayɛ́li ví lɛ́ɛ ɖɔ yě ní nɔ́ hɛn olívu sín ami e nyɔ́ ganjí ɔ́ wá nú we, bónú è nǎ nɔ́ dó zogbɛ́n lɛ́ɛ mɛ, bɔ yě ná nɔ́ ɖo títá gbadanu lɛ́ɛ bǐ. Aalɔ́ɔn ná sɔ́ zogbɛ́nhɛnnú ɔ́ dó goxɔ e mɛ un nɔ kpé mi ɖe ɔ́ mɛ, ɖo xɔmɛgbovɔ e gúdo akɔjijɛgbá ɔ́ ɖe ɔ́ nukɔn. Zogbɛ́n lɛ́ɛ ná ɖo jiji wɛ ɖo nukɔn ce dɔ̌n sín gbadanu káká bɔ ayǐ ná hɔ́n. Mi ɖó ná nɔ́ xwedó tito énɛ́ ɔ́ káká sɔ́yi, jijimɛ ɖě jɛ ɖě gúdo. Aalɔ́ɔn ná fɔ zogbɛ́n lɛ́ɛ ɖó zogbɛ́nhɛnnú e è sɔ́ siká akú dó bló ná ɔ́ jí, bɔ yě ná nɔ́ ɖo jiji wɛ zǎn mɛ tɛgbɛ ɖo nyɛ Mawu Mavɔmavɔ nukɔn.” Mawu Mavɔmavɔ ɖɔ nú Mɔyízi ɖɔ: “Zě linfín dó ɖa wɔ̌xúxú gbajagbaja wěwe ná. Wɔ̌xúxú ɖokpó ɖokpó ní da kilóo ayizɛ́n. A nǎ to yě ɖó nukɔn ce, ɖo távo e è sɔ́ siká akú dó bló ná ɔ́ jí dɔ̌n. Hǎ we jí wɛ a nǎ to yě ɖó, a nǎ to ayizɛ́n ayizɛ́n, ɖě ɖo ɖě jí. A nǎ zé zǎlínkpɔ́n akú ɖó hǎ ɖokpó ɖokpó jí, bó ná dó zo ɖó wɔ̌xúxú tɛnmɛ, dó kpa susu nú mì, bɔ é ná nyí flǐn ɖé nú nyɛ Mawu Mavɔmavɔ. “Gbɔjɛzán gbe tɛgbɛ káká sɔ́yi ɔ́, è ɖǒ ná nɔ́ to wɔ̌xúxú mɔ̌hunkɔtɔn wěwe ɖó nukɔn ce; Izlayɛ́li ví lɛ́ɛ ɖó ná nɔ́ bló mɔ̌ hwebǐnu dandan. Wɔ̌xúxú lɛ́ɛ ná húzú Aalɔ́ɔn kpó vǐ tɔn lɛ́ɛ kpó tɔn. Yě ná nɔ́ nɔ fí mímɛ́ ɖé bó ná nɔ́ ɖu, ɖó nǔ mímɛ́ titewungbe wɛ wɔ̌xúxú nɛ́ lɛ́ɛ nyí, ɖó nyɛ wɛ è nǎ, bɔ kanta énɛ́ lɛ́ɛ ná nyí Aalɔ́ɔn kpó vǐ tɔn lɛ́ɛ kpó tɔn káká sɔ́yi.” Nyɔ̌nu Izlayɛ́li ví ɖé kpó nya Ejípunu ɖé kpó ɖó vǐ súnnu ɖokpó. É wá su gbe ɖokpó, bɔ vǐ énɛ́ kpó Izlayɛ́li ví ɖé kpó bɛ́ jlɛ ɖo fí e Izlayɛ́li togun ɔ́ ɖó gɔnu ɖó ɔ́. Vǐ ɔ́ sín nɔ nɔ nyí Celomíti, bó nyí Divli sín vǐ, bó jɔ ɖo Dan sín akɔta mɛ. Nyɔ̌nu nɛ́ ɔ́ sín vǐ nylá nu dó Mawu Mavɔmavɔ sín nyǐkɔ wú; é zun Mawu Mavɔmavɔ, bɔ è kplá ɛ yi Mɔyízi gɔ́n, bó sɔ́ ɛ dó gankpá mɛ, bó nɔ te kpɔ́n hwɛ e Mawu Mavɔmavɔ ná ɖó n'i é. Mawu Mavɔmavɔ wá ɖɔ nú Mɔyízi ɖɔ: “Mi kplá nyaví élɔ́ tɔ́n sín fí e mi ɖó gɔnu ɖó ɔ́. Mɛ e se bɔ é nylá nu dó nyɛ Mawu Mavɔmavɔ sín nyǐkɔ wú lɛ́ɛ bǐ ní fɔ alɔ yětɔn lɛ́ɛ ɖó ta tɔn; Izlayɛ́li ví lɛ́ɛ bǐ ní nyi hwǎn dó hu i. Énɛ́ ɔ́ gúdo ɔ́, a nǎ ɖɔ nú Izlayɛ́li ví lɛ́ɛ ɖɔ: “Mɛ ɖěbǔ zun nyɛ mɛ e nyí Mawu tɔn ɔ́, hwɛ tɔn ná nɔ kɔ n'i. Mɛ ɖěbǔ e ná nylá nu dó nyɛ Mawu Mavɔmavɔ sín nyǐkɔ wú ɔ́, è nǎ ɖó kúhwɛ nú mɛ ɔ́. Togun ɔ́ bǐ ná nyi hwǎn dó hu i dandan; é sixú nyí jǒnɔ abǐ toví, é ná kú; ɖó é nylá nu dó nyɛ Mawu Mavɔmavɔ sín nyǐkɔ wú. “Ényí mɛɖé hu mɛ ɔ́, è nǎ hu é lɔmɔ̌ dandan. Amɔ̌, mɛ e ná xo mɛ ɖěvo sín kanlin bɔ é ná kú ɔ́, mɛ ɔ́ ná zé kanlin gbɛɖe ɖěvo dó ɖyɔ́ ná. “Nú mɛɖé gblé wǔ nɔzo tɔn ɔ́, nǔ e é wa nú mɛ ɖě ɔ́, è nǎ wa nú é lɔmɔ̌. Nú xú wɛ é wɛ́n n'i ɔ́, è nǎ wɛ́n xú nú é lɔmɔ̌. Nú nukún wɛ é tɔ́n ɛ ɔ́, è nǎ tɔ́n nukún é lɔmɔ̌. Nú aɖǔ wɛ é lɔ́ ɛ ɔ́, è nǎ lɔ́ aɖǔ é lɔmɔ̌. Wǔ e é gblé nɔzo tɔn ɔ́ wɛ è nǎ gblé é lɔmɔ̌. “Mɛ e ná hu kanlin ɔ́ ná zé kanlin ɖěvo dó ɖyɔ́ ná, mɛ e ka ná hu gbɛtɔ́ ɔ́, è nǎ hu é lɔmɔ̌. “Sɛ́n ɖokpó ɔ́ wɛ mɛ bǐ ná nyi; jǒnɔ kpó toví kpó ɔ́, sɛ́n ɖokpó ɔ́ wɛ yě bǐ ná nyi; ɖó nyɛ wɛ nyí Mawu Mavɔmavɔ, Mawu mitɔn.” Mɔyízi ɖɔ xó lɛ́ɛ nú Izlayɛ́li ví lɛ́ɛ, bɔ yě kplá nyaví e zun Mawu Mavɔmavɔ ɔ́ tɔ́n sín fí e yě ɖó gɔnu ɖó ɔ́, bó nyi hwǎn dó hu i. Yě bló lě e Mawu Mavɔmavɔ ɖɔ nú Mɔyízi gbɔn é. Mawu Mavɔmavɔ ɖɔ nú Mɔyízi ɖo Sinayíi só jí ɖɔ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná jɛ to e ná ná mi wɛ un ɖe ɔ́ mɛ ɔ́, é jɛ hwe tɔn nu ɔ́, mi ná nɔ́ ná gbɔjɛ ayǐkúngban ɔ́; mi ná nɔ́ bló mɔ̌ dó kpa susu nú nyɛ Mawu Mavɔmavɔ. Mi ná nɔ́ sɔ́ xwe ayizɛ́n ɖó te, bó ná nɔ́ dó nǔ dó gle mitɔn lɛ́ɛ mɛ, bó ná nɔ́ jlá ala nú vǐwuntín mitɔn lɛ́ɛ, bó ná nɔ́ ya jinukún mitɔn lɛ́ɛ. Lo ɔ́, mi ná sɔ́ xwe tɛ́nwegɔ́ ɔ́ ɖó vo nú nyɛ Mawu Mavɔmavɔ. Xwe énɛ́ ɔ́ xwe ɔ́, mi ná ná gbɔjɛ ayǐkúngban mitɔn ɔ́. Mi ɖó ná dó nǔ dó gle mitɔn mɛ ǎ, mi ka ɖó ná jlá ala nú vǐwuntín mitɔn lɛ́ɛ ǎ. Mi ná ya nǔkún e ná nɔ yě ɖóɖó bó wú lɛ́ɛ lɔ ǎ. Mi ka ná ba vǐwun e ko zin ɖo vǐwuntín e mi ma jlá ala ná ǎ lɛ́ɛ jí ɔ́ ǎ, ɖó mi ɖó ná ná gbɔjɛ́ ayǐkúngban ɔ́ bǐ sésé, bó ná wa nǔ ɖěbǔ ɖ'é jí ǎ. Gbɔjɛ sín xwe wɛ xwe énɛ́ ɔ́ ná nyí. Amɔ̌, nǔ e ná nɔ yě ɖóɖó bó wú ɖo ayǐkúngban ɔ́ jí ɖo xwe ɔ́ mɛ lɛ́ɛ ɔ́, mi sixú ɖu. Mi ná ɖu bɔ mɛsɛntɔ́ mitɔn lɛ́ɛ ná ɖu, bɔ azɔ̌watɔ́ mitɔn kpó jǒnɔ e ɖo mi gɔ́n lɛ́ɛ kpó ná ɖu. Kanlin mitɔn lɛ́ɛ lɔ ná ɖu nǔ énɛ́ lɛ́ɛ; gběkanlin e ɖo to mitɔn mɛ lɛ́ɛ lɔ ná ɖu.” “Mi yi to e ná ná mi wɛ un ɖe ɔ́ mɛ ɔ́, mi ná xa gbɔjɛzán xwe tɛ́nwe; hǔn mi ná xa xwe tɛ́nwe tɛ́nwe donu tɛ́nwe; é bló xwe kanɖé tɛ́nnɛ (49). Énɛ́ ɔ́ gúdo ɔ́, azǎn wǒgɔ́ ɔ́ e ɖo sun tɛ́nwegɔ́ ɔ́ mɛ ɔ́, azǎn énɛ́ ɔ́ e nyí hwɛsúnsún sín kɔ nú mɛ zán ɖaxó ɔ́, mi ná kún lanzo gbɔn to ɔ́ bǐ mɛ. Énɛ́ ɔ́, mi ná jlá ɖɔ è nǐ ɖe to ɔ́ mɛ nu lɛ́ɛ bǐ nyi te. È nǎ sun nyǐ xwe énɛ́ ɔ́ ɖɔ ‘Awǎjijɛxwe’. Xwe énɛ́ ɔ́ xwe ɔ́, mɛ ɖokpó ɖokpó ná yí ayǐkúngban tɔn, bó ná yi hɛ̌nnu tɔn mɛ. Xwe kanɖé wǒgɔ́ (50) ɔ́ ná nyí xwe bɔ mi ná ɖe ɖó vo nú mì. Mi ná nɔ́ ɖu ‘Awǎjijɛxwe’ ɔ́ xwe kanɖé wǒ (50) mɛ kanɖé wǒ (50) mɛ. Xwe énɛ́ ɔ́ xwe ɔ́, mi ná dó nǔkún ǎ, mi ka ná ya nǔkúnflá éé wú ɖo gle mitɔn mɛ lɛ́ɛ dó agɔ̌ mɛ ǎ, mi ka ná gbɛ vǐwun ɖo vǐwuntín e mi má jlá ɖa ná ǎ lɛ́ɛ jí ǎ, ɖó ‘Awǎjijɛxwe’ wɛ, bɔ mi ná mɔ dó mɔ xwe ɖeɖóvo. Lo ɔ́, mi ná ba nǔ e ná nyɔ́ ɖo gle mitɔn mɛ lɛ́ɛ ɖu. “ ‘Awǎjijɛxwe’ ɔ́ bǐ mɛ ɔ́, mɛ ɖokpó ɖokpó ná yí ayǐkúngban tɔn. Hǔn nú mi xɔ ayǐkúngban ɖo to mitɔn mɛ nu ɖé sí, abǐ mi sa ayǐkúngban ɖé n'i ɔ́, mi ma hízí i ó. Nú mi ja ayǐkúngban xɔ gbé ɖo to mitɔn mɛ nu sí ɔ́, xwe nabí e kpo bɔ è nǎ ɖu ‘Awǎjijɛxwe’ ɔ́ wɛ mi ná kpɔ́n dó xɔ, bɔ éyɛ́ ná kpɔ́n xwe nabí e a nǎ dó ya jinukún ɖo gle ɔ́ jí cóbɔ ‘Awǎjijɛxwe’ ɔ́ ná wá ɔ́ dó sa. Nú xwe e kpo ɔ́ sukpɔ́ ɔ́, akwɛ́ e mi ná dó xɔ ɔ́ ná sukpɔ́. Nú xwe e kpo ɔ́ má sukpɔ́ ǎ ɔ́, akwɛ́ e mi ná dó xɔ ɔ́ ná hwe, ɖó azɔn nabí e mi ná ya jinukún ɔ́ sa xá mi wɛ è ɖe. Mɛ ɖokpó má ɖo mi mɛ bó hízí nɔzo tɔn ó. Mi ɖi xɛsi nú nyɛ Mawu mitɔn, ɖó nyɛ wɛ nyí Mawu Mavɔmavɔ, Mawu mitɔn. Mi nyi sɛ́n ce lɛ́ɛ, bó bló nǔ e un zɔ́n mi lɛ́ɛ ganjí; énɛ́ ɔ́, mi ná vo ɖo to ɔ́ mɛ. Énɛ́ ɔ́, ayǐkúngban ná ná jinukún, bɔ mi ná ɖu, bɔ é ná kpé mi kpo, bɔ mi ná vo ɖo to ɔ́ mɛ. “Mi sixú kanbyɔ́ miɖée ɖɔ: Xwe tɛ́nwe mɛ xwe tɛ́nwe mɛ ɔ́, nú mǐ má dó nǔkún ǎ ɔ́, étɛ́ mǐ ná ɖu? Énɛ́ ɔ́ wú ɔ́, nyɛ Mawu Mavɔmavɔ ɔ́, un ná kɔn nyɔ̌ná dó jǐ mitɔn, bɔ ji ná jɛ nú mi ɖo xwe ayizɛ́ngɔ́ ɔ́ mɛ. Un ná ɖe gbe nú ayǐkúngban ɔ́, bɔ é ná ná jinukún e mi ná ɖu nú xwe atɔn ɔ́ mi. Xwe tántɔngɔ́ ɔ́ mɛ ɔ́, mi ná lɛ́ dó nǔ. Amɔ̌, xwe énɛ́ ɔ́ mɛ ɔ́, jinukún e mi ya ɖo xwe ayizɛ́ngɔ́ ɔ́ mɛ ɔ́ ɖu wɛ mi ná kpo ɖe, ɖó é ná kpo ɖo así mitɔn ganjí káká yi kpé dó jinukún e mi ná ya ɖo xwe tɛ́nnɛgɔ́ ɔ́ mɛ ɔ́ nu.” “È sixú sa ayǐkúngban ɖé bǐ gbídígbídí ǎ, ɖó ayǐkúngban ɔ́, ce wɛ, bɔ midɛɛ lɛ́ɛ ká nyí jǒnɔ ɖo to ce mɛ; mi ná nɔ fínɛ́ káká sɔ́yi ǎ. Énɛ́ ɔ́ wú ɔ́, mi ná ɖó sɛ́n ayǐ, gbɔn fí bǐ, ɖo to e ná ná mi wɛ un ɖe ɔ́ mɛ, bɔ sɛ́n ɔ́ ná ná acɛ mɛ ɖokpó ɖokpó, bɔ é hɛn ɔ́, é ná vɔ́ ayǐkúngban e é sa ɔ́ xɔ. “Nú nɔví mitɔn ɖé jɛ ya mɛ, bó sa ayǐkúngban tɔn ɖě ɔ́, mɛ e nyí mɛ tɔn bó sɛkpɔ́ ɛ ganjí, bó ɖó acɛ, bó hɛn ɔ́ é ná vɔ́ ayǐkúngban ɔ́ xɔ ɔ́ ná wá, bó ná vɔ́ ayǐkúngban ɔ́ xɔ ɖo mɛ e é sa xá ɔ́ sí. Nú mɛɖé má ka ɖó mɛɖé bɔ é ná vɔ́ ayǐkúngban e é sa ɔ́ xɔ ǎ, bónú é ɖésú ká ba akwɛ́ tɔn bó ná vɔ́ xɔ ɔ́, é ná kpɔ́n xwe nabí e kpo bɔ è nǎ ɖu ‘Awǎjijɛxwe’ ɔ́, bó ná ná akwɛ́ tɔn ɛ, bó ná yí ayǐkúngban tɔn. Nú é má ká mɔ nǔ e é ná dó sú axɔ́ ɔ́ ná ɔ́ ǎ ɔ́, ayǐkúngban ɔ́ ná kpo ɖo mɛ e xɔ ɔ́ tɔn nyí wɛ káká yi jɛ ‘Awǎjijɛxwe’ ɔ́ mɛ. Xwe énɛ́ ɔ́ xwe ɔ́, ayǐkúngbannɔ ɔ́ ná yí ayǐkúngban tɔn. “Nú mɛɖé sa xwé tɔn ɖo toxo e è mɛ ahohó lɛ́ lɛ̌ dó lɛ́ɛ ɖě mɛ ɔ́, xwe e xwe é sa ɔ́ wɛ é ná ɖó acɛ bó ná vɔ́ xɔ. Acɛ e é ɖó bó ná dó vɔ́ nǔ e é sa ɔ́ xɔ ɔ́ ɖo te káká nú xwe ɖokpó. Lo ɔ́, nú é má kó vɔ́ xɔ ǎ, bɔ é bló xwe ɖokpó gbánwúngbánwún ɔ́, hǔn é húzú mɛ e xɔ ɔ́ kpódó vǐ tɔn lɛ́ɛ kpó tɔn káká sɔ́yi. Yě sɔ́ ná sɔ́ jó ‘Awǎjijɛxwe’ ɔ́ mɛ ǎ. Amɔ̌, xwé e è sa ɖo gletoxo e è ma mɛ ahohó lɛ́ lɛ̌ dó ǎ lɛ́ɛ mɛ ɔ́, lě e è nɔ vɔ́ ayǐkúngban xɔ gbɔn ɔ́ wɛ è nǎ vɔ́ xɔ gbɔn. Ényí mɛ e sa ɔ́ má vɔ́ xɔ ǎ káká bɔ ‘Awǎjijɛxwe’ wá ɔ́, mɛ e xɔ ɔ́ ná tɔ́n sín mɛ. “Levíi ví lɛ́ɛ ɔ́, yě ɖó acɛ hwebǐnu, bó ná vɔ́ xwé yětɔn e ɖo Levíi sín toxo lɛ́ɛ mɛ é xɔ. É ná bó nyí Levíi ví ɖěvo wɛ xɔ xwé lɛ́ɛ ɖě ‘Awǎjijɛxwe’ ɔ́ mɛ ɔ́, xwé ɔ́ ná húzú mɛ e sí é xɔ ɖe ɔ́ tɔn; ɖó xwé e ɖo Levíi toxo ɔ́ mɛ lɛ́ɛ wɛ nyí Levíi ví lɛ́ɛ tɔn ɖo Izlayɛ́li to ɔ́ mɛ. È nǎ sa gle e lɛ́ lɛ̌ dó toxo yětɔn lɛ́ɛ ǎ, ɖó yětɔn wɛ gle énɛ́ lɛ́ɛ nyí káká sɔ́yi.” “Nú nɔví towe ɖo akpá towe bó jɛ ya mɛ, bɔ nǔɖé má sɔ́ ɖo así tɔn ǎ ɔ́, a nǎ hɛn sɔ ɛ. É ná bó nyí jǒnɔ abǐ mɛ e ná nɔ akpá towe káká jɛ hwe ɖé nu ɔ́ wɛ ɔ́, a nǎ hɛn sɔ ɛ bɔ é ná nɔ akpá towe. A nǎ nya nǔ n'i bó byɔ́ d'é jí ǎ, a ka ná sa akwɛ́ n'i ǎ; a nǎ ɖi xɛsi nú nyɛ Mawu towe, bɔ nɔzo towe ná nɔ akpá towe. Nú akwɛ́ wɛ mi nya n'i hǔn, mi ma byɔ́ ɛ akwɛ́ví ó; é nyí nǔɖuɖu wɛ mi nya n'i hǔn, mi ma byɔ́ ɖɔ é ní ná émí d'é jí ó. Nyɛ wɛ nyí Mawu Mavɔmavɔ, Mawu mitɔn. Nyɛ wɛ ɖe mi tɔ́n sín Ejípu, bó ná ná Kanáa to ɔ́ mi, bó ná nyí Mawu mitɔn.” “Nú to mitɔn mɛ nu ɖé jɛ ya mɛ, bó sɔ́ éɖée sa nú mi, bó ná nyí mɛsɛntɔ́ mitɔn ɔ́, mi ma zɔ́n kannumɔ zɔ́ ɛ ó. Lo ɔ́, mi hɛn ɛ ɖi azɔ̌watɔ́ e ɖo azɔ̌ wa nú mi wɛ, bɔ mi ɖo axɔ́ sú i wɛ, abǐ jǒnɔ e ɖo mi gɔ́n ɔ́ ɖɔhun. É ná ɖo azɔ̌ wa nú mi wɛ káká jɛ ‘Awǎjijɛxwe’ ɔ́ mɛ. Xwe énɛ́ ɔ́ xwe ɔ́, mi ná jó e, bó ná jó vǐ tɔn lɛ́ɛ lɔmɔ̌. É ná lɛ́ kɔ yi hɛ̌n tɔn nu, bó ná yi tɔ́ tɔn lɛ́ɛ yíkúngban jí. Đó mɛsɛntɔ́ ce e un ɖe sín Ejípu lɛ́ɛ wɛ; è nǎ sa yě kannumɔ ɖɔhun ǎ. Mi ma hɛn yě syɛ́nsyɛ́n ó. Mi ná ɖi xɛsi nú nyɛ Mawu mitɔn. “Nú mi ɖo kannumɔ ba wɛ ɔ́, akɔta e lɛ́ lɛ̌ dó mi lɛ́ɛ mɛ wɛ mi ná xɔ ɖe. Mi sixú lɛ́ xɔ ɖo jǒnɔ e ɖo to mitɔn mɛ lɛ́ɛ sín vǐ lɛ́ɛ sí, abǐ jǒnɔ e kó húzú xwénu lɛ́ɛ sín vǐ lɛ́ɛ sí; yě ná nyí mitɔn. É wá yá ɔ́, mi ná jó yě dó nú vǐ mitɔn súnnu lɛ́ɛ, bɔ yě ná ɖu gǔ yětɔn. Yě ná nyí vǐ mitɔn súnnu lɛ́ɛ tɔn. Yě ná nyí kannumɔ mitɔn káká sɔ́yi. Amɔ̌, mɛ ɖěbǔ ní má ɖo mi mɛ, bó hɛn nɔví tɔn Izlayɛ́li ví lɛ́ɛ ɖě syɛ́nsyɛ́n ó. “Mǐ ní ɖɔ jǒnɔ e wá cí to mitɔn mɛ lɛ́ɛ ɖě jɛ dɔkun, bɔ nɔví mitɔn ɖě jɛ ya mɛ, bó sɔ́ éɖée sa n'i, abǐ é sɔ́ éɖée sa nú jǒnɔ e kó húzú xwénu lɛ́ɛ ɖě. Ényí nǔ ɖo mɔ̌ ɔ́, to mitɔn mɛ nu énɛ́ ɔ́ ɖó acɛ bɔ è nǎ vɔ́ ɛ xɔ. Nɔví tɔn lɛ́ɛ ɖě sixú vɔ́ ɛ xɔ. Nú nɔví tɔn ɖě má vɔ́ ɛ xɔ ǎ ɔ́, atagán tɔn abǐ ataví tɔn ɖé, abǐ vǐ yětɔn súnnu ɖé sixú vɔ́ ɛ xɔ; abǐ mɛ tɔn ɖěvo ɖé sixú vɔ́ ɛ xɔ. Nú é ɖésúnɔ ɖó hlɔ̌nhlɔ́n tɔn ɔ́, é sixú vɔ́ éɖée xɔ. Nú è nǎ vɔ́ ɛ xɔ ɔ́, é kpó mɛ e xɔ ɛ ɔ́ kpó ná xa xwe nabí e é kó bló ɖo gɔ̌n tɔn ɔ́ kpó xwe nabí e kpo bɔ è nǎ byɔ́ ‘Awǎjijɛxwe’ ɔ́ mɛ é kpó. Xwe nabí e é bló ɔ́ wɛ è nǎ xwedó bó dó lɛ́n axɔ́ e é ná sú ɔ́. É ná lɛ́n akwɛ́ ɔ́ dó gbeɖokpókwɛ́ e è nɔ sú azɔ̌watɔ́ ɔ́ jí. Nú xwe e kpo bɔ è nǎ byɔ́ ‘Awǎjijɛxwe’ ɔ́ mɛ ɔ́ lɛ́ sukpɔ́ ɔ́, akwɛ́ e mɛ e xɔ ɛ ɔ́ su ɔ́ wɛ è nǎ kpɔ́n dó lɛ́n akwɛ́ nabí e è nǎ dó vɔ́ ɛ xɔ é. Nú xwe nabí e kpo bɔ è nǎ byɔ́ ‘Awǎjijɛxwe’ ɔ́ mɛ ɔ́ má ká sɔ́ sukpɔ́ ǎ ɔ́, é ná lɛ́n akwɛ́ ɔ́, bó ná sú nabí e ná sɔgbe xá xwe nabí e kpo ɔ́. Nú mɛɖé ma ka vɔ́ ɛ xɔ ǎ, bɔ é kpo ɖo gǎn tɔn ɔ́ xwé ɔ́, é ná nɔ́ mɔ ɛ dó mɔ azɔ̌watɔ́ e è nɔ sú axɔ́ xwe mɛ xwe mɛ ɔ́. Mi ma lɔn nú gǎn tɔn hɛn ɛ syɛ́nsyɛ́n ó. Nú è ma vɔ́ to mitɔn mɛ nu ɔ́ xɔ ǎ káká bɔ ‘Awǎjijɛxwe’ ɔ́ wá ɔ́, è nǎ jó e, bó ná jó vǐ tɔn lɛ́ɛ.” “Mi ná nɔ́ nyi sɛ́n énɛ́ lɛ́ɛ, ɖó mɛsɛntɔ́ ce lɛ́ɛ wɛ mi Izlayɛ́li ví lɛ́ɛ nyí. Mɛsɛntɔ́ ce e un ɖe tɔ́n sín Ejípu lɛ́ɛ wɛ mi nyí. Nyɛ wɛ nyí Mawu Mavɔmavɔ, Mawu mitɔn.” “Mi ma lí vodún ó, mi ma kpa bǒcyɔ abǐ akpajlɛ́ awǐnnya e yě tun te bó nɔ sɛn lɛ́ɛ tɔn ó. Mi má zé awǐnnya e wú è ɖe nǔ dó é ɖěbǔ ɖó to mitɔn mɛ bó sɛn ó, ɖó nyɛ wɛ nyí Mawu Mavɔmavɔ, Mawu mitɔn. “Mi ná nɔ́ nyi gbɔjɛzán ce lɛ́ɛ, bó ná nɔ́ ɖó sísí nú xwé ce. Nyɛ wɛ nyí Mawu Mavɔmavɔ.” “Ényí mi nɔ nyi sɛ́n ce lɛ́ɛ ɔ́, ényí mi nɔ kpé nukún dó nǔ e un zɔ́n mi lɛ́ɛ wú bó nɔ bló ɔ́, é su jǐ hwenu ɔ́, un ná nɔ́ sɛ́ jǐ dó mi, ayǐkúngban ɔ́ ná nɔ́ ná jinukún, atín e ɖo zunkan mɛ lɛ́ɛ ná nɔ́ sɛ́n. Mi ná nɔ ɖo jinukún só wɛ káká jɛ vǐwun gbigbɛ hwenu; mi ná ɖo vǐwun gbɛ wɛ káká jɛ nǔkúndídó hwenu. Mi ná nɔ́ ɖu nǔ gɔ́ xo; mi ná vo ɖo to mitɔn mɛ. Un ná bló bɔ ayi ná j'ayǐ nú mi ɖo to ɔ́ mɛ. Nú mi dɔ́ amlɔ zǎn mɛ ɔ́, mɛ ɖěbǔ ná wá dó tagba nú mi ǎ. Un ná bló bɔ adǎnkanlin lɛ́ɛ bǐ ná gosín to ɔ́ mɛ. È nǎ wá fun ahwan xá mi ɖo to mitɔn mɛ ǎ. Mi ná tɔ́n ahwan kɛntɔ́ mitɔn lɛ́ɛ; mi ná jɛ gǔdo yětɔn, bɔ yě ná j'ayǐ ɖo nukɔn mitɔn. Mi mɛ atɔ́ɔ́n ná jɛ kɛntɔ́ kanwe ko (100) gúdo, bɔ yě ná j'ayǐ ɖo nukɔn mitɔn, bɔ mi mɛ kanwe ko (100) ná jɛ kɛntɔ́ děgba we afɔwó (10.000) gúdo, bɔ yě ná j'ayǐ ɖo nukɔn mitɔn. Un ná kpé nukún dó mi wú. Un ná bló bɔ mi ná ji bó gba kún. Un ná hɛn akɔ e un jɛ xá mi ɔ́ ɖó te. Jinukún mitɔn lɛ́ɛ ná sukpɔ́ káká bɔ éé mi sɔ́ ɖ'ayǐ lɛ́ɛ ná vɔ cóbɔ ɖěvo ná tɔ́n ǎ; é ná wá byɔ́ ɖɔ mi ní bɛ́ xóxó lɛ́ɛ síin lɔ, bɔ éé tɔ́n yɔ̌yɔ́ lɛ́ɛ ná mɔ tɛn. Un ná bló nɔtɛn ce mímɛ́ ɔ́ ɖó tɛ́ntin mitɔn, bó ná lɛ́ kɔ sín mi gúdo ǎ. Un ná nɔ tɛ́ntin mitɔn. Un ná nyí Mawu mitɔn, bɔ mi ná nyí togun ce. Nyɛ wɛ nyí Mawu Mavɔmavɔ, Mawu mitɔn e ɖe mi tɔ́n sín Ejípunu lɛ́ɛ to mɛ é, bónú mi ma sɔ́ nyí kannumɔ yětɔn ó. Nyɛ wɛ flí agban yětɔn e ɖo kɔ mitɔn jí ɔ́ gba, bó bló bɔ mi ná nɔ́ tɛ afɔ ayǐ bó gó.” “Lo ɔ́, ényí mi ma nɔ ɖótó mì ǎ ɔ́, ényí mi ma nɔ wa nǔ énɛ́ lɛ́ɛ e un zɔ́n mi lɛ́ɛ bǐ ǎ ɔ́, ényí mi hɔn sɛ́n ce lɛ́ɛ nyi gbě ɔ́, ényí mi gbɛ́ wǎn nú tito ce lɛ́ɛ káká bó má nɔ́ bló nǔ e un zɔ́n lɛ́ɛ ǎ, lobo gbɛ́ akɔ e un jɛ xá mi ɔ́, nǔ e un ná dó sin xá mi ɔ́ ɖíe: “Un ná dó xɛsi ɖaxó ɖé mi, mi ná xú gǒ bɔ avivɔ ná nɔ́ sin mi. Nǔ énɛ́ lɛ́ɛ ná zɔ́n bɔ nukún mitɔn lɛ́ɛ sɔ́ ná nɔ́ mɔ nǔ ganjí ǎ, gbɛ mitɔn ná blá wǔ. Mi ná nɔ́ dó jinukún nyi gle mitɔn lɛ́ɛ jí; lo ɔ́, mi ná nɔ́ mɔ ɖěbǔ ǎ, ɖó kɛntɔ́ mitɔn lɛ́ɛ wɛ ná nɔ́ bɛ́ nǔ e tɔ́n ɖ'é mɛ lɛ́ɛ bǐ. Un ná húzú kpan nukɔn mi, bɔ kɛntɔ́ mitɔn lɛ́ɛ ná ɖu ɖo mi jí. Mɛ e gbɛ́ wǎn nú mi lɛ́ɛ ná kpa acɛ nú mi, bɔ mɛ ɖěbǔ ná bó ma ɖo nyinya mi wɛ ǎ ɔ́, mi ná nɔ́ ɖo hinhɔn wɛ. “Ényí un wa mɔ̌ xá mi bɔ mi ma ɖótó mì ǎ jɛ́n wɛ ɔ́, un ná dɔn tó nú mi azɔn tɛ́nwe ɖó hwɛ e mi hu lɛ́ɛ wú. Hlɔ̌nhlɔ́n e mi ɖó bó dó ɖo go yí wɛ ɔ́, un ná gba bǐ dó; un ná bló bɔ jǐnukúnsin mitɔn ná syɛ́n gan ɖɔhun. Akú ná ɖó bɔ ayǐkúngban mitɔn ná xú ganvɔ ɖɔhun. Mi ná zán hlɔ̌nhlɔ́n mitɔn dó wǔvɔ́; ayǐkúngban mitɔn ná ná jinukún ǎ. Atín e ɖo ayǐkúngban jí lɛ́ɛ ná sɛ́n ǎ. “Ényí mi lɛ́ fɔ́n gǔ dó jǐ ce, bó má ba ná ɖótó mì ǎ ɔ́, un ná dɔn tó nú mi azɔn tɛ́nwe d'é jí, bɔ é ná sɔgbe xá hwɛ e mi hu lɛ́ɛ. Un ná sɛ́ gběkanlin lɛ́ɛ dó mi, bɔ yě ná hu vǐ mitɔn lɛ́ɛ, bó ná sú kanlin mitɔn lɛ́ɛ sín kún dó, bɔ é ná kpo mi mɛ kpɛɖé bɔ è sɔ́ ná mɔ mɛ ɖé ɖo ali mitɔn lɛ́ɛ jí ǎ. “Ényí tó e un dɔn nú mi nɛ́ lɛ́ɛ má húzú mi ǎ ɔ́, ényí mi lɛ́ kpo ɖo gǔ fɔ́n dó jǐ ce wɛ jɛ́n wɛ ɔ́, nyɛ ná fɔ́n gǔ dó mi jí, bó ná lɛ́ vɔ́ dɔn tó nú mi azɔn tɛ́nwe ɖó hwɛ e mi hu lɛ́ɛ wú. Un ná bló bɔ è nǎ tɔ́n ahwan mi, bó ná dó ba hlɔn, ɖó akɔjijɛ ce e mi hɛn gba ɔ́ wú. Mi na bo hɔn yi cí toxo mitɔn e ahohó lɛ́ lɛ̌ dó lɛ́ɛ mɛ ɔ́, un ná nɔ́ sɛ́ jɛmɛjí dó tɛ́ntin mitɔn, bɔ kɛntɔ́ mitɔn lɛ́ɛ ná kpé mi wú. Un ná tɛ nǔɖuɖu mi. Nyɔ̌nu wǒ wɛ ná ɖa wɔ̌xúxú mitɔn ɖo myɔkpó ɖokpó géé mɛ, bó ná bɛ́ wá nú mi, bɔ mi ná má, bɔ é ná hwe káká, bɔ mi ɖu ɔ́, mi ná gɔ́ xo ǎ. “Ényí un dó nǔ énɛ́ lɛ́ɛ bǐ sin xá mi, bɔ mi ma ɖótó mì ǎ, bó lɛ́ ɖo gǔ fɔ́n dó jǐ ce wɛ jɛ́n wɛ ɔ́, nyɛ ɖésúnɔ lɔmɔ̌ ná fɔ́n gǔ dó mi jí, kpó xomɛsin ɖé kpó, bó ná lɛ́ dɔn tó nú mi azɔn tɛ́nwe ɖó hwɛ e mi hu lɛ́ɛ wú. Mi ná ɖu vǐ e mi ɖésúnɔ ji lɛ́ɛ sín lan. Un ná gbɛ́ wǎn nú mi. Un ná gba vodún xwé mitɔn e ɖo só jí lɛ́ɛ; un ná mu vɔ̌sákpe e jí mi nɔ dó zǎlínkpɔ́n zo ɖe lɛ́ɛ. Un ná bɛ́ cyɔ mitɔn lɛ́ɛ kplé ɖó vodún mitɔn e è gba hánnyá lɛ́ɛ jí. Un ná bló bɔ toxo mitɔn lɛ́ɛ ná jɛ vɔ̌. Un ná gba vodúnxɔ mitɔn lɛ́ɛ hánnyá, bó sɔ́ ná se vɔ̌ wǎnɖagbenɔ mitɔn lɛ́ɛ ɖě sín wǎn ǎ. Nyɛ ɖésú wɛ ná gba to ɔ́, bɔ é ná zɛ hǔn nú kɛntɔ́ mitɔn e ná wá nɔ to ɔ́ mɛ lɛ́ɛ ɖésú. Midɛɛ lɛ́ɛ ɔ́, un ná gba mi dó gbɔn akɔta lɛ́ɛ mɛ, bɔ ahwan ná ɖo mi nya kpé wɛ. È nǎ gba to mitɔn, bɔ toxo mitɔn lɛ́ɛ ná jɛ vɔ̌. “Énɛ́ ɔ́, xwe nabí e mi nǎ hɔn yi cí kɛntɔ́ mitɔn lɛ́ɛ to mɛ xɔ lɛ́ɛ bǐ ɔ́, to mitɔn e mi jó dó ɔ́ ná gbɔjɛ́ ɖó gbɔjɛ e mi má ná ɛ ɖ'ayǐ ǎ é tɛnmɛ. Hǔn, ayǐkúngban mitɔn ná gbɔjɛ́ ɖó gbɔjɛ e mi ma ná ɛ, hwenu e mi ɖo to ɔ́ mɛ ǎ lɛ́ɛ tɛnmɛ. “Mɛ e ná gán ɖo nǔ énɛ́ lɛ́ɛ mɛ ɖo mi mɛ, ɖo kɛntɔ́ mitɔn lɛ́ɛ sín tomɛ lɛ́ɛ ɔ́, un ná bló bɔ yě ná ɖo síja jí; jɔhɔn nyi bónú ama yǎyá ɖɔ nǔ ɔ́, yě ná hɔn. Yě ná hɔn káká bó ná j'ayǐ, ahwan wɛ ɖo yě nya wɛ ɖɔhun. Mɛ ɖé ká ɖo yě nya wɛ ǎ. Yě ná nɔ xo za nú yěɖée ɖi ahwan wɛ ɖo yě nya wɛ ɖɔhun, có mɛɖé ká ɖo yě nya wɛ ǎ. Mi ná sixú nɔ te ɖo kɛntɔ́ mitɔn lɛ́ɛ nukɔn ǎ. Mi ná kú jɛ mɛ ɖěvo tomɛ fí e mi ɖe lɛ́ɛ; kɛntɔ́ mitɔn lɛ́ɛ sín tomɛ wɛ è nǎ ɖi mi dó. Mɛ e ná gán ɖo kɛntɔ́ sí ɖo mi mɛ lɛ́ɛ ná xú gǒ ɖo kɛntɔ́ yětɔn lɛ́ɛ sín tomɛ, ɖó hwɛ e yě hu lɛ́ɛ kpó hwɛ e tɔ́gbó yětɔn lɛ́ɛ hu lɛ́ɛ kpó wú.” “Mɛ e ka ná gán lɛ́ɛ ná yí hwɛ e yě hu lɛ́ɛ kpó hwɛ e tɔ́gbó yětɔn lɛ́ɛ hu lɛ́ɛ kpó sín gbe. Yě ná yí agɔ e yě jɛ dó mì lɛ́ɛ, kpó gǔ e yě fɔ́n dó jǐ ce lɛ́ɛ kpó sín gbe. Yě ná mɔ ɖɔ hwɛ énɛ́ lɛ́ɛ e émí hu lɛ́ɛ wɛ zɔ́n bɔ nyɛ lɔmɔ̌ fɔ́n gǔ dó émí jí, bó kplá émí yi kɛntɔ́ émítɔn lɛ́ɛ sín tomɛ. Énɛ́ ɔ́, yě mɛ tótlítɔ́ énɛ́ lɛ́ɛ ná hwíhwɛ́ yěɖée, bó ná yí gbe nú tó e ná dɔn nú yě wɛ è ɖe ɖó hwɛ e yě hu ɔ́ wú é. Un ná flín akɔ e un jɛ xá Jakɔ́bu, Izáki kpó Ablaxámu kpó é; un ná flín to ɔ́. É ka ɖo mɔ̌ có to ɔ́ ná ko jɛ vɔ̌ hwɛ̌ bɔ ayǐkúngban ɔ́ ná gbɔjɛ́ bǐ. Énɛ́ ɔ́, sɛ́n ce e yě gba lɛ́ɛ kpó nǔ e un zɔ́n yě bɔ yě má wa ǎ lɛ́ɛ kpó ɔ́, un ná dɔn tó tɔn nú yě. É ɖo mɔ̌ có, hwenu e yě ná ɖo kɛntɔ́ yětɔn lɛ́ɛ sín tomɛ ɔ́, un ná jó yě dó ɖó mɔ̌ nu ǎ; un ná ɖe kɔ sín yě wú ǎ; un ná sú kún yětɔn dó ǎ; un ná gba akɔ e un jɛ xá yě ɔ́ ǎ, ɖó nyɛ wɛ nyí Mawu Mavɔmavɔ, Mawu yětɔn. Un ná flín akɔ e un jɛ xá tɔ́gbó yětɔn lɛ́ɛ ɔ́ ɖó ɖagbe yětɔn wú. Yě wɛ un ɖe tɔ́n sín Ejípu, ɖo akɔta ɖě lɛ́ɛ nukún mɛ, bó ná nyí Mawu yětɔn. Nyɛ wɛ nyí Mawu Mavɔmavɔ.” Sɛ́n e Mawu Mavɔmavɔ dó nú Izlayɛ́li ví lɛ́ɛ, nǔ e é zɔ́n yě lɛ́ɛ, kpódó nǔ e é kplɔ́n yě lɛ́ɛ kpó gbɔn Mɔyízi jí ɖo Sinayíi só ɔ́ jí lɛ́ɛ nɛ́. Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Nú mɛɖé dó gbɛtɔ́ sín akpá nú nyɛ Mawu Mavɔmavɔ ɔ́, mɛ ɔ́ sixú ná akwɛ́, bó dó ɖe akpá e é dó ɔ́ ná. Akwɛ́ e é ná ná dó ɖe akpá e é dó ɔ́ ná ɔ́ ɖíe: “Nú súnnu sín akpá wɛ é dó, bɔ súnnu ɔ́ sín xwe bɛ́ sín xwe ko yi xwe kanɖé ko (60) ɔ́, gankwɛ́ kanɖé wǒ (50) wɛ é ná ná, bɔ gankwɛ́ ɖokpó ɖokpó ná sɔgbe xá éé è nɔ zán ɖo Mawu xwé gbe é. Nú é ká nyí nyɔ̌nu sín akpá wɛ é dó, bɔ nyɔ̌nu ɔ́ sín xwe bɛ́ sín ko yi kanɖé wǒ (50) ɔ́, é ná sú gankwɛ́ gban (30). “Nú é nyí ɖɔ yɔkpɔ́vú súnnu sín akpá wɛ é dó, bɔ vǐ ɔ́ sín xwe bɛ́ sín xwe atɔ́ɔ́n yi ko ɔ́, é ná sú gankwɛ́ ko. Nú é ká nyí yɔkpɔ́vú nyɔ̌nu sín akpá wɛ é dó, bɔ vǐ ɔ́ sín xwe bɛ́ sín atɔ́ɔ́n yi ko ɔ́, é ná sú gankwɛ́ wǒ. “Nú vǐ ɔ́ nyí súnnu, bɔ xwe tɔn bɛ́ sín sun ɖokpó yi xwe atɔ́ɔ́n ɔ́, é ná sú gankwɛ́ atɔ́ɔ́n. Nú é ká nyí nyɔ̌nu wɛ, bɔ xwe tɔn bɛ́ sín sun ɖokpó yi xwe atɔ́ɔ́n ɔ́, é ná sú gankwɛ́ atɔn. “Nú mɛ ɔ́ kó ɖó hú xwe kanɖé ko (60), bó nyí súnnu ɔ́, é ná sú gankwɛ́ afɔtɔn. Nú é ká nyí nyɔ̌nu wɛ ɔ́, é ná sú gankwɛ́ wǒ. “Nú mɛɖé má ɖó akwɛ́ nabí e xó è ɖɔ ɔ́ ǎ ɔ́, mɛ ɔ́ ɖó ná kplá mɛ e sín akpá é dó ɔ́ yi vɔ̌sánú-xwlémawutɔ́ ɔ́ gɔ́n, bɔ éyɛ́ ná kpɔ́n nabí e ɖo mɛ e d'akpá ɔ́ sí ɔ́, bó ná ɖɔ nabí e é ná sú ɔ́ n'i. “Nú é ká nyí ɖɔ kanlin sín akpá wɛ mɛ ɔ́ dó, bɔ kanlin ɔ́ sɔgbe xá éé è nǎ dó sá vɔ̌ nú Mawu Mavɔmavɔ ɔ́, hǔn kanlin ɔ́ húzú kanlin ɖeɖóvo. È ɖǒ acɛ bó sixú zé kanlin ɖěvo dó ɖyɔ́ ná ǎ. Nú kanlin ɔ́ nyí kanlin ɖagbe kpódó é má nyí ɖagbe kpó ɔ́, è ɖǒ ná ɖyɔ́ ǎ. Nú mɛɖé ká ɖyɔ́ jɛ́n wɛ ɔ́, hǔn kanlin we lɛ́ɛ bǐ húzú nyɛ Mawu Mavɔmavɔ ɔ́ tɔn. “Nú kanlin ɔ́ ká nyí kanlin e vɛ́ mi, bɔ é má jɛ xá ɖɔ è nǐ zé dó sá vɔ̌ nú nyɛ Mawu Mavɔmavɔ ǎ ɔ́, kanlinnɔ ɔ́ ɖó ná kplá yi vɔ̌sánú-xwlémawutɔ́ ɔ́ gɔ́n, bɔ éyɛ́ ná kpɔ́n ɖɔ kanlin ɔ́ nyí kanlin ɖagbe abǐ kanlin blɔ̌ ɖo wǔ wɛ ají, bó ná sun axi ná; akwɛ́ e é ɖɔ ɔ́ wɛ mɛ ɔ́ ná sú. Nú ényí ɖɔ kanlinnɔ ɔ́ jló ná vɔ́ kanlin ɔ́ xɔ ɔ́, é ná sú akwɛ́ nabí e vɔ̌sánú-xwlémawutɔ́ ɔ́ ɖɔ ɔ́, bó ná ná akwɛ́ ɔ́ sín mǎ ɖó atɔ́ɔ́n d'é jí. “Nú mɛ ɖé sɔ́ xwé tɔn ɖó vo nú nyɛ Mawu Mavɔmavɔ ɔ́, vɔ̌sánú-xwlémawutɔ́ ɔ́ ná kpɔ́n ɖɔ xwé ɔ́ ɖo ganjí, abǐ nǔɖé jɛ do ɖ'é wú ají, bó ná sun axi ná; akwɛ́ nabí e é ɖɔ ɔ́ wɛ è nǎ sú dó xɔ xwé ɔ́. Nú mɛ e tɔn xwé ɔ́ nyí ɔ́ jló ná vɔ́ xwé tɔn xɔ ɔ́, é ná sú akwɛ́ nabí e vɔ̌sánú-xwlémawutɔ́ ɔ́ ɖɔ ɔ́, bó ná ná akwɛ́ ɔ́ sín mǎ ɖó atɔ́ɔ́n d'é jí, bɔ xwé ɔ́ ná húzú étɔn. “Nú mɛɖé sɔ́ gle tɔn ɖó vo nú nyɛ Mawu Mavɔmavɔ ɔ́, è nǎ kpɔ́n lě e ɔ́ji e è nǎ dó d'é jí ɔ́ ná sukpɔ́ gbɔn ɔ́, bó ná sun axi. Nú ɔ́ji ɔ́ yi kilóo afɔɖé kanwe ko (300) ɔ́, è nǎ nɔ́ sú gankwɛ́ kanɖé wǒ (50). Nú é nyí ɖɔ ‘Awǎjijɛxwe’ ɔ́ mɛ wɛ è sɔ́ gle ɔ́ ɖó vo nú nyɛ Mawu Mavɔmavɔ ɔ́, akwɛ́ nabí e xó è ko ɖɔ ɔ́ jɛ́n è nǎ sú. Nú ‘Awǎjijɛxwe’ ɔ́ ká kó wá yi cóbɔ è sɔ́ gle ɔ́ ɖó vo nú mì ɔ́, vɔ̌sánú-xwlémawutɔ́ ɔ́ ná kpɔ́n xwe nabí e kpo bɔ ‘Awǎjijɛxwe’ ɖěvo ná wá ɔ́, bó ná ɖe akwɛ́ ɔ́ kpo, bó lɛ́n. “Nú glenɔ ɔ́ jló ná vɔ́ gle tɔn xɔ ɔ́, é ná sú akwɛ́ e xó vɔ̌sánú-xwlémawutɔ́ ɔ́ ɖɔ ɔ́, bó ná ná akwɛ́ ɔ́ sín mǎ ɖó atɔ́ɔ́n d'é jí, bɔ gle ɔ́ ná lɛ́ nyí étɔn. “Nú glenɔ ɔ́ má vɔ́ gle tɔn e é kó ɖe ɖó vo nú mì ɔ́ xɔ ǎ, bó ká sɔ́ sa xá mɛ ɖěvo ɔ́, é ɖésú sɔ́ ɖó acɛ bó ná vɔ́ xɔ ǎ. ‘Awǎjijɛxwe’ ɔ́ mɛ ɔ́, gle énɛ́ ɔ́ ná húzú nyɛ Mawu Mavɔmavɔ tɔn, bó ná nyí vɔ̌sánú-xwlémawutɔ́ lɛ́ɛ tɔn; gle e è sɔ́ ɖó vo nú nyɛ Mawu Mavɔmavɔ bɔ é ná nyí ce káká sɔ́yi ɔ́ wɛ é ná nyí. “Nú mɛɖé sɔ́ gle e é xɔ bɔ é má nyí gǔ tɔn wɛ é ɖu ǎ ɔ́ ɖó vo nú nyɛ Mawu Mavɔmavɔ ɔ́, vɔ̌sánú-xwlémawutɔ́ ɔ́ ná kpɔ́n xwe nabí e kpo bɔ ‘Awǎjijɛxwe’ ɖěvo ná wá ɔ́, bó ná sun axi gle ɔ́, bɔ mɛ e sɔ́ gle ɔ́ ɖó vo nú mì ɔ́, ná sú akwɛ́ e xó è ɖɔ ɔ́ gbe nɛ́ gbe, gbe nɛ́ gbe. È nǎ sɔ́ akwɛ́ ɔ́ ɖó vo nú nyɛ Mawu Mavɔmavɔ. Amɔ̌, nú é wá jɛ ‘Awǎjijɛxwe’ mɛ ɔ́, gle ɔ́ ná lɛ́ jɛ mɛ e tɔn é nyí jɛ nukɔn ɔ́ sí; é wɛ nyí mɛ e ɖu gǔ tɔn é. “Ényí è sun axi nǔ lɛ́ɛ ɔ́, akwɛ́ e è nɔ zán ɖo Mawu xwé gbe ɔ́ wɛ è nǎ zě dó xɔ. Akwɛ́ ɔ́ ɖokpó nɔ́ da glǎmu wǒ.” Mawu Mavɔmavɔ ɖɔ: “Mɛ ɖé má sɔ́ vǐ nukɔntɔn e kanlin tɔn ji ɔ́ ɖó vo nú nyɛ Mawu Mavɔmavɔ bó ɖɔ é ɖésú wɛ jló ó; ɖó nukɔn ví bǐ wɛ kó nyí nyɛ Mawu Mavɔmavɔ tɔn. É ná bó nyí nyibúví, abǐ gbɔ̌ví ɔ́, nyɛ Mawu Mavɔmavɔ tɔn wɛ é kó nyí. Nú kanlin e vɛ́ yě ɔ́ sín vǐ wɛ ɔ́, è nǎ kpɔ́n akwɛ́ nabí e kanlin ví ɔ́ ná xɔ é, bɔ é jló kanlinnɔ ɔ́, é ná ná bó ná lɛ́ ná akwɛ́ ɔ́ vlɔ̌ ɖó atɔ́ɔ́n tɔn d'é jí dó vɔ́ kanlin ví ɔ́ xɔ. Nú é má vɔ́ xɔ ǎ ɔ́, vɔ̌sánú-xwlémawutɔ́ ɔ́ ná sa xá mɛ ɖěvo yí axi e é sun é. “Mɔ̌ ɖokpó ɔ́, nǔ e mɛɖé sɔ́ ɖó vo nú nyɛ Mawu Mavɔmavɔ ɔ́, è sixú sa ǎ, è ka sixú vɔ́ xɔ ǎ; é sixú nyí gbɛtɔ́, é sixú nyí kanlin, é sixú nyí gle. Hǔn nǔ e mɛɖé sɔ́ ɖó vo nú nyɛ Mawu Mavɔmavɔ ɔ́, é ná nyí ce káká sɔ́yi. É ná bó nyí gbɛtɔ́ wɛ è sɔ́ ɖó vo nú nyɛ Mawu Mavɔmavɔ ɔ́, è sixú vɔ́ ɛ xɔ ǎ; hu jɛ́n è nǎ hu i. “Nǔ e nyɔ́ ɖo gle mɛ lɛ́ɛ bǐ sín mǎɖówǒ wɛ nyí nyɛ Mawu Mavɔmavɔ ɔ́ tɔn. É sixú nyí jinukún, é sixú nyí atínsínsɛ́n; nǔ wɛ nyí bɔ è sɔ́ ɖó vo nú nyɛ Mawu Mavɔmavɔ. Nú mɛɖé jló ná vɔ́ nǔ e sín mǎ ɖó wǒ é ná lɛ́ɛ ɖě xɔ ɔ́, mɛ ɔ́ ná ná akwɛ́ nabí e nǔ ɔ́ xɔ é, bó ná lɛ́ ná akwɛ́ ɔ́ vlɔ̌ ɖó atɔ́ɔ́n d'é jí. Nyibú abǐ gbɔ̌ sín mǎ ɖó wǒ ɔ́, kanlinnɔ ɔ́ ná xa kanlin tɔn lɛ́ɛ; é ná xa wǒ wǒ, bó ka ná nɔ́ sɔ́ lɛ̌ngbɔ́nyitɔ́kpogɛ tɔn dó ɖó wuntun wǒgɔ́ lɛ́ɛ, bó ná sɔ́ ɖó vo nú nyɛ Mawu Mavɔmavɔ. È nǎ kpɔ́n ɖɔ kanlin ɔ́ nyí kanlin ɖagbe abǐ nyanya bó ná ɖyɔ́ ǎ. Nú è ka sɔ́ kanlin ɖě dó ɖyɔ́ ɖě ɔ́, è ɖǒ ná sɔ́ kanlin we lɛ́ɛ bǐ ɖó vo nú nyɛ Mawu Mavɔmavɔ, è ká ná sixú vɔ́ ɖě xɔ ǎ.” Sɛ́n e Mawu Mavɔmavɔ dó nú Izlayɛ́li ví lɛ́ɛ gbɔn Mɔyízi jí, ɖo Sinayíi só jí lɛ́ɛ nɛ́. Xwe e bɔ dó xwe e mɛ Izlayɛ́li ví lɛ́ɛ gosín Ejípu ɔ́ wú ɔ́, ɖo sun tɔn wegɔ́ ɔ́ sín azǎn nukɔn tɔn ɔ́ gbe ɔ́, Mɔyízi ɖo Goxɔ ɔ́ mɛ, bɔ Mawu Mavɔmavɔ ɖɔ xó n'i ɖo gbětótló Sinayíi tɔn mɛ; é ɖɔ n'i ɖɔ: “Hwi kpó Aalɔ́ɔn kpó ní sɔ́ togun Izlayɛ́li tɔn ɔ́ bǐ sín kɛ́n. Mi ná xwedó hɛ̌nnu yětɔn lɛ́ɛ, bó ná xwedó xwédo tɔ́ yětɔn lɛ́ɛ tɔn, bó ná ylɔ́ súnnu lɛ́ɛ ɖokpó ɖokpó sín nyǐkɔ bó sɔ́ kɛ́n yětɔn. Mi ná sɔ́ súnnu e ko ɖó xwe bɛ́ sín ko, kpódó ée kó ɖó hú mɔ̌, bó sixú fun ahwan lɛ́ɛ kpó sín kɛ́n; hwi kpódó Aalɔ́ɔn kpó ná xwedó ahwangɔnu yětɔn yětɔn, bó dó sɔ́ kɛ́n yětɔn. Hɛ̌nnugán akɔta ɖokpó ɖokpó tɔn ná dó alɔ mi. Mɛ e ná dó alɔ mi lɛ́ɛ sín nyǐkɔ ɖíe: Elisúu, Cedewúu ví ɔ́ akɔta Hwlibɛ́ni tɔn mɛ wɛ é ɖe; Celumiyɛ́li, Sulicadáyi ví ɔ́, akɔta Sinmɛnyɔ́ɔ tɔn mɛ wɛ é ɖe; Naxicɔ́ni, Aminadabu ví ɔ́, ɖo akɔta Judáa tɔn mɛ Nɛtanɛli, Suwáa ví ɔ́; akɔta Isakáa tɔn mɛ wɛ é ɖe. Eliavu, Helɔ́ni ví ɔ́; akɔta Zabulɔ́ɔn tɔn mɛ wɛ é ɖe. Elicama Amumihudi ví ɔ́; Eflayímu Jozɛ́fu ví ɔ́ sín akɔta mɛ wɛ é ɖe. Gamɛliyɛ́li, Pedasúu ví ɔ́; Manasée Jozɛ́fu ví ɔ́ sín akɔta mɛ wɛ é ɖe. Avidáni, Gideóni ví ɔ́; akɔta Bɛnjamɛ́ɛ tɔn mɛ wɛ é ɖe. Axiezɛ́ɛ, Amumicadayi ví ɔ́; akɔta Dan tɔn mɛ wɛ é ɖe. Pagiyɛ́li, Ɔkláni ví ɔ́; akɔta Acɛ́ɛ tɔn mɛ wɛ é ɖe. Eliyasáfu, Dewúɛli ví ɔ́; akɔta Gadi tɔn mɛ wɛ é ɖe. Axila, Eyináni ví ɔ́; akɔta Nɛfutali tɔn mɛ wɛ é ɖe.” Hɛ̌nnugán énɛ́ lɛ́ɛ e è sɔ́ ɖo togun ɔ́ mɛ lɛ́ɛ lɛ́ nyí ahwangán Izlayɛ́li tɔn. Mɔyízi kpódó Aalɔ́ɔn kpó sɔ́ mɛ énɛ́ lɛ́ɛ e è ɖe lɛ́ɛ gɔ́ nú yěɖée. Énɛ́ ɔ́ gúdo ɔ́, yě ylɔ́ togun Izlayɛ́li tɔn ɔ́ bǐ kplé, ɖo sun wegɔ́ ɔ́ sín azǎn nukɔn tɔn ɔ́ gbe, bó sɔ́ mɛ e ko ɖó xwe ko lɛ́ɛ, kpódó mɛ ko ɖó hú mɔ̌ lɛ́ɛ kpó sín kɛ́n. Yě sɔ́ hɛ̌nnu nabí e ɖo akɔta ɖokpó ɖokpó mɛ ɔ́ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n, lě e Mawu Mavɔmavɔ ɖɔ nú Mɔyízi ɖɔ è nǐ bló gbɔn é. Gbětótló Sinayíi tɔn mɛ wɛ è xa mɛ lɛ́ɛ ɖe. Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ Hwlibɛ́ni, nukɔngbéví Izlayɛ́li tɔn ɔ́ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko kpódó ée ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo akɔta Hwlibɛ́ni tɔn mɛ lɛ́ɛ bló súnnu adɔ̌kpo we děgba ɖě afɔwó-afɔwe kanwe ko (46.500). Yě sɔ́ Sinmɛnyɔ́ɔ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko kpódó ée kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo Sinmɛnyɔ́ɔ sín akɔta mɛ lɛ́ɛ bǐ bló súnnu adɔ̌kpo we děgba ɛnɛ afɔwó-afayizɛ́n kanwe ko (59.300). Yě sɔ́ Gadi sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ kpó ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko, kpódó éé kó ɖó hú mɔ̌, bó ko su ahwan fun lɛ́ɛ ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo Gadi sín akɔta mɛ lɛ́ɛ bló súnnu adɔ̌kpo we děgba ɖě afɔtántɔn kanɖé wǒ (45.650). Yě sɔ́ Judáa sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e ko ɖó xwe ko, kpódó éé kó ɖó hú mɔ̌, bó ko su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo akɔta Judáa tɔn mɛ ɔ́ bló súnnu adɔ̌kpo atɔn děgba atɔn afɔwó nǔwɔntɔn (74.600). Yě sɔ́ Isakáa sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ ɖokpó ɖokpó mɛ ɔ́ sín kɛ́n. Súnnu e ko ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo Isakáa sín akɔta mɛ ɔ́ bló súnnu adɔ̌kpo we děgba atɔn afɔwó-afɔwe (54.400). Yě sɔ́ Zabulɔ́ɔn sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko kpódó éé kó ɖó hú mɔ̌, bó kó su ahwan fun lɛ́ɛ kpó bǐ sín kɛ́n wɛ yě sɔ́. Súnnu e sín kɛ́n yě sɔ́ ɖo Zabulɔ́ɔn sín akɔta mɛ lɛ́ɛ bló súnnu adɔ̌kpo we děgba ɛnɛ afɔtɛ́nwe (57.400). Yě sɔ́ Eflayímu sín vǐ súnnu lɛ́ɛ sín kɛ́n, ɖo Jozɛ́fu ví lɛ́ɛ mɛ. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko, kpódó éé kó ɖó hú mɔ̌, bó ko su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo Eflayímu sín akɔta mɛ lɛ́ɛ bló súnnu adɔ̌kpo we afɔwe kanwe ko (40.500). Yě sɔ́ Manasée sín vǐ súnnu lɛ́ɛ sín kɛ́n; yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó sín kɛ́n wɛ yě sɔ́. Súnnu e sín kɛ́n yě sɔ́ ɖo Manasée sín akɔta mɛ lɛ́ɛ bló súnnu adɔ̌kpo ɖě děgba atɔn afɔɖé (32.200). Yě sɔ́ Bɛnjamɛ́ɛ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo Bɛnjamɛ́ɛ sín akɔta mɛ lɛ́ɛ bló súnnu adɔ̌kpo ɖě děgba atɔn afɔwó-afɔtɛ́nwe (35.400). Yě sɔ́ Dan sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu nabí e sín kɛ́n yě sɔ́ ɖo Dan sín akɔta mɛ lɛ́ɛ bló súnnu adɔ̌kpo atɔn afɔwó nǔwɔntɔn kanwe ko (62.700). Yě sɔ́ Acɛ́ɛ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó sín kɛ́n wɛ yě sɔ́. Súnnu e sín kɛ́n yě sɔ́ ɖo Acɛ́ɛ sín akɔta mɛ ɔ́ bló súnnu adɔ̌kpo we afɔtɛ́nwe kanwe ko (41.500). Yě sɔ́ Nɛfutali sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e ko ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́. Súnnu e sín kɛ́n yě sɔ́ ɖo Nɛfutali sín akɔta mɛ lɛ́ɛ bló súnnu adɔ̌kpo we děgba atɔn afɔtɛ́nwe (53.400). Mɛ e sín kɛ́n Mɔyízi kpó Aalɔ́ɔn kpó, kpódó hɛ̌nnugán wěwe e yě ɖe ɖo togun ɔ́ mɛ lɛ́ɛ kpó sɔ́ lɛ́ɛ nɛ́. Yě mɛ wěwe énɛ́ lɛ́ɛ wɛ sɔ́ akɔta wěwe lɛ́ɛ sín afɔ ɖó te. Lě e Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ Izlayɛ́linu lɛ́ɛ sín kɛ́n ɖo akɔta lɛ́ɛ ɖokpó ɖokpó mɛ, hɛ̌nnu lɛ́ɛ ɖokpó ɖokpó mɛ, bɛ́ sín súnnu e kó ɖó xwe ko lɛ́ɛ jí, yi éé kó ɖó hú mɔ̌ lɛ́ɛ jí gbɔn ɔ́ nɛ́. Yě mɛ énɛ́ lɛ́ɛ bǐ wɛ kó su ahwan fun. Yě mɛ e sín kɛ́n Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ lɛ́ɛ bǐ bló adɔ̌kpo gban afɔwó-afɔtɛ́nwe kantɔn gban (603.550). Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ mɛ e ɖo akɔta Levíi tɔn ɔ́ mɛ lɛ́ɛ sín kɛ́n kɛ́nsísɔ́ élɔ́ hwenu ǎ, ɖó Mawu Mavɔmavɔ ko ɖɔ nú Mɔyízi ɖɔ: “Ma sɔ́ Levíi ví lɛ́ɛ sín kɛ́n dó Izlayɛ́li ví ɖě lɛ́ɛ mɛ ó. A nǎ zé azɔ̌ e nyí Goxɔ ɔ́ tɔn lɛ́ɛ dó alɔ mɛ nú Levíi ví lɛ́ɛ; fínɛ́ wɛ akɔjijɛgbá ɔ́ ɖe. Nǔ e è dǒ bló Goxɔ ɔ́ ná lɛ́ɛ kpó nǔ e è nɔ zán ɖo xwé ɔ́ gbe lɛ́ɛ kpó sín azɔ̌ lɛ́ɛ ɔ́, a nǎ zé dó alɔ mɛ nú yě. Yě wɛ ná nɔ́ zé Goxɔ ɔ́ kpó nǔ e è nɔ zán ɖ'é mɛ lɛ́ɛ bǐ kpó. Yě wɛ ná nɔ wa azɔ̌ ɖo xwé ɔ́ gbe; yě wɛ ná nɔ́ ɖó gɔnu lɛ́ lɛ̌ dó Goxɔ ɔ́. Nú è ɖo tɛn ná sɛ nú Goxɔ ɔ́ wɛ hweɖěbǔnu ɔ́, Levíi ví lɛ́ɛ wɛ ná nɔ́ tún; nú è nǎ nɔ te fí ɖé bó ɖó gɔnu ɖó fínɛ́ ɔ́, yědɛɛ lɛ́ɛ wɛ ná nɔ́ ján Goxɔ ɔ́. Nú mɛ ɖěvo ɖé sɛkpɔ́ ɔ́, è ná hu i. Izlayɛ́li ví ɖě lɛ́ɛ ɔ́, yě ɖó ná nɔ tɛn yětɔn mɛ, ɖo ahwangɔnu yětɔn yětɔn mɛ, ɖo ahwansyá yětɔn yětɔn kpá. Amɔ̌, kúnkan Levíi tɔn lɛ́ɛ kɛ́ɖɛ́ wɛ ná nɔ́ ɖó gɔnu lɛ́ lɛ̌ dó Goxɔ ɔ́, bó ká ná nɔ́ ɖo azɔ̌ yětɔn wa wɛ. Énɛ́ ɔ́, Izlayɛ́li ví lɛ́ɛ ná dɔn xomɛsin nyɛ Mawu Mavɔmavɔ tɔn dó yěɖée jí ǎ.” Izlayɛ́li ví lɛ́ɛ wa nǔ, bɔ é sɔgbe xá lě e Mawu Mavɔmavɔ ɖɔ nú Mɔyízi gbɔn é pɛ́pɛ́pɛ́. Mawu Mavɔmavɔ lɛ́ ɖɔ nú Mɔyízi kpó Aalɔ́ɔn kpó ɖɔ: “Akɔta Izlayɛ́li ví lɛ́ɛ tɔn ɖokpó ɖokpó ɖó ná nɔ ahwansyá tɔn kpá, bɔ hɛ̌nnu ɖokpó ɖokpó ná nɔ asyá tɔn glɔ́. Yě ná nɔ fínɛ́ lɛ́ lɛ̌ dó Mawu xwé ɔ́, bó ná nɔ zɔ nú Mawu xwé ɔ́. “Ahwangɔnu Judáa tɔn ɔ́ kpódó ahwansyá tɔn kpó ná nɔ zǎnzǎnhwe jí. Naxicɔ́ni e nyí Aminadabu sín vǐ, bó nyí akɔta Judáa tɔn ɔ́ sín gǎn ɔ́ ná nɔ yě nu ɖo fínɛ́. Súnnu adɔ̌kpo atɔn děgba atɔn afɔwó nǔwɔntɔn (74.600) wɛ è xa bɔ yě nyí ahwanfuntɔ́ tɔn lɛ́ɛ. Akɔta Isakáa tɔn sín ahwangɔnu ɔ́ ná bɔ dó wǔ tɔn. Nɛtanɛli e nyí Suwáa sín vǐ, bó nyí akɔta Isakáa tɔn sín gǎn ɔ́ ná nɔ yě nu. Súnnu adɔ̌kpo we děgba atɔn afɔwó-afɔwe (54.400) wɛ nyí ahwanfuntɔ́ tɔn lɛ́ɛ. Akɔta Zabulɔ́ɔn tɔn sín ahwangɔnu ɔ́ jɛ fínɛ́. Eliavu e nyí Helɔ́ni ví, bó nyí akɔta Zabulɔ́ɔn tɔn sín gǎn ɔ́ ná nɔ yě nu. Súnnu adɔ̌kpo we děgba ɛnɛ afɔtɛ́nwe (57.400) wɛ nyí ahwanfuntɔ́ tɔn lɛ́ɛ. Énɛ́ ɔ́, ahwanfuntɔ́ e sín kɛ́n è sɔ́ bɔ yě ɖo ahwansyá Judáa tɔn ɔ́ kpá lɛ́ɛ bǐ bló súnnu adɔ̌kpo tɛ́nnɛ děgba ɖě afɔwó-afɔwe (186.400). Togun ɔ́ jɛ ali ɔ́, Judáa sín mɛ lɛ́ɛ wɛ ná nɔ nukɔn. “Ahwangɔnu Hwlibɛ́ni tɔn ɔ́ kpódó ahwansyá tɔn kpó ná nɔ tofɔligbé. Elisúu e nyí Cedewúu sín vǐ, bó nyí akɔta Hwlibɛ́ni tɔn sín gǎn ɔ́ ná nɔ yě nu. Súnnu adɔ̌kpo we děgba ɖě afɔwó-afɔwe kanwe ko (46.500) sín kɛ́n wɛ è sɔ́, bɔ yě nyǐ ahwanfuntɔ́ tɔn lɛ́ɛ. Akɔta Sinmɛnyɔ́ɔ tɔn sín ahwangɔnu ɔ́ ná bɔ dó wǔ tɔn. Celumiyɛ́li e nyí Sulicadáyi sín vǐ, bó nyí akɔta Sinmɛnyɔ́ɔ tɔn sín gǎn ɔ́ ná nɔ yě nu. Súnnu adɔ̌kpo we děgba ɛnɛ afɔwó-afayizɛ́n kanwe ko (59.300) sín kɛ́n wɛ è sɔ́, bɔ yě nyǐ ahwanfuntɔ́ tɔn lɛ́ɛ. Bɔ akɔta Gadi tɔn sín ahwangɔnu ɔ́ ná jɛ fínɛ́. Eliyasáfu e nyí Hlewuyɛ́li sín vǐ, bó nyí akɔta Gadi tɔn sín gǎn ɔ́ ná nɔ yě nu. Súnnu adɔ̌kpo we děgba ɖě afɔtántɔn kanɖé wǒ (45.650) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ. Énɛ́ ɔ́, ahwanfuntɔ́ e sín kɛ́n è sɔ́, bɔ yě ɖo ahwansyá Hwlibɛ́ni tɔn kpá lɛ́ɛ bǐ bló súnnu adɔ̌kpo tɛ́nwe děgba we afɔwó-afɔtɛ́nwe kanɖé wǒ (151.450) jɛ jí. Yědɛɛ lɛ́ɛ wɛ ná jɛ ahwangɔnu Judáa tɔn ɔ́ gúdo. “Énɛ́ ɔ́ gúdo ɔ́, Levíi ví lɛ́ɛ ná ɖíɖá Goxɔ ɔ́ ɖidó; yě xweyǐgbe ɔ́, yě ná nɔ ahwangbɛ́ we nukɔntɔn lɛ́ɛ kpódó we gǔdo tɔn lɛ́ɛ kpó tɛ́ntin. Yě lɔ ná nɔ tito jí yi fí e yě ná nɔ ɔ́; súnnu ɖokpó ɖokpó ná nɔ tɛn tɔn mɛ, ɖo fí e xwédo tɔn sín ahwansyá ɖe é. “Akɔta Eflayímu tɔn sín ahwangɔnu ɔ́, kpódó ahwansyá tɔn kpó ná nɔ gbadahwe jí. Elicama e nyí Amumihudi sín vǐ, bó nyí akɔta Eflayímu tɔn sín gǎn ɔ́ ná nɔ yě nu ɖo fínɛ́. Súnnu adɔ̌kpo we afɔwe kanwe ko (40.500) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ. Akɔta Manasée tɔn sín ahwangɔnu ɔ́ ná bɔ dó wǔ tɔn. Gamɛliyɛ́li e nyí Pedasúu sín vǐ, bó nyí akɔta Manasée tɔn sín gǎn ɔ́ ná nɔ yě nu. Súnnu adɔ̌kpo ɖě děgba atɔn afɔɖé (32.200) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ. Akɔta Bɛnjamɛ́ɛ tɔn sín ahwangɔnu ɔ́ jɛ gǔdo tɔn. Avidáni e nyí Gideóni sín vǐ, bó nyí akɔta Bɛnjamɛ́ɛ tɔn sín gǎn ɔ́ ná nɔ yě nu. Súnnu adɔ̌kpo ɖě děgba atɔn afɔwó-afɔtɛ́nwe (35.400) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ. Énɛ́ ɔ́, ahwanfuntɔ́ e sín kɛ́n è sɔ́, bɔ yě ɖo ahwansyá Eflayímu tɔn ɔ́ mɛ lɛ́ɛ bǐ bló adɔ̌kpo atɔ́ɔ́n děgba we kanwe ko (108.100). Yědɛɛ lɛ́ɛ wɛ ná jɛ ahwangɔnu Hwlibɛ́ni tɔn ɔ́ gúdo. “Akɔta Dan tɔn ɔ́ sín ahwangɔnu ɔ́, kpódó ahwansyá tɔn kpó ná nɔ totaligbé. Axiezɛ́ɛ e nyí Amumicadayi ví, bó nyí akɔta Dan tɔn sín gǎn ɔ́ ná nɔ yě nu ɖo fínɛ́. Súnnu adɔ̌kpo atɔn afɔwó nǔwɔntɔn kanwe ko (62.700) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ. Akɔta Acɛ́ɛ tɔn sín ahwangɔnu ɔ́ ná bɔ dó wǔ tɔn. Pagiyɛ́li e nyí Ɔkláni sín vǐ, bó nyí akɔta Acɛ́ɛ tɔn sín gǎn ɔ́ ná nɔ yě nu. Súnnu adɔ̌kpo we afɔtɛ́nwe kanwe ko (41.500) sín kɛ́n wɛ è sɔ́, bɔ yě nyǐ ahwanfuntɔ́ tɔn lɛ́ɛ. Akɔta Nɛfutali tɔn ɔ́ sín ahwangɔnu ɔ́ ná jɛ gǔdo tɔn. Axila e nyí Eyináni sín vǐ, bó nyí akɔta Nɛfutali tɔn sín gǎn ɔ́ ná nɔ yě nu. Súnnu adɔ̌kpo we děgba atɔn afɔtɛ́nwe (53.400) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ. Énɛ́ ɔ́, ahwanfuntɔ́ e sín kɛ́n Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́, bɔ yě ɖo ahwangɔnu Dan tɔn ɔ́ mɛ lɛ́ɛ bǐ bló adɔ̌kpo tɛ́nwe děgba ɛnɛ afɔtántɔn (157.600). Yědɛɛ lɛ́ɛ wɛ ná nyí ahwangɔnu e ná gbɔn gǔdo é bó ná hɛn ahwansyá yětɔn.” Izlayɛ́li ví e sín kɛ́n è sɔ́, ɖo hɛ̌nnu ɖokpó ɖokpó mɛ lɛ́ɛ nɛ́. Yě mɛ e sín kɛ́n è sɔ́, bɔ yě nyí ahwanfuntɔ́, bó ɖo ahwangɔnu ɔ́ mɛ lɛ́ɛ bǐ bló adɔ̌kpo gban afɔwó-afɔtɛ́nwe kantɔn gban (603.550). Lě e Mawu Mavɔmavɔ ko ɖɔ gbɔn nú Mɔyízi ɔ́, è sɔ́ Levíi ví lɛ́ɛ sín kɛ́n ɖo hwe ɖokpó ɔ́ nu kpódó Izlayɛ́li ví ɖě lɛ́ɛ kpó ǎ. Izlayɛ́li ví lɛ́ɛ wa nǔ, bɔ é sɔgbe xá lě e Mawu Mavɔmavɔ ɖɔ nú Mɔyízi gbɔn é pɛ́pɛ́pɛ́. Yě ɖó gɔnu ɖó fí ɖé ɔ́, yě kpó ahwansyá yětɔn kpó nɔ́ ɖo fí ɔ́. Yě ɖo yiyi wɛ ɔ́, hɛ̌nnu ɖokpó ɖokpó nɔ́ ɖo tɛn tɔn mɛ, bɔ mɛ ɖokpó ɖokpó nɔ́ ɖo xwédo tɔn mɛ. Aalɔ́ɔn kpó Mɔyízi kpó sín vǐ lɛ́ɛ ɖíe: Hwenu e Mawu Mavɔmavɔ ɖɔ xó nú Mɔyízi ɖo Sinayíi só jí ɔ́, vǐ e yě ɖǒ hwenɛ́nu lɛ́ɛ ɖíe: Aalɔ́ɔn ví lɛ́ɛ sín nyǐkɔ lɛ́ɛ ɖíe: Nadavu nukɔngbéví ɔ́ kpódó Avihu kpó, kpódó Eleazáa kpó, kpódó Itamáa kpó. È kɔn ami dó ta nú yě, bó sɔ́ yě vɔ̌sánú-xwlémawutɔ́, bɔ yě bɛ̌ azɔ̌. Lo ɔ́, Nadavu kpó Avihu kpó kú ɖo Mawu Mavɔmavɔ nukɔn, ɖó yě hɛn myɔ e ma ɖó ná yi Mawu Mavɔmavɔ nukɔn ǎ yi nukɔn tɔn, hwenu e yě ɖo gbětótló Sinayíi tɔn mɛ é. Yě ká ɖó vǐ có bó kú ǎ. Hǔn Eleazáa kpó Itamáa kpó kɛ́ɖɛ́ jɛ́n kpo, bó ɖo vɔ̌sánú-xwlémawutɔ́zɔ́ ɔ́ wa xá tɔ́ yětɔn Aalɔ́ɔn wɛ. Mawu Mavɔmavɔ ɖɔ nú Mɔyízi ɖɔ: “Kplá Levíi ví lɛ́ɛ dó así nú vɔ̌sánú-xwlémawutɔ́ Aalɔ́ɔn, bónú yě ná nɔ́ gɔ́ alɔ n'i. Yě ná nɔ́ wa sinsɛnzɔ́ yětɔn ɖó Aalɔ́ɔn kpódó Izlayɛ́li togun ɔ́ bǐ kpó tɛnmɛ, ɖo Goxɔ ɔ́ nukɔn. Yě ná nɔ́ wa azɔ̌ e ɖo Goxɔ ɔ́ mɛ lɛ́ɛ. Yě ná nɔ́ kpé nukún dó nǔ e è nɔ zán ɖo Goxɔ ɔ́ mɛ lɛ́ɛ wú bó ná nɔ wa azɔ̌ e ɖo Goxɔ ɔ́ mɛ lɛ́ɛ ɖó Izlayɛ́li ví lɛ́ɛ do mɛ. Énɛ́ ɔ́, a nǎ sɔ́ Levíi ví lɛ́ɛ jó nú Aalɔ́ɔn kpódó vǐ tɔn súnnu lɛ́ɛ kpó bónú yě ná dó alɔ yě. Izlayɛ́li ví ɖě lɛ́ɛ ná sɔ́ yě jó bǐ gbídígbídí. A nǎ sɔ́ Aalɔ́ɔn kpódó vǐ tɔn súnnu lɛ́ɛ kpó, bɔ yědɛɛ lɛ́ɛ kɛ́ɖɛ́ wɛ ná nɔ wa vɔ̌sánú-xwlémawutɔ́ zɔ́ ɔ́. Nú mɛ ɖěvo e ma nyí vɔ̌sánú-xwlémawutɔ́ ǎ ɖě sɛkpɔ́ azɔ̌ énɛ́ ɔ́, è ɖǒ ná hu i.” Mawu Mavɔmavɔ ɖɔ nú Mɔyízi ɖɔ: “Nyɛ Mawu Mavɔmavɔ ɖésú wɛ sɔ́ Levíi ví súnnu lɛ́ɛ ɖo Izlayɛ́li ví ɖě lɛ́ɛ bǐ mɛ, bó sɔ́ yě ɖó togun Izlayɛ́li tɔn ɔ́ sín nukɔngbéví lɛ́ɛ bǐ do mɛ; ce wɛ yě nyí. Nǔgbó ɔ́, gbe e gbe un hu Ejípunu lɛ́ɛ sín nukɔngbéví súnnu lɛ́ɛ bǐ ɔ́, un ɖe Izlayɛ́li ví lɛ́ɛ sín nukɔngbéví súnnu lɛ́ɛ kpódó kanlin yětɔn lɛ́ɛ sín nukɔngbéví asú lɛ́ɛ kpó ɖó vo nú nyɛɖée; ce wɛ yě nyǐ. Nyɛ wɛ nyí Mawu Mavɔmavɔ.” Mawu Mavɔmavɔ ɖɔ xó nú Mɔyízi ɖo gbětótló Sinayíi tɔn mɛ; é ɖɔ n'i ɖɔ: “Sɔ́ Levíi ví súnnu lɛ́ɛ sín kɛ́n; sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n. A nǎ sɔ́ súnnu e ɖó sun ɖokpó lɛ́ɛ, kpódó éé ɖó hú mɔ̌ lɛ́ɛ bǐ kpó sín kɛ́n.” Énɛ́ ɔ́, Mɔyízi bló lě e Mawu Mavɔmavɔ ɖɔ é ní bló gbɔn ɔ́, bó sɔ́ kɛ́n yětɔn. Levíi ví lɛ́ɛ sín nyǐkɔ ɖíe: Gɛɛcɔ́ni, Kexáti kpódó Mɛlali kpó; Gɛɛcɔ́ni ɔ́, vǐ tɔn lɛ́ɛ sín nyǐkɔ ɖíe: Livuni, Cimɛ́yi kpó hɛ̌nnu yětɔn lɛ́ɛ kpó. Kexáti ɔ́, vǐ tɔn lɛ́ɛ sín nyǐkɔ ɖíe: Amulámu, Yisexáa, Eblɔ́n, Wuziyɛ́li kpó hɛ̌nnu yětɔn lɛ́ɛ kpó. Mɛlali ɔ́, vǐ tɔn lɛ́ɛ sín nyǐkɔ ɖíe: Maxli, Muci kpó hɛ̌nnu yětɔn lɛ́ɛ kpó. Levíi sín hɛ̌nnu lɛ́ɛ nɛ́. Hǔn Gɛɛcɔ́ni ví wɛ Livuni, Cimɛ́yi kpó hɛ̌nnu yětɔn lɛ́ɛ kpó nyí. Hwenu e è sɔ́ kɛ́n yětɔn ɔ́, súnnu e ɖó sun ɖokpó lɛ́ɛ, kpódó ée ɖó hú mɔ̌ lɛ́ɛ kpó bló děgba ɖě afɔwó-afɔtɛ́nwe kanwe ko (7.500). Gɛɛcɔ́ni sín vǐ lɛ́ɛ ɖó gɔnu ɖó Goxɔ ɔ́ gúdo, ɖo gbadahwe jí. Eliyasáfu, Laɛ́li sín vǐ ɔ́ wɛ nyí Gɛɛcɔ́ni ví lɛ́ɛ sín hɛ̌nnugán. Gɛɛcɔ́ni ví lɛ́ɛ nɔ́ kpé nukún dó Goxɔ ɔ́ wú; yě nɔ́ kpé nukún dó nǔ e ɖo Goxɔ ɔ́ mɛ lɛ́ɛ, nǔ e ɖo Mawu xwé lɛ́ɛ, nǔ e è nɔ cyɔ́n dó Goxɔ ɔ́ kpódó avɔ e ɖo Goxɔ ɔ́ sín ali nu ɔ́ kpó wú. Yě ná nɔ́ kpé nukún dó avɔ e è dǒ xá kɔ́xo ta ɔ́ ná lɛ́ɛ, kpódó avɔ e ɖo Mawu xwé ɔ́ sín ali nu ɔ́ kpó wú. Hǔn avɔ énɛ́ lɛ́ɛ wɛ è dǒ xá Goxɔ ɔ́ kpódó vɔ̌sákpe ɔ́ kpó; yě ná nɔ́ kpé nukún dó kan e è sin dó Goxɔ ɔ́ wú lɛ́ɛ wú. Nǔ e wú yě nɔ́ kpé nukún dó lɛ́ɛ nɛ́. Kexáti ví wɛ Amulámu ví lɛ́ɛ, Yisexáa ví lɛ́ɛ, Eblɔ́n ví lɛ́ɛ, Wuziyɛ́li ví lɛ́ɛ kpódó hɛ̌nnu yětɔn lɛ́ɛ kpó nyí. Súnnu e ɖó sun ɖokpó kpódó éé ɖó hú mɔ̌ ɔ́, bɔ è sɔ́ kɛ́n yětɔn lɛ́ɛ bǐ bló súnnu děgba we nǔwɔntɔn (8.600). Yědɛɛ lɛ́ɛ wɛ nɔ kpé nukún dó Goxɔ ɔ́ mɛ sín azɔ̌ lɛ́ɛ wú. Kexáti sín hɛ̌nnu lɛ́ɛ ɖó gɔnu ɖó Mawu xwé ɔ́ sín afɔligbé. Elisafáni, Wuziyɛ́li sín vǐ ɔ́ wɛ nyí Kexáti ví lɛ́ɛ sín hɛ̌nnugán. Hǔn yědɛɛ lɛ́ɛ wɛ nɔ kpé nukún dó akɔjijɛgbá ɔ́ kpódó távo ɔ́ kpó, kpódó zogbɛ́nhɛnnú ɔ́ kpó, kpódó vɔ̌sákpe lɛ́ɛ kpó, kpódó nǔzínzán e è nɔ dó wa sinsɛnzɔ́ ná, ɖo tɛn mímɛ́ ɔ́ mɛ lɛ́ɛ kpó, kpódó xɔmɛgbovɔ ɔ́ kpó, kpódó nǔ e ɖ'é wú lɛ́ɛ bǐ kpó wú. Eleazáa, vɔ̌sánú-xwlémawutɔ́ Aalɔ́ɔn sín vǐ ɔ́ wɛ nyí gǎn ɖaxó nú Levíi ví lɛ́ɛ sín gǎn lɛ́ɛ. É wɛ nɔ́ nɔ mɛ e nɔ wa azɔ̌ ɖo Goxɔ ɔ́ mɛ lɛ́ɛ nu. Mɛlali ví wɛ Maxli, Muci kpó hɛ̌nnu yětɔn lɛ́ɛ kpó nyí. Súnnu e ɖó sun ɖokpó, kpódó ée ɖó hú mɔ̌, bɔ è xa lɛ́ɛ bǐ kpó bló děgba ɖě afɔwó-afɔɖé (6.200). Sulyɛ́li Avihayilu sín vǐ ɔ́ wɛ nyí Mɛlali sín vǐ lɛ́ɛ sín hɛ̌nnugán. Yě ɖó gɔnu ɖó Goxɔ ɔ́ sín taligbé. Yě wɛ nɔ́ kpé nukún dó Goxɔ ɔ́ sín xwlɛ lɛ́ɛ kpódó atín e è nɔ dó blá wɛ̌n lɛ́ɛ kpó, kpódó dotín lɛ́ɛ kpó, kpódó nǔ e jí dotín lɛ́ɛ jínjɔ́n lɛ́ɛ kpó, kpódó nǔzínzán Mawu xwé ɔ́ gbe tɔn lɛ́ɛ bǐ kpó wú. Mɔ̌ ɖokpó ɔ́, yě ná nɔ́ cɔ́ dotín e è tun dó xá xwé ɔ́ lɛ́ɛ, bó ná nɔ́ cɔ́ nǔ e jí dotín lɛ́ɛ jínjɔ́n lɛ́ɛ, kpódó só yětɔn lɛ́ɛ kpó, kpódó kan yětɔn lɛ́ɛ bǐ kpó. Mɔyízi kpódó Aalɔ́ɔn kpó, kpódó Aalɔ́ɔn sín vǐ lɛ́ɛ kpó ɔ́, yědɛɛ lɛ́ɛ ɖó gɔnu ɖó Mawu xwé ɔ́ nukɔn, ɖo zǎnzǎnhwe jí. Azɔ̌ yětɔn wɛ nyí ɖɔ yě ná nɔ́ sɛkpɔ́ Mawu Mavɔmavɔ ɖó Izlayɛ́li ví lɛ́ɛ tɛnmɛ, bɔ nú mɛ ɖěvo sɛkpɔ́ ɔ́, è ɖǒ ná hu i. Énɛ́ ɔ́, Mɔyízi kpódó Aalɔ́ɔn kpó sɔ́ Levíi ví súnnu éé ɖó sun ɖokpó, kpódó éé ɖó hú mɔ̌ lɛ́ɛ kpó sín kɛ́n lě e Mawu Mavɔmavɔ ko ɖɔ gbɔn nú Mɔyízi é, bɔ yě bǐ bló súnnu adɔ̌kpo ɖě afɔwó (22.000). Mawu Mavɔmavɔ ɖɔ nú Mɔyízi ɖɔ: “Izlayɛ́li ví lɛ́ɛ sín nukɔngbéví súnnu e ɖó sun ɖokpó lɛ́ɛ, kpódó éé ɖó hú mɔ̌ lɛ́ɛ kpó ɔ́, a nǎ sɔ́ kɛ́n yětɔn, bó ná wlán nyǐkɔ yětɔn. Énɛ́ ɔ́ gúdo ɔ́, a nǎ ɖe Levíi lɛ́ɛ ɖó vo, bɔ yě ná nyí nyɛ Mawu Mavɔmavɔ ɔ́ tɔn, ɖó Izlayɛ́li ví ɖě lɛ́ɛ sín nukɔngbéví súnnu lɛ́ɛ bǐ tɛn mɛ. Mɔ̌ ɖokpó ɔ́, a nǎ jó Levíi ví lɛ́ɛ sín kanlin lɛ́ɛ nú mì, ɖó Izlayɛ́li ví ɖě lɛ́ɛ sín nukɔngbéví lɛ́ɛ bǐ tɛnmɛ. Nyɛ wɛ nyí Mawu Mavɔmavɔ.” Énɛ́ ɔ́, Mɔyízi sɔ́ kɛ́n Izlayɛ́li ví lɛ́ɛ sín nukɔngbéví súnnu lɛ́ɛ bǐ tɔn, lě e Mawu Mavɔmavɔ ɖɔ gbɔn n'i é. É sɔ́ yě mɛ e ɖó sun ɖokpó lɛ́ɛ, kpódó yě mɛ e ɖó hú mɔ̌ lɛ́ɛ kpó sín kɛ́n, bɔ yě bǐ bló adɔ̌kpo ɖě afɔwó-afɔɖé kanɖé gban-nukún-atɔn (22.273). Mawu Mavɔmavɔ ɖɔ nú Mɔyízi ɖɔ: “Đe Levíi ví lɛ́ɛ ɖó vo nú yě ná nyí nyɛ Mawu Mavɔmavɔ ɔ́ tɔn, ɖó Izlayɛ́li ví ɖě lɛ́ɛ sín nukɔngbéví lɛ́ɛ sín tɛnmɛ, bónú yě ná nyí ce. Mɔ̌ ɖokpó ɔ́, jǒ Levíi ví lɛ́ɛ sín kanlin lɛ́ɛ nú mì, ɖó Izlayɛ́li ví ɖě lɛ́ɛ sín kanlin lɛ́ɛ sín nukɔngbéví lɛ́ɛ tɛnmɛ, bónú yě ná nyí ce. Amɔ̌, nú è sɔ́ kɛ́n yětɔn ɔ́, è nǎ mɔ ɖɔ nukɔngbéví Izlayɛ́li ví lɛ́ɛ tɔn afɔɖé kanɖé gban-nukún-atɔn (273) lán ɖ'é jí. Yě mɛ e lán ɖ'é jí lɛ́ɛ ɔ́, è nǎ vɔ́ yě xɔ. Hǔn a nǎ yǐ gankwɛ́ atɔ́ɔ́n atɔ́ɔ́n ɖó yě mɛ ɖokpó ɖokpó ta. Gankwɛ́ ɔ́ ná nyí ée è nɔ zán ɖo Mawu xwé, bɔ é nɔ́ da glǎmu wǒ ɔ́. Bɔ a nǎ bɛ́ gankwɛ́ énɛ́ lɛ́ɛ nú Aalɔ́ɔn kpódó vǐ tɔn súnnu lɛ́ɛ kpó; lě e è nǎ vɔ́ nukɔngbéví e ná lán ɖ'é jí lɛ́ɛ xɔ gbɔn ɔ́ nɛ́.” Énɛ́ ɔ́, Mɔyízi yí gankwɛ́ e è nǎ dó vɔ́ Izlayɛ́li ví lɛ́ɛ sín nukɔngbéví e lán ɖ'é jí lɛ́ɛ dó xɔ é. É yí gankwɛ́ énɛ́ ɔ́ afayizɛ́n kɛnnɛ atɔ́ɔ́n (1.365) ɖo nukɔngbéví Izlayɛ́li ví lɛ́ɛ tɔn e è vɔ̌ xɔ lɛ́ɛ bǐ sí. Akwɛ́ e é yí ɔ́ nyí gankwɛ́ e è nɔ zán ɖo Mawu xwé gbe é. Gankwɛ́ e é yí ɔ́, é bɛ́ nú Aalɔ́ɔn kpódó vǐ tɔn súnnu lɛ́ɛ kpó, lě e Mawu Mavɔmavɔ ɖɔ gbɔn n'i é. Mawu Mavɔmavɔ ɖɔ nú Mɔyízi kpódó Aalɔ́ɔn kpó ɖɔ: “Mi sɔ́ Levíi ví súnnu e jɔ ɖo Kexáti kún mɛ lɛ́ɛ sín kɛ́n; mi sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Mi ná sɔ́ kɛ́n yětɔn bɛ́ sín yě mɛ e ɖó xwe gban (30) lɛ́ɛ, kpódó yě mɛ e ɖó hú mɔ̌ lɛ́ɛ kpó jí káká yi jɛ yě mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ wɛ ná nɔ́ wa azɔ̌ ɖé lɛ́ɛ ɖo Goxɔ ɔ́ mɛ. Azɔ̌ e yě ná nɔ́ wa ɖo Goxɔ ɔ́ mɛ ɔ́ wɛ nyí ɖɔ yě ná nɔ́ kpé nukún dó nǔ mímɛ́ bǐ lɛ́ɛ wú. Izlayɛ́li ví lɛ́ɛ jló ná sɛ tɛn sín fí e yě ɖó gɔnu ɖó ɔ́ hweɖěbǔnu ɔ́, Aalɔ́ɔn kpódó vǐ tɔn súnnu lɛ́ɛ kpó ná byɔ́ Goxɔ ɔ́ mɛ, bó ná ɖe xɔmɛgbovɔ e è dǒ gbo tɛn mímɛ́ bǐ ɔ́ ná ɔ́ síin, bó ná zé bú dó akɔjijɛgbá ɔ́, bó ná zé anyǔ tlitli cyɔ́n jí, bó ná zé avɔ cyɔ́n bǐ jí. Avɔ ɔ́ bǐ ná nyí kwlésinnɔ; énɛ́ gúdo ɔ́, yě ná bɛ́ kpo e è nɔ dó zé ná lɛ́ɛ dó alɔgan lɛ́ɛ mɛ. Távo e jí wɔ̌xúxú e è xwlé Mawu lɛ́ɛ nɔ́ nɔ ɔ́, yě ná tɛ́ avɔ kwlésinnɔ ɖokpó ɖ'é jí, bó ná bɛ́ nǔ élɔ́ lɛ́ɛ ɖ'é jí: gannúgbɛ́jɛ́, kɔ́fu, sinnugannú kpódó goví e mɛ è nǎ nɔ́ wún vɛ̌ɛn dó, bó ná nɔ́ xwlé nyɛ Mawu ɔ́ lɛ́ɛ kpó, kpódó wɔ̌xúxú e è nǎ nɔ́ xwlé mì lɛ́ɛ kpó; wɔ̌xúxú ɖó ná ɖo távo ɔ́ jí tɛgbɛ. Yě ná zé avɔ vɔvɔ cɛ́cɛ́ cyɔ́n dó nǔ énɛ́ lɛ́ɛ bǐ, bó ná zé anyǔ tlitli cyɔ́n jí, bó ná bɛ́ kpo e è nɔ dó zé távo ɔ́ ná lɛ́ɛ dó alɔgan lɛ́ɛ mɛ. Yě ná zé avɔ kwlésinnɔ cyɔ́n dó zogbɛ́nhɛnnú ɔ́ kpódó nǔ e ɖ'é wú lɛ́ɛ bǐ kpó: zogbɛ́n lɛ́ɛ, nǔwlínú lɛ́ɛ, afíngannú lɛ́ɛ kpódó amigoví lɛ́ɛ kpó. Yě ná bɛ́ nǔ énɛ́ lɛ́ɛ kpódó nǔzínzán lɛ́ɛ bǐ kpó dó anyǔ tlitli ɖé mɛ, bó ná zé dó agbanhɛnnú mɛ. Vɔ̌sákpe siká tɔn ɔ́, yě ná tɛ́ avɔ kwlésinnɔ d'é jí, bó ná zé anyǔ tlitli cyɔ́n jí, bó ná bɛ́ kpo e è nɔ dó zé vɔ̌sákpe ɔ́ ná lɛ́ɛ dó alɔgan lɛ́ɛ mɛ. Yě ná bɛ́ nǔzínzán e è nɔ dó wa azɔ̌ ná ɖo Goxɔ ɔ́ mɛ lɛ́ɛ, bó bɛ́ yě dó avɔ kwlésinnɔ mɛ, bó ná zé anyǔ tlitli bú dó, bó ná zé dó agbanhɛnnú mɛ. Vɔ̌sákpe e jí è nɔ dó vɔ̌ zo ɖe ɔ́, yě ná bɛ́ afín sín jí, bó ná tɛ́ avɔ vɔvɔ cɛ́cɛ́ ɖ'é jí, bó ná bɛ́ nǔ e è nɔ zán ɖo vɔ̌sísá hwenu lɛ́ɛ bǐ ɖ'é jí. Yě wɛ nyí afíngannú lɛ́ɛ, gǎfu lɛ́ɛ, pɛ́li lɛ́ɛ, basya lɛ́ɛ, nǔ e è ko nɔ sixú zán ɖo vɔ̌sákpe jí lɛ́ɛ bǐ, bó ná zé anyǔ tlitli cyɔ́n jí, bó ná bɛ́ kpo e è nɔ dó zé vɔ̌sákpe ɔ́ ná lɛ́ɛ dó alɔgan lɛ́ɛ mɛ. Cóbónú yě ná jɛ ali ɔ́, Aalɔ́ɔn kpódó vǐ tɔn súnnu lɛ́ɛ kpó nɔ́ bú nǔ dó nǔ mímɛ́ énɛ́ lɛ́ɛ, kpódó nǔ e è nɔ zán ɖo nǔ énɛ́ lɛ́ɛ kɔn lɛ́ɛ kpó. Yě bló fó ɔ́, Kexáti sín vǐ súnnu lɛ́ɛ nɔ́ wá ɖíɖá. Lo ɔ́, yě ná ɖó alɔ nǔ mímɛ́ lɛ́ɛ ɖě wú ǎ; yě táá kú. Nú è tún Goxɔ ɔ́, azɔ̌ e nyí yědɛɛ lɛ́ɛ tɔn bɔ yě ná wa é nɛ́. Eleazáa, vɔ̌sánú-xwlémawutɔ́ Aalɔ́ɔn sín vǐ ɔ́ ná nɔ́ kpé nukún dó ami e è nɔ dó tá zogbɛ́n ná ɔ́ kpó atínkɛn wǎnɖagbenɔ ɔ́ kpó, kpódó nǔníná jinukún tɔn e è nɔ ná ayǐhɔ́ngbe ayǐhɔ́ngbe ɔ́ kpó wú; Eleazáa ná nɔ́ kpé nukún dó Mawu xwé ɔ́ bǐ, kpódó nǔ e ɖ'é mɛ lɛ́ɛ kpó wú. É ná nɔ́ kpé nukún dó nǔ mímɛ́ lɛ́ɛ, kpó nǔ e è nɔ zán ɖo xwé ɔ́ gbe lɛ́ɛ kpó wú.” Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Mi ma lɔn nú Kexáti ví lɛ́ɛ wa nǔ e yě ná wa bɔ un ná hu yě ɔ́ ó. Yě ɖo nukún kpé dó nǔ mímɛ́ lɛ́ɛ wú wɛ ɔ́, nǔ e mi ná bló, bɔ yě má ná kú ǎ ɔ́ ɖíe: hwenu e yě ná sɛkpɔ́ tɛn mímɛ́ bǐ ɔ́, hwɛ Aalɔ́ɔn kpó vǐ towe súnnu lɛ́ɛ kpó ɔ́, mi ná kplá yě mɛ ɖokpó ɖokpó ɖó tɛn yětɔn yětɔn mɛ, bó ná ɖɔ nǔ e mɛ ɖokpó ɖokpó ɖó ná wa ɔ́, abǐ nǔ e mɛ ɖokpó ɖokpó ɖó ná sɔ́ ɔ́ n'i. Yě ɖó ná byɔ́ tɛn mímɛ́ bǐ ɔ́ mɛ, bó ná fin nǔ mímɛ́ lɛ́ɛ kpɔ́n hwenu e è ɖo nǔ bǔ dó yě wɛ ɔ́ ǎ. Yě mɔ ɔ́, yě ná kú” Mawu Mavɔmavɔ ɖɔ nú Mɔyízi ɖɔ: “Sɔ́ Gɛɛcɔ́ni ví lɛ́ɛ sín kɛ́n; sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Sɔ́ súnnu e ɖó xwe gban (30) káká yi xwe kanɖé wǒ (50) lɛ́ɛ sín kɛ́n. Súnnu e sixú wa azɔ̌ e kan Mawu xwé ɔ́ lɛ́ɛ bǐ sín kɛ́n wɛ a nǎ sɔ́. Azɔ̌ Gɛɛcɔ́ni ví lɛ́ɛ tɔn ɖíe: Yě ná nɔ́ ɖíɖá Goxɔ ɔ́ sín avɔ ɖagbe ɖagbe lɛ́ɛ kpó avɔ ɖě lɛ́ɛ e è cyɔ́n Goxɔ ɔ́ jí lɛ́ɛ kpó, kpó anyǔ e è cyɔ́n avɔ lɛ́ɛ jí lɛ́ɛ kpó, kpódó avɔ e ɖo Goxɔ ɔ́ sín ali nu ɔ́ kpó. Yě ná nɔ́ kpé nukún dó avɔ e è dǒ xá kɔ́xota ɔ́ ná lɛ́ɛ, kpódó avɔ e ɖo Mawu xwé ɔ́ sín ali nu ɔ́ kpó wú. Avɔ énɛ́ lɛ́ɛ wɛ è dǒ xá Goxɔ ɔ́ kpódó vɔ̌sákpe ɔ́ kpó. Yě ná kpé nukún dó kan e è sin dó Goxɔ ɔ́ wú lɛ́ɛ wú. Mɔ̌ ɖokpó ɔ́, yě ná nɔ́ kpé nukún dó nǔ e ɖo Goxɔ ɔ́ wú lɛ́ɛ, kpódó nǔ e è nɔ zán ɖ'é mɛ lɛ́ɛ kpó wú. Nǔ e wú yě ná nɔ́ kpé nukún dó lɛ́ɛ nɛ́. Hɛ̌nnu Gɛɛcɔ́ni tɔn lɛ́ɛ ná nɔ́ wa azɔ̌ yětɔn lɛ́ɛ ɖo Aalɔ́ɔn kpódó vǐ tɔn súnnu lɛ́ɛ kpó sín acɛ mɛ. Nǔ e yě ná nɔ́ hɛn lɛ́ɛ, kpódó azɔ̌ e yě ná nɔ́ wa lɛ́ɛ kpó ɔ́, acɛ Aalɔ́ɔn kpó vǐ tɔn súnnu lɛ́ɛ kpó mɛ wɛ yě ná nɔ́. Yědɛɛ lɛ́ɛ wɛ ná nɔ́ ɖɔ nǔ e yě ná nɔ́ wa lɛ́ɛ kpódó nǔ e yě ná nɔ́ ɖíɖá lɛ́ɛ kpó nú yě. Azɔ̌ e kan Mawu xwé ɔ́, bɔ è sɔ́ dó así nú hɛ̌nnu Gɛɛcɔ́ni tɔn lɛ́ɛ, bɔ yě ná nɔ́ wa lɛ́ɛ nɛ́. Itamáa, vɔ̌sánú-xwlémawutɔ́ Aalɔ́ɔn sín vǐ ɔ́ wɛ ná nɔ yě nu.” Mawu Mavɔmavɔ ɖɔ nú Mɔyízi ɖɔ: “Sɔ́ Mɛlali ví lɛ́ɛ sín kɛ́n; sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Sɔ́ súnnu nabí e ɖó xwe gban (30) káká yi xwe kanɖé wǒ (50) lɛ́ɛ sín kɛ́n, bó ná zé Goxɔ ɔ́ sín azɔ̌ ɖé lɛ́ɛ dó así nú yě, bɔ yě ná nɔ́ wa. Azɔ̌ e a nǎ zé dó así nú yě lɛ́ɛ ɖíe: yě ná nɔ́ ɖíɖá Goxɔ ɔ́ sín xwlɛ lɛ́ɛ, wɛ̌n lɛ́ɛ, dotín lɛ́ɛ, kpódó nǔ e jí dotín lɛ́ɛ nɔ́ jínjɔ́n lɛ́ɛ kpó, kpódó Mawu xwé ɔ́ sín dotín lɛ́ɛ kpó, kpódó nǔ e jí dotín lɛ́ɛ nɔ́ jínjɔ́n lɛ́ɛ kpó, kpódó só yětɔn lɛ́ɛ kpó, kpódó kan yětɔn lɛ́ɛ kpó, kpódó nǔ e yě nɔ́ zán ɖ'é mɛ lɛ́ɛ bǐ kpó. Mi ná wlán nǔ e mi ná sɔ́ dó así nú mɛ ɖokpó ɖokpó bɔ é ná hɛn ɔ́ sín nyǐkɔ. Azɔ̌ e kan Mawu xwé ɔ́, bɔ è sɔ́ dó así nú hɛ̌nnu Mɛlali tɔn lɛ́ɛ, bɔ yě ná nɔ́ wa lɛ́ɛ nɛ́. Itamáa vɔ̌sánú-xwlémawutɔ́ Aalɔ́ɔn ví ɔ́ ná nɔ yě nu.” Mɔyízi kpódó Aalɔ́ɔn kpó, kpódó kplékplé Izlayɛ́li tɔn ɔ́ sín gǎn lɛ́ɛ kpó sɔ́ Kexáti ví lɛ́ɛ sín kɛ́n; yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Yě sɔ́ kɛ́n yětɔn bɛ́ sín mɛ e ɖó xwe gban (30) lɛ́ɛ, kpó mɛ e ɖó hú mɔ̌ lɛ́ɛ kpó jí, káká yi mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ wɛ ná nɔ́ wa azɔ̌ ɖé lɛ́ɛ ɖo Mawu xwé gbe. Mɛ e sín kɛ́n yě sɔ́ lɛ́ɛ bǐ bló afɔwó nǔwɔntɔn kantɔn gban (2.750). Hǔn Kexáti ví e sín kɛ́n è sɔ́ lɛ́ɛ nɛ́. Yě mɛ bǐ wɛ ɖó azɔ̌ ɖé bó nɔ wa ɖo Mawu xwé gbe. Mɔyízi xwedó gbeta e Mawu Mavɔmavɔ ná ɛ ɔ́, bɔ é kpódó Aalɔ́ɔn kpó sɔ́ kɛ́n yětɔn. È sɔ́ Gɛɛcɔ́ni ví súnnu lɛ́ɛ sín kɛ́n; è sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. È sɔ́ kɛ́n yětɔn bɛ́ sín súnnu e ɖó xwe gban (30) lɛ́ɛ, kpó mɛ e ɖó hú mɔ̌ lɛ́ɛ kpó jí káká yi mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ nɔ́ wa azɔ̌ ɖé lɛ́ɛ ɖo Mawu xwé gbe. Mɛ e sín kɛ́n è sɔ́ lɛ́ɛ bǐ bló afɔwó nǔwɔntɔn gban (2.630). Hǔn Gɛɛcɔ́ni ví e sín kɛ́n è sɔ́ lɛ́ɛ nɛ́. Yě wɛ ɖó azɔ̌ ɖé bó nɔ́ wa ɖo Mawu xwé gbe. Mɔyízi xwedó gbeta e Mawu Mavɔmavɔ ná ɛ ɔ́, bɔ é kpó Aalɔ́ɔn kpó sɔ́ kɛ́n yětɔn. È sɔ́ Mɛlali ví súnnu lɛ́ɛ sín kɛ́n; è sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. È sɔ́ kɛ́n yětɔn bɛ́ sín mɛ e ɖó xwe gban (30) lɛ́ɛ, kpó mɛ e ɖó hú mɔ̌ lɛ́ɛ kpó jí káká yi mɛ e ɖó xwe kanɖé wǒ (50) lɛ́ɛ jí. Yědɛɛ lɛ́ɛ nɔ́ wa azɔ̌ ɖé lɛ́ɛ ɖo Mawu xwé gbe. Mɛ e sín kɛ́n è sɔ́ lɛ́ɛ bǐ bló afɔwó-afayizɛ́n (3.200). Hǔn Mɛlali ví e sín kɛ́n è sɔ́ lɛ́ɛ nɛ́. Mɔyízi xwedó gbeta e Mawu Mavɔmavɔ ná ɛ ɔ́, bɔ é kpódó Aalɔ́ɔn kpó sɔ́ kɛ́n yětɔn. Hǔn Levíi ví e sín kɛ́n Mɔyízi kpó Aalɔ́ɔn kpó, kpódó Izlayɛ́li sín gǎn lɛ́ɛ kpó sɔ́ ɖo akɔta ɖokpó ɖokpó mɛ, hɛ̌nnu ɖokpó ɖokpó mɛ lɛ́ɛ nɛ́. Yě sɔ́ kɛ́n yětɔn bɛ́ sín súnnu e ɖó xwe gban (30) lɛ́ɛ, kpó éé ɖó hú mɔ̌ lɛ́ɛ kpó jí, káká yi mɛ e ɖó xwe kanɖé wǒ (50) lɛ́ɛ jí. Yě mɛ e sín kɛ́n è sɔ́ lɛ́ɛ bǐ wɛ nɔ́ wa azɔ̌ ɖé ɖo Mawu xwé gbe, bó nɔ́ ɖíɖá Goxɔ ɔ́ sín agban. Yě bǐ bló děgba we afɔwe kɛnnɛ ko (8.580). È ɖɔ nú e yě mɛ ɖokpó ɖokpó ná wa ɔ́ kpó nǔ e mɛ ɖokpó ɖokpó ná hɛn ɔ́ kpó nú yě, lě e Mawu Mavɔmavɔ ɖɔ nú Mɔyízi gbɔn é, bó sɔ́ kɛ́n yětɔn lě e Mawu Mavɔmavɔ ɖɔ n'i gbɔn é. Mawu Mavɔmavɔ ɖɔ nú Mɔyízi ɖɔ: “Đɔ nú Izlayɛ́li ví lɛ́ɛ ɖɔ yě ní ɖe mɛ e ɖo wǔtuzɔn baɖabaɖa jɛ wɛ, abǐ mɛ e ɖo glɔ̌ zɔn jɛ wɛ, abǐ mɛ e ɖ'alɔ cyɔ ɖé wú lɛ́ɛ tɔ́n sín fí e mi ɖó gɔnu ɖó é, ɖó mɛ blíblí wɛ yě nyǐ. Nú mɛ ɔ́ na bo nyí súnnu abǐ nyɔ̌nu ɔ́, mi ɖó ná ɖe e tɔ́n sín agun ɔ́ mɛ, bónú é má wá hɛn fí e mi ɖó gɔnu ɖó ɔ́ hɛn blí ó, ɖó un ɖo tɛ́ntin mitɔn.” Énɛ́ ɔ́, Izlayɛ́li ví lɛ́ɛ bló ɖó gbeta e Mawu Mavɔmavɔ ɖe tɔ́n nú Mɔyízi ɔ́ jí: yě ɖe mɛ e nyí mɛ blíblí lɛ́ɛ bǐ tɔ́n sín fí e yě ɖó gɔnu ɖó é. Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Súnnu ɖé abǐ nyɔ̌nu ɖé wa nǔ nyi do nú mɛɖé hǔn, sɛ́n ce wɛ é gba, bɔ hwɛ tɔn ná nɔ kɔ n'i. É ɖó ná ɖɔ hwɛ e é hu ɔ́, bó ná sɔ́ nǔ e wú é hu hwɛ ɔ́ jó nú mɛ e tɔn nǔ ɔ́ nyí ɔ́, bó ná ná akwɛ́ e nǔ ɔ́ xɔ ɔ́ sín atɔ́ɔ́nvlɔ́ɖó d'é jí. Nú mɛ e tɔn nǔ ɔ́ nyí ɔ́ má sɔ́ ɖe ǎ, bɔ mɛ tɔn e sɛkpɔ́ ɛ ɔ́ ɖěbǔ má ɖe bɔ è nǎ sɔ́ nǔ ɔ́ jó n'i ǎ ɔ́, è nǎ sɔ́ nǔ ɔ́ jó nú Mawu Mavɔmavɔ. É wɛ nyí ɖɔ è nǎ sɔ́ jó nú vɔ̌sánú-xwlémawutɔ́. Mɛ e hu hwɛ ɔ́ ná lɛ́ ná agbo ɖokpó, bɔ è nǎ dó sá hwɛxɔ́súsú vɔ́ ná; vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná sá vɔ̌ e nɔ́ súnsún hwɛ ɔ́ dó ta tɔn mɛ. Nǔ e è nǎ jɔ ɖo nǔ e Izlayɛ́li ví lɛ́ɛ ɖe ɖó vo nú Mawu Mavɔmavɔ ɔ́ jí lɛ́ɛ ɔ́, bǐ ná nyí vɔ̌sánú-xwlémawutɔ́ e nukɔn è zě wá ɔ́ tɔn. Mɛɖé sɔ́ nǔɖé ɖó vo nú Mawu Mavɔmavɔ ɔ́, mɛ ɔ́ ná sɔ́ nǔ ɔ́ jó nú vɔ̌sánú-xwlémawutɔ́ ɔ́. Nǔ e è sɔ́ jó nú vɔ̌sánú-xwlémawutɔ́ ɔ́, vɔ̌sánú-xwlémawutɔ́ ɔ́ tɔn wɛ.” Mawu Mavɔmavɔ ɖɔ nú Mɔyízi ɖɔ, é ní ɖɔ nú Izlayɛ́li ví lɛ́ɛ ɖɔ: “Mǐ ní ɖɔ nyɔ̌nu mɛsi ɖé dó afɔ gbě. É hɛn éɖée blí, ɖó súnnu ɖěvo ɖó xó xá ɛ ɖo nǔglɔ́; asú tɔn ká wlí kpó alɔ kpó ǎ. Mɛɖé ɖo te bo mɔ lě e nǔ ɔ́ jɛ gbɔn ɔ́ ǎ, mɛɖé ká gbo e dó ǎ; lo ɔ́, asú tɔn ɔ́ ɖo nǔ vɛ dó e wɛ. É sixú wá jɔ bɔ súnnu ɖé ná vɛ aga dó asi tɔn, có nyɔ̌nu ɔ́ wa mɔ̌ nú ɖé ǎ, Nú nǔ cí mɔ̌ ɔ́, súnnu ɔ́ ná kplá asi tɔn ɔ́ yi vɔ̌sánú-xwlémawutɔ́ ɔ́ gɔ́n, bó ná ná ɔ́ji sín linfín kilóo atɔn ɖó ta tɔn mɛ; é ná kɔn ami dó linfín ɔ́ jí ǎ, é ká ná hɛn zǎlínkpɔ́n d'é jí ǎ, ɖó nǔvɛdómɛ wú wɛ è nǎ nǔ énɛ́, bó ná dó ɖe nǔ e é wa nyi do ɔ́ gba. Vɔ̌sánú-xwlémawutɔ́ ɔ́ ná kplá nyɔ̌nu ɔ́ byɔ́ Goxɔ ɔ́ mɛ bɔ é ná nɔ te Mawu Mavɔmavɔ nukɔn. Énɛ́ ɔ́, vɔ̌sánú-xwlémawutɔ́ ɔ́ ná wún sin e è ɖe ɖó vo nú Mawu Mavɔmavɔ ɔ́ dó kogbán ɖé mɛ, bó ná wún kɔ́ ɖo Mawu xwé gbe dó sin ɔ́ mɛ, bó ná dán d'é wú. Nyɔ̌nu ɔ́ ná nɔ te mɔ̌ ɖo Mawu Mavɔmavɔ nukɔn, bɔ vɔ̌sánú-xwlémawutɔ́ ɔ́ ná ɖe avɔ sín ta n'i. Énɛ́ ɔ́ gúdo ɔ́, é ná zé mɛɖegba sín nǔ e è nǎ, ɖó è vɛ nǔ d'é ɔ́ wú ɔ́ dó alɔ mɛ n'i. É ɖésú ná hɛn sin vívɛ́ e nɔ dɔn nyladó wá ɔ́ alɔ mɛ. Vɔ̌sánú-xwlémawutɔ́ ɔ́ ná ɖɔ nú nyɔ̌nu ɔ́ ɖɔ émí ɖɔ xó élɔ́ lɛ́ɛ ɔ́, é ná xwlé nǔ d'é jí; é ná ɖɔ nú nyɔ̌nu ɔ́ ɖɔ: ‘Ényí súnnu ɖěvo ma ɖó xó xá we ǎ, ényí a ma hɛn hwiɖée blí, bó blɛ́ asú towe ǎ, bó nu sin vívɛ́ élɔ́ e nɔ hɛn nyladó wá nú mɛ ɔ́ hǔn, é ní má wa nǔɖé nú we ó. Amɔ̌, nú a hɛn hwiɖée blí, bó blɛ́ asú towe nǔgbó ɔ́, nú súnnu ɖěvo ɖó xó xá we nǔgbó ɔ́, Mawu Mavɔmavɔ ní dɔn tó nú we; é ní bló bónú a nǐ húzú wɛnsinɔ; é ní bló bónú adɔgo towe ní jí; é ní bló mɔ̌ nú we, bónú gbɛ̌ towe lɛ́ɛ ná nɔ́ sɔ́ we dó ná xlɛ́, hwenu e yě ná ja nu dó mɛ ɖé gbé é. Sin élɔ́ e nɔ́ hɛn nyladó wá nú mɛ ɔ́ ní yi xo towe mɛ, bónú adɔgo towe ní jí, bó sɔ́ we dó húzú wɛnsinɔ.’ Nú é ɖɔ mɔ̌ ɔ́, nyɔ̌nu ɔ́ ná yí gbe ɖɔ: ‘Nú un bló mɔ̌ nǔgbó hǔn, nǔ e a ɖɔ ɔ́ ní bó nyí gbɔn mɔ̌.’ “Vɔ̌sánú-xwlémawutɔ́ ɔ́ ná wlán nudómɛ sín xó énɛ́ lɛ́ɛ dó wěma jí, bó ná klɔ́ dó sin vívɛ́ ɔ́ mɛ, bó ná ná nyɔ̌nu ɔ́, bɔ é ná nu, bɔ sin vívɛ́ énɛ́ ɔ́ ná yi xo tɔn mɛ, bó ná wa nǔ xá ɛ. Vɔ̌sánú-xwlémawutɔ́ ɔ́ ná yí mɛɖegba sín nǔ e è nǎ ɔ́ ɖo nyɔ̌nu ɔ́ sí, bó bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná xwlé e, bó ná zé ɖó vɔ̌sákpe jí. Vɔ̌sánú-xwlémawutɔ́ ɔ́ ná wún nǔníná énɛ́ ɔ́ alɔgogo ɖokpó, bó ná dó zo ɖo vɔ̌sákpe ɔ́ jí, bɔ é ná nyí flǐnnú ɖé nú Mawu Mavɔmavɔ. Énɛ́ ɔ́ gúdo ɔ́, é ná ná sin ɔ́ nyɔ̌nu ɔ́, bɔ é ná nu. Nú é ná sin ɔ́ nyɔ̌nu ɔ́ bɔ é nu fó ɔ́, nú nyɔ̌nu ɔ́ má nɔ gbejí nú asú tɔn ǎ, bó hɛn éɖée blí nǔgbó ɔ́, sin énɛ́ e nɔ́ hɛn nyladó wá nú mɛ ɔ́ ná yi xo tɔn mɛ, bó ná ná ɛ vǐvɛ́ sise; adɔgo tɔn ná jí; é ná húzú wɛnsinɔ. Nyɔ̌nu énɛ́ sín gbɛ̌ lɛ́ɛ ja nu dó mɛ gbé ɔ́, yě ná nɔ́ sɔ́ ɛ dó ná xlɛ́. Nú nyɔ̌nu ɔ́ má ká hɛn éɖée blí ǎ, bó ɖo gbejí ɔ́, è nǎ mɔ ɖɔ é ɖo xomɛvɔ́, bɔ é ná lɛ́ ji vǐ. “Sɛ́n e ɖɔ xó dó mɛɖegba wú ɔ́ nɛ́; sɛ́n énɛ́ ɔ́ kan nyɔ̌nu e ɖo asúxwé, bó dó afɔ gbě ɔ́, abǐ nyɔ̌nu e asú tɔn vɛ aga dó é. Vɔ̌sánú-xwlémawutɔ́ ɔ́ ná sɔ́ nyɔ̌nu ɔ́ ɖó te Mawu Mavɔmavɔ nukɔn, bó ná zé sɛ́n énɛ́ ɔ́ bǐ bɔ dó wǔ tɔn. Nú asú ɔ́ wɛ gba acɛ nyɔ̌nu ɔ́ wú ɔ́, è nǎ dó hwɛ ɖěbǔ i ǎ; amɔ̌, nyɔ̌nu ɔ́, nú é wɛ gba acɛ súnnu ɔ́ wú ɔ́, é ji nǔɖé ɔ́, é ná kpan.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Nú mɛ ɖé dó akpá ɖɔ émí gbɛ́ nǔ bǐ, bó ná sɔ́ émíɖée ɖó vo nú Mawu Mavɔmavɔ, bó ná nɔ́ wa azɔ̌ n'i, lobo ɖe éɖée ɖó vo ɖo mɛ ɖě lɛ́ɛ mɛ ɔ́, é ná nu vɛ̌ɛn ǎ; é ná nu ahan syɛ́nsyɛ́n ɖěbǔ ǎ; é ná nu vɛ̌ɛn sinvɛ́sinvɛ́ ǎ, é ná nu vinɛ́gli ahan syɛ́nsyɛ́n tɔn ǎ; é ná nu ahan e è sɔ́ vǐwun dó ɖa ná ɔ́ ɖěbǔ ǎ. É ná ɖu vǐwun mú ǎ, é ká ná ɖu ée kó xú ɔ́ ǎ. Nú akpá e é dó ɔ́ kpo ɖo te ɔ́, é ɖó ná ɖu nǔ e tɔ́n sín vǐwuntín wú ɔ́ ɖě ǎ, bɛ́ sín kwín tɔn jí, káká yi fló tɔn jí. É ɖó ná xwlɛ́ ta ǎ. È sɔ́ ɛ ɖó vo nú Mawu Mavɔmavɔ, bɔ é ná wa azɔ̌ n'i wɛ. Hǔn é ɖó ná jó ɖa tɔn dó, bɔ é ná ɖo susu wɛ, káká jɛ hwenu e é ɖó dó é. Đo hwe énɛ́ nu e é sɔ́ ɖó te ɔ́ bǐ ɔ́, é ɖó ná sɛkpɔ́ cyɔ ǎ. É ɖó ná sɛkpɔ́ tɔ́ tɔn, nɔ tɔn, nɔví tɔn súnnu, abǐ nyɔ̌nu sín cyɔ, bó dó hɛn éɖée blí ǎ, ɖó é sɔ́ éɖée ɖó vo nú Mawu, bó ná wa azɔ̌ n'i. É ná bló mɔ̌ ǎ, ɖó é sɔ́ éɖée ɖó vo nú Mawu lě e ɖa e ɖo ta tɔn ɔ́ ɖe xlɛ́ gbɔn é. “Hwenu e mɛ ɔ́ sɔ́ ɖó te ɖɔ émí ná dó wa azɔ̌ nú Mawu Mavɔmavɔ ɔ́ bǐ ɔ́, vo wɛ é sɔ́ éɖée ɖó nú Mawu Mavɔmavɔ. Nú mɛɖé wá kú ɖo akpá tɔn ɖo ajijimɛ ɔ́, é ná ɖó akpá e é dó, bó sɔ́ éɖée ɖó vo nú Mawu Mavɔmavɔ ɔ́ te, ɖó nǔ énɛ́ e jɛ ɖo akpá tɔn, bó hɛn ɛ blí ɔ́ wútu. Azǎn tɛ́nwegɔ́ ɔ́ gbe ɔ́, é ná lɛ́ húzú mɛ mímɛ́, bó ná xwlɛ́ ta. Azǎn tántɔngɔ́ ɔ́ gbe ɔ́, é ná hɛn xwelé we abǐ ahwannɛ́ we yi jó nú vɔ̌sánú-xwlémawutɔ́ ɔ́ ɖo Goxɔ ɔ́ lihɛ́nnu. Vɔ̌sánú-xwlémawutɔ́ ɔ́ ná zé xɛ e é hɛn wá lɛ́ɛ ɖokpó xwlé Mawu Mavɔmavɔ, bó dó sá hwɛxɔ́súsúvɔ́ ná, bó ná zé wegɔ́ ɔ́ dó sá vɔ̌ e è nɔ dó zo ɔ́ ná. Énɛ́ ɔ́ gúdo ɔ́, é ná bló lě e è nɔ bló gbɔn, bó nɔ́ slá wǔ nú mɛ ɔ́ nú mɛ ɔ́, bó dó slá wǔ n'i ɖó cyɔ e kú ɖo akpá tɔn ɔ́ wú. Gbe énɛ́ gbe ɖokpó ɔ́ jɛ́n vɔ̌sánú-xwlémawutɔ́ ɔ́ ná ɖɔ ɖɔ nya ɔ́ lɛ́ nyí mɛ e è sɔ́ ɖó vo nú Mawu Mavɔmavɔ é. Énɛ́ ɔ́ gúdo ɔ́, nya ɔ́ ná lɛ́ ná lɛ̌ngbɔ́ví asú e ɖó xwe ɖokpó ɔ́ ɖokpó, bɔ vɔ̌sánú-xwlémawutɔ́ ɔ́ ná dó sá hwɛxɔ́súsúvɔ́ ɔ́ ná, bɔ nya ɔ́ ná dó vɔ́ akpá e é dó, bó sɔ́ éɖée ɖó vo nú Mawu Mavɔmavɔ ɔ́ bɛ́ sín do. Azǎn e é kó bló wá yi lɛ́ɛ sɔ́ ɖ'é mɛ ǎ, ɖó é ɖó akpá e é dó ɔ́ te. “Nǔwiwa e ɖɔ xó dó mɛ e sɔ́ éɖée ɖó vo nú Mawu Mavɔmavɔ, bó ná wa azɔ̌ n'i ɔ́ wú lɛ́ɛ ɖíe: Hwenu e azǎn e é ɖó ɔ́ ná sɔgbe ɔ́, è nǎ kplá ɛ yi Goxɔ ɔ́ sín alihɛ́nnu. É ná hɛn kanlin e ma ɖó blɔ̌ ǎ atɔn bó yi ná Mawu Mavɔmavɔ: é ná ná lɛ̌ngbɔ́ví asú e ɖó xwe ɖokpó ɔ́ ɖokpó, bɔ è nǎ dó sá vɔ̌ e è nɔ dó zo ɔ́ ná; é ná ná lɛ̌ngbɔ́ví e ɖó xwe ɖokpó ɔ́ ɖokpó, bɔ è nǎ dó sá vɔ̌ e nɔ́ súnsún hwɛ ɔ́ ná, bó ná ná agbo ɖokpó, bɔ è nǎ dó sá kɔnɖókpɔ́ vɔ́ ná. É ná lɛ́ ná wɔ̌xúxú e è sɔ́ ami dó nya linfín tɔn bó má dó tɔ́n mɛ ǎ ɔ́ xasun ɖokpó, bó ná ná acɔnmɔ e mɛ tɔ́n má ɖe ǎ, bɔ è sá ami dó ɔ́ xasun ɖokpó, bó ná ná nǔníná linfín tɔn, kpódó vɛ̌ɛn kpó dó vɔ̌sánú lɛ́ɛ jí. Vɔ̌sánú-xwlémawutɔ́ ɔ́ ná bɛ́ nǔníná énɛ́ lɛ́ɛ wá Mawu Mavɔmavɔ nukɔn, bó ná sá hwɛxɔ́súsú vɔ́ ɔ́, kpódó vɔ̌ e è nɔ dó zo ɔ́ kpó. Énɛ́ ɔ́ gúdo ɔ́, é ná xwlé agbo e é ná dó sá kɔnɖókpɔ́ vɔ́ ɔ́ Mawu Mavɔmavɔ kpódó wɔ̌xúxú e mɛ è ma dó tɔ́n ǎ é xasun ɖokpó ɔ́ kpó, bó ná lɛ́ xwlé e nǔníná linfín tɔn lɛ́ɛ kpó, kpódó vɛ̌ɛn ɔ́ kpó. Hwe énɛ́ ɔ́ nu ɔ́, mɛ e sɔ́ éɖée ɖó vo nú Mawu, bó ná wa azɔ̌ n'i ɔ́ ná xwlɛ́ ta ɖo Goxɔ ɔ́ sín alihɛ́nnu, bó ná bɛ́ ɖa lɛ́ɛ kɔn nyi myɔ e mɛ è ɖo kanlin e è dǒ sá kɔnɖókpɔ́ vɔ́ ɔ́ dó zo ɖe wɛ ɔ́ mɛ. Vɔ̌sánú-xwlémawutɔ́ ɔ́ ná zé agbo ɔ́ sín abǎ e è ko ɖa ɔ́, bó ná zé wɔ̌xúxú e mɛ è ma dó tɔ́n ǎ é ɖokpó ɖo xasun ɔ́ mɛ, bó ná zé acɔnmɔ e mɛ è ma dó tɔ́n ǎ é ɖokpó; nya ɔ́ xwlɛ́ ta ɔ́, vɔ̌sánú-xwlémawutɔ́ ɔ́ ná bɛ́ nǔ énɛ́ lɛ́ɛ ɖó alɔ tɔn lɛ́ɛ jí. Vɔ̌sánú-xwlémawutɔ́ ɔ́ ná bló lě e è ko nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná xwlé nǔníná énɛ́ lɛ́ɛ Mawu Mavɔmavɔ. Nǔníná énɛ́ lɛ́ɛ kpódó kanlin ɔ́ sín akɔ́n kpó, kpódó asá tɔn kpó kó nyí nǔ bɔ è ɖe ɖó vo nú vɔ̌sánú-xwlémawutɔ́ ɔ́. Bɛ́ sín hwe énɛ́ ɔ́ nu ɔ́, nya ɔ́ sixú lɛ́ jɛ vɛ̌ɛn nu jí. “Nǔwiwa e ɖɔ xó dó mɛ e dó akpá, bó sɔ́ éɖée ɖó vo nú Mawu Mavɔmavɔ ɔ́ wú lɛ́ɛ nɛ́. Nǔ e é ɖó ná ná Mawu Mavɔmavɔ ɖo nǔwiwa énɛ́ ɔ́ tamɛ lɛ́ɛ nɛ́. Nú é ɖó nǔ hú mɔ̌ ɔ́, é sixú ná nǔ ɖěvo lɛ́ɛ gɔ́ ná. Amɔ̌, nǔ e sín akpá é dó ɔ́, é ɖó ná ná bǐ, bɔ é ná sɔgbe xá mɛɖée sɔ́ ɖó vo nú Mawu Mavɔmavɔ sín akpá e é dó ɔ́ sín nǔwiwa lɛ́ɛ.” Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn kpódó vǐ tɔn súnnu lɛ́ɛ kpó ɖɔ nú yě jló ná xo ɖɛ dó Izlayɛ́li ví lɛ́ɛ jí ɔ́, yě ná nɔ́ ɖɔ: “Mawu Mavɔmavɔ ní xo ɖɛ dó mi jí, bó cyɔ́n alɔ mi jí. Mawu Mavɔmavɔ ní zé nukún ɖagbe dó kpɔ́n mi ná, bó yí mi dó ɖagbe jí. Mawu Mavɔmavɔ ní ɖe xomɛnyínyɔ́ tɔn xlɛ́ mi, bó ná fífá tɔn mi.” Hwenu e vɔ̌sánú-xwlémawutɔ́ lɛ́ɛ ná ylɔ́ nyǐkɔ ce, bó dó xo ɖɛ dó Izlayɛ́li ví lɛ́ɛ jí gbɔn mɔ̌ ɔ́, nyɛ ɖésúnɔ ná xo ɖɛ dó yě jí. Gbe e gbe Mɔyízi bló Mawu xwé ɔ́ fó ɔ́, é kɔn ami d'é wú, bó dó ɖe é kpó nǔ e ɖ'é mɛ lɛ́ɛ bǐ kpó ɖó vo nú Mawu Mavɔmavɔ. Mɔ̌ ɖokpó ɔ́, é kɔn ami dó vɔ̌sákpe ɔ́ wú, bó dó ɖe é kpódó nǔ e è nɔ zán ɖ'é kɔn lɛ́ɛ bǐ kpó ɖó vo nú Mawu Mavɔmavɔ. Ée é bló mɔ̌ é ɔ́, hɛ̌nnugán e sɔ́ akɔta Izlayɛ́li ví lɛ́ɛ tɔn sín afɔ ɖó te lɛ́ɛ sɛkpɔ́. Yědɛɛ lɛ́ɛ wɛ sɔ́ Izlayɛ́li ví lɛ́ɛ sín kɛ́n xá yě. Yě hɛn nǔ wá ná Mawu Mavɔmavɔ: yě hɛn kɛkɛ́ví ayizɛ́n bɔ è bǔ nǔ dó, bó hɛn nyibú wěwe; hɛ̌nnugán we kpédó kɛkɛ́ví ɖokpó, bɔ nyibú lɛ́ɛ ɖokpó ɖokpó nyí hɛ̌nnugán ɖokpó ɖokpó tɔn. Yě bɛ̌ nǔ énɛ́ lɛ́ɛ yi Mawu xwé ɔ́ nukɔn. Mawu Mavɔmavɔ ɖɔ nú Mɔyízi ɖɔ: “Yǐ nǔ e yě hɛn wá lɛ́ɛ. Kɛkɛ́ví énɛ́ lɛ́ɛ, kpódó nyibú énɛ́ lɛ́ɛ kpó ɔ́, è nǎ zán yě dó wa Goxɔ ɔ́ sín azɔ̌ ná. A nǎ kpɔ́n azɔ̌ e Levíi ví lɛ́ɛ ɖokpó ɖokpó nɔ́ wa ɔ́, bó ná ná nǔ énɛ́ lɛ́ɛ yě.” Mɔyízi yí kɛkɛ́ví lɛ́ɛ kpódó nyibú lɛ́ɛ kpó, bó má nú Levíi ví lɛ́ɛ. É ná kɛkɛ́ví we, nyibú ɛnɛ Gɛɛcɔ́ni ví lɛ́ɛ, bónú azɔ̌ yětɔn ná nyɔ́ wa nú yě. Bɔ kɛkɛ́ví ɛnɛ, kpódó nyibú tántɔn e kpo lɛ́ɛ kpó ná nyí Mɛlali ví lɛ́ɛ tɔn, bónú azɔ̌ yětɔn ná nyɔ́ wa nú yě. Itamáa vɔ̌sánú-xwlémawutɔ́ Aalɔ́ɔn sín vǐ ɔ́ sín acɛ mɛ wɛ yě nɔ́ wa azɔ̌ ɖe. É zé kɛkɛ́ví ɖě nú Kexáti ví lɛ́ɛ ǎ, é ká zé nyibú ɖě nú yě ǎ, ɖó nǔ mímɛ́ lɛ́ɛ wú wɛ yědɛɛ lɛ́ɛ nɔ́ kpé nukún dó, bó nɔ́ hɛn yě abɔ̌ta. Hɛ̌nnugán akɔta Izlayɛ́li ví lɛ́ɛ tɔn lɛ́ɛ ná nǔ, bɔ è nǎ dó jó vɔ̌sákpe ɔ́ nú Mawu Mavɔmavɔ, gbe e gbe Mɔyízi kɔn ami d'é wú é. Hɛ̌nnugán lɛ́ɛ hɛn nǔníná yětɔn lɛ́ɛ wá vɔ̌sákpe ɔ́ nukɔn. Lo ɔ́, Mawu Mavɔmavɔ ɖɔ nú Mɔyízi ɖɔ: “Hɛ̌nnugán ɖokpó wɛ ná nɔ́ wá gbe ɖokpó, bó ná nɔ́ hɛn nǔníná tɔn e è nǎ dó jó vɔ̌sákpe ɔ́ nú Mawu Mavɔmavɔ ɔ́ wá.” Naxicɔ́ni, Aminadabu ví súnnu e jɔ ɖo akɔta Judáa tɔn mɛ ɔ́ wɛ hɛn nǔníná éyɛ́ tɔn wá ɖo azǎn nukɔn nukɔntɔn ɔ́ gbe. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu Mavɔmavɔ xwé gbe é wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ zé xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́; nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó. È nǎ bɛ̌ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n. È nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Naxicɔ́ni Aminadabu ví súnnu ɔ́ ná lɛ́ɛ nɛ́. Azǎn wegɔ́ ɔ́ gbe ɔ́, Nɛtanɛli Suwáa ví súnnu e nyí akɔta Isakáa tɔn sín hɛ̌nnugán ɔ́ hɛn nǔníná tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu Mavɔmavɔ xwé gbe é wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100) bɔ nǔhwɛ́nkún gɔ́. Nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ̌ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ɔ́ ná, nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n. Nǔ e Nɛtanɛli Suwáa ví ɔ́ ná lɛ́ɛ nɛ́. Azǎn atɔngɔ́ ɔ́ gbe ɔ́, Eliavu, Helɔ́ni sín vǐ súnnu e nyí akɔta Zabulɔ́ɔn tɔn sín hɛ̌nnugán ɔ́ hɛn nǔníná tɔn lɛ́ɛ wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu Mavɔmavɔ xwé gbe é wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ bǐ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ̌ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Eliavu, Helɔ́ni ví ɔ́ ná lɛ́ɛ nɛ́. Azǎn ɛnɛgɔ́ ɔ́ gbe ɔ́, Elisúu, Cedewúu ví súnnu e nyí akɔta Hwlibɛ́ni tɔn sín hɛ̌nnugán ɔ́ wɛ hɛn nǔníná tɔn lɛ́ɛ wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ná ɖo Mawu xwé gbe ɔ́ wɛ è dǒ da; linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ nɔ́ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Elisúu, Cedewúu sín ví súnnu ɔ́ ná lɛ́ɛ nɛ́. Azǎn atɔ́ɔ́ngɔ́ ɔ́ gbe ɔ́, Celumiyɛ́li, Sulicadáyi sín vǐ súnnu e nyí akɔta Sinmɛnyɔ́ɔ tɔn sín hɛ̌nnugán ɔ́ hɛn nǔníná éyɛ́ tɔn lɛ́ɛ wá. É ná agbǎn e è sɔ́ kpatágan dó bló ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ bǐ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Celumiyɛ́li, Sulicadáyi ví ɔ́ ná lɛ́ɛ nɛ́. Azǎn ayizɛ́ngɔ́ ɔ́ gbe ɔ́, Eliyasáfu, Dewúɛli ví súnnu e nyí akɔta Gadi tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), bó ná basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná agbo ɖokpó, bɔ è nǎ dó sá hwɛxɔ́súsú vɔ́ ɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Eliyasáfu, Dewúɛli ví ɔ́ ná lɛ́ɛ nɛ́. Azǎn tɛ́nwegɔ́ ɔ́ gbe ɔ́, Elicama, Amumihudi ví súnnu e nyí akɔta Eflayímu tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Elicama, Amumihudi ví ɔ́ ná lɛ́ɛ nɛ́. Azǎn tántɔngɔ́ ɔ́ gbe ɔ́, Gamɛliyɛ́li, Pedasúu sín vǐ súnnu e nyí akɔta Manasée tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Gamɛliyɛ́li Pedasúu ví ɔ́ ná lɛ́ɛ nɛ́. Azǎn tɛ́nnɛgɔ́ ɔ́ gbe ɔ́, Avidáni, Gideóni sín ví e nyí akɔta Bɛnjamɛ́ɛ tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è do da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná; é ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Avidáni, Gideóni sín vǐ ɔ́ ná lɛ́ɛ nɛ́. Azǎn wǒgɔ́ ɔ́ gbe ɔ́, Axiezɛ́ɛ, Amumicadayi sín vǐ súnnu e nyí akɔta Dan tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló é ɖokpó, bɔ é da glǎmu kanwe ko (100), bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Axiezɛ́ɛ, Amumicadayi sín vǐ ɔ́ ná lɛ́ɛ nɛ́. Azǎn wǒ-ɖokpógɔ́ ɔ́ gbe ɔ́, Pagiyɛ́li, Ɔkláni ví súnnu e nyí akɔta Acɛ́ɛ tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100) bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná, bó ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ̌ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Pagiyɛ́li, Ɔkláni sín vǐ ɔ́ ná lɛ́ɛ nɛ́. Azǎn wěwegɔ́ ɔ́ gbe ɔ́, Axila, Eyináni ví súnnu e nyí akɔta Nɛfutali tɔn sín hɛ̌nnugán ɔ́ hɛn nǔníná éyɛ́ tɔn wá. É ná agbǎn e è sɔ́ kpatágan dó bló ná ɔ́ ɖokpó, bɔ é da glǎmu afayizɛ́n kanwe ko (1.300), basya e è sɔ́ kpatágan dó bló ná ɔ́ ɖokpó, bɔ é da glǎmu nǔwɔntɔn kanwe ko (700). Gan e è nɔ dó da nǔ ɖo Mawu xwé gbe ɔ́ wɛ è dǒ da. Linfín e è sɔ́ ami dó nya ná ɔ́ gɔ́ gannú we énɛ́ lɛ́ɛ, bɔ è nǎ xwlé Mawu. É ná kɔ́fu e è sɔ́ siká dó bló ná ɔ́ ɖokpó, bɔ é da glǎmu kanwe ko (100) bɔ nǔhwɛ́nkún gɔ́. É ná nyibúsú wínnyáwínnyá ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ ɖokpó; è nǎ bɛ́ kanlin énɛ́ lɛ́ɛ dó sá vɔ̌ e è nɔ dó zo ɔ́ ná. É ná gbǎgbá ɖokpó, bɔ è nǎ dó sá hwɛxɔ́súsú vɔ́ ná. É ná nyibú we, agbo atɔ́ɔ́n, gbǎgbá atɔ́ɔ́n, lɛ̌ngbɔ́ví e ɖó xwe ɖokpó ɔ́ atɔ́ɔ́n; è nǎ bɛ́ kanlin énɛ́ lɛ́ɛ dó sá kɔnɖókpɔ́ vɔ́ ná. Nǔ e Axila, Eyináni ví ɔ́ ná lɛ́ɛ nɛ́. Nǔ e akɔta Izlayɛ́li ví lɛ́ɛ tɔn sín hɛ̌nnugán lɛ́ɛ ná, bɔ è nǎ dó jó vɔ̌sákpe ɔ́ nú Mawu Mavɔmavɔ lɛ́ɛ nɛ́; hwenu e Mɔyízi kɔn ami dó vɔ̌sákpe ɔ́ wú ɔ́ wɛ yě ná nǔ énɛ́ lɛ́ɛ. Bǐ bló agbǎn e è sɔ́ kpatágan dó bló ná ɔ́ wěwe, basya e è sɔ́ kpatágan dó bló ná ɔ́ wěwe, kɔ́fu e è sɔ́ siká dó bló ná ɔ́ wěwe. Agban e è sɔ́ kpatágan dó bló ná lɛ́ɛ ɖokpó ɖokpó da glǎmu afayizɛ́n kanwe ko (1.300). Basya e è sɔ́ kpatágan dó bló ná lɛ́ɛ ɖokpó ɖokpó da glǎmu nǔwɔntɔn kanwe ko (700). Kpatágan e è dǒ bló gannú we énɛ́ lɛ́ɛ ná ɔ́ bǐ da kilóo ko-nukún-ɛnɛ (24). Gan e nɔ dó da nǔ ɖo Mawu xwé gbe ɔ́ wɛ è dǒ da. Kɔ́fu wěwe e è sɔ́ siká dó bló lɛ́ɛ ɖokpó ɖokpó da glǎmu kanwe ko (100); hǔn wěwe lɛ́ɛ bǐ da glǎmu afayizɛ́n (1.200). Nǔhwɛ́nkún e è nǎ dó zo lɛ́ɛ gɔ́ ná. Kanlin e è nǎ dó sá vɔ̌ e è nɔ dó zo ɔ́ ná lɛ́ɛ bǐ bló nyibúsú wěwe, agbo wěwe, lɛ̌ngbɔ́ví e ɖó xwe ɖokpó ɔ́ wěwe, bɔ nǔníná kpaa lɛ́ɛ jɛ jí. Kanlin e è nǎ dó sá hwɛxɔ́súsú vɔ́ ná lɛ́ɛ bǐ bló gbǎgbá wěwe. Kanlin e è nǎ dó sá kɔnɖókpɔ́ vɔ́ ná lɛ́ɛ bǐ bló nyibúsú ko-nukún-ɛnɛ (24), agbo kanɖé ko (60), gbǎgbá kanɖé ko (60), lɛ̌ngbɔ́ví e ɖó xwe ɖokpó ɔ́ kanɖé ko (60). Ée Mɔyízi kɔn ami dó vɔ̌sákpe ɔ́ wú ɔ́, nǔ e è nǎ, bɔ è nǎ dó jó vɔ̌sákpe ɔ́ nú Mawu Mavɔmavɔ ɔ́ nɛ́. Hwenu e Mɔyízi byɔ́ Goxɔ ɔ́ mɛ, bo ná ɖɔ xó xá Mawu Mavɔmavɔ ɔ́, é se gbe ɖé sín wɛnsagun susunɔ we e ɖo akɔjijɛgbá ɔ́ sín nusú jí lɛ́ɛ ta nu. Hwe énɛ́ ɔ́ nu ɔ́, é jɛ xó ɖɔ xá ɛ jí. Mawu Mavɔmavɔ ɖɔ nú Mɔyízi ɖɔ é ní ɖɔ nú Aalɔ́ɔn ɖɔ: “Hwenu e a nǎ bɛ́ zogbɛ́n tɛ́nwe lɛ́ɛ ɖó zogbɛ́nhɛnnú ɔ́ jí ɔ́, blǒ bónú yě nǐ ɖi ɖɛ̌ dó nukɔn.” Aalɔ́ɔn bló lě e è ɖɔ gbɔn ɔ́. É fɔ zogbɛ́n lɛ́ɛ ɖó zogbɛ́nhɛnnú ɔ́ jí ɖo nukɔn lě e Mawu Mavɔmavɔ ɖɔ gbɔn nú Mɔyízi é. Siká wɛ è dǒ tun zogbɛ́nhɛnnú ɔ́ ná, sín do káká yi aga. É tun bɔ é sɔgbe xá ée Mawu Mavɔmavɔ zé xlɛ́ Mɔyízi é. Mawu Mavɔmavɔ ɖɔ nú Mɔyízi ɖɔ: “Đe Levíi ví lɛ́ɛ sín Izlayɛ́li ví ɖě lɛ́ɛ mɛ, bó slá wǔ nú yě. Lě e a nǎ slá wǔ nú yě gbɔn ɔ́ ɖíe: a nǎ mi sin e è nɔ dó slá wǔ nú mɛ ɔ́ dó yě wú, bɔ yě ná xwlɛ́ fún e ɖo yě wú ɔ́ bǐ; yě ná nya avɔ yětɔn lɛ́ɛ, énɛ́ ɔ́, yě ná húzú mɛ mímɛ́. Énɛ́ ɔ́ gúdo ɔ́, yě ná ná nyibúsú wínnyáwínnyá ɖokpó, kpódó linfín e è sɔ́ ami dó nya ná ɔ́ kpó, bɔ hwi ɖésúnɔ ná zé nyibúsú wínnyáwínnyá ɖěvo, bɔ è nǎ dó sá hwɛxɔ́súsú vɔ́ ná. A nǎ kplá Levíi ví lɛ́ɛ wá Goxɔ ɔ́ nukɔn, bó ná ylɔ́ Izlayɛ́li ví lɛ́ɛ kplé. A nǎ kplá Levíi ví lɛ́ɛ wá Mawu Mavɔmavɔ nukɔn, bɔ Izlayɛ́li ví lɛ́ɛ bǐ ná fɔ alɔ ɖó jǐ yětɔn; Aalɔ́ɔn ná bló lě e è nɔ bló gbɔn, bó nɔ ɖe mɛ ɖó vo nú mì ɔ́, bó ɖe yě ɖó vo nú mì, ɖo Izlayɛ́li ví lɛ́ɛ sín nyǐkɔ mɛ, bɔ yě ná nɔ́ wa azɔ̌ nú nyɛ Mawu Mavɔmavɔ. Levíi ví lɛ́ɛ ná fɔ alɔ ɖó nyibúsú we lɛ́ɛ ta, bɔ a nǎ sɔ́ ɖokpó dó sá hwɛxɔ́súsú vɔ́ ná, bó ná sɔ́ wegɔ́ ɔ́ dó sá vɔ̌ e è nɔ dó zo ɔ́ ná, bónú è nǎ sɔ́ hwɛ kɛ Levíi ví lɛ́ɛ. A nǎ bló bɔ Levíi ví lɛ́ɛ ná nɔ te ɖo Aalɔ́ɔn kpó vǐ tɔn súnnu lɛ́ɛ kpó sín nukɔn, bɔ a nǎ bló lě e è nɔ bló gbɔn, bó nɔ́ ɖe mɛ ɖó vo nú mì ɔ́, bó ɖe yě ɖó vo nú mì. A nǎ ɖe Levíi ví lɛ́ɛ sín Izlayɛ́li ví ɖě lɛ́ɛ mɛ, bɔ yě ná nyí nyɛ Mawu Mavɔmavɔ tɔn. Énɛ́ ɔ́, Levíi ví lɛ́ɛ ná nɔ́ wá wa azɔ̌ ɖo Goxɔ ɔ́ mɛ. “Lě e a nǎ slá wǔ nú yě gbɔn, bó ná bló lě e è nɔ bló gbɔn, bó nɔ́ ɖe mɛ ɖó vo nú mì gbɔn ɔ́ nɛ́. Đó ce wɛ yě nyǐ; yě wɛ sɔ́ Izlayɛ́li ví ɖě lɛ́ɛ sín afɔ ɖó te. Un ɖe yě ɖó vo nú nyɛɖée, bɔ yě ná nɔ Izlayɛ́li ví ɖě lɛ́ɛ sín tɛn mɛ. Đó nukɔngbéví e ɖo Izlayɛ́li lɛ́ɛ bǐ wɛ nyí ce; é sixú nyí gbɛtɔ́, é sixú nyí kanlin, ɖó gbe e gbe un hu nukɔngbéví lɛ́ɛ bǐ ɖo Ejípu ɔ́, un ko ɖe yě ɖó vo nú nyɛɖée, bó zé Levíi ví lɛ́ɛ ɖó Izlayɛ́li ví ɖě lɛ́ɛ sín nukɔngbéví lɛ́ɛ tɛn mɛ. Un ɖe Levíi ví lɛ́ɛ sín Izlayɛ́li ví ɖě lɛ́ɛ tɛ́ntin, bó sɔ́ yě jó nú Aalɔ́ɔn kpódó vǐ tɔn súnnu lɛ́ɛ kpó, bónú yě ná nɔ́ wa Izlayɛ́li ví lɛ́ɛ sín azɔ̌ ɖo Goxɔ ɔ́ mɛ, bó ná sá vɔ̌ e nɔ́ súnsún hwɛ ɔ́ ɖó ta yětɔn mɛ. Énɛ́ ɔ́, nú Izlayɛ́li ví lɛ́ɛ sɛkpɔ́ Mawu xwé ɔ́, nyladó ɖěbǔ ná kɔn dó yě jí ǎ.” Mɔyízi kpó Aalɔ́ɔn kpó, kpódó Izlayɛ́li ví lɛ́ɛ bǐ kpó bló nǔ e Mawu Mavɔmavɔ ɖɔ nú Mɔyízi dó Levíi ví lɛ́ɛ wú é. Levíi ví lɛ́ɛ slá wǔ, bó nya avɔ yětɔn lɛ́ɛ, bɔ Aalɔ́ɔn ɖe yě ɖó vo nú Mawu Mavɔmavɔ; é bló lě e è nɔ bló gbɔn, bó nɔ́ ɖe mɛ ɖó vo nú Mawu ɔ́, bó sá hwɛxɔ́súsú vɔ́ nú yě, bɔ yě húzú mɛ mímɛ́. Énɛ́ ɔ́ gúdo ɔ́, Levíi ví lɛ́ɛ wá wa azɔ̌ yětɔn ɖo Goxɔ ɔ́ mɛ, ɖo Aalɔ́ɔn kpódó vǐ tɔn súnnu lɛ́ɛ kpó sín nukɔn, lě e Mawu Mavɔmavɔ kó ɖɔ gbɔn nú Mɔyízi dó Levíi ví lɛ́ɛ wú é. Mawu Mavɔmavɔ ɖɔ nú Mɔyízi ɖɔ: “Levíi ví e ɖó xwe koatɔ́n lɛ́ɛ (25) kpódó ée ɖó hú mɔ̌ lɛ́ɛ kpó ná jɛ azɔ̌ yětɔn jí, ɖo Goxɔ ɔ́ mɛ. Nú mɛ ɖé ɖó xwe kanɖé wǒ (50) ɖo yě mɛ ɔ́, mɛ ɔ́ ná yí gbɔjɛ́, bó sɔ́ ná nɔ́ wa azɔ̌ ɔ́ ɖě ǎ. É ná nɔ́ gɔ́ alɔ nú nɔví tɔn lɛ́ɛ ɖo Goxɔ ɔ́ mɛ, bó ná nɔ́ kpé nukún dó nǔ e è sɔ́ ɖ'ayǐ nú yě lɛ́ɛ wú. Lo ɔ́, azɔ̌ sɔ́ ná nɔ́ jɛ yě jí ɖě ǎ. Lě e a nǎ nɔ́ bló gbɔn nú Levíi ví lɛ́ɛ ɖo azɔ̌ yětɔn sín alixo ɔ́ nɛ́.” Mawu Mavɔmavɔ ɖɔ xó nú Mɔyízi ɖo gbětótló Sinayíi tɔn mɛ. Izlayɛ́li ví lɛ́ɛ gosín Ejípu ɔ́ xwe e bɔ dó xwe énɛ́ ɔ́ wú ɔ́ sín sun nukɔn tɔn ɔ́ mɛ wɛ é ɖɔ xó n'i; é ɖɔ n'i ɖɔ: “Izlayɛ́li ví lɛ́ɛ ní nɔ ɖu Dǐndínwáyixwe ɔ́ ɖo hwenu e un ɖó dó é. Mi ná nɔ́ ɖu xwe ɔ́ ɖo hwenu e un ɖó dó é. Hwe ɔ́ nu wɛ nyí sun élɔ́ sín azǎn wǒ-ɛnɛgɔ́ ɔ́ gbe gbadanu. Mi ná xwedó sɛ́n e ɖɔ xó dó xwé ɔ́ wú é kpódó tito e ɖɔ xó dó xwe ɔ́ wú é kpó lɛ́ɛ, bó dó ɖu.” Mɔyízi ɖɔ xó énɛ́ ɔ́ nú Izlayɛ́li ví lɛ́ɛ. Énɛ́ ɔ́, yě ɖu Dǐndínwáyixwe ɔ́ ɖo sun nukɔn tɔn ɔ́ sín azǎn wǒ-ɛnɛgɔ́ ɔ́ gbe gbadanu, ɖo gbětótló Sinayíi tɔn mɛ. Lě e Mawu Mavɔmavɔ ɖɔ gbɔn nú Mɔyízi ɔ́ bǐ wɛ yě xwedó bó dó ɖu xwe ɔ́. Mɛ ɖé lɛ́ɛ ká tíin bó sixú ɖu xwe ɔ́ gbe énɛ́ ɔ́ gbe ǎ, ɖó yě ɖ'alɔ cyɔ wú, bó dó hɛn yěɖée blí. Mɛ énɛ́ lɛ́ɛ yi mɔ Mɔyízi kpó Aalɔ́ɔn kpó, bó ɖɔ nú Mɔyízi ɖɔ: “Mǐ hɛn mǐɖée blí, ɖó mǐ ɖó alɔ cyɔ wú; étɛ́wú è ka dó sɛ́n nú mǐdɛɛ lɛ́ɛ ɖɔ mǐ kún ná hɛn nǔníná wá nú Mawu Mavɔmavɔ Izlayɛ́li ví ɖě lɛ́ɛ ɖɔhun, ɖo azǎn e Mawu Mavɔmavɔ ɖó ɔ́ gbe ó?” Mɔyízi ka ɖɔ nú yě ɖɔ: “Mi nɔ te nú má se nǔ e Mawu Mavɔmavɔ ná ɖɔ dó xó mitɔn wú é.” Bɔ Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Nú mɛ ɖé ɖo mi mɛ égbé, abǐ jijimɛ mitɔn e ná wá lɛ́ɛ ɖě mɛ, bó nyí mɛ blíblí ɖó é ɖó alɔ cyɔ wú wútu, abǐ é yi to mɛ aga ɔ́, é sixú wá ɖu Dǐndínwáyixwe ɔ́ dó kpa susu nú nyɛ Mawu Mavɔmavɔ. Amɔ̌, sun wegɔ́ ɔ́ sín azǎn wǒ-ɛnɛgɔ́ ɔ́ gbe gbadanu wɛ é ná ɖu. Wɔ̌xúxú e mɛ è ma dó tɔ́n ǎ é kpódó amavívɛ́ kpó wɛ é ná dó ɖu. É ná ɖu nǔɖé kpo bɔ ayǐ ná hɔ́n dó ǎ; é ká ná gba xú ɖěbǔ ǎ. Yě ná xwedó lě e nyɛ Mawu Mavɔmavɔ ɖɔ gbɔn lɛ́ɛ bǐ, bó dó ɖu. Nú mɛ ɔ́ má nyí mɛ blíblí ǎ, bó má ká yi tomɛ ǎ, bó gbɛ́ Dǐndínwáyixwe ɔ́ ɖu ɔ́, è ɖǒ ná ɖe mɛ énɛ́ ɔ́ sín togun ɔ́ mɛ, ɖó é ná nǔníná nyɛ Mawu Mavɔmavɔ dó hwe tɔn nu ǎ. Mɛ énɛ́ ɔ́ sín hwɛgban ná nɔ kɔ n'i. Nú tomɛyitɔ́ ɖé ɖo mi gɔ́n, bó jló ná ɖu Dǐndínwáyixwe ɔ́ xá mi ɔ́, é ɖó ná bló lě e nyɛ Mawu Mavɔmavɔ ɖɔ gbɔn ɔ́, bó ná xwedó lě e é ɖe gbɔn ɖo sɛ́n ɔ́ mɛ ɔ́ dó ɖu. Lě e mi Izlayɛ́li ví lɛ́ɛ ɖu gbɔn ɔ́ wɛ tomɛyitɔ́ lɛ́ɛ ná ɖu gbɔn.” Gbe e gbe Mɔyízi kɛ́ Goxɔ ɔ́, akpɔ́kpɔ́ cyɔ́n ɛ bǐ. Goxɔ ɔ́ mɛ wɛ akɔjijɛgbá ɔ́ ɖe. Akpɔ́kpɔ́ ɔ́ cí myɔ ɖɔhun ɖo Goxɔ ɔ́ jí sín gbadanu káká bɔ ayǐ hɔ́n. Bɛ́ sín gbe énɛ́ gbe ɔ́, akpɔ́kpɔ́ ɔ́ nɔ́ ɖo Goxɔ ɔ́ jí; akpɔ́kpɔ́ nɔ́ cyɔ́n Goxɔ ɔ́, bɔ é jɛ gbadanu ɔ́, é nɔ́ cí myɔ ɖɔhun. Nú akpɔ́kpɔ́ ɔ́ sí te sín Goxɔ ɔ́ jí hweɖěbǔnu ɔ́, Izlayɛ́li ví lɛ́ɛ nɔ́ jɛ ali. Yě ɖo yiyi wɛ bónú akpɔ́kpɔ́ ɔ́ lɛ́ nɔ te ɖo fí ɖé ɔ́, yě nɔ́ ɖó gɔnu ɖó fí ɔ́. Mawu Mavɔmavɔ wɛ nɔ́ ɖe gbe bɔ Izlayɛ́li ví lɛ́ɛ nɔ́ jɛ ali; é wɛ nɔ́ lɛ́ ɖe gbe bɔ yě nɔ́ ɖó gɔnu ɖó fí e yě jɛ ɔ́. Nú akpɔ́kpɔ́ ɔ́ kpo ɖo Goxɔ ɔ́ jí jɛ́n wɛ ɔ́, yě nɔ́ sɛ tɛn ǎ. Nú akpɔ́kpɔ́ ɔ́ nɔ Goxɔ ɔ́ jí nú hwenu gěgé ɔ́, Izlayɛ́li ví lɛ́ɛ nɔ́ se tónú nú Mawu Mavɔmavɔ bó nɔ́ sɛ tɛn ǎ. É ná bó lɛ́ nɔ nú hwenu kpɛɖé ɔ́, Izlayɛ́li ví lɛ́ɛ nɔ́ se tónú nú Mawu Mavɔmavɔ bó nɔ́ sɛ tɛn ǎ; Mawu Mavɔmavɔ wɛ nɔ́ ɖe gbe nú yě cóbɔ yě nɔ́ jɛ ali. Hwe ɖé lɛ́ɛ nu ɔ́, akpɔ́kpɔ́ ɔ́ nɔ́ nɔ te ɖo fí ɖokpó sín gbadanu káká bɔ ayǐ nɔ́ hɔ́n, abǐ nú kéze ɖokpó zǎn ɖokpó. Nú é sí te hweɖěbǔnu ɔ́, Izlayɛ́li ví lɛ́ɛ nɔ́ jɛ ali. Amɔ̌, nú akpɔ́kpɔ́ ɔ́ nɔ Goxɔ ɔ́ jí nú azǎn we, abǐ nú sun ɖokpó, abǐ nú xwe ɖokpó ɔ́, Izlayɛ́li ví lɛ́ɛ nɔ́ cí fínɛ́; yě nɔ́ jɛ ali ǎ. Nú akpɔ́kpɔ́ ɔ́ wá sí te ɔ́, yě nɔ́ jɛ ali. Mawu Mavɔmavɔ wɛ nɔ́ ɖe gbe bɔ yě nɔ́ nɔ te; é wɛ nɔ́ lɛ́ ɖe gbe bɔ yě nɔ́ jɛ ali; yě nɔ́ se tónú nú Mawu Mavɔmavɔ lě e Mawu Mavɔmavɔ ɖɔ nú Mɔyízi gbɔn é. Mawu Mavɔmavɔ ɖɔ nú Mɔyízi ɖɔ: “Hwi ɖésú ní zé kpatágan dó tun kpɛn we. È nǎ nɔ́ kwín dó ylɔ́ togun ɔ́ kplé, abǐ è nǎ nɔ́ kwín bɔ akɔta tɛnmɛ tɛnmɛ lɛ́ɛ ná nɔ jɛ ali. Nú è kwín kpɛn we lɛ́ɛ ɔ́, agun ɔ́ bǐ ná kplé ɖo gɔ̌n towe ɖo Goxɔ ɔ́ sín nukɔn. Nú kpɛn ɔ́ ɖokpó wɛ è kwín ɔ́, gǎn lɛ́ɛ kpó Izlayɛ́li ví lɛ́ɛ sín hɛ̌nnugán lɛ́ɛ kpó kɛ́ɖɛ́ wɛ ná nɔ́ kplé ɖo gɔ̌n towe. Nú è kwín kpɛn ɔ́ kpódó awǒbóbó kpó ɔ́, mɛ e ɖó gɔnu ɖó zǎnzǎnhwe jí lɛ́ɛ ná nɔ́ jɛ ali. Nú è kwín kpɛn ɔ́ kpódó awǒbóbó kpó azɔn wegɔ́ ɔ́, mɛ e ɖó gɔnu ɖó afɔligbé lɛ́ɛ ná nɔ́ jɛ ali. È nǎ nɔ́ kwín kpɛn ɔ́ kpódó awǒbóbó kpó, bɔ yě ná nɔ́ jɛ ali. Mi ná nɔ́ lɛ́ kwín kpɛn ɔ́ dó ylɔ́ Izlayɛ́li ví lɛ́ɛ kplé; mi ka ná kwín kpódó awǒbóbó kpó ǎ. “Aalɔ́ɔn sín vǐ súnnu lɛ́ɛ kpódó vɔ̌sánú-xwlémawutɔ́ lɛ́ɛ kpó kɛ́ɖɛ́ wɛ ná nɔ́ kwín kpɛn lɛ́ɛ. Sɛ́n énɛ́ ɔ́, sɛ́n ɖé wɛ é nyí, bó ná nɔ ayǐ káká sɔ́yi, nú mi kpódó kúnkan mitɔn lɛ́ɛ kpó. “Hwenu e kɛntɔ́ wá tɔ́n ahwan mi ɖo to mitɔn mɛ, bɔ mi xwe ahwan fun xá yě gbé ɔ́, mi ná nɔ́ kwín kpɛn lɛ́ɛ kpódó awǒbóbó kpó; énɛ́ ɔ́, nyɛ Mawu Mavɔmavɔ, Mawu mitɔn ná flín mi, bó ná hwlɛ́n mi ɖo kɛntɔ́ sí. Đo awǎjijɛ sín azǎn mitɔn lɛ́ɛ gbe ɔ́, ɖo xwezán mitɔn lɛ́ɛ gbe ɔ́, ɖo sunwájǐxwe mitɔn lɛ́ɛ hwenu ɔ́, mi ná nɔ́ ɖo vɔ̌ e è nɔ dó zo ɔ́ sá wɛ, bó ná nɔ́ ɖo kɔnɖókpɔ́ vɔ́ sá wɛ, bó ná nɔ́ kwín kpɛn lɛ́ɛ. Énɛ́ ɔ́, un ná nɔ́ flín mi. Mawu Mavɔmavɔ, Mawu mitɔn wɛ un nyí.” Izlayɛ́li ví lɛ́ɛ gosín Ejípu ɔ́, é bló xwe we. Sun wegɔ́ ɔ́ e ɖo xwe énɛ́ ɔ́ mɛ ɔ́ sín azǎn kogɔ́ ɔ́ gbe ɔ́, akpɔ́kpɔ́ ɔ́ sí te ɖo Goxɔ ɔ́ jí, bɔ Izlayɛ́li ví lɛ́ɛ gosín gbětótló Sinayíi tɔn mɛ. Akpɔ́kpɔ́ ɔ́ yi nɔ te ɖo gbětótló Paláni tɔn mɛ. Azɔn nukɔn tɔn ɔ́ nɛ́ Izlayɛ́li ví lɛ́ɛ jɛ ali lě e Mawu Mavɔmavɔ ɖɔ gbɔn nú yě gbɔn Mɔyízi jí ɔ́ nɛ́. Ahwangɔnu Judáa tɔn ɔ́ zé ahwansyá tɔn bó jɛ ali jɛ nukɔn. Naxicɔ́ni, Aminadabu sín vǐ súnnu ɔ́ wɛ nɔ ahwangɔnu ɔ́ nu. Nɛtanɛli, Suwáa ví súnnu ɔ́ wɛ nɔ akɔta Isakáa tɔn sín ahwangɔnu ɔ́ nu. Eliavu, Helɔ́ni sín vǐ súnnu ɔ́ wɛ nɔ akɔta Zabulɔ́ɔn tɔn sín ahwangɔnu ɔ́ nu. Levíi ví lɛ́ɛ tún Goxɔ ɔ́, bɔ Gɛɛcɔ́ni kpódó Mɛlali kpó sín kúnkan lɛ́ɛ ɖíɖá, bó jɛ ali. Ahwangɔnu Hwlibɛ́ni tɔn ɔ́ zé ahwansyá tɔn bó jɛ gǔdo yětɔn. Elisúu, Cedewúu sín vǐ súnnu ɔ́ wɛ nɔ ahwangɔnu ɔ́ nu. Celumiyɛ́li, Sulicadáyi sín vǐ súnnu ɔ́ nɔ akɔta Sinmɛnyɔ́ɔ tɔn sín ahwangɔnu ɔ́ nu. Eliyasáfu, Dewúɛli sín vǐ súnnu ɔ́ nɔ akɔta Gadi tɔn sín ahwangɔnu ɔ́ nu. Levíi ví e jɔ ɖo Kexáti kún mɛ lɛ́ɛ bɛ́ nǔ mímɛ́ bǐ lɛ́ɛ, bó jɛ ali ɖidó bɔdó yě wú. Levíi ví ɖě lɛ́ɛ ɖó ná kó kɛ́ Goxɔ ɔ́ ɖ'ayǐ, cóbɔ yě ná wá. Ahwangɔnu Eflayímu tɔn ɔ́ zé ahwansyá tɔn bó jɛ ali. Elicama, Amumihudi sín vǐ súnnu ɔ́ wɛ nɔ ahwangɔnu ɔ́ nu. Gamɛliyɛ́li, Pedasúu sín vǐ súnnu ɔ́ nɔ akɔta Manasée tɔn sín ahwangɔnu ɔ́ nu. Avidáni, Gideóni sín vǐ súnnu ɔ́ nɔ akɔta Bɛnjamɛ́ɛ tɔn sín ahwangɔnu ɔ́ nu. Ahwangɔnu Dan tɔn ɔ́ zé ahwansyá tɔn bó jɛ ali. Ahwangɔnu Dan tɔn ɔ́ wɛ ɖo ahwangɔnu ɖě lɛ́ɛ bǐ gúdo. Axiezɛ́ɛ, Amumicadayi sín vǐ súnnu ɔ́ wɛ nɔ ahwangɔnu ɔ́ nu. Pagiyɛ́li, Ɔkláni sín vǐ súnnu ɔ́ nɔ akɔta Acɛ́ɛ tɔn sín ahwangɔnu ɔ́ nu. Axila, Eyináni sín vǐ súnnu ɔ́ nɔ akɔta Nɛfutali tɔn sín ahwangɔnu ɔ́ nu. Lě e ahwangɔnu Izlayɛ́li ví lɛ́ɛ tɔn to yěɖée gbɔn bó jɛ ali ɔ́ nɛ́. Mɔyízi ɖɔ xó nú Hobabu; Hobabu ɔ́, Hlewuyɛ́li e nyí Madiáani ví, bó nyí Mɔyízi sín asi tɔ́ ɔ́ sín vǐ wɛ; é ɖɔ n'i ɖɔ: “Mǐ xwe to e Mawu Mavɔmavɔ ɖɔ émí ná ná mǐ ɔ́ mɛ; wǎ xwedó mǐ hɛn yi; mǐ ná wa ɖagbe nú we, ɖó Mawu Mavɔmavɔ dó akpá nú mǐ Izlayɛ́li ví lɛ́ɛ ɖɔ émí ná wa ɖagbe nú mǐ.” Hobabu yí gbe n'i ɖɔ: “Un ná yi ǎ, lo ɔ́, un ná yi to ce mɛ fí e un jɔ ɖe é.” Mɔyízi ɖɔ n'i ɖɔ: “Kɛnklɛ́n, ma jó mǐ dó ó. A tunwun fí e mǐ nɔ́ ɖó gɔnu ɖó ɖo gbětótló mɛ lɛ́ɛ; a nǎ xlɛ́ ali mǐ. Nú a xwedó mǐ ɔ́, ɖagbe e Mawu Mavɔmavɔ ná wa nú mǐ ɔ́, a nǎ ɖu le tɔn.” Izlayɛ́li ví lɛ́ɛ gosín Mawu Mavɔmavɔ sín só ɔ́ kɔn ɖidó, bó ɖi zɔnlin xɔ azǎn atɔn; akɔjijɛgbá Mawu Mavɔmavɔ tɔn ɔ́ jɛ nukɔn nú yě. Mɛ e hɛn akɔjijɛgbá ɔ́ lɛ́ɛ ɖi zɔnlin xɔ azǎn atɔn, bó ba fí e yě ná gbɔjɛ́ ɖe ɔ́ ɖ'ayǐ. Yě jɛ ali kéze ɔ́, akpɔ́kpɔ́ Mawu Mavɔmavɔ tɔn nɔ́ ɖo ta yětɔn nu. Akɔjijɛgbá ɔ́ ɖidó ɔ́, Mɔyízi nɔ sú xó ɖɔ: “Mawu Mavɔmavɔ, sí te! Sí te, bónú kɛntɔ́ towe lɛ́ɛ ná gbadó. Sí te, bónú mɛ e gbɛ́ wǎn nú we lɛ́ɛ ná hɔn ɖo nukɔn towe!” È ka zé akɔjijɛgbá ɔ́ ɖ'ayǐ ɔ́, Mɔyízi nɔ sú xó ɖɔ: “Mawu Mavɔmavɔ, lɛ̌ kɔ wá nɔ hɛ̌nnu maxamaxa Izlayɛ́li ví lɛ́ɛ tɔn lɛ́ɛ tɛ́ntin.” É wá su gbe ɖokpó, bɔ Izlayɛ́li ví lɛ́ɛ jɛ gbɛvíhan dó sɛ́ dó Mawu Mavɔmavɔ jí, bɔ é nyɔ́ nukún tɔn mɛ ǎ. Ée Mawu Mavɔmavɔ se gbɛvíhan e dó wɛ yě ɖe ɔ́, xomɛ sin i, bɔ é sɛ́ myɔ dó yě, bɔ sin ɖa nǔ ɖo fí e yě ɖǒ gɔnu ɖó ɔ́ ɖo akpá ɖokpó. Bɔ togun ɔ́ sú xó ylɔ́ Mɔyízi, bɔ Mɔyízi sa vo nú Mawu Mavɔmavɔ, bɔ myɔ ɔ́ cí. È sun nyǐ tɛn énɛ́ ɔ́ mɛ ɖɔ Taveéla, tínmɛ tɔn wɛ nyí “zo ji nǔ”, ɖó myɔ Mawu Mavɔmavɔ tɔn fyɔ́ nǔ ɖo tɛ́ntin yětɔn. É su gbe ɖěvo gbe bɔ lan ɖuɖu jɛ nǔvɔ́nɔ e ɖo Izlayɛ́li ví lɛ́ɛ tɛ́ntin lɛ́ɛ jló jí. Izlayɛ́li ví lɛ́ɛ ɖésú lɛ́ jɛ nǔ hlún ɖɔ jí ɖɔ: “Mɛ̌ wɛ ná ná lan mǐ bɔ mǐ ná ɖu? Mǐ ɖo nǔ e mǐ nɔ́ ɖu vɔ̌nu ɖ'ayǐ ɖo Ejípu lɛ́ɛ flín wɛ: hweví, kɔnkɔ́nbu, ayǐkpɛn, mǎ, ayomása, áyo. Nǔ énɛ́ lɛ́ɛ ɖě ɖo fí ǎ; din ɔ́, lan ɖo mǐ jló wɛ, mǐ ká sɔ́ nɔ mɔ nǔɖé ɖu zɛ mǎna wú ǎ.” Mǎna ɔ́ cí kolyandli sín kwín ɖɔhun, bó wé budeliyɔ́mu sín hǐnhɔ́n ɖɔhun. Togun ɔ́ nɔ́ gbadó, bó nɔ́ yi bɛ́ mǎna zǎnzǎn. Yě nɔ́ li ɖo sé jí, abǐ yě nɔ́ só ɖo tomɛ; yě nɔ́ ɖa ɖo zɛ̌n mɛ, bó nɔ́ dó bló atá ná. Atá e è sɔ ɖo ami mɛ ɔ́ ɖɔhun wɛ mǎna ɔ́ nɔ́ cí ɖo nu mɛ. Hwenu e ahǔn nɔ́ ɖo jija wɛ zǎn mɛ kɔn nyi fí e yě ɖó gɔnu ɖó ɔ́, mǎna ɔ́ lɔ nɔ kɔn nyi ayǐ. Mɛ ɖokpó ɖokpó ɖo hɛ̌nnu tɔn mɛ, ɖo Goxɔ tɔn lihɛ́nnu, bó ɖo nǔ hlún ɖɔ wɛ, bɔ Mɔyízi se. Énɛ́ ɔ́, xomɛ sin Mawu Mavɔmavɔ ɖésú. Wǔ kú Mɔyízi, bɔ é ɖɔ nú Mawu Mavɔmavɔ ɖɔ: “Nɛ̌ wɛ ká gbɔn bɔ a ɖo ya dó nú nyɛ mɛsɛntɔ́ towe wɛ gbɔn lě? Aniwú wɛ a ma nyɔ́ xomɛ dó wǔ ce ǎ? Aniwú wɛ a jǒ togun élɔ́ bǐ sín agban nyi kɔ jí nú mì? Nyɛ wɛ hɛn togun élɔ́ sín adɔgo a? Nyɛ wɛ ji i, bɔ a nɔ ɖɔ nú mì ɖɔ nyɛ ní hɛn ɛ akɔ́nnu vǐnɔ ɖɔhun káká yi to e sín akpá a dǒ nú togun élɔ́ ɔ́ mɛ a? Fítɛ́ un ka ná ba lan sín nú mɛ tobutóbú élɔ́ lɛ́ɛ e ɖo lan ví ya dó kɔ nú mì wɛ é? Nyɛ ɖokpónɔ sixú hɛn togun élɔ́ sín agban ǎ, ɖó é ɖo kpinkpɛn mì wɛ dín. Nú mɔ̌ jɛ́n a nǎ wa nǔ ce gbɔn hǔn, gbɔ bo hu mì; énɛ́ ɔ́, un ná mɔ ɖɔ a nyɔ̌ xomɛ dó wǔ ce, bɔ un sɔ́ ná ɖo gbɛ bo ná ɖo wǔvɛ́ élɔ́ mɔ wɛ ǎ.” Ée Mɔyízi ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Kplé tomɛxó Izlayɛ́li tɔn e a tunwun ɖɔ yě nyí tomɛxó, bó ɖó acɛ ɖo togun ɔ́ jí lɛ́ɛ kanɖé gban (70). A nǎ kplá yě wá Goxɔ ɔ́ kɔn, bɔ yě kpódó hwi kpó ná nɔ nukɔn ce fínɛ́. Un ná jɛ te, bó ná ɖɔ xó nú we ɖo fínɛ́; un ná yí yɛ e ɖo jǐ towe ɔ́ ɖě, bó ná sɔ́ ɖó yě jǐ, bónú yě ná hɛn togun ɔ́ sín agban xá we, bónú hwi ɖokpónɔ ní má hɛn ó. A nǎ ɖɔ nú togun ɔ́ ɖɔ: ‘Mi slá wǔ nú sɔ! Mi ná mɔ lan ɖu; Mawu Mavɔmavɔ se nǔ e hlún ɖɔ wɛ mi ɖe é, bó ɖɔ: mɛ̌ wɛ ná ná mǐ lan bɔ mǐ nǎ ɖu? Đó hwenu e mǐ ɖo Ejípu ɔ́, mǐ ɖo ganjí.’ Mawu Mavɔmavɔ ná ná lan mi bɔ mi ná ɖu. É ká nyí ɖɔ azǎn ɖokpó géé, abǐ we, abǐ atɔ́ɔ́n, abǐ wǒ, abǐ ko wɛ mi ná ɖu lan ɔ́ xɔ ǎ; lo ɔ́, mi ná ɖu xɔ sun ɖokpó kpíkpé; mi ná ɖu káká bɔ é ná kpé kɔ nú mi; mi ná ɖu káká bɔ é ná nɔ́ tɔ́n gbɔn awɔntín mɛ nú mi, ɖó mi gbɛ́ wǎn nú nyɛ Mawu Mavɔmavɔ e ɖo tɛ́ntin mitɔn ɔ́; mi hlún nǔ ɖɔ ɖo nukɔn ce, bó ɖɔ: ‘Aniwú wɛ mǐ ká tɔ́n sín Ejípu tawun?’ ” Mɔyízi ɖɔ: “Togun e tɛ́ntin un ɖe ɔ́ bló súnnu adɔ̌kpo gban (600.000), bɔ a ka ɖɔ émí ná ná yě lan bɔ yě ná ɖu xɔ sun ɖokpó kpíkpé a! Gbɔ̌ kpó nyibú kpó wɛ è nǎ hu nú yě, bɔ é ná kpé yě a, abǐ hweví e ɖo xu mɛ lɛ́ɛ bǐ wɛ è nǎ bɛ́ kplé nú yě bɔ é ná kpé yě a?” Mawu Mavɔmavɔ ka yí gbe nú Mɔyízi ɖɔ: “Nyɛ Mawu Mavɔmavɔ ɔ́, un hwe dó nǔ wú wɛ a? Nú nǔ e un ɖɔ nú we ɔ́ ná jɛ kpódó é má ná jɛ kpó ɔ́, a nǎ mɔ din.” Mɔyízi gosín Mawu Mavɔmavɔ nukɔn, bó yi ɖɔ xó e Mawu Mavɔmavɔ ɖɔ ɔ́ nú togun ɔ́. É kplé tomɛxó togun ɔ́ tɔn lɛ́ɛ kanɖé gban (70), bo to yě lɛ́ lɛ̌ dó Goxɔ ɔ́. Mawu Mavɔmavɔ jɛ te ɖo akpɔ́kpɔ́ mɛ, bó ɖɔ xó nú Mɔyízi. É yí Yɛ e ɖo Mɔyízi jí ɔ́ ɖě, bó sɔ́ ɖó tomɛxó kanɖé gban (70) lɛ́ɛ jí, bɔ ée Yɛ ɔ́ jɛ yě jí lě tlóló ɔ́, yě jɛ xó e Mawu sɔ́ dó nu nú yě ɔ́ ɖɔ jí; yě ká ɖɔ sɔ́ yi nukɔn ǎ. Mɛ we ɖo tomɛxó kanɖé gban (70) lɛ́ɛ mɛ, Ɛlidádi kpó Mɛdadi kpó. Yědɛɛ lɛ́ɛ yi Goxɔ Mawu tɔn ɔ́ kɔn ɖě ǎ, yě cí fí e Izlayɛ́li ví lɛ́ɛ ɖó gɔnu ɖó é. Yɛ Mawu tɔn jɛ yě lɔ jí, bɔ yě jɛ xó e Mawu sɔ́ dó nu nú yě ɔ́ ɖɔ jí ɖo fí e yě ɖǒ gɔnu ɖó é. Nyaví dɔ̌nkpɛvú ɖokpó kán wezun yi ɖɔ nú Mɔyízi ɖɔ: “Ɛlidádi kpó Mɛdadi kpó ɖo Mawuxó ɖɔ wɛ ɖo fí e mǐ ɖó gɔnu ɖó ɔ́.” Jozuwée e nyí Nuni sín vǐ súnnu, bo nyí mɛsɛntɔ́ Mɔyízi tɔn sín dɔ̌nkpɛvú mɛ tɔn ɖokpóó ɔ́ yí xó, bó ɖɔ nú Mɔyízi ɖɔ: “Gǎn ce, yi gbɛ́ nú yě!” Mɔyízi ka yí gbe n'i ɖɔ: “Wǔ hwan dó ta ce mɛ wɛ a ɖe a? É jló mì ɖɔ Mawu Mavɔmavɔ ní gba Yɛ tɔn kɔn nyi togun tɔn bǐ jǐ, bɔ yě bǐ ná húzú gbeyíɖɔ tɔn.” Ée Mɔyízi ɖɔ mɔ̌ ɔ́, é kpó tomɛxó Izlayɛ́li tɔn kanɖé gban lɛ́ɛ kpó lɛ́ kɔ yi fí e yě ɖǒ gɔnu ɖó é. Mawu Mavɔmavɔ bló bɔ jɔhɔn ɖé jɛ nyinyi sín xu mɛ jí, bó dɔn káyi lɛ́ɛ wá kɔn nyi fí e Izlayɛ́li ví lɛ́ɛ ɖó gɔnu ɖó ɔ́. Yě lɛ́ lɛ̌ dó fí e yě ɖǒ gɔnu ɖó ɔ́ káká yi fó dó fí ɖé, bɔ è nǎ gosín fí e yě ɖǒ gɔnu ɖó ɔ́ yi fí ɔ́, è nǎ ɖi zɔnlin nú kéze ɖokpó. Jǐ yiyi yětɔn ná ɖó mɛ̌tlu ɖokpó mɔ̌. Gbe énɛ́ ɔ́ gbe bǐ kpó zǎn tɔn mɛ bǐ kpó, kpódó ayǐhɔ́ngbe tɔn bǐ kpó ɔ́, káyi cyán wɛ jɛ́n togun ɔ́ nɔ́ ɖe. Mɛ e bɛ́ kpɛɖé ɖo yě mɛ ɔ́ tɔn hú kilóo afɔwó-afatɔ́n (3.000). È xyá yě lɛ́ lɛ̌ dó fí e yě ɖǒ gɔnu ɖó ɔ́, bónú yě ná xú. Izlayɛ́li ví lɛ́ɛ sɔ́ xɛ nɛ́ lɛ́ɛ sín lan dó nu mɛ ɔ́, yě kó tɛ aɖǔ jí cóbónú Mawu Mavɔmavɔ sin xomɛ ɖaxó ɖé dó yě, bó dɔn jɛmɛjí baɖabaɖa ɖé dó yě jǐ ǎ. È sun nyǐ tɛn énɛ́ ɔ́ mɛ ɖɔ Kivlɔti-Taawa, tínmɛ tɔn wɛ nyí “Yɔdo nǔ jló mɛ díngan tɔn”, ɖó fínɛ́ wɛ è ɖi mɛ e ɖó lan ɖuɖu sín jlǒ díngan lɛ́ɛ ɖó. Togun ɔ́ gosín Kivlɔti-Taawa, bo yi Haselɔ́ti, bó ɖó gɔnu ɖó fínɛ́. Mɔyízi ɔ́, Etiopíinu wɛ é da bɔ Miliamu kpó Aalɔ́ɔn kpó jɛ xó ɖɔ dó Mɔyízi wú jí, ɖó Etiopíinu e é da ɔ́ wútu. Yě ɖɔ: “Mɔyízi kɛ́ɖɛ́ jí jɛ́n Mawu Mavɔmavɔ nɔ ɖɔ xó gbɔn a? Mawu Mavɔmavɔ ɖɔ xó gbɔn mǐ lɔmɔ̌ jí ɖě ǎ cé?” Mawu Mavɔmavɔ se xó e yě ɖɔ ɔ́. Mɔyízi ka nyí mɛɖé, bó nɔ́ sɔ́ éɖée hwe ɖésú; é nɔ́ sɔ́ éɖée hwe hú gbɛtɔ́ e ɖo ayǐkúngban jí lɛ́ɛ bǐ. Tlóló kpowun ɔ́, Mawu Mavɔmavɔ ɖɔ nú Mɔyízi kpó Aalɔ́ɔn kpó, kpódó Miliamu kpó ɖɔ: “Mi mɛ atɔn lɛ́ɛ ní yi Goxɔ ɔ́ kɔn.” Bɔ yě mɛ atɔn lɛ́ɛ bǐ ɖidó. Mawu Mavɔmavɔ jɛ te ɖo akpɔ́kpɔ́ mɛ, bó cí Goxɔ ɔ́ sín alihɛ́nnu, bó ylɔ́ Aalɔ́ɔn kpó Miliamu kpó, bɔ yě mɛ we lɛ́ɛ sɛkpɔ́ ɛ, bɔ é ɖɔ nú yě ɖɔ: “Mi ɖótó xó e ná ɖɔ nú mi wɛ un ɖe ɔ́ ganjí. Ényí gbeyíɖɔ ɖé ɖo mi mɛ ɔ́, nyɛ Mawu Mavɔmavɔ wɛ nɔ ɖe nyɛɖée xlɛ́ ɛ, bó nɔ́ ɖɔ xó n'i gbɔn nǔmimɔ kpódó dlɔ̌ kpó mɛ. Mɔ̌ wɛ é ká nyí gbɔn nú mɛsɛntɔ́ ce Mɔyízi ǎ. Éyɛ́ ɖo gbejí ɖo xwédo ce bǐ mɛ. Un nɔ ɖɔ xó n'i tlɔlɔ, bɔ é nɔ́ se gbe ce céɖécéɖé. Un nɔ zé nyɛɖée xlɛ́ ɛ; un nɔ tɔ́n ɖo nukɔn tɔn, bɔ é nɔ́ mɔ mì. Aniwú wɛ xó ɖɔ dó mɛsɛntɔ́ ce Mɔyízi wú má dó xɛsi nú mi ǎ?” Xomɛ yětɔn sin Mawu Mavɔmavɔ, bɔ é ɖidó. Akpɔ́kpɔ́ ɔ́ hɔ́n sín Goxɔ ɔ́ ta nu, bɔ è nǎ mɔ nǔɖé kpowun ɔ́, wǔtuzɔn baɖabaɖa ɖé jɛ́n kɔn nyi Miliamu wú, bó wé kɛ́njí ɖɔhun. Aalɔ́ɔn lílɛ́, bó kpɔ́n Miliamu, bó mɔ ɖɔ wǔtuzɔn baɖabaɖa ɖé ko kɔn nyi wǔ tɔn. Ée Aalɔ́ɔn mɔ mɔ̌ ɔ́, é ɖɔ nú Mɔyízi ɖɔ: “Mǐ wa nǔ nyi do, kɛnklɛ́n, ma zé nǔ e mǐ wa taɖunɔ ɖɔhun ɔ́ sín bǎ dó xo mǐ ó. Yéége! Ma lɔn bónú Miliamu ní cí vǐ kúkú e vlɔ̌ɖówe ko gblé cóbɔ è ji i ɔ́ ɖɔhun ó.” Ée Mɔyízi se mɔ̌ ɔ́, é sú xó sɛ́ dó Mawu Mavɔmavɔ bo ɖɔ: “Mawu ce, kɛnklɛ́n gbɔ azɔn n'i!” Mawu Mavɔmavɔ ka ɖɔ nú Mɔyízi ɖɔ: “Nú atán wɛ tɔ́ tɔn kó tún dó nukún mɛ n'i ɔ́, é má ná nɔ winnyá mɛ xɔ azǎn tɛ́nwe ǎ cé? Mi bo ɖe e tɔ́n sín fí e mi ɖó gɔnu ɖó ɔ́ nú azǎn tɛ́nwe. Énɛ́ ɔ́ gúdo ɔ́, è nǎ lɛ́ yí i dó fí e mi ɖó gɔnu ɖó ɔ́.” Énɛ́ ɔ́, è ɖe Miliamu tɔ́n sín fí e Izlayɛ́li ví lɛ́ɛ ɖó gɔnu ɖó ɔ́ xɔ azǎn tɛ́nwe. Ée è ɖe tɔ́n mɔ̌ ɔ́, togun ɔ́ sɛ tɛn cóbónú Miliamu lɛ́ kɔ wá fí e yě ɖó gɔnu ɖó ɔ́ ǎ. Ée Miliamu lɛ́ kɔ wá ɔ́, togun ɔ́ gosín Haselɔ́ti ɖidó, bó yi ɖó gɔnu ɖó gbětótló Paláni tɔn mɛ. Mawu Mavɔmavɔ ɖɔ nú Mɔyízi ɖɔ: “Sɛ́ mɛ dó nú yě ní yi ba do nú Kanáa, to e ná ná Izlayɛ́li ví lɛ́ɛ wɛ un ɖe ɔ́. A nǎ ɖe mɛ ɖokpó ɖokpó ɖo gǎn lɛ́ɛ mɛ, ɖo akɔta ɖokpó ɖokpó mɛ.” Mɔyízi xwedó nǔ e Mawu Mavɔmavɔ ɖɔ ɔ́, bó sɛ́ mɛ dó sín gbětótló Paláni tɔn mɛ. Mɛ e Mɔyízi sɛ́ dó lɛ́ɛ bǐ wɛ nyí Izlayɛ́li ví lɛ́ɛ sín gǎn. Nyǐkɔ yětɔn lɛ́ɛ ɖíe: Camumúa, Zakúu ví súnnu ɔ́; akɔta Hwlibɛ́ni tɔn mɛ wɛ é ɖe. Cafáti, Holi ví súnnu ɔ́; akɔta Sinmɛnyɔ́ɔ tɔn mɛ wɛ é ɖe; Kalɛ́bu, Yefunnɛ́ɛ ví súnnu ɔ́; akɔta Judáa tɔn mɛ wɛ é ɖe; Yigealu, Jozɛ́fu ví súnnu ɔ́, ɖo akɔta Isakáa tɔn mɛ; Hocea, Nuni ví súnnu ɔ́, ɖo akɔta Eflayímu tɔn mɛ, Paluti, Hlafu ví súnnu ɔ́, ɖo akɔta Bɛnjamɛ́ɛ tɔn mɛ, Gadiyɛ́li, Sodi ví súnnu ɔ́, ɖo akɔta Zabulɔ́ɔn tɔn mɛ, Gaadu, Súsi ví súnnu ɔ́, ɖo Manasée Jozɛ́fu ví súnnu ɔ́ sín akɔta mɛ, Amumiyɛli, Gemali ví súnnu ɔ́, ɖo akɔta Dan tɔn mɛ, Setúu, Mikaɛli ví súnnu ɔ́, ɖo akɔta Acɛ́ɛ tɔn mɛ, Naxibi, Wɔfúsi ví súnnu ɔ́, ɖo akɔta Nɛfutali tɔn mɛ, Gewuyɛ́li, Maki ví súnnu ɔ́, ɖo akɔta Gadi tɔn mɛ. Mɛ e Mɔyízi sɛ́ dó bɔ yě yi ba do nú to ɔ́ lɛ́ɛ sín nyǐkɔ lɛ́ɛ nɛ́. Mɔyízi sun nyǐ Hocea, Nuni ví súnnu ɔ́ ɖɔ Jozuwée. Mɔyízi sɛ́ yě dó, bónú yě ná yi ba do nú Kanáa to ɔ́. É ɖɔ nú yě ɖɔ: “Mi gbɔn afɔligbé fí, bó tɔ́n jɛ sókan mɛ byɔ́ Kanáa to ɔ́ mɛ. Mi ná kpɔ́n lě e to ɔ́ ɖe gbɔn ɔ́; mi ná kpɔ́n mɛ e ɖo to ɔ́ mɛ lɛ́ɛ ɖɔ yě dó hlɔ̌nhlɔ́n, abǐ yě vɔ́ wɛ a jí; mi ná kpɔ́n ɖɔ yě sukpɔ́ abǐ yě hwe wɛ a jí. Mi ná kpɔ́n ɖɔ to ɖagbe wɛ nyí to ɔ́, abǐ to nyanya wɛ a jí; mi ná kpɔ́n ɖɔ è mɛ ahohó lɛ́ lɛ̌ dó toxo lɛ́ɛ, abǐ nuvo wɛ yě ɖe a jí. Mi ná kpɔ́n ɖɔ ayǐkúngban ɔ́ ná nyɔ́ jinukún, abǐ é má ná nyɔ́ jinukún a jí. Mi ná kpɔ́n ɖɔ atín wú ɖo to ɔ́ mɛ, abǐ atín má wú a jí. Mi kpan akɔ́n. Mi hɛn atínsínsɛ́n to ɔ́ mɛ tɔn ɖě wǎ.” Vǐwun nukɔntɔn lɛ́ɛ sín hwenu ka lɛ́ wɛ. Énɛ́ ɔ́, mɛ lɛ́ɛ yi bó ba do nú to ɔ́; yě bɛ́ sín gbětótló Síni tɔn mɛ, káká yi Hlexɔ́vu ɖo Lɛbo-Hamáti toxo ɔ́ nukɔn. Yě byɔ́ to ɔ́ mɛ gbɔn afɔligbé, bó yi káká Eblɔ́n, fí e Aximani kpó Cecáyi kpó, kpódó Talumayi kpó kó nɔ ɖ'ayǐ é; mɛ énɛ́ lɛ́ɛ ɔ́, Anáki ví wɛ yě nyǐ. È ɖǒ Eblɔ́n toxo ɔ́ ayǐ ɔ́, é kó ɖó xwe tɛ́nwe cóbɔ è wǎ ɖó Sowáan toxo ɔ́ ayǐ ɖo Ejípu. Yě wǎ káká tɔdo Ɛcikɔ́lu tɔn mɛ, bó sɛ́n vǐwunkan e nu vǐwun ɖé ɔ́ ɖokpó ɖo fínɛ́. Yě lɛ́ gbɛ glenádi kpó fígi kpó bó dó bǐ kpɔn, bɔ mɛ we hɛn. È sun nyǐ tɛn énɛ́ ɔ́ mɛ ɖɔ: “Tɔdo Ɛcikɔ́lu tɔn”, ɖó vǐwun sín kan e Izlayɛ́li ví lɛ́ɛ sɛ́n ɖo fínɛ́ ɔ́ wútu. Azǎn kanɖé wɛ Izlayɛ́li ví lɛ́ɛ ba do nú to ɔ́ xɔ, bó lɛ́ kɔ wá. Ée yě wá ɔ́, yě yi Mɔyízi kpó Aalɔ́ɔn kpó, kpódó togun Izlayɛ́li tɔn ɔ́ bǐ kpó gɔ́n, ɖo Kadɛ́ci, ɖo gbětótló Paláni tɔn mɛ. Yě ɖǒ nǔ e yě mɔ ɖo dɔ̌n ɔ́ sín gbe nú yě bǐ, bó xlɛ́ atínsínsɛ́n to ɔ́ mɛ tɔn yě. Yě ɖɔ nú Mɔyízi ɖɔ: “Mǐ yi to e mɛ a sɛ́ mǐ dó ɔ́ mɛ. Anɔ̌sin kpó wǐin kpó nɔ́ sa ɖo to ɔ́ mɛ nǔgbó. Atínsínsɛ́n to ɔ́ mɛ tɔn ɖě ɖíe. Amɔ̌, nǔ ɖokpó e ɖ'é mɛ ɔ́ wɛ nyí ɖɔ mɛ e ɖo to ɔ́ mɛ lɛ́ɛ ɖó hlɔ̌nhlɔ́n; toxo e ɖo to ɔ́ mɛ lɛ́ɛ d'agba ɖésú, bɔ è mɛ ahohó lɛ́ lɛ̌ dó yě ganjí. Mǐ tlɛ mɔ Anáki ví lɛ́ɛ ɖo dɔ̌n. Amalɛ́ki ví lɛ́ɛ ɖo to ɔ́ sín afɔligbé; Hitíti lɛ́ɛ, Jebuzinu lɛ́ɛ, kpódó Amɔliti ví lɛ́ɛ kpó ɖo sókan mɛ, bɔ Kanáanu lɛ́ɛ ɖo xu ɔ́ kpódó Judɛ́ɛn tɔ ɔ́ kpó kpá.” Ée yě ɖǒ gbe ɔ́ fó ɔ́, Kalɛ́bu ɖɔ nú mɛ lɛ́ɛ ɖo Mɔyízi nukún mɛ ɖɔ yě ní nɔ abwɛ̌. É ɖɔ nú yě ɖɔ: “Mi wá mǐ yi; mi wá mǐ yi yí to énɛ́; é sixú gló mǐ ǎ.” Lo ɔ́, mɛ e kpó Kalɛ́bu kpó yi to ɔ́ mɛ lɛ́ɛ ɖɔ: “Mǐ sixú yi tɔ́n ahwan mɛ énɛ́ lɛ́ɛ ǎ; yě hú gǎn mǐ dín.” Bɔ yě jɛ nǔ e to e yě yi ba do ná ɔ́ nyí ɔ́ xó ɖɔ jí, ɖo Izlayɛ́li ví lɛ́ɛ nukɔn; yě ɖɔ: “To e mɛ mǐ yi gbɔn, bó ba do ná ɔ́, to ɖé wɛ é nyí, bɔ mɛ ɖé nɔ́ yi mɛ bó nɔ́ gán ǎ; mɛ e mǐ mɔ ɖo to ɔ́ mɛ lɛ́ɛ bǐ wɛ jɔ asú. Mǐ mɔ Anáki ví lɛ́ɛ; gbɛtɔ́ jangan jangan wɛ yě nyǐ. Ayǐsínzɛn ɖɔhun wɛ mǐ cí ɖo akpá yětɔn; mɔ̌ jɛ́n yě lɔ ka ná kó mɔ mǐ ɖó ɖo akpá yětɔn.” Gbe énɛ́ gbe zǎn mɛ ɔ́, Izlayɛ́li ví lɛ́ɛ ɖo xó sú wɛ, bó ɖo avǐ ya wɛ. Yě bǐ ɖó gbe kpɔ́, bó jɛ nǔ hlún ɖɔ dó Mɔyízi kpó Aalɔ́ɔn kpó wú jí, bó nɔ́ ɖɔ nú yě ɖɔ: “Ényí mǐ kó kú ɖo Ejípu ɔ́, é nyɔ́ hú; abǐ ényí mǐ gbɔ bó kú ɖo gbětótló ɔ́ mɛ fí ɔ́, é nyɔ́ hú! Aniwú Mawu Mavɔmavɔ ka kplá mǐ xwe to énɛ́ ɔ́ mɛ, bɔ mǐ ná kú ɖo ahwangbénu, bɔ asi mǐtɔn lɛ́ɛ kpó vǐ mǐtɔn lɛ́ɛ kpó ná nyí mɛ e ɖu ɖo jǐ mǐtɔn lɛ́ɛ sín ahwankannumɔ? Mǐ lɛ́ kɔ yi Ejípu ɔ́, é nyɔ́ nú mǐ hú ǎ cé?” Énɛ́ ɔ́, yě jɛ ɖiɖɔ nú yěɖée jí ɖɔ: “Mǐ ní sɔ́ gǎn ɖokpó ɖó mǐ nu, bó lɛ́ kɔ yi Ejípu.” Ée Mɔyízi kpódó Aalɔ́ɔn kpó se mɔ̌ ɔ́, yě xwe agbɔ̌nnusú do ɖo Izlayɛ́li ví lɛ́ɛ bǐ nukɔn. Nya we ɖé lɛ́ɛ ká ɖo mɛ e yi ba do nú to ɔ́ lɛ́ɛ mɛ: Jozuwée, Nuni ví ɔ́, kpódó Kalɛ́bu, Yefunnɛ́ɛ ví ɔ́ kpó. Yědɛɛ lɛ́ɛ sin xomɛ, bó vún awu dó kɔ nú yěɖée, bó ɖɔ nú Izlayɛ́li ví lɛ́ɛ ɖɔ: “To e mǐ yi ba do ná ɔ́, to ɖagbe wɛ. Nú Mawu Mavɔmavɔ nyɔ́ xomɛ dó mǐ wú ɔ́, é ná kplá mǐ yi to ɔ́ mɛ, bó ná ná to ɔ́ mǐ. Anɔ̌sin kpó wǐin kpó wɛ nɔ́ sa ɖo fínɛ́. Nǔ e wɛ kpowun ɔ́ ɖíe: mi ma fɔ́n gǔ dó Mawu Mavɔmavɔ jí ó, mi ma ka ɖi xɛsi nú to ɔ́ mɛ nu lɛ́ɛ ó, ɖó mǐ nǎ ɖu ɖo jǐ yětɔn; vodún e nɔ́ cyɔ́n alɔ yě jí lɛ́ɛ ɖě sɔ́ ɖo jǐ yětɔn ǎ. Mawu Mavɔmavɔ ka ɖo kpɔ́ xá mǐdɛɛ lɛ́ɛ; mǐ ní bó má ɖi xɛsi nú yě ó.” Togun ɔ́ bǐ ká ɖó gbe kpɔ́, bó jɛ ɖiɖɔ jí ɖɔ è nǐ nyi hwǎn dó hu yě; tlóló kpowun ɔ́, susu Mawu Mavɔmavɔ tɔn tɔ́n ɖo Goxɔ ɔ́ jí, ɖo Izlayɛ́li ví lɛ́ɛ bǐ nukɔn. Bɔ Mawu Mavɔmavɔ ɖɔ nú Mɔyízi ɖɔ: “Káká hwetɛ́nu wɛ togun élɔ́ ká ná gbɛ́ wǎn nú mì yi jɛ? Nǔjíwǔ tobutóbú e un bló ɖo tɛ́ntin yětɔn ɔ́ nɛ́ có, yě ɖǒ jiɖiɖe dó wǔ ce ǎ. Káká hwetɛ́nu wɛ yě ká ná nɔ mɔ̌ yi jɛ? Un ná bló bɔ jɛmɛjí ná byɔ́ yě mɛ, bó ná sú kún yětɔn dó; un ka ná zé we dó bló akɔta ɖé bɔ é ná sukpɔ́, bó ná syɛ́n hú yě.” Ée Mawu Mavɔmavɔ ɖɔ mɔ̌ ɔ́, Mɔyízi ɖɔ n'i ɖɔ: “Nú a blǒ mɔ̌ ɔ́, Ejípunu e tɛ́ntin a zě hlɔ̌nhlɔ́n towe dó ɖe yě sín ɔ́ ná wá se, bó ná ɖɔ nú to énɛ́ ɔ́ mɛ nu lɛ́ɛ. Yě tunwun ɖɔ hwi Mawu Mavɔmavɔ ɔ́, a ɖo togun élɔ́ tɛ́ntin; yě tunwun ɖɔ a nɔ tɔ́n dó yě jí gannaganna, bɔ akpɔ́kpɔ́ towe ɖo jǐ yětɔn. Yě tunwun ɖɔ kéze ɔ́, a nɔ ɖo nukɔn yětɔn, ɖo akpɔ́kpɔ́ ɖaxó mɛ, bɔ zǎn mɛ ɔ́, a nɔ ɖo nukɔn yětɔn ɖo myɔ ɖé mɛ. Din ɔ́, nú a sú togun towe sín kún dó vawun mɔ̌ ɔ́, akɔta e ko se nǔ e a wa nɛ́ lɛ́ɛ ná ɖɔ: ‘Mawu Mavɔmavɔ sixú kplá togun ɔ́ yi to e sín akpá é dó n'i ɔ́ mɛ ǎ, énɛ́ wú wɛ é sú kún tɔn dó ɖo gbětótló mɛ.’ Énɛ́ ɔ́ wú ɔ́, Aklúnɔ, un ɖo vo sa nú we wɛ. Zǎn hlɔ̌nhlɔ́n towe; wa nǔ lě e a ɖɔ nú mǐ gbɔn é. A ɖɔ: ‘Mawu Mavɔmavɔ wɛ un nyí; un nɔ yá wǔ sin xomɛ ǎ; un nyí Mawu xomɛnyɔ́tɔ́; un nɔ sɔ́ nǔ nyanya e è wa lɛ́ɛ kpódó tónú e è ma se ǎ lɛ́ɛ kpó kɛ mɛ. Un ká nɔ mɔ mɛ e hu hwɛ ɔ́ dó mɔ hwɛjijɔnɔ ǎ. Hwɛ e vǐtɔ́ lɛ́ɛ hu ɔ́, vǐ yětɔn lɛ́ɛ ná sún sin tɔn; vǐvú yětɔn lɛ́ɛ, vitikli yětɔn lɛ́ɛ kpó kpaba yětɔn lɛ́ɛ kpó ná sún sin tɔn.’ Mawu Mavɔmavɔ, kɛnklɛ́n kpɔ́n dó xomɛnyínyɔ́ towe wú, bó zé hwɛ e togun élɔ́ hu ɔ́ kɛ ɛ, lě e a ko nɔ bló gbɔn n'i sín Ejípu káká wá jɛ fí é.” Mawu Mavɔmavɔ ka yí gbe nú Mɔyízi ɖɔ: “Un sɔ́ hwɛ kɛ togun ɔ́ lě e a byɔ́ mì gbɔn é. Amɔ̌, nyɛ Mawu Mavɔmavɔ ɔ́, un ɖo gbɛ, bɔ susu ce kpé ayǐkúngban ɔ́ bǐ jǐ. Yě mɛ e mɔ susu ce, bó mɔ nǔjíwǔ e un bló ɖo Ejípu, bó bló ɖo gbětótló mɛ lɛ́ɛ, yě mɛ énɛ́ lɛ́ɛ e tɛ́n mì kpɔ́n azɔn mɔ̌kpán, lobo ma ɖótó mì ǎ lɛ́ɛ ɔ́, ɖokpó ná mɔ to e un dó akpá tɔn nú tɔ́gbó yětɔn lɛ́ɛ ɖɔ un ná ná yě ɔ́ ǎ. Yě mɛ e gbɛ́ wǎn nú mì lɛ́ɛ ɖě ná mɔ to ɔ́ ǎ. Amɔ̌, mɛsɛntɔ́ ce Kalɛ́bu ɔ́, ayi ɖo xomɛ nú éyɛ́, bɔ é nɔ gbejí nú mì. Énɛ́ ɔ́ wú ɔ́, un ná kplá ɛ yi to e é yi ba do ná ɔ́ mɛ, bó ná ná to ɔ́ vǐ tɔn lɛ́ɛ. Amalɛ́ki ví lɛ́ɛ kpódó Kanáanu lɛ́ɛ kpó ɔ́, tɔdo e ɖo gbě énɛ́ ɔ́ jí ɔ́ mɛ wɛ yě ɖe din. Sɔ su hǔn, mi lɛ́ kɔ gbɔn gbětótló mɛ, ɖo Xu Vɔvɔ ɔ́ sín awa jí.” Mawu Mavɔmavɔ lɛ́ ɖɔ nú Mɔyízi kpódó Aalɔ́ɔn kpó ɖɔ: “Un se Izlayɛ́li ví lɛ́ɛ ɖo nǔ hlún ɖɔ dó wǔ ce wɛ; káká hwetɛ́nu wɛ un ka ná jó togun baɖabaɖa énɛ́ ɔ́ dó, bɔ é ná hlún nǔ ɖɔ dó wǔ ce yi jɛ? Mi yi ɖɔ nú yě ɖɔ: ‘Nyɛ Mawu Mavɔmavɔ ɔ́, un ɖo gbɛ; xó e mi ɖɔ bɔ un se lɛ́ɛ wɛ un ná dó wa nǔ xá mi. Mi bǐ wɛ ná kú ɖo gbětótló mɛ fí. Mi mɛ e è ko yí nyǐkɔ mitɔn, bó kó sɔ́ kɛ́n mitɔn, bɛ́ sín mɛ e ɖó xwe ko lɛ́ɛ jí, sɔ́ yi mɛ e ɖó hú mɔ̌ lɛ́ɛ jí ɔ́, mi bǐ wɛ ná kú, ɖó mi hlún nǔ ɖɔ dó wǔ ce. Mi sɔ́ ná yi to e sín akpá un dó nú mi ɖɔ mi ná nɔ mɛ ɔ́ mɛ ǎ. Kalɛ́bu Yefunnɛ́ɛ ví ɔ́, kpódó Jozuwée Nuni ví ɔ́ kpó ná yi to ɔ́ mɛ. Vǐvú mitɔn e mi ɖɔ ná ɖɔ mɛ e ná ɖu ɖo jǐ mitɔn lɛ́ɛ sín ahwankannumɔ wɛ yě ná nyí lɛ́ɛ ɔ́, un ná kplá yědɛɛ lɛ́ɛ yi to e mi gbɛ́ wǎn ná ɔ́ mɛ, bɔ yě ná tunwun to ɔ́. Midɛɛ lɛ́ɛ ɔ́, mi ná kú ɖo gbětótló mɛ. Vǐ mitɔn lɛ́ɛ ná ɖo flúflú wɛ gbɔn gbětótló mɛ xɔ xwe kanɖé (40); lě e yě ná sú gbejí e mi ma nɔ ǎ ɔ́ sín axɔ́ gbɔn káká bɔ mi bǐ ná kú vɔ ɖo gbětótló mɛ ɔ́ nɛ́. Azǎn kanɖé (40) wɛ mi sɔ́ ɖó te bo dó ba do nú to ɔ́; mɔ̌ ɖokpó ɔ́, mi ná hɛn hwɛgban mitɔn lɛ́ɛ xɔ xwe kanɖé (40); xwe ɖokpó ɖo azǎn ɖokpó tɛnmɛ. Énɛ́ ɔ́, nú un húzú kpan nukɔn mɛ ɔ́ nǔ e ɖ'é mɛ ɔ́ mi ná tunwun. Nyɛ Mawu Mavɔmavɔ wɛ ɖɔ mɔ̌! Lě e un ná wa togun baɖabaɖa élɔ́ e fɔ́n gǔ dó jǐ ce ɔ́ sín nǔ gbɔn ɔ́ nɛ́. Yě bǐ wɛ ná kú ɖo gbětótló mɛ fí. Mɛ ɖé ná kpo ǎ.’ ” Mɛ e Mɔyízi sɛ́ dó bɔ yě yi ba do nú to ɔ́, bó lɛ́ kɔ wá ɖɔ to ɔ́ sín xó nyanya, bɔ togun ɔ́ jɛ nǔ hlún ɖɔ dó Mɔyízi wú jí lɛ́ɛ ɔ́, yě kú; Mawu Mavɔmavɔ sín alɔ jɛ yě wǔ, ɖó yě ɖɔ xó nyanya dó to ɔ́ wú. Jozuwée kpó Kalɛ́bu kpó kɛ́ɖɛ́ wɛ nyí mɛ e gán ɖo mɛ e Mɔyízi sɛ́ dó lɛ́ɛ mɛ é. Mɔyízi ɖɔ nǔ e Mawu Mavɔmavɔ ɖɔ lɛ́ɛ bǐ nú Izlayɛ́li ví lɛ́ɛ, bɔ wǔ kú yě ɖésú. Énɛ́ ɔ́ wú wɛ togun ɔ́ fɔ́n zǎn jɛ ali, bó wlí sókan mɛ sín ali ɔ́ bó ɖɔ: “Mǐ wa nǔ nyi do! Amɔ̌, din ɔ́, mǐ ɖo gbesisɔ mɛ bo ná yi fí e Mawu Mavɔmavɔ ɖɔ mǐ ní yi ɔ́.” Mɔyízi ka ɖɔ nú yě ɖɔ: “Étɛ́ mi ná yi wa ɖo dɔ̌n? Mi gba Mawu Mavɔmavɔ sín sɛ́n; mi yi ɔ́, é ná kpa mi ǎ, ɖó Mawu Mavɔmavɔ sɔ́ ɖo kpɔ́ xá mi ǎ; mi ma sɔ́ miɖée yi jó nú kɛntɔ́ ó. Đó Amalɛ́ki ví lɛ́ɛ kpódó Kanáanu lɛ́ɛ kpó ɖo fínɛ́, ɖo nukɔn mitɔn; mi ná cí ahwan, ɖó mi ko lɛ́ kɔ sín Mawu Mavɔmavɔ gúdo. Mawu Mavɔmavɔ sɔ́ ná nɔ kpɔ́ xá mi ǎ.” Mɔyízi ɖɔ mɔ̌ nú Izlayɛ́li ví lɛ́ɛ có yě xwe nǔ, bó ɖidó sókan ɔ́ mɛ; Mɔyízi kpó akɔjijɛgbá ɔ́ kpó ká sɛ tɛn sín fí e yě ɖó gɔnu ɖó ɔ́ ǎ. Énɛ́ ɔ́, Amalɛ́ki ví lɛ́ɛ kpódó Kanáanu lɛ́ɛ kpó ɖo sókan ɔ́ mɛ; yě jɛ te sín só ɔ́ jí, bó wá fun ahwan xá Izlayɛ́li ví lɛ́ɛ, bó ɖu ɖo yě jí, bó jɛ gǔdo yětɔn káká wá Hɔ́ɔma. Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná byɔ́ to e un ná mi bɔ mi ná nɔ mɛ ɔ́ mɛ ɔ́, mi ná nɔ́ sá vɔ̌ e è nɔ dó zo é abǐ kɔnɖókpɔ́ vɔ́ nú Mawu Mavɔmavɔ; é sixú nyí vɔ̌ e è nǎ dó ɖe akpá e è dǒ lɛ́ɛ, é ká sixú nyí ɖɔ mɛ ɖésúnɔ kpɔ́n mɛɖée xomɛ bó sá; é sixú nyí xwe ɖé sín hwenu. Mi ja vɔ̌ mɔ̌hunkɔtɔn lɛ́ɛ sá gbé ɔ́, nyibú ɖokpó, lɛ̌ngbɔ́ ɖokpó, abǐ gbɔ̌ ɖokpó wɛ mi ná nɔ́ sɔ́ dó sá, bɔ wǎn tɔn ná nyɔ́ se nú nyɛ Mawu Mavɔmavɔ. Mɛ e ná hɛn kanlin ɔ́ wá nú mì ɔ́, ná sɔ́ nǔníná jinukún tɔn lɛ́ɛ gɔ́ ná: é ná ná linfín kilóo atɔn bɔ è nǎ zé ami lǐtli ɖokpó adaɖé dó nya ná, bó ná ná vɛ̌ɛn lǐtli ɖokpó adaɖé; é ná bɛ́ nǔ énɛ́ lɛ́ɛ bǐ dó lɛ̌ngbɔ́ví e ná sá vɔ̌ e è nɔ dó zo ɔ́, abǐ kɔnɖókpɔ́ vɔ́ ɔ́ ná wɛ è ɖe ɔ́ jí. Ényí agbo ɖokpó ná dó sá vɔ̌ ɔ́ ná wɛ è ɖe ɔ́, è nǎ ná linfín kilóo ayizɛ́n, bó ná zé ami lǐtli we dó nya ná, bɔ é ná jɛ kanlin ɔ́ jí. Mɛ ɔ́ ná lɛ́ ná vɛ̌ɛn lǐtli we d'é jí. Ényí è blǒ gbɔn mɔ̌ ɔ́, wǎn tɔn nɔ́ nyɔ́ se nú nyɛ Mawu Mavɔmavɔ. É ká nyí nyibú wɛ è nǎ dó sá vɔ̌ e è nɔ dó zo ɔ́, abǐ kɔnɖókpɔ́ vɔ́ ná dó ɖe akpá e è dǒ ɔ́, abǐ è nǎ dó sá vɔ̌ yǎyá ɖé kpowun ɔ́, è ɖǒ ná ná vɔ̌sánú ɖé dó kanlin ɔ́ jí: è nǎ ná linfín kilóo tɛ́nnɛ, bó ná zé ami lǐtli atɔn dó nya ná, bó ná lɛ́ ná vɛ̌ɛn lǐtli atɔn d'é jí. Vɔ̌ e è nɔ dó zo é wɛ, bɔ wǎn tɔn nɔ́ nyɔ́ se nú nyɛ Mawu Mavɔmavɔ. “Ényí è jlǒ ná zé nyibú abǐ agbo, abǐ lɛ̌ngbɔ́ví, abǐ gbɔ̌ dó sá vɔ̌ ɔ́, mɔ̌ wɛ è nǎ bló gbɔn. Kanlin e ná dó sá vɔ̌ ɔ́ wɛ mi ɖe lɛ́ɛ ná bó sukpɔ́ gbɔn ɖěbǔ ɔ́, nǔníná énɛ́ lɛ́ɛ e è xa lɛ́ɛ ɖó ná jɛ kanlin lɛ́ɛ ɖokpó ɖokpó jí. Izlayɛ́li ví ɖěbǔ jló ná sá vɔ̌ nú nyɛ Mawu Mavɔmavɔ bónú wǎn tɔn ná nyɔ́ se nú mì ɔ́, tito énɛ́ lɛ́ɛ wɛ è ɖǒ ná xwedó. Jǒnɔ e ɖo to mitɔn mɛ nú hwenu kpɛɖé abǐ éé kó ɖo to mitɔn mɛ bɔ xwe ko sɛ yi lɛ́ɛ ɔ́, nú yě jló ná sá vɔ̌ e è nɔ dó zo bɔ wǎn tɔn nɔ́ nyɔ́ se nú nyɛ Mawu Mavɔmavɔ ɔ́, nǔ ɖokpó ɔ́ jɛ́n yě lɔmɔ̌ ná bló. Sɛ́n ɖokpó ɔ́ wɛ togun ɔ́ bǐ ná xwedó, toví kpó jǒnɔ kpó bǐ. Sɛ́n ɖé wɛ, bó ná nɔ ayǐ káká sɔ́yi. Mi kpó jǒnɔ kpó bǐ wɛ ɖó ná nyi sɛ́n énɛ́ ɔ́, ɖo nyɛ Mawu Mavɔmavɔ nukɔn. Sɛ́n e mi ná nɔ́ nyi lɛ́ɛ kpó tito e mi ná nɔ́ xwedó lɛ́ɛ kpó wɛ jǒnɔ lɛ́ɛ lɔ ná nɔ́ xwedó.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná byɔ́ to e mɛ un ná kplá mi yi ɔ́ mɛ, bó ná ɖu wɔ̌xúxú to énɛ́ ɔ́ mɛ tɔn ɔ́, mi ná ɖe ɖě ɖ'é mɛ, bó ná xwlé nyɛ Mawu Mavɔmavɔ. Mi ná wún jinukún mitɔn nukɔn nukɔntɔn ɔ́, bó ná li, lobo ná nya, bó ná ɖa acɔnmɔ ná, bó xwlé nyɛ Mawu Mavɔmavɔ lě e è nɔ xwlé nǔníná jinukún tɔn mì gbɔn é, bɔ é ná nyí nǔníná jinukún tɔn e è ya jinukún ɔ́, è nɔ xwlé mì é. Énɛ́ ɔ́, mi ná xwlé acɔnmɔ e mi ná zé jinukún nukɔntɔn dó ɖa ná ɔ́ nyɛ Mawu Mavɔmavɔ. Sɛ́n énɛ́ ɔ́ lɔmɔ̌ ná nɔ ayǐ káká sɔ́yi.” Mawu Mavɔmavɔ lɛ́ ɖɔ nú Mɔyízi ɖɔ: “Ényí mi ma tunwun ǎ bó hu hwɛ, abǐ mi ma tunwun ǎ bó gba sɛ́n e un dó nú mi gbɔn Mɔyízi jí lɛ́ɛ ɖě ɔ́, nǔ e nyɛ Mawu Mavɔmavɔ zɔ́n mi sín gbe e gbe un ná sɛ́n mi gbɔn Mɔyízi jí, bɔ mi ná nɔ wa, bɔ midɛɛ lɛ́ɛ gúdo ɔ́, vǐ mitɔn lɛ́ɛ lɔ ɖó ná nɔ wa ɔ́, ényí mɛɖé má tunwun ǎ, bó gba ɖě, bɔ togun ɔ́ lɔ ma ka tunwun ǎ ɔ́, togun ɔ́ bǐ wɛ ná zé nyibúsú wínnyáwínnyá ɖokpó dó sá vɔ̌ e è nɔ dó zo ɔ́ ná nú nyɛ Mawu Mavɔmavɔ, bɔ wǎn tɔn ná nyɔ́ se nú mì. Mɛ ɔ́ ná ná nǔníná vɛ̌ɛn tɔn kpó jinukún tɔn kpó gɔ́ ná lě e è nɔ bló gbɔn é; gbɔ̌sú ɖokpó ná jɛ jí, bɔ è nǎ dó sá hwɛxɔ́súsú vɔ́ ná. Vɔ̌sánú-xwlémawutɔ́ ɔ́ ná sá hwɛxɔ́súsú vɔ́ dó Izlayɛ́li ví lɛ́ɛ bǐ tamɛ, bɔ nyɛ Mawu Mavɔmavɔ ná sɔ́ hwɛ kɛ yě; ɖó yě tunwun ǎ, bó hu hwɛ, bo ká hɛn vɔ̌sánú yětɔn wá nú vɔ̌ e è nɔ dó zo nú nyɛ Mawu Mavɔmavɔ ɔ́, bó hɛn kanlin e è nɔ dó sá hwɛxɔ́súsú vɔ́ ná ɖo nukɔn ce ɔ́ wá, ɖó hwɛ e yě má tunwun ǎ bó hu ɔ́ wú. Nyɛ Mawu Mavɔmavɔ ná sɔ́ hwɛ kɛ Izlayɛ́li ví lɛ́ɛ bǐ, kpódó jǒnɔ e ɖo yě mɛ lɛ́ɛ kpó, ɖó yě tunwun cóbó hu hwɛ ǎ. “Ényí mɛ ɖokpó géé wɛ má tunwun ǎ bó hu hwɛ ɔ́, mɛ ɔ́ ná zé gbɔ̌ e kó ɖó xwe ɖokpó ɔ́ dó sá vɔ̌ ná ɖó hwɛ e é hu ɔ́ tamɛ. Vɔ̌sánú-xwlémawutɔ́ ɔ́ ná sá hwɛxɔ́súsú vɔ́ ɔ́ ɖo nukɔn ce, dó mɛ e ma tunwun ǎ bó hu hwɛ ɔ́ tamɛ. Ényí é kó sá hwɛxɔ́súsú vɔ́ ɔ́ dó ta tɔn mɛ ɔ́, un ná sɔ́ hwɛ kɛ ɛ. Mɛ ɔ́ sixú nyí Izlayɛ́li ví, é sixú nyí toví, é ká sixú nyí jǒnɔ ɖo yě gɔ̌n; sɛ́n ɖokpó ɔ́ wɛ è nǎ zé bɔ dó mɛ e ma tunwun ǎ bó hu hwɛ lɛ́ɛ bǐ wú. “Lo ɔ́, nú mɛ ɔ́ nyí Izlayɛ́li ví abǐ jǒnɔ, bó tunwun gaan bo hu hwɛ ɔ́, nyɛ Mawu Mavɔmavɔ wɛ mɛ ɔ́ zun, bɔ è nǎ ɖe e sín togun ɔ́ mɛ. Wǎn wɛ mɛ ɔ́ gbɛ́ nú xó ce, bó gba sɛ́n ce; è ɖǒ ná ɖe e sín togun ɔ́ mɛ. Hwɛ e é hu ɔ́ ji nǔɖé ɔ́, é ná kpan.” Hwenu e Izlayɛ́li ví lɛ́ɛ ɖo gbětótló mɛ ɔ́, nya ɖé ɖo nakí ba wɛ gbɔjɛzán gbe, bɔ yě gbo e dó. Yě kplá ɛ yi Mɔyízi kpó Aalɔ́ɔn kpódó togun ɔ́ bǐ kpó nukɔn, bɔ è sɔ́ ɛ ɖó fí ɖé bó nɔ cɔ́ ɛ, bó ɖo te kpɔ́n sɛ́n e Mawu Mavɔmavɔ ná bɔdó wú tɔn é. Mawu Mavɔmavɔ ka ɖɔ nú Mɔyízi ɖɔ: “È ɖǒ ná hu nya ɔ́; è nǎ kplá ɛ sín fí e mi ɖó gɔnu ɖó ɔ́, bɔ togun ɔ́ bǐ ná nyi awǐnnyaglo dó hu i.” Ée Mawu Mavɔmavɔ ɖɔ mɔ̌ ɔ́, togun ɔ́ bǐ dɔn nya ɔ́ tɔ́n sín fí e yě ɖó gɔnu ɖó ɔ́, bó nyi awǐnnyaglo dó e bɔ é kú, lě e Mawu Mavɔmavɔ ɖɔ nú Mɔyízi gbɔn é. Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Mi kpó vǐ mitɔn lɛ́ɛ kpó ɔ́, mi ná xo kɛyɛ dó awu mitɔn lɛ́ɛ tó, bó ná sin kan fɛ́sinnɔ ɖó kɛyɛ lɛ́ɛ nu. Hǔn mi ná nɔ́ dó awu e dó kɛyɛ lɛ́ɛ é. Nú mi kpɔ́n kɛyɛ énɛ́ lɛ́ɛ ɔ́, mi ná nɔ́ flín sɛ́n ce lɛ́ɛ, bó ná nɔ́ nyi. Énɛ́ ɔ́, mi sɔ́ ná nɔ́ xwedó nǔ e ayi mitɔn ɖɔ nú mi lɛ́ɛ kpó nǔ e mɔ wɛ nukún mitɔn lɛ́ɛ ɖe ɔ́ kpó, bó ná jɛ nǔ ɖěvo lɛ́ɛ sɛn jí ǎ. Mi ná nɔ́ flín sɛ́n ce lɛ́ɛ, bó ná nɔ́ nyi; mi ná bló mɔ̌ bó ná nyí mɛ e è zě ɖó vo nú nyɛ Mawu mitɔn é. Nyɛ wɛ nyí Mawu Mavɔmavɔ, Mawu mitɔn; nyɛ wɛ kplá mi tɔ́n sín Ejípu; nyɛ wɛ nyí Mawu mitɔn. Mawu Mavɔmavɔ, Mawu mitɔn wɛ un nyí.” Levíi ví ɖé tíin, bó nyí Kolée. Yisexáa ví wɛ é nyí ɖo Kexáti hɛ̌nnu ɔ́ mɛ. É kplɔ́n nǔ mɛ atɔn ɖo akɔta Hwlibɛ́ni tɔn mɛ. Mɛ atɔn lɛ́ɛ wɛ nyí Datáni kpó Abilámu, Eliavu sín vǐ ɔ́ kpó, kpódó Onu Pɛlɛ́ti ví ɔ́ kpó. Yě fɔ́n gǔ dó Mɔyízi jí. Izlayɛ́li sín gǎn lɛ́ɛ kpódó tomɛxó lɛ́ɛ kpó wɛ nɔ́ ná tasyɛ́n yě. Yě mɛ afɔɖé kanɖé wǒ wɛ (250). Yě kplé lɛ́ lɛ̌ dó Mɔyízi kpó Aalɔ́ɔn kpó, bó ɖɔ nú yě ɖɔ: “É kpé mɔ̌ lo! Đó mǐ mɛ e ɖo Izlayɛ́li sín togun ɔ́ mɛ lɛ́ɛ bǐ wɛ nyí Mawu Mavɔmavɔ tɔn, bɔ Mawu Mavɔmavɔ ɖo mǐ bǐ tɛ́ntin. Aniwú wɛ mi nɔ mɔ ɖɔ émí hú gǎn mɛ e ɖo togun Mawu Mavɔmavɔ tɔn mɛ lɛ́ɛ bǐ?” Ée Mɔyízi se mɔ̌ ɔ́, é xwe agbɔ̌nnusú do, bó ɖɔ nú Kolée kpó ahwan tɔn lɛ́ɛ kpó ɖɔ: “É jɛ sɔ zǎnzǎn ɔ́, Mawu Mavɔmavɔ ná ɖe mɛ e nyí étɔn bɔ é sɔ́ ɖó vo bɔ é ná nɔ́ sɛkpɔ́ ɛ ɔ́ xlɛ́. É ná jó mɛ e é sɔ́ ɔ́ dó bɔ é ná wá gɔ̌n tɔn. Kolée, hwi kpódó ahwan towe lɛ́ɛ kpó ɔ́, nǔ e mi ná bló ɔ́ ɖíe: mi zé zǎlínkpɔ́nfyɔ́nú. É jɛ sɔ ɔ́, mi ná bɛ́ myɔkán d'é mɛ, bó ná kɔn zǎlínkpɔ́n d'é jí ɖo Mawu Mavɔmavɔ nukɔn. Énɛ́ ɔ́, è nǎ mɔ mɛ e Mawu Mavɔmavɔ sɔ́ é; è nǎ tunwun mɛ e nyí étɔn é. Mi mɛ Levíi ví lɛ́ɛ wɛ un ná ɖɔ ná ɖɔ é kpé mɔ̌ lo.” Mɔyízi lɛ́ ɖɔ nú Kolée ɖɔ: “Levíi ví lɛ́ɛ mi, mi ɖótó mì. Ée Mawu Mavɔmavɔ, Mawu Izlayɛ́li tɔn ɔ́ ɖe mi ɖó vo ɖo Izlayɛ́li ví ɖě lɛ́ɛ mɛ, bónú mi ná nɔ́ sɛkpɔ́ ɛ, bó ná nɔ́ kpé nukún dó Goxɔ tɔn wú, bó ná nɔ́ sɛn Mawu Mavɔmavɔ ɖó Izlayɛ́li togun ɔ́ ta mɛ ɔ́, nǔ énɛ́ ɔ́ kpé mi ǎ wɛ a? Mawu Mavɔmavɔ yí gbe ɖɔ hwi kpó nɔví towe súnnu Levíi ví lɛ́ɛ bǐ kpó ní sɛkpɔ́ émí, bɔ énɛ́ ɔ́ kpé mi ǎ, bɔ mi lɛ́ ɖo vɔ̌sánú-xwlémawutɔ́ sín azɔ̌ ba ná wa gɔ́ nú énɛ́ ɔ́ wɛ dandan. Nǔ énɛ́ ɔ́ wú wɛ hwi kpó ahwan towe lɛ́ɛ bǐ kpó fɔ́n gǔ dó Mawu Mavɔmavɔ jí, ɖó nú è nǎ ɖɔ xó nǔgbó ɔ́, Aalɔ́ɔn wú ɖɔ xó dó wɛ mi ɖe ǎ.” Ée Mɔyízi ɖɔ mɔ̌ ɔ́, é sɛ́ mɛ dó bɔ è yi ylɔ́ Eliavu ví Datáni kpó Abilámu kpó wá. Lo ɔ́, yě ɖɔ sɛ́ dó Mɔyízi ɖɔ: “Mǐ jǎwe ǎ! A kplá mǐ sín to e mɛ nyibúnɔ́sin kpó wǐin kpó ɖo sisa ɖe wɛ ɔ́ mɛ, bó ná hu mǐ ɖo gbětótló mɛ. É ɖo mɔ̌ có énɛ́ ɔ́ kó kpé we ǎ, bɔ a jlǒ ná kpa acɛ nú mǐ gǎn mǐtɔn wɛ a nyǐ ɖɔhun. Gbeɖé, a kplá mǐ yi to e mɛ nyibúnɔ́sin kpó wǐin kpó ɖo sisa wɛ ɖe ɔ́ mɛ ǎ. A nǎ gle mǐ ǎ, a ka ná vǐwungbo mǐ ǎ. Nukúntíntɔ́nnɔ lɛ́ɛ wɛ a ka kpé nǔ xá wɛ a vɛdó a? Mǐ jǎwe ǎ, mǐ gbɛ́!” Ée Mɔyízi se mɔ̌ ɔ́, xomɛ sin i ɖésú. É ɖɔ nú Mawu Mavɔmavɔ ɖɔ: “Ma yí nǔníná yětɔn ó; un yí nǔ ɖěbǔ ɖo yě sí kpɔ́n gbeɖé ǎ; un tlɛ yí tócí vɔ́vɔ́ ɖo yě sí ǎ, un ka wa nǔ nyi do nú mɛɖé ɖo yě mɛ gbeɖé kpɔ́n ǎ.” Mɔyízi ɖɔ nú Kolée ɖɔ: “É jɛ sɔ ɔ́, hwi kpó ahwan towe lɛ́ɛ kpó ní wá Mawu Mavɔmavɔ nukɔn; Aalɔ́ɔn lɔmɔ̌ ná ɖo fínɛ́. Mɛ towe afɔɖé kanɖé wǒ (250) lɛ́ɛ ɖokpó ɖokpó ná zé zǎlínkpɔ́nfyɔ́nú tɔn bó ná kɔn zǎlínkpɔ́n d'é mɛ, lobo ná zé wá Mawu Mavɔmavɔ nukɔn. Hwi kpó Aalɔ́ɔn kpó ná bló nǔ ɖokpó ɔ́.” Kolée kpó ahwan tɔn lɛ́ɛ kpó bló nǔ e Mɔyízi ɖɔ é. Mɛ ɖokpó ɖokpó zé zǎlínkpɔ́nfyɔ́nú tɔn, bó kɔn myɔkán d'é mɛ, bó kɔn zǎlínkpɔ́n d'é jí, bó wá nɔ Goxɔ ɔ́ sín ali nu. Mɔyízi kpó Aalɔ́ɔn kpó lɔmɔ̌ wǎ, bɔ Kolée kplé togun Izlayɛ́li tɔn ɔ́ bǐ ɖó nukɔn yětɔn, ɖo Goxɔ ɔ́ sín ali nu. Ée yě wá kplé ɔ́, susu Mawu Mavɔmavɔ tɔn tɔ́n dó togun ɔ́ bǐ jí, bɔ Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Mi tɔ́n sín mɛ énɛ́ lɛ́ɛ mɛ, ɖó un ná sú kún yětɔn dó din, ɖo nukúnxwixwe ɖokpó mɛ.” Ée Mawu Mavɔmavɔ ɖɔ mɔ̌ ɔ́, Mɔyízi kpó Aalɔ́ɔn kpó xwe agbɔ̌nnusú do, bó sú xó ɖɔ: “Yéége Mawu! Hwi mɛ e ná gbɛ nǔɖíɖó lɛ́ɛ bǐ ɔ́, a nǎ kpɔ́n dó hwɛ e mɛ ɖokpó géé hu ɔ́ wú, bó ná sin xomɛ dó togun ɔ́ bǐ sésé wɛ a?” Mawu Mavɔmavɔ ka yí gbe nú Mɔyízi ɖɔ: “Đɔ nú togun ɔ́ ɖɔ yě ní sɛ yi zɔ nú fí e Kolée kpó Datáni kpó, kpódó Abilámu kpó ɖe ɔ́.” Mɔyízi ka sí te bo ɖidó Datáni kpó Abilámu kpó gɔ́n, bɔ tomɛxó Izlayɛ́li tɔn lɛ́ɛ xwedó e. É ɖɔ nú togun ɔ́ ɖɔ: “Mi sɛ yi zɔ nú mɛdídá élɔ́ lɛ́ɛ sín Goxɔ lɛ́ɛ; mi ma ɖ'alɔ nǔ yětɔn lɛ́ɛ ɖěbǔ wú ó, é má nyí mɔ̌ ǎ ɔ́, mi lɔmɔ̌ táá wá kú ɖó hwɛ e yě hu lɛ́ɛ wú.” Ée Mɔyízi ɖɔ mɔ̌ ɔ́, togun ɔ́ sɛ yi zɔ dó fí e Kolée kpó Datáni kpó, kpódó Abilámu kpó ɖe é. Datáni kpó Abilámu kpó tɔ́n, bó wá nɔ te Goxɔ yětɔn lɛ́ɛ sín ali nu kpó asi yětɔn lɛ́ɛ kpó, kpó vǐ yětɔn lɛ́ɛ kpó, kpódó vǐvú yětɔn lɛ́ɛ kpó. Énɛ́ ɔ́ gúdo ɔ́, Mɔyízi ɖɔ nú togun ɔ́ ɖɔ: “Mi ná mɔ din ɖɔ Mawu Mavɔmavɔ wɛ sɛ́ mì dó nǔgbó, nú má wa azɔ̌ énɛ́ lɛ́ɛ bǐ; mi ná mɔ ɖɔ é kún nyí nyɛ ɖésú wɛ kpɔ́n xo ce mɛ bo bló mɔ̌ ó. Ényí mɛ élɔ́ lɛ́ɛ kú sɛ́ kú e mɛ bǐ nɔ́ kú ɔ́, hǔn Mawu Mavɔmavɔ wɛ sɛ́ mì dó ǎ. Lo ɔ́, ényí Mawu Mavɔmavɔ wa azɔ̌jíwǔ ɖé ɔ́, ényí ayǐkúngban kɛ nu, bo fɔ yě kpó nǔ e yě ɖó lɛ́ɛ bǐ kpó mi ɔ́, nú yě zɔn gbɛ yi kútomɛ ɔ́, mi ná tunwun ɖɔ mɛ énɛ́ lɛ́ɛ ɔ́, Mawu Mavɔmavɔ wɛ yě zun.” Xó ɔ́ ɖɔ fó wɛ Mɔyízi ɖe kɛ́ɖɛ́, bɔ ayǐkúngban kɛ nu ɖo Datáni kpó Abilámu kpó sín afɔ glɔ́. Ayǐkúngban kɛ nu bo mi yě kpó hɛ̌nnu yětɔn lɛ́ɛ kpó, kpó Kolée sín ahwan lɛ́ɛ lɔmɔ̌ kpó, kpódó dɔkun yětɔn lɛ́ɛ bǐ kpó. Nya énɛ́ lɛ́ɛ zɔn gbɛ yi kútomɛ kpó nǔ e yě ɖó lɛ́ɛ bǐ kpó; ayǐkúngban ɔ́ mi yě, bɔ kún yětɔn sú dó sín togun Izlayɛ́li tɔn ɔ́ mɛ. Ée Izlayɛ́li ví e sɛkpɔ́ yě lɛ́ɛ se xósúsú yětɔn ɔ́, Izlayɛ́li ví lɛ́ɛ bǐ hɔn bó ɖɔ: “Ayǐkúngban ní vɛ́ má mi mǐ ó mɛ!” Énɛ́ ɔ́ gúdo ɔ́, Mawu Mavɔmavɔ sɛ́ myɔ dó, bɔ é fyɔ́ yě mɛ afɔɖé kanɖé wǒ (250) e ɖo zǎlínkpɔ́n xwlé e wɛ lɛ́ɛ gbɛɖe gbɛɖe. Mawu Mavɔmavɔ ɖɔ nú Mɔyízi ɖɔ: “Đɔ nú vɔ̌sánú-xwlémawutɔ́ Eleazáa, Aalɔ́ɔn ví ɔ́ ɖɔ é ní cyán zǎlínkpɔ́nfyɔ́nú lɛ́ɛ sín myɔ mɛ, bó kɔn myɔkán lɛ́ɛ nyi gbě; nǔ mímɛ́ wɛ zǎlínkpɔ́nfyɔ́nú énɛ́ lɛ́ɛ nyí. Đó zǎlínkpɔ́nfyɔ́nú énɛ́ lɛ́ɛ na bo nyí mɛ e hu hwɛ bó kú lɛ́ɛ tɔn ɔ́, nyɛ Mawu Mavɔmavɔ ɔ́ wɛ è sɔ́ xwlé. È nǎ fɔ yě dó tun gan gbajagbaja ɖé ná, bó ná fɔ cyɔ́n vɔ̌sákpe ɔ́, bɔ yě ná nyí flǐn ɖé nú Izlayɛ́li ví lɛ́ɛ.” Énɛ́ ɔ́, vɔ̌sánú-xwlémawutɔ́ Eleazáa bɛ́ zǎlínkpɔ́nfyɔ́nú mɛ e fyɔ́ lɛ́ɛ tɔn, bó fɔ yě dó tun gan gbajagbaja ɖé lɛ́ɛ ná, bó ná cyɔ́n vɔ̌sákpe ɔ́. Zǎlínkpɔ́nfyɔ́nú énɛ́ lɛ́ɛ ɔ́, ganvɔ wɛ è zě dó tun yě. Nǔ énɛ́ e è cyɔ́n dó vɔ̌sákpe ɔ́ nɔ́ flín Izlayɛ́li ví lɛ́ɛ ɖɔ mɛ ɖěbǔ kún ɖó acɛ e ná dó zǎlínkpɔ́n zo nú nyɛ Mawu Mavɔmavɔ ɔ́ zɛ kúnkan Aalɔ́ɔn tɔn lɛ́ɛ wú ó. Mɛ ɖěbǔ bló mɔ̌ ɔ́, awě e xo Kolée kpó ahwan tɔn lɛ́ɛ kpó ɔ́ wɛ ná xo mɛ ɔ́, lě e nyɛ Mawu Mavɔmavɔ ko ɖɔ gbɔn Mɔyízi jí é. Ée Mawu Mavɔmavɔ ɖɔ xó énɛ́ ɔ́ nú Mɔyízi bɔ ayǐ hɔ́n ɔ́, togun Izlayɛ́li tɔn ɔ́ bǐ jɛ nǔ hlún ɖɔ dó Mɔyízi kpó Aalɔ́ɔn kpó wú jí. Yě ɖɔ nú yě ɖɔ: “Mi hu togun Mawu Mavɔmavɔ tɔn ɔ́.” Izlayɛ́li ví lɛ́ɛ xísí dó Mɔyízi kpó Aalɔ́ɔn kpó. Lo ɔ́, hwenu e yě kpɔ́n Goxɔ ɔ́ sɛ́ dó ɔ́, yě mɔ ɖɔ akpɔ́kpɔ́ cyɔ́n ɛ, bɔ Mawu Mavɔmavɔ ɖo susu tɔn ɖe xlɛ́ wɛ ɖo fínɛ́. Mɔyízi kpó Aalɔ́ɔn kpó yi Goxɔ ɔ́ nukɔn, bɔ Mawu Mavɔmavɔ ɖɔ nú Mɔyízi ɖɔ: “Mi gosín togun ɔ́ tɛ́ntin; un ná sú mɛ énɛ́ lɛ́ɛ sín kún dó ɖo nukúnxwixwe ɖokpó mɛ.” Ée Mawu Mavɔmavɔ ɖɔ mɔ̌ ɔ́, Mɔyízi kpó Aalɔ́ɔn kpó xwe agbɔ̌nnusú do, bɔ Mɔyízi ɖe gbe nú Aalɔ́ɔn ɖɔ: “Zě zǎlínkpɔ́nfyɔ́nú towe, bó bɛ́ myɔkán e ɖo vɔ̌sákpe ɔ́ jí lɛ́ɛ d'é mɛ, bó kɔn zǎlínkpɔ́n d'é jí. Yǎ wǔ yi togun ɔ́ nukɔn, bó bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, bó sá hwɛxɔ́súsú vɔ́ dó ta yětɔn mɛ, ɖó Mawu Mavɔmavɔ ko sin xomɛ, bɔ awě jɛ mɛ xo jí.” Aalɔ́ɔn bló nǔ e Mɔyízi ɖɔ n'i é. É kán wezun yi togun ɔ́ tɛ́ntin fí e awě jɛ mɛ xo jí ɖe é. É dó zǎlínkpɔ́n zo bo sá hwɛxɔ́súsú vɔ́ ɔ́ dó togun ɔ́ tamɛ. É cí mɛ e kú lɛ́ɛ kpó mɛ e kpo ɖo gbɛ lɛ́ɛ kpó tɛ́ntin; énɛ́ ɔ́, awě e ɖo mɛ xo wɛ ɔ́ nɔ te. Gbɛtɔ́ děgba atɔn afɔwó nǔwɔntɔn kanwe ko (14.700) wɛ kú ɖo nǔ énɛ́ ɔ́ mɛ; è ka xa ahwan Kolée tɔn e kú ɖ'ayǐ lɛ́ɛ d'é mɛ ǎ. Ée awě e ɖo mɛ xo wɛ ɔ́ nɔ te lě tlóló ɔ́, Aalɔ́ɔn lɛ́ kɔ yi Mɔyízi gɔ́n ɖo Goxɔ ɔ́ nukɔn. Mawu Mavɔmavɔ ɖɔ nú Mɔyízi ɖɔ: “Đɔ nú Izlayɛ́li ví lɛ́ɛ ɖɔ akɔta lɛ́ɛ ɖokpó ɖokpó sín gǎn ní ná we kpo ɖokpó ɖokpó. Hǔn kpo wěwe wɛ a nǎ yǐ bó ná wlán akɔta ɖokpó ɖokpó sín nyǐkɔ dó kpo tɔn wú. Akɔta Levíi tɔn ɔ́ kɛ́ɖɛ́ sín kpo wú wɛ a ma ná wlán nyǐkɔ tɔn dó ǎ; Aalɔ́ɔn sín nyǐkɔ wɛ a nǎ wlán d'é wú. Énɛ́ ɔ́, akɔtagán ɖokpó ná ɖó kpo ɖokpó. A nǎ bɛ̌ kpo énɛ́ lɛ́ɛ yi ɖó Goxɔ ɔ́ mɛ, ɖo akɔjijɛgbá ɔ́ nukɔn fí e un nɔ wá kpé mi ɖe é. Lě e nǔ lɛ́ɛ ná yi gbɔn ɔ́ ɖíe: mɛ e un sɔ́ ɔ́ sín kpo ná tɔ́n kun. Énɛ́ ɔ́, un ná ɖó nǔ e hlún ɖɔ dó mi wú wɛ Izlayɛ́li ví lɛ́ɛ ɖe ɔ́ te. Yě sɔ́ ná hlún nǔ ɖɔ ɖě dó mi wú ǎ.” Mɔyízi ɖɔ xó e Mawu Mavɔmavɔ ɖɔ n'i ɔ́ nú Izlayɛ́li ví lɛ́ɛ bɔ akɔtagán yětɔn lɛ́ɛ bǐ zé kpo ɖokpó ɖokpó n'i: akɔta ɖokpó kpo ɖokpó, bɔ kpo lɛ́ɛ bǐ bló wěwe. Aalɔ́ɔn sín kpo ɔ́ lɔmɔ̌ ɖo kpo wěwe lɛ́ɛ mɛ. Mɔyízi bɛ́ kpo lɛ́ɛ ɖó akɔjijɛgbá Mawu Mavɔmavɔ tɔn ɔ́ nukɔn, ɖo Goxɔ ɔ́ mɛ. Ayǐhɔ́ngbe tɔn ɔ́, Mɔyízi byɔ́ Goxɔ ɔ́ mɛ, bó mɔ ɖɔ Aalɔ́ɔn sín kpo e nyí akɔta Levíi tɔn ɔ́ tɔ́n kun, é ká nyí kun kɛ́ɖɛ́ wɛ é tɔ́n ǎ; lo ɔ́, é lɛ́ gba sɛ́, bó sɛ́n, bɔ sínsɛ́n tɔn lɛ́ɛ myá. Mɔyízi ka bɛ́ kpo lɛ́ɛ bǐ tɔ́n sín Goxɔ ɔ́ mɛ, bó yi xlɛ́ Izlayɛ́li ví lɛ́ɛ. Mɛ bǐ mɔ kpo lɛ́ɛ, bɔ gǎn lɛ́ɛ ɖokpó ɖokpó yí kpo yětɔn yětɔn. Mawu Mavɔmavɔ lɛ́ ɖɔ nú Mɔyízi ɖɔ: “Lɛ̌ kɔ nú Aalɔ́ɔn sín kpo ɔ́ yi akɔjijɛgbá ɔ́ nukɔn, ɖo Goxɔ ɔ́ mɛ; è nǎ jó kpo ɔ́ dó nyi fínɛ́, bó ná nɔ́ dó flín Izlayɛ́li ví lɛ́ɛ ɖɔ yě kún se tónú ó; nú a blǒ gbɔn mɔ̌ ɔ́, yě ná ɖó nǔ e hlún ɖɔ wɛ yě ɖe ɖo nukɔn ce lɛ́ɛ te bó sɔ́ ná kú ǎ.” Mɔyízi bló nǔ e Mawu Mavɔmavɔ ɖɔ n'i lɛ́ɛ bǐ. Izlayɛ́li ví lɛ́ɛ ɖɔ nú Mɔyízi ɖɔ: “A mɔ ɖɔ mǐ ɖo kúkú wɛ a cé? A mɔ ɖɔ mǐ mɛ bǐ ɖo dindɔn wɛ a cé? Mɛ ɖěbǔ sɛkpɔ́ nɔtɛn Mawu Mavɔmavɔ tɔn ɔ́, mɛ ɔ́ nɔ́ kú. Mɔ̌ wɛ mǐ mɛ bǐ ná kú gbɔn a?” Mawu Mavɔmavɔ ɖɔ nú Aalɔ́ɔn ɖɔ: “Bɛ́ sín din ɔ́, è wa nǔɖé nyi do ɖo Goxɔ ɔ́ mɛ ɔ́, hwi kpó vǐ towe lɛ́ɛ kpó, kpódó nɔví towe súnnu e ɖo akɔta Levíi tɔn ɔ́ mɛ lɛ́ɛ kpó wɛ agban tɔn ná kpɛn. Amɔ̌, ényí hwi kpó vǐ towe lɛ́ɛ kpó ɖo vɔ̌sánú-xwlémawutɔ́ sín azɔ̌ mitɔn wa wɛ ɖo Goxɔ ɔ́ mɛ bó wa nǔɖé nyi do ɔ́, hwi kpó vǐ towe lɛ́ɛ kpó wɛ agban tɔn ná kpɛn. A nǎ ylɔ́ nɔví towe súnnu e ɖo akɔta Levíi tɔn ɔ́ mɛ lɛ́ɛ, bɔ yě ná wá gɔ̌n towe. Hwenu e hwi kpó vǐ towe lɛ́ɛ kpó ná ɖo azɔ̌ wa wɛ ɖo Goxɔ ɔ́ nukɔn ɔ́, yě ná xo kpó ɖó nú mi, bo ná wa azɔ̌ xá mi. Mi zɔ́n nǔ ɖěbǔ yě ɔ́, yě ná wa; yě ná nɔ́ wa azɔ̌ e kan Goxɔ ɔ́ lɛ́ɛ bǐ. Lo ɔ́, yě ná sɛkpɔ́ nǔ mímɛ́ lɛ́ɛ ǎ; yě ná sɛkpɔ́ vɔ̌sákpe ɔ́ ǎ; é má nyí mɔ̌ ǎ ɔ́, mi kpó yě kpó bǐ ná kú. Yě ná xo kpó ɖó nú mi, bó ná wa sinsɛnzɔ́ lɛ́ɛ bǐ kpó azɔ̌ e è nǎ wa ɖo Goxɔ ɔ́ mɛ lɛ́ɛ kpó. Mɛ e ma nyí Levíi ví ǎ ɖěbǔ ká ná sɛkpɔ́ mi ǎ. Midɛɛ lɛ́ɛ ká ná nɔ́ wa azɔ̌ e nyí azɔ̌ mitɔn ɔ́ ɖo tɛn mímɛ́ ɔ́ mɛ, bó ná nɔ́ wa ɖo vɔ̌sákpe ɔ́ kɔn, bónú Mawu Mavɔmavɔ ní má sɔ́ sin xomɛ ɖě dó Izlayɛ́li ví lɛ́ɛ ó. Éɖíe! Un ɖe nɔví mitɔn Levíi ví lɛ́ɛ sín Izlayɛ́li ví ɖě lɛ́ɛ mɛ. Yě nyí ce bɔ un sɔ́ yě dó así nú mi, bónú yě ná nɔ́ wa azɔ̌ lɛ́ɛ ɖo Goxɔ ɔ́ mɛ. Amɔ̌, Aalɔ́ɔn, hwɛ kpó vǐ towe lɛ́ɛ kpó ɔ́, mi ná nɔ́ wa vɔ̌sánú-xwlémawutɔ́ zɔ́ ɖo vɔ̌sákpe ɔ́ kɔn, bó ná nɔ́ wa ɖo tɛn mímɛ́ bǐ ɔ́ mɛ, ɖo xɔmɛgbovɔ ɔ́ gúdo. Nyɛ wɛ ná azɔ̌ énɛ́ ɔ́ mi. Ényí mɛ ɖěvo séé sɛkpɔ́ mi ɔ́, é ná kú.” Mawu Mavɔmavɔ ɖɔ nú Aalɔ́ɔn ɖɔ: “Đǒtó mì; un zé nǔníná e Izlayɛ́li ví lɛ́ɛ ɖe ɖó vo nú mì lɛ́ɛ dó así nú we. Un ná yě we; yě ná nyí kanta towe, bó ná nyí kanta vǐ towe lɛ́ɛ tɔn káká sɔ́yi. Nǔ e ná nyí towe ɖo nǔ mímɛ́ titewungbe e è ma dó zo ǎ lɛ́ɛ mɛ é ɖíe: nǔníná jinukún tɔn lɛ́ɛ bǐ, hwɛxɔ́súsú vɔ́ lɛ́ɛ bǐ kpódó hwɛsɔ́kɛmɛvɔ́ lɛ́ɛ kpó. Nǔ énɛ́ lɛ́ɛ e nyí nǔ mímɛ́ titewungbe lɛ́ɛ ná nyí towe, bó ná nyí vǐ towe lɛ́ɛ tɔn. Nǔ e mi ná nɔ́ ɖu lɛ́ɛ nɛ́; súnnu lɛ́ɛ bǐ ná nɔ́ ɖu. A nǎ mɔ nǔ énɛ́ lɛ́ɛ dó mɔ nǔ mímɛ́ titewungbe, bo ná nɔ́ ɖu. Nǔ ɖěvo e ná lɛ́ nyí towe lɛ́ɛ ɖíe: nǔ e è nǎ jɔ ɖo nǔníná e Izlayɛ́li ví lɛ́ɛ ná mì lɛ́ɛ mɛ, bɔ è xwlé mì lě e è nɔ xwlé vɔ̌sánú mì gbɔn lɛ́ɛ ɔ́, bǐ wɛ ná nyí towe, bo ná nyí vǐ towe súnnu kpó nyɔ̌nu kpó tɔn. Sɛ́n ɖé wɛ nyí sɛ́n énɛ́ ɔ́, bó ná nɔ ayǐ káká sɔ́yi. Mɛ e ná nyí mɛ mímɛ́ ɖo xwédo towe mɛ lɛ́ɛ bǐ wɛ ná ɖu. Un ná we nǔ nukɔn tɔn e nyɔ́ ɖo gle yětɔn mɛ bɔ yě wá ná nyɛ Mawu Mavɔmavɔ lɛ́ɛ; nǔ lɛ́ɛ wɛ nyí: ami e nyɔ́ hú ami ɖě lɛ́ɛ bǐ é, vɛ̌ɛn kpó jinukún kpó e nyɔ́ hú ɖě lɛ́ɛ bǐ é. Nǔ énɛ́ lɛ́ɛ e yě ná hɛn wá nú nyɛ Mawu Mavɔmavɔ lɛ́ɛ ná nyí towe. Mɛ e ná nyí mɛ mímɛ́ ɖo xwédo towe mɛ lɛ́ɛ bǐ wɛ ná ɖu. Nǔ e Izlayɛ́li ví lɛ́ɛ ná ɖe ɖó vo nú mì lɛ́ɛ bǐ ná nyí towe. Nukɔngbéví yětɔn súnnu e yě ná xwlé mì lɛ́ɛ kpó kanlin yětɔn lɛ́ɛ sín nukɔngbéví asú e yě ná xwlé mì lɛ́ɛ kpó bǐ wɛ ná nyí towe. Lo ɔ́, a nǎ xɔ gbɛ nú nukɔngbéví yětɔn lɛ́ɛ bǐ, bó ná xɔ nú kanlin yětɔn e nyí kanlin blíblí lɛ́ɛ sín nukɔngbéví lɛ́ɛ. Nabí e è nǎ dó xɔ gbɛ nú vǐ súnnu e ɖó sun ɖokpó ɔ́ wɛ nyí gankwɛ́ atɔ́ɔ́n. Gankwɛ́ e è nɔ zán ɖo sinsɛnxɔ mɛ, bɔ é nɔ́ da glǎmu wǒ ɔ́ wɛ è nǎ zán. Lo ɔ́, a nǎ xɔ gbɛ nú lɛ̌ngbɔ́ kpódó gbɔ̌ kpó sín nukɔngbéví ǎ; è ko ɖe kanlin énɛ́ lɛ́ɛ ɖó vo nú mì. A nǎ kɔn hun yětɔn kɔn nyi vɔ̌sákpe ɔ́ jí, bó ná dó jǒ yětɔn zo, bɔ é ná nyí vɔ̌ e è nɔ dó zo ɔ́; wǎn tɔn nɔ́ nyɔ́ se nú nyɛ Mawu Mavɔmavɔ. Lan yětɔn ná nyí towe lě e akɔ́n lɛ́ɛ kpó asá ɖisíxwé tɔn lɛ́ɛ e yě nǎ xwlé mì lɛ́ɛ ná nyí towe gbɔn é. Nǔníná mímɛ́ e Izlayɛ́li ví lɛ́ɛ ná xwlé mì lɛ́ɛ bǐ ɔ́, un ná yě we, bó ná vǐ towe súnnu kpó nyɔ̌nu kpó; sɛ́n ɖé wɛ nyí sɛ́n énɛ́ ɔ́, bó ná nɔ ayǐ káká sɔ́yi. Akɔ ɖé wɛ é nyí bɔ un jɛ xá hwi kpó kúnkan towe lɛ́ɛ kpó; è ɖǒ nǎ gba gbeɖé ǎ.” Mawu Mavɔmavɔ lɛ́ ɖɔ nú Aalɔ́ɔn ɖɔ: “A nǎ ɖǒ ayǐkúngban ɖě ɖo to ɔ́ mɛ ǎ; kanta ɖěbǔ ná nyí towe ɖo yě mɛ ǎ; nyɛ wɛ nyí kanta towe, bó nyí nǔ e ná nyí towe ɖo Izlayɛ́li ví lɛ́ɛ tɛ́ntin é.” Mawu Mavɔmavɔ lɛ́ ɖɔ nú Aalɔ́ɔn ɖɔ: “Un ná ná nǔ e nyɔ́ ɖo Izlayɛ́li lɛ́ɛ bǐ sín mǎɖówǒ Levíi ví súnnu lɛ́ɛ, ɖó azɔ̌ e wa wɛ yě ɖe ɖo Goxɔ ɔ́ mɛ ɔ́ nu. Izlayɛ́li ví ɖě lɛ́ɛ sɔ́ ná nɔ́ sɛkpɔ́ Goxɔ ɔ́ ǎ; é má nyí mɔ̌ ǎ ɔ́, yě táá hu hwɛ, bó ná kú. Levíi ví lɛ́ɛ kɛ́ɖɛ́ wɛ ná wa sinsɛnzɔ́ ɔ́ ɖo Goxɔ ɔ́ mɛ, bɔ hwɛ e yě ná hu ɖo Goxɔ ɔ́ mɛ lɛ́ɛ ná nɔ kɔ nú yě. Levíi ví lɛ́ɛ ná ɖó gǔ ɖě, akɔta Izlayɛ́li ví lɛ́ɛ tɔn ɖě lɛ́ɛ ɖɔhun ǎ; sɛ́n ɖé wɛ nyí sɛ́n énɛ́ ɔ́, bó ná nɔ ayǐ káká sɔ́yi. Mǎɖówǒ e Izlayɛ́li ví lɛ́ɛ ná ɖe ɖó vo nú mì lɛ́ɛ wɛ un ná Levíi ví lɛ́ɛ. Énɛ́ ɔ́ wú wɛ un ɖɔ nú yě ɖɔ yě kún ná ɖó gǔ ɖěbǔ ɖo Izlayɛ́li ví lɛ́ɛ tɛ́ntin ó.” Mawu Mavɔmavɔ ɖɔ nú Mɔyízi ɖɔ é ní ɖɔ nú Levíi ví lɛ́ɛ ɖɔ: “Hwenu e mi ná yí mǎɖówǒ e Izlayɛ́li ví lɛ́ɛ ná ná, bɔ un ná mi bɔ é nyí kanta mitɔn ɔ́, mi lɔmɔ̌ ná ɖe mǎɖówǒ ɖo mǎɖówǒ énɛ́ lɛ́ɛ mɛ, bó xwlé nyɛ Mawu Mavɔmavɔ. Bɔ nǔníná mitɔn lɛ́ɛ ná cí ée nɔví mitɔn Izlayɛ́li ví ɖě lɛ́ɛ nɔ́ ɖe ɖo jinukún yětɔn kpó vɛ̌ɛn yɔ̌yɔ́ yětɔn kpó mɛ, bó nɔ́ xwlé nyɛ Mawu Mavɔmavɔ ɔ́ ɖɔhun. Lě e mi lɔ ná hɛn nǔníná mitɔn lɛ́ɛ wá nú nyɛ Mawu Mavɔmavɔ gbɔn ɔ́ nɛ́. Mi ná ɖe ɖo mǎɖówǒ e nɔví mitɔn lɛ́ɛ hɛn wá nú mì lɛ́ɛ mɛ, bó ná zé nú vɔ̌sánú-xwlémawutɔ́ Aalɔ́ɔn, bɔ é ná xwlé mì. Nǔ e è nǎ ná mi lɛ́ɛ bǐ mɛ ɔ́, ée nyɔ́ hú ɖě lɛ́ɛ bǐ sésé lɛ́ɛ mɛ wɛ mi ná ɖe ɖe, bɔ è nǎ sɔ́ ɖó vo nú mì. A nǎ lɛ́ ɖɔ nú yě ɖɔ: ‘Nú mi ɖe éé ná ná Mawu Mavɔmavɔ wɛ mi ɖe lɛ́ɛ ɔ́, éé kpo ɔ́ ná nyí mitɔn, lě e nɔví mitɔn ɖě lɛ́ɛ ná mǎɖówǒ yětɔn lɛ́ɛ ɔ́, jinukún e kpo ɔ́ kpó vɛ̌ɛn e kpo ɔ́ kpó nɔ́ nyí yětɔn gbɔn é. Mi kpó xwédo mitɔn kpó ná ɖu ɖo fí e jló mi é, ɖó axɔ́ e è sú mi ɖó azɔ̌ e mi wa ɖo Goxɔ ɔ́ mɛ ɔ́ nu ɔ́ nɛ́. Mi ɖe éé nyɔ́ hú ɖě lɛ́ɛ bǐ ɔ́ nú Mawu Mavɔmavɔ hwɛ̌ cóbó ɖu ée kpo ɔ́; é ná nyí hwɛ bɔ mi ná hu ǎ, é ká ná nyí su bɔ mi ɖu nú nǔníná mímɛ́ e Izlayɛ́li ví lɛ́ɛ ná lɛ́ɛ é ǎ; mi ka ná kú ǎ.’ ” Mawu Mavɔmavɔ ɖɔ xó nú Mɔyízi kpó Aalɔ́ɔn kpó. É ɖɔ yɛsu e sɛ́n ɔ́ zɔ́n ɖɔ è nǐ fɔ lɛ́ɛ nú yě; é ɖɔ: “Mi ɖɔ nú Izlayɛ́li ví lɛ́ɛ ɖɔ yě ní hɛn nyibú asi vɔvɔ ɖokpó wá nú mì; é ná ɖó blɔ̌ ɖěbǔ ǎ; è ka ná kó sin mɔ e è nɔ dó lɛ gle ná ɔ́ dó kɔ n'i kpɔ́n ǎ. Mi ná zé nyibú ɔ́ nú vɔ̌sánú-xwlémawutɔ́ Eleazáa, bɔ é ná dɔn ɛ tɔ́n sín fí e mi ɖó gɔnu ɖó é, bɔ è nǎ gbo gbe e ɖo nukún tɔn mɛ. Bɔ vɔ̌sánú-xwlémawutɔ́ Eleazáa ná sɔ́ alɔví dó nyibú ɔ́ sín hun mɛ, bó ná mì azɔn tɛ́nwe sɛ́ dó Goxɔ ɔ́ li nu. Énɛ́ ɔ́ gúdo ɔ́, è nǎ fyɔ́ nyibú ɔ́ ɖo nukún tɔn mɛ: è nǎ dó anyǔ tɔn kpó lan tɔn kpó hun tɔn kpó, kpódó mǐ tɔn kpó zo. Vɔ̌sánú-xwlémawutɔ́ ɔ́ ná zé sɛ́dlukpo kpó izɔ́puma kpó, kpódó avɔ vɔvɔ cɛ́cɛ́ kpó, bó ná bɛ́ yě kɔn nyi myɔ e mɛ è ɖo nyibú ɔ́ fyɔ́ ɖe wɛ ɔ́ mɛ. Énɛ́ ɔ́ gúdo ɔ́, vɔ̌sánú-xwlémawutɔ́ ɔ́ ná nya avɔ tɔn lɛ́ɛ, bó ná lɛ wǔ, cóbó ná byɔ́ fí e mi ɖó gɔnu ɖó ɔ́. É ná nyí mɛ blíblí káká jɛ gbadanu. Mɛ e ná fyɔ́ nyibú asi ɔ́ ná nya avɔ tɔn lɛ́ɛ, bó ná lɛ wǔ, bó ná nyí mɛ blíblí káká jɛ gbadanu. Súnnu e nyí mɛ mímɛ́ ɔ́ ɖokpó ná bɛ́ nyibú asi ɔ́ sín afín, bó ná ɖe sín fí e Izlayɛ́li ví lɛ́ɛ ɖó gɔnu ɖó ɔ́, bó ná kɔn nyi tɛn mímɛ́ ɖé mɛ; è nǎ zé afín énɛ́ ɔ́ ɖ'ayǐ nú Izlayɛ́li ví lɛ́ɛ, bɔ yě ná dó bló wǔsláslá sin ná. Yɛsu énɛ́ ɔ́ cí hwɛsɔ́kɛmɛ sín yɛsu ɖɔhun, bɔ è nɔ fɔ. Mɛ e ná bɛ́ nyibú ɔ́ sín afín ɔ́ ná nya avɔ tɔn lɛ́ɛ, bó ká ná nyí mɛ blíblí káká jɛ gbadanu. Sɛ́n ɖé wɛ sɛ́n énɛ́ ɔ́ nyí, bó ná ɖo te káká sɔ́yi nú Izlayɛ́li ví lɛ́ɛ kpó jǒnɔ e ɖo yě mɛ lɛ́ɛ kpó.” Mawu Mavɔmavɔ lɛ́ ɖɔ: “Mɛ e ná ɖó alɔ cyɔ wú ɔ́ ná nyí mɛ blíblí xɔ azǎn tɛ́nwe. Azǎn atɔngɔ́ ɔ́ kpó tɛ́nwegɔ́ ɔ́ kpó gbe ɔ́, mɛ ɔ́ ná mì wǔsláslá sin ɔ́ dó wǔ dó slá wǔ, bó ná nyí mɛ mímɛ́. Lo ɔ́, nú mɛ ɔ́ má mì sin ɔ́ dó wǔ dó slá wǔ ɖo azǎn énɛ́ lɛ́ɛ gbe ǎ ɔ́, é ná nyí mɛ mímɛ́ ǎ. Mɛ e ná ɖó alɔ cyɔ wú, bó má ná mì sin énɛ́ ɔ́ dó wǔ dó slá wǔ ǎ ɔ́, mɛ ɔ́ ná ɖu su nú nɔtɛn Mawu Mavɔmavɔ tɔn; è nǎ ɖe mɛ ɔ́ sín togun Izlayɛ́li tɔn ɔ́ mɛ. È ma ko mì wǔsláslá sin ɔ́ dó wǔtu tɔn ǎ ɔ́, mɛ ɔ́ kpo ɖo mɛ blíblí nyí wɛ, bɔ nǔblíblí e é wa ɔ́ kpo ɖo te. “Sɛ́n ɔ́ ɖěvo ɖíe: ényí gbɛtɔ́ kú ɖo Goxɔ ɖé mɛ ɔ́, mɛ e ná byɔ́ Goxɔ énɛ́ ɔ́ mɛ ɔ́ kpó mɛ e kó ɖ'é mɛ ɔ́ kpó ná nyí mɛ blíblí xɔ azǎn tɛ́nwe. Zɛ̌n abǐ gannú ɖé ɖo fínɛ́ bɔ è ma sú ganjí ǎ ɔ́, nǔ e ɖ'é mɛ ɔ́ húzú nǔ blíblí. Ényí mɛɖé ɖo zunkan mɛ gbɔn wɛ, bó ɖó alɔ mɛ e è hu, abǐ mɛ e nɔ é ɖóɖó bó kú ɔ́ ɖě sín cyɔ wú ɔ́, mɛ ɔ́ ná nyí mɛ blíblí xɔ azǎn tɛ́nwe; mɔ̌ ɖokpó ɔ́, ényí mɛɖé ɖó alɔ gbɛtɔ́ xú wú, abǐ yɔdo wú ɔ́, mɛ ɔ́ ná nyí mɛ blíblí xɔ azǎn tɛ́nwe. Nú è nǎ slá wǔ nú mɛ blíblí ɔ́, è nǎ wún nyibú asi e è dǒ sá hwɛsɔ́kɛmɛvɔ́ ná ɔ́ sín afín bó kɔn dó zɛ̌n abǐ gannú mɛ, bó wún tɔsisa sin d'é jí. Súnnu e nyí mɛ mímɛ́ ɔ́ ɖokpó ná zé izɔ́puma bó sɔ́ dó sin ɔ́ mɛ, bó ná mi dó Goxɔ e mɛ mɛ kú ɖe ɔ́ wú, bó ná mi dó nǔ e ɖo Goxɔ ɔ́ mɛ lɛ́ɛ bǐ wú, bó ná mi dó mɛ e ɖo Goxɔ ɔ́ mɛ lɛ́ɛ bǐ wú, abǐ é ná mi dó mɛ e ɖó alɔ gbɛtɔ́ xú wú é wú, abǐ mɛ e ɖó alɔ cyɔ wú é wú, abǐ mɛ e ɖ'alɔ yɔdo wú é wú. Mɛ e nyí mɛ mímɛ́ ɔ́ ná mì sin ɔ́ dó mɛ e nyí mɛ blíblí ɔ́ wú azǎn atɔngɔ́ ɔ́ kpó azǎn tɛ́nwegɔ́ ɔ́ kpó gbe. Azǎn tɛ́nwegɔ́ ɔ́ gbe wɛ é ná slá wǔ nú mɛ ɔ́ bǐ, bɔ mɛ ɔ́ ná nya avɔ tɔn lɛ́ɛ, bó ná lɛ wǔ, bɔ gbadanu su ɔ́, mɛ ɔ́ ná nyí mɛ mímɛ́. “Súnnu e ná nyí mɛ blíblí, bó má ná slá wǔ ǎ ɔ́, Mɔyízi kpó Aalɔ́ɔn kpó ná ɖe e sín togun Izlayɛ́li tɔn ɔ́ mɛ, ɖó é ɖu su nú Mawu xwé ɔ́. È ma mì wǔsláslá sin ɔ́ dó wǔtu tɔn ǎ ɔ́, é kpo ɖo mɛ blíblí nyí wɛ. “Sɛ́n ɖé wɛ sɛ́n énɛ́ ɔ́ nyí, bó ná nɔ te káká sɔ́yi nú Izlayɛ́li ví lɛ́ɛ. Mɛ e ná mì wǔsláslá sin ɔ́ dó mɛ wú ɔ́, ná nya avɔ tɔn lɛ́ɛ. Mɛ e ka ná ɖó alɔ sin ɔ́ wú ɔ́ ná nyí mɛ blíblí káká jɛ gbadanu. Mɛ e nyí mɛ blíblí ɔ́ ɖó alɔ nǔ ɖěbǔ wú ɔ́, nǔ ɔ́ ná nyí nǔ blíblí. Mɛ ɖěbǔ ɖó alɔ mɛ e nyí mɛ blíblí ɔ́ wú ɔ́, mɛ ɔ́ lɔmɔ̌ ná nyí mɛ blíblí káká jɛ gbadanu.” Izlayɛ́li togun ɔ́ bǐ wǎ gbětótló Síni tɔn ɔ́ mɛ ɖo sun nukɔn tɔn ɔ́ mɛ, bó ɖó gɔnu ɖó Kadɛ́ci. Kadɛ́ci fínɛ́ wɛ Miliamu kú ɖe, bɔ è ɖi i ɖó fínɛ́. Togun ɔ́ mɔ sin ǎ, bɔ mɛ lɛ́ɛ fɔ́n gǔ dó Mɔyízi kpó Aalɔ́ɔn kpó jí. Togun Izlayɛ́li tɔn ba xó Mɔyízi nu, bó ɖɔ n'i ɖɔ: “Hwenu e Mawu Mavɔmavɔ ɖo nǔ wa xá nɔví mǐtɔn lɛ́ɛ wɛ bɔ yě ɖo kúkú wɛ ɔ́, mǐ lɔ gbɔ bo kú yě ɖɔhun ɔ́, é ná kó nyɔ́ hú! Aniwú wɛ mi kplá togun Mawu Mavɔmavɔ tɔn ɔ́ wá gbětótló mɛ fí, bɔ mǐ ná kú jɛ fí, mǐ kpó kanlin mǐtɔn lɛ́ɛ kpó? Nɛ̌ gbɔn bɔ mi kplá mǐ sín Ejípu wá tɛn nyanya élɔ́ mɛ fí? È sixú dó nǔ ɖěbǔ ɖó fí ǎ; fígitín ɖě ɖo fí ǎ, vǐwungbo ɖě ɖo fí ǎ, glenáditín ɖě ɖo fí ǎ, sin nunu ka lɛ́ ɖo fí ǎ.” Ée Izlayɛ́li ví lɛ́ɛ ɖɔ mɔ̌ ɔ́, Mɔyízi kpó Aalɔ́ɔn kpó sɛ yi zɔ nú yě, bó yi Goxɔ ɔ́ nukɔn, bó xwe agbɔ̌nnusú do; éé yě bló mɔ̌ ɔ́, susu Mawu Mavɔmavɔ tɔn tɔ́n dó yě jí. Bɔ Mawu Mavɔmavɔ ɖɔ nú Mɔyízi ɖɔ: “Zě kpo towe. Hwi kpó nɔví towe Aalɔ́ɔn kpó ní kplé Izlayɛ́li ví lɛ́ɛ. Mi ná ɖɔ xó nú só élɔ́ ɖo nukún yětɔn mɛ, bɔ é ná ná sin mi. A nǎ ɖe sin tɔ́n sín só ɔ́ mɛ nú yě, bó ná ná sin yě kpó kanlin yětɔn lɛ́ɛ kpó.” Ée Mawu Mavɔmavɔ ɖɔ mɔ̌ ɔ́, Mɔyízi yi Goxɔ ɔ́ mɛ, bó zé kpo tɔn lě e Mawu Mavɔmavɔ ɖɔ gbɔn n'i é. Énɛ́ ɔ́, Mɔyízi kpó Aalɔ́ɔn kpó ylɔ́ Izlayɛ́li ví lɛ́ɛ kplé ɖó só ɔ́ nukɔn, bɔ Mɔyízi ɖɔ nú yě ɖɔ: “Gǔfɔ́ntɔ́ e mi, mi ɖótó! Mǐ nǎ sixú kpé wú bó ɖe sin tɔ́n sín só élɔ́ mɛ nú mi a?” Ée Mɔyízi kan mɔ̌ byɔ́ yě ɔ́, é zé alɔ yi jǐ, bó zin kpo tɔn dó só ɔ́ wú azɔn we, bɔ sin jɛ tíntɔ́n sín só ɔ́ mɛ jí, bó sukpɔ́ ɖésú. Énɛ́ ɔ́, Izlayɛ́li ví lɛ́ɛ nu, bɔ kanlin yětɔn lɛ́ɛ lɔmɔ̌ nu. Bɔ Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Mi ɖeji dó wǔ ce ǎ, mi ɖe mǐmɛ́ e un nyí ɔ́ xlɛ́ ɖo Izlayɛ́li ví lɛ́ɛ nukún mɛ ǎ; énɛ́ ɔ́ wú ɔ́, midɛɛ lɛ́ɛ sɔ́ ná kplá togun élɔ́ yi to e un ná yě ɔ́ mɛ ǎ.” Nǔ énɛ́ e jɛ ɔ́ wú wɛ è nɔ ylɔ́ sin énɛ́ ɔ́ ɖɔ Mɛliba sin. Đó Izlayɛ́li ví lɛ́ɛ ba xó Mawu Mavɔmavɔ nu, bɔ Mawu Mavɔmavɔ ka sɔ́ nǔ énɛ́ dó ɖe mǐmɛ́ e é nyí ɔ́ xlɛ́. Mɔyízi nɔ Kadɛ́ci bo sɛ́ mɛ dó axɔ́sú Edɔ́mu tɔn ɔ́. É ɖɔ sɛ́ dó e ɖɔ: “Đǒtó xó e ɖɔ wɛ mǐ nɔví towe Izlayɛ́li ví lɛ́ɛ ɖe é; a tunwun wǔvɛ́ e mǐ mɔ lɛ́ɛ bǐ. Tɔ́gbó mǐtɔn lɛ́ɛ yi Ejípu ɖ'ayǐ, bɔ mǐ nɔ fínɛ́ ɖésú. Ejípunu lɛ́ɛ dó ya nú mǐ, yě dǒ ya nú tɔ́gbó mǐtɔn lɛ́ɛ kpó mǐ kpó. Mǐ ká sú xó ylɔ́ Mawu Mavɔmavɔ ɖɔ é ní wá dó alɔ mǐ, bɔ é sɔ nú mǐ, bó sɛ́ wɛnsagun ɖokpó dó, bó ɖe mǐ tɔ́n sín Ejípu. Toxo Kadɛ́ci e ɖo to towe sín dogbó jí ɔ́ mɛ wɛ mǐ ɖe din. Kɛnklɛ́n ná gbe mǐ, bónú mǐ ná gbɔn to towe mɛ dín; mǐ ná gbɔn gle lɛ́ɛ mɛ ǎ; mǐ nǎ gbɔn vǐwungbo lɛ́ɛ mɛ ǎ, mǐ nǎ nu dotɔ lɛ́ɛ sín sin ǎ. Axɔ́sú li ɔ́ wɛ mǐ ná wlí; mǐ ná zɛ dó ɖisí abǐ amyɔ káká có bó gbɔn to towe mɛ dín ǎ.” Axɔ́sú Edɔ́mu tɔn ɔ́ ká ɖɔ sɛ́ dó Mɔyízi ɖɔ: “Mi ná gbɔn to ce mɛ dín ǎ; ényí mi ka tɛ́nkpɔ́n ɔ́, un ná fun ahwan xá mi.” Izlayɛ́li ví lɛ́ɛ ká ɖɔ n'i ɖɔ: “Axɔ́sú li ɔ́ kɛ́ɖɛ́ jí wɛ mǐ ná gbɔn. Ényí mǐ kpó kanlin mǐtɔn lɛ́ɛ kpó nu sin ɖo to towe mɛ ɔ́, mǐ nǎ sú axɔ́ tɔn we. Nǔ e byɔ́ we wɛ mǐ ɖe kpowun ɔ́ wɛ nyí ɖɔ a nǐ ná gbe mǐ, bónú mǐ nǎ gbɔn to towe mɛ dín.” Axɔ́sú ɔ́ lɛ́ gbɛ́, bó ɖɔ: “Mi ná gbɔn to ce mɛ dín ǎ.” Ée axɔ́sú ɔ́ ɖɔ mɔ̌ ɔ́, Edɔ́munu lɛ́ɛ sɔ́ ahwannú, bó nyi ahwan hooo, bó wá kpé Izlayɛ́li ví lɛ́ɛ, bó gbo ali nú yě ɖɔ yě kún ná gbɔn to émítɔn mɛ dín ó. Énɛ́ ɔ́, Izlayɛ́li ví lɛ́ɛ wlí ali ɖěvo. Izlayɛ́li ví lɛ́ɛ bǐ gosín Kadɛ́ci toxo ɔ́ mɛ, bó yi Hɔ́ɔ só ɔ́ kɔn, ɖo Edɔ́mu to ɔ́ sín dogbó jí. Mawu Mavɔmavɔ ɖɔ nú Mɔyízi kpó Aalɔ́ɔn kpó ɖo fínɛ́ ɖɔ: “Aalɔ́ɔn ná kú ɖo malín málín mɛ, é sɔ́ ná byɔ́ to e un ná Izlayɛ́li ví lɛ́ɛ ɔ́ mɛ ǎ, ɖó mi se tónú nú mì ɖo Mɛliba sin ɔ́ kɔn ǎ. Hǔn Mɔyízi, kplá Aalɔ́ɔn kpó vǐ tɔn súnnu Eleazáa ɔ́ kpó yi Hɔ́ɔ só ɔ́ jí. Đe vɔ̌sánú-xwlémawutɔ́ wu lɛ́ɛ sín kɔ tɔn bo dó nú vǐ tɔn Eleazáa. Fínɛ́ wɛ sɛ́ ná ɖó zan nú Aalɔ́ɔn ɖe.” Mɔyízi bló nǔ e Mawu Mavɔmavɔ ɖɔ n'i é; yě yi Hɔ́ɔ só ɔ́ jí ɖo togun ɔ́ bǐ nukún mɛ. Bɔ Mɔyízi ɖe awu lɛ́ɛ sín kɔ nú Aalɔ́ɔn bo dó nú vǐ tɔn Eleazáa. Aalɔ́ɔn kú ɖo só ɔ́ jí fínɛ́, bɔ Mɔyízi kpó Eleazáa kpó jɛ te sín só ɔ́ jí. Izlayɛ́li ví lɛ́ɛ mɔ ɖɔ Aalɔ́ɔn kú, bɔ yě bǐ ví i káká nú azǎn gban (30). Axɔ́sú Aladi tɔn ɔ́, Kanáanu wɛ bó nɔ́ nɔ to ɔ́ sín afɔligbé. É se ɖɔ Izlayɛ́li ví lɛ́ɛ wlí Atalímu sín ali ɔ́ jǎwe. Ée é se mɔ̌ ɔ́, é tɔ́n ahwan Izlayɛ́li ví lɛ́ɛ, bó wlí mɛɖé lɛ́ɛ ɖo yě mɛ. Énɛ́ ɔ́, Izlayɛ́li ví lɛ́ɛ dó akpá nú Mawu Mavɔmavɔ ɖɔ: “Nú a jǒ togun Aladi tɔn ɔ́ nú mǐ ɔ́, mǐ nǎ gba toxo tɔn lɛ́ɛ bǐ hánnyá.” Mawu Mavɔmavɔ ka yí gbe nú akpá e yě dó ɔ́, bó jó Kanáanu énɛ́ lɛ́ɛ nú yě. Bɔ Izlayɛ́li ví lɛ́ɛ sú kún yětɔn dó, bó gba toxo yětɔn lɛ́ɛ hánnyá, bó ylɔ́ tɛn énɛ́ ɔ́ mɛ ɖɔ Hɔ́ɔma. Izlayɛ́li ví lɛ́ɛ gosín Hɔ́ɔ só ɔ́ kɔn, bó wlí Xu Vɔvɔ ɔ́ sín ali, bó ná lɛ́ dó Edɔ́mu to ɔ́. Lo ɔ́, ée yě ɖo ali jí bó ɖo yiyi wɛ ɔ́, yě sɔ́ sixú dɛ ǎ. Bɔ mɛ lɛ́ɛ jɛ nǔ hlún ɖɔ dó Mawu kpó Mɔyízi kpó wú jí ɖɔ: “Aniwú mi ka kplá mǐ tɔ́n sín Ejípu bɔ mǐ ná kú jɛ gbětótló mɛ fí? Đó nǔɖuɖu ɖe ɖo fí ǎ; sin ka ɖe ǎ. Wamamɔnɔ nǔɖuɖu élɔ́ cikɔ nú mǐ.” Ée yě ɖɔ mɔ̌ ɔ́, Mawu Mavɔmavɔ sɛ́ dan aɖǐnɔ dó yě, bɔ dan ɖu Izlayɛ́li ví lɛ́ɛ bɔ gěgé kú. Izlayɛ́li ví e kpo lɛ́ɛ fyá wá Mɔyízi gɔ́n, bó ɖɔ n'i ɖɔ: “Mǐ hu hwɛ, ɖó mǐ hlún nǔ ɖɔ dó Mawu Mavɔmavɔ kpó hwi kpó wú; sa vo nú Mawu Mavɔmavɔ, bónú é ná nya dan énɛ́ lɛ́ɛ dó zɔ nú mǐ.” Ée yě ɖɔ mɔ̌ ɔ́, Mɔyízi jɛ vo sa nú Mawu Mavɔmavɔ jí dó Izlayɛ́li ví lɛ́ɛ tamɛ. Mawu Mavɔmavɔ ka ɖɔ nú Mɔyízi ɖɔ: “Tun dan ɖokpó, bó sɔ́ ɖó kpo nu; ényí dan ɖu mɛ ɖěbǔ, bónú mɛ ɔ́ kpɔ́n dan e ɖo kponu ɔ́, mɛ ɔ́ ná gán.” Ée Mawu Mavɔmavɔ ɖɔ mɔ̌ ɔ́, Mɔyízi zé ganvɔ dó tun dan ɖokpó ná, bó sɔ́ ɖó kpo nu; énɛ́ ɔ́, nú dan ɖu mɛ ɖěbǔ, bónú mɛ ɔ́ kpɔ́n dan e Mɔyízi zé ganvɔ dó tun ná ɔ́, mɛ ɔ́ nɔ́ gán. Izlayɛ́li ví lɛ́ɛ jɛ ali bo yi ɖó gɔnu ɖó Ovɔ́ti. Yě gosín Ovɔ́ti bo yi ɖó gɔnu ɖó Iyé-Avalímu ɖo gbětótló e ɖo zǎnzǎnhwe jí nú Mɔwabu é mɛ. Yě gosín fínɛ́ bó yi ɖó gɔnu ɖó tɔdo Zelɛ́di tɔn mɛ. Yě gosín fínɛ́ bó yi ɖó gɔnu ɖó tɔsisa e è nɔ ylɔ́ ɖɔ Aanɔ́ni ɔ́ gúdo. Aanɔ́ni tɔ ɔ́, Amɔliti lɛ́ɛ sín ayǐkúngban jí wɛ é nɔ́ sa sín yi gbětótló mɛ. É wɛ nyí dogbó e ɖo Mɔwabu kpó Amɔliti ví lɛ́ɛ kpó tɛ́ntin é. Tɔsisa énɛ́ ɔ́ kpó Waxɛ́bu kpó ala tɔn lɛ́ɛ kpó sín xó wɛ è ɖɔ dó wěma e mɛ ahwan e Mawu Mavɔmavɔ fun lɛ́ɛ ɖe ɔ́ mɛ, bó ɖɔ: Waxɛ́bu e ɖo Sufa ɔ́ kpó ala tɔn lɛ́ɛ kpó, tɔsisa Aanɔ́ni kpó ala tɔn lɛ́ɛ kpó. Aanɔ́ni tɔsisa ɔ́ ɖo Áa toxo wa jí, bó nyí dogbó nú Mɔwabu. Yě gosín fínɛ́ bó yi Bɛ̌. Bɛ̌ fínɛ́ wɛ Mawu Mavɔmavɔ ɖɔ xó nú Mɔyízi ɖe ɖɔ: “Kplé togun ɔ́ bónú má ná sin yě.” Hwe énɛ́ ɔ́ nu ɔ́, Izlayɛ́li ví lɛ́ɛ ji han élɔ́: “Sin ní sa sín dotɔ ɔ́ mɛ, bónú awǒbóbó ní mlí. Gǎn lɛ́ɛ wɛ kun dotɔ ɔ́, tonukún lɛ́ɛ wɛ tɔ́n dotɔ ɔ́ kpó gǎnkpogɛ yětɔn kpó.” Yě gosín gbětótló mɛ bó yi Matana toxo ɔ́ mɛ; yě gosín Matana bó yi Naxaliyɛ́li, bó gosín Naxaliyɛ́li bo yi Bamɔ́ti. Yě gosín Bamɔ́ti bo wá yi tɔdo e ɖo Mɔwabu, ɖo Pisiga só ɔ́ kɔn, ɖo gbětótló ɔ́ nukɔn ɔ́ mɛ. Izlayɛ́li ví lɛ́ɛ sɛ́ wɛn dó Sihɔ́ni, axɔ́sú Amɔliti lɛ́ɛ tɔn ɔ́ ɖɔ: “Kɛnklɛ́n nǎ gbe mǐ, bónú mǐ ná gbɔn to towe mɛ dín; mǐ ná gbɔn gle lɛ́ɛ mɛ ǎ, mǐ nǎ gbɔn vǐwungbo lɛ́ɛ mɛ ǎ, mǐ nǎ nu dotɔ lɛ́ɛ sín sin ǎ. Axɔ́súli ɔ́ wɛ mǐ nǎ wlí bó ná gbɔn to towe mɛ dín.” Axɔ́sú Sihɔ́ni ka ná gbe Izlayɛ́li ví lɛ́ɛ ɖɔ yě ní gbɔn to tɔn mɛ ǎ. É kplé togun tɔn lɛ́ɛ bǐ, bó yi kpé Izlayɛ́li ví lɛ́ɛ ɖo gbětótló mɛ. É wá Yaxisa toxo mɛ bo tɔ́n ahwan yě. Izlayɛ́li ví lɛ́ɛ ká ɖu ɖo jǐ tɔn, bó yí toxo tɔn lɛ́ɛ bǐ; yě yí toxo tɔn lɛ́ɛ, bɛ́ sín Aanɔ́ni káká yi Yabɔ́ku, bó yí sín Yabɔ́ku yi Amumɔ́ɔ ví lɛ́ɛ sín dogbó jí, fí e yě mɛ ahohó gbɔn é. Izlayɛ́li ví lɛ́ɛ yí Amɔliti lɛ́ɛ sín toxo ɖaxó ɖaxó lɛ́ɛ bǐ, káká bó yí Hɛcibɔ́ni tota ɔ́ kpódó gletoxo tɔn lɛ́ɛ bǐ kpó, bó ɖó gɔnu ɖó fínɛ́. Hɛcibɔ́ni wɛ nyí Sihɔ́ni, axɔ́sú Amɔliti lɛ́ɛ tɔn ɔ́ sín toxo. Ahwan wɛ é kó fun xá axɔ́sú Mɔwabu tɔn nukɔn tɔn ɔ́, bó yí to tɔn bǐ sín así tɔn káká yi Aanɔ́ni. Énɛ́ ɔ́ wú wɛ xólómílómíɖɔtɔ́ lɛ́ɛ ɖɔ: “Mi wá Hɛcibɔ́ni! È nǐ vɔ́ axɔ́sú Sihɔ́ni sín toxo ɔ́ blóɖó! È nǐ vɔ́ toxo ɔ́ ɖó ayǐ! Đó myɔ ɖé tɔ́n sín Hɛcibɔ́ni, zo ɖé tɔ́n sín axɔ́sú Sihɔ́ni sín toxo ɔ́ mɛ. Myɔ fyɔ́ Áa toxo ɔ́ ɖo Mɔwabu to mɛ, bó fyɔ́ vodún e ɖo Aanɔ́ni tɔ ɔ́ sín kpó jí lɛ́ɛ. Heelú we Mɔwabu! Mi bǐ dɔn, mi mɛ e nɔ sɛn vodún Kemɔci lɛ́ɛ ɔ́, mi bǐ dɔn. Súnnu e gán ɖ'é mɛ lɛ́ɛ kpó nyɔ̌nu kpó bǐ wɛ è wlǐ ahwankannumɔ yětɔn. È wlǐ ahwankannumɔ yětɔn yi jó nú Sihɔ́ni, Amɔliti lɛ́ɛ xɔ́sú ɔ́. Lo ɔ́, mǐ da gǎ Amɔliti lɛ́ɛ. Din ɔ́, mǐ gba Hɛcibɔ́ni toxo ɔ́; to ɔ́ bǐ wɛ mǐ gba hánnyá káká yi Divɔ́ni, bó gba káká yi Nɔfáxi, bo lɛ́ gba káká yi Madaba. Mǐ vívá kún nú nǔ bǐ.” Lě e Izlayɛ́li ví lɛ́ɛ ɖó gɔnu ɖó Amɔliti lɛ́ɛ tomɛ gbɔn ɔ́ nɛ́. Mɔyízi sɛ́ dobanúnǔtɔ́ lɛ́ɛ dó Yazɛ́ɛ toxo ɔ́ mɛ. Énɛ́ ɔ́ gúdo ɔ́, Izlayɛ́li ví lɛ́ɛ yí toxo ɔ́ kpódó gletoxo e lɛ́ lɛ̌ dó e lɛ́ɛ kpó, bó nya Amɔliti lɛ́ɛ sín toxo énɛ́ lɛ́ɛ mɛ. Énɛ́ ɔ́ gúdo ɔ́, Izlayɛ́li ví lɛ́ɛ lɛ́ kɔ sín ali e jí yě ɖe ɔ́, bó wlí Basáni sín ali ɔ́. Bɔ Ɔgu Basáni xɔ́sú ɔ́ tɔ́n kpó togun tɔn bǐ kpó, bó yi kpé Izlayɛ́li ví lɛ́ɛ, bó ná fun ahwan xá yě ɖo Edlɛyi. Bɔ Mawu Mavɔmavɔ ɖɔ nú Mɔyízi ɖɔ: “Ma ɖi xɛsi n'i ó! Un ná jó e nú we; un ná jó é kpó togun tɔn ɔ́ bǐ kpó, kpódó to tɔn kpó nú we. A nǎ wa nǔ xá ɛ lě e a wa nǔ xá Sihɔ́ni, axɔ́sú Amɔliti lɛ́ɛ tɔn e nɔ́ nɔ Hɛcibɔ́ni ɔ́ gbɔn é.” Izlayɛ́li ví lɛ́ɛ ɖu ɖo axɔ́sú Ɔgu kpó vǐ súnnu tɔn lɛ́ɛ kpó, kpó togun ɔ́ bǐ kpó jí. Yě lɔn bɔ mɛ ɖokpó géé hɔn ɖo yě mɛ ǎ, bɔ yě yí to tɔn. Izlayɛ́li ví lɛ́ɛ jɛ ali, bó yi ɖó gɔnu ɖó ayǐkúngban wɛnjɛ e ɖo Mɔwabu lɛ́ɛ jí, ɖo Judɛ́ɛn tɔ ɔ́ gúdo ɖo Jeliko toxo ɔ́ nukɔn. Balaki Sipɔ́ɔ ví ɔ́ mɔ nǔ e Izlayɛ́li ví lɛ́ɛ wa xá Amɔliti lɛ́ɛ é bǐ. Énɛ́ ɔ́, ado ɖaxó ɖé jɛ Mɔwabunu lɛ́ɛ hu jí ɖó lě e togun Izlayɛ́li tɔn ɔ́ sukpɔ́ sɔ é wú, bɔ xɛsi ɖaxó ɖé jɛ yě jǐ ɖo Izlayɛ́li ví lɛ́ɛ nukɔn. Énɛ́ ɔ́, Mɔwabunu lɛ́ɛ ɖɔ nú tomɛxó Madiáani tɔn lɛ́ɛ ɖɔ: “Ahwan wɔ̌buwɔ́bú élɔ́ ná vɔ nǔ e lɛ́ dó mǐ lɛ́ɛ bǐ, lě e nyibú nɔ́ jɛ fí ɖé bó nɔ́ ɖu ama e gbɔn fínɛ́ ɔ́ bǐ é ɖɔhun.” Hwenɛ́nu ɔ́, Balaki, Sipɔ́ɔ ví ɔ́, wɛ nyí Mɔwabu sín axɔ́sú. Balaki sɛ́ mɛ dó Baláamu, Beɔ́ɔ ví ɔ́, ɖo Petɔ́ɔ toxo mɛ. Balaki ɔ́, Efláti tɔ ɔ́ tó wɛ é nɔ́ nɔ, é kpódó mɛ tɔn lɛ́ɛ kpó. É sɛ́ mɛ dó ɖɔ è nǐ yi ɖɔ nú Baláamu ɖɔ: “Togun ɖé ɖíe gosín Ejípu bo wá fí, bó gba kpé to ɔ́ bǐ mɛ e; fí e yě ɖǒ gɔnu ɖó ɔ́ lín dó mǐ ɖěbǔ ǎ. Kɛnklɛ́n bó wá dó alɔ mì; wǎ dó nu togun ɔ́, ɖó é syɛ́n hú mì; nú a yǐ gbe bo dó nu yě ɔ́, afɔ nyɔ́ ɔ́, un sixú ɖu ɖo yě jí, bó ná nya yě sín to ɔ́ mɛ. Đó un tunwun ɖɔ a xo ɖɛ dó mɛɖé jí ɔ́, mɛ ɔ́ nɔ́ mɔ nyɔ̌ná, a dǒ nu mɛɖé ɔ́, é nɔ́ ɖi mɛ ɔ́ wú.” Tomɛxó Mɔwabu tɔn lɛ́ɛ kpó Madiáani tɔn lɛ́ɛ kpó hɛn nǔ e yě ná yi ná nǔkantɔ́ Baláamu é. Yě yi Baláamu gɔ́n bó ɖɔ xó e Balaki ɖɔ lɛ́ɛ n'i. Bɔ Baláamu ɖɔ nú yě ɖɔ: “Mi dɔ́ fí, bónú é kó jɛ sɔ ɔ́, un ná ɖɔ xósin e Mawu Mavɔmavɔ ná ná mì ɔ́ nú mi.” Énɛ́ ɔ́, Mɔwabu sín gǎn lɛ́ɛ nɔ Baláamu gɔ́n. Mawu wǎ Baláamu gɔ́n, bó kanbyɔ́ ɛ ɖɔ: “Mɛ̌ ká nyí mɛ élɔ́ lɛ́ɛ e a yǐ dó xwé towe gbe ɔ́?” Bɔ Baláamu yí gbe nú Mawu ɖɔ: “Balaki Sipɔ́ɔ ví e nyí axɔ́sú Mɔwabu tɔn ɔ́ wɛ sɛ́ yě dó, bó ɖɔ sɛ́ dó mì ɖɔ: ‘Togun ɖé gosín Ejípu bo gba kpé to ɔ́ bǐ mɛ. Kɛnklɛ́n bó wá dó nu i. Nú a yǐ gbe bo dó nu i ɔ́, afɔ nyɔ́ ɔ́, un ná sixú ɖu ɖo jǐ tɔn, bó nya ɛ.’ ” Mawu ká ɖɔ nú Baláamu ɖɔ: “A nǎ xwedó yě yi ǎ; a nǎ dó nu togun ɔ́ ǎ, ɖó un ko xo ɖɛ dó jǐ tɔn.” Ée ayǐ hɔ́n ɔ́, Baláamu ɖɔ nú gǎn e Balaki sɛ́ dó e lɛ́ɛ ɖɔ: “Mi lɛ́ kɔ yi to mitɔn mɛ; Mawu Mavɔmavɔ gbɛ́ nú mì ɖɔ nyɛ ní má xwedó mi yi ó.” Bɔ Mɔwabu sín gǎn lɛ́ɛ lɛ́ kɔ yi Balaki gɔ́n, bó ɖɔ n'i ɖɔ: “Baláamu gbɛ́ ɖɔ émí kún ná xwedó mǐ wá ó.” Balaki ka lɛ́ sɛ́ gǎn ɖěvo lɛ́ɛ dó bɔ yě sukpɔ́ hú mɛ nukɔntɔn lɛ́ɛ, bó lɛ́ nyí gbɛtɔ́ nukúnɖéjí hú yě. Bɔ yě yi Baláamu gɔ́n, bó ɖɔ n'i ɖɔ: “Balaki Sipɔ́ɔ ví ɔ́ sɛ́ mǐ dó ɖɔ mǐ ní ɖɔ nú we ɖɔ mɛɖé ní má gbɛ́ nú we ɖɔ hwi ní má wá émí gɔ́n, bónú a ɖǒtó mɛ ɔ́ ó. É ɖɔ hwi wá ɔ́, émí ná wlí yɛ̌yi nú hwi ɖésú. Émí ná bló nǔ e hwi ná byɔ́ émí lɛ́ɛ bǐ. Hwi ní kɛnklɛ́n wá dó nu togun ɔ́ nú émí.” Baláamu ka ɖɔ nú mɛ e Balaki sɛ́ dó e lɛ́ɛ ɖɔ: “Kpatágan kpó siká kpó ná bo gɔ́ Balaki sín xwé, bónú é ná xwé ɔ́ mì ɔ́, un sixú wa nǔ ɖěbǔ bɔ é ná gbɔn vo nú xó e Mawu Mavɔmavɔ, Mawu ce ɖɔ nú mì ɔ́ ǎ; é sixú nyí nǔ kpɛví, é sixú nyí nǔ ɖaxó, un sixú bló ǎ. Amɔ̌, mi kɛnklɛ́n bó nɔ fí zǎn élɔ́ mɛ; énɛ́ ɔ́, un ná se xó e Mawu Mavɔmavɔ ná lɛ́ ɖɔ nú mì é.” Mawu wǎ Baláamu gɔ́n zǎn mɛ, bó ɖɔ n'i ɖɔ: “Ée é nyí ɖɔ mɛ élɔ́ lɛ́ɛ ɔ́, ylɔ̌ wɛ yě wǎ ylɔ́ we ɔ́, sɔ́ nǔ bó xwedó yě. Amɔ̌, nǔ e un ná ɖɔ nú we ɔ́ wɛ a nǎ bló.” Ée ayǐ hɔ́n ɔ́, Baláamu blá akpa nú tócí tɔn, bó xwedó Mɔwabu sín gǎn lɛ́ɛ ɖidó. Tócí ɔ́, tócí asi wɛ. Mawu sin xomɛ dó Baláamu, ɖó yi e é yi ɔ́ wú, bɔ wɛnsagun Mawu Mavɔmavɔ tɔn ɖokpó cí ali ɔ́ jí, bó ná gbo ali n'i. Baláamu xá tócí tɔn jí, bɔ mɛsɛntɔ́ tɔn we lɛ́ɛ xwedó e. Tócí ɔ́ mɔ wɛnsagun Mawu Mavɔmavɔ tɔn ɔ́ ɖo te ɖo ali jí, bó hɛn hwǐ tɔn alɔ mɛ. Hwǐ ɔ́ sɔ́ ɖo akún mɛ ǎ, bɔ tócí ɔ́ zɛ, bó byɔ́ gběhan mɛ; lo ɔ́, Baláamu xo e bó lɛ́ kɔ n'i wá ali ɔ́ jí. Énɛ́ ɔ́, wɛnsagun Mawu Mavɔmavɔ tɔn yi cí yɛhwín ɖokpó jí ɖo vǐwungbo mɛ, bɔ dǒ ɖo ɖisí amyɔ. Tócí ɔ́ mɔ wɛnsagun Mawu Mavɔmavɔ tɔn ɔ́, bó sɛ dó dǒ ɔ́ wú, bɔ Baláamu sín afɔ glín dó dǒ wú, bɔ Baláamu ka lɛ́ xo e. Wɛnsagun ɔ́ ká lɛ́ jɛ nukɔn nú yě, bó yi cí fí e ján bɔ è ma sixú zɛ dó ɖisíxwé abǐ amyɔxwé ǎ é. Tócí ɔ́ lɛ́ mɔ wɛnsagun ɔ́, bó mlɔ́ ayǐ ɖo gǎn tɔn glɔ́. Ée tócí ɔ́ mlɔ́ ayǐ mɔ̌ ɔ́, Baláamu sin xomɛ ɖésú, bó ɖó kpo n'i. Mawu Mavɔmavɔ bló bɔ tócí ɔ́ jɛ xó ɖɔ jí, bó kanbyɔ́ Baláamu ɖɔ: “Étɛ́ un ka wa nú we bɔ a xo mì azɔn atɔn?” Baláamu ka yí gbe nú tócí ɔ́ ɖɔ: “Nǔ e a wa xá mì ɔ́ wú wɛ un xo we. Nú hwǐ wɛ ɖo alɔ ce mɛ ɔ́, un ná kó hu we xóxó!” Tócí ɔ́ ká ɖɔ nú Baláamu ɖɔ: “Tócí towe wɛ un nyí bɔ a nɔ xá káká wá jɛ égbé a cé? Un nɔ ko bló mɔ̌ ɖě ɖ'ayǐ wɛ a?” Bɔ Baláamu yí gbe n'i ɖɔ: “Éeǒ!” Hwenɛ́nu ɔ́, Mawu Mavɔmavɔ hun nukún nú Baláamu bɔ é mɔ wɛnsagun ɔ́ ɖo te ɖo ali ɔ́ jí, bó hɛn hwǐ tɔn alɔ mɛ. Ée é mɔ mɔ̌ tlóló ɔ́, é xwe agbɔ̌nnusú do. Bɔ Mawu Mavɔmavɔ kanbyɔ́ ɛ ɖɔ: “Nɛ̌ ka gbɔn bɔ a xo tócí towe azɔn atɔn? Ali wɛ un wá gbo nú we, ɖó un mɔ ɖɔ to élɔ́ e mɛ a xwe ɔ́, dindɔn gbé wɛ a xwe. Azɔn atɔn wɛ tócí ɔ́ mɔ mì bó lɛ́ kɔ sín nukɔn ce. Nú é má nɔ́ lɛ́ kɔ sín nukɔn ce ǎ ɔ́, un ná ko hu we, bó ná jó éyɛ́ dó nyi gbɛ.” Baláamu ɖɔ nú wɛnsagun Mawu Mavɔmavɔ tɔn ɔ́ ɖɔ: “Un hu hwɛ, ɖó un tunwun ɖ'ayǐ ɖɔ a ɖo nukɔn ce ɖo ali ɔ́ jí ǎ; din ɔ́, nú a ma jló ɖɔ má yi to ɔ́ mɛ ǎ ɔ́, un ná lɛ́ kɔ yi xwé.” Wɛnsagun ɔ́ ɖɔ nú Baláamu ɖɔ: “Ma lɛ́ kɔ yi xwé ó; xwedó nya lɛ́ɛ yi, amɔ̌, xó e un ná ɖɔ nú we lɛ́ɛ kɛ́ɖɛ́ wɛ a nǎ vɔ́ ɖɔ.” Énɛ́ ɔ́, Baláamu lɛ́ jɛ ali xwedó gǎn e Balaki sɛ́ dó lɛ́ɛ. Balaki se ɖɔ Baláamu jǎwe, bó tɔ́n yi kpé e ɖo káká Mɔwabu sín toxo e ɖo Aanɔ́ni tɔ ɔ́ tó, ɖo to ɔ́ sín dogbó jí e mɛ. Ée Balaki mɔ Baláamu ɔ́, é kanbyɔ́ ɛ ɖɔ: “Un sɛ́ wɛn dó we ɖ'ayǐ ɖɔ hwi ní wá gɔ̌n ce a cé? Nɛ̌ ka gbɔn bɔ a ma wá ǎ? Hǔn a tunwun ɖɔ un kpé wú bó ná wlí yɛ̌yi nú we a cé?” Baláamu ká ɖɔ n'i ɖɔ: “Nyɛ ɖíe wá e. Un ka ɖó acɛ e ɖɔ xó e jló mì ɔ́ ǎ. Xó e Mawu ná sɔ́ dó nu nú mì ɔ́ wɛ un ná ɖɔ.” Baláamu xwedó Balaki, bɔ yě yi Kiliyati-Usɔ́ti toxo mɛ. Balaki zé nyibú kpó gbɔ̌ kpó dó sá vɔ̌ ná, bó sɛ́ ɖě dó Baláamu kpó gǎn e xwedó e lɛ́ɛ kpó. Ayǐhɔ́ngbe zǎnzǎn ɔ́, Balaki kplá Baláamu, bɔ yě fán kpó yi Bamɔ́ti-Baalu toxo mɛ, bɔ Baláamu mɔ togun ɔ́ hǎbǔ ɖo fínɛ́. Baláamu ɖɔ nú Balaki ɖɔ: “Mɛ vɔ̌sákpe tɛ́nwe ɖó fí nú mì, bó hɛn nyibúsú tɛ́nwe kpódó agbo tɛ́nwe kpó wá nú mì.” Balaki bló nǔ e Baláamu ɖɔ é; énɛ́ ɔ́, Balaki kpó Baláamu kpó sɔ́ nyibúsú ɖokpó ɖokpó, agbo ɖokpó ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí. Baláamu ɖɔ nú Balaki ɖɔ: “Nɔ vɔ̌ towe kɔn fí, nú nyɛ má yi nɔ zɔ. Afɔ nyɔ́ ɔ́, Mawu Mavɔmavɔ sixú wá ɖe éɖée xlɛ́ mì. Énɛ́ ɔ́, un ná ɖɔ xó e é ná ɖɔ nú mì ɔ́ nú we.” Ée Baláamu ɖɔ mɔ̌ ɔ́, é yi xá só kpɛví ɖé jí, bɔ Mawu wá ɖe éɖée xlɛ́ ɛ ɖo fínɛ́, bɔ Baláamu ɖɔ n'i ɖɔ: “Un mɛ vɔ̌sákpe tɛ́nwe lɛ́ɛ, bó sɔ́ nyibúsú ɖokpó, agbo ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí.” Mawu Mavɔmavɔ ka ɖɔ xó e Baláamu ɖó ná ɖɔ lɛ́ɛ n'i. Énɛ́ ɔ́ gúdo ɔ́, é ɖɔ n'i ɖɔ ní lɛ́ kɔ yi Balaki gɔ́n, bó yi ɖɔ xó e émí ɖɔ n'i ɔ́ n'i. Baláamu ka lɛ́ kɔ yi Balaki gɔ́n nǔgbó, bó mɔ ɛ ɖo vɔ̌ tɔn kɔn, é kpó Mɔwabu sín gǎn lɛ́ɛ bǐ kpó. Bɔ Baláamu ɖɔ xó e Mawu Mavɔmavɔ ɖɔ n'i lɛ́ɛ; é ɖɔ: “Balaki wɛ ylɔ́ mì sín Silíi wá; axɔ́sú Mɔwabu tɔn Balaki wɛ ylɔ́ mì sín só ɖaxó zǎnzǎnhwe jí tɔn lɛ́ɛ jí wá. É ɖɔ nú mì ɖɔ: ‘Wǎ dó nu Jakɔ́bu nú mì! Wǎ gblɔ́n adǎn nú Izlayɛ́li nú mì!’ Nɛ̌ un ka ná dó nu mɛ e Mawu má dó nu ǎ é gbɔn? Mawu Mavɔmavɔ gblɔ́n adǎn nú Izlayɛ́li ǎ, bɔ nyɛ ka ná gblɔ́n adǎn n'i a? Un ɖo awǐnnya jí aga bo ɖo togun ɔ́ mɔ sɛ́ dó wɛ. Un ɖo só jí aga bo ɖo togun ɔ́ kpɔ́n sɛ́ dó wɛ. Togun ɖé wɛ bó ɖo vo. É ɖo akɔta ɖě lɛ́ɛ mɛ ǎ. Mɛ̌ ká sixú xa Jakɔ́bu ví wɔ̌buwɔ́bú énɛ́ lɛ́ɛ, bó ná ɖɔ mɛ nabí e ɛnɛvlɔ́ɖó Izlayɛ́li ví lɛ́ɛ tɔn nyí é? Un byɔ́ ɖɔ má kú kú e hwɛjijɔnɔ lɛ́ɛ kú é. Un byɔ́ ɖɔ gbɛzán ce ní fó yědɛɛ lɛ́ɛ tɔn ɖɔhun.” Balaki ɖɔ nú Baláamu ɖɔ: “Étɛ́ a ka wa nú mì nɛ́? A nǎ dó nu kɛntɔ́ ce lɛ́ɛ wú wɛ un kplá we wá fí, bɔ a ka jɛ ɖɛ xo dó yě jí jí a?” Baláamu ka kanbyɔ́ ɛ ɖɔ: “Xó e Mawu Mavɔmavɔ ɖɔ nú mì ɔ́ kɛ́ɖɛ́ wɛ un ɖó ná nɔ́ ɖɔ a cé?” Balaki lɛ́ yí xó, bó ɖɔ: “Wǎ nú mǐ nǎ yi tɛn ɖěvo mɛ; a nǎ mɔ Izlayɛ́li ví lɛ́ɛ bǐ ɖo fínɛ́. Fí élɔ́ e mǐ ɖe ɔ́, Izlayɛ́li ví lɛ́ɛ hǎbǔ jɛ́n mɔ wɛ a ɖe. Nú mǐ jɛ fí ɔ́, a nǎ dó nu yě nú mì.” Ée Balaki ɖɔ mɔ̌ ɔ́, é kplá Baláamu yi káká Sofimu sín gle ɔ́ mɛ, ɖo Pisiga kpó ɔ́ ta. É mɛ vɔ̌sákpe tɛ́nwe ɖó fí énɛ́ lɔmɔ̌, bó sɔ́ nyibúsú ɖokpó, agbo ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí. Baláamu ɖɔ nú Balaki ɖɔ: “Nɔ vɔ̌ towe kɔn fí, nú nyɛ má yi ɖótó Mawu.” Mawu Mavɔmavɔ wá ɖe éɖée xlɛ́ Baláamu, bó ɖɔ xó e é ɖó ná ɖɔ lɛ́ɛ n'i. Énɛ́ ɔ́ gúdo ɔ́, é ɖɔ n'i ɖɔ é ní lɛ́ kɔ yi Balaki gɔ́n, bó ɖɔ xó e émí ɖɔ n'i ɔ́ n'i. Baláamu lɛ́ kɔ yi Balaki gɔ́n nǔgbó, bó mɔ ɛ ɖo vɔ̌ tɔn kɔn, é kpódó Mɔwabu sín gǎn lɛ́ɛ bǐ kpó. Bɔ Balaki kanbyɔ́ ɛ ɖɔ: “Xó tɛ́ Mawu Mavɔmavɔ ɖɔ?” Bɔ Baláamu ɖɔ xó e Mawu Mavɔmavɔ ɖɔ n'i é ɖɔ: “Balaki, sí te, ɖǒtó mì! Sipɔ́ɔ ví, ɖǒtó mì ganjí! Mawu nyí gbɛtɔ́ bó ná ɖó adingban ǎ. É nyí gbɛtɔ́ví, bó ná lɛ́ kɔ sín nǔ e ná wa wɛ é ɖe ɔ́ gúdo ǎ. Nǔ e é ɖɔ ɔ́, é ná bló ɖ'é jí a cé? Xó e é ɖɔ ɔ́, é ná bló ɖ'é jí a cé? Mawu Mavɔmavɔ wɛ ná gbe mì ɖɔ má xo ɖɛ dó togun ɔ́ jí. Mawu Mavɔmavɔ wɛ xo ɖɛ dó togun ɔ́ jí. Un sixú ɖyɔ́ nǔ ɖěbǔ ɖ'é mɛ ǎ. Mawu Mavɔmavɔ mɔ hwɛ ɖě ɖo Jakɔ́bu ví lɛ́ɛ tɛ́ntin ǎ. É mɔ tagba ɖěbǔ ɖo Izlayɛ́li ví lɛ́ɛ tɛ́ntin ǎ. Mawu Mavɔmavɔ, Mawu yětɔn ɖo kpɔ́ xá yě. É wɛ nyí axɔ́sú Izlayɛ́li togun ɔ́ tɔn. É wɛ nyí axɔ́sú e yě bǐ nɔ́ kpa awǒbóbó ná é. Mawu wɛ ɖe yě tɔ́n sín Ejípu. Hlɔ̌nhlɔ́n agbo tɔn wɛ é dó ɖe yě tɔ́n. Bǒ sixú kpé Jakɔ́bu ví lɛ́ɛ wú ǎ Vodún sixú wa nǔ ɖěbǔ nú yě ǎ. Hwe tɔn nu ko wá su ɔ́, è nǎ ɖɔ nǔ e Mawu wa ɔ́ nú yě. Togun ɖé wɛ bó sí te kinnikínní asi ɖɔhun. É nɔ te kinnikínní ɖɔhun. É má vún kanlin e é hu ɔ́ ɖu ǎ ɔ́, é nɔ́ mlɔ́ ayǐ ǎ. É má nu kanlin e é wlí ɔ́ sín hun ǎ ɔ́, é nɔ́ mlɔ́ ayǐ ǎ.” Balaki ɖɔ nú Baláamu ɖɔ: “Ényí a ma ná dó nu yě ǎ hǔn, bó ma sɔ́ xo ɖɛ ɖě dó yě jí ó.” Bɔ Baláamu ɖɔ n'i ɖɔ: “Un ma ka ko ɖɔ nú we ɖ'ayǐ ɖɔ nǔ e Mawu Mavɔmavɔ ɖɔ nyɛ ní wa lɛ́ɛ bǐ wɛ un ná wa a?” Balaki ka ɖɔ nú Baláamu ɖɔ: “Bo wá nú má lɛ́ kplá we yi tɛn ɖěvo mɛ. Afɔ nyɔ́ ɔ́, Mawu sixú yí gbe ɖɔ a nǐ dó nu togun élɔ́ nú mì ɖo fínɛ́.” Ée Balaki ɖɔ mɔ̌ ɔ́, é kplá Baláamu yi Peɔ́ɔ só ɔ́ ta, ɖo akpáxwé e kpan nukɔn gbětótló é mɛ. Baláamu ɖɔ nú Balaki ɖɔ: “Mɛ vɔ̌sákpe tɛ́nwe ɖó fí nú mì, bó hɛn nyibúsú tɛ́nwe kpódó agbo tɛ́nwe kpó wá nú mì.” Bɔ Balaki bló nǔ e Baláamu ɖɔ é, bɔ é sɔ́ nyibúsú ɖokpó, agbo ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí. Baláamu mɔ ɖɔ Mawu Mavɔmavɔ ba ɖɔ émí ní xo ɖɛ dó Izlayɛ́li ví lɛ́ɛ jí. Énɛ́ ɔ́, é sɔ́ xaji yi Mawu Mavɔmavɔ nukɔn ɖ'ayǐ tɔn lɛ́ɛ ɖɔhun, bó ná se xó e é ná ɖɔ n'i é ǎ. Lo ɔ́, é lílɛ́ kpan nukɔn gbětótló mɛ, é zé ta d'aga bo mɔ akɔta Izlayɛ́li tɔn lɛ́ɛ ɖó gɔnu ɖó ahwankpá yětɔn yětɔn lɛ́ɛ mɛ. Énɛ́ ɔ́, Yɛ Mawu tɔn wá ta n'i, bɔ é ɖɔ: “Nyɛ Baláamu, Beɔ́ɔ ví ɔ́, xó e un ɖɔ ɔ́ ɖíe. Nyɛ mɛ e nɔ́ mɔ nǔ e ná jɛ sɔ ɔ́, xó e un ɖɔ ɔ́ ɖíe. Nyɛ mɛ e nɔ se xó e Mawu nɔ́ ɖɔ ɔ́, xó e un ɖɔ ɔ́ ɖíe. Nyɛ mɛ e nɔ mɔ nǔɖexlɛ́mɛ Nǔbǐwúkpétɔ́ ɔ́ tɔn lɛ́ɛ ɔ́, xó e un ɖɔ ɔ́ ɖíe, nyɛ mɛ e ɖo sinsɛn ɛ wɛ ɔ́, é nɔ́ ɖe éɖée xlɛ́ mì ɔ́, xó e un ɖɔ ɔ́ ɖíe: Jakɔ́bu ví lɛ́ɛ mi, Goxɔ mitɔn lɛ́ɛ nyɔ́ ɖɛkpɛ mɛ nya! Izlayɛ́li ví lɛ́ɛ e mi, nɔtɛn mitɔn lɛ́ɛ nyɔ́ ɖɛkpɛ mɛ nya! Yě cí tɔdo ɖɔhun Yě cí jikpá e ɖo tɔsisa tó é ɖɔhun. Yě cí alowɛ́sitín e Mawu Mavɔmavɔ tun ɔ́ ɖɔhun. Yě cí sɛ́dlutín e ɖo tɔ tó ɔ́ ɖɔhun. Yě cí tɔ e gbawu, bó nɔ́ sa gbɔn atínkan lɛ́ɛ mɛ é ɖɔhun. Axɔ́sú Izlayɛ́li tɔn ɔ́ ná ɖu ɖo Agagi jí, bɔ axɔ́súɖuto tɔn ná syɛ́n ɖésú. Mawu ɖe Izlayɛ́li ví lɛ́ɛ tɔ́n sín Ejípu. Hlɔ̌nhlɔ́n agbo tɔn wɛ é dó ɖe yě tɔ́n. Yě nɔ́ vúnvún akɔta e nɔ tɔ́n ahwan yě lɛ́ɛ. Yě nɔ́ wɛ́n xú yě, yě nɔ́ da gǎ yě. Izlayɛ́li ví lɛ́ɛ ɖo gbigbɔjɛ́ wɛ, yě mlɔ́ ayǐ kinnikínní ɖɔhun, kinnikínní asi ɖɔhun. Mɛ̌ ká ná sixú fɔ́n yě sí te? Izlayɛ́li togun e, Mawu ní xo ɖɛ dó mɛ e ná xo ɖɛ dó jǐ towe ɔ́ jí. Mawu ní dó nu mɛ e ná dó nu we é.” Ée Baláamu ɖɔ mɔ̌ ɔ́, Balaki sin xomɛ dó e ɖésú bó xo así bó ɖɔ nú Baláamu ɖɔ: “A nǎ dó nu kɛntɔ́ ce lɛ́ɛ wú wɛ un kplá we wá fí; azɔn atɔngɔ́ ɔ́ nɛ́ a ka xo ɖɛ dó yě jí nɛ́. Din ɔ́, bǔ dó mì, lɛ̌ kɔ yi xwé towe gbe! Un ko ɖɔ nú we ɖ'ayǐ ɖɔ un ná wlí yɛ̌yi nú we, amɔ̌, Mawu Mavɔmavɔ sú ali tɔn dó we.” Baláamu ɖɔ nú Balaki ɖɔ: “Un ka ko ɖɔ nú mɛ e a sɛ́ dó mì lɛ́ɛ ɖɔ: ‘Kpatágan kpó siká kpó na bo gɔ́ Balaki sín xwé, bónú é ná xwé ɔ́ mì ɔ́, un sixú wa nǔ ɖěbǔ bɔ é ná gbɔn vo nú xó e Mawu Mavɔmavɔ ɖɔ nú mì ɔ́ ǎ; é sixú nyí nǔ ɖagbe, é sixú nyí nǔ nyanya; xó e Mawu Mavɔmavɔ ɖɔ ɔ́ wɛ un ná ɖɔ.’ Din ɔ́, un ná lɛ́ kɔ yi togun ce mɛ. Wǎ má ɖɔ nǔ e togun élɔ́ ná wa xá togun towe ɖo sɔ gúdo ɔ́ nú we.” Énɛ́ ɔ́, Baláamu ɖɔ nú Balaki ɖɔ: “Nyɛ Baláamu, Beɔ́ɔ ví ɔ́, xó e un ɖɔ ɔ́ ɖíe. Nyɛ mɛ e nɔ́ mɔ nǔ e ná jɛ sɔ ɔ́, xó e un ɖɔ ɔ́ ɖíe. Nyɛ mɛ e nɔ se xó e Mawu nɔ́ ɖɔ lɛ́ɛ ɔ́, xó e un ɖɔ ɔ́ ɖíe. Nyɛ mɛ e nɔ mɔ do nú tito Ajalɔ̌nlɔn ɔ́ tɔn lɛ́ɛ ɔ́, xó e un ɖɔ ɔ́ ɖíe. Nyɛ mɛ e nɔ mɔ nǔɖexlɛ́mɛ Nǔbǐwúkpétɔ́ ɔ́ tɔn lɛ́ɛ ɔ́, xó e un ɖɔ ɔ́ ɖíe. Nyɛ mɛ e ɖo sinsɛn ɛ wɛ ɔ́, é nɔ́ ɖe éɖée xlɛ́ mì ɔ́, xó e un ɖɔ ɔ́ ɖíe. Un mɔ nǔ e ɖo nǎ jɛ wɛ ɔ́, amɔ̌, égbé wɛ nǔ ɔ́ ná jɛ ǎ. Ayi ce ɖo nǔ e ná jɛ ɔ́ mɔ wɛ. É kó wá yá ɔ́, nǔ ɔ́ ná jɛ. Sunví ɖokpó tɔ́n ɖo Jakɔ́bu kúnkan lɛ́ɛ mɛ. Axɔ́sú ɖaxó ɖokpó tɔ́n ɖo Izlayɛ́li togun ɔ́ tɛ́ntin. É zin gǎnkpogɛ tɔn dó tókpá nú Mɔwabunu lɛ́ɛ. É dó gǎnkpogɛ tɔn dó ta nú Sɛ́ti ví lɛ́ɛ. É kpa acɛ nú Edɔ́mu. É kpa acɛ nú kɛntɔ́ tɔn Seyíinu lɛ́ɛ. Izlayɛ́li togun ɔ́ ɖe hlɔ̌nhlɔ́n tɔn xlɛ́. Mɛ e tɔ́n ɖo Jakɔ́bu kúnkan mɛ ɔ́ kpa acɛ nú kɛntɔ́ tɔn lɛ́ɛ. É sú mɛ e kpo ɖo toxo yětɔn mɛ lɛ́ɛ sín kún dó.” Un lɛ́ kpɔ́n, bó mɔ Amalɛ́ki ví lɛ́ɛ bó ɖɔ: “Amalɛ́ki ví lɛ́ɛ wɛ nyí akɔta e syɛ́n hú akɔta ɖě lɛ́ɛ é. Amɔ̌, yě bǐ wɛ ná vɔ gbe ɖokpó.” Baláamu mɔ Keni ví lɛ́ɛ lɔmɔ̌ bó ɖɔ: “Keni ví lɛ́ɛ e mi, ayi mitɔn j'ayǐ ɖo to mitɔn mɛ, lě e xɛ e xo adɔ̌ ɖó sókan mɛ ɔ́ nɔ́ vo gbɔn é. É ɖo mɔ̌ có, myɔ wɛ ná fyɔ́ nɔtɛn mitɔn lɛ́ɛ, bɔ Asilíinu lɛ́ɛ ná kplá mi yi kannumɔgbénu.” Un sú xó bó ɖɔ: “Ké! Mɛ̌ ka ná nɔ gbɛ hwenu e Mawu ná wa nǔ gbɔn mɔ̌ é? Tɔjíhún ɖé lɛ́ɛ ná gosín Cíplu wá. Kɛntɔ́ ná dó winnyá Asilíinu lɛ́ɛ. Kɛntɔ́ ná dó winnyá Ebɛ́ɛ sín vǐ lɛ́ɛ. Amɔ̌, yě lɔmɔ̌ ná dɔn.” Ée Baláamu ɖɔ xó énɛ́ lɛ́ɛ fó ɔ́, é sí te bó ɖidó to tɔn mɛ, bɔ Balaki lɔmɔ̌ wlí ali tɔn bo ɖidó. Izlayɛ́li ví lɛ́ɛ ɖó gɔnu ɖó Citímu. Ée yě ɖó gɔnu ɖó fínɛ́ ɔ́, yě jɛ aga lɛ xá ɖyɔ̌vǐ Mɔwabu tɔn lɛ́ɛ jí. Đyɔ̌vǐ lɛ́ɛ dɔn yě bɔ yě jɛ vɔ̌sánú xwlé vodún Mɔwabu tɔn lɛ́ɛ jí bó nɔ́ ɖu nǔ e yě xwlé vodún yětɔn lɛ́ɛ é. Yě nɔ́ sɛn vodún yětɔn lɛ́ɛ xá yě. Yě nɔ́ sɛn vodún Baalu e ɖo Peɔ́ɔ é, bɔ Mawu Mavɔmavɔ sin xomɛ dó yě, bó ɖɔ nú Mɔyízi ɖɔ: “Kplé togun Izlayɛ́li tɔn ɔ́ sín gǎn lɛ́ɛ bǐ, bó dó kan kɔ nú yě ɖo nyɛ Mawu Mavɔmavɔ nukɔn ɖo hwesivɔ́nu cíɖíɖí. Énɛ́ ɔ́, xomɛ ɖaxó e un sin dó mi ɔ́ ná fá.” Mɔyízi ɖɔ nú gǎn Izlayɛ́li tɔn lɛ́ɛ ɖɔ: “Mi mɛ ɖokpó ɖokpó ní hu mɛ tɔn e ɖo vodún Baalu Peɔ́ɔ tɔn sɛn wɛ lɛ́ɛ.” Hwenu e Mɔyízi ɖo xó énɛ́ lɛ́ɛ ɖɔ nú gǎn lɛ́ɛ wɛ ɔ́, Izlayɛ́li ví ɖokpó kplá Madiáani ví nyɔ̌nu ɖokpó wá mɛ tɔn lɛ́ɛ mɛ, bɔ Mɔyízi kpó Izlayɛ́li ví ɖě lɛ́ɛ kpó mɔ ɛ. Yě bǐ kó kplé ɖo Goxɔ ɔ́ sín ali nu bo ɖo avǐ ya wɛ hwenɛ́nu. Ée yě mɔ yě ɔ́, vɔ̌sánú-xwlémawutɔ́ Pínxási, Eleazáa ví, Aalɔ́ɔn vívú ɔ́ sí te sín agun ɔ́ mɛ; é zé hwǎn tɔn, bó jɛ nya Izlayɛ́li ví ɔ́ gúdo byɔ́ Goxɔ tɔn mɛ, bó sɔ́ hwǎn yě mɛ we lɛ́ɛ. É sɔ́ hwǎn adɔ mɛ nú nya Izlayɛ́li ví ɔ́ kpó nyɔ̌nu Madiáani ɔ́ kpó bó hu yě. Ée é bló mɔ̌ tlóló ɔ́, nǔ nyanya e ɖo jijɛ dó Izlayɛ́li ví lɛ́ɛ jí wɛ ɔ́ nɔ te. Nǔ nyanya énɛ́ e jɛ dó yě jí ɔ́, gbɛtɔ́ adɔ̌kpo ɖě děgba (24.000) wɛ kú ɖ'é mɛ. Mawu Mavɔmavɔ ɖɔ nú Mɔyízi ɖɔ: “Vɔ̌sánú-xwlémawutɔ́ Pínxási, Eleazáa ví, Aalɔ́ɔn vívú ɔ́ ɖó xomɛ e sin dó Izlayɛ́li ví lɛ́ɛ wɛ un ɖe ɔ́ te, ɖó hun e é jɛ dó jǐ ce ɖo tɛ́ntin yětɔn ɔ́ syɛ́n ɖésú. Nǔgbó ɔ́, un ɖɔ nyɛ ɖokpónɔ géé wɛ nyí Mawu e yě ná nɔ́ sɛn é. Amɔ̌, lě e Pínxási jɛ hun dó jǐ ce gbɔn ɔ́ zɔ́n bɔ un sú kún yětɔn dó ǎ. Din ɔ́, a nǎ ɖɔ n'i ɖɔ un ná jɛ fífá sín akɔ xá ɛ. Akɔjijɛ énɛ́ ɔ́ e un ná jɛ xá ɛ ɔ́ ná nyí é kpó kúnkan tɔn lɛ́ɛ kpó tɔn, bó ná zɔ́n bɔ yě ná nyí vɔ̌sánú-xwlémawutɔ́ káká sɔ́yi. É ɖe wǎn yíyí e é ɖó nú nyɛ Mawu tɔn ɔ́ xlɛ́, bɔ é sín énɛ́ ɔ́ wú, bɔ un sɔ́ hwɛ kɛ Izlayɛ́li ví lɛ́ɛ.” Izlayɛ́li ví e è hu kpó nyɔ̌nu Madiáani ɔ́ kpó ɔ́ nɔ́ nyí Zimuli, bo nyí Salu ví. Hɛ̌nnugán ɖokpó wɛ é nyí ɖo akɔta Sinmɛnyɔ́ɔ tɔn mɛ. Nyɔ̌nu Madiáani e è hu ɔ́ nɔ́ nyí Kɔzibi, bo nyí Súu ví. Súu ɔ́, hɛ̌nnugán xwédo gěgé tɔn wɛ é nyí, ɖo akɔta Madiáani lɛ́ɛ tɔn ɖokpó mɛ. Mawu Mavɔmavɔ ɖɔ nú Mɔyízi ɖɔ: “Tɔ́n ahwan Madiáani lɛ́ɛ, bó sú kún yětɔn dó. Yě sɔ́ sísɛ́ ɖó nukɔn nú mi, bo flú mi ɖo Peɔ́ɔ xó ɔ́ kpó Kɔzibi xó ɔ́ kpó mɛ, bó dó ɖe lě e yě sɛ́ gbɔn ɔ́ xlɛ́. Kɔzibi xó ɔ́, gǎn Madiáani tɔn lɛ́ɛ ɖokpó sín vǐ nyɔ̌nu wɛ; nɔví yětɔn nyɔ̌nu wɛ é nyí. É wɛ è hu, hwenu e nǔ nyanya ɖo jijɛ ɖo Peɔ́ɔ wɛ é.” Ée nǔ nyanya énɛ́ ɔ́ jɛ wá yi ɔ́, Mawu Mavɔmavɔ ɖɔ nú Mɔyízi kpó vɔ̌sánú-xwlémawutɔ́ Eleazáa, Aalɔ́ɔn ví ɔ́ kpó ɖɔ: “Mi sɔ́ Izlayɛ́li ví lɛ́ɛ bǐ sín kɛ́n; mi ná xwedó hɛ̌nnu yětɔn lɛ́ɛ, bó ná sɔ́ súnnu e kó ɖó xwe ko lɛ́ɛ kpódó éé kó ɖó hú mɔ̌ bó sixú fun ahwan lɛ́ɛ bǐ kpó sín kɛ́n.” Énɛ́ ɔ́, Mɔyízi kpó vɔ̌sánú-xwlémawutɔ́ Eleazáa kpó ɖɔ xó nú Izlayɛ́li ví lɛ́ɛ ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. Yě ɖɔ nú yě ɖɔ Mawu Mavɔmavɔ ɖɔ nú Mɔyízi ɖɔ è nǐ sɔ́ súnnu e kó ɖó xwe ko lɛ́ɛ kpó éé kó ɖó hú mɔ̌ lɛ́ɛ bǐ kpó sín kɛ́n. Akɔta Izlayɛ́li tɔn e gosín Ejípu lɛ́ɛ ɖíe: Akɔta Hwlibɛ́ni tɔn ɔ́ wɛ jɛ nukɔn; nukɔngbéví Jakɔ́bu tɔn wɛ é nyí. Vǐ súnnu e ɖo akɔta Hwlibɛ́ni tɔn ɔ́ mɛ lɛ́ɛ ɖíe: Hanɔki kpó vǐ tɔn lɛ́ɛ kpó; Palúu kpó vǐ tɔn lɛ́ɛ kpó; Ɛslɔ́ni kpó vǐ tɔn lɛ́ɛ kpó; Hwlibɛ́ni ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo we afɔwó-afatɔ́n nǔwɔntɔn kantɔn wǒ (43.730). Palúu ví súnnu lɛ́ɛ ɖokpó nɔ́ nyí Eliavu. Eliavu ví súnnu lɛ́ɛ ɖíe: Nɛmuwɛ́li, Datáni kpódó Abilámu kpó. Datáni kpó Abilámu kpó ɔ́, gbɛtɔ́ nukúnɖéjí Izlayɛ́li tɔn lɛ́ɛ mɛ wɛ yě ɖe. Yědɛɛ lɛ́ɛ wɛ fɔ́n gǔ dó Mɔyízi kpó Aalɔ́ɔn kpó jí. Hwenu e Kolée kpó ahwan tɔn lɛ́ɛ kpó fɔ́n gǔ dó Mawu Mavɔmavɔ jí ɔ́, yě wɛ nɔ jǐ yětɔn. Hwenɛ́nu ɔ́, ayǐkúngban kɛ nu bo mi yě kpó Kolée kpó. Gbe énɛ́ gbe wɛ Kolée kpó ahwan tɔn lɛ́ɛ kpó bǐ kú, bɔ súnnu afɔɖé kanɖé wǒ (250) fyɔ́ gbɛɖe gbɛɖe ɖo myɔ mɛ, bɔ énɛ́ kplɔ́n nǔ mɛ e kpo lɛ́ɛ. É ká ɖo mɔ̌ có Kolée ví lɛ́ɛ ɖě kú hwenɛ́nu ǎ. Vǐ súnnu e ɖo akɔta Sinmɛnyɔ́ɔ tɔn mɛ lɛ́ɛ ɖíe: Nɛmuwɛ́li kpó vǐ tɔn lɛ́ɛ kpó; Yamini kpó vǐ tɔn lɛ́ɛ kpó; Yakíni kpó vǐ tɔn lɛ́ɛ kpó. Zeláxi kpó vǐ tɔn lɛ́ɛ kpó; Cawúlu kpó vǐ tɔn lɛ́ɛ kpó. Sinmɛnyɔ́ɔ ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo ɖě afɔwó-afɔɖé (22.200). Vǐ súnnu e ɖo akɔta Gadi tɔn ɔ́ mɛ lɛ́ɛ ɖíe: Sefɔ́ni kpó vǐ tɔn lɛ́ɛ kpó, Hagíi kpó vǐ tɔn lɛ́ɛ kpó, Cúni kpó vǐ tɔn lɛ́ɛ kpó, Ozini kpo vǐ tɔn lɛ́ɛ kpó, Ehli kpó vǐ tɔn lɛ́ɛ kpó. Alodu kpó vǐ tɔn lɛ́ɛ kpó, Aleli kpó vǐ tɔn lɛ́ɛ kpó, Gadi ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo we afɔwe kanwe ko (40.500). Vǐ súnnu e ɖo akɔta Judáa tɔn mɛ lɛ́ɛ ɖíe: Ɛ́ɛ kpó Ɔɔnáni kpó. Kanáa tomɛ wɛ Ɛ́ɛ kpó Ɔɔnáni kpó kú ɖe. Vǐ súnnu e kpo ɖo akɔta Judáa tɔn ɔ́ mɛ lɛ́ɛ ɖíe: Cela kpó vǐ tɔn lɛ́ɛ kpó, Pɛlɛ́si kpó vǐ tɔn lɛ́ɛ kpó, Zeláxi kpó vǐ tɔn lɛ́ɛ kpó. Vǐ súnnu e ɖo xwédo Pɛlɛ́si tɔn ɔ́ mɛ lɛ́ɛ ɖíe: Ɛslɔ́ni kpó vǐ tɔn lɛ́ɛ kpó, Hamúlu kpó vǐ tɔn lɛ́ɛ kpó. Judáa ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo atɔn děgba ɛnɛ afɔwe kanwe ko (76.500). Vǐ súnnu e ɖo akɔta Isakáa tɔn ɔ́ mɛ lɛ́ɛ ɖíe: Tola kpó vǐ tɔn lɛ́ɛ kpó, Púwa kpó vǐ tɔn lɛ́ɛ kpó. Yacúvu kpó vǐ tɔn lɛ́ɛ kpó, Cimulɔ́ni kpó vǐ tɔn lɛ́ɛ kpó, Isakáa ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo atɔn děgba ɖě afɔɖé kanwe ko (64.300). Vǐ súnnu e ɖo akɔta Zabulɔ́ɔn tɔn ɔ́ mɛ lɛ́ɛ ɖíe: Sɛlɛ́di kpó vǐ tɔn lɛ́ɛ kpó, Elɔ́ni kpó vǐ tɔn lɛ́ɛ kpó, Yaxileɛ́li kpó vǐ tɔn lɛ́ɛ kpó. Zabulɔ́ɔn ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo atɔn afɔwe kanwe ko (60.500). Vǐ súnnu e ɖo Jozɛ́fu ví Manasée kpó Eflayímu kpó sín akɔta mɛ lɛ́ɛ ɖíe: Vǐ súnnu e ɖo akɔta Manasée tɔn ɔ́ mɛ lɛ́ɛ ɖíe: Makíi kpó vǐ tɔn lɛ́ɛ kpó; Galadi kpó vǐ tɔn lɛ́ɛ kpó, Galadi ɔ́ Makíi ví wɛ. Galadi ví súnnu lɛ́ɛ sín nyǐkɔ ɖíe: Iezɛ́ɛ kpó vǐ tɔn lɛ́ɛ kpó, Helɛ́ki kpó vǐ tɔn lɛ́ɛ kpó, Asiliɛ́li kpó vǐ tɔn lɛ́ɛ kpó, Cɛkɛ́mu kpó vǐ tɔn lɛ́ɛ kpó, Cemida kpó vǐ tɔn lɛ́ɛ kpó, Hefɛ́ɛ kpó vǐ tɔn lɛ́ɛ kpó. Selofɛxádi Hefɛ́ɛ ví súnnu ɔ́ ji vǐ súnnu ɖě ǎ; nyɔ̌nu kɛ́ɖɛ́ wɛ é ji. Vǐ lɛ́ɛ sín nyǐkɔ ɖíe: Maxla, Nɔwa, Hogla, Miluka kpódó Tíisa kpó. Manasée sín xwédo lɛ́ɛ nɛ́. Yě bló súnnu adɔ̌kpo we děgba atɔn nǔwɔntɔn kanwe ko (52.700). Vǐ súnnu e ɖo akɔta Eflayímu tɔn ɔ́ mɛ lɛ́ɛ ɖíe: Cutɛláxi kpó vǐ tɔn lɛ́ɛ kpó. Bɛkɛ́ɛ kpó vǐ tɔn lɛ́ɛ kpó, Taxáni kpó vǐ tɔn lɛ́ɛ kpó, Ɛláni kpó vǐ tɔn lɛ́ɛ kpó. Ɛláni ɔ́, Cutɛláxi ví wɛ. Eflayímu ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo ɖě děgba atɔn afɔwe kanwe ko (32.500). Jozɛ́fu sín vǐ lɛ́ɛ bǐ wɛ ɖo akɔta we énɛ́ lɛ́ɛ mɛ. Vǐ súnnu e ɖo akɔta Bɛnjamɛ́ɛ tɔn ɔ́ mɛ lɛ́ɛ ɖíe: Bɛ́la kpó vǐ tɔn lɛ́ɛ kpó, Acibɛ́li kpó vǐ tɔn lɛ́ɛ kpó, Axilámu kpó vǐ tɔn lɛ́ɛ kpó, Cefufámu kpó vǐ tɔn lɛ́ɛ kpó, Hufamu kpó vǐ tɔn lɛ́ɛ kpó, Aadi kpó vǐ tɔn lɛ́ɛ kpó; Naamáni kpó vǐ tɔn lɛ́ɛ kpó. Aadi kpó Naamáni kpó ɔ́, Bɛ́la ví wɛ yě nyǐ. Bɛnjamɛ́ɛ ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo we děgba ɖě afɔtántɔn (45.600). Xwédo ɖokpó géé wɛ ɖo akɔta Dan tɔn ɔ́ mɛ; é wɛ nyí Cuxámu kpó vǐ tɔn lɛ́ɛ kpó. Dan ví súnnu lɛ́ɛ sín xwédo ɔ́ nɛ́. Súnnu adɔ̌kpo atɔn děgba ɖě afɔwe (64.400) wɛ ɖo xwédo énɛ́ ɔ́ mɛ. Vǐ súnnu e ɖo akɔta Acɛ́ɛ tɔn ɔ́ mɛ lɛ́ɛ ɖíe: Yimuna kpó vǐ tɔn lɛ́ɛ kpó, Yicíwi kpó vǐ tɔn lɛ́ɛ kpó, Beliya kpó vǐ tɔn lɛ́ɛ kpó, Hebɛ́ɛ kpó vǐ tɔn lɛ́ɛ kpo, Malukiyɛ́li kpó vǐ tɔn lɛ́ɛ kpó. Hebɛ́ɛ kpó Malukiyɛ́li kpó ɔ́, Beliya ví wɛ yě nyǐ. Acɛ́ɛ ji vǐ nyɔ̌nu ɖokpó, bɔ è nɔ ylɔ́ ɛ ɖɔ Sɛláxi. Acɛ́ɛ ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo we děgba atɔn afɔtɛ́nwe (53.400). Vǐ súnnu e ɖo akɔta Nɛfutali tɔn ɔ́ mɛ lɛ́ɛ ɖíe: Yaxiseɛ́li kpó vǐ tɔn lɛ́ɛ kpó, Gúni kpó vǐ tɔn lɛ́ɛ kpó, Yesɛ́ɛ kpó vǐ tɔn lɛ́ɛ kpó, Cilɛ́mu kpó vǐ tɔn lɛ́ɛ kpó, Nɛfutali ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo we děgba ɖě afɔtɛ́nwe (45.400). Izlayɛ́li ví e sín kɛ́n è sɔ́ lɛ́ɛ nɛ́. Yě bǐ bló súnnu adɔ̌kpo gban afɔtántɔn kantɔn wǒ (601.730). Mawu Mavɔmavɔ ɖɔ nú Mɔyízi ɖɔ: “È nǎ má to ɔ́ nú akɔta énɛ́ lɛ́ɛ, bɔ é ná nyí yětɔn; è nǎ xwedó lě e gbɛtɔ́ sukpɔ́ ɖo akɔta ɖokpó ɖokpó mɛ gbɔn ɔ́ bó má nú yě. Akɔta lɛ́ɛ ɖokpó ɖokpó ná yí ayǐkúngban e jɛ xá mɛ nabí e è mɔ ɖo akɔta ɔ́ mɛ lɛ́ɛ é; akɔta e mɛ gbɛtɔ́ sukpɔ́ ɖe lɛ́ɛ ná yí ayǐkúngban bɔ é ná gbló hú akɔta e mɛ gbɛtɔ́ má sukpɔ́ ɖe ǎ lɛ́ɛ. Lo ɔ́, akɔ wɛ è nǎ nyi dó má to ɔ́; è nǎ kpɔ́n lě e gbɛtɔ́ sukpɔ́ ɖo akɔta ɖokpó ɖokpó mɛ gbɔn ɔ́ bó dó nyi akɔ ɔ́. Akɔ wɛ è nǎ nyi bó ná ná ayǐkúngban e jɛ xá akɔta e mɛ gbɛtɔ́ sukpɔ́ ɖe lɛ́ɛ kpó akɔta e mɛ gbɛtɔ́ má sukpɔ́ ɖe ǎ é kpó.” Vǐ súnnu e sín kɛ́n è sɔ́ ɖo akɔta Levíi tɔn ɔ́ mɛ lɛ́ɛ ɖíe: Gɛɛcɔ́ni kpó vǐ tɔn lɛ́ɛ kpó, Kexáti kpó vǐ tɔn lɛ́ɛ kpó, Mɛlali kpó vǐ tɔn lɛ́ɛ kpó. Levíi sín hɛ̌nnu lɛ́ɛ ɖíe: hɛ̌nnu Livuni tɔn, hɛ̌nnu Eblɔ́n tɔn, hɛ̌nnu Maxli tɔn, hɛ̌nnu Muci tɔn, hɛ̌nnu Kolée tɔn; Kexáti wɛ nyí Amulámu sín tɔ́. Amulámu sín asi ɔ́ nyí Yokɛvɛ́di; Levíi ví wɛ, bɔ è ji i ɖo Ejípu. Vǐ atɔn wɛ Yokɛvɛ́di ji nú Amulámu; yě wɛ nyí Aalɔ́ɔn, Mɔyízi kpó Miliamu kpó. Miliamu ɔ́, nyɔ̌nu wɛ. Vǐ súnnu ɛnɛ wɛ Aalɔ́ɔn ji. Vǐ tɔn lɛ́ɛ sín nyǐkɔ ɖíe: Nadavu, Avihu, Eleazáa kpó Itamáa kpó. Lo ɔ́, Nadavu kpó Avihu kpó hɛn myɔ yi Mawu Mavɔmavɔ nukɔn bó kú. Levíi ví súnnu e kó ɖó sun ɖokpó, kpó éé kó ɖó hú mɔ̌ lɛ́ɛ kpó sín kɛ́n wɛ è sɔ́, bɔ bǐ bló adɔ̌kpo ɖě afɔwó-afatɔ́n (23.000). È xa yědɛɛ lɛ́ɛ dó Izlayɛ́li ví ɖě lɛ́ɛ mɛ ǎ, ɖó è ɖó ná ná ayǐkúngban ɖě yědɛɛ lɛ́ɛ mɛ ɖě lɛ́ɛ ɖɔhun ǎ. Hwenu e Mɔyízi kpó vɔ̌sánú-xwlémawutɔ́ Eleazáa kpó sɔ́ Izlayɛ́li ví lɛ́ɛ sín kɛ́n ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn ɔ́, Izlayɛ́li ví nabí e sín kɛ́n è sɔ́ lɛ́ɛ nɛ́. Izlayɛ́li ví e sín kɛ́n Mɔyízi kpó vɔ̌sánú-xwlémawutɔ́ Aalɔ́ɔn kpó sɔ́ ɖo gbětótló Sinayíi tɔn ɔ́ mɛ lɛ́ɛ ɖěbǔ ɖo Izlayɛ́li ví énɛ́ lɛ́ɛ mɛ ǎ. É sɔ́ kpo yě ɖě ǎ, ɖó Mawu Mavɔmavɔ ko ɖɔ nú yě ɖ'ayǐ ɖɔ yě bǐ ná kú ɖo gbětótló mɛ, bɔ é kún sɔ́ ná kpo mɛ ɖé zɛ Kalɛ́bu Yefunnɛ́ɛ ví ɔ́ kpó Jozuwée Nuni ví ɔ́ kpó wú ó. Maxla, Nɔwa, Hogla, Miluka kpódó Tíisa kpó ɔ́, vǐ nyɔ̌nu Selofɛxádi tɔn lɛ́ɛ wɛ yě nyǐ. Selofɛxádi ka nyí Hefɛ́ɛ ví, Hefɛ́ɛ nyí Galadi ví, Galadi nyí Makíi ví, bɔ Makíi nyí Manasée ví. Hɛ̌nnu Manasée tɔn ɔ́ mɛ wɛ yě jɔ ɖe. Manasée ka nyí Jozɛ́fu ví. Selofɛxádi sín vǐ nyɔ̌nu énɛ́ lɛ́ɛ wá mɔ Mɔyízi kpó vɔ̌sánú-xwlémawutɔ́ Eleazáa kpó, kpó tomɛxó Izlayɛ́li tɔn lɛ́ɛ kpó, kpódó togun Izlayɛ́li tɔn ɔ́ bǐ kpó, ɖo Goxɔ ɔ́ sín ali nu, bo ɖɔ: “Tɔ́ mǐtɔn kó kú ɖo gbětótló mɛ. É ka ɖo yě mɛ é kpó Kolée kpó fɔ́n gǔ dó Mawu Mavɔmavɔ jí lɛ́ɛ mɛ ǎ. Lo ɔ́, hwɛ e é ɖésúnɔ hu lɛ́ɛ wú wɛ é kú; é ká ɖó vǐ súnnu ɖé có bó kú ǎ. Aniwú wɛ mi ná ɖe tɔ́ mǐtɔn sín nyǐkɔ sín hɛ̌nnu tɔn mɛ ɖó vǐ súnnu e é má ji ǎ wú? Mi ná ayǐkúngban ɔ́ ɖě mǐ lɔmɔ̌, lě e mi ná tɔ́ mǐtɔn nɔví súnnu lɛ́ɛ gbɔn é.” Ée yě ɖɔ mɔ̌ ɔ́, Mɔyízi ɖɔ nǔ e byɔ́ wɛ yě ɖe ɔ́ nú Mawu Mavɔmavɔ. Bɔ Mawu Mavɔmavɔ ɖɔ nú Mɔyízi ɖɔ: “Selofɛxádi sín vǐ nyɔ̌nu lɛ́ɛ sín hwɛ jɔ. A nǎ ná ayǐkúngban ɔ́ ɖě yě, bɔ yě lɔmɔ̌ ná ɖu gǔ tɔn, tɔ́ yětɔn nɔví súnnu lɛ́ɛ ɖɔhun. Yě wɛ a nǎ sɔ́ ayǐkúngban e ná nyí tɔ́ yětɔn tɔn ɔ́ jó ná, bó ná ɖɔ nú Izlayɛ́li ví lɛ́ɛ ɖɔ ényí súnnu ɖé má ji vǐ súnnu cóbó kú ǎ ɔ́, yě ná zé nǔ e nyí étɔn lɛ́ɛ jó nú vǐ tɔn nyɔ̌nu lɛ́ɛ. Ényí é má ká ɖó vǐ nyɔ̌nu ǎ ɔ́, yě ná zé nǔ e ná nyí étɔn lɛ́ɛ jó nú nɔví tɔn súnnu lɛ́ɛ. Ényí é má ká ɖó nɔví súnnu ǎ ɔ́, yě ná zé jó nú tɔ́ tɔn nɔví súnnu lɛ́ɛ. Ényí é má ká ɖó tɔ́ nɔví súnnu ǎ ɔ́, yě ná zé jó nú hɛ̌nnumɔ tɔn e sɛkpɔ́ ɛ hú hɛ̌nnumɔ tɔn ɖě lɛ́ɛ bǐ ɖo xwédo tɔn mɛ é; sɛ́n ɖé wɛ sɛ́n énɛ́ ɔ́ ná nyí, bó ná ɖo te káká sɔ́yi nú Izlayɛ́li ví lɛ́ɛ, lě e nyɛ Mawu Mavɔmavɔ ɖɔ nú Mɔyízi gbɔn é.” Mawu Mavɔmavɔ ɖɔ nú Mɔyízi ɖɔ: “Xá Avalímu só élɔ́ jí, bó kpɔ́n to e un ná ná Izlayɛ́li ví lɛ́ɛ ɔ́ sɛ́ dó. A nǎ kpɔ́n to ɔ́ sɛ́ dó; énɛ́ ɔ́ gúdo ɔ́, hwi lɔmɔ̌ ná kú nɔví towe Aalɔ́ɔn ɖɔhun. Đó hwenu e togun Izlayɛ́li tɔn ɔ́ ɖo xó ba mì wɛ ɖo gbětótló Síni tɔn mɛ ɔ́, mi gbɛ́ nǔ e un ɖɔ mi ní wa ɔ́ bló. Hwenu e yě ɖo sin byɔ́ wɛ ɔ́, mi ɖe mǐmɛ́ e un nyí ɔ́ xlɛ́ ɖo nukún yětɔn mɛ ǎ.” Mɛliba sín sin e ɖo Kadɛ́ci, ɖo gbětótló Síni tɔn mɛ ɔ́ sín xó ɖɔ wɛ é ɖe. Mɔyízi ɖɔ nú Mawu Mavɔmavɔ ɖɔ: “Mawu Mavɔmavɔ, hwi mɛ e ná gbɛ nǔɖíɖó lɛ́ɛ bǐ ɔ́, sɔ́ mɛ ɖokpó ɖó togun ɔ́ nu. Sɔ́ mɛ e ná sixú nɔ yě nu, ɖo ali bǐ nu é, bónú togun towe ní má cí lɛ̌ngbɔ́ e má ɖó nyinyitɔ́ ǎ lɛ́ɛ ɖɔhun ó.” Ée Mɔyízi ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Zě Jozuwée Nuni ví ɔ́. Nya ɖé wɛ é nyí bɔ Yɛ ce ɖo jǐ tɔn. A nǎ sɔ́ alɔ towe ɖó jǐ tɔn. A nǎ kplá ɛ wá vɔ̌sánú-xwlémawutɔ́ Eleazáa gɔ́n, ɖo togun ɔ́ bǐ nukɔn, bó ná sɔ́ ɛ ɖó tɛn towe mɛ, ɖo nukún yětɔn mɛ. A nǎ ná acɛ e a ɖǒ ɔ́ ɖe e, bónú Izlayɛ́li ví lɛ́ɛ bǐ ná se tónú n'i. Amɔ̌, é ɖésúnɔ ná yi vɔ̌sánú-xwlémawutɔ́ Eleazáa gɔ́n, bɔ éyɛ́ ná zé Wulímu dó kan lě e é ná wa nǔ gbɔn ɔ́ byɔ́ nyɛ Mawu Mavɔmavɔ. Bɔ Jozuwée kpó togun Izlayɛ́li tɔn ɔ́ bǐ kpó ná wa nǔ e é ná ɖɔ nú yě lɛ́ɛ bǐ, ɖo ali bǐ nu.” Mɔyízi bló nǔ e Mawu Mavɔmavɔ ɖɔ n'i é. É kplá Jozuwée wá vɔ̌sánú-xwlémawutɔ́ Eleazáa nukɔn, ɖo togun ɔ́ bǐ nukún mɛ. É sɔ́ alɔ ɖó jǐ tɔn, bó sɔ́ ɛ ɖó tɛn tɔn mɛ, lě e Mawu Mavɔmavɔ ɖɔ gbɔn n'i é. Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Mi ná nɔ́ kpé nukún dó nǔníná e nyí nyɛ Mawu Mavɔmavɔ tɔn lɛ́ɛ wú, bó nɔ́ xwlé mì dó hwetɔnnu; nǔɖuɖu ɖé wɛ é nyí, bɔ è nɔ dó zo bɔ wǎn tɔn nɔ́ nyɔ́ se nú mì. “Mi ná nɔ́ zé lɛ̌ngbɔ́ví e ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ ɔ́ we dó sá vɔ̌ e è nɔ dó zo ɔ́ ná ayǐhɔ́ngbe ayǐhɔ́ngbe nú nyɛ Mawu Mavɔmavɔ. Vɔ̌ ɖé wɛ é nyí, bɔ è nǎ nɔ́ gɔn xwléxwlé mì gbeɖé ǎ. Mi ná xwlé lɛ̌ngbɔ́ví lɛ́ɛ ɖokpó mì zǎnzǎn, bó ná xwlé ɖokpó mì gbadanu. Mi ná zé olívu sín ami akú lǐtli ɖokpó adaɖé dó nya linfín kilóo atɔn ná, bó ná zé gɔ́ nú kanlin lɛ́ɛ ɖokpó ɖokpó. Vɔ̌ e è nǎ nɔ dó zo ayǐhɔ́ngbe ayǐhɔ́ngbe tɛgbɛ ɔ́ wɛ nyí vɔ̌ énɛ́ ɔ́, bɔ é ná cí ée è xwlé mì ɖo Sinayíi só jí é ɖɔhun. Vɔ̌ ɖé wɛ, bɔ wǎn tɔn nɔ́ nyɔ́ se nú nyɛ Mawu Mavɔmavɔ. Lɛ̌ngbɔ́ví zǎnzǎn tɔn ɔ́, vɛ̌ɛn lǐtli ɖokpó adaɖé wɛ ná nyí nǔníná e ná jɛ jí é, bɔ è nǎ xwlé mì ɖo Goxɔ ɔ́ mɛ. Mi ná xwlé lɛ̌ngbɔ́ví wegɔ́ ɔ́ mì gbadanu, bɔ nǔníná e jɛ zǎnzǎn tɔn ɔ́ jí lɛ́ɛ ɖokpó ɔ́ ná jɛ jí. Vɔ̌ e è nɔ dó zo ɔ́ wɛ nyí vɔ̌ énɛ́ ɔ́, bɔ wǎn tɔn nɔ́ nyɔ́ se nú nyɛ Mawu Mavɔmavɔ.” Mawu Mavɔmavɔ ɖɔ nú Mɔyízi ɖɔ: “Gbɔjɛzán gbe tɛgbɛ ɔ́, mi ná nɔ́ zé lɛ̌ngbɔ́ví e ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ ɔ́ we dó sá vɔ̌ ná nú nyɛ Mawu Mavɔmavɔ. Mi ná zé ami dó nya linfín kilóo ayizɛ́n, bó ná zé gɔ́ ná, bɔ vɛ̌ɛn ná jɛ jí. Vɔ̌ e è nɔ dó zo gbɔjɛzán gbe ɔ́ wɛ, bɔ è nǎ nɔ́ bló gɔ́ nú vɔ̌ e è nɔ dó zo ayǐhɔ́ngbe ayǐhɔ́ngbe lɛ́ɛ, kpó vɛ̌ɛn e è nɔ ná d'é jí é kpó.” Mawu Mavɔmavɔ ɖɔ nú Mɔyízi ɖɔ: “Azǎn nukɔntɔn e ɖo sun ɖokpó ɖokpó mɛ ɔ́ gbe ɔ́, mi ná nɔ́ zé nyibúsú we, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe dó sá vɔ̌ e è nɔ dó zo ɔ́ ná nú nyɛ Mawu Mavɔmavɔ; blɔ̌ ɖěbǔ ná ɖo kanlin énɛ́ lɛ́ɛ wú ǎ. Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí; mi ná ná linfín ɔ́ kilóo tɛ́nwe dó nyibúsú ɖokpó ɖokpó jí, bó ná kilóo ayizɛ́n dó agbo ɔ́ jí. Bó ná ná linfín ɔ́ kilóo atɔn dó lɛ̌ngbɔ́ví lɛ́ɛ ɖokpó ɖokpó jí; vɔ̌ e è nɔ dó zo ɔ́ wɛ, bɔ wǎn tɔn nɔ́ nyɔ́ se nú nyɛ Mawu Mavɔmavɔ. Mi ná ná vɛ̌ɛn lǐtli atɔn dó nyibúsú ɖokpó ɖokpó jí, lǐtli we dó agbo ɔ́ jí, bó ná ná lǐtli ɖokpó adaɖé dó lɛ̌ngbɔ́ví ɖokpó ɖokpó jí. Vɔ̌ e è nǎ nɔ́ sá ɖo azǎn nukɔntɔn e ɖo sun ɖokpó ɖokpó mɛ ɔ́ gbe, ɖo xwe ɔ́ mɛ é nɛ́. Mi ná lɛ́ zé gbǎgbá ɖokpó dó sá hwɛsɔ́kɛmɛvɔ́ ná nú nyɛ Mawu Mavɔmavɔ gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe lɛ́ɛ kpó vɛ̌ɛn e mi nɔ ná d'é jí ɔ́ kpó.” Mawu Mavɔmavɔ ɖɔ nú Mɔyízi ɖɔ: “Sun nukɔntɔn ɔ́ e ɖo xwe ɔ́ mɛ ɔ́ sín azǎn wǒ-ɛnɛgɔ́ ɔ́ gbe ɔ́, mi ná nɔ́ ɖu Dǐndínwáyixwe ɔ́ dó nyɛ Mawu Mavɔmavɔ tamɛ. Sun énɛ́ ɔ́ sín azǎn afɔtɔngɔ́ ɔ́ gbe wɛ xwe ɔ́ ná bɛ́, bɔ mi ná ɖu xɔ azǎn tɛ́nwe, bó ná nɔ́ ɖu wɔ̌xúxú e mɛ tɔ́n má ɖe ǎ é. Mi ná kplé bó ná sɛn nyɛ Mawu Mavɔmavɔ ɖo gbe e gbe xwe ɔ́ ná bɛ́ é. Mi ná wa azɔ̌ kpaa e mi nɔ wa lɛ́ɛ ɖě gbe énɛ́ ɔ́ gbe ǎ. Mi ná zé nyibúsú wínnyáwínnyá we, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe dó sá vɔ̌ e è nɔ dó zo ɔ́ ná nú nyɛ Mawu Mavɔmavɔ; blɔ̌ ɖěbǔ ná ɖo kanlin énɛ́ lɛ́ɛ ɖě wú ǎ. Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí: mi ná ná linfín ɔ́ kilóo tɛ́nnɛ dó nyibúsú ɖokpó ɖokpó jí, bó ná ná kilóo ayizɛ́n dó agbo ɔ́ jí, bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí. Mi ná lɛ́ ná gbǎgbá ɖokpó bɔ è nǎ dó sá hwɛsɔ́kɛmɛvɔ́ ná; hwenɛ́nu ɔ́, è nǎ bló lě e è nɔ bló gbɔn, bó nɔ́ xwlé vɔ̌sánú mì ɔ́ dó sá hwɛxɔ́súsú vɔ́ dó ta mitɔn mɛ. Vɔ̌ énɛ́ lɛ́ɛ bǐ wɛ mi ná nɔ́ sá gɔ́ nú vɔ̌ e mi ná nɔ dó zo zǎnzǎn tɛgbɛ é. Mi ná nɔ́ sá vɔ̌ énɛ́ lɛ́ɛ ayǐhɔ́ngbe ayǐhɔ́ngbe, xɔ azǎn tɛ́nwe; nǔɖuɖu ɖé wɛ é nyí bɔ è nɔ dó zo, bɔ wǎn tɔn nɔ́ nyɔ́ se nú nyɛ Mawu Mavɔmavɔ. Mi ná nɔ́ xwlé vɔ̌ énɛ́ lɛ́ɛ mì gɔ́ nú vɔ̌ e mi nɔ sá ayǐhɔ́ngbe ayǐhɔ́ngbe lɛ́ɛ kpó vɛ̌ɛn e mi nɔ ná d'é jí é kpó. Azǎn tɛ́nwegɔ́ ɔ́ gbe ɔ́, mi ná lɛ́ kplé bó ná sɛn nyɛ Mawu Mavɔmavɔ; mi ná wa azɔ̌ kpaa e mi nɔ wa lɛ́ɛ ɖě gbe énɛ́ gbe ǎ.” Mawu Mavɔmavɔ ɖɔ nú Mɔyízi ɖɔ: “ Pantekótu gbe, gbe e gbe mi ná hɛn jinukún nukɔntɔn e mi ya lɛ́ɛ wá xwlé nyɛ Mawu Mavɔmavɔ ɔ́, mi ná kplé, bó ná sɛn mì; mi ná wa azɔ̌ kpaa e mi nɔ wa lɛ́ɛ ɖě gbe énɛ́ gbe ǎ. Mi ná zé nyibúsú we, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe dó sá vɔ̌ e è nɔ dó zo, bɔ wǎn tɔn nɔ́ nyɔ́ se nú mì ɔ́ ná. Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí; mi ná ná linfín ɔ́ kilóo tɛ́nwe dó nyibúsú lɛ́ɛ ɖokpó ɖokpó jí; bó ná ná kilóo ayizɛ́n dó agbo ɔ́ jí, bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí. Mi ná lɛ́ ná gbǎgbá ɖokpó, bɔ è nǎ bló lě e è nɔ bló gbɔn, bó nɔ́ xwlé vɔ̌sánú mì ɔ́ dó sá hwɛxɔ́súsú vɔ́ ná dó ta mitɔn mɛ. Vɔ̌ énɛ́ lɛ́ɛ bǐ wɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe lɛ́ɛ kpódó nǔníná jinukún tɔn e mi nɔ ná lɛ́ɛ kpó. Kanlin e ma ɖó blɔ̌ ɖěbǔ ǎ lɛ́ɛ wɛ mi ná nɔ́ xwlé nyɛ Mawu Mavɔmavɔ, bó ná nɔ́ ná vɛ̌ɛn e xó è ɖɔ ɔ́ d'é jí.” Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ e ɖo xwe ɔ́ mɛ ɔ́ sín azǎn nukɔntɔn ɔ́ gbe ɔ́, mi ná kplé bó ná sɛn nyɛ Mawu Mavɔmavɔ. Mi ná wa azɔ̌ kpaa e mi nɔ wa lɛ́ɛ ɖěbǔ gbe énɛ́ ɔ́ gbe ǎ, ɖó lanzo kúnkún sín azǎn wɛ. Mi ná ná nyibúsú ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo, bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ná ɖo kanlin énɛ́ lɛ́ɛ wú ǎ. Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí: mi ná ná linfín ɔ́ kilóo tɛ́nnɛ dó nyibúsú ɔ́ jí, bó ná ná kilóo ayizɛ́n dó agbo ɔ́ jí, bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí. Mi ka ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná; hwenɛ́nu ɔ́, è nǎ bló lě e è nɔ bló gbɔn, bó nɔ́ xwlé vɔ̌sánú mì ɔ́, dó sá hwɛxɔ́súsú vɔ́ ná, dó ta mitɔn mɛ. Vɔ̌ énɛ́ lɛ́ɛ bǐ wɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe lɛ́ɛ, kpó éé mi nɔ do zo ɖo azǎn nukɔntɔn e ɖo sun ɖokpó ɖokpó mɛ ɔ́ gbe é, bɔ linfín kpó vɛ̌ɛn kpó nɔ́ jɛ jí lě e sɛ́n ɔ́ zɔ́n gbɔn é. Vɔ̌ énɛ́ lɛ́ɛ e mi ná dó zo ɔ́ sín wǎn ná nyɔ́ se nú nyɛ Mawu Mavɔmavɔ.” Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ énɛ́ ɔ́ sín azǎn wǒgɔ́ ɔ́ gbe ɔ́, mi ná kplé, bó ná sɛn nyɛ Mawu Mavɔmavɔ; mi ná blá nu; mi ɖó ná wa azɔ̌ ɖěbǔ ǎ. Mi ná ná nyibúsú ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo, bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí; mi ná ná linfín kilóo tɛ́nnɛ dó nyibúsú ɔ́ jí, bó ná ná kilóo ayizɛ́n dó agbo ɔ́ jí, bó ná ná kilóo atɔn dó lɛ̌ngbɔ́ví tɛ́nwe lɛ́ɛ ɖokpó ɖokpó jí. Mi ná ná gbǎgbá ɖokpó, bɔ è nǎ dó sá hwɛ súnsún sín kɔ nú mɛ vɔ́ ná, dó ta mitɔn mɛ. Vɔ̌ énɛ́ lɛ́ɛ bǐ ná gɔ́ nú hwɛ súnsún sín kɔ nú mɛ vɔ́ e è blǒ lě e è nɔ bló gbɔn, bó nɔ́ xwlé vɔ̌sánú mì gbe énɛ́ gbe é; ɖó gbe énɛ́ gbe ɔ́, hwɛ súnsún sín kɔ nú mɛ zán ɖaxó gbe wɛ; mi ná sá vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é gɔ́ ná.” Mawu Mavɔmavɔ ɖɔ nú Mɔyízi ɖɔ: “Sun tɛ́nwegɔ́ ɔ́ sín azǎn afɔtɔngɔ́ ɔ́ gbe ɔ́, mi ná kplé bó ná sɛn nyɛ Mawu Mavɔmavɔ. Mi ná wa azɔ̌ kpaa e mi nɔ wa lɛ́ɛ ɖěbǔ gbe énɛ́ gbe ǎ. Xwe wɛ mi ná ɖu dó nyɛ Mawu Mavɔmavɔ ɔ́ tamɛ; azǎn tɛ́nwe wɛ mi ná ɖu xwe ɔ́ xɔ. Azǎn nukɔntɔn ɔ́ gbe ɔ́, mi ná ná nyibúsú wǒ-atɔn, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ná ɖo kanlin énɛ́ lɛ́ɛ wú ǎ. Mi ná zé ami dó nya linfín ná, bó ná ná dó kanlin lɛ́ɛ ɖokpó ɖokpó jí: mi ná ná linfín kilóo tɛ́nnɛ dó nyibúsú wǒ-atɔn lɛ́ɛ ɖokpó ɖokpó jí, bó ná ná kilóo ayizɛ́n dó agbo we lɛ́ɛ ɖokpó ɖokpó jí, bó ná ná kilóo atɔn dó lɛ̌ngbɔ́ví wǒ-ɛnɛ lɛ́ɛ ɖokpó ɖokpó jí. Mi ná ná gbǎgbá ɖokpó bɔ è nǎ dó sá hwɛsɔ́kɛmɛvɔ́ ná dó ta mitɔn mɛ. Vɔ̌ énɛ́ lɛ́ɛ bǐ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. “Azǎn wegɔ́ ɔ́ gbe ɔ́, mi ná ná nyibúsú wěwe, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ bɔ è nǎ dó sá vɔ̌ ná. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná ná nǔníná linfín tɔn kpó vɛ̌ɛn tɔn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é. Mi ná ná gbǎgbá ɖokpó bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. Azǎn atɔngɔ́ ɔ́ gbe ɔ́, mi ná ná nyibúsú wǒ-ɖokpó, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná ná nǔníná linfín tɔn kpó vɛ̌ɛn tɔn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é. Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. Azǎn ɛnɛgɔ́ ɔ́ gbe ɔ́, mi ná ná nyibúsú wǒ, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ná ɖo kanlin énɛ́ lɛ́ɛ wú ǎ. Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é. Mi ná ná gbǎgbá ɖokpó dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. Azǎn atɔ́ɔ́ngɔ́ ɔ́ gbe ɔ́, mi ná ná nyibúsú tɛ́nnɛ, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é. Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. Azǎn ayizɛ́ngɔ́ ɔ́ gbe ɔ́, mi ná ná nyibúsú tántɔn, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mawu Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí lě e sɛ́n ɔ́ zɔ́n gbɔn é. Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. Azǎn tɛ́nwegɔ́ ɔ́ gbe ɔ́, mi ná ná nyibúsú tɛ́nwe, agbo we, lɛ̌ngbɔ́ví e ɖó xwe ɖokpó ɔ́ wǒ-ɛnɛ nyɛ Mavɔmavɔ. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é. Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. “Azǎn tántɔngɔ́ ɔ́ gbe ɔ́, mi ná bló kplé ɖaxó ɖokpó dó sú ta nú xwe ɔ́; mi ná wa azɔ̌ kpaa e mi nɔ wa lɛ́ɛ ɖěbǔ gbe énɛ́ gbe ǎ. Mi ná ná nyibúsú ɖokpó, agbo ɖokpó, lɛ̌ngbɔ́ví e ɖó xwe ɖokpó ɔ́ tɛ́nwe nyɛ Mawu Mavɔmavɔ, bɔ è nǎ dó sá vɔ̌ e è nɔ dó zo, bɔ é nɔ́ fyɔ́ bǐ, bɔ wǎn tɔn nɔ́ nyɔ́ se nú mì ɔ́ nú mì. Blɔ̌ ɖěbǔ ká ná ɖo kanlin énɛ́ lɛ́ɛ wú ǎ. Mi ná ná linfín kpó vɛ̌ɛn kpó dó kanlin énɛ́ lɛ́ɛ ɖokpó ɖokpó jí, lě e sɛ́n ɔ́ zɔ́n gbɔn é. Mi ná ná gbǎgbá ɖokpó, bɔ è nǎ dó sá hwɛsɔ́kɛmɛvɔ́ ná dó ta mitɔn mɛ; vɔ̌ énɛ́ lɛ́ɛ ná gɔ́ nú vɔ̌ e mi nɔ dó zo ayǐhɔ́ngbe ayǐhɔ́ngbe, bó nɔ́ ná linfín kpó vɛ̌ɛn kpó d'é jí é. “Vɔ̌ e mi ɖó ná nɔ́ xwlé nyɛ Mawu Mavɔmavɔ ɖo xwe mitɔn lɛ́ɛ gbe lɛ́ɛ nɛ́; mi ná nɔ́ sá vɔ̌ énɛ́ lɛ́ɛ gɔ́ nú vɔ̌ e mi nɔ dó zo lɛ́ɛ, linfín kpó vɛ̌ɛn kpó e mi nɔ ná lɛ́ɛ, kɔnɖókpɔ́ vɔ́ e mi nɔ sá dó ɖe akpá e mi nɔ dó lɛ́ɛ, abǐ ée mi nɔ zé jlǒ mi ɖésúnɔ tɔn dó sá lɛ́ɛ.” Mɔyízi ɖɔ nǔ e Mawu Mavɔmavɔ ɖɔ n'i lɛ́ɛ bǐ nú Izlayɛ́li ví lɛ́ɛ. Énɛ́ ɔ́ gúdo ɔ́, Mɔyízi ɖɔ xó ɖěvo e Mawu Mavɔmavɔ ɖɔ n'i lɛ́ɛ nú akɔta Izlayɛ́li tɔn sín gǎn lɛ́ɛ. É ɖɔ: “Súnnu ɖé dó akpá ɖɔ émí ná xwlé nǔníná ɖé Mawu Mavɔmavɔ, abǐ é xwlé nǔ ɖɔ émí kún ná bló nǔɖé ó ɔ́, é ná bló nǔ e é ɖɔ é; ɖě ná hwe ɖ'é mɛ ǎ. “Mǐ ní ɖɔ ɖyɔ̌vǐ ɖé tíin, bɔ hwenu e é kpo ɖo tɔ́ tɔn xwé ɔ́, é dó akpá ɖé ɖɔ émí ná xwlé nǔníná ɖé Mawu Mavɔmavɔ, abǐ é xwlé nǔ ɖɔ émí kún ná bló nǔɖé ó ɔ́, ényí tɔ́ tɔn se bó má ɖɔ xó ɖěbǔ n'i d'é wú ǎ ɔ́, nyɔ̌nu énɛ́ ɔ́ ɖó ná ɖe akpá e é dó lɛ́ɛ. Lo ɔ́, nú tɔ́ tɔn se bó gbɛ́ n'i gbe e gbe é se ɔ́, é sɔ́ ná ɖe akpá e é dó lɛ́ɛ ǎ. Mawu Mavɔmavɔ ka ná sɔ́ hwɛ kɛ ɛ, ɖó tɔ́ tɔn wɛ gbɛ́ n'i. “Din ɔ́, mǐ ní ɖɔ ɖyɔ̌vǐ ɖé tíin, bó dó akpá, abǐ é xwlé nǔ, bó ké ya ná ǎ. Ée é bló énɛ́ ɔ́ gúdo ɔ́, é wá da asú. Ényí asú tɔn wá se, bó má ɖɔ xó ɖěbǔ n'i d'é wú gbe e gbe é se ɔ́ ǎ ɔ́, é ní tunwun ɖɔ akpá e émí dó ɔ́ kpó nǔ e émí xwlé ɔ́ kpó kpo ɖo te. Lo ɔ́, nú asú tɔn se bó gbɛ́ n'i gbe e gbe é se ɔ́, akpá e é dó ɔ́ kpó nǔ e é xwlé ɔ́ kpó sɔ́ ná wa azɔ̌ ǎ, bɔ Mawu Mavɔmavɔ ka ná sɔ́ akpá e má ɖe ǎ ɔ́ sín hwɛ kɛ ɛ. “Asúkúsi ɖé abǐ nyɔ̌nu e asú tɔn gbɛ́ ɛ ɔ́ dó akpá ɖé ɔ́, é ɖó ná ɖe akpá e é dó ɔ́. “Ényí nyɔ̌nu ɖé ɖo asúxwé, bó dó akpá abǐ é xwlé nǔ, bɔ asú tɔn se, bó má gbɛ́ n'i ǎ ɔ́, nyɔ̌nu ɔ́ ɖó ná ɖe akpá e é dó lɛ́ɛ. Lo ɔ́, nú asú tɔn gbɛ́ n'i gbe e gbe é se ɔ́, é sɔ́ ná ɖe akpá e é dó lɛ́ɛ ǎ, Mawu Mavɔmavɔ ka ná sɔ́ hwɛ kɛ ɛ, ɖó asú tɔn gbɛ́ n'i. Hǔn ényí nyɔ̌nu ɖé dó akpá ɖé abǐ é xwlé nǔ ɖɔ émí ná bló nǔɖé ɔ́, asú tɔn sixú yí gbe ná, é ká sixú gbɛ́. Ényí nyɔ̌nu ɔ́ sín asú se, bó má ɖɔ xó ɖěbǔ d'é wú n'i ǎ, bɔ azǎn jɛ dó ɔ́, gbe wɛ é yí nú akpá e nyɔ̌nu ɔ́ dó ɔ́, abǐ nǔ e é xwlé ɔ́, ɖó é kɛ nu d'é wú n'i gbe e gbe é se ɔ́ ǎ. Lo ɔ́, nú gbe e gbe é se xó ɔ́ kó dín cóbɔ é wá gbɛ́ n'i ɔ́, kɔ tɔn wɛ hwɛ e asi tɔn hu ɔ́ ná nɔ.” Sɛ́n e Mawu Mavɔmavɔ dó nú Mɔyízi, bɔ yě ɖɔ xó dó akpádídó e ɖo asú kpó asi kpó tɛ́ntin ɔ́ wú, abǐ tɔ́ kpó vǐ kpó tɛ́ntin hwenu e vǐ ɔ́ kpo ɖo tɔ́ tɔn xwé ɔ́ wú lɛ́ɛ nɛ́. Mawu Mavɔmavɔ ɖɔ nú Mɔyízi ɖɔ: “Yi dɔn tó nú Madiáani ví lɛ́ɛ, bó dó ba Izlayɛ́li ví lɛ́ɛ sín hlɔn, ɖó nǔ nyanya e Madiáani ví lɛ́ɛ wá xá yě ɔ́ wú. Énɛ́ ɔ́ gúdo ɔ́, a nǎ yi su tɔ́gbó towe lɛ́ɛ.” Ée Mawu Mavɔmavɔ ɖɔ mɔ̌ ɔ́, Mɔyízi ɖɔ nú togun ɔ́ ɖɔ: “Mi sɔ́ ahwannú nú súnnu ɖé lɛ́ɛ ɖo mi mɛ, bónú yě ná yi tɔ́n ahwan Madiáani ví lɛ́ɛ, bó dó sɔ́ yě dó ba hlɔn e xó Mawu Mavɔmavɔ ɖɔ ɔ́ ná. Mi ná ɖe ahwanfuntɔ́ afatɔ́n afatɔ́n (1.000) ɖo akɔta lɛ́ɛ ɖokpó ɖokpó mɛ.” Énɛ́ ɔ́, è kpɔ́n ahwangɔnu Izlayɛ́li tɔn lɛ́ɛ mɛ, bó cyán súnnu afatɔ́n afatɔ́n (1.000) ɖo akɔta ɖokpó ɖokpó mɛ. Mɛ e è cyán lɛ́ɛ bǐ bló súnnu děgba atɔn (12.000). È blǎ akpa nú yě, bɔ yě ná yi fun ahwan. Énɛ́ ɔ́, Mɔyízi sɛ́ yě bǐ dó ahwan fun gbé, bɔ vɔ̌sánú-xwlémawutɔ́ Pínxási Eleazáa ví ɔ́ xwedó yě. É hɛn nǔ e è nɔ zán ɖo tɛn mímɛ́ ɔ́ mɛ lɛ́ɛ, kpódó kpɛn e è nǎ kún dó ɖe xlɛ́ ɖɔ ahwanfunfun yá lɛ́ɛ kpó. Yě tɔ́n ahwan Madiáani ví lɛ́ɛ lě e Mawu Mavɔmavɔ ná gbe tɔn gbɔn Mɔyízi jí gbɔn é, bó hu súnnu lɛ́ɛ bǐ. Yě hu axɔ́sú Madiáani ví lɛ́ɛ tɔn atɔ́ɔ́n lɛ́ɛ; axɔ́sú lɛ́ɛ sín nyǐkɔ ɖíe: Ewi, Hlɛkɛ́mu, Súu, Húu kpó Hlɛva kpó. Yě hu nǔkantɔ́ Baláamu, Beɔ́ɔ ví súnnu ɔ́ lɔmɔ̌. Izlayɛ́li ví lɛ́ɛ wlí Madiáani ví nyɔ̌nu lɛ́ɛ sín ahwankannumɔ kpó vǐ yětɔn lɛ́ɛ kpó; yě bɛ́ nyibú yětɔn lɛ́ɛ bǐ, kpó gbɔ̌ yětɔn lɛ́ɛ bǐ kpó, bó bɛ́ dɔkun yětɔn lɛ́ɛ bǐ. Yě dǒ toxo e mɛ Madiáani ví lɛ́ɛ nɔ́ nɔ lɛ́ɛ bǐ zo, kpódó ahwankpá yětɔn lɛ́ɛ bǐ kpó. Énɛ́ ɔ́ gúdo ɔ́, yě bɛ̌ nǔ e yě yí ɖo ahwangbénu lɛ́ɛ bǐ, bó kplá gbɛtɔ́ kpó kanlin kpó e yě wlí lɛ́ɛ bǐ, bó yi. Yě bɛ̌ mɛ e yě wlí lɛ́ɛ kpó kanlin lɛ́ɛ bǐ kpó, kpódó nǔ e yě yí ɖo ahwangbénu lɛ́ɛ kpó wá nú Mɔyízi kpó vɔ̌sánú-xwlémawutɔ́ Eleazáa kpó, kpódó Izlayɛ́li togun ɔ́ kpó, ɖo fí e yě ɖǒ gɔnu ɖó ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn é. Mɔyízi kpó Eleazáa kpó, kpódó togun Izlayɛ́li tɔn ɔ́ sín gǎn ɖě lɛ́ɛ kpó tɔ́n sín fí e yě ɖó gɔnu ɖó ɔ́, bó yi kpé yě. Mɔyízi ka sin xomɛ dó sɔ́ja afatɔ́ngán lɛ́ɛ kpó kanwekogán lɛ́ɛ kpó e gosín ahwan énɛ́ fun gbé lɛ́ɛ é. É ɖɔ nú yě ɖɔ: “Étɛ́! Nyɔ̌nu élɔ́ lɛ́ɛ bǐ wɛ mi jó dó nyi gbɛ a? Yědɛɛ lɛ́ɛ wɛ Baláamu kplɔ́n nǔ, bɔ yě dɔn Izlayɛ́li ví lɛ́ɛ bɔ yě jɛ agɔ dó Mawu Mavɔmavɔ ɖo Peɔ́ɔ sín xó ɔ́ mɛ, bɔ nǔ énɛ́ ɔ́ zɔ́n bɔ nǔ nyanya byɔ́ togun Mawu Mavɔmavɔ tɔn ɔ́ mɛ. Din ɔ́, mi ná hu vǐ yětɔn súnnu lɛ́ɛ bǐ, bó ná hu nyɔ̌nu e kó tunwun súnnu lɛ́ɛ bǐ. Lo ɔ́, mi ná jó nyɔ̌nuví e má kó tunwun súnnu ǎ lɛ́ɛ dó nyi gbɛ nú mi ɖésúnɔ. Midɛɛ lɛ́ɛ ɔ́, mi ná tɔ́n sín fí e togun ɔ́ ɖó gɔnu ɖó ɔ́, bó ná yi ɖó gɔnu ɖó fí ɖěvo xɔ azǎn tɛ́nwe. Mɛ e ɖo mi mɛ bo hu gbɛtɔ́ lɛ́ɛ kpó mɛ e ɖó alɔ cyɔ wú lɛ́ɛ kpó bǐ ná slá wǔ azǎn atɔngɔ́ ɔ́ gbe kpó azǎn tɛ́nwegɔ́ ɔ́ gbe kpó; sɛ́n énɛ́ ɔ́ kan ahwankannumɔ mitɔn lɛ́ɛ lɔmɔ̌. Mɔ̌ ɖokpó ɔ́, mi ná slá wǔ nú avɔ mitɔn lɛ́ɛ bǐ, kpó nǔ e è zě anyǔ dó bló ná lɛ́ɛ bǐ kpó, kpó nǔ e è zě gbɔ̌fún dó lɔn ná lɛ́ɛ bǐ kpó, kpódó nǔ e è nɔ zán bɔ è zě atín dó bló ná lɛ́ɛ bǐ kpó.” Vɔ̌sánú-xwlémawutɔ́ Eleazáa ɖɔ nú sɔ́ja e yi fun ahwan lɛ́ɛ ɖɔ: “Nǔ e sín gbe Mawu Mavɔmavɔ ná ɖo sɛ́n e é dó nú Mɔyízi ɔ́ mɛ lɛ́ɛ ɖíe: Siká, kpatágan, ganvɔ, gan, aflemú kpódó sunmí kpó ɔ́, nǔ ɖěbǔ e sixú yi myɔ mɛ ɔ́ wɛ mi ná zé gbɔn myɔ nu, bɔ é ná húzú nǔ mímɛ́. Lo ɔ́, wǔsláslá sín sin mɛ wɛ nǔ e má sixú yi myɔ mɛ ǎ lɛ́ɛ ná gbɔn, bó ná húzú nǔ mímɛ́. Nǔ e má sixú yi myɔ mɛ ǎ lɛ́ɛ bǐ wɛ mi ná zé gbɔn wǔsláslá sín sin mɛ. Mi ná nya avɔ mitɔn lɛ́ɛ azǎn tɛ́nwegɔ́ ɔ́ gbe, bó ná nyí mɛ mímɛ́; énɛ́ ɔ́ gúdo ɔ́, mi hɛn ɔ́, mi ná byɔ́ fí e togun ɔ́ ɖó gɔnu ɖó é.” Mawu Mavɔmavɔ ɖɔ nú Mɔyízi ɖɔ: “Hwi kpó vɔ̌sánú-xwlémawutɔ́ Eleazáa kpó, kpódó hɛ̌nnugán lɛ́ɛ kpó ní xa nǔ e yě hɛn wá sín ahwangbénu lɛ́ɛ; mi xa gbɛtɔ́ e yě wlí wá lɛ́ɛ kpó kanlin lɛ́ɛ kpó. A nǎ má nǔ lɛ́ɛ nú ahwanfuntɔ́ e yi fun ahwan lɛ́ɛ kpó togun ɔ́ bǐ kpó. A nǎ ɖe nǔjɔ ɖo sɔ́ja e yi fun ahwan lɛ́ɛ sín nǔ lɛ́ɛ jí nú nyɛ Mawu Mavɔmavɔ. A nǎ zé gbɛtɔ́ ɖokpó ɖo gbɛtɔ́ afɔwe kanwe ko (500) jí, nyibú ɖokpó ɖo nyibú afɔwe kanwe ko jí (500), tócí ɖokpó ɖo tócí afɔwe kanwe ko (500) jí, bó ná zé lɛ̌ngbɔ́ ɖokpó ɖo lɛ̌ngbɔ́ afɔwe kanwe ko (500) jí. A nǎ yí, bó ná bɛ́ nú vɔ̌sánú-xwlémawutɔ́ Eleazáa, bɔ é ná nyí nǔníná ɖé nú nyɛ Mawu Mavɔmavɔ. Nǔ e nyí Izlayɛ́li ví ɖě lɛ́ɛ tɔn lɛ́ɛ ɔ́, a nǎ zé gbɛtɔ́ ɖokpó ɖo gbɛtɔ́ kanɖé wǒ (50) jí, nyibú ɖokpó ɖo nyibú kanɖé wǒ (50) jí, tócí ɖokpó ɖo tócí kanɖé wǒ (50) jí, lɛ̌ngbɔ́ ɖokpó ɖo lɛ̌ngbɔ́ kanɖé wǒ (50) jí, bó ná bló nǔ ɖokpó ɔ́ nú kanlin alɔkpa alɔkpa lɛ́ɛ bǐ; a nǎ bɛ́ nǔ énɛ́ lɛ́ɛ e a jɔ ɔ́ nú Levíi ví e nɔ́ kpé nukún dó nyɛ Mawu Mavɔmavɔ sín nɔtɛn wú lɛ́ɛ é.” Énɛ́ ɔ́, Mɔyízi kpó vɔ̌sánú-xwlémawutɔ́ Eleazáa kpó bló nǔ e Mawu Mavɔmavɔ ɖɔ nú Mɔyízi é. Đo nǔ e ahwanfuntɔ́ lɛ́ɛ yí ɖo kɛntɔ́ lɛ́ɛ sí ɔ́ lɛ́ɛ mɛ ɔ́, é kpo lɛ̌ngbɔ́ kpó gbɔ̌ kpó adɔ̌kpo gban-nukún-atɔn děgba atɔn afɔwó-afatɔ́n (675.000), nyibú adɔ̌kpo atɔn děgba atɔn (72.000), tócí adɔ̌kpo atɔn afatɔ́n (61.000), kpó nyɔ̌nuví e má kó tunwun súnnu ǎ lɛ́ɛ adɔ̌kpo ɖě děgba atɔn (32.000) kpó. Nǔ e è nǎ ahwanfuntɔ́ e yi fun ahwan lɛ́ɛ ɖíe: lɛ̌ngbɔ́, kpó gbɔ̌ kpó adɔ̌kpo afɔtɔn-nukún-ɖokpó děgba ɛnɛ afɔtɛ́nwe kanwe ko (337.500), bɔ è ɖe nǔwɔntɔn kanɖé gbantɔ́n (675) sín mɛ nú Mawu Mavɔmavɔ. Nyibú adɔ̌kpo ɖě děgba ɛnɛ (36.000) bɔ è ɖe kanɖé gban-nukún-we (72) sín mɛ nú Mawu Mavɔmavɔ. Tócí adɔ̌kpo ɖě děgba we afɔwó afɔwe kanwe ko (30.500), bɔ è ɖe kanɖé ko-nukún-ɖokpó (61) sín mɛ nú Mavɔmavɔ. Gbɛtɔ́ děgba ɛnɛ (16.000), bɔ è ɖe kanɖé gban-nukún-we (72) sín mɛ nú Mawu Mavɔmavɔ. Mɔyízi bɛ́ nǔjɔ énɛ́ lɛ́ɛ nú vɔ̌sánú-xwlémawutɔ́ Eleazáa, bɔ yě nyí nǔníná ɖé nú Mawu Mavɔmavɔ, lě e Mawu Mavɔmavɔ ko ɖɔ n'i gbɔn é. Nǔ e è nǎ Izlayɛ́li ví e kpo lɛ́ɛ, bɔ Mɔyízi ɖe ɖó vo nú mɛ e yi fun ahwan lɛ́ɛ, nyí nǔ ɖokpó ɔ́ xá sɔ́ja e yi fun ahwan lɛ́ɛ. Nǔ lɛ́ɛ ɖíe: lɛ̌ngbɔ́ kpó gbɔ̌ kpó adɔ̌kpo afɔtɔn-nukún-ɖokpó děgba ɛnɛ afɔtɛ́nwe kanwe ko (337.500), nyibú adɔ̌kpo ɖě děgba ɛnɛ (36.000), tócí adɔ̌kpo ɖě děgba we afɔwó afɔwe kanwe ko (30.500), gbɛtɔ́ děgba ɛnɛ (16.000). Mɔyízi ɖe nǔjɔ ɖo nǔ e nyí Izlayɛ́li ví lɛ́ɛ tɔn lɛ́ɛ jí; é ɖe gbɛtɔ́ ɖokpó ɖo gbɛtɔ́ kanɖé wǒ (50) jí, bó ɖe kanlin ɖokpó ɖo kanlin kanɖé wǒ (50) jí, bó kplá yě jó nú Levíi ví e nɔ́ kpé nukún dó nɔtɛn Mawu Mavɔmavɔ tɔn ɔ́ wú, lě e Mawu Mavɔmavɔ ko ɖɔ n'i gbɔn é. Ahwangán e nɔ ahwan ɔ́ nu bɔ yě fun lɛ́ɛ, sɔ́ja afatɔ́ngán lɛ́ɛ, kpódó kanwekogán lɛ́ɛ kpó yi kplé ɖo Mɔyízi gɔ́n, bó ɖɔ n'i ɖɔ: “Mǐ mɛsɛntɔ́ towe lɛ́ɛ xa sɔ́ja e nɔ acɛ mǐtɔn mɛ lɛ́ɛ; mɛ ɖěbǔ hwe ɖo yě mɛ ǎ, bɔ mǐ mɛ ɖokpó ɖokpó hɛn sikánú e mǐ mɔ lɛ́ɛ wá nú Mawu Mavɔmavɔ; mǐ mɛ ɖokpó ɖokpó hɛn sikánú e mǐ mɔ lɛ́ɛ wá, bónú è nǎ dó sá hwɛsɔ́kɛmɛvɔ́ ná dó ta mǐtɔn mɛ. Sikánú lɛ́ɛ ɖíe: wɔlɔ, alɔgan, alɔkɛ́, tógbé kpó kɔjɛ́ kpó.” Mɔyízi kpó Eleazáa kpó ká yí sikánú énɛ́ lɛ́ɛ bǐ ɖo yě sí. Siká e sɔ́ja afatɔ́ngán lɛ́ɛ kpó kanwekogán lɛ́ɛ kpó hɛn wá ná Mawu Mavɔmavɔ ɔ́ bǐ da kilóo kɛnnɛ wǒ mɔ̌ (170). Sɔ́ja lɛ́ɛ ɖokpó ɖokpó ká hɛn nǔ e é mɔ bɛ́ sín ahwangbénu lɛ́ɛ é. Mɔyízi kpó vɔ̌sánú-xwlémawutɔ́ Eleazáa kpó ká yí sikánú e sɔ́ja afatɔ́ngán lɛ́ɛ kpó kanwekogán lɛ́ɛ kpó ná Mawu Mavɔmavɔ lɛ́ɛ, bó bɛ́ yě yi dó Goxɔ ɔ́ mɛ, bónú Mawu Mavɔmavɔ ná nɔ́ dó flín Izlayɛ́li ví lɛ́ɛ. Hwlibɛ́ni ví lɛ́ɛ kpó Gadi ví lɛ́ɛ kpó ɖó kanlin bɔ é sukpɔ́ tawun. Yě mɔ ɖɔ Yazɛ́ɛ gbé jí kpó Galadi to ɔ́ kpó nyɔ́ nú kanlin nyinyi. Énɛ́ ɔ́, yě yi mɔ Mɔyízi kpó vɔ̌sánú-xwlémawutɔ́ Eleazáa kpó, kpódó togun Izlayɛ́li tɔn ɔ́ sín gǎn lɛ́ɛ kpó, bó ɖɔ nú yě ɖɔ: “Atalɔ́ti, Divɔ́ni, Yazɛ́ɛ, Nimula, Hɛcibɔ́ni, Eleale, Sevamu, Nɛbo kpódó Beɔ́ni kpó sín toxo lɛ́ɛ ɔ́, toxo énɛ́ lɛ́ɛ e Mawu Mavɔmavɔ dó alɔ Izlayɛ́li ví lɛ́ɛ bɔ yě yí lɛ́ɛ ɔ́, kanlin ná nyɔ́ nyi ɖo fí énɛ́ lɛ́ɛ; mǐ mɛsɛntɔ́ towe lɛ́ɛ ɖíe ká ɖó kanlin sukpɔ́ e. Ényí a nǎ wa ɖagbe nú mǐ mɛsɛntɔ́ towe lɛ́ɛ ɖo gbě énɛ́ ɔ́ jí hǔn, nǎ gbe bónú ní nyí mǐtɔn. Ma nyi mǐ sɛ́ dó Judɛ́ɛn tɔ ɔ́ gúdo ó.” Ée yě ɖɔ mɔ̌ ɔ́, Mɔyízi kanbyɔ́ Gadi kpó Hwlibɛ́ni kpó sín vǐ lɛ́ɛ ɖɔ: “Étɛ́? Nɔví mitɔn lɛ́ɛ ná yi ahwan fun gbé, bɔ midɛɛ lɛ́ɛ ná nɔ fí wɛ a? Aniwú wɛ mi ná dó awakanmɛkú nú Izlayɛ́li ví lɛ́ɛ ɖɔ yě ní má yi to e Mawu Mavɔmavɔ ná yě ɔ́ mɛ ó? Nǔ e tɔ́ mitɔn lɛ́ɛ wa hwenu e un sɛ́ yě dó sín Kadɛ́ci-Baanɛ́ya bɔ yě ná yi ba do nú to ɔ́ nɛ́. Yě hun káká yi tɔdo Ɛcikɔ́lu tɔn ɔ́ mɛ, bɔ éé yě ba do nú to ɔ́, yě dǒ awakanmɛkú nú Izlayɛ́li ví lɛ́ɛ ɖɔ yě ní má yi to e Mawu Mavɔmavɔ ná yě ɔ́ mɛ ó. Gbe énɛ́ gbe ɔ́, Mawu Mavɔmavɔ sin xomɛ ɖésú, bó dó akpá ɖɔ: ‘Mɛ élɔ́ lɛ́ɛ e gosín Ejípu lɛ́ɛ ɔ́, yě mɛ e ɖó xwe ko lɛ́ɛ kpó yě mɛ e ɖó hú mɔ̌ lɛ́ɛ kpó ɖěbǔ ná mɔ ayǐkúngban e sín akpá un dó nú Ablaxámu, Izáki, kpódó Jakɔ́bu kpó ɔ́ ǎ. Đó yě nɔ gbejí nú mì yi kpé ǎ. Kalɛ́bu Yefunnɛ́ɛ ví súnnu ɔ́ kpódó Jozuwée Nuni ví ɔ́ kpó kɛ́ɖɛ́ wɛ ná yi ayǐkúngban énɛ́ ɔ́ jí, ɖó yě nɔ gbejí nú mì yi kpé. Yefunnɛ́ɛ ɔ́, Kenázi kúnkan ɔ́ mɛ wɛ é jɔ ɖe.’ Mawu Mavɔmavɔ sin xomɛ dó Izlayɛ́li ví lɛ́ɛ, bó bló bɔ yě flú gbɔn gbětótló mɛ xɔ xwe kanɖé (40) káká bɔ jijimɛ e sín zǐnzán má nyɔ́ Mawu Mavɔmavɔ nukún mɛ ǎ lɛ́ɛ bǐ sín kún sú dó. Hwɛhutɔ́ e mi, din ɔ́, mi jló ná wa nǔ tɔ́ mitɔn lɛ́ɛ ɖɔhun, bɔ Mawu Mavɔmavɔ ná lɛ́ sin xomɛ dó Izlayɛ́li ví lɛ́ɛ d'é jí. Đó ényí mi lɛ́ kɔ sín Mawu Mavɔmavɔ gúdo ɔ́, é ná jó Izlayɛ́li ví lɛ́ɛ dó nyi gbětótló mɛ, bɔ yě ná ɖo flúflú wɛ, bɔ é ná sín midɛɛ lɛ́ɛ wú, bɔ togun élɔ́ bǐ ná sú kún dó.” Ée Mɔyízi ɖɔ mɔ̌ ɔ́, yě sɛ yi gɔ̌n tɔn, bó ɖɔ n'i ɖɔ: “Mǐ ná bló kpó nyi fí nú kanlin mǐtɔn lɛ́ɛ, bó ná ɖó toxo ɖaxó ɖaxó lɛ́ɛ ayǐ nú vǐ mǐtɔn lɛ́ɛ. Énɛ́ ɔ́ gúdo ɔ́, mǐ ná yá wǔ sɔ́ ahwanfunnú, bó ná jɛ nukɔn nú Izlayɛ́li ví ɖě lɛ́ɛ, bó ná bló bɔ yě ná yi ayǐkúngban e Mawu Mavɔmavɔ ná yě ɔ́ jí. Vǐ mǐtɔn lɛ́ɛ ná nɔ fí, ɖo toxo e è mɛ ahohó lɛ́ lɛ̌ dó lɛ́ɛ mɛ, bó ná gán ɖo to ɔ́ mɛ nu lɛ́ɛ sí. Ényí Izlayɛ́li ví lɛ́ɛ ɖokpó ɖokpó má jɛ ayǐkúngban yětɔn yětɔn jí ǎ ɔ́, mǐ ná lɛ́ kɔ yi xwé mǐtɔn lɛ́ɛ gbe ǎ. Mǐ ká ná má ayǐkúngban ɖě xá yě ɖo Judɛ́ɛn tɔ ɔ́ sín akpá ɖě ɔ́ xwé ǎ, ɖó ayǐkúngban e nyí mǐdɛɛ lɛ́ɛ tɔn lɛ́ɛ kó ɖo Judɛ́ɛn tɔ ɔ́ sín zǎnzǎnhwe jí fí.” Mɔyízi ka ɖɔ nú yě ɖɔ: “Ényí mi bló nǔ gbɔn mɔ̌ ɔ́, ényí mi sɔ́ ahwannú bó fun ahwan ɖo Mawu Mavɔmavɔ nukɔn ɔ́, ényí mi mɛ e sɔ́ ahwannú lɛ́ɛ bǐ dó asá Judɛ́ɛn tɔ ɔ́, bó nɔ Mawu Mavɔmavɔ nukɔn káká bɔ é nya kɛntɔ́ tɔn lɛ́ɛ bǐ dó zɔ, bónú hwenu e to ɔ́ jɛ Mawu Mavɔmavɔ sín acɛ mɛ dó ɔ́ jɛ́n mi ná lɛ́ kɔ dó ɔ́, Mawu Mavɔmavɔ ná mɔ nǔɖé ɖɔ dó mi wú ǎ, bɔ to élɔ́ ná nyí mitɔn ɖo Mawu Mavɔmavɔ nukɔn. Lo ɔ́, ényí mi ma wa nǔ gbɔn mɔ̌ ǎ ɔ́, mi hu hwɛ dó Mawu Mavɔmavɔ. Mi ka ná tunwun ɖɔ hwɛ e mi hu ɔ́ ji nǔɖé ɔ́, mi ná kpan. Mi bo ɖó toxo ɖaxó ɖaxó lɛ́ɛ ayǐ nú vǐ mitɔn lɛ́ɛ, bó bló kpó nú kanlin mitɔn lɛ́ɛ; amɔ̌, mi ma wɔn nǔ e mi ɖɔ émí ná bló lɛ́ɛ ó.” Gadi kpó Hwlibɛ́ni kpó sín vǐ lɛ́ɛ ká ɖɔ nú Mɔyízi ɖɔ: “Mǐ mɛsɛntɔ́ towe lɛ́ɛ ná bló nǔ e hwi gǎn mǐtɔn ɔ́ ɖɔ lɛ́ɛ. Mǐ nǎ jó vǐ mǐtɔn lɛ́ɛ kpó asi mǐtɔn lɛ́ɛ kpó dó, bó ná jó nyibú mǐtɔn lɛ́ɛ bǐ kpó gbɔ̌ mǐtɔn lɛ́ɛ bǐ kpó dó bɔ yě ná nɔ fí, ɖo toxo e ɖo Galadi lɛ́ɛ mɛ. Mǐ mɛsɛntɔ́ towe lɛ́ɛ bǐ ná sɔ́ ahwannú, bó ná yi fun ahwan ɖo Mawu Mavɔmavɔ nukɔn, lě e hwi gǎn mǐtɔn ɔ́ ɖɔ gbɔn é.” Ée yě ɖɔ mɔ̌ ɔ́, Mɔyízi ɖe gbe nú vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó, kpódó hɛ̌nnugán akɔta Izlayɛ́li tɔn lɛ́ɛ tɔn lɛ́ɛ kpó. É ɖɔ nú yě ɖɔ: “Ényí Gadi kpó Hwlibɛ́ni kpó sín vǐ lɛ́ɛ bǐ sɔ́ ahwannú bó dó asá Judɛ́ɛn tɔ ɔ́ kpó mi kpó, bó ná fun ahwan ɖo Mawu Mavɔmavɔ nukɔn, bɔ to ɔ́ ná jɛ acɛ mǐtɔn mɛ hǔn, mi ná ná Galadi yíkúngban ɔ́ yě. Lo ɔ́, ényí yě má sɔ́ ahwannú, bó xwedó mi ǎ ɔ́, mi ná ná ayǐkúngban yě ɖo gɔ̌n mitɔn ɖo Kanáa.” Gadi ví lɛ́ɛ kpó Hwlibɛ́ni ví lɛ́ɛ kpó ká lɛ́ ɖɔ nú Mɔyízi ɖɔ: “Mǐ ná bló nǔ e Mawu Mavɔmavɔ ɖɔ nú mǐ mɛsɛntɔ́ towe lɛ́ɛ é. Mǐ ná sɔ́ ahwannú ɖo Mawu Mavɔmavɔ nukɔn, bó ná yi Kanáa. Amɔ̌, ayǐkúngban e ɖo Judɛ́ɛn tɔ ɔ́ sín akpáxwé fí ɔ́ ní nyí mǐtɔn.” Énɛ́ ɔ́, Sihɔ́ni axɔ́sú Amɔliti ví lɛ́ɛ tɔn kpó Ɔgu axɔ́sú Basáni ví lɛ́ɛ tɔn kpó sín axɔ́súɖuto lɛ́ɛ kpó toxo e lɛ́ dó yě lɛ́ɛ kpó ɔ́, Mɔyízi ná Gadi kpó Hwlibɛ́ni kpó sín akɔta lɛ́ɛ, kpódó akɔta vlɔ́ Manasée Jozɛ́fu ví ɔ́ tɔn kpó. Toxo e Gadi ví lɛ́ɛ vɔ́ ɖó ayǐ lɛ́ɛ ɖíe: Divɔ́ni, Atalɔ́ti, Alowɛ́ɛ, Atlɔ́ti-Cofani, Yazɛ́ɛ, Yogibóxa, Bɛti-Nimula kpódó Bɛti-Halani kpó. Yě mɛ ahohó lɛ́ lɛ̌ dó toxo énɛ́ lɛ́ɛ, bó bló kpó nú kanlin yětɔn lɛ́ɛ. Toxo e Hwlibɛ́ni ví lɛ́ɛ vɔ́ ɖó ayǐ lɛ́ɛ ɖíe: Hɛcibɔ́ni, Eleale, Kiliyatayimu, Nɛbo, Baalu-Mɛyɔ́ni kpódó Sivuma kpó. Yě sun nyǐkɔ ɖěvo toxo e yě vɔ́ ɖó ayǐ lɛ́ɛ. Makíi Manasée ví ɔ́ sín vǐ lɛ́ɛ tɔ́n ahwan Galadi bo yí to tɔn lɛ́ɛ. Yě nya Amɔliti ví e nɔ́ nɔ to ɔ́ mɛ lɛ́ɛ. Énɛ́ ɔ́, Mɔyízi ná to ɔ́ Makíi ví lɛ́ɛ nú yě ná nɔ fínɛ́. Yayíi Manasée ví ɔ́ sín vǐ lɛ́ɛ tɔ́n ahwan Amɔliti ví lɛ́ɛ, bó yí gletoxo yětɔn lɛ́ɛ, bó nɔ́ ylɔ́ gletoxo énɛ́ lɛ́ɛ ɖɔ: “Gletoxo Yayíi tɔn lɛ́ɛ.” Nɔváxi yi yí toxo e è nɔ ylɔ́ ɖɔ Kenáti ɔ́ kpódó gletoxo e lɛ́ dó e lɛ́ɛ kpó. Nyǐkɔ é ɖésúnɔ tɔn ɔ́ wɛ é sun toxo ɔ́, bɔ toxo ɔ́ nɔ́ nyí Nɔváxi. Fí tɛnmɛ tɛnmɛ e Izlayɛ́li ví lɛ́ɛ gbɔn hwenu e yě gosín Ejípu kpó ahwangɔnu yětɔn lɛ́ɛ kpó, bɔ Mɔyízi kpó Aalɔ́ɔn kpó nɔ nukɔn nú yě lɛ́ɛ ɖíe: Mɔyízi wlán fí e yě nɔ te ɖe lɛ́ɛ ɖokpó ɖokpó lě e Mawu Mavɔmavɔ ná gbe tɔn ɛ gbɔn é. Hǔn fí e yě nɔ te ɖe lɛ́ɛ ɖíe: Yě gosín Hlamusɛ́si toxo ɔ́ mɛ ɖo Ejípu, sun nukɔntɔn e ɖo xwe ɔ́ mɛ ɔ́ sín azǎn afɔtɔngɔ́ ɔ́ gbe. È ɖu Dǐndínwáyixwe ɔ́, ayǐhɔ́ngbe tɔn wɛ Izlayɛ́li ví lɛ́ɛ tɔ́n ɖo Ejípunu lɛ́ɛ bǐ nukún mɛ ma ɖi xɛsi nú nǔɖé. Énɛ́ ɔ́, Ejípunu lɛ́ɛ ɖo nukɔngbéví yětɔn e wú Mawu Mavɔmavɔ sín alɔ jɛ ɖo tɛ́ntin yětɔn, bɔ yě bǐ kú lɛ́ɛ sín cyɔ ɖi wɛ. Mawu Mavɔmavɔ ɖo hwɛ ɖó nú Ejípunu lɛ́ɛ sín vodún lɛ́ɛ lɔmɔ̌ wɛ. Izlayɛ́li ví lɛ́ɛ gosín Hlamusɛ́si bo yi ɖó gɔnu ɖó Sukɔ́tu. Yě gosín Sukɔ́tu bó ɖó gɔnu ɖó Etámu ɖo gbětótló ɔ́ tó. Yě gosín Etámu bo lɛ́ kɔ ɖidó Pi-Haxilɔ́ti e ɖo Baalu-Cefɔ́ni nukɔn é, bó ɖó gɔnu ɖó Migidɔ́lu nukɔn. Yě gosín Pi-Haxilɔ́ti nukɔn bo gbɔn xu ɔ́ tɛ́ntin ɖidó gbětótló mɛ. Yě zun zɔnlin nú azǎn atɔn ɖo Etámu sín gbětótló mɛ, bó ɖó gɔnu ɖó Mala. Yě gosín Mala bo wá Elimu. Tɔjɔtɛn wěwe kpó dětín kanɖé gban (70) kpó wɛ ɖo Elimu fínɛ́; fínɛ́ wɛ yě ɖó gɔnu ɖó. Yě gosín Elimu bo ɖó gɔnu ɖó Xu Vɔvɔ ɔ́ kpá. Yě gosín Xu Vɔvɔ ɔ́ kpá, bó ɖó gɔnu ɖó Sínu sín gbětótló ɔ́ mɛ. Yě gosín Sínu sín gbětótló mɛ bó ɖó gɔnu ɖó Dɔfuka. Yě gosín Dɔfuka, bó ɖó gɔnu ɖó Aluci. Yě gosín Aluci, bó ɖó gɔnu ɖó Hlefidímu; yě ká mɔ sin nu ɖo fínɛ́ ǎ. Yě gosín Hlefidímu, bó ɖó gɔnu ɖó gbětótló Sinayíi tɔn mɛ. Yě gosín gbětótló Sinayíi tɔn mɛ, bó ɖó gɔnu ɖó Kivlɔti-Taawa. Yě gosín Kivlɔti-Taawa, bó ɖó gɔnu ɖó Haselɔ́ti. Yě gosín Haselɔ́ti, bó ɖó gɔnu ɖó Hlitúma. Yě gosín Hlitúma, bó ɖó gɔnu ɖó Hlimumɔ́ni-Pɛlɛ́si. Yě gosín Hlimumɔ́ni-Pɛlɛ́si, bó ɖó gɔnu ɖó Livuna. Yě gosín Livuna bó ɖó gɔnu ɖó Hlisa. Yě gosín Hlisa, bó ɖó gɔnu ɖó Kexelata. Yě gosín Kexelata bó ɖó gɔnu ɖó Cɛfɛ́ɛ só ɔ́ kpá. Yě gosín Cɛfɛ́ɛ só ɔ́ kpá, bó ɖó gɔnu ɖó Halada. Yě gosín Halada, bó ɖó gɔnu ɖó Makexelɔ́ti. Yě gosín Makexelɔ́ti, bó ɖó gɔnu ɖó Taxati. Yě gosín Taxati, bó ɖó gɔnu ɖó Tɛláxi. Yě gosín Tɛláxi, bó ɖó gɔnu ɖó Mitika. Yě gosín Mitika, bó ɖó gɔnu ɖó Hacimɔ́na. Yě gosín Hacimɔ́na, bó ɖó gɔnu ɖó Mɔselɔ́ti. Yě gosín Mɔselɔ́ti, bó ɖó gɔnu ɖó Benɛ-Yakáni. Yě gosín Benɛ-Yakáni, bó ɖó gɔnu ɖó Hɔ́ɔ-Gidugadi. Yě gosín Hɔ́ɔ-Gidugadi, bó ɖó gɔnu ɖó Yotivata. Yě gosín Yotivata, bó ɖó gɔnu ɖó Avlona. Yě gosín Avlona, bó ɖó gɔnu ɖó Esiɔ́ni-Gevɛ́ɛ. Yě gosín Esiɔ́ni-Gevɛ́ɛ, bó ɖó gɔnu ɖó gbětótló Síni tɔn mɛ: Kadɛ́ci xó ɖɔ wɛ è ɖe. Yě gosín Kadɛ́ci, bó ɖó gɔnu ɖó Hɔ́ɔ só ɔ́ kpá, ɖo Edɔ́mu tɔ ɔ́ tó. Vɔ̌sánú-xwlémawutɔ́ Aalɔ́ɔn xá Hɔ́ɔ só ɔ́ jí lě e Mawu Mavɔmavɔ ɖɔ n'i gbɔn é. Fínɛ́ wɛ é kú ɖe; Izlayɛ́li ví lɛ́ɛ gosín Ejípu ɔ́, xwe tɔn kanɖégɔ́ ɔ́ (40) mɛ wɛ é kú ɖo sun atɔ́ɔ́ngɔ́ ɔ́ sín azǎn nukɔntɔn ɔ́ gbe. Xwe kantɔn-nukún-atɔn (123) wɛ Aalɔ́ɔn ɖó hwenu e é kú ɖo Hɔ́ɔ só ɔ́ jí é. Hwenɛ́nu wɛ axɔ́sú Aladi tɔn, Kanáanu ɔ́ se ɖɔ Izlayɛ́li ví lɛ́ɛ wá. Kanáa to ɔ́ sín afɔligbé wɛ é nɔ́ nɔ. Izlayɛ́li ví lɛ́ɛ gosín Hɔ́ɔ só ɔ́ jí, bó ɖó gɔnu ɖó Salumɔ́na. Yě gosín Salumɔ́na bó ɖó gɔnu ɖó Punɔni. Yě gosín Punɔni, bó ɖó gɔnu ɖó Ovɔ́ti. Yě gosín Ovɔ́ti, bó ɖó gɔnu ɖó Iyé-Avalímu, ɖo Mɔwabu sín dogbó jí. Yě gosín Iyé-Avalímu, bó ɖó gɔnu ɖó Divɔ́ni-Gadi. Yě gosín Divɔ́ni-Gadi, bó ɖó gɔnu ɖó Alumɔ́ni-Divlatayima. Yě gosín Alumɔ́ni-Divlatayima, bó ɖó gɔnu ɖó Avalímu sín sókan lɛ́ɛ mɛ, ɖo Nɛbo nukɔn. Yě gosín Avalímu sín sókan lɛ́ɛ mɛ, bó ɖó gɔnu ɖó ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. Yě ɖǒ gɔnu ɖó Judɛ́ɛn tɔ ɔ́ kpá, bɛ́ sín Bɛti-Yesimɔ́ti káká yi Avɛ́li-Citímu, ɖo ayǐkúngban wɛnjɛ Mɔwabu tɔn lɛ́ɛ jí. Mawu Mavɔmavɔ ɖɔ xó nú Mɔyízi ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. É ɖɔ n'i ɖɔ ní ɖɔ nú Izlayɛ́li ví lɛ́ɛ ɖɔ: “Ényí mi dó asá Judɛ́ɛn tɔ ɔ́, bó byɔ́ Kanáa to mɛ ɔ́, mi ná nya mɛ e ɖo to ɔ́ mɛ lɛ́ɛ bǐ; mi ná gba awǐnnya e yě sɔ́ dó lí vodún ná lɛ́ɛ bǐ; mi ná gba bǒcyɔ yětɔn e yě sínsín gan dó bló ná lɛ́ɛ bǐ, bó ná gba vodún xwé yětɔn lɛ́ɛ bǐ. Mi ná yí to ɔ́, bó ná jɛ fínɛ́. Đó nyɛ wɛ ná to ɔ́ mi, bɔ é ná nyí mitɔn. Mi ná nyi akɔ dó to ɔ́, bó ná má nú hɛ̌nnu mitɔn lɛ́ɛ ɖokpó ɖokpó. Hɛ̌nnu e mɛ gbɛtɔ́ sukpɔ́ ɖe lɛ́ɛ ná yí ayǐkúngban bɔ é ná gbló hú hɛ̌nnu e mɛ gbɛtɔ́ má sukpɔ́ ɖe ǎ lɛ́ɛ. Mɛ ɖokpó ɖokpó ɖó ná yí ayǐkúngban e è nǎ nyi akɔ bo ná ná ɛ é. Mi ná yí ayǐkúngban ɔ́, bɔ é ná nyí mitɔn, lě e tɔ́ mitɔn lɛ́ɛ sín akɔta lɛ́ɛ ɖe gbɔn é. Lo ɔ́, nú mi ma nya mɛ e ɖo to ɔ́ mɛ lɛ́ɛ bǐ ǎ ɔ́, mɛ e mi ná jó dó ɖo yě mɛ lɛ́ɛ ná cí nǔ wɛ jɛ nukún jí nú mi ɖɔhun, nyɛ̌ví wɛ ɖo adaja mɛ nú mi ɖɔhun. Yě ná nyí kɛntɔ́ mitɔn, ɖo to e mɛ mi ná yi jɛ é mɛ. Ényí é jɛ mɔ̌ ɔ́, nǔ e un ɖɔ un ná wa xá yě ɔ́, midɛɛ lɛ́ɛ wɛ un ná wa xá.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Ényí mi byɔ́ Kanáa to ɔ́ mɛ ɔ́, to ɔ́ ná húzú mitɔn. Dogbó Kanáa to ɔ́ tɔn lɛ́ɛ ɖíe: Gbětótló Síni tɔn ɔ́ kpó Edɔ́mu tɔn ɔ́ kpó wɛ ná nyí ayǐkúngban mitɔn sín dogbó, ɖo afɔligbé. Đo zǎnzǎnhwe jí ɔ́, dogbó mitɔn ná gosín Xu Kúkú ɔ́ sín afɔligbé. É ná xá gbɔn Aklabímu kpó ɔ́ sín afɔligbé, bó ná gbɔn Síni bó ná hun káká yi Kadɛ́ci-Baanɛ́ya sín afɔligbé; é ná dlɛ́n d'é nu gbɔn Hasáa-Adáa, bo ná dín gbɔn Asemɔ́ni. Bɛ́ sín Asemɔ́ni ɔ́, é ná xá káká yi tɔsisa Ejípu tɔn ɔ́ kɔn, bó ná yi fó dó Mɛditɛlanɛ́ɛ xu ɔ́ tó. Mɛditɛlanɛ́ɛ xu ɔ́ wɛ ná nyí ayǐkúngban mitɔn sín dogbó ɖo gbadahwe jí. Đo totaligbé ɔ́, mi ná ɖó dogbó sín Mɛditɛlanɛ́ɛ xu ɔ́ kɔn káká yi Hɔ́ɔ só ɔ́ kɔn. Sín Hɔ́ɔ só ɔ́ kɔn ɔ́, mi ná gbɔn Lɛbo-Hamáti bó ná wá Sedádi. Mi ná gosín fínɛ́, bó ná tunta Ziflɔ́ni bó ná wá Hasáa-Ɛnáni. Dogbó mitɔn taligbé tɔn ɔ́ nɛ́. Đo zǎnzǎnhwe jí ɔ́, mi ná ɖó dogbó sín Hasáa-Ɛnáni yi Cefámu, bó ná gosín Cefámu ɖidó Hlivla ɖo Ayini sín zǎnzǎnhwe jí; é ná gosín fínɛ́ bó ná dlɛ́n d'é nu gbɔn Jenɛzalɛ́ti xu ɔ́ tó. É ná lɛ́ gosín fínɛ́, bó ɖidó Judɛ́ɛn tɔ ɔ́ tó, bó ná fó dó Xu Kúkú ɔ́ kɔn. To mitɔn sín dogbó lɛ́ɛ nɛ́.” Mɔyízi ɖɔ xó énɛ́ e Mawu Mavɔmavɔ ɖɔ ɔ́ nú Izlayɛ́li ví lɛ́ɛ. Énɛ́ gúdo ɔ́, é ɖɔ nú yě ɖɔ: “To e mi ná nyi akɔ bo má ɔ́ nɛ́. Mawu Mavɔmavɔ wɛ ná akɔta tɛ́nnɛ adaɖé lɛ́ɛ. Đó akɔta Hwlibɛ́ni ví lɛ́ɛ tɔn kpó Gadi ví lɛ́ɛ tɔn lɛ́ɛ kpó, kpódó akɔta vlɔ́ Manasée tɔn ɔ́ kpó kó yí ayǐkúngban yědɛɛ lɛ́ɛ tɔn. Ayǐkúngban e nyí akɔta we adaɖé énɛ́ lɛ́ɛ tɔn, ɖo Jeliko nukɔn, ɖo Judɛ́ɛn tɔ ɔ́ gúdo ɖo zǎnzǎnhwe jí é nɛ́.” Mawu Mavɔmavɔ ɖɔ nú Mɔyízi ɖɔ: “Vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó wɛ ná má to ɔ́ nú mi. Mi ná lɛ́ sɔ́ gǎn ɖokpó ɖokpó ɖo akɔta ɖokpó ɖokpó mɛ, bɔ yě ná dó alɔ yě. Gǎn énɛ́ lɛ́ɛ sín nyǐkɔ ɖíe: Kalɛ́bu Yefunnɛ́ɛ ví ɔ́; akɔta Judáa tɔn mɛ wɛ è sɔ́ ɛ ɖe; Cemuyɛlu, Amumihudi ví ɔ́, akɔta Sinmɛnyɔ́ɔ tɔn mɛ wɛ è sɔ́ ɛ ɖe. Elidadi, Kisilɔ́ni ví ɔ́, akɔta Bɛnjamɛ́ɛ tɔn mɛ wɛ è sɔ́ ɛ ɖe. Buki, Yogli ví ɔ́, akɔta Dan tɔn mɛ wɛ è sɔ́ ɛ ɖe. Hanniyɛ́li, Efódi ví ɔ́, akɔta Manasée Jozɛ́fu ví ɔ́ tɔn mɛ wɛ è sɔ́ ɛ ɖe. Kemuwɛ́li, Cifutáni ví ɔ́, akɔta Eflayímu tɔn mɛ wɛ è sɔ́ ɛ ɖe. Elisafáni, Panaki ví ɔ́, akɔta Zabulɔ́ɔn tɔn mɛ wɛ è sɔ́ ɛ ɖe. Palutiyɛ́li, Azani ví ɔ́, akɔta Isakáa tɔn mɛ wɛ è sɔ́ ɛ ɖe. Axiwudi, Celomi ví ɔ́, akɔta Acɛ́ɛ tɔn mɛ wɛ è sɔ́ ɛ ɖe. Pedaxɛli, Amumihudi ví ɔ́, akɔta Nɛfutali tɔn mɛ wɛ è sɔ́ ɛ ɖe.” Mɛ e Mawu Mavɔmavɔ ná gbe ɖɔ yě nǐ má Kanáa to ɔ́ nú Izlayɛ́li ví lɛ́ɛ ɔ́ nɛ́. Mawu Mavɔmavɔ ɖɔ xó nú Mɔyízi ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. É ɖɔ n'i ɖɔ: “Đɔ nú Izlayɛ́li ví lɛ́ɛ ɖɔ yě ní kpɔ́n to yětɔn mɛ, bó ná toxo ɖé lɛ́ɛ Levíi ví lɛ́ɛ, bónú yě ná nɔ mɛ. Yě ní ná ayǐkúngban e lɛ́ dó toxo énɛ́ lɛ́ɛ lɔmɔ̌ yě. Toxo énɛ́ lɛ́ɛ ná nyí yětɔn, bɔ yě ná nɔ mɛ, bɔ ayǐkúngban e lɛ́ dó toxo lɛ́ɛ ná nyí amagbo nú kanlin yětɔn alɔkpa alɔkpa lɛ́ɛ. Ayǐkúngban e lɛ́ dó toxo ɔ́, bɔ mi ná ná Levíi ví lɛ́ɛ ɔ́, ná bɛ́ sín toxo ɔ́ sín dǒ ɔ́ wú ɖo kɔ́xo, bó ná ɖó mɛ̌tlu afɔwe kanwe ko (500) lɛ́ dó. Mi ná jlɛ́ mɛ̌tlu afatɔ́n (1.000) bɛ́ sín toxo ɔ́ wú, ɖo zǎnzǎnhwe jí, bó ná jlɛ́ mɛ̌tlu afatɔ́n (1.000) ɖo tofɔligbé, bó ná jlɛ́ mɛ̌tlu afatɔ́n (1.000) ɖo totaligbé. Toxo ɔ́ ná ɖo tɛ́ntin. Ayǐkúngban e ná lɛ́ dó toxo lɛ́ɛ ɔ́ nɛ́. Đo toxo e mi ná ná Levíi ví lɛ́ɛ mɛ ɔ́, toxo ayizɛ́n ná tíin, bó ná nyí bibɛtɛn, bɔ mɛɖé hu mɛ ɔ́, é sixú hɔn hwlá cí fínɛ́, bɔ toxo kanɖé-nukún-we (42) ɖěvo lɛ́ɛ ná gɔ́ ná. Toxo e mi ná ná Levíi ví lɛ́ɛ bǐ ná bló toxo kanɖé tántɔn (48), kpó ayǐkúngban e lɛ́ dó yě lɛ́ɛ kpó. Akɔta lɛ́ɛ ɖokpó ɖokpó ná kpɔ́n lě e ayǐkúngban tɔn d'agba gbɔn ɔ́, bó ná ná toxo lɛ́ɛ yě: akɔta e d'agba ɔ́ ná ná toxo gěgé; akɔta e ka hwe ɔ́ ná ná toxo kpɛɖé.” Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖɔ: “Mi dó asá Judɛ́ɛn tɔ ɔ́, bó byɔ́ Kanáa to mɛ ɔ́, mi ná ɖó toxo ɖé lɛ́ɛ ayǐ, bó ná nɔ́ hɔn yi cí. Toxo énɛ́ lɛ́ɛ mɛ wɛ mɛ e ma tunwun ǎ bó hu gbɛtɔ́ ɔ́ ná hɔn yi cí. Toxo énɛ́ lɛ́ɛ mɛ wɛ mi ná nɔ́ hɔn yi cí, bó ná sixú gló mɛ e ɖo mɛ e kú ɔ́ sín hlɔn ba wɛ é. Énɛ́ ɔ́, mɛɖé ná hu mɛhutɔ́ ɔ́ cóbɔ é ná wá hwɛgun ɖo togun ɔ́ nukɔn, bɔ è nǎ ɖɔ hwɛ xá ɛ ǎ. Toxo e mi ná ná lɛ́ɛ mɛ ɔ́, ayizɛ́n ná nyí toxo e mɛ mi ná nɔ́ hɔn yi cí é. Mi ná ná toxo atɔn ɖo Judɛ́ɛn tɔ ɔ́ gúdo, bó ná ná atɔn ɖo Kanáa tomɛ; toxo e mɛ mi ná nɔ́ hɔn yi cí lɛ́ɛ wɛ toxo énɛ́ lɛ́ɛ ná nyí. Toxo ayizɛ́n énɛ́ lɛ́ɛ ná nyí bibɛtɛn nú Izlayɛ́li ví lɛ́ɛ, bó ná nyí nú jǒnɔ kpó mɛ e ná nɔ mi mɛ nú hwenu kpɛɖé lɛ́ɛ kpó. Mɛ ɖěbǔ má tunwun ǎ, bó hu mɛ ɔ́, mɛ ɔ́ ná hɔn yi fínɛ́. “Ényí mɛɖé zé alǐnnyánú ɖé dó xo nɔzo tɔn ná, bɔ é kú ɔ́, mɛhutɔ́ wɛ mɛ énɛ́ ɔ́ nyí, bɔ è nǎ hu é lɔmɔ̌. Ényí mɛɖé zé awǐnnya e sixú hu mɛ ɔ́ nyi dó nɔzo tɔn, bɔ é kú ɔ́, mɛhutɔ́ wɛ mɛ énɛ́ ɔ́ nyí, bɔ è nǎ hu é lɔmɔ̌. Ényí kpo e sixú hu mɛ ɔ́ wɛ mɛ ɔ́ zé dó xo nɔzo tɔn ná bɔ é kú ɔ́, mɛhutɔ́ wɛ mɛ énɛ́ ɔ́ nyí, bɔ è nǎ hu é lɔmɔ̌. Mɛ e ɖo mɛ e è hu ɔ́ sín hlɔn ba wɛ ɔ́ ná hu mɛhutɔ́ ɔ́. Ényí hlɔnbatɔ́ ɔ́ mɔ mɛhutɔ́ ɔ́, hlɔnbatɔ́ ɔ́ ná hu i. Ényí mɛɖé wa wǎngbɛ́númɛ nú xá nɔzo tɔn abǐ é ɖó ayixa nyanya dó wǔ tɔn bó nyi nǔɖé dó e bɔ é kú, abǐ nɔzo tɔn ɔ́ sín nǔ vɛ́ wǔ tɔn, bɔ é dó akpotokwín i bɔ é kú ɔ́, è nǎ hu mɛ e hu mɛ ɔ́, ɖó mɛhutɔ́ wɛ é nyí. Ényí mɛ e ɖo mɛ e è hu ɔ́ sín hlɔn ba wɛ ɔ́ mɔ mɛ e hu mɛ ɔ́, é ná hu mɛ e hu mɛ ɔ́. “Lo ɔ́, ényí mɛɖé sísɛ́ nɔzo tɔn vawun, bɔ é má nyí mɛnúvɛ́mɛwú sín nǔ ǎ, abǐ mɛɖé nyi nǔɖé dó nɔzo tɔn bɔ é má nyí kpó ayixa nyanya kpó ǎ ɔ́, abǐ mɛ ɔ́ tunwun ǎ bó nyi awǐnnya e sixú hu mɛ ɔ́ dó nɔzo tɔn bɔ é kú, bɔ é má nyí ɖɔ mɛnúvɛ́mɛwú sín nǔ wɛ é wa xá ɛ ǎ, bó má ká ɖo biba ná wa nǔ nyanya xá ɛ wɛ ǎ ɔ́, sɛ́n e togun ɔ́ ná xwedó dó ɖɔ hwɛ xá mɛ e dó nǔ mɛ bɔ è kú ɔ́ kpó mɛ e ná ba hlɔn ɔ́ kpó lɛ́ɛ ɖíe: Togun ɔ́ ná hwlɛ́n mɛhutɔ́ ɔ́ ɖo hlɔnbatɔ́ ɔ́ sí, bó ná lɛ́ kɔ n'i yi toxo e nyí bibɛtɛn, bɔ é kó hɔn yi hwlá cí ɔ́ mɛ. “É ná nɔ fínɛ́ káká jɛ hwenu e vɔ̌sánú-xwlémawutɔ́ ɖaxó e è kɔn ami dó ta ná ɔ́ ná kú dó é. Ényí mɛhutɔ́ ɔ́ ká tɔ́n sín toxo e nyí bibɛtɛn, bɔ é hɔn hwlá yi cí ɔ́ mɛ, bɔ mɛ e ɖo mɛ e é hu ɔ́ sín hlɔn ná ba wɛ ɔ́ mɔ ɛ ɖo toxo ɔ́ gúdo bo hu i ɔ́, hlɔnbatɔ́ ɔ́ ná nyí mɛhutɔ́ hwenɛ́nu ǎ. Đó mɛhutɔ́ ɔ́ ɖó ná nɔ toxo e nyí bibɛtɛn ɔ́ mɛ káká bɔ vɔ̌sánú-xwlémawutɔ́ ɖaxó ɔ́ ná kú. Ényí vɔ̌sánú-xwlémawutɔ́ ɖaxó ɔ́ kú ɔ́, mɛhutɔ́ ɔ́ hɛn ɔ́, é ná lɛ́ kɔ yi to tɔn mɛ. “Sɛ́n e mi kpó vǐ mitɔn lɛ́ɛ kpó ná nɔ́ xwedó hwebǐnu dó ɖɔ hwɛ xá mɛ ɖo fí e mi ná nɔ́ nɔ lɛ́ɛ bǐ é nɛ́. “Ényí mɛɖé hu mɛ ɔ́, è nǎ hu é lɔmɔ̌; amɔ̌, è ɖǒ ná mɔ kúnnuɖetɔ́ gěgé hwɛ̌; kúnnuɖetɔ́ ɖokpó kpé bɔ è nǎ ɖǒ kúhwɛ nú mɛ e hu mɛ ɔ́ ǎ. Mi ma yí nǔ ɖu bó jó mɛhutɔ́ e è ɖǒ ná hu ɔ́ dó nyi gbɛ ó, ɖó è ɖǒ ná hu i. Mi ma yí nǔ ɖu, bó ná tɛn mɛhutɔ́ ɔ́ bónú é hɔn yi toxo e nyí bibɛtɛn tɔn ɔ́ mɛ, bó ná wá lɛ́ kɔ yi to tɔn mɛ, cóbɔ vɔ̌sánú-xwlémawutɔ́ ɖaxó ɔ́ ná kú ó. “Mi ma hɛn to e mɛ mi ɖe ɔ́ blí ó, ɖó nú è hu mɛ ɖo to ɖé mɛ ɔ́, to ɔ́ nɔ́ nyí to blíblí. Ényí mɛ ɖé hu mɛ ɔ́, mɛ e hu mɛ ɔ́ jɛ́n è nǎ hu, cóbó ná sixú slá wǔ nú to ɔ́. Mi ma hɛn to e mɛ mi ná yi nɔ, bɔ nyɛ ɖésúnɔ ná nɔ tɛ́ntin mitɔn ɔ́ blí ó, ɖó nyɛ wɛ nyí Mawu Mavɔmavɔ; nyɛ wɛ nɔ nɔ Izlayɛ́li ví lɛ́ɛ tɛ́ntin.” Xwédo Galadi e nyí Makíi ví, bó nyí Manasée vívú, ɖo Jozɛ́fu kúnkan lɛ́ɛ mɛ ɔ́ sín hɛ̌nnugán lɛ́ɛ wá Mɔyízi kpó akɔtagán Izlayɛ́li tɔn lɛ́ɛ kpó gɔ́n, bó ɖɔ nú yě ɖɔ: “Gǎn mǐtɔn Mɔyízi, hwenu e Mawu Mavɔmavɔ ɖɔ hwi ní nyi akɔ bo má to ɔ́ nú Izlayɛ́li ví lɛ́ɛ ɔ́, é lɛ́ ɖɔ hwi ní má nɔví mǐtɔn Selofɛxádi sín ayǐkúngban lɛ́ɛ nú vǐ tɔn nyɔ̌nu lɛ́ɛ. Din ɔ́, ényí yě ká yi da asú ɖo akɔta Izlayɛ́li tɔn lɛ́ɛ ɖěvo mɛ ɔ́, énɛ́ ɔ́, è nǎ kán ayǐkúngban yětɔn e ɖo akɔta mǐtɔn mɛ ɔ́, bó ná zé dó ayǐkúngban e nyí akɔta yɔ̌yɔ́ e mɛ yě byɔ́ ɔ́ tɔn jí. Hǔn, ayǐkúngban e è nyi akɔ bo ná mǐ ɔ́ ɖo nǎ ɖe kpo wɛ nɛ́. Énɛ́ ɔ́, xwe e xwe è nǎ ɖu ‘Awǎjijɛxwe’ ɔ́, è nǎ kán ayǐkúngban yětɔn ɔ́ sín akɔta mǐtɔn mɛ bǐ dégbédégbé, bó ná zé dó akɔta yětɔn yɔ̌yɔ́ ɔ́ tɔn jí.” Mɔyízi ɖɔ nǔ e Mawu Mavɔmavɔ ɖɔ ɔ́ nú Izlayɛ́li ví lɛ́ɛ. É ɖɔ: “Akɔta Jozɛ́fu ví lɛ́ɛ tɔn sín hwɛ jɔ. Gbeta e Mawu Mavɔmavɔ ɖe tɔ́n dó Selofɛxádi ví nyɔ̌nu lɛ́ɛ wú lɛ́ɛ ɖíe: yě sixú da mɛ e jló yě ɔ́; amɔ̌, akɔta tɔ́ yětɔn lɛ́ɛ tɔn sín hɛ̌nnu mɛ jɛ́n yě ná da asú ɖe. Ayǐkúngban e nyí Izlayɛ́li ví lɛ́ɛ tɔn ɔ́, è nǎ kán akɔta ɖě tɔn dó akɔta ɖěvo tɔn jí ǎ. Lo ɔ́, Izlayɛ́li ví ɖokpó ɖokpó ɖó ná jɛ hun dó ayǐkúngban e nyí tɔ́ tɔn sín akɔta tɔn ɔ́ jí syɛ́nsyɛ́n. Vǐ nyɔ̌nu e ná ɖó ayǐkúngban, ɖo akɔta Izlayɛ́li tɔn lɛ́ɛ mɛ ɔ́ ɖó ná da asú ɖo akɔta tɔ́ tɔn tɔn ɔ́ sín hɛ̌nnu ɖokpó mɛ, bónú Izlayɛ́li ví lɛ́ɛ ɖokpó ɖokpó ná hɛn ayǐkúngban e nyí tɔ́ yětɔn lɛ́ɛ tɔn é, bɔ ɖě ná hwe ɖ'é wú ǎ. Énɛ́ ɔ́, ayǐkúngban akɔta ɖě tɔn ɖě ná byɔ́ akɔta ɖěvo tɔn mɛ ǎ. Lo ɔ́, akɔta Izlayɛ́li ví lɛ́ɛ tɔn lɛ́ɛ ɖokpó ɖokpó ná jɛ hun dó ayǐkúngban e nyí étɔn ɔ́ jí.” Selofɛxádi sín vǐ nyɔ̌nu lɛ́ɛ ká bló ɖó nǔ e Mawu Mavɔmavɔ ɖɔ nú Mɔyízi ɔ́ jí. Maxla, Tíisa, Hogla, Miluka kpódó Nɔwa kpó da tɔ́ yětɔn sín nɔví lɛ́ɛ. Selofɛxádi sín nɔví nyɔ̌nu wɛ yě nyǐ. Yě da asú ɖo Manasée Jozɛ́fu ví ɔ́ sín hɛ̌nnu lɛ́ɛ mɛ; énɛ́ ɔ́, ayǐkúngban e nyí yětɔn lɛ́ɛ nɔ akɔta tɔ́ yětɔn tɔn ɔ́ sín hɛ̌nnu ɔ́ sí. Sɛ́n kpó tito kpó e Mawu Mavɔmavɔ ná Izlayɛ́li ví lɛ́ɛ gbɔn Mɔyízi jí ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ tó, ɖo Jeliko toxo ɔ́ nukɔn ɔ́ lɛ́ɛ nɛ́. Xó e Mɔyízi ɖɔ nú Izlayɛ́li ví lɛ́ɛ é wɛ ɖo wěma élɔ́ mɛ. Hwenɛ́nu ɔ́, Izlayɛ́li ví lɛ́ɛ ɖo ayǐkúngban wɛnjɛ ɖé jí ɖo gbětótló mɛ, ɖo Judɛ́ɛn tɔ ɔ́ sín zǎnzǎnhwe jí, ɖo Súfu kpá, ɖo Paláni, kpó Tofɛ́li kpó Lavani kpó Haselɔ́ti, kpódó Di-Zaxávu kpó tɛ́ntin. Ényí è gosín Holɛ́bu só ɔ́ kɔn, bó wlí ali e wá Seyíi só kan mɛ é, bó ná yi Kadɛ́ci-Baanɛ́ya ɔ́, è nɔ zun zɔnlin nú azǎn wǒ-ɖokpó. Izlayɛ́li ví lɛ́ɛ gosín Ejípu ɔ́, é bló xwe kanɖé (40); sun wǒ-ɖokpógɔ́ ɔ́ e ɖo xwe kanɖégɔ́ énɛ́ ɔ́ mɛ ɔ́ sín azǎn nukɔntɔn gbe wɛ Mɔyízi ɖɔ nǔ e Mawu Mavɔmavɔ ɖɔ é ní ɖɔ nú Izlayɛ́li ví lɛ́ɛ ɔ́ nú yě. Hwenɛ́nu ɔ́, Mɔyízi ko ɖu ɖo Amɔliti lɛ́ɛ sín axɔ́sú Sihɔ́ni kpó Basáni xɔ́sú Ɔgu kpó jí, có bó ɖɔ xó e Mawu Mavɔmavɔ ɖɔ é ní ɖɔ nú Izlayɛ́li ví lɛ́ɛ é. Axɔ́sú Sihɔ́ni ɔ́ nɔ́ nɔ Hɛcibɔ́ni, bɔ axɔ́sú Ɔgu ɔ́ nɔ́ nɔ Acitalɔ́ti. Edlɛyi wɛ Mɔyízi ɖu ɖo axɔ́sú Ɔgu jí ɖe. Mɔyízi jɛ Mawusɛ́n ɔ́ kplɔ́n mɛ jí ɖo Mɔwabu, ɖo Judɛ́ɛn tɔ ɔ́ sín zǎnzǎnhwe jí. Xó e é ɖɔ lɛ́ɛ ɖíe: Hwenu e mǐ ɖo Holɛ́bu só kɔn ɔ́, Mawu Mavɔmavɔ, Mawu mǐtɔn ɖɔ nú mǐ ɖɔ: “Mi ɖo só élɔ́ kpá din ɔ́, é kó lín. Din ɔ́, mi wlí ali, bó yi sókan mɛ fí e Amɔliti lɛ́ɛ ɖe ɔ́. Mi gba kpé ayǐkúngban e sɛkpɔ́ yě lɛ́ɛ bǐ jí: mi yi ayǐkúngban wɛnjɛ Judɛ́ɛn tɔn ɔ́ jí, mi yi sókan mɛ, mi yi tofɔligbé, mi yi xutó, mi yi Kanáanu lɛ́ɛ sín to mɛ, bó yi Libáan. Mi gba kpé fí énɛ́ lɛ́ɛ bǐ káká yi tɔ ɖaxó Efláti tɔn ɔ́ tó. Éɖíe, un ná to ɔ́ mi. Mi yi yí, ɖó to e sín akpá nyɛ Mawu Mavɔmavɔ dó nú tɔ́gbó mitɔn Ablaxámu, kpó Izáki kpó Jakɔ́bu kpó ɖɔ un ná ná vǐ yětɔn lɛ́ɛ nɛ́.” Mɔyízi dlɛ́n xó ɔ́ d'é nú, bó ɖɔ: “Hwenɛ́nu ɔ́, un ɖɔ nú mi ɖɔ nyi ɖokpónɔ kún sɔ́ sixú nɔ mi nu ó. Mawu Mavɔmavɔ, Mawu mitɔn bló bɔ mi gba kún, bó sukpɔ́ din sunví ɖɔhun. É jló mì ɖɔ Mawu Mavɔmavɔ, Mawu tɔ́gbó mitɔn lɛ́ɛ tɔn ní bló bónú mi ní lɛ́ sukpɔ́, bó yi mɔ̌hun donu afatɔ́n (1.000), bónú é ní dó acɛ mi jí, lě e é dó akpá tɔn gbɔn é. Lo ɔ́, mi ní ká tunwun ɖɔ nyɛ ɖokpó kún sixú ɖɔ nǔ e ɖo mi gbo wɛ ɔ́ xá mi ó, nyɛ ɖokpónɔ kún sixú wa nǔ e ba wɛ mi ɖe ɔ́ nú mi ó, nyɛ ɖokpónɔ kún sixú ɖɔ hwɛ gbo nú mi ó. Mi kpɔ́n akɔta ɖokpó ɖokpó mɛ, bó cyán gbɛtɔ́ nǔnywɛ́tɔ́, gbɛtɔ́ e mɔ nukúnnú jɛ nǔ mɛ é, gbɛtɔ́ e è sixú ɖe kúnnu ɖagbe ná lɛ́ɛ, bónú má sɔ́ yě gǎn ɖó togun ɔ́ nu. Ée un ɖɔ mɔ̌ nú mi ɔ́, mi yí gbe nú mì ɖɔ xó jɔ xó wɛ un ɖɔ. Énɛ́ ɔ́, un cyán gbɛtɔ́ nǔnywɛ́tɔ́, gbɛtɔ́ e è sixú ɖe kúnnu ɖagbe ná, bɔ yě kó ɖó azɔ̌, bó nɔ́ wa ɖo akɔta mitɔn lɛ́ɛ mɛ lɛ́ɛ. Un zé mɛ ɖě ɖó gbɛtɔ́ afatɔ́n (1.000) nu, bó zé mɛ ɖě ɖó gbɛtɔ́ kanwe ko (100) nu; mɛ ɖě kpa acɛ dó gbɛtɔ́ kanɖé wǒ (50) abǐ wǒ nu? Un zɔ́n mɛ ɖě lɛ́ɛ ɖɔ yě ní cɔ́ mɛ lɛ́ɛ ɖo akɔta ɖokpó ɖokpó mɛ. Énɛ́ ɔ́, un kplɔ́n nǔ mɛ énɛ́ lɛ́ɛ e nyí hwɛɖɔtɔ́ mitɔn lɛ́ɛ; un ɖɔ lě e yě ná ɖɔ hwɛ gbɔn é nú yě; é ɖɔ nú yě ɖɔ: ‘Mi wlí tó hwɛ e nɔví mitɔn lɛ́ɛ ná wá jɛ nú mi lɛ́ɛ wú ganjí, bó hɛn ayi dó xó e ná dɔn Izlayɛ́li ví kpó nɔví tɔn ɖě kpó, abǐ to ɖěvo mɛ nu ɖé kpó wá hwɛ nukɔn ɔ́ wú, bó ɖɔ gbo ganjí. Mi ma nɔ mɛ ɖěbǔ jí ó; mi kú hǔn, bó ɖótó gǎn kpó ahwan kpó bǐ. Mi ma nú mɛ ɖěbǔ ván nukún dó mi ó, Mawu gbe wɛ mi ná xo bó ná ɖɔ hwɛ. Ényí xó ɖé ná hú gǎn mi hǔn, mi wá ɖɔ nú mì bónú má gbéjé kpɔ́n.’ Hwenɛ́nu ɔ́, un ɖɔ lě e mi ná wa nǔ gbɔn ɔ́ bǐ nú mi.” Énɛ́ ɔ́ gúdo ɔ́, Mawu Mavɔmavɔ, Mawu mǐtɔn ná gbe mǐ, bɔ mǐ gosín Holɛ́bu bó gbɔn gbětótló ɖaxó e dó xɛsi bɔ mi bǐ tunwun ganjí ɔ́ mɛ dín, lobo wlí ali e yi Amɔliti lɛ́ɛ sín sókan mɛ é. Ée mǐ wá jɛ Kadɛ́ci-Baanɛ́ya é ɔ́, un ɖɔ nú mi ɖɔ: “Mi ɖíe ɖo Amɔliti lɛ́ɛ sín só e ná ná mǐ wɛ Mawu Mavɔmavɔ, Mawu mǐtɔn ɖe ɔ́ ná sɛkpɔ́ wɛ e. Mi kpɔ́n, Mawu Mavɔmavɔ, Mawu mitɔn sɔ́ to élɔ́ dó acɛ mitɔn mɛ. Mi yá wǔ wlí ali bó yí to ɔ́, lě e Mawu Mavɔmavɔ, Mawu tɔ́gbó mitɔn lɛ́ɛ tɔn dó akpá tɔn nú mi gbɔn é. Mi kpan akɔ́n, mi ma ɖi xɛsi ó.” Lo ɔ́, mi mɛ bǐ wá mɔ mì bó ɖɔ: “Mi nú mǐ ná sɛ́ gbɛtɔ́ dó to ɔ́ mɛ, nú yě ná yi kpɔ́n ayǐ nú mǐ. Azɔ̌ e yě ná wa é wɛ nyí ɖɔ yě ná ɖɔ ali e mǐ nǎ gbɔn lɛ́ɛ, kpó toxo e mɛ mǐ nǎ gbɔn lɛ́ɛ kpó nú mǐ.” Xó mitɔn nyɔ́ nukún ce mɛ. Énɛ́ ɔ́ wú wɛ un cyán mɛ ɖokpó ɖokpó gbɔn akɔta lɛ́ɛ ɖokpó ɖokpó mɛ, bɔ yě bló mɛ wěwe. Yě wlí ali e gbɔn sókan mɛ ɔ́ ɖidó, bó yi tɔdo Ɛcikɔ́lu tɔn mɛ, bó ba do ná. Yě gbɛ atínsínsɛ́n e ɖo to ɔ́ mɛ lɛ́ɛ wá nú mǐ. Yě ɖɔ to e na ná mǐ wɛ Mawu Mavɔmavɔ, Mawu mǐtɔn ɖe ɔ́ nyɔ́ ɖésú. Lo ɔ́, mi gbɛ́ ɖɔ émí kún ná yi to ɔ́ mɛ ó, mi se tónú nú Mawu Mavɔmavɔ, Mawu mitɔn ǎ. Mi nɔ goxɔ mitɔn lɛ́ɛ mɛ, bó húnhún nǔ ɖɔ bó ɖɔ: “Wǎn wɛ Mawu Mavɔmavɔ gbɛ́ nú mǐ wú wɛ é ɖe mǐ tɔ́n sín Ejípu. É jló ná jó mǐ nú Amɔliti lɛ́ɛ, bɔ yě ná hu mǐ wú wɛ é bló mɔ̌. Étɛ́wú wɛ mǐ ká ná yi dɔ̌n tawun? Mǐ ɖǒ akɔ́nkpinkpan mɔ̌hun ǎ. Nɔví mǐtɔn lɛ́ɛ ɖésú kó ɖɔ nú mǐ ɖɔ to ɔ́ mɛ nu lɛ́ɛ jɔ asú, bó ɖó hlɔ̌nhlɔ́n hú mǐ, bɔ toxo yětɔn lɛ́ɛ lɔ d'agba, bɔ è mɛ ahohó lɛ́ lɛ̌ dó, bɔ é yi jǐ ɖésú. Yě lɛ́ mɔ Anáki ví, gbɛtɔ́ jangan jangan nɛ́ lɛ́ɛ ɖo toxo ɔ́ mɛ.” Un ka ɖɔ nú mi ɖɔ: “Ado ma hu mi ó. Mi ma ɖi xɛsi nú yě ó. Mawu Mavɔmavɔ, Mawu mitɔn e ɖo ali xlɛ́ mi wɛ ɔ́ ná fun ahwan nú mi, lě e é kó bló gbɔn bɔ mi mɔ ɖo Ejípu, bó lɛ́ mɔ ɖo gbětótló mɛ é. Mi ɖésú mɔ ganjí ɖɔ é hɛn mi awa mɛ lě e tɔ́ nɔ́ hɛn vǐ tɔn awa mɛ é ɖɔhun; mɔ̌ wɛ é hɛn mi gbɔn sín dɔ̌n káká wá fí.” Mi ka ɖeji dó Mawu Mavɔmavɔ, Mawu mitɔn wú hwenɛ́nu ǎ. É ká ɖo mɔ̌ có, é wɛ nɔ́ nɔ nukɔn nú mi ɖo ali jí, bó nɔ́ ba fí e mi ná ɖó gɔnu ɖó ɔ́ nú mi; zǎn kú ɔ́, é nɔ́ nɔ nukɔn mitɔn ɖo myɔ ɖé mɛ, bó nɔ xlɛ́ ali mi; kéze ɔ́, é nɔ́ nɔ nukɔn mitɔn ɖo akpɔ́kpɔ́ ɖaxó ɖé mɛ. Mawu Mavɔmavɔ se nǔ e húnhún ɖɔ wɛ mi ɖe lɛ́ɛ, bó sin xomɛ bó ɖɔ: “Mi vǐ baɖabaɖa élɔ́ lɛ́ɛ ɔ́, mɛ ɖěbǔ ɖo mi mɛ, bó ná byɔ́ to ɖagbe e sín akpá un dó nú tɔ́gbó mitɔn lɛ́ɛ é mɛ ǎ. Un ɖɔ bó tɛ afɔ jí. Kalɛ́bu Yefunnɛ́ɛ ví ɔ́ kɛ́ɖɛ́ wɛ ná mɔ to ɔ́. Un ná ná ɛ to e mɛ é tɛ afɔ é, bɔ é ná nyí é kpódó vǐ tɔn lɛ́ɛ kpó tɔn. Đó é nɔ gbejí nú nyɛ Mawu Mavɔmavɔ, bɔ nǔ bǐ vɔ ɖ'é wú.” Mi wú wɛ Mawu Mavɔmavɔ sin xomɛ dó nyi lɔmɔ̌, bó ɖɔ nú mì ɖɔ: “Hwi lɔmɔ̌ ná byɔ́ to ɔ́ mɛ ǎ. Amɔ̌, mɛsɛntɔ́ towe Jozuwée Nuni ví ɔ́ ná byɔ́ to ɔ́ mɛ. Nǎ ɛ akɔ́nkpinkpan, ɖó é wɛ ná kplá Izlayɛ́li ví lɛ́ɛ bɔ yě ná yí to ɔ́.” Énɛ́ ɔ́ gúdo ɔ́, Mawu Mavɔmavɔ ɖɔ nú mi mɛ bǐ ɖɔ: “Mi nɔ ɖɔ mɛ e ná ɖu ɖo émí jí lɛ́ɛ ná bɛ́ vǐ mitɔn lɛ́ɛ. Din ɔ́, vǐ mitɔn énɛ́ lɛ́ɛ e má kó tunwun nǔ ɖagbe kpó nǔ nyanya kpó ǎ lɛ́ɛ wɛ ná byɔ́ to ɔ́ mɛ. Yě wɛ ná yí to ɔ́ bɔ é ná nyí yětɔn. Lo ɔ́, midɛɛ lɛ́ɛ ɔ́, mi bo lɛ́ kɔ bó gbɔn gbětótló mɛ, bó tunta Xu Vɔvɔ ɔ́ wá jí.” Ée Mawu Mavɔmavɔ ɖɔ mɔ̌ ɔ́, mi ɖɔ nú mì ɖɔ: “Mǐ hu hwɛ dó Mawu Mavɔmavɔ. Amɔ̌, din ɔ́, mǐ jló ná yi ahwan fun gbé lě e Mawu Mavɔmavɔ, Mawu mǐtɔn ɖɔ gbɔn nú mǐ é.” Ée mi ɖɔ mɔ̌ ɔ́, mi mɛ ɖokpó ɖokpó sɔ́ ahwan nú, bó vɛdó ɖɔ toxo e ɖo sókan mɛ ɔ́ ná yí ɔ́, nǔ fífá wɛ nyí sín. Mawu Mavɔmavɔ ka ɖɔ nú mì ɖɔ: “Đɔ nú yě ɖɔ yě má yi ahwan fun gbé ó, ɖó un ɖo kpɔ́ xá yě ǎ. Yě má sɔ́ yěɖée yi jó, bónú kɛntɔ́ yětɔn lɛ́ɛ hu yě ó.” Ée Mawu Mavɔmavɔ ɖɔ mɔ̌ ɔ́, nyi lɔ ka gbɛ́ nú mi, bɔ mi jló ná ɖótó mì ǎ. Mi se tónú nú Mawu Mavɔmavɔ ǎ, bó syɛ́n ta bó yi só ɔ́ jí. Bɔ Amɔliti lɛ́ɛ gosín káká só yětɔn ta fí e yě ɖe ɔ́, bó wá kpé mi ɖo Seyíi gbé jí, bó vun blá mi wǐin ɖɔhun, bó nya mi káká wá Hɔ́ɔma. Ée mi lɛ́ kɔ ɔ́, mi yi Mawu Mavɔmavɔ gɔ́n bó sa vo n'i; é ká jló ná se gbe mitɔn ǎ; é wlí tó xó mitɔn wú ǎ. Énɛ́ ɔ́, mi cí Kadɛ́ci-Baanɛ́ya fínɛ́ káká bɔ é cikɔ. Énɛ́ ɔ́ gúdo ɔ́, mǐ lɛ́ kɔ gbɔn gbětótló mɛ, bó tunta Xu Vɔvɔ ɔ́ wá jí, lě e Mawu Mavɔmavɔ ɖɔ nú mì gbɔn é. Mǐ nɔ ɖo gɔnu ɖó lɛ́ dó Seyíi só ɔ́ wɛ, bó nɔ fínɛ́ xɔ azǎn. Mawu Mavɔmavɔ ɖɔ nú mì ɖɔ: “Fí e mi nɔ só élɔ́ kɔn jɛ din é kpé. Din ɔ́, mi bo lɛ́ kɔ kpan ta totaligbé.” Mawu Mavɔmavɔ ɖɔ nyi ní ɖɔ nú mi ɖɔ: “Mi ná gbɔn Seyíi dín, ɖo fí e nɔví mitɔn Esawu ví lɛ́ɛ ɖe ɔ́. Yě ná ɖi xɛsi nú mi; amɔ̌, mi ka nɔ acéjí. Mi ma wa nǔ ɖěbǔ nú yě ó, ɖó nyɛ Mawu Mavɔmavɔ, Mawu mitɔn ná ná ayǐkúngban afɔkpákpá ɖokpó mi ɖo to yětɔn mɛ ǎ. Esawu wɛ un ná Seyíi só ɔ́, bɔ é nyí étɔn. Nǔɖuɖu e mi ná ɖu ɔ́, akwɛ́ wɛ mi ná zé dó xɔ ná ɖo yě sí. Sin vɔ́vɔ́ e mi ná nu ɔ́, akwɛ́ wɛ mi ná zé dó jɛ ná ɖo yě sí.” Đó nyɛ Mawu Mavɔmavɔ, Mawu mitɔn dó acɛ azɔ̌ e mi wa lɛ́ɛ bǐ jí. Un nya xɛ ɖo mi jí hwenu e mi ɖo gbětótló ɖaxó nɛ́ mɛ gbɔn dín wɛ é. Xwe kanɖé nɛ́ é nɔ kpɔ́ xá mi xɔ nɛ́, bɔ nǔ ɖěbǔ hwedó mi ǎ. Énɛ́ ɔ́, mǐ sɔ́ gbɔn Seyíi gbé jí fí e nɔví mǐtɔn Esawu ví lɛ́ɛ ɖe é ǎ, mǐ ká sɔ́ gbɔn ali e gbɔn tɔdo mɛ é ǎ. Mǐ gbɔn Eyilati kpó Esiɔ́ni-Gevɛ́ɛ kpó sín slá lɛ́ɛ mɛ ǎ. Mǐ húzú ali bó gbɔn Mɔwabu sín gbětótló mɛ dín. Mawu Mavɔmavɔ ɖɔ nú mì ɖɔ: “Mi ma ba nǔ ɖɔ Mɔwabunu lɛ́ɛ ó, mi ma tɔ́n ahwan yě ó, ɖó un ɖo nǔ ɖěbǔ ná ná mi wɛ ɖo ayǐkúngban yětɔn jí ǎ: Lɔ̌ti ví lɛ́ɛ wɛ un ná Áa toxo énɛ́.” Đ'ayǐ ɔ́, Emíti lɛ́ɛ wɛ nɔ Áa toxo ɔ́ mɛ. Emíti lɛ́ɛ ɔ́, togun syɛ́nsyɛ́n ɖé wɛ yě nyǐ, yě sukpɔ́ ɖésú; gbɛtɔ́ jɔ asú wɛ yě nyǐ Anáki ví lɛ́ɛ ɖɔhun. Mɛ ɖé lɛ́ɛ nɔ́ vɛdó ɖɔ Hlafa ví wɛ yě nyǐ Anáki ví lɛ́ɛ ɖɔhun sín, lo ɔ́, Mɔwabunu lɛ́ɛ nɔ́ ylɔ́ yě ɖɔ Emíti. Holiti lɛ́ɛ wɛ nɔ Seyíi gbé ɔ́ jí ɖ'ayǐ cóbɔ Esawu ví lɛ́ɛ wá nya yě, bó sú kún yětɔn dó, bó jɛ tɛn yětɔn mɛ, lě e Izlayɛ́li ví lɛ́ɛ bló gbɔn bó ɖo to e Mawu Mavɔmavɔ ná yě bɔ é nyí yětɔn ɔ́ mɛ gbɔn é. Mawu Mavɔmavɔ ɖɔ: “Din ɔ́, mi bo jɛ ali bó dó asá Zelɛ́di tɔ ɔ́, bó dín.” Énɛ́ ɔ́, mǐ jɛ ali bó dó asá tɔ ɔ́. Cóbónú mǐ nǎ gosín Kadɛ́ci-Baanɛ́ya bó gbɔn Zelɛ́di tɔ ɔ́ mɛ dín ɔ́, xwe gbantɔ́n-nukún-atɔn (38) wɛ mǐ bló. Hwenɛ́nu ɔ́, mɛ e ɖó xwe e ná fun ahwan lɛ́ɛ bǐ kó kú, lě e Mawu Mavɔmavɔ ko ɖɔ gbɔn nú yě ɖ'ayǐ é. Mawu Mavɔmavɔ ɖésú tɔ́n ahwan yě bó sú kún yětɔn dó káká yi fó. Ée gbɛtɔ́ énɛ́ lɛ́ɛ bǐ xwíí vɔ ɔ́, Mawu Mavɔmavɔ ɖɔ nú mì ɖɔ: “Din ɔ́, mi ná gbɔn Áa toxo ɔ́ mɛ, Mɔwabu dogbó ɔ́ jí dín, bó ná wá jɛ Amumɔ́ɔ nu lɛ́ɛ sín to nukɔn; mi ma ba nǔ ɖɔ yě ó; mi ma tɔ́n ahwan yě ó, ɖó un ɖo nǔ ɖěbǔ ná ná mi wɛ ɖo ayǐkúngban yětɔn jí ǎ: ɖó Lɔ̌ti ví wɛ nú yě lɔmɔ̌; yě wɛ un ná ayǐkúngban énɛ́ ɔ́.” È nɔ ɖɔ to énɛ́ ɔ́, Hlafa ví lɛ́ɛ sín to wɛ, ɖó Hlafa ví lɛ́ɛ e Amumɔ́ɔ ví lɛ́ɛ nɔ ylɔ́ ɖɔ Zamuzumímu lɛ́ɛ é wɛ ko nɔ fínɛ́ ɖ'ayǐ. Togun ɖaxó ɖé wɛ yě nyí, yě sukpɔ́ ɖésú, bó jɔ asú, Anáki ví lɛ́ɛ ɖɔhun. Lo ɔ́, Mawu Mavɔmavɔ sú kún yětɔn dó ɖo Amumɔ́ɔ ví lɛ́ɛ nukɔn, bɔ Amumɔ́ɔ ví lɛ́ɛ bɛ́ nǔ yětɔn lɛ́ɛ bǐ, bó jɛ tɛn yětɔn mɛ. Mɔ̌ wɛ Mawu Mavɔmavɔ bló gbɔn nú Esawu ví lɛ́ɛ ɖo Seyíi; é sú Holiti lɛ́ɛ sín kún dó ɖo nukɔn yětɔn. Esawu ví lɛ́ɛ bɛ́ nǔ yětɔn lɛ́ɛ, bó jɛ tɛn yětɔn mɛ, bó ɖo fínɛ́ káká jɛ égbé. Awanu lɛ́ɛ lɔmɔ̌ ɔ́, káká Gaza gletoxo lɛ́ɛ mɛ wɛ yě nɔ́ nɔ ɖ'ayǐ, lo ɔ́ Kafutɔ́ɔnu lɛ́ɛ gosín to yětɔn mɛ, bó wá sú kún yětɔn dó bó jɛ tɛn yětɔn mɛ. Énɛ́ gúdo ɔ́, Mɔyízi ɖɔ Mawu Mavɔmavɔ ɖɔ: “Mi sí te bó jɛ ali; mi gbɔn Aanɔ́ni tɔ ɔ́ mɛ dín. Un ná jó axɔ́sú Hɛcibɔ́ni tɔn Amɔliti e è nɔ ylɔ́ ɖɔ Sihɔ́ni ɔ́ kpódó to tɔn kpó nú mi. Mi jɛ to ɔ́ yí jí; mi tɔ́n ahwan yě. Bɛ́ sín égbé ɔ́, un ná bló bɔ akɔta e ɖo gbɛ ɔ́ mɛ lɛ́ɛ bǐ ná ɖo xɛsi jí, bó ná lɛ́ ɖo adohu jí ɖó mi wú. Ényí è ɖɔ xó mitɔn lě bónú yě se lě tlóló ɔ́, xɛsi ná jɛ yě jí, bɔ yě ná nɔ́ sísɔ́.” Mɔyízi ɖɔ: “Hwenu e mǐ ɖo Kedemɔ́ti sín gbětótló mɛ ɔ́, un sɛ́ wɛnsagun dó Hɛcibɔ́ni xɔ́sú Sihɔ́ni, nú yě ní yi ɖɔ xɔ́ntɔn xɔ́ntɔn xó n'i ɖɔ: ‘Mǐ jló ná gbɔn to towe mɛ dín. Mǐ ná wlí ali bó ná dín tlɔlɔ; mǐ ná zɛ dó ɖisí ǎ, mǐ ká ná zɛ dó amyɔ ǎ. Mǐ ná sú nǔ e mǐ ná ɖu é kpó sin e mǐ ná nu é kpó sín axɔ́ we. Vɛ̌ kó jó mǐ dó kpowun bónú mǐ ná gbɔn to towe mɛ dín. Esawu ví lɛ́ɛ ɔ́, yě kó jó mǐ dó bɔ mǐ gbɔn Seyíi dín; Mɔwabunu lɛ́ɛ lɔ jó mǐ dó bɔ mǐ gbɔn Áa toxo ɔ́ mɛ dín. Mǐ nǎ gbɔn Judɛ́ɛn tɔ ɔ́ mɛ dín, bó byɔ́ to e ná mǐ wɛ Mawu Mavɔmavɔ, Mawu mǐtɔn ɖe é mɛ.’ Lo ɔ́, axɔ́sú Sihɔ́ni ná gbe mǐ, bónú mǐ nǎ gbɔn to tɔn mɛ dín ǎ, ɖó Mawu Mavɔmavɔ, Mawu mǐtɔn hɛn ayixa tɔn syɛ́n bǐ dégbédégbé, bónú mi ná sixú yí to tɔn e mɛ mi ɖe égbé din é. Mawu Mavɔmavɔ ɖɔ nú mì ɖɔ: ‘Đǒtó mì, bɛ́ sín din ɔ́, un jó Sihɔ́ni kpó to tɔn kpó nú we. Jɛ to ɔ́ yí jí.’ Sihɔ́ni kpódó togun tɔn bǐ kpó wá kpé mǐ ɖo Yaxisa bó fun ahwan xá mǐ. Mawu Mavɔmavɔ, Mawu mǐtɔn ká jó e nú mǐ, bɔ mǐ ɖu ɖo é kpódó vǐ tɔn lɛ́ɛ kpó, kpódó togun ɔ́ bǐ kpó jí. Mǐ yí toxo tɔn lɛ́ɛ bǐ. Mǐ gba toxo lɛ́ɛ bǐ, bó hu mɛxó kpó yɔkpɔ́vú kpó e ɖo toxo ɔ́ mɛ lɛ́ɛ bǐ. Mǐ jó mɛ ɖěbǔ dó nyi gbɛ ǎ. Nǔ e jló mǐ bɔ mǐ bɛ́ wá yi xwé lɛ́ɛ wɛ nyí kanlin lɛ́ɛ kpódó dɔkun e ɖo toxo e mǐ yí lɛ́ɛ mɛ lɛ́ɛ é kpó. Bɛ́ sín Alowɛ́ɛ toxo e ɖo Aanɔ́ni tɔ ɔ́ kpá ɔ́ yi toxo e ɖo tɔdo mɛ ɔ́ mɛ káká yi Galadi ɔ́, toxo ɖěbǔ ɖo fí énɛ́ lɛ́ɛ bó hú gǎn mǐ ǎ. Mawu Mavɔmavɔ, Mawu mǐtɔn zé bǐ dó acɛ mǐtɔn mɛ. Lo ɔ́, mǐ ya agba Amumɔ́ɔ ví lɛ́ɛ sín to wú ǎ: mǐ ya agba toxo yětɔn e ɖo Yabɔ́ku tɔ ɔ́ tó lɛ́ɛ ɖě wú ǎ; mǐ ká ya agba toxo yětɔn e ɖo sókan mɛ lɛ́ɛ ɖě wú ǎ; mǐ ká ya agba fí e Mawu Mavɔmavɔ, Mawu mǐtɔn gbɛ́ nú mǐ ɖɔ mǐ má wa nǔɖé ná ó lɛ́ɛ ɖě wú ǎ.” Mɔyízi ɖɔ: “Mǐ wlí ali ɖidó Basáni. Axɔ́sú Basáni tɔn Ɔgu kpó ahwangɔnu tɔn kpó ká wá mɔ mǐ, bó ná tɔ́n ahwan mǐ ɖo Edlɛyi. Lo ɔ́, Mawu Mavɔmavɔ ɖɔ nú mì ɖɔ: ‘Ma ɖi xɛsi n'i ó. Un ná jó é kpódó ahwangɔnu tɔn kpó to tɔn kpó nú we bɔ a nǎ wa nǔ tɔn lě e a wa Sihɔ́ni Amɔliti lɛ́ɛ xɔ́sú ɔ́ sín nǔ gbɔn é. Hɛcibɔ́ni wɛ é nɔ́ nɔ.’ Nǔgbó ɔ́, Mawu Mavɔmavɔ, Mawu mǐtɔn lɛ́ jó Basáni xɔ́sú Ɔgu kpódó ahwangɔnu tɔn kpó nú mǐ: Mǐ fun ahwan xá yě, bó hu mɛ e ɖo to ɔ́ mɛ lɛ́ɛ bǐ. Mǐ jǒ mɛ ɖěbǔ dó nyi gbɛ ǎ. Ée mǐ hu yě mɔ̌ é ɔ́, mǐ yǐ toxo yětɔn lɛ́ɛ bǐ; toxo kwín ɖokpó kpo bó má ɖo acɛ mǐtɔn mɛ ǎ. Toxo kanɖé ko (60) wɛ bǐ nyǐ: toxo énɛ́ lɛ́ɛ bǐ ɖo Basáni, ɖo Aagɔ́vu yíkúngban jí, bɔ axɔ́sú Ɔgu kpa acɛ dó bǐ nu. Toxo énɛ́ lɛ́ɛ ɔ́, ahohó wɛ è mɛ lɛ́ lɛ̌ dó, bɔ é yi jǐ bó syɛ́n ɖésú; è dó hɔn nú yě, bó dó sɛxlo ná. Mǐ lɛ̌ yí toxo gěgé ɖěvo lɛ́ɛ bɔ è mɛ ahohó lɛ́ lɛ̌ dó ǎ. Mǐ gba toxo énɛ́ lɛ́ɛ bǐ hánnyá, bó hu mɛxó kpó yɔkpɔ́vú kpó bǐ, lě e mǐ wa Sihɔ́ni Hɛcibɔ́ni xɔ́sú ɔ́ sín nǔ gbɔn é. Amɔ̌, mǐ bɛ́ kanlin yětɔn lɛ́ɛ kpó dɔkun e ɖo toxo yětɔn mɛ lɛ́ɛ kpó wá yi xwé.” Mɔyízi ɖɔ: “Hwenɛ́nu ɔ́, lě e mǐ yǐ axɔ́sú Amɔliti lɛ́ɛ tɔn we sín ayǐkúngban gbɔn é nɛ́. Mǐ yǐ ayǐkúngban énɛ́ lɛ́ɛ ɖo Judɛ́ɛn tɔ ɔ́ sín zǎnzǎnhwe jí, bɛ́ sín Aanɔ́ni tɔ ɔ́ kɔn káká wá Ɛmɔ́ɔ só ɔ́ kɔn. Sidɔ́ɔnnu lɛ́ɛ nɔ́ ylɔ́ Ɛmɔ́ɔ só ɔ́ ɖɔ Siliyɔ́ni, bɔ Amɔliti lɛ́ɛ ká nɔ́ ylɔ́ ɖɔ Seníi. Mǐ yǐ toxo e ɖo ayǐkúngban wɛnjɛ jí lɛ́ɛ bǐ, bó yí éé ɖo Galadi gbé jí lɛ́ɛ bǐ, bó yí éé ɖo Basáni gbé jí lɛ́ɛ bǐ, káká wá Saluka toxo ɔ́ kpó Edlɛyi toxo ɔ́ kpó. Axɔ́súɖuto Ɔgu tɔn sín toxo lɛ́ɛ wɛ, bó ɖo Basáni. Axɔ́sú Basáni tɔn Ɔgu wɛ nyí mɛ ɖokpó e kpo ɖo gbɛ ɖo Hlafa ví lɛ́ɛ mɛ hwenɛ́nu é; yɔdo tɔn kpo ɖo te ɖo Hlaba, Amumɔ́ɔ ví lɛ́ɛ sín tota mɛ. Awǐnnya Bazalu mɛ wɛ è kun yɔdo ɔ́ dó. Ga tɔn hú mɛ̌tlu ɛnɛ, gblǒ tɔn yi mɛ̌tlu we. “Mǐ yǐ to énɛ́ ɔ́ hwenɛ́nu, bɔ un ná ayǐkúngban e bɛ́ sín Alowɛ́ɛ ɖo Aanɔ́ni tɔ ɔ́ kɔn ɔ́ Hwlibɛ́ni ví lɛ́ɛ kpódó Gadi ví lɛ́ɛ kpó. Un lɛ́ ná Galadi só ɔ́ sín wevlɔ́ɖó kpódó toxo e ɖ'é jí lɛ́ɛ kpó yě. Un ná Galadi sín ayǐkúngban e kpo ɔ́, kpódó axɔ́súɖuto Ɔgu tɔn e ɖo Basáni é kpó akɔta vlɔ́ Manasée tɔn; fí énɛ́ lɛ́ɛ wɛ nyí axɔ́súɖuto Ɔgu tɔn ɖ'ayǐ. Aagɔ́vu to ɔ́ kpódó Basáni to ɔ́ kpó bǐ wɛ è nɔ ylɔ́ ɖɔ Hlafa ví lɛ́ɛ sín to. Yayíi yí Aagɔ́vu to ɔ́ bǐ káká jɛ to Gɛcúunu lɛ́ɛ kpó Maakatinu lɛ́ɛ tɔn kpó sín dogbó jí. Yayíi ɔ́, Manasée kún mɛ wɛ é jɔ ɖe. É ná nyǐkɔ tɔn Basáni to ɔ́, bɔ è nɔ ylɔ́ fínɛ́ ɖɔ gletoxo Yayíi tɔn lɛ́ɛ. Nyǐkɔ énɛ́ ɔ́ kpo ɖo te káká jɛ égbé. Un ná Galadi to ɔ́ Makíi. Makíi lɔ ɔ́, Manasée kún mɛ wɛ é jɔ ɖe. Un ná ayǐkúngban e ɖo Galadi kpó Aanɔ́ni kpó tɛ́ntin ɔ́ Hwlibɛ́ni ví lɛ́ɛ, kpó Gadi ví lɛ́ɛ kpó. Aanɔ́ni tɔ ɔ́ nyí dogbó ɖo tofɔligbé, bɔ Yabɔ́ku tɔ ɔ́ kplé dogbó xá Amumɔ́ɔ ví lɛ́ɛ sín to. Dogbó e gbɔn zǎnzǎnhwe jí ɔ́ zɔn mɔ̌, bó gbɔn Judɛ́ɛn sín tɔdo mɛ, ɖo Jenɛzalɛ́ti tɔ ɔ́ kpó Jɛ xu ɔ́ kpó tɛ́ntin, káká wá Pisiga só e ɖo gbadahwe jí ɔ́ kɔn. “Hwenɛ́nu ɔ́, un ɖɔ nú akɔta Hwlibɛ́ni tɔn, Manasée tɔn kpódó Gadi tɔn kpó ɖɔ: ‘Mawu Mavɔmavɔ, Mawu mitɔn ná to élɔ́ mi, bɔ é nyí mitɔn. É ká ɖo mɔ̌ có, mi ahwanfuntɔ́ lɛ́ɛ bǐ ní fɔ ahwanfunnú, bó nɔ nukɔn nú nɔví mitɔn Izlayɛ́li ví ɖě lɛ́ɛ bó ná gɔ́ alɔ nú yě. Asi mitɔn lɛ́ɛ, vǐ mitɔn lɛ́ɛ kpó kanlin mitɔn lɛ́ɛ kpó kɛ́ɖɛ́ wɛ ná kpo ɖo toxo e un ná mi lɛ́ɛ é mɛ. Un ka tunwun ganjí ɖɔ kanlin mitɔn lɛ́ɛ sukpɔ́ ɖésú. Mi ɖo alɔ dó nɔví mitɔn lɛ́ɛ wɛ mɔ̌ káká jɛ hwenu e Mawu Mavɔmavɔ ná ná gbɔjɛ́ yě mi ɖɔhun é, bónú yě lɔmɔ̌ ná yí to e Mawu Mavɔmavɔ, Mawu mitɔn ɖɔ émí ná ná yě bɔ é ɖo Judɛ́ɛn tɔ ɔ́ sín gbadahwe jí é. Énɛ́ ɔ́, mi mɛ ɖokpó ɖokpó ná lɛ́ kɔ wá to e un ná mi é mɛ.’ “Hwenɛ́nu ɖokpó ɔ́, un lɛ́ ɖɔ nú Jozuwée lɔmɔ̌ ɖɔ: ‘Hwi ɖésú mɔ lě e Mawu Mavɔmavɔ, Mawu mǐtɔn wa axɔ́sú we énɛ́ lɛ́ɛ sín nǔ gbɔn ɔ́ ɖó nukún towe wú ganjí. Mɔ̌ wɛ Mawu Mavɔmavɔ ná wa axɔ́súɖuto e a nǎ tɔ́n ahwan lɛ́ɛ bǐ sín nǔ gbɔn. Mi ma ɖi xɛsi nú yě ó, ɖó Mawu Mavɔmavɔ, Mawu mitɔn ɖésú ná fun ahwan nú mi.’ ” Mɔyízi ɖɔ hwenɛ́nu ɔ́ émí sa vo nú Mawu Mavɔmavɔ bó ɖɔ: “Aklúnɔ Mavɔmavɔ, a jɛ lě e a kló gbɔn ɔ́, lě e alɔ towe kpé nǔ wú sɔ ɔ́ ɖe xlɛ́ nyɛ mɛsɛntɔ́ towe jí. Nǔmɛsɛn ɖěbǔ ɖo ayǐkúngban jí, abǐ sɛ́xwé, bó sixú bló nǔ e a nɔ bló lɛ́ɛ é ǎ; ɖěbǔ ká sixú jlɛ́ nǔ hwi ɖɔhun ǎ. Kɛnklɛ́n gbɔ nú má yi kpɔ́n to ɖagbe ɖagbe énɛ́ e ɖo Judɛ́ɛn tɔ ɔ́ sín gbadahwe jí é, gbɔ nú má yi kpɔ́n só ɖagbe ɖagbe nɛ́ lɛ́ɛ kpó Libáan só ɔ́ kpó.” Lo ɔ́, Mawu Mavɔmavɔ sin xomɛ dó mì ɖó mi wú; é sɔ́ nɔ ɖótó mì ǎ. Mawu Mavɔmavɔ ɖɔ nú mì ɖɔ: “É kpé mɔ̌, ma sɔ́ ɖɔ xó énɛ́ ɖě nú má se ó. Xá Pisiga só jí, bó ván nukún, bó kpɔ́n totaligbé, bó kpɔ́n tofɔligbé, bó kpɔ́n zǎnzǎnhwe jí, bó kpɔ́n gbadahwe jí; a nǎ mɔ nǔ lɛ́ɛ ganjí, a ka ɖo Judɛ́ɛn tɔ ɔ́ ná dó asá wɛ ǎ. Đɔ xó e a ɖǒ ɔ́ nú Jozuwée, bó dó wǔsyɛ́n lanmɛ n'i, bó ná ɛ akɔ́nkpinkpan, ɖó é wɛ ɖo togun ɔ́ nukɔn ná nɔ wɛ, bɔ yě ná dó asá Judɛ́ɛn tɔ ɔ́, bɔ é ná yí to e a nǎ mɔ sɛ́ dó ɔ́ nú yě, bɔ é ná nyí yětɔn.” Sín hwenɛ́nu ɔ́, mǐ cí tɔdo mɛ fí ɖo Bɛti-Peɔ́ɔ toxo ɔ́ nukɔn. Mɔyízi ɖɔ: “Din ɔ́, Izlayɛ́li ví lɛ́ɛ e mi, mi xwedó sɛ́n e un kplɔ́n mi lɛ́ɛ kpó nǔ e Mawu zɔ̌n mi lɛ́ɛ kpó. Mi zé yě dó wa azɔ̌ ná. Mi bló mɔ̌ ɔ́, mi ná nɔ gbɛ, bó ná yí to e ná mi wɛ Mawu Mavɔmavɔ, Mawu tɔ́gbó mitɔn lɛ́ɛ tɔn ɖe é. Mi ma gɔ́ nǔ ɖěbǔ nú nǔ e Mawu Mavɔmavɔ, Mawu mitɔn zɔ́n mi bɔ un ɖɔ nú mi lɛ́ɛ é ó; mi ma ɖe ɖěbǔ kpo ó; mi zé bǐ dó wa azɔ̌ ná. Mi mɔ lě e Mawu Mavɔmavɔ, Mawu mitɔn wa nǔ gbɔn hwenu e vodún Baalu-Peɔ́ɔ sín xó wá é kpó nukún mitɔn kpó: Mawu Mavɔmavɔ, Mawu mitɔn sú mɛ e sɛn vodún Baalu-Peɔ́ɔ ɖo tɛ́ntin mitɔn lɛ́ɛ bǐ sín kún dó. Lo ɔ́, mi mɛ e nɔ gbejí nú Mawu Mavɔmavɔ, Mawu mitɔn lɛ́ɛ ɔ́, mi bǐ kpo ɖo gbɛ égbé din. “Éɖíe, un kplɔ́n sɛ́n lɛ́ɛ kpó nǔ e Mawu zɔ́n lɛ́ɛ kpó mi lě e Mawu Mavɔmavɔ, Mawu ce ɖɔ nyɛ ní bló gbɔn é, bónú mi ná zé yě dó wa azɔ̌ ná, ɖo to e ná yí wɛ mi ɖe é mɛ. Ényí mi wlíbo nú sɛ́n lɛ́ɛ bó nyi ganjí ɔ́, akɔta ɖě lɛ́ɛ e ná tunwun sɛ́n énɛ́ lɛ́ɛ ná mɔ mi dó mɔ gbɛtɔ́ nǔnywɛ́tɔ́, gbɛtɔ́ bíbí, bó ná nɔ́ ɖɔ: ‘Nǔnywɛ́ tɛ́ ɖíe, bǐbí tɛ́ ɖíe ɖo akɔta ɖaxó élɔ́ mɛ e.’ Mǐ ylɔ́ Mawu Mavɔmavɔ, Mawu mǐtɔn hweɖěbǔnu ɔ́, é nɔ́ sɔ nú mǐ a cé? Akɔta ɖaxó tɛ́ ká tíin tawun, bó ylɔ́ vodún tɔn ɔ́, é nɔ́ sɔ n'i mɔ̌? Sɛ́n e un ná mi égbé din é sɔgbe a cé? Akɔta ɖaxó tɛ́ ká ɖe, bó ɖó sɛ́n bɔ é sɔgbe mɔ̌?” Mɔyízi ɖɔ: “Nǔ ɖokpó e mi ná bló é wɛ nyí ɖɔ mi ná nɔ acéjí, bɔ ayi mitɔn ná ɖo te hwebǐnu, bó má wɔn nǔ e nukún mitɔn lɛ́ɛ mɔ é ó. Mi kplɔ́n yě vǐ mitɔn lɛ́ɛ kpó vǐvú mitɔn lɛ́ɛ kpó. “Mi flín gbe e gbe mi yi Mawu Mavɔmavɔ, Mawu mitɔn nukɔn ɖo Holɛ́bu só jí, bɔ é ɖɔ xó nú mì é. É ɖɔ nú mì ɖɔ: ‘Kplé togun ɔ́ bǐ nú mì, un jló ná ná sɛ́n ce lɛ́ɛ yě, bɔ yě ná tunwun lě e yě ná nɔ́ sí mì gbɔn ɖo gbɛ hwenu yětɔn ɖo ayǐkúngban jí fí é, bó ná lɛ́ tunwun lě e yě ná nɔ́ kplɔ́n sɛ́n ce lɛ́ɛ vǐ yětɔn lɛ́ɛ gbɔn é.’ Hwenɛ́nu ɔ́, mi sɛkpɔ́ só ɔ́, bó wá cí só ɔ́ kpá. Myɔ hɛhɛ ɖé vun blá só ɔ́, bó hun káká yi jǐxwé, ɖo zǐnflú kpó, akpɔ́kpɔ́ kpó, kpódó ahǔn kpó mɛ. Mawu Mavɔmavɔ ɖɔ xó nú mi sín myɔ ɔ́ mɛ; mi se gbe tɔn, mi ka mɔ ɛ ɖó nukún wú ǎ, gbe tɔn kɛ́ɖɛ́ se wɛ jɛ́n mi ɖe. É ɖe akɔ e é jɛ xá mi ɔ́ xlɛ́. É byɔ́ ɖɔ mi ní se tónú nú sɛ́n wǒ e émí wlán ɖó awǐnnyatɛ we jí dó jɛ akɔ xá mi lɛ́ɛ. Hwe énɛ́ nu ɖokpó ɔ́, Mawu Mavɔmavɔ lɛ́ ná gbe mì ɖɔ nyi ní kplɔ́n sɛ́n lɛ́ɛ kpó nǔ e é zɔ́n lɛ́ɛ kpó mi, bónú mi ná zé dó wa azɔ̌ ná ɖo to e yí gbé mi ja ɔ́ mɛ.” Mɔyízi ɖɔ: “Xó tají ɖokpó ɖíe, bɔ mi ɖó ná wɔn ǎ; gbe e gbe Mawu Mavɔmavɔ nɔ myɔ tɛ́ntin, bó ɖɔ xó nú mi ɖo Holɛ́bu só jí é ɔ́, mi mɔ é ɖésú ǎ; hǔn mi ma lí vodún ó; mi ma bló nǔ ɖěbǔ sín akpajlɛ́ bó sɛn ó; mi bló mɔ̌ ɔ́, mi ná hu hwɛ, mi ma bló súnnu abǐ nyɔ̌nu sín akpajlɛ́ ɖé ó. Mi ma bló kanlin lɛ́ɛ abǐ xɛ lɛ́ɛ ɖě sín akpajlɛ́ bó sɛn ó. Mi ma bló kanlin e nɔ sá lɛ́ɛ, abǐ hweví lɛ́ɛ ɖě sín akpajlɛ́ bó sɛn ó. Mi ma kpɔ́n hwe kpó sun kpó, kpó sunví lɛ́ɛ kpó, kpódó nǔbúdo tobutóbú e ɖo jǐxwé lɛ́ɛ bǐ kpó bó jɛ yě sɛn jí ó, yě ní má dɔn mi, bónú mi jɛ kpo ɖo nukɔn yětɔn bó sɛn yě ó; ɖó nǔ énɛ́ lɛ́ɛ ɔ́, togun e ɖo gbɛ ɔ́ mɛ lɛ́ɛ wɛ Mawu Mavɔmavɔ, Mawu mitɔn ná, bɔ yě ná wa azɔ̌ yětɔn. Lo ɔ́, midɛɛ lɛ́ɛ ɔ́, Mawu Mavɔmavɔ sɔ́ mi bó ɖe mi tɔ́n sín Ejípu, kúgan mɛ, bónú mi ná húzú togun tɔn lě e mi ɖe gbɔn égbé din é. “Mawu Mavɔmavɔ ka sin xomɛ dó mì, ɖó mi wú. É gblɔ́n adǎn ɖɔ nyɛ kún ná dó asá Judɛ́ɛn tɔ ɔ́ ó, nyɛ kún ká ná byɔ́ to ɖagbe e ná mi wɛ émí ɖe ɔ́ mɛ ó. Hǔn nyɛ ná kú ɖo to élɔ́ mɛ; un ná dó asá Judɛ́ɛn tɔ ɔ́ gbeɖé ǎ; midɛɛ lɛ́ɛ ná dó asá Judɛ́ɛn tɔ ɔ́, bó ná yí to ɖagbe énɛ́ e ɖo tɔ ɔ́ gúdo é. Amɔ̌, mi cɔ́ miɖée bó má wɔn akɔ e Mawu Mavɔmavɔ, Mawu mitɔn jɛ xá mi é ó. Mi ma gba ó, mi ma lí vodún ó, mi ma bló nǔ ɖěbǔ sín akpajlɛ́ bó sɛn ó. Đó Mawu Mavɔmavɔ, Mawu mitɔn ɔ́, zo e nɔ hɛn nǔ gblé é wɛ. É nɔ́ ba gbeɖé ɖɔ è nǐ sɛn nǔ ɖěvo zɛ éyɛ́ wú ǎ. “Hwenu e mi ná ɖo to ɔ́ mɛ, bɔ é ná ko lín, bɔ mi ná kó ji vǐ bó ɖó vǐvú ɔ́, mi ma lí vodún ó, mi ma bló akpajlɛ́ nǔ alɔkpa ɖěbǔ tɔn ó, mi ma wa nǔ e má nɔ́ nyɔ́ Mawu Mavɔmavɔ, Mawu mitɔn nukún mɛ ǎ, bó nɔ́ dó xomɛsin n'i lɛ́ɛ ɖěbǔ ó. Ényí mi dó nǔ mɔ̌hunkɔtɔn sin gbeɖé ɔ́, un ɖo ɖiɖɔ nú mi wɛ égbé agbawungba, un xwlé jǐxwé kpó dodomɛ kpó nú mi, é ná lín cóbɔ mi bǐ ná gbadó sín to e mi ná yí ɖo Judɛ́ɛn tɔ ɔ́ gúdo é mɛ ǎ; mi ná nɔ fínɛ́ vo ɖé ǎ; è nǎ za mi sín to ɔ́ mɛ. Mawu Mavɔmavɔ ná gba mi dó gbɔn togun lɛ́ɛ mɛ, bɔ mi mɛ kpɛɖé jɛ́n ná gán ɖo akɔta e tɛ́ntin Mawu Mavɔmavɔ ná kplá mi yi é mɛ. Fínɛ́ ɔ́, mi ná sɛn nǔmɛsɛn e gbɛtɔ́ zé atín abǐ awǐnnya dó kpa ná lɛ́ɛ. Nǔmɛsɛn énɛ́ lɛ́ɛ nɔ́ mɔ nǔ ǎ, yě nɔ́ se nǔ ǎ, yě nɔ́ ɖu nǔ ǎ, yě ká nɔ́ se nǔ wán ǎ. Hwenɛ́nu lo ɔ́, mi ná ba Mawu Mavɔmavɔ, Mawu mitɔn ɖo to énɛ́ lɛ́ɛ mɛ; ényí mi ka ba ɛ kpó ayi mitɔn bǐ kpó, kpódó linlin mitɔn bǐ kpó ɔ́, mi ná mɔ ɛ. Hwenu e nǔ e un ɖɔ nú mi lɛ́ɛ bǐ ná jɛ, bɔ mi ná ɖo aluwɛ mɛ ɔ́, mi ná lɛ́ kɔ wá Mawu Mavɔmavɔ, Mawu mitɔn gɔ́n, bó ná lɛ́ jɛ tónú se n'i jí. Nǔgbó ɔ́, Mawu Mavɔmavɔ, Mawu mitɔn ɔ́, Mawu nǔbláwǔkúnúmɛtɔ́ wɛ; é ná jó mi dó ǎ, é ná sú kún mitɔn dó ǎ, é ká ná wɔn akɔ e é jɛ xá tɔ́gbó mitɔn lɛ́ɛ é gbeɖé kpɔ́n ǎ.” Mɔyízi ɖɔ: “Mi lin tamɛ dó nǔ e ko jɛ ɖ'ayǐ xóxó lɛ́ɛ é wú. Nǔ e ɖo jijɛ wɛ sín hwenu e Mawu kó ɖó gbɛtɔ́ ɖó ayǐkúngban jí, káká wá jɛ mi jí ɔ́, mi lin tamɛ d'é wú. Mi lin tamɛ dó nǔ e jɛ ɖo wɛ̌kɛ́zo ɛnɛ lɛ́ɛ jí ɔ́ wú. Nǔ ɖaxó lěhun jɛ kpɔ́n gbeɖé a? È se nǔ lěhun kpɔ́n gbeɖé a? Togun ɖé tíin, bó se Mawu sín gbe ɖo myɔ tɛ́ntin, lě e mi se gbɔn é, lobo nɔ gbɛ a? Nǔmɛsɛn tɛ́ ka tíin, bó sí te bó zán hlɔ̌nhlɔ́n bǐ, bó jlɛ́ nǔ, bó wa nǔjíwǔ, bó wa nǔ hu ado, nǔ syɛ́nsyɛ́n bǐ dó yí togun tɔn sín kɛntɔ́ sín acɛ mɛ kpɔ́n? É ɖe kpɔ́n ǎ; lo ɔ́, Mawu Mavɔmavɔ, Mawu mitɔn kɛ́ɖɛ́ wɛ nyí Mawu e yí mi gbɔn mɔ̌ ɖo Ejípu, bɔ mi gosín kannumɔgbénu lě e mi ɖésú mɔ gbɔn kpó nukún mitɔn kpó é. Mawu jɔwǔ mi, bɔ mi mɔ énɛ́, bó ná dó tunwun ɖɔ Mawu Mavɔmavɔ ɖokpó wɛ nyí Mawu, ɖɔ Mawu ɖé kún tíin zɛ éyɛ́ wú ó. É ɖɔ xó nú mi sín jǐxwé bónú mi ná se tónú. É xlɛ́ myɔ ɖaxó ɖé mi, bɔ mi se gbe tɔn sín myɔ ɔ́ tɛ́ntin. Wǎn wɛ Mawu Mavɔmavɔ yí nú tɔ́gbó mitɔn lɛ́ɛ, bó sɔ́ mi vǐ lɛ́ɛ; énɛ́ wú wɛ é zé hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é dó ɖe mi tɔ́n sín Ejípu. Din ɔ́, é nya akɔta e sukpɔ́ hú mi, bó syɛ́n hú mi lɛ́ɛ ɖo nukɔn mitɔn, bó kplá mi byɔ́ to yětɔn mɛ, bó ɖo to yětɔn ná mi wɛ lě e mɔ gbɔn wɛ mi ɖe égbé é. Mi ní tunwun sín égbé, bó hɛn ayi mɛ ganjí ɖɔ Mawu Mavɔmavɔ ɖokpó géé wɛ nyí Mawu ɖo jǐxwé kpó dodomɛ kpó, bó tunwun ɖɔ Mawu ɖé kún sɔ́ ɖe zɛ éyɛ́ wú ó. Mi zé sɛ́n kpó gbeta kpó e un ná mi égbé din lɛ́ɛ dó wa azɔ̌ ná; énɛ́ ɔ́, nǔ ná nyɔ́ nú mi kpó vǐ mitɔn lɛ́ɛ kpó, bɔ mi ná dɔ́ ji ɖo to e na ná mi wɛ Mawu Mavɔmavɔ, Mawu mitɔn ɖe, bɔ é ná nyí mitɔn káká sɔ́yi é mɛ.” Énɛ́ ɔ́ gúdo wɛ Mɔyízi sɔ́ toxo atɔn ɖo Judɛ́ɛn tɔ ɔ́ sín zǎnzǎnhwe jí, bɔ toxo énɛ́ lɛ́ɛ ná nyí bibɛtɛn nú mɛ e ma tunwun ǎ, bó hu nɔzo tɔn é; nɔzo tɔn ɔ́ sín nǔ ká vɛ́ wǔ tɔn ɖ'ayǐ ǎ. Ényí nǔ cí mɔ̌ ɔ́, mɛ e hu mɛ ɔ́ hɛn ɔ́, é ná hɔn yi cí toxo énɛ́ lɛ́ɛ ɖokpó mɛ, bó gán. Toxo énɛ́ lɛ́ɛ wɛ nyí: Bɛsɛ́ɛ, ɖo gbětótló mɛ, ɖo ayǐkúngban wɛnjɛ jí, bó nyí Hwlibɛ́ni ví lɛ́ɛ tɔn. Toxo ɖěvo nyí Hlamɔti, ɖo Galadi, bó nyí Gadi ví lɛ́ɛ tɔn. Đěvo nyí Goláni, ɖo Basáni, bó nyí Manasée ví lɛ́ɛ tɔn. Mɔyízi xa Mawusɛ́n ɔ́ nú Izlayɛ́li ví lɛ́ɛ. Ée yě tɔ́n sín Ejípu ɔ́, Mɔyízi ɖɔ su e yě ná nyi lɛ́ɛ, nǔ e yě ná wa lɛ́ɛ, nǔ e Mawu zɔ́n lɛ́ɛ nú yě. Hwenɛ́nu ɔ́, Izlayɛ́li ví lɛ́ɛ ɖo Judɛ́ɛn tɔ ɔ́ sín zǎnzǎnhwe jí, ɖo tɔdo e kpan nukɔn Bɛti-Peɔ́ɔ é mɛ, ɖo Amɔliti lɛ́ɛ sín axɔ́sú Sihɔ́ni to mɛ. Axɔ́sú Sihɔ́ni ɖo Hɛcibɔ́ni, hwenu e Mɔyízi kpó Izlayɛ́li ví lɛ́ɛ kpó tɔ́n sín Ejípu é. Yě fun ahwan xá ɛ, bó ɖu ɖo jǐ tɔn. Yě yí to tɔn, bó lɛ́ yí axɔ́sú Basáni tɔn Ɔgu sín to lɔmɔ̌. Amɔliti lɛ́ɛ sín axɔ́sú we énɛ́ lɛ́ɛ bǐ wɛ ɖo Judɛ́ɛn tɔ ɔ́ gúdo ɖo zǎnzǎnhwe jí. Izlayɛ́li ví lɛ́ɛ sín ayǐkúngban wɛ bɛ́ sín Alowɛ́ɛ ɖo Aanɔ́ni tɔ ɔ́ tó, káká yi Sinyɔ́ɔ, só e è nɔ ylɔ́ ɖɔ Ɛmɔ́ɔ é kɔn. Ayǐkúngban yětɔn wɛ nyí éé ɖo zǎnzǎnhwe jí nú Judɛ́ɛn tɔdo ɔ́, bó zɔn mɔ̌ káká wá Xu Kúkú ɔ́ kɔn ɖo Pisiga só kpá é. Mɔyízi kplé Izlayɛ́li ví lɛ́ɛ bǐ, bó ɖɔ nú yě ɖɔ: “Izlayɛ́li ví lɛ́ɛ e mi, mi ɖótó sɛ́n kpó nǔ e Mawu zɔ́n, bɔ è ja xixa nú mi gbé égbé din lɛ́ɛ kpó. Mi kpé nukún dó yě wú, bó kplɔ́n, bó zé yě dó wa azɔ̌ ná. Mawu Mavɔmavɔ, Mawu mǐtɔn jɛ akɔ xá mǐ ɖo Holɛ́bu só jí. Ényí tɔ́gbó mǐtɔn lɛ́ɛ kɛ́ɖɛ́ wɛ é jɛ akɔ xá ǎ. Mǐ mɛ e kpo ɖo gbɛ ɖo fí égbé din lɛ́ɛ bǐ wɛ é jɛ xá. Mawu Mavɔmavɔ kpó mi kpó kpé nu bó ɖɔ xó ɖo só jí, sín myɔ tɛ́ntin. Hwenɛ́nu ɔ́, nyɛ ɖo Mawu Mavɔmavɔ kpó mi kpó tɛ́ntin, bó nɔ́ ɖɔ xó e Mawu Mavɔmavɔ ɖɔ é nú mi, ɖó mi ɖo xɛsi ɖi nú myɔ ɔ́ wɛ, bó glá xá só ɔ́ jí ǎ.” Mawu Mavɔmavɔ ɖɔ nú togun ɔ́ ɖɔ: “Nyɛ wɛ nyí Mawu Mavɔmavɔ, Mawu towe e ɖe we tɔ́n sín Ejípu fí e a nyǐ kannumɔ ɖe é. Ma sɛn nǔ ɖěvo zɛ nyɛ wú ó. Ma ka kpa bǒcyɔ ó; ma kpa nǔ e ɖo jǐnukúnsin aga lɛ́ɛ, nǔ e ɖo ayǐkúngban jí ɖo do lɛ́ɛ, nǔ e ɖo sin mɛ ɖo ayǐkúngban glɔ́ lɛ́ɛ ɖě sín akpajlɛ́ ó. Ma jɛ kpo bó ɖe kɔ́ nú yě ó; ma sɛn yě ó, ɖó nyɛ Mawu Mavɔmavɔ, Mawu towe ɔ́, un nɔ ba gbeɖé ɖɔ a nǐ sɛn nǔ ɖěvo zɛ nyɛ wú ǎ. Ényí mɛɖé gbɛ́ wǎn nú mì ɔ́, vǐ tɔn lɛ́ɛ ná sún sin tɔn, vǐvú tɔn lɛ́ɛ, vitikli tɔn lɛ́ɛ kpódó kpaba tɔn lɛ́ɛ kpó ná sún sin tɔn. Lo ɔ́, mɛ e yí wǎn nú mì, bó nɔ́ nyi sɛ́n ce lɛ́ɛ ɔ́, un nɔ nyɔ́ xomɛ dó mɛ ɔ́ wú káká yi jijimɛ afatɔ́n (1.000). Ma zé nyɛ Mawu Mavɔmavɔ, Mawu towe ɔ́ sín nyǐkɔ dó da ayihún ó, ɖó nyɛ Mawu Mavɔmavɔ ɔ́, un nɔ gɔn tó dɔn nú mɛ e ná zé nyǐkɔ ce dó da ayihún ná é ǎ. Wlǐbo nú gbɔjɛzán ɔ́ bó sɔ́ ɖó vo nú nyɛ Mawu Mavɔmavɔ, Mawu towe lě e un ɖɔ gbɔn nú we é. Azǎn ayizɛ́n wɛ ɖo te nú we ɖo aklúnɔzángbla ɖokpó mɛ bɔ a nǎ dó wa azɔ̌ towe lɛ́ɛ bǐ ná. Lo ɔ́, azǎn tɛ́nwegɔ́ ɔ́, gbɔjɛzán wɛ; gbɔjɛzán ɔ́, nyɛ Mawu Mavɔmavɔ, Mawu towe ɔ́ tɔn wɛ. Ma wa azɔ̌ ɖěbǔ gbe énɛ́ gbe ó. Vǐ towe súnnu kpó nyɔ̌nu kpó ɖě ní má wa azɔ̌ ó; mɛsɛntɔ́ towe súnnu kpó nyɔ̌nu kpó ɖě ní má wa ó; jǒnɔ e ɖo xwé towe gbe lɛ́ɛ ɖěbǔ ní má wa azɔ̌ ó; nyibú towe lɛ́ɛ, tócí towe lɛ́ɛ, abǐ kanlin towe ɖě lɛ́ɛ ɖě ní má wa azɔ̌ ó. Mɛsɛntɔ́ towe súnnu kpó nyɔ̌nu kpó bǐ ɖó ná gbɔjɛ́ hwi ɖɔhun. Flín ɖɔ kannumɔ wɛ émí nyí ɖo Ejípu, bɔ nyɛ Mawu Mavɔmavɔ, Mawu towe zé hlɔ̌nhlɔ́n ce e nukɔn nǔɖé má nɔ́ nɔ te ɖe ǎ é dó ɖe we tɔ́n. Énɛ́ ɔ́ wútu wɛ nyɛ Mawu Mavɔmavɔ, Mawu towe ɖɔ nú we ɖɔ hwi ní nyi gbɔjɛzánsɛ́n ɔ́. Sí tɔ́ towe kpó nɔ towe kpó, lě e nyɛ Mawu Mavɔmavɔ, Mawu towe ɖɔ gbɔn nú we é; énɛ́ ɔ́, a nǎ dɔ́ ji, bɔ nǔ ná nyɔ́ nú we ɖo to e ná we wɛ nyɛ Mawu Mavɔmavɔ, Mawu towe ɖe ɔ́ mɛ. Ma hu mɛ ó. Ma lɛ aga ó. Ma ja ajo ó. Ma ɖe kúnnu agɔ dó nɔzo towe wú ó. Nukún towe ní má nɔ nɔzo towe sín asi wú ó; nukún towe ní má nɔ xwé tɔn wú ó; nukún towe ní má nɔ nɔzo towe sín gle wú ó; nukún towe ní má nɔ mɛsɛntɔ́ tɔn súnnu wú ó, nukún towe ní má nɔ mɛsɛntɔ́ tɔn nyɔ̌nu wú ó; nukún towe ní má nɔ nyibú tɔn wú ó, nukún towe ní má nɔ tócí tɔn wú ó; nukún towe ní má nɔ nǔ e nyí étɔn lɛ́ɛ ɖěbǔ wú ó.” Xó e Mawu Mavɔmavɔ nɔ myɔ kpó zǐnflú kpó, kpó akpɔ́kpɔ́ kpó tɛ́ntin ɖo só jí, bó zé gbe d'aga bó ɖɔ nú mi é nɛ́. Mi togun Izlayɛ́li tɔn ɔ́ bǐ wɛ kplé ɖo só ɔ́ kpá bɔ é xa sɛ́n énɛ́ lɛ́ɛ nú mi; é dó ɖěbǔ jí ǎ bó wlán yě ɖó awǐnnyatɛ we jí, bó zé nú mì. Mɔyízi ɖɔ: “Hwenu e mi se gbe ɔ́ sín ablu mɛ, bɔ myɔ ko vun blá só ɔ́ bǐ ɔ́, akɔtagán mitɔn lɛ́ɛ kpó tomɛxó mitɔn lɛ́ɛ kpó wá mɔ mì, bó ɖɔ: ‘Mawu Mavɔmavɔ, Mawu mǐtɔn ɖe susu tɔn kpó hlɔ̌nhlɔ́n tɔn kpó xlɛ́ mǐ, bɔ mǐ se gbe tɔn sín myɔ tɛ́ntin. Mǐ mɔ égbé din ɖɔ Mawu sixú ɖɔ xó nú gbɛtɔ́ cóbɔ é ná gɔn kúkú. Amɔ̌, din ɔ́, étɛ́wú mǐ ná jó mǐɖée nú myɔ ɖaxó énɛ́ ɔ́, bɔ é ná fyɔ́ mǐ? Ényí mǐ lɛ́ se Mawu Mavɔmavɔ, Mawu mǐtɔn sín gbe ɔ́, kú jɛ́n mǐ ná kú. Gbɛtɔ́ tɛ́ ká se Mawu gbɛɖe ɔ́ sín gbe sín myɔ tɛ́ntin mǐ ɖɔhun, bó gán bɔ a se kpɔ́n? Mɔyízi, hwɛ ɔ́, sɛkpɔ́ Mawu Mavɔmavɔ, Mawu mǐtɔn, bó ɖótó xó e ɖɔ wɛ é ɖe ɔ́. É ɖɔ nǔɖé ɔ́, a nǎ wá ɖɔ nú mǐ, bɔ mǐ ná se bó bló.’ Mawu Mavɔmavɔ se xó e mi ɖɔ ɔ́, bó ɖɔ nú mì ɖɔ: ‘Un se xó e togun ɔ́ wá ɖɔ nú we é; nǔ e é ɖɔ é bǐ nyɔ́. Nú yě sixú ɖó ayixa mɔ̌hun, bó ɖó sísí nú mì, bó nyi sɛ́n ce lɛ́ɛ bǐ ɔ́, nǔ ná nyɔ́ nú yě kpó vǐ yětɔn lɛ́ɛ kpó káká yi. Din ɔ́, yi, bó ɖɔ nú yě ɖɔ yě ní lɛ́ kɔ yi goxɔ yětɔn lɛ́ɛ mɛ. Amɔ̌, hwɛ ɔ́, nɔ gɔ̌n ce fí. Un ná ɖɔ gbetakɛ́n lɛ́ɛ, sɛ́n lɛ́ɛ, kpó nǔ e un ná zɔ́n lɛ́ɛ bǐ kpó nú we. A nǎ yi kplɔ́n yě, bɔ yě ná zé dó wa azɔ̌ ná, ɖo to e ná yě wɛ un ɖe, bɔ é ná nyí yětɔn ɔ́ mɛ.’ ” Mɔyízi sú ta nú xó tɔn bó ɖɔ: “Mi ná wlíbo nú nǔ e Mawu Mavɔmavɔ, Mawu mitɔn ɖɔ é ganjí bó ná bló. Mi ná zɛ dó aɖisí ǎ, mi ka ná zɛ dó amyɔ ǎ. Mi ná wlí ali e Mawu Mavɔmavɔ, Mawu mitɔn ɖe nú mi ɔ́ télélé, bó ná sixú nɔ gbɛ bó j'awǎ, bó ná sixú dɔ́ ji ɖo to e ná yí wɛ mi ɖe é mɛ.” Mɔyízi ɖɔ: “Mawu Mavɔmavɔ, Mawu mitɔn ɖɔ nyɛ ní kplɔ́n gbetakɛ́n tɔn lɛ́ɛ, sɛ́n tɔn lɛ́ɛ kpó nǔ e é zɔ́n lɛ́ɛ kpó mi. Yě wɛ mi ná zé dó wa azɔ̌ ná ɖo to e ná yí wɛ mi ɖe ɔ́ mɛ. Énɛ́ ɔ́, ɖo gbɛzán mitɔn bǐ mɛ ɔ́, mi ná nɔ́ ɖó sísí nú Mawu Mavɔmavɔ, Mawu mitɔn, bó ná nɔ́ se tónú nú sɛ́n tɔn lɛ́ɛ, kpó nǔ e é zɔ́n bɔ un ɖɔ nú mi lɛ́ɛ kpó. Mi kpó vǐ mitɔn lɛ́ɛ kpó wɛ ná nɔ́ ɖó sísí nú gbetakɛ́n tɔn lɛ́ɛ, sɛ́n tɔn lɛ́ɛ kpó nǔ e é zɔ́n lɛ́ɛ kpó, bó ná dɔ́ ji. Izlayɛ́li ví lɛ́ɛ mi! Mi ɖótó xó énɛ́ lɛ́ɛ ganjí, bó wlíbo nú yě, bó xwedó yě dó wa nǔ, bónú nǔ ná nyɔ́ nú mi, bɔ mi ná gba kún ɖo to e sín akpá Mawu Mavɔmavɔ, Mawu tɔ́gbó mitɔn lɛ́ɛ tɔn dó nú mi, bɔ anɔ̌sin kpó wǐin kpó ɖo sisa ɖe wɛ é mɛ.” Mɔyízi ɖɔ: “Izlayɛ́li, ɖǒtó: Mawu Mavɔmavɔ, Mawu mǐtɔn wɛ nyí Mawu ɖokpó géé e ɖe é. A nǎ yí wǎn nú Mawu Mavɔmavɔ, Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó hlɔ̌nhlɔ́n towe bǐ kpó. Xó élɔ́ lɛ́ɛ e xa nú we wɛ un ɖe égbé din lɛ́ɛ ká ná nɔ ayixa towe mɛ. A nǎ kplɔ́n yě vǐ towe lɛ́ɛ. Ayǐjínjɔ́n wɛ a ɖe ɖo xwé towe gbe oo, ali jí wɛ a ɖe bó ɖo yiyi wɛ oo, ayǐmlɔ́mlɔ́ wɛ a ɖe oo, fɔ́n wɛ a fɔ́n oo, a nǎ nɔ́ ɖo xó ɖɔ d'é wú wɛ. A nǎ blá xó énɛ́ lɛ́ɛ dó awa, abǐ nukɔn, bó má wá wɔn ó. A nǎ wlán yě ɖó xwé towe sín hɔnkpo wú, bó wlán ɖó hɔntogbó toxo lɛ́ɛ tɔn sín kpo lɛ́ɛ wú.” Mɔyízi ɖɔ: “Ée Mawu Mavɔmavɔ, Mawu mitɔn ná kplá mi byɔ́ to e ná mi wɛ é ɖe ɔ́ mɛ, lě e é ɖɔ nú tɔ́gbó mitɔn Ablaxámu, Izáki, kpó Jakɔ́bu kpó gbɔn é ɔ́, mi ná mɔ toxo ɖaxó ɖaxó, toxo ɖagbe ɖagbe; mi wɛ ka gbá yě ǎ. Mi ná mɔ xɔ lɛ́ɛ, bɔ dɔkun tɛnmɛ tɛnmɛ e mi ma kplé ǎ lɛ́ɛ gɔ́; mi ná mɔ sɛ́tɔ e mi ma kun ǎ lɛ́ɛ; mi ná mɔ vǐwungbo kpó olívugbo e mi ma dó ǎ lɛ́ɛ kpó. Mi ná mɔ nǔ bó ɖu bó gɔ́ xo ganjí. Ée mi ka ná ɖu nǔ bó gɔ́ xo ɔ́, mi ma wɔn Mawu Mavɔmavɔ e ɖe mi tɔ́n sín Ejípu fí e mi nyí kannumɔ ɖe ɔ́ ó. Mi ná ɖó sísí n'i, bó ná sɛn é ɖokpónɔ géé. É ɖokpónɔ sín nyǐkɔ wɛ mi ná nɔ́ xwlé. Mi ná sɛn vodún ǎ; mi ná sɛn togun e lɛ́ lɛ̌ dó mi lɛ́ɛ sín vodún lɛ́ɛ ǎ. Đó Mawu Mavɔmavɔ, Mawu mitɔn ɖo tɛ́ntin mitɔn. É nɔ́ ba gbeɖé ɖɔ mi ní sɛn nǔ ɖěvo zɛ éyɛ́ wú ǎ. Mi bo cɔ́ miɖée, bó má dó xomɛsin n'i ó. Đó mi dó xomɛsin n'i ɔ́, é sixú hu mi sín ayǐkúngban ɔ́ jí. Mi ma sɔ́ tɛ́n Mawu Mavɔmavɔ, Mawu mitɔn kpɔ́n ɖě ó; mi ko bló ɖě ɖo Masa, mi ma sɔ́ bló ɖě ó. Đo tají ɔ́, mi ná xwedó gbetakɛ́n tɔn lɛ́ɛ, sɛ́n tɔn lɛ́ɛ, kpó nǔ e é zɔ́n lɛ́ɛ kpó ganjí. Mi wa nǔ e nyɔ́ bó sɔgbe Mawu Mavɔmavɔ nukún mɛ lɛ́ɛ; énɛ́ ɔ́, nǔ ná nyɔ́ nú mi, bɔ mi ná yí to ɖagbe e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ é; mi ná nya kɛntɔ́ mitɔn lɛ́ɛ, lě e Mawu Mavɔmavɔ ɖɔ gbɔn é. “É wá jɛ sɔ gúdo bónú vǐ mitɔn lɛ́ɛ kanbyɔ́ mi ɖɔ: ‘Étɛ́wú wɛ Mawu Mavɔmavɔ, Mawu mǐtɔn ná gbetakɛ́n énɛ́ lɛ́ɛ, sɛ́n énɛ́ lɛ́ɛ, kpó nǔ e é zɔ́n énɛ́ lɛ́ɛ kpó mi a jí’ ɔ́, mi ná yí gbe nú yě ɖɔ: ‘Kannumɔ Ejípu xɔ́sú ɔ́ tɔn wɛ mǐ nyǐ ɖ'ayǐ ɖo to tɔn mɛ, bɔ Mawu Mavɔmavɔ zé hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é dó ɖe mǐ tɔ́n. Mawu Mavɔmavɔ jlɛ́ nǔ ɖaxó ɖaxó lɛ́ɛ, nǔdábaɖa lɛ́ɛ, ɖo nukún mǐtɔn mɛ, bó dó wa nǔ xá Ejípu kpó axɔ́sú ɔ́ kpó xwédo tɔn kpó, togun tɔn bǐ kpó. Bó ká ɖe mǐ tɔ́n sín Ejípu, bó ná kplá mǐ wá to e é zin alɔ dó akɔ́n ɖɔ émí ná ná tɔ́gbó mǐtɔn lɛ́ɛ é mɛ. Mawu Mavɔmavɔ ɖɔ mǐ ní nyi sɛ́n énɛ́ lɛ́ɛ bǐ, bó ɖó sísí nú émí Mawu Mavɔmavɔ, Mawu mǐtɔn; énɛ́ ɔ́, nǔ ná nyɔ́ nú mǐ tɛgbɛ, bɔ é ná hɛn mǐ ɖó gbɛ lě e mǐ ɖe gbɔn égbé din é. Ényí mǐ wlíbo nú sɛ́n e Mawu Mavɔmavɔ ná mǐ lɛ́ɛ bǐ, bó nyi ganjí ɔ́, zǐnzán mǐtɔn ná sɔgbe xá lě e é jló gbɔn é.’ ” Mɔyízi ɖɔ: “Mawu Mavɔmavɔ, Mawu mitɔn ná kplá mi yi byɔ́ to e mi ɖó ná yí ɔ́ mɛ. Hwenu e mi ná ɖo to ɔ́ sɛkpɔ́ wɛ ɔ́, é ná nya togun tobutóbú ɖé lɛ́ɛ ɖo nukɔn mitɔn; togun tɛ́nwe wɛ; yě sukpɔ́ hú mi, bó syɛ́n hú mi. Togun lɛ́ɛ wɛ nyí: Hitíti lɛ́ɛ, Giigacíti lɛ́ɛ, Amɔliti lɛ́ɛ, Kanáanu lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó. Hwenu e Mawu Mavɔmavɔ, Mawu mitɔn ná jó yě nú mi ɔ́, mi ná kpé nǔɖé xá yě ǎ, mi ná kú nǔbláwǔ nú yě ǎ, mi ná ɖu ɖo yě jí, mi ná vívá kún yětɔn. Mi ma da yě ó; mi ma ná vǐ mitɔn nyɔ̌nu yě, bónú yě da ó, mi ma da vǐ yětɔn nyɔ̌nu nú vǐ mitɔn lɛ́ɛ ó. É má nyí mɔ̌ ǎ ɔ́, jǒnɔ énɛ́ lɛ́ɛ ná dɔn vǐ mitɔn lɛ́ɛ, bɔ yě ná jó Mawu Mavɔmavɔ dó, bó jɛ nǔ ɖěvo lɛ́ɛ sɛn jí. Mawu Mavɔmavɔ ka ná sin xomɛ dó mi, bó ná vívá kún mitɔn cɛ́jú mɛ. Lě e mi ka ɖó ná wa nǔ xá togun énɛ́ lɛ́ɛ gbɔn é ɖíe: mi ná flí vɔ̌sákpe yětɔn lɛ́ɛ xwe, mi ná gba awǐnnya e yě tun te bó nɔ́ sɛn lɛ́ɛ, mi ná hɔn kpo e yě tun te bó nɔ́ sɛn lɛ́ɛ; mi ná dó bǒcyɔ yětɔn lɛ́ɛ zo. Đó togun ɖe ɖó vo Mawu Mavɔmavɔ, Mawu mitɔn tɔn wɛ mi nyí. Mawu Mavɔmavɔ, Mawu mitɔn sɔ́ mi bɔ mi ná nyí togun tɔn vívɛ́ná ɖo togun e ɖo ayǐkúngban ɔ́ jí lɛ́ɛ bǐ mɛ.” Mɔyízi ɖɔ: “Ée Mawu Mavɔmavɔ ɖó kɔ mi wú, bó sɔ́ mi é ɔ́, ényí ɖɔ mi sukpɔ́ hú togun ɖě lɛ́ɛ wú wɛ ǎ; mi sukpɔ́ sɔ togun ɖě lɛ́ɛ ɖěbǔ ǎ. Lo ɔ́, Mawu Mavɔmavɔ yí wǎn nú mi, lobo ɖe akpá e é zin alɔ dó akɔ́n bó dó nú tɔ́gbó mitɔn lɛ́ɛ é: hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é wɛ é sɔ́ dó ɖe mi tɔ́n sín Ejípu, fí e mi ɖo Ejípu xɔ́sú ɔ́ sín fɛn mɛ ɖe, bó nyí kannumɔ tɔn é. “Mi ní tunwun ganjí ɖɔ Mawu Mavɔmavɔ, Mawu mitɔn wɛ nyí Mawu. Mawu gbejínɔtɔ́ énɛ́ ɔ́, yě mɛ e yí wǎn n'i bó nɔ́ nyi sɛ́n tɔn lɛ́ɛ ɔ́, é nɔ́ nɔ gbejí nú akɔ e é jɛ xá yě ɔ́, bó nɔ́ nyɔ́ xomɛ dó yě wú káká yi jijimɛ afatɔ́ngɔ́ ɔ́ (1.000) jí. Amɔ̌, nú mɛ ɖé gbɛ́ wǎn n'i ɔ́, é nɔ́ hu mɛ ɔ́ dó sú axɔ́ mɛ ɔ́; é nɔ́ ɖó yibowá ná ǎ. Hǔn mi bo wlíbo nú gbetakɛ́n lɛ́ɛ kpó sɛ́n lɛ́ɛ kpó, kpó nǔ e Mawu zɔ́n bɔ un ɖɔ nú mi égbé lɛ́ɛ kpó, bó nyi yě ganjí. “Ényí mi ɖó ayi sɛ́n énɛ́ lɛ́ɛ jí, bó wlíbo nú yě bó nyi ɔ́, Mawu Mavɔmavɔ, Mawu mitɔn ná nɔ gbejí nú akɔ e é zin alɔ dó akɔ́n bó jɛ xá tɔ́gbó mitɔn lɛ́ɛ é, bɔ é ná nyí ɖagbe nú mi. Mawu Mavɔmavɔ ɔ́, ɖo wǎn yíyí tɔn mɛ ɔ́, é ná dó acɛ mi kpó nǔ mitɔn lɛ́ɛ bǐ kpó jí: mi ná ji vǐ kpɔ́ gégé, mi ná ya jinukún kpɔ́ gégé, vǐwun ná ɖo kpɔ́, ami ná ɖo kpɔ́, nyibú mitɔn lɛ́ɛ kpó gbɔ̌ mitɔn lɛ́ɛ kpó bǐ ná ji bó ná túnflá. Mɔ̌ wɛ nǔ ná nyí gbɔn nú mi ɖo to ɔ́ mɛ, lě e Mawu Mavɔmavɔ zin alɔ dó akɔ́n bó ɖɔ nú tɔ́gbó mitɔn lɛ́ɛ gbɔn é. Mawu Mavɔmavɔ ná dó acɛ mi jí hú togun ɖě lɛ́ɛ bǐ; súnnu mitɔn abǐ nyɔ̌nu mitɔn, abǐ kanlin mitɔn lɛ́ɛ ɖěbǔ ná zun aji ǎ. Mawu Mavɔmavɔ ná ɖó azɔn bǐ zɔ nú mi; awě baɖabaɖa e xo Ejípu bɔ mi tunwun lɛ́ɛ bǐ ná nɔ zɔ nú mi; Mawu Mavɔmavɔ ná sɛ́ azɔn énɛ́ lɛ́ɛ ɖěbǔ dó mi ǎ; mɛ e gbɛ́ wǎn nú mi lɛ́ɛ wɛ ná jɛ azɔn énɛ́ lɛ́ɛ. “Mi ma kú nǔbláwǔ nú togun e Mawu Mavɔmavɔ, Mawu mitɔn ná jó nú mi lɛ́ɛ ó; mi hu bǐ. Mi ma sɛn vodún yětɔn lɛ́ɛ ó; ɖó mɔ wɛ yě nyǐ nú mi.” Mɔyízi ɖɔ: “Mi ná kó ɖo linlin wɛ ɖɔ: ‘Akɔta énɛ́ lɛ́ɛ syɛ́n hú mǐ ɖésú, nɛ̌ mǐ ká ná sixú kpé yě wú gbɔn?’ Mi ma ɖi xɛsi nú yě ó. Mi flín nǔ e Mawu Mavɔmavɔ, Mawu mitɔn dó sín xá Ejípu xɔ́sú ɔ́ kpó Ejípu togun ɔ́ bǐ kpó é hwebǐnu; mi ma wɔn gbeɖé ó. Mi mɔ nǔ e Mawu Mavɔmavɔ jlɛ́ lɛ́ɛ, nǔdábaɖa lɛ́ɛ, nǔ hu ado lɛ́ɛ, nǔ syɛ́nsyɛ́n e é bló hwenu e é ɖe mi tɔ́n sín Ejípu é ɖó nukún mitɔn wú. Mɔ̌ wɛ Mawu Mavɔmavɔ, Mawu mitɔn ná nɔ kpɔ́ xá mi gbɔn, ɖo akɔta e ɖi xɛsi ná wɛ mi ɖe lɛ́ɛ nukɔn. Mawu Mavɔmavɔ ná sɛ́ gbɔ̌nvɛ dó akɔta énɛ́ lɛ́ɛ mɛ, bɔ yě ná hu mɛ e è ma ko hu ǎ, bɔ yě ɖo hinhɔn bú dó mi wɛ lɛ́ɛ bǐ. Mi ma sísɔ́ ɖo akɔta énɛ́ lɛ́ɛ nukɔn ó: Mawu Mavɔmavɔ, Mawu mitɔn ɖo tɛ́ntin mitɔn; Mawu ɖaxó wɛ, lobo dó xɛsi. Ényí mi ɖo to ɔ́ sɛkpɔ́ wɛ ɔ́, Mawu Mavɔmavɔ ná jɛ akɔta lɛ́ɛ nya dó zɔ nú mi jí kpɛɖé kpɛɖé. Mi sixú hu yě bǐ kpɔ́ jí ǎ, é má nyí mɔ̌ ǎ ɔ́, gběkanlin lɛ́ɛ ná wá vun blá mi. Amɔ̌, Mawu Mavɔmavɔ, Mawu mitɔn ná wá jó yě nú mi; xɛsi ɖaxó ɖé ná wá jɛ yě jí, bɔ yě bǐ ná yi dɔn. Mawu Mavɔmavɔ ná jó axɔ́sú yětɔn lɛ́ɛ nú mi, bɔ mi ná sú kún yětɔn dó, mɛ ɖěbǔ sɔ́ ná flín yě ɖo ayǐkúngban jí ǎ; yě mɛ ɖokpó géé ná kpo ɖo nukɔn mitɔn ǎ; yě bǐ wɛ mi ná hu, bó ná dó nǔmɛsɛn yětɔn lɛ́ɛ sín bǒcyɔ zo; amɔ̌, mi ma nú siká kpó kpatágan kpó e ɖo yě wú lɛ́ɛ jló mi ó. Mi ma fɔ yě ó, ɖó suɖunú wɛ yě nyí ɖo Mawu Mavɔmavɔ, Mawu mitɔn nukɔn, bó ná dɔn nǔ nyanya wá nú mi. Mi ma zé nǔ mɔ̌hun ɖěbǔ byɔ́ xwé mitɔn lɛ́ɛ gbe ó. Ényí mi zé byɔ́ xwé mitɔn lɛ́ɛ gbe ɔ́, Mawu nǎ sú mi kpó yě kpó sín kún dó. Lo ɔ́, nǔ mɔ̌hunkɔtɔn lɛ́ɛ bǐ wɛ è ɖǒ ná hɛn gblé bǐ dégbédégbé; mi ɖó ná gbɛ́ wǎn nú nǔ énɛ́ lɛ́ɛ, bó ná nɔ́ ba ná mɔ yě ɖó nukún wú vɔ́vɔ́ ǎ.” Mɔyízi ɖɔ: “Mi wlíbo nú sɛ́n e un ná mi égbé din lɛ́ɛ, bó nyi; énɛ́ ɔ́, mi ná nɔ gbɛ, bó ná gba kún; mi ná yí to e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ é. Mi flín zɔnlin tobutóbú e Mawu Mavɔmavɔ kplá mi bɔ mi zun ɖo gbětótló mɛ xɔ xwe kanɖé (40) é. Mawu Mavɔmavɔ tɛ́n mi kpɔ́n gbɔn wǔvɛ́ tɛnmɛ tɛnmɛ lɛ́ɛ mɛ, bó ná dó mɔ nǔ jɛ nǔ e ɖo ayi mitɔn mɛ é wú; énɛ́ ɔ́, mi ná sixú nyi sɛ́n tɔn lɛ́ɛ kpó mi ná gbɔ kpó ɔ́, é ná tunwun. Ée mi mɔ wǔvɛ́ énɛ́ lɛ́ɛ, bɔ adɔ dó ya nú mi fó ɔ́, é ná mǎna mi bɔ mi ɖu; nǔɖuɖu e tɔ́gbó mitɔn kpó mi kpó má mɔ kpɔ́n ǎ é wɛ é ná mi. É bló mɔ̌, bó dó ɖe xlɛ́ ɖɔ é kún nyí nǔɖuɖu kɛ́ɖɛ́ wɛ gbɛtɔ́ nɔ́ ɖu bó nɔ́ nɔ gbɛ ó, lo ɔ́, xó e tɔ́n sín Mawu Mavɔmavɔ nu mɛ ɔ́ bǐ wɛ nɔ́ hɛn mɛ ɖó gbɛ. Xwe kanɖé énɛ́ lɛ́ɛ mɛ ɔ́, awu mitɔn lɛ́ɛ gbi ǎ, afɔ mitɔn lɛ́ɛ ka tɛ ǎ. Mi bo tunwun dó ayi mitɔn mɛ ɖɔ Mawu Mavɔmavɔ, Mawu mitɔn jló ná kplɔ́n mi lě e tɔ́ nɔ́ kplɔ́n vǐ é ɖɔhun. Mi bló nǔ e Mawu Mavɔmavɔ, Mawu mitɔn zɔ́n mi lɛ́ɛ; mi zán gbɛ lě e é jló gbɔn é, bó ɖó sísí n'i.” Mɔyízi ɖɔ: “Mawu Mavɔmavɔ, Mawu mitɔn ná kplá mi byɔ́ to ɖagbe ɖé mɛ. Tɔsisa ɖo to ɔ́ mɛ, tɔjɔtɛn ɖo to ɔ́ mɛ, sin nɔ tɔ́n sín ayǐkúngban lanmɛ, bó nɔ́ sa gbɔn tɔdo lɛ́ɛ mɛ, bó nɔ́ sa gbɔn sókan lɛ́ɛ mɛ. Blěe to wɛ; ɔ́ji to wɛ. Vǐwuntín, fígi, glenáditín, olívu kpó wǐin kpó sín to wɛ. Mi ná mɔ nǔɖuɖu bó ɖu lě e é jló mi gbɔn é; nǔ ɖěbǔ ná hwedó mi ǎ. È nɔ mɔ gan ɖo só e ɖo to ɔ́ mɛ lɛ́ɛ mɛ, bó nɔ́ mɔ ganvɔ ɖo só e ɖo to ɔ́ mɛ lɛ́ɛ mɛ. Mi ná mɔ nǔ e mi ná ɖu bó gɔ́ xo ganjí ɔ́ ɖo to ɔ́ mɛ, lobo ná dó kú nú Mawu Mavɔmavɔ, Mawu mitɔn ɖó to ɖagbe e é ná mi é wútu. “Mi ka ɖó ayi te, bó má dó vɛ̌ nú gbetakɛ́n Mawu Mavɔmavɔ, Mawu mitɔn tɔn lɛ́ɛ, sɛ́n tɔn lɛ́ɛ, kpó nǔ e é zɔ́n, bɔ un ɖɔ nú mi égbé din lɛ́ɛ kpó ó. É má nyí mɔ̌ ǎ ɔ́, mi táá wɔn ɛ. Mi ná mɔ nǔɖuɖu bó ɖu gɔ́ xo; mi ná gbá xɔ ɖagbe ɖagbe lɛ́ɛ bó nɔ mɛ; nyibú mitɔn lɛ́ɛ kpó gbɔ̌ mitɔn lɛ́ɛ kpó ná gba kún; kpatágan kpó siká kpó dɔkun tɛnmɛ tɛnmɛ kpó ná ɖo kpɔ́ ɖo mi sí. Ée nǔ ná cí mɔ̌ é ɔ́, mi ma ɖo afɔ tɛ ayǐ wɛ káká bó wɔn Mawu Mavɔmavɔ, Mawu mitɔn e ɖe mi tɔ́n sín kannumɔgbénu ɖo Ejípu é ó. É wɛ kplá mi gbɔn gbětótló ɖaxó e dó xɛsi bɔ dan aɖǐnɔ lɛ́ɛ kpó hɔnkéklě lɛ́ɛ kpó gɔ́ é mɛ. Ayǐkúngban énɛ́ e jí jǐ má nɔ́ ja dó ǎ é ɔ́, Mawu Mavɔmavɔ bló bɔ sin tɔ́n sín só syɛ́nsyɛ́n mɛ nú mi. Gbětótló ɖokpó énɛ́ ɔ́ mɛ wɛ Mawu Mavɔmavɔ ná mǎna e tɔ́gbó mitɔn lɛ́ɛ má mɔ kpɔ́n ǎ é mi, bó ná dó dó winnyá mi, bó ná dó tɛ́n mi kpɔ́n bɔ sɔ gúdo ná nyɔ́ nú mi. Hwenu e nǔ ná nyɔ́ nú mi ɖo to ɔ́ mɛ ɔ́, mi ma lin gbeɖé ɖɔ émí ɖésú wɛ dó gǎn, bó wa nǔ bɔ nǔ nyɔ́ nú émí ó. Mi ná flín Mawu Mavɔmavɔ, Mawu mitɔn; ɖó é wɛ nɔ́ ná hlɔ̌nhlɔ́n mi, bɔ nǔ nyɔ́ nú mi mɔ̌. É bló mɔ̌, bó dó ɖe xlɛ́ ɖɔ émí ɖo gbejí nú akɔ e émí zin alɔ dó akɔ́n bó jɛ xá tɔ́gbó mitɔn lɛ́ɛ, lě e é ɖ'é wú gbɔn din é. “Ényí mi wɔn Mawu Mavɔmavɔ, Mawu mitɔn, bó jɛ nǔ ɖěvo lɛ́ɛ sɛn jí, bó jɛ vɔ̌ sá nú yě jí, bó jɛ kpo jɛ nú yě jí ɔ́, un ɖo ɖiɖɔ nú mi wɛ agbawungba égbé ɖɔ mi bǐ ná vɔ. Nǔgbó ɔ́, ényí mi ma se tónú nú Mawu Mavɔmavɔ, Mawu mitɔn ǎ ɔ́, mi bǐ ná vɔ lě e Mawu Mavɔmavɔ hu akɔta lɛ́ɛ ɖo nukɔn mitɔn é ɖɔhun.” Mɔyízi ɖɔ: “Izlayɛ́li ví lɛ́ɛ e mi, mi ɖótó mì; mi ɖíe ja Judɛ́ɛn tɔ ɔ́ d'asá gbé e. Mi ná nya akɔta wɔ̌buwɔ́bú ɖé lɛ́ɛ, bó ná yí toxo yětɔn lɛ́ɛ; toxo ɖaxó ɖaxó ɖé lɛ́ɛ wɛ, bɔ è mɛ ahohó lɛ́ lɛ̌ dó bɔ é yi jǐ ɖésú. Akɔta énɛ́ lɛ́ɛ sukpɔ́ hú mi bó syɛ́n hú mi. Mi ná mɔ Anáki ví lɛ́ɛ; gbɛtɔ́ sakasaka hlɔ̌nhlɔ́nnɔ wɛ yě nyǐ. Mi ɖésú tunwun yě. Yě xó ɖɔ wɛ è nɔ ɖe bó nɔ́ ɖɔ: ‘Mɛ̌ ká sixú nɔ te Anáki ví lɛ́ɛ nukɔn?’ Zaanɖé din ɔ́, mi ná mɔ Mawu Mavɔmavɔ, Mawu mitɔn ɖo yiyi wɛ ɖo nukɔn mitɔn myɔ ɖo nǔ fyɔ́ wɛ ɖɔhun. Mawu mitɔn wɛ ná dó winnyá yě ɖo nukɔn mitɔn. É wɛ ná vívá kún yětɔn; mi ná hu yě cɛ́jú mɛ; mi ná yí to yětɔn lě e é kó ɖɔ gbɔn nú mi é. “Ée Mawu Mavɔmavɔ, Mawu mitɔn ná nya yě nú mi ɔ́, mi ma yí nugo, bó ɖɔ nǔnyɔ́wa émítɔn wɛ zɔ́n bɔ Mawu Mavɔmavɔ ná to ɔ́ émí ó. Walɔ baɖabaɖa e akɔta énɛ́ lɛ́ɛ ɖó ɔ́ wɛ zɔ́n bɔ Mawu Mavɔmavɔ nya yě, bɔ mi yí to yětɔn. É nyí nǔnyɔ́wa mitɔn ɖé wɛ zɔ́n bɔ nǔ cí mɔ̌ ǎ. Mawu Mavɔmavɔ nya togun énɛ́ lɛ́ɛ ɖó walɔ baɖabaɖa yětɔn wú, bó ná ɖe akpá e é zin alɔ dó akɔ́n bó dó nú tɔ́gbó mitɔn Ablaxámu kpó Izáki kpó Jakɔ́bu kpó é. Hǔn mi bo tunwun ɖɔ Mawu Mavɔmavɔ, Mawu mitɔn ná jó to ɖagbe énɛ́ nú mi, bɔ mi ná yí; é ká nyí nǔnyɔ́wa mitɔn wú wɛ ǎ, ɖó togun ɖé wɛ mi nyí, bó tlí tó.” Mɔyízi ɖɔ: “Mi flín lě e mi dó xomɛsin nú Mawu Mavɔmavɔ, Mawu mitɔn gbɔn, ɖo gbětótló mɛ é. Mi ma wɔn gbeɖé ó. Sín gbe e gbe mi tɔ́n sín Ejípu, káká bó wá ɖo fí égbé din ɔ́, mi gɔn gǔ fɔ́n dó Mawu Mavɔmavɔ jí gbeɖé ǎ. Đo tají ɔ́, mi dó xomɛsin ɖaxó ɖokpó nú Mawu Mavɔmavɔ ɖo Holɛ́bu só jí, bɔ é jló ná sú kún mitɔn dó. Hwenɛ́nu ɔ́, un ko xá só ɔ́ jí, bó xwe awǐnnyatɛ e jí akɔ e Mawu Mavɔmavɔ jɛ xá mi é ɖe ɔ́ yí gbé. Un nɔ só ɔ́ jí xɔ zǎn kanɖé (40), kéze kanɖé (40), nǔ má ɖu, sin ma nu. Xó e Mawu Mavɔmavɔ nɔ myɔ tɛ́ntin, bó ɖɔ nú mi gbe e gbe mi kplé ɖo só ɔ́ kpá é ɔ́, é ɖésúnɔ wlán bǐ dó awǐnnyatɛ we jí, bó bɛ́ nú mì. “Ée un bló zǎn kanɖé (40), kéze kanɖé (40) lɛ́ɛ fó bɔ é zé awǐnnyatɛ we e jí é wlán akɔjijɛsɛ́n lɛ́ɛ ɖó é nú mì ɔ́, é ɖɔ: ‘Yǎ wǔ jɛ te, togun towe énɛ́ e a kplá tɔ́n sín Ejípu é jɛ agɔ ɖaxó ɖé. Ali e un xlɛ́ yě ɔ́, bléwún jɛ́n yě gosín jí; yě sínsín siká dó bló bǒcyɔ.’ Bɔ Mawu Mavɔmavɔ lɛ́ ɖɔ: ‘Din ɔ́, un mɔ ɖɔ togun élɔ́ ɔ́, togun tótlítɔ́ wɛ. Gbɔ nú má wa nǔ yětɔn: un ná vívá kún yětɔn bɔ mɛ ɖěbǔ sɔ́ ná flín yě ɖo ayǐkúngban ɔ́ jí ǎ. Énɛ́ ɔ́ gúdo ɔ́, un ná dó akɔta ɖokpó sín kún gbɔn jǐ towe; é ná nyí akɔta ɖé bó ná syɛ́n, bó ná sukpɔ́ hú yě.’ Ée Mawu Mavɔmavɔ ɖɔ mɔ̌ ɔ́, un jɛ te sín só ɔ́ jí, bɔ awǐnnyatɛ e jí akɔjijɛsɛ́n ɔ́ ɖe lɛ́ɛ ɖo alɔ ce we lɛ́ɛ mɛ. Só ɔ́ bǐ wɛ ká nyí myɔ. Ée un jɛ te ɔ́, un ná mɔ nǔɖé kpowun ɔ́, un mɔ ɖɔ mi ko hu hwɛ dó Mawu Mavɔmavɔ, Mawu mitɔn nǔgbó; mi sínsín siká dó bló bǒcyɔ. Mi yá wǔ gosín ali e Mawu Mavɔmavɔ xlɛ́ mi é jí ɖo cɛ́jú mɛ. Énɛ́ ɔ́ wú wɛ un zé awǐnnyatɛ e un hɛn alɔ mɛ lɛ́ɛ nyi gbě, bó gba yě hánnyá ɖo nukún mitɔn mɛ.” Mɔyízi ɖɔ: “Un lɛ́ jɛ kpo fínɛ́, ɖo Mawu Mavɔmavɔ nukɔn bó nɔ mɔ̌ káká nú zǎn kanɖé (40), kéze kanɖé (40), nǔ má ɖu sin ma nu lě e un bló gbɔn ɖ'ayǐ é. Un bló mɔ̌ ɖó hwɛ e mi hu lɛ́ɛ wú. Mi hu hwɛ dó Mawu Mavɔmavɔ, bɔ é sin xomɛ n'i ɖésú. Lě e Mawu Mavɔmavɔ sin xomɛ dó mi gbɔn ɔ́ hu ado nú mì; xomɛ sin i káká bɔ é jló ná vívá kún mitɔn. Lo ɔ́, Mawu Mavɔmavɔ lɛ́ yí vosisa ce hwenɛ́nu. Xomɛ e Mawu Mavɔmavɔ sin dó Aalɔ́ɔn ɔ́ syɛ́n ɖésú; é sin xomɛ dó e káká bó jló ná hu i. Lo ɔ́, un sa vo nú Mawu Mavɔmavɔ dó é lɔmɔ̌ tamɛ hwe énɛ́ nu, lobo zé nyibúví sín bǒcyɔ e mi bló bó hu hwɛ dó Mawu Mavɔmavɔ ɔ́ dó myɔ mɛ. Énɛ́ ɔ́ gúdo ɔ́, un gba nǔ e kpo lɛ́ɛ, bó li bǐ, bɔ é húzú linfín, bɔ un bɛ́ kɔn nyi tɔ e nɔ sa sín só ɔ́ jí é mɛ. “Mɔ̌ ɖokpó ɔ́, mi dó xomɛsin nú Mawu Mavɔmavɔ ɖo Taveéla, bó dó n'i ɖo Masa, bó lɛ́ dó n'i ɖo Kivlɔti-Taawa. Mɔ̌ jɛ́n hwenu e Mawu Mavɔmavɔ sɛ́ mi dó Kadɛ́ci-Baanɛ́ya, bó ɖɔ mi ní yi to e émí ná mi é mɛ ɔ́, mi ma se tónú nú Mawu Mavɔmavɔ, Mawu mitɔn ǎ é nɛ́; mi ɖeji dó wǔ tɔn ǎ; mi ké ya nú xó e ɖɔ wɛ é ɖe lɛ́ɛ é ǎ. Sín gbe e gbe un tunwun mi ɔ́, mi gɔn gǔ fɔ́n dó Mawu Mavɔmavɔ jí gbeɖé kpɔ́n ǎ. “Lě e un ko ɖɔ gbɔn ɔ́, éé Mawu Mavɔmavɔ ɖɔ émí ná vívá kún mitɔn ɔ́, un jɛ kpo ɖo nukɔn tɔn, bó nɔ mɔ̌ káká nú zǎn kanɖé kéze kanɖé. Un sa vo n'i bó ɖɔ: ‘Aklúnɔ Mavɔmavɔ, ma sú togun towe sín kún dó ó; togun towe wɛ, bɔ a zě acɛkpikpa towe e hú gǎn nǔ bǐ ɔ́, kpó hlɔ̌nhlɔ́n towe e nukɔn nǔɖé má nɔ́ nɔ te ɖe ǎ é kpó, dó hwlɛ́n yě bó ɖe yě tɔ́n sín Ejípu. Flín mɛsɛntɔ́ towe Ablaxámu kpó Izáki kpó Jakɔ́bu kpó; ma kpɔ́n dó tónúmase togun ɔ́ tɔn wú ó; ma kpɔ́n dó adǎkaxixo togun ɔ́ tɔn kpó hwɛ tɔn lɛ́ɛ kpó wú ó. Ma lɔn nú mɛ e ɖo to e mɛ a ɖe mǐ tɔ́n sín lɛ́ɛ é ɖɔ: Mawu Mavɔmavɔ sixú kplá yě yi to e sín akpá é dó nú yě é mɛ ǎ, abǐ yě ná ɖɔ: É yí wǎn ɖěbǔ nú yě ǎ, kplá wɛ é kplá yě kpowun, bó ná yi hu yě ɖo gbětótló mɛ. Ma lɔn nú yě ɖɔ mɔ̌ ó. Mawu Mavɔmavɔ, togun towe wɛ yě nyí. Yě mɛ e wú a zǎn hlɔ̌nhlɔ́n towe kpó acɛ towe e nukɔn nǔɖé má nɔ́ nɔ te ɖe ǎ é dó, dó ɖe yě tɔ́n sín Ejípu ɔ́, towe wɛ yě nyí tɛgbɛ.’ ” Mɔyízi ɖɔ: “Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ: ‘Kpa awǐnnyatɛ we nukɔntɔn lɛ́ɛ ɖɔhun, bó zé atín dó bló gbǎ ɖokpó ná. A blǒ bǐ ɔ́, a nǎ wá gɔ̌n ce ɖo só ɔ́ jí. Énɛ́ ɔ́, xó e ɖo awǐnnyatɛ e a hɛn gba lɛ́ɛ jí ɔ́, un ná lɛ́ wlán dó awǐnnyatɛ e a nǎ kpa lɛ́ɛ jí, bɔ a nǎ zé dó gbǎ ɔ́ mɛ.’ Ée Mawu Mavɔmavɔ ɖɔ mɔ̌ ɔ́, un zé kasyatín dó bló gbǎ ɔ́ ná, lobo kpa awǐnnyatɛ we, nukɔntɔn lɛ́ɛ ɖɔhun, bó bɛ́ awǐnnyatɛ lɛ́ɛ yi só ɔ́ jí. Mawu Mavɔmavɔ wlán xó e é wlán dó awǐnnyatɛ nukɔntɔn lɛ́ɛ jí lɛ́ɛ dó awǐnnyatɛ yɔ̌yɔ́ lɛ́ɛ jí. Sɛ́n wǒ e Mawu Mavɔmavɔ nɔ myɔ tɛ́ntin, bó ná mi gbe e gbe mi kplé ɖo só ɔ́ kpá é wɛ Mawu Mavɔmavɔ lɛ́ wlán, lobo zé nú mì. Énɛ́ ɔ́, un jɛ te sín só ɔ́ jí bó wá bɛ́ awǐnnyatɛ lɛ́ɛ dó gbǎ e un bló é mɛ. Yě nɔ gbǎ ɔ́ mɛ lě e Mawu Mavɔmavɔ ɖɔ gbɔn nú mì é. “Izlayɛ́li ví lɛ́ɛ gosín sɛ́tɔ e ɖo Benɛ-Yakáni lɛ́ɛ kɔn, bó yi Mɔsela. Mɔsela fínɛ́ wɛ Aalɔ́ɔn kú bɔ è ɖi i dó. Vǐ tɔn Eleazáa jɛ do tɔn mɛ bó nɔ wa vɔ̌sánú-xwlémawutɔ́zɔ́. Yě gosín Mɔsela bó yi Gudigoda, bó gosín Gudigoda bó yi Yotivata. Tɔsisa gěgé ɖo to énɛ́ mɛ. Hwenɛ́nu ɔ́, Mawu Mavɔmavɔ ɖe akɔta Levíi tɔn ɔ́ ɖó vo, bó zé azɔ̌ élɔ́ lɛ́ɛ dó así nú yě: yě ná nɔ hɛn akɔjijɛgbá Mawu Mavɔmavɔ tɔn, yě ná nɔ́ ɖo xwé gbe bó ná nɔ ɖo azɔ̌ tɔn wa wɛ hwebǐnu, yě ná nɔ́ xo ɖɛ dó mɛ jí, ɖo Mawu Mavɔmavɔ sín nyǐkɔ mɛ. Yě wɛ kpo ɖo azɔ̌ énɛ́ lɛ́ɛ wa wɛ káká jɛ égbé. Énɛ́ wɛ zɔ́n bɔ akɔta énɛ́ má ɖó ayǐkúngban ɖěbǔ ɖo akɔta ɖě lɛ́ɛ mɛ ǎ. Nǔ e yě ɖó acɛ ná ɔ́ wɛ nyí ɖɔ yě ná sɛn Mavɔmavɔ. Nǔ e Mawu Mavɔmavɔ, Mawu mitɔn ɖɔ nú yě ɔ́ nɛ́. “Un bló zǎn kanɖé (40), kéze kanɖé (40), ɖo só ɔ́ jí lě e un bló gbɔn wá yi é, bɔ Mawu Mavɔmavɔ lɛ́ yí gbe nú ɖɛ ce bó sɔ́ vívá kún mitɔn ǎ. Mawu Mavɔmavɔ ɖɔ nú mì ɖɔ: ‘Din ɔ́, sɔ́ nǔ, bó nɔ togun ɔ́ nu, bónú mi jɛ ali; yě ní yi byɔ́ to e nyɛ Mawu Mavɔmavɔ zin alɔ dó akɔ́n ɖɔ un ná ná tɔ́gbó yětɔn lɛ́ɛ ɔ́ mɛ, bónú é ná nyí yětɔn.’ ” Mɔyízi ɖɔ: “Izlayɛ́li ví lɛ́ɛ mi, étɛ́ ba wɛ Mawu Mavɔmavɔ, Mawu mitɔn ɖe ɖo mi gɔ́n? É jló ɖɔ mi ní nɔ sí émí, bó wa jlǒ émítɔn, bó yí wǎn nú émí, bó sɛn émí kpó ayi mitɔn bǐ kpó, kpódó lǐndɔ̌n mitɔn bǐ kpó. É jló ɖɔ mi ní xwedó gbetakɛ́n émítɔn e un ná mi égbé din lɛ́ɛ, bó xwedó sɛ́n émítɔn e un ná mi égbé din lɛ́ɛ; énɛ́ ɔ́, é ná nyí ɖagbe nú mi. Mawu Mavɔmavɔ, Mawu mitɔn wɛ ɖó jǐnukúnsin káká yi fí e é kponu ɖó é, bó ɖó ayǐkúngban kpó nǔ e ɖ'é jí lɛ́ɛ bǐ kpó. Đ'ayǐ xóxó ɔ́, tɔ́gbó mitɔn lɛ́ɛ kɛ́ɖɛ́ wɛ Mawu Mavɔmavɔ nɔ́ nɔ kpɔ́ xá; yě wɛ é yí wǎn ná. Égbé din ɔ́, mi vǐ yětɔn lɛ́ɛ wɛ é sɔ́ ɖo akɔta lɛ́ɛ bǐ mɛ, lě e mɔ gbɔn wɛ mi ɖe é. Mi bo jó miɖée dó bǐ nú Mawu Mavɔmavɔ, Mawu mitɔn, bó má sɔ́ tlí tó ɖě ó. È ka ná ɖɔ ɔ́, Mawu Mavɔmavɔ, Mawu mitɔn ɔ́, é ɖokpónɔ wɛ nyí Mawu; é wɛ nyí Aklúnɔ aklúnɔ lɛ́ɛ tɔn; Mawu ɖaxó wɛ, lobo dó xɛsi. É nɔ́ nɔ awo mɛ nú mɛ ɖěbǔ ǎ; é ká nɔ́ yí ajɔ ɖo mɛ ɖěbǔ sí ǎ. É nɔ́ jɛ ahwan tɔ́cyɔvǐ lɛ́ɛ kpó asúkúsi lɛ́ɛ kpó jí; é nɔ́ ná nǔɖuɖu kpó avɔ kpó to ɖěvo mɛ nu e ɖo mi gɔ́n lɛ́ɛ. Hǔn mi lɔmɔ̌ ní yí wǎn nú to ɖěvo mɛ nu e ɖo mi mɛ lɛ́ɛ, bó ká nɔ́ flín ɖɔ émí lɔmɔ̌ kó nyí jǒnɔ ɖo Ejípu tomɛ kpɔ́n. “Mi ní ɖó sísí nú Mawu Mavɔmavɔ, Mawu mitɔn; mi nɔ sɛn ɛ; é ɖokpónɔ géé wú wɛ mi ná ɖó kan dó bó ná nɔ sɛn; é ɖokpónɔ sín nyǐkɔ wɛ mi ná nɔ́ xwlé. É wɛ mi ná nɔ́ kpa susu ná; é wɛ nyí Mawu ɖokpó e mi ɖó é; é wɛ wa nǔ ɖaxó ɖaxó lɛ́ɛ, nǔ e dó xɛsi lɛ́ɛ bɔ mi mɔ.” Tɔ́gbó mitɔn e yi Ejípu lɛ́ɛ sɔ́ hú kanɖé gban (70) ǎ. Égbé din ɔ́, Mawu Mavɔmavɔ, Mawu mitɔn bló bɔ mi sukpɔ́ winnini sunví e ɖo jǐxwé lɛ́ɛ ɖɔhun. Mɔyízi ɖɔ: “Mi yí wǎn nú Mawu Mavɔmavɔ, Mawu mitɔn; mi zé sɛ́n tɔn lɛ́ɛ, gbetakɛ́n tɔn lɛ́ɛ kpó nǔ e é zɔ́n lɛ́ɛ kpó dó wa azɔ̌ ná hwebǐnu. Xó élɔ́ e ɖɔ wɛ un ɖe din ɔ́, vǐ mitɔn lɛ́ɛ ɖɔ ná wɛ un ɖe ǎ, ɖó lě e Mawu Mavɔmavɔ ɖe hlɔ̌nhlɔ́n tɔn xlɛ́ gbɔn ɔ́, yě mɔ ǎ, yě ká tunwun do ná ǎ. Midɛɛ lɛ́ɛ wɛ é ɖe xlɛ́; mi wɛ mɔ susu tɔn bó mɔ hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é. Mi wɛ mɔ nǔ e é jlɛ́ lɛ́ɛ, bó mɔ lě e Mawu Mavɔmavɔ ɖe xomɛsin tɔn xlɛ́ ɖo Ejípu gbɔn é: é ɖe xomɛsin tɔn xlɛ́ Ejípu xɔ́sú ɔ́, kpó to tɔn kpó. Mi wɛ mɔ nǔ e é dó sin xá ahwangɔnu Ejípu tɔn é, lě e é wa sɔ́ yětɔn lɛ́ɛ kpó kɛkɛ́ví yětɔn lɛ́ɛ kpó nú gbɔn é. Mi mɔ lě e é dɔn Xu Vɔvɔ ɔ́ cyɔ́n yě gbɔn hwenu e yě ɖo mi nya wɛ é. Mawu Mavɔmavɔ bló bɔ yě cí ahwan bǐ gbídígbídí. Mi mɔ lě e é nya xɛ ɖo mi jí ɖo gbětótló mɛ, bó kplá mi wá fí gbɔn é. Mi mɔ nǔ e é wa xá Eliavu e jɔ ɖo akɔta Hwlibɛ́ni tɔn mɛ ɔ́ sín vǐ Datáni kpó Abilámu kpó é. Mi Izlayɛ́li ví lɛ́ɛ nukún mɛ wɛ ayǐkúngban mi yě kpó asi yětɔn lɛ́ɛ kpó, vǐ yětɔn lɛ́ɛ kpó goxɔ yětɔn lɛ́ɛ kpó, kpódó nǔ e yě hɛn lɛ́ɛ bǐ kpó ɖe. Nukún mitɔn mɛ wɛ Mawu Mavɔmavɔ bló nǔ ɖaxó ɖaxó énɛ́ lɛ́ɛ ɖe. Mi bo zé sɛ́n e un dó nú mi égbé din lɛ́ɛ bǐ dó wa azɔ̌ ná. Énɛ́ ɔ́, mi ná mɔ hlɔ̌nhlɔ́n bó ná yí to e mɛ ná byɔ́ wɛ mi ɖe ɔ́, bó ná dɔ́ ji ɖo to e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ kpó vǐ mitɔn lɛ́ɛ kpó ɔ́ mɛ. To e mɛ nyibúnɔ́sin kpó wǐin kpó nɔ́ sa ɖe é.” Mɔyízi ɖɔ: “To e yí gbé mi ja é cí Ejípu to e mɛ mi gosín ɔ́ ɖɔhun ǎ. Mi lɛ gle ɖo Ejípu to ɔ́ mɛ ɔ́, sin wɛ mi nɔ hú ná mǎgle ɖɔhun. Lo ɔ́, to e yí gbé mi xwe ɔ́, só kpó tɔdo kpó ɖo to ɔ́ mɛ kpɔ́, bɔ jǐ nɔ́ ja ganjí ɖo to ɔ́ mɛ. To ɖé wɛ bɔ Mawu Mavɔmavɔ, Mawu mitɔn kpé nukún d'é wú ganjí, bɔ nukún tɔn ɖ'é wú hwebǐnu sín xwe ɔ́ sín bǐbɛ́ káká yi xwe ɔ́ sín fífó. “Ényí mi ɖó kan dó sɛ́n e un xa nú mi égbé din lɛ́ɛ wú, bó nyi ganjí ɔ́, ényí mi yí wǎn nú Mawu Mavɔmavɔ, Mawu mitɔn bó sɛn ɛ kpó ayi mitɔn bǐ kpó, kpódó lǐndɔ̌n mitɔn bǐ kpó ɔ́, é ná bló bɔ jǐ ná ja dó to mitɔn mɛ hwenu e é ɖó ná ja dó é; xwetají ná ja bɔ zǒjí lɔ ná ja, bɔ ji ná jɛ. Mi ná ya blěe ganjí; mi ná mɔ vɛ̌ɛn ganjí, bó ná mɔ ami ganjí. É ná bló bɔ gběhan ná wú nú kanlin mitɔn lɛ́ɛ, nǔɖuɖu ná kpé mi kpo. “Mi bo cɔ́ miɖée, bó má lɔn bónú nǔɖé ní ɖe mi sín Mawu sín ali ɔ́ jí, bónú mi sɛn nǔ ɖěvo lɛ́ɛ bó ɖe kɔ́ nú yě ó. Mi bló mɔ̌ gbeɖé ɔ́, Mawu Mavɔmavɔ ná sin xomɛ dó mi, bó ná sú jǐnukúnsin, bɔ jǐ sɔ́ ná ja ǎ, ayǐkúngban mitɔn sɔ́ ná ná jinukún ɖě ǎ, bɔ mi bǐ ná kú ɖo to ɖagbe e ná mi gbé Mawu Mavɔmavɔ ja é mɛ. Mi ná wlán sɛ́n e un xa nú mi lɛ́ɛ dó ayi mɛ, bó ná nɔ́ lin tamɛ dó yě wú. Mi ná blá yě dó awa abǐ nukɔn, bó má wá wɔn ó. Mi ná kplɔ́n yě vǐ mitɔn lɛ́ɛ; ayǐjínjɔ́n wɛ mi ɖe ɖo xwé mitɔn gbe oo, ali jí wɛ mi ɖe bó ɖo yiyi wɛ oo, ayǐmlɔ́mlɔ́ wɛ mi ɖe oo, fɔ́n wɛ mi fɔ́n oo, mi ná nɔ́ ɖo xó ɖɔ d'é wú wɛ. Mi ná wlán yě ɖó xwé mitɔn lɛ́ɛ wú, hɔnkpo lɛ́ɛ wú, bó wlán ɖó hɔntogbó toxo lɛ́ɛ tɔn sín kpo lɛ́ɛ wú. Énɛ́ ɔ́, nú jǐnukúnsin ɖo aga bɔ ayǐkúngban ɖo do jɛ́n wɛ ɔ́, mi kpó vǐ mitɔn lɛ́ɛ kpó ná dɔ́ ji ɖo to e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ é mɛ. “Nǔgbó ɖɔ nú mi wɛ un ɖe, mi ɖó kan dó sɛ́n e un xa nú mi lɛ́ɛ wú, bó nyi ganjí. Mi yí wǎn nú Mawu Mavɔmavɔ, Mawu mitɔn; mi wa jlǒ tɔn, bó se tónú n'i, bó nɔ gbejí n'i bǐ. Énɛ́ ɔ́, Mawu Mavɔmavɔ ná nya akɔta e sukpɔ́ bó syɛ́n hú mi lɛ́ɛ ɖo nukɔn mitɔn, bɔ mi ná yí to yětɔn. Fí e mi ná tɛ afɔ ɔ́ bǐ wɛ ná húzú mitɔn: to mitɔn sín dogbó ná bɛ́ sín gbětótló mɛ ɖo tofɔligbé káká yi Libáan só lɛ́ɛ kɔn ɖo totaligbé. Dogbó mitɔn ná bɛ́ sín tɔsisa ɖaxó Efláti tɔn ɔ́ kɔn, ɖo zǎnzǎnhwe jí, káká yi Mɛditɛlanɛ́ɛ xu ɔ́ kɔn ɖo gbadahwe jí. Mɛ ɖěbǔ sixú nɔ te nukɔn mitɔn ǎ. Mi jɛ fí ɖěbǔ ɖo to ɔ́ mɛ ɔ́, Mawu Mavɔmavɔ, Mawu mitɔn ná bló, bɔ mɛ lɛ́ɛ ná ɖi xɛsi nú mi, bɔ ado ná nɔ́ hu yě dó mi wú, lě e Mawu Mavɔmavɔ, Mawu mitɔn ko dó akpá tɔn gbɔn nú mi é. “Mi ɖótó mì! Égbé din ɔ́, mi ná kpɔ́n ɖɛxodómɛjí Mawu Mavɔmavɔ, Mawu mitɔn tɔn ɔ́ kpó nudómɛ tɔn kpó, bó ná sɔ́ ɖokpó. Ényí mi nyi Mawu Mavɔmavɔ, Mawu mitɔn sín sɛ́n e un xa nú mi égbé lɛ́ɛ ɔ́, ɖɛ tɔn ná nɔ mi jí. Ényí mi ma ka se tónú nú sɛ́n tɔn lɛ́ɛ ǎ, bó gosín ali e un ɖe nú mi é jí, bó yi sɛn nǔ ɖěvo e mi ma tunwun ǎ lɛ́ɛ ɔ́, nudómɛ tɔn ná nɔ mi jí. “Hwenu e Mawu Mavɔmavɔ, Mawu mitɔn ná kplá mi yi to e ná ná mi wɛ é ɖe ɔ́ mɛ bɔ mi ná yí ɔ́, mi ná nɔ xo ɖɛ dó mɛ jí ɖo Galizímu só jí, bó ná nɔ dó nu mɛ ɖo Ebalu só jí. Só énɛ́ lɛ́ɛ ɖo Judɛ́ɛn tɔ ɔ́ gúdo, ɖo ali e gbɔn gbadahwe jí ɔ́ gúdo, ɖo fí e Kanáanu lɛ́ɛ nɔ́ nɔ ɖo Judɛ́ɛn é. Só lɛ́ɛ ɖo zungbó ɖaxó Mɔlée tɔn kpá, bó kpan nukɔn Gilugalu. Mi ɖíe ɖo Judɛ́ɛn tɔ ɔ́ ná dó asá wɛ, bó ná byɔ́ to e na ná mi wɛ Mawu Mavɔmavɔ, Mawu mitɔn ɖe bɔ é ná nyí mitɔn ɔ́ mɛ e. Mi ná yí to ɔ́, bó ná nɔ mɛ. Mi bo ɖó ayi te, bó nyi sɛ́n Mawu Mavɔmavɔ tɔn lɛ́ɛ kpó gbetakɛ́n tɔn e un xa nú mi égbé din lɛ́ɛ bǐ kpó.” Mɔyízi ɖɔ: “Mi yi jɛ to e ná mi wɛ Mawu Mavɔmavɔ, Mawu e tɔ́gbó mitɔn lɛ́ɛ sɛn ɔ́ mɛ, bó yí ɔ́, sɛ́n kpó gbetakɛ́n kpó e mi ná nɔ́ se tónú ná bó ná nɔ́ bló ɖ'é jí lɛ́ɛ ɖíe: “Mi ná gba vodún xwé lɛ́ɛ bǐ hánnyá: vodún xwé e ɖo só jí lɛ́ɛ, ée ɖo kpó ta lɛ́ɛ, ée ɖo atínkan mɛ lɛ́ɛ, mi ná gba bǐ. Mi ná gba fí e akɔta e mi nya tɔ́n lɛ́ɛ nɔ́ sɛn nǔmɛsɛn yětɔn lɛ́ɛ ɖe lɛ́ɛ bǐ. Mi ná flí vɔ̌sákpe yětɔn lɛ́ɛ bǐ xwe, bó ná gba awǐnnya e yě tun te bó nɔ sɛn lɛ́ɛ bǐ, bó ná dó kpo e yě tun te bó nɔ́ sɛn lɛ́ɛ bǐ zo, bó ná gba bǒcyɔ yětɔn lɛ́ɛ bǐ. Mi ná sú nǔmɛsɛn yětɔn lɛ́ɛ sín kún dó, bɔ mɛ ɖé sɔ́ ná flín yě ǎ. Mi ma zán walɔ akɔta énɛ́ lɛ́ɛ tɔn ɖěbǔ dó sɛn Mawu Mavɔmavɔ, Mawu mitɔn ó. Lo ɔ́, fí e é ná sɔ́ ɖo akɔ mitɔn lɛ́ɛ sín ayǐkúngban jí, bó ná nɔ́ nɔ, bó ná nɔ́ ɖe susu tɔn xlɛ́ ɖe é kɛ́ɖɛ́ wɛ mi ná nɔ́ yi sɛn ɛ ɖe. Fínɛ́ wɛ mi ná hɛn vɔ̌ mitɔn lɛ́ɛ wá; é sixú nyí vɔ̌ e è nɔ dó zo é, é sixú nyí kɔnɖókpɔ́ vɔ́, é sixú nyí mǎɖówǒ jinukún mitɔn lɛ́ɛ tɔn, é sixú nyí nǔ e mi ɖésú ɖó jlǒ bó ná lɛ́ɛ, é sixú nyí nǔ e wá ayi mɛ nú mi bɔ mi ná lɛ́ɛ, abǐ éé mi ná dó ɖe akpá e mi dó é ná lɛ́ɛ, é sixú nyí nyibú mitɔn lɛ́ɛ, kpó gbɔ̌ mitɔn lɛ́ɛ kpó sín nukɔngbéví. Nǔɖuɖu e è nɔ xwlé Mawu Mavɔmavɔ, Mawu mitɔn ɔ́, nukɔn tɔn fínɛ́ wɛ mi kpó hɛ̌nnumɔ mitɔn lɛ́ɛ kpó ná ɖu éé nyí mitɔn ɔ́ ɖe; mi ná jɛ awa, ɖó nǔ e Mawu Mavɔmavɔ, Mawu mitɔn ná xo ɖɛ dó mi jí bɔ mi ná mɔ lɛ́ɛ wú. “Mi sɔ́ ná sɛn Mawu Mavɔmavɔ lě e mǐ ɖ'é wú gbɔn égbé din bɔ nǔɖé nyɔ́ mɛɖé nukún mɛ ɔ́, é nɔ́ bló é ǎ. Đó to e ná ná mi wɛ Mawu Mavɔmavɔ, Mawu mitɔn ɖe, bɔ é ná nyí mitɔn, bɔ mi ná vo ɖ'é mɛ ɔ́, mi ko yi to ɔ́ mɛ ǎ. Amɔ̌, mi ná dó asá Judɛ́ɛn tɔ ɔ́, bó ná yi nɔ to e ná mi wɛ Mawu Mavɔmavɔ ɖe é mɛ. É ná cyɔ́n alɔ mi jí, bɔ kɛntɔ́ mitɔn e lɛ́ lɛ̌ dó mi lɛ́ɛ ná kpé mi wú ǎ, bɔ ayi mitɔn ná j'ayǐ. Énɛ́ ɔ́ gúdo lo ɔ́, mi ná hɛn nǔ e xó un ɖɔ nú mi lɛ́ɛ bǐ wá fí e Mawu Mavɔmavɔ ná sɔ́, bó ná ɖe susu tɔn xlɛ́ ɖe é. Nǔ e xó un ko ɖɔ nú mi lɛ́ɛ wɛ; yě wɛ nyí: vɔ̌ e è nɔ dó zo lɛ́ɛ, kɔnɖókpɔ́ vɔ́ lɛ́ɛ, mǎɖówǒ jinukún lɛ́ɛ tɔn, nǔ e mi ɖésú jló bó ná lɛ́ɛ, kpó nǔ e sín akpá mi dó bó ná ná Mawu Mavɔmavɔ lɛ́ɛ kpó. Xomɛ ná hun mi kpó vǐ mitɔn lɛ́ɛ kpó, mɛsɛntɔ́ mitɔn súnnu kpó nyɔ̌nu kpó, ɖo Mawu Mavɔmavɔ nukɔn fínɛ́. Xomɛ ná hun Levíi ví e ɖo toxo mitɔn mɛ lɛ́ɛ, xomɛ ná hun yě có yě ɖǒ ayǐkúngban ɖě ǎ. “Mi cɔ́ miɖée; mi ma mɔ fí ɖé kpowun bó nɔ́ sá vɔ̌ ɖe ó. Fí ɖokpó wɛ mi ná nɔ́ sá vɔ̌ ɖe; fí e Mawu Mavɔmavɔ ná sɔ́ ɖo akɔta mitɔn lɛ́ɛ ɖokpó sín ayǐkúngban jí ɔ́ kɛ́ɖɛ́ wɛ mi ná nɔ́ sá vɔ̌ lɛ́ɛ ɖe. Fínɛ́ wɛ mi ná bló nǔ e un ɖɔ nú mi lɛ́ɛ bǐ ɖe. Nǔ ɖo mɔ̌ có, é jló mi hweɖěbǔnu ɔ́, mi ná wlí kanlin e jló mi é ɖokpó, bó ná hu bó ɖu ɖo toxo mitɔn mitɔn mɛ; mi sixú ɖo mǐmɛ́ jí, mi ka sixú gɔn mǐmɛ́ jí má nɔ. Mi ná ɖu lan ɔ́ agbanlín abǐ hwǐn lan wɛ ɖɔhun. Lě e Mawu Mavɔmavɔ, Mawu mitɔn ná dó dɔkun nú mɛ ɖokpó ɖokpó gbɔn é wɛ mi ná kpɔ́n. Nǔ ɖokpó ká tíin, mi ná ɖu kanlin ɔ́ sín hun ǎ, mi ná zé kɔn nyi kɔ́ mɛ sin ɖɔhun. “Nǔ e nyí Mawu tɔn bɔ mi ɖó ná ná ɛ lɛ́ɛ ɔ́, mi ma sɔ́ ɖó xwé gbe bó ɖu ó; yě wɛ nyí: mǎɖówǒ blěe mitɔn tɔn, mǎɖówǒ vɛ̌ɛn mitɔn tɔn, mǎɖówǒ ami mitɔn tɔn, nukɔngbéví nyibú mitɔn lɛ́ɛ tɔn, kpó gbɔ̌ mitɔn lɛ́ɛ tɔn kpó; nǔ e mi ɖésú jló bó ná lɛ́ɛ, kpó nǔ e mi ná dó ɖe akpá e mi dó nú Mawu Mavɔmavɔ lɛ́ɛ ná é kpó. Mawu Mavɔmavɔ, Mawu mitɔn xwé jɛ́n mi kpó vǐ mitɔn súnnu kpó nyɔ̌nu kpó, mɛsɛntɔ́ mitɔn súnnu kpó nyɔ̌nu kpó kpódó Levíi ví e ɖo toxo mitɔn lɛ́ɛ mɛ lɛ́ɛ kpó ná ɖu nǔ énɛ́ lɛ́ɛ ɖe, ɖo Mawu Mavɔmavɔ nukɔn. Nǔ e ɖo mi sí lɛ́ɛ bǐ ná dó xomɛhunhun nú mi. Ényí mi kpo ɖo gbɛ ɖo to mitɔn mɛ jɛ́n wɛ hǔn, mi ma dó vɛ̌ nú Levíi ví lɛ́ɛ gbeɖé ó. “Hwenu e Mawu Mavɔmavɔ, Mawu mitɔn ná gbló ada nú dogbó mitɔn lɛ́ɛ lě e é ɖɔ gbɔn nú mi ɔ́, ényí lan jló mi hwenɛ́nu ɔ́, mi ná ɖu lě e é jló mi gbɔn é. É ká nyí fí e mi ɖe ɔ́ lín dó fí e Mawu Mavɔmavɔ, Mawu mitɔn ná sɔ́, bó ná ɖe susu tɔn xlɛ́ ɖe ɔ́, mi sixú kpɔ́n nyibú mitɔn lɛ́ɛ, abǐ gbɔ̌ mitɔn lɛ́ɛ e Mawu Mavɔmavɔ ná mi é mɛ, bó hu kanlin ɖokpó, lobo ɖu lan tɔn lě e é jló mi gbɔn é. Mi ká bló lě e un ɖɔ gbɔn nú mi é. Mi ɖo mǐmɛ́ jí oo, mi ma ɖo mǐmɛ́ jí oo, mi hɛn ɔ́, mi ná ɖu lan ɔ́ agbanlín abǐ hwǐn lan wɛ ɖɔhun. Amɔ̌, nǔ e ɖ'é mɛ ɔ́, mi ma ɖu hun ɔ́ gbeɖé ó, ɖó hun ɔ́ mɛ wɛ gbɛ ɖe. Mi ma ɖu lan ɔ́ kpó gbɛ ɔ́ kpó ó. Lo ɔ́, mi ná kɔn hun ɔ́ nyi kɔ́ mɛ sin ɖɔhun. Mi wa nǔ gbɔn mɔ̌ ɔ́, mi kpó vǐ mitɔn lɛ́ɛ kpó ná mɔ nyɔ̌ná, ɖó mi wa nǔ e nyɔ́ Mawu Mavɔmavɔ nukún mɛ é. “Amɔ̌, kanlin e mi sɔ́ ɖó vo nú Mawu Mavɔmavɔ lɛ́ɛ abǐ kanlin e mi sɔ́ bó ná dó ɖe akpá e mi dó lɛ́ɛ ná ɔ́, kanlin énɛ́ lɛ́ɛ ɔ́, mi ná hɛn wá fí e Mawu Mavɔmavɔ na sɔ́ bó ná ɖe susu tɔn xlɛ́ ɖe é. Ényí vɔ̌ e è nɔ dó zo ɔ́ wɛ ɔ́, lan ɔ́ kpó hun tɔn kpó bǐ wɛ ná yi vɔ̌sákpe Mawu Mavɔmavɔ, Mawu mitɔn tɔn jí. É ká nyí kɔnɖókpɔ́ vɔ́ wɛ ɔ́, mi ná kɔn hun ɔ́ dó vɔ̌sákpe ɔ́ jí bó ná ɖu lan ɔ́. “Mi ɖó ayi te bó bló nǔ e ɖɔ nú mi wɛ un ɖe lɛ́ɛ; énɛ́ ɔ́, nǔ ná nyɔ́ nú mi kpó vǐ mitɔn lɛ́ɛ kpó hwebǐnu, ɖó mi wa nǔ e nyɔ́ bó sɔgbe Mawu Mavɔmavɔ, Mawu mitɔn nukún mɛ é.” Mawu Mavɔmavɔ, Mawu mitɔn ná vívá kún nú akɔta e ɖo to e mɛ ná byɔ́ wɛ mi ɖe lɛ́ɛ bǐ ɖo nukɔn mitɔn, bɔ mi ná bɛ́ nǔ yětɔn lɛ́ɛ bǐ, bó ná nɔ to yětɔn mɛ. Ée Mawu Mavɔmavɔ ka ná vívá kún yětɔn ɖo nukɔn mitɔn ɔ́, mi cɔ́ miɖée, bó má wa nǔ yě ɖɔhun, bó sɔ́ mɔ ó. Mi ma ɖó kɔ nǔmɛsɛn yětɔn lɛ́ɛ wú ó, mi ma ɖo do ba nú lě e yě nɔ́ sɛn vodún yětɔn gbɔn ɔ́ wɛ, lobo jɛ walɔ yětɔn lɛ́ɛ zán jí ó. Mi ma zé walɔ yětɔn dó sɛn Mawu Mavɔmavɔ, Mawu mitɔn ná ó, ɖó akɔta énɛ́ lɛ́ɛ nɔ ɖo nǔ e Mawu Mavɔmavɔ gbɛ́ wǎn ná, bɔ é nyí nǔvɛ́mɔ n'i lɛ́ɛ kɛ́ɖɛ́ bló nú vodún yětɔn lɛ́ɛ wɛ káká bó nɔ́ dó vǐ yětɔn súnnu zo, bó nɔ́ dó, vǐ yětɔn nyɔ̌nu zo nú vodún yětɔn lɛ́ɛ. Mi bo ɖó ayi te, bó bló nǔ e ɖɔ nú mi wɛ un ɖe égbé din lɛ́ɛ bǐ; mi ma dó ɖě jí ó, mi ma ka ɖe ɖě kpo ó. Ayǐ ɖokpó sixú wá hɔ́n, bɔ gbeyíɖɔ ɖé abǐ amɔɛkantɔ́ ɖé ná ɖo mi mɛ, bó ná ɖɔ nú mi ɖɔ nǔjlɛ́jlɛ́ abǐ nǔdábaɖa ɖaxó ɖokpó ná jɛ. Ényí nǔjíjlɛ́ abǐ nǔdábaɖa e xó é ɖɔ ɔ́ jɛ nǔgbó, bónú é wá ɖɔ nú mi ɖɔ mi wá mǐ ná xwedó nǔ ɖěvo bó sɛn nǔ e mi ma tunwun ǎ lɛ́ɛ hǔn, mi ma yí gbe nú xó tɔn ó; lo ɔ́, mi ní tunwun ɖɔ Mawu Mavɔmavɔ, Mawu mitɔn wɛ ɖo mi dókpɔ́n wɛ mɔ̌, bó ná kpɔ́n ɖɔ mi ka yí wǎn nú émí kpó ayi mitɔn bǐ kpó, kpó lǐndɔ̌n mitɔn bǐ kpó a jí. Mi ma xwedó nǔ ɖěvo zɛ Mawu Mavɔmavɔ, Mawu mitɔn wú ó; mi ní ɖó sísí n'i, bó ylɔ́ sɛ́n tɔn lɛ́ɛ ɖɔ nǔ, bó se tónú n'i, bó sɛn é ɖokpónɔ géé bó tɛ́ dó wǔ tɔn. Gbeyíɖɔ abǐ amɔɛkantɔ́ mɔ̌hunkɔtɔn ɔ́, hu wɛ è nǎ hu i, ɖó é kplɔ́n nǔ mi ɖɔ mi ní lɛ́ kɔ sín Mawu Mavɔmavɔ, Mawu mitɔn e yí mi sín mɛ kannu, bó ɖe mi tɔ́n sín Ejípu ɔ́ gúdo. È nǎ hu i, ɖó é jló ná ɖe mi sín ali e Mawu Mavɔmavɔ, Mawu mitɔn ɖɔ mi ní gbɔn é jí. Lě e mi ná ɖe nǔ nyanya sín tɛ́ntin mitɔn gbɔn é nɛ́. Ayǐ ɖokpó sixú wá hɔ́n, bɔ mɛɖé ná ɖo mi mɛ bɔ nɔví tɔn nɔ tɔn xomɛ ví, abǐ vǐ tɔn súnnu abǐ nyɔ̌nu, abǐ asi tɔn ɖésú, abǐ xɔ́ntɔn tɔn vívɛ́ ɖé ná gbɔn nǔglɔ́, bó ná ɖɔ n'i ɖɔ: “Wǎ mǐ yi sɛn nǔ ɖěvo.” È ka na ɖɔ ɔ́, nǔmɛsɛn énɛ́ lɛ́ɛ ɔ́, tɔ́gbó mitɔn lɛ́ɛ tunwun ǎ, mi lɔmɔ̌ ká tunwun ǎ. Nǔmɛsɛn énɛ́ lɛ́ɛ wɛ akɔta e lɛ́ lɛ̌ dó mi lɛ́ɛ bǐ nɔ́ sɛn; yě wɛ akɔta e sɛkpɔ́ mi lɛ́ɛ kpó éé ɖo zɔ nú mi lɛ́ɛ kpó, abǐ éé ɖo gbɛ ɔ́ mɛ lɛ́ɛ bǐ nɔ́ sɛn. Mi ma yí gbe nú mɛ mɔ̌hunkɔtɔn ó; mi ma ɖótó e vɔ́vɔ́ ó. Mɛ e hu hwɛ mɔ̌hunkɔtɔn ɔ́, è nǎ kú nǔbláwǔ n'i kpɛví títí ɖé ǎ; è nǎ nɔ jǐ tɔn ǎ; hu wɛ è ɖǒ ná hu i dandan. Hwi mɛ e é jló ná dɔn dó hwɛ mɛ ɔ́ wɛ ná nyi awǐnnyaglo dó e dó nukɔn, bɔ togun ɔ́ bǐ ná zɔn jǐ tɔn bó hu. Mawu Mavɔmavɔ ɖe mi tɔ́n sín Ejípu. Mɛ e ná ɖɔ émí ná lɛ́ kɔ nú mi sín gǔdo tɔn ɔ́, awǐnnyaglo wɛ è nǎ nyi dó mɛ mɔ̌hun káká bɔ é ná kú. Énɛ́ ɔ́, Izlayɛ́linu lɛ́ɛ bǐ ná se nǔ e jɛ é, bɔ xɛsi ná ɖi yě, bɔ yě sɔ́ ná hu hwɛ mɔ̌hun gbeɖé ǎ. Ayǐ ɖokpó sixú wá hɔ́n, bɔ mi ná se, bɔ è nǎ ɖɔ dó toxo e Mawu Mavɔmavɔ, Mawu mitɔn ná ná mi bɔ mi ná nɔ mɛ lɛ́ɛ ɖokpó wú ɖɔ: Gbɛtɔ́ nǔvɔ́nɔ ɖé lɛ́ɛ sí te ɖo togun mitɔn mɛ, bó dɔn mɛ e ɖo toxo énɛ́ mɛ lɛ́ɛ ɖɔ: “Mi wá mǐ yi sɛn nǔ ɖěvo.” È ka na ɖɔ ɔ́, mi tunwun nǔmɛsɛn énɛ́ lɛ́ɛ ǎ. Mi ná yi ba do ná, bó ná kan nǔ byɔ́, bó ná gbéjé kpɔ́n, bó ná mɔ nǔ jɛ wú céɖécéɖé; nú mi mɔ nǔgbó ɖɔ nǔ baɖabaɖa mɔ̌hun jɛ ɖo Izlayɛ́li hǔn, mi hu mɛ e ɖo toxo ɔ́ mɛ lɛ́ɛ bǐ, bó hu kanlin yětɔn lɛ́ɛ bǐ. Mi bló mɔ̌ ɔ́, mi ná gba toxo ɔ́ bǐ, bó ná hɛn nǔ e ɖ'é mɛ lɛ́ɛ bǐ gblé. Mi ná kplé dɔkun e ɖo toxo énɛ́ ɔ́ mɛ lɛ́ɛ bǐ ɖó tokplétɛn, bó ná flɔ́ myɔ d'é mɛ, bó ná dó toxo ɔ́ zo. É ná cí vɔ̌ e mi nɔ dó zo nú Mawu Mavɔmavɔ, Mawu mitɔn, lobo nɔ dó sɔ́ ɛ su ɔ́ ɖɔhun. Asangokan jɛ́n ná vun blá toxo énɛ́; è sɔ́ ná bló toxo énɛ́ ɔ́ ɖó gbeɖé ǎ. Mi ma zé nǔ ɖěbǔ ɖo nǔ e ná hɛn gblé wɛ è ɖe lɛ́ɛ mɛ ó; énɛ́ ɔ́, xomɛsin ɖaxó e jí Mawu Mavɔmavɔ, Mawu mitɔn ɖe ɔ́ ná fá, bɔ é ná ɖe xomɛnyínyɔ́ tɔn xlɛ́ mi, bó ná bló bɔ mi ná ji gba, lě e é kó dó akpá tɔn nú tɔ́gbó mitɔn lɛ́ɛ gbɔn é. Ényí mi se tónú n'i, bó nyi sɛ́n tɔn e xa nú mi wɛ un ɖe égbé lɛ́ɛ, bó wa nǔ e nyɔ́ nukún tɔn mɛ lɛ́ɛ ɔ́, é ná bló nǔ énɛ́ lɛ́ɛ bǐ nú mi. Mɔyízi ɖɔ: Vǐ wɛ mi nyí nú Mawu Mavɔmavɔ, Mawu mitɔn. Énɛ́ wú ɔ́, nú cyɔ kú mi hǔn, mi ma já wǔtu mitɔn ó, mi ma xwlɛ́ ɖa ɖo nukɔn ó. Đó togun ɖé wɛ mi nyí, bó ɖo vo nú Mawu Mavɔmavɔ, Mawu mitɔn. Mi wɛ é sɔ́ ɖo togun e ɖo ayǐkúngban ɔ́ jí lɛ́ɛ bǐ mɛ, bɔ mi vɛ́ n'i hú nǔ bǐ. Mi ɖó ná ɖu nǔ e Mawu Mavɔmavɔ mɔ dó mɔ nǔblíblí é ɖěbǔ ǎ. Kanlin e mi ná ɖu lɛ́ɛ sín nyǐkɔ ɖíe: nyibú, gbɔ̌, lɛ̌ngbɔ́, hwǐn, tɛ́, lǎ, sógbɔ́, lɛ̌ngbɔ́ gbě tɔn, agbanlín, zungbɔ́, kpódó kanlin ɖěvo e sín afɔkpa zɛ, bɔ yě nɔ́ tún nǔ ɖu lɛ́ɛ kpó. É ká nyí kanlin e sín afɔkpa zɛ, abǐ kanlin e nɔ tún nǔ ɖu lɛ́ɛ bǐ wɛ mi ná ɖu ǎ; kanlin e mi ná zé dó mɔ nǔblíblí lɛ́ɛ ɖíe: lǎkúnmí, azwi, azwijɔmɔ, kanlin énɛ́ lɛ́ɛ nɔ́ tún nǔ ɖu, lo ɔ́, yě ɖó afɔkpa ǎ. Mɔ̌ ɖokpó ɔ́, mi ná ɖu aglǔza ǎ, ɖó afɔkpa tɔn zɛ, éyɛ́ ká nɔ́ tún nǔ ɖu ǎ. Mi ma ɖu kanlin énɛ́ lɛ́ɛ ɖěbǔ ó; mi ma ɖ'alɔ kúkú yětɔn wú lɔ vɔ́vɔ́ ó. Kanlin e ɖo tɔ mɛ lɛ́ɛ mɛ ɔ́, mi hɛn ɔ́, mi ná ɖu éé ɖó kɛn bó ɖó zǎ lɛ́ɛ. Mi ɖó ná ɖu éé má ɖó kɛn ǎ lɛ́ɛ é ǎ, mi ɖó ná ɖu éé má ɖó zǎ ǎ lɛ́ɛ é ǎ; mi mɔ yě dó mɔ nǔblíblí. Mi hɛn ɔ́, mi ná ɖu xɛ e nyí xɛ mímɛ́ lɛ́ɛ. Xɛ e ka vɛ́ mi lɛ́ɛ sín nyǐkɔ ɖíe: hɔ̌n, gangan, hɔ̌n xu mɛ tɔn, gɛ̌nkpákpɛ, aklasú, lanɖuxɛ alɔkpa alɔkpa lɛ́ɛ bǐ, avǔnsákɔwó, gowungo, klolwe, aɖɔwé xu mɛ tɔn, gɛ̌n alɔkpa alɔkpa lɛ́ɛ, agbigbi, sɔ́wáyi, klolwe zonɔ, avǔnsákɔwó kpɛví kpɛví, lanɖuxɛ, avǔnsákɔwó xu mɛ tɔn, Tɔxɛ, aɖɔwé alɔkpa alɔkpa lɛ́ɛ, ahlǐnhǎn, afluiflui. Mi mɔ nǔvínúví e ɖó awa lɛ́ɛ bǐ dó mɔ nǔblíblí; è ɖǒ ná ɖu ǎ. Amɔ̌, mi hɛn ɔ́, mi ná ɖu nǔvínúví e nyí nǔvínúví mímɛ́ lɛ́ɛ bǐ. Mi ma ɖu kanlin kúkú ó; mi ná jǒnɔ e ɖo to mitɔn mɛ lɛ́ɛ, abǐ mi sa nú mɛ e ɖo to mitɔn mɛ gbɔn dín wɛ lɛ́ɛ. Đó midɛɛ lɛ́ɛ ɔ́, togun Mawu Mavɔmavɔ, Mawu mitɔn tɔn wɛ mi nyí, bó ɖe nú é ɖokpónɔ géé. Mi ma ɖa gbɔ̌ví ɖo nɔ tɔn sín anɔ̌sin mɛ ó. Mi ná nɔ́ ɖe nǔ e nyɔ́ ɖo gle mitɔn mɛ lɛ́ɛ bǐ sín mǎɖówǒ xwewú xwewú tɛgbɛ. Énɛ́ ɔ́ gúdo ɔ́, mi ná bɛ́ nǔ énɛ́ lɛ́ɛ yi Mawu Mavɔmavɔ, Mawu mitɔn sín xwé gbe, fí e é ná sɔ́, bó ná nɔ ɖe susu tɔn xlɛ́ ɖe ɔ́; fínɛ́ ɖokpó ɔ́ wɛ mi ná nɔ ɖu nǔ mitɔn lɛ́ɛ kpó vɛ̌ɛn mitɔn kpó ami kpó sín mǎɖówǒ ɖe; fínɛ́ ɖokpó ɔ́ wɛ mi ná nɔ ɖu nyibú mitɔn lɛ́ɛ kpó gbɔ̌ mitɔn lɛ́ɛ kpó, kpó lɛ̌ngbɔ́ mitɔn lɛ́ɛ kpó sín nukɔngbéví ɖe. Lě e mi ná nɔ́ ɖó sísí nú Mawu Mavɔmavɔ, Mawu mitɔn gbɔn káká sɔ́yi é nɛ́. Ée Mawu Mavɔmavɔ, Mawu mitɔn ná dó dɔkun nú mi, bɔ ji na jɛ nú mi bó túnflá ɔ́, afɔ nyɔ́ ɔ́, mi ná sixú bɛ́ mǎɖówǒ mitɔn lɛ́ɛ bǐ wá fí e Mawu Mavɔmavɔ ná sɔ́, bó ná ɖe susu tɔn xlɛ́ ɖe ɔ́ ǎ, ɖó ali ɔ́ sixú ɖi ga. Ényí nǔ cí mɔ̌ ɔ́, mi ná sa mǎɖówǒ mitɔn lɛ́ɛ, bó ná zé akwɛ́ ɔ́ wá Mawu Mavɔmavɔ, Mawu mitɔn xwé gbe. Mi wá fínɛ́ lo ɔ́, mi ná zé akwɛ́ ɔ́ dó xɔ nǔ e jló mi é ná; mi ná xɔ nyibú, gbɔ̌ abǐ lɛ̌ngbɔ́, vɛ̌ɛn abǐ ahan syɛ́nsyɛ́n ɖěvo lɛ́ɛ, bɔ mi kpó mɛ mitɔn lɛ́ɛ kpó ná ɖu kpó xomɛhunhun kpó ɖo Mawu Mavɔmavɔ nukɔn. Mi ma wɔn Levíi ví e ná ɖo toxo mitɔn lɛ́ɛ mɛ lɛ́ɛ, hwe énɛ́ lɛ́ɛ nu ó; ɖó yě ɖó ayǐkúngban ɖěbǔ ɖo tɛ́ntin mitɔn ǎ. Xwe atɔn mɛ tɛgbɛ ɔ́, mi ná ɖe mǎɖówǒ xwe e mɛ mi ɖe ɔ́ tɔn, bó ná kplé ɖó toxo mitɔn lɛ́ɛ mɛ. Énɛ́ ɔ́, Levíi ví lɛ́ɛ ná nɔ wá ba nǔ e yě ná ɖu lɛ́ɛ ɖo fínɛ́. Đó yědɛɛ lɛ́ɛ ɖó ayǐkúngban ɖě ɖo mi tɛ́ntin ǎ. Mɔ̌ ɖokpó ɔ́, jǒnɔ lɛ́ɛ kpó tɔ́cyɔvǐ lɛ́ɛ kpó asúkúsi lɛ́ɛ kpó lɔmɔ̌ ná mɔ nǔɖuɖu yě lɔmɔ̌ tɔn ɖo fínɛ́. Yě bǐ ná mɔ nǔ bó ɖu bó gɔ́ xo. Énɛ́ ɔ́, Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí. Xwe tɛ́nwe mɛ tɛ́nwe mɛ tɛgbɛ ɔ́, mi ná nɔ́ zé axɔ́ kɛ mɛ e ɖu axɔ́ dó mi lɛ́ɛ bǐ. Lě e è ka ɖó ná nyi sɛ́n énɛ́ ɔ́ gbɔn é ɖíe: ée xwe e xwe è nǎ sɔ́ axɔ́ kɛ mɛ e ɖu axɔ́ ɔ́ dó sɔ́ Mawu Mavɔmavɔ su ɔ́ ná wá, bɔ è nǎ ɖɔ ɔ́, axɔ́tɔ́nɔ lɛ́ɛ bǐ ɖǒ ná sɔ́ axɔ́ kɛ nɔzo yětɔn e ɖu axɔ́ dó yě lɛ́ɛ; yě ká ɖó ná dó cɔcɔ nú yě ɖɔ yě ɖǒ ná sú axɔ́ émí cóbɔ hwe ɔ́ nu ná su ǎ. Mi sixú dó cɔcɔ nú to ɖěvo mɛ nu e ɖu axɔ́ dó mi é ɖɔ é ní sú axɔ́ émítɔn émí; amɔ̌, mi ná sɔ́ axɔ́ e mɛ e nyí to mitɔn mɛ nu é ɖu dó mi é kɛ ɛ. È ɖɔ è nǎ wa nǔ gbɔn mɔ̌ có wamamɔnɔ ɖěbǔ ká ná nɔ mi mɛ ǎ, ɖó Mawu Mavɔmavɔ, Mawu mitɔn ná ná dɔkun bǐ mi ɖo to e na ná mi wɛ é ɖe bɔ é ná nyí mitɔn ɔ́ mɛ. Mi vɛ́ ko ɖo tónú se n'i wɛ, bó ɖo sɛ́n tɔn e xa nú mi wɛ un ɖe égbé lɛ́ɛ nyi wɛ ganjí ɔ́, é ná dó dɔkun nú mi. Ée Mawu Mavɔmavɔ, Mawu mitɔn ná dó dɔkun nú mi lě e é ɖɔ gbɔn ɔ́, mɛ ɖěbǔ ná ɖo mi mɛ bó ná nya akwɛ́ ǎ; é nyɔ́ wa ɔ́, mi wɛ ná nɔ́ yí nǔ ɖó gbanu dó nya nǔ nú to ɖěvo mɛ nu gěgé. Mi ná hú gǎn akɔta gěgé; yě mɛ ɖě ká ná hú gǎn mi ǎ. É ká nyí wamamɔnɔ ɖé wá tɔ́n ɖo mi mɛ vlafo, ɖo to e Mawu Mavɔmavɔ na ná mi é mɛ ɔ́, mi ma syɛ́n nukún, bó syɛ́n fɛn, bó gɔn nǔ nya n'i ó. É nyɔ́ wa ɔ́, mi ná hun alɔ bó ná ɛ nǔ e ba wɛ é ɖe ɔ́. Amɔ̌, mi cɔ́ miɖée! Mi ma nú linlin nyanya byɔ́ ayi mitɔn mɛ, bónú mi ɖɔ nú miɖée ɖɔ xwe tɛ́nwegɔ́ e mɛ è nɔ zé axɔ́ kɛ mɛ é kó ja, bónú é sín énɛ́ wú, bɔ mi ná syɛ́n nukún, bó tɛ nǔ e ba wɛ nɔzo mitɔn e ɖo ya ji wɛ ɔ́ ɖe ɔ́ ó. É táá wá jɛ hwɛ mitɔn nú Mawu Mavɔmavɔ, bɔ mi ná nyí nǔwanyidotɔ́. Mi nya nǔ n'i; mi nya n'i kpó xomɛ ɖagbe kpó. Mawu Mavɔmavɔ, Mawu mitɔn ná kpɔ́n dó xomɛnyínyɔ́ mitɔn énɛ́ ɔ́ wú, bó ná dó acɛ nǔ e mi ná wa lɛ́ɛ bǐ jí. Wamamɔnɔ ná hán ɖo to mitɔn mɛ gbeɖé ǎ wútu wɛ un ɖɔ nú mi ɖɔ mi ní nyɔ́ xomɛ dó nɔzo mitɔn wamamɔnɔ gbɛ̌dónánɔ lɛ́ɛ wú. Ényí nɔví mitɔn Eblée ɖé wá sɔ́ éɖée sa kannumɔ ɖɔhun ɔ́, é ná sɛn mi nú xwe ayizɛ́n; é sixú nyí súnnu, é sixú nyí nyɔ̌nu. Amɔ̌, mi byɔ́ xwe tɛ́nwegɔ́ ɔ́ mɛ ɔ́, mi ná jó e dó bɔ é ná jɛ éɖée sí. Mi ka ná jó e dó bɔ é ná yi asígbá alɔgbá ǎ. Nyibú, gbɔ̌, lɛ̌ngbɔ́, jinukún kpó vɛ̌ɛn kpó e Mawu Mavɔmavɔ hun alɔ bó ná mi lɛ́ɛ ɔ́, mi ɖó na ná ɖě yě. Mi flín ɖɔ kannumɔ wɛ émí lɔmɔ̌ ko nyí ɖo Ejípu, bɔ Mawu Mavɔmavɔ, Mawu mitɔn ɖe mi tɔ́n. Énɛ́ ɔ́ wú wɛ un ɖo sɛ́n énɛ́ xa nú mi wɛ égbé. Ényí kannumɔ ɖé ká ɖɔ émí kún jló ná jó mi dó ó, ɖɔ émí yí wǎn nú mi kpó mɛ mitɔn lɛ́ɛ kpó, ɖɔ émí mɔ vivo ɖo gɔ̌n mitɔn ɔ́, mi ná zé swe bó ná tɔ́n tó n'i dó hɔn wú, bɔ é ná húzú kannumɔ mitɔn káká yi. É ná bó nyí kannumɔ nyɔ̌nu hǔn, mi bló mɔ̌ n'i. Mi jó kannumɔ ɖé hǔn, é ní má nɔ́ vɛ́ nú mi ó, ɖó azɔ̌ e é wa nú mi nú xwe ayizɛ́n ɔ́ kó yi azɔ̌ e mɛ e ná yí akwɛ́ ɔ́ ná wa ɔ́ donu we. Mi jó e nú é yi bónú Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí. Vǐ nukɔntɔn e nyibú mitɔn lɛ́ɛ, gbɔ̌ mitɔn lɛ́ɛ, lɛ̌ngbɔ́ mitɔn lɛ́ɛ ná ji bɔ é ná nyí asú lɛ́ɛ ɔ́, mi ná zé yě ɖó vo nú Mawu Mavɔmavɔ, Mawu mitɔn. Mi ma zé nyibúsú nukɔntɔn lɛ́ɛ dó wa azɔ̌ ná ó, mi ma kpa fún nú nukɔngbéví lɛ̌ngbɔ́ lɛ́ɛ tɔn ó. Xwewú xwewú tɛgbɛ ɔ́, mi kpó mɛ mitɔn lɛ́ɛ kpó ná nɔ́ kplé bó ná nɔ́ ɖu kanlin énɛ́ lɛ́ɛ ɖo fí e Mawu Mavɔmavɔ, Mawu mitɔn ná sɔ́ é. Ényí kanlin lɛ́ɛ ɖě ɖó blɔ̌: gǒ wɛ é lɔ́ a, nukún wɛ é tɔ́n a, abǐ blɔ̌ baɖabaɖa ɖěbǔ wɛ é ɖó hǔn, mi ma zé dó sá vɔ̌ ná nú Mawu Mavɔmavɔ, Mawu mitɔn ó. Mi ɖo mǐmɛ́ jí oo, mi ma ɖo mǐmɛ́ jí oo, mi hɛn ɔ́, mi ná ɖu lan ɔ́ agbanlín abǐ hwǐn lan wɛ ɖɔhun, ɖo xwé mitɔn lɛ́ɛ gbe. Lo ɔ́, mi ma ɖu hun ɔ́ ó; mi ná kɔn nyi kɔ́ mɛ sin ɖɔhun. Mi ɖu Dǐndínwáyixwe ɔ́ ɖo Abibu sun ɔ́ mɛ, bó dó zé Mawu Mavɔmavɔ, Mawu mitɔn su, ɖó sun énɛ́ ɔ́ mɛ wɛ Mawu Mavɔmavɔ ɖe mi tɔ́n sín Ejípu zǎn mɛ. Kanlin e mi ná hu dó ɖu Dǐndínwáyixwe ɔ́ nú Mawu Mavɔmavɔ, Mawu mitɔn ɔ́, mi ná zé ɖo nyibú mitɔn lɛ́ɛ mɛ, gbɔ̌ mitɔn lɛ́ɛ mɛ. Mi ná hu kanlin ɔ́ ɖo tɛn e Mawu Mavɔmavɔ ná sɔ́, bó ná ɖe susu tɔn xlɛ́ ɖe ɔ́ mɛ. Mi ná ɖu wɔ̌xúxú e mɛ è dǒ tɔ́n ɔ́ xwe ɔ́ hwenu ǎ. Lo ɔ́, wɔ̌xúxú e mɛ è ma dó tɔ́n ǎ é wɛ mi ná ɖu káká nú azǎn tɛ́nwe. Énɛ́ xlɛ́ ɖɔ kpitikpiti wɛ mi tɔ́n sín Ejípu. Mi ɖo wamamɔnɔ wɔ̌xúxú énɛ́ ɖu wɛ ɔ́, é ná nɔ́ flín azǎn e gbe mi tɔ́n sín Ejípu é mi, bɔ mi ná wɔn gbeɖé ǎ. È nǎ mɔ tɔ́n ɖěbǔ ɖo xwé mitɔn gbe azǎn tɛ́nwe énɛ́ lɛ́ɛ mɛ ǎ; è ka ná mɔ ɖo to mitɔn mɛ ǎ. Ayǐ ká ná hɔ́n dó kanlin e mi hu ɔ́ sín lan xwe ɔ́ sín azǎn nukɔntɔn ɔ́ gbe ǎ. Mi ná ɖu Dǐndínwáyixwe ɔ́ ɖo toxo e Mawu Mavɔmavɔ, Mawu mitɔn ná ná mi lɛ́ɛ ɔ́ ɖě mɛ kpowun ǎ. Toxo e mɛ Mawu Mavɔmavɔ, Mawu mitɔn ná sɔ́ tɛn ɖe bó ná ɖe susu tɔn xlɛ́ ɖe ɔ́ mɛ kɛ́ɖɛ́ jɛ́n mi ná ɖu xwe ɔ́ ɖe. Gan e mɛ mi tɔ́n sín Ejípu ɔ́ mɛ wɛ mi ná sá vɔ̌ ɔ́; hǔn gbadanu, hwe ɖo xɔ yi wɛ ɔ́ wɛ mi ná hu kanlin ɔ́. Mi ná ɖa lan ɔ́ ɖo tɛn e mɛ Mawu Mavɔmavɔ, Mawu mitɔn ná sɔ́ ɔ́ mɛ, lobo ná ɖu. Ayǐ hɔ́n ɔ́, mi ná lɛ́ kɔ yi xwé mitɔn lɛ́ɛ gbe. Mi ná ɖu wɔ̌xúxú e mɛ è ma dó tɔ́n ǎ é káká nú azǎn ayizɛ́n. É jɛ azǎn tɛ́nwegɔ́ ɔ́ gbe ɔ́, mi ná ɖu xwe ɖaxó ɖokpó, bó ná zé Mawu Mavɔmavɔ, Mawu mitɔn su. Mi ná wa azɔ̌ ɖěbǔ gbe énɛ́ gbe ǎ. Mi ná xa aklúnɔzángbla tɛ́nwe, bɛ́ sín hwenu e mi jɛ jinukún mitɔn lɛ́ɛ ya jí ɔ́, lobo ná ɖu Pantekótuxwe ɔ́, bó ná dó zé Mawu Mavɔmavɔ, Mawu mitɔn su. Mi mɛ ɖokpó ɖokpó ná hɛn nǔníná e mi ɖó jlǒ bó ná ná é wá, lě e Mawu Mavɔmavɔ, Mawu mitɔn dó nú mi gbɔn é. Mi ná j'awǎ ɖo Mawu Mavɔmavɔ nukɔn, ɖo tɛn e é ná sɔ́ bó ná ɖe susu tɔn xlɛ́ ɖe ɔ́ mɛ. Mi kpó vǐ mitɔn súnnu kpó nyɔ̌nu kpó, mɛsɛntɔ́ mitɔn súnnu kpó nyɔ̌nu kpó, Levíi ví e ɖo mi mɛ lɛ́ɛ kpó jǒnɔ e ɖo mi mɛ lɛ́ɛ kpó, tɔ́cyɔvǐ lɛ́ɛ kpódó asúkúsi e ɖo mi mɛ lɛ́ɛ bǐ kpó ná j'awǎ. Mi flín ɖɔ émí kó nyí kannumɔ kpɔ́n ɖo Ejípu; énɛ́ wú ɔ́, mi ɖó ayi te bó nyi sɛ́n énɛ́ lɛ́ɛ. Ée mi ná fún jinukún lɛ́ɛ fó, bó ná fyɔ́n vǐwun fó ɔ́, mi ná ɖu Azavaxwe ɔ́ káká nú azǎn tɛ́nwe. Mi kpó vǐ mitɔn súnnu kpó nyɔ̌nu kpó, mɛsɛntɔ́ mitɔn súnnu kpó nyɔ̌nu kpó, Levíi ví e ɖo mi mɛ lɛ́ɛ kpó jǒnɔ e ɖo mi mɛ lɛ́ɛ kpó, tɔ́cyɔvǐ lɛ́ɛ kpódó asúkúsi e ɖo mi mɛ lɛ́ɛ bǐ kpó ná ɖu xwe ɔ́ kpó awǎjijɛ kpó. Ée Mawu Mavɔmavɔ ná bló bɔ gle mitɔn lɛ́ɛ ná nyɔ́, bɔ é ná dó acɛ nǔ e mi ná wa lɛ́ɛ bǐ jí é ɔ́, mi ná ɖo awǎ jɛ wɛ kpowun; mi ná ɖu xwe ɔ́ káká nú azǎn tɛ́nwe, bó ná dó zé Mawu Mavɔmavɔ, Mawu mitɔn su, ɖo tɛn e é ná sɔ́ ɔ́ mɛ. Hǔn xwewú xwewú ɔ́, súnnu e ɖo togun mitɔn mɛ lɛ́ɛ bǐ ná nɔ́ yi Mawu Mavɔmavɔ, Mawu mitɔn nukɔn azɔn atɔn ɖo tɛn e é ná sɔ́ é mɛ: yě ná nɔ́ yi Dǐndínwáyixwe ɔ́ hwenu, bó ná nɔ́ yi Pantekótuxwe ɔ́ hwenu, bó ná nɔ́ yi Azavaxwe ɔ́ hwenu. Yě ná zɔn asígbá alɔgbá yi Mawu Mavɔmavɔ nukɔn ǎ; lo ɔ́, mɛ ɖokpó ɖokpó ná kpɔ́n lě e Mawu Mavɔmavɔ, Mawu tɔn dó n'i gbɔn é, bó ná hɛn nǔníná e wú é kpé ɔ́ yi ná ɛ. Mi ná zé hwɛɖɔtɔ́ kpó hwɛgbotɔ́ kpó gbɔn akɔta ɖokpó ɖokpó mɛ ɖo toxo e Mawu Mavɔmavɔ, Mawu mitɔn ná ná mi lɛ́ɛ bǐ mɛ, bɔ yě ná nɔ́ ɖɔ hwɛ ɖó sɛ́nxwi jí ɖo togun ɔ́ mɛ. Mi ma táfú mɛ ɖo hwɛ nukɔn ó, mi ma kpɔ́n mɛ nukúnta dó ɖɔ hwɛ ó, mi ma yí nǔ ɖu bó dó hwɛ agɔ ó, ɖó nǔ ɖu ɖo nǔ mɛ nɔ́ tɔ́n nukún nǔnywɛ́tɔ́ lɛ́ɛ, bɔ mɛ e hwɛ tɔn nyɔ́ é nɔ́ kú hwɛ. Nǔ ɖokpó e ɖo tají ɔ́ wɛ nyí è nǐ ɖɔ hwɛ jlɔ́jlɔ́. Énɛ́ ɔ́, mi ná nɔ gbɛ, bó ná yí to e Mawu Mavɔmavɔ, Mawu mitɔn ná ná mi bɔ é ná nyí mitɔn ɔ́ mɛ. Mi ma tun kpo, abǐ bǒcyɔ ɖěbǔ ɖó vɔ̌sákpe e mi ná mɛ nú Mawu Mavɔmavɔ, Mawu mitɔn é kpá ó. Mi ma tun awǐnnya ɖěbǔ te bó sɛn ó, ɖó Mawu Mavɔmavɔ, Mawu mitɔn gbɛ́ wǎn nú walɔ mɔ̌hunkɔ lɛ́ɛ. Mi ma zé nyibú abǐ gbɔ̌ azinzɔnnɔ abǐ kanlin e ɖó blɔ̌ ɖo wǔ é ɖěbǔ dó sá vɔ̌ nú Mawu Mavɔmavɔ, Mawu mitɔn ó, ɖó walɔ mɔ̌hunkɔtɔn nɔ́ vɛ́ mɔ n'i. Ayǐ ɖokpó sixú wá hɔ́n ɖo toxo e Mawu Mavɔmavɔ, Mawu mitɔn ná ná mi lɛ́ɛ é ɖě mɛ, bɔ súnnu ɖé abǐ nyɔ̌nu ɖé sixú dó nǔ e Mavɔmavɔ gbɛ́ lɛ́ɛ ɖě sin bó gba akɔ e é jɛ xá mi é. É sixú nyí vodún to ɖěvo mɛ tɔn lɛ́ɛ ɖě wɛ é jɛ kpo bó ɖe kɔ́ ná, abǐ hwe, sun abǐ nǔɖíɖó jǐxwé tɔn lɛ́ɛ ɖě wɛ é jɛ kpo bó ɖe kɔ́ ná. Mawu Mavɔmavɔ ka ɖɔ mi ní jɛ kpo nú nǔ énɛ́ lɛ́ɛ gbeɖé kpɔ́n ǎ! Ényí mɛɖé dó nǔ mɔ̌hun sin bónú mi se hǔn, mi ba do ná céɖécéɖé. Nú mi mɔ nǔgbó ɖɔ nǔ baɖabaɖa mɔ̌hun jɛ ɖo Izlayɛ́li hǔn, mi dɔn mɛ e hu hwɛ mɔ̌hunkɔtɔn ɔ́ jɛ toxo ɔ́ sín hɔntogbó jí, lobo nyi awǐnnyaglo dó e káká nú é kú. Mɛ ɔ́ sixú nyí súnnu, é sixú nyí nyɔ̌nu. Cóbónú è nǎ ɖó kúhwɛ nú mɛɖé ɔ́, mɛ we abǐ mɛ atɔn wɛ ná ɖe kúnnu ɖɔ mɛ ɔ́ wa nǔ nyi do nǔgbó; mɛ ɖokpó géé sín kúnnuɖiɖe kpé ǎ. Kúnnuɖetɔ́ lɛ́ɛ wɛ ná nyi awǐnnyaglo dó e jɛ nukɔn, bɔ togun ɔ́ bǐ ná nyi awǐnnyaglo dó e, bó ná hu i. Lě e mi ná sú walɔ nyanya kún dó gbɔn, ɖo to mitɔn mɛ é nɛ́. Ényí hwɛ ɖé ɖe, bó gló hwɛɖɔxɔsá e ɖo toxo ɔ́ mɛ lɛ́ɛ ɔ́, mi ná dɔn yi tɛn e Mawu Mavɔmavɔ, Mawu mitɔn ná sɔ́ bó ná nɔ́ ɖe susu tɔn xlɛ́ ɖe ɔ́ mɛ: é sixú nyí mɛhuhu, wǔgblémɛ, nǔdindɔn alɔkpa ɖěbǔ sín hwɛ. Mi ná yi ɖó xó ɔ́ te nú Levíi ví vɔ̌sánú-xwlémawutɔ́ lɛ́ɛ kpódó hwɛɖɔtɔ́ e jí azɔ̌ ɖe ɖo Mawu xwé gbe hwenɛ́nu é kpó, bɔ yě ná kplé bó ná ɖɔ lě e è nǎ gbo xó ɔ́ gbɔn é. Lě e yě ná gbo hwɛ ɔ́ gbɔn ɖo fínɛ́ ɔ́ wɛ mi ná xwedó, bó ná bló nǔ e yě ɖɔ nú mi é pɛ́pɛ́pɛ́. Mi xwedó sɛ́n e yě ná dó nú mi lɛ́ɛ, bó bló nǔ e yě ná ɖɔ nú mi lɛ́ɛ é. Mi ma jó ɖěbǔ dó ó. Vɔ̌sánú-xwlémawutɔ́ ɖo Mawu Mavɔmavɔ xwé gbe bó ɖo azɔ̌ tɔn wa wɛ; hwɛɖɔtɔ́ lɔ ɖo fínɛ́ bó ɖo azɔ̌ tɔn wa wɛ. Ényí mɛ ɖé syɛ́n ta bó má ké ya nú xó yětɔn ǎ ɔ́, è ɖǒ ná hu mɛ ɔ́. Lě e mi ná sú walɔ nyanya kún dó gbɔn ɖo tɛ́ntin mitɔn, ɖo Izlayɛ́li é nɛ́. Énɛ́ ɔ́, togun ɔ́ bǐ ná se nǔ e jɛ ɔ́, bɔ xɛsi ná jɛ yě jí, bɔ mɛ ɖěbǔ sɔ́ ná syɛ́n ta mɔ̌ ǎ. Ée mi ná tɛ afɔ to e Mawu Mavɔmavɔ, Mawu mitɔn ná ná mi é mɛ, bó ná yí to ɔ́, bó ná cí fínɛ́ ɔ́, mi sixú wá ɖó jlǒ ɖɔ émí lɔ ná sɔ́ axɔ́sú, akɔta e lɛ́ dó mi lɛ́ɛ é ɖɔhun. Ényí nǔ nyí mɔ̌ hǔn, mi ma sɔ́ to ɖěvo mɛ nu axɔ́sú ó. Izlayɛ́li ví wɛ mi ná sɔ́. Mɛ e Mawu Mavɔmavɔ, Mawu mitɔn ɖésú zé ɔ́ wɛ mi ná sɔ́ axɔ́sú. Mɛ e mi ná sɔ́ axɔ́sú ɔ́ ɖó ná ba ná ɖó sɔ́ gěgé ǎ, é ká ná sɛ́ mɛ dó Ejípu, bó ná xɔ sɔ́ dó éé ɖo así tɔn lɛ́ɛ jí ǎ, ɖó Mawu Mavɔmavɔ ko ɖɔ nú mi ɖɔ mi kún sɔ́ ná lɛ́ kɔ yi Ejípu ó. É ní má ɖó asi gěgé ó; é táá jó Mawu dó. É ní má kplé kpatágan kpó siká kpó kɔn nyi kpɔ́ gégé ó. Ée é ká ná yi zinkpo jí ɔ́, é ná yí sɛ́n énɛ́ ɔ́ ɖo Levíi ví vɔ̌sánú-xwlémawutɔ́ lɛ́ɛ sí, bó ná wlán lobo hɛn. É ná hɛn sɛ́nwéma ɔ́, bó ná nɔ́ xa hwebǐnu ɖo gbɛzán tɔn bǐ mɛ. Énɛ́ wɛ ná zɔ́n bɔ é ná sixú ɖó sísí nú Mawu Mavɔmavɔ, Mawu mitɔn, bó ná kpé nukún dó sɛ́n lɛ́ɛ kpódó gbetakɛ́n lɛ́ɛ kpó wú, bó ná nyi bǐ. Énɛ́ ná zɔ́n bɔ é sɔ́ ná mɔ ɖɔ émí wɛ nyí nǔ hú mɛ e ɖo togun ɔ́ mɛ é bǐ, bó ná gɔn xwi jí nɔ nú sɛ́n ɔ́ ǎ. Énɛ́ ɔ́, é ɖésú kpódó vǐ tɔn lɛ́ɛ kpó ná ɖu axɔ́sú ɖo Izlayɛ́li togun ɔ́ nu káká. Levíi ví vɔ̌sánú-xwlémawutɔ́ lɛ́ɛ kpó mɛ e ɖo Levíi sín akɔta mɛ lɛ́ɛ kpó ɖó ayǐkúngban ɖě Izlayɛ́li ví ɖě lɛ́ɛ ɖɔhun ǎ. Vɔ̌ e è wǎ sá nú Mawu Mavɔmavɔ lɛ́ɛ kpó nǔ e nyí Mawu Mavɔmavɔ tɔn lɛ́ɛ kpó ɔ́, éé nyí kanta yětɔn ɖ'é mɛ lɛ́ɛ wɛ yě ná nɔ́ ɖu. Yě ná ɖó ayǐkúngban ɖěbǔ ɖo Izlayɛ́li ví ɖě lɛ́ɛ tɛ́ntin ǎ; Mawu Mavɔmavɔ wɛ nyí nǔ e yě ɖǒ é. Vɔ̌sánú-xwlémawutɔ́ lɛ́ɛ ɖó acɛ bó ná yí nyibú abǐ gbɔ̌ e Izlayɛ́li ví lɛ́ɛ hu bó dó sá kɔnɖókpɔ́ vɔ́ ná lɛ́ɛ ɖě: è ɖǒ ná ná kanlin lɛ́ɛ sín abɔ̌ kpó aglan kpó adɔ lɛ́ɛ kpó yě. Mi ná ná jinukún e mi ná ya dó nukɔn lɛ́ɛ yě; mi ná ná vɛ̌ɛn kpó ami kpó yě; mɔ̌ ɖokpó ɔ́, fún nukɔntɔn e mi ná kpa sín gbɔ̌ lɛ́ɛ wú é ɔ́, mi na ná yě. Đó Mawu Mavɔmavɔ, Mawu mitɔn sɔ́ Levíi kpó ví tɔn lɛ́ɛ kpó ɖó vo ɖo akɔta lɛ́ɛ bǐ mɛ, bónú yě ná wa azɔ̌ n'i káká sɔ́yi. Ényí Levíi ví ɖé jló ná gosín Izlayɛ́li toxo e mɛ é ɖe ɔ́ mɛ, bó ná wá nɔ fí e Mawu Mavɔmavɔ ná sɔ́ é ɔ́, é sixú wá fínɛ́ bó wa azɔ̌ nú Mawu Mavɔmavɔ, Mawu tɔn, Levíi ví ɖě lɛ́ɛ e ɖo Mawu xwé gbe é ɖɔhun. Kanta e Levíi ví ɖě lɛ́ɛ nɔ́ yí é wɛ é lɔmɔ̌ ná yí gɔ́ nú tɔ́ tɔn gú e é sa lɛ́ɛ. Ée mi ná jɛ to e Mawu Mavɔmavɔ, Mawu mitɔn ná ná mi é mɛ ɔ́, mi ma jɛ nǔ baɖabaɖa e wa wɛ mɛ e ɖo fínɛ́ din lɛ́ɛ ɖe ɔ́ wa jí ó. Mɛ ɖěbǔ ní má ɖo mi mɛ, bó dó vǐ tɔn súnnu abǐ nyɔ̌nu zo nú vodún ó; mɛ ɖěbǔ ní má bló majíki abǐ é ní kan fá ó, mɛ ɖěbǔ ní má kan amɔɛ abǐ é ní ɖu azě ó; mɛ ɖěbǔ ní má ɖó bǒ nú mɛ ó; mɛ ɖěbǔ ní má yi bonu ó. Đó mɛ e nɔ wa nǔ mɔ̌hun lɛ́ɛ nɔ́ vɛ́ mɔ nú Mawu Mavɔmavɔ, Mawu mitɔn; mɛ e ɖo to e ná ná mi wɛ Mawu Mavɔmavɔ ɖe ɔ́ mɛ lɛ́ɛ wɛ nɔ́ wa nǔ énɛ́ lɛ́ɛ; énɛ́ wú wɛ, nú mi wá to ɔ́ mɛ ɔ́, é ná nya mɛ e ɖo to ɔ́ mɛ lɛ́ɛ ɖo nukɔn mitɔn. Amɔ̌, midɛɛ lɛ́ɛ ɔ́, mi ní zán gbɛ bónú Mawu Mavɔmavɔ, Mawu mitɔn ma mɔ nǔɖé d'é wú ó. Đó togun énɛ́ lɛ́ɛ e sín tɛnmɛ nɔ gbé wɛ mi ja ɔ́, nǔ e majíkiblótɔ́ lɛ́ɛ, abǐ nǔkantɔ́ lɛ́ɛ nɔ kplɔ́n yě ɔ́ wɛ yě nɔ́ ɖótó. Mawu Mavɔmavɔ, Mawu mitɔn ka gbɛ́ ɖɔ midɛɛ lɛ́ɛ ní má wa nǔ gbɔn mɔ̌ ó. É ká ná sɛ́ gbeyíɖɔ nyɛ Mɔyízi ɖɔhun ɖokpó dó mi, togun mitɔn mɛ nu wɛ é ná nyí: mi ná ɖótó nǔ e é ná ɖɔ nú mi é. Nǔ e mi ka byɔ́ Mawu Mavɔmavɔ gbe e gbe mi kplé ɖo Holɛ́bu só ɔ́ kpá é nɛ́. Mi ɖɔ gbe énɛ́ gbe ɖɔ: “Mǐ sɔ́ ba nú Mawu Mavɔmavɔ, Mawu mǐtɔn ná nɔ ɖɔ xó sɛ́ dó mǐ tlɔlɔ ǎ! Mǐ sɔ́ ba ná mɔ myɔ hɛhɛ énɛ́ ɖě ǎ! Mǐ táá kú.” Fínɛ́ jɛ́n Mawu Mavɔmavɔ ɖɔ nú mì ɖe gbe énɛ́ gbe ɖɔ: “Xó énɛ́ ɔ́ e togun ɔ́ ɖɔ ɔ́, hwɛ tɔn jɔ. Un ná sɛ́ gbeyíɖɔ hwi ɖɔhun ɖokpó dó yě, bɔ é ná nyí to yětɔn mɛ nu. Xó e un ná ɖɔ é ní ɖɔ nú mi lɛ́ɛ ɔ́, é ná ɖɔ bǐ nú mi. Ényí mɛ ɖé má ké ya nú xó e gbeyíɖɔ ɔ́ ná ɖɔ dó nyǐkɔ ce mɛ é ǎ ɔ́, nyi ɖésú wɛ ná kan nǔ e wú wɛ ɔ́ byɔ́ ɛ. Lo ɔ́, é nyí gbeyíɖɔ ɖěvo glá káká bó yi ɖɔ xó e un ma ɖɔ n'i ǎ é, dó nyǐkɔ ce mɛ abǐ é ɖɔ xó dó nǔmɛsɛn ɖé sín nyǐkɔ mɛ ɔ́, è nǎ hu i.” Afɔ nyɔ́ ɔ́, mi sixú ɖo kinkanbyɔ́ miɖée wɛ ɖɔ nɛ̌ émí sixú wa gbɔn bó tunwun ɖɔ wɛn ɔ́ kún gosín Mawu Mavɔmavɔ gɔ́n ó. Éɖíe, ényí gbeyíɖɔ ɖé ɖɔ nǔɖé dó Mawu Mavɔmavɔ sín nyǐkɔ mɛ, bɔ nǔ ɔ́ má jɛ ǎ ɔ́, hǔn xó e é ɖɔ ɔ́ gosín Mawu Mavɔmavɔ gɔ́n ǎ nɛ́. Gbeyíɖɔ ɔ́ ɖésú wɛ syɛ́n ta bó ɖɔ xó énɛ́ ɔ́. Mi ma ké ya nú xó tɔn ó. Akɔta e ɖo to e ná ná mi wɛ Mawu Mavɔmavɔ, Mawu mitɔn ɖe ɔ́ mɛ lɛ́ɛ ɔ́, Mawu Mavɔmavɔ ná vívá kún yětɔn, bó ná ná ayǐkúngban yětɔn lɛ́ɛ mi, bɔ mi ná nɔ toxo yětɔn lɛ́ɛ mɛ, mi ná nɔ xwé yětɔn lɛ́ɛ gbe. To énɛ́ e Mawu Mavɔmavɔ ná ná mi, bɔ é ná nyí mitɔn ɔ́, mi ná sɔ́ toxo atɔn ɖ'é mɛ. Mi ná ɖe ali yi toxo atɔn énɛ́ lɛ́ɛ bǐ mɛ, bɔ mɛ ɖé hu mɛ ɔ́, mɛ ɔ́ hɛn ɔ́, é ná hɔn yi toxo énɛ́ lɛ́ɛ ɖě mɛ. To e Mawu Mavɔmavɔ, Mawu mitɔn ná ná mi, bɔ é ná nyí mitɔn ɔ́, mi ná má ɖó atɔn. Mɛ e ma jló ná hu mɛ ǎ, bó ka hu mɛ ɔ́, bɔ mɛ e é hu ɔ́ kpó é kpó má kó kpé nǔɖé ɖ'ayǐ ǎ ɔ́, mɛ mɔ̌hun kɛ́ɖɛ́ wɛ ná hɔn yi cí toxo énɛ́ lɛ́ɛ ɖokpó mɛ, bó ná gán. Kpɔ́n d'é wú ɖokpó ɖíe: Nya ɖé kpó hǎgbɛ́ tɔn kpó zɔn yi atínkan mɛ, bɔ hwenu e é zé asyɔ́ tɔn, bó ɖo atín gbo wɛ ɔ́, asyɔ́ví ɔ́ sún sín atín ɔ́ kɔ, bó yi xo hǎgbɛ́ ɔ́ bɔ é kú. Ényí nǔ cí mɔ̌ ɔ́, nya e jí nǔ mɔ̌hun jɛ dó ɔ́ hɛn ɔ́, é ná hɔn yi cí toxo énɛ́ lɛ́ɛ ɖokpó mɛ, bó ná gán. Ényí ali e yi toxo énɛ́ lɛ́ɛ mɛ lɛ́ɛ lín, bónú mɛ e ɖo hlɔn ba wɛ ɔ́ ɖo xomɛsin jí, bó nya ɛ káká bó xwedó wǔ tɔn, bó hu i ɔ́, é ná nyɔ́ ǎ. È ɖǒ ná hu i ǎ, ɖó mɛ e é hu ɔ́ kpó é kpó kó kpé nǔɖé ɖ'ayǐ ǎ. Énɛ́ ɔ́ wú wɛ un ɖɔ nú mi ɖɔ mi ní sɔ́ toxo atɔn, bónú mɛ mɔ̌hun lɛ́ɛ ná hɔn yi cí mɛ. Hwenu e Mawu Mavɔmavɔ, Mawu mitɔn ná gbló ada nú ayǐkúngban mitɔn, bó ná ná to e sín akpá é dó nú tɔ́gbó mitɔn lɛ́ɛ mi ɔ́, mi ná lɛ́ sɔ́ toxo atɔn dó atɔn nukɔntɔn lɛ́ɛ jí. Amɔ̌, cóbónú Mawu Mavɔmavɔ ná bló mɔ̌ ɔ́, sɛ́n e ná mi wɛ é ɖe égbé din lɛ́ɛ bǐ wɛ mi ná nɔ́ nyi, bó ná yí wǎn n'i, lobo ná nɔ́ wa jlǒ tɔn tɛgbɛ. Mi bló mɔ̌ ɔ́, è nǎ hu xomɛvɔ́nɔ ɖěbǔ ɖo to e Mawu Mavɔmavɔ, Mawu mitɔn ná ná mi é mɛ ǎ. É má nyí mɔ̌ ǎ ɔ́, kɔ mitɔn wɛ kú mɔ̌hun ná nɔ. Lo ɔ́, ényí mɛ ɖé gbɛ́ wǎn nú mɛ ɖé, bó ɖo wu yi n'i wɛ káká, bó wá kpé wǔ tɔn bó hu, lobo hɔn yi cí toxo énɛ́ lɛ́ɛ ɖěbǔ mɛ ɔ́, tomɛxó e ɖo toxo tɔn mɛ lɛ́ɛ ná sɛ́ mɛ dó gbě tɔn mɛ, bɔ yě ná yi wlí i wá, bó ná zé e dó alɔ mɛ nú mɛ e ɖó ná ba hlɔn mɛ e kú ɔ́ tɔn é, bɔ é ná hu i. Nǔ tɔn má blá wǔ nú mi ó; mɔ̌ wɛ mi ná sú kún dó nú mɛ e nɔ hu xomɛvɔ́nɔ é gbɔn ɖo Izlayɛ́li, lobo ná mɔ agbɔ̌n. Ée mi ná yi cí to e ná ná mi wɛ Mawu Mavɔmavɔ, Mawu mitɔn ɖe ɔ́ sín ayǐkúngban jí ɔ́, mi ma sɛ tɛn nú mɛ e ko wá fínɛ́ dó nukɔn nú mi lɛ́ɛ sín dogbó ó. Kúnnuɖiɖe mɛ ɖokpó géé tɔn kpé bónú è nǎ ɖó hwɛ nú mɛ e è vɛ nǔ baɖabaɖa ɖé dó, abǐ mɛ e hu hwɛ, abǐ mɛ e dó nǔ alɔkpa ɖé sin é ǎ. Kúnnuɖiɖe mɛ ɖokpó tɔn kpé ǎ. Mɛ we abǐ mɛ atɔn wɛ ná to ɖe kúnnu nú lě e nǔ lɛ́ɛ nyí gbɔn é hwɛ̌. Ényí mɛ ɖé ɖe kúnnu agɔ dó mɛ ɖé wú ɔ́, mi ná kplá é kpódó mɛ e nu ɖó adingban dó wɛ é ɖe ɔ́ kpó, bɔ yě mɛ we lɛ́ɛ bǐ ná wá Mawu Mavɔmavɔ xwé gbe. Yě ná wlí lě e nǔ lɛ́ɛ nyí gbɔn ɔ́ ɖɔ nú vɔ̌sánú-xwlémawutɔ́ ɔ́ kpó hwɛɖɔtɔ́ e ɖo azɔ̌ wa ɖo xwé ɔ́ gbe wɛ hwenɛ́nu lɛ́ɛ kpó. Énɛ́ ɔ́, hwɛɖɔtɔ́ lɛ́ɛ ná ba do nú lě e nǔ lɛ́ɛ nyí gbɔn é céɖécéɖé: ée yě ná mɔ ɖɔ mɛ e ɖo kúnnu ɖe wɛ ɔ́, kúnnu agɔ ɖe tɔ́ wɛ é nyí, bó ɖo xó kpa ɖɔ dó nɔví tɔn nu wɛ ɔ́, hwɛ e é jló ɖɔ è nǐ ɖó nú nɔví émítɔn ɔ́, mi ná ɖó nú éyɛ́. Lě e mi ná sú kún dó nú nǔ nyanya gbɔn ɖo mi mɛ é nɛ́. Mɛ ɖě lɛ́ɛ ná se nǔ énɛ́ e jɛ é, bó ná ɖi xɛsi bó sɔ́ ná dó nǔ mɔ̌hun sin ǎ. Mi ma kú nǔbláwǔ nú mɛ e hu hwɛ é ó; è ɖǒ ná dɔn tó n'i: mɛɖé hu mɛ ɔ́, è nǎ hu é lɔmɔ̌; mɛɖé tɔ́n nukún mɛ ɔ́, è nǎ tɔ́n nukún é lɔmɔ̌; mɛ ɖé sún aɖǔ mɛ ɔ́, è nǎ sún aɖǔ é lɔmɔ̌; mɛɖé wɛ́n alɔ mɛ ɔ́, è nǎ wɛ́n alɔ é lɔmɔ̌; mɛɖé wɛ́n afɔ mɛ ɔ́, è nǎ wɛ́n afɔ é lɔmɔ̌. Ényí mi sɔ́ ahwan nú, bó xwe ahwan fun xá kɛntɔ́ gbé, bó ná bó mɔ ɖɔ sɔ́ tɔn lɛ́ɛ, ahwankɛkɛ́ví tɔn lɛ́ɛ kpó ahwanfuntɔ́ tɔn lɛ́ɛ kpó sukpɔ́ hú émítɔn lɛ́ɛ hǔn, mi ma ɖi xɛsi nú yě ó, ɖó Mawu Mavɔmavɔ, Mawu mitɔn e ɖe mi tɔ́n sín Ejípu tomɛ ɔ́ ɖo kpɔ́ xá mi. Nú é yá nú mi ja ahwan fun gbé ɔ́, vɔ̌sánú-xwlémawutɔ́ ɔ́ ná wá togun ɔ́ nukɔn, bó ná ɖɔ xó n'i. É ná ɖɔ: “Izlayɛ́li ví e mi, mi ɖótó mì! Mi ɖíe xwe ahwan fun xá kɛntɔ́ mitɔn lɛ́ɛ gbé égbé e, mi ma nú ado hu mi ó, mi ma ɖi xɛsi ó, mi ma dán jaja ó, mi ma sísɔ́ ɖo nukɔn yětɔn ó. Đó Mawu Mavɔmavɔ, Mawu mitɔn ná ɖo nukɔn nú mi, bó ná gɔ́ alɔ nú mi, bó ná fun ahwan xá kɛntɔ́ mitɔn lɛ́ɛ, bó ná ná ɖuɖéjí mi.” Énɛ́ ɔ́ gúdo ɔ́, ahwangán e nɔ́ yí mɛ dó ahwan mɛ lɛ́ɛ ná ɖɔ nú sɔ́ja lɛ́ɛ ɖɔ: “Mɛ ɖé ɖo mi mɛ bó sá xwé yɔ̌yɔ́ bó má kó nɔ mɛ kpɔ́n a? Mɛ mɔ̌hun ɖé ɖo mɛ mɛ hǔn, ní lɛ́ kɔ yi xwé; é má nyí mɔ̌ ǎ ɔ́, é sixú cí ahwan, bɔ mɛ ɖěvo ná nɔ mɛ. Mɛɖé ɖo mi mɛ bó ɖó vǐwungbo, bó má ko gbɛ sínsɛ́n nukɔn nukɔntɔn lɛ́ɛ ɖu kpɔ́n a? Mɛ ɔ́ ní lɛ́ kɔ yi xwé; é má nyí mɔ̌ ǎ ɔ́, mɛ ɔ́ sixú cí ahwan, bɔ mɛ ɖěvo ná gbɛ vǐwun tɔn lɛ́ɛ. Mɛ ɖé ɖo mi mɛ bó ɖó asi xɔ́ntɔn, bó má kó da a? Mɛ mɔ̌hun ɖo mɛ mɛ hǔn, ní lɛ́ kɔ bó yi xwé; é má nyí mɔ̌ ǎ ɔ́, é sixú cí ahwan, bɔ súnnu ɖěvo ná da nyɔ̌nu ɔ́.” Ahwangán lɛ́ɛ ná lɛ́ yí xó, bó ná ɖɔ nú togun ɔ́ ɖɔ: “Mɛɖé ɖo mi mɛ, bó ɖo xɛsi jí, bó má sixú kpan akɔ́n a? Mɛ mɔ̌hun ɖe hǔn, ní lɛ́ kɔ bó yi xwé, bó má gbɔ́jɔ́ kanmɛ nú nɔví tɔn lɛ́ɛ bónú yě bɛ́ xɛsi éyɛ́ ɖɔhun ó.” Ényí ahwangán lɛ́ɛ ɖɔ xó fó ɔ́, yě ná sɔ́ sɔ́jagán, bɔ yě ná nɔ ahwangɔnu ɔ́ nu. Cóbónú mi ná yi tɔ́n ahwan toxo ɖé ɔ́, mi ná tó dó gbe fífá nú to ɔ́ mɛ nu lɛ́ɛ hwɛ̌. Nú yě yí gbe nú mi kpó gbe fífá kpó, bó hun toxo yětɔn sín hɔn lɛ́ɛ nú mi ɔ́, mi ná ɖɔ bɔ mɛ e ɖo toxo ɔ́ mɛ lɛ́ɛ bǐ ná jɛ kan mitɔn nu, bó ná nɔ wa azɔ̌ nú mi. Amɔ̌, yě má dó gbe fífá nú mi ǎ, bó sí ahwan te ɔ́, mi ná xá toxo ɔ́ bǐ. Mawu Mavɔmavɔ, Mawu mitɔn ná jó toxo ɔ́ nú mi, bɔ mi ná hu súnnu e ko ɖo toxo ɔ́ mɛ lɛ́ɛ bǐ. Amɔ̌, mi ná bɛ́ nyɔ̌nu lɛ́ɛ, yɔkpɔ́vú lɛ́ɛ, kanlin lɛ́ɛ, kpódó nǔ e mi ná mɔ ɖo toxo ɔ́ mɛ lɛ́ɛ bǐ kpó, bɔ yě ná nyí dɔkun e mi mɔ ɖo ahwangbénu lɛ́ɛ. Dɔkun kɛntɔ́ mitɔn lɛ́ɛ tɔn ná húzú mitɔn, ɖó Mawu Mavɔmavɔ, Mawu mitɔn wɛ ná mi. Lě e mi ná wa nǔ xá toxo e ɖo zɔ vóéé, bó má ɖo to e mɛ ná nɔ wɛ mi ɖe ǎ mɛ lɛ́ɛ gbɔn ɔ́ nɛ́. Amɔ̌, toxo e ɖo ayǐkúngban e Mawu Mavɔmavɔ, Mawu mitɔn ná ná mi lɛ́ɛ jí ɔ́, mi ná jó gbɛtɔ́ ɖokpó dó nyi gbɛ ɖe mɛ ǎ. Hǔn, mi ná hu Hitíti lɛ́ɛ bǐ, Amɔliti lɛ́ɛ bǐ, Kanáanu lɛ́ɛ bǐ, Pɛliziti lɛ́ɛ bǐ, Hivíti lɛ́ɛ bǐ kpó Jebuzinu lɛ́ɛ bǐ kpó lě e Mawu Mavɔmavɔ, Mawu mitɔn zɔ́n mi gbɔn é. É má nyí mɔ̌ ǎ ɔ́, yě ná kplɔ́n nǔ baɖabaɖa e yě nɔ́ dó sin bó nɔ́ nyɔ́ ɖo vodún yětɔn lɛ́ɛ gɔ́n lɛ́ɛ mi, bɔ mi ná hu hwɛ dó Mawu Mavɔmavɔ, Mawu mitɔn. Ényí mi tunwun ɖɔ émí ná yi tɔ́n ahwan toxo ɖé, bó ná xá toxo ɔ́ xɔ azǎn cóbó ná yí hǔn, mi ma gbo atín e è nɔ ɖu sínsɛ́n tɔn lɛ́ɛ ó; mi ná ɖu atínsínsɛ́n lɛ́ɛ; mi ma ka gbo atín lɛ́ɛ ó. Atín e ɖo gběhan mɛ ɔ́ nyí gbɛtɔ́ bɔ mi ná yi tɔ́n ahwan ǎ. Atín e mi mɔ ɖɔ è kún nɔ́ ɖu sínsɛ́n tɔn ó lɛ́ɛ kɛ́ɖɛ́ wɛ mi ná gbo, lobo ná zán hwenu e mi ná ɖo ahwan fun wɛ ɔ́, káká bó ná yí toxo ɔ́. Hwenu e mi ná ɖo to e Mawu Mavɔmavɔ, Mawu mitɔn ná ná mi é mɛ ɔ́, ayǐ ɖokpó sixú wá hɔ́n, bɔ è nǎ mɔ è hu mɛ ɖé sɔ́ nyi gběhan mɛ fí ɖé, bɔ è ka tunwun mɛ e hu i é ǎ. Nǔ cí mɔ̌ ɔ́, tomɛxó mitɔn lɛ́ɛ kpó hwɛɖɔtɔ́ mitɔn lɛ́ɛ kpó ná yi fí e cyɔ ɔ́ ɖe ɔ́, bó ná jlɛ́ fí e cyɔ ɔ́ ɖe dó toxo e lɛ́ lɛ̌ dó fínɛ́ lɛ́ɛ kpɔ́n, bó ná mɔ toxo e sɛkpɔ́ cyɔ ɔ́ hú toxo ɖě lɛ́ɛ bǐ é. Énɛ́ ɔ́, tomɛxó e ɖo toxo énɛ́ ɔ́ mɛ lɛ́ɛ ná sɔ́ nyibúsixwɛ e è ma dó wa azɔ̌ ná kpɔ́n gbeɖé ǎ, è ma ka sin kpo dó kɔ ná kpɔ́n gbeɖé ǎ é ɖokpó. Bó ná kplá yi tɔsisa e ma nɔ mɛ gbeɖé ǎ é ɖokpó nu, ɖo fí e è ma lɛ gle ɖe ǎ é, è ma ka dó nǔ ɖěbǔ ɖe ǎ é ɖokpó, bó ná gba nyibúsixwɛ ɔ́ sín zogúdo ɖo fínɛ́. Énɛ́ ɔ́, vɔ̌sánú-xwlémawutɔ́ Levíi ví lɛ́ɛ ná wá, ɖó yě wɛ Mawu Mavɔmavɔ sɔ́, bɔ yě ná nɔ́ wa azɔ̌ n'i, bó ná nɔ́ xo ɖɛ dó togun ɔ́ jí ɖo nyǐkɔ tɔn mɛ, bɔ adɔn ɖěbǔ tíin ɔ́, yě ná nɔ́ gbo; nú mɛɖé gblé wǔ mɛɖé ɔ́, yě wɛ ná nɔ́ ɖɔ gbo. Énɛ́ ɔ́ gúdo ɔ́, tomɛxó toxo énɛ́ ɔ́ tɔn lɛ́ɛ bǐ ná klɔ́ alɔ kɔn nyi nyibúsixwɛ e è gba zogúdo ná é jí ɖo tɔ ɔ́ nu, bó ná ɖɔ: “Mǐ wɛ hu i ǎ, mǐ ká ɖo do tɔn mɛ ǎ. Mawu Mavɔmavɔ, sɔ́ hwɛ kɛ togun towe e a hwlɛngán é. Ma jó xomɛvɔ́nɔ sín hun dó nyi kɔ nú Izlayɛ́li togun towe ɔ́ ó.” Énɛ́ ɔ́, Mawu nǎ sɔ́ hwɛ kɛ mi. Nú mi blǒ gbɔn mɔ̌ ɔ́, nǔ e nɔ́ nyɔ́ Mawu Mavɔmavɔ nukún mɛ lɛ́ɛ wɛ mi bló, bɔ xomɛvɔ́nɔ sín hun ná nɔ kɔ nú mi ǎ. Ényí mi yi tɔ́n ahwan kɛntɔ́ mitɔn lɛ́ɛ, bɔ Mawu Mavɔmavɔ, Mawu mitɔn jó yě nú mi, bɔ mi wlí kannumɔ yětɔn ɔ́, ényí mɛɖé ɖo mi mɛ, bó mɔ nyɔ̌nu ɖé ɖo yě mɛ, bɔ é nyɔ́ ɖɛkpɛ, bɔ é yí wǎn n'i, bó jló ná da ɔ́, é na kplá nyɔ̌nu ɔ́ yi xwé gbe. Nyɔ̌nu ɔ́ ná xwlɛ́ ta bó ná kpa fɛn, bó ná ɖyɔ́ awu e é dó hwenu e ahwan wlí i é, bó nɔ súnnu ɔ́ sín xwé gbe. Nyɔ̌nu ɔ́ ná ví tɔ́ tɔn kpó nɔ tɔn kpó káká nú sun ɖokpó. Énɛ́ ɔ́ gúdo ɔ́, súnnu ɔ́ ná ɖó xó xá ɛ, bɔ é ná húzú asi tɔn. Nú é wá yá nú súnnu ɔ́ má sɔ́ ɖó wǎn yíyí nú nyɔ̌nu ɔ́ ǎ ɔ́, é ná jó e dó, bɔ é ná yi. Amɔ̌, é sɔ́ ɖó acɛ e sɔ́ ɛ sa, bó yí akwɛ́ é ǎ; é ká ɖó ná sɔ́ ɛ dó ɖó kannumɔ ná ǎ, ɖó é kó da ɛ gǎnnugǎnnu. Mǐ ní ɖɔ súnnu ɖé da asi we, bó yí wǎn nú mɛ ɖokpó hú mɛ ɖokpó. Nyɔ̌nu we lɛ́ɛ bǐ ji vǐ súnnu n'i, bɔ vǐ súnnu ɖaxó ɔ́ ká nyí nyɔ̌nu e é má yí wǎn ná sɔ mɔ̌ ǎ é tɔn. Nǔ cí mɔ̌ ɔ́, hwenu e é ná ja dɔkun tɔn lɛ́ɛ má nú vǐ tɔn lɛ́ɛ gbe ɔ́, é ná kpɔ́n dó mɔ̌ wú bó ná zé vǐ súnnu ɖaxó sín acɛ ɔ́ jó nú nyɔ̌nu e é yí wǎn ná é sín vǐ ǎ. É nyɔ́ wa ɔ́, é ná tunwun vǐ súnnu ɖaxó tɛnmɛ nú mɛ e é má yí wǎn ná ǎ sín vǐ, bó ná sɔ́ nǔ e nyí étɔn é bǐ sín donu we n'i. Đó é wɛ nyí vǐ súnnu tɔn nukɔntɔn ɔ́, bó ɖó vǐ súnnu ɖaxó sín acɛ. Mǐ ní ɖɔ nya ɖé ɖó vǐ súnnu ɖé, bɔ é nɔ́ se tónú nú tɔ́ kpó nɔ kpó ɖě ǎ, bó nɔ́ ɖo gǔ fɔ́n wɛ. Mɛjitɔ́ tɔn lɛ́ɛ ná bó ɖo tó dɔn n'i wɛ ɔ́, é nɔ́ se tónú ǎ. Nǔ cí mɔ̌ ɔ́, tɔ́ ɔ́ kpó nɔ ɔ́ kpó ná wlí i, bó ná kplá ɛ yi tomɛxó lɛ́ɛ nukɔn, ɖo toxo ɔ́ sín hɔntogbó jí, bó ná ɖɔ nú tomɛxó lɛ́ɛ ɖɔ: “Vǐ mǐtɔn élɔ́ nɔ́ se tónú ǎ, gǔ fɔ́n wɛ jɛ́n é nɔ́ ɖe; é nɔ́ ké ya nú xó mǐtɔn ǎ; é nɔ́ ɖo nǔ kwíji lɛ́ɛ wa wɛ, bó nɔ́ ɖo ahan nu mú wɛ.” Énɛ́ ɔ́, súnnu e ɖo toxo tɔn mɛ lɛ́ɛ bǐ ná nyi awǐnnyaglo dó e káká bɔ é ná kú. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́. Izlayɛ́li toxo ɔ́ bǐ ná se xó énɛ́, bó ná ɖó sísí nú Mawu. Mǐ ní ɖɔ mɛɖé hu hwɛ, bɔ è ɖǒ kúhwɛ n'i, bó dó kan dó atín wú bɔ é kú. Cyɔ tɔn ná dɔ́ atín ɔ́ jí ǎ. È nǎ ɖi i gbe énɛ́ gbe. Đó mɛ e è dǒ kan dó atín wú ɔ́, nu wɛ Mawu dó e. Hǔn mi bo ma hɛn ayǐkúngban e Mawu Mavɔmavɔ, Mawu mitɔn ná ná mi ɔ́ blí ó. Nú mi mɔ nyibú nɔví mitɔn tɔn, abǐ gbɔ̌ tɔn ɖo flúflú wɛ hǔn, mi ma jó dó ó; mi kplá wá n'i. Ényí fí e kanlinnɔ ɔ́ ɖe ɔ́ lín dó mi, abǐ mi ma tunwun ǎ hǔn, mi ná kplá kanlin ɔ́ dó xwé mitɔn gbe, bɔ é ná ɖo fínɛ́ káká bɔ kanlinnɔ ɔ́ ná tɔ́n kanlin tɔn gbé, bɔ mi ná sɔ́ jó. Ényí tócí tɔn wɛ bú bɔ mi mɔ ɔ́, mɔ̌ wɛ mi ná bló gbɔn awu tɔn wɛ bú bɔ mi mɔ ɔ́, mɔ̌ wɛ mi ná wa nǔ gbɔn; ényí nǔ tɔn ɖěbǔ wɛ bú bɔ mi mɔ ɔ́, mɔ̌ wɛ mi ná bló gbɔn; mi ná jó dó ǎ. Mǐ ní ɖɔ nɔví mitɔn kplá tócí tɔn, abǐ nyibú tɔn bɔ yě ɖo yiyi wɛ bɔ tócí ɔ́ j'ayǐ, abǐ nyibú ɔ́ j'ayǐ bɔ mi mɔ. Ényí mi mɔ mɔ̌ ɔ́, mi ná jó é ɖokpónɔ dó bɔ é ná fɔ́n kanlin ɔ́ sí te ǎ; mi ɖó ná d'alɔ ɛ bɔ é ná fɔ́n kanlin ɔ́ sí te. Nyɔ̌nu ɖó ná dó nǔ e súnnu nɔ́ dó lɛ́ɛ ǎ; mɔ̌ ɖokpó ɔ́, súnnu ɖó ná dó nǔ e nyɔ̌nu nɔ́ dó lɛ́ɛ ǎ. Mɛ e bló mɔ̌ ɔ́ nɔ́ vɛ́ mɔ nú Mawu Mavɔmavɔ, Mawu mitɔn. Nú mi ɖo yiyi wɛ, bó yi mɔ xɛdɔ́ ɖo atín jí abǐ kɔ́ mɛ, bɔ vǐ ɖ'é mɛ, abǐ azin ɖ'é mɛ, bɔ xɛ nɔkɔ́ ɔ́ ɖo vǐ tɔn lɛ́ɛ jí, abǐ é fɛ azin ɔ́, mi ná wlí xɛ nɔkɔ́ ɔ́ kpó vǐ tɔn lɛ́ɛ kpó ǎ; vǐ lɛ́ɛ kɛ́ɖɛ́ wɛ mi ná fɔ, bɔ é ná nyí mitɔn. Mi ná jó xɛ nɔkɔ́ ɔ́ dó bɔ é ná yi; énɛ́ ɔ́, nǔ ná nyɔ́ nú mi, bɔ mi ná dɔ́ ji. Nú mi bló xɔ yɔ̌yɔ́ ɔ́, mi ná sú ta ná, bɔ è hɛn ɔ́, è nǎ nɔ ɖi zɔnlin gbɔn xɔ ɔ́ ta, bɔ mi ná mɛ nǔ gbɔn tó tɔn lɛ́ dó; é má nyí mɔ̌ ǎ ɔ́, gbɛtɔ́ táá wá j'ayǐ sín xɔ ɔ́ ta, bɔ kanjɔ ná wá kɔn nyi ayǐ ɖo xwé mitɔn gbe. Mi ná tun atín ɖěvo gbɔn vǐwungbo mitɔn mɛ ǎ. É má nyí mɔ̌ ǎ ɔ́, è nǎ sɔ́ atín we lɛ́ɛ bǐ sín sínsɛ́n ɖó vo nú Mawu Mavɔmavɔ, vǐwun lɛ́ɛ kpó atín ɖěvo e mi tun é sín sínsɛ́n lɛ́ɛ kpó. Mi ná sin mɔ e è nɔ dó lɛ gle ná ɔ́ dó kɔ nú nyibúsú kpó tócí kpó ɖó kpɔ́ dó lɛ gle ǎ. Nǔzínzán e è sɔ́ gbɔ̌fún kpó lɛ̌ɛnkan kpó ɖó kpɔ́ dó lɔn ɔ́, mi ná dó ɖě ǎ. Avɔ mitɔn e mi nɔ cyɔ́n ɔ́, mi ná sin kan ɖagbe ɖagbe dó tó tɔn ɛnɛ lɛ́ɛ. Ényí mɛɖé da asi, bó kó ɖó xó xá ɛ, bó má ká sɔ́ wá yí wǎn n'i ǎ, bó jɛ hɛ̌n dó e jí ɖɔ: “Nyɔ̌nu élɔ́ e un da ɔ́, un mɔ ɛ ɖo alɔ jí ǎ.” Nǔ cí mɔ̌ ɔ́, vǐtɔ́ ɔ́ kpó vǐnɔ ɔ́ kpó ná sɔ́ nǔ e ɖe xlɛ́ ɖɔ vǐ émítɔn nɔ alɔ jí bó yi asúxwé ɔ́ xlɛ́, bó yi xlɛ́ tomɛxó lɛ́ɛ ɖo toxo ɔ́ sín hɔntogbó jí. Nyɔ̌nu ɔ́ sín tɔ́ ná ɖɔ nú tomɛxó lɛ́ɛ ɖɔ: “Nyɔ̌nu élɔ́ ɔ́, vǐ ce wɛ, bɔ un sɔ́ ná dǎwe élɔ́, bɔ é ná nɔ así tɔn; é ká sɔ́ ba ɛ din ǎ, bó jɛ hɛ̌n dó e jí, bó ɖɔ nú mì ɖɔ: ‘Vǐ towe ɔ́, un mɔ ɛ ɖo alɔ jí ǎ.’ Nǔ e ká ɖe xlɛ́ ɖɔ vǐ ce zɔn alɔ jí yi asúxwé é ɖíe.” É ɖɔ mɔ̌ ɔ́, mɛ tɔn lɛ́ɛ ná vlɔ́n avɔ e jí yě dɔ̌, bɔ hun kɔn nyi mɛ ɔ́ ɖo tomɛxó lɛ́ɛ nukɔn. Bɔ tomɛxó lɛ́ɛ ná wlí dǎwe e dó nǔ mɔ̌hun sin é, bó ná dɔn tó n'i, bɔ é ná sú gankwɛ́ kanwe ko (100) nyɔ̌nu ɔ́ sín tɔ́, ɖó nyǐkɔ nyanya wɛ é sun Izlayɛ́li ví nyɔ̌nu e zɔn alɔ jí yi asúxwé é. Nyɔ̌nu ɔ́ ká ná nyí asi tɔn káká yi gbe e gbe é ná kú é. Ényí nǔ ká nyí mɔ̌ nǔgbó, bɔ súnnu ɔ́ má mɔ nyɔ̌nu ɔ́ ɖo alɔ jí nǔgbó ǎ ɔ́, è nǎ kplá ɛ wá tɔ́ tɔn hɔnto, bɔ súnnu e ɖo toxo ɔ́ mɛ lɛ́ɛ ná nyi awǐnnyaglo dó hu i, ɖó winnyánú wɛ é dó sin ɖo Izlayɛ́li tomɛ, bó lɛ aga ɖo tɔ́ tɔn xwé. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́. Ényí mɛɖé ɖo mɛsi ba wɛ, bɔ è gbo e dó ɔ́, è nǎ hu yě mɛ we lɛ́ɛ bǐ; è nǎ hu súnnu ɔ́, bó hu nyɔ̌nu ɔ́. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́. Ényí ɖyɔ̌vǐ ɖé tíin, bó kó ɖó asúxɔ́ntɔn, bónú súnnu ɖé mɔ ɛ ɖo toxo mɛ bó ɖó xó xá ɛ ɔ́, mi ná kplá yě mɛ we lɛ́ɛ bǐ wá toxo ɔ́ sín hɔnto, bó ná nyi awǐnnyaglo dó yě káká bɔ yě ná kú. Mi ná hu yě mɛ we lɛ́ɛ bǐ, ɖó nyɔ̌nu ɔ́ sú xó ǎ, có toxo tɛ́ntin wɛ é ɖe, bɔ súnnu ɔ́ ká ba mɛsi. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́. É ká nyí gběhan mɛ zɔ fí ɖé wɛ súnnu ɔ́ kpé nyɔ̌nu ɔ́ ɖe, bó hú gǎn ɛ, bó ɖó xó xá ɛ ɔ́, súnnu ɔ́ kɛ́ɖɛ́ wɛ è nǎ hu; mi ná wa nǔ ɖěbǔ nú nyɔ̌nu ɔ́ ǎ, ɖó é hu kúhwɛ ɖé ǎ. Mi ná ɖɔ hwɛ énɛ́ ɔ́ lě e è nɔ ɖɔ mɛ e hu mɛ ɔ́ sín hwɛ gbɔn é. Đó gběhan mɛ wɛ é kpé vǐ ɔ́ ɖe, bɔ é sú xó, mɛɖé ká se bó wá ǎ. Ényí súnnu ɖé mɔ ɖyɔ̌vǐ e má ɖó asúxɔ́ntɔn ǎ é, bó zunfán, bó ɖo xó ɖó xá ɛ wɛ, bɔ è gbo yě dó ɔ́, súnnu e ɖó xó xá ɖyɔ̌vǐ ɔ́ ná ná gankwɛ́ kanɖé wǒ (50) vǐ e é ɖó xó xá é sín tɔ́; bɔ ée é ká kó ɖó xó xá vǐ ɔ́ é ɔ́, é ɖó ná da, bó ká ɖó ná nya ɛ gbeɖé cóbó kú ǎ. Mɛɖé má yí tɔ́ tɔn sín asi ó; mɛ e bló mɔ̌ ɔ́, kɔ́n tɔ́ ɔ́ sín wi. Mɛ e è gba ajiglokwín tɔn lɛ́ɛ, abǐ mɛ e è sɛ́n súnnuxwé tɔn ɔ́ sixú nɔ mawusɛntɔ́ lɛ́ɛ sín agun ɔ́ mɛ ǎ. Agaví ɖě ná sixú nɔ mawusɛntɔ́ lɛ́ɛ sín agun ɔ́ mɛ ǎ. Mɛ e nyí agaví ɔ́ káká jɛ vǐ tɔn ví jí yi jijimɛ wǒgɔ́ ɔ́ jí ɖě ná sixú nɔ mawusɛntɔ́ lɛ́ɛ sín agun ɔ́ mɛ ǎ. Amumɔ́ɔ ví lɛ́ɛ kpó Mɔwabunu lɛ́ɛ kpó ɖě ná sixú nɔ mawusɛntɔ́ lɛ́ɛ sín agun ɔ́ mɛ gbeɖé ǎ. Bɛ́ sín vǐ yětɔn jí káká yi jijimɛ wǒgɔ́ ɔ́ jí lɔmɔ̌ ná sixú nɔ mawusɛntɔ́ lɛ́ɛ sín agun ɔ́ mɛ ǎ. Đó hwenu e mi gosín Ejípu tomɛ wá xweyǐgbe ɔ́, yě hɛn nǔɖuɖu kpó sin kpó wá nú mi ǎ; é nyɔ́ wa ɔ́, yě dǒ nǔ nu nú nǔkantɔ́ Baláamu, Beɔ́ɔ ví ɔ́, bónú é ná dó nu mi; é gosín Petɔ́ɔ toxo ɔ́ mɛ ɖo Mɛzopotamíi, bó wá. Amɔ̌, Mawu Mavɔmavɔ, Mawu mitɔn gbɛ́ Baláamu xó, bó sɔ́ nu e é dó mi ɔ́ dó húzú nyɔ̌ná, ɖó Mawu Mavɔmavɔ yí wǎn nú mi. Nú mi kpo ɖo gbɛ jɛ́n wɛ ɔ́, mi ma ba fífá nú togun we énɛ́ lɛ́ɛ ó; mi ma ka ba nukɔn yiyi yětɔn gbeɖé ó. Mi ma gbɛ́ wǎn nú Edɔ́munu lɛ́ɛ ó, nɔví mitɔn wɛ yě nyǐ; mi ma ka gbɛ́ wǎn nú Ejípunu lɛ́ɛ ó, ɖó mi ko nɔ to yětɔn mɛ kpɔ́n. Togun we énɛ́ lɛ́ɛ e wá ɖo mi mɛ lɛ́ɛ hɛn ɔ́, yě ná byɔ́ mawusɛntɔ́ lɛ́ɛ sín agun ɔ́ mɛ bɛ́ sín vǐvú vivu yětɔn lɛ́ɛ jí káká sɔ́yi. Mi yi ahwan fun xá kɛntɔ́ mitɔn lɛ́ɛ gbé, bó yi ɖó gɔnu ɖó fí ɖé hǔn, mi cɔ́ miɖée, bó má wa nǔ e ná hɛn mi blí lɛ́ɛ ɖě ó. Ényí mɛɖé ɖo mi mɛ, bó húzú mɛ blíblí zǎn mɛ, ɖó sin e nɔ gosín súnnuxwé ɔ́ wú ɔ́, é ná tɔ́n sín fí e mi ɖó gɔnu ɖó é, bó sɔ́ ná wá fínɛ́ có zǎn ná kú ǎ. Lo ɔ́, nú hwe jɛ xɔ yi jí ɔ́, é ná yi lɛ wǔ, bɔ nú hwe ɔ́ yi xɔ ɔ́, é ná wá fí e yě ɖó gɔnu ɖó ɔ́. Mi ná ɖó fí ɖé, bɔ é ná ɖo zɔ nú fí e mi ɖó gɔnu ɖó é kpɛɖé, bó ná nɔ́ yi afɔ jí ɖe. Mɛ ɖokpó ɖokpó ná ɖó nǔɖé, bɔ nú é sɛ yi zɔ ɔ́, é ná nɔ́ dó kun do, bɔ nú é yi afɔ jí ɔ́ kpé ɔ́, é ná zé dó dɔn kɔ́ d'é jí. Đó Mawu Mavɔmavɔ, Mawu mitɔn ɖésú ná nɔ́ ɖi sa gbɔn fí e mi ɖó gɔnu ɖó é, bó ná hwlɛ́n mi gán ɖo kɛntɔ́ sí, bó ná jó yě nú mi. Hǔn fí e mi ɖe ɔ́ ɖó ná nyí fí mímɛ́ ɖé; é nyɔ́ nú Mawu Mavɔmavɔ, Mawu mitɔn ná mɔ nǔɖé ɖo fínɛ́, bɔ é ná fyɔ́n wǔ n'i, bɔ é ná gɔn fí e mi ɖó gɔnu ɖó é ǎ. Nú kannumɔ ɖé hɔn, bó wá cí xwé mitɔn gbe ɔ́, mi ná kplá ɛ yi jó nú gǎn tɔn ǎ. Toxo e jló e ɔ́ mɛ wɛ é ná nɔ, bó ná nɔ fí e jló e ɔ́ ɖo mi mɛ. Mi ma ka dɔn ɛ zán ó. Izlayɛ́li ví súnnu abǐ nyɔ̌nu ɖěbǔ ɖó ná nɔ lɛ aga dó sɛn hun ǎ. Mi ma nú mɛ e nɔ wa mɔ̌ lɛ́ɛ ɖě hɛn agakwɛ́ yětɔn lɛ́ɛ ɖě wá Mawu Mavɔmavɔ, Mawu mitɔn xwé gbe bó ná ɖe akpá e yě dó é ná, nú mi yí ó. Đó Mawu Mavɔmavɔ, Mawu mitɔn mɔ walɔ yětɔn énɛ́ lɛ́ɛ dó mɔ hɛ̌n nú. Mi ma nya nǔɖé nú nɔví mitɔn bó yí d'é jí ó; é sixú nyí akwɛ́, é sixú nyí nǔɖuɖu, é sixú nyí nǔ alɔkpa ɖěbǔ, mi ma yí d'é jí ó. Ényí to ɖěvo mɛ nu wɛ mi nya nǔɖé ná ɔ́, mi sixú yí d'é jí. É ká nyí nɔví mitɔn wɛ ɔ́, mi ná yí d'é jí ǎ. Mi nyi sɛ́n énɛ́ ɔ́ ɖo to e yí gbé mi ja ɔ́ mɛ; énɛ́ ɔ́, Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí. Ényí mi dó akpá ɖɔ émí ná xwlé nǔníná ɖé Mawu Mavɔmavɔ hǔn, mi yá wǔ ɖe. É má nyí mɔ̌ ǎ ɔ́, Mawu Mavɔmavɔ, Mawu mitɔn ná byɔ́ axɔ́ tɔn mi. Bɔ nǔ énɛ́ ɔ́ ká ná nyí hwɛ bó ná nɔ kɔ nú mi. Lo ɔ́, ényí mi ma dó akpá ǎ ɔ́, é nyí hwɛ nú mi ǎ. Ényí mi kɛ nu mitɔn bó dó akpá ɖé nú Mawu Mavɔmavɔ hǔn, mi ɖe akpá ɔ́ pɛ́pɛ́pɛ́, ɖó mi ɖésúnɔ wɛ kɛ nu mitɔn bó dó akpá nú Mawu Mavɔmavɔ, Mawu mitɔn. Nú mi ɖo mɛ ɖěvo sín vǐwungbo mɛ gbɔn wɛ ɔ́, mi hɛn ɔ́, mi ná ba bó ɖu lě e é jló mi gbɔn é; amɔ̌, mi ɖó ná gbɛ dó nǔ mɛ hɛn yi ǎ. Mɔ̌ ɖokpó ɔ́, nú mi ɖo mɛ ɖěvo sín blěegbo mɛ gbɔn wɛ ɔ́, mi hɛn ɔ́, mi ná ba ɖě ɖó alɔ wú; amɔ̌, mi ná bɔ alǐnnyánú nyi mɛ bó ba ǎ. Mǐ ní ɖɔ mɛɖé da nyɔ̌nu ɖé, bɔ é wá su gbe ɖokpó, bɔ nyɔ̌nu ɔ́ sín nǔ sɔ́ nyɔ́ nukún tɔn mɛ ǎ, ɖó é mɔ nǔjɛdo ɖé ɖo wǔ tɔn. Énɛ́ ɔ́, é wlán wěma ɖɔ émí gbɛ́ ɛ, bó sɔ́ dó así n'i, lobo nya ɛ, bɔ nyɔ̌nu ɔ́ tɔ́n sín xwé tɔn gbe, bó yi da asú ɖěvo, bɔ asú énɛ́ lɔ wá gbɛ́ wǎn n'i bó wlán wěma ɖɔ émí gbɛ́ ɛ, bó sɔ́ n'i, bó nya ɛ sín xwé tɔn gbe, abǐ asú énɛ́ wá kú. Ényí nǔ cí mɔ̌ ɔ́, asú tɔn nukɔntɔn ɔ́ sɔ́ ná yí i dó xwé gbe ǎ, ɖó é kó húzú mɛ blíblí n'i. Nǔ mɔ̌hunkɔtɔn ɔ́, Mawu Mavɔmavɔ nɔ mɔ dó mɔ hɛ̌n nǔ. To e Mawu Mavɔmavɔ, Mawu mitɔn ná ná mi bɔ é ná nyí mitɔn ɔ́, mi ma zán walɔ mɔ̌hunkɔtɔn dó hɛn gblé ó. Mɛ e da asi yɔ̌yɔ́ ɔ́ ná yi ahwan ǎ. È ka nǎ wá dó tagba ɖěbǔ n'i ɖo xwé tɔn gbe ǎ; è nǎ zɔ́n nǔ ɖěbǔ i ǎ káká nú xwe ɖokpó, bɔ é ná kpé nukún dó xwé tɔn wú, bɔ asi tɔn ná ɖu asú gbɛ. È nǎ yí sé e jí mɛɖé nɔ́ li linfín ɖe abǐ sénukwɛn tɔn ɖó gbanu ǎ. Nú è blǒ mɔ̌ hǔn, nǔ e nɔ́ ná nǔɖuɖu i ɔ́ nɛ́ è yǐ ɖó gbanu nɛ́. Ényí Izlayɛ́li ví ɖé fin nɔví tɔn, bó sɔ́ ɛ dó ɖó kannumɔ abǐ é sɔ́ ɛ sa ɔ́, è nǎ hu mɛ e bló mɔ̌ ɔ́. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́. Mi cɔ́ miɖée dó gudu tɛnmɛ tɛnmɛ lɛ́ɛ wú, bó xwedó nǔ e vɔ̌sánú-xwlémawutɔ́ Levíi ví lɛ́ɛ ná ɖɔ é bǐ ganjí. Mi ɖó ayi te, bo xwedó nǔ e un zɔ́n yě lɛ́ɛ bǐ, bó flín nǔ e Mawu Mavɔmavɔ, Mawu mitɔn bló xá Miliamu ɖo ali jí hwenu e mi tɔ́n sín Ejípu é. Ényí mi nya nǔɖé nú nɔzo mitɔn ɔ́, mi ma byɔ́ xɔ tɔn mɛ bó yi yí nǔɖé ɖó gbanu ó. Kɔ́xo wɛ mi ná nɔ bɔ mɛ e mi nya nǔ ná ɔ́ ná sɔ́ nǔ e ná sɔ́ ɖó gbanu wɛ é ɖe é wá nú mi. Ényí mɛ ɔ́ má ɖó nǔɖé ǎ, bɔ awu tɔn ɖaxó ɔ́ wɛ é sɔ́ ɖó gbanu ɔ́, mi ná hɛn bɔ ayǐ ná hɔ́n dó ǎ. Ényí hwe yi xɔ ɔ́, mi ná sɔ́ wá n'i, bɔ é ná dó awu ɔ́ bó yi xɔ, bó ná xo ɖɛ nú mi. Mi bló mɔ̌ ɔ́, é ná nyí nǔ ɖagbe bɔ mi ná wa ɖo Mawu Mavɔmavɔ, Mawu mitɔn nukɔn. Mɛ e ɖo azɔ̌ wa nú mi wɛ ɔ́, ényí mɛ ɔ́ nyí mɛ má ɖó mɛɖé kpó é nyí wamamɔnɔ kpó ɔ́, mi ɖǒ ná táfú i ǎ. É na bó nyí nɔví mitɔn kpó é nyí jǒnɔ e wá ɖo to mitɔn mɛ lɛ́ɛ ɖě kpó ɔ́, mi ɖó ná táfú i gbeɖé ǎ. Gbe e gbe é wa azɔ̌ nú mi ɔ́ jɛ́n mi ná sú axɔ́ ɛ, hwe ná yi xɔ có mi ná sú axɔ́ ɛ ǎ. Đó é ɖó nǔɖé ǎ, bɔ énɛ́ mi kɔtán dó wɛ é ɖe. Mi má nú é jɛ hwɛ mitɔn nú Mawu Mavɔmavɔ ó, ɖó hwɛ wɛ é ná nyí, bó nɔ kɔ nú mi. È nǎ hu tɔ́ ɖó vǐ tɔn nu ǎ. È nǎ hu vǐ ɖó tɔ́ tɔn nu ǎ. Mɛ e wa nǔ nyi do é wɛ è nǎ hu ɖó nǔ e é wa ɔ́ nu. Mi ma dó hwɛ agɔ nú jǒnɔ e ɖo to mitɔn mɛ lɛ́ɛ ɖě, abǐ tɔ́cyɔvǐ ɖé ó. Mi ma yí avɔ asúkúsi tɔn ɖó gbanu ó. Mi ná flín ɖɔ kannumɔ wɛ émí kó nyí ɖo Ejípu, bɔ Mawu Mavɔmavɔ, Mawu mitɔn wá hwlɛ́n mi ɖ'é mɛ. Énɛ́ ɔ́ wú wɛ un zɔ́n mi ɖɔ mi ní bló ɖó xó énɛ́ lɛ́ɛ e un ɖɔ nú mi din é jí. Ényí mi ya jinukún ɖo gle mitɔn mɛ, bó wɔn nǔkúnkɔ ɖě sɔ́ nyi gle ɔ́ mɛ hǔn, mi ma lɛ́ kɔ bó yi sɔ́ ó. Nǔkúnkɔ énɛ́ ɔ́ ná nyí jǒnɔ e ɖo to ɔ́ mɛ lɛ́ɛ tɔn, tɔ́cyɔvǐ lɛ́ɛ kpó asúkúsi lɛ́ɛ kpó tɔn. Mi bló mɔ̌ ɔ́, Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí. Ényí mi gbɛ olívu mitɔn ɔ́, mi sɔ́ ná lɛ́ vɔ́ wá gbɛ azɔn wegɔ́ ɔ́ ǎ; éé kpo ɔ́ ná nyí jǒnɔ lɛ́ɛ tɔn, tɔ́cyɔvǐ lɛ́ɛ kpó asúkúsi lɛ́ɛ kpó tɔn. Mi gbɛ vǐwun mitɔn ɔ́, mi ná lɛ́ wá gbɔn jí, bó gbɛ azɔn wegɔ́ ɔ́ ǎ; éé kpo lɛ́ɛ ná nyí jǒnɔ lɛ́ɛ tɔn, tɔ́cyɔvǐ lɛ́ɛ kpó asúkúsi lɛ́ɛ kpó tɔn. Mi ná flín ɖɔ kannumɔ wɛ émí ko nyí ɖo Ejípu. Énɛ́ ɔ́ wú wɛ un zɔ́n mi ɖɔ mi ní bló ɖó xó énɛ́ lɛ́ɛ e un ɖɔ nú mi din lɛ́ɛ jí. Ayǐ ɖokpó sixú wá hɔ́n, bɔ Izlayɛ́li ví we ná ɖɔ jlɛ, bó ná wá hwɛ nukɔn; mɛ e nyɔ́ hwɛ ɔ́, è nǎ ɖɔ é nyɔ́ hwɛ; mɛ e ka kú hwɛ ɔ́, è nǎ ɖɔ é kú hwɛ. Ényí é byɔ́ ɖɔ è nǎ xo mɛ e kú hwɛ ɔ́, hwɛɖɔtɔ́ ɔ́ ná sɔ́ ɛ mlɔ́ ayǐ, bɔ è nǎ sɛ́n bǎ nabí e jɛ xá hwɛ e é hu ɔ́ n'i, ɖo hwɛɖɔtɔ́ ɔ́ nukɔn. Nǔ e è nǎ dó e ɔ́ ná hú azɔn kanɖé ǎ, é má nyí mɔ̌ ǎ ɔ́, é sɔ́ ná ɖó wi ɖé ta ɖo nukún mitɔn mɛ ǎ. Mi ma dó aja nu nú nyibú e ɖo nǔkún só ɖó afɔ wú wɛ é ó. Ényí nɔví nɔví ɖé lɛ́ɛ ɖo kpɔ́, nú mɛ ɖokpó da asi bó má ko ji vǐ súnnu n'i ǎ, bó kú ɔ́, nyɔ̌nu ɔ́ ná nyí mɛ ɖěvo tɔn zɛ nɔví tɔn lɛ́ɛ wú ǎ; asú tɔn nɔví ɖokpó ná sɔ́ ɛ da, bó ná nɔ asú tɔn tɛn mɛ. Vǐ súnnu nukɔntɔn e nyɔ̌nu ɔ́ ná ji é ná nyí vǐ nú mɛ e kú é. Énɛ́ ɔ́, nyǐkɔ tɔn ná bú ɖo Izlayɛ́li gbeɖé ǎ. Ényí mɛ ɔ́ má ká jló ná da nɔví tɔn sín asi ǎ ɔ́, nyɔ̌nu ɔ́ ná yi tomɛxó lɛ́ɛ gɔ́n ɖo toxo ɔ́ sín hɔntogbó jí, bó ná ɖɔ nú yě ɖɔ: “Asú ce nɔví gbɛ́ ɖɔ émí kún ná hɛn nɔví émítɔn sín nyǐkɔ ɖó te ɖo Izlayɛ́li ó. Asú ce nɔví jló ná nɔ asú do mɛ nú mì ǎ.” Énɛ́ ɔ́, tomɛxó lɛ́ɛ ná ylɔ́ ɛ, bó ná ɖɔ xó n'i. Ényí é gbɛ́ jɛ́n wɛ ɔ́, nɔví tɔn si ɔ́ ná sɛkpɔ́ ɛ ɖo tomɛxó lɛ́ɛ bǐ nukún mɛ, bó ná ɖe afɔkpa sín afɔ n'i, bó ná tún atán dó nukún mɛ n'i, bó ná yí xó, bó ɖɔ: “Lě e è nɔ wa nǔ gbɔn nú mɛ e ma jló ná ɖó donu nú nɔví tɔn ǎ é nɛ́.” Énɛ́ ɔ́, bɛ́ sín gbe nɛ́ gbe ɔ́, è nǎ nɔ́ ylɔ́ xwédo tɔn ɖo Izlayɛ́li ɖɔ: “Mɛ e è ɖe afɔkpa ná ɔ́ sín xwédo.” Ayǐ ɖokpó sixú wá hɔ́n, bɔ súnnu we ná ɖo hun xo wɛ; nú mɛ ɖokpó sín asi wá asú tɔn hwlɛ́n gbé, bó zunfán súnnuxwé mɛ ɖě ɔ́ tɔn ɔ́, è nǎ sɛ́n alɔ nyɔ̌nu énɛ́ ɔ́ tɔn; è nǎ kú nǔbláwǔ n'i ǎ. Mi ma ɖó nǔdagan alɔkpa we ɖo glo mitɔn mɛ bó ná zé éé kló ɔ́ dó xɔ nǔ ná, lobo ná zé éé hwe ɔ́ dó sa nǔ ná ó. Mi ma ɖó nǔjlɛ́ká alɔkpa we ɖo xwé mitɔn gbe bó ná zé éé kló ɔ́ dó xɔ nǔ ná, lobo ná zé éé hwe ɔ́ dó sa nǔ ná ó. Lo ɔ́, nǔdagan e sɔgbe é kpó nǔjlɛ́ká e sɔgbe é kpó wɛ mi ná ɖó. Énɛ́ ɔ́, Mawu Mavɔmavɔ, Mawu mitɔn ná dó azǎn azǎn jí nú mi ɖo to e ná ná mi wɛ é ɖe é mɛ. Mɛ ɖěbǔ bló mɔ̌ ɔ́, hwɛ wɛ é hu; nǔ e Mawu Mavɔmavɔ, Mawu mitɔn gbɛ́ wǎn ná ɔ́ wɛ é wa. Mi flín nǔ e Amalɛ́ki ví lɛ́ɛ wa xá mi hwenu e mi gosín Ejípu ja xwé é. Yě ɖó sísí ɖěbǔ nú Mawu ǎ. Énɛ́ ɔ́ wú wɛ hwenu e nǔ cikɔ nú mi bǐ bɔ mi ma sɔ́ ɖó gǎn ɖěbǔ ǎ é ɔ́, yě gbo ali nú mɛ mitɔn e kpo ɖo gǔdo lɛ́ɛ. Din ɔ́, Mawu Mavɔmavɔ, Mawu mitɔn ná kplá mi yi to e ná ná mi wɛ é ɖe bɔ é ná nyí mitɔn ɔ́ mɛ, bó ná cyɔ́n alɔ mi jí, bɔ mi ná gló kɛntɔ́ e lɛ́dó mi lɛ́ɛ bǐ. Hwenɛ́nu ɔ́, mi ná sú Amalɛ́ki ví lɛ́ɛ sín kún dó, bɔ mɛɖé sɔ́ ná flín yě gbeɖé ɖo ayǐkúngban jí fí ǎ. Mi ɖó kɛ́n jí. Mi ná yi to e Mawu Mavɔmavɔ, Mawu mitɔn ná ná mi bɔ é ná nyí mitɔn ɔ́ mɛ, bó ná yí to ɔ́. Ée mi ná yi jɛ to ɔ́ mɛ ɔ́, jinukún e ná nɔ́ nyɔ́ dó nukɔn ɖo to ɔ́ mɛ lɛ́ɛ ɔ́, mi ná nɔ́ ɖe ɖě ɖó vo bó bɛ́ dó xasun mɛ, bó ná nɔ́ yi fí e Mawu Mavɔmavɔ, Mawu mitɔn ná sɔ́, bó ná ɖe susu tɔn xlɛ́ ɖe é. Mi jɛ dɔ̌n ɔ́, mi ná yi vɔ̌sánú-xwlémawutɔ́ e jí azɔ̌ ɖe gbe nɛ́ gbe ɔ́ gɔ́n, bɔ mɛ ɖokpó ɖokpó ná sɔ́ xasun tɔn jó, bó ná ɖɔ: “Un ɖo ɖiɖɔ nú Mawu Mavɔmavɔ, Mawu towe wɛ ɖɔ un wá to e sín akpá é dó nú tɔ́gbó mǐtɔn lɛ́ɛ bó xwlé nǔ d'é jí é mɛ égbé.” Vɔ̌sánú-xwlémawutɔ́ ɔ́ ná yí xasun ɔ́ ɖo así mitɔn, bó ná sɔ́ ɖó vɔ̌sákpe Mawu Mavɔmavɔ, Mawu mitɔn tɔn nukɔn. Bɔ mi mɛ ɖokpó ɖokpó ná yí xó ɖo Mawu Mavɔmavɔ, Mawu mitɔn nukɔn, bó ná ɖɔ: “Tɔ́ ce ɔ́, Alamunu wɛ, é ɖó fí ɖé tawun bó nɔ́ nɔ ɖ'ayǐ ǎ. É nɔ́ ɖo yiyi wɛ, bó wá yi Ejípu, bó nyí jǒnɔ ɖo fínɛ́, é kpó mɛ kwín we e é kplá lɛ́ɛ kpó. É ɖo fínɛ́ káká bɔ mɛ tɔn lɛ́ɛ wá sukpɔ́ káká bó húzú togun ɖaxó ɖokpó, bó syɛ́n káká. Ejípunu lɛ́ɛ ká wá jɛ ya dó nú mǐ jí, bó jɛ mǐ táfú jí, bó nɔ́ sɔ́ azɔ̌ syɛ́nsyɛ́n lɛ́ɛ dó así nú mǐ. Énɛ́ ɔ́, mǐ sú xó ylɔ́ Mawu Mavɔmavɔ, Mawu tɔ́gbó mǐtɔn lɛ́ɛ tɔn, bɔ Mawu Mavɔmavɔ se gbe mǐtɔn; é mɔ ɖɔ mǐ ɖo ya ji wɛ, é mɔ ɖɔ è ɖo mǐ táfú wɛ; é mɔ ɖɔ nǔ mǐtɔn blá wǔ. Énɛ́ ɔ́, Mawu Mavɔmavɔ zán hlɔ̌nhlɔ́n bǐ, nǔ hu ado, nǔ syɛ́nsyɛ́n bǐ, nǔjíwǔ kpó nǔjlɛ́jlɛ́ kpó dó ɖe mǐ tɔ́n sín Ejípu. É kplá mǐ wá fí élɔ́, bó ná to élɔ́ mǐ; to e mɛ wǐin kpó nyibúnɔ́sin kpó nɔ sa ɖe é. Énɛ́ ɔ́ wú wɛ un hɛn jinukún nukɔntɔn e un ya ɖo ayǐkúngban e é ná mì é jí wá n'i.” Énɛ́ ɔ́ gúdo ɔ́, mi mɛ ɖokpó ɖokpó ná bɛ́ nǔ lɛ́ɛ ɖó Mawu Mavɔmavɔ, Mawu mitɔn nukɔn, bó ná ɖe kɔ́ n'i. Énɛ́ ɔ́ gúdo ɔ́, mi kpó Levíi ví lɛ́ɛ kpó, jǒnɔ e ɖo to mitɔn mɛ lɛ́ɛ kpó bǐ ná j'awǎ. Mi ná j'awǎ, ɖó ɖagbe e Mawu Mavɔmavɔ, Mawu mitɔn bló nú mi kpó xwédo mitɔn kpó é tamɛ. Xwe atɔn mɛ atɔn mɛ wɛ mi ná nɔ́ ná mǎɖówǒ. Hǔn xwe atɔn mɛ atɔn mɛ ɔ́, mi mɛ ɖokpó ɖokpó ná nɔ́ ɖe mǎɖówǒ ɖo nǔ e mi dó lɛ́ɛ bǐ jí, bó ná nɔ́ ná Levíi ví lɛ́ɛ, jǒnɔ e ɖo to mitɔn mɛ lɛ́ɛ, tɔ́cyɔvǐ lɛ́ɛ kpó asúkúsi lɛ́ɛ kpó, bɔ yě ná nɔ́ ɖu nǔ gɔ́ xo ɖo gɔ̌n mitɔn. Mi mɛ ɖokpó ɖokpó ná ɖɔ ɖo Mawu tɔn nukɔn ɖɔ: “Nǔkún e un sɔ́ ɖó vo nú we ɔ́, un ɖe ɖě kpo ǎ, un nǎ Levíi ví lɛ́ɛ, jǒnɔ lɛ́ɛ, tɔ́cyɔvǐ lɛ́ɛ kpó asúkúsi lɛ́ɛ kpó, bɔ é kpé yě lě e a ɖɔ gbɔn é. Un gba sɛ́n e a dǒ lɛ́ɛ ɖě ǎ, un ka wɔn nǔ e a zɔ̌n mì lɛ́ɛ ɖě ǎ. Nǔ e nyí towe ɔ́, un zán ɖě hwenu e un ɖo aluwɛ mɛ é ǎ. Un ka ɖe mǎɖówǒ lɛ́ɛ ɖě hwenu e un nyí mɛ blíblí é ǎ. Un ká zán ɖě hwenu e cyɔ kú mì é ǎ. Un se xó e Mawu Mavɔmavɔ, Mawu ce ɖɔ é, un bló lě e a zɔ̌n mì gbɔn é. Nyi kɔ kpɔ́n mǐ jí sín jǐxwé dɔ̌n. Xo ɖɛ dó Izlayɛ́li togun towe ɔ́ jí; xo ɖɛ dó ayǐkúngban e a nǎ mǐ lě e a ko dó akpá tɔn nú tɔ́gbó mǐtɔn lɛ́ɛ gbɔn é jí. Xo ɖɛ dó to élɔ́ e mɛ wǐin kpó nyibúnɔ́sin kpó nɔ sa ɖe é jí.” Mɔyízi ɖɔ: “Égbé ɔ́, Mawu Mavɔmavɔ, Mawu mitɔn zɔ́n mi ɖɔ mi ní nyi sɛ́n e émí dó lɛ́ɛ, bó wa nǔ e émí zɔ́n lɛ́ɛ. Mi ná ɖó kan dó sɛ́n énɛ́ lɛ́ɛ wú, bó ná nyi kpó ayi mitɔn bǐ kpó, kpó lǐndɔ̌n mitɔn bǐ kpó. Égbé din ɔ́, mi wɛ byɔ́ Mawu Mavɔmavɔ bɔ é dó akpá nú mi ɖɔ émí ná nyí Mawu mitɔn, bɔ mi ná xwedó e, bó ná nyi sɛ́n tɔn lɛ́ɛ, bó ná wa nǔ e é zɔ́n lɛ́ɛ, bó ná xwedó gbeta tɔn lɛ́ɛ, bó ná se tónú n'i. Mawu Mavɔmavɔ ka byɔ́ mi, bɔ mi dó akpá n'i ɖɔ émí ná nyí togun é ɖokpónɔ géé tɔn, lě e é kó ɖɔ gbɔn é, bó ná bló nǔ e é zɔ́n lɛ́ɛ bǐ. Énɛ́ ɔ́, é ná bló bɔ mi ná hú gǎn togun e é kó bló lɛ́ɛ bǐ ɖo susu mɛ, ɖo ɖɛkpɛ mɛ; nyǐkɔ mitɔn ná nɔ aga nú yě bǐ, bɔ mi ná nyí togun e Mawu Mavɔmavɔ, Mawu mitɔn sɔ́ ɖó vo lě e é kó dó akpá tɔn nú mi gbɔn é.” Mɔyízi kpó tomɛxó lɛ́ɛ kpó wá Izlayɛ́li togun ɔ́ nukɔn, bɔ Mɔyízi ɖɔ nú togun ɔ́ ɖɔ: “Sɛ́n e dó nú mi wɛ un ɖe égbé din lɛ́ɛ ɔ́, mi ná nyi bǐ sésé. Gbe e gbe mi ná dó asá Judɛ́ɛn tɔ ɔ́ ɖidó to e ná mi wɛ Mawu Mavɔmavɔ, Mawu mitɔn ɖe ɔ́ mɛ ɔ́, mi ná tun awǐnnya ɖaxó ɖaxó te, bó ná sá nǔ wěwé dó, bó ná wlán sɛ́n lɛ́ɛ bǐ dó awǐnnya lɛ́ɛ wú. Mɔ̌ wɛ mi ná bló cóbó ná byɔ́ to e ná mi wɛ Mawu Mavɔmavɔ, Mawu mitɔn ɖe ɔ́ mɛ, bɔ é ná nyí mitɔn lě e é kó dó akpá tɔn nú tɔ́gbó mitɔn lɛ́ɛ gbɔn é; to énɛ́ mɛ ɔ́, wǐin kpó nyibúnɔ́sin kpó wɛ nɔ́ sa tɔ ɖ'é mɛ. Nú mi dó asá Judɛ́ɛn tɔ ɔ́, mi ná tun awǐnnya e xó un ɖɔ nú mi lɛ́ɛ te ɖo Ebalu só ɔ́ jí, bó ná sá nǔ wěwé dó. Fínɛ́ ɖokpó ɔ́ wɛ mi ná mɛ vɔ̌sákpe ɖe nú Mawu Mavɔmavɔ, Mawu mitɔn; awǐnnya e wú alǐnnyánú ɖěbǔ má jɛ kpɔ́n gbeɖé ǎ lɛ́ɛ wɛ mi ná dó mɛ vɔ̌sákpe ɔ́ ná. Awǐnnya e wú è má dó akpa ɖo fí ɖěbǔ ǎ lɛ́ɛ wɛ mi ná dó mɛ vɔ̌sákpe Mawu Mavɔmavɔ, Mawu mitɔn tɔn ná. Fínɛ́ wɛ mi ná nɔ́ sá vɔ̌ e è nɔ dó zo lɛ́ɛ nú Mawu Mavɔmavɔ, Mawu mitɔn ɖe. Mi ná sá kɔnɖókpɔ́ vɔ́ ɔ́, bó ná ɖu mitɔn ɔ́ ɖo fínɛ́, bó ná j'awǎ ɖo Mawu Mavɔmavɔ, Mawu mitɔn nukɔn. Mi ná wlán sɛ́n e un xa nú mi lɛ́ɛ bǐ ɖó awǐnnya e mi tun te lɛ́ɛ wú, bɔ é ná ɖi wun ganjí.” Énɛ́ ɔ́ gúdo ɔ́, Mɔyízi kpó vɔ̌sánú-xwlémawutɔ́ Levíi ví lɛ́ɛ kpó wá togun ɔ́ nukɔn, bɔ Mɔyízi ɖɔ: “Izlayɛ́li ví e mi, mi nɔ tóó bó se. Égbé din ɔ́, mi húzú togun Mawu Mavɔmavɔ, Mawu mitɔn tɔn. Hǔn mi bo ɖótó Mawu Mavɔmavɔ, Mawu mitɔn, bó nyi sɛ́n tɔn e un xa nú mi égbé lɛ́ɛ bǐ.” Gbe énɛ́ gbe ɖokpó ɔ́, Mɔyízi ɖɔ nú togun ɔ́ ɖɔ: Ée mi ná dó asá Judɛ́ɛn tɔ ɔ́, akɔta e ná yi nɔ Galizímu só ɔ́ jí, bó ná xo ɖɛ tɔn dó togun ɔ́ jí lɛ́ɛ ɖíe: Akɔta Sinmɛnyɔ́ɔ tɔn, Levíi tɔn, Judáa tɔn, Isakáa tɔn, Jozɛ́fu tɔn kpó Bɛnjamɛ́ɛ tɔn kpó. Akɔta e ka ná yi nɔ Ebalu só ɔ́ jí, bó ná dó nu togun ɔ́ lɛ́ɛ ɖíe: Akɔta Hwlibɛ́ni tɔn, Gadi tɔn, Acɛ́ɛ tɔn, Zabulɔ́ɔn tɔn, Dan tɔn kpó Nɛfutali tɔn kpó. Levíi ví lɛ́ɛ ná yí xó, bó ná zé gbe d'aga bó ná ɖɔ xó élɔ́ lɛ́ɛ nú Izlayɛ́li ví súnnu lɛ́ɛ bǐ: “Heelú mɛ e kpa bǒcyɔ, abǐ mɛ e sínsín gan dó kɔn bǒcyɔ bó nɔ́ sɛn ɖo nǔglɔ́ lɛ́ɛ! Mawu Mavɔmavɔ gbɛ́ wǎn nú nǔ e gbɛtɔ́ nɔ́ bló bó nɔ́ sɛn lɛ́ɛ.” Bɔ togun ɔ́ bǐ ná ɖɔ: “ Amǐ.” “Heelú mɛ e dó vɛ̌ nú tɔ́ tɔn kpó nɔ tɔn kpó é!” Bɔ togun ɔ́ bǐ ná yí gbe ɖɔ: “Amǐ.” “Heelú mɛ e sɛ tɛn nú nɔzo tɔn sín dogbó lɛ́ɛ é!” Bɔ togun ɔ́ bǐ ná ɖɔ: “Amǐ.” “Heelú mɛ e dɔn nukúntíntɔ́nnɔ bú ali é!” Bɔ togun ɔ́ bǐ na ɖɔ: “Amǐ.” “Heelú mɛ e nɔ dó hwɛ agɔ nú jǒnɔ abǐ tɔ́cyɔvǐ, abǐ asúkúsi é!” Bɔ togun ɔ́ bǐ ná ɖɔ: “Amǐ.” “Heelú mɛ e ba tɔ́ ɔ́ si é! Heelú i ɖó é kɔ́n tɔ́ ɔ́ sín wi.” Bɔ togun ɔ́ bǐ ná yí gbe ɖɔ: “Amǐ.” “Heelú mɛ e ɖó xó xá kanlin é!” Bɔ togun ɔ́ bǐ ná ɖɔ: “Amǐ.” “Heelú mɛ e ɖó xó xá nɔ tɔn, abǐ tɔ́ tɔn sín vǐ é!” Bɔ togun ɔ́ bǐ ná ɖɔ: “Amǐ.” “Heelú mɛ e ɖó xó xá asi tɔn nɔ é!” Bɔ togun ɔ́ bǐ ná ɖɔ: “Amǐ.” “Heelú mɛ e hu mɛ ɖo nǔglɔ́ é!” Bɔ togun ɔ́ bǐ ná ɖɔ: “Amǐ.” “Heelú mɛ e yí gbe bó ɖu nǔ ɖo nǔ mɛ, bó hu xomɛvɔ́nɔ é!” Bɔ togun ɔ́ bǐ ná yí gbe ɖɔ: “Amǐ.” “Heelú mɛ e ma ná nyi sɛ́n e un xa nú mi lɛ́ɛ bǐ ǎ é!” Bɔ togun ɔ́ bǐ ná ɖɔ: “Amǐ.” Ényí mi ɖótó Mawu Mavɔmavɔ, Mawu mitɔn nǔgbó, bó ɖó ayi te, bó bló nǔ e é zɔ́n mi, bɔ un ɖo ɖiɖɔ nú mi wɛ égbé din lɛ́ɛ bǐ ɖ'é jí ɔ́, Mawu Mavɔmavɔ, Mawu mitɔn ná bló, bɔ mi ná hú gǎn togun e ɖo gbɛ ɔ́ mɛ lɛ́ɛ bǐ. Đɛ e Mawu Mavɔmavɔ, Mawu mitɔn xo dó mi jí bɔ mi se tónú n'i ɔ́, é ná nyí ɖagbe nú mi lɛ́ɛ ɖíe: Mawu Mavɔmavɔ ná xo ɖɛ dó mi jí ɖo toxo mitɔn lɛ́ɛ mɛ, bó ná xo dó mi jí ɖo gle mitɔn lɛ́ɛ mɛ. Mawu Mavɔmavɔ ná xo ɖɛ dó vǐ e mi ná ji lɛ́ɛ, jinukún e mi ná sɔ́ lɛ́ɛ, gbɔ̌ mitɔn lɛ́ɛ, lɛ̌ngbɔ́ mitɔn lɛ́ɛ kpó nyibú mitɔn lɛ́ɛ kpó jí, bɔ yě ná sukpɔ́. Mawu Mavɔmavɔ ná xo ɖɛ dó mi jí bɔ nǔɖuɖu ná hán mi ǎ: atínsínsɛ́n ná gɔ́ xasun mitɔn lɛ́ɛ, jinukún ná gɔ́ kɔ́zún mitɔn lɛ́ɛ. Mawu Mavɔmavɔ ná xo ɖɛ dó nǔ e mi ná wa lɛ́ɛ bǐ jí. Ényí kɛntɔ́ wá tɔ́n ahwan mi ɔ́, Mawu Mavɔmavɔ ná bló bɔ mi ná ɖu ɖo kɛntɔ́ jí. Ényí ali ɖokpó wɛ yě gbɔn bó wá tɔ́n ahwan mi ɔ́, ali tɛ́nwe wɛ yě ná hɔn gbɔn bó yi. Mawu Mavɔmavɔ, Mawu mitɔn ná xo ɖɛ dó nǔkún e mi ná ya dó agɔ̌ mɛ lɛ́ɛ bǐ jí, bó ná dó acɛ nǔ e mi ná wa lɛ́ɛ bǐ jí. É ná xo ɖɛ dó mi jí ɖo to e é ná ná mi ɔ́ mɛ. Ényí mi bló nǔ e Mawu Mavɔmavɔ, Mawu mitɔn zɔ́n mi lɛ́ɛ, bó wa jlǒ tɔn ɔ́, é ná sɔ́ mi bɔ mi ná nyí togun tɔn lě e é kó dó akpá tɔn gbɔn nú mi é. Togun e ɖo gbɛ ɔ́ mɛ lɛ́ɛ bǐ ná mɔ ɖɔ Mawu Mavɔmavɔ tɔn wɛ mi nyí, bó ná nɔ́ ɖi xɛsi nú mi. Mawu Mavɔmavɔ ná ná vǐ gěgé mi, kanlin mitɔn lɛ́ɛ ná ji gba, bɔ jinukún e mi ná sɔ́ lɛ́ɛ ná sukpɔ́. É ná bló mɔ̌, bó dó wa ɖagbe nú mi ɖo to e é ɖɔ nú tɔ́gbó mitɔn lɛ́ɛ ɖɔ émí ná ná yě ɔ́ mɛ. Mawu Mavɔmavɔ ná hun agbanxɔ tɔn ɖagbe ɖagbe e ɖo jǐnukúnsin ɔ́, bɔ jǐ ná nɔ́ ja dó ayǐkúngban mitɔn jí, bɔ nǔ e mi ná wa lɛ́ɛ bǐ ná nyɔ́ nú mi. Mi ná nɔ́ nya nǔ nú akɔta gěgé, midɛɛ lɛ́ɛ ká ná nya nǔɖé ɖo mɛɖé sí ǎ. Mawu Mavɔmavɔ ná sɔ́ mi ɖó nukɔn nú akɔta lɛ́ɛ bǐ; mi ná nɔ gǔdo ǎ. Aga wɛ mi ná nɔ nú yě tɛgbɛ; mi sɔ́ ná nɔ do ǎ. Amɔ̌, cóbónú nǔ ná nyí mɔ̌ ɔ́, nǔ e Mawu Mavɔmavɔ, Mawu mitɔn zɔ́n bɔ un ɖo ɖiɖɔ nú mi wɛ égbé din lɛ́ɛ ɔ́, mi ná xwedó bǐ dó wa azɔ̌ ná ganjí. Mi ɖó ná zɛ sín ali e xlɛ́ mi wɛ un ɖe ɔ́ jí, bó ná yi sɛn nǔ ɖěvo ǎ. Mi ma ka se Mawu Mavɔmavɔ, Mawu mitɔn sín gbe bó nɔ acéjí, bó bló nǔ e é zɔ́n mi lɛ́ɛ, bó nyi sɛ́n e é dó nú mi, bɔ un ɖo ɖiɖɔ nú mi wɛ égbé din lɛ́ɛ ǎ ɔ́, nǔ nyanya e ná gbo mi lɛ́ɛ ɖíe: É ná dó nu mi ɖo toxo ɔ́ mɛ, bó ná dó nu mi ɖo gle lɛ́ɛ mɛ. É ná dó nu xasun mitɔn lɛ́ɛ bɔ yě ná jɛ vɔ̌, bó dó nu kɔ́zún mitɔn lɛ́ɛ bɔ yě ná jɛ vɔ̌. É ná dó nu vǐ e ná tɔ́n sín xo mitɔn mɛ lɛ́ɛ, bó dó nu nǔkún e ná nyɔ́ ɖo ayǐkúngban mitɔn jí lɛ́ɛ, bó dó nu nyibú mitɔn asi lɛ́ɛ, bó dó nu gbɔ̌ mitɔn asi lɛ́ɛ. É ná dó nu nǔ e mi ná wa lɛ́ɛ bǐ. Mi sɔ́ nǔ ɖěbǔ bó ná wa ɔ́, Mawu Mavɔmavɔ ná dó nu. É ná dó bǐ agudu, ɖě ná yi ta ǎ, káká bɔ kún mitɔn bǐ ná sú dó, ɖó hwɛ énɛ́ e mi hu ɔ́ jǒ wɛ mi jó Mawu Mavɔmavɔ dó. Mawu Mavɔmavɔ ná sɛ́ jɛmɛjí dó mi ɖo to e mɛ mi xwe é mɛ, bɔ mi ná ɖo kúkú wɛ káká bɔ kún mitɔn bǐ ná sú dó. Mawu Mavɔmavɔ ná ɖó gǒxúxú kpó flɔ́flɔ́ kpó nú mi, abǐ é ná ɖó avivɔ nú mi. É ná sɛ́ akú dó, jɔhɔn zozo ná fyɔ́ nǔkún mitɔn lɛ́ɛ dó te, abǐ bǐ ná nyɔ. Nǔ nyanya énɛ́ lɛ́ɛ bǐ ná ɖo mi gbo wɛ káká bɔ mi bǐ ná vɔ. Jǐnukúnsin e ɖo ta mitɔn nu ɔ́ ná syɛ́n ganvɔ ɖɔhun, bɔ ayǐkúngban e jí gbɔn wɛ mi ɖe ɔ́ ná syɛ́n gan ɖɔhun. Mawu Mavɔmavɔ ná sɛ́ kɔ́ kpó afúntúntún kpó dó sín jǐxwé, bɔ yě ná nɔ́ ja dó ayǐkúngban mitɔn jí ɖó jǐ do mɛ, bɔ é ná ɖo jija wɛ mɔ̌ káká bɔ mi bǐ ná vɔ. Mawu Mavɔmavɔ ná jó kɛntɔ́ dó bɔ kɛntɔ́ ná ɖu ɖo mi jí. Nú ali ɖokpó wɛ mi gbɔn bó yi tɔ́n ahwan kɛntɔ́ ɔ́, ali tɛ́nwe wɛ mi ná hɔn gbɔn ɖo nukɔn tɔn, bɔ axɔ́súɖuto e ɖo gbɛ ɔ́ mɛ é ɖěbǔ mɔ nǔ e gbo mi ɔ́, xɛsi ná jɛ jǐ tɔn. Cyɔ mitɔn ná nyí nǔɖuɖu nú xɛ kpó kanlin kpó, bɔ mɛɖé ká ná ɖe lɔ bó dó tagba nú yě ǎ. Mawu Mavɔmavɔ ná sɛ́ nǔtitɛ e é sɛ́ dó Ejípunu lɛ́ɛ ɔ́ dó mi, bó ná sɛ́ yonutúntún dó mi, bó ná sɛ́ cíɖɔ́ kpó akli kpó dó mi, bɔ ɖě ká ná gbɔ gbeɖé ǎ. Mawu Mavɔmavɔ ná dó taɖu mi, é ná va nukún mi, é ná dó yɛyi mi. Hwemɛ cíɖíɖí wɛ mi ná nɔ́ dlá avi nukúntíntɔ́nnɔ ɖɔhun. Nǔ e mi ná wa lɛ́ɛ ɖě ná yi ta ǎ. Mi ná nyí gbɛtɔ́ bɔ ayǐ hɔ́n tɛgbɛ ɔ́, è nǎ nɔ táfú, bó ná nɔ́ wló ɖu. Mɛɖé ká ná gɔ́ alɔ nú mi ǎ. Asixɔ́ntɔn e mi ná ɖó ɔ́, mɛ ɖěvo ná da. Xwé e mi ɖésú ná gbá ɔ́, mi ná nɔ mɛ ǎ. Vǐwun e mi ná tun ɔ́, mi ná gbɛ sínsɛ́n tɔn nukɔntɔn ɔ́ vɔ́vɔ́ ǎ. È nǎ hu nyibú mitɔn lɛ́ɛ ɖo nukún mitɔn mɛ, bɔ mi ka ná dó lan tɔn ɖɛ̌ ǎ. È nǎ fin tócí mitɔn lɛ́ɛ ɖo nukún mitɔn mɛ, bɔ yě sɔ́ ná lɛ́ kɔ wá nú mi gbeɖé ǎ. Kɛntɔ́ mitɔn lɛ́ɛ ná bɛ́ lɛ̌ngbɔ́ mitɔn lɛ́ɛ, mi ka ná mɔ mɛɖé d'é wú ǎ. È nǎ bɛ́ vǐ mitɔn súnnu kpó nyɔ̌nu kpó jó nú togun ɖěvo lɛ́ɛ, bɔ mi ná ɖó nukún yě káká bɔ é ná cikɔ. Mi ka sixú wa nǔ ɖěbǔ ǎ. Nǔkún e ná nyɔ́ ɖo ayǐkúngban mitɔn jí lɛ́ɛ kpó nǔ e mi ná jɛ tagba bó wa lɛ́ɛ kpó ɔ́, togun e mi ma tunwun vɔ́vɔ́ ǎ lɛ́ɛ wɛ ná ɖu bǐ. Bɔ ayǐ hɔ́n tɛgbɛ ɔ́, è nǎ nɔ táfú mi, bó ná nɔ́ wló mi ɖu. Nǔ e mɔ wɛ nukún mitɔn ɖe lɛ́ɛ ná zɔ́n bɔ mi ná bɛ́ taɖu. Mawu Mavɔmavɔ ná sɛ́ nǔtitɛ dó mi, bɔ é ná tɛ mi dó koli, bó tɛ mi dó asá; nǔ ná tɛ mi sín afɔkpákpá mɛ káká yi ta; ɖě ká ná gbɔ gbeɖé ǎ. Mawu Mavɔmavɔ ná sɛ́ mi kpó axɔ́sú e mi ná sɔ́ nú miɖée é kpó dó to ɖěvo mɛ, to e mi ma tunwun ǎ, bɔ tɔ́gbó mitɔn lɛ́ɛ lɔ ma tunwun ǎ é mɛ, bɔ mi ná sɛn nǔ ɖěvo lɛ́ɛ ɖo fínɛ́. Mi ná sɛn nǔ e è zě atín dó bló lɛ́ɛ, bó ná sɛn éé è zě awǐnnya dó bló lɛ́ɛ. Bɔ mi nǎ húzú nǔkpínkpɔ́n, winnyánú, nǔkiko ɖo togun e Mawu Mavɔmavɔ ná jó mi bɔ ahwan ná wlí mi hɛn yi mɛ lɛ́ɛ mɛ. Mi ná dó nǔkún gěgé ɖó gle mitɔn mɛ, amɔ̌, wɛn lɛ́ɛ wɛ ná ɖu bǐ, bɔ mi ná mɔ nǔjɔnǔ ɖé ǎ. Mi ná tun vǐwuntín bó kpé nukún d'é wú, mi ka ná nu vɛ̌ɛn tɔn ɖě ǎ; mi ná gbɛ vǐwun lɛ́ɛ vɔ́vɔ́ ǎ, ɖó wǎnvú ná ɖu bǐ. Olívutín mitɔn lɛ́ɛ ná gbɔn to ɔ́ bǐ mɛ, mi ka ná mɔ ami e mi ná sá é vɔ́vɔ́ ǎ, ɖó gloglóe tɔn lɛ́ɛ bǐ ná kɔn nyi ayǐ. Mi ná ji vǐ súnnu bó ji nyɔ̌nu, ɖě ká ná nɔ gɔ̌n mitɔn ǎ; yě bǐ ná yi kannumɔgbénu. Atín mitɔn lɛ́ɛ kpó nǔ e ná wú ɖo gle mitɔn mɛ lɛ́ɛ kpó ɔ́, bɔ ná ɖu bǐ. Mɛ e nyí jǒnɔ ɖo to mitɔn mɛ lɛ́ɛ ɔ́, acɛ yětɔn ná ɖo jijɛ jí wɛ, bɔ mitɔn ná ɖo ɖiɖe kpo wɛ. Yě wɛ na nɔ́ nya nǔ nú mi, midɛɛ ka ná ɖó nǔɖé bó ná nya nú yě ǎ. Jǒnɔ lɛ́ɛ wɛ ná nɔ nukɔn, bɔ midɛɛ lɛ́ɛ ka ná nyí gǔdo nú. Awě énɛ́ lɛ́ɛ bǐ ná xo mi, bɔ nǔ nyanya énɛ́ lɛ́ɛ bǐ ná ɖo gbigbo mi wɛ káká bɔ mi ná vɔ ɖ'é mɛ, ɖó tó e mi má ná ɖó Mawu Mavɔmavɔ, Mawu mitɔn bó nyi sɛ́n tɔn lɛ́ɛ, bó wa nǔ e é zɔ́n mi lɛ́ɛ ǎ é wú. Nǔ énɛ́ lɛ́ɛ ná jɛ dó mi jí, bó ná nɔ́ ɖo nǔ flín mi kpó vǐ mitɔn lɛ́ɛ kpó wɛ káká sɔ́yi. Hǔn, ényí mi ma sɛn Mawu Mavɔmavɔ, Mawu mitɔn kpó xomɛhunhun kpó, kpó awǎjijɛ kpó, kpó ayi mitɔn bǐ kpó hwenu e nǔ nyɔ́ nú mi é ǎ ɔ́, mi ná nɔ xovɛ́, bó nɔ nugblá, bó nɔ mɛ̌, bó nɔ nǔɖé má ɖó, bó sɛn kɛntɔ́ e Mawu Mavɔmavɔ ná sɛ́ dó mi lɛ́ɛ. Azɔ̌ syɛ́nsyɛ́n wɛ Mawu Mavɔmavɔ ná ɖó kɔ jí nú mi káká bó ná sú kún mitɔn dó. Mawu Mavɔmavɔ ná sɛ́ akɔta ɖokpó dó mi sín zɔ vóéé, sín fí e gbɛ ɔ́ kponu ɖó é, bɔ mi ná se gbe e é nɔ́ dó ɔ́ ǎ; akɔta ɔ́ ná kplɔ́ bó wá zɔn mi jí lě e gangan nɔ sá nǔ gbɔn ɔ́. Súnnu e ɖo akɔta énɛ́ ɔ́ mɛ lɛ́ɛ jɔ lan, yě ɖó sísí nú mɛxó ǎ, yɔkpɔ́vú nú ká nɔ́ blá wǔ nú yě ǎ. Yě ná ɖu vǐ e kanlin mitɔn lɛ́ɛ ná ji lɛ́ɛ, bó ná ɖa nǔ e ná nyɔ́ ɖo gle mitɔn mɛ lɛ́ɛ bǐ ɖu, yě ná ɖo ɖuɖu wɛ káká, bɔ kún mitɔn ná sú dó. Yě ná jó vɛ̌ɛn mitɔn ɖě dó nú mi ǎ; yě ná jó jinukún ɖě dó nú mi ǎ, yě ná jó ami mitɔn ɖě dó ǎ, nyibú mitɔn asinɔ lɛ́ɛ kpó gbɔ̌ mitɔn asinɔ lɛ́ɛ kpó ɔ́, yě ná jó ɖěbǔ dó nú mi ǎ: yě ná wa nǔ énɛ́ lɛ́ɛ xá mi káká jɛ hwenu e mi bǐ nǎ vɔ sín ayǐkúngban ɔ́ jí dó é. Yě ná xá mi gbɔn fí e mi ɖe lɛ́ɛ bǐ káká bɔ ahohó e wú mi nɔ ɖeji dó lɛ́ɛ bǐ ná mu. Yě ná xá mi gbɔn toxo e ɖo to e Mawu Mavɔmavɔ, Mawu mitɔn na ná mi lɛ́ɛ bǐ mɛ. Hwenu e kɛntɔ́ mitɔn ná xá mi ɔ́, mi ná ɖo ya ji wɛ káká bó ná jɛ vǐ mi ɖésúnɔ tɔn lɛ́ɛ ɖu jí. Vǐ súnnu kpó nyɔ̌nu kpó e Mawu Mavɔmavɔ ná mi lɛ́ɛ ɔ́, mi ná ɖu lan yětɔn. Súnnu e nyí mɛjɔmɛ, mɛfífá hú mɛ bǐ ɖo toxo mitɔn mɛ ɔ́ ná sɔ́ nukún nyanya dó kpɔ́n nɔví tɔn, bó sɔ́ nukún nyanya dó kpɔ́n asi tɔn e ɖo xɔ tɔn sá é, bó ná sɔ́ nukún nyanya dó kpɔ́n vǐ tɔn e kpo lɛ́ɛ. Đó é táá wá ná vǐ tɔn e hu ɖa ɖu wɛ é ɖe lɛ́ɛ sín lan ɖě yě wútu. Ya e dó nú mi wɛ kɛntɔ́ e xá toxo mitɔn lɛ́ɛ ɖe ɔ́ syɛ́n sɔ mɔ̌, bɔ mɛjɔmɛ, mɛfífá énɛ́ e ɖo toxo mitɔn mɛ ɔ́ sɔ́ ɖó nǔɖé ná ɖu zɛ énɛ́ lɛ́ɛ wú ǎ. Nyɔ̌nu e nyí mɛjɔmɛ, mɛfífá, bó má nɔ́ jló nú afɔ tɔn vɔ́vɔ́ ná tɛ kɔ́ mɛ ǎ é ɔ́, xomɛ na sin i káká bɔ é ná mɔ asú é ɖésúnɔ tɔn dó mɔ nǔ ɖuɖu, bó ná mɔ vǐ é ɖésúnɔ tɔn súnnu kpó nyɔ̌nu kpó dó mɔ nǔ ɖuɖu. É ná ɖu vǐ yɛ̌yɛ́ e é ji tlóló ɔ́, bó ná ɖu nǔzínzán e mɛ vǐ ɔ́ zɔn wá é lɔ. Đó éé nǔ bǐ ná hán é ɔ́, é ná nɔ́ nɔ nǔglɔ́, bó ná nɔ́ ɖu nǔ énɛ́ lɛ́ɛ, hwenu e kɛntɔ́ e ná wá xá toxo ɔ́ lɛ́ɛ ná dɔn toxo ɔ́ dó ya mɛ bɔ é ná vɛ́ jlɛ́ é. Sɛ́n e Mawu zɔ́n bɔ è wlǎn dó wěma élɔ́ mɛ lɛ́ɛ ɔ́, mi kpé nukún dó bǐ wú bó nyi. Mi ɖó sísí nú mɛ e nyǐkɔ tɔn nɔ́ nyí “Mawu Mavɔmavɔ” é; é wɛ nyí Mawu mitɔn. Nyǐkɔ énɛ́ d'agba bó dó xɛsi. Mi ma bló mɔ̌ ǎ ɔ́, Mawu Mavɔmavɔ sín alɔ ná jɛ mi wú, bó jɛ vǐ mitɔn lɛ́ɛ wú; é ná gblé wǔ mi vantankánnyá, bɔ akpa ɔ́ ná kú ǎ; é ná dó azɔn baɖabaɖa lɛ́ɛ mi, bɔ yě ká ná gbɔ ǎ. É ná sɛ́ awě e mi hɔn ná ɖo Ejípu lɛ́ɛ bǐ dó mi, bɔ awě énɛ́ lɛ́ɛ ná xo mi. Mawu Mavɔmavɔ ná sɛ́ azɔn e xó è ma ɖɔ ɖo wěma élɔ́ mɛ fí din ǎ é, kpó nǔ nyanya e xó è ma ɖɔ ɖo wěma élɔ́ mɛ fí din ǎ kpó dó mi. É ná ɖo nǔ wa xá mi wɛ mɔ̌ káká bɔ mi bǐ ná kú. Mi mɛ e ná ko sukpɔ́, bó ná ko cí sunví e ɖo jǐxwé lɛ́ɛ ɖɔhun lɛ́ɛ ɔ́, é sɔ́ ná kpo mi mɛ nabí ɖé ǎ, ɖó tónú e mi ma se nú Mawu Mavɔmavɔ, Mawu mitɔn ǎ ɔ́ ná zɔ́n bɔ nǔ énɛ́ lɛ́ɛ bǐ ná gbo mi. Lě e é nyɔ́ Mawu Mavɔmavɔ nukún mɛ bɔ é wa ɖagbe nú mi, bó ná vǐ mi bɔ mi ji gba ɔ́, mɔ̌ ɖokpó ɔ́ wɛ é ná lɛ́ nɔ mi gúdo gbɔn káká bó ná ɖe mi bǐ sín ayǐkúngban e yí gbé mi ja ɔ́ jí, bó sú kún mitɔn bǐ dó. Mawu Mavɔmavɔ ná gba mi dó gbɔn akɔta e gbɔn gbɛ ɔ́ mɛ é bǐ mɛ, káká yi fí e gbɛ ɔ́ kponu ɖó é, bɔ mi ná sɛn nǔ ɖěvo lɛ́ɛ; nǔmɛsɛn énɛ́ lɛ́ɛ ɔ́, tɔ́gbó mitɔn lɛ́ɛ tunwun ɖě ǎ, mi lɔ ka tunwun ǎ. Nǔmɛsɛn énɛ́ lɛ́ɛ ɔ́, atín kpó awǐnnya kpó yǎyá wɛ è dǒ bló yě. Mi na mɔ agbɔ̌n ɖo akɔta énɛ́ lɛ́ɛ ɖě mɛ gbeɖé ǎ; mi ná mɔ fí e mi ná ɖó afɔ é ǎ. Ayi mitɔn ná jɛ ayǐ ǎ. Nukún mitɔn mɛ ná nɔ́ jɛ ayǐ ǎ, bɔ mi ná nɔ́ ɖo ya ji wɛ. Gbɛ mitɔn sɔ́ ná nyí gbɛ jɔ gbɛ ɖé ǎ. Mi ná nɔ́ ɖo xɛsi jí zǎn kéze. Gbɛ mitɔn ná ɖo gblɛlɛ mɛ. É su zǎnzǎn ɔ́, mi ná nɔ́ ɖɔ: “Ényí zǎn yá wǔ kú din ɔ́, é ná nyɔ́ mɛ!” É ká su gbadanu ɔ́, mi ná nɔ́ ɖɔ: “Ényí ayǐ yá wǔ hɔ́n din ɔ́, é ná nyɔ́ mɛ!” Xɛsi e ná ɖo mi jí ɔ́ kpó nǔ e mɔ wɛ mi ná ɖe lɛ́ɛ kpó ná zɔ́n bɔ mi ná nɔ́ ɖɔ mɔ̌ Mawu Mavɔmavɔ ná lɛ́ lɛ́ kɔ nú mi yi Ejípu, bɔ mi ná gbɔn tɔjíhún mɛ lɛ́ kɔ yi to e mɛ é ɖɔ mi kún sɔ́ ná yi gbeɖé ó ɔ́ mɛ, bɔ mi ná ba ná sa miɖée xá kɛntɔ́ mitɔn lɛ́ɛ bó ná húzú kannumɔ yětɔn; mɛɖé ká ná xɔ mi ǎ. Xó e Mawu Mavɔmavɔ ɖɔ nú Mɔyízi ɖɔ é ní ɖɔ nú Izlayɛ́li ví lɛ́ɛ ɖo Mɔwabu tomɛ dó jɛ akɔ xá yě dó nyǐkɔ émítɔn mɛ ɔ́ ɖíe. Akɔ énɛ́ ɔ́ gɔ́ nú éé é jɛ xá yě ɖo Holɛ́bu só jí é. Mɔyízi ylɔ́ Izlayɛ́li togun ɔ́ bǐ bó ɖɔ nú yě ɖɔ: “Mi ɖésú mɔ nǔ e Mawu Mavɔmavɔ bló ɖo Ejípu xá Ejípu xɔ́sú ɔ́ kpó mɛsɛntɔ́ tɔn lɛ́ɛ bǐ kpó, kpó to ɔ́ bǐ kpó ɖo nukún mitɔn mɛ é. Mi ɖésú mɔ ya tobutóbú e Mawu Mavɔmavɔ dó nú yě lɛ́ɛ, nǔjíwǔ ɖaxó ɖaxó lɛ́ɛ kpó nǔdábaɖa e é jlɛ́ lɛ́ɛ kpó. Nǔ ɖo mɔ̌ có, káká wá jɛ égbé din ɔ́, Mawu Mavɔmavɔ sɔ́ ayi dó xomɛ nú mi, nú mi ná mɔ nǔ jɛ nǔ e ɖo jijɛ wɛ lɛ́ɛ wú ǎ. É ká ná nukún mi nú mi ná dó mɔ nǔ ǎ. É ká ná tó mi, nú mi ná dó se nǔ ǎ.” É kplá mi gbɔn gbětótló mɛ nú xwe kanɖé. Awu e ɖo kɔ mitɔn é ká dóxó ǎ, afɔkpa e ɖo afɔ nú mi é ká dóxó ɖo afɔ nú mi ǎ. Wɔ̌xúxú wɛ nyí nǔɖuɖu e mi nɔ ɖu é ǎ, é ká nyí vɛ̌ɛn abǐ ahan syɛ́nsyɛ́n ɖé wɛ mi nɔ nu hwenu e kɔ nɔ xú mi é ǎ. Nǔ nyí mɔ̌, bónú mi ná tunwun ɖɔ nyɛ Mawu Mavɔmavɔ wɛ nyí Mawu mitɔn. Ée mǐ wá fí ɔ́, Sihɔ́ni Hɛcibɔ́ni xɔ́sú ɔ́ kpó Ɔgu, Basáni xɔ́sú ɔ́ kpó wá tɔ́n ahwan mǐ; mǐ ká ɖu ɖo yě jí. Mǐ yí to yětɔn, bó má nú akɔta Hwlibɛ́ni tɔn kpó Gadi tɔn kpó, kpó akɔta vlɔ́ Manasée tɔn kpó. Énɛ́ ɔ́ wú ɔ́, mi ná kpé nukún dó xó e Mavɔmavɔ ɖɔ dó jɛ akɔ xá mi ɔ́ wú bó bló ɖ'é jí. Énɛ́ ɔ́, mi sɔ́ nǔɖé bó ná wa ɔ́, mi ná mɔ nu tɔn. Izlayɛ́li ví e mi! Mi bǐ xwíí ɖíe ɖo te Mawu Mavɔmavɔ, Mawu mitɔn nukɔn égbé din e: gǎn mitɔn lɛ́ɛ, gǎn e ɖo akɔta mitɔn mɛ lɛ́ɛ, tomɛxó mitɔn lɛ́ɛ, ahwangán mitɔn lɛ́ɛ, mi súnnu e ɖo Izlayɛ́li lɛ́ɛ bǐ, vǐ mitɔn lɛ́ɛ, asi mitɔn lɛ́ɛ, káká jɛ jǒnɔ e ɖo ahwankpá mitɔn mɛ bó ná nɔ́ gbo atín nú mi, bó ná nɔ́ dun sin nú mi lɛ́ɛ kpó jí; mi bǐ xwíí ɖo fí. Mawu Mavɔmavɔ, Mawu mitɔn jɛ akɔ xá mi, bó sɔ́ nǔ slé jí. Akɔ énɛ́ ɔ́ ná bɛ́ azɔ̌ bɛ́ sín égbé. Énɛ́ ɔ́, mi ná húzú togun tɔn, bɔ é ná nyí Mawu mitɔn lě e é kó dó akpá tɔn gbɔn nú tɔ́gbó mitɔn Ablaxámu, Izáki kpó Jakɔ́bu kpó bó xwlé nǔ d'é jí é. Akɔ élɔ́ e un ɖɔ mi ní jɛ xá Mawu Mavɔmavɔ bó xwlé nǔ d'é jí ɔ́, é nyí mi kɛ́ɖɛ́ wɛ Mawu Mavɔmavɔ jɛ xá ǎ. É nyí mɛ e ɖo te fí din ɖo Mawu Mavɔmavɔ, Mawu mǐtɔn nukɔn lɛ́ɛ kɛ́ɖɛ́ tɔn wɛ ǎ, lo ɔ́, é lɛ́ nyí vǐ mǐtɔn e è ma ko ji din ǎ lɛ́ɛ lɔ tɔn. Midɛɛ lɛ́ɛ ɔ́, mi tunwun lě e mǐ nɔ Ejípu gbɔn é, bó tunwun akɔta e yíkúngban jí mǐ gbɔn lɛ́ɛ. Mi mɔ suɖunú e yě nɔ́ sɛn lɛ́ɛ, vodún e yě nɔ́ sɛn lɛ́ɛ, vodún e è sɔ́ atín dó bló lɛ́ɛ, éé è sɔ́ awǐnnya dó bló lɛ́ɛ, éé è sɔ́ kpatágan dó bló lɛ́ɛ, kpó éé è sɔ́ siká dó bló lɛ́ɛ kpó. Mɛ ɖé má ɖo mi mɛ, súnnu oo, nyɔ̌nu, abǐ hwɛndo ɖé oo, abǐ akɔta ɖé bó lɛ́ kɔ sín Mawu Mavɔmavɔ, Mawu mǐtɔn gúdo, bó jɛ vodún akɔta énɛ́ lɛ́ɛ tɔn sɛn jí, bó húzú atín aɖǐvɛ́nɔ ɖo mi mɛ ó. Mɛɖé má ɖo mi mɛ bó se akɔ e mi jɛ din ɔ́, bó wa yɛ nú éɖée bó ɖɔ nú éɖée ɖɔ: “Din ɔ́, un na bo wa nǔ e jló mì lɛ́ɛ ɔ́, un ná vo.” Ényí mɛ ɔ́ ɖɔ mɔ̌ bó dɔn mɛ ɖé, bɔ mɛ ɔ́ jɛ nǔ ɖěvo sɛn jí ɔ́, Mawu Mavɔmavɔ ná sɔ́ hwɛ tɔn kɛ ɛ gbeɖé ǎ; é ná sin xomɛ dó e bɔ nǔ nyanya e sín xó è ɖɔ dó wěma mɛ fí lɛ́ɛ bǐ ná gbo e, bɔ Mawu Mavɔmavɔ ná súnsún nyǐkɔ tɔn sín hwe glɔ́ fí, bɔ mɛɖé sɔ́ ná flín i ǎ. Mawu Mavɔmavɔ ná ɖe e sín akɔta Izlayɛ́li tɔn lɛ́ɛ bǐ mɛ, bɔ awě e xó è ɖɔ ɖo akɔ e è jɛ bó wlán dó sɛ́nwéma ɔ́ mɛ lɛ́ɛ ná xo e. Énɛ́ ɔ́, gbɛtɔ́ e ná wá jɛ mi gúdo lɛ́ɛ ɔ́, vǐ mitɔn e ná wá jɛ fínɛ́ lɛ́ɛ kpó jǒnɔ e ná gosín zɔ wá to mitɔn mɛ lɛ́ɛ kpó mɔ nǔ e Mawu Mavɔmavɔ dó sin xá to élɔ́ ɔ́, xó e yě ná ɖɔ ɔ́ ɖíe: “Ayǐkúngban e ɖo to ɔ́ mɛ ɔ́ hwemí kpó jɛ kpó hɛn bǐ gblé. È sixú dó nǔɖé ɖo to ɔ́ mɛ ǎ; atín ɖo to ɔ́ mɛ ǎ, ama ɖěbǔ ɖo to ɔ́ mɛ ǎ, bɔ é cí Sodɔ́mu kpó Gomɔ́ɔ kpó ɖɔhun, bó cí Adima kpó Sevoyímu kpó ɖɔhun. Toxo énɛ́ lɛ́ɛ ɔ́, xomɛ ɖaxó ɖé wɛ Mawu Mavɔmavɔ sin bó gba bǐ.” Mɛ e ɖo akɔta ɖě lɛ́ɛ mɛ lɛ́ɛ bǐ ná sú xó, bó ɖɔ: “Étɛ́wú Mawu Mavɔmavɔ ka wa to élɔ́ nú gbɔn lě. Étɛ́wú xomɛ ɖaxó énɛ́ ká sin i.” Bɔ è nǎ yí gbe ɖɔ: “Akɔ e yě jɛ xá Mawu Mavɔmavɔ ɔ́ wɛ yě jó dó; akɔ e Mawu tɔ́gbó yětɔn lɛ́ɛ tɔn jɛ xá yě hwenu e é ɖe yě tɔ́n sín Ejípu é wɛ yě jó dó. Yě jɛ nǔ ɖěvo lɛ́ɛ sɛn jí, bó jɛ kɔ́ ɖe ná jí. Yě ká tunwun nǔmɛsɛn énɛ́ lɛ́ɛ ɖ'ayǐ ǎ. Mawu Mavɔmavɔ ka ná gbe tɔn yě ǎ. Énɛ́ ɔ́ zɔ́n bɔ Mawu Mavɔmavɔ sin xomɛ ɖaxó ɖé dó to ɔ́, bɔ awě e sín xó è ɖɔ ɖo wěma élɔ́ mɛ lɛ́ɛ bǐ xo yě. Mawu Mavɔmavɔ ɖe yě sín ayǐkúngban yětɔn jí kpó xomɛsin kpó, kpó adǎn kpó, kpódó zǐngídi kpó, bó nya yě sɛ́ dó to ɖěvo lɛ́ɛ mɛ, bɔ yě kpo ɖo dɔ̌n káká jɛ égbé.” Nǔ e ɖo hwlǎhwlá ɔ́, Mawu Mavɔmavɔ, Mawu mǐtɔn kɛ́ɖɛ́ wɛ tunwun. Lo ɔ́, mǐ tunwun éé é ɖe xlɛ́ mǐ kpó vǐ mǐtɔn lɛ́ɛ kpó bɔ é ná nɔ ayǐ káká sɔ́yi é. É wɛ nyí sɛ́n tɔn lɛ́ɛ bɔ mǐ ɖǒ ná nɔ́ nyi. Nǔ e un ɖɔ lɛ́ɛ bǐ ná jɛ: ɖɛ e un xo dó mi jí ɔ́ ná cɛ́; nu e un dó mi é ná ɖi. Hwenu e Mawu Mavɔmavɔ, Mawu mitɔn ná gba mi dó kpé gbɔn togun lɛ́ɛ bǐ mɛ ɔ́, mi ná lin tamɛ dó nǔ énɛ́ lɛ́ɛ wú, bó ná lɛ́ kɔ wá Mawu Mavɔmavɔ, Mawu mitɔn gɔ́n, bó ná lɛ́ se tónú n'i. Énɛ́ ɔ́, nǔ e é zɔ́n, bɔ un ɖo ɖiɖɔ nú mi wɛ égbé din lɛ́ɛ ɔ́, mi kpó vǐ mitɔn lɛ́ɛ kpó ná bló ɖ'é jí, kpó ayi mitɔn bǐ kpó, kpó lǐndɔ̌n mitɔn bǐ kpó. Énɛ́ ɔ́, Mawu Mavɔmavɔ, Mawu mitɔn ná húzú ninɔmɛ mitɔn bó ná ɖe lě e é yí wǎn nú mi gbɔn ɔ́ xlɛ́ mi, bó ná cyán mi kplé sín togun e mɛ é kó gba mi dó gbɔn lɛ́ɛ bǐ. É ná bó nyí káká fí e gbɛ ɔ́ kponu ɖó ɔ́ wɛ mi ɖe ɔ́, Mawu Mavɔmavɔ, Mawu mitɔn ná hun káká wá dɔ̌n bó wá kplá mi. É ná kplá mi wá to e nyí tɔ́gbó mitɔn lɛ́ɛ tɔn ɔ́ mɛ, bɔ é ná nyí mitɔn; é ná bló bɔ nǔ ná nyɔ́ nú mi, bɔ mi ná sukpɔ́ hú tɔ́gbó mitɔn lɛ́ɛ. Mawu Mavɔmavɔ, Mawu mitɔn ná bló bɔ mi ná jó miɖée bǐ n'i; é ná bló bɔ vǐ mitɔn lɛ́ɛ ná jó yěɖée bǐ n'i, bónú mi ná yí wǎn nú Mawu kpódó ayi mitɔn bǐ kpó, kpódó lǐndɔ̌n mitɔn bǐ kpó, bó ná sixú nɔ gbɛ. Awě e xó un ɖɔ nú mi lɛ́ɛ ɔ́, Mawu Mavɔmavɔ, Mawu mitɔn ná bló, bɔ bǐ ná xo kɛntɔ́ mitɔn lɛ́ɛ kpó mɛ e gbɛ́ wǎn nú mi, bó ɖo gbě mitɔn nya wɛ lɛ́ɛ kpó. Midɛɛ lɛ́ɛ ka ná lɛ́ jɛ Mawu Mavɔmavɔ sín xó se jí, bó ná nɔ nyi sɛ́n tɔn e é dó nú mi bɔ un ɖo ɖiɖɔ nú mi wɛ égbé din lɛ́ɛ bǐ. Énɛ́ ɔ́, Mawu Mavɔmavɔ, Mawu mitɔn na ná vǐ gěgé mi, kanlin mitɔn lɛ́ɛ ná ji gba, jinukún e mi ná sɔ́ lɛ́ɛ ná sukpɔ́. Mawu Mavɔmavɔ ná bló mɔ̌ dó wa ɖagbe nú mi. Đó lě e ɖagbe wa nú tɔ́gbó mitɔn lɛ́ɛ nyɔ́ Mawu Mavɔmavɔ nukún mɛ sɔ́ é ɔ́, mɔ̌ ɖokpó ɔ́ wɛ ɖagbe wa nú mi lɔ ná nyɔ́ nukún tɔn mɛ. Nú mi ɖótó e, bó wa nǔ e é zɔ́n lɛ́ɛ, kpó nǔ e è ɖɔ dó sɛ́nwéma élɔ́ mɛ lɛ́ɛ kpó, bó lɛ́ kɔ wá gɔ̌n tɔn kpó ayi mitɔn bǐ kpó, kpó lǐndɔ̌n mitɔn bǐ kpó ɔ́, é ná bló gbɔn mɔ̌ nú mi. Nǔ e Mawu zɔ́n mi, bɔ un ɖo ɖiɖɔ nú mi wɛ égbé din ɔ́ hú gǎn mi ǎ; blǒbló tɔn gló mi ǎ. Nǔ e Mawu zɔ́n mi ɔ́ ɖo jǐxwé, bónú è nǎ ɖɔ: “Mɛ̌ ká ná yi jǐxwé din, bó yi se, bó wá ɖɔ nú mǐ, bónú mǐ nǎ bló ɖ'é jí ǎ?” É ká ɖo xu gúdo bɔ è nǎ ɖɔ: “Mɛ̌ ká ná d'asá xu, bó yí se, bó wá ɖɔ nú mǐ bónú mǐ nǎ se bó bló ɖ'é jí ǎ?” Xó ɔ́ ɖo akpá mitɔn. É ɖo nu mitɔn mɛ, bó ɖo ayi mitɔn mɛ, bónú mi ná sixú zé dó wa azɔ̌ ná. Izlayɛ́li ví lɛ́ɛ e mi! Mi ɖótó! Égbé ɔ́, un sɔ́ gbɛ kpó nyɔ̌ná kpó ɖó nukɔn mitɔn, bó sɔ́ kú kpó nǔ nyanya kpó ɖó nukɔn mitɔn. Nyɛ ɔ́, un ɖo zǐnzɔ́n mi wɛ égbé ɖɔ mi ní yí wǎn nú Mawu Mavɔmavɔ, Mawu mitɔn, bó gbɔn ali e é ɖe nú mi lɛ́ɛ jí, bó wa nǔ e é zɔ́n lɛ́ɛ, bó nyi sɛ́n tɔn lɛ́ɛ, bó xwedó gbetakɛ́n tɔn lɛ́ɛ. Énɛ́ ɔ́, mi ná nɔ gbɛ. Mi ná sukpɔ́, bɔ Mawu Mavɔmavɔ, Mawu mitɔn ná xo ɖɛ dó jǐ mitɔn ɖo to e mɛ ná byɔ́ wɛ mi ɖe bɔ é ná nyí mitɔn ɔ́ mɛ. Amɔ̌, nú mi lɛ́ kɔ sín Mawu Mavɔmavɔ gúdo ɔ́, nú mi ma sɔ́ ɖótó e ǎ, bó jó miɖée dó, bó jɛ kɔ́ ɖe nú vodún lɛ́ɛ jí, bó jɛ yě sɛn jí ɔ́, kún mitɔn ná sú dó sín ayǐkúngban ɔ́ jí. To e mɛ mi xwe bɔ é ná nyí mitɔn ɖo Judɛ́ɛn tɔ ɔ́ gúdo ɔ́, mi ná dɔ́ ji ɖ'é mɛ ǎ. Nyi wɛ ɖo mɔ̌ ɖɔ nú mi wɛ égbé din. Nǔ e ɖɔ nú mi wɛ un ɖe égbé din ɔ́, un sɔ́ jǐxwé kpó ayǐkúngban kpó ɖó te, bɔ yě ná nyí kúnnuɖetɔ́ ce. Un sɔ́ kú kpó gbɛ kpó ɖó nukɔn mitɔn; nudómɛ kpó ɖɛxodómɛjí kpó ɖó nukɔn mitɔn. Din ɔ́, mi sɔ́ gbɛ ɔ́, bónú mi kpó vǐ mitɔn lɛ́ɛ kpó ná nɔ gbɛ, bó ná yí wǎn nú Mawu Mavɔmavɔ, Mawu mitɔn, bó ná nɔ́ se xó tɔn, bó ná nɔ gbejí n'i; énɛ́ ɔ́, mi ná nɔ gbɛ, bó ná dɔ́ ji ɖo ayǐkúngban e Mawu Mavɔmavɔ xwlé nǔ bó ɖɔ émí ná ná tɔ́gbó mitɔn Ablaxámu, Izáki kpó Jakɔ́bu kpó é jí. Mɔyízi ɖɔ nú Izlayɛ́li ví lɛ́ɛ bǐ ɖɔ: “Xwe kantɔn (120) ɖó wɛ un ɖe din, un sɔ́ ɖó hlɔ̌nhlɔ́n bó ná ɖo mi kplá wɛ bɔ mǐ nǎ ɖo yiyi wɛ ǎ. Mawu Mavɔmavɔ ka ko ɖɔ nú mì lɔ ɖɔ nyi kún ná dó asá Judɛ́ɛn tɔ ɔ́ ó. Mawu Mavɔmavɔ, Mawu mitɔn ɖésú ná nɔ mi nu, é ɖésú ná vívá kún nú akɔta e ɖo Judɛ́ɛn tɔ ɔ́ gúdo lɛ́ɛ bǐ, bɔ mi ná yí to yětɔn. Jozuwée wɛ ka ná nɔ nu mitɔn lě e Mawu Mavɔmavɔ ɖɔ gbɔn é. Lě e Mawu Mavɔmavɔ wa Amɔliti lɛ́ɛ xɔ́sú Sihɔ́ni kpó Ɔgu kpó sín nǔ gbɔn, bó gba to yětɔn ɔ́, nǔ ɖokpó ɔ́ wɛ é ná bló xá akɔta énɛ́ lɛ́ɛ. Mawu Mavɔmavɔ ná jó yě nú mi, bɔ mi ná wa nǔ yětɔn lě e un ko ɖɔ gbɔn nú mi é. Mi bo kpan akɔ́n, bó dó gǎn! Ado ma hu mi ó, mi ma ɖi xɛsi ɖo nukɔn yětɔn ó. Đó Mawu Mavɔmavɔ, Mawu mitɔn ɖésú ná zɔn xá mi; é ná jó mi dó ǎ, é ná ɖe alɔ sín kan mitɔn mɛ ǎ.” Énɛ́ ɔ́ gúdo ɔ́, Mɔyízi ylɔ́ Jozuwée bó ɖɔ n'i ɖo Izlayɛ́li ví lɛ́ɛ bǐ nukɔn ɖɔ: “Kpan akɔ́n, bó dó gǎn; hwi wɛ ná kplá togun élɔ́ byɔ́ to e Mawu Mavɔmavɔ dó akpá nú tɔ́gbó mǐtɔn lɛ́ɛ ɖɔ émí ná ná yě ɔ́ mɛ. Hwi wɛ ná yí to ɔ́ nú yě. Mawu Mavɔmavɔ ɖésú ná nɔ nukɔn nú we, é ɖésú ná nɔ kpɔ́ xá we, é ná jó we dó ǎ, é ná ɖe alɔ sín kan towe mɛ ǎ. Ma ɖi xɛsi ó, ado ma hu we ó.” Mɔyízi wlán sɛ́n ɔ́ bó zé dó así nú Levíi ví vɔ̌sánú-xwlémawutɔ́ lɛ́ɛ; yě wɛ nɔ ɖíɖá akɔjijɛgbá Mawu Mavɔmavɔ tɔn ɔ́. Yě kpó tomɛxó Izlayɛ́li tɔn lɛ́ɛ kpó wɛ Mɔyízi zé sɛ́n ɔ́ jó ná. Bó ɖɔ nú yě ɖɔ: “Xwe tɛ́nwe mɛ tɛ́nwe mɛ tɛgbɛ ɔ́, xwe e xwe è nɔ zé axɔ́ kɛ mɛ ɔ́, xwe e xwe è nɔ ɖu azavaxwe ɔ́ wá hweɖěbǔnu ɔ́, mi ná zé gbe dó jǐ bó xa sɛ́n ɔ́ nú Izlayɛ́li ví e wá kplé ɖo Mawu Mavɔmavɔ nukɔn lɛ́ɛ bǐ ɖo tɛn e Mawu Mavɔmavɔ ná sɔ́ é mɛ. Mi ná kplé togun ɔ́ bǐ: mɛxó súnnu kpó mɛxó nyɔ̌nu kpó, kpó yɔkpɔ́vú kpó bǐ ná kplé, mɛ e nyí jǒnɔ bó ɖo to mitɔn mɛ lɛ́ɛ lɔmɔ̌ ná wá, bɔ mɛ bǐ ná ɖótó sɛ́n e xa wɛ è ɖe é, bó ná tunwun lě e è ɖǒ ná ɖó sísí nú Mawu Mavɔmavɔ, bó ná nyi sɛ́n tɔn gbɔn é. Vǐ yětɔn e ma ko tunwun sɛ́n ɔ́ ǎ lɛ́ɛ lɔmɔ̌ ná se, bó ná kplɔ́n lě e è nǎ ɖó sísí nú Mawu Mavɔmavɔ, Mawu mitɔn gbɔn é, ɖo to e ná yí wɛ mi ɖe ɖo Judɛ́ɛn tɔ ɔ́ gúdo é mɛ.” Mawu Mavɔmavɔ ɖɔ nú Mɔyízi ɖɔ: “Hwenu e a nǎ kú é ɖíe ɖo yǐyá wɛ e; ylɔ̌ Jozuwée bónú mi wá goxɔ e mɛ un nɔ kpé togun ce ɖe ɔ́ mɛ. Un ná ná ɛ gbetakɛ́n ce lɛ́ɛ ɖo fínɛ́.” Ée é ɖɔ mɔ̌ ɔ́, Mɔyízi kpó Jozuwée kpó yi goxɔ ɔ́ mɛ. Bɔ Mawu Mavɔmavɔ zɔn akpɔ́kpɔ́ mɛ bó wá. Akpɔ́kpɔ́ ɔ́ wá nɔ te ɖo goxɔ ɔ́ sín ali nu. Mawu Mavɔmavɔ ɖɔ nú Mɔyízi ɖɔ: “Zaanɖé din ɔ́, a nǎ yi su tɔ́gbó towe lɛ́ɛ. Hwenu e a ma sɔ́ ná ɖo fí ǎ é ɔ́, Izlayɛ́li togun ɔ́ ná jɛ nǔmɛsɛn e ɖo to e mɛ yě xwe lɛ́ɛ sɛn jí. Yě ná jó mì dó, bó ná hɛn akɔ e un jɛ xá yě ɔ́ gblé. Gbe nɛ́ gbe su ɔ́, un ná sin xomɛ dó yě titewungbe. Un ná jó yě dó, un ná ɖe kɔ dó yě. Gbɛ yětɔn ná gblé, azɔn kpó nǔxámɛ kpó ná vun blá yě gbɔn ɖisí amyɔ, bɔ yě ná nɔ́ ɖɔ: ‘Mawu mǐtɔn ka sɔ́ ɖo mǐ tɛ́ntin ǎ wɛ zɔ́n bɔ nǔ élɔ́ lɛ́ɛ ɖo mǐ xá wɛ a?’ Lo ɔ́, nyɛ ná ɖe kɔ dó yě hwenɛ́nu, ɖó nǔ ɖěvo e yě ná sɛn, bó ná hu hwɛ dó mì lɛ́ɛ wú. Xó e ɖɔ gbé un ja din ɔ́, wlǎn; han wɛ, bɔ a nǎ kplɔ́n Izlayɛ́li ví lɛ́ɛ. A nǎ tɛ́nkpɔ́n káká bɔ yě ná tunwun. Han énɛ́ ná ɖe kúnnu nú mì ɖo Izlayɛ́li ví lɛ́ɛ nukɔn. Đó un ná kplá yě yi to e sín akpá un dó nú tɔ́gbó yětɔn lɛ́ɛ bɔ anɔ̌sin kpó wǐin kpó nɔ́ sa ɖe ɔ́ mɛ. Yě ná mɔ nǔ bó ɖu, bó gɔ́ xo, bó ná vo. Yě ká ná sɛn nǔ ɖěvo lɛ́ɛ. Yě ná gbɛ́ wǎn nú mì, bó ná hɛn akɔ e un jɛ xá yě é gblé. Hwenɛ́nu lo ɔ́, awě tɛnmɛ tɛnmɛ ná xo yě, nǔ wunmɛ wunmɛ ná gbo yě; bɔ han élɔ́ ná ɖé xlɛ́ ɖɔ yě wa nǔ nyi do. Đó han élɔ́ ná ɖo yě kpó vǐ yětɔn lɛ́ɛ kpó nu. Un tunwun nǔ e ɖo ayi yětɔn mɛ lɛ́ɛ, cóbó kplá yě xwe to e sín akpá un dó nú yě ɔ́ mɛ.” Gbe nɛ́ gbe ɔ́, Mɔyízi wlán han ɔ́, bó kplɔ́n Izlayɛ́li ví lɛ́ɛ. Énɛ́ ɔ́ gúdo ɔ́, Mawu Mavɔmavɔ ɖɔ nú Jozuwée Nuni ví ɔ́ ɖɔ: “Kpan akɔ́n, bó dó gǎn ɖó hwi wɛ ná kplá Izlayɛ́li ví lɛ́ɛ byɔ́ to e sín akpá un dó nú yě ɔ́ mɛ; nyi ɖésú ká ná nɔ kpɔ́ xá we.” Mɔyízi wlán sɛ́n ɔ́ bǐ dó wěma ɖokpó mɛ; éé é wlán fó ɔ́, é ɖɔ nú Levíi ví e nɔ́ ɖíɖá akɔjijɛgbá Mawu Mavɔmavɔ tɔn lɛ́ɛ é ɖɔ: “Mi zé sɛ́nwéma élɔ́ ɖó akɔjijɛgbá Mawu Mavɔmavɔ, Mawu mitɔn tɔn kpá; mi wa nǔ nyi do ɔ́, é wɛ ná ɖe kúnnu ɖɔ mi wa nǔ nyi do. Đó un tunwun ɖɔ gǔ wɛ mi nɔ fɔ́n bó nɔ́ ci tamɛ. Ée un ka ɖo gbɛ ɖo mi tɛ́ntin din, bɔ mi ɖo gǔ fɔ́n dó Mawu Mavɔmavɔ jí wɛ mɔ̌ ɔ́, un ka wá kú ɔ́, nɛ̌ mi ná wa nǔ gbɔn lo? Din ɔ́, mi kplé tomɛxó lɛ́ɛ kpó gǎn e ɖo akɔta mitɔn mɛ lɛ́ɛ kpó bǐ nú mì; yě bǐ ní kplé ɖo nukɔn ce; yě nukɔn wɛ un ná ɖɔ xó e ɖo han ɔ́ mɛ lɛ́ɛ ɖe, bɔ jǐxwé kpó ayǐkúngban kpó ná ɖe kúnnu nú mì. Đó un tunwun ɖɔ jí un kú ɔ́, mi ná lɛ́ kɔ sín ali e un ɖe nú mi é jí, bó ná jɛ hwɛ hu jí. Énɛ́ ɔ́, nǔ bǐ nǎ jɛ mi gbo jí, ɖó mi ná wa nǔ e má sɔgbe ɖo Mawu Mavɔmavɔ nukún mɛ ǎ é, bɔ é ná sin xomɛ.” Xó e ɖo han ɔ́ mɛ lɛ́ɛ ɔ́, Mɔyízi ɖɔ bǐ ɖo kplékplé Izlayɛ́li ví lɛ́ɛ bǐ tɔn nukɔn. “Jǐxwé! Đǒtó mì! Un ɖo xó ná ɖɔ wɛ. Ayǐkúngban! Đǒtó xó e ɖo nu ce mɛ ná tɔ́n sín wɛ lɛ́ɛ. Kplɔ́n ce lɛ́ɛ ní ja jǐ ɖɔhun. Xó ce lɛ́ɛ ní ja ahǔn ɖɔhun. Ní gba, fo ɖo gbigba kɔn nyi gbě jí wɛ ɖɔhun. Ní ja kwín kloklo, jǐ ɖo jija wɛ katakata kɔn nyi gběhan jí wɛ ɖɔhun. Đó un ná jlá Mawu Mavɔmavɔ sín nyǐkɔ. Mi kpa susu nú Mawu mǐtɔn. É wɛ nyí só ɔ́; nǔwiwa tɔn lɛ́ɛ nyɔ́ bɔ nǔ vɔ ɖ'é wú. Đó ali tɔn lɛ́ɛ bǐ jlɔ́. Mawu gbejínɔtɔ́ wɛ. É nɔ́ wa nǔblíblí ǎ. É jlɔ́ bó ɖo xwi jí. Amɔ̌, mi togun nyanya, togun hízíhízí e mi! Mi hu hwɛ dó Mawu Mavɔmavɔ. Winnyá ní hu mi. Mi sɔ́ nyí vǐ tɔn ǎ. Togun xlonɔ, nǔmanywɛ́tɔ́ e mi! Mawu Mavɔmavɔ wɛ zɔ́n wɛ mi ná ɖɔ a? É wɛ nyí tɔ́ mitɔn, bó ɖó mi a cé? É wɛ bló mi a cé? É wɛ zɔ́n bɔ mi ɖo te a cé? Mi flín azǎn xóxó lɛ́ɛ sɛ́ dó. Mi flín nǔ e jɛ ɖo mɛ xóxó lɛ́ɛ hwenu e é sɛ́ dó. Mi kan nǔ byɔ́ tɔ́ mitɔn lɛ́ɛ. Mɛxó lɛ́ɛ ní kpi tan nú mi. Hwenu e Mawu Ajalɔ̌nlɔn má to ɔ́ nú gbɛtɔ́ lɛ́ɛ ɔ́, é ɖó dogbó nú akɔta lɛ́ɛ. É sɔ́ togun lɛ́ɛ ɖokpó ɖokpó ɖó wɛnsagun ɖokpó glɔ́. Izlayɛ́li togun ɔ́ wɛ nyí Mawu Mavɔmavɔ tɔn, Jakɔ́bu ví lɛ́ɛ wɛ nyí étɔn. É mɔ Izlayɛ́li togun ɔ́ ɖo gbětótló mɛ, ɖo cukú gbě tɔn e ɖo nǔ hó wɛ lɛ́ɛ tɛ́ntin. É wlíbo n'i, é ná ɛ kplɔ́n. É hɛn ɛ kɛ́ɖɛ́ kɛ́ɖɛ́ nukúnzin ɖɔhun. Lě e gangan nɔ ɖo zinzɔn gbɔn adɔ̌ta nu wɛ, bó nɔ́ ɖo ɖiɖɔ nú vǐ tɔn lɛ́ɛ wɛ ɖɔ yě ní zɔn é ɖɔhun wɛ é cí nú yě. Abǐ lě e gangan nɔ vlɔ́n awa tɔn lɛ́ɛ ɖó vǐ tɔn lɛ́ɛ glɔ́ bó nɔ́ hɛn yě ɖó te bónú yě má jɛ ayǐ ó ɔ́ ɖɔhun wɛ é cí nú yě. Nǔgbó wɛ, Mawu Mavɔmavɔ ɖokpónɔ géé wɛ kplá togun tɔn; é ba vodún ɖěbǔ sín alɔdó ǎ. É ba tɛn nú yě ɖó sókan mɛ; é ná yě nǔɖuɖu e ɖo gle mɛ lɛ́ɛ, é bló bɔ wǐin tɔ́n sín só mɛ wá nú yě; é bló bɔ olívutín wú ɖo sókan mɛ. Nyibú asi lɛ́ɛ kpó gbɔ̌ lɛ́ɛ kpó sín anɔ̌sin wɛ yě nɔ́ nu. Lɛ̌ngbɔ́ lɛ́ɛ kpó agbo lɛ́ɛ kpó, kpó gbǎgbá kloklo lɛ́ɛ kpó sín lan wɛ yě nɔ́ ɖu. Yě nɔ́ ɖu jinukún ɖagbe ɖagbe, bó nɔ́ nu vɛ̌ɛn e vǐwungbo yětɔn ná é. Ée Yeculunu ɖu nǔ gɔ́ xo bó kló, bó nyɔ́ wǔ ɔ́, é fɔ́n gǔ; é jó Mawu e ɖó e ɔ́ dó; é dó winnyá só tɔn, hwlɛngán tɔn ɔ́. É nɔ́ zé walɔ tɔn e nɔ́ vɛ́ mɔ nú Mawu Mavɔmavɔ lɛ́ɛ dó fɔ́n wǔhwan Mawu Mavɔmavɔ tɔn dó jǐ. É nɔ́ sɛn nǔ ɖěvo lɛ́ɛ, dó dó xomɛsin n'i. É nɔ́ xwlé vɔ̌sánú yɛ nyanya lɛ́ɛ; yɛ énɛ́ lɛ́ɛ ká nyí Mawu ǎ; é nɔ́ xwlé vɔ̌sánú vodún e é má tunwun kpɔ́n gbeɖé ǎ lɛ́ɛ, vodún yɔ̌yɔ́ énɛ́ lɛ́ɛ e tɔ́gbó tɔn lɛ́ɛ má ké ya ná ǎ lɛ́ɛ. ‘Nǔgbó wɛ, Izlayɛ́li ví e mi! Mi wɔn alɔcyɔ́nmɛjítɔ́ mitɔn e dó kún mitɔn é. É wɛ nyí só mitɔn. Mi dó vɛ̌ nú Mawu e ná gbɛ mi é!’ Ée Mawu Mavɔmavɔ mɔ lě e vǐ tɔn lɛ́ɛ ɖo xomɛsin dó n'i wɛ gbɔn ɔ́, akpɔ ɖó e ɖésú. Bɔ é ɖɔ: ‘È sixú ɖeji dó yě wú ǎ. Yě nɔ́ sí nǔ ɖěbǔ ǎ. Un sɔ́ ná nya xɛ ɖo yě jí ǎ, bó ná kpɔ́n lě e nǔ ná cí gbɔn nú yě ɔ́. Yě zé nǔmɛsɛn nyanya lɛ́ɛ dó fɔ́n wǔhwan ce dó jǐ. Yě dó xomɛsin nú mì kpó vodún yětɔn lɛ́ɛ kpó. Din ɔ́, nyɛ lɔ ná zé mɛ e ma nyí togun nǔgbó nǔgbó ɔ́ ǎ lɛ́ɛ, dó fɔ́n wǔhwan yětɔn dó jǐ, akɔta e ma ɖó nǔnywɛ́ ǎ é, dó dó xomɛsin nú yě. Un sin xomɛ nǔgbó: Xomɛsin ce cí zo ɖɔhun. É fyɔ́ nǔ káká yi kútomɛ, ɖo do gɔngɔn mɛ; é fyɔ́ jinukún e ɖo ayǐkúngban jí é bǐ. É fyɔ́ nǔ káká yi sózan jí. Un ná sɛ́ awě ɖě ɖo ɖě jí dó yě. Un ná da gǎ ce lɛ́ɛ bǐ dó yě. Hwenu e xovɛ́ ná sin yě bɔ avivɔ kpó jɛmɛjí kpó ná ɖo yě jí bɔ yě ná ba hlɔ̌nhlɔ́n kpo é ɔ́, un ná sɛ́ adǎnkanlin lɛ́ɛ kpó dan aɖǐnɔ lɛ́ɛ kpó dó yě. È nǎ hu gbɛtɔ́ ɖó hwǐ wú, gbɔn ali lɛ́ɛ jí; mɛ bǐ ná ɖo síja jí ɖo xwé lɛ́ɛ gbe. Mɛ bǐ ná kú. Dɔ̌nkpɛvú kpó ɖyɔ̌vǐ kpó, kpó degénɔ kpó vǐ ɖo anɔ̌ nu kpó bǐ ná kú.’ ‘Un ko jló ná vívá kún yětɔn bǐ gbídígbídí, bɔ mɛɖé sɔ́ ná nɔ́ flín yě ǎ. Lo ɔ́, un ɖo xɛsi ɖi wɛ ɖɔ kɛntɔ́ yětɔn lɛ́ɛ ní má ko mì ó; yě táá vɛdó ɖɔ émí wɛ bló bɔ nǔ cí mɔ̌ nú yě sín, lobo ná lin ɖɔ nyi kún mɔ do nú nǔɖé ó. Izlayɛ́li ví lɛ́ɛ ɔ́, akɔta ɖé wɛ yě nyí, bó ɖó tamɛ ǎ; yě bí ǎ. Nǔnywɛ́ kpɛɖé jɛ́n hwedó yě, bɔ yě ná tunwun fí e nǔ e wa wɛ yě ɖe ɔ́ kplá yě xwe é. Kɛntɔ́ ɖokpó sixú sí te é ɖokpó géé bó gba Izlayɛ́li ví afatɔ́n (1.000) dó a? Kɛntɔ́ we sixú nya Izlayɛ́li ví děgba we afɔwó (10.000) a? Cóbónú nǔ ná cí mɔ̌ ɔ́, nyɛ mɛ e nyí Só yětɔn ɔ́ jɛ́n ná jó yě nú kɛntɔ́ yětɔn lɛ́ɛ. Kɛntɔ́ yětɔn lɛ́ɛ ɖésú ká tunwun ɖɔ nǔmɛsɛn émítɔn e nɔ́ ɖo alɔ cyɔ́n émí jí wɛ ɔ́ kún sixú nɔ te nyɛ Mawu Izlayɛ́li ví lɛ́ɛ tɔn nukɔn ó. È ka ná ɖɔ ɔ́, kɛntɔ́ yětɔn lɛ́ɛ ɔ́, nyɔ̌ wɛ yě nyɔ́ hú Izlayɛ́li Sodɔ́munu lɛ́ɛ kpó Gomɔ́ɔnu lɛ́ɛ kpó ǎ; yě bǐ wɛ cí vǐwuntín e nɔ́ ná sínsɛ́n vlɛ́vlɛ́, sínsɛ́n aɖǐnɔ é ɖɔhun. Vɛ̌ɛn yětɔn cí dan sín aɖǐvɛ́ ɖɔhun. Wě e ɖe dó yě wǔ wɛ nyɛ Mawu Mavɔmavɔ ɖe bɔ yě ma tunwun ǎ é ɖíe: Nǔ e ná wa xá yě wɛ un ɖe ɔ́ ɖíe: Gbe e gbe yě ná jɛ ayǐ ɔ́, un ná ba hlɔn, un ná sú nǔ e yě wa ɔ́ sín axɔ́ yě. Nǔgbó wɛ, nǔ nyanya sín azǎn énɛ́ ɔ́ kó sɛkpɔ́ bǐ; nǔ e ɖo yě ná xá wɛ ɔ́ sɔ́ ɖo lǐnlín mɛ ǎ.’ Nǔgbó ɔ́, Mawu Mavɔmavɔ ná wa nǔ jlɔ́jlɔ́ nú togun tɔn; mɛsɛntɔ́ tɔn lɛ́ɛ sín nǔ ná blá wǔ n'i, hwenu e é ná mɔ ɖɔ hlɔ̌nhlɔ́n hwedó yě bɔ yě ma sɔ́ ɖó gǎnjɛwú ɖěbǔ ǎ, bó má sɔ́ ɖó ɖɔxátɔ́ ɖěbǔ ǎ é. É ná kanbyɔ́ yě ɖɔ: ‘Fítɛ́ vodún mitɔn e mi nɔ hɔn yi su lɛ́ɛ ɖe? Mi nɔ hu kanlin dó yě; mi nɔ ba ahan nú yě. Din ɔ́, yě bó bló nǔɖé bó hwlɛ́n mi gán bó cyɔ́n alɔ mi jí bó. Mi mɔ din ɖɔ nyɛ ɖokpó géé wɛ nyí Mawu. Mi mɔ din ɖɔ nǔ e è ɖǒ ná sɛn ɔ́ ɖě kún tíin zɛ nyɛ wú ó. Un nɔ hɛn mɛ ɖó gbɛ, un nɔ hu mɛ. Un nɔ gblé wǔ mɛ, un nɔ hu akpa nú mɛ. Mɛɖé nɔ yí mɛ sín alɔ ce mɛ ǎ. Un dlɛ́n alɔ dó jǐ, bó ɖe gbeta tɔ́n ɖɔ: Un ɖo gbɛ tɛgbɛ! Un gan hwǐ ce bó blóɖó ganjí; un sɔ́ hwɛ jlɔ́jlɔ́ sín afɔ ɖó te; un ná ba hlɔn kɛntɔ́ ce lɛ́ɛ, bó ná dɔn tó nú mɛ e gbɛ́ wǎn nú mì lɛ́ɛ. Gǎ ce lɛ́ɛ ná nu hun. Hwǐ ce ná kán lan hɛn nu. Kɛntɔ́ ce syɛ́nsyɛ́n lɛ́ɛ ɖěbǔ ná gán ǎ; mɛ e è gblě wǔ lɛ́ɛ kpó mɛ e è wlǐ lɛ́ɛ kpó bǐ ná kú.’ Akɔta lɛ́ɛ bǐ ní kpa awǒbóbó nú togun Mawu Mavɔmavɔ tɔn! Mawu Mavɔmavɔ ná ba hlɔn nú mɛsɛntɔ́ tɔn e kú lɛ́ɛ. É ná dɔn tó nú kɛntɔ́ tɔn lɛ́ɛ. É ná bló mɔ̌ dó slá wǔ nú to tɔn. É ná slá wǔ nú togun tɔn.” Mɔyízi kpódó Jozuwée Nuni ví ɔ́ kpó wá togun ɔ́ nukɔn, bó zé gbe d'aga bó ɖɔ xó e ɖo han énɛ́ mɛ lɛ́ɛ. Ée Mɔyízi ná kplɔ́n Mawu tɔn Izlayɛ́li ví lɛ́ɛ fó ɔ́, é ɖɔ nú yě ɖɔ: “Mi zé xó e ɖɔ nú mi wɛ un ɖe égbé lɛ́ɛ ylɔ́ ɖɔ nǔ. Mi xa yě nú vǐ mitɔn lɛ́ɛ, bónú yě ní wa nǔ e sɛ́n ɔ́ ɖɔ é. Nǔgbó ɔ́, sɛ́n énɛ́ lɛ́ɛ nyí xó tófwe ǎ. Nú mi nyi sɛ́n énɛ́ lɛ́ɛ ɔ́, mi ná nɔ gbɛ bó ná dɔ́ ji ɖo to e mi ná yí ɖo Judɛ́ɛn tɔ ɔ́ gúdo é mɛ.” Gbe nɛ́ gbe ɖokpó ɔ́, Mawu Mavɔmavɔ ɖɔ nú Mɔyízi ɖɔ: “Yi Avalímu sókan ɔ́ mɛ ɖo Mɔwabu, ɖo Jeliko nukɔn, bó xá Nɛbo só ɔ́ ta. Kpɔ́n Kanáa to e ná ná Izlayɛ́li ví lɛ́ɛ wɛ un ɖe é sɛ́ dó sín fínɛ́. Só énɛ́ e jí ná xá wɛ a ɖe ɔ́ jí wɛ a nǎ kú jɛ, bó ná yi mɔ tɔ́gbó towe lɛ́ɛ, lě e nɔví towe Aalɔ́ɔn kú gbɔn ɖo Hɔ́ɔ só jí, bó yi mɔ tɔ́gbó tɔn lɛ́ɛ é. Nǔ cí mɔ̌, ɖó Aalɔ́ɔn kpó hwi kpó hu hwɛ ɖaxó ɖé dó mì ɖo Izlayɛ́li ví lɛ́ɛ nukún mɛ, ɖo Mɛliba sín sin ɔ́ kɔn, ɖo Kadɛ́ci, ɖo Síni gbětótló mɛ. Mi ɖe lě e un nyí mɛ mímɛ́ gbɔn é xlɛ́ ɖo Izlayɛ́li ví lɛ́ɛ tɛ́ntin ǎ. Énɛ́ ɔ́ wú wɛ a nǎ mɔ to e ná Izlayɛ́li ví lɛ́ɛ wɛ un ɖe é sɛ́ dó, lo ɔ́, hwɛ ná byɔ́ to ɔ́ mɛ ǎ.” Đɛ e Mɔyízi ɖɛ̌mɛnu Mawu tɔn ɔ́ xo dó Izlayɛ́li ví lɛ́ɛ jí cóbó kú é ɖíe: “Mawu Mavɔmavɔ gosín Sinayíi só jí bó wá. É tɔ́n ɖo Seyíi to ɔ́ ta nu hwe ɖɔhun. É tɔ́n ɖo Paláni só lɛ́ɛ jí, bó za wě dó togun ɔ́ bǐ jí. Wɛnsagun wɔ̌buwɔ́bú ɖé xwedó e bɔ é wá mɛ tɔn lɛ́ɛ gɔ́n, bó hɛn sɛ́n ɔ́ alɔ mɛ, bɔ é ɖo jiji wɛ myɔ ɖɔhun. Mawu Mavɔmavɔ yí wǎn nú Izlayɛ́li sín akɔta lɛ́ɛ. Izlayɛ́li ví súnnu e nyí étɔn, bó nɔ́ wá kplé ɖo asá tɔn mɛ, bó ná yí kplɔ́n lɛ́ɛ ɔ́, é nɔ́ cyɔ́n alɔ yě jǐ. Sɛ́n e Mɔyízi ná mǐ ɔ́ nyí dɔkun ɖaxó ɖé nú Jakɔ́bu ví lɛ́ɛ. Hwenu e togán lɛ́ɛ kpó akɔta Izlayɛ́li tɔn lɛ́ɛ bǐ kpó kplé ɔ́, yě tunwun ɖɔ Mawu Mavɔmavɔ wɛ nyí Yeculunu xɔ́sú.” Mɔyízi lɛ́ ɖɔ: “Hwlibɛ́ni sín akɔta ɔ́ ní nɔ gbɛ. Vǐ tɔn lɛ́ɛ ná bó má sukpɔ́ ǎ hǔn, kún tɔn ní má sú dó ó.” Xó e é ká ɖɔ dó Judáa ví lɛ́ɛ wú é ɖíe, é ɖɔ: “Mawu Mavɔmavɔ, ɖǒtó xó e sú ylɔ́ we wɛ Judáa ví lɛ́ɛ ɖe é! Dɔn Judáa ví lɛ́ɛ kpó togun ɖě lɛ́ɛ kpó ɖó bǔ. Yě ɖó akɔ́n nǔ e ɖo yě gbo wɛ é nu. Kɛnklɛ́n d'alɔ yě hwenu e kɛntɔ́ yětɔn lɛ́ɛ ná wá tɔ́n ahwan yě é.” Xó e Mɔyízi ɖɔ dó Levíi ví lɛ́ɛ wú é ɖíe: “Mawu Mavɔmavɔ, a zě Tumímu kpó Wulímu kpó dó así nú Levíi ví mɛsɛntɔ́ gbejínɔtɔ́ towe lɛ́ɛ, a ko tɛ́n yě kpɔ́n ɖo Masa hwɛ̌, bó ɖɔ hwɛ xá yě ɖó Mɛliba sin xó ɔ́ wú. Yě nɔ́ se tónú nú we, bó nɔ́ nɔ gbejí nú akɔ e a jɛ xá yě ɔ́, dó ɖe xlɛ́ ɖɔ émí yí wǎn nú we hú tɔ́ émítɔn lɛ́ɛ, nɔ émítɔn lɛ́ɛ, nɔví émítɔn lɛ́ɛ kpó vǐ émítɔn lɛ́ɛ kpó. Yě wɛ nɔ́ kplɔ́n sɛ́n towe lɛ́ɛ Izlayɛ́li ví lɛ́ɛ, bó nɔ́ sá vɔ̌ wǎnɖagbenɔ lɛ́ɛ kpó vɔ̌ e è nɔ dó zo lɛ́ɛ kpó ɖo vɔ̌sákpe towe jí. Mawu Mavɔmavɔ, nǎ hlɔ̌nhlɔ́n yě, bó dó acɛ nǔ e yě ná wa lɛ́ɛ bǐ jí. Wɛ̌n alin nú kɛntɔ́ yětɔn lɛ́ɛ, bónú yě má sɔ́ sí te gbeɖé ó!” Xó e Mɔyízi ɖɔ dó Bɛnjamɛ́ɛ ví lɛ́ɛ wú é ɖíe: “Bɛnjamɛ́ɛ ví lɛ́ɛ wɛ nyí akɔta wǎnyínánɔ Mawu Mavɔmavɔ tɔn, yě nɔ́ nɔ vivo mɛ ɖo Mawu Mavɔmavɔ kpá. Mawu Mavɔmavɔ nɔ cyɔ́n alɔ yě jí ayǐhɔ́ngbe ayǐhɔ́ngbe; é nɔ́ nɔ yě tɛ́ntin.” Xó e Mɔyízi ɖɔ dó Jozɛ́fu ví lɛ́ɛ wú é ɖíe: “Mawu Mavɔmavɔ dó acɛ ayǐkúngban yětɔn jí: ahǔn nɔ́ ja dó ayǐkúngban yětɔn jí sín jǐxwé, bɔ sin nɔ tɔ́n sín ayǐkúngban glɔ́. Hwesivɔ́ nɔ́ hun, bɔ atín lɛ́ɛ nɔ́ wú, jinukún nɔ́ nyɔ́ sun mɛ sun mɛ. Só lɛ́ɛ húzú gbeɖé ǎ; lě e yě ɖe ɔ́ jɛ́n yě kpo ɖe. Nǔ nɔ nyɔ́ ɖo só lɛ́ɛ jí kpɔ́ gěgé gbɔn fí bǐ. Dɔkun ɖaxó e ɖo to ɔ́ mɛ lɛ́ɛ kpódó fɛ́nú Mawu e nɔ zungodwe mɛ bó ɖɔ xó ɔ́ tɔn kpó ní kɔn dó Jozɛ́fu e nyí gǎn nú nɔví tɔn lɛ́ɛ é sín akɔta jí. Jɛlijɛli nú Jozɛ́fu! É dó hlɔ̌nhlɔ́n nyibúsú ɖɔhun. É ɖó zo jangan jangan we agbo ɖɔhun, bó nɔ́ zé dó xo akɔta lɛ́ɛ ná, bó nɔ́ nya togun lɛ́ɛ sín ayǐkúngban ɔ́ jí káká yi fí e gbɛ ɔ́ kponu ɖó é. Zo lɛ́ɛ ɖokpó nyí Eflayímu ví wɔ̌buwɔ́bú lɛ́ɛ, zo wegɔ́ ɔ́, Manasée sín ahwangɔnu tobutóbú lɛ́ɛ wɛ.” Xó e Mɔyízi ɖɔ dó Zabulɔ́ɔn ví lɛ́ɛ kpó Isakáa ví lɛ́ɛ kpó wú é ɖíe: “Zabulɔ́ɔn ví lɛ́ɛ e mi! Mi j'awǎ ɖó hwɛzizɛ mitɔn lɛ́ɛ kpó wǐwá mitɔn lɛ́ɛ kpó wú, Isakáa ví lɛ́ɛ e mi! Mi j'awǎ ɖó mi vo ɖo goxɔ mitɔn lɛ́ɛ sá. Mi ná ylɔ́ akɔ ɖě lɛ́ɛ bǐ kplé ɖo só ɔ́ jí, bó ná xwlé vɔ̌sánú lɛ́ɛ Mawu Mavɔmavɔ lě e sɛ́n ɔ́ zɔ́n gbɔn é, ɖó mi ná dɔn dɔkun mitɔn lɛ́ɛ sín xu mɛ, mi ná dɔn dɔkun e ɖo xuta, ɖo kɔ́ glɔ́ lɛ́ɛ tɔ́n.” Xó e Mɔyízi ɖɔ dó Gadi ví lɛ́ɛ wú é ɖíe: “Susu nú Mawu Mavɔmavɔ e ná ayǐkúngban gěgé Gadi é! Gadi tɔ wu kinnikínní ɖɔhun, bó ná wlí kanlin bó tlɛ́n ɖu sín afɔ káká yi ta. Gadi kpɔ́n ayǐkúngban ɖagbe ɖagbe e ɖo to ɔ́ mɛ ɔ́ bó sɔ́. É kpɔ́n fí e jɛ xá gǎn ɔ́, bó sɔ́. É nɔ togun ɔ́ nu. É bló nǔ e Mavɔmavɔ zɔ́n lɛ́ɛ kpó gbeta tɔn lɛ́ɛ kpó, nú ɖagbe Izlayɛ́li ví lɛ́ɛ tɔn.” Xó e Mɔyízi ɖɔ dó Dan ví lɛ́ɛ wú é ɖíe: “Dan cí kinnikínní wínnyáwínnyá e lɔ́n sín Basáni gbé jí é ɖɔhun.” Xó e Mɔyízi ɖɔ dó Nɛfutali ví lɛ́ɛ wú é ɖíe: “Nǔ nyɔ́ nú Nɛfutali bó túnflá, Mawu Mavɔmavɔ wa ɖagbe n'i bɔ é vɛ́ jlɛ́. É ní gbló ada nú ayǐkúngban tɔn yi gbadahwe jí; é ní lɛ́ gbló ada ná yi tofɔligbé.” Xó e Mɔyízi ɖɔ dó Acɛ́ɛ ví lɛ́ɛ wú é ɖíe: “Susu nú Acɛ́ɛ ɖo Jakɔ́bu ví lɛ́ɛ mɛ. Nɔví tɔn lɛ́ɛ ní ɖe lě e yě yí wǎn n'i gbɔn é xlɛ́. Olívumi tɔn sukpɔ́ káká bɔ é nɔ́ sɔ́ dó klɔ́ afɔ ná. To tɔn sín hɔntogbó ɔ́, gan kpó ganvɔ kpó wɛ è dǒ sú, bɔ é vo ɖo to tɔn mɛ. Nú afɔ tɔn ɖo kɔ́ gbo wɛ jɛ́n wɛ ɔ́, hlɔ̌nhlɔ́n tɔn ná ɖo te tɛgbɛ.” Énɛ́ ɔ́ gúdo ɔ́, Mɔyízi ɖɔ: “Yeculunu ví lɛ́ɛ e mi! Nǔmɛsɛn ɖěbǔ cí Mawu ɖɔhun ǎ. É nɔ́ zɔn akpɔ́kpɔ́ jí kpó susu kpó, bó nɔ́ gosín jǐxwé bó nɔ́ wá d'alɔ mi. É wɛ nyí bibɛtɛn mitɔn sín do. Acɛkpikpa tɔn ko nyí nǔɖaxó ɖo hwe glɔ́ fí sín do. É wɛ nya kɛntɔ́ mitɔn lɛ́ɛ ɖo nukɔn mitɔn, bó ná gbe mi ɖɔ mi ní hu yě. Izlayɛ́li ví lɛ́ɛ sín ayi jɛ ayǐ ɖo xwé yětɔn lɛ́ɛ gbe. Jakɔ́bu ví lɛ́ɛ vo ɖo to e mɛ ahǔn nɔ́ ja kpɔ́ gégé sín jǐxwé, bɔ jinukún kpó vǐwuntín kpó nɔ́ nyɔ́ ɖe é mɛ. Izlayɛ́li ví lɛ́ɛ e mi! Nǔ nyɔ́ nú mi. Mi ɖokpónɔ géé wɛ nyí togun e Mawu Mavɔmavɔ hwlɛ́n gán é. Mawu Mavɔmavɔ wɛ nyí gǎglónú mitɔn bó gló nǔ nú mi; é wɛ nyí hwǐ e ná ɖuɖéjí mi é. Hwenu e kɛntɔ́ mitɔn lɛ́ɛ ná ja mi klɔ́ gbé ɔ́, mi ná dó winnyá yě.” Mɔyízi gosín ayǐkúngban wɛnjɛ e ɖo Mɔwabu é jí, bó xá Nɛbo, só ɖaxó e ɖo Pisiga sókan mɛ ɔ́ jí. Pisiga ɔ́ ɖo zǎnzǎnhwe jí nú Jeliko; Mawu Mavɔmavɔ xlɛ́ ɛ to ɔ́ bǐ. É jɛ to ɔ́ xlɛ́ ɛ jí sín Galadi gbé jí káká yi Dan. É xlɛ́ ɛ sín Nɛfutali, Eflayímu, Manasée, Judáa, káká yi Mɛditɛlanɛ́ɛ xu ɔ́ tó. É xlɛ́ ɛ Nɛgɛ́vu, ɖo Judáa tofɔligbé kpó Jeliko děkan toxo ɔ́ kpó, ɖo Judɛ́ɛn tɔdo ɔ́ mɛ káká wá Sowáa. Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Kpɔ́n to e sín akpá un dó nú Ablaxámu kpó Izáki kpó, kpódó Jakɔ́bu kpó, hwenu e un ɖɔ: ‘Un ná ná to élɔ́ vǐ mitɔn lɛ́ɛ’ é. Un xlɛ́ to ɔ́ we, a ka ɖo nǎ byɔ́ mɛ wɛ ǎ.” Mɔyízi mɛsɛntɔ́ Mawu Mavɔmavɔ tɔn ɔ́ kú ɖo Mɔwabu tomɛ fínɛ́, lě e Mawu Mavɔmavɔ ko ɖɔ gbɔn é. Mawu Mavɔmavɔ ɖésúnɔ wɛ ɖi Mɔyízi ɖo tɔdo ɖé mɛ, ɖo Mɔwabu. Tɔdo ɔ́ kpan nukɔn Bɛti-Peɔ́ɔ. Mɛ ɖěbǔ kó tunwun fí e Mɔyízi sín yɔdo ɖe ɔ́ káká jɛ égbé ǎ. Xwe kantɔn (120) wɛ Mɔyízi ɖó bó kú. Nukún tɔn ká kpo ɖo nǔ mɔ wɛ ganjí, bɔ gǎn kpó ɖo wǔ tɔn titewungbe. Izlayɛ́li ví lɛ́ɛ ví i xɔ azǎn gban (30) e yě nɔ́ nɔ aluwɛ mɛ xɔ é. Nǔnywɛ́ sín yɛ ɖaxó ɖé gɔ́ Jozuwée Nuni ví ɔ́, ɖó Mɔyízi dlɛ́n alɔ dó jǐ tɔn. É wɛ Izlayɛ́li ví lɛ́ɛ jɛ tónú se ná jí sín hwenɛ́nu, bó nɔ́ nyi sɛ́n e Mawu Mavɔmavɔ ná yě gbɔn Mɔyízi jí lɛ́ɛ. È sɔ́ mɔ gbeyíɖɔ Mɔyízi tɔn ɖɔhun ɖěbǔ ɖo Izlayɛ́li ǎ. Mawu Mavɔmavɔ kpó é kpó nɔ́ kpé nu bó nɔ́ ɖɔ xó. Mawu Mavɔmavɔ sɛ́ ɛ dó Ejípu bɔ é bló nǔjíwǔ gěgé ɖo Ejípu xɔ́sú ɔ́ kpó gǎn hɔn-yitɔ́ tɔn lɛ́ɛ kpó togun tɔn bǐ kpó nukɔn. Izlayɛ́li ví lɛ́ɛ bǐ nukún mɛ wɛ Mɔyízi jlɛ́ nǔ kpó acɛ kpó ɖe; acɛ e nukɔn mɛ ɖěbǔ má nɔ́ sixú nɔ te ɖe ǎ é. Mɛsɛntɔ́ Mawu Mavɔmavɔ tɔn Mɔyízi kú. Ée é kú ɔ́, Mawu Mavɔmavɔ ɖɔ nú Jozuwée Nuni ví e nɔ dó alɔ Mɔyízi ɔ́ ɖɔ: “Mɛsɛntɔ́ ce Mɔyízi kú. Din ɔ́, hwi wɛ ná kplá togun ɔ́ bǐ, bɔ hwi kpó yě kpó ná dó asá Judɛ́ɛn tɔ ɔ́, bó ná yi to e un ná yě ɔ́ mɛ. Mi tɛ afɔ fí ɖěbǔ ɔ́, un ná ná fí ɔ́ mi, lě e un ko ɖɔ gbɔn nú Mɔyízi é. Ayǐkúngban mitɔn ná gosín gbětótló ɔ́ mɛ, ɖo tofɔligbé káká yi Libáan sókan ɔ́ mɛ ɖo totaligbé, bó ná lɛ́ gosín tɔ ɖaxó e è nɔ ylɔ́ ɖɔ Efláti ɔ́ kɔn, ɖo zǎnzǎnhwe jí, bó ná gbɔn Hitíti lɛ́ɛ sín to mɛ káká yi Mɛditɛlanɛ́ɛ xu ɔ́ tó, ɖo gbadahwe jí. Đo gbɛzán towe bǐ mɛ ɔ́, mɛ ɖěbǔ ná sixú nɔ te nukɔn towe ǎ, ɖó un ɖo kpɔ́ xá we lě e un nɔ kpɔ́ xá Mɔyízi gbɔn é. Un ná ɖe kɔ sín wǔtu towe gbeɖé ǎ, un ka ná jó we dó gbeɖé ǎ. Kpan akɔ́n bó dó gǎn, ɖó to e sín akpá un dó nú tɔ́gbó mitɔn lɛ́ɛ ɔ́, hwi wɛ ná kplá Izlayɛ́li ví lɛ́ɛ, bɔ yě ná yí. Vɛ̌ ko kpan akɔ́n bó dó gǎn kpowun bo bló nǔ e mɛsɛntɔ́ ce Mɔyízi ɖɔ nú we ɔ́ bǐ, ma yi ɖisí ó, ma yi amyɔ ó. Nú a blǒ gbɔn mɔ̌ ɔ́, a sɔ́ nǔɖé bó ná wa ɔ́, a nǎ mɔ nu tɔn. Ma nɔ gɔn sɛ́nwéma élɔ́ xa gbeɖé ó. Nɔ lin tamɛ d'é wú zǎn kpó kéze kpó, bó nɔ́ bló nǔ e è ɖɔ d'é mɛ ɔ́ bǐ ɖ'é jí. Énɛ́ ɔ́, a sɔ́ nǔɖé bó ná wa ɔ́, a nǎ mɔ nu tɔn. Lě e nǔ ná nyɔ́ nú we gbɔn ɔ́ nɛ́. Un ɖɔ nú we ɖɔ hwi ní kpan akɔ́n bó dó gǎn, ma wɔn ó. Ma ɖi xɛsi ó, ma lɔn nú awakanmɛ ní kú we ó, ɖó nyɛ Mawu Mavɔmavɔ, Mawu towe ɔ́, un ɖo kpɔ́ xá we ɖo fí e a nǎ gbɔn lɛ́ɛ bǐ.” Jozuwée ɖɔ nú gǎn e ɖo togun ɔ́ nu lɛ́ɛ ɖɔ yě ní gbɔn mɛ lɛ́ɛ bǐ jí, bó ɖɔ nú yě ɖɔ: “Azǎn atɔn gbe ɔ́, mǐ ná dó asá Judɛ́ɛn tɔ ɔ́, bó ná yí to e Mawu Mavɔmavɔ, Mawu mǐtɔn ná mǐ é. Mi bo jɛ nǔ e mi ná ɖu ɔ́ sín agban dó jí.” Jozuwée lɛ́ ɖɔ nú súnnu e ɖo akɔta Hwlibɛ́ni tɔn mɛ lɛ́ɛ kpó éé ɖo akɔta Gadi tɔn mɛ lɛ́ɛ kpó, kpódó éé ɖo Manasée sín akɔta vlɔ́ mɛ lɛ́ɛ kpán ɖɔ: “Xó e mɛsɛntɔ́ Mawu Mavɔmavɔ tɔn Mɔyízi ɖɔ nú mi ɔ́, mi flín; é ɖɔ nú mi ɖɔ: ‘Mawu Mavɔmavɔ, Mawu mitɔn ná to énɛ́ ɔ́ mi, bɔ mi ná vo ɖ'é mɛ.’ Asi mitɔn lɛ́ɛ kpó vǐ mitɔn lɛ́ɛ kpó, kpódó kanlin mitɔn lɛ́ɛ kpán sixú nɔ ayǐkúngban élɔ́ jí, fí e Mɔyízi ná mi é. Amɔ̌, mi mɛ súnnu hlɔ̌nhlɔ́n ɖo wǔ e sixú fun ahwan lɛ́ɛ ɔ́, mi ná bɛ́ ahwanfunnú mitɔn lɛ́ɛ, bó ná nɔ nukɔn nú nɔví mitɔn lɛ́ɛ, bó ná dó asá Judɛ́ɛn tɔ ɔ́. Mi ná dó alɔ yě, káká bɔ Mawu Mavɔmavɔ, Mawu mitɔn ná bló, bɔ yě ná yí ayǐkúngban e é ná yě ɔ́, lě e é bló gbɔn nú midɛɛ lɛ́ɛ é. Énɛ́ ɔ́ gúdo ɔ́, mi ná lɛ́ kɔ wá ayǐkúngban e mɛsɛntɔ́ Mawu Mavɔmavɔ tɔn Mɔyízi ná mi ɖo Judɛ́ɛn tɔ ɔ́ sín zǎnzǎnhwe jí ɔ́ jí.” Ée Jozuwée ɖɔ mɔ̌ nú yě ɔ́, yě yí gbe n'i ɖɔ: “Mǐ ná bló nǔ e a zɔ̌n mǐ ɔ́ bǐ. A sɛ́ mǐ dó fí ɖěbǔ ɔ́, mǐ ná yi. Mǐ ná se tónú nú we ɖo nǔ bǐ mɛ, lě e mǐ se tónú nú Mɔyízi gbɔn é. Mawu Mavɔmavɔ, Mawu towe ní vɛ́ kó sixú nɔ kpɔ́ xá we, lě e é nɔ kpɔ́ xá Mɔyízi é ɖɔhun. Mɛ ɖěbǔ fɔ́n gǔ dó jǐ towe bó ná gbɛ́ gbe nú we ɔ́, è nǎ hu i. Nǔ e nyí towe kpowun ɔ́ wɛ nyí ɖɔ a nǐ kpan akɔ́n bó dó gǎn.” Jozuwée Nuni ví ɔ́ nɔ Citímu bó sɛ́ dobanúnǔtɔ́ we dó Jeliko ɖɔ yě ní gbɔn nǔglɔ́ nǔglɔ́ bó ba do nú to ɔ́. É ɖɔ nú yě ɖɔ yě ní ba do nú Kanáa to ɔ́ bǐ, ɖo tají ɔ́, yě ní ba do nú Jeliko toxo ɔ́. Ée mɛ we lɛ́ɛ yi to ɔ́ mɛ ɔ́, yě yi dɔ́ nyɔ̌nu agalɛtɔ́ ɖé xwé; è nɔ ylɔ́ nyɔ̌nu ɔ́ ɖɔ Hlaxábu. Axɔ́sú Jeliko tɔn ɔ́ se ɖɔ Izlayɛ́li ví ɖé lɛ́ɛ wá to ɔ́ mɛ ɖo zǎn énɛ́ ɔ́ mɛ, bó ná ba do nú to ɔ́. Ée axɔ́sú ɔ́ se mɔ̌ ɔ́, é dó wɛn sɛ́ dó Hlaxábu ɖɔ: “Nya e wá xwé towe gbe lɛ́ɛ ɔ́, è sɛ́ yě dó ɖɔ yě ní wá ba do nú to ɔ́ céɖécéɖé wɛ. Jǒ yě nú mǐ.” Hlaxábu ka ko sɔ́ yě hwlá, lobo ɖɔ nú mɛ e axɔ́sú ɔ́ sɛ́ dó lɛ́ɛ ɖɔ: “Nya ɖé lɛ́ɛ wá xwé ce gbe nǔgbó, amɔ̌, un tunwun fí e nu yě nyí ɔ́ ǎ. Yě kó lɛ́ kɔ yi hwenu e zǎn ɖo bibɔ wɛ, bɔ è ɖo hɔntogbó to ɔ́ tɔn ná sú wɛ é. Un tunwun fí e yě yi ɔ́ ǎ. Ényí mi hwlɛ́ndó ɔ́, mi sixú xwedó yě wú.” É ká kó kplá nya lɛ́ɛ yi xɔ ta, bó sɔ́ yě hwlá dó lɛ̌ɛnkantín e è ko xyá ɖó fínɛ́ lɛ́ɛ glɔ́. Mɛ e axɔ́sú ɔ́ sɛ́ dó lɛ́ɛ jɛ dobanúnǔtɔ́ lɛ́ɛ gbé mɛ; ée yě tɔ́n sín toxo ɔ́ mɛ tlóló ɔ́, è sú hɔntogbó ɔ́, bɔ yě wlí ali e yi fí e è nɔ dó asá Judɛ́ɛn tɔ ɔ́ ɖe ɔ́, bó ɖo dobanúnǔtɔ́ lɛ́ɛ ba wɛ. Cóbónú dobanúnǔtɔ́ lɛ́ɛ ná dɔ́ amlɔ ɔ́, Hlaxábu yi yě gɔ́n ɖo xɔ tɔn ta, bo ɖɔ nú yě ɖɔ: “Un tunwun ɖɔ Mawu Mavɔmavɔ ná to élɔ́ mi. Nǔwiwa mitɔn nɔ dó xɛsi nú mǐ ɖésú, káká bɔ mɛ ɖěbǔ sín ayi sɔ́ nɔ jɛ ayǐ ɖo to mǐtɔn mɛ fí ǎ, ɖó mi wú. Đó mǐ se ɖɔ hwenu e mi tɔ́n sín Ejípu bó wá jɛ Xu Vɔvɔ ɔ́ tó ɔ́, Mawu Mavɔmavɔ bló bɔ sin ɔ́ xú, bɔ mi gbɔn ayǐkúngban xúxú jí bó dín. Mǐ lɛ́ se ɖɔ mi hu Amɔliti lɛ́ɛ sín axɔ́sú we: Sihɔ́ni kpó Ɔgu kpó ɖo Judɛ́ɛn tɔ ɔ́ sín zǎnzǎnhwe jí, lobo hɛn nǔ yětɔn lɛ́ɛ bǐ gblé. Ée mǐ se xó énɛ́ lɛ́ɛ ɔ́, ayixa mǐtɔn bǐ wɛ gba dó, bɔ mɛ ɖěbǔ sɔ́ glá bó ná nɔ te ɖo nukɔn mitɔn ǎ, ɖó Mawu Mavɔmavɔ, Mawu mitɔn ɔ́ wɛ ɖó acɛ ɖo jǐnukúnsin aga, bó ɖó acɛ ɖo ayǐkúngban jí fí ɖo do. Din ɔ́, mi xwlé Mawu Mavɔmavɔ nú mì ɖɔ émí ná nyɔ́ xomɛ dó hɛ̌nnumɔ ce lɛ́ɛ wú, lě e un nyɔ́ xomɛ dó mi wú gbɔn din é. Mi ná xlɛ̌ ɖé mì, bónú má ɖó gǎnjɛwú ɖɔ mi kún ná hu tɔ́ ce, nɔ ce, nɔví ce súnnu, nɔví ce nyɔ̌nu kpó mɛ yětɔn lɛ́ɛ ɖěbǔ kpó ó, mi kún ná lɔn bónú è nǎ hu mǐ ó.” Nya lɛ́ɛ yí gbe n'i ɖɔ: “Ényí mi ma ɖe mǐ gba ǎ ɔ́, mǐ ɖo gbesisɔ mɛ bó ná kú dó ta mitɔn mɛ. Hwenu e Mawu Mavɔmavɔ ná bló bɔ to ɔ́ ná jɛ mǐ sí ɔ́, mǐ ná bló nǔ e a ɖɔ é; mǐ ná nyɔ́ xomɛ dó wǔ towe.” Ée yě ɖɔ mɔ̌ ɔ́, Hlaxábu zé kan gbɔn flɛtɛ́li nu, bó dó ɖe yě jɛ te nyi toxo ɔ́ gúdo, ɖó dǒ e è dǒ xá toxo ɔ́ ná ɔ́ jí wɛ xɔ tɔn ɖe. É ɖɔ nú yě ɖɔ: “Mi yi hɔn hwlá cí sókan mɛ, bónú mɛ e jɛ gbě mitɔn mɛ lɛ́ɛ má mɔ mi ó. Mi nɔ fínɛ́ xɔ azǎn atɔn, káká jɛ hwenu e yě ná lɛ́ kɔ wá dó é. Énɛ́ ɔ́ gúdo ɔ́, mi ná wlí ali mitɔn ɖidó.” Nya we lɛ́ɛ ɖɔ n'i ɖɔ: “Akpá e a byɔ́ mǐ, bɔ mǐ dó nú we ɔ́, lě e mǐ ná ɖe gbɔn ɔ́ ɖíe: Hwenu e mǐ ná wá ahwan tɔ́n to ɔ́ gbé ɔ́, a nǎ sin kan vɔvɔ cɛ́cɛ́ élɔ́ dó flɛtɛ́li e nu a zě mǐ jɛ te gbɔn é. Énɛ́ ɔ́ gúdo ɔ́, a nǎ kplá tɔ́ towe, nɔ towe, nɔví towe súnnu kpó nyɔ̌nu kpó, kpódó hɛ̌nnumɔ towe bǐ kpán wá ɖó xwé towe gbe. Ényí mɛɖé tɔ́n sín xwé towe gbe, bónú nǔɖé yi wa ɛ ɔ́, é wɛ é kan; é kan mǐdɛɛ lɛ́ɛ ǎ. Amɔ̌, ényí è wa nǔɖé nú mɛ e ɖo gɔ̌n towe ɖo xwé towe gbe lɛ́ɛ ɖě hǔn, mǐdɛɛ lɛ́ɛ wɛ kú tɔn ɖo kɔ ná. Ényí a ka yi jlá xó e mǐ ɖɔ din ɔ́ hǔn, akpá e a byɔ̌ bɔ mǐ dó nú we ɔ́ sɔ́ ɖ'é jí ǎ.” Ée yě ɖɔ mɔ̌ ɔ́, Hlaxábu yí gbe nú yě ɖɔ: “Ní bó nɔ lě e mi ɖɔ gbɔn ɔ́.” Énɛ́ ɔ́ gúdo ɔ́, é nyi yě. Ée yě ɖidó tlóló ɔ́, é sin kan vɔvɔ cɛ́cɛ́ ɔ́ dó flɛtɛ́li tɔn nu. Nya we lɛ́ɛ yi sókan ɔ́ mɛ, bó hwlá cí fínɛ́ xɔ azǎn atɔn káká bɔ mɛ e jɛ gbě yětɔn mɛ lɛ́ɛ yi ba yě kpo, lobo lɛ́ kɔ wá Jeliko. Nya we lɛ́ɛ ká jɛ te sín sókan ɔ́ mɛ fí e yě hɔn hwlá cí ɔ́, bó dó asá Judɛ́ɛn tɔ ɔ́. Yě yi Jozuwée Nuni ví ɔ́ gɔ́n, bó wlí nǔ e jɛ dó yě jí ɔ́ bǐ ɖɔ n'i. Yě ɖɔ nú Jozuwée ɖɔ: “Mǐ mɔ ɖɔ Mawu Mavɔmavɔ jó to ɔ́ bǐ nú mǐ nǔgbó; to ɔ́ mɛ nu lɛ́ɛ bǐ wɛ kó ɖo xɛsi ɖi nú mǐ wɛ.” Jozuwée fɔ́n zǎn bó gosín Citímu é kpó Izlayɛ́li ví lɛ́ɛ kpó. Yě yi Judɛ́ɛn tɔ ɔ́ tó, bó ɖó gɔnu ɖó fínɛ́ hwɛ̌ cóbó dó asá tɔ ɔ́. Azǎn tɔn atɔngɔ́ ɔ́ gbe ɔ́, gǎn e ɖo togun ɔ́ nu lɛ́ɛ gbɔn mɛ lɛ́ɛ jí. Yě ɖɔ nú togun ɔ́ ɖɔ: “Hwenu e mi ná mɔ Levíi ví vɔ̌sánú-xwlémawutɔ́ lɛ́ɛ hɛn akɔjijɛgbá Mawu Mavɔmavɔ, Mawu mitɔn tɔn ɔ́ wá xweyǐgbe ɔ́, mi na gosín fí e mi ɖe ɔ́, bó ná jɛ gǔdo tɔn. Énɛ́ ɔ́, é ná xlɛ́ ali e mi ná gbɔn ɔ́ mi, ɖó mi ko gbɔn fínɛ́ kpɔ́n gbeɖé ǎ. Mi ma ka sɛkpɔ́ ɛ dín ó, mi nɔ zɔ n'i nú kilomɛ́tlu ɖokpó mɔ̌.” Jozuwée ɖɔ nú togun ɔ́ ɖɔ: “Mi slá wǔ, ɖó sɔ ɔ́, Mawu Mavɔmavɔ ná jlɛ́ nǔ ɖo tɛ́ntin mitɔn.” Ée ayǐ hɔ́n ɔ́, é ɖɔ nú vɔ̌sánú-xwlémawutɔ́ lɛ́ɛ ɖɔ yě ní zé akɔjijɛgbá ɔ́, bó jɛ nukɔn nú togun ɔ́. Yě ká zé akɔjijɛgbá ɔ́, bó jɛ nukɔn nú togun ɔ́ ɖidó. Mawu Mavɔmavɔ ɖɔ nú Jozuwée ɖɔ: “Bɛ́ sín égbé ɔ́, un ná sɔ́ acɛkpikpa towe jínjɔ́n ayǐ ɖo Izlayɛ́li ví lɛ́ɛ bǐ tɛ́ntin, bɔ yě ná tunwun ɖɔ un ɖo kpɔ́ xá we lě e un nɔ kpɔ́ xá Mɔyízi gbɔn é.” A nǎ ɖɔ nú vɔ̌sánú-xwlémawutɔ́ e hɛn akɔjijɛgbá ɔ́ lɛ́ɛ ɖɔ yě byɔ́ Judɛ́ɛn tɔ ɔ́ mɛ tlóló hǔn, yě ní nɔ te. Énɛ́ ɔ́ gúdo ɔ́, é ɖɔ nú Izlayɛ́li ví lɛ́ɛ ɖɔ: “Mi sɛ wá, bó se xó e Mawu Mavɔmavɔ, Mawu mitɔn ɖɔ é.” Ée yě sɛ wá ɔ́, é ɖɔ nú yě ɖɔ: “Nǔ e Mavɔmavɔ ná jlɛ́ ɔ́ ná zɔ́n bɔ mi ná tunwun ɖɔ Mawu gbɛɖe ɔ́ ɖo tɛ́ntin mitɔn, bó ná nya Kanáanu lɛ́ɛ, Hitíti lɛ́ɛ, Hivíti lɛ́ɛ, Pɛliziti lɛ́ɛ, Giigacíti lɛ́ɛ, Amɔliti lɛ́ɛ kpódó Jebuzinu lɛ́ɛ kpán sín nukɔn mitɔn. Aklúnɔ ayǐkúngban ɔ́ bǐ tɔn sín akɔjijɛgbá ná nɔ nukɔn nú mi dó asá Judɛ́ɛn tɔ ɔ́. Mi cyán súnnu wěwe gbɔn akɔta Izlayɛ́li tɔn lɛ́ɛ mɛ. Mi sɔ́ súnnu ɖokpó ɖokpó gbɔn akɔta ɖokpó ɖokpó mɛ. Hwenu e vɔ̌sánú-xwlémawutɔ́ e hɛn akɔjijɛgbá Mawu Mavɔmavɔ tɔn, Aklúnɔ e ɖó ayǐkúngban ɔ́ bǐ é tɔn ɔ́ lɛ́ɛ ná tɛ afɔ tɔ ɔ́ mɛ lě tlóló ɔ́, tɔ ɔ́ ná gbo bɔ sin ɔ́ ná kplé cí fí ɖokpó nǔɖé wɛ hɛn ɛ ɖó te ɖɔhun.” Ée togun ɔ́ se mɔ̌ ɔ́, é gosín fí e é ɖe ɔ́, bó ná dó asá Judɛ́ɛn tɔ ɔ́. Vɔ̌sánú-xwlémawutɔ́ e hɛn akɔjijɛgbá Aklúnɔ tɔn lɛ́ɛ jɛ nukɔn nú yě. Nǔkún-yiyahwenu, hwenu e Judɛ́ɛn tɔ ɔ́ nɔ ɖi sin, bo nɔ gba kpé fí bǐ ɔ́ wɛ mɛ e hɛn akɔjijɛgbá ɔ́ lɛ́ɛ wá tɔ ɔ́ tó. Ée vɔ̌sánú-xwlémawutɔ́ lɛ́ɛ tɛ afɔ sín ɔ́ mɛ lě tlóló ɔ́, tɔ ɔ́ gbo, bɔ sin e sa jǎwe ɔ́ kplé cí fí ɖokpó nǔɖé wɛ hɛn ɛ ɖó te ɖɔhun. Sin ɔ́ nɔ te ɖo zɔ vóéé ɖo Adámu, toxo e ɖo Saatáni kpá ɔ́ mɛ. Bɔ sin e ɖo sisa yi Xu Kúkú ɔ́ mɛ wɛ ɔ́ gbo bǐ. Ée tɔ ɔ́ gbo mɔ̌ ɔ́, togun ɔ́ gbɔn ayǐkúngban xúxú jí, bó dó asá tɔ ɔ́ yi jɛ Jeliko nukɔn. Vɔ̌sánú-xwlémawutɔ́ e hɛn akɔjijɛgbá Mawu Mavɔmavɔ tɔn lɛ́ɛ nɔ te ɖo ayǐkúngban xúxú jí, ɖo tɔ ɔ́ tɛ́ntin. Yě nɔ te fínɛ́ káká bɔ togun ɔ́ bǐ zɔn afɔ gbɔn ayǐkúngban xúxú jí yi jɛ tɔ ɔ́ gúdo. Ée togun ɔ́ bǐ d'asá Judɛ́ɛn tɔ ɔ́ fó ɔ́, Mawu Mavɔmavɔ ɖɔ nú Jozuwée ɖɔ: “Mi cyán súnnu wěwe ɖo togun ɔ́ mɛ, mi sɔ́ súnnu ɖokpó ɖokpó gbɔn akɔta ɖokpó ɖokpó mɛ, bó ná zɔ́n yě ɖɔ yě ní yi tɔ zan ɔ́ jí ɖo fí e vɔ̌sánú-xwlémawutɔ́ lɛ́ɛ nɔ te ɖe ɔ́, bó bɛ́ awǐnnya wěwe wá. Yě ná bɛ́ awǐnnya énɛ́ lɛ́ɛ yi ɖó fí e ná dɔ́ wɛ mi ɖe égbé é.” Jozuwée ylɔ́ súnnu wěwe e é zɔ́n bɔ è cyán ɖo Izlayɛ́li ví lɛ́ɛ mɛ lɛ́ɛ, è sɔ́ súnnu ɖokpó ɖokpó gbɔn akɔta ɖokpó ɖokpó mɛ. Jozuwée ɖɔ nú yě ɖɔ: “Mi jɛ Mawu Mavɔmavɔ, Mawu mitɔn sín akɔjijɛgbá ɔ́ nukɔn, bó yi tɔ ɔ́ sín azan jí. Mi mɛ ɖokpó ɖokpó ná zé awǐnnya ɖokpó ɖokpó ɖó abɔ̌ ta. Awǐnnya ɖokpó ɖokpó ná nyí Izlayɛ́li sín akɔta lɛ́ɛ ɖokpó ɖokpó tɔn. Awǐnnya énɛ́ lɛ́ɛ ná nɔ flín nǔ e jɛ ɖo fí ɔ́ mi. Nú é wá jɛ sɔ gúdo bónú vǐ mitɔn lɛ́ɛ kan nǔ byɔ́ ɖɔ étɛ́ awǐnnya énɛ́ lɛ́ɛ ká nyí nú mi ɔ́, mi ná yí gbe nú yě ɖɔ: ‘Hwenu e akɔjijɛgbá Mawu Mavɔmavɔ tɔn ɖo Judɛ́ɛn tɔ dó asá wɛ ɔ́, tɔ ɔ́ gbo ɖo nukɔn tɔn; tɔ ɔ́ gbo bɔ sin kplé cí fí ɖokpó nǔɖé wɛ hɛn ɛ ɖó te ɖɔhun. Nǔ énɛ́ ɔ́ e jɛ ɔ́ flín Izlayɛ́li ví lɛ́ɛ wɛ awǐnnya énɛ́ lɛ́ɛ ɖe káká sɔ́yi mavɔ mavɔ.’ ” Énɛ́ ɔ́ gúdo ɔ́, mɛ e è cyán lɛ́ɛ bló nǔ e Jozuwée zɔ́n yě ɔ́. Yě yi bɛ́ awǐnnya wěwe ɖo Judɛ́ɛn tɔ ɔ́ tɛ́ntin, bó bɛ́ hɛn yi fí e yě ɖɔ é. Akɔta ɖokpó awǐnnya ɖokpó lě e Mawu Mavɔmavɔ ɖésú ɖɔ gbɔn nú Jozuwée é. Jozuwée zɔ́n bɔ è lɛ̌ to awǐnnya wěwe ɖó tɔ ɔ́ tɛ́ntin, ɖó fí e vɔ̌sánú-xwlémawutɔ́ e hɛn akɔjijɛgbá lɛ́ɛ nɔ te ɖe ɖo tɔ ɔ́ mɛ é. Awǐnnya énɛ́ lɛ́ɛ kpo ɖo fínɛ́ káká jɛ égbé. Vɔ̌sánú-xwlémawutɔ́ e hɛn akɔjijɛgbá ɔ́ lɛ́ɛ nɔ te ɖo tɔ ɔ́ tɛ́ntin káká, bɔ togun ɔ́ bló nǔ e Mawu Mavɔmavɔ ɖɔ nú Jozuwée, bɔ é ɖɔ nú yě ɔ́ bǐ. Yě bló nǔ lɛ́ɛ bɔ é sɔ gbe xá lě e Mɔyízi ɖɔ gbɔn nú Jozuwée é. Togun ɔ́ hwlɛ́ndó bo dó asá tɔ ɔ́. Ée mɛ lɛ́ɛ bǐ jɛ tɔ ɔ́ gúdo ɔ́, vɔ̌sánú-xwlémawutɔ́ lɛ́ɛ jɛ togun ɔ́ nukɔn kpó akɔjijɛgbá ɔ́ kpó. Súnnu e ɖo Hwlibɛ́ni sín akɔta mɛ lɛ́ɛ, kpódó éé ɖo Gadi sín akɔta mɛ lɛ́ɛ kpó, kpódó éé ɖo Manasée sín akɔta vlɔ̌ɖówe mɛ lɛ́ɛ kpó sɔ́ ahwan nú, bó ɖo gbesisɔ mɛ bo ná fun ahwan. Yě nɔ nukɔn nú Izlayɛ́li ví e kpo lɛ́ɛ, bɔ yě dó asá tɔ ɔ́; yě bló lě e Mɔyízi ɖɔ gbɔn nú yě ɔ́. Yě mɛ e sɔ́ ahwan nú bo ɖo gbesisɔ mɛ bo ná fun ahwan lɛ́ɛ yi gbɛtɔ́ adɔ̌kpo we (40.000) mɔ̌. Yě dó asá Judɛ́ɛn tɔ ɔ́ ɖo Mawu Mavɔmavɔ nukún mɛ, bó ɖidó Jeliko sín ayǐkúngban wɛnjɛ lɛ́ɛ jí. Gbe énɛ́ gbe ɔ́, Mawu Mavɔmavɔ sɔ́ acɛkpikpa Jozuwée tɔn jínjɔ́n ayǐ ɖo Izlayɛ́li ví lɛ́ɛ bǐ tɛ́ntin, bɔ yě ɖó sísí n'i ɖo gbɛzán tɔn bǐ mɛ, lě e yě ɖó sísí nú Mɔyízi gbɔn é. Énɛ́ ɔ́ gúdo ɔ́, Mawu Mavɔmavɔ ɖɔ nú Jozuwée ɖɔ: “Đe gbe nú vɔ̌sánú-xwlémawutɔ́ e hɛn kúnnuɖegbá ɔ́ lɛ́ɛ ɖɔ yě ní tɔ́n sín tɔ ɔ́ mɛ.” Bɔ Jozuwée ɖe gbe nú yě ɖɔ: “Mi tɔ́n sín Judɛ́ɛn tɔ ɔ́ mɛ.” Vɔ̌sánú-xwlémawutɔ́ lɛ́ɛ bló nǔ e Jozuwée ɖɔ nú yě ɔ́; ée afɔ yětɔn ná jɛ agě lě tlóló ɔ́, tɔ ɔ́ lɛ́ jɛ sisa jí, bo ɖi sin lě e é kó ɖe gbɔn ɖ'ayǐ é. Sun nukɔntɔn ɔ́ sín azǎn wǒgɔ́ ɔ́ gbe wɛ Izlayɛ́li ví lɛ́ɛ dó asá tɔ ɔ́. Yě ɖǒ gɔnu ɖó Gilugalu, ɖo Jeliko sín zǎnzǎnhwe jí. Jozuwée ɖɔ bɔ yě tɛ́ awǐnnya wěwe e yě bɛ́ sín Judɛ́ɛn tɔ ɔ́ mɛ lɛ́ɛ ɖó Gilugalu. Énɛ́ ɔ́ gúdo ɔ́, é ɖɔ nú Izlayɛ́li ví lɛ́ɛ ɖɔ: “Nú é wá jɛ sɔ gúdo, bónú vǐ mitɔn lɛ́ɛ kan nǔ byɔ́ ɖɔ étɛ́ awǐnnya énɛ́ lɛ́ɛ ká nyí nú mi ɔ́, mi ná tínmɛ nú yě ɖɔ Judɛ́ɛn tɔ ɔ́ gbo, bɔ Izlayɛ́li ví lɛ́ɛ gbɔn ayǐkúngban xúxú jí yi jɛ tɔ ɔ́ gúdo. Đó Mawu Mavɔmavɔ, Mawu mitɔn bló bɔ Judɛ́ɛn tɔ ɔ́ xú, bɔ mi gbɔn ayǐkúngban xúxú jí, bó dó asá tɔ ɔ́. Nǔ ɖokpó ɔ́ wɛ é bló nú Xu Vɔvɔ ɔ́ bɔ é xú, bɔ mi gbɔn ayǐkúngban xúxú jí bó dín. É bló mɔ̌ bónú togun e ɖo ayǐkúngban jí é bǐ ná tunwun lě e hlɔ̌nhlɔ́n tɔn dó agba sɔ é, bónú mi ná ɖó sísí nú Mawu Mavɔmavɔ, Mawu mitɔn tɛgbɛ.” Axɔ́sú Amɔliti lɛ́ɛ tɔn e ɖo Judɛ́ɛn tɔ ɔ́ sín gbadahwe jí lɛ́ɛ bǐ kpódó axɔ́sú Kanáanu lɛ́ɛ tɔn e ɖo Mɛditɛlanɛ́ɛ xu ɔ́ tó lɛ́ɛ kpó se ɖɔ Mawu Mavɔmavɔ bló bɔ Judɛ́ɛn tɔ ɔ́ xú, bɔ Izlayɛ́li ví lɛ́ɛ gbɔn ayǐkúngban xúxú jí yi jɛ tɔ ɔ́ gúdo. Ée yě se mɔ̌ ɔ́, ayixa yětɔn bǐ gba dó, bɔ yě sɔ́ glá bó ná nɔ te ɖo Izlayɛ́li ví lɛ́ɛ nukɔn ǎ. Hwenɛ́nu ɖokpó ɔ́, Mawu Mavɔmavɔ ɖɔ nú Jozuwée ɖɔ: “Zě awǐnnya dó bló jǐví, bó gbo ada nú Izlayɛ́li ví e má kó gbo ada ǎ lɛ́ɛ.” Bɔ Jozuwée sɔ́ awǐnnya dó bló jǐví, bó dó gbo ada nú Izlayɛ́li ví lɛ́ɛ ɖo Adagbigbo só jí. Nǔ e wú Jozuwée gbo ada nú Izlayɛ́li ví lɛ́ɛ ɔ́ ɖíe: ée togun ɔ́ tɔ́n sín Ejípu ɔ́, súnnu lɛ́ɛ, súnnu e ko su ahwan yi lɛ́ɛ bǐ kú ɖo gbětótló mɛ ɖo alixo. Togun énɛ́ e tɔ́n sín Ejípu ɔ́ bǐ wɛ è ko gbo ada ná. Lo ɔ́, hwenu e yě tɔ́n sín Ejípu ɔ́, vǐ súnnu e yě wá ji ɖo gbětótló mɛ ɖo alixo lɛ́ɛ ɔ́, è gbo ada nú yě ɖě ǎ. Đó xwe kanɖé (40) wɛ Izlayɛ́li ví lɛ́ɛ ɖi zɔnlin xɔ ɖo gbětótló mɛ. Yě ɖo gbětótló ɔ́ mɛ káká bɔ súnnu e ko su ahwan yi ɖo yě mɛ hwenu e yě gosín Ejípu lɛ́ɛ bǐ kú, ɖó yě se tónú nú Mawu Mavɔmavɔ ǎ; bɔ Mawu Mavɔmavɔ xwlé nǔ ɖɔ émí kún ná jó yě dó, bɔ yě ná mɔ to e sín akpá émí dó nú tɔ́gbó yětɔn lɛ́ɛ ɖɔ émí ná ná yě ɔ́ ó. Anɔ̌sin kpó wǐin kpó wɛ gɔ́ to énɛ́ ɔ́ mɛ. Vǐ yětɔn lɛ́ɛ wɛ Mawu Mavɔmavɔ kplá byɔ́ to énɛ́ ɔ́ mɛ ɖó tɛn yětɔn mɛ. Yědɛɛ lɛ́ɛ wɛ Jozuwée wá gbo ada ná, ɖó è ko gbo nú yě ɖ'ayǐ ǎ. Ée è gbo ada nú yě bǐ fó ɔ́, yě nɔ fí e yě ɖó gɔnu ɖó ɔ́ káká bɔ ada yětɔn kú. Énɛ́ ɔ́ gúdo ɔ́, Mawu Mavɔmavɔ ɖɔ nú Jozuwée ɖɔ: “Égbé ɔ́, un ɖe winnyá e mɛ mi nɔ, ɖo Ejípu ɔ́ nú mi.” Énɛ́ ɔ́ wú wɛ è nǎ nɔ́ ylɔ́ fí élɔ́ ɖɔ Gilugalu. Fí énɛ́ ɔ́ kpo ɖo mɔ̌ nyí wɛ káká jɛ égbé. Izlayɛ́li ví lɛ́ɛ ɖó gɔnu ɖó Gilugalu, bó ɖu Dǐndínwáyixwe ɔ́ ɖo sun ɔ́ sín azǎn wǒ-ɛnɛgɔ́ ɔ́ gbe gbadanu, ɖo ayǐkúngban wɛnjɛ jí ɖo Jeliko kpá. Ayǐhɔ́ngbe tɔn ɔ́, yě ɖu wɔ̌xúxú e tɔ́n má ɖ'é mɛ ǎ é kpó jinukún mimɛ kpó ɖo gbe énɛ́ ɔ́ gbe ɖokpó ɔ́. Jinukún to ɔ́ mɛ tɔn wɛ yě dó ɖa nǔɖuɖu énɛ́ lɛ́ɛ ná. Bɛ́ sín gbe énɛ́ ɔ́ gbe e yě ɖu nǔɖuɖu to ɔ́ mɛ tɔn ɔ́, nǔɖuɖu e è nɔ ylɔ́ ɖɔ mǎna ɔ́ ɖě sɔ́ wá nú yě ǎ. Jinukún e nɔ wú ɖo Kanáa ɔ́ wɛ yě ɖu ɖo xwe énɛ́ ɔ́ xwe. Jozuwée ɖo Jeliko toxo ɔ́ kpá gbe ɖokpó, bó zé ta. É ná mɔ nǔɖé kpowun ɔ́, nya ɖé jɛ́n wá nɔ te nukɔn tɔn, bɔ nya ɔ́ kó sún hwǐ tɔn sín akún mɛ, bó hɛn alɔ mɛ. É ká sɛkpɔ́ nya ɔ́, bó kanbyɔ́ ɛ ɖɔ: “Mǐdɛɛ lɛ́ɛ jí wɛ a ɖe a, abǐ kɛntɔ́ mǐtɔn lɛ́ɛ jí wɛ a ɖe?” Bɔ nya ɔ́ yí gbe n'i ɖɔ: “Un ɖo mɛ ɖěbǔ jí ǎ, ahwangán Mawu Mavɔmavɔ tɔn wɛ un nyí. Wǐwá wɛ un ɖe din.” Ée Jozuwée se mɔ̌ ɔ́, é xwe agbɔ̌nnusú do, bó ɖe kɔ́, lobo ɖɔ nú nya ɔ́ ɖɔ: “Mɛsɛntɔ́ towe wɛ un nyí, étɛ́ a jlǒ ná zɔ́n mì?” Ahwangán Mawu Mavɔmavɔ tɔn ɔ́ ká ɖɔ n'i ɖɔ: “Đe afɔkpa towe, ɖó tɛn e mɛ a ɖe ɔ́, tɛn mímɛ́ wɛ.” Bɔ Jozuwée ɖe afɔkpa tɔn. È sú hɔntogbó Jeliko tɔn lɛ́ɛ bǐ dó Izlayɛ́li ví lɛ́ɛ kpánwúnkpánwún, bó ján bǐ. Mɛ ɖěbǔ sixú byɔ́ to ɔ́ mɛ ǎ, mɛ ɖěbǔ ká sixú tɔ́n ǎ. Mawu Mavɔmavɔ ká ɖɔ nú Jozuwée ɖɔ: “Kpɔ́n, un ná jó Jeliko toxo ɔ́ nú we, bó ná jó axɔ́sú e kpa acɛ ɖo toxo ɔ́ mɛ ɔ́ kpó ahwanfuntɔ́ toxo ɔ́ tɔn lɛ́ɛ kpó nú we. Hwi kpódó ahwanfuntɔ́ towe lɛ́ɛ bǐ kpó ná nɔ́ ɖi zɔnlin lɛ́ lɛ̌ dó toxo ɔ́ azɔn ɖokpó gbe ɖokpó, káká nú azǎn ayizɛ́n. Vɔ̌sánú-xwlémawutɔ́ tɛ́nwe ná jɛ nukɔn nú akɔjijɛgbá ɔ́. Yě mɛ ɖokpó ɖokpó ná hɛn lanzo ɖokpó ɖokpó. Azǎn tɛ́nwegɔ́ ɔ́ gbe ɔ́, mi ná lɛ́ lɛ̌ dó toxo ɔ́ azɔn tɛ́nwe, bɔ vɔ̌sánú-xwlémawutɔ́ lɛ́ɛ ná kún lanzo. Hwenu e lanzo ɔ́ ná ɖo nǔ ɖɔ wɛ magbokɔ bɔ mi ná se ɔ́, togun ɔ́ ná sú xó ɖaxó ɖé. Énɛ́ ɔ́, dǒ e è mɛ lɛ́ lɛ̌ dó toxo ɔ́ lɛ́ɛ ná mu. Hwe énɛ́ ɔ́ nu ɔ́, mi bǐ ná byɔ́ toxo ɔ́ mɛ; fí e mɛ ɖokpó ɖokpó kpan nukɔn ɔ́, mɛ ɔ́ ná zɔn mɔ̌ tlélé byɔ́ toxo ɔ́ mɛ.” Ée Jozuwée Nuni ví ɔ́ se mɔ̌ ɔ́, é ylɔ́ vɔ̌sánú-xwlémawutɔ́ lɛ́ɛ, bó ɖɔ nú yě ɖɔ: “Mi zé akɔjijɛgbá Mawu Mavɔmavɔ tɔn ɔ́, bónú mi mɛ tɛ́nwe ní zé lanzo bo jɛ nukɔn tɔn.” Énɛ́ ɔ́ gúdo ɔ́, é ɖe gbe nú togun ɔ́ ɖɔ: “Éyá! Mi lɛ́ lɛ̌ dó toxo ɔ́. Mɛ e hɛn ahwanfunnú lɛ́ɛ ní jɛ nukɔn nú akɔjijɛgbá Mawu Mavɔmavɔ tɔn ɔ́.” Yě bló nǔ lɛ́ɛ bǐ lě e Jozuwée ɖɔ gbɔn nú yě ɔ́. Vɔ̌sánú-xwlémawutɔ́ tɛ́nwe e hɛn lanzo tɛ́nwe lɛ́ɛ ɖidó, bó ɖo lanzo kún wɛ, bɔ akɔjijɛgbá Mawu Mavɔmavɔ tɔn ɖo gǔdo yětɔn. Ahwanfuntɔ́ lɛ́ɛ ɖě ɖo vɔ̌sánú-xwlémawutɔ́ lɛ́ɛ nukɔn, bɔ yě mɛ e kpo lɛ́ɛ ɖo akɔjijɛgbá ɔ́ gúdo. Yě ɖo yiyi wɛ bɔ lanzo ɖo nǔ ɖɔ wɛ magbokɔ. Jozuwée ka ko ɖɔ nú togun ɔ́ ɖɔ: “Mi ma sú xó ó, mi ma nú è se gbe mitɔn ó, mi ma nú xó ɖé tɔ́n sín nu mitɔn mɛ káká jɛ gbe e gbe un ná ɖɔ nú mi ɖɔ mi sú xó é ó.” É ɖɔ bɔ yě hɛn akɔjijɛgbá Mawu Mavɔmavɔ tɔn ɔ́ bó lɛ́ lɛ̌ dó toxo ɔ́ azɔn ɖokpó, bó lɛ́ kɔ wá fí e yě ɖǒ gɔnu ɖó ɔ́, bó dɔ́ fínɛ́. Ayǐhɔ́ngbe tɔn zǎnzǎn tɛɛn ɔ́, Jozuwée fɔ́n, bɔ vɔ̌sánú-xwlémawutɔ́ lɛ́ɛ lɛ́ ɖíɖá akɔjijɛgbá Mawu Mavɔmavɔ tɔn ɔ́. Bɔ vɔ̌sánú-xwlémawutɔ́ tɛ́nwe e hɛn lanzo lɛ́ɛ jɛ akɔjijɛgbá ɔ́ sín nukɔn ɖidó, bó ɖo lanzo yětɔn lɛ́ɛ kún wɛ. Ahwanfuntɔ́ lɛ́ɛ ɖě ɖo nukɔn nú yě, bɔ yě mɛ ɖě ɖo akɔjijɛgbá ɔ́ gúdo. Hwenu e yě ɖo yiyi wɛ ɔ́, lanzo ɔ́ ɖo nǔ ɖɔ wɛ magbokɔ. Gbe énɛ́ gbe ɖokpó ɔ́, yě lɛ́ lɛ́ lɛ̌ dó toxo ɔ́ azɔn ɖokpó, bó lɛ́ kɔ wá yi fí e yě ɖó gɔnu ɖó ɔ́. Yě bló mɔ̌ xɔ azǎn ayizɛ́n. Azǎn tɛ́nwegɔ́ ɔ́ gbe ɔ́, yě fɔ́n ayǐtéhɔ̌nnu, bó lɛ́ lɛ̌ dó toxo ɔ́ azɔn tɛ́nwe, bó bló nǔ lɛ́ɛ lě e yě kó nɔ́ bló gbɔn ɖ'ayǐ ɔ́. Azǎn énɛ́ ɔ́ gbe kɛ́ɖɛ́ wɛ yě lɛ́ lɛ̌ dó toxo ɔ́ azɔn tɛ́nwe. Ée yě ɖo lɛ̌ lɛ́ dó toxo ɔ́ wɛ azɔn tɛ́nwegɔ́ ɔ́, bɔ vɔ̌sánú-xwlémawutɔ́ lɛ́ɛ ɖo lanzo kún wɛ ɔ́, Jozuwée ɖɔ nú togun ɔ́ ɖɔ: “Mi sú xó! Mawu Mavɔmavɔ kó jó toxo ɔ́ nú mi. È nǎ gba toxo ɔ́, bó ná hɛn nǔ e ɖ'é mɛ lɛ́ɛ bǐ gblé, ɖó Mawu Mavɔmavɔ wɛ è sɔ́ ɖ'ayǐ ná. Hlaxábu agalɛtɔ́ ɔ́ kɛ́ɖɛ́, kpó mɛ e ɖo xwé tɔn gbe lɛ́ɛ bǐ kpó wɛ è nǎ jó dó, ɖó é wɛ sɔ́ dobanúnǔtɔ́ e mǐ sɛ́ dó lɛ́ɛ hwlá. Mi ká cɔ́ miɖée, mi ma sɔ́ nǔ e è ɖǒ ná hɛn gblé lɛ́ɛ ɖěbǔ ó, é má nyí mɔ̌ ǎ ɔ́, mi ná dɔn nǔ nyanya wá nú togun Izlayɛ́li tɔn ɔ́, bó ná vɔ to ɔ́. Kpatágan kpó siká kpó e è nǎ mɔ ɖo toxo ɔ́ mɛ lɛ́ɛ bǐ, nǔ e è zě ganvɔ dó bló ná lɛ́ɛ, kpódó éé è sɔ́ gan dó bló ná bɔ è nǎ mɔ ɖo toxo ɔ́ mɛ lɛ́ɛ bǐ kpó ɔ́, è nǎ sɔ́ ɖó vo nú Mawu Mavɔmavɔ bó ná bɛ́ kɔn nyi dɔkun tɔn lɛ́ɛ jí.” Ée Jozuwée ɖɔ mɔ̌ ɔ́, è kún lanzo. Ée togun ɔ́ se lanzo gbe tlóló ɔ́, xósúsú mlí, bɔ dǒ e è mɛ lɛ́ lɛ̌ dó toxo ɔ́ bǐ hɔ́. Énɛ́ ɔ́, Izlayɛ́li ví lɛ́ɛ nyi agbo byɔ́ toxo ɔ́ mɛ, mɛ ɖokpó ɖokpó ɖidó fí e é kpan nukɔn ɔ́ tlélé, bɔ yě yǐ toxo ɔ́. Yě vívá nǔ e ɖo toxo ɔ́ mɛ lɛ́ɛ bǐ sín kún. Yě hu súnnu lɛ́ɛ, bó hu nyɔ̌nu lɛ́ɛ, bó hu mɛ wínnyáwínnyá lɛ́ɛ kpódó degénɔ lɛ́ɛ kpó. Yě hu káká bó hu nyibú bó hu gbɔ̌ kpódó tócí lɛ́ɛ kpó. Jozuwée yi ɖɔ nú mɛ we e yi ba do nú to ɔ́ lɛ́ɛ ɖɔ: “Mi yi Hlaxábu agalɛtɔ́ ɔ́ xwé, bó kplá é kpó mɛ tɔn lɛ́ɛ bǐ kpó tɔ́n sín xwé ɔ́ gbe, lě e mi ko ɖɔ bo xwlé nǔ d'é jí n'i gbɔn ɖ'ayǐ é.” Bɔ yě yi bó kplá Hlaxábu, bó kplá tɔ́ tɔn, nɔ tɔn, nɔví tɔn súnnu lɛ́ɛ kpó nyɔ̌nu lɛ́ɛ kpó, kpódó mɛ tɔn lɛ́ɛ bǐ kpó wá. Yě ɖe mɛ e ɖo hɛ̌nnu tɔn mɛ lɛ́ɛ bǐ tɔ́n bó ɖó tɛnmɛ nú yě ɖó fí e yě ná nɔ bɔ nǔɖé má ná wa yě ǎ é. Yě ká ɖo fí e Izlayɛ́li ví lɛ́ɛ ɖó gɔnu ɖó é ǎ. Énɛ́ ɔ́ gúdo ɔ́, yě dó toxo ɔ́ zo, kpódó nǔ e ɖo toxo ɔ́ mɛ lɛ́ɛ bǐ kpó. Yě jó nǔɖé dó zɛ kpatágan, siká, kpó nǔ e è zě ganvɔ abǐ gan dó bló ná lɛ́ɛ kpó wú ǎ. Yě bɛ̌ nǔ énɛ́ lɛ́ɛ bǐ dó dɔkun e ɖo Mawu Mavɔmavɔ sín xɔ mɛ lɛ́ɛ jí. Énɛ́ ɔ́, Jozuwée jó Hlaxábu agalɛtɔ́ ɔ́ dó nyi gbɛ, é kpó mɛ tɔn lɛ́ɛ bǐ kpó, ɖó hwenu e Jozuwée sɛ́ dobanúnǔtɔ́ lɛ́ɛ dó ɖɔ yě ní yi kpɔ́n lě e toxo ɔ́ ɖe gbɔn ɔ́, é wɛ sɔ́ yě hwlá bɔ è ma wa nǔɖé nú yě ǎ. É nɔ Izlayɛ́li ví lɛ́ɛ mɛ, bɔ kúnkan tɔn lɛ́ɛ kpo ɖo gbɛ ɖo yě mɛ káká jɛ égbé. Hwenɛ́nu ɖokpó ɔ́, Jozuwée ɖɔ xó dó Jeliko toxo ɔ́ wú, é xwlé nǔ d'é jí ɖɔ: “Ényí mɛɖé tɛ́nkpɔ́n ɖɔ émí ná vɔ́ toxo élɔ́ blóɖó ɔ́, Mawu Mavɔmavɔ ní dó nu mɛ énɛ́ ɔ́. Nú é kun do bo ná dó dǒ ɔ́ do ɔ́, nukɔn ví tɔn wɛ é ná d'é mɛ; é ja hɔn lɛ́ɛ dó gbé ɔ́, vǐ tɔn kpodé ɔ́ wɛ é ná d'é mɛ.” Mawu Mavɔmavɔ ɖo kpɔ́ xá Jozuwée, bɔ nyǐkɔ tɔn gba kpé to ɔ́ bǐ mɛ. Izlayɛ́li ví lɛ́ɛ bló nǔ e Mawu Mavɔmavɔ gbɛ́ nú yě ɖɔ yě ní má bló ó é; ɖó nya ɖé ɖo yě mɛ, bó nɔ́ nyí Akáni, bó jɔ ɖo akɔta Judáa tɔn mɛ. Akáni ɔ́, Kaamíi ví wɛ, bɔ Kaamíi nyí Zavúdi ví, bɔ Zavúdi nyí Zeláxi ví. Dɔkun e Mawu Mavɔmavɔ gbɛ́ ɖɔ yě ní má bɛ́ ó lɛ́ɛ ɔ́, Akáni fɔ nǔɖé lɛ́ɛ ɖ'é mɛ. Nǔ énɛ́ ɔ́ wɛ zɔ́n bɔ Mawu Mavɔmavɔ sin xomɛ dó Izlayɛ́li ví lɛ́ɛ. Jozuwée sɛ́ mɛ dó sín Jeliko ɖɔ yě ní yi Ayíi. Toxo énɛ́ ɔ́ ɖo zǎnzǎnhwe jí nú Betɛ́li ɖo Bɛti-Awɛni kpá. É ɖɔ nú yě ɖɔ yě ní yi kpɔ́n lě e toxo ɔ́ ɖe gbɔn ɔ́. Ée yě yi kpɔ́n toxo ɔ́, yě lɛ́ kɔ wá ɖɔ nú Jozuwée ɖɔ: “É byɔ́ ɖɔ è nǐ sɛ́ ahwangɔnu ɔ́ bǐ dó ahwan fun xá toxo énɛ́ ɔ́ gbé ǎ. Gbɛtɔ́ afɔwó (2.000) abǐ afɔwó-afatɔ́n (3.000) yi ɔ́, é kó kpé, ɖó mɛ e ɖo toxo ɔ́ mɛ lɛ́ɛ sukpɔ́ ɖěbǔ ǎ. È nǎ xaji dó tagba nú ahwangɔnu mǐtɔn ɔ́ bǐ ǎ.” Gbɛtɔ́ afɔwó-afatɔ́n (3.000) mɔ̌ yi tɔ́n ahwan Ayíi toxo ɔ́. É ká kpa yě ǎ, yě bǐ wɛ hɔn ɖo Ayíinu lɛ́ɛ nukɔn. Ayíinu lɛ́ɛ hu gbɛtɔ́ gbantɔ́n-nukún-ɖokpó (36) mɔ̌ ɖo yě mɛ. Mɛ e kpo lɛ́ɛ ɔ́, Ayíinu lɛ́ɛ nya yě sín hɔntogbó toxo ɔ́ tɔn nukɔn, káká wá Cevalímu, bó wá xwedó yě wú ɖo dodo ɔ́ mɛ, bó hu yě ɖo fínɛ́. Énɛ́ ɔ́, ahwi xo togun ɔ́ bǐ, bɔ xɛsi jɛ yě jí. Ée nǔ cí mɔ̌ ɔ́, Jozuwée kpódó mɛxó lɛ́ɛ kpó vún awu dó kɔ nú yěɖée, bó vun afúntúntún dó ta, lobo xwe agbɔ̌nnusú do ɖo akɔjijɛgbá Mawu Mavɔmavɔ tɔn nukɔn, lobo nɔ mɔ̌ káká jɛ gbadanu. Bɔ Jozuwée sú xó bó ɖɔ: “Óo! Aklúnɔ, Mawu Mavɔmavɔ! Aniwú a kplá mǐ d'asá Judɛ́ɛn tɔ ɔ́? A blǒ mɔ̌ bó ná jó mǐ nú Amɔliti lɛ́ɛ, bó ná tin bɔ mǐ ná kú wɛ a? Ényí mǐ kó tunwun ɔ́, mǐ ná kó gbɔ bó nɔ tɔ ɔ́ gúdo dɔ̌n. Aklúnɔ, din e Izlayɛ́li ví lɛ́ɛ hɔn ɖo kɛntɔ́ nukɔn ɔ́, nu tɛ́ un sixú kɛ? Kanáanu lɛ́ɛ kpó mɛ e ɖo to ɔ́ mɛ lɛ́ɛ bǐ kpó ná se xó énɛ́ ɔ́, bó ná wá xá mǐ, lobo ná sú kún mǐtɔn dó. Ényí nǔ ká cí mɔ̌ ɔ́, nɛ̌ wɛ a nǎ ɖe susu towe xlɛ́ gbɔn lo?” Ée Jozuwée ɖɔ xó énɛ́ lɛ́ɛ fó ɔ́, Mawu Mavɔmavɔ yí gbe n'i ɖɔ: “Sí te! Étɛ́wú a ɖo agbɔ̌nnusú xwe do mɔ̌? Hwɛ wɛ Izlayɛ́li ví lɛ́ɛ hu. Yě nɔ gbejí nú akɔ e un jɛ xá yě ɔ́ ǎ. Yě bɛ́ dɔkun e un gbɛ́ nú yě ɖɔ yě ní má bɛ́ ɖo to ɔ́ mɛ ó lɛ́ɛ. Yě fin dɔkun lɛ́ɛ bó bɛ́ hwlá dó nǔ yětɔn lɛ́ɛ mɛ. Ée yě wa nǔ gbɔn mɔ̌ ɔ́, yě sɔ́ sixú nɔ te ɖo kɛntɔ́ yětɔn lɛ́ɛ nukɔn ǎ. Hɔn jɛ́n wɛ yě ná nɔ́ hɔn ɖo kɛntɔ́ nukɔn, ɖó yě ɖésúnɔ ɔ́, nǔ dindɔn wɛ yě kó nyí; è nǎ sú kún yětɔn dó. Mi Izlayɛ́li ví lɛ́ɛ ɔ́, dɔkun e un gbɛ́ ɖɔ mi ma bɛ́ ó bɔ mi bɛ́ lɛ́ɛ ɔ́, ényí mi ma hɛn gblé ǎ ɔ́, un sɔ́ sixú nɔ jǐ mitɔn ǎ. Din ɔ́, yi ɖɔ nú togun ɔ́ ɖɔ é ní sɔ́ nǔ, bó wá kpé mì. Đe gbe n'i bónú é ní slá wǔ nú sɔ, ɖó nyɛ Mawu Mavɔmavɔ, Mawu Izlayɛ́li tɔn ɔ́, nǔ e ɖɔ nú Izlayɛ́li ví lɛ́ɛ wɛ un ɖe ɔ́ ɖíe: Dɔkun e un gbɛ́ ɖɔ mi ní ma bɛ́ ó lɛ́ɛ ɔ́, nǔ lɛ́ɛ ɖo así mitɔn. Ényí mi ma bɛ́ yě tɔ́n sín tɛ́ntin mitɔn ǎ ɔ́, mi ná sixú nɔ te ɖo kɛntɔ́ mitɔn lɛ́ɛ nukɔn ǎ. Sɔ zǎnzǎn ɔ́, mi ná wá gɔ̌n ce ɖě jɛ ɖě gúdo. Nú un ɖe akɔta ɖé ɔ́, hɛ̌nnu e ɖo akɔta énɛ́ ɔ́ mɛ lɛ́ɛ bǐ ná wá gɔ̌n ce ɖě jɛ ɖě gúdo. Nú un ɖe hɛ̌nnu ɖé ɔ́, xwédo e ɖo hɛ̌nnu énɛ́ ɔ́ mɛ lɛ́ɛ ná wá gɔ̌n ce ɖě jɛ ɖě gúdo. Nú un ɖe xwédo ɖé ɔ́, súnnu e ɖo xwédo énɛ́ ɔ́ mɛ lɛ́ɛ ná wá gɔ̌n ce ɖě jɛ ɖě gúdo. Énɛ́ ɔ́, un ná ɖe mɛ e sí dɔkun e un gbɛ́ ɖɔ è nǐ má bɛ́ lɛ́ɛ ó ɖe ɔ́ ɖo yě mɛ, bɔ è nǎ zé é kpódó nǔ e é ɖó lɛ́ɛ bǐ kpó nyi zo mɛ, ɖó é nɔ gbejí nú akɔ e un jɛ xá ɛ ɔ́ ǎ, bó wa wunhínhɔ́n nú ɖo Izlayɛ́li ví lɛ́ɛ tɛ́ntin.” Ayǐhɔ́ngbe tɔn zǎnzǎn tɛɛn ɔ́, Jozuwée kplá Izlayɛ́li ví lɛ́ɛ yi Mawu nukɔn: akɔta ɖě bɔ dó ɖě wú, bɔ Mawu ɖe akɔta Judáa tɔn. É kplá akɔta Judáa tɔn wá Mawu nukɔn: hɛ̌nnu ɖě jɛ ɖě gúdo, bɔ Mawu ɖe hɛ̌nnu Zeláxi tɔn, bɔ Jozuwée kplá hɛ̌nnu Zeláxi tɔn wá Mawu nukɔn xwédo ɖě jɛ ɖě gúdo, bɔ Mawu ɖe xwédo Zavúdi tɔn. É kplá súnnu e ɖo xwédo Zavúdi tɔn mɛ lɛ́ɛ ɖokpó ɖokpó wá Mawu nukɔn, bɔ Mawu ɖe Akáni. Akáni ɔ́, akɔta Judáa tɔn ɔ́ mɛ wɛ é jɔ ɖe, bó nyí Kaamíi ví, bɔ Kaamíi nyí Zavúdi ví, bɔ Zavúdi nyí Zeláxi ví. Jozuwée ɖɔ nú Akáni ɖɔ: “Vǐ ce, tunwun ɖɔ Mawu Mavɔmavɔ, Mawu Izlayɛ́li tɔn kló, ɖɔ nǔgbó nú mì. Đɔ nǔ e a wa ɔ́ nú mì; ma hwlá nǔ ɖěbǔ dó mì ó.” Bɔ Akáni yí gbe nú Jozuwée ɖɔ: “Nǔgbó wɛ, nyɛ wɛ hu hwɛ dó Mawu Mavɔmavɔ, Mawu Izlayɛ́li tɔn. Nǔ e un wa ɔ́ ɖíe: Un mɔ awu ɖaxó ɖagbe ɖagbe e Mɛzopotamíinu lɛ́ɛ nɔ́ dó ɔ́ ɖokpó ɖo dɔkun lɛ́ɛ mɛ, bó mɔ kpatágan kilóo we jɛjí, bó mɔ sikágó ɖokpó, bɔ é ná yi kilóo vlɔ̌ bɔ kpɛɖé ɖ'é jí. Ée un mɔ nǔ énɛ́ lɛ́ɛ ɔ́, yě jló mì káká bɔ un bɛ́. Un kun do ɖó goxɔ ce tɛ́ntin bó bɛ́ hwlá d'é mɛ, kpatágan ɔ́ ɖo do.” Ée Jozuwée se mɔ̌ ɔ́, é sɛ́ mɛ dó Akáni sín goxɔ mɛ ɖɔ yě ní yi bɛ́ nǔ lɛ́ɛ wá, bɔ mɛ lɛ́ɛ hwlɛ́n dó bó yi, lobo mɔ nǔ lɛ́ɛ ɖo do mɛ ɖo goxɔ ɔ́ tɛ́ntin, bɔ kpatágan ɔ́ ɖo do. Yě bɛ̌ nǔ lɛ́ɛ wá nú Jozuwée kpódó Izlayɛ́li ví lɛ́ɛ kpó. È bɛ̌ nǔ lɛ́ɛ ɖó akɔjijɛgbá ɔ́ nukɔn. Énɛ́ ɔ́ gúdo ɔ́, Jozuwée kpó Izlayɛ́li ví lɛ́ɛ bǐ kpó zɔn Akáni jí. Yě bɛ̌ kpatágan ɔ́ kpódó awu ɔ́ kpó, kpódó sikágó ɔ́ kpó, lobo kplá vǐ tɔn súnnu lɛ́ɛ kpódó nyɔ̌nu lɛ́ɛ kpó, bó kplá nyibú tɔn lɛ́ɛ, tócí tɔn lɛ́ɛ, gbɔ̌ tɔn lɛ́ɛ, bó bɛ́ goxɔ tɔn kpódó dɔkun tɔn ɖě lɛ́ɛ bǐ kpó. Yě bɛ̌ nǔ énɛ́ lɛ́ɛ bǐ hɛn yi tɔdo Akɔ́ɔ tɔn mɛ. Bɔ Jozuwée ɖɔ nú Akáni ɖɔ: “Hwi wɛ dɔn mǐ dó nǔ nyanya élɔ́ mɛ. Din ɔ́, Mawu Mavɔmavɔ ná dɔn hwi lɔmɔ̌ dó nǔ nyanya mɛ.” Ée Jozuwée ɖɔ mɔ̌ ɔ́, Izlayɛ́li ví lɛ́ɛ nyi awǐnnyaglo dó Akáni káká bɔ é kú. Yě nyi hwǎn dó hu mɛ tɔn lɛ́ɛ bǐ ná, bó dó dɔkun tɔn lɛ́ɛ bǐ zo. Énɛ́ ɔ́ gúdo ɔ́, yě kplé awǐnnya ɖó jǐ tɔn gédégédé, bɔ é kpo ɖo mɔ̌ káká jɛ din. Énɛ́ ɔ́ wú wɛ è nɔ ylɔ́ tɛn énɛ́ ɔ́ mɛ ɖɔ: “Tɔdo Akɔ́ɔ tɔn”. Ée yě bló mɔ̌ lo ɔ́, xomɛ Mawu Mavɔmavɔ tɔn fá. Mawu Mavɔmavɔ ɖɔ nú Jozuwée ɖɔ: “Ma ɖi xɛsi ó, ado ní má hu we ó. Kplá ahwangɔnu towe bǐ bónú mi yi tɔ́n ahwan Ayíi toxo ɔ́. Éɖíe, un jó axɔ́sú Ayíi tɔn ɔ́ kpó togun tɔn kpó nú we; un jó toxo tɔn kpó ayǐkúngban tɔn kpó nú we. A nǎ wa nǔ xá toxo énɛ́ ɔ́ kpódó axɔ́sú tɔn kpó lě e a wa nǔ xá Jeliko kpódó axɔ́sú tɔn kpó gbɔn é. Amɔ̌, dɔkun e mi ná mɔ ɖo toxo ɔ́ mɛ lɛ́ɛ kpódó kanlin e mi ná mɔ ɖ'é mɛ lɛ́ɛ kpó ɔ́, mi ná bɛ́ yě. Toxo ɔ́ gúdo wɛ mi ka ná tɔ́n ahwan yě sín ɖo ajijimɛ.” Ée Mawu Mavɔmavɔ ɖɔ xó énɛ́ lɛ́ɛ nú Jozuwée ɔ́, Jozuwée sɔ́ nǔ é kpódó ahwangɔnu tɔn ɔ́ bǐ kpó, bó ná yi tɔ́n ahwan Ayíi toxo ɔ́. É cyán ahwanfuntɔ́ syɛ́nsyɛ́n adɔ̌kpo ɖě děgba we afɔwó (30.000), bo sɛ́ yě dó zǎn mɛ, bó ɖɔ nú yě ɖɔ: “Mi tɔwu ɖo toxo ɔ́ gúdo, mi ma lín dó toxo ɔ́ dín ó, mi nɔ acéjí bó ná tɔ́n ahwan yě. Nyɛ kpó mɛ e xwedó mì lɛ́ɛ kpó ná ɖidó toxo ɔ́ mɛ. Hwenu e to ɔ́ mɛ nu lɛ́ɛ ná tɔ́n sín toxo ɔ́ mɛ bó ná ja mǐ gɔ́n ɔ́, mǐ ná hɔn lě e mǐ hɔn gbɔn ayisɔnmɔ é. Énɛ́ ɔ́, yě ná jɛ gǔdo mǐtɔn, bó ná ɖo nyinya mǐ wɛ, bɔ mǐ ná ɖo hinhɔn wɛ, bó ná dó dɔn yě káká bɔ yě ná yi zɔ nú toxo ɔ́. Yě ná vɛdó ɖɔ hinhɔn wɛ mǐ ɖe lě e mǐ hɔn gbɔn ayisɔnmɔ ɔ́ sín. Hwe énɛ́ ɔ́ nu ɔ́, mi ná tɔ́n sín fí e mi tɔwu ɖó ɔ́, bó ná yí toxo ɔ́, ɖó Mawu Mavɔmavɔ, Mawu mitɔn ná jó toxo ɔ́ nú mi. Mi yí toxo ɔ́ lě tlóló hǔn, mi dó zo lě e Mawu Mavɔmavɔ ɖɔ gbɔn é. Mi xwedó nǔ e un ɖɔ nú mi lɛ́ɛ ganjí.” Jozuwée nyi ahwanfuntɔ́ lɛ́ɛ sɛ́ dó fí e yě ná yi tɔwu ɖe, bó ná tɔ́n ahwan mɛ lɛ́ɛ ajijimɛ é. Ayíi sín gbadahwe jí wɛ yě yi tɔwu ɖó, ɖo Betɛ́li kpó Ayíi kpó tɛ́ntin. Jozuwée ka dɔ́ fí e ahwanfuntɔ́ e kpo lɛ́ɛ ɖe ɔ́ ɖo zǎn énɛ́ ɔ́ mɛ. Jozuwée fɔ́n zǎn bó kpɔ́n ahwanfuntɔ́ tɔn lɛ́ɛ ɖɔ yě ɖo gbesisɔ mɛ ají. Énɛ́ ɔ́ gúdo ɔ́, é kpó tomɛxó Izlayɛ́li tɔn lɛ́ɛ kpó zɔn togun ɔ́ nu bɔ yě ɖidó ahwan tɔ́n Ayíinu lɛ́ɛ gbé. É kpódó ahwanfuntɔ́ lɛ́ɛ bǐ kpó sɛ yi hɔntogbó toxo ɔ́ tɔn sín nukɔn. Yě ɖǒ gɔnu ɖó toxo ɔ́ sín taligbé, bɔ tɔdo ɖé ɖo yě kpó toxo ɔ́ kpó tɛ́ntin. Jozuwée cyán súnnu děgba ɖě afatɔ́n (5.000) mɔ̌, bó ɖɔ nú yě ɖɔ yě ní yi tɔwu ɖo toxo ɔ́ sín gbadahwe jí, ɖo Betɛ́li kpó Ayíi kpó tɛ́ntin. Ahwanfuntɔ́ lɛ́ɛ ɖó gɔnu ɖó toxo ɔ́ sín taligbé. Mɛ hǎbǔ ká kó tɔwu ɖo gbadahwe jí. Jozuwée ka yi tɔdo ɔ́ mɛ zǎn énɛ́ ɔ́ mɛ. Ée axɔ́sú Ayíi tɔn mɔ mɔ̌ ɔ́, é fɔ́n zǎn, bó yá wǔ tɔ́n sín toxo ɔ́ mɛ, é kpó ahwanfuntɔ́ tɔn lɛ́ɛ bǐ kpó, bó ná yi fun ahwan xá Izlayɛ́li ví lɛ́ɛ ɖo fí e yě fun ahwan xá yě ɖe ɖ'ayǐ ɔ́, ɖo Judɛ́ɛn tɔdo ɔ́ sín awa jí. É ká tunwun ɖɔ mɛ hǎbǔ kó tɔwu nú émí ɖo toxo ɔ́ gúdo ǎ. Jozuwée kpó mɛ tɔn lɛ́ɛ kpó bló nǔ ɖi ɖu wɛ yě ko ɖu ɖo émí jí ɖɔhun, lobo hɔn bo wlí gbětótló mɛ sín ali. Énɛ́ ɔ́, è kplé mɛ e ɖo toxo ɔ́ mɛ lɛ́ɛ bǐ, bó ná nya Izlayɛ́li ví lɛ́ɛ. Yě jɛ Jozuwée gúdo, bɔ é dɔn yě yi zɔ nú toxo ɔ́. É sɔ́ kpo súnnu ɖěbǔ ɖo Ayíi kpó Betɛ́li kpó ǎ. Yě bǐ wɛ tɔ́n bó jɛ Izlayɛ́li ví lɛ́ɛ gúdo, bó jó toxo ɔ́ sín hɔntogbó nyi nuvo. Énɛ́ ɔ́, Mawu Mavɔmavɔ ɖɔ nú Jozuwée ɖɔ: “Dlɛ̌n hwǎn towe dó toxo ɔ́, ɖó nǎ jó toxo ɔ́ nú we.” Bɔ Jozuwée dlɛ́n hwǎn tɔn dó Ayíi toxo ɔ́. Ée Jozuwée dlɛ́n alɔ tlóló ɔ́, Izlayɛ́li ví e tɔwu lɛ́ɛ yá wǔ tɔ́n sín fí e yě tɔwu ɖe é, bó kán wezun yi byɔ́ toxo ɔ́ mɛ, bó yí toxo ɔ́, bó yá wǔ dó zo. Ayíinu lɛ́ɛ lɛ́ kɔ kpɔ́n gǔdo, bó mɔ ɖɔ toxo émítɔn ɖo myɔ ji wɛ azizɔ tiii. Yě sɔ́ mɔ fí e yě ná hɔn gbɔn ɔ́ ǎ, ɖó Izlayɛ́li ví e hɔn kpan ta gbětótló mɛ lɛ́ɛ húzú kpan nukɔn yě mɛ e ɖo yě nya wɛ lɛ́ɛ. Ée Jozuwée kpódó mɛ tɔn lɛ́ɛ kpó mɔ ɖɔ ahwanfuntɔ́ e tɔwu ɖo toxo ɔ́ gúdo dɔ̌n lɛ́ɛ yí toxo ɔ́, bɔ toxo ɔ́ kó ɖo zo ji wɛ ɔ́, yě lɛ́ kɔ bo jɛ Ayíinu lɛ́ɛ hu jí. Izlayɛ́li ví ɖě lɛ́ɛ gosín toxo ɔ́ mɛ, bó wá kpé yě, bɔ Ayíinu lɛ́ɛ wá mɔ yěɖée ɖo Izlayɛ́li ví lɛ́ɛ tɛ́ntin, bó mɔ ɖɔ yě ján émí gbɔn fí bǐ. Izlayɛ́li ví lɛ́ɛ hu yě bǐ; yě jǒ mɛ ɖokpó lě dó nyi gbɛ ǎ. Yě ká lɔn bɔ mɛɖé hɔn yi ǎ. Yě wlí axɔ́sú Ayíi tɔn ɔ́ gbɛɖe, bó dɔn ɛ yi jó nú Jozuwée. Izlayɛ́li ví lɛ́ɛ hu Ayíinu e ma ɖo toxo ɔ́ mɛ ǎ lɛ́ɛ bǐ ɖo gbětótló mɛ, fí e Ayíinu lɛ́ɛ kó nya yě gbɔn ɖ'ayǐ é. Ée Izlayɛ́li ví lɛ́ɛ hu yě bǐ fó ɔ́, yě lɛ́ kɔ byɔ́ toxo ɔ́ mɛ, bó hu to ɔ́ mɛ nu e kpo lɛ́ɛ bǐ. Ayíinu súnnu kpó nyɔ̌nu kpó děgba atɔn (12.000) wɛ yě hu gbe énɛ́ ɔ́ gbe. Hwǎn e Jozuwée dlɛ́n sɛ́ dó Ayíi toxo ɔ́ ɖo mɔ̌, alɔ tɔn yi do ǎ; alɔ tɔn ɖo dlɛ̌ndlɛ́n mɔ̌ káká bɔ è hu to ɔ́ mɛ nu lɛ́ɛ bǐ sésé. Izlayɛ́li ví lɛ́ɛ bɛ́ dɔkun e ɖo toxo ɔ́ mɛ lɛ́ɛ, bó bɛ́ kanlin lɛ́ɛ lě e Mawu Mavɔmavɔ ɖɔ gbɔn nú Jozuwée é. Jozuwée dó Ayíi toxo ɔ́ zo, bɔ é húzú to gbigba, bɔ mɛɖé sɔ́ ɖo toxo ɔ́ mɛ ǎ. Toxo ɔ́ kpo ɖo mɔ̌ káká jɛ égbé. È hu axɔ́sú ɔ́, bó dó kan cyɔ tɔn ɖó gblɛlɛ mɛ ɖó atín ɖé wú, bɔ é nɔ mɔ̌ káká jɛ gbadanu. Ée hwe yi xɔ ɔ́, Jozuwée ná gbe bɔ è ɖe cyɔ ɔ́ jɛ te, bó zé e nyi hɔntogbó toxo ɔ́ tɔn nukɔn, lobo bɛ́ awǐnnya kplé ɖó jǐ tɔn gédégédé, bɔ é ɖo mɔ̌ káká jɛ égbé. Jozuwée mɛ vɔ̌sákpe ɖokpó nú Mawu Mavɔmavɔ, Mawu Izlayɛ́li tɔn ɔ́ ɖo Ebalu só jí. É mɛ vɔ̌sákpe ɔ́ lě e mɛsɛntɔ́ Mawu Mavɔmavɔ tɔn Mɔyízi ko ɖɔ gbɔn nú yě ɖɔ yě ná mɛ gbɔn é; lě e è ɖɔ è nǎ mɛ vɔ̌sákpe ɔ́ gbɔn ɔ́, è wlǎn dó Sɛ́nwéma Mɔyízi tɔn ɔ́ mɛ. Awǐnnya makpamakpa wɛ è dǒ mɛ vɔ̌sákpe ɔ́ ná, alǐnnyánú ɖěbǔ jɛ wú ǎ. Vɔ̌ e è nɔ dó zo ɔ́ kpódó kɔnɖókpɔ́ vɔ́ kpó wɛ è nɔ sá nú Mawu Mavɔmavɔ ɖo vɔ̌sákpe ɔ́ jí. Jozuwée wlán sɛ́n e Mɔyízi ko wlán ɖ'ayǐ ɔ́ dó awǐnnya lɛ́ɛ wú ɖo fínɛ́, ɖo Izlayɛ́li ví lɛ́ɛ nukún mɛ. Izlayɛ́li ví lɛ́ɛ bǐ, tomɛxó yětɔn lɛ́ɛ, gǎn yětɔn lɛ́ɛ, kpódó hwɛɖɔtɔ́ yětɔn lɛ́ɛ kpó, kpódó jǒnɔ yětɔn lɛ́ɛ kpó ɖo ɖisí amyɔ nú akɔjijɛgbá ɔ́, ɖo vɔ̌sánú-xwlémawutɔ́ e hɛn akɔjijɛgbá Mawu Mavɔmavɔ tɔn lɛ́ɛ nukɔn. Yě mɛ vlɔ̌ɖówe ɖo Galizímu só ɔ́ kpáxwé, bɔ vlɔ̌ɖówe ɖo Ebalu só ɔ́ kpáxwé. Mɔyízi wɛ ko ɖɔ ɖ'ayǐ ɖɔ è nǐ bló gbɔn mɔ̌, bó xo ɖɛ dó Izlayɛ́li togun ɔ́ jí dó nukɔn. Jozuwée wá xa nǔ e è wlán dó Sɛ́nwéma ɔ́ mɛ ɔ́ bǐ nú yě. É xa lě e è nɔ xo ɖɛ dó mɛ jí gbɔn ɔ́ kpó lě e è nɔ dó nu mɛ gbɔn ɔ́ kpó nú yě. É xa Mɔyízisɛ́n lɛ́ɛ bǐ sésé nú yě; é wɔn ɖokpó géé ǎ. Togun ɔ́ bǐ nukɔn wɛ é xa ɖe; nyɔ̌nu lɛ́ɛ, yɔkpɔ́vú lɛ́ɛ kpódó jǒnɔ e ɖo yě mɛ lɛ́ɛ bǐ kpó lɔ ɖo fínɛ́. Axɔ́sú e ɖo Judɛ́ɛn tɔ ɔ́ gúdo ɖo sókan mɛ, ɖo tɔdo mɛ lɛ́ɛ kpódó éé ɖo Mɛditɛlanɛ́ɛ xu ɔ́ tó káká yi Libáan lɛ́ɛ kpó bǐ se ɖɔ è gba Ayíi toxo ɔ́. Axɔ́sú e wɛ lɛ́ɛ ɖíe: Hitíti lɛ́ɛ xɔ́sú ɔ́, Amɔliti lɛ́ɛ xɔ́sú ɔ́, Kanáanu lɛ́ɛ xɔ́sú ɔ́, Pɛliziti lɛ́ɛ xɔ́sú ɔ́, Hivíti lɛ́ɛ xɔ́sú ɔ́ kpódó Jebuzinu lɛ́ɛ xɔ́sú ɔ́ kpó. Yě ɖó gbe kpɔ́, bó ná fun ahwan xá Jozuwée kpó togun Izlayɛ́li tɔn ɔ́ kpó. Gabawɔ́ɔnnu lɛ́ɛ lɔ se lě e Jozuwée wa Jeliko toxo ɔ́ kpó Ayíi toxo ɔ́ kpó sín nǔ gbɔn ɔ́, bó ɖɔ émí ná ɖó ayi nukɔn nú Jozuwée. Énɛ́ ɔ́, yě ɖidó mɛɖé wɛ sɛ́ yě dó to yětɔn sín afɔ sɔ́ ɖó te gbé ɖɔhun. Yě dǒ nǔɖuɖu sín agban, lobo bɛ́ ati xóxó lɛ́ɛ kpó anyǔglo e mɛ è nɔ kɔn vɛ̌ɛn dó lɛ́ɛ xóxó tɔn e kó vún bɔ è ɖɛ̌ lɛ́ɛ kpó, bó dó agban tɔn nú tócí yětɔn lɛ́ɛ. Yě bɛ̌ awu vúnvún lɛ́ɛ kplá, bó bɛ́ afɔkpa e vún bɔ è ko tɔ lɛ́ɛ dó, lobo bɛ́ wɔ̌xúxú e kó xú káókáó bó gba hánnyá lɛ́ɛ hɛn. Yě yi fí e Izlayɛ́li ví lɛ́ɛ ɖó gɔnu ɖó ɖo Gilugalu é, bó ɖɔ nú Jozuwée kpó togun ɔ́ kpó ɖɔ: “To línlín ɖé mɛ wɛ mǐ gosín wá mi gɔ́n. Mǐ jló ná byɔ́ mi ɖɔ mi ní jɛ akɔ xá mǐ.” Izlayɛ́li ví lɛ́ɛ ká ɖɔ nú yě ɖɔ: “É sixú kó nyí ɖɔ mǐ kpá fí jɛ́n mi ná ɖe din. Ényí mɔ̌ wɛ nyí ɔ́, mǐ ná sixú jɛ akɔ xá mi ǎ.” Yě ká ɖɔ nú Jozuwée ɖɔ: “Mɛsɛntɔ́ towe wɛ mǐ nyǐ.” Jozuwée ka kanbyɔ́ yě ɖɔ: “Mɛ̌ wɛ mi ka nyí tawun? Fítɛ́ mi ka gosín?” Yě yí gbe n'i ɖɔ: “Mǐ mɛsɛntɔ́ towe lɛ́ɛ ɔ́, to e mɛ mǐ gosín ɔ́ lín ɖésú. Mawu Mavɔmavɔ, Mawu towe sín nyǐkɔ wɛ mǐ se, mǐ ká lɛ́ se nǔjíwǔ e é bló ɖo Ejípu lɛ́ɛ bǐ. Mǐ lɛ́ se nǔ e é dó sin xá axɔ́sú Amɔliti tɔn we e nɔ Judɛ́ɛn tɔ ɔ́ sín zǎnzǎnhwe jí lɛ́ɛ é: yě wɛ nyí axɔ́sú Hɛcibɔ́ni tɔn Sihɔ́ni kpódó axɔ́sú Basáni tɔn Ɔgu e nɔ Acitalɔ́ti é kpó. Tomɛxó mǐtɔn lɛ́ɛ kpó to mǐtɔn mɛ nu lɛ́ɛ bǐ kpó kplɔ́n nǔ mǐ ɖɔ mǐ ní wá gɔ̌n mitɔn, mǐ ní ká hɛn nǔ e mǐ ná ɖu ɖo alixo é. Yě ɖɔ nú mǐ ɖɔ mǐ ní wá wa azɔ̌ nú mi, bó dó byɔ́ mi ɖɔ mi ní jɛ akɔ xá mǐ. Mi kpɔ́n wɔ̌xúxú e mǐ hɛn é. Hwenu e mǐ jɛ ali ja mi gɔ́n ɔ́, zozo wɛ é ɖe; é ɖíe ká kó xú bǐ din bo gba hánnyá e! Mi kpɔ́n, anyǔglo élɔ́ lɛ́ɛ ɔ́, yɔ̌yɔ́ wɛ yě ɖe bɔ mǐ kɔn vɛ̌ɛn d'é mɛ; din ɔ́, bǐ ɖíe ká kó vún e! Awu mǐtɔn lɛ́ɛ kpódó afɔkpa mǐtɔn lɛ́ɛ kpó lɔmɔ̌ ɔ́, yě bǐ wɛ vún, ɖó aliga e mǐ zɔn é wútu.” Ée yě ɖɔ mɔ̌ ɔ́, Izlayɛ́li ví lɛ́ɛ sɔ́ kan gbe byɔ́ Mawu Mavɔmavɔ ǎ, lobo dó alɔ nǔɖuɖu e yě hɛn ɔ́ jí, bɔ Jozuwée zun xɔ́ntɔn xá yě, bo jɛ akɔ xá yě ɖɔ émí kún ná hu yě ó. Gǎn lɛ́ɛ lɔ yí gbe ná, bó xwlé nǔ d'é jí nú yě. Ée yě jɛ akɔ énɛ́ ɔ́ xá yě ɔ́, azǎn tɔn atɔn gbe gúdo ɔ́, Izlayɛ́li ví lɛ́ɛ wá se ɖɔ akpá émítɔn fí jɛ́n yě nɔ́ nɔ. Ée Izlayɛ́li ví lɛ́ɛ se mɔ̌ ɔ́, yě jɛ ali bo yi mɛ e wá jɛ akɔ xá yě lɛ́ɛ sín toxo lɛ́ɛ mɛ azǎn tɔn atɔngɔ́ ɔ́ gbe. Toxo lɛ́ɛ sín nyǐkɔ ɖíe: Gabawɔ́ɔn, Kefila, Beelɔ́ti kpódó Kiliyati-Yealimu kpó. Yě ká hu yě ǎ, ɖó togun Izlayɛ́li tɔn ɔ́ sín gǎn lɛ́ɛ kó dó akpá nú yě, ɖo Mawu Mavɔmavɔ, Mawu Izlayɛ́li tɔn ɔ́ sín nyǐkɔ mɛ. Izlayɛ́li ví lɛ́ɛ bǐ jɛ nǔ húnhún ɖɔ dó gǎn yětɔn lɛ́ɛ wú jí. Gǎn yětɔn lɛ́ɛ ká ɖɔ nú yě ɖɔ: “Mǐ má sixú wa nǔɖé nú yě nɛ́, ɖó mǐ dó akpá nú yě ɖo Mawu Mavɔmavɔ, Mawu Izlayɛ́li tɔn ɔ́ sín nyǐkɔ mɛ. Mǐ ɖó ná jó yě dó nyi gbɛ, ɖó akpá e mǐ dó ɔ́ wútu. É má nyí mɔ̌ ǎ ɔ́, mǐ ná dɔn xomɛsin Mawu Mavɔmavɔ tɔn dó mǐɖée jí. Lo ɔ́, lě e mǐ ná wa nǔ yětɔn gbɔn ɔ́ ɖíe: Mǐ ná jó yě dó nyi gbɛ. Amɔ̌, mǐ ná ɖɔ nú yě bɔ yě ná nɔ́ gbo atín nú mǐ, bó ná nɔ́ dun sin nú togun ɔ́.” Lě e gǎn lɛ́ɛ ɖɔ gbɔn ɔ́ nɛ́. Énɛ́ ɔ́, Jozuwée ylɔ́ Gabawɔ́ɔnnu lɛ́ɛ kplé, bó ɖɔ nú yě ɖɔ: “Akpá mǐtɔn fí jɛ́n mi gosín! Nɛ̌ ka gbɔn bɔ mi blɛ́ mǐ ɖɔ fí línlín wɛ émí gosín? Din ɔ́, nu wɛ è ko dó mi, mi ɖě sɔ́ ná gɔn kannumɔ nyí gbeɖé ǎ. Mi wɛ ná gbo atín e è nǎ zǎn ɖo Mawu ce xwé lɛ́ɛ, bó ná dun sin e è nǎ zǎn ɖo fínɛ́ é.” Ée Jozuwée ɖɔ mɔ̌ ɔ́, Gabawɔ́ɔnnu lɛ́ɛ yí gbe n'i ɖɔ: “Nǔ e zɔ́n bɔ mǐ wa nǔ gbɔn mɔ̌ ɔ́ ɖíe: mǐ se ɖɔ Mawu Mavɔmavɔ, Mawu towe ná gbe mɛsɛntɔ́ tɔn Mɔyízi ɖɔ ní ná to élɔ́ ɔ́ bǐ mi. É ɖɔ nú mi ɖɔ mi ɖo yiyi wɛ ɔ́, mi ná nɔ́ ɖo to ɔ́ mɛ nu lɛ́ɛ bǐ hu wɛ. Nǔ énɛ́ ɔ́ e mǐ se ɔ́ hu ado nú mǐ bɔ mǐ ɖo xɛsi ɖi wɛ ɖɔ mǐ táá kú. Din ɔ́, acɛ towe glɔ́ wɛ mǐ ɖe, zě mǐ dó wa nǔ e jló we ɔ́ ná.” Lě e Jozuwée wa nǔ yětɔn gbɔn ɔ́ ɖíe: é gbɛ́ nú Izlayɛ́li ví lɛ́ɛ ɖɔ yě ní má hu yě ó. É ɖɔ nú Gabawɔ́ɔnnu lɛ́ɛ ɖɔ yě ná nɔ gbo atín, yě ná nɔ́ dun sin nú togun Izlayɛ́li tɔn ɔ́, bó ná nɔ́ dun sin e è nǎ nɔ zán ɖo vɔ̌sákpe Mawu Mavɔmavɔ tɔn ɔ́ kɔn é, ɖo fí e Mawu Mavɔmavɔ ná xlɛ́ Izlayɛ́li ví lɛ́ɛ bɔ yě ná nɔ sɛn ɛ ɖe é. Kúnkan yětɔn lɛ́ɛ kpo ɖo azɔ̌ énɛ́ ɔ́ wa wɛ káká jɛ égbé. Axɔ́sú Jeluzalɛ́mu tɔn Adoni-Sedɛ́ki se ɖɔ Jozuwée yí Ayíi toxo ɔ́, lobo hɛn nǔ e ɖo toxo ɔ́ mɛ lɛ́ɛ bǐ gblé. É se ɖɔ Jozuwée wa nǔ xá toxo ɔ́ kpó axɔ́sú tɔn kpó lě e é wa nǔ xá Jeliko kpódó Jeliko xɔ́sú ɔ́ kpó gbɔn é. É lɛ́ se ɖɔ Gabawɔ́ɔnnu lɛ́ɛ jɛ akɔ xá Izlayɛ́li togun ɔ́, bó dó mɔ fífá, bó ɖo yě mɛ. Xɛsi ɖaxó ɖé jɛ Jeluzalɛ́munu lɛ́ɛ jí ɖó xó énɛ́ ɔ́ e yě se ɔ́ wútu, ɖó Gabawɔ́ɔn kló hú Ayíi, bó ká nyí toxo nukúnɖéjí ɖokpó, toxo e mɛ axɔ́sú ɖe lɛ́ɛ ɖɔhun, bɔ gbɛtɔ́ asúká kɛ́ɖɛ́ wɛ ɖo toxo ɔ́ mɛ. Énɛ́ ɔ́ wú wɛ Adoni-Sedɛ́ki axɔ́sú Jeluzalɛ́mu tɔn ɔ́ sɛ́ wɛn dó Hoxámu Eblɔ́n xɔ́sú ɔ́, bó sɛ́ wɛn dó Pileyamu Yaamúti xɔ́sú ɔ́, bó sɛ́ wɛn dó Yafia Lakíci xɔ́sú ɔ́, kpódó Devíi Eglɔ́ni xɔ́sú ɔ́ kpó ɖɔ: “Mi wá dó alɔ mì, bónú mǐ ná gba Gabawɔ́ɔn toxo ɔ́, ɖó yě jɛ akɔ xá Jozuwée kpó Izlayɛ́li ví lɛ́ɛ kpó.” Ée é ɖɔ mɔ̌ nú yě ɔ́, axɔ́sú Amɔliti lɛ́ɛ tɔn atɔ́ɔ́n ɖó gbe kpɔ́ bó ɖidó kpódó ahwangɔnu yětɔn lɛ́ɛ bǐ kpó; axɔ́sú énɛ́ lɛ́ɛ wɛ nyí Jeluzalɛ́mu xɔ́sú ɔ́, Eblɔ́n xɔ́sú ɔ́, Yaamúti xɔ́sú ɔ́, Lakíci xɔ́sú ɔ́ kpódó Eglɔ́ni xɔ́sú ɔ́ kpó. Yě xá Gabawɔ́ɔn toxo ɔ́, bó tɔ́n ahwan ɛ. Gabawɔ́ɔnnu lɛ́ɛ ká sɛ́ wɛn dó Jozuwée, ɖo fí e é ɖó gɔnu ɖó ɖo Gilugalu ɔ́, ɖɔ: “Ma jó mǐ mɛsɛntɔ́ towe lɛ́ɛ dó ó, yǎ wǔ wá dó alɔ mǐ, lobo ná hwlɛ́n mǐ, ɖó axɔ́sú Amɔliti lɛ́ɛ tɔn e ɖo sókan mɛ lɛ́ɛ bǐ blá gbě mǐtɔn.” Ée Jozuwée se mɔ̌ tlóló ɔ́, é kplá ahwanfuntɔ́ tɔn syɛ́nsyɛ́n lɛ́ɛ, kpó ahwangɔnu ɔ́ bǐ kpó, bɔ yě gosín Gilugalu. Mawu Mavɔmavɔ ɖɔ nú Jozuwée ɖɔ: “Ma ɖi xɛsi nú yě ó; un ná jó yě nú we. Yě mɛ ɖokpó ná sixú nɔ te nukɔn towe ǎ.” Jozuwée kpódó ahwan tɔn lɛ́ɛ kpó xo zǎn sín Gilugalu, bó yi tɔ́n ahwan Amɔliti ví lɛ́ɛ ajijimɛ. Mawu Mavɔmavɔ gba Amɔliti ví lɛ́ɛ dó ɖo Izlayɛ́li ví lɛ́ɛ nukɔn. Izlayɛ́li ví lɛ́ɛ wa nǔ xá yě ɖésú ɖo Gabawɔ́ɔn kpá. Yě jɛ gǔdo yětɔn bo gbɔn Bɛti-Holɔ́ni kpó ɔ́ jí, bó ɖo yě hu wɛ káká wá Azeka kpódó Makeda kpó. Hwenu e Amɔliti e ɖo hinhɔn wɛ ɖo Izlayɛ́li ví lɛ́ɛ nukɔn lɛ́ɛ wá Bɛti-Holɔ́ni sín dodomɛ ɖo akpá ɖě ɔ́ xwé ɔ́, Mawu Mavɔmavɔ sɛ́ kɛ́njí kloklo ɖé dó, bɔ é xo yě káká wá Azeka, bɔ yě kú. Mɛ e kɛ́njí ɔ́ hu lɛ́ɛ hú gǎn mɛ e Izlayɛ́li ví lɛ́ɛ hu kpó hwǐ kpó lɛ́ɛ. Gbe e gbe Mawu Mavɔmavɔ jó Amɔliti lɛ́ɛ nú ahwangɔnu Izlayɛ́li ví lɛ́ɛ tɔn ɔ́, Jozuwée byɔ́ nǔɖé Mawu Mavɔmavɔ ɖo Izlayɛ́li ví lɛ́ɛ bǐ nukún mɛ. É sú xó bó ɖɔ: “Hwe, nɔ te ɖo Gabawɔ́ɔn ta nu! Sun, nɔ xwíí ɖo Ayalɔ́ni sín tɔdo ɔ́ ta nu!” Bɔ hwe nɔ te, bɔ sun nɔ te cúɖúɖú káká bɔ Izlayɛ́li ví lɛ́ɛ ɖu ɖo kɛntɔ́ yětɔn lɛ́ɛ jí, lě e è wlǎn gbɔn ɖo “Nǔjlɔ́jlɔ́watɔ́ wéma” ɔ́ mɛ é; é wlǎn d'é mɛ ɖɔ: “Hwe nɔ te ɖo jǐnukúnsin tɛ́ntin, bó sɔ́ sɛ tɛn ǎ káká nú azǎn ɖokpó.” Azǎn mɔ̌hunkɔtɔn ɖě kó tíin kpɔ́n ɖ'ayǐ ǎ, ɖě ká lɛ́ wá tíin kpɔ́n gbeɖé, bɔ Mawu Mavɔmavɔ wa nǔ lě e gbɛtɔ́ byɔ́ gbɔn ɔ́ ǎ. Mawu Mavɔmavɔ ɖésú wɛ fun ahwan nú Izlayɛ́li ví lɛ́ɛ. Énɛ́ ɔ́ gúdo ɔ́, Jozuwée kpó Izlayɛ́li ví lɛ́ɛ bǐ kpó lɛ́ kɔ wá Gilugalu, fí e yě ɖǒ gɔnu ɖó é. Hwe énɛ́ ɔ́ nu ɔ́, axɔ́sú Amɔliti tɔn atɔ́ɔ́n lɛ́ɛ kó hɔn hwlá cí sóxo mɛ ɖo Makeda. È wá ɖɔ nú Jozuwée ɖɔ axɔ́sú atɔ́ɔ́n lɛ́ɛ hwlá cí sóxo mɛ ɖo Makeda. Bɔ Jozuwée ɖɔ nú mɛ tɔn lɛ́ɛ ɖɔ: “Mi blí awǐnnya ɖaxó ɖaxó lɛ́ɛ dó yi sú só li ɔ́ ná, bó ɖó mɛ fínɛ́ nú yě ní cɔ́. Amɔ̌, mi ma nɔ fínɛ́ dín ó, mi jɛ kɛntɔ́ mitɔn lɛ́ɛ gúdo, bó gbo ali nú yě. Mi ma lɔn nú yě ní byɔ́ toxo yětɔn lɛ́ɛ mɛ ó, ɖó Mawu Mavɔmavɔ, Mawu mitɔn ko jó yě nú mi.” Jozuwée kpó mɛ tɔn lɛ́ɛ kpó ɖu ɖo Amɔliti ví lɛ́ɛ jí; yě ɖu ɖo yě jí bǐ gbídígbídí, mɛ kwín we ɖé lɛ́ɛ jɛ́n gán ɖ'é mɛ, bó hɔn yi toxo e è mɛ ahohó lɛ́ lɛ̌ dó lɛ́ɛ mɛ. Énɛ́ ɔ́ gúdo ɔ́, Izlayɛ́li ví lɛ́ɛ lɛ́ kɔ wá yi Jozuwée gɔ́n, ɖo fí e yě ɖǒ gɔnu ɖó ɖo Makeda kpá é wǔyɛ́yɛ́ afɔyɛ́yɛ́. Mɛ ɖé ká ɖo to ɔ́ mɛ bó sɔ́ glá kɛ nu dó yě wú ǎ. Énɛ́ ɔ́, Jozuwée ɖe gbe nú yě ɖɔ yě ní yi blí awǐnnya lɛ́ɛ sín só li ɔ́ nu, bó ɖe axɔ́sú Amɔliti lɛ́ɛ tɔn atɔ́ɔ́n lɛ́ɛ tɔ́n, bó kplá yě wá nú émí. Yě bló nǔ e Jozuwée ɖɔ ɔ́, bó kplá axɔ́sú atɔ́ɔ́n lɛ́ɛ wá n'i; yě ɖíe: axɔ́sú Jeluzalɛ́mu tɔn, Eblɔ́n tɔn, Yaamúti tɔn, Lakíci tɔn, kpó Eglɔ́ni tɔn kpó. Ée Jozuwée mɔ yě lě tlóló ɔ́, é ylɔ́ Izlayɛ́li ví lɛ́ɛ bǐ, bó ɖɔ nú ahwangán e kó nɔ jǐ tɔn bó fun ahwan ɖ'ayǐ lɛ́ɛ ɖɔ: “Mi wá tɛ afɔ axɔ́sú élɔ́ lɛ́ɛ sín kɔ jí.” Bɔ ahwangán lɛ́ɛ bló nǔ e Jozuwée ɖɔ é. É lɛ́ ɖɔ nú yě ɖɔ: “Mi ma ɖi xɛsi ó, ado ní má hu mi ó! Mi kpan akɔ́n bó dó gǎn, ɖó lě e Mawu Mavɔmavɔ ná wa nǔ xá kɛntɔ́ e mi ná fun ahwan xá lɛ́ɛ bǐ gbɔn é nɛ́.” Ée yě bló nǔ énɛ́ lɛ́ɛ gúdo ɔ́, Jozuwée hu axɔ́sú atɔ́ɔ́n lɛ́ɛ bǐ, bó dó kan cyɔ yětɔn ɖó gblɛlɛ mɛ ɖó atín atɔ́ɔ́n wú, bɔ cyɔ yětɔn nɔ atín wú káká jɛ gbadanu. Ée hwe yi xɔ ɔ́, é ná gbe bɔ yě ɖe cyɔ lɛ́ɛ jɛ te, bó bɛ́ yě kɔn nyi sóxo e mɛ yě kó hɔn hwlá cí ɖ'ayǐ ɔ́ mɛ, bó bɛ́ awǐnnya ɖaxó ɖaxó lɛ́ɛ dó sú nu tɔn, bɔ é kpo ɖo mɔ̌ káká jɛ égbé. Gbe énɛ́ ɔ́ gbe ɔ́, Jozuwée yí Makeda toxo ɔ́; é hu axɔ́sú ɔ́ kpó to ɔ́ mɛ nu lɛ́ɛ bǐ kpó; é jó yě ɖěbǔ dó nyi gbɛ ǎ. É wa nǔ xá axɔ́sú Makeda tɔn ɔ́ lě e é wa xá axɔ́sú Jeliko tɔn ɔ́ gbɔn é. Jozuwée kpódó Izlayɛ́li ví lɛ́ɛ bǐ kpó gosín Makeda bo yi tɔ́n ahwan Livunanu lɛ́ɛ. Mawu Mavɔmavɔ jó toxo énɛ́ ɔ́ lɔ kpódó axɔ́sú e ɖo toxo ɔ́ nu ɔ́ kpó nú yě, bɔ yě hu to ɔ́ mɛ nu lɛ́ɛ bǐ; yě jó yě ɖěbǔ dó nyi gbɛ ǎ. Yě wa nǔ xá axɔ́sú ɔ́ lě e yě wa xá axɔ́sú Jeliko tɔn ɔ́ gbɔn é. Jozuwée kpó Izlayɛ́li ví lɛ́ɛ bǐ kpó gosín Livuna, bó wá Lakíci. Yě xá toxo ɔ́, lobo tɔ́n ahwan toxo ɔ́. Mawu Mavɔmavɔ jó toxo ɔ́ nú yě azǎn tɔn wegɔ́ ɔ́ gbe, bɔ yě hu to ɔ́ mɛ nu lɛ́ɛ bǐ; yě jó yě ɖěbǔ dó nyi gbɛ ǎ, lě e yě bló gbɔn xá Livuna é. Holámu Gɛzɛ́ɛ xɔ́sú ɔ́ wá dó alɔ Lakíci. Jozuwée ka hu é kpó ahwangɔnu tɔn ɔ́ bǐ kpó, é jó yě ɖěbǔ dó nyi gbɛ ǎ. Jozuwée kpódó Izlayɛ́li ví lɛ́ɛ bǐ kpó gosín Lakíci, bó wá Eglɔ́ni, yě xá toxo ɔ́, lobo tɔ́n ahwan toxo ɔ́. Yě yí toxo ɔ́ gbe énɛ́ ɔ́ gbe, bó hu to ɔ́ mɛ nu lɛ́ɛ bǐ, lě e yě kó bló gbɔn xá Lakíci é. Jozuwée kpó Izlayɛ́li ví lɛ́ɛ bǐ kpó gosín Eglɔ́ni, bó yi Eblɔ́n, lobo tɔ́n ahwan toxo ɔ́. Yě yí toxo ɔ́, bó hu axɔ́sú ɔ́ kpó to ɔ́ mɛ nu lɛ́ɛ bǐ kpó. Yě lɛ́ yí toxo e gbɔn akpá tɔn akpá tɔn lɛ́ɛ, bó hu to énɛ́ lɛ́ɛ mɛ nu lɛ́ɛ bǐ, yě jó yě mɛ ɖokpó dó nyi gbɛ ǎ, lě e yě kó bló gbɔn xá Eglɔ́ni é. Énɛ́ ɔ́ gúdo ɔ́, Jozuwée kpó Izlayɛ́li ví lɛ́ɛ bǐ kpó yi Devíi, lobo tɔ́n ahwan toxo ɔ́. Yě yí toxo ɔ́, bó wlí axɔ́sú ɔ́. Yě yǐ toxo e gbɔn toxo énɛ́ ɔ́ kpá lɛ́ɛ bǐ, yě hu mɛ e ɖo to énɛ́ lɛ́ɛ mɛ lɛ́ɛ bǐ, yě jó yě mɛ ɖěbǔ dó nyi gbɛ ǎ. Jozuwée wa nǔ xá Devíi toxo ɔ́ kpódó axɔ́sú ɔ́ kpó lě e é wa xá Eblɔ́n gbɔn, bó wa xá Livuna toxo ɔ́ kpódó axɔ́sú tɔn kpó gbɔn é. Jozuwée yí to ɔ́ bǐ; é hu axɔ́sú sókan mɛ tɔn lɛ́ɛ, bó hu éé ɖo tofɔligbé lɛ́ɛ, bó hu éé ɖo tɔdo mɛ lɛ́ɛ, bó hu éé ɖo kpó jí lɛ́ɛ. É jó mɛ ɖěbǔ dó ǎ. Nǔ e kó sixú ɖó funfún lɛ́ɛ bǐ wɛ é hu, lě e Mawu Mavɔmavɔ, Mawu Izlayɛ́li ví lɛ́ɛ tɔn ɖɔ gbɔn é. Jozuwée hu mɛ lɛ́ɛ sín Kadɛ́ci-Baanɛ́ya wá Gaza; é hu to ɔ́ mɛ nu lɛ́ɛ bǐ sín Gocɛ́ni káká wá Gabawɔ́ɔn. Ahwangbénu ɖokpó jɛ́n Jozuwée yi bó wlí axɔ́sú énɛ́ lɛ́ɛ bǐ, bó yí to yětɔn lɛ́ɛ, ɖó Mawu Mavɔmavɔ, Mawu Izlayɛ́li tɔn ɔ́ ɖésú wɛ fun ahwan nú Izlayɛ́li ví lɛ́ɛ. Énɛ́ ɔ́ gúdo ɔ́, Jozuwée kpódó Izlayɛ́li ví lɛ́ɛ bǐ kpó lɛ́ kɔ wá yi fí e yě ɖǒ gɔnu ɖó ɖo Gilugalu é. Yavíni Hasɔ́ɔ xɔ́sú ɔ́ se ɖɔ Jozuwée ɖu ɖo ahwan e é fun lɛ́ɛ jí. Ée é se mɔ̌ ɔ́, é sɛ́ wɛn dó Yovavu Madɔ́ni xɔ́sú ɔ́, bó sɛ́ wɛn dó Cimulɔ́ni xɔ́sú ɔ́ kpó Akisáfu xɔ́sú ɔ́ kpó. É sɛ́ wɛn dó axɔ́sú e ɖo sókan mɛ ɖo totaligbé lɛ́ɛ lɔmɔ̌, bó sɛ́ wɛn dó axɔ́sú e ɖo tɔdo Judɛ́ɛn tɔn ɔ́ mɛ, ɖo Jenɛzalɛ́ti tɔ ɔ́ sín afɔligbé lɛ́ɛ, bó sɛ́ wɛn dó axɔ́sú e ɖo to e ɖo tɔdo mɛ lɛ́ɛ kpódó éé ɖo kpó jí ɖo Dɔ́ɔ kpá, ɖo gbadahwe jí lɛ́ɛ kpó. É sɛ́ wɛn dó Kanáanu e ɖo Judɛ́ɛn tɔ ɔ́ sín zǎnzǎnhwe jí kpó gbadahwe jí lɛ́ɛ kpó. É sɛ́ wɛn dó Amɔliti lɛ́ɛ, bó sɛ́ wɛn dó Hitíti lɛ́ɛ, bó sɛ́ dó Pɛliziti lɛ́ɛ, bó sɛ́ wɛn dó Jebuzinu e ɖo sókan mɛ lɛ́ɛ, bó sɛ́ wɛn dó Hivíti e ɖo Ɛmɔ́ɔ só kpá, ɖo Misipa lɛ́ɛ. Axɔ́sú lɛ́ɛ bǐ jɛ ali kpó ahwanfuntɔ́ maxamaxa kpó. Ahwanfuntɔ́ lɛ́ɛ sukpɔ́ kɔ́ e ɖo xutó é ɖɔhun. Yě hɛn sɔ́ gěgé kpódó kɛkɛ́ví gěgé kpó. Yě kplé yěɖée ɖó kpɔ́, bó wá ɖó gɔnu ɖó tɔsisa Mɛlɔmu tɔn kpá, bó ná tɔ́n ahwan Izlayɛ́li ví lɛ́ɛ. Mawu Mavɔmavɔ ɖɔ nú Jozuwée ɖɔ: “Ma ɖi xɛsi nú yě ó, ɖó sɔ lěhwenu ɔ́, un ná jó yě bǐ nú mi togun Izlayɛ́li tɔn ɔ́, bɔ mi ná hu yě. A nǎ sɛ́n dɔnkan nú sɔ́ yětɔn lɛ́ɛ, bó ná dó kɛkɛ́ví yětɔn lɛ́ɛ zo.” Jozuwée kpódó ahwanfuntɔ́ tɔn lɛ́ɛ kpó yi tɔ́n ahwan kɛntɔ́ yětɔn lɛ́ɛ ajijimɛ, ɖo Mɛlɔmu tɔ ɔ́ tó. Mawu Mavɔmavɔ jó yě nú Izlayɛ́li ví lɛ́ɛ, bɔ Izlayɛ́li ví lɛ́ɛ ɖu ɖo yě jí, bó nya yě káká yi toxo ɖaxó Sidɔ́ɔn sín taligbé, bó lɛ́ nya yě gbɔn Mislefɔ́ti-Mayimu, ɖo zǎnzǎnhwe jí káká yi Misipa sín tɔdo mɛ. Yě hu yě bǐ, yě jó yě mɛ ɖokpó dó nyi gbɛ ǎ. Jozuwée wa nǔ xá yě lě e Mawu Mavɔmavɔ ɖɔ n'i gbɔn é. É sɛ́n dɔnkan nú sɔ́ yětɔn lɛ́ɛ, bó dó kɛkɛ́ví yětɔn lɛ́ɛ zo. Ée Jozuwée lɛ́ kɔ ɔ́, é yí Hasɔ́ɔ toxo ɔ́, bó hu axɔ́sú ɔ́. Hasɔ́ɔ ɔ́, Tota wɛ é nyí nú axɔ́súɖuto e ɖo totaligbé lɛ́ɛ ɖ'ayǐ. É hu to ɔ́ mɛ nu lɛ́ɛ bǐ. É jó yě mɛ ɖokpó dó nyi gbɛ ǎ, bɔ è dǒ toxo ɔ́ zo. Jozuwée ɖu ɖo axɔ́sú e blá gbě tɔn lɛ́ɛ bǐ jí, bó yí toxo yětɔn lɛ́ɛ. É hu axɔ́sú lɛ́ɛ, bó hu mɛ e ɖo to yětɔn mɛ lɛ́ɛ bǐ, lě e mɛsɛntɔ́ Mawu Mavɔmavɔ tɔn Mɔyízi ɖɔ é ní bló gbɔn é. Amɔ̌, yě dó toxo e ɖo kpó jí lɛ́ɛ ɖěbǔ zo zɛ Hasɔ́ɔ e Jozuwée ná gbe bɔ è dǒ zo ɔ́ wú ǎ. Izlayɛ́li ví lɛ́ɛ bɛ́ dɔkun kpó kanlin kpó e yě mɔ ɖo toxo énɛ́ lɛ́ɛ mɛ lɛ́ɛ bǐ, bó hu to énɛ́ lɛ́ɛ mɛ nu lɛ́ɛ bǐ. Yě jǒ nǔ e kó sixú ɖó funfún lɛ́ɛ ɖokpó dó nyi gbɛ ɖo to énɛ́ lɛ́ɛ mɛ ǎ. Mɔyízi ko ɖɔ xó e Mawu Mavɔmavɔ ɖɔ n'i dó nǔ énɛ́ ɔ́ wú ɔ́ bǐ nú Jozuwée, bɔ Jozuwée bló ɖ'é jí, é hɔn xó ɔ́ ɖokpó nyi gbě ǎ. Jozuwée yí to ɔ́ bǐ. É yí to e ɖo sókan mɛ lɛ́ɛ, bó yí to e ɖo afɔligbé lɛ́ɛ bǐ, bó yí to e ɖo Gocɛ́ni gbé jí lɛ́ɛ bǐ, bó yí to e ɖo dodomɛ lɛ́ɛ, bó yí to e ɖo Judɛ́ɛn sín tɔdo mɛ lɛ́ɛ, bó yí to e ɖo Izlayɛ́li só jí, ɖo totaligbé lɛ́ɛ, kpódó éé ɖo ayǐkúngban wɛnjɛ jí ɖo só ɔ́ kpá lɛ́ɛ kpó. É ɖu ɖo to lɛ́ɛ bǐ jí, bɛ́ sín só e jí nǔɖé má ɖe ǎ, bɔ é gbɔn Seyíi káká yi Baalu-Gadi ɖo Libáan tɔdo mɛ, ɖo Ɛmɔ́ɔ só kpá é. É wlí to énɛ́ lɛ́ɛ bǐ sín axɔ́sú bó hu. É fun ahwan xá axɔ́sú énɛ́ lɛ́ɛ xɔ azǎn. Hivíti e ɖo Gabawɔ́ɔn lɛ́ɛ kɛ́ɖɛ́ wɛ jɛ akɔ xá Izlayɛ́li ví lɛ́ɛ. To ɖě lɛ́ɛ e kpó ɔ́, ahwan wɛ é fun dó yí bǐ. Đó Mawu Mavɔmavɔ ná ta syɛ́nsyɛ́n to énɛ́ ɔ́ mɛ nu lɛ́ɛ ɖɔ yě ní fun ahwan xá Izlayɛ́li ví lɛ́ɛ. Mawu Mavɔmavɔ bló mɔ̌, nú Izlayɛ́li ví lɛ́ɛ ná hu yě ma kú nǔbláwǔ yětɔn, bó vɔ yě bǐ sésé, lě e Mawu Mavɔmavɔ ɖésú kó ɖɔ gbɔn nú Mɔyízi ɖ'ayǐ é. Hwe énɛ́ ɔ́ nu ɖokpó ɔ́, Jozuwée yi fun ahwan xá Anáki ví e ɖo sókan mɛ, ɖo Eblɔ́n lɛ́ɛ, éé ɖo Devíi lɛ́ɛ, éé ɖo Anávu lɛ́ɛ, kpódó éé ɖo Judáa kpó Izlayɛ́li kpó sín sókan mɛ lɛ́ɛ kpó. É vívá kún yě bǐ tɔn, bó gba to yětɔn bǐ hánnyá. Anáki ví ɖé sɔ́ kpo ɖo Izlayɛ́li ǎ. Gaza kpódó Gati kpó, kpódó Acidɔ́di kpó kɛ́ɖɛ́ wɛ yě mɛ kwín we ɖé kpo ɖe. Lě e Jozuwée yí to ɔ́ bǐ gbɔn ɔ́ nɛ́, bɔ é sɔgbe xá lě e Mawu Mavɔmavɔ kó ɖɔ gbɔn nú Mɔyízi ɖ'ayǐ é. Énɛ́ ɔ́ gúdo ɔ́, é má to ɔ́ nú Izlayɛ́li ví lɛ́ɛ. É má nú akɔta ɖokpó ɖokpó. Énɛ́ ɔ́, to ɔ́ gbɔjɛ́, bó sɔ́ fun ahwan ɖě ǎ. Izlayɛ́li ví lɛ́ɛ kó ɖu ɖo axɔ́sú we jí ɖo Judɛ́ɛn tɔ ɔ́ sín zǎnzǎnhwe jí; yě yí ayǐkúngban yětɔn sín Aanɔ́ni tɔ ɔ́ kɔn, káká yi Ɛmɔ́ɔ só ɔ́ kɔn; ayǐkúngban e ɖo Judɛ́ɛn tɔdo ɔ́ mɛ ɖo zǎnzǎnhwe jí ɔ́ lɔ ɖo ayǐkúngban e yě yǐ lɛ́ɛ mɛ. Axɔ́sú ɔ́ ɖokpó nyí Sihɔ́ni. Éyɛ́ ɔ́, Amɔliti wɛ é nyí, bó nɔ́ nɔ Hɛcibɔ́ni. É kpa acɛ dó tɔdo e ɖo Aanɔ́ni ɔ́ sín vlɔ̌ɖówe nu, bɛ́ sín gletoxo Alowɛ́ɛ tɔn mɛ, bó kpa acɛ dó Galadi yíkúngban ɔ́ sín vlɔ̌ɖówe nu káká yi Yabɔ́ku tɔ ɔ́ kɔn. Tɔ énɛ́ ɔ́ wɛ nyí dogbó nú yě kpódó Amumɔ́ɔ ví lɛ́ɛ kpó. É lɛ́ kpa acɛ dó tɔdo Judɛ́ɛn tɔn ɔ́ nu, ɖo zǎnzǎnhwe jí, bɛ́ sín Jenɛzalɛ́ti tɔ ɔ́ kɔn ɖo totaligbé káká yi Xu Kúkú ɔ́ kɔn, ɖo Bɛti-Yesimɔ́ti kpá, bó lɛ́ kpa acɛ dó ayǐkúngban e ɖo Pisiga só kpá ɔ́ nu, ɖo tofɔligbé do dɔ̌n. Axɔ́sú ɔ́ ɖě nyí Ɔgu, bo nyí Hlafa ví gǔdo gúdo tɔn e kpo lɛ́ɛ ɖě bó kpa acɛ dó Basáni nu, bó nɔ́ nɔ Acitalɔ́ti, bó nɔ́ lɛ́ nɔ Edlɛyi. É kpa acɛ ɖo Ɛmɔ́ɔ só ɔ́ kɔn, bó kpa acɛ ɖó Saluka toxo ɔ́ nu, bó kpa acɛ dó Basáni to ɔ́ bǐ nu, káká yi Gɛcúunu lɛ́ɛ kpó Maakatinu lɛ́ɛ kpó sín dogbó jí. É lɛ́ kpa acɛ dó ayǐkúngban Galadi tɔn ɔ́ sín vlɔ̌ɖówe nu, káká yi bɔdó Sihɔ́ni axɔ́sú Hɛcibɔ́ni tɔn sín dogbó wú. Mɛsɛntɔ́ Mawu Mavɔmavɔ tɔn Mɔyízi kpódó Izlayɛ́li ví lɛ́ɛ kpó kó ɖu ɖo axɔ́sú we énɛ́ lɛ́ɛ jí, bɔ Mɔyízi ko sɔ́ ayǐkúngban yětɔn lɛ́ɛ jó nú akɔta Hwlibɛ́ni tɔn kpódó Gadi tɔn kpó, kpódó akɔta vlɔ́ Manasée tɔn ɔ́ kpó. Énɛ́ ɔ́ gúdo ɔ́, Jozuwée kpódó Izlayɛ́li ví lɛ́ɛ kpó wá ɖu ɖo axɔ́sú e ɖo Judɛ́ɛn tɔ ɔ́ sín gbadahwe jí lɛ́ɛ jí; axɔ́sú énɛ́ lɛ́ɛ sín ayǐkúngban gosín Baalu-Gadi, ɖo Libáan tɔdo mɛ, ɖo totaligbé káká yi só e jí nǔɖé má ɖe ǎ é kɔn, ɖo Seyíi kpá, ɖo tofɔligbé. Jozuwée ná to énɛ́ lɛ́ɛ Izlayɛ́li ví lɛ́ɛ; é má nú akɔta yětɔn lɛ́ɛ. To e é má nú yě lɛ́ɛ ɖíe: Ayǐkúngban e ɖo sókan mɛ é, to e ɖo dodomɛ é, ayǐkúngban e ɖo tɔdo Judɛ́ɛn tɔn mɛ é, ayǐkúngban e ɖo só jí lɛ́ɛ, ayǐkúngban e ɖo gbětótló mɛ lɛ́ɛ kpódó éé ɖo só kpɛví kpɛví lɛ́ɛ kan mɛ lɛ́ɛ kpó. Mɛ e nɔ ayǐkúngban énɛ́ lɛ́ɛ jí ɖ'ayǐ lɛ́ɛ ɖíe: Hitíti lɛ́ɛ, Amɔliti lɛ́ɛ, Kanáanu lɛ́ɛ, Pɛliziti lɛ́ɛ, Hivíti lɛ́ɛ, kpódó Jebuzinu lɛ́ɛ kpó. Axɔ́sú e jí Jozuwée kpó Izlayɛ́li ví lɛ́ɛ kpó ɖu ɖe lɛ́ɛ ɖíe: Jeliko xɔ́sú ɔ́, Ayíi xɔ́sú ɔ́; Betɛ́li kpá wɛ Ayíi ɔ́ ɖe. Jeluzalɛ́mu xɔ́sú ɔ́, Eblɔ́n xɔ́sú ɔ́, Yaamúti xɔ́sú ɔ́, Lakíci xɔ́sú ɔ́, Eglɔ́ni xɔ́sú ɔ́, Gɛzɛ́ɛ xɔ́sú ɔ́, Devíi xɔ́sú ɔ́, Gɛdɛ́ɛ xɔ́sú ɔ́, Hɔ́ɔma xɔ́sú ɔ́, Aladi xɔ́sú ɔ́, Livuna xɔ́sú ɔ́, Adulámu xɔ́sú ɔ́, Makeda xɔ́sú ɔ́, Betɛ́li xɔ́sú ɔ́, Tapuwaxi xɔ́sú ɔ́, Hefɛ́ɛ xɔ́sú ɔ́, Afɛ́ki xɔ́sú ɔ́, Lacalɔ́ni xɔ́sú ɔ́, Madɔ́ni xɔ́sú ɔ́, Hasɔ́ɔ xɔ́sú ɔ́, Cimulɔ́ni-Mɛlɔ́ni xɔ́sú ɔ́, Akisáfu xɔ́sú ɔ́, Tanaki xɔ́sú ɔ́, Mɛgido xɔ́sú ɔ́, Kedɛ́ci xɔ́sú ɔ́, Yokunɛámu xɔ́sú ɔ́, Kaamɛ́li gbé ɔ́ jí wɛ Yokunɛámu ɔ́ ɖe. Dɔ́ɔ xɔ́sú ɔ́; xutó wɛ Dɔ́ɔ ɔ́ ɖe; Goyímu xɔ́sú ɔ́; Galilée wɛ Goyímu ɔ́ ɖe, kpódó Tíisa xɔ́sú ɔ́ kpó. É bló axɔ́sú gban-nukún-ɖokpó. Jozuwée kpo bǐ, xwe tɔn ko sɛ yi, bɔ Mawu Mavɔmavɔ ɖɔ n'i ɖɔ: “Hwi ɖíe kpo bǐ e, xwe towe ko sɛ yi; ayǐkúngban e ka kpo bɔ a nǎ yí ɔ́ d'agba ɖésú. Fí e kpo bɔ a nǎ yí lɛ́ɛ ɖíe: a nǎ yǐ Filisitɛ́ɛn lɛ́ɛ kpó Gɛcúunu lɛ́ɛ kpó sín to. To énɛ́ ɔ́ bɛ́ sín Cixɔ́ɔ tɔ ɔ́ kɔn ɖo Ejípu dogbó ɔ́ kɔn ɖo afɔligbé, káká yi Eklɔ́ni dogbó ɔ́ kɔn ɖo taligbé. Ayǐkúngban énɛ́ ɔ́, Kanáanu lɛ́ɛ tɔn wɛ, bɔ gǎn Filisitɛ́ɛn lɛ́ɛ tɔn atɔ́ɔ́n kpó Awanu lɛ́ɛ kpó ka klá jɛ nu. Gǎn énɛ́ lɛ́ɛ nɔ́ nɔ Gaza, Acidɔ́di, Acikelɔ́ni, Gati kpó Eklɔ́ni kpó, ɖo afɔligbé; a nǎ lɛ́ yí Kanáanu lɛ́ɛ sín ayǐkúngban ɔ́ bǐ, bó ná yí Mɛyala Sidɔ́ɔnnu lɛ́ɛ sín ayǐkúngban ɔ́ káká yi Afeka, káká yi Amɔliti lɛ́ɛ sín dogbó jí. Mɔ̌ ɖokpó ɔ́, a ɖǒ ná yí ayǐkúngban Gebali tɔn ɔ́, bó ná yí ayǐkúngban e ɖo Libáan sín zǎnzǎnhwe jí, bɛ́ sín Baalu-Gadi, ɖo Ɛmɔ́ɔ só kpá lɛ́ɛ, káká yi Lɛbo-Hamáti. A nǎ lɛ́ yí ayǐkúngban mɛ e ɖo sókan mɛ lɛ́ɛ tɔn, bɛ́ sín Libáan káká yi Mislefɔ́ti-Mayimu; Sidɔ́ɔnnu wɛ yě bǐ nyí. Izlayɛ́li ví lɛ́ɛ ɖo yiyi wɛ ɔ́, nyɛ ná ɖo mɛ e ɖo ayǐkúngban énɛ́ lɛ́ɛ jí lɛ́ɛ nya wɛ, ɖo nukɔn yětɔn. A nǎ nyi akɔ dó to tɛnmɛ tɛnmɛ énɛ́ lɛ́ɛ, bó ná má nú Izlayɛ́li ví lɛ́ɛ lě e un ɖɔ nú we gbɔn é. Hǔn bo má ayǐkúngban ɔ́ nú akɔta tɛ́nnɛ lɛ́ɛ, kpó akɔta vlɔ́ Manasée tɔn ɔ́ kpó; yědɛɛ lɛ́ɛ ko ɖó nǔɖé ǎ.” Akɔta Hwlibɛ́ni tɔn kpó Gadi tɔn kpó, kpódó akɔta vlɔ́ Manasée tɔn nukɔn tɔn ɔ́ kpó kó yí ayǐkúngban ɖ'ayǐ ɖo Judɛ́ɛn tɔ ɔ́ sín zǎnzǎnhwe jí. Mɛsɛntɔ́ Mawu Mavɔmavɔ tɔn Mɔyízi wɛ ko má énɛ́ lɛ́ɛ nú yě ɖ'ayǐ. Ayǐkúngban yětɔn bɛ́ sín Alowɛ́ɛ ɖo Aanɔ́ni tɔ ɔ́ tó, bó gbɔn toxo ɖaxó e ɖo tɔdo ɔ́ tɛ́ntin ɔ́ mɛ. Ayǐkúngban wɛnjɛ e gosín Madaba yi Divɔ́ni ɔ́ bǐ ɖ'é mɛ. Toxo e nu Sihɔ́ni kpa acɛ dó lɛ́ɛ bǐ ɖ'é mɛ káká yi Amumɔ́ɔ ví lɛ́ɛ sín dogbó jí. Sihɔ́ni ɔ́, Amɔliti lɛ́ɛ sín axɔ́sú wɛ, bó kó ɖu axɔ́sú ɖo Hɛcibɔ́ni ɖ'ayǐ. Galadi Gɛcúunu lɛ́ɛ kpó Maakatinu lɛ́ɛ kpó sín to ɔ́, kpódó Ɛmɔ́ɔ só ɔ́ bǐ kpó, kpódó ayǐkúngban Basáni tɔn ɔ́ bǐ kpó ɖ'é mɛ káká yi Saluka. Axɔ́súɖuto Ɔgu tɔn lɔ ɖ'é mɛ. Ɔgu ɔ́, Hlafa ví gǔdo gúdo tɔn e kpo lɛ́ɛ ɖě wɛ, bó ɖu axɔ́sú ɖo Acitalɔ́ti kpó Edlɛyi kpó; toxo énɛ́ lɛ́ɛ ɖo Basáni. Mɔyízi ko ɖu ɖo to énɛ́ lɛ́ɛ sín axɔ́sú lɛ́ɛ jí, bó kó yí to yětɔn lɛ́ɛ. Lo ɔ́, Izlayɛ́li ví lɛ́ɛ nya Gɛcúunu lɛ́ɛ, kpódó Maakatinu lɛ́ɛ kpó ǎ, bɔ mɛ énɛ́ lɛ́ɛ lɛ́ kpo ɖo Izlayɛ́li ví lɛ́ɛ mɛ káká wá jɛ din. Akɔta Levíi tɔn ɔ́ kɛ́ɖɛ́ jɛ́n è ma ná ayǐkúngban ɖě ǎ. Vɔ̌ e è nɔ dó zo nú Mawu Mavɔmavɔ, Mawu Izlayɛ́li tɔn ɔ́ wɛ nyí yětɔn, lě e Mawu Mavɔmavɔ ɖésú kó dó akpá tɔn n'i gbɔn é. Ayǐkúngban e Mɔyízi má nú akɔta Hwlibɛ́ni tɔn sín xwédo lɛ́ɛ ɔ́, bɛ́ sín Alowɛ́ɛ ɖo Aanɔ́ni tɔ ɔ́ tó, bó gbɔn toxo ɖaxó e gbɔn tɔdo ɔ́ tɛ́ntin ɔ́ mɛ. Ayǐkúngban wɛnjɛ e lɛ́ lɛ̌ dó Madaba ɔ́ ɖ'é mɛ. Hɛcibɔ́ni lɔ kpódó toxo e ɖo ayǐkúngban wɛnjɛ ɔ́ jí lɛ́ɛ bǐ kpó ɖ'é mɛ. Yě wɛ nyí: Divɔ́ni, Bamɔ́ti-Baalu, Bɛti-Baalu-Mɛwɔ́ni, Yaxisa, Kedemɔ́ti, Mɛfáti, Kiliyatayimu, Sivuma, Sɛlɛ́ti-Caha; Sɛlɛ́ti-Caha ɔ́ ɖo só e ɖo tɔdo mɛ ɔ́ jí, Bɛti-Peɔ́ɔ, Pisiga kpó ɔ́ kpódó Bɛti-Yesimɔ́ti kpó lɔmɔ̌ ɖo ayǐkúngban wɛnjɛ ɔ́ jí. Toxo e ɖo ayǐkúngban wɛnjɛ jí lɛ́ɛ bǐ, kpódó toxo e nu Sihɔ́ni kpa acɛ dó lɛ́ɛ kpó ɖ'é mɛ. Sihɔ́ni ɔ́, Amɔliti lɛ́ɛ sín axɔ́sú wɛ, bó kó ɖu axɔ́sú ɖo Hɛcibɔ́ni ɖ'ayǐ. Mɔyízi hu axɔ́sú Sihɔ́ni kpódó Madiáani gán e ɖo acɛ tɔn glɔ́, bó ɖo to ɔ́ mɛ lɛ́ɛ kpó. Gǎn énɛ́ lɛ́ɛ sín nyǐkɔ ɖíe: Ewinu, Hlɛkɛ́mu, Súu, Húu kpó Hlɛva kpó. Nǔkantɔ́ Baláamu Beɔ́ɔ ví ɔ́ lɔ ɖo mɛ e Izlayɛ́li ví lɛ́ɛ hu hwenɛ́nu lɛ́ɛ mɛ. Judɛ́ɛn tɔ ɔ́ wɛ nyí dogbó nú ayǐkúngban Hwlibɛ́ni ví lɛ́ɛ tɔn ɖo gbadahwe jí. Toxo kpó gletoxo kpó e è nǎ Hwlibɛ́ni ví lɛ́ɛ sín xwédo lɛ́ɛ nɛ́. Ayǐkúngban e Mɔyízi ná akɔta Gadi tɔn ɔ́ sín xwédo lɛ́ɛ ɖíe: Yazɛ́ɛ, Galadi sín toxo lɛ́ɛ bǐ, kpó Amumɔ́ɔ ví lɛ́ɛ sín toxo wevlɔ́ɖó kpó káká yi Alowɛ́ɛ, ɖo Hlaba kpá. Ayǐkúngban ɔ́ bɛ́ sín Hɛcibɔ́ni ɖo Hlamati-Misipée, kpó Betonímu kpó, bó bɛ́ sín Maxanayímu yi Lodeváa sín dogbó jí. Bɛti-Halamu, Bɛti-Nimula, Sukɔ́tu kpó Safɔ́ni kpó, ɖo tɔdo Judɛ́ɛn tɔn ɔ́ mɛ. Sihɔ́ni Hɛcibɔ́ni xɔ́sú ɔ́ wɛ kpa acɛ gbɔn fí énɛ́ lɛ́ɛ, ɖo Judɛ́ɛn tɔ ɔ́ sín zǎnzǎnhwe jí, bɔ Judɛ́ɛn tɔ ɔ́ nyí dogbó n'i káká yi Jenɛzalɛ́ti tɔ ɔ́ kɔn, ɖo totaligbé. Toxo kpó gletoxo kpó e è nǎ Gadi ví lɛ́ɛ sín xwédo lɛ́ɛ nɛ́. Ayǐkúngban e Mɔyízi ná akɔta vlɔ́ Manasée tɔn ɔ́ sín xwédo lɛ́ɛ ɔ́, bɛ́ sín Maxanayímu, bó yí Basáni ɔ́ bǐ, bó yí Ɔgu axɔ́sú Basáni tɔn sín to ɔ́ bǐ. Gletoxo Yayíi tɔn kanɖé ko (60) e ɖo gbě nɛ́ ɔ́ jí lɛ́ɛ lɔ bǐ wɛ ɖ'é mɛ. Galadi to ɔ́ sín vlɔ̌ɖówe ɖ'é mɛ. Basáni xɔ́sú Ɔgu sín toxo Acitalɔ́ti kpódó Edlɛyi kpó ɖ'é mɛ. Ayǐkúngban énɛ́ lɛ́ɛ wɛ è nǎ kúnkan Makíi, Manasée ví ɔ́ tɔn sín xwédo vlɔ̌ɖówe. Hwenu e Mɔyízi ɖo ayǐkúngban wɛnjɛ Mɔwabu tɔn ɔ́ jí ɔ́ wɛ é kó má ayǐkúngban tɛnmɛ tɛnmɛ énɛ́ lɛ́ɛ e ɖo Jeliko kpódó Judɛ́ɛn kpó sín zǎnzǎnhwe jí ɔ́ nú yě. É ná ayǐkúngban ɖěbǔ akɔta Levíi tɔn ɔ́ sín mɛ lɛ́ɛ ǎ; lo ɔ́, é ɖɔ nú yě ɖɔ nǔ e nyí yědɛɛ lɛ́ɛ tɔn ɔ́ wɛ nyí yě ní wa azɔ̌ nú Mawu Mavɔmavɔ, Mawu Izlayɛ́li tɔn ɔ́. Vɔ̌sánú-xwlémawutɔ́ Eleazáa, kpódó Jozuwée Nuni ví ɔ́ kpó, kpódó hɛ̌nnugán akɔta lɛ́ɛ tɔn lɛ́ɛ kpó má Kanáa to ɔ́ nú Izlayɛ́li ví lɛ́ɛ. Lě e è mǎ nú yě gbɔn ɔ́ ɖíe: È nyi akɔ dó ayǐkúngban e ɖo to ɔ́ mɛ ɔ́ bó má nú akɔta tɛ́nnɛ lɛ́ɛ, kpódó akɔta vlɔ́ Manasée tɔn kpó, lě e Mawu Mavɔmavɔ kó ɖɔ gbɔn nú Mɔyízi ɖ'ayǐ é. Mɔyízi ko má ayǐkúngban e ɖo Judɛ́ɛn tɔ ɔ́ sín zǎnzǎnhwe jí ɔ́ nú akɔta we kpódó akɔta vlɔ́ Manasée tɔn ɔ́ kpó ɖ'ayǐ, é ká ná ɖě Levíi ví lɛ́ɛ ǎ. Jozɛ́fu ví lɛ́ɛ bló akɔta we: yě wɛ nyí akɔta Manasée tɔn ɔ́ kpódó Eflayímu tɔn ɔ́ kpó. Levíi ví lɛ́ɛ ɔ́, è nǎ ayǐkúngban ɖě yědɛɛ lɛ́ɛ zɛ toxo e mɛ yě ɖe lɛ́ɛ, kpódó ayǐkúngban e lɛ́ lɛ̌ dó yě, bɔ kanlin yětɔn lɛ́ɛ ɖ'é jí lɛ́ɛ kpó wú ǎ. Énɛ́ ɔ́, Izlayɛ́li ví lɛ́ɛ má to ɔ́ lě e Mawu Mavɔmavɔ ɖɔ gbɔn nú Mɔyízi ɔ́. Akɔta Judáa tɔn ɔ́ sín mɛɖé lɛ́ɛ yi mɔ Jozuwée ɖo Gilugalu gbe ɖokpó, bɔ Kalɛ́bu Yefunnɛ́ɛ ví Kenázi kúnkan ɔ́ ɖɔ n'i ɖɔ: “A ma flín nǔ e Mawu Mavɔmavɔ ɖɔ nú Mɔyízi ɖɛ̌mɛnu tɔn ɔ́ dó nyɛ kpódó hwi kpó wú ɖo Kadɛ́ci-Baanɛ́ya ɔ́ a? Xwe kanɖé (40) wɛ un ɖó hwenu e mɛsɛntɔ́ Mawu Mavɔmavɔ tɔn Mɔyízi sɛ́ mì dó ɖɔ má yi ba do nú to ɔ́ é. Kadɛ́ci-Baanɛ́ya wɛ un gosín bó yi. Un ka yi bo wá ɖɔ lě e un mɔ to ɔ́ gbɔn ɔ́ nǔgbó tɔn n'i. Nɔví ce e kpó nyɛ kpó yi lɛ́ɛ ɔ́, yědɛɛ lɛ́ɛ wá dó awakanmɛ kú nú togun ɔ́. Amɔ̌, nyɛ ɔ́, un nɔ gbejí nú Mawu Mavɔmavɔ, Mawu ce yi fó. Bɔ gbe énɛ́ gbe ɔ́, Mɔyízi dó akpá nú mì ɖɔ: ‘Ayǐkúngban e jí a tɛ afɔ ɔ́ ná nyí hwi kpódó vǐ towe lɛ́ɛ kpó tɔn káká sɔ́yi, ɖó gbejí e a nɔ nú Mawu Mavɔmavɔ, Mawu ce ɔ́ wú.’ Din ɔ́, Mawu Mavɔmavɔ ná jidɔ́ mì, lě e é ɖɔ gbɔn é. Mawu Mavɔmavɔ ɖɔ xó énɛ́ ɔ́ nú Mɔyízi ɔ́, xwe kanɖé atɔ́ɔ́n (45) ɖíe. Hwenɛ́nu ɔ́, Izlayɛ́li ví lɛ́ɛ kpo ɖo yiyi wɛ ɖo gbětótló mɛ. Égbé din ɔ́, xwe kanwe atɔ́ɔ́n (85) wɛ un ɖó. Hlɔ̌nhlɔ́n ka lɛ́ kpo ɖo wǔ ce gbe e gbe Mɔyízi sɛ́ mì dó to ɔ́ mɛ ɔ́ ɖɔhun. Un lɛ́ ɖó hlɔ̌nhlɔ́n din hwe énɛ́ ɔ́ nu ɖɔhun, bó ná dó fun ahwan, abǐ bó ná dó wa azɔ̌ bǐ. Hǔn bo ná mì sókan mɛ yíkúngban élɔ́ e sín akpá Mawu Mavɔmavɔ dó nú mì gbe nɛ́ gbe ɔ́, ɖó a se ɖɔ Anáki ví lɛ́ɛ wɛ ɖo fínɛ́, bɔ toxo ɖaxó ɖaxó e è mɛ ahohó lɛ́ lɛ̌ dó lɛ́ɛ ɖo fínɛ́. Nú Mawu Mavɔmavɔ kó sixú ɖo kpɔ́ xá mì kpowun ɔ́, un ná yí to ɔ́ sín yě sí, lě e Mawu Mavɔmavɔ ɖɔ gbɔn é.” Ée Jozuwée se xó énɛ́ lɛ́ɛ ɔ́, é xo ɖɛ nú Kalɛ́bu Yefunnɛ́ɛ ví ɔ́, bó sɔ́ Eblɔ́n to ɔ́ jó n'i, bɔ é nyí étɔn. Lě e Eblɔ́n to ɔ́ nyí Kalɛ́bu Yefunnɛ́ɛ Kenázi ví ɔ́ tɔn gbɔn káká wá jɛ égbé ɔ́ nɛ́; ɖó gbejí e é nɔ nú Mawu Mavɔmavɔ, Mawu Izlayɛ́li ví lɛ́ɛ tɔn ɔ́ yi fó ɔ́ wú. Eblɔ́n to ɔ́, Kiliyati-Aaba wɛ é nɔ nyí ɖ'ayǐ. Aaba sɔ́ avɔ hú Anáki ví lɛ́ɛ bǐ. Énɛ́ ɔ́, Izlayɛ́li togun ɔ́ gbɔjɛ́, bó sɔ́ fun ahwan ɖě ǎ. Ayǐkúngban e è nyi akɔ dó, bó má nú akɔta Judáa tɔn sín xwédo lɛ́ɛ ɔ́ gosín tofɔligbé-zǎnzǎnhwe jí, káká yi bɔdó Edɔ́mu sín dogbó ɔ́ wú. Gbětótló Síni tɔn wɛ nyí ayǐkúngban Judáa tɔn ɔ́ sín dogbó ɖo afɔligbé. Dogbó yětɔn e ɖo afɔligbé ɔ́ gosín fí e Xu Kúkú ɔ́ vɔ ɖe, bó ɖe nu kpan nukɔn tofɔligbé ɔ́ kɔn. É dín yi Aklabímu só ɔ́ sín afɔligbé, bó gbɔn Síni ɖidó Kadɛ́ci-Baanɛ́ya sín afɔligbé. É gbɔn fínɛ́ wá Ɛslɔ́ni, bo dín ɖidó Adudáa toxo ɔ́ wa jí, bó xá ɖidó Kaakáa. É dlɛ́n d'é nu gbɔn Asemɔ́ni, bó gbɔn Ejípu tɔ ɔ́ kɔn, bo wá yi fó dó Mɛditɛlanɛ́ɛ xutó. Fí e ayǐkúngban Judáa tɔn sín dogbó e ɖo tofɔligbé ɔ́ gbɔn ɔ́ nɛ́. Dogbó tɔn e ɖo zǎnzǎnhwe jí ɔ́ bɛ́ sín Xu Kúkú ɔ́ tó káká yi fí e Judɛ́ɛn tɔ ɔ́ sa yi byɔ́ Xu Kúkú ɔ́ mɛ ɖe é. Fí énɛ́ ɔ́ ɖokpó ɔ́ wɛ dogbó tɔn e ɖo totaligbé ɔ́ bɛ́ sín. É dín yi Bɛti-Hogla, bó gbɔn Bɛti-Alaba ɖo totaligbé, bó dín káká yi awǐnnya Bohani tɔn ɔ́ kɔn. Bohani ɔ́, Hwlibɛ́ni ví wɛ. É lɛ́ yi Devíi bó gbɔn tɔdo Akɔ́ɔ tɔn ɔ́ mɛ, bó dín ɖidó totaligbé wají ɖo Gilugalu kpá. Gilugalu ɔ́ kpan nukɔn Adumímu só ɔ́ ɖo tɔsisa ɔ́ sín afɔligbé. É lɛ́ gbɔn tɔ Eyinu-Cemɛ́ci tɔn kpá, bó dín káká yi Eyinu-Hlogɛ́li. É lɛ́ gosín fínɛ́, bó gbɔn tɔdo Hinnɔ́mu tɔn ɔ́ mɛ, bó fán Jebuzinu só ɔ́ yi ɖó fí ɖé, ɖo Jeluzalɛ́mu sín afɔligbé. É hun káká yi só e ɖo tɔdo Hinnɔ́mu tɔn sín nukɔn ɔ́ kpá ɖo gbadahwe jí, bó yi tɔdo Hlafa ví lɛ́ɛ tɔn e ɖo totaligbé ɔ́ sín vivɔnu. É gosín fínɛ́, bó xá ɖidó Nɛfutoáxi sín tɔjɔtɛn lɛ́ɛ kɔn, ɖo toxo e ɖo Eflɔ́ni só ɔ́ kpá lɛ́ɛ mɛ, cóbó wá ɖidó Baala; è nɔ lɛ́ ylɔ́ toxo énɛ́ ɔ́ ɖɔ Kiliyati-Yealimu. Dogbó ɔ́ xá sín Baala ɖo gbadahwe jí, ɖidó Seyíi sín só lɛ́ɛ kɔn, bó fán zungbó só ɔ́ yi ɖó fí ɖé, ɖo totaligbé; zungbó só ɔ́ wɛ è nɔ lɛ́ ylɔ́ ɖɔ Kesalɔ́ni só; é sí kɔ do wá Bɛti-Cɛmɛ́ci, lobo dín zɛ Timuna wú. É dlɛ́n d'é nu ɖidó, bó fán Eklɔ́ni só ɔ́ yi ɖó fí ɖé, ɖo taligbé, bó xá lɛ́dó Cikikalɔ́ni, bó gbɔn Baala só ɔ́ kɔn ɖidó Yavunɛyɛ́li, bo yi fó dó Mɛditɛlanɛ́ɛ xutó. Mɛditɛlanɛ́ɛ xu ɔ́ wɛ nyí dogbó tɔn e ɖo gbadahwe jí é. Ayǐkúngban e è nǎ akɔta Judáa tɔn sín xwédo lɛ́ɛ ɔ́, fí e dogbó tɔn lɛ́ɛ gbɔn ɔ́ nɛ́. È nǎ ayǐkúngban Judáa tɔn ɔ́ ɖě Kalɛ́bu Yefunnɛ́ɛ ví ɔ́, lě e Mawu Mavɔmavɔ kó ɖɔ gbɔn nú Jozuwée é. È nǎ ɛ Kiliyati-Aaba. Din ɔ́, è nɔ ylɔ́ toxo énɛ́ ɔ́ ɖɔ Eblɔ́n. Aaba ɔ́, Anáki ví lɛ́ɛ sín tɔ́gbó wɛ. Kalɛ́bu nya Anáki ví atɔn lɛ́ɛ kpó xwédo yětɔn lɛ́ɛ kpó sín ayǐkúngban ɔ́ jí. É nya Cecáyi kpó xwédo tɔn kpó, Aximani kpó xwédo tɔn kpó, Talumayi kpó xwédo tɔn kpó. Kalɛ́bu gosín Eblɔ́n bo yi tɔ́n ahwan Devíinu lɛ́ɛ. Dɛvíi ɔ́, Kiliyati-Sefɛ́ɛ wɛ é nɔ́ nyí ɖ'ayǐ. Kalɛ́bu ɖɔ mɛ e ná ɖu ɖo Kiliyati-Sefɛ́ɛ to ɔ́ jí, bó ná yí ɔ́, émí ná sɔ́ vǐ émítɔn Akisa da n'i. Kenázi ví Ɔtiniyɛ́li e nyí Kalɛ́bu nɔví ɔ́ yí to ɔ́, bɔ Kalɛ́bu sɔ́ vǐ tɔn da n'i. Ée vǐ ɔ́ jɛ Ɔtiniyɛ́li kpá ɔ́, é ɖɔ nú Ɔtiniyɛ́li ɖɔ é ní byɔ́ gle ɖokpó tɔ́ émítɔn. Énɛ́ ɔ́ gúdo ɔ́, é jɛ te sín tócí tɔn jí, bɔ tɔ́ tɔn kan nǔ e jló e ɔ́ byɔ́ ɛ. Bɔ é yí gbe n'i ɖɔ: “Kɛnklɛ́n bó ná fí e sin ɖe lɛ́ɛ mì, ɖó ayǐkúngban e a nǎ mì ɖo tofɔligbé ɔ́, axéko wɛ.” Bɔ Kalɛ́bu ná ɛ fí e sin ɖe ɖo só jí lɛ́ɛ, kpódó fí e sin ɖe ɖo dodomɛ lɛ́ɛ kpó. Ayǐkúngban e è nǎ akɔta Judáa tɔn sín xwédo lɛ́ɛ ɔ́ nɛ́. Toxo e ɖo ayǐkúngban Judáa tɔn ɔ́ jí ɖo tofɔligbé ɖo Edɔ́mu sín dogbó kpá lɛ́ɛ ɖíe: Kavuceyɛ́li, Edɛ́ɛ, Yagúu, Kina, Dimɔna, Adeada, Kedɛ́ci, Hasɔ́ɔ, Itináni, Zifu, Tɛlɛ́mu, Bealɔ́ti, Hasɔ́ɔ-Hadata, Keliyɔ́ti-Ɛslɔ́ni e è nɔ lɛ́ ylɔ́ ɖɔ Hasɔ́ɔ é, Amamu, Cema, Mɔlada, Hasáa-Gadáa, Hɛcimɔ́ni, Bɛti-Pɛlɛ́ti, Hasáa-Cuwáli, Bɛ̌-Ceva, Biziotia, Baala, Iyé-Avalímu, Esɛ́mu, Ɛlutoladi, Kesilu, Hɔ́ɔma, Siklági, Madumána, Sansána, Levaɔ́ti, Cilɛxímu, kpódó Eyinu-Hlimumɔ́ni kpó. Bǐ sésé bló toxo koatɔ́n-nukún-ɛnɛ (29), kpódó gletoxo e lɛ́ lɛ̌ dó yě lɛ́ɛ kpó. Toxo e ɖo ayǐkúngban wɛnjɛ jí lɛ́ɛ wɛ nyí: Ɛcitawɔ́lu, Soléa, Acina, Zanɔwáxi, Eyinu-Gannimu, Tapuwaxi, Eyinamu, Yaamúti, Adulámu, Soko, Azeka, Caalayímu, Aditayimu, Gedela kpó Gedelotayímu kpó. Bǐ sésé bló toxo wǒ-ɛnɛ, kpódó gletoxo e lɛ́ lɛ̌ dó yě lɛ́ɛ kpó. Toxo élɔ́ lɛ́ɛ lɔ ɖ'é mɛ: Senáni, Hadaca, Migidalu-Gadi, Dileani, Misipa, Yokiteɛ́li, Lakíci, Bɔsikáti, Eglɔ́ni, Kabubɔni, Laximási, Kitlíci, Gedelɔ́ti, Bɛti-Dagɔ́ni, Naama kpódó Makeda kpó. Bǐ sésé bló toxo afɔtɔn-nukún-ɖokpó, kpódó gletoxo e lɛ́ lɛ̌ dó yě lɛ́ɛ kpó. Toxo élɔ́ lɛ́ɛ lɔ ɖ'é mɛ: Livuna, Etɛ́ɛ, Acáni, Yifutáxi, Acina, Nɛsívu, Keyila, Akizívu kpódó Maleca kpó. É bló toxo tɛ́nnɛ kpódó gletoxo e lɛ́ lɛ̌ dó yě lɛ́ɛ kpó. Toxo élɔ́ lɛ́ɛ lɔ ɖ'é mɛ: Eklɔ́ni kpódó toxo e ɖo acɛ tɔn mɛ lɛ́ɛ kpó, kpódó gletoxo lɛ́ɛ kpó, kpó toxo lɛ́ɛ bǐ kpó, kpódó gletoxo e lɛ́ lɛ̌ dó Acidɔ́di, bó ɖo Eklɔ́ni kpódó Mɛditɛlanɛ́ɛ xu ɔ́ kpó tɛ́ntin lɛ́ɛ bǐ kpó. Acidɔ́di kpódó Gaza kpó, kpódó toxo e ɖo acɛ yětɔn mɛ lɛ́ɛ kpó, kpódó gletoxo yětɔn lɛ́ɛ kpó, káká yi Ejípu tɔ ɔ́ tó, bó hun káká yi Mɛditɛlanɛ́ɛ xu ɔ́ tó. Toxo e ɖo sókan mɛ lɛ́ɛ ɖíe: Camíi, Yatíi, Soko, Dana, Kiliyati-Sána e è nɔ lɛ́ ylɔ́ ɖɔ Devíi é, Anávu, Ɛcitemɔwa, Animu, Gocɛ́ni, Holɔ́ni kpódó Gilóo kpó. É bló toxo wǒ-ɖokpó, kpódó gletoxo yětɔn lɛ́ɛ kpó. Toxo élɔ́ lɛ́ɛ ɖ'é mɛ: Alávu, Duma, Ɛceani, Yanúmu, Bɛti-Tapuwaxi, Afeka, Humɛta, Kiliyati-Aaba e è nɔ lɛ́ ylɔ́ ɖɔ Eblɔ́n é kpódó Siɔ́ɔ kpó. É bló toxo tɛ́nnɛ kpódó gletoxo yětɔn lɛ́ɛ kpó. Toxo élɔ́ lɛ́ɛ lɔ ɖ'é mɛ: Mawɔ́ni, Kaamɛ́li, Zifu, Yutá, Izleyɛ́li, Yɔkeamu, Zanɔwáxi, Kayini, Giveya kpódó Timuna kpó. É bló toxo wǒ, kpódó gletoxo yětɔn lɛ́ɛ kpó. Bó ná dó fó ɔ́, toxo élɔ́ lɛ́ɛ lɔ ɖ'é mɛ: Halihúli, Bɛti-Súu, Gedɔ́ɔ, Maalati, Bɛti-Anɔti kpódó Ɛlutekɔ́nu kpó. É bló toxo ayizɛ́n, kpódó gletoxo yětɔn lɛ́ɛ kpó. Toxo élɔ́ lɛ́ɛ lɔ ɖ'é mɛ: Kiliyati-Baalu e è nɔ lɛ́ ylɔ́ ɖɔ Kiliyati-Yealimu é, kpódó Hlaba kpó. É bló toxo we, kpódó gletoxo yětɔn lɛ́ɛ kpó. Toxo e ɖo gbětótló mɛ lɛ́ɛ ɖíe: Bɛti-Alaba, Midíni, Sekaka, Nivucáni, Ii-Mɛláxi, kpódó Eyinu-Gɛdi kpó. É bló toxo ayizɛ́n, kpódó gletoxo yětɔn lɛ́ɛ kpó. Judáa sín kúnkan lɛ́ɛ kpé wú bó nya Jebuzinu e ɖo Jeluzalɛ́mu lɛ́ɛ ǎ, bɔ yě mɛ énɛ́ lɛ́ɛ kpo ɖo toxo ɔ́ mɛ, kpódó kúnkan Judáa tɔn lɛ́ɛ kpó káká jɛ égbé. Ayǐkúngban e è nǎ kúnkan Jozɛ́fu tɔn lɛ́ɛ gosín Judɛ́ɛn ɖo Jeliko kpá, ɖo Jeliko tɔ lɛ́ɛ sín awa jí, ɖo zǎnzǎnhwe jí, bó gbɔn gbětótló mɛ, bó yi Betɛ́li sókan ɔ́ mɛ. Bó gosín fínɛ́ bó ɖidó Lǔzi bó gbɔn Atalɔ́ti fí e Aakíti lɛ́ɛ nɔ́ nɔ é, bó sí kɔ do ɖidó Yaflɛ́ti ví lɛ́ɛ sín toxo mɛ ɖo gbadahwe jí. É xo Bɛti-Holɔ́ni dodomɛ tɔn kpódó Gɛzɛ́ɛ kpó zlɛ́, bó wá fó dó Mɛditɛlanɛ́ɛ xutó. Ayǐkúngban e è nǎ kúnkan Jozɛ́fu tɔn lɛ́ɛ, akɔta Manasée tɔn ɔ́, kpó akɔta Eflayímu tɔn ɔ́ kpó ɔ́ nɛ́. Akɔta Eflayímu tɔn ɔ́ sín xwédo lɛ́ɛ yí ayǐkúngban ɔ́ akpáxwé ɖokpó. Ayǐkúngban e yě yí ɔ́ bɛ́ sín Atlɔ́ti-Adáa, ɖo afɔligbé zǎnzǎnhwe jí, bó hun káká yi Bɛti-Holɔ́ni kpóta tɔn ɔ́. É gosín fínɛ́ bó hun káká yi Mɛditɛlanɛ́ɛ xu ɔ́ tó. Bó gbɔn Mikumɛtáti kpá ɖo totaligbé. Bó gosín Mikumɛtáti sín zǎnzǎnhwe jí ɖidó Tanati-Silóo, bó gbɔn fínɛ́ dín yi Yanɔwáxi. É gosín fínɛ́ bó sí kɔ do yi Atalɔ́ti kpódó Naalata kpó, bó dín yi Jeliko, lobo wá fó dó Judɛ́ɛn tɔ ɔ́ tó. Dogbó e ɖo totaligbé ɔ́ gosín Tapuwaxi bó tunta gbadahwe jí, bó hun káká yi Kana tɔ ɔ́ tó, bó yi fó dó Mɛditɛlanɛ́ɛ xu ɔ́ tó. Ayǐkúngban e è nǎ akɔta Eflayímu tɔn sín xwédo lɛ́ɛ ɔ́ nɛ́. È nǎ yě toxo ɖé lɛ́ɛ, kpódó gletoxo e ɖo akpá yětɔn, bó ɖo akɔta Manasée tɔn ɔ́ sín ayǐkúngban jí lɛ́ɛ kpó gɔ́ ná. Eflayímu ví lɛ́ɛ nya Kanáanu e ɖo Gɛzɛ́ɛ lɛ́ɛ ǎ. Yě mɛ énɛ́ lɛ́ɛ kpo ɖo Eflayímu ví lɛ́ɛ mɛ káká jɛ égbé, bɔ Eflayímu ví lɛ́ɛ kpa acɛ nú yě bó nɔ́ zɔ́n azɔ̌ syɛ́nsyɛ́n lɛ́ɛ yě. È nǎ ayǐkúngban ɖě akɔta Manasée tɔn; é wɛ nyí nukɔn ví Jozɛ́fu tɔn. Makíi e nyí nukɔn ví Manasée tɔn, bo nyí Galadi sín tɔ́ ɔ́, è ko ná Galadi yíkúngban ɔ́ kpó Basáni yíkúngban ɔ́ kpó éyɛ́, ɖó ahwanfuntɔ́ wɛ é nyí. È lɛ̌ nǎ ayǐkúngban ɖěvo akɔta Manasée tɔn sín hɛ̌nnu ɖě lɛ́ɛ lɔmɔ̌. Hɛ̌nnu énɛ́ lɛ́ɛ ɖíe: hɛ̌nnu Aviɛzɛ́ɛ tɔn, Helɛ́ki tɔn, Asiliɛ́li tɔn, Cɛkɛ́mu tɔn, Hefɛ́ɛ tɔn kpódó Cemida tɔn kpó. Jozɛ́fu ví Manasée ɔ́, vǐ tɔn súnnu lɛ́ɛ sín hɛ̌nnu lɛ́ɛ nɛ́. Selofɛxádi ji vǐ súnnu ɖě ǎ, nyɔ̌nu kɛ́ɖɛ́ wɛ é ji. Hefɛ́ɛ ví wɛ é nyí, bɔ Hefɛ́ɛ nyí Galadi ví, bɔ Galadi nyí Makíi ví, bɔ Makíi nyí Manasée ví. Selofɛxádi sín vǐ nyɔ̌nu lɛ́ɛ sín nyǐkɔ ɖíe: Maxla, Nɔwa, Hogla, Miluka kpó Tíisa kpó. Vǐ nyɔ̌nu nɛ́ lɛ́ɛ wá mɔ vɔ̌sánú-xwlémawutɔ́ Eleazáa kpódó Jozuwée Nuni ví ɔ́ kpó, kpódó mɛ e ɖo togun ɔ́ nu lɛ́ɛ kpó, bó ɖɔ nú yě ɖɔ: “Mawu Mavɔmavɔ zɔ́n Mɔyízi ɖɔ é ní ná ayǐkúngban mǐ lɔmɔ̌, lě e è nǎ súnnu e ɖo akɔta mǐtɔn mɛ lɛ́ɛ ɔ́ ɖɔhun.” Ée yě ɖɔ mɔ̌ ɔ́, è xwedó gbeta e Mawu Mavɔmavɔ ɖe tɔ́n ɔ́, bó ná ayǐkúngban yě, lě e è nǎ súnnu e ɖo akɔta yětɔn mɛ lɛ́ɛ é ɖɔhun. Ayǐkúngban e akɔta Manasée tɔn yí ɔ́ bló ayǐkúngban ta wǒ, bɔ ayǐkúngban Galadi kpódó Basáni tɔn kpó e ɖo Judɛ́ɛn sín zǎnzǎnhwe jí ɔ́ gɔ́ ná. Nǔgbó ɔ́, é nyí súnnu e ɖo akɔta Manasée tɔn mɛ lɛ́ɛ kɛ́ɖɛ́ wɛ è nǎ ayǐkúngban ǎ; è nǎ ayǐkúngban nyɔ̌nu lɛ́ɛ lɔmɔ̌. Manasée sín vǐ ɖě lɛ́ɛ tɔn wɛ nyí ayǐkúngban e ɖo Galadi ɔ́. Manasée sín ayǐkúngban ɔ́, dogbó tɔn bɛ́ sín Acɛ́ɛ, bo yi Mikumɛtáti ɖo Sikɛ́mu kpá. É gosín fínɛ́, bó tunta tofɔligbé ɖo Eyinu-Tapuwaxinu lɛ́ɛ sín awa jí. Tapuwaxi yíkúngban ɔ́, Manasée tɔn wɛ é nyí; amɔ̌, Tapuwaxi, toxo e ɖo dogbó ɔ́ jí ɔ́, Eflayímu ví lɛ́ɛ wɛ è nǎ. Dogbó ɔ́ wá Kana tɔ ɔ́ sín afɔligbé. É ká ɖo mɔ̌ có toxo e ɖo tɔ ɔ́ sín afɔligbé lɛ́ɛ ɔ́, Eflayímu ví lɛ́ɛ tɔn wɛ, có ayǐkúngban Manasée tɔn jí wɛ toxo énɛ́ lɛ́ɛ ɖe. Dogbó ɔ́ gbɔn fínɛ́ bó yi to ɔ́ sín taligbé, cóbó wá yi fó dó Mɛditɛlanɛ́ɛ xu ɔ́ tó. Énɛ́ ɔ́, akɔta Eflayímu tɔn ɔ́ gba kpé afɔligbé, bɔ Manasée tɔn ɔ́ gba kpé taligbé. Ayǐkúngban e ɖo afɔligbé ɔ́ nyí Eflayímu tɔn, bɔ éé ɖo taligbé ɔ́ nyí Manasée tɔn, bɔ Mɛditɛlanɛ́ɛ xu ɔ́ nyí dogbó nú yě. Yě bɔdó ayǐkúngban Acɛ́ɛ tɔn wú ɖo taligbé-gbadahwe jí, bó bɔdó Isakáa tɔn wú ɖo totaligbé zǎnzǎnhwe jí. È nǎ toxo ɖé lɛ́ɛ akɔta Manasée tɔn ɔ́ ɖo Isakáa kpó Acɛ́ɛ kpó sín ayǐkúngban jí. Toxo e wɛ lɛ́ɛ ɖíe: Bɛti-Ceani kpó gletoxo tɔn lɛ́ɛ kpó, Yivleámu kpó gletoxo tɔn lɛ́ɛ kpó. Dɔ́ɔ kpó gletoxo tɔn lɛ́ɛ kpó, Eyinu-Dɔ́ɔ kpó gletoxo tɔn lɛ́ɛ kpó, Tanaki kpó gletoxo tɔn lɛ́ɛ kpó, Mɛgido kpó toxo tɔn lɛ́ɛ kpó: só atɔn lɛ́ɛ. É ká ɖo mɔ̌ có akɔta Manasée tɔn kpé wú bó nya Kanáanu lɛ́ɛ sín to énɛ́ lɛ́ɛ mɛ ǎ, yě kpo ɖo to énɛ́ lɛ́ɛ mɛ káká jɛ égbé. Izlayɛ́li ví lɛ́ɛ wá syɛ́n ganjí, có yě kpé wú bó nya Kanáanu lɛ́ɛ ǎ; amɔ̌, yě kpa acɛ nú yě bó nɔ́ zɔ́n azɔ̌ syɛ́nsyɛ́n lɛ́ɛ yě. Jozɛ́fu ví lɛ́ɛ wá ɖɔ nú Jozuwée ɖɔ: “Étɛ́wú wɛ a nǎ ayǐkúngban ta ɖokpó géé mǐ mɛ e jí Mawu Mavɔmavɔ dó acɛ, bɔ mǐ sukpɔ́ sɔ mɔ̌ lɛ́ɛ?” Jozuwée ka yí gbe nú yě ɖɔ: “Ényí mi sukpɔ́ sɔ mɔ̌ hǔn, mi yi zunkan mɛ ɖo Pɛliziti lɛ́ɛ kpó Hlafa ví lɛ́ɛ kpó sín to mɛ. Mi ná xo zun ɖo fínɛ́, bó ná mɔ tɛnmɛ, ɖó Eflayímu sókan ɔ́ hwe dó mi dín.” Jozɛ́fu ví lɛ́ɛ ká yí gbe n'i ɖɔ: “Ayǐkúngban e ɖo sókan mɛ ɔ́ kpé mǐ nǔgbó ǎ. Wegɔ́ ɔ́, Kanáanu e ɖo ayǐkúngban wɛnjɛ jí lɛ́ɛ, kpódó éé ɖo Bɛti-Ceani kpó lɛ́ɛ, kpódó éé ɖo toxo e lɛ́ lɛ̌ dó yě lɛ́ɛ kpó mɛ, kpódó éé ɖo tɔdo Izleyɛ́li tɔn ɔ́ mɛ lɛ́ɛ kpó ɔ́, gan sín kɛkɛ́ví wɛ ɖo así yě bǐ tɔn.” Ée yě ɖɔ mɔ̌ ɔ́, Jozuwée ɖɔ nú Jozɛ́fu ví e ɖo akɔta Eflayímu tɔn mɛ lɛ́ɛ, kpódó éé ɖo akɔta vlɔ́ Manasée tɔn e ɖo gbadahwe jí lɛ́ɛ kpó ɖɔ: “Mi sukpɔ́, bó syɛ́n ɖésú. É nyí ayǐkúngban ta ɖokpó géé wɛ è nǎ ná mi ǎ. Lo ɔ́, ayǐkúngban e ɖo sókan mɛ ɔ́, zunkan wɛ, có é wɛ è nǎ ná mi, bɔ mi ná xo, bɔ bǐ ná nyí mitɔn. Kanáanu e ɖo ayǐkúngban ɔ́ jí lɛ́ɛ ɖó gankɛkɛ́ví, bó syɛ́n, có mi ka ná nya yě.” To ɔ́ jɛ Izlayɛ́li ví lɛ́ɛ sín acɛ mɛ, bɔ yě bǐ kplé ɖo Silóo, bó dó goxɔ e mɛ Mawu Mavɔmavɔ ná nɔ́ wá kpé yě ɖe ɔ́ nyi fínɛ́. Akɔta tɛ́nwe ka kpo ɖo yě mɛ, bɔ è ko ná ayǐkúngban ɖě yědɛɛ lɛ́ɛ ǎ. Jozuwée ɖɔ nú akɔta énɛ́ lɛ́ɛ ɖɔ: “Káká hwetɛ́nu wɛ mi ná nɔ te yi jɛ cóbó ná jɛ to e Mawu Mavɔmavɔ, Mawu tɔ́gbó mitɔn lɛ́ɛ tɔn ná mi ɔ́ mɛ? Mi ɖe súnnu atɔn ɖo akɔta ɖokpó ɖokpó mɛ. Un ná sɛ́ yě dó, bɔ yě ná yi gbɔn to ɔ́ mɛ, bó ná kpɔ́n ayǐkúngban e nyí akɔta yětɔn lɛ́ɛ tɔn ɔ́ céɖécéɖé, bó ná lɛ́ kɔ wá ɖɔ lě e yě mɔ gbɔn ɔ́ nú mì. Yě ná má to ɔ́ ɖó tɛ́nwe. Kúnkan Judáa tɔn lɛ́ɛ ná nɔ ayǐkúngban yětɔn jí ɖo tofɔligbé. Kúnkan Jozɛ́fu tɔn lɛ́ɛ ná nɔ yědɛɛ tɔn jí ɖo totaligbé. Hǔn mi bo ɖó ayǐkúngban ta tɛ́nwe énɛ́ lɛ́ɛ sín jlɛ̌, bó wá zé xlɛ́ mì. Énɛ́ ɔ́, un ná nyi akɔ dó bó ná ɖe akpáxwé e nyí akɔta mi mɛ ɖokpó ɖokpó tɔn ɔ́, ɖo Mawu Mavɔmavɔ, Mawu mǐtɔn nukɔn. Levíi ví lɛ́ɛ ɔ́, è nǎ ná ayǐkúngban ɖě yě ǎ, ɖó nǔ e nyí yětɔn ɔ́ jɛ́n kó nyí ɖɔ yě ná nyí vɔ̌sánú-xwlémawutɔ́, bó ná wa azɔ̌ nú Mawu Mavɔmavɔ. Akɔta Gadi tɔn kpódó Hwlibɛ́ni tɔn kpó, kpódó akɔta vlɔ́ Manasée tɔn kpó ɔ́, è ko ná ayǐkúngban yědɛɛ lɛ́ɛ ɖo Judɛ́ɛn tɔ ɔ́ sín zǎnzǎnhwe jí. Mɛsɛntɔ́ Mawu Mavɔmavɔ tɔn Mɔyízi ɖésú wɛ ná yě.” Hwenu e súnnu e è ɖe bɔ yě ná yi kpɔ́n to ɔ́ lɛ́ɛ ɖo nǔ sɔ́ wɛ bó ná yi ɔ́, Jozuwée ɖɔ nú yě ɖɔ: “Mi yi gbɔn to ɔ́ mɛ, bó jlɛ́ ayǐkúngban e ɖo to ɔ́ mɛ lɛ́ɛ, bó lɛ́ kɔ wá xlɛ́ mì. Nú mi ko wá ɔ́, un ná nyi akɔ dó ɖo Silóo fí ɖo Mawu Mavɔmavɔ nukɔn.” Ée é ɖɔ xó énɛ́ lɛ́ɛ nú yě ɔ́, yě ɖidó bó yi gbɔn to ɔ́ mɛ. Yě kpɔ́n lě e toxo lɛ́ɛ ɖe gbɔn é, bó má ɖó tɛ́nwe, lobo yí jlɛ̌ tɔn, lobo lɛ́ kɔ wá Jozuwée gɔ́n ɖo Silóo fí e yě ɖǒ gɔnu ɖó ɔ́. Jozuwée nyi akɔ dó ayǐkúngban énɛ́ lɛ́ɛ nú yě, ɖo Mawu Mavɔmavɔ nukɔn, lobo má nú Izlayɛ́li ví lɛ́ɛ. Ayǐkúngban e nyí akɔta ɖokpó ɖokpó tɔn ɖo to ɔ́ mɛ ɔ́ nɛ́ é ná akɔta ɖokpó ɖokpó nɛ́. Ayǐkúngban nukɔntɔn e è nyi akɔ dó ɔ́, akɔta Bɛnjamɛ́ɛ tɔn ɔ́ sín xwédo lɛ́ɛ wɛ yí. Ayǐkúngban yětɔn ɖo Judáa ví lɛ́ɛ tɔn ɔ́ kpódó Jozɛ́fu ví lɛ́ɛ tɔn kpó tɛ́ntin. Dogbó tɔn e ɖo taligbé ɔ́, bɛ́ sín Judɛ́ɛn tɔ ɔ́ tó, bó fán Jeliko só ɔ́ yi ɖó fí ɖé, ɖo taligbé, lobo gbɔn sókan mɛ dín ɖidó gbadahwe jí, bó hun káká yi gbětótló mɛ ɖo Bɛti-Awɛni. É gosín fínɛ́ bó gbɔn Lǔzi e è nɔ lɛ́ ylɔ́ ɖɔ Betɛ́li ɔ́ sín afɔligbé, bó gbɔn sókan mɛ ɖo Bɛti-Holɔ́ni do tɔn ɔ́ sín afɔligbé, bó wá Atlɔ́ti-Adáa. Dogbó ɔ́ xá d'é mɛ ɖo só ɔ́ sín gbadahwe jí. É xá d'é mɛ bó ɖidó afɔligbé, bó yi fó dó Kiliyati-Baalu e è nɔ ylɔ́ ɖɔ Kiliyati-Yealimu é; Kiliyati-Baalu ɔ́ Judáa sín akɔta ɔ́ tɔn wɛ é nyí. Fí e dogbó tɔn e ɖo gbadahwe jí ɔ́ gbɔn ɔ́ nɛ́. Dogbó e ɖo afɔligbé ɔ́ gosín Kiliyati-Yealimu, bo ɖidó Gazin wají, lobo nɔ te ɖo tɔjɔtɛn Nɛfutoáxi tɔn lɛ́ɛ kɔn. Dogbó ɔ́ zɔn mɔ̌ sín fínɛ́, bó wá só e kpan nukɔn Bɛni-Hinnɔ́mu ɔ́ kɔn, ɖo tɔdo Hlafa ví lɛ́ɛ tɔn sín taligbé. É mlɛ́ tɔdo Hinnɔ́mu tɔn ɔ́, bó fán só Jebuzinu lɛ́ɛ tɔn ɔ́ yi ɖó fí ɖé, ɖo afɔligbé, bó sí kɔ do wá Eyinu-Hlogɛ́li. Dogbó ɔ́ xá d'é mɛ ɖo fínɛ́ ɖidó taligbé, bó yi Eyinu-Cemɛ́ci, bó gosín Gelilɔ́ti bo yi Adumímu kpó ɔ́ nukɔn. É gosín fínɛ́ bó wá awǐnnya Bohani tɔn kɔn. Hwlibɛ́ni ví lɛ́ɛ ɖokpó wɛ nɔ́ nyí Bohani. Dogbó ɔ́ fán só ɔ́ yi ɖó fí ɖé, ɖo taligbé, ɖo Judɛ́ɛn tɔdo ɔ́ mɛ. É fán Bɛti-Hogla só ɔ́ yi ɖó fí ɖé, ɖo taligbé, bó yi fó dó fí e Xu Kúkú ɔ́ ɖe nu ɖe é, ɖo totaligbé, ɖo fí e Judɛ́ɛn tɔ ɔ́ nɔ sa wá kɔn dó Xu Kúkú ɔ́ mɛ ɖe ɖo tofɔligbé é. Fí e dogbó afɔligbé tɔn ɔ́ gbɔn lɛ́ɛ nɛ́. Judɛ́ɛn tɔ ɔ́ wɛ nyí dogbó tɔn e ɖo zǎnzǎnhwe jí é. Ayǐkúngban e è nǎ akɔta Bɛnjamɛ́ɛ tɔn sín xwédo lɛ́ɛ ɔ́, dogbó tɔn lɛ́ɛ nɛ́. Akɔta Bɛnjamɛ́ɛ tɔn sín hɛ̌nnu lɛ́ɛ ɔ́, toxo yětɔn lɛ́ɛ ɖíe: Jeliko, Bɛti-Hogla, Emɛki-Kesisi, Bɛti-Alaba, Semalayímu, Betɛ́li, Avuvímu, Pala, Ɔfla, Kefáa-Amumɔna, Ɔfini kpó Gɛva kpó. É bló toxo wěwe, kpódó gletoxo e lɛ́ lɛ̌ dó yě lɛ́ɛ kpó. Toxo élɔ́ lɛ́ɛ lɔ ɖ'é mɛ: Gabawɔ́ɔn, Hlama, Beelɔ́ti, Misipa, Kefila, Mɔsa, Hlɛkɛ́mu, Yiipeɛ́li, Taléala, Sela, Elɛ́fu, Jebuzinu e è nɔ lɛ́ ylɔ́ ɖɔ Jeluzalɛ́mu é; kpó Kiliyati-Yealimu kpó. É bló toxo wǒ-ɛnɛ, kpódó gletoxo e lɛ́ lɛ̌ dó yě lɛ́ɛ kpó. Akɔta Bɛnjamɛ́ɛ tɔn ɔ́ sín hɛ̌nnu lɛ́ɛ ɔ́, ayǐkúngban e nyí yětɔn lɛ́ɛ nɛ́. Ayǐkúngban wegɔ́ ɔ́ e è nyi akɔ dó ɔ́, akɔta Sinmɛnyɔ́ɔ tɔn ɔ́ sín hɛ̌nnu lɛ́ɛ wɛ yí. Toxo e ɖo ayǐkúngban yětɔn jí lɛ́ɛ ɖíe: Bɛ̌-Ceva, Cema, Mɔlada, Hasáa-Cuwáli, Bala, Esɛ́mu, Ɛlutoladi, Betúli, Hɔ́ɔma, Siklági, Bɛti-Maakavɔ́ti, Hasáa-Súsa, Bɛti-Levaɔ́ti kpódó Caluxɛ́ni kpó. É bló toxo wǒ-atɔn, kpódó gletoxo e lɛ́ lɛ̌ dó yě lɛ́ɛ kpó. Toxo élɔ́ lɛ́ɛ lɔ ɖ'é mɛ: Eyinu-Hlimumɔ́ni, Etɛ́ɛ kpódó Acáni kpó. É bló toxo ɛnɛ, kpódó gletoxo e lɛ́ lɛ̌ dó yě lɛ́ɛ kpó. Gletoxo e ɖo toxo énɛ́ lɛ́ɛ kpá káká yi Baaláti-Beɛɛ e nyí Hlamati tofɔligbé tɔn ɔ́ gɔ́ ná. Ayǐkúngban e nyí akɔta Sinmɛnyɔ́ɔ tɔn sín hɛ̌nnu lɛ́ɛ tɔn ɔ́ nɛ́. Akɔta Judáa tɔn sín ayǐkúngban mɛ wɛ è kán ayǐkúngban nú akɔta Sinmɛnyɔ́ɔ tɔn ɔ́ ɖe. Đó ayǐkúngban yědɛɛ lɛ́ɛ tɔn ko d'agba dín ɖ'ayǐ. Énɛ́ ɔ́ wɛ zɔ́n bɔ ayǐkúngban yětɔn lɛ́ lɛ̌ dó Sinmɛnyɔ́ɔ sín akɔta ɔ́ tɔn. Ayǐkúngban atɔngɔ́ ɔ́ e è nyi akɔ dó ɔ́, akɔta Zabulɔ́ɔn tɔn sín hɛ̌nnu lɛ́ɛ wɛ yí. Ayǐkúngban e è nǎ yě ɔ́ hun káká yi Salidu. É gosín fínɛ́, bó tunta gbadahwe jí, ɖo Maleala, bó gbɔn Dabɛsɛ́ti, bo yi fó dó tɔsisa e gbɔn Yokunɛámu nukɔn ɔ́ tó. Dogbó ɔ́ gosín Salidu, bó xá dó zǎnzǎnhwe jí, bó yi Kisilɔ́ti-Tabɔ́ɔ sín dogbó ɔ́ kɔn, bó gbɔn Davɛlati, lobo yi Yafia. É gosín fínɛ́ bó gbɔn zǎnzǎnhwe jí, ɖo Gati-Hefɛ́ɛ, bó gbɔn Ita-Kacíni, bó dín yi Hlimumɔ́ni, bo xá d'é mɛ káká yi Nɛya. Dogbó ɔ́ xá ɖo Hannatɔ́ni taligbé, bó yi fó dó tɔdo Yifutáxi-Ɛli tɔn mɛ. Toxo élɔ́ lɛ́ɛ ɖ'é mɛ: Katáti, Naxalalu, Cimulɔ́ni, Yideala kpódó Bɛteleyɛ́mu kpó. É bló toxo wěwe, kpódó gletoxo yětɔn lɛ́ɛ kpó. Toxo énɛ́ lɛ́ɛ bǐ wɛ ɖo ayǐkúngban e è nǎ akɔta Zabulɔ́ɔn tɔn ɔ́ sín hɛ̌nnu lɛ́ɛ ɔ́ jí. Ayǐkúngban ɛnɛgɔ́ ɔ́ e è nyi akɔ dó ɔ́, akɔta Isakáa tɔn ɔ́ sín hɛ̌nnu lɛ́ɛ wɛ yí. Toxo élɔ́ lɛ́ɛ ɖo ayǐkúngban yětɔn jí: Izleyɛ́li, Kesulɔ́ti, Cunɛ́mu, Hafalayímu, Ciɔ́ni, Anaxalati, Hlabíti, Kiciɔ́ni, Evɛ́si, Hlɛmɛ́ti, Eyinu-Gannimu, Eyinu-Hada kpódó Bɛti-Pasesi kpó. Dogbó ɔ́ yi Tabɔ́ɔ, é yi Caxasíma, é yi Bɛti-Cɛmɛ́ci, bo yi fó dó Judɛ́ɛn tɔ ɔ́ tó. Toxo afɔtɔn-nukún-ɖokpó wɛ ɖo ayǐkúngban ɔ́ jí, kpódó gletoxo e lɛ́ lɛ̌ dó yě lɛ́ɛ kpó. Ayǐkúngban e è nǎ akɔta Isakáa tɔn sín hɛ̌nnu lɛ́ɛ nɛ́. Ayǐkúngban atɔ́ɔ́ngɔ́ ɔ́ e è nyi akɔ dó ɔ́, akɔta Acɛ́ɛ tɔn sín hɛ̌nnu lɛ́ɛ wɛ yí. Ayǐkúngban yětɔn gbɔn Hɛlukáti, Hali, Bɛtɛ́ni, Akisáfu, Alamɛlɛ́ki, Amɛyadi, kpódó Miceali kpó. É sɛ yi Kaamɛ́li só ɔ́ kpó Cixɔ́ɔ-Livunati kpó ɖo gbadahwe jí. É xá gbɔn zǎnzǎnhwe jí ɖo Bɛti-Dagɔ́ni, bo dín yi Zabulɔ́ɔn yíkúngban ɔ́ kpódó tɔdo Yifutáxi-Ɛli tɔn kpó kɔn, ɖo Bɛti-Emɛ́ki kpó Nɛyiɛli kpó sín taligbé, bó dín ɖidó Kavúli ɖo amyɔxwé. É ɖidó Avidɔni, Hlexɔ́vu, Hamumɔ́ni kpódó Kana kpó, bó yi fó dó Sidɔ́ɔn toxo ɖaxó ɔ́ kpá. Ayǐkúngban e è nǎ akɔta Acɛ́ɛ tɔn sín hɛ̌nnu lɛ́ɛ ɔ́ nɛ́. Toxo énɛ́ lɛ́ɛ kpódó gletoxo e lɛ́ lɛ̌ dó yě lɛ́ɛ kpó ɖo ayǐkúngban énɛ́ ɔ́ jí. Ayǐkúngban ayizɛ́ngɔ́ ɔ́ e è nyi akɔ dó ɔ́, akɔta Nɛfutali tɔn sín hɛ̌nnu lɛ́ɛ wɛ yí. Dogbó ayǐkúngban ɔ́ tɔn e ɖo afɔligbé ɔ́ bɛ́ sín Helɛ́fu, sín Elɔ́ni, bó gbɔn Saanánimu cɛ́nitín kan mɛ, bó gbɔn Adámi-Nɛgɛ́vu kpódó Yavunɛyɛ́li kpó, bó yi Lakúmu, bó yi fó dó Judɛ́ɛn tɔ ɔ́ tó. Đo gbadahwe jí ɔ́, dogbó ɔ́ xá d'é mɛ ɖidó Azinɔ́ti-Tabɔ́ɔ, bó yi Hukɔ́ki, bó mlɛ́ Zabulɔ́ɔn yíkúngban ɔ́ ɖo afɔligbé, bó wá yi Acɛ́ɛ yíkúngban ɔ́ kpá, ɖo gbadahwe jí. Judɛ́ɛn tɔ ɔ́ wɛ nyí ayǐkúngban ɔ́ sín dogbó ɖo zǎnzǎnhwe jí. Toxo e ɖo ayǐkúngban ɔ́ jí, bɔ è mɛ ahohó lɛ́ lɛ̌ dó lɛ́ɛ ɖíe: Sidímu, Sɛ́ɛ, Hamumáti, Hlakáti, Jenɛzalɛ́ti, Adáma, Hlama, Hasɔ́ɔ, Kedɛ́ci, Edlɛyi, Eyinu-Hasɔ́ɔ, Yileɔ́ni, Migidalu-Ɛlu, Holɛ́mu, Bɛti-Anati kpódó Bɛti-Cɛmɛ́ci kpó. Bǐ bló toxo afɔtɔn-nukún-ɛnɛ, kpódó gletoxo e lɛ́ lɛ̌ dó yě lɛ́ɛ kpó. Ayǐkúngban e è nǎ akɔta Nɛfutali tɔn sín hɛ̌nnu lɛ́ɛ ɔ́ nɛ́. Toxo ɖaxó ɖaxó énɛ́ lɛ́ɛ kpó gletoxo e lɛ́ lɛ̌ dó yě lɛ́ɛ kpó ɖo ayǐkúngban énɛ́ ɔ́ jí. Ayǐkúngban tɛ́nwegɔ́ ɔ́ e è nyi akɔ dó ɔ́, akɔta Dan tɔn sín hɛ̌nnu lɛ́ɛ wɛ yí. Toxo élɔ́ lɛ́ɛ wɛ ɖo ayǐkúngban yětɔn jí: Soléa, Ɛcitawɔ́lu, Ii-Cɛmɛ́ci, Caalabubíni, Ayalɔ́ni, Yitála, Elɔ́ni, Timuna, Eklɔ́ni, Ɛluteke, Gibetɔ́ni, Baaláti, Yexudi, Benɛ-Belaki, Gati-Hlimumɔ́ni, Mɛ-Yaakɔ́ni kpódó Hlakɔni kpó, kpódó ayǐkúngban e ɖo Jafa nukɔn ɔ́ kpó. Ayǐkúngban e è nǎ akɔta Dan tɔn ɔ́, yě kpé wú bó yí ǎ. Énɛ́ ɔ́, yě gbɔ bó yi tɔ́n ahwan Lɛcɛ́mu toxo ɔ́. Yě yǐ toxo ɔ́, bó hu toxo ɔ́ mɛ nu lɛ́ɛ bǐ. Yě jɛ ayǐkúngban ɔ́ bǐ jí, bó sá xwé nyi fínɛ́. Tɔ́gbó yětɔn Dan sín nyǐkɔ wɛ yě ɖó nú toxo ɔ́. Ayǐkúngban e è nǎ akɔta Dan tɔn sín hɛ̌nnu lɛ́ɛ ɔ́ nɛ́. Toxo énɛ́ lɛ́ɛ kpó gletoxo e lɛ́ lɛ̌ dó yě lɛ́ɛ kpó ɖo ayǐkúngban énɛ́ ɔ́ jí. Ée Izlayɛ́li ví lɛ́ɛ má to ɔ́ yětɔn yětɔn ɔ́, yě ná ayǐkúngban ɔ́ ɖě Jozuwée Nuni ví ɔ́ ɖo yětɔn mɛ. Toxo e Jozuwée byɔ́ ɔ́ wɛ yě ná ɛ lě e Mawu Mavɔmavɔ ɖɔ nú yě gbɔn é. Toxo ɔ́ wɛ nyí Timunati-Sɛláxi, ɖo sókan Eflayímu tɔn ɔ́ mɛ. Jozuwée vɔ́ toxo ɔ́ blóɖó, bó jɛ mɛ. Vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó, kpódó hɛ̌nnugán akɔta Izlayɛ́li ví lɛ́ɛ tɔn lɛ́ɛ kpó wɛ nyi akɔ dó ayǐkúngban tɛnmɛ tɛnmɛ nɛ́ lɛ́ɛ, bó má. Silóo wɛ yě bló ɖe ɖo Mawu Mavɔmavɔ nukɔn, ɖo goxɔ e mɛ Mawu Mavɔmavɔ ná nɔ wá kpé yě ɖe ɔ́ sín alihɛ́nnu. Lě e yě mǎ to ɔ́ gbɔn ɔ́ nɛ́. Mawu Mavɔmavɔ ɖɔ nú Jozuwée ɖɔ: Đɔ nú Izlayɛ́li ví lɛ́ɛ ɖɔ: “Toxo e mɛ mi hɛn ɔ́, mi ná nɔ hɔn hwlá cí, bɔ un ko ɖɔ xó tɔn nú mi gbɔn Mɔyízi jí lɛ́ɛ ɔ́, mi cyán yě. É sixú wá yá bɔ mɛɖé ná ɖo mi mɛ, bó ná tunwun ǎ, lobo ná hu mɛ. Ényí nǔ wá nyí mɔ̌ ɔ́, mɛ énɛ́ ɔ́ hɛn ɔ́, é ná hɔn hwlá cí toxo énɛ́ lɛ́ɛ ɖě mɛ, bó ná gló mɛ e ɖo mɛ e kú ɔ́ sín hlɔn ba wɛ é. Nú mɛ e hu mɛ ɔ́ hɔn yi toxo e mɛ è nɔ hɔn hwlá cí ɔ́ ɖě mɛ ɔ́, é ná nɔ te ɖo toxo ɔ́ sín hɔntogbó ta, fí e è nɔ ɖɔ to ɔ́ sín xó ɖe é, bó ná tín nǔ e é wa ɔ́ mɛ nú tomɛxó fínɛ́ tɔn lɛ́ɛ. Énɛ́ ɔ́, yě ná jó e dó bɔ é ná byɔ́ toxo ɔ́ mɛ, bɔ yě ná ná ɛ fí e é ná nɔ é. Ényí mɛ e ɖo mɛ e kú ɔ́ sín hlɔn ba wɛ ɔ́ jɛ gǔdo tɔn káká wá jɛ fínɛ́ ɔ́, toxo ɔ́ mɛ nu lɛ́ɛ ná jó mɛ e hɔn wá su yě ɔ́ n'i ǎ, ɖó awǒvi nú wɛ jɛ. É tunwun có bó bló ǎ; mɛ e é hu ɔ́, é kpó é kpó ká kó kpé nǔɖé ɖ'ayǐ ǎ. É ná nɔ toxo énɛ́ ɔ́ mɛ káká bɔ togun ɔ́ ná ɖɔ hwɛ tɔn, bɔ é ná ɖo fínɛ́ káká jɛ hwenu e mɛ e nyí vɔ̌sánú-xwlémawutɔ́ ɖaxó hwenɛ́nu ɔ́ ná kú dó é. Hwenɛ́nu ɔ́, mɛ e hu mɛ ɔ́ ná lɛ́ kɔ yi to tɔn mɛ fí e é hɔn sín é.” Ée Izlayɛ́li ví lɛ́ɛ se mɔ̌ ɔ́, yě cyán toxo élɔ́ lɛ́ɛ: Kedɛ́ci ɖo Galilée, ɖo sókan Nɛfutali tɔn mɛ, Sikɛ́mu, ɖo sókan Eflayímu tɔn mɛ, kpódó Kiliyati-Aaba e è nɔ lɛ́ ylɔ́ ɖɔ Eblɔ́n ɔ́ kpó, ɖo sókan Judáa tɔn mɛ. Yě cyán toxo élɔ́ lɛ́ɛ ɖo Judɛ́ɛn tɔ ɔ́ sín zǎnzǎnhwe jí, ɖo Jeliko sín zǎnzǎnhwe jí: Bɛsɛ́ɛ ɖo ayǐkúngban wɛnjɛ akɔta Hwlibɛ́ni tɔn ɔ́ jí, ɖo gbětótló mɛ. Hlamɔti ɖo Galadi, ɖo akɔta Gadi tɔn ɔ́ sín ayǐkúngban jí, kpódó Goláni kpó ɖo Basáni, ɖo akɔta Manasée tɔn ɔ́ sín ayǐkúngban jí. Toxo e è cyán bɔ Izlayɛ́li ví lɛ́ɛ kpódó jǒnɔ e ɖo yě mɛ lɛ́ɛ kpó ná nɔ́ yi hɔn hwlá cí lɛ́ɛ nɛ́. Nú mɛɖé má tunwun ǎ bó hu mɛɖé ɔ́, mɛ énɛ́ ɔ́ ná hɔn hwlá cí toxo énɛ́ lɛ́ɛ ɖě mɛ, bó ná gló mɛ e ɖo mɛ e è hu ɔ́ sín hlɔn ba wɛ é. Énɛ́ ɔ́, mɛ e ɖo mɛ e è hu ɔ́ sín hlɔn ba wɛ ɔ́ ná hu mɛ e hu mɛ ɔ́ cóbɔ è nǎ ɖɔ hwɛ tɔn ǎ. Levíi ví lɛ́ɛ sín hɛ̌nnugán lɛ́ɛ wá mɔ vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó, kpódó akɔta Izlayɛ́li ví lɛ́ɛ tɔn sín hɛ̌nnugán ɖé lɛ́ɛ kpó, ɖo Silóo, ɖo Kanáa tomɛ, bó ɖɔ nú yě ɖɔ: “Mawu Mavɔmavɔ kó ná gbe gbɔn Mɔyízi jí ɖɔ è nǐ ná toxo e mɛ mǐ ná nɔ lɛ́ɛ mǐ, bó ná ayǐkúngban e lɛ́ lɛ̌ dó toxo énɛ́ lɛ́ɛ mǐ, bónú kanlin mǐtɔn lɛ́ɛ ná nɔ jí.” Ée Izlayɛ́li ví lɛ́ɛ se mɔ̌ ɔ́, yě cyán toxo ɖé lɛ́ɛ ɖo ayǐkúngban yětɔn lɛ́ɛ jí, kpódó ayǐkúngban e lɛ́ lɛ̌ dó toxo énɛ́ lɛ́ɛ kpó jí, bó ná akɔta Levíi ví lɛ́ɛ tɔn ɔ́, lě e Mawu Mavɔmavɔ ɖɔ yě ní bló gbɔn é. È nyi akɔ bo sɔ́ xwédo Kexáti tɔn ɔ́; è nyi akɔ dó toxo lɛ́ɛ, bɔ vɔ̌sánú-xwlémawutɔ́ Aalɔ́ɔn ví lɛ́ɛ yí toxo wǒ-atɔn. Judáa kpódó Sinmɛnyɔ́ɔ kpó, kpódó Bɛnjamɛ́ɛ kpó sín ayǐkúngban jí wɛ toxo wǒ-atɔn énɛ́ lɛ́ɛ ɖe. Kexáti ví ɖě lɛ́ɛ e má nyí Aalɔ́ɔn ví ǎ lɛ́ɛ yí toxo wǒ, ɖo Eflayímu kpódó Dan kpó, kpódó akɔta vlɔ́ Manasée tɔn kpó sín ayǐkúngban jí. Gɛɛcɔ́ni ví lɛ́ɛ ká yí toxo wǒ-atɔn ɖo Isakáa kpódó Acɛ́ɛ kpó, kpódó Nɛfutali kpó, kpódó akɔta vlɔ́ Manasée tɔn e ɖo Basáni ɔ́ kpó sín ayǐkúngban jí. Mɛlali ví lɛ́ɛ yí toxo wěwe ɖo Hwlibɛ́ni kpó Gadi kpó, kpódó Zabulɔ́ɔn kpó sín ayǐkúngban jí. Akɔ wɛ Izlayɛ́li ví lɛ́ɛ nyi dó toxo énɛ́ lɛ́ɛ bǐ, bó ná Levíi ví lɛ́ɛ, bó ná yě ayǐkúngban e lɛ́ lɛ̌ dó toxo énɛ́ lɛ́ɛ é. Xó e Mawu Mavɔmavɔ ɖɔ nú yě gbɔn Mɔyízi jí ɔ́ wɛ yě xwédo, bo dó ná toxo énɛ́ lɛ́ɛ yě. Judáa kpó Sinmɛnyɔ́ɔ kpó sín toxo lɛ́ɛ ɖě wɛ è nǎ Kexáti ví e nyí Levíi ví, bó jɔ ɖo Aalɔ́ɔn kún mɛ lɛ́ɛ. Yědɛɛ lɛ́ɛ wɛ akɔ e è nyi ɔ́ ɖe jɛ nukɔn. Toxo e è nǎ yě lɛ́ɛ sín nyǐkɔ ɖíe: è nǎ yě Kiliyati-Aaba e nyí Eblɔ́n é kpó ayǐkúngban e lɛ́ lɛ̌ dó e lɛ́ɛ kpó, ɖo sókan Judáa tɔn ɔ́ mɛ. Aaba wɛ nyí Anáki sín tɔ́. Amɔ̌, toxo ɔ́ sín ayǐkúngban lɛ́ɛ kpódó gletoxo tɔn lɛ́ɛ kpó ɔ́, Kalɛ́bu Yefunnɛ́ɛ ví ɔ́ wɛ è ko ná. È nǎ Eblɔ́n kpó Livuna kpó vɔ̌sánú-xwlémawutɔ́ Aalɔ́ɔn ví lɛ́ɛ. Eblɔ́n ɔ́, toxo e mɛ mɛ e hu mɛ lɛ́ɛ hɛn ɔ́, yě ná nɔ yi hɔn hwlá cí lɛ́ɛ ɖě wɛ. È lɛ̌ ná yě Yatíi kpó Ɛcitemɔwa kpó, kpódó ayǐkúngban e lɛ́ lɛ̌ dó yě lɛ́ɛ kpó. Holɔ́ni kpó Devíi kpó, kpódó ayǐkúngban e lɛ́ lɛ̌ dó yě lɛ́ɛ kpó. Acáni kpó Yutá kpó, kpó Bɛti-Cɛmɛ́ci kpó, kpódó ayǐkúngban e lɛ́ lɛ̌ dó yě lɛ́ɛ kpó. Toxo e è fɔ ɖo akɔta we énɛ́ lɛ́ɛ mɛ, bɔ è hɛn ɔ́, è nǎ nɔ hɔn hwlá cí lɛ́ɛ bǐ bló tɛ́nnɛ. Toxo e è nǎ yě ɖo akɔta Bɛnjamɛ́ɛ tɔn ɔ́ sín ayǐkúngban jí lɛ́ɛ ɖíe: Gabawɔ́ɔn kpó Gɛva kpó, kpódó ayǐkúngban e lɛ́ lɛ̌ dó yě lɛ́ɛ kpó. Anatɔ́ti kpó Alumɔ́ni kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Toxo e è nǎ vɔ̌sánú-xwlémawutɔ́ Aalɔ́ɔn ví lɛ́ɛ ɔ́, bǐ bló toxo wǒ-atɔn, kpódó ayǐkúngban e lɛ́ lɛ̌ dó yě lɛ́ɛ kpó. Levíi ví e jɔ ɖo Kexáti ví ɖě lɛ́ɛ sín xwédo mɛ lɛ́ɛ ɔ́, è nyi akɔ bo má akɔta Eflayímu tɔn ɔ́ sín toxo ɖé lɛ́ɛ nú yě. È nǎ yě Sikɛ́mu kpó ayǐkúngban e lɛ́ lɛ̌ dó e lɛ́ɛ kpó, ɖo sókan Eflayímu tɔn mɛ, bo ná yě Gɛzɛ́ɛ kpó ayǐkúngban e lɛ́ lɛ̌ dó e lɛ́ɛ kpó. Sikɛ́mu ɔ́, toxo e mɛ mɛ e hu mɛ lɛ́ɛ ná nɔ hɔn hwlá cí lɛ́ɛ ɖě wɛ. È lɛ̌ ná yě Kivusayimu kpó Bɛti-Holɔ́ni kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Toxo e è nǎ yě ɖo akɔta Dan tɔn ɔ́ sín ayǐkúngban jí lɛ́ɛ ɖíe: Ɛluteke kpó Gibetɔ́ni kpó, kpódó ayǐkúngban e lɛ́ lɛ̌ dó yě lɛ́ɛ kpó, Ayalɔ́ni kpó Gati-Hlimumɔ́ni kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Toxo e è nǎ yě ɖo akɔta vlɔ́ Manasée tɔn sín ayǐkúngban jí lɛ́ɛ ɖíe: Tanaki kpó Yivleámu kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo we. Toxo e è nǎ Kexáti ví ɖě lɛ́ɛ sín xwédo lɛ́ɛ bǐ bló toxo wǒ kpó ayǐkúngban yětɔn lɛ́ɛ kpó. Levíi ví, Gɛɛcɔ́ni sín xwédo lɛ́ɛ ɔ́, è nǎ yě toxo we kpódó ayǐkúngban e lɛ́ lɛ̌ dó yě lɛ́ɛ kpó. Toxo énɛ́ lɛ́ɛ ɖo akɔta vlɔ́ Manasée tɔn sín ayǐkúngban jí, ɖo gbadahwe jí. Toxo we lɛ́ɛ ɖíe: Goláni e ɖo Basáni ɔ́ kpó Bɛciteláa kpó, kpódó ayǐkúngban yětɔn lɛ́ɛ kpó. Goláni ɔ́, toxo e mɛ mɛ e hu mɛ lɛ́ɛ ná nɔ hɔn hwlá cí lɛ́ɛ ɖě wɛ. Toxo e è nǎ yě ɖo akɔta Isakáa tɔn ɔ́ sín ayǐkúngban jí lɛ́ɛ ɖíe: Kiciɔ́ni kpó Davɛlati kpó, kpódó ayǐkúngban e lɛ́ lɛ̌ dó yě lɛ́ɛ kpó, Yaamúti kpó Eyinu-Gannimu kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Ée è nǎ yě ɖo akɔta Acɛ́ɛ tɔn ɔ́ sín ayǐkúngban jí lɛ́ɛ ɖíe: Miceali kpó Avidɔni kpó, kpódó ayǐkúngban e lɛ́ lɛ̌ dó yě lɛ́ɛ kpó, Hɛlukáti kpó Hlexɔ́vu kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Ée è nǎ yě ɖo akɔta Nɛfutali tɔn ɔ́ sín ayǐkúngban jí lɛ́ɛ ɖíe: Kedɛ́ci e ɖo Galilée ɔ́ kpó Hamumɔ́ti-Dɔ́ɔ kpó, kpó Kaatáni kpó, kpódó ayǐkúngban e lɛ́ lɛ̌ dó yě lɛ́ɛ kpó. Kedɛ́ci ɔ́, toxo e mɛ mɛ e hu mɛ lɛ́ɛ nɔ yi hɔn hwlá cí lɛ́ɛ ɖě wɛ. É bló toxo atɔn. Toxo e è nǎ Gɛɛcɔ́ni ví lɛ́ɛ sín xwédo lɛ́ɛ bǐ bló toxo wǒ-atɔn, kpódó ayǐkúngban e lɛ́ lɛ̌ dó yě lɛ́ɛ kpó. Levíi ví ɖě lɛ́ɛ e kpo, bó nyí Mɛlali sín xwédo lɛ́ɛ ɔ́, toxo e è nǎ yě ɖo akɔta Zabulɔ́ɔn tɔn ɔ́ sín ayǐkúngban jí lɛ́ɛ ɖíe: Yokunɛámu kpó Kaata kpó, kpódó ayǐkúngban e lɛ́ lɛ̌ dó yě lɛ́ɛ kpó. Hlimɔna kpó Naxalalu kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Ée è nǎ yě ɖo akɔta Hwlibɛ́ni tɔn ɔ́ sín ayǐkúngban jí lɛ́ɛ ɖíe: Bɛsɛ́ɛ kpó Yaxisa kpó, kpódó ayǐkúngban e lɛ́ lɛ̌ dó yě lɛ́ɛ kpó, Kedemɔ́ti kpó Mɛfáti kpó, kpódó ayǐkúngban e lɛ́ lɛ̌ dó yě lɛ́ɛ kpó. É bló toxo ɛnɛ. Ée è nǎ yě ɖo akɔta Gadi tɔn ɔ́ sín ayǐkúngban jí lɛ́ɛ ɖíe: Hlamɔti e ɖo Galadi ɔ́ kpó Maxanayímu kpó, kpódó ayǐkúngban e lɛ́ lɛ̌ dó yě lɛ́ɛ kpó. Hlamɔti ɔ́, toxo e mɛ e hu mɛ lɛ́ɛ nɔ yi hɔn hwlá cí lɛ́ɛ ɖě wɛ. È lɛ̌ ná yě kpó Hɛcibɔ́ni kpó ayǐkúngban e lɛ́ lɛ̌ dó e ɔ́ kpó, bó lɛ́ ná yě Yazɛ́ɛ kpó ayǐkúngban e lɛ́ lɛ̌ dó e ɔ́ kpó gɔ́ ná. É bló toxo ɛnɛ. Toxo e è nyi akɔ bo ná Levíi ví ɖě lɛ́ɛ e kpo, bó nyí Mɛlali sín xwédo lɛ́ɛ bǐ bló toxo wěwe. Toxo e è nǎ Levíi ví lɛ́ɛ, ɖo Izlayɛ́li ví lɛ́ɛ sín ayǐkúngban jí ɔ́, bǐ bló kanɖé tántɔn (48), kpó ayǐkúngban e lɛ́ lɛ̌ dó yě lɛ́ɛ kpó. Toxo énɛ́ lɛ́ɛ ɖokpó ɖokpó ɖó ayǐkúngban yětɔn yětɔn lɛ́ lɛ̌ dó. Mɔ̌ wɛ toxo énɛ́ lɛ́ɛ bǐ ɖe. Izlayɛ́li ví lɛ́ɛ ɔ́, ayǐkúngban e sín akpá Mawu Mavɔmavɔ dó nú tɔ́gbó yětɔn lɛ́ɛ ɔ́, é ná bǐ yě. Yě yǐ ayǐkúngban lɛ́ɛ, bó sá xwé nyi yě jí. Mawu Mavɔmavɔ ná yě ayi jɛ ayǐ gbɔn dogbó yětɔn lɛ́ɛ bǐ jí, lě e é kó dó akpá tɔn nú tɔ́gbó yětɔn lɛ́ɛ lɔ gbɔn é. É ná yě, bɔ yě ná ɖu ɖo kɛntɔ́ yětɔn lɛ́ɛ bǐ jí. Kɛntɔ́ yětɔn lɛ́ɛ ɖěbǔ ná sixú nɔ te ɖo nukɔn yětɔn ǎ. Akpá e Mawu Mavɔmavɔ dó nú Izlayɛ́li togun ɔ́ lɛ́ɛ, bǐ wɛ é ɖe. É gɔn ɖěbǔ ɖe ǎ. Hwenɛ́nu ɔ́, Jozuwée ylɔ́ akɔta Hwlibɛ́ni tɔn ɔ́ kpódó Gadi tɔn kpó, bó ylɔ́ akɔta vlɔ́ Manasée tɔn e ɖo zǎnzǎnhwe jí ɔ́ lɔmɔ̌, bó ɖɔ nú yě ɖɔ: “Mi bló nǔ e mɛsɛntɔ́ Mawu Mavɔmavɔ tɔn Mɔyízi zɔ́n mi lɛ́ɛ bǐ, bó lɛ́ se gbe nú mì, bó bló nǔ e un zɔ́n mi lɛ́ɛ bǐ. Mi jó nɔví mitɔn lɛ́ɛ dó sín hwenɛ́nu káká wá jɛ égbé ǎ. Nǔ e Mawu Mavɔmavɔ, Mawu mitɔn zɔ́n mi ɔ́ wɛ mi bló. Din e Mawu Mavɔmavɔ, Mawu mitɔn bló, bɔ nɔví mitɔn lɛ́ɛ jɛ ayǐkúngban yětɔn jí, lě e é kó ɖɔ gbɔn nú yě ɔ́, mi lɛ́ kɔ yi to mitɔn mɛ. Mi ná yi nɔ ayǐkúngban e mɛsɛntɔ́ Mawu Mavɔmavɔ tɔn Mɔyízi ko ná mi ɔ́ jí ɖo Judɛ́ɛn tɔ ɔ́ sín zǎnzǎnhwe jí. Amɔ̌, mi nyi sɛ́n e mɛsɛntɔ́ Mawu Mavɔmavɔ tɔn Mɔyízi dó nú mi lɛ́ɛ bǐ sésé: mi yí wǎn nú Mawu Mavɔmavɔ, Mawu mitɔn, mi xwedó nǔ e é ɖɔ lɛ́ɛ bǐ, mi bló nǔ e é zɔ́n mi lɛ́ɛ bǐ, mi tɛ́ dó wǔ tɔn, bó sɛn ɛ, kpódó ayixa mitɔn bǐ kpó, kpódó lǐndɔ̌n mitɔn bǐ kpó.” Énɛ́ ɔ́ gúdo ɔ́, Jozuwée xo ɖɛ dó yě jí, bó ɖɔ nú yě ɖɔ yě ní lɛ́ kɔ yi xwé, bɔ yě yi. Mɔyízi ko ná ayǐkúngban akɔta vlɔ́ Manasée tɔn we lɛ́ɛ ɖokpó ɖo Basáni, bɔ Jozuwée wá ná ayǐkúngban akɔta vlɔ́ Manasée tɔn ɔ́ wegɔ́ ɔ́, ɖo Izlayɛ́li ví ɖě lɛ́ɛ kpá, ɖo Judɛ́ɛn tɔ ɔ́ gúdo, ɖo gbadahwe jí. Hwenu e Jozuwée nyi yě sɛ́ dó xwé ɔ́, é xo ɖɛ nú yě. É ɖɔ nú yě ɖɔ: “Mi lɛ́ kɔ yi xwé kpó dɔkun mitɔn lɛ́ɛ kpó; mi lɛ́ kɔ kpó kanlin mitɔn lɛ́ɛ kpó, kpatágan mitɔn lɛ́ɛ, siká mitɔn lɛ́ɛ, ganvɔ mitɔn lɛ́ɛ, gan mitɔn lɛ́ɛ kpódó nǔzínzán mitɔn lɛ́ɛ kpó; yě ná sukpɔ́ ɖésú. Mi má kɛntɔ́ mitɔn lɛ́ɛ sín dɔkun énɛ́ lɛ́ɛ e mi bɛ́ lɛ́ɛ xá nɔví mitɔn lɛ́ɛ.” Hwlibɛ́ni kpódó Gadi kpó sín akɔta lɛ́ɛ, kpódó akɔta vlɔ́ Manasée tɔn kpó lɛ́ kɔ yi to yětɔn mɛ. Yě gosín Izlayɛ́li ví ɖě lɛ́ɛ gɔ́n ɖo Silóo, ɖo Kanáa tomɛ, bó yi Galadi. Ayǐkúngban énɛ́ ɔ́ wɛ è nǎ yě, lě e Mawu Mavɔmavɔ kó ɖɔ gbɔn, gbɔn Mɔyízi jí é. Ée yě kpo ɖo Kanáa to ɔ́ mɛ, bo ɖo yiyi wɛ káká lobo wá jɛ Judɛ́ɛn tɔ ɔ́ tó ɔ́, yě mɛ vɔ̌sákpe ɖokpó nyi fínɛ́, bɔ é d'agba ɖésú. È yi ɖɔ nú Izlayɛ́li ví ɖě lɛ́ɛ ɖɔ: “Mi ɖótó! Hwlibɛ́ni kpó Gadi kpó sín akɔta lɛ́ɛ, kpódó akɔta vlɔ́ Manasée tɔn kpó mɛ vɔ̌sákpe ɖokpó ɖó Judɛ́ɛn tɔ ɔ́ tó, ɖo akpá mǐtɔn ɖo Kanáa.” Ée Izlayɛ́li ví lɛ́ɛ se mɔ̌ ɔ́, yě bǐ kplé ɖo Silóo, bó ná yi tɔ́n ahwan akɔta e ɖo zǎnzǎnhwe jí lɛ́ɛ. Yě sɛ́ Pínxási vɔ̌sánú-xwlémawutɔ́ Eleazáa ví ɔ́ dó Galadi, bɔ é ná ɖɔ xó nú Hwlibɛ́ni kpódó Gadi kpó sín akɔta lɛ́ɛ bó ná ɖɔ nú akɔta vlɔ́ Manasée tɔn e ɖo zǎnzǎnhwe jí ɔ́ kpó. Gǎn togun ɔ́ tɔn wǒ xwedó e. È ɖe mɛ ɖokpó ɖokpó ɖo akɔta ɖokpó ɖokpó mɛ. Hɛ̌nnugán wɛ yě bǐ nyí ɖo xwédo Izlayɛ́li tɔn lɛ́ɛ nu. Yě yi Hwlibɛ́ni kpó Gadi kpó sín akɔta lɛ́ɛ gɔ́n, bó yi akɔta vlɔ́ Manasée tɔn ɔ́ gɔ́n, ɖo Galadi, bo ɖɔ nú yě ɖɔ: “Xó e togun Mawu Mavɔmavɔ tɔn ɔ́ bǐ kplé bó ɖɔ ɔ́ ɖíe: Agɔ tɛ́ ká nyí énɛ́ ɔ́ bɔ mi jɛ dó Mawu Izlayɛ́li tɔn ɔ́? Égbé din ɔ́, mi lɛ́ kɔ sín Mawu Izlayɛ́li tɔn ɔ́ gǔdo; mi mɛ vɔ̌sákpe, mi fɔ́n gǔ dó jǐ tɔn. Mi sɔ́ flín nǔ e mi dó sin ɖo Peɔ́ɔ é ǎ cé? Mawu Mavɔmavɔ dɔn tó tɔn nú mǐ hwenɛ́nu, có mǐ kpo ɖo sin tɔn sún wɛ káká wá jɛ égbé. Bɔ din ɔ́, é kpé mɔ̌ lo ǎ cé? Éɖíe mi lɛ́ kɔ sín Mawu Mavɔmavɔ gúdo égbé din e! Ényí mi fɔ́n gǔ dó jǐ tɔn égbé ɔ́, sɔ wá su ɔ́, Izlayɛ́li togun ɔ́ bǐ wɛ é nǎ zé xomɛsin tɔn dó wa nǔ xá. Ényí mi mɔ ɖɔ ayǐkúngban émítɔn ɔ́ kún jɛ xá Mawu Mavɔmavɔ ó hǔn, mi bǐ ní wá to e nyí étɔn ɔ́ mɛ, ɖo fí e nɔtɛn tɔn ɖe é, bó kán ayǐkúngban ɖo fínɛ́. Amɔ̌, ɖo tají ɔ́, mi má mɛ vɔ̌sákpe ɖěvo zɛ Mawu Mavɔmavɔ, Mawu mǐtɔn tɔn ɔ́ wú, bó dó fɔ́n gǔ dó é kpó mǐ kpó jí ó. Hwenu e Akáni Zeláxi ví ɔ́ hu hwɛ ɖaxó, ɖó é bɛ́ dɔkun e è gbɛ̌ ɖɔ è nǐ má bɛ́ ó lɛ́ɛ wútu ɔ́, Izlayɛ́li togun ɔ́ bǐ wɛ Mawu Mavɔmavɔ zé xomɛsin tɔn dó wa nǔ xá, mi tunwun ganjí. Ényí Akáni ɖokpónɔ wɛ kú ɖó hwɛ énɛ́ ɔ́ e é hu ɔ́ wútu ǎ.” Ée yě ɖɔ xó énɛ́ lɛ́ɛ fó ɔ́, Hwlibɛ́ni kpó Gadi kpó sín akɔta lɛ́ɛ, kpódó akɔta vlɔ́ Manasée tɔn e ɖo zǎnzǎnhwe jí ɔ́ kpó yí gbe nú xwédo akɔta ɖě lɛ́ɛ tɔn sín hɛ̌nnugán lɛ́ɛ ɖɔ: “Mawu Mavɔmavɔ wɛ nyí Mawu gǎnhúnǔtɔ́. Ɛɛn, é wɛ nyí Mawu gǎnhúnǔtɔ́ e tunwun nǔ e wútu mǐ wa nǔ gbɔn mɔ̌ é. Izlayɛ́li ví lɛ́ɛ lɔ bǐ ná wá tunwun. Ényí gǔ wɛ mǐ fɔ́n dó Mawu Mavɔmavɔ jí, abǐ hwɛ ɖaxó ɖé wɛ mǐ hu dó e ɔ́, ní má jó mǐ dó nyi gbɛ égbé ó. Ényí vɔ̌sákpe mǐ ɖésúnɔ tɔn wɛ mǐ mɛ, bó ná nɔ sá vɔ̌ e è nɔ dó zo ɔ́ ɖ'é ji, bó ná nɔ xwlé nǔníná lɛ́ɛ ɖ'é jí, lobo ná nɔ sá kɔnɖókpɔ́ vɔ́ ɔ́ ɖ'é jí, bó dó gbɛ́ gbe nú Mawu Mavɔmavɔ ɔ́, Mawu Mavɔmavɔ ɖésú ní kanbyɔ́ mǐ! Mɔ̌ wɛ é ká nyí gbɔn ǎ. É nyɔ́ wa ɔ́, ado wɛ ɖo mǐ hu wɛ, bɔ mǐ wa nǔ gbɔn mɔ̌, bónú vǐ mitɔn lɛ́ɛ ní má wá kanbyɔ́ vǐ mǐdɛɛ tɔn lɛ́ɛ sɔ gúdo ɖɔ: ‘Étɛ́ mi kpó Mawu Mavɔmavɔ, Mawu Izlayɛ́li tɔn ɔ́ kpó ká kpé dó? Mawu Mavɔmavɔ ɖésú kó sɔ́ Judɛ́ɛn tɔ ɔ́ dó ɖó dogbó ɖo mǐ kpó mi Hwlibɛ́ni kpó Gadi kpó sín mɛ lɛ́ɛ kpó tɛ́ntin. Nǔɖé kan mi ɖo Mawu Mavɔmavɔ sinsɛn xó mɛ ǎ.’ Énɛ́ ɔ́, nú vǐ mitɔn lɛ́ɛ ɖɔ mɔ̌ ɔ́, yě ná ná ta syɛ́nsyɛ́n kúnkan mǐdɛɛ tɔn lɛ́ɛ, bɔ yě ná gbɛ́ Mawu Mavɔmavɔ sɛn. Nǔ má nyí gbɔn mɔ̌ ó wɛ zɔ́n bɔ mǐ ɖɔ mǐ ná mɛ vɔ̌sákpe ɖokpó, é ká nyí ɖɔ mǐ ná wá sá vɔ̌ e è nɔ dó zo ɔ́, abǐ vɔ̌ ɖě lɛ́ɛ ɖ'é jí wú wɛ ǎ. Nǔ e mǐ jló kpowun ɔ́ wɛ nyí ɖɔ vɔ̌sákpe élɔ́ ní nyí kúnnuɖenú nú mǐ kpó mi kpó, bó nyí kúnnuɖenú nú vǐ mitɔn lɛ́ɛ kpó vǐ mǐtɔn e ná wá jɔ lɛ́ɛ kpó; ɖó mǐ nɔ́ sá vɔ̌ e è nɔ dó zo lɛ́ɛ, kpódó kɔnɖókpɔ́ vɔ́ lɛ́ɛ kpó, kpódó vɔ̌ ɖěvo lɛ́ɛ kpó nú Mawu Mavɔmavɔ, bó ná dó sɛn ɛ ɖo goxɔ tɔn mɛ. Énɛ́ ɔ́, vǐ mitɔn lɛ́ɛ sɔ́ ná wá ɖɔ nú mǐdɛɛ tɔn lɛ́ɛ ɖɔ nǔɖé kún kan yě ɖo Mawu Mavɔmavɔ sín xó mɛ ó ǎ. Mǐ ɖɔ ényí yě wá ɖɔ mɔ̌ nú mǐ, abǐ nú vǐ mǐtɔn lɛ́ɛ ɖo nukɔn mɛ jɛ́n wɛ ɔ́, mǐ ná sixú yí gbe nú yě ɖɔ: ‘Mi kpɔ́n vɔ̌sákpe élɔ́ e tɔ́gbó mǐtɔn lɛ́ɛ mɛ é; nǔ ɖokpó ɔ́ wɛ é nyí xá vɔ̌sákpe Mawu Mavɔmavɔ tɔn. É ká ɖo mɔ̌ có, ényí ɖɔ yě mɛ vɔ̌sákpe élɔ́ bó ná nɔ́ sá vɔ̌ e è nɔ dó zo ɔ́ kpó vɔ̌sísá ɖěvo lɛ́ɛ kpó ɖ'é jí wɛ ǎ; lo ɔ́, yě mɛ bɔ é ná nyí kúnnuɖenú ɖo mi kpó mǐ kpó tɛ́ntin.’ Énɛ́ ɔ́, mǐ lin gbeɖé ɖɔ mǐ ná gbɛ́ gbe n'i wú wɛ mǐ mɛ vɔ̌sákpe élɔ́ ǎ; é ká nyí ɖɔ mǐ ná sá vɔ̌ e è nɔ dó zo lɛ́ɛ, bó ná xwlé nǔníná lɛ́ɛ, bó ná sá vɔ̌ ɖěvo lɛ́ɛ wú wɛ ǎ. Mǐ jló ná nɔ́ sá vɔ̌ tɛnmɛ tɛnmɛ énɛ́ lɛ́ɛ ɖo fí ɖěvo zɛ vɔ̌sákpe Mawu Mavɔmavɔ, Mawu mǐtɔn tɔn e ɖo goxɔ tɔn sín nukɔn ɔ́ wú ǎ.” Ée vɔ̌sánú-xwlémawutɔ́ Pínxási kpódó nukɔntɔ́ togun ɔ́ tɔn lɛ́ɛ kpó, kpódó hɛ̌nnugán xwédo Izlayɛ́li ví lɛ́ɛ tɔn kpó se xó e Hwlibɛ́ni ví lɛ́ɛ, Gadi ví lɛ́ɛ, kpódó Manasée ví lɛ́ɛ kpó ɖɔ ɔ́, é víví nú yě. Pínxási vɔ̌sánú-xwlémawutɔ́ Eleazáa ví ɔ́ ɖɔ nú Hwlibɛ́ni ví lɛ́ɛ kpódó Gadi ví lɛ́ɛ kpó, kpódó Manasée ví lɛ́ɛ kpó ɖɔ: “Mǐ tunwun din ɖɔ Mawu Mavɔmavɔ ɖo kpɔ́ xá mǐ, ɖó mi hu hwɛ ɖaxó ɖé dó Mawu Mavɔmavɔ lě e mǐ vɛdó bó ɖo xɛsi ɖi wɛ ɔ́ ǎ. Hǔn é nyí ɖɔ tó dɔn nú mɛ Mawu Mavɔmavɔ tɔn dɔn dó Izlayɛ́li ví lɛ́ɛ jí wɛ mi ɖe ǎ.” Pínxási vɔ̌sánú-xwlémawutɔ́ Eleazáa ví ɔ́ kpódó nukɔntɔ́ togun ɔ́ tɔn lɛ́ɛ kpó jó Hwlibɛ́ni kpódó Gadi kpó sín akɔta lɛ́ɛ dó bó yi. Yě gosín Galadi bo yi Kanáa, bó ɖó gbe nú Izlayɛ́li ví ɖě lɛ́ɛ. Ée mɛ e yě sɛ́ dó lɛ́ɛ wá ɖó gbe nú yě ɔ́, é víví nú yě, bɔ yě dó kú nú Mawu. Linlin e yě kó ɖó ɖ'ayǐ ɖɔ émí ná yi tɔ́n ahwan Hwlibɛ́ni kpódó Gadi kpó sín akɔta lɛ́ɛ, bo ná hɛn nǔ e ɖo ayǐkúngban yětɔn jí lɛ́ɛ bǐ gblé ɔ́, yě jó dó. Hwenɛ́nu ɔ́, Hwlibɛ́ni kpó Gadi kpó sín mɛ lɛ́ɛ sú xó bó ɖɔ: “Vɔ̌sákpe élɔ́ ɖo kúnnu ɖe nú mǐ bǐ wɛ ɖɔ Mawu Mavɔmavɔ nyí Mawu!” Bɔ yě sun nyǐ vɔ̌sákpe ɔ́ ɖɔ “Kúnnuɖetɔ́”. Mawu Mavɔmavɔ hwlɛ́n Izlayɛ́li ví lɛ́ɛ sín kɛntɔ́ e lɛ́ lɛ̌ dó yě lɛ́ɛ bǐ sí, bɔ yě mɔ agbɔ̌n; nǔ énɛ́ ɔ́ jɛ ɔ́, é kó lín tawun, káká bɔ Jozuwée ko kpo bǐ. Ée Jozuwée mɔ ɖɔ émí kó kpo bǐ ɔ́, é ylɔ́ Izlayɛ́li ví lɛ́ɛ bǐ, tomɛxó yětɔn lɛ́ɛ, gǎn yětɔn lɛ́ɛ, hwɛɖɔtɔ́ yětɔn lɛ́ɛ, ahwangán yětɔn lɛ́ɛ, bó ɖɔ nú yě ɖɔ: “Nyɛ ɖíe kó kpo bǐ e. Mi ka mɔ lě e Mawu Mavɔmavɔ, Mawu mitɔn wa nǔ xá togun e ɖo ayǐkúngban énɛ́ lɛ́ɛ jí gbɔn ɖó mi wútu é. É ɖésúnɔ fun ahwan nú mi. Mi kpɔ́n, ayǐkúngban e un ko yí ɔ́ kpó éé kpo bɔ un ma ko yí ǎ é kpó ɔ́, un ko nyi akɔ dó bó ko má nú akɔta mitɔn lɛ́ɛ bɛ́ sín Judɛ́ɛn tɔ ɔ́ tó ɖo zǎnzǎnhwe jí káká yi Mɛditɛlanɛ́ɛ xu ɔ́ tó ɖo gbadahwe jí. Mawu Mavɔmavɔ, Mawu mitɔn ɖésú ná nya togun e kpo lɛ́ɛ ɖo nukɔn mitɔn. Ényí mi sɛkpɔ́ yě ɔ́, é ná bló bɔ yě ná hɔn, bɔ mi ná yí to yětɔn, lě e é kó dó akpá tɔn nú mi gbɔn é. Amɔ̌, mi hɛn dó ayi mitɔn mɛ syɛ́nsyɛ́n ɖɔ nǔ e è wlǎn dó sɛ́n wéma Mɔyízi tɔn mɛ lɛ́ɛ ɔ́, mi ná xwedó bǐ, bó ná wa nǔ lě e sɛ́n ɔ́ zɔ́n gbɔn é, ma yi ɖisí ma yi amyɔ. Mi ma kpé nǔɖé xá togun e kpó mi kpó kpo ɖo kpɔ́ lɛ́ɛ ó, mi ma ka ylɔ́ vodún yětɔn lɛ́ɛ ɖě sín nyǐkɔ ó, mi ma ka xwlé vodún yětɔn lɛ́ɛ ɖě sín nyǐkɔ dó nǔɖé jí ó, mi ma sɛn yě ɖě ó, mi ma ka jɛ kpo nú yě ɖě ó. Mawu Mavɔmavɔ, Mawu mitɔn kɛ́ɖɛ́ wú wɛ mi ná tɛ́ dó lě e mi ko bló gbɔn káká jɛ din é. Đó Mawu Mavɔmavɔ nya togun nukúnɖéjí hlɔ̌nhlɔ́nnɔ lɛ́ɛ ɖo nukɔn mitɔn, bɔ káká wá jɛ din ɔ́, yě ɖě kó sixú nɔ te ɖo nukɔn mitɔn ǎ. Mɛ ɖokpó géé sí te ɖo mi mɛ ɔ́, é nɔ nya kɛntɔ́ afatɔ́n dó wezun nu, ɖó Mawu Mavɔmavɔ, Mawu mitɔn wɛ fun ahwan nú mi lě e é dó akpá tɔn nú mi gbɔn é. Mi bo cɔ́ miɖée ganjí, bó yí wǎn nú Mawu Mavɔmavɔ, Mawu mitɔn. Ényí mi lɛ́ kɔ sín gǔdo tɔn, bó yi ɖó kɔnɖókpɔ́ xá togun e kpó mi kpó kpo ɖo kpɔ́ lɛ́ɛ ɔ́, ényí mi da vǐ yětɔn lɛ́ɛ ɔ́, ényí mi byɔ́ yě mɛ ɔ́, mi bo tunwun ganjí ɖɔ Mawu Mavɔmavɔ, Mawu mitɔn kún sɔ́ ná nɔ nya yě ɖo nukɔn mitɔn ɖě ó. Hwenɛ́nu ɔ́, yě ná húzú mɔ, bó ná húzú fɛ́ca nú mi. Yě ná bló bɔ mi ná mɔ wǔvɛ́ ɖi bǎ sɛ́n dó nɛgbé nú mi wɛ è ɖe ɖɔhun, abǐ wun wɛ ɖo nukún tɔ́n mi wɛ ɖɔhun. Nǔ ná ɖo mi xá wɛ mɔ̌ káká bɔ mi bǐ ná vɔ sín ayǐkúngban ɖagbe ɖagbe élɔ́ e Mawu Mavɔmavɔ, Mawu mitɔn ná mi ɔ́ jí. Nyɛ ɔ́, zaanɖé din ɔ́, un ná yi fí e nǔ e mɔ hwe lɛ́ɛ bǐ ná yi é. Mi ní ka tunwun kpó ayi mitɔn bǐ kpó, kpódó lǐndɔ̌n mitɔn bǐ kpó ɖɔ Mawu Mavɔmavɔ, Mawu mitɔn kún gɔn akpá e é dó nú mi lɛ́ɛ ɖěbǔ ɖe ó; bǐ wɛ é ɖe káká yi fó. Lě e Mawu Mavɔmavɔ, Mawu mitɔn ɖe akpá e é dó nú mi lɛ́ɛ gbɔn ɔ́, mɔ̌ ɖokpó ɔ́ jɛ́n wɛ é ná wa nǔ nyanya bǐ xá mi gbɔn, káká bó ná hu mi bǐ sín ayǐkúngban ɖagbe ɖagbe élɔ́ e é ná mi ɔ́ jí. Ényí mi gba akɔ e é jɛ xá mi, bo ɖɔ mi ní ɖó sísí ná ɔ́, ényí mi ɖe kɔ́ nú vodún lɛ́ɛ, bó sɛn yě ɔ́, Mawu Mavɔmavɔ ná sin xomɛ dó mi, bó ná vɔ mi cɛ́jú mɛ sín ayǐkúngban ɖagbe ɖagbe élɔ́ e é nǎ mi ɔ́ jí.” Jozuwée kplé akɔta Izlayɛ́li tɔn lɛ́ɛ bǐ ɖo Sikɛ́mu. É ylɔ́ tomɛxó lɛ́ɛ, gǎn lɛ́ɛ, hwɛɖɔtɔ́ lɛ́ɛ kpódó ahwangán Izlayɛ́li tɔn lɛ́ɛ kpó, bɔ yě wá kplé ɖo Mawu nukɔn, bɔ é ɖɔ nú yě bǐ ɖɔ nǔ e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe: “Đ'ayǐ xóxó ɔ́, Efláti tɔ gúdo dɔ̌n wɛ tɔ́gbó mitɔn lɛ́ɛ nɔ, bó nɔ́ sɛn vodún lɛ́ɛ. Tɔ́gbó mitɔn énɛ́ lɛ́ɛ ɖě wɛ nyí Tɛláxi, Ablaxámu kpó Naxɔ́ɔ kpó sín tɔ́. Un ɖe tɔ́gbó mitɔn Ablaxámu sín tɔ ɔ́ gúdo dɔ̌n, bó kplá ɛ gbɔn Kanáa to ɔ́ bǐ mɛ. Un ná ɛ vǐ gěgé. Un ná ɛ Izáki bɔ é ji. Bó ná Jakɔ́bu kpódó Esawu kpó Izáki, bɔ é ji. Un ná ayǐkúngban Esawu ɖo Seyíi, ɖo sókan mɛ, bɔ é ná nɔ fínɛ́. Jakɔ́bu kpó vǐ tɔn lɛ́ɛ kpó ka yi Ejípu. Ée é wá yá ɔ́, un sɛ́ Mɔyízi kpó Aalɔ́ɔn kpó dó. Un wa nǔ tɛnmɛ tɛnmɛ xá yě ɖo Ejípu; énɛ́ ɔ́ gúdo ɔ́, un ɖe togun mitɔn tɔ́n sín to ɔ́ mɛ. Un ɖe tɔ́gbó mitɔn lɛ́ɛ tɔ́n sín Ejípu, bɔ yě wǎ xu Vɔvɔ ɔ́ tó. Ejípunu lɛ́ɛ ká fɔ kɛkɛ́ví kpódó sɔ́ kpó, bó jɛ gǔdo yětɔn káká wá fínɛ́. Énɛ́ ɔ́, tɔ́gbó mitɔn lɛ́ɛ ylɔ́ mì ɖɔ má wá dó alɔ émí, bɔ un sɛ́ akpɔ́kpɔ́ wiwi dó bɔ é wá nɔ tɔ́gbó mitɔn lɛ́ɛ kpó Ejípunu lɛ́ɛ kpó tɛ́ntin. Énɛ́ ɔ́ gúdo ɔ́, un bló bɔ xu ɔ́ cyɔ́n Ejípunu lɛ́ɛ. Mi tunwun lě e un wa nǔ xá Ejípunu lɛ́ɛ gbɔn ɔ́ ganjí. Bɔ tɔ́gbó mitɔn lɛ́ɛ nɔ gbětótló mɛ xɔ xwe mɔ̌kpán. Énɛ́ ɔ́ gúdo ɔ́, un kplá mi yi Amɔliti lɛ́ɛ tomɛ, ɖo Judɛ́ɛn tɔ ɔ́ sín zǎnzǎnhwe jí. Yě tɔ́n ahwan mi, un ka jó yě nú mi, bɔ mi yí to yětɔn, un vívá kún yětɔn ɖo nukɔn mitɔn. Axɔ́sú Mɔwabu tɔn Balaki Sipɔ́ɔ ví ɔ́ lɔ tɔ́n ahwan mi, é sɛ́ wɛn dó Baláamu, Beɔ́ɔ ví ɔ́, ɖɔ é ní wá dó nu mi. Un ka jló ná ɖótó Baláamu ǎ; bɔ é gbɔ bó xo ɖɛ dó mi jí bɔ un hwlɛ́n mi sín así tɔn. Mi dó asá Judɛ́ɛn tɔ ɔ́, bó wá Jeliko, bɔ Jelikonu lɛ́ɛ tɔ́n ahwan mi; mɔ̌ ɖokpó ɔ́, Amɔliti lɛ́ɛ, Pɛliziti lɛ́ɛ, Kanáanu lɛ́ɛ, Hitíti lɛ́ɛ, Giigacíti lɛ́ɛ, Hivíti lɛ́ɛ kpódó Jebuzinu lɛ́ɛ kpó tɔ́n ahwan mi, un ka jó yě bǐ nú mi. Un sɛ́ gbɔ̌nvɛ dó, bɔ yě jɛ nukɔn nú mi, bó yi nya Amɔliti lɛ́ɛ sín axɔ́sú we lɛ́ɛ dó wezun nu. Hwǐ e mi hɛn lɛ́ɛ kpó gǎ e mi hɛn lɛ́ɛ kpó wɛ mi dó wa nǔɖé ná ɖo nǔ énɛ́ ɔ́ mɛ ǎ. Un ná mi to e mɛ mi ma jɛ tagba ɖěbǔ ɖe ǎ é, bó ná mi toxo e mi ma ɖó ayǐ ǎ lɛ́ɛ, bɔ mi ɖ'é mɛ. Un ná mi vǐwuntín e mi ma tun ǎ lɛ́ɛ, bó ná mi olívutín e mi ma tun ǎ lɛ́ɛ, bɔ mi ɖo ɖuɖu wɛ.” Jozuwée lɛ́ ɖɔ nú yě ɖɔ: “Din ɔ́, mi ɖó sísí nú Mawu Mavɔmavɔ bó sɛn ɛ kpódó ayixa mitɔn bǐ kpó, bó nɔ gbejí n'i. Vodún e tɔ́gbó mitɔn lɛ́ɛ nɔ sɛn ɖ'ayǐ ɖo Efláti tɔ ɔ́ gúdo kpó Ejípu kpó lɛ́ɛ ɔ́, mi bɛ́ yě kɔn nyi gbě, bó sɛn Mawu Mavɔmavɔ. Nú mi ma ka jló ná sɛn Mawu Mavɔmavɔ ǎ hǔn, mi bo ɖɔ nǔ e mi ná sɛn ɔ́ bɛ́ sín égbé. É sixú nyí vodún e tɔ́gbó mitɔn lɛ́ɛ sɛn ɖ'ayǐ ɖo Efláti tɔ ɔ́ gúdo lɛ́ɛ; é ká sixú nyí vodún e Amɔliti e mɛ mi ɖe lɛ́ɛ nɔ sɛn lɛ́ɛ é. Amɔ̌, nyɛ kpó xwédo ce kpó ɔ́, Mawu Mavɔmavɔ wɛ mǐ ná sɛn.” Ée Jozuwée ɖɔ mɔ̌ ɔ́, togun ɔ́ yí gbe n'i ɖɔ: “Gbeɖé kpɔ́n! Mǐ ná jó Mawu Mavɔmavɔ dó bó ná sɛn nǔ ɖěvo ǎ. Đó Mawu Mavɔmavɔ wɛ nyí Mawu mǐtɔn. É wɛ ɖe mǐ kpó tɔ́gbó mǐtɔn lɛ́ɛ kpó tɔ́n sín kannumɔgbénu, ɖo Ejípu. É wɛ jlɛ́ nǔ ɖaxó ɖaxó lɛ́ɛ bɔ mǐ mɔ. É wɛ cyɔ́n alɔ jǐ mǐtɔn ɖo ali e mǐ gbɔn ɔ́ bǐ xo, bó cyɔ́n alɔ jǐ mǐtɔn ɖo togun e mɛ mǐ gbɔn lɛ́ɛ bǐ mɛ. É wɛ nya togun lɛ́ɛ bǐ ɖo nukɔn mǐtɔn, bó nya Amɔliti e nɔ nɔ fí lɛ́ɛ. Mǐ lɔmɔ̌ ɔ́, Mawu Mavɔmavɔ wɛ mǐ ná sɛn, ɖó é wɛ nyí Mawu mǐtɔn.” Bɔ Jozuwée ɖɔ nú yě ɖɔ: “Mi ná sixú sɛn Mawu Mavɔmavɔ ǎ, ɖó Mawu mímɛ́ wɛ é nyí. Mawu ɖé wɛ é nyí bó nɔ́ ba gbeɖé ɖɔ è nǐ sɛn nǔ ɖěvo gɔ́ nú émí ǎ. É ná sɔ́ nǔ e mi wa nyi do lɛ́ɛ kpó hwɛ e mi hu lɛ́ɛ kpó kɛ mi ǎ. Ényí mi lɛ́ kɔ sín gǔdo tɔn, bó jɛ nǔ ɖěvo lɛ́ɛ sɛn jí ɔ́, éyɛ́ mɛ e ko wa ɖagbe nú mi sɔ mɔ̌ ɔ́ ná húzú kpan nukɔn mi. É ná wa nǔ nyanya xá mi; é ná vívá kún mitɔn.” Ée Jozuwée ɖɔ mɔ̌ ɔ́, togun ɔ́ yí xó bó ɖɔ: “Gbeɖé, Mawu Mavɔmavɔ jɛ́n mǐ ná sɛn.” Jozuwée lɛ́ yí xó bó ɖɔ: “É nyí mɔ̌ hǔn, mi ɖésúnɔ wɛ nyí kúnnuɖetɔ́ miɖée tɔn. Mi ɖésúnɔ wɛ yí gbe ɖɔ émí ná sɛn Mawu Mavɔmavɔ nɛ́.” Bɔ yě yí gbe ɖɔ: “Ɛɛn! Mǐ ɖésúnɔ wɛ nyí kúnnuɖetɔ́ mǐɖée tɔn.” Ée yě ɖɔ mɔ̌ ɔ́, Jozuwée ɖɔ nú yě ɖɔ: “Hǔn mi bo bɛ́ vodún mitɔn lɛ́ɛ kɔn nyi gbě, bó sɔ́ ayi mitɔn jó nú Mawu Mavɔmavɔ, Mawu Izlayɛ́li tɔn.” Togun ɔ́ ká yí gbe nú Jozuwée ɖɔ: “Mǐ ná sɛn Mawu Mavɔmavɔ, Mawu mǐtɔn, bó ná bló nǔ e é ɖɔ lɛ́ɛ.” Gbe nɛ́ ɔ́ gbe ɖo Sikɛ́mu ɔ́, Jozuwée jɛ akɔ xá togun ɔ́. É dó sɛ́n lɛ́ɛ nú yě, bó ɖɔ tito e yě ná xwédo lɛ́ɛ nú yě. Jozuwée wlán nǔ énɛ́ lɛ́ɛ dó sɛ́nwéma Mawu tɔn mɛ, bó wá sɔ́ awǐnnya ɖaxó ɖé, bó dó do nyi fínɛ́, ɖo cɛ́nitín ɖé sá, ɖo fí e yě nɔ́ sɛn Mawu Mavɔmavɔ ɖe é, bó ɖɔ nú togun ɔ́ ɖɔ: “Mi kpɔ́n awǐnnya élɔ́ ganjí, é wɛ ná ɖe kúnnu nú mǐ, ɖó é se xó e Mawu Mavɔmavɔ ɖɔ nú mǐ lɛ́ɛ bǐ. É wɛ ná nɔ flín nǔ mi, bɔ mi ná lɛ́ kɔ sín Mawu mitɔn gúdo ǎ.” Énɛ́ ɔ́ gúdo ɔ́, Jozuwée nyi togun ɔ́, bɔ mɛ ɖokpó ɖokpó lɛ́ kɔ yi ayǐkúngban e è nǎ ɛ ɔ́ jí. Ée nǔ énɛ́ lɛ́ɛ bǐ jɛ wá yi ɔ́, mɛsɛntɔ́ Mawu Mavɔmavɔ tɔn Jozuwée Nuni ví ɔ́ wá kú. Xwe kanwe gban (110) ɖó wɛ é ɖe bó kú. È ɖi i ɖó ayǐkúngban e è ná ɛ ɔ́ jí, ɖo Timunati-Sɛláxi, ɖo sókan Eflayímu tɔn mɛ, ɖo Gaaci só ɔ́ sín taligbé. Izlayɛ́li ví lɛ́ɛ sɛn Mawu Mavɔmavɔ Jozuwée hwenu. Ée Jozuwée kú ɔ́, yě lɛ́ sɛn Mawu Mavɔmavɔ ɖo mɛxó e mɔ nǔ ɖagbe e Mawu Mavɔmavɔ wa nú Izlayɛ́li ví lɛ́ɛ hwenu. Izlayɛ́li ví lɛ́ɛ bɛ́ Jozɛ́fu xú lɛ́ɛ sín Ejípu wá yi Sikɛ́mu, bó ɖi ɖó ayǐkúngban e Jakɔ́bu xɔ yí gankwɛ́ kanwe ko (100) ɖo Hamɔ́ɔ ví lɛ́ɛ sí ɔ́ jí. Hamɔ́ɔ wɛ ɖó Sikɛ́mu toxo ɔ́ ayǐ. Toxo énɛ́ ɔ́ wɛ è wǎ sɔ́ nú Jozɛ́fu vǐ lɛ́ɛ. Eleazáa Aalɔ́ɔn ví ɔ́ lɔ wá kú, bɔ è ɖi i ɖó só e è nǎ vǐ tɔn Pínxási ɔ́ jí, ɖo Eflayímu sókan mɛ. Ée Jozuwée kú gúdo ɔ́, Izlayɛ́li ví lɛ́ɛ kan nǔ byɔ́ Mawu Mavɔmavɔ bɔ é ná ɖɔ akɔta e ɖó na yi tɔ́n ahwan Kanáanu lɛ́ɛ jɛ nukɔn ɖo akɔta yětɔn lɛ́ɛ mɛ ɔ́ nú yě. Mawu Mavɔmavɔ ka yí gbe nú yě ɖɔ: “Súnnu e ɖo Judáa sín akɔta mɛ lɛ́ɛ wɛ ná jɛ nukɔn; un ko jó to ɔ́ nú yě.” Énɛ́ ɔ́, súnnu e ɖo Judáa sín akɔta mɛ lɛ́ɛ ɖɔ nú akɔta Sinmɛnyɔ́ɔ tɔn nɔví yětɔn lɛ́ɛ ɖɔ: “Mi xwedó mǐ, nú mǐ na yi fun ahwan bó ná yí to e Mawu Mavɔmavɔ má nú mǐ é. Mǐ ní zɔn kpɔ́ bó tɔ́n ahwan Kanáanu lɛ́ɛ. Énɛ́ ɔ́ gúdo ɔ́, mǐ ná yi fun ahwan bó yí to mitɔn xá mi.” Bɔ akɔta Sinmɛnyɔ́ɔ tɔn ɔ́ sín mɛ lɛ́ɛ yi gɔ́ nú akɔta Judáa tɔn sín mɛ lɛ́ɛ, bɔ yě yi tɔ́n ahwan Kanáanu lɛ́ɛ. Mawu Mavɔmavɔ ka jó Kanáanu lɛ́ɛ kpó Pɛliziti lɛ́ɛ kpó nú yě, bɔ yě hu gbɛtɔ́ děgba we afɔwó (10.000) ɖo Bɛzɛ́ki. Nǔgbó ɔ́, yě mɔ axɔ́sú Adoni-Bɛzeki ɖo toxo énɛ́ ɔ́ mɛ; yě tɔ́n ahwan ɛ bó ɖu ɖo Kanáanu lɛ́ɛ kpó Pɛliziti lɛ́ɛ kpó jí. Axɔ́sú ɔ́ hɔn bɔ yě jɛ gǔdo tɔn, bó wlí i lobo sɛ́n alɔsú tɔn lɛ́ɛ kpó afɔsú tɔn lɛ́ɛ kpó. Énɛ́ ɔ́, Adoni-Bɛzeki ɖɔ: “Nú un ɖo nǔ ɖu wɛ ɔ́, axɔ́sú e è sɛ́n alɔsú kpó afɔsú kpó ná lɛ́ɛ kanɖé gban (70) wɛ nɔ cyán nǔɖuɖu e nɔ hlɛ́n kɔn nyi ayǐ lɛ́ɛ ɖu. Nǔ e un nɔ wa ɔ́ sín axɔ́ wɛ Mawu sú mì.” È kplá Adoni-Bɛzeki yi Jeluzalɛ́mu, bɔ é kú ɖo fínɛ́. Súnnu e ɖo Judáa sín akɔta mɛ lɛ́ɛ tɔ́n ahwan Jeluzalɛ́munu lɛ́ɛ bó yí toxo ɔ́. Yě hu mɛ e ɖo toxo ɔ́ mɛ lɛ́ɛ bó dó toxo ɔ́ zo. Énɛ́ ɔ́ gúdo ɔ́, yě yi tɔ́n ahwan Kanáanu e ɖo sókan mɛ lɛ́ɛ kpó éé ɖo tofɔligbé lɛ́ɛ kpó, kpódó éé ɖo ayǐkúngban wɛnjɛ jí lɛ́ɛ kpán. Yě tɔ́n ahwan Kanáanu e ɖo Eblɔ́n lɛ́ɛ, bó ɖu ɖo hɛ̌nnu Cecáyi tɔn, Aximani tɔn kpódó Talumayi tɔn kpán jí. Đ'ayǐ xóxó ɔ́, Eblɔ́n ɔ́, Kiliyati-Aaba wɛ é nɔ́ nyí. Yě gosín fínɛ́ bó yi tɔ́n ahwan Devíinu lɛ́ɛ; ɖ'ayǐ xóxó ɔ́, Devíi ɔ́, Kiliyati-Sefɛ́ɛ wɛ é nɔ́ nyí. Kalɛ́bu ɖɔ émí ná sɔ́ vǐ émítɔn Akisa da nú mɛ e ná tɔ́n ahwan Kiliyati-Sefɛ́ɛ toxo ɔ́, bó ná yí é. Ɔtiniyɛ́li Kenázi ví e nyí Kalɛ́bu sín nɔví kpɛví ɔ́ yí toxo ɔ́ bɔ Kalɛ́bu sɔ́ vǐ tɔn da n'i. Ée Akisa wá ɔ́, é ɖɔ nú Ɔtiniyɛ́li ɖɔ é ní byɔ́ gle ɖokpó tɔ́ émítɔn. Énɛ́ ɔ́ gúdo ɔ́, Akisa jɛ te sín tócí tɔn jí bɔ tɔ́ tɔn kan nǔ e jló e ɔ́ byɔ́ ɛ. Bɔ é yí gbe n'i ɖɔ: “Kɛnklɛ́n ná fí e sin ɖe lɛ́ɛ mì, ɖó ayǐkúngban e a nǎ mì ɖo tofɔligbé ɔ́, axéko wɛ.” Bɔ Kalɛ́bu ná ɛ fí e sin ɖe ɖo só jí lɛ́ɛ kpó fí e sin ɖe ɖo dodomɛ lɛ́ɛ kpó. Asitɔ́ Mɔyízi tɔn Keni sín vǐ lɛ́ɛ gosín Jeliko, děkan toxo ɔ́ mɛ kpó Judáa sín súnnu lɛ́ɛ kpó, lobo yi jɛ agban ɖó ayǐkúngban Judáa tɔn ɔ́ sín afɔligbé ɖo Aladi sín afɔligbé. Yě yi nɔ Amalɛ́ki togun ɔ́ tɛ́ntin. Súnnu e ɖo Judáa sín akɔta mɛ lɛ́ɛ kpó akɔta Sinmɛnyɔ́ɔ tɔn nɔví yětɔn lɛ́ɛ kpó yi tɔ́n ahwan Kanáanu e ɖo Sefáti lɛ́ɛ, bó ɖu ɖo yě jí; yě gba toxo énɛ́ ɔ́ bǐ sésé; énɛ́ ɔ́ wú wɛ è sun nyǐ toxo énɛ́ ɔ́ ɖɔ Hɔ́ɔma; tínmɛ tɔn wɛ nyí “Nǔ gbigba.” Énɛ́ ɔ́ gúdo ɔ́, Judáa sín mɛ lɛ́ɛ yí Gaza toxo ɔ́ kpó Acikelɔ́ni toxo ɔ́ kpó, kpódó Eklɔ́ni toxo ɔ́ kpán; bó yí ayǐkúngban e lɛ́dó toxo atɔn énɛ́ lɛ́ɛ lɔmɔ̌. Mawu Mavɔmavɔ ɖésú ɖo kpɔ́ xá yě bɔ yě fun ahwan bó yí ayǐkúngban e ɖo sókan mɛ é. Nǔ ɖo mɔ̌ có, yě kpé wú bó nya mɛ e ɖo ayǐkúngban wɛnjɛ jí lɛ́ɛ ǎ, ɖó yědɛɛ lɛ́ɛ ɖó ahwankɛkɛ́ví gannɔ lɛ́ɛ. È nǎ Eblɔ́n toxo ɔ́ Kalɛ́bu, lě e Mɔyízi ko ɖɔ gbɔn é; bɔ é nya Anáki sín hɛ̌nnu atɔn e ɖo toxo ɔ́ mɛ lɛ́ɛ. Bɛnjamɛ́ɛ sín vǐ lɛ́ɛ kpé wú bó nya Jebuzinu e nɔ nɔ Jeluzalɛ́mu lɛ́ɛ ǎ; bɔ yě lɛ́ kpo ɖo Jeluzalɛ́mu fínɛ́ din kpó Bɛnjamɛ́ɛ ví lɛ́ɛ kpó. Xwédo Jozɛ́fu tɔn ɔ́ lɔmɔ̌ tɔ́n ahwan mɛ e ɖo Betɛ́li lɛ́ɛ, bɔ Mawu Mavɔmavɔ nɔ kpɔ́ xá Jozɛ́fu xwédo ɔ́. Yě sɛ́ mɛ dó bɔ yě to yi kpɔ́n lě e toxo ɔ́ ɖe ɔ́. Lǔzi wɛ toxo énɛ́ ɔ́ nyí ɖ'ayǐ. Mɛ e è sɛ́ dó lɛ́ɛ mɔ nya ɖé ɖo toxo ɔ́ mɛ tɔ́n sín wɛ, bó ɖɔ n'i ɖɔ: “Xlɛ́ fí e mǐ ná gbɔn byɔ́ toxo ɔ́ mɛ ɔ́ mǐ, énɛ́ ɔ́, mǐ ná wa ɖagbe nú we.” Nya ɔ́ ka xlɛ́ fí e yě ná sixú gbɔn ɔ́ yě, bɔ yě byɔ́ toxo ɔ́ mɛ bó hu mɛ e ɖ'é mɛ lɛ́ɛ; amɔ̌, yě jǒ nya e xlɛ́ ali yě ɔ́ kpó xwédo tɔn lɛ́ɛ bǐ kpó dó. Nya ɔ́ ka yi Hitíti lɛ́ɛ sín to mɛ; é ɖó toxo ɖaxó ɖokpó ayǐ bó sun nyǐ toxo ɔ́ ɖɔ Lǔzi, bɔ nyǐkɔ énɛ́ ɔ́ ɖo te káká jɛ din. Manasée sín mɛ lɛ́ɛ kpé wú bó nya mɛ e ɖo Bɛti-Ceani lɛ́ɛ ǎ, yě ká kpé wú bó nya Tanakinu lɛ́ɛ, Dɔ́ɔnu lɛ́ɛ, Yivleámunu lɛ́ɛ kpó Mɛgidonu lɛ́ɛ kpó ǎ; yě ká kpé wú bó nya mɛ e ɖo toxo e ɖo to énɛ́ lɛ́ɛ kpá lɛ́ɛ mɛ lɛ́ɛ ǎ; bɔ Kanáanu lɛ́ɛ kpo ɖo gbě énɛ́ ɔ́ jí. Hwenu e Izlayɛ́li ví lɛ́ɛ wá ɖó hlɔ̌nhlɔ́n d'é jí ɖésú lɔ ɔ́, yě tlɛ kpé wú bó nya Kanáanu lɛ́ɛ ǎ, amɔ̌, yě ɖǒ azɔ̌ ɖé lɛ́ɛ kɔ jí nú yě. Eflayímu sín mɛ lɛ́ɛ kpé wú bó nya Kanáanu e nɔ nɔ Gɛzɛ́ɛ lɛ́ɛ ǎ; bɔ Kanáanu lɛ́ɛ nɔ tɛ́ntin yětɔn. Zabulɔ́ɔn sín mɛ lɛ́ɛ kpé wú bó nya Kanáanu e ɖo Kitlɔ́ni kpó éé ɖo Naxalɔlu lɛ́ɛ kpó ǎ; yě nɔ Zabulɔ́ɔn sín akɔta tɛ́ntin; amɔ̌, yě ɖǒ azɔ̌ ɖé lɛ́ɛ kɔ jí nú yě. Acɛ́ɛ sín mɛ lɛ́ɛ kpé wú bó nya Akonu lɛ́ɛ, Sidɔ́ɔnnu lɛ́ɛ, Axlavunu lɛ́ɛ kpó Akizívunu lɛ́ɛ kpó ǎ. Yě kpé wú bó nya Hɛlubanu lɛ́ɛ, Afíkinu lɛ́ɛ kpó Hlexɔ́vunu lɛ́ɛ kpó ǎ. Énɛ́ ɔ́ wú wɛ yě gbɔ bó jɛ agban ɖó Kanáanu e ɖo to ɔ́ mɛ lɛ́ɛ tɛ́ntin. Nɛfutali sín mɛ lɛ́ɛ kpé wú bó nya Kanáanu e ɖo Bɛti-Cɛmɛ́ci lɛ́ɛ kpó ée ɖo Bɛti-Anati lɛ́ɛ kpó ǎ; yě jɛ agban ɖó Kanáanu e ɖo to ɔ́ mɛ lɛ́ɛ tɛ́ntin lobo ká ɖó azɔ̌ ɖé lɛ́ɛ kɔ jí nú yě. Amɔliti lɛ́ɛ nya Dan sín vǐ lɛ́ɛ yi sókan mɛ bó lɔn nú yě ná jɛ te wá ayǐkúngban wɛnjɛ jí ǎ. Amɔliti lɛ́ɛ lɛ́ kpo ɖo Haa-Hɛlɛ́si, Ayalɔ́ni kpó Caaluvímu kpó; lo ɔ́ ée é wá yá ɔ́, Jozɛ́fu sín vǐ lɛ́ɛ kpa acɛ nú yě bó ɖó azɔ̌ ɖé lɛ́ɛ kɔ jí nú yě. Dogbó Amɔliti lɛ́ɛ tɔn e ɖo tofɔligbé ɔ́, kplá dó ayǐkúngban Edɔ́munu lɛ́ɛ tɔn, bó gbɔn Aklabímu só ɔ́ sín zǎnzǎnhwe jí. Wɛnsagun Mawu Mavɔmavɔ tɔn gosín Gilugalu wá Bokímu, bó ɖɔ nú Izlayɛ́li ví lɛ́ɛ ɖɔ: “Un ɖe mi tɔ́n sín Ejípu bó kplá mi wá ayǐkúngban e un dó akpá tɔn nú tɔ́gbó mitɔn lɛ́ɛ ɔ́ jí. Un ɖɔ un kún ná hɛn akɔ e un jɛ xá mi ɔ́ gblé gbeɖé ó. Lo ɔ́, un ɖɔ nú mi ɖɔ mi ní ma jɛ akɔ xá to énɛ́ ɔ́ mɛ nu lɛ́ɛ ó; mi ní gba vɔ̌sákpe yětɔn lɛ́ɛ. Mi ka se tónú nú mì ǎ. Étɛ́wú wɛ mi wa mɔ̌? Un ɖɔ din ɔ́, un sɔ́ ná nya to ɔ́ mɛ nu lɛ́ɛ sín nukɔn mitɔn ǎ. Lo ɔ́, yě ná dɔn mi dó mɔ mɛ, bɔ mi ná jɛ vodún yětɔn lɛ́ɛ sɛn jí.” Ée wɛnsagun Mawu Mavɔmavɔ tɔn ɖɔ xó énɛ́ lɛ́ɛ nú Izlayɛ́li ví lɛ́ɛ ɔ́, yě bǐ jɛ avǐ ya jí. Yě ylɔ́ fí énɛ́ ɔ́ ɖɔ Bokímu; Bokímu ɔ́ sín tínmɛ wɛ nyí avǐyatɔ́ lɛ́ɛ; bɔ yě sá vɔ̌ nú Mawu Mavɔmavɔ ɖo fínɛ́. Ée Jozuwée nyi togun ɔ́ fó ɔ́, Izlayɛ́li ví lɛ́ɛ ɖokpó ɖokpó yi ayǐkúngban e nyí étɔn ɔ́ jí, bɔ yě jɛ agban ɖó to ɔ́ mɛ. Togun ɔ́ sɛn Mawu Mavɔmavɔ ɖo Jozuwée hwenu, bó sɛn ɛ ɖo mɛxó e dɔ́ ji hú Jozuwée lɛ́ɛ hwenu; mɛxó énɛ́ lɛ́ɛ e mɔ azɔ̌ ɖaxó ɖaxó e Mawu Mavɔmavɔ ko wa nú Izlayɛ́li ví lɛ́ɛ é. Jozuwée Nuni ví, mɛsɛntɔ́ Mawu Mavɔmavɔ tɔn ɔ́, xwe kanwe gban (110) wɛ é ɖó bó kú. Ayǐkúngban e è nǎ ɛ ɖo Timunati-Xɛlɛsi ɔ́ jí wɛ è ɖi i dó ɖo sókan Eflayímu tɔn mɛ, ɖo Gaaci só ɔ́ sín taligbé. Énɛ́ ɔ́ gúdo ɔ́, mɛ e jɔ Jozuwée hwe nu lɛ́ɛ wá kú. Mɛ e jɛ fínɛ́ lɛ́ɛ tunwun Mawu Mavɔmavɔ ǎ; yě ká tunwun azɔ̌ e é wa nú Izlayɛ́li ví lɛ́ɛ ɔ́ ǎ. Izlayɛ́li togun ɔ́ jɛ nǔ e má nyɔ́ Mawu Mavɔmavɔ nukún mɛ ǎ lɛ́ɛ wa jí; yě jɛ vodún Baalu lɛ́ɛ sɛn jí. Yě jǒ Mawu Mavɔmavɔ, Mawu tɔ́gbó yětɔn lɛ́ɛ tɔn e ɖe yě tɔ́n sín Ejípu ɔ́ dó, bó ɖo vodún lɛ́ɛ sɛn wɛ; yě nɔ́ sɛn vodún e togun e lɛ́ dó yě lɛ́ɛ nɔ sɛn lɛ́ɛ é. Yě nɔ́ jɛ kpo bó nɔ ɖe kɔ́ nú yě, bó nɔ dó xomɛsin nú Mawu Mavɔmavɔ. Yě jǒ Mawu Mavɔmavɔ dó, bó nɔ sɛn vodún Baalu lɛ́ɛ kpó vodún Asitaatée lɛ́ɛ kpó. Mawu Mavɔmavɔ sin xomɛ dó Izlayɛ́li ví lɛ́ɛ. É jó yě dó nyi ajotɔ́ axánsúnxó lɛ́ɛ sín alɔ mɛ bɔ yě fin nǔ yětɔn lɛ́ɛ; é sa yě nú kɛntɔ́ yětɔn e lɛ́ dó yě lɛ́ɛ, bɔ yě sɔ́ sixú nɔ te ɖo nukɔn yětɔn ǎ. Yě yi ahwan fun gbé ɖo fí ɖěbǔ ɔ́, Mawu Mavɔmavɔ nɔ zɔ́n bɔ yě nɔ́ cí ahwan, lě e é ko zin alɔ dó akɔ́n bó ɖɔ gbɔn é. Bɔ yě jɛ lele ɖaxó ɖé mɛ. Énɛ́ ɔ́, Mawu Mavɔmavɔ fɔ hwɛɖɔtɔ́ ɖó nu yětɔn bɔ yě hwlɛ́n yě ɖo ajotɔ́ axánsúnxó énɛ́ lɛ́ɛ sí. Lo ɔ́, Izlayɛ́li ví lɛ́ɛ se tónú nú hwɛɖɔtɔ́ yětɔn lɛ́ɛ ǎ, ɖó yě lɛ́ kɔ yi vodún lɛ́ɛ kɔn, bó nɔ jɛ kpo bó nɔ ɖe kɔ́ nú yě. Yě yá wǔ lɛ́ kɔ sín ali e tɔ́gbó yětɔn lɛ́ɛ kó xwedó ɔ́ jí, bó sɔ́ nɔ́ nyi sɛ́n e Mawu Mavɔmavɔ dó lɛ́ɛ tɔ́gbó yětɔn lɛ́ɛ ɖɔhun ǎ. Nú Mawu Mavɔmavɔ sɛ́ hwɛɖɔtɔ́ ɖé dó Izlayɛ́li ví lɛ́ɛ hweɖěbǔnu ɔ́, é ɖésúnɔ nɔ́ nɔ gǔdo tɔn, bó nɔ́ hwlɛ́n yě ɖo kɛntɔ́ yětɔn lɛ́ɛ sí, nú hwenu e hwɛɖɔtɔ́ énɛ́ ɔ́ ná nɔ gbɛ xɔ é bǐ. Nǔgbó ɔ́, hwenu e yě nɔ́ ɖo aɖǔkún ɖu wɛ ɖo mɛ e nɔ ɖo ya dó nú yě wɛ lɛ́ɛ lɔ mɛ ɔ́, nǔ yětɔn nɔ blá wǔ nú Mawu Mavɔmavɔ. Lo ɔ́, nú hwɛɖɔtɔ́ ɔ́ kú ɔ́, gbɛ e yě nɔ́ zán ɔ́, nɔ lɛ́ nylá hú ée tɔ́gbó yětɔn lɛ́ɛ kó zán ɖ'ayǐ é; yě nɔ́ sɛn vodún lɛ́ɛ, bó nɔ́ jɛ kpo lobo nɔ ɖe kɔ́ nú yě. Yě jó tó e tlí wɛ yě ɖe ɔ́ dó ǎ. Mawu Mavɔmavɔ sin xomɛ dó Izlayɛ́li ví lɛ́ɛ. É ɖɔ: “Mɛ e ɖo togun élɔ́ mɛ lɛ́ɛ gba akɔ e un jɛ bó ɖe gbeta tɔ́n nú tɔ́gbó yětɔn lɛ́ɛ ɖɔ yě ní ɖó sísí ná lɛ́ɛ; yě se tónú nú mì ǎ. É nyɔ́! Nyɛ ɔ́, un sɔ́ na nya mɛ ɖokpó géé lě ɖo nukɔn mitɔn ɖo togun e Jozuwée ma ko nya, cóbó kú ǎ lɛ́ɛ mɛ ǎ. Togun énɛ́ lɛ́ɛ wɛ un ná dó wa azɔ̌ ná, bó ná kpɔ́n ɖɔ Izlayɛ́li ví lɛ́ɛ jló ná xwedó jlǒ ce, bó se tónú nú mì, lě e tɔ́gbó yětɔn lɛ́ɛ ko bló gbɔn ɔ́ a jí.” Énɛ́ ɔ́ wɛ zɔ́n bɔ Mawu Mavɔmavɔ jó togun e é ma jó nú Jozuwée ǎ lɛ́ɛ dó nyi to ɔ́ mɛ. É yá wǔ nya yě ǎ. Mawu Mavɔmavɔ jó togun énɛ́ lɛ́ɛ dó nyi to ɔ́ mɛ, bó ná dó tɛ́n Izlayɛ́li e má fun ahwan xá Kanáanu lɛ́ɛ bó yí ayǐkúngban yětɔn ǎ lɛ́ɛ kpɔ́n. É jló ɖɔ Izlayɛ́linu e ji gbɔn gǔdo wɛ è ɖe bɔ yě má kó fun ahwan kpɔ́n ǎ lɛ́ɛ ní kplɔ́n ahwanfunfun. Yě mɛ e é jó dó nyi to ɔ́ mɛ lɛ́ɛ wɛ nyí mɛ e ɖo Filisitɛ́ɛn lɛ́ɛ sín axɔ́súɖuto atɔ́ɔ́n lɛ́ɛ mɛ lɛ́ɛ, Kanáanu lɛ́ɛ bǐ, Sidɔ́ɔnnu lɛ́ɛ kpódó Hivíti e nɔ́ nɔ Libáan sókan mɛ lɛ́ɛ kpó, sín Baalu-Ɛmɔ́ni só ɔ́ kɔn káká yi Lɛbo-Hamáti lɛ́ɛ. Mawu Mavɔmavɔ jló ná zé togun énɛ́ lɛ́ɛ dó wa azɔ̌ ná, bó ná kpɔ́n ɖɔ Izlayɛ́li ví lɛ́ɛ ná nyi sɛ́n e émí dó nú tɔ́gbó yětɔn lɛ́ɛ gbɔn Mɔyízi jí ɔ́ a jí. Énɛ́ ɔ́ wú wɛ Izlayɛ́li ví lɛ́ɛ nɔ Kanáanu lɛ́ɛ, Hitíti lɛ́ɛ, Amɔliti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó tɛ́ntin. Yě nɔ́ da asi ɖo togun énɛ́ lɛ́ɛ mɛ; yě nɔ́ sɔ́ vǐ yětɔn lɛ́ɛ da nú yě, lobo nɔ sɛn vodún yětɔn lɛ́ɛ. Izlayɛ́li ví lɛ́ɛ wa nǔ e ma nyɔ́ Mawu Mavɔmavɔ nukún mɛ ǎ é; yě wɔn Mawu Mavɔmavɔ, Mawu yětɔn bó nɔ́ sɛn vodún Baalu lɛ́ɛ kpó vodún Acela lɛ́ɛ kpó. Mawu Mavɔmavɔ sin xomɛ dó yě bó jó yě nú axɔ́sú Mɛzopotamíi tɔn Kucáni-Hliceatayímu, bɔ yě nɔ acɛ tɔn mɛ xɔ xwe tántɔn. Énɛ́ ɔ́, yě sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí, bɔ Mawu Mavɔmavɔ sɛ́ Ɔtiniyɛ́li dó nú é na yi hwlɛ́n yě; Ɔtiniyɛ́li ɔ́, Kenázi ví wɛ, bó nyí Kalɛ́bu sín nɔví kpɛví. Yɛ Mawu Mavɔmavɔ tɔn wá ta nú Ɔtiniyɛ́li bɔ é húzú togun Izlayɛ́li tɔn sín gǎn. É yi ahwan fun gbé bɔ Mawu Mavɔmavɔ bló bɔ é ɖu ɖo axɔ́sú Mɛzopotamíi tɔn Kucáni-Hliceatayímu jí. Énɛ́ ɔ́, to ɔ́ mɔ vivo xɔ xwe kanɖé. Énɛ́ ɔ́ gúdo ɔ́, Ɔtiniyɛ́li Kenázi ví ɔ́ kú. Izlayɛ́li ví lɛ́ɛ lɛ́ wa nǔ e ma nyɔ́ Mawu Mavɔmavɔ nukún mɛ ǎ é. Énɛ́ ɔ́ wú wɛ Mawu Mavɔmavɔ dɔn axɔ́sú Mɔwabu tɔn Eglɔ́ni dó yě jí. Eglɔ́ni ɖó gbě kpɔ́ xá Amumɔ́ɔ ví lɛ́ɛ kpó Amalɛ́ki ví lɛ́ɛ kpó, bó ná yi tɔ́n ahwan Izlayɛ́li ví lɛ́ɛ. Yě yǐ Jeliko, děkan toxo ɔ́. Izlayɛ́li ví lɛ́ɛ nɔ axɔ́sú Eglɔ́ni sín acɛ mɛ xɔ xwe afɔtɔn-nukún-atɔn. Yě wá sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí, bɔ é sɛ́ Ehúdi dó nú é ná yi hwlɛ́n yě; Ehúdi ɔ́, amyɔnɔ wɛ; Gela ví wɛ, bó jɔ ɖo akɔta Bɛnjamɛ́ɛ tɔn mɛ. Izlayɛ́li ví lɛ́ɛ sɛ́ Ehúdi dó axɔ́sú Mɔwabu tɔn Eglɔ́ni gɔ́n, nú é ná yi zé kuzú n'i. Ehúdi bló hwǐ ɖíɖá nuwenɔ ɖokpó, bó sɔ́ hwlá dó avɔ glɔ́ ɖo ɖisíxwé; hwǐ ɔ́ ga tɔn ná yi mɛ̌tlu vlɔ́ mɔ̌. Énɛ́ ɔ́, é zé kuzú ɔ́ yi jó nú Eglɔ́ni; Eglɔ́ni ɔ́, nya ɖé wɛ, bó kló ɖésú. Ée é zé kuzú ɔ́ jó ɔ́, é kpó mɛ e hɛn kuzú ɔ́ lɛ́ɛ kpó ɖidó. Ée yě jɛ vodún e è sɔ awǐnnya dó lí ná lɛ́ɛ kɔn, ɖo Gilugalu kpá ɔ́, Ehúdi lɛ́ kɔ bó wá yi ɖɔ nú axɔ́sú ɔ́ ɖɔ: “Sɛ́mɛɖó, un ɖó wɛn ɖé bó ná dó we ɖo kpá.” Bɔ axɔ́sú ɔ́ ɖɔ nú mɛsɛntɔ́ tɔn lɛ́ɛ ɖɔ yě ní ná tɛn émí, bɔ yě bǐ tɔ́n. Xɔ tɔn fífá e è sɔ́ ɖó vo n'i ɖo xɔ ta ɔ́ mɛ wɛ é ɖe, ɖo ayǐjínjɔ́n; Ehúdi ka sɛ yi gɔ̌n tɔn bó ɖɔ n'i ɖɔ: “Mawu wɛ dó wɛn mì ɖɔ má wá dó we”. Bɔ axɔ́sú ɔ́ sí te sín zinkpo tɔn jí. Énɛ́ ɔ́, Ehúdi zé amyɔlɔ tɔn dó dɔn hwǐ e é sɔ́ dó avɔ glɔ́ ɖo ɖisí tɔn xwé ɔ́ ná, bó lun dó adɔ mɛ nú axɔ́sú ɔ́. Hwǐ ɔ́ kpó ta tɔn kpó byɔ́ lan tɔn mɛ bó bú bǐ bɔ jǒ nyɛ sú i ɖó Ehúdi jó dó nyi lan tɔn mɛ. Énɛ́ ɔ́ gúdo ɔ́, Ehúdi dó gan hɔn lɛ́ɛ mɛ lobo tɔ́n gbɔn xɔ gúdo. Ée é yi ɔ́, mɛsɛntɔ́ lɛ́ɛ wá, bó wá mɔ ɖɔ hɔn lɛ́ɛ ɖo súsú. Ée yě mɔ mɔ̌ ɔ́, yě lin ɖɔ afɔjí yi wɛ axɔ́sú ɔ́ ná kó ɖe ɖo xɔ ɔ́ mɛ. Yě nɔ te káká bɔ agbɔ̌ kpé yě; lo ɔ́, axɔ́sú ɔ́ ɖo hɔn lɛ́ɛ hun wɛ ǎ jɛ́n wɛ. Énɛ́ ɔ́, yě zě cávi ɔ́, bó hun hɔn lɛ́ɛ yě ɖésúnɔ, lobo mɔ ɖɔ axɔ́sú yětɔn kó kú, bó ɖo dlɛ̌ndlɛ́n ɖo kɔ́ mɛ. Hwenu e yě ɖo te nɔ kpɔ́n gǎn yětɔn wɛ ɔ́, Ehúdi ko hɔn yi; é zɛ vodún e è zě awǐnnya dó lí ná lɛ́ɛ wú, bó hɔn wá cí Seyíla wǔyɛ́yɛ́ afɔyɛ́yɛ́. Ée é jɛ tɛn énɛ́ ɔ́ mɛ tlóló ɔ́, é kún lanzo ɖo Eflayímu sókan ɔ́ mɛ, bó ná sɛ Izlayɛ́li ví lɛ́ɛ kplé; ée yě wá ɔ́, é nɔ nukɔn nú yě bɔ yě jɛ te sín só ɔ́ jí. É ɖɔ nú yě ɖɔ: “Mi xwedó mì, ɖó Mawu Mavɔmavɔ ko jó kɛntɔ́ mitɔn Mɔwabunu lɛ́ɛ nú mi.” Izlayɛ́li ví lɛ́ɛ ká xwedó Ehúdi, bó yí fí e è nɔ dó asá Judɛ́ɛn tɔ ɔ́ ɖe ɔ́ sín Mɔwabunu lɛ́ɛ sí, lobo lɔn bɔ mɛ ɖěbǔ gbɔn tɔ ɔ́ mɛ dín ǎ. Hwenɛ́nu ɔ́, Mɔwabunu e yě hu lɛ́ɛ yi děgba we afɔwó (10.000) mɔ̌. Yě mɛ e yě hu lɛ́ɛ bǐ wɛ nyí súnnu glegbenu bó kpan akɔ́n. É sɔ́ kpo mɛ ɖěbǔ ɖo gbɛ ǎ. Bɛ́ sín hwenɛ́nu ɔ́, Mɔwabunu lɛ́ɛ gbɔ bó hwíhwɛ́ yěɖée dó Izlayɛ́li ví lɛ́ɛ glɔ́, bɔ to ɔ́ mɔ vivo xɔ xwe kanwe (80). Camugáa, Anáti ví ɔ́ wɛ ɖyɔ́ Ehúdi. É zé kpo nu xwíɖíxwíɖí ɖé dó hu Filisitɛ́ɛn nǔwɔntɔn (600) ná, bɔ é lɔmɔ̌ hwlɛ́n togun Izlayɛ́li tɔn ɔ́. Ée Ehúdi kú gúdo ɔ́, Izlayɛ́li ví lɛ́ɛ lɛ́ wa nǔ e ma nyɔ́ Mawu Mavɔmavɔ nukún mɛ ǎ é. Mawu Mavɔmavɔ ka jó yě nú Yavíni, Kanáa xɔ́sú lɛ́ɛ ɖokpó. Hasɔ́ɔ wɛ é nɔ nɔ; ahwangán tɔn nɔ nyí Sisela, bó nɔ́ nɔ Halocɛ́ti-Goyímu. Yavíni ɖó ahwankɛkɛ́ví gannɔ afɛnɛ kanwe ko (900), bó ɖo acɛ gannaganna kpa nú Izlayɛ́li ví lɛ́ɛ wɛ sín xwe ko ɖíe. Énɛ́ ɔ́, Izlayɛ́li ví lɛ́ɛ sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí. Gbeyíɖɔ Mawu tɔn Debola, Lapidɔ́ti sín asi ɔ́, wɛ nyí hwɛɖɔtɔ́ hwenɛ́nu ɖo Izlayɛ́li. É nɔ́ jínjɔ́n hwɛɖiɖɔ yí ɖo dětín e è nɔ ylɔ́ ɖɔ Debola tɔn ɔ́ sá ɖo Hlama kpó Betɛ́li kpó tɛ́ntin, ɖo Eflayímu sókan ɔ́ mɛ; bɔ Izlayɛ́li ví lɛ́ɛ nɔ yi gɔ̌n tɔn nú é ná ɖɔ hwɛ nú yě. É wá su gbe ɖokpó, bɔ Debola sɛ́ mɛ dó ɖɔ è nǐ yi ylɔ́ Balaaki, Avinɔwamu Kedɛ́ci-Nɛfutalinu ɔ́ sín ví ɔ́ wá; éé Balaaki wá ɔ́, Debola ɖɔ n'i ɖɔ, xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe, é ɖɔ “Cyán súnnu děgba we afɔwó (10.000) ɖo Nɛfutali kpó Zabulɔ́ɔn kpó sín akɔta lɛ́ɛ mɛ, bó kplá yě yi Tabɔ́ɔ só tá. Un ná bló bɔ Sisela ahwangán Yavíni tɔn ɔ́ ná bɛ́ ahwankɛkɛ́ví tɔn lɛ́ɛ bó ná kplá ahwanfuntɔ́ tɔn lɛ́ɛ, bɔ yě ná wǎ tɔsisa Kicɔ́ni tɔn ɔ́ tó, bó ná tɔ́n ahwan we. Un ka ná jó e nú we.” Balaaki ka yí gbe nú Debola ɖɔ: “Nú a nǎ xwedó mì ɔ́, un ná yi; amɔ̌, nú a ma ná xwedó mì ǎ ɔ́, un ná yi ǎ.” Ée é ɖɔ mɔ̌ ɔ́, Debola ɖɔ n'i ɖɔ: “Hǔn un ná xwedó we. Amɔ̌, ahwangbénu élɔ́ e a xwe ɔ́, é ná nyí susu ɖěbǔ nú we ǎ, ɖó nyɔ̌nu ɖé wɛ Mawu Mavɔmavɔ ná jó Sisela ná.” Bɔ Debola kpó Balaaki kpó yi Kedɛ́ci. Balaaki ylɔ́ Nɛfutali kpó Zabulɔ́ɔn kpó sín akɔta lɛ́ɛ kplé; súnnu děgba we afɔwó (10.000) yí gbe bó ná xwedó e yi ahwangbénu, bɔ Debola ɖésú xwedó e yi. Hebɛ́ɛ Keni ví ɔ́ ɖo Kedɛ́ci kpá. Đ'ayǐ ɔ́, é kó klán xá nɔví tɔn Keni ví ɖě lɛ́ɛ. Mɔyízi sín asitɔ́ Hobabu wɛ ka dó kún yětɔn. Hebɛ́ɛ ɔ́ yi bló goxɔ tɔn nyi cɛ́nitín ɖé kpá ɖo Saanánimu. Sisela se ɖɔ Balaaki Avinɔwamu ví ɔ́ yi Tabɔ́ɔ só jí. Énɛ́ ɔ́, é sɛ ahwankɛkɛ́ví tɔn afɛnɛ kanwe ko (900) lɛ́ɛ kpó gbɛtɔ́ tɔn lɛ́ɛ kpó kplé ɖo Halocɛ́ti-Goyímu; énɛ́ ɔ́ gúdo ɔ́, yě gosín fínɛ́ bó yi tɔsisa Kicɔ́ni tɔn ɔ́ tó. Bɔ Debola ɖɔ nú Balaaki ɖɔ: “Jɛ ali! Égbé wɛ Mawu Mavɔmavɔ ná jó Sisela nú we. Mawu Mavɔmavɔ ɖésú ɖo nukɔn towe.” Balaaki jɛ te sín Tabɔ́ɔ só jí, bó ɖo nukɔn nú ahwanfuntɔ́ tɔn děgba we afɔwó (10.000) lɛ́ɛ. É tɔ́n ahwan Sisela bɔ Mawu Mavɔmavɔ bló bɔ Sisela hɔn ɖo nukɔn tɔn, é kpó ahwankɛkɛ́ví tɔn lɛ́ɛ bǐ kpó, kpódó ahwanfuntɔ́ tɔn lɛ́ɛ bǐ kpó. Sisela jó ahwankɛkɛ́ví tɔn dó, bó zɔn afɔ bó hɔn. Balaaki jɛ ahwankɛkɛ́ví lɛ́ɛ kpó ahwanfuntɔ́ kɛntɔ́ yětɔn lɛ́ɛ kpó gúdo káká yi Halocɛ́ti-Goyímu. È hu ahwanfuntɔ́ Sisela tɔn lɛ́ɛ; é sɔ́ kpo mɛ ɖokpó géé ǎ. Sisela ka zɔn afɔ bó hɔn, bó kán wezun káká yi Yaɛ́li ɖo Hebɛ́ɛ Keni ví ɔ́ sín asi sín goxɔ mɛ, ɖó Hebɛ́ɛ Keni ví ɔ́ sín xwédo kpó axɔ́sú Hasɔ́ɔ tɔn Yavíni sín xwédo kpó ɖo ganjí. Yaɛ́li tɔ́n bó wá Sisela nukɔn, bó ɖɔ n'i ɖɔ: “Gǎn ce, byɔ́ fí! Byɔ̌ xɔ mɛ. Ma ɖi xɛsi ó.” Bɔ Sisela byɔ́ xɔ ɔ́ mɛ, bɔ é sɔ́ ɛ hwlá ɖó avɔ ɖé glɔ́. Sisela ɖɔ nú Yaɛ́li ɖɔ: “Kɛnklɛ́n, nǎ sin kpɛɖé mì má nu ɖó kɔ xú mì.” Yaɛ́li ka hun anyǔglo e mɛ nyibúnɔ́sin ɖe ɔ́, bó ná ɛ bɔ é nu, bɔ é lɛ́ dɔn avɔ ɔ́ cyɔ́n n'i. É lɛ́ ɖɔ n'i ɖɔ: “Nɔ goxɔ ɔ́ sín ali nu. Ényí è wǎ kanbyɔ́ we ɖɔ mɛ ɖé ɖo fí a jí ɔ́, a nǎ gbɛ̌”. Nǔ cikɔ nú Sisela, bɔ é dɔ́ amlɔ bǐ gbídígbídí. Yaɛ́li ka sɔ́ zǔn kpó goxɔ ɔ́ sín só ɖokpó kpó, bó wa dɛ̌dɛ̌ bó sɛ yá ɛ, bó xwe só ɔ́ dó ta tɔn mɛ bɔ goxɔ tín ɔ́ xo ta tɔn zlɛ́ byɔ́ ayǐkúngban lanmɛ. Bɔ Sisela kú. Énɛ́ ɔ́ gúdo ɔ́, Balaaki e ɖo Sisela nya wɛ ɔ́ wá, Yaɛ́li ka tɔ́n wá kpé e, bó ɖɔ n'i ɖɔ: “Wǎ má xlɛ́ mɛ e ba wɛ a ɖe ɔ́ we.” Balaaki byɔ́ goxɔ ɔ́ mɛ, bó mɔ Sisela sín cyɔ ɖo kɔ́ mɛ, bɔ só ɔ́ xo ta tɔn zlɛ́. Gbe énɛ́ ɔ́ gbe ɔ́, Mawu blǒ bɔ Izlayɛ́li ví lɛ́ɛ ɖu ɖo Yavíni Kanáa xɔ́sú ɔ́ jí. Yě jɛ gǒ mɛ nú Yavíni káká bó wá sú kún tɔn dó. Gbe nɛ́ ɔ́ gbe ɔ́, Debola kpó Balaaki Avinɔwamu ví ɔ́ kpó ji han élɔ́: Mɛ ɖokpó ɖokpó ɖo gbesisɔ mɛ ɖo Izlayɛ́li bó ná fun ahwan; togun ɔ́ yí gbe nú ahwanfunfun: Mi bo dó kú nú Mawu Mavɔmavɔ. Axɔ́sú lɛ́ɛ mi, gǎnhúnǔtɔ́ lɛ́ɛ mi, mi ɖótó ganjí. Un ná ji han dó kpa susu nú Mawu Mavɔmavɔ, Mawu Izlayɛ́li tɔn ɔ́. Mawu Mavɔmavɔ, hwenu e a gosín Edɔ́mu wá ɔ́, hwenu e a jɛ te sín Seyíi só lɛ́ɛ jí ɔ́, ayǐkúngban jɛ wǔ dán jí. Akpɔ́kpɔ́ lɛ́ɛ húzú sin, jǐ ɖaxó ɖé ja sín jǐxwé; só lɛ́ɛ sísɔ́ ɖo nukɔn towe, Mawu Mavɔmavɔ Sinayíi só ɔ́ tɔn, Mawu Izlayɛ́li tɔn. Đo Camugáa Anáti ví ɔ́ hwenu ɔ́, ɖo Yaɛ́li hwenu ɔ́, mɛɖé sɔ́ nɔ gbɔn ali ɖaxó ɖaxó lɛ́ɛ jí ǎ; mɛ ɖé xwe tomɛ ɔ́, é nɔ́ gbɔn yɛhwín lɛ́ɛ. Gǎn ɖě sɔ́ tíin ǎ; gǎn ɖěbǔ sɔ́ tíin ɖo Izlayɛ́li ǎ, káká bɔ nyɛ Debola wá ɖe nyɛɖée xlɛ́, bó cí nɔ ɖɔhun nú Izlayɛ́li. Togun ɔ́ ɖɔ émí ná sɛn vodún lɛ́ɛ, tlóló kpowun ɔ́, ahwan tɔ́n. Lo ɔ́, afɔ wɛ nɔ nyɔ́ bɔ è nɔ mɔ gǎglónú ɖokpó ɖo Izlayɛ́li afɔ wɛ nɔ nyɔ́ bɔ è nɔ mɔ hwǎn ɖokpó nú gbɛtɔ́ adɔ̌kpo we (40.000) ɖo Izlayɛ́li. Ayi ce ɖo ahwangán Izlayɛ́li tɔn lɛ́ɛ jí, ayi ce ɖo mɛ e yí gbe ɖo togun ɔ́ mɛ, bó ná fun ahwan lɛ́ɛ jí. Mi bo dó kú nú Mawu Mavɔmavɔ. Mi mɛ e xá tócí asi wěwé jí lɛ́ɛ, mi mɛ e jínjɔ́n akwɛ́núvɔ kpinkpɛn lɛ́ɛ jí lɛ́ɛ, mi mɛ e ɖo zɔnlin ɖi wɛ ɖo ali jí lɛ́ɛ, mi ní ɖɔ nǔ e Mawu Mavɔmavɔ wa lɛ́ɛ. Mɛ e ɖo sinnutɛn lɛ́ɛ kpá, bó ɖo sin má nú mɛ wɛ lɛ́ɛ ɖo azɔ̌ ɖagbe e Mawu Mavɔmavɔ wa lɛ́ɛ kpa wɛ; azɔ̌ ɖagbe e é wa nú Izlayɛ́li sín gǎn lɛ́ɛ é. Énɛ́ ɔ́, togun ɔ́ wá hɔntogbó toxo ɔ́ tɔn lɛ́ɛ jí. Debola, fɔ́n bó bló nǔɖé; sí te, dǒ han e è nɔ ji ɖo ahwangbénu lɛ́ɛ ɖokpó. Balaaki Avinɔwamu ví, sí te; kplá ahwankannumɔ towe lɛ́ɛ wá. Énɛ́ ɔ́, mɛ e kpo ɖo gbɛ lɛ́ɛ yi jɛ gǎn lɛ́ɛ jí; togun Mawu Mavɔmavɔ tɔn ɔ́ kplé ɖo gɔ̌n tɔn; yě ɖo gbesisɔ mɛ bó ná fun ahwan. Mɛ e ɖu ɖo Amalɛ́ki ví lɛ́ɛ jí lɛ́ɛ gosín Eflayímu wá. Bɛnjamɛ́ɛ xwedó yě byɔ́ ahwanfuntɔ́ yětɔn lɛ́ɛ mɛ. Makíi sín hɛ̌nnu ɔ́ ná togán lɛ́ɛ. Bɔ Zabulɔ́ɔn sín akɔta ɔ́ ná ahwangán lɛ́ɛ. Gǎn e ɖo akɔta Isakáa tɔn mɛ lɛ́ɛ yi gɔ́ nú Debola. Isakáa ka ɖo gbejí nú Balaaki; é hwlɛ́n dó bó jɛ gǔdo tɔn ɖo ayǐkúngban wɛnjɛ ɔ́ jí. Lo ɔ́, è ɖo nǔ dɔn wɛ magbokɔ ɖo Hwlibɛ́ni sín hɛ̌nnu lɛ́ɛ mɛ. Étɛ́wú wɛ mi ka cí gbɔ̌kpó lɛ́ɛ kpá, bó ɖo tó xɔ́ gbɔ̌nyitɔ́ e ɖo gbɔ̌ yětɔn lɛ́ɛ ylɔ́ wɛ lɛ́ɛ wɛ? Ɛɛn! È ɖo nǔ dɔn wɛ magbokɔ ɖo Hwlibɛ́ni sín hɛ̌nnu lɛ́ɛ mɛ. Đo Galadi, ɖo Judɛ́ɛn tɔ ɔ́ sín zǎnzǎnhwe jí ɔ́, akɔta lɛ́ɛ sɛ tɛn ǎ. Akɔta Dan tɔn ɔ́ cí tɔjíhún tɔn lɛ́ɛ kpá; akɔta Acɛ́ɛ tɔn ɔ́ lɔmɔ̌ nɔ xuta, ɖo tɔjíhúnglíntɛn lɛ́ɛ kpá. Zabulɔ́ɔn sín mɛ lɛ́ɛ ɔ́, ɖi Nɛfutali sín mɛ lɛ́ɛ ɖɔhun ɔ́, yědɛɛ lɛ́ɛ yí gbe bó ná li za xá kú ɖo ahwangbénu. Axɔ́sú e nyí kɛntɔ́ yětɔn lɛ́ɛ ɔ́, axɔ́sú Kanáa tɔn lɛ́ɛ wɛ, yě tɔ́n ahwan Tanaki ɖo tɔjɔtɛn Mɛgido tɔn lɛ́ɛ kpá; lo ɔ́, yě mɔ akwɛ́ bɛ́ ǎ. Sunví lɛ́ɛ lɔmɔ̌ fun ahwan ɔ́ sín jǐxwé; yě nɔ fí e yě nɔ́ gbɔn lɛ́ɛ bó fun ahwan xá Sisela. Tɔ e ko ɖo sisa wɛ tɛgbɛ ɔ́, Kicɔ́ni tɔ ɔ́, kplɔ́ kɛntɔ́ lɛ́ɛ yi. Mǐ ní zun zɔnlin kpó ta syɛ́nsyɛ́n kpó yi ahwangbénu. Énɛ́ ɔ́, sɔ́ lɛ́ɛ ɖo lǐnlɔ́n wá yi wɛ, bɔ afɔ yětɔn lɛ́ɛ nɔ zín ayǐkúngban ɔ́. Wɛnsagun Mawu Mavɔmavɔ tɔn ɔ́ ɖɔ: “Mi dó nu Mɛlɔzu toxo ɔ́, mi dó nu i, mi dó nu toxo ɔ́ mɛ nu lɛ́ɛ; ɖó yě wǎ dó alɔ Mawu Mavɔmavɔ ǎ; yě wá gɔ́ nú ahwanfuntɔ́ syɛ́nsyɛ́n lɛ́ɛ, bó fun ahwan ǎ. Yaɛ́li, Hebɛ́ɛ Keni ví ɔ́ sín asi ɔ́, nǔ ní nyɔ́ n'i ɖo nyɔ̌nu lɛ́ɛ bǐ mɛ. Ɛɛn, ɖo nyɔ̌nu e ɖo goxɔ mɛ lɛ́ɛ bǐ mɛ ɔ́, Mawu ní kɔn nyɔ̌ná dó jǐ tɔn. Sisela byɔ́ ɛ sin, bɔ é ná ɛ nyibúnɔ́sin; é ná ɛ nyibúnɔ́sin ɖagbe ɔ́ dó kɔ́fu ɖagbe ɖagbe ɖé mɛ. Énɛ́ ɔ́ gúdo ɔ́, é zé alɔ tɔn ɖokpó dó zé goxɔ só, bo zé alɔ tɔn ɖě ɔ́ dó sɔ́ azɔ̌watɔ́ lɛ́ɛ sín zǔn, bó xwe só ɔ́ dó taká mɛ nú Sisela. É fɛ́n ahɔnká ɛ. É tɔ́n ta ɛ. Sisela yi do ɖo Yaɛ́li nukɔn; é hɔ́ jɛ ayǐ; é ɖo dlɛ̌ndlɛ́n ɖo kɔ́ mɛ ɖo afɔ tɔn lɛ́ɛ kpá; é yi do, é hɔ́ jɛ ayǐ, é kú. Hwenɛ́nu ɔ́, nɔ tɔn ka ɖo ali kpɔ́n n'i wɛ gbɔn flɛtɛ́li nu, é ɖo ali kpɔ́n n'i wɛ gbɔn ganja lɛ́ɛ nu, bó sú xó ɖɔ: ‘Nɛ̌ ka gbɔn bɔ ahwankɛkɛ́ví tɔn sín wǐwá ɖo lǐnlín wɛ? Nɛ̌ ka gbɔn bɔ ahwankɛkɛ́ví tɔn lɛ́ɛ ɖo dɛ̌dɛ̌ zɔn wɛ mɔ̌?’ Nyɔ̌nu nukúnɖéjí e nɔ́ nɔ kpɔ́ xá ɛ lɛ́ɛ ɔ́, mɛ e nyɔ́ nǔ i hú yě bǐ ɖo yě mɛ ɔ́ yí gbe n'i ɖɔ: ‘Ahwanfuntɔ́ lɛ́ɛ wɛ ná ko ɖo nǔ e yě mɔ ɖo to e yě gba lɛ́ɛ mɛ lɛ́ɛ bɛ́ wɛ; yě ná ko ɖo nǔ lɛ́ɛ má wɛ; ahwanfuntɔ́ ɖokpó ɖokpó ná yí ɖyɔ̌vǐ ɖokpó abǐ we. Sisela na yí avɔ e è dǒ ahǒ bó kó lɛ́ɛ. Mɛ e ɖuɖéjí ɔ́ ná yí avɔ e è zě kan tɛnmɛ tɛnmɛ dó kó ná ɔ́ dó blá kɔ ná.’ Mawu Mavɔmavɔ, kɛntɔ́ towe lɛ́ɛ bǐ ní kú lě e Sisela kú gbɔn é; lo ɔ́, xɔ́ntɔn towe lɛ́ɛ ní cí hwe ɖɔhun. Hwe e tɔ́n kpó wěziza tɔn bǐ kpó é ɖɔhun!” To ɔ́ nɔ vivo mɛ xɔ xwe kanɖé. Izlayɛ́li ví lɛ́ɛ lɛ́ wa nǔ e má nyɔ́ Mawu Mavɔmavɔ nukún mɛ ǎ é. Énɛ́ ɔ́ wú wɛ Mawu Mavɔmavɔ jó yě nú Madiáani ví lɛ́ɛ xɔ xwe tɛ́nwe. Madiáani ví lɛ́ɛ dó ya nú Izlayɛ́li ví lɛ́ɛ ɖésú. Izlayɛ́li ví lɛ́ɛ nɔ́ hɔn hwlá cí do lɛ́ɛ mɛ, sónu lɛ́ɛ mɛ kpó fí e gɛ́dɛ́ ɖo só lɛ́ɛ ta lɛ́ɛ kpó, bó ná dó gló yě. Izlayɛ́li ví lɛ́ɛ dó jinukún yětɔn lɛ́ɛ hweɖěbǔnu ɔ́, Madiáani ví lɛ́ɛ kpó Amalɛ́ki ví lɛ́ɛ kpó, kpódó yě mɛ e gosín zǎnzǎnhwe jí lɛ́ɛ kpó nɔ wá tɔ́n ahwan yě. Yě nɔ́ jɛ agban ɖó ayǐkúngban Izlayɛ́li tɔn jí, bó nɔ́ vívá kún nú nǔkún yětɔn lɛ́ɛ káká yi Gaza kpá. Yě nɔ́ jó nǔɖuɖu ɖěbǔ dó nú Izlayɛ́li ví lɛ́ɛ ǎ; yě nɔ́ jó nǔ ɖěbǔ dó ǎ: gbɔ̌ oo, nyibú oo, tócí oo, yě nɔ́ jó ɖěbǔ dó ǎ. Đó yě nɔ́ ɖo yiyi wɛ kpó kanlinhwan yětɔn lɛ́ɛ kpó, kpó avɔgoxɔ yětɔn lɛ́ɛ kpó; yě nɔ́ sukpɔ́ wɛn ɖɔhun. Yě kpó lǎkúnmí yětɔn lɛ́ɛ kpó sukpɔ́ káká bɔ è sixú xa yě ǎ. Yě nɔ́ wá vun gba to ɔ́, bó nɔ́ vívá kún n'i. Énɛ́ ɔ́, Madiáani ví lɛ́ɛ dɔn Izlayɛ́li ví lɛ́ɛ dó ya mɛ káká, bɔ yě sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí. Ée Izlayɛ́li ví lɛ́ɛ byɔ́ Mawu Mavɔmavɔ ɖɔ é ní hwlɛ́n émí sín Madiáani ví lɛ́ɛ sí ɔ́, Mawu Mavɔmavɔ sɛ́ gbeyíɖɔ ɖokpó dó yě, bɔ é ɖɔ nú yě ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Un ɖe mi tɔ́n sín Ejípu, un ɖe mi tɔ́n sín kannumɔgbénu. Un hwlɛ́n mi sín Ejípunu lɛ́ɛ sí, bó hwlɛ́n mi sín mɛ e ɖo ya dó nú mi wɛ lɛ́ɛ bǐ sí; un nya yě sín nukɔn mitɔn, bo sɔ́ to yětɔn ná mi. Un ɖɔ nú mi ɖɔ nyɛ wɛ nyí Mawu Mavɔmavɔ, Mawu mitɔn; mi kún ɖó ná sɛn vodún Amɔliti e tɛ́ntin mi ɖe lɛ́ɛ tɔn lɛ́ɛ ó. Lo ɔ́, mi se tónú nú mì ǎ.’ ” Wɛnsagun Mawu Mavɔmavɔ tɔn wá gletoxo e è nɔ ylɔ́ ɖɔ Ɔfla ɔ́ mɛ. É jínjɔ́n cɛ́nitín ɖé sá; atín énɛ́ ɔ́ ɖo Yoaci e ɖo Aviɛzɛ́ɛ hɛ́nnu mɛ ɔ́ sín ayǐkúngban jí. Jedenyɔ́ɔ Yoaci ví ɔ́, ɖo jinukún só wɛ ɖo to e mɛ è nɔ li vǐwun ɖe ɔ́ mɛ, bónú Madiáani ví lɛ́ɛ ní má mɔ ɛ ó. Wɛnsagun Mawu Mavɔmavɔ tɔn wá tɔ́n dó jǐ tɔn, bó ɖɔ n'i ɖɔ: “Ahwanfuntɔ́ akowunká, Mawu Mavɔmavɔ ɖo kpɔ́ xá we!” Jedenyɔ́ɔ ɖɔ n'i ɖɔ: “Aklúnɔ ce! Ényí Mawu Mavɔmavɔ ɖo kpɔ́ xá mǐ ɔ́, nɛ̌ ká gbɔn bɔ nǔ énɛ́ lɛ́ɛ bǐ jɛ dó mǐ jí? Azɔ̌jíwǔ e sín xó tɔ́ mǐtɔn lɛ́ɛ nɔ́ ɖɔ nú mǐ, bó nɔ́ ɖɔ Mawu Mavɔmavɔ ɖe émí tɔ́n sín Ejípu ɔ́, fítɛ́ nǔ énɛ́ lɛ́ɛ bǐ ká ɖe? È nǎ ɖɔ nǔgbó ɔ́, Mawu Mavɔmavɔ jó mǐ dó; é jó mǐ nú Madiáani ví lɛ́ɛ.” Mawu Mavɔmavɔ ka lílɛ́ kpan nukɔn Jedenyɔ́ɔ bó ɖɔ n'i ɖɔ: “Yi hwlɛ́n Izlayɛ́li ví lɛ́ɛ sín Madiáani ví lɛ́ɛ sí kpó hlɔ̌nhlɔ́n e a ɖǒ ɔ́ kpó; nyɛ wɛ sɛ́ we dó.” Jedenyɔ́ɔ ka ɖɔ n'i ɖɔ: “Aklúnɔ ce, kɛnklɛ́n! Nɛ̌ un ná sixú hwlɛ́n Izlayɛ́li ví lɛ́ɛ gbɔn? Hɛ̌nnu ce wɛ nyí hɛ̌nnu e ɖo gǔdo bǐ ɖo akɔta Manasée tɔn ɔ́ mɛ é; nyɛ wɛ ka nyí yɔkpɔ́vú bǐ ɖo xwédo ce mɛ.” Énɛ́ ɔ́, Mawu Mavɔmavɔ ɖɔ n'i ɖɔ: “Un ná ɖo kpɔ́ xá we, énɛ́ ɔ́, a nǎ ɖu ɖo Madiáani ví lɛ́ɛ jí gbɛtɔ́ ɖokpó géé wɛ yě nyǐ ɖɔhun.” Jedenyɔ́ɔ ɖɔ n'i ɖɔ: “Ényí nǔ ce nyɔ́ nukún towe mɛ nǔgbó hǔn, nǎ xlɛ́ ɖé mì nú má dó tunwun ɖɔ hwi Mawu Mavɔmavɔ ɔ́ wɛ ɖo xó ɖɔ nú mì wɛ; ma yi cóbónú má lɛ́ kɔ wá kpó nǔníná e un jló ná zé nú we ɔ́ kpó ó.” Mawu Mavɔmavɔ ka ɖɔ n'i ɖɔ: “Un ná nɔ fí káká bɔ a nǎ lɛ́ kɔ wá.” Jedenyɔ́ɔ ka yi ɖa gbɔ̌ví ɖokpó kpó wɔ̌xúxú e mɛ è ma dó tɔ́n ǎ é kpó; linfín kilóo gban wɛ é sɔ́ dó ɖa wɔ̌xúxú ɔ́ ná. É zé lan ɔ́ dó xasun ɖokpó mɛ, bó kɔn nǔsúnnú ɔ́ dó zɛ̌n ɖokpó mɛ; é zé bǐ wá cɛ́nitín ɖé sá, bó sɔ́ nú wɛnsagun Mawu tɔn ɔ́. Wɛnsagun ɔ́ ɖɔ n'i ɖɔ: “Yi zé lan ɔ́ kpó wɔ̌xúxú lɛ́ɛ kpó ɖó awǐnnya énɛ́ ɔ́ jí, bó kɔn nǔsúnnú ɔ́ dó ta ná.” Jedenyɔ́ɔ bló nǔ e wɛnsagun ɔ́ ɖɔ ɔ́. Énɛ́ ɔ́, wɛnsagun Mawu Mavɔmavɔ tɔn ɔ́ dlɛ́n alɔ, bɔ kpo e ɖo alɔ tɔn mɛ ɔ́, é zé nuvínu tɔn ɖó lan ɔ́ kpó wɔ̌xúxú lɛ́ɛ kpó wú. Ée é bló mɔ̌ ɔ́, myɔ tɔ́n sín awǐnnya ɔ́ mɛ, bó dó lan ɔ́ kpó wɔ̌xúxú lɛ́ɛ kpó zo. Énɛ́ ɔ́ gúdo ɔ́, wɛnsagun ɔ́ bú. Jedenyɔ́ɔ mɔ ɖɔ wɛnsagun Mawu Mavɔmavɔ tɔn wɛ, bó sú xó ɖɔ: “Aklúnɔ, Mawu Mavɔmavɔ! Heelú mì. Un mɔ wɛnsagun towe gannaganna!” Lo ɔ́, Mawu Mavɔmavɔ ɖɔ n'i ɖɔ: “Fífá ní nɔ kpɔ́ xá we; ma ɖi xɛsi ó; a nǎ kú ǎ.” Énɛ́ ɔ́, Jedenyɔ́ɔ bló vɔ̌sákpe ɖokpó ɖó fínɛ́ nú Mawu Mavɔmavɔ, bó ylɔ́ fí énɛ́ ɔ́ ɖɔ: “Mawu Mavɔmavɔ nɔ ná fífá mɛ.” Vɔ̌sákpe énɛ́ ɔ́ kpo ɖo fínɛ́ káká jɛ din ɖo Ɔfla, gletoxo hɛ̌nnu Aviɛzɛ́ɛ tɔn ɔ́ tɔn mɛ. Zǎn énɛ́ ɔ́ mɛ ɔ́, Mawu Mavɔmavɔ ɖe gbe nú Jedenyɔ́ɔ ɖɔ: “Zě nyibúsú tɔ́ towe tɔn ɔ́, nyibúsú wegɔ́ ɔ́ e ɖó xwe tɛ́nwe é; gba vɔ̌sákpe Baalu tɔn e tɔ́ towe ɖó ɔ́, bó sɛ́n vodún Acela bócyɔ e ɖo vɔ̌sákpe ɔ́ kpá ɔ́ síin. Énɛ́ ɔ́ gúdo ɔ́, a nǎ bló vɔ̌sákpe ɖagbe ɖagbe ɖokpó ɖó só kpɛví élɔ́ jí nú Mawu Mavɔmavɔ, Mawu towe. A nǎ zé nyibúsú ɔ́ dó sá vɔ̌ e è nɔ dó zo ɔ́ ná; bǒcyɔ e a sɛ́n ɔ́ wɛ a nǎ dó flɔ́ myɔ ɔ́ ná.” Jedenyɔ́ɔ cyán mɛ wǒ ɖo mɛsɛntɔ́ tɔn lɛ́ɛ mɛ, bó yi bló nǔ e Mawu Mavɔmavɔ ɖɔ n'i é. Lo ɔ́, zǎn mɛ wɛ é bló nǔ énɛ́ lɛ́ɛ; é glá bó bló ɖo kéze ǎ, ɖó é ɖo xɛsi ɖi nú hɛ̌nnu tɔn kpó mɛ e ɖo toxo ɔ́ mɛ lɛ́ɛ kpó wɛ. Ée mɛ e ɖo toxo ɔ́ mɛ lɛ́ɛ fɔ́n zǎnzǎn ɔ́, yě mɔ ɖɔ è gba vɔ̌sákpe Baalu tɔn ɔ́, bó sɛ́n vodún Acela bócyɔ e ɖo akpá tɔn ɔ́ síin, lobo zé nyibúsú ɖokpó dó sá vɔ̌ e è nɔ dó zo ɔ́ ná ɖo vɔ̌sákpe yɔ̌yɔ́ ɔ́ jí. Yě nɔ́ kanbyɔ́ yěɖée ɖɔ: “Mɛ̌ wɛ bló mɔ̌?” Yě hwlɛ́n awɔntín ayǐ, yě ba do ná bó mɔ ɖɔ Jedenyɔ́ɔ, Yoaci ví ɔ́ wɛ. Énɛ́ ɔ́, yě ɖɔ nú Yoaci ɖɔ: “Kplá vǐ towe wá nú mǐ bónú mǐ ná hu i, ɖó é gba vɔ̌sákpe Baalu tɔn, bó sɛ́n vodún Acela bócyɔ e ɖo akpá tɔn é.” Yoaci ɖɔ nú mɛ e fɔ́n gǔ dó jǐ tɔn lɛ́ɛ bǐ ɖɔ: “Midɛɛ lɛ́ɛ wɛ ná jɛ ahwan Baalu jí a? Midɛɛ lɛ́ɛ wɛ ná hwlɛ́n ɛ gán a? Mɛ ɖěbǔ jɛ ahwan jǐ tɔn ɔ́, è nǎ hu mɛ ɔ́ sɔ zǎnzǎn. Ényí Baalu ɔ́ hú gǎn nǔ bǐ nǔgbó hǔn, ní hwlɛ́n éɖée, ɖó vɔ̌sákpe tɔn wɛ è gba.” Bɛ́ sín hwenɛ́nu ɔ́, è nɔ ylɔ́ Jedenyɔ́ɔ ɖɔ Yelubáalu; tínmɛ tɔn wɛ nyí Baalu ní hwlɛ́n éɖée; xó e Yoaci ɖɔ bó ɖɔ Baalu ní hwlɛ́n éɖée, ɖó vɔ̌sákpe tɔn wɛ è gba ɔ́ wú wɛ è nɔ ylɔ́ ɛ ɖɔ mɔ̌. Madiáani ví lɛ́ɛ, Amalɛ́ki ví lɛ́ɛ kpó yě mɛ e nɔ gosín zǎnzǎnhwe jí lɛ́ɛ kpó sɛ yěɖée kplé; yě dó asá Judɛ́ɛn tɔ ɔ́, bó jɛ agban ɖó ayǐkúngban wɛnjɛ e ɖo Izleyɛ́li ɔ́ jí. Lo ɔ́, Yɛ Mawu Mavɔmavɔ tɔn wá ta nú Jedenyɔ́ɔ, bɔ é kún lanzo bó ylɔ́ mɛ e ɖo hɛ̌nnu Aviɛzɛ́ɛ tɔn mɛ lɛ́ɛ, nú yě ná xwedó e. É sɛ́ mɛ dó Manasée yíkúngban ɔ́ bǐ jí, bónú yě ná yi ylɔ́ mɛ e ɖo akɔta ɔ́ mɛ lɛ́ɛ nú yě lɔ ná xwedó e. É lɛ́ sɛ́ mɛ dó akɔta Acɛ́ɛ tɔn mɛ, Zabulɔ́ɔn tɔn mɛ kpó Nɛfutali tɔn kpó mɛ, bɔ súnnu e ɖo akɔta énɛ́ lɛ́ɛ mɛ lɛ́ɛ wá gɔ́ n'i. Jedenyɔ́ɔ ɖɔ nú Mawu ɖɔ: “A ɖɔ émí ná gbɔn nyɛ jí, bó hwlɛ́n Izlayɛ́li gán. É nyɔ́! Din ɔ́, un ná tɛ́ gbɔ̌fún ɖó fí e è nɔ só jinukún ɖe ɔ́. Ényí é jɛ zǎn mɛ, bónú ahǔn ja kɔn nyi gbɔ̌fún ɔ́ kɛ́ɖɛ́ jí, bónú fí e lɛ́dó gbɔ̌fún ɔ́ bǐ ɖo xúxú jí ɔ́, é ná nyí xlɛ̌ nú mì ɖɔ a nǎ gbɔn jǐ ce dó hwlɛ́n Izlayɛ́li, lě e a ɖɔ gbɔn é.” Bɔ nǔ ká nyí mɔ̌ nǔgbó. Ayǐhɔ́ngbe zǎnzǎn ɔ́, Jedenyɔ́ɔ yi zé gbɔ̌fún ɔ́ bó fyɔ́n, bɔ sin e gosín mɛ ɔ́ gɔ́ sinnugannú ɖokpó. Énɛ́ ɔ́, é ɖɔ nú Mawu ɖɔ: “Ma sin xomɛ dó mì ó; un ná lɛ́ byɔ́ nǔ ɖokpó we; un jló ná lɛ́ mɔ xlɛ̌ ɖěvo gbɔn gbɔ̌fún ɔ́ jí; din tɔn ɔ́, gbɔ̌fún ɔ́ kɛ́ɖɛ́ ní ɖo xúxú jí, bónú ahǔn ní ja gbɔn fí e lɛ́dó e lɛ́ɛ bǐ.” Zǎn énɛ́ ɔ́ mɛ ɔ́, Mawu bló nǔ e Jedenyɔ́ɔ byɔ́ ɛ é: gbɔ̌fún ɔ́ kɛ́ɖɛ́ ɖo xúxú jí, bɔ fí e lɛ́dó gbɔ̌fún ɔ́ bǐ nyǐ ahǔn. Zǎnzǎn tɛɛn ɔ́, Jedenyɔ́ɔ e è nɔ lɛ́ ylɔ́ ɖɔ Yelubáalu ɔ́ jɛ ali kpó mɛ tɔn lɛ́ɛ kpó, bó yi ɖó gɔnu ɖó tɔjɔtɛn e è nɔ ylɔ́ ɖɔ Eyinu-Halɔ́di ɔ́ kpá. Fí e Madiáani ví lɛ́ɛ ɖó gɔnu ɖó ɔ́, ɖo to ɔ́ sín taligbé aga ɖo Mɔlée kpó ɔ́ kpá ɖo ayǐkúngban wɛnjɛ jí. Mawu Mavɔmavɔ ɖɔ nú Jedenyɔ́ɔ ɖɔ: “Ahwan towe lɛ́ɛ sukpɔ́ dín; nú un bló bɔ yě ɖu ɖo Madiáani ví lɛ́ɛ jí ɔ́, Izlayɛ́li ví lɛ́ɛ na yí go ɖɔ hlɔ̌nhlɔ́n émí ɖésúnɔ tɔn wɛ zɔ́n bɔ émí ɖuɖéjí, lobɔ susu e nyí ce ɔ́, yě ná sɔ́ dó ɖó yětɔn ná. Hǔn, xó e a ná ɖɔ nú ahwan towe lɛ́ɛ ɖíe: ‘Mɛ e ɖo xɛsi ɖi wɛ bó ɖo sísɔ́sísɔ́ wɛ lɛ́ɛ bǐ ní sɛ yi zɔ nú Galadi só ɔ́, bó lɛ́ kɔ yi xwé yětɔn lɛ́ɛ gbe.’ ” Ée é ɖɔ mɔ̌ ɔ́, yě mɛ adɔ̌kpo afɔwó (22.000) lɛ́ kɔ yi xwé ɖo yě mɛ, bɔ é wá kpo mɛ děgba we afɔwó (10.000). Mawu Mavɔmavɔ ka lɛ́ ɖɔ nú Jedenyɔ́ɔ ɖɔ: “Ahwan towe lɛ́ɛ lɛ́ sukpɔ́ dín. Kplá yě yi tɔsisa ɔ́ tó; énɛ́ ɔ́, un ná kpɔ́n mɛ lɛ́ɛ bó cyán nú we. Un ná ɖɔ mɛ e kpó hwi kpó ɖó ná yi lɛ́ɛ, kpó mɛ e kpó hwi kpó má ɖó ná yi ǎ lɛ́ɛ kpó nú we.” Ée Mawu Mavɔmavɔ ɖɔ mɔ̌ ɔ́, Jedenyɔ́ɔ kplá ahwan tɔn lɛ́ɛ yi tɔsisa ɔ́ tó. Énɛ́ ɔ́, Mawu Mavɔmavɔ ɖɔ n'i ɖɔ: “Mɛ e ná sɔ́ alɔ tɔn dó wún sin ɔ́ ná bó ná nu lě e cukú nɔ́ sɔ́ ɖɛ̌ dó nu sin ná gbɔn ɔ́ lɛ́ɛ ɔ́, a nǎ ɖe yě ɖó vo nú mɛ e ná jɛ kpo bó dó nu sin ɔ́ mɛ bó nu lɛ́ɛ.” Mɛ afɔɖé kanwe ko (300) jɛ́n wún sin ɔ́ dó alɔgogo mɛ bó nu; yě mɛ e kpo lɛ́ɛ bǐ wɛ jɛ kpo bó dó nu sin ɔ́ mɛ bó nu. Bɔ Mawu Mavɔmavɔ ɖɔ nú Jedenyɔ́ɔ ɖɔ: “Mɛ afɔɖé kanwe ko (300) e wún sin ɔ́ dó alɔgogo mɛ bó nu lɛ́ɛ wɛ un ná zé dó hwlɛ́n togun Izlayɛ́li tɔn ɔ́ ná, lobo ná jó Madiáani ví lɛ́ɛ nú we. Mɛ e kpo lɛ́ɛ bǐ ní lɛ́ kɔ yi xwé yětɔn lɛ́ɛ gbe.” Jedenyɔ́ɔ ɖó Izlayɛ́li ví afɔɖé kanwe ko (300) lɛ́ɛ te, bó ka nyi mɛ ɖě lɛ́ɛ sɛ́ dó xwé yětɔn lɛ́ɛ gbe; lo ɔ́, é yí nǔɖuɖu yětɔn lɛ́ɛ kpó lanzo yětɔn lɛ́ɛ kpó ɖ'ayǐ. Madiáani ví lɛ́ɛ ɖó gɔnu ɖó ayǐkúngban wɛnjɛ jí. Fí e yě ɖó gɔnu ɖó ɔ́ ɖo do nú fí e Jedenyɔ́ɔ ɖó gɔnu ɖó é. Zǎn énɛ́ ɔ́ mɛ ɔ́, Mawu Mavɔmavɔ ɖɔ nú Jedenyɔ́ɔ ɖɔ: “Sí te, jɛ te bó yi tɔ́n ahwan Madiáani ví lɛ́ɛ ɖó un jó yě nú we. Ényí a ɖo xɛsi ɖi wɛ bó má sixú yi tɔ́n ahwan yě ǎ hǔn, hwi kpó mɛsɛntɔ́ towe Púla kpó ní to jɛ te yi hwɛ̌. Énɛ́ ɔ́, a nǎ se nǔ e ɖɔ wɛ yě ɖe ɖo dɔ̌n ɔ́, bó ná ɖó akɔ́nkpinkpan bó ná yi tɔ́n ahwan yě.” Ée Mawu ɖɔ mɔ̌ ɔ́, Jedenyɔ́ɔ kpó mɛsɛntɔ́ tɔn ɔ́ kpó jɛ te bó yi káká fí e yě bɛ̌ gɔnu ɖíɖó sín é. Madiáani ví lɛ́ɛ kpó Amalɛ́ki ví lɛ́ɛ kpó, kpódó mɛ e gosín zǎnzǎnhwe jí lɛ́ɛ kpó gba kpé ayǐkúngban wɛnjɛ ɔ́ jí, bó sukpɔ́ ɖésú wɛn ɖɔhun. Lǎkúnmí yětɔn lɛ́ɛ nyí maxamaxa, xuta nyɛ́kɛ́n ɖɔhun. Hwenu e Jedenyɔ́ɔ wá ɔ́, nya ɖé ɖo dlɔ̌ e é kú ɔ́ ɖɔ nú hǎgbɛ́ tɔn ɖokpó wɛ ɖɔ: “Un kú dlɔ̌, bó mɔ wɔ̌xúxú ɖokpó ɖo blǐblí wɛ gbɔn ahwankpá mǐtɔn mɛ, bó wá xo dó goxɔ lɛ́ɛ ɖokpó wú, bó mu goxɔ ɔ́ lobo flí i jɛ wɛn.” Hǎgbɛ́ tɔn ɔ́ ɖɔ n'i ɖɔ: “Nǔ énɛ́ ɔ́ sɔ́ nyí nǔ ɖěvo zɛ Jedenyɔ́ɔ Izlayɛ́li ví, Yoaci ví ɔ́ sín hwǐ wú ǎ. Mawu ko jó mǐ kpó ahwankpá ɔ́ bǐ kpó n'i.” Ée Jedenyɔ́ɔ se dlɔ̌ ɔ́ kpó tínmɛ tɔn kpó ɔ́, é jɛ kpo bó dó kú nú Mawu. Énɛ́ ɔ́ gúdo ɔ́, é lɛ́ kɔ wá yi ahwankpá Izlayɛ́li ví lɛ́ɛ tɔn mɛ, bó sú xó ɖɔ: “Mi sí te! Mawu Mavɔmavɔ jó ahwankpá Madiáani ví lɛ́ɛ tɔn nú mi!” Jedenyɔ́ɔ má mɛ afɔɖé kanwe ko (300) lɛ́ɛ ɖó gbɛ̌ta atɔn; é zé lanzo kpó tɔyizɛ́n vɔ̌tɔ́ kpó nú mɛ ɖokpó ɖokpó, bɔ zohwín ɖo tɔyizɛ́n lɛ́ɛ mɛ. Énɛ́ ɔ́ gúdo ɔ́, é ɖɔ nú yě ɖɔ: “Nú un jɛ ahwankpá ɔ́ sín dogbó jí tlóló ɔ́, mi ná kpɔ́n mì bó ná wa nǔ e wa wɛ un ɖe ɔ́ pɛ́pɛ́pɛ́. Hwenu e nyɛ kpó mɛ e xwedó mì lɛ́ɛ bǐ kpó ná kún lanzo ɔ́, mi lɔmɔ̌ ná kún lanzo lɛ́ lɛ̌ dó ahwankpá ɔ́, bó ná ɖɔ: ‘Susu nú Mawu Mavɔmavɔ! Susu nú Jedenyɔ́ɔ!’ ” Ée gan wěwe ɖo nǎ xo wɛ bɔ è ɖyɔ̌ ahwanfuntɔ́ e ɖo kɛntɔ́ lɛ́ɛ cɔ́ wɛ lɛ́ɛ tlóló ɔ́, Jedenyɔ́ɔ kpó ahwanfuntɔ́ tɔn kanwe ko (100) e xwedó e lɛ́ɛ kpó wá jɛ ahwankpá ɔ́ sín dogbó jí. Ée yě jɛ fínɛ́ ɔ́, yě kún lanzo ɔ́, bó gba tɔyizɛ́n e yě hɛn lɛ́ɛ. Gbɛ̌ta we ɖě lɛ́ɛ bló nǔ ɖokpó ɔ́. Yě bǐ zé amyɔlɔ dó zé zohwín lɛ́ɛ ná, bó zé ɖisílɔ dó zé lanzo lɛ́ɛ ná, bó ná kún, bó ná sú xó ɖɔ: “Mi wá mǐ ní tɔ́n ahwan yě dó sɔ́ Mawu Mavɔmavɔ kpó Jedenyɔ́ɔ kpó su.” Yě ɖo te lɛ́dó ahwankpá ɔ́, bɔ mɛ ɖokpó ɖokpó ɖo tɛn tɔn mɛ. Lo ɔ́, mɛ e ɖo ahwankpá ɔ́ mɛ lɛ́ɛ bǐ wlí wezun; yě ɖo xó sú wɛ, lobo hɔn. Hwenu e sunnú afɔɖé kanwe ko (300) lɛ́ɛ ɖo lanzo kún wɛ ɔ́, Mawu Mavɔmavɔ bló bɔ Madiáani ví lɛ́ɛ húzú kpan nukɔn yěɖée, bó hu yěɖée, ɖo ahwankpá ɔ́ bǐ mɛ. Wǎgbɔ tɔn ɔ́, yě mɛ e wá kpo lɛ́ɛ hɔn káká yi Bɛti-Cíta ɖo Selela kpáxwé, bó hɔn káká yi toxo e è nɔ ylɔ́ ɖɔ Avɛ́li-Mɛhola ɔ́ mɛ, ɖo Tabati kpá. Jedenyɔ́ɔ sɛ́ wɛn dó Izlayɛ́li ví e ɖo akɔta Nɛfutali tɔn mɛ lɛ́ɛ, ée ɖo Acɛ́ɛ tɔn mɛ lɛ́ɛ kpó ée ɖo Manasée tɔn mɛ lɛ́ɛ bǐ kpó; bɔ yě wǎ, bó jɛ Madiáani ví lɛ́ɛ gúdo. Jedenyɔ́ɔ sɛ́ wɛn dó Eflayímu sókan ɔ́ bǐ mɛ ɖɔ: “Mi bǐ ní jɛ te bó wá cí fí e è nɔ dó asá Judɛ́ɛn tɔ ɔ́ ɖe ɔ́, bó to gbɔn tɔ ɔ́ tó káká yi Bɛti-Baláa bó dó sú ali dó Madiáani ví lɛ́ɛ.” Énɛ́ ɔ́, è ylɔ̌ súnnu e ɖo Eflayímu sín akɔta mɛ lɛ́ɛ, bɔ yě cí fí e è nɔ dó asá Judɛ́ɛn tɔ ɔ́ ɖe ɔ́, bó to gbɔn tɔ ɔ́ tó káká yí Bɛti-Baláa. Yě wlǐ Madiáani ví lɛ́ɛ sín gǎn we. Mɛ ɖokpó nɔ́ nyí Olɛ́vu, bɔ mɛ ɖě ɔ́ nɔ nyí Zéɛvu; yě hu Olɛ́vu ɔ́ ɖo awǐnnya e è nɔ ylɔ́ ɖɔ Olɛ́vu wínnya din ɔ́ kɔn, bó hu Zéɛvu ɔ́ ɖo vǐwunto e è nɔ ylɔ́ ɖɔ Zéɛvu vǐwunto din ɔ́ kɔn. Énɛ́ ɔ́ gúdo ɔ́, yě lɛ́ jɛ Madiáani ví lɛ́ɛ gúdo; yě zé Olɛ́vu kpó Zéɛvu kpó sín ta wá nú Jedenyɔ́ɔ ɖo Judɛ́ɛn tɔ ɔ́ sín zǎnzǎnhwe jí. Súnnu e ɖo akɔta Eflayímu tɔn mɛ lɛ́ɛ ɖɔ nú Jedenyɔ́ɔ ɖɔ: “Étɛ́wú wɛ a wa mɔ̌ xá mǐ? Hwenu e a xwe ahwan fun xá Madiáani ví lɛ́ɛ gbé ɔ́, étɛ́wú a ma ylɔ́ mǐ bónú mǐ ná wá gɔ́ so nú we ǎ?” Bɔ yě ɖú zǐngídi xá ɛ ɖésú. Jedenyɔ́ɔ ka yí gbe nú yě ɖɔ: “Eflayímu sín mɛ lɛ́ɛ mi, étɛ́ wɛ un wa bɔ è sixú jlɛ̌ dó mitɔn wú? Kpɛ e mi bló ɔ́, é ma lɛ́ xɔ akwɛ́ hú ɖu e hɛ̌nnu ce e nyí Aviɛzɛ́ɛ tɔn ɔ́ ɖuɖéjí ɔ́ a? Midɛɛ lɛ́ɛ wɛ Mawu jǒ Madiáani ví lɛ́ɛ sín axɔ́sú Olɛ́vu kpó Zéɛvu kpó ná. Un wa nǔ ɖěbǔ bɔ è sixú jlɛ́ d'é wú ǎ.” Xósin énɛ́ ɔ́ e Jedenyɔ́ɔ ná ɔ́ fá xomɛ nú Eflayímu sín mɛ lɛ́ɛ. Jedenyɔ́ɔ kpó mɛ tɔn afɔɖé kanwe ko (300) lɛ́ɛ kpó wá jɛ Judɛ́ɛn tɔ ɔ́ tó, bó dó asá tɔ ɔ́. Nǔ cikɔ nú yě có, yě ɖo kɛntɔ́ yětɔn lɛ́ɛ gúdo. Yě wǎ jɛ toxo e è nɔ ylɔ́ ɖɔ Sukɔ́tu ɔ́ mɛ, bɔ Jedenyɔ́ɔ ɖɔ nú to ɔ́ mɛ nu lɛ́ɛ ɖɔ: “Mi kɛnklɛ́n bó má wɔ̌xúxú nú mɛ e xwedó mì lɛ́ɛ, ɖó nǔ cikɔ nú yě. Madiáani ví lɛ́ɛ sín axɔ́sú Zɛváxi kpó Salumúna kpó gbé mɛ wɛ un ɖe.” Gǎn e ɖo toxo ɔ́ mɛ lɛ́ɛ ka ɖɔ n'i ɖɔ: “Étɛ́wú mǐdɛɛ lɛ́ɛ wɛ ɖó ná ná nǔɖuɖu ahwangɔnu towe? Axɔ́sú Zɛváxi kpó Salumúna kpó kó ɖo acɛ towe mɛ nɛ́ a?” Jedenyɔ́ɔ ka ɖɔ nú yě ɖɔ: “É nyɔ́! Nú Mawu Mavɔmavɔ ko wa jó Zɛváxi kpó Salumúna kpó nú mì ɔ́, un ná zé wun gbětótló mɛ tɔn lɛ́ɛ kpó vɛ̌wunkan lɛ́ɛ kpó dó tlɛ́n wǔtu mitɔn lɛ́ɛ.” Jedenyɔ́ɔ ka gosín fínɛ́, bó wá yi Pɛnuwɛ́li, bó byɔ́ nǔ ɖokpó ɔ́ to ɔ́ mɛ nu lɛ́ɛ. Lě e Sukɔ́tunu lɛ́ɛ ɖɔ xó gbɔn ɔ́ wɛ mɛ énɛ́ lɛ́ɛ lɔmɔ̌ ɖɔ gbɔn. Jedenyɔ́ɔ ka ɖɔ nú yě ɖɔ: “Hwenu e un ná ɖuɖéjí bó ná lɛ́ kɔ wá ɔ́, un ná mu ahohó e ɖo toxo mitɔn mɛ é.” Zɛváxi kpó Salumúna kpó, kpódó ahwangɔnu yětɔn e hú gbɛtɔ́ děgba atɔn afɔwó-afatɔ́n (15.000) ɔ́ kpó ko ɖo Kaakɔ́ɔ. Mɛ e kpo ɖo ahwangɔnu mɛ e gosín zǎnzǎnhwe jí tɔn ɔ́ mɛ lɛ́ɛ bǐ nɛ́, ɖó ahwanfuntɔ́ děgba atɔn (120.000) wɛ è hu ɖo yě mɛ. Jedenyɔ́ɔ wlí ali e yě mɛ e ma nɔ nɔ fí ɖokpó ǎ lɛ́ɛ mlɛ́ é, ɖo Nɔváxi kpó Yogibóxa kpó; é tɔ́n ahwan kɛntɔ́ lɛ́ɛ sín ahwangɔnu e lin ɖɔ émí ɖo vivo mɛ lɛ́ɛ é. Madiáani ví lɛ́ɛ sín axɔ́sú we lɛ́ɛ, Zɛváxi kpó Salumúna kpó hɔn; lo ɔ́, Jedenyɔ́ɔ jɛ gǔdo yětɔn, bó wlí yě bɔ ahwangɔnu ɔ́ bǐ gba dó. Ée Jedenyɔ́ɔ lɛ́ kɔ sín ahwangbénu bó gbɔn Ɛlɛ́si sín kpó ɔ́ ta ɔ́, é wlí dɔ̌nkpɛvú Sukɔ́tu tɔn ɖokpó, bó kan nǔ byɔ́ ɛ; dɔ̌nkpɛvú ɔ́ ka wlán togán lɛ́ɛ kpó tomɛxó lɛ́ɛ kpó sín nyǐkɔ n'i; yě bǐ bló gbɛtɔ́ kanɖé gbantɔ́n-nukún-we (77). Énɛ́ ɔ́ gúdo ɔ́, Jedenyɔ́ɔ wá yi Sukɔ́tunu lɛ́ɛ gɔ́n, bó ɖɔ nú yě ɖɔ: “Mi ma flín ɖɔ mi zun mì, bó ɖɔ nú mì ɖɔ étɛ́wú émí ɖó ná ná nǔɖuɖu mɛ nyɛtɔn e nǔ cikɔ ná lɛ́ɛ é jí a? Đɔ Zɛváxi kpó Salumúna kpó kó ɖo acɛ nyɛtɔn mɛ wɛ a jí a? É nyɔ́! Zɛváxi kpó Salumúna ɔ́ kpó ɖíe un kplá wá nú mi e.” Énɛ́ ɔ́, Jedenyɔ́ɔ zé wun kpó vɛ̌wunkan gbětótló mɛ tɔn lɛ́ɛ kpó dó dɔn tó nú tomɛxó Sukɔ́tu tɔn lɛ́ɛ. É lɛ́ mu ahohó Pɛnuwɛ́li tɔn ɔ́, bó hu to ɔ́ mɛ nu lɛ́ɛ. Énɛ́ ɔ́ gúdo ɔ́, é kanbyɔ́ Zɛváxi kpó Salumúna kpó ɖɔ: “Nɛ̌ wɛ mɛ e mi hu ɖo Tabɔ́ɔ lɛ́ɛ cí?” Yě yí gbe ɖɔ: “Yě ɖi we. Yě mɛ ɖokpó ɖokpó ɖi axɔ́ví.” Jedenyɔ́ɔ ka sú xó ɖɔ: “Nɔví ce tɔ́jinɔji lɛ́ɛ wɛ. Un xwlé Mawu nú mi ɖɔ: Mawu Mavɔmavɔ ɖo gbɛ! Nú é má nyí ɖɔ mi hu yě wɛ din ǎ ɔ́, nyɛ lɔmɔ̌ ɖo mi ná hu wɛ ǎ.” Énɛ́ ɔ́, é ɖɔ nú Yɛtɛ́ɛ, vǐ súnnu tɔn ɖaxó ɔ́ ɖɔ: “Sí te bó hu yě.” Lo ɔ́, é glá bó ɖe hwǐ tɔn tɔ́n ǎ, ɖó é kpo ɖo kpɛví, bó ɖo xɛsi ɖi wɛ. Zɛváxi kpó Salumúna kpó ka ɖɔ nú Jedenyɔ́ɔ ɖɔ: “Hwi ɖésúnɔ ní gbɔ bó hu mǐ, ɖó súnnu glegbenu wɛ hɛn ɔ́, é ná bló nǔ énɛ́!” Bɔ Jedenyɔ́ɔ hu axɔ́sú we lɛ́ɛ, bó bɛ́ acɔ́nú e ɖo lǎkúnmí yětɔn sín kɔ lɛ́ɛ. Énɛ́ ɔ́ gúdo ɔ́, Izlayɛ́li ví lɛ́ɛ ɖɔ nú Jedenyɔ́ɔ ɖɔ: “Nyǐ gǎn nú mǐ, bɔ vǐ towe kpó vǐvú towe kpó ná jɛ tɛn towe mɛ; ɖó a hwlɛ̌n mǐ sín Madiáani ví lɛ́ɛ sí.” Jedenyɔ́ɔ ka ɖɔ nú yě ɖɔ: “Éeǒ! Un ná nyí gǎn mitɔn ǎ, vǐ ce lɔmɔ̌ ɖo gǎn mitɔn ná nyí wɛ ǎ. Mawu Mavɔmavɔ wɛ ná nyí gǎn mitɔn.” É lɛ́ ɖɔ: “Un ka jló ná byɔ́ nǔɖé mi: mi mɛ ɖokpó ɖokpó ní ná mì ganví e mi sɔ́ ɖo nǔ e mi hɛn wá sín ahwangbénu lɛ́ɛ mɛ lɛ́ɛ ɖokpó ɖokpó.” Nǔgbó ɔ́, Madiáani ví lɛ́ɛ nɔ dó siká ganví súnnu e nɔ́ nɔ gbětótló mɛ lɛ́ɛ bǐ ɖɔhun. Izlayɛ́li ví lɛ́ɛ ɖɔ: “Mǐ ná ná we kpó jlǒ ɖagbe kpó.” Ée yě ɖɔ mɔ̌ ɔ́, yě tɛ́ awu ɖaxó ɖokpó nyi kɔ́ mɛ, bɔ mɛ ɖokpó ɖokpó nɔ sɔ́ ganví e ɖo nǔ e é hɛn wá sín ahwangbénu lɛ́ɛ mɛ lɛ́ɛ ɖokpó nyi jí. Siká ganví e Jedenyɔ́ɔ byɔ́ bɔ è nǎ ɛ lɛ́ɛ bǐ ɖibla da kilóo ko. É lɛ́ yí acɔ́nú lɛ́ɛ, tógbé lɛ́ɛ kpó awu vɔvɔ ɖagbe ɖagbe e axɔ́sú Madiáani ví lɛ́ɛ nɔ́ dó lɛ́ɛ kpó. Mɔ̌ ɖokpó ɔ́, é yí wlɔ e yě sɔ́ dó lǎkúnmí yětɔn lɛ́ɛ sín kɔ, bó dó ɖó acɔ́ nú yě lɛ́ɛ é. Jedenyɔ́ɔ zé siká ɔ́ dó bló bǒcyɔ ɖokpó ná, bó sɔ́ ɖó gletoxo tɔn e è nɔ ylɔ́ ɖɔ Ɔfla ɔ́ mɛ. Izlayɛ́li ví lɛ́ɛ jɛ vodún énɛ́ ɔ́ sɛn jí, bɔ é húzú afɔklɛ́nnú nú Jedenyɔ́ɔ kpó hɛ̌nnu tɔn kpó. Sín hwenu e Jedenyɔ́ɔ ɖu ɖo Madiáani ví lɛ́ɛ jí ɔ́, yě nɔ acɛkpikpa Izlayɛ́li ví lɛ́ɛ tɔn glɔ́; Madiáani ví lɛ́ɛ sɔ́ zé ta gbeɖé ǎ. To ɔ́ nɔ vivo mɛ xɔ xwe kanɖé, xwe nabí e Jedenyɔ́ɔ nɔ gbɛ xɔ é. Jedenyɔ́ɔ Yoaci ví e è nɔ lɛ́ ylɔ́ ɖɔ Yelubáalu ɔ́ lɛ́ kɔ yi xwé tɔn gbe. É ɖó vǐ súnnu kanɖé gban (70), ɖó asi gěgé wɛ é ɖó. Asi tɔn e nɔ Sikɛ́mu ɔ́ lɔ ji vǐ súnnu ɖokpó n'i, bɔ é sun nyǐ vǐ ɔ́ ɖɔ Abimɛlɛ́ki. Kpikpoxɔmɛ nyɔ́ nú Jedenyɔ́ɔ ganjí, cóbɔ é wá kú, bɔ è yi ɖi ɖó Ɔfla, hɛ̌nnu Aviɛzɛ́ɛ tɔn ɔ́ sín toxo mɛ, ɖo tɔ́ tɔn Yoaci ɔ́ sín yɔdo mɛ. Ée Jedenyɔ́ɔ kú ɔ́, Izlayɛ́li ví lɛ́ɛ lɛ́ jɛ vodún Baalu sɛn jí. Baalu-Bɛlíti wɛ yě sɔ́ dó ɖó vodún ná. Yě wɔn Mawu Mavɔmavɔ, Mawu yětɔn e hwlɛ́n yě sín kɛntɔ́ e lɛ́dó yě lɛ́ɛ bǐ sí é. Nǔ ɖagbe e Jedenyɔ́ɔ e nɔ lɛ́ nyí Yelubáalu ɔ́ wa nú Izlayɛ́li ví lɛ́ɛ ɔ́, yě wa nǔ ɖěbǔ dó tunwun nú hɛ̌nnu tɔn ǎ. Abimɛlɛ́ki Yelubáalu e è nɔ lɛ́ ylɔ́ ɖɔ Jedenyɔ́ɔ ɔ́ sín vǐ ɔ́ yi Sikɛ́mu, bó ɖɔ xó nú nylɔ tɔn lɛ́ɛ kpó nɔ tɔn sín hɛ̌nnu ɔ́ bǐ kpó. É ɖɔ nú yě ɖɔ: “Mi yi kanbyɔ́ tonukún lɛ́ɛ ɖɔ yě ba ɖɔ Yelubáalu sín vǐ kanɖé gban (70) lɛ́ɛ ní kpa acɛ nú yě a jí, abǐ mɛ ɖokpó géé ní kpa acɛ nú yě? Mi ní ka flín ɖɔ hun mitɔn wɛ un nyí.” Nylɔ tɔn lɛ́ɛ ka wlí xó ɔ́ ɖɔ nú tonukún Sikɛ́mu tɔn lɛ́ɛ, bɔ yědɛɛ ɖe gbeta tɔ́n ɖɔ émí ná nɔ Abimɛlɛ́ki jí ɖó mɛ émítɔn wɛ é nyí. Yě ná ɛ gankwɛ́ kanɖé gban (70) e yě bɛ̌ tɔ́n sín Baalu-Bɛlíti sín xɔ mɛ lɛ́ɛ. Abimɛlɛ́ki zé akwɛ́ énɛ́ ɔ́ dó da nǔvɔ́nɔ lɛ́ɛ kpó gběvún lɛ́ɛ kpó, bónú yě ná xwedó e. Abimɛlɛ́ki yi tɔ́ tɔn xwé ɖo Ɔfla, bó hu nɔví tɔn kanɖé gban (70) e nyí vǐ súnnu Yelubáalu tɔn lɛ́ɛ, ɖo awǐnnya ɖokpó ɔ́ jí. Yotámu e nyí yɔkpɔ́vú bǐ ɖo yě mɛ ɔ́ kɛ́ɖɛ́ wɛ gán ɖ'é mɛ, ɖó é hɔn hwlá. Tonukún Sikɛ́mu tɔn lɛ́ɛ kpó mɛ e ɖo Bɛti-Milóo lɛ́ɛ bǐ kpó sɛ ta kplé. Yě yi cɛ́nitín e ɖo Sikɛ́mu ɔ́ kɔn, ɖo awǐnnya e é tun te ɔ́ kpá, bó sɔ́ Abimɛlɛ́ki axɔ́sú. È wǎ ɖɔ lě e Abimɛlɛ́ki nyí axɔ́sú gbɔn ɔ́ nú Yotámu. É ka yi Galizímu só ɔ́ ta aga bó sú xó lélé ɖɔ: “Sikɛ́munu lɛ́ɛ mi, ényí mi jló ɖɔ Mawu ní ɖótó émí hǔn, mi bo ɖótó nyɛ. “Gbe ɖokpó wɛ tíin, bɔ atín lɛ́ɛ ɖe gbeta tɔ́n ɖɔ émí na sɔ́ axɔ́sú ɖokpó. Yě ɖɔ nú olívutín ɖɔ é ní ɖu axɔ́sú ɖo émí nu. Lo ɔ́, olívutín ɖɔ nú yě ɖɔ: ‘Mi lin ɖɔ nyɛ ná jó ami e un nɔ ná, bɔ Mawu kpó gbɛtɔ́ kpó bǐ nɔ kpa ɔ́ dó, bó ná dó ya nú nyɛɖée bó ɖɔ un ɖo axɔ́sú ɖu wɛ ɖo atín ɖě lɛ́ɛ nu a?’ Énɛ́ ɔ́, atín lɛ́ɛ ɖɔ nú fígitín ɖɔ éyɛ́ ní wá ɖu axɔ́sú ɖo émí nu. Lo ɔ́, fígitín ɖɔ nú yě ɖɔ: ‘Mi lin ɖɔ nyɛ na jó sínsɛ́n víví e un nɔ ná ɔ́ dó, bó ná dó ya nú nyɛɖée, bó ɖɔ un ɖo axɔ́sú ɖu nú atín ɖě lɛ́ɛ wɛ a?’ Yě wa ɖɔ nú vǐwuntín ɖɔ é ní wá ɖu axɔ́sú ɖo émí nu. Lo ɔ́, vǐwuntín ɖɔ nú yě ɖɔ: ‘Mi lin ɖɔ nyɛ ná jó vɛ̌ɛn e un nɔ ná, bɔ é nɔ dó xomɛhunhun nú Mawu kpó gbɛtɔ́ kpó ɔ́ dó, bó ná dó ya nú nyɛɖée ɖɔ un ɖo axɔ́sú ɖu nú atín lɛ́ɛ wɛ a?’ Wǎgbɔ tɔn ɔ́, atín lɛ́ɛ ɖó gbe kpɔ́ bó ɖɔ nú wunkan ɖɔ é ní wá ɖu axɔ́sú ɖo émí nu. Bɔ wunkan ɖɔ nú yě ɖɔ: ‘Ényí mi jló ná sɔ́ mì axɔ́sú nǔgbó hǔn, mi wá bɛ yɛ ɖo glɔ̌ ce. É má nyí mɔ̌ ǎ ɔ́, myɔ ná tɔ́n sín wun ce lɛ́ɛ mɛ, bó ná fyɔ́ sɛ́dlutín Libáan tɔn lɛ́ɛ ɖésúnɔ.’ ” Yotámu lɛ́ ɖɔ: “Midɛɛ lɛ́ɛ ɔ́, ée mi sɔ́ axɔ́sú Abimɛlɛ́ki ɔ́, mi bló kpó ayijlɔ́jlɔ́ kpó a? Mi zán zǐnzán ɖagbe xá Yelubáalu kpó hɛ̌nnu tɔn kpó a? Nǔ ɖagbe e é wa nú mi lɛ́ɛ ɔ́, mi tunwun n'i a? Đó tɔ́ ce fun ahwan nú mi; é ɖibla kú bó dó hwlɛ́n mi sín Madiáani ví lɛ́ɛ sí. Din ɔ́ ɖíe mi ka fɔ́n gǔ dó hɛ̌nnu tɔn jí e; mi hu vǐ tɔn súnnu kanɖé gban (70) lɛ́ɛ ɖo awǐnnya ɖokpó ɔ́ jí, bó sɔ́ Abimɛlɛ́ki e é ji ɖo mɛsɛntɔ́ tɔn xomɛ ɔ́, bɔ é nyí Sikɛ́mu xɔ́sú, ɖó nɔví mitɔn e é nyí ɔ́ wú. Égbé din ɔ́, ényí kpó ayijlɔ́jlɔ́ kpó wɛ mi wa nǔ mɔ̌ nú Yelubáalu kpó hɛ̌nnu tɔn kpó hǔn, Abimɛlɛ́ki ní bó nyí awǎjijɛ mitɔn, bónú mi lɔmɔ̌ ní nyí awǎjijɛ éyɛ́ tɔn. É má nyí mɔ̌ ǎ hǔn, myɔ ná tɔ́n sín Abimɛlɛ́ki mɛ, bó wá fyɔ́ Sikɛ́munu lɛ́ɛ kpó Bɛti-Milóonu lɛ́ɛ kpo; bó ná tɔ́n sín Sikɛ́munu lɛ́ɛ kpó Bɛti-Milóonu lɛ́ɛ kpó mɛ, bó ná fyɔ́ Abimɛlɛ́ki.” Énɛ́ ɔ́ gúdo ɔ́, Yotámu hɔn yi hwlá cí Bɛ̌, ɖó é ɖo xɛsi ɖi nú fofó tɔn Abimɛlɛ́ki wɛ. Abimɛlɛ́ki ɖu axɔ́sú ɖo Izlayɛ́li xɔ xwe atɔn. Énɛ́ ɔ́ gúdo ɔ́, Mawu sɛ́ yɛ nyanya ɖé dó bɔ é dɔn hunnyahunnya byɔ́ axɔ́sú Abimɛlɛ́ki kpó Sikɛ́munu lɛ́ɛ kpó tɛ́ntin, bɔ yě fɔ́n gǔ dó jǐ tɔn. Énɛ́ ɔ́, adǎka e è xo Yelubáalu sín vǐ súnnu kanɖé gban (70) lɛ́ɛ wú ɔ́, yě bǐ ná sú axɔ́ tɔn; Abimɛlɛ́ki ná sú axɔ́ tɔn, ɖó é hu nɔví tɔn lɛ́ɛ, Sikɛ́munu lɛ́ɛ ná sú axɔ́ tɔn, ɖó yě wɛ dó alɔ ɛ, bɔ é hu nɔví tɔn lɛ́ɛ. Sikɛ́munu lɛ́ɛ sɔ́ mɛ lɛ́ɛ ɖó só lɛ́ɛ ta bɔ yě tɔ wu nú Abimɛlɛ́ki; mɛ ɖěbǔ ɖo ali jí wá xweyǐgbe, bó gbɔn akpá yětɔn ɔ́, yě nɔ́ yí mɛ ɔ́ sín nǔ lɛ́ɛ bǐ. È yi ɖɔ nǔ e ɖo jijɛ wɛ nɛ́ lɛ́ɛ nú Abimɛlɛ́ki. Gaali Evɛ́di ví ɔ́, wá Sikɛ́mu kpó nɔví tɔn lɛ́ɛ kpó gbe ɖokpó. Sikɛ́munu lɛ́ɛ ka ɖeji dó wǔtu tɔn. Yě yi vǐwungbo yětɔn lɛ́ɛ mɛ, bó gbɛ vǐwun, bó li; énɛ́ ɔ́ gúdo ɔ́, yě ylɔ́ agɔ̌. Yě yi vodún yětɔn xwé, bó ɖu agɔ̌, lobo dó nu Abimɛlɛ́ki. Gaali, Evɛ́di ví ɔ́ kanbyɔ́ yě ɖɔ: “Mɛ̌ wɛ nɔ nyí Abimɛlɛ́ki? Étɛ́ wɛ Sikɛ́mu toxo ɔ́ nyí bɔ mǐ na nɔ Abimɛlɛ́ki sín acɛ mɛ? Yelubáalu ví ɔ́ wɛ ǎ cé? Bɔ Zevúlu ka nyí azɔ̌gán tɔn ǎ cé? Mi nɔ Hamɔ́ɔ mɛ lɛ́ɛ sín acɛ mɛ; ɖó Hamɔ́ɔ wɛ ɖó Sikɛ́mu toxo ɔ́ ayǐ. Amɔ̌, mǐdɛɛ lɛ́ɛ ɔ́, aniwú mǐ ná nɔ Abimɛlɛ́ki sín acɛ mɛ? Nyɛ ɔ́, nú alɔ ce mɛ wɛ Sikɛ́mu toxo ɔ́ ko ɖe ɔ́, un ná flí Abimɛlɛ́ki sín acɛkpikpa ɔ́ xwe.” Énɛ́ ɔ́ gúdo ɔ́, Gaali sú xó bó ɖɔ: “Abimɛlɛ́ki e, yǐ gbɛtɔ́ gɔ́ nú ahwangɔnu towe, bó wá fun ahwan xá mì.” Ée Zevúlu, tokpɔngán e ɖo toxo ɔ́ mɛ ɔ́ se xó e Gaali, Evɛ́di ví ɔ́ ɖɔ lɛ́ɛ ɔ́, é sin xomɛ. É sɛ́ mɛ dó Abimɛlɛ́ki ɖo nǔglɔ́, bó ɖɔ yě ní yi ɖɔ n'i ɖɔ: “Gaali, Evɛ́di ví ɔ́ kpó nɔví tɔn lɛ́ɛ kpó wá Sikɛ́mu din bó ɖo to ɔ́ mɛ nu lɛ́ɛ fɔ́n dó jǐ towe wɛ. Din ɔ́, hwi kpó ahwan towe lɛ́ɛ kpó ní tɔ́n zǎn mɛ din bó yi tɔ wu ɖo zunkan mɛ. Sɔ zǎnzǎn hwenu e hwe ná tɔ́n ɔ́, a nǎ wá tɔ́n ahwan toxo ɔ́, bɔ hwenu e Gaali kpó ahwan tɔn lɛ́ɛ kpó ná tɔ́n wá kpé we ɔ́, a nǎ wa nǔ xá yě lě e hlɔ̌nhlɔ́n towe kpé wú gbɔn é.” Ée é jɛ zǎn mɛ ɔ́, Abimɛlɛ́ki kpó ahwan tɔn lɛ́ɛ kpó má yěɖée ɖó gɔnu ɛnɛ, lobo yi tɔ wu ɖo Sikɛ́mu kpá. Ée Gaali tɔ́n sín toxo ɔ́ mɛ, bó yi nɔ te ɖo hɔntogbó ɔ́ kpá ɔ́, Abimɛlɛ́ki kpó gbɛ̌ta tɔn bǐ kpó tɔ́n sín fí e yě tɔ wu ɖó é. Bɔ Gaali mɔ yě, bó ɖɔ nú Zevúlu ɖɔ: “Vɛ̌ kpɔ́n! Mɛ ɖé lɛ́ɛ ɖo te jɛ sín só lɛ́ɛ jí wɛ.” Zevúlu ka ɖɔ: “Éeǒ mɛ! Só lɛ́ɛ sín yɛ dó mɔ gbɛtɔ́ ná wɛ a ɖe.” Gaali lɛ́ yí xó, bó ɖɔ: “Kpɔ́n! Gbɛtɔ́ wɛ ɖo te jɛ sín só e ɖo to ɔ́ tɛ́ntin ɔ́ jí wɛ ganjí; bɔ gbɛ̌ta ɖěvo gbɔn nǔkantɔ́ lɛ́ɛ sín cɛ́nitín sín ali jǎwe.” Zevúlu ka ɖɔ n'i ɖɔ: “Nu e flé wɛ a nɔ ɖe lɛ́ɛ lo? A ma ko ɖɔ mɛ̌ wɛ nɔ́ nyí Abimɛlɛ́ki ɔ́, bɔ mǐ ná jó mǐɖée dó, bɔ é ná kpa acɛ ná a jí a? Din ɔ́, énɛ́ é ja kpó mɛ e a gbɛ́ wǎn ná lɛ́ɛ kpó nɛ́; bo yi fun ahwan xá ɛ bo!” Énɛ́ ɔ́, Gaali nɔ Sikɛ́munu lɛ́ɛ nu, bó yi tɔ́n ahwan Abimɛlɛ́ki. Abimɛlɛ́ki hú gǎn ɛ bɔ é hɔn, bɔ Abimɛlɛ́ki jɛ gúdo tɔn; gbɛtɔ́ gěgé kú kɔn nyi ayǐ káká yi toxo ɔ́ sín hɔntogbó ta. Abimɛlɛ́ki yi jɛ agban ɖó Aluma, bɔ Zevúlu nya Gaali kpó nɔví tɔn lɛ́ɛ kpó sín Sikɛ́mu, lobo dó sɛ́n nú yě ɖɔ yě ní má lɛ́ kɔ wá toxo ɔ́ mɛ ó. Ayǐhɔ́ngbe tɔn ɔ́, Sikɛ́munu lɛ́ɛ ɖo nǔ sɔ́ wɛ, bó ná yi gle mɛ, bɔ è wǎ ɖɔ nú Abimɛlɛ́ki. Abimɛlɛ́ki ka kplá ahwan tɔn lɛ́ɛ, bó má yě ɖó gɔnu atɔn, lobo tɔ wu nú yě ɖo gle ɔ́ mɛ. Bɔ ée é mɔ Sikɛ́munu lɛ́ɛ tɔ́n sín toxo ɔ́ mɛ ɔ́, é kpó mɛ tɔn lɛ́ɛ kpó zun dó yě jí bó ná hu yě. Abimɛlɛ́ki kpó gbɛ̌ta e nu é ɖe é kpó bɛ́ wezun bó yi sí ahwan te ɖo toxo ɔ́ sín hɔntogbó jí; bɔ gbɛ̌ta we ɖě lɛ́ɛ zɔn mɛ e ɖo gle ɔ́ mɛ lɛ́ɛ jí bó hu yě. Abimɛlɛ́ki fun ahwan xá mɛ e ɖo toxo ɔ́ mɛ lɛ́ɛ ɖo kéze ɔ́ bǐ mɛ, bó yí toxo ɔ́; é hu to ɔ́ mɛ nu lɛ́ɛ, bó gba toxo ɔ́ bǐ sésé, lobo fúnfún jɛ do tɔn nu bó hɛn ayǐkúngban ɔ́ gblé bɔ mɛ ɖé sɔ́ sixú nɔ jí ǎ. Ée Migidalu-Sikɛ́munu lɛ́ɛ se mɔ̌ ɔ́, yě bǐ yi byɔ́ do e è kun dó vodún Baalu-Bɛlíti xɔ glɔ́ ɔ́ mɛ. È wǎ ɖɔ nú Abimɛlɛ́ki ɖɔ yě hɔn hwlá cí tɛn énɛ́ ɔ́ mɛ. Énɛ́ ɔ́, é yi Salumɔ́ni só ta kpó ahwan tɔn lɛ́ɛ kpó. É zé asyɔ́ví, bó sɛ́n atínla ɖokpó, bó sɔ́ ɖó abɔ̌ta. É ɖe gbe nú ahwan tɔn lɛ́ɛ ɖɔ yě nǐ yá wǔ bló nǔ ɖokpó ɔ́. Bɔ mɛ ɖokpó ɖokpó sɛ́n atínla ɖokpó ɖokpó, bó xwedó Abimɛlɛ́ki. Yě yi xo atínla lɛ́ɛ kplé ɖó do ɔ́ nu, bó dó zo kpó mɛ e ɖ'é mɛ lɛ́ɛ bǐ kpó. Lě e Migidalu-Sikɛ́munu lɛ́ɛ bǐ kú gbɔn é nɛ́; súnnu kpó nyɔ̌nu kpó e kú lɛ́ɛ yi afatɔ́n (1.000) mɔ̌. Abimɛlɛ́ki gosín fínɛ́, bó yi Tevesi. É xá toxo ɔ́ bó yí. Tocɔ́xɔ ɖé ka ɖo toxo ɔ́ tɛ́ntin, bɔ è mɛ dǒ lɛ́ lɛ̌ dó. Fínɛ́ wɛ mɛ e ɖo toxo ɔ́ mɛ lɛ́ɛ, súnnu kpó nyɔ̌nu kpó, kpódó tonukún lɛ́ɛ kpó bǐ yi hɔn hwlá cí. Yě sú hɔn dó ta, bó yi cí xɔ ɔ́ ta aga. Abimɛlɛ́ki wá ahohó ɔ́ kɔn, bó ná tɔ́n ahwan yě. É sɛ yi ahohó ɔ́ sín hɔnlinu, bó ná dó xɔ ɔ́ zo. Lo ɔ́, nǎwe ɖé nyi sé ɖaxó ɖé dó ta tɔn bó fɛ́n ahɔnká ɛ. Tlóló ɔ́, Abimɛlɛ́ki ylɔ́ dɔ̌nkpɛvú e hɛn ahwanfunnú tɔn lɛ́ɛ ɔ́, bó ɖe gbe n'i ɖɔ: “Zě hwǐ towe bó hu mì kpé bónú è ma wá ɖɔ nyɔ̌nu wɛ hu mì ó.” Énɛ́ ɔ́, dɔ̌nkpɛvú ɔ́ lun hwǐ ɔ́ dó lan tɔn mɛ bɔ Abimɛlɛ́ki kú. Ée Izlayɛ́li ví lɛ́ɛ mɔ ɖɔ é kú ɔ́, yě mɛ ɖokpó ɖokpó lɛ́ kɔ yi xwé yětɔn lɛ́ɛ gbe. Énɛ́ ɔ́, Abimɛlɛ́ki ɔ́, nɔví tɔn kanɖé gban (70) e é hu, bó dó wa nǔ nyanya dó tɔ́ tɔn wú ɔ́, Mawu sú axɔ́ tɔn ɛ. Nǔ nyanya e Sikɛ́munu lɛ́ɛ wa ɔ́ bǐ sín axɔ́ wɛ Mawu sú yě lɔmɔ̌. Nu e Yotámu Yelubáalu ví ɔ́ dó yě lɛ́ɛ bí wɛ ɖi yě wú. Ée Abimɛlɛ́ki kú gúdo ɔ́, Tola e nyǐ Púwa vǐ, bó nyí Dódo sín vǐvú ɔ́, wá hwlɛ́n togun Izlayɛ́li tɔn ɔ́. Isakáa sín akɔta mɛ wɛ é jɔ ɖe; Camíi wɛ é nɔ́ nɔ ɖo Eflayímu sókan mɛ. É ɖu gǎn ɖo Izlayɛ́li xɔ xwe ko-nukún-atɔn; énɛ́ ɔ́ gúdo ɔ́, é kú, bɔ è ɖi i ɖó Camíi. Yayíi Galadinu ɔ́ jɛ tɛn tɔn mɛ bó ɖu gǎn ɖo Izlayɛ́li xɔ xwe ko-nukún-we. Vǐ súnnu gban (30) wɛ é ɖó, bɔ yě nɔ́ xá tócí gban (30) jí lobo ɖó gletoxo gban (30) ɖo Galadi yíkúngban jí. Káká jɛ din ɔ́, è nɔ lɛ́ ylɔ́ toxo énɛ́ lɛ́ɛ ɖɔ gletoxo Yayíi tɔn. Ée Yayíi wá kú ɔ́, è ɖi i ɖó Kamɔ́ni. Izlayɛ́li ví lɛ́ɛ lɛ́ wa nǔ e ma nyɔ́ Mawu Mavɔmavɔ nukún mɛ ǎ é: Yě sɛn vodún Baalu lɛ́ɛ kpó Asitaatée lɛ́ɛ kpó; yě sɛn vodún Silíi tɔn lɛ́ɛ, Sidɔ́ɔnnu lɛ́ɛ tɔn lɛ́ɛ, Mɔwabunu lɛ́ɛ tɔn lɛ́ɛ, Amumɔ́ɔ ví lɛ́ɛ tɔn lɛ́ɛ kpó Filisitɛ́ɛn lɛ́ɛ tɔn lɛ́ɛ kpo. Yě jó Mawu Mavɔmavɔ dó bó sɔ́ nɔ sɛn ɛ ǎ. Énɛ́ ɔ́, Mawu Mavɔmavɔ sin xomɛ dó Izlayɛ́li ví lɛ́ɛ bó jó yě nú Filisitɛ́ɛn lɛ́ɛ kpó Amumɔ́ɔ ví lɛ́ɛ kpó. Bɛ́ sín hwenɛ́nu ɔ́, mɛ énɛ́ lɛ́ɛ kpa acɛ gannaganna nú Izlayɛ́li ví e nɔ nɔ Galadi, ɖo fí e Amɔliti lɛ́ɛ nɔ ɖ'ayǐ, ɖo Judɛ́ɛn tɔ ɔ́ sín zǎnzǎnhwe jí lɛ́ɛ; yě dó ya nú yě káká nú xwe afɔtɔn-nukún-atɔn. Amumɔ́ɔ ví lɛ́ɛ tlɛ́ dó asá Judɛ́ɛn tɔ ɔ́, bó yi fun ahwan xá akɔta Judáa tɔn ɔ́, Bɛnjamɛ́ɛ tɔn ɔ́, kpódó Eflayímu tɔn ɔ́ kpó. Bɔ Izlayɛ́li ví lɛ́ɛ jɛ lele ɖaxó ɖé mɛ. Énɛ́ ɔ́, yě sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí; yě ɖɔ n'i ɖɔ: “Mǐ hu hwɛ dó we, ɖó mǐ jǒ hwi mɛ e nyí Mawu mǐtɔn ɔ́ dó, bó sɛn vodún Baalu lɛ́ɛ.” Mawu Mavɔmavɔ ɖɔ nú yě ɖɔ: “Hwenu e Ejípunu lɛ́ɛ, Amumɔ́ɔ ví lɛ́ɛ, Amɔliti lɛ́ɛ, Filisitɛ́ɛn lɛ́ɛ, Sidɔ́ɔnnu lɛ́ɛ, Amalɛ́ki ví lɛ́ɛ kpó Mawɔ́ninu lɛ́ɛ kpó ɖo acɛ gannaganna kpa nú mi wɛ, bɔ mi sú xó ylɔ́ mì ɖɔ ma wá gɔ́ alɔ nú émí ɔ́, un hwlɛ́n mi sín alɔ yětɔn mɛ ǎ cé? Lo ɔ́, midɛɛ lɛ́ɛ ɔ́, mi jó nyɛ dó, bó sɛn vodún lɛ́ɛ. Énɛ́ ɔ́ wú wɛ un gbɛ́ ɖɔ un kún sɔ́ ná lɛ́ hwlɛ́n mi ɖě ó. Hǔn mi bó sú xó ylɔ́ vodún e mi kpɔ́n bó sɔ́ lɛ́ɛ, ɖɔ yě ní wá gɔ́ alɔ nú émí. Yědɛɛ lɛ́ɛ ní bó wá hwlɛ́n mi hwenu e mi ɖo lele mɛ din é bó.” Bɔ Izlayɛ́li ví lɛ́ɛ lɛ́ yí xó, bó ɖɔ: “Mawu Mavɔmavɔ, hwɛ wɛ mǐ hu. Wa nǔ xá mǐ lě e é jló we gbɔn ɔ́, amɔ̌, hwlɛ̌n mǐ gán égbé.” Énɛ́ ɔ́ gúdo ɔ́, yě bɛ̌ vodún lɛ́ɛ kɔn nyi gbě, bó lɛ́ jɛ Mawu Mavɔmavɔ sɛn jí. Bɔ ya e ji wɛ yě ɖe ɔ́ blá wǔ nú Mawu Mavɔmavɔ. Amumɔ́ɔ ví lɛ́ɛ sɛ́ yěɖée kplé, bó ɖó gɔnu ɖó Galadi yíkúngban jí, bɔ Izlayɛ́li ví lɛ́ɛ lɔmɔ̌ sɛ yěɖée kplé, bó ɖó gɔnu ɖó Misipa. Énɛ́ ɔ́, Izlayɛ́li ví e ɖo Galadi lɛ́ɛ kpó gǎn yětɔn lɛ́ɛ kpó nɔ ɖo ɖiɖɔ nú yěɖée wɛ ɖɔ: “Mɛ̌ wɛ ná jɛ nukɔn bó tɔ́n ahwan Amumɔ́ɔ ví lɛ́ɛ? Mɛ e ná jɛ nukɔn bó tɔ́n ahwan yě ɔ́ ná ɖu gǎn ɖo mɛ e ɖo Galadi lɛ́ɛ bǐ nu.” Ahwanfuntɔ́ syɛ́nsyɛ́n ɖé ɖo Galadi, bɔ è nɔ ylɔ́ ɛ ɖɔ Jɛfutée; nyɔ̌nu agalɛtɔ́ ɖé sín vǐ wɛ bɔ tɔ́ tɔn nɔ́ nyí Galadi. Galadi sín asi tawun ɔ́ lɔ ji vǐ súnnu n'i. Ée vǐ lɛ́ɛ wá su ɔ́, yě nya Jɛfutée bó ɖɔ n'i ɖɔ: “A nǎ ɖu nǔ e tɔ́ mǐtɔn jó dó nú mǐ lɛ́ɛ ɖě sín gǔ ǎ, ɖó nyɔ̌nu ɖěvo sín vǐ wɛ a nyǐ.” Énɛ́ ɔ́, Jɛfutée hɔn bó nɔ zɔ nú nɔví tɔn lɛ́ɛ; é yi nɔ Tɔ́vu tomɛ. Gběvún ɖé lɛ́ɛ ká gɔ́ n'i bó xwédo e gbɔn fí e é gbɔn lɛ́ɛ. É wá su hwe ɖé nu bɔ Amumɔ́ɔ ví lɛ́ɛ tɔ́n ahwan Izlayɛ́li ví lɛ́ɛ. Ée Amumɔ́ɔ ví lɛ́ɛ ɖo ahwan fun wɛ mɔ̌ ɖo Izlayɛ́li ɔ́, tomɛxó Galadi tɔn lɛ́ɛ yi Jɛfutée gbé mɛ ɖo Tɔ́vu to mɛ. Yě yi ɖɔ n'i ɖɔ: “Wǎ nɔ ahwangɔnu mǐtɔn lɛ́ɛ nu, bónú mǐ ná sixú fun ahwan xá Amumɔ́ɔ ví lɛ́ɛ.” Jɛfutée ka ɖɔ nú yě ɖɔ: “Wǎn wɛ mi gbɛ́ nú mì, bó nya mì sín daá ce xwé ǎ cé? Din e adǎn ɖo mi gbo wɛ ɔ́, mi wá ɖo biba mì wɛ!” Tomɛxó lɛ́ɛ yí xó bó ɖɔ: “Hɔn wɛ mǐ hɔn wá su we din, bónú a nǎ wá fun ahwan xá Amumɔ́ɔ ví lɛ́ɛ xá mǐ, nú a nǎ nyǐ gǎn mǐtɔn, gǎn Galadinu lɛ́ɛ bǐ tɔn.” Énɛ́ ɔ́, Jɛfutée ɖɔ nú yě ɖɔ: “Ényí mi wá kplá mì, bɔ un yi fun ahwan xá Amumɔ́ɔ ví lɛ́ɛ, bɔ Mawu Mavɔmavɔ jó yě nú mi ɔ́, un ná nyí gǎn mitɔn.” Ée é ɖɔ mɔ̌ ɔ́, tomɛxó Galadi tɔn lɛ́ɛ ɖɔ n'i ɖɔ: “Mǐ dó akpá ɖɔ mǐ ná blǒ nǔ e a ɖɔ ɔ́; Mawu Mavɔmavɔ nyí kúnnuɖetɔ́ mǐtɔn.” Énɛ́ ɔ́, Jɛfutée xwedó tomɛxó Galadi tɔn lɛ́ɛ yi; togun ɔ́ zé e gǎn, yě sɔ́ ɛ ɖó ahwangɔnu lɛ́ɛ nu. Bɔ é vɔ́ xó e é ɖɔ nú tomɛxó lɛ́ɛ ɔ́ ɖɔ ɖo Misipa, ɖo Mawu Mavɔmavɔ nukɔn. Jɛfutée sɛ́ mɛ dó axɔ́sú Amumɔ́ɔ ví lɛ́ɛ tɔn, nú è nǐ yi kanbyɔ́ ɛ ɖɔ: “Xó tɛ́ wɛ ɖo nyɛ kpó hwi kpó tɛ́ntin, bɔ a wǎ tɔ́n ahwan to ce?” Axɔ́sú Amumɔ́ɔ ví lɛ́ɛ tɔn ɔ́ ká yí gbe sɛ́ dó Jɛfutée ɖɔ: “Hwenu e Izlayɛ́li ví lɛ́ɛ gosín Ejípu ɔ́, yě yǐ to ce, sín Aanɔ́ni tɔdo mɛ káká yi tɔsisa Yabɔ́ku tɔn ɔ́ kɔn, bó lɛ́ yí Judɛ́ɛn tɔdo ɔ́. Hǔn, bo jó ayǐkúngban énɛ́ lɛ́ɛ dó nú mǐ kpó jlǒ towe kpó xwɛ́lɛ́ɛ́.” Jɛfutée lɛ́ sɛ́ mɛ dó axɔ́sú Amumɔ́ɔ ví lɛ́ɛ tɔn, bónú è nǐ yi ɖɔ n'i ɖɔ: “Izlayɛ́li ví lɛ́ɛ yí ayǐkúngban Mɔwabunu lɛ́ɛ tɔn ǎ, yě ká yí Amumɔ́ɔ ví lɛ́ɛ tɔn ǎ. Đó hwenu e yě gosín Ejípu ɔ́, yě gbɔn gbětótló mɛ káká yi Xu Vɔvɔ ɔ́ kɔn, bó yi Kadɛ́ci. Ée yě jɛ fínɛ́ ɔ́, yě sɛ́ mɛ dó axɔ́sú Edɔ́mu tɔn ɔ́ bó byɔ́ ɛ gbe ɖɔ émí ná gbɔn ayǐkúngban tɔn jí dín. Lo ɔ́, axɔ́sú ɔ́ ná gbe tɔn yě ǎ. Izlayɛ́li ví lɛ́ɛ byɔ́ nǔ ɖokpó ɔ́ axɔ́sú Mɔwabu tɔn ɔ́, bɔ é lɔmɔ̌ gbɛ́. Bɔ yě gbɔ bó cí Kadɛ́ci. Énɛ́ ɔ́ gúdo ɔ́, Izlayɛ́li ví lɛ́ɛ lɛ́ vɔ́ sɔ́ ali gbɔn gbětótló mɛ, bó kpa kɛ́n nú ayǐkúngban Edɔ́mu tɔn ɔ́ kpó Mɔwabu tɔn ɔ́ kpó, bó wá jɛ Mɔwabu sín zǎnzǎnhwe jí. Yě ɖǒ gɔnu ɖó tɔsisa Aanɔ́ni tɔn ɔ́ sín akpá ɖě ɔ́ xwé; yě ká yi ayǐkúngban Mɔwabu tɔn ɔ́ jí ǎ, ɖó Aanɔ́ni ɔ́ wɛ nyí Mɔwabu sín dogbó. Ée yě jɛ fínɛ́ ɔ́, yě sɛ́ mɛ dó axɔ́sú Amɔliti tɔn Sihɔ́ni e ɖo axɔ́sú ɖu wɛ ɖo Hɛcibɔ́ni ɔ́ é, bó byɔ́ ɛ ɖɔ é ní ná gbe émí bónú émí ná dín gbɔn ayǐkúngban tɔn jí yi to e è nǎ émí ɔ́ mɛ. Lo ɔ́, Sihɔ́ni ko ɖeji dó Izlayɛ́li ví lɛ́ɛ wú káká bó ná jó yě dó bɔ yě ná gbɔn ayǐkúngban tɔn jí ǎ; é sɛ ahwangɔnu tɔn lɛ́ɛ bǐ kplé bó sí ahwan te ɖo Yaxisa lobo tɔ́n ahwan Izlayɛ́li ví lɛ́ɛ. Mawu Mavɔmavɔ, Mawu Izlayɛ́li tɔn ɔ́ jó Sihɔ́ni kpó ahwangɔnu tɔn lɛ́ɛ kpó nú Izlayɛ́li ví lɛ́ɛ, bɔ yě ɖuɖéjí. Izlayɛ́li ví lɛ́ɛ yí ayǐkúngban e jí Amɔliti lɛ́ɛ ɖe ɔ́ bǐ, bɛ́ sín Aanɔ́ni sín tɔdo mɛ káká wá yi tɔsisa Yabɔ́ku tɔn ɔ́ kɔn; bó bɛ́ sín gbětótló zǎnzǎnhwe jí tɔn ɔ́ kɔn káká yi Judɛ́ɛn tɔ ɔ́ kɔn. Mawu Mavɔmavɔ, Mawu Izlayɛ́li tɔn ɔ́ wɛ wa nǔ bɔ mǐ togun tɔn ɔ́ kpé wú bó yí ayǐkúngban Amɔliti lɛ́ɛ tɔn, bɔ hwɛ ɔ́, a nǎ lɛ́ yí sín mǐ sí wɛ a? Ayǐkúngban e vodún towe Kemɔci ná we ɔ́, ɖo así towe ǎ cé? Hǔn mǐ lɔmɔ̌ ɔ́, ayǐkúngban e Mawu Mavɔmavɔ wa nǔ bɔ mǐ kpé wú bó yí ɔ́, mǐ ɖó acɛ d'é nu. A vɛdó ɖɔ émí dó hlɔ̌nhlɔ́n hú Balaki, Sipɔ́ɔ ví axɔ́sú Mɔwabu tɔn ɔ́ wɛ sín a? Có éyɛ́ ba nǔɖɔ Izlayɛ́li ví lɛ́ɛ ǎ, é ká tɔ́n ahwan yě ǎ. Sín xwe afɔɖé kanwe ko (300) ɖíe wɛ Izlayɛ́li ví lɛ́ɛ ɖo Hɛcibɔ́ni kpó Alowɛ́ɛ kpó, kpó toxo e yá fí énɛ́ lɛ́ɛ kpó, kpódó toxo ɖaxó ɖaxó e ɖo Aanɔ́ni tɔ ɔ́ tó lɛ́ɛ bǐ kpó; aniwú wɛ mi ma ka yí ayǐkúngban énɛ́ ɔ́ sín yě sí sín hwenɛ́nu ǎ? Nyɛ ɔ́, un wa nǔɖé nyi do nú we ǎ; hwi wɛ tɔ́n ahwan mì, bó dó wa nǔ nyanya dó mì. Mawu Mavɔmavɔ Hwɛɖɔtɔ́ gbɛtɔ́ lɛ́ɛ tɔn ɔ́, ní gbo hwɛ ɔ́ nú Izlayɛ́li ví lɛ́ɛ kpó Amumɔ́ɔ ví lɛ́ɛ kpó égbé.” Lo ɔ́, axɔ́sú Amumɔ́ɔ ví lɛ́ɛ tɔn ɔ́, ké ya nú xó e Jɛfutée ɖɔ ɔ́ ǎ. Yɛ Mawu Mavɔmavɔ tɔn wá ta nú Jɛfutée. Bɔ Jɛfutée gbɔn Galadi gbé jí, bó gbɔn ayǐkúngban Manasée tɔn jí. Énɛ́ ɔ́ gúdo ɔ́, é yi Misipa ɖo Galadi, bó ná gbɔn Amumɔ́ɔ ví lɛ́ɛ sín ayǐkúngban jí. É dó akpá élɔ́ nú Mawu Mavɔmavɔ ɖɔ: “Ényí a zě Amumɔ́ɔ ví lɛ́ɛ ɖó acɛ ce mɛ ɔ́, hwenu e un ná ɖu ɖo yě jí, bó ná lɛ́ kɔ jǎwe xwé ɔ́, nǔ funfún ɖo xo mɛ nukɔntɔn e ná tɔ́n sín xwé ce gbe, bó ná wá kpé mì ɔ́, un ná sɔ́ dó sá vɔ̌ e è nɔ dó zo ɔ́ nú we.” Jɛfutée dó asá dogbó ɔ́, bó yí tɔ́n ahwan Amumɔ́ɔ ví lɛ́ɛ, bɔ Mawu Mavɔmavɔ jó yě n'i. Jɛfutée ɖu ɖo yě jí tawun, bó yí toxo e ɖo Alowɛ́ɛ tɛ́ntin lɛ́ɛ, bó yí toxo e lɛ́ lɛ̌ dó Mɛniti kpó Avɛ́li-Kelamimu kpó lɛ́ɛ; toxo ko wɛ é yí; Amumɔ́ɔ ví lɛ́ɛ gbɔ bo jó ta nú Izlayɛ́li ví lɛ́ɛ. Ée Jɛfutée lɛ́ kɔ wá xwé ɖo Misipa ɔ́, vǐ tɔn nyɔ̌nu ɔ́ wɛ tɔ́n bó wá kpé e, bɔ hǔn ɖo gbe jɛ wɛ bɔ é ɖo we ɖú wɛ. Vǐ ɖokpó géé e é ká ɖó ɔ́ nɛ́, é sɔ́ ɖó vǐ ɖěvo ǎ. Ée Jɛfutée mɔ ɛ lě tlóló ɔ́, é vún awu dó kɔ nú éɖée bó dó ɖe xlɛ́ ɖɔ ayi émítɔn gba dó, lobo ɖɔ: “Áo vǐ ce! A dǒ mì lele mɛ. A ɖo mɛ e ɖo ayixa gba dó nú mì wɛ lɛ́ɛ mɛ; un ko dó akpá nú Mawu Mavɔmavɔ hǔn, un ma ka sixú gɔn ɖiɖe nɛ́!” Vǐ ɔ́ ka ɖɔ n'i ɖɔ: “Daá, ényí a ko dó akpá nú Mawu Mavɔmavɔ hǔn, wa nǔ xá mì lě e hwi ɖésúnɔ kó ɖɔ gbɔn sín nu towe mɛ é; ɖó Mawu Mavɔmavɔ wɛ bló din bɔ nǔ e kɛntɔ́ towe lɛ́ɛ wa xá we ɔ́, a ba hlɔn tɔn. Lo ɔ́, un ɖo byɔ̌byɔ́ we wɛ ɖɔ a nǐ nɔ te kpɔ́n mì nú sun we; nyɛ kpó ɖyɔ̌vǐ hǎgbɛ́ ce lɛ́ɛ kpó ná yi sókan mɛ, bɔ mǐ ná yi ya avǐ, ɖó asú e un ma da cóbó ɖo nǎ kú wɛ ǎ ɔ́ wútu.” Jɛfutée ka ná gbe e ɖɔ é ní bó yi nú sun we; bɔ é yi sókan mɛ é kpó ɖyɔ̌vǐ hǎgbɛ́ tɔn lɛ́ɛ kpó, bɔ yě ya avǐ ɖó asú e é má da ǎ é wútu. Ée sun we lɛ́ɛ wá yi ɔ́, é lɛ́ kɔ yi tɔ́ tɔn gɔ́n, bɔ tɔ́ tɔn zé e dó ɖe akpá e é dó é; énɛ́ ɔ́, é ɖo alɔ jí bó kú. Bɛ́ sín hwenɛ́nu ɔ́, è ɖǒ walɔ énɛ́ ɔ́ ayǐ ɖo Izlayɛ́li. Bɔ xwewú xwewú tɛgbɛ ɔ́, Izlayɛ́li nyɔ̌nu lɛ́ɛ nɔ́ yi ya avǐ xɔ azǎn ɛnɛ dó vǐ nyɔ̌nu Jɛfutée, Galadinu ɔ́ tɔn tamɛ. Súnnu e jɔ ɖo akɔta Eflayímu tɔn mɛ lɛ́ɛ sɛ yěɖée kplé, bó dó asá Judɛ́ɛn tɔ ɔ́, bó yi Safɔ́ni. Yě ɖɔ nú Jɛfutée ɖɔ: “Étɛ́wú wɛ a xwe ahwan fun xá Amumɔ́ɔ ví lɛ́ɛ gbé bó má ká ylɔ́ mǐ bónú mǐ nǎ wá gɔ́ so nú we ǎ? Mǐ ná dó xwé towe zo, bó ná fyɔ́ hwi kpó xwé ɔ́ kpó.” Jɛfutée ka yí gbe nú yě ɖɔ: “Nyɛ kpó togun ce kpó ɔ́, mǐ li za ɖésú xá Amumɔ́ɔ ví lɛ́ɛ. Un sɛ́ wɛn dó mi; lo ɔ́, mi wá hwlɛ́n mì sín yě sí ǎ. Ée un mɔ ɖɔ mi kún ɖo wǐwá wɛ ó ɔ́, un gbɔ bo sɔ́ ta mɛ nyi gbě bó yi tɔ́n ahwan Amumɔ́ɔ ví lɛ́ɛ, lobɔ Mawu Mavɔmavɔ ka jó yě nú mì. Bɔ aniwú wɛ mi wá ɖo ahwan ná fun xá mì wɛ lo?” Jɛfutée kplé súnnu e ɖo Galadi gbé jí lɛ́ɛ bǐ, bó tɔ́n ahwan Eflayímu ví lɛ́ɛ, bó ɖu ɖo yě jí. Eflayímu ví lɛ́ɛ wɛ ko ɖɔ ɖ'ayǐ ɖɔ: “Mi mɛ e ɖo Galadi gbé jí lɛ́ɛ ɔ́, gbějɛtɔ́ akɔta Eflayímu tɔn lɛ́ɛ jɛ́n mi nyí; mi gosín akɔta Eflayímu tɔn ɔ́ mɛ, bó wá yi akɔta Manasée tɔn ɔ́ mɛ.” Énɛ́ ɔ́ gúdo ɔ́, Galadi sín mɛ lɛ́ɛ yi cí fí e è nɔ dó asá Judɛ́ɛn tɔ ɔ́ ɖe ɔ́, bó ná gbo ali nú Eflayímu ví lɛ́ɛ. Mɛ e ɖo hinhɔn wɛ lɛ́ɛ ɖě gbɔn fínɛ́ dín hweɖěbǔnu ɔ́, è nɔ kanbyɔ́ ɛ ɖɔ: “Eflayímu sín mɛ wɛ a nyǐ a?” Ényí é ɖɔ: “Éeǒ” ɔ́, è nɔ ɖɔ n'i ɖɔ é ní ɖɔ: “Cibolé”. Bɔ mɛ ɔ́ nɔ ɖɔ: “Sibolé”, ɖó é nɔ sixú ɖɔ xógbe ɔ́ ganjí ǎ. Énɛ́ ɔ́, è nɔ wlí i bó nɔ hu i ɖo fí e è nɔ dó asá Judɛ́ɛn tɔ ɔ́ ɖe ɔ́ kpá. Hwenɛ́nu ɔ́, Eflayímu sín mɛ adɔ̌kpo we afɔwó (42.000) wɛ kú. Jɛfutée, Galadinu ɔ́ ɖu gǎn ɖo Izlayɛ́li xɔ xwe ayizɛ́n; énɛ́ ɔ́ gúdo ɔ́, é kú bɔ è ɖi i ɖó Misipa, toxo tɔn mɛ ɖo Galadi. Ée Jɛfutée kú gúdo ɔ́, Ibusáni Bɛteleyɛ́munu ɔ́ wɛ húzú gǎn ɖo Izlayɛ́li. Vǐ súnnu gban (30) wɛ é ɖó, bó ɖó vǐ nyɔ̌nu gban (30). É fɔ vǐ nyɔ̌nu tɔn lɛ́ɛ ná asú dó akɔta ɖěvo lɛ́ɛ mɛ, bó da asi nú vǐ tɔn lɛ́ɛ ɖo akɔta ɖěvo lɛ́ɛ mɛ. É nɔ togun Izlayɛ́li tɔn ɔ́ nu xɔ xwe tɛ́nwe. Énɛ́ ɔ́ gúdo ɔ́, é kú bɔ è ɖi i ɖó Bɛteleyɛ́mu. Ée Ibusáni kú gúdo ɔ́, Elɔ́ni e ɖo akɔta Zabulɔ́ɔn tɔn ɔ́ mɛ ɔ́, ɖu gǎn ɖo Izlayɛ́li xɔ xwe wǒ. Énɛ́ ɔ́ gúdo ɔ́, é kú bɔ è ɖi i ɖó Ayalɔ́ni, ɖo Zabulɔ́ɔn yíkúngban jí. Ée Elɔ́ni kú gúdo ɔ́, Avidɔni, Ilɛ́li Pileyatɔ́ni ɔ́ sín ví ɔ́ húzú gǎn ɖo Izlayɛ́li. Vǐ súnnu kanɖé (40) wɛ Avidɔni ɖó, bó ɖó vǐvú súnnu gban (30), bɔ yě bǐ nɔ xá tócí ɖokpó ɖokpó jí. Avidɔni nɔ Izlayɛ́li togun ɔ́ nu xɔ xwe tántɔn. Énɛ́ ɔ́ gúdo ɔ́, é kú bɔ è ɖi i ɖó Pileyatɔ́ni, ɖo ayǐkúngban Eflayímu tɔn jí, ɖo Amalɛ́ki sókan mɛ. Izlayɛ́li ví lɛ́ɛ lɛ́ wa nǔ e má nyɔ́ Mawu Mavɔmavɔ nukún mɛ ǎ é; énɛ́ ɔ́ wɛ zɔ́n bɔ Mawu Mavɔmavɔ jó yě nú Filisitɛ́ɛn lɛ́ɛ xɔ xwe kanɖé. Nya ɖé tíin, bó ɖo gletoxo e è nɔ ylɔ́ ɖɔ Soléa ɔ́ mɛ, bɔ è nɔ ylɔ́ ɛ ɖɔ Manɔwáxi, bó ɖo akɔta Dan tɔn ɔ́ sín xwédo ɖé mɛ. Asi tɔn ji vǐ kpɔ́n gbeɖé ǎ. Wɛnsagun Mawu Mavɔmavɔ tɔn ka wá tɔ́n dó nyɔ̌nu énɛ́ ɔ́ jí gbe ɖokpó, bó ɖɔ n'i ɖɔ: “Un tunwun ɖɔ a kún ɖó vǐ ó, ɖó wɛnsinɔ wɛ a nyǐ. Nǔ ɖo mɔ̌ có, a nǎ mɔ xo bó ná ji vǐ súnnu ɖokpó. Bɛ́ sín din ɔ́, ma sɔ́ nɔ́ nu vɛ̌ɛn ɖě abǐ ahan syɛ́nsyɛ́n ɖěbǔ ó; ma ka ɖu nǔɖuɖu e nyí su é ɖěbǔ ó, ɖó a nǎ mɔ xo bó ná ji vǐ súnnu ɖokpó. Hǎ ná jɛ ta tɔn kpɔ́n gbeɖé ǎ, ɖó vǐ énɛ́ ɔ́, è sɔ́ ɛ ɖó vo nú Mawu sín nɔ tɔn xo mɛ. É wɛ ná jɛ Izlayɛ́li ví lɛ́ɛ hwlɛ́n sín Filisitɛ́ɛn lɛ́ɛ sí jí.” Nyɔ̌nu ɔ́ yi xwé, bó ɖɔ nú asú tɔn ɖɔ: “Đɛ̌mɛnu Mawu tɔn ɖokpó wá gɔ̌n ce; é cí wɛnsagun Mawu tɔn ɖɔhun, ɖó ninɔmɛ tɔn dó abaɖa. Un kan fí e é gosín ɔ́ byɔ́ ɛ ǎ; é ká ɖɔ nyǐkɔ tɔn nú mì ǎ. É ɖɔ nú mì ɖɔ nyɛ na mɔ xo bó ná ji vǐ súnnu ɖokpó. É gbɛ́ nú mì ɖɔ bɛ́ sín din ɔ́, nyɛ ní má sɔ́ nu vɛ̌ɛn ɖě ó, nyɛ ní má sɔ́ nu ahan syɛ́nsyɛ́n ɖě ó; nyɛ ní má ká sɔ́ ɖu nǔɖuɖu e nyí su é ɖěbǔ ó, ɖó vǐ ɔ́, è nǎ sɔ́ ɛ ɖó vo nú Mawu, sín xo mɛ káká yi kúzán gbe tɔn.” Énɛ́ ɔ́, Manɔwáxi asú tɔn ɔ́ sa vo nú Mawu Mavɔmavɔ ɖɔ: “Aklúnɔ, ɖɛ̌mɛnu towe e a sɛ́ dó mǐ ɖ'ayǐ ɔ́, kɛnklɛ́n bó lɛ́ sɛ́ ɛ dó mǐ bónú é ná kplɔ́n mǐ lě e mǐ nǎ nɔ gbɔn kpó vǐ súnnuví e è nǎ ji ɔ́ kpó é.” Mawu yí gbe nú nǔ e Manɔwáxi byɔ́ ɛ é: Wɛnsagun Mawu Mavɔmavɔ tɔn lɛ́ wá nyɔ̌nu ɔ́ gɔ́n ɖo gleta. Asú tɔn ká ɖo akpá tɔn hwenɛ́nu ǎ. Bɔ nyɔ̌nu ɔ́ kán wezun bó yi ɖɔ nú asú tɔn ɖɔ: “Vɛ̌ kpɔ́n! Nya e wá gɔ̌n ce azǎn nabí ɖé ɖíe ɔ́, lɛ́ wá tɔ́n dó jǐ ce.” Manɔwáxi ka xwedó asi tɔn azɔn ɖokpó; é sɛ yi nya ɔ́ gɔ́n, bó kanbyɔ́ ɛ ɖɔ: “Hwi wɛ ɖɔ xó nú asi ce a?” Nya ɔ́ ka yí gbe n'i ɖɔ: “Ɛɛn nyɛ wɛ.” Manɔwáxi lɛ́ yí xó bó ɖɔ: “É nyɔ́! Hwenu e xó e a ɖɔ lɛ́ɛ ná jɛ ɔ́, sɛ́n tɛ́ lɛ́ɛ wɛ mǐ ɖó ná xwedó dó hɛn vǐ ɔ́ ná? Étɛ́ wɛ mǐ ɖó ná wa n'i?” Wɛnsagun Mawu Mavɔmavɔ tɔn ɔ́ ka ɖɔ nú Manɔwáxi ɖɔ: “Asi towe ɖó ná gɔn nǔ e sín sɛ́n un dó n'i lɛ́ɛ bǐ ɖu; vǐwuntín sínsɛ́n ɖě ná jɛ nu tɔn ǎ, é ná nu vɛ̌ɛn ǎ; é ná nu ahan syɛ́nsyɛ́n ǎ; é ná ɖu nǔɖuɖu e nyí su é ɖěbǔ ǎ. É ní nyi sɛ́n e un dó n'i lɛ́ɛ ganjí.” Énɛ́ ɔ́, Manɔwáxi ɖɔ nú wɛnsagun ɔ́ ɖɔ: “Kɛnklɛ́n bó nɔ te kpɛɖé bó ná ɖu nǔ. Mǐ nǎ ɖa lɛ̌ngbɔ́ví ɖokpó nú we.” Wɛnsagun ɔ́ ka ɖɔ n'i ɖɔ: “Nú un na bo nɔ te din ɔ́, un sixú ɖu nǔ e a nǎ xwlé mì ɔ́ ǎ. Lo ɔ́, nú a jlǒ ɔ́, a sixú sá vɔ̌ e è nɔ dó zo ɔ́ nú Mawu Mavɔmavɔ.” Manɔwáxi ka tunwun ɖɔ wɛnsagun Mawu Mavɔmavɔ tɔn wɛ ɖo xó ɖɔ nú émí wɛ ǎ, bó ɖɔ n'i ɖɔ: “Đɔ nyǐkɔ towe nú mì, bónú hwenu e xó e a ɖɔ lɛ́ɛ ná jɛ ɔ́, mǐ ná sixú kpa susu nú we.” Wɛnsagun ɔ́ yí xó bó ɖɔ: “Étɛ́wú a jlǒ ná tunwun nyǐkɔ ce? Nyǐkɔ ɖé wɛ bó búdo.” Manɔwáxi zé lɛ̌ngbɔ́ví ɔ́ kpó nǔníná ɔ́ kpó dó sá vɔ̌ ná nú Mawu Mavɔmavɔ ɖo awǐnnya jí. Hwenu e Manɔwáxi kpó asi tɔn kpó ɖo kpínkpɔ́n wɛ ɔ́, nǔ dó abaɖa ɖé jɛ. Ée myɔ ɖo vɔ̌sákpe ɔ́ jí gosín wɛ, bó ɖo jǐ yi wɛ ɔ́, wɛnsagun Mawu Mavɔmavɔ tɔn byɔ́ mɛ, bó ɖidó jǐxwé. Ée Manɔwáxi kpó asi tɔn kpó mɔ mɔ̌ ɔ́, yě j'ayǐ bó xwe agbɔ̌nnusú do. Wɛnsagun Mawu Mavɔmavɔ tɔn ka sɔ́ tɔ́n dó yě jí ɖě ǎ. Manɔwáxi ka wá mɔ nǔ jɛ wú ɖɔ wɛnsagun Mavɔmavɔ tɔn wɛ. Bó ɖɔ nú asi tɔn ɖɔ: “Mǐ kú, ɖó mǐ mɔ Mawu.” Asi tɔn ka ɖɔ n'i ɖɔ: “Ényí Mawu Mavɔmavɔ ko jló ná hu mǐ wɛ ɔ́, é ná yí vɔ̌ e mǐ sá n'i ɔ́ kpó ée mǐ ná ɛ ɔ́ kpó ǎ; é ná ɖe nǔ énɛ́ lɛ́ɛ bǐ xlɛ́ mǐ ǎ; é ka ná ɖɔ xó mɔ̌hunkɔ lɛ́ɛ nú mǐ din ǎ.” Nyɔ̌nu ɔ́ ji vǐ súnnu ɖokpó, bó sun nyǐ i ɖɔ Sanmusɔ́ɔn. Vǐ ɔ́ su, bɔ Mawu Mavɔmavɔ dó acɛ jǐ tɔn. Ahwankpá Dan tɔn ɔ́ mɛ wɛ é ɖe, ɖo Soléa kpó Ɛcitawɔ́lu kpó tɛ́ntin, hwenu e yɛ Mawu Mavɔmavɔ tɔn wá jǐ tɔn bɔ é wa azɔ̌ nukɔntɔn ɔ́ é. Sanmusɔ́ɔn yi Timuna gbe ɖokpó, bó mɔ ɖyɔ̌vǐ Filisitɛ́ɛn ɖé. Ée é lɛ́ kɔ yi xwé ɔ́, é ɖɔ nú mɛjitɔ́ tɔn lɛ́ɛ ɖɔ: “Un mɔ ɖyɔ̌vǐ Filisitɛ́ɛn ɖé ɖo Timuna, bɔ nǔ tɔn nyɔ́ nukún ce mɛ. É jló mì ɖɔ mi ná yi byɔ́ ɛ nú mì bónú má da.” Mɛjitɔ́ tɔn lɛ́ɛ ka ɖɔ n'i ɖɔ: “A mɔ ɖyɔ̌vǐ ɖěbǔ ɖo akɔta towe mɛ abǐ togun mǐtɔn mɛ bó ná da ǎ, bɔ é nyí Filisitɛ́ɛn énɛ́ lɛ́ɛ e ma nɔ sɛn Mawu ǎ lɛ́ɛ mɛ wɛ a nǎ da asi ɖe a?” Bɔ Sanmusɔ́ɔn ɖɔ nú tɔ́ tɔn ɖɔ: “Da ɛ nú mì, ɖó éyɛ́ sín nǔ wɛ nyɔ́ nukún ce mɛ.” Mɛjitɔ́ tɔn lɛ́ɛ ka tunwun ɖɔ Mawu Mavɔmavɔ wɛ zé linlin énɛ́ ɔ́ dó ayi mɛ nú vǐ yětɔn, bó ná mɔ nǔɖé wú bó ɖó dó, bó ná dó ba xó Filisitɛ́ɛn lɛ́ɛ ǎ. Đó hwe énɛ́ ɔ́ nu ɔ́, Filisitɛ́ɛn lɛ́ɛ wɛ ɖo acɛ kpa nú Izlayɛ́li ví lɛ́ɛ wɛ. Sanmusɔ́ɔn kpó mɛjitɔ́ tɔn lɛ́ɛ kpó ɖidó Timuna. Ée yě jɛ vǐwungbo e ɖo gletoxo ɔ́ kpá ɔ́ mɛ ɔ́, kinnikínní wínnyáwínnyá ɖé dó gbe bó tɔ́n lobo kplɔ́ dó Sanmusɔ́ɔn. Yɛ Mawu Mavɔmavɔ tɔn wá Sanmusɔ́ɔn jí, bɔ é tlɛ́n kinnikínní ɔ́ lě e è nɔ tlɛ́n lɛ̌ngbɔ́ví é ɖɔhun. É ká hɛn nǔ ɖěbǔ alɔ mɛ ǎ. É ɖɔ nǔ e é wa ɔ́ nú mɛjitɔ́ tɔn lɛ́ɛ ǎ. É wlí ali tɔn bó yi, bó ɖɔ xó nú ɖyɔ̌vǐ Filisitɛ́ɛn ɔ́. Yɔkpɔ́ ɔ́ sín nǔ nyɔ́ nukún tɔn mɛ ɖésú. Ée azǎn ɖé jɛ ɔ́, Sanmusɔ́ɔn lɛ́ kɔ yi Timuna é kpó mɛjitɔ́ tɔn lɛ́ɛ kpó, bó ná da vǐ ɔ́; ée é ɖo ali jí xweyǐgbe ɔ́, é zɛ bó yi kpɔ́n kinnikínní kúkú ɔ́; é mɔ bɔ wǐin kó dó, ɖo xúgloxú kinnikínní ɔ́ tɔn mɛ. É fɔ wǐin ɔ́, bó ɖíɖɔ́ ɖě ɖo ali jí. É yi xwedó mɛjitɔ́ tɔn lɛ́ɛ wú, bó ná yě bɔ yě ɖíɖɔ́; é ká tínmɛ nú yě ɖɔ wǐin ɔ́, xúgloxú kinnikínní tɔn mɛ wɛ émí fɔ ɖe ǎ. Sanmusɔ́ɔn sín tɔ́ yi nyɔ̌nu ɔ́ gɔ́n bɔ Sanmusɔ́ɔn ylɔ́ agɔ̌ ɖokpó dó asi ɔ́ tamɛ, ɖó mɔ̌ wɛ dɔ̌nkpɛvú lɛ́ɛ nɔ bló gbɔn. Ée Filisitɛ́ɛn lɛ́ɛ mɔ ɛ lě ɔ́, yě cyán dɔ̌nkpɛvú gban (30), bónú yě ná nɔ kpɔ́ xá ɛ. Sanmusɔ́ɔn ɖɔ nú yě ɖɔ: “Un ná ɖɔ nǔbasɔ́ ɖokpó nú mi. Ényí mi tunwun nǔ e ɖɔ wɛ nǔbasɔ́ ɔ́ ɖe ɔ́, bó tínmɛ nú mì cóbɔ azǎn tɛ́nwe e ná ɖu agɔ̌ ɔ́ ná wɛ mǐ ɖe ɔ́ ná kpé ɔ́, un ná ná awu xɔ akwɛ́ gban (30) mi, bó ná lɛ́ ná gban (30) ɖěvo mi bɔ mi ná nɔ ɖyɔ́ ɖě lɛ́ɛ ná. Ényí mi ma ka tunwun ǎ ɔ́, midɛɛ lɛ́ɛ wɛ ná ná awu xɔ akwɛ́ gban (30) mì, bó ná lɛ́ ná gban (30) ɖěvo mì, bɔ un ná dó nɔ ɖyɔ́ ɖě lɛ́ɛ ná.” Yě ká ɖɔ n'i ɖɔ: “Bo ɖɔ nǔbasɔ́ towe, mǐ ɖo tó ɖó we wɛ.” Sanmusɔ́ɔn ɖɔ nú yě ɖɔ: “Nǔ e è nɔ ɖu ɔ́, tɔ́n sín nǔ e nɔ ɖu nǔ ɔ́ mɛ. Nǔ e víví ɔ́ tɔ́n sín nǔ e dó hlɔ̌nhlɔ́n ɔ́ mɛ. Étɛ́ wɛ nyí nǔ ɔ́?” Dɔ̌nkpɛvú lɛ́ɛ ká ko mɔ nǔbasɔ́ ɔ́ ǎ káká bó kó bló azǎn atɔn. Azǎn tɛ́nwegɔ́ ɔ́ gbe ɔ́, yě ɖɔ nú Sanmusɔ́ɔn sín asi ɖɔ: “Blɛ̌ asú towe, bó ɖɔ n'i ɖɔ é ní tín nǔbasɔ́ ɔ́ mɛ nú mǐ; é má nyí mɔ̌ ǎ ɔ́, mǐ ná dǒ hwi kpó xwédo towe bǐ kpó zo. Ya mɛ ná dɔn mǐ dó wɛ mi ɖe wú wɛ mi ylɔ́ mǐ a?” Sanmusɔ́ɔn sín asi yi ɖɔ n'i kpó avǐ kpó ɖɔ: “A yǐ wǎn nú mì ɖěbǔ ǎ; a gbɛ̌ wǎn nú mì! A ɖɔ nǔbasɔ́ ɖé nú mɛ ce lɛ́ɛ, bó ka tínmɛ nú mì ǎ.” Sanmusɔ́ɔn ka ɖɔ n'i ɖɔ: “Un tínmɛ nú tɔ́ ce ǎ, un ka tínmɛ nú nɔ ce ǎ; bɔ hwi wɛ un ná tínmɛ ná a?” Asi tɔn ka ya avǐ n'i káká nú azǎn tɛ́nwe e yě ɖu agɔ̌ ɔ́ é; bɔ azǎn tɛ́nwegɔ́ ɔ́ gbe ɔ́, é gbɔ bó tínmɛ n'i, ɖó é ɖo tagba dó n'i wɛ dín. Énɛ́ ɔ́, tlóló jɛ́n é yi sɔ́ ɖɔ nú mɛ tɔn lɛ́ɛ. Azǎn tɛ́nwegɔ́ ɔ́ gbe ɔ́, cóbónú hwe ná yi xɔ ɔ́, mɛ e ɖo toxo ɔ́ mɛ lɛ́ɛ wá ɖɔ nú Sanmusɔ́ɔn ɖɔ: “Ani wɛ víví hú wǐin? Ani wɛ dó hlɔ̌nhlɔ́n hú kinnikínní?” É ka yí gbe nú yě bó ɖɔ: “Ényí mi ma ko zé nyibúsixwɛ ce dó lɛ gle ǎ ɔ́, mi ná sixú tunwun nǔ e ɖɔ wɛ nǔbasɔ́ ce ɖe ɔ́ ǎ.” Énɛ́ ɔ́, Yɛ Mawu Mavɔmavɔ tɔn wá ta nú Sanmusɔ́ɔn bɔ é yi Acikelɔ́ni. Ée é jɛ fínɛ́ ɔ́, é hu súnnu gban (30), bó yí awu yětɔn lɛ́ɛ, lobo bɛ́ jó nú mɛ e tín nǔbasɔ́ tɔn mɛ lɛ́ɛ. Énɛ́ ɔ́ gúdo ɔ́, é lɛ́ kɔ yi tɔ́ tɔn gɔ́n kpó xomɛsin ɖaxó kpó. È sɔ́ asi tɔn ɔ́ ná xɔ́ntɔn tɔn e nɔ nǔ lɛ́ɛ nu gbe e gbe é kplá asi é. Azǎn ɖé jɛ wá yi, bɔ Sanmusɔ́ɔn yi ba asi tɔn kpɔ́n, ɖo hwenu e è ɖo jinukún ya wɛ é. É hɛn lɛ̌ngbɔ́ví ɖokpó wá n'i. É byɔ́ ɖɔ émí ná yi asi émítɔn gɔ́n ɖo xɔ tɔn mɛ; lo ɔ́, asi tɔn tɔ́ lɔn nǔ n'i ǎ. Asi tɔn tɔ́ ɔ́ gbɛ́ bó ɖɔ n'i ɖɔ: “Un vɛdó ɖɔ a kún sɔ́ yí wǎn n'i ó wɛ sín, bó kó sɔ́ ɛ ná xɔ́ntɔn towe e nɔ nǔ lɛ́ɛ nu gbe e gbe a kplá asi é. Amɔ̌, nɔví tɔn kpɛví nyɔ̌nu ɔ́ nyɔ́ ɖɛkpɛ hú i, a mɔ ɖó mɔ̌ ǎ cé? A sixú zé éyɛ́ ɖó tɛn tɔn mɛ.” Sanmusɔ́ɔn ka ɖɔ: “Nú un wa nǔ ɖěbǔ nyi do nú Filisitɛ́ɛn lɛ́ɛ gayɛnu ɔ́, mɛ ɖěbǔ ná sixú kɛ nu d'é wú nú mì ǎ.” Énɛ́ ɔ́, Sanmusɔ́ɔn yi bó wlí ayǐsájɛ afɔɖé kanwe ko (300). É fɔ zohwín gěgé; é slɛ́ ayǐsájɛ lɛ́ɛ sín sí ɖó kpɔ́ webɔ webɔ, bó blá zohwín ɖokpó ɖokpó dó sí e é slɛ́ lɛ́ɛ wú. É tá zohwín lɛ́ɛ, bó ɖe kanlin lɛ́ɛ nyi te ɖo Filisitɛ́ɛn lɛ́ɛ sín jinukún gle mɛ, bó dó jinukún e è kplé lɛ́ɛ kpó éé kpo ɖo te ɖo hankán nu lɛ́ɛ kpó, kpódó olívutín lɛ́ɛ ɖésú kpán zo. Bɔ Filisitɛ́ɛn lɛ́ɛ kan mɛ e wa mɔ̌ byɔ́, bɔ è yǐ gbe nú yě ɖɔ: “Sanmusɔ́ɔn wɛ. É wa nǔ gbɔn mɔ̌ ɖó asi tɔn tɔ́ Timunanu ɔ́ yí asi tɔn sín así tɔn, bó zé jó nú xɔ́ntɔn tɔn e nɔ nǔ lɛ́ɛ nu gbe e gbe é kplá asi é.” Énɛ́ ɔ́, Filisitɛ́ɛn lɛ́ɛ yi dó nyɔ̌nu ɔ́ kpó tɔ́ tɔn kpó zo gbɛɖe gbɛɖe. Sanmusɔ́ɔn ka ɖɔ nú yě ɖɔ: “Mɔ̌ wɛ mi nɔ wa nǔ gbɔn a? Nǔ e mi bló nú mì ɔ́, un ma ba hlɔn tɔn ǎ ɔ́, un ná xwɛ ǎ.” Ée é ɖɔ mɔ̌ ɔ́, é tɔ́n ahwan yě, bó hu mɛ gěgé ɖo yě mɛ; énɛ́ ɔ́ gúdo ɔ́, é yi cí sóxo ɖé mɛ ɖo sókan Etámu tɔn ɔ́ mɛ. Filisitɛ́ɛn lɛ́ɛ wá sí ahwan te ɖo ayǐkúngban Judáa tɔn ɔ́ jí, bó sɛ́ ahwangɔnu yětɔn lɛ́ɛ dó Lɛ́xi sín gletoxo ɔ́ mɛ. Súnnu e ɖo Judáa sín akɔta mɛ lɛ́ɛ kanbyɔ́ yě ɖɔ: “Nɛ̌ ka gbɔn bɔ mi wá ahwan tɔ́n mǐ gbé?” Bɔ yě yí gbe ɖɔ: “Sanmusɔ́ɔn wlí gbé wɛ mǐ ja, bó ná wa nǔ xá ɛ lě e é wa nǔ xá mǐ gbɔn é.” Énɛ́ ɔ́, súnnu e ɖo Judáa sín akɔta mɛ lɛ́ɛ afɔwó-afatɔ́n (3.000) yi sóxo e mɛ Sanmusɔ́ɔn ɖe ɔ́ kɔn, ɖo sókan Etámu tɔn ɔ́ mɛ, bó ɖɔ nú Sanmusɔ́ɔn ɖɔ: “A tunwun ganjí ɖɔ Filisitɛ́ɛn lɛ́ɛ wɛ kpa acɛ nú mǐ. A mɔ nǔ e wa xá mǐ wɛ a ɖe ɔ́ a?” Sanmusɔ́ɔn ka yí gbe nú yě ɖɔ: “Nǔ e yě wa xá mì ɔ́, wɛ un wa xá yě.” Bɔ yě lɛ́ ɖɔ: “Mǐ wá fí, bó ná blá we, lobo ná zé we jó nú Filisitɛ́ɛn lɛ́ɛ.” Sanmusɔ́ɔn ɖɔ nú yě ɖɔ: “Mi dó akpá nú mì ɖɔ mi ɖésúnɔ kún ná hu mì ó.” Yě ká ɖɔ n'i ɖɔ: “Éeǒ! Mǐ jló ná hu we ǎ. Mǐ jló ná blá we, bó zé we yi jó nú yě kpowun wɛ.” Énɛ́ ɔ́, yě zě kan yɔ̌yɔ́ we dó blá ɛ ná bó kplá ɛ sín sókan ɔ́ mɛ. Ée yě wá Lɛ́xi ɔ́, Filisitɛ́ɛn lɛ́ɛ wá kpé yě kpó awǒbóbó kpó. Énɛ́ ɔ́, yɛ Mawu Mavɔmavɔ tɔn wá Sanmusɔ́ɔn jí, bɔ kan e yě dó blá alɔ tɔn lɛ́ɛ ná lɛ́ɛ jɛ ayǐ sín alɔ tɔn, lɛ̌ɛnkan e ji zo ɔ́ ɖɔhun. Sanmusɔ́ɔn mɔ tócí sín aglan yaɖéyaɖé ɖé. É dlɛ́n alɔ bó sɔ́ bó dó hu gbɛtɔ́ afatɔ́n (1.000) ná. Énɛ́ ɔ́ gúdo ɔ́, é sú xó bó ɖɔ: “Un zé tócí sín aglan ɖokpó dó hu gbɛtɔ́ afatɔ́n (1.000) ná, tócí sín aglan ɖokpó wɛ un dó hu gbɛtɔ́ tɛ́.” Ée é ɖɔ mɔ̌ ɔ́, é zé aglan ɔ́ nyi gbě; bɔ è nɔ ylɔ́ tɛn énɛ́ ɔ́ mɛ ɖɔ Hlamati-Lɛxi, tínmɛ tɔn wɛ nyí Aglansó. Sinnugblá ɖaxó ɖé sin Sanmusɔ́ɔn bɔ é sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí; é ɖɔ: “Mawu, hwi wɛ zɔ́n bɔ un ɖó ɖuɖéjí ɖaxó élɔ́; bɔ din ɔ́, sinnugblá ná sin mì káká bɔ un ná jɛ mɛ élɔ́ lɛ́ɛ e má nɔ́ sɛn we ǎ lɛ́ɛ sín alɔ mɛ wɛ a?” Ée Sanmusɔ́ɔn ɖɔ mɔ̌ ɔ́, Mawu zɛ fí e só Lɛ́xi tɔn ɔ́ ɖó do ɖe ɔ́, bɔ sin jɛ tíntɔ́n sín mɛ jí. Sanmusɔ́ɔn nu sin bɔ hlɔ̌nhlɔ́n lɛ́ wá n'i. È nɔ ylɔ́ tɔjɔtɛn énɛ́ ɔ́ ɖɔ “Tɔjɔtɛn Kolée tɔn”; tínmɛ tɔn wɛ nyí tɔjɔtɛn mɛ e ylɔ́ mɛ é tɔn. Tɔjɔtɛn énɛ́ ɔ́ ɖo te káká jɛ din. Sanmusɔ́ɔn nyí gǎn ɖo Izlayɛ́li xɔ xwe ko ɖo Filisitɛ́ɛn lɛ́ɛ hwenu. Sanmusɔ́ɔn yi Gaza toxo mɛ gbe ɖokpó, bó mɔ nyɔ̌nu agalɛtɔ́ ɖé, lobo yi dɔ́ xwé tɔn gbe. Mɛ e ɖo toxo ɔ́ mɛ lɛ́ɛ se ɖɔ Sanmusɔ́ɔn ɖo fínɛ́. Yě xá fí ɔ́, bó tɔ wu n'i ɖo toxo ɔ́ sín hɔntogbó jí, ɖo zǎn ɔ́ bǐ mɛ. Lo ɔ́, yě wa nǔ ɖěbǔ nú Sanmusɔ́ɔn ɖo zǎn ɔ́ mɛ ǎ; yě ɖo linlin wɛ ɖɔ émí ná nɔ te jɛ zǎnzǎn, bó ná hu i. Lo ɔ́, Sanmusɔ́ɔn nɔ ayǐmlɔ́mlɔ́ káká bɔ zǎn vlɔ́ ɖó we. Ée zǎn vlɔ́ ɖó we ɔ́, é sí te bó zunfán toxo ɔ́ sín hɔntogbó lɛ́ɛ kpó hɔnkpo we lɛ́ɛ kpó, bó hɔn yě sín do mɛ kpó gan e è dǒ sú hɔntogbó ɔ́ ná lɛ́ɛ kpó, bó zé ɖó abɔ̌ ta, lobo bɛ́ yě yi ɖó só e ɖo Eblɔ́n nukɔn ɔ́ ta. Énɛ́ ɔ́ gúdo ɔ́, Sanmusɔ́ɔn wá mɔ nyɔ̌nu ɖé bó yí wǎn n'i. Dalila wɛ nyɔ̌nu ɔ́ nɔ́ nyí, bó nɔ́ nɔ Sɔlɛ́ku tɔdo mɛ. Axɔ́sú Filisitɛ́ɛn lɛ́ɛ tɔn atɔ́ɔ́n lɛ́ɛ wá ɖɔ nú Dalila ɖɔ: “Blɛ̌ Sanmusɔ́ɔn bónú é ní ɖɔ fí e hlɔ̌nhlɔ́n alɔkpa énɛ́ ɔ́ nɔ gosín wá n'i ɔ́ kpó lě e è nǎ sixú kpé wǔtu tɔn gbɔn é kpó nú we. A se bó ɖɔ nú mǐ ɔ́, mǐ nǎ kpé wǔ tɔn bó blá ɛ. Énɛ́ ɔ́, mǐ mɛ ɖokpó ɖokpó ná ná we gankwɛ́ afatɔ́n kanwe ko (1.100).” Ée yě ɖɔ mɔ̌ nú Dalila ɔ́, é yi kanbyɔ́ Sanmusɔ́ɔn ɖɔ: “Hlɔ̌nhlɔ́n alɔkpa énɛ́ ɔ́ e a ɖǒ ɔ́, kɛnklɛ́n bó ɖɔ fí e a ba sín ɔ́ nú mì. Étɛ́ è nǎ dó blá we, bó ná sixú kpé wǔ we?” Sanmusɔ́ɔn yí gbe n'i ɖɔ: “Ényí è zě kan yɔ̌yɔ́ e ma kó xú ǎ é tɛ́nwe dó blá mì ɔ́, un sɔ́ ná dó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.” Bɔ axɔ́sú Filisitɛ́ɛn lɛ́ɛ tɔn lɛ́ɛ hɛn kan yɔ̌yɔ́ e ma kó xú ǎ é tɛ́nwe wá nú Dalila, bɔ é dó blá Sanmusɔ́ɔn ná. Cóbónú é ka ná bló mɔ̌ ɔ́, é ko fɔ mɛ ɖé lɛ́ɛ hwlá dó xɔnɔnɔ mɛ. Tlóló tɛn tɔn mɛ ɔ́, é sú xó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Sanmusɔ́ɔn ka hɛn kan lɛ́ɛ wɛ́n ɖi fyɔ́ wɛ yě fyɔ́ ɖɔhun. Énɛ́ ɔ́, è mɔ do nú fí e é nɔ ba hlɔ̌nhlɔ́n sín ɔ́ ǎ. Dalila ɖɔ nú Sanmusɔ́ɔn ɖɔ: “A ɖǒ adingban dó blɛ́ mì. Din ɔ́, kɛnklɛ́n bó ɖɔ nǔ e è nǎ dó blá we ná ɔ́ nú mì.” Sanmusɔ́ɔn ka ɖɔ n'i ɖɔ: “Ényí è zě kan yɔ̌yɔ́ e è ma ko zán kpɔ́n ǎ ɔ́ dó blá mì ɔ́, un sɔ́ ná dó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.” Bɔ Dalila zé kan yɔ̌yɔ́ dó blá ɛ ná. Énɛ́ ɔ́ gúdo ɔ́, é sú xó bó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Cóbónú é ká ná bló mɔ̌ ɔ́, é ko lɛ́ fɔ mɛ ɖé lɛ́ɛ hwlá dó xɔnɔnɔ mɛ. Bɔ Sanmusɔ́ɔn wɛ́n kan e è dǒ blá ɛ ná lɛ́ɛ avɔkan ɖɔhun. Dalila ɖɔ nú Sanmusɔ́ɔn ɖɔ: “A lɛ̌ ɖó adingban dó blɛ́ mì. Din ɔ́, ɖɔ xó nǔgbó nú mì; ɖɔ nǔ e è nǎ dó blá we ná ɔ́ nú mì.” Sanmusɔ́ɔn ɖɔ n'i ɖɔ: “Ényí a lɔn ɖabláblá tɛ́nwe e ɖo ta ce lɛ́ɛ ɖo avɔlɔnkpɔn mɛ ɔ́, un sɔ́ ná dó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.” Dalila xwe Sanmusɔ́ɔn dó amlɔ mɛ, bó lɔn ɖabláblá tɛ́nwe e ɖo ta tɔn lɛ́ɛ ɖo avɔlɔnkpɔn mɛ; énɛ́ ɔ́ gúdo ɔ́, é sú xó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Bɔ Sanmusɔ́ɔn fɔ́n sín amlɔ mɛ bó hɔn avɔlɔnkpɔn ɔ́ kpó kpo ɔ́ kpó kpódó wlɔ ɔ́ kpó. Dalila ka ɖɔ n'i ɖɔ: “A ɖeji dó wǔtu ce ǎ, bó ká nɔ́ ɖɔ émí yí wǎn nú mì a? Azɔn atɔn nɛ́ a blɛ̌ mì, bó gbɛ́ fí e a nɔ ba hlɔ̌nhlɔ́n ɖaxó énɛ́ ɔ́ sín ɔ́ ɖɔ nú mì nɛ́.” Ée Dalila nɔ ɖo xó ɖokpó lɛ́ɛ ɖɔ nú Sanmusɔ́ɔn wɛ ayǐhɔ́ngbe ayǐhɔ́ngbe, bó ma ná agbɔ̌n ɛ ɖěbǔ ǎ, bɔ tagba e dó n'i wɛ é ɖe ɔ́ wá kpé agbɔ̌n n'i bǐ, bɔ é má sɔ́ sixú nɔ nu ǎ ɔ́, é gbɔ bo ɖɔ xomɛ n'i; é ɖɔ n'i ɖɔ: “È kpa ɖa e ɖo ta ce ɔ́ kpɔ́n gbeɖé ǎ, ɖó è ko sɔ́ mì ɖó vo nú Mawu cóbɔ è ji mì. Ényí è kpa ɖa nú mì ɔ́, un sɔ́ ná ɖó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.” Dalila mɔ ɖɔ Sanmusɔ́ɔn ɖɔ xomɛ nú émí, lobo yi ɖɔ nú axɔ́sú Filisitɛ́ɛn lɛ́ɛ tɔn lɛ́ɛ ɖɔ: “Mi sixú wá gayɛnu ɖó é ɖɔ xomɛ nú mì lo.” Nǔgbó ɔ́, yě yi Dalila gɔ́n, bɔ mɛ ɖokpó ɖokpó hɛn akwɛ́ e sín akpá e é dó n'i é. Dalila xwe Sanmusɔ́ɔn dó amlɔ mɛ, bɔ é dɔ́ amlɔ jɛ akɔn tɔn, bɔ é ylɔ́ nya ɖokpó, bɔ nya ɔ́ wá xwlɛ́ ɖabláblá tɛ́nwe e ɖo Sanmusɔ́ɔn ta lɛ́ɛ síin. Din ɔ́, Dalila ɖu ɖo Sanmusɔ́ɔn jí, ɖó é sɔ́ ɖó hlɔ̌nhlɔ́n ɖěbǔ ǎ. Énɛ́ ɔ́, Dalila sú xó, bó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Sanmusɔ́ɔn ka fɔ́n sín amlɔ mɛ, bó vɛdó ɖɔ émí ná gló yě, bó ná gán ɖ'é mɛ lě e émí nɔ́ kó bló gbɔn ɔ́ wɛ sín; ɖó é tunwun ɖɔ Mawu Mavɔmavɔ ko ɖe alɔ sín kan émítɔn mɛ ǎ. Lo ɔ́, Filisitɛ́ɛn lɛ́ɛ wlí i, bó tɔ́n nukún i; yě kplá ɛ yi Gaza, bó zé ganvɔ sín wlɔ dó blá ɛ ná, bó zɔ́n ɛ gǎnnugǎnnu ɖɔ é ní nɔ li nǔ ɖo sé kɔn, ɖo gankpá mɛ. Hwenɛ́nu ɔ́, ɖa tɔn e è kpa lɛ́ɛ lɛ́ jɛ wǔwú jí. Axɔ́sú Filisitɛ́ɛn lɛ́ɛ tɔn lɛ́ɛ sɛ ta kplé gbe ɖokpó, bó ná ɖu ɖuɖéjí e yě ɖó ɔ́ sín xwe, bó ná sá vɔ̌ ɖaxó ɖokpó nú vodún yětɔn Dagɔ́ni. Yě ɖo han ji wɛ ɖɔ: “Vodún mǐtɔn jó Sanmusɔ́ɔn, kɛntɔ́ mǐtɔn ɔ́ nú mǐ.” Ée Filisitɛ́ɛn lɛ́ɛ mɔ mɔ̌ ɔ́, yě lɔmɔ̌ jɛ susu kpa nú vodún yětɔn jí ɖɔ: “Vodún mǐtɔn jó Sanmusɔ́ɔn, kɛntɔ́ mǐtɔn ɔ́ nú mǐ; é wɛ gba to mǐtɔn, bó hu mɛ mǐtɔn lɛ́ɛ gěgé.” Ée yě bǐ ɖo awǎjijɛ mɛ mɔ̌ ɔ́, yě byɔ́ ɖɔ è nǐ kplá Sanmusɔ́ɔn wá bónú é ná dó nǔkiko nu nú émí. È ka yi kplá ɛ wá sín gankpá mɛ, bɔ é jɛ manahɛn vlɛ́ jí ɖo nukɔn yětɔn; énɛ́ ɔ́, è sɔ́ ɛ ɖó vodún xɔ yětɔn ɔ́ sín dotín lɛ́ɛ tɛ́ntin. Bɔ é ɖɔ nú nyaví e hɛn alɔ tɔn bó ɖo ali xlɛ́ ɛ wɛ ɔ́ ɖɔ: “Kplá mì, bó sɔ́ alɔ ce yi ɖó dotín e jí vodúnxɔ ɔ́ jínjɔ́n lɛ́ɛ wú, bónú má mɔ tɛn gán jɛ wú.” Súnnu kpó nyɔ̌nu kpó ká gɔ́ vodúnxɔ ɔ́ mɛ hwenɛ́nu. Axɔ́sú Filisitɛ́ɛn lɛ́ɛ tɔn atɔ́ɔ́n lɛ́ɛ ɖo fínɛ́, bɔ gbɛtɔ́ ná yi afɔwó-afatɔ́n (3.000) mɔ̌ ɖo xɔ ɔ́ ta aga, bó ɖo manahɛn e vlɛ́ wɛ Sanmusɔ́ɔn ɖe ɔ́ kpɔ́n wɛ. Énɛ́ ɔ́, Sanmusɔ́ɔn ɖɔ nú Mawu Mavɔmavɔ ɖɔ: “Aklúnɔ, Mawu Mavɔmavɔ, flín mì; áo! Mawu, lɛ̌ ná hlɔ̌nhlɔ́n mì gayɛnu, bónú ɖo nukúnxwixwe ɖokpó mɛ ɔ́, má zé Filisitɛ́ɛn lɛ́ɛ dó ba hlɔn kpowun ɖó nukún ce we lɛ́ɛ e yě tɔ́n ɔ́ wú.” Ée Sanmusɔ́ɔn ɖɔ mɔ̌ ɔ́, é ɖó alɔ dotín tɛ́ntin mɛ tɔn we e jí vodún xɔ ɔ́ ɖe lɛ́ɛ wú; é zé aɖisílɔ tɔn dó tun dotín ɖokpó, bó zé amyɔlɔ tɔn dó tun dotín ɖě ɔ́. Bó sú xó bó ɖɔ: “Nyɛ kpó Filisitɛ́ɛn lɛ́ɛ kpó ní kú zɛ̌ɛ́n!” Ée é ɖɔ mɔ̌ ɔ́, é sísɛ́ dotín lɛ́ɛ kpó hlɔ̌nhlɔ́n tɔn bǐ kpó, bɔ vodún xɔ ɔ́ hɔ́ jɛ axɔ́sú lɛ́ɛ kpó mɛ e ɖo xɔ ɔ́ mɛ lɛ́ɛ bǐ kpó jí. Mɛ e é hu, bɔ yě kú kpó é kpó gbe nɛ́ gbe lɛ́ɛ sukpɔ́ hú mɛ e é hu káká jɛ gbe nɛ́ gbe é. Nɔví tɔn lɛ́ɛ kpó hɛ̌nnumɔ tɔn bǐ kpó wá sɔ́ cyɔ tɔn. Yě zě é yi ɖi dó tɔ́ tɔn Manɔwáxi sín yɔdo mɛ ɖo Soléa kpó Ɛcitawɔ́lu kpó tɛ́ntin. Xwe ko wɛ Sanmusɔ́ɔn nɔ Izlayɛ́li ví lɛ́ɛ nu xɔ. Nya ɖé tíin ɖo Eflayímu sókan ɔ́ mɛ bɔ è nɔ ylɔ́ ɛ ɖɔ Mika. É ɖɔ nú nɔ tɔn gbe ɖokpó ɖɔ: “A flín ɖɔ hwenu e è fin gankwɛ́ afatɔ́n kanwe ko (1.100) dó we ɔ́, a dó nu mɛ e fin ɔ́ ɖo nukún ce mɛ a? Kpɔ́n! Akwɛ́ ɔ́ ɖíe ɖo así ce e. Nyɛ wɛ sɔ́.” Énɛ́ ɔ́, nɔ tɔn ɖɔ n'i ɖɔ: “Vǐ ce, Mawu Mavɔmavɔ ní kɔn nyɔ̌ná tɔn dó jǐ towe!” Mika ka bɛ́ gankwɛ́ afatɔ́n kanwe ko (1.100) lɛ́ɛ jó nú nɔ tɔn bɔ nɔ tɔn ɖɔ n'i ɖɔ: “Vǐ ce, un ɖe gbeta tɔ́n ɖɔ un ná sɔ́ akwɛ́ élɔ́ ɖó vo nú Mawu Mavɔmavɔ ɖó ta towe mɛ; hǔn è nǎ zě akwɛ́ énɛ́ ɔ́ dó bló bǒcyɔ ɖokpó ná, bó ná kɔn gan dó; bo yí akwɛ́ ɔ́ azɔn ɖokpó.” Lo ɔ́, Mika lɛ́ zé gankwɛ́ lɛ́ɛ nú nɔ tɔn; nɔ tɔn ka ɖe gankwɛ́ afɔɖé (200) ɖ'é mɛ, bó zé nú nǔtuntɔ́ ɔ́, bɔ é zé dó tun bǒcyɔ ɖokpó bó kɔn gan dó, bɔ è sɔ́ yi ɖó Mika sín xɔ mɛ. Mika ɔ́, é ɖó sinsɛn sín tɛnmɛ ɖokpó ɖo xwé tɔn gbe; é lí vodún ɖěvo, bó kpa bǒcyɔ ɖé lɛ́ɛ, lobo sɔ́ vǐ tɔn lɛ́ɛ ɖokpó bɔ é nyí sinsɛngán tɔn. Axɔ́sú ɖé ɖo Izlayɛ́li hwenɛ́nu ǎ, bɔ mɛ ɖokpó ɖokpó nɔ wa nǔ e jló e ɔ́. Levíi ví dɔ̌nkpɛvú ɖé nɔ́ nɔ Bɛteleyɛ́mu ɖo akɔta Judáa tɔn yíkúngban jí. Dɔ̌nkpɛvú nɛ́ ɔ́ gosín Bɛteleyɛ́mu, bó ná yi ba fí ɖěvo nɔ. Ée é ɖo ali jí bó ɖo yiyi wɛ ɔ́, é wá jɛ Mika sín xwé gbe, ɖo Eflayímu sókan ɔ́ mɛ. Mika kanbyɔ́ ɛ ɖɔ: “Fítɛ́ a gosín?” Bɔ é yí gbe n'i ɖɔ: “Bɛteleyɛ́mu wɛ un gosín ɖo Judáa yíkúngban jí; Levíi ví wɛ un ka nyí bó ɖo fí e un ná nɔ ɔ́ ba wɛ.” Mika ka ɖɔ n'i ɖɔ: “Nɔ gɔ̌n ce bó ná húzú xwédo ce sín sinsɛngán. Un ná nɔ sú gankwɛ́ wǒ we ɖo xwe ɖokpó mɛ, bó ná nɔ ná nǔzínzán we, lobo ná nɔ tɔ́jú we.” Ée Mika ɖɔ mɔ̌ ɔ́, Levíi ví ɔ́ byɔ́ xwé gbe, bó yí gbe bó nɔ Mika gɔ́n, bɔ Mika hɛn ɛ vǐ ɖɔhun. Mika sɔ́ ɛ dó ɖó sinsɛngán tɔn, bó ná ɛ xɔ. Mika ka ɖo ɖiɖɔ ɖo éɖée mɛ wɛ ɖɔ: “Un ɖeji din ɖɔ Mawu Mavɔmavɔ ná wa ɖagbe nú mì, ɖó Levíi ví wɛ nyí sinsɛngán ce.” Axɔ́sú ɖé ɖo Izlayɛ́li hwenɛ́nu ǎ, bɔ akɔta Dan tɔn ɔ́ ɖo ayǐkúngban e jí é ná yi nɔ ɔ́ ba wɛ; ɖó káká wá jɛ din ɔ́, è ko ná ayǐkúngban ɖěbǔ yědɛɛ lɛ́ɛ Izlayɛ́li ví ɖě lɛ́ɛ ɖɔhun ǎ. Énɛ́ ɔ́, Dan sín vǐ lɛ́ɛ kpɔ́n súnnu e kpan akɔ́n ganjí ɖo yě mɛ lɛ́ɛ atɔ́ɔ́n bó sɔ́, bó sɛ́ yě dó sín gletoxo Soléa tɔn kpó Ɛcitawɔ́lu tɔn kpó mɛ, bó ɖɔ nú yě ɖɔ yě ní yi ba do nú to ɔ́ xéɖéxéɖé. Nya énɛ́ lɛ́ɛ wá jɛ Eflayímu sín ayǐkúngban jí ɖo sókan mɛ, bó nɔ te ɖo Mika sín xwé kpá. Hwenu e yě ɖo fínɛ́ ɔ́, yě se lě e dɔ̌nkpɛvú Levíi ví ɔ́ ɖo xó ɖɔ gbɔn wɛ ɔ́ bó tunwun ɖɔ é kún nyí fínɛ́ nu ó. Énɛ́ ɔ́, yě yi kanbyɔ́ ɛ ɖɔ: “Mɛ̌ wɛ ɖɔ nú we ɖɔ hwi ní wá fí? Ani wa wɛ a ɖe ɖo fí? Nǔ towe tɛ́ ɖo fí?” Bɔ é yí gbe nú yě ɖɔ: “Mika wɛ mɔ azɔ̌ nú mì; é nɔ sú axɔ́ mì bɔ un nyí sinsɛngán tɔn.” Yě ká ɖɔ n'i ɖɔ: “É nyɔ́! Bo kan nǔ byɔ́ Mawu nú mǐ, mǐ jlǒ ná tunwun nú to mɛ e yi wɛ mǐ ɖe ɔ́ ná nyɔ́ nú mǐ a jí.” Sinsɛngán ɔ́ ka ɖɔ nú yě ɖɔ: “Mi ma ɖi xɛsi ó. Mawu Mavɔmavɔ kpó mi kpó wɛ ɖo yiyi wɛ.” Nya atɔ́ɔ́n lɛ́ɛ ka lɛ́ wlí ali ɖidó, bó hun káká yi Layici. Ée yě jɛ fínɛ́ ɔ́, mɛ e yě mɔ lɛ́ɛ ɖo vivo mɛ; ayi yětɔn j'ayǐ, nǔɖé ɖo ado hu nú yě wɛ ǎ Sidɔ́ɔnnu lɛ́ɛ ɖɔhun. Mɛ ɖěbǔ mɔ nǔɖé ná ɖɔ dó mɛ e ɖo gǎn ɖu wɛ ɖo gbě ɔ́ jí ɔ́ wú ǎ. Fí e mɛ énɛ́ lɛ́ɛ ɖe ɔ́ lín dó Sidɔ́ɔnnu lɛ́ɛ; yě ká ɖo mɛ ɖěbǔ sín acɛ mɛ ǎ. Nya énɛ́ lɛ́ɛ lɛ́ kɔ wá mɔ nɔví yětɔn lɛ́ɛ ɖo Soléa kpó Ɛcitawɔ́lu kpó, bɔ mɛ yětɔn lɛ́ɛ kanbyɔ́ yě ɖɔ étɛ́ wɛ yě mɔ ɖo dɔ̌n a jí. Bɔ yě ɖɔ nú yě ɖɔ: “Mi wá mǐ ní yi! Mi nú mǐ ná yi tɔ́n ahwan Layicinu lɛ́ɛ. Mǐ mɔ ɖɔ to ɔ́ nyɔ́ ganjí. Mi ma cí fí nǔɖé ma wa ó; mi yá wǔ hwlɛ́ndó to ɔ́ yí gbé. Ényí mi jɛ to ɔ́ mɛ ɔ́, mi ná mɔ ɖɔ mɛ e ɖo to ɔ́ mɛ lɛ́ɛ sín ayi j'ayǐ, bɔ ayǐkúngban yětɔn ka lɛ́ d'agba; Mawu ná jó to énɛ́ ɔ́ nú mi; nǔ e è nɔ mɔ ɖo ayǐkúngban jí lɛ́ɛ ɖě hán ɖo to énɛ́ ɔ́ mɛ ǎ.” Énɛ́ ɔ́, súnnu e ɖo akɔta Dan tɔn ɔ́ mɛ lɛ́ɛ nǔwɔntɔn (600) sɔ́ ahwannú, bó gosín Soléa kpó Ɛcitawɔ́lu kpó. Yě yi ɖó gɔnu ɖó Kiliyati-Yealimu sín gbada hwe jí, ɖo Judáa. Nǔ e wú è ɖǒ nyǐkɔ nú fí énɛ́ ɔ́ ɖɔ Maxanɛ́ɛ-Dan ɔ́ nɛ́; nyǐkɔ énɛ́ ɔ́ sín tínmɛ wɛ nyí “Ahwankpá Dan tɔn”; nyǐkɔ énɛ́ ɔ́ lɛ́ kpo ɖo te káká wá jɛ din. Yě gosín fínɛ́, bó ɖidó Eflayímu sókan mɛ, bó wá jɛ Mika sín xwé kpá. Énɛ́ ɔ́, mɛ atɔ́ɔ́n e wá ba do nú Layici to ɔ́ ɖ'ayǐ lɛ́ɛ ɖɔ nú nɔví yětɔn lɛ́ɛ ɖɔ: “Mi tunwun ɖɔ vodún ɖé kpó bǒcyɔ ɖé lɛ́ɛ kpó, kpódó vodún ɖěvo e wú è kɔn gan dó ɔ́ kpán ɖo xwé élɔ́ lɛ́ɛ ɖokpó gbe a? Din ɔ́, nǔ e mi ná wa ɔ́, mi sí wɛ é ɖe.” Mɛ atɔ́ɔ́n lɛ́ɛ ɖɔ mɔ̌ bó ɖidó Mika xwé; ée yě jɛ fínɛ́ ɔ́, yě byɔ́ xwé ɔ́ gbe, bó yi dɔ̌nkpɛvú Levíi ví ɔ́ sín xɔ mɛ bó kanbyɔ́ ɛ ɖɔ nɛ̌ wɛ é ɖe gbɔn a jí. Hwenɛ́nu ɔ́, súnnu e ɖo akɔta Dan tɔn ɔ́ mɛ lɛ́ɛ nǔwɔntɔn (600) e ko sɔ́ ahwannú lɛ́ɛ ɔ́ ɖo te ɖo hɔntogbó jí. Ée mɛ atɔ́ɔ́n e ba do nú to ɔ́ ɖ'ayǐ lɛ́ɛ byɔ́ xwé ɔ́ gbe ɔ́, yě bɛ̌ vodún tɛnmɛ tɛnmɛ e ɖo fínɛ́ lɛ́ɛ, bǒcyɔ lɛ́ɛ, kpódó vodún e wú è kɔn gan dó ɔ́ lɔmɔ̌ kpán. Sinsɛngán ɔ́ ka ɖo te ɖo hɔnto é kpó súnnu nǔwɔntɔn (600) e sɔ́ ahwannú lɛ́ɛ kpó. Ée sinsɛngán ɔ́ mɔ mɛ ɖé lɛ́ɛ ɖo Mika sín xwé gbe byɔ́ wɛ, bó ɖo vodún lɛ́ɛ bǐ bɛ́ wɛ ɔ́, é kanbyɔ́ yě ɖɔ: “Étɛ́ wa wɛ mi ɖe ɖo fínɛ́?” Bɔ yě yí gbe n'i ɖɔ: “Nɔ abwɛ̌! Ma ɖɔ xó ɖé ó. Xwedó mǐ, bó húzú akɔta mǐtɔn sín sinsɛngán. Nú a nyǐ sinsɛngán nú xwédo gbɛtɔ́ ɖokpó ɖé tɔn kpó a nyǐ sinsɛngán nú akɔta Izlayɛ́li tɔn ɔ́ bǐ kpó ɔ́, ɖě tɛ́ wɛ jló we hú ɖě?” Ée sinsɛngán ɔ́ se mɔ̌ ɔ́, é víví n'i ɖésú, bɔ é fɔ vodún lɛ́ɛ kpó bǒcyɔ lɛ́ɛ kpó, lobo xwedó yě. Énɛ́ ɔ́, Dan ví lɛ́ɛ lɛ́ wlí ali ɖidó, bó ɖe yɔkpɔ́vú lɛ́ɛ, kanlin lɛ́ɛ kpó agban lɛ́ɛ kpó ɖó nukɔn. Hwenu e Mika kpó mɛ e ɖo xwé tɔn kpá lɛ́ɛ kpó wá sɛ ta kplé bó jɛ gǔdo yětɔn ɔ́, yě kó lín dó xwé tɔn. Xó e sú ylɔ́ Dan ví lɛ́ɛ wɛ yě ɖe ɔ́ zɔ́n bɔ Dan ví lɛ́ɛ lɛ́ kɔ bó kanbyɔ́ Mika ɖɔ: “Étɛ́ wɛ ɖo wiwa we wɛ? Nɛ̌ gbɔn bɔ ahwan kplé lě?” É ka yí gbe nú yě ɖɔ: “Mi bɛ́ vodún ce e un bló lɛ́ɛ, bó kplá sinsɛngán ce. É sɔ́ kpo nǔ ɖěbǔ nú mì ǎ, bɔ mi lɛ́ glá bó kanbyɔ́ mì ɖɔ étɛ́ wɛ ɖo wiwa mì wɛ a jí?” Yě ká ɖɔ n'i ɖɔ: “Ma nú mǐ sɔ́ se gbe towe ɖě ó; é má nyí mɔ̌ ǎ ɔ́, mɛ lɛ́ɛ sin xomɛ ɔ́, yě ná zɔn mi jí, bɔ é ná sín hwɛ wú bɔ hwi kpó xwédo towe kpó ná dɔn.” Énɛ́ ɔ́ gúdo ɔ́, yě lɛ́ wlí ali yětɔn ɖidó. Ée Mika mɔ ɖɔ yě hú gǎn émí ɔ́, é lɛ́ kɔ bo wá yi xwé. Dan ví lɛ́ɛ bɛ́ nǔ e Mika bló lɛ́ɛ sɔ́ yi, bó kplá sinsɛngán e ɖo azɔ̌ wa n'i wɛ é. Yě yi tɔ́n ahwan Layici, bó hu mɛ e ɖo to ɔ́ mɛ bó ɖo vivo mɛ, bɔ nǔɖé ma ɖo adohu ná wɛ ǎ lɛ́ɛ, lobo dó toxo ɔ́ zo. Layici ɔ́, Bɛti-Hlehovu sín tɔdo mɛ wɛ é ɖe, bo lín dó Sidɔ́ɔn, bɔ mɛ e ɖo to ɔ́ mɛ lɛ́ɛ ɖo mɛ ɖěbǔ sín acɛ mɛ ǎ. Nǔ e wútu mɛ ɖěbǔ ma wá gɔ́ alɔ nú yě ǎ ɔ́ nɛ́. Dan ví lɛ́ɛ vɔ́ toxo ɔ́ gbá, bó ɖó gɔnu ɖó fínɛ́. Layici wɛ è nɔ ylɔ́ toxo énɛ́ ɔ́ ɖɔ ɖ'ayǐ; yě ká ɖyɔ́ bó nɔ ylɔ́ ɖɔ Dan. Dan ɔ́, tɔ́gbó yětɔn wɛ, tɔ́gbó yětɔn Jakɔ́bu ví ɔ́ wɛ. Yě lí vodún Mika tɔn ɔ́, bó nɔ sɛn; bɔ Yexonatáni e nyí Gɛɛcɔ́mu ví, bó nyí Mɔyízi sín vǐvú ɔ́ kpódó vǐ tɔn lɛ́ɛ kpó húzú sinsɛngán nú akɔta Dan tɔn ɔ́ káká yi jɛ hwenu e è wlí yě yi kannumɔgbénu é. Mika sín vodún ɔ́ nɔ yě sí nú hwenu e Mawu xwé ɔ́ nɔ Silóo xɔ ɔ́ bǐ. Hwenu e axɔ́sú ɖé ma ɖo Izlayɛ́li ǎ ɔ́, Levíi ví ɖé nɔ́ fí ɖé ɖo fínɛ́, bɔ fí ɔ́ ɖo Eflayímu sókan ɔ́ mɛ, bó ká ɖo gblǒlǒ mɛ. Asi tɔn ɖokpó gosín Bɛteleyɛ́mu ɖo Judáa. Nyɔ̌nu énɛ́ ɔ́ sin xomɛ dó e bó jó e dó, lobo lɛ́ kɔ yi tɔ́ tɔn xwé ɖo Bɛteleyɛ́mu, bó nɔ fínɛ́ nú sun ɛnɛ. Asú tɔn ka sɔ́ nǔ, bó yi mɔ ɛ, bó ná ci kpɛ n'i lobo kplá ɛ wá yi. É kpó mɛsɛntɔ́ tɔn kpó wɛ zɔn, bɔ é hɛn tócí we. Ée é yi nyɔ̌nu ɔ́ xwé ɔ́, nyɔ̌nu ɔ́ kplá ɛ yi byɔ́ tɔ́ tɔn xɔ mɛ; ée nyɔ̌nu ɔ́ sín tɔ́ mɔ ɛ ɔ́, é yí jǒnɔ tɔn kpó awǎjijɛ kpó. É cí jǐ tɔn nú azǎn atɔn. Levíi ví ɔ́ kpó mɛsɛntɔ́ tɔn kpó nɔ ɖu nǔ, bó nɔ nu ahan, bó nɔ dɔ́ fínɛ́. Azǎn tɔn ɛnɛgɔ́ ɔ́ gbe ɔ́, yě fɔ́n zǎn, bɔ Levíi ví ɔ́ ko sɔ́ nǔ, bó ná ɖidó. Lo ɔ́, yɔkpɔ́ ɔ́ sín tɔ́ ɖɔ nú vǐ tɔn sú ɖɔ: “Nɔ te bó ná ɖu nǔɖé bó ná dó mɔ hlɔ̌nhlɔ́n; énɛ́ ɔ́ gúdo ɔ́, mi na jɛ ali.” Énɛ́ ɔ́, yě mɛ we lɛ́ɛ jínjɔ́n ayǐ bó ɖu nǔ bó nu ahan ɖó kpɔ́. Ée yě ɖu nǔ ɔ́, nyɔ̌nu ɔ́ sín tɔ́ ɖɔ nú vǐ tɔn sú ɖɔ: “Ayi towe ní j'ayǐ, nú a nǐ lɛ́ yí gbe bó dɔ́ fí.” Levíi ví ɔ́ ká jló ná yi, lo ɔ́, asi tɔn tɔ́ jɛ kɔ n'i káká bɔ é gbɔ bó yí gbe bó lɛ́ dɔ́ fínɛ́ ɖokpó d'é jí. Azǎn atɔ́ɔ́ngɔ́ ɔ́ gbe ɔ́, é fɔ́n zǎn bó ná yi, bɔ asi tɔn tɔ́ ɖɔ n'i ɖɔ: “To ɖu nǔ hwɛ̌; mi zé yiyi ɔ́ ɖó hwelɛ́kɔ.” Énɛ́ ɔ́, yě ɖu nǔ ɖó kpɔ́. Ée Levíi ví ɔ́ jló ná yi kpó asi tɔn kpó, kpódó mɛsɛntɔ́ tɔn kpó ɔ́, asi tɔn tɔ́ ɖɔ n'i ɖɔ: “Kpɔ́n! Gan mɛ ko sɛ yi, ablu ko ɖo dǐdó wɛ, mi gbɔ bó dɔ́ ayǐ. Ayi towe ní j'ayǐ, nú a nǐ lɛ́ dɔ́ fí ɖokpó d'é jí. Énɛ́ ɔ́, mi ná fɔ́n zǎn sɔ bó ná yi xwé. “Levíi ví ɔ́ ká gbɛ́ gayɛnu ɖɔ émí kún ná nɔ ayǐ ó, bó wlí ali ɖidó kpó asi tɔn kpó, kpódó tócí tɔn we e è blǎ kpa ná lɛ́ɛ kpó. Yě wǎ Jebuzi; fínɛ́ wɛ è nɔ ylɔ́ din ɖɔ Jeluzalɛ́mu.” Ée yě sɛ́ kpɔ́ toxo ɔ́, gan mɛ ko sɛ yi bǐ, bɔ mɛsɛntɔ́ ɔ́ ɖɔ nú gǎn tɔn ɖɔ: “Mǐ ní yi dɔ́ Jebuzinu lɛ́ɛ sín toxo mɛ.” Gǎn tɔn ka yí gbe n'i ɖɔ: “Éeǒ! Mǐ ná yi toxo e mɛ mɛ e ma nyí togun Mawu tɔn ǎ lɛ́ɛ ɖe, bɔ Izlayɛ́li ví lɛ́ɛ ɖě ma ɖe ɔ́ ɖěbǔ mɛ ǎ. Mǐ ná hun káká yi Giveya.” É lɛ́ ɖɔ nú mɛsɛntɔ́ tɔn ɖɔ: “Mǐ ní tɛ́nkpɔ́n bó yi Giveya abǐ Hlama; mǐ ná dɔ̌ toxo we énɛ́ lɛ́ɛ ɖokpó mɛ.” Bɔ yě wlí ali bó ɖidó. Giveya jɛ wɛ yě ɖe ɖo Bɛnjamɛ́ɛ sín ayǐkúngban jí, bɔ hwe yi xɔ. Yě yi toxo énɛ́ ɔ́ mɛ, bó lin ɖɔ émí ná dɔ́ fínɛ́. Levíi ví ɔ́ byɔ́ toxo ɔ́ mɛ, bó yi nɔ te ɖo tokplétɛn ɔ́; lo ɔ́, mɛ ɖěbǔ ylɔ́ yě dó xwé gbe ǎ. Dǎwe nyɔ̌xónɔ ɖé gosín gleta, bó wá toxo ɔ́ mɛ ɖo gbadanu ɖokpó énɛ́ ɔ́. Eflayímu sín sókan ɔ́ mɛ nu wɛ nyí dǎwe ɔ́. Lo ɔ́, Giveya wɛ é nɔ́ nɔ, ɖo Bɛnjamɛ́ɛ ví lɛ́ɛ sín to mɛ. Dǎwe énɛ́ ɔ́ mɔ jǒnɔ e ɖo te ɖo fínɛ́ ɔ́ bó kanbyɔ́ ɛ ɖɔ: “Fítɛ́ a gosín? Fítɛ́ a xwe?” Levíi ví ɔ́ ka yí gbe n'i ɖɔ: “Bɛteleyɛ́mu wɛ mǐ gosín ɖo Judáa bó wá xwe fí ɖé, ɖo Eflayímu sókan mɛ bó ká ɖo gblǒlǒ mɛ. Fínɛ́ wɛ un nɔ́ nɔ; Bɛteleyɛ́mu wɛ un wá yi, bó lɛ́ kɔ wá xweyǐgbe xwé. Mɛ ɖěbǔ ka ylɔ́ mǐ dó xwé gbe ǎ; Có mǐ ka hɛn ama kpó gběhan kpó nú tócí mǐtɔn lɛ́ɛ, bó hɛn nǔɖuɖu kpó vɛ̌ɛn kpó nú nyɛ kpó asi ce kpó, kpódó mɛsɛntɔ́ ce kpán. Nǔɖé hwedó mǐ ǎ.” Énɛ́ ɔ́, dǎwe ɔ́ ɖɔ n'i ɖɔ: “Doo nú we! Un ná kpé nukún wǔtu towe ɖo nǔ e ná hu dó we lɛ́ɛ mɛ; a ɖǒ ná dɔ́ tokplétɛn fí ǎ.” Ée é ɖɔ mɔ̌ ɔ́, é kplá yě yi xwé gbe, bó ná gběhan xúxú tócí lɛ́ɛ. Yědɛɛ lɛ́ɛ ká klɔ́ afɔ, bó ɖu nǔ bó nu ahan. Hwenu e yě ɖo nǔ ɖu wɛ ɔ́, súnnu nǔɖégótegó e ɖo toxo ɔ́ mɛ lɛ́ɛ dó ahwan gbě bó xá xwé ɔ́, bó xúxú hɔn lobo ɖɔ nú dǎwe xwétɔ́ degénɔ kpikpoe ɔ́ ɖɔ: “Nya e a yi dó xwé gbe ɔ́, ɖe e tɔ́n bónú mǐ nǎ ɖó xó xá ɛ.” Dǎwe degénɔ ɔ́ tɔ́n, bó ɖɔ nú yě ɖɔ: “Xɔ́ntɔn ce lɛ́ɛ mi, mi kɛnklɛ́n bó má wa nǔ nyanya e wa gbé mi ja ɔ́ ó. Mi ma mɔ ɖɔ nya élɔ́ ɔ́, jǒnɔ ce wɛ a? Hǔn mi bo ma dó nǔ baɖabaɖa ɖé sin xá ɛ ó. Mi ɖótó! Un ɖó nyɔ̌nuví ɖokpó, é tunwun súnnu kpɔ́n ǎ, bɔ nya élɔ́ ɖó asi ɖokpó. Un ná kplá yě wá nú mi bɔ nǔɖé jló mi ɔ́, mi ná sɔ́ yě dó wá ná. Lo ɔ́, mi ma dó nǔ nyanya ɖé sin xá dǎwe élɔ́ ó.” É ɖɔ mɔ̌ có, mɛ lɛ́ɛ jló ná se étɔn ǎ. Énɛ́ ɔ́, Levíi ví ɔ́ kplá asi tɔn yi jó nú yě ɖo kɔ́xo. Yě ɖó xó xá ɛ zɛ jlɛ̌ wú ɖo zǎn ɔ́ mɛ káká bó wa jó e dó ɖo ayǐtéhɔ̌nnu. Ée wun jɛ kinkɛn jí ɔ́, nyɔ̌nu ɔ́ wa jɛ ayǐ jɛ dǎwe degénɔ e xwé gbe asú tɔn ɖe ɔ́ sín hɔn jí. É nɔ fínɛ́ káká bɔ ayǐ hɔ́n. Ée é wá su zǎnzǎn ɔ́, asú tɔn yi hun hɔn, bó tɔ́n bó ná wlí ali tɔn. É mɔ asi tɔn ɖo ayǐmlɔ́mlɔ́ ɖo xwé ɔ́ nukɔn, bɔ alɔ tɔn lɛ́ɛ ɖo kpekán ɔ́ jí. Bɔ asú tɔn ɖɔ n'i ɖɔ: “Sí te, mǐ ɖo yiyi wɛ.” Lo ɔ́, nyɔ̌nu ɔ́ kɛ nu ǎ. Énɛ́ ɔ́, nya ɔ́ zé asi tɔn ɖó tócí tɔn jí, bó ɖidó xwé. Ée é wá jɛ xwé gbe ɔ́, é zé jǐví bó já asi tɔn sín cyɔ ɖó donu wěwe, bó sɛ́ dó akɔta Izlayɛ́li tɔn wěwe lɛ́ɛ ɖokpó ɖokpó. Mɛ e mɔ nǔ énɛ́ ɔ́ lɛ́ɛ bǐ ɖɔ: “Sín hwenu e Izlayɛ́li ví lɛ́ɛ ko tɔ́n sín Ejípu ɔ́ káká wá jɛ égbé ɔ́, nǔ lěhunkɔtɔn jɛ kpɔ́n gbeɖé ǎ, è ka mɔ kpɔ́n gbeɖé ǎ. Mi gbéjé xó énɛ́ ɔ́ kpɔ́n, bó mɔ miɖée lobo ɖe gbeta ɖé tɔ́n.” Izlayɛ́li ví lɛ́ɛ bǐ ɖó gbe kpɔ́ bó sɛ yěɖée kplé ɖo Misipa ɖo Mawu Mavɔmavɔ nukɔn; to lɛ́ɛ bǐ mɛ wɛ yě gosín, bɛ́ sín Dan ɖo totaligbé káká yi Bɛ̌-Ceva ɖo tofɔligbé, bó gosín Galadi ɖo zǎnzǎnhwe jí. Gǎn lɛ́ɛ kpó súnnu e ɖo akɔta Izlayɛ́li tɔn mɛ lɛ́ɛ bǐ kpó wá togun Mawu tɔn sín kplé énɛ́ ɔ́ tɛnmɛ. Sɔ́ja e nyɔ́ hwǐ zán ganjí lɛ́ɛ adɔ̌kpo ko (400.000) wɛ zɔn afɔ wá. Bɔ súnnu e ɖo Bɛnjamɛ́ɛ sín akɔta ɔ́ mɛ lɛ́ɛ se ɖɔ Izlayɛ́li ví ɖé lɛ́ɛ yi Misipa. Izlayɛ́li ví lɛ́ɛ ka ɖɔ: “Mi ɖɔ lě e nǔ baɖabaɖa énɛ́ ɔ́ jɛ gbɔn ɔ́ nú mǐ.” Énɛ́ ɔ́, nyɔ̌nu e è hu ɔ́ sín asú, Levíi ví ɔ́, yí xó bó ɖɔ: “Nyɛ kpó asi ce kpó wɛ wá gletoxo Giveya tɔn mɛ ɖo Bɛnjamɛ́ɛ yíkúngban jí, bó ná dɔ́ fínɛ́, bɔ Giveyanu lɛ́ɛ ka fɔ́n gǔ dó jǐ ce, bó xá xwé e gbe un ɖe ɔ́ zǎn mɛ. Yě jló ná hu mì; yě hú gǎn asi ce bó ɖó xó xá ɛ káká bɔ é kú. Un ka zé asi ce sín cyɔ bó já lobo má sɛ́ dó Izlayɛ́li sín akɔta lɛ́ɛ bǐ, ɖó nǔ nyanya, nǔ dó abaɖa ɖé wɛ nyí nǔ énɛ́ ɔ́ e yě dó sin ɖo Izlayɛ́li é. Izlayɛ́li ví lɛ́ɛ mi, ée mi bǐ wá kplé ɖo fí din é ɔ́, mi ná nɔ kpɔ́ bó gbéjé nǔ énɛ́ ɔ́ kpɔ́n lobo ɖe gbeta ɖé tɔ́n.” Togun ɔ́ bǐ ka ɖó gbe kpɔ́ bó ɖɔ: “Mɛ ɖěbǔ ná yi goxɔ sá ɖo mǐ mɛ ǎ; mɛ ɖěbǔ ka ná lɛ́ kɔ yi xwé ǎ. Nǔ e mǐ ná bló nú Giveya din ɔ́ ɖíe: mǐ nǎ nyi akɔ, bó ná cyán súnnu e ɖo akɔta Izlayɛ́li tɔn lɛ́ɛ ɖokpó ɖokpó mɛ lɛ́ɛ wǒvlɔ́ɖó wǒvlɔ́ɖó, bɔ yě ná nɔ hɛn nǔɖuɖu yi jó nú ahwangɔnu e ná tɔ́n ahwan Giveyanu lɛ́ɛ é. Yě ná tɔ́n ahwan Giveyanu lɛ́ɛ ɖó nǔ nyanya e yě wa ɖo Izlayɛ́li ɔ́ wú.” Énɛ́ ɔ́, Izlayɛ́li ví lɛ́ɛ bǐ yí gbe, bó ná nɔ kpɔ́ bó tɔ́n ahwan Giveyanu lɛ́ɛ. Akɔta tɛnmɛ tɛnmɛ e ɖo Izlayɛ́li lɛ́ɛ sɛ́ mɛ dó Bɛnjamɛ́ɛ hɛ̌nnu lɛ́ɛ bǐ mɛ ɖɔ: “Nɛ̌ nǔ ká nyí gbɔn, bɔ nǔ baɖabaɖa mɔ̌hunkɔtɔn jɛ ɖo to mitɔn mɛ? Mi jó mɛ e dó nǔ baɖabaɖa mɔ̌hunkɔtɔn sin lɛ́ɛ nú mǐ; nǔɖégótegó Giveya tɔn lɛ́ɛ ɔ́, mi jó yě nú mǐ, nú mǐ ná hu yě, bó ná sú nǔ nyanya wiwa kún dó ɖo togun Izlayɛ́li tɔn mɛ.” Lo ɔ́, Bɛnjamɛ́ɛ ví lɛ́ɛ jló ná ɖótó nɔví yětɔn Izlayɛ́li ví lɛ́ɛ ǎ. Yě gosín toxo yětɔn tɛnmɛ tɛnmɛ lɛ́ɛ mɛ wá kplé ɖo Giveya, bó ná fun ahwan xá Izlayɛ́li ví lɛ́ɛ. Gbe énɛ́ ɔ́ gbe ɔ́, Bɛnjamɛ́ɛ sín sɔ́ja e gosín toxo yětɔn lɛ́ɛ bǐ mɛ wá, bó nyɔ́ hwǐ zǎn ganjí lɛ́ɛ ɔ́, adɔ̌kpo ɖě děgba ɖě afɔwó (26.000) wɛ è xa yě dó; è ka xa Giveyanu lɛ́ɛ d'é mɛ ǎ; sɔ́ja yědɛɛ lɛ́ɛ tɔn e syɛ́n ganjí lɛ́ɛ bló nǔwɔntɔn kanwe ko (700). Đo ahwangɔnu énɛ́ ɔ́ mɛ ɔ́, sɔ́ja syɛ́nsyɛ́n nǔwɔntɔn kanwe ko (700) wɛ ɖ'é mɛ bó nyí amyɔnɔ. Yě mɛ ɖokpó ɖokpó sixú nyi klohwán dó xo ɖa ɖokpó ná, ma xogblá. Akɔta Izlayɛ́li tɔn ɖě lɛ́ɛ ɔ́, yědɛɛ lɛ́ɛ ɖó sɔ́ja adɔ̌kpo ko (400.000), bɔ è kplɔ́n ahwanfunfun yě. Izlayɛ́li ví lɛ́ɛ yi Betɛ́li bó yi kan nǔ byɔ́ Mawu bó ná tunwun akɔta yětɔn e ɖó ná tɔ́n ahwan Bɛnjamɛ́ɛ sín mɛ lɛ́ɛ jɛ nukɔn é. Bɔ Mawu Mavɔmavɔ ɖe Judáa sín akɔta ɔ́. Ée ayǐ hɔ́n tlóló ɔ́, Izlayɛ́li ví lɛ́ɛ wlí ali bó yi ɖó gɔnu ɖó Giveya kpá. Énɛ́ ɔ́ gúdo ɔ́, yě ɖidó ahwan fun xá Bɛnjamɛ́ɛ sín mɛ lɛ́ɛ gbé, bó to yěɖée ɖó ahwanfunfun lɔ jí kpan nukɔn Giveya. Gbe énɛ́ ɔ́ gbe ɔ́, Bɛnjamɛ́ɛ sín mɛ lɛ́ɛ tɔ́n sín toxo ɔ́ mɛ, bó hu Izlayɛ́li ví lɛ́ɛ adɔ̌kpo ɖě afɔwó (22.000). Énɛ́ ɔ́, Izlayɛ́li togun ɔ́ bǐ yi Belɛti. Mɛ lɛ́ɛ jínjɔ́n fínɛ́ ɖo Mawu Mavɔmavɔ nukɔn, bó ná ji gbɛvíhan, bɔ gbe énɛ́ ɔ́ gbe ɔ́, yě nɔ nǔ ma ɖu sin ma nu káká jɛ gbadanu. Yě sá vɔ̌ e è nɔ dó zo lɛ́ɛ kpó kɔnɖókpɔ́vɔ́ lɛ́ɛ kpó nú Mawu Mavɔmavɔ. Izlayɛ́li ví lɛ́ɛ fɔ sɔ́ja lɛ́ɛ tɔ lɛ́dó Giveya. Énɛ́ ɔ́ gúdo ɔ́, azɔn atɔngɔ́ élɔ́ din ɔ́, yě lɛ́ to yěɖée ɖó ahwanfunfun lɔ jí kpan nukɔn toxo ɔ́ ɖi azɔn we ɖě lɛ́ɛ ɖɔhun, bó tɔ́n ahwan Giveya. Bɛnjamɛ́ɛ sín mɛ lɛ́ɛ ká tɔ́n, bó ná fun ahwan xá yě bó ká jó yěɖée dó bɔ Izlayɛ́li ví lɛ́ɛ dɔn yě yi zɔ nú Giveya. Đi azǎn ɖě lɛ́ɛ ɖɔhun ɔ́, yě jɛ sɔ́ja Izlayɛ́li tɔn lɛ́ɛ hu jí. Yě hu sɔ́ja gban (30) mɔ̌ ɖo gblǒlǒ mɛ, ɖo ali e yi Betɛ́li ɔ́ kpó ée yi Giveya ɔ́ kpó jí. Yě mɔ ɖɔ émí kó ɖu ɖo Izlayɛ́li ví lɛ́ɛ jí ɖ'ayǐ tɔn lɛ́ɛ ɖɔhun. Lo ɔ́, ɖɔ wɛ Izlayɛ́li ví lɛ́ɛ ká kó ɖɔ, bó hɔn, bó dɔn Bɛnjamɛ́ɛ sín mɛ lɛ́ɛ sɛ yi zɔ nú Giveya, gbɔn ali lɛ́ɛ jí ɖo gblǒlǒ mɛ. Énɛ́ ɔ́, Izlayɛ́li sín ahwangɔnu lɛ́ɛ gosín fí tɛnmɛ tɛnmɛ e yě ɖe lɛ́ɛ, bó ná yi sɛ yěɖée kplé ɖó Baalu-Tamáa; hwe énɛ́ ɔ́ nu ɔ́, sɔ́ja e ɖo hwlǎhwlá ɖo toxo ɔ́ kpá lɛ́ɛ tɔ́n sín fí e yě ɖe lɛ́ɛ ajijimɛ, ɖo ayǐkúngban wɛnjɛ Gɛva tɔn ɔ́ kpáxwé. Bɔ Izlayɛ́li sín sɔ́ja e syɛ́n ganjí lɛ́ɛ děgba we afɔwó (10.000) wá Giveya nukɔn. Yě fun ahwan ɖésú ɖo fínɛ́; lo ɔ́, Bɛnjamɛ́ɛ sín mɛ lɛ́ɛ kó tunwun nǔ baɖabaɖa e ɖo yě ná gbo wɛ é ǎ. Mawu Mavɔmavɔ bló bɔ Bɛnjamɛ́ɛ sín mɛ lɛ́ɛ hɔn ɖo Izlayɛ́li ví lɛ́ɛ nukɔn; Izlayɛ́li ví lɛ́ɛ hu yě, bɔ gbe énɛ́ ɔ́ gbe ɔ́, sɔ́ja yětɔn adɔ̌kpo ɖě děgba ɖě afatɔ́n (25.000) jɛjí wɛ Izlayɛ́li ví lɛ́ɛ hu. Bɛnjamɛ́ɛ sín mɛ lɛ́ɛ wá mɔ ɖɔ émí dɔn. Izlayɛ́li ví lɛ́ɛ hɔn ɖo Bɛnjamɛ́ɛ sín mɛ lɛ́ɛ nukɔn, ɖó yě gán jɛ wú ɖɔ sɔ́ja émítɔn e ɖo hwlǎhwlá lɛ́dó Giveya lɛ́ɛ ná sí te dó yě jí. Sɔ́ja énɛ́ lɛ́ɛ yá wǔ ɖidó toxo ɔ́ mɛ; yě yi nyɛ sú toxo ɔ́, bó hu mɛ e ɖ'é mɛ lɛ́ɛ. Sɔ́ja e tɔ wu lɛ́ɛ ɔ́, nú yě ɖu ɖ'é jí ɔ́, wuntun e ná ɖe xlɛ́ ɔ́, yě kpó Izlayɛ́li ví e kpo lɛ́ɛ kpó kó ɖɔ; wuntun ɔ́ wɛ nyí ɖɔ yě ná dó nǔ zo bɔ azɔ tɔn ná yi jǐ ɖo toxo ɔ́ ta nu. Hwenu e yě ɖo ahwan ɔ́ fun wɛ bɔ Izlayɛ́li ví lɛ́ɛ ɖo agɔ jó wɛ ɔ́, Bɛnjamɛ́ɛ sín mɛ lɛ́ɛ hu mɛ gban (30) mɔ̌ ɖo yě mɛ, bó mɔ ɖɔ émí kó ɖu ɖ'é jí ɖě lɛ́ɛ ɖɔhun. Lo ɔ́, hwenɛ́nu ɔ́, azɔ e xó yě ɖɔ ɔ́ jɛ mlǐmlí jí ɖo Giveya ta nu akpɔ́kpɔ́ ɖɔhun. Bɛnjamɛ́ɛ sín mɛ lɛ́ɛ lɛ́ kɔ kpɔ́n gǔdo, bó mɔ azizɔ e ɖo fínfɔ́n wɛ ɖo toxo yětɔn e myɔ vun blá bǐ é ta nu é. Bɔ Izlayɛ́li ví lɛ́ɛ húzú kpan nukɔn Bɛnjamɛ́ɛ sín mɛ lɛ́ɛ, bɔ xɛsi ɖaxó ɖé jɛ Bɛnjamɛ́ɛ sín mɛ lɛ́ɛ jí, ɖó yě mɔ nǔ baɖabaɖa e ɖo yě gbo wɛ é. Yě hɔn ɖo Izlayɛ́li ví lɛ́ɛ nukɔn, bó ɖidó gbětótló mɛ. Lo ɔ́, yě yi jɛ ahwankánɖó wɔ̌buwɔ́bú ɖé lɛ́ɛ kpó sɔ́ja e gosín toxo ɔ́ mɛ lɛ́ɛ kpó sín alɔ mɛ, bɔ yě hu yě tɛ́. Izlayɛ́li ví lɛ́ɛ xá Bɛnjamɛ́ɛ sín mɛ lɛ́ɛ; yě jɛ gǔdo yětɔn bó ɖo yě hu dó ali wɛ, lobo ná agbɔ̌n ɖěbǔ yě ǎ káká yi jɛ fí ɖé, ɖo zǎnzǎnhwe jí nú Gɛva. Énɛ́ ɔ́, Bɛnjamɛ́ɛ sín sɔ́ja adɔ̌kpo ɛnɛ afɔwó (18.000) kú; yě bǐ wɛ ká nyí súnnu glegbenu. Bɛnjamɛ́ɛ sín mɛ ɖé lɛ́ɛ hɔn bó tunta gbětótló mɛ, ɖo awǐnnya Hlimumɔ́ni tɔn kpáxwé. È hu mɛ děgba ɖě afatɔ́n (5.000) tɛ́ dó ali ɖo yě mɛ. È jɛ mɛ e kpo lɛ́ɛ gúdo káká wá Gidɔ́mu, bó lɛ́ hu afɔwó (2.000) tɛ́ ɖo yě mɛ. Bɛnjamɛ́ɛ sín mɛ e è hu tɛ́ gbe énɛ́ ɔ́ gbe lɛ́ɛ bló sɔ́ja adɔ̌kpo ɖě děgba ɖě afatɔ́n (25.000). Amɔ̌, ɖo mɛ e hɔn ɖidó gbětótló mɛ lɛ́ɛ mɛ ɔ́, gbɛtɔ́ nǔwɔntɔn (600) gán ɖo yě mɛ, bó wá awǐnnya Hlimumɔ́ni tɔn jí, bó nɔ fínɛ́ nú sun ɛnɛ. Izlayɛ́li ví lɛ́ɛ húzú kpan nukɔn Bɛnjamɛ́ɛ sín mɛ e kpo lɛ́ɛ; yě nɔ́ gbɔn toxo lɛ́ɛ ɖokpó ɖokpó mɛ, bó nɔ hu súnnu lɛ́ɛ bǐ tɛ́, bó nɔ hu kanlin lɛ́ɛ bǐ tɛ́. Ée yě blǒ mɔ̌ fó ɔ́, yě dǒ toxo e ɖo gbě ɔ́ jí lɛ́ɛ bǐ zo. Ée súnnu e ɖo togun Izlayɛ́li tɔn mɛ lɛ́ɛ sɛ ta kplé ɖo Misipa ɔ́, yě ɖɔ bó xwlé nǔ d'é jí ɖɔ émí mɛ ɖěbǔ kún ná sɔ́ vǐ émítɔn da nú súnnu e ɖo akɔta Bɛnjamɛ́ɛ tɔn mɛ lɛ́ɛ ɖě ó. Izlayɛ́li togun ɔ́ wá Betɛ́li, bɔ mɛ lɛ́ɛ jínjɔ́n Mavɔmavɔ nukɔn ɖo fínɛ́ káká yi jɛ gbadanu. Yě ji gbɛvíhan bɔ ɖasin wá yi dó yě ɖésú. Bɔ yě ɖɔ: “Áo! Mawu Mavɔmavɔ, Mawu Izlayɛ́li tɔn! Nɛ̌ nǔ ká nyí gbɔn ɖo Izlayɛ́li, bɔ égbé din ɔ́, akɔta tɔn ɖokpó hwe sín mɛ?” Ayǐhɔ́ngbe tɔn zǎnzǎn tɛɛn ɔ́, togun ɔ́ bló vɔ̌sákpe ɖokpó nyi tɛn énɛ́ ɔ́ mɛ, bó sá vɔ̌ e è nɔ dó zɔ ɔ́ kpó kɔnɖókpɔ́vɔ́ kpó nú Mawu Mavɔmavɔ. Énɛ́ ɔ́ gúdo ɔ́, Izlayɛ́li ví lɛ́ɛ kanbyɔ́ yěɖée ɖɔ: “Đo Izlayɛ́li sín akɔta lɛ́ɛ bǐ mɛ ɔ́, gbɛ̌ta ɖé ɖe, bó má wá kplé e è blǒ ɖo Mawu Mavɔmavɔ nukɔn ɖo Misipa ɔ́ a?” Đó yě kó ɖɔ bó xwlé nǔ d'é jí ɖɔ mɛ ɖěbǔ gɔn Misipa ɔ́, è nǎ hu i. Amɔ̌, din ɔ́, nǔ e gbo nɔví yětɔn Bɛnjamɛ́ɛ sín mɛ lɛ́ɛ ɔ́ nyí nǔɖé bó blá wǔ nú yě ɖɔ: “Akɔta Izlayɛ́li tɔn ɖokpó ɖo kún sú dó wɛ ɖo égbé. Ani wɛ mǐ nǎ wa bó ná mɔ nyɔ̌nu nú súnnu e ɖo akɔta Bɛnjamɛ́ɛ tɔn ɔ́ mɛ bó gán lɛ́ɛ? Đó mǐ kó dó akpá bó xwlé nǔ d'é jí ɖo Mawu Mavɔmavɔ nukɔn ɖɔ mǐ kún ná sɔ́ vǐ mǐtɔn lɛ́ɛ da nú yě ó.” Énɛ́ ɔ́, yě ba do ná bó ná kpɔ́n ɖɔ gbɛ̌ta ɖé ɖo akɔta Izlayɛ́li tɔn lɛ́ɛ mɛ, bó má wá Mawu Mavɔmavɔ nukɔn ɖo Misipa a jí. Bɔ è mɔ ɖɔ mɛ ɖěbǔ kún gosín Yavɛ́ci ɖo Galadi yíkúngban jí, bó wá fí e è blǒ kplé ɔ́ ɖe ɔ́ ó. Nǔgbó, ée è sɔ́ mɛ e wá kplé ɔ́ tɛnmɛ lɛ́ɛ sín kɛ́n ɔ́, è mɔ ɖɔ Yavɛ́cinu ɖěbǔ kún wá ó. Énɛ́ ɔ́, mɛ e ɖo kplé ɔ́ tɛn mɛ lɛ́ɛ sɛ́ súnnu glegbenu děgba atɔn (12.000) dó Yavɛ́ci, bó ná gbe yě ɖɔ: “Mi yi Yavɛ́ci ɖo Galadi yíkúngban jí, bó hu to énɛ́ ɔ́ mɛ nu lɛ́ɛ; mi ná hu nyɔ̌nu lɛ́ɛ kpó yɔkpɔ́vú lɛ́ɛ lɔmɔ̌ kpó. Mi ná hu súnnu lɛ́ɛ bǐ sésé kpó nyɔ̌nu e kó tunwun súnnu kpɔ́n lɛ́ɛ kpó. Nǔ e mi ná wa ɔ́ nɛ́.” Ée yě yi Yavɛ́ci ɔ́, yě mɔ ɖyɔ̌vǐ afɔwe (400) ɖo mɛ e ɖo to ɔ́ mɛ lɛ́ɛ mɛ bɔ yě kpo ɖo alɔ jí. Yě kplá yě wá ahwankpá Silóo tɔn ɔ́ mɛ ɖo Kanáa yíkúngban jí. Énɛ́ ɔ́ gúdo ɔ́, mɛ e ɖo kplé ɔ́ tɛn mɛ lɛ́ɛ sɛ́ mɛ dó Bɛnjamɛ́ɛ sín mɛ e hɔn yi cí awǐnnya Hlimumɔ́ni tɔn jí lɛ́ɛ, nú yě ná yi ɖɔ nú yě ɖɔ xó ɔ́ kó gbo. Bɔ Bɛnjamɛ́ɛ sín mɛ lɛ́ɛ lɛ́ kɔ yi xwé azɔn ɖokpó tlóló; énɛ́ ɔ́, è sɔ́ nyɔ̌nu e è ma hu ɖo Yavɛ́ci ǎ lɛ́ɛ ná yě; lo ɔ́, é kpé yě bǐ nu ǎ. Bɛnjamɛ́ɛ sín mɛ lɛ́ɛ sín nǔ blá wǔ nǔ Izlayɛ́li ví lɛ́ɛ, ɖó Mawu Mavɔmavɔ ɖó do wǔ nú akɔta Izlayɛ́li tɔn lɛ́ɛ. Gǎn e ɖo kplé ɔ́ nu lɛ́ɛ ɖɔ: “Nyɔ̌nu ɖě sɔ́ ɖo akɔta Bɛnjamɛ́ɛ tɔn ɔ́ mɛ ǎ. Nɛ̌ wɛ mǐ nǎ wa gbɔn bó ná mɔ nyɔ̌nu nú súnnu e gán lɛ́ɛ? Yě mɛ e gán ɖo akɔta Bɛnjamɛ́ɛ tɔn ɔ́ mɛ lɛ́ɛ ɔ́, è ɖǒ ná bló nǔɖé bó ɖó donu nú yě, bó má lɔn nú akɔta Izlayɛ́li tɔn lɛ́ɛ ɖokpó ní hwe ó. Amɔ̌, mǐ sixú ná gbe yě ɖɔ yě nǐ da vǐ mǐtɔn lɛ́ɛ ǎ, ɖó mǐ ko ɖɔ bó xwlé nǔ d'é jí ɖɔ Izlayɛ́li ví ɖěbǔ sɔ́ vǐ tɔn da nú Bɛnjamɛ́ɛ ví ɖé ɔ́, è nǎ dó nu i.” Énɛ́ ɔ́, yě wá flín ɖɔ è nǎ ɖu Mawu Mavɔmavɔ sín xwe e è nɔ ɖu xwewú xwewú ɔ́ ɖo malín málín mɛ ɖo Silóo; Silóo ɔ́, gletoxo ɖé wɛ, bó ɖo Betɛ́li sín taligbé, lobo ɖo Levona sín afɔligbé, bó ká ɖo ali e gosín Betɛ́li bó wá yi Sikɛ́mu ɔ́ sín zǎnzǎnhwe jí. Yě kplɔ́n nǔ Bɛnjamɛ́ɛ sín súnnu lɛ́ɛ ɖɔ: “Mi yi sɔ́ miɖée hwlá dó vǐwungbo lɛ́ɛ mɛ, bó tɔ wu ɖo fínɛ́. Hwenu e ɖyɔ̌vǐ Silóo tɔn lɛ́ɛ ná tɔ́n wá xwe ɖu gbé ɔ́, mi na tɔ́n ajijimɛ sín vǐwungbo lɛ́ɛ mɛ; mɛ ɖokpó ɖokpó ná wlí ɖyɔ̌vǐ lɛ́ɛ ɖokpó ɖokpó, bó ná kplá ɛ yi Bɛnjamɛ́ɛ yíkúngban jí bɔ é ná húzú mɛ énɛ́ ɔ́ sín asi. Ényí tɔ́ yětɔn lɛ́ɛ abǐ nɔví yětɔn súnnu lɛ́ɛ wá jɛ hwɛ nú mǐ ɔ́, mǐ ná ɖɔ nú yě ɖɔ: ‘Mi kɛnklɛ́n bó jɔwǔ Bɛnjamɛ́ɛ sín súnnu lɛ́ɛ, ɖó mǐ kpé wú bó mɔ nyɔ̌nu nú yě mɛ ɖokpó ɖokpó ɖo hwenu e mǐ ɖo ahwan fun wɛ ɖo Yavɛ́ci é ǎ. Ée é má kó nyí ɖɔ midɛɛ lɛ́ɛ ɖésú wɛ sɔ́ vǐ mitɔn lɛ́ɛ da nú yě ǎ nɛ́ ɔ́, è sixú dó hwɛ mi ɖɔ mi gba akpá e mi dó é ǎ.’ ” Bɛnjamɛ́ɛ sín súnnu lɛ́ɛ ka xwedó nǔ énɛ́ ɔ́ e è kplɔ́n yě ɔ́; yě wlí nyɔ̌nu nabí e hu dó yě lɛ́ɛ ɖo ɖyɔ̌vǐ e ɖo we ɖú wɛ ɖo Silóo lɛ́ɛ mɛ, lobo kplá yě yi. Énɛ́ ɔ́, yě lɛ́ kɔ yi to yětɔn mɛ, bó vɔ́ toxo yětɔn lɛ́ɛ gbá, lobo jɛ mɛ. Izlayɛ́li ví ɖě lɛ́ɛ gosín fí e è blǒ kplé ɔ́ ɖe é. Mɛ ɖokpó ɖokpó yi akɔta tɔn mɛ ɖo xwédo tɔn mɛ, lobo yi jɛ ayǐkúngban e nyí étɔn ɔ́ jí. Hwe énɛ́ ɔ́ nu ɔ́, axɔ́sú ɖě ɖo Izlayɛ́li ǎ, bɔ mɛ ɖokpó ɖokpó nɔ́ wa nǔ e jló e ɔ́. Hwenu e hwɛɖɔtɔ́ lɛ́ɛ ɖo acɛ kpa wɛ ɖo Izlayɛ́li ɔ́, adɔ ɖé tɔ́n ɖo to ɔ́ mɛ. Nya ɖé ka tíin bó nɔ́ nɔ Bɛteleyɛ́mu ɖo Judáa yíkúngban jí; nya énɛ́ ɔ́ kplá asi tɔn kpó vǐ tɔn súnnu we lɛ́ɛ kpó, bɔ yě ná yi nɔ Mɔwabu, ɖó adɔ e tɔ́n é wú. Nya ɔ́ nɔ́ nyí Elimɛlɛ́ki; asi tɔn nɔ nyí Nɔemíi, bɔ vǐ tɔn we lɛ́ɛ ɖokpó nɔ́ nyí Maxlɔ́ni, bɔ ɖokpó nɔ́ nyí Kiliɔ́ni. Efláta nu wɛ nú yě. Ée yě wǎ Mɔwabu ɔ́, yě sá xwé nyi fínɛ́. Nɔemíi sín asú wá kú, bɔ é kpo é kpódó vǐ tɔn we lɛ́ɛ kpó. Vǐ lɛ́ɛ da Mɔwabunu; mɛ ɖokpó sín asi nɔ nyí Ɔpa, mɛ ɖě ɔ́ tɔn nɔ́ nyí Hwliti. Yě nɔ fínɛ́ xɔ xwe wǒ mɔ̌; bɔ Maxlɔ́ni kpó Kiliɔ́ni kpó lɔmɔ̌ wá kú, bɔ Nɔemíi sɔ́ ɖó asú ǎ, é ka sɔ́ ɖó vǐ ǎ. Mɔwabu fínɛ́ wɛ Nɔemíi ɖe, bó se ɖɔ Mawu Mavɔmavɔ jɔwǔ togun émítɔn, bɔ nǔɖuɖu tíin; énɛ́ ɔ́, é jɛ nǔ sɔ́ jí, é kpó vǐ tɔn sín asi we lɛ́ɛ kpó, bó ná lɛ́ kɔ yi Judáa. É kplá yě bɔ yě jɛ ali. Lo ɔ́, hwenu e yě ɖo yiyi wɛ ɔ́, é ɖɔ nú yě ɖɔ: “Din ɔ́, mi lɛ́ kɔ yi xwé, bónú mɛ ɖokpó ɖokpó ní yi nɔ tɔn gɔ́n! Mawu Mavɔmavɔ ní nyɔ́ xomɛ dó mi wú, lě e mi nyɔ́ xomɛ dó asú mitɔn e kú lɛ́ɛ kpó nyɛ kpó wú gbɔn é! Mawu Mavɔmavɔ ní bló bónú mi mɛ ɖokpó ɖokpó ní mɔ asú da, bónú asúxwé ní nyɔ́ nú mi.” Ée é ɖɔ mɔ̌ ɔ́, é kplá así kɔ nú yě, bó ná jó yě dó, bɔ yě bɛ́ avǐ, bó ya ɖésú, bó ɖɔ n'i ɖɔ: “Éeǒ! Mǐ ná xwedó we yi to towe mɛ.” Nɔemíi lɛ́ ɖɔ nú yě ɖɔ: “Vǐ ce lɛ́ɛ mi, mi lɛ́ kɔ yi to mitɔn mɛ. Étɛ́wú wɛ mi jló ná xwedó mì? Un sɔ́ sixú ɖo vǐ ná ji wɛ bónú mi ná da ǎ. Mi lɛ́ kɔ yi to mitɔn mɛ bó jó mì dó; un ko kpo; un sɔ́ sixú vɔ́ asú da ǎ. Ényí un tlɛ ɖɔ: vǐ kpo ɖo wǔ ce, lobo yi xɔ nú súnnu zǎn mɛ din bó ji vǐ ɔ́, mi ná gbɛ́ súnnu ɖěvo da, bó ná nɔ te kpɔ́n yě káká bɔ yě ná su wɛ a? Vǐ ce lɛ́ɛ e mi, mi gbɔ, nyɛ wɛ Mawu Mavɔmavɔ húzú kpan nukɔn, bó ɖo nǔ wa xá wɛ.” Bɔ yě lɛ́ dó avǐ gbe, bó ya ɖésú. Ɔpa ka gbɔ bó kplá así kɔ nú asú tɔn nɔ, bó ná jó é dó; lo ɔ́, Hwliti tɛ́ dó asú tɔn nɔ wú, bó gbɛ́ ɖɔ émí kún ná jó e dó gbeɖé ó. Nɔemíi ɖɔ nú Hwliti ɖɔ: “Kpɔ́n, wegɔ́ towe nɛ́ lɛ́ kɔ xwe togun tɔn kpó vodún tɔn kpó kɔn nɛ́. Hwi lɔmɔ̌ ní lɛ́ kɔ yi éyɛ́ ɖɔhun.” Hwliti ka yí gbe n'i ɖɔ: “Ma dó tagba nú mì ɖɔ ma jó we dó bó lɛ́ kɔ yi nɔ zɔ nú we ó; a yi fí ɖěbǔ ɔ́, un ná yi; fí e a nɔ ɔ́ wɛ un ná nɔ. Togun towe wɛ ná nyí togun ce; Mawu e a nɔ sɛn ɔ́ wɛ un ná sɛn. Fí e a nǎ kú ɖe ɔ́ wɛ un ná kú ɖe, bɔ è na ɖi mì ɖó fínɛ́. Ényí kú ɖé má hu mì ǎ, bónú nyɛ ɖésúnɔ jló bó jɛ vo nú we hǔn, Mawu Mavɔmavɔ ní dɔn tó nú mì, bónú é syɛ́n hú tódɔnnúmɛ lɛ́ɛ bǐ!” Ée Nɔemíi mɔ ɖɔ Hwliti ɖɔ émí ná xwedó émí dandan jɛ́n wɛ ɔ́, é gbɔ bó xwɛ. Bɔ yě zɔn kpɔ́ káká yi Bɛteleyɛ́mu. Ée yě wǎ ɔ́, toxo ɔ́ bǐ xo zǐn bɔ nyɔ̌nu lɛ́ɛ nɔ́ kanbyɔ́ yěɖée ɖɔ: “Nɔemíi jɛ́n wɛ a?” Nɔemíi ka yí gbe nú yě ɖɔ: “Mi ma sɔ́ ylɔ́ mì ɖɔ Nɔemíi ɖě ó, mi ylɔ́ mì ɖɔ Mala, ɖó Nǔbǐwúkpétɔ́ ɔ́ sɔ́ mì dó aluwɛ ɖaxó ɖé mɛ. Hwenu e un gosín fí ɔ́, nǔ ɖo así ce bó túnflá. Din ɔ́, Mawu Mavɔmavɔ ká kplá mì wá así gbá alɔ gbá. Hǔn mi ma sɔ́ ylɔ́ mì ɖɔ Nɔemíi ó, Nǔbǐwúkpétɔ́ ɔ́ húzú kpan nukɔn mì, é dó ya mì.” Lě e Nɔemíi gosín Mɔwabu wá gbɔn ɔ́ nɛ́, é kpódó vǐ tɔn si Hwliti Mɔwabunu ɔ́ kpó. Hwenu e è jɛ nǔkún ya jí ɔ́ wɛ é wá Bɛteleyɛ́mu. Nya ɖé tíin bɔ è nɔ ylɔ́ ɛ ɖɔ Bowozi; nya énɛ́ ɔ́, Nɔemíi sín asú mɛ lɛ́ɛ ɖě wɛ. Nya nukúnɖéjí ɖé wɛ; é jɛ dɔkun ɖésú. Hwliti Mɔwabunu ɔ́ byɔ́ gbe Nɔemíi gbe ɖokpó ɖɔ: “Nǎ gbe mì nú ma yi mɛ e ná nyɔ́ xomɛ dó wǔ ce ɔ́ sín gle mɛ, bó ná yi cyán nǔkún e nǔkún-yatɔ́ lɛ́ɛ ma mɔ bó ya ǎ lɛ́ɛ.” Nɔemíi ká yí gbe n'i ɖɔ: “Vǐ ce, bo yi.” Bɔ é yi gle ɖé mɛ, bó yi cyán nǔkún ɖo fí e nǔkún-yatɔ́ lɛ́ɛ kó gbɔn dín é. Lo ɔ́, é ká wá nyí ɖɔ Bowozi, Elimɛlɛ́ki sín mɛ ɔ́ sín gle wɛ. Ée é ná nɔ zaanɖé ɔ́, Bowozi gosín Bɛteleyɛ́mu wá. É dó gbe nǔkún-yatɔ́ lɛ́ɛ ɖɔ: “Mawu Mavɔmavɔ ní nɔ kpɔ́ xá mi.” Yě ká yí gbe n'i ɖɔ: “Mawu Mavɔmavɔ ní xo ɖɛ dó jǐ towe.” Bowozi kanbyɔ́ nǔkún-yatɔ́gán ɔ́ ɖɔ: “Mɛ̌ ví wɛ ka nyí nyɔ̌nu énɛ́ ɔ́?” Nǔkún-yatɔ́gán ɔ́ ká yí gbe n'i ɖɔ: “Nyɔ̌nu Mɔwabunu e kpó Nɔemíi kpó wá é wɛ. É wá bó ɖɔ è nǐ ná gbe émí, nú émí ná cyán nǔkún e nǔkún-yatɔ́ lɛ́ɛ jó dó nyi gle mɛ lɛ́ɛ. Sín zǎnzǎn e é wá ɔ́, azɔ̌ wa wɛ jɛ́n é ɖe káká jɛ din, é gbɔjɛ́ ɖé vo ǎ.” Bowozi ka ɖɔ nú Hwliti ɖɔ: “Yɔkpɔ́, ɖǒtó mì. Ma sɔ́ yi cyán nǔkún ɖo gle ɖěvo mɛ ó, nɔ fí xá nyɔ̌nu e ɖo azɔ̌ wa nú mì wɛ lɛ́ɛ. Kpɔ́n fí e ya nǔkún gbɔn wɛ nyɔ̌nu lɛ́ɛ ɖe ɖo gle ɔ́ mɛ lɛ́ɛ, bó nɔ gǔdo yětɔn. Un ko ɖɔ nú azɔ̌watɔ́ ce lɛ́ɛ ɖɔ yě ní má dó tagba nú we ó. Ényí sinnugblá sín we hǔn, yi sinzɛ́n ɔ́ kɔn, bó nu sin e azɔ̌watɔ́ lɛ́ɛ dun é.” Ée Bowozi ɖɔ mɔ̌ n'i ɔ́, é xwe agbɔ̌nnusú do bó ɖe kɔ́, bó ɖɔ: “Nɛ̌ a ka nyɔ́ xomɛ dó wǔ ce sɔ e? Nyɛ mɛ e nyí jǒnɔ ɔ́ a wlǐbo nú mì sɔ mɔ̌?” Bowozi ka yí gbe n'i ɖɔ: “Nǔ e a wa nú asú towe nɔ sín hwenu e asú towe kú ɔ́, lě e a jǒ tɔ́ towe kpó nɔ towe kpó dó, bó jó to towe dó, bó wá ɖo togun e a ma tunwun ɖ'ayǐ ǎ mɛ gbɔn ɔ́, un se bǐ. Mawu Mavɔmavɔ, Mawu Izlayɛ́li tɔn e sín awa glɔ́ a wǎ hɔn hwlá cí ɔ́, ní sú nǔ e a wa ɔ́ sín axɔ́ we, é ní ná ajɔ tɔn we, nú é ní túnflá.” Hwliti ɖɔ: “Óo! Sɛ́ ce, xomɛ jɛ́n a nyɔ̌ dó wǔ ce sɔ mɔ̌ a? A dǒ gbɔ nú mì, a zě gbe fífá dó ɖɔ xó nú mì, có nyɛ ka tlɛ sɔ azɔ̌watɔ́ towe lɛ́ɛ ɖě lɔ ǎ.” Ée nǔɖuɖu hwenu su ɔ́, Bowozi ɖɔ nú Hwliti ɖɔ: “Wǎ ɖu nǔ xá mǐ; sɔ́ wɔ̌xúxú bó sún nǔsúnnú.” Ée é ɖɔ mɔ̌ ɔ́, Hwliti jínjɔ́n nǔkún-yatɔ́ lɛ́ɛ kpá, bɔ Bowozi ná ɛ nǔkún mimɛ. É ɖu káká bó gɔ́ xo bɔ é kpo. Ée Hwliti lɛ́ lɛ́ kɔ ɖidó nǔkún cyán gbé ɔ́, Bowozi ɖɔ nú azɔ̌watɔ́ tɔn lɛ́ɛ ɖɔ: “Mi jó e dó nú é cyán nǔkún ɖo nǔkún e mi kplé lɛ́ɛ mɛ, mi ma dó tagba n'i ó. Đésú lɔ ɔ́, ée mi kplé lɛ́ɛ ɔ́, mi ɖe ɖ'é mɛ, bó sɔ́ nyi ayǐ n'i, bónú é ná cyán. Mi ma ɖɔ xó ɖé n'i ó.” É cyán nǔkún ɖo gle ɔ́ mɛ káká bɔ gbadanu su, bɔ é só nǔkún e é mɔ é, bɔ é ná yi towungoɖo gban (30) mɔ̌. É zé yi xwé bó zé xlɛ́ asú tɔn nɔ; é lɛ́ zé nǔ e é ɖu kpo ɔ́ jó n'i. Bɔ asú tɔn nɔ kanbyɔ́ ɛ ɖɔ: “Étɛ́! Gle tɛ́ mɛ wɛ a ka yi cyán nǔ ɖe égbé? Gle tɛ́ mɛ a ka wa azɔ̌ ɖe? Mawu Mavɔmavɔ ní xo ɖɛ dó mɛ e wlíbo nú we ɔ́ jí!” Hwliti ɖɔ nú asú tɔn nɔ ɖɔ mɛ e sín gle mɛ émí wa azɔ̌ ɖe ɔ́ nɔ́ nyí Bowozi. Nɔemíi ɖɔ nú Hwliti Mɔwabunu ɔ́ ɖɔ: “Mawu Mavɔmavɔ e nɔ́ kú nǔbláwǔ nú mɛ e ɖo gbɛ lɛ́ɛ kpó mɛ e ko kú lɛ́ɛ kpó ɔ́, ní xo ɖɛ dó nya énɛ́ jí.” Nɔemíi lɛ́ ɖɔ: “Nya énɛ́ ɔ́ mɛ mǐtɔn wɛ. Mɛ e ɖó ná kpé nukún mǐ wú lɛ́ɛ ɖě wɛ.” Ée é ɖɔ mɔ̌ ɔ́, Hwliti Mɔwabunu ɔ́ lɛ́ yí xó bó ɖɔ: “Nya ɔ́ lɛ́ ɖɔ nú mì ɖɔ nyi ní ɖo nǔkún cyán wɛ ɖo azɔ̌watɔ́ lɛ́ɛ gúdo, káká jɛ hwenu e yě ná ya nǔkún fó dó é.” Nɔemíi ka lɛ́ ɖɔ nú Hwliti ɖɔ: “Vǐ ce, é nyɔ́ ganjí, bo nɔ yi wa azɔ̌ xá azɔ̌watɔ́ Bowozi tɔn lɛ́ɛ, ɖó a yi mɛ ɖěvo sín gle mɛ din ɔ́, è sixú dó tagba nú we.” Lě e Hwliti nɔ yi cyán nǔkún ɖo azɔ̌watɔ́ Bowozi tɔn lɛ́ɛ gúdo gbɔn káká bɔ è ya nǔkún bǐ vɔ ɔ́ nɛ́. Asú tɔn nɔ gɔ́n jɛ́n é ká kpo ɖe. Nɔemíi ɖɔ nú Hwliti gbe ɖokpó ɖɔ: “Vǐ ce, un jló ɖɔ a nǐ da asú bó vo. Lě e a ko tunwun gbɔn ɔ́, Bowozi e jó we dó bɔ a cyán nǔkún ɖo azɔ̌watɔ́ tɔn nyɔ̌nu lɛ́ɛ gúdo ɔ́, mɛ mǐtɔn wɛ. Égbé gbadanu ɔ́, é ná yi só nǔkún ɖo kɔ́xota ɖo gle tɔn mɛ. Din ɔ́, nǔ e a nǎ wa ɔ́ ɖíe: yi lɛ wǔ, bó sá nǔ, bó ba acɔ́ ganjí. Énɛ́ ɔ́ gúdo ɔ́, a nǎ yi fí e só nǔkún ɖe wɛ é ɖe é. Ma ka lɔn nú é mɔ we cóbó ɖu nǔ bó nu ahan fó ó. É xwe ayǐ mlɔ́ gbé ɔ́, a nǎ kpɔ́n fí e é ná mlɔ́ ɔ́ ganjí. Énɛ́ ɔ́ gúdo ɔ́, a nǎ sɛkpɔ́ ɛ bó ɖe avɔ sín afɔ tɔn jí, bó ná mlɔ́ afɔ tɔn ligbé. A blǒ mɔ̌ ɔ́, é ɖésú ná ɖɔ nǔ e a nǎ wa ɔ́ nú we.” Hwliti yí gbe n'i ɖɔ émí ná bló nǔ e é ɖɔ nú émí ɔ́ bǐ. Hwliti ka yi kɔ́xota fí e Bowozi nɔ́ só nǔkún ɖe é bó bló nǔ e asú tɔn nɔ zɔ́n ɔ́ bǐ pɛ́pɛ́pɛ́. Bowozi ɖu nǔ bó nu ahan, bɔ xomɛ hun i ganjí, bɔ é yi mlɔ́ jinukún tɔn e é kplé ɔ́ kpá. Hwliti sɛkpɔ́ ɛ dɛ̌dɛ̌, bó ɖe avɔ sín afɔ tɔn jí, bó mlɔ́ afɔ tɔn ligbé. Ée zǎn vlɔ́ ɖó we ɔ́, Bowozi nyí fɔ́n hawun, bó nya dó nukɔn bó mɔ nyɔ̌nu ɖo ayǐmlɔ́mlɔ́ ɖo afɔ tɔn ligbé. Ée é mɔ mɔ̌ ɔ́, é ɖɔ: “Hwi mɛ̌ ká nɛ́?” Nyɔ̌nu ɔ́ ká yí gbe n'i ɖɔ: “Nyɛ mɛsɛntɔ́ towe Hwliti wɛ, kɛnklɛ́n yí mì dó xɔ towe sá, ɖó a ɖǒ acɛ bó ná kpé nukún wǔ ce.” Bowozi ɖɔ n'i ɖɔ: “Mawu Mavɔmavɔ ní xo ɖɛ dó jǐ towe se a yɔkpɔ́. Nǔ e a blǒ din ɔ́ lɛ́ ɖe lě e a yǐ wǎn nú asú towe mɛ lɛ́ɛ, bó ɖo gbejí nú yě gbɔn ɔ́ xlɛ́, hú nǔ e a ko bló ɖ'ayǐ é. Đó a yi ba dɔ̌nkpɛvú wamamɔnɔ abǐ dɔkunnɔ ɖé ǎ. Din ɔ́ yɔkpɔ́, ma ɖi xɛsi ó, un ná bló nǔ e a nǎ ɖɔ ɔ́ bǐ nú we, ɖó mɛ bǐ wɛ tunwun ɖɔ nyɔ̌nu jijɔɖagbenɔ wɛ nú we. Nǔgbó wɛ, un ɖó acɛ bó ná kpé nukún wǔ we, amɔ̌, mɛ ɖěvo ɖe bó sɛkpɔ́ we hú nyɛ. Dɔ̌ fí, sɔ zǎnzǎn tɛɛn ɔ́, un ná yi mɔ ɛ, nú é yí gbe, bó ná kpé nukún wǔ we ɔ́, é ná bló. Nú é má ká jló ǎ ɔ́, nyɛ ná kpé nukún wǔ we, Mawu Mavɔmavɔ Gbɛɖe ɔ́ nukɔn ɖíe ɖɔ ɖe wɛ un ɖe e. Amɔ̌, to mlɔ́ ayǐ hwɛ̌ nú ayǐ ní hɔ́n.” Bɔ Hwliti mlɔ́ afɔ tɔn ligbé fínɛ́ káká bɔ ayǐ hɔ́n. É ká yá wǔ fɔ́n zǎn bó sí te cóbɔ gbɛmɛ hɔ́n. Bowozi ka ɖɔ n'i ɖɔ: “Mɛ ɖé ní má tunwun ɖɔ nyɔ̌nu wá dɔ́ fí ó.” É lɛ́ ɖɔ n'i ɖɔ: “Tún avɔ ɖaxó e a gbǎ ɔ́ bó hɛn ganjí.” É tɛ́ avɔ ɔ́ bɔ Bowozi jlɛ́ nǔkún towungoɖo kanɖé wǒ (50) jɛjí d'é mɛ, lobo ɖíɖá ɛ bɔ é yi xwé. É wá asú tɔn nɔ gɔ́n, bɔ asú tɔn nɔ kanbyɔ́ ɛ ɖɔ: “Vǐ ce, nɛ̌ nǔ lɛ́ɛ ká yi gbɔn?” Hwliti wlí nǔ e Bowozi wa n'i ɔ́ bǐ ɖɔ nú asú tɔn nɔ. É lɛ́ ɖɔ n'i ɖɔ: “É tlɛ lɛ́ ná mì nǔkún towungoɖo kanɖé wǒ (50) jɛjí élɔ́, bó ɖɔ nyi kún ná lɛ́ kɔ wá mɔ we alɔgbá ó.” Nɔemíi ɖɔ n'i ɖɔ: “Vǐ ce, nɔ te bó ná kpɔ́n; Bowozi ma ɖɔ xó énɛ́ ɔ́ gbo égbé ǎ ɔ́, é ɖo nǎ gbɔjɛ́ wɛ ǎ.” Daxwi énɛ́ ɔ́ mɛ ɔ́, Bowozi yi toxo ɔ́ sín hɔntogbó jí fí e è nɔ kplé xó ɖɔ ɖe ɔ́, bó jínjɔ́n ayǐ. Fínɛ́ wɛ é ɖe bɔ nya e xó é ɖɔ nú Hwliti ɖɔ é sɛkpɔ́ ɛ hú émí ɔ́ wá xweyǐgbe, lobɔ é ylɔ́ ɛ, bó ɖɔ é ní wá jínjɔ́n ayǐ, bɔ nya ɔ́ wá jínjɔ́n ayǐ. Bowozi ylɔ́ tomɛxó wǒ, ɖɔ yě ní wá jínjɔ́n ayǐ. Ée yě wǎ jínjɔ́n ayǐ ɔ́, é ɖɔ nú mɛ e nyí Elimɛlɛ́ki sín mɛ hú i ɔ́ ɖɔ: “Nɔemíi lɛ́ kɔ sín Mɔwabu wá. É ɖo nɔví mǐtɔn Elimɛlɛ́ki sín ayǐkúngban ná sa wɛ. Un tunwun ɖɔ má ɖɔ nú we, bó ná byɔ́ we ɖɔ hwi ní yí ayǐkúngban ɔ́ ɖo tomɛxó lɛ́ɛ kpódó mɛ e jínjɔ́n ayǐ ɖo fí lɛ́ɛ kpó nukɔn. Ényí a jló ná wa tɛn e mɛ a ɖe ɔ́ sín azɔ̌ hǔn, wa. A ma ka jló ǎ hǔn ɖɔ nú mì, ɖó nyi jɛ́n bɔ dó wǔ we tlóló.” Nya ɔ́ yí gbe n'i ɖɔ émí ná yí ayǐkúngban ɔ́. Bowozi lɛ́ yí xó bó ɖɔ: “Gbe e gbe a nǎ yí ayǐkúngban ɔ́ ɖo Nɔemíi sí ɔ́, a ɖǒ nǎ lɛ́ yí Hwliti Mɔwabunu asúkúsi ɔ́ dó xɔ towe sá, bónú ayǐkúngban ɔ́ ná kpo ɖo asú tɔn e kú ɔ́ sín hɛ̌nnu tɔn nyí wɛ.” Bɔ nya ɔ́ ká yí gbe n'i ɖɔ: “Ényí mɔ̌ wɛ hǔn un sɔ́ ná yí ǎ, ɖó un táá wá gba dɔkun nyɛ ɖésúnɔ tɔn lɛ́ɛ dó. Azɔ̌ énɛ́ e nyí ce ɔ́, un jó nú we, ɖó nyɛ ɖésúnɔ sixú wa ǎ.” Đ'ayǐ xóxó ɖo Izlayɛ́li ɔ́, nú è xɔ nǔɖé abǐ è ɖyɔ̌ nǔɖé xá mɛɖé ɔ́, mɛ ɖokpó nɔ ɖe afɔkpa tɔn bo nɔ sɔ́ jó nú mɛ ɖě ɔ́ bó nɔ dó ɖó ata xó ɔ́ jí. Énɛ́ ɔ́ wɛ nɔ ɖe xlɛ́ ɖɔ è ko ɖɔ xó ɔ́ gbo. Énɛ́ ɔ́ wú wɛ, hwenu e nya ɔ́ ɖo ɖiɖɔ nú Bowozi wɛ ɖɔ é ní yí ayǐkúngban ɔ́ é ɔ́, é ɖe afɔkpa tɔn bó sɔ́ jó nú Bowozi. Bɔ Bowozi ɖɔ nú tomɛxó lɛ́ɛ kpódó mɛ e ɖo fínɛ́ lɛ́ɛ bǐ kpán ɖɔ: “Mi mɛ bǐ nukún mɛ wɛ un yí nǔ e nyí Elimɛlɛ́ki kpódó vǐ tɔn Kiliɔ́ni kpó Maxlɔ́ni kpán tɔn lɛ́ɛ bǐ ɖo Nɔemíi sí ɖe égbé din mɛ. Mɔ̌ ɖokpó ɔ́, un sɔ́ Hwliti Mɔwabunu, Maxlɔ́ni e kú ɔ́ sín asi ɖó xɔ ce sá. Énɛ́ ɔ́, ayǐkúngban ɔ́ ná nɔ mɛ e kú ɔ́ sín hɛ̌nnu mɛ, vǐ tɔn lɛ́ɛ ná hɛn nyǐkɔ tɔn ɖó te ɖo hɛ̌nnumɔ tɔn lɛ́ɛ tɛ́ntin, bó ná hɛn ɖó te ɖo to tɔn mɛ. Mi bǐ nukún mɛ wɛ nǔ énɛ́ lɛ́ɛ bǐ jɛ ɖe.” Tomɛxó lɛ́ɛ kpódó mɛ e ɖo fínɛ́ lɛ́ɛ bǐ kpán yí gbe ɖɔ: “Ɛɛn nukún mǐtɔn mɛ wɛ nǔ énɛ́ lɛ́ɛ bǐ jɛ ɖe. Mawu Mavɔmavɔ ní xo ɖɛ dó nyɔ̌nu e byɔ́ xɔ towe sá ɔ́ jí, bónú é ní gba kún Jakɔ́bu sín asi Hlacɛ́li kpó Lěya kpó e dó Izlayɛ́li ví lɛ́ɛ sín kún é ɖɔhun. Dɔkun towe ní d'agba ɖo Efláta sín ayǐkúngban jí. Nyǐkɔ towe ní yi jǐ ɖo Bɛteleyɛ́mu to ɔ́ bǐ mɛ. Mawu Mavɔmavɔ ní bló bónú nyɔ̌nu énɛ́ ɔ́ ní ji vǐ gěgé nú we, bónú xwé towe ní gɔ́ Pɛlɛ́si e Judáa ji ɖo Tamáa xomɛ ɔ́ sín xwé ɖɔhun.” Énɛ́ ɔ́, Bowozi yí Hwliti dó xɔ tɔn sá, bɔ Mawu Mavɔmavɔ bló bɔ é mɔ xo bó ji vǐ súnnu ɖokpó. Nyɔ̌nu Bɛteleyɛ́munu lɛ́ɛ ɖɔ nú Nɔemíi ɖɔ: “Susu nú Mawu Mavɔmavɔ, ɖó é bló bɔ è ji mɛ e ná kpé nukún dó wǔ we é. Vǐvú towe ní nyí nǔsúɖaxó ɖo Izlayɛ́li. É ná ná ayi j'ayǐ we bó ná kpé nukún wǔ we ɖo kpikpoxɔmɛ. Vǐ towe si ɔ́ hú vǐ tɛ́nwe nú we, ɖó é yí wǎn nú we bó ji vǐ súnnu élɔ́ nú we.” Nɔemíi yí vǐ ɔ́ bó dɔn ɛ dó wǔ, bo zin alɔ dó akɔ́n ɖɔ émí ná tɔ́jú i. Nyɔ̌nu e ɖo xwé tɔn kpá lɛ́ɛ nɔ́ ɖɔ: “Nɔemíi ɖó vǐ súnnu ɖokpó!” Yě ylɔ́ vǐ ɔ́ ɖɔ Ovɛ́di. Ovɛ́di wɛ ji Jɛsée Davídi sín tɔ́. Davídi ɔ́, tɔ́gbó tɔn lɛ́ɛ ɖíe, bɛ́ sín Pɛlɛ́si jí: Pɛlɛ́si ji Ɛslɔ́ni. Ɛslɔ́ni ji Hlamu, Hlamu ji Aminadabu, Aminadabu ji Naxicɔ́ni, Naxicɔ́ni ji Saluma, Saluma ji Bowozi, Bowozi ji Ovɛ́di, Ovɛ́di ji Jɛsée, Jɛsée ji Davídi. Dǎwe ɖé tíin, bó nɔ́ nyí Ɛlukana, bó nɔ́ nɔ Hlamatayímu-Sofímu, ɖo sókan Eflayímu tɔn mɛ, ɖo tokpɔnla Súfu ví lɛ́ɛ tɔn mɛ. Ɛlukana ɔ́, Eflayímu ví wɛ, bó nyí Yeloxámu ví; Yeloxámu ká nyí Elihu ví, bɔ Elihu ká nyí Tohu ví, bɔ Tohu nyí Súfu ví. Asi we wɛ Ɛlukana ɖó; mɛ ɖokpó nyí Ana, bɔ mɛ wegɔ́ ɔ́ nyí Penína. Penína ɖó vǐ, Ana ká ɖó vǐ ɖě ǎ. Xwewú xwewú tɛgbɛ ɔ́, Ɛlukana nɔ gosín toxo tɔn mɛ, bó nɔ́ yi Silóo toxo mɛ, bó nɔ́ yi sɛn Mawu Mavɔmavɔ, Mawu Nǔbǐwúkpétɔ́ ɔ́, bó nɔ sá vɔ̌ n'i. Eli ví, Hofíni kpó Pínxási kpó wɛ nyí vɔ̌sánú-xwlémawutɔ́ ɖo Silóo fínɛ́. Ɛlukana sá vɔ̌ gbeɖé ɔ́, é nɔ́ ná lan asi tɔn Penína ɔ́, bó nɔ́ ná lan vǐ tɔn súnnu kpó nyɔ̌nu kpó. Lo ɔ́, lan e é nɔ́ ná mɛ ɖě lɛ́ɛ ɖokpó ɖokpó ɔ́, mɔ̌hunkɔtɔn donu we wɛ é nɔ ná Ana, ɖó é yí wǎn n'i ɖésú. Mawu Mavɔmavɔ ná ɛ vǐ ǎ có Ɛlukana yí wǎn n'i. Ana ɔ́, asísi tɔn nɔ ɖo nǔ ɖɔ ba ɛ wɛ, bó ná dó dó aɖi xomɛ n'i ɖó vǐ e Mawu Mavɔmavɔ ma ná ɛ ǎ é wú. Xwewú xwewú tɛgbɛ ɔ́, nú Ana ko yi Mawu Mavɔmavɔ xwé gbe ɔ́, nǔ ɖokpó ɔ́ jɛ́n nɔ́ jɛ. É ká wá jɛ xwe ɖokpó mɛ, bɔ Ana ko lɛ́ ɖo avǐ ya wɛ, bó gbɛ́ nǔ ɖu, bɔ asú tɔn kanbyɔ́ ɛ ɖɔ: “Ana, étɛ́wú a ka ɖo avǐ ya wɛ bó gbɛ́ nǔ ɖu? Étɛ́wú a ka ɖo aluwɛ mɛ? Nyɛ ma hú vǐ wǒ nú we ǎ cé?” Ée yě ɖu nǔ bó nu sin fó ɖo Silóo fínɛ́ ɔ́, Ana sí te, bó yi Mawu Mavɔmavɔ xwé ɔ́ sín hɔntogbó jí. Eli vɔ̌sánú-xwlémawutɔ́ ɔ́ ká ɖo ayǐjínjɔ́n ɖo hɔnkpo ɔ́ kpá. Akpɔ ɖó Ana ɖésú, bɔ é xo ɖɛ kpó avǐ kpó, bó ɖɔ: “Mawu Mavɔmavɔ Nǔbǐwúkpétɔ́, ényí a kɛnklɛ́n bó nyi kɔ kpɔ́n wǔvɛ́ e mɔ wɛ nyɛ mɛsɛntɔ́ towe ɖe ɔ́, ényí a flín mì bó má wɔn mì ǎ, bó ná vǐ súnnu ɖokpó nyɛ mɛsɛntɔ́ towe ɔ́, un ná sɔ́ vǐ ɔ́ ɖó vo nú we, bɔ é ná nyí towe kúgbe gbɛgbe, bɔ è nǎ xwlɛ́ ta n'i gbeɖé ǎ; énɛ́ ɔ́ ná ɖe xlɛ́ ɖɔ è sɔ́ ɛ ɖó vo nú we.” Ée é ɖo ɖɛ xo wɛ bɔ é wá jɛ lǐnlín jí ɔ́, Eli jɛ nu tɔn kpɔ́n jí. Ana ɖo ɖɛ xo dó xomɛ wɛ, bɔ mɛɖé ɖo gbe tɔn se wɛ ǎ, nu tɔn kɛ́ɖɛ́ jɛ́n ɖo wǔ dán wɛ, bɔ Eli vɛdó ɖɔ ahan wɛ é nu mú sín, bó ɖɔ: “Káká hwetɛ́nu ahan ka ná nɔ jǐ we yi jɛ? Ahan ɔ́ ní hɔ́n nú we lo.” Ana ka yí gbe n'i ɖɔ: “Éeǒ aklúnɔ ce, nyɔ̌nu ɖé wɛ nú mì bɔ un ɖo wǔvɛ́ mɔ wɛ ɖo ayi mɛ. Un nu vɛ̌ɛn ǎ, un ka nu ahan syɛ́nsyɛ́n ɖěbǔ ǎ. Nǔ e ɖo xo ce mɛ ɔ́ ɖɔ nú Mawu Mavɔmavɔ wɛ un ɖe. Ma mɔ nyɛ mɛsɛntɔ́ towe dó mɔ nyɔ̌nu nǔvɔ́nɔ ó. Ɖó wǔvɛ́ e mɔ wɛ un ɖe din ɔ́ kpó aɖi e ɖó mì ɔ́ kpó wɛ zɔ́n bɔ un ɖo ɖɛ xo wɛ káká wá jɛ din.” Ée é ɖɔ mɔ̌ ɔ́, Eli ɖɔ: “Yi kpódó fífá kpó; Mawu Izlayɛ́li tɔn ní ná nǔ e a byɔ́ ɔ́ we.” Ana ka yí gbe n'i ɖɔ: “A nyɔ̌ xomɛ dó nyɛ mɛsɛntɔ́ towe wú mɛ nya!” Ée é ɖɔ mɔ̌ ɔ́, é yi bó ɖu nǔ, bɔ nukún tɔn mɛ jɛ ayǐ. Ɛlukana kpó mɛ tɔn lɛ́ɛ kpó fɔ́n zǎn, bó yi ɖe kɔ́ nú Mawu Mavɔmavɔ bó lɛ́ kɔ yi xwé ɖo Hlama. Ɛlukana ɖó xó xá asi tɔn Ana ɔ́, bɔ Mawu Mavɔmavɔ ná ɛ nǔ e Ana byɔ́ é. Đo xwe nɛ́ xwe ɔ́, Ana mɔ xo bo ji vǐ súnnu ɖokpó, bó ɖɔ dó ayi mɛ ɖɔ émí ná sun nyǐ i ɖɔ Samuwɛ́li, ɖó Mawu Mavɔmavɔ wɛ émí byɔ́. Énɛ́ ɔ́ gúdo ɔ́, asú tɔn Ɛlukana lɛ́ yi Silóo, é kpódó xwédo tɔn bǐ kpó, bó wá yi sá xwetavɔ́ nú Mawu Mavɔmavɔ, bó lɛ́ sá vɔ̌ ɖokpó; vɔ̌ énɛ́ ɔ́, akpá tɔn wɛ é dó. Amɔ̌, Ana yi ɖě xwe nɛ́ xwe ǎ. É ɖɔ nú asú tɔn ɖɔ: “Nú vǐ ɔ́ kó ɖe anɔ̌ ɔ́, un ná kplá ɛ yi, bó ná sɔ́ ɛ yi xwlé Mawu Mavɔmavɔ, bɔ é ná nɔ fínɛ́ káká sɔ́yi.” Asú tɔn ká ɖɔ n'i ɖɔ: “Blǒ lě e a mɔ ɖɔ é ná nyɔ́ gbɔn é; nɔ te bónú vǐ ɔ́ ɖe anɔ̌. Mawu Mavɔmavɔ ní vɛ́ ɖe akpá e é dó é.” Nǔgbó ɔ́, Ana cí Hlama, bó ná anɔ̌ vǐ ɔ́ káká bɔ vǐ ɔ́ ɖe anɔ̌. Ée vǐ ɔ́ ɖe anɔ̌ ɔ́, é kplá ɛ yi Mawu Mavɔmavɔ xwé ɖo Silóo. É kpó asú tɔn kpó hɛn nyibúsú e ɖó xwe atɔn ɔ́ ɖokpó, linfín ati ɖokpó, kpó vɛ̌ɛn anyǔglo ɖokpó kpó dó vǐ ɔ́ jí, bɔ yě yi Mawu Mavɔmavɔ xwé ɖo Silóo. Vǐ ɔ́ ká kpo ɖo kpɛví tawun. Yě hu nyibúsú ɔ́ dó sá vɔ̌, bó kplá vǐ ɔ́ hɛn yi Eli gɔ́n. Ana ɖɔ n'i ɖɔ: “Aklúnɔ ce, a flín nyɔ̌nu e wá fí gbe ɖokpó, bó wá sa vo nú Mawu Mavɔmavɔ é a? Un xwlé nǔ nú we; nyɔ̌nu ɔ́ jɛ́n ɖíe mɔ wɛ a ɖe e; ényí mɛ ɖěvo wɛ ǎ. Vǐ e byɔ́ Mawu Mavɔmavɔ wɛ un ɖe, bó ɖo ɖɛ xo wɛ hwenɛ́nu é ɖíe Mawu Mavɔmavɔ se ɖɛ ce e. Din ɔ́, nyɛ lɔ jló ná sɔ́ vǐ ɔ́ ná Mawu Mavɔmavɔ, bɔ é ná nyí étɔn káká sɔ́yi.” Bɔ yě ɖe kɔ́ nú Mawu Mavɔmavɔ. Ana xo ɖɛ bó ɖɔ: Un ɖo awǎjijɛ mɛ; Mawu Mavɔmavɔ wɛ ka nyí tɔn. Din ɔ́, un zé ta ɖo gbɛtɔ́ lɛ́ɛ mɛ; Mawu Mavɔmavɔ wɛ ka nyí tɔn. Din ɔ́, un hɛn ɔ́, un ná ko kɛntɔ́ ce lɛ́ɛ. Un ɖo awǎ jɛ wɛ ɖó Mawu Mavɔmavɔ hwlɛ́n mì gán. Mawu Mavɔmavɔ ɖokpónɔ géé wɛ nyí mǐmɛ́. Awǐnnya ɖě syɛ́n Mawu mǐtɔn ɖɔhun ǎ. Mawu ɖěvo ɖe zɛ éyɛ́ wú ǎ. Mi ma nɔ yí nu go ó, mɛmasíxó ɖé ní má tɔ́n sín nu mitɔn mɛ ó: Mawu Mavɔmavɔ ɔ́, Mawu ɖé wɛ, bó tunwun nǔ bǐ, é wɛ nɔ ɖɔ hwɛ dó nǔ e gbɛtɔ́ lɛ́ɛ nɔ wa lɛ́ɛ bǐ. Ahwanfuntɔ́ syɛ́nsyɛ́n lɛ́ɛ sín gǎ nɔ́ wɛ́n dó alɔ mɛ nú yě; lo ɔ́, mɛ e ma ɖó gǎn ǎ lɛ́ɛ nɔ́ mɔ hlɔ̌nhlɔ́n. Mɛ e ko ɖu nǔ kpo ɔ́ lɛ́ wá ɖo gbatɛ sɔ́ wɛ cóbó ná sixú mɔ nǔ ɖu. Mɛ e ka ɖo xovɛ́ ɖ'ayǐ lɛ́ɛ nɔ ɖo gbɔjɛ mɛ. Nyɔ̌nu wɛnsinɔ lɛ́ɛ nɔ ji vǐ azɔn tɛ́nwe. Nyɔ̌nu e ka ko ɖó vǐ kpɔ́ lɛ́ɛ nɔ húzú ajikponɔ. Mawu Mavɔmavɔ wɛ ɖó acɛ bó ná hu mɛ, é wɛ ká lɛ́ ɖó acɛ bó ná hɛn mɛ ɖó gbɛ. É wɛ ɖó acɛ bo ná sɔ́ mɛ dó do gɔngɔn mɛ ɖo kúxwé; é wɛ lɛ́ ɖó acɛ bo ná fɔ́n mɛ sín kú. Mawu Mavɔmavɔ wɛ nɔ dó ya mɛ, bo nɔ lɛ́ dó dɔkun nú mɛ. É wɛ nɔ́ zé mɛ hwe, é wɛ ká nɔ́ lɛ́ zé mɛ su. É nɔ́ sɔ́ wamamɔnɔ sí te sín kɔ́ mɛ, é nɔ́ sɔ́ lelenɔ sí te sín zunkɔ́ mɛ, é nɔ́ sɔ́ ɛ jínjɔ́n mɛ klogǎn klogǎn lɛ́ɛ há jí, é nɔ́ sɔ́ ɛ ɖó tɛn ɖaxó mɛ. Đó Mawu Mavɔmavɔ tɔn wɛ nyí dotín ayǐkúngban ɔ́ tɔn lɛ́ɛ. Dotín énɛ́ lɛ́ɛ jí wɛ é sɔ́ gbɛ ɔ́ jínjɔ́n. É nɔ́ nya xɛ ɖo mɛ e ɖo gbejí n'i lɛ́ɛ jí; lo ɔ́, mɛdídá lɛ́ɛ nɔ́ dɔn ɖo zǐnflú gɔngɔn mɛ. Đó gbɛtɔ́ sixú sɔ́ hlɔ̌nhlɔ́n é ɖésúnɔ tɔn dó ɖu ɖo nǔ ɖěbǔ jí ǎ. Mawu Mavɔmavɔ nɔ jǐxwé dɔ̌n, bó bló bɔ jǐ dó gbe bó ná vívá kɛntɔ́ tɔn lɛ́ɛ, ɖó é wɛ nyí hwɛɖɔtɔ́ ɖaxó e ná ɖɔ hwɛ xá mɛ e ɖo ayǐkúngban ɔ́ jí lɛ́ɛ bǐ. É nɔ́ ná hlɔ̌nhlɔ́n axɔ́sú e é sɔ́ ɖó togun tɔn nu é. É nɔ́ dó acɛ acɛ jí nú axɔ́sú e é sɔ́ é. Énɛ́ ɔ́ gúdo ɔ́, Ɛlukana lɛ́ kɔ yi xwé tɔn gbe ɖo Hlama; Samuwɛ́li ká ɖo Mawu Mavɔmavɔ sín azɔ̌ wa wɛ ɖo Silóo, ɖo vɔ̌sánú-xwlémawutɔ́ Eli glɔ́. Eli ví lɛ́ɛ ɔ́, nǔvɔ́nɔ wɛ nú yě; yě ké ya nú Mawu Mavɔmavɔ ǎ. Yě nyí vɔ̌sánú-xwlémawutɔ́ có, ényí mɛɖé wá sá vɔ̌, bónú è jɛ lan ɔ́ ɖa jí ɔ́, mɛsɛntɔ́ vɔ̌sánú-xwlémawutɔ́ ɔ́ tɔn nɔ wá bó nɔ hɛn gǎfu alɔví atɔnnɔ ɖé alɔnu. É nɔ lun gǎfu ɔ́ dó lan e ɖo ado jí é mɛ, bɔ nú gǎfu ɔ́ fɔ lan nabí ɖěbǔ ɔ́, bǐ nɔ nyí vɔ̌sánú-xwlémawutɔ́ ɔ́ tɔn. Lě e yě nɔ́ wa nǔ gbɔn xá Izlayɛ́li ví e nɔ́ wá sá vɔ̌ ɖo Silóo lɛ́ɛ bǐ é nɛ́. Ée nylá bǐ ɔ́, cóbónú è nǎ dó jǒ ɔ́ zo ɔ́, mɛsɛntɔ́ vɔ̌sánú-xwlémawutɔ́ ɔ́ tɔn nɔ wá bó nɔ ɖɔ nú mɛ e ɖo vɔ̌ ɔ́ sá wɛ ɔ́ ɖɔ: “Un ná lan nú è nǎ mɛ nú vɔ̌sánú-xwlémawutɔ́ ɔ́; a ná ɛ lan ɖiɖa ɔ́, é ná yí ǎ; lan mú wɛ a nǎ ná ɛ.” Ényí mɛ e ɖo vɔ̌ ɔ́ sá wɛ ɔ́ ɖɔ n'i ɖɔ: “Nɔ te nú è dǒ jǒ ɔ́ zo fó ɔ́, a nǎ sɔ́ lan e jló we é” ɔ́, mɛsɛntɔ́ vɔ̌sánú-xwlémawutɔ́ ɔ́ tɔn nɔ ɖɔ: “Éeǒ, din wɛ a na ná lan ɔ́; é má nyí mɔ̌ ǎ ɔ́, un ná sɔ́ gǎnnugǎnnu.” Hwɛ e Eli ví énɛ́ lɛ́ɛ nɔ́ hu dó Mawu Mavɔmavɔ ɔ́ nɔ́ syɛ́n ɖésú, ɖó yě nɔ́ ɖó sísí nú vɔ̌ e è sá nú Mawu Mavɔmavɔ lɛ́ɛ ǎ. Nyaví Samuwɛ́li ɔ́ ká nɔ́ ɖo vɔ̌sánú-xwlémawutɔ́ sín awu mɛ, bó nɔ ɖo azɔ̌ wa nú Mawu Mavɔmavɔ wɛ. Samuwɛ́li ɔ́, nɔ tɔn nɔ tɔ awu gaga kpɛví ɖokpó n'i xwewú xwewú tɛgbɛ, bɔ nú asú tɔn Ɛlukana xwe xwetavɔ́ sá gbé ɔ́, é nɔ xwedó e, bó nɔ sɔ́ yi jó nú Samuwɛ́li. Eli nɔ xo ɖɛ dó Ɛlukana kpó asi tɔn kpó jí, bó nɔ ɖɔ nú Ɛlukana ɖɔ: “Mawu Mavɔmavɔ ní ná vǐ we gbɔn nyɔ̌nu élɔ́ jí nú yě ná nɔ ée a sɔ́ ná Mawu Mavɔmavɔ ɔ́ sín tɛnmɛ.” Énɛ́ ɔ́ gúdo ɔ́, yě nɔ́ lɛ́ kɔ wá yi xwé. Mawu Mavɔmavɔ nyi kɔ kpɔ́n Ana, bɔ é lɛ́ ji vǐ; é ji súnnu atɔn, nyɔ̌nu we. Samuwɛ́li ka ɖo susu wɛ ɖo Mawu Mavɔmavɔ nukɔn. Hwenɛ́nu ɔ́, vɔ̌sánú-xwlémawutɔ́ Eli ko kpo bǐ. É se nǔ e dó sin xá Izlayɛ́li ví lɛ́ɛ wɛ vǐ tɔn lɛ́ɛ ɖe ɔ́; é lɛ́ se ɖɔ yě nɔ́ ɖó xó xá nyɔ̌nu e jí azɔ̌ jɛ ɖo Mawu Mavɔmavɔ sín goxɔ nukɔn lɛ́ɛ. É wá kanbyɔ́ yě ɖɔ: “Étɛ́wú mi ka ɖo nǔ dó sin gbɔn mɔ̌ wɛ? Togun ɔ́ bǐ wɛ ɖo nǔ nyanya e dó sin wɛ mi ɖe lɛ́ɛ ɖɔ wɛ bɔ un se. Vǐ ce lɛ́ɛ mi, mi gbɔ, xó e se dó mi wú wɛ un ɖe ɖo togun Mawu Mavɔmavɔ tɔn mɛ ɔ́ nyɔ́ se ǎ. Ényí gbɛtɔ́ ɖě hu hwɛ dó ɖě ɔ́, Mawu ná ɖɔ hwɛ xá ɛ. É ká nyí Mawu Mavɔmavɔ wɛ é hu hwɛ dó ɔ́, mɛ̌ ká ná ɖɔ gbo n'i?” Yě ká ɖótó tɔ́ yětɔn sín xó ǎ; yě ɖótó ǎ, ɖó Mawu Mavɔmavɔ ka ko jló ná hu yě. Samuwɛ́li ka ɖo susu wɛ, bɔ nǔ tɔn nyɔ́ Mawu Mavɔmavɔ nukún mɛ, bó nyɔ́ gbɛtɔ́ lɛ́ɛ nukún mɛ. Đɛ̌mɛnu Mawu tɔn ɖokpó wá Eli gɔ́n, bo ɖɔ n'i ɖɔ: “Xó e Mawu Mavɔmavɔ ɖɔ ɔ́ ɖíe: Hwenu e tɔ́gbó towe lɛ́ɛ nyí Ejípu xɔ́sú ɔ́ sín kannumɔ ɖo Ejípu ɔ́, un ɖe nyiɖée xlɛ́ yě ǎ cé? Un sɔ́ tɔ́gbó towe Aalɔ́ɔn xwédo ɔ́ ɖo akɔta Izlayɛ́li tɔn lɛ́ɛ bǐ mɛ, bɔ é ná wa vɔ̌sánú-xwlémawutɔ́zɔ́ nú mì; yě wɛ ná nɔ sɛkpɔ́ vɔ̌sákpe ce, bó ná nɔ́ dó zǎlínkpɔ́n zo, bó ná nɔ́ kan xó byɔ́ mì; vɔ̌ e Izlayɛ́li ví lɛ́ɛ ná sá, bɔ è nǎ dǒ zo ɔ́, un ná lan tɔn ɖě yě ɖ'é mɛ. Bɔ étɛ́wú mi ká nɔ sɔ́ vɔ̌ e un ná gbe bɔ è nɔ sá nú mì lɛ́ɛ kpó nǔ e è nɔ ná mì lɛ́ɛ kpó dó xo kɔ́? Nɛ̌ ká gbɔn bɔ a nɔ sɔ́ vǐ towe lɛ́ɛ su hú nyɛ? Nǔ e togun ce Izlayɛ́li ɔ́ nɔ hɛn wá nú mì ɔ́, mi wɛ nɔ sɔ́ ɖ'é mɛ dó nukɔn bo nɔ ɖu dó dó jǒ. Énɛ́ ɔ́ wútu ɔ́, nǔ e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: Un ɖɔ xwédo towe kpó tɔ́gbó towe xwédo kpó ná nyí vɔ̌sánú-xwlémawutɔ́ ce káká sɔ́yi. Amɔ̌, din ɔ́, nǔ sɔ́ sixú nyí mɔ̌ gbeɖé ǎ. Đó mɛɖé sɔ́ mì su ɔ́, un ná sɔ́ ɛ su; mɛɖé ka dó vɛ̌ nú mì lɛ́ɛ ɔ́, un ná dó vɛ̌ nú yě. Hwenu e un ná cí awa nú we, bó ná cí awa nú mɛ e ɖo tɔ́gbó towe xwé lɛ́ɛ, bɔ mɛɖé má sɔ́ ná kpo nyɔ̌xó ɖo xwé towe gbe ǎ ɔ́ ɖíe ja e. A nǎ mɔ kɛntɔ́ towe ɖokpó, bɔ é ná yí tɛnmɛ towe ɖo xwé ce gbe. Izlayɛ́li ɔ́, Mawu Mavɔmavɔ ka ná dó dɔkun n'i. Mɛ ɖé ka sɔ́ ná kpo nyɔ̌xó ɖo xwé towe gbe gbeɖé ǎ. Un ná jó mɛ towe ɖokpó dó nyi vɔ̌sákpe ce kɔn, bɔ é ná vɛ́ mɔ nú we, bó ná ɖó akpɔ nú we. Amɔ̌, mɛ ɖě lɛ́ɛ bǐ ná wɛ́n kú. “Nǔ e ná jɛ dó vǐ súnnu towe Hofíni kpó Pínxási kpó jí ɔ́ wɛ ná nyí xlɛ̌ nú we: yě mɛ we lɛ́ɛ ná kú gbe ɖokpó ɔ́. Un ka ná sɔ́ vɔ̌sánú-xwlémawutɔ́ ɖěvo, bɔ é ná nɔ gbejí, bó ná nɔ́ wa nǔ lě e un jló gbɔn é. Un ná bló bɔ xwédo tɔn ná lí dǒ, bɔ é ná nɔ́ wa vɔ̌sánú-xwlémawutɔ́zɔ́ tɛgbɛ ɖo axɔ́sú e un ná sɔ́ ɔ́ kpá. Mɛ e ná kpo ɖo xwé towe gbe lɛ́ɛ bǐ ná nɔ wá jɛ kpo ɖo nukɔn tɔn, bó ná nɔ byɔ́ akwɛ́ kpó nǔɖuɖu kpó. Yě ná nɔ byɔ́ ɖɔ é ní ba azɔ̌ ɖé nú émí ɖo Mawu xwé ɔ́ gbe, bónú émí ná wa, bó ná sixú mɔ nǔ ɖu.” Nyaví Samuwɛ́li ɔ́ ká ɖo azɔ̌ wa nú Mawu Mavɔmavɔ wɛ ɖo Eli glɔ́. Hwe nɛ́ ɔ́ nu ɔ́, Mawu Mavɔmavɔ nɔ ɖɔ xó nú mɛ gbɔn mɔ̌ ǎ. Mawu Mavɔmavɔ ká nɔ xlɛ́ nǔ mɛ gbɔn mɔ̌ ǎ. É ká wá jɛ zǎn mɛ gbe ɖokpó, bɔ Eli ɖo ayǐmlɔ́mlɔ́ ɖo fí e é nɔ́ mlɔ́ é; é ká sɔ́ ɖo nǔ mɔ wɛ ganjí ǎ. Zogbɛ́n e è tá ɖó Mawu Mavɔmavɔ sín goxɔ mɛ ɔ́, è ko xo cí hwenɛ́nu ǎ, bɔ Samuwɛ́li ka ɖo ayǐmlɔ́mlɔ́ ɖo goxɔ Mawu Mavɔmavɔ tɔn mɛ, fí e akɔjijɛgbá Mawu tɔn ɔ́ ɖe é. Mawu Mavɔmavɔ ylɔ́ Samuwɛ́li, bɔ é ɖɔ: “Wěyi!” Bó bɛ́ wezun yi Eli gɔ́n, bó ɖɔ: “Un se a ylɔ̌ mì; nyi ɖíe!” Eli ka ɖɔ: “Un ylɔ́ we ǎ. Lɛ̌ kɔ bo yi mlɔ́ ayǐ.” Bɔ é yi mlɔ́ ayǐ. Mawu Mavɔmavɔ ylɔ́ Samuwɛ́li azɔn wegɔ́ ɔ́, bɔ é sí te bo yi Eli gɔ́n, bó ɖɔ: “Nyi ɖíe!” Eli ka yí gbe n'i ɖɔ: “Vǐ ce, un ylɔ́ we ɖě ǎ, lɛ̌ kɔ bo yi mlɔ́ ayǐ.” Samuwɛ́li ko tunwun Mawu Mavɔmavɔ hwenɛ́nu ǎ, Mawu Mavɔmavɔ ko ɖɔ xó n'i kpɔ́n hwenɛ́nu ǎ. Mawu Mavɔmavɔ lɛ́ ylɔ́ Samuwɛ́li azɔn atɔngɔ́ ɔ́, bɔ é bɛ́ wezun yi Eli gɔ́n, bó ɖɔ: “Un se a ylɔ̌ mì; nyi ɖíe!” Bɔ Eli wá mɔ nǔ jɛ wú ɖɔ Mawu Mavɔmavɔ wɛ ɖo ylɔ̌ylɔ́ ɛ wɛ. Énɛ́ ɔ́, é ɖɔ nú Samuwɛ́li ɖɔ: “Yi mlɔ́ ayǐ, nú è sɔ́ ylɔ́ we ɖě ɔ́, a nǎ ɖɔ: ‘Mawu Mavɔmavɔ, ɖɔ xó; nyɛ mɛsɛntɔ́ towe ɖo tó ɖó we wɛ.’ ” Bɔ Samuwɛ́li yi mlɔ́ ayǐ fí e é fɔ́n sín é. Mawu Mavɔmavɔ wá Samuwɛ́li gɔ́n, bó ylɔ́ ɛ lě e é ko nɔ ylɔ́ ɛ gbɔn é; é ɖɔ: “Samuwɛ́li! Samuwɛ́li!” Samuwɛ́li yí gbe ɖɔ: “Đɔ xó, nyɛ mɛsɛntɔ́ towe ɖo tó ɖó we wɛ.” Bɔ Mawu Mavɔmavɔ ɖɔ nú Samuwɛ́li ɖɔ: “Un ná dó nǔ ɖokpó sin ɖo Izlayɛ́li, bɔ mɛ ɖěbǔ se ɔ́, tó tɔn ná sú hɔn. Gbe énɛ́ ɔ́ gbe ɔ́, nǔ e un ko ɖɔ un ná wa xá Eli sín xwédo ɔ́ bǐ ná jɛ. Un bɛ́ ɔ́, un ná bló yi fó. Un ɖɔ n'i ɖɔ un jló ná dɔn tó nú xwédo tɔn káká sɔ́yi, ɖó vǐ tɔn lɛ́ɛ ké ya nú mì ǎ; yě hu hwɛ dó mì bɔ é tunwun, bó ká gbɛ́ nú yě dó nǔjɔnǔ mɛ ǎ. Énɛ́ ɔ́ wútu wɛ un xwlé nǔ nú Eli xwédo ɔ́ ɖɔ hwɛ e é hu ɔ́, vɔ̌sísá kún ná súnsún ó; nǔníná kún ká ná súnsún ó.” Samuwɛ́li nɔ ayǐmlɔ́mlɔ́ káká bɔ ayǐ hɔ́n, bɔ é hun Mawu Mavɔmavɔ xwé sín hɔn lɛ́ɛ. É ká glá ɖɔ nǔ e é mɔ ɔ́ nú Eli ǎ, ɖó é ɖo xɛsi ɖi wɛ. Eli ka ylɔ́ Samuwɛ́li bo ɖɔ: “Samuwɛ́li vǐ ce!” Bɔ é ɖɔ: “Wěyi!” Eli kanbyɔ́ ɛ ɖɔ: “Xó tɛ́ Mawu ka ɖɔ nú we? Ma hwlá ɖěbǔ dó mì ó. Ényí a hwlǎ ɖěbǔ dó mì hǔn, Mawu ní dɔn tó nú we, bónú é syɛ́n hú tódɔnnúmɛ lɛ́ɛ bǐ.” Énɛ́ ɔ́, Samuwɛ́li wlí bǐ ɖɔ n'i; é ɖe ɖě kpo ǎ. Eli ka ɖɔ: “Mawu Mavɔmavɔ wɛ, ní bló lě e é jló e gbɔn é.” Samuwɛ́li ɖo susu wɛ, bɔ Mawu Mavɔmavɔ ɖo kpɔ́ xá ɛ, bɔ nǔ e é nɔ́ ɖɔ dó Mawu Mavɔmavɔ nyíkɔ mɛ ɔ́ bǐ nɔ́ jɛ. Izlayɛ́li to ɔ́ bǐ, bɛ́ sín Dan ɖo taligbé káká yi Bɛ̌-Ceva ɖo afɔligbé ɔ́, bǐ wɛ tunwun ɖɔ Mawu Mavɔmavɔ sɔ́ Samuwɛ́li gbeyíɖɔ tɔn. Mawu Mavɔmavɔ ká nɔ gɔn éɖée ɖe xlɛ́ ɖo Silóo ǎ. Đó Silóo fínɛ́ wɛ é nɔ́ tɔ́n dó Samuwɛ́li jí ɖe, bó nɔ́ ɖɔ xó n'i. Samuwɛ́li nɔ ɖɔ xó énɛ́ lɛ́ɛ nú Izlayɛ́li togun ɔ́ bǐ. Izlayɛ́li ví lɛ́ɛ tɔ́n gbe ɖokpó, bó ná yi fun ahwan xá Filisitɛ́ɛn lɛ́ɛ. Yě yi ɖó gɔnu ɖó malín málín mɛ dó Evɛ́ni-Ezɛ́ɛ. Filisitɛ́ɛn lɛ́ɛ ká ɖó gɔnu ɖó Afɛ́ki. Filisitɛ́ɛn lɛ́ɛ sí te, bó tɔ́n ahwan Izlayɛ́li ví lɛ́ɛ, bɔ ahwan ɔ́ bɛ́, bó syɛ́n ɖésú. Filisitɛ́ɛn lɛ́ɛ wá ɖu ɖo ahwan ɔ́ jí, bó hu Izlayɛ́li ví děgba (4.000) mɔ̌. Izlayɛ́li ví lɛ́ɛ lɛ́ kɔ wá yi ahwankpá yětɔn mɛ, bɔ tomɛxó yětɔn lɛ́ɛ ɖɔ: “Étɛ́wú Mawu Mavɔmavɔ ká jó mǐ dó égbé, bɔ Filisitɛ́ɛn lɛ́ɛ ɖu ɖo mǐ jí? Mi nú mǐ ná yi Silóo, bó ná yi sɔ́ akɔjijɛgbá Mawu Mavɔmavɔ tɔn ɔ́ wá. Nú akɔjijɛgbá ɔ́ ɖo tɛ́ntin mǐtɔn ɔ́, é ná hwlɛ́n mǐ sín kɛntɔ́ mǐtɔn lɛ́ɛ sí.” Togun ɔ́ sɛ́ mɛ dó Silóo nǔgbó, bɔ è yi sɔ́ akɔjijɛgbá Mawu Mavɔmavɔ Nǔbǐwúkpétɔ́ ɔ́ tɔn wá. Akɔjijɛgbá ɔ́ jí wɛ Mawu Mavɔmavɔ ɖo ayǐjínjɔ́n ɖe, ɖo axɔ́súzinkpo tɔn jí. Eli ví we lɛ́ɛ: Pínxási kpó Hofíni kpó ɖo akɔjijɛgbá ɔ́ kɔn. Ée akɔjijɛgbá Mawu Mavɔmavɔ tɔn byɔ́ fí e Izlayɛ́li ví lɛ́ɛ ɖó gɔnu ɖó ɔ́ lě tlóló ɔ́, Izlayɛ́li ví lɛ́ɛ bǐ ɖo xó sú wɛ, bó ɖo awǒbóbó kpa wɛ káká bɔ ayǐkúngban dán wǔ. Filisitɛ́ɛn lɛ́ɛ se awǒbóbó e kpa wɛ yě ɖe ɔ́, bó ɖɔ: “Étɛ́ sín awǒbóbó kpa wɛ Eblée lɛ́ɛ ká ɖe sɔ mɔ̌ ɖo fí e yě ɖǒ gɔnu ɖó ɔ́?” Yě wá se ɖɔ akɔjijɛgbá Mawu Mavɔmavɔ tɔn ɔ́ wɛ yě sɔ́ wá fí e yě ɖǒ gɔnu ɖó é. Énɛ́ ɔ́, xɛsi jɛ Filisitɛ́ɛn lɛ́ɛ jí, ɖó yě ɖo ɖiɖɔ wɛ ɖɔ: “Mawu wá fí e Eblée lɛ́ɛ ɖó gɔnu ɖó ɔ́. É ɖo fínɛ́ ɖ'ayǐ ǎ. Étɛ́ ɖíe gbo mǐ e! Étɛ́ ɖíe ká gbo mǐ e! Mɛ̌ ká ná hwlɛ́n mǐ gán ɖo nǔmɛsɛn hlɔ̌nhlɔ́nnɔ énɛ́ ɔ́ sí din. Nǔmɛsɛn énɛ́ ɔ́ wɛ dó nǔ tɛnmɛ tɛnmɛ sin xá Ejípunu lɛ́ɛ ɖo gbětótló mɛ. Filisitɛ́ɛn e mi, mi dó wǔsyɛ́n lanmɛ nú miɖée, bó wa nǔ súnnu ɖɔhun; é má nyí mɔ̌ ǎ ɔ́, mi ná húzú kannumɔ Eblée lɛ́ɛ tɔn, lě e yě ɖésú kó nyí kannumɔ mǐtɔn kpɔ́n gbɔn é. Mi wa nǔ súnnu ɖɔhun. Mi fun ahwan.” Ée Filisitɛ́ɛn lɛ́ɛ ɖɔ mɔ̌ ɔ́, yě tɔ́n ahwan Izlayɛ́li ví lɛ́ɛ, bó ɖu ɖo yě jí, bɔ mɛ ɖokpó ɖokpó hɔn yi xwé tɔn gbe. Lě e Filisitɛ́ɛn lɛ́ɛ ɖu ɖo Izlayɛ́li ví lɛ́ɛ jí gbɔn ɔ́ syɛ́n ɖésú. Izlayɛ́li ví adɔ̌kpo ɖě děgba we afɔwó (30.000) wɛ è hu gbe nɛ́ gbe. Filisitɛ́ɛn lɛ́ɛ yí akɔjijɛgbá Mawu tɔn ɔ́, bɔ Eli ví we lɛ́ɛ: Hofíni kpó Pínxási kpó kú. Gbe nɛ́ ɔ́ gbe ɖokpó ɔ́, nya ɖokpó bɛ́ wezun sín ahwangbé ɔ́ nu wá yi Silóo. É vún awu dó kɔ nú éɖée, bó lɛ kɔ́ dó ta dó ɖe xlɛ́ ɖɔ émí ɖo aluwɛ mɛ. Nya énɛ́ ɔ́, Bɛnjamɛ́ɛ sín akɔta mɛ wɛ é tɔ́n sín. Eli ɖo ayǐjínjɔ́n ɖo zinkpo tɔn jí ɖo ali kpá, bó ɖo te kpɔ́n wɛn e ná gosín ahwangbé ɔ́ nu é, ɖó ado ɖo huhu i wɛ, ɖó akɔjijɛgbá Mawu tɔn e ɖo dɔ̌n é wú. Nya e gosín ahwangbé ɔ́ nu ɔ́ byɔ́ to ɔ́ mɛ, bó ɖɔ nǔ e jɛ lɛ́ɛ, bɔ to ɔ́ bǐ bɛ́ xósúsú. Ée Eli se xósúsú énɛ́ ɔ́, é ɖɔ: “Étɛ́ xósúsú ká sɔ mɔ̌?” Tlóló ɔ́, nya ɔ́ wá ɖɔ xó ɔ́ bǐ n'i. Eli ka ko ɖó xwe kanwe afɔtɔn-nukún-atɔn (98). Nukún tɔn lɛ́ɛ ɖo te bó ká sɔ́ ɖo nǔ mɔ wɛ ǎ. Nya ɔ́ ɖɔ nú Eli ɖɔ: “Fí e fun ahwan ɖe wɛ yě ɖe é wɛ un gosín. Dɔ̌n wɛ un hɔn sín égbé din.” Bɔ Eli kanbyɔ́ ɛ ɖɔ: “Vǐ ce, étɛ́ ká jɛ?” Bɔ nya e hɛn wɛn ɔ́ wá é yí gbe n'i ɖɔ: “Izlayɛ́li ví lɛ́ɛ hɔn ɖo Filisitɛ́ɛn lɛ́ɛ nukɔn, bɔ Filisitɛ́ɛn lɛ́ɛ ɖu ɖo yě jí bǐ gbídígbídí, káká bɔ vǐ towe we lɛ́ɛ: Hofíni kpó Pínxási kpó kú, bɔ yě yí akɔjijɛgbá Mawu tɔn ɔ́.” Káká nú nya ɔ́ ná ɖɔ akɔjijɛgbá Mawu tɔn xó lě ɔ́, Eli nyi agbo sín zinkpo e jí é ɖe ɔ́, bó j'ayǐ wɛn, bó sɔ́ zogúdo xo dó kɔ́ mɛ ɖo Mawu Mavɔmavɔ xwé ɔ́ sín hɔntogbó kpá, bó kú. Đó Eli ko kpo, bó ká lɛ́ ɖó zin. Xwe kanɖé (40) wɛ é nɔ togun Izlayɛ́li tɔn ɔ́ nu xɔ. Eli ɔ́, vǐ tɔn Pínxási sín asi ka ɖo xo hwenɛ́nu, bɔ azǎn tɔn kó vɔ. Ée é se ɖɔ Filisitɛ́ɛn lɛ́ɛ yí akɔjijɛgbá Mawu tɔn, bɔ asú émítɔn tɔ́ kpó asú émítɔn kpó kú ɔ́, é syán ayǐ kpowun ɔ́, vǐ jɛ́n é ji, ɖó vǐ tɔ́n ɛ ajijimɛ. É ji vǐ ɔ́ mɔ̌, lobo lɛ́ tɔ́n kú, bɔ nyɔ̌nu e nɔ aji n'i lɛ́ɛ ɖɔ: “Ma ɖi xɛsi ó, vǐ súnnu wɛ a ji.” Có é kɛ nu ǎ, é ká tlɛ wlí tó xó e yě ɖɔ n'i ɔ́ wú ǎ. É sun nyǐ vǐ ɔ́ ɖɔ Ikavodi; tínmɛ tɔn wɛ nyí susu Mawu tɔn vɔ ɖo Izlayɛ́li. É ɖɔ mɔ̌ ɖó Filisitɛ́ɛn lɛ́ɛ yí akɔjijɛgbá Mawu tɔn ɔ́, bɔ asú tɔn tɔ́ kú; asú tɔn lɔ ka lɛ́ kú. É ɖo ɖiɖe xlɛ́ gbɔn mɔ̌ wɛ ɖɔ Izlayɛ́li sín wi kɔ́n ɖó akɔjijɛgbá Mawu tɔn ɔ́ jɛ kɛntɔ́ sí. Filisitɛ́ɛn lɛ́ɛ yí akɔjijɛgbá Mawu tɔn ɔ́, bó sɔ́ sín Evɛ́ni-Ezɛ́ɛ yi Acidɔ́di. Ée yě jɛ dɔ̌n ɔ́, yě sɔ́ dó vodún yětɔn Dagɔ́ni ɔ́ xɔ mɛ, bó sɔ́ ɖó vodún ɔ́ kpá. Ayǐhɔ́ngbe tɔn zǎnzǎn tɛɛn ɔ́, Acidɔ́dinu lɛ́ɛ fɔ́n bó wá mɔ Dagɔ́ni ɔ́ ɖo agbɔ̌nnusúxwedo ɖo akɔjijɛgbá Mawu Mavɔmavɔ tɔn sá mɛ. Ée yě mɔ mɔ̌ ɔ́, yě fɔ́n Dagɔ́ni xwete, bó lɛ́ sɔ́ ɛ ɖó tɛn tɔn mɛ. Ée ayǐ lɛ́ hɔ́n ɔ́, yě lɛ́ fɔ́n zǎn, bó lɛ́ mɔ Dagɔ́ni ɖo agbɔ̌nnusúxwedo ɖo akɔjijɛgbá Mawu Mavɔmavɔ tɔn sá mɛ, bɔ ta tɔn kpó alɔ tɔn we lɛ́ɛ kpó ɖo kpekán ɔ́ ta, bó ɖo jǐ lɔ́n yi wɛ, bɔ golyo ɔ́ ɖo vo. Énɛ́ wɛ zɔ́n bɔ káká jɛ égbé din ɔ́, Dagɔ́ninɔ lɛ́ɛ kpó mɛ e nɔ yi Dagɔ́ni xɔ mɛ ɖo Acidɔ́di lɛ́ɛ kpó ɖě nɔ tɛ afɔ kpekán ta gbeɖé ǎ. Alɔ Mawu Mavɔmavɔ tɔn jɛ Acidɔ́dinu lɛ́ɛ wú, bɔ yě byɔ́ aluwɛ mɛ. Mawu dó yonutúntún Acidɔ́di toxo ɔ́, bɔ azɔn énɛ́ kpé Acidɔ́di yíkúngban ɔ́ bǐ jí. Ée nǔ cí mɔ̌ ɔ́, Acidɔ́dinu lɛ́ɛ ɖɔ: “Akɔjijɛgbá Mawu Izlayɛ́li tɔn ɔ́ tɔn ná nɔ gɔ̌n mǐtɔn ǎ, ɖó alɔ Mawu tɔn ɖo mǐ wú jɛ wɛ, bó jɛ vodún mǐtɔn Dagɔ́ni wú.” Yě dó wɛn sɛ́ dó gǎn e kpa acɛ dó Filisitɛ́ɛn lɛ́ɛ nu lɛ́ɛ bǐ, ɖɔ yě ní wá, bɔ yě wá, bɔ yě kanbyɔ́ yě ɖɔ: “Nɛ̌ mǐ ka ná wa akɔjijɛgbá Mawu Izlayɛ́li tɔn ɔ́ tɔn sín nǔ gbɔn?” Gǎn lɛ́ɛ ká yí gbe nú yě ɖɔ: “È nǐ sɔ́ Mawu Izlayɛ́li tɔn ɔ́ sín akɔjijɛgbá yi ɖó Gati.” Bɔ è sɔ́ akɔjijɛgbá Mawu Izlayɛ́li tɔn ɔ́ tɔn yi ɖó dɔ̌n nǔgbó. Ée è ká sɔ́ yi Gati ɔ́, Mawu Mavɔmavɔ sín alɔ jɛ toxo ɔ́ wú, bɔ ahwi ɖaxó ɖé xo to ɔ́ bǐ. Mawu Mavɔmavɔ sín alɔ jɛ yě bǐ wú, bɛ́ sín yɔkpɔ́vú lɛ́ɛ jí káká yi mɛxó lɛ́ɛ jí: Nǔ tɛ mɛ e ɖo to ɔ́ mɛ é bǐ, bɔ yě gbɔ bó sɔ́ akɔjijɛgbá Mawu tɔn sɛ́ dó Eklɔ́ni. Ée akɔjijɛgbá Mawu tɔn ɔ́ byɔ́ Eklɔ́ni lě ɔ́, Eklɔ́ninu lɛ́ɛ sú xó bó ɖɔ: “È sɔ́ Mawu Izlayɛ́li tɔn sín akɔjijɛgbá wá gɔ̌n mǐtɔn, bó ná dó hu mǐ, mǐ kpó togun mǐtɔn kpó.” Bɔ yě ylɔ́ gǎn e kpa acɛ dó Filisitɛ́ɛn lɛ́ɛ nu lɛ́ɛ bǐ kplé bó ɖɔ: “Mi lɛ́ kɔ nú Mawu Izlayɛ́li tɔn sín akɔjijɛgbá ɔ́ sɛ́ dó Izlayɛ́li, bónú é yi nɔ tɛn tɔn mɛ, bó má wá hu mǐ kpó togun mǐtɔn kpó ó. Đó xɛsi ɖaxó ɖé ɖo to ɔ́ bǐ jí.” Mawu sín alɔ ɖo yě wú jɛ wɛ mɔ̌hunkɔtɔn. Mɛ e ma ɖo kúkú wɛ ǎ lɛ́ɛ ɔ́, nǔ nɔ tɛ yě, bɔ yě bǐ nɔ́ ɖo avǐ ya wɛ, bɔ alě e ná wɛ yě ɖe ɔ́ hun káká yi jǐxwé. Akɔjijɛgbá Mawu Mavɔmavɔ tɔn ɔ́, sun tɛ́nwe wɛ é nɔ Filisitɛ́ɛn lɛ́ɛ gɔ́n xɔ. Bɔ Filisitɛ́ɛn lɛ́ɛ wá ylɔ́ vodúnnɔ yětɔn lɛ́ɛ kpó nǔkantɔ́ yětɔn lɛ́ɛ kpó, bó ɖɔ nú yě ɖɔ: “Nɛ̌ mǐ ká ná bló gbɔn nú akɔjijɛgbá ɔ́? Mi ɖɔ lě e mǐ ná bló gbɔn, bó sɛ́ dó fí e é gosín ɔ́ nú mǐ.” Bɔ yě yí gbe nú yě ɖɔ: “Ényí mi jló ná sɛ́ akɔjijɛgbá Mawu tɔn ɔ́ dó hǔn, mi ma sɛ́ dó yǎyá ó. Mi sá vɔ̌ nú Mawu ɖó hwɛ mitɔn lɛ́ɛ tamɛ; énɛ́ ɔ́, azɔn mitɔn ná gbɔ, bɔ mi ná tunwun nǔ e wú Mawu ɖo mɔ̌ wa xá mi wɛ é.” Filisitɛ́ɛn lɛ́ɛ ɖɔ: “Hwɛsɔ́kɛmɛ vɔ́ tɛ́ wɛ mǐ ná sá?” Bɔ yě yí gbe nú yě ɖɔ: “Mi ná sɔ́ siká, bó ná dó bló yonutúntún sín akpajlɛ́ atɔ́ɔ́n, bó ná lɛ́ sɔ́ siká dó bló ajaka atɔ́ɔ́n bɔ é ná sɔgbe dó gǎn nabí e ɖo to ɔ́ mɛ é ta, ɖó bǎ ɖokpó ɔ́ wɛ xo mi, bó xo gǎn mitɔn lɛ́ɛ lɔ. Mi ná sɔ́ siká dó bló yonutúntún e ɖo mi wú é sín akpajlɛ́ ná, bó ná lɛ́ sɔ́ siká dó bló ajaka e ɖo nǔkún mitɔn lɛ́ɛ hɛn gblé wɛ é sin akpajlɛ́ ná, bó ná susu Mawu Izlayɛ́li tɔn. Énɛ́ ɔ́, é sixú kú nǔbláwǔ mitɔn, bó ná gɔn tó dɔn nú mi, bó ná gɔn tó dɔn nú vodún mitɔn lɛ́ɛ, bó ná gɔn tó dɔn nú to mitɔn. Mi ma tlí tó Ejípunu lɛ́ɛ kpó Ejípu xɔ́sú ɔ́ kpó ɖɔhun ó. Ée yědɛɛ lɛ́ɛ tlí tó mɔ̌ ɔ́, Mawu dɔn tó tɛnmɛ tɛnmɛ lɛ́ɛ nú yě, bɔ yě gbɔ bó wá jó Izlayɛ́li ví lɛ́ɛ dó bɔ yě yi. Din ɔ́, mi bló kɛkɛ́ví yɔ̌yɔ́ ɖokpó, bó fɔ nyibú vǐnɔ e má dɔn kɛkɛ́ví ɖě kpɔ́n ǎ é we, bó dó kan nyibú lɛ́ɛ, bó sin dó kɛkɛ́ví ɔ́ wú. Énɛ́ ɔ́, mi ná kplá nyibúví e ɖo gǔdo yětɔn lɛ́ɛ yi xwé. Mi ná sɔ́ akɔjijɛgbá Mawu tɔn ɔ́ ɖó kɛkɛ́ví ɔ́ jí, bó bɛ́ nǔ e mi zé siká dó bló bó ná Mawu ɖó hwɛ mitɔn lɛ́ɛ tamɛ é dó gbǎví ɖé mɛ, bó ná sɔ́ ɖó akɔjijɛgbá ɔ́ kpá; énɛ́ gúdo ɔ́, mi ná jó kɛkɛ́ví ɔ́ kpó nyibú lɛ́ɛ kpó dó, bɔ yě ná yi. Yě ɖidó ɔ́, mi ná ɖo kpínkpɔ́n wɛ. Ényí nyibú lɛ́ɛ tunta Bɛti-Cɛmɛ́ci, bó wlí Izlayɛ́li sín ali hǔn, Mawu Mavɔmavɔ wɛ dó nǔ baɖabaɖa énɛ́ sin xá mǐ nɛ́. É má nyí mɔ̌ ǎ ɔ́, mǐ ná tunwun ɖɔ é kún nyí Mawu Mavɔmavɔ wɛ wa nǔɖé xá mǐ ó, hǔn nǔɖé kpowun wɛ wa mǐ nɛ́.” Filisitɛ́ɛn lɛ́ɛ bló nǔ e vodúnnɔ lɛ́ɛ kpó nǔkantɔ́ lɛ́ɛ kpó kplɔ́n yě ɔ́ nǔgbó: yě fɔ nyibú vǐnɔ we, bó dó kɛkɛ́ví ɔ́ kan, bo sin dó yě wú, bó sú nyibúví lɛ́ɛ dó xwé gbe. Yě sɔ́ akɔjijɛgbá ɔ́ kpó gbǎ e mɛ è bɛ̌ nǔ e è sɔ́ siká dó bló ná lɛ́ɛ kpó ɖó kɛkɛ́ví ɔ́ jí. Bɔ nyibú lɛ́ɛ wlí Bɛti-Cɛmɛ́ci sín ali ɔ́ tlélé. Yě mlɛ́ ali ɖokpó ɔ́ tlélé bó ɖo xó sú wɛ. Yě zɛ dó aɖisí ǎ, yě ká zɛ dó amyɔ ǎ. Gǎn Filisitɛ́ɛn lɛ́ɛ tɔn lɛ́ɛ jɛ gǔdo yětɔn, bó xwedó yě káká yi Bɛti-Cɛmɛ́ci sín dogbó jí. Bɛti-Cɛmɛ́cinu lɛ́ɛ ɖo blěe ya wɛ ɖo tɔdo ɖé mɛ, bó jlɔ́ kɔ bo mɔ akɔjijɛgbá Mawu tɔn sɛ́ dó, bɔ é víví nú yě káká. Kɛkɛ́ví ɔ́ wá Jozuwée Bɛti-Cɛmɛ́cinu ɔ́ sín gle mɛ, bó nɔ te ɖo awǐnnya ɖaxó ɖokpó kpá; énɛ́ ɔ́, atín e è dǒ ján kɛkɛ́ví ɔ́ ná lɛ́ɛ ɔ́, Bɛti-Cɛmɛ́cinu lɛ́ɛ zɛ bǐ, bó fɔ nyibú we lɛ́ɛ dó sá vɔ̌ e è nɔ dó zo ɔ́ ná nú Mawu Mavɔmavɔ. Levíi ví lɛ́ɛ ká kó ɖe akɔjijɛgbá Mawu Mavɔmavɔ tɔn jɛ te nɛ́, bó ɖe gbǎ e mɛ sikánú lɛ́ɛ ɖe ɔ́ lɔ jɛ te. Yě fɔ bǐ ɖó awǐnnya ɖaxó ɔ́ jí. Bɛti-Cɛmɛ́cinu lɛ́ɛ sá vɔ̌ e è nɔ dó zo é kpó kɔnɖókpɔ́ vɔ́ kpó kɔn nyi kpɔ́ nú Mawu Mavɔmavɔ gbe nɛ́ ɔ́ gbe. Ée gǎn Filisitɛ́ɛn lɛ́ɛ tɔn atɔ́ɔ́n lɛ́ɛ mɔ mɔ̌ ɔ́, yě lɛ́ kɔ gbe nɛ́ ɔ́ gbe wá yi Eklɔ́ni. Yonutúntún sín akpajlɛ́ nabí e è sɔ́ siká dó bló ná bɔ Filisitɛ́ɛn lɛ́ɛ ná Mawu Mavɔmavɔ ɖó hwɛ yětɔn tamɛ lɛ́ɛ ɖíe: Acidɔ́di ná ɖokpó, Gaza ná ɖokpó, Acikelɔ́ni ná ɖokpó, Gati ná ɖokpó, bɔ Eklɔ́ni ná ɖokpó. Ajaka sín akpajlɛ́ e yě sɔ́ siká dó bló ná lɛ́ɛ ɖ'é mɛ, bɔ ajaka nabí e ɖo gbǎ ɔ́ mɛ é sɔgbe xá toxo nabí e nu gǎn atɔ́ɔ́n lɛ́ɛ kpa acɛ dó é. Toxo e è mɛ ahohó lɛ́ lɛ̌ dó é kpódó ée è ma mɛ ahohó lɛ́ lɛ̌ dó ǎ é kpó bǐ ɖ'é mɛ. Nǔ e ɖɔ wɛ awǐnnya ɖaxó e jí yě sɔ́ akɔjijɛgbá Mawu Mavɔmavɔ tɔn ɔ́ ɖó ɔ́ ɖe é nɛ́. É kpo ɖo Jozuwée Bɛti-Cɛmɛ́ci tɔn sín gle mɛ káká wá jɛ égbé. Bɛti-Cɛmɛ́cinu lɛ́ɛ kpɔ́n akɔjijɛgbá Mawu Mavɔmavɔ tɔn ɔ́ mɛ, bɔ Mawu Mavɔmavɔ hu súnnu kanɖé gban (70) ɖo yě mɛ, bɔ to ɔ́ bǐ byɔ́ aluwɛ mɛ, ɖó Mawu Mavɔmavɔ sín alɔ wɛ jɛ yě wú. Bɛti-Cɛmɛ́cinu lɛ́ɛ ɖɔ: “Mɛ ɖěbǔ sixú nɔ te ɖo Mawu Mavɔmavɔ, Mawu mímɛ́ énɛ́ ɔ́ nukɔn ǎ. Fítɛ́ mǐ ká ná zé akɔjijɛgbá tɔn yi ɖó din, bɔ é ná nɔ zɔ nú mǐ?” Ée yě ɖɔ mɔ̌ ɔ́, yě sɛ́ mɛ dó Kiliyati-Yealimunu lɛ́ɛ, bó ɖɔ nú yě ɖɔ: “Filisitɛ́ɛn lɛ́ɛ lɛ́ kɔ nú akɔjijɛgbá Mawu Mavɔmavɔ tɔn wá; mi wá sɔ́.” Kiliyati-Yealimunu lɛ́ɛ wá sɔ́ akɔjijɛgbá Mawu Mavɔmavɔ tɔn yi, bó sɔ́ yi ɖó Avinadávu xwé ɖo só ɖé jí, bó sɔ́ vǐ tɔn Eleazáa ɖó vo bɔ é ná nɔ cɔ́. È sɔ́ akɔjijɛgbá Mawu Mavɔmavɔ tɔn ɔ́ wá Kiliyati-Yealimu ɔ́, é kó lín; xwe tɔn ko yi ko mɔ̌, bɔ Izlayɛ́li to ɔ́ wá jɛ xó sú ylɔ́ Mawu Mavɔmavɔ jí. Samuwɛ́li ka ɖɔ nú Izlayɛ́li to ɔ́ bǐ kplékplé ɖɔ: “Ényí mi ɖésú jɛ́n kpɔ́n ayi mitɔn mɛ, bó lɛ́ kɔ wá Mawu Mavɔmavɔ gɔ́n hǔn, mi bo ɖe vodún Asitaatée kpó nǔmɛsɛn togun ɖě lɛ́ɛ tɔn lɛ́ɛ bǐ kpó sín xwé mitɔn lɛ́ɛ gbe. Mi sɔ́ ayi mitɔn ɖó Mawu Mavɔmavɔ ɖokpó jí, bó sɛn é ɖokpónɔ géé. Énɛ́ ɔ́, é ná hwlɛ́n mi ɖo Filisitɛ́ɛn lɛ́ɛ sí.” Nǔgbó ɔ́, Izlayɛ́li ví lɛ́ɛ bɛ́ vodún Baalu lɛ́ɛ, kpó vodún Asitaatée kpó sín xwé yětɔn lɛ́ɛ gbe, bó nɔ sɛn Mawu Mavɔmavɔ kɛ́ɖɛ́. Samuwɛ́li ɖɔ: “Mi kplé to ɔ́ bǐ ɖó Misipa, bónú ma xo ɖɛ nú mi.” Bɔ yě bǐ kplé ɖo Misipa, bó dun sin bo ba kɔn nyi ayǐ nú Mawu Mavɔmavɔ, bó blá nu gbe nɛ́ ɔ́ gbe. Gbe nɛ́ ɔ́ gbe wɛ yě ɖɔ: “Mǐ hu hwɛ dó Mawu Mavɔmavɔ.” Fínɛ́ wɛ Samuwɛ́li húzú togun Izlayɛ́li tɔn sín gǎn ɖe. Filisitɛ́ɛn lɛ́ɛ se ɖɔ Izlayɛ́li ví lɛ́ɛ kplé ɖo Misipa, bɔ gǎn yětɔn lɛ́ɛ sɔ́ nǔ, bó ná wá tɔ́n ahwan Izlayɛ́li ví lɛ́ɛ. Ée Izlayɛ́li ví lɛ́ɛ se mɔ̌ ɔ́, xɛsi jɛ yě jí, bɔ yě ɖɔ nú Samuwɛ́li ɖɔ: “Ma gɔn xó sú ylɔ́ Mawu Mavɔmavɔ, Mawu mǐtɔn ɖó ta mǐtɔn mɛ ó, bónú é ná hwlɛ́n mǐ gán ɖo Filisitɛ́ɛn lɛ́ɛ sí.” Samuwɛ́li sɔ́ lɛ̌ngbɔ́ví e kpo ɖo anɔ̌nu é ɖokpó, bó dó gbɔ̌ví ɔ́ blěbǔ tɔn zo nú Mawu Mavɔmavɔ. Samuwɛ́li sú xó ylɔ́ Mawu Mavɔmavɔ ɖó Izlayɛ́li ví lɛ́ɛ tamɛ, bɔ Mawu Mavɔmavɔ yí gbe nú ɖɛ tɔn. Hwenu e Samuwɛ́li ɖo vɔ̌ ɔ́ dó zo wɛ ɔ́, Filisitɛ́ɛn lɛ́ɛ lɔ ko ɖo sisɛkpɔ́ Izlayɛ́li ví lɛ́ɛ wɛ, bó ná wá tɔ́n ahwan yě. Mawu Mavɔmavɔ ká ɖe gbe bɔ jǐ dó gbe dó Filisitɛ́ɛn lɛ́ɛ jí, bó dó xɛsi yě bɔ yě bǐ gba dó, bɔ Izlayɛ́li ví lɛ́ɛ ɖu ɖo yě jí. Énɛ́ ɔ́, Izlayɛ́li ví lɛ́ɛ tɔ́n sín Misipa, bó nya Filisitɛ́ɛn lɛ́ɛ káká yi ɖó Bɛti-Káa, bó hu yě mɛ gěgé. Samuwɛ́li sɔ́ awǐnnya ɖokpó, bó sɔ́ ɖó Misipa kpó Ceni kpó tɛ́ntin, bó ylɔ́ fínɛ́ ɖɔ Evɛ́ni-Ezɛ́ɛ, tínmɛ tɔn wɛ nyí Alɔgɔ́númɛ sín awǐnnya, bó dó ɖo ɖiɖɔ wɛ ɖɔ: “Mawu Mavɔmavɔ dó alɔ mǐ káká wá jɛ fí.” Lě e Filisitɛ́ɛn lɛ́ɛ ɖu winnyá gbɔn é nɛ́. Énɛ́ ɔ́, yě sɔ́ wá Izlayɛ́li yíkúngban jí ɖě gbeɖé ǎ. Mawu Mavɔmavɔ sín alɔ jɛ Filisitɛ́ɛn lɛ́ɛ wú, bɔ é nɔ mɔ̌ káká yi jɛ hwenu e Samuwɛ́li kú é. Izlayɛ́li sín toxo e Filisitɛ́ɛn lɛ́ɛ yí lɛ́ɛ bǐ lɛ́ húzú Izlayɛ́li tɔn ɖo Eklɔ́ni kpó Gati kpó tɛ́ntin. Izlayɛ́li yí toxo énɛ́ lɛ́ɛ bǐ sín Filisitɛ́ɛn lɛ́ɛ sí. Tagba ɖě ká sɔ́ lɛ́ tíin ɖo Izlayɛ́li ví lɛ́ɛ kpódó Amɔliti lɛ́ɛ kpó tɛ́ntin ǎ. Samuwɛ́li nyí gǎn ɖo togun Izlayɛ́li tɔn ɔ́ nu káká jɛ hwenu e é kú é. Xwewú xwewú tɛgbɛ ɔ́, é nɔ yi gbɔn Betɛ́li, Gilugalu kpódó Misipa kpó, bó nɔ́ gbo hwɛ nú Izlayɛ́li ví lɛ́ɛ gbɔn fí énɛ́ lɛ́ɛ bǐ. É ɖɔ hwɛ gbo nú yě ɔ́, é nɔ lɛ́ lɛ́ kɔ wá Hlama, xwé tɔn gbe, bó nɔ ɖɔ hwɛ gbo nú Izlayɛ́li ví lɛ́ɛ ɖo fínɛ́; é bló vɔ̌sákpe ɖokpó nú Mawu Mavɔmavɔ ɖo fínɛ́. Ée Samuwɛ́li wá kpo ɔ́, é sɔ́ vǐ tɔn lɛ́ɛ gǎn ɖó Izlayɛ́li togun ɔ́ nu. Vǐ tɔn nukɔn tɔn ɔ́ nɔ́ nyí Yoɛ́li, bɔ wegɔ́ ɔ́ nɔ nyí Avíya. Bɛ̌-Ceva wɛ yě nyí gǎn ɖe. Samuwɛ́li ví lɛ́ɛ ɔ́, yě nɔ́ wa nǔ é ɖɔhun ǎ. Yě nɔ́ dó nukúnkɛn, bó nɔ ɖu nǔ ɖo nǔ mɛ, bó nɔ dó hwɛ agɔ. Izlayɛ́li tomɛxó lɛ́ɛ bǐ kplé, bó wá Samuwɛ́li gɔ́n ɖo Hlama. Yě ɖɔ n'i ɖɔ: “Din ɔ́, a ko kpo, bɔ vǐ towe lɛ́ɛ ka nɔ wa nǔ hwi ɖɔhun ǎ. Gbɔ bo sɔ́ axɔ́sú ɖokpó nú é ná nɔ mǐ nu, lě e togun ɖě lɛ́ɛ ɖó axɔ́sú é ɖɔhun.” Ée yě ɖɔ nú Samuwɛ́li ɖɔ é ní sɔ́ axɔ́sú ɖokpó nú émí ɔ́, é vɛ́ wǔ tɔn ɖésú. Samuwɛ́li ka xo ɖɛ. Énɛ́ ɔ́, Mawu Mavɔmavɔ ɖɔ nú Samuwɛ́li ɖɔ: “Đǒtó Izlayɛ́li ví lɛ́ɛ; blǒ nǔ e ba wɛ yě ɖe ɔ́ nú yě. Đó hwi wɛ yě gbɛ̌ ǎ, nyɛ wɛ yě gbɛ̌ ɖɔ nyi kún sɔ́ ná ɖu axɔ́sú ɖo émí nu ó. Nǔ e yě nɔ́ wa sín hwenu e un ɖe yě tɔ́n sín Ejípu ɔ́ bló xá we wɛ yě ɖe; ɖó yě jó mì dó, bó nɔ sɛn nǔ ɖěvo lɛ́ɛ. Đǒtó Izlayɛ́li ví lɛ́ɛ; blǒ nǔ e ba wɛ yě ɖe ɔ́ nú yě; amɔ̌, a nǎ ɖɔ nǔ e sín acɛ axɔ́sú e yě ná sɔ́ ɔ́ ná ɖó ɖo yě jí lɛ́ɛ nú yě ɖo togun mɛ.” Xó e Mawu Mavɔmavɔ ɖɔ nú Samuwɛ́li lɛ́ɛ ɔ́, Samuwɛ́li ɖɔ bǐ xwíí nú togun e byɔ́ ɛ axɔ́sú é: “Axɔ́sú e ná ɖu gǎn ɖo mi nu ɔ́, lě e é ná kpa acɛ nú mi gbɔn ɔ́ ɖíe: é ná fɔ vǐ súnnu mitɔn lɛ́ɛ, bɔ yě ná nɔ́ kun kɛkɛ́ví n'i, bó ná fɔ sɔ́xátɔ́ mitɔn lɛ́ɛ, bɔ yě ná nɔ xá sɔ́ tɔn lɛ́ɛ, abǐ yě ná nɔ dó wezun ɖo kɛkɛ́ví é ɖésúnɔ tɔn nukɔn. É ná sɔ́ yě gǎn: mɛ ɖě ná nyí sɔ́ja afatɔ́ngán, mɛ ɖě ná nyí sɔ́ja kanwekogán, bɔ é ná zán yě dó lɛ gle tɔn lɛ́ɛ ná, bó ná zán yě dó ya jinukún tɔn lɛ́ɛ ná. Yě ná nɔ́ tun ahwanlyánnú tɔn lɛ́ɛ n'i, bó ná nɔ bló nǔ e è nǎ nɔ́ dó dɔn kɛkɛ́ví tɔn lɛ́ɛ n'i. É ná fɔ vǐ mitɔn nyɔ̌nu lɛ́ɛ, bɔ mɛ ɖě ná nɔ́ ɖa célu n'i, mɛ ɖě ná nɔ ɖa nǔ n'i, bɔ mɛ ɖě ná nɔ ɖa wɔ̌xúxú n'i. Ayǐkúngban mitɔn e nɔ nyɔ́ nǔkún ganjí é wɛ é ná sɔ́, bó ná sɔ́ vǐwungbo mitɔn e nɔ sɛ́n ganjí é kpó olívugbo mitɔn e nɔ sɛ́n ganjí lɛ́ɛ kpó bó ná ná azɔ̌watɔ́ tɔn lɛ́ɛ. É ná yí jinukún mitɔn lɛ́ɛ sín mǎɖówǒ, kpó vǐwun mitɔn lɛ́ɛ sín mǎɖówǒ kpó, bó ná ná azɔ̌watɔ́ tɔn lɛ́ɛ kpó mɛ e é sɔ́ gǎn lɛ́ɛ kpó. É ná bɛ́ mɛsɛntɔ́ mitɔn súnnu kpó nyɔ̌nu kpó, bó ná bɛ́ mɛ wínnyáwínnyá mitɔn e dó hlɔ̌nhlɔ́n hú mɛ bǐ lɛ́ɛ, kpó tócí mitɔn lɛ́ɛ kpó, bó dó wa azɔ̌ tɔn lɛ́ɛ ná. É ná yí gbɔ̌ mitɔn lɛ́ɛ sín mǎɖówǒ, bɔ mi ɖésúnɔ ká ná húzú kannumɔ tɔn. Hwenɛ́nu ɔ́, mi ná jɛ vo sa dó kɔ nú Mawu Mavɔmavɔ jí, ɖó axɔ́sú mitɔn e mi sɔ́ é wú; Mawu Mavɔmavɔ ká sɔ́ ná ɖótó mi ǎ.” Ée Samuwɛ́li ɖɔ mɔ̌ nú Izlayɛ́li ví lɛ́ɛ ɔ́, yě gbɛ̌ ɖɔ émí kún ná ɖótó xó tɔn ó; yě ɖɔ: “Nǔɖé ná jɛ hǔn, nǔ ɔ́ ní jɛ, axɔ́sú ba wɛ mǐdɛɛ lɛ́ɛ ɖe.” Bɔ mǐ lɔ ná cí togun ɖě lɛ́ɛ ɖɔhun. Axɔ́sú mǐtɔn ná nɔ mǐ nu, bó ná nɔ́ kplá mǐ yi ahwan. Ée Samuwɛ́li se xó e togun ɔ́ ɖɔ ɔ́ bǐ ɔ́, é yi ɖɔ bǐ nú Mawu Mavɔmavɔ. Bɔ Mawu Mavɔmavɔ ɖɔ nú Samuwɛ́li ɖɔ: “Se xó e ɖɔ nú we wɛ yě ɖe é, bó sɔ́ axɔ́sú ɖokpó ɖó yě nu.” Énɛ́ ɔ́, Samuwɛ́li ɖɔ nú Izlayɛ́li ví lɛ́ɛ ɖɔ mɛ ɖokpó ɖokpó ní lɛ́ kɔ yi xwé. Nya Bɛnjamɛ́ɛnu ɖé tíin; bɔ è nɔ ylɔ́ ɛ ɖɔ Kícu, bó nyí Aviɛ́li ví, Aviɛ́li ka nyí Selɔ́ɔ ví, bɔ Selɔ́ɔ nyí Bekolati ví, bɔ Bekolati nyí Afíaxi ví. Kícu ɔ́, nya ɖé wɛ, bó ɖó alɔnu, bó nyí gbɛtɔ́ nukúnɖéjí. Nya énɛ́ ɖó vǐ ɖokpó, bɔ è nɔ ylɔ́ ɛ ɖɔ Sawúlu, bɔ é nyí dɔ̌nkpɛvú ɖagbe ɖagbe ɖé. É nyɔ́ ɖɛkpɛ hú Izlayɛ́li ví lɛ́ɛ bǐ, bó hú ta ga yě bǐ. Kícu Sawúlu tɔ́ ɔ́, tócí tɔn asi ɖé lɛ́ɛ bú, bɔ é ɖɔ nú vǐ tɔn Sawúlu ɖɔ: “Kplá mɛsɛntɔ́ ce lɛ́ɛ ɖokpó, bó yi ba tócí lɛ́ɛ.” Nǔgbó ɔ́, Sawúlu kpó mɛsɛntɔ́ ɔ́ kpó sɔ́ nǔ, bó gbɔn Eflayímu só ɔ́ jí, bó gbɔn Calicato ɔ́ mɛ dín; yě ká mɔ tócí lɛ́ɛ ǎ. Yě gbɔn Caalímu tomɛ, tócí lɛ́ɛ ká ɖo fínɛ́ ǎ; yě gbɔn Bɛnjamɛ́ɛ to ɔ́ bǐ mɛ, yě ká mɔ yě ǎ. Ée yě wá Súfu gbé jí ɔ́, Sawúlu ɖɔ nú mɛsɛntɔ́ e kplá ɛ ɔ́ ɖɔ: “Wǎ mǐ ní lɛ́ kɔ yi xwé gbe, é má nyí mɔ̌ ǎ ɔ́, tɔ́ ce ná jó tócí xó dó, bó ná jɛ mǐ lin jí.” Mɛsɛntɔ́ ɔ́ ká yí gbe n'i ɖɔ: “Đɛ̌mɛnu Mawu tɔn ɖokpó ɖo toxo élɔ́ mɛ fí; nya ɖé wɛ bɔ mɛ bǐ nɔ sí i. É ɖɔ nǔɖé ɔ́, é nɔ jɛ. Wǎ mǐ ní yi gɔ̌n tɔn, afɔ nyɔ́ ɔ́, é ná ɖɔ ali e mǐ ná gbɔn bó ná mɔ tócí lɛ́ɛ nú mǐ.” Sawúlu ka ɖɔ nú mɛsɛntɔ́ ɔ́ ɖɔ: “Ényí mǐ ká yi ɔ́, étɛ́ mǐ ká ná ná ɖɛ̌mɛnu Mawu tɔn ɔ́? Đó nǔɖuɖu ɖě sɔ́ kpo ɖo glo mǐtɔn lɛ́ɛ mɛ ǎ. Mǐ ká ɖó nǔɖé, bó ná ná ɖɛ̌mɛnu ɔ́ ǎ. Abǐ nǔɖé sɔ́ ɖo mǐ sí a?” Mɛsɛntɔ́ ɔ́ lɛ́ yí xó, bó ɖɔ nú Sawúlu ɖɔ: “Gankwɛ́ kpɛví ɖokpó ɖíe ɖo así ce e. Un ná ná ɖɛ̌mɛnu Mawu tɔn ɔ́, bɔ é ná xlɛ́ ali mǐ.” Xóxó hwenu ɖo Izlayɛ́li ɔ́, nú è xwe nǔ kanbyɔ́ Mawu gbé ɔ́, è nɔ ɖɔ: “Wǎ mǐ yi nǔmɔtɔ́ xwé.” Đó mɛ e è nɔ ylɔ́ égbé din ɖɔ “gbeyíɖɔ” ɔ́, nǔmɔtɔ́ wɛ è nɔ ylɔ́ ɛ ɖɔ ɖ'ayǐ. Sawúlu ɖɔ nú mɛsɛntɔ́ ɔ́ ɖɔ: “Nǔgbó wɛ a ɖɔ, wǎ mǐ yi.” Bɔ yě ɖidó toxo e mɛ ɖɛ̌mɛnu Mawu tɔn ɔ́ ɖe ɔ́ mɛ. Ée yě ɖo kpó fán byɔ́ toxo ɔ́ mɛ wɛ ɔ́, yě kpé ɖyɔ̌vǐ ɖé lɛ́ɛ, bɔ yě xwe tɔ, bɔ yě kanbyɔ́ yě ɖɔ: “Nǔmɔtɔ́ ɔ́ ɖo xwé gbe a?” Yě yí gbe nú yě ɖɔ: “Ɛɛn, é ɖo nukɔn mitɔn. Amɔ̌, mi yá wǔ; é wá toxo mǐtɔn mɛ, ɖó égbé wɛ togun ɔ́ jló ná yi sá vɔ̌ ɖo só jí. Ényí mi yá wǔ yi toxo ɔ́ mɛ ɔ́, mi ná mɔ ɛ cóbɔ é ná ɖidó nǔ ɖu gbé ɖo só jí; é má nyí mɔ̌ ǎ ɔ́, togun ɔ́ ná ɖu nǔ ǎ, ɖó é wɛ ná xo ɖɛ dó nǔɖuɖu ɔ́ jí hwɛ̌, có yě ná ɖu nǔ. Mi yi din ɔ́, mi ná mɔ ɛ.” Sawúlu kpó mɛsɛntɔ́ ɔ́ kpó wlí ali ɖidó. Ée yě ɖo toxo ɔ́ mɛ byɔ́ wɛ ɔ́, Samuwɛ́li tɔ́n, bó ko xwe só jí, bó kpé yě. Ée Sawúlu sín wǐwá kpo sɔ ɔ́, Mawu Mavɔmavɔ ko ɖɔ nú Samuwɛ́li ɖɔ: “Sɔ gan élɔ́ mɛ ɔ́, un ná sɛ́ dǎwe ɖokpó dó we, bɔ é ná gosín Bɛnjamɛ́ɛ tomɛ. A nǎ kɔn ami dó ta n'i, bɔ é ná nyí gǎn nú togun Izlayɛ́li tɔn ɔ́. É ná hwlɛ́n togun ce gán ɖo Filisitɛ́ɛn lɛ́ɛ sí; un nyi kɔ kpɔ́n togun ce, ɖó xó e sú wɛ é ɖe é wá káká gɔ̌n ce.” Ée Samuwɛ́li mɔ Sawúlu lě tlóló ɔ́, Mawu Mavɔmavɔ ɖɔ n'i ɖɔ: “Dǎwe e xó un ɖɔ nú we ɔ́ ɖíe! É wɛ ná ɖu gǎn ɖo togun ce nu.” Ée Sawúlu jɛ sisɛkpɔ́ Samuwɛ́li jí ɔ́, é nɔ te ɖo toxo ɔ́ sín hɔntogbó jí bó ɖɔ n'i ɖɔ: “Kɛnklɛ́n xlɛ́ nǔmɔtɔ́ ɔ́ xwé mì.” Samuwɛ́li ka yí gbe nú Sawúlu ɖɔ: “Nyi wɛ nyí nǔmɔtɔ́ ɔ́. Wǎ kplá mì yi só jí, bónú mi ná ɖu nǔ xá mì égbé. É jɛ sɔ ɔ́, un ná ɖɔ nǔ e ɖo ayi towe mɛ ɔ́ bǐ nú we, bó ná jó we dó bɔ a nǎ yi. Ma nú ado hu we ɖó tócí towe asi e bú sín azǎn atɔn ɖíe lɛ́ɛ wú ó. È ko mɔ yě. Nǔ e a nǎ tunwun din ɔ́ wɛ nyí ɖɔ hwi kpó tɔ́ towe sín xwédo ɔ́ kpó ɖó nukún wɛ Izlayɛ́li to ɔ́ bǐ ɖe.” Sawúlu yí gbe n'i ɖɔ: “Étɛ́! Bɛnjamɛ́ɛnu wɛ nú mì, akɔta e hwe hú akɔta e ɖo Izlayɛ́li lɛ́ɛ ɖokpó mɛ wɛ un gosín, hɛ̌nnu e hwe hú hɛ̌nnu lɛ́ɛ bǐ ɖo akɔta Bɛnjamɛ́ɛ tɔn mɛ ɔ́ ɖokpó mɛ wɛ un tɔ́n sín. Nɛ̌ wɛ a nǎ ɖɔ mɔ̌ nú mì gbɔn?” Samuwɛ́li kplá Sawúlu kpó mɛsɛntɔ́ ɔ́ kpó yi só ɔ́ jí, bó kplá yě yi xɔ e mɛ è nɔ ɖu nǔ ɖe ɔ́ mɛ. É ɖó tɛnmɛ nú yě ɖó tɛn nukɔn nukɔntɔn lɛ́ɛ mɛ, ɖo fí e mɛ e è ylɔ̌ lɛ́ɛ ɖe é. Mɛ e è ylɔ̌ lɛ́ɛ yi gbɛtɔ́ gban (30) mɔ̌. Ée é ɖó tɛnmɛ nú yě ɔ́, é ɖɔ nú mɛ e nɔ ɖa nǔ ɔ́ ɖɔ: “Sɔ́ lan e un sɔ́ nú we bó ɖɔ hwi ní sɔ́ ɖó vo é wá.” Nǔɖatɔ́ ɔ́ sɔ́ gbɔ̌sá blěbǔ ɔ́ wá, bó sɔ́ ɖó Sawúlu sá mɛ, bɔ Samuwɛ́li ɖɔ: “Lan e è sɔ́ ɖó vo nú we é ɖíe; ɖu nǔ xá mɛ e un ylɔ́ lɛ́ɛ.” Énɛ́ ɔ́, Sawúlu ɖu nǔ xá Samuwɛ́li gbe énɛ́ gbe. Yě wǎ jɛ te sín só ɔ́ jí, bó wá toxo mɛ, bɔ Samuwɛ́li kpó Sawúlu kpó yi cí xɔ ta bó ɖɔ xó. Ayǐhɔ́ngbe tɔn ɔ́, Sawúlu kpó mɛsɛntɔ́ ɔ́ kpó fɔ́n zǎn. Ée gbɛmɛ hɔ́n ɔ́, Samuwɛ́li ylɔ́ Sawúlu sɛ́ dó ɖo xɔ ta, bó ɖɔ n'i ɖɔ: “Wǎ nú má nyi we.” Sawúlu sí te bɔ yě mɛ we lɛ́ɛ tɔ́n. Ée yě jɛ fí e toxo ɔ́ fó dó ɔ́, Samuwɛ́li ɖɔ nú Sawúlu ɖɔ: “Đɔ nú mɛsɛntɔ́ towe ní jɛ nukɔn nú mǐ.” Bɔ mɛsɛntɔ́ ɔ́ jɛ nukɔn. Bɔ Samuwɛ́li ɖɔ nú Sawúlu ɖɔ: “Nɔ te bónú ma ɖɔ xó e Mawu ɖɔ ɔ́ nú we.” Ée Sawúlu nɔ te ɔ́, Samuwɛ́li sɔ́ ami goví ɖokpó bó kɔn dó ta nú Sawúlu, bó kplá así kɔ n'i, bó ɖɔ: “Mawu Mavɔmavɔ ɖésú wɛ kɔn ami dó ta nú we, bó sɔ́ we axɔ́sú ɖó togun tɔn nu. Zaanɖé din ɔ́, a nǎ jó mì dó, bó ná ɖidó; a nǎ mɔ nya we ɖé lɛ́ɛ ɖo yɔdo Hlacɛ́li tɔn kɔn, ɖo Bɛnjamɛ́ɛ sín dogbó jí, ɖo Sɛlusáxi; yě ná ɖɔ nú we ɖɔ: ‘Tócí asi e ba gbé a yi lɛ́ɛ ɔ́, è ko mɔ yě. Din ɔ́, tɔ́ towe sɔ́ ɖo tócí xó ɖé ɖɔ wɛ ǎ, lo ɔ́ mi lin wɛ é ɖe bó nɔ ɖɔ: nɛ̌ un ka ná bló gbɔn din bo mɔ vǐ ce?’ A gosín fínɛ́ bó sɛ yi kpɛɖé ɔ́, a nǎ jɛ Tabɔ́ɔ cɛ́nitín kpá. A nǎ mɔ nya atɔn ɖé lɛ́ɛ ɖo fínɛ́, bɔ yě ná xwe Mawu gɔ́n ɖo Betɛ́li: mɛ ɖokpó ná hɛn gbɔ̌ví atɔn, mɛ wegɔ́ ɔ́ ná hɛn wɔ̌xúxú atɔn bɔ mɛ atɔngɔ́ ɔ́ ná hɛn vɛ̌ɛn anyǔglo ɖokpó. Yě ná kanbyɔ́ we ɖɔ hwi ɖo ɖagbe a jí, bó ná ná we wɔ̌xúxú we, bɔ a na yí ɖo yě sí. Énɛ́ gúdo ɔ́, a na wá Giveya-Eloyimu fí e ahwankpá Filisitɛ́ɛn lɛ́ɛ tɔn ɖokpó ɖe é. A ɖo toxo ɔ́ mɛ byɔ́ wɛ ɔ́, a nǎ kpé gbeyíɖɔ Mawu tɔn sín gbɛ̌ta ɖé; yě ná jɛ te sín só jí, bɔ agǐdigbo kpó hǔn kpó, kpete kpó kanhún kpó ná ɖo nukɔn nú yě, bɔ Yɛ Mawu tɔn ná wá ta yětɔn, bɔ yě ná ɖo xó e Mawu ɖɔ nú yě ɔ́ ɖɔ wɛ. Mawu Mavɔmavɔ sín Yɛ ná wá jǐ we, bɔ Mawu ná jɛ xó ɖɔ gbɔn jǐ we jí yě ɖɔhun, bɔ a nǎ húzú gbɛtɔ́ ɖěvo. Ényí nǔ énɛ́ lɛ́ɛ bǐ jɛ ɔ́, a nǎ tunwun ɖɔ Mawu ɖo kpɔ́ xá émí nǔgbó. Hwenɛ́nu ɔ́, a nǎ jɛ nǔ wa jí lě e é byɔ́ gbɔn é. Énɛ́ ɔ́ gúdo ɔ́, a nǎ zɔn mǐ yi Gilugalu, bɔ un ná wá mɔ we ɖo fínɛ́, bó ná sá vɔ̌ e è nɔ dó zo é, kpódó kɔnɖókpɔ́ sín vɔ̌ kpó. A na nɔ te káká nú azǎn tɛ́nwe, bɔ un ná wá bó ná ɖɔ nǔ e a na wa ɔ́ nú we.” Ée Sawúlu dó gǔdo Samuwɛ́li lě tlóló ɔ́, Mawu sɔ́ ayi ɖěvo dó xomɛ n'i, bɔ nǔ e Samuwɛ́li ɖɔ n'i lɛ́ɛ bǐ jɛ gbe énɛ́ ɔ́ gbe. Ée yě wǎ Giveya ɔ́, gbeyíɖɔ Mawu tɔn sín gbɛ̌ta ɖokpó wá kpé Sawúlu, bɔ Yɛ Mawu tɔn wá jǐ tɔn, bɔ é jɛ xó e Mawu ɖɔ gbɔn jǐ tɔn lɛ́ɛ ɖɔ jí ɖo tɛ́ntin yětɔn. Mɛ ɖěɖě kó tunwun i ɖ'ayǐ lɛ́ɛ mɔ ɛ bo ɖɔ: “É ɖo xó e Mawu sɔ́ dó nu n'i lɛ́ɛ ɖɔ wɛ éé kpó gbeyíɖɔ Mawu tɔn lɛ́ɛ kpó.” Bɔ mɛ lɛ́ɛ nɔ kanbyɔ́ yěɖée ɖo togun ɔ́ mɛ ɖɔ: “Nɛ̌ ka gbɔn nú Sawúlu Kícu ví ɔ́? Élɔ́ nyí gbeyíɖɔ Mawu tɔn wɛ a?” Nya Giveyanu ɖokpó kanbyɔ́ ɖɔ: “Bɔ mɛ̌ ká nyí tɔ́ yětɔn lo?” Fínɛ́ wɛ è jɛ lǒ dó jí ɖe ɖɔ: “Sawúlu lɔ nyí gbeyíɖɔ Mawu tɔn wɛ a?” Ée é ɖɔ xó e Mawu ɖɔ n'i lɛ́ɛ fó ɔ́, é ɖidó só ɔ́ jí. Sawúlu ɔ́, tɔ́ tɔn nɔví kanbyɔ́ é kpó mɛsɛntɔ́ tɔn kpó ɖɔ: “Fítɛ́ mi ka yi?” Sawúlu ka yí gbe n'i ɖɔ: “Tócí lɛ́ɛ ba gbé wɛ mǐ yi, mǐ ká mɔ yě ǎ, bɔ mǐ yi kan nǔ byɔ́ Mawu ɖo Samuwɛ́li gɔ́n.” Tɔ́ tɔn nɔví ɔ́ lɛ́ ɖɔ nú yě ɖɔ: “Mi bo ɖɔ nǔ e Samuwɛ́li ɖɔ nú mi é nú mì.” Sawúlu ka yí gbe n'i ɖɔ: “É ɖɔ nú mǐ ɖɔ è ko mɔ tócí lɛ́ɛ.” É ká ɖɔ xó ɖěbǔ n'i dó axɔ́súɖuɖu e xó Samuwɛ́li ɖɔ n'i ɔ́ wú ǎ. Samuwɛ́li ylɔ́ Izlayɛ́li ví lɛ́ɛ bǐ kplé ɖo Mawu Mavɔmavɔ nukɔn ɖo Misipa, bó ɖɔ nú yě ɖɔ: “Xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe; é ɖɔ: ‘Nyɛ wɛ ɖe mi tɔ́n sín Ejípu tomɛ, bó hwlɛ́n mi gán ɖo Ejípunu lɛ́ɛ kpó axɔ́sú e ɖo tagba dó nú mi wɛ lɛ́ɛ bǐ kpó sí.’ Égbé din ɔ́, mi ka gbɛ́ nyɛ Mawu mitɔn. Nyɛ mɛ e hwlɛ́n mi gán ɖo ya e mi ji é kpó nǔ e gbo mi lɛ́ɛ kpó bǐ mɛ é. Bɔ mi nɔ ɖɔ nú mì ɖɔ: ‘Sɔ́ axɔ́sú ɖokpó ɖó mǐ nu.’ Din ɔ́, mi zɔn akɔta mitɔn mitɔn mɛ, hɛ̌nnu mitɔn mitɔn mɛ, bó wá Mawu Mavɔmavɔ nukɔn.” Samuwɛ́li ylɔ́ akɔta Izlayɛ́li tɔn ɖokpó ɖokpó wá Mawu Mavɔmavɔ nukɔn, bó nyi akɔ dó yě bɔ Mawu Mavɔmavɔ ɖe akɔta Bɛnjamɛ́ɛ tɔn. Bɔ Samuwɛ́li ylɔ́ xwédo e ɖo akɔta Bɛnjamɛ́ɛ tɔn mɛ lɛ́ɛ ɖokpó ɖokpó wá Mawu Mavɔmavɔ nukɔn, bó nyi akɔ dó yě, bɔ akɔ jɛ xwédo Matli tɔn jí; é nyi akɔ dó mɛ e ɖo xwédo énɛ́ ɔ́ mɛ lɛ́ɛ, bɔ akɔ jɛ Sawúlu Kícu ví ɔ́ jí. È jɛ Sawúlu ba jí, è ka mɔ ɛ ǎ. Bɔ è lɛ̌ kan nǔ byɔ́ Mawu Mavɔmavɔ ɖɔ mɛ mɔ̌hunkɔtɔn wá fí a jí, bɔ Mawu Mavɔmavɔ yí gbe ɖɔ: “Mi yi ba ɛ ɖo agban lɛ́ɛ tɛ́ntin; fínɛ́ wɛ é hɔn hwlá cí.” Ée Mawu Mavɔmavɔ ɖɔ mɔ̌ ɔ́, è bɛ̌ wezun bo yi dɔn ɛ sín dɔ̌n wá togun ɔ́ nukɔn; é hú taga yě bǐ. Ée é wá ɔ́, Samuwɛ́li ɖɔ nú togun ɔ́ bǐ ɖɔ: “Mi mɔ mɛ e Mawu Mavɔmavɔ sɔ́ é a? Mɛ éé ɖɔhun ɖě ɖo to ɔ́ mɛ ǎ.” Bɔ togun ɔ́ bǐ kpa awǒbóbó bó sú xó ɖɔ: “Susu nú axɔ́sú ɔ́.” Samuwɛ́li wá ɖɔ acɛ e axɔ́sú ɔ́ ɖó ɔ́, bó wlán bǐ dó wěma mɛ, bó sɔ́ ɖó Mawu Mavɔmavɔ nukɔn. Énɛ́ ɔ́ gúdo ɔ́, é nyi togun ɔ́, bɔ mɛ ɖokpó ɖokpó yi xwé tɔn gbe. Sawúlu ɖésú ká yi xwé tɔn gbe ɖo Giveya, bɔ Mawu ɖɔ xó dó ayi mɛ nú mɛ e nyɔ́ ahwan fun ganjí lɛ́ɛ ɖě, bɔ yě kplá ɛ hɛn yi. Nǔ ɖo mɔ̌ có, nǔvɔ́nɔ ɖé lɛ́ɛ tíin bó nɔ́ ɖɔ: “Étɛ́! Mɛ e ɖo mǐ ná hwlɛ́n gán wɛ é ɖíe a?” Bɔ yě gbɛ́ wǎn n'i, bó hɛn nǔɖé wá ná ɛ ǎ. Sawúlu ka ké ya ná ǎ. Axɔ́sú Naxáci Amumɔ́ɔ ví ɔ́ wá tɔ́n ahwan Yavɛ́ci ɖo Galadi. Yavɛ́cinu lɛ́ɛ bǐ ɖɔ nú Naxáci ɖɔ: “Jɛ akɔ xá mǐ, nú mǐ nǎ nɔ se tónú nú we.” Lo ɔ́, axɔ́sú ɔ́ ɖɔ nú yě ɖɔ: “Nú mi jló nú má jɛ akɔ xá mi ɔ́, mi ná yí gbe bɔ un ná tɔ́n nukún aɖisíxwé tɔn ɔ́ mi bǐ sésé dó dó winnyá Izlayɛ́li togun ɔ́ bǐ.” Tomɛxó Yavɛ́ci tɔn lɛ́ɛ ɖɔ nú Naxáci ɖɔ: “Nɔ te kpɔ́n mǐ káká nú azǎn tɛ́nwe, énɛ́ ɔ́, mǐ ná sɛ́ wɛn dó Izlayɛ́li to ɔ́ bǐ mɛ. Ényí mɛɖé má tíin, bó ná hwlɛ́n mǐ gán ǎ ɔ́, mǐ ná sɔ́ miɖée wá jó nú we.” Mɛ e è sɛ́ dó lɛ́ɛ wá Giveya Sawúlu toxo mɛ, bo ɖɔ xó nɛ́ lɛ́ɛ bǐ nú togun ɔ́, bɔ mɛ e ɖo to ɔ́ mɛ lɛ́ɛ bǐ wlí avǐ bó ya ɖésú. Hwe énɛ́ ɔ́ nu ɔ́, Sawúlu kplá nyibú lɛ́ɛ sín gle mɛ, bo ɖo xwé gbe wá wɛ. É kanbyɔ́ ɖɔ: “Étɛ́ ka jɛ bɔ mɛ bǐ ɖo avǐ ya wɛ?” Bɔ è ɖɔ nǔ e mɛ e gosín Yavɛ́ci lɛ́ɛ ɖɔ ɔ́ n'i. Ée Sawúlu se mɔ̌ lě tlóló ɔ́, Yɛ Mawu tɔn wá jǐ tɔn, bɔ xomɛ ɖaxó ɖé sin i. É sɔ́ nyibú we bó já bǐ, bó bɛ́ nú wɛnsagun lɛ́ɛ bo ɖɔ yě ní yi gbɔn Izlayɛ́li to ɔ́ bǐ mɛ, bó ɖɔ: “Mɛ ɖěbǔ gbɛ́ ɖɔ émí kún ná xwedó Samuwɛ́li kpó Sawúlu kpó yi ahwan fun gbé ó ɔ́, lě e è nǎ wa nyibú tɔn lɛ́ɛ nú gbɔn é ɖíe.” Ée yě se mɔ̌ ɔ́, Mawu Mavɔmavɔ dó xɛsi yě bǐ, bɔ yě bǐ sɛ ta kplé ɖó bǔ. Sawúlu sɔ́ yě bǐ sín kɛ́n ɖo Bɛzɛ́ki Akɔta e ɖo totaligbé lɛ́ɛ ɔ́, yě mɛ adɔ̌kpo afɔtɔn wɛ (300.000). Bɔ akɔta Judáa tɔn ɔ́ nyí gbɛtɔ́ adɔ̌kpo ɖě děgba we afɔwó (30.000). Yě ɖɔ nú wɛnsagun e gosín Yavɛ́ci wá lɛ́ɛ ɖɔ: “Mi ná ɖɔ nú Yavɛ́cinu e ɖo Galadi lɛ́ɛ ɖɔ: sɔ hwe yi hwǎn ɔ́, mi ná mɔ alɔgɔ́númɛtɔ́.” Wɛnsagun lɛ́ɛ yi dó wɛn énɛ́ ɔ́ Yavɛ́cinu lɛ́ɛ, bɔ é víví nú yě káká, bɔ yě ɖɔ nú Amumɔ́ɔ ví lɛ́ɛ ɖɔ: “É jɛ sɔ ɔ́, mǐ nǎ sɔ́ miɖée wá jó nú mi, bɔ mi ná sɔ́ mǐ dó wa nǔ e jló mi é ná.” Ayǐhɔ́ngbe tɔn ɔ́, Sawúlu má ahwanfuntɔ́ tɔn lɛ́ɛ ɖó donu atɔn. Bɔ yě byɔ́ Amumɔ́ɔ ví lɛ́ɛ sín ahwankpá mɛ zǎnzǎn tɛɛn bo hu yě káká bɔ hwe yi hwǎn. Mɛ e kpo lɛ́ɛ hɔn bó gba dó yětɔn yětɔn, mɛɖé sɔ́ ba mɛɖé ǎ. Togun ɔ́ ɖɔ nú Samuwɛ́li ɖɔ: “Mɛ̌ ká nyí mɛ e ɖɔ Sawúlu kún sixú ɖu gǎn ɖo mǐ nu ó lɛ́ɛ? È nǐ ɖe yě gba, nú mǐ nǎ hu yě.” Sawúlu ka ɖɔ: “È nǎ hu mɛɖé égbé ǎ. Đó égbé ɔ́, Mawu Mavɔmavɔ hwlɛ́n togun tɔn Izlayɛ́li gán.” Bɔ Samuwɛ́li ɖɔ nú togun ɔ́ ɖɔ: “Mi wá mǐ yi Gilugalu bó ná yi sɔ́ axɔ́sú ɔ́ ɖó zinkpo jí.” Togun ɔ́ bǐ yi Gilugalu bo sɔ́ Sawúlu axɔ́sú, bó sá kɔnɖókpɔ́vɔ́ nú Mawu, bɔ Sawúlu kpó togun ɔ́ bǐ kpó ɖu agɔ̌ gɛnnyii. Samuwɛ́li ɖɔ nú Izlayɛ́li to ɔ́ bǐ ɖɔ: “Éɖíe, un bló nǔ e mi ɖɔ nú mì lɛ́ɛ bǐ, bó sɔ́ axɔ́sú ɖokpó nú mi. Bɛ́ sín din ɔ́, é wɛ ná ɖu gǎn ɖo mi nu. Nyɛ ɔ́, un ko kpo, bó wú hwa kpé fí bǐ; vǐ ce lɛ́ɛ ka ɖo mi mɛ. Nyɛ ɔ́, un nɔ mi nu sín vǔ ce káká wá jɛ égbé. Nyi ɖíe! Ényí un wa nǔɖé nyi do nú mɛɖé hǔn, mi ɖɔ ɖo Mawu Mavɔmavɔ kpó axɔ́sú e é sɔ́ ɔ́ kpó nukɔn din: un yí nyibú mɛɖé tɔn a? Un yí tócí mɛɖé tɔn a? Mɛ̌ un ka táfú kpɔ́n? Mɛ̌ un dó tagba ná kpɔ́n? Mɛ̌ sí un yí nǔ ɖu ɖe bo nɔ jǐ tɔn kpɔ́n? Mɛ ɔ́ ní ɖɔ nú má sú axɔ́ tɔn ɛ.” Bɔ yě bǐ yí gbe n'i ɖɔ: “A táfú mɛɖé gbeɖé ǎ, a ka dó tagba nú mǐ ɖě gbeɖé kpɔ́n ǎ, a ka yí nǔ ɖu ɖo mɛɖé sí gbeɖé kpɔ́n ǎ.” Bɔ Samuwɛ́li lɛ́ ɖɔ nú yě ɖɔ: “Hǔn Mawu Mavɔmavɔ kpó axɔ́sú e é sɔ́ ɔ́ kpó nyí kúnnuɖetɔ́ égbé din ɖɔ mi kún mɔ nǔɖé ɖɔ dó wǔ ce ó.” Bɔ yě yí gbe n'i ɖɔ: “Ɛɛn mǐ yí gbe.” Bɔ Samuwɛ́li lɛ́ ɖɔ nú togun ɔ́ ɖɔ: “Mawu Mavɔmavɔ wɛ sɔ́ Mɔyízi kpó Aalɔ́ɔn kpó; é wɛ ɖe tɔ́gbó mitɔn lɛ́ɛ tɔ́n sín Ejípu. Din ɔ́, mi wá hwɛgun ɖo Mawu Mavɔmavɔ nukɔn. Đagbe e Mawu Mavɔmavɔ wa nú mi kpó tɔ́gbó mitɔn lɛ́ɛ kpó ɔ́, un ná to flín mi hwɛ̌. Ée Jakɔ́bu kpó mɛ tɔn lɛ́ɛ kpó yi Ejípu ɔ́, tɔ́gbó mitɔn lɛ́ɛ jɛ xó sú ylɔ́ Mawu Mavɔmavɔ jí, bɔ é sɛ́ Mɔyízi kpó Aalɔ́ɔn kpó dó, bɔ yě kplá yě sín Ejípu wá fí. Lo ɔ́, yě wǎ wɔn Mawu Mavɔmavɔ, Mawu yětɔn. Énɛ́ ɔ́ wú wɛ Mawu Mavɔmavɔ jó yě nú Sisela ahwangán Hasɔ́ɔ toxo ɔ́ tɔn, bó jó yě nú Filisitɛ́ɛn lɛ́ɛ kpó axɔ́sú Mɔwabu tɔn kpó, bɔ mɛ énɛ́ lɛ́ɛ bǐ fun ahwan bo ɖu ɖo yě jí. Énɛ́ ɔ́, yě lɛ́ wá jɛ xó sú ylɔ́ Mawu Mavɔmavɔ jí bó ɖɔ: ‘Mǐ hu hwɛ bo sɛn vodún Baalu lɛ́ɛ kpó Asitaatée lɛ́ɛ kpó; hwlɛ̌n mǐ gán din ɖo kɛntɔ́ mǐtɔn lɛ́ɛ sí, bónú mǐ ná nɔ se tónú nú we.’ Ée yě ɖɔ mɔ̌ ɔ́, Mawu Mavɔmavɔ sɛ́ Yelubáalu kpó Bedáni kpó Jɛfutée kpó Samuwɛ́li kpó dó, bó ɖe mi sín kɛntɔ́ e lɛ́ lɛ̌ dó mi lɛ́ɛ lɔ mɛ, bɔ ayi mitɔn j'ayǐ. Bɔ ée mi wá mɔ ɖɔ Naxáci Amumɔ́ɔ ví lɛ́ɛ xɔ́sú ɔ́ ja mi gba gbé ɔ́, mi ɖɔ nú mì ɖɔ: ‘Gbeɖé, axɔ́sú ɖokpó ná nɔ mǐ nu dandan.’ Mawu Mavɔmavɔ, Mawu mitɔn ká ko nyí axɔ́sú mitɔn. Axɔ́sú e mi byɔ́ bó sɔ́ é ɖíe. Mi byɔ́ bɔ Mawu Mavɔmavɔ ná mi. Ényí mi ɖó sísí nú Mawu Mavɔmavɔ ɔ́, ényí mi nɔ sɛn ɛ ɔ́, ényí mi nɔ se tónú n'i ɔ́, ényí mi ma fɔ́n gǔ dó xó tɔn jí ǎ ɔ́, mi ná ɖo Mawu Mavɔmavɔ, Mawu mitɔn xwedó wɛ, mi kpó axɔ́sú mitɔn kpó. Amɔ̌, nú mi ma se tónú nú Mawu Mavɔmavɔ ǎ ɔ́, nú mi gbɛ́ gbe n'i ɔ́, Mawu Mavɔmavɔ ná wa nǔ xá mi, lě e é wa xá tɔ́gbó mitɔn lɛ́ɛ gbɔn é. Mi lɔmɔ̌ mi nɔ te bó ná kpɔ́n nǔ ɖaxó e Mawu Mavɔmavɔ ná jlɛ́ ɖo nukún mitɔn mɛ din é. Hwenu e mǐ ɖe din ɔ́, é nyí jǐ hwenu ǎ, ɖó nǔkún-yiya hwenu wɛ mǐ ɖe. Un ka ná xomlá Mawu Mavɔmavɔ, bɔ jǐ ná dó gbe, bó ná ja. Ényí nǔ cí mɔ̌ hǔn, mi tunwun ɖɔ axɔ́sú e émí byɔ́ Mawu Mavɔmavɔ é ɔ́, nǔ ɖaxó ɖokpó wɛ é nyí bɔ émí wa nyi do.” Samuwɛ́li xomlá Mawu Mavɔmavɔ, bɔ gbe énɛ́ gbe ɖokpó ɔ́, jǐ dó gbe bó ja, bɔ togun ɔ́ bǐ ɖi xɛsi dó Mawu Mavɔmavɔ kpó Samuwɛ́li kpó wú. Togun ɔ́ bǐ ka ɖɔ nú Samuwɛ́li ɖɔ: “Ylɔ̌ Mawu Mavɔmavɔ, Mawu towe dó mɛsɛntɔ́ towe lɛ́ɛ tamɛ, bónú mǐ ní ma kú ó, ɖó axɔ́sú e mǐ byɔ́ ɔ́, hwɛ wɛ nyí bɔ mi hu dó hwɛ jí.” Samuwɛ́li ka ɖɔ nú yě ɖɔ: “Mi ma ɖi xɛsi ó, mi dó nǔ nyanya énɛ́ ɔ́ sin có mi ma lɛ́ kɔ sín Mawu Mavɔmavɔ gúdo ó, mi sɛn ɛ kpódó ayi mitɔn bǐ kpó. Mi ma jó Mawu mitɔn dó ó, é má nyí mɔ̌ ǎ ɔ́, mi ná xwedó nǔ yǎyá lɛ́ɛ; nǔ yǎyá lɛ́ɛ ka nɔ sixú hwlɛ́n mɛ gán ǎ, yě nɔ́ sixú wa ɖagbe ɖé nú mɛ ǎ, ɖó nǔ yǎyá kpowun wɛ yě nyí. Mawu Mavɔmavɔ ná jó togun tɔn dó gbeɖé ǎ, bó ná dó hɛn nyǐkɔ tɔn e gba kpé ɔ́ ɖó te; ɖó Mawu Mavɔmavɔ wɛ zin alɔ dó akɔ́n ɖɔ émí ná sɔ́ mi dó bló togun émítɔn. Mawu Mavɔmavɔ ma lɔn nú un gɔn ɖɛ xo nú mi, bó hu hwɛ dó e ó. Un ná xlɛ́ ali e nyí ali ɖagbe ɔ́ mi, ali e nyí ali jlɔ́jlɔ́ é. Mi vɛ́ kó ɖó sísí nú Mawu Mavɔmavɔ kpowun, bó sɛn ɛ ɖo nǔgbó mɛ kpódó ayi mitɔn bǐ kpó; mi kpɔ́n nǔ ɖaxó e é jlɛ́ ɖo nukún mitɔn mɛ é. Amɔ̌, ényí mi wa nǔ nyanya ɔ́, mi ná dɔn, mi kpódó axɔ́sú mitɔn kpó.” Xwe gban (30) wɛ Sawúlu ɖó bó yi axɔ́súzinkpo Izlayɛ́li tɔn jí. Hwenu e é ɖo xwe we bló wɛ ɖo zinkpo jí ɔ́, é cyán Izlayɛ́li ví afɔwó-afatɔ́n (3.000), bó bɛ́ yě mɛ afɔwó (2.000), bɔ é kpó yě kpó cí Mikumasi kpó Betɛ́li só ɔ́ kpó jí, bɔ yě mɛ afatɔ́n (1.000) kpó Jonatáan kpó cí Giveya ɖo Bɛnjamɛ́ɛ yíkúngban jí. Sawúlu nyi Izlayɛ́li ví e kpo lɛ́ɛ ɖɔ mɛ ɖokpó ɖokpó ní yi xwé tɔn gbe. Jonatáan gba ahwankpá Filisitɛ́ɛn lɛ́ɛ tɔn e ɖo Gɛva é, bɔ Filisitɛ́ɛn lɛ́ɛ se. Sawúlu ɖɔ bɔ è kún lanzo gbɔn Izlayɛ́li to ɔ́ bǐ mɛ bónú Eblée lɛ́ɛ bǐ ná se nǔ e jɛ é. Énɛ́ ɔ́, Izlayɛ́li to ɔ́ bǐ se bɔ è ɖo ɖiɖɔ wɛ ɖɔ: “Sawúlu gba ahwankpá Filisitɛ́ɛn lɛ́ɛ tɔn, bɔ Izlayɛ́li ví lɛ́ɛ bǐ húzú nǔ baɖabaɖa ɖo Filisitɛ́ɛn lɛ́ɛ nukún mɛ.” Énɛ́ ɔ́, togun ɔ́ bǐ kplé ɖo Sawúlu gɔ́n ɖo Gilugalu. Filisitɛ́ɛn lɛ́ɛ kplé bó ná tɔ́n ahwan Izlayɛ́li. Yě ɖó ahwankɛkɛ́ví adɔ̌kpo ɖě děgba we afɔwó (30.000), bó ɖó sɔ́xátɔ́ děgba ɖě afɔwó (6.000). Ahwanfuntɔ́ e ɖo fínɛ́ lɛ́ɛ sukpɔ́, è sixú xa ǎ. Yě sukpɔ́ káká, bó cí kɔ́ e ɖo xutó é ɖɔhun, bɔ yě wá ɖó gɔnu ɖó Mikumasi, ɖo zǎnzǎnhwe jí ɖo Bɛti-Awɛni. Izlayɛ́li ví lɛ́ɛ wá mɔ ɖɔ nǔ ɔ́ hú gǎn émí, ɖó mɛ lɛ́ɛ lɛ́ lɛ̌ dó yě gbɔn fí bǐ, bɔ yě gbɔ bó hɔn byɔ́ sónu lɛ́ɛ mɛ, do lɛ́ɛ mɛ, awǐnnya kan mɛ, nu lɛ́ɛ mɛ, dotɔ lɛ́ɛ mɛ. Mɛ ɖé lɛ́ɛ ɖo yě mɛ, bɔ yě lɔ dó asá Judɛ́ɛn tɔ ɔ́, bó yi Gadi kpó Galadi kpó gbé jí. Sawúlu ka kpo ɖo Gilugalu, bɔ mɛ wɔ̌buwɔ́bú e kpó é kpó ɖo fínɛ́ lɛ́ɛ bǐ ɖo xɛsi jí. Sawúlu nɔ te nú azǎn tɛ́nwe lě e Samuwɛ́li ɖɔ gbɔn n'i é. Lo ɔ́, Samuwɛ́li ɖo wǐwá wɛ ǎ, bɔ mɛ lɛ́ɛ bǐ ɖo hinhɔn jó Sawúlu dó wɛ. Bɔ Sawúlu gbɔ bo ɖɔ: “Mi sɔ́ kanlin e ná dó sá vɔ̌ e è nɔ dó zo ɔ́ ná wɛ è ɖe ɔ́ kpó éé ná dó sá kɔnɖókpɔ́ vɔ́ lɛ́ɛ ná wɛ è ɖe lɛ́ɛ kpó wá.” È bɛ̌ kanlin lɛ́ɛ wá n'i, bɔ é ɖésú sá vɔ̌ e è nɔ dó zo ɔ́. Vɔ̌ ɔ́ sá fó wɛ è ɖe kɛ́ɖɛ́, bɔ Samuwɛ́li wá, bɔ é yi gɔ̌n tɔn, bó ná dó gbe e. Samuwɛ́li ka kanbyɔ́ ɛ ɖɔ: “Étɛ́ a ka bló nɛ́?” Bɔ é yí gbe n'i ɖɔ: “Ée hwenu e a ɖɔ dó é su bɔ a ma ɖo wǐwá wɛ ǎ, bɔ Filisitɛ́ɛn lɛ́ɛ ká ko kplé ɖo Mikumasi é ɔ́, un mɔ ɖɔ nú un ma yá wǔ xomlá Mawu Mavɔmavɔ ǎ ɔ́, Filisitɛ́ɛn lɛ́ɛ ná wá tɔ́n ahwan mǐ ɖo Gilugalu. Énɛ́ ɔ́ wɛ zɔ́n bɔ un gbɔ bo sɔ́ tamɛ nyi gbě, bó sá vɔ̌ e è nɔ dó zo ɔ́.” Samuwɛ́li ka yí gbe nú Sawúlu ɖɔ: “A wa nǔ taɖunɔ ɖɔhun. Sɛ́n e Mawu Mavɔmavɔ, Mawu towe dó nú we ɔ́, a nyi ǎ. Ényí a ko se tónú nú Mawu wɛ ɔ́, é ná hɛn axɔ́súɖuɖu towe ɖó te káká yi káká sá. Amɔ̌, din ɔ́, axɔ́súɖuɖu towe ná fó. Mawu Mavɔmavɔ ko sɔ́ mɛ e nyɔ́ nukún tɔn mɛ, bɔ é ná nyí gǎn ɖo togun tɔn nu é. Đó nǔ e é ɖɔ nú we ɔ́, a blǒ ɖ'é jí ǎ.” Énɛ́ ɔ́ gúdo ɔ́, Samuwɛ́li gosín Gilugalu bo yi Giveya ɖo Bɛnjamɛ́ɛ yíkúngban jí. Sawúlu ka kpɔ́n mɛ e kpo ɖo gɔ̌n tɔn fínɛ́ lɛ́ɛ. Yě yi nǔwɔntɔn (600) mɔ̌. Sawúlu kpó vǐ tɔn Jonatáan ɔ́ kpó mɛ e kpó yě kpó ɖo yiyi wɛ lɛ́ɛ kpó ɖó gɔnu ɖó Gɛva ɖo Bɛnjamɛ́ɛ yíkúngban jí, bɔ Filisitɛ́ɛn lɛ́ɛ ká ɖó gɔnu ɖó Mikumasi. Gbɛ̌ta atɔn gosín Filisitɛ́ɛn lɛ́ɛ sín ahwankpá mɛ, bó ná vɔ Izlayɛ́li ví lɛ́ɛ. Gbɛ̌ta ɖokpó wlí Ɔfla toxo ɔ́ sín ali, bó tunta Cuwálu to ɔ́. Gbɛ̌ta wegɔ́ ɔ́ tunta Bɛti-Holɔ́ni, bɔ gbɛ̌ta atɔngɔ́ ɔ́ wlí ali e gbɔn tɔdo Sevoyímu tɔn mɛ ɖo to ɔ́ sín dogbó jí, ɖo gbětótló kpá é, bó ɖidó. Hwe nɛ́ ɔ́ nu ɔ́, è mɔ nǔtuntɔ́ ɖěbǔ ɖo Izlayɛ́li to ɔ́ mɛ ǎ, ɖó Filisitɛ́ɛn lɛ́ɛ dó sɛ́n nú Izlayɛ́li ví lɛ́ɛ ɖɔ yě ní má tun hwǐ ó, yě ní má tun hwǎn ó. Bɔ Izlayɛ́li ví lɛ́ɛ bǐ nɔ́ yi tɛ́n alǐn yětɔn lɛ́ɛ, jǐga yětɔn lɛ́ɛ, asyɔ́ yětɔn lɛ́ɛ kpó adǒvwé yětɔn lɛ́ɛ kpó ɖo gɔ̌n yětɔn. Ényí alǐn ɖé, abǐ jǐga ɖé, nǔkplɔ́nú ɖé, abǐ asyɔ́ ɖé, abǐ gan nuxwíɖíxwíɖí ɖé wló, bɔ è nǎ tɛ́n ɔ́, Filisitɛ́ɛn lɛ́ɛ gɔ́n jɛ́n è nɔ yi. Énɛ́ ɔ́ wɛ zɔ́n bɔ gbe e gbe yě xwe ahwan fun gbé ɔ́, mɛ e kplá Sawúlu kpó Jonatáan kpó xwe ahwan fun gbé lɛ́ɛ ɖě ɖó ahwanfunnú ɖé ǎ. Gbe nɛ́ gbe ɔ́, Sawúlu kpó vǐ tɔn Jonatáan ɔ́ kpó kɛ́ɖɛ́ jɛ́n hɛn ahwanfunnú. Ahwanfuntɔ́ Filisitɛ́ɛn lɛ́ɛ tɔn sín gbɛ̌ta ɖokpó yi tɔwu ɖó Mikumasi só vla mɛ, ɖo aga. É wá su gbe ɖokpó, bɔ Jonatáan Sawúlu ví ɔ́ ɖɔ nú nyaví dɔ̌nkpɛvú e nɔ hɛn ahwanfunnú tɔ́n lɛ́ɛ ɖɔ: “Wǎ mǐ ní hun káká yi fí e Filisitɛ́ɛn lɛ́ɛ ɖó gɔnu ɖó é.” Lo ɔ́, é ɖɔ xó ɖěbǔ nú tɔ́ tɔn ǎ. Sawúlu ka ɖo ayǐjínjɔ́n ɖo Giveya to ɔ́ sín dogbó jí dɔ̌n, ɖo glenáditín e ɖo Miglɔni é sá. Ahwanfuntɔ́ e xwedó e lɛ́ɛ ná yi nǔwɔntɔn (600) mɔ̌. Vɔ̌sánú-xwlémawutɔ́ e ɖo yě mɛ, bɔ nǔ e è nɔ dó kan nǔ byɔ́ Mawu lɛ́ɛ ɖo así tɔn ɔ́ nɔ́ nyí Axiya. Axitúvu ví wɛ, bɔ tɔ́ tɔn nɔví nɔ́ nyí Ikavodi. Ikavodi ɔ́, Pínxási ví wɛ, bó nyí Eli vívú. Eli ɔ́ wɛ nyí vɔ̌sánú-xwlémawutɔ́ e nɔ Silóo ɖ'ayǐ é. Ahwanfuntɔ́ ɖě ká tunwun ɖɔ Jonatáan yi fí ɖé ǎ. Sónuvínu we tɛ́ntin gbɔn wɛ Jonatáan ɖe bó ná yi Filisitɛ́ɛn lɛ́ɛ gɔ́n, bɔ nuvínu ɖě ɖo dě, bɔ ɖě ɖo dě. Sónuvínu ɖokpó nyí Bocesi, bɔ wegɔ́ ɔ́ nyí Sɛnnɛ́ɛ. Sónuvínu ɖokpó ɖo totaligbé ɖo Mikumasi nukɔn, bɔ wegɔ́ ɔ́ ɖo tofɔligbé ɖo Gɛva nukɔn. Jonatáan ɖɔ nú nyaví e nɔ́ hɛn ahwanfunnú tɔn lɛ́ɛ ɖɔ: “Wǎ mǐ ní hun káká yi fí e yě mɛ énɛ́ lɛ́ɛ e má nɔ sɛn Mawu ǎ lɛ́ɛ ɖó gɔnu ɖó é; afɔ nyɔ́ ɔ́, Mawu Mavɔmavɔ sixú wa ɖagbe nú mǐ, ɖó mǐ sukpɔ́ kpó mǐ má sukpɔ́ kpó ɔ́, é sixú hwlɛ́n mǐ gán; nǔ ɖěbǔ gló e ǎ.” Nyaví e nɔ́ hɛn ahwanfunnú tɔn lɛ́ɛ ɔ́ ɖɔ n'i ɖɔ: “Nǔɖé wá ayi towe mɛ hǔn, blǒ, ma xokpɔ́n ó; nǔ e ɖo ayi towe mɛ ɔ́ jɛ́n ɖo nyi lɔ sín ayi mɛ.” Bɔ Jonatáan ɖɔ: “É nyɔ́! Bo wá mǐ yi mɛ énɛ́ lɛ́ɛ gɔ́n, bó ná sɔ́ mǐɖée xlɛ́ yě. Nú yě ɖɔ mǐ ní nɔ te káká nú émí ná wá mǐ gɔ́n ɔ́, mǐ sɔ́ ná sɛ tɛn ǎ, mǐ sɔ́ ná yi yě gɔ̌n ǎ. Lo ɔ́, nú yě ɖɔ mǐ ní wá gɔ̌n émítɔn ɔ́, mǐ ná yi. Énɛ́ ɔ́ wɛ ná ɖe xlɛ́ mǐ ɖɔ Mawu Mavɔmavɔ jó yě nú mǐ.” Yě mɛ we lɛ́ɛ yi ɖe yěɖée xlɛ́ bɔ Filisitɛ́ɛn lɛ́ɛ mɔ yě bó ɖɔ: “Hǐn! Eblée lɛ́ɛ ɖíe; yě ɖo tíntɔ́n sín do e mɛ yě hɔn hwlá dó lɛ́ɛ é wɛ.” Bɔ Filisitɛ́ɛn lɛ́ɛ ɖɔ nú Jonatáan kpó mɛ e nɔ hɛn ahwanfunnú tɔn lɛ́ɛ ɔ́ kpó ɖɔ: “Mi wá gɔ̌n mǐtɔn nú mǐ ná xlɛ́ nǔɖé mi.” Bɔ Jonatáan ɖɔ nú mɛ e nɔ hɛn ahwanfunnú tɔn lɛ́ɛ ɔ́ ɖɔ: “Xwedó mì, ɖó Mawu Mavɔmavɔ jó yě nú Izlayɛ́li.” Jonatáan ɖo sísá gbɔn só ɔ́ jí wɛ, bɔ mɛ e nɔ hɛn nǔ tɔn lɛ́ɛ ɔ́ jɛ gǔdo tɔn. Jonatáan nɔ ɖo Filisitɛ́ɛn lɛ́ɛ xo zin dɛ́ wɛ, bɔ mɛ e nɔ hɛn ahwanfunnú tɔn lɛ́ɛ ɔ́ nɔ́ ɖo yě hu wɛ. Azɔn nukɔntɔn énɛ́ e Jonatáan kpó mɛ e nɔ hɛn nǔ tɔn lɛ́ɛ ɔ́ kpó ɖu ɖo Filisitɛ́ɛn lɛ́ɛ jí ɔ́, gbɛtɔ́ ná yi ko mɔ̌ wɛ yě hu. Yě ká yi fí jɔ fí ɖé có bó hu mɛ sɔ mɔ̌ ǎ. Nǔ énɛ́ e jɛ ɔ́ gba kpé gbě énɛ́ ɔ́ bǐ jǐ, bó gba kpé togun ɔ́ bǐ mɛ. Ahwanfuntɔ́ e ɖo ahwankpá ɔ́ mɛ lɛ́ɛ kpó mɛ e ko tɔ́n bó ná vɔ Izlayɛ́li ví lɛ́ɛ kpó bǐ bɛ́ xɛsi. Ayǐkúngban dán wǔ, bɔ é nyí nǔdóxɛsi ɖaxó ɖé, bɔ Mawu sɛ́ dó. Mɛcɔ́tɔ́ Sawúlu tɔn e ɖo Giveya ɖo Bɛnjamɛ́ɛ yíkúngban jí lɛ́ɛ mɔ sɛ́ dó ɖɔ Filisitɛ́ɛn lɛ́ɛ ɖo hinhɔn wɛ, bó gba kpé tánmɛ tánmɛ. Bɔ Sawúlu ɖɔ nú ahwanfuntɔ́ lɛ́ɛ ɖɔ: “Mi kpɔ́n mɛ mɛ, bó kpɔ́n ɖɔ mɛɖé hwe ɖo mǐ mɛ a jí.” Yě kpɔ́n mɛ mɛ nǔgbó, bó mɔ ɖɔ é hwe Jonatáan kpó mɛ e nɔ hɛn ahwanfunnú tɔn lɛ́ɛ é kpó. Sawúlu ɖɔ nú Axiya ɖɔ ní zé akɔjijɛgbá Mawu tɔn ɔ́ wá. Đó hwe énɛ́ ɔ́ nu ɔ́, akɔjijɛgbá Mawu tɔn ɔ́ ɖo fí e Izlayɛ́li ví lɛ́ɛ ɖó gɔnu ɖó é. Hwenu e Sawúlu ɖo xó ɖɔ nú vɔ̌sánú-xwlémawutɔ́ ɔ́ wɛ é ɔ́, zǐngídi ɔ́ lɛ́ ɖo syɛ́nsyɛ́n d'é jí wɛ ɖo fí e Filisitɛ́ɛn lɛ́ɛ ɖó gɔnu ɖó é; énɛ́ ɔ́, Sawúlu ɖɔ nú vɔ̌sánú-xwlémawutɔ́ ɔ́ ɖɔ: “Ma xaji kan nǔɖé byɔ́ Mawu ó.” Ée é ɖɔ mɔ̌ ɔ́, é kplé ahwanfuntɔ́ tɔn lɛ́ɛ, bɔ é kpó yě kpó yi fí e fun ahwan ɔ́ ɖe wɛ yě ɖe é, bó mɔ Filisitɛ́ɛn lɛ́ɛ ɖo yěɖée hu wɛ, bɔ mɛɖé sɔ́ mɔ nukúnnú jɛ nǔɖé mɛ ǎ. Eblée ɖé lɛ́ɛ ká ɖo Filisitɛ́ɛn lɛ́ɛ sín acɛ mɛ ɖ'ayǐ, bó nɔ kplá yě yi ahwangbénu. Ée Izlayɛ́li ví lɛ́ɛ kpó Sawúlu kpó Jonatáan kpó wá ɔ́, Eblée énɛ́ lɛ́ɛ lílɛ́ jɛ jǐ yětɔn. Izlayɛ́li ví e yi hɔn hwlá ɖo Eflayímu sókan mɛ lɛ́ɛ se ɖɔ Filisitɛ́ɛn lɛ́ɛ ɖo hinhɔn wɛ lobo tɔ́n, bó zun dó Filisitɛ́ɛn lɛ́ɛ jí. Lě e Mawu Mavɔmavɔ bló bɔ Izlayɛ́li ví lɛ́ɛ ɖu ɖ'é jí gbɔn ɔ́ nɛ́. Izlayɛ́li ví lɛ́ɛ fun ahwan ɔ́ káká bó zɛ Bɛti-Awɛni wú. Izlayɛ́li ví lɛ́ɛ mɔ wǔvɛ́ gbe énɛ́ ɔ́ gbe ɖésú. Đó Sawúlu dó sɛ́n nú togun ɔ́ ɖɔ: “Mɛ ɖěbǔ ɖo mi mɛ bó sɔ́ nǔ ɖokpó dó nu cóbónú zǎn kú ɔ́, heelú mɛ ɔ́. Ényí mɛɖé ɖu nǔ cóbónú un ba hlɔn kɛntɔ́ ce lɛ́ɛ bǐ wú hǔn, heelú mɛ ɔ́.” Nǔgbó ɔ́, mɛɖé dó kɛ́n nu ǎ. Ahwanfuntɔ́ lɛ́ɛ bǐ wá zungbó ɖé mɛ, bɔ wǐin ɖo fínɛ́ káká bó nɔ sa. Ée yě byɔ́ zungbó ɔ́ mɛ ɔ́, yě mɔ wǐin ɖo sisa wɛ, mɛɖé ká glá dó ɖɛ̌ ǎ, ɖó mɛ bǐ ɖo xɛsi ɖi nú nǔ e Sawúlu ɖɔ é wɛ. Jonatáan ka tunwun ɖɔ tɔ́ émítɔn dó sɛ́n mɔ̌hunkɔtɔn ǎ, bó sɔ́ kpo e ɖo alɔ tɔn mɛ ɔ́ ɖó wǐin ɔ́ mɛ bó sɔ́ dó nu. Ée é bló mɔ̌ ɔ́, nukún tɔn mɔ nǔ ganjí. Ahwanfuntɔ́ lɛ́ɛ ɖokpó ká ɖɔ n'i ɖɔ: “Tɔ́ towe zín togun ɔ́ bǐ jí, bɔ mɛ bǐ xwlé nǔ, bɔ é ɖɔ heelú mɛ e ná ɖu nǔ égbé ɔ́. Énɛ́ ɔ́ wú wɛ nǔ ci kɔ nú mɛ bǐ.” Jonatáan ɖɔ: “Tɔ́ ce ɔ́, tagba dó nú togun ɔ́ wɛ é ɖe kpowun. Mi kpɔ́n! Ée nyɛ dó wǐin kpɛɖé nu din ɔ́, nukún ce mɔ nǔ ganjí. Ényí mǐ Izlayɛ́li ví lɛ́ɛ ko ɖu nǔ e mǐ gba Filisitɛ́ɛn lɛ́ɛ, bó yí ɖo yě sí lɛ́ɛ ɖě wɛ ɔ́, nǔ e mǐ nǎ kó wa xá yě ɔ́ ná hú mɔ̌.” Gbe énɛ́ gbe ɔ́, Izlayɛ́li ví lɛ́ɛ ɖu ɖo Filisitɛ́ɛn lɛ́ɛ jí, bó nya yě sín Mikumasi káká yi Ayalɔ́ni, bɔ nǔ cikɔ nú Izlayɛ́li ví lɛ́ɛ ɖésú. Yě zɔn nǔ e yě yí ɖo Filisitɛ́ɛn lɛ́ɛ sí é jí, bó nɔ́ hu gbɔ̌ kpó nyibúsú kpó, kpó nyibúví kpó kɔn nyi kɔ́ mɛ, bó nɔ ɖu kpó hun kpó. È yi ɖɔ xó nɛ́ ɔ́ nú Sawúlu bó ɖɔ: “Ahwanfuntɔ́ lɛ́ɛ ɖíe ɖo lan ɖu kpó hun kpó wɛ, bó dó ɖo Mawu Mavɔmavɔ sɛ́n gba wɛ e.” Bɔ Sawúlu ɖɔ: “Étɛ́ ɖíe mi dó sin e! Mi yá wǔ blí awǐnnya ɖaxó ɖokpó wá nú mì.” É lɛ́ ɖɔ nú yě ɖɔ: “Mi gbɔn togun ɔ́ bǐ mɛ, bó ɖɔ nú yě ɖɔ mɛ ɖokpó ɖokpó ní hɛn nyibú tɔn abǐ gbɔ̌ tɔn, bó wá gɔ̌n ce. Nukún ce mɛ fí wɛ yě ná hu kanlin yětɔn lɛ́ɛ ɖe, bó ná ɖu. Énɛ́ ɔ́, yě sɔ́ ná ɖu kpó hun kpó bó ná dó gba Mawu Mavɔmavɔ sɛ́n ǎ.” Gbe nɛ́ gbe zǎn mɛ ɔ́, mɛ ɖokpó ɖokpó hɛn nyibú tɔn wá, bó hu bó kɔn hun tɔn dó awǐnnya ɔ́ jí. Lě e Sawúlu mɛ vɔ̌sákpe ɖokpó nú Mawu Mavɔmavɔ gbɔn ɔ́ nɛ́. Vɔ̌sákpe nukɔntɔn e Sawúlu mɛ nú Mawu Mavɔmavɔ é nɛ́. Sawúlu ɖɔ: “Mi wá mǐ ní zɔn zǎn bó ná tɔ́n ahwan Filisitɛ́ɛn lɛ́ɛ. Mǐ nǎ ɖo nǔ yětɔn lɛ́ɛ bɛ́ wɛ káká bɔ ayǐ ná hɔ́n. Mǐ nǎ jó mɛ e kpo ɖo gbɛ lɛ́ɛ ɖokpó dó ǎ.” Bɔ yě yí gbe n'i ɖɔ: “Ayi towe mɔ nǔɖé hǔn wa.” Vɔ̌sánú-xwlémawutɔ́ ɔ́ ká ɖɔ: “Mi wá mǐ ní kan nǔ byɔ́ Mawu hwɛ̌.” Bɔ Sawúlu kanbyɔ́ Mawu ɖɔ: “Ma yi tɔ́n ahwan Filisitɛ́ɛn lɛ́ɛ a? A nǎ jó yě nú mǐ a?” Mawu ká kɛ nu d'é mɛ n'i gbe nɛ́ gbe ǎ. Énɛ́ ɔ́, Sawúlu ylɔ́ gǎn lɛ́ɛ bǐ, bó ɖɔ: “Mi ba do nú hwɛ e jɛ́n mǐ hu égbé é. Un xwlé Mawu nú mi. Mawu Mavɔmavɔ Izlayɛ́li tɔn Mɛhwlɛ́ngántɔ́ ɔ́ ɖo gbɛ. É ná bó nyí vǐ ce Jonatáan ɔ́ wɛ hu hwɛ ɔ́, é ná kú.” Ée é ɖɔ mɔ̌ ɔ́, mɛ ɖokpó kɛ nu d'é mɛ n'i ǎ. É ɖɔ nú Izlayɛ́li togun ɔ́ bǐ ɖɔ: “Mi jɛ vo bónú nyi kpó vǐ ce Jonatáan ɔ́ kpó ná jɛ vo.” Togun ɔ́ ká yí gbe nú Sawúlu ɖɔ: “Ayi towe mɔ nǔɖé hǔn, wa.” Sawúlu ka ɖɔ nú Mawu Mavɔmavɔ ɖɔ: “Mawu Izlayɛ́li tɔn! Đe nǔgbó ɔ́ xlɛ́.” Bɔ Mawu Mavɔmavɔ ɖe Sawúlu kpó vǐ tɔn Jonatáan ɔ́ kpó. Sawúlu ɖɔ: “Mi bo nyi akɔ dó mɛ e wɛ é ɖo nyɛ kpó vǐ ce Jonatáan kpó mɛ.” È ka nyi akɔ, bɔ é nyí Jonatáan wɛ. Bɔ Sawúlu ɖɔ n'i ɖɔ: “Jonatáan! Đɔ nǔ e a dó sin ɔ́ nú mì.” Bɔ Jonatáan ka yí xó bó ɖɔ: “Kpo e ɖo alɔ ce mɛ é wɛ un sɔ́ dó wǐin mɛ bó dó nu; din ɔ́, un yí kú gbe.” Sawúlu sú xó bó ɖɔ: “Jonatáan, ényí a ma kú ǎ hǔn, Mawu ní wa nǔ bǐ xá mì.” Ahwanfuntɔ́ lɛ́ɛ ká yí xó, bó ɖɔ: “Étɛ́, Jonatáan ná kú o! É mɛ e hwlɛ́n Izlayɛ́li to ɔ́ gán é! Gbeɖé kpɔ́n! Mǐ xwlé Mawu nú we ɖɔ: Mawu Mavɔmavɔ ɖo gbɛ; ɖa ɖokpó géé vɔ́vɔ́ ná j'ayǐ sín ta tɔn ǎ, ɖó Mawu wɛ bló bɔ é wa azɔ̌ égbé.” Lě e ahwanfuntɔ́ lɛ́ɛ hwlɛ́n Jonatáan gán gbɔn é nɛ́, bɔ é sɔ́ kú ǎ. Sawúlu lɛ́ kɔ sín Filisitɛ́ɛn lɛ́ɛ gúdo, bɔ yě lɛ́ kɔ yi xwé. Ée Sawúlu ɖu axɔ́sú ɖo Izlayɛ́li ɔ́, é fun ahwan xá kɛntɔ́ tɔn lɛ́ɛ bǐ. Yě wɛ nyí: Mɔwabunu lɛ́ɛ, Amumɔ́ɔ ví lɛ́ɛ, Edɔ́munu lɛ́ɛ, bó fun ahwan xá Sova xɔ́sú lɛ́ɛ, kpó Filisitɛ́ɛn lɛ́ɛ kpó. É fun ahwan ɖěbǔ ɔ́, é nɔ ɖu ɖ'é jí. É wá su gbe ɖokpó, bɔ é fun ahwan xá Amalɛ́ki ví lɛ́ɛ, bó gba yě dó, bó ɖe hlɔ̌nhlɔ́n tɔn xlɛ́. Lě e é hwlɛ́n Izlayɛ́li to ɔ́ ɖo mɛ e ɖo yě vɔ wɛ lɛ́ɛ sí gbɔn ɔ́ nɛ́. Sawúlu ví lɛ́ɛ wɛ nyí Jonatáan, Yicíwi kpó Maluki-Cua kpó. Vǐ nyɔ̌nu we wɛ é ɖó: vǐ tɔn nyɔ̌nu ɖaxó ɔ́ nyí Mɛlávu, bɔ kpɛví ɔ́ nyí Mikali. Sawúlu sín asi nɔ nyí Axinɔwamu; Aximáasi ví wɛ. Mɛ e kpa acɛ dó ahwangɔnu tɔn nu é nɔ nyí Avunɛ́ɛ. Sawúlu sín tɔ́ nɔví Nɛ̌ɛ ɔ́ sín vǐ wɛ. Đó Kícu Sawúlu tɔ́ ɔ́ kpó Nɛ̌ɛ Avunɛ́ɛ tɔ́ ɔ́ kpó ɔ́, Aviɛ́li wɛ ji yě. Sawúlu ɔ́, ɖo gbɛ hwenu tɔn bǐ ɔ́, é fun ahwan xá Filisitɛ́ɛn lɛ́ɛ káká. É nyí Sawúlu mɔ súnnu hlɔ̌nhlɔ́nnɔ akɔ́nkpantɔ́ ɖé ɔ́, é nɔ yí dó ahwan mɛ. É wá su gbe ɖokpó bɔ Samuwɛ́li ɖɔ nú Sawúlu ɖɔ: “Nyi wɛ Mawu Mavɔmavɔ sɛ́ dó bɔ un wá kɔn ami dó ta nú we, bó sɔ́ we axɔ́sú ɖó Izlayɛ́li nu. Hǔn bo ɖótó xó e Mawu Mavɔmavɔ ɖɔ é. Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe; é ɖɔ: ‘Un ná dɔn tó nú Amalɛ́ki ví lɛ́ɛ ɖó nǔ e yě blǒ xá Izlayɛ́li ví lɛ́ɛ ɔ́ wú. Hwenu e Izlayɛ́li ví lɛ́ɛ gosín Ejípu bo wá xweyǐgbe ɔ́, Amalɛ́ki ví lɛ́ɛ gbo ali nú yě. Din ɔ́, yi bo gba Amalɛ́ki, bó hɛn nǔ tɔn lɛ́ɛ bǐ gblé. Ma jó é ɖésúnɔ dó ó. A nǎ hu nǔ e ɖo to ɔ́ mɛ lɛ́ɛ bǐ; a nǎ hu súnnu kpó nyɔ̌nu kpó, yɔkpɔ́vú kpó vǐ yɛ̌yɛ́ kpó, nyibú kpó gbɔ̌ kpó, lǎkúnmí kpó tócí kpó.’ ” Sawúlu ylɔ́ ahwanfuntɔ́ lɛ́ɛ kplé, bó xa yě ɖo Telayimu. É mɔ gbɛtɔ́ adɔ̌kpo wǒ (200.000) ɖo akɔta e ɖo totaligbé lɛ́ɛ mɛ, bɔ súnnu Judáa ví děgba we afɔwó (10.000) gɔ́ ná. Sawúlu kplá yě káká yi Amalɛ́ki ví lɛ́ɛ sín toxo mɛ, bɔ yě tɔwu nú Amalɛ́ki ví lɛ́ɛ ɖó tɔdo ɔ́ mɛ. Sawúlu ɖɔ nú Keni ví lɛ́ɛ ɖɔ: “Mi gosín fí, mi tɔ́n sín Amalɛ́ki ví lɛ́ɛ mɛ bónú un ma wá hu mi kpó yě kpó ó. Đó hwenu e Izlayɛ́li ví lɛ́ɛ gosín Ejípu ɔ́, mi nyɔ́ xomɛ dó yě wú.” Ée é ɖɔ mɔ̌ ɔ́, Keninu lɛ́ɛ tɔ́n sín Amalɛ́ki ví lɛ́ɛ mɛ. Ée Keninu lɛ́ɛ tɔ́n ɔ́, Sawúlu gba Amalɛ́ki ví lɛ́ɛ, sín Hawíla káká wá Cúu, ɖo Ejípu kpá. É wlí Amalɛ́ki xɔ́sú Agagi ɔ́ gbɛɖe gbɛɖe, bo hu mɛ e kpo lɛ́ɛ bǐ. Lo ɔ́, Sawúlu kpó ahwanfuntɔ́ tɔn lɛ́ɛ kpó wa nǔɖé nú Agagi ǎ. Yě hu kanlin ɖagbe ɖagbe e ɖo to ɔ́ mɛ lɛ́ɛ ɖě ǎ. Gbɔ̌ kpó nyibú kpó, kpódó lɛ̌ngbɔ́ví kpó e ɖo ganjí lɛ́ɛ ɔ́, yě hu ɖě ǎ. Kanlin ɖagbe ɖagbe, kanlin kloklo e ɖo to ɔ́ mɛ lɛ́ɛ ɔ́, yě hu ɖě ǎ. Nǔ e ma nyí nǔjɔnǔ, nǔɖé wa nú ǎ bó gbɛ́ hɛn lɛ́ɛ kɛ́ɖɛ́ wɛ yě hɛn gblé. Énɛ́ ɔ́ gúdo ɔ́, Mawu Mavɔmavɔ ɖɔ nú Samuwɛ́li ɖɔ: “Sawúlu e un sɔ́ axɔ́sú ɔ́ vɛ́ nú mì, ɖó é jó mì dó; é bló nǔ e un ɖɔ lɛ́ɛ ǎ.” Bɔ Samuwɛ́li sin xomɛ bó sa vo nú Mawu Mavɔmavɔ zǎn ɔ́ mɛ káká bɔ ayǐ hɔ́n. Ée ayǐ hɔ́n zǎnzǎn tɛɛn ɔ́, é xwe Sawúlu gɔ́n, bɔ è wǎ ɖɔ n'i ɖɔ Sawúlu yi Kaamɛ́li toxo mɛ, bó mɛ kpe ɖokpó ɖó fínɛ́. Énɛ́ ɔ́ gúdo ɔ́, Sawúlu lɛ́ kɔ bo yi gbɔn zɔ, bó yi Gilugalu. Samuwɛ́li yi Sawúlu gɔ́n, bɔ Sawúlu ɖɔ n'i ɖɔ: “Mawu Mavɔmavɔ ní kɔn acɛ dó jǐ we. Un bló nǔ e Mawu Mavɔmavɔ ɖɔ é.” Samuwɛ́li ka kanbyɔ́ ɛ ɖɔ: “Bɔ gbɔ̌ tɛ́ lɛ́ɛ ká ɖo xó sú wɛ? Nyibú tɛ́ lɛ́ɛ ká ɖo xó sú wɛ?” Sawúlu ka yí gbe n'i ɖɔ: “Sɔ́ja lɛ́ɛ wɛ bɛ́ yě sín Amalɛ́ki ví lɛ́ɛ gɔ́n. Đó gbɔ̌ e nyí gbɔ̌ ɖagbe lɛ́ɛ, kpó nyibú ɖagbe lɛ́ɛ kpó ɔ́, yě bɛ̌ yě sín Amalɛ́ki ví lɛ́ɛ gɔ́n, bó ná dó sá vɔ̌ nú Mawu Mavɔmavɔ, Mawu towe. Ée kpo lɛ́ɛ ɔ́, mǐ hu.” Samuwɛ́li ka ɖɔ n'i ɖɔ: “É kpé mɔ̌! Nɔ te ma ɖɔ nǔ e Mawu Mavɔmavɔ ɖɔ nú mì égbé zǎn mɛ ɔ́ nú we.” Bɔ Sawúlu ná ɛ xó. Énɛ́ ɔ́, Samuwɛ́li ɖɔ: “Đ'ayǐ ɔ́, a nɔ sɔ́ hwiɖée dó mɔ mɛjɔmɛ ɖě ǎ. Din ɔ́, a hǔzú akɔta Izlayɛ́li tɔn lɛ́ɛ bǐ sín gǎn. Mawu Mavɔmavɔ wɛ kɔn ami dó ta nú we bó sɔ́ we Izlayɛ́li xɔ́sú. Mawu Mavɔmavɔ wɛ sɛ́ we dó ɖɔ hwi ní vívá kún nú Amalɛ́ki ví lɛ́ɛ bǐ, ɖó hwɛhutɔ́ wɛ nú yě. Đɔ hwi ná fun ahwan xá yě káká bó ná hu yě bǐ. Étɛ́wú a ma ka bló nǔ e Mawu Mavɔmavɔ zɔn we ɔ́ ǎ? Étɛ́wú a ka zɔn dɔkun e a mɔ ɖo dɔ̌n lɛ́ɛ jí, bó bɛ́? Nǔ énɛ́ nyɔ́ Mawu Mavɔmavɔ nukún mɛ ǎ.” Sawúlu ka yí gbe nú Samuwɛ́li ɖɔ: “Un ɖótó Mawu Mavɔmavɔ ganjí hǔn. Nǔ e é zɔ́n mì ɔ́, un bló. Un wlí axɔ́sú Amalɛ́ki tɔn, Agagi ɔ́ wá, bó ká hu Amalɛ́ki ví e kpo lɛ́ɛ bǐ. Lo ɔ́, ényí ahwanfuntɔ́ ce lɛ́ɛ cyán kanlin ɖagbe lɛ́ɛ ɖo kanlin e è ɖǒ ná hu lɛ́ɛ mɛ, bó bɛ́ wá Gilugalu fí ɔ́, è nǎ zé yě dó sá vɔ̌ nú Mawu Mavɔmavɔ, Mawu towe wú wɛ.” Samuwɛ́li lɛ́ ɖɔ: “Lě e Mawu Mavɔmavɔ yí wǎn nú tónú se nú xó tɔn gbɔn ɔ́ wɛ é yí wǎn nú vɔ̌ e è nɔ dó zo ɔ́, kpódó vɔ̌sísá ɖě lɛ́ɛ kpó gbɔn a? Gbeɖé! É yí wǎn nú tónú se n'i hú vɔ̌sísá. È blǒ nǔ e é ɖɔ ɔ́, é nɔ́ víví n'i hú jǒ. Đó mɛ e gbɛ́ gbe nú Mawu ɔ́, hwɛ ɖokpó ɔ́ wɛ é hu xá mɛ e kan nǔ é. Mɛ e dó tókúse nǔ e Mawu ɖɔ ɔ́ mɛ ɔ́, hwɛ ɖokpó ɔ́ wɛ é hu xá mɛ e nɔ sɛn vodún é kpó mɛ e nɔ sɛn bǒcyɔ lɛ́ɛ kpó. Ée a hɔn xó Mawu tɔn sɔ́ nyi gbě ɔ́, élɔ́ ɖe we sín axɔ́súzinkpo jí.” Ée Samuwɛ́li ɖɔ mɔ̌ ɔ́, Sawúlu ɖɔ: “Un hu hwɛ, un bló nǔ e Mawu Mavɔmavɔ ɖɔ lɛ́ɛ ǎ, un ka bló nǔ e hwi lɔ ɖɔ lɛ́ɛ ǎ. Ahwanfuntɔ́ lɛ́ɛ ɖi xɛsi ná wɛ un ka ɖe, bó gbɔ bó bló nǔ e yě ɖɔ é. Din ɔ́, kɛnklɛ́n, sɔ́ hwɛ ce kɛ mì, bó wá kplá mì nú má yi ɖe kɔ́ nú Mawu Mavɔmavɔ.” Samuwɛ́li ka ɖɔ nú Sawúlu ɖɔ: “Un ná kplá we yi ǎ. Đó a hɔn xó Mawu Mavɔmavɔ tɔn nyi gbě, bɔ Mawu Mavɔmavɔ gbɛ́ hwi lɔ, bɔ a sɔ́ nyí Izlayɛ́li xɔ́sú ǎ.” Ée Samuwɛ́li lɛ́ kɔ bó ná ɖidó ɔ́, Sawúlu hɛn awu ɖaxó e é dó ɔ́ sín tó, bɔ é sun. Bɔ Samuwɛ́li ɖɔ n'i ɖɔ: “Éénɛ́! Lě e Mawu Mavɔmavɔ yí axɔ́súɖuto Izlayɛ́li tɔn sín así towe, bó sɔ́ jó nú mɛ ɖěvo, mɛ e nyɔ́ hú hwɛ é ɖěvo gbɔn é nɛ́. Mawu Mavɔmavɔ e nyí susu Izlayɛ́li tɔn ɔ́ nɔ ɖó adingban ǎ; nǔ e é ká ɖɔ ɔ́, é nɔ lɛ́ vɔ́ wá jí ǎ. Đó é nyí gbɛtɔ́, bó ná ɖɔ xó bó lɛ́ húzú ǎ.” Sawúlu lɛ́ ɖɔ: “Hwɛ wɛ un hu. Ka kɛnklɛ́n bó sɔ́ mì su ɖo tomɛxó lɛ́ɛ nukɔn, bó sɔ́ mì su ɖo Izlayɛ́li ví lɛ́ɛ nukɔn. Wǎ kplá mì nú má yi ɖe kɔ́ nú Mawu Mavɔmavɔ, Mawu towe.” Énɛ́ ɔ́, Samuwɛ́li lɛ́ kɔ, bó kplá Sawúlu, bɔ é yi ɖe kɔ́ nú Mawu Mavɔmavɔ. Énɛ́ ɔ́ gúdo ɔ́, Samuwɛ́li ɖɔ: “Mi kplá Agagi Amalɛ́ki xɔ́sú ɔ́ wá nú mì.” Bɔ Agagi ɖidó Samuwɛ́li gɔ́n kpó xomɛhunhun kpó, ɖó é ɖo ɖiɖɔ dó ayi mɛ wɛ ɖɔ: “Un ɖiɖɔ kú xó ɖé sɔ́ ɖ'é mɛ nú mì din ǎ.” Samuwɛ́li ka ɖɔ: “Lě e a sɔ́ hwǐ towe dó hu vǐ ɖé lɛ́ɛ sín nɔ yětɔn kɔn ɔ́, mɔ̌ ɖokpó ɔ́, vǐ ɖokpó ná kú sín nɔ towe kɔn égbé.” Ée Samuwɛ́li ɖɔ mɔ̌ ɔ́, é já Agagi ɖo Mawu Mavɔmavɔ nukɔn ɖo Gilugalu. Énɛ́ ɔ́ gúdo ɔ́, Samuwɛ́li lɛ́ kɔ yi Hlama, bɔ Sawúlu lɔ yi xwé tɔn gbe ɖo Giveya. Samuwɛ́li sɔ́ mɔ Sawúlu gbeɖé có bó kú ǎ; é nɔ ɖo avǐ ya wɛ hwebǐnu ɖó Sawúlu tamɛ. Đó Mawu Mavɔmavɔ ɖésú wɛ sɔ́ Sawúlu Izlayɛ́li xɔ́sú bɔ é ká lɛ́ wá vɛ́ n'i. Mawu Mavɔmavɔ ɖɔ nú Samuwɛ́li ɖɔ: “Hwetɛ́nu a nǎ gɔn avǐ ya dó Sawúlu tamɛ dó? Un gbɛ́ xó tɔn wɛ hǔn; é sɔ́ ná ɖu axɔ́sú ɖo Izlayɛ́li gbeɖé ǎ. Hwɛ ɔ́, un ná sɛ́ we dó Jɛsée Bɛteleyɛ́munu ɔ́ gɔ́n, ɖó mɛ e un jló ná sɔ́ axɔ́sú ɔ́, un mɔ ɖo vǐ tɔn lɛ́ɛ mɛ. Hǔn, sɔ́ lanzo towe bó kɔn ami d'é mɛ ní gɔ́, bó jɛ ali.” Samuwɛ́li kanbyɔ́ Mawu Mavɔmavɔ ɖɔ: “Nɛ̌ un ka ná yi gbɔn? Sawúlu táá wá se bó ná hu mì.” Bɔ Mawu Mavɔmavɔ ɖɔ nú Samuwɛ́li ɖɔ: “A xweyǐgbe ɔ́, a nǎ hɛn nyibúví asi ɖokpó, bó ná ɖɔ vɔ̌ sá nú Mawu Mavɔmavɔ gbé wɛ émí xwe. Énɛ́ ɔ́, a nǎ ylɔ́ Jɛsée wá vɔ̌sísá ɔ́ do mɛ. Nǔ e a na bló ɔ́, un ná ɖɔ nú we, bɔ a nǎ kɔn ami dó ta nú mɛ e un ná xlɛ́ we ɔ́, bó ná sɔ́ ɛ axɔ́sú bɔ é ná nɔ́ wa azɔ̌ nú mì.” Samuwɛ́li bló nǔ e Mawu Mavɔmavɔ ɖɔ n'i ɔ́ bǐ, bó yi Bɛteleyɛ́mu. Ée é jɛ dɔ̌n ɔ́, tomɛxó lɛ́ɛ bɛ́ wezun bo wá gɔ̌n tɔn adohu adohu, bó kanbyɔ́ ɛ ɖɔ: “Đagbe wɛ a wǎ fí a?” Samuwɛ́li yí gbe ɖɔ: “Ɛɛn, ɖagbe wɛ. Vɔ̌ ɖé sá gbé wɛ un ja bo wá. Mi slá wǔ bó ná kplá mì yi vɔ̌sísá ɔ́ do mɛ.” Samuwɛ́li ylɔ́ Jɛsée kpó vǐ tɔn lɛ́ɛ kpó ɖɔ yě lɔ ní wá slá wǔ. Ée Jɛsée kpó vǐ tɔn lɛ́ɛ kpó wá bɔ Samuwɛ́li mɔ Eliavu lě ɔ́, é ɖɔ dó ayi mɛ ɖɔ: “Un ɖiɖɔ mɛ e Mawu Mavɔmavɔ sɔ́ é ɖíe.” Mawu Mavɔmavɔ ká ɖɔ nú Samuwɛ́li ɖɔ: “Ma nú ninɔmɛ tɔn blɛ́ we ó, ma ka nú ga tɔn blɛ́ we ó, ɖó é wɛ un sɔ́ ǎ. Nǔ e nyí nǔxɔ-akwɛ́ ɖo gbɛtɔ́ lɛ́ɛ nukún mɛ ɔ́ nɔ xɔ akwɛ́ nyɛ Mawu nukún mɛ ǎ. Nǔ e ɖo wěxo ɔ́ wɛ gbɛtɔ́ nɔ kpɔ́n, ayixa mɛ wɛ nyɛ Mawu Mavɔmavɔ ká nɔ́ kpɔ́n.” Jɛsée ylɔ́ Avinadávu bó kplá ɛ gbɔn Samuwɛ́li nukɔn, bɔ Samuwɛ́li ɖɔ: “Mawu Mavɔmavɔ sɔ́ mɛ élɔ́ lɔ ǎ.” Jɛsée lɛ́ ylɔ́ vǐ tɔn Camúma wá, bɔ Samuwɛ́li ɖɔ: “Mawu Mavɔmavɔ sɔ́ mɛ élɔ́ lɔ ǎ.” Jɛsée ylɔ́ vǐ tɔn ɖokpó ɖokpó tɛ́nwe wá, bɔ Samuwɛ́li ɖɔ: “Mawu Mavɔmavɔ sɔ́ mɛ ɖokpó ɖo yě mɛ ǎ.” Samuwɛ́li gbɔ bo kanbyɔ́ Jɛsée ɖɔ: “Vǐ towe lɛ́ɛ bǐ jɛ́n ná?” Bɔ Jɛsée yí gbe n'i ɖɔ: “É kpo mɛ kpɛví ɔ́; è nɔ ylɔ́ ɛ ɖɔ Davídi; amɔ̌, é kplá gbɔ̌ lɛ́ɛ yi amagbo mɛ.” Énɛ́ ɔ́, Samuwɛ́li ɖɔ n'i ɖɔ: “Dǒ wɛn sɛ́ dó e din tlóló. É má wá fí ǎ ɔ́, mɛɖé ná ɖu nǔ e è xwlé Mawu é ǎ.” Jɛsée sɛ́ mɛ dó gbě tɔn mɛ nǔgbó. Nyaví vɔvɔ ɖagbe ɖagbe ɖé wɛ, bó ɖó nukún cɔɔn. Ée é wá ɔ́, Mawu Mavɔmavɔ ɖɔ nú Samuwɛ́li ɖɔ: “Sí te bo kɔn ami dó ta n'i bó sɔ́ ɛ axɔ́sú. É wɛ un sɔ́.” Samuwɛ́li sɔ́ ami ɔ́ bó kɔn dó ta n'i bó sɔ́ ɛ axɔ́sú ɖo nɔví tɔn lɛ́ɛ nukún mɛ. Kpowun ɔ́, yɛ Mawu Mavɔmavɔ tɔn wá Davídi jí gbe énɛ́ gbe, bó nɔ jǐ tɔn káká sɔ́yi. Ée Samuwɛ́li bló énɛ́ ɔ́ fó ɔ́, é lɛ́ kɔ yi Hlama. Yɛ Mawu Mavɔmavɔ tɔn gosín Sawúlu jí, bɔ Mawu Mavɔmavɔ sɛ́ yɛ nyanya ɖé dó e, bɔ é jɛ tagba dó n'i jí. Mɛsɛntɔ́ Sawúlu tɔn lɛ́ɛ ɖɔ n'i ɖɔ: “Mǐ mɔ ɖɔ yɛ nyanya ɖé gosín Mawu gɔ́n, bó ɖo tagba dó nú mɛ wɛ. Sɛ́mɛɖó ní ɖe gbe. Mǐ mɛsɛntɔ́ mɛtɔn lɛ́ɛ ɖo gbesisɔ mɛ; mǐ nǎ yi ba mɛ e nyɔ́ kanhún xo ɔ́ ɖokpó, bɔ nú yɛ nyanya e Mawu sɛ́ dó ɔ́ wá jǐ mɛtɔn ɔ́, é ná nɔ́ xo kanhún ɔ́ nú mɛ, bɔ mɛ ná nɔ́ mɔ agbɔ̌n.” Ée yě ɖɔ mɔ̌ ɔ́, Sawúlu ɖɔ nú yě ɖɔ: “Mi bo yi ba mɛ e nyɔ́ nǔ xo ganjí é ɖokpó bó kplá wá nú mì.” Mɛsɛntɔ́ lɛ́ɛ ɖokpó ká yí xó, bó ɖɔ: “Un tunwun Jɛsée Bɛteleyɛ́munu ɔ́ sín vǐ ɖokpó, bɔ é nyɔ́ nǔ xo ganjí. Nyaví ahwanfuntɔ́ ɖé wɛ. É nyɔ́ xó ɖɔ ganjí. É nyɔ́ ɖɛkpɛ. Asúká ɖokpó wɛ. Mawu Mavɔmavɔ ɖo kpɔ́ xá ɛ.” Ée Sawúlu se mɔ̌ ɔ́, é sɛ́ wɛn dó Jɛsée bo ɖɔ: “Sɛ́ vǐ towe Davídi e nɔ kplá lɛ̌ngbɔ́ towe lɛ́ɛ yi amagbo mɛ é dó mì.” Jɛsée ka dó nǔɖuɖu gban, bó sɔ́ anyǔglo ɖokpó, bó dó vɛ̌ɛn mɛ bɔ é gɔ́, bó sɔ́ gbɔ̌ví ɖokpó gɔ́ ná, bó dó bǐ sín agban dó tócí ɖokpó jí, bó sɛ́ dó Sawúlu gbɔn vǐ tɔn Davídi jí. Davídi yi Sawúlu gɔ́n. Nǔ tɔn nyɔ́ Sawúlu nukún mɛ káká, bɔ é sɔ́ ɛ, bɔ é nɔ́ hɛn ahwanfunnú tɔn lɛ́ɛ n'i. Sawúlu ɖɔ sɛ́ dó Jɛsée ɖɔ: “Kɛnklɛ́n bó jó vǐ towe Davídi ɔ́ dó nú mì, bónú é ná nɔ wa azɔ̌ nú mì, ɖó nǔ tɔn nyɔ́ nukún ce mɛ.” Sín hwenɛ́nu ɔ́, yɛ nyanya e Mawu sɛ́ dó Sawúlu ɔ́ wá jǐ tɔn hweɖěbǔnu ɔ́, Davídi nɔ sɔ́ kanhún bó nɔ xo. Énɛ́ ɔ́, yɛ nyanya ɔ́ nɔ́ gosín jǐ tɔn, bɔ gbɔjɛ tɔn nɔ yi do, bɔ é nɔ́ mɔ agbɔ̌n kpɛɖé. Filisitɛ́ɛn lɛ́ɛ kplé ahwangɔnu yětɔn lɛ́ɛ ɖo Soko ɖo Judáa yíkúngban jí, bó ná yi fun ahwan xá Izlayɛ́li ví lɛ́ɛ. Yě ɖǒ gɔnu ɖó Azeka kpó Soko kpó tɛ́ntin ɖo Efɛ́si-Damumímu. Sawúlu kpó ahwangɔnu Izlayɛ́li tɔn lɔ kpó kplé, bó ɖó gɔnu ɖó tɔdo Telebɛ́ntitín tɔn mɛ, bó sɔ́ ahwan nú, bó ná fun ahwan xá Filisitɛ́ɛn lɛ́ɛ. Énɛ́ ɔ́, Filisitɛ́ɛn lɛ́ɛ ɖo só jí ɖo akpá ɖě xwé, bɔ Izlayɛ́li ví lɛ́ɛ ɖo só jí ɖo akpá ɖě ɔ́ xwé bɔ tɔdo ɔ́ ɖo tɛ́ntin yětɔn. Ahwanfuntɔ́ Filisitɛ́ɛn lɛ́ɛ tɔn ɖokpó tɔ́n sín ahwankpá yětɔn mɛ, bó wá gblɔ́n adǎn nú Izlayɛ́li ví lɛ́ɛ. Nya ɔ́ nɔ nyí Goliyati; Gati toxomɛnu wɛ. Ga tɔn yi mɛ̌tlukpo atɔn jɛjí. Ganvɔgbákún ɖo ta tɔn, ganvɔwu kacakaca ɖé ɖo kɔ n'i bó da kilóo kanɖé ko (60). É bú ganvɔ dó asá, bó kplá hwǎn kpɛví ɖokpó, bɔ è zě ganvɔ dó bló. É lɛ́ hɛn hwǎn ɖaxó ɖokpó bɔ kpo tɔn kló sɔ avɔlɔnkpɔntín, bɔ gan e ɖo kpo ɔ́ nu ɔ́ da kilóo tɛ́nwe jɛjí. Mɛ e nɔ hɛn gǎglónú tɔn ɔ́ ɖo zɔnlin ɖi wɛ ɖo nukɔn tɔn. Goliyati nɔ te bó sú xó sɛ́ dó ahwanfuntɔ́ Izlayɛ́li tɔn lɛ́ɛ ɖɔ: “Étɛ́wú mi ka wá tun ahwanfɔ te? Nyɛ ɔ́, Filisitɛ́ɛn wɛ un nyí, bɔ midɛɛ lɛ́ɛ ká nyí Sawúlu sín kannumɔ. Mi kpɔ́n miɖée mɛ bó ɖe mɛ ɖokpó nú nyi kpó é kpó ná li za. Ényí mɛ ɔ́ kpé wú bó ɖu ɖo jǐ ce bó hu mì ɔ́, mǐdɛɛ lɛ́ɛ ná húzú kannumɔ mitɔn, bó ná nɔ wa azɔ̌ nú mi. Lo ɔ́, ényí nyɛ wɛ kpé wú bó ɖu ɖo jǐ tɔn, bó hu i ɔ́, midɛɛ lɛ́ɛ ná nyí kannumɔ mǐtɔn, bó ná nɔ́ wa azɔ̌ nú mǐ.” Nya Filisitɛ́ɛn ɔ́ lɛ́ ɖɔ: “Mi nyi gbehwán sɛ́ dó wɛ un ɖe égbé. Mi ɖe mɛ ɖokpó sɛ́ dó mì, nú nyi kpó é kpó ná kpé hun.” Sawúlu kpó Izlayɛ́li ví lɛ́ɛ bǐ kpó se xó e ɖɔ wɛ nya Filisitɛ́ɛn énɛ́ ɔ́ ɖe é. Ée yě se xó énɛ́ lɛ́ɛ ɔ́, ado hu yě bǐ, bɔ xɛsi ɖi yě ɖésú. Davídi ɔ́, Jɛsée ví wɛ. Jɛsée ɔ́ ka jɔ ɖo Efláta sín hɛ̌nnu mɛ, bó nɔ́ nɔ Bɛteleyɛ́mu Judáa tɔn. Jɛsée ɔ́, vǐ súnnu tántɔn wɛ é ɖó. Hwenu e Sawúlu ɖo gǎn jí ɔ́, Jɛsée sín xwe ko sɛ yi tawun. Jɛsée sín vǐ súnnu mɛxó atɔn lɛ́ɛ bǐ ka ɖo ahwangbénu xá Sawúlu. Vǐ nukɔntɔn ɔ́ nɔ nyí Eliavu, wegɔ́ ɔ́ nɔ nyí Avinadávu, bɔ atɔngɔ́ ɔ́ nɔ nyí Camúma. Davídi wɛ nyí yɔkpɔ́vú ɖo yě mɛ, bɔ ée fofó tɔn atɔn lɛ́ɛ xwedó Sawúlu yi ahwan ɔ́, Davídi nɔ yi wa azɔ̌ nú Sawúlu bó ká nɔ́ lɛ́ kɔ wá yi kpé nukún dó tɔ́ tɔn sín kanlin lɛ́ɛ wú ɖo Bɛteleyɛ́mu. Zǎnzǎn gbada ɔ́, nya Filisitɛ́ɛn ɔ́ nɔ wá, bó nɔ wá ɖɔ nǔ ɖokpó ɔ́. É ɖ'é wú mɔ̌ káká nú azǎn kanɖé (40). Jɛsée ɖɔ nú vǐ tɔn Davídi gbe ɖokpó ɖɔ: “Sɔ́ nǔkún mimɛ ati ɖokpó élɔ́, kpó wɔ̌xúxú wǒ élɔ́ lɛ́ɛ kpó, bó kán wezun bó sɔ́ yi jó nú fofó towe lɛ́ɛ ɖo ahwankpá Izlayɛ́li ví lɛ́ɛ tɔn mɛ. Lɛ̌ fɔ amɔ̌ wǒ élɔ́ lɛ́ɛ, bó bɛ́ yi jó nú sɔ́ja afatɔ́ngán ɔ́. A nǎ kpɔ́n ɖɔ fofó towe lɛ́ɛ ɖo ganjí a jí, bó ná yí nǔɖé ɖo yě sí wá nú mì, bónú má tunwun ɖɔ yě ɖo ganjí. A nǎ mɔ yě kpó Sawúlu kpó ahwangɔnu Izlayɛ́li tɔn ɔ́ bǐ kpó ɖo tɔdo Telebɛ́ntitín tɔn mɛ, bó ɖo ahwan fun xá Filisitɛ́ɛn lɛ́ɛ wɛ.” Ée tɔ́ tɔn ɖɔ mɔ̌ n'i ɔ́, é fɔ́n zǎn bó ɖidó. É ɖó kanlin lɛ́ɛ nú mɛ ɖěvo, bó dó nǔ e sín xó tɔ́ tɔn ɖɔ lɛ́ɛ sín agban bo ɖidó, lě e tɔ́ ɔ́ kó ɖɔ gbɔn n'i é. Hwenu e é ɖo ahwankpá ɔ́ mɛ byɔ́ wɛ ɔ́, sɔ́ja lɛ́ɛ ɖo zɔnlin ɖi wɛ, bo ɖo ahwanfɔ ɖe wɛ, bó ɖo ahwandán gblɔ́n wɛ. Filisitɛ́ɛn lɛ́ɛ kpó Izlayɛ́li ví lɛ́ɛ kpó sí ahwante dó yěɖée jí. Yě kpan nukɔn yěɖée, bó ná fun ahwan. Ée Davídi wá ɔ́, é bɛ́ nǔ e é hɛn ɔ́ jó nú mɛ e nɔ kpé nukún dó agban lɛ́ɛ wú é, bó bɛ́ wezun yi fí e sɔ́ja lɛ́ɛ ɖe é. É yi fofó tɔn lɛ́ɛ gɔ́n, bó kanbyɔ́ ɖɔ nɛ̌ yě ɖe gbɔn a jí. Hwenu e Davídi ɖo xó ɖɔ xá fofó tɔn lɛ́ɛ wɛ ɔ́, nya Filisitɛ́ɛn Goliyati Gati toxomɛnu ɔ́ lɛ́ tɔ́n sín Filisitɛ́ɛn lɛ́ɛ mɛ, bó jɛ nǔ e é nɔ́ wlí ɖɔ ɖ'ayǐ lɛ́ɛ wlí ɖɔ jí, bɔ Davídi se. Ée Izlayɛ́li ví lɛ́ɛ mɔ nya énɛ́ ɔ́ lě ɔ́, xɛsi jɛ yě jí, bɔ yě bǐ jɛ agɔ jó yi gǔdo jí. Mɛ ɖokpó ɖokpó nɔ ɖɔ: “Mi ma mɔ nya énɛ́ e wá é a? Adǎn gblɔ́n nú Izlayɛ́li ví lɛ́ɛ gbé wɛ é ja bó wá. Ényí mɛɖé kpé wú bó hu i ɔ́, axɔ́sú mǐtɔn ná dó dɔkun nú mɛ ɔ́, bó ná ná ɛ vǐ tɔn nyɔ̌nu bɔ é ná da, bó ná sɔ́ mɛ énɛ́ ɔ́, bɔ mɛ e ɖo daá tɔn xwé lɛ́ɛ sɔ́ ná nɔ ná nǔjɔ ɖo Izlayɛ́li ǎ.” Davídi kanbyɔ́ sɔ́ja e ɖo akpá tɔn lɛ́ɛ ɖɔ: “Étɛ́ è ka ná ná mɛ e ná hu Filisitɛ́ɛn énɛ́, bó ná ɖe winnyá nú Izlayɛ́li to ɔ́ é? Bɔ mɛ̌ ká nyí Filisitɛ́ɛn énɛ́ ɔ́, mɛ e ma nɔ sɛn Mawu ǎ nɛ́ ɔ́, bó glá káká bó zun Mawu gbɛɖe ɔ́ sín ahwangɔnu?” Bɔ mɛ lɛ́ɛ lɛ́ vɔ́ nǔ e è nǎ ná mɛ e ná hu i ɔ́ ɖɔ nú Davídi. Lo ɔ́, Eliavu Davídi sín fofó ɖaxó ɔ́ se xó e ɖɔ xá sɔ́ja lɛ́ɛ wɛ é ɖe é, bɔ xomɛ sin i dó Davídi wú tlala, bɔ é ɖɔ: “Étɛ́wú a ka wá fí? Mɛ̌ a ka jó kanlin kpɛ e ɖo mǐ sí é dó ná nyi gbětótló mɛ bó wá fí? Un tunwun ɖɔ go wɛ a nɔ yí bó nɔ zán ayi wínníwínní. Lě e fun ahwan gbɔn wɛ mǐ ɖe é kpɔ́n gbé wɛ a tɔ́n.” Davídi ka yí gbe n'i bo ɖɔ: “Étɛ́ un ka wa nyi do din? Nǔ wɛ un kanbyɔ́ kpowun ǎ cé?” Ée é ɖɔ mɔ̌ é ɔ́, é jó fofó tɔn dó, bo jɛ xó ɖɔ nú mɛ ɖěvo jí, bó kan nǔ ɖokpó e kanbyɔ́ wɛ é ɖe é byɔ́ mɛ ɔ́, bɔ yě lɛ́ ɖɔ xó ɖokpó ɔ́ n'i. Ée mɛ lɛ́ɛ se xó e Davídi ɖɔ lɛ́ɛ ɔ́, yě yi ɖɔ nú Sawúlu, bɔ é ɖɔ è nǐ kplá ɛ wá nú émí. Ée Davídi yi ɔ́, é ɖɔ nú Sawúlu ɖɔ: “Mɛ ɖokpó ma ɖi xɛsi nú nya Filisitɛ́ɛn énɛ́ ɔ́ ó. Nyɛ mɛsɛntɔ́ towe ná yi kpé hun xá ɛ.” Sawúlu ka ɖɔ nú Davídi ɖɔ: “A sixú kpé hun xá Filisitɛ́ɛn énɛ́ ɔ́ ǎ, ɖó yɔkpɔ́vú wɛ nú we, éyɛ́ ká kó ɖo ahwan mɛ sín vǔ.” Ée Sawúlu ɖɔ mɔ̌ ɔ́, Davídi ɖɔ n'i ɖɔ: “Mɛsɛntɔ́ towe wɛ nɔ kplá tɔ́ ce sín kanlin lɛ́ɛ yi amagbo mɛ, bɔ nú kinnikínní abǐ lɔnmɔ ɖé wá wlí kanlin lɛ́ɛ ɖokpó ɔ́, un nɔ bɛ́ wezun ɖo gǔdo tɔn, bó nɔ xo e, bó nɔ yí kanlin ɔ́ sín nu tɔn. Ényí é lílɛ́ kpan nukɔn mì ɔ́, un nɔ hɛn vɛ̌go tɔn, bó nɔ xo káká bɔ é nɔ kú. Lě e nyɛ mɛsɛntɔ́ towe hu kinnikínní mɔ̌kpán, bó hu lɔnmɔ mɔ̌kpán gbɔn é nɛ́. Nǔ e un nɔ dó sin xá lan énɛ́ lɛ́ɛ ɔ́ wɛ un ná dó sin xá Filisitɛ́ɛn énɛ́ lɔ. Đó mɛ énɛ́ e ma nɔ sɛn Mawu ǎ ɔ́ gblɔ́n adǎn nú ahwangɔnu Mawu gbɛɖe ɔ́ tɔn.” Davídi lɛ́ ɖɔ: “Mawu e nɔ hwlɛ́n mì sín kinnikínní fɛn mɛ, bó nɔ hwlɛ́n mì sín lɔnmɔ fɛn mɛ ɔ́ ná hwlɛ́n mì ɖo Filisitɛ́ɛn énɛ́ sí.” Bɔ Sawúlu ɖɔ nú Davídi ɖɔ: “Bo yi! Mawu Mavɔmavɔ ní nɔ kpɔ́ xá we.” Sawúlu ná gbe bɔ è fɔ awu tɔn lɛ́ɛ dó nú Davídi. È sɔ́ ganvɔgbákún tɔn xwe n'i, bó sɔ́ ganvɔwu tɔn dó n'i. Davídi sɔ́ hwǐ Sawúlu tɔn blá dó nǔ e é dó lɛ́ɛ jí, bó jló ná ɖi zɔnlin kpɔ́n bɔ é gló e, ɖó é dó nǔ mɔ̌hunkɔ kpɔ́n ǎ. É wá ɖɔ nú Sawúlu ɖɔ: “Un sixú ɖi zɔnlin kpó akpa e è blǎ nú mì ɔ́ kpó ǎ, ɖó é má mì ǎ.” Ée é ɖɔ mɔ̌ ɔ́, é ɖe nǔ lɛ́ɛ bǐ kɔn nyi ayǐ. É sɔ́ kpo tɔn, bo yi cyán kɛ́n e wǔtu tɔn ɖíɖí ganjí ɔ́ atɔ́ɔ́n ɖo tɔ tó, bó bɛ́ dó lɛ̌ngbɔ́nyitɔ́ gló tɔn mɛ, bó sɔ́ klohwán tɔn hɛn alɔ mɛ, bo ɖidó Filisitɛ́ɛn ɔ́ gɔ́n. Filisitɛ́ɛn ɔ́ jɛ sisɛkpɔ́ Davídi jí kpɛɖé kpɛɖé, bɔ mɛ e nɔ hɛn gǎglónú tɔn n'i ɔ́ ɖo nukɔn tɔn. Ée Filisitɛ́ɛn ɔ́ mɔ Davídi sɛ́ dó ɔ́, é hu tɛ́ n'i, ɖó é mɔ ɖɔ é kpo ɖo yɔkpɔ́vú, bó nyí nyaví vɔvɔ ɖagbe ɖagbe ɖé. Nya ɔ́ kanbyɔ́ Davídi ɖɔ cukú wɛ émí ká nyí bɔ é ja émí gɔ́n bó hɛn kpo a jí. Ée é ɖɔ mɔ̌ ɔ́, é ɖó vodún Davídi. Bó lɛ́ ɖɔ: “Sɛkpɔ́ mì, sɛkpɔ́ mì, un ná ná lan towe xɛ lɛ́ɛ kpó gběkanlin lɛ́ɛ kpó, bɔ yě ná ɖu.” Davídi ka ɖɔ nú Filisitɛ́ɛn ɔ́ ɖɔ: “Hwɛ ɔ́, a hɛn hwǐ bó hɛn hwǎn kpɛví, bó hɛn hwǎn ɖaxó, bo ja ahwan fun xá mì gbé. Nyɛ ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn e sín ahwangɔnu a zun ɔ́ sín nyǐkɔ mɛ wɛ nyɛ ná fun ahwan xá we dó. Mawu Mavɔmavɔ ná jó we nú mì égbé, bɔ un ná hu we sɔ́ nyi ayǐ, bó gbo ta towe. Égbé ɔ́, un ná ná Filisitɛ́ɛn lɛ́ɛ sín lan xɛ lɛ́ɛ kpó gběkanlin lɛ́ɛ kpó bɔ yě ná ɖu. Énɛ́ ɔ́, gbɛ ɔ́ bǐ ná tunwun ɖɔ Mawu Izlayɛ́li tɔn ɔ́ hú gan nǔ bǐ. Bɔ mɛ e ɖo fí lɛ́ɛ bǐ ná tunwun ɖɔ Mawu Mavɔmavɔ kún ba hwǐ abǐ hwǎn cóbó ná hwlɛ́n mɛ gán ó, ɖó Mawu Mavɔmavɔ wɛ nɔ ná ɖuɖéjí mɛ; é ná jó mi nú mǐ.” Filisitɛ́ɛn ɔ́ xo zǐn, bó ná sɛkpɔ́ Davídi, bɔ Davídi bɛ́ wezun ɖidó gɔ̌n tɔn. Bó dó alɔ glo mɛ, bó sɔ́ awǐnnya ɖokpó dó klohwán tɔn mɛ bó da, bɔ é yi xo Filisitɛ́ɛn ɔ́ dó nukɔngɛ́ngɛ́n jí bó byɔ́ taká tɔn mɛ, bɔ é xwe agbɔ̌nnusú do viwun. Lě e Davídi ɖu ɖo Filisitɛ́ɛn ɔ́ jí gbɔn ɔ́ nɛ́; klohwán kpó awǐnnya kpó jɛ́n é dó hu i ná. É hɛn hwǐ ǎ. Ée Filisitɛ́ɛn ɔ́ j'ayǐ ɔ́, Davídi kán wezun yi gɔ̌n tɔn, bó yi nɔ te ɖo akpá tɔn, bo dɔn hwǐ e Filisitɛ́ɛn ɔ́ blá é sín akún mɛ, bó hu i, bó gbo ta ɛ. Ée Filisitɛ́ɛn lɛ́ɛ mɔ ɖɔ ahwanfuntɔ́ e syɛ́n hú émí mɛ bǐ ɔ́ kú é ɔ́, yě bǐ hɔn. Bɔ Izlayɛ́li ví lɛ́ɛ kpó Judáa ví lɛ́ɛ kpó sú xó, bó zun dó yě jí. Yě nya Filisitɛ́ɛn lɛ́ɛ káká yi tɔdo ɔ́ mɛ, bó nya yě káká yi ɖó hɔntogbó Eklɔ́ni tɔn lɛ́ɛ jí. Yě gblé wǔ Filisitɛ́ɛn lɛ́ɛ vantankánnyá, bɔ yě kú jɛ alixo. Cyɔ yětɔn kpé alixo alixo sín Caalayímu káká yi Gati kpó Eklɔ́ni kpó. Izlayɛ́li ví lɛ́ɛ wá lɛ́ kɔ sín Filisitɛ́ɛn lɛ́ɛ gúdo, bó wá bɛ́ nǔ e Filisitɛ́ɛn lɛ́ɛ jó dó nyi fí e yě ɖó gɔnu ɖó é bǐ. Bɔ Davídi sɔ́ nya Filisitɛ́ɛn ɔ́ sín ta yi Jeluzalɛ́mu, bó bɛ́ ahwanfunnú tɔn lɛ́ɛ dó goxɔ tɔn mɛ. Hwenu e Sawúlu mɔ Davídi bɔ é xwe ahwan fun xá Filisitɛ́ɛn ɔ́ gbé ɔ́, é kanbyɔ́ Avunɛ́ɛ ahwangán tɔn e kpa acɛ nú ahwangɔnu ɔ́ ɖɔ: “Avunɛ́ɛ, mɛ̌ ví ká nyí nyaví énɛ́?” Bɔ Avunɛ́ɛ xwlé nǔ n'i ɖɔ: “Sɛ́mɛɖó, un mɔ do ná ǎ.” Bɔ axɔ́sú ɔ́ ɖɔ nú Avunɛ́ɛ ɖɔ: “Bo ba do ná nú mì, bó tunwun mɛ e ví wɛ é.” Ée Davídi yi hu Filisitɛ́ɛn ɔ́ bó lɛ́ kɔ wá ɔ́, Avunɛ́ɛ kplá ɛ yi Sawúlu gɔ́n. Filisitɛ́ɛn ɔ́ sín ta ka kpo ɖo alɔ tɔn mɛ hwenɛ́nu. Sawúlu ɖɔ n'i ɖɔ: “Nyaví ɛ, mɛ̌ vǐ ká nú we?” Davídi ka yí gbe n'i ɖɔ: “Mɛsɛntɔ́ towe Jɛsée Bɛteleyɛ́munu ɔ́ ví wɛ nú mì.” Ée Davídi ɖo xó ɖɔ xá Sawúlu fó wɛ ɔ́, Davídi sín nǔ jɛ Jonatáan Sawúlu ví ɔ́ tɔn jí, bɔ é yí wǎn nú Davídi é ɖésúnɔ ɖɔhun. Gbe énɛ́ gbe ɖokpó ɔ́, Sawúlu cí Davídi jí. É jó e dó ní lɛ́ kɔ yi tɔ́ tɔn xwé ǎ. Jonatáan nu alɛ xá Davídi ɖó é yí wǎn n'i é ɖésúnɔ ɖɔhun. É ɖe awu ɖaxó e ɖo kɔ n'i é, bó ná Davídi. É lɛ́ ná ɛ ahwanwu tɔn lɛ́ɛ, bó lɛ́ ná ɛ hwǐ tɔn kpó gǎ tɔn kpó, kpódó gǒjíblánú tɔn kpó. Sawúlu sɛ́ Davídi dó ahwangbénu hweɖěbǔnu ɔ́, Davídi nɔ ɖu ɖ'é jí, bɔ Sawúlu sɔ́ ɛ ahwangán, bɔ é nyɔ́ togun ɔ́ bǐ nukún mɛ, káká bó lɛ́ nyɔ́ mɛsɛntɔ́ Sawúlu tɔn lɛ́ɛ lɔ nukún mɛ. Ée Davídi hu Filisitɛ́ɛn ɔ́ bɔ Izlayɛ́li ví lɛ́ɛ lɛ́ kɔ bo wá xwe xwé ɔ́, nyɔ̌nu e ɖo Izlayɛ́li lɛ́ɛ bǐ gosín toxo lɛ́ɛ mɛ toxo lɛ́ɛ mɛ, bó wá ɖo han ji wɛ ɖo Sawúlu nukɔn, bó ɖo hǔn tɛnmɛ tɛnmɛ xo wɛ, bó ɖo we ɖú wɛ, bó ɖo xó sú wɛ kpó awǎjijɛ kpó. Nyɔ̌nu lɛ́ɛ ɖo han ji wɛ, mɛ ɖě nɔ́ dó bɔ mɛ ɖě nɔ́ yí, bó nɔ ɖɔ: “Sawúlu hu kɛntɔ́ afatɔ́n (1.000), Davídi ka hu děgba we afɔwó (10.000).” Ée Sawúlu se han e ji wɛ yě ɖe ɔ́, xomɛ sin i ɖésú, bɔ é ɖɔ: “È ɖɔ Davídi hu kɛntɔ́ děgba we afɔwó (10.000), bɔ nyɛ hu kɛntɔ́ afatɔ́n (1.000). Nǔ e kpo din ɔ́ wɛ nyí ɖɔ è nǎ sɔ́ axɔ́súzinkpo ɔ́ jó n'i.” Bɛ́ sín gbe nɛ́ ɔ́ gbe ɔ́, Sawúlu jɛ nukún nyanya dó kpɔ́n Davídi ná jí. Ayǐhɔ́ngbe tɔn ɔ́, Mawu sɛ́ yɛ nyanya ɖokpó dó Sawúlu bɔ é wá jǐ tɔn, bɔ é jɛ gblǒ ɖɔ jí ɖo xwé é ɖésúnɔ tɔn gbe. Davídi jɛ kanhún xo n'i jí lě e é nɔ xo n'i gbɔn ɖ'ayǐ é. Sawúlu ka hɛn hwǎn tɔn alɔ mɛ. È nǎ mɔ nǔɖé kpowun ɔ́, Sawúlu dlɛ́n hwǎn ɔ́, bó ɖɔ dó ayi mɛ ɖɔ: “Un ná xwe e dó dǒ wú.” Lo ɔ́, Davídi sɛ sín hwǎn ɔ́ nu azɔn we. Sawúlu jɛ xɛsi ɖi nú Davídi jí, ɖó Mawu Mavɔmavɔ ɖo kpɔ́ xá ɛ, bó ká jó éyɛ́ Sawúlu ɔ́ dó. Énɛ́ ɔ́ wú wɛ é ɖe Davídi sín akpá, bó sɔ́ ɛ ahwangán, bɔ é kpa acɛ dó sɔ́ja afatɔ́n (1.000) nu. Bɔ Davídi nɔ nɔ sɔ́ja lɛ́ɛ nu, bɔ yě nɔ́ yi fun ahwan, bó nɔ wá xwé. Davídi sɔ́ nǔ ɖěbǔ bó ná wa ɔ́, é nɔ bló ganjí, bɔ Mawu Mavɔmavɔ ɖo kpɔ́ xá ɛ. Ée Sawúlu mɔ ɖɔ é sɔ́ nǔ ɖěbǔ ɔ́, é nɔ bló ganjí ɔ́, xɛsi ɔ́ ɖě lɛ́ɛ jɛ ɖě jí. Lo ɔ́, Izlayɛ́li to ɔ́ bǐ kpó Judáa to ɔ́ bǐ kpó yí wǎn nú Davídi, ɖó é nɔ́ nɔ yě nu bɔ yě nɔ́ yi fun ahwan bo nɔ wá. Sawúlu ɖɔ nú Davídi ɖɔ: “Éɖíe, un ná ná we Mɛlávu vǐ ce nyɔ̌nu nukɔn tɔn ɔ́, bɔ a nǎ da. Vɛ̌ ko hun xomɛ bo ɖo azɔ̌ wa nú mì wɛ kpowun, bó ɖo ahwan fun nú Mawu Mavɔmavɔ wɛ kpowun.” Lo ɔ́, é ɖo ɖiɖɔ dó ayi mɛ wɛ ɖɔ: “Nyɛ ɖésúnɔ wɛ ná hu i ǎ, Filisitɛ́ɛn lɛ́ɛ wɛ ná hu i.” Davídi ka yí gbe nú Sawúlu ɖɔ: “Sɛ́mɛɖó, un nyí mɛɖé ǎ. Daá ce xwédo ɔ́ kpó hɛ̌nnu tɔn kpó nyí nǔtí ɖo Izlayɛ́li ǎ. Mɛ̌ nyɛ ka nyí bó ná da axɔ́sú sín ví?” Ée hwenu e Sawúlu ná sɔ́ vǐ tɔn Mɛlávu ɔ́ da nú Davídi ɔ́ su ɔ́, é sɔ́ ɛ da nú Adliɛ́li Avɛ́li-Mɛholanu ɔ́. Sawúlu ka ɖó vǐ nyɔ̌nu ɖokpó; è nɔ ylɔ́ ɛ ɖɔ Mikali; éyɛ́ yí wǎn nú Davídi. È yi ɖɔ xó nɛ́ ɔ́ nú axɔ́sú ɔ́, bɔ é yí gbe ná. Sawúlu nɔ ko ɖɔ dó ayi mɛ ɖɔ: “Un ná sɔ́ Mikali da nú Davídi, bɔ é ná nyí mɔ ɖokpó n'i, bɔ Filisitɛ́ɛn lɛ́ɛ ná kpé wǔ tɔn.” Lo ɔ́, Sawúlu wá ɖɔ nú Davídi azɔn wegɔ́ ɔ́ ɖɔ: “É jló mì ma ná vǐ ce ɖokpó we bónú a nǎ da.” Sawúlu blá ɖɔ gbɔn mɛsɛntɔ́ tɔn lɛ́ɛ jí ɖɔ: “Mi yi gba kpá nú Davídi. Mi ɖɔ n'i ɖɔ: ‘Axɔ́sú ɔ́ kpó mǐ mɛsɛntɔ́ tɔn lɛ́ɛ kpó bǐ yí wǎn nú we. Axɔ́sú ɔ́ jló ná ná vǐ tɔn we; yǐ gbe lobo da vǐ tɔn.’ ” Mɛsɛntɔ́ lɛ́ɛ yi ɖɔ xó énɛ́ ɔ́ nú Davídi, bɔ Davídi ɖɔ: “Mi vɛdó ɖɔ axɔ́súví dida ɔ́, nǔ da ayihún wɛ sín a? Nyɛ ɔ́ wamamɔnɔ wɛ nú mì, un nyí mɛɖé ǎ.” Bɔ mɛsɛntɔ́ lɛ́ɛ yi ɖó gbe nú Sawúlu. Sawúlu ɖɔ nú mɛsɛntɔ́ tɔn lɛ́ɛ ɖɔ: “Mi yi ɖɔ nú Davídi ɖɔ: ‘Axɔ́sú ɔ́ ɖo asigban ba ɖo así we wɛ ǎ; lo ɔ́ Filisitɛ́ɛn lɛ́ɛ sín atɔtɔ kanwe ko (100) ba wɛ jɛ́n é ɖe kpowun, bó ná dó ba hlɔn.’ ” Lě e Sawúlu ka ná bló gbɔn bɔ Filisitɛ́ɛn lɛ́ɛ sín alɔ ná jɛ Davídi wú ɔ́ sín wě wɛ nyí énɛ́ ɔ́ bɔ é ɖe. Mɛsɛntɔ́ lɛ́ɛ yi ɖɔ xó énɛ́ ɔ́ nú Davídi, bɔ é yí gbe ná, bó ná da axɔ́sú ɔ́ sín vǐ. Cóbónú azǎn e yě ɖǒ ɔ́ ná sɔgbe ɔ́, Davídi sɔ́ nǔ, é kpó mɛ tɔn lɛ́ɛ kpó, bɔ yě ɖidó, bó yi hu Filisitɛ́ɛn súnnu afɔɖé (200), bó sɛ́n atɔtɔ yětɔn wá, bó xa bǐ ɖo axɔ́sú ɔ́ nukún mɛ, bó ná dó da vǐ tɔn. Énɛ́ ɔ́, Sawúlu sɔ́ vǐ tɔn Mikali ɔ́ da nú Davídi. Sawúlu mɔ nukúnnú jɛ wú din ɖɔ Mawu Mavɔmavɔ ɖo kpɔ́ xá Davídi, bɔ vǐ émítɔn Mikali lɔ ka yí wǎn n'i. Ée é mɔ mɔ̌ ɔ́, é fɔ́n ɔ́, é nɔ ɖo xɛsi ɖi nú Davídi d'é ji wɛ, bó dó kɛn Davídi káká yi kú. Hwenɛ́nu ɔ́, gǎn Filisitɛ́ɛn lɛ́ɛ tɔn lɛ́ɛ nɔ ɖo ahwan tɔ́n Izlayɛ́li ví lɛ́ɛ wɛ. Yě ká ko wá tɛgbɛ ɔ́, Davídi nɔ ɖu ɖ'é jí hú Sawúlu sín ahwanfuntɔ́ lɛ́ɛ bǐ, bɔ nyǐkɔ tɔn fɔ́n ɔ́, é nɔ́ ɖo jǐ yi wɛ. Sawúlu ɖɔ nú Jonatáan kpó azaglɔ́gán tɔn lɛ́ɛ bǐ kpó ɖɔ émí jló ná hu Davídi. Jonatáan Sawúlu ví ɔ́ ká yí wǎn nú Davídi ɖésú. É yi ɖɔ xó nɛ́ ɔ́ nú Davídi, bo ɖɔ: “Tɔ́ ce jló ná hu we. Sɔ zǎnzǎn ɔ́, a nǎ nɔ acéjí. Hɔn yi bɛ cí gle ɖé mɛ. Un ná xwedó tɔ́ ce, bó ná kplá ɛ gbɔn gle e mɛ a nǎ hɔn bɛ dó ɔ́ mɛ. Énɛ́ ɔ́, un ná ɖɔ xó towe nú tɔ́ ce bó ná kpɔ́n nǔ e é ná ɖɔ é, bó ná wá ɖɔ nú we.” Ée yě wá jɛ gle ɔ́ mɛ ɔ́, Jonatáan jɛ Davídi xó ɖagbe ɖɔ nú tɔ́ tɔn jí; é ɖɔ: “Sɛ́mɛɖó, è ma wa nǔɖé nyi do nú mɛsɛntɔ́ mɛtɔn Davídi ɔ́ ó; ɖó é jɛ agɔ ɖé dó mɛ ǎ, é nyɔ́ wa ɔ́, ɖagbe mɛtɔn kɛ́ɖɛ́ wɛ é nɔ ba. É gbɛ́ kú ǎ, bó yi kpé hun xá Filisitɛ́ɛn ɔ́ bó hu i, bɔ Mawu Mavɔmavɔ hwlɛ́n togun tɔn Izlayɛ́li ɔ́ bǐ gǎn. Mɛ ɖésú mɔ bɔ é víví nú mɛ. Étɛ́wú nǔɖé má sín nǔɖé wú ɔ́, è nǎ hu Davídi, bó ná kɔn xomɛvɔ́nɔ sín hun kɔn nyi ayǐ bó dó hu hwɛ?” Sawúlu mɔ ɖɔ nǔgbó ɖɔ wɛ Jonatáan ɖe, bó xwlé Mawu n'i ɖɔ: “Mawu Mavɔmavɔ ɖo gbɛ! Davídi ná kú ǎ.” Ée é ɖɔ mɔ̌ ɔ́, Jonatáan yi ylɔ́ Davídi bó ɖɔ xó nɛ́ lɛ́ɛ bǐ n'i, bó kplá ɛ wá Sawúlu gɔ́n, bɔ Davídi lɛ́ bɛ́ azɔ̌ tɔn ɖo Sawúlu gɔ́n, lě e é nɔ bló gbɔn ɖ'ayǐ é. Ahwan ɔ́ lɛ́ bɛ́, bɔ Davídi yi bo fun ahwan xá Filisitɛ́ɛn lɛ́ɛ, bó ɖu ɖo yě jí bǐ, bɔ yě hɔn ɖo nukɔn tɔn. É wá su gbe ɖokpó bɔ Sawúlu ɖo ayǐjínjɔ́n xwé tɔn gbe bɔ hwǎn tɔn ɖo alɔ tɔn mɛ, bɔ yɛ nyanya e Mawu Mavɔmavɔ sɛ́ dó ɔ́ lɛ́ wá jǐ tɔn. Davídi ka ɖo kanhún xo wɛ. Bɔ Sawúlu nyi hwǎn e ɖo alɔ tɔn mɛ ɔ́, bó ná xwe Davídi dó dǒ wǔ, Davídi ka sɛ sín nu, bɔ hwǎn ɔ́ byɔ́ dǒ ɔ́ mɛ. Davídi hɔn zǎn ɔ́ mɛ bó gló e. Sawúlu sɛ́ mɛ dó Davídi xwé ɖɔ yě ní ɖo cícɔ́ ɛ wɛ, nú é jɛ zǎnzǎn ɔ́, yě ná hu i. Lo ɔ́, Mikali ɖɔ nú asú tɔn ɖɔ: “Ényí a ma hɔn din zǎn mɛ ǎ nú ayǐ hɔ́n dó we ɔ́, yě ná hu we.” Ée Mikali ɖɔ mɔ̌ nú asú tɔn ɔ́, é sɔ́ ɛ gbɔn flɛtɛ́li nu, bɔ é jɛ te bo hɔn yi. Lě e Davídi gló yě gbɔn é nɛ́. Ée é yi ɔ́, Mikali sɔ́ bǒcyɔ ɖokpó, bó sɔ́ mlɔ́ Davídi zan jí, bó sɔ́ gbɔ̌nyú ɖó bǒcyɔ ɔ́ sín ta bó bú avɔ dó bǐ. Ée mɛ e Sawúlu sɛ́ dó ɖɔ è nǐ wá wlí Davídi ɔ́ lɛ́ɛ wá é ɔ́, Mikali ɖɔ nú yě ɖɔ é kún nyɔ́ n'i ó. Sawúlu lɛ́ lɛ́ kɔ nú mɛ lɛ́ɛ ɖɔ yě ní yi mɔ ɛ. É ɖɔ nú yě ɖɔ: “Mi yi sɔ́ é kpó zan e jí é ɖe ɔ́ kpó wá nú mì ma hu i.” Mɛ lɛ́ɛ yi bó wá, bɔ bǒcyɔ ɔ́ ɖo ayǐmlɔ́mlɔ́ zan ɔ́ jí, bɔ gbɔ̌nyú ɔ́ ɖo ta tɔn. Sawúlu ɖɔ nú Mikali ɖɔ: “Étɛ́wú a ka blɛ́ mì mɔ̌, bó jó kɛntɔ́ ce dó bɔ é yi bó gló mì?” Mikali ka yí gbe nú Sawúlu ɖɔ: “É wɛ ɖɔ nyi ma jó émí dó ǎ ɔ́, émí ná hu mì.” Hwenɛ́nu ɔ́, Davídi hɔn bo gló Sawúlu. É yi Samuwɛ́li gɔ́n ɖo Hlama, bó ɖɔ nǔ e Sawúlu wa xá ɛ é bǐ n'i, bɔ é kpó Samuwɛ́li kpó yi nɔ gbeyíɖɔ Mawu tɔn lɛ́ɛ xwé. È yi ɖɔ nú Sawúlu ɖɔ Davídi ɖo gbeyíɖɔ Mawu tɔn lɛ́ɛ xwé ɖo Hlama. Bɔ Sawúlu sɛ́ mɛ dó ɖɔ è nǐ wlí Davídi wá. Ée yě yi ɔ́, yě mɔ gbeyíɖɔ Mawu tɔn sín gbɛ̌ta ɔ́, bɔ yě ɖo xó e Mawu ɖɔ nú yě lɛ́ɛ ɖɔ wɛ. Samuwɛ́li wɛ ka ɖo yě nu. Yɛ Mawu tɔn jɛ mɛ e Sawúlu sɛ́ dó lɛ́ɛ jí, bɔ yě lɔ jɛ xó e Mawu ɖɔ nú yě ɔ́ ɖɔ jí. È ɖɔ xó nɛ́ lɛ́ɛ nú Sawúlu bɔ é lɛ́ sɛ́ mɛ ɖěvo lɛ́ɛ dó. Ée yě lɔ jɛ dɔ̌n ɔ́, yě jɛ xó e Mawu ɖɔ nú yě lɛ́ɛ ɖɔ jí. É lɛ́ sɛ́ gbɛ̌ta atɔngɔ́ ɔ́ dó, bɔ yě lɔ bló nǔ ɖokpó ɔ́. Bɔ Sawúlu ɖésú gbɔ bo yi Hlama. Ée é jɛ dotɔ ɖaxó e ɖo Sekú ɔ́ kɔn ɔ́, é kanbyɔ́ ɖɔ: “Fí e Samuwɛ́li kpó Davídi kpó ka ɖe?” È yǐ gbe n'i ɖɔ: Yě ɖo gbeyíɖɔ Mawu tɔn lɛ́ɛ xwé ɖo Hlama. Ée é se mɔ̌ ɔ́, é wlí ali ɖidó gbeyíɖɔ Mawu tɔn lɛ́ɛ xwé ɖo Hlama. Ée é ɖo yiyi wɛ ɔ́, Yɛ Mawu tɔn wá jǐ tɔn, bɔ é ɖo xó e Mawu sɔ́ dó nu n'i ɔ́ ɖɔ dó ali wɛ káká yi gbeyíɖɔ Mawu tɔn lɛ́ɛ xwé ɖo Hlama. É lɔmɔ̌ ɖe awu gbeyíɖɔ ɖě lɛ́ɛ ɖɔhun; é lɔ ɖo xó e Mawu Mavɔmavɔ ɖɔ n'i ɔ́ ɖɔ wɛ ɖo Samuwɛ́li nukɔn, bó ɖo wěxo mɔ̌, bó j'ayǐ, bó nɔ mɔ̌ gbe énɛ́ gbe káká bɔ ayǐ hɔ́n. Énɛ́ ɔ́ wú wɛ è nɔ kanbyɔ́ ɖɔ: “Sawúlu lɔ nyí gbeyíɖɔ Mawu tɔn wɛ a?” Davídi hɔn sín gbeyíɖɔ Mawu tɔn lɛ́ɛ xwé ɖo Hlama, bó yi mɔ Jonatáan bo kanbyɔ́ ɛ ɖɔ: “Étɛ́ un wa? Mɛ wɛ un hu a? Hwɛ tɛ́ un ka hu dó tɔ́ towe bɔ é ɖo kú ce ba wɛ sɔ mɔ̌?” Jonatáan yí gbe n'i ɖɔ: “Gbeɖé kpɔ́n, è nǎ hu we ǎ. Tɔ́ ce nɔ ja nǔ ɖěbǔ wa gbé ma ɖó te nú mì ǎ. Étɛ́wú é ká ná hwlá énɛ́ ɔ́ dó mì. Adingban wɛ, nǔ sixú nyí mɔ̌ ǎ.” Davídi lɛ́ yí xó, bó ɖɔ n'i ɖɔ: “Un xwlé Mawu nú we ɖɔ nǔgbó wɛ. Tɔ́ towe tunwun ganjí ɖɔ xɔ́ntɔn towe wɛ un nyí; énɛ́ wú wɛ é má ná ba ɖɔ hwi ní mɔ do ná ǎ, é táá vɛ́ nú we. Amɔ̌, Mawu Mavɔmavɔ nukɔn ɖíe ɖɔ ɖe wɛ un ɖe, bó ɖo ɖiɖɔ wɛ ɖo hwi ɖésúnɔ nukɔn e, afɔ ɖiɖe ɖokpó jɛ́n ɖo kú kpó nyɛ kpó tɛ́ntin.” Jonatáan kanbyɔ́ Davídi ɖɔ: “Étɛ́ a jló nú má bló nú we?” Bɔ Davídi ɖɔ n'i ɖɔ: “Sɔ wɛ mǐ ná ɖu sunwájǐxwe ɔ́, bɔ nyi kpó axɔ́sú ɔ́ kpó ɖó ná jínjɔ́n ayǐ, bó ná ɖu nǔ. Amɔ̌, din ɔ́, nǎ gbe mì nú má yi hɔn bɛ cí gle ɖé mɛ káká jɛ azǎn atɔngbe gbadanu. Tɔ́ towe ná mɔ ɖɔ nyi kún wá ó; ɖɔ n'i ɖɔ nyi byɔ́ gbe émí ɖɔ nyi ná yá wǔ yi Bɛteleyɛ́mu, tɔ́ ce toxo mɛ, bó ná sá xwetavɔ́ xá mɛ ce lɛ́ɛ. Ényí a ɖɔ mɔ̌ n'i nú é ɖɔ é nyɔ́ ɔ́, énɛ́ ɔ́, nyɛ mɛsɛntɔ́ towe sɔ́ ná ɖi xɛsi nú nǔɖé ǎ. Amɔ̌, nú é bɛ́ xomɛsin ɔ́, a nǎ mɔ ɖɔ é ɖo biba ná hu mì wɛ. É jɛ mɔ̌ ɔ́, a nǎ ɖe lě e a yǐ wǎn nú nyɛ mɛsɛntɔ́ towe gbɔn ɔ́ xlɛ́, ɖó mǐ kó nu alɛ ɖo Mawu Mavɔmavɔ nyíkɔ mɛ. É ká nyí nǔ nyanya ɖé wɛ un dó sin hǔn, hwi ɖésúnɔ ní hu mì. É byɔ́ ɖɔ a nǐ sɔ́ mì yi jó nú tɔ́ towe ǎ.” Jonatáan ka sú xó, bó ɖɔ: “Gbeɖé kpɔ́n! Ényí un se ɖɔ tɔ́ ce ɖe gbeta tɔ́n ɖɔ émí ná hu we ɔ́, un ná ɖɔ nú we; Mawu Mavɔmavɔ, Mawu Izlayɛ́li tɔn wɛ un xwlé nú we.” Bɔ Davídi kanbyɔ́ Jonatáan ɖɔ: “Ényí tɔ́ towe ká yí gbe nú we kpó xomɛsin kpó ɔ́, mɛ̌ a ka ná ɖɔ ná bɔ é ná wá ɖɔ nú mì?” Jonatáan ɖɔ nú Davídi ɖɔ: “Wǎ mǐ ní tɔ́n bó yi gle mɛ.” Bɔ yě mɛ we lɛ́ɛ tɔ́n bó ɖidó gle ɔ́ mɛ. Jonatáan ɖɔ nú Davídi ɖɔ: “Un xwlé Mawu Mavɔmavɔ, Mawu Izlayɛ́li tɔn ɔ́ nú we; sɔ abǐ azǎn atɔn gbe gan élɔ́ mɛ lě ɔ́, un ná kan nǔ byɔ́ tɔ́ ce dó nǔ e lin dó wǔtu towe wɛ é ɖe ɔ́ wú. Ényí é má lin nǔ nyanya ɖé dó wǔtu towe ǎ ɔ́, un ná ɖɔ sɛ́ dó we. Nú é ká lin nǔ nyanya dó wǔtu towe, bónú un ma ɖɔ sɛ́ dó we ǎ hǔn, Mawu Mavɔmavɔ ní sɔ́ mì dó wa nǔ e jló e lɛ́ɛ bǐ ná. Énɛ́ ɔ́, un ná jó we dó bɔ a nǎ yi kpódó fífá kpó. Mawu Mavɔmavɔ ní nɔ kpɔ́ xá we, lě e é nɔ kpɔ́ xá tɔ́ ce gbɔn ɖ'ayǐ é. Ényí un kpo ɖo gbɛ jɛ́n wɛ ɔ́, a nǎ ɖe xomɛnyínyɔ́ Mawu Mavɔmavɔ tɔn xlɛ́ mì, bɔ un ná kú ǎ. Ma ɖe xomɛnyínyɔ́ towe sín xwédo ce wú gbeɖé ó. Ényí Mawu Mavɔmavɔ ná bo wá ɖo kɛntɔ́ towe lɛ́ɛ ɖokpó ɖokpó ná ɖe sín ayǐkúngban jí fí wɛ hǔn, ma ɖe xomɛnyínyɔ́ towe sín xwédo ce wú ó.” Jonatáan nu alɛ xá Davídi xwédo ɔ́ bó ɖɔ: “Mawu Mavɔmavɔ ma kan nǔ byɔ́ Davídi ǎ ɔ́, é ká ná kanbyɔ́ kɛntɔ́ tɔn lɛ́ɛ.” Jonatáan lɛ́ ɖɔ nú Davídi ɖɔ é ní xwlé nǔ ɖɔ émí yí wǎn nú émí. Đó Jonatáan yí wǎn nú Davídi é ɖésúnɔ ɖɔhun. Jonatáan lɛ́ ɖɔ nú Davídi ɖɔ: “Sɔ wɛ è nǎ ɖu sunwájǐxwe ɔ́; tɛn towe mɛ ná nɔ vɔ̌ bɔ è nǎ tunwun ɖɔ hwi kún wá ó. Azǎn atɔngbe ɔ́, a nǎ hun káká yi fí e a hɔn hwlá cí gbe énɛ́ ɔ́ gbe é, bó ná nɔ Ezɛ́li wínnya kpá. Bɔ un ná da gǎ atɔn sɛ́ dó fí e a hɔn hwlá cí ɔ́, nǔɖé da gǎ dó wɛ un ɖe ɖɔhun. Un bló mɔ̌ fó ɔ́, un ná ɖɔ nú mɛsɛntɔ́ ce ɖɔ: ‘Yi fɔ gǎ lɛ́ɛ wá nú mì.’ Ényí un ka ɖɔ n'i ɖɔ: ‘Kpɔ́n, gǎ lɛ́ɛ yi nukɔn sɔ mɔ̌ ǎ, lɛ̌ kɔ wá fɔ yě wá nú mì;’ ényí un ɖɔ mɔ̌ ɔ́, a nǎ tunwun ɖɔ nǔɖé kún ɖo émí ná gbo wɛ ó, bɔ a hɛn ɔ́, a nǎ lɛ́ kɔ wá. Xɛsi ɖ'é mɛ ǎ, un xwlé Mawu nú we ɖɔ: Mawu Mavɔmavɔ ɖo gbɛ! Ényí un ka ɖɔ nú mɛsɛntɔ́ ce ɖɔ: ‘Gǎ lɛ́ɛ nɛ́ ɖo nukɔn dɔ̌n nɛ́;’ ényí un ɖɔ mɔ̌ ɔ́, a nǎ hɔn, ɖó Mawu Mavɔmavɔ wɛ ɖɔ hwi ní yi nɛ́. Alɛ e nyi kpó hwi kpó nu ɔ́, Mawu Mavɔmavɔ ná bló bɔ mǐ ná nɔ gbejí ná káká sɔ́yi.” Nǔgbó ɔ́, Davídi yi hɔn hwlá cí gle ɔ́ mɛ. Gbe e gbe è ɖo sunwájǐxwe ɔ́ ɖu wɛ ɔ́, axɔ́sú ɔ́ jínjɔ́n ayǐ bó ná ɖu nǔ. Axɔ́sú ɔ́ jínjɔ́n fí e é kó nɔ jínjɔ́n ɖ'ayǐ é, ɖo dǒ wú. Ahwangán Avunɛ́ɛ jínjɔ́n akpá tɔn, bɔ Jonatáan ɖo te. Davídi sín tɛnmɛ ka ɖo vɔ̌. Gbe nɛ́ ɔ́ gbe ɔ́, Sawúlu ɖɔ xó ɖé ǎ, ɖó é ɖo ɖiɖɔ wɛ ɖɔ é sixú nyí mǐmɛ́ jí wɛ é má ɖe ǎ wú wɛ é ná kó gɔn. Xwe ɔ́ sín azǎn wegɔ́ ɔ́ gbe ɔ́, Davídi tɛn mɛ lɛ́ kpo ɖo vɔ̌, bɔ Sawúlu kanbyɔ́ Jonatáan ɖɔ: “Étɛ́wú Jɛsée vǐ ɔ́ má ka wá ɖu nǔ sɔ ǎ? Étɛ́wú é má ká lɛ́ wá égbé ǎ?” Jonatáan yí gbe nú tɔ́ ɔ́ ɖɔ: “É byɔ́ gbe mì ɖɔ émí ná yi Bɛteleyɛ́mu. É ɖɔ nú mì ɖɔ nyɛ ní kɛnklɛ́n ná gbe émí nú émí ná yi Bɛteleyɛ́mu, ɖɔ nɔví émítɔn ɖɔ émí ní má gɔn nǔwiwa ɔ́ do mɛ gbeɖé ó. É ɖɔ nú mì ɖɔ ényí xɔ́ntɔn jɛ́n nyɛ kpó émí kpó nyí hǔn, nyɛ ní ná gbe émí, bónú émí ná yi xwetavɔ́ e sá gbé hɛ̌nnu émítɔn ja ɔ́ do mɛ. Énɛ́ ɔ́ wɛ zɔ́n bɔ é má wá ɖu nǔ ǎ.” Ée Jonatáan ɖɔ mɔ̌ ɔ́, Sawúlu wlí xomɛsin, bó ɖɔ n'i ɖɔ: “Avǔnví. Hwi kpó Jɛsée ví ɔ́ kpó nyí xɔ́ntɔn ɔ́, un tunwun ǎ wɛ a vɛdó a? Hwi kpó nɔ towe kpó bǐ ná ɖu winnyá. Đǒtó mì ganjí! Nya énɛ́ ɔ́ kpo ɖo gbɛ jɛ́n wɛ ɔ́, a sixú ɖu axɔ́sú ǎ. Énɛ́ ɔ́ wú wɛ a nǎ sɛ́ mɛ dó bɔ è nǎ yi wlí i bó kplá ɛ wá fí din, ɖó è ɖǒ ná hu i.” Jonatáan ka kanbyɔ́ tɔ́ tɔn ɖɔ: “Étɛ́wú è ka ná hu i? Étɛ́ é wa?” Ée é ɖɔ mɔ̌ ɔ́, Sawúlu sɔ́ hwǎn tɔn dó jǐ tɔn, bó jló ná hu i, bɔ Jonatáan mɔ nǔ jɛ wú ɖɔ tɔ́ émítɔn jló ná hu Davídi nǔgbó. Bɔ Jonatáan sí te sín nǔɖuɖu ká ɔ́ kɔn kpó xomɛsin kpó, bó sɔ́ ɖu nǔ xá yě gbe énɛ́ ɔ́ gbe ǎ; wǔ kú i ɖó Davídi wú, ɖó tɔ́ tɔn zun i ɖésú. Ayǐhɔ́ngbe tɔn zǎnzǎn ɔ́, Jonatáan yi gle mɛ fí e é kpó Davídi kpó ko ɖɔ é, bɔ é kpó nyaví kpɛví ɖé kpó zɔn. É ɖɔ nú nyaví ɔ́ ɖɔ: “Bɛ̌ wezun bo jɛ nukɔn bónú gǎ e un ná da lɛ́ɛ ɔ́, a na cyán yě wá nú mì.” Nyaví ɔ́ bɛ́ wezun bɔ Jonatáan da gǎ ɖokpó bɔ é zɛ nyaví ɔ́ wú. Ée nyaví ɔ́ yi fí e gǎ e Jonatáan da ɔ́ jɛ ɔ́, Jonatáan sú xó bó ɖɔ: “É má nyí gǎ ɔ́ nɛ́ ɖo nukɔn dɔ̌n nɛ́ a?” É lɛ́ sú xó bó ɖɔ nú nyaví ɔ́ ɖɔ: “Ya wǔ yi zé gǎ ɔ́ wá; ma nɔ te ó.” Bɔ nyaví ɔ́ yi zé gǎ ɔ́, bó wá gǎn tɔn gɔ́n. Nyaví kpɛví ɔ́ mɔ do nú nǔɖé ǎ. Jonatáan kpó Davídi kpó kɛ́ɖɛ́ wɛ tunwun nǔ e wa wɛ yě ɖe é. Jonatáan sɔ́ da tɔn kpó gǎ tɔn lɛ́ɛ kpó nú nyaví kpɛví ɔ́ ɖɔ ní zé yi xwé gbe. Ée nyaví ɔ́ ɖidó ɔ́, Davídi tɔ́n sín gle ɔ́ sín afɔligbé, bó wá xwe agbɔ̌nnusú do, bó ɖe kɔ́ azɔn atɔn, bɔ xɔ́ntɔn xɔ́ntɔn we lɛ́ɛ zunfán yěɖée, bó y'avǐ káká. Davídi wɛ ka y'avǐ tawun. Énɛ́ ɔ́ gúdo ɔ́, Jonatáan ɖɔ nú Davídi ɖɔ: “Yi dó fífá mɛ, bó ká flín alɛ e mǐ nu ɖo Mawu Mavɔmavɔ nyíkɔ mɛ bó ɖɔ: ‘Mawu Mavɔmavɔ ní bló bónú alɛ e nyi kpó hwi kpó nu ɔ́, mǐ ní nɔ gbejí ná káká sɔ́yi, bónú vǐ e mǐ nǎ ji lɛ́ɛ lɔ ní nɔ gbejí ná.’ ” Énɛ́ ɔ́, Davídi ɖidó, bɔ Jonatáan ka lɛ́ kɔ yi toxo ɔ́ mɛ. Davídi yi vɔ̌sánú-xwlémawutɔ́ Aximɛlɛ́ki gɔ́n, ɖo Nɔvu. Ée Aximɛlɛ́ki mɔ ɛ ɔ́, é bɛ́ wezun yi kpé e adohu adohu, bó kanbyɔ́ ɛ ɖɔ: “Étɛ́wú hwi ɖokpó ka zɔn? Mɛ ɖé xwedó we ǎ wɛ a?” Davídi ka yí gbe nú vɔ̌sánú-xwlémawutɔ́ ɔ́ ɖɔ: “Axɔ́sú ɔ́ wɛ zɔ́n nǔ mì bó ɖɔ mɛɖé ní má tunwun nǔ e émí zɔ́n nyi ɔ́ ó; énɛ́ ɔ́ wú wɛ un ɖó goxo nú mɛ ce lɛ́ɛ ɖó fí ɖé. Din ɔ́, nǔɖuɖu tɛ́ wɛ ɖo así we ɖo fínɛ́? Nǎ wɔ̌xúxú atɔ́ɔ́n mì, abǐ a ɖǒ nǔɖé hǔn, nǎ mì.” Vɔ̌sánú-xwlémawutɔ́ ɔ́ ka ɖɔ nú Davídi ɖɔ: “Wɔ̌xúxú yǎyá ɖé ɖo fí ǎ, amɔ̌, wɔ̌xúxú e è xwlé Mawu é jɛ́n ɖo fí. Ényí mɛ towe lɛ́ɛ ma ɖó xó xá nyɔ̌nu ǎ ɔ́, yě hɛn ɔ́, yě ná ɖu.” Davídi yí gbe nú vɔ̌sánú-xwlémawutɔ́ ɔ́ ɖɔ: “È dǒ nyɔ̌nu biba sɛ́n nú mǐ lě e un xwe ahwan ɖ'ayǐ ɔ́, è nɔ dó nú mì gbɔn é. Ahwanfunnú mɛ ce lɛ́ɛ tɔn bǐ wɛ nyí nǔ mímɛ́. Ényí nǔ e wa wɛ mǐ ɖe ɔ́ ná bó nyí su ɔ́, égbé din ɔ́, ahwanfunnú lɛ́ɛ ná zɔ́n bɔ é ná nyí nǔ mímɛ́ vɔ́vɔ́.” Énɛ́ ɔ́, vɔ̌sánú-xwlémawutɔ́ ɔ́ gbɔ bó ná ɛ wɔ̌xúxú e è xwlé Mawu é, ɖó wɔ̌xúxú ɖěvo sɔ́ ɖo fínɛ́ zɛ ée è xo ɖɛ d'é jí bó ɖe sín vɔ̌sákpe Mawu Mavɔmavɔ tɔn ɔ́ jí é wú ǎ. Wɔ̌xúxú énɛ́ ɔ́, è ka ɖe síin gbeɖé ɔ́, è nɔ sɔ́ wɔ̌xúxú zozo ɖěvo ɖó tɛn tɔn mɛ. Gbe nɛ́ ɔ́ gbe ɖokpó ɔ́, mɛsɛntɔ́ Sawúlu tɔn lɛ́ɛ ɖokpó ɖo goxɔ Mawu Mavɔmavɔ tɔn mɛ bó ná wa sinsɛnzɔ́. Nya Edɔ́munu ɖé wɛ, bɔ nyǐkɔ tɔn nɔ nyí Dowɛgi; é wɛ nyí gbɛtɔ́ nukúnɖéjí e ɖo lɛ̌ngbɔ́nyitɔ́ Sawúlu tɔn lɛ́ɛ mɛ é. Davídi ɖɔ nú Aximɛlɛ́ki ɖɔ: “A ɖǒ hwǐ ɖé, abǐ hwǎn ɖé ɖo fínɛ́ ǎ cé? Đó nǔ e axɔ́sú ɔ́ zɔ́n mì ɔ́ myá nukún káká bɔ un sixú sɔ́ hwǐ ce ǎ, un ká sɔ́ ahwanfunnú ce ɖěbǔ ǎ.” Vɔ̌sánú-xwlémawutɔ́ ɔ́ ɖɔ: “Nya Filisitɛ́ɛn e a hu ɖo tɔdo Telebɛ́ntitín tɔn mɛ bɔ è nɔ ylɔ́ ɛ ɖɔ Goliyati ɔ́, hwǐ tɔn ɖo fí. È bǔ avɔ dó bɔ é ɖo efódu ɔ́ gúdo; é jló we hǔn, yi sɔ́; mǐ sɔ́ ɖó hwǐ ɖěvo hú énɛ́ ɔ́ ǎ.” Davídi ɖɔ: “Un sɔ́ ná mɔ hwǐ ɖě bɔ é ná nyɔ́ hú énɛ́ ɔ́ ǎ, sɔ́ nú mì.” Gbe énɛ́ ɔ́ gbe ɖokpó ɔ́, Davídi kpo ɖo hinhɔn nú Sawúlu wɛ bó yi cí Gati xɔ́sú Akíci gɔ́n. Mɛsɛntɔ́ Akíci tɔn lɛ́ɛ ɖɔ: “É má nyí Davídi toxɔ́sú ɔ́ nɛ́ a? É má nyí é ɖú we ná wɛ nyɔ̌nu lɛ́ɛ nɔ ɖe, bó nɔ ɖo han ji wɛ, bó nɔ ɖɔ: ‘Sawúlu hu kɛntɔ́ afatɔ́n (1.000). Davídi ka hu kɛntɔ́ děgba we afɔwó (10.000)’ ” a? Ée Davídi se xó nɛ́ lɛ́ɛ ɔ́, é jɛ xɛsi ɖi dó Gati xɔ́sú ɔ́ wú jí tawun. É jɛ nǔwanǔmɔnɔ vlɛ́ jí, bó nɔ ɖo xó gbló ɖé lɛ́ɛ ɖɔ wɛ ɖo nukɔn yětɔn. É nɔ wlán nǔ dó hɔn lɛ́ɛ wú, bó nɔ ɖo dɛ lun dó atán mɛ wɛ. Akíci ɖɔ nú mɛsɛntɔ́ tɔn lɛ́ɛ ɖɔ: “Mi mɔ din ɖɔ dǎwe élɔ́ ɔ́, nǔwanǔmɔnɔ wɛ ǎ cé? Étɛ́wú mi ka kplá ɛ wá nú mì? Nǔwanǔmɔnɔ jɛ́n hán mì bɔ mi yi kplá éyɛ́ wá nú mì bɔ é ná vlɛ́ manahɛn nú mì a? Mɛ énɛ́ ɔ́ ná byɔ́ xwé ce gbe ǎ.” Davídi gosín Gati, bó hɔn yi cí sóxo mɛ ɖo Adulámu. Nɔví tɔn lɛ́ɛ kpó mɛ e ɖo tɔ́ tɔn xwé lɛ́ɛ bǐ kpó se mɔ̌ bó yi mɔ ɛ ɖo dɔ̌n. Mɛ e adǎn ɖo gbigbo wɛ lɛ́ɛ, mɛ e axɔ́ ɖo kɔ ná lɛ́ɛ, kpó mɛ e xomɛ ma hun ǎ lɛ́ɛ kpó bǐ hɔn yi su i; yě ná yi gbɛtɔ́ afɔwe (400) mɔ̌, bɔ é húzú gǎn yětɔn. Davídi gosín Adulámu, bó yi Misipée ɖo Mɔwabu yíkúngban jí, bó ɖɔ nú axɔ́sú Mɔwabu tɔn ɖɔ: “Kɛnklɛ́n bó ná gbe nú tɔ́ ce kpó nɔ ce kpó ná wá nɔ fí káká jɛ hwenu e un ná tunwun nǔ e ná sɔ́ mì dó wa ná wɛ Mawu ɖe é.” Davídi kplá yě yi ɖó axɔ́sú Mɔwabu tɔn ɔ́ xwé, bɔ yě nɔ́ fínɛ́ káká jɛ hwenu e Davídi tɔ́n sín fí e é yi cí, bɔ mɛɖé ma sixú kpé wǔ tɔn ɖe ǎ é. É wá su gbe ɖokpó bɔ gbeyíɖɔ Mawu tɔn Gadi ɖɔ nú Davídi ɖɔ: “Ma nɔ fí élɔ́ e a wǎ hɔn hwlá cí é ó, yi Judáa tomɛ.” Ée é ɖɔ mɔ̌ ɔ́, Davídi yi nǔgbó bó yi cí Ɛlɛti zungbó mɛ. Sawúlu se ɖɔ mɛɖé lɛ́ɛ tunwun fí e Davídi kpó mɛ tɔn lɛ́ɛ kpó ɖe é. Hwenɛ́nu ɔ́, Sawúlu ɖo só ɖé jí ɖo Giveya, bó ɖo ayǐjínjɔ́n ɖo tamalisitín ɖé sá, bɔ hwǎn tɔn ɖo alɔ tɔn mɛ. Mɛsɛntɔ́ tɔn lɛ́ɛ bǐ ɖo fínɛ́ xá ɛ. Bɔ é ɖɔ nú yě ɖɔ: “Bɛnjamɛ́ɛnu e mi, mi ɖótó mì ganjí. Jɛsée ví ɔ́ ná ná gle kpó vǐwungbo kpó mi bǐ nyɛ ɖɔhun wɛ mi vɛdó a? É ná sɔ́ mi ahwangán, bɔ mɛ ɖě ná nyí sɔ́ja afatɔ́ngán, bɔ mɛ ɖé lɛ́ɛ ná nyí sɔ́ja kanwekogán mi vɛdó a? Gbeɖé kpɔ́n! Étɛ́wú mi bǐ ká blá gbě ce, bɔ mɛ ɖěbǔ sixú ɖɔ nú mì ɖɔ vǐ ce kpó Jɛsée ví ɔ́ kpó nu alɛ ǎ? Hǔn nǔ ce blá wǔ nú mɛ ɖěbǔ ɖo mi mɛ, bónú mɛ ɔ́ ná ɖɔ nú mì ɖɔ vǐ ce fɔ́n Jɛsée ví ɔ́ dó jǐ ce ǎ cé? Nǔ énɛ́ ɔ́ wɛ zɔ́n din bɔ Jɛsée ví ɔ́ ɖó mɔ nú mì lě e é bló gbɔn égbé din é.” Nya Dowɛgi Edɔ́munu ɔ́ ká ɖo Sawúlu sín mɛ lɛ́ɛ mɛ. Éyɛ́ yí xó bó ɖɔ: “Un mɔ Jɛsée ví ɔ́ gbe ɖokpó, bɔ é wá Aximɛlɛ́ki Axitúvu ví ɔ́ gɔ́n ɖo Nɔvu, bɔ Aximɛlɛ́ki kan nǔ byɔ́ Mawu Mavɔmavɔ n'i, bó dó nǔɖuɖu gban n'i, bó lɛ́ sɔ́ hwǐ Goliyati Filisitɛ́ɛn ɔ́ tɔn n'i.” Ée é ɖɔ mɔ̌ ɔ́, axɔ́sú ɔ́ sɛ́ mɛ dó vɔ̌sánú-xwlémawutɔ́ Aximɛlɛ́ki Axitúvu ví ɔ́, kpó mɛ e ɖo hɛ̌n tɔn nu, bó nyí vɔ̌sánú-xwlémawutɔ́ ɖo Nɔvu lɛ́ɛ bǐ kpó gbé mɛ, bɔ yě bǐ wǎ axɔ́sú ɔ́ gɔ́n. Ée yě wá ɔ́, Sawúlu ɖɔ nú Aximɛlɛ́ki ɖɔ: “Axitúvu ví, ɖǒtó mì.” Bɔ nya ɔ́ ɖɔ: “Un ɖo tó ɖó mɛ wɛ sɛ́mɛɖó.” Bɔ Sawúlu kanbyɔ́ ɛ ɖɔ: “Étɛ́wú hwi kpó Jɛsée ví ɔ́ kpó ká blá gbě ce? Étɛ́wú a ka dó nǔɖuɖu gban n'i, bó lɛ́ kan nǔ byɔ́ Mawu n'i, bónú é ná fɔ́n gǔ dó jǐ ce, bó ná ɖó mɔ nú mì lě e é bló gbɔn égbé din é?” Aximɛlɛ́ki ka yí gbe nú axɔ́sú ɔ́ ɖɔ: “Mɛsɛntɔ́ mɛtɔn lɛ́ɛ ɖě tɛ́ ka ɖo gbejí nú mɛ Davídi ɖɔhun? Éyɛ́ ɔ́, vǐ mɛtɔn sú wɛ. É wɛ kpa acɛ dó sɔ́ja e nɔ cɔ́ mɛ lɛ́ɛ nu, bɔ mɛ e ɖo hɔnmɛ lɛ́ɛ bǐ nɔ sɔ́ ɛ su. Gbe énɛ́ gbe wɛ un jɛ nǔ kanbyɔ́ Mawu n'i jí a? Éeǒ. È ma dó hwɛ ɖěbǔ nyɛ mɛsɛntɔ́ mɛtɔn ɔ́ ó, è ma ka dó hwɛ mɛ ce lɛ́ɛ ɖěbǔ ó, ɖó un mɔ do nú nǔ énɛ́ lɛ́ɛ ɖokpó lě ǎ.” Ée Aximɛlɛ́ki ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Un ná hu hwi kpó mɛ e ɖo hɛ̌n towe nu lɛ́ɛ bǐ kpó.” Ée axɔ́sú ɔ́ ɖɔ mɔ̌ ɔ́, é ɖɔ nú sɔ́ja e nɔ kplá ɛ lɛ́ɛ ɖɔ: “Mi hu vɔ̌sánú-xwlémawutɔ́ lɛ́ɛ, ɖó yě lɔ nɔ Davídi jí. Yě tunwun ganjí ɖɔ hinhɔn yi wɛ é ɖe, bó ká gba kpá nú mì ǎ.” Lo ɔ́, mɛ e axɔ́sú ɔ́ ná gbe lɛ́ɛ jló ná hu yě ǎ. Bɔ axɔ́sú ɔ́ ɖɔ nú Dowɛgi ɖɔ: “Sí te bo hu vɔ̌sánú-xwlémawutɔ́ lɛ́ɛ.” Bɔ Dowɛgi hu mɛ e ɖó acɛ bo nɔ dó vɔ̌sánú-xwlémawutɔ́ sín awu é kanwe atɔ́ɔ́n (85) gbe nɛ́ gbe. Sawúlu lɛ́ ná gbe bɔ è hu mɛxó kpó yɔkpɔ́vú kpó súnnu, nyɔ̌nu, vǐ ɖo anɔ̌nu, nyibú, tócí, gbɔ̌ kpó lɛ̌ngbɔ́ kpó e ɖo Nɔvu vɔ̌sánú-xwlémawutɔ́ lɛ́ɛ sín toxo mɛ lɛ́ɛ bǐ. Mɛ ɖokpó géé wɛ kpé wú bó hɔn; è nɔ ylɔ́ ɛ ɖɔ Abiyatáa. Aximɛlɛ́ki ví wɛ, bó nyí Axitúvu vívú. É hɔn yi su Davídi, bo ɖɔ n'i ɖɔ: “Sawúlu hu vɔ̌sánú-xwlémawutɔ́ lɛ́ɛ bǐ.” Bɔ Davídi ɖɔ n'i ɖɔ: “Un tunwun ganjí ɖɔ Dowɛgi Edɔ́munu e ɖo fínɛ́ gbe nɛ́ gbe ɔ́ kún ná gɔn ɖiɖɔ nú Sawúlu ó. Nyi wú wɛ è hu mɛ towe lɛ́ɛ bǐ. Nɔ fí xá mì. Ma ɖi xɛsi ó, ɖó mɛ e ɖo biba ná hu mì wɛ ɔ́ ɖo hwi lɔ ba ná hu wɛ. A ka ɖo gɔ̌n ce ɔ́, nǔɖé ná wa we ǎ.” É wá su gbe ɖokpó, bɔ mɛ ɖokpó wá ɖɔ nú Davídi ɖɔ: “ Filisitɛ́ɛn lɛ́ɛ yi tɔ́n ahwan Keyila toxo ɔ́, bó bɛ́ jinukún e è kplé ɖó fí e è nɔ só jinukún ɖe lɛ́ɛ bǐ.” Ée Davídi se mɔ̌ ɔ́, é kan nǔ byɔ́ Mawu Mavɔmavɔ ɖɔ: “Má yi fun ahwan xá Filisitɛ́ɛn lɛ́ɛ a?” Bɔ Mawu Mavɔmavɔ yí gbe n'i ɖɔ: “Yi, a nǎ ɖu ɖo Filisitɛ́ɛn lɛ́ɛ jí, bó ná hwlɛ́n Keyila toxo ɔ́ gán.” Lo ɔ́, Davídi sín mɛ lɛ́ɛ ɖɔ n'i ɖɔ: “Mǐ ɖíe kó ɖo xɛsi ɖi wɛ ɖo Judáa fí din e, mǐ ká yi Keyila bó ná tɔ́n ahwan Filisitɛ́ɛn lɛ́ɛ ɔ́, nɛ̌ ká ná nyí gbɔn lo?” Énɛ́ ɔ́, Davídi lɛ́ kan nǔ byɔ́ Mawu Mavɔmavɔ, bɔ Mawu Mavɔmavɔ yí gbe n'i ɖɔ: “Sɔ́ nǔ bó yi Keyila, ɖó un ná jó Filisitɛ́ɛn lɛ́ɛ nú we.” Nǔgbó ɔ́, Davídi kpó mɛ tɔn lɛ́ɛ kpó yi Keyila, bó yi fun ahwan xá Filisitɛ́ɛn lɛ́ɛ, bó gba yě bǐ gbídí gbídí, bó bɛ́ kanlin yětɔn lɛ́ɛ wá yi xwé. Lě e Davídi hwlɛ́n Keyilanu lɛ́ɛ gán gbɔn é nɛ́. Hwenu e Abiyatáa Aximɛlɛ́ki ví ɔ́ hɔn xwe Davídi gɔ́n ɖo Keyila ɔ́, é hɛn nǔ e è nɔ dó kan nǔ byɔ́ Mawu ɔ́ alɔ mɛ. Sawúlu se ɖɔ Davídi wá Keyila; ée é se mɔ̌ ɔ́, é ɖɔ: “Mawu jó Davídi nú mì, ɖó é wá sú éɖée dó toxo e ɖó hɔntogbó, bɔ è nɔ dó gan mɛ é mɛ.” Sawúlu ylɔ́ ahwanfuntɔ́ lɛ́ɛ bǐ kplé, nú yě ná nyi ahwan, bó ná yi xá Davídi kpó mɛ tɔn lɛ́ɛ kpó ɖo Keyila toxo ɔ́ mɛ. Davídi se nǔ baɖabaɖa e lin dó wǔ tɔn wɛ Sawúlu ɖe é, bó ɖɔ nú vɔ̌sánú-xwlémawutɔ́ Abiyatáa ɖɔ: “Sɔ́ nǔ e è nɔ dó kan nǔ byɔ́ Mawu ɔ́ wá.” Bɔ Davídi ɖɔ: “Mawu Mavɔmavɔ, Mawu Izlayɛ́li tɔn, nyɛ mɛsɛntɔ́ towe se ɖɔ Sawúlu jló ná wá Keyila, bó ná wá gba toxo ɔ́ bǐ ɖó nyɛ wú. Ényí Sawúlu wá ɔ́, Keyilanu lɛ́ɛ ná jó mì n'i wɛ a? Sawúlu ka jǎwe nǔgbó lě e nyɛ mɛsɛntɔ́ towe se gbɔn é a? Mawu Mavɔmavɔ, Mawu Izlayɛ́li tɔn, kɛnklɛ́n bó ɖe xlɛ́ nyɛ mɛsɛntɔ́ towe.” Bɔ Mawu Mavɔmavɔ yí gbe nú Davídi ɖɔ: “Sawúlu ná wá.” Davídi lɛ́ kanbyɔ́ ɖɔ: “Keyilanu lɛ́ɛ ná jó nyɛ kpó mɛ ce lɛ́ɛ kpó nú Sawúlu wɛ a?” Bɔ Mawu Mavɔmavɔ yí gbe n'i ɖɔ: “Yě ná jó mi n'i.” Ée Davídi se mɔ̌ ɔ́, é yá wǔ sɔ́ nǔ, é kpó mɛ tɔn lɛ́ɛ kpó. Mɛ tɔn lɛ́ɛ ná yi gbɛtɔ́ nǔwɔntɔn mɔ̌ (600), bɔ yě tɔ́n sín Keyila toxo mɛ, bó byɔ́ gbɛ ɔ́ mɛ ɖidó. Ée Sawúlu se ɖɔ Davídi hɔn sín Keyila toxo mɛ ɔ́, é ɖó ahwan e ná fun wɛ é ɖe ɔ́ te. Davídi yi gbětótló Zifu tɔn mɛ, bó yi cí sókan mɛ fí e è ma ná sixú kpé wǔ tɔn ɖe ǎ é. Sawúlu fɔ́n ɔ́, é nɔ ɖo Davídi ba wɛ, Mawu ka jó e n'i ǎ. Ée Davídi mɔ ɖɔ Sawúlu dó ahwan gbě, bó ɖo émí ná hu wɛ ɔ́, é cí gbětótló Zifu tɔn mɛ ɖo Holɛ́ca. É wá su gbe ɖokpó bɔ Jonatáan Sawúlu ví ɔ́ yi mɔ Davídi ɖo Holɛ́ca, bó dó wǔsyɛ́n lanmɛ n'i, ɖɔ é ní ɖeji dó Mawu wǔ. É ɖɔ n'i ɖɔ: “Ma ɖi xɛsi nú nǔ ɖěbǔ ó, ɖó tɔ́ ce Sawúlu sixú wlí we ǎ. A nǎ ɖu axɔ́sú ɖo Izlayɛ́li, bɔ nyɛ ná bɔ dó wǔ we, bó ná nɔ glɔ́ towe. Tɔ́ ce ɖésú tunwun mɔ̌ ganjí.” Ée é ɖɔ mɔ̌ ɔ́, yě mɛ we lɛ́ɛ nu alɛ ɖo Mawu Mavɔmavɔ nyíkɔ mɛ. Davídi ka cí Holɛ́ca, bɔ Jonatáan yi xwé. Zifunu ɖé lɛ́ɛ yi Sawúlu gɔ́n ɖo Giveya, bó ɖɔ n'i ɖɔ: “Davídi hɔn wá cí to mǐtɔn mɛ ɖo Holɛ́ca fí e è ma sixú kpé wǔ tɔn ɖe ǎ é, ɖo Hakila só ɔ́ jí, ɖo zunkan ɔ́ sín afɔligbé. Sɛ́mɛɖó, ényí a ɖo biba ná wlí i wɛ ɔ́, vɛ̌ kó wá kpowun, mǐdɛɛ lɛ́ɛ ná jó e nú we.” Sawúlu ɖɔ nú yě ɖɔ: “Mawu Mavɔmavɔ ní xo ɖɛ dó mi jí, ɖó nǔ ce blá wǔ nú mi. Mi kɛnklɛ́n bó lɛ́ yi gǔdo, bó yi ba do ná céɖécéɖé, bó ná tunwun fí e é ɖe é, bó ná tunwun mɛ e mɔ ɛ ɖo fínɛ́ é, ɖó un se ɖɔ é bí ɖésú. Mi ba do ná, bó tunwun fí e é nɔ hɔn hwlá cí lɛ́ɛ bǐ, bó lɛ́ kɔ wá mɔ mì, bó ná ɖɔ fí e é ɖe tawun ɔ́ nú mì. Énɛ́ ɔ́, un ná xwedó mi yi. Ényí to ɔ́ mɛ jɛ́n é ɖe ɔ́, un ná ba ɛ gbɔn Judáa yíkúngban ɔ́ jí káká bó ná mɔ ɛ.” Ée Sawúlu ɖɔ mɔ̌ ɔ́, Zifunu lɛ́ɛ lɛ́ kɔ yi xwé. Hwenɛ́nu ɔ́, Davídi kpó mɛ tɔn lɛ́ɛ kpó ká ɖo gbětótló Mawɔ́ni tɔn ɔ́ sín dodomɛ, ɖo zunkan ɔ́ sín afɔligbé. Sawúlu kpó mɛ tɔn lɛ́ɛ kpó yi Davídi ba gbé, bɔ è gba kpá tɔn nú Davídi, bɔ é yi cí awǐnnya kan mɛ, ɖo gbětótló Mawɔ́ni tɔn ɔ́ mɛ. Ée Sawúlu se mɔ̌ ɔ́, élɔ́ yi gbětótló Mawɔ́ni tɔn ɔ́ mɛ, bó ɖo Davídi ba wɛ. Sawúlu ɖo zɔnlin ɖi gbɔn só ɔ́ sín akpá ɖě xwé wɛ ɔ́, Davídi ɔ́ nɔ ɖo zɔnlin ɖi gbɔn akpá ɖě ɔ́ xwé wɛ, é kpó mɛ tɔn lɛ́ɛ kpó. Davídi ɖo hwlɛ̌nhwlɛ́n dó wɛ bó ná gló Sawúlu. Lo ɔ́, Sawúlu kpó ahwan tɔn lɛ́ɛ kpó ko ɖo Davídi kpó mɛ tɔn lɛ́ɛ kpó ná xá wɛ hwenɛ́nu, bó ná wlí yě. Énɛ́ ɖɔ wɛ è ɖe bɔ mɛ ɖokpó wá ɖɔ nú Sawúlu ɖɔ: “Yǎ wǔ bó wá yi xwé, ɖó Filisitɛ́ɛn lɛ́ɛ wá tɔ́n ahwan to mǐtɔn.” Énɛ́ ɔ́, Sawúlu lɛ́ kɔ sín Davídi gúdo, bó yi ahwan fun xá Filisitɛ́ɛn lɛ́ɛ gbé. Énɛ́ ɔ́ wú wɛ è nɔ ylɔ́ fí énɛ́ ɔ́ ɖɔ Sela-Hamahlekɔti, tínmɛ tɔn wɛ nyí awǐnnya e kɔn yě jǒ yěɖée dó ɖe é. Davídi hɔn sín Zifu, bó yi cí Eyinu-Gɛdi, ɖo fí e mɛɖé má ná sixú kpé wǔ tɔn ɖe ǎ é. Ée Sawúlu nya Filisitɛ́ɛn lɛ́ɛ yi ɖó bó wá ɔ́, é se ɖɔ Davídi ɖo gbětótló Eyinu-Gɛdi tɔn mɛ. Ée Sawúlu se mɔ̌ ɔ́, é cyán súnnu glegbenu afɔwó-afatɔ́n donu atɔn (3.000) ɖo Izlayɛ́li to ɔ́ mɛ, bó jɛ Davídi kpó mɛ tɔn lɛ́ɛ kpó gbé mɛ, bó hun káká yi gbǎgbá gbě tɔn lɛ́ɛ sín awǐnnya lɛ́ɛ kɔn. Sawúlu wá ɖo gbɔ̌kpó e ɖo ali ɔ́ kpá lɛ́ɛ kɔn gbɔn wɛ, bó mɔ sónu ɖé, bó byɔ́ mɛ, bó ná yi afɔ jí. Davídi kpó mɛ tɔn lɛ́ɛ kpó ká ɖo sónu ɔ́ mɛ ɖo nukɔn. Davídi sín mɛ lɛ́ɛ ɖɔ n'i ɖɔ: “Égbé wɛ Mawu Mavɔmavɔ ɖɔ émí ná jó kɛntɔ́ towe nú we, bɔ a nǎ sɔ́ dó wa nǔ e jló we é.” Ée yě ɖɔ mɔ̌ ɔ́, Davídi sɛ yi fí e Sawúlu ɖe ɔ́, bó wa dɛ̌dɛ̌, bó kán awu ɖaxó e Sawúlu dó é. Ée é bló mɔ̌ ɔ́, ayi tɔn jɛ hun xo xá ɛ jí, ɖó Sawúlu sín awu e é kán ɔ́ wú. Bɔ é ɖɔ nú mɛ tɔn lɛ́ɛ ɖɔ: “Mawu Mavɔmavɔ ní má lɔn nú un hu Sɛ́mɛɖó ce, axɔ́sú e Mawu Mavɔmavɔ sɔ́ ɔ́ ó; un ma sɔ́ alɔ ce bo dó wa nǔ mɔ̌hun ná ó, ɖó Mawu Mavɔmavɔ wɛ ɖe e ɖó vo.” Xó énɛ́ e Davídi ɖɔ ɔ́ zɔ́n bɔ mɛ tɔn lɛ́ɛ sɔ́ sixú ɖó alɔ Sawúlu wú ǎ. Sawúlu tɔ́n sín sónu ɔ́ mɛ, bó lɛ́ wlí ali tɔn ɖidó. Ée Sawúlu tɔ́n bɔ é nɔ zaan ɔ́, Davídi lɔmɔ̌ tɔ́n sín sónu ɔ́ mɛ, bó jɛ xó sú ylɔ́ Sawúlu jí ɖɔ: “Axɔ́sú sɛ́mɛɖó ce!” Ée Sawúlu se mɔ̌ ɔ́, é kpɔ́n gǔdo, bɔ Davídi jɛ kpo bo ɖe kɔ́. Davídi ɖɔ nú Sawúlu ɖɔ: “Étɛ́wú è ka nɔ ɖótó mɛ e nɔ ɖɔ nú mɛ ɖɔ un ɖo nyanya mɛ tɔn lin wɛ lɛ́ɛ? Mɛ ɖésú mɔ din kpó nukún mɛtɔn kpó ɖɔ Mawu Mavɔmavɔ jó mɛ nú mì égbé ɖo sónu élɔ́ mɛ, bɔ è kplɔ́n nǔ mì ɖɔ má hu mɛ. Lo ɔ́, un gbɛ́, ɖó un jló ná hu Sɛ́mɛɖó ce ǎ, ɖó Mawu Mavɔmavɔ wɛ sɔ́ mɛ axɔ́sú. Daá, kpɔ́n, awu mɛtɔn sín tó ɖíe ɖo alɔ ce mɛ e. Ée un sɛ́n awu mɛtɔn sín tó bó má ká hu mɛ ǎ é ɔ́, tunwun bo mɔ nǔ jɛ wú ɖɔ un kún fɔ́n gǔ dó jǐ mɛtɔn ó. Un kún ká ɖo nyanya mɛtɔn lin wɛ ó. Un kún ká hu hwɛ ɖé dó mɛ ó. Mɛ ka nɔ ɖo mɔ ɖó nú mì wɛ bó ná hu mì. Mawu Mavɔmavɔ wɛ ná gbo hwɛ énɛ́ ɔ́ nú nyi kpó mɛ kpó; nǔ e mɛ wa xá mì ɔ́, é wɛ ná dɔn tó tɔn nú mɛ. Amɔ̌ nyɛ ɔ́, un ná wa nǔɖé nú mɛ ǎ. È ko dó lǒ ɖé bó ɖɔ: ‘Mɛdídá ɔ́, nǔ nyanya jɛ́n é ná wa;’ amɔ̌, nyɛ ɔ́, un ná wa nǔɖé nú mɛ ǎ. Sɛ́mɛɖó! Mɛ̌ gbě nya wɛ è ɖe? Nyɛ wɛ a? Nyɛ mɛ e cí cukú kúkú ɖɔhun ɔ́, nyɛ mɛ e cí jɔ̌ yǎyá ɖɔhun ɔ́ sín gbě nya wɛ è ɖe a? Mawu Mavɔmavɔ ná gbo nú nyi kpó mɛ kpó. É ná kpɔ́n bó ná jɛ ahwan jǐ ce, bó ná mɔ hwɛjijɔ nú mì, bó ná hwlɛ́n mì ɖo mɛ sí.” Ée Davídi ɖɔ xó énɛ́ lɛ́ɛ nú Sawúlu fó ɔ́, Sawúlu kanbyɔ́ Davídi ɖɔ: “Davídi, vǐ ce, hwi jɛ́n ɖo mɔ̌ ɖɔ nú mì wɛ a?” Ée é ɖɔ mɔ̌ ɔ́, é sú xó bó ya avǐ káká, bó ɖɔ nú Davídi ɖɔ: “Hwɛ towe jɔ; nyɛ wɛ wa nǔ nyi do, ɖó nyɛ ɔ́, un wa nyanya nú we, bɔ hwɛ ka wa ɖagbe nú mì. A ɖe xomɛnyínyɔ́ towe xlɛ́ mì égbé, ɖó Mawu Mavɔmavɔ jó mì nú we, có hwɛ ɔ́, a hu mì ǎ. Ényí mɛɖé yi kpé kɛntɔ́ tɔn ɔ́, é nɔ jó e dó bɔ é nɔ yi wǔɖíɖí aji ɖɔhun wɛ a? Gbeɖé kpɔ́n! Mawu Mavɔmavɔ ní ná nǔ e a wa nú mì égbé ɔ́ sín ajɔ we. Din ɔ́, un mɔ ɖɔ a nǎ wá ɖu axɔ́sú gbe ɖokpó, bɔ Izlayɛ́li to ɔ́ ná vo ɖo acɛ towe mɛ. Xwlé Mawu Mavɔmavɔ nú mì ɖɔ nú un kú ɔ́, a kún ná sú mɛ ce lɛ́ɛ sín kún dó, bónú nyǐkɔ ce ná bú ó.” Davídi yí gbe bo xwlé Mawu Mavɔmavɔ nú Sawúlu bɔ Sawúlu lɛ́ kɔ yi xwé, bɔ Davídi kpó mɛ tɔn lɛ́ɛ kpó lɛ́ kɔ yi cí fí e mɛɖé má ná sixú kpé yě wú ɖe ǎ é. Samuwɛ́li kú, bɔ Izlayɛ́li to ɔ́ bǐ kplé bó wa nǔ tɔn, bó ɖi i ɖó xwé tɔn gbe ɖo Hlama. Énɛ́ ɔ́ gúdo ɔ́, Davídi yi cí gbětótló Paláni tɔn mɛ. Nya dɔkunnɔ ɖokpó ká tíin ɖo Mawɔ́ni bó nɔ́ nɔ Kaamɛ́li. Nǔ ɖo así tɔn ɖésú. É ɖó lɛ̌ngbɔ́ afɔwó-afatɔ́n (3.000), bó ɖó gbɔ̌ afatɔ́n (1.000). Nya ɔ́ yi Kaamɛ́li, bó ɖo fún kpa nú kanlin tɔn lɛ́ɛ wɛ. Nya ɔ́ nɔ nyí Navalu, bɔ asi tɔn nɔ nyí Avigayilu. Nyɔ̌nu ɔ́ ɖó nǔnywɛ́, bó lɛ́ nyɔ́ ɖɛkpɛ ɖésú. Súnnu ɔ́ ká nyí mɛɖé bó nylá hun, bó nɔ xo dǎka; Kalɛ́bu kún mɛ wɛ nya ɔ́ jɔ ɖe. Davídi ɖo gbětótló ɔ́ mɛ bó se ɖɔ Navalu ɖo fún kpa nú kanlin tɔn lɛ́ɛ wɛ, bó sɛ́ dɔ̌nkpɛvú wǒ dó gɔ̌n tɔn, bó ɖɔ nú yě ɖɔ: “Mi yi Kaamɛ́li, Navalu gɔ́n, bó dó gbe e nú mì. Mi ná ɖɔ n'i ɖɔ nyɛ mɛsɛntɔ́ tɔn Jɛsée ví ɔ́ wɛ sɛ́ mi dó, bó ɖɔ xwe ɔ́ ná nyí xwesi n'i, ɖɔ nǔ ná nyɔ́ n'i bɔ ká tɔn kpó go tɔn kpó bǐ nǎ nɔ ganjí. Mi ɖɔ n'i ɖɔ un se ɖɔ fúnkpatɔ́ lɛ́ɛ ɖo gɔ̌n tɔn. Lɛ̌ngbɔ́nyitɔ́ tɔn lɛ́ɛ ɔ́, hwenu e mǐ kpó yě kpó nɔ kpɔ́ ɖo Kaamɛ́li ɔ́, mǐ wa nǔ nyanya ɖěbǔ nú yě ǎ. Kanlin yětɔn ɖokpó ká hwe ǎ. É jló e hǔn, é ní kanbyɔ́ yě, yě ná tínmɛ n'i. Mi ɖɔ n'i ɖɔ ní kɛnklɛ́n bó nyɔ́ xomɛ dó mi wú, ɖó égbé ɔ́, xwe ɖu wɛ mǐ ɖe. Mi ɖɔ n'i ɖɔ un ɖo kɛnklɛ́n dó n'i wɛ ɖɔ nú é ɖó nǔɖé ɖo fínɛ́ hǔn, é ní ná nyɛ mɛsɛntɔ́ tɔn ɔ́ kpó mi kpó.” Ée Davídi sín mɛ lɛ́ɛ wá Navalu gɔ́n ɔ́, yě ɖɔ xó nɛ́ lɛ́ɛ bǐ n'i ɖó Davídi nyíkɔ mɛ bó xwɛ. Navalu ka ɖɔ nú mɛsɛntɔ́ Davídi tɔn lɛ́ɛ ɖɔ: “Mɛ̌ ka nyí Davídi Jɛsée ví ɔ́ tawun? Égbé din ɔ́, mɛsɛntɔ́ gěgé tíin bó nɔ hɔn sín gǎn yětɔn lɛ́ɛ gɔ́n, bɔ din ɔ́, nyɛ ná sɔ́ nǔɖuɖu ce, bó ná sɔ́ sin ce, bó ná sɔ́ kanlin e un hu nú mɛ e ɖo fún kpa nú kanlin ce wɛ lɛ́ɛ, bó ná mɛ e un ma tunwun fí e yě gosín ǎ lɛ́ɛ é wɛ a? Un ná wa mɔ̌ ǎ.” Ée Navalu ɖɔ mɔ̌ ɔ́, mɛ e Davídi sɛ́ dó lɛ́ɛ lɛ́ kɔ bo yi ɖɔ xó nɛ́ lɛ́ɛ bǐ nú Davídi. Bɔ Davídi ɖɔ nú mɛ tɔn lɛ́ɛ ɖɔ: “Mɛ ɖokpó ɖokpó ní blá hwǐ tɔn.” Ée é ɖɔ mɔ̌ ɔ́, yě bǐ blá hwǐ, bɔ Davídi lɔ blá hwǐ tɔn. Mɛ e xwedó Davídi lɛ́ɛ ná yi afɔwe (400), bɔ é kpo gbɛtɔ́ afɔɖé (200) ɖo agban yětɔn lɛ́ɛ kɔn. Mɛsɛntɔ́ Navalu tɔn lɛ́ɛ ɖokpó wá ɖɔ nú Avigayilu Navalu sín asi ɔ́ ɖɔ: “Davídi nɔ gbětótló mɛ, bó sɛ́ mɛ dó ɖɔ yě ní wá dó gbe gǎn mǐtɔn. Ée yě wá ɔ́, gǎn mǐtɔn yí yě ganjí ǎ. Có mɛ énɛ́ lɛ́ɛ ká wa ɖagbe nú mǐ titewungbe. Yě bló nǔ nyanya ɖokpó nú mǐ ǎ, kanlin mǐtɔn lɛ́ɛ ɖokpó ká hwe hwenu e mǐ kpó yě kpó nɔ kpɔ́ ɖo gběhan mɛ ɔ́ ǎ. Hwenu e mǐ kpó yě kpó ɖo kpɔ́ zǎn kpó kéze kpó ɔ́, ahohó ɖɔhun wɛ yě cí nú mǐ, bɔ mǐdɛɛ lɛ́ɛ nɔ́ ɖo kanlin mǐtɔn lɛ́ɛ wú kpé nukún dó wɛ. Din ɔ́, lin tamɛ bó kpɔ́n nǔ e a nǎ wa é, ɖó gǎn mǐtɔn ná dɔn, bɔ xwédo tɔn ná dɔn ɔ́, wɛn wɛ é ko ɖe din. É ɖíe ká nyí mɛɖé, bɔ jijɔ tɔn ma nyɔ́ ɖěbǔ, bónú è nǎ sixú glá ɖɔ xó ɖé n'i ǎ e.” Ée Avigayilu se mɔ̌ ɔ́, é yá wǔ fɔ wɔ̌xúxú afɔɖé, bó fɔ vɛ̌ɛn anyǔglo we, bó hu gbɔ̌ atɔ́ɔ́n, bó bló bǐ, bó hɛn nǔkún mimɛ gannú atɔ́ɔ́n, bó fɔ vǐwun xúxú hwǐn kanwe ko kpó fígi mlímlí afɔɖé kpó, bó dó nǔ nɛ́ lɛ́ɛ bǐ sín agban nú tócí ɖé lɛ́ɛ. É ɖɔ nú mɛsɛntɔ́ tɔn lɛ́ɛ ɖɔ: “Mi zɔn mǐ yi; un ná jɛ gǔdo mitɔn.” É ká ɖɔ xó ɖěbǔ nú asú tɔn ǎ. Avigayilu xá tócí tɔn jí, bó gbɔn ali e gbɔn sókan mɛ ɔ́, bó jɛ te wá só ɔ́ kpá, bó mɔ Davídi kpó mɛ tɔn lɛ́ɛ kpó lɔ ɖo te jɛ wɛ, bɔ é kpé yě. Davídi ka ɖo ɖiɖɔ dó ayi mɛ wɛ ɖɔ: “Ée un kpé nukún dó nya nɛ́ ɔ́ sín nǔ lɛ́ɛ wú ɖo gbětótló mɛ bɔ ɖokpó ma hwe ǎ ɔ́, nǔ yǎyá wɛ un wa nɛ́ hǔn. É sɔ́ nyanya dó sú ɖagbe xɔ́ mì. Cóbónú sɔ zǎnzǎn ná su ɔ́, ényí un jó mɛ e ko sixú nyí Navalu tɔn ɔ́ ɖokpó dó nyi gbɛ hǔn, Mawu ní dɔn tó e syɛ́n hú tódɔnnúmɛ lɛ́ɛ bǐ é nú mì.” Ée Avigayilu mɔ Davídi lě tlóló ɔ́, é jɛ te bléwún sín tócí tɔn jí, bó xwe agbɔ̌nnusú do ɖo Davídi sá mɛ, bó ɖe kɔ́, bó ɖɔ: “Sɛ́ ce, nǔ e jɛ nɛ́ lɛ́ɛ bǐ ɔ́, nyɛ wɛ zɔ́n, kɛnklɛ́n bónú nyɛ mɛsɛntɔ́ towe ná ɖɔ xó nú we; ɖǒtó nyɛ mɛsɛntɔ́ towe. Sɛ́ ce, ma ɖótó nya dídá énɛ́ ɔ́ ó. Lě e nyǐkɔ tɔn cí é jɛ́n é cí. Navalu wɛ nyǐkɔ tɔn nyí. É gú hú gbɔ̌, nyɛ mɛsɛntɔ́ towe ká mɔ mɛ e a sɛ́ dó lɛ́ɛ ǎ. Din ɔ́ sɛ́ ce, un xwlé Mawu nú we ɖɔ nú Mawu Mavɔmavɔ ɖo gbɛ jɛ́n wɛ bónú hwi lɔ ɖo gbɛ ɔ́, Mawu Mavɔmavɔ wɛ hɛn we ɖó te ɖɔ hwi ní má kɔn hun kɔn nyi ayǐ dó ba hwɛjijɔ nú hwiɖée ó. Mɛ e nyí kɛntɔ́ towe lɛ́ɛ kpó mɛ e ɖo nyanya towe lin wɛ lɛ́ɛ kpó ɔ́, nǔ e ná gbo Navalu ɔ́ ní gbo yě lɔ. Kɛnklɛ́n yí nǔ e nyɛ mɛsɛntɔ́ towe hɛn wá nú we é, bó má nú mɛ e kpó hwi kpó zɔn lɛ́ɛ é. Kɛnklɛ́n wɛ un dó nú we, sɔ́ hwɛ e un hu dó we ɔ́ kɛ mì. Mawu Mavɔmavɔ ná bló bɔ axɔ́súɖuɖu ná nɔ hɛ̌n towe nu tɛgbɛ, ɖó a nɔ fun ahwan n'i; ma nú è mɔ nǔ nyanya ɖé ɖo gbɛzán towe mɛ gbeɖé ó. Sɛ́ ce, ényí mɛɖé sí te dó jǐ towe, bó ɖo kú towe ba wɛ ɔ́, Mawu Mavɔmavɔ, Mawu towe ná nya xɛ ɖo jǐ we, bó ká ná fɔ kɛntɔ́ towe lɛ́ɛ nyi dó gbě, lě e è nɔ sɔ́ hwǎn dó klohwán mɛ bó nɔ da é ɖɔhun. Sɛ́ ce, hwenu e Mawu Mavɔmavɔ ná bló nǔ ɖagbe e sín akpá é dó nú we ɔ́ bǐ, bó ná sɔ́ we ɖó Izlayɛ́li togun ɔ́ nu ɔ́, ma ɖo hwɛjijɔ ba nú hwiɖée wɛ bó hu mɛ dó wǔvɔ́ bónú ayi towe ná xo hun xá we ó. Sɛ́ ce, hwenu e Mawu Mavɔmavɔ ká ná wá wa ɖagbe nú we ɔ́, flín nyɛ mɛsɛntɔ́ towe.” Davídi ɖɔ nú Avigayilu ɖɔ: “Un dó kú nú Mawu Izlayɛ́li tɔn e sɛ́ we dó, bɔ a wǎ kpé mì égbé din é. Un dó kú nú hwi lɔmɔ̌; hwi mɛ e ɖó nǔnywɛ́, bó hɛn mì ɖó te, bɔ un ma kɔn hun kɔn nyi ayǐ dó ba hwɛjijɔ nú nyɛɖée ǎ é. Amɔ̌, un xwlé nǔ nú we; Mawu Mavɔmavɔ, Mawu Izlayɛ́li tɔn e hɛn mì ɖó te bɔ un ma wa nǔɖé nú we égbé ǎ ɔ́ ɖo gbɛ. Ényí a ma ko yá wǔ wá mɔ mì ǎ ɔ́, mɛɖé sɔ́ ná nyí Navalu tɔn bo ná kpo bɔ ayǐ ná hɔ́n dó ǎ.” Ée Davídi ɖɔ mɔ̌ ɔ́, é yí nǔ e Avigayilu hɛn wá n'i lɛ́ɛ ɖo así tɔn, bó ɖɔ n'i ɖɔ: “A nǎ yi xwé ɖagbe; un se xó e a ɖɔ ɔ́. Un yí gbe ná.” Hwenu e Avigayilu ɖo xwé gbe wá wɛ ɔ́, Navalu ko ylɔ́ agɔ̌ ɖaxó ɖokpó axɔ́sú ɖé ɖɔhun. É kó nu ahan bo mú bǐ, bɔ xomɛ ɖo hunhun i wɛ ɖo gbɛmɛ. Avigayilu ka ɖɔ xó ɖěbǔ n'i ǎ. É tín nǔ ɖěbǔ mɛ n'i káká cóbɔ ayǐ hɔ̌n ǎ. Ée é su zǎnzǎn bɔ ahan ɔ́ hɔ́n nú Navalu ɔ́, asi tɔn tín nǔ e jɛ ɔ́ bǐ sésé mɛ n'i. Énɛ́ ɔ́, Navalu sín hǔn zɛ, bɔ é sɔ́ sixú xo nǔ ɖo wǔ ǎ. Azǎn wǒ gúdo ɔ́, Mawu Mavɔmavɔ sín alɔ jɛ Navalu wú bɔ é kú. Ée Davídi se ɖɔ Navalu kú ɔ́, é ɖɔ: “Un dó kú nú Mawu Mavɔmavɔ ɖó é ba hlɔn nú mì ɖó nǔ e Navalu wa nú mì ɔ́ nu. É lɔn bónú mɛsɛntɔ́ tɔn wa nǔ nyanya ǎ. Adǎka e Navalu jló ná xo wǔ e ɔ́, Mawu Mavɔmavɔ lílɛ́ bɔ é jɛ é ɖésúnɔ jí.” Ée Davídi ɖɔ mɔ̌ ɔ́, é sɛ́ wɛn dó Avigayilu ɖɔ é ní wá húzú asi émítɔn. Mɛsɛntɔ́ Davídi tɔn lɛ́ɛ wá Avigayilu gɔ́n ɖo Kaamɛ́li, bó ɖɔ n'i ɖɔ: “Davídi sɛ́ mǐ dó gɔ̌n towe ɖɔ mǐ ní wá kplá hwi wá nú émí, bónú hwi ná nyí asi émítɔn.” Énɛ́ ɔ́, Avigayilu sí te, bo jɛ kpo bo ɖe kɔ́, bó ɖɔ: “Un ná húzú kannumɔ nú sɛ́ ce, bó ná nɔ klɔ́ afɔ nú mɛsɛntɔ́ tɔn lɛ́ɛ.” Ée Avigayilu ɖɔ mɔ̌ ɔ́, é sɔ́ nǔ tlóló, bó xá tócí ɖé jí, bɔ ɖyɔ̌vǐ atɔ́ɔ́n kplá ɛ, bɔ é xwedó wɛnsagun e Davídi sɛ́ dó e lɛ́ɛ, bó húzú asi nú Davídi. Davídi ka ko da Axinɔwamu Izleyɛ́linu ɔ́ ɖ'ayǐ, bɔ yě mɛ we lɛ́ɛ bǐ nyí asi tɔn. Davídi sín asi nukɔntɔn ɔ́ nɔ́ nyí Mikali; Sawúlu ví wɛ. Tɔ́ tɔn Sawúlu ɔ́ ká ko sɔ́ ɛ da nú Layici Galímunu ɔ́ sín vǐ Paluti. Zifunu lɛ́ɛ yi mɔ Sawúlu ɖo Giveya, bó ɖɔ n'i ɖɔ: “Davídi hɔn yi cí sókan Hakila tɔn mɛ, ɖo zunkan ɔ́ kpá.” Ée Sawúlu se mɔ̌ ɔ́, é kplá ahwanfuntɔ́ syɛ́nsyɛ́n afɔwó-afatɔ́n (3.000) sín Izlayɛ́li, bɔ yě yi gbětótló Zifu tɔn mɛ, bó ɖo Davídi ba wɛ. Sawúlu yi ɖó gɔnu ɖó sókan Hakila tɔn ɔ́ mɛ, ɖo gbětótló Zifu tɔn ɔ́ nukɔn, ɖo alitó. Davídi ka ɖo gbětótló ɔ́ mɛ, bó se ɖɔ Sawúlu ɖo gbě émítɔn mɛ. É sɛ́ mɛ dó bɔ è yi ba do ná, bó wá ɖɔ n'i ɖɔ Sawúlu ɖo fínɛ́ nǔgbó. Bɔ Davídi wá fí e Sawúlu ɖó gɔnu ɖó é, bó mɔ fí e Sawúlu mlɔ́ ɔ́, bó lɛ́ mɔ fí e ahwangán Avunɛ́ɛ Nɛ̌ɛ ví ɔ́ lɔ mlɔ́ é. Sawúlu mlɔ́ ahwankpá ɔ́ tɛ́ntin, bɔ sɔ́ja lɛ́ɛ lɛ́ lɛ̌ dó e. Davídi ɖɔ nú Aximɛlɛ́ki Hitíti ɔ́ kpó Avicáyi Selúya ví e nyí Jowabu nɔví é kpó ɖɔ: “Mɛ̌ ká jló ná xwedó mì yi Sawúlu gɔ́n ɖo ahwankpá ɔ́ mɛ ɖo mi mɛ?” Bɔ Avicáyi ɖɔ émí ná yi. Davídi kpó Avicáyi kpó zɔn zǎn bó yi fí e Sawúlu ɖó gɔnu ɖó é, bɔ Sawúlu ɖo ayǐmlɔ́mlɔ́, bó ɖo amlɔ dɔ́ wɛ ɖo ahwankpá ɔ́ tɛ́ntin, bɔ hwǎn tɔn ɖo te ɖo ta tɔn ligbé. Avunɛ́ɛ kpó sɔ́ja lɛ́ɛ kpó ɖo ayǐmlɔ́mlɔ́ lɛ́ lɛ̌ dó e. Avicáyi ɖɔ nú Davídi ɖɔ: “Mawu jó kɛntɔ́ towe nú we égbé. Gbɔ nú má yi sɔ́ hwǎn tɔn bó xwe dó lanmɛ n'i dó ká ɛ nyi kɔ́ mɛ. Hwǎn ɖokpó jɛ́n un ná sɔ́ ɛ, un ná sɔ́ ɛ we ǎ.” Lo ɔ́, Davídi ɖɔ nú Avicáyi ɖɔ: “Ma hu i ó. Ényí mǐ hu axɔ́sú e Mawu Mavɔmavɔ sɔ́ ɔ́, Mawu Mavɔmavɔ ná gɔn tó tɔn dɔn nú mǐ wɛ a vɛdó a?” Bɔ Davídi lɛ́ xwlé Mawu ɖɔ: “Mawu Mavɔmavɔ ɖo gbɛ. Mawu Mavɔmavɔ ɖésú jɛ́n ná hu i. Afɔ nyɔ́ ɔ́, é sixú kú sɛ́ kú, é ká sixú yi ahwan bo cí ahwan. Mawu má lɔn nú un hu mɛ e Mawu Mavɔmavɔ sɔ́ axɔ́sú é ó. Mǐ ní sɔ́ hwǎn e ɖo ta tɔn ligbé é, bó sɔ́ anyǔglo e mɛ sin ɖe é, bó ná yi.” Bɔ Davídi sɔ́ hwǎn ɔ́, bó sɔ́ anyǔglo ɔ́ ɖo Sawúlu taligbé, bɔ é kpó Avicáyi kpó ɖidó. Mɛ ɖěbǔ ká mɔ yě ǎ, mɛɖé ká tunwun ɖɔ nǔ mɔ̌hun ɖé jɛ ǎ, mɛɖé ká fɔ́n ǎ, ɖó sɛnmlɔ wɛ Mawu Mavɔmavɔ sɛ́ dó yě. Tɔdo ɖé ɖo fínɛ́, bɔ Davídi dó asá, bó sɛ yi zɔ nú ahwangɔnu Sawúlu tɔn ɔ́ ganjí, bó xá só ta aga ɖéé, bó sú xó ylɔ́ Avunɛ́ɛ Nɛ̌ɛ ví ɔ́ ɖo ahwanfuntɔ́ lɛ́ɛ tɛ́ntin ɖɔ: “Avunɛ́ɛ, Avunɛ́ɛ, a nǎ sɔ ǎ cé?” Bɔ Avunɛ́ɛ yí gbe n'i ɖɔ: “Mɛ̌ ká ɖo tagba dó nú axɔ́sú ɔ́ wɛ mɔ̌?” Bɔ Davídi ɖɔ nú Avunɛ́ɛ ɖɔ: “Súnnu glegbenu wɛ a nyǐ ǎ cé? Ahwanfuntɔ́ hwi ɖɔhun ɖě sɔ́ ɖo Izlayɛ́li ǎ. Étɛ́wú a ma ka kpé nukún dó gǎn towe wú ǎ? Mɛ ɖé wá axɔ́sú ɔ́ hu gbé. Un xwlé Mawu nú we ɖɔ Mawu Mavɔmavɔ ɖo gbɛ. É nyɔ́ nú a nǎ dó vɛ̌ nú azɔ̌ towe mɔ̌ ǎ. Hu wɛ è ɖǒ ná hu mi bǐ, ɖó mi kpé nukún dó gǎn mitɔn axɔ́sú e Mawu Mavɔmavɔ sɔ́ ɔ́ wú ǎ! Kpɔ́n axɔ́sú ɔ́ sín taligbé; fítɛ́ hwǎn tɔn kpó anyǔglo tɔn kpó ká ɖe?” Sawúlu wá tunwun ɖɔ Davídi wɛ ɖo xó ɖɔ wɛ, bó ɖɔ: “Vǐ ce Davídi, hwi jɛ́n wɛ ɖo xó ɖɔ wɛ a?” Bɔ Davídi yí gbe n'i ɖɔ: “Sɛ́mɛɖó, nyi jɛ́n wɛ.” Davídi lɛ́ ɖɔ: “Sɛ́mɛɖó, étɛ́wú è ka ɖo gbě ce mɛ? Étɛ́ un ka wa nú mɛ? Nǔ nyanya tɛ́ un wa? Sɛ́mɛɖó, kɛnklɛ́n bó ɖótó xó e ɖɔ nú mɛ gbé un ja é. Ényí Mawu Mavɔmavɔ ɖésú wɛ sɛ́ mɛ dó ɖɔ mɛ wá wa mɔ̌ xá mì hǔn, ní yí vɔ̌ e è nǎ sá n'i ɔ́ dó fá xomɛ. É ká nyí gbɛtɔ́ lɛ́ɛ wɛ hǔn, Mawu Mavɔmavɔ ní dó nu yě, ɖó yě ɖo nyinya mì wɛ égbé din sín Mawu Mavɔmavɔ to ɔ́ mɛ, bó ɖo ɖiɖɔ nú mì wɛ ɖɔ nyi ní yi sɛn vodún. É ní ma lɔn nú un kú jɛ zɔ nú Mawu Mavɔmavɔ ó. Sɛ́mɛɖó, nyɛ mɛ e cí jɔ̌ ɖɔhun ɔ́, étɛ́wú è ka ɖo gbě ce nya wɛ? Étɛ́wú è ɖo gbě ce nya wɛ lě e è nɔ ɖo asɔklé nya wɛ gbɔn sókan mɛ sókan mɛ ɔ́ ɖɔhun mɔ̌?” Ée é ɖɔ mɔ̌ ɔ́, Sawúlu sú xó, bó ɖɔ: “Davídi, vǐ ce, wǎ, hwɛ wɛ un hu, un sɔ́ ná wa nǔɖé nú we ǎ, ɖó égbé ɔ́, a ɖǒ sísí nú gbɛ ce. Taɖunɔ ɖɔhun wɛ un wa nǔ; nǔ ɖaxó ɖokpó wɛ un wa nyi do.” Ée é ɖɔ mɔ̌ ɔ́, Davídi lɛ́ yí xó, bó ɖɔ: “Sɛ́mɛɖó, kpɔ́n, hwǎn mɛtɔn ɖíe, mɛ mɛtɔn ɖokpó ní wá yí. Mawu Mavɔmavɔ ní kpɔ́n dó nǔjlɔ́jlɔ́wiwa tɔn kpó gbejíninɔ tɔn kpó wú, dó wa nǔ xá mǐ mɛ ɖokpó ɖokpó. Đó Mawu Mavɔmavɔ jó mɛ nú mì égbé, un ka jló ná hu mɛ ǎ, ɖó Mawu Mavɔmavɔ wɛ sɔ́ mɛ axɔ́sú. Lě e gbɛ mɛtɔn xɔ akwɛ́ ɖo nukún ce mɛ gbɔn ɔ́, gbɛ ce lɔ ní xɔ akwɛ́ ɖo Mawu Mavɔmavɔ nukún mɛ, bónú é ní ɖe mì sín tagba bǐ mɛ.” Ée Davídi ɖɔ mɔ̌ ɔ́, Sawúlu ɖɔ: “Vǐ ce Davídi, Mawu Mavɔmavɔ ní xo ɖɛ dó jǐ we. A sɔ́ nǔ ɖěbǔ bó ná wa ɔ́, a nǎ mɔ nu tɔn.” Davídi ka wlí ali tɔn bo ɖidó, bɔ Sawúlu lɔ wá yi xwé. Davídi wá lin tamɛ bo ɖɔ dó ayi mɛ ɖɔ: “É lín káká ɔ́, Sawúlu ná wá hu mì gbe ɖokpó. Nǔɖé sɔ́ kpo nú mì din zɛ má hɔn yi Filisitɛ́ɛn lɛ́ɛ gɔ́n wú ǎ. Énɛ́ ɔ́, Sawúlu ná gbɔjɛ́, bó gɔn biba mì kpé gbɔn Izlayɛ́li to ɔ́ bǐ mɛ; un bló mɔ̌ ɔ́, un ná gló e.” Ée Davídi ɖɔ mɔ̌ é ɔ́, é sɔ́ nǔ bó kplá mɛ tɔn lɛ́ɛ bó yi Akíci Gati xɔ́sú Mawɔ́ki ví ɔ́ gɔ́n. Yě mɛ súnnu nǔwɔntɔn (600) wɛ. Davídi kpó mɛ tɔn lɛ́ɛ kpó nɔ Gati ɖo Akíci gɔ́n, mɛ ɖokpó ɖokpó kpó vǐ tɔn lɛ́ɛ kpó asi tɔn lɛ́ɛ kpó. Davídi ɔ́, asi we wɛ é ɖó. Yě wɛ nyí Axinɔwamu Izleyɛ́linu ɔ́ kpó Avigayilu Kaamɛ́linu e nyí asúkúsi Navalu tɔn ɔ́ kpó. Ée Sawúlu se ɖɔ Davídi hɔn yi Gati ɔ́, é sɔ́ nya gbě tɔn ɖě ǎ. É wá su gbe ɖokpó bɔ Davídi ɖɔ nú Akíci ɖɔ: “Sɛ́mɛɖó, ényí è mɔ ɖɔ è sixú ɖó ji ɖe dó wǔtu ce hǔn, è nǐ ná fí ɖé mì ɖo toxo e ɖo to ɔ́ mɛ lɛ́ɛ ɖě mɛ, nú nyi kpó mɛ ce lɛ́ɛ kpó ná nɔ fínɛ́. Đó é nyɔ́ bónú nyi kpó mɛ kpó ná nɔ toxo ɖokpó ɔ́ mɛ ǎ.” Gbe nɛ́ gbe ɔ́, Akíci ná ɛ toxo e è nɔ ylɔ́ ɖɔ Siklági é. Énɛ́ ɔ́ wú wɛ zɔ́n bɔ Siklági ɔ́ kpo ɖo axɔ́sú Judáa tɔn lɛ́ɛ sín acɛ mɛ káká jɛ égbé. Xwe ɖokpó sun ɛnɛ wɛ Davídi bló ɖo Filisitɛ́ɛn lɛ́ɛ tomɛ. Davídi kpó mɛ tɔn lɛ́ɛ kpó nɔ yi tɔ́n ahwan Gɛcúunu lɛ́ɛ, Giizíti lɛ́ɛ; yě mɛ énɛ́ lɛ́ɛ kpó Amalɛ́ki ví lɛ́ɛ kpó kó ɖo gbě énɛ́ jí sín do. Togun e ko ɖo gbě énɛ́ jí ɖo Cúu wa jí káká yi Ejípu lɛ́ɛ bǐ wɛ yě nɔ́ gosín Siklági bo nɔ yi tɔ́n ahwan. Davídi nɔ yi gba togun énɛ́ lɛ́ɛ sín to. É nɔ jó mɛ ɖěbǔ dó nyi gbɛ ǎ; súnnu wɛ a, nyɔ̌nu wɛ a? É nɔ hu bǐ, bó nɔ bɛ́ gbɔ̌ yětɔn lɛ́ɛ, nyibú yětɔn lɛ́ɛ, tócí yětɔn lɛ́ɛ, lǎkúnmí yětɔn lɛ́ɛ kpó avɔ yětɔn lɛ́ɛ kpó, bó nɔ lɛ́ kɔ yi Akíci gɔ́n. Nú é yi bó wá ɔ́, Akíci nɔ kanbyɔ́ ɛ ɖɔ: “Fítɛ́ mi ka yi nya gbě ɖe égbé?” Bɔ Davídi nɔ yí gbe n'i ɖɔ: “Mǐ yi Judáa tofɔligbé,” abǐ “Mǐ yi Yelaximɛyɛ́linu lɛ́ɛ tofɔligbé,” abǐ “Mǐ yi Keni ví lɛ́ɛ sín tofɔligbé.” Davídi nɔ jó súnnu kpó nyɔ̌nu kpó ɖěbǔ dó nyi gbɛ bó nɔ́ kplá wá yi Gati ǎ. Đó é ɖo xɛsi ɖi wɛ ɖɔ yě sixú wá ɖɔ xó émítɔn nyanya ɖɔ: “Mɔ̌ wɛ Davídi jɔ.” Lě e Davídi wa nǔ gbɔn hwenu e é nɔ Filisitɛ́ɛn lɛ́ɛ tomɛ é nɛ́. Énɛ́ ɔ́ wɛ zɔ́n bɔ Akíci ɖeji dó Davídi wú, bó nɔ ɖɔ dó ayi mɛ ɖɔ: “É húzú nǔ gbɛ́hɛn nú mɛ tɔn Izlayɛ́li ví lɛ́ɛ, bó ká ná nyí mɛsɛntɔ́ ce káká sɔ́yi.” Hwenɛ́nu ɔ́, Filisitɛ́ɛn lɛ́ɛ sɛ yěɖée kplé, bó dó ahwan gbě, bó ná yi fun ahwan xá Izlayɛ́li ví lɛ́ɛ, bɔ Akíci ɖɔ nú Davídi ɖɔ: “Hwi kpó mɛ towe lɛ́ɛ kpó ná kplá mì yi ahwangbénu. A se ganjí a?” Davídi ɖɔ nú Akíci ɖɔ: “È nǎ mɔ lě e nyɛ mɛsɛntɔ́ mɛtɔn ná wa nǔ gbɔn é.” Bɔ Akíci ɖɔ nú Davídi ɖɔ: “Un ná sɔ́ we bɔ a nǎ nɔ́ kplá mì, bó ná nɔ́ nya xɛ ɖo jǐ ce hwebǐnu.” Ée Samuwɛ́li kú ɔ́, Izlayɛ́li to ɔ́ bǐ yi ɖi i ɖó toxo tɔn mɛ ɖo Hlama, bó wa nǔ tɔn. Đ'ayǐ ɔ́, Sawúlu ka ko hu mɛ e nɔ kan amɔɛ lɛ́ɛ kpó mɛ e nɔ kan bo lɛ́ɛ kpó sín axɔ́súɖuto tɔn mɛ. É wá su gbe ɖokpó, bɔ Filisitɛ́ɛn lɛ́ɛ kplé yěɖée, bó wá ɖó gɔnu ɖó Cunɛ́mu. Sawúlu ká kplé ahwanfuntɔ́ Izlayɛ́li tɔn lɛ́ɛ, bɔ yě ɖó gɔnu ɖó Gilubowa. Ée Sawúlu mɔ Filisitɛ́ɛn lɛ́ɛ lě ɔ́, xɛsi ɖaxó ɖé jɛ jǐ tɔn, bɔ hǔn tɔn nɔ xo gblo, gblo, gblo. Sawúlu kan nǔ byɔ́ Mawu Mavɔmavɔ; Mawu Mavɔmavɔ ka kɛ nu d'é mɛ n'i ǎ. É xo dlɔ̌ ɛ ǎ, é ká ɖɔ xó n'i gbɔn Wulímu vɔ̌sánú-xwlémawutɔ́ lɛ́ɛ tɔn jí ǎ, é ká ɖɔ xó n'i gbɔn gbeyíɖɔ tɔn lɛ́ɛ ɖě jí ǎ. Sawúlu gbɔ bo ɖɔ nú mɛsɛntɔ́ tɔn lɛ́ɛ ɖɔ: “Mi ba nyɔ̌nu e nɔ kan bo é ɖokpó nú mì bónú má yi kan nǔ ɖo gɔ̌n tɔn.” Mɛsɛntɔ́ tɔn lɛ́ɛ ɖɔ n'i ɖɔ nyɔ̌nu ɖokpó ɖo Eyinu-Dɔ́ɔ, bó nɔ́ kan bo. Bɔ Sawúlu fɔ awu ɖěvo dó, bɔ è sɔ́ sixú tunwun i ǎ. É yi nǎwe ɔ́ gɔ́n zǎn mɛ, é kpó súnnu we kpó. Sawúlu ɖɔ nú nǎwe ɔ́ ɖɔ: “Kan bo nú mì. Kúvítɔ́ e un ná ɖɔ ɔ́ wɛ a nǎ ylɔ́ bó ná kan nǔ byɔ́ nú mì.” Nyɔ̌nu ɔ́ ká yí gbe n'i ɖɔ: “A tunwun nǔ e Sawúlu dó sin xá mɛ e nɔ kan amɔɛ lɛ́ɛ kpó mɛ e nɔ kan bo lɛ́ɛ kpó ɖo tomɛ fí é; é hu yě bǐ. Bɔ étɛ́wú hwɛ ka wá ɖo mɔ ɖó nú mì wɛ, bɔ è nǎ hu nyi lɔ?” Ée é ɖɔ mɔ̌ ɔ́, Sawúlu xwlé Mawu n'i ɖɔ: “Mawu Mavɔmavɔ ɖo gbɛ! Nǔɖé ná gbo we ɖ'é mɛ ǎ.” Nyɔ̌nu ɔ́ kanbyɔ́ ɛ ɖɔ: “Kúvítɔ́ ɖě tɛ́ a jlǒ má ylɔ́ nú we?” Bɔ é yí gbe n'i ɖɔ: “Ylɔ̌ Samuwɛ́li nú mì.” Ée é ɖɔ mɔ̌ ɔ́, nyɔ̌nu ɔ́ ylɔ́ Samuwɛ́li nǔgbó, bɔ é wá. Ée nyɔ̌nu ɔ́ mɔ Samuwɛ́li lě ɔ́, é sú xó ɖaxó ɖé, bó ɖɔ nú Sawúlu ɖɔ: “Étɛ́wú a blɛ̌ mì? Hwi wɛ nyí Sawúlu hǔn?” Axɔ́sú ɔ́ ká yí gbe n'i ɖɔ: “Ma ɖi xɛsi ó, ɖɔ nǔ e mɔ wɛ a ɖe ɔ́ nú mì.” Nyɔ̌nu ɔ́ yí gbe n'i ɖɔ: “Un ɖo kúvítɔ́ ɖé mɔ wɛ bɔ é ɖo ayǐkúngban glɔ́ tɔ́n sín wɛ.” É lɛ́ kanbyɔ́ ɛ ɖɔ: “Nɛ̌ kúvítɔ́ e mɔ wɛ a ɖe ɔ́ ka cí?” Bɔ nǎwe ɔ́ yí gbe n'i ɖɔ: “Degénɔ kpikpo ɖé mɔ wɛ un ɖe, bɔ é ɖo awu ɖaxó ɖé mɛ, bó ɖo tíntɔ́n sín ayǐkúngban glɔ́ wɛ.” Sawúlu mɔ nukúnnú jɛ wú ɖɔ Samuwɛ́li wɛ, bó húzú jɛ kpo bo ɖe kɔ́. Samuwɛ́li kanbyɔ́ Sawúlu ɖɔ: “Étɛ́wú a ka dó tagba nú mì bó ylɔ́ mì?” Sawúlu yí gbe n'i ɖɔ: “Aluwɛ ɖaxó ɖé mɛ wɛ un ɖe. Filisitɛ́ɛn lɛ́ɛ wɛ tɔ́n ahwan mì, bɔ Mawu ka jó mì dó. É ɖɔ xó nú mì gbɔn gbeyíɖɔ tɔn lɛ́ɛ ɖě jí ǎ, é ká ɖɔ nú mì gbɔn dlɔ̌ mɛ ǎ, bɔ un tunwun ɖɔ má wá ylɔ́ we nú a nǎ ɖɔ nǔ e un nǎ wa é nú mì.” Ée é ɖɔ mɔ̌ ɔ́, Samuwɛ́li kanbyɔ́ ɛ ɖɔ: “Étɛ́wú a ka wá ɖo nǔ kanbyɔ́ nyɛ wɛ? Mawu Mavɔmavɔ ko jó we dó, bó húzú kɛntɔ́ towe. Lě e Mawu Mavɔmavɔ ɖɔ émí ná wa nǔ towe gbɔn bɔ un ɖɔ nú we ɔ́ wa gbɔn wɛ é ɖe. Mawu Mavɔmavɔ gba to ɔ́ dó ta nú we, bó sɔ́ jó nú Davídi. A se tónú nú Mawu Mavɔmavɔ ǎ, a sú Amalɛ́ki ví lɛ́ɛ bǐ sín kún dó lě e Mawu Mavɔmavɔ zɔ́n gbɔn é ǎ. Énɛ́ ɔ́ wú wɛ Mawu Mavɔmavɔ ɖo nǔ wa xá we wɛ gbɔn mɔ̌ égbé. Đésú lɔ ɔ́, Mawu Mavɔmavɔ ná jó hwi kpó Izlayɛ́li to ɔ́ bǐ kpó dó nú Filisitɛ́ɛn lɛ́ɛ. Sɔ ɔ́, hwi kpó vǐ towe lɛ́ɛ kpó ná ɖo kpɔ́ xá mì ɖo kútomɛ dě, bɔ Mawu Mavɔmavɔ ná jó ahwangɔnu Izlayɛ́li tɔn nú Filisitɛ́ɛn lɛ́ɛ.” Tlóló kpowun ɔ́, Sawúlu j'ayǐ, bó dlɛ́n bǐ ɖo kɔ́ mɛ; xó e Samuwɛ́li ɖɔ ɔ́ kú lanmɛ n'i bǐ, bɔ é sɔ́ ɖó gǎn ɖěbǔ ǎ, ɖó é ɖu nǔ ɖěbǔ ɖo kéze ɔ́ mɛ ǎ, é ká ɖu zǎn ɔ́ mɛ ǎ. Nyɔ̌nu ɔ́ wá Sawúlu gɔ́n, bó mɔ ɖɔ xɛsi ɖi i, bó ɖɔ n'i ɖɔ: “Sɛ́mɛɖó, xó e mɛ ɖɔ nú nyɛ mɛsɛntɔ́ mɛtɔn ɔ́, un bló. Un sɔ́ gbɛ ce ɖó axɔ́nu, bó wa nǔ e mɛ zɔ́n mì é. Din ɔ́, è nǐ bó ɖótó mì; un ná hɛn nǔɖuɖu kpɛɖé wá nú mɛ, bɔ mɛ ná ɖu, bó ná mɔ gǎn dó zɔn ali.” Lo ɔ́, Sawúlu gbɛ́ ɖɔ émí kún ná ɖu nǔ ɖěbǔ ó. Mɛsɛntɔ́ tɔn lɛ́ɛ kpó nyɔ̌nu ɔ́ kpó jɛ kɔ n'i káká ɖɔ é ní ɖu nǔ, bɔ é gbɔ bó yí gbe. Énɛ́ ɔ́, é sí te sín kɔ́ mɛ, bó jínjɔ́n zan jí. Nyibúví kloklo ɖokpó ká ɖo nǎwe ɔ́ sí, bɔ é yá wǔ bó hu tlóló; é zé linfín bó nya, bó ɖa wɔ̌xúxú, lobo sɔ́ nú Sawúlu kpó mɛsɛntɔ́ tɔn lɛ́ɛ kpó, bɔ yě ɖu. Ée yě ɖu nǔ fó ɔ́, yě sɔ́ nǔ zǎn ɔ́ mɛ bó yi. Filisitɛ́ɛn lɛ́ɛ kplé ahwangɔnu yětɔn lɛ́ɛ bǐ ɖó Afɛ́ki, bɔ Izlayɛ́li ví lɛ́ɛ ka ɖó gɔnu yětɔn ɖó tɔjɔtɛn e ɖo Izleyɛ́li ɔ́ kpá. Axɔ́sú Filisitɛ́ɛn lɛ́ɛ tɔn ɖokpó ɖokpó ɖo ahwankánɖó yětɔn yětɔn nukɔn bó ɖidó; Davídi kpó mɛ tɔn lɛ́ɛ kpó kplá axɔ́sú Akíci bó jɛ yě gúdo. Ahwangán Filisitɛ́ɛn lɛ́ɛ tɔn lɛ́ɛ kanbyɔ́ ɖɔ: “Étɛ́ wa wɛ Eblée élɔ́ lɛ́ɛ ka ɖe ɖo fí?” Bɔ Akíci yí gbe nú yě ɖɔ: “É má nyí Sawúlu Izlayɛ́li xɔ́sú ɔ́ sín mɛsɛntɔ́ Davídi nɛ́ a? É ɖo gɔ̌n ce din ɔ́, xwe ko yi ɖokpó abǐ we; sín gbe e gbe é jó gǎn tɔn dó ɔ́ káká jɛ égbé din ɔ́, un ko mɔ nǔjɛdo ɖěbǔ ɖo wǔ tɔn ǎ.” Lo ɔ́, ahwangán lɛ́ɛ sin xomɛ dó Akíci bo ɖɔ n'i ɖɔ: “Lɛ̌ kɔ nú dǎwe énɛ́ ɔ́ nú é yi nɔ toxo e mɛ a sɔ́ ɛ ɖó é. É ma xwedó mǐ yi ahwangbénu ó, é táá wá húzú kpan nukɔn mǐ ɖo dɔ̌n. Nú é ká ná nyí mɛ ɖo gǎn tɔn sí ɔ́, é má nyí mɛ mǐtɔn lɛ́ɛ jɛ́n é ná hu a? É má nyí Davídi énɛ́ wɛ nyɔ̌nu lɛ́ɛ nɔ́ ɖú we ná bó nɔ ji han ná ɖɔ: ‘Sawúlu hu kɛntɔ́ afatɔ́n (1.000), Davídi ka hu děgba we afɔwó (10.000) ǎ cé?’ ” Ée yě ɖɔ mɔ̌ ɔ́, Akíci gbɔ bo ylɔ́ Davídi bó xwlé Mawu n'i ɖɔ: “Mawu Mavɔmavɔ ɖo gbɛ! Gbɛtɔ́ e nɔ wa nǔ jlɔ́jlɔ́ é wɛ nú we; nú a yi fun ahwan élɔ́ xá mì ɔ́, é ná víví nú mì, ɖó sín gbe e gbe a wǎ gɔ̌n ce ɔ́ káká wá jɛ égbé din ɔ́, un mɔ nǔjɛdo ɖěbǔ ɖo wǔ we ǎ. Amɔ̌, axɔ́sú ɖě lɛ́ɛ ba xó towe ǎ. Hǔn din ɔ́, bo lɛ́ kɔ; a nǎ yi xwé ɖagbe; ma nɔ fí, bó wá wa nǔɖé nyi do nú gǎn Filisitɛ́ɛn lɛ́ɛ tɔn lɛ́ɛ ó.” Davídi ka ɖɔ nú Akíci ɖɔ: “Nǔjɛdo tɛ́ a ka mɔ ɖo wǔ ce sín gbe e gbe un wá gɔ̌n towe é káká jɛ égbé? Étɛ́ un ka wa bo ma ná yi fun ahwan xá axɔ́sú sɛ́mɛɖó ce sín kɛntɔ́ lɛ́ɛ ǎ?” Akíci yí gbe nú Davídi ɖɔ: “Un tunwun ɖɔ gbɛtɔ́ ɖagbe wɛ a nyǐ nú nyɛ. A nyɔ̌ bó cí wɛnsagun Mawu tɔn ɖɔhun. Lo ɔ́, ahwangán Filisitɛ́ɛn lɛ́ɛ tɔn lɛ́ɛ gbɛ́ ɖɔ a kún ná xwedó émí yi ahwangbénu ó. Énɛ́ ɔ́, bo fɔ́n zǎn hwi kpó sɛ́mɛɖó towe sín mɛsɛntɔ́ e wá fí lɛ́ɛ kpó. Mi fɔ́n zǎn, bónú ayǐxomɛ hɔ́n lě tlóló hǔn, mi ɖidó.” Davídi kpó mɛ tɔn lɛ́ɛ kpó fɔ́n zǎnzǎn tɛɛn, bó lɛ́ kɔ yi Filisitɛ́ɛn lɛ́ɛ tomɛ, bɔ Filisitɛ́ɛn lɛ́ɛ ɖidó Izleyɛ́li. Ée Filisitɛ́ɛn lɛ́ɛ nya Davídi bɔ é lɛ́ kɔ ɔ́, é kpó mɛ tɔn lɛ́ɛ kpó wá Siklági toxo mɛ azǎn atɔngɔ́ ɔ́ gbe. Amalɛ́ki ví lɛ́ɛ byɔ́ Judáa tofɔligbé bó tɔ́n ahwan Siklági toxo ɔ́. Yě gba Siklági toxo ɔ́ bǐ, bó dó zo. Yě ká to wlí nyɔ̌nu kpó yɔkpɔ́vú kpó e ɖo toxo ɔ́ mɛ é bǐ hwɛ̌ có bó dó zo. Yě hu mɛɖé ɖo toxo ɔ́ mɛ ǎ, yě bɛ̌ mɛ énɛ́ lɛ́ɛ bǐ bó jɛ ali. Ée Davídi kpó mɛ tɔn lɛ́ɛ kpó wá toxo ɔ́ mɛ ɔ́, yě mɔ ɖɔ è ko wlí asi yětɔn lɛ́ɛ kpó vǐ yětɔn lɛ́ɛ bǐ kpó, bó kó bɛ́ yě yi kannumɔgbénu, bo ko dó toxo ɔ́ zo. Bɔ Davídi kpó mɛ e kpó é kpó zɔn lɛ́ɛ bǐ kpó wlí avǐ bo ya káká bɔ agbɔ̌ kpé yě. Amalɛ́ki ví lɛ́ɛ kplá Davídi sín asi we lɛ́ɛ: Axinɔwamu Izleyɛ́linu ɔ́ kpó Avigayilu Kaamɛ́linu asúkúsi Navalu tɔn kpó. Hwenɛ́nu ɔ́, nukún myá Davídi ɖésú, ɖó togun ɔ́ bǐ ɖo ɖiɖɔ wɛ ɖɔ émí ná nyi awǐnnyaglo dó hu i. Đó yě ɖokpó ɖokpó ɖo akpɔ mɔ wɛ ɖó vǐ yětɔn lɛ́ɛ wú. Amɔ̌, Davídi lɛ́ kpan akɔ́n, ɖó é gán jɛ Mawu Mavɔmavɔ, Mawu tɔn wú. É ɖɔ nú vɔ̌sánú-xwlémawutɔ́ Abiyatáa Aximɛlɛ́ki ví ɔ́ ɖɔ: “Sɔ́ efódu ɔ́ wá.” Abiyatáa sɔ́ wá n'i. Bɔ Davídi kan nǔ byɔ́ Mavɔmavɔ bo ɖɔ: “Má jɛ ahwangɔnu énɛ́ gúdo a? Un ka ná sixú xwedó yě wǔ a?” Bɔ Mawu Mavɔmavɔ yí gbe n'i ɖɔ: “Jɛ yě gúdo; a nǎ xwedó yě wǔ, bó ná yí mɛ towe lɛ́ɛ sín kɛntɔ́ lɛ́ɛ sí.” Davídi jɛ Amalɛ́ki ví lɛ́ɛ gúdo é kpó súnnu nǔwɔntɔn (600) e kpó é kpó ɖo yiyi wɛ lɛ́ɛ kpó. Yě yi jɛ Besɔ́ɔ tɔ ɔ́ kɔn, bɔ mɛ e nǔ cikɔ ná lɛ́ɛ nɔ te fínɛ́. Yě mɛ afɔɖé (200) wɛ. Davídi kpó yě mɛ afɔwe (400) e kpo lɛ́ɛ kpó ká lɛ́ wlí ali yětɔn bó jɛ Amalɛ́ki ví e nya wɛ yě ɖe lɛ́ɛ gúdo. Ahwanfuntɔ́ Davídi tɔn lɛ́ɛ mɔ nya Ejípunu ɖokpó ɖo gbě ɔ́ jí, bó kplá ɛ yi jó nú Davídi. È nǎ ɛ nǔɖuɖu bɔ é ɖu, bó ná ɛ sin bɔ é nu, bó ná ɛ fígi xúxú, bó ná ɛ vǐwun xúxú hwǐn we. Ée é ɖu nǔ énɛ́ lɛ́ɛ ɔ́, é mɔ gǎn, ɖó é má sɔ́ ɖu nǔ ǎ ɔ́, kéze atɔn zǎn atɔn ko nɛ́. Davídi kanbyɔ́ nya ɔ́ ɖɔ: “Mɛ̌ wɛ nyí gǎn towe? Fítɛ́ a ka gosín?” Nya ɔ́ yí gbe n'i ɖɔ: “Ejípunu wɛ un nyí, lobo ɖo nya Amalɛ́ki ví ɖé sín kan nu. Sín azǎn atɔn ɖíe wɛ é ka ko jó mì dó, ɖó un ɖo azɔn jɛ wɛ. Mǐ wɛ yi fun ahwan ɖo Keleti lɛ́ɛ sín tofɔligbé, bó fun ɖo Judáa ví lɛ́ɛ sín tofɔligbé, bó fun ɖo Kalɛ́bunu lɛ́ɛ sín tofɔligbé lobo dó Siklági toxo ɔ́ zo.” Ée é ɖɔ mɔ̌ ɔ́, Davídi kanbyɔ́ ɛ ɖɔ: “A nǎ sixú kplá mì yi fí e sɔ́ja énɛ́ lɛ́ɛ ɖe ɔ́ a?” Nya ɔ́ yí gbe n'i ɖɔ: “Đɔ bó xwlé Mawu d'é jí ɖɔ émí kún ná hu mì ó, émí kún ká ná sɔ́ mì yi jó nú gǎn ce ó. Énɛ́ ɔ́, un ná kplá we yi fí e yě ɖe ɔ́.” Ée nya ɔ́ ɖɔ mɔ̌ ɔ́, é jɛ nukɔn nú Davídi, bó kplá ɛ yi Amalɛ́ki ví lɛ́ɛ gɔ́n. Ée yě jɛ dɔ̌n ɔ́, yě mɔ ɖɔ Amalɛ́ki ví lɛ́ɛ kó gba kpé gbě nɛ́ ɔ́ jí bǐ, bó ɖo nǔ ɖu wɛ, bó ɖo ahan nu wɛ, bó ɖo we ɖú wɛ, ɖó dɔkun tobutóbú e yě bɛ́ sín Filisitíi kpó Judáa kpó lɛ́ɛ wú. Davídi zɔn yě mɛ, bó ɖo yě hu wɛ sín ayǐtéhɔ̌nnu káká jɛ ayǐhɔ́ngbe tɔn gbadanu. Yě ɖě kpé wú bó hɔn yi zɛ dɔ̌nkpɛvú afɔwe (400) e xá lǎkúnmí jí bó hɔn yi lɛ́ɛ wú ǎ. Nǔ e Amalɛ́ki ví lɛ́ɛ ko bɛ́ lɛ́ɛ ɔ́, Davídi yí bǐ; é yí asi tɔn we lɛ́ɛ lɔ. Mɛ yětɔn e è kplá yi lɛ́ɛ ɖokpó hwe ǎ; mɛxó hwe ǎ, yɔkpɔ́vú hwe ǎ. Súnnu hwe ǎ, nyɔ̌nu hwe ǎ. Nǔ yětɔn e è bɛ̌ lɛ́ɛ ɖěbǔ hwe ǎ, bǐ wɛ Davídi bɛ́ wá xwé. Davídi bɛ́ nyibú kpó gbɔ̌ kpó bǐ wá, bɔ mɛ e ɖo kanlin lɛ́ɛ kplá wɛ lɛ́ɛ nɔ ɖɔ: “Nǔ e Davídi bɛ́ sín ahwangbénu wá lɛ́ɛ ɖíe.” Davídi lɛ́ kɔ wá mɛ afɔɖé (200) e nǔ cikɔ ná káká bɔ yě má sixú xwedó e ǎ, bɔ è jó yě dó nyi Besɔ́ɔ tɔ ɔ́ tó lɛ́ɛ gɔ́n. Ée yě mɔ Davídi ɔ́, yě bǐ sí te bo wá kpé e, kpódó mɛ e zɔn xá ɛ lɛ́ɛ kpó. Davídi sɛkpɔ́ yě, bó kan lě e yě ɖe gbɔn é byɔ́. Gbɛtɔ́ nyanya, gbɛtɔ́ dídá ɖé lɛ́ɛ ɖo mɛ e kpó Davídi kpó zɔn lɛ́ɛ mɛ, bó yí xó bó ɖɔ: “Mǐ ná ná dɔkun e mǐ hɛn sín ahwangbénu lɛ́ɛ kwín ɖokpó géé mɛ e ma xwedó mǐ yi lɛ́ɛ é ǎ. Nǔ ɖokpó e mǐ ná wa nú yě ɔ́ wɛ nyí ɖɔ mɛ ɖokpó ɖokpó ná kplá asi tɔn kpó vǐ tɔn lɛ́ɛ kpó, bó ná yi.” Davídi ka yí xó bó ɖɔ: “Nɔví ce lɛ́ɛ mi, mi kpɔ́n ɖagbe e Mawu Mavɔmavɔ wa nú mǐ é; é nyɔ́ nú mǐ ná wa nǔ gbɔn mɔ̌ ǎ. Đó Mawu Mavɔmavɔ nya xɛ ɖo mǐ jí, bó jó mɛ e wá tɔ́n ahwan mǐ lɛ́ɛ nú mǐ. Xó énɛ́ e ɖɔ wɛ mi ɖe ɔ́, mɛ̌ ká ná se xá mi? ‘Mɛ e yi ahwangbénu ɔ́ kpó, mɛ e nɔ agban lɛ́ɛ kɔn é kpó, bǐ wɛ ná má nǔ e mǐ hɛn sín ahwangbénu wá lɛ́ɛ bǐ ɖó zɛ̌nzɛ̌n.’ ” Lě e è nɔ wa nǔ gbɔn ɖo Izlayɛ́li sín gbe énɛ́ gbe káká wá jɛ égbé ɔ́ nɛ́, bɔ é húzú sɛ́n ɖo Izlayɛ́li, bó ɖo ayǐ káká jɛ égbé. Ée Davídi lɛ́ kɔ wá Siklági ɔ́, é sɛ́ dɔkun e yě hɛn wá sín ahwangbénu lɛ́ɛ ɖě dó tomɛxó Judáa tɔn e nyí xɔ́ntɔn tɔn lɛ́ɛ, bó ɖɔ sɛ́ dó yě ɖɔ: “Dɔkun e mǐ yí ɖo Mawu Mavɔmavɔ sín kɛntɔ́ lɛ́ɛ sí ɔ́, mitɔn ɖíe.” Yě mɛ énɛ́ lɛ́ɛ wɛ nyí tomɛxó e ɖo Betɛ́li lɛ́ɛ, tomɛxó e ɖo Hlamɔti tofɔligbé lɛ́ɛ kpó éé ɖo Yatíi lɛ́ɛ kpó. Tomɛxó e ɖo Alowɛ́ɛ lɛ́ɛ, éé ɖo Sifemɔ́ti lɛ́ɛ, éé ɖo Ɛcitemɔwa lɛ́ɛ, éé ɖo Hlakalu lɛ́ɛ, éé ɖo Yelaximɛyɛ́linu lɛ́ɛ sín toxo mɛ lɛ́ɛ, éé ɖo Keni ví lɛ́ɛ sín toxo mɛ lɛ́ɛ, éé ɖo Hɔ́ɔma lɛ́ɛ, éé ɖo Bɔɔ-Acáni lɛ́ɛ, éé ɖo Atáki lɛ́ɛ. Tomɛxó e ɖo Eblɔ́n lɛ́ɛ, kpó éé ɖo fí e é kpó mɛ tɔn lɛ́ɛ kpó ko gbɔn lɛ́ɛ bǐ kpó. Filisitɛ́ɛn lɛ́ɛ tɔ́n ahwan Izlayɛ́li ví lɛ́ɛ, bó gblé wǔ yě, bɔ yě hɔn bó yi kú jɛ Gilubowa só ɔ́ ta. Filisitɛ́ɛn lɛ́ɛ zun dó Sawúlu kpó vǐ tɔn lɛ́ɛ kpó jí. Yě hu vǐ tɔn Jonatáan, Avinadávu kpódó Maluki-Cua kpó. Sawúlu gbé nya wɛ yě ká ɖe tawun. Mɛ e nɔ da gǎ lɛ́ɛ wá mɔ ɛ, bɔ xɛsi ɖaxó ɖé jɛ jǐ tɔn. Bɔ Sawúlu ɖɔ nú mɛ e nɔ hɛn ahwanfunnú tɔn lɛ́ɛ n'i ɔ́ ɖɔ: “Sún hwǐ towe bó hu mì, bónú mɛ e ma nɔ sɛn Mawu ǎ nɛ́ lɛ́ɛ má wá hu mì kpó hwǐ kpó, bó wá cá mì ko ó.” Mɛ e nɔ hɛn ahwanfunnú tɔn lɛ́ɛ n'i ɔ́ ká ɖi xɛsi bo gbɛ́. Énɛ́ ɔ́, Sawúlu sɔ́ hwǐ tɔn tun te, bó zé éɖée slɔ́ nu. Ée mɛ e nɔ hɛn ahwanfunnú tɔn lɛ́ɛ n'i ɔ́ mɔ mɔ̌ ɔ́, élɔ́ sɔ́ hwǐ tɔn tun te, bó zé éɖée slɔ́ nu bó kú. Lě e Sawúlu kpó vǐ tɔn atɔn lɛ́ɛ kpó, mɛ e nɔ hɛn ahwanfunnú tɔn lɛ́ɛ n'i ɔ́ kpó mɛ tɔn lɛ́ɛ kpó bǐ kú gbɔn gbe nɛ́ gbe ɔ́ nɛ́. Izlayɛ́li ví e ɖo tɔdo Izleyɛ́li tɔn ɔ́ gúdo lɛ́ɛ kpó éé ɖo Judɛ́ɛn tɔ ɔ́ gúdo lɛ́ɛ kpó se ɖɔ ahwanfuntɔ́ Izlayɛ́li tɔn lɛ́ɛ hɔn, bó lɛ́ se ɖɔ Sawúlu kpó vǐ tɔn lɛ́ɛ kpó kú. Ée yě se mɔ̌ ɔ́, yě lɔmɔ̌ hɔn jó toxo yětɔn lɛ́ɛ dó, bó yi, bɔ Filisitɛ́ɛn lɛ́ɛ yi cí toxo lɛ́ɛ mɛ. Ayǐhɔ́ngbe tɔn ɔ́, Filisitɛ́ɛn lɛ́ɛ tɔ́n gǒ mɛ kíjé nú cyɔ lɛ́ɛ gbé, bó wá mɔ Sawúlu kpó vǐ tɔn lɛ́ɛ kpó sín cyɔ ɖo Gilubowa só ɔ́ jí. Yě gbo Sawúlu sín ta, bó bɛ́ ahwanfunnú tɔn lɛ́ɛ, bó sɛ́ mɛ dó ɖɔ yě ní yi jlá wɛnɖagbe énɛ́ ɔ́ gbɔn Filisitíi to ɔ́ bǐ mɛ, bónú mɛ e ɖo vodún yětɔn lɛ́ɛ xwé lɛ́ɛ, kpó togun ɔ́ bǐ kpó ní se. Yě bɛ́ Sawúlu sín ahwanfunnú lɛ́ɛ yi ɖó vodún yětɔn Asitaatée xwé, bó yi sɔ́ Sawúlu sín cyɔ, lobo blá ɖó Bɛti-Ceani sín ahohó ta. Ée Yavɛ́cinu e ɖo Galadi gbé jí lɛ́ɛ se lě e Filisitɛ́ɛn lɛ́ɛ wa Sawúlu nú gbɔn ɔ́, súnnu glegbenu yětɔn lɛ́ɛ bǐ sɔ́ nǔ bó zɔn zǎn, bó yi ɖe Sawúlu cyɔ sín Bɛti-Ceani sín ahohó ɔ́ ta, bó ɖe vǐ tɔn lɛ́ɛ lɔ sín cyɔ, lobo bɛ́ wá Yavɛ́ci, bó wá dó zo. Yě bɛ̌ xú yětɔn lɛ́ɛ bó ɖi ɖó Tamalisitín ɖé sá. Ée yě ɖi xú lɛ́ɛ ɔ́, yě blá nu nú azǎn tɛ́nwe. Ée Davídi hu Amalɛ́ki ví lɛ́ɛ ɔ́, é lɛ́ kɔ wá Siklági, bo bló azǎn we ɖo fínɛ́. Sawúlu ka ko kú hwenɛ́nu nɛ́. Azǎn tɔn atɔngɔ́ ɔ́ gbe ɔ́, nya ɖokpó gosín Sawúlu sín ahwankpá mɛ bó wá. Nya ɔ́ vún awu dó kɔ nú éɖée, bó lɛ kɔ́ dó ta dó ɖe xlɛ́ ɖɔ émí ɖo aluwɛ mɛ. Ée é wá Davídi nukɔn ɔ́, é jɛ kpo bo ɖe kɔ́. Bɔ Davídi kanbyɔ́ ɛ ɖɔ: “Fítɛ́ a gosín?” Bɔ é yí gbe n'i ɖɔ: “Ahwankpá Sawúlu tɔn mɛ wɛ un hɔn sín.” Davídi ɖɔ: “Étɛ́ ká jɛ? Đɔ nú mì.” Bɔ é ɖɔ n'i ɖɔ: “Ahwangɔnu Izlayɛ́li tɔn ɔ́ hɔn ɖo ahwan nukɔn. È hu mɛ gěgé ɖo yě mɛ, káká bɔ Sawúlu kpó vǐ tɔn Jonatáan ɔ́ lɔmɔ̌ kpó kú.” Davídi kanbyɔ́ nya e hɛn xó énɛ́ wá ɔ́ ɖɔ: “Nɛ̌ a wa gbɔn bo tunwun ɖɔ Sawúlu kpó vǐ tɔn Jonatáan kpó cí ahwan?” Nya ɔ́ yí gbe n'i ɖɔ: “Yiyi wɛ un ɖe bo wá jɛ Gilubowa só jí, bó mɔ Sawúlu gán jɛ hwǎn tɔn wú, lobɔ ahwankɛkɛ́ví kpó sɔ́xátɔ́ ɖé lɛ́ɛ kpó ɖo sisɛkpɔ́ ɛ wɛ, bó ná hu i. É lílɛ́ bó mɔ mì, lobo ylɔ́ mì, bɔ un sɔ. É kanbyɔ́ mì ɖɔ: ‘Hwi mɛ̌ ká nɛ́?’ Bɔ un yí gbe n'i ɖɔ: ‘Amalɛ́ki ví ɖé wɛ.’ Bɔ é ɖɔ nú mì ɖɔ: ‘Wǎ nɔ te akpá ce fí, bó hu mì, ɖó un ɖo wǔvɛ́ ɖé mɔ wɛ, ayi ce ka kpo ɖo te.’ Ée é ɖɔ mɔ̌ ɔ́, un sɛkpɔ́ ɛ lobo hu i, ɖó un mɔ ɖɔ wǔ e é gblé ɔ́, é kún sɔ́ sixú nɔ gbɛ ó. Sɛ́mɛɖó, ée un bló mɔ̌ é ɔ́, un zé tablá tɔn kpó alɔgan tɔn kpó wá nú we.” Ée Davídi se mɔ̌ ɔ́, é vún awu dó kɔ nú éɖée, bɔ mɛ e ɖo fínɛ́ xá ɛ lɛ́ɛ lɔ vún awu dó kɔ nú yěɖée. Yě byɔ́ aluwɛ mɛ; yě ɖo avǐ ya wɛ, yě ɖu nǔ ǎ káká jɛ gbadanu. Yě byɔ́ aluwɛ mɛ, ɖó Sawúlu kpó vǐ tɔn Jonatáan kpó, kpódó Izlayɛ́li ví e ɖo togun Mawu Mavɔmavɔ tɔn mɛ bó cí ahwan lɛ́ɛ bǐ kpó tamɛ. Davídi kanbyɔ́ nya ɔ́ ɖɔ: “Fítɛ́ nu ka nú we?” Nya ɔ́ yí gbe bo ɖɔ: “Nya jǒnɔ Amalɛ́ki ví ɖé sín vǐ wɛ un nyí. Fí wɛ é sá xwé nyi.” Bɔ Davídi sú xó bó ɖɔ: “Étɛ́! A ja axɔ́sú e Mawu Mavɔmavɔ sɔ́ ɔ́ hu gbé bɔ xɛsi ɖi we ǎ!” Ée Davídi ɖɔ mɔ̌ ɔ́, é ylɔ́ mɛsɛntɔ́ tɔn lɛ́ɛ ɖokpó, bó ná ɛ gbe ɖɔ: “Hu dǎwe nɛ́.” Mɛsɛntɔ́ ɔ́ hu Amalɛ́ki ví ɔ́ nǔgbó. Hwenɛ́nu ɔ́, Davídi ɖɔ: “Hwi ɖésú wɛ zɔ́n bɔ è hu we, hwi ɖésú wɛ ɖɔ émí hu axɔ́sú e Mawu Mavɔmavɔ sɔ́ é.” Énɛ́ gúdo ɔ́, Davídi kpa nǔwamɛhan ɖokpó dó Sawúlu kpó vǐ tɔn Jonatáan kpó e kú é tamɛ. É ɖɔ è nǐ kplɔ́n han énɛ́ Judáa ví lɛ́ɛ bǐ. Han e è nɔ ylɔ́ ɖɔ “Nǔwamɛhan Gǎ tɔn” ɔ́, è wlǎn dó “Nǔjlɔ́jlɔ́watɔ́ wéma” ɔ́ mɛ. Han ɔ́ ɖíe: Izlayɛ́li, étɛ́wú ahwanfuntɔ́ towe ɖaxó ɔ́ ká kú mɔ̌? Étɛ́wú ahwanfuntɔ́ syɛ́nsyɛ́n lɛ́ɛ ká ɖo títɛ́ ɖo só lɛ́ɛ jí? È ma ɖɔ xó énɛ́ nú mɛɖé se ɖo Gati ó. È ma ɖɔ xó énɛ́ ɔ́ gbɔn Acikelɔ́ni sín ali lɛ́ɛ ɖě jí ó; é má nyí mɔ̌ ǎ ɔ́, xomɛ táá hun Filisitɛ́ɛn lɛ́ɛ sín vǐ nyɔ̌nu lɛ́ɛ, mɛ e ma nɔ sɛn Mawu ǎ lɛ́ɛ sín vǐ nyɔ̌nu lɛ́ɛ táá j'awǎ. Gilubowa só lɛ́ɛ mi! Ahǔn má sɔ́ ja dó mi jí gbeɖé ó, jǐ ma sɔ́ ja dó mi jí gbeɖé ó. È ma sɔ́ mɔ ayǐkúngban e ná nyɔ́ jinukún ɔ́ ɖě ɖo mi sí gbeɖé ó, ɖó fínɛ́ wɛ ahwanfuntɔ́ lɛ́ɛ sín gǎglónú j'ayǐ ɖe, bɔ yě ɖu winnyá. Sawúlu tɔn lɔ j'ayǐ ɖo fínɛ́, bɔ mɛɖé sɔ́ ná sá ami dó gbeɖé ǎ. Jonatáan sín gǎ nɔ yi do ɖo kɛntɔ́ nukɔn ǎ, kɛntɔ́ ɔ́ ná bó dó hlɔ̌nhlɔ́n gbɔn ɖěbǔ ɔ́, gǎ tɔn nɔ yi do ǎ. Sawúlu ka nɔ nyi hwǐ tɔn gblá ǎ. Hwenu e Sawúlu kpó Jonatáan kpó ɖo gbɛ ɔ́, yě yí wǎn nú yěɖée ɖésú. Yě yí wǎn nú yěɖée káká bó zɔn kpɔ́ yi kú. Yě yá alɔ hú gangan, Yě kpan akɔ́n hú kinnikínní. Vǐ nyɔ̌nu Izlayɛ́li tɔn lɛ́ɛ e mi, mi ví Sawúlu; é wɛ nɔ dó akwɛ́núvɔ mi; é wɛ nɔ zé sikánú lɛ́ɛ dó ɖó acɔ́ nú awu mitɔn lɛ́ɛ. Étɛ́wú ahwan ná ɖo te mɔ̌ bɔ ahwanfuntɔ́ syɛ́nsyɛ́n lɛ́ɛ ná kú? Étɛ́wú Jonatáan ka ná kú jɛ só jí xwlɛlɛ mɔ̌? Nɔví ce Jonatáan, kú towe wɛ zɔ́n bɔ un ɖo wǔvɛ́ mɔ wɛ lě. Hwi wɛ nɔ dó xomɛhunhun nú mì. A yí wǎn nú mì bɔ é vɛ́ jlɛ́. Wǎn yíyí e a ɖǒ nú mì ɔ́ hú wǎn e è nɔ yí nú nyɔ̌nu é. Étɛ́wú ahwanfuntɔ́ syɛ́nsyɛ́n lɛ́ɛ ka ná cí ahwan mɔ̌? Étɛ́wú ahwanfuntɔ́ nukúnɖéjí énɛ́ lɛ́ɛ ná dɔn? Ée nǔ énɛ́ lɛ́ɛ jɛ wá yi ɔ́, Davídi kanbyɔ́ Mawu Mavɔmavɔ ɖɔ: “Un ɖó ná yi Judáa toxo lɛ́ɛ ɖokpó mɛ wɛ a?” Mawu Mavɔmavɔ yí gbe n'i ɖɔ: “Ɛɛn!” Davídi lɛ́ kanbyɔ́ Mawu Mavɔmavɔ ɖɔ: “Toxo tɛ́ mɛ un ná yi?” Bɔ Mawu Mavɔmavɔ ɖɔ n'i ɖɔ: “Yi Eblɔ́n.” Ée Mawu Mavɔmavɔ ɖɔ mɔ̌ ɔ́, Davídi kplá asi tɔn we lɛ́ɛ bó ɖidó. Asi tɔn Axinɔwamu Izleyɛ́linu ɔ́, kpódó asi tɔn Avigayilu Kaamɛ́linu, asúkúsi Navalu tɔn kpó. Davídi kplá hǎgbɛ́ tɔn lɛ́ɛ lɔmɔ̌, yě kpó mɛ yětɔn lɛ́ɛ bǐ kpó, bɔ yě yi cí gletoxo e lɛ́ dó Eblɔ́n lɛ́ɛ mɛ. Énɛ́ ɔ́ gúdo ɔ́, Judáa ví lɛ́ɛ wá Eblɔ́n, bó wá sɔ́ Davídi axɔ́sú, ɖó Judáa to ɔ́ nu. È wǎ ɖɔ nú Davídi ɖɔ Yavɛ́cinu e ɖo Galadi lɛ́ɛ zé Sawúlu sín cyɔ bó yi ɖi. Ée é se mɔ̌ ɔ́, é sɛ́ mɛ dó ɖɔ è nǐ yi ɖɔ nú yě ɖɔ: “Mawu Mavɔmavɔ ní dó acɛ mi jí, ɖó mi ɖe wǎn yíyí e mi ɖó nú Sawúlu gǎn mitɔn ɔ́ xlɛ́, bó zé cyɔ tɔn yi ɖi. Din ɔ́, Mawu Mavɔmavɔ ní nyɔ́ xomɛ dó mi wú. Ní ɖe gbejíninɔ tɔn xlɛ́ mi. Nyɛ lɔmɔ̌ ná wa ɖagbe nú mi ɖó mɔ̌ e mi wa ɔ́ wú. Din ɔ́, mi lɛ́ kpan akɔ́n bó syɛ́nlǐn. Gǎn mitɔn Sawúlu kú, mi ní ká tunwun ɖɔ nyɛ wɛ Judáa ví lɛ́ɛ sɔ́ axɔ́sú, bɔ un ná nɔ yě nu.” Avunɛ́ɛ Nɛ̌ɛ ví e nyí ahwangán Sawúlu tɔn ɔ́ kplá Icíbɔcɛ́ti Sawúlu ví ɔ́ yi ɖó toxo e è nɔ ylɔ́ ɖɔ Maxanayímu ɔ́ mɛ. É sɔ́ ɛ axɔ́sú ɖó Galadi to ɔ́, Acúu to ɔ́, Izleyɛ́li to ɔ́, Eflayímu to ɔ́ kpó Bɛnjamɛ́ɛ to ɔ́ kpó nu. È nǎ ɖɔ ɔ́, é kpa acɛ dó Izlayɛ́li to ɔ́ bǐ nu. Xwe kanɖé ɖó wɛ Icíbɔcɛ́ti ɖe bo nyí Izlayɛ́li xɔ́sú. É nɔ gǎnzinkpo ɔ́ jí nú xwe we. Akɔta Judáa tɔn ɔ́ kɛ́ɖɛ́ wɛ se tónú nú acɛkpikpa Davídi tɔn. Davídi ɖu axɔ́sú ɖo Eblɔ́n, bó kpa acɛ dó akɔta Judáa tɔn ɔ́ nu xɔ xwe tɛ́nwe adaɖé. Avunɛ́ɛ Nɛ̌ɛ ví ɔ́ kpó Icíbɔcɛ́ti Sawúlu ví ɔ́ sín ahwanfuntɔ́ lɛ́ɛ kpó tɔ́n sín Maxanayímu, bó tunta Gabawɔ́ɔn. Jowabu Selúya ví ɔ́ kpó Davídi sín ahwanfuntɔ́ lɛ́ɛ kpó lɔmɔ̌ jɛ ali. Gbɛ̌ta we énɛ́ lɛ́ɛ wá kplé afɔ ɖo Gabawɔ́ɔn sindo ɔ́ kɔn. Yě mɛ ɖokpó ɖokpó sí ahwan te, bó nɔ te ɖisí amyɔ ɖo sindo ɔ́ tó. Avunɛ́ɛ ɖɔ nú Jowabu ɖɔ: “Un jló ɖɔ sɔ́ja wínnyáwínnyá mǐtɔn lɛ́ɛ ní fun ahwan nú mǐ ná kpɔ́n mɛ e syɛ́n hú mɛ ɖě é.” Jowabu yí gbe n'i ɖɔ: “É nyɔ́.” Ahwanfuntɔ́ lɛ́ɛ sɛkpɔ́ yěɖée. Akɔta Bɛnjamɛ́ɛ tɔn sín ahwanfuntɔ́ lɛ́ɛ nyí wěwe; yě wɛ zé Icíbɔcɛ́ti sín afɔ ɖó te, bɔ sɔ́ja Davídi tɔn lɛ́ɛ lɔ nyí wěwe. Sɔ́ja ɖokpó ɖokpó nɔ wlí kɛntɔ́ tɔn sín ta, bó nɔ lun hwǐ dó adaja mɛ n'i. Yě bló mɔ̌, bó hu yě bǐ. È nɔ ylɔ́ tɛn énɛ́ e ɖo Gabawɔ́ɔn ɔ́ ɖɔ Hɛlukáti Hasulimu. Tínmɛ tɔn wɛ nyí: Awǐnnya lɛ́ɛ sín gle. Ahwan e yě fun gbe nɛ́ gbe ɔ́ syɛ́n ɖésú. Davídi sín ahwanfuntɔ́ lɛ́ɛ ɖu ɖo Avunɛ́ɛ kpó ahwanfuntɔ́ tɔn lɛ́ɛ kpó jí. Selúya sín vǐ atɔn lɛ́ɛ: Jowabu, Avicáyi kpó Asaxɛli kpó ɖo fínɛ́. Asaxɛli yá afɔ hú tɛ́. É zun dó Avunɛ́ɛ jí; é zɛ dó aɖisí ǎ, é ká zɛ dó amyɔ ǎ. Avunɛ́ɛ kpɔ́n gǔdo bó ɖɔ: “Asaxɛli, hwi jɛ́n wɛ a?” Bɔ Asaxɛli yí gbe n'i ɖɔ: “Nyi jɛ́n wɛ.” Bɔ Avunɛ́ɛ ɖɔ n'i ɖɔ: “Jɛ ahwanfuntɔ́ nɛ́ lɛ́ɛ ɖokpó gúdo ɖo ɖisí abǐ amyɔ, bó tɛ́nkpɔ́n bó wlí mɛ ɖokpó ɖo yě mɛ, bó yí ahwanfunnú tɔn lɛ́ɛ.” Lo ɔ́, Asaxɛli jló ná lɛ́ kɔ sín gǔdo tɔn ǎ. Avunɛ́ɛ lɛ́ ɖɔ n'i ɖɔ: “Lɛ̌ kɔ sín gǔdo ce; ma lɔn nú un hu we ó, ɖó ényí un hu we bó wá mɔ nɔví towe Jowabu ɔ́, un ná tunwun nukún e un ná dó kpɔ́n ɛ ná ɔ́ ǎ.” Ée Asaxɛli gbɛ́ kɔ lɛ́ é ɔ́, Avunɛ́ɛ lun hwǎn tɔn sín nu xwíɖíxwíɖí ɔ́ dó adɔgo mɛ n'i, bɔ hwǎn ɔ́ xo adɔ ɔ́ zlɛ́ bó tɔ́n, bɔ Asaxɛli kú cúɖúɖú. Wǔ kú mɛ e wá jɛ fínɛ́ bó mɔ Asaxɛli cyɔ lɛ́ɛ bǐ, bɔ yě sɔ́ nɔ sɛ tɛn ǎ. Lo ɔ́, Jowabu kpó Avicáyi kpó jɛ Avunɛ́ɛ gbé mɛ, bɔ hwe wá yi xɔ dó yě ɖo Giveyati-Amuma, ɖo Giyáxi sín gbadahwe jí, ɖo ali e yi Gabawɔ́ɔn sín gbětótló mɛ ɔ́ jí. Ahwanfuntɔ́ Bɛnjamɛ́ɛ tɔn lɛ́ɛ so gbɛ̌ ɖo Avunɛ́ɛ gúdo, bó kplé cí só ɖokpó jí. Avunɛ́ɛ ylɔ́ Jowabu bo ɖɔ: “Mǐ ná fɔ́n tɛgbɛ bó ná ɖo mǐɖée hu wɛ a? A tunwun ɖɔ fífó tɔn ná blá wǔ ǎ cé? Étɛ́ nɔ te kpɔ́n wɛ a ka ɖe cóbó ná gbɛ́ nú ahwanfuntɔ́ towe lɛ́ɛ ɖɔ yě má sɔ́ nya nɔví yětɔn lɛ́ɛ ɖě ó?” Jowabu xwlé nǔ n'i ɖɔ: “Mawu ɖo gbɛ; ényí a ma ɖɔ mɔ̌ ǎ ɔ́, ahwanfuntɔ́ ce lɛ́ɛ ɖo mɛ e nya wɛ yě ɖe ɔ́ ná ɖó te wɛ káká cóbónú ayǐ ná hɔ́n ǎ.” Ée Jowabu ɖɔ mɔ̌ ɔ́, é ɖɔ bɔ è kún lanzo, bɔ sɔ́ja tɔn lɛ́ɛ lɛ́ kɔ sín Izlayɛ́li ví lɛ́ɛ gúdo bó ɖó ahwan e fun wɛ yě ɖe ɔ́ te. Avunɛ́ɛ kpó ahwanfuntɔ́ tɔn lɛ́ɛ kpó zun zɔnlin gbɔn Judɛ́ɛn tɔdo ɔ́ mɛ káká bɔ ayǐ hɔ́n. Yě wǎ dó asá Judɛ́ɛn tɔ ɔ́, bó gbɔn Bitlɔ́ni to ɔ́ mɛ dín, bó wá tɔ́n dó Maxanayímu. Ée Jowabu lɛ́ kɔ sín Avunɛ́ɛ gbé mɛ bó wá ɔ́, é kplé ahwanfuntɔ́ tɔn lɛ́ɛ, bó xa yě kpɔ́n, bó mɔ ɖɔ mɛ afɔtɔn-nukún-ɛnɛ jɛ́n hwe ɖo ahwanfuntɔ́ Davídi tɔn lɛ́ɛ mɛ, bɔ Asaxɛli gɔ́ ná. Amɔ̌, Davídi sín ahwanfuntɔ́ lɛ́ɛ hu gbɛtɔ́ afɔɖé kɛnnɛ (360) ɖo sɔ́ja Bɛnjamɛ́ɛ kpó Avunɛ́ɛ kpó tɔn lɛ́ɛ mɛ. Yě zě Asaxɛli sín cyɔ yi ɖi dó tɔ́ tɔn sín yɔdo mɛ ɖo Bɛteleyɛ́mu. Énɛ́ ɔ́ gúdo ɔ́, Jowabu kpó ahwanfuntɔ́ tɔn lɛ́ɛ kpó zun zɔnlin zǎn ɔ́ mɛ káká; ayǐ ko ɖo hǐnhɔ́n wɛ có yě wá Eblɔ́n. Sawúlu sín mɛ lɛ́ɛ kpó Davídi sín mɛ lɛ́ɛ kpó fun ahwan káká. Acɛkpikpa Davídi tɔn fɔ́n ɔ́, é nɔ́ ɖo nukɔn yi wɛ, bɔ Sawúlu sín mɛ lɛ́ɛ tɔn ká nɔ́ ɖo gǔdo yi wɛ. Davídi ji vǐ ɖo Eblɔ́n. Vǐ tɔn nukɔn tɔn ɔ́ nɔ́ nyí Amunɔ́ɔ; Axinɔwamu Izleyɛ́linu ɔ́ wɛ ji vǐ énɛ́ ɔ́ n'i. Vǐ tɔn wegɔ́ ɔ́ nɔ nyí Kileavu, Avigayilu Kaamɛ́linu, asúkúsi Navalu tɔn ɔ́ wɛ ji vǐ énɛ́ ɔ́ n'i. Vǐ tɔn atɔngɔ́ ɔ́ nɔ nyí Abusalɔ́mu; Gɛcúu xɔ́sú Talumayi sín vǐ Maaka wɛ ji vǐ énɛ́ ɔ́ n'i. Vǐ tɔn ɛnɛgɔ́ ɔ́ nɔ nyí Adoniyasi, Hagiti wɛ ji vǐ énɛ́ ɔ́ n'i. Vǐ tɔn atɔ́ɔ́ngɔ́ ɔ́ nɔ nyí Cefátiya; Avitálu wɛ ji vǐ énɛ́ n'i. Vǐ tɔn ayizɛ́ngɔ́ ɔ́ nɔ nyí Yitleamu, asi tɔn Egla ɔ́ wɛ ji vǐ énɛ́ n'i. Vǐ e Davídi ji ɖo Eblɔ́n lɛ́ɛ sín nyǐkɔ nɛ́. Hwenu e Sawúlu sín mɛ lɛ́ɛ kpó Davídi sín mɛ lɛ́ɛ kpó ɖo ahwan fun wɛ é ɔ́, Avunɛ́ɛ ɖo acɛ ɖó dó acɛ jí wɛ ɖo Sawúlu sín mɛ lɛ́ɛ tɛ́ntin. Sawúlu ɖó asi ɖokpó, bɔ è nɔ ylɔ́ ɛ ɖɔ Hlisipa; Aya ví wɛ. Icíbɔcɛ́ti ɖɔ xó nú Avunɛ́ɛ dó nyɔ̌nu énɛ́ wú gbe ɖokpó. É ɖɔ n'i ɖɔ: “Étɛ́wú a ɖǒ xó xá tɔ́ ce sín asi?” Ée Avunɛ́ɛ se xó énɛ́ ɔ́, xomɛ sin i ɖésú, bɔ é ɖɔ: “Cukú wɛ un nyí bó ɖo Judáa ví lɛ́ɛ kan nu a? Un ɖe lě e un nyɔ́ xomɛ dó tɔ́ towe Sawúlu sín xwédo ɔ́ wú gbɔn ɔ́ xlɛ́, bó ɖe lě e un nyɔ́ xomɛ dó nɔví tɔn lɛ́ɛ kpó xɔ́ntɔn tɔn lɛ́ɛ kpó wú gbɔn ɔ́ xlɛ́. Un jó we dó nú Davídi sín mɛ lɛ́ɛ bɔ yě wlí we ǎ, bɔ égbé din ɔ́, a wǎ mɔ nǔ e un wa xá nyɔ̌nu élɔ́ ɔ́, bó ɖo ɖiɖɔ wɛ. Ényí un ma bló nǔ e sín alɔ Mawu Mavɔmavɔ zin dó akɔ́n nú Davídi ɔ́ bǐ nú Davídi ǎ hǔn, Mawu ní dɔn tó nú mì nú é syɛ́n hú tódɔnnúmɛ lɛ́ɛ bǐ. Đó Mawu ko zin alɔ dó akɔ́n ɖɔ émí ná yí axɔ́súɖuɖu ɔ́ sín xwédo Sawúlu tɔn mɛ, bó ná zé jó nú Davídi. Bɔ Davídi ná kpa acɛ dó Izlayɛ́li nu, bó ná kpa dó Judáa nu. É ná kpa acɛ dó to ɔ́ bǐ nu sín Dan ɖo totaligbé káká wá Bɛ̌-Ceva ɖo tofɔligbé.” Icíbɔcɛ́ti sixú glá kɛ nu dó xó e Avunɛ́ɛ ɖɔ ɔ́ wú ǎ, ɖó xɛsi e ɖo jǐ tɔn ɔ́ flá. Avunɛ́ɛ dó wɛn sɛ́ dó Davídi gbɔn wɛnsagun tɔn lɛ́ɛ jí ɖɔ: “Mɛ̌ tɔn ká nyí to ɔ́? Wǎ mǐ nu alɛ bónú má dó alɔ we nú a nǎ yí Izlayɛ́li to ɔ́ bǐ.” Bɔ Davídi yí gbe nú Avunɛ́ɛ bo ɖɔ: “É nyɔ́, un yí gbe bo ná nu alɛ xá we. Amɔ̌, nǔ ɖokpó byɔ́ we wɛ un ɖe: Cóbónú mǐ nǎ nu alɛ ɔ́, a nǎ to kplá asi ce Mikali, Sawúlu ví ɔ́ wá nú mì hwɛ̌.” Énɛ́ ɔ́ gúdo ɔ́, Davídi dó wɛn sɛ́ dó Icíbɔcɛ́ti, Sawúlu ví ɔ́ nú è yi ɖɔ n'i ɖɔ é ní sɛ́ asi émítɔn Mikali Sawúlu ví e émí zé atɔtɔ Filisitɛ́ɛn lɛ́ɛ tɔn kanwe ko dó da ɔ́ dó émí. Icíbɔcɛ́ti yí nyɔ̌nu ɔ́ sín asú tɔn Palutiyɛ́li Layici ví ɔ́ sí, bɔ asú ɔ́ ɖo avǐ ya wɛ ɖo gǔdo tɔn káká bó wá Baxulimu. Ée yě jɛ fínɛ́ ɔ́, Avunɛ́ɛ ɖɔ nú asú ɔ́ ɖɔ é ní lɛ́ kɔ yi xwé, bɔ é lɛ́ kɔ nǔgbó. Avunɛ́ɛ ka ko ɖɔ xó xá tomɛxó Izlayɛ́li tɔn lɛ́ɛ hwe ɖé nu. É ɖɔ nú yě ɖɔ: “Mi ɖo biba wɛ ɖɔ Davídi ní nyí axɔ́sú émítɔn din ɔ́, é kó lín. Mi bo sɔ́ ɛ axɔ́sú din, ɖó Mawu Mavɔmavɔ ɖɔ xó dó wǔ tɔn ɖɔ: ‘Mɛsɛntɔ́ ce Davídi jí wɛ un ná gbɔn, bó hwlɛ́n togun ce Izlayɛ́li ɔ́ gán ɖo Filisitɛ́ɛn lɛ́ɛ kpó kɛntɔ́ tɔn ɖě lɛ́ɛ bǐ kpó sí.’ ” Avunɛ́ɛ ɖɔ xó xá Bɛnjamɛ́ɛnu lɛ́ɛ lɔmɔ̌. Énɛ́ ɔ́ gúdo ɔ́, é ɖidó Eblɔ́n, bo ná ɖɔ linlin e Bɛnjamɛ́ɛnu lɛ́ɛ kpó Izlayɛ́li ví ɖě lɛ́ɛ kpó yí gbe ná ɔ́ nú Davídi ɖésúnɔ. Avunɛ́ɛ kplá gbɛtɔ́ ko bo wá Davídi gɔ́n ɖo Eblɔ́n. Ée Avunɛ́ɛ wá ɔ́, Davídi ɖu agɔ̌ xá é kpódó mɛ tɔn lɛ́ɛ kpó. Avunɛ́ɛ ɖɔ nú Davídi ɖɔ: “Sɛ́mɛɖó, un ɖo gbesisɔ mɛ bó ná yi, bó ná kplé Izlayɛ́li to ɔ́ bǐ nú mɛ. Yě ná nu alɛ xá mɛ, bɔ mɛ ná kpa acɛ dó to ɔ́ bǐ jǐ, lě e é jló mɛ gbɔn é.” Énɛ́ ɔ́, Davídi ná gbe Avunɛ́ɛ, bɔ é ɖidó kpó fífá kpó. É nɔ zaan bɔ Jowabu kpó Davídi sín ahwanfuntɔ́ lɛ́ɛ kpó lɛ́ kɔ sín to ɖé gba gbé wá. Nǔ e yě mɔ sín dɔ̌n ɔ́ sukpɔ́ tawun. Avunɛ́ɛ sɔ́ ɖo kpɔ́ xá Davídi ɖo Eblɔ́n ǎ, ɖó Davídi ko nyi Avunɛ́ɛ, bɔ é ko yi kpó fífá kpó. Ée Jowabu kpó ahwangɔnu tɔn kpó wá ɔ́, è wlǐ nǔ e jɛ ɔ́ ɖɔ n'i ɖɔ: “Avunɛ́ɛ Nɛ̌ɛ ví ɔ́ wá axɔ́sú ɔ́ gɔ́n, bɔ axɔ́sú ɔ́ jó e dó, bɔ é yi kpó fífá kpó.” Jowabu yi axɔ́sú ɔ́ gɔ́n, bó ɖɔ n'i ɖɔ: “Étɛ́ a ka bló nɛ́? Avunɛ́ɛ wá gɔ̌n towe, bɔ a jǒ e dó bɔ é yi wɛ a? A tunwun Avunɛ́ɛ Nɛ̌ɛ ví ɔ́ ganjí. Fí e é wá é ɔ́, é jló ná blɛ́ we, bó ná ba do nú nǔ e wa wɛ a ɖe lɛ́ɛ, bó ná mɔ do nú we bǐ céɖécéɖé wú wɛ é wá.” Ée Jowabu tɔ́n sín axɔ́sú ɔ́ gɔ́n ɔ́, é sɛ́ mɛ dó Avunɛ́ɛ gbé mɛ, bɔ è yi kplá ɛ sín Siláa dotɔ ɔ́ kɔn wá. Davídi ka mɔ do nú nǔɖé ǎ. Ée yě kplá Avunɛ́ɛ wá Eblɔ́n ɔ́, Jowabu kplá ɛ jɛ zɔ ɖo toxo ɔ́ sín hɔnnúwa sá, mɛ jló ná ɖe kpá ɛ ɖɔhun, lobo sɔ́ nǔ adɔ mɛ n'i bó hu i. É bló mɔ̌, dó ba nɔví tɔn Asaxɛli e kú ɔ́ sín hlɔn. Ée Davídi se nǔ e jɛ ɔ́ tlóló ɔ́, é sú xó bó ɖɔ: “Mawu Mavɔmavɔ ɖésú tunwun ɖɔ nyi kpó mɛ e ɖo axɔ́súɖuto ce mɛ lɛ́ɛ kpó kún mɔ do nú Avunɛ́ɛ Nɛ̌ɛ ví ɔ́ sín kú ó lóóo! Ényí kú ɖé ɔ́, é ɖo kɔ nú Jowabu kpó xwédo tɔn kpó. Káká sɔ́yi gbɛ mavɔ mavɔ ɔ́, glɔ̌zɔn ní hun hɔn byɔ́ xwé tɔn gbe, gudu ní kpé yě wǔ, gbɛtɔ́ ná ɖo xwé tɔn gbe bɔ kpogɛ jɛ́n é ná mɔ cóbó ɖi zɔnlin; gbɛtɔ́ ní kú hwǐ kú, abǐ gbɛtɔ́ ní kú adɔ kú ɖo xwé tɔn gbe.” Lě e Jowabu kpó nɔví tɔn Avicáyi kpó hu Avunɛ́ɛ gbɔn é nɛ́, ɖó Avunɛ́ɛ hu nɔví yětɔn Asaxɛli ɖo ahwangbénu ɖo Gabawɔ́ɔn. Davídi ɖɔ nú Jowabu kpó mɛ e kplá ɛ lɛ́ɛ kpó ɖɔ: “Mi vún awu dó kɔ nú miɖée, bó dó caki bo ví Avunɛ́ɛ.” Axɔ́sú Davídi ɖésú ɖo zɔnlin jí ɖo cyɔ ɔ́ gúdo. È ɖi Avunɛ́ɛ ɖó Eblɔ́n. Ée è ɖi i ɔ́, axɔ́sú ɔ́ sú xó bó ya avǐ ɖo Avunɛ́ɛ sín yɔta, bɔ togun ɔ́ bǐ wlí avǐ. Énɛ́ ɔ́ gúdo ɔ́, axɔ́sú ɔ́ dó gbɛvíhan dó Avunɛ́ɛ tamɛ ɖɔ: “Avunɛ́ɛ! Étɛ́wú a ka ná kú adǎnúwatɔ́ ɖɔhun mɔ̌? Mɛ ɖé ma blá alɔ towe nɛ́! È ma ka dó gɛdɛ we nɛ́! Có a j'ayǐ bó kú adǎnúwatɔ́ lɛ́ɛ wɛ fyán we ɖɔhun.” Ée é ɖɔ mɔ̌ fó ɔ́, mɛ e ɖo fínɛ́ lɛ́ɛ bǐ bɛ́ avǐ. Énɛ́ ɔ́ gúdo ɔ́, kéze kpo ɖo te bɔ yě hɛn nǔɖuɖu wá nú axɔ́sú ɔ́, bɔ é xwlé nǔ nú yě ɖɔ: “Ényí un ɖu nǔɖé, abǐ un dó kɛ́n nu cóbónú hwe yi xɔ hǔn, Mawu ní dɔn tó e syɛ́n hú tódɔnnúmɛ lɛ́ɛ bǐ ɔ́ nú mì.” Togun ɔ́ bǐ se nǔ e axɔ́sú ɔ́ ɖɔ é, bó yí gbe d'é jí. Lo ɔ́, axɔ́sú ɔ́ jí jɛ́n togun ɔ́ nɔ́ nɔ tɛgbɛ. Judáa togun ɔ́ kpó Izlayɛ́li togun ɔ́ bǐ kpó mɔ gbe nɛ́ gbe ɖɔ é kún nyí axɔ́sú ɔ́ wɛ ná gbe bɔ è hu Avunɛ́ɛ Nɛ̌ɛ ví ɔ́ ó. Axɔ́sú ɔ́ lɛ́ ɖɔ nú mɛsɛntɔ́ tɔn lɛ́ɛ ɖɔ: “Mi ma mɔ égbé din ɖɔ gǎn ɖokpó, gǎn Izlayɛ́li tɔn ɖaxó ɖokpó wɛ kú a? È kɔn ami dó ta nú mì bó sɔ́ mì axɔ́sú, có un ka ba hlɔ̌nhlɔ́n kpo. Nya énɛ́ lɛ́ɛ ɔ́, Selúya ví énɛ́ lɛ́ɛ ɔ́, yě syɛ́n hú mì. Mawu Mavɔmavɔ ní wa nǔ xá mɛ e wa nǔ nyi do é.” Icíbɔcɛ́ti, Sawúlu ví ɔ́ se ɖɔ Avunɛ́ɛ kú ɖo Eblɔ́n. Ée é se mɔ̌ ɔ́, awakanmɛ kú i; xɛsi ɖaxó ɖé jɛ Izlayɛ́li to ɔ́ bǐ jí. Icíbɔcɛ́ti ka kpa acɛ dó ahwangán we nu; mɛ ɖokpó nɔ́ nyí Baana, bɔ mɛ wegɔ́ ɔ́ nɔ́ nyí Hlekávu. Hlimumɔ́ni, Bɛnjamɛ́ɛ ví e nɔ́ nɔ Beelɔ́ti ɔ́ sín vǐ wɛ yě nyí. Beelɔ́ti sín toxo ɔ́, Bɛnjamɛ́ɛ yíkúngban jí wɛ é ɖe. Sín hwenu e Beelɔ́tinu xóxó lɛ́ɛ ko hɔn yi cí Gitayímu, bɔ vǐ yětɔn lɛ́ɛ kpo ɖo fínɛ́ káká wá jɛ égbé din ɔ́ wɛ Beelɔ́ti húzú Bɛnjamɛ́ɛ yíkúngban. Jonatáan Sawúlu ví ɔ́ lɔ ka ɖó vǐ súnnu ɖokpó, bɔ é xwe ayǐsó. Hwenu e vǐ ɔ́ ɖo xwe atɔ́ɔ́n ɖó wɛ ɔ́ wɛ è se sín Izleyɛ́li ɖɔ Sawúlu kpó Jonatáan kpó kú. Ée nyɔ̌nu e ɖo vǐ ɔ́ hɛn wɛ ɔ́ se mɔ̌ ɔ́, é hɔn dó jǐ tɔn, bó ká ɖo hwlɛ̌ndó jí káká bɔ vǐ ɔ́ j'ayǐ, bɔ afɔ tɔn we lɛ́ɛ bǐ lɔ́, bɔ é xwe ayǐsó. Mɛfibáalu wɛ vǐ ɔ́ nɔ nyí. Hlimumɔ́ni Beelɔ́tinu ɔ́ sín vǐ Hlekávu kpó Baana kpó sɔ́ nǔ, bó ɖidó Icíbɔcɛ́ti xwé. Yě ɖo xwé ɔ́ gbe byɔ́ wɛ hwemɛ cíɖíɖí; Icíbɔcɛ́ti ka ɖo hwemɛ mlɔ dɔ́ wɛ hwenɛ́nu. Hlekávu kpó Baana kpó yi xwé ɔ́ ta, mɛ xwe jinukún ba gbé ɖɔhun, lobo sɔ́ nǔ Icíbɔcɛ́ti dó adɔgo mɛ bó hu i, lobo hɔn. Hǔn, hwenu e Icíbɔcɛ́ti ɖo xɔnɔnɔ tɔn mɛ, bó ɖo gbigbɔjɛ́ wɛ ɖo zan tɔn jí ɔ́ wɛ yě byɔ́ xɔ ɔ́ mɛ, lobo xo e hu bó gbo ta tɔn bó zé, lobo zɔn zǎn d'é jí gbɔn Judɛ́ɛn tɔdo ɔ́ mɛ bó yi. Yě zě Icíbɔcɛ́ti sín ta wá nú Davídi ɖo Eblɔ́n, bó ɖɔ n'i ɖɔ: “Sɛ́mɛɖó! Kɛntɔ́ mɛtɔn Sawúlu e jló ná hu mɛ ɔ́ sín vǐ Icíbɔcɛ́ti ɔ́ sín ta ɖíe. Égbé din ɔ́, Mawu Mavɔmavɔ hu Sawúlu kpó vǐ tɔn lɛ́ɛ kpó dó ba hlɔn nú mɛ.” Bɔ Davídi xwlé Mawu ɖɔ: “Mawu Mavɔmavɔ e hwlɛ́n mì sín awě nɛ́ lɛ́ɛ bǐ mɛ ɔ́ ɖo gbɛ. Mɛ e wá dó Sawúlu kúkú sín wɛn mì bó vɛdó ɖɔ xó ɖagbe wɛ émí hɛn wá nú mì sín ɔ́, un wlí i bó hu i ɖo Siklági, bó xlɛ́ ɛ ɖɔ wɛn e é wá dó ɔ́ sín le nɛ́. Bɔ din ɔ́, adǎkaxotɔ́ e yi hu xomɛvɔ́nɔ ɖo xwé tɔn gbe, ɖo zan tɔn jí lɛ́ɛ ɔ́, nɛ̌ yětɔn ká ná nyí gbɔn lo? Kanjɔ e mi kɔn nyi ayǐ ɔ́ sín tó wɛ un ná dɔn nú mi, bó sú kún mitɔn dó ɖo ayǐkúngban jí fí.” Davídi ná gbe sɔ́ja tɔn lɛ́ɛ, bɔ yě hu Hlekávu kpó Baana kpó, lobo sɛ́n alɔ yětɔn lɛ́ɛ kpó afɔ yětɔn lɛ́ɛ kpó bó yi dó kan ɖó sindo Eblɔ́n tɔn ɔ́ tó, bó ká zé Icíbɔcɛ́ti sín ta yi dó Avunɛ́ɛ sín yɔdo mɛ ɖo Eblɔ́n. Izlayɛ́li sín akɔta lɛ́ɛ bǐ wá mɔ Davídi ɖo Eblɔ́n bo ɖɔ n'i ɖɔ: “Hun mɛtɔn wɛ mǐ nyí. Đ'ayǐ e Sawúlu nyí axɔ́sú mǐtɔn ɔ́, mɛ wɛ nɔ kplá ahwanfuntɔ́ Izlayɛ́li tɔn lɛ́ɛ yi ahwangbénu, bó nɔ lɛ́ kplá yě wá xwé. Mawu Mavɔmavɔ ko ɖɔ nú mɛ ɖ'ayǐ ɖɔ mɛ wɛ ná kpé nukún dó togun émítɔn Izlayɛ́li ɔ́ wú lě e lɛ̌ngbɔ́nyitɔ́ nɔ kpé nukún dó lɛ̌ngbɔ́ tɔn lɛ́ɛ wú é ɖɔhun, mɛ wɛ ná nyí to ɔ́ sín gǎn.” Énɛ́ ɔ́, hwenu e tomɛxó Izlayɛ́li tɔn lɛ́ɛ bǐ wá axɔ́sú ɔ́ gɔ́n ɖo Eblɔ́n ɔ́, é nu alɛ xá yě ɖo Mawu Mavɔmavɔ nukɔn. Yě kɔn ami dó ta nú Davídi, bó sɔ́ ɛ Izlayɛ́li xɔ́sú. Xwe gban wɛ (30) Davídi ɖó bɔ è sɔ́ ɛ axɔ́sú, bɔ é nɔ zinkpo jí nú xwe kanɖé (40). É nɔ Eblɔ́n bó kpa acɛ dó Judáa sín akɔta ɔ́ nu nú xwe tɛ́nwe adaɖé, bɔ hwenu e é wá wá Jeluzalɛ́mu ɔ́, é kpa acɛ dó Izlayɛ́li to ɔ́ bǐ kpó Judáa to ɔ́ bǐ kpó nu nú xwe gban-nukún-atɔn (33). Axɔ́sú Davídi kpó ahwanfuntɔ́ tɔn lɛ́ɛ kpó sí te dó Jeluzalɛ́mu toxo ɔ́ jí, bó tɔ́n ahwan Jebuzinu e ɖo fínɛ́ lɛ́ɛ. Yě ɖɔ nú Davídi ɖɔ: “A sixú byɔ́ toxo mǐtɔn mɛ fí ǎ. Nukúntíntɔ́nnɔ lɛ́ɛ kpó sékúnɔ lɛ́ɛ kpó yǎyá wɛ ná nya we tɔ́n.” Yě ɖo ɖiɖɔ nú Davídi wɛ gbɔn mɔ̌ ɖɔ é kún sixú yí toxo ɔ́ ó. É ká ɖo mɔ̌ có Davídi yí toxo e è mɛ ahohó lɛ́ lɛ̌ dó ɖo Sinyɔ́ɔ é. Toxo énɛ́ ɔ́ wɛ è nɔ ylɔ́ ɖɔ Davídi Toxo. Davídi ɖɔ gbe nɛ́ gbe ɖɔ: “Ényí mɛɖé jló ná hu Jebuzinu lɛ́ɛ hǔn, mɛ ɔ́ ní gbɔn ali e è ɖe gbɔn ayǐkúngban glɔ́ é; énɛ́ ɔ́, é ná kpé yě wú. Un gbɛ́ wǎn nú sékúnɔ nɛ́ lɛ́ɛ kpó nukúntíntɔ́nnɔ nɛ́ lɛ́ɛ kpó ɖésú.” Énɛ́ ɔ́ wú wɛ è nɔ ɖɔ: “È nɔ yí nukúntíntɔ́nnɔ lɛ́ɛ kpó sékúnɔ lɛ́ɛ kpó dó sinsɛnxɔ Mawu tɔn mɛ ǎ.” Davídi sá xwé nyi ahohó ɔ́ mɛ, bó sun nyǐ fínɛ́ ɖɔ: “Davídi Toxo.” Énɛ́ ɔ́ gúdo ɔ́, Davídi lɛ́ zɔ́n bɔ è mɛ dǒ sín Milo kpe ɔ́ kɔn káká wá hɔnmɛ fí e é nɔ́ nɔ é. Davídi sín hlɔ̌nhlɔ́n nɔ́ ɖo jijɛ jí wɛ ayǐhɔ́ngbe ayǐhɔ́ngbe, ɖó Mawu Mavɔmavɔ, Mawu Nǔbǐwúkpétɔ́ ɔ́ ɖo kpɔ́ xá ɛ. Ilámu Tíi xɔ́sú ɔ́ sɛ́ mɛ dó Davídi gɔ́n, bó sɛ́ sɛ́dlutín dó e, bó sɛ́ xɔgbátɔ́ kpó awǐnnyakpatɔ́ kpó dó e, nú yě ná gbá hɔnmɛ ɖokpó n'i. Davídi mɔ ɖɔ Mawu Mavɔmavɔ ɖésú wɛ zé émí Izlayɛ́li xɔ́sú, lobo zé axɔ́súɖuto émítɔn su ɖó togun tɔn Izlayɛ́li wú. Ée Davídi gosín Eblɔ́n bó wá cí Jeluzalɛ́mu ɔ́, é lɛ́ da asi ɖěvo lɛ́ɛ ɖo fínɛ́, bɔ yě ji vǐ súnnu kpó vǐ nyɔ̌nu kpó n'i. Vǐ e Davídi ji ɖo Jeluzalɛ́mu lɛ́ɛ sín nyǐkɔ ɖíe: Camumúa, Covavu, Natáni, Salomɔ́ɔ, Yiváa, Elicuwa Nɛfɛ́gi, Yafia, Elicama, Eliyada kpódó Elifɛlɛ́ti kpó. Filisitɛ́ɛn lɛ́ɛ se ɖɔ è kɔn ami dó ta nú Davídi, bó sɔ́ ɛ Izlayɛ́li xɔ́sú. Ée yě se mɔ̌ ɔ́, yě bǐ jɛ gbě tɔn nya jí, bó ná wlí i. Davídi ka se bo hɔn yi cí fí e mɛɖé má sixú kpé wǔ tɔn ɖe ǎ é. Filisitɛ́ɛn lɛ́ɛ wá bó gba kpé Hlafa ví lɛ́ɛ sín tɔdo mɛ. Davídi kanbyɔ́ Mawu Mavɔmavɔ ɖɔ: “Má yi tɔ́n ahwan Filisitɛ́ɛn lɛ́ɛ a? A nǎ jó yě nú mì a?” Bɔ Mawu Mavɔmavɔ yí gbe nú Davídi ɖɔ: “Yi tɔ́n ahwan yě, un ná jó yě nú we, é ná gló ǎ.” Ée Mawu Mavɔmavɔ ɖɔ mɔ̌ ɔ́, Davídi yi Baalu-Pelasímu bó gba Filisitɛ́ɛn lɛ́ɛ ɖo fínɛ́, lobo ɖɔ: “Mawu Mavɔmavɔ nya kɛntɔ́ ce lɛ́ɛ sín nukɔn ce, bɔ yě gba wu sin ɖɔhun. Énɛ́ wú wɛ è sun nyǐ tɛn énɛ́ mɛ ɖɔ Baalu-Pelasímu; tínmɛ tɔn wɛ nyí ‘Aliɖedókɛntɔ́mɛgán.’ ” Filisitɛ́ɛn lɛ́ɛ jó vodún yětɔn lɛ́ɛ dó nyi fínɛ́, bɔ Davídi kpó sɔ́ja tɔn lɛ́ɛ kpó bɛ́ wá yi xwé. Filisitɛ́ɛn lɛ́ɛ lɛ́ vɔ́ sɔ́ ahwannú hwe ɖěvo nu, bo lɛ́ gba kpé Hlafa ví lɛ́ɛ sín tɔdo mɛ. Davídi lɛ́ vɔ́ kanbyɔ́ Mawu Mavɔmavɔ, bɔ Mawu Mavɔmavɔ ɖɔ n'i ɖɔ: “Ma gbɔn fí bó yi tɔ́n ahwan yě ó. Gbɔn gǔdo yětɔn, bó sɛkpɔ́ yě gbɔn Mikokulietínkan mɛ. Hwenu e a na se afɔ gbe ɖo atínkan ɔ́ mɛ ɔ́, a nǎ yá wǔ sí te, ɖó nyɛ Mawu Mavɔmavɔ wɛ ɖo nukɔn towe, bó ná gba Filisitɛ́ɛn lɛ́ɛ nú we.” Davídi wa nǔ lě e Mawu Mavɔmavɔ ɖɔ n'i gbɔn é. Énɛ́ ɔ́, é gba Filisitɛ́ɛn lɛ́ɛ bó jɛ gǔdo yětɔn sín Gɛva káká yi Gɛzɛ́ɛ. Davídi lɛ́ kplé sɔ́ja Izlayɛ́li tɔn e sín alɔ se kpɛ́n lɛ́ɛ, bɔ yě bǐ yi adɔ̌kpo ɖě děgba we afɔwó (30.000). Davídi kplá sɔ́ja énɛ́ lɛ́ɛ, bó yi Baalé-Yehuda ɖo Judáa yíkúngban jí, bó ná yi zé akɔjijɛgbá Mawu tɔn. Mawu Mavɔmavɔ Nǔbǐwúkpétɔ́ ɔ́ sín nyǐkɔ ɖ'é wú, bɔ é ɖo ayǐjínjɔ́n ɖo akɔjijɛgbá ɔ́ jí, ɖo axɔ́súzinkpo tɔn jí. Akɔjijɛgbá ɔ́, Avinadávu xwé wɛ é ká ɖe, ɖo só jí. È zě dó kɛkɛ́ví yɔ̌yɔ́ ɖé mɛ, bó ɖidó. Avinadávu ví Wúza kpó Axiyo kpó ɖo kɛkɛ́ví ɔ́ kun wɛ. Akɔjijɛgbá ɔ́ ɖo kɛkɛ́ví ɔ́ jí, bɔ Axiyo ɖo zɔnlin jí ɖo kɛkɛ́ví ɔ́ nukɔn. Davídi kpó Izlayɛ́li ví lɛ́ɛ bǐ kpó ɖo awǎ jɛ wɛ ɖo Mawu Mavɔmavɔ nukɔn, bó ɖo nǔxonú tɛnmɛ tɛnmɛ lɛ́ɛ xo wɛ. Yě hɛn nǔxonú ɖé lɛ́ɛ bɔ è zě atín e è nɔ ylɔ́ ɖɔ sikplɛ́ ɔ́ dó bló ná. Yě hɛn agǐdigbo kpó kanhún kpó, bó hɛn hǔnví, bó hɛn asán kpó gan kpó. Ée yě wá jɛ Nakɔ́ni sín kɔ́xota ɔ́, nyibú lɛ́ɛ jló ná zin akɔjijɛgbá ɔ́ dɛ́, bɔ Wúza dlɛ́n alɔ, bó hɛn akɔjijɛgbá ɔ́ ɖó te. Bɔ Mawu Mavɔmavɔ sin xomɛ dó Wúza, bó dɔn tó n'i ɖo fínɛ́ tɛn tɔn mɛ ɖó su e é ɖu ɔ́ wú, bɔ Wúza kú jɛ fínɛ́ ɖo akɔjijɛgbá ɔ́ kpá. Lě e Mawu Mavɔmavɔ hu Wúza gbɔn nɛ́ ɔ́ sin xomɛ nú Davídi. È ɖǒ nyǐkɔ nú tɛn e mɛ Wúza kú ɖe ɔ́ ɖɔ Pelɛ́si-Wúza. È kpo ɖo fí ɔ́ ylɔ́ ɖɔ mɔ̌ wɛ káká jɛ égbé. Gbe énɛ́ gbe ɔ́, xɛsi ɖi Davídi dó Mawu Mavɔmavɔ wú, bɔ é ɖɔ: “Un sixú yí gbe bɔ akɔjijɛgbá Mawu Mavɔmavɔ tɔn ná byɔ́ toxo ce mɛ ǎ.” Davídi jló ɖɔ akɔjijɛgbá ɔ́ ní byɔ́ xwé émítɔn gbe ɖo toxo émítɔn mɛ ǎ, lobo zé akɔjijɛgbá ɔ́ yi ɖó nya Gatinu ɖé xwé. È nɔ ylɔ́ nya ɔ́ ɖɔ Ovɛ́di-Edɔ́mu. Akɔjijɛgbá Mawu Mavɔmavɔ tɔn ɔ́ nɔ Ovɛ́di-Edɔ́mu xwé xɔ sun atɔn, bɔ Mawu Mavɔmavɔ dó acɛ Ovɛ́di-Edɔ́mu kpó mɛ tɔn lɛ́ɛ bǐ kpó jí. È wǎ ɖɔ nú axɔ́sú Davídi ɖɔ Mawu Mavɔmavɔ dó acɛ Ovɛ́di-Edɔ́mu kpó mɛ tɔn lɛ́ɛ kpó jí, bɔ nǔ tɔn bǐ nyɔ́, ɖó akɔjijɛgbá Mawu tɔn e ɖo xwé tɔn gbe ɔ́ wú. Ée Davídi se mɔ̌ ɔ́, é wlí ali bo ɖidó Ovɛ́di-Edɔ́mu xwé, lobo ná yi zé akɔjijɛgbá Mawu Mavɔmavɔ tɔn ɔ́ wá ɖó Toxo tɔn mɛ, kpó awǒbóbó kpó. Ée mɛ e hɛn akɔjijɛgbá ɔ́ lɛ́ɛ ɖe afɔ ayizɛ́n ɔ́, é ɖó yě te, bɔ è hu nyibúsú ɖokpó, nyibúví kloklo ɖokpó. Davídi nɔ dó hlɔ̌nhlɔ́n bó nɔ́ ɖú we dó sɔ́ Mawu Mavɔmavɔ su. Lɛ̌ɛnkanvɔ e mɛ vɔ̌sánú-xwlémawutɔ́ lɛ́ɛ nɔ nɔ ɔ́ mɛ jɛ́n wɛ é ɖe, bó ɖo we ɖú wɛ. Davídi kpó Izlayɛ́li ví lɛ́ɛ bǐ kpó zɔn akɔjijɛgbá ɔ́ jí wá Jeluzalɛ́mu, bó ɖo awǒbóbó kpa wɛ, bó ɖo lanzo kún wɛ. Hwenu e akɔjijɛgbá Mawu Mavɔmavɔ tɔn ɖo Davídi Toxo mɛ byɔ́ wɛ ɔ́, Sawúlu sín vǐ nyɔ̌nu Mikali Davídi si ɔ́ kpɔ́n sɛ́ dó gbɔn flɛtɛ́li nu, bó mɔ axɔ́sú Davídi ɖo we ɖú wɛ, bó ɖo lɛ́ lɛ̌ wɛ ɖo akɔjijɛgbá ɔ́ nukɔn, bɔ Davídi sín nǔ vɛ́ wǔ tɔn ɖésú. Ée è zě akɔjijɛgbá ɔ́ wá ɔ́, è sɔ́ yi ɖó tɛn tɔn mɛ ɖo goxɔ ɔ́ tɛ́ntin fí e Davídi ko bló tɛnmɛ tɔn ɖó ɖ'ayǐ é. Énɛ́ ɔ́ gúdo ɔ́, Davídi sá vɔ̌ e è nɔ dó zo ɔ́ kpó kɔnɖókpɔ́vɔ́ kpó nú Mawu Mavɔmavɔ. Ée Davídi sá vɔ̌ lɛ́ɛ fó ɔ́, é xo ɖɛ dó togun ɔ́ bǐ jí ɖo Mawu Mavɔmavɔ Nǔbǐwúkpétɔ́ ɔ́ sín nyǐkɔ mɛ. Énɛ́ ɔ́ gúdo ɔ́, é ná gbe ɖɔ è nǐ ná wɔ̌xúxú ɖokpó, dǎti xúxú mlímlí, kpó vǐwun xúxú mlímlí kpó mɛ ɖokpó ɖokpó. Bɔ è mǎ nú Izlayɛ́li togun ɔ́ bǐ, súnnu kpó nyɔ̌nu kpó. Énɛ́ ɔ́ gúdo ɔ́, mɛ ɖokpó ɖokpó yi xwé. Davídi lɛ́ kɔ wá xwé, bó ná xo ɖɛ dó mɛ tɔn lɛ́ɛ jí, bɔ Mikali Sawúlu ví ɔ́ wá kpé e, bó ɖɔ: “Izlayɛ́li xɔ́sú ɔ́ xɔ susu égbé mɛ nya! É xɔ susu káká bó ɖibla jɛ mɛ̌, bó húzú nǔkpínkpɔ́n nú kannumɔ tɔn lɛ́ɛ sín mɛsɛntɔ́ nyɔ̌nu lɛ́ɛ, mɛ ma nyí mɛɖé ɖɔhun mɔ̌ á!” Davídi yí gbe n'i ɖɔ: “Mawu Mavɔmavɔ wlí yɛ̌yi ná wɛ un ɖe. É mɔ ɖɔ un nyɔ́ hú tɔ́ towe kpó mɛ tɔn lɛ́ɛ kpó bó sɔ́ mì, bónú má kpa acɛ dó togun tɔn Izlayɛ́li nu, bɔ un ɖo lě e xomɛ hun mì gbɔn ɔ́ ɖe xlɛ́ ɛ wɛ. Un ná wɛ ta bo ná zé nyiɖée bǐ hwe hú mɔ̌; un na bo bló mɔ̌ ɔ́, un ná xɔ susu ɖo mɛsɛntɔ́ nyɔ̌nu énɛ́ e xó ɖɔ wɛ a ɖe lɛ́ɛ lɔ nukɔn.” Mikali Sawúlu ví ɔ́ ji vǐ káká cóbó kú ǎ. Axɔ́sú Davídi jɛ hɔn tɔn mɛ, Mawu Mavɔmavɔ ɖo alɔ cyɔ́n jǐ tɔn wɛ ɖo kɛntɔ́ e lɛ́ dó axɔ́súɖuto tɔn lɛ́ɛ bǐ nukɔn. É wá su gbe ɖokpó, bɔ Davídi ɖɔ nú gbeyíɖɔ Natáan ɖɔ: “Xɔ e mɛ nyɛ ɖe ɔ́, sɛ́dlutín wɛ è dǒ gbá, bɔ akɔjijɛgbá Mawu tɔn ɔ́ ká ɖo avɔgoxɔ mɛ. Étɛ́ a lin d'é wú?” Bɔ Natáan yí gbe nú axɔ́sú ɔ́ ɖɔ: “Yi bló nǔ e lin wɛ a ɖe ɔ́, ɖó Mawu Mavɔmavɔ ɖo kpɔ́ xá we.” Lo ɔ́, gbe nɛ́ gbe zǎn mɛ ɔ́, Mawu Mavɔmavɔ ɖɔ xó nú Natáan. É ɖɔ n'i ɖɔ: “Yi ɖɔ nú mɛsɛntɔ́ ce Davídi ɖɔ: Xó e Mawu Mavɔmavɔ ɖɔ è nǐ ɖɔ nú we ɔ́ ɖíe: ‘Hwi wɛ ná sá xwé nú mì bɔ un ná nɔ mɛ ǎ. Sín gbe e gbe un kplá Izlayɛ́li ví lɛ́ɛ sín Ejípu ɔ́ káká wá jɛ égbé ɔ́, un nɔ xɔ ɖě mɛ kpɔ́n ǎ; goxɔ jɛ́n nyí xwé ce, bɔ un nɔ ɖ'é mɛ, bó nɔ́ ɖo yiyi xá yě wɛ. Fí e gbɔn wɛ nyi kpó Izlayɛ́li ví lɛ́ɛ bǐ kpó ɖe ɔ́, un zɔ́n nǔɖé Izlayɛ́li gán e un ɖɔ ná ɖɔ yě ní kpé nukún dó Izlayɛ́li to ɔ́ wú lɛ́ɛ ɖě kpɔ́n gbeɖé a? Un ka kanbyɔ́ yě ɖɔ étɛ́wú yě má gbá sɛ́dluxɔ nú mì a jí kpɔ́n a?’ Din ɔ́, a nǎ ɖɔ nú mɛsɛntɔ́ ce Davídi ɖɔ xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: ‘Sín hwenu e a ɖo lɛ̌ngbɔ́nyitɔ́ nyí wɛ ɔ́ wɛ un ylɔ́ we, bó sɔ́ we gǎn ɖó togun ce Izlayɛ́li nu. Un nɔ kpɔ́ xá we ɖo fí e a gbɔn lɛ́ɛ bǐ; un vívá kɛntɔ́ towe lɛ́ɛ sín kún ɖo nukún towe mɛ; un zé nyǐkɔ towe su gǎn e ɖo ayǐkúngban ɔ́ jí lɛ́ɛ ɖɔhun. Un ná ná tɛnmɛ ɖé togun ce Izlayɛ́li, bó ná sɔ́ ɛ ɖó fínɛ́, bɔ ayi tɔn ná j'ayǐ. Adǎnúwatɔ́ lɛ́ɛ ɖě sɔ́ ná dó ya n'i lě e yě nɔ́ bló gbɔn n'i ɖ'ayǐ é ɖɔhun ǎ. É sɔ́ ná cí hwenu e un zé hwɛɖɔtɔ́ lɛ́ɛ bɔ yě nɔ́ kpɔ́n jǐ tɔn é ɖɔhun ǎ. Davídi, un hwlɛ́n we sín kɛntɔ́ towe lɛ́ɛ bǐ sí, bó ná gbɔjɛ we. Nyɛ Mawu Mavɔmavɔ ɖo ɖiɖɔ nú we wɛ ɖɔ nyɛ wɛ ná sɔ́ xwé towe jínjɔ́n ayǐ. Hwenu e kú ná wá kplá we, bɔ a nǎ yi mlɔ́ tɔ́gbó towe lɛ́ɛ kpá ɔ́, un ná sɔ́ vǐ e hwi ɖésúnɔ ji lɛ́ɛ ɖokpó axɔ́sú ɖó tɛn towe mɛ, bó ná bló bɔ acɛkpikpa tɔn ná syɛ́n ɖésú. É wɛ ná sá xwé nú mì, bɔ un ná sɔ́ axɔ́súɖuɖu tɔn jínjɔ́n ayǐ káká sɔ́yi. Un ná nyí tɔ́ n'i, bɔ é ná nyí vǐ nú mì. Nú é wa nǔ nyi do ɔ́, un ná dɔn tó n'i lě e tɔ́ nɔ kplɔ́n vǐ gbɔn é. Amɔ̌, un ná gɔn hun jɛ dó jǐ tɔn ǎ; é ná cí lě e un bló gbɔn xá Sawúlu, bo jó e dó, bó zé we ɖó tɛn tɔn mɛ é ɖɔhun ǎ. A gosín axɔ́súzinkpo jí ɔ́, vǐ towe lɛ́ɛ wɛ ná nɔ ɖu axɔ́sú ɖě jɛ ɖě gúdo káká sɔ́yi, ɖó nǔɖé ná yí axɔ́súɖuɖu ɔ́ sín xwédo towe mɛ ǎ.’ ” Natáan wlí nǔ e Mawu ɖe xlɛ́ ɔ́ bǐ ɖɔ nú Davídi. Ée axɔ́sú ɔ́ se mɔ̌ ɔ́, é yi Mawu Mavɔmavɔ nukɔn bo ɖɔ: “Aklúnɔ, Mawu Mavɔmavɔ ce, étɛ́ un ka nyí, nɛ̌ a ka mɔ xwédo ce gbɔn, bó zé mì wá ɖó tɛn e mɛ un ɖe din é? Aklúnɔ, Mawu Mavɔmavɔ ce, nǔ énɛ́ e a blǒ nú mì ɔ́ kó su nukún towe mɛ ǎ, bɔ a lɛ̌ dó akpá ɖ'ayǐ nú xwédo ce din, bɔ é ná nɔ ayǐ káká sɔ́yi, bó lɛ́ wá ɖɔ nú nyɛ mɛ e nyí gbɛtɔ́ yǎyá é. Étɛ́ nyɛ Davídi ka sixú lɛ́ ɖɔ nú we din? Aklúnɔ, Mawu Mavɔmavɔ ce, a tunwun nyɛ mɛsɛntɔ́ towe ganjí. A blǒ nǔ ɖaxó ɖaxó énɛ́ lɛ́ɛ bǐ, bó ɖe yě xlɛ́ mì, ɖó é jló we mɔ̌ bɔ a dǒ akpá tɔn nú mì. Aklúnɔ, Mawu Mavɔmavɔ ce, a kló ɖésú. È sixú jlɛ́ we dó mɛ ɖěbǔ wú ǎ. Xó e è ɖɔ bɔ mǐ se lɛ́ɛ bǐ ɖe xlɛ́ ɖɔ Mawu ɖěvo kún tíin zɛ hwɛ wú ó. Mɔ̌ ɖokpó ɔ́, togun ɖé ɖo ayǐkúngban ɔ́ jí, bó cí togun towe Izlayɛ́li ɖɔhun ǎ. A wa hwlɛ́n ɛ gán sín tagba e dó n'i wɛ Ejípunu lɛ́ɛ kpó vodún yětɔn lɛ́ɛ kpó ɖe é mɛ, bó sɔ́ ɛ dó bló togun towe ná. A blǒ nǔjíwǔ lɛ́ɛ, nǔdábaɖa lɛ́ɛ ɖo to towe mɛ, bo dó sɔ́ ɛ su. A blǒ bɔ togun towe Izlayɛ́li lí dǒ, bó ná nyí togun towe káká sɔ́yi, bɔ hwi Mawu Mavɔmavɔ ɔ́, a húzú Mawu tɔn. Din ɔ́, Mawu Mavɔmavɔ, Mawu ce, nǔ e a ɖɔ dó mɛsɛntɔ́ towe kpó xwédo tɔn kpó jí ɔ́ ní nɔ mɔ̌ káká sɔ́yi, bónú nǔ e a ɖɔ ɔ́ ní jɛ. Nyǐkɔ towe ní nyí nǔsísí káká sɔ́yi, bónú è nǐ nɔ ɖɔ: ‘Mawu Mavɔmavɔ Nǔbǐwúkpétɔ́ ɔ́ wɛ nyí Mawu Izlayɛ́li tɔn.’ Énɛ́ ɔ́, mɛsɛntɔ́ towe Davídi ɔ́ sín xwédo ná lí dǒ ɖo nukɔn towe. Đó hwi ɖésú Mawu Mavɔmavɔ Nǔbǐwúkpétɔ́ ɔ́, hwi Mawu Izlayɛ́li tɔn ɔ́, a ɖe hwiɖée xlɛ́ nyɛ mɛsɛntɔ́ towe bó ɖɔ: ‘Un ná zé xwédo towe jínjɔ́n ayǐ.’ Xó énɛ́ ɔ́ wɛ ná akɔ́nkpinkpan nyɛ mɛsɛntɔ́ towe, bɔ un ɖo ɖɛ élɔ́ xo wɛ. Din ɔ́, Aklúnɔ, Mawu Mavɔmavɔ ce, Mawu wɛ a nyǐ bɔ nǔ e a ɖɔ ɔ́ nɔ jɛ, bɔ a ka ɖɔ nyɔ̌ná énɛ́ xó nú nyɛ mɛsɛntɔ́ towe. Bo kɛnklɛ́n xo ɖɛ dó nyɛ mɛsɛntɔ́ towe sín xwédo jí, bónú é ná sixú nɔ te ɖo nukɔn towe káká sɔ́yi. Đó hwi Aklúnɔ, Mawu Mavɔmavɔ wɛ ɖɔ xó, bɔ gbɔn ɖɛxodómɛjí towe mɛ ɔ́, nyɛ mɛsɛntɔ́ towe sín xwédo ná nɔ nyɔ̌ná mɛ káká sɔ́yi.” Énɛ́ ɔ́ gúdo ɔ́, Davídi ɖu ɖo Filisitɛ́ɛn lɛ́ɛ jí, bó dó winnyá yě, bó yí gbě énɛ́ ɔ́ jí sín acɛ yětɔn mɛ. É lɛ́ ɖu ɖo Mɔwabunu lɛ́ɛ jí. É ná gbe bɔ yě bǐ mlɔ́ kɔ́ mɛ bɔ è nɔ xa mɛ atɔn bó nɔ́ hu we bó nɔ́ jó ɖokpó dó. Énɛ́ ɔ́, é wá kpo gbɛtɔ́ atɔnvlɔ́ɖó ɖo gbɛ ɖo to ɔ́ mɛ. Sín hwenɛ́nu ɔ́, Mɔwabunu lɛ́ɛ húzú kannumɔ Davídi tɔn, bo nɔ hɛn nǔjɔ wá n'i. Hwenu e Sova xɔ́sú Hadadɛzɛ́ɛ Hlexɔ́vu ví ɔ́ jló ná lɛ́ vɔ́ yí fí e gbɔn Efláti tɔ ɔ́ kpáxwé lɛ́ɛ ɔ́, Davídi hu i. Davídi wlí sɔ́xátɔ́ afatɔ́n nǔwɔntɔn kanwe ko (1.700), bó wlí sɔ́ja adɔ̌kpo (20.000). Amɔ̌, é jó sɔ́ e ná dɔn ahwankɛkɛ́ví kanwe ko (100) mɔ̌ lɛ́ɛ dó, bó ká sɛ́n dɔn nú sɔ́ e kpo lɛ́ɛ bǐ. Silíinu e ɖo Damási lɛ́ɛ wá bó ná dó alɔ Hadadɛzɛ́ɛ, Davídi ka ɖu ɖo yě lɔ jí, bó hu Silíinu adɔ̌kpo ɖě afɔwó (22.000) ɖo yě mɛ. Davídi sɔ́ tokpɔngán lɛ́ɛ ɖó yě nu gǎnnugǎnnu, bɔ Silíinu lɛ́ɛ húzú kannumɔ tɔn, bó nɔ ná nǔjɔ. Mawu Mavɔmavɔ dó alɔ Davídi bɔ é fun ahwan gbɔn fí ɖěbǔ ɔ́, é nɔ ɖu ɖ'é jí. Davídi bɛ́ siká gǎglónú e Hadadɛzɛ́ɛ sín mɛsɛntɔ́ lɛ́ɛ nɔ zán lɛ́ɛ, bó bɛ́ wá yi Jeluzalɛ́mu. Axɔ́sú Davídi lɛ́ bɛ́ ganvɔ wɔ̌buwɔ́bú ɖé ɖo Hadadɛzɛ́ɛ sín toxo Bɛtáxi kpó Belotáyi kpó mɛ. Axɔ́sú Hamáti tɔn e è nɔ ylɔ́ ɖɔ Toyi ɔ́ se ɖɔ Davídi ɖu ɖo Hadadɛzɛ́ɛ sín ahwangɔnu ɔ́ bǐ jí. Ée é se mɔ̌ ɔ́, é sɛ́ vǐ tɔn Yolámu dó axɔ́sú Davídi gɔ́n, nú é ná yi dó gbe e, bó kpa gbe n'i ɖó ahwan e é fun xá Hadadɛzɛ́ɛ bó ɖu ɖo jǐ tɔn ɔ́ wú, ɖó Toyi lɔ ɖo ahwan fun xá Hadadɛzɛ́ɛ wɛ. Ée Yolámu xweyǐgbe ɔ́, é hɛn nǔ e è zě siká dó bló lɛ́ɛ, nǔ e è zě kpatágan dó bló lɛ́ɛ kpó nǔ e è zě ganvɔ dó bló lɛ́ɛ kpó wá nú Davídi. Davídi zé nǔ énɛ́ lɛ́ɛ bǐ ɖó vo nú Mawu Mavɔmavɔ lě e é zé kpatágan kpó siká kpó e é hɛn sín ahwangbénu wá lɛ́ɛ ɖó vo nú Mawu Mavɔmavɔ gbɔn é. Nǔ énɛ́ lɛ́ɛ ɔ́, é bɛ́ ɖě sín Silíi, bó bɛ́ ɖě sín Mɔwabu, bó bɛ́ ɖě sín Amumɔ́ɔ ví lɛ́ɛ gɔ́n, bó bɛ́ ɖě sín Filisitɛ́ɛn lɛ́ɛ gɔ́n, bó bɛ́ ɖě sín Amalɛ́ki ví lɛ́ɛ gɔ́n, bɔ nǔ e é fun ahwan xá Hadadɛzɛ́ɛ bo yí lɛ́ɛ gɔ́ ná. Ée Davídi yi gba Edɔ́munu děgba ɛnɛ afɔwó (18.000) ɖo Jɛtɔdo ɔ́ mɛ bó lɛ́ kɔ wá xwé ɔ́, nyǐkɔ tɔn yi jǐ d'é jí. É zé tokpɔngán lɛ́ɛ ɖó Edɔ́munu lɛ́ɛ nu gǎnnugǎnnu, bɔ Edɔ́munu lɛ́ɛ húzú kannumɔ Davídi tɔn. Mawu Mavɔmavɔ dó alɔ Davídi bɔ é fun ahwan gbɔn fí ɖěbǔ ɔ́, é nɔ ɖu ɖ'é jí. Davídi ɖó acɛ dó Izlayɛ́li to ɔ́ bǐ jí. É nɔ ɖɔ hwɛjlɔ́jlɔ́ nú mɛ bǐ ɖo togun tɔn bǐ mɛ. Gǎn e nɔ wa azɔ̌ xá Davídi lɛ́ɛ ɖíe: Jowabu Selúya ví ɔ́; é wɛ nyí ahwangán. Yexosafáti Axiludi ví ɔ́; é wɛ nyí ɖɛ̌mɛnu axɔ́sú ɔ́ tɔn. Sadɔ́ku Axitúvu ví ɔ́ kpó Aximɛlɛ́ki Abiyatáa ví ɔ́ kpó; vɔ̌sánú-xwlémawutɔ́ wɛ nú yě. Selaya; é wɛ nyí Wěgbójínɔtɔ́. Benayahu Yexoyada ví ɔ́; é wɛ nyí gǎn ɖo Keleti lɛ́ɛ kpó Pɛlɛ́ti ví lɛ́ɛ kpó nu; yědɛɛ lɛ́ɛ wɛ nɔ́ cɔ́ axɔ́sú ɔ́ sín hɔnmɛ lɛ́ɛ. Bɔ Davídi ví lɛ́ɛ nyí vɔ̌sánú-xwlémawutɔ́. Davídi kanbyɔ́ éɖée gbe ɖokpó ɖɔ: “Sawúlu sín mɛ ɖě ká kpo ɖo gbɛ bɔ un ná wa ɖagbe n'i ɖó Jonatáan wú a?” Mɛ ɖokpó ka tíin, bó kó wa azɔ̌ ɖo Sawúlu xwé ɖ'ayǐ, bɔ è kplá ɛ wá nú Davídi. È nɔ ylɔ́ mɛsɛntɔ́ ɔ́ ɖɔ Siva. È kplá ɛ wá bɔ Davídi kanbyɔ́ ɛ ɖɔ: “Hwi wɛ nyí Siva a?” Bɔ é yí gbe n'i ɖɔ: “Ɛɛn nyɛ wɛ.” Bɔ axɔ́sú ɔ́ lɛ́ kanbyɔ́ ɛ ɖɔ: “Sawúlu sín mɛ ɖě sɔ́ kpo ɖo gbɛ, bɔ un ná wa ɖagbe n'i a?” Bɔ é yí gbe n'i ɖɔ: “É kpo Jonatáan sín vǐ ɖokpó ɖo fínɛ́, bó xwe ayǐsó. È nɔ ylɔ́ ɛ ɖɔ Mɛfibáalu.” Axɔ́sú ɔ́ ɖɔ n'i ɖɔ: “Fítɛ́ vǐ ɔ́ ká ɖe?” Bɔ é yí gbe n'i ɖɔ: “É ɖo Amumiyɛli ví Makíi xwé, ɖo Lodeváa.” Ée axɔ́sú ɔ́ se mɔ̌ ɔ́, é sɛ́ mɛ dó vǐ ɔ́ gbé mɛ ɖo Lodeváa ɖɔ è nǐ yi kplá ɛ wá. Ée Mɛfibáalu Jonatáan ví, Sawúlu vívú ɔ́ wá axɔ́sú Davídi gɔ́n ɔ́, é xwe agbɔ̌nnusú do bó ɖe kɔ́, bɔ axɔ́sú ɔ́ kanbyɔ́ ɛ ɖɔ: “Hwi wɛ nyí Mɛfibáalu a?” Bɔ é yí gbe n'i ɖɔ: “Sɛ́mɛɖó, nyɛ wɛ nyí mɔ̌.” Bɔ Davídi ɖɔ n'i ɖɔ: “Ado ma hu we ó, un jló ná wa ɖagbe ɖé nú we ɖó tɔ́ towe Jonatáan wú. Un ná jó ayǐkúngban e nyí tɔ́gbó towe Sawúlu tɔn lɛ́ɛ bǐ nú we, bɔ a ka ná nɔ lɛ́ ɖu nǔ xá mì tɛgbɛ.” Ée é ɖɔ mɔ̌ ɔ́, Mɛfibáalu ɖe kɔ́, bó ɖɔ: “Sɛ́mɛɖó, nɛ̌ ka gbɔn bɔ è wlǐbo nú nyɛ mɛ e cukú kúkú nyí nǔ hú ɔ́ sɔ mɔ̌?” Axɔ́sú ɔ́ ylɔ́ Siva mɛsɛntɔ́ Sawúlu tɔn bo ɖɔ n'i ɖɔ: “Un bɛ́ nǔ e nyí gǎn towe Sawúlu kpó mɛ tɔn lɛ́ɛ kpó tɔn lɛ́ɛ bǐ jó nú vǐvú tɔn Mɛfibáalu. Siva, hwi kpó vǐ towe lɛ́ɛ kpó, mɛsɛntɔ́ towe lɛ́ɛ kpó ná nɔ lɛ gle n'i, bó ná nɔ hɛn nǔ e mɛ tɔn lɛ́ɛ ná nɔ ɖu ɔ́ wá xwé gbe. Amɔ̌, Mɛfibáalu ɔ́ ná nɔ ɖu nǔ xá mì tɛgbɛ tɛgbɛ.” Siva ka ɖó vǐ súnnu afɔtɔn, bo ɖó mɛsɛntɔ́ ko. Siva ɖɔ nú axɔ́sú ɔ́ ɖɔ: “Sɛ́mɛɖó, nǔ e è ɖɔ ɔ́ ná nyí wiwa.” Énɛ́ ɔ́, Mɛfibáalu nɔ ɖu nǔ xá axɔ́sú ɔ́ axɔ́ví wɛ é nyí ɖɔhun. Mɛfibáalu ɖó vǐ súnnu ɖokpó bɔ è nɔ ylɔ́ ɛ ɖɔ Mika. Mɛ e ɖo Siva xwé lɛ́ɛ bǐ wɛ nyí mɛsɛntɔ́ Mɛfibáalu tɔn. Mɛfibáalu ɔ́ nɔ́ nɔ Jeluzalɛ́mu, bo nɔ wá ɖu nǔ gbe bǐ gbe ɖo axɔ́sú ɔ́ gɔ́n. Afɔ tɔn we lɛ́ɛ bǐ wɛ ka kú. Azǎn ɖé jɛ ǎ bɔ Amumɔ́ɔ ví lɛ́ɛ xɔ́sú Naxáci kú, bɔ vǐ tɔn Hanúni jɛ do tɔn mɛ. Davídi nɔ ɖɔ dó ayi mɛ ɖɔ: “Un ná wa ɖagbe nú Hanúni Naxáci ví ɔ́ lě e tɔ́ tɔn bló gbɔn nú mì é.” Ée Davídi lin mɔ̌ ɔ́, é sɛ́ gǎn hɔn-yitɔ́ tɔn ɖé lɛ́ɛ dó, nú yě ná yi dó nǔwamɛgbe e. Ée gǎn hɔn-yitɔ́ tɔn lɛ́ɛ yi Amumɔ́ɔ ví lɛ́ɛ sín tomɛ ɔ́, Amumɔ́ɔ ví lɛ́ɛ sín gǎn hɔn-yitɔ́ lɛ́ɛ yi ɖɔ nú gǎn yětɔn Hanúni ɖɔ: “A vɛdó ɖɔ tɔ́ towe ná zé su wú jɛ́n Davídi sɛ́ gǎn hɔn-yitɔ́ tɔn lɛ́ɛ dó ɖɔ yě wá dó nǔwamɛgbe we a? Gbeɖé, mɔ̌ wɛ ǎ. É sɛ́ yě dó nú yě ná wá ba do nú toxo ɔ́, bó ná wá gba.” Énɛ́ ɔ́, Hanúni ɖe gbe, bɔ è wlí gǎn hɔn-yitɔ́ Davídi tɔn lɛ́ɛ, bó xwlɛ́ atán yětɔn akpá ɖokpó, bó sɛ́n awu yětɔn lɛ́ɛ, sín nɛgbé káká wá alin, lobo nya yě. È yi ɖɔ nǔ e jɛ ɔ́ nú Davídi. Ée é se mɔ̌ ɔ́, é sɛ́ mɛ dó gbě yětɔn mɛ, bɔ è yi kpé yě; amɔ̌, winnyá hu gǎn hɔn-yitɔ́ lɛ́ɛ ɖésú, ɖó nǔ e è wa xá yě ɔ́ wútu. Axɔ́sú Davídi ɖɔ sɛ́ dó yě ɖɔ yě ní nɔ Jeliko káká nú atán yětɔn ní wú bǐ cóbónú yě ní wá xwé. Ée Amumɔ́ɔ ví lɛ́ɛ mɔ ɖɔ émí zé émíɖée dó xomɛ nú Davídi ɔ́, yě da sɔ́ja Silíinu e ɖo Bɛti-Hlehovu kpó Sova kpó lɛ́ɛ adɔ̌kpo (20.000) dó yěɖée jí. Yě lɛ́ kplá sɔ́ja afatɔ́n (1.000) ɖo Maaka xɔ́sú ɔ́ sín ahwangɔnu ɔ́ mɛ, bó lɛ́ kplá sɔ́ja děgba atɔn (12.000) ɖo Tɔ́vu xɔ́sú ɔ́ sín ahwangɔnu ɔ́ mɛ. Ée Davídi se nǔ e wa wɛ Amumɔ́ɔ ví lɛ́ɛ ɖe ɔ́, é sɛ́ ahwangán ɖaxó Jowabu kpó ahwanfuntɔ́ tɔn e sín alɔ se kpɛ́n ganjí lɛ́ɛ bǐ kpó dó ahwangbénu. Amumɔ́ɔ ví lɛ́ɛ sɔ́ ahwannú bó wá to yěɖée ɖó toxo ɔ́ sín hɔntogbó jí, bɔ sɔ́ja Silíinu e gosín Sova kpó Hlexɔ́vu kpó lɛ́ɛ, sɔ́ja Tɔ́vu tɔn lɛ́ɛ kpó Maaka tɔn lɛ́ɛ kpó ɖo fí vo, ɖo gběhan ɔ́ mɛ. Jowabu mɔ ɖɔ émí ɖó kɛntɔ́ ɖo gǔdo nukɔn. Ée nǔ ɖo mɔ̌ ɔ́, é cyán sɔ́ja Izlayɛ́li tɔn e syɛ́n hú ɖě lɛ́ɛ bǐ lɛ́ɛ, bɔ yě húzú kpan nukɔn sɔ́ja Silíinu lɛ́ɛ. É zé nɔví tɔn Avicáyi ɖó sɔ́ja tɔn e kpo lɛ́ɛ nu, bɔ yě húzú kpan nukɔn Amumɔ́ɔ ví lɛ́ɛ. Jowabu ɖɔ nú nɔví tɔn Avicáyi ɖɔ: “Nú Silíinu lɛ́ɛ ɖo gǎn hú mì wɛ ɔ́, a na wá dó alɔ mì. Nú é ká nyí ɖɔ Amumɔ́ɔ ví lɛ́ɛ wɛ ɖo gǎn hú hwɛ wɛ ɔ́, nyɛ ná wá dó alɔ we. Kpan akɔ́n! Mǐ ní ván kan bo fun ahwan nú togun mǐtɔn kpó Mawu mǐtɔn sín toxo lɛ́ɛ kpó. Mawu Mavɔmavɔ ní ka bló lě e é jló e gbɔn é.” Jowabu kpó ahwanfuntɔ́ tɔn lɛ́ɛ kpó sí ahwan te dó Silíinu lɛ́ɛ jí, bɔ yě hɔn ɖo nukɔn tɔn. Ée Amumɔ́ɔ ví lɛ́ɛ mɔ Silíinu lɛ́ɛ hɔn ɔ́, yě lɔ hɔn ɖo Avicáyi nukɔn, bó lɛ́ kɔ byɔ́ toxo yětɔn mɛ. Jowabu lɔ lɛ́ kɔ sín Amumɔ́ɔ ví lɛ́ɛ gúdo bó wá Jeluzalɛ́mu. Ée Silíinu lɛ́ɛ mɔ ɖɔ Izlayɛ́li ví lɛ́ɛ ɖu ɖo émí jí ɔ́, yě sɛ yěɖée kplé. Hadadɛzɛ́ɛ sɛ́ mɛ dó sɔ́ja Silíinu e ɖo Efláti tɔ ɔ́ gǔdo dɔ̌n lɛ́ɛ gbé mɛ, bɔ yě wǎ Helámu, bɔ Covaki ahwangán Hadadɛzɛ́ɛ tɔn zɔn yě nu, bó kplá yě wá. È yi ɖɔ nú Davídi. Ée é se mɔ̌ ɔ́, é kplé ahwangɔnu Izlayɛ́li tɔn ɔ́ bǐ, bó dó asá Judɛ́ɛn tɔ ɔ́, bó wá Helámu. Bɔ Silíinu lɛ́ɛ sɔ́ ahwan nú, bó tɔ́n ahwan Davídi. Amɔ̌, Silíinu lɛ́ɛ hɔn ɖo Izlayɛ́li ví lɛ́ɛ nukɔn. Davídi kpó ahwanfuntɔ́ tɔn lɛ́ɛ kpó hu sɔ́ yětɔn e nɔ dɔn ahwankɛkɛ́ví lɛ́ɛ nǔwɔntɔn kanwe ko (700), bó hu sɔ́xátɔ́ adɔ̌kpo we (40.000). Yě gblé wǔ ahwangán ɖaxó Covaki bɔ é kú jɛ fínɛ́. Ée axɔ́sú e ɖo Hadadɛzɛ́ɛ glɔ́ lɛ́ɛ bǐ mɔ ɖɔ Izlayɛ́li ví lɛ́ɛ ɖu ɖo émí jí ɔ́, yě gbɔ bó dó hwɛ gbo, bó nɔ acɛkpikpa Izlayɛ́li tɔn glɔ́. Lo ɔ́, Silíinu lɛ́ɛ sɔ́ glá gbeɖé ɖɔ émí ná dó alɔ Amumɔ́ɔ ví lɛ́ɛ ǎ. Đo xwe e jɛ fínɛ́ ɔ́ mɛ ɔ́, hwenu e axɔ́sú lɛ́ɛ nɔ yi fun ahwan dó ɔ́, Davídi sɛ́ ahwangán ɖaxó Jowabu kpó mɛsɛntɔ́ tɔn lɛ́ɛ kpó Izlayɛ́li to ɔ́ bǐ kpó dó Amumɔ́ɔ ví lɛ́ɛ sín kún vívá gbé, lobo ná yí Hlaba toxo ɔ́. Davídi ɖésú ka cí Jeluzalɛ́mu. É wá su gbe ɖokpó, bɔ hwe ko lɛ́ kɔ, bɔ Davídi dɔ́ amlɔ bó fɔ́n, bó ɖidó sa ɖi gbé ɖo xɔ tɔn ta, bó mɔ nyɔ̌nu ɖé sɛ́ dó, bɔ é ɖo wǔ lɛ wɛ. Nyɔ̌nu ɔ́ nyɔ́ ɖɛkpɛ ɖésú. Davídi sɛ́ mɛ dó ɖɔ è yi ba do nú nyɔ̌nu e wɛ ɔ́, bɔ è ɖɔ n'i ɖɔ: “Bɛtisabe wɛ. Ulíi Hitíti ɔ́ sín asi wɛ. Tɔ́ tɔn nɔ nyí Eliamu.” Davídi sɛ́ wɛn dó ɖɔ è nǐ yi ylɔ́ Bɛtisabe wá, bɔ è yi ylɔ́ ɛ wá. Ée é wá ɔ́, Davídi ɖó xó xá ɛ. Énɛ́ ɔ́ gúdo ɔ́, é lɛ́ kɔ yi xwé. Glegbe wɛ é ká jɛ bó nya nǔ tlóló. Bɛtisabe mɔ xo, bó ɖɔ sɛ́ dó Davídi ɖɔ: “Sun nɔ te nú mì.” Énɛ́ ɔ́, Davídi dó wɛn sɛ́ dó ahwangán Jowabu tlóló, bó ɖɔ n'i ɖɔ: “Nyi Ulíi Hitíti ɔ́ sɛ́ dó mì.” Bɔ Jowabu nyi Ulíi sɛ́ dó Davídi. Ulíi wá, bɔ Davídi kan lě e Jowabu ɖe gbɔn ɔ́ byɔ́, bó kan lě e togun ɔ́ ɖe gbɔn ɔ́ byɔ́, lobo kan lě e ahwan ɔ́ ɖo yiyi wɛ gbɔn ɔ́ byɔ́. Énɛ́ ɔ́ gúdo ɔ́, é ɖɔ nú Ulíi ɖɔ: “Yi xwé gbe, bó yi gbɔjɛ́ kpɛɖé.” Ulíi tɔ́n sín hɔn ɔ́ mɛ, bɔ axɔ́sú Davídi sɛ́ nǔɖuɖu ɖagbe ɖagbe ɖé dó e. Ulíi ka yi xwé ǎ, bó yi mlɔ́ axɔ́sú ɔ́ sín mɛsɛntɔ́ lɛ́ɛ kpá ɖo axɔ́sú ɔ́ sín hɔnnúwa sá. Mɛ lɛ́ɛ wá yi ɖɔ nú axɔ́sú ɔ́ ɖɔ: “Ulíi yi xwé gbe ǎ.” Bɔ Davídi ɖɔ nú Ulíi ɖɔ: “Tomɛ wɛ a gosín ǎ cé? Étɛ́wú a ma yi xwé gbe ǎ?” Ulíi ka yí gbe nú Davídi ɖɔ: “ Akɔjijɛgbá mímɛ́ Mawu Mavɔmavɔ tɔn kpó ahwangɔnu Izlayɛ́li tɔn kpó, Judáa tɔn kpó ɖo goxɔ mɛ. Bɔ gǎn ce Jowabu kpó mɛsɛntɔ́ mɛtɔn lɛ́ɛ kpó ɖo ahwangbénu, bɔ nyɛ ná yi xwé ce gbe, bó ná ɖu nǔ bó nu ahan, bɔ nyi kpó asi ce kpó ná mlɔ́ ayǐ? Gbeɖé kpɔ́n!” Ée Ulíi ɖɔ mɔ̌ ɔ́, é xwlé nǔ ɖɔ: “È ɖo gbɛ bɔ funfún mɛtɔn ɖo dǐndín wɛ jɛ́n wɛ ɔ́, un ná dó nǔ mɔ̌hun sin gbeɖé ǎ.” Davídi ɖɔ n'i ɖɔ: “Bo lɛ́ nɔ fí égbé, bónú sɔ ko su ɔ́, a nǎ yi.” Bɔ Ulíi nɔ Jeluzalɛ́mu gbe nɛ́ gbe bɔ ayǐ hɔ́n. Ée ayǐ hɔ́n ɔ́, Davídi ylɔ́ ɛ bó ná ɛ nǔɖuɖu, bó ná ɛ ahan, bɔ é nu mú. Ée gbadanu su ɔ́, Ulíi sɔ́ yi xwé ǎ; é yi mlɔ́ Davídi sín mɛsɛntɔ́ lɛ́ɛ kpá, lobo dɔ́ fínɛ́. Ayǐhɔ́ngbe zǎnzǎn ɔ́, Davídi wlán wěma dó así nú Ulíi, ɖɔ é ní sɔ́ yi jó nú Jowabu. É ɖɔ dó wěma ɔ́ mɛ ɖɔ: “Zě Ulíi ɖó fí e ahwan ɔ́ syɛ́n ɖe ganjí é, bó jó é ɖokpónɔ dó, bónú kɛntɔ́ ní kpé wǔ tɔn bo hu i.” Jowabu ɖo toxo e è jǎn go dó ɔ́ cɔ́ wɛ bó zé Ulíi ɖó fí e é tunwun ɖɔ è sɔ́ kɛntɔ́ e syɛ́n lɛ́ɛ ɖó é. Toxo ɔ́ mɛ nu lɛ́ɛ tɔ́n ahwan Jowabu gbe ɖokpó, bó hu sɔ́ja ɖé lɛ́ɛ kpó ahwangán ɖé lɛ́ɛ kpó ɖo ahwangɔnu Davídi tɔn mɛ. Ulíi lɔmɔ̌ ɖo mɛ e è hu lɛ́ɛ mɛ. Ée Ulíi kú é ɔ́, Jowabu ɖɔ nǔ e jɛ ɖo ahwangbénu ɔ́ bǐ sɛ́ dó Davídi. Jowabu ɖɔ nú mɛ e sɛ́ dó Davídi wɛ é ɖe é ɖɔ: “Nú a wlǐ nǔ e jɛ ɖo ahwan ɔ́ hwenu ɔ́ bǐ ɖɔ n'i fó ɔ́, é sixú bɛ́ adǎn bó ɖɔ: ‘Étɛ́wú mi ka sɛkpɔ́ toxo ɔ́ sɔ mɔ̌ bó fun ahwan? Mi tunwun ɖɔ è nɔ́ nɔ ahohó ɔ́ ta bó nɔ́ da gǎ ǎ cé? Mɛ̌ ká hu Abimɛlɛ́ki Yelubɛcɛ́ti ví ɔ́ ɖo Tevesi? É má nyí nyɔ̌nu wɛ nɔ dǒ ta, bó nyi sé ɖaxó ɖé, bɔ é jɛ jǐ tɔn, bɔ é kú a? Étɛ́wú midɛɛ lɛ́ɛ mi ka sɛkpɔ́ ahohó ɔ́ sɔ mɔ̌?’ Nú é ɖɔ mɔ̌ ɔ́, a nǎ ɖɔ n'i ɖɔ: ‘Ahwangán towe Ulíi, Hitíti ɔ́ lɔmɔ̌ kú.’ ” Mɛ e Jowabu sɛ́ dó Davídi ɔ́ wá Davídi gɔ́n, bó wlí nǔ e Jowabu ɖɔ n'i ɔ́ bǐ ɖɔ nú Davídi. É ɖɔ nú Davídi ɖɔ: “É wá jɛ hweɖénu bɔ mɛ lɛ́ɛ hú gǎn mǐ. Yě tɔ́n ahwan mǐ ɖo gběgbó mɛ; lo ɔ́, mǐ nya yě káká yi toxo ɔ́ sín hɔntogbó jí. Amɔ̌, gǎdatɔ́ yětɔn lɛ́ɛ nɔ ahohó ɔ́ ta, bó da gǎ dó mǐ, bó hu ahwangán mɛtɔn ɖé lɛ́ɛ. Ahwangán mɛtɔn Ulíi, Hitíti ɔ́ lɔmɔ̌, kú.” Davídi ɖɔ nú mɛ e wá dó wɛn ɛ é ɖɔ: “Yi ná akɔ́nkpinkpan Jowabu, bó ɖɔ n'i ɖɔ ní má lin nǔ énɛ́ kpɔ́n ó, ɖó è yi ahwan ɔ́, gbɛtɔ́ nɔ kú jɛ́n wɛ. È nɔ hu mɛ ɖo akpá ɖě xwé, bó nɔ hu ɖo akpá ɖě ɔ́ xwé. É ní lɛ́ húzú kan dó yě wǔ, bó gba toxo ɔ́.” Bɛtisabe se ɖɔ asú émítɔn kú, bó nɔ asúkúkúxɔmɛ. Ée Bɛtisabe nɔ asúkúkúxɔmɛ fó ɔ́, Davídi sɛ́ mɛ dó gbě tɔn mɛ, bɔ è yi kplá ɛ wá, bɔ é yí i dó xɔ tɔn sá, bɔ é húzú asi tɔn bo ji vǐ ɖokpó n'i. Nǔ énɛ́ e Davídi wa ɔ́ nyɔ́ Mawu Mavɔmavɔ nukún mɛ ɖěbǔ ǎ. Mawu Mavɔmavɔ sɛ́ Natáan dó Davídi gɔ́n, bɔ Natáan yi gɔ̌n tɔn bó ɖɔ n'i ɖɔ: “Nya we ɖé lɛ́ɛ tíin bó nɔ́ nɔ toxo ɖokpó ɔ́ mɛ, bɔ mɛ ɖokpó nyí dɔkunnɔ, bɔ mɛ ɖě ɔ́ nyí wamamɔnɔ. Nya dɔkunnɔ ɔ́ ɖó gbɔ̌ kpó nyibú kpó kpɔ́ gégé. Wamamɔnɔ ɔ́ ká ɖó nǔɖé ǎ; lɛ̌ngbɔ́ví asi ɖokpó jɛ́n é xɔ, bɔ é ɖo así tɔn, bɔ é nɔ ná nǔɖuɖu. Lɛ̌ngbɔ́ví asi ɔ́ kpó nya ɔ́ sín vǐ lɛ́ɛ kpó ɖo fínɛ́, bó ɖo susu wɛ. Nǔ e é ɖu ɔ́ wɛ lɛ̌ngbɔ́ví ɔ́ nɔ ɖu, bó nɔ nu sin ɖo ká ɖokpó ɔ́ nu xá ɛ; é nɔ́ mlɔ́ akpá tɔn, bó cí vǐ nyɔ̌nu ɖɔhun n'i. Jǒnɔ ká wá ba nya dɔkunnɔ ɔ́ gbe ɖokpó. É ká hu gbɔ̌ tɔn ɖě, abǐ nyibú tɔn ɖě dó yí jǒnɔ e wá ba ɛ ɔ́ ná ǎ. Lɛ̌ngbɔ́ví asi ɖokpó e nya wamamɔnɔ ɔ́ ɖó é wɛ é zé bo hu, bó ɖa dó yí jǒnɔ e wá ba ɛ ɔ́ ná.” Nǔ e nya dɔkunnɔ nɛ́ ɔ́ wa é sin xomɛ nú Davídi ɖésú, bɔ é xwlé Mawu ɖɔ: “Mawu Mavɔmavɔ ɖo gbɛ. Nya e wa mɔ̌ ɔ́, hu jɛ́n è nǎ hu i. Ée wamamɔnɔ ɔ́ sín nǔ ma blá wǔ n'i ǎ, bɔ é bló mɔ̌ ɔ́, é ná ná lɛ̌ngbɔ́ví asi ɛnɛ dó sú ɖokpó e é zé ɔ́ sín axɔ́.” Bɔ Natáan ɖɔ nú Davídi ɖɔ: “Hwi wɛ nyí nya e xó ɖɔ wɛ è ɖe é. Xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe; ɖǒtó: ‘Un zé we axɔ́sú ɖó Izlayɛ́li to ɔ́ nu, bó hwlɛ́n we gán ɖo Sawúlu sí, bó zé gǎn towe sín xwédo ɔ́ dó alɔ mɛ nú we, bó ná asi tɔn lɛ́ɛ we, bó lɛ́ ná Izlayɛ́li kpó Judáa kpó sín togun we. Ényí nǔ énɛ́ lɛ́ɛ má kpé we ǎ ɔ́, un ná lɛ́ ná we d'é jí. Étɛ́wú a ma ka ké ya nú xó ce ǎ, bó wa nǔ e un ma yí wǎn ná ǎ é? A hu Ulíi Hitíti ɔ́; hwi wɛ zɔ́n bɔ Amumɔ́ɔ ví lɛ́ɛ hu i, bɔ a lɛ̌ zé asi tɔn bo da. Din ɔ́, è nǎ ɖo mɛ hu wɛ ɖo xwé towe gbe tɛgbɛ, ɖó a ké ya ɖěbǔ nú mì ǎ, ɖó a yǐ Ulíi Hitíti ɔ́ sín asi bo da. Đǒtó xó e ɖɔ nú we wɛ un ɖe ɔ́ ganjí: un ná sɛ́ nǔ nyanya dó we, sín xwédo towe ɖésú mɛ. A nǎ ɖo nukún te lě, bɔ un ná ná asi towe lɛ́ɛ mɛ e nyí mɛ towe é ɖokpó, bɔ é ná ɖó xó xá yě agbawungba. Nǔ e hwɛ wa dó nǔglɔ́ ɔ́, nyɛ ná bló bɔ é ná jɛ kéze ɖéɖé, ɖo Izlayɛ́li to ɔ́ bǐ nukɔn.’ ” Bɔ Davídi ɖɔ nú Natáan ɖɔ: “Hwɛ wɛ un hu dó Mawu Mavɔmavɔ.” Bɔ Natáan ɖɔ n'i ɖɔ: “Ée a tunwun ɖɔ mɔ̌ ɔ́, Mawu Mavɔmavɔ zé hwɛ towe kɛ we, a nǎ kú ǎ. Nǔ énɛ́ e a wa ɔ́, do ɖaxó ɖé wɛ a jɛ dó Mawu Mavɔmavɔ bɔ Mawu Mavɔmavɔ sín kɛntɔ́ lɛ́ɛ mɔ ali bó ɖo ɖɔɖɔ ɖɔ nyɔ̌nu énɛ́ ɔ́ wú wɛ. Énɛ́ wú ɔ́, vǐ e è ji nú we din ɔ́ ná kú dandan.” Natáan ɖɔ mɔ̌ bó ɖidó xwé. Mawu Mavɔmavɔ sín alɔ jɛ vǐ e Ulíi sín asi ji nú Davídi ɔ́ wú, bɔ vǐ ɔ́ wlí azɔn ɖaxó ɖé. Davídi sa vo nú Mawu dó vǐ ɔ́ tamɛ, bó nɔ́ blá nu. É yi ayǐ mlɔ́ gbé tɛgbɛ ɔ́, é nɔ́ dɔ́ kɔ́ mɛ. Mɛsɛntɔ́ tɔn nukúnɖéjí lɛ́ɛ nɔ yi gɔ̌n tɔn bó nɔ ɖɔ é ní fɔ́n sín kɔ́ mɛ; lo ɔ́, é nɔ́ ba ná fɔ́n ǎ, é ká sɔ́ nɔ ɖu nǔ ɖěbǔ xá yě ǎ. Azǎn tɛ́nwegɔ́ ɔ́ gbe ɔ́, vǐ ɔ́ kú. Mɛsɛntɔ́ tɔn lɛ́ɛ ká tunwun lě e yě ná wá ɖɔ n'i gbɔn ɔ́ ǎ, ɖó yě nɔ́ ɖɔ: “Hwenu e vǐ ɔ́ ɖo gbɛ ɔ́ ɖíe mǐ ɖo xó ɖɔ n'i wɛ bɔ é ma ba ná se ǎ e. Nɛ̌ mǐ ká sixú glá ɖɔ n'i ɖɔ vǐ ɔ́ kú gbɔn din? É se din ɔ́, é sixú dó nǔ nyanya ɖé sin dó éɖée wú.” Davídi mɔ mɛsɛntɔ́ tɔn lɛ́ɛ ɖo kpá yi wɛ ɖo yěɖée tɛ́ntin, bó mɔ ɖɔ vǐ ɔ́ wɛ kú, lobo kanbyɔ́ yě ɖɔ: “Vǐ ɔ́ kú wɛ a?” Bɔ yě yí gbe n'i ɖɔ: “Ɛɛn é kú.” Ée yě ɖɔ mɔ̌ ɔ́, Davídi fɔ́n sín kɔ́ mɛ, bó lɛ wǔ, bó sá nǔ, bó ɖyɔ́ awu lobo ɖidó sinsɛnxɔ mɛ, bó yi ɖe kɔ́ nú Mawu Mavɔmavɔ. Ée é lɛ́ kɔ wá xwé gbe ɔ́, é byɔ́ nǔɖuɖu lobo ɖu, bɔ mɛsɛntɔ́ tɔn lɛ́ɛ kanbyɔ́ ɛ ɖɔ: “Étɛ́wú a ka ɖo nǔ wa gbɔn mɔ̌ wɛ? Hwenu e vǐ ɔ́ ɖo gbɛ ɔ́, a ɖo nu blá wɛ, bó ɖo avǐ ya wɛ. Din e vǐ ɔ́ ká kú ɔ́, a fɔ́n bó ɖu nǔ.” Bɔ é yí gbe nú yě ɖɔ: “Hwenu e vǐ ɔ́ kpo ɖo gbɛ ɔ́, un nɔ ɖo nu blá wɛ, bó nɔ ɖo avǐ ya wɛ, ɖó un nɔ ɖɔ: ‘Nǔ ce to ná blá wǔ nú Mawu Mavɔmavɔ bɔ é na jó vǐ ɔ́ dó nyi gbɛ hǔn mɛ̌ ká tunwun.’ Din e é ká kú ɔ́, étɛ́ sín nu blá wɛ un ná lɛ́ ɖe? Un sixú fɔ́n ɛ wɛ a? Nyɛ wɛ xwe fí e é ɖe é, amɔ̌, éyɛ́ sixú lɛ́ kɔ wá gɔ̌n ce ǎ.” Davídi dó gbɔ nú asi tɔn Bɛtisabe, bó ɖó xó xá ɛ, bɔ é mɔ xo bo ji vǐ súnnu ɖokpó, bɔ è nɔ ylɔ́ vǐ ɔ́ ɖɔ Salomɔ́ɔ. Mawu Mavɔmavɔ yí wǎn nú vǐ ɔ́, bó ɖɔ nú gbeyíɖɔ Natáan ɖɔ é ní sun nyǐ vǐ ɔ́ ɖɔ Yedidya, tínmɛ tɔn wɛ nyí wǎnyínámɔ Mawu Mavɔmavɔ tɔn. Hwenɛ́nu ɔ́, ahwangán ɖaxó Jowabu ko yí Hlaba Amumɔ́ɔ ví lɛ́ɛ sín toxo ɖaxó ɔ́, bó ko yí slá e mɛ axɔ́sú ɔ́ ɖésú nɔ́ nɔ é, bó sɛ́ mɛ dó Davídi ɖɔ è yi ɖɔ n'i ɖɔ: “Un tɔ́n ahwan Hlaba toxo ɔ́. Un ko yí slǎ e mɛ sindo ɖe é lɔ. Din ɔ́, kplé ahwanfuntɔ́ e kpo lɛ́ɛ, bó wá xá toxo ɔ́, lobo ná yí hwi ɖésú. Un jló ná yí, bónú susu ɔ́ bǐ ná nyí ce ǎ.” Énɛ́ ɔ́, Davídi kplé ahwanfuntɔ́ e kpo lɛ́ɛ bǐ, bó wá tɔ́n ahwan Hlaba toxo ɔ́, lobo yí. É yí gbǎkún e ɖo ta nú Amumɔ́ɔ ví lɛ́ɛ sín vodún Mɔlɛ́ki é. Sikágbákún wɛ, bó da kilóo gban mɔ̌, bɔ è zě awǐnnya xɔ akwɛ́ dó ɖó acɔ́ ná. È zě gbǎkún énɛ́ xwe nú Davídi, bɔ Davídi lɛ́ hɛn nǔ ɖagbe ɖagbe ɖěvo lɛ́ɛ sín ahwangbénu wá yi xwé. Davídi kplá togun e ɖo fínɛ́ lɛ́ɛ gěgé sín toxo yětɔn mɛ, lobo zɔ́n azɔ̌ syɛ́nsyɛ́n lɛ́ɛ yě. Mɛɖě nɔ́ zɛ xwlɛ, mɛ ɖě nɔ́ kpa awǐnnya, mɛ ɖě nɔ́ mu atín, mɛ ɖě nɔ́ sún blǐki. Mɔ̌ jɛ́n é wa Amumɔ́ɔ ví lɛ́ɛ sín nǔ gbɔn, gbɔn toxo lɛ́ɛ bǐ mɛ. Énɛ́ ɔ́ gúdo ɔ́, Davídi lɛ́ kɔ é kpó ahwangɔnu tɔn bǐ kpó, bó wá Jeluzalɛ́mu. Énɛ́ ɔ́ gúdo ɔ́, nǔ e wá jɛ ɔ́ ɖíe: Abusalɔ́mu Davídi ví ɔ́ ɖó nɔví nyɔ̌nu ɖokpó. É nyɔ́ ɖɛkpɛ ɖésú; è nɔ ylɔ́ ɛ ɖɔ Tamáa. Davídi ɔ́, vǐ tɔn súnnu ɖokpó tíin, bɔ è nɔ ylɔ́ ɛ ɖɔ Amunɔ́ɔ. É yí wǎn nú tɔ́ví tɔn Tamáa ɔ́ ɖésú. Wǎn e Amunɔ́ɔ yí nú tɔ́ví tɔn Tamáa ɔ́ dó azɔn ɛ, lo ɔ́, Amunɔ́ɔ tunwun lě e é ná sɛkpɔ́ ɛ gbɔn é ǎ, ɖó é kpo ɖo alɔ jí. Amunɔ́ɔ ka ɖó xɔ́ntɔn súnnu ɖokpó, bɔ è nɔ ylɔ́ ɛ ɖɔ Yonadávu. Davídi nɔví Cimɛ́ya sín vǐ wɛ. Yonadávu ka nyí mɛɖé bó bí ɖésú. É kanbyɔ́ Amunɔ́ɔ ɖɔ: “Hwɛ mɛ e nyí axɔ́sú ɖokpó sín vǐ é ɔ́, étɛ́wú a ka fɔ́n tɛgbɛ bo ɖo wǔ blá wɛ mɔ̌? A jlǒ ná ɖɔ nǔ e wú wɛ ɔ́ nú mì ǎ cé?” Amunɔ́ɔ ɖɔ n'i ɖɔ: “Tɔ́ví ce Abusalɔ́mu sín nɔví Tamáa ɔ́ wɛ un yí wǎn nǎ.” Yonadávu ɖɔ n'i ɖɔ: “Yi mlɔ́ ayǐ bó bló azunzɔnnɔ. Nú tɔ́ towe wá mɔ we ɔ́, a nǎ ɖɔ n'i ɖɔ: ‘Yi ɖɔ nú nɔví ce Tamáa ní wá ná nǔɖuɖu mì nú má ɖu. É ní wá ɖa nǔɖuɖu ɔ́ ɖo nukún ce mɛ bónú má mɔ. É ɖésúnɔ wɛ ná dó nú mì, bɔ un ná ɖu.’ ” Nǔgbó ɔ́, Amunɔ́ɔ mlɔ́ ayǐ, bó bló azunzɔnnɔ, bɔ axɔ́sú ɔ́ wá kpɔ́n ɛ, bɔ Amunɔ́ɔ ɖɔ n'i ɖɔ: “Nǎ gbe nɔví ce Tamáa nú é wá bló wɔ̌xúxú we nú mì, bo ná ná mì bɔ un ná ɖu.” Davídi sɛ́ wɛn dó Tamáa ɖo xwé tɔn gbe ɖɔ: “Yi nɔví towe Amunɔ́ɔ xwé, bó ɖa nǔɖuɖu n'i.” Tamáa yi Amunɔ́ɔ gɔ́n, bó mɔ ɛ ɖo ayǐmlɔ́mlɔ́. É zé linfín bó nya, bó mlí, bó ɖa wɔ̌xúxú ɖo nukún tɔn mɛ. É húzú wɔ̌xúxú ɔ́ sín gannú e mɛ é ɖa ɖe é, bó zé nú Amunɔ́ɔ, é ká gbɛ́ ɖuɖu, lobo ɖɔ mɛ bǐ ní tɔ́n, bɔ mɛ bǐ tɔ́n nǔgbó. Bɔ Amunɔ́ɔ ɖɔ nú Tamáa ɖɔ: “Zě nǔɖuɖu ɔ́ sɛkpɔ́ mì ɖo zan ce tó, bó dó nú mì, nú má ɖu.” Tamáa zé nǔɖuɖu e é bló ɔ́ yi jó nú Amunɔ́ɔ ɖo xɔnɔnɔ ɔ́ mɛ, ɖo zan tɔn tó. Hwenu e Tamáa ɖo nǔɖuɖu ɔ́ dó n'i wɛ ɔ́, Amunɔ́ɔ zunfán ɛ, bó ɖɔ: “Nɔví ce, wǎ mǐ ní mlɔ́ ayǐ.” Bɔ Tamáa sú xó, bó ɖɔ: “Gbɔ nú mì Amunɔ́ɔ; ma hwlɛ́n kan xá mì ó! È nɔ wa mɔ̌ ɖo Izlayɛ́li ǎ. Ma wa hɛ̌nnú nɛ́ ó! Fítɛ́ un ná yi nɔ kpó winnyá énɛ́ kpó? Bɔ hwɛ ná húzú nǔ baɖabaɖa ɖo Izlayɛ́li to ɔ́ mɛ. Din ɔ́, nǔ e byɔ́ we wɛ un ɖe ɔ́, a nǎ yi ɖɔ nú axɔ́sú ɔ́. Un ɖi ɖɔ é ná gbɛ́ ɖɔ émí kún ná sɔ́ mì da nú we ó ǎ.” Amunɔ́ɔ ka jló ná se gbɔ ǎ; é hwlɛ́n kan xá ɛ bó ɖó xó xá ɛ. Ée é bló mɔ̌ fó ɔ́, é jɛ wǎn gbɛ́ n'i jí; wǎn e é gbɛ́ n'i ɔ́ syɛ́n hú wǎn e é yí n'i ɖ'ayǐ é; é ɖɔ n'i ɖɔ: “Alě! Sí te bo tɔ́n!” Bɔ Tamáa sú xó bó ɖɔ n'i ɖɔ: “Gbɔ, ma nya mì mɔ̌ ó, nǔ énɛ́ e wa wɛ a ɖe ɔ́ ná lɛ́ nylá hú ée a blǒ wá yi din é.” Amunɔ́ɔ ka jló ná se xó e ɖɔ wɛ é ɖe ɔ́ ǎ. É ylɔ́ nyaví mɛsɛntɔ́ e ɖo gɔ̌n tɔn é, bó ɖɔ n'i ɖɔ: “Đe nyɔ̌nu élɔ́ tɔ́n sín fí, bó dó gan hɔn ɔ́ mɛ.” Nyaví ɔ́ nya Tamáa tɔ́n, bó dó gan hɔn ɔ́ mɛ. Tamáa ka dó awu gaga ɖagbe ɖagbe ɖé, lě e axɔ́ví e ma ko da asú ǎ lɛ́ɛ nɔ dó gbɔn é. É lɛ afín dó ta, bó vún awu dó kɔ nú éɖée, bó kplá así ta bo wlí xósúsú bo ɖidó. Nɔví tɔn Abusalɔ́mu kanbyɔ́ ɛ ɖɔ: “Nɔví, é má nyí Amunɔ́ɔ wɛ hwlɛ́n kan xá we bó ɖó xó xá we a? Ma ɖɔ nú mɛɖé ó, ɖó nɔví towe wɛ; ma dó ga nú xó nɛ́ ɔ́ dín ó.” Sín hwenɛ́nu ɔ́, Tamáa gbɔ bo cí nɔví tɔn Abusalɔ́mu xwé, nyɔ̌nu e è jǒ dó é ɖɔhun. Ée axɔ́sú Davídi se xó nɛ́ ɔ́, xomɛ sin i ɖésú, có é kɛ nu d'é wú nú Amunɔ́ɔ ǎ, ɖó vǐ súnnu ɖaxó tɔn wɛ, bɔ é yí wǎn n'i ɖésú. Xó nɛ́ ɔ́ nyɔ́ kpó é nylá kpó ɔ́, Abusalɔ́mu kɛ nu d'é wú nú Amunɔ́ɔ ǎ. Amɔ̌, Amunɔ́ɔ sín nǔ nɔ ɖo Abusalɔ́mu wú vɛ́ wɛ, ɖó kan e é hwlɛ́n xá nɔví tɔn, bó ɖó xó xá ɛ é wú. Ée nǔ énɛ́ lɛ́ɛ jɛ bɔ é bló xwe we ɔ́, mɛ e nɔ kpa fún nú gbɔ̌ lɛ́ɛ ɔ́ ɖo fún kpa nú Abusalɔ́mu sín gbɔ̌ lɛ́ɛ wɛ, ɖo Baalu-Hasɔ́ɔ, ɖo Eflayímu kpá. Énɛ́ ɔ́ wú wɛ Abusalɔ́mu jló ná ylɔ́ axɔ́sú ɔ́ sín vǐ lɛ́ɛ bǐ. Abusalɔ́mu yi mɔ axɔ́sú ɔ́, bó ɖɔ n'i ɖɔ: “Sɛ́mɛɖó, mɛ e nɔ kpa fún nú gbɔ̌ lɛ́ɛ é ɖo fún kpa nú gbɔ̌ ce lɛ́ɛ wɛ. Un jló ɖɔ mɛ kpó gǎn hɔn-yitɔ́ mɛtɔn lɛ́ɛ kpó ní wá ɖu agɔ̌ xá mì.” Axɔ́sú ɔ́ ka ɖɔ nú Abusalɔ́mu ɖɔ: “Éeǒ vǐ ce; é byɔ́ ɖɔ mǐ bǐ ná wá ǎ, ɖó mǐ táá nyí agban bo ná nɔ kɔ nú we.” Abusalɔ́mu jɛ kɔ n'i, lo ɔ́, axɔ́sú ɔ́ jló ná yi ǎ, bo gbɔ bo xo ɖɛ dó jǐ tɔn. Abusalɔ́mu ɖɔ nú axɔ́sú ɔ́ ɖɔ: “È ma ná kɛnklɛ́n bo ná gbe nɔví ce Amunɔ́ɔ bónú é ná xwedó mǐ yi a?” Bɔ axɔ́sú ɔ́ ɖɔ: “Étɛ́wú é ká ná xwedó mi yi?” Abusalɔ́mu ka ɖo kɔ jɛ nú axɔ́sú ɔ́ wɛ káká bɔ é gbɔ bó jó Amunɔ́ɔ kpó vǐ tɔn ɖě lɛ́ɛ bǐ kpó dó, bɔ yě xwedó e yi. Abusalɔ́mu ná gbe mɛsɛntɔ́ tɔn lɛ́ɛ ɖɔ: “Mi ɖo hwenu e Amunɔ́ɔ ná nu ahan mú bó ɖo awǎ jɛ wɛ ɔ́ cɔ́ wɛ, bónú un ɖɔ nú mi ɖɔ: ‘Mi hu Amunɔ́ɔ’ ɔ́, mi ná hu i. Mi ma ɖi xɛsi ó, nyi wɛ ná gbe tɔn mi. Mi kpan akɔ́n, bó dó súnnu gán.” Abusalɔ́mu sín mɛsɛntɔ́ lɛ́ɛ wa Amunɔ́ɔ nú lě e Abusalɔ́mu zɔ́n yě gbɔn é, bɔ axɔ́sú Davídi sín vǐ lɛ́ɛ bǐ sí te, bɔ mɛ ɖokpó ɖokpó xá sɔ́tócí tɔn jí bó hɔn. Hwenu e yě ɖo ali jí ja xwé ɔ́, Davídi se ɖɔ Abusalɔ́mu hu vǐ émítɔn lɛ́ɛ bǐ, bɔ é kún sɔ́ kpo mɛ ɖokpó géé ɖo gbɛ ó. Ée Davídi se mɔ̌ ɔ́, é sí te bo vún awu dó kɔ nú éɖée, bó mlɔ́ kɔ́ mɛ. Mɛsɛntɔ́ tɔn lɛ́ɛ lɔmɔ̌ vún awu dó kɔ nú yěɖée, bó lɛ́ lɛ̌ dó e. Yonadávu, Davídi nɔví Cimɛ́ya ví ɔ́ yí xó, bó ɖɔ: “Sɛ́mɛɖó, è ma vɛdó ɖɔ vǐ mɛtɔn lɛ́ɛ bǐ wɛ è hu sín ó. Amunɔ́ɔ kɛ́ɖɛ́ wɛ kú. Nǔ e lin wɛ Abusalɔ́mu ka ɖe sín gbe e gbe Amunɔ́ɔ hwlɛ́n kan xá nɔví tɔn Tamáa bó ɖó xó xá ɛ ɔ́ ka nɛ́. Sɛ́mɛɖó, è ma zé dó ayi mɛ ɖɔ vǐ mɛtɔn lɛ́ɛ bǐ wɛ è hu bo ɖo nǔ lin kpɔ́n wɛ dín ó. Amunɔ́ɔ ɖokpónɔ wɛ kú. Abusalɔ́mu ka hɔn yi.” Nyaví dɔ̌nkpɛvú e nɔ ɖo ali cɔ́ wɛ ɔ́ zé ta bo kpɔ́n zɔ sɛ́ dó, bó mɔ gbɛtɔ́ wɔ̌buwɔ́bú ɖé ɖo ali e gosín sókan mɛ bó ɖo gǔdo tɔn é jí jǎwe. Énɛ́ ɔ́, Yonadávu ɖɔ nú axɔ́sú Davídi ɖɔ: “Sɛ́mɛɖó, vǐ mɛtɔn lɛ́ɛ ɖíe jǎwe e; un ma ɖɔ mɔ̌ nú mɛ a?” Yonadávu ɖo xó ɖɔ fó wɛ kɛ́ɖɛ́ bɔ axɔ́sú ɔ́ sín vǐ lɛ́ɛ wá, bó wlí avǐ, bɔ axɔ́sú ɔ́ kpó gǎn hɔn-yitɔ́ tɔn lɛ́ɛ kpó bǐ y'avǐ xá yě, ɖasin hoho. Abusalɔ́mu hɔn bo yi cí Talumayi Amumihúu ví, Gɛcúu xɔ́sú ɔ́ xwé. Davídi ka fɔ́n bó ɖo vǐ tɔn sín aluwɛ mɛ. Abusalɔ́mu hɔn bo yi cí Gɛcúu bó nɔ fínɛ́ nú xwe atɔn. Hwenɛ́nu ɔ́, Davídi sɔ́ ɖo Abusalɔ́mu sín gbě nya wɛ ǎ, ɖó é kó sɔ́ vǐ tɔn Amunɔ́ɔ e kú ɔ́ sá wǔ. Jowabu Selúya ví ɔ́ mɔ ɖɔ Davídi ɖo ganjí xá Abusalɔ́mu, bó sɛ́ mɛ dó nyɔ̌nu bíbí ɖokpó gbé mɛ, ɖo Tekowa, bɔ é wá lobɔ é ɖɔ n'i ɖɔ: “A nǎ wa nǔ mɛ ɖo aluwɛ mɛ ɖɔhun, bó ná dó nǔwamɛwu; a nǎ sá nǔsáwǔ ǎ, a nǎ cí nyɔ̌nu e mɛ tɔn ɖé kú bɔ é ɖo avǐ tɔn ya wɛ bɔ é kó lín é ɖɔhun. Mɔ̌ wɛ a nǎ zɔn, bó yi axɔ́sú ɔ́ gɔ́n, bó ná ɖɔ xó e un ná ɖɔ nú we lɛ́ɛ n'i.” Bɔ Jowabu ɖɔ xó e nyɔ̌nu ɔ́ ná yi ɖɔ nú Davídi ɔ́ n'i. Nyɔ̌nu ɔ́ yi mɔ axɔ́sú ɔ́, bó xwe agbɔ̌nnusú do ɖo asá tɔn mɛ bó sú xó ɖɔ: “Sɛ́mɛɖó, hwlɛ́n mì!” Bɔ axɔ́sú ɔ́ kanbyɔ́ ɛ ɖɔ: “Nɛ̌ ká gbɔn nú we?” Bɔ nyɔ̌nu ɔ́ ɖɔ: “Asú ce wɛ kú, asúkúsi wɛ nú mì. Un ka ɖó vǐ súnnu we bɔ yě xo hun ɖo gle mɛ, bɔ mɛ ɖokpó hu mɛ ɖokpó, ɖó mɛ ɖěbǔ ɖo fínɛ́ bó ɖá yě ǎ. Din ɔ́, hɛ̌nnu ɔ́ bǐ sí te dó nyɛ mɛsɛntɔ́ mɛtɔn jí, bó nɔ́ ɖɔ: ‘Ɖe mɛ e hu nɔví tɔn é tɔ́n nú mǐ, nú mǐ ná hu i. Mǐ nǎ hu i dó ba hlɔn nú nɔví tɔn e kú é! Mǐ ná hu i, bó ná sú gǔɖutɔ́ ɔ́ sín kún dó.’ Ényí yě bló mɔ̌ din ɔ́, yě ná vívá nǔ e ɖó nukún wɛ un ɖe ɔ́ sín kún dó, bɔ asú ce sɔ́ ná ɖó donu ɖěbǔ ɖo ayǐkúngban jí fí ǎ.” Ée é ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Yi xwé towe gbe, un ná ɖɔ xó dó xó towe wú.” Ée axɔ́sú ɔ́ ɖɔ mɔ̌ ɔ́, nyɔ̌nu ɔ́ lɛ́ ɖɔ n'i ɖɔ: “Sɛ́mɛɖó! Nú é ji nǔɖé ɔ́, nyɛ kpó mɛ ce lɛ́ɛ kpó wɛ ná kpan. Nǔ e é ná ji ɔ́ ná nɔ kɔ nú mɛ ǎ, é ká ná nɔ kɔ nú acɛkpikpa mɛtɔn ǎ.” Bɔ axɔ́sú ɔ́ ɖɔ n'i ɖɔ: “Ényí mɛ ɖé kɛ nu dó wǔ we hǔn, kplá mɛ ɔ́ wá nú mì; é sɔ́ ná ɖo yiyi wɛ bo ná ɖɔ nǔɖé nú we gbeɖé ǎ.” Bɔ nyɔ̌nu ɔ́ ɖɔ: “Sɛ́mɛɖó, è nǐ zin alɔ dó akɔ́n nú mì ɖo Mawu Mavɔmavɔ, Mawu mɛtɔn nukɔn, bónú mɛ e ja vǐ ce sín hlɔn ba gbé ɔ́ má ɖo nǔ dó sin wɛ káká bó wá hu vǐ ɖokpó e kpo nú mì é ó.” Bɔ axɔ́sú ɔ́ xwlé Mawu n'i ɖɔ: “Mawu Mavɔmavɔ ɖo gbɛ; ɖa e ɖo vǐ towe ta é ɖokpó ná jɛ kɔ́ mɛ ǎ. Nyi wɛ ɖɔ mɔ̌ nú we.” Bɔ nyɔ̌nu ɔ́ ɖɔ: “Sɛ́mɛɖó, è kɛnklɛ́n má lɛ́ ɖɔ xó ɖokpó nú mɛ.” Bɔ axɔ́sú ɔ́ ɖɔ: “A ɖǒ xó ɖé hǔn ɖɔ.” Bɔ é ɖɔ nú axɔ́sú ɔ́ ɖɔ: “Étɛ́wú mɛ ka lin nǔ mɔ̌hun dó togun Mawu tɔn wú? Lě e mɛ ɖɔ xó gbɔn din zaanɖé ɔ́ slɛ́ mɛ, ɖɔ mɛ wa nǔ nyi do. Étɛ́wú mɛ ma ka sɛ́ wɛn dó Abusalɔ́mu bónú é gosín to e mɛ é hɔn yi cí é, bó wá xwé ǎ. Nǔgbó wɛ; mǐ bǐ wɛ ná kú bó yi sin e gba kɔn nyi kɔ́ mɛ bɔ è ma sɔ́ sixú xwá ǎ é ɖɔhun. Amɔ̌, linlin Mawu tɔn wɛ nyí ɖɔ mɛ e è gbɛ̌ sín vǐ mɛ din bɔ é yi é ɔ́, má sɔ́ wá ó ǎ. Sɛ́mɛɖó, ényí un wá ɖo xó élɔ́ lɛ́ɛ ɖɔ nú mɛ wɛ égbé din ɔ́, xɛsi e dó mì wɛ togun ɔ́ ɖe ɔ́ wɛ zɔ́n. Bɔ un gbɔ bo ɖɔ un ná wá jɛ hwɛ nú mɛ, afɔ nyɔ́ ɔ́, mɛ sixú bló nǔ e ba wɛ un ɖe ɔ́ nú mì. Axɔ́sú ɔ́ ná hwlɛ́n nyi kpó vǐ ce kpó gán ɖo mɛ e jló ná ɖe mǐ sín togun Mawu tɔn mɛ ɔ́ sí. Sɛ́mɛɖó, nǔ e un nɔ lin ɔ́ ɖíe: ‘Xó e axɔ́sú ɔ́ ná ɖɔ ɔ́ ná fá xomɛ nú mɛ bǐ, ɖó sɛ́mɛɖó ce ɔ́, wɛnsagun Mawu tɔn ɖɔhun wɛ mɛ cí, mɛ tunwun nǔ e nyɔ́ ɔ́ kpó nǔ e gblé ɔ́ kpó.’ Mawu Mavɔmavɔ, Mawu mɛtɔn ní nɔ kpɔ́ xá mɛ.” Bɔ axɔ́sú ɔ́ ɖɔ nú nyɔ̌nu ɔ́ ɖɔ: “Un ná kan nǔ ɖokpó byɔ́ we. Ma hwlá xomɛ dó mì ó.” Bɔ nyɔ̌nu ɔ́ ɖɔ: “Sɛ́mɛɖó, un ɖo xó mɛtɔn se wɛ.” Bɔ axɔ́sú ɔ́ ɖɔ: “Xó énɛ́ lɛ́ɛ e a ɖɔ nú mì din ɔ́, Jowabu ɖó nu ɖ'é mɛ ǎ cé?” Bɔ nyɔ̌nu ɔ́ xwlé nǔ nú axɔ́sú ɔ́ ɖɔ: “Sɛ́mɛɖó, mɛ ɖo gbɛ; xó nǔgbó ɔ́ nɛ́ mɛ ɖɔ nɛ́. Mɛsɛntɔ́ mɛtɔn Jowabu wɛ to nǔ e un wá ɖɔ lɛ́ɛ bǐ dó así nú mì. É wa mɔ̌ bó ná dó dɔn nǔ lɛ́ɛ bǐ wlú. Amɔ̌, hwɛ sɛ́mɛɖó ɔ́, mɛ ɖó nǔnywɛ́ wɛnsagun Mawu tɔn ɖɔhun, bó nɔ tunwun nǔ e ɖo jijɛ wɛ ɖo ayǐkúngban ɔ́ jí é.” Énɛ́ ɔ́ gúdo ɔ́, axɔ́sú ɔ́ ɖɔ nú Jowabu ɖɔ: “Un ná gbɔ bo bló lě e a ɖɔ gbɔn é. Yi kplá vǐ ce Abusalɔ́mu wá.” Ée axɔ́sú ɔ́ ɖɔ mɔ̌ ɔ́, Jowabu xwe agbɔ̌nnusú do, bó ɖe kɔ́, bó dó kú nú mɛ bo ɖɔ: “Sɛ́mɛɖó, nyi mɛsɛntɔ́ mɛtɔn mɔ din ɖɔ un mɔ fɛ́nú ɖo gɔ̌n mɛtɔn, ɖó mɛ bló nǔ e nyɛ mɛsɛntɔ́ mɛtɔn jló é.” Ée é ɖɔ mɔ̌ ɔ́, é sí te bo yi Gɛcúu, bó yi kplá Abusalɔ́mu wá Jeluzalɛ́mu. Lo ɔ́, axɔ́sú ɔ́ ɖɔ: “É ní yi xwé tɔn gbe; é ná mɔ nukún ce mɛ ǎ.” Bɔ Abusalɔ́mu yi xwé tɔn gbe; é mɔ axɔ́sú ɔ́ nukún mɛ nǔgbó ǎ. Mɛ ɖěbǔ ɖo Izlayɛ́li to ɔ́ mɛ bó nyɔ́ ɖɛkpɛ sɔ Abusalɔ́mu ǎ. È kpɔ́n ɛ sín ta káká yi afɔ ɔ́, blɔ̌ ɖěbǔ ɖo wǔ tɔn ǎ. Xwewú xwewú tɛgbɛ ɔ́, nú ɖa tɔn gɔ́ dín ɔ́, è nɔ kpa n'i. Đa e è nɔ kpa sín ta n'i ɔ́ nɔ da hú kilóo we. Abusalɔ́mu ɖó vǐ súnnu atɔn, vǐ nyɔ̌nu ɖokpó. È nɔ ylɔ́ vǐ nyɔ̌nu ɔ́ ɖɔ Tamáa. Vǐ ɖé wɛ bó nyɔ́ ɖɛkpɛ ɖésú. Abusalɔ́mu bló xwe we ɖo Jeluzalɛ́mu ma mɔ axɔ́sú ɔ́ nukún mɛ. É sɛ́ wɛn dó Jowabu gbe ɖokpó, bó ná sɛ́ ɛ dó axɔ́sú ɔ́ gɔ́n, bɔ Jowabu ka jló ná wá ǎ. Abusalɔ́mu lɛ́ sɛ́ wɛn dó e azɔn wegɔ́ ɔ́ bɔ Jowabu lɛ́ gbɛ́ wǐwá. Bɔ Abusalɔ́mu gbɔ bo ɖɔ nú mɛsɛntɔ́ tɔn lɛ́ɛ ɖɔ: “Mi mɔ Jowabu sín gle a, é ɖo gle ce kpá; ɔ́ji ɖo gle ɔ́ jí din. Mi yi dó gle ɔ́ zo.” Bɔ mɛsɛntɔ́ lɛ́ɛ yi dó gle ɔ́ zo nǔgbó. Jowabu sɔ́ nǔ tlóló bó yi mɔ Abusalɔ́mu ɖo xwé tɔn gbe, bó ɖɔ: “Étɛ́wú mɛsɛntɔ́ towe lɛ́ɛ ka dó gle ce zo?” Bɔ Abusalɔ́mu yí gbe nú Jowabu ɖɔ: “Nǔ e wú wɛ ɔ́, un ɖɔ hwi ní wá gɔ̌n ce bɔ a gbɛ̌. Un ka jló ná sɛ́ we dó axɔ́sú ɔ́ gɔ́n wɛ, bɔ a nǎ yi kanbyɔ́ ɛ nú mì ɖɔ étɛ́wú un ka lɛ́ kɔ sín Gɛcúu wá é jí? Un gbɔ bo nɔ dɔ̌n ɔ́, é nyɔ́ hú. Din ɔ́, un jló ná yi mɔ axɔ́sú ɔ́, bónú hwɛ ɖé wɛ un hu ɔ́, é ná gbɔ bo hu mì.” Jowabu yi dó wɛn énɛ́ axɔ́sú ɔ́, bɔ axɔ́sú ɔ́ sɛ́ wɛn dó Abusalɔ́mu, bɔ é kán wezun bo wá xwe agbɔ̌nnusú do ɖo axɔ́sú ɔ́ sá mɛ. Énɛ́ ɔ́, axɔ́sú ɔ́ kplá así kɔ n'i. Ée nǔ énɛ́ lɛ́ɛ jɛ gúdo ɔ́, Abusalɔ́mu ba kɛkɛ́ví ɖokpó, bó xo sɔ́ kplé, bó xo gbɛtɔ́ kanɖé wǒ (50) kplé, bɔ yě nɔ́ ɖo wezun jí ɖo kɛkɛ́ví ɔ́ nukɔn. É nɔ́ fɔ́n zǎn, bó nɔ́ yi cí te ali e byɔ́ toxo ɔ́ mɛ ɔ́ tó, bɔ mɛ ɖěbǔ gbɔn fínɛ́ bó xwe hwɛ jɛ nú axɔ́sú ɔ́ gbé ɔ́, é nɔ kanbyɔ́ mɛ ɔ́ ɖɔ: “Fítɛ́ a gosín?” Nú mɛ ɔ́ ɖɔ: “Un gosín akɔta lě mɛ ɖo Izlayɛ́li” ɔ́, é nɔ́ ɖɔ n'i ɖɔ: “Éɖíe, nǔ e a wa ɔ́ nyɔ́, hwɛ towe jɔ, amɔ̌, mɛɖé ɖo axɔ́sú ɔ́ xwé bó ɖo tó ná ɖó xó towe wɛ ǎ.” É nɔ́ lɛ́ ɖɔ: “Nú nyɛ wɛ nɔ ɖɔ hwɛ ɖo tomɛ fí din ɔ́, mɛ e ɖo jlɛ ɖɔ wɛ lɛ́ɛ, abǐ mɛ e ɖó hwɛ ɖé bɔ è na ɖɔ gbo lɛ́ɛ bǐ ná nɔ wá mɔ mì, bɔ un ná nɔ ɖɔ hwɛ gbo nú yě.” Nú mɛɖé sɛkpɔ́ ɛ bó ja kɔ́ ɖe gbé ɔ́, é nɔ jlɔ́ mɛ ɔ́, bó nɔ kplá así kɔ n'i. Mɔ̌ wɛ Abusalɔ́mu nɔ bló gbɔn nú Izlayɛ́li ví e xwe axɔ́sú ɔ́ gɔ́n bó ná jɛ hwɛ n'i lɛ́ɛ bǐ. Nǔ énɛ́ e wa wɛ é ɖe ɔ́, ayi ɖó nukɔn nú Izlayɛ́li ví lɛ́ɛ wɛ é ká ɖe, bónú yě ná nɔ jǐ tɔn. Xwe ɛnɛ gúdo ɔ́, Abusalɔ́mu yi mɔ axɔ́sú ɔ́ bó ɖɔ: “È nǐ ná gbe mì bónú ma yi Eblɔ́n, lobo ná yi ɖe akpá e un dó nú Mawu Mavɔmavɔ é. Nǔ e wú un ɖɔ mɔ̌ ɔ́, hwenu e un ɖo Gɛcúu Silíi yíkúngban jí ɔ́, un ɖɔ nú Mawu Mavɔmavɔ ɖɔ nú é kplá mì yi Jeluzalɛ́mu ɔ́, un ná yi sá vɔ̌ n'i ɖo Eblɔ́n.” Axɔ́sú ɔ́ ɖɔ n'i ɖɔ: “Yi kpó fífá kpó.” Bɔ Abusalɔ́mu wlí ali, bó yi Eblɔ́n. Abusalɔ́mu sɛ́ nǔdobatɔ́ tɔn lɛ́ɛ dó akɔta Izlayɛ́li tɔn lɛ́ɛ ɖokpó ɖokpó mɛ, nú yě ná yi ɖɔ nú mɛ lɛ́ɛ ɖɔ: “Lanzo ɖɔ nǔ nú mi se ɔ́, mi ná sú xó bó ɖɔ: ‘Abusalɔ́mu yi zinkpo jí ɖo Eblɔ́n.’ ” Abusalɔ́mu da gbɛtɔ́ afɔɖé (200), bɔ yě kplá ɛ sín Jeluzalɛ́mu wá. Yě ká mɔ do nú nǔ e wa gbé yě xwe ɔ́ ǎ. Hwenu e Abusalɔ́mu ɖo vɔ̌ lɛ́ɛ sá wɛ ɔ́, é sɛ́ wɛn dó Axitofɛ́li e nɔ ɖe wě xá Davídi ɔ́, sín Gilóo toxo e mɛ é nɔ́ nɔ é. Abusalɔ́mu lɛ́ mɔ ahwan dó éɖée jí, bɔ gbě e blá wɛ yě ɖe ɔ́ lɛ́ ɖo syɛ́nsyɛ́n d'é jí wɛ. Mɛ ɖokpó wá ɖɔ nú Davídi ɖɔ: “Izlayɛ́li ví lɛ́ɛ ɖo Abusalɔ́mu jí.” Ée Davídi se mɔ̌ tlóló ɔ́, é ɖɔ nú gǎn hɔn-yitɔ́ tɔn e ɖo Jeluzalɛ́mu fínɛ́ xá ɛ lɛ́ɛ bǐ ɖɔ: “Mi sɔ́ nǔ, nú mǐ ná hɔn yi, ɖó mǐ sɔ́ sixú wa nǔɖé bó gló Abusalɔ́mu ǎ. Mi yá wǔ, é má nyí mɔ̌ ǎ ɔ́, é ɖo nǎ lín wɛ cóbó ná tɔ́n ahwan mǐ, bó ná hu mǐ, bó ná hu mɛ e ɖo toxo ɔ́ mɛ lɛ́ɛ ǎ.” Ée axɔ́sú ɔ́ ɖɔ mɔ̌ ɔ́, gǎn hɔn-yitɔ́ lɛ́ɛ ɖɔ n'i ɖɔ: “Sɛ́mɛɖó, mǐ ɖo gbesisɔ mɛ, mɛ ɖɔ nǔ ɖěbǔ ɔ́, mǐ ná bló bǐ.” Axɔ́sú ɔ́ tɔ́n sín hɔn ɔ́ mɛ, bɔ mɛ tɔn lɛ́ɛ bǐ xwedó e, asi tɔn wǒ jɛ́n é jó dó nyi hɔn ɔ́ mɛ, bɔ yě ná kpé nukún d'é wú. Hwenu e axɔ́sú ɔ́ kpó mɛ e xwedó e lɛ́ɛ kpó ɖo toxo ɔ́ mɛ tɔ́n sín wɛ ɔ́, yě nɔ te ɖo xwé gǔdo gúdo tɔn ɔ́ kpá. Gǎn hɔn-yitɔ́ axɔ́sú ɔ́ tɔn lɛ́ɛ bǐ slɛ́, bó ɖo nukɔn tɔn gbɔn dín wɛ: Keleti lɛ́ɛ, Pɛlɛ́ti ví e nɔ cɔ́ axɔ́sú ɔ́ lɛ́ɛ, kpó gbɛtɔ́ nǔwɔntɔn (600) e xwedó e sín Gati lɛ́ɛ kpó. Yě bǐ ɖo nukɔn tɔn gbɔn dín wɛ. Axɔ́sú ɔ́ kanbyɔ́ Itayi, ahwangán e kpa acɛ dó sɔ́ja e gosín Gati lɛ́ɛ ɔ́ ɖɔ: “Étɛ́wú a ka xwedó mǐ? Lɛ̌ kɔ bo yi nɔ kpɔ́ xá axɔ́sú yɔ̌yɔ́ ɔ́, ɖó jǒnɔ wɛ hwɛ nyí; to towe mɛ wɛ a hɔn sín, bó wá ɖo fí. A wǎ gɔ̌n ce din ɔ́, é lín ǎ, bɔ égbé din ɔ́, un ná kplá we bɔ a nǎ jɛ flúflú xá mǐ jí yi ɖisí amyɔ. Nyi lɔ ɖíe ma ko tunwun fí e un xwe é ǎ e. Kplá nɔví towe lɛ́ɛ, bónú hwi kpó yě kpó lɛ́ kɔ. Mawu Mavɔmavɔ ní nyɔ́ xomɛ dó wǔ we, bó nɔ gbejí nú we.” Itayi ka xwlé Mawu nú axɔ́sú ɔ́ ɖɔ: “Mawu Mavɔmavɔ ɖo gbɛ! Sɛ́mɛɖó ce axɔ́sú ɔ́ ɖo gbɛ; è yi fí ɖé ɔ́, nyi lɔ ná yi. È nɔ gbɛ ɔ́, nyi lɔ ná nɔ gbɛ. È kú ɔ́, nyi lɔ ná kú.” Ée é ɖɔ mɔ̌ ɔ́, Davídi ɖɔ: “É nyɔ́, bo wá yi.” Bɔ Itayi kpó sɔ́ja tɔn lɛ́ɛ kpó, kpó mɛ yětɔn lɛ́ɛ bǐ kpó wá yi. Hwenu e mɛ lɛ́ɛ ɖo wǐwá yi wɛ ɔ́, mɛ bǐ ɖo avǐ ya wɛ, bó ɖo xó sú wɛ. Davídi ka wlí ali e gbɔn Sedlɔ́n tɔ ɔ́ mɛ yi gbětótló mɛ é, é kpó ahwangbɛ́ tɔn lɛ́ɛ kpó. Vɔ̌sánú-xwlémawutɔ́ Sadɔ́ku lɔmɔ̌ ɖo fínɛ́, bɔ Levíi ví lɛ́ɛ hɛn akɔjijɛgbá Mawu tɔn, bó ɖo fínɛ́ xá ɛ. Yě zlɔ́n akɔjijɛgbá ɔ́, bɔ vɔ̌sánú-xwlémawutɔ́ Abiyatáa ɖo vɔ̌ sá nú Mawu wɛ káká bɔ togun ɔ́ bǐ tɔ́n sín toxo ɔ́ mɛ. Axɔ́sú ɔ́ ɖɔ nú vɔ̌sánú-xwlémawutɔ́ Sadɔ́ku ɖɔ: “Lɛ̌ zé akɔjijɛgbá ɔ́ yi ɖó toxo ɔ́ mɛ. Nú Mawu Mavɔmavɔ jló ná wa ɖagbe nú mì ɔ́, é ná bló bɔ un ná lɛ́ kɔ wá, bó ná lɛ́ mɔ akɔjijɛgbá tɔn kpó tɛn mímɛ́ tɔn kpó. Amɔ̌, nú é ma jló ná wa ɖagbe nú mì ǎ ɔ́, nyi ɖíe ɖo fí e, é ní wa nǔ ce lě e é jló e gbɔn é.” Axɔ́sú ɔ́ lɛ́ ɖɔ n'i ɖɔ: “A mɔ din a? Lɛ̌ kɔ yi kpó fífá kpó, hwi kpó vǐ towe Aximáasi kpó Abiyatáa kpó vǐ tɔn Jonatáan kpó. Nyɛ ɔ́, un ná yi nɔ te ɖo gbětótló mɛ, fí e è nɔ zɔn afɔ gbɔn Judɛ́ɛn tɔ ɔ́ mɛ dín ɖe ɔ́ kpá, káká jɛ hwenu e un ná se wɛn mitɔn dó é.” Ée axɔ́sú ɔ́ ɖɔ mɔ̌ ɔ́, Sadɔ́ku kpó Abiyatáa kpó ɖíɖá akɔjijɛgbá ɔ́ bo lɛ́ kɔ yi Jeluzalɛ́mu, bó cí fínɛ́. Davídi ɖo Olívutín só ɔ́ jí xá wɛ kpó avǐ kpó, bó cyɔ́n nǔ ta, bo ɖo afɔ vɔ́. Mɛ e xwedó e lɛ́ɛ lɔmɔ̌ cyɔ́n nǔ ta, bo ɖo avǐ ya wɛ, bó ɖo só ɔ́ jí xá wɛ. È wa ɖɔ nú Davídi ɖɔ Axitofɛ́li ɖo mɛ e ɖo Abusalɔ́mu jí, bó ɖo gbě tɔn blá wɛ lɛ́ɛ mɛ, bɔ Davídi sú xó bo ɖɔ: “Mawu Mavɔmavɔ, blǒ bónú nǔ e Axitofɛ́li ná kplɔ́n Abusalɔ́mu lɛ́ɛ ní nyí nǔ yǎyá.” Hwenu e Davídi ɖo só ɔ́ jí xá wɛ, ɖo fí e é ná ɖe kɔ́ nú Mawu ɖe ɔ́, é mɔ Hucáyi Aakíti ɔ́ ɖo nukɔn tɔn, bɔ awu tɔn bǐ vún, bɔ é lɛ kɔ́ dó ta. Bɔ Davídi ɖɔ n'i ɖɔ: “Ma xwedó mì ó; a xwedó mì ɔ́, a nǎ nyí agban bo ná nɔ kɔ jí nú mì. Nǔ e a nǎ wa ɔ́, a nǎ lɛ́ kɔ yi toxo ɔ́ mɛ, bó ná yi ɖɔ nú Abusalɔ́mu ɖɔ: ‘Sɛ́mɛɖó, un ɖo kan mɛtɔn nu. Đ'ayǐ ɔ́, tɔ́ mɛtɔn sín mɛsɛntɔ́ wɛ un nyí, amɔ̌, din ɔ́, mɛ wɛ un ɖó ná sɛn.’ Nú a ɖɔ mɔ̌ n'i ɔ́, a nǎ dó alɔ mì, bɔ nǔ e Axitofɛ́li ná kplɔ́n ɛ ɔ́, a nǎ hɛn bǐ gblé. A blǒ mɔ̌ ɔ́, vɔ̌sánú-xwlémawutɔ́ Sadɔ́ku kpó Abiyatáa kpó ná nɔ jǐ we. A nǎ ɖɔ nǔ e a se ɖo hɔnmɛ ɔ́ bǐ nú yě. Aximáasi Sadɔ́ku ví ɔ́ kpó Jonatáan Abiyatáa ví ɔ́ kpó ɖo fínɛ́ xá yě; ényí mi se xó ɖé ɔ́, mi ná nɔ ɖɔ sɛ́ dó mì gbɔn yě jí.” Hucáyi Davídi xɔ́ntɔn ɔ́ lɛ́ kɔ yi Jeluzalɛ́mu, bɔ Abusalɔ́mu lɔmɔ̌ ko ɖo fínɛ́ wá wɛ hwenɛ́nu. Só ɔ́ ɖavínu wú wɛ Davídi zɛ zaan, bɔ mɛsɛntɔ́ Mɛfibáalu tɔn e è nɔ ylɔ́ ɖɔ Siva ɔ́ wá kpé e. É hɛn tócí we bɔ è blǎ akpa nú yě. É bɛ́ wɔ̌xúxú afɔɖé, vǐwun xúxú sín kan kanwe ko, atínsínsɛ́n e tɔ́n hwe ɔ́ nu ɔ́ kanwe ko, kpó vɛ̌ɛn anyǔglo ɖokpó kpó, bó dó nǔ énɛ́ lɛ́ɛ bǐ sín agban ɖó tócí lɛ́ɛ jí. Ée axɔ́sú ɔ́ mɔ Siva ɔ́, é kanbyɔ́ ɛ ɖɔ: “Étɛ́ ná zé nǔ énɛ́ lɛ́ɛ dó wa ná wɛ a ɖe?” Bɔ Siva yí gbe n'i ɖɔ: “Mɛ kpó xwédo mɛtɔn kpó ná nɔ́ dó tócí lɛ́ɛ; sɔ́ja mɛtɔn lɛ́ɛ ná ɖu wɔ̌xúxú lɛ́ɛ kpó atínsínsɛ́n lɛ́ɛ kpó. Mɛ e nǔ ná cikɔ ná ɖo gbětótló mɛ lɛ́ɛ ná nu vɛ̌ɛn.” Axɔ́sú ɔ́ ɖɔ: “Fítɛ́ Mɛfibáalu gǎn towe Sawúlu sín vǐvú ɔ́ ɖe?” Bɔ Siva yí gbe n'i ɖɔ: “É cí Jeluzalɛ́mu, ɖó é ɖo ɖiɖɔ wɛ ɖɔ din ɔ́, Izlayɛ́li ví lɛ́ɛ ná zé axɔ́súɖuto tɔ́gbó émítɔn tɔn dó alɔ mɛ nú émí.” Axɔ́sú ɔ́ lɛ́ ɖɔ: “É nyí mɔ̌ wɛ hǔn, un ná nǔ e nyí Mɛfibáalu tɔn lɛ́ɛ bǐ we.” Bɔ Siva ɖɔ: “Axɔ́sú sɛ́mɛɖó, un kan xwé byɔ́, ɖó è jɔwǔ mì!” Axɔ́sú Davídi ko wá káká Baxulimu, bɔ nya ɖé tɔ́n sín gletoxo ɔ́ mɛ, bó jɛ nu dó e jí. Nya ɔ́, Sawúlu xwé nu wɛ, bɔ è nɔ ylɔ́ ɛ ɖɔ Cimɛ́yi, bɔ é nyí Gela ví. Togun ɔ́ bǐ kpó súnnu glegbenu lɛ́ɛ kpó ɖo ɖisí kpó amyɔ kpó nú axɔ́sú Davídi có Cimɛ́yi ɖo awǐnnyaglo nyi dó é kpódó gǎn hɔn-yitɔ́ tɔn lɛ́ɛ bǐ kpó wɛ. Hwenɛ́nu ɔ́, togun ɔ́ bǐ kpó súnnu asúká lɛ́ɛ kpó ká ɖo ɖisí kpó amyɔ kpó nú axɔ́sú ɔ́. É ɖo axɔ́sú ɔ́ zun wɛ bo nɔ ɖɔ: “Bǔ hwiɖée, bǔ hwiɖée, avǔn nǔvɔ́nɔ mɛhutɔ́. Mawu Mavɔmavɔ ɖo tó dɔn nú we wɛ ɖó Sawúlu sín mɛ e a hu lɛ́ɛ bǐ tamɛ. Axɔ́súɖuɖu Sawúlu tɔn ɔ́ nyí towe ǎ, bɔ a klá jɛ nu. Énɛ́ ɔ́ wú wɛ Mawu Mavɔmavɔ yí axɔ́súɖuɖu ɔ́ jó nú vǐ towe Abusalɔ́mu. Hwi ɖíe gbɛ towe wá blá wǔ bǐ é; nǔ e jɛ xá we ɔ́ nɛ́, ɖó mɛhutɔ́ wɛ nú we.” Énɛ́ ɔ́, Avicáyi Selúya ví ɔ́ ɖɔ nú axɔ́sú ɔ́ ɖɔ: “Étɛ́wú wɛ avǔn kúkú nɛ́ ɔ́ ká ɖo dǎnǔ ɖɔ nú hwi sɛ́mɛɖó ce wɛ mɔ̌? Gbɔ nú má yi gbo ta ɛ.” Lo ɔ́, axɔ́sú ɔ́ ɖɔ: “Avicáyi, étɛ́ ká nyí hwi kpó nɔví towe Jowabu kpó tɔn ɖ'é mɛ? Ényí Mawu Mavɔmavɔ wɛ ná gbe tɔn ɛ ɖɔ é ní ɖɔ dǎnǔ nú mì ɔ́, mɛɖé ná kan nǔ e wú wɛ ɔ́ byɔ́ ǎ.” Bɔ Davídi ɖɔ nú Avicáyi kpódó gǎn hɔn-yitɔ́ tɔn lɛ́ɛ kpó ɖɔ: “Vǐ e nyɛ ɖésúnɔ ji ɔ́ ɖíe ɖo kú ce ba wɛ e, étɛ́ ká sɔ́ nyí Bɛnjamɛ́ɛ ví énɛ́ tɔn? Mi tin dó e nú é ɖɔ nǔ e jló é nú mì, ɖó Mawu Mavɔmavɔ wɛ ná gbe tɔn ɛ. Afɔ nyɔ́ ɔ́, Mawu Mavɔmavɔ sixú nyi kɔ kpɔ́n wǔvɛ́ e mɔ wɛ un ɖe ɔ́, bó ná zé nu e dó mì wɛ é ɖe égbé din lɛ́ɛ dó húzú ɖagbe nú mì.” Davídi kpó mɛ tɔn lɛ́ɛ kpó wlí ali yětɔn bó ɖidó. Cimɛ́yi ka jɛ yě gúdo, bó ɖo só kpá só kpá gbɔn wɛ, bó ɖo dǎnǔ ɖɔ nú Davídi wɛ, bó ɖo hwǎn nyi dó e wɛ, bó ɖo kɔ́ nyi dó e wɛ, káká bɔ axɔ́sú ɔ́ kpó mɛ tɔn lɛ́ɛ kpó wá Judɛ́ɛn tɔ ɔ́ tó. Nǔ cikɔ nú yě bǐ, bɔ yě gbɔjɛ́ ɖo fínɛ́. Abusalɔ́mu kpó Izlayɛ́li togun ɔ́ bǐ kpó wá Jeluzalɛ́mu. Axitofɛ́li lɔmɔ̌ xwedó e. Ée Hucáyi Aakíti Davídi xɔ́ntɔn ɔ́ yi Abusalɔ́mu gɔ́n ɔ́, é sú xó, bó ɖɔ nú Abusalɔ́mu ɖɔ: “Jɛlijɛli nú mɛ! Jɛlijɛli nú mɛ!” Bɔ Abusalɔ́mu ka kanbyɔ́ Hucáyi ɖɔ: “Étɛ́wú a ma xwedó xɔ́ntɔn towe yi ǎ? Lě e a ɖo gbejí nú xɔ́ntɔn towe gbɔn ɔ́ nɛ́ a?” Hucáyi yí gbe n'i ɖɔ: “É jló mì nú má xwedó e ǎ. Đó mɛ e Mawu Mavɔmavɔ kpó Izlayɛ́li ví lɛ́ɛ kpó ná zé axɔ́sú ɔ́ jí wɛ un ná nɔ; mɛ énɛ́ gɔ́n wɛ un ná nɔ. Un ná ɖɔ lɔ ɔ́, mɛ̌ wɛ un ná sɛn? Vǐ tɔn jɛ́n ná nyí ǎ cé? Hǔn lě e un sɛn tɔ́ towe gbɔn ɔ́, mɔ̌ wɛ un ná sɛn hwi lɔ gbɔn, bɛ́ sín égbé.” Abusalɔ́mu ɖɔ nú Axitofɛ́li ɖɔ: “Mi ɖɔ nǔ e mǐ nǎ wa ɔ́ ɖo miɖée tɛ́ntin.” Ée Abusalɔ́mu ɖɔ mɔ̌ ɔ́, Axitofɛ́li ɖɔ n'i ɖɔ: “Yi ɖó xó xá tɔ́ towe sín asi e é jó dó nyi hɔn ɔ́ mɛ, bɔ yě ɖo nukún kpé dó hɔn ɔ́ mɛ wú wɛ lɛ́ɛ. A nǎ wa mɔ̌ xá tɔ́ towe dó jɛ adǎnnyí ná, bɔ Izlayɛ́li ví lɛ́ɛ bǐ ná se, bɔ é ná dó wǔsyɛ́n lanmɛ nú mɛ e ɖo jǐ towe lɛ́ɛ bǐ.” Énɛ́ ɔ́ wú ɔ́, è blǒ goxɔ ɖokpó ɖó xɔ ta ɖo hɔn ɔ́ mɛ nú Abusalɔ́mu, bɔ é nɔ ɖó xó xá tɔ́ tɔn sín asi lɛ́ɛ ɖ'é mɛ, ɖo Izlayɛ́li togun ɔ́ bǐ nukún mɛ. Nǔ e Axitofɛ́li nɔ kplɔ́n mɛ hwenɛ́nu ɔ́ bǐ wɛ è nɔ mɔ dó mɔ nǔjɔnǔ, Mawu wɛ ɖɔ xó ɖɔhun. Nǔ e Axitofɛ́li nɔ kplɔ́n Davídi ɔ́ kpó ée é nɔ́ kplɔ́n Abusalɔ́mu ɔ́ kpó bǐ wɛ è nɔ mɔ dó mɔ nǔjɔnǔ, Mawu wɛ ɖɔ xó ɖɔhun. Axitofɛ́li ɖɔ nú Abusalɔ́mu ɖɔ: “Nǎ gbe mì nú má cyán súnnu děgba atɔn (12.000), bónú má jɛ Davídi gbé mɛ zǎn élɔ́ mɛ din. Un ná yi fyán ɛ hwenu e nǔ ná kó cikɔ n'i bɔ kanmɛ ná ko gbɔ́jɔ́ ɛ é. Un ná dó xɛsi i, bɔ togun ɔ́ bǐ ná hɔn jó e dó, lobɔ un ná hu é ɖokpónɔ géé. Énɛ́ ɔ́, un ná kplá togun ɔ́ bǐ wá nú we. Nú nya e ba wɛ a ɖe ɔ́ kú din ɔ́, mɛ bǐ ná lɛ́ kɔ wá, bɔ togun ɔ́ sín ayi ná j'ayǐ.” É cí xó nɛ́ ɔ́ jɛ jí nú Abusalɔ́mu kpó tomɛxó Izlayɛ́li tɔn lɛ́ɛ bǐ kpó ɖɔhun. Nǔ cí mɔ̌ có Abusalɔ́mu ɖɔ: “Mi yi ylɔ́ Hucáyi Aakíti ɔ́ wá, nú mǐ ná se nǔ e élɔ́ ná ɖɔ é.” Hucáyi wá Abusalɔ́mu gɔ́n, bɔ é ɖɔ nǔ e Axitofɛ́li ɖɔ é n'i, lobo kanbyɔ́ ɛ ɖɔ: “Nǔ e Axitofɛ́li ɖɔ ɔ́ nɛ́. Mǐ nǎ bló gbɔn mɔ̌ a, abǐ mǐ nǎ gbɔ? Hwɛ ɖó xó ɖé hǔn, ɖɔ.” Hucáyi ka ɖɔ nú Abusalɔ́mu ɖɔ: “Nǔ e Axitofɛ́li kplɔ́n we din ɔ́ nyɔ́ ǎ. A tunwun lě e tɔ́ towe kpó sɔ́ja tɔn lɛ́ɛ kpó syɛ́n sɔ é. Yě nylá hun hú lɔnmɔ e ba vǐ tɔn kpo ɖo nǔkan mɛ é. Tɔ́ towe ɔ́, ahwanfuntɔ́ ɖaxó ɖokpó wɛ. É ná dɔ́ fí ɖokpó ɔ́ xá sɔ́ja tɔn lɛ́ɛ ǎ. Fí e mǐ ɖe din é ɔ́, é ná kó yi hɔn hwlá cí sóxo mɛ, abǐ fí ɖé din. Ényí è bɛ̌ ahwanfunfun din tlóló bónú yě jɛ mɛ hu jí ɖo mǐ mɛ ɔ́, è nǎ se gbɔn fí bǐ ɖɔ è ɖu ɖo mɛ e ɖo Abusalɔ́mu jí lɛ́ɛ jí. Hwenɛ́nu ɔ́, kanmɛ ná gbɔ́jɔ́ mɛ e syɛ́n ta kinnikínní ɖɔhun ɖo mi mɛ lɛ́ɛ bǐ, ɖó Izlayɛ́li to ɔ́ bǐ kó tunwun ɖɔ tɔ́ towe ɔ́, ahwanfuntɔ́ ɖaxó ɖokpó wɛ, bɔ sɔ́ja tɔn lɛ́ɛ lɔ syɛ́n ɖésú. Nǔ e nyɛ ná kplɔ́n we ɔ́ ɖíe: a nǎ dɔn sɔ́ja Izlayɛ́li tɔn lɛ́ɛ bǐ dó wǔ; a nǎ kplé yě sín Dan ɖo totaligbé káká wá Bɛ̌-Ceva ɖo tofɔligbé, bɔ yě ná sukpɔ́ nyɛ̌kɛ́n e ɖo xutó é ɖɔhun, bɔ hwi ɖésúnɔ ná nɔ ahwan ɔ́ nu. Davídi jɛ tɔ dó fí ɖé ɔ́, mǐ nǎ ba ɛ káká bó mɔ. Mǐ nǎ vun blá ɛ lě e ahǔn nɔ ja kɔn nyi kɔ́ mɛ é ɖɔhun. Yě mɛ kwín ɖokpó ná gló mǐ ǎ. Nú é ka hɔn byɔ́ toxo ɖé mɛ ɔ́, Izlayɛ́li ví lɛ́ɛ bǐ ná dó kan toxo ɔ́ bǐ lɛ́ lɛ̌ dó, bó dɔn bǐ xwíí yi dó tɔsisa e ɖo fínɛ́ é mɛ; mǐ ná jó awǐnnya vɔ́vɔ́ dó nyi to ɔ́ mɛ ǎ.” Abusalɔ́mu kpó Izlayɛ́li ví lɛ́ɛ bǐ kpó ɖɔ: “Wě e Hucáyi Aakíti ɔ́ ɖe ɔ́ nyɔ́ hú Axitofɛ́li tɔn.” Mawu Mavɔmavɔ wɛ ka ko to ɖó mɔ̌ ɖɔ è nǎ jó nǔkplɔ́nmɛ ɖagbe Axitofɛ́li tɔn dó, bɔ awě ná mɔ tɛn bo xo Abusalɔ́mu. Hucáyi wlí nǔ e Axitofɛ́li kplɔ́n Abusalɔ́mu kpó tomɛxó Izlayɛ́li tɔn lɛ́ɛ kpó é ɖɔ nú vɔ̌sánú-xwlémawutɔ́ Sadɔ́ku kpó Abiyatáa kpó; é lɛ́ ɖɔ nǔ e é ɖésúnɔ wá kplɔ́n yě ɔ́. É ɖɔ nú yě ɖɔ: “Din ɔ́, mi yá wǔ dó wɛn sɛ́ dó Davídi ɖɔ é ma dɔ́ fí e è nɔ zɔn afɔ gbɔn Judɛ́ɛn tɔ ɔ́ mɛ dín ɖe ɔ́ kpá ɖo gbětótló mɛ ó, é ɖó ná dó asá Judɛ́ɛn tɔ ɔ́ dandan, é má nyí mɔ̌ ǎ ɔ́, yě táá hu é kpódó sɔ́ja tɔn lɛ́ɛ kpó.” È sɔ́ Jonatáan Abiyatáa ví ɔ́ kpó Aximáasi Sadɔ́ku ví ɔ́ kpó yi ɖó Eyinu-Hlogɛ́li, bɔ nyɔ̌nu mɛsɛntɔ́ ɖé ná nɔ gosín toxo ɔ́ mɛ, bó ná nɔ́ dó wɛn yě, bɔ yě ná nɔ́ yi dó axɔ́sú Davídi. Đó yědɛɛ lɛ́ɛ ɖésú glá ná yi toxo ɔ́ mɛ ǎ, è táá mɔ yě. Nyaví ɖokpó ká mɔ yě, bó ɖɔ nú Abusalɔ́mu. Lo ɔ́, yě mɛ we lɛ́ɛ yá wǔ bó ɖidó. Yě wǎ Baxulimu, bó byɔ́ dǎwe ɖokpó xwé, bó mɔ dotɔ ɖokpó ɖo nya ɔ́ sín kɔ́xota, lobo byɔ́ mɛ, bó hɔn hwlá cí fínɛ́. Énɛ́ ɔ́, asi tɔn zé nǔ bó cyɔ́n dó dotɔ ɔ́ nu, lobo kan jinukún xyá ɖ'é jí, bónú mɛɖé ma tunwun ɖɔ nǔɖé ɖo fínɛ́ ó. Mɛ e Abusalɔ́mu sɛ́ dó gbě yětɔn mɛ lɛ́ɛ wá mɔ nyɔ̌nu ɔ́, bó kanbyɔ́ ɛ ɖɔ: “Fítɛ́ Aximáasi kpó Jonatáan kpó ɖe?” Nyɔ̌nu ɔ́ ɖɔ nú yě ɖɔ: “Yě wlí ali e gbɔn sindo ɔ́ kɔn é.” Ée é ɖɔ mɔ̌ nú yě ɔ́, yě yi ba yě, bó ba yě kpo, bó lɛ́ kɔ wá yi Jeluzalɛ́mu. Ée mɛ e Abusalɔ́mu sɛ́ dó lɛ́ɛ yi é ɔ́, Aximáasi kpó Jonatáan kpó tɔ́n sín tɔ ɔ́ mɛ, bó yi ɖɔ nǔ e Axitofɛ́li kplɔ́n Abusalɔ́mu ɔ́ nú Davídi. Énɛ́ ɔ́ gúdo ɔ́, yě ɖɔ n'i ɖɔ: “Ée Axitofɛ́li kplɔ́n nǔ yě mɔ̌ din é ɔ́, yǎ wǔ sɔ́ nǔ bó jɛ ali. Yǎ wǔ dó asá Judɛ́ɛn tɔ ɔ́.” Tlóló ɔ́, Davídi kpó mɛ e ɖo fínɛ́ xá ɛ lɛ́ɛ kpó jɛ Judɛ́ɛn tɔ zlɛ́ jí, bɔ cóbónú ayǐ ná hɔ́n ɔ́, yě bǐ ko dó asá tɔ ɔ́; é sɔ́ kpo mɛɖé ɖo tɔ ɔ́ gúdo ǎ. Ée Axitofɛ́li mɔ ɖɔ yě kún xwedó nǔ e émí kplɔ́n yě ɔ́ ó é ɔ́, é blá akpa nú tócí tɔn bó xá jí, bó ɖidó toxo tɔn mɛ. Ée é wá xwé é ɔ́, é ɖɔ xó nú mɛ tɔn lɛ́ɛ, lobo dó kan kɔ bó kú. Lě e é hu éɖée gbɔn é nɛ́, bɔ è yi ɖi i dó tɔ́ tɔn sín yɔdo mɛ. Davídi wá Maxanayímu. Hwe énɛ́ ɔ́ nu ɔ́, Abusalɔ́mu kpódó Izlayɛ́li ví e xwedó e lɛ́ɛ bǐ kpó ɖo Judɛ́ɛn tɔ ɔ́ dó asá wɛ. Abusalɔ́mu zé Amasa ɖó Jowabu tɛnmɛ, bɔ é nɔ sɔ́ja lɛ́ɛ nu. Amasa ɔ́, nya Izlayɛ́li ví ɖé sín vǐ wɛ, bɔ è nɔ ylɔ́ nya ɔ́ ɖɔ Yitla. Yitla ɔ́ wɛ da Avigalu Naxáci ví ɔ́. Avigalu ɔ́, Selúya, Jowabu nɔ ɔ́ sín nɔví ká wɛ. Izlayɛ́li ví lɛ́ɛ kpó Abusalɔ́mu kpó ɖó gɔnu ɖó Galadi. Hwenu e Davídi wá Maxanayímu é ɔ́, Coví Naxáci ví Hlabanu ɔ́ kpó Makíi Amumiyɛli ví Lodeváanu ɔ́ kpó, kpódó Baaziláyi Hlogɛlímunu e ɖo Galadinu ɔ́ kpó, hɛn zan, gannú, zɛ̌n, blěe, ɔ́ji, linfín, jinukún mimɛ, akpakún, ayikún, wǐin, bɔ̌ta, amɔ̌, nyibú tɔn, kpó gbɔ̌ tɔn kpó. Yě hɛn nǔ énɛ́ lɛ́ɛ wá nú Davídi kpó ahwan tɔn lɛ́ɛ kpó, ɖó yě lin ɖɔ: “Mɛ énɛ́ lɛ́ɛ e ɖo gbětótló mɛ din é ɔ́, xovɛ́ ná kó sin yě, nǔ ná ko cikɔ nú yě, kɔ ná kó xú yě.” Davídi kpɔ́n sɔ́ja e kplá ɛ lɛ́ɛ mɛ káká yi ɖó, lobo cyán sɔ́ja afatɔ́ngán lɛ́ɛ kpó sɔ́ja kanwekogán lɛ́ɛ kpó. É zé togun ɔ́ atɔnvlɔ́ɖó ɖó Jowabu sín acɛ mɛ, atɔnvlɔ́ɖó ɖó Avicáyi Jowabu nɔví Selúya ví ɔ́ sín acɛ mɛ, bó zé atɔnvlɔ́ɖó ɖó Itayi Gatinu ɔ́ sín acɛ mɛ. É ɖɔ nú sɔ́ja lɛ́ɛ ɖɔ: “Nyɛ kpó mi kpó ná yi.” Lo ɔ́, sɔ́ja lɛ́ɛ sú xó bó ɖɔ: “Gbeɖé! Mɛ kpó mǐ kpó ná yi ǎ! Đó ényí mǐ dó gblǒ mɛ ɔ́, é ná ɖɔ nǔɖé nú kɛntɔ́ ǎ. È na bo hu mɛ vlɔ̌ ɖo mǐ mɛ ɔ́, é ná ɖɔ nǔɖé nú kɛntɔ́ ǎ. Amɔ̌, mǐ mɛ děgba we afɔwó (10.000) tɛnmɛ wɛ mɛ ɖe. Hǔn din ɔ́, é nyɔ́ ɖɔ mɛ ní nɔ toxo ɔ́ mɛ, lobo ná nɔ dó alɔ mǐ sɛ́ dó.” Bɔ axɔ́sú ɔ́ ɖɔ: “É nyɔ́! Un ná bló nǔ e nyɔ́ mi nukún mɛ é.” Ée é ɖɔ mɔ̌ é ɔ́, é cí toxo ɔ́ sín hɔntogbó kpá, bɔ sɔ́ja lɛ́ɛ to yěɖée afatɔ́n (1.000), afatɔ́n, kanwe ko (100), kanwe ko, bó ɖo tíntɔ́n wɛ sonu sonu. Axɔ́sú ɔ́ ká ɖɔ nú Jowabu kpó Avicáyi kpó Itayi kpó ɖɔ: “Un ɖo kɛnklɛ́n dó nú mi wɛ, mi ma wa nǔ nyanya ɖé nú vǐ ce Abusalɔ́mu ó.” Sɔ́ja lɛ́ɛ bǐ se xó énɛ́ e axɔ́sú ɔ́ ɖɔ nú gǎn yětɔn lɛ́ɛ dó Abusalɔ́mu wú é. Ahwangɔnu Davídi tɔn jɛ ali bo ɖidó ahwan fun xá Abusalɔ́mu sín sɔ́ja lɛ́ɛ gbé. Yě fun ahwan ɔ́ ɖo Eflayímu sín zungbó mɛ. Davídi sín ahwangɔnu ɖu ɖo Abusalɔ́mu sín mɛ lɛ́ɛ jí. Mɛ e kú gbe nɛ́ gbe lɛ́ɛ sukpɔ́ ɖésú. Yě yi adɔ̌kpo (20.000). Yě fun ahwan ɔ́ gbɔn gbě ɔ́ bǐ jí. Mɛ e kú ɖo zungbó ɔ́ mɛ lɛ́ɛ hú mɛ e è hu ɖo ahwangbénu lɛ́ɛ. Abusalɔ́mu ɖo sɔ́tócí jí, bó wá xwetɔ́n ɖo Davídi sín sɔ́ja lɛ́ɛ nukɔn. Sɔ́tócí ɔ́ yi dó ta atínla hizihizi ɖé lɛ́ɛ mɛ, ɖo atín ɖaxó ɖé sá, bɔ Abusalɔ́mu sín ta ján dó atínla lɛ́ɛ tɛ́ntin, bɔ é cí gblɛlɛ mɛ fínɛ́, bɔ sɔ́tócí ɔ́ jó e dó nyi gblɛlɛ fínɛ́ bó ɖidó. Davídi sín sɔ́ja lɛ́ɛ ɖokpó wá mɔ ɛ, bó yi ɖɔ nú Jowabu ɖɔ: “Un mɔ Abusalɔ́mu bɔ é ján cí atínla mɛ.” Bɔ Jowabu ɖɔ nú nya e hɛn xó nɛ́ wá é ɖɔ: “A mɔ ɛ nǔgbó a? Étɛ́wú a ma ka hu i azɔn ɖokpó ǎ? A ko hu i wɛ ɔ́, un ná ná gankwɛ́ wǒ kpó gǒjíblánú ɖokpó kpó we.” Sɔ́ja ɔ́ ká ɖɔ nú Jowabu ɖɔ: “A na bo xa gankwɛ́ afatɔ́n (1.000) dó alɔ mɛ nú mì ɔ́, un ná yí gbe bo hu axɔ́sú ɔ́ sín vǐ gbeɖé ǎ. Đó mǐ mɛ bǐ wɛ se bɔ axɔ́sú ɔ́ ɖɔ nú hwi kpó Avicáyi kpó Itayi kpó ɖɔ: ‘Un ɖo kɛnklɛ́n dó nú mi wɛ, mi ma hu vǐ ce Abusalɔ́mu ó.’ Ényí un hu i din, bo bló mɛ ma se xó ɖé ɖɔhun ɔ́, axɔ́sú ɔ́ ná wá wɔ́ ɖɔ adingban wɛ, ɖó é nɔ dán do nú nǔɖé ǎ. É ká wá xɛ ɔ́, hwi ɖésú ná lɔn bó nɔ jǐ ce ǎ.” Bɔ Jowabu ɖɔ: “Nyɛ ɖo towe nɛ́ ná xweɖɔ wɛ ɖo fí wɛ ǎ.” Ée é ɖɔ mɔ̌ ɔ́, é fɔ hwǎn atɔn, bo yi lun dó hǔn mɛ nú Abusalɔ́mu e ján cí atínla mɛ, bó ka kpo ɖo gbɛ é. Sɔ́ja wǒ e hɛn ahwanfunnú Jowabu tɔn lɛ́ɛ wá xísí dó Abusalɔ́mu, bo hu i kpé. Ée yě bló mɔ̌ ɔ́, Jowabu kún lanzo, bo ɖó ahwan e fun wɛ yě ɖe ɔ́ te, bɔ Davídi sín sɔ́ja lɛ́ɛ lɛ́ kɔ sín ahwangɔnu Abusalɔ́mu tɔn gúdo. Yě zě Abusalɔ́mu sín cyɔ nyi dó do ɖaxó ɖé mɛ ɖo zungbó ɔ́ mɛ, bó bɛ́ awǐnnyaglo kɔn nyi jǐ tɔn kpɔ́ gégé. Hwenu e yě ɖo énɛ́ ɔ́ bló wɛ ɔ́, Abusalɔ́mu sín sɔ́ja lɛ́ɛ ɖokpó ɖokpó ba ali ɖó ta wú, bó yi xwé yětɔn yětɔn gbe. Hwenu e Abusalɔ́mu kpo ɖo gbɛ ɔ́, é zɔ́n bɔ è tun awǐnnya ɖokpó te ɖó axɔ́sú ɔ́ sín tɔdo mɛ, ɖó é kó ɖɔ: “Un ɖó vǐ ɖěbǔ bɔ è nǎ nɔ dó flín nyǐkɔ ce ná ǎ.” Lobo ná nyǐkɔ tɔn awǐnnya ɔ́, bɔ káká jɛ égbé ɔ́, è nɔ ylɔ́ awǐnnya ɔ́ ɖɔ “Awǐnnya Abusalɔ́mu tɔn.” Aximáasi Sadɔ́ku ví ɔ́ ɖɔ nú Jowabu ɖɔ: “Gbɔ nú má kán wezun yi dó wɛn ɖagbe élɔ́ axɔ́sú ɔ́ ɖɔ Mawu Mavɔmavɔ ba hlɔn n'i, bó yí i sín kɛntɔ́ tɔn lɛ́ɛ lɔ mɛ.” Bɔ Jowabu ɖɔ n'i ɖɔ: “Égbé din ɔ́, hwi wɛ ná yi dó wɛn ǎ, gbe ɖěvo gbe ko su ɔ́, a nǎ yi dó, amɔ̌, ma yi égbé ó, ɖó axɔ́sú ɔ́ sín vǐ wɛ kú.” Lo ɔ́, Jowabu ɖɔ nú kannumɔ Etiopíinu ɖé ɖɔ: “Yi ɖɔ nǔ e a mɔ ɔ́ nú axɔ́sú ɔ́.” Bɔ kannumɔ ɔ́ ɖe kɔ́ nú Jowabu bo kán wezun bo ɖidó. Aximáasi lɛ́ ɖɔ nú Jowabu ɖɔ: “Gbɔ nú ma xwedó Etiopíinu nɛ́ ɔ́, nǔɖé ná jɛ hǔn, ní jɛ.” Bɔ Jowabu kanbyɔ́ Aximáasi ɖɔ: “Vǐ ce, étɛ́ hwlɛ́n dó a ɖe? Wɛn énɛ́ má nyí wɛn e a yi dó ɔ́, é ná nyɔ́ nú we nɛ́!” Aximáasi lɛ́ ɖɔ: “Nǔɖé ná jɛ hǔn, ní jɛ, un ná yi wɛ un ɖɔ.” Bɔ Jowabu ɖɔ n'i ɖɔ: “É nyɔ́, bo yi.” Ée é ɖɔ mɔ̌ ɔ́, Aximáasi kán wezun gbɔn ayǐkúngban wɛnjɛ e ɖo gbětótló mɛ ɔ́ jí, bó jɛ nukɔn nú Etiopíinu ɔ́. Hwenɛ́nu ɔ́, Davídi ɖo ayǐjínjɔ́n ɖo toxo ɔ́ sín hɔntogbó we lɛ́ɛ tɛ́ntin. Sɔ́ja mɛcɔ́tɔ́ ɔ́ ká ɖo xɔ ta, ɖo hɔntogbó ɔ́ ta nu, ɖo ahohó ɔ́ ta. Sɔ́ja ɔ́ kpɔ́n zɔ sɛ́ dó, bó mɔ nya ɖokpó ɖo wezun jí, é ɖokpónɔ bó jǎwe. Ée é mɔ mɔ̌ ɔ́, é sú xó bo ɖɔ nú axɔ́sú ɔ́, bɔ axɔ́sú ɔ́ ɖɔ: “Ényí é ɖokpónɔ wɛ zɔn hǔn, wɛn ɖagbe wɛ é hɛn jǎwe.” Nya ɔ́ ɖo wezun jí, bó ɖo sisɛkpɔ́ wɛ. Sɔ́ja mɛcɔ́tɔ́ ɔ́ lɛ́ mɔ mɛ ɖěvo ɖo wezun jí jǎwe, bó lɛ́ sú xó, bó ɖɔ nú hɔnjínɔtɔ́ ɔ́ ɖɔ: “Mɛ ɖěvo ɖíe lɛ́ ɖo wezun jí é ɖokpónɔ bo jǎwe e.” Bɔ axɔ́sú ɔ́ ɖɔ: “É lɔmɔ̌ ɔ́, wɛn ɖagbe wɛ é hɛn jǎwe.” Bɔ sɔ́ja mɛcɔ́tɔ́ ɔ́ ɖɔ: “Lě e mɛ nukɔntɔn ɔ́ ɖo wezun kán wɛ gbɔn ɔ́, é ɖi Aximáasi Sadɔ́ku ví ɔ́.” Bɔ axɔ́sú ɔ́ ɖɔ: “Nya ɖagbe ɖé wɛ n'i, xó ɖagbe ɖé wɛ é hɛn jǎwe dandan.” Ée Aximáasi ɖo sisɛkpɔ́ wɛ é ɔ́, é sú xó bó ɖɔ nú axɔ́sú ɔ́ ɖɔ: “Nǔɖé jɛ ǎ!” É wá lobo xwe agbɔ̌nnusú do ɖo axɔ́sú ɔ́ sá mɛ, bó ɖɔ: “Sɛ́mɛɖó, susu nú Mawu Mavɔmavɔ, Mawu mɛtɔn. É jó mɛ e fɔ́n gǔ dó mɛ jí lɛ́ɛ nyi acɛ mɛtɔn mɛ.” Axɔ́sú ɔ́ kanbyɔ́ ɛ ɖɔ: “Vǐ ce Abusalɔ́mu ɔ́ ká ɖo ganjí a?” Aximáasi yí gbe nú axɔ́sú ɔ́ bó ɖɔ: “Hwenu e Jowabu ɖo nyɛ kpó mɛsɛntɔ́ mɛtɔn ɖěvo kpó sɛ́ dó dě wɛ é ɔ́, un ɖo zǐngídi ɖé se wɛ, un ka tunwun nǔ e jɛ tawun é ǎ.” Bɔ axɔ́sú ɔ́ ɖɔ: “Bo jɛ kɛ́n dě.” Bɔ Aximáasi jɛ kɛ́n ɖokpó, bó nɔ te. Tlóló ɔ́, kannumɔ Etiopíinu ɔ́ wá, bó ɖɔ nú axɔ́sú ɔ́ ɖɔ: “Un hɛn wɛn ɖagbe ɖokpó wá nú mɛ. Égbé ɔ́, Mawu Mavɔmavɔ ba hlɔn nú mɛ, é ɖe mɛ sín kɛntɔ́ mɛtɔn lɛ́ɛ bǐ sín alɔ mɛ.” Axɔ́sú ɔ́ kanbyɔ́ Etiopíinu ɔ́ ɖɔ: “Vǐ ce Abusalɔ́mu ɔ́ ká ɖo ganjí a?” Etiopíinu ɔ́ yí gbe nú axɔ́sú ɔ́ bó ɖɔ: “Sɛ́mɛɖó, nǔ e gbo nyaví nɛ́ ɔ́ ní gbo kɛntɔ́ mɛtɔn lɛ́ɛ bǐ kpó mɛ e nɔ fɔ́n gǔ dó mɛ jí lɛ́ɛ bǐ kpó.” Wǔ kú axɔ́sú Davídi, bɔ é ɖidó xɔ mɛ ɖo jǐ, ɖo toxo ɔ́ sín hɔntogbó ta, lobo y'avǐ. É ɖo yiyi wɛ, bo ɖo xó sú wɛ, bó nɔ ɖɔ: “Áo, vǐ ce Abusalɔ́mu! Áo vǐ ce! Áo vǐ ce! Kóóyi nya! Vǐ ce Abusalɔ́mu! Nyɛ wɛ ɖó ná kú ɖó tɛn towe mɛ mɛ nya! Áo Abusalɔ́mu! Vǐ ce! Áo vǐ ce!” È wǎ ɖɔ nú Jowabu ɖɔ axɔ́sú ɔ́ ɖo avǐ ya wɛ, bó ɖo alě ná wɛ dó Abusalɔ́mu tamɛ. Gbe énɛ́ gbe ɔ́, ɖuɖéjí yětɔn húzú aluwɛ nú sɔ́ja lɛ́ɛ bǐ, ɖó gbe énɛ́ gbe ɖokpó ɔ́ jɛ́n yě lɔ se ɖɔ axɔ́sú ɔ́ ɖo vǐ tɔn e kú ɔ́ ví wɛ. Yě gbɔn yɛwúyɛwú, bó byɔ́ toxo ɔ́ mɛ, sɔ́ja e hɔn sín ahwangbénu, bó wá xwé kpó winnyá kpó é ɖɔhun. Amɔ̌, axɔ́sú ɔ́, éyɛ́ cyɔ́n nǔ nukún mɛ, bó ɖo xó sú wɛ, bó nɔ ɖɔ: “Abusalɔ́mu! Áo, Abusalɔ́mu vǐ ce! Vǐ ce!” Jowabu yi mɔ axɔ́sú ɔ́ ɖo xɔ e mɛ é ɖe ɔ́, bó ɖɔ n'i ɖɔ: “Nǔ élɔ́ e wa wɛ mɛ ɖe égbé din ɔ́, winnyá dó sɔ́ja mɛtɔn lɛ́ɛ wɛ mɛ ɖe; yě wɛ ka xɔ gbɛ nú mɛ kpó vǐ mɛtɔn súnnu kpó nyɔ̌nu kpó, kpó asi mɛtɔn lɛ́ɛ bǐ kpó. Mɛ e ma mɔ mɛ gbɔ ǎ lɛ́ɛ wɛ mɛ yí wǎn ná, bó gbɛ́ wǎn nú mɛ e yí wǎn nú mɛ lɛ́ɛ. Mɛ ɖo xíxlɛ́ wɛ ɖɔ ahwangán mɛtɔn lɛ́ɛ kpó mɛsɛntɔ́ mɛtɔn lɛ́ɛ kpó kún sɔ́ nyí nǔɖé wa nú nú mɛ ó. Un mɔ din ɖɔ nú mǐ mɛ bǐ wɛ kú, bɔ Abusalɔ́mu ɖo gbɛ ɔ́, é ná nyɔ́ mɛ nukún mɛ. È byɔ̌ mɛɖée mɛ din, bo yi ɖɔ xó ɖé dó dó wǔyá lanmɛ nú sɔ́ja mɛtɔn lɛ́ɛ. Nú è ma yi ǎ ɔ́, un xwlé Mawu Mavɔmavɔ nú mɛ, yě bǐ ná gosín acɛ mɛtɔn mɛ zǎn élɔ́ mɛ. Awě énɛ́ e ná xo mɛ ɔ́ ná nylá hú éé ɖo mɛ xo wɛ sín dɔ̌nkpɛvú mɛ mɛtɔn káká wá jɛ égbé lɛ́ɛ bǐ.” Ée é ɖɔ mɔ̌ é ɔ́, axɔ́sú ɔ́ sí te, bó yi jínjɔ́n ayǐ ɖo toxo ɔ́ sín hɔnnúwa sá. È yi ɖɔ nú sɔ́ja lɛ́ɛ bɔ yě bǐ wá kplé ɖo axɔ́sú ɔ́ gɔ́n. Abusalɔ́mu sín sɔ́ja lɛ́ɛ hɔn, bɔ mɛ ɖokpó ɖokpó hɔn yi xwé tɔn gbe. Nǔ énɛ́ e jɛ ɔ́, è nɔ ɖo xó ɖɔ dó é wú wɛ kpó zǐngídi kpó gbɔn akɔta Izlayɛ́li tɔn lɛ́ɛ bǐ mɛ ɖɔ: “Axɔ́sú Davídi hwlɛ́n mǐ gán ɖo kɛntɔ́ mǐtɔn lɛ́ɛ sí, ɖo ta jí ɔ́, ɖo Filisitɛ́ɛn lɛ́ɛ sí; amɔ̌, din ɔ́, hɔn wɛ é gbɔ bó hɔn sín toxo ɔ́ mɛ ɖo Abusalɔ́mu nukɔn. Lo ɔ́, Abusalɔ́mu énɛ́ e mǐ zé axɔ́sú ɔ́ kú ɖo ahwangbénu. Din ɔ́, étɛ́ nɔ te kpɔ́n wɛ mǐ ɖe bó ná ylɔ́ axɔ́sú Davídi, bɔ é ná lɛ́ kɔ wá zinkpo ɔ́ jí?” Davídi ɔ́, éyɛ́ ɖɔ sɛ́ dó vɔ̌sánú-xwlémawutɔ́ Sadɔ́ku kpó Abiyatáa kpó ɖɔ: “Mi yi kanbyɔ́ tomɛxó Judáa tɔn lɛ́ɛ ɖɔ: ‘Étɛ́wú midɛɛ lɛ́ɛ wɛ ná nyí mɛ gǔdo gúdo tɔn e ná kplá axɔ́sú ɔ́ wá xwé tɔn gbe é? É ɖésú ko se nǔ e ɖɔ wɛ Izlayɛ́li ví ɖě lɛ́ɛ ɖe é. Axɔ́sú ɔ́ sín nɔví wɛ mi nyí; hun tɔn wɛ mi nyí, hɛ̌n tɔn nu wɛ mi gosín. Mi ma nyí mɛ gǔdo gúdo tɔn e ná ɖɔ é ní lɛ́ kɔ wá lɛ́ɛ ó.’ Énɛ́ ɔ́ gúdo ɔ́, mi ná yi ɖɔ nú Amasa nú mì ɖɔ: ‘Hun ce wɛ a nyǐ ǎ cé? Hɛ̌n ce nu wɛ a gosín ǎ cé? Ényí un ma sɔ́ we ɖó Jowabu tɛnmɛ ɖo ahwangɔnu ɔ́ nu káká sɔ́yi ǎ hǔn, Mawu ní dɔn tó nú mì nú é syɛ́n hú tódɔnnúmɛ lɛ́ɛ bǐ.’ ” Xó e Davídi ɖɔ lɛ́ɛ byɔ́ ayi mɛ nú Judáa ví lɛ́ɛ, bɔ yě bǐ ɖó gbe kpɔ́, bó ɖɔ sɛ́ dó e ɖɔ: “Mɛ kpó mɛsɛntɔ́ mɛtɔn lɛ́ɛ bǐ kpó ní lɛ́ kɔ wá.” Ée axɔ́sú ɔ́ se mɔ̌ ɔ́, é wlí ali bo lɛ́ kɔ wá Judɛ́ɛn tɔ ɔ́ tó. Judáa ví e wá Gilugalu lɛ́ɛ yi kpé axɔ́sú ɔ́, lobo ná dó alɔ ɛ, bónú é ná dó asá tɔ ɔ́. Cimɛ́yi Gela ví e nyí Bɛnjamɛ́ɛnu, bo gosín Baxulimu ɔ́ yá wǔ xwedó mɛ e gosín Judáa lɛ́ɛ é, bó wá kpé axɔ́sú Davídi. Bɛnjamɛ́ɛnu e kplá Cimɛ́yi lɛ́ɛ yi afatɔ́n. Mɔ̌ ɖokpó ɔ́, Siva e nyí mɛsɛntɔ́ ɖo Sawúlu xwé é, kpódó vǐ tɔn afɔtɔn (1.000) lɛ́ɛ kpó, kpódó mɛsɛntɔ́ tɔn ko lɛ́ɛ kpó kplá Cimɛ́yi. Yě yi Judɛ́ɛn tɔ ɔ́ tó, bó ná yi kpé axɔ́sú ɔ́. Hwenɛ́nu ɔ́, tɔjíhún e bɛ́ axɔ́sú ɔ́ sín mɛ lɛ́ɛ ɔ́ ɖo tɔ ɔ́ mɛ gbɔn dín wɛ, bɔ yě ɖó ná bló nǔ e axɔ́sú ɔ́ ná ɖɔ lɛ́ɛ. Ée axɔ́sú gbɔn tɔ ɔ́ mɛ dín é ɔ́, Cimɛ́yi jɛ kpo asá tɔn mɛ, bó ɖɔ: “Sɛ́mɛɖó, è ma kpɔ́n dó hwɛ e un hu ɔ́ wú ó! È nǐ wɔn agɔ e un jɛ dó mɛ hwenu e mɛ gosín Jeluzalɛ́mu é. È ma zé dó wa nǔ xá mì ó. Sɛ́mɛɖó, un tunwun ganjí ɖɔ un hu hwɛ ɖokpó dó mɛ. Égbé din ɔ́, mɛ ɖésú mɔ ɖɔ nyɛ wɛ nyí mɛ nukɔntɔn e wá kpé mɛ ɖo Izlayɛ́li ví ɖě lɛ́ɛ e ɖo Totaligbé é bǐ mɛ é.” Ée é ɖɔ mɔ̌ ɔ́, Avicáyi Selúya ví ɔ́ yí xó, bó ɖɔ: “Cimɛ́yi e dó nu axɔ́sú e Mawu Mavɔmavɔ sɔ́ é ɔ́, xó énɛ́ e ɖɔ wɛ é ɖe ɔ́ wɛ ná zɔ́n bɔ é ná gló kú a?” Lo ɔ́, Davídi ɖɔ nú Avicáyi kpódó nɔví tɔn Jowabu kpó ɖɔ: “Mi Selúya ví lɛ́ɛ ɔ́, xó tɛ́ mɛ dó ta wɛ mi ɖe? Étɛ́wú mi ka ɖo nǔ e ayi nyɛtɔn mɔ lɛ́ɛ gbɛ́ wɛ din? Un ba ɖɔ è nǐ hu Izlayɛ́li ví ǎ, ɖó égbé din ɔ́, nyɛ wɛ kpa acɛ dó togun énɛ́ ɔ́ nu.” Ée axɔ́sú ɔ́ ɖɔ mɔ̌ ɔ́, é ɖɔ nú Cimɛ́yi ɖɔ: “Un zin alɔ dó akɔ́n nú we; è nǎ hu we ǎ.” Mɛfibáalu Sawúlu vívú ɔ́ lɔmɔ̌ wá kpé axɔ́sú ɔ́. Sín gbe e gbe axɔ́sú ɔ́ tɔ́n sín to ɔ́ mɛ káká wá jɛ gbe e gbe é wá Jeluzalɛ́mu wǔyɛ́yɛ́ afɔyɛ́yɛ́ ɔ́, Mɛfibáalu sɔ́ nɔ xwlɛ́ atán ǎ, é ká sɔ́ nɔ klɔ́ afɔ ǎ, é ká sɔ́ nɔ nya avɔ ǎ. Hwenu e é wá jɛ axɔ́sú ɔ́ nukɔn ɔ́, axɔ́sú ɔ́ kanbyɔ́ ɛ ɖɔ: “Mɛfibáalu, étɛ́wú a ma xwedó mì yi ǎ?” É yí gbe nú axɔ́sú ɔ́ ɖɔ: “Sɛ́mɛɖó, mɛsɛntɔ́ ce wɛ blɛ́ mì; un ko lin ɖ'ayǐ ɖɔ ée zɔnlin ma sɔxú mì ǎ ɔ́, un ná ɖɔ bɔ è nǎ blá akpa nú tócí ce, bɔ un ná xá jí, bɔ nyi lɔ ná kplá mɛ yi. Mɛsɛntɔ́ ce wá mɔ mɛ, bó ɖó adingban dó nu ce. Sɛ́mɛɖó, é bló mɔ̌ có, wɛnsagun Mawu tɔn ɖɔhun wɛ mɛ cí, hǔn nǔɖé jló mɛ hǔn, mɛ wa. Mɛ ɖěbǔ ɖo tɔ́gbó ce Sawúlu xwé gbe, bɔ è gɔn kúhwɛ ɖó ná ɖo nukɔn mɛtɔn ǎ. Sɛ́mɛɖó, nǔ ɖo mɔ̌ có mɛ yí mì dó mɛ e nɔ ɖu nǔ xá mɛ lɛ́ɛ mɛ. Un sɔ́ ɖó acɛ ɖé, bó ná byɔ́ ɖɔ mɛ ní wa ɖagbe ɖěvo nú mì hú énɛ́ ǎ.” Ée é ɖɔ mɔ̌ ɔ́, axɔ́sú ɔ́ ɖɔ n'i ɖɔ: “É nyɔ́, xó kpé we. Un ná gbe ɖɔ Siva kpó hwi kpó ná má Sawúlu sín ayǐkúngban lɛ́ɛ.” Mɛfibáalu ɖɔ nú axɔ́sú ɔ́ ɖɔ: “Siva ɖokpónɔ sixú bɛ́ nǔ lɛ́ɛ bǐ. Sɛ́mɛɖó, nǔ e ɖo tají é ɔ́ wɛ nyí ɖɔ mɛ wá xwé wǔyɛ́yɛ́ afɔyɛ́yɛ́.” Baaziláyi Hlogɛlímunu ɔ́ lɔmɔ̌ xwedó axɔ́sú ɔ́ káká yi jɛ Judɛ́ɛn tɔ ɔ́ tó, bó jó e dó. Hlogɛlímu toxo ɔ́, Galadi wɛ é ɖe. Baaziláyi ko kpo ɖésú; é ko ɖó xwe kanwe. Hwenu e axɔ́sú ɔ́ wá nɔ Maxanayímu é ɔ́, é dó agban n'i ɖó Baaziláyi ɔ́, nya ɖé wɛ bó jɛ dɔkun titewungbe. Axɔ́sú ɔ́ ɖɔ n'i ɖɔ: “Baaziláyi, wǎ mǐ yi Jeluzalɛ́mu; a nǎ nɔ xwé ce gbe bɔ un ná kpé nukún wǔ we.” Lo ɔ́, Baaziláyi ɖɔ nú axɔ́sú ɔ́ ɖɔ: “Xwe nabí ná nɔ gbɛ xɔ wɛ un ka lɛ́ ɖe, bó ná xwedó mɛ yi Jeluzalɛ́mu? Xwe kanwe wɛ ɖo ta ce égbé din. Un sɔ́ sixú tunwun nǔ e nyɔ́ é kpó nǔ e gblé é kpó ǎ. Nǔ e ɖu wɛ un ɖe ɔ́ kpó nǔ e nu wɛ un ɖe ɔ́ kpó to nyɔ́ kpó é gbɔ kpó ɔ́, un sixú tunwun ǎ. È na bo ɖo han ji ɖo akpá ce wɛ ɔ́, un sɔ́ nɔ tunwun súnnu gbe ɖo nyɔ̌nu gbe mɛ ǎ. Sɛ́mɛɖó, un xwedó mɛ din ɔ́, agban jɛ́n un ná nyí, bó ná nɔ kɔ mɛtɔn nu. Ényí un sixú xwedó mɛ jɛ Judɛ́ɛn tɔ ɔ́ gúdo hǔn, kpé jɛ́n un kpé wú nɛ́. È ka ná ɖɔ lɔ ɔ́, un nyí mɛ bo jɛ xá ɖagbe mɔ̌hun ǎ. Gbɔ nú nyi mɛsɛntɔ́ mɛtɔn ná lɛ́ kɔ yi xwé, bó ná yi kú jɛ fí e tɔ́ ce kpó nɔ ce kpó sín yɔdo ɖe é. Amɔ̌, vǐ ce Kimuxámu ɖíe; é ná xwedó mɛ yi, bɔ è nǎ zé e dó wa nǔ e jló mɛ ɔ́ ná.” Ée é ɖɔ mɔ̌ ɔ́, axɔ́sú ɔ́ ɖɔ: “É nyɔ́, Kimuxámu ní bo xwedó mì. Un ná bló nǔ e a ɖɔ é bǐ n'i. Un ná ná nǔ e a nǎ byɔ́ mì ɔ́ bǐ we.” Ée togun ɔ́ bǐ dó asá Judɛ́ɛn tɔ ɔ́, bɔ axɔ́sú ɔ́ lɔmɔ̌ dó asá é ɔ́, é kplá asi kɔ nú Baaziláyi, bo xo ɖɛ dó jǐ tɔn, bɔ Baaziláyi lɛ́ kɔ yi xwé tɔn gbe. Bɔ axɔ́sú ɔ́ wlí ali bo ɖidó Gilugalu, bɔ Kimuxámu xwedó e. Judáa ví lɛ́ɛ bǐ kpó Izlayɛ́li ví e ɖo Totaligbé lɛ́ɛ vlɔ̌ kpó xwedó axɔ́sú ɔ́. Izlayɛ́li ví e ɖo Totaligbé lɛ́ɛ yi mɔ axɔ́sú ɔ́, bó kanbyɔ́ ɛ ɖɔ: “Étɛ́wú nɔví mǐtɔn Judáa ví lɛ́ɛ wá zé mɛ, bó kplá mɛ ɖésú kpó mɛ mɛtɔn lɛ́ɛ kpó, kpódó sɔ́ja mɛtɔn lɛ́ɛ kpó bó dó asá Judɛ́ɛn tɔ ɔ́?” Ée yě ɖɔ mɔ̌ é ɔ́, Judáa ví lɛ́ɛ ɖɔ nú yě ɖɔ: “Mɛ mǐtɔn wɛ é nyí wú wɛ mǐ blǒ mɔ̌! Étɛ́ xomɛ sin wɛ mi ka ɖe? Nǔɖé wɛ mǐ ɖu ɖo así tɔn a? Nǔɖé wɛ é ká ná mǐ wú wɛ mǐ bló mɔ̌ a?” Bɔ Izlayɛ́li ví lɛ́ɛ sú xó bó ɖɔ nú yě ɖɔ: “Axɔ́sú ɔ́ nyí mɛ mǐtɔn donu wǒ, lě e é nyí mi lɔ tɔn gbɔn é. Étɛ́wú mi ka ɖo mǐ ɖe kpo wɛ mɔ̌? Mǐdɛɛ lɛ́ɛ wɛ nyí mɛ nukɔntɔn e ɖɔ axɔ́sú mǐtɔn ní lɛ́ kɔ wá xwé é ǎ cé?” Judáa ví lɛ́ɛ ká jɛ xó vɛ́sin vɛ́sin ɖɔ jí, bɔ gbe yětɔn yi jǐ hú Izlayɛ́li ví lɛ́ɛ sín gbe. Nya nǔvɔ́nɔ ɖé ɖo Gilugalu fínɛ́, bó nɔ nyí Cɛ́va; Bɛnjamɛ́ɛnu wɛ, lobo nyí Bikli ví. É kún lanzo bo sú xó bó ɖɔ: “Mǐ ɖó xó ɖěbǔ xá Davídi ǎ, mǐ kpó Jɛsée ví nɛ́ kpó kpé dó nǔɖé ǎ lóóo! Izlayɛ́li ví e mi! Mɛ ɖokpó ɖokpó ní lɛ́ kɔ yi xwé tɔn gbe!” Ée é ɖɔ mɔ̌ ɔ́, Izlayɛ́li ví lɛ́ɛ bǐ jó Davídi dó, bó xwedó Cɛ́va Bikli ví ɔ́. Judáa ví lɛ́ɛ ka nɔ gbejí nú axɔ́sú yětɔn, bó kplá ɛ sín Judɛ́ɛn tɔ ɔ́ kɔn káká wá Jeluzalɛ́mu. Davídi byɔ́ hɔnmɛ, xwé tɔn gbe ɖo Jeluzalɛ́mu. É kplá asi tɔn wǒ e é ɖó xwé ɔ́ ná bó yi lɛ́ɛ dó xwé ɖokpó gbe, bó ɖó mɛ xwé ɔ́ kɔn bɔ è nɔ cɔ́; é nɔ́ kpé nukún dó yě wú, é ká sɔ́ ɖó xó xá yě ǎ. Yě nɔ hɔn sú dó mɔ̌ káká bó kú. Asú yětɔn ɖo gbɛ có yě cí asúkúsi ɖɔhun. Axɔ́sú ɔ́ ɖɔ nú Amasa ɖɔ: “Kplé sɔ́ja e ɖo Judáa lɛ́ɛ bǐ nú mì ɖó fí azǎn atɔn gbe. Hwi lɔ ɔ́, afɔ towe ní sɔ gbe ɖo fí.” Amasa yi nǔ e axɔ́sú ɔ́ zɔ́n ɛ ɔ́ bló gbé. É ká yi nɔ káká bɔ azǎn e axɔ́sú ɔ́ ɖó n'i ɔ́ dín. Bɔ Davídi ɖɔ nú Avicáyi ɖɔ: “Nǔ e wa xá mǐ gbé wɛ Cɛ́va Bikli ví ɔ́ ja din é ɔ́ ná nylá hú ée Abusalɔ́mu wa xá mǐ é. Din ɔ́, a nǎ nɔ sɔ́ja ce lɛ́ɛ nu, bó jɛ gbě tɔn mɛ, bónú é ma hɔn yi hwlá cí toxo e è mɛ ahohó lɛ́ lɛ̌ dó lɛ́ɛ ɖě mɛ bó bú dó mǐ ó.” Ée axɔ́sú ɔ́ ɖɔ mɔ̌ ɔ́, Avicáyi kplá sɔ́ja e nu Jowabu kpa acɛ dó lɛ́ɛ, sɔ́ja Keleti lɛ́ɛ, sɔ́ja Pɛlɛ́ti ví lɛ́ɛ kpódó sɔ́ja e sín alɔ se kpɛ́n ganjí lɛ́ɛ kpó. É kplá yě, bó tɔ́n sín Jeluzalɛ́mu, bó jɛ Cɛ́va Bikli ví ɔ́ gbé mɛ. Awǐnnya ɖaxó e ɖo Gabawɔ́ɔn e kɔn jɛ wɛ yě ɖe kɛ́ɖɛ́, bɔ Amasa wá xwedó yě wú. Jowabu ɖo ahwan wu tɔn mɛ, bó sin gǒjíblánú, bó zé hwǐ tɔn slɔ́ mɛ, bɔ hwǐ ɔ́ ɖo akún mɛ. Lo ɔ́, hwenu e Jowabu ɖo yiyi wɛ é ɔ́, hwǐ ɔ́ sún j'ayǐ. Jowabu ɖɔ nú Amasa ɖɔ: “Nɔví ce, a ɖo ganjí a?” É hɛn Amasa sín atán kpó alɔ aɖisí kpó, mɛ ɖo si ná kí n'i wɛ ɖɔhun. Amasa tunwun hwenu Jowabu zé hwǐ ɔ́ sín kɔ́ mɛ kpó alɔ amyɔ kpó é ǎ, bɔ Jowabu sɔ́ hwǐ ɔ́ xomɛ n'i, bɔ adɔ tɔn lúlú kɔn nyi kɔ́ mɛ. Hwǐ énɛ́ e é sɔ́ ɛ ɔ́, é sɔ́ sɔ́ ɖěe cóbónú é kú ǎ. Ée Jowabu dó énɛ́ ɔ́ sin ɔ́, é kpó nɔví tɔn Avicáyi kpó wlí ali bo ɖidó Cɛ́va Bikli ví ɔ́ gbé mɛ. Jowabu sín sɔ́ja lɛ́ɛ ɖokpó nɔ te Amasa kpá bó ɖɔ: “Jowabu sín xɔ́ntɔn lɛ́ɛ kpó mɛ e ɖo Davídi jí lɛ́ɛ kpó ní xwedó Jowabu.” Amasa ka ɖo kúsukpɔ xo ɖo kanjɔ mɛ wɛ ɖo ali ɔ́ tɛ́ntin. Ée Jowabu sín sɔ́ja ɔ́ mɔ ɖɔ mɛ lɛ́ɛ bǐ ɖo te nɔ wɛ é ɔ́, é dɔn ɛ sín ali ɔ́ jí, bó dɔn ɛ dó gle mɛ, bó zé avɔ nyi jǐ tɔn. Ée é bló mɔ̌ ɔ́, sɔ́ja lɛ́ɛ mɔ tɛn bo slɛ́ ɖo Jowabu gúdo, bó ɖidó Cɛ́va gbé mɛ. Cɛ́va xo Izlayɛ́li sín akɔta lɛ́ɛ bǐ zlɛ́, bó tunta Avɛ́li-Bɛti-Maaka, bɔ Belíi ví lɛ́ɛ bǐ kplé, bó xwedó e. Jowabu kpó mɛ tɔn lɛ́ɛ kpán wá xá Cɛ́va ɖo Avɛ́li-Bɛti-Maaka, lobo kplé kɔ́ káká yi sɔ́ toxo ɔ́ sín ahohó. Yě jɛ do kun dó ahohó ɔ́ glɔ́ jí, bó ná mu ahohó ɔ́. Nyɔ̌nu bíbí ɖokpó nɔ toxo ɔ́ mɛ, bó jɛ xó sú jí, bó nɔ ɖɔ: “Mi ɖótó mì, mi ɖótó mì. Mi yi ɖɔ nú Jowabu ɖɔ é ní hun káká wá fí; un ɖó xó ɖé bó ná ɖɔ n'i.” Jowabu wá, bɔ nyɔ̌nu ɔ́ kanbyɔ́ ɛ ɖɔ: “Hwi wɛ nyí Jowabu a?” Bɔ Jowabu yí gbe n'i ɖɔ: “Nyi wɛ nyí Jowabu.” Bɔ nyɔ̌nu ɔ́ ɖɔ: “Gǎn, ɖǒtó xó e ɖɔ nú we gbé un ja é.” Bɔ Jowabu ɖɔ: “Un ɖo tó ɖó we wɛ.” Bɔ nyɔ̌nu ɔ́ ɖɔ: “È nɔ ɖɔ ɖ'ayǐ ɖɔ: ‘È yi kan nǔ ɖo Avɛ́li-Bɛti-Maaka ɔ́, è nɔ mɔ nu tɔn.’ Toxo mǐtɔn ɖo toxo e vo bo ɖo gbejí ɖo Izlayɛ́li lɛ́ɛ é mɛ. Lo ɔ́, hwɛ jló ná gba toxo élɔ́ e ɖo toxo nukúnɖéjí lɛ́ɛ mɛ ɖo Izlayɛ́li é. Étɛ́wú a ka jló ná hɛn nǔ e nyí Mawu Mavɔmavɔ tɔn é gblé?” Ée é ɖɔ mɔ̌ ɔ́, Jowabu sú xó bo ɖɔ: “Mawu ma lɔn ó, linlin e ná hɛn nǔ gblé, linlin e ná vívá kún nú nǔ é ɖě má byɔ́ ayi ce mɛ ó. Nǔ nyí gbɔn mɔ̌ ǎ. Lo ɔ́ nya Eflayímu sókan mɛ nu ɖokpó wɛ fɔ́n gǔ dó axɔ́sú ɔ́ jí; nya ɔ́ nɔ nyí Cɛ́va, Bikli ví wɛ. Mi jó éyɛ́ kɛ́ɖɛ́ nú mì, bónú ma jó toxo mitɔn dó.” Ée é ɖɔ mɔ̌ ɔ́, nyɔ̌nu ɔ́ ɖɔ: “É nyɔ́! Un ná nyi ta tɔn sɛ́ dó we gbɔn ahohó ɔ́ jí.” Nyɔ̌nu ɔ́ yi mɔ mɛ tɔn lɛ́ɛ, bó kplɔ́n nǔ yě, bɔ yě yi gbo Cɛ́va sín ta, bó nyi sɛ́ dó Jowabu. Ée Jowabu yí ta ɔ́, é kún lanzo, bɔ sɔ́ja lɛ́ɛ jó toxo ɔ́ dó; mɛ ɖokpó ɖokpó hɔn yi xwé tɔn gbe, bɔ Jowabu lɛ́ kɔ yi axɔ́sú ɔ́ gɔ́n ɖo Jeluzalɛ́mu. Jowabu wɛ kpa acɛ dó ahwangɔnu Izlayɛ́li tɔn ɔ́ bǐ nu. Benayahu Yexoyada ví ɔ́ wɛ ɖo sɔ́ja Keleti lɛ́ɛ kpó sɔ́ja Pɛlɛ́ti ví lɛ́ɛ kpó nu. Adolámu wɛ nɔ nɔ mɛɖezɔ́ lɛ́ɛ nu. Yexosafáti Axiludi ví ɔ́ wɛ nyí gbeyíɖɔ axɔ́sú ɔ́ tɔn. Cewa wɛ nyí wěgbójínɔtɔ́. Sadɔ́ku kpó Abiyatáa kpó nyí vɔ̌sánú-xwlémawutɔ́. Ila, Yayíi ví ɔ́ lɔmɔ̌ nyí vɔ̌sánú-xwlémawutɔ́ Davídi tɔn. Adɔ tɔ́n xɔ xwe atɔn, hwenu e Davídi ɖo axɔ́sú ɖu wɛ é. Davídi kan xó byɔ́ Mawu Mavɔmavɔ bɔ é yí gbe n'i ɖɔ: “Adǎka e Sawúlu kpó mɛ tɔn lɛ́ɛ kpó xo hwenu e é hu Gabawɔ́ɔnnu lɛ́ɛ é wú wɛ adɔ tɔ́n.” Axɔ́sú ɔ́ ylɔ́ Gabawɔ́ɔnnu lɛ́ɛ, bó ná ɖɔ xó nú yě. Yě nyí Izlayɛ́li ví ǎ; Amɔliti e kpo bɔ Izlayɛ́li ví lɛ́ɛ xwlé nǔ nú yě ɖɔ émí kún ná hu yě ó lɛ́ɛ é wɛ. Nǔ cí mɔ̌ có Sawúlu ɖo hun jɛ dó Izlayɛ́li to ɔ́ kpó Judáa to ɔ́ kpó jí wɛ, bó ɖo lě e é ná sú Gabawɔ́ɔnnu lɛ́ɛ sín kún dó gbɔn ɔ́ ba wɛ. Davídi kanbyɔ́ Gabawɔ́ɔnnu lɛ́ɛ ɖɔ: “Đagbe tɛ́ un sixú wa nú mi din? Nǔ tɛ́ un sixú wa nú mi bɔ mi ná wɔn ya e mi ko ji lɛ́ɛ, bó ná byɔ́ ɖagbe nú togun Mawu Mavɔmavɔ tɔn?” Gabawɔ́ɔnnu lɛ́ɛ yí gbe nú Davídi ɖɔ: “Tagba e ɖo mǐ kpó Sawúlu kpó, kpó mɛ tɔn lɛ́ɛ kpó tɛ́ntin ɔ́ nyí kpatágan xó ǎ, é ká nyí siká xó ǎ, é ká nyí ɖɔ Izlayɛ́li ví wɛ è nǎ hu nú mǐ, bó ná ɖɔ gbo ǎ.” Bɔ axɔ́sú ɔ́ ɖɔ nú yě ɖɔ: “Étɛ́ ba wɛ mi ɖe bɔ un ná wa nú mi lo?” Bɔ Gabawɔ́ɔnnu lɛ́ɛ ɖɔ nú Davídi ɖɔ: “Sawúlu ko jló ná fó xó mǐtɔn, é jló ná sú kún mǐtɔn dó; é ba ɖɔ mǐ mɛ ɖěbǔ ní nɔ gbɛ ɖo Izlayɛ́li yíkúngban jí ǎ. Mǐ jló ɖɔ è nǐ jó vǐ tɔn súnnu tɛ́nwe nú mǐ, bónú mǐ ná yi dó kan kɔ nú yě ɖo Mawu Mavɔmavɔ nukɔn ɖo Giveya, toxo e mɛ Sawúlu axɔ́sú e Mawu Mavɔmavɔ sɔ́ é nɔ é mɛ.” Bɔ axɔ́sú ɔ́ ɖɔ: “Un ná jó yě nú mi.” Davídi ka jó Mɛfibáalu Jonatáan ví Sawúlu vívú é ǎ, ɖó alɛ e é nu xá Jonatáan ɖo Mawu Mavɔmavɔ nyíkɔ mɛ ɔ́ wútu. Axɔ́sú ɔ́ jó Sawúlu ví we: Aamɔni kpó Mɛfibáalu kpó; vǐ we énɛ́ lɛ́ɛ ɔ́, Hlisipa Aya ví nyɔ̌nu wɛ ji yě nú Sawúlu. É lɛ́ jó vǐ atɔ́ɔ́n e Sawúlu ví nyɔ̌nu Mikali ji nú Adliɛ́li Avɛ́li-Mɛholanu Baaziláyi ví é. Axɔ́sú ɔ́ jó yě nú Gabawɔ́ɔnnu lɛ́ɛ, bɔ yě yi dó kan kɔ nú vǐ lɛ́ɛ ɖo só jí, ɖo Mawu Mavɔmavɔ nukɔn. Vǐ tɛ́nwe lɛ́ɛ bǐ kú zɛ̌nzɛ̌n. Azǎn nukɔn nukɔntɔn e mɛ è ɖo ɔ́ji ya wɛ lɛ́ɛ mɛ wɛ è hu yě. Hlisipa, asúkúsi Sawúlu tɔn ɔ́ ɖe nǔwamɛvɔ e é dó ɔ́, bó tɛ́ nyi awǐnnya e jí cyɔ lɛ́ɛ ɖe ɔ́, bó nɔ fínɛ́ sín nǔkún-yiya hwenu káká jɛ hwenu e jǐ lɛ́ wɔ́ bó ja dó cyɔ lɛ́ɛ jí é. Kéze ɔ́, é nɔ lɔn nú xɛ lɛ́ɛ nɔ́ ɖó jɛ cyɔ lɛ́ɛ jí ǎ. Zǎn kú ɔ́, é nɔ́ nya gběkanlin lɛ́ɛ dó zɔ. È yi ɖɔ nǔ e Hlisipa wa ɔ́ nú Davídi. Ée Davídi se mɔ̌ ɔ́, é yi bɛ́ Sawúlu kpó vǐ tɔn Jonatáan kpó sín xú ɖo Yavɛ́cinu lɛ́ɛ sí, ɖo Galadi. Ée Filisitɛ́ɛn lɛ́ɛ wlí Sawúlu ɖo Gilubowa ɔ́, Bɛti-Ceani sín gblogblo jí wɛ yě wá dó kan kɔ nú Sawúlu kpó vǐ tɔn Jonatáan kpó ɖe. Fínɛ́ wɛ Yavɛ́cinu lɛ́ɛ wá fɔ xú yětɔn ɖe. Davídi bɛ́ Sawúlu kpó vǐ tɔn Jonatáan kpó sín xú sín Yavɛ́ci, bó lɛ́ bɛ́ mɛ tɛ́nwe e è dǒ kan kɔ ná lɛ́ɛ sín xú, bó yi ɖi dó Kícu, Sawúlu tɔ́ ɔ́ sín yɔdo mɛ, ɖo Sela, ɖo Bɛnjamɛ́ɛ yíkúngban jí. Ée è wa nǔ e axɔ́sú ɔ́ zɔ́n lɛ́ɛ bǐ fó é ɔ́, Mawu fá xomɛ dó to ɔ́ wú. Tagba ɖěvo lɛ́ bɛ́ ɖo Filisitɛ́ɛn lɛ́ɛ kpó Izlayɛ́li ví lɛ́ɛ kpó tɛ́ntin. Davídi kpó sɔ́ja tɔn lɛ́ɛ kpó yi tɔ́n ahwan Filisitɛ́ɛn lɛ́ɛ. Tlóló kpowun ɔ́, nǔ jɛ kɔ ci nú Davídi jí. Halafa ví ɖokpó nɔ́ nyí Yicibi-Be-Nɔvu. Nyaví nɛ́ ɔ́ ɖɔ émí ná hu Davídi géé. Nyaví ɔ́ kplá hwǐ yɔ̌yɔ́ ɖokpó, bó hɛn hwǎn ɖokpó, bɔ gan xwíɖíxwíɖí e ɖo nu tɔn ɔ́, ganvɔ wɛ è dǒ tun; ganvɔ ɔ́ da hú kilóo atɔn. Lo ɔ́, Avicáyi Selúya ví ɔ́ hwlɛ́n Davídi gán, bó xo Filisitɛ́ɛn ɔ́, bó hu i. Énɛ́ ɔ́, sɔ́ja lɛ́ɛ yi mɔ Davídi, bó xwlé nǔ n'i bó ɖɔ: mǐ kpó mɛ kpán sɔ́ ná yi ahwan fun gbé ɖě ǎ; ɖó mɛ wɛ nyí zogbɛ́n Izlayɛ́li tɔn bɔ zogbɛ́n énɛ́ ɔ́ sɔ́ ná cí gbeɖé ǎ. Ée ahwan énɛ́ fó ɔ́, Izlayɛ́li ví lɛ́ɛ lɛ́ tɔ́n ahwan Filisitɛ́ɛn lɛ́ɛ ɖo Gɔvu. Ahwan énɛ́ mɛ ɔ́, Sibekayi Hucanu ɔ́ hu Sáfu Halafa ví ɖěvo. Izlayɛ́li ví lɛ́ɛ lɛ́ tɔ́n ahwan ɖěvo Filisitɛ́ɛn lɛ́ɛ ɖo Gɔvu ɖokpó ɔ́, bɔ Ɛluhanani Yaalé-Olegimu ví, Bɛteleyɛ́munu ɔ́ hu Goliyati Gatinu ɔ́. Goliyati ɖó hwǎn ɖokpó, bɔ kpo tɔn kló sɔ avɔlɔnkpɔntín. Izlayɛ́li ví lɛ́ɛ lɛ́ tɔ́n ahwan ɖěvo yě ɖo Gati. Nya gaga ɖokpó ɖo to énɛ́ mɛ; alɔví ayizɛ́n wɛ ɖo alɔ tɔn ɖokpó ɖokpó nu, bɔ afɔví ayizɛ́n ɖo afɔ tɔn ɖokpó ɖokpó nu, bɔ bǐ bló ko-nukún-ɛnɛ. Nya énɛ́ ɔ́ lɔ ɔ́, Halafa ví wɛ. É nyi gbehwán sɛ́ dó Izlayɛ́li ví lɛ́ɛ, bɔ Davídi nɔví Cimɛ́ya sín vǐ Yexonatáni ɔ́ hu i. Sɔ́ja ɛnɛ énɛ́ lɛ́ɛ bǐ ɔ́, Filisitɛ́ɛn wɛ yě nyǐ, bó nyí Halafa ví, bó ɖo Gati. Davídi kpó sɔ́ja tɔn lɛ́ɛ kpó ka hu yě bǐ. Davídi wɛ ji han élɔ́ dó kpa susu nú Mawu Mavɔmavɔ, gbe e gbe Mawu Mavɔmavɔ hwlɛ́n ɛ sín kɛntɔ́ tɔn lɛ́ɛ bǐ lɔ mɛ, ɖo tají ɔ́, Sawúlu lɔ mɛ é. “Mawu Mavɔmavɔ wɛ nyí só ce, é wɛ nyí ahohó ce, bó nyí mɛhwlɛ́ngántɔ́ ce. Mawu wɛ nyí só ce, é glɔ́ wɛ un nɔ́ hɔn hwlá cí. É wɛ nyí gǎglónú ce, bó nyí hlɔ̌nhlɔ́n e nɔ hwlɛ́n mì gán é. É glɔ́ wɛ un nɔ hɔn hwlá cí. É wɛ nyí mɛhwlɛ́ngántɔ́ ce, é wɛ nɔ́ hwlɛ́n mì sín adǎkaxotɔ́ lɛ́ɛ sí. Susu nú Mawu Mavɔmavɔ!” Un sú xó ylɔ́ ɛ hweɖěbǔnu ɔ́, é nɔ yí mì sín kɛntɔ́ ce lɛ́ɛ lɔ mɛ. Kú sín aslɔkɛ́ lɛ́ɛ wá ján go dó mì, kú ɖo xɛsi dó nú mì wɛ tɔsisa ɖo adǎn jí ɖɔhun. Yɔdo lɛ́ɛ nyi kan lɛ́ lɛ̌ dó mì, kú nyi ɖɔ dó fyán mì. Hwenu e adǎn gbo mì ɔ́, un ylɔ́ Mawu Mavɔmavɔ, un sú xó ylɔ́ Mawu ce. É se gbe ce sɛ́ dó sín xwé tɔn gbe, xó e un sú ɔ́ yi tó tɔn mɛ. Ayǐkúngban ɔ́ húnhún, bó dán wǔ, jǐnukúnsin sín dodó lɛ́ɛ sísɔ́, bó húnhún, ɖó Mawu sin xomɛ. Azizɔ nɔ tɔ́n sín awɔntín tɔn mɛ, myɔ hɛhɛ ɖé nɔ tɔ́n sín nu tɔn mɛ, myɔkán nɔ́ tɔ́n sín myɔ ɔ́ mɛ. É dɔn jǐnukúnsin wá do, bó jɛ te, akpɔ́kpɔ́ tlitli ɖé ɖo afɔ tɔn lɛ́ɛ glɔ́. É xá wɛnsagun ɖokpó jí, bó zɔn ɖidó, é tɔ́n, bó zɔn jɔhɔn mɛ. É sɔ́ zǐnflú dó dó goxɔ lɛ́ lɛ̌ dó éɖée, é sɔ́ sin kpó akpɔ́kpɔ́ wiwi lɛ́ɛ kpó bú dó éɖée. Wěziza ɖé ɖo nukɔn tɔn, myɔkán ɖo zo da wɛ ɖo nukɔn tɔn. Mawu Mavɔmavɔ dó gbe sín sɛ́xwé, è se Mawu Ajalɔ̌nlɔn sín gbe. É da gǎ, bó gba kɛntɔ́ ce lɛ́ɛ dó, jǐ kɛ wun bɔ yě bǐ hɔn. Adǎn e jɛ wɛ Mawu Mavɔmavɔ ɖe ɔ́, kpó funfún e ɖo awɔntín tɔn mɛ tɔ́n sín wɛ ɔ́ sín zǐngídi kpó zɔ́n, bɔ xu ɔ́ sín azan jí jɛ wěxo, bɔ è mɔ nǔ jɛ gbɛ ɔ́ sín dodó lɛ́ɛ wú. É dlɛ̌n alɔ tɔn sín jǐxwé bó hɛn mì, é ɖe mì tɔ́n sín tɔ ɖaxó mɛ. É yí mì sín kɛntɔ́ ce hlɔ̌nhlɔ́nnɔ ɔ́ sí, é yí mì sín kɛntɔ́ ce e syɛ́n hú mì lɛ́ɛ sí. Hwenu e adǎn ɖo gbigbo mì wɛ ɔ́, yě wá fyán mì, lo ɔ́, Mawu Mavɔmavɔ wɛ nyí gǎnjɛwú ce. É ɖe mì tɔ́n, bó ná ayi j'ayǐ mì; é yí mì sín yě sí, ɖó é yí wǎn nú mì. Mawu Mavɔmavɔ nɔ wa mɔ̌ nú mì, ɖó un ɖo gbejí n'i, é ná ajɔ mì ɖó walɔ ɖagbe e un ɖó é wú. Un wa nǔ e Mawu Mavɔmavɔ ɖɔ nú mì lɛ́ɛ; un wa nǔɖé nyi do nú Mawu ce ǎ. Sɛ́n tɔn lɛ́ɛ bǐ wɛ ɖo ayi ce mɛ; un gɔn nǔ e é zɔ́n lɛ́ɛ ɖě wa ǎ. Un jló ɖɔ é ní má mɔ nǔɖé ɖɔ dó wǔ ce ó; un lɔn bo jɛ hwɛ ɖé mɛ ǎ. Énɛ́ ɔ́ wú wɛ Mawu Mavɔmavɔ ná ajɔ mì, ɖó é mɔ ɖɔ un ɖo gbejí nú émí; é mɔ ɖɔ un ɖó walɔ ɖagbe. Mawu Mavɔmavɔ, mɛ ɖé ɖo gbejí nú we ɔ́, hwi lɔ nɔ nɔ gbejí n'i; mɛ ɖé ma mɔ nǔɖé ɖɔ dó wǔ towe ǎ ɔ́, hwi lɔ nɔ mɔ nǔɖé ɖɔ dó wǔ tɔn ǎ. Mɛ ɖé ɖo mǐmɛ́ jí ɔ́, a nɔ nɔ mǐmɛ́ jí xá ɛ, mɛ ɖé ká ɖo yɛmɛnú wa wɛ ɔ́, a nɔ ko e. A nɔ hwlɛ́n togun e nɔ zé éɖée hwe ɔ́ gán, bó nɔ zé mɛ e nɔ zé éɖée su ɔ́ hwe. Nǔgbó wɛ Mawu Mavɔmavɔ, hwi wɛ nyí wěziza ce, hwi wɛ nɔ ná wěziza mì ɖo ablu mɛ. A ɖo kpɔ́ xá mì ɔ́, un nɔ tɔ́n ahwan ahwangɔnu e ko sɔ́ ahwannú ganjí é; Mawu ce, a ɖo kpɔ́ xá mì ɔ́, un nɔ fán ahohó. Mawu ɔ́, alixlɛ́mɛtɔ́ e nyɔ́ bɔ nǔ bǐ vɔ ɖ'é wú ɔ́ wɛ, xó e Mawu Mavɔmavɔ nɔ ɖɔ ɔ́ nɔ sɔgbe. Gǎglónú wɛ é nyí nú mɛ e nɔ hɔn wá su i lɛ́ɛ bǐ. Mawu mǐtɔn ɖɔhun we ɖe ǎ, Mawu Mavɔmavɔ wɛ, Mawu mǐtɔn wɛ nyí awǐnnya ɖokpó e mǐ ɖǒ é. Ahohó ɖaxó wɛ Mawu nyí nú mì; é wɛ nɔ ɖe ali nú mì. É bló bɔ un nɔ yá afɔ zungbɔ́ ɖɔhun, é nɔ́ hɛn mì bɔ un nɔ nɔ te só jí. É wɛ nɔ kplɔ́n ahwanfunfun mì. É wɛ nɔ bló bɔ awa ce lɛ́ɛ nɔ mɔ gǎn bó nɔ da gǎ e syɛ́n lɛ́ɛ. Mawu Mavɔmavɔ, a cyɔ́n alɔ jǐ ce gǎglónú ɖɔhun, a hwlɛ̌n mì gán. Un ylɔ́ we ɔ́, a nɔ yí gbe nú mì, bó nɔ ná hlɔ̌nhlɔ́n mì. A nɔ bló bɔ un nɔ kán wezun bléblé, un nɔ ɖe afɔ nyi do ǎ. Un nɔ jɛ kɛntɔ́ ce lɛ́ɛ gúdo, bó nɔ sú kún yětɔn dó, un ma sú kún yětɔn dó ǎ ɔ́, un nɔ lɛ́ kɔ ǎ. Un nɔ já yě, un nɔ gblé gbɛ dó nú yě. Yě sɔ́ ná sí te ǎ, yě ɖo kɔ́ mɛ, bɔ afɔ ce ɖo yě jí. A nɔ ná hlɔ̌nhlɔ́n mì bɔ un nɔ dó fun ahwan, a nɔ zin kɛntɔ́ ce lɛ́ɛ dɛ́ ɖo nukɔn ce. A nɔ bló bɔ kɛntɔ́ ce lɛ́ɛ nɔ hɔn ɖo nukɔn ce, bɔ un nɔ hu mɛ e gbɛ́ wǎn nú mì lɛ́ɛ. Yě nɔ́ ba mɛ e ná hwlɛ́n yě gán ɔ́ gbɔn fí bǐ bó ka nɔ́ ba kpo; yě nɔ́ sú xó ylɔ́ Mawu Mavɔmavɔ; é ká nɔ kɛ nu d'é mɛ nú yě ǎ. Un nɔ li yě kɔ́ ɖɔhun, un nɔ li yě kpɔ́ɖɔ́kpɔ́ɖɔ́, un nɔ gbídí yě babá e ɖo ali jí é ɖɔhun. A ɖe mì sín gǔ e togun ce fɔ́n dó jǐ ce ɔ́ mɛ, a sɔ́ mì ɖó togun lɛ́ɛ nu. Togun e un ma tunwun ɖ'ayǐ ǎ ɔ́ lɔ ɖo acɛ ce mɛ. Toɖévomɛnu lɛ́ɛ nɔ jló ná nyí mɛ ɖo así ce, bɔ un ɖɔ xó lě tlóló kpowun ɔ́, yě nɔ́ bló ɖ'é jí. Toɖévomɛnu lɛ́ɛ sín ayi sɔ́ nɔ jɛ ayǐ ǎ, bɔ yě nɔ́ tɔ́n sín fí e yě hɔn hwlá cí ɔ́ kpó xɛsi kpó. Mawu Mavɔmavɔ ɖo gbɛ nǔgbó! Un dó kú nú mɛ e nyí só ce é. È nǐ kpa susu nú Mawu Mɛhwlɛ́ngántɔ́ ce. É wɛ nyí Mawu e nɔ ba hlɔn nú mì é, é wɛ nɔ sɔ́ togun lɛ́ɛ ɖó acɛ ce mɛ. Mawu Mavɔmavɔ, a nɔ yí mì sín kɛntɔ́ ce lɛ́ɛ sí, Mawu Mavɔmavɔ, a nɔ bló bɔ un nɔ ɖu ɖo mɛ e nɔ tɔ́n ahwan mì lɛ́ɛ jí. A nɔ hwlɛ́n mì gán ɖo adǎkaxotɔ́ lɛ́ɛ sí. Mawu Mavɔmavɔ ce, énɛ́ wú wɛ un ná nɔ kpa we ɖo akɔta lɛ́ɛ tɛ́ntin, bó ná nɔ ji han dó sɔ́ nyǐkɔ towe su. Mawu Mavɔmavɔ wa nǔ ɖaxó ɖaxó dó hwlɛ́n axɔ́sú e é sɔ́ é gán, é nyɔ́ xomɛ dó mɛ e é kɔn ami dó ta ná é wú, é nyɔ́ xomɛ dó Davídi kpó vǐ tɔn lɛ́ɛ kpó wú káká sɔ́yi. Xó gǔdo gúdo tɔn e Davídi ɖɔ lɛ́ɛ ɖíe: Mi ɖótó xó e Davídi Jɛsée ví ɔ́ ɖɔ lɛ́ɛ; xó e mɛ e Mawu sɔ́ su ɔ́ ɖɔ lɛ́ɛ, mɛ e Mawu Jakɔ́bu tɔn sɔ́ axɔ́sú é ɖɔ lɛ́ɛ. Mi ɖótó xó e hannyɔ́jitɔ́ Izlayɛ́li tɔn ɖɔ dó han mɛ lɛ́ɛ; Yɛ Mawu Mavɔmavɔ tɔn ɖɔ xó gbɔn jǐ ce. Xó tɔn ɖo nu ce. Mawu Izlayɛ́li tɔn ɖɔ xó; Izlayɛ́lisó ɔ́ ɖɔ nú mì ɖɔ: “Mɛ e ɖu axɔ́sú ɖo gbɛtɔ́ lɛ́ɛ nu kpó hwɛjijɔ kpó é, mɛ e nɔ yě nu kpó sísí ɖó nú Mawu kpó ɔ́, é cí hwe e tɔ́n kpó wěziza kpó é ɖɔhun, bɔ è nɔ mɔ akpɔ́kpɔ́ ɖěbǔ ɖo jǐxwé ǎ. É cí hwe e jǐ ja ɔ́, é nɔ tɔ́n, bɔ ama nɔ wú é ɖɔhun.” Mɔ̌ wɛ é nyí gbɔn nú xwédo ce, ɖo Mawu nukɔn: Mawu jɛ akɔ xá mì, bɔ é ná nɔ ayǐ káká sɔ́yi. Akɔ e é jɛ xá mì ɔ́ ɖó tito ɖé lɛ́ɛ, bó ná hɛn akɔ ɔ́ ɖó te káká sɔ́yi. Mawu nɔ ná ɖuɖéjí mì ɖo nǔ bǐ mɛ. É nɔ bló nǔ e ba wɛ un ɖe é bǐ nú mì. Lo ɔ́, mɛ e nɔ gbɛ́ wǎn nú Mawu lɛ́ɛ cí wunkan e è nɔ bɛ́ kɔn nyi gbě ɔ́ ɖɔhun; è nɔ ɖo alɔ vɔ̌ bó nɔ zé ǎ. Nú mɛɖé jló ná zé ɔ́, mɛ ɔ́ nɔ hɛn gan abǐ kpo gaga alɔ mɛ, bó nɔ dó bǐ zo ɖo tɛn tɔn mɛ tɛn tɔn mɛ. Sɔ́ja syɛ́nsyɛ́n e fun ahwan nú Davídi lɛ́ɛ sín nyǐkɔ ɖíe: Ɛcibáalu, Hakimɔ́ni ví ɔ́, sɔ́jagán ɖokpó wɛ é nyí. É wɛ sɔ́ hwǎn dó hu gbɛtɔ́ afɛnɛ (800), ɖo ahwanfunfun ɖokpó hwenu. Eleazáa, Dódo ví e jɔ ɖo Axoxi hɛ́nnu mɛ ɔ́ lɔ ɖo yě mɛ. É lɔ ɖo ahwanfuntɔ́ syɛ́nsyɛ́n atɔn e kplá Davídi yi ahwan fun xá Filisitɛ́ɛn e kplé bó ɖo ahwan ná fun wɛ lɛ́ɛ é mɛ; ahwan kpa Izlayɛ́li ví lɛ́ɛ ǎ, bɔ yě hɔn. Lo ɔ́, Eleazáa hɔn ǎ. É nɔ te, lobo hu Filisitɛ́ɛn lɛ́ɛ káká, bɔ alɔ tɔn kúyɛ; hwǐ ɔ́ ɖo alɔ tɔn mɛ bɔ é sɔ́ sixú zé dó jǐ ǎ. Mawu Mavɔmavɔ ná ɖuɖéjí ɖaxó ɖokpó Izlayɛ́li ví lɛ́ɛ gbe énɛ́ gbe. Ée é hu yě fó é ɔ́, togun ɔ́ wá, bó wá bɛ́ nǔ e mɛ e kú lɛ́ɛ hɛn wá ahwangbénu lɛ́ɛ kpowun. Camúma, Agée ví Haláanu ɔ́ lɔ ɖo yě mɛ. Hwenu e Filisitɛ́ɛn lɛ́ɛ kplé ɖo ayikúngle ɖé mɛ ɖo Lɛ́xi ɔ́, ahwangɔnu Izlayɛ́li tɔn hɔn. Lo ɔ́, Camúma yi gle ɔ́ jí, bó nya Filisitɛ́ɛn lɛ́ɛ sín gle ɔ́ mɛ, bó hu yě. Mawu Mavɔmavɔ ná ɖuɖéjí ɖaxó ɖokpó Izlayɛ́li ví lɛ́ɛ. É wá su gbe ɖokpó, bɔ mɛ atɔn ɖo “sɔ́ja Gban gbɛ́ta” ɔ́ mɛ, bó wá Davídi gɔ́n, ɖo Adulámu sín sóxo mɛ, jinukún-yiya hwenu. Hwenu e yě wǎ é ɔ́, Filisitɛ́ɛn lɛ́ɛ sín gɔnu ɖokpó ɖo Hlafa ví lɛ́ɛ sín tɔdo mɛ. Davídi ka ɖo fí e mɛɖé má sixú kpé wǔ tɔn ɖe ǎ é hwenɛ́nu, bɔ Filisitɛ́ɛn lɛ́ɛ sín gɔnu ɖokpó ɖo Bɛteleyɛ́mu. Linlin ɖokpó byɔ́ ayi mɛ nú Davídi bɔ é ɖɔ: “Mɛ̌ ka ná dun sin nú mì ɖo sitɛ́nu e ɖo Bɛteleyɛ́mu sín hɔntogbó jí ɔ́ mɛ wá, bɔ un ná nu din?” Ée é ɖɔ mɔ̌ ɔ́, sɔ́ja syɛ́nsyɛ́n atɔn lɛ́ɛ byɔ́ Filisitɛ́ɛn lɛ́ɛ sín ahwankpá mɛ gǎnnugǎnnu, bó yi dun sin ɔ́ ɖo sitɛ́nu ɔ́ mɛ, bó zé wá nú Davídi. Lo ɔ́, Davídi jló ná nu sin ɔ́ ǎ; é yí bó húzú kɔn nyi kɔ́ mɛ nú Mawu Mavɔmavɔ, bó ɖɔ: “Mawu Mavɔmavɔ, un ná nu sin élɔ́ gbeɖé ǎ. Mɛ élɔ́ lɛ́ɛ e sɔ́ gbɛ yětɔn ɖó axɔ́ nu, bó yi dun sin ɔ́ wá nú mì é ɔ́, é cí hun yětɔn nu gbé un ja ɖɔhun.” Ée é ɖɔ mɔ̌ ɔ́, é nu sin ɔ́ ǎ. Nǔ e sɔ́ja syɛ́nsyɛ́n atɔn lɛ́ɛ bló ɔ́ nɛ́. Avicáyi Jowabu nɔví Selúya ví ɔ́ wɛ kpa acɛ dó “sɔ́ja Gban gbɛ́ta” ɔ́ nu. É wɛ sɔ́ hwǎn dó hu gbɛtɔ́ afɔɖé kanwe ko (300) gbe ɖokpó, ɖo ahwangbénu, bɔ nyǐkɔ tɔn yi jǐ ɖo gbɛ̌ta ɔ́ mɛ. Gbɛtɔ́ nukúnɖéjí ɖokpó wɛ é nyí ɖo “sɔ́ja Gban gbɛ́ta” ɔ́ mɛ, bó nyí gǎn yětɔn. Amɔ̌, é sixú kpé nǔ xá sɔ́ja syɛ́nsyɛ́n atɔn nukɔntɔn lɛ́ɛ ǎ. Benayahu Yexoyada ví, Kavuceyɛ́linu ɔ́ lɔ ɖo yě mɛ. Sɔ́ja syɛ́nsyɛ́n ɖokpó sín vǐvú wɛ; é nɔ wa nǔ gěgé bɔ to nɔ ké. É wɛ hu Aliɛ́li Mɔwabunu ɔ́ sín vǐ we. É ɖokpó ɔ́ wɛ avuvɔ gbɛ́ gbe ɖokpó káká, bɔ é byɔ́ sitɛ́nu mɛ bó hu kinnikínní ɖokpó. É ɖokpó ɔ́ wɛ hu sɔ́ja Ejípunu ɖé. Sɔ́ja ɔ́ jí wǔ, bó hɛn hwǎn alɔ mɛ, bɔ Benayahu zé kpo dó jǐ tɔn, bó yí hwǎn tɔn sín alɔ tɔn mɛ, bó dó hu i ná. Nǔ ɖaxó ɖaxó énɛ́ lɛ́ɛ e é wa ɔ́ zɔ́n bɔ nyǐkɔ tɔn yi jǐ ɖo “sɔ́ja Gban gbɛ́ta” ɔ́ mɛ. Sɔ́ja nukúnɖéjí ɖokpó wɛ é nyí ɖo “sɔ́ja Gban gbɛ́ta” ɔ́ mɛ. Amɔ̌, é sixú kpé nǔ xá sɔ́ja syɛ́nsyɛ́n atɔn nukɔntɔn lɛ́ɛ ǎ. Davídi zé e ɖó sɔ́ja e nɔ nɔ hɔnmɛ lɛ́ɛ bǐ nu. Asaxɛli Jowabu nɔví ɔ́ lɔ ɖo “sɔ́ja Gban gbɛ́ta” ɔ́ mɛ. Ɛluhanani Dódo ví Bɛteleyɛ́munu ɔ́ lɔmɔ̌ ɖo yě mɛ, Camúma Halɔ́dinu ɔ́ kpó Elika Halɔ́dinu ɔ́ kpó ɖo yě mɛ; Hɛlɛ́si Bɛti-Pɛlɛ́tinu ɔ́ kpó Ila Ikɛ́ci ví Tekowanu ɔ́ kpó ɖo yě mɛ. Aviɛzɛ́ɛ Anatɔ́tinu ɔ́ kpó Mɛvunáyi Hucanu ɔ́ kpó ɖo yě mɛ, Salumɔ́ni Axoxi ví ɔ́ kpó Maxlayi Nɛtofanu ɔ́ kpó ɖo yě mɛ. Helɛ́vu Baana Nɛtofanu ɔ́ sín vǐ kpó Itayi Hlivayi ví e nɔ́ nɔ Bɛnjamɛ́ɛ ví lɛ́ɛ sín tomɛ ɖo Giveya é kpó ɖo yě mɛ, Benayahu Pileyatɔ́ninu ɔ́ kpó Hididayi e nɔ́ nɔ tɔsisa Gaaci tɔn kpá ɔ́ kpó ɖo yě mɛ, Avi-Aluvɔ́nu Bɛti-Alabanu ɔ́ kpó Azimawɛ́ti Baahulímunu ɔ́ kpó ɖo yě mɛ, Eliyaba Caaluvímunu ɔ́ kpó Yacenu ví lɛ́ɛ ɖokpó kpó, kpódó Yexonatáni kpó ɖo yě mɛ. Camúma Haláanu ɔ́ kpó Axiyamu Caláa Aláanu ɔ́ sín vǐ kpó ɖo yě mɛ, Elifɛlɛ́ti Ahasibayi ví e nyí nya Maaka ví ɔ́, kpó Eliamu Axitofɛ́li Gilóonu ɔ́ ví kpó ɖo yě mɛ, Ɛslayi Kaamɛ́linu ɔ́ kpó Palayíi, Alávunu ɔ́ kpó, Yigealu Natáni Sovanu ɔ́ sín vǐ kpódó Bani e jɔ ɖo akɔta Gadi tɔn mɛ ɔ́ kpó, Sɛlɛ́ki Amumɔ́ɔ ví ɔ́ kpódó Naxilayi Beelɔ́tinu ɔ́ kpó ɖo yě mɛ. Naxilayi ɔ́ wɛ nɔ hɛn ahwanfunnú Jowabu Selúya ví ɔ́ tɔn lɛ́ɛ. Ila Yɛtɛ́ɛ ví ɔ́ ɖo yě mɛ, é kpódó hɛ̌nnumɔ tɔn Galɛ́vu kpó, kpó Ulíi Hitíti ɔ́ kpó. Yě bǐ kplékplé bló gbɛtɔ́ gbantɔ́n-nukún-we (37). Mawu Mavɔmavɔ lɛ́ sin xomɛ dó Izlayɛ́li ví lɛ́ɛ, bó dɔn Davídi dó yě jí, bó ɖɔ n'i ɖɔ: “Yi sɔ́ mɛ e ɖo Izlayɛ́li kpó Judáa kpó lɛ́ɛ sín kɛ́n.” Ahwangán ɖaxó Jowabu ɖo axɔ́sú Davídi kpá ɖo fínɛ́, bɔ axɔ́sú ɔ́ ɖɔ n'i ɖɔ: “Yi gbɔn akɔta e ɖo Izlayɛ́li lɛ́ɛ bǐ mɛ, bó sɔ́ mɛ lɛ́ɛ sín kɛ́n, sín Dan ɖo totaligbé káká wá Bɛ̌-Ceva ɖo tofɔligbé, bónú má tunwun mɛ nabí e ɖo to ɔ́ mɛ é.” Jowabu ɖɔ nú axɔ́sú ɔ́ ɖɔ: “Mawu Mavɔmavɔ, Mawu mɛtɔn ní bló bónú togun ɔ́ mɔ̌hunkɔtɔn donu kanwe ko ní ji d'é jí, bónú mɛ ɖésú ná mɔ ɖó nukún wú. Amɔ̌, Sɛ́mɛɖó, étɛ́wú è jlǒ ná sɔ́ mɛ lɛ́ɛ sín kɛ́n kpɔ́n?” É ɖo mɔ̌ có, xó e axɔ́sú ɔ́ ɖɔ ɔ́, é ɖɔ wɛ; Jowabu kpó ahwangán lɛ́ɛ kpó sixú gbɛ́ ǎ; énɛ́ ɔ́, yě gbɔ bo gosín gɔ̌n tɔn, bó ɖidó mɛ lɛ́ɛ sín kɛ́n sɔ́ gbé lě e é ɖɔ gbɔn é. Yě dó asá Judɛ́ɛn tɔ ɔ́ bó jɛ mɛ lɛ́ɛ sín kɛ́n sɔ́ jí ɖo Alowɛ́ɛ toxo ɔ́ kpó toxo e ɖo tɔdo ɔ́ tɛ́ntin ɔ́ kpó mɛ. Yě gbɔn akɔta Gadi tɔn yíkúngban jí ɖidó Yazɛ́ɛ. Yě byɔ́ Galadi yíkúngban jí, bó yi Hitíti lɛ́ɛ sín tomɛ. Yě yi Kadɛ́ci, bó yi Dan-Yaani, kpó toxo e lɛ́ lɛ̌ dó e lɛ́ɛ kpó mɛ, bó wá yi Sidɔ́ɔn. Yě lɛ́ yi toxo e è mɛ ahohó lɛ́ lɛ̌ dó ɖo Tíi ɔ́ mɛ, bó gbɔn Hivíti lɛ́ɛ kpó Kanáanu lɛ́ɛ kpó sín toxo lɛ́ɛ bǐ mɛ, bó wá fó dó Bɛ̌-Ceva, ɖo Judáa sín tofɔligbé. Sun tɛ́nnɛ azǎn ko wɛ yě zě ɖó te bo gbɔn to ɔ́ bǐ mɛ káká wá Jeluzalɛ́mu. Jowabu ɖó lě e é sɔ́ mɛ lɛ́ɛ sín kɛ́n gbɔn ɔ́ sín gbe nú axɔ́sú ɔ́. É mɔ gbɛtɔ́ e hɛn ɔ́, é ná sixú yi fun ahwan ɔ́ adɔ̌kpo kanɖé (800.000) ɖo Izlayɛ́li, bó mɔ gbɛtɔ́ adɔ̌kpo koatɔ́n (500.000) ɖo Judáa. Ée Davídi sɔ́ mɛ lɛ́ɛ sín kɛ́n fó ɔ́, hǔn tɔn jɛ xixo jí, bɔ é ɖɔ nú Mawu Mavɔmavɔ ɖɔ: “Nǔ énɛ́ e un wa ɔ́, hwɛ ɖaxó ɖokpó wɛ un hu dó we. Din ɔ́, Mawu Mavɔmavɔ, kɛnklɛ́n zé hwɛ kɛ mɛsɛntɔ́ towe, ɖó taɖunɔnú ɖésú wɛ un wa.” Ée Davídi fɔ́n ayǐhɔ́ngbe tɔn ɔ́, Mawu Mavɔmavɔ ɖɔ xó nú Gadi gbeyíɖɔ nǔmɔtɔ́ Davídi tɔn. Mawu Mavɔmavɔ ɖɔ n'i ɖɔ é ní yi ɖɔ nú Davídi ɖɔ: “Un sɔ́ awě atɔn ɖó te nú we. A nǎ zě ɖokpó, bɔ un ná sɛ́ dó we.” Ée Mavɔmavɔ ɖɔ mɔ̌ nú Gadi ɔ́, é yi Davídi gɔ́n, bó wlí nǔ e Mavɔmavɔ ɖɔ n'i ɔ́ ɖɔ n'i. É kanbyɔ́ ɛ ɖɔ: “A jlǒ ɖɔ adɔ ní tɔ́n ɖo to towe mɛ xɔ xwe tɛ́nwe a? Abǐ a jlǒ ná hɔn ɖo kɛntɔ́ towe lɛ́ɛ nukɔn káká nú sun atɔn a? Abǐ a jlǒ ɖɔ jɛmɛjí ná nɔ to towe jí káká nú azǎn atɔn a? Lin tamɛ kpɔ́n ganjí, bó ɖɔ nǔ e un ná yi ɖɔ nú mɛ e sɛ́ mì dó ɔ́.” Davídi ɖɔ nú Gadi ɖɔ: “Ado ɖaxó ɖé ɖo huhu mì wɛ. Amɔ̌, un mɔ ɖɔ un jɛ Mawu Mavɔmavɔ lɔ mɛ ɔ́, é nyɔ́ hú un jɛ gbɛtɔ́ lɔ mɛ, ɖó Mawu Mavɔmavɔ nɔ́ kú nǔbláwǔ nú mɛ ɖésú.” Mawu Mavɔmavɔ sɛ́ jɛmɛjí dó Izlayɛ́li to ɔ́ mɛ gbe énɛ́ gbe zǎnzǎn káká wá jɛ hwenu e Mawu Mavɔmavɔ ɖó dó é. Bɛ́ sín Dan káká wá Bɛ̌-Ceva ɔ́, gbɛtɔ́ adɔ̌kpo atɔn děgba we afɔwó (70.000) kú ɖo togun ɔ́ mɛ. Ée wɛnsagun Mawu Mavɔmavɔ tɔn dlɛ́n alɔ dó Jeluzalɛ́mu jí, bó ɖo jɛmɛjí ɔ́ ná sɛ́ dó wɛ ɔ́, Mawu Mavɔmavɔ mɔ ɖɔ fí e émí wa nǔ xá yě jɛ ɔ́ kpé, lobo ɖɔ nú wɛnsagun nǔhɛngblétɔ́ ɔ́ ɖɔ: “É nyɔ́ mɔ̌, zě alɔ dó do.” Hwenɛ́nu ɔ́, wɛnsagun ɔ́ kó sɛkpɔ́ fí e Alona Jebuzinu ɔ́ nɔ́ fún jinukún ɖe é. Ée Davídi mɔ wɛnsagun ɔ́ ɖo kún vívá nú togun ɔ́ wɛ é ɔ́, é ɖɔ nú Mawu Mavɔmavɔ ɖɔ: “Nyi wɛ hu hwɛ, hwɛ ce wɛ. Mɛ énɛ́ lɛ́ɛ ɔ́, xomɛvɔ́nɔ wɛ nú yě. Hǔn nyɛ kpó hɛ̌nnumɔ ce lɛ́ɛ kpó wɛ a nǎ dɔn tó ná.” Gbe énɛ́ gbe ɔ́, Gadi wá Davídi gɔ́n, bó ɖɔ n'i ɖɔ: “Yi gle e mɛ Alona Jebuzinu ɔ́ nɔ́ fún jinukún ɖe é mɛ, bó mɛ vɔ̌sákpe ɖokpó ɖó fínɛ́ nú Mawu Mavɔmavɔ.” Davídi yi gle ɔ́ mɛ lě e Mawu Mavɔmavɔ ɖɔ sɛ́ dó e gbɔn Gadi jí é. Alona ɖo jǐ, bó mɔ axɔ́sú ɔ́ kpó mɛsɛntɔ́ tɔn lɛ́ɛ kpó jǎwe gɔ̌n tɔn, lobo tɔ́n, bó wá jɛ kpo ɖo axɔ́sú ɔ́ sá mɛ, bó xwe agbɔ̌nnusú do. Alona kanbyɔ́ axɔ́sú ɔ́ ɖɔ: “Đagbe wɛ sɛ́mɛɖó ce wá gɔ̌n ce a?” Bɔ Davídi yí gbe n'i ɖɔ: “Gle towe élɔ́ xɔ gbé wɛ un tɔ́n, bó ná mɛ vɔ̌sákpe ɖokpó ɖ'é jí nú Mawu Mavɔmavɔ, bɔ awě e ɖo to ɔ́ xo wɛ ɔ́, ná nɔ te.” Bɔ Alona ɖɔ nú Davídi ɖɔ: “Sɛ́mɛɖó! È nǐ fɔ nǔ e ba wɛ mɛ ɖe lɛ́ɛ bǐ, bó sá vɔ̌ lɛ́ɛ lě e é jló mɛ gbɔn é. Nyibú ce lɛ́ɛ nɛ́ ɖo fínɛ́ nɛ́, é jló mɛ ɔ́, è nǎ zé yě dó sá vɔ̌ ná. Kpo e nyibú lɛ́ɛ nɔ́ dɔn gbɔn nǔkún jí ɔ́ nɛ́ ɖo fínɛ́ nɛ́, é jló mɛ ɔ́, è nǎ zé yě dó flɔ́ myɔ ná. Un ná bǐ mɛ. Sɛ́mɛɖó, Mawu Mavɔmavɔ, Mawu mɛtɔn ná hun xomɛ bo yí vɔ̌ mɛtɔn.” Lo ɔ́, axɔ́sú ɔ́ ɖɔ nú Alona ɖɔ: “Éeǒ, un jló ná xɔ ɖo así towe bó ná sú axɔ́ wɛ. Un jló ná sɔ́ nǔ e mɛ un ma dó nǔ ɖěbǔ ǎ é dó sá vɔ̌ nú Mawu Mavɔmavɔ, Mawu ce ǎ.” Ée Davídi ɖɔ mɔ̌ é ɔ́, é zé gankwɛ́ kanɖé wǒ (50) n'i, bó xɔ gle ɔ́ kpó nyibú lɛ́ɛ kpó. Davídi mɛ vɔ̌sákpe ɔ́ ɖó fínɛ́ nú Mawu Mavɔmavɔ. É sá vɔ̌ e è nɔ dó zo lɛ́ɛ kpó kɔnɖókpɔ́ vɔ́ lɛ́ɛ kpó ɖ'é jí. Énɛ́ ɔ́ gúdo ɔ́, Mawu Mavɔmavɔ fá xomɛ dó to ɔ́ wú, bɔ awě e ɖo Izlayɛ́li to ɔ́ xo wɛ ɔ́ nɔ te. Axɔ́sú Davídi ko kpo; xwe tɔn ko sɛ yi. È na bo bɛ́ avɔ cyɔ́n n'i ɔ́, é nɔ glɔ́n jɔhɔn n'i ǎ. Énɛ́ ɔ́, mɛsɛntɔ́ tɔn lɛ́ɛ ɖɔ n'i ɖɔ: “Sɛ́mɛɖó, mǐ ná yi ba ɖyɔ̌vǐ ɖokpó wá nú mɛ, bónú é ná nɔ wa azɔ̌ nú mɛ; é ná nɔ kpé nukún mɛ wǔ, é ná nɔ mlɔ́ kpɔ́ xá mɛ, bó ná nɔ glɔ́n jɔhɔn nú mɛ.” Ée yě ɖɔ mɔ̌ n'i ɔ́, yě yi ba ɖyɔ̌vǐ e nyɔ́ ɖɛkpɛ ganjí ɔ́ gbɔn Izlayɛ́li to ɔ́ bǐ mɛ, bó mɔ ɖokpó ɖo gletoxo Cunɛ́mu tɔn mɛ; nyǐkɔ tɔn nɔ́ nyí Avicági; yě kplá ɛ wá nú axɔ́sú ɔ́. Đyɔ̌vǐ énɛ́ ɔ́ nyɔ́ ɖɛkpɛ tawun. É nɔ kpé nukún dó axɔ́sú ɔ́ wú, bó nɔ́ wa azɔ̌ n'i; lo ɔ́, axɔ́sú ɔ́ ɖó xó xá ɛ ǎ. Hwenɛ́nu ɖokpó ɔ́, axɔ́sú Davídi sín vǐ Adoniyasi e nɔ tɔn nɔ́ nyí Hagiti ɔ́ bɛ́ goyíyí bó ɖɔ émí wɛ ná nyí axɔ́sú. É ba kɛkɛ́ví ɖokpó kpó sɔ́ kpó, bɔ gbɛtɔ́ kanɖé wǒ (50) ɖo wezun kán wɛ ɖo nukɔn tɔn. Nǔ e wa wɛ é nɔ́ ɖe lɛ́ɛ ɔ́, tɔ́ ɔ́ nɔ́ kɛ nu dó ɖě wú n'i kpɔ́n gbeɖé ɖo gbɛ tɔn mɛ ǎ; é ká nɔ́ kan nǔ e wú é ɖo mɔ̌ wa wɛ ɔ́ byɔ́ ɛ ǎ. Adoniyasi ka nyí mɛɖé bó nyɔ́ ɖɛkpɛ tawun; é wɛ jɛ Abusalɔ́mu nɛgbé. É blá ɖɔ xá ahwangán ɖaxó Jowabu, Selúya ví ɔ́ kpódó vɔ̌sánú-xwlémawutɔ́ Abiyatáa kpó, bɔ yě húzú jɛ jǐ tɔn. Lo ɔ́, vɔ̌sánú-xwlémawutɔ́ Sadɔ́ku kpódó Benayahu Yexoyada ví ɔ́ kpó, kpódó gbeyíɖɔ Mawu tɔn Natáan kpó, kpódó Cimɛ́yi kpó, kpódó Hleyi kpó, kpódó ahwanfuntɔ́ syɛ́nsyɛ́n e nɔ kplá Davídi lɛ́ɛ kpó ɖo jǐ tɔn ǎ. Adoniyasi ylɔ́ agɔ̌ ɖaxó ɖokpó, ɖo awǐnnya Zohelɛti tɔn e ɖo Eyinu-Hlogɛ́li ɔ́ kpá, bó fɔ gbɔ̌, nyibú kpó kanlin e dó jǒ lɛ́ɛ kpó dó sá vɔ̌. É ylɔ́ nɔví tɔn axɔ́sú ɔ́ sín vǐ lɛ́ɛ bǐ, bó ylɔ́ Judáa ví e ɖo azɔ̌ wa nú axɔ́sú ɔ́ wɛ lɛ́ɛ bǐ. Amɔ̌ é ylɔ́ gbeyíɖɔ Mawu tɔn Natáan ǎ, é ylɔ́ Benayahu ǎ, é ylɔ́ ahwanfuntɔ́ syɛ́nsyɛ́n lɛ́ɛ ǎ, é ká ylɔ́ nɔví tɔn Salomɔ́ɔ ɔ́ ǎ. Énɛ́ ɔ́, Natáan ɖɔ nú Bɛtisabe Salomɔ́ɔ sín nɔ ɔ́ ɖɔ: “A ka se ɖɔ Adoniyasi Hagiti ví ɔ́ húzú axɔ́sú cóbɔ aklúnɔ mǐtɔn Davídi ma tunwun a? Din ɔ́, wǎ nú má ɖɔ xó élɔ́ nú we bónú a nǎ hwlɛ́n hwi kpó vǐ towe Salomɔ́ɔ kpó sín gbɛ. Yi axɔ́sú Davídi gɔ́n, bó ɖɔ n'i ɖɔ: ‘Sɛ́mɛɖó, è ɖɔ nú nyɛ mɛsɛntɔ́ mɛtɔn bó xwlé nǔ d'é jí ɖɔ vǐ ce Salomɔ́ɔ wɛ ná wá ɖu axɔ́sú ɖó mɛ tɛn mɛ, bó ná jínjɔ́n axɔ́súzinkpo jí ǎ cé? Nɛ̌ ká gbɔn bɔ Adoniyasi ka ɖo axɔ́sú ɖu wɛ?’ Hwenu e a nǎ kpo ɖo fínɛ́ bó ɖo xó ɖɔ xá axɔ́sú ɔ́ wɛ ɔ́, nyɛ ɖésú ná yi mɔ ɛ, bó ná gɔ́ so nú xó towe.” Ée Bɛtisabe se mɔ̌ ɔ́, é yi axɔ́sú ɔ́ gɔ́n. Axɔ́sú ɔ́ ka ɖo xɔ tɔn mɛ, ɖó é kó kpo bǐ. Đyɔ̌vǐ Avicági Cunɛ́munu ɔ́ ɖo fínɛ́, bó ɖo nukún kpé dó wǔ tɔn wɛ. Ée Bɛtisabe wá ɔ́, é jɛ kpo bo ɖe kɔ́ nú axɔ́sú ɔ́, bɔ é kanbyɔ́ ɛ ɖɔ: “Nɛ̌ wɛ gbɔn nú we?” Bɔ Bɛtisabe yí gbe n'i ɖɔ: “Sɛ́mɛɖó, mɛ ɖésúnɔ ko ɖɔ nú nyɛ mɛsɛntɔ́ mɛtɔn, bó xwlé Mawu Mavɔmavɔ, Mawu mɛtɔn d'é jí ɖɔ vǐ ce Salomɔ́ɔ wɛ ná ɖu axɔ́sú ɖó tɛn mɛtɔn mɛ, bó ná jínjɔ́n zinkpo mɛtɔn jí ǎ cé? Lo ɔ́, Sɛ́mɛɖó, Adoniyasi ko ɖo axɔ́sú ɖu wɛ, bɔ mɛ ka tunwun ǎ! É ylɔ́ agɔ̌ ɖaxó ɖokpó, bó bɛ́ nyibú, gbɔ̌ kpó kanlin e dó jǒ lɛ́ɛ kɔn nyi kpɔ́ dó sá vɔ̌ ná. É ylɔ́ vǐ mɛtɔn lɛ́ɛ bǐ, bó ylɔ́ vɔ̌sánú-xwlémawutɔ́ Abiyatáa, bó ylɔ́ ahwangán ɖaxó Jowabu; é ka ylɔ́ vǐ mɛtɔn Salomɔ́ɔ ǎ. Sɛ́mɛɖó, Izlayɛ́li togun ɔ́ bǐ sín nukún wɛ ɖo jǐ mɛtɔn, bónú mɛ ɖésúnɔ ná ɖɔ mɛ e ná wá jínjɔ́n zinkpo mɛtɔn jí hwenu e è ma sɔ́ ná ɖo fí ǎ é. É ma nyí mɔ̌ ǎ ɔ́, hwenu e mɛ ná wá gosín mǐ mɛ fí ɔ́, è nǎ wa ɖɔ nyɛ kpó vǐ ce Salomɔ́ɔ kpó wa nǔ nyi do, bó ná dó ya nú mǐ.” É kpo ɖo xó ɖɔ xá axɔ́sú ɔ́ wɛ bɔ gbeyíɖɔ Mawu tɔn Natáan wá. È wǎ ɖɔ nú axɔ́sú ɔ́ ɖɔ: “Gbeyíɖɔ Mawu tɔn Natáan wá.” Natáan wá axɔ́sú ɔ́ nukɔn, bo xwe agbɔ̌nnusú do, lobo ɖe kɔ́. Bo ɖɔ n'i ɖɔ: “Sɛ́mɛɖó, mɛ ɖésúnɔ wɛ ɖɔ Adoniyasi ná ɖu axɔ́sú ɖó tɛn mɛtɔn mɛ, bó ná jínjɔ́n zinkpo mɛtɔn jí a? Đó égbé din ɔ́, é yi tɔdo mɛ, bó ylɔ́ agɔ̌ ɖaxó ɖokpó, bó bɛ́ gbɔ̌, nyibú kpó kanlin e dó jǒ lɛ́ɛ kpó kɔn nyi kpɔ́ dó sá vɔ̌ ná. É ylɔ́ vǐ mɛtɔn lɛ́ɛ bǐ, bó ylɔ́ ahwangán lɛ́ɛ, lobo ylɔ́ vɔ̌sánú-xwlémawutɔ́ Abiyatáa bɔ yě ɖo gɔ̌n tɔn bó ɖo nǔ ɖu wɛ, bó ɖo ahan nu wɛ, bó nɔ sú xó ɖɔ: ‘Susu nú axɔ́sú Adoniyasi!’ É ka ylɔ́ nyɛ mɛsɛntɔ́ mɛtɔn ɔ́ ǎ, é ylɔ́ vɔ̌sánú-xwlémawutɔ́ Sadɔ́ku ǎ, é ylɔ́ Benayahu Yexoyada ví ɔ́ ǎ, é ka ylɔ́ vǐ mɛtɔn Salomɔ́ɔ ǎ. Axɔ́sú sɛ́mɛɖó ce jɛ́n ná gbe, bɔ è wa nǔ gbɔn mɔ̌ a? Sɛ́mɛɖó ce jɛ́n sɔ́ mɛ e ná yi zinkpo mɛtɔn jí, ɖó tɛn mɛtɔn mɛ é, bó má ká ɖɔ xó ɖé nú mǐ mɛsɛntɔ́ tɔn lɛ́ɛ a? Nǔ ká sixú nyí mɔ̌ a?” Ée Natáan ɖɔ mɔ̌ ɔ́, axɔ́sú Davídi ɖɔ è nǐ yi ylɔ́ Bɛtisabe wá nú émí. Bɔ Bɛtisabe wá bó yi axɔ́sú ɔ́ gɔ́n. Bɔ axɔ́sú ɔ́ xwlé Mawu bó ɖɔ: “Mawu Mavɔmavɔ e hwlɛ́n mì sín nǔgbomɛ lɛ́ɛ bǐ mɛ ɔ́ ɖo gbɛ. Lě e un ko xwlé Mawu Mavɔmavɔ, Mawu Izlayɛ́li tɔn ɔ́, bó ɖɔ nú we ɖɔ vǐ towe Salomɔ́ɔ ná ɖu axɔ́sú ɖó tɛn ce mɛ, bó ná jínjɔ́n zinkpo ce jí ɔ́, un ná bló égbé.” Ée Bɛtisabe se mɔ̌ ɔ́, é jɛ kpo bó ɖe kɔ́ nú axɔ́sú ɔ́, bó ɖɔ: “Susu nú sɛ́mɛɖó ce axɔ́sú Davídi káká sɔ́yi.” Énɛ́ ɔ́ gúdo ɔ́, axɔ́sú Davídi ɖɔ è nǐ yi ylɔ́ vɔ̌sánú-xwlémawutɔ́ Sadɔ́ku, kpódó gbeyíɖɔ Mawu tɔn Natáan kpó, kpódó Benayahu Yexoyada ví ɔ́ kpó wá nú émí; ée yě wá ɔ́, é ɖɔ nú yě ɖɔ: “Mi kplá sɔ́ja ce e nɔ nya xɛ ɖo jǐ ce lɛ́ɛ, bónú mi zé vǐ ce Salomɔ́ɔ ɖó sɔ́tócí ce jí, bó kplá ɛ yi tɔjɔtɛn Gixɔ́ni kɔn. Nú mi jɛ fínɛ́ ɔ́, vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó ná kɔn ami dó ta n'i, bó ná sɔ́ ɛ axɔ́sú ɖó Izlayɛ́li togun ɔ́ nu. Mi ná kún lanzo, bó ná sú xó ɖɔ: ‘Susu nú axɔ́sú Salomɔ́ɔ!’ Énɛ́ ɔ́ gúdo ɔ́, mi ná xwedó e wá, bɔ é ná jínjɔ́n axɔ́súzinkpo ce jí, bó ná ɖu axɔ́sú ɖó tɛn ce mɛ. É wɛ un sɔ́ bɔ é ná ɖu gǎn ɖo Izlayɛ́li togun ɔ́ kpódó Judáa togun ɔ́ kpó nu.” Ée axɔ́sú ɔ́ ɖɔ mɔ̌ ɔ́, Benayahu Yexoyada ví ɔ́ yí gbe n'i ɖɔ: “Sɛ́mɛɖó, è ɖɔ xó ganjí! Mawu Mavɔmavɔ, Mawu mɛtɔn ɖésú wɛ ɖɔ xó gbɔn jǐ mɛtɔn. Mawu Mavɔmavɔ ní nɔ kpɔ́ xá Salomɔ́ɔ lě e é nɔ kpɔ́ xá mɛ gbɔn é. É ní bló bónú axɔ́súɖuɖu Salomɔ́ɔ tɔn ní ɖó susu hú gǎn mɛtɔn!” Vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó, kpódó Benayahu Yexoyada ví ɔ́ kpó, kpódó Keleti lɛ́ɛ kpó, kpódó sɔ́ja Pɛlɛ́ti ví e nɔ nya xɛ ɖo axɔ́sú ɔ́ jí lɛ́ɛ kpó yi mɔ Salomɔ́ɔ, bó sɔ́ ɛ ɖó axɔ́sú Davídi sín sɔ́tócí jí, bó kplá ɛ yi tɔjɔtɛn Gixɔ́ni kɔn. Vɔ̌sánú-xwlémawutɔ́ Sadɔ́ku ka ko zé lanzo ɖé ɖo goxɔ Mawu tɔn ɔ́ mɛ, bɔ ami ɖ'é mɛ. É kɔn ami ɔ́ dó ta nú Salomɔ́ɔ bó sɔ́ ɛ axɔ́sú. Énɛ́ ɔ́ gúdo ɔ́, è kún lanzo, bɔ togun ɔ́ bǐ ɖɔ: “Susu nú axɔ́sú Salomɔ́ɔ.” Togun ɔ́ bǐ xwedó e yi toxo ɔ́ mɛ, bó ɖo kpete kún wɛ, bó ɖo awǎ jɛ wɛ mɔ̌hunkɔtɔn. Yě ɖo awǒbóbó kpa wɛ bó ɖo xó sú wɛ káká bɔ ayǐkúngban sísɔ́. Nǔ ɖu fó wɛ Adoniyasi kpódó mɛ e é ylɔ́ bɔ yě wá ɖo agɔ̌ ɖu xá ɛ wɛ lɛ́ɛ kpó ɖe kɛ́ɖɛ́, bó se zǐngídi ɔ́. Ée Jowabu se lanzo ɔ́ sín gbe ɔ́, é ɖɔ: “Nɛ̌ ka gbɔn bɔ zǐngídi ɖo toxo ɔ́ mɛ sɔ mɔ̌?” Xó ɔ́ ɖɔ wɛ é ɖe bɔ Jonatáan vɔ̌sánú-xwlémawutɔ́ Abiyatáa ví ɔ́ wá, bɔ Adoniyasi ɖɔ n'i ɖɔ: “Sɛ wá gɔ̌n ce, ɖó mɛjɔmɛ ɖokpó wɛ nú we, xó ɖagbe ɖé jɛ́n wɛ a nǎ kó hɛn wá din.” Bɔ Jonatáan yí gbe n'i ɖɔ: “Gbeɖé, xó ɖagbe ɖé wɛ ǎ! Sɛ́mɛɖó mǐtɔn Davídi wɛ sɔ́ Salomɔ́ɔ axɔ́sú. É ɖɔ nú vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó, kpódó Benayahu Yexoyada ví ɔ́ kpó, kpódó Keleti lɛ́ɛ kpó, kpódó Pɛlɛ́tinu lɛ́ɛ kpó ɖɔ yě ní kplá Salomɔ́ɔ, bɔ yě sɔ́ ɛ ɖó axɔ́sú Davídi sín sɔ́tócí jí. Bɔ vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó kɔn ami dó ta n'i, bó sɔ́ ɛ axɔ́sú ɖo tɔjɔtɛn Gixɔ́ni kɔn. Yě lɛ́ kɔ sín fínɛ́, bó ɖidó kpó awǎjijɛ kpó, bɔ toxo ɔ́ bǐ xozǐn. Zǐngídi e se wɛ mi ɖe ɔ́ nɛ́. Salomɔ́ɔ ko ɖo zinkpo ɔ́ jí lɔ. Bɔ mɛsɛntɔ́ axɔ́sú ɔ́ tɔn lɛ́ɛ wá xo ɖɛ nú sɛ́mɛɖó mǐtɔn axɔ́sú Davídi ɖɔ jí: ‘Mawu mɛtɔn ní bló bónú Salomɔ́ɔ sín nyǐkɔ ní gba kpé hú nyǐkɔ mɛtɔn. Ní bló bónú axɔ́súɖuɖu tɔn ní ɖó susu hú gǎn axɔ́súɖuɖu mɛtɔn!’ Énɛ́ ɔ́ gúdo ɔ́, axɔ́sú ɔ́ xwe agbɔ̌nnusú do ɖo zan tɔn jí, bó ɖɔ: ‘Susu nú Mawu Mavɔmavɔ, Mawu Izlayɛ́li tɔn. É ná mɛ e ná nɔ zinkpo ce jí ɔ́ mì égbé, bɔ nyɛ ɖésú mɔ.’ ” Ée mɛ e Adoniyasi ylɔ́ wá agɔ̌ gbé lɛ́ɛ se mɔ̌ ɔ́, xɛsi jɛ yě bǐ jí, bɔ yě jɛ te sí jí, bɔ mɛ ɖokpó ɖokpó wlí ali tɔn. Adoniyasi lɔmɔ̌ ɖi xɛsi nú Salomɔ́ɔ bó yi goxɔ Mawu Mavɔmavɔ tɔn ɔ́ mɛ, bó zunfán vɔ̌sákpe ɔ́ sín zo lɛ́ɛ. È wǎ ɖɔ nú Salomɔ́ɔ ɖɔ: “Kpɔ́n! Adoniyasi ɖo xɛsi ɖi nú we wɛ, bó yi goxɔ Mawu tɔn ɔ́ mɛ, bó zunfán vɔ̌sákpe ɔ́ sín zo lɛ́ɛ, bó ɖɔ ényí axɔ́sú Salomɔ́ɔ ma xwlé nǔ égbé ɖɔ émí kún ná hu émí ó ǎ ɔ́, émí kún ná gosín fínɛ́ ó.” Énɛ́ ɔ́, Salomɔ́ɔ ɖɔ: “Nú é zán ayixa ɖagbe ɔ́, ɖa e ɖo ta tɔn ɔ́ ɖokpó ná j'ayǐ ǎ; amɔ̌ é zán ayixa nyanya ɔ́, é ná kú.” Axɔ́sú Salomɔ́ɔ sɛ́ mɛ dó bɔ è yi kplá ɛ sín vɔ̌sákpe ɔ́ kɔn wá; ée é wá ɔ́, é ɖe kɔ́ nú axɔ́sú Salomɔ́ɔ, bɔ Salomɔ́ɔ ɖɔ é ní yi xwé tɔn gbe. Davídi mɔ ɖɔ kúzán émítɔn kó sɛkpɔ́, bó ɖɔ lě e nǔ ná nɔ gbɔn ɔ́ nú vǐ tɔn Salomɔ́ɔ. É ɖɔ: “Un ɖo nǎ yi wɛ; ɖǒ akɔ́nkpinkpan, bó wa nǔ súnnu ɖɔhun. Nɔ gbejí nú Mawu Mavɔmavɔ, Mawu towe: nɔ wa jlǒ tɔn hwebǐnu, nɔ nyi sɛ́n tɔn lɛ́ɛ, nɔ wa nǔ e é zɔ́n lɛ́ɛ, nɔ xwedó gbetakɛ́n tɔn lɛ́ɛ kpó kplɔ́n tɔn lɛ́ɛ kpó lě e è wlǎn dó Mɔyízi sɛ́n ɔ́ mɛ gbɔn é. A nɔ wa nǔ mɔ̌ ɔ́, a nǎ mɔ nu nú nǔ e a nǎ wa lɛ́ɛ bǐ. Énɛ́ ɔ́, Mawu Mavɔmavɔ ná ɖe akpá e é dó nú mì ɔ́. É dó akpá nú mì ɖɔ: ‘Ényí vǐ towe lɛ́ɛ hɛn yěɖée, bó nɔ gbejí nú mì kpódó ayixa yětɔn bǐ kpó, kpódó lǐndɔ̌n yětɔn bǐ kpó ɔ́, a nǎ ba mɛ e ná nɔ tɛn towe mɛ ɖo axɔ́súzinkpo Izlayɛ́li tɔn ɔ́ jí ɔ́ kpo gbeɖé ɖo yě mɛ ǎ.’ A tunwun nǔ e Jowabu Selúya ví ɔ́ wa xá mì ɔ́, nǔ e é wa xá ahwangán Izlayɛ́li tɔn we Avunɛ́ɛ Nɛ̌ɛ ví ɔ́, kpódó Amasa Yɛtɛ́ɛ ví ɔ́ kpó é. Vivo mɛ wɛ mɛ bǐ ɖe bɔ é tɔ́n ahwan yě ahwan hwenu wɛ yě ɖe ɖɔhun, bó hu yě, lobo va hun yětɔn dó gǒjíblánú e ɖo alin tɔn é wú, bó va dó afɔkpa e ɖo afɔ tɔn lɛ́ɛ wú. A nǎ zé nǔnywɛ́ towe dó wa azɔ̌ ná; a nǎ jó e dó bɔ é ná kpo nyɔ̌xó, bó ná kú sɛ́ kú ǎ. A nǎ flín Baaziláyi Galadinu ɔ́ sín vǐ lɛ́ɛ; a nǎ nyɔ̌ xomɛ dó yě wú, bɔ yě ná nɔ ɖu nǔ xá we; ɖó hwenu e un ɖo hinhɔn ɖo nɔví towe Abusalɔ́mu nukɔn wɛ ɔ́, yě wɛ gɔ́ alɔ nú mì. Gela e nɔ́ nɔ Baxulimu ɖo Bɛnjamɛ́ɛ yíkúngban jí ɔ́ sín vǐ Cimɛ́yi nɛ́ ɖo akpá towe nɛ́. Gbe e gbe un hɔn xwe Maxanayímu ɔ́, é dó nu mì bɔ é syɛ́n. Amɔ̌, é wá kpé mì ɖo Judɛ́ɛn tɔ ɔ́ tó hwenu e un lɛ́ kɔ é, bɔ un ko xwlé Mawu Mavɔmavɔ n'i ɖɔ un kún ná hu i ó. Din ɔ́, ma gɔn tó dɔn n'i ó, ɖó gbɛtɔ́ nǔnywɛ́tɔ́ wɛ nú we, bɔ a tunwun lě e a nǎ wa nǔ xá ɛ gbɔn é. É kó kpo bǐ mɔ̌, có a ka ná tɛ́nkpɔ́n bó hu i.” Davídi zán wá kú, bɔ è sɔ́ ɛ ɖó Davídi Toxo mɛ ɖo Jeluzalɛ́mu. Xwe kanɖé (40) wɛ Davídi ɖu axɔ́sú ɖo Izlayɛ́li togun ɔ́ nu xɔ: é ɖu axɔ́sú ɖo Eblɔ́n nú xwe tɛ́nwe, bó ɖu ɖo Jeluzalɛ́mu nú xwe gban-nukún-atɔn (33). Salomɔ́ɔ yi axɔ́súzinkpo tɔ́ tɔn Davídi tɔn jí, bɔ axɔ́súɖuɖu tɔn jínjɔ́n ayǐ tawun. É wá su gbe ɖokpó, bɔ Adoniyasi e nɔ tɔn nɔ nyí Hagiti ɔ́ yi Bɛtisabe Salomɔ́ɔ sín nɔ gɔ́n. Ée nyɔ̌nu ɔ́ mɔ ɛ ɔ́, é kanbyɔ́ ɛ ɖɔ: “Đagbe wɛ a wǎ gɔ̌n ce a?” Bɔ é yí gbe n'i ɖɔ: “Ɛɛn ɖagbe wɛ. Xó ɖé wɛ un jló ná ɖɔ nú we.” Bɔ nyɔ̌nu ɔ́ ɖɔ n'i ɖɔ: “Bo ɖɔ xó ɔ́.” Ée é ɖɔ mɔ̌ é ɔ́, é ɖɔ: “Hwi ɖésú tunwun ɖɔ nyɛ wɛ ɖó ná ɖu axɔ́sú ɔ́ bɔ Izlayɛ́li to ɔ́ bǐ sín nukún kó ɖo jǐ ce; nǔ ká sɔ́ wá nyí gbɔn mɔ̌ ǎ. Axɔ́súɖuɖu ɔ́ wá lílɛ́ jɛ nɔví ce jí. Un mɔ ɖɔ lě e Mawu Mavɔmavɔ jló gbɔn ɔ́ nɛ́. Din ɔ́, un ná byɔ́ nǔ ɖokpó we, ma gbɛ́ ó!” Bɔ nyɔ̌nu ɔ́ ɖɔ n'i ɖɔ: “Bo ɖɔ nǔ ɔ́.” Bɔ é ɖɔ: “Kɛnklɛ́n yi ɖɔ nú axɔ́sú Salomɔ́ɔ ɖɔ ní ná mì Avicági Cunɛ́munu ɔ́ bónú ma da; ɖó nú a byɔ́ nǔ Salomɔ́ɔ ɔ́, é ná gbɛ́ ǎ.” Bɛtisabe ka ɖɔ n'i ɖɔ: “É nyɔ́, un ná yi mɔ axɔ́sú ɔ́ nú we.” Bɛtisabe yi axɔ́sú Salomɔ́ɔ gɔ́n, bó ná ɖɔ Adoniyasi sín xó ɔ́ n'i. Axɔ́sú ɔ́ sí te sín axɔ́súzinkpo tɔn jí, bó yi kpé e, lobo ɖe kɔ́, bó lɛ́ wá jínjɔ́n ayǐ. È nǎ zinkpo axɔ́sú ɔ́ sín nɔ, bɔ é jínjɔ́n ayǐ ɖo ɖisí tɔn xwé. Bo ɖɔ n'i ɖɔ: “Un ɖo nǔ kpɛví ɖé ná byɔ́ mɛ wɛ, è ma ka tɛ mì ó.” Bɔ axɔ́sú ɔ́ ɖɔ n'i ɖɔ: “Nǎna, bo byɔ́ nǔ e ba wɛ a ɖe é! Un ná tɛ we ǎ.” Bɔ nɔ tɔn ɖɔ n'i ɖɔ: “Un ba ɖɔ è nǐ sɔ́ Avicági Cunɛ́munu ɔ́ jó nú nɔví mɛtɔn Adoniyasi nú é ní nyí asi tɔn.” Axɔ́sú Salomɔ́ɔ yí gbe nú nɔ tɔn bo ɖɔ: “Aniwú wɛ a ɖo Avicági Cunɛ́munu ɔ́ byɔ́ nú Adoniyasi wɛ? Gbɔ bo byɔ́ axɔ́súzinkpo ɔ́ n'i bó, ɖó fofó ce wɛ. Byɔ̌ axɔ́súzinkpo ɔ́ nú é kpó vɔ̌sánú-xwlémawutɔ́ Abiyatáa kpó, kpódó Jowabu ahwangán ɖaxó ɔ́ kpó.” Énɛ́ ɔ́, axɔ́sú Salomɔ́ɔ xwlé Mawu Mavɔmavɔ ɖɔ: “Nú un ma hu Adoniyasi ɖó nǔ énɛ́ e é byɔ́ ɔ́ wú ǎ hǔn, Mawu ní dɔn tó nú mì nú é ní syɛ́n hú tódɔnnúmɛ lɛ́ɛ bǐ. Din ɔ́, un xwlé Mawu ɖɔ: Mawu Mavɔmavɔ ɖo gbɛ; é wɛ bló bɔ axɔ́súɖuɖu ce lí dǒ. É sɔ́ mì jínjɔ́n axɔ́súzinkpo tɔ́ ce Davídi tɔn jí. É wɛ dó akpá nú mì ɖɔ nyi wɛ ná ɖu axɔ́sú, bɔ vǐ ce lɛ́ɛ lɔ ná ɖu káká sɔ́yi. Adoniyasi ná kú égbé.” Énɛ́ ɔ́, axɔ́sú Salomɔ́ɔ sɛ́ Benayahu Yexoyada ví ɔ́ dó, bɔ é yi hu Adoniyasi. Lě e Adoniyasi kú gbɔn é nɛ́. Énɛ́ ɔ́ gúdo ɔ́, axɔ́sú Salomɔ́ɔ ɖɔ nú vɔ̌sánú-xwlémawutɔ́ Abiyatáa ɖɔ: “Gosín fí, bó yi ayǐkúngban towe jí, ɖo Anatɔ́ti toxo mɛ, ɖó hu wɛ è ɖǒ ná hu we. Un ka ɖo nǎ hu we wɛ égbé ǎ, ɖó a hɛn akɔjijɛgbá Aklúnɔ, Mawu Mavɔmavɔ tɔn ɖo tɔ́ ce Davídi nukɔn; a ka lɛ́ ji ya lɛ́ɛ bǐ xá tɔ́ ce.” Énɛ́ ɔ́, Salomɔ́ɔ yí vɔ̌sánú-xwlémawutɔ́ sín azɔ̌ e Abiyatáa nɔ wa lɛ́ɛ sín así tɔn, bónú xó e Mawu Mavɔmavɔ ko ɖɔ ɖ'ayǐ dó vɔ̌sánú-xwlémawutɔ́ ɖaxó Eli sín xwé ɔ́ wú ɖo Silóo ɔ́ ná dó jɛ. Ée Jowabu se nǔ e jɛ dó Adoniyasi kpó Abiyatáa kpó jí é ɔ́, é hɔn yi goxɔ Mawu Mavɔmavɔ tɔn mɛ, bó zunfán vɔ̌sákpe ɔ́ sín zo lɛ́ɛ, ɖó Adoniyasi jí wɛ é nɔ; é nɔ Abusalɔ́mu jí ǎ. È wǎ yi ɖɔ nú axɔ́sú Salomɔ́ɔ ɖɔ Jowabu yi goxɔ Mawu Mavɔmavɔ tɔn mɛ, bó zunfán vɔ̌sákpe ɔ́ sín zo lɛ́ɛ. Ée Salomɔ́ɔ se mɔ̌ ɔ́, é sɛ́ Benayahu Yexoyada vǐ ɔ́ dó, bó ɖɔ n'i ɖɔ é ní yi hu i. Bɔ Benayahu yi goxɔ Mawu Mavɔmavɔ tɔn ɔ́ mɛ, bó ɖɔ nú Jowabu ɖɔ axɔ́sú ɔ́ ɖɔ é ní tɔ́n sín fí. Jowabu ka gbɛ́, bó ɖɔ fí wɛ émí ná kú jɛ. Ée é ɖɔ mɔ̌ ɔ́, Benayahu lɛ́ kɔ yi mɔ axɔ́sú ɔ́ bó ɖó gbe n'i. Axɔ́sú ɔ́ ka ɖɔ nú Benayahu ɖɔ: “Blǒ lě e é ɖɔ gbɔn ɔ́; hu i bo ɖi i. Énɛ́ ɔ́, xomɛvɔ́nɔ we e Jowabu hu lɛ́ɛ ɔ́, hwɛ tɔn ná nɔ kɔ nú nyɛ kpó tɔ́ ce sín mɛ lɛ́ɛ kpó ǎ. Mawu Mavɔmavɔ ná byɔ́ mɛ e sín hun é kɔn nyi ayǐ lɛ́ɛ sín axɔ́ ɛ, ɖó tɔ́ ce Davídi tunwun ǎ, bɔ é gbo gbe gbɛtɔ́ e nyɔ́ hú i bó nɔ wa nǔ jlɔ́jlɔ́ hú i ɔ́ we; yě wɛ nyí ahwangán Izlayɛ́li tɔn Avunɛ́ɛ Nɛ̌ɛ ví ɔ́, kpódó ahwangán Judáa tɔn Amasa Yɛtɛ́ɛ ví ɔ́ kpó. Hun yětɔn sín axɔ́ ɖo kɔ nú Jowabu, bó ɖo kɔ nú vǐ tɔn lɛ́ɛ káká sɔ́yi. Amɔ̌, Mawu Mavɔmavɔ ná kɔn fífá dó to ɔ́ mɛ, nú Davídi, nú vǐ tɔn lɛ́ɛ, nú xwédo tɔn, kpódó axɔ́súzinkpo tɔn kpó káká sɔ́yi.” Benayahu Yexoyada ví ɔ́ yi hu Jowabu bo ɖi i dó xwé tɔn gbe, ɖo gbětótló mɛ. Axɔ́sú ɔ́ sɔ́ Benayahu ɖó ahwangɔnu ɔ́ nu, ɖó Jowabu tɛnmɛ, bó sɔ́ vɔ̌sánú-xwlémawutɔ́ Sadɔ́ku ɖó Abiyatáa tɛnmɛ. Axɔ́sú Salomɔ́ɔ zɔ́n bɔ è yi kplá Cimɛ́yi wá n'i, bɔ é ɖɔ n'i ɖɔ: “Gbǎ xɔ ɖokpó ɖó Jeluzalɛ́mu, bó nɔ fínɛ́. Ma ka tɔ́n sín toxo ɔ́ mɛ, bó yi fí ɖé ó. Tunwun ganjí ɖɔ gbe e gbe émí ná tɔ́n bó d'asá Sedlɔ́n tɔ ɔ́, émí ná kú dandan. Énɛ́ ɔ́, a ka ná tunwun ɖɔ émí ɖésú wɛ sɔ́ émíɖée nyi gbě nɛ́.” Cimɛ́yi yí gbe nú axɔ́sú ɔ́ ɖɔ: “É nyɔ́! Nyɛ mɛsɛntɔ́ mɛtɔn ná bló nǔ e mɛ ɖɔ é.” Énɛ́ ɔ́, Cimɛ́yi nɔ Jeluzalɛ́mu fínɛ́ sɛ yi. Ée é bló xwe atɔn mɔ̌ ɔ́, kannumɔ tɔn we hɔn yi Akíci Gati xɔ́sú Maaka sín vǐ ɔ́ gɔ́n. È wǎ ɖɔ nú Cimɛ́yi ɖɔ kannumɔ tɔn lɛ́ɛ ɖo Gati. Ée Cimɛ́yi se mɔ̌ ɔ́, é sɔ́ nǔ bó blá akpa nú tócí tɔn, bó xá jí ɖidó Akíci gɔ́n ɖo Gati, bó ná yi kplá kannumɔ tɔn lɛ́ɛ. É yi bó kplá yě wá. È yi ɖɔ nú axɔ́sú Salomɔ́ɔ ɖɔ Cimɛ́yi gosín Jeluzalɛ́mu bo yi Gati bo ko lɛ́ kɔ wá. Ée axɔ́sú ɔ́ se mɔ̌ ɔ́, é sɛ́ mɛ dó Cimɛ́yi bɔ é wá, bɔ é kanbyɔ́ ɛ ɖɔ: “Un ma ɖɔ nú we ɖ'ayǐ ɖɔ hwi ní xwlé Mawu Mavɔmavɔ nú mì ɖɔ nú émí tɔ́n sín Jeluzalɛ́mu bó yi fí ɖěbǔ ɔ́, émí ná kú, bɔ a yǐ gbe nú mì ɖɔ: ‘É nyɔ́, un se’ ǎ cé? Bɔ aniwú wɛ a ma xwedó nǔ e a ɖɔ bo xwlé Mawu Mavɔmavɔ d'é jí ɔ́ ǎ? Aniwú wɛ a ma xwedó nǔ e un ɖɔ nú we ɔ́ ǎ? Nǔ e a wa xá tɔ́ ce Davídi ɔ́, a tunwun dó ayi towe mɛ ganjí. Mawu Mavɔmavɔ ná sú nǔ énɛ́ ɔ́ e a wa ɔ́ sín axɔ́ we. É ká ná kɔn nyɔ̌ná dó nyɛ axɔ́sú Salomɔ́ɔ jí, bó ná bló bɔ axɔ́súɖuɖu Davídi tɔn ná jínjɔ́n ayǐ káká sɔ́yi.” Ée axɔ́sú ɔ́ ɖɔ mɔ̌ ɔ́, é ɖe gbe nú Benayahu Yexoyada ví ɔ́, bɔ é kplá Cimɛ́yi tɔ́n, bó yi hu i. Bɛ́ sín hwenɛ́nu ɔ́, acɛkpikpa Salomɔ́ɔ tɔn jínjɔ́n ayǐ ganjí. Axɔ́sú Salomɔ́ɔ da axɔ́sú Ejípu tɔn sín vǐ ɖokpó dó jɛ akɔ xá ɛ. É kplá asi tɔn ɔ́ yi ɖó Davídi Toxo mɛ, ɖo Jeluzalɛ́mu, có bó wá gbá xɔ é ɖésúnɔ tɔn ɔ́ fó, bó gbá sinsɛnxɔ Mawu Mavɔmavɔ tɔn, lobo mɛ dǒ lɛ́ lɛ̌ dó Jeluzalɛ́mu toxo ɔ́. Vɔ̌sákpe e gbɔn só jí só jí lɛ́ɛ jí wɛ togun ɔ́ nɔ́ sá vɔ̌ nú Mawu Mavɔmavɔ ɖe hwe énɛ́ ɔ́ nu, ɖó è ko gbá sinsɛnxɔ nú Mawu Mavɔmavɔ ǎ. Salomɔ́ɔ yí wǎn nú Mawu Mavɔmavɔ, bó nɔ́ xwedó nǔ e tɔ́ tɔn Davídi ɖɔ é. Lo ɔ́, vɔ̌sákpe e ɖo só jí lɛ́ɛ jí wɛ élɔ́ nɔ́ xwlé vɔ̌sánú lɛ́ɛ kpó zǎlínkpɔ́n kpó Mawu ɖe. É wá su gbe ɖokpó, bɔ axɔ́sú ɔ́ ɖidó Gabawɔ́ɔn, bó ná yi sá vɔ̌ nú Mawu ɖo fínɛ́, ɖó vɔ̌sákpe énɛ́ ɔ́ wɛ nyí vɔ̌sákpe e ɖo tají é. É kó dó vɔ̌sánú maxamaxa zo nú Mawu ɖo vɔ̌sákpe e ɖo tɛn énɛ́ ɔ́ mɛ é jí ɖ'ayǐ. Hwenu e Salomɔ́ɔ ɖo Gabawɔ́ɔn ɔ́, Mawu Mavɔmavɔ wá xo dlɔ̌ ɛ zǎn mɛ, bó ɖɔ n'i ɖɔ: “Byɔ̌ nǔ e jló we é, nú má ná we.” Ée Mawu Mavɔmavɔ ɖɔ mɔ̌ ɔ́, Salomɔ́ɔ ɖɔ n'i ɖɔ: “A nyɔ̌ xomɛ dó mɛsɛntɔ́ towe tɔ́ ce Davídi wú tawun. Đó Davídi ɔ́, gbɛtɔ́ ɖé wɛ bɔ è nǎ ɖeji dó wǔ tɔn; é nɔ wa nǔ jlɔ́jlɔ́, bó sɔ́ xomɛ ɖó wɛn nú we, bɔ a nyɔ̌ xomɛ énɛ́ ɔ́ dó wǔ tɔn, bó ná ɛ vǐ súnnu ɖokpó, bɔ é wá jínjɔ́n axɔ́súzinkpo tɔn jí lě e mɔ gbɔn wɛ è ɖe égbé é. Mawu Mavɔmavɔ, Mawu ce, din ɔ́, a sɔ́ nyɛ mɛsɛntɔ́ towe dó ɖó axɔ́sú dó tɔ́ ce Davídi tɛnmɛ. Yɔkpɔ́vú wɛ un ka nyí. Un tunwun lě e un ná wa azɔ̌ énɛ́ ɔ́ gbɔn ɔ́ ǎ. Nyɛ mɛsɛntɔ́ towe ɔ́, un wá mɔ nyɛɖée ɖo togun e a sɔ́ ɔ́ nu. Yě sukpɔ́ ɖésú, bɔ è sixú tunwun nabí e yě nyí é tawun ǎ. Énɛ́ ɔ́ wú ɔ́, nǎ nǔnywɛ́ e nyɛ mɛsɛntɔ́ towe ná sixú ɖó bó nɔ togun towe nu, bó ná sixú tunwun nǔ ɖagbe kpó nǔ nyanya kpó. Énɛ́ ɔ́ mɛ vo ɔ́, mɛ ɖěbǔ sixú nɔ togun towe wɔ̌buwɔ́bú énɛ́ ɔ́ nu ǎ.” Nǔ énɛ́ e Salomɔ́ɔ byɔ́ ɔ́ nyɔ́ Mawu Mavɔmavɔ nukún mɛ, bɔ é ɖɔ n'i ɖɔ: “A byɔ́ jidɔ́ ǎ, a byɔ́ dɔkun ǎ, a ka byɔ́ kɛntɔ́ towe lɛ́ɛ sín kú ǎ; a byɔ́ nǔnywɛ́ bó ná dó wa nǔ jlɔ́jlɔ́ ɖo togun ce nu. Énɛ́ ɔ́ wú ɔ́, un ná bló lě e a ɖɔ gbɔn ɔ́, un ná ná nǔnywɛ́ kpódó nukúnnú mɔ jɛ nǔ mɛ kpó we. Un ná ná we sɔ mɔ̌, bɔ mɛɖé ná ko ɖó nǔnywɛ́ towe ɖɔhun kpɔ́n ǎ, mɛɖé ká ná lɛ́ ɖó gbeɖé ǎ. Un ná lɛ́ ná we nǔ e a ma byɔ́ ǎ é. A ɖɔ a nǎ jɛ dɔkun, a nǎ xɔ susu, bɔ ɖo gbɛzán towe bǐ mɛ ɔ́, axɔ́sú ɖěbǔ ná jɛ dɔkun, bó ná xɔ susu towe ɖɔhun ǎ. Nú a nɔ wa jlǒ ce, bó nɔ nyi sɛ́n ce lɛ́ɛ, lobo nɔ bló nǔ e un zɔ́n lɛ́ɛ tɔ́ towe Davídi ɖɔhun ɔ́, un ná dó azǎn gbɛzán towe jí.” Salomɔ́ɔ fɔ́n sín amlɔ mɛ, bo mɔ ɖɔ Mawu wɛ xo dlɔ̌ émí. É lɛ́ kɔ wá yi Jeluzalɛ́mu, bo yi akɔjijɛgbá Mawu Mavɔmavɔ tɔn ɔ́ kɔn. É xwlé vɔ̌sánú e è nɔ dó zo lɛ́ɛ kpódó kɔnɖókpɔ́ vɔ́ lɛ́ɛ kpó Mawu, bó ylɔ́ agɔ̌ nú gǎn hɔn-yitɔ́ tɔn lɛ́ɛ bǐ. Nyɔ̌nu agalɛtɔ́ we wá axɔ́sú Salomɔ́ɔ gɔ́n gbe ɖokpó. Mɛ ɖokpó ɖɔ n'i ɖɔ: “Sɛ́mɛɖó, kɛnklɛ́n! Nyɛ kpódó nyɔ̌nu élɔ́ kpó ɔ́, xwé ɖokpó ɔ́ gbe wɛ mǐ nɔ́ nɔ. É ɖo fínɛ́ bɔ un ji vǐ súnnu ɖokpó. Azǎn tɔn atɔn gɔ́ ɔ́ gbe ɔ́, élɔ́ ji vǐ súnnu ɖokpó. Nyɛ kpódó éyɛ́ kpó jɛ́n ká ɖo xwé ɔ́ gbe. Mɛ ɖěvo sɔ́ ɖo fínɛ́ xá mǐ ǎ, mǐ mɛ we lɛ́ɛ géé jɛ́n ɖo fínɛ́. Éyɛ́ mlɔ́ vǐ tɔn jí ɖo zǎn mɛ, bɔ é kú. Ée nǔ cí mɔ̌ ɔ́, é fɔ́n zǎnxwete bɔ hwenu e un ɖo amlɔ dɔ́ wɛ ɔ́, é wá zé nyɛ mɛsɛntɔ́ mɛtɔn sín vǐ sín akpá ce, bó zé e yi mlɔ́ akpá, lobo zé éyɛ́ tɔn kúkú ɔ́ wá mlɔ́ akpá nyɛtɔn. Ée un fɔ́n zǎnzǎn bó ja anɔ̌ ná vǐ ce gbé ɔ́, un mɔ ɖɔ é kó kú. Énɛ́ ɔ́, un zé e jɛ wěziza nu, bó kpɔ́n ɛ tlítlí, lobo mɔ ɖɔ é kún nyí vǐ ce ɖíe ó.” Hwenɛ́nu ɔ́, nyɔ̌nu ɖě ɔ́ sú xó, bó ɖɔ: “Adingban wɛ! Vǐ nyɛtɔn wɛ ɖo gbɛ, vǐ towe ɔ́ wɛ kú!” Nyɔ̌nu nukɔn tɔn ɔ́ ká lɛ́ yí xó bó ɖɔ: “Nǔvú wɛ! Vǐ towe ɔ́ wɛ kú, nyɛ tɔn ɔ́ wɛ ɖo gbɛ!” Lě e yě ɖo nǔ dɔn xá yěɖée wɛ gbɔn ɖo axɔ́sú ɔ́ nukɔn ɔ́ nɛ́. Axɔ́sú ɔ́ wá yí xó, bó ɖɔ: “Mɛ ɖě nɔ́ ɖɔ: ‘Ce wɛ ɖo gbɛ, towe wɛ kú!’ Bɔ mɛ ɖě nɔ́ ɖɔ: ‘Nǔvú wɛ, towe wɛ kú! Bɔ ce ɖo gbɛ!’ É nyɔ́! Mi zé hwǐ ɖokpó wá nú mì.” Ée è zě hwǐ ɔ́ wá n'i ɔ́, é ɖɔ: “Mi sɛ́n vǐ e ɖo gbɛ ɔ́ ɖó we, bo zé akpá ɖokpó jó nú mɛ ɖokpó, bó zé akpá wegɔ́ ɔ́ jó nú mɛ ɖě ɔ́.” Ée axɔ́sú ɔ́ ɖɔ mɔ̌ ɔ́, nyɔ̌nu e sín vǐ ɖo gbɛ ɔ́, vǐ tɔn vɛ́ n'i, bɔ é sú xó bó ɖɔ: “Gbeɖé sɛ́mɛɖó! È ma hu vǐ ɔ́ ó, è sɔ́ ɛ jó n'i!” Nyɔ̌nu ɖě ɔ́ ká ɖɔ: “É ná gú mǐ bǐ! Mi sɛ́n ɛ ɖó we!” Ée nyɔ̌nu énɛ́ ɔ́ ɖɔ mɔ̌ ɔ́, axɔ́sú ɔ́ yí xó, bo ɖɔ: “Mi sɔ́ vǐ gbɛɖe ɔ́ jó nú nyɔ̌nu nukɔn tɔn ɔ́, mi ma hu i ó. É wɛ nyí vǐ ɔ́ sín nɔ.” Izlayɛ́li to ɔ́ bǐ se lě e axɔ́sú ɔ́ gbo hwɛ ɔ́ gbɔn ɔ́, bó nɔ ɖó sísí n'i, ɖó è mɔ ɖɔ Mawu ná ɛ nǔnywɛ́ titewungbe, bɔ é ná nɔ dó ɖɔ hwɛ ná. Axɔ́sú Salomɔ́ɔ wɛ nyí axɔ́sú Izlayɛ́li ví lɛ́ɛ bǐ tɔn. Gǎn e nɔ́ wa azɔ̌ xá ɛ lɛ́ɛ sín nyǐkɔ ɖíe: Azalyahu, vɔ̌sánú-xwlémawutɔ́ Sadɔ́ku ví ɔ́, Eliholɛ́fu kpódó Axiya Cica ví lɛ́ɛ kpó wɛ nyí wěgbójínɔtɔ́ tɔn. Yexosafáti Axiludi ví ɔ́ wɛ nyí gbeyíɖɔ tɔn. Benayahu Yexoyada ví ɔ́ wɛ kpa acɛ dó ahwangɔnu ɔ́ nu. Sadɔ́ku kpó Abiyatáa kpó wɛ nyí vɔ̌sánú-xwlémawutɔ́. Azalyahu Natáni ví ɔ́ wɛ kpa acɛ dó tokpɔngán lɛ́ɛ nu. Zavúdu Natáni ví ɔ́, vɔ̌sánú-xwlémawutɔ́ wɛ, bó nɔ́ lɛ́ ɖe wě xá axɔ́sú ɔ́. Axisáa wɛ kpa acɛ dó axɔ́sú ɔ́ sín xwé nu, bɔ Adonilámu Avuda ví ɔ́ ɖo mɛ e nɔ yi mɛɖe lɛ́ɛ nu. Tokpɔngán wěwe wɛ Salomɔ́ɔ ɖó, bó má yě gbɔn to ɔ́ mɛ, bɔ yě nɔ́ ná nǔɖuɖu é kpó xwédo tɔn kpó, sun mɛ sun mɛ, mɛjíjɛ mɛjíjɛ. Nyǐkɔ yětɔn lɛ́ɛ ɖíe: Húu ví ɔ́; éyɛ́ kpa acɛ dó Eflayímu sókan ɔ́ nu. Dɛkɛ́ɛ ví ɔ́; éyɛ́ kpa acɛ ɖo Makasi gbé jí, bó kpa ɖo Caaluvímu gbé jí, bó kpa ɖo Bɛti-Cɛmɛ́ci kpódó Elɔ́ni-Bɛti-Hanáni kpó gbé jí. Hɛsɛ́di ví ɔ́; éyɛ́ nɔ́ nɔ Alubɔti, bó kpa acɛ ɖo Soko gbé jí, bó kpa dó Hefɛ́ɛ to ɔ́ bǐ nu. Avinadávu ví ɔ́; éyɛ́ kpa acɛ dó sókan e ɖo Dɔ́ɔ gbé jí ɔ́ bǐ nu. É da Tafáti Salomɔ́ɔ ví ɔ́. Baana Axiludi ví ɔ́; éyɛ́ kpa acɛ ɖo Tanaki gbé jí, bó kpa ɖo Mɛgido kpódó Bɛti-Ceani kpó gbé jí. Bɛti-Ceani ɔ́ ɖo gletoxo Saatáni kpá, ɖo dokɔ nú Izleyɛ́li, bó gosín Bɛti-Ceani yi Avɛ́li-Mɛhola, bó dín zɛ Yokimɔámu wú. Gɛvɛ́ɛ ví ɔ́; éyɛ́ nɔ́ nɔ Hlamɔti ɖo Galadi yíkúngban jí. É kpa acɛ dó gletoxo Manasée ví ɔ́ tɔn e ɖo Yayíi gbé jí ɖo Galadi lɛ́ɛ bǐ nu, bó kpa acɛ dó Aagɔ́vu sín toxo ɔ́ nu ɖo Basáni. Toxo énɛ́ lɛ́ɛ bǐ bló toxo kanɖé ko (60), bɔ è mɛ ahohó lɛ́ lɛ̌ dó, bó dó hɔn nu, lobo zé sɛxlo ganvɔ tɔn dó sú ná. Axinadavu Idóo ví ɔ́; éyɛ́ kpa acɛ ɖo Maxanayímu gbé jí. Aximáasi ɔ́, éyɛ́ kpa acɛ ɖo Nɛfutali gbé jí. É lɔmɔ̌ da Salomɔ́ɔ ví ɖokpó, bɔ è nɔ ylɔ́ ɛ ɖɔ Basimáti. Baana Hucáyi ví ɔ́, éyɛ́ kpa acɛ ɖo Acɛ́ɛ kpódó Bealɔ́ti kpó gbé jí. Yexosafáti Paluwáxi ví ɔ́, éyɛ́ kpa acɛ ɖo Isakáa gbé ɔ́ jí. Cimɛ́yi Ela ví ɔ́, éyɛ́ kpa acɛ ɖo Bɛnjamɛ́ɛ gbé ɔ́ jí. Gɛvɛ́ɛ Wulíi ví ɔ́, éyɛ́ kpa acɛ dó Galadi to ɔ́ nu, bó lɛ́ kpa acɛ dó Amɔliti lɛ́ɛ xɔ́sú Sihɔ́ni kpódó Basáni xɔ́sú Ɔgu kpó sín to lɛ́ɛ nu. Tokpɔngán ɖokpó géé wɛ kpa acɛ gbɔn gbě énɛ́ lɛ́ɛ bǐ jí. Togun Judáa tɔn ɔ́ kpó Izlayɛ́li tɔn ɔ́ kpó sukpɔ́ ɖésú, bó cí nyɛ̌kɛ́n e ɖo xutó ɔ́ ɖɔhun; yě nɔ́ mɔ nǔ ɖu, bó nɔ mɔ ahan nu, lobo vo ganjí. Salomɔ́ɔ lɛ́ ɖu ɖo axɔ́súɖuto lɛ́ɛ bǐ jí, bɛ́ sín Efláti tɔ ɔ́ kɔn káká yi Filisitɛ́ɛn lɛ́ɛ tomɛ, káká yi bɔ dó Ejípu to sín dogbó ɔ́ wú. Axɔ́sú to énɛ́ lɛ́ɛ bǐ tɔn ɖo Salomɔ́ɔ sín acɛ glɔ́, bó nɔ sú takwɛ́ n'i ɖo gbɛ hwenu tɔn bǐ. Nǔ e Salomɔ́ɔ nɔ mɔ gbe ɖokpó bɔ é kpó mɛ tɔn lɛ́ɛ kpó nɔ ɖu ɔ́ ɖíe: jinukún glínglín tɔ́nu tɛ́nnɛ, linfín tɔ́nu afɔtɔn-nukún-atɔn, Nyibú kloklo wǒ, nyibú kpaa ko, lɛ̌ngbɔ́ kanwe ko, tɛ́, agbanlín, zungbɔ́, kpódó xɛ kloklo lɛ́ɛ kpó gɔ́ ná. É lɛ́ kpa acɛ dó ayǐkúngban e ɖo Efláti tɔ ɔ́ sín gbadahwe jí lɛ́ɛ bǐ nu, bɛ́ sín Tifusáxi káká yi Gaza. Axɔ́sú e ɖo gbě énɛ́ lɛ́ɛ jí lɛ́ɛ bǐ wɛ ɖo acɛ tɔn mɛ. To tɔn kpó to e lɛ́ lɛ̌ dó e lɛ́ɛ kpó sín ayi jɛ ayǐ. Bɛ́ sín Dan ɖo totaligbé káká yi Bɛ̌-Ceva ɖo tofɔligbé ɔ́, Judáa ví lɛ́ɛ kpó Izlayɛ́li ví lɛ́ɛ kpó bǐ sín ayi jɛ ayǐ. Mɛ ɖokpó ɖokpó nɔ́ vo bó nɔ́ kpé nukún dó vǐwungle tɔn kpó fígigle tɔn kpó wú ganjí, ɖo Salomɔ́ɔ sín hwenu. Salomɔ́ɔ bló kpó nú sɔ́ e nɔ́ dɔn kɛkɛ́ví tɔn lɛ́ɛ é; kpó lɛ́ɛ ná hɛn sɔ́ adɔ̌kpo we (40.000); é ɖó sɔ́xátɔ́ děgba atɔn (12.000). Tokpɔngán wěwe e Salomɔ́ɔ sɔ́ lɛ́ɛ nɔ́ ná nǔ e é kpódó mɛ e nɔ ɖu nǔ ɖo xwé tɔn gbe lɛ́ɛ kpó ná ɖu é sun mɛ sun mɛ, mɛjíjɛ mɛjíjɛ. É jɛ tokpɔngán ɖé jí sun ɖé mɛ ɔ́, é nɔ lɔn nú nǔɖuɖu nɔ hwe ǎ. Yě nɔ́ lɛ́ hɛn ɔ́ji kpó gběhan kpó wá nú sɔ́ lɛ́ɛ, kpó sɔ́ wezunkántɔ́ lɛ́ɛ kpó. Tokpɔngán lɛ́ɛ nɔ bɛ́ nǔ énɛ́ lɛ́ɛ yi jó ɖo fí e axɔ́sú ɔ́ ɖe é, lě e è ɖɔ nú yě gbɔn é. Mawu ná nǔnywɛ́ kpó nukúnnú mɔ jɛ nǔ mɛ kpó Salomɔ́ɔ titewungbe. Énɛ́ ɔ́, xó e Salomɔ́ɔ ɖɔ gbo lɛ́ɛ sukpɔ́ nyɛ̌kɛ́n e ɖo xutó ɔ́ ɖɔhun. Salomɔ́ɔ ɖó nǔnywɛ́ hú mɛ e ɖo zǎnzǎnhwe jí lɛ́ɛ, kpó mɛ e ɖo Ejípu lɛ́ɛ bǐ kpó. É ɖó nǔnywɛ́ hú gbɛtɔ́ lɛ́ɛ bǐ. É ɖó nǔnywɛ́ hú Etáni Zeláxi ví ɔ́, é ɖó hú Maxɔ́lu ví Hemani, Kalukɔ́lu kpódó Daada kpó. É ɖó nǔnywɛ́ ɔ́ ɖésú, bɔ nyǐkɔ tɔn gba kpé to e lɛ́ lɛ̌ dó e lɛ́ɛ bǐ mɛ. Lǒ afɔwó-afatɔ́n (3.000) wɛ Salomɔ́ɔ dó. Nǔnywɛ́ sín han e é kpa lɛ́ɛ hú afatɔ́n (1.000). É ɖɔ xó dó atín tɛnmɛ tɛnmɛ lɛ́ɛ wú, bɛ́ sín atín ɖaxó ɖaxó sɛ́dlu Libáan tɔn lɛ́ɛ jí, káká jɛ atínvú izɔ́pu e nɔ wú ɖo dǒ wú lɛ́ɛ jí. É lɛ́ ɖɔ xó dó kanlin lɛ́ɛ wú; é ɖɔ xó dó xɛ lɛ́ɛ wú, é ɖɔ xó dó hweví lɛ́ɛ kpó kanlin e nɔ sá gbɔn kɔ́ mɛ lɛ́ɛ kpó wú. Mɛ lɛ́ɛ nɔ gosín togun lɛ́ɛ bǐ mɛ, bó nɔ wá se nǔnywɛ́xó Salomɔ́ɔ tɔn. Axɔ́sú e ɖo ayǐkúngban jí, bó se nǔnywɛ́ tɔn sín xó lɛ́ɛ nɔ sɛ́ mɛ dó, bɔ è nɔ wá se xó tɔn. Axɔ́sú Tíi tɔn Ilámu sɛ́ mɛsɛntɔ́ tɔn lɛ́ɛ dó Salomɔ́ɔ gɔ́n, ɖó é se ɖɔ è kɔn ami dó ta n'i, bó sɔ́ ɛ axɔ́sú ɖó tɔ́ tɔn Davídi sín tɛnmɛ. Davídi sín xɔ́ntɔn wɛ Ilámu ɔ́ kó nyí sín do. Salomɔ́ɔ lɔ ka sɛ́ mɛ dó e ɖɔ è nǐ yi ɖɔ n'i ɖɔ: “A tunwun ɖɔ tɔ́ ce Davídi kún kpé wú bó sá xwé nú Mawu Mavɔmavɔ, Mawu tɔn ó. Đó kɛntɔ́ tɔn lɛ́ɛ nɔ́ ɖo ahwan tɔ́n ɛ wɛ gbɔn ɖisí amyɔ. Mawu Mavɔmavɔ ka bló bɔ é wá ɖu ɖo yě jǐ. Din ɔ́, Mawu Mavɔmavɔ, Mawu ce ná vivo mì gbɔn fí bǐ. Un sɔ́ ɖó kɛntɔ́ ǎ, adǎn ɖé ká sɔ́ ɖo gbigbo mì wɛ ǎ. Un jló ná sá xwé ɖokpó nú Mawu Mavɔmavɔ, Mawu ce. Đó Mawu Mavɔmavɔ ko ɖɔ nú tɔ́ ce Davídi ɖɔ: ‘Vǐ towe e un ná sɔ́ ɖó tɛn towe mɛ ɖo axɔ́súzinkpo towe jí ɔ́ wɛ ná wá gbá sinsɛnxɔ e mɛ è nǎ nɔ́ wá sɛn mì ɖe ɔ́.’ Bo ná gbe din tlóló nú è nǐ gbo atín ɖaxó ɖaxó sɛ́dlu Libáan tɔn lɛ́ɛ nú mì. Mɛsɛntɔ́ ce lɛ́ɛ kpódó towe lɛ́ɛ kpó ná gbo, bɔ un ná sú axɔ́ e a nǎ ɖɔ ɔ́ mɛsɛntɔ́ towe lɛ́ɛ. Đó a tunwun ɖɔ mɛ ɖěbǔ kún ɖo mǐdɛɛ lɛ́ɛ gɔ́n, bó ná sixú gbo atín ɔ́ Sidɔ́ɔnnu lɛ́ɛ ɖɔhun ó.” Ée Ilámu se xó e Salomɔ́ɔ ɖɔ ɔ́, xomɛ hun i ɖaxó, bɔ é ɖɔ: “Égbé din ɔ́, un dó kú nú Mawu Mavɔmavɔ, ɖó é ná vǐ nǔnywɛ́tɔ́ Davídi, bɔ é ná ɖu axɔ́sú ɖo Izlayɛ́li togun ɖaxó élɔ́ nu!” Énɛ́ ɔ́ gúdo ɔ́, é yí gbe nú Salomɔ́ɔ sɛ́ dó ɖɔ: “Un se xó e a ɖɔ sɛ́ dó mì ɔ́. Un ná ná sɛ́dlutín kpó siplɛ́tín kpó e ba wɛ a ɖe lɛ́ɛ bǐ we. Mɛsɛntɔ́ ce lɛ́ɛ ná bɛ́ yě sín Libáan wá xutó, bó ná blá yě ɖó kpɔ́, bɔ un ná bɛ́ yě sɛ́ dó we gbɔn xu jí káká wá fí e a ba ɖɔ má bɛ́ yě ɖó é. Yě ná tún yě ɖó fínɛ́, bɔ mɛsɛntɔ́ towe lɛ́ɛ ná bɛ́ yě. Nǔ e un jló ɖɔ a nǎ dó sú axɔ́ tɔn mì ɔ́ wɛ nyí ɖɔ a nǎ sɛ́ nǔɖuɖu dó xwédo ce.” Ée Ilámu ɖɔ mɔ̌ ɔ́, é ná atín e ba wɛ Salomɔ́ɔ ɖe lɛ́ɛ bǐ i. Xwewú xwewú tɛgbɛ ɔ́, Salomɔ́ɔ nɔ ná jinukún tɔ́nu děgba ɖě afɔwó (6.000) Ilámu, bo nɔ ná ɛ olívumi ɖiɖi lǐtli děgba we (8.000), bɔ é nɔ́ dó tɔ́jú xwédo tɔn ná. Mawu Mavɔmavɔ ná nǔnywɛ́ Salomɔ́ɔ lě e é dó akpá tɔn n'i gbɔn é, bɔ Salomɔ́ɔ nɔ ganjí xá Ilámu lobo jɛ akɔ xá ɛ. Axɔ́sú Salomɔ́ɔ cyán mɛ ɖo Izlayɛ́li ví lɛ́ɛ mɛ, bó sɛ́ dó mɛɖe. Yě bǐ yi adɔ̌kpo ɖě děgba we afɔwó (30.000). Sun mɛ sun mɛ ɔ́, é nɔ sɛ́ mɛ děgba we afɔwó (10.000) dó, bɔ yě nɔ́ yi mɛɖe ɖo Libáan só jí. Yě blǒ sun ɖokpó ɖo dɔ̌n ɔ́, yě nɔ́ wá bló sun we ɖo to yětɔn mɛ. Adonilámu wɛ ɖo yě nu. Salomɔ́ɔ lɛ́ ɖó súnnu e nɔ hɛn agban kpinkpɛn lɛ́ɛ adɔ̌kpo atɔn děgba we afɔwó (70.000), bó ɖó súnnu e nɔ kpa awǐnnya ɖo sókan mɛ lɛ́ɛ adɔ̌kpo ɛnɛ (80.000). Gǎn lɛ́ɛ ka ɖ'é mɛ ǎ. Yědɛɛ lɛ́ɛ bló gbɛtɔ́ afɔwó-afayizɛ́n kanwe ko (3.300). Salomɔ́ɔ wɛ sɔ́ yě dó azɔ̌ lɛ́ɛ nu, bɔ yě ná nɔ cɔ́ azɔ̌watɔ́ lɛ́ɛ. Axɔ́sú Salomɔ́ɔ ɖe gbeta tɔ́n ɖɔ è nǐ kun awǐnnya ɖaxó ɖaxó e nyɔ́ ɖɛkpɛ lɛ́ɛ, bó kpa bónú è nǎ dó sá xwé ɔ́ ná. Salomɔ́ɔ sín azɔ̌watɔ́ lɛ́ɛ kpódó Ilámu tɔn lɛ́ɛ kpó, kpódó Gebalinu lɛ́ɛ kpó kpa awǐnnya lɛ́ɛ bǐ. Lě e è ba atín kpódó awǐnnya kpó e ná kpé xwé ɔ́ sísá gbɔn ɔ́ nɛ́. Hwenu e Salomɔ́ɔ ɖo xwe ɛnɛ bló wɛ ɖo zinkpo jí, ɖo Izlayɛ́li ɔ́ wɛ é jɛ Mawu Mavɔmavɔ xwé ɔ́ sá jí, ɖo Ziwu sín sun ɔ́ mɛ, sun wegɔ́ e ɖo xwe ɔ́ mɛ é. Izlayɛ́li ví lɛ́ɛ gosín Ejípu ɔ́, é ko bló xwe afɔwe kanwe (480) nɛ́. Xɔ e Salomɔ́ɔ gbá nú Mawu Mavɔmavɔ ɔ́, ga tɔn nyí mɛ̌tlu gban (30), gblǒ tɔn nyí mɛ̌tlu wǒ, bɔ jǐ yiyi tɔn nyí mɛ̌tlu afɔtɔn. Hɔnnúwa e ɖo xɔ ɔ́ nukɔn ɔ́ sín ga nyí mɛ̌tlu wǒ xɔ ɔ́ sín gbló ɖɔhun. Gblǒ tɔn nyí mɛ̌tlu atɔ́ɔ́n. Salomɔ́ɔ ɖe flɛtɛ́li gbɔn xɔ ɔ́ wú, bó dó ganja nu. É lɛ́ gbá síngbó atɔnnɔ ɖó tɛn mímɛ́ ɔ́ kpó tɛn mímɛ́ bǐ ɔ́ kpó sín dǒdɔn wú ɖo ɖisí amyɔ, bó lɛ́ gbá ɖó dǒdɔn gǔdo tɔn ɔ́ wú, ɖo xɔ ɔ́ sín gblǒ jí. Síngbó ɔ́, do tɔn sín gblǒ nyí mɛ̌tlu we adaɖé, éé ɖo tɛ́ntin ɔ́ sín gblǒ nyí mɛ̌tlu atɔn, éé ɖo aga ɔ́ sín gblǒ nyí mɛ̌tlu atɔn adaɖé, ɖó xɔ e è gbǎ lɛ́ lɛ̌ dó lɛ́ɛ ɔ́, è gbǎ yědɛɛ lɛ́ɛ ɖó vo, bɔ azakpo yětɔn byɔ́ xɔ ɖaxó ɔ́ sín dǒ mɛ ǎ. Awǐnnya e è ko kpa bǐ ɖ'ayǐ lɛ́ɛ wɛ è zǎn dó gbá xɔ ɔ́ ná. Énɛ́ ɔ́, è se zǔn gbe ǎ, è ka se asyɔ́ gbe ǎ, è se alǐnnyánú ɖěbǔ sín gbe hwenu e è ɖo xwé ɔ́ sá wɛ ɔ́ ǎ. Síngbó do tɔn ɔ́ sín ali ɖo xɔ ɔ́ sín ɖisíxwé. È gosín xɔ do tɔn ɔ́ mɛ ɔ́, è nɔ gbɔn kpekán jí yi síngbó tɛ́ntin tɔn ɔ́ mɛ, bó nɔ lɛ́ gbɔn kpekán jí sín fínɛ́ yi síngbó atɔngɔ́ ɔ́ jí. Ée è mɛ xɔ ɔ́ fó ɔ́, è zě xwlɛ kpódó sɛ́dlukpo kpó dó sú aza ná. Síngbó e è gbǎ lɛ́ lɛ̌ dó xɔ ɔ́, éé ɖo do ɔ́, éé ɖo tɛ́ntin e, kpó éé ɖo aga ɔ́ kpó ɔ́, ɖokpó ɖokpó sín jǐ yiyi nyí mɛ̌tlu we adaɖé, bɔ è zě sɛ́dlutín dó dɔn yě cá dó xɔ ɔ́ wú. Mawu Mavɔmavɔ ɖɔ nú Salomɔ́ɔ ɖɔ: “A ɖo xɔ gbá nú mì wɛ. É nyɔ́! Nú a xwedó sɛ́n ce lɛ́ɛ bó bló nǔ e un ɖɔ lɛ́ɛ ɔ́, nú a se tónú, bó bló nǔ e un zɔ́n ɖɔ è nǐ bló lɛ́ɛ bǐ ɔ́, un ná ɖe nǔ e un dó akpá tɔn nú tɔ́ towe Davídi ɖɔ un ná bló ɔ́ nú we: Un ná nɔ Izlayɛ́li ví lɛ́ɛ tɛ́ntin ɖo goxɔ mɛ fí; un ná jó togun ce Izlayɛ́li ɔ́ dó gbeɖé ǎ.” Ée Salomɔ́ɔ mɛ xɔ ɔ́ fó ɔ́, é tɛ́ sɛ́dlu xwlɛ dó xɔ ɔ́ sín dǒ lɛ́ɛ wú ɖo xomɛ, sín do káká yi aga, bó lɛ́ tɛ́ siplɛ́xwlɛ dó kɔ́ mɛ, ɖo xɔ ɔ́ mɛ. Tɛn mímɛ́ bǐ ɔ́ ɖo xɔ ɖaxó ɔ́ mɛ ɖo nukɔn dɔ̌n bǐ, bó ɖó gblǒ zɛ̌ɛ́n, ga zɛ̌ɛ́n, bó nyí mɛ̌tlu wǒ. É sɔ́ sɛ́dlu xwlɛ dó gbo Tɛn mímɛ́ bǐ ɔ́ ɖó vo, sín do káká yi aga. Tɛn e kpo ɖo sinsɛnxɔ ɔ́ mɛ, bɛ́ sín Tɛn mímɛ́ bǐ ɔ́ kɔn káká wá yi jɛ sinsɛnxɔ ɔ́ li nu ɔ́, ga tɔn nyí mɛ̌tlu ko. É kun atínsínsɛ́n e è nɔ ylɔ́ ɖɔ kolokɛ́nti ɔ́ kpódó folówa kikɛ kpó dó xwlɛ e é tɛ́ dó xɔ ɔ́ sín xomɛ lɛ́ɛ mɛ. Xwlɛ kɛ́ɖɛ́ wɛ kpé dǒ ɔ́ bǐ wú; è sɔ́ nɔ mɔ awǐnnya e è dǒ mɛ xɔ ɔ́ ná lɛ́ɛ ɖěbǔ ǎ. É bló Tɛn mímɛ́ bǐ ɔ́ mɛ ɖó, bó ná zé akɔjijɛgbá Mawu Mavɔmavɔ tɔn ɔ́ d'é mɛ. Tɛn mímɛ́ bǐ ɔ́ sín ga nyí mɛ̌tlu wǒ, gblǒ tɔn nyí mɛ̌tlu wǒ, bɔ jǐ yiyi tɔn nyí mɛ̌tlu wǒ. Salomɔ́ɔ tɛ́ siká akú d'é wú. É zé sɛ́dlutín dó bló vɔ̌sákpe ɖokpó nyi tɛn mímɛ́ ɔ́ sín nukɔn, lobo tɛ́ siká d'é wú. É tɛ́ siká akú gbɔn sinsɛnxɔ ɔ́ sín dǒ wú bǐ ɖo xomɛ, bó dó siká wlɔ kpɛví kpɛví gbɔn Tɛn mímɛ́ bǐ ɔ́ nukɔn. Énɛ́ ɔ́, é tɛ́ siká gbɔn sinsɛnxɔ ɔ́ bǐ wú, bó tɛ́ gbɔn vɔ̌sákpe e ɖo Tɛn mímɛ́ bǐ ɔ́ nukɔn ɔ́ wú bǐ. Salomɔ́ɔ zé olívutín gbě tɔn dó bló wɛnsagun susunɔ we ná, bó bɛ́ ɖó Tɛn mímɛ́ bǐ ɔ́ mɛ. Đokpó ɖokpó sín jǐ yiyi nyí mɛ̌tlu atɔ́ɔ́n. Wɛnsagun susunɔ we lɛ́ɛ ɖokpó ɖokpó sín awa ɖó mɛ̌tlu we adaɖé; hǔn wɛnsagun ɖokpó kɛ awa tɔn we lɛ́ɛ ɔ́, é nɔ́ bló mɛ̌tlu atɔ́ɔ́n. Wɛnsagun susunɔ wegɔ́ ɔ́ sín awa we lɛ́ɛ lɔ ɖó mɛ̌tlu atɔ́ɔ́n. Wɛnsagun we lɛ́ɛ ɖó jlɛ̌ ɖokpó ɔ́, ninɔmɛ ɖokpó ɔ́. Wɛnsagun susunɔ we lɛ́ɛ ɖokpó ɖokpó sín jǐ yiyi nyí mɛ̌tlu atɔ́ɔ́n. Salomɔ́ɔ bɛ́ wɛnsagun susunɔ we lɛ́ɛ ɖó Tɛn mímɛ́ bǐ ɔ́ tɛ́ntin. Awa yětɔn lɛ́ɛ ɖo dlɛ̌ndlɛ́n, bɔ ɖokpó sín awa sɔ́ dǒ ɔ́ ɖo akpá ɖokpó, bɔ wegɔ́ ɔ́ lɔ sín awa sɔ́ dǒ ɔ́ ɖo akpá wegɔ́ ɔ́ xwé. Bɔ awa yětɔn ɖě lɛ́ɛ ɖě kpé ɖě, ɖo Tɛn mímɛ́ bǐ ɔ́ tɛ́ntin. É tɛ́ siká dó wɛnsagun susunɔ lɛ́ɛ wú. Salomɔ́ɔ zɔ́n bɔ è kun wɛnsagun susunɔ, bó kun děma, bó kun folówa kikɛ dó xwlɛ e è tɛ́ dó xɔ ɔ́ sín dǒ lɛ́ɛ wú lɛ́ lɛ̌ dó, ɖo gǔdo kpó xomɛ kpó lɛ́ɛ mɛ. É tɛ́ siká gbɔn kɔ́ mɛ ɖo xwé ɔ́ gbe, bó lɛ́ tɛ́ gbɔn kɔ́ mɛ ɖo Tɛn mímɛ́ kpó Tɛn mímɛ́ bǐ ɔ́ kpó mɛ. È zě olívutín gbě tɔn dó bló hɔn vǐ we nɔ ná, bó zé dó Tɛn mímɛ́ bǐ ɔ́ sín ali nu. Agba ɔ́ kpó hɔnkpo lɛ́ɛ kpó sín tlitli yi dǒ ɔ́ sín atɔ́ɔ́nvlɔ́ɖó. Olívutín gbě tɔn wɛ è dǒ kpa hɔnvǐwenɔ ɔ́ ná, bó kun wɛnsagun susunɔ, bó kun děma, bó kun folówa kikɛ, dó hɔn lɛ́ɛ mɛ, lobo tɛ́ siká dó yě wú. Wɛnsagun susunɔ lɛ́ɛ kpódó děma lɛ́ɛ kpó ɔ́, siká wɛ è dǒ tun. É lɛ́ bló hɔn ɖokpó ɖó xɔ ɖaxó ɔ́ nu, bɔ hɔnkpo lɛ́ɛ sín tlitli yi dǒ ɔ́ sín ɛnɛvlɔ́ɖó. Olívutín gbě tɔn wɛ è dǒ bló. È zě siplɛ́tín dó bló hɔn vǐ-ɛnɛnɔ ɖokpó ná. Vǐ we ɖo aɖisíxwé, vǐ we ɖo amyɔxwé. Hɔn lɛ́ɛ ɖokpó ɖokpó nɔ́ lílɛ́ dó gǔdo nukɔn, ɖo hɔnsóswé lɛ́ɛ jí. È kun wɛnsagun susunɔ, bó kun děma, bó kun folówa kikɛ dó hɔn lɛ́ɛ mɛ, bó tɛ́ siká dó. Awǐnnya e è kpa lɛ́ɛ ɔ́, è to atɔn atɔn, ɖě ɖo ɖě jí, dó xá kɔ́xota ɔ́, bó wá zé sɛ́dlukpo hǎ ɖokpó gbɔn jí. Énɛ́ ɔ́, è dǒ Mawu Mavɔmavɔ xɔ ɔ́ do, hwenu e Salomɔ́ɔ ɖo xwe ɛnɛ bló wɛ ɖo zinkpo jí ɔ́, ɖo Ziwu sun ɔ́ mɛ. Hwenu e Salomɔ́ɔ ɖo xwe wǒ-ɖokpó bló wɛ ɖo zinkpo jí ɔ́ wɛ é fó Mawu Mavɔmavɔ xɔ ɔ́ bǐ, bó bló nǔ e ɖ'é wú lɛ́ɛ, bɔ é cí lě e é ɖó ná nɔ é. Bulu sun, sun tántɔngɔ́ ɔ́ e ɖo xwe ɔ́ mɛ é mɛ wɛ é fó xɔ ɔ́. Xwe tɛ́nwe wɛ é sɔ́ ɖó te dó gbá xɔ ɔ́ fó. Salomɔ́ɔ sá xwé é ɖésúnɔ tɔn. Xwe wǒ atɔn wɛ é sɔ́ ɖó te bó dó gbá xɔ lɛ́ɛ bǐ fó. Xɔ e è nɔ ylɔ́ ɖɔ “Zungbó Libáan tɔn” ɔ́ wɛ é to gbá hwɛ̌, bɔ ga tɔn nyí mɛ̌tlu kanɖé wǒ (50), gblǒ tɔn nyí mɛ̌tlu koatɔ́n (25), bɔ jǐ yiyi tɔn nyí mɛ̌tlu afɔtɔn. È ylɔ̌ ɖɔ “Zungbó Libáan tɔn” ɖó sɛ́dlukpo wɛ nyí dotín tɔn lɛ́ɛ, bɔ è to ɖó hǎ ɛnɛ jí, bó lɛ́ zé sɛ́dlu kpo dó ɖó azakpo nú xɔ ɔ́. Azakpo kanɖé atɔ́ɔ́n (45) wɛ, bɔ è to afɔtɔn afɔtɔn ɖó hǎ atɔn jí, bó zé dotín dó hɛn ná, bó wá to sɛ́dlu xwlɛ gbɔn azakpo lɛ́ɛ jí, dó sú aza nú xɔ ɔ́. Flɛtɛ́li hǎ atɔn wɛ ɖo xɔ ɔ́ sín akpá ɖokpó ɖokpó xwé; flɛtɛ́li e ɖo akpá ɖě xwé lɛ́ɛ ɔ́ nɔ́ kpan nukɔn éé ɖo akpá ɖě ɔ́ xwé lɛ́ɛ. Ali énɛ́ lɛ́ɛ kpó hɔnkpo yětɔn lɛ́ɛ kpó bǐ ɖǒ gblǒ zɛ̌ɛ́n, ga zɛ̌ɛ́n. Flɛtɛ́li ɖokpó kpan nukɔn flɛtɛ́li ɖěvo. Énɛ́ ɔ́, flɛtɛ́li hǎ atɔn e ɖo akpá élɔ́ xwé lɛ́ɛ kpan nukɔn atɔn e ɖo akpá ɖě ɔ́ xwé lɛ́ɛ. Énɛ́ ɔ́ gúdo ɔ́, é lɛ́ gbá “Dotín xɔ”. Ga tɔn nyí mɛ̌tlu koatɔ́n (25), bɔ gblǒ tɔn nyí mɛ̌tlu afɔtɔn. É wɛ nyí hɔnnúwa ɔ́, bɔ è fɔ dotín dó bló ná, bɔ jɔhɔnsinglɔ́nnú ɖo nukɔn tɔn. É lɛ́ gbá xɔ nú “Zinkpo ɔ́”. È nɔ lɛ́ ylɔ́ xɔ énɛ́ ɔ́ ɖɔ “Hwɛɖɔxɔsá”, ɖó fínɛ́ wɛ Salomɔ́ɔ nɔ ɖɔ hwɛ ɖe. Sɛ́dlutín wɛ è xwe dó xɔ ɔ́ wú sín do káká yi aga. É gbá xɔ é ɖésúnɔ tɔn, ɖó zɔ zaan, ɖo “Zinkpo xɔ” ɔ́ gúdo. É gbá bɔ é cí ɖě lɛ́ɛ ɖɔhun. Xɔ alɔkpa ɖokpó ɔ́ wɛ é lɛ́ gbá nú asi tɔn, Ejípu xɔ́sú ví ɔ́. Awǐnnya ɖagbe ɖagbe e è kpa lɛ́ɛ wɛ é cyán dó gbá xɔ énɛ́ lɛ́ɛ bǐ ná. È kpa awǐnnya lɛ́ɛ ɖó jlɛ̌ jí. È sɔ́ sá dó kpa yě ná ɖo gǔdo nukɔn. Awǐnnya énɛ́ lɛ́ɛ wɛ è zǎn sín awǐnnya dodó ɔ́ jí káká yi aga. Yě wɛ é zán dó mɛ xɔ e ɖo xwé ɔ́ gúdo lɛ́ɛ, kpó kɔ́xota ɖaxó ɔ́ sín dǒ lɛ́ɛ kpó. Awǐnnya ɖaxó ɖaxó ɖagbe ɖagbe lɛ́ɛ wɛ è dǒ dó xɔ lɛ́ɛ do. Awǐnnya lɛ́ɛ ɖě sín ga nyí mɛ̌tlu atɔ́ɔ́n, bɔ ɖě tɔn nyí mɛ̌tlu ɛnɛ. Awǐnnya énɛ́ lɛ́ɛ jí wɛ è to awǐnnya ɖagbe ɖagbe e è kpa ɖó jlɛ̌ jí lɛ́ɛ kpódó sɛ́dlukpo lɛ́ɛ kpó ɖó. Awǐnnya ɖagbe ɖagbe e è kpa lɛ́ɛ ɔ́, hǎ atɔn jí wɛ è to ɖó ɖě ɖo ɖě jí lɛ́ dó, bó to sɛ́dlukpo lɛ́ɛ hǎ ɖokpó gbɔn jí. È blǒ bɔ é cí dǒ e è dǒ xá Mawu Mavɔmavɔ xwé ɔ́ sín kɔ́xota ná ɔ́ ɖɔhun, bó cí hɔnnúwa Mawu Mavɔmavɔ xwé ɔ́ tɔn sín dǒ ɖɔhun. Axɔ́sú Salomɔ́ɔ sɛ́ mɛ dó Tíi, bɔ è yi ylɔ́ Ilámu wá. Ilámu sín nɔ ɔ́, asúkúsi wɛ, bó jɔ ɖo Nɛfutali sín akɔta mɛ. Tɔ́ tɔn ɔ́, Tíinu wɛ bó nɔ wa ganvɔ sín azɔ̌. Ilámu ɖó nǔnywɛ́ bó ɖó nukúnnú-mɔjɛnǔmɛ, bó ɖó nǔtunwuntunwun, bó nɔ wa alɔlyɛ́n. É wá Salomɔ́ɔ gɔ́n, bó wa azɔ̌ e é zɔ́n ɛ lɛ́ɛ bǐ. Ilámu zé ganvɔ dó bló dotín we ná. Jǐ yiyi yětɔn nyí mɛ̌tlu tɛ́nnɛ, bɔ goto yětɔn nyí mɛ̌tlu ayizɛ́n lɛ́ dó. É sínsín ganvɔ dó bló ata we ná, bó ná fɔ ɖó dotín we lɛ́ɛ ta. Ata we lɛ́ɛ ɖokpó ɖokpó sín jǐ yiyi nyí mɛ̌tlu we adaɖé. É lɛ́ zé ganvɔ dó bló acɔ́ɖónú ɖěvo lɛ́ɛ ná, é bló nǔ ɖɔ ɖɔhun ɖé lɛ́ɛ, bó lɛ́ bló nǔ wlɔ ɖɔhun ɖé lɛ́ɛ, bó lɛ́ zé nǔ fukɔfukɔ ɖé dó bló wlɔ kpɛví kpɛví ná, bó tɛ́ yě dó ata lɛ́ɛ wú. Nǔ énɛ́ lɛ́ɛ tɛ́nwe tɛ́nwe wɛ ɖo ata ɖokpó ɖokpó wú. É lɛ́ zé ganvɔ dó bló glenádi sínsɛ́n ná, bó to hǎ we we dó ɖɔ e è cyɔ́n dó ata lɛ́ɛ é wú. Ata ɖěvo lɛ́ ɖo dotín lɛ́ɛ ɖokpó ɖokpó jí. Jǐ yiyi yětɔn nyí mɛ̌tlu we, yě cí folówa ɖɔhun. Gǒ ɖé ɖo ata ɖokpó ɖokpó jí, bó ɖo aga nú ɖɔ ɔ́ kpódó glenádi sínsɛ́n afɔɖé e è to ɖó ata ɖokpó ɖokpó wú é kpó. É tun dotín lɛ́ɛ gbɔn Mawu Mavɔmavɔ xwé ɔ́ sín hɔnnúwa kpá. Đokpó ɖo ɖisíxwé, bɔ ɖokpó ɖo amyɔxwé. È nɔ ylɔ́ ɖisíxwé tɔn ɔ́ ɖɔ Yakíni, bó nɔ ylɔ́ amyɔxwé tɔn ɔ́ ɖɔ Bowazi. Lě e Ilámu bló dotín lɛ́ɛ fó gbɔn ɔ́ nɛ́. Ilámu zé ganvɔ dó bló basya ɖaxó tobotobo ɖokpó ná. Gblǒ tɔn nyí mɛ̌tlu atɔ́ɔ́n, jǐ yiyi tɔn nyí mɛ̌tlu we adaɖé, bɔ goto tɔn nyí mɛ̌tlu afɔtɔn lɛ́ dó. É bló kolokɛ́nti sínsɛ́n gbɔn tó tɔn lɛ́ lɛ̌ dó. É to ko ko ɖó mɛ̌tlu ɖokpó jí lɛ́ dó, bó to hǎ we. Kolokɛ́nti lɛ́ɛ kpódó basya ɔ́ kpó wɛ è kɔn ɖó kpɔ́. Nyibúsú ganvɔ tɔn wěwe jí wɛ basya ɔ́ jínjɔ́n. Nyibúsú ɔ́ atɔn kpan nukɔn totaligbé, atɔn kpan nukɔn gbadahwe jí, atɔn kpan nukɔn tofɔligbé, bɔ atɔn kpan nukɔn zǎnzǎnhwe jí. Bɔ yě dǒ gǔdo yěɖée ɖo basya ɔ́ glɔ́. Basya ɔ́ sín tlitli yi santimɛ́tlu tántɔn; è blǒ tó tɔn, bɔ é cí kɔ́fu sín tó ɖɔhun, bó kɛ folówa ɖɔhun. É nɔ́ hɛn sin lǐtli adɔ̌kpo ɛnɛ (80.000) mɔ̌. Ilámu lɛ́ zé ganvɔ dó bló kɛkɛ́ví wǒ nǎ. Đokpó ɖokpó sín ga nyí mɛ̌tlu we, gbló tɔn nyí mɛ̌tlu we, bɔ jǐ yiyi tɔn nyí mɛ̌tlu ɖokpó adaɖé. Lě e è blǒ yě gbɔn ɔ́ ɖíe: ganvɔ gbajagbaja wɛ è dǒ ján yě ná, bó tɛ́ ganvɔ gbajagbaja ɖěvo dó gankpo lɛ́ɛ tɛ́ntin. È ɖe kinnikínní kpódó nyibúsú kpó, kpódó wɛnsagun susunɔ kpó dó ganvɔ gbajagbaja lɛ́ɛ wú, bó lɛ́ ɖe ɖó gankpo lɛ́ɛ ta, bɔ acɔ́ɖónú tɛnmɛ tɛnmɛ ɖo gblɛlɛ mɛ ɖo kinnikínní lɛ́ɛ kpódó nyibúsú lɛ́ɛ kpó glɔ́. Kɛkɛ́ví ɖokpó ɖokpó ɖó afɔ ɛnɛ; ganvɔ wɛ è dǒ bló yě; mayóokpo ɖé lɛ́ɛ hɛn afɔ lɛ́ɛ ɖó kɛkɛ́ví ɔ́ wú. Nǔ kɛkɛ́fɔ ɖɔhun ɖé lɛ́ɛ tɛ́ntin wɛ gankpo kpɛví kpɛví nɛ́ lɛ́ɛ ɖe, ɖo zwe ɛnɛ lɛ́ɛ jí. Nǔ kɛkɛ́fɔ ɖɔhun nɛ́ lɛ́ɛ kpó ganvɔ gbajagbaja e è jǎn ɔ́ kpó wɛ è kɔn ɖó kpɔ́. Yě ká ɖi ga hú acɔ́ɖónú lɛ́ɛ ǎ. È ɖe ali tobotobo ɖé ɖó kɛkɛ́ví ɔ́ ta, bɔ jǐ yiyi tɔn nyí mɛ̌tlu vlɔ́, bɔ basya ɔ́ nɔ́ nɔ jí. Ali tobotobo ɔ́ sín gblǒ nyí mɛ̌tlu ɖokpó é hwe káa. Akpá xwé e zɛ kádli e mɛ basya ɔ́ jínjɔ́n ɔ́ wú ɔ́ ɖó gblǒ zɛ̌ɛ́n ga zɛ̌ɛ́n, é ɖo toboo ǎ, bɔ è ɖe nǔɖé lɛ́ɛ gbɔn tó tɔn dó ba acɔ́ ná. Kɛkɛ́ví ɔ́ sín tó lɛ́ɛ glɔ́ wɛ è blǎ afɔ ɛnɛ lɛ́ɛ ɖó, bɔ gan e hɛn afɔ lɛ́ɛ ɖó te ɔ́ gbɔn kɛkɛ́ví ɔ́ mɛ dín. Afɔ lɛ́ɛ sín gblǒ nyí mɛ̌tlu ɖokpó é hwe káa. È blǒ afɔ lɛ́ɛ bɔ é cí ahwankɛkɛ́ ɖaxó sín afɔ ɖɔhun. Mayóo lɛ́ɛ, hlúu lɛ́ɛ, hlɛnyɔ́ɔ́ lɛ́ɛ kpódó mayóokpo lɛ́ɛ kpó ɔ́, bǐ wɛ è zě ganvɔ dó kɔn. Nǔ ɛnɛ e cí afɔ ɖɔhun, bo ɖo kɛkɛ́ví ɖokpó ɖokpó sín zwe ɛnɛ lɛ́ɛ jí ɔ́, yě kpó kɛkɛ́ví kpó kɛkɛ́ví ɔ́ sín kádli kpó bǐ wɛ è kɔn ɖó kpɔ́. È blǒ acɔ́ɖónú ɖokpó ɖokpó ɖó kɛkɛ́ví ɖokpó ɖokpó ta, bɔ é lɛ́ dó ali tobotobo ɔ́. Acɔ́ɖónú ɔ́ sín gblǒ nyí mɛ̌tlu ɖokpó sín vlɔ̌ ɖó ɛnɛ. Awa tɔn lɛ́ɛ kpódó ganvɔ gbajagbaja lɛ́ɛ kpó bǐ wɛ ɖo bǔ. È lɛ̌ kun wɛnsagun susunɔ, bó kun kinnikínní, bó kun děma dó nǔ e jí afɔ lɛ́ɛ jínjɔ́n é kpó ganvɔ gbajagbaja ɔ́ kpó mɛ. È kun acɔ́ɖónú lɛ́ɛ lɛ́ lɛ̌ dó. Lě e è blǒ kɛkɛ́ví wǒ lɛ́ɛ ɖokpó ɖokpó gbɔn ɔ́ nɛ́. È kɔn bǐ ɖó bǔ. Yě bǐ ɖó jlɛ̌ ɖokpó ɔ́, ɖě gbɔn vo nú ɖě ǎ. Ilámu lɛ́ zé ganvɔ dó bló basya wǒ ná, bɔ è nǎ bɛ́ ɖó kɛkɛ́ví wǒ lɛ́ɛ jí. Basya lɛ́ɛ ɖokpó sín gbló nyí mɛ̌tlu we, bo nɔ hɛn sin lǐtli afatɔ́n nǔwɔntɔn (1.600) mɔ̌. È to kɛkɛ́ví atɔ́ɔ́n ɖó xɔ ɔ́ sín ɖisíxwé, bó to atɔ́ɔ́n ɖó sinsɛnxɔ ɔ́ sín amyɔxwé, bɔ basya ɖokpó ɖokpó ɖo kɛkɛ́ví ɖokpó ɖokpó jí. È zě basya ɖaxó tobotobo ɔ́ ɖó sinsɛnxɔ ɔ́ sín ɖisíxwé, ɖo zwe tɔn e ɖo afɔligbé-zǎnzǎnhwe jí ɔ́ kpá. Ilámu lɛ́ bló basya lɛ́ɛ, bó bló afínbɛ́nú lɛ́ɛ, lobo bló gannú lɛ́ɛ. Ilámu bló nǔ e axɔ́sú Salomɔ́ɔ zɔ́n ɛ nú sinsɛnxɔ Mawu Mavɔmavɔ tɔn ɔ́ bǐ. É bló dotín we, ata tobotobo we, bɔ è nǎ bɛ́ yě ɖó dotín lɛ́ɛ ta; é bló nǔ ɖɔ ɖɔhun we, bɔ è nǎ bɛ́ yě cyɔ́n dó ata tobotobo lɛ́ɛ, ɖo dotín lɛ́ɛ jí. É bló glenádi afɔwe ɖó ɖɔ we e è bǔ dó ata lɛ́ɛ wú. É to glenádi sínsɛ́n lɛ́ɛ hǎ we we dó ɖɔ ɖokpó ɖokpó wú dó ata lɛ́ɛ ɖokpó ɖokpó wú. É bló kɛkɛ́ví wǒ. É bló basya wǒ, bɔ è bɛ̌ ɖó kɛkɛ́ví lɛ́ɛ jí. É bló basya ɖaxó tobotobo ɖokpó, bo bló nyibúsú wěwe, bɔ basya ɔ́ ɖo yě jí. Afíngannú lɛ́ɛ, afínbɛ́nú lɛ́ɛ kpódó gannú lɛ́ɛ kpó. Nǔ énɛ́ lɛ́ɛ e Salomɔ́ɔ ɖɔ nú Ilámu bɔ é bló nú sinsɛnxɔ Mawu Mavɔmavɔ tɔn lɛ́ɛ ɔ́, ganvɔ wɛ è dǒ bló yě ná, bó ɖíɖí wǔ ná. Kɔ́kpe mɛ wɛ Ilámu kɔn nǔ énɛ́ lɛ́ɛ bǐ ɖe, ɖo Judɛ́ɛn tɔdo mɛ, ɖo Sukɔ́tu kpódó Saatáni kpó sín gletoxo lɛ́ɛ tɛ́ntin. Axɔ́sú Salomɔ́ɔ zɔ́n bɔ è bɛ̌ nǔ énɛ́ lɛ́ɛ to dó sinsɛnxɔ Mawu Mavɔmavɔ tɔn mɛ. Lo ɔ́, nǔ lɛ́ɛ sukpɔ́ káká bɔ é sɔ́ ba ná tunwun ganvɔ kilóo nabí e è zǎn ɔ́ ǎ. Salomɔ́ɔ ɖɔ bɔ è lɛ̌ bló sikánú e è nǎ nɔ zán ɖo sinsɛnxɔ Mawu Mavɔmavɔ tɔn mɛ lɛ́ɛ: vɔ̌sákpe e jí è nɔ dó zǎlínkpɔ́n zo ɖe ɔ́, távo e jí è nɔ bɛ́ wɔ̌xúxú e è nɔ xwlé Mawu lɛ́ɛ ɖó ɔ́, siká wɛ è dǒ bló bǐ ná. É bló zogbɛ́nhɛnnú wǒ, bó bɛ́ ɖó tɛn mímɛ́ bǐ ɔ́ nukɔn, atɔ́ɔ́n ɖo ɖisíxwé, atɔ́ɔ́n ɖo amyɔxwé. Siká akú wɛ è dǒ bló yě ná. É bló folówa lɛ́ɛ kpó zogbɛ́n lɛ́ɛ kpó, bó bló nǔ e è nɔ dó bló myɔ ɖó ná lɛ́ɛ nú zogbɛ́nhɛnnú lɛ́ɛ; siká wɛ è dǒ bló bǐ. É bló basya lɛ́ɛ, nǔ e è nɔ dó bló myɔ ɖó ná lɛ́ɛ, gannú lɛ́ɛ, kɔ́fu lɛ́ɛ, zǎlínkpɔ́nfyɔ́nú lɛ́ɛ; siká akú wɛ é dó bló yě ná. É bló hɔnsóswé nú tɛn mímɛ́ bǐ ɔ́, bó bló nú tɛn mímɛ́ ɔ́ sín hɔn lɛ́ɛ; siká wɛ è dǒ bló yě ná. Ée axɔ́sú Salomɔ́ɔ wa azɔ̌ e ɖo sinsɛnxɔ Mawu Mavɔmavɔ tɔn wú ɔ́ bǐ fó ɔ́, é ɖɔ bɔ è bɛ̌ nǔ e tɔ́ tɔn Davídi bɛ́ ɖ'ayǐ nú Mawu Mavɔmavɔ ɔ́ wá: kpatágan, siká, kpódó nǔ ɖěvo ɖěvo lɛ́ɛ kpó. É bɛ́ nǔ énɛ́ lɛ́ɛ bǐ ɖó sinsɛnxɔ Mawu Mavɔmavɔ tɔn mɛ, ɖo fí e dɔkun Mawu Mavɔmavɔ tɔn lɛ́ɛ nɔ́ nɔ é. Ée axɔ́sú Salomɔ́ɔ bló nǔ lɛ́ɛ fó ɔ́, é ylɔ́ tomɛxó Izlayɛ́li tɔn lɛ́ɛ, akɔtagán lɛ́ɛ bǐ, kpódó hɛ̌nnugán Izlayɛ́li tɔn lɛ́ɛ kpó, ɖɔ yě ní wá gɔ̌n émítɔn ɖo Jeluzalɛ́mu, bó ná yi zé akɔjijɛgbá Mawu Mavɔmavɔ tɔn ɔ́ sín Sinyɔ́ɔ, Davídi Toxo mɛ sɔ́ yi Mawu Mavɔmavɔ xwé gbe. Énɛ́ ɔ́, Izlayɛ́li ví lɛ́ɛ bǐ wá axɔ́sú Salomɔ́ɔ gɔ́n ɖo azavaxwe hwenu, ɖo Etanímu sun ɔ́ mɛ, sun tɛ́nwegɔ́ e ɖo xwe ɔ́ mɛ é. Ée tomɛxó Izlayɛ́li tɔn lɛ́ɛ wá ɔ́, vɔ̌sánú-xwlémawutɔ́ lɛ́ɛ zé akɔjijɛgbá ɔ́. Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó wɛ zé akɔjijɛgbá Mawu Mavɔmavɔ tɔn ɔ́, kpó goxɔ ɔ́ kpó, bó bɛ́ nǔ e ɖo goxɔ ɔ́ mɛ lɛ́ɛ. Axɔ́sú Salomɔ́ɔ kpódó Izlayɛ́li ví e wá gɔ̌n tɔn lɛ́ɛ kpó bǐ kplé ɖo akɔjijɛgbá ɔ́ nukɔn. Gbɔ̌ kpódó nyibú kpó e yě dó sá vɔ̌ ná lɛ́ɛ sukpɔ́ káká bɔ è sixú xa ǎ. Énɛ́ ɔ́ gúdo ɔ́, vɔ̌sánú-xwlémawutɔ́ lɛ́ɛ zé akɔjijɛgbá Mawu Mavɔmavɔ tɔn ɔ́ ɖó tɛn tɔn mɛ, ɖo tɛn mímɛ́ bǐ ɔ́ mɛ, ɖo Mawu xwé ɔ́ gbe, wɛnsagun susunɔ lɛ́ɛ sín awa glɔ́. Đó fí e ná nɔ wɛ akɔjijɛgbá ɔ́ ɖe ɔ́ ta nu wɛ wɛnsagun susunɔ lɛ́ɛ sín awa ɖo dlɛ̌ndlɛ́n ɖe, bónú akɔjijɛgbá ɔ́ kpó kpo e è nɔ dó zé ná lɛ́ɛ kpó ná nɔ awa yětɔn lɛ́ɛ glɔ́. Kpo lɛ́ɛ ɖi ga ɖésú, nú è ɖo tɛn mímɛ́ ɔ́ mɛ dě, ɖo tɛn mǐmɛ́ bǐ ɔ́ nukɔn ɔ́, è nɔ mɔ kpo lɛ́ɛ sín nuvínu sɛ́ dó. È ka ɖo kɔ́xota ɔ́, è nɔ mɔ yě sɛ́ dó ǎ. Bǐ kpo ɖo mɔ̌ káká wá jɛ égbé. Nǔɖé ɖo akɔjijɛgbá ɔ́ mɛ zɛ awǐnnyatɛ we e Mɔyízi bɛ́ d'é mɛ ɖo Holɛ́bu, hwenu e Izlayɛ́li ví lɛ́ɛ tɔ́n sín Ejípu, bɔ Mawu Mavɔmavɔ jɛ akɔ xá yě ɔ́ wú ǎ. Hwenu e vɔ̌sánú-xwlémawutɔ́ lɛ́ɛ gosín tɛn mímɛ́ ɔ́ mɛ ɔ́, akpɔ́kpɔ́ gɔ́ sinsɛnxɔ ɔ́. Bɔ yě sɔ́ sixú nɔ fínɛ́ bó wa azɔ̌ yětɔn ǎ, ɖó akpɔ́kpɔ́ ɔ́ sukpɔ́ dín, ɖó susu Mawu Mavɔmavɔ tɔn gɔ́ xɔ ɔ́. Énɛ́ ɔ́, Salomɔ́ɔ sú xó bó ɖɔ: “Mawu Mavɔmavɔ! A ɖɔ émí ná nɔ zǐnflú mɛ. Un gbá nɔtɛn towe nú we lo, fí e a nǎ nɔ káká sɔ́yi é!” Izlayɛ́li togun ɔ́ bǐ kplé bó ɖo te, bɔ axɔ́sú Salomɔ́ɔ lílɛ́ kpan nukɔn yě, bó xo ɖɛ dó yě jí, bo ɖɔ: “Susu nú Mawu Mavɔmavɔ, Mawu Izlayɛ́li tɔn! É ɖésúnɔ wɛ ɖɔ xó nú tɔ́ ce, bɔ nǔ e é ɖɔ ɔ́, é sɔ́ hlɔ̌nhlɔ́n tɔn dó bló. É ɖɔ: ‘Sín gbe e gbe un ko ɖe togun ce Izlayɛ́li ɔ́ tɔ́n sín Ejípu ɔ́, un sɔ́ toxo ɖěbǔ ɖo Izlayɛ́li sín toxo lɛ́ɛ mɛ, bónú è nǎ sá xwé ɖé, bónú má nɔ́ ɖe susu ce xlɛ́ ɖo fínɛ́ ǎ. Amɔ̌ un sɔ́ Davídi bɔ é ɖu axɔ́sú ɖo togun ce Izlayɛ́li ɔ́ nu.’ Tɔ́ ce Davídi wɛ ko lin ɖɔ émí ná sá xwé nú Mawu Mavɔmavɔ, Mawu Izlayɛ́li tɔn. Lo ɔ́, Mawu Mavɔmavɔ ɖɔ n'i ɖɔ: ‘Linlin e a ɖǒ ɖɔ émí ná sá xwé ɖokpó nú mì ɔ́, linlin ɖagbe wɛ. Amɔ̌ hwi wɛ ná gbá xwé ɔ́ ǎ, lo ɔ́, vǐ towe jiji wɛ ná gbá nú mì.’ Xó énɛ́ e Mawu Mavɔmavɔ ɖɔ ɔ́, é bló ɖ'é jí. Un jɛ tɔ́ ce Davídi sín tɛnmɛ, bó jínjɔ́n axɔ́súzinkpo Izlayɛ́li tɔn ɔ́ jí lě e Mawu Mavɔmavɔ ɖɔ gbɔn é, bó sá xwé nú Mawu Mavɔmavɔ, Mawu Izlayɛ́li tɔn ɔ́. Un bló tɛnmɛ nú gbǎ e mɛ akɔjijɛ sín nǔ lɛ́ɛ ɖe ɔ́ ɖó xɔ ɔ́ mɛ; akɔ e é jɛ xá tɔ́gbó mǐtɔn lɛ́ɛ, hwenu e é ɖe yě tɔ́n sín Ejípu é.” Salomɔ́ɔ yi cí vɔ̌sákpe Mawu Mavɔmavɔ tɔn ɔ́ nukɔn, bó kpan nukɔn Izlayɛ́li ví e kplé lɛ́ɛ bǐ. É dlɛ́n alɔ tɔn lɛ́ɛ sɛ́ dó jǐnukúnsin, bó ɖɔ: “Mawu Mavɔmavɔ, Mawu Izlayɛ́li tɔn! Nǔmɛsɛn towe ɖɔhun ɖě sɔ́ tíin ǎ, ɖě sɔ́ ɖo jǐxwé aga ǎ, ɖě ká sɔ́ ɖo do ɖo ayǐkúngban jí fí ǎ. Mɛsɛntɔ́ towe e nɔ xwedó sɛ́n towe lɛ́ɛ kpódó ayixa yětɔn bǐ kpó lɛ́ɛ ɔ́, a nɔ́ nɔ gbejí nú akɔ e a jɛ xá yě ɔ́, bó nɔ ɖe xomɛnyínyɔ́ towe xlɛ́ yě. A ɖe akpá e a dǒ nú tɔ́ ce Davídi mɛsɛntɔ́ towe ɔ́; nǔ e a ɖɔ n'i ɔ́ ɖíe hwi ɖésúnɔ bló ɖ'é jí égbé e. Din ɔ́, Mawu Mavɔmavɔ, Mawu Izlayɛ́li tɔn, lɛ̌ ɖe akpá e a dǒ nú tɔ́ ce Davídi bo ɖɔ n'i ɖɔ nú vǐ tɔn lɛ́ɛ nyi sɛ́n émítɔn lɛ́ɛ, bó xwedó émí lě e é ɖésúnɔ bló gbɔn ɔ́, mɛ e ná nɔ tɛn tɔn mɛ, ɖo axɔ́súzinkpo Izlayɛ́li tɔn ɔ́ jí ɔ́, é kún ná ba kpo ɖo yě mɛ gbeɖé ó. Din ɔ́, Mawu Izlayɛ́li tɔn, akpá e a dǒ nú mɛsɛntɔ́ towe tɔ́ ce Davídi ɔ́ ní bó nyí mɔ̌! “Mawu ká sixú nɔ ayǐkúngban jí nǔgbó a? Jǐnukúnsin ɖíe sɔ́ avɔ sɔ mɔ̌ cóbó ma ka sixú hɛn ɛ ǎ e! Ani wɛ ka sɔ́ lɛ́ nyí xɔ élɔ́ e nyɛ gbá nú we ɔ́ tɔn? Amɔ̌ Mawu Mavɔmavɔ, Mawu ce, nyi kɔ kpɔ́n mì, ɖǒtó vo e sa wɛ un ɖe ɔ́. Đǒtó xó e sú ylɔ́ we wɛ un ɖe égbé ɔ́. Nukún towe ní ɖo xɔ élɔ́ jí zǎn kéze, tɛn élɔ́ e mɛ a ɖɔ émí ná nɔ é! Đǒtó ɖɛ e nyɛ mɛsɛntɔ́ towe ɖo tɛn élɔ́ mɛ, bó ɖo xixo sɛ́ dó we wɛ é! Đǒtó xó e sú ylɔ́ we wɛ un ɖe é, bó ɖótó xó e togun towe Izlayɛ́li e kpan nukɔn tɛn élɔ́ bó ɖo susu sɛ́ dó we wɛ é! Mawu Mavɔmavɔ, ɖǒtó mǐ sín jǐxwé fí e a nɔ nɔ é! Đǒtó mǐ, bó sɔ́ hwɛ kɛ mǐ! “Nú mɛɖé hu hwɛ dó nɔzo tɔn, bɔ è ɖɔ n'i ɖɔ ní xwlé nǔ dandan, bɔ é wá xwlé nǔ ɖo vɔ̌sákpe towe nukɔn ɖo xɔ élɔ́ mɛ hǔn, Mawu Mavɔmavɔ, nɔ jǐxwé dɔ̌n bó ɖǒtó; blǒ gbɔn ɖě; gbo hwɛ nú mɛsɛntɔ́ towe lɛ́ɛ, nú mɛ e wa nǔ nyi do ɔ́, è nǎ dɔn tó n'i, bɔ hwɛ ka ná jó mɛ e hwɛ tɔn jɔ é. “Hwenu e Izlayɛ́li ví lɛ́ɛ ná hu hwɛ dó we, bɔ é ná sín hwɛ e yě hu dó we ɔ́ wú, bɔ kɛntɔ́ yětɔn lɛ́ɛ ná ɖu ɖo yě jí ɔ́, nú yě byɔ́ sísɔ́kɛ hwɛ yětɔn lɛ́ɛ tɔn, nú yě kpa susu nú we, nú yě xo ɖɛ lobo sa vo nú we ɖo xwé élɔ́ gbe hǔn, nɔ jǐxwé dɔ̌n, bó ɖótó yě, bó sɔ́ hwɛ kɛ togun towe Izlayɛ́li, bó kplá yě wá ayǐkúngban e a nǎ tɔ́gbó mǐtɔn lɛ́ɛ ɔ́ jí. “Hwenu e jǐnukúnsin ná sú dó yě bɔ jǐ ma sɔ́ ná ja ǎ ɖó yě hu hwɛ dó we wútu ɔ́, nú yě kpan nukɔn tɛn élɔ́ bó xo ɖɛ ɔ́, nú yě kpa susu nú we ɔ́, nú yě lɛ́ kɔ sín hwɛ yětɔn lɛ́ɛ gúdo ɖó a ɖo tó dɔn nú yě wɛ wútu ɔ́, nɔ jǐxwé dɔ̌n, bó ɖótó yě, bó sɔ́ hwɛ kɛ togun towe mɛsɛntɔ́ towe lɛ́ɛ. Xlɛ́ ali ɖagbe e yě ɖó ná gbɔn ɔ́ yě, bó bló bónú jǐ ní ja kɔn nyi ayǐkúngban e a nǎ yě, bɔ é nyí yětɔn é jí. “Hwenu e adɔ abǐ jɛmɛjí ná byɔ́ to ɔ́ mɛ ɔ́, hwenu e jinukún lɛ́ɛ ná fyɔ́ abǐ yě ná nyɔ dó te ɔ́, hwenu e wɛn kpó bɔkle kpó ná vun blá to ɔ́, hwenu e kɛntɔ́ lɛ́ɛ ná hun káká yi gba Izlayɛ́li ví lɛ́ɛ ɖo toxo yětɔn e yě mɛ ahohó lɛ́ lɛ̌ dó lɛ́ɛ mɛ ɔ́, hwenu e nǔ baɖabaɖa ɖěbǔ abǐ azɔnhwi ná byɔ́ to ɔ́ mɛ ɔ́, nú togun towe Izlayɛ́li ɔ́ mɔ ɖɔ émí wa nǔ nyi do, bɔ hwɛ tɔn lɛ́ɛ vɛ́ n'i, bónú é kpan nukɔn xwé élɔ́, bó dlɛ́n alɔ tɔn, bó sa vo sɛ́ dó we lobo xo ɖɛ sɛ́ dó we hǔn, nɔ jǐxwé, fí e a nɔ nɔ é, bó ɖótó e, bó sɔ́ hwɛ tɔn lɛ́ɛ kɛ ɛ. Blǒ gbɔn ɖě, dǒ alɔ mɛ ɖokpó ɖokpó nú é ní sɔgbe xá lě e é zán gbɛ tɔn gbɔn ɔ́, ɖó a tunwun ayixa tɔn. Hwi ɖokpónɔ géé wɛ tunwun gbɛtɔ́ lɛ́ɛ bǐ sín ayixa. Énɛ́ ɔ́, Izlayɛ́li ví lɛ́ɛ ná nɔ ɖó sísí nú we hwebǐnu, ɖo ayǐkúngban e a nǎ tɔ́gbó mǐtɔn lɛ́ɛ ɔ́ jí. “Mɔ̌ ɖokpó ɔ́, toɖévomɛnu e ma nyí Izlayɛ́li ví ǎ sixú gosín to línlín ɖé mɛ, bó wá xo ɖɛ ɖo xwé élɔ́ gbe, ɖó è nǎ tunwun ɖɔ nyǐkɔ towe d'agba, bó ná tunwun ɖɔ mɛɖé kún nɔ sixú nɔ te hlɔ̌nhlɔ́n towe nukɔn ó; bó ná tunwun ɖɔ a kpé nǔ bǐ wú. Ényí mɛ mɔ̌hun wá xo ɖɛ ɖo xwé élɔ́ gbe hǔn, nɔ jǐxwé fí e a nɔ nɔ ɔ́, bó ɖótó e, bó ná ɛ nǔ e é byɔ́ we é; énɛ́ ɔ́, togun e ɖo ayǐkúngban jí lɛ́ɛ bǐ nǎ tunwun we, bó ná ɖó sísí nú we togun towe Izlayɛ́li ɖɔhun, bó ná tunwun ɖɔ nyǐkɔ towe wɛ ɖo xwé élɔ́ e un sá é wú. “Hwenu e a nǎ ná gbe Izlayɛ́li ví lɛ́ɛ bɔ yě ná yi ahwan fun xá kɛntɔ́ yětɔn lɛ́ɛ gbé ɔ́, nú yě kpan nukɔn toxo e a sɔ́ ɔ́ kpódó xwé élɔ́ e un sá nú we ɔ́ kpó, bó xo ɖɛ sɛ́ dó hwi Mawu Mavɔmavɔ hǔn, nɔ jǐxwé dɔ̌n, bó ɖótó yě; ɖǒtó vo e sa sɛ́ dó we wɛ yě ɖe é, bó wá dó alɔ yě. “Gbɛtɔ́ ɖě nɔ́ gɔn hwɛ hu ǎ. Hwenu e Izlayɛ́li ví lɛ́ɛ nǎ hu hwɛ dó we, bɔ a nǎ sin xomɛ dó yě, bó ná jó yě nú kɛntɔ́ yětɔn lɛ́ɛ, bɔ yě ná wlí kannumɔ yětɔn hɛn yi to yětɔn e lín lɛ́ɛ abǐ éé yá lɛ́ɛ ɖě mɛ ɔ́, nú yě byɔ́ yěɖée mɛ ɖo to e mɛ yě nyí kannumɔ ɖe ɔ́ mɛ ɔ́, nú yě lɛ́ kɔ wá gɔ̌n towe, bó sa vo nú we ɖo to e mɛ è wlǐ yě yi ɔ́ mɛ, bó ɖɔ: ‘Mǐ vɛ́ tóli, mǐ hu hwɛ, mǐ wa nǔ nyi do’ ɔ́, nú yě lɛ́ kɔ wá gɔ̌n towe kpódó ayixa yětɔn bǐ kpó, kpódó lǐndɔ̌n yětɔn kpó ɔ́, nú yě nɔ to e mɛ kɛntɔ́ wlí kannumɔ yětɔn hɛn yi ɔ́ mɛ, lobo kpan nukɔn to e a nǎ tɔ́gbó yětɔn lɛ́ɛ ɔ́ mɛ, toxo e a sɔ́ é, xwé e un sá nú we égbé, bó xo ɖɛ sɛ́ dó we hǔn, nɔ jǐxwé dɔ̌n bó ɖótó yě; ɖǒtó vo e sa sɛ́ dó we wɛ yě ɖe é bó wá dó alɔ yě. Sɔ́ togun towe sín hwɛ lɛ́ɛ kɛ ɛ; sɔ́ nǔ e é wa nyi do nú we lɛ́ɛ bǐ kɛ ɛ. Blǒ bónú kɛntɔ́ yětɔn lɛ́ɛ ní nyɔ́ xomɛ dó yě wú, ɖó togun towe wɛ yě nyǐ, towe wɛ yě nyǐ, hwi wɛ ɖe yě tɔ́n sín Ejípu kú gan mɛ. “Mawu Mavɔmavɔ, kpɔ́n mǐ jǐ; ɖǒtó vo e nyɛ kpó togun towe kpó ná sa sɛ́ dó we lɛ́ɛ. Mǐ sú xó sɛ́ dó we hweɖěbǔnu hǔn, nɔ ɖótó mǐ. Đó a ɖe mǐ ɖó vo nú togun ɖě lɛ́ɛ e ɖo ayǐkúngban jí lɛ́ɛ bǐ, bónú mǐ ná nyí towe lě e a ɖɔ gbɔn, gbɔn mɛsɛntɔ́ towe Mɔyízi jí hwenu e a ɖe tɔ́gbó mǐtɔn lɛ́ɛ tɔ́n sín Ejípu é!” Ée Salomɔ́ɔ xo ɖɛ énɛ́ lɛ́ɛ bǐ, bó sa vo énɛ́ bǐ sɛ́ dó Mawu Mavɔmavɔ fó ɔ́, é sí te sín vɔ̌sákpe Mawu Mavɔmavɔ tɔn e kɔn é ko jɛ kpo ɖe ɖ'ayǐ, bó dlɛ́n alɔ sɛ́ dó jǐnukúnsin ɔ́ nukɔn. É nɔ te bo zé gbe dó jǐ, bó xo ɖɛ dó kplékplé Izlayɛ́li tɔn ɔ́ bǐ jí ɖɔ: “Un dó kú nú Mawu Mavɔmavɔ ɖó é ná vivo togun tɔn Izlayɛ́li, bɔ é sɔgbe xá akpá e é dó lɛ́ɛ bǐ! Akpá ɖagbe ɖagbe e é dó gbɔn mɛsɛntɔ́ tɔn Mɔyízi jí lɛ́ɛ ɔ́, é gɔn ɖěbǔ ɖe ǎ. Mawu Mavɔmavɔ, Mawu mǐtɔn ní nɔ kpɔ́ xá mǐ, lě e é nɔ kpɔ́ xá tɔ́gbó mǐtɔn lɛ́ɛ gbɔn é. Ní má ɖe alɔ tɔn sín mǐ wú ó, ní má ka jó mǐ dó ó. Ní bló bónú ayixa mǐtɔn ní nɔ jǐ tɔn, bónú mǐ ná zán gbɛ lě e é jló gbɔn é, bó ná nyi sɛ́n tɔn lɛ́ɛ, bó ná bló nǔ e é zɔ́n lɛ́ɛ, bó ná bló nǔ e é ɖɔ nú tɔ́gbó mǐtɔn lɛ́ɛ é! Mawu Mavɔmavɔ, Mawu mǐtɔn ní nɔ́ flín vo e sa n'i wɛ un ɖe din lɛ́ɛ zǎn kéze, bó nɔ wá dó alɔ mì, bó nɔ́ wá dó alɔ togun tɔn Izlayɛ́li, bónú togun e ɖo ayǐkúngban jí lɛ́ɛ bǐ ná tunwun ɖɔ Mawu Mavɔmavɔ ɖokpónɔ géé wɛ nyí Mawu, Mawu ɖěvo kún sɔ́ ɖe ó. Ayixa mitɔn bǐ ní nɔ Mawu Mavɔmavɔ, Mawu mǐtɔn jí, lě e é ɖe gbɔn égbé din é, bónú mi ní xwedó sɛ́n tɔn lɛ́ɛ, bó wa nǔ e é zɔ́n mi lɛ́ɛ.” Axɔ́sú Salomɔ́ɔ kpódó Izlayɛ́li ví e ɖo fínɛ́ lɛ́ɛ bǐ kpó sá vɔ̌ nú Mawu Mavɔmavɔ. Salomɔ́ɔ hu nyibú adɔ̌kpo ɖě afɔwó (22.000), bó hu lɛ̌ngbɔ́ adɔ̌kpo ayizɛ́n (120.000), bó dó sá kɔnɖókpɔ́vɔ́ nú Mawu Mavɔmavɔ. Énɛ́ ɔ́, Salomɔ́ɔ kpó Izlayɛ́li ví lɛ́ɛ kpó jó xwé ɔ́ nú Mawu Mavɔmavɔ. Gbe énɛ́ ɔ́ gbe ɔ́, axɔ́sú ɔ́ jó kɔ́xota e ɖo sinsɛnxɔ ɔ́ nukɔn ɔ́ bǐ nú Mawu Mavɔmavɔ. Đó vɔ̌sákpe ganvɔ tɔn e ɖo sinsɛnxɔ ɔ́ nukɔn ɔ́ sixú hɛn vɔ̌ lɛ́ɛ bǐ ǎ, bɔ Salomɔ́ɔ gbɔ bo dó vɔ̌ e è nɔ dó zo é, jinukúnvɔ́ lɛ́ɛ, kpó kanlin e è dǒ sá kɔnɖókpɔ́vɔ́ ná lɛ́ɛ sín jǒ kpó zo ɖo kɔ́xo ɔ́ ta. Salomɔ́ɔ ɖu azavaxwe ɔ́ hwe énɛ́ ɔ́ nu, é kpódó Izlayɛ́li ví lɛ́ɛ bǐ kpó. Yě wǎ kpɔ́ gégé. Yě gosín fí tɛnmɛ tɛnmɛ ɖo to ɔ́ mɛ. Mɛɖě gosín káká Lɛbo-Hamáti ɖo totaligbé, bɔ mɛ ɖě gosín káká tɔsisa Ejípu tɔn kɔn ɖo tofɔligbé, bó wá kplé ɖo Mawu Mavɔmavɔ, Mawu mǐtɔn nukɔn, bó ɖu xwe ɔ́ káká nú azǎn tɛ́nwe, bó lɛ́ bló azǎn tɛ́nwe ɖěvo gɔ́ ná, bɔ bǐ blǒ azǎn wǒ-ɛnɛ. Ayǐhɔ́ngbe tɔn, azǎn afɔtɔngɔ́ ɔ́ gbe ɔ́, Salomɔ́ɔ nyi togun ɔ́, bɔ mɛ ɖokpó ɖokpó dó kú n'i, bó ɖidó xwé; yě bǐ ɖo awǎ jɛ wɛ, xomɛ ɖo yě hun wɛ, ɖó ɖagbe e Mawu Mavɔmavɔ wa nú mɛsɛntɔ́ tɔn Davídi kpó togun tɔn Izlayɛ́li kpó ɔ́ bǐ tamɛ. Hwenu e axɔ́sú Salomɔ́ɔ sá xwé nú Mawu Mavɔmavɔ fó, bó sá xwé é ɖésúnɔ tɔn ɔ́, lobo gbá xɔ e é jló ná gbá lɛ́ɛ bǐ ɔ́, Mawu Mavɔmavɔ tɔ́n dó jǐ tɔn azɔn wegɔ́ ɔ́, lě e é tɔ́n dó jǐ tɔn gbɔn ɖo Gabawɔ́ɔn é, bó ɖɔ n'i ɖɔ: “Un yí ɖɛ towe, un se vo e a sa sɛ́ dó mì ɔ́. Un yí xwé élɔ́ e a sá nú mì, bɔ é ná nyí ce káká sɔ́yi bɔ un ná nɔ́ ɖe nyɛɖée xlɛ́ mi ɖo fínɛ́, bɔ nukún ce kpódó ayixa ce kpó ná ɖo jǐ tɔn hwebǐnu. Hwɛ ɔ́, nú a zǎn gbɛ ganjí ɖo nukɔn ce, tɔ́ towe Davídi ɖɔhun kpódó ayixa towe kpó, bó wa nǔ jlɔ́jlɔ́ ɔ́, nú a wa nǔ e un zɔ́n we lɛ́ɛ bǐ ɔ́, nú a nyi sɛ́n ce lɛ́ɛ bó xwedó nǔ e un ɖɔ lɛ́ɛ ɔ́, un ná hɛn zinkpo towe ɖó te tɛgbɛ ɖo Izlayɛ́li, lě e un ɖɔ nú tɔ́ towe Davídi gbɔn é; un ɖɔ n'i ɖɔ: ‘A nǎ ba mɛ e ná nɔ axɔ́súzinkpo towe jí ɖo Izlayɛ́li ɔ́ kpo gbeɖé ɖo vǐ towe lɛ́ɛ mɛ ǎ.’ Amɔ̌, nú mi kpódó vǐ mitɔn lɛ́ɛ kpó lɛ́ kɔ sín gǔdo ce ɔ́, nú mi ma bló nǔ e un zɔ́n mi lɛ́ɛ ǎ ɔ́, nú mi ma nyi sɛ́n ce lɛ́ɛ bó xwedó nǔ e un ɖɔ lɛ́ɛ ǎ ɔ́, nú mi yi sɛn vodún, bó ɖe kɔ́ nú yě ɔ́, un ná ɖe Izlayɛ́li ví lɛ́ɛ sín to e un ná yě ɔ́ mɛ, un ná jó xwé élɔ́ e a sá nú mì bɔ un yí din ɔ́ dó, bɔ Izlayɛ́li to ɔ́ ná húzú to gbigba, bó ná húzú slǎmɛɖɔnú ɖo togun lɛ́ɛ bǐ mɛ. Bɔ xwé élɔ́ e ɖó susu sɔ mɔ̌ din ɔ́, mɛ ɖěbǔ gbɔn akpá tɔn ɔ́, é ná nɔ kpácá ɛ, bɔ é ná nɔ sú xó. È nǎ nɔ́ ɖɔ: ‘Étɛ́wú wɛ Mawu Mavɔmavɔ ká wa nǔ xá to élɔ́ kpódó xwé élɔ́ kpó gbɔn mɔ̌?’ Bɔ è nǎ yí gbe nú yě ɖɔ: ‘Mawu Mavɔmavɔ, Mawu yětɔn e ɖe yě tɔ́n sín Ejípu ɔ́ wɛ yě jó dó, bó tɛ́ dó vodún lɛ́ɛ wú, bó nɔ ɖe kɔ́ nú yě, lobo nɔ sɛn yě. Énɛ́ ɔ́ wú wɛ Mawu Mavɔmavɔ sɛ́ awě énɛ́ lɛ́ɛ bǐ dó yě.’ ” Xwe ko wɛ Salomɔ́ɔ sɔ́ ɖó te bo dó sá xwé we lɛ́ɛ ná. É sá Mawu Mavɔmavɔ xwé ɔ́ kpódó xwé é ɖésúnɔ tɔn kpó. Hwenɛ́nu ɔ́, axɔ́sú Tíi tɔn Ilámu wɛ ná sɛ́dlutín kpó siplɛ́tín kpó, kpódó siká kpó Salomɔ́ɔ lě e Salomɔ́ɔ ba gbɔn ɔ́, énɛ́ wú wɛ Salomɔ́ɔ ná toxo ko Ilámu ɖo Galilée gbé jí. Ilámu gosín Tíi bó ná yi kpɔ́n toxo e Salomɔ́ɔ ná ɛ lɛ́ɛ; lo ɔ́, éé é yi mɔ toxo lɛ́ɛ ɔ́, toxo lɛ́ɛ nyɔ́ nukún tɔn mɛ ǎ. Bɔ é ɖɔ: “Nɔví ce, toxo tɛ́ ká nyí toxo énɛ́ lɛ́ɛ bɔ a nǎ mì?” Bɔ é ɖó nyǐkɔ nú toxo énɛ́ lɛ́ɛ ɖɔ Kavúli; è kpo ɖo toxo énɛ́ lɛ́ɛ ylɔ́ ɖɔ mɔ̌ wɛ káká jɛ égbé. Siká tɔ́nu atɔn adaɖé wɛ Ilámu ná Salomɔ́ɔ. Axɔ́sú Salomɔ́ɔ ɖe mɛ sɛ́ dó mɛɖe, bónú yě ná gbá Mawu Mavɔmavɔ xwé ɔ́, bó ná gbá xwé é ɖésúnɔ tɔn ɔ́, bó ná sú Milo do ɔ́, bó ná mɛ Jeluzalɛ́mu sín ahohó ɔ́, bó ná gbá Hasɔ́ɔ toxo ɔ́, Mɛgido toxo ɔ́, kpódó Gɛzɛ́ɛ toxo ɔ́ kpó. Axɔ́sú Ejípu tɔn wá yí Gɛzɛ́ɛ toxo ɔ́; é hu Kanáanu e ɖo toxo ɔ́ mɛ lɛ́ɛ, bó dó toxo ɔ́ zo. Énɛ́ ɔ́ gúdo ɔ́, é zé toxo ɔ́ dó ná agban nú vǐ tɔn nyɔ̌nu e nyí Salomɔ́ɔ sín asi é. Bɔ Salomɔ́ɔ vɔ́ Gɛzɛ́ɛ toxo ɔ́ ɖó ayǐ, bó vɔ́ Bɛti-Holɔ́ni Dodomɛ tɔn ɔ́ ɖó ayǐ. É vɔ́ Baaláti toxo ɔ́ ɖó ayǐ, bo vɔ́ Tamáa toxo e ɖo gbětótló Judáa tɔn ɔ́ mɛ ɔ́ ɖó ayǐ. É gbá toxo e mɛ é ná nɔ bɛ́ agban tɔn lɛ́ɛ dó lɛ́ɛ, bó gbá ée mɛ é ná nɔ bɛ́ ahwankɛkɛ́ví tɔn lɛ́ɛ dó lɛ́ɛ, bó gbá toxo e mɛ é ná nɔ bɛ́ sɔ́ tɔn lɛ́ɛ dó ɔ́. Salomɔ́ɔ gbá xɔ e é jló ná gbá ɖó Jeluzalɛ́mu lɛ́ɛ, bó gbá ée é jló ná gbá ɖó Libáan lɛ́ɛ kpódó ée é jló ná gbá gbɔn to e mɛ é kpa acɛ gbɔn lɛ́ɛ bǐ kpó. Amɔliti lɛ́ɛ, Hitíti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó ɖé lɛ́ɛ kpo ɖo to ɔ́ mɛ; yědɛɛ ká nyí Izlayɛ́li ví ǎ. Yě kpo ɖo to ɔ́ mɛ, ɖó Izlayɛ́li ví lɛ́ɛ kpé wú bó hu yě bǐ sín to ɔ́ mɛ ǎ; yě mɛ énɛ́ lɛ́ɛ sín vǐ wɛ Salomɔ́ɔ nɔ sɔ́ dó wa azɔ̌ syɛ́nsyɛ́n lɛ́ɛ; é kpo ɖo mɔ̌ káká jɛ égbé. Salomɔ́ɔ ka nɔ sɔ́ Izlayɛ́li ví lɛ́ɛ dó wa azɔ̌ syɛ́nsyɛ́n ǎ, ɖó yědɛɛ lɛ́ɛ ɔ́, ahwanfuntɔ́ wɛ yě nyí, bó nyí mɛsɛntɔ́ tɔn lɛ́ɛ, bó nyí azɔ̌gán tɔn lɛ́ɛ, bó nyí ahwangán tɔn lɛ́ɛ, bó nyí mɛ e kpa acɛ dó ahwankɛkɛ́ví tɔn lɛ́ɛ kpódó sɔ́ tɔn lɛ́ɛ kpó nu é. Gǎn e Salomɔ́ɔ sɔ́ ɖó azɔ̌ tɔn lɛ́ɛ nu lɛ́ɛ ɔ́, yě mɛ afɔwe kantɔn gban (550) wɛ, bɔ yě nɔ́ cɔ́ azɔ̌watɔ́ lɛ́ɛ. Axɔ́sú Ejípu tɔn sín vǐ nyɔ̌nu ɔ́ gosín Davídi Toxo mɛ, bo yi jɛ xwé e Salomɔ́ɔ sá n'i ɔ́ gbe. Hwe énɛ́ ɔ́ nu ɔ́, Salomɔ́ɔ zɔ́n bɔ è sú Milo do ɔ́. Xwe atɔn mɛ, atɔn mɛ tɛgbɛ ɔ́, Salomɔ́ɔ nɔ sá kɔnɖókpɔ́vɔ́ kpó vɔ̌ e è nɔ dó zo é kpó, ɖo vɔ̌sákpe e é bló nú Mawu Mavɔmavɔ ɔ́ jí, bó nɔ́ dó zǎlínkpɔ́n zo ɖo vɔ̌sákpe e ɖo Mawu Mavɔmavɔ nukɔn é jí. Énɛ́ ɔ́, nǔ e wú Salomɔ́ɔ sá xwé ɔ́, é nɔ́ bló. Axɔ́sú Salomɔ́ɔ bló tɔjíhún ɖé lɛ́ɛ ɖo Esiɔ́ni-Gevɛ́ɛ ɖo Eyilati kpá, ɖo Xu Vɔvɔ ɔ́ tó, ɖo Edɔ́mu tomɛ. Ilámu bɛ́ mɛsɛntɔ́ é ɖésúnɔ tɔn, tɔzɔ́watɔ́ e tunwun tɔ ganjí lɛ́ɛ dó tɔjíhún énɛ́ lɛ́ɛ mɛ, bó sɛ́ yě dó mɛsɛntɔ́ Salomɔ́ɔ tɔn lɛ́ɛ gɔ́n. Yě yi Ofíi, bó hɛn siká tɔ́nu wěwe jɛjí sín dɔ̌n wá nú axɔ́sú Salomɔ́ɔ. Axɔ́sú nyɔ̌nu Saba tɔn se lě e Salomɔ́ɔ sín nyǐkɔ ɖo jǐ yi wɛ gbɔn é. É wá gɔ̌n tɔn, bó ná nyi nǔbasɔ́ ɖé lɛ́ɛ dó e, dó tɛn ɛ kpɔ́n. É kpódó gbɛtɔ́ wɔ̌buwɔ́bú ɖé lɛ́ɛ kpó wɛ wá Jeluzalɛ́mu. É dó nǔsáwǔ wǎnɖagbenɔ gěgé, siká gěgé kpódó awǐnnya xɔ akwɛ́ gěgé kpó sín agban nú lǎkúnmí gěgé, bó wá Jeluzalɛ́mu. É yi Salomɔ́ɔ gɔ́n, bó kan nǔ e é kó lɛ́n dó ayi mɛ lɛ́ɛ bǐ byɔ́ ɛ. Salomɔ́ɔ kpé nǔ e é kanbyɔ́ ɛ lɛ́ɛ bǐ wú, bó ná sin nú yě; nǔ ɖěbǔ kpo bɔ axɔ́sú ɔ́ gɔn ma tínmɛ n'i ǎ. Axɔ́sú nyɔ̌nu Saba tɔn mɔ nǔnywɛ́ e Salomɔ́ɔ ɖó lɛ́ɛ bǐ, bó mɔ xwé e é sá é. É mɔ nǔ e Salomɔ́ɔ nɔ ɖu lɛ́ɛ, bó mɔ fí e gǎn hɔn-yitɔ́ tɔn lɛ́ɛ nɔ́ nɔ é, bó mɔ awu e mɛ mɛ e nɔ ná ɛ nǔɖuɖu lɛ́ɛ kpó mɛ e nɔ ba ahan n'i lɛ́ɛ kpó ɖe é, bó mɔ vɔ̌ e é dó zo nú Mawu Mavɔmavɔ lɛ́ɛ. Ée é mɔ nǔ énɛ́ lɛ́ɛ mɔ̌ ɔ́, agbɔ̌n kpé e, bɔ é ɖɔ nú axɔ́sú ɔ́ ɖɔ: “Xó e a nɔ ɖɔ bɔ un se ɖo to ce mɛ ɔ́, kpódó nǔnywɛ́ e a ɖǒ bɔ un se ɖo to ce mɛ ɔ́ kpó ɔ́, hǔn nǔgbó wɛ. Xó énɛ́ lɛ́ɛ e un se ɔ́, un ɖi có bó wá mɔ ɖó nukún wú ǎ. Nǔ e un ka wá mɔ ɖo fí din lɛ́ɛ ɔ́, un se vlɔ̌ɖówe có bó wá fí ǎ. Nǔnywɛ́ e a ɖǒ ɔ́ kpódó dɔkun e a jɛ ɔ́ kpán hú gǎn lě e è ɖɔ gbɔn bɔ un se é. Nǔ nyɔ́ nú mɛ towe lɛ́ɛ, nǔ nyɔ́ nú mɛsɛntɔ́ towe lɛ́ɛ; yě nɔ́ ɖo nukɔn towe hwebǐnu, bó nɔ ɖo nǔnywɛ́ yí ɖo así towe wɛ. Susu nú Mawu Mavɔmavɔ, Mawu towe e wa ɖagbe nú we, bó sɔ́ we ɖó axɔ́súzinkpo Izlayɛ́li tɔn jí é. Wǎn e Mawu Mavɔmavɔ yí nú Izlayɛ́li ɔ́ ɖo te káká sɔ́yi; énɛ́ ɔ́ wú wɛ é sɔ́ we axɔ́sú, bónú a nǎ wa nǔ jlɔ́jlɔ́, bó ná dó hwɛjijɔ.” Ée axɔ́sú nyɔ̌nu Saba tɔn ɔ́ ɖɔ mɔ̌ ɔ́, é ná siká tɔ́nu atɔn adaɖé mɔ̌ Salomɔ́ɔ, bó ná ɛ nǔsáwǔ wǎn ɖagbenɔ kpɔ́ gégé, bó ná ɛ awǐnnya xɔ akwɛ́. Sín gbe énɛ́ gbe ɔ́, è sɔ́ mɔ mɛɖé hɛn nǔsáwǔ wǎnɖagbenɔ ɖé wá Izlayɛ́li bɔ é sukpɔ́ sɔ ée axɔ́sú nyɔ̌nu Saba tɔn wá ná axɔ́sú Salomɔ́ɔ ɔ́ kpɔ́n gbeɖé ǎ. Tɔjíhún axɔ́sú Ilámu tɔn e hɛn siká sín Ofíi wá lɛ́ɛ lɛ́ hɛn santálutín wɔ̌buwɔ́bú ɖé lɛ́ɛ kpó awǐnnya xɔ akwɛ́ wɔ̌buwɔ́bú ɖé lɛ́ɛ kpó wá. Axɔ́sú Salomɔ́ɔ sɔ́ santálutín lɛ́ɛ dó ná sósyɛ́n Mawu Mavɔmavɔ xwé ɔ́, lobo sɔ́ ɖě dó ná sósyɛ́n hɔnmɛ ɔ́, bó lɛ́ sɔ́ ɖě dó bló agǐdigbo kpódó kanhún lɛ́ɛ kpán nú hanjitɔ́ lɛ́ɛ. È sɔ́ hɛn santálutín wá Izlayɛ́li bɔ é sukpɔ́ sɔ mɔ̌ kpɔ́n gbeɖé ǎ. È ka sɔ́ mɔ ɖě káká jɛ égbé ǎ. Axɔ́sú Salomɔ́ɔ ka ná nǔ e jló axɔ́sú nyɔ̌nu Saba tɔn bɔ é byɔ́ ɛ lɛ́ɛ bǐ i. É lɛ́ ná ɛ nǔ e axɔ́sú é ɖɔhun sixú ná mɛ é. Énɛ́ ɔ́ gúdo ɔ́, axɔ́sú nyɔ̌nu ɔ́ kpódó mɛsɛntɔ́ tɔn lɛ́ɛ kpó lɛ́ kɔ yi to yětɔn mɛ. Siká e nɔ wá nú Salomɔ́ɔ xwewú xwewú ɔ́ yi tɔ́nu ko. Nǔjɔ e è nɔ ɖe ɖo agban e nɔ gosín togúdo wá lɛ́ɛ jí lɛ́ɛ, kpódó ée è nɔ yí ɖo ajɔ̌nú to ɔ́ mɛ tɔn lɛ́ɛ jí lɛ́ɛ kpó, kpódó takwɛ́ e axɔ́sú toɖévomɛ tɔn lɛ́ɛ nɔ sú lɛ́ɛ kpó, abǐ ée tokpɔngán to ɔ́ mɛ tɔn lɛ́ɛ nɔ yí lɛ́ɛ kpó gɔ́ ná. Axɔ́sú Salomɔ́ɔ zɔ́n bɔ è blǒ gǎglónú ɖaxó ɖaxó afɔɖé n'i bó tɛ́ siká dó yě wú. Siká kilóo ayizɛ́n wɛ è tɛ́ dó gǎglónú ɖokpó ɖokpó wú. È lɛ̌ bló gǎglónú kpɛví kpɛví afɔɖé kanwe ko (300) n'i bó tɛ́ siká dó yě wú. Siká kilóo ɖokpó adaɖé wɛ è tɛ́ dó ɖokpó ɖokpó wú. É bɛ́ yě dó xwé e è nɔ ylɔ́ ɖɔ “Zungbó Libáan tɔn” ɔ́ gbe. Axɔ́sú ɔ́ lɛ́ zɔ́n bɔ è blǒ axɔ́súzinkpo ɖaxó ɖokpó n'i, bó zé ajinakúɖú dó ɖó acɔ́ ná, bó tɛ́ siká akú d'é wú. Axɔ́súzinkpo énɛ́ ɔ́ ɖó kpekán ayizɛ́n, bɔ gǎnjɛmɛ tɔn cí toboo. É ɖó awaɖótɛn we; é kpa kinnikínní we ɖó awaɖótɛn ɖokpó ɖokpó kpá. È lɛ̌ kpa kinnikínní wěwé ɖěvo lɛ́ɛ, bó to yě ɖó kpekán lɛ́ɛ jí, ayizɛ́n ɖo amyɔxwé, bɔ ayizɛ́n ɖo ɖisíxwé. È blǒ nǔ mɔ̌hunkɔtɔn ɖě ɖo axɔ́súɖuto lɛ́ɛ ɖě mɛ ǎ. Siká wɛ è dǒ bló kɔ́fu axɔ́sú Salomɔ́ɔ tɔn lɛ́ɛ bǐ nǎ. Gannú e ɖo xwé e è nɔ ylɔ́ ɖɔ “Zungbó Libáan tɔn” ɔ́ gbe lɛ́ɛ bǐ wɛ è sɔ́ siká akú dó bló ná. È zě kpatágan dó bló nǔ ɖěbǔ ná ǎ, ɖó axɔ́sú Salomɔ́ɔ sín hwenu ɔ́, è nɔ mɔ kpatágan dó mɔ nǔɖé wa nú ǎ. Axɔ́sú Salomɔ́ɔ ɖó tɔjíhún ɖaxó ɖaxó ɖé lɛ́ɛ, bó nɔ sɛ́ dó gbě jí zɔga kpódó axɔ́sú Ilámu tɔn lɛ́ɛ kpó, bɔ xwe atɔn mɛ tɛgbɛ ɔ́, tɔjíhún nɛ́ lɛ́ɛ nɔ hɛn siká, kpatágan, ajinakúɖú, zǐnwó, kpódó ahlǐnhǎn kpó wá. Axɔ́sú Salomɔ́ɔ hú gǎn axɔ́sú e ɖo ayǐkúngban jí lɛ́ɛ bǐ ɖo dɔkun kpó nǔnywɛ́ kpó mɛ. Mɛ bǐ nɔ ba ná mɔ Salomɔ́ɔ, bó ná se nǔnywɛ́xó e Mawu sɔ́ dó ayi mɛ n'i é. Yě mɛ ɖokpó ɖokpó nɔ wá ná nǔ i. Yě nɔ́ hɛn nǔ e è zě kpatágan dó bló ná lɛ́ɛ kpódó ée è zě siká dó bló ná lɛ́ɛ kpó, yě nɔ́ hɛn avɔ, ahwanfunnú, nǔsáwǔ wǎnɖagbenɔ, sɔ́ kpódó sɔ́tócí kpó wá n'i. Mɔ̌ wɛ yě nɔ́ bló xwewú xwewú tɛgbɛ. Salomɔ́ɔ kplé kɛkɛ́ví lɛ́ɛ kpódó sɔ́ lɛ́ɛ kpó. É ɖó kɛkɛ́ví afɔtɛ́nwe (1.400), bó ɖó sɔ́ děgba atɔn (12.000). É bɛ́ kɛkɛ́ví lɛ́ɛ ɖě dó toxo e mɛ kɛkɛ́ví lɛ́ɛ nɔ́ nɔ é mɛ, bó bɛ́ ɖě ɖó é ɖésúnɔ gɔ́n ɖo Jeluzalɛ́mu. Axɔ́sú Salomɔ́ɔ bló bɔ kpatágan e ɖo Jeluzalɛ́mu ɔ́ sukpɔ́ kɛ́n ɖɔhun. É bló bɔ sɛ́dlutín sukpɔ́ sikomɔ́ɔtín e ɖo Cefela lɛ́ɛ ɖɔhun. Ejípu kpó Silísíi kpó wɛ axɔ́sú Salomɔ́ɔ sín sɔ́ lɛ́ɛ nɔ gosín. Ajɔ̌tɔ́ ɖé lɛ́ɛ wɛ nɔ yi xɔ wá n'i sín dɔ̌n. Gankwɛ́ nǔwɔntɔn (600) wɛ è nɔ dó xɔ kɛkɛ́ví ɖokpó ná sín Ejípu, bó nɔ xɔ sɔ́ ɖokpó yí gankwɛ́ kantɔn gban (150). Ajɔ̌tɔ́ ɖokpó énɛ́ lɛ́ɛ wɛ nɔ xɔ wá nú axɔ́sú Hitíti lɛ́ɛ bǐ kpódó axɔ́sú Silíi tɔn lɛ́ɛ bǐ kpó. Axɔ́sú Salomɔ́ɔ da nyɔ̌nu toɖévomɛnu gěgé; é nyí axɔ́sú Ejípu tɔn ví ɔ́ kɛ́ɖɛ́ wɛ nyí toɖévomɛnu e é da ɔ́ ǎ. É da Mɔwabunu ɖé lɛ́ɛ, bó da Amumɔ́ɔ ví ɖé lɛ́ɛ, Edɔ́munu ɖé lɛ́ɛ, Sidɔ́ɔnnu ɖé lɛ́ɛ, Hitíti ɖé lɛ́ɛ. Mawu Mavɔmavɔ ká kó ɖɔ nú Izlayɛ́li ví lɛ́ɛ dó togun énɛ́ lɛ́ɛ wú ɖɔ: “Mi ma da to énɛ́ lɛ́ɛ mɛ nu lɛ́ɛ ó, yě lɔ ní má da mi ó, é má nyí mɔ̌ ǎ ɔ́, yě ná dɔn mi bɔ mi ná jɛ vodún yětɔn lɛ́ɛ sɛn jí.” Lo ɔ́, Salomɔ́ɔ ɖó wǎn yíyí nú nyɔ̌nu toɖévomɛnu énɛ́ lɛ́ɛ. Nyɔ̌nu nǔwɔntɔn kanwe ko (700) wɛ é da, bó lɛ́ ɖó asi afɔɖé kanwe ko (300) ɖěvo. Nyɔ̌nu lɛ́ɛ lílɛ́ ayixa tɔn. Hwenu e Salomɔ́ɔ wá kpo nyɔ̌xó ɔ́, asi tɔn lɛ́ɛ lílɛ́ ayixa tɔn bɔ é jɛ vodún lɛ́ɛ sɛn jí, bɔ ayixa tɔn bǐ sɔ́ ɖo Mawu Mavɔmavɔ, Mawu tɔn wú, tɔ́ tɔn Davídi ɖɔhun ǎ. Salomɔ́ɔ nɔ sɛn Sidɔ́ɔnnu lɛ́ɛ sín vodún Asitaatée ɔ́, bó nɔ sɛn Amumɔ́ɔ ví lɛ́ɛ sín vodún Milukɔ́mu, nǔvɛ́mɔ Mawu tɔn ɔ́. Salomɔ́ɔ wa nǔ e má nyɔ́ Mawu Mavɔmavɔ nukún mɛ ǎ é, ɖó é nɔ́ se tónú nú Mawu Mavɔmavɔ ɖo ali bǐ nu tɔ́ tɔn Davídi ɖɔhun ǎ. É gbá vodúnxɔ ɖokpó ɖó só e kpan nukɔn Jeluzalɛ́mu ɔ́ jí nú Mɔwabunu lɛ́ɛ sín vodún, nǔvɛ́mɔ Mawu tɔn Kemɔci ɔ́ kpódó Amumɔ́ɔ ví lɛ́ɛ sín vodún Mɔlɛ́ki, nǔvɛ́mɔ Mawu tɔn ɔ́ kpó. Mɔ̌ wɛ é gbá xɔ nú asi tɔn toɖévomɛnu lɛ́ɛ bǐ sín vodún, bɔ yě nɔ́ xwlé nǔsáwǔ wǎnɖagbenɔ vodún yětɔn lɛ́ɛ, bó nɔ́ zé kanlin dó sá vɔ̌ nú yě. Mawu sin xomɛ dó Salomɔ́ɔ, ɖó é ɖe ayixa tɔn sín Mawu Mavɔmavɔ, Mawu Izlayɛ́li tɔn e ɖe éɖée xlɛ́ ɛ azɔn we ɔ́ wú. Hwe énɛ́ lɛ́ɛ nu wɛ Mawu Mavɔmavɔ dó sɛ́n n'i ɖɔ é ní ma sɛn vodún ó. Salomɔ́ɔ ka nyi sɛ́n e Mawu Mavɔmavɔ dó n'i lɛ́ɛ ǎ. Énɛ́ ɔ́, Mawu Mavɔmavɔ ɖɔ n'i ɖɔ: “Ée a wa nǔ gbɔn mɔ̌, bó má hɛn akɔ e mǐ jɛ ɔ́ ǎ, bó má ká nyi sɛ́n e un dó nú we lɛ́ɛ ǎ ɔ́, un ná yí axɔ́súɖuto ɔ́ sín así towe, bó ná sɔ́ jó nú mɛsɛntɔ́ towe lɛ́ɛ ɖokpó. Amɔ̌, un ná kpɔ́n dó tɔ́ towe Davídi wú bó ná yí axɔ́súɖuto ɔ́ sín así towe hwenu e a ɖo gbɛ ɔ́ ǎ. Vǐ towe sí wɛ un ná wá yí axɔ́súɖuto ɔ́ ɖe. É ká nyí axɔ́súɖuto ɔ́ bǐ wɛ un ná yí ǎ, un ná jó akɔta ɖokpó dó n'i, ɖó mɛsɛntɔ́ ce Davídi kpódó Jeluzalɛ́mu toxo e un sɔ́ ɔ́ kpó wútu.” Mawu Mavɔmavɔ sɔ́ dó ayi mɛ nú mɛ ɖokpó, bɔ é ná hwlɛ́n gǎn xá Salomɔ́ɔ. Mɛ ɔ́ nɔ nyí Hadádi; Edɔ́munu wɛ, bó jɔ ɖo axɔ́sú Edɔ́mu tɔn sín kún mɛ. Hwenu e Davídi ɖo ahwan fun xá Edɔ́mu to ɔ́ wɛ ɔ́, ahwangán Jowabu yi Izlayɛ́li ví e kú ɖo ahwangbénu lɛ́ɛ ɖi gbé, bó hu súnnu Edɔ́munu lɛ́ɛ bǐ. Jowabu kpó Izlayɛ́li ví lɛ́ɛ bǐ kpó nɔ fínɛ́ xɔ sun ayizɛ́n; yě nɔ fínɛ́ káká bó hu súnnu e ɖo Edɔ́mu tomɛ lɛ́ɛ bǐ. Amɔ̌, Hadádi hɔn, é kpódó Edɔ́munu ɖé lɛ́ɛ kpó, bó yi Ejípu. Tɔ́ tɔn sín mɛsɛntɔ́ lɛ́ɛ wɛ. Hadádi lɛ́ kpo ɖo dɔ̌nkpɛvú mɛ hwenɛ́nu. Yě gosín Madiáani, bó yi Paláni. Yě kplá súnnu Paláninu ɖé lɛ́ɛ, bó yi Ejípu ɖo axɔ́sú Ejípu tɔn ɔ́ gɔ́n. Axɔ́sú ɔ́ ná xwé ɖokpó Hadádi, bó nɔ ná ɛ nǔɖuɖu, lobo ná ɛ ayǐkúngban. Axɔ́sú Ejípu tɔn ɔ́ nyɔ́ xomɛ dó Hadádi wú, káká bó sɔ́ asi tɔn Taxipenɛ́si sín nɔví ɔ́ da n'i. Taxipenɛ́si sín nɔví ɔ́ ji vǐ súnnu ɖokpó nú Hadádi, bó sun nyǐ i ɖɔ Genuváti. Taxipenɛ́si hɛn vǐ ɔ́ ɖó axɔ́sú ɔ́ xwé, bɔ é kpó Ejípu xɔ́sú ɔ́ sín vǐ lɛ́ɛ kpó nɔ kpɔ́. Hadádi kpo ɖo Ejípu dɔ̌n, bó se ɖɔ Davídi zán kú, bɔ Jowabu e nyí ahwangán ɔ́ lɔ kú. Ée é se mɔ̌ ɔ́, é ɖɔ nú Ejípu xɔ́sú ɔ́ ɖɔ: “Nǎ gbe mì nú ma yi to ce mɛ.” Ée é ɖɔ mɔ̌ ɔ́, axɔ́sú ɔ́ kanbyɔ́ ɛ ɖɔ: “Ani wɛ hwedó we ɖo gɔ̌n ce, bɔ a jlǒ ná yi to towe mɛ?” Bɔ Hadádi yí gbe n'i ɖɔ: “Nǔ ɖěbǔ hwedó mì ǎ, amɔ̌ gbɔ nú má yi.” Mawu sɔ́ dó ayi mɛ nú mɛ ɖěvo bɔ é ná hwlɛ́n gǎn xá Salomɔ́ɔ. Eliyada sín vǐ Hlezɔ́ni wɛ. É hɔn sín gǎn tɔn Hadadɛzɛ́ɛ, Sova xɔ́sú ɔ́ gɔ́n. Hwenu e Davídi hu gǎn tɔn Hadadɛzɛ́ɛ sín sɔ́ja lɛ́ɛ ɔ́, Hlezɔ́ni kplé mɛ ɖé lɛ́ɛ bó nyí gǎn ɖo yě nu, bɔ yě yi Damási, bó nɔ fínɛ́, bó ɖu axɔ́sú ɖo fínɛ́. Hwenu e axɔ́sú Salomɔ́ɔ ɖo zinkpo jí ɔ́, Hlezɔ́ni mɔ Izlayɛ́li togun ɔ́ gbɔ ǎ; Hadádi lɔ ɖo nǔ e jló e ɔ́ dó sin xá togun ɔ́ wɛ hwenɛ́nu ɖokpó ɔ́. Hlezɔ́ni gbɛ́ wǎn nú Izlayɛ́li ví lɛ́ɛ hwenu e é ɖo axɔ́sú ɖu wɛ ɖo Silíi é. Nya ɖé tíin, bó nɔ́ nyí Jelobowámu; akɔta Eflayímu tɔn mɛ wɛ é jɔ ɖe, bó gosín gletoxo Seleda tɔn mɛ. Tɔ́ tɔn nɔ́ nyí Nɛvati. Nɔ tɔn nɔ nyí Selúa; asúkúsi wɛ. Jelobowámu ɔ́, mɛsɛntɔ́ Salomɔ́ɔ tɔn wɛ, bó ká fɔ́n gǔ dó jǐ tɔn. Lě e é fɔ́n gǔ dó jǐ tɔn gbɔn é ɖíe: Hwenu e Salomɔ́ɔ ɖo Milo do ɔ́ sú wɛ, bó ɖo fí e ahohó Davídi tɔn mu ɖe lɛ́ɛ blóɖó wɛ ɔ́, Jelobowámu fɔ́n gǔ dó jǐ tɔn. Jelobowámu dó hlɔ̌nhlɔ́n; súnnu glegbenu ɖokpó wɛ. Ée Salomɔ́ɔ mɔ lě e é ɖo azɔ̌ wa gbɔn wɛ ɔ́, é sɔ́ ɛ, ɖɔ ní cɔ́ mɛ e ɖo mɛɖe ɖo akɔta Eflayímu tɔn kpó Manasée tɔn kpó mɛ lɛ́ɛ bǐ. Jelobowámu tɔ́n sín Jeluzalɛ́mu gbe ɖokpó, bɔ gbeyíɖɔ Mawu tɔn Axiya Silóonu ɔ́ kpé e ɖo alixo. Awu ɖaxó yɔ̌yɔ́ ɖé wɛ Axiya dó. Yě mɛ we lɛ́ɛ géé wɛ ɖo ali ɔ́ jí, ɖo gblǒlǒ mɛ. Axiya dɔn awu yɔ̌yɔ́ e é dó ɔ́, bó hɛn tlɛ́n ɖó wěwe, bó ɖɔ nú Jelobowámu ɖɔ: “Bɛ̌ xwɛ wǒ! Đó Mawu Mavɔmavɔ, Mawu Izlayɛ́li tɔn ɖɔ: ‘Đǒtó mì, un ná yí axɔ́súɖuto ɔ́ sín Salomɔ́ɔ sí, bó ná ná we akɔta wǒ. Amɔ̌ un ná jó akɔta ɖokpó dó n'i ɖó mɛsɛntɔ́ ce Davídi kpó Jeluzalɛ́mu toxo e un sɔ́ ɖo akɔta Izlayɛ́li tɔn lɛ́ɛ bǐ mɛ ɔ́ kpó wútu. Un ná bló mɔ̌, ɖó Salomɔ́ɔ kpó Izlayɛ́li ví lɛ́ɛ kpó jó mì dó, bó nɔ sɛn Sidɔ́ɔnnu lɛ́ɛ sín vodún Asitaatée; yě nɔ́ sɛn Mɔwabunu lɛ́ɛ sín vodún Kemɔci, yě nɔ́ sɛn Amumɔ́ɔ ví lɛ́ɛ sín vodún Milukɔ́mu. Yě ká lɛ́ xwedó ali ce, bó ná nɔ wa nǔ e sɔgbe ɖo nukún ce mɛ ɔ́ ǎ, yě nɔ́ nyi sɛ́n ce lɛ́ɛ ǎ, yě nɔ́ wa nǔ e un zɔ́n lɛ́ɛ ǎ, yě nɔ́ wa nǔ Davídi Salomɔ́ɔ sín tɔ́ ɔ́ ɖɔhun ǎ. Nǔ ɖo mɔ̌ có, Salomɔ́ɔ sí ná yí axɔ́súɖuto ɔ́ bǐ ɖe wɛ un ɖe ǎ: un ná jó e dó bɔ é ná nyí gǎn ɖo gbɛzán tɔn bǐ mɛ, ɖó mɛsɛntɔ́ ce Davídi e un sɔ́, bɔ é bló nǔ e un zɔ́n lɛ́ɛ, bó nyi sɛ́n ce lɛ́ɛ ɔ́ wú. Amɔ̌, vǐ tɔn sí wɛ un ná wá yí axɔ́súɖuto ɔ́ sín, bó ná ná we akɔta wǒ. Un ná jó akɔta ɖokpó dó nú vǐ tɔn, bónú mɛsɛntɔ́ ce Davídi sín vǐ ɖokpó ná ɖo zinkpo jí tɛgbɛ ɖo Jeluzalɛ́mu toxo e un sɔ́, bɔ nyǐkɔ ce ná nɔ jí ɔ́ mɛ. Jelobowámu, hwɛ ɔ́, un ná sɔ́ we bɔ a nǎ ɖu axɔ́sú lě e é jló we gbɔn é. A nǎ ɖu axɔ́sú ɖo Izlayɛ́li sín akɔta wǒ nu. Nú a xwedó nǔ e un ná ɖɔ nú we lɛ́ɛ bǐ ɔ́, nú a gbɔn ali ce lɛ́ɛ ɔ́, nú a nyi sɛ́n ce lɛ́ɛ, bó wa nǔ e un zɔ́n lɛ́ɛ ɔ́, nú a wa nǔ jlɔ́jlɔ́ ɖo nukɔn ce, lě e mɛsɛntɔ́ ce Davídi bló gbɔn ɔ́, un ná nɔ kpɔ́ xá we, un ná zé axɔ́súzinkpo ɔ́ ɖó xwédo towe mɛ, lě e un bló nú Davídi gbɔn é. Un ná ná Izlayɛ́li to ɔ́ we. Un ná bló mɔ̌, bó ná dó dó winnyá Davídi ví lɛ́ɛ. Un ka ná dó winnyá yě káká sɔ́yi ǎ.’ ” Ée Salomɔ́ɔ se mɔ̌ ɔ́, é jló ná hu Jelobowámu, bɔ Jelobowámu hɔn yi Ejípu ɖo Cicáki axɔ́sú Ejípu tɔn ɔ́ gɔ́n. É nɔ Ejípu káká bɔ Salomɔ́ɔ zán wá kú. Nǔ e kpo bɔ Salomɔ́ɔ wa lɛ́ɛ, azɔ̌ e é wa lɛ́ɛ bǐ, kpódó nǔnywɛ́ tɔn kpó ɔ́, è wlǎn dó azɔ̌ e Salomɔ́ɔ wa lɛ́ɛ sín wěma mɛ. Salomɔ́ɔ ɖu axɔ́sú ɖo Jeluzalɛ́mu ɖo Izlayɛ́li to ɔ́ bǐ nu nú xwe kanɖé (40). Énɛ́ ɔ́ gúdo ɔ́, Salomɔ́ɔ zán wá kú, bɔ è sɔ́ ɛ ɖó tɔ́ tɔn Davídi Toxo mɛ. Vǐ tɔn Hlobowámu wɛ ɖu axɔ́sú ɖó tɛn tɔn mɛ. Hlobowámu yi Sikɛ́mu, ɖó akɔta Izlayɛ́li tɔn e ɖo Totaligbé lɛ́ɛ bǐ wá Sikɛ́mu bó ná sɔ́ ɛ axɔ́sú. Jelobowámu Nɛvati ví ɔ́, Ejípu fí e é hɔn nú axɔ́sú Salomɔ́ɔ bo yi cí ɔ́ wɛ é kpo ɖe, bó se ɖɔ è sɔ́ Hlobowámu axɔ́sú. Ée é se mɔ̌, é ɖɔ émí kún ɖo tɛn ná sɛ sín Ejípu wɛ ó. Lo ɔ́, yě sɛ́ mɛ dó e ɖɔ é ní wá. Énɛ́ ɔ́, é kpó kplékplé Izlayɛ́li ví e ɖo Totaligbé lɛ́ɛ tɔn bǐ kpó wá Hlobowámu gɔ́n, bó ɖɔ n'i ɖɔ: “Agban kpinkpɛn wɛ tɔ́ towe ɖíɖá mǐ. Hwɛ din ɔ́, nú a ɖe kan kpo nú azɔ̌ syɛ́nsyɛ́n e wa wɛ mǐ ɖe ɔ́, bo ɖe agban kpinkpɛn e tɔ́ towe ɖíɖá mǐ ɔ́ kpo nú mǐ ɔ́, mǐ nǎ wa azɔ̌ nú we.” Ée yě ɖɔ mɔ̌ ɔ́, Hlobowámu ɖɔ nú yě ɖɔ: “Mi yi bo lɛ́ kɔ wá gɔ̌n ce azǎn atɔn gbe.” Ée é ɖɔ mɔ̌, yě ɖidó. Ée togun ɔ́ yi ɔ́, axɔ́sú Hlobowámu yi mɔ tomɛxó e wa azɔ̌ xá tɔ́ tɔn Salomɔ́ɔ hwenu e é ɖo gbɛ ɔ́, bó kanbyɔ́ yě ɖɔ: “Nǔ tɛ́ wɛ mi ná kplɔ́n mì, nú má ɖɔ nú togun énɛ́ ɔ́?” Bɔ yě ɖɔ n'i ɖɔ: “Égbé din ɔ́, nú a ɖe xlɛ́ yě ɖɔ émí ɖo gbesisɔ mɛ, bó ná nyí mɛsɛntɔ́ togun ɔ́ tɔn ɔ́, nú a dǒ gbe ɖagbe nú yě ɔ́, yě ná nyí mɛsɛntɔ́ towe káká sɔ́yi.” Hlobowámu ka zé nǔ e tomɛxó lɛ́ɛ kplɔ́n ɛ ɔ́ dó wa azɔ̌ ná ǎ, lobo yi mɔ gbɛ̌ tɔn e kpódó é kpó su ɖó hǎ jí bɔ yě nɔ́ sɛn ɛ lɛ́ɛ, bó ɖɔ nú yě ɖɔ: “Togun énɛ́ wá ɖɔ nú mì ɖɔ nyɛ ní ɖe agban kpinkpɛn e tɔ́ ce dó nú émí, bó ɖɔ émí ní hɛn dandan ɔ́ kpo nú émí. Nǔ tɛ́ wɛ mi ná kplɔ́n mì, nú má ɖɔ nú yě?” Ée é ɖɔ mɔ̌ ɔ́, gbɛ̌ tɔn lɛ́ɛ ɖɔ n'i ɖɔ: “Mɛ énɛ́ lɛ́ɛ ɖo vo sa wɛ ɖɔ tɔ́ hwi tɔn ɖíɖá agban kpinkpɛn émí, bó ɖo byɔ̌byɔ́ wɛ ɖɔ hwi ní ɖe agban kpo nú émí. É nyɔ́! Xó e a ɖǒ ná ɖɔ nú yě ɔ́ ɖíe: Đɔ nú yě ɖɔ: ‘Alɔví ce tókɛ́ ɔ́ kló hú tɔ́ ce sín awa. Tɔ́ ce dó agban kpinkpɛn nú mi. Nyɛ ka ná dó agban e kpɛn hú mɔ̌ ɔ́ nú mi. Tɔ́ ce zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.’ ” Azǎn atɔn e axɔ́sú ɔ́ ɖó ɔ́ sɔgbe, bɔ Jelobowámu kpódó togun ɔ́ bǐ kpó wá Hlobowámu gɔ́n lě e é ɖɔ nú yě gbɔn é. Ée yě wá é ɔ́, é bló nǔ e tomɛxó lɛ́ɛ kplɔ́n ɛ ɔ́ ǎ; é dó gbe ɖagbe nú yě ǎ. É bló nǔ e gbɛ̌ tɔn lɛ́ɛ kplɔ́n ɛ é. É ɖɔ nú yě ɖɔ: “Tɔ́ ce dó agban kpinkpɛn nú mi, nyɛ ká ná dó éé hú mɔ̌ ɔ́ nú mi. É zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.” Hǔn axɔ́sú ɔ́ bló nǔ e ba wɛ togun ɔ́ ɖe ɔ́ ǎ. Mawu Mavɔmavɔ wɛ ka zɔ́n bɔ nǔ nɛ́ lɛ́ɛ nyí gbɔn mɔ̌, bónú xó e é ɖɔ nú Jelobowámu Nɛvati ví ɔ́ gbɔn Axiya Silóonu ɔ́ jí ɔ́ ná dó jɛ. Ée akɔta Izlayɛ́li tɔn e ɖo Totaligbé lɛ́ɛ bǐ mɔ ɖɔ axɔ́sú ɔ́ kún bló nǔ e ba wɛ émí ɖe ɔ́ ó ɔ́, yě ɖɔ: “Ani wɛ ɖo mǐ kpódó Davídi kpó tɛ́ntin? Mǐ kpó Jɛsée ví énɛ́ ɔ́ kpó kpé nǔɖé ǎ, Izlayɛ́li ví e mi, mi wá mǐ ní lɛ́ kɔ yi xwé! Din ɔ́, Davídi ví, kpé nukún dó axɔ́súɖuto towe wú!” Ée Izlayɛ́li ví lɛ́ɛ ɖɔ mɔ̌ ɔ́, yě ɖidó. Judáanu lɛ́ɛ kɛ́ɖɛ́ jɛ́n nɔ́ mɔ Hlobowámu dó mɔ axɔ́sú. Nǔ ká ɖo mɔ̌ có Hlobowámu sɛ́ Adolámu e kpa acɛ dó mɛɖezɔ́ nu ɔ́ dó Izlayɛ́li ví e ɖo Totaligbé lɛ́ɛ gɔ́n, bɔ yě bǐ nyi hwǎn dó e bó hu i. Énɛ́ ɔ́, Hlobowámu yá wǔ byɔ́ kɛkɛ́ví tɔn mɛ, bó hɔn yi Jeluzalɛ́mu. Lě e Izlayɛ́li ví e ɖo Totaligbé lɛ́ɛ gbɛ́ ɖɔ xwédo Davídi tɔn kún ná kpa acɛ nú émí ó gbɔn ɔ́ nɛ́, bɔ é kpo ɖo mɔ̌ káká wá jɛ égbé. Izlayɛ́li ví e ɖo Totaligbé lɛ́ɛ bǐ se ɖɔ Jelobowámu lɛ́ kɔ wá. Ée yě se mɔ̌ ɔ́, yě kplé yěɖée, bó sɛ́ wɛn dó Jelobowámu, bɔ é wá, bɔ yě sɔ́ ɛ axɔ́sú ɖó Izlayɛ́li to ɔ́ bǐ nu. Akɔta Judáa tɔn ɔ́ kɛ́ɖɛ́ wɛ nɔ gbejí nú Davídi sín mɛ lɛ́ɛ. Ée Hlobowámu Salomɔ́ɔ ví ɔ́ wá Jeluzalɛ́mu ɔ́, é kplé ahwanfuntɔ́ syɛ́nsyɛ́n adɔ̌kpo tɛ́nnɛ (180.000) ɖo akɔta Judáa tɔn kpódó akɔta Bɛnjamɛ́ɛ tɔn kpó mɛ, bónú yě ná yi fun ahwan xá Izlayɛ́li ví e ɖo Totaligbé lɛ́ɛ, bónú Hlobowámu ná ɖu axɔ́sú ɖo yě nu gǎnnugǎnnu. Mawu ká ɖɔ nú ɖɛ̌mɛnu tɔn Cemaya ɖɔ: “Đɔ xó nú Hlobowámu Salomɔ́ɔ sín vǐ, axɔ́sú Judáa tɔn ɔ́ kpódó akɔta Judáa tɔn ɔ́ bǐ kpó, kpódó Bɛnjamɛ́ɛ tɔn ɔ́ bǐ kpó ɖɔ: ‘Mawu Mavɔmavɔ ɖɔ mi ní má yi fun ahwan xá nɔví mitɔn Izlayɛ́linu lɛ́ɛ ó, ɖɔ ɖokpó ɖokpó mitɔn ní lɛ́ kɔ yi xwé! Đó émí wɛ zɔ́n bɔ nǔ énɛ́ lɛ́ɛ bǐ jɛ.’ ” Ée yě se nǔ e Mawu Mavɔmavɔ ɖɔ ɔ́, yě se tónú n'i bó lɛ́ kɔ yi xwé. Jelobowámu mɛ ahohó lɛ́ lɛ̌ dó Sikɛ́mu toxo ɔ́, ɖo Eflayímu sókan mɛ, bó nɔ fínɛ́. Ée é yá ɔ́, é wá gosín fínɛ́, bó yi mɛ ahohó lɛ́ lɛ̌ dó Pɛnuwɛ́li toxo ɔ́. Jelobowámu ɖo ɖiɖɔ dó ayi mɛ wɛ ɖɔ: “Nǔ e ɖo jijɛ wɛ din ɔ́ ná zɔ́n bɔ mɛ e ɖo axɔ́súɖuto ce mɛ lɛ́ɛ ná lɛ́ kɔ yi axɔ́súɖuto Davídi tɔn mɛ. É nyí mɛ élɔ́ lɛ́ɛ wá yi vɔ̌sánú xwlé Mawu Mavɔmavɔ gbé ɖo xwé tɔn gbe, ɖo Jeluzalɛ́mu ɔ́, ayi yětɔn ná lílɛ́ jɛ gǎn yětɔn xóxó Hlobowámu axɔ́sú Judáa tɔn ɔ́ jí, bɔ yě ná hu mì, bó ná lɛ́ kɔ yi axɔ́súɖuto tɔn mɛ.” Énɛ́ ɔ́, é ba ayixa ɖokpó; é zɔ́n bɔ è zě siká dó bló nyibúví we n'i, bɔ é ɖɔ nú togun ɔ́ ɖɔ: “Fí e mi yi Jeluzalɛ́mu jɛ ɔ́ kpé. Izlayɛ́linu e mi! Mawu mitɔn ɖíe. É wɛ ɖe mi tɔ́n sín Ejípu.” Ée é ɖɔ mɔ̌ ɔ́, é zé nyibúví ɔ́ ɖokpó ɖó Betɛ́li ɖo afɔligbé, bó zé ɖokpó ɖó Dan ɖo taligbé. Nǔ énɛ́ e é wa ɔ́ wɛ dɔn yě dó hwɛ mɛ. Mɛ wɔ̌buwɔ́bú ɖé jɛ nyibúví wegɔ́ ɔ́ gúdo káká yi Dan. Jelobowámu bló nɔtɛn Mawu tɔn ɖé lɛ́ɛ ɖó vodún xwé e gbɔn só jí só jí lɛ́ɛ kpá, lobo cyán mɛ ɖo togun ɔ́ mɛ, bó sɔ́ yě dó ɖó sinsɛngán ná. Yě mɛ énɛ́ lɛ́ɛ ɖo Levíi ví lɛ́ɛ mɛ ǎ. É ɖó xwe ɖokpó ayǐ, bɔ è nɔ ɖu ɖo azǎn afɔtɔngɔ́ ɔ́ gbe, ɖo sun tántɔngɔ́ ɔ́ mɛ. Xwe énɛ́ ɔ́ cí xwe e è nɔ ɖu ɖo Judáa ɔ́ ɖɔhun. É ɖésúnɔ nɔ́ sá vɔ̌ ɖo vɔ̌sákpe ɔ́ jí. Nǔ e é wa ɖo Betɛ́li ɔ́ nɛ́. É nɔ́ xwlé vɔ̌sánú nyibúví e é bló lɛ́ɛ. É bɛ́ sinsɛngán e é sɔ́ lɛ́ɛ ɖó Betɛ́li. Jelobowámu ɖu xwe ɖokpó nú togun Izlayɛ́li tɔn ɔ́ ɖo Betɛ́li, ɖo azǎn afɔtɔngɔ́ ɔ́ e ɖo sun tántɔngɔ́ ɔ́ mɛ ɔ́ gbe. É ɖésúnɔ wɛ sɔ́ azǎn énɛ́ ɔ́. Xwe énɛ́ ɔ́ hwenu ɔ́, é ɖésú wɛ nɔ́ sá vɔ̌ ɖo vɔ̌sákpe e é bló ɔ́ jí. Mawu Mavɔmavɔ sɛ́ gbeyíɖɔ tɔn dó, bɔ é gosín Judáa bó wá Betɛ́li hwenu e Jelobowámu ɖo vɔ̌sákpe ɔ́ kɔn, bó ɖo vɔ̌ sá wɛ é. Gbeyíɖɔ ɔ́ sú xó dó vɔ̌sákpe ɔ́ jí lě e Mawu Mavɔmavɔ ɖɔ n'i gbɔn é; é ɖɔ: “Vɔ̌sákpe! Vɔ̌sákpe! Nǔ e Mawu Mavɔmavɔ ɖɔ ɔ́ ɖíe: ‘È nǎ ji vǐ súnnu ɖokpó ɖo Davídi hɛ̌nnu; nyǐkɔ tɔn ná nyí Joziyási. É ná hu sinsɛngán e ɖo vɔ̌ sá wɛ ɖo hwi vɔ̌sákpe ɔ́ jí lɛ́ɛ, bɔ è nǎ nɔ́ dó gbɛtɔ́ xú zo ɖo jǐ towe!’ ” Gbeyíɖɔ Mawu tɔn ɔ́ lɛ́ ɖɔ: “Vɔ̌sákpe ɔ́ ná gba, bɔ afín e ɖ'é jí ɔ́ ná kɔn nyi kɔ́ mɛ. Énɛ́ ɔ́ ná xlɛ́ mi ɖɔ Mawu Mavɔmavɔ ɖésú wɛ ɖɔ xó.” Ée axɔ́sú Jelobowámu se xó e gbeyíɖɔ Mawu tɔn ɔ́ ɖo ɖiɖɔ dó vɔ̌sákpe Betɛ́li tɔn ɔ́ wú wɛ ɔ́, é dlɛ́n alɔ tɔn e ɖo vɔ̌sákpe ɔ́ jí ɔ́ dó gbeyíɖɔ ɔ́, bó sú xó bó ɖɔ: “Mi wlí nya élɔ́!” Lo ɔ́, alɔ e Jelobowámu dlɛ́n dó gbeyíɖɔ ɔ́ nɔ dlɛ̌ndlɛ́n mɔ̌, bó kú, bɔ é sɔ́ sixú wún ǎ. Hwenɛ́nu ɖokpó ɔ́, vɔ̌sákpe ɔ́ gba, bɔ afín e ɖ'é jí ɔ́ kɔn nyi kɔ́ mɛ, lě e Mawu Mavɔmavɔ ko ɖɔ gbɔn bó ná wuntun tɔn gbɔn gbeyíɖɔ tɔn jí é. Ée nǔ cí mɔ̌ ɔ́, axɔ́sú ɔ́ yí xó, bó ɖɔ nú gbeyíɖɔ Mawu tɔn ɔ́ ɖɔ: “Ylɔ̌ Mawu Mavɔmavɔ, Mawu towe, bó sa vo n'i dó ta ce mɛ, bónú má sixú wún alɔ ce!” Bɔ gbeyíɖɔ Mawu tɔn ɔ́ sa vo nú Mawu Mavɔmavɔ, bɔ axɔ́sú ɔ́ wún alɔ tɔn, bɔ alɔ jɛ alɔ tɛnmɛ. Énɛ́ ɔ́, axɔ́sú ɔ́ ɖɔ nú gbeyíɖɔ Mawu tɔn ɔ́ ɖɔ: “Wǎ mǐ ní yi xwé gbe, bó ná yi ɖu nǔ, énɛ́ ɔ́ gúdo ɔ́, un ná ná nǔ we.” Ée é ɖɔ mɔ̌ ɔ́, gbeyíɖɔ Mawu tɔn ɔ́ yí gbe n'i ɖɔ: “Nú a na bo ná mì dɔkun towe sín vlɔ̌ɖówe ɔ́, un xwe xwé towe gbe ǎ, un ɖo nǔ ná ɖu wɛ ǎ, un ka ɖo sin ná nu wɛ ɖo fí ǎ. Đó Mawu gbɛ́ nú mì ɖɔ nyɛ ní ma ɖu nǔ ó, nyɛ ní ma nu sin ó, nyɛ ní ma ká lɛ́ kɔ gbɔn ali e un gbɔn wá ɔ́ ó.” Ée é ɖɔ mɔ̌ ɔ́, é wlí ali ɖěvo ɖidó. É sɔ́ lɛ́ kɔ gbɔn ali e é gbɔn bó wá Betɛ́li ɔ́ ǎ. Gbeyíɖɔ Mawu tɔn degénɔ ɖé ko ɖo Betɛ́li fínɛ́. Vǐ tɔn lɛ́ɛ ɖokpó wá wlí nǔ e gbeyíɖɔ Mawu tɔn ɔ́ wa ɖo Betɛ́li gbe nɛ́ gbe ɔ́ kpódó xó e é ɖɔ nú axɔ́sú ɔ́ lɛ́ɛ bǐ kpó ɖɔ n'i. Ée é wlí nǔ énɛ́ lɛ́ɛ bǐ ɖɔ nú tɔ́ tɔn ɔ́, tɔ́ yětɔn kanbyɔ́ yě ɖɔ: “Ali tɛ́ wɛ é ka gbɔn ɖidó?” Vǐ lɛ́ɛ ká mɔ ali e gbeyíɖɔ Mawu tɔn e gosín Judáa wá ɔ́ gbɔn é. Énɛ́ ɔ́, é ɖɔ nú vǐ tɔn lɛ́ɛ ɖɔ: “Mi blá akpa nú tócí ce nú mì.” Bɔ yě blá akpa nú tócí ɔ́, bɔ é xá jí, bo jɛ gbeyíɖɔ Mawu tɔn ɔ́ gúdo, bó yi mɔ ɛ ɖo ayǐjínjɔ́n ɖo telebɛ́ntitín ɖé sá, bó kanbyɔ́ ɛ ɖɔ: “Hwi wɛ nyí gbeyíɖɔ Mawu tɔn e gosín Judáa ɔ́ a?” Bɔ gbeyíɖɔ Mawu tɔn ɔ́ yí gbe n'i ɖɔ: “Nyɛ wɛ.” Bɔ é ɖɔ n'i ɖɔ: “Bo wá mǐ yi xwé gbe, bó ná yi ɖu nǔ.” É ká ɖɔ n'i ɖɔ: “Un sixú lɛ́ kɔ xwedó we ǎ, un ka sixú byɔ́ xwé towe gbe ǎ. Un ná ɖu nǔ ǎ, un ka ná nu sin xá we ɖo Betɛ́li fínɛ́ ǎ, ɖó Mawu Mavɔmavɔ gbɛ́ nú mì ɖɔ nyi wá hǔn, nyɛ ní ma ɖu nǔ ó, nyɛ ní ma ka nu sin ɖo fínɛ́ ó, nyɛ ní ma ka lɛ́ kɔ gbɔn ali e un gbɔn yi ɔ́ ó.” Bɔ gbeyíɖɔ Mawu tɔn degénɔ ɔ́ ɖɔ n'i ɖɔ: “Nyɛ lɔ ɔ́, gbeyíɖɔ Mawu tɔn wɛ un nyí hwi ɖɔhun, bɔ Mawu Mavɔmavɔ wá ɖɔ xó nú mì gbɔn wɛnsagun ɖokpó jí ɖɔ: ‘Kplá ɛ wá xwé towe gbe, bónú é ní ɖu nǔ bó nu sin.’ ” Adingban ɖó wɛ é ká ɖe. Ée gbeyíɖɔ Mawu tɔn ɔ́ se mɔ̌ ɔ́, é lɛ́ kɔ xwedó e yi xwé tɔn gbe, bó ɖu nǔ, bó nu sin. Nǔ ɖu wɛ yě ɖe, bɔ Mawu ɖɔ xó nú gbeyíɖɔ e kplá ɛ wá xwé gbe ɔ́, bɔ éyɛ́ sú xó sɛ́ dó gbeyíɖɔ Mawu tɔn e gosín Judáa wá ɔ́ ɖɔ: “Xó e Mawu Mavɔmavɔ ɖɔ ɔ́ ɖíe: ‘A gba sɛ́n e Mawu Mavɔmavɔ dó nú we ɔ́. A blǒ nǔ e Mawu Mavɔmavɔ, Mawu towe zɔ́n we ɔ́ ǎ. A lɛ̌ kɔ bo ɖu nǔ, bó nu sin ɖo tɛn e mɛ Mawu Mavɔmavɔ gbɛ́ nú we ɖɔ hwi ní má ɖu nǔ ɖe, hwi ní má ka nu sin ɖe ɔ́ ó. Énɛ́ ɔ́ wú ɔ́, a nǎ kú, bɔ è nǎ ɖi cyɔ towe dó tɔ́ towe sín yɔdo lɛ́ɛ mɛ ǎ.’ ” Ée gbeyíɖɔ Mawu tɔn e lɛ́ kɔ wá ɔ́, ɖu nǔ bó nu sin ɔ́, mɛ e kplá ɛ wá ɔ́ blá akpa nú tócí ɔ́ n'i. Bɔ é ɖidó, bɔ kinnikínní wlí i ɖo alixo bo hu i. Cyɔ tɔn ɖo ali ɔ́ jí, bɔ tócí ɔ́ ɖo akpá tɔn, bɔ kinnikínní ɔ́ lɔ ɖo akpá tɔn. Mɛ e ɖo dǐndín wá yi wɛ lɛ́ɛ mɔ cyɔ ɔ́ ɖo ali ɔ́ xo, bɔ kinnikínní ɔ́ ɖo akpá tɔn. Ée yě jɛ toxo e mɛ gbeyíɖɔ Mawu tɔn degénɔ ɔ́ ɖe ɔ́ mɛ ɔ́, yě jɛ nǔ e yě mɔ ɔ́ ɖɔ jí. Ée gbeyíɖɔ Mawu tɔn e lɛ́ kɔ n'i wá xwé gbe ɔ́ se mɔ̌ ɔ́, é ɖɔ: “Gbeyíɖɔ Mawu tɔn Judáanu e gbɛ́ gbe nú Mawu Mavɔmavɔ ɔ́ wɛ, bɔ Mawu Mavɔmavɔ jó e nú kinnikínní, bɔ kinnikínní wlí i bó hu i, lě e Mawu Mavɔmavɔ ko ɖɔ gbɔn n'i é.” Énɛ́ ɔ́ gúdo ɔ́, é ɖɔ nú vǐ tɔn lɛ́ɛ ɖɔ: “Mi blá akpa nú tócí ce nú mì.” Ée yě blá akpa nú tócí ɔ́, gbeyíɖɔ Mawu tɔn degénɔ ɔ́ ɖidó, bó mɔ cyɔ ɔ́ ɖo alixo, bɔ tócí ɔ́ kpó kinnikínní ɔ́ kpó ɖo akpá tɔn. Kinnikínní ɔ́ vún cyɔ ɔ́ ɖu ǎ, é ká wlí tócí ɔ́ ɖu ǎ. Gbeyíɖɔ degénɔ ɔ́ sɔ́ cyɔ ɔ́ ɖó tócí ɔ́ jí, bó lɛ́ kɔ dó jǐ tɔn wá toxo ɔ́ mɛ, bó ná ɖi i, bó ná nɔ aluwɛ mɛ n'i. É sɔ́ cyɔ ɔ́ dó yɔdo é ɖésúnɔ tɔn mɛ, bɔ mɛ lɛ́ɛ ji nǔwamɛhan élɔ́ n'i ɖɔ: “Áo nɔví ce kú!” Ée é ɖi i gúdo ɔ́, é ɖɔ nú vǐ tɔn lɛ́ɛ ɖɔ: “Nú un wá kú ɔ́, mi ná ɖi mì dó yɔdo e mɛ è ɖi gbeyíɖɔ Mawu tɔn ɔ́ dó ɔ́ mɛ; mi ná bɛ́ xú ce lɛ́ɛ ɖó xú tɔn lɛ́ɛ kpá. Đó xó e Mawu Mavɔmavɔ ɖɔ n'i bɔ é sú xó bó ɖɔ ɔ́ ɖó ná jɛ; xó e Mawu Mavɔmavɔ ɖɔ n'i dó vɔ̌sákpe e ɖo Betɛ́li ɔ́ kpódó nɔtɛn Mawu tɔn e gbɔn só jí só jí ɖo Samalíi toxo lɛ́ɛ bǐ mɛ lɛ́ɛ kpó ɔ́ ɖó ná jɛ.” Mawu Mavɔmavɔ ɖɔ xó énɛ́ lɛ́ɛ nú Jelobowámu, có é jó walɔ tɔn nyanya lɛ́ɛ dó ǎ. É lɛ́ cyán mɛ gbɔn togun ɔ́ bǐ mɛ, bó sɔ́ yě sinsɛngán. Mɛ ɖěbǔ jló ɔ́, é nɔ sɔ́ ɛ sinsɛngán. Nǔ énɛ́ e Jelobowámu wa ɔ́ wɛ dɔn xwédo tɔn dó hwɛ mɛ. É wɛ zɔ́n bɔ è sú kún tɔn dó sín gbɛ ɔ́ mɛ. Hwenɛ́nu ɔ́, Jelobowámu sín vǐ Avíya ɔ́ bɛ́ azɔn. Bɔ Jelobowámu ɖɔ nú asi tɔn ɖɔ: “Sɔ́ nǔ, húzú kan bónú è ma sɔ́ tunwun ɖɔ hwi asi ce ɔ́ wɛ ó. A nǎ yi Silóo, fínɛ́ wɛ gbeyíɖɔ Mawu tɔn Axiya ɖe. É wɛ ɖɔ nú mì ɖɔ nyi ná ɖu axɔ́sú nú Izlayɛ́li togun ɔ́. Hɛn wɔ̌xúxú wǒ, bo hɛn acɔnmɔ, bó hɛn wǐin go ɖokpó, bó yi xwé tɔn gbe. A ko yi ɔ́, é ná ɖɔ nǔ e ná jɛ dó vǐ ɔ́ jí ɔ́ nú we.” Jelobowámu sín asi bló nǔ e asú tɔn ɖɔ n'i ɔ́. É sɔ́ nǔ bó yi Silóo, lobo yi Axiya xwé. Axiya ka sɔ́ ɖo nukúnnú mɔ wɛ hwenɛ́nu ǎ, ɖó é ko kpo dín. Mawu Mavɔmavɔ ká ko ɖɔ nú Axiya ɖɔ: “Jelobowámu sín asi jǎwe; é ná dó éɖée gesí ganjí ǎ, bó ná kan nǔ byɔ́ we dó vǐ tɔn e ɖo azɔn jɛ wɛ ɔ́ wú. Nú é kan nǔ byɔ́ we ɔ́, a nǎ ɖɔ nǔ e Mawu Mavɔmavɔ ɖɔ hwi ní ɖɔ ɔ́ n'i.” Hwenu e nyɔ̌nu ɔ́ gosín hɔntogbó ɔ́ kɔn jǎwe bɔ Axiya se afɔ tɔn gbe ɔ́, é ɖɔ: “Byɔ̌ xɔ mɛ Jelobowámu si. Étɛ́wú a ma dó hwiɖée gesí ganjí ǎ? Wɛn nyanya ɖé wɛ Mawu ɖɔ má dó we. Yi ɖɔ nú Jelobowámu ɖɔ Mawu Mavɔmavɔ, Mawu Izlayɛ́li tɔn ɖɔ: ‘Un sɔ́ we ɖo togun ɔ́ mɛ, bó sɔ́ we su. Un sɔ́ we gǎn ɖó togun ce Izlayɛ́li ɔ́ nu, un yí axɔ́súzinkpo sín xwédo Davídi tɔn sí, bó sɔ́ jó nú we, a ka wa nǔ mɛsɛntɔ́ ce Davídi ɖɔhun ǎ. Éyɛ́ ɔ́, é bló nǔ e un zɔ́n ɛ lɛ́ɛ, bó xwedó mì kpó ayi tɔn bǐ kpó. Nǔ e sɔgbe ɖo nukún ce mɛ lɛ́ɛ kɛ́ɖɛ́ jɛ́n é nɔ́ bló. Hwɛ ɔ́, nǔ nyanya e a wa ɔ́ nylá hú mɛ e ko ɖu axɔ́sú jɛ nukɔn nú we lɛ́ɛ bǐ tɔn. A zě gan dó bló vodún kpódó bǒcyɔ lɛ́ɛ kpó nú hwiɖée, bó dó dó xomɛsin nú mì; a jǒ mì dó. Énɛ́ ɔ́ wú wɛ un ná sɛ́ nyladó dó we, un ná za mɛ towe lɛ́ɛ bǐ zunkɔ́ ɖɔhun: un ná hu mɛ e nyí mɛ towe lɛ́ɛ bǐ, un ná hu yɔkpɔ́vú kpó mɛxó kpó. Un ná za mɛ towe lɛ́ɛ bǐ zunkɔ́ ɖɔhun, bɔ yě sɔ́ ná tɔ́n nyǐ ǎ. Jelobowámu sín xwégbenu e ná kú ɖo toxo ɔ́ mɛ lɛ́ɛ ɔ́, cukú lɛ́ɛ wɛ ná ɖu lan yětɔn. Mɛ tɔn e ka ná kú ɖo gběhan mɛ lɛ́ɛ ɔ́, xɛ lɛ́ɛ wɛ ná ɖu lan yětɔn. Mawu Mavɔmavɔ wɛ ɖɔ mɔ̌.’ ” Axiya lɛ́ ɖɔ nú nyɔ̌nu ɔ́ ɖɔ: “Hwɛ ɔ́, sí te bo yi xwé. Afɔ towe tɛ toxo ɔ́ mɛ lě tlóló ɔ́, vǐ towe ná kú. Izlayɛ́li to ɔ́ bǐ ná nɔ aluwɛ mɛ n'i, bó ná ɖi i. É ɖokpónɔ géé wɛ nyí mɛ e ɖo Jelobowámu xwé bɔ è nǎ ɖi dó yɔdo mɛ é, ɖó é ɖokpónɔ géé sín nǔ wɛ nyɔ́ Mawu Mavɔmavɔ, Mawu Izlayɛ́li tɔn ɔ́ nukún mɛ, ɖo Jelobowámu ví lɛ́ɛ bǐ mɛ. Mawu Mavɔmavɔ ná sɔ́ axɔ́sú tɔn ɖěvo ɖó Izlayɛ́li to ɔ́ nu, bɔ é ná vɔ xwédo Jelobowámu tɔn ɔ́ bǐ gbe énɛ́ gbe. É wɛ ká ko ɖo jijɛ wɛ din. Mawu Mavɔmavɔ ná dɔn tó nú Izlayɛ́linu lɛ́ɛ, bɔ yě ná nɔ dán fɛ́n e ɖo tɔ mɛ ɔ́ ɖɔhun. É ná yí to ɖagbe élɔ́ e é ná tɔ́gbó yětɔn lɛ́ɛ ɔ́ sín yě sí, bó ná má yě kpé Eflátitɔ ɔ́ gúdo, ɖó yě blǒ vodún Acela, bɔ xomɛ sin Mawu Mavɔmavɔ. Mawu Mavɔmavɔ ná ɖe alɔ sín Izlayɛ́linu lɛ́ɛ sín kanmɛ ɖó hwɛ e Jelobowámu hu, bó dɔn yě d'é mɛ bɔ yě lɔ hu ɔ́ wú.” Jelobowámu sín asi sí te, bó ɖidó Tíisa. Ée é jɛ xwé ɔ́ nukɔn ɔ́ lě tlóló ɔ́, vǐ tɔn kú. È nǎ ɖi i bɔ Izlayɛ́li to ɔ́ bǐ ná nɔ aluwɛ mɛ n'i lě e Mawu Mavɔmavɔ ko ɖɔ gbɔn, gbɔn gbeyíɖɔ tɔn Axiya jí é. È wlǎn Jelobowámu sín tan e kpo ɔ́ dó “Axɔ́sú Izlayɛ́li tɔn lɛ́ɛ sín Tan wéma” mɛ. È ɖɔ lě e é fun ahwan gbɔn ɔ́ kpó lě e é ɖu axɔ́sú gbɔn ɔ́ kpó d'é mɛ. Jelobowámu ɖu axɔ́sú nú xwe ko-nukún-we, bɔ zǎn tɔn wá kú. Vǐ tɔn Nadabu wɛ wá ɖu axɔ́sú ɖó tɛn tɔn mɛ. Hlobowámu, Salomɔ́ɔ ví ɔ́ ɖu axɔ́sú ɖo Judáa. Xwe kanɖé-nukún-ɖokpó (41) wɛ é ɖó bó yi axɔ́súzinkpo Judáa tɔn jí ɖo Jeluzalɛ́mu. É ɖu axɔ́sú nú xwe afɔtɔn-nukún-we. Jeluzalɛ́mu ɔ́, toxo e Mawu Mavɔmavɔ sɔ́ ɖo akɔta Izlayɛ́li tɔn lɛ́ɛ bǐ mɛ, bɔ nyǐkɔ tɔn ná nɔ jǐ ɔ́ wɛ. Hlobowámu sín nɔ ɔ́, nyǐkɔ tɔn nɔ́ nyí Naama; Amumɔ́ɔ ví wɛ nyí Naama. Judáanu lɛ́ɛ wa nǔ e nylá Mawu Mavɔmavɔ nukún mɛ é. Yě dǒ xomɛsin nú Mawu gbɔn hwɛ e yě hu lɛ́ɛ gblá mɛ. Xomɛ e Mawu Mavɔmavɔ sin dó yě ɔ́ syɛ́n hú xomɛ e é sin dó tɔ́gbó yětɔn lɛ́ɛ é, ɖó hwɛ yětɔn lɛ́ɛ syɛ́n hú tɔ́gbó yětɔn lɛ́ɛ tɔn. Yě lɔ bló vodún xwé lɛ́ɛ gbɔn só jí só jí, bó tun awǐnnya lɛ́ɛ bó nɔ́ sɛn; yě bló vodún Acela lɛ́ɛ gbɔn só lɛ́ɛ bǐ jí, bó lɛ́ bló gbɔn atín e dó ama lɛ́ɛ sá. Yě mɛ súnnu kpó nyɔ̌nu kpó e nɔ lɛ aga ɖo hunkpá mɛ dó sɛn hun lɛ́ɛ tlɛ ɖo to ɔ́ mɛ. Akɔta e Mawu Mavɔmavɔ nya ɖo Izlayɛ́li ví lɛ́ɛ nukɔn lɛ́ɛ ɔ́, nǔ gblégblé yě nɔ́ wa lɛ́ɛ ɔ́, bǐ wɛ yě lɔmɔ̌ nɔ wa. Hwenu e Hlobowámu ɖo xwe atɔ́ɔ́n bló wɛ ɖo gǎn jí ɔ́, axɔ́sú Ejípu tɔn Cicáki tɔ́n ahwan Jeluzalɛ́mu. É bɛ́ dɔkun e ɖo Mawu Mavɔmavɔ xwé gbe lɛ́ɛ kpódó éé ɖo axɔ́sú ɔ́ sín hɔnmɛ lɛ́ɛ kpó bǐ yi. É lɛ́ bɛ́ gǎglónú e Salomɔ́ɔ zé siká dó bló lɛ́ɛ bǐ. Axɔ́sú Hlobowámu zé ganvɔ dó bló gǎglónú ná ɖó tɛn yětɔn mɛ, bó bɛ́ dó alɔ mɛ nú sɔ́jagán e nɔ cɔ́ hɔnmɛ sín hɔntogbó lɛ́ɛ é. Nú axɔ́sú ɔ́ xwe Mawu Mavɔmavɔ xwé gbe hweɖěbǔnu ɔ́, sɔ́ja lɛ́ɛ nɔ́ bɛ́ gǎglónú lɛ́ɛ, bó nɔ́ xwedó e. É ká lɛ́ kɔ wá yi ɔ́, yě nɔ́ bɛ́ yě wá ɖó xɔ yětɔn mɛ. È wlǎn Hlobowámu sín tan e kpo ɔ́ dó “Axɔ́sú Judáa tɔn lɛ́ɛ sín Tan wéma” mɛ. Hlobowámu kpódó Jelobowámu kpó ɔ́ ahwan fun xá yěɖée wɛ jɛ́n yě nɔ́ ɖe. Hlobowámu sín zǎn wá kú, bɔ è sɔ́ ɛ yi ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ. Hlobowámu sín nɔ ɔ́, Amumɔ́ɔ ví wɛ; nyǐkɔ tɔn nɔ́ nyí Naama. Vǐ tɔn Abiya wɛ wá ɖu axɔ́sú ɖó tɛn tɔn mɛ. Hwenu e Nɛvati ví Jelobowámu ɖo xwe afɔtɔn nukún atɔn bló wɛ ɖo axɔ́súzinkpo jí ɔ́, Abiya ɖu axɔ́sú ɖo Judáa. É ɖu axɔ́sú nú xwe atɔn. Jeluzalɛ́mu wɛ é nɔ́ nɔ. Nɔ tɔn nyí Maaka; Abusalɔ́mu ví wɛ. Hwɛ e tɔ́ tɔn ko hu jɛ nukɔn n'i ɖ'ayǐ lɛ́ɛ bǐ wɛ élɔ́ hu; é sɔ́ ayixa tɔn bǐ jó nú Mawu Mavɔmavɔ, Mawu tɔn tɔ́gbó tɔn Davídi ɖɔhun ǎ. Nǔ ɖo mɔ̌ có, Mawu Mavɔmavɔ, Mawu tɔn kpɔ́n dó Davídi wú, bó ná ɛ vǐ ɖokpó, bɔ é ná wá ɖu axɔ́sú ɖó tɛn tɔn mɛ, bónú Davídi sín kan ma bú ó, bɔ Jeluzalɛ́mu ná ɖo te. Đó Davídi ɔ́, nǔ e sɔgbe ɖo Mawu Mavɔmavɔ nukún mɛ ɔ́ wɛ é wa. Đo gbɛzán tɔn bǐ mɛ ɔ́, é lɛ́ kɔ sín nǔ e Mawu Mavɔmavɔ zɔ́n lɛ́ɛ ɖě gúdo gbeɖé zɛ Ulíi Hitíti ɔ́ sín xó ɔ́ wú ǎ. Hlobowámu kpódó Jelobowámu kpó ɔ́ ahwan fun xá yěɖée wɛ jɛ́n yě nɔ́ ɖe. Ahwan énɛ́ ɔ́ kpo ɖo te káká wá jɛ Abiya hwenu. È wlǎn Abiya sín tan e kpo ɔ́ dó “Axɔ́sú Judáa tɔn lɛ́ɛ sín Tan wéma” mɛ. Abiya lɔmɔ̌ fun ahwan xá Jelobowámu. Abiya zán wá kú, bɔ è sɔ́ ɛ ɖó Davídi Toxo mɛ, bɔ vǐ tɔn Asa ɖu axɔ́sú ɖó tɛn tɔn mɛ. Hwenu e axɔ́sú Izlayɛ́li tɔn Jelobowámu ɖo xwe ko bló wɛ ɖo axɔ́súzinkpo jí ɔ́, Asa ɖu axɔ́sú ɖo Judáa. É ɖu axɔ́sú nú xwe kanɖé-nukún-ɖokpó (41) ɖo Jeluzalɛ́mu. Tɔ́ tɔn sín nɔ nɔ nyí Maaka; Abusalɔ́mu ví wɛ. Asa wa nǔ e sɔgbe ɖo Mawu Mavɔmavɔ nukún mɛ é tɔ́gbó tɔn Davídi ɖɔhun. É nya súnnu kpó nyɔ̌nu kpó e nɔ́ lɛ aga ɖo hunkpá mɛ dó sɛn hun lɛ́ɛ sín to ɔ́ mɛ, bó ɖe vodún e tɔ́gbó tɔn lɛ́ɛ lí lɛ́ɛ bǐ síin. É tlɛ lɛ́ yí nyɔ̌nu ɖaxó sín acɛ e tɔ́ tɔn nɔ Maaka ɖó ɔ́ sín así tɔn, ɖó Maaka kpa vodún Acela sín bǒcyɔ bó nɔ́ sɛn. Asa gba vodún nǔvɛ́mɔ Mawu tɔn, vodún tɔ́ tɔn nɔ ɔ́ tɔn, bó dó zo ɖo tɔsisa Sedlɔ́n tɔn tó. Tɛn mímɛ́ e ɖo to ɔ́ mɛ lɛ́ɛ ɖo fínɛ́, có Asa sín ayi bǐ nɔ Mawu Mavɔmavɔ jí, ɖo gbɛzán tɔn bǐ mɛ. Kpatágan kpó siká kpó, kpódó nǔ tɛnmɛ tɛnmɛ e é kpó tɔ́ tɔn kpó bɛ́ ɖó vo nú Mawu Mavɔmavɔ lɛ́ɛ ɔ́, é bɛ́ bǐ wá Mawu Mavɔmavɔ xwé. Asa kpódó Baeca axɔ́sú Izlayɛ́li tɔn ɔ́ kpó ɔ́, ahwan fun xá yěɖée wɛ jɛ́n yě nɔ́ ɖe hwebǐnu. Baeca yi, bó tɔ́n ahwan Judáa to ɔ́ gbe ɖokpó, bó jɛ ahohó mɛ lɛ́ dó Hlama gletoxo ɔ́ jí, bó dó gbo ali nú axɔ́sú Judáa tɔn Asa. Énɛ́ ɔ́, Asa bɛ́ kpatágan kpódó siká kpó e kpo ɖo dɔkun e ɖo Mawu Mavɔmavɔ xwé lɛ́ɛ mɛ lɛ́ɛ, kpódó dɔkun e ɖo axɔ́sú ɔ́ sín hɔnmɛ lɛ́ɛ kpó, bó bɛ́ jó nú mɛsɛntɔ́ tɔn lɛ́ɛ, bó sɛ́ yě dó Damási, ɖo Silíi xɔ́sú Bɛni-Hadadi gɔ́n. Bɛni-Hadadi ɔ́, Tavlimumɔ́ni ví wɛ, bó nyí Hɛziyɔ́ni vívú. Axɔ́sú Asa sɛ́ yě dó gɔ̌n tɔn, nú yě nǐ ɖɔ n'i ɖɔ: “Wǎ mǐ ní jɛ akɔ, lě e tɔ́ ce kpódó tɔ́ towe kpó jɛ akɔ é ɖɔhun. Kpatágan kpódó siká kpó e un sɛ́ dó we ɔ́ ɖíe. Yi klán akɔ xá axɔ́sú Izlayɛ́li tɔn Baeca, bónú é ní gosín ayǐkúngban ce jí.” Bɛni-Hadadi yí gbe nú xó e axɔ́sú Asa ɖɔ ɔ́, bó sɛ́ ahwangán tɔn lɛ́ɛ dó, bɔ yě yi tɔ́n ahwan Izlayɛ́li sín toxo lɛ́ɛ; yě yǐ Iyɔ́ni, bó yí Dan, bó yí Avɛ́li-Bɛti-Maaka, bó yí ayǐkúngban e gbɔn Jenɛzalɛ́ti gbé ɔ́ jí lɛ́ɛ bǐ, bó yí Nɛfutali yíkúngban e kpo lɛ́ɛ bǐ. Ée Baeca se mɔ̌ ɔ́, é ɖó ahohó e mɛ lɛ́ dó Hlama wɛ é ɖe lɛ́ɛ te, bó lɛ́ kɔ bó yi cí Tíisa. Axɔ́sú Asa ylɔ́ Judáa to ɔ́ bǐ, mɛ ɖěbǔ hwe ɖ'é mɛ ǎ. Bɔ yě bɛ̌ awǐnnya, bó bɛ́ atín e Baeca dó ɖo dǒ mɛ lɛ́ dó Hlama wɛ ɔ́, bɔ axɔ́sú Asa bɛ́ dó mɛ ahohó lɛ́ dó Gɛva ɖo Bɛnjamɛ́ɛ, bó lɛ́ mɛ lɛ́ dó Misipa. È wlǎn Asa sín tan e kpo lɛ́ɛ bǐ, ahwan e é fun lɛ́ɛ, nǔ e é wa lɛ́ɛ bǐ, kpódó toxo e é mɛ ahohó lɛ́ lɛ̌ dó lɛ́ɛ kpó dó “Axɔ́sú Judáa tɔn lɛ́ɛ sín Tan wéma” mɛ. Hwenu e é wá kpo ɔ́, afɔ wá wa nǔ xá ɛ. Asa zán wá kú, bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Jozafáti wá ɖu axɔ́sú ɖó tɛn tɔn mɛ. Axɔ́sú Judáa tɔn Asa ɖo xwe we bló wɛ ɖo axɔ́súzinkpo jí, hwenɛ́nu wɛ Nadabu Jelobowámu ví ɔ́ ɖu axɔ́sú ɖo Izlayɛ́li, bó ɖu axɔ́sú nú xwe we. É wa nǔ e ma nyɔ́ Mawu Mavɔmavɔ nukún mɛ ǎ é. É zán gbɛ nyanya tɔ́ ɔ́ ɖɔhun, bó hu hwɛ e tɔ́ ɔ́ hu bó dɔn Izlayɛ́linu lɛ́ɛ d'é mɛ bɔ yě hu é. Baeca Axiya ví e jɔ ɖo Isakáa sín akɔta mɛ ɔ́ blá axɔ́sú ɔ́ gbé, bó hu i ɖo Gibetɔ́ni, Filisitɛ́ɛn lɛ́ɛ sín toxo mɛ, hwenu e axɔ́sú ɔ́ kpódó Izlayɛ́li to ɔ́ bǐ kpó xá Gibetɔ́ni é. Hwenu e Asa ɖo xwe atɔn bló wɛ ɖo axɔ́súzinkpo Judáa tɔn jí ɔ́ wɛ Baeca hu axɔ́sú Nadabu bo yí zinkpo ɔ́. Ée Baeca yi zinkpo jí lě tlóló ɔ́, é hu mɛ e ɖo Jelobowámu sín xwé gbe lɛ́ɛ bǐ. É jó mɛ ɖěbǔ dó ǎ. É hu mɛ bǐ lě e Mawu Mavɔmavɔ ko ɖɔ gbɔn gbeyíɖɔ tɔn Axiya Silóonu ɔ́ jí é. Nǔ énɛ́ lɛ́ɛ jɛ, ɖó hwɛ e Jelobowámu hu, bó dɔn Izlayɛ́linu lɛ́ɛ d'é mɛ bɔ yě hu bo dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ wú. È wlǎn Nadabu sín tan e kpo ɔ́, nǔ e é wa lɛ́ɛ bǐ dó “Axɔ́sú Izlayɛ́li tɔn lɛ́ɛ sín Tan wéma” mɛ. Asa kpódó Baeca axɔ́sú Izlayɛ́li tɔn ɔ́ kpó ɔ́, ahwan fun xá yěɖée wɛ jɛ́n yě nɔ́ ɖe hwebǐnu. Hwenu e Asa, axɔ́sú Judáa tɔn ɔ́ ɖo xwe atɔn bló wɛ ɖo axɔ́súzinkpo jí ɔ́, Baeca, Axiya ví ɔ́ ɖu axɔ́sú ɖo Izlayɛ́li to ɔ́ nu; Tíisa wɛ é nɔ́ nɔ. É ɖu axɔ́sú nú xwe ko-nukún-ɛnɛ. É wa nǔ e ma nyɔ́ Mawu Mavɔmavɔ nukún mɛ ǎ é. É zán gbɛ nyanya Jelobowámu ɖɔhun; é hu hwɛ e Jelobowámu hu, bó dɔn Izlayɛ́linu lɛ́ɛ d'é mɛ bɔ yě hu é. Mawu Mavɔmavɔ ɖɔ nú Jehu Hanáni ví ɔ́ ɖɔ é ní ɖɔ nú Baeca ɖɔ: “Hwi mɛ e ma sɔ atɛ́n ɖo togun ɔ́ mɛ ɖ'ayǐ ǎ é ɔ́, un sɔ́ we gǎn ɖó togun ce Izlayɛ́li nu. Lo ɔ́, hwi lɔ zán gbɛ nyanya Jelobowámu ɖɔhun; a dɔn Izlayɛ́linu lɛ́ɛ bɔ yě hu hwɛ; yě dǒ xomɛsin nú mì gbɔn hwɛ e yě hu lɛ́ɛ gblá mɛ. Énɛ́ ɔ́ wú wɛ un ná sú hwi kpódó xwédo towe bǐ kpó sín kún dó sín ayǐkúngban jí, bɔ xwédo towe ná cí Jelobowámu Nɛvati ví ɔ́ sín xwédo ɖɔhun. Mɛ towe e ná kú ɖo toxo ɔ́ mɛ lɛ́ɛ ɔ́, cukú lɛ́ɛ ná ɖu lan yětɔn. Bɔ mɛ towe e ka ná kú ɖo gběhan mɛ lɛ́ɛ ɔ́, xɛ lɛ́ɛ ná ɖu lan yětɔn.” È wlǎn Baeca sín tan e kpo ɔ́, nǔ e é wa lɛ́ɛ kpódó lě e é kpan akɔ́n gbɔn ɔ́ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ. Baeca zán wá kú, bɔ è sɔ́ ɛ yí ɖó Tíisa. Vǐ tɔn Ela wɛ ɖu axɔ́sú ɖó tɛn tɔn mɛ. Nǔ we wú wɛ Mawu Mavɔmavɔ ɖɔ xó nú Baeca kpó xwédo tɔn kpó gbɔn gbeyíɖɔ tɔn Jehu Hanáni ví ɔ́ jí: Nukɔn nukɔntɔn ɔ́, Baeca wa nǔ e má nyɔ́ Mawu Mavɔmavɔ nukún mɛ ǎ é; é wa nǔ bó dó xomɛsin nú Mawu Mavɔmavɔ, Jelobowámu kpó xwédo tɔn kpó ɖɔhun. Wegɔ́ ɔ́, é sú Jelobowámu xwédo ɔ́ sín kún dó. Hwenu e Asa ɖo xwe koatɔ́n-nukún-ɖokpó (26) bló wɛ ɖo axɔ́súzinkpo Judáa tɔn jí wɛ ɔ́, Ela, Baeca ví ɔ́ yi axɔ́súzinkpo Izlayɛ́li tɔn jí ɖo Tíisa; é ɖu axɔ́sú nú xwe we. Mɛsɛntɔ́ tɔn Zimuli e kpa acɛ dó kɛkɛ́ví lɛ́ɛ sín vlɔ̌ɖówe nu ɔ́ blá gbě tɔn. Ela ka ɖo Tíisa, bó ɖo ahan nu wɛ ɖo hɔnmɛgán Tíisa tɔn Aasa xwé, bɔ ahan ɖo jǐ tɔn yi wɛ. Bɔ Zimuli byɔ́ xwé ɔ́ gbe, bó hu i. Hwenu e Asa axɔ́sú Judáa tɔn ɔ́ ɖo xwe koatɔ́n-nukún-we (27) bló wɛ ɖo zinkpo jí ɔ́ wɛ Zimuli hu Ela, bo ɖu axɔ́sú ɖó tɛn tɔn mɛ. Ée é yi zinkpo jí lě tlóló ɔ́, é hu Baeca sín xwédo ɔ́ bǐ. É jó súnnu e ko nyí Baeca tɔn é ɖokpó dó ǎ. É jó hɛ̌nnumɔ dó ǎ, é ka jó xɔ́ntɔn dó ǎ. Zimuli sú Baeca xwédo ɔ́ bǐ sín kún dó, lě e Mawu Mavɔmavɔ ko ɖɔ gbɔn dó Baeca wú, gbɔn gbeyíɖɔ Jehu jí é. Nǔ énɛ́ lɛ́ɛ bǐ jɛ, ɖó hwɛ e Baeca kpódó vǐ tɔn Ela kpó hu, bó dɔn Izlayɛ́linu lɛ́ɛ d'é mɛ, bɔ yě hu, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ gbɔn vodún sinsɛn yětɔn lɛ́ɛ gbla mɛ é wú. È wlǎn Ela sín tan e kpo lɛ́ɛ kpódó nǔ e é wa lɛ́ɛ bǐ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ. Hwenu e Judáa xɔ́sú Asa ɖo xwe koatɔ́n-nukún-we (27) bló wɛ ɖo zinkpo jí ɔ́, Zimuli yi axɔ́súzinkpo Izlayɛ́li tɔn jí ɖo Tíisa; é ɖu axɔ́sú nú azǎn tɛ́nwe. Ahwangɔnu Izlayɛ́li tɔn ɔ́ ɖó gɔnu ɖó Gibetɔ́ni toxo e Filisitɛ́ɛn lɛ́ɛ yí ɔ́ nukɔn. Sɔ́ja lɛ́ɛ se ɖɔ Zimuli blá axɔ́sú ɔ́ sín gbě, bó ko hu i. Ée yě se mɔ̌ tlóló ɔ́, yě ɖó gbe kpɔ́, bó sɔ́ ahwangán Ɔmúli axɔ́sú ɖó Izlayɛ́li to ɔ́ nu gbe nɛ́ gbe, ɖo fí e yě ɖǒ gɔnu ɖó é. Ɔmúli kpódó ahwangɔnu tɔn bǐ kpó gosín Gibetɔ́ni, bó xá Tíisa toxo ɔ́. Ée Zimuli mɔ ɖɔ è ko yí toxo ɔ́ é ɔ́, é hɔn yi xɔ ɖokpó mɛ ɖo hɔn ɔ́ mɛ, lobo dó xwé ɔ́ zo dó ta nú éɖée, bó kú. É kú ɖó é wa nǔ e ma nyɔ́ Mawu Mavɔmavɔ nukún mɛ ǎ é, bɔ é nyí hwɛ bɔ é hu. É hu hwɛ e Jelobowámu hu, bó dɔn Izlayɛ́linu lɛ́ɛ d'é mɛ, bɔ yě hu é. È wlǎn Zimuli sín tan e kpo lɛ́ɛ kpó gbě e é blá ɔ́ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ. Ée Zimuli zán wá kú ɔ́, Izlayɛ́li togun ɔ́ má ɖó we. Togun ɔ́ akpá ɖokpó ɖo Tivuni Gináti ví ɔ́ jí, bó ná sɔ́ ɛ axɔ́sú, bɔ akpá wegɔ́ ɔ́ ká ɖo Ɔmúli jí. Wǎgbɔ wǎgbɔ ɔ́, mɛ e ɖo Ɔmúli jí lɛ́ɛ ɖu ɖo mɛ e ɖo Tivuni Gináti ví ɔ́ jí lɛ́ɛ jí. Tivuni ɔ́ ká kú, bɔ Ɔmúli ɖu axɔ́sú. Hwenu e Asa Judáa xɔ́sú ɔ́ ɖo xwe gban-nukún-ɖokpó bló wɛ ɖo zinkpo jí ɔ́, Ɔmúli yi axɔ́súzinkpo Izlayɛ́li tɔn jí; é ɖu axɔ́sú nú xwe wěwe. É to nɔ Tíisa nú xwe ayizɛ́n. Énɛ́ ɔ́ gúdo ɔ́, é xɔ só Samalíi tɔn ɔ́ ɖo Cɛmɛ́ɛ sí yí gankwɛ́ děgba ɖě afɔwó (6.000). É ɖó toxo ɖokpó ayǐ ɖo só ɔ́ jí, bo sun nyǐ ɖɔ Samalíi. Cɛmɛ́ɛ e nyí só ɔ́ nɔ ɖ'ayǐ ɔ́ sín nyǐkɔ wɛ é ɖó nú só ɔ́. Ɔmúli wa nǔ e má nyɔ́ Mawu Mavɔmavɔ nukún mɛ ǎ é. Nǔ nyanya e é wa lɛ́ɛ lɛ́ nylá hú ée mɛ e ɖu axɔ́sú jɛ nukɔn n'i lɛ́ɛ bǐ wa é. É zán gbɛ e Jelobowámu Nɛvati ví ɔ́ zán lɛ́ɛ bǐ. É hu hwɛ e Jelobowámu hu, bo dɔn Izlayɛ́linu lɛ́ɛ d'é mɛ bɔ yě hu, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ gbɔn vodún sinsɛn yětɔn lɛ́ɛ gbla mɛ. È wlǎn Ɔmúli sín tan e kpo lɛ́ɛ, nǔ e é wa lɛ́ɛ, lě e é kpan akɔ́n gbɔn é bǐ dó “Axɔ́sú Izlayɛ́li tɔn lɛ́ɛ sín Tan wéma” mɛ. Ɔmúli zán wá kú, bɔ è sɔ́ ɛ yi ɖó Samalíi, bɔ vǐ tɔn Akábu ɖu axɔ́sú ɖó tɛn tɔn mɛ. Akábu Ɔmúli ví ɔ́ ɖu axɔ́sú ɖo Izlayɛ́li; hwenu e Asa, Judáa xɔ́sú ɔ́ ɖo xwe gbantɔ́n-nukún-atɔn (38) bló wɛ ɖo axɔ́súzinkpo jí ɔ́, Akábu yi axɔ́súzinkpo Izlayɛ́li tɔn jí ɖo Samalíi; é ɖu axɔ́sú xɔ xwe ko-nukún-we (22). Akábu Ɔmúli ví ɔ́ wa nǔ e má nyɔ́ Mawu Mavɔmavɔ nukún mɛ ǎ é hú ée mɛ e ko ɖu axɔ́sú jɛ nukɔn n'i lɛ́ɛ bǐ wa é. Hwɛ e Jelobowámu hu bɔ é lɔmɔ̌ hu ɔ́ víví hwe dó e, bɔ é lɛ́ da Jezabɛ́li Ɛtibaalu axɔ́sú Sidɔ́ɔnnu lɛ́ɛ tɔn sín vǐ ɖokpó, lobo jɛ vodún Baalu sɛn jí, bó nɔ ɖe kɔ́ n'i. É mɛ vodún Baalu xɔ ɖokpó ɖó Samalíi ɖésú, bó lɛ́ bló vɔ̌sákpe e jí è nǎ nɔ sá vɔ̌ ɖe é ɖokpó. Akábu bló bǒcyɔ. É wa nǔ e má nyɔ́ Mawu Mavɔmavɔ nukún mɛ ǎ é hú ée axɔ́sú Izlayɛ́li tɔn e ko jɛ nukɔn n'i lɛ́ɛ bǐ wa é, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́. Hwenɛ́nu ɖokpó ɔ́, Iyɛli Betɛ́linu ɔ́ vɔ́ toxo Jeliko tɔn ɔ́ gbá. Hwenu e é ɖo do kun wɛ bo ná dó dǒ lɛ́ɛ do ɔ́, nukɔngbéví tɔn Avilámu kú, bɔ kpodéví tɔn Segúvu kú hwenu e é ɖo hɔn lɛ́ɛ dó wɛ é, lě e Mawu Mavɔmavɔ ko ɖɔ gbɔn ɖ'ayǐ gbɔn Jozuwée Nuni ví ɔ́ jí é. Elíi Ticibéenu ɔ́ xwlé Mawu nú axɔ́sú Akábu ɖɔ: “Mawu Mavɔmavɔ ɖo gbɛ; ɖo Mawu Izlayɛ́li tɔn e sín mɛsɛntɔ́ un nyí ɔ́ nyíkɔ mɛ ɔ́, un ɖo ɖiɖɔ nú we wɛ ɖɔ: ‘Xwe e jǎwe lɛ́ɛ mɛ ɔ́, ahǔn ná ja ǎ, jǐ ká ná ja ǎ, káká jɛ hwenu e un ná ɖɔ é.’ ” Énɛ́ ɔ́ gúdo ɔ́, Mawu Mavɔmavɔ ɖɔ nú Elíi ɖɔ: “Gosín fí, bó yi zǎnzǎnhwe jí, bó yi hwlá cí tɔhwín Keliti tɔn e ɖo Judɛ́ɛn tɔ ɔ́ sín zǎnzǎnhwe jí ɔ́ kpá. A nǎ nɔ́ nu tɔ ɔ́ sín sin. Un ko ná gbe avǔnsákɔwó lɛ́ɛ ɖɔ yě ní nɔ́ hɛn nǔɖuɖu wá nú we ɖo fínɛ́.” Elíi bló lě e Mawu Mavɔmavɔ ɖɔ gbɔn n'i é. É yi cí tɔhwín Keliti tɔn ɔ́ tó. Avǔnsákɔwó lɛ́ɛ nɔ hɛn wɔ̌xúxú kpódó lan kpó wá n'i zǎnzǎn gbada, bɔ é nɔ́ nu tɔhwín ɔ́ sín sin. Ée Elíi ɖo fínɛ́ káká ɔ́, tɔ ɔ́ wá xú, ɖó jǐ sɔ́ ja ɖo to ɔ́ mɛ ǎ. Énɛ́ ɔ́, Mawu Mavɔmavɔ ɖɔ nú Elíi ɖɔ: “Sɔ́ nǔ bó yi Salɛpúta ɖo Sidɔ́ɔn kpá, bó nɔ fínɛ́. Un ko ná gbe nyɔ̌nu asúkúsi ɖé ɖo dɔ̌n ɖɔ ní nɔ ná nǔɖuɖu we.” Ée Mawu Mavɔmavɔ ɖɔ mɔ̌ ɔ́, Elíi sɔ́ nǔ, bó ɖidó, bó yi Salɛpúta. Ée é jɛ toxo ɔ́ sín hɔn nukɔn ɔ́, é mɔ nyɔ̌nu asúkúsi ɖé ɖo nakí cyán wɛ. É ylɔ́ nyɔ̌nu ɔ́, bó ɖɔ n'i ɖɔ: “Kɛnklɛ́n bó yi wún sin kpɛɖé wá nú mì, bónú ma nu.” Ée é ɖɔ mɔ̌ ɔ́, nyɔ̌nu ɔ́ ɖidó sin ɔ́ wún gbé, bɔ Elíi lɛ́ ylɔ́ ɛ, bó ɖɔ n'i ɖɔ: “Kɛnklɛ́n bó hɛn wɔ̌xúxú kpɛɖé wá nú mì d'é jí.” Bɔ nyɔ̌nu ɔ́ xwlé nǔ n'i ɖɔ: “Mawu Mavɔmavɔ, Mawu towe ɖo gbɛ! Un ko ɖa nǔ ɖěbǔ ǎ. Linfín alɔgogo ɖokpó jɛ́n ɖo ká mɛ nú mì, bɔ ami kpɛɖé kpo ɖo go mɛ nú mì. Éɖíe un ɖo nakí kwín we ɖé cyán wɛ din, bo ná yi xwé gbe bó yi ɖa, bɔ nyɛ kpódó vǐ ce kpó ná ɖu e. Nú mǐ ɖu énɛ́ ɔ́, nǔɖé sɔ́ kpo nú mǐ zɛ kú wú ǎ.” Elíi ka xwlé Mawu n'i ɖɔ: “Ado ma hu we ó, yi bo bló lě e a ɖɔ gbɔn ɔ́. Amɔ̌, to zé dó ɖa wɔ̌xúxú kpɛví ɖé, bó zé wá nú mì hwɛ̌. Énɛ́ ɔ́ gúdo ɔ́, a nǎ ɖa hwi kpódó vǐ towe kpó tɔn. Đó nǔ e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: ‘Linfínká ɔ́ ná jɛ vɔ̌ ǎ, amigo ɔ́ ná jɛ vɔ̌ ǎ, káká yi jɛ gbe e gbe nyɛ Mawu Mavɔmavɔ ná bló bɔ jǐ ná ja kɔn nyi ayǐkúngban ɔ́ jí dó é.’ ” Ée Elíi ɖɔ mɔ̌ ɔ́, nyɔ̌nu ɔ́ yi bó bló lě e é ɖɔ gbɔn ɔ́, bɔ é kpódó vǐ tɔn kpó, kpódó Elíi kpó mɔ nǔ bó ɖu xɔ azǎn. Linfínká ɔ́ jɛ vɔ̌ ǎ, amigo ɔ́ jɛ vɔ̌ ǎ lě e Mawu Mavɔmavɔ ɖɔ gbɔn, gbɔn Elíi jí é. Ée nǔ énɛ́ lɛ́ɛ jɛ wá yi ɔ́, asúkúsi e yí gbeyíɖɔ Mawu tɔn ɔ́ dó xwé gbe ɔ́ sín vǐ wlí azɔn. Azɔn ɔ́ syɛ́n káká bɔ gbɔjɛ tɔn xwɛ. Ée vǐ ɔ́ sín gbɔjɛ xwɛ mɔ̌ ɔ́, nyɔ̌nu ɔ́ ɖɔ nú Elíi ɖɔ: “Étɛ́wú wɛ a wa mɔ̌ xá mì gbeyíɖɔ Mawu tɔn? A nǎ flín hwɛ e un hu lɛ́ɛ Mawu, bó ná hu vǐ ce wú wɛ a wǎ a?” Ée nyɔ̌nu ɔ́ ɖɔ mɔ̌ ɔ́, Elíi ɖɔ n'i ɖɔ: “Zě vǐ ɔ́ nú mì.” Vǐ ɔ́ ká ɖo nyɔ̌nu ɔ́ sín awa mɛ bɔ Elíi yí i, bó zé e yi xɔ e mɛ é nɔ nɔ é mɛ ɖo jǐ, bó zé e mlɔ́ zan tɔn jí. Énɛ́ ɔ́ gúdo ɔ́, é ylɔ́ Mawu Mavɔmavɔ bó ɖɔ: “Mawu Mavɔmavɔ, Mawu ce, nyɔ̌nu asúkúsi élɔ́ yí mì ɖó xwé tɔn gbe. A hu vǐ tɔn bó ná dó wa nǔ xá ɛ nǔgbó wɛ a?” Ée Elíi ɖɔ mɔ̌ ɔ́, é mlɔ́ vǐ ɔ́ jí azɔn atɔn, bó ylɔ́ Mawu Mavɔmavɔ bo ɖɔ: “Mawu Mavɔmavɔ, Mawu ce, kɛnklɛ́n bó fɔ́n vǐ élɔ́ wá gbɛ.” Mawu Mavɔmavɔ se xó e Elíi ɖɔ ɔ́, bó fɔ́n vǐ ɔ́ wá gbɛ, bɔ é jɛ gbigbɔjɛ́ jí, bɔ Elíi zé e wá do, lobo sɔ́ ɛ jó nú nɔ tɔn, bó ɖɔ n'i ɖɔ: “Kpɔ́n! Vǐ towe ɖíe, é ɖo gbɛ.” Ée nyɔ̌nu ɔ́ mɔ mɔ̌ ɔ́, é ɖɔ nú Elíi ɖɔ: “Un mɔ din ɖɔ gbeyíɖɔ Mawu tɔn wɛ a nyǐ nǔgbó, bɔ xó Mawu Mavɔmavɔ tɔn e nɔ tɔ́n sín nu towe mɛ ɔ́ nyí nǔgbó.” Akú ɖó ɔ́, é kó lín, bɔ xwe tɔn atɔngɔ́ ɔ́ mɛ ɔ́, Mawu Mavɔmavɔ ɖɔ nú Elíi ɖɔ: “Yi Akábu gɔ́n, un ná sɛ́ jǐ dó bɔ é ná ja kɔn nyi ayǐkúngban ɔ́ jí.” Ée Mawu Mavɔmavɔ ɖɔ mɔ̌ nú Elíi ɔ́, é ɖidó axɔ́sú Akábu gɔ́n. Adɔ ɔ́ ka syɛ́n ɖo Samalíi ɖésú. Ée adɔ ɔ́ syɛ́n mɔ̌ ɔ́, Akábu ylɔ́ hɔnmɛgán tɔn Ovadiahu. Mɛ ɖé wɛ Ovadiahu ka nyí, bó nɔ ɖó sísí nú Mawu Mavɔmavɔ ɖésú. Hwenu e axɔ́si Jezabɛ́li ɖo gbeyíɖɔ Mawu Mavɔmavɔ tɔn lɛ́ɛ hu wɛ ɔ́, Ovadiahu fɔ yě mɛ kanwe ko (100) hwlá. Yě mɛ kanɖé wǒ (50) kanɖé wǒ (50) wɛ é fɔ hwlá dó sóxo mɛ sóxo mɛ, bó nɔ ná nǔɖuɖu kpódó sin kpó yě. Ée axɔ́sú Akábu ylɔ́ Ovadiahu bɔ é wá ɔ́, é ɖɔ n'i ɖɔ: “Wǎ mǐ yi gbɔn fí e tɔjɔtɛn kpó tɔsisa kpó ɖe ɖo to ɔ́ mɛ é. Bóyá mǐ ná mɔ gběhan, bó ná ná sɔ́ mǐtɔn lɛ́ɛ kpódó sɔ́tócí mǐtɔn lɛ́ɛ kpó. Énɛ́ ɔ́, é sɔ́ ná byɔ́ ɖɔ mǐ ní hu yě ǎ.” Akábu kpó Ovadiahu kpó ɖɔ fí e mɛ ɖokpó ɖokpó ná gbɔn ɖo to ɔ́ mɛ ɔ́ nú yěɖée. Akábu wlí ali éyɛ́ tɔn, bɔ Ovadiahu wlí ali élɔ́ tɔn. Ée Ovadiahu ɖo yiyi wɛ ɔ́, Elíi nu jɛ́n é kpédó ɖo ajijimɛ. Ée é mɔ ɛ ɔ́, é tunwun i, bó xwe agbɔ̌nnusú do bó ɖɔ: “Gǎn ce Elíi! Hwi jɛ́n wɛ a?” Ée é ɖɔ mɔ̌ ɔ́, Elíi yí gbe n'i ɖɔ: “Nyɛ wɛ hǔn! Yi ɖɔ nú gǎn towe Akábu ɖɔ Elíi ɖo fí.” Ovadiahu ka yí xó bó ɖɔ: “Hwɛ tɛ́ wɛ un hu, bɔ a nǎ jó nyɛ mɛsɛntɔ́ towe nú Akábu bɔ é ná hu? Mawu Mavɔmavɔ ɖo gbɛ! Togun ɖé mɛ abǐ axɔ́súɖuto ɖé mɛ tíin bɔ gǎn ce ma sɛ́ mɛ dó, ɖɔ è yi ba we ɖe ǎ. Nú è yi ba we kpo ɖo togun ɖé abǐ to ɖé mɛ bó wá ɖɔ n'i ɔ́, é nɔ́ ɖɔ nú togun ɔ́ abǐ axɔ́súɖuto ɔ́ ɖɔ yě ní xwlé nǔ ɖɔ: ‘É ɖo mǐ gɔn ǎ.’ Hwi ɖíe ká ɖɔ nú mì din ɖɔ má yi ɖɔ nú gǎn ce ɖɔ Elíi ɖo fí e! Bɔ hwenu e un ná gosín gɔ̌n towe, bó ná ɖidó ɔ́, yɛ Mawu Mavɔmavɔ tɔn ná wá zé we yi fí e un ma ná tunwun ǎ é, bɔ un ká ná kó ɖɔ nú Akábu ɖɔ hwi ɖo fí, bɔ é ná wá ba we kpo, bó ná hu mì. Sín vǔ ɖokpóó wɛ nyɛ mɛsɛntɔ́ towe ka kó nɔ ɖó sísí nú Mawu Mavɔmavɔ. Gǎn ce, nǔ e un wa hwenu e Jezabɛ́li ɖo gbeyíɖɔ Mawu Mavɔmavɔ tɔn lɛ́ɛ hu wɛ ɔ́, è ɖɔ nú we ǎ cé? Un bɛ́ gbeyíɖɔ Mawu Mavɔmavɔ tɔn kanwe ko (50) hwlá. Yě mɛ kanɖé wǒ (50) kanɖé wǒ (50) wɛ un fɔ hwlá dó sóxo mɛ sóxo mɛ, bó nɔ́ ná nǔɖuɖu kpó sin kpó yě. A ka ɖo ɖiɖɔ nú mì wɛ din ɖɔ má yi ɖɔ nú gǎn ce ɖɔ Elíi ɖo fí! É ná hu mì.” Elíi ka xwlé nǔ ɖɔ: “Mawu Mavɔmavɔ Nǔbǐwúkpétɔ́ e sɛn wɛ un ɖe ɔ́ ɖo gbɛ! Égbé ɔ́, un ná yi Akábu gɔ́n.” Ovadiahu kpé Akábu, bó ɖɔ fí e Elíi ɖe ɔ́ n'i, bɔ Akábu yi kpé Elíi. Ée Akábu mɔ Elíi lě tlóló ɔ́, é kanbyɔ́ ɛ ɖɔ: “É má nyí hwi wɛ dɔn nǔ nyanya dó Izlayɛ́li togun jí a?” Elíi ka yí gbe n'i ɖɔ: “Un dɔn nǔ nyanya ɖé dó Izlayɛ́li togun ɔ́ jí ǎ. É nyɔ́ wa ɔ́, hwi kpó mɛ towe lɛ́ɛ kpó wɛ, ɖó mi gbɛ́ nǔ e Mawu Mavɔmavɔ zɔ́n lɛ́ɛ wa, bɔ a ɖo vodún Baalu lɛ́ɛ sɛn wɛ. Din ɔ́, sɛ́ mɛ dó nú è nǐ kplé Izlayɛ́li togun ɔ́ bǐ nú mì ɖo Kaamɛ́li só ɔ́ jí. Vodún Baalu sín hunnɔ afɔwe kanɖé wǒ (450) lɛ́ɛ kpódó vodún Acela sín hunnɔ afɔwe (400) e axɔ́si Jezabɛ́li nɔ ná nǔɖuɖu lɛ́ɛ lɔ kpó ní wá.” Akábu sɛ́ mɛ dó, bɔ è kplé Izlayɛ́li togun ɔ́ bǐ, kpó hunnɔ lɛ́ɛ bǐ kpó ɖo Kaamɛ́li só ɔ́ jí. Ée yě kplé ɔ́, Elíi sɛkpɔ́ yě, bó ɖɔ: “Hwetɛ́nu wɛ mi ka ná sɛn nǔ we yi jɛ? Mi sɔ́ ɖokpó bó sɛn. Ényí Mawu Mavɔmavɔ wɛ ɖó acɛ nǔgbó hǔn, mi bo sɛn ɛ. É ká nyí vodún Baalu wɛ ɖó acɛ nǔgbó hǔn, mi bo sɛn ɛ!” Ée é ɖɔ mɔ̌ ɔ́, mɛɖé kɛ nu ɖo yě mɛ ǎ. Bɔ Elíi lɛ́ yí xó bó ɖɔ: “Nyɛ ɖokpónɔ géé wɛ nyí gbeyíɖɔ Mawu Mavɔmavɔ tɔn e kpo ɔ́, bɔ vodún Baalu sín hunnɔ lɛ́ɛ ká nyí afɔwe kanɖé wǒ (450). È nǐ ná mǐ nyibúsú we. Vodún Baalu sín hunnɔ lɛ́ɛ ná kpɔ́n nyibúsú ɔ́ ɖokpó ɖo we lɛ́ɛ mɛ bó ná sɔ́. Yě ná já nyibúsú ɔ́, bó bɛ́ lan tɔn ɖó nakí jí. Yě ní má ká flɔ́ myɔ dó ó. Nyɛ lɔ ná já nyibúsú ɖě ɔ́, bó ná bɛ́ lan tɔn ɖó nakí jí, un ka ná flɔ́ myɔ dó ǎ. Énɛ́ ɔ́ gúdo ɔ́, yě ná xomlá vodún yětɔn, bɔ nyɛ lɔ ná xomlá Mawu Mavɔmavɔ ce. Yě mɛ we lɛ́ɛ mɛ ɔ́, mɛ e ná bló bɔ nakí e jí è bɛ̌ lan ɔ́ ɖó ɔ́ ná wlí myɔ ɔ́ wɛ ɖó acɛ.” Ée é ɖɔ mɔ̌ ɔ́, togun ɔ́ bǐ ɖɔ: “Mǐ yí gbe.” Elíi ɖɔ nú vodún Baalu sín hunnɔ lɛ́ɛ ɖɔ: “Midɛɛ lɛ́ɛ sukpɔ́, mi kpɔ́n nyibúsú lɛ́ɛ ɖokpó, bó wa azɔ̌ tɔn dó nukɔn, bó xomlá vodún mitɔn; mi ma ka flɔ́ myɔ dó ó.” Ée é ɖɔ mɔ̌ ɔ́, yě zě nyibúsú e è zě wá lɛ́ɛ ɖokpó, bó wa azɔ̌ tɔn, bó jɛ vodún Baalu xomlá jí sín zǎnzǎn káká yi hwemɛ, bó nɔ ɖɔ: “Baalu, yǐ gbe nú mǐ.” Yě ɖo we ɖú lɛ́ lɛ̌ dó vɔ̌sákpe e yě bló ɔ́ wɛ. Lo ɔ́, mɛɖé kɛ nu d'é mɛ nú yě ǎ. Ée é jɛ hwemɛ ɔ́, Elíi jɛ slǎmɛ ɖɔ yě wú jí, bó nɔ ɖɔ: “Mi sú xó hú mɔ̌, ɖó vodún wɛ é nyí. Nǔɖé linkpɔ́n wɛ é ná kó ɖe, abǐ nǔkan mɛ yi wɛ é ná kó ɖe, abǐ é sixú kó yi tomɛ. Bóyá ɔ́, amlɔ dɔ́ wɛ é ná kó ɖe; mi sú xó ganjí din ɔ́, é ná fɔ́n.” Ée Elíi ɖɔ mɔ̌ nú yě ɔ́, yě lɛ́ sú xó syɛ́nsyɛ́n; yě zé jǐví kpódó hwǎn kpó dó já wǔtu nú yěɖée, lě e é kó ɖe gbɔn ɖo walɔ yětɔn mɛ é káká bɔ hun nɔ sa sín yě wǔ. Ée hwe lɛ́ kɔ ɔ́, yě lɛ́ jɛ vodún Baalu xomlá jí kpó awǒbóbó kpó káká jɛ gan e mɛ è nɔ xwlé vɔ̌sánú hwe lɛ́ kɔ tɔn dó é. Lo ɔ́, mɛɖé kɛ nu d'é mɛ nú yě ǎ, yě se xó ɖé ǎ, nǔɖé ká kpácá yě ǎ. Hwe énɛ́ ɔ́ nu ɔ́, Elíi ɖɔ nú togun ɔ́ bǐ ɖɔ: “Mi sɛkpɔ́ mì!” Bɔ togun ɔ́ bǐ sɛkpɔ́ ɛ, bɔ Elíi jɛ vɔ̌sákpe Mawu Mavɔmavɔ tɔn e ko ɖo fínɛ́ bó ko gblé ɔ́ blóɖó jí. É bɛ́ awǐnnya wěwe bɔ é sɔgbe xá Jakɔ́bu ví lɛ́ɛ sín akɔta wěwe lɛ́ɛ. Jakɔ́bu wɛ Mawu Mavɔmavɔ ɖɔ yě ná nɔ ylɔ́ ɖɔ Izlayɛ́li. É zé awǐnnya énɛ́ lɛ́ɛ dó mɛ vɔ̌sákpe ɖokpó nú Mawu Mavɔmavɔ. É kun do lɛ́ lɛ̌ dó vɔ̌sákpe ɔ́, bɔ do ɔ́ sixú hɛn nǔ lǐtli gban. É to nakí ɖó vɔ̌sákpe ɔ́ jí; é já nyibúsú ɔ́, bó bɛ́ lan tɔn ɖó nakí lɛ́ɛ jí. Énɛ́ ɔ́ gúdo ɔ́, é ɖɔ: “Mi dun sin zɛ̌n ɛnɛ bó húzú kɔn nyi vɔ̌ ɔ́ kpódó nakí ɔ́ kpó jí.” Bɔ yě bló. Ée yě bló ɔ́, é lɛ́ ɖɔ nú yě ɖɔ: “Mi lɛ́ bló azɔn wegɔ́!” Bɔ yě bló. É lɛ́ ɖɔ nú yě ɖɔ yě ní bló azɔn atɔngɔ́ ɔ́, bɔ yě bló. Sin ɔ́ sa lɛ́ lɛ̌ dó vɔ̌sákpe ɔ́, bɔ do e è kun ɔ́ bǐ gɔ̌. Ée gan e mɛ è nɔ xwlé vɔ̌sánú hwe lɛ́ kɔ tɔn Mawu Mavɔmavɔ ɔ́ xo ɔ́, gbeyíɖɔ Mawu Mavɔmavɔ tɔn Elíi sɛkpɔ́ vɔ̌sákpe ɔ́, bó ɖɔ: “Mawu Mavɔmavɔ, Mawu Ablaxámu tɔn, Mawu Izáki tɔn, Mawu Izlayɛ́li tɔn! Đe xlɛ́ égbé din ɖɔ hwi wɛ nyí Mawu Izlayɛ́li tɔn, bɔ nyɛ nyí mɛsɛntɔ́ towe; ɖe xlɛ́ ɖɔ gbe towe wɛ un xwedó dó bló nǔ énɛ́ lɛ́ɛ bǐ. Yǐ gbe nú mì Mawu Mavɔmavɔ, yǐ gbe nú mì, bónú togun élɔ́ ná tunwun ɖɔ hwi Mawu Mavɔmavɔ ɔ́ wɛ ɖó acɛ nǔgbó. Yǐ gbe nú mì bó ná lɛ́ kɔ nú yě, nú yě ná nɔ gbejí nú we lě e yě nɔ́ gbɔn ɖ'ayǐ é!” Ée Elíi ɖɔ mɔ̌ ɔ́, Mawu Mavɔmavɔ sɛ́ myɔ dó, bɔ é fyɔ́ vɔ̌ ɔ́, bó fyɔ́ nakí ɔ́, bó fyɔ́ awǐnnya lɛ́ɛ, bó fyɔ́ kɔ́ e ɖo fínɛ́ é, bó xwí sin e ɖo do ɔ́ mɛ ɔ́ bǐ. Ée togun ɔ́ bǐ mɔ mɔ̌ ɔ́, yě xwe agbɔ̌nnusú do, bó ɖɔ: “Mawu Mavɔmavɔ wɛ ɖó acɛ nǔgbó! Mawu Mavɔmavɔ wɛ ɖó acɛ nǔgbó!” Bɔ Elíi ɖɔ nú yě ɖɔ: “Mi wlí vodún Baalu sín hunnɔ lɛ́ɛ. Mi ma jó ɖokpó yětɔn dó ó!” Ée yě wlí yě ɔ́, Elíi kplá yě yi Kicɔ́ni tɔ ɔ́ tó, bó gbo gbe yě. Énɛ́ ɔ́ gúdo ɔ́, Elíi ɖɔ nú Akábu ɖɔ: “Yi, ɖu nǔ, bó nu sin, ɖó jǐ ɖo nǔ wa wɛ.” Ée é ɖɔ mɔ̌ ɔ́, Akábu yi ɖu nǔ, bó nu sin. Elíi ka xá Kaamɛ́li só ɔ́ ta aga, bó fɛ, lobo zé ta dó asá mɛ, bó ɖɔ nú mɛsɛntɔ́ tɔn ɖɔ: “Xá só ɔ́ jí bó kpɔ́n xuwa jí.” Bɔ mɛsɛntɔ́ ɔ́ xá só ɔ́ jí, bó kpɔ́n xuwa jí, lobo ɖɔ: “Un mɔ nǔ ɖěbǔ ǎ.” Elíi ɖɔ n'i azɔn tɛ́nwe ɖɔ ní lɛ́ kɔ yi kpɔ́n xuwa jí. Ée mɛsɛntɔ́ tɔn lɛ́ kɔ yi azɔn tɛ́nwegɔ́ ɔ́, é ɖɔ: “Un mɔ akpɔ́kpɔ́ kpɛví ɖé sí te sín xu ɔ́ jí, bó sɔ́ gbló hú alɔkpákpá mɛ gbɛtɔ́ tɔn ǎ.” Bɔ Elíi ɖɔ nú mɛsɛntɔ́ tɔn ɔ́ ɖɔ é ní yi ɖɔ nú Akábu ɖɔ é ní sɔ́ kɛkɛ́ví tɔn sín dó sɔ́ tɔn lɛ́ɛ wú, bó yá wǔ yi, bónú jǐ ní má gbo e dó ó. Zaanɖé kpowun ɔ́, akpɔ́kpɔ́ kpé jǐnukúnsin bǐ, bɔ ablu dó, bɔ jɔhɔn jɛ nyinyi jí, bɔ jǐ ɖaxó ɖé bɛ́, bó ja ɖésú, bɔ Akábu xá kɛkɛ́ví tɔn jí, bó ɖidó Izleyɛ́li. Mawu Mavɔmavɔ nɔ kpɔ́ xá Elíi, bɔ é sin gǒjíblánú tɔn, bó kán wezun ɖo Akábu nukɔn káká yi Izleyɛ́li. Axɔ́sú Akábu wlí nǔ e Elíi dó sin ɔ́ kpódó lě e é hu vodún Baalu sín hunnɔ lɛ́ɛ bǐ gbɔn ɔ́ kpó ɖɔ nú asi tɔn Jezabɛ́li. Ée Jezabɛ́li se mɔ̌ ɔ́, é sɛ́ mɛ dó Elíi, nú è yi ɖɔ n'i ɖɔ: “Sɔ lěhwenu ɔ́, nú un ma hu we lě e a hu hunnɔ lɛ́ɛ gbɔn ɔ́ ǎ ɔ́, vodún lɛ́ɛ ní dɔn tó nú mì, bónú é ní syɛ́n hú tódɔnnúmɛ lɛ́ɛ bǐ.” Ée Elíi se mɔ̌ ɔ́, xɛsi jɛ jǐ tɔn, bɔ é kplá mɛsɛntɔ́ tɔn, bó hɔn, bó ná hwlɛ́n éɖée. É wá jɛ Bɛ̌-Ceva ɖo Judáa sín afɔligbé bó jó mɛsɛntɔ́ tɔn dó nyi fínɛ́. Bɔ é ɖésúnɔ ɔ́ ɖi zɔnlin gbɔn gbětótló mɛ nú kéze ɖokpó, bó yi jínjɔ́n jenɛ́ɛtín ɖé sá. É ɖo biba wɛ ɖɔ émí ní kú. É ɖɔ: “Din ɔ́, Mawu Mavɔmavɔ, agbɔ̌n kpé mì! Yǐ gbɛ ce, ɖó nyɛ nyɔ́ hú tɔ́gbó ce lɛ́ɛ ǎ.” Ée é ɖɔ mɔ̌ ɔ́, é mlɔ́ ayǐ, bó dɔ́ amlɔ ɖo atín ɔ́ sá. Lo ɔ́, wɛnsagun Mawu Mavɔmavɔ tɔn ɖokpó wá ɖó alɔ wǔ tɔn, bó ɖɔ n'i ɖɔ: “Fɔ́n bó ɖu nǔ.” Ée é fɔ́n ɔ́, é mɔ wɔ̌xúxú e è nɔ ɖa ɖo awǐnnya zozo jí é ɖokpó ɖo ta tɔn ligbé, bó mɔ sin tɔyizɛ́n ɖokpó. É ɖu nǔ bó nu sin bo lɛ́ mlɔ́ ayǐ. Wɛnsagun Mawu Mavɔmavɔ tɔn ɔ́ lɛ́ wá azɔn wegɔ́ ɔ́ bó ɖó alɔ wǔ tɔn, bó ɖɔ n'i ɖɔ: “Fɔ́n bó ɖu nǔ, ɖó ali towe lín ga ɖésú.” Bɔ Elíi fɔ́n, bó ɖu nǔ, bó nu sin, bɔ nǔɖuɖu énɛ́ ɔ́ ná ɛ hlɔ̌nhlɔ́n, bɔ é ɖi zɔnlin nú kéze kanɖé (40) zǎn kanɖé (40), bó wá jɛ Holɛ́bu, só Mawu tɔn kɔn. Ée Elíi wá jɛ Holɛ́bu só ɔ́ kɔn ɔ́, é byɔ́ sóxo mɛ, bó dɔ́ fínɛ́. Bɔ Mawu Mavɔmavɔ wá kanbyɔ́ ɛ ɖɔ: “Elíi, étɛ́ wa wɛ a ɖe ɖo fí?” Bɔ Elíi yí gbe n'i ɖɔ: “Mawu Mavɔmavɔ, Mawu Nǔbǐwúkpétɔ́, un yí wǎn nú we káká bɔ nǔ e wa wɛ Izlayɛ́linu lɛ́ɛ ɖe ɔ́, un sɔ́ sixú dɛ ɖ'é nu ǎ; yě gba akɔ e a jɛ xá yě ɔ́; yě flí vɔ̌sákpe towe lɛ́ɛ xwe; yě hu gbeyíɖɔ towe lɛ́ɛ. Nyɛ ɖokpónɔ géé wɛ kpo, yě ká lɛ́ jló ná hu mì.” Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Tɔ́n bó wá nɔ só ɔ́ jí, ɖo nukɔn ce! Un ná wá dín.” Ée Mawu Mavɔmavɔ ɖɔ mɔ̌ ɔ́, jɔhɔn ɖaxó ɖé jɛ nyinyi jí, jɔhɔn ɔ́ syɛ́n ɖésú, bó zɛ só lɛ́ɛ, lobo gba awǐnnya lɛ́ɛ hánnyá ɖo Mawu Mavɔmavɔ nukɔn. Mawu Mavɔmavɔ ká ɖo jɔhɔn énɛ́ mɛ ǎ. Ée jɔhɔn ɔ́ nyi gúdo ɔ́, ayǐkúngban dán wǔ. Mawu Mavɔmavɔ ká ɖo ayǐkúngban énɛ́ e dán wǔ ɔ́ mɛ ǎ. Ée ayǐkúngban dán wǔ gúdo ɔ́, è mɔ zo, Mawu Mavɔmavɔ ka ɖo zo énɛ́ mɛ ǎ. Ée è mɔ zo gúdo ɔ́, jɔhɔn wɛ́lɛ́wɛ́lɛ́ ɖé nyi. Ée Elíi se jɔhɔn ɔ́ sín zǐngídi ɔ́, é sɔ́ awu tɔn ɖaxó ɔ́ cyɔ́n nukún mɛ, bó tɔ́n sín sóxo mɛ, lobo wá nɔ te ɖo só ɔ́ li nu; é lɛ́ se gbe ɖé, bɔ gbe ɔ́ kanbyɔ́ ɛ ɖɔ: “Elíi, étɛ́ wa wɛ a ɖe ɖo fí?” Bɔ é yí gbe ɖɔ: “Mawu Mavɔmavɔ, Mawu Nǔbǐwúkpétɔ́, un yí wǎn nú we káká bɔ nǔ e wa wɛ Izlayɛ́linu lɛ́ɛ ɖe ɔ́, un sɔ́ sixú dɛ ɖ'é nu ǎ. Yě gba akɔ e a jɛ xá yě ɔ́. Yě flí vɔ̌sákpe towe lɛ́ɛ xwe; yě hu gbeyíɖɔ towe lɛ́ɛ. Nyɛ ɖokpónɔ géé wɛ kpo, yě ká lɛ́ jló ná hu mì.” Mawu Mavɔmavɔ ka ɖɔ n'i ɖɔ: “Lɛ̌ kɔ, lɛ̌ wlí ali towe káká yi gbětótló Damási tɔn mɛ. Nú a jɛ dɔ̌n ɔ́, a nǎ kɔn ami dó ta nú Hazayɛ́li nú mì, bó ná sɔ́ ɛ Silíi xɔ́sú. A nǎ kɔn ami dó ta nú Jehu Nimuci ví ɔ́ lɔ, bó ná sɔ́ ɛ Izlayɛ́li xɔ́sú. A nǎ kɔn ami dó ta nú Elizée, Avɛ́li-Mɛhola, Cafáti ví ɔ́, bó ná sɔ́ ɛ gbeyíɖɔ ce ɖó tɛn towe mɛ. Mɛ ɖé gló Hazayɛ́li ɔ́, Jehu ná hu mɛ ɔ́. Mɛ ɖé ká gló Jehu ɔ́, Elizée ná hu mɛ ɔ́. Amɔ̌, un ná jó gbɛtɔ́ děgba ɖě afɔwó-afatɔ́n (7.000) dó ɖo Izlayɛ́li; yědɛɛ lɛ́ɛ wɛ ma jɛ kpo nú vodún Baalu ǎ; yě ká kí si n'i ǎ.” Elíi gosín Holɛ́bu, bó ɖo yiyi wɛ bó yi mɔ Elizée, Cafáti ví ɔ́, bɔ é ɖo gle lɛ wɛ. Nyibú ko nukún-ɛnɛ wɛ ɖo gle ɔ́ lɛ wɛ. Elizée ɖésú wɛ hɛn nyibú we gǔdo tɔn lɛ́ɛ, bó dó ɖo gle lɛ ná wɛ. Elíi gbɔn akpá tɔn, bó zé awu tɔn ɖaxó ɔ́ nyi jǐ tɔn bó ɖidó. Elizée ká jó nyibú tɔn lɛ́ɛ dó, bó kán wezun yi mɔ Elíi bo ɖɔ n'i ɖɔ: “Gbɔ nú má yi dó yibowá nú tɔ́ ce kpó nɔ ce kpó, bó wá xwedó we.” Bɔ Elíi yí gbe n'i ɖɔ: “Bo yi bo lɛ́ kɔ wá, ɖó nǔ e un wa nú we ɔ́ wú.” Ée Elizée jó Elíi dó ɔ́, é wá zé nyibú we bo dó sá vɔ̌ ná. É já mɔ e é dó ɖo gle lɛ ná wɛ ɔ́, dó bló nakí, bó ɖa lan yětɔn bo ná mɛ e ɖo fínɛ́ lɛ́ɛ, bɔ yě ɖu. Énɛ́ ɔ́ gúdo ɔ́, é sɔ́ nǔ bó xwedó Elíi, bó húzú mɛsɛntɔ́ tɔn. Axɔ́sú Silíi tɔn Bɛni-Hadadi kplé ahwangɔnu tɔn ɔ́ bǐ. É kplá axɔ́sú gban-nukún-we (32) e ɖo acɛ tɔn mɛ lɛ́ɛ, bó fɔ sɔ́ kpódó kɛkɛ́ví kpó, bó yi xá Samalíi toxo ɔ́, bó ná tɔ́n ahwan. É sɛ́ wɛnsagun dó axɔ́sú Izlayɛ́li tɔn Akábu gɔ́n ɖo toxo ɔ́ mɛ. É ɖɔ yě ní yi ɖɔ n'i ɖɔ: “Axɔ́sú Bɛni-Hadadi ɖɔ mǐ ní ɖɔ nú we ɖɔ hwi ní jó kpatágan towe, siká towe, asi towe lɛ́ɛ kpó vǐ towe ɖagbe ɖagbe lɛ́ɛ kpó nú émí.” Bɔ axɔ́sú Izlayɛ́li tɔn ɔ́ ɖɔ sɛ́ dó e ɖɔ: “Sɛ́mɛɖó, a ɖɔ nǔɖé ɔ́, un sixú gbɛ́ ǎ. Nyɛ kpó nǔ e un ɖó lɛ́ɛ bǐ kpó wɛ nyí towe.” Lo ɔ́, wɛnsagun lɛ́ɛ lɛ́ lɛ́ kɔ wá yi ɖɔ n'i ɖɔ: “Axɔ́sú Bɛni-Hadadi ɖɔ: ‘Un sɛ́ wɛn dó we ɖɔ hwi ní jó kpatágan towe, siká towe, asi towe lɛ́ɛ kpódó vǐ towe lɛ́ɛ kpó nú mì. Hǔn tunwun ɖɔ sɔ lěhwenu ɔ́, un ná sɛ́ mɛsɛntɔ́ ce lɛ́ɛ dó, bɔ yě ná wá kíjé xwé towe, bó ná kíjé gǎn hɔn-yitɔ́ towe lɛ́ɛ ɖokpó ɖokpó sín xwé, bó ná bɛ́ nǔ xɔ akwɛ́ e a ɖǒ lɛ́ɛ bǐ.’ ” Ée axɔ́sú Izlayɛ́li tɔn ɔ́ se mɔ̌ ɔ́, é ylɔ́ tomɛxó lɛ́ɛ bǐ, bó ɖɔ nú yě ɖɔ: “Mi mɔ nukúnnú jɛ wú ganjí ɖɔ nyanya mǐtɔn ba wɛ nya nɛ́ ɔ́ ɖe, ɖó é sɛ́ mɛ dó mì, bó byɔ́ asi ce lɛ́ɛ kpó vǐ ce lɛ́ɛ kpó, kpatágan ce kpó siká ce kpó. Un ka gbɛ́ nǔ ɖěbǔ n'i ǎ.” Ée é ɖɔ mɔ̌ ɔ́, tomɛxó lɛ́ɛ bǐ kpódó togun ɔ́ bǐ kpó ɖɔ n'i ɖɔ: “Ma ɖótó e ó, gbɛ̌.” Ée yě ɖɔ mɔ̌ n'i ɔ́, é wá yi ɖɔ nú wɛnsagun Bɛni-Hadadi tɔn lɛ́ɛ ɖɔ: “Mi yi ɖɔ nú sɛ́mɛɖó ce ɖɔ nǔ e é byɔ́ mì dó nukɔn ɔ́, un ná bló. Amɔ̌, ée byɔ́ mì wɛ é ɖe din ɔ́, un gbɛ́.” Énɛ́ ɔ́, wɛnsagun lɛ́ɛ lɛ́ kɔ yi dó wɛn ɔ́ Bɛni-Hadadi. Bɔ Bɛni-Hadadi ɖɔ sɛ́ dó Akábu azɔn atɔngɔ́ ɔ́ ɖɔ: “Un ná gba Samalíi toxo ɔ́ bǐ. Nú nǔ e ná kpo ɖo toxo ɔ́ mɛ ɔ́, mɛ e xwedó mì lɛ́ɛ ɖokpó ɖokpó mɔ hɛn alɔ mɛ hǔn, vodún lɛ́ɛ ní dɔn tó nú mì, bónú é ní syɛ́n hú tódɔnnúmɛ lɛ́ɛ bǐ.” Énɛ́ ɔ́, axɔ́sú Izlayɛ́li tɔn ɔ́ yí gbe sɛ́ dó e ɖɔ é ní flín lǒ e è dǒ bó ɖɔ: “Ahwan wɛ nɔ gbɔ cóbɔ è nɔ ɖɔ ahwan xó” é. Ahan nu wɛ Bɛni-Hadadi kpódó axɔ́sú ɖě lɛ́ɛ kpó ɖe ɖo goxɔ sá, bɔ è wǎ dó wɛn énɛ́ ɔ́ ɛ, bɔ é ɖɔ nú mɛsɛntɔ́ tɔn lɛ́ɛ ɖɔ: “Mɛ ɖokpó ɖokpó ní yi nɔ tɛn tɔn mɛ bó ná fun ahwan!” Bɔ yě yi nɔ te toxo ɔ́ nukɔn. Hwenɛ́nu ɔ́, gbeyíɖɔ Mawu tɔn ɖokpó sɛkpɔ́ axɔ́sú Izlayɛ́li tɔn Akábu, bo ɖɔ n'i ɖɔ: “Mawu Mavɔmavɔ sɛ́ wɛn dó we ɖɔ: ‘A mɔ mɛ wɔ̌buwɔ́bú nɛ́ lɛ́ɛ bǐ a? Un ná jó yě nú we égbé, bɔ a nǎ tunwun ɖɔ nyɛ wɛ nyí Mawu Mavɔmavɔ e ɖó acɛ dó nǔ bǐ jí é.’ ” Akábu ka kanbyɔ́ gbeyíɖɔ ɔ́ ɖɔ: “Mɛ̌ jí wɛ Mawu Mavɔmavɔ ka ná jó yě nú mì gbɔn?” Bɔ gbeyíɖɔ ɔ́ yí gbe n'i ɖɔ: “Nǔ e Mawu Mavɔmavɔ ɖɔ ɔ́ ɖíe: ‘Dɔ̌nkpɛvú e tokpɔngán lɛ́ɛ yí dó ahwan mɛ lɛ́ɛ jí wɛ un ná jó yě nú we gbɔn.’ ” Ée é ɖɔ mɔ̌ ɔ́, Akábu lɛ́ ɖɔ: “Mɛ̌ wɛ ka ná tɔ́n ahwan mɛ ɖé jɛ nukɔn?” Bɔ gbeyíɖɔ ɔ́ yí gbe n'i ɖɔ: “Hwi wɛ.” Énɛ́ ɔ́, Akábu wá yi xa dɔ̌nkpɛvú e tokpɔngán lɛ́ɛ yí dó ahwan mɛ lɛ́ɛ, bó mɔ ɖɔ yě nyí afɔɖé gban-nukún-we (232). Ée é xa yě fó ɔ́, é wá yi xa ahwanfuntɔ́ Izlayɛ́li tɔn lɛ́ɛ lɔ, bó mɔ ɖɔ yě nyǐ děgba ɖě afɔwó-afatɔ́n (7.000). Akábu kpó ahwanfuntɔ́ tɔn lɛ́ɛ kpó tɔ́n ahwan yě hwemɛ. Hwenɛ́nu ɔ́, Bɛni-Hadadi kpódó axɔ́sú gban-nukún-we (32) ɖěe ɖo acɛ tɔn mɛ lɛ́ɛ kpó ɖo ahan nu wɛ ɖo goxɔ sá, bɔ ahan ɖo yě jí yi wɛ. Dɔ̌nkpɛvú e tokpɔngán lɛ́ɛ yí dó ahwan mɛ lɛ́ɛ tɔ́n ahwan yě jɛ nukɔn, bɔ Bɛni-Hadadi sɛ́ mɛ dó ɖɔ yě ní yi kpɔ́n nǔ e ɖo jijɛ wɛ é, bɔ yě yi, bó wá ɖɔ n'i ɖɔ mɛ ɖé lɛ́ɛ wɛ jǎwe sín Samalíi. Bɔ é ɖɔ: “Nú fífá gbé wɛ yě tɔ́n bó ja hǔn, mi wlí yě gbɛɖe gbɛɖe. É ká nyí ahwan fun gbé wɛ yě tɔ́n bó ja hǔn, mi lɛ́ wlí yě gbɛɖe gbɛɖe.” Hwenɛ́nu ɔ́, dɔ̌nkpɛvú Izlayɛ́linu e tokpɔngán lɛ́ɛ yí dó ahwan mɛ lɛ́ɛ kó tɔ́n sín toxo ɔ́ mɛ, bɔ ahwangɔnu e kpo ɔ́ xwedó yě. Yě mɛ ɖokpó ɖokpó hu kɛntɔ́ ɖokpó ɖokpó, káká bɔ Silíinu lɛ́ɛ hɔn, bɔ Izlayɛ́linu lɛ́ɛ jɛ gǔdo yětɔn. Axɔ́sú Silíi tɔn Bɛni-Hadadi ɔ́, éyɛ́ xá sɔ́ jí, bó hɔn, é kpó sɔ́xátɔ́ ɖé lɛ́ɛ kpó. Lě e axɔ́sú Izlayɛ́li tɔn ɔ́ ɖu ɖo ahwan jí gbɔn ɔ́ nɛ́: É dó nǔ sin xá Silíinu lɛ́ɛ bɔ é vɛ́ jlɛ́. É hu sɔ́ yětɔn lɛ́ɛ, lobo hɛn kɛkɛ́ví yětɔn lɛ́ɛ bǐ gblé. Énɛ́ ɔ́ gúdo ɔ́, gbeyíɖɔ Mawu tɔn ɔ́ wá mɔ axɔ́sú Izlayɛ́li tɔn ɔ́, bó ɖɔ n'i ɖɔ: “Kpan akɔ́n, lin tamɛ dó nǔ e a ɖǒ ná wa ɔ́ wú ganjí, ɖó xwe ɖě ɔ́ mɛ lěhwenu ɔ́, axɔ́sú Silíi tɔn ɔ́ ná lɛ́ wá tɔ́n ahwan we.” Silíi xɔ́sú ɔ́ sín azaglɔ́gán lɛ́ɛ ɖɔ n'i ɖɔ: “Vodún Izlayɛ́linu lɛ́ɛ tɔn ɔ́, vodún sókan mɛ tɔn wɛ, énɛ́ ɔ́ wú wɛ yě hú gǎn mǐ. Din ɔ́, mǐ ní tɔ́n ahwan yě ɖo ayǐkúngban wɛnjɛ jí, mi ná mɔ ɖɔ mǐ syɛ́n hú yě. Din ɔ́, nǔ e a nǎ wa ɔ́ ɖíe: ɖe axɔ́sú gban-nukún-we (32) e ɖo acɛ towe mɛ lɛ́ɛ síin, bó sɔ́ tokpɔngán lɛ́ɛ ɖó tɛn yětɔn mɛ. Hwi ɖésúnɔ ní cyán ahwanfuntɔ́ ɖěvo lɛ́ɛ, bónú yě ní sukpɔ́ sɔ ahwanfuntɔ́ nukɔntɔn e kɛntɔ́ hu lɛ́ɛ é. Sɔ́ lɛ́ɛ kpódó kɛkɛ́ví lɛ́ɛ kpó lɔ ní sukpɔ́, xóxó tɔn lɛ́ɛ ɖɔhun. Énɛ́ ɔ́, mǐ ná yi tɔ́n ahwan yě ɖo ayǐkúngban wɛnjɛ jí; mi ná mɔ ɖɔ mǐ syɛ́n hú yě.” Énɛ́ ɔ́, Bɛni-Hadadi yí gbe nú xó yětɔn, bó bló lě e yě ɖɔ gbɔn é. Xwe e jɛ fínɛ́ ɔ́ mɛ ɔ́, ɖo hwe ɖokpó ɔ́ nu ɔ́, Bɛni-Hadadi xa ahwanfuntɔ́ Silíi tɔn lɛ́ɛ, bó kplá yě yi toxo Afɛ́ki tɔn mɛ, bónú yě ná fun ahwan xá ahwanfuntɔ́ Izlayɛ́li tɔn lɛ́ɛ. Akábu lɔ xa ahwanfuntɔ́ Izlayɛ́li tɔn lɛ́ɛ, lobo dó nǔɖuɖu gban nú yě, bɔ yě jɛ ali, bó ná yi kpé Silíinu lɛ́ɛ. Yě mǎ ahwangbɛ́ ɔ́ ɖó we, bó ɖó gɔnu ɖó Silíinu lɛ́ɛ nukɔn, bó cí gbɔ̌hwan kpɛví we ɖɔhun. Silíinu lɛ́ɛ ka sukpɔ́ káká bó gba kpé to ɔ́ bǐ mɛ. Đɛ̌mɛnu Mawu tɔn ɔ́ lɛ́ wá mɔ axɔ́sú Izlayɛ́li tɔn ɔ́, bó ɖɔ n'i ɖɔ: “Mawu Mavɔmavɔ ɖɔ: ‘Silíinu lɛ́ɛ ɖɔ nyɛ Mawu Mavɔmavɔ ɔ́, vodún sókan mɛ tɔn wɛ un nyí, un kún nyí ayǐkúngban wɛnjɛ tɔn ó. Énɛ́ ɔ́ wú ɔ́, un ná jó ahwan wɔ̌buwɔ́bú énɛ́ ɔ́ bǐ nú we; énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ e ɖó acɛ dó nǔ bǐ jí é.’ ” Yě nɔ fí e yě ɖǒ gɔnu ɖó, bó kpan nukɔn Silíinu lɛ́ɛ ɔ́ nú azǎn tɛ́nwe. Azǎn tɛ́nwegɔ́ ɔ́ gbe ɔ́, yě bɛ̌ ahwanfunfun, bɔ Izlayɛ́linu lɛ́ɛ hu ahwanfuntɔ́ Silíinu e zɔn afɔ lɛ́ɛ adɔ̌kpo atɔ́ɔ́n (100.000) ɖo kéze ɖokpó mɛ. Mɛ e kpo lɛ́ɛ ɔ́, yě mɛ adɔ̌kpo ɖě děgba ɖě afɔwó-afatɔ́n (27.000) wɛ. Yě hɔn yi Afɛ́ki toxo ɔ́ mɛ. Toxo ɔ́ sín ahohó lɛ́ɛ ka mu kɔn nyi yě jí. Bɛni-Hadadi ɔ́ ká hɔn yi hwlá cí toxo ɔ́ mɛ, bó nɔ ɖo xɔ mɛ xɔ mɛ dán gbɔn wɛ. Azaglɔ́gán Bɛni-Hadadi tɔn lɛ́ɛ ɖɔ n'i ɖɔ: “Éɖíe mǐ se ɖɔ axɔ́sú Izlayɛ́li tɔn lɛ́ɛ ɔ́, axɔ́sú nǔbláwǔkúnúmɛtɔ́ wɛ yě nyǐ é. Mǐ ná sin ati dó alin, bó ná xásá kan dó kɔ, bó ná yi axɔ́sú Izlayɛ́li tɔn ɔ́ gɔ́n. Afɔ nyɔ́ ɔ́, é sixú jó we dó nyi gbɛ.” Ée yě ɖɔ mɔ̌ ɔ́, yě sin ati dó alin, bó xásá kan dó kɔ, bó yi axɔ́sú Izlayɛ́li tɔn ɔ́ gɔ́n. Yě ɖɔ n'i ɖɔ: “Mɛsɛntɔ́ towe Bɛni-Hadadi ɖɔ hwi ní kɛnklɛ́n jó émí dó nyi gbɛ!” Bɔ Akábu kanbyɔ́ yě ɖɔ: “É kpo ɖo gbɛ a? Nɔví ce wɛ.” Azaglɔ́gán Bɛni-Hadadi tɔn lɛ́ɛ mɔ ɖɔ nǔ ɖo nǎ nyɔ́ wɛ, bó yá wǔ yí xó sín nu tɔn bo ɖɔ: “Nǔgbó wɛ, Bɛni-Hadadi ɔ́, nɔví towe wɛ!” Akábu lɛ́ ɖɔ nú yě ɖɔ: “Mi yi kplá ɛ wá.” Bɛni-Hadadi tɔ́n sín fí e é hɔn hwlá cí ɔ́, bó wá Akábu gɔ́n, bɔ Akábu sɔ́ ɛ ɖó kɛkɛ́ví tɔn mɛ. Énɛ́ ɔ́ gúdo ɔ́, Bɛni-Hadadi ɖɔ nú Akábu ɖɔ: “Un jló ná jó toxo e tɔ́ ce yí ɖo tɔ́ towe sí lɛ́ɛ nú we. A sixú lɛ́ ɖó ajɔ̌tɛn ɖé lɛ́ɛ ɖo Damási, lě e tɔ́ ce ɖó ajɔ̌tɛn ɖé lɛ́ɛ ɖo Samalíi ɔ́ ɖɔhun.” Ée Bɛni-Hadadi ɖɔ mɔ̌ ɔ́, Akábu ɖɔ n'i ɖɔ: “Nyɛ ɔ́, un ná jɛ akɔ xá we, énɛ́ ɔ́ gúdo ɔ́, un ná jó we dó bɔ a nǎ yi.” Ée yě jɛ akɔ énɛ́ ɔ́, Akábu jó Bɛni-Hadadi dó, bɔ é yi. Mawu Mavɔmavɔ ɖɔ nú mɛ e ɖo gbeyíɖɔ Mawu tɔn gbɛ́ta mɛ lɛ́ɛ ɖokpó ɖɔ ní sa vo nú hǎgbɛ́ tɔn lɛ́ɛ ɖokpó ɖɔ é ní dó nǔ émí. Hǎgbɛ́ tɔn ɔ́ ká gbɛ́. Gbeyíɖɔ ɔ́ ká ɖɔ n'i ɖɔ: “A gosín gɔ̌n ce din bo ɖidó ɔ́, kinnikínní ná wlí we, ɖó a gbɛ̌ gbe nú Mawu Mavɔmavɔ.” Bɔ ée é ɖidó ɔ́, é kpé kinnikínní ɖokpó bɔ kinnikínní ɔ́ wlí i. Gbeyíɖɔ ɔ́ lɛ́ mɔ hǎgbɛ́ tɔn ɖěvo, bó sa vo n'i ɖɔ é ní dó nǔ émí. Bɔ mɛ énɛ́ ɔ́ dó nǔ i, bó gblé wǔ i. Énɛ́ ɔ́ gúdo ɔ́, gbeyíɖɔ ɔ́ sɔ́ nǔ bó cyɔ́n nǔ nukún mɛ, bó yi cí ali e axɔ́sú Akábu ná gbɔn ɔ́ tó. Ée axɔ́sú ɔ́ ɖo nǎ dín wɛ ɔ́, gbeyíɖɔ ɔ́ sú xó sɛ́ dó e, bó ɖɔ: “Sɛ́mɛɖó, nyɛ mɛsɛntɔ́ mɛtɔn ɔ́, ahwan fun wɛ un ɖe nukún myámyá, bɔ nya ɖokpó tɔ́n sín ahwanfuntɔ́ lɛ́ɛ mɛ, bó kplá mɛ ɖokpó wá nú mì, bó ɖɔ: ‘Hɛn nya élɔ́ nú mì ganjí. Nú un wá ba ɛ kpo ɔ́, hwi wɛ un ná hu ɖó tɛn tɔn mɛ; un ma ka hu we ǎ ɔ́, a nǎ sú mì gankwɛ́ afɔwó-afatɔ́n (3.000).’ Hwenu e un ka ɖo yiyi wɛ, bó ɖo wǐwá wɛ ɔ́, un wá ba nya ɔ́ kpo.” Axɔ́sú Izlayɛ́li tɔn ɔ́ ká ɖɔ n'i ɖɔ: “Hwɛ e è nǎ ɖó nú we ɔ́ nɛ́ hwi ɖésúnɔ ko ɖó nú hwiɖée nɛ́.” Ée é ɖɔ mɔ̌ tlóló ɔ́, gbeyíɖɔ ɔ́ ɖe nǔ e é cyɔ́n nukún mɛ ɔ́ síin, bɔ axɔ́sú Izlayɛ́li tɔn ɔ́ mɔ ɖɔ gbeyíɖɔ lɛ́ɛ ɖokpó wɛ. Énɛ́ ɔ́, é ɖɔ nú axɔ́sú ɔ́ ɖɔ: “Xó e Mawu Mavɔmavɔ ɖɔ ɔ́ ɖíe. É ɖɔ: ‘A jǒ nya e un ɖɔ un ná hu ɔ́ dó, bɔ é yi. Énɛ́ ɔ́ wútu ɔ́, hwi ɖésú wɛ ná kú ɖó tɛn tɔn mɛ, bɔ togun towe ná ji ya ɖó togun tɔn sín tɛnmɛ.’ ” Ée é ɖɔ mɔ̌ ɔ́, wǔ kú axɔ́sú Izlayɛ́li tɔn ɔ́. Xomɛ sin i, bɔ é lɛ́ kɔ yi xwé tɔn gbe ɖo Samalíi. Nǔ e wá jɛ ɖo nǔ énɛ́ lɛ́ɛ gúdo ɔ́ ɖíe: Nya ɖé tíin, bó nɔ nyí Nabɔti, bó nyí Izleyɛ́linu. Nya énɛ́ ɔ́ ɖó vǐwungle ɖokpó ɖo Izleyɛ́li ɖo axɔ́sú Samalíi tɔn Akábu sín hɔnmɛ kpá. É wá su gbe ɖokpó, bɔ Akábu ɖɔ n'i ɖɔ: “Jǒ vǐwungle towe nú mì, bónú má dó bló mǎgbo ná, ɖó é sɛkpɔ́ xwé ce ganjí. Un ná ná vǐwungle e nyɔ́ hú mɔ̌ ɔ́ we ɖó tɛn tɔn mɛ. Nú é ká jló we ɔ́, un ná sú axɔ́ tɔn we.” Nabɔti ka yí gbe nú Akábu ɖɔ: “Mawu Mavɔmavɔ ní ma lɔn nú má jó gǔ e un ɖu ɖo tɔ́gbó ce lɛ́ɛ sí ɔ́ nú we ó!” Ée Akábu se mɔ̌ ɔ́, wǔ kú i; xomɛ sin i, ɖó xó e Nabɔti ɖɔ é wú, bɔ é lɛ́ kɔ yi xwé tɔn gbe. É mlɔ́ ayǐ bó kpan nukɔn dǒ; é ɖu nǔ ǎ. Asi tɔn Jezabɛ́li ɔ́ wá gɔ̌n tɔn, bó ɖɔ n'i ɖɔ: “Nɛ̌ ká gbɔn bɔ wǔ kú we mɔ̌, bɔ a gbɛ̌ nǔ ɖu?” Bɔ é yí gbe nú asi tɔn ɖɔ: “Un ɖɔ nú Nabɔti ɖɔ é ní jó vǐwungle tɔn nú mì, bónú má sú axɔ́ tɔn ɛ, abǐ nú é jló e ɔ́, un ná ná ɛ vǐwungle ɖěvo ɖó tɛn tɔn mɛ, bɔ é ká ɖɔ nú mì ɖɔ émí kún ná jó vǐwungle émítɔn nú mì ó.” Ée é ɖɔ mɔ̌ ɔ́, asi tɔn ɖɔ n'i ɖɔ: “Hwi jɛ́n ká ɖo acɛ kpa wɛ ɖo Izlayɛ́li a? Sí te bó ɖu nǔ, bó j'awǎ. Vǐwungle Nabɔti Izleyɛ́linu ɔ́ tɔn ɔ́, nyɛ ná yí nú we.” Ée é ɖɔ mɔ̌ ɔ́, é wlán wěma dó axɔ́sú Akábu sín nyǐkɔ mɛ, bó sɔ́ axɔ́sú ɔ́ sín wuntun ɖó yě jí. É bɛ́ wěma lɛ́ɛ sɛ́ dó tomɛxó lɛ́ɛ kpó tonukún lɛ́ɛ kpó ɖo Izleyɛ́li fí e Nabɔti ɖe é. Nǔ e é ɖɔ dó wěma ɔ́ mɛ lɛ́ɛ ɖíe: É ɖɔ: “Mi kplé togun ɔ́ bǐ, bónú mɛ bǐ ní blá nu. Mi zé Nabɔti ɖó kplé ɔ́ nu, bó sɔ́ nǔvɔ́nɔ we ɖó nukɔn tɔn, bɔ yě ná dó hwɛ ɛ, bó ɖɔ é nylá gbe nú Mawu kpódó axɔ́sú ɔ́ kpó. Nú yě ɖɔ mɔ̌ ɔ́, mi ná dɔn ɛ jɛ toxo ɔ́ gúdo, bó ná nyi awǐnnyaglo dó e káká bɔ é ná kú.” Tomɛxó lɛ́ɛ kpó tonukún e ɖo Nabɔti sín toxo mɛ lɛ́ɛ kpó bló nǔ e Jezabɛ́li zɔ́n yě gbɔn wěma e é sɛ́ dó yě ɔ́ mɛ lɛ́ɛ. Yě kplé togun ɔ́ bǐ bó blá nu, bó zé Nabɔti ɖó kplé ɔ́ nu. Nǔvɔ́nɔ we lɛ́ɛ wá cí nukɔn tɔn, bó jɛ hwɛ dó e jí, bó nɔ ɖɔ: “Nabɔti nylá gbe nú Mawu kpódó axɔ́sú ɔ́ kpó.” Ée yě ɖɔ mɔ̌ ɔ́, yě dɔn ɛ jɛ toxo ɔ́ gúdo, bó nyi awǐnnyaglo dó e káká bɔ é kú. Ée nǔ nyí mɔ̌ ɔ́, yě sɛ́ wɛn dó Jezabɛ́li ɖɔ: “È ko nyi awǐnnyaglo dó Nabɔti káká bɔ é kú.” Ée Jezabɛ́li se ɖɔ è ko nyi awǐnnyaglo dó Nabɔti bɔ é kú ɔ́, é ɖɔ nú Akábu ɖɔ: “Sɔ́ nǔ, bó yi yí vǐwungle Nabɔti tɔn. É gbɛ́ ɖɔ émí kún ná sɔ́ jó nú we, bó ná yí akwɛ́ ó; din ɔ́, é ká sɔ́ ɖo gbɛ ǎ, é kó kú.” Ée Akábu se ɖɔ Nabɔti kú ɔ́, é sɔ́ nǔ, bo ɖidó Nabɔti sín vǐwungle mɛ, bó ná yí gle ɔ́. Ée yě bló nǔ lɛ́ɛ gbɔn mɔ̌ ɔ́, Mawu Mavɔmavɔ ɖɔ nú Elíi Ticibéenu ɔ́ ɖɔ: “Sɔ́ nǔ bó yi mɔ axɔ́sú Izlayɛ́li tɔn Akábu e nɔ nɔ Samalíi é. É ɖo Nabɔti sín vǐwungle mɛ. É yi fínɛ́ bó yí gle ɔ́. A nǎ ɖɔ n'i ɖɔ Mawu Mavɔmavɔ ɖɔ: ‘Étɛ́! A hu Nabɔti, bó lɛ́ yí gle tɔn! Énɛ́ ɔ́ wú ɔ́, tɛn e mɛ cukú lɛ́ɛ ɖíɖɔ́ hun tɔn ɖe ɔ́, tɛn ɖokpó ɔ́ mɛ wɛ yě ná ɖíɖɔ́ hwi ɖésúnɔ sín hun ɖe.’ ” Elíi yi dó wɛn ɔ́ Akábu, bɔ Akábu ɖɔ n'i ɖɔ: “Kɛntɔ́ ce, a kpo ɖo gǔdo ce” Bɔ Elíi yí gbe n'i ɖɔ: “Ɛɛn! Un kpo ɖo gǔdo towe! Nǔ e má nyɔ́ Mawu Mavɔmavɔ nukún mɛ ǎ é wiwa wɛ nɔ víví nú we; énɛ́ wútu ɔ́, Mawu Mavɔmavɔ ɖɔ: ‘Un ná sɛ́ nyladó dó we, un ná za mɛ towe lɛ́ɛ bǐ zunkɔ́ ɖɔhun: un ná hu mɛ towe lɛ́ɛ bǐ, un ná hu yɔkpɔ́vú kpó mɛxó kpó. Un ná wa nǔ xá xwédo towe lě e un wa nǔ xá Jelobowámu Nɛvati ví ɔ́ sín xwédo gbɔn é, bó wa nǔ xá Baeca Axiya ví ɔ́ sín xwédo gbɔn é, ɖó a dǒ xomɛsin nú mì; a dɔn Izlayɛ́li togun ɔ́ dó hwɛ mɛ.’ Mawu Mavɔmavɔ ɖɔ xó dó Jezabɛ́li lɔ wú ɖɔ: ‘Cukú lɛ́ɛ ná vúnvún Jezabɛ́li ɖo Izleyɛ́li toxo ɔ́ sín ahohó kpá. Akábu sín xwégbenu e ná kú ɖo toxo ɔ́ mɛ lɛ́ɛ ɔ́, cukú lɛ́ɛ wɛ ná ɖu lan yětɔn. Mɛ tɔn e ka ná kú ɖo gběhan mɛ lɛ́ɛ ɔ́, xɛ lɛ́ɛ wɛ ná ɖu lan yětɔn.’ ” Mɛ ɖěbǔ ɖe bɔ nǔ e má nyɔ́ Mawu Mavɔmavɔ nukún mɛ ǎ wiwa nɔ víví n'i Akábu ɖɔhun ǎ. Asi tɔn Jezabɛ́li ɔ́ wɛ ká dɔn ɛ d'é mɛ. Nǔ e Akábu dó sin ɔ́ hɛn hǔn; é sɛn vodún lě e Amɔliti e Mawu Mavɔmavɔ nya bo sɔ́ to yětɔn jó nú Izlayɛ́li ví lɛ́ɛ nɔ bló gbɔn é. Ée Akábu se xó e Elíi ɖɔ ɔ́, é vún awu dó kɔ nú éɖée, bó bɛ́ ati kplá, lobo blá nu. Ati ɔ́ mɛ wɛ é nɔ dɔ́; kéze ɔ́, é nɔ ɖo zɔnlin ɖi wɛ wǔɖéwúɖé. Hwenɛ́nu ɔ́, Mawu Mavɔmavɔ kanbyɔ́ Elíi Ticibéenu ɔ́ ɖɔ: “A mɔ lě e Akábu sɔ́ éɖée hwe gbɔn ɖo nukɔn ce ɔ́ a? Ée é sɔ́ éɖée hwe mɔ̌ ɔ́, un sɔ́ ná kɔn nǔ nyanya dó xwédo tɔn jí hwenu e é ɖo axɔ́sú ɖu wɛ ɔ́ ǎ; lo ɔ́, vǐ tɔn hwenu wɛ nǔ nyanya ɔ́ ná kɔn dó xwédo tɔn jí.” Silíi kpódó Izlayɛ́li kpó gɔn ahwan fun xá yěɖée káká nú xwe we. Đo xwe atɔngɔ́ ɔ́ mɛ ɔ́, axɔ́sú Judáa tɔn Jozafáti yi axɔ́sú Izlayɛ́li tɔn Akábu gɔ́n. Axɔ́sú Akábu ká ko ɖɔ nú gǎn hɔn-yitɔ́ tɔn lɛ́ɛ ɖɔ: “Mi ma tunwun ɖɔ Hlamɔti toxo e ɖo Galadi yíkúngban jí ɔ́, mǐtɔn wɛ a? Étɛ́wú mǐ ma ka ná yí sín axɔ́sú Silíi tɔn sí ǎ, bó ɖo xixo kpɔ́n wɛ?” Ée é ɖɔ mɔ̌ ɔ́, é ɖɔ nú Jozafáti ɖɔ: “A ma ná gɔ́ nú mì, bónú mǐ nǎ yi tɔ́n ahwan Hlamɔti toxo ɔ́ ɖo Galadi yíkúngban jí a?” Ée é ɖɔ mɔ̌ ɔ́, Jozafáti yí gbe n'i ɖɔ: “Mǐ nǎ yi hǔn. Nyɛ kpó hwi kpó ɔ́ nǔ ɖokpó ɔ́ wɛ mǐ nyǐ; togun ce ɔ́, togun towe wɛ; togun towe ɔ́, togun ce wɛ. Sɔ́ ce lɛ́ɛ ɔ́, sɔ́ towe lɛ́ɛ wɛ; sɔ́ towe lɛ́ɛ ɔ́, sɔ́ ce lɛ́ɛ wɛ.” Énɛ́ ɔ́ gúdo ɔ́, Jozafáti ɖɔ nú axɔ́sú Izlayɛ́li tɔn ɖɔ: “Din ɔ́, bo kɛnklɛ́n bó kan nǔ byɔ́ Mawu Mavɔmavɔ hwɛ̌.” Énɛ́ ɔ́, Izlayɛ́li xɔ́sú ɔ́ kplé gbeyíɖɔ lɛ́ɛ. Yě yi afɔwe (400) mɔ̌. É kanbyɔ́ yě ɖɔ: “Má yi tɔ́n ahwan Hlamɔti toxo ɖo Galadi a, abǐ má gbɔ?” Bɔ yě yí gbe n'i ɖɔ: “Yi, Aklúnɔ ná jó toxo ɔ́ nú we.” Lo ɔ́, Jozafáti kanbyɔ́ ɖɔ: “ Gbeyíɖɔ Mawu Mavɔmavɔ tɔn ɖě sɔ́ ɖo fí, bónú mǐ ná kan nǔ byɔ́ Mawu Mavɔmavɔ gbɔn jǐ tɔn ǎ cé?” Axɔ́sú Izlayɛ́li tɔn ɔ́ ká yí gbe n'i ɖɔ: “Nya ɖokpó jɛ́n ɖo fí, bɔ mǐ sixú kan nǔ byɔ́ Mawu Mavɔmavɔ gbɔn jǐ tɔn. Un ka gbɛ́ wǎn n'i, ɖó é nɔ mɔ nǔ ɖagbe ɖé ɖɔ nú mì ǎ. Nǔ nyanya kɛ́ɖɛ́ jɛ́n é nɔ mɔ bó nɔ́ ɖɔ nú mì. Micée Yimula ví ɔ́ wɛ.” Ée é ɖɔ mɔ̌, Jozafáti ɖɔ n'i ɖɔ: “Sɛ́mɛɖó, ma ɖɔ mɔ̌ ó!” Énɛ́ ɔ́, Izlayɛ́li xɔ́sú ɔ́ ylɔ́ agooɖojǐe tɔn ɖokpó, bó ɖɔ n'i ɖɔ ní yi kplá Micée Yimula ví ɔ́ wá din tlóló. Hwenɛ́nu ɔ́, Izlayɛ́li xɔ́sú ɔ́ kpódó Judáa xɔ́sú Jozafáti kpó ɖo ayǐjínjɔ́n ɖo axɔ́súzinkpo yětɔn yětɔn jí, bó ɖo axɔ́súwu yětɔn mɛ. Samalíi toxo ɔ́ sín hɔntogbó jí wɛ yě ɖe, ɖo gblogblo jí, bɔ gbeyíɖɔ lɛ́ɛ bǐ ɖo xó ɖɔ nú yě wɛ. Sidikíyahu Kenáana ví ɔ́ zé gan dó tun lanzo we ná, bó ɖɔ: “Mawu Mavɔmavɔ ɖɔ: ‘Lanzo we élɔ́ lɛ́ɛ ná nyí hlɔ̌nhlɔ́n e a nǎ dǒ gba Silíinu lɛ́ɛ é sín xlɛ̌.’ ” Ée é ɖɔ mɔ̌ ɔ́, gbeyíɖɔ ɖě lɛ́ɛ bǐ ɖɔ xó ɖokpó ɔ́, bó wá ɖɔ nú Akábu ɖɔ: “Sɛ́mɛɖó, yi Hlamɔti toxo mɛ, ɖo Galadi yíkúngban jí. Ahwan ɔ́ ná kpa we, Mawu Mavɔmavɔ ná jó toxo ɔ́ nú we.” Wɛnsagun e yi Micée ylɔ́ gbé ɔ́ ɖɔ n'i ɖɔ: “Gbeyíɖɔ ɖě lɛ́ɛ bǐ wɛ ɖɔ nǔ ɖokpó ɔ́; yě bǐ ɖɔ xó ɖagbe nú axɔ́sú ɔ́. Hwi lɔ tɛ́nkpɔ́n bó ɖɔ xó ɖagbe nú axɔ́sú ɔ́, yě ɖɔhun.” Micée ka xwlé Mawu ɖɔ: “Mavɔmavɔ ɖo gbɛ! Nǔ e Mawu Mavɔmavɔ ná ɖɔ nyɛ ní ɖɔ ɔ́ wɛ un ná ɖɔ.” Hwenu e Micée wá axɔ́sú ɔ́ gɔ́n ɔ́, axɔ́sú ɔ́ kanbyɔ́ ɛ ɖɔ: “Mǐ ní yi tɔ́n ahwan Hlamɔti ɖo Galadi yíkúngban jí a, abǐ mǐ ní ma yi ó?” Bɔ Micée yí gbe n'i ɖɔ: “Sɛ́mɛɖó, yi! É ná kpa mɛ, Mawu Mavɔmavɔ ná jó toxo ɔ́ nú mɛ.” Axɔ́sú ɔ́ ká wá kanbyɔ́ ɛ ɖɔ: “Azɔn nabí mɔ̌ un ka ná byɔ́ we ɖɔ hwi ní xwlé nǔ ɖɔ nǔgbó jɛ́n ɖɔ nú mì wɛ a ɖe ɖo Mawu Mavɔmavɔ nyíkɔ mɛ?” Ée é ɖɔ mɔ̌ ɔ́, Micée ɖɔ n'i ɖɔ: “Un mɔ nǔ: un mɔ Izlayɛ́li togun ɔ́, togun ɔ́ bǐ gba dó gbɔn sókan mɛ sókan mɛ; yě gbadó lɛ̌ngbɔ́ e má ɖó nyinyitɔ́ ǎ lɛ́ɛ ɖɔhun, bɔ Mawu Mavɔmavɔ ɖɔ: ‘Mɛ nɛ́ lɛ́ɛ sɔ́ ɖó mɛɖé bɔ é ɖo yě nu ǎ. Mɛ ɖokpó ɖokpó ní bó lɛ́ kɔ yi xwé tɔn gbe; è ma fun ahwan ó.’ ” Énɛ́ ɔ́, axɔ́sú Izlayɛ́li tɔn ɔ́ ɖɔ nú Jozafáti ɖɔ: “Un ma ɖɔ mɔ̌ nú we a? É nɔ mɔ nǔ ɖagbe ɖé bó nɔ ɖɔ nú mì gbeɖé ǎ; xó nyanya kɛ́ɖɛ́ jɛ́n é nɔ mɔ bó nɔ́ ɖɔ nú mì.” Micée ka ɖɔ n'i ɖɔ: “Se nǔ e Mawu Mavɔmavɔ ɖɔ ɔ́. Un mɔ Mawu Mavɔmavɔ ɖo ayǐjínjɔ́n ɖo axɔ́súzinkpo tɔn jí, bɔ mɛsɛntɔ́ sɛ́xwé tɔn lɛ́ɛ bǐ ɖo gɔ̌n tɔn. Mɛ hǎbǔ ɖo ɖisí tɔn xwé, bɔ hǎbǔ ɖo amyɔ tɔn xwé. Bɔ Mawu Mavɔmavɔ ɖɔ: ‘Mɛ̌ ká ná blɛ́ Akábu bɔ é ná yi tɔ́n ahwan Hlamɔti toxo ɔ́, ɖo Galadi yíkúngban jí, bó ná kú?’ Bɔ yě ɖɔ yětɔn yětɔn. Hwenɛ́nu ɔ́, yɛ ɖokpó wá Mawu Mavɔmavɔ nukɔn, bó ɖɔ: ‘Nyɛ ná yi blɛ́ ɛ.’ Bɔ Mawu Mavɔmavɔ kanbyɔ́ ɛ ɖɔ: ‘Nɛ̌ wɛ a nǎ bló gbɔn?’ Bɔ é yí gbe nú Mawu Mavɔmavɔ ɖɔ: ‘Un ná yi, bó ná zé adingban dó nu nú gbeyíɖɔ tɔn lɛ́ɛ bǐ.’ Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: ‘Wlɛnwín ɖagbe nɛ́! A nǎ kpé wú bó blɛ́ ɛ nǔgbó. Bo yi bo bló gbɔn mɔ̌.’ Bɔ din ɔ́, Mawu Mavɔmavɔ sɔ́ yɛ adingbannɔ dó gbeyíɖɔ towe e ɖo fínɛ́ lɛ́ɛ bǐ sín nu mɛ nǔgbó. Amɔ̌, nú è nǎ ɖɔ nǔgbó ɔ́, awě sɛ́ dó we wɛ Mavɔmavɔ ɖe.” Ée Micée ɖɔ mɔ̌ tlóló ɔ́, Sidikíyahu Kenáana ví ɔ́ sɛkpɔ́ ɛ, bó gba tómɛ n'i, bó ɖɔ: “Fítɛ́ wɛ yɛ Mawu Mavɔmavɔ tɔn ɔ́ gbɔn bó tɔ́n sín nyɛ mɛ, bó wá ɖɔ xó nú we?” Bɔ Micée yí gbe n'i ɖɔ: “Gbe e gbe a nǎ ɖo hinhɔn hwlá gbɔn xɔ mɛ xɔ mɛ wɛ ɔ́, a nǎ mɔ.” Bɔ axɔ́sú Izlayɛ́li tɔn ɔ́ ná gbe ahwangán tɔn lɛ́ɛ ɖokpó ɖɔ: “Wlǐ Micée, bó kplá ɛ yi jó nú gǎn Amɔ́ni e kpa acɛ dó toxo ɔ́ nu ɔ́, kpó axɔ́ví Yoaci kpó, bó ɖɔ nú yě ɖɔ: ‘Axɔ́sú ɔ́ ɖɔ: Mi sú nya élɔ́, bónú è nǐ nɔ́ ɖo nǔɖuɖu kpɛví ɖé, sin kpɛví ɖé ná ɛ wɛ, káká bónú má lɛ́ kɔ sín ahwangbénu wá wǔyɛ́yɛ́ afɔyɛ́yɛ́.’ ” Micée ka ɖɔ n'i ɖɔ: “Nú a lɛ̌ kɔ wá wǔyɛ́yɛ́ afɔyɛ́yɛ́ hǔn, Mawu Mavɔmavɔ ɖɔ xó gbɔn jǐ ce ǎ.” Ée é ɖɔ mɔ̌ gúdo ɔ́, é ɖɔ: “Togun lɛ́ɛ bǐ ní ɖótó.” Axɔ́sú Izlayɛ́li tɔn ɔ́ kpódó Jozafáti axɔ́sú Judáa tɔn ɔ́ kpó yi tɔ́n ahwan Hlamɔti toxo ɔ́ ɖo Galadi. Cóbónú yě ká ná yi ɔ́, axɔ́sú Izlayɛ́li tɔn ɔ́ ɖɔ nú Jozafáti ɖɔ: “Nyɛ ɔ́, un ná húzú kan; un ná dó axɔ́súwu ce lɛ́ɛ ǎ; amɔ̌ hwɛ ɔ́, dǒ axɔ́súwu towe lɛ́ɛ.” Ée axɔ́sú Izlayɛ́li tɔn ɔ́ ɖɔ mɔ̌ ɔ́, é dó nǔ ɖěvo lɛ́ɛ bɔ yě ɖidó ahwangbénu. Axɔ́sú Silíi tɔn ɔ́ ká kó ɖɔ nú gǎn gban-nukún-we (32) e kpa acɛ dó ahwankɛkɛ́ví tɔn lɛ́ɛ nu lɛ́ɛ ɖɔ yě ní ma ɖ'alɔ ahwanfuntɔ́ kpaa lɛ́ɛ wú ó, yě ní ma ka ɖó alɔ ahwangán lɛ́ɛ wú ó, lo ɔ́ axɔ́sú Izlayɛ́li tɔn ɔ́ kɛ́ɖɛ́ wɛ yě ná wlí. Ée gǎn e kpa acɛ dó ahwankɛkɛ́ví lɛ́ɛ nu lɛ́ɛ mɔ Jozafáti jǎwe ɔ́, yě lin dó ayi mɛ ɖɔ: “Dandan mɛ ɔ́, axɔ́sú Izlayɛ́li tɔn ɔ́ wɛ.” Énɛ́ ɔ́, yě ɖidó gɔ̌n tɔn, bó ná wlí i; é sú xó e é nɔ sú ɖo ahwangbénu é. Énɛ́ ɔ́, yě mɔ ɖɔ é kún nyí axɔ́sú Izlayɛ́li tɔn ɔ́ wɛ ó, lobo jó e dó. Énɛ́ ɔ́, sɔ́ja Silíinu ɖé ká da gǎ tɔn kpowun, bɔ gǎ ɔ́ gbɔn fí e gǎnwu e Izlayɛ́li xɔ́sú ɔ́ dó ɔ́ kpé ɖe ɔ́, bó sɔ́ ɛ, bɔ é ɖɔ nú mɛ e ɖo kunkun i wɛ ɔ́ ɖɔ: “Lɛ̌ kɔ bo kplá mì sín ahwangbénu ɖó un xo akpa.” Ahwan ɔ́ ká syɛ́n gbe nɛ́ gbe káká bɔ è gbɔ bó hɛn ɛ ɖó te ɖo kɛkɛ́ví tɔn mɛ, bɔ é nɔ ahwan ɔ́ nu ɖo ahwangɔnu Silíi tɔn ɔ́ nukɔn. É ɖi hun káká bó wá kú gbadanu. Hun tɔn sa gbɔn kɛkɛ́ví ɔ́ mɛ bǐ, ɖó wǔ e è gblě e ɔ́ wú. Ée hwe lɛ́ kɔ ɔ́, è sú xó, bó ɖɔ gbɔn ahwangɔnu Izlayɛ́li tɔn ɔ́ bǐ mɛ ɖɔ mɛ ɖokpó ɖokpó ní yi toxo tɔn mɛ, mɛ ɖokpó ɖokpó ní yi to tɔn mɛ. Énɛ́ ɔ́, axɔ́sú ɔ́ kú. Ée axɔ́sú ɔ́ kú ɔ́, è zě cyɔ tɔn wá Samalíi bo ɖi i ɖó fínɛ́. È klɔ́ hun tɔn sín kɛkɛ́ví ɔ́ mɛ, ɖo sindo Samalíi tɔn ɔ́ tó, fí e nyɔ̌nu agalɛtɔ́ lɛ́ɛ nɔ lɛ wǔ ɖe é. Bɔ cukú lɛ́ɛ wá ɖíɖɔ́ hun tɔn lě e Mawu Mavɔmavɔ kó ɖɔ gbɔn é. È wlǎn Akábu sín tan e kpo ɔ́, nǔ e é wa lɛ́ɛ bǐ, hɔnmɛ e é zé ajinakúɖú dó ba acɔ́ ná ɔ́, kpódó toxo e é mɛ ahohó lɛ́ lɛ̌ dó lɛ́ɛ bǐ kpó dó “Axɔ́sú Izlayɛ́li tɔn lɛ́ɛ sín Tan wéma” mɛ. Ée axɔ́sú Akábu zán wá kú ɔ́, vǐ tɔn Akaziasi wá ɖu axɔ́sú ɖó tɛn tɔn mɛ. Jozafáti Asa ví ɔ́ ɖu axɔ́sú ɖo Judáa, ɖo hwenu e axɔ́sú Izlayɛ́li tɔn Akábu ɖo xwe ɛnɛ bló wɛ ɖo zinkpo jí é. Xwe gbantɔ́n (35) wɛ é ɖó hwenu e é yi axɔ́súzinkpo jí ɖo Jeluzalɛ́mu é. É ɖu axɔ́sú nú xwe koatɔ́n (25), bó nɔ́ nɔ Jeluzalɛ́mu. Nɔ tɔn nɔ nyí Azuva, Ciluxi ví wɛ. É zán gbɛ jlɔ́jlɔ́ tɔ́ tɔn Asa ɖɔhun. É nɔ wa nǔ e sɔgbe ɖo Mawu Mavɔmavɔ nukún mɛ é. É lɛ́ kɔ sín nǔ e tɔ́ ɔ́ nɔ wa lɛ́ɛ ɖěbǔ gúdo ǎ. Nǔ ka ɖo mɔ̌ có, é gba vodún xwé lɛ́ɛ ǎ; togun ɔ́ lɛ́ kpo ɖo kanlin kpódó zǎlínkpɔ́n kpó dó yi sá vɔ̌ ná wɛ gbɔn vɔ̌sákpe jí vɔ̌sákpe jí ɖo só jí. Jozafáti kpó axɔ́sú Izlayɛ́li tɔn kpó nɔ ganjí. È wlǎn Jozafáti sin tan e kpo ɔ́, nǔ ɖaxó ɖaxó e é bló lɛ́ɛ, kpódó lě e é kpan akɔ́n gbɔn ɔ́ kpó dó “Axɔ́sú Judáa tɔn lɛ́ɛ sín Tan wéma” mɛ. Súnnu kpó nyɔ̌nu kpó e kpo ɖo to ɔ́ mɛ, bó nɔ lɛ aga ɖo hunkpá mɛ dó sɛn hun, sín tɔ́ tɔn Asa hwenu lɛ́ɛ ɔ́, é wɛ nya yě sín to ɔ́ mɛ. Axɔ́sú ɖě ká ɖo Edɔ́mu hwenɛ́nu ǎ. Tokpɔngán ɖokpó wɛ Judáa xɔ́sú ɔ́ sɔ́ ɖó Edɔ́mu to ɔ́ nu. Jozafáti bló tɔjíhún ɖaxó ɖaxó ɖé lɛ́ɛ ɖo Esiɔ́ni-Gevɛ́ɛ, bó ná dó yi bɛ́ siká ɖo Ofíi. É ká kpé wú ǎ, ɖó tɔjíhún lɛ́ɛ gba ɖo Esiɔ́ni-Gevɛ́ɛ fínɛ́. Énɛ́ ɔ́, Akaziasi Akábu ví ɔ́ ɖɔ nú Jozafáti ɖɔ: “A jlǒ nú tɔzɔ́watɔ́ ce lɛ́ɛ ní byɔ́ tɔjíhún ɔ́ mɛ xá tɔzɔ́watɔ́ towe lɛ́ɛ hɛn yi a?” Jozafáti ka jló ǎ. Jozafáti zán wá kú, bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Yexolámu ɖu axɔ́sú ɖó tɛn tɔn mɛ. Akaziasi Akábu ví ɔ́ ɖu axɔ́sú ɖo Izlayɛ́li, hwenu e axɔ́sú Judáa tɔn Jozafáti ɖo xwe afɔtɔn-nukún-we bló wɛ ɖo zinkpo jí é. Samalíi wɛ é nɔ́ nɔ. É ɖu axɔ́sú nú xwe we ɖo Izlayɛ́li. É wa nǔ e má nyɔ́ Mawu Mavɔmavɔ nukún mɛ ǎ é. É zán gbɛ nyanya lě e tɔ́ tɔn kpódó nɔ tɔn kpó zán gbɛ yětɔn gbɔn é. É wa nǔ Jelobowámu Nɛvati ví e dɔn Izlayɛ́linu lɛ́ɛ dó hwɛ mɛ ɔ́ ɖɔhun. É nɔ́ sɛn Baalu, bó nɔ ɖe kɔ́ n'i, bó dó dó xomɛsin nú Mawu Mavɔmavɔ, Mawu Izlayɛ́li tɔn ɔ́ lě e tɔ́ tɔn bló gbɔn é. Ée axɔ́sú Akábu zán wá kú ɔ́, Mɔwabunu lɛ́ɛ fɔ́n gǔ dó acɛkpikpa Izlayɛ́li tɔn jí. É wá su gbe ɖokpó, bɔ axɔ́sú Akaziasi jɛ ayǐ gbɔn flɛtɛ́li nu. Síngbó tɔn e ɖo Samalíi ɔ́ jí wɛ é jɛ ayǐ sín, bó gblé wǔ ɖésú. Énɛ́ ɔ́, é sɛ́ mɛ dó Eklɔ́ni toxo ɔ́ mɛ, bónú è nǎ yi kan nǔ byɔ́ vodún Eklɔ́ni tɔn Baalu-Zebúbi ɖɔ émí ná gán ɖo wǔ e émí gblé ɔ́ mɛ ají. Wɛnsagun Mawu Mavɔmavɔ tɔn ɖokpó ka ɖɔ nú Elíi Ticibéenu ɔ́ ɖɔ: “Sɔ́ nǔ, bó yi kpé mɛ e axɔ́sú Samalíi tɔn sɛ́ dó lɛ́ɛ, bó kanbyɔ́ yě ɖɔ: ‘Mawu ɖo Izlayɛ́li ǎ wú wɛ mi xwe nǔ kan gbé ɖo Eklɔ́ni vodún Baalu-Zebúbi gɔ́n a?’ Mawu Mavɔmavɔ ɖɔ: ‘A nǎ ɖɔ nú Izlayɛ́li xɔ́sú ɔ́ ɖɔ wǔ e é gblé bó jɛ xɔ ɔ́, é kún ɖo nǎ gán ɖ'é mɛ wɛ ó, é ná kú dandan.’ ” Elíi bló nǔ e Mawu Mavɔmavɔ zɔ́n ɛ ɔ́. Mɛ e axɔ́sú Akaziasi sɛ́ dó lɛ́ɛ lɛ́ kɔ wá mɔ ɛ tlóló, bɔ é kanbyɔ́ yě ɖɔ: “Étɛ́wú mi ka yá wǔ wá sɔ mɔ̌?” Yě yí gbe n'i ɖɔ: “Nya ɖé wá kpé mǐ, bó ɖɔ nú mǐ ɖɔ Mawu Mavɔmavɔ ɖɔ Mawu ɖo Izlayɛ́li ǎ wú wɛ hwi sɛ́ mɛ dó nǔ kan gbé ɖo Eklɔ́ni vodún Baalu-Zebúbi gɔ́n a jí? Énɛ́ ɔ́ wú wɛ wǔ e hwi gblé ɔ́, hwi kún ɖo nǎ gán ɖ'é mɛ wɛ ó, hwi ná kú dandan.” Ée yě ɖɔ mɔ̌ ɔ́, Akaziasi kanbyɔ́ yě ɖɔ: “Nɛ̌ nya e ká wá kpé mi bó ɖɔ xó énɛ́ lɛ́ɛ nú mi ɔ́ ká cí?” Yě yí gbe n'i ɖɔ: “Nya ɖé wɛ, bó dó awu ɖé, bɔ è sɔ́ lǎkúnmí fún dó lɔn ná; é sin anyǔkan dó alin.” Ée yě ɖɔ mɔ̌ ɔ́, axɔ́sú Akaziasi sú xó bó ɖɔ: “Hǔn! Elíi Ticibéenu ɔ́ wɛ!” Axɔ́sú Akaziasi sɛ́ ahwangán ɖokpó kpódó sɔ́ja kanɖé wǒ (50) kpó dó Elíi gbé mɛ, bónú yě ná wlí i. Yě yi mɔ Elíi ɖo só ɖé ta aga, bɔ é ɖo ayǐjínjɔ́n, bɔ yě ɖɔ n'i ɖɔ: “Đɛ̌mɛnu Mawu tɔn, axɔ́sú ɔ́ ɖɔ hwi ní wá.” Elíi yí gbe nú ahwangán ɔ́ ɖɔ: “Đɛ̌mɛnu Mawu tɔn wɛ un nyí nǔgbó. Ée nǔ nyí mɔ̌ é ɔ́, myɔ ní gosín jǐxwé bó fyɔ́ hwi kpó sɔ́ja towe kanɖé wǒ (50) lɛ́ɛ kpó!” Ée Elíi ɖɔ mɔ̌ tlóló ɔ́, myɔ gosín jǐxwé, bó fyɔ́ ahwangán ɔ́ kpó sɔ́ja tɔn kanɖé wǒ (50) lɛ́ɛ kpó. Akaziasi lɛ́ sɛ́ ahwangán ɖěvo kpó sɔ́ja kanɖé wǒ (50) ɖěvo kpó dó Elíi gɔ́n, bɔ ahwangán ɔ́ yi ɖɔ nú Elíi ɖɔ: “Đɛ̌mɛnu Mawu tɔn, axɔ́sú ɔ́ ɖɔ hwi ní wá din tlóló.” Elíi ka yí gbe nú yě ɖɔ: “Đɛ̌mɛnu Mawu tɔn wɛ un nyí nǔgbó. Ée nǔ nyí mɔ̌ é ɔ́, Mawu ní sɛ́ myɔ dó sín jǐxwé, bó fyɔ́ hwi kpó sɔ́ja towe kanɖé wǒ (50) lɛ́ɛ kpó!” Ée Elíi ɖɔ mɔ̌ tlóló ɔ́, Mawu sɛ́ myɔ dó sín jǐxwé, bó fyɔ́ ahwangán ɔ́ kpó sɔ́ja tɔn kanɖé wǒ (50) lɛ́ɛ kpó. Akaziasi lɛ́ sɛ́ ahwangán ɖěvo kpódó sɔ́ja kanɖé wǒ (50) kpó dó Elíi gɔ́n azɔn atɔngɔ́ ɔ́. Yě xá só e jí Elíi ɖe ɔ́ jí. Ée yě mɔ Elíi ɔ́, ahwangán ɔ́ jɛ kpo, bó sa vo n'i ɖɔ: “Đɛ̌mɛnu Mawu tɔn, kɛnklɛ́n bó ma hu nyɛ kpódó sɔ́ja ce lɛ́ɛ kpó ó. Myɔ ɖíe ko gosín jǐxwé bó fyɔ́ ahwangán kanɖéwǒgán we nukɔntɔn lɛ́ɛ kpó sɔ́ja e xwedó yě lɛ́ɛ bǐ kpó e. Amɔ̌, kɛnklɛ́n, má hu mì ó.” Wɛnsagun Mawu Mavɔmavɔ tɔn ka ɖɔ nú Elíi ɖɔ: “Xwedó ahwangán ɔ́, ma ɖi xɛsi n'i ó.” Ée wɛnsagun ɔ́ ɖɔ mɔ̌ ɔ́, Elíi xwedó ahwangán ɔ́ yi axɔ́sú ɔ́ gɔ́n, bó ɖɔ n'i ɖɔ Mawu Mavɔmavɔ ɖɔ: “Mawu ɖo Izlayɛ́li ǎ wú wɛ a sɛ́ mɛ dó nǔ kan gbé ɖo Eklɔ́ni vodún Baalu-Zebúbi gɔ́n a? Énɛ́ ɔ́ wú wɛ wǔ e a gblě bó jɛ xɔ ɔ́, a ɖo nǎ gán ɖ'é mɛ wɛ ǎ; a nǎ kú dandan.” Akaziasi kú nǔgbó lě e Mawu Mavɔmavɔ ɖɔ nú Elíi gbɔn é. É ká ɖó vǐ ǎ, bɔ nɔví tɔn Yolámu ɖu axɔ́sú ɖó tɛn tɔn mɛ, hwenu e axɔ́sú Judáa tɔn Yexolámu Jozafáti ví ɔ́ ɖo xwe we bló wɛ ɖo zinkpo jí é. È wlǎn Akaziasi sín tan e kpo ɔ́ bǐ dó “Izlayɛ́li xɔ́sú lɛ́ɛ sín Tan wéma” mɛ. Gilugalu wɛ Elíi kpó Elizée kpó gosín, bɔ Mawu Mavɔmavɔ sɔ́ Elíi yi jǐxwé ɖo axásáxásá jɔhɔn ɖé mɛ. Lě e nǔ lɛ́ɛ jɛ gbɔn ɔ́ ɖíe: Hwenu e yě ɖo ali jí bó ɖo yiyi wɛ ɔ́, Elíi ɖɔ nú Elizée ɖɔ: “Kɛnklɛ́n nɔ fí, ɖó káká Betɛ́li wɛ Mawu Mavɔmavɔ sɛ́ mì dó.” Elizée ka xwlé Mawu n'i ɖɔ: “Mawu Mavɔmavɔ ɖo gbɛ bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, yě yi Betɛ́li. Gbeyíɖɔ Mawu tɔn e ɖo Betɛ́li lɛ́ɛ yi Elizée gɔ́n, bó kanbyɔ́ ɛ ɖɔ: “A ka tunwun ɖɔ égbé ɔ́, Mawu Mavɔmavɔ ná sɔ́ gǎn towe yi jǐxwé a?” É yí gbe nú yě ɖɔ: “Ɛɛn, nyi lɔ tunwun, mi ka jó xó énɛ́ dó.” Elíi lɛ́ ɖɔ nú Elizée ɖɔ: “Kɛnklɛ́n nɔ fí, ɖó Mawu Mavɔmavɔ sɛ́ mì dó Jeliko.” É ka xwlé Mawu n'i ɖɔ: “Mawu Mavɔmavɔ ɖo gbɛ, bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, yě yi Jeliko. Gbeyíɖɔ Mawu tɔn e ɖo Jeliko lɛ́ɛ sɛkpɔ́ Elizée, bo kanbyɔ́ ɛ ɖɔ: “A ka tunwun ɖɔ égbé ɔ́, Mawu Mavɔmavɔ ná sɔ́ gǎn towe yi jǐxwé a?” É yí gbe nú yě ɖɔ: “Ɛɛn nyi lɔ tunwun, mi ka jó xó énɛ́ dó.” Elíi lɛ́ ɖɔ nú Elizée ɖɔ: “Kɛnklɛ́n nɔ fí, ɖó Mawu Mavɔmavɔ sɛ́ mì dó Judɛ́ɛn tɔ tó.” É ká xwlé Mawu n'i ɖɔ: “Mawu Mavɔmavɔ ɖo gbɛ bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Bɔ yě zɔn kpɔ́ ɖidó. Elíi kpó Elizée kpó nɔ te ɖo Judɛ́ɛn tɔ ɔ́ tó, bɔ gbeyíɖɔ Mawu tɔn lɛ́ɛ kanɖé wǒ (50) wá, bó nɔ te zɔ zaan dó yě. Énɛ́ ɔ́, Elíi ɖe awu tɔn ɖaxó ɔ́, bó sló, bó zin dó tɔ ɔ́ nukún mɛ, bɔ tɔ ɔ́ má, bɔ yě mɛ we lɛ́ɛ zun zɔnlin gbɔn ayǐkúngban xúxú jí dín. Ée yě dín ɔ́, Elíi ɖɔ nú Elizée ɖɔ: “Byɔ̌ nǔ e jló we ɔ́ mì nú má ná we, có nú Mawu ná sɔ́ mì sín gɔ̌n towe.” Elizée ɖɔ n'i ɖɔ: “Kɛnklɛ́n ná yɛ e a nǎ vǐ ɖě lɛ́ɛ ɔ́ donu we mì.” Elíi ɖɔ n'i ɖɔ: “Nǔ e byɔ́ wɛ a ɖe ɔ́ vɛ́ wǔ, lo ɔ́, ényí a mɔ mì hwenu e Mawu ná ɖo sísɔ́ mì sín gɔ̌n towe wɛ ɔ́, a nǎ mɔ nǔ e byɔ́ wɛ a ɖe ɔ́ yí. Nú a ma ka mɔ mì ǎ ɔ́, a nǎ mɔ yí ǎ.” Ée yě ɖo yiyi wɛ bo ɖo xó ɖɔ wɛ ɔ́, yě mɔ sɔ́ ɖé lɛ́ɛ dɔn ahwankɛkɛ́ví myɔnɔ ɖé bó gbo yě, bɔ Elíi byɔ́ axásáxásá jɔhɔn ɖé mɛ ɖidó jǐxwé. Ée Elizée mɔ mɔ̌ ɔ́, é sú xó bó ɖɔ: “Daá! Daá! Ali e nu a ɖe nú Izlayɛ́li ɔ́ syɛ́n hú ahwankɛkɛ́ví Izlayɛ́li tɔn lɛ́ɛ bǐ kpó sɔ́ Izlayɛ́li tɔn lɛ́ɛ bǐ kpó.” Ée é ma sɔ́ mɔ ɛ ǎ ɔ́, é hɛn awu e ɖo kɔ tɔn lɛ́ɛ vún ɖó we we. Énɛ́ ɔ́ gúdo ɔ́, é sɔ́ awu ɖaxó e Elíi jó dó, bɔ é jɛ ayǐ é, bó lɛ́ kɔ wá nɔ te Judɛ́ɛn tɔ ɔ́ tó. É sɔ́ awu ɔ́, bó zin dó tɔ ɔ́ nukún mɛ bó sú xó ɖɔ: “Fítɛ́ Mawu Mavɔmavɔ, Mawu Elíi tɔn ɔ́ ɖe?” Ée Elizée lɔmɔ̌ zin nǔ dó tɔ ɔ́ nukún mɛ Elíi ɖɔhun ɔ́, tɔ ɔ́ má ɖó we, bɔ é dín gbɔn mɛ. Gbeyíɖɔ Mawu tɔn gbɛ́ta e gosín Jeliko ɔ́ ɖo zɔ bo mɔ nǔ e Elizée bló ɔ́, bó ɖɔ: “Yɛ Elíi tɔn ɖo Elizée jí.” Ée yě ɖɔ mɔ̌ ɔ́, yě yi kpé e, bó ɖe kɔ́ n'i. Yě ɖɔ n'i ɖɔ: “Súnnu glegbenu kanɖé wǒ (50) ɖo fí xá mǐ mɛsɛntɔ́ towe lɛ́ɛ. A jlǒ nú yě ná ba gǎn towe a? Bóyá yɛ Mawu Mavɔmavɔ tɔn ná kó sɔ́ ɛ nyi só ɖé jí, abǐ tɔdo ɖé mɛ din.” É ka yí gbe nú yě ɖɔ: “Mi ma sɛ́ yě dó ó.” Lo ɔ́, yě ɖo hǔn mɛ n'i káká bɔ é gbɔ bó ɖɔ: “Mi bo sɛ́ yě dó.” Bɔ yě sɛ́ súnnu kanɖé wǒ (50) lɛ́ɛ dó bɔ yě yi Elíi ba gbé, bo ba ɛ káká nú azǎn atɔn, yě ká mɔ ɛ ǎ. Ée yě lɛ́ kɔ wá ɔ́, Elizée kpo ɖo Jeliko, bó ɖɔ nú yě ɖɔ: “Un ma ko ɖɔ nú mi ɖɔ mi ní má yi ó a?” Jelikonu lɛ́ɛ ɖɔ nú Elizée ɖɔ: “Gǎn, a mɔ din a? Fí e toxo mǐtɔn ɖe ɔ́ nyɔ́, amɔ̌ sin e ɖo to ɔ́ mɛ ɔ́ nyɔ́ ǎ, bɔ ayǐkúngban ɔ́ nɔ́ nyɔ́ nǔ ǎ.” Ée yě ɖɔ mɔ̌ ɔ́, Elizée ɖɔ nú yě ɖɔ: “Mi wún jɛ dó gannú yɔ̌yɔ́ ɖokpó mɛ wá nú mì.” Bɔ yě yi wún jɛ ɔ́ wá n'i, bɔ é yi tɔjɔtɛn ɔ́ kɔn, bó wún jɛ ɔ́ kɔn nyi mɛ bo ɖɔ: “Mawu Mavɔmavɔ ɖɔ: ‘Un sɔ́ sin élɔ́ dó húzú sin ɖagbe. É sɔ́ ná hu mɛ ǎ, é ká sɔ́ ná hɛn ayǐkúngban ɔ́ gblé ǎ.’ ” Nǔgbó ɔ́, sin ɔ́ húzú sin ɖagbe, bó kpo ɖo mɔ̌ káká jɛ égbé lě e Elizée ɖɔ gbɔn é. Elizée gosín Jeliko, bó ɖidó Betɛ́li. Hwenu e é ɖo yiyi wɛ ɔ́, yɔkpɔ́vú ɖé lɛ́ɛ tɔ́n sín toxo ɔ́ mɛ, bó jɛ kiko e jí. Yě nɔ́ ɖɔ n'i ɖɔ: “Yi, ta xwíxwá! Yi, ta xwíxwá!” Bɔ Elizée lɛ́ kɔ kpɔ́n yě, bó dó nu yě ɖo Mawu Mavɔmavɔ nyíkɔ mɛ, bɔ lɔnmɔ we tɔ́n sín nǔkan mɛ, bó vúnvún mɛ kanɖé-nukún-we (42) ɖo yě mɛ. Énɛ́ ɔ́ gúdo ɔ́, Elizée gosín fínɛ́, bó yi Kaamɛ́li só jí, bó gosín fínɛ́ bo lɛ́ kɔ wá Samalíi. Hwenu e Jozafáti Judáa xɔ́sú ɔ́ ɖo xwe afɔtɔn-nukún-atɔn bló wɛ ɖo axɔ́súzinkpo jí ɔ́, Yolámu Akábu ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú nú xwe wěwe. É wa nǔ e má nyɔ́ Mawu Mavɔmavɔ nukún mɛ ǎ é. É ká sɔ tɔ́ tɔn kpó nɔ tɔn kpó tɔn ǎ, ɖó é mu awǐnnya e tɔ́ tɔn tun te bo nɔ sɛn dó sɔ́ vodún Baalu su é. Lo ɔ́, é hu hwɛ e Jelobowámu Nɛvati ví ɔ́ hu bó dɔn Izlayɛ́linu lɛ́ɛ dó hwɛ mɛ lɛ́ɛ, bó ká kpo ɖ'é wú. Mɛca Mɔwabu xɔ́sú ɔ́, kanlinnyitɔ́ wɛ. Xwewú xwewú ɔ́, é nɔ ná lɛ̌ngbɔ́ví adɔ̌kpo atɔ́ɔ́n (100.000), agbo adɔ̌kpo atɔ́ɔ́n (100.000) kpó fún yětɔn kpó sín nǔjɔ Izlayɛ́li xɔ́sú ɔ́. Lo ɔ́, ée Akábu zán wá kú ɔ́, axɔ́sú Mɛca fɔ́n gǔ dó Yolámu e jɛ tɛn tɔn mɛ ɔ́ jí. Ée Yolámu se mɔ̌ ɔ́, é tɔ́n sín Samalíi, bo xa sɔ́ja Izlayɛ́li tɔn lɛ́ɛ bǐ. Énɛ́ ɔ́ gúdo ɔ́, é dó wɛn sɛ́ dó axɔ́sú Judáa tɔn Jozafáti ɖɔ: “Axɔ́sú Mɔwabu tɔn fɔ́n gǔ dó jǐ ce. A ma ná gɔ́ nú mì nú mǐ ná yi tɔ́n ahwan ɛ a?” Jozafáti yí gbe n'i ɖɔ: “Mǐ ná yi; nyɛ kpó hwi kpó ɔ́, nǔ ɖokpó ɔ́ mǐ nyí, togun ce ɔ́, togun towe wɛ, togun towe ɔ́, togun ce wɛ, sɔ́ ce lɛ́ɛ ɔ́, sɔ́ towe lɛ́ɛ wɛ, sɔ́ towe lɛ́ɛ ɔ́, sɔ́ ce lɛ́ɛ wɛ.” É lɛ́ ɖɔ: “Ali tɛ́ wɛ mǐ nǎ gbɔn yi?” Yolámu ɖɔ n'i ɖɔ: “Gbětótló Edɔ́mu tɔn sín ali ɔ́ wɛ mǐ ná gbɔn.” Axɔ́sú Izlayɛ́li tɔn, Judáa tɔn kpódó Edɔ́mu tɔn kpó gbɔn ali tlɔlɔ ɔ́ ǎ. Ée yě ɖi zɔnlin káká nú azǎn tɛ́nwe ɔ́, sin wá vɔ dó sɔ́ja lɛ́ɛ kpódó kanlin e yě hɛn lɛ́ɛ kpó. Énɛ́ ɔ́, Izlayɛ́li xɔ́sú ɔ́ sú xó ɖɔ: “Heelú! Mawu Mavɔmavɔ ylɔ́ mǐ mɛ axɔ́sú atɔn élɔ́ lɛ́ɛ, bó ná jó mǐ nú Mɔwabunu lɛ́ɛ.” Lo ɔ́, Jozafáti kanbyɔ́ ɖɔ: “ Gbeyíɖɔ Mawu Mavɔmavɔ tɔn ɖé ɖo fí bónú mǐ nǎ kan nǔ byɔ́ Mawu Mavɔmavɔ ǎ cé?” Axɔ́sú Izlayɛ́li tɔn sín ahwangán ɖokpó yí gbe ɖɔ: “Elizée Cafáti ví e dó alɔ Elíi ɔ́ ɖo fí.” Bɔ Jozafáti ɖɔ: “Xó Mawu Mavɔmavɔ tɔn ɖo nu tɔn.” Ée é ɖɔ mɔ̌ ɔ́, yě mɛ axɔ́sú atɔn lɛ́ɛ yi mɔ Elizée tlóló. Elizée ɖɔ nú axɔ́sú Izlayɛ́li tɔn ɔ́ ɖɔ: “Étɛ́ sín tagba dó nú mì wɛ a ká ɖe? Yi mɔ tɔ́ towe sín gbeyíɖɔ lɛ́ɛ, abǐ nɔ towe tɔn lɛ́ɛ.” Ée é ɖɔ mɔ̌ ɔ́, axɔ́sú Izlayɛ́li tɔn ɔ́ ɖɔ n'i ɖɔ: “Éeǒ, ɖó Mawu Mavɔmavɔ wɛ ylɔ́ mǐ mɛ axɔ́sú atɔn élɔ́ lɛ́ɛ, bó ná jó mǐ nú Mɔwabunu lɛ́ɛ.” Elizée xwlé nǔ ɖɔ: “Mawu Mavɔmavɔ Nǔbǐwúkpétɔ́ e sín mɛsɛntɔ́ un nyí ɔ́ ɖo gbɛ. É má nyí sísí e un ɖó nú axɔ́sú Judáa tɔn Jozafáti ɔ́ wú wɛ ǎ ɔ́, un ɖo nu ná kɛ d'é mɛ nú we wɛ ǎ; un ka ɖo jɔ towe jí ná kpɔ́n wɛ ǎ. Din ɔ́, mi yi kplá nǔxotɔ́ ɖokpó wá.” Ée nǔxotɔ́ ɔ́ wá, bó ɖo nǔ xo wɛ ɔ́, Mawu Mavɔmavɔ sín hlɔ̌nhlɔ́n wá Elizée jí, bɔ é ɖɔ: “Mawu Mavɔmavɔ ɖɔ: ‘Mi kun do gbɔn tɔdo élɔ́ mɛ. Jɔhɔn ná nyi ǎ, jǐ ka ná ja ǎ, bɔ sin ka ná gɔ́ tɔdo élɔ́, bɔ mi kpódó kanlin mitɔn lɛ́ɛ kpó ná nu. Lo ɔ́, nǔ énɛ́ nyí nǔɖé ɖo Mawu Mavɔmavɔ nukɔn ǎ. É ná jó Mɔwabuto ɔ́ nú mi. Mi ná gba toxo e è mɛ ahohó lɛ́ lɛ̌ dó lɛ́ɛ bǐ, bó ná gba toxo nukúnɖéjí lɛ́ɛ bǐ. Mi ná gbo atín e nɔ ná sínsɛ́n lɛ́ɛ bǐ, mi ná sú tɔjɔtɛn lɛ́ɛ bǐ, bó ná nyi awǐnnya dó gle e è lɛ lɛ́ɛ jí, bó ná hɛn bǐ gblé.’ ” Énɛ́ ɔ́, ayǐhɔ́ngbe tɔn zǎnzǎn ɔ́, gan e mɛ è nɔ xwlé vɔ̌sánú zǎnzǎn tɔn ɔ́ Mawu ɔ́, sin sa sín Edɔ́mu wá gba to ɔ́ bǐ. Nǔ ɖo mɔ̌ có, Mɔwabunu lɛ́ɛ se ɖɔ axɔ́sú lɛ́ɛ ja ahwan tɔ́n émí gbé, bó cyán mɛ e ɖó xwe bó hɛn ɔ́, é ná yi ahwan lɛ́ɛ kpó mɛ e sín xwe ko zɛ mɔ̌ wú lɛ́ɛ kpó bǐ, bɔ yě fɔ ahwanfunnú, bó yi cí to ɔ́ sín dogbó jí. Sɔ́ja Mɔwabu tɔn lɛ́ɛ fɔ́n zǎn, bɔ hwenu e hwesivɔ́ klé dó tɔ lɛ́ɛ jí ɔ́, yě mɔ tɔ ɔ́ sɛ́ dó ɖo nukɔn yětɔn, bɔ é myá hun ɖɔhun. Énɛ́ ɔ́, yě sú xó bó ɖɔ: “Mi kpɔ́n hun! Axɔ́sú lɛ́ɛ kpó ahwangɔnu yětɔn lɛ́ɛ kpó fun ahwan xá yěɖée, bó hu yěɖée. Din ɔ́, mǐ ní yi bɛ́ nǔ yětɔn lɛ́ɛ!” Ée yě ɖɔ mɔ̌ ɔ́, yě ɖidó Izlayɛ́li ví lɛ́ɛ gɔ́n. Ée yě sɛkpɔ́ yě ɔ́, Izlayɛ́li ví lɛ́ɛ ɖu ɖo yě jǐ, bɔ yě hɔn. Izlayɛ́li ví lɛ́ɛ nya yě káká byɔ́ to yětɔn mɛ, bó wa nǔ xá yě, bɔ tɛn tɔn mɛ vɛ́ jlɛ́. Yě gba toxo lɛ́ɛ, mɛ ɖokpó ɖokpó nyi awǐnnya dó gle lɛ́ɛ bǐ mɛ, bɔ awǐnnya gɔ́ gle lɛ́ɛ bǐ. Yě sú tɔjɔtɛn lɛ́ɛ bǐ, bó gbo atín e nɔ ná sínsɛ́n lɛ́ɛ bǐ. Kíi-Alɛsɛ́ti toxo ɔ́ wɛ nyí toxo ɖokpó e kpo ɖo te é. Lo ɔ́, sɔ́ja e hɛn klohwán lɛ́ɛ wá xá toxo ɔ́ lobo gba. Ée axɔ́sú Mɔwabu tɔn mɔ ɖɔ émí kún sixú ɖu ɖo ahwan ɔ́ jí ó ɔ́, é cyán sɔ́ja hwǐkplátɔ́ nǔwɔntɔn kanwe ko (700) dó éɖée jí, bɔ yě ná ba ali káká yi Silíi xɔ́sú ɔ́ gɔ́n; lo ɔ́, yě kpé wú ǎ. Énɛ́ ɔ́, é hu vǐ tɔn súnnu nukɔntɔn e ɖó ná nɔ do tɔn mɛ ɔ́ dó sá vɔ̌ ɖo toxo ɔ́ sín ahohó jí. Ée Izlayɛ́li ví lɛ́ɛ mɔ mɔ̌ ɔ́, xɛsi jɛ yě jí, bɔ yě hɔn jó Mɔwabu xɔ́sú ɔ́ dó, bó lɛ́ kɔ yi to yětɔn mɛ. Gbeyíɖɔ e nɔ gbeyíɖɔ Mawu tɔn lɛ́ɛ gbɛ́ta ɔ́ mɛ lɛ́ɛ ɖokpó sín asúkúsi wá mɔ Elizée gbe ɖokpó, bó sa vo n'i ɖɔ ní wá hwlɛ́n émí. É ɖɔ n'i ɖɔ: “Gǎn, asú ce kú. A ka tunwun ɖɔ é nɔ ɖó sísí nú Mawu Mavɔmavɔ. Axɔ́tɔ́nɔ ka wá din bo jló ná kplá vǐ ce we lɛ́ɛ, bó ná sɔ́ yě dó ɖó kannumɔ ná.” Elizée kanbyɔ́ ɛ ɖɔ: “Étɛ́ un ká sixú bló nú we? Đɔ nǔ e a ɖǒ ɖo xwé gbe ɔ́ nú mì.” É yí gbe n'i ɖɔ: “Un sɔ́ ɖó nǔɖé ɖo xwé gbe zɛ ami kpɛ e un ná sa bɔ é ná vɔ é wú ǎ.” Ée é ɖɔ mɔ̌ ɔ́, Elizée ɖɔ n'i ɖɔ: “Yi ba zɛ̌n hwé ɖo mɛ e ɖo xwé towe kpá lɛ́ɛ sí. Hwě zɛ̌n nabí e wú a kpé é. Ényí a yi xwé gbe ɔ́, a nǎ kplá vǐ towe lɛ́ɛ, bɔ mi ná dɔn hɔn sú dó ta. Énɛ́ ɔ́, a nǎ kɔn ami e kpo ɖo así towe ɔ́ dó zɛ̌n lɛ́ɛ bǐ mɛ, bɔ ɖě gɔ́ ɔ́, a nǎ nɔ sɔ́ ɖó kɛ́n ɖokpó.” Nyɔ̌nu ɔ́ yi hwé zɛ̌n lɛ́ɛ bó wá xwé gbe, bɔ é kpó vǐ tɔn lɛ́ɛ kpó sú hɔn dó ta. Vǐ tɔn lɛ́ɛ jɛ zɛ̌n lɛ́ɛ fɔ n'i jí, bɔ é jɛ ami ɔ́ kɔn d'é mɛ jí. Zɛ̌n lɛ́ɛ bǐ kó gɔ́, é ka tunwun ǎ, bó ɖɔ nú vǐ tɔn lɛ́ɛ ɖokpó ɖɔ ní lɛ́ sɔ́ zɛ̌n ɖěvo nú émí, bɔ vǐ ɔ́ yí gbe n'i ɖɔ zɛ̌n ɖě kún sɔ́ kpo ó. Ée vǐ ɔ́ ɖɔ mɔ̌ ɔ́, ami ɔ́ gbo. Nyɔ̌nu ɔ́ yi ɖó gbe nú ɖɛ̌mɛnu Mawu tɔn ɔ́, bɔ é ɖɔ n'i ɖɔ: “Yi sa ami ɔ́, bó sú axɔ́ e a ɖu ɔ́, bó sɔ́ akwɛ́ e kpo ɔ́, bónú hwi kpó vǐ towe lɛ́ɛ kpó ná zán, bó ná nɔ gbɛ.” Gbe ɖokpó tíin, bɔ Elizée ɖo Cunɛ́mu gbɔn dín wɛ, bó mɔ nyɔ̌nu nukúnɖéjí ɖokpó. Nyɔ̌nu ɔ́ ɖɔ n'i ɖɔ ní wá ɖu nǔ ɖo xwé émítɔn gbe dandan. Énɛ́ ɔ́ wú ɔ́, sín gbe nɛ́ gbe ɔ́, é wá toxo ɔ́ mɛ hweɖěbǔnu ɔ́, é nɔ yi nyɔ̌nu ɔ́ xwé, bó nɔ yi ɖu nǔ. É wá su gbe ɖokpó, bɔ nyɔ̌nu ɔ́ ɖɔ nú asú tɔn ɖɔ: “Un tunwun ɖɔ nya e nɔ wá xwé mǐtɔn gbe hwɛhwɛ ɔ́, ɖɛ̌mɛnu Mawu tɔn wɛ é nyí nǔgbó. Mǐ ní gbá xɔ kpɛví ɖokpó ɖó xɔ mǐtɔn ta n'i. Mǐ ná sɔ́ zan ɖokpó, távo ɖokpó, zinkpo ɖokpó, kpódó zogbɛ́n ɖokpó kpó dó xɔ ɔ́ mɛ n'i. Énɛ́ ɔ́, é wá mǐ gɔ́n ɔ́, é ná nɔ́ nɔ fínɛ́.” Elizée lɛ́ wá Cunɛ́mu gbe ɖokpó, bó yi mlɔ́ xɔ e è blǒ n'i ɔ́ mɛ. É ɖɔ nú mɛsɛntɔ́ tɔn Gehazíi ɖɔ: “Yi ylɔ́ nyɔ̌nu Cunɛ́munu énɛ́ ɔ́ wá nú mì.” Bɔ Gehazíi yi ylɔ́ nyɔ̌nu ɔ́ wá, bɔ nyɔ̌nu ɔ́ wá nɔ te ɖo nukɔn tɔn. Elizée ɖɔ nú Gehazíi ɖɔ é ní ɖɔ nú nyɔ̌nu ɔ́ ɖɔ: “Hwi ɖíe jɛ tagba dó mǐ tamɛ káká e! Étɛ́ wɛ un ká sixú wa nú we? A jlǒ nú má yi ɖɔ xó towe nú axɔ́sú ɔ́ abǐ ahwangán ɔ́ a?” É yí gbe ɖɔ: “Éeǒ, mi ma jɛ tagba ó, mɛ ce lɛ́ɛ mɛ wɛ un ɖe, un jɛ nǔɖé do ǎ.” Bɔ Elizée ɖɔ nú Gehazíi ɖɔ: “Étɛ́ mǐ ká ná wa n'i din?” Gehazíi yí gbe n'i ɖɔ: “Á! Un ko tunwun nǔ e mǐ nǎ wa n'i é. É ɖó vǐ ǎ, asú tɔn ká kó kpo.” Énɛ́ ɔ́, Elizée ɖɔ: “Bo lɛ́ yi ylɔ́ ɛ wá.” Bɔ Gehazíi yi ylɔ́ ɛ wá, bɔ nyɔ̌nu ɔ́ wá nɔ te hɔnli ɔ́ nu. Énɛ́ ɔ́, Elizée ɖɔ n'i ɖɔ: “Xwe ɖě ɔ́ mɛ lěhwenu ɔ́, a nǎ ji vǐ súnnu ɖokpó.” Bɔ nyɔ̌nu ɔ́ ɖɔ n'i ɖɔ: “Nǔ sixú nyí mɔ̌ ǎ! Gbeyíɖɔ Mawu tɔn wɛ nú we, ma blɛ́ nyɛ mɛsɛntɔ́ towe ɔ́ ó.” Nyɔ̌nu ɔ́ ká mɔ xo nǔgbó, bó ji vǐ súnnu ɖokpó ɖo hwenu e Elizée ɖó n'i é. Vǐ e nyɔ̌nu Cunɛ́munu ɔ́ ji ɔ́ ɖo susu wɛ. É ká wá su gbe ɖokpó, bɔ é yi tɔ́ tɔn gɔ́n ɖo gle mɛ fí e tɔ́ tɔn kpó azɔ̌watɔ́ lɛ́ɛ kpó ɖo nǔkún ya ɖe wɛ é. Ée yě ɖo fínɛ́ ɔ́, é sú xó, bó jɛ ɖiɖɔ nú tɔ́ tɔn jí ɖɔ: “Ta ce! Ta ce!” Bɔ tɔ́ tɔn ɖɔ nú mɛsɛntɔ́ tɔn ɖokpó ɖɔ: “Sɔ́ ɛ yi jó nú nɔ tɔn.” Mɛsɛntɔ́ ɔ́ sɔ́ ɛ yi jó nú nɔ tɔn, bɔ vǐ ɔ́ nɔ nɔ tɔn sín akɔn káká jɛ hwemɛ bo kú. Ée vǐ ɔ́ kú é ɔ́, nɔ ɔ́ sɔ́ ɛ yi mlɔ́ Elizée sín zan jí, bó sú hɔn ɔ́, bó yi gle ɔ́ mɛ, bó sú xó ylɔ́ asú tɔn, bó ɖɔ n'i ɖɔ: “Kɛnklɛ́n sɛ́ mɛsɛntɔ́ ɖokpó kpó tócí asi ɖokpó kpó dó mì, bónú má yá wǔ yi gbeyíɖɔ Mawu tɔn ɔ́ gɔ́n bó wá.” Bɔ asú tɔn ɖɔ n'i ɖɔ: “Étɛ́wú a jlǒ ná yi gɔ̌n tɔn égbé? Sun ma wá jǐ nɛ́, égbé ma ká nyí gbɔjɛzán gbe nɛ́!” Nyɔ̌nu ɔ́ yí gbe n'i ɖɔ: “Nǔɖé jɛ ǎ.” Énɛ́ ɔ́, nyɔ̌nu ɔ́ ɖɔ bɔ è blǎ akpa nú tócí ɔ́, bɔ é jínjɔ́n jí, bó ɖɔ nú mɛsɛntɔ́ tɔn ɖɔ: “Kplá tócí ɔ́ nú mǐ ná yi. Ényí un ma ná gbe tɔn we ǎ hǔn, ma nɔ te alixo ó.” Énɛ́ ɔ́, é ɖidó gbeyíɖɔ Mawu tɔn ɔ́ gɔ́n ɖo Kaamɛ́li só jí. Hwenu e gbeyíɖɔ ɔ́ mɔ ɛ sɛ́ dó jǎwe ɔ́, é ɖɔ nú mɛsɛntɔ́ tɔn Gehazíi ɖɔ: “Kpɔ́n nyɔ̌nu Cunɛ́munu ɔ́! Kán wezun yi kpé e, bó kanbyɔ́ ɛ ɖɔ é má ɖo ganjí a jí; asú tɔn kpó vǐ tɔn kpó má ɖo ganjí a jí.” Ée Gehazíi yi kan xó byɔ́ nyɔ̌nu ɔ́, é yí gbe n'i ɖɔ yě bǐ ɖo ganjí. Ée é wá gbeyíɖɔ Mawu tɔn ɔ́ gɔ́n ɖo só jí ɔ́, é zunfán afɔ tɔn, bɔ Gehazíi sɛkpɔ́ ɛ, bó jló ná sísɛ́ ɛ. Lo ɔ́, gbeyíɖɔ Mawu tɔn ɔ́ ɖɔ: “Jǒ e dó, ɖó aluwɛ mɛ wɛ é ɖe. Mawu Mavɔmavɔ ká sɔ́ nǔ e sín aluwɛ mɛ é ɖe ɔ́ hwlá dó mì. É gba kpá nú mì ǎ.” Nyɔ̌nu ɔ́ ɖɔ: “Un byɔ́ vǐ ɖé we a? Un ma ko ɖɔ nú we ɖɔ hwi ma blɛ́ mì ó a?” Ée é ɖɔ mɔ̌ ɔ́, Elizée ɖɔ nú Gehazíi ɖɔ: “Sɔ́ nǔ, bó sɔ́ kpogɛ ce bo yi. Ma gú hwenu bo ɖo gbe dó mɛɖé wɛ ɖo alixo ó; mɛɖé ká dó gbe we hǔn, ma kɛ nu ó. A jɛ dɔ̌n hǔn, sɔ́ kpogɛ ɔ́ ɖó nukún mɛ nú vǐ ɔ́.” Vǐ ɔ́ sín nɔ xwlé Mawu ɖɔ: “Nú Mawu Mavɔmavɔ ɖo gbɛ, nú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, Elizée gbɔ bo sí te, bo xwedó e. Nǔ ɖo mɔ̌ có, Gehazíi jɛ nukɔn nú yě, bó sɔ́ kpogɛ ɔ́ ɖó nukún mɛ nú vǐ ɔ́; vǐ ɔ́ ká dán wǔ ǎ, é ká kɛ nu ǎ. É lɛ́ kɔ bo wá kpé Elizée, bó ɖɔ n'i ɖɔ: “Vǐ ɔ́ fɔ́n ǎ.” Hwenu e Elizée wá xwé ɔ́ gbe ɔ́, vǐ ɔ́ sín cyɔ ɖo ayǐmlɔ́mlɔ́ ɖo zan tɔn jí. Elizée byɔ́ xɔ ɔ́ mɛ, bó dɔn hɔn ɔ́ sú, bɔ é kpó vǐ kúkú ɔ́ kpó we lɛ́ɛ ɖo xɔ ɔ́ mɛ, bɔ é xo ɖɛ. É xá zan ɔ́ jí, bó mlɔ́ vǐ ɔ́ jí, bó sɔ́ nu tɔn bɔ ɖó nu tɔn wú, bó sɔ́ nukún tɔn lɛ́ɛ bɔ ɖó nukún tɔn lɛ́ɛ wú, bó fɔ alɔ tɔn lɛ́ɛ ɖó vǐ ɔ́ sín alɔ lɛ́ɛ jí, lobo dlɛ́n éɖée ɖó jǐ tɔn, bɔ zozo byɔ́ vǐ ɔ́ sín lanmɛ. Elizée fɔ́n sín vǐ ɔ́ jí, bó ɖi sa gbɔn xɔ ɔ́ mɛ, lobo lɛ́ wá mlɔ́ vǐ ɔ́ jí, bó dlɛ́n éɖée, bɔ vǐ ɔ́ nyi cin azɔn tɛ́nwe bo hun nukún. Tlóló ɔ́, Elizée ylɔ́ Gehazíi bo ɖɔ n'i ɖɔ: “Yi ylɔ́ vǐ ɔ́ sín nɔ wá.” Bɔ Gehazíi yi ylɔ́ ɛ, bɔ é wá Elizée gɔ́n, bɔ Elizée ɖɔ n'i ɖɔ: “Wǎ kplá vǐ towe.” Ée Elizée ɖɔ mɔ̌ n'i ɔ́, é wá jɛ kpo ɖo asá tɔn mɛ, bó ɖe kɔ́. Énɛ́ ɔ́ gúdo ɔ́, é kplá vǐ tɔn bó tɔ́n. Elizée lɛ́ kɔ wá Gilugalu. Adɔ ɖé ká tɔ́n ɖo to ɔ́ mɛ hwenɛ́nu. É kplé gbeyíɖɔ Mawu tɔn lɛ́ɛ bɔ yě lɛ́ lɛ̌ dó e, bɔ é ɖɔ nú mɛsɛntɔ́ tɔn ɖɔ: “Sɔ́ zɛ̌n ɖaxó ɔ́ nyi ado jí, bó ɖa nǔsúnnú nú gbeyíɖɔ Mawu tɔn lɛ́ɛ.” Gbeyíɖɔ Mawu tɔn lɛ́ɛ ɖokpó ɖidó mǎ ba gbé ɖo gle mɛ, bó yi mɔ atín e nɔ́ vun kan é ɖokpó, bó gbɛ sínsɛ́n tɔn gɔ́ avɔ mɛ. Ée é lɛ́ kɔ wá ɔ́, é já, bó bɛ́ kɔn nyi nǔsúnnú ɔ́ mɛ, mɛɖé ká tunwun nǔ e wɛ é ǎ. È wǔn nǔsúnnú ɔ́ nú yě; lo ɔ́, ée yě dó nu ɔ́, yě sú xó bó ɖɔ: “Gbeyíɖɔ Mawu tɔn, nǔsúnnú ɔ́ ɖó aɖǐ.” Énɛ́ ɔ́ zɔ́n bɔ mɛɖé sixú ɖu ǎ. Elizée ɖɔ è nǐ zé linfín wá, bɔ è zě n'i bɔ é kɔn dó zɛ̌n ɔ́ mɛ, bó ɖɔ nú mɛsɛntɔ́ tɔn ɖɔ: “Nǎ mɛ lɛ́ɛ nú yě ɖu.” Énɛ́ ɔ́, nǔsúnnú ɔ́ nyɔ́ bɔ è hɛn ɔ́, è nǎ ɖu. É wá su gbe ɖokpó, bɔ nya ɖé gosín Baalu-Calica wá. Nya ɔ́ hɛn ɔ́ji nukɔntɔn e é ya é sín wɔ̌xúxú ko wá nú gbeyíɖɔ Mawu tɔn ɔ́. É lɛ́ hɛn blěe nukɔntɔn e é ya ɔ́ dó glo tɔn mɛ wá n'i. Elizée ɖɔ nú mɛsɛntɔ́ tɔn ɖɔ: “Mǎ nú mɛ e ɖo fí lɛ́ɛ nú yě ɖu.” Mɛsɛntɔ́ tɔn yí gbe n'i ɖɔ: “Nɛ̌ wɛ un ka sixú má nǔ élɔ́ lɛ́ɛ nú gbɛtɔ́ kanwe ko gbɔn?” Lo ɔ́, Elizée ɖɔ: “Un ɖɔ hwi ní má nú yě nú yě ní ɖu. Đó Mawu Mavɔmavɔ ɖɔ: ‘Mɛ bǐ ná ɖu bɔ é ná lɛ́ kpo.’ ” Énɛ́ ɔ́, mɛsɛntɔ́ ɔ́ má nǔɖuɖu ɔ́ nú yě, bɔ yě ɖu bɔ é kpo nǔgbó, lě e Mawu Mavɔmavɔ ɖɔ gbɔn é. Naamáni wɛ nyí ahwangán Silíi xɔ́sú ɔ́ tɔn. Silíi xɔ́sú ɔ́ nyɔ́ xomɛ dó wǔ tɔn. Gbɛtɔ́ nukúnɖéjí ɖokpó wɛ é nyí ɖo axɔ́sú ɔ́ gɔ́n, ɖó é jí wɛ Mawu Mavɔmavɔ ná ɖuɖéjí Silíinu lɛ́ɛ gbɔn. Amɔ̌, nya ahwanfuntɔ́ syɛ́nsyɛ́n nɛ́ ɔ́, gudunɔ wɛ. Hwenu e sɔ́ja Silíi tɔn lɛ́ɛ fɔ nǔ e ɖo Izlayɛ́li to ɔ́ mɛ lɛ́ɛ bǐ ɔ́, yě mɔ ɖyɔ̌vǐvú ɖé bó wlí kannumɔ tɔn. Ée yě kplá ɛ wá ɔ́, è sɔ́ ɛ ɖó Naamáni sín asi gɔ́n. É wá su gbe ɖokpó, bɔ vǐ ɔ́ ɖɔ nú mɛ e gɔ́n é ɖe ɔ́ ɖɔ: “Áo! Ényí gbeyíɖɔ Mawu tɔn e ɖo Samalíi ɔ́ gɔ́n wɛ gǎn ce yi din ɔ́, é ná gbɔ azɔn e jɛ wɛ é ɖe ɔ́ n'i tlóló.” Ée Naamáni se mɔ̌ ɔ́, é yi ɖɔ nǔ e ɖyɔ̌vǐvú Izlayɛ́linu ɔ́ ɖɔ ɔ́ nú axɔ́sú ɔ́. Ée é ɖɔ mɔ̌ ɔ́, axɔ́sú ɔ́ ɖɔ: “Ényí mɔ̌ wɛ hǔn, bo yi. Un ná wlán wěma ɖokpó dó así nú we, bɔ a nǎ sɔ́ nú Izlayɛ́li xɔ́sú ɔ́.” Ée Naamáni xweyǐgbe ɔ́, é hɛn kpatágan kilóo afɔɖé kanwe ko (300) mɔ̌, bó hɛn siká ɖagbe ɖagbe kilóo kanɖé ko (60) mɔ̌, bó hɛn nǔzínzán ɖagbe ɖagbe wǒ. Ée Naamáni jɛ dɔ̌n ɔ́, é zé wěma ɔ́ jó nú Izlayɛ́li xɔ́sú ɔ́. Wěma ɔ́ ɖo ɖiɖɔ wɛ ɖɔ: “Un wlán wěma élɔ́ dó así nú ahwangán ce Naamáni, bó dó ɖe xlɛ́ we ɖɔ nyi wɛ sɛ́ ɛ dó nú a nǎ gbɔ gudu e jɛ wɛ é ɖe ɔ́ n'i.” Ée Izlayɛ́li xɔ́sú ɔ́ xa wěma ɔ́, é vún awu dó kɔ nú éɖée bó ɖɔ: “Mawu wɛ un nyí bó ɖó acɛ bó ná hu mɛ bo lɛ́ fɔ́n a? Bɔ è wlán wěma sɛ́ dó mì ɖɔ nyɛ ní gbɔ gudu nú mɛ. Mi ma mɔ ganjí ɖɔ nǔ ɖɔ ba mì wɛ é ɖe a?” Ée Elizée gbeyíɖɔ Mavɔmavɔ tɔn ɔ́ se ɖɔ Izlayɛ́li xɔ́sú ɔ́ vún awu dó kɔ nú éɖée ɔ́, é sɛ́ mɛ dó ɖɔ è nǐ yi kanbyɔ́ ɛ ɖɔ: “Étɛ́wú a ka vún awu dó kɔ nú hwiɖée? Ní wá gɔ̌n ce, énɛ́ ɔ́, é ná tunwun ɖɔ gbeyíɖɔ Mawu tɔn ɖokpó ɖo Izlayɛ́li fí.” Énɛ́ ɔ́, Naamáni sɔ́ kɛkɛ́ví tɔn, kpódó sɔ́ tɔn lɛ́ɛ kpó, bó yi nɔ te ɖo Elizée sín hɔntogbó jí. Elizée sɛ́ mɛ dó ɖɔ è nǐ yi ɖɔ n'i ɖɔ: “Yi, bó nylɔ́ hwiɖée dó Judɛ́ɛn tɔ mɛ azɔn tɛ́nwe; énɛ́ ɔ́, gudu towe ná fyɔ́, bɔ a nǎ húzú mɛ mímɛ́.” Ée Naamáni se mɔ̌ ɔ́, xomɛ sin i, bɔ é ɖidó bó ɖɔ: “Nyɛ ɖo linlin wɛ ɖɔ é ná tɔ́n, bó ná wá gɔ̌n ce dandan, bɔ é ɖésú ná ylɔ́ Mawu Mavɔmavɔ, Mawu tɔn sín nyǐkɔ, lobo ná sɔ́ alɔ tɔn gbɔn fí e gudu ɔ́ gbɔn nú mì lɛ́ɛ, bó ná gbɔ azɔn nú mì. Abana tɔ kpó Paapáa tɔ kpó e ɖo Damási lɛ́ɛ má nyɔ́ hú ée ɖo Izlayɛ́li lɛ́ɛ bǐ a? Un hɛn ɔ́, un ná yi nylɔ́ nyɛɖée dó tɔ énɛ́ lɛ́ɛ ɖokpó mɛ, bó húzú mɛ mímɛ́!” Ée é ɖɔ mɔ̌ ɔ́, é lɛ́ kɔ bo ɖidó kpó xomɛsin kpó. Lo ɔ́, mɛsɛntɔ́ tɔn lɛ́ɛ sɛkpɔ́ ɛ, bo ɖɔ n'i ɖɔ: “Gǎn, ényí ɖɔ nǔvɛ́wǔ ɖé wɛ gbeyíɖɔ Mawu tɔn ɔ́ zɔ́n we ɖɔ hwi bló ɔ́, a nǎ bló ǎ cé? Étɛ́wú a ma ka ná bló nǔ e é ɖɔ ɔ́ ǎ? Nylɔ̌ hwiɖée dó tɔ mɛ bo húzú mɛ mímɛ́ bó!” Ée yě ɖɔ mɔ̌ n'i ɔ́, é yi Judɛ́ɛn tɔ ɔ́ nu, bó nylɔ́ éɖée dó tɔ ɔ́ mɛ azɔn tɛ́nwe lě e gbeyíɖɔ Mawu tɔn ɔ́ ɖɔ gbɔn n'i é. Bɔ wǔtu tɔn cí yɔkpɔ́vú sín wǔtu ɖɔhun, bɔ é húzú mɛ mímɛ́. Naamáni lɛ́ kɔ ɖidó gbeyíɖɔ Mawu tɔn ɔ́ gɔ́n tlóló, é kpódó mɛ e xwedó e lɛ́ɛ kpó. Ée é wá ɔ́, é nɔ te nukɔn tɔn bo ɖɔ n'i ɖɔ: “Un mɔ din ɖɔ nǔmɛsɛn ɖě kún sɔ́ ɖo fí ɖěbǔ ɖo ayǐkúngban ɔ́ jí zɛ Mawu Izlayɛ́li tɔn ɔ́ wú ó. Din ɔ́, kɛnklɛ́n bó yí nǔ e nyɛ mɛsɛntɔ́ towe hɛn wá nú we é.” Elizée ka xwlé nǔ n'i ɖɔ: “Mawu Mavɔmavɔ e un nɔ sɛn ɔ́ ɖo gbɛ, un ná yí nǔ ɖěbǔ ǎ.” Naamáni ka ɖɔ yǐ jɛ́n é ná yí dandan, lo ɔ́, é gbɛ́ bǐ gbídígbídí. Bɔ Naamáni ɖɔ: “Ée a gbɛ̌ nǔ e un ná we lɛ́ɛ bǐ ɔ́, bo gbɔ nú è nǐ ná to ɔ́ mɛ sín kɔ́ e tócí we sixú hɛn ɔ́ mì. Đó nyɛ mɛsɛntɔ́ towe sɔ́ jló ná sá vɔ̌ e è nɔ dó zo ɔ́ ɖě, abǐ kɔnɖókpɔ́vɔ́ ɖě nú nǔmɛsɛn ɖěbǔ zɛ Mawu Mavɔmavɔ Izlayɛ́li tɔn wú ǎ. Nǔ ɖokpó e byɔ́ Mawu Mavɔmavɔ wɛ un ɖe ɖɔ é ní sɔ́ kɛ mì ɔ́ ɖíe: ényí gǎn ce Silíi xɔ́sú ɔ́ xwe vodún Hlimumɔ́ni sín xɔ mɛ bo xwe kɔ́ ɖe gbé ɔ́, awa ce wɛ é nɔ́ hɛn, bó nɔ́ jɛ kpo. Hǔn nyi lɔmɔ̌ ɖó ná jɛ kpo. Ényí un bló mɔ̌ hǔn, Mawu Mavɔmavɔ ní kɛnklɛ́n sɔ́ kɛ mì.” Ée é ɖɔ mɔ̌ ɔ́, Elizée ɖɔ n'i ɖɔ: “Yi xwé, ado ma hu we ó.” Bɔ é ɖidó. Ée Naamáni gosín Elizée gɔ́n ɔ́, é ko yi zɔ fí ɖé ǎ, bɔ Gehazíi, mɛsɛntɔ́ Elizée tɔn ɖɔ dó ayi mɛ ɖɔ: “Gǎn ce ɖíe gbɔ azɔn nú Naamáni Silíinu énɛ́ ɔ́, bó ká gbɛ́ nǔ e é hɛn wá n'i ɔ́ bǐ e. Un xwlé Mawu ɖɔ Mawu Mavɔmavɔ ɖo gbɛ, un ná kán wezun xwedó e, bó ná yí nǔ lɛ́ɛ ɖě.” Énɛ́ ɔ́, Gehazíi kán wezun jɛ Naamáni gúdo. Ée Naamáni mɔ ɛ ɖo wezun jí jǎwe ɔ́, é jɛ te sín kɛkɛ́ví tɔn mɛ, bó yi kpé e bó ɖɔ: “Nǔɖé jɛ wɛ a?” Bɔ Gehazíi yí gbe n'i ɖɔ: “Nǔɖé jɛ ǎ. Gǎn ce wɛ sɛ́ mì dó ɖɔ nyɛ ní ɖɔ nú we ɖɔ gbeyíɖɔ dɔ̌nkpɛvú we ɖé lɛ́ɛ gosín Eflayímu só ta wá émí gɔ́n. Hwi ní kɛnklɛ́n sɛ́ kpatágan kilóo gban (30) kpó nǔzínzán ɖagbe ɖagbe we kpó dó yě.” Ée é ɖɔ mɔ̌ ɔ́, Naamáni ɖɔ: “A yǐ kpatágan kilóo kanɖé ko (60) ɔ́, é ná nyɔ́ hú.” É ɖɔ kilóo kanɖé ko (60) jɛ́n é ná yí dandan, bó blá kpatágan kilóo kanɖé ko (60) ɔ́ n'i dó glo we mɛ, bó fɔ awu ɖagbe ɖagbe we d'é jí, bó dó agban tɔn nú mɛsɛntɔ́ tɔn we, bɔ yě hɛn, bó jɛ Gehazíi nukɔn. Ée yě jɛ Ofɛ́lu ɔ́, Gehazíi yí nǔ lɛ́ɛ, bó bɛ́ yi ɖó xwé gbe, bó nyi mɛ lɛ́ɛ bɔ yě yi. Énɛ́ ɔ́ gúdo ɔ́, é yi gǎn tɔn gɔ́n, bɔ gǎn tɔn ɖɔ: “Gehazíi, fítɛ́ a gosín?” É yí gbe n'i ɖɔ: “Gǎn, un ma yi fí ɖé nɛ́.” Lo ɔ́, Elizée ɖɔ n'i ɖɔ: “Hwenu e nya ɔ́ gosín kɛkɛ́ví tɔn mɛ, bó wá kpé we ɔ́, un tunwun ǎ wɛ a vɛdó a? Hwenu e a nǎ yí kpatágan, bó yí awu, bo yí olívugbo, bó yí vǐwungbo, bó yí lɛ̌ngbɔ́, bó yí nyibú, bó yí mɛsɛntɔ́ súnnu kpó nyɔ̌nu kpó ɔ́, hwe ɔ́ nu ɖíe ǎ. Énɛ́ ɔ́ wú ɔ́, hwi kpódó vǐ towe lɛ́ɛ kpó ná bɛ́ gudu e Naamáni jɛ ɔ́, bɔ é ná nɔ mi wú káká yi.” Ée Elizée ɖɔ mɔ̌ ɔ́, gudu kpé Gehazíi wú, bɔ wǔtu tɔn bǐ wé kɛ́njí ɖɔhun, bɔ é ɖidó. É su gbe ɖokpó, bɔ gbeyíɖɔ Mawu tɔn lɛ́ɛ ɖɔ nú gǎn yětɔn Elizée ɖɔ: “Xɔ élɔ́ e mɛ mǐ kpó hwi kpó ɖe ɔ́ hwedó mǐ dín. Nǎ gbe mǐ, nú mǐ nǎ yi káká Judɛ́ɛn tɔ ɔ́ tó, bónú mǐ mɛ ɖokpó ɖokpó ná gbo atín kloklo ɖokpó ɖokpó, bó ná dó gbá xɔ ɖokpó ɖó fínɛ́.” Elizée ka ɖɔ nú yě ɖɔ: “Mi bo yi.” Mɛ ɖokpó ká ɖo yě mɛ bó ɖɔ: “Gǎn, a ma ná kɛnklɛ́n xwedó mǐ yi a?” É yí gbe nú yě ɖɔ: “É nyɔ́.” Nǔgbó ɔ́, é xwedó yě bɔ yě yi. Ée yě wá Judɛ́ɛn tɔ ɔ́ tó ɔ́, yě gbo atín. Mɛ ɖokpó ká ɖo yě mɛ, bɔ hwenu e é ɖo atín ɔ́ gbo wɛ ɔ́, asyɔ́ví ɔ́ sún jɛ tɔ mɛ. Bɔ é sú xó bó ɖɔ: “Yéége gǎn ce! Asyɔ́ví ɔ́, hwě wɛ mǐ hwé mɛ!” Elizée ɖɔ: “Fítɛ́ é jɛ?” Ée é kan mɔ̌ byɔ́ ɛ ɔ́, é xlɛ́ ɛ fí e é jɛ ɔ́. Énɛ́ ɔ́, Elizée sɛ́n kpo ɖokpó, bó sɔ́ nyi fí ɔ́, bɔ asyɔ́ví ɔ́ wá tɔ nukún mɛ tlóló, bɔ é ɖɔ: “Bo sɔ́!” Bɔ nya ɔ́ dlɛ́n alɔ kpowun bo sɔ́. Hwenu e Silíi xɔ́sú ɔ́ nɔ́ ɖo ahwan fun xá Izlayɛ́li wɛ ɔ́, é kan fí e ahwangɔnu tɔn ná ɖó gɔnu ɖó ɔ́ byɔ́ ahwangán tɔn lɛ́ɛ bó sɔ́ fí e yě ɖɔ n'i é. Lo ɔ́, Elizée ɖɔ sɛ́ dó axɔ́sú Izlayɛ́li tɔn ɔ́ ɖɔ é ní cɔ́ éɖée, bó má yi tɛn ɔ́ mɛ ó, ɖó sɔ́ja Silíi tɔn lɛ́ɛ ɖo dɔ̌n. Ée Izlayɛ́li xɔ́sú ɔ́ se mɔ̌ ɔ́, é sɛ́ mɛ dó nú yě ná yi cɔ́ fí e xó gbeyíɖɔ Mawu tɔn ɔ́ ɖɔ é. Azɔn nabí ɖé wɛ Elizée sɛ́ mɛ dó Izlayɛ́li xɔ́sú ɔ́ gɔ́n, bɔ é ná sɔ́ nǔ ɖ'ayǐ. Axɔ́sú Silíi tɔn sín ayi gba dó, bɔ é ylɔ́ azaglɔ́gán tɔn lɛ́ɛ, bó ɖɔ nú yě ɖɔ: “Mɛ̌ ká ɖo mǐ mɛ, bó ɖo axɔ́sú Izlayɛ́li tɔn jí tawun?” Azaglɔ́gán tɔn lɛ́ɛ ɖokpó yí gbe n'i ɖɔ: “Sɛ́mɛɖó, mɛ ɖěbǔ ɖo mǐ mɛ bó ɖo jǐ tɔn ǎ. Elizée gbeyíɖɔ Mawu tɔn e ɖo Izlayɛ́li ɔ́ wɛ nɔ wlí nǔ e a nɔ ɖɔ ɖo xɔ glɔ́ ɔ́ bǐ ɖɔ nú Izlayɛ́li xɔ́sú ɔ́.” Énɛ́ ɔ́, axɔ́sú ɔ́ ɖɔ: “Mi yi kpɔ́n fí e é ɖe ɔ́, nú ma sɛ́ mɛ dó nú è nǎ yi wlí i.” È yi kpɔ́n, bó wá ɖɔ nú axɔ́sú ɔ́ ɖɔ é ɖo Dotáni toxo mɛ. Nǔgbó ɔ́, Silíi xɔ́sú ɔ́ sɛ́ sɔ́, kɛkɛ́ví kpó, kpódó sɔ́ja gěgé kpó dó, bɔ yě wá xá Dotáni zǎn mɛ. Elizée sín mɛsɛntɔ́ fɔ́n ayǐtéhɔ̌nnu, bó tɔ́n, bó mɔ sɔ́ja lɛ́ɛ kpódó kɛkɛ́ví lɛ́ɛ kpó xá toxo ɔ́. Ée é mɔ mɔ̌ ɔ́, é ɖɔ nú gǎn tɔn Elizée ɖɔ: “Yéége! Gǎn, nɛ̌ mǐ ká ná bló gbɔn?” Bɔ é yí gbe n'i ɖɔ: “Ma ɖi xɛsi ó, ɖó mɛ e ɖo kpɔ́ xá mǐ lɛ́ɛ sukpɔ́ hú mɛ e ɖo kpɔ́ xá yě lɛ́ɛ.” Énɛ́ ɔ́ gúdo ɔ́, Elizée xo ɖɛ bo ɖɔ: “Mawu Mavɔmavɔ, kɛnklɛ́n hun nukún n'i, bónú é ná sixú mɔ nǔ.” Ée é ɖɔ mɔ̌ ɔ́, Mawu Mavɔmavɔ hun nukún nú mɛsɛntɔ́ ɔ́, bɔ é mɔ sɔ́ kpó kɛkɛ́ví myɔnɔ kpó kpé só ɔ́ jí bǐ lɛ́ lɛ̌ dó Elizée. Hwenɛ́nu ɔ́, sɔ́ja Silíi tɔn lɛ́ɛ ɖidó Elizée gɔ́n. Énɛ́ ɔ́, Elizée xo ɖɛ bo ɖɔ: “Mawu Mavɔmavɔ, kɛnklɛ́n va nukún sɔ́ja élɔ́ lɛ́ɛ.” Bɔ Mawu Mavɔmavɔ va nukún yě lě e Elizée byɔ́ gbɔn é. Énɛ́ ɔ́ gúdo ɔ́, Elizée ɖɔ nú yě ɖɔ: “Ali ɔ́ ɖíe ǎ. Toxo ɔ́ ɖíe ǎ. Mi xwedó mì nú má kplá mi yi nya e ba wɛ mi ɖe ɔ́ gɔ́n.” Bɔ Elizée kplá yě yi Samalíi toxo mɛ. Ée yě byɔ́ Samalíi toxo ɔ́ mɛ ɔ́, Elizée lɛ́ xo ɖɛ bo ɖɔ: “Mawu Mavɔmavɔ, hun nukún nú mɛ élɔ́ lɛ́ɛ nú yě ná mɔ nǔ.” Ée Mawu Mavɔmavɔ hun nukún nú yě ɔ́, yě mɔ ɖɔ Samalíi toxo tɛ́ntin wɛ émí ɖe. Ée axɔ́sú Izlayɛ́li tɔn mɔ yě ɔ́, é kanbyɔ́ Elizée ɖɔ: “Gǎn, má hu yě a?” Bɔ Elizée yí gbe n'i ɖɔ: “Ma hu yě ó. Sɔ́ja e a nɔ wlí ɖo ahwangbénu lɛ́ɛ ɔ́, hu wɛ a nɔ hu yě a? Nǎ nǔɖuɖu yě, bó ná sin yě, bó lɛ́ kɔ nú yě yi gǎn yětɔn gɔ́n.” Axɔ́sú Izlayɛ́li tɔn ylɔ́ agɔ̌ nú yě, bɔ yě ɖu nǔ bó nu ahan. Énɛ́ ɔ́ gúdo ɔ́, é jó yě dó bɔ yě lɛ́ kɔ yi axɔ́sú yětɔn gɔ́n ɖo Silíi. Bɛ́ sín gbe nɛ́ gbe ɔ́, sɔ́ja Silíi tɔn lɛ́ɛ sɔ́ lɛ́ kɔ wá Izlayɛ́li yíkúngban jí ǎ. É wá su hwe ɖěvo nu, bɔ axɔ́sú Silíi tɔn Bɛni-Hadadi kplé sɔ́ja tɔn lɛ́ɛ bǐ, bɔ yě yi xá Samalíi toxo ɔ́. Mɛ e yi to ɔ́ mɛ lɛ́ɛ sú ali dó nǔ bǐ, bɔ adɔ ɖaxó ɖé wá tɔ́n ɖo Samalíi, káká bɔ tócí sín ta yǎyá nɔ xɔ kpatágankwɛ́ kanwe (80), bɔ ahwannɛ́mí gannú vlɔ́ nɔ xɔ kpatágankwɛ́ atɔ́ɔ́n. É wá su gbe ɖokpó bɔ Izlayɛ́li xɔ́sú ɔ́ ɖo ahohó dó ɔ́ jí gbɔn wɛ; nyɔ̌nu ɖé sú xó bó ɖɔ n'i ɖɔ: “Áo! Sɛ́mɛɖó, hwlɛ̌n mì!” Ée nyɔ̌nu ɔ́ ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Ényí Mawu Mavɔmavɔ má hwlɛ́n we gán ǎ ɔ́, étɛ́ nyɛ ka ná zé dó hwlɛ́n we gán ná? Blěe ɖě sɔ́ kpo ǎ, vɛ̌ɛn ɖě sɔ́ kpo ǎ.” Axɔ́sú ɔ́ kanbyɔ́ ɛ ɖɔ: “Nɛ̌ ká gbɔn nú we?” É yí gbe nú axɔ́sú ɔ́ ɖɔ: “Kpɔ́n nyɔ̌nu élɔ́! É ɖɔ nú mì ɖɔ nyɛ ní sɔ́ vǐ nyɛtɔn wá nú mǐ ná ɖa ɖu égbé, bónú é su sɔ ɔ́, mǐ ná ɖu émítɔn. Ée é ɖɔ mɔ̌ ɔ́, mǐ sɔ́ vǐ nyɛtɔn bó ɖa ɖu. Ayǐhɔ́ngbe tɔn ɔ́, un ɖɔ n'i ɖɔ é ní sɔ́ vǐ éyɛ́ tɔn wá bónú mǐ ná ɖa ɖu, bɔ é ká sɔ́ vǐ éyɛ́ tɔn hwlá.” Ée axɔ́sú ɔ́ se xó e nyɔ̌nu ɔ́ ɖɔ lɛ́ɛ ɔ́, é vún awu dó kɔ nú éɖée; ahohó ɔ́ jí gbɔn wɛ é ka ɖe hwenɛ́nu, bɔ togun ɔ́ bǐ mɔ ɖɔ ati wɛ é dó ɖó do. Axɔ́sú ɔ́ ɖɔ: “Ényí Elizée Cafáti ví ɔ́ sín ta nɔ kɔ tɔn nu égbé hǔn, Mawu ní dɔn tó e syɛ́n hú tódɔnnúmɛ lɛ́ɛ bǐ é nú mì.” Hwenɛ́nu ɔ́, Elizée ɖo ayǐjínjɔ́n ɖo xwé tɔn gbe, bɔ tomɛxó lɛ́ɛ jínjɔ́n akpá tɔn. Axɔ́sú ɔ́ sɛ́ mɛ dó e. Lo ɔ́, cóbónú mɛ e axɔ́sú ɔ́ sɛ́ dó ɔ́ ná wá ɔ́, Elizée ɖɔ nú tomɛxó lɛ́ɛ ɖɔ: “Mi mɔ nǔ a? Nǔ mɛhutɔ́ nɛ́ ɔ́ sɛ́ mɛ dó ɖɔ è nǐ wá ɖe ta sín kɔ nu nú mì á! Mi ɖótó mì: ényí nya ɔ́ wá hǔn, mi sú hɔn ɔ́, bó má lɔn nú é byɔ́ xwé ɔ́ gbe ó. È ko ɖo gǎn tɔn e sɛ́ ɛ dó ɔ́ sín afɔgbe se ɖo gǔdo tɔn jǎwe wɛ lɔ.” Elizée kpo ɖo xó ɖɔ xá yě wɛ, bɔ axɔ́sú ɔ́ wá, bó ɖɔ n'i ɖɔ: “Mawu Mavɔmavɔ gɔ́n wɛ awě élɔ́ bǐ gosín, bó wá ɖo mɛ xo wɛ. Étɛ́ wɛ un ka sixú lɛ́ ɖó nukún ɖo gɔ̌n tɔn?” Elizée yí gbe ɖɔ: “Mi ɖótó xó e Mawu Mavɔmavɔ ɖɔ é! É ɖɔ: ‘Sɔ lěhwenu ɔ́, linfín kilóo wěwe ná jɛ kpatágankwɛ́ ɖokpó, bɔ ɔ́ji kilóo ko-nukún-ɛnɛ ná jɛ kpatágankwɛ́ ɖokpó ɖo Samalíi xi mɛ.’ ” Ée é ɖɔ mɔ̌ ɔ́, ahwangán e nɔ kplá axɔ́sú ɔ́ ɖɔ nú gbeyíɖɔ Mawu tɔn ɔ́ ɖɔ: “Ényí Mawu Mavɔmavɔ na bo tɔ́n ali dó jǐnukúnsin, bó sɛ́ jinukún dó gbɔn fínɛ́ ɔ́, nǔ e a ɖɔ din ɔ́ ná sixú jɛ wɛ a?” Elizée yí gbe n'i ɖɔ: “A nǎ mɔ kpó nukún towe kpó, lo ɔ́, ɖě ɖo nu towe ná jɛ wɛ ǎ.” Gudunɔ ɛnɛ ɖé lɛ́ɛ ká ɖo toxo ɔ́ sín hɔntogbó jí, bó ɖɔ nú yěɖée ɖɔ: “Anǐwo! Mǐ ná nɔ fí káká bó kú wɛ a? Ényí mǐ ɖɔ mǐ ná byɔ́ toxo ɔ́ mɛ din ɔ́, mǐ ná kú adɔ, ɖó adɔ tɔ́n ɖo toxo ɔ́ mɛ. Ényí mǐ ká lɛ́ nɔ fí ɔ́, mǐ ná lɛ́ kú. Mi gbɔ bo wá mǐ ní yi fí e ahwangɔnu Silíi tɔn lɛ́ɛ ɖó gɔnu ɖó é, bó ná sɔ́ mǐɖée jó nú yě. Ényí yě jó mǐ dó nyi gbɛ hǔn, é jɛ́n nɛ́. Yě ká hu mǐ hǔn, é jɛ́n lɛ́ nɛ́, mǐ ná kú bɔ xó ná fó.” Nǔgbó ɔ́, yě sɔ́ nǔ zǎn ɖo bibɔ wɛ, bó ɖidó fí e ahwangɔnu Silíi tɔn lɛ́ɛ ɖó gɔnu ɖó é. Yě sɛkpɔ́ fí ɔ́, yě ká mɔ mɛ ɖěbǔ ǎ. Cóbónú yě ná wá fí e ahwangɔnu Silíi tɔn lɛ́ɛ ɖó gɔnu ɖó ɔ́, sɔ́ja Silíi tɔn lɛ́ɛ kó se zǐngídi ɖé, bɔ é cí ahwangɔnu ɖaxó ɖé wɛ hɛn sɔ́ kpódó kɛkɛ́ví kpó jǎwe ɖɔhun. Mawu Mavɔmavɔ wɛ ka sɛ́ zǐngídi énɛ́ ɔ́ dó, bɔ Silíinu lɛ́ɛ ɖɔ ɖo yěɖée tɛ́ntin ɖɔ: “Mi mɔ axɔ́sú Izlayɛ́li tɔn dó ajɔ axɔ́sú Hitíti tɔn lɛ́ɛ kpódó Ejípu tɔn lɛ́ɛ kpó, bɔ ahwangɔnu yětɔn lɛ́ɛ wá tɔ́n ahwan mǐ din a?” Énɛ́ ɔ́ wú wɛ, ée zǎn ɖo bibɔ wɛ ɔ́, yě hɔn jó goxɔ yětɔn lɛ́ɛ, sɔ́ yětɔn lɛ́ɛ kpó tócí yětɔn lɛ́ɛ kpó dó, lobo jó tɛn e mɛ yě ɖó gɔnu ɖó ɔ́ dó nyi lě e é ɖe gbɔn é, bó hwlɛ́n ta yětɔn. Ée gudunɔ lɛ́ɛ wá fí e sɔ́ja Silíi tɔn lɛ́ɛ ɖó gɔnu ɖó ɔ́, yě byɔ́ goxɔ lɛ́ɛ ɖokpó mɛ, bó ɖu nǔ, bó nu ahan, lobo bɛ́ kpatágan, siká kpó awu kpó yi hwlá. Yě lɛ́ lɛ́ kɔ wá, bó byɔ́ goxɔ ɖěvo mɛ, lobo lɛ́ bɛ́ nǔ ɖěvo ɖěvo sɔ́ yi hwlá. Ée yě bló mɔ̌ gúdo ɔ́, yě ɖɔ ɖo yěɖée tɛ́ntin ɖɔ: “Nǔ e wa wɛ mǐ ɖe ɔ́ nyɔ́ ǎ. Azǎn égbé tɔn ɔ́, wɛn ɖagbe sín azǎn ɖé wɛ. Nú mǐ tin, lobo nɔ te káká nú ayǐ hɔ́n ɔ́, è nǎ dɔn tó nú mǐ. Mi bo wá nú mǐ ná yi ɖɔ xó ɔ́ ɖo hɔnmɛ.” Ée yě ɖɔ mɔ̌ ɔ́, yě lɛ́ kɔ wá toxo ɔ́ mɛ, bó ylɔ́ sɔ́ja e ɖo toxo ɔ́ sín hɔntogbó cɔ́ wɛ lɛ́ɛ, bó ɖɔ nú yě ɖɔ: “Mǐ yi fí e sɔ́ja Silíi tɔn lɛ́ɛ ɖó gɔnu ɖó é, mǐ ká sɔ́ mɔ mɛɖé ɖo fínɛ́ ǎ, mǐ ká sɔ́ se mɛɖé sín gbe ǎ. Sɔ́ lɛ́ɛ kpó tócí lɛ́ɛ kpó jɛ́n mǐ mɔ ɖo kanmɛ, bó mɔ goxɔ lɛ́ɛ bǐ ɖo te.” Sɔ́ja e ɖo toxo ɔ́ sín hɔntogbó cɔ́ wɛ lɛ́ɛ ylɔ́ mɛ ɖokpó tlóló, bó ɖɔ xó ɔ́ sɛ́ dó hɔnmɛ. Ée Axɔ́sú ɔ́ se mɔ̌ ɔ́, é sí te zǎn ɔ́ mɛ, bó ɖɔ nú azaglɔ́gán tɔn lɛ́ɛ ɖɔ: “Un jló ná ɖɔ wě e ɖe dó mǐ wú wɛ Silíinu lɛ́ɛ ɖe ɔ́ nú mi. Ée yě tunwun ɖɔ mǐ ɖo xovɛ́ ɔ́, yě gosín fí e yě ɖó gɔnu ɖó ɔ́, bó yi hɔn hwlá dó gle lɛ́ɛ mɛ, bó ɖo ɖiɖɔ nú yěɖée wɛ ɖɔ: ‘Hwenu e yě ná tɔ́n sín toxo ɔ́ mɛ ɔ́, mǐ ná wlí yě gbɛɖe gbɛɖe, bó ná byɔ́ toxo ɔ́ mɛ.’ ” Axɔ́sú ɔ́ sín azaglɔ́gán ɖokpó yí gbe bo ɖɔ: “Mi wá mǐ nǐ fɔ sɔ́ e kpo ɖo gbɛ lɛ́ɛ atɔ́ɔ́n, bó ná sɛ́ mɛ dó, nú yě ná yi kpɔ́n nǔ e ɖo jijɛ wɛ ɖo dɔ̌n é. È na bo gɔn mɔ̌ bló ɔ́, nǎ kú wɛ jɛ́n yě ɖe Izlayɛ́linu tobutóbú e kú lɛ́ɛ ɖɔhun.” Énɛ́ ɔ́, è sin kɛkɛ́ví we dó sɔ́ wú, bɔ axɔ́sú ɔ́ sɛ́ mɛ dó sɔ́ja Silíi tɔn lɛ́ɛ gbé mɛ, bó ɖɔ yě ní yi kpɔ́n nǔ e ɖo jijɛ wɛ é. Mɛ e axɔ́sú ɔ́ sɛ́ dó lɛ́ɛ xwedó Silíinu lɛ́ɛ sín afɔdo káká yi Judɛ́ɛn tɔ ɔ́ kɔn. Ée yě ɖo yiyi wɛ ɔ́, yě mɔ awu kpódó nǔ yětɔn e yě jó dó, bó mɔ tɛn bó yá wǔ hɔn yi lɛ́ɛ kpó gěgé. Yě wá wlí nǔ e yě mɔ ɔ́ ɖɔ nú axɔ́sú ɔ́. Ée togun ɔ́ se mɔ̌ tlóló ɔ́, yě bǐ tɔ́n, bó yi fɔ nǔ e sɔ́ja Silíi tɔn lɛ́ɛ jó dó, ɖo fí e yě ɖó gɔnu ɖó é. Énɛ́ ɔ́, linfín kilóo wěwe jɛ kpatágankwɛ́ ɖokpó, bɔ ɔ́ji kilóo ko-nukún-ɛnɛ jɛ kpatágankwɛ́ ɖokpó lě e Mawu Mavɔmavɔ ɖɔ gbɔn é. Axɔ́sú ɔ́ ɖɔ nú ahwangán e nɔ kplá ɛ ɔ́ ɖɔ ní yi toxo ɔ́ sín hɔntogbó jí, bó kpɔ́n nǔ e ɖo jijɛ wɛ ɖo fínɛ́ é. Lo ɔ́, ée é yi ɔ́, mɛ e kplé ɖo fínɛ́ lɛ́ɛ gbídí i ɖó afɔ wú, bɔ é kú lě e gbeyíɖɔ Mawu tɔn Elizée ko ɖɔ gbɔn hwenu e axɔ́sú ɔ́ wá gɔ̌n tɔn é. Nǔgbó ɔ́, Elizée ko ɖɔ nú axɔ́sú ɔ́ ɖɔ: “Sɔ lěhwenu ɔ́, linfín kilóo wěwe ná jɛ kpatágankwɛ́ ɖokpó, bɔ ɔ́ji kilóo ko-nukún-ɛnɛ ná jɛ kpatágankwɛ́ ɖokpó ɖo Samalíi xi mɛ.” Bɔ ahwangán ɔ́ yí gbe nú gbeyíɖɔ Mawu tɔn ɔ́ ɖɔ: “Ényí Mawu Mavɔmavɔ na bo tɔ́n ali dó jǐnukúnsin, bó sɛ́ jinukún dó gbɔn fínɛ́ ɔ́, nǔ e a ɖɔ din ɔ́ ná sixú jɛ wɛ a?” Bɔ Elizée yí gbe n'i ɖɔ: “A nǎ mɔ kpó nukún towe kpó, lo ɔ́ ɖě ɖo nu towe ná jɛ wɛ ǎ.” Nǔ e jɛ dó jǐ tɔn nǔgbó ɔ́ nɛ́: togun e kplé ɖo toxo ɔ́ sín hɔntogbó jí ɔ́ gbídí ahwangán e nɔ́ kplá axɔ́sú ɔ́ é ɖó afɔ wú. Nyɔ̌nu e sín vǐ kú bɔ Elizée fɔ́n ɛ ɔ́, Elizée ɖɔ n'i gbe ɖokpó ɖɔ: “Sɔ́ nǔ bo yi fí e hwi kpódó mɛ towe lɛ́ɛ kpó ná sixú nɔ é, ɖó Mawu Mavɔmavɔ sɛ́ adɔ dó to ɔ́ mɛ, bɔ adɔ ɔ́ ná tɔ́n nú xwe tɛ́nwe.” Nyɔ̌nu ɔ́ sɔ́ nǔ nǔgbó, bó bló nǔ e gbeyíɖɔ Mawu tɔn ɔ́ ɖɔ n'i é. É yi, é kpó mɛ tɔn lɛ́ɛ kpó, bó yi nɔ Filisitɛ́ɛn lɛ́ɛ sín tomɛ xɔ xwe tɛ́nwe. Xwe tɛ́nwe lɛ́ɛ gúdo ɔ́, nyɔ̌nu ɔ́ kplá mɛ tɔn lɛ́ɛ, bó gosín Filisitɛ́ɛn lɛ́ɛ sín tomɛ. Ée é wá Izlayɛ́li ɔ́, é yi axɔ́sú ɔ́ gɔ́n bó sa vo n'i ɖɔ é ní sɔ́ xwé émítɔn kpó gle émítɔn kpó nú émí. Hwenɛ́nu ɔ́, axɔ́sú ɔ́ ɖo xó ɖɔ xá gbeyíɖɔ Mawu tɔn Elizée sín mɛsɛntɔ́ Gehazíi wɛ bo ɖɔ: “Kɛnklɛ́n ɖɔ nǔ ɖaxó ɖaxó e Elizée wa lɛ́ɛ nú mì.” Hwenu e Gehazíi ɖo lě e Elizée fɔ́n mɛkúkú ɖokpó gbɔn ɔ́ wlí ɖɔ nú axɔ́sú ɔ́ wɛ ɔ́, nyɔ̌nu e sín vǐ Elizée fɔ́n ɔ́ wá axɔ́sú ɔ́ gɔ́n, bó ná byɔ́ xwé tɔn kpó gle tɔn kpó. Ée Gehazíi mɔ nyɔ̌nu ɔ́, é ɖɔ nú axɔ́sú ɔ́ ɖɔ: “Sɛ́mɛɖó, nyɔ̌nu ɔ́ ɖíe, vǐ e Elizée fɔ́n ɔ́ lɔ ka ɖíe.” Axɔ́sú ɔ́ kan nǔ byɔ́ nyɔ̌nu ɔ́, bɔ é wlí nǔ e jɛ lɛ́ɛ ɖɔ n'i. Énɛ́ ɔ́, axɔ́sú ɔ́ sɔ́ ɛ dó alɔ mɛ nú azaglɔ́gán tɔn ɖokpó, bó ɖɔ: “Bɛ̌ nǔ e nyí nyɔ̌nu élɔ́ tɔn lɛ́ɛ bǐ jó n'i, bó ná nǔ i dó nǔkún e è ya ɖo gle tɔn mɛ, sín gbe e gbe é gosín tomɛ fí káká jɛ din ɔ́ do mɛ.” Elizée yi Damási Silíi tota ɔ́ mɛ. Bɛni-Hadadi Silíi xɔ́sú ɔ́ ká ɖo azɔn jɛ wɛ hwenɛ́nu. È wǎ yi ɖɔ n'i ɖɔ gbeyíɖɔ Mawu tɔn ɔ́ wá fí. Ée axɔ́sú ɔ́ se mɔ̌ ɔ́, é ɖɔ nú Hazayɛ́li ɖɔ: “Hɛn nǔɖé bó yi ná gbeyíɖɔ Mawu tɔn ɔ́, bónú é ní kanbyɔ́ Mawu Mavɔmavɔ ɖɔ azɔn e jɛ wɛ un ɖe ɔ́ ká ná xwɛ a jí.” Ée axɔ́sú ɔ́ ɖɔ mɔ̌ ɔ́, Hazayɛ́li dó nǔ ɖagbe ɖagbe e ɖo Damási ɔ́ sín agban dó lǎkúnmí kanɖé (40) jí, bó ná yi ná Elizée. Ée é yi Elizée gɔ́n ɔ́, é ɖɔ n'i ɖɔ: “Mɛsɛntɔ́ towe Bɛni-Hadadi Silíi xɔ́sú ɔ́ wɛ sɛ́ mì dó gɔ̌n towe, bó ɖɔ nyɛ ní wá kanbyɔ́ we ɖɔ azɔn e jɛ wɛ émí ɖe ɔ́ ká ná xwɛ a jí.” Elizée yí gbe n'i ɖɔ: “Mawu Mavɔmavɔ ɖe xlɛ́ mì ɖɔ é ná kú dandan; amɔ̌, yi ɖɔ n'i ɖɔ azɔn tɔn ná xwɛ.” Ée gbeyíɖɔ Mawu tɔn ɔ́ ɖɔ mɔ̌ tlóló ɔ́, é sɔ́ xwe nukún ǎ. É cí too mɔ̌ káká bó wlí avǐ. Hazayɛ́li kanbyɔ́ ɛ ɖɔ: “Gǎn, étɛ́wú è ká ɖo avǐ ya wɛ?” Ée Hazayɛ́li kan mɔ̌ byɔ́ ɔ́, Elizée yí gbe n'i ɖɔ: “Un ko tunwun nǔ e a nǎ wa xá Izlayɛ́linu lɛ́ɛ ɔ́ wú wɛ un ɖo avǐ ya wɛ. A nǎ dó toxo yětɔn e è mɛ ahohó lɛ́ lɛ̌ dó lɛ́ɛ zo. A nǎ hu dɔ̌nkpɛvú yětɔn lɛ́ɛ, a nǎ nyínyɛ́ yɔkpɔ́vú yětɔn lɛ́ɛ, bó ná zɛ adɔgo nú xoxónɔ yětɔn lɛ́ɛ.” Hazayɛ́li ɖɔ n'i ɖɔ: “Nyɛ mɛ e má ɖó acɛ ɖěbǔ ǎ ɔ́ sixú wa nǔ mɔ̌hunkɔtɔn a?” Bɔ Elizée yí gbe n'i ɖɔ: “Mawu Mavɔmavɔ ɖe xlɛ́ mì ɖɔ hwi ná nyí Silíi xɔ́sú.” Hazayɛ́li gosín Elizée gɔ́n, bó wá yi gǎn tɔn gɔ́n, bɔ gǎn tɔn kanbyɔ́ ɛ ɖɔ: “Étɛ́ wɛ Elizée ɖɔ nú we?” Bɔ é yí gbe n'i ɖɔ: “É ɖɔ nú mì ɖɔ azɔn towe ná gbɔ dandan.” Ayǐhɔ́ngbe tɔn ɔ́, Hazayɛ́li zé wǔcyɔ́n ɖé nylɔ́ dó sin mɛ, bó bú dó nukún mɛ nú axɔ́sú ɔ́, bó glɔ́n agbɔ̌n n'i bɔ é kú, bɔ Hazayɛ́li jɛ tɛn tɔn mɛ. Hwenu e Yolámu Akábu ví ɔ́ ɖo xwe atɔ́ɔ́n bló wɛ ɖo axɔ́súzinkpo Izlayɛ́li tɔn jí ɔ́, Jozafáti kpo ɖo Judáa xɔ́sú nyí wɛ, bɔ vǐ tɔn Yexolámu húzú Judáa xɔ́sú. Xwe gban-nukún-we (32) ɖó wɛ é ɖe bó yi zinkpo jí ɖo Jeluzalɛ́mu, bó ɖu axɔ́sú nú xwe tántɔn. É lɔmɔ̌ wa nǔ nyanya Izlayɛ́li xɔ́sú lɛ́ɛ ɖɔhun. É wa nǔ e má nyɔ́ Mawu Mavɔmavɔ nukún mɛ ǎ é, lě e Akábu sín hɛ̌nnu ɔ́ bló gbɔn é, ɖó é da Akábu sín vǐ ɖokpó. Lo ɔ́, Mawu Mavɔmavɔ jló ná vívá kún Judáanu lɛ́ɛ tɔn ǎ. É jló ná vívá kún yětɔn ǎ, ɖó akpá e é dó nú mɛsɛntɔ́ tɔn Davídi ɖɔ kúnkan tɔn ná ɖu axɔ́sú káká sɔ́yi é wú. Hwenu e axɔ́sú Yexolámu ɖo zinkpo jí ɔ́, Edɔ́mu sín togun ɔ́ fɔ́n gǔ dó acɛkpikpa Judáa tɔn jí, bó sɔ́ axɔ́sú ɖokpó ɖó to ɔ́ nu. Ée Yexolámu se mɔ̌ ɔ́, é bɛ́ ahwankɛkɛ́ví tɔn lɛ́ɛ bǐ bó yi Sayíi. Edɔ́munu lɛ́ɛ ka xá yě ɖo fínɛ́, bɔ zǎn xóxó mɛ ɔ́, Yexolámu kpó ahwangán e kpa acɛ dó ahwankɛkɛ́ví tɔn lɛ́ɛ nu lɛ́ɛ kpó tɛ́nkpɔ́n bó ba ali bó gbɔn Edɔ́munu lɛ́ɛ tɛ́ntin, bɔ sɔ́ja Judáa tɔn lɛ́ɛ hɔn yi xwé. Sín gbe énɛ́ ɔ́ gbe ɔ́, Edɔ́mu to ɔ́ gosín acɛkpikpa Judáa tɔn mɛ, bó kpo ɖo mɔ̌ káká jɛ égbé. Hwenɛ́nu ɖokpó ɔ́ wɛ Livuna toxo ɔ́ lɔ fɔ́n gǔ. È wlǎn axɔ́sú Yexolámu sín tan e kpo ɔ́ dó “Judáa xɔ́sú lɛ́ɛ sín Tan wéma” mɛ. Yexolámu zán wá kú, bɔ è sɔ́ ɛ ɖó tɔ́ tɔn lɛ́ɛ kpá ɖo Davídi Toxo mɛ. Énɛ́ ɔ́ gúdo ɔ́, vǐ tɔn Akaziasi ɖu axɔ́sú ɖó tɛn tɔn mɛ. Hwenu e Yolámu Akábu ví ɔ́ ɖo xwe wěwe bló wɛ ɖo axɔ́súzinkpo Izlayɛ́li tɔn jí ɔ́, Akaziasi Yexolámu ví ɔ́ húzú Judáa xɔ́sú. Xwe ko-nukún-we ɖó wɛ Akaziasi ɖe bó yi zinkpo jí ɖo Jeluzalɛ́mu. É ɖu axɔ́sú nú xwe ɖokpó. Nɔ tɔn nɔ nyí Atalíi, bó jɔ ɖo Izlayɛ́li xɔ́sú Ɔmúli kún mɛ. É lɔmɔ̌ wa nǔ nyanya Akábu hɛ́nnu ɔ́ ɖɔhun. É wa nǔ e má nyɔ́ Mawu Mavɔmavɔ nukún mɛ ǎ é, ɖó Akábu kún mɛ wɛ é lɔmɔ̌ jɔ ɖe. Akaziasi xwedó Yolámu Akábu ví ɔ́, bó yi fun ahwan xá Hazayɛ́li Silíi xɔ́sú ɔ́ ɖo Hlamɔti toxo mɛ, ɖo Galadi yíkúngban jí. Hwenu e yě ɖo ahwan ɔ́ fun wɛ ɔ́, Silíinu lɛ́ɛ gblé wǔ Yolámu. Axɔ́sú Yolámu lɛ́ kɔ yi Izleyɛ́li, bó ná kpé nukún dó wǔ e è gblě e ɔ́ wú. Judáa xɔ́sú Akaziasi Yexolámu ví ɔ́ yi kpɔ́n Yolámu Akábu ví ɔ́ ɖo Izleyɛ́li, ɖó Yolámu ɖo wǔvɛ́ mɔ wɛ. É wá su gbe ɖokpó, bɔ Elizée ylɔ́ gbeyíɖɔ Mawu tɔn lɛ́ɛ ɖokpó, bó ɖɔ n'i ɖɔ: “Sɔ́ nǔ, bó zé amigoví élɔ́, bó yá wǔ yi Hlamɔti toxo mɛ, ɖo Galadi yíkúngban jí. Nú a jɛ dɔ̌n hǔn, yi mɔ Jehu Jozafáti ví, Nimuci vívú ɔ́. A nǎ kplá ɛ sín hǎgbɛ́ tɔn lɛ́ɛ tɛ́ntin, bɔ mi ná yi jɛ vo ɖo xɔ ɖokpó mɛ. A nǎ zé ami e ɖo goví ɔ́ mɛ ɔ́ kɔn dó ta n'i, bó ná ɖɔ: ‘Mawu Mavɔmavɔ ɖɔ: Un sɔ́ we Izlayɛ́li xɔ́sú.’ Énɛ́ ɔ́ gúdo ɔ́, ma nɔ te ó, yǎ wǔ hun hɔn bo hɔn tɔ́n.” Ée Elizée ɖɔ mɔ̌ ɔ́, gbeyíɖɔ Mawu tɔn ɔ́ ɖidó Hlamɔti. Ée é jɛ dɔ̌n ɔ́, ahwangán lɛ́ɛ ɖo kplé jí, bɔ é ɖɔ: “Gǎn, un jló ná ɖɔ xó ɖé nú we.” Bɔ Jehu kanbyɔ́ ɛ ɖɔ: “Mɛ̌ ba wɛ a ɖe ɖo mǐ mɛ?” Bɔ é yí gbe n'i ɖɔ: “Gǎn, hwi wɛ.” Ée é ɖɔ mɔ̌ ɔ́, Jehu sí te, bó kplá ɛ yi xwé gbe, bɔ gbeyíɖɔ Mawu tɔn ɔ́ kɔn ami dó ta n'i bó ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Un sɔ́ we Izlayɛ́li xɔ́sú ɖó togun ce nu. Hwi wɛ ná hu gǎn towe Akábu sín hɛ̌nnumɔ lɛ́ɛ bǐ. Énɛ́ ɔ́, un ná ba hlɔn nú mɛsɛntɔ́ ce gbeyíɖɔ lɛ́ɛ kpódó mɛsɛntɔ́ ce ɖě lɛ́ɛ kpó e Jezabɛ́li hu lɛ́ɛ. Akábu sín hɛ̌nnumɔ lɛ́ɛ bǐ wɛ ná kú. Un ná hu mɛ tɔn lɛ́ɛ bǐ, un ná hu yɔkpɔ́vú kpó mɛxó kpó. Nǔ e un ná wa xá Akábu sín hɛ̌nnumɔ lɛ́ɛ ɔ́ wɛ un ko wa xá Jelobowámu Nɛvati ví ɔ́ sín hɛ̌nnumɔ lɛ́ɛ kpó Baeca Axiya ví ɔ́ sín hɛ̌nnumɔ lɛ́ɛ kpó. Jezabɛ́li ɔ́, mɛɖé ná mɔ cyɔ tɔn bó ɖi ǎ. Cukú lɛ́ɛ wɛ ná ɖu lan tɔn ɖo Izleyɛ́li sín gle mɛ.’ ” Ée gbeyíɖɔ ɔ́ ɖɔ xó énɛ́ lɛ́ɛ ɔ́, é hun hɔn bo hɔn yi. Ée Jehu lɛ́ kɔ yi ahwangán ɖě lɛ́ɛ gɔ́n ɔ́, yě kanbyɔ́ ɛ ɖɔ: “Nɛ̌ ká gbɔn? Étɛ́ ba wɛ nǔ taɖunɔ nɛ́ ɔ́ ká ɖe bó wá gɔ̌n towe?” Jehu yí gbe nú yě ɖɔ: “Éeǒ! Nǔɖé jɛ ǎ. Mi tunwun gbeyíɖɔ Mawu tɔn énɛ́ lɛ́ɛ, bó tunwun lě e yě nɔ́ ɖɔ xó gbɔn é.” Lo ɔ́, yě lɛ́ ɖɔ: “Adingban wɛ! Đɔ xó e é ɖɔ ɔ́ nú mǐ.” Bɔ é ɖɔ: “Xó e é ɖɔ nú mì ɔ́ bǐ ɖíe: é ɖɔ nú mì ɖɔ Mawu Mavɔmavɔ kɔn ami dó ta nú mì bó sɔ́ mì Izlayɛ́li xɔ́sú.” Ée é ɖɔ mɔ̌ tlóló ɔ́, ahwangán ɖě lɛ́ɛ bǐ ɖe awu yětɔn lɛ́ɛ, bó tɛ́ dó kpekán jí aga, bo sɔ́ Jehu jínjɔ́n jí, bó jɛ lanzo kún jí, bó nɔ ɖɔ: “Susu nú axɔ́sú Jehu!” Ée Jehu Jozafáti ví Nimuci vívú ɔ́ húzú axɔ́sú ɔ́, é blá Yolámu gbé. Hwenɛ́nu ɔ́, Yolámu kpó Izlayɛ́li togun ɔ́ bǐ kpó ka ɖo xɛ nya ɖo Hlamɔti toxo ɔ́ jí wɛ ɖo Galadi, bónú Hazayɛ́li Silíi xɔ́sú ɔ́ ma yí ó. Lo ɔ́, axɔ́sú Yolámu ko lɛ́ kɔ yi Izleyɛ́li, bónú è nǎ kpé nukún dó wǔ e Silíinu lɛ́ɛ gblé e, hwenu e é ɖo ahwan fun xá Hazayɛ́li Silíi xɔ́sú ɔ́ wɛ ɔ́ wú. Énɛ́ ɔ́, Jehu ɖɔ nú ahwangán ɖě lɛ́ɛ ɖɔ: “Nú mi ɖo jǐ ce nǔgbó hǔn, mɛ ɖokpó ní tɔ́n sín toxo ɔ́ mɛ, bó yi Izleyɛ́li, bó yi ɖɔ nǔ e jɛ ɖo Hlamɔti fí é.” Ée Jehu ɖɔ mɔ̌ ɔ́, é byɔ́ kɛkɛ́ví tɔn mɛ, bó ɖidó Izleyɛ́li, ɖó Yolámu ɖo azɔnxɔmɛ ɖo dɔ̌n. Hwenɛ́nu ɔ́, Akaziasi Judáa xɔ́sú ɔ́ lɔ wá kpínkpɔ́n ɛ gbé. Sɔ́ja alicɔ́tɔ́ e è sɔ́ ɖó Izleyɛ́li sín ahohó ɔ́ jí ɔ́ mɔ Jehu sín ahwangɔnu ɔ́ jǎwe, bó ɖɔ sɛ́ dó axɔ́sú ɔ́ ɖɔ: “Un mɔ mɛɖé lɛ́ɛ dó ahwan gbě ja.” Bɔ Yolámu ɖɔ sɛ́ dó e ɖɔ: “Sɛ́ sɔ́xátɔ́ ɖokpó dó, ní kanbyɔ́ yě ɖɔ ɖagbe jɛ́n wɛ a jí.” Sɔ́xátɔ́ ɔ́ yi Jehu gɔ́n, bó ɖɔ: “Axɔ́sú ɔ́ kanbyɔ́ ɖɔ ɖagbe jɛ́n wɛ a jí.” Bɔ Jehu yí gbe n'i ɖɔ: “Étɛ́ ka kan we ɖ'é mɛ? Jɛ gǔdo ce.” Énɛ́ ɔ́, sɔ́ja alicɔ́tɔ́ ɔ́ ɖɔ nú axɔ́sú ɔ́ ɖɔ: “Mɛ e a sɛ́ dó ɔ́ yi káká gɔ̌n yětɔn, é ká sɔ́ lɛ́ kɔ wá ǎ.” Axɔ́sú Yolámu sɛ́ sɔ́xátɔ́ ɖěvo dó, bɔ é yi yě gɔ́n bó ɖɔ: “Axɔ́sú ɔ́ ɖɔ má kanbyɔ́ ɖɔ ɖagbe jɛ́n wɛ a jí.” Bɔ Jehu yí gbe n'i ɖɔ: “Étɛ́ ká kan we ɖ'é mɛ? Jɛ gǔdo ce.” Sɔ́ja alicɔ́tɔ́ ɔ́ lɛ́ ɖɔ nú axɔ́sú ɔ́ ɖɔ: “Mɛ wegɔ́ e a sɛ́ dó ɔ́ yi káká gɔ̌n yětɔn, élɔ́ ka sɔ́ lɛ́ kɔ wá ǎ. Amɔ̌, lě e mɔ gbɔn wɛ un ɖe ɔ́, é cí ɖɔ Jehu Nimuci vívú ɔ́ wɛ ɖɔhun. Đó un tunwun lě e é nɔ kun kɛkɛ́ví gbɔn ɔ́, taɖunɔ ɖɔhun wɛ é nɔ kun.” Énɛ́ ɔ́, axɔ́sú Yolámu ná gbe bɔ è sɔ́ kɛkɛ́ví tɔn sin dó sɔ́ wú, bɔ é byɔ́ mɛ; Akaziasi Judáa xɔ́sú ɔ́ lɔ byɔ́ kɛkɛ́ví élɔ́ tɔn mɛ, bɔ yě ɖidó, bó yi kpé Jehu, ɖo Nabɔti e ɖo Izleyɛ́li ɔ́ sín gle kpá. Ée Yolámu mɔ Jehu lě ɔ́, é kanbyɔ́ ɛ ɖɔ: “Jehu, ɖagbe jɛ́n wɛ a?” Bɔ Jehu yí gbe n'i ɖɔ: “Nɔ towe Jezabɛ́li ɔ́ kpo ɖo vodún sɛn wɛ, bó kpo ɖo azě gbo mɛ wɛ bɔ a nɔ kanbyɔ́ ɖɔ ɖagbe jɛ́n wɛ a jí a?” Yolámu lɛ́ kɔ ɖo tɛndo tɔn mɛ bó hɔn, bó ɖɔ nú Akaziasi ɖɔ: “Akaziasi, adingban wɛ mɛ!” Ée Yolámu hɔn bo ɖo yiyi wɛ ɔ́, Jehu sɔ́ gǎ tɔn, bó da ɛ dó abɔ̌ mɛ, bɔ é xo hǔn tɔn zlɛ́, bɔ é yɔ́ cí kɛkɛ́ví tɔn mɛ. Jehu ɖɔ nú ahwangán tɔn Bidikáa ɖɔ: “Sɔ́ cyɔ tɔn nyi dó Nabɔti gle mɛ. Đó, nú a flín ɔ́, hwenu e nyɛ kpó hwi kpó ɖo sɔ́ jí ɖo tɔ́ tɔn Akábu gúdo ɔ́, Mawu Mavɔmavɔ ɖó hwɛ n'i ɖɔ: ‘A hu Nabɔti kpódó vǐ tɔn lɛ́ɛ kpó sɔ, un mɔ bǐ. Nyɛ Mawu Mavɔmavɔ ɔ́, un mɔ bǐ, un ná sú hun yětɔn sín axɔ́ we ɖo gle ɖokpó élɔ́ ɔ́ mɛ.’ Jehu lɛ́ ɖɔ: énɛ́ wú ɔ́, sɔ́ cyɔ tɔn nyi dó gle ɔ́ mɛ lě e Mawu Mavɔmavɔ kó ɖɔ gbɔn é.” Ée Akaziasi Judáa xɔ́sú ɔ́ mɔ nǔ e jɛ nɛ́ ɔ́, é hɔn bó tunta Bɛti-Gani. Jehu ka jɛ gǔdo tɔn, bó ɖɔ: “Mi hu é lɔmɔ̌ dó kɛkɛ́ví tɔn mɛ.” Bɔ hwenu e é ɖo ali jí bó xwe Gǔu ɖo malín málín mɛ dó Yivleámu ɔ́, yě da gǎ dó e, bɔ é hɔn yi Mɛgido bó kú. Mɛsɛntɔ́ tɔn lɛ́ɛ ɖíɖá cyɔ tɔn dó kɛkɛ́ví tɔn mɛ yi Jeluzalɛ́mu, bó yi ɖi i dó yɔdo e mɛ è ɖi tɔ́gbó tɔn lɛ́ɛ dó é mɛ, ɖo Davídi Toxo mɛ. Yolámu Akábu ví ɔ́ ɖu axɔ́sú ɔ́, xwe tɔn wǒ-ɖokpógɔ́ ɔ́ mɛ wɛ Akaziasi ɖu axɔ́sú ɖo Judáa. Jehu xwe Izleyɛ́li toxo ɔ́ mɛ. Ée Jezabɛ́li se mɔ̌ ɔ́, é sá nǔ dó wundama, bó bló ɖa tɔn ɖó, bó yi cí flɛtɛ́li nu ɖo síngbó jí, bó ɖo do kpɔ́n sɛ́ dó wɛ. Ée Jehu ɖo toxo ɔ́ mɛ byɔ́ wɛ ɔ́, é ɖɔ n'i ɖɔ: “Zimuli jɔmɔ, nɛ̌ a ɖe gbɔn, axɔ́súhutɔ́?” Jehu kpɔ́n flɛtɛ́li ɔ́ nu sɛ́ dó, bó ɖɔ: “Mɛ̌ wɛ ɖo jǐ ce? Mɛ̌ wɛ?” Ée é ɖɔ mɔ̌ ɔ́, azaglɔ́gán nǎ yi we kpó atɔn kpó mɔ̌ sɛkpɔ́ flɛtɛ́li ɔ́, bó kpɔ́n ɛ sɛ́ dó ɖo do. Jehu ɖɔ nú yě ɖɔ: “Mi sɔ́ ɛ nyi gbɔn flɛtɛ́li ɔ́ nu sɛ́ dó mì ɖo do dě.” Ée é ɖɔ mɔ̌ ɔ́, yě sɔ́ ɛ nyi gbɔn flɛtɛ́li ɔ́ nu, bɔ é wá jɛ ayǐ, bɔ hun tɔn zlɔ́n kɔn nyi dǒ ɔ́ kpó sɔ́ lɛ́ɛ kpó wú, bɔ Jehu kun kɛkɛ́ví tɔn gbɔn jǐ tɔn dín. Énɛ́ ɔ́ gúdo ɔ́, Jehu byɔ́ hɔn ɔ́ mɛ, bó ɖu nǔ, bó nu ahan bo ɖɔ: “Mi yi sɔ́ nyɔ̌nu énɛ́ e Mawu ko dó nu é, bó yi ɖi, ɖó axɔ́sú ví wɛ.” Yě tɔ́n, bó ná yi sɔ́ cyɔ ɔ́ yi, lo ɔ́, yě sɔ́ mɔ nǔɖé zɛ takágo tɔn kpó afɔ tɔn lɛ́ɛ kpó, kpódó alɔ tɔn lɛ́ɛ kpó wú ǎ. Yě lɛ́ kɔ bo ɖɔ nǔ e jɛ ɔ́ nú Jehu, bɔ é ɖɔ: “Éénɛ́! Xó e Mawu Mavɔmavɔ ɖɔ gbɔn gbeyíɖɔ tɔn Elíi Ticibéenu ɔ́ jí ɔ́ nɛ́. É ɖɔ: ‘Cukú lɛ́ɛ wɛ ná ɖu Jezabɛ́li sín lan ɖo gle mɛ ɖo Izleyɛ́li, bɔ nǔ e ná kpo ɖo wǔ tɔn lɛ́ɛ ná nyí zunkɔ́ ɖo gle mɛ, ɖo Izleyɛ́li, bɔ énɛ́ ɔ́, mɛɖé sɔ́ ná sixú ɖɔ Jezabɛ́li ɖíe ǎ.’ ” Akábu ɖó vǐ súnnu kpó vǐvú súnnu kpó kanɖé gban (70). Samalíi wɛ yě nɔ́ nɔ. Jehu sɛ́ wěma dó ahwangán Izleyɛ́li tɔn lɛ́ɛ, tomɛxó lɛ́ɛ, kpó mɛ e nɔ kplɔ́n nǔ Akábu ví lɛ́ɛ kpó ɖo Samalíi. É ɖɔ dó wěma ɔ́ mɛ ɖɔ: “Mi wɛ ɖo nukún kpé dó axɔ́sú ɔ́ sín vǐ lɛ́ɛ wú wɛ, kɛkɛ́ví tɔn lɛ́ɛ ɖo mi sí, sɔ́ tɔn lɛ́ɛ ɖo mi sí, ahwanfunnú tɔn lɛ́ɛ ɖo mi sí, bɔ mi ɖo toxo tɔn e è mɛ ahohó lɛ́ lɛ̌ dó ɔ́ mɛ. Hǔn din e mi ɖo wěma élɔ́ mɔ wɛ ɔ́, mi ná kpɔ́n vǐ tɔn lɛ́ɛ mɛ, bó ná sɔ́ mɛ e nyɔ́ hú yě bǐ, bó sixú ɖu axɔ́sú ɖo yě mɛ é, bó ná sɔ́ ɛ ɖó zinkpo jí. Énɛ́ ɔ́ gúdo ɔ́, mi ná sɔ́ ahwan nú, bó ná fun ahwan dó gǎn mitɔn sín xwédo tamɛ.” Ée yě se mɔ̌ ɔ́, xɛsi ɖaxó ɖé jɛ yě jí, bɔ yě ɖɔ: “Éyɛ́ mɛ e nukɔn axɔ́sú we ma sixú nɔ te ǎ ɔ́, nɛ̌ wɛ mǐdɛɛ lɛ́ɛ ká sixú nɔ te nukɔn tɔn gbɔn?” Énɛ́ ɔ́, mɛ e kpa acɛ dó axɔ́sú ɔ́ sín xwé nu ɔ́, kpó mɛ e kpa acɛ dó toxo ɔ́ nu ɔ́ kpó, kpó tomɛxó lɛ́ɛ kpó, kpódó mɛ e nɔ kplɔ́n nǔ axɔ́sú ɔ́ sín vǐ lɛ́ɛ kpó sɛ́ wɛn dó Jehu ɖɔ: “Mɛsɛntɔ́ towe wɛ mǐ nyí. Mǐ ná bló nǔ e a nǎ ɖɔ nú mǐ lɛ́ɛ bǐ. Mǐ ná sɔ́ mɛɖé axɔ́sú ǎ, nǔɖé jló we hǔn wa.” Énɛ́ ɔ́, Jehu lɛ́ sɛ́ wěma ɖěvo dó yě bó ɖɔ: “Ényí mi ɖo jǐ ce bo jló ná se tónú nú mì hǔn, mi gbo ta gǎn mitɔn sín vǐ lɛ́ɛ, bó wá gɔ̌n ce sɔ zǎnzǎn lěhwenu ɖo Izleyɛ́li.” Lo ɔ́, axɔ́sú ɔ́ sín vǐ kanɖé gban lɛ́ɛ ka ɖo tonukún to ɔ́ tɔn lɛ́ɛ gɔ́n, bɔ yě ɖo nukún kpé dó vǐ lɛ́ɛ wú wɛ. Ée yě mɔ wěma ɔ́, yě bɛ́ axɔ́sú ɔ́ sín vǐ kanɖé gban (70) lɛ́ɛ, bó gbo ta yě bǐ, bó bɛ́ ta yětɔn dó xasun mɛ, bo sɛ́ dó Jehu ɖo Izleyɛ́li. Axɔ́sú ɔ́ sín wɛnsagun ɖokpó wá dó wɛn Jehu bo ɖɔ: “Yě bɛ̌ axɔ́sú ɔ́ sín vǐ lɛ́ɛ sín ta wá.” Ée wɛnsagun ɔ́ wá ɖɔ nú Jehu ɖɔ è bɛ̌ vǐ lɛ́ɛ sín ta wá ɔ́, é ɖɔ: “Mi má yě ɖó donu we ɖó toxo ɔ́ sín hɔntogbó jí, nú yě nɔ fínɛ́ káká nú ayǐ hɔ́n.” Zǎnzǎn ɔ́, Jehu tɔ́n bó wá togun ɔ́ bǐ nukɔn, bó ɖɔ: “Midɛɛ lɛ́ɛ ɔ́, mi mɛ́! Nyɛ ɔ́, nyɛ tunwun ɖɔ nyɛ wɛ blá gǎn ce Yolámu gbé bó hu i. Midɛɛ ká tunwun mɛ e hu mɛ élɔ́ lɛ́ɛ a? Mi bo tunwun ɖɔ xó e Mawu Mavɔmavɔ ɖɔ dó Akábu sín mɛ lɛ́ɛ wú ɔ́ ɖě kún ná gɔn jijɛ ó. Mawu Mavɔmavɔ bló nǔ e é ɖɔ gbɔn mɛsɛntɔ́ tɔn Elíi jí é.” Ée Jehu ɖɔ mɔ̌ ɔ́, é hu mɛ e kpo ɖo Akábu sín hɔnmɛ ɖo Izleyɛ́li lɛ́ɛ bǐ. É hu mɛ nukúnɖéjí lɛ́ɛ bǐ, mɛ e va dó wǔ tɔn lɛ́ɛ bǐ. É hu vodúnnɔ lɛ́ɛ bǐ. É jó yě mɛ ɖokpó dó nyi gbɛ ǎ. Énɛ́ ɔ́ gúdo ɔ́, Jehu jɛ ali bo ɖidó Samalíi. É ɖo yiyi wɛ bo jɛ Gbɔ̌fúnkpatɛn, bó kpé Judáa xɔ́sú Akaziasi sín mɛ lɛ́ɛ, bó kanbyɔ́ yě ɖɔ: “Mɛ̌ mi ka nyí?” Bɔ yě yí gbe n'i ɖɔ: “Axɔ́sú Akaziasi sín mɛ wɛ mǐ nyí. Mǐ wá bó ná dó gbe axɔ́si Jezabɛ́li sín vǐ lɛ́ɛ kpódó axɔ́sú ɔ́ sín mɛ ɖě lɛ́ɛ kpó.” Ée yě ɖɔ mɔ̌ ɔ́, Jehu ɖɔ: “Mi wlí yě gbɛɖe gbɛɖe.” Bɔ mɛ tɔn lɛ́ɛ wlí yě gbɛɖe gbɛɖe, bó gbo gbe yě, bó bɛ́ yě kɔn nyi dotɔ e ɖo Gbɔ̌fúnkpatɛn ɔ́ mɛ. Yě mɛ kanɖé-nukún-we (42) wɛ. Jehu jǒ mɛ ɖěbǔ dó nyi gbɛ ǎ. Ée Jehu gosín fínɛ́ ɔ́, é kpé Yonadávu Hlekávu ví ɔ́. É dó gbe e, bó ɖɔ n'i ɖɔ: “Xomɛ towe ka ɖo wɛn dó wǔ ce lě e xomɛ ce ɖo wɛn dó wǔtu towe gbɔn ɔ́ a?” Yonadávu yí gbe n'i bó ɖɔ: “Ɛɛn!” Jehu lɛ́ ɖɔ n'i ɖɔ: “Ényí é ɖo mɔ̌ nǔgbó hǔn, nǎ alɔ mì.” Bɔ Yonadávu ná alɔ ɛ, bɔ Jehu dɔn ɛ dó kɛkɛ́ví e mɛ é ɖe ɔ́ mɛ, bó ɖɔ: “Wǎ mǐ yi kpɔ́n lě do e un yí wǎn nú Mawu Mavɔmavɔ sín azɔ̌ gbɔn é.” Énɛ́ ɔ́, é sɔ́ ɛ dó kɛkɛ́ví tɔn mɛ ɖidó. Ée Jehu jɛ Samalíi ɔ́, é hu Akábu sín mɛ e kpo ɖo fínɛ́ lɛ́ɛ bǐ. É sú yě bǐ sín kún dó lě e Mawu Mavɔmavɔ ko ɖɔ nú Elíi gbɔn é. Énɛ́ ɔ́ gúdo ɔ́, Jehu kplé togun ɔ́ bǐ, bó ɖɔ nú yě ɖɔ: “Akábu sɛn vodún Baalu nabí ɖé ǎ, amɔ̌, nyɛ ɔ́, nyɛ ná sɛn káká. Din ɔ́, mi dó wɛn sɛ́ dó gbeyíɖɔ vodún Baalu tɔn lɛ́ɛ bǐ, Baalusi lɛ́ɛ kpódó hunnɔ tɔn lɛ́ɛ bǐ kpó nú yě wá gɔ̌n ce fí. Yě mɛ ɖěbǔ ma hwe ó, ɖó un jló ná sá vɔ̌ ɖaxó ɖokpó nú vodún Baalu. È nǎ hu mɛ e ná gɔn lɛ́ɛ bǐ.” Ayi wɛ Jehu ka sɔ́ ɖó nukɔn bó ná mɔ tɛn bo hu mɛ e nɔ sɛn vodún Baalu lɛ́ɛ bǐ. Énɛ́ ɔ́ wú wɛ é ɖɔ: “Mi ylɔ́ kplé ɖaxó ɖokpó nú mǐ ná wa nǔ nú vodún Baalu.” Bɔ è ylɔ̌ kplé ɔ́. É sɛ́ mɛ dó Izlayɛ́li to ɔ́ bǐ mɛ, bɔ mɛ e nɔ sɛn Baalu lɛ́ɛ bǐ wǎ; yě ɖokpó gɔn ǎ. Yě bǐ wá bó byɔ́ Baalu xwé, bɔ xwé ɔ́ gɔ́ bǐ, bɔ Jehu ɖɔ nú mɛ e nɔ kpé nukún dó vodúnwu lɛ́ɛ wú é ɖɔ: “Đe awu tɔ́n nú Baalusɛntɔ́ lɛ́ɛ bǐ.” Bɔ nya ɔ́ ɖe awu lɛ́ɛ tɔ́n nú yě. Énɛ́ ɔ́ gúdo ɔ́, Jehu kpódó Yonadávu Hlekávu ví ɔ́ kpó wá Baalu xwé ɔ́ gbe, bɔ Jehu ɖɔ nú mɛ e nɔ sɛn Baalu lɛ́ɛ ɖɔ: “Mi kpɔ́n ɖɔ mɛ e nɔ sɛn Mawu Mavɔmavɔ ɔ́ ɖě ɖo mɛ mɛ a jí, ɖó mɛsɛntɔ́ Baalu tɔn lɛ́ɛ kɛ́ɖɛ́ wɛ ɖó ná nɔ fí.” Énɛ́ ɔ́, Jehu kpó Yonadávu kpó ɖidó vɔ̌ yǎyá lɛ́ɛ kpó vɔ̌ e è nɔ dó zo lɛ́ɛ kpó sá gbé. Jehu ka ko ɖó sɔ́ja kanwe (80) kɔ́xo, bó ko ɖɔ nú yě ɖɔ: “Un jó mɛ énɛ́ lɛ́ɛ bǐ nú mi. Ényí mɛɖé gló mɛɖé bó yi ɔ́, un ná hu mɛ ɔ́ ɖó tɛn tɔn mɛ.” Ée Jehu sá vɔ̌ lɛ́ɛ fó ɔ́, é ɖɔ nú sɔ́ja lɛ́ɛ kpó gǎn yětɔn lɛ́ɛ kpó ɖɔ: “Mi byɔ́ xwé ɔ́ gbe, bó hu mɛ lɛ́ɛ bǐ. Mi ma lɔn nú mɛ ɖokpó tɔ́n ó.” Ée é ɖɔ mɔ̌ ɔ́, sɔ́ja lɛ́ɛ kpó gǎn yětɔn lɛ́ɛ kpó hu yě, bó bɛ́ cyɔ yětɔn nyi gbě. Énɛ́ ɔ́ gúdo ɔ́, yě hun káká yi slǎ e mɛ vodún Baalu xwé ɔ́ ɖe é, ɖo tɛn mímɛ́ bǐ ɔ́ mɛ. Yě bɛ̌ awǐnnya e yě tun te ɖó vodún Baalu xwé bó nɔ sɛn lɛ́ɛ tɔ́n bó dó zo. Yě flí Baalu wínnya e yě tun te bó nɔ sɛn lɛ́ɛ xwe, bó gba xɔ tɔn, bó kun adado ɖó fínɛ́, bɔ yě kpo ɖo fínɛ́ káká jɛ égbé. Lě e Jehu sú Baalu sinsɛn sín kún dó gbɔn ɖo Izlayɛ́li ɔ́ nɛ́. Lo ɔ́, é hu hwɛ e Jelobowámu Nɛvati ví ɔ́ hu bó dɔn Izlayɛ́li togun ɔ́ d'é mɛ é. É sɛn sikányibúví e ɖo Betɛ́li lɛ́ɛ kpó ée ɖo Dan lɛ́ɛ kpó Jelobowámu ɖɔhun. Mawu Mavɔmavɔ ɖɔ nú Jehu ɖɔ: “A dɔn tó nú Akábu xwédo ɔ́ lě e un ba gbɔn é. Nǔ e nɔ jló mì é nɛ́. Énɛ́ ɔ́ wú wɛ vǐ towe lɛ́ɛ ná ɖu axɔ́sú ɖo Izlayɛ́li ɖě jɛ ɖě gúdo káká nú jijimɛ ɛnɛ.” É ɖo mɔ̌ có Jehu nyi Mawu Mavɔmavɔ, Mawu Izlayɛ́li tɔn sín sɛ́n lɛ́ɛ kpó ayi tɔn bǐ kpó ǎ. Hwɛ e Jelobowámu hu bo dɔn Izlayɛ́linu lɛ́ɛ d'é mɛ ɔ́, é gɔn huhu ǎ. Hwe énɛ́ ɔ́ nu ɔ́, Mawu Mavɔmavɔ jɛ Izlayɛ́li sín ayǐkúngban yí jí. É sɛ́ Hazayɛ́li Silíi xɔ́sú ɔ́ dó, bɔ é jɛ Izlayɛ́li to ɔ́ yí jí. Énɛ́ ɔ́, è yǐ ayǐkúngban e ɖo zǎnzǎnhwe jí nú Judɛ́ɛn tɔ é kpódó ée ɖo totaligbé nú Alowɛ́ɛ toxo ɖo Aanɔ́ni tɔdo ɔ́ mɛ ɔ́ kpó sín yě sí. Ayǐkúngban énɛ́ lɛ́ɛ wɛ nyí Galadi to ɔ́ kpó Basáni to ɔ́ kpó. To énɛ́ lɛ́ɛ mɛ wɛ akɔta Hwlibɛ́ni tɔn, Gadi tɔn kpódó Manasée tɔn kpó nɔ́ nɔ. È wlǎn axɔ́sú Jehu sín tan e kpo ɔ́, nǔ e é wa lɛ́ɛ kpó akɔ́nkpinkpan e é ɖó ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ. Jehu zán wá kú, bɔ è sɔ́ ɛ yi ɖó Samalíi, bɔ vǐ tɔn Yoakázi ɖu axɔ́sú ɖó tɛn tɔn mɛ. Xwe koatɔ́n-nukún-atɔn (28) wɛ Jehu bló ɖo axɔ́súzinkpo Izlayɛ́li tɔn jí ɖo Samalíi. Ée Atalíi, axɔ́sú Akaziasi sín nɔ se ɖɔ vǐ émítɔn kú é ɔ́, é jɛ mɛ e ko jɔ ɖo axɔ́sú kún mɛ lɛ́ɛ bǐ hu jí. Lo ɔ́, cóbónú é ná hu mɛ lɛ́ɛ ɔ́, Yexocɛ́va axɔ́sú Yexolámu sín vǐ nyɔ̌nu e nyí Akaziasi nɔví ɔ́ zé Joasi Akaziasi ví ɔ́ sín axɔ́sú ví lɛ́ɛ mɛ, lobo zé e hwlá hwenu e è ɖo mɛ lɛ́ɛ hu wɛ é. É zé vǐ ɔ́ kpó nyɔ̌nu e ɖo vǐ ɔ́ hɛn wɛ ɔ́ kpó yi ɖó xɔ e mɛ è nɔ dɔ́ ɖo Mawu Mavɔmavɔ xwé gbe ɔ́ ɖokpó mɛ. Lě e é gló Atalíi bó má kú ǎ gbɔn é nɛ́. Vǐ ɔ́ kpó nyɔ̌nu e nɔ hɛn ɔ́ kpó nɔ hwlǎhwlá ɖo Mawu Mavɔmavɔ xwé gbe káká nú xwe ayizɛ́n. Atalíi ɔ́ ká ɖo axɔ́sú ɖu ɖo to ɔ́ nu wɛ hwenɛ́nu. Atalíi yi zinkpo jí ɔ́, xwe tɔn tɛ́nwegɔ́ ɔ́ mɛ ɔ́, Yexoyada sɛ́ wɛn dó sɔ́ja kanwekogán Kali lɛ́ɛ kpó sɔ́ja ɖěvo e nɔ kplá axɔ́sú ɔ́ lɛ́ɛ kpó, bɔ yě wá gɔ̌n tɔn ɖo Mawu Mavɔmavɔ xwé gbe. É jɛ akɔ xá yě, bó ɖɔ yě ní xwlé nǔ d'é jí ɖo Mawu Mavɔmavɔ nukɔn. Énɛ́ ɔ́ gúdo ɔ́, é zé axɔ́sú ví ɔ́ xlɛ́ yě, lobo ɖɔ nú yě ɖɔ: “Nǔ e mi ná wa lɛ́ɛ ɖíe: mi ɖótó. Mi mɛ e ɖo azɔ̌ ná wa wɛ gbɔjɛzán gbe lɛ́ɛ ɔ́, mi ná má miɖée ɖó atɔn. Atɔnvlɔ́ɖó ɖó ná cɔ́ hɔn e mɛ axɔ́sú ɔ́ nɔ́ nɔ é. Atɔnvlɔ́ɖó ná cí Súu sín hɔntogbó ɔ́ jí, bɔ atɔnvlɔ́ɖó e kpo ɔ́ ná nɔ hɔntogbó e ɖo sɔ́ja e nɔ kplá axɔ́sú ɔ́ lɛ́ɛ gúdo ɔ́ jí. Lě e mi ná cɔ́ xwé ɔ́ mɛ ɖě jɛ mɛ ɖě gúdo gbɔn ɔ́ nɛ́, bó ná lɔn nú mɛɖé ná byɔ́ mɛ ǎ. Gbɛ̌ta mitɔn we ɖě lɛ́ɛ e jɛ te sín azɔ̌mɛ gbɔjɛzán gbe lɛ́ɛ ɔ́, yědɛɛ lɛ́ɛ ná wá cɔ́ Mawu Mavɔmavɔ xwé ɔ́ ɖo fí e axɔ́sú ɔ́ ɖe é. Mi mɛ bǐ ná lɛ́ lɛ̌ dó axɔ́sú ɔ́, bɔ mɛ ɖokpó ɖokpó ná hɛn ahwanfunnú tɔn alɔ mɛ. Mɛ ɖěbǔ dó ta mi mɛ hǔn, mi hu mɛ ɔ́. Axɔ́sú ɔ́ sɛ afɔ hǔn, mi nɔ sɛ afɔ.” Sɔ́ja kanwekogán lɛ́ɛ bló nǔ lɛ́ɛ lě e vɔ̌sánú-xwlémawutɔ́ Yexoyada ɖɔ gbɔn nú yě é. Yě sɛ sɔ́ja yětɔn yětɔn kplé. Mɛ e wá azɔ̌mɛ gbɔjɛzán gbe lɛ́ɛ, kpó mɛ e tɔ́n sín azɔ̌mɛ gbɔjɛzán gbe lɛ́ɛ kpó kplé, bɔ yě bǐ zɔn, bó ɖidó vɔ̌sánú-xwlémawutɔ́ Yexoyada gɔ́n. Yexoyada fɔ axɔ́sú Davídi sín hwǎn kpó gǎglónú kpó e ɖo Mawu Mavɔmavɔ xwé gbe lɛ́ɛ jó nú sɔ́ja kanwekogán lɛ́ɛ. Sɔ́ja e nɔ kplá axɔ́sú ɔ́ lɛ́ɛ hɛn ahwanfunnú yětɔn yětɔn alɔ mɛ, bó to lɛ́ lɛ̌ dó axɔ́sú ɔ́. Yě to yěɖée bɛ́ sín sinsɛnxɔ ɔ́ sín ɖisíxwé káká yi amyɔxwé, ɖo vɔ̌sákpe ɔ́ kpá, bó ná cɔ́ axɔ́sú ɔ́. Yexoyada ɖe axɔ́súví ɔ́ dó nukɔn, lobo zé tablá ɖokpó kpó sɛ́nwéma ɔ́ kpó jó n'i, bɔ yě kɔn ami dó ta nú Joasi, bó sɔ́ ɛ axɔ́sú, bó jɛ alɔ xo n'i jí, bó nɔ ɖɔ: “Susu nú axɔ́sú ɔ́!” Ée Atalíi se xó e sú wɛ togun ɔ́ kpó sɔ́ja lɛ́ɛ kpó ɖe ɔ́, é wá mɔ yě ɖo Mawu Mavɔmavɔ xwé gbe. Ée é wá ɔ́, é mɔ axɔ́sú yɔ̌yɔ́ e è sɔ́ ɔ́ ɖo te Mawu Mavɔmavɔ xwé ɔ́ sín dotín lɛ́ɛ ɖokpó kpá, lě e è ko nɔ bló gbɔn é, bɔ ahwangán lɛ́ɛ kpó kpɛnkúntɔ́ lɛ́ɛ kpó ɖo te akpá tɔn. Togun ɔ́ bǐ ɖo awǎ jɛ wɛ, kpɛnkúntɔ́ lɛ́ɛ ɖo kpɛn kún wɛ. Ée Atalíi mɔ mɔ̌ é ɔ́, é vún awu dó kɔ nú éɖée, bó ɖɔ: “Ahizi nɛ́! Ahizi nɛ́!” Ée é ɖɔ mɔ̌ ɔ́, vɔ̌sánú-xwlémawutɔ́ Yexoyada ɖɔ nú sɔ́ja kanwekogán e ɖo ahwangɔnu ɔ́ nu lɛ́ɛ ɖɔ: “Mi ɖe nyɔ̌nu nɛ́ tɔ́n sín mɛ mɛ; mɛɖé xwedó e hǔn, mi hu mɛ ɔ́.” Yexoyada ɖɔ mɔ̌, ɖó é ba ɖɔ è nǐ hu i ɖo Mawu Mavɔmavɔ xwé gbe ǎ. Ée é ɖɔ mɔ̌ ɔ́, yě dɔn ɛ gbɔn Sɔ́ lɛ́ɛ sín Hɔntogbó nu byɔ́ hɔn ɔ́ mɛ, bó hu i ɖo fínɛ́. Yexoyada dɔn axɔ́sú ɔ́ kpó togun ɔ́ kpó, bɔ yě jɛ akɔ xá Mawu Mavɔmavɔ, bó ná nyí togun Mawu Mavɔmavɔ tɔn. Yexoyada lɛ́ dɔn axɔ́sú ɔ́ kpó togun tɔn kpó, bɔ yě jɛ akɔ xá yěɖée. Bɔ togun ɔ́ bǐ sɔ́ nǔ bó yi kíjá vodún Baalu xwé ɔ́ bǐ. Yě gba vɔ̌sákpe lɛ́ɛ kpó bǒcyɔ lɛ́ɛ kpó, bó lɛ́ hu Matáni; nya énɛ́ wɛ nyí vodún Baalunɔ. Yě hu i nyi vɔ̌sákpe lɛ́ɛ nukɔn. Ée nǔ énɛ́ lɛ́ɛ jɛ fó é ɔ́, Yexoyada ɖe mɛ bɔ yě nɔ́ cɔ́ Mawu Mavɔmavɔ xwé ɔ́. Yexoyada lɛ́ kplé sɔ́ja kanwekogán Kali lɛ́ɛ kpó sɔ́ja ɖěvo e nɔ kplá axɔ́sú ɔ́ lɛ́ɛ kpó, kpó togun ɔ́ bǐ kpó, bɔ yě ɖe axɔ́sú ɔ́ tɔ́n sín Mawu Mavɔmavɔ xwé. Énɛ́ ɔ́ gúdo ɔ́, yě gbɔn sɔ́ja e nɔ kplá axɔ́sú ɔ́ lɛ́ɛ sín hɔntogbó ɔ́ nu, bó byɔ́ hɔn ɔ́ mɛ. Énɛ́ ɔ́, Joasi jínjɔ́n axɔ́súzinkpo ɔ́ jí. Togun ɔ́ bǐ j'awǎ jɛ jí. Ée è hu Atalíi ɖo hɔnmɛ é ɔ́, toxo ɔ́ vo. Xwe tɛ́nwe ɖó wɛ Joasi ɖe bó nyí axɔ́sú. Hwenu e Jehu ɖo xwe tɛ́nwe bló ɖo axɔ́súzinkpo jí wɛ ɔ́, Joasi húzú axɔ́sú, bó kpa acɛ ɖo Jeluzalɛ́mu káká nú xwe kanɖé (40). Nɔ tɔn ɔ́, Bɛ̌-Cevanu wɛ, bɔ è nɔ ylɔ́ ɛ ɖɔ Sivía. Joasi nɔ wa nǔ e nyɔ́ Mawu Mavɔmavɔ nukún mɛ ɔ́ hwebǐnu, ɖó vɔ̌sánú-xwlémawutɔ́ Yexoyada kplɔ́n ɛ ganjí. Amɔ̌, vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌sánú kpó zǎlínkpɔ́n kpó xwlé vodún wɛ gbɔn fí énɛ́ lɛ́ɛ. Joasi ɖɔ nú vɔ̌sánú-xwlémawutɔ́ lɛ́ɛ gbe ɖokpó ɖɔ: “Mi ná zé akwɛ́ e è wǎ ná ɖo Mawu Mavɔmavɔ xwé gbe lɛ́ɛ dó wa Mawu Mavɔmavɔ xwé ɔ́ sín azɔ̌ ná. É sixú nyí akwɛ́ e è nǎ dó xɔ gbɛ nú mɛ é, é sixú nyí akwɛ́ e mɛ ɖésúnɔ jló bó ná é. Mi mɛ ɖokpó ɖokpó ná yí akwɛ́ énɛ́ lɛ́ɛ ɖo mɛ mitɔn e nɔ yí akwɛ́ ɖo Mawu Mavɔmavɔ xwé lɛ́ɛ sí, bó ná zé dó bló Mawu Mavɔmavɔ xwé ɔ́ ɖó ná, ɖo fí e é gblé ɖe lɛ́ɛ.” Lo ɔ́, káká wá jɛ hwenu e Joasi ɖo xwe ko-nukún-atɔngɔ́ bló wɛ ɖo zinkpo jí é ɔ́, vɔ̌sánú-xwlémawutɔ́ lɛ́ɛ kó bló nǔ ɖěbǔ ɖó ɖo Mawu Mavɔmavɔ xwé ɔ́ wú ǎ. Din ɔ́, axɔ́sú Joasi ylɔ́ vɔ̌sánú-xwlémawutɔ́ Yexoyada kpódó vɔ̌sánú-xwlémawutɔ́ ɖě lɛ́ɛ bǐ kpó kplé, bó kanbyɔ́ yě ɖɔ: “Étɛ́wú mi ma ka bló Mawu Mavɔmavɔ xwé ɔ́ ɖó ǎ? Bɛ́ sín égbé ɔ́, mi sɔ́ ná cyán akwɛ́ ɖě ɖo mɛ mitɔn e nɔ yí akwɛ́ lɛ́ɛ sí ǎ, lo ɔ́, mi ná jó akwɛ́ lɛ́ɛ dó bɔ è nǎ dó bló Mawu Mavɔmavɔ xwé ɔ́ ɖó.” Vɔ̌sánú-xwlémawutɔ́ lɛ́ɛ bǐ yí gbe ɖɔ émí kún sɔ́ ná yí akwɛ́ ɖo togun ɔ́ sí ó, émí kún ka sɔ́ ná bló Mawu Mavɔmavɔ xwé ɔ́ ɖó ó. Énɛ́ ɔ́, vɔ̌sánú-xwlémawutɔ́ Yexoyada zé gbǎ ɖokpó bó tɔ́n ali ɖokpó ɖó nusú tɔn mɛ, lobo zé ɖó vɔ̌sákpe ɔ́ kpá ɖo aɖisíxwé, fí e è nɔ gbɔn byɔ́ Mawu Mavɔmavɔ xwé gbe é. È ɖe vɔ̌sánú-xwlémawutɔ́ e nɔ́ nɔ ali nu lɛ́ɛ bɔ yě ná nɔ́ bɛ́ akwɛ́ e togun ɔ́ hɛn wá Mawu Mavɔmavɔ xwé ɔ́ gbe é bǐ dó gbǎ ɔ́ mɛ. Ée yě mɔ ɖɔ akwɛ́ sukpɔ́ ɖo gbǎ ɔ́ mɛ é ɔ́, wěgbójínɔtɔ́ axɔ́sú ɔ́ tɔn kpódó vɔ̌sánú-xwlémawutɔ́ ɖaxó ɔ́ kpó yi bɛ́ akwɛ́ e ɖo gbǎ ɔ́ mɛ é, lobo xa. Ée yě xa akwɛ́ ɔ́, yě bɛ̌ jó nú mɛ e ná kpé nukún dó Mawu Mavɔmavɔ xwé ɔ́ sín azɔ̌ wú lɛ́ɛ. Énɛ́ ɔ́, yě sɔ́ akwɛ́ ɔ́ bó sú axɔ́ xɔgbátɔ́ lɛ́ɛ kpó mɛ e nɔ wa azɔ̌ ɖo Mawu Mavɔmavɔ xwé gbe lɛ́ɛ kpó, kpó xɔmɛtɔ́ lɛ́ɛ kpó, kpó awǐnnyakpatɔ́ lɛ́ɛ kpó. Yě xɔ atín kpó awǐnnya kpikpa kpó ɖo akwɛ́ ɔ́ mɛ dó wa azɔ̌ ná ɖo Mawu Mavɔmavɔ xwé ɔ́ wú. Yě xɔ nǔ tɛnmɛ tɛnmɛ ɖo akwɛ́ ɔ́ mɛ dó bló nǔ e gblé ɖo Mawu Mavɔmavɔ xwé ɔ́ wú lɛ́ɛ ɖó. È glǎ zé akwɛ́ e è hɛn wá Mawu Mavɔmavɔ xwé ɔ́ ɖě dó bló kpatágan sín basya ná ǎ, è ka zé dó bló nǔ e è nɔ dó bló myɔ ɖó ná lɛ́ɛ kpó gannú kpó ná ǎ, è ka zé dó bló kpɛn ná ǎ, è ka zé dó bló sikánú ɖé abǐ kpatágannú ɖé ná ǎ. Mɛ e ná kpé nukún dó Mawu Mavɔmavɔ xwé ɔ́ sín azɔ̌ wú lɛ́ɛ wɛ è bɛ̌ akwɛ́ ɔ́ jó ná, bɔ yě sɔ́ dó bló Mawu Mavɔmavɔ xwé ɔ́ ɖó. Yě mɛ énɛ́ lɛ́ɛ e lɔ mɛ è zě akwɛ́ ɔ́ dó lɛ́ɛ ɔ́, è ba do nú lě e yě ɖo axɔ́ sú azɔ̌watɔ́ lɛ́ɛ gbɔn wɛ é ǎ, ɖó yě nɔ́ hízí nǔ ǎ. Akwɛ́ e mɛ e hu hwɛ lɛ́ɛ wá ná nú hwɛxɔ́súsúvɔ́ kpó hwɛsɔ́kɛmɛvɔ́ kpó ɔ́, è bɛ̌ ɖěbǔ dó gbǎ ɔ́ mɛ ǎ. Vɔ̌sánú-xwlémawutɔ́ lɛ́ɛ tɔn wɛ akwɛ́ énɛ́ ɔ́ nyí. Hwenɛ́nu ɔ́, axɔ́sú Silíi tɔn Hazayɛ́li wá tɔ́n ahwan Gati toxo ɔ́ bó yí, lobo lɛ́ jló ná tɔ́n ahwan Jeluzalɛ́mu toxo ɔ́. Axɔ́sú Judáa tɔn Joasi bɛ́ nǔ e tɔ́gbó tɔn Judáa xɔ́sú Jozafáti kpó Yexolámu kpó Akaziasi kpó sɔ́ ɖó vo nú Mawu lɛ́ɛ bǐ, bó bɛ́ ée é ɖésú sɔ́ ɖó vo nú Mawu lɛ́ɛ d'é jí. É bɛ́ siká e ɖo dɔkun e ɖo Mawu Mavɔmavɔ xwé gbe ɔ́ mɛ lɛ́ɛ kpó ée ɖo hɔnmɛ lɛ́ɛ kpó. É bɛ́ nǔ énɛ́ lɛ́ɛ bǐ sɛ́ dó Silíi xɔ́sú Hazayɛ́li, bɔ é sɔ́ wá tɔ́n ahwan Jeluzalɛ́mu toxo ɔ́ ǎ. È wlǎn axɔ́sú Joasi sín tan e kpo lɛ́ɛ dó “Judáa xɔ́sú lɛ́ɛ sín Tan wéma” mɛ. Joasi sín azaglɔ́gán lɛ́ɛ fɔ́n gǔ, bó yi kpá dó Joasi wú, lobo hu i ɖo Bɛti-Milóo ɖo Sila sín ali jí. Mɛsɛntɔ́ Yozavadi Cimɛyati ví ɔ́ kpó Yexozavadi Comɛ́ɛ ví ɔ́ kpó wɛ hu i. È zě cyɔ tɔn yi ɖi ɖo fí e è ɖi tɔ́gbó tɔn lɛ́ɛ ɖó é, ɖo Davídi Toxo mɛ, bɔ vǐ tɔn Amasiyasi ɖu axɔ́sú ɖó tɛn tɔn mɛ. Hwenu e axɔ́sú Judáa tɔn Joasi Akaziasi ví ɔ́ ɖo xwe ko-nukún-atɔn bló wɛ ɖo zinkpo jí ɔ́, Yoakázi Jehu ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú nú xwe afɔtɔn-nukún-we. É wa nǔ e má nyɔ́ Mawu Mavɔmavɔ nukún mɛ ǎ é. É gɔn hwɛ e Jelobowámu Nɛvati ví ɔ́ hu bó dɔn Izlayɛ́li to ɔ́ d'é mɛ lɛ́ɛ hu ǎ. Énɛ́ ɔ́, Mawu Mavɔmavɔ sin xomɛ dó Izlayɛ́linu lɛ́ɛ, bó jó yě nú Hazayɛ́li Silíi xɔ́sú ɔ́ kpódó vǐ tɔn Bɛni-Hadadi kpó, bɔ yě ɖu ɖo Izlayɛ́linu lɛ́ɛ jí xɔ xwe mɔ̌kpán. Lo ɔ́, Yoakázi sa vo nú Mawu Mavɔmavɔ ɖɔ é ní fá xomɛ. Bɔ Mawu Mavɔmavɔ yí gbe nú ɖɛ tɔn, ɖó é mɔ lě e Silíi xɔ́sú ɔ́ ɖo Izlayɛ́linu lɛ́ɛ sín nǔ wa gbɔn wɛ é. Énɛ́ ɔ́, Mawu Mavɔmavɔ sɛ́ gbɛxɔnúmɛtɔ́ ɖokpó dó Izlayɛ́linu lɛ́ɛ, bɔ é wá ɖe yě sín Silíinu lɛ́ɛ sín acɛ mɛ, bɔ ayi yětɔn jɛ ayǐ lě e yě kó ɖe gbɔn ɖ'ayǐ é. Amɔ̌, yě lɛ́ kɔ sín hwɛ e mɛ Jelobowámu kpó mɛ tɔn lɛ́ɛ kpó dɔn Izlayɛ́li to ɔ́ dó lɛ́ɛ é gúdo ǎ. Yě lɔ kpo ɖo ali énɛ́ ɔ́ jí káká bɔ vodún Acela kpo ɖo te ɖo Samalíi toxo ɔ́ mɛ. Mawu jó nǔɖé dó nú Yoakázi zɛ sɔ́xátɔ́ kanɖé wǒ (50), kɛkɛ́ví wǒ, kpódó ahwanfuntɔ́ e nɔ zɔn afɔ é děgba we afɔwó (10.000) kpó wú ǎ. Đó Silíi xɔ́sú ɔ́ hu mɛ ɖě lɛ́ɛ, bó gbídí yě ɖó afɔ wú kɔ́gúdu ɖɔhun. È wlǎn axɔ́sú Yoakázi sín tan e kpo lɛ́ɛ, nǔ e é wa lɛ́ɛ, kpó akɔ́nkpinkpan e é ɖó ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ. Yoakázi zán wá kú bɔ è sɔ́ ɛ yi ɖó Samalíi, bɔ vǐ tɔn Yexoázi ɖu axɔ́sú ɖó tɛn mɛ. Hwenu e axɔ́sú Judáa tɔn Joasi Akaziasi ví ɔ́ ɖo xwe gbantɔ́n-nukún-we (37) bló wɛ ɖo zinkpo jí ɔ́, Yexoázi Yoakázi ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú nú xwe afɔtɔn-nukún-ɖokpó. É wa nǔ e má nyɔ́ Mawu Mavɔmavɔ nukún mɛ ǎ é: é gɔn hwɛ e Jelobowámu Nɛvati ví ɔ́ hu bo dɔn Izlayɛ́li to ɔ́ d'é mɛ lɛ́ɛ hu ǎ. È wlǎn axɔ́sú Yexoázi sín tan e kpo lɛ́ɛ: nǔ e é wa lɛ́ɛ, akɔ́nkpinkpan e é ɖó, bó fun ahwan xá axɔ́sú Judáa tɔn Amasiyasi é kpó dó “Izlayɛ́li xɔ́sú lɛ́ɛ sín Tan wéma” mɛ. Yexoázi zán wá kú bɔ è sɔ́ ɛ yi ɖó Samalíi ɖo axɔ́sú Izlayɛ́li tɔn lɛ́ɛ sín yɔdo mɛ, bɔ vǐ tɔn Jelobowámu ɖu axɔ́sú ɖó tɛn tɔn mɛ. Hwenu e axɔ́sú Izlayɛ́li tɔn Yexoázi kpo ɖo gbɛ ɔ́, Elizée ɖo azɔn e ná kplá ɛ yi kú ɔ́ jɛ wɛ, bɔ axɔ́sú ɔ́ yi gɔ̌n tɔn, bó nya dó akɔ́n tɔn nu, bó wlí avǐ bó ɖɔ: “Daá! Daá! Ali e nu a ɖe nú Izlayɛ́li ɔ́ syɛ́n hú ahwankɛkɛ́ví Izlayɛ́li tɔn lɛ́ɛ bǐ kpó sɔ́ tɔn lɛ́ɛ bǐ kpó.” Elizée ɖɔ n'i ɖɔ: “Zě da ɖokpó, bó fɔ gǎ d'é jí.” Énɛ́ ɔ́, Yexoázi ɖɔ bɔ è zě da ɖokpó, bó fɔ gǎ d'é jí wá n'i. Bɔ Elizée ɖɔ n'i ɖɔ: “Tlɔ́ gǎ ɔ́.” Ée axɔ́sú ɔ́ tlɔ́ gǎ ɔ́, Elizée bɛ́ alɔ ɖó alɔ tɔn lɛ́ɛ jí bó ɖɔ: “Bo hun flɛtɛ́li e ɖo zǎnzǎnhwe jí ɔ́.” É hun flɛtɛ́li ɔ́, bɔ Elizée ɖɔ n'i ɖɔ: “Da!” Ée Yexoázi da gǎ ɔ́, Elizée ɖɔ n'i ɖɔ: “Gǎ énɛ́ ɔ́ xlɛ́ ɖɔ Mawu Mavɔmavɔ ná ná ɖuɖéjí mǐ ɖo Silíinu lɛ́ɛ jí.” A nǎ ɖu ɖo Silíinu lɛ́ɛ jí, ɖo Afɛ́ki bó ná vívá kún yětɔn. Elizée lɛ́ ɖɔ nú axɔ́sú ɔ́ ɖɔ: “Fɔ gǎ e kpo lɛ́ɛ.” Ée é ɖɔ mɔ̌ ɔ́, axɔ́sú ɔ́ fɔ gǎ lɛ́ɛ, bɔ Elizée ɖɔ n'i ɖɔ: “Zin dó kɔ́ mɛ.” Bɔ é zin dó kɔ́ mɛ azɔn atɔn bo nɔ te. Gbeyíɖɔ Mawu tɔn ɔ́ sin xomɛ dó e, bó ɖɔ n'i ɖɔ: “Ényí ganjí wɛ ɔ́, azɔn atɔ́ɔ́n abǐ ayizɛ́n wɛ a nǎ kó zin dó kɔ́ mɛ. Ényí mɔ̌ wɛ a ko bló ɔ́, a nǎ ɖu ɖo Silíinu lɛ́ɛ jí bó vívá kún yětɔn. Amɔ̌, din ɔ́, azɔn atɔn jɛ́n a nǎ ɖu ɖo yě jí.” Énɛ́ ɔ́ gúdo ɔ́, Elizée kú bɔ è ɖi i. Hwenɛ́nu ɔ́, Mɔwabunu ajotɔ́ ɖé lɛ́ɛ nɔ́ dó ahwan gbě, bó nɔ́ byɔ́ Izlayɛ́li to ɔ́ mɛ xwewú xwewú tɛgbɛ. Mɛ ɖé lɛ́ɛ ka xwe cyɔ ɖi gbé gbe ɖokpó, bó xo go Mɔwabunu lɛ́ɛ sín gbɛ̌ta ɖokpó. Yě zé cyɔ e yě hɛn ɔ́ nyi dó yɔdo e mɛ è ɖi Elizée dó ɔ́ lobo hɔn. Ée cyɔ ɔ́ jɛ Elizée sín xú wú é ɔ́, cyɔ ɔ́ fɔ́n lobo sí te. Axɔ́sú Silíi tɔn Hazayɛ́li dó ya nú Izlayɛ́linu lɛ́ɛ ɖésú hwenu e Yoakázi ɖo axɔ́súzinkpo jí é. Lo ɔ́, nǔ yětɔn wá jɛ wǔ blá nú Mawu Mavɔmavɔ jí, bɔ é sɔ́ hwɛ yětɔn lɛ́ɛ kɛ yě ɖó akɔ e é kó jɛ xá Ablaxámu, bó jɛ xá Izáki, bo jɛ xá Jakɔ́bu ɔ́ wú. É gbɛ́ ɖɔ émí kún ná sú kún yětɔn dó ó. Bɔ káká jɛ égbé din ɔ́, é nya yě dó gbě ǎ. Hazayɛ́li Silíi xɔ́sú ɔ́ zán wá kú, bɔ vǐ tɔn Bɛni-Hadadi ɖu axɔ́sú ɖó tɛn tɔn mɛ. Ée Hazayɛ́li zán kú tlóló ɔ́, Yexoázi, Yoakázi ví ɔ́ yí toxo e Hazayɛ́li yí sín tɔ́ tɔn sí lɛ́ɛ. Azɔn atɔn wɛ Yexoázi ɖu ɖo Bɛni-Hadadi jí bó yí toxo lɛ́ɛ. Hwenu e Izlayɛ́li xɔ́sú Yexoázi Yoakázi ví ɔ́ ɖo xwe we bló wɛ ɖo zinkpo jí ɔ́, Amasiyasi Joasi Judáa xɔ́sú ví ɔ́ yi axɔ́súzinkpo Judáa tɔn jí. Xwe koatɔ́n (25) wɛ é ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yexoadini. É nɔ wa nǔ e nyɔ́ Mawu Mavɔmavɔ nukún mɛ é. Amɔ̌, é wa nǔ sɔ tɔ́gbó tɔn Davídi ǎ. Lě e tɔ́ tɔn Joasi wa nǔ gbɔn ɔ́ wɛ é bló gbɔn pɛ́pɛ́pɛ́. Nǔ ka ɖo mɔ̌ có vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌ sá wɛ bó ɖo zǎlínkpɔ́n dó zo wɛ gbɔn fí énɛ́ lɛ́ɛ. Ée Amasiyasi sín acɛkpikpa jínjɔ́n ayǐ bǐ é ɔ́, é hu azaglɔ́gán e hu tɔ́ tɔn lɛ́ɛ é. Amɔ̌, é ɖó alɔ vǐ yětɔn lɛ́ɛ ɖěbǔ wú ǎ. É bló lě e é ɖe gbɔn ɖo Mɔyízi sín sɛ́nwéma mɛ ɔ́, ɖó Mawu Mavɔmavɔ ɖɔ dó wěma ɔ́ mɛ ɖɔ: “È nǎ hu tɔ́ ɖó vǐ tɔn nu ǎ. È nǎ hu vǐ ɖó tɔ́ tɔn nu ǎ. Mɛ e wa nǔ nyi do é wɛ è nǎ hu, ɖó nǔ e é wa ɔ́ nu.” Amasiyasi wɛ lɛ́ hu Edɔ́munu děgba we afɔwó (10.000) ɖo Jɛtɔdo ɔ́ mɛ, bó yí Sɛla toxo ɔ́ hwenu e yě ɖo ahwan ɔ́ fun wɛ é, bó sun nyǐ toxo ɔ́ ɖɔ Yokiteɛ́li; nyǐkɔ énɛ́ kpo ɖo te káká jɛ égbé. Énɛ́ ɔ́ gúdo ɔ́, Amasiyasi sɛ́ mɛ dó Yexoázi Yoakázi ví, Jehu vívú Izlayɛ́li xɔ́sú ɔ́ ɖɔ yě nǐ yi ɖɔ n'i ɖɔ: “Wǎ nú mǐ nǎ fun ahwan.” Bɔ Yexoázi ɖɔ sɛ́ dó Amasiyasi ɖɔ: “Wunkan byɔ́ vǐ sɛ́dlutín ɖo Libáan só jí, bó ná da nú vǐ tɔn; gběkanlin ɖokpó ká gbɔn wunkan ɔ́ jí bó gbídí. Ée a ɖu ɖo Edɔ́munu lɛ́ɛ jí é ɔ́, a jɛ afɔ tɛ ayǐ jí. Susu énɛ́ e a xɔ ɔ́ ní kpé we bónú a nɔ fí e a ɖe ɔ́. Étɛ́wú a jlǒ ná dó ta ahwan e mɛ hwi kpó Judáanu lɛ́ɛ kpó bǐ ná yi dɔn ɖe ɔ́ mɛ?” Lo ɔ́, Amasiyasi wlí tó xó énɛ́ wú ǎ. Bɔ axɔ́sú Izlayɛ́li tɔn Yexoázi kpódó Amasiyasi kpó fun ahwan ɖo Bɛti-Cɛmɛ́ci ɖo Judáa yíkúngban jí. Izlayɛ́linu lɛ́ɛ ɖu ɖo Judáanu lɛ́ɛ jí, bɔ Judáanu lɛ́ɛ ɖokpó ɖokpó hɔn yi xwé. Izlayɛ́li xɔ́sú Yexoázi wlí Judáa xɔ́sú Amasiyasi Joasi ví, Akaziasi vívú ɔ́ ɖo Bɛti-Cɛmɛ́ci bó kplá ɛ yi Jeluzalɛ́mu. Ée é kplá ɛ yi Jeluzalɛ́mu é ɔ́, é mu Jeluzalɛ́mu sín ahohó ɔ́ sín Eflayímu hɔntogbó ɔ́ jí káká wá jɛ Zwemɛhɔntogbó ɔ́ jí. Fí e é mu dǒ ɔ́ gbɔn ɔ́ yi mɛ̌tlu afɔɖé (200) mɔ̌. É bɛ́ siká kpó kpatágan kpó, kpó nǔ xɔ akwɛ́ tɛnmɛ tɛnmɛ kpó e ɖo Mawu Mavɔmavɔ xwé gbe lɛ́ɛ, kpó ée ɖo dɔkunxɔ axɔ́sú ɔ́ tɔn mɛ lɛ́ɛ kpó. É bɛ́ mɛ e è wlǐ ɖó gbanu lɛ́ɛ lɔmɔ̌, bó lɛ́ kɔ ɖidó Samalíi. È wlǎn axɔ́sú Yexoázi sín tan e kpo lɛ́ɛ, nǔ e é wa lɛ́ɛ, akɔ́nkpinkpan e é ɖó ɔ́, kpó ahwan e é fun xá axɔ́sú Judáa tɔn Amasiyasi ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ. Axɔ́sú Yexoázi zán wá kú bɔ è sɔ́ ɛ yi ɖó Samalíi ɖo axɔ́sú Izlayɛ́li tɔn lɛ́ɛ sín yɔdo mɛ, bɔ vǐ tɔn Jelobowámu ɖu axɔ́sú ɖó tɛn tɔn mɛ. Ée Izlayɛ́li xɔ́sú Yexoázi zán kú é ɔ́, Judáa xɔ́sú Amasiyasi nɔ gbɛ xɔ xwe afɔtɔn. È wlǎn axɔ́sú Amasiyasi sín tan e kpo lɛ́ɛ dó “Judáa xɔ́sú lɛ́ɛ sín Tan wéma” mɛ. Lě e Amasiyasi kú gbɔn ɔ́ ɖíe: È blǎ gbě tɔn ɖo Jeluzalɛ́mu. É wá su gbe ɖokpó bɔ é hɔn yi cí Lakíci toxo mɛ, amɔ̌, è tɔ́n gbě tɔn káká yi Lakíci dɔ̌n bo hu i. È sɔ́ cyɔ tɔn ɖó kɛkɛ́ví mɛ, bɔ sɔ́ gěgé dɔn, bɔ è wǎ ɖi i ɖo Jeluzalɛ́mu ɖo tɔ́gbó tɔn lɛ́ɛ sín yɔdo mɛ ɖo Davídi Toxo mɛ. Judáa to ɔ́ bǐ zě Oziyási ɖó tɔ́ tɔn Amasiyasi tɛn mɛ. Xwe afɔtɔn-nukún-ɖokpó ɖó wɛ é ɖe hwenɛ́nu. Ée Oziyási tɔ́ kú ɔ́, é wɛ lɛ́ vɔ́ Eyilati toxo ɔ́ yí bó blóɖó. Hwenu e axɔ́sú Judáa tɔn Amasiyasi, Joasi ví ɔ́ ɖo xwe afɔtɔn bló wɛ ɖo axɔ́súzinkpo Judáa tɔn jí ɔ́, Jelobowámu axɔ́sú Izlayɛ́li tɔn Yexoázi ví ɔ́ yi axɔ́súzinkpo Izlayɛ́li tɔn jí ɖo Samalíi. É ɖu axɔ́sú káká nú xwe kanɖé-nukún-ɖokpó (41). É nɔ wa nǔ e má nyɔ́ Mawu Mavɔmavɔ nukún mɛ ǎ é. É lɛ́ kɔ sín hwɛ e Jelobowámu Nɛvati ví ɔ́ hu bó dɔn Izlayɛ́li to ɔ́ d'é mɛ lɛ́ɛ gúdo ǎ. É lɛ́ vɔ́ ayǐkúngban Izlayɛ́li tɔn lɛ́ɛ yí sín Lɛbo-Hamáti toxo mɛ ɖo totaligbé káká yi Xu Kúkú ɔ́ kɔn ɖo tofɔligbé. Nǔ énɛ́ e Jelobowámu bló ɔ́ sɔgbe xá xó e Mawu Mavɔmavɔ, Mawu Izlayɛ́li tɔn ɖɔ gbɔn gbeyíɖɔ tɔn Jonási jí é. Jonási ɔ́, Amitayi Gati-Hefɛ́ɛnu ɔ́ ví wɛ. Nǔ cí mɔ̌, ɖó Mawu Mavɔmavɔ mɔ lě do e Izlayɛ́linu lɛ́ɛ sín nǔ blǎ wǔ sɔ é. Mɛ ɖěbǔ ɖe bó ná hwlɛ́n Izlayɛ́linu lɛ́ɛ gán ǎ, xɛ ɖe bó ná wá hwlɛ́n yě gán ǎ. Lo ɔ́, Mawu Mavɔmavɔ ɖɔ émí kún ná vívá Izlayɛ́linu lɛ́ɛ kún sín hwe glɔ́ fí ó. Énɛ́ ɔ́ wú wɛ é hwlɛ́n Izlayɛ́li gán gbɔn Jelobowámu Yexoázi ví ɔ́ jí. È wlǎn axɔ́sú Jelobowámu sín tan e kpo lɛ́ɛ dó “Izlayɛ́li xɔ́sú lɛ́ɛ sín Tan wéma” mɛ: nǔ e é wa lɛ́ɛ, akɔ́nkpinkpan e é ɖó ɖo ahwangbénu ɔ́, kpó lě e é zé Damási toxo ɔ́ kpó Hamáti toxo ɔ́ kpó jó nú Izlayɛ́li gbɔn ɔ́ kpó ɔ́, è wlǎn bǐ d'é mɛ; Damási toxo ɔ́ kpó Hamáti toxo ɔ́ kpó ɔ́, Judáa tɔn wɛ yě nyí ɖ'ayǐ. Jelobowámu zán wá kú bɔ è sɔ́ ɛ ɖó Izlayɛ́li xɔ́sú lɛ́ɛ sín yɔdo mɛ ɖo Samalíi, bɔ vǐ tɔn Zakalíi ɖu axɔ́sú ɖó tɛn tɔn mɛ. Hwenu e axɔ́sú Izlayɛ́li tɔn Jelobowámu ɖo xwe koatɔ́n-nukún-we (27) bló wɛ ɖo zinkpo jí ɔ́, Oziyási Amasiyasi ví ɔ́ yi axɔ́súzinkpo Judáa tɔn jí. Xwe afɔtɔn-nukún-ɖokpó wɛ é ɖó bó yi axɔ́súzinkpo Judáa tɔn jí ɖo Jeluzalɛ́mu. É ɖu axɔ́sú káká nú xwe kanɖé wěwe (52). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yekolia. É nɔ wa nǔ e nyɔ́ Mawu Mavɔmavɔ nukún mɛ é. Lě e tɔ́ tɔn Amasiyasi wa nǔ gbɔn ɔ́ wɛ é bló gbɔn pɛ́pɛ́pɛ́. Nǔ ka ɖo mɔ̌ có vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌ sá wɛ, bó ɖo zǎlínkpɔ́n dó zo wɛ gbɔn fí énɛ́ lɛ́ɛ. Mawu Mavɔmavɔ sɛ́ azɔn baɖabaɖa ɖé dó Oziyási: é bɛ́ gudu bɔ gudu ɔ́ nɔ wǔtu tɔn mɔ̌ káká jɛ gbe e gbe é kú é. Hwenu e é ɖo azɔn ɔ́ jɛ wɛ ɔ́, è sɔ́ ɛ yi ɖó xwé ɖé gbe ɖo zɔ nú mɛ bǐ, bó sɔ́ vǐ tɔn Yotámu e kpa acɛ ɖo hɔnmɛ ɔ́ ɖó axɔ́súɖuto ɔ́ bǐ nu. È wlǎn axɔ́sú Oziyási sín tan e kpo lɛ́ɛ kpó nǔ e é wa lɛ́ɛ kpó dó “Judáa xɔ́sú lɛ́ɛ sín Tan wéma” mɛ. Oziyási zán wá kú, bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Yotámu ɖu axɔ́sú ɖó tɛn tɔn mɛ. Hwenu e axɔ́sú Judáa tɔn Oziyási ɖo xwe gbantɔ́n-nukún-atɔn (38) bló wɛ ɖo axɔ́súzinkpo jí ɔ́, Zakalíi Jelobowámu ví ɔ́ yi axɔ́súzinkpo Izlayɛ́li tɔn jí ɖo Samalíi, bó ɖu axɔ́sú nú sun ayizɛ́n. É wa nǔ e ma nyɔ́ Mawu Mavɔmavɔ nukún mɛ ǎ é tɔ́gbó tɔn lɛ́ɛ ɖɔhun. É gɔn hwɛ e Jelobowámu Nɛvati ví ɔ́ hu, bó dɔn Izlayɛ́li to ɔ́ d'é mɛ lɛ́ɛ hu ǎ. Calúmu Yavɛ́ci ví ɔ́ blá Zakalíi gbé bó hu i ɖo agbawungba, bó jɛ tɛn tɔn mɛ. È wlǎn axɔ́sú Zakalíi sín tan e kpo lɛ́ɛ dó “Izlayɛ́li xɔ́sú lɛ́ɛ sín Tan wéma” mɛ. Lě e nǔ e Mawu Mavɔmavɔ ɖɔ nú Jehu ɔ́ jɛ gbɔn é nɛ́. Mawu Mavɔmavɔ ɖɔ n'i ɖɔ: “Vǐ towe, vǐvú towe, vitikli towe kpó kpaba towe kpó ná yi axɔ́súzinkpo Izlayɛ́li tɔn jí.” Hwenu e axɔ́sú Judáa tɔn Oziyási ɖo xwe gbantɔ́n-nukún-ɛnɛ (39) bló wɛ ɖo zinkpo jí ɔ́, Calúmu Yavɛ́ci ví ɔ́ yi axɔ́súzinkpo Izlayɛ́li tɔn jí ɖo Samalíi bó ɖu axɔ́sú nú sun ɖokpó. Mɛnahɛmu Gadíi ví ɔ́ gosín Tíisa, bó wá Samalíi, lobo hu Calúmu, bó jɛ tɛn tɔn mɛ. È wlǎn axɔ́sú Calúmu sín tan e kpo lɛ́ɛ, kpódó Zakalíi gbé e é blá ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ. Énɛ́ ɔ́ gúdo wɛ Mɛnahɛmu tɔ́n ahwan Tifusáxi toxo ɔ́, bó hu mɛ e ɖo toxo ɔ́ mɛ lɛ́ɛ, lobo vɔ mɛ e ɖo Tíisa gbé jí lɛ́ɛ káká yi Tifusáxi. É tɔ́n ahwan toxo ɔ́ ɖó è hun toxo ɔ́ sín hɔntogbó lɛ́ɛ n'i ǎ. É zɛ xoxónɔ e ɖo toxo ɔ́ mɛ lɛ́ɛ bǐ sín adɔgo. Hwenu e axɔ́sú Oziyási ɖo xwe gbantɔ́n-nukún-ɛnɛ (39) bló wɛ ɖo axɔ́súzinkpo Judáa tɔn jí ɔ́, Mɛnahɛmu Gadíi ví ɔ́ yi axɔ́súzinkpo Izlayɛ́li tɔn jí ɖo Samalíi, bó ɖu axɔ́sú nú xwe wǒ. É wa nǔ e ma nyɔ́ Mawu Mavɔmavɔ nukún mɛ ǎ é káká yi kú. É gɔn hwɛ e Jelobowámu Nɛvati ví ɔ́ hu, bó dɔn Izlayɛ́li to ɔ́ d'é mɛ lɛ́ɛ hu ǎ. Axɔ́sú Asilíi tɔn Púlu wá to ɔ́ mɛ, bɔ Mɛnahɛmu ná ɛ kpatágan tɔ́nu gban, bónú é ná dó alɔ ɛ, bónú acɛkpikpa tɔn ná jínjɔ́n ayǐ. Dɔkunnɔ e ɖo Izlayɛ́li lɛ́ɛ sí wɛ Mɛnahɛmu yí kpatágan énɛ́ lɛ́ɛ ɖe, bó bɛ́ nú Asilíi xɔ́sú ɔ́. Kpatágan kanɖé wǒ (50) wɛ dɔkunnɔ ɖokpó ɖokpó ná. Ée è zě kpatágan ɔ́ nú Asilíi xɔ́sú é ɔ́, é lɛ́ kɔ yi to tɔn mɛ, é sɔ́ nɔ te Izlayɛ́li ǎ. È wlǎn axɔ́sú Mɛnahɛmu sín tan e kpo lɛ́ɛ kpó nǔ e é wa lɛ́ɛ kpó dó “Izlayɛ́li xɔ́sú lɛ́ɛ sín Tan wéma” mɛ. Mɛnahɛmu zán wá kú, bɔ vǐ tɔn Pekaxíya ɖu axɔ́sú ɖó tɛn tɔn mɛ. Hwenu e Oziyási ɖo axɔ́sú ɖu wɛ ɖo Judáa ɔ́, xwe tɔn kanɖé wǒgɔ́ (50) ɔ́ mɛ ɔ́, Pekaxíya, Mɛnahɛmu ví ɔ́ yi axɔ́súzinkpo Izlayɛ́li tɔn jí ɖo Samalíi, bó ɖu axɔ́sú nú xwe we. É wa nǔ e ma nyɔ́ Mawu Mavɔmavɔ nukún mɛ ǎ é. É gɔn hwɛ e Jelobowámu Nɛvati ví ɔ́ hu, bó dɔn Izlayɛ́li to ɔ́ d'é mɛ lɛ́ɛ hu ǎ. Pekáxi Hlemaliyahu ví ahwangán Pekaxíya tɔn ɔ́ blá gbě tɔn, bó tɔ́n ahwan ɛ ɖo Samalíi ɖo xɔ ɖokpó mɛ, ɖo hɔnmɛ, bó hu i; é hu Aagɔ́vu kpó Aliyé kpó lɔmɔ̌. Galadinu kanɖé wǒ (50) wɛ é kplá dó éɖée jí bó yi fun ahwan ɔ́. Mɔ̌ wɛ é hu Pekaxíya gbɔn, bó ɖu axɔ́sú ɖó tɛn tɔn mɛ. È wlǎn axɔ́sú Pekaxíya sín tan e kpo lɛ́ɛ kpó nǔ e é wa lɛ́ɛ bǐ kpó dó “Izlayɛ́li xɔ́sú lɛ́ɛ sín Tan wéma” mɛ. Hwenu e Oziyási ɖo xwe kanɖé wěwe (52) bló wɛ ɖo axɔ́súzinkpo Judáa tɔn jí ɔ́, Pekáxi Hlemaliyahu ví ɔ́ yi axɔ́súzinkpo Izlayɛ́li tɔn jí ɖo Samalíi bo ɖu axɔ́sú nú xwe ko. É nɔ́ wa nǔ e má nyɔ́ Mawu Mavɔmavɔ nukún mɛ ǎ é. É gɔn hwɛ e Jelobowámu hu bo dɔn Izlayɛ́li to ɔ́ d'é mɛ lɛ́ɛ hu ǎ. Hwenu e Pekáxi ɖo axɔ́sú ɖu wɛ ɖo Izlayɛ́li ɔ́, Asilíi xɔ́sú Tiglati-Pilesɛ́ɛ wá tɔ́n ahwan ɛ, bó yí toxo gěgé: é yí Iyɔ́ni, Avɛ́li-Bɛti-Maaka, Yanɔwáxi, Kedɛ́ci kpó Hasɔ́ɔ kpó, bó yí Galadi yíkúngban ɔ́ kpó Galilée yíkúngban ɔ́ kpó bó yí Nɛfutali to ɔ́ bǐ. É bɛ́ mɛ e gbɔn fí énɛ́ lɛ́ɛ bǐ yi Asilíi. Ozée Ela ví ɔ́ blá Pekáxi sín gbě bo hu i, bó ɖu axɔ́sú ɖó tɛn tɔn mɛ. Yotámu Oziyási ví ɔ́ ɖo xwe ko bló wɛ ɖo axɔ́súzinkpo Judáa tɔn jí hwenɛ́nu. È wlǎn axɔ́sú Pekáxi sín tan e kpo lɛ́ɛ kpó nǔ e é wa lɛ́ɛ bǐ kpó dó “Izlayɛ́li xɔ́sú lɛ́ɛ sín Tan wéma” mɛ. Hwenu e axɔ́sú Izlayɛ́li tɔn Pekáxi, Hlemaliyahu ví ɔ́ ɖo xwe we bló wɛ ɖo zinkpo jí ɔ́, Yotámu, Oziyási ví ɔ́ yi axɔ́súzinkpo Judáa tɔn jí. Xwe koatɔ́n (25) wɛ é ɖó bó yi zinkpo jí ɖo Jeluzalɛ́mu, lobo ɖu axɔ́sú nú xwe afɔtɔn-nukún-ɖokpó. È nɔ ylɔ́ nɔ tɔn ɖɔ Yeluca; Sadɔ́ku ví wɛ. É nɔ wa nǔ e nyɔ́ Mawu Mavɔmavɔ nukún mɛ é. Lě e tɔ́ tɔn Oziyási wa nǔ gbɔn ɔ́ wɛ é bló gbɔn pɛ́pɛ́pɛ́. Nǔ ka ɖo mɔ̌ có vɔ̌sákpe e gbɔn só jí só jí lɛ́ɛ kpo ɖo te. Togun ɔ́ lɛ́ kpo ɖo vɔ̌ sá wɛ, bó ɖo zǎlínkpɔ́n dó zo wɛ gbɔn fí énɛ́ lɛ́ɛ. Yotámu wɛ bló hɔntogbó aga tɔn e ɖo Mawu Mavɔmavɔ xwé ɔ́ nu é. È wlǎn axɔ́sú Yotámu sín tan e kpo lɛ́ɛ kpó nǔ e é wa lɛ́ɛ bǐ kpó dó “Judáa xɔ́sú lɛ́ɛ sín Tan wéma” mɛ. Hwenu e Yotámu ɖo axɔ́súzinkpo jí ɔ́ wɛ Mawu Mavɔmavɔ jɛ axɔ́sú Asilíi tɔn Hlesini kpódó axɔ́sú Izlayɛ́li tɔn Pekáxi kpó sɛ́ dó Judáa to ɔ́ mɛ jí, bɔ yě nɔ́ yi fun ahwan xá Judáa to ɔ́. Yotámu zán wá kú bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ, ɖo tɔ́gbó tɔn Davídi Toxo mɛ, bɔ vǐ tɔn Akázi ɖu axɔ́sú ɖó tɛn tɔn mɛ. Hwenu e Pekáxi Hlemaliyahu ví ɔ́ ɖo xwe afɔtɔn-nukún-we bló wɛ ɖo axɔ́súzinkpo Izlayɛ́li tɔn jí ɔ́, Akázi Yotámu ví ɔ́ yi axɔ́súzinkpo Judáa tɔn jí. Xwe ko wɛ Akázi ɖó bó nyí axɔ́sú, bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe afɔtɔn-nukún-ɖokpó. É ká wa nǔ e má nyɔ́ Mawu Mavɔmavɔ nukún mɛ ǎ é. É bló lě e tɔ́gbó tɔn Davídi bló gbɔn ɖ'ayǐ é ǎ. É wa nǔ axɔ́sú Izlayɛ́li tɔn lɛ́ɛ ɖɔhun. Akɔta e Mawu Mavɔmavɔ nya bo yí ayǐkúngban yětɔn nú Izlayɛ́li lɛ́ɛ ɔ́, é xwedó walɔ baɖabaɖa e yě nɔ́ zán lɛ́ɛ káká bó sɔ́ vǐ tɔn dó sá vɔ̌ ná. É nɔ́ zé kanlin kpó zǎlínkpɔ́n kpó dó sá vɔ̌ gbɔn vɔ̌sákpe e gbɔn só jí só jí lɛ́ɛ jí, gbɔn kpó lɛ́ɛ jí, gbɔn atín e dó ama lɛ́ɛ sá. Énɛ́ ɔ́, axɔ́sú Silíi tɔn Hlesini kpódó axɔ́sú Izlayɛ́li tɔn Pekáxi Hlemaliyahu ví ɔ́ kpó sɔ́ nǔ, bó tɔ́n ahwan Jeluzalɛ́mu toxo ɔ́. Yě ján go dó Akázi; yě ká kpé wú bó ɖu ɖo jǐ tɔn ǎ. Hwenɛ́nu ɖokpó ɔ́, Silíi xɔ́sú Hlesini nya Judáanu lɛ́ɛ sín Eyilati, bó sɔ́ toxo ɔ́ ɖó Silíinu lɛ́ɛ sín acɛ mɛ, bɔ Edɔ́munu lɛ́ɛ wá cí Eyilati, bó kpo ɖo fínɛ́ káká jɛ égbé. Akázi sɛ́ mɛ dó axɔ́sú Asilíi tɔn Tiglati-Pilesɛ́ɛ, nú è yi ɖɔ n'i ɖɔ: “Mɛsɛntɔ́ towe wɛ un nyí, acɛ towe mɛ wɛ un ɖe. Axɔ́sú Silíi tɔn kpó axɔ́sú Izlayɛ́li tɔn kpó tɔ́n ahwan mì. Wǎ hwlɛ́n mì ɖo yě sí.” Ée Akázi ɖɔ mɔ̌ ɔ́, é bɛ́ siká kpó kpatágan kpó e ɖo Mawu Mavɔmavɔ xwé gbe é kpó ée ɖo dɔkun e ɖo hɔnmɛ lɛ́ɛ kpó, bó bɛ́ jó nú mɛ e é sɛ́ dó lɛ́ɛ, bɔ yě bɛ́ yi jó nú axɔ́sú Asilíi tɔn. Axɔ́sú Asilíi tɔn ɔ́ bló nǔ e axɔ́sú Akázi ɖɔ sɛ́ dó e é, bó yi tɔ́n ahwan Damási toxo ɔ́, bó yí lobo bɛ́ mɛ e ɖ'é mɛ lɛ́ɛ yi Kíi, bó hu Hlesini. Énɛ́ ɔ́ gúdo ɔ́, axɔ́sú Akázi yi Damási axɔ́sú Asilíi tɔn Tiglati-Pilesɛ́ɛ gɔ́n. É mɔ vɔ̌sákpe e ɖo vodún xwé ɖo Damási ɔ́, bó sɛ́ ɖiɖe tɔn kpó jlɛ̌ tɔn kpó dó vɔ̌sánú-xwlémawutɔ́ Wuliya ɖo Jeluzalɛ́mu. Wuliya bló vɔ̌sákpe ɔ́, bɔ é sɔgbe xá jlɛ̌ e axɔ́sú Akázi nɔ Damási bo sɛ́ dó é. É bló vɔ̌sákpe ɔ́ fó cóbɔ Akázi lɛ́ kɔ sín Damási wá. Ée Akázi gosín Damási wá ɔ́, é mɔ vɔ̌sákpe ɔ́ bó sɛkpɔ́. É dó vɔ̌ e è nɔ dó zo ɔ́ kpó nǔníná linfín tɔn kpó zo ɖo vɔ̌sákpe ɔ́ jí. É ba ahan ɖ'é jí; é kɔn kanlin e é hu dó sá kɔnɖókpɔ́vɔ́ ná lɛ́ɛ sín hun dó vɔ̌sákpe ɔ́ jí. Akázi ɖe vɔ̌sákpe e è zě ganvɔ dó bló ná, bɔ é ɖo fínɛ́ ɖ'ayǐ ɔ́ síin. É jló nú vɔ̌sákpe énɛ́ ɔ́ ní nɔ vɔ̌sákpe yɔ̌yɔ́ ɔ́ kpó Mawu Mavɔmavɔ xwé ɔ́ kpó tɛ́ntin ǎ. É zé yi ɖó vɔ̌sákpe yɔ̌yɔ́ ɔ́ gúdo ɖo xwé ɔ́ sín taligbé. Axɔ́sú Akázi ɖɔ nú vɔ̌sánú-xwlémawutɔ́ Wuliya ɖɔ: “Bɛ́ sín din ɔ́, vɔ̌sákpe ɖaxó ɔ́ wɛ a nǎ nɔ́ zán, bó ná nɔ dó vɔ̌ e è nɔ dó zo zǎnzǎn ɔ́ kpó nǔníná gbadanu tɔn kpó zo ɖ'é jí, bó ná dó axɔ́sú ɔ́ sín vɔ̌ e è nɔ dó zo ɔ́ kpó nǔníná linfín tɔn kpó zo ɖ'é jí, bó ná nɔ dó vɔ̌ e togun ɔ́ nɔ́ dó zo kpó nǔníná linfín tɔn kpó zo ɖ'é jí. A nǎ nɔ kɔn ahan yětɔn yětɔn d'é jí. A nǎ nɔ kɔn kanlin e è dǒ zo lɛ́ɛ sín hun dó vɔ̌sákpe ɔ́ jí, bó ná nɔ kɔn kanlin e è dó sá vɔ̌ ná lɛ́ɛ sín hun d'é jí. Vɔ̌sákpe e è zě ganvɔ dó bló ná ɔ́, nyɛ ɖésúnɔ ná ɖɔ lě e è nǎ zǎn gbɔn é.” Vɔ̌sánú-xwlémawutɔ́ Wuliya wa nǔ lě e axɔ́sú Akázi zɔ́n gbɔn é bǐ. Bɔ axɔ́sú Akázi já ganvɔ gbajagbaja e ɖo Mawu Mavɔmavɔ xwé ɔ́ sín kɛkɛ́ví lɛ́ɛ wú lɛ́ɛ, bó ɖe basya e ɖo kɛkɛ́ví lɛ́ɛ jí lɛ́ɛ síin. É ɖe basya ɖaxó tobotobo e ɖo nyibúsú wěwe e è zě ganvɔ dó bló ná lɛ́ɛ jí é síin, lobo zé ɖó kɔ́ mɛ fí e è tɛ́ kpé ɖó é. Bo ná dó nyɔ́ ɖo axɔ́sú Asilíi tɔn sí ɔ́, axɔ́sú Akázi ɖyɔ́ “Gbɔjɛzángbasá” e ɖo Mawu Mavɔmavɔ xwé gbe é, bó lɛ́ ɖyɔ́ “Axɔ́sú Hɔnli” ɔ́. È wlǎn axɔ́sú Akázi sín tan e kpo lɛ́ɛ kpó nǔ e é wa lɛ́ɛ kpó dó “Judáa xɔ́sú lɛ́ɛ sín Tan wéma” mɛ. Akázi zán wá kú bɔ è sɔ́ ɛ ɖó tɔ́gbó tɔn lɛ́ɛ sín yɔdo mɛ ɖo tɔ́gbó tɔn Davídi Toxo mɛ, bɔ vǐ tɔn Ezekiyási ɖu axɔ́sú ɖó tɛn tɔn mɛ. Hwenu e axɔ́sú Akázi ɖo axɔ́sú ɖu wɛ ɖo Judáa ɔ́, xwe tɔn wěwe gɔ́ ɔ́ mɛ ɔ́, Ozée Ela ví ɔ́ yi axɔ́súzinkpo Izlayɛ́li tɔn jí ɖo Samalíi bo ɖu axɔ́sú nú xwe tɛ́nnɛ. É wa nǔ e má nyɔ́ Mawu Mavɔmavɔ nukún mɛ ǎ é, é ká wa nǔ nyanya sɔ axɔ́sú Izlayɛ́li tɔn e jɛ nukɔn n'i lɛ́ɛ é ǎ. Asilíi xɔ́sú Salumanasáa tɔ́n ahwan Ozée; Ozée gbɔ bó hwíhwɛ́ éɖée ɖó glɔ̌ tɔn bó jɛ nǔjɔ ná ɛ jí xwewú xwewú. Ée é wá yá ɔ́, axɔ́sú Ozée jɛ gbě blá dó Asilíi xɔ́sú ɔ́ wú jí: é sɛ́ mɛ dó Ejípu xɔ́sú ɔ́ ɖo Sayisi ɖɔ émí kún sɔ́ ɖo nǔjɔ e émí nɔ sú Asilíi xɔ́sú ɔ́ xwewú xwewú ɔ́ ɖěbǔ ná sú wɛ ó. Ée Asilíi xɔ́sú ɔ́ se mɔ̌ ɔ́, é wlí Ozée sú dó gankpá mɛ. Énɛ́ ɔ́ gúdo ɔ́, é tɔ́n ahwan Izlayɛ́li to ɔ́ bǐ, bó xá Samalíi toxo ɔ́ nú xwe atɔn. Xwe tɛ́nnɛ bló wɛ Ozée ɖe ɖo zinkpo jí hwenɛ́nu bɔ Asilíi xɔ́sú ɔ́ yí Samalíi toxo ɔ́, bó wlí Izlayɛ́linu lɛ́ɛ yi Asilíi. É bɛ́ mɛ ɖě ɖó Halaxi gbé jí bó bɛ́ mɛ ɖě ɖó Gozáni gbé jí, fí e Habɔ́ɔ tɔ ɔ́ ɖe é, bó bɛ́ mɛ ɖě ɖó Mɛdi sín toxo lɛ́ɛ mɛ. È ɖe Izlayɛ́li ví lɛ́ɛ sín to yětɔn mɛ, ɖó yě hu hwɛ dó Mawu Mavɔmavɔ, Mawu yětɔn e kplá yě sín Ejípu, bɔ yě gosín Ejípu xɔ́sú ɔ́ sín acɛ mɛ é. Awě énɛ́ ɔ́ xo yě, ɖó yě nɔ́ sɛn vodún. Akɔta e Mawu Mavɔmavɔ nya bó yí ayǐkúngban yětɔn nú yě lɛ́ɛ sín walɔ nyanya lɛ́ɛ wɛ Izlayɛ́li togun ɔ́ nɔ xwedó; yě nɔ́ lɛ́ xwedó walɔ nyanya e axɔ́sú Izlayɛ́li tɔn lɛ́ɛ dɔn wá to ɔ́ mɛ lɛ́ɛ. Izlayɛ́li ví lɛ́ɛ jɛ nǔ e è ma ɖó ná bló ǎ lɛ́ɛ bló nú Mawu Mavɔmavɔ, Mawu yětɔn jí. Yě ɖǒ vodún xwé lɛ́ɛ ayǐ gbɔn toxo yětɔn lɛ́ɛ bǐ mɛ, bɛ́ sín gletoxo kpɛví kpɛví lɛ́ɛ jí káká yi toxo e è mɛ ahohó lɛ́ lɛ̌ dó lɛ́ɛ bǐ jí. Yě tun awǐnnya kpó vodún Acela kpó te gbɔn só lɛ́ɛ bǐ jí bó tun gbɔn atín e dó ama lɛ́ɛ bǐ sá. Yě nɔ́ sá vɔ̌ gbɔn vodún xwé e gbɔn só jí só jí lɛ́ɛ bǐ, lě e akɔta e Mawu Mavɔmavɔ nya bo yí ayǐkúngban yětɔn nú yě lɛ́ɛ nɔ bló gbɔn é. Yě nɔ́ dó nǔ baɖabaɖa lɛ́ɛ sin dó dó xomɛsin nú Mawu Mavɔmavɔ. Yě sɛn vodún; Mawu Mavɔmavɔ ka ko dó sɛ́n tɔn nú yě. Mawu Mavɔmavɔ ka ko ɖɔ nú Izlayɛ́li to ɔ́ kpó Judáa to ɔ́ kpó, gbɔn gbeyíɖɔ tɔn tɛnmɛ tɛnmɛ lɛ́ɛ bǐ jí ɖɔ: “Mi jó walɔ mitɔn baɖabaɖa lɛ́ɛ dó; mi nyi sɛ́n ce lɛ́ɛ, bó wa nǔ e un ɖɔ lɛ́ɛ. Nǔ énɛ́ lɛ́ɛ ɖo sɛ́n e un ná tɔ́gbó mitɔn lɛ́ɛ mɛ, bó lɛ́ ɖo xó e un ɖɔ nú mi gbɔn mɛsɛntɔ́ ce gbeyíɖɔ lɛ́ɛ jí é mɛ.” Lo ɔ́, yě wlí tó nǔ e ɖɔ nú yě wɛ gbeyíɖɔ lɛ́ɛ ɖe ɔ́ wú ǎ. Yě tlí tó tɔ́gbó yětɔn lɛ́ɛ ɖɔhun. Tɔ́gbó yětɔn lɛ́ɛ ɖi nǔ nú Mawu Mavɔmavɔ, Mawu yětɔn ǎ. Yě hɔn Mawusɛ́n lɛ́ɛ nyi gbě, akɔ e é jɛ xá tɔ́gbó yětɔn lɛ́ɛ kpó nǔ e é ɖɔ lɛ́ɛ kpó ɔ́, yě hɔn nyi gbě. Yě nɔ́ ɖo wezun jí ɖo nǔ yǎyá lɛ́ɛ gúdo káká bó sɔ́ nyí nǔɖéwanú ǎ. Yě lɛ́ ɖo wezun jí ɖo akɔta e lɛ́ dó yě bɔ Mawu Mavɔmavɔ gbɛ́ nú yě ɖɔ yě ma wa nǔ yě ɖɔhun ó lɛ́ɛ gúdo. Yě dó vɛ̌ nú sɛ́n e Mawu Mavɔmavɔ, Mawu yětɔn dó nú yě lɛ́ɛ bǐ, yě sínsín gan dó bló nyibúví sín bǒcyɔ we ná. Yě bló vodún Acela. Yě jɛ kpo bó ɖe kɔ́ nú nǔɖíɖó jǐxwé tɔn lɛ́ɛ, yě sɛn vodún Baalu. Yě zě vǐ yětɔn súnnu kpó nyɔ̌nu kpó dó sá vɔ̌. Yě bló majíki tɛnmɛ tɛnmɛ. Yě kpo nú nǔ e má nyɔ́ Mawu Mavɔmavɔ nukún mɛ ǎ lɛ́ɛ wiwa, bó dó xomɛsin n'i. Énɛ́ ɔ́, Mawu Mavɔmavɔ sin xomɛ dó Izlayɛ́linu lɛ́ɛ ɖésú, lobo nya yě dó gbě, bɔ é kpo akɔta Judáa tɔn ɔ́ kɛ́ɖɛ́. Judáa lɔ ka nyi Mawu Mavɔmavɔ, Mawu tɔn sín sɛ́n lɛ́ɛ ǎ, lobo nɔ xwedó walɔ nyanya e Izlayɛ́linu lɛ́ɛ dɔn wá to ɔ́ mɛ lɛ́ɛ. Énɛ́ ɔ́ wú wɛ Mawu Mavɔmavɔ ɖe alɔ sín Izlayɛ́li ví lɛ́ɛ bǐ sín kanmɛ. É jó yě nú mɛvɔtɔ́ lɛ́ɛ, bɔ wi yětɔn kɔ́n; é nya yě dó gbě. Ée Mawu Mavɔmavɔ ɖe Izlayɛ́li yíkúngban ɖó vo nú axɔ́súɖuto e Davídi ɖó ayǐ é ɔ́, Izlayɛ́linu lɛ́ɛ zé Jelobowámu Nɛvati ví ɔ́ axɔ́sú. Énɛ́ ɔ́, Jelobowámu ɖe sísí e yě ɖó nú Mawu Mavɔmavɔ ɔ́ sín ayi mɛ nú yě, bɔ yě jɛ hwɛ baɖabaɖa lɛ́ɛ hu dó Mawu Mavɔmavɔ jí. Bɛ́ sín hwenɛ́nu ɔ́, Izlayɛ́linu lɛ́ɛ gɔn hwɛ e Jelobowámu hu lɛ́ɛ ɖěbǔ hu ǎ. Wǎgbɔ wǎgbɔ ɔ́, Mawu Mavɔmavɔ sɔ́ jló ná mɔ yě ɖó nukún wú ǎ, bó jó yě, bɔ è bɛ̌ yě yi Asilíi. Fínɛ́ wɛ yě kpo ɖe káká jɛ égbé. Lě e nǔ e Mawu Mavɔmavɔ ɖɔ gbɔn mɛsɛntɔ́ tɔn gbeyíɖɔ lɛ́ɛ jí ɔ́ jɛ gbɔn é nɛ́. Axɔ́sú Asilíi tɔn ylɔ́ mɛ sín Babilɔ́nu, sín Kúti, sín Awa, sín Hamáti, sín Sefáawayímu, bo zé yě ɖó Izlayɛ́linu lɛ́ɛ tɛnmɛ ɖo Samalíi toxo lɛ́ɛ mɛ. Samalíi to ɔ́ húzú yětɔn, bɔ yě jɛ agban ɖó toxo lɛ́ɛ mɛ. Ée yě wá jɛ toxo lɛ́ɛ mɛ bó cí fínɛ́ é ɔ́, yě nɔ́ ɖó sísí ɖěbǔ nú Mawu Mavɔmavɔ ǎ, bɔ Mawu Mavɔmavɔ sɛ́ kinnikínní dó, bɔ kinnikínní jɛ yě hu jí. È yi ɖɔ nú axɔ́sú Asilíi tɔn ɖɔ: “Mɛ e a wlǐ hɛn yi, bɔ yě wǎ jɛ Samalíi lɛ́ɛ ɔ́, yě tunwun lě e è nɔ sɛn nǔmɛsɛn e ɖo to ɔ́ mɛ é gbɔn é ǎ, bɔ é sɛ́ kinnikínní dó, bɔ kinnikínní ɖo yě hu wɛ.” Ée axɔ́sú ɔ́ se mɔ̌ ɔ́, é ná gbe ɖɔ: “Mi yi kplá vɔ̌sánú-xwlémawutɔ́ e è wlǐ sín Samalíi hɛn yi lɛ́ɛ ɖokpó wá, bónú é wá cí to ɔ́ mɛ, bó ná kplɔ́n lě e è nɔ sɛn nǔmɛsɛn e ɖo to ɔ́ mɛ ɔ́ gbɔn ɔ́ yě.” È yi kplá vɔ̌sánú-xwlémawutɔ́ e è wlǐ hɛn yi lɛ́ɛ ɖokpó wá, bɔ é yi cí Betɛ́li, bó jɛ lě e yě ɖó ná ɖó sísí nú Mawu Mavɔmavɔ gbɔn é kplɔ́n yě jí. Lo ɔ́, mɛ e wá jɛ to ɔ́ mɛ lɛ́ɛ lí vodún yětɔn yětɔn ɖó toxo e mɛ yě mɛ ɖokpó ɖokpó ɖe lɛ́ɛ mɛ. Yě lǐ vodún lɛ́ɛ ɖó vodún xwé e Samalíinu xóxó lɛ́ɛ lí gbɔn só jí só jí lɛ́ɛ gbe. Vodún e Babilɔ́nunu lɛ́ɛ bló ɔ́ nɔ nyí Sukɔ́tu-Bɛnɔti; Kútinu lɛ́ɛ tɔn nyí Nɛ̌ɛgali, Hamátinu lɛ́ɛ tɔn nyí Acima. Ée Awanu lɛ́ɛ bló ɔ́ nɔ nyí Nibuxázi, ɖěvo nɔ nyí Taatáku. Sefáawayímunu lɛ́ɛ nɔ zé vǐ yětɔn lɛ́ɛ dó sá vɔ̌ nú vodún yětɔn Adlamɛlɛ́ki kpó Anamɛlɛ́ki kpó. Yě nɔ́ sɛn Mawu Mavɔmavɔ lɔmɔ̌, bó cyán mɛ e ná nɔ sá vɔ̌ nú yě nú Mawu lɛ́ɛ gbɔn fí bǐ. Yě mɛ énɛ́ lɛ́ɛ ná nɔ wa azɔ̌ nú yě gbɔn goxɔ e yě bló nú Mawu gbɔn vodún xwé e gbɔn só jí só jí lɛ́ɛ é gbe. Yě nɔ́ ɖo Mawu Mavɔmavɔ sɛn wɛ, bó nɔ lɛ́ ɖo vodún yětɔn lɛ́ɛ sɛn wɛ lě e yě kó nɔ bló gbɔn sín do ɖo to yětɔn mɛ é. Vǐ yětɔn lɛ́ɛ kpo ɖo walɔ xóxó énɛ́ lɛ́ɛ zán wɛ káká jɛ égbé din: yě nɔ́ ɖó sísí nú Mawu Mavɔmavɔ ǎ, yě nɔ́ nyi sɛ́n e yě ɖésú dó lɛ́ɛ ǎ, yě sɔ́ ɖo tɔ́gbó yětɔn lɛ́ɛ sín kan fɔ wɛ ganjí ǎ. Yě nɔ́ nyi sɛ́n e Mawu Mavɔmavɔ dó nú tɔ́gbó yětɔn Jakɔ́bu ví lɛ́ɛ ɔ́ ǎ, yě ká nɔ xwedó nǔ e é zɔ́n yě lɛ́ɛ ǎ. Jakɔ́bu ɔ́ wɛ Mawu Mavɔmavɔ sun nyǐ ɖɔ Izlayɛ́li. Mawu Mavɔmavɔ jɛ akɔ xá yě, bó dó sɛ́n nú yě ɖɔ: “Mi ma ɖó sísí nú vodún ó, mi ma jɛ kpo nú vodún ó, mi ma sɛn vodún ó, mi ma ka xwlé vɔ̌sánú vodún ó. Lo ɔ́, nyɛ Mawu Mavɔmavɔ wɛ mi ná ɖó sísí ná. Nyɛ wɛ zé hlɔ̌nhlɔ́n kpó acɛkpikpa kpó dó ɖe mi sín Ejípu. Nyɛ wɛ mi ná jɛ kpo ná, nyɛ wɛ mi ná xwlé vɔ̌sánú mitɔn lɛ́ɛ. Ayǐhɔ́ngbe ayǐhɔ́ngbe ɔ́, mi ná nɔ xwedó tito ce lɛ́ɛ, nǔ e un zɔ́n mi lɛ́ɛ, gbeta e un ɖe tɔ́n lɛ́ɛ kpó sɛ́n ce lɛ́ɛ kpó. Bǐ wɛ un wlǎn nú mi. Midɛɛ lɛ́ɛ ɔ́, mi ɖó ná ɖó sísí nú vodún ǎ. Mi ma wɔn akɔ e un jɛ xá mi é ó, mi ma ɖó sísí nú vodún ó. Lo ɔ́, nyɛ Mawu Mavɔmavɔ, Mawu mitɔn wɛ mi ɖó ná ɖó sísí ná. Đó nyɛ ɖokpó géé wɛ sixú hwlɛ́n mi ɖo kɛntɔ́ mitɔn lɛ́ɛ bǐ sí.” Mɛ énɛ́ lɛ́ɛ ka se tónú ǎ, yě kpo ɖo walɔ yětɔn xóxó lɛ́ɛ zán wɛ. Yě nɔ́ ɖo Mawu Mavɔmavɔ sɛn wɛ, bó ka nɔ lɛ́ ɖo vodún yětɔn lɛ́ɛ sɛn wɛ. Bɔ káká jɛ égbé din ɔ́, vǐ yětɔn lɛ́ɛ kpó vǐvú yětɔn lɛ́ɛ kpó kpo ɖo nǔ wa wɛ tɔ́gbó yětɔn lɛ́ɛ ɖɔhun. Hwenu e Ozée Ela ví ɔ́ ɖo xwe atɔn bló wɛ ɖo zinkpo jí ɖo Izlayɛ́li ɔ́, Ezekiyási Akázi ví ɔ́ ɖu axɔ́sú ɖo Judáa. Xwe koatɔ́n (25) wɛ é ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). Nɔ tɔn nɔ nyí Avi, bó nyí Zekaliya ví. É nɔ́ wa nǔ e nyɔ́ Mawu Mavɔmavɔ nukún mɛ ɔ́ tɔ́gbó tɔn Davídi ɖɔhun pɛ́pɛ́pɛ́. É gba vɔ̌sákpe e gbɔn só jí só jí lɛ́ɛ bǐ, bó gba awǐnnya e yě tun te bo nɔ sɛn lɛ́ɛ, bó sɛ́n vodún Acela. Dan e Mɔyízi sɔ́ ganvɔ dó bló ná ɔ́, é gba hánnyá, ɖó káká wá jɛ hwenɛ́nu ɔ́, Izlayɛ́li ví lɛ́ɛ kpo ɖo zǎlínkpɔ́n dó zo nú dan énɛ́ ɔ́ wɛ. È nɔ ylɔ́ dan ɔ́ ɖɔ Nɛxucitáni. Ezekiyási ɖeji dó Mawu Mavɔmavɔ, Mawu Izlayɛ́li tɔn wú. Axɔ́sú e jɛ nukɔn n'i ɖo Judáa lɛ́ɛ kpó ée wá jɛ gǔdo tɔn lɛ́ɛ kpó ɖě wa nǔ é ɖɔhun ǎ. É zunfán Mawu Mavɔmavɔ syɛ́nsyɛ́n, é jó e dó kpɛɖé ǎ, é nɔ nyi sɛ́n e Mawu Mavɔmavɔ dó nú Mɔyízi lɛ́ɛ é bǐ. Mawu Mavɔmavɔ ɖo kpɔ́ xá Ezekiyási, bɔ é sɔ́ nǔɖé bó wa ɔ́, é nɔ mɔ nu tɔn. É fɔ́n gǔ dó axɔ́sú Asilíi tɔn jí, bó gosín acɛ tɔn mɛ. É gba Filisitɛ́ɛn lɛ́ɛ, bó nya yě káká yi Gaza. É yí to yětɔn, bɛ́ sín gletoxo kpɛví kpɛví lɛ́ɛ jí káká yi toxo e è mɛ ahohó lɛ́ lɛ̌ dó lɛ́ɛ jí. Hwenu e Ezekiyási ɖo xwe ɛnɛ bló wɛ ɖo zinkpo jí ɖo Judáa, bɔ Ozée Ela ví ɔ́ ká ɖo xwe tɛ́nwe bló wɛ ɖo zinkpo jí ɖo Izlayɛ́li ɔ́, Salumanasáa Asilíi xɔ́sú ɔ́ wá tɔ́n ahwan Samalíi toxo ɔ́, bó xá. Xwe atɔn wɛ é sɔ́ ɖó te bo dó yí toxo ɔ́; hwenɛ́nu ɔ́, Ezekiyási Judáa xɔ́sú ɔ́ ɖo xwe ayizɛ́n bló wɛ ɖo zinkpo jí, bɔ Ozée Izlayɛ́li xɔ́sú ɔ́ ɖo xwe tɛ́nnɛ bló wɛ. Asilíi xɔ́sú ɔ́ wlí Izlayɛ́linu lɛ́ɛ hɛn yi Asilíi. É bɛ́ mɛ ɖě ɖó Halaxi gbé jí, bó bɛ́ ɖě ɖó Gozáni gbé jí, fí e Habɔ́ɔ tɔ ɔ́ ɖe é, bó bɛ́ mɛ ɖě ɖó Mɛdi toxo lɛ́ɛ mɛ. Nǔ énɛ́ ɔ́ gbo Izlayɛ́linu lɛ́ɛ, ɖó yě ɖótó Mawu Mavɔmavɔ, Mawu yětɔn sín xó ǎ, yě nɔ gbejí nú akɔ e yě kpó Mawu yětɔn kpó jɛ é ǎ; sɛ́n e mɛsɛntɔ́ Mawu Mavɔmavɔ tɔn Mɔyízi ná yě lɛ́ɛ ɔ́, yě nyi ɖě ǎ. Hwenu e Ezekiyási ɖo xwe wǒ-ɛnɛ bló wɛ ɖo zinkpo jí ɔ́, Senakelíbu Asilíi xɔ́sú ɔ́ wá tɔ́n ahwan Judáa toxo e è mɛ ahohó lɛ́ lɛ̌ dó lɛ́ɛ bǐ, bó yí. Énɛ́ ɔ́, Ezekiyási Judáa xɔ́sú ɔ́ ɖɔ sɛ́ dó Asilíi xɔ́sú ɔ́ ɖo Lakíci ɖɔ: “Un wa nǔ ɖokpó nyi do, ka kɛnklɛ́n bó jó mì dó. Énɛ́ ɔ́, a byɔ́ nǔ ɖěbǔ mì ɔ́, un ná ná.” Ée Asilíi xɔ́sú ɔ́ se mɔ̌ ɔ́, é ɖɔ sɛ́ dó Ezekiyási ɖɔ é ɖó ná ná kpatágan kilóo děgba we afatɔ́n (9.000), kpó siká kilóo afɛnɛ kanwe ko (900) kpó émí. Énɛ́ ɔ́, Ezekiyási bɛ́ kpatágan e ɖo Mawu Mavɔmavɔ xwé gbe é bǐ kpódó ée ɖo dɔkun e ɖo hɔnmɛ lɛ́ɛ mɛ é kpó jó. Hwenɛ́nu wɛ Ezekiyási kɔ́n siká e ɖo Mawu Mavɔmavɔ xwé ɔ́ sín hɔn lɛ́ɛ wú é kpó éé ɖo hɔnkpo lɛ́ɛ wú é kpó, bó bɛ́ sɛ́ dó Asilíi xɔ́sú ɔ́. Asilíi xɔ́sú ɔ́ nɔ Lakíci, bó sɛ́ mɛ dó axɔ́sú Ezekiyási ɖo Jeluzalɛ́mu. Mɛ e é sɛ́ dó lɛ́ɛ ɖíe: ahwangán ɖaxó bǐ ɔ́, ahwangán e kpa acɛ dó ahwangɔnu ɔ́ nu é kpó ahwangán e nɔ kplá axɔ́sú ɔ́ é kpó. Ahwangɔnu ɖaxó ɖé nu wɛ yě zɔn bó wá Jeluzalɛ́mu. Ée yě wá ɔ́, yě nɔ te ɖo ali e è nɔ gbɔn yi Avɔnyatɔ́ lɛ́ɛ gle mɛ ɔ́ jí ɖo fí e sindo e ɖo só ta ɔ́ sín sin nɔ gbɔn é kpá. Yě ylɔ́ axɔ́sú ɔ́, bɔ Eliyakímu Ilukyahu ví hɔnmɛgán ɔ́ yi, bɔ Cevúna wěgbójínɔtɔ́ ɔ́ kpó Yoáxi Asáfu ví wěgbóhɛntɔ́ ɔ́ kpó xwedó e. Énɛ́ ɔ́, ahwangán e nɔ kplá Asilíi xɔ́sú ɔ́ ɖɔ nú yě ɖɔ: “Mi ɖɔ nú Ezekiyási ɖɔ: ‘Nǔ e axɔ́sú ɖaxó Asilíi tɔn ɖɔ ɔ́ ɖíe: Étɛ́wú gán jɛ wɛ a ka ɖe tawun? È ja ahwan fun gbé ɔ́, wě tɔn wɛ è nɔ ɖe, bó nɔ́ ɖó akɔ́nkpinkpan. Hwɛ ka vɛdó ɖɔ xó kpowun wɛ nɔ fun ahwan sín. Mɛ̌ wú a ka ɖeji dó tawun bo fɔ́n gǔ dó jǐ ce? É ma nyí Ejípu wú wɛ a ɖeji dó a? Ejípu e nyí fántín lúlɔ́, bɔ mɛɖé gán jɛ wǔ tɔn ɔ́, é nɔ gbo alɔ nú mɛ ɔ́, bó nɔ́ byɔ́ lan tɔn mɛ ɔ́, é wú wɛ hwɛ ɖeji dó a? Mɔ̌ wɛ Ejípu xɔ́sú ɔ́ cí gbɔn nú mɛ e nɔ gán jɛ wǔ tɔn lɛ́ɛ bǐ. Mi ná ɖɔ nú mì din ɖɔ Mawu Mavɔmavɔ, Mawu émítɔn wú wɛ émí gán jɛ. É ma ká nyí hwi ɖésú Ezekiyási ɔ́ wɛ gba vɔ̌sákpe e gbɔn só jí só jí lɛ́ɛ, bó gba vɔ̌sákpe lɛ́ɛ, bó ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ yě ma sɔ́ jɛ kpo ɖo vɔ̌sákpe ɖěvo nukɔn zɛ Jeluzalɛ́mu tɔn wú ó a? Din ɔ́, nú a mɔ ɖɔ émí ná kpé nǔɖé wú hǔn, wǎ gbo gbě xá gǎn ce Asilíi xɔ́sú ɔ́. Nú a nǎ mɔ sɔ́xátɔ́ ɔ́, un ɖo gbesisɔ mɛ, bó ná ná we sɔ́ afɔwó (2.000). A ka sixú kpé gǎn ce sín ahwangán lɛ́ɛ ɖěbǔ wú ǎ; mɛ gǔdo gúdo tɔn e ɖo yě mɛ ɔ́, a sixú kpé wǔ tɔn ǎ. A ɖo ji ɖe ɖó dó Ejípu wú wɛ ɖɔ émí ná mɔ ahwankɛkɛ́ví kpó sɔ́xátɔ́ kpó. Nǔ e un ka ná kanbyɔ́ we lɔ ɔ́, Mawu Mavɔmavɔ mɛ vo wɛ un tɔ́n ahwan to élɔ́, bó ná gba wɛ a vɛdó a? Gbeɖé! Mawu Mavɔmavɔ ɖésú wɛ ɖɔ nú mì ɖɔ nyɛ ní wá tɔ́n ahwan to élɔ́ bó gba.’ ” Eliyakímu Ilukyahu ví ɔ́ kpó Cevúna kpó, kpó Yoáxi kpó ɖɔ nú ahwangán ɔ́ ɖɔ: “Kɛnklɛ́n, dǒ alamugbe nú mǐ, mǐ se gbe énɛ́ ɔ́ ganjí. Ma sɔ́ dó Ebléegbe ɖě nú mǐ ó, é má nyí mɔ̌ ǎ ɔ́, mɛ e ɖo ahohó ɔ́ ta lɛ́ɛ bǐ ɖo tó ɖó mǐ wɛ.” Ahwangán ɔ́ yí gbe nú yě ɖɔ: “Axɔ́sú mitɔn kpó midɛɛ lɛ́ɛ kpó kɛ́ɖɛ́ wú wɛ gǎn ce ɖɔ xó énɛ́ lɛ́ɛ sɛ́ dó wɛ mi vɛdó a? É má nyí mɛ énɛ́ lɛ́ɛ e ɖo ahohó ɔ́ ta fínɛ́ bɔ zaanɖé din ɔ́, yě ná jɛ mǐ nyɛ bó sɔ́ ɖu jí, bó jɛ aɖɔ̌ ɖɔ́ bó sɔ́ nu jí ɔ́ wɛ gǎn ce ɖɔ xó énɛ́ lɛ́ɛ sɛ́ dó a?” Ée ahwangán ɔ́ ɖɔ mɔ̌ ɔ́, é jlɔ́ bó sú xó, bó ɖɔ dó Ebléegbe mɛ ɖɔ: “Mi ɖótó xó e axɔ́sú ɖaxó, axɔ́sú Asilíi tɔn ɔ́ ɖɔ é. É ɖɔ: ‘Mi ma nú Ezekiyási flú mi ó, ɖó é sixú hwlɛ́n mi sín fɛn ce mɛ ǎ. É nɔ ɖɔ mi ní ɖeji dó Mawu Mavɔmavɔ wú, ɖɔ é ná hwlɛ́n mi dandan; é kún ná lɔn nú nyɛ Asilíi xɔ́sú ɔ́ ná yí to mitɔn ó, mi ma ɖótó xó tɔn ó. Mi ma ɖótó Ezekiyási ó, xó e nyɛ axɔ́sú Asilíi tɔn ɖɔ é wɛ mi ná ɖótó; Asilíi xɔ́sú ɔ́ ɖɔ: Mi gɔn nǔ xwe, bó wá jó ta nú mì, énɛ́ ɔ́, mɛ ɖokpó ɖokpó ná ɖu vǐwun tɔn, bó ná ɖu fígi tɔn, bó ná nu sin e ɖo tɔ tɔn mɛ é. Mi ná ɖ'é wú mɔ̌ káká bɔ un ná wá kplá mi yi to e cí to mitɔn ɖɔhun é mɛ; to e mɛ blěe kpó vɛ̌ɛn kpó ɖe é. To e mɛ wɔ̌xúxú kpó vǐwun kpó ɖe, bɔ olívu e nɔ ná ami ganjí ɔ́ ɖe, bɔ wǐin ɖe é mɛ. Énɛ́ ɔ́, mi ná nɔ gbɛ bó ná kú ǎ. Hǔn mi bo ma ɖótó Ezekiyási gbeɖé ó, ɖó é hɛn ɔ́, é ná blɛ́ mi bó ná ɖɔ Mawu Mavɔmavɔ ná hwlɛ́n mi gán. Akɔta ɖě lɛ́ɛ ɖě sín nǔmɛsɛn gbɛ́ nú nyɛ axɔ́sú Asilíi tɔn ɖɔ nyɛ ní má yí to yětɔn lɛ́ɛ ɖě ó a? Fítɛ́ vodún Hamáti tɔn kpó Aapadu tɔn ɔ́ kpó ká yi? Fítɛ́ vodún Sefáawayímu tɔn, Hena tɔn, kpó Iwa tɔn kpó ká yi? Fítɛ́ yě yi bɔ un yí to yětɔn? Yě kpé wú bó gbɛ́ nú mì bɔ un gɔn Samalíi to ɔ́ yí a? Vodún to énɛ́ lɛ́ɛ tɔn ɖě tɛ́ ká gbɛ́ nú mì ɖɔ nyɛ ní má yí to yětɔn ó, bɔ é ná nyí Mawu Mavɔmavɔ wɛ ná wá gbɛ́ nú mì ɖɔ nyɛ ní má yí Jeluzalɛ́mu toxo ɔ́ ó?’ ” Togun ɔ́ bǐ ká nɔ tóó; yě ɖɔ xó ɖokpó géé lě ǎ, ɖó axɔ́sú ɔ́ kó ɖɔ nú yě ɖɔ: “Mi ma kɛ nu d'é mɛ n'i ó.” Eliyakímu Ilukyahu ví hɔnmɛgán ɔ́ kpó Cevúna wěgbójínɔtɔ́ ɔ́ kpó, kpó Yoáxi Asáfu ví wěgbóhɛntɔ́ ɔ́ kpó ká vún awu dó kɔ nú yěɖée, bó wá Ezekiyási gɔ́n, bó ɖɔ xó e ahwangán Asilíi xɔ́sú ɔ́ tɔn ɖɔ lɛ́ɛ n'i. Ée axɔ́sú Ezekiyási se xó e ahwangán Asilíi xɔ́sú ɔ́ tɔn ɖɔ sɛ́ dó e ɔ́, é vún awu dó kɔ nú éɖée, bó sɔ́ caki dó, bó ɖidó Mawu Mavɔmavɔ xwé gbe. É sɛ́ Eliyakímu hɔnmɛgán ɔ́ kpó Cevúna wěgbójínɔtɔ́ ɔ́ kpó, kpódó mɛ e kó nyí vɔ̌sánú-xwlémawutɔ́ jɛ nukɔn ɖo yě mɛ e nyí vɔ̌sánú-xwlémawutɔ́ lɛ́ɛ kpó dó, bɔ yě dó ati, bó ɖidó gbeyíɖɔ Mawu tɔn Ezayíi Amɔ̌si ví ɔ́ gɔ́n, bónú yě jɛ dɔ̌n ɔ́, yě ná ɖɔ n'i ɖɔ: “Wɛn e axɔ́sú ɔ́ dó sɛ́ dó we é ɖíe: Azǎn égbé tɔn ɔ́, aluwɛzán ɖé wɛ, tódɔnnúmɛzán ɖé wɛ, bó nyí hɛ̌nzán. Mǐ cí nyɔ̌nu e jɛ flú mɛ, bó má ká ɖó hlɔ̌nhlɔ́n bó ná zɛn ǎ é ɖɔhun. Asilíi xɔ́sú ɔ́ sɛ́ ahwangán e nɔ kplá ɛ ɔ́ dó bɔ é wá zun Mawu gbɛɖe ɔ́. Kóóyi nya! Ényí Mawu Mavɔmavɔ, Mawu towe se zun énɛ́ lɛ́ɛ din bó dɔn tó n'i ɔ́, é ná nyɔ́ mɛ nya! Hwɛ ɔ́, bo xo ɖɛ nú mɛ e kpo ɖo togun ɔ́ mɛ lɛ́ɛ.” Mɛ e axɔ́sú Ezekiyási sɛ́ dó lɛ́ɛ yi dó wɛn ɔ́ Ezayíi, bɔ Ezayíi ɖɔ nú yě ɖɔ: “Mi yi ɖɔ nú gǎn mitɔn ɖɔ Mawu Mavɔmavɔ ɖɔ: ‘Xó énɛ́ lɛ́ɛ e a se ɔ́ ní ma dó xɛsi nú we ó. Xó énɛ́ lɛ́ɛ e azaglɔ́gán axɔ́sú Asilíi tɔn lɛ́ɛ ɖɔ dó ɖɔ slǎmɛ wǔ ce ɔ́, ní má dó xɛsi nú we ó. Axɔ́sú ɔ́ ná se xó ɖé, bɔ un ka ná ɖɔ dó ayi tɔn mɛ ɖɔ ní lɛ́ kɔ yi to tɔn mɛ. É jɛ dɔ̌n ɔ́, un ná zɔ́n bɔ è nǎ hu i.’ ” Ahwangán e nɔ kplá axɔ́sú ɔ́ se ɖɔ axɔ́sú Asilíi tɔn ko gosín Lakíci bo yi tɔ́n ahwan Livuna. Énɛ́ ɔ́, é yi mɔ ɛ ɖo dɔ̌n. Axɔ́sú Asilíi tɔn se xó ɖé dó Tilaka Etiopíi xɔ́sú ɔ́ wú. É se ɖɔ axɔ́sú énɛ́ ɔ́ sɔ́ nǔ, bó ná wá fun ahwan xá émí. Énɛ́ ɔ́, Asilíi xɔ́sú ɔ́ lɛ́ sɛ́ wɛn ɖěvo dó Ezekiyási, Judáa xɔ́sú ɔ́ ɖɔ: “A nɔ gán jɛ Mawu towe wú dín, ɖɔ é kún ná lɔn nú un ná yí Jeluzalɛ́mu ó, ma lɔn nú é blɛ́ we ó. A se lě e Asilíi xɔ́sú lɛ́ɛ wa to ɖě lɛ́ɛ bǐ sín nǔ gbɔn é, yě vívá kún yětɔn bǐ, bɔ hwɛ ka ná gán ɖ'é mɛ a? Hwenu e tɔ́gbó ce lɛ́ɛ gba Gozáni, Haláani, Hlɛsɛ́fu, kpó Telasáa tota Edɛ́ninu lɛ́ɛ tɔn kpó ɔ́, fí ɖě wɛ nǔmɛsɛn yětɔn lɛ́ɛ yi a? Fítɛ́ axɔ́sú Hamáti tɔn, axɔ́sú Aapadu tɔn, axɔ́sú Layíi tɔn, axɔ́sú Sefáawayímu tɔn, axɔ́sú Hena tɔn kpódó Iwa tɔn kpó ka ɖe égbé din?” Ezekiyási yí wěma ɔ́ ɖo mɛ e Asilíi xɔ́sú ɔ́ sɛ́ dó e lɛ́ɛ sí, bó xa, bó yi Mawu Mavɔmavɔ xwé gbe, bó vlɔ́n wěma ɔ́ ɖo nukɔn tɔn. Énɛ́ ɔ́ gúdo ɔ́, é jɛ ɖɛ xo jí ɖɔ: “Mawu Mavɔmavɔ, Mawu Izlayɛ́li tɔn e, hwi mɛ e ɖo ayǐjínjɔ́n ɖo akɔjijɛgbá ɔ́ jí, ɖo axɔ́súzinkpo towe jí é ɔ́, hwi ɖokpó géé wɛ nyí Mawu; hwi ɖokpó géé wɛ kpa acɛ nú axɔ́súɖuto e ɖo ayǐkúngban jí lɛ́ɛ bǐ. Hwi wɛ bló jǐ kpó do kpó. Mawu Mavɔmavɔ, ɖǒtó ganjí; kpɔ́n ganjí. Hwi Mawu gbɛɖe ɔ́, kpɔ́n lě do e mɛ e Senakelíbu sɛ́ dó lɛ́ɛ zun we sɔ é. Mawu Mavɔmavɔ, axɔ́sú Asilíi tɔn lɛ́ɛ vívá kún nú akɔta ɖě lɛ́ɛ, bó gba to yětɔn lɛ́ɛ, bó bɛ́ nǔmɛsɛn yětɔn lɛ́ɛ dó myɔ mɛ nǔgbó. Amɔ̌, nǔmɛsɛn yětɔn énɛ́ lɛ́ɛ cí hwi ɖɔhun ǎ. Nǔdówá gbɛtɔ́ lɛ́ɛ tɔn wɛ; atín kpó awǐnnya kpó wɛ bɔ yě vívá kún ná. Din ɔ́, Mawu Mavɔmavɔ, Mawu mǐtɔn, hwlɛ́n mǐ sín Senakelíbu sí, bónú axɔ́súɖuto e ɖo gbɛ ɔ́ mɛ lɛ́ɛ bǐ ná tunwun ɖɔ hwi Mawu Mavɔmavɔ ɔ́, hwi ɖokpó géé wɛ nyí Mawu.” Énɛ́ ɔ́, Ezayíi Amɔ̌si ví ɔ́ ɖɔ sɛ́ dó Ezekiyási ɖɔ: “Mawu Mavɔmavɔ, Mawu Izlayɛ́li tɔn ɔ́ ɖɔ: ‘Un se xó e a ɖɔ dó Asilíi xɔ́sú Senakelíbu wú dó ɖɛ mɛ é. Xó e nyɛ Mawu Mavɔmavɔ ɖɔ dó Senakelíbu wú ɔ́ ɖíe: Senakelíbu, ɖyɔ̌vǐ nyɔ̌nu ɖo alɔ jí Jeluzalɛ́mu ɖo tɛ́ hu nú we wɛ; é ɖo cícá we ko wɛ. Đyɔ̌vǐ Jeluzalɛ́mu nɔ kpɔ́n we bó nɔ́ húnhún ta. Senakelíbu, mɛ̌ a ka zun? Mɛ̌ a ka ba hǎ? Mɛ̌ ta a ka wa adǎn dó? Mɛ̌ a kpɔ́n wunvɔ? Nyɛ Mawu mímɛ́ Izlayɛ́li tɔn ɔ́ wɛ a? A sɛ́ mɛsɛntɔ́ towe lɛ́ɛ dó nyɛ Mawu Mavɔmavɔ ɔ́, bó zun mì sɛ́ dó ɖɔ: Nyɛ Senakelíbu byɔ́ ahwankɛkɛ́ví ce mɛ, un xá Libáan só lɛ́ɛ jí káká yi Libáan só e vɛ́ xá lɛ́ɛ bǐ jí, un gbo sɛ́dlutín tɔn e yi jǐ hú ɖě lɛ́ɛ bǐ é, un gbo siplɛ́tín tɔn e nyɔ́ ɖɛkpɛ hú ɖě lɛ́ɛ bǐ é. Un hun káká yi só tɔn gǔdo gúdo tɔn lɛ́ɛ jí, un yi zungbó tɔn e dó ganjí lɛ́ɛ mɛ. Un kun tɔ, bó nu to ɖěvo mɛ sin, un tɛ afɔ Ejípu to ɔ́ mɛ kpowun ɔ́, tɔsisa e ɖo to ɔ́ mɛ lɛ́ɛ bǐ ná xú.’ A tunwun ɖɔ nyɛ Mawu Mavɔmavɔ ɔ́, nyi wɛ ko to nǔ énɛ́ lɛ́ɛ bǐ ɖ'ayǐ sín do ǎ cé? Un kó tunwun sín do ɖɔ nǔ énɛ́ lɛ́ɛ ná jɛ. Din ɔ́, un jló ɖɔ nǔ énɛ́ lɛ́ɛ ní jɛ, bónú a nǐ gba toxo e è mɛ ahohó lɛ́ lɛ̌ dó lɛ́ɛ hánnyá. Mɛ e ɖo to énɛ́ lɛ́ɛ mɛ lɛ́ɛ kpé nǔɖé wú ǎ. Xɛsi jɛ yě jí. Winnyá hu yě. Yě cí gběhan e ɖo gle mɛ lɛ́ɛ ɖɔhun, yě cí gběhan e wú tlóló lɛ́ɛ ɖɔhun, yě cí gběhan wlɛ́wlɛ́ e nɔ wú ɖo xɔ ta é ɖɔhun, yě cí nǔkún e ma wú zinzin ǎ bó fyɔ́ é ɖɔhun. Amɔ̌, un tunwun hwenu e a nɔ jínjɔ́n ayǐ é. Un tunwun hwenu e a nɔ tɔ́n é. Un tunwun hwenu e a nɔ wá xwé gbe é. Un tunwun hwenu e a nɔ sin xomɛ dó mì é. A sin xomɛ dó mì, bó dó jimakplɔ́n gbe, bɔ é wá káká gɔ̌n ce. Énɛ́ ɔ́ wútu ɔ́, un nǎ dó gan awɔntín mɛ nú we, bó ná dó aja nu nú we, bó ná lɛ́ kɔ nú we gbɔn ali e a gbɔn wá é. “Amɔ̌, hwɛ ɔ́, Ezekiyási, nǔ e ná nyí xlɛ̌ nú we ɔ́ ɖíe: Xwe élɔ́ mɛ ɔ́, nǔkún flá lɛ́ɛ wɛ è nǎ ɖu; xwe wegɔ́ ɔ́ mɛ ɔ́, è nǎ ɖu nǔ ɖokpó ɔ́, amɔ̌, xwe atɔngɔ́ ɔ́ mɛ ɔ́, nǔ e mi ɖésúnɔ ná dó é wɛ mi ná ɖu. Mi ná dó nǔkún bó ná ya, mi ná tun vǐwun, bɔ é ná sɛ́n, bɔ mi ná ɖu. Mɛ e ná kpo ɖo gbɛ ɖo axɔ́súɖuto Judáa tɔn ɔ́ mɛ lɛ́ɛ ná dó ɖɔ do atín ɖɔhun, bó ná sɛ́n. Đó mɛɖé lɛ́ɛ ná kpo ɖo gbɛ, gbɛtɔ́ ná kpo ɖo gbɛ ɖo Jeluzalɛ́mu, Sinyɔ́ɔ só ɔ́ jí. “Nǔ e Mawu Mavɔmavɔ ná bló ɖo wǎn yíyí ɖaxó e é ɖó ɔ́ mɛ é nɛ́. Nǔ énɛ́ lɛ́ɛ wú wɛ Mawu Mavɔmavɔ ɖɔ xó élɔ́ dó axɔ́sú Asilíi tɔn wú: ‘É nǎ byɔ́ toxo élɔ́ mɛ ǎ; é ná da gǎ ɖo toxo ɔ́ mɛ ǎ; é ná zán gǎglónú tɔn ɖo toxo élɔ́ mɛ ǎ; é ná kplé kɔ́ bó nɔ gǔdo tɔn, bó tɔ́n ahwan toxo élɔ́ ǎ. Ali e é gbɔn bó wá é wɛ é ná gbɔn bó lɛ́ kɔ. É ná byɔ́ toxo élɔ́ mɛ ǎ. Nyɛ Mawu Mavɔmavɔ wɛ ɖɔ mɔ̌. Un ná cyɔ́n alɔ toxo élɔ́ jí, bó ná hwlɛ́n ɛ gán, ɖó Mawu wɛ un nyí; un ná bló mɔ̌, ɖó akpá e un dó nú mɛsɛntɔ́ ce Davídi é wú.’ ” Zǎn énɛ́ ɔ́ mɛ ɔ́, wɛnsagun Mawu Mavɔmavɔ tɔn ɖokpó tɔ́n, bó hu gbɛtɔ́ adɔ̌kpo tɛ́nnɛ děgba ɖě afatɔ́n (185.000) ɖo Asilíinu lɛ́ɛ sín ahwankpá mɛ. Ée ayǐ hɔ́n zǎnzǎn ɔ́, mɛ e kpo ɖo gbɛ lɛ́ɛ ná mɔ nǔɖé kpowun ɔ́, cyɔ yětɔn jɛ́n yě mɔ. Énɛ́ ɔ́, Senakelíbu Asilíi xɔ́sú ɔ́ sɔ́ nǔ kpó ahwangɔnu tɔn kpó, bó lɛ́ kɔ, bó yi cí Ninívu. Gbe ɖokpó tíin, bɔ Senakelíbu ɖo kɔ́ ɖe nú vodún tɔn Nislɔki ɔ́ wɛ, bɔ vǐ tɔn Adlamɛlɛ́ki kpó Salɛsɛ́ɛ kpó sɔ́ hwǐ i, bó hu i, bó hɔn yi Alaláti; ée é kú ɔ́, vǐ tɔn Asaaxadɔ́ɔn ɖu axɔ́sú ɖó tɛn tɔn mɛ. Hwenɛ́nu ɔ́, Ezekiyási wlí azɔn, bó ko ɖo kú lixo, bɔ gbeyíɖɔ Mawu tɔn Ezayíi Amɔ̌si ví ɔ́ wá gɔ̌n tɔn, bó ɖɔ n'i ɖɔ: “Xó e Mawu Mavɔmavɔ ɖɔ ɔ́ ɖíe: Nǔ ná nɔ́ gbɔn ɖě hǔn, ɖɔ nú mɛ towe lɛ́ɛ, ɖó azɔn élɔ́ e a wlǐ din ɔ́, a sɔ́ ná gán ɖ'é mɛ ǎ.” Ée é ɖɔ mɔ̌ n'i ɔ́, Ezekiyási húzú kpan nukɔn dǒ, bó xo ɖɛ ɖɔ: “Óo! Mawu Mavɔmavɔ, flín ɖɔ un nɔ gbejí ɖo nukɔn towe, bó wa azɔ̌ kpó ayijlɔ́jlɔ́ kpó, bó bló nǔ e nɔ nyɔ́ nukún towe mɛ lɛ́ɛ.” Ée é ɖɔ mɔ̌ ɔ́, é wlí avǐ bó ya ɖasin hoho. Ezayíi tɔ́n bó ɖidó. É ká ko yi kɔ́xota e ɖo hɔnmɛ ɔ́ tɛ́ntin é jí ǎ, bɔ Mawu Mavɔmavɔ ɖɔ n'i ɖɔ: “Lɛ̌ kɔ bo yi Ezekiyási e ɖo togun ce nu ɔ́ gɔ́n, bó ɖɔ n'i ɖɔ nyɛ Mawu Mavɔmavɔ, Mawu tɔ́gbó tɔn Davídi tɔn ɖɔ: ‘Un se ɖɛ towe, bó mɔ avǐ e ya wɛ a ɖe é. Kpɔ́n, un ná gbɔ azɔn nú we. Azǎn atɔn gbe ɔ́, a nǎ yi xwé ce gbe. Un ná dó xwe afɔtɔn xwe towe jí; un ná hwlɛ́n hwi kpó toxo élɔ́ kpó gán ɖo axɔ́sú Asilíi tɔn sí; un ná cyɔ́n alɔ toxo élɔ́ jí, ɖó Mawu wɛ un nyí; un ná bló mɔ̌, ɖó akpá e un dó nú mɛsɛntɔ́ ce Davídi é wú.’ ” Énɛ́ ɔ́, Ezayíi ɖɔ: “Mi li fígi bó mlí, bó ɖó akpa ɔ́ mɛ n'i.” È blǒ mɔ̌ bónú Ezekiyási sín azɔn ná gbɔ. Ée è blǒ mɔ̌ ɔ́, Ezekiyási kanbyɔ́ Ezayíi ɖɔ: “Étɛ́ ka ná xlɛ́ mì ɖɔ Mawu Mavɔmavɔ ná gbɔ azɔn nú mì, bɔ azǎn atɔn gbe ɔ́, un ná yi xwé tɔn gbe?” Ezayíi ɖɔ n'i ɖɔ: “Nǔ e ná ɖe xlɛ́ we ɖɔ Mawu Mavɔmavɔ ná gbɔ azɔn nú we ɔ́ ɖíe: yɛtɛn e nɔ jɛ Akázi sín kpekán jí ɔ́ ná sɛ tɛn afɔɖiɖe wǒ. A jlǒ ɖɔ é ní yi nukɔn a, abǐ é ní yi gǔdo?” Ezekiyási ka yí gbe n'i ɖɔ: “Yɛtɛn ná yi nukɔn ɔ́ vɛ́ wǔ ǎ, énɛ́ ɔ́ wú wɛ nyɛ ba ɖɔ ní yi gǔdo.” Ée é ɖɔ mɔ̌ ɔ́, Ezayíi xo ɖɛ bo byɔ́ Mawu Mavɔmavɔ bɔ Mawu Mavɔmavɔ dɔn yɛtɛn ɔ́ wá yi gǔdo afɔɖiɖe wǒ ɖo Akázi sín kpekán jí. Hwe énɛ́ nu ɖokpó ɔ́, Mɛlodaki-Baladáni, Baladáni ví, Babilɔ́nu xɔ́sú ɔ́ sɛ́ wěma dó Ezekiyási bo lɛ́ ná ɛ nǔ d'é jí, ɖó é se ɖɔ é jɛ azɔn. Ezekiyási yí mɛ e hɛn nǔ lɛ́ɛ wá lɛ́ɛ, bó kplá yě yi fí e nǔ xɔ akwɛ́ tɔn lɛ́ɛ ɖe é: kpatágan, siká, nǔhwɛ́nkún lɛ́ɛ, ami ɖagbe ɖagbe lɛ́ɛ, ahwanfunnú tɔn lɛ́ɛ; é xlɛ́ dɔkun tɔn lɛ́ɛ bǐ yě. É kpo nǔ ɖěbǔ ɖo xwé tɔn gbe abǐ axɔ́súɖuto tɔn mɛ, bɔ é má xlɛ́ yě ǎ. Énɛ́ ɔ́ gúdo ɔ́, gbeyíɖɔ Mawu tɔn Ezayíi wá axɔ́sú Ezekiyási gɔ́n, bó kanbyɔ́ ɛ ɖɔ: “Étɛ́ mɛ énɛ́ lɛ́ɛ ká wá ɖɔ nú we? Fí e yě ká gosín bó wá gɔ̌n towe lɔ?” Bɔ Ezekiyási yí gbe n'i ɖɔ: “To línlín mɛ wɛ yě gosín; Babilɔ́nu wɛ yě gosín.” Ezayíi lɛ́ kanbyɔ́ ɛ ɖɔ: “Étɛ́ yě ká mɔ ɖo xwé towe gbe?” Ezekiyási ka yí gbe n'i ɖɔ: “Yě mɔ nǔ e ɖo xwé ce gbe lɛ́ɛ bǐ. Dɔkun ce ɖě kpo nú un ma xlɛ́ yě ǎ.” Énɛ́ ɔ́, Ezayíi ɖɔ nú Ezekiyási ɖɔ: “Đǒtó xó e Mawu Mavɔmavɔ ɖɔ é; é ɖɔ: ‘Gbe ɖokpó ná wá su, bɔ è nǎ bɛ́ nǔ e ɖo xwé towe gbe lɛ́ɛ bǐ yi Babilɔ́nu, bó ná bɛ́ nǔ e tɔ́gbó towe ko wa ɖ'ayǐ káká wá jɛ égbé lɛ́ɛ bǐ yi Babilɔ́nu. É ná kpo ɖokpó ǎ. Mawu Mavɔmavɔ wɛ ɖɔ mɔ̌. È nǎ kplá vǐ towe lɛ́ɛ ɖě, vǐ e a ji lɛ́ɛ ɖě, bɔ yě ná nyí agooɖojǐe ɖo Babilɔ́nu xɔ́sú ɔ́ sín hɔnmɛ.’ ” Ezekiyási ka ɖɔ nú Ezayíi ɖɔ: “Xó e Mawu Mavɔmavɔ ɖɔ bɔ a ɖɔ ɔ́ nyɔ́.” Đó é tunwun dó xo tɔn mɛ ɖɔ: “Nú un ɖo gbɛ jɛ́n wɛ ɔ́, mǐ nǎ mɔ fífá kpó ayi jɛ ayǐ kpó.” È wlǎn axɔ́sú Ezekiyási sín tan e kpo lɛ́ɛ, akɔ́nkpinkpan e é ɖó ɔ́, kpó lě e é kun sindo ɖokpó, bó ɖe ali nú sin ɔ́, bó dɔn káká wá Jeluzalɛ́mu toxo ɔ́ mɛ gbɔn ɔ́ kpó dó “Judáa xɔ́sú lɛ́ɛ sín Tan wéma” mɛ. Axɔ́sú Ezekiyási zán wá kú, bɔ vǐ tɔn Manasée ɖu axɔ́sú ɖó tɛn tɔn mɛ. Xwe wěwe wɛ Manasée ɖó bó yi zinkpo jí ɖo Jeluzalɛ́mu. É ɖu axɔ́sú nú xwe kanɖé afɔtɔn (55). Nɔ tɔn nɔ nyí Efusí-Ba. É wa nǔ e ma nyɔ́ Mawu Mavɔmavɔ nukún mɛ ǎ lɛ́ɛ. Akɔta e Mawu nya bó yí ayǐkúngban yětɔn nú Izlayɛ́li ví lɛ́ɛ ɔ́, é xwedó walɔ baɖabaɖa e yě nɔ́ zán lɛ́ɛ. Vɔ̌sákpe e tɔ́ tɔn Ezekiyási gba gbɔn só jí só jí lɛ́ɛ ɔ́, é lɛ́ vɔ́ bǐ blóɖó. É bló vɔ̌sákpe gěgé nú Baalu, bó tun vodún Acela te lě e Izlayɛ́li xɔ́sú e è nɔ ylɔ́ ɖɔ Akábu é bló gbɔn é. É nɔ́ sɛn nǔ e nɔ́ ná wěziza ɖo jǐxwé lɛ́ɛ. É bló vodúnkpe gbɔn Mawu Mavɔmavɔ xwé gbe fí e Mawu Mavɔmavɔ ɖɔ émí ná ɖe émíɖée xlɛ́ ɖe é. É bló vɔ̌sákpe nú nǔ e nɔ́ ná wěziza ɖo jǐxwé lɛ́ɛ gbɔn kɔ́xota we e ɖo Mawu Mavɔmavɔ xwé gbe lɛ́ɛ. É bló káká bó sɔ́ vǐ tɔn dó sá vɔ̌ ná. É nɔ́ bló majíki tɛnmɛ tɛnmɛ, bó nɔ́ yi kan nǔ ɖo mɛ e nɔ kan bo lɛ́ɛ gɔ́n. É nɔ́ fɔ́n bó nɔ́ ɖo nǔ e má nyɔ́ Mawu Mavɔmavɔ nukún mɛ ǎ lɛ́ɛ wa wɛ, bó dó xomɛsin n'i. Vodún Acela e é bló ɔ́, é sɔ́ yi ɖó Mawu Mavɔmavɔ xwé ɔ́ gbe. Mawu Mavɔmavɔ ka ko ɖɔ nú Davídi kpó vǐ tɔn Salomɔ́ɔ kpó ɖɔ: “Xwé élɔ́ gbe ɖo Jeluzalɛ́mu wɛ un ná ɖe nyɛɖée xlɛ́ ɖe káká yi mavɔ mavɔ; Jeluzalɛ́mu toxo ɔ́ wɛ un sɔ́, ɖo toxo akɔta wěwe Izlayɛ́li tɔn lɛ́ɛ tɔn mɛ, bó ná ɖe nyɛɖée xlɛ́ ɖe, káká yi mavɔ mavɔ. Nú Izlayɛ́li ví lɛ́ɛ vɛ́ kó sixú bló nǔ e un zɔ́n lɛ́ɛ ɔ́, nú yě vɛ́ kó sixú nyi sɛ́n e mɛsɛntɔ́ ce Mɔyízi ná yě lɛ́ɛ bǐ ɔ́, un sɔ́ ná kplá yě sín to e un ná tɔ́gbó yětɔn lɛ́ɛ ɔ́ mɛ bɔ yě ná yi flú ɖě ǎ.” Lo ɔ́, Judáanu lɛ́ɛ se tónú ǎ. Manasée dɔn yě bú, bɔ nǔ nyanya e yě dó sin lɛ́ɛ hú nǔ nyanya e togun e Mawu Mavɔmavɔ nya, bó yí ayǐkúngban yětɔn nú Izlayɛ́li ví lɛ́ɛ tɔn. Énɛ́ ɔ́ wú wɛ Mawu Mavɔmavɔ dó wɛn gbɔn mɛsɛntɔ́ tɔn gbeyíɖɔ lɛ́ɛ jí ɖɔ: “Manasée, Judáa xɔ́sú ɔ́ dó nǔ nyanya énɛ́ lɛ́ɛ sin. É dó nǔ sin hú nǔ e Amɔliti lɛ́ɛ kó dó sin ɖ'ayǐ lɛ́ɛ. É lɛ́ sɔ́ vodún tɔn lɛ́ɛ dó dɔn Judáanu lɛ́ɛ dó hwɛ mɛ. Énɛ́ ɔ́ wútu ɔ́, Mawu Mavɔmavɔ, Mawu Izlayɛ́li tɔn ɖɔ: Un ná dó nǔ sin xá Jeluzalɛ́mu, bɔ mɛ ɖěbǔ se ɔ́, é ná sú alɔ tó nu. Un ná gba Jeluzalɛ́mu toxo ɔ́ hánnyá lě e un gba Samalíi toxo ɔ́ kpódó Akábu xwédo ɔ́ kpó gbɔn é; un ná klɔ́ Jeluzalɛ́mu lě e è nɔ klɔ́ agbǎn bó nɔ́ húzú xwe nu do é ɖɔhun. Mɛ e ná kpo ɖo gbɛ ɖo togun ce mɛ lɛ́ɛ ɔ́, un ná ɖe alɔ sín kan yětɔn mɛ, un ná jó yě nú kɛntɔ́ yětɔn lɛ́ɛ, bɔ yě ná bɛ́ dɔkun yětɔn lɛ́ɛ bǐ, bó ná vɔ to yětɔn. Đó, sín gbe e gbe tɔ́gbó yětɔn lɛ́ɛ kó gosín Ejípu tomɛ káká wá jɛ égbé ɔ́, yě nɔ́ ɖo nǔ e un gbɛ́ wǎn ná lɛ́ɛ bló wɛ, bó nɔ ɖo xomɛsin dó nú mì wɛ.” Axɔ́sú Manasée hu xomɛvɔ́nɔ káká bɔ kanjɔ sa tɔ gbɔn Jeluzalɛ́mu toxo ɔ́ bǐ mɛ. Nǔ baɖabaɖa énɛ́ lɛ́ɛ yi jɛ hwɛ e é hu bó dɔn Judáa togun ɔ́ d'é mɛ́ é jí. É dɔn togun ɔ́ bɔ é wa nǔ e má nyɔ́ Mawu Mavɔmavɔ nukún mɛ ǎ é. È wlǎn Manasée sín tan e kpo lɛ́ɛ, nǔ e é wa lɛ́ɛ bǐ, kpó hwɛ e é hu lɛ́ɛ kpó dó “Judáa xɔ́sú lɛ́ɛ sín Tan wéma” mɛ. Ée Manasée zán wá kú ɔ́, è sɔ́ ɛ yi ɖó jikpá e ɖo xwé tɔn gbe ɔ́ mɛ, Wúza jikpá mɛ, bɔ vǐ tɔn Amɔ́ni ɖu axɔ́sú ɖó tɛn tɔn mɛ. Xwe ko-nukún-we wɛ Amɔ́ni ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe we. Nɔ tɔn nɔ nyí Mɛculɛmɛti, bo nyí Halúsi Yotivanu ɔ́ sín vǐ. Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ é dó sin tɔ́ tɔn Manasée ɔ́ ɖɔhun. Ali e tɔ́ ɔ́ gbɔn é bǐ wɛ élɔ́ gbɔn; é sɛn vodún e tɔ́ ɔ́ nɔ sɛn lɛ́ɛ; é nɔ jɛ kpo nú yě. É jó Mawu Mavɔmavɔ, Mawu e tɔ́gbó tɔn lɛ́ɛ nɔ sɛn é dó. É xwedó Mawu Mavɔmavɔ sín ali ɔ́ ɖěbǔ ǎ. Azaglɔ́gán Amɔ́ni tɔn lɛ́ɛ blá gbě tɔn, bó hu i sɔ́ nyi xwé tɔn gbe. Lo ɔ́, togun ɔ́ hu mɛ e hu axɔ́sú Amɔ́ni lɛ́ɛ bǐ, bó sɔ́ vǐ tɔn Joziyási ɖó tɛn tɔn mɛ. È wlǎn axɔ́sú Amɔ́ni sín tan e kpo ɔ́ bǐ dó “Judáa xɔ́sú lɛ́ɛ sín Tan wéma” mɛ. Ée Amɔ́ni zán wá kú ɔ́, è sɔ́ ɛ yi ɖó yɔdo tɔn mɛ ɖo Wúza jikpá mɛ, bɔ vǐ tɔn Joziyási ɖu axɔ́sú ɖó tɛn tɔn mɛ. Xwe tántɔn wɛ Joziyási ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe gban nukún ɖokpó (31). Nɔ tɔn nɔ nyí Yedida, bó nyí Adaya Bɔsikátinu ɔ́ sín vǐ. É bló nǔ e nɔ nyɔ́ Mawu Mavɔmavɔ nukún mɛ lɛ́ɛ, tɔ́gbó tɔn Davídi ɖɔhun; é jó ɖě dó ǎ. Hwenu e axɔ́sú Joziyási ɖo xwe afɔtɔn-nukún-atɔn bló wɛ ɖo zinkpo jí ɔ́, é sɛ́ Cafáni wěgbójínɔtɔ́ Asaliyahu ví, Mɛculamu ví ɔ́ dó Mawu Mavɔmavɔ xwé gbe gbe ɖokpó bó ɖɔ n'i ɖɔ: “Yi Ilukyahu vɔ̌sánú-xwlémawutɔ́ ɖaxó ɔ́ gɔ́n, bónú é ní xa akwɛ́ e togun ɔ́ hɛn wá Mawu Mavɔmavɔ xwé gbe bɔ hɔnjínɔtɔ́ lɛ́ɛ yí ɖo yě sí ɔ́ bǐ, bó kpɔ́n nabí e wɛ é. È nǎ bɛ̌ akwɛ́ ɔ́ jó nú mɛ e ná kpé nukún dó Mawu Mavɔmavɔ xwé ɔ́ sín azɔ̌ wú lɛ́ɛ, bɔ yě ná dó sú axɔ́ mɛ e ná bló Mawu Mavɔmavɔ xwé ɔ́ ɖó lɛ́ɛ: yě ná sú axɔ́ xɔgbátɔ́ lɛ́ɛ, bó sú axɔ́ mɛ e nɔ dó alɔ azɔ̌watɔ́ lɛ́ɛ, bó sú axɔ́ xɔmɛtɔ́ lɛ́ɛ; yě ná xɔ atín kpó awǐnnya kpikpa e ná kpé bɔ è nǎ bló xwé ɔ́ ɖó lɛ́ɛ é kpó. Amɔ̌, è nǎ ba do nú lě e mɛ e lɔ mɛ è zě akwɛ́ ɔ́ dó lɛ́ɛ ɖo axɔ́ sú azɔ̌watɔ́ lɛ́ɛ gbɔn wɛ é ǎ. Đó yě nɔ́ hízí nǔ ǎ.” Ée è wǎ dó wɛn ɔ́ Ilukyahu vɔ̌sánú-xwlémawutɔ́ ɖaxó ɔ́, é ɖɔ nú wěgbójínɔtɔ́ Cafáni ɖɔ: “Un mɔ sɛ́nwéma ɔ́ ɖo Mawu Mavɔmavɔ xwé gbe.” Ée é ɖɔ mɔ̌ ɔ́, é sɔ́ sɛ́nwéma ɔ́ nú Cafáni, bɔ é xa. Énɛ́ ɔ́ gúdo ɔ́, é lɛ́ kɔ wá axɔ́sú ɔ́ gɔ́n, bó ɖó gbe n'i ɖɔ: “Mɛsɛntɔ́ towe lɛ́ɛ húzú akwɛ́ e ɖo Mawu Mavɔmavɔ xwé gbe ɔ́, bó bɛ́ jó nú mɛ e è sɔ́ bɔ yě ná nɔ azɔ̌ ɔ́ nu lɛ́ɛ.” Cafáni lɛ́ ɖɔ nú axɔ́sú ɔ́ ɖɔ: “Vɔ̌sánú-xwlémawutɔ́ Ilukyahu sɔ́ wěma ɖé nú mì.” Ée Cafáni ɖɔ mɔ̌ ɔ́, é xa wěma ɔ́ nú axɔ́sú ɔ́. Ée axɔ́sú ɔ́ se xó e ɖo sɛ́nwéma ɔ́ mɛ ɔ́, é vún awu dó kɔ nú éɖée; bó zɔ́n vɔ̌sánú-xwlémawutɔ́ Ilukyahu kpó Axikamu Cafáni ví ɔ́ kpó, kpó Akubɔ́ɔ Mikaya ví ɔ́ kpó, kpó Cafáni wěgbójínɔtɔ́ ɔ́ kpó, kpódó Asaya azaglɔ́gán tɔn ɖokpó kpó ɖɔ: “Mi yi kan nǔ byɔ́ Mawu Mavɔmavɔ nú mì ɖó nyi kpó togun ɔ́ kpó, kpódó Judáa to ɔ́ bǐ kpó tamɛ dó wěma e è mɔ é jí. Đó Mawu Mavɔmavɔ ɖo xomɛ sin jí ɖésú. É sin xomɛ dó mǐ, ɖó tɔ́ mǐtɔn lɛ́ɛ se tónú nú nǔ e è wlǎn dó wěma élɔ́ mɛ é ǎ; yě ká bló ɖě ɖ'é ji ǎ.” Énɛ́ ɔ́, Ilukya vɔ̌sánú-xwlémawutɔ́ ɖaxó ɔ́, Axikamu, Akubɔ́ɔ, Cafáni kpó Asaya kpó yi gbeyíɖɔ Mawu tɔn nyɔ̌nu Hulida Calúmu sín asi ɔ́ gɔ́n, bó ɖɔ xó ɔ́ n'i. Calúmu ɔ́, Tikwa ví wɛ, bó nyí Haaxási vívú, bó nɔ kpé nukún dó awu e è nɔ dó bó nɔ wa azɔ̌ ɖo Mawu Mavɔmavɔ xwé lɛ́ɛ wú. Hulida ɔ́, Jeluzalɛ́mu sín slǎ yɔ̌yɔ́ ɔ́ mɛ wɛ é nɔ́ nɔ. Ée yě ɖɔ xó nú Hulida fó ɔ́, é ɖɔ nú yě ɖɔ: “Mi yi ɖɔ nú mɛ e sɛ́ mi dó gɔ̌n ce ɔ́ ɖɔ: ‘Xó e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe: Un ná sɛ́ awě dó toxo élɔ́, bó sɛ́ dó mɛ e ɖo toxo ɔ́ mɛ lɛ́ɛ lě e Judáa xɔ́sú ɔ́ xa gbɔn ɖo sɛ́nwéma ɔ́ mɛ é.’ Đó yě jǒ mì dó, bó nɔ sá vɔ̌ nú nǔmɛsɛn ɖěvo lɛ́ɛ, bó ná dó sɔ́ nǔ e alɔ yětɔn bló lɛ́ɛ bǐ dó dó xomɛsin nú mì. Énɛ́ wú wɛ un sin xomɛ dó toxo élɔ́, bó ɖo gbɔ ná se wɛ ǎ. Amɔ̌, mi ná ɖɔ nú Judáa xɔ́sú e sɛ́ mi dó ɖɔ mi ní wá kan nǔ byɔ́ nyɛ Mawu Mavɔmavɔ ɔ́ ɖɔ: ‘Xó e Mawu Mavɔmavɔ, Mawu Izlayɛ́li tɔn ɖɔ dó xó e a se din lɛ́ɛ wú ɔ́ ɖíe: A se xó e un ɖɔ dó Jeluzalɛ́mu toxo ɔ́ kpó Jeluzalɛ́munu lɛ́ɛ kpó wú é: nǔ e ná xá yě ɔ́ ná syɛ́n káká bɔ è nǎ nɔ́ zé nyǐkɔ yětɔn dó dó nu mɛ. Ée a se mɔ̌ ɔ́, a lɛ̌ kɔ sín nǔ e wa wɛ a ɖe lɛ́ɛ gúdo; a yǐ nǔ e a wa nyi do lɛ́ɛ gbe ɖo nukɔn ce; a vǔn awu dó kɔ nú hwiɖée bó ya avǐ. É nyɔ́! Nyi lɔ se xó e a ɖɔ é. Un ná bló nǔ e ba wɛ a ɖe é. Nyi wɛ ɖɔ mɔ̌ nú we. Énɛ́ ɔ́ wú ɔ́, un ná yí we ɖó tɔ́gbó towe lɛ́ɛ kpá, a nǎ yi yɔdo towe mɛ, kpó fífá kpó, bɔ nukún towe ná mɔ awě énɛ́ lɛ́ɛ e un ná sɛ́ dó Jeluzalɛ́mu lɛ́ɛ ɖě ǎ.’ ” Ée yě se xó énɛ́ lɛ́ɛ ɔ́, yě yi ɖó gbe tɔn nú axɔ́sú ɔ́. Axɔ́sú Joziyási ylɔ́ tomɛxó Judáa tɔn lɛ́ɛ bǐ kpó Jeluzalɛ́mu tɔn lɛ́ɛ bǐ kpó kplé, bɔ yě yi Mawu Mavɔmavɔ xwé gbe. Yě kpó Judáanu lɛ́ɛ bǐ kpó, Jeluzalɛ́munu lɛ́ɛ bǐ kpó, vɔ̌sánú-xwlémawutɔ́ lɛ́ɛ kpó, gbeyíɖɔ Mawu tɔn lɛ́ɛ kpó, kpódó togun ɔ́ bǐ kpó wɛ yi, bɛ́ sín yɔkpɔ́vú lɛ́ɛ jí káká yi jɛ mɛxó lɛ́ɛ jí. Ée yě yi xwé ɔ́ gbe ɔ́, axɔ́sú ɔ́ zé akɔjijɛwéma e è mɔ ɖo Mawu Mavɔmavɔ xwé gbe ɔ́ bó xa bǐ nú yě. Axɔ́sú ɔ́ nɔ te ɖo kpe e ɖo sinsɛnxɔ ɔ́ mɛ ɔ́ jí, bó jɛ akɔ xá Mawu Mavɔmavɔ. Mɛ ɖokpó ɖokpó ɖe gbeta tɔ́n ɖɔ émí ná xwedó Mawu Mavɔmavɔ, émí ná bló nǔ e é zɔ́n lɛ́ɛ bǐ, émí ná nyi su tɔn lɛ́ɛ bǐ, bó ná nyi sɛ́n tɔn lɛ́ɛ bǐ kpódó ayi émítɔn bǐ kpó, kpódó lǐndɔ̌n émítɔn bǐ kpó, bó ná dó sixú bló nǔ e ɖo akɔjijɛ ɔ́ mɛ bɔ è wlǎn dó wěma ɔ́ mɛ é bǐ ɖ'é jí. Togun ɔ́ bǐ yí gbe nú nǔ e axɔ́sú ɔ́ ɖɔ ɔ́, bó jɛ akɔ xá Mawu. Axɔ́sú Joziyási zɔ́n Ilukya vɔ̌sánú-xwlémawutɔ́ ɖaxó ɔ́, kpó vɔ̌sánú-xwlémawutɔ́ e bɔ dó wǔ tɔn lɛ́ɛ kpó, kpó mɛ e nɔ nɔ hɔn jí lɛ́ɛ kpó ɖɔ yě ní ɖe gannú e nyí vodún Baalu tɔn é, ée nyí vodún Acela tɔn é kpó ée nyí nǔ e nɔ́ ná wěziza ɖo jǐxwé lɛ́ɛ tɔn é kpó sín Mawu Mavɔmavɔ xwé gbe, bɔ yě bɛ́ yě tɔ́n sín Jeluzalɛ́mu toxo ɔ́ mɛ, bó yi dó bǐ zo ɖo Sedlɔ́n tɔdo mɛ, bó bɛ́ afín tɔn hɛn yi Betɛ́li. É nya vodúnnɔ e axɔ́sú Judáa tɔn lɛ́ɛ sɔ́, bɔ yě nɔ́ dó zǎlínkpɔ́n zo gbɔn vɔ̌sákpe e gbɔn só jí só jí ɖo Judáa sín toxo lɛ́ɛ mɛ lɛ́ɛ, bó nya ée gbɔn Jeluzalɛ́mu toxo ɔ́ kpá lɛ́ɛ, bó nya vodúnnɔ e nɔ dó zǎlínkpɔ́n zo nú Baalu lɛ́ɛ é, vodúnnɔ e nɔ́ dó zǎlínkpɔ́n zo nú hwe lɛ́ɛ é, yě mɛ e nɔ dó zo nú sun lɛ́ɛ é, yě mɛ e nɔ́ dó zo nú nǔ ɖěvo e nɔ ná wěziza ɖo jǐxwé lɛ́ɛ é, kpó yě mɛ e nɔ dó zo nú nǔ ɖě lɛ́ɛ e kpo lɛ́ɛ é kpó. É ɖe vodún Acela e ɖo Mawu Mavɔmavɔ xwé gbe é síin, bó zé sín Jeluzalɛ́mu, bó dó zo ɖo Sedlɔ́n tɔdo mɛ, bɔ é húzú afín, bɔ é wá fúnfún afín tɔn gbɔn kúxwé mɛ kpaa lɛ́ɛ tɔn. É gba súnnu e nɔ lɛ aga dó sɛn vodún lɛ́ɛ sín xɔ e ɖo Mawu Mavɔmavɔ xwé kpá, bɔ nyɔ̌nu lɛ́ɛ nɔ́ nɔ fínɛ́, bó nɔ lɔn avɔ e glɔ́ vodún Acela nɔ nɔ é. É kplá vɔ̌sánú-xwlémawutɔ́ lɛ́ɛ bǐ sín Judáa toxo lɛ́ɛ mɛ wá Jeluzalɛ́mu, bó ɖu su nú vodún xwé e gbɔn só jí só jí, bɔ yě nɔ́ yi sá vɔ̌ nú vodún ɖe lɛ́ɛ bǐ, bɛ́ sín Gɛva káká yi Bɛ̌-Ceva. É gba vɔ̌sákpe e ɖo hɔntogbó Jeluzalɛ́mu tɔn kpá lɛ́ɛ. É lɛ́ gba ée ɖo Jozuwée e kpa acɛ dó toxo ɔ́ nu ɔ́ sín hɔntogbó jí, bɔ è ɖo toxo ɔ́ mɛ byɔ́ wɛ ɔ́, è nɔ mɔ ɖo amyɔxwé é. Mɛ e ka ko sá vɔ̌ nú Mawu ɖo vodún xwé e gbɔn só jí só jí lɛ́ɛ ɔ́, è nǎ gbe ɖě ɖɔ yě ní yi dó vɔ̌ zo ɖo vɔ̌sákpe Mawu Mavɔmavɔ tɔn jí ɖo Jeluzalɛ́mu ǎ. Amɔ̌, yě nɔ́ ɖu wɔ̌xúxú e mɛ è ma dó tɔ́n ǎ é vɔ̌sánú-xwlémawutɔ́ ɖě lɛ́ɛ ɖɔhun. Axɔ́sú ɔ́ ɖu su nú fí e è nɔ ylɔ́ ɖɔ Tofɛ́ti bɔ é ɖo tɔdo Bɛni-Hinnɔ́mu tɔn mɛ é, bónú mɛ ɖěbǔ ma sɔ́ sɔ́ vǐ tɔn súnnu abǐ nyɔ̌nu dó sá vɔ̌ nú vodún Mɔlɛ́ki ó. É ɖe sɔ́ e axɔ́sú Judáa tɔn lɛ́ɛ fɔ ɖó te nú vodún Hwe sinsɛn é síin. Sɔ́ énɛ́ lɛ́ɛ ɖo goxɔ ɔ́ sín kɔ́xota ɖo hɔntogbó ɔ́ kpá bó ɖo malín málín dó agooɖojǐe Nɛtáni-Mɛlɛ́ki sín xɔ ɔ́. É lɛ́ dó vodún Hwe sín kɛkɛ́ví lɛ́ɛ bǐ zo. Axɔ́sú ɔ́ gba vɔ̌sákpe e ɖo Akázi sín xɔ ta, bɔ axɔ́sú Judáa tɔn lɛ́ɛ bló lɛ́ɛ, bó gba vɔ̌sákpe e Manasée bló gbɔn kɔ́xota we e ɖo Mawu Mavɔmavɔ xwé ɔ́ gbe lɛ́ɛ. É gba bǐ hánnyá bó bɛ́ yi kɔn nyi Sedlɔ́n tɔdo mɛ. É ɖu su nú vodún xwé e axɔ́sú Salomɔ́ɔ bló gbɔn só jí só jí, bɔ yě ɖo afɔligbé nú Nǔhɛngblé só ɔ́, bó kpan nukɔn Jeluzalɛ́mu lɛ́ɛ. Vodúnxwé énɛ́ lɛ́ɛ ɔ́, nǔvɛ́mɔ Asitaatée, vodún Sidɔ́ɔnnu lɛ́ɛ tɔn, nǔvɛ́mɔ Kemɔci, vodún Mɔwabunu lɛ́ɛ tɔn kpódó nǔvɛ́mɔ Milukɔ́mu, vodún Amumɔ́ɔ ví lɛ́ɛ tɔn kpó tɔn wɛ. É gba awǐnnya e yě tun te bó nɔ́ sɛn lɛ́ɛ, bó sɛ́n vodún Acela lɛ́ɛ, bó bɛ́ gbɛtɔ́ xú gɔ́ tɛn yětɔn lɛ́ɛ mɛ. Joziyási gba vodún xwé e ɖo Betɛ́li bɔ Jelobowámu Nɛvati ví ɔ́ gbá bó dɔn Izlayɛ́linu lɛ́ɛ dó hwɛ mɛ é. É dó vodún xwé e ɖo só jí ɔ́ zo, bó gba vɔ̌sákpe ɔ́, bó dó vodún Acela zo, bɔ bǐ ji bo kɔn afín. Ée Joziyási dó vodún lɛ́ɛ zo fó ɔ́, é lílɛ́ bó mɔ yɔdo ɖé lɛ́ɛ ɖo só ɔ́ jí fínɛ́. Énɛ́ ɔ́, é sɛ́ mɛ dó bɔ è yi ba xú wá n'i ɖo yɔdo lɛ́ɛ mɛ, bɔ é dó zo ɖo vɔ̌sákpe ɔ́ jí, bó ɖu su nú vɔ̌sákpe ɔ́ lě e Mawu Mavɔmavɔ ɖɔ gbɔn, gbɔn gbeyíɖɔ tɔn jí, hwenu e axɔ́sú Jelobowámu ɖo vɔ̌sákpe ɔ́ nukɔn, xwe hwenu é. Énɛ́ ɔ́ gúdo ɔ́, Joziyási lílɛ́ bó mɔ yɔdo gbeyíɖɔ Mawu Mavɔmavɔ tɔn énɛ́ ɔ́. Joziyási kanbyɔ́ yě ɖɔ: “Kpe tɛ́ ká nyí ée è mɛ ɖó te dɔ̌n é?” Bɔ to ɔ́ mɛ nu lɛ́ɛ ɖɔ n'i ɖɔ: “Gbeyíɖɔ Mawu tɔn e gosín Judáa ɔ́ sín yɔdo wɛ. É wɛ ko ɖɔ nǔ e wa xá vɔ̌sákpe élɔ́ wɛ a ɖe din é sín xó ɖo fí.” Ée yě ɖɔ mɔ̌ ɔ́, Joziyási ɖɔ: “Mi jó yɔdo énɛ́ ɔ́ dó, mɛɖé ma ɖó alɔ xú tɔn lɛ́ɛ wú ó.” Nǔgbó ɔ́, è jǒ xú tɔn lɛ́ɛ dó, lě e è jǒ gbeyíɖɔ e gosín Samalíi ɔ́ tɔn lɛ́ɛ dó gbɔn é. Joziyási lɛ́ gba fí e yě nɔ́ sɛn vodún ɖe gbɔn Samalíi toxo lɛ́ɛ mɛ é bǐ. Fí énɛ́ lɛ́ɛ ɔ́, axɔ́sú Izlayɛ́li tɔn lɛ́ɛ wɛ bló bó dó dó xomɛsin nú Mawu Mavɔmavɔ. Nǔ e Joziyási jlɛ́ xá vɔ̌sákpe e gbɔn só jí só jí ɖo Betɛ́li lɛ́ɛ wɛ é jlɛ́ xá Samalíi tɔn lɛ́ɛ lɔ. É hu vodúnnɔ e nɔ sá vɔ̌ ɖo vodún xwé e gbɔn só jí só jí, bó ɖo fínɛ́ lɛ́ɛ bǐ ɖo vɔ̌sákpe vodún lɛ́ɛ tɔn jí, bó dó gbɛtɔ́ xú zo ɖo vɔ̌sákpe énɛ́ lɛ́ɛ jí. Énɛ́ ɔ́ gúdo ɔ́, é lɛ́ kɔ yi Jeluzalɛ́mu. Axɔ́sú Joziyási ɖe sɛ́n ɖokpó tɔ́n nú togun ɔ́ bǐ ɖɔ: “Mi ɖu Dǐndínwáyixwe ɔ́ dó sɔ́ Mawu Mavɔmavɔ, Mawu mitɔn su lě e è wlǎn gbɔn dó akɔjijɛwéma ɔ́ mɛ é.” Sín hwenu e hwɛɖɔtɔ́ lɛ́ɛ ɖo Izlayɛ́li to ɔ́ nu é káká wá jɛ hwenu e axɔ́sú lɛ́ɛ wá jɛ Izlayɛ́li kpó Judáa kpó to ɔ́ nu ɔ́, è ko ɖu Dǐndínwáyixwe mɔ̌hunkɔtɔn ɖě gbeɖé ǎ. Amɔ̌, Joziyási yi zinkpo jí ɔ́, xwe tɔn afɔtɔn-nukún-atɔngɔ́ ɔ́ mɛ wɛ è wǎ ɖu xwe énɛ́ ɔ́ ɖo Jeluzalɛ́mu dó kpa susu nú Mawu Mavɔmavɔ. Mɔ̌ ɖokpó ɔ́, bó ná dó bló nǔ e è wlǎn dó wěma e vɔ̌sánú-xwlémawutɔ́ ɖaxó Ilukya mɔ ɖo Mawu Mavɔmavɔ xwé gbe ɔ́ mɛ ɔ́, Joziyási hu mɛ e nɔ kan bo lɛ́ɛ, mɛ e nɔ ɖɔ nǔ e ná wá jɛ sɔ lɛ́ɛ, bó gba bǒcyɔ lɛ́ɛ, vodún lɛ́ɛ, kpódó nǔ ɖěvo e è nɔ sɛn ɖo Jeluzalɛ́mu toxo ɔ́ kpódó Judáa to ɔ́ bǐ kpó mɛ lɛ́ɛ kpó. Axɔ́sú e ko kpa acɛ có Joziyási wá ɖu axɔ́sú lɛ́ɛ ɖě lɛ́ kɔ wá Mawu Mavɔmavɔ gɔ́n kpó ayi tɔn bǐ kpó, kpó lǐndɔ̌n tɔn bǐ kpó, kpó hlɔ̌nhlɔ́n tɔn bǐ kpó Joziyási ɖɔhun lě e Mɔyízisɛ́n ɔ́ ɖɔ gbɔn é ǎ. Axɔ́sú e ka wá jɛ gǔdo tɔn lɛ́ɛ ɖě wa nǔ é ɖɔhun ǎ. Joziyási wa nǔ gbɔn mɔ̌ có Mawu Mavɔmavɔ jó xomɛ e é sin dó Judáa ɔ́ dó ǎ, ɖó nǔ baɖabaɖa e Manasée wa dó dó xomɛsin n'i lɛ́ɛ wú. Énɛ́ wú wɛ Mawu Mavɔmavɔ ɖɔ: “Un ná ɖe kɔ dó Judáa to ɔ́ lě e un ɖe kɔ dó Izlayɛ́li to ɔ́ gbɔn é, bó ná jó Jeluzalɛ́mu toxo e un sɔ́ é kpó goxɔ e mɛ un dó akpá ɖɔ un ná nɔ́ ɖe susu ce xlɛ́ ɖe ɔ́ kpó dó.” È wlǎn axɔ́sú Joziyási sín tan e kpo lɛ́ɛ bǐ, kpó nǔ e é wa lɛ́ɛ bǐ kpó dó “Judáa xɔ́sú lɛ́ɛ sín Tan wéma” mɛ. Joziyási hwenu wɛ Nɛko Ejípu xɔ́sú ɔ́ xwe axɔ́sú Asilíi tɔn ɔ́ gɔ́n ɖo Efláti tɔ ɔ́ wá ji, bɔ Joziyási gbo ali n'i. Ée Joziyási tɔ́n ahwan Ejípu xɔ́sú ɔ́ lě tlóló ɔ́, Ejípu xɔ́sú ɔ́ hu i ɖo Mɛgido. Bɔ mɛsɛntɔ́ tɔn lɛ́ɛ sɔ́ ɛ dó kɛkɛ́ví ɖé mɛ. Yě sɔ́ ɛ wá Jeluzalɛ́mu, bó ɖi i dó yɔdo tɔn mɛ, bɔ togun ɔ́ sɔ́ vǐ tɔn Yoakázi bo kɔn ami dó ta n'i, bó sɔ́ ɛ axɔ́sú ɖó tɔ́ ɔ́ tɛn mɛ. Xwe ko-nukún-atɔn wɛ Yoakázi ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn. Nɔ tɔn nɔ nyí Hamutálu, bó nyí Yiimɛyahu Livunanu ɔ́ sín vǐ. Nǔ e ma nyɔ́ Mawu Mavɔmavɔ nukún mɛ ǎ lɛ́ɛ wɛ é bló gbɔn ali bǐ xo, tɔ́gbó tɔn lɛ́ɛ ɖɔhun. Nɛko Ejípu xɔ́sú ɔ́ wlí i bó sɔ́ ɛ dó gan ɖo Hlivla, ɖo Hamáti tomɛ, bónú é ma sɔ́ ɖu axɔ́sú ɖo Jeluzalɛ́mu ó. Nɛko Ejípu xɔ́sú ɔ́ ɖɔ nú to ɔ́ ɖɔ yě ɖǒ ná nɔ́ ná nǔjɔ émí; yě ná nɔ́ ná kpatágan kilóo afɔwó-afatɔ́n (3.000), bó ná nɔ ná siká kilóo gban (30). Ejípu xɔ́sú ɔ́ sɔ́ Joziyási ví Eliyakímu bɔ é jɛ tɔ́ tɔn tɛn mɛ. É ɖyɔ́ nyǐkɔ n'i, bó sun nyǐ i ɖɔ Yoyakímu. É kplá Yoakázi yi Ejípu bɔ é kú ɖo dɔ̌n. Énɛ́ ɔ́, Yoyakímu yí nǔjɔ ɖo toví tɔn lɛ́ɛ bǐ sí, bó ná dó sixú mɔ nǔ e Ejípu xɔ́sú ɔ́ byɔ́ é. Ée toví lɛ́ɛ bǐ ná nǔjɔ é ɔ́, é mɔ siká kpó kpatágan kpó e Ejípu xɔ́sú ɔ́ byɔ́ ɛ é, bó bɛ́ jó. Xwe koatɔ́n (25) wɛ Yoyakímu ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nɔ tɔn nɔ nyí Zevidá bó nyí Pedaya Hlumanu ɔ́ ví. Nǔ e ma nyɔ́ Mawu Mavɔmavɔ nukún mɛ ǎ lɛ́ɛ wɛ é bló gbɔn ali bǐ xo tɔ́gbó tɔn lɛ́ɛ ɖɔhun. Yoyakímu hwenu wɛ Nabukodonɔzɔ́ɔ Babilɔ́nu xɔ́sú ɔ́ tɔ́n ahwan Judáa to ɔ́, bɔ Yoyakímu nɔ acɛ tɔn mɛ nú xwe atɔn, bó lɛ́ fɔ́n gǔ dó jǐ tɔn. Énɛ́ ɔ́, Mawu Mavɔmavɔ sɛ́ gbɛ̌ta tɛnmɛ tɛnmɛ dó Yoyakímu. É sɛ́ gbɛ̌ta Babilɔ́nunu lɛ́ɛ tɔn, Sikíinu lɛ́ɛ tɔn, Mɔwabunu lɛ́ɛ tɔn, kpó Amumɔ́ɔ ví lɛ́ɛ tɔn kpó dó, bɔ yě wǎ gba Judáa to ɔ́ bǐ hánnyá lě e Mawu Mavɔmavɔ ko ɖɔ gbɔn, gbɔn mɛsɛntɔ́ tɔn gbeyíɖɔ lɛ́ɛ jí é. Mawu Mavɔmavɔ bló mɔ̌ ɖó é sɔ́ jló ná mɔ Judáa to ɔ́ ɖó nukún wú ǎ, ɖó hwɛ e Manasée hu lɛ́ɛ, kpódó xomɛvɔ́nɔ e sín hun Manasée kɔn nyi ayǐ káká bɔ é gbɔn Jeluzalɛ́mu toxo ɔ́ bǐ mɛ é kpó wútu. Énɛ́ ɔ́ wɛ zɔ́n bɔ Mawu Mavɔmavɔ jló ná sɔ́ nǔ énɛ́ lɛ́ɛ kɛ yě ǎ. È wlǎn axɔ́sú Yoyakímu sín tan e kpo lɛ́ɛ kpódó nǔ e é bló lɛ́ɛ kpó dó “Judáa xɔ́sú lɛ́ɛ sín Tan wéma” mɛ. Ée Yoyakímu zán wá kú ɔ́, vǐ tɔn Yoyakini ɖu axɔ́sú ɖó tɛn tɔn mɛ. Axɔ́sú Babilɔ́nu tɔn ɔ́ yí to e ɖo Ejípu xɔ́sú ɔ́ sín acɛ mɛ lɛ́ɛ bǐ, bɛ́ sín Ejípu tɔ ɔ́ tó, káká yi Efláti tɔ ɔ́ tó. Énɛ́ ɔ́ wú ɔ́, Ejípu xɔ́sú ɔ́ sɔ́ nɔ́ tɔ́n sín to tɔn mɛ ɖě ǎ. Xwe afɔtɔn nukún atɔn wɛ Yoyakini ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn. Nɔ tɔn nɔ nyí Nɛxucita bo nyí Ɛlunatáni Jeluzalɛ́munu ɔ́ sín vǐ. Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ Yoyakini bló gbɔn ali bǐ xo tɔ́ tɔn ɖɔhun. Hwenɛ́nu ɔ́, ahwangán axɔ́sú Nabukodonɔzɔ́ɔ tɔn lɛ́ɛ wá xá Jeluzalɛ́mu toxo ɔ́. Hwenu e Nabukodonɔzɔ́ɔ sín mɛ lɛ́ɛ ɖo toxo ɔ́ xá wɛ ɔ́, Nabukodonɔzɔ́ɔ ɖésú wá Jeluzalɛ́mu toxo ɔ́ sín hɔn nukɔn. Énɛ́ ɔ́, axɔ́sú Yoyakini kplá nɔ tɔn, ahwangán tɔn lɛ́ɛ, gǎn hɔn-yitɔ́ lɛ́ɛ kpó agooɖojǐe tɔn lɛ́ɛ kpó, bó yi su axɔ́sú Babilɔ́nu tɔn, bɔ é wlí yě, bɔ yě húzú gantɔ́ tɔn. Xwe tántɔn bló wɛ Nabukodonɔzɔ́ɔ ɖe ɖo zinkpo jí hwenɛ́nu. Axɔ́sú Nabukodonɔzɔ́ɔ bɛ́ dɔkun e ɖo Mawu Mavɔmavɔ xwé gbe é bǐ, bó bɛ́ ée ɖo axɔ́sú ɔ́ xwé gbe lɛ́ɛ bǐ. Sikágannú e axɔ́sú Izlayɛ́li tɔn Salomɔ́ɔ bló ɖó Mawu Mavɔmavɔ xwé ɔ́ gbe lɛ́ɛ ɔ́, é hɛn bǐ gblé. É bló nǔ énɛ́ lɛ́ɛ lě e Mawu Mavɔmavɔ ko ɖɔ gbɔn é. É kplá Jeluzalɛ́mu to ɔ́ bǐ, gǎn hɔn-yitɔ́ lɛ́ɛ, gbɛtɔ́ nukúnɖéjí lɛ́ɛ. Yě bǐ yi gbɛtɔ́ děgba we afɔwó (10.000). É lɛ́ kplá alɔlyɛ́nzɔ́watɔ́ lɛ́ɛ kpó fletuntɔ́ lɛ́ɛ kpó. Wamamɔnɔ lɛ́ɛ kɛ́ɖɛ́ jɛ́n kpo ɖo to ɔ́ mɛ. É kplá Yoyakini sín Jeluzalɛ́mu yi Babilɔ́nu, é kpódó nɔ tɔn kpó, kpó asi tɔn lɛ́ɛ kpó, kpó agooɖojǐe tɔn lɛ́ɛ kpó, kpó gǎn e ɖo to ɔ́ mɛ lɛ́ɛ kpó. Gbɛtɔ́ nukúnɖéjí lɛ́ɛ ɔ́, yě mɛ děgba ɖě afɔwó-afatɔ́n (7.000) wɛ, bɔ alɔlyɛ́nzɔ́watɔ́ lɛ́ɛ kpó fletuntɔ́ lɛ́ɛ kpó nyí afatɔ́n (1.000). Yě bǐ wɛ nyí gbɛtɔ́ syɛ́nsyɛ́n, bó nɔ fun ahwan, bɔ Babilɔ́nu xɔ́sú ɔ́ bɛ́ yě bǐ yi Babilɔ́nu. Axɔ́sú Babilɔ́nu tɔn ɔ́ sɔ́ Yoyakini sín tɔ́ nɔví ɖokpó ɖó tɛn tɔn mɛ, bɔ é nyí axɔ́sú. Nyǐkɔ tɔn nɔ nyí Mataniya, bɔ é ɖyɔ́ nyǐkɔ n'i bɔ é nɔ́ nyí Sedesíyasi. Xwe ko-nukún-ɖokpó wɛ Sedesíyasi ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nɔ tɔn nɔ nyí Hamutálu; Yiimɛyahu Livunanu ɔ́ sín vǐ wɛ. Nǔ e ma nyɔ́ Mawu Mavɔmavɔ nukún mɛ ǎ lɛ́ɛ wɛ é bló gbɔn ali bǐ xo Yoyakímu ɖɔhun; ɖě hwe ɖ'é mɛ ǎ. Nǔ énɛ́ lɛ́ɛ jɛ ɖó xomɛ e Mawu Mavɔmavɔ sin dó Jeluzalɛ́mu toxo ɔ́, bó sin dó Judáa to ɔ́ bǐ ɔ́ syɛ́n káká, bɔ é nya togun tɔn dó gbě. Amɔ̌, Sedesíyasi wá fɔ́n gǔ dó axɔ́sú Babilɔ́nu tɔn jí. Hwenu e Sedesíyasi ɖo xwe tɛ́nnɛ bló wɛ ɖo zinkpo jí ɔ́, sun tɔn wǒgɔ́ ɔ́ mɛ, ɖo azǎn tɔn wǒgɔ́ ɔ́ gbe ɔ́, Nabukodonɔzɔ́ɔ Babilɔ́nu xɔ́sú ɔ́ wá tɔ́n ahwan Jeluzalɛ́mu, é kpó ahwangɔnu tɔn bǐ kpó. É wá ɖó gɔnu ɖó Jeluzalɛ́mu nukɔn, bó xá toxo ɔ́, bó kun agbǒdo lɛ́ lɛ̌ dó. Yě xá toxo ɔ́ mɔ̌ káká jɛ hwenu e Sedesíyasi ɖo xwe wǒ-ɖokpó bló wɛ ɖo zinkpo jí é. Adɔ tɔ́n ɖo toxo ɔ́ mɛ bó syɛ́n ɖésú. Toví lɛ́ɛ sɔ́ mɔ nǔɖé ná ɖu ǎ. Sun ɛnɛgɔ́, xwe énɛ́ ɔ́ xwe tɔn ɔ́, azǎn tɔn tɛ́nnɛgɔ́ ɔ́ gbe ɔ́, Babilɔ́nunu lɛ́ɛ tɔ́n ali ɖokpó dó ahohó e è mɛ lɛ́ lɛ̌ dó toxo ɔ́ é mɛ. Yě xá toxo ɔ́ mɔ̌ có ahwanfuntɔ́ Judáa tɔn lɛ́ɛ dɔn zǎn dó wǔ, bó hɔn gbɔn hɔntogbó e ɖo ahohó lɛ́ɛ tɛ́ntin ɖo axɔ́sú ɔ́ sín jikpá kpá é nu. Axɔ́sú Sedesíyasi wlí ali e yi Judɛ́ɛn tɔdo ɔ́ mɛ é. Lo ɔ́, gbɛ̌ta Babilɔ́nunu lɛ́ɛ tɔn jɛ axɔ́sú Sedesíyasi gúdo, bó xwedó wǔ tɔn ɖo ayǐkúngban wɛnjɛ Jeliko tɔn jí, bɔ ahwanfuntɔ́ tɔn lɛ́ɛ bǐ hɔn jó e dó. Yě wlí axɔ́sú ɔ́ bó kplá ɛ yi Babilɔ́nu xɔ́sú ɔ́ gɔ́n ɖo Hlivla. Fínɛ́ wɛ Babilɔ́nunu lɛ́ɛ ɖó hwɛ nú Sedesíyasi ɖe. È gbo gbe axɔ́sú Sedesíyasi sín vǐ lɛ́ɛ ɖo nukún tɔn mɛ. Énɛ́ ɔ́ gúdo ɔ́, Babilɔ́nu xɔ́sú ɔ́ ná gbe bɔ è tɔ́n nukún Sedesíyasi tɔn we lɛ́ɛ, bó dó wlɔ ɛ, bó kplá ɛ yi Babilɔ́nu. Hwenu e Nabukodonɔzɔ́ɔ ɖo xwe afɔtɔn-nukún-ɛnɛ bló wɛ ɖo axɔ́súzinkpo Babilɔ́nu tɔn jí ɔ́, azǎn tɛ́nwegɔ́ ɔ́ e ɖo sun atɔ́ɔ́ngɔ́ ɔ́ mɛ ɔ́ gbe ɔ́, Nɛbuzaladáni ahwangán e kpa acɛ dó mɛ e nɔ cɔ́ axɔ́sú ɔ́ lɛ́ɛ nu ɔ́ wá Jeluzalɛ́mu. É dó Mawu Mavɔmavɔ xwé ɔ́ zo, bó dó hɔnmɛ ɔ́ kpó xwé e ɖo Jeluzalɛ́mu lɛ́ɛ bǐ kpó zo. Đo tají ɔ́, é dó gbɛtɔ́ nukúnɖéjí lɛ́ɛ sín xwé zo. Babilɔ́nu sín gbɛ̌ta ɔ́ bǐ wɛ xwedó Nɛbuzaladáni, bó mu ahohó e è mɛ lɛ́ lɛ̌ dó Jeluzalɛ́mu lɛ́ɛ bǐ. Nɛbuzaladáni wlí mɛ e sɔ́ yěɖée jó nú Babilɔ́nu xɔ́sú ɔ́ lɛ́ɛ, kpó mɛ e kpo ɖo toxo ɔ́ mɛ lɛ́ɛ bǐ kpó; é wlí mɛ e cí to ɔ́ mɛ lɛ́ɛ bǐ hɛn yi Babilɔ́nu. Amɔ̌, é jó wamamɔnɔ e ɖo to ɔ́ mɛ lɛ́ɛ ɖě dó, bɔ yědɛɛ lɛ́ɛ ná nɔ kpé nukún dó vǐwungbo lɛ́ɛ kpó gle lɛ́ɛ kpó wú. Babilɔ́nunu lɛ́ɛ gba dotín e è sɔ́ ganvɔ dó bló ná ɖo Mawu Mavɔmavɔ xwé ɔ́ gbe lɛ́ɛ kpó ganvɔ basya e ɖo kɔ́xo jí é kpó kɛkɛ́ví lɛ́ɛ kpó hánnyá, bó bɛ́ ganvɔ lɛ́ɛ bǐ hɛn yi Babilɔ́nu. Yě bɛ́ nǔ e è zě ganvɔ dó bló bɔ è nɔ zán ɖo sinsɛn hwenu lɛ́ɛ bǐ: afíngannú lɛ́ɛ, afínbɛ́nú lɛ́ɛ, nǔ e è nɔ dó bló myɔ ɖó ná lɛ́ɛ kpódó kɔ́fu lɛ́ɛ kpó. Nɛbuzaladáni bɛ́ nǔ e è zě siká dó bló lɛ́ɛ kpó nǔ e è zě kpatágan dó bló lɛ́ɛ kpó, kpó zǎlínkpɔ́nfyɔ́nú lɛ́ɛ kpó, kpódó gannú lɛ́ɛ kpó. Nǔ énɛ́ lɛ́ɛ e Salomɔ́ɔ bló ɖó Mawu Mavɔmavɔ xwé ɔ́ gbe lɛ́ɛ kpɛn káká, bɔ è sixú da bó tunwun nabí e yě da é ǎ. Nǔ lɛ́ɛ wɛ nyí dotín we lɛ́ɛ, basya ɖaxó tobotobo ɔ́ kpódó kɛkɛ́ví lɛ́ɛ kpó. Dotín lɛ́ɛ ɖokpó ɖokpó sín jǐ yiyi bló mɛ̌tlu tɛ́nnɛ, bɔ è zě ganvɔ dó bló ata ɖó dotín lɛ́ɛ ɖokpó ɖokpó jí, bɔ ata ɔ́ sín jǐ yiyi nyí mɛ̌tlu ɖokpó adaɖé. È zě ganvɔ dó lɔn ganja, bó bló lɛ́ lɛ̌ dó ata e ɖo dotín ɖokpó ɖokpó jí é, bó zé ganvɔ dó bló glenádi ná, bó to lɛ́ lɛ̌ dó ata e ɖo dotín lɛ́ɛ jí é. Bɔ dotín we lɛ́ɛ bǐ nyí nǔ ɖokpó ɔ́, bɔ nǔ e è blǒ ɖ'é ta lɛ́ɛ lɔ nyí nǔ ɖokpó ɔ́. Nɛbuzaladáni ahwangán e kpa acɛ dó mɛ e nɔ cɔ́ axɔ́sú ɔ́ lɛ́ɛ nu ɔ́ kplá Selaya vɔ̌sánú-xwlémawutɔ́ ɖaxó ɔ́, bó kplá Sefaníyahu mɛ e bɔ dó wǔ tɔn é, kpódó vɔ̌sánú-xwlémawutɔ́ atɔn e nɔ́ nɔ ali nu lɛ́ɛ kpó. Ée é wá toxo ɔ́ mɛ ɔ́, é wlí ahwangán e kpa acɛ dó sɔ́ja lɛ́ɛ nu é, bó wlí mɛ atɔ́ɔ́n ɖo mɛ e kpó axɔ́sú ɔ́ kpó nɔ́ ɖe wě lɛ́ɛ mɛ, bó wlí ahwangán wěgbójínɔtɔ́ e nɔ́ yí mɛ dó ahwanmɛ é, bó lɛ́ wlí toví kanɖé ko (60) ɖo toxo ɔ́ mɛ gɔ́ ná. Nɛbuzaladáni kplá mɛ e é wlí lɛ́ɛ hɛn yi Babilɔ́nu xɔ́sú ɔ́ gɔ́n ɖo Hlivla. Babilɔ́nu xɔ́sú ɔ́ xo yě, bó hu yě bǐ ɖo fínɛ́ ɖo Hamáti to ɔ́ mɛ. Judáanu e è wlǐ hɛn yi to línlín mɛ lɛ́ɛ sín tan nɛ́. Mɛ e kpo ɖo to ɔ́ mɛ, bɔ axɔ́sú Nabukodonɔzɔ́ɔ jó dó lɛ́ɛ ɔ́, é sɔ́ Gedaliyási tokpɔngán ɔ́ ɖó yě nu. Gedaliyási ɔ́, Axikamu ví wɛ, bó nyí Cafáni vívú. Ée ahwangán lɛ́ɛ se ɖɔ axɔ́sú Babilɔ́nu tɔn sɔ́ Gedaliyási tokpɔngán ɖo Judáa ɔ́, yě kpó sɔ́ja yětɔn lɛ́ɛ kpó yi gɔ̌n tɔn ɖo Misipa. Yě mɛ e yi lɛ́ɛ ɖíe: Yicimayɛ́li Nɛtaniya ví ɔ́, Yoxanáni Kaleyaxi ví ɔ́, Selaya Tanxumɛti Nɛtofanu ɔ́ kpó Yaazaniyahu Maaka kúnkan ɔ́ kpó. Gedaliyási ɖɔ nú yě, bó xwlé nǔ d'é jí nú yě ɖɔ: “Mi ma ɖi xɛsi nú mɛ e ɖo azɔ̌ wa nú Babilɔ́nunu lɛ́ɛ wɛ é ɖě ó. Mi nɔ to ɔ́ mɛ fí, bó sɛn axɔ́sú Babilɔ́nu tɔn; énɛ́ ɔ́, mi ná nɔ ganjí.” Lo ɔ́, xwe énɛ́ ɔ́ sín sun tɛ́nwegɔ́ ɔ́ mɛ ɔ́, Yicimayɛ́li e nyí Nɛtaniya ví, bó nyí Elicama vívú, bó jɔ ɖo axɔ́sú kún mɛ ɔ́ wá, é kpó sɔ́ja wǒ kpó, bɔ yě hu Gedaliyási, bo hu Judáanu e kpó é kpó ɖo azɔ̌ wa wɛ lɛ́ɛ kpódó Babilɔ́nunu e kpó é kpó ɖo Misipa lɛ́ɛ kpó. Énɛ́ ɔ́, togun ɔ́ bǐ sɔ́ nǔ, bɛ́ sín yɔkpɔ́vú lɛ́ɛ jí, káká yi jɛ mɛxó lɛ́ɛ jí, ahwangán lɛ́ɛ lɔ ɖ'é mɛ, bɔ yě hɔn yi Ejípu, ɖó yě ɖo xɛsi ɖi nú Babilɔ́nunu lɛ́ɛ wɛ. Hwenu e Yoyakini ɖo xwe gbantɔ́n-nukún-we (37) bló wɛ ɖo gankpá mɛ ɔ́, sun wěwegɔ́, xwe énɛ́ xwe tɔn ɔ́, azǎn tɔn koatɔ́n-nukún-wegɔ́ (27) ɔ́ gbe ɔ́, Babilɔ́nu xɔ́sú Evilu-Mɛlodaki ɖe Yoyakini Judáa xɔ́sú ɔ́ sín gankpá mɛ, bó ɖe winnyá n'i. Xwe e xwe Ewilu-Mɛlodaki yi zinkpo jí ɔ́ wɛ é ɖe e tɔ́n sín gankpá mɛ. É ɖɔ xó nú Yoyakini kpó xomɛfífá kpó, bó sɔ́ ɛ ɖó tɛn ɖé mɛ, bɔ tɛn ɔ́ ɖo nukɔn nú axɔ́sú e kpó é kpó ɖo Babilɔ́nu lɛ́ɛ bǐ tɔn. Axɔ́sú ɔ́ ná gbe ɖɔ è nǐ má sɔ́ dó gantɔ́wu nú Yoyakini ó; énɛ́ ɔ́, bɛ́ sín hwenɛ́nu ɔ́, é nɔ ɖu nǔ xá axɔ́sú ɔ́ tɛgbɛ tɛgbɛ. Axɔ́sú ɔ́ nɔ ná ɛ nǔ e hu dó e lɛ́ɛ bǐ ayǐhɔ́ngbe ayǐhɔ́ngbe. É gɔn nǐná ɛ gbeɖé káká bɔ Yoyakini kú ǎ. Adámu ji Sɛ́ti, bɔ Sɛ́ti ji Enɔci. Enɔci ji Kenáni, bɔ Kenáni ji Maxalalɛ́li, Maxalalɛ́li ji Yɛlɛ́di. Yɛlɛ́di ji Henɔci, Henɔci ji Mɛtucɛláxi, bɔ Mɛtucɛláxi ji Lamɛki. Lamɛki ji Nɔwée, bɔ Nɔwée ji Sɛ́mu, bó ji Cámu, bó ji Jafɛ́ti. Jafɛ́ti ví lɛ́ɛ ɖíe: Gomɛ́ɛ, Magɔ́gi, Madayi, Yaváni, Tubalu, Mɛcɛ́ki kpó Tilaasi kpó. Gomɛ́ɛ ví lɛ́ɛ ɖíe: Acikenázi, Difáti kpó Togáama kpó. Yaváni ví lɛ́ɛ ɖíe: Elica, Taasísi, Kitímu kpó Hlodanímu kpó. Cámu ví lɛ́ɛ ɖíe: Kúci, Misilayimu, Púti kpó Kanáa kpó. Kúci ví lɛ́ɛ ɖíe: Seva, Hawíla, Savuta, Hlaema kpódó Savuteka kpán. Hlaema ví lɛ́ɛ ɖíe: Saba kpódó Dedáni kpó. Kúci wɛ lɛ́ ji Nɛmulɔ́di; Nɛmulɔ́di ɔ́ wɛ nyí ahwanfuntɔ́ syɛ́nsyɛ́n nukɔntɔn e ɖo ayǐkúngban ɔ́ jí é. Lǔdinu lɛ́ɛ, Eyinamunu lɛ́ɛ, Lexávunu lɛ́ɛ, Nafutwaxinu lɛ́ɛ, Patlɔ́sinu lɛ́ɛ, Kasluaxinu lɛ́ɛ kpódó Kafutɔ́ɔnu lɛ́ɛ kpó sín tɔ́gbó wɛ nyí Mislayímu. Kasluaxi wɛ Filisitɛ́ɛn lɛ́ɛ gosín. Kanáa ji Sidɔ́ɔn, bó ji Xɛti. Sidɔ́ɔn wɛ nyí nukɔngbéví tɔn. Jebuzinu lɛ́ɛ, Amɔliti lɛ́ɛ, Giigacíti lɛ́ɛ, Hivíti lɛ́ɛ, Aakíti lɛ́ɛ, Sini ví lɛ́ɛ, Aavadinu lɛ́ɛ, Semáa ví lɛ́ɛ, kpódó Hamátinu lɛ́ɛ kpó sín tɔ́gbó lɛ́ɛ ɔ́, Kanáa wɛ ji yě. Sɛ́mu ví lɛ́ɛ ɖíe: Elámu, Asúu, Aapakisadu, Lǔdi, Alamu, Wúsi, Huli, Gɛtɛ́ɛ kpó Mɛcɛ́ki kpó. Aapakisadu ji Cɛláxi, bɔ Cɛláxi ji Ebɛ́ɛ. Vǐ súnnu we wɛ Ebɛ́ɛ ji. Mɛ ɖokpó nɔ nyí Pɛlɛ́gi, Pɛlɛ́gi sín tínmɛ wɛ nyí “Mima”, ɖó hwetɔnnu wɛ è mǎ ayǐkúngban ɔ́. Nɔví tɔn ká nɔ nyí Yokitáni. Yokitáni ji Alumɔdadi, Cɛlɛ́fu, Hasáamawɛ́ti, Yeláxi, Hadolámu, Wuzálu, Dikla, Evalu, Avimayɛ́li, Saba, Ofíi, Hawíla kpódó Yovavu kpó. Yě mɛ énɛ́ lɛ́ɛ bǐ wɛ nyí Yokitáni ví. Sɛ́mu ji Aapakisadu, bɔ Aapakisadu ji Cɛláxi, Cɛláxi ji Ebɛ́ɛ, bɔ Ebɛ́ɛ ji Pɛlɛ́gi, bɔ Pɛlɛ́gi ji Hlewu, Hlewu ji Selúgi, Selúgi ji Naxɔ́ɔ, Naxɔ́ɔ ji Tɛláxi. Tɛláxi ka ji Ablámu; Ablámu ɔ́ wɛ è wǎ ɖó nyǐkɔ ná ɖɔ Ablaxámu. Ablaxámu ví lɛ́ɛ ɖíe: Izáki kpó Isimayɛ́li kpó. Vǐ yětɔn lɛ́ɛ ɖíe: Nɛbayɔ́ti, é wɛ nyí nukɔngbéví Isimayɛ́li tɔn. Kedáa, Adibeɛli, Mivusámu, Micima, Duma, Masa, Hadádi, Téma, Yetúu, Nafíci kpódó Kedúma kpó. Isimayɛ́li ví lɛ́ɛ nɛ́. Ketúla Ablaxámu sín asi ɔ́, vǐ tɔn lɛ́ɛ ɖíe: Zimulani, Yokicáni, Mɛdani, Madiáani, Yicibaku kpó Cuwáxi kpó. Yokicáni ví lɛ́ɛ ɖíe: Saba kpó Dedáni kpó. Madiáani ví lɛ́ɛ ɖíe: Eyifa, Efɛ́ɛ, Hanɔki, Avida kpódó Ɛlidáa kpó. Yě mɛ énɛ́ lɛ́ɛ bǐ wɛ nyí vǐ súnnu Ketúla tɔn. Ablaxámu ji Izáki; Izáki ví lɛ́ɛ ɖíe: Esawu kpó Izlayɛ́li kpó. Esawu ví lɛ́ɛ ɖíe: Elifázi, Hlewuyɛ́li, Yewúci, Yaelámu kpódó Koláxi kpó. Elifázi ví lɛ́ɛ ɖíe: Temani, Omáa, Sefíi, Gayetámu, Kenázi, Timuna kpódó Amalɛ́ki kpó. Hlewuyɛ́li ví lɛ́ɛ ɖíe: Naxáti, Zeláxi, Camuma kpó Miziza kpó. Seyíi ví lɛ́ɛ ɖíe: Lotáni, Covalu, Siveɔ́ni, Esɛ́ɛ kpó Dicɔ́ni kpó. Siveɔ́ni wɛ ji Ana, bó nyí Dicáni sín daágbó. Lotáni ví lɛ́ɛ ɖíe: Holi kpó Homamu kpó. Lotáni ɖó nɔví nyɔ̌nu ɖokpó, bɔ è nɔ ylɔ́ ɛ ɖɔ Timuna. Covalu ví lɛ́ɛ ɖíe: Aliyani, Manaxáti, Evalu, Cefí kpódó Ɔnámu kpó. Siveɔ́ni ví lɛ́ɛ ɖíe: Aya kpó Ana. Ana ji Dicɔ́ni; Dicɔ́ni ví lɛ́ɛ ɖíe: Hamulaní, Ɛcibáni, Yitlani kpódó Keláni kpó. Esɛ́ɛ ví lɛ́ɛ ɖíe: Biluháni, Zaawani kpó Yaakáni kpó. Dicɔ́ni ví lɛ́ɛ ɖíe: Wúsi kpódó Alani kpán. Axɔ́sú e yi axɔ́súzinkpo Edɔ́mu tɔn jí ɖě jɛ ɖě gúdo cóbɔ axɔ́sú ɖokpó wá jɛ Izlayɛ́li togun ɔ́ nu ɔ́, nyǐkɔ yětɔn lɛ́ɛ ɖíe: Bɛ́la, Beɔ́ɔ ví ɔ́, Dinavanu wɛ. Bɛ́la wá kú bɔ Boslanu Yovavu Zeláxi ví ɔ́ wá ɖu axɔ́sú ɖó tɛn tɔn mɛ. Yovavu wá kú, bɔ Temaninu Hucámu wá ɖu axɔ́sú ɖó tɛn tɔn mɛ. Hucámu wá kú, bɔ Awítinu Hadádi Bedádi ví ɔ́ ɖu axɔ́sú ɖó tɛn tɔn mɛ. É wɛ hu Madiáani ví lɛ́ɛ ɖo Mɔwabu gbé jí. Hadádi wá kú, bɔ Samula, Maslekanu ɔ́ ɖu axɔ́sú ɖó tɛn tɔn mɛ. Samula lɔ wá kú, bɔ Cawúlu Hlexɔvɔ́tinu e ɖo Efláti tɔ jí ɔ́ ɖu axɔ́sú ɖó tɛn tɔn mɛ. Cawúlu wá kú, bɔ Baalu-Hanáni, Akubɔ́ɔ ví ɔ́ ɖu axɔ́sú ɖó tɛn tɔn mɛ. Baalu-Hanáni lɔ wá kú, bɔ Hadádi Payíinu ɔ́ ɖu axɔ́sú ɖó tɛn tɔn mɛ; asi tɔn nɔ nyí Mɛxetaveyɛ́li. Mɛxetaveyɛ́li ɔ́ Matlɛ́di ví wɛ bó nyí Mɛ-Zahavu vívú. Hadádi lɔ wá kú, bɔ hɛ̌nnugán lɛ́ɛ kpa acɛ dó Edɔ́mu to ɔ́ nu. Nyǐkɔ yětɔn lɛ́ɛ ɖíe: Timuna, Aliya, Yetɛ́ti, Oxoliváma, Ela, Pinɔ́nu, Kenázi, Temani, Mivusáa, Magidiɛ́li kpódó Ilamu kpó. Hɛ̌nnugán Edɔ́mu tɔn lɛ́ɛ nɛ́. Jakɔ́bu e nɔ lɛ́ nyí Izlayɛ́li ɔ́ sín vǐ lɛ́ɛ ɖíe: Hwlibɛ́ni, Sinmɛnyɔ́ɔ, Levíi, Judáa, Isakáa, Zabulɔ́ɔn, Dan, Jozɛ́fu, Bɛnjamɛ́ɛ, Nɛfutali, Gadi kpó Acɛ́ɛ kpó. Judáa ví lɛ́ɛ ɖíe: Ɛ́ɛ, Ɔnáni kpó Cela kpó. Asi tɔn Kanáanu Cuwa ví ɔ́ wɛ ji vǐ atɔn énɛ́ lɛ́ɛ n'i. Ɛ́ɛ nukɔngbéví Judáa tɔn ɔ́, Mawu Mavɔmavɔ mɔ ɛ dó mɔ mɛdídá, bó hu i. Judáa lɛ́ ji Pɛlɛ́si kpó Zeláxi kpó ɖo vǐ tɔn sín asi Tamáa xomɛ. Vǐ tɔn lɛ́ɛ bǐ bló atɔ́ɔ́n. Pɛlɛ́si ví lɛ́ɛ ɖíe: Ɛslɔ́ni kpó Hamúlu kpó. Zeláxi ví lɛ́ɛ ɖíe: Zimuli, Etáni, Hemani, Kalukɔ́lu kpódó Dala kpán. Yě bǐ bló vǐ atɔ́ɔ́n. Kaamíi ví ɔ́ nɔ́ nyí Akáa. Akáa ɔ́ wɛ ɖe nǔ e è bɛ̌ sín ahwangbénu wá nú Mawu Mavɔmavɔ ɔ́ kpo, bó dɔn nǔ nyanya dó Izlayɛ́li to ɔ́ jí. Etáni ví ɔ́ nɔ́ nyí Azalya. Ɛslɔ́ni ví lɛ́ɛ ɖíe: Yelaximɛyɛ́li, Hlamu kpódó Kalɛ́bu e è nɔ lɛ́ ylɔ́ ɖɔ Kelubayi ɔ́ kpó. Hlamu ji Aminadabu, Aminadabu ji Naxicɔ́ni; Naxicɔ́ni wɛ kpa acɛ dó akɔta Judáa tɔn nu. Naxicɔ́ni ji Saluma, Saluma ka ji Bowozi, Bowozi ji Ovɛ́di, bɔ Ovɛ́di ji Jɛsée. Jɛsée ɖó vǐ súnnu tɛ́nwe. Nukɔntɔn ɔ́ nyí Eliavu, wegɔ́ ɔ́ nyí Avinadávu, bɔ atɔngɔ́ ɔ́ nyí Cimɛ́ya. Ɛnɛgɔ́ ɔ́ nyí Nɛtanɛli. Atɔ́ɔ́ngɔ́ ɔ́ nyí Hladayi. Ayizɛ́ngɔ́ ɔ́ nyí Osɛ́mu, bɔ tɛ́nwegɔ́ ɔ́ nyí Davídi. Nɔví yětɔn nyɔ̌nu lɛ́ɛ ɖíe: Selúya kpó Avigalu kpó. Selúya ɔ́ ji vǐ atɔn: Avicáyi, Jowabu kpó Asaxɛli kpó. Avigalu ɔ́, ji vǐ ɖokpó bɔ é nɔ́ nyí Amasa. Tɔ́ tɔn nɔ́ nyí Yɛtɛ́ɛ; Isimayɛ́li ví wɛ. Kalɛ́bu Ɛslɔ́ni ví ɔ́ ji vǐ ɖo asi tɔn Azuva xomɛ, bo ji ɖo Yeliyɔ́ti xomɛ. Vǐ tɔn lɛ́ɛ ɖíe: Yecɛ́ɛ, Covavu kpódó Aadɔ́ni kpó. Azuva wá kú, bɔ Kalɛ́bu da Efláti, bo ji Húu ɖo xo tɔn mɛ. Húu ji Wulíi, bɔ Wulíi ji Besalɛli. Énɛ́ ɔ́ gúdo ɔ́, Ɛslɔ́ni da Makíi Galadi tɔ́ ɔ́ sín vǐ. Xwe kanɖé ko (60) wɛ é ɖó hwenu e é da nyɔ̌nu ɔ́ é, bó ji Segúvu ɖo xo tɔn mɛ. Segúvu ka ji Yayíi, Yayíi ɔ́ toxo ko-nukún-atɔn wɛ é ɖó ɖo Galadi yíkúngban jí. Axɔ́sú Gɛcúu tɔn kpó Alamu tɔn kpó yí gletoxo Yayíi tɔn lɛ́ɛ, bó yí gletoxo e ɖo Kenáti lɛ́ɛ kpódó éé lɛ́ lɛ̌ dó e lɛ́ɛ kpó, bɔ bǐ bló kanɖé ko (60). Mɛ e ɖo toxo énɛ́ lɛ́ɛ mɛ lɛ́ɛ bǐ wɛ nyí Makíi, Galadi tɔ́ ɔ́ sín vǐ. Ée Ɛslɔ́ni kú ɔ́, Kalɛ́bu ɖó xó xá tɔ́ tɔn Ɛslɔ́ni sín asi Efláti, bɔ é ji Acehúu n'i. Acehúu ɔ́ wɛ ɖó Tekowa toxo ɔ́ ayǐ. Yelaximɛyɛ́li nukɔngbéví Ɛslɔ́ni tɔn sín vǐ lɛ́ɛ ɖíe: Hlamu, Buna, Olɛni, Osɛ́mu kpó Axiya kpó. Hlamu wɛ nyí nukɔngbéví ɔ́. Yelaximɛyɛ́li da nyɔ̌nu ɖěvo bo ji Ɔnámu ɖo xo tɔn mɛ. Nyɔ̌nu ɔ́ nɔ́ nyí Atala. Hlamu nukɔngbéví Yelaximɛyɛ́li tɔn ɔ́ sín vǐ lɛ́ɛ ɖíe: Maasi, Yamini kpó Ekɛ́ɛ kpó. Ɔnámu ví lɛ́ɛ ɖíe: Camumayi kpó Yada kpó. Camumayi ɔ́, vǐ éyɛ́ tɔn lɛ́ɛ ɖíe: Nadavu kpó Avicúu kpó. Avicúu da Avihayilu, bó ji Axibani kpó Mɔlidi kpó ɖo xo tɔn mɛ. Nadavu ví lɛ́ɛ ɖíe: Sɛlɛ́di kpó Akpayímu kpó. Sɛlɛ́di ka ɖó vǐ ɖě cóbó kú ǎ. Akpayímu ɔ́ ji Yiceyi. Yiceyi ji Cecáni, Cecáni ji Axlayi. Yada, Camumayi nɔví ɔ́ sín vǐ lɛ́ɛ ɖíe: Yɛtɛ́ɛ kpó Yonatáni kpó. Yɛtɛ́ɛ ka ɖó vǐ ɖě cóbó kú ǎ. Yonatáni ví lɛ́ɛ ɖíe: Pɛlɛ́ti kpó Zaza kpó. Yelaximɛyɛ́li sín kúnkan lɛ́ɛ nɛ́. Cecáni ji vǐ súnnu ɖě ǎ, vǐ nyɔ̌nu kɛ́ɖɛ́ wɛ é ji. Cecáni ɖó kannumɔ Ejípunu ɖokpó, bɔ é nɔ nyí Yaaxa. Cecáni sɔ́ vǐ tɔn ɖokpó da nú Yaaxa, kannumɔ tɔn ɔ́, bɔ é ji Atayi n'i. Atayi ji Natáni. Natáni ji Zavadu, Zavadu ji Efláli, Efláli ji Ovɛ́di, Ovɛ́di ji Yehu, Yehu ji Azalya, Azalya ji Hɛlɛ́si, Hɛlɛ́si ji Eleasa, Eleasa ji Sisimayi, Sisimayi ka ji Calúmu. Calúmu ji Yekamiya, Yekamiya ka ji Elicama. Kalɛ́bu, Yelaximɛyɛ́li nɔví ɔ́ sín vǐ lɛ́ɛ ɖíe: Mɛca kpó Maleca kpó. Mɛca wɛ nyí nukɔngbéví tɔn. É wɛ ji Zifu. Maleca ví lɛ́ɛ wɛ ka ɖo Eblɔ́n. Eblɔ́n ví lɛ́ɛ ɖíe: Koláxi, Tapuwaxi, Hlɛkɛ́mu kpódó Cɛma kpán. Cɛma ji Hlaxámu, Hlaxámu ji Yɔkeamu, Hlɛkɛ́mu ka ji Camumayi. Camumayi ji Mawɔ́ni, bɔ Mawɔ́ni ji Bɛti-Súu. Kalɛ́bu ɖó asi ɖokpó bɔ é nɔ́ nyí Eyifa. Eyifa ji Halani, Mɔsa kpó Gazɛzi kpó n'i. Halani ji súnnu ɖokpó, bó sun nyǐ i ɖɔ Gazɛzi. Yaxidayi ví lɛ́ɛ ɖíe: Hlɛgɛ́mu, Yotámu, Gecáni, Pɛlɛ́ti, Eyifa kpódó Cáafu kpó. Kalɛ́bu ɖó asi ɖěvo, bɔ è nɔ ylɔ́ ɛ ɖɔ Maaka. Maaka ji Cɛvɛ́ɛ kpó Tíilana kpó n'i, Maaka lɛ́ ji Cáafu kpódó Cewa kpó. Cáafu ɔ́ ji Madumána, Cewa ɔ́ ji Makibena kpó Giveya kpó. Kalɛ́bu ji nyɔ̌nu ɖěvo bɔ è nɔ ylɔ́ ɛ ɖɔ Akisa. Kalɛ́bu sín vǐ ɖěvo lɛ́ɛ ɖíe: Húu. É wɛ nyí asi tɔn Efláti ɔ́ sín nukɔngbéví. Húu ɔ́ ji vǐ atɔn. Đokpó nɔ́ nyí Covalu. É wɛ ɖó Kiliyati-Yealimu toxo ɔ́ ayǐ. Đokpó nɔ́ nyí Saluma. É wɛ ɖó Bɛteleyɛ́mu toxo ɔ́ ayǐ. Đokpó nɔ́ nyí Halɛ́fu. É wɛ ɖó Bɛti-Gadɛ́ɛ toxo ɔ́ ayǐ. Covalu e ɖó Kiliyati-Yealimu toxo ɔ́ ayǐ ɔ́ wɛ dó Haloɛnu lɛ́ɛ kpó Mɛnuhɔtinu lɛ́ɛ vlɔ̌ kpó sín kún. Bó lɛ́ dó akɔta e ɖo Kiliyati-Yealimu lɛ́ɛ sín kún. Akɔta lɛ́ɛ ɖíe: Yɛtɛ́ɛ ví lɛ́ɛ, Pútinu lɛ́ɛ, Cumatinu lɛ́ɛ kpó Micelanu lɛ́ɛ kpó. Akɔta énɛ́ lɛ́ɛ wɛ ɖo Soléa gletoxo lɛ́ɛ kpó Ɛcitawɔ́lu gletoxo lɛ́ɛ kpó mɛ. Saluma wɛ dó Bɛteleyɛ́munu lɛ́ɛ kpó Nɛtofanu lɛ́ɛ kpó sín kún, bó dó Atlɔ́ti-Bɛti-Yoavunu, Manaxáti ví lɛ́ɛ vlɔ̌ kpó Soléanu lɛ́ɛ vlɔ̌ kpó sín kún, bó lɛ́ dó wěmasetɔ́ e ɖo Yaebɛ́si lɛ́ɛ sín kún. Yě wɛ nyí Tileatíi lɛ́ɛ kpó Cimɛyati lɛ́ɛ kpó, kpódó Sukátinu lɛ́ɛ kpó. Yě mɛ énɛ́ lɛ́ɛ ɔ́, Keninu wɛ yě nyǐ, bó jɔ ɖo Hamumáti e nyí tɔ́gbó Hlekávu ví lɛ́ɛ tɔn é sín kún mɛ. Davídi ví e é ji ɖo Eblɔ́n lɛ́ɛ ɖíe: Nukɔngbéví tɔn nɔ́ nyí Amunɔ́ɔ, bɔ é ji ɖo Axinɔwamu Izleyɛ́linu ɔ́ xomɛ. Vǐ tɔn wegɔ́ ɔ́ nɔ́ nyí Daniyɛ́li, bɔ é ji ɖo Avigalu Kaamɛ́linu ɔ́ xomɛ. Vǐ tɔn atɔngɔ́ ɔ́ nɔ́ nyí Abusalɔ́mu, bɔ é ji ɖo Maaka xomɛ. Maaka ɔ́, Gɛcúu xɔ́sú Talumayi ví wɛ. Vǐ tɔn ɛnɛgɔ́ ɔ́ nɔ́ nyí Adoniyasi, bɔ é ji ɖo Hagiti xomɛ. Vǐ tɔn atɔ́ɔ́ngɔ́ ɔ́ nɔ́ nyí Cefátiya, bɔ é ji ɖo Avitálu xomɛ. Vǐ tɔn ayizɛ́ngɔ́ ɔ́ nɔ́ nyí Yitleamu, bɔ é ji ɖo Egla xomɛ. Eblɔ́n wɛ é ji vǐ ayizɛ́n énɛ́ lɛ́ɛ ɖe. É nɔ́ Eblɔ́n bó ɖu axɔ́sú xɔ xwe tɛ́nwe adaɖé, bó nɔ Jeluzalɛ́mu bó ɖu axɔ́sú nú xwe gban-nukún-atɔn (33). Vǐ e é ji ɖo Jeluzalɛ́mu lɛ́ɛ ɖíe: Cimɛ́ya, Covavu, Natáni kpó Salomɔ́ɔ kpó. Bati-Cúwa, Amumiyɛli ví ɔ́ xomɛ wɛ é ji vǐ énɛ́ lɛ́ɛ ɖe. Yiváa, Elicuwa, Elifɛlɛ́ti. Nɔgáxi, Nɛfɛ́gi, Yafia, Elicama, Eliyada, kpódó Elifɛlɛ́ti kpó. Vǐ énɛ́ lɛ́ɛ bló vǐ tɛ́nnɛ. Davídi ví lɛ́ɛ bǐ nɛ́. Vǐ e asi tɔn lɛ́ɛ ji n'i lɛ́ɛ ɖ'é mɛ ǎ. É ká ɖó vǐ nyɔ̌nu ɖokpó, bɔ é nɔ́ nyí Tamáa. Salomɔ́ɔ ji Hlobowámu, Hlobowámu ji Abiya, Abiya ji Asa, Asa ji Jozafáti, Jozafáti ji Yexolámu, Yexolámu ji Akaziasi, Akaziasi ji Joasi, Joasi ji Amasiyasi, Amasiyasi ji Oziyási, Oziyási ji Yotámu, Yotámu ji Akázi, Akázi ji Ezekiyási, Ezekiyási ji Manasée, Manasée ji Amɔ́ni, Amɔ́ni ji Joziyási. Joziyási ví lɛ́ɛ ɖíe: nukɔngbéví ɔ́ nɔ́ nyí Yoxanáni, wegɔ́ ɔ́ nɔ́ nyí Yoyakímu, atɔngɔ́ ɔ́ nɔ́ nyí Sedesíyasi, ɛnɛgɔ́ ɔ́ nɔ́ nyí Calúmu. Yoyakímu ví lɛ́ɛ ɖíe: Yoyakini kpó Sedesíyasi kpó. Yoyakini e ahwan wlí yi Babilɔ́nu é sín ví lɛ́ɛ ɖíe: Calutiyɛ́li, Malukilámu, Pedaya, Cɛnasáa, Yekamiya, Hocama kpódó Nɛdaviya kpó. Pedaya ví lɛ́ɛ ɖíe: Zolobabɛ́li kpó Cimɛ́yi kpó. Zolobabɛ́li ví lɛ́ɛ ɖíe: Mɛculamu kpó Hananiya kpó. É ɖó vǐ nyɔ̌nu ɖokpó bɔ è nɔ ylɔ́ ɛ ɖɔ Celomíti. Zolobabɛ́li lɛ́ ji vǐ súnnu atɔ́ɔ́n. Yě wɛ nyí Hacúva, Ohɛli, Bɛlɛkya, Hasadiya kpódó Yucavu-Xɛsɛ́di kpó. Hananiya ví lɛ́ɛ ɖíe: Pelatiya kpó Yecaya kpó, Hlefaya ví lɛ́ɛ, Aanani ví lɛ́ɛ, Ovadia ví lɛ́ɛ kpódó Cekaniya ví lɛ́ɛ kpó. Cekaniya ɖó vǐ ayizɛ́n. Yě wɛ nyí Cemaya, Hatúci, Yigealu, Balyaxi, Nɛyalíya kpódó Cafáti kpó. Nɛyalíya ɖó vǐ atɔn. Yě wɛ nyí Eliyoenayi, Hizikiya kpódó Azlikámu kpó. Eliyoenayi ɖó vǐ tɛ́nwe. Yě wɛ nyí Hodawyahu, Eliyacivu, Pelaya, Akúvu, Yoxanáni, Deláya kpódó Anáni kpó. Judáa ví súnnu lɛ́ɛ ɖíe: Pɛlɛ́si, Ɛslɔ́ni, Kaamíi, Húu kpódó Covalu kpó. Hleaya, Covalu ví ɔ́ ji Yaxáti, Yaxáti ji Ahumayi kpó Laxádi kpó. Yě mɛ énɛ́ lɛ́ɛ wɛ nyí mɛ e jɔ ɖo Soléa hɛ́nnumɛ lɛ́ɛ sín tɔ́gbó. Mɛ e ɖó Etámu toxo ɔ́ ayǐ lɛ́ɛ ɖíe: Izleyɛ́li, Yicima kpódó Yidubaci kpó. Yě ɖǒ nɔví nyɔ̌nu ɖokpó, bɔ é nɔ́ nyí Haselɛlipɔ́ni. Pɛnuwɛ́li; é wɛ ɖó Gedɔ́ɔ toxo ɔ́ ayǐ. Ezɛ́ɛ; é wɛ ɖó Huca toxo ɔ́ ayǐ. Húu ví lɛ́ɛ nɛ́. Húu ɔ́, nukɔngbéví Efláti tɔn wɛ é nyí. É wɛ ɖó Bɛteleyɛ́mu toxo ɔ́ ayǐ. Acehúu e ɖó Tekowa toxo ɔ́ ayǐ ɔ́, asi we wɛ é ɖó. Yě wɛ nyí Hɛleya kpó Naala kpó. Naala ɔ́, vǐ e é ji n'i lɛ́ɛ ɖíe: Ahuzámu, Hefɛ́ɛ, Temani lɛ́ɛ kpódó Ahasitáalinu lɛ́ɛ kpó. Hɛleya ɔ́, vǐ e é ji n'i lɛ́ɛ ɖíe: Sɛlɛ́ti, Soháa kpódó Ɛtináni kpó. Kɔ́si ji Anuvu kpó Hasɔvéva kpó. Kɔ́si wɛ nyí mɛ e jɔ ɖo Ahaaxɛli, Halúmu ví ɔ́ sín hɛ̌nnu mɛ lɛ́ɛ sín tɔ́gbó. Yaebɛ́si ɔ́, è nɔ wlí yɛ̌yi nú éyɛ́ hú nɔví tɔn lɛ́ɛ. Nɔ tɔn sun nyǐ i ɖɔ Yaebɛ́si, ɖó hwenu e é ɖo nǎ ji i wɛ ɔ́, é mɔ wǔvɛ́ ɖésú. Yaebɛ́si sú xó ylɔ́ Mawu Izlayɛ́li tɔn ɔ́ bó ɖɔ: “Mawu Izlayɛ́li tɔn, kɔn nyɔ̌ná towe dó jǐ ce, dǒ dɔkun dɔkun jí nú mì. Dlɛ̌n mɛhwlɛ́ngántɔ́lɔ towe dó jǐ ce, bó sɛ nǔ nyanya kpó yajiji kpó dó zɔ nú mì.” Mawu ká ná ɛ nǔ e é byɔ́ ɛ lɛ́ɛ é. Kelúvu, Cúxa nɔví ɔ́ ji Mɛxíi, Mɛxíi ɔ́ ka ji Ɛcitɔ́ni. Ɛcitɔ́ni ji Bɛti-Hlafa, Paseyaxi kpódó Texína kpó. Texína wɛ ɖó Naxáci toxo ɔ́ ayǐ. Yě wɛ nyí Hlekanu lɛ́ɛ. Kenázi ví lɛ́ɛ ɖíe: Ɔtiniyɛ́li kpó Selaya kpó; Ɔtiniyɛ́li ji Hatáti kpó Mɛwɔnɔtayi kpó. Mɛyɔnɔtayi ji Ɔfla. Selaya ji Yoavu. Yoavu ɔ́ wɛ nyí alɔnuzɔ́watɔ́ e ɖo tɔdo alɔnuzɔ́watɔ́ lɛ́ɛ tɔn mɛ lɛ́ɛ sín tɔ́gbó. Kalɛ́bu, Yefunnɛ́ɛ ví ɔ́ sín vǐ lɛ́ɛ ɖíe: Ilu, Ela kpódó Naamu kpó. Ela ji Kenázi. Yexalelɛ́li ví lɛ́ɛ ɖíe: Zifu, Zifa, Tilia kpódó Asaleɛli kpó. Hodya da Naxámu sín nɔví nyɔ̌nu ɖokpó. Yě wɛ dó Gɛlɛ́munu lɛ́ɛ kpó Maaka ví lɛ́ɛ kpó sín kún. Gɛlɛ́munu lɛ́ɛ wɛ ɖo Keyila, bɔ Maaka ví lɛ́ɛ ɖo Ɛcitemɔwa. Cimɔ́ni ví lɛ́ɛ ɖíe: Amunɔ́ni, Hlína, Bɛni-Hanáni kpódó Tilɔni kpó. Yiceyi ví lɛ́ɛ ɖíe: Zoxɛ́ti kpó vǐ tɔn kpó. Cela, Judáa ví ɔ́, vǐ tɔn lɛ́ɛ ɖíe: Ɛ́ɛ kpó Laedáa kpó. Ɛ́ɛ ɔ́ wɛ ɖó Leka toxo ɔ́ ayǐ, bɔ Laedáa ɖó Maleca toxo ɔ́ ayǐ, bó lɛ́ dó mɛ e nɔ lɔn gbɔ̌fúnvɔ ɖo Bɛti-Acibea lɛ́ɛ sín kún. Cela lɛ́ nyí Yokímu kpó Kozevanu lɛ́ɛ kpó, kpó Yoaci kpó, kpó Saláfu kpó sín tɔ́gbó; yědɛɛ lɛ́ɛ wɛ da Mɔwabunu lɛ́ɛ cóbó lɛ́ kɔ wá cí Lexɛ́mu. Tan xóxó wɛ nyí tan énɛ́ lɛ́ɛ. Zɛ̌nmɛtɔ́ wɛ vǐ yětɔn lɛ́ɛ nyí. Nɛtayímu kpó Gedela kpó wɛ yě nɔ́ nɔ, bó nɔ wa azɔ̌ nú axɔ́sú ɔ́. Sinmɛnyɔ́ɔ ví lɛ́ɛ ɖíe: Nɛmuwɛ́li, Yamini, Yalívu, Zeláxi kpó Cawúlu kpó. Cawúlu ji Calúmu, Calúmu ji Mivusámu, Mivusámu ji Micima. Micima ji Hamumuwɛ́li, Hamumuwɛ́li ji Zakúu, bɔ Zakúu ji Cimɛ́yi. Cimɛ́yi ji vǐ súnnu afɔtɔn-nukún-ɖokpó, bó ji nyɔ̌nu ayizɛ́n. Nɔví tɔn súnnu lɛ́ɛ ji vǐ gěgé ɖé ǎ. Énɛ́ wú wɛ akɔta Sinmɛnyɔ́ɔ tɔn ma gba kún sɔ Judáa tɔn ǎ. Toxo e mɛ yě nɔ́ nɔ lɛ́ɛ ɖíe: Bɛ̌-Ceva, Mɔlada, Hasáa-Cuwáli, Biluha, Esɛ́mu, Toladi, Betuwɛ́li, Hɔ́ɔma, Siklági, Bɛti-Maakavɔ́ti, Hasáa-Susímu, Bɛti-Bileyi kpódó Caalayímu kpó. Toxo énɛ́ lɛ́ɛ wɛ nyí toxo yětɔn lɛ́ɛ kpó gletoxo yětɔn lɛ́ɛ kpó káká wá jɛ hwenu e Davídi ɖu axɔ́sú dó é. Yě lɛ̌ ɖó toxo atɔ́ɔ́n ɖěvo lɛ́ɛ. Toxo lɛ́ɛ nɔ nyí Etámu, Ayini, Hlimumɔ́nɔ, Tokɛ́ni kpó Acáni kpó, kpódó gletoxo e lɛ́ dó toxo énɛ́ lɛ́ɛ bǐ kpó, káká yi Baaláti. Fí e yě nɔ́ nɔ lɛ́ɛ nɛ́; tɔ́gbó yětɔn lɛ́ɛ sín nyǐkɔ nɛ́. Mɛ e nyí hɛ̌nnugán ɖo akɔta Sinmɛnyɔ́ɔ tɔn mɛ lɛ́ɛ ɖíe: Mɛcovavu, Yamulɛ́ki, Yoca; Yoca ɔ́, Amaciya ví wɛ. Yoɛ́li, Yehu; Yehu ɔ́, Yocivia ví wɛ. Yocivia nyí Selaya ví bó nyí Aziɛ́li vívú. Eliyoenayi, Yaakova, Yecoxáya, Asaya, Adiyɛli, Yesimiyɛ́li, Benaya, Ziza Cifeyi ví, Alɔ́ni vívú ɔ́; Alɔ́ni ɔ́, Yedaya ví, Cimuli vívú, Cemaya vívú vivu wɛ. Mɛ énɛ́ lɛ́ɛ ɔ́, hɛ̌nnugán wɛ yě nyǐ, bɔ yě kpó vǐ yětɔn lɛ́ɛ kpó gba kún, bó sukpɔ́ káká. Yě yi Gedɔ́ɔ wají ɖo Gedɔ́ɔ tɔdo ɔ́ sín zǎnzǎnhwe jí, bó ná ba fí e gbɔ̌ yětɔn lɛ́ɛ ná nɔ mɔ ama ɖu ɖe é. Yě wǎ yi jɛ fí ɖé, bɔ fí ɔ́ gbló ganjí, bɔ xɛsi ɖo fí ɔ́ ǎ. Yě mɔ ama ɖagbe, ama e nyɔ́ ganjí é ɖo fínɛ́ nú gbɔ̌ yětɔn lɛ́ɛ. Fínɛ́ wɛ Cámu ví lɛ́ɛ nɔ ɖ'ayǐ. Ezekiyási Judáa xɔ́sú ɔ́ hwenu wɛ gǎn énɛ́ lɛ́ɛ e è xa din lɛ́ɛ wá gbě énɛ́ ɔ́ jí. Yě kíjá goxɔ Cámu ví lɛ́ɛ tɔn kpó nɔtɛn yětɔn lɛ́ɛ kpó, bó sú mɛ e ɖo fínɛ́ lɛ́ɛ bǐ kún dó, bɔ è sɔ́ nɔ mɔ yě ɖo fí ɖě káká jɛ égbé ǎ. Ée yě sú kún yětɔn dó ɔ́, yě jɛ tɛn yětɔn mɛ, ɖó ama ɖagbe ɖo fínɛ́ nú gbɔ̌ yětɔn lɛ́ɛ. Sinmɛnyɔ́ɔ ví ɖé lɛ́ɛ yi Edɔ́mu só ɔ́ jí. Yě mɛ afɔwe kanwe ko (500) wɛ yi, bɔ Yiceyi ví Pelatiya, Nɛyalíya, Hlefaya kpódó Wuziyɛ́li kpó zɔn yě nu. Yě hu Amalɛ́ki ví e kpo ɖo gbɛ, bo hɔn yi cí fínɛ́ lɛ́ɛ, bó sá xwé nyi fínɛ́, bɔ kúnkan yětɔn lɛ́ɛ kpo ɖo fínɛ́ káká jɛ égbé. Hwlibɛ́ni wɛ nyí nukɔngbéví Izlayɛ́li tɔn. É wɛ nyí nukɔngbéví, amɔ̌, é wá ɖó xó xá tɔ́ tɔn sín asi bɔ è yǐ vǐɖaxó sín acɛ e é ɖó ɔ́ sín así tɔn, bó zé nú Jozɛ́fu ví lɛ́ɛ. Hǔn hwenu e è sɔ́ kɛ́n yětɔn ɔ́, è wlǎn ɖɔ Hwlibɛ́ni nyí vǐɖaxó ǎ. Judáa ɔ́ wɛ nyí mɛ syɛ́nsyɛ́n e ɖo nɔví tɔn lɛ́ɛ mɛ é. Kún tɔn mɛ wɛ Izlayɛ́li xɔ́sú ɖokpó jɔ ɖe. Amɔ̌, Jozɛ́fu wɛ ɖó vǐɖaxó sín acɛ ɔ́. Hwlibɛ́ni nukɔngbéví Izlayɛ́li tɔn ɔ́ sín vǐ lɛ́ɛ ɖíe: Hanɔki, Palúu, Ɛslɔ́ni kpódó Kaamíi kpó. Yoɛ́li ji Cemaya, Cemaya ji Gɔgu, bɔ Gɔgu ji Cimɛ́yi, Cimɛ́yi ji Mika, Mika ji Hleaya, bɔ Hleaya ji Baalu, Baalu ji Beela; Beela ɔ́ wɛ kpa acɛ dó Hwlibɛ́ni ví lɛ́ɛ nu. É wɛ axɔ́sú Asilíi tɔn Tiglati-Pilesɛ́ɛ wlí hɛn yi kannumɔgbénu. È sɔ́ Beela mɛ lɛ́ɛ sín kɛ́n. Yeyiɛ́li wɛ nyí mɛ nukɔntɔn ɔ́, bɔ Zekaliyahu bɔ d'é wú. Lobɔ Bɛ́la wá jɛ fínɛ́. Bɛ́la ɔ́, Azazi sín vǐ wɛ é nyí, bó nyí Cɛma vívú, lobo nyí Yoɛ́li vívú vivu. Ayǐkúngban e jí Hwlibɛ́ni ví lɛ́ɛ nɔ ɔ́, bɛ́ sín Alowɛ́ɛ, bo gbɔn Nɛbo só ɔ́ kɔn káká yi Baalu-Mɛyɔ́ni toxo ɔ́ mɛ, ɖo totaligbé. Ayǐkúngban yětɔn lɛ́ ɖo zǎnzǎnhwe jí, ɖo gbětótló e yi tɔsisa Efláti tɔn ɔ́ kɔn é kpá. Đó kanlin yětɔn lɛ́ɛ sukpɔ́ ɖésú ɖo Galadi yíkúngban jí. Đo Sawúlu hwenu ɔ́, yě fun ahwan xá Hagáa ví lɛ́ɛ bó ɖu ɖo yě jí. Énɛ́ ɔ́ gúdo ɔ́, yě sá xwé gbɔn Galadi yíkúngban ɔ́ bǐ jí ɖo zǎnzǎnhwe jí. Ayǐkúngban Gadi ví lɛ́ɛ tɔn ɖo Hwlibɛ́ni ví lɛ́ɛ tɔn sín taligbé, bɛ́ sín Basáni káká yi Saluka ɖo zǎnzǎnhwe jí. È nɔ mɔ Yoɛ́li nukɔntɔ́ ɔ́ sín hɛ̌nnu, Cafámu e bɔ d'é wú ɔ́ sín hɛ̌nnu, Yaenayi sín hɛ̌nnu kpódó Cafáti sín hɛ̌nnu kpó ɖo fínɛ́. Mɔ̌ ɖokpó ɔ́, è nɔ lɛ́ mɔ hɛ̌nnu tɛ́nwe ɖěvo ɖo fínɛ́. Hɛ̌nnu lɛ́ɛ wɛ nyí Mikaɛli hɛ́nnu ɔ́, Mɛculamu hɛ́nnu ɔ́, Cɛ́va hɛ́nnu ɔ́, Yolayi hɛ́nnu ɔ́, Yaekani hɛ́nnu ɔ́, Ziya hɛ́nnu ɔ́ kpó Ebɛ́ɛ hɛ́nnu ɔ́ kpó. Avihayilu ví lɛ́ɛ wɛ ɖó hɛ̌nnu énɛ́ lɛ́ɛ ayǐ. Tɔ́gbó yětɔn lɛ́ɛ ká ɖíe: Avihayilu Hulíi ví ɔ́, Hulíi Yalɔáxi ví ɔ́, Yalɔáxi Galadi ví ɔ́, Galadi Mikaɛli ví ɔ́, Mikaɛli Yecicayi ví ɔ́, Yecicayi Yaxidóo ví ɔ́, Yaxidóo Buzu ví ɔ́. Axi e nyí Avidyɛli ví, bó nyí Gúni vívú ɔ́ wɛ nyí gǎn nú hɛ̌nnu énɛ́ lɛ́ɛ bǐ. Yě nɔ́ nɔ Galadi, bó nɔ́ nɔ Basáni kpó toxo e lɛ́ dó yě lɛ́ɛ kpó mɛ, bó nɔ́ nɔ nǔkan e lɛ́ dó Calɔ́ni toxo ɔ́ é mɛ, káká yi fí e dogbó yětɔn vɔ dó é. Gadi ví lɛ́ɛ bǐ sín kɛ́n wɛ è sɔ́ ɖo Yotámu Judáa xɔ́sú ɔ́ kpódó Jelobowámu Izlayɛ́li xɔ́sú ɔ́ kpó sín hwenu. Akɔta Hwlibɛ́ni tɔn, Gadi tɔn kpódó akɔta vlɔ́ Manasée tɔn kpó ɖó ahwanfuntɔ́ syɛ́nsyɛ́n ɖé lɛ́ɛ; yě tunwun ahwanzɔ́; yě nyɔ́ gǎglónú kpó hwǐ kpó gǎ kpó zán, bó ɖo gbesisɔ mɛ bo ná yi ahwangbénu. Yě mɛ ahwanfuntɔ́ syɛ́nsyɛ́n énɛ́ lɛ́ɛ bló gbɛtɔ́ adɔ̌kpo we děgba ɖě nǔwɔntɔn kɛnnɛ (44.760). Yě fun ahwan xá Hagáa ví lɛ́ɛ, bó fun xá Yetúu ví lɛ́ɛ, lobo fun xá Nafíci ví lɛ́ɛ kpódó Nɔdávu ví lɛ́ɛ kpó. Hwenu e yě ɖo ahwan ɔ́ fun wɛ ɔ́, yě sú xó ylɔ́ Mawu ɖɔ é ní wá dó alɔ émí, bɔ Mawu dó alɔ yě bɔ yě ɖu ɖo Hagáa ví lɛ́ɛ kpó mɛ yětɔn lɛ́ɛ kpó jí, bó wlí yě. Mawu dó alɔ yě ɖó yě ɖeji dó wǔ tɔn. Yě bɛ̌ kanlin yětɔn lɛ́ɛ bǐ; kanlin e yě bɛ̌ lɛ́ɛ ɖíe: lǎkúnmí adɔ̌kpo we děgba we afɔwó (50.000), tócí afɔwó (2.000). Gbɔ̌ adɔ̌kpo wěwe děgba we afɔwó (250.000). Yě wlí gbɛtɔ́ adɔ̌kpo atɔ́ɔ́n (100.000) Gbɛtɔ́ e ka kú lɛ́ɛ sukpɔ́, ɖó ahwan énɛ́ ɔ́ e yě fun ɔ́, Mawu wɛ fun. Bɔ yě jɛ agban ɖó Hagáa ví lɛ́ɛ sín tɛn mɛ káká wá jɛ hwenu e è wlǐ yě lɔmɔ̌ yi kannumɔgbénu é. Akɔtavlɔ́ Manasée tɔn ɔ́ nɔ to ɔ́ mɛ bɛ́ sín Basáni ɖo tofɔligbé káká yi Baalu-Ɛmɔ́ɔ, Seníi kpó Ɛmɔ́ɔ só ɔ́ kɔn kpó ɖo totaligbé. Yě wá sukpɔ́ ɖo to ɔ́ mɛ. Hɛ̌nnugán e ɖo akɔta ɔ́ mɛ lɛ́ɛ ɖíe: Efɛ́ɛ, Yiceyi, Eliyɛ́li, Azliyɛ́li, Yiimɛya, Hodawya kpódó Yaxidiɛ́li kpó. Yě mɛ énɛ́ lɛ́ɛ bǐ wɛ nyí gbɛtɔ́ nukúnɖéjí, bɔ nyǐkɔ yětɔn yi jǐ. Lo ɔ́, yě hu hwɛ dó Mawu tɔ́gbó yětɔn lɛ́ɛ tɔn. Yě jǒ Mawu e tɔ́gbó yětɔn lɛ́ɛ nɔ sɛn ɔ́ dó, bó nɔ sɛn togun e sín kún Mawu sú dó lɛ́ɛ sín vodún. Énɛ́ ɔ́, Mawu Izlayɛ́li tɔn ɔ́ fɔ́n hun dó jǐ nú Asilíi xɔ́sú Púlu e è nɔ lɛ́ ylɔ́ ɖɔ Tiglati-Pilesɛ́ɛ é, bɔ é yi gba akɔta Hwlibɛ́ni tɔn, Gadi tɔn kpódó akɔta vlɔ́ Manasée tɔn ɔ́ kpó, bó bɛ́ mɛ e ɖo to ɔ́ mɛ lɛ́ɛ wá yi Halaxi, yi Habɔ́ɔ, yi Hala, bó bɛ́ yi tɔsisa Gozáni tɔn ɔ́ kɔn. Vǐ yětɔn lɛ́ɛ kpo ɖo fínɛ́ káká wá jɛ égbé. Levíi ví lɛ́ɛ ɖíe: Gɛɛcɔ́ni, Kexáti kpódó Mɛlali kpó. Kexáti ví lɛ́ɛ ɖíe: Amulámu, Yisexáa, Eblɔ́n kpó Wuziyɛ́li kpó. Amulámu ví lɛ́ɛ ɖíe: Aalɔ́ɔn kpó Mɔyízi kpó, kpódó nɔví yětɔn nyɔ̌nu Miliamu kpó. Aalɔ́ɔn ví lɛ́ɛ ɖíe: Nadavu, Avihu, Eleazáa kpódó Itamáa kpó. Eleazáa ji Pínxási, bɔ Pínxási ji Avicua. Avicua ji Buki; Buki ji Wúzi, Wúzi ji Zelaxiya; Zelaxiya ji Mɛlayɔ́ti. Mɛlayɔ́ti ji Amaliya; Amaliya ji Axitúvu. Axitúvu ji Sadɔ́ku; Sadɔ́ku ji Aximáasi, Aximáasi ji Azalya; Azalya ji Yoxanáni. Yoxanáni ji Azalya; Azalya élɔ́ wɛ nyí vɔ̌sánú-xwlémawutɔ́ e wa azɔ̌ ɖo sinsɛnxɔ e Salomɔ́ɔ gbá ɖó Jeluzalɛ́mu ɔ́ mɛ é. Azalya ji Amaliya; Amaliya ji Axitúvu, Axitúvu ji Sadɔ́ku, bɔ Sadɔ́ku ji Calúmu. Calúmu ji Ilukya, bɔ Ilukya ji Azalya. Azalya ji Selaya, bɔ Selaya ji Yexosadaki. Yexosadaki ɔ́ wɛ Nabukodonɔzɔ́ɔ kplá hɛn yi hwenu e Mawu Mavɔmavɔ nyi Jeluzalɛ́munu lɛ́ɛ kpódó Judáanu lɛ́ɛ kpó sɛ́ dó kannumɔgbénu é. Levíi ví lɛ́ɛ ɖíe: Gɛɛcɔ́ni, Kexáti kpó Mɛlali kpó. Gɛɛcɔ́ni ví lɛ́ɛ ɖíe: Livuni kpódó Cimɛ́yi kpó. Kexáti ví lɛ́ɛ ɖíe: Amulámu, Yisexáa, Eblɔ́n kpódó Wuziyɛ́li kpó. Mɛlali ví lɛ́ɛ ɖíe: Maxli kpó Muci kpó. Tɔ́gbó e ɖó nyǐkɔ nú hɛ̌nnu e ɖo akɔta Levíi tɔn ɔ́ mɛ lɛ́ɛ nɛ́. Gɛɛcɔ́ni ji Livuni, Livuni ji Yaxáti, Yaxáti ji Zimuma. Zimuma ji Yoáxi, Yoáxi ji Idóo, Idóo ji Zeláxi, Zeláxi ji Yeotlayi. Kexáti ji Aminadabu, Aminadabu ji Kolée, Kolée ji Asíi, Asíi ji Ɛlukana, Ɛlukana ji Eviyasáfu, Eviyasáfu ji Asíi, Asíi ji Taxati, Taxati ji Wuliyɛ́li, Wuliyɛ́li ji Wuziya, Wuziya ji Cawúlu. Ɛlukana ví lɛ́ɛ ɖíe: Amasayi, Aximɔti kpó Ɛlukana kpó; Ɛlukana ji Sofáyi, bɔ Sofáyi ji Naxáti, Naxáti ji Eliavu, bɔ Eliavu ji Yeloxámu, Yeloxámu ka ji Ɛlukana. Samuwɛ́li ví lɛ́ɛ ɖíe: Yoɛ́li wɛ nyí nukɔngbéví ɔ́ bɔ Avíya bɔ d'é wú. Mɛlali ji Maxli, Maxli ji Livuni, bɔ Livuni ji Cimɛ́yi, bɔ Cimɛ́yi ji Wúza. Wúza ji Cimɛ́ya, bɔ Cimɛ́ya ji Hagiya, bɔ Hagiya ji Asaya. Sín hwenu e è ɖǒ tɛnmɛ nú akɔjijɛgbá ɔ́, Davídi ɖe Levíi ví ɖé lɛ́ɛ, bɔ yě ná nɔ́ kpé nukún dó han jiji wú ɖo Mawu Mavɔmavɔ xwé gbe. Cóbónú Salomɔ́ɔ ná gbá sinsɛnxɔ Jeluzalɛ́mu tɔn ɔ́, yě mɛ énɛ́ lɛ́ɛ nɔ kplé ɖo goxɔ e mɛ Mawu Mavɔmavɔ nɔ wá kpé yě ɖe ɔ́ nukɔn, bó nɔ ɖo han ji wɛ lě e è ko to ɖó é. Yě mɛ e nɔ ji han lɛ́ɛ ɔ́, mɛ e ɖo Kexáti hɛ́nnu mɛ lɛ́ɛ ɖíe: Hemani Hansinɔ ɔ́; tɔ́gbó tɔn lɛ́ɛ wɛ nyí Yoɛ́li Samuwɛ́li ví ɔ́, Samuwɛ́li Ɛlukana ví ɔ́, Ɛlukana Yeloxámu ví ɔ́, Yeloxámu Eliyɛ́li ví ɔ́, Eliyɛ́li Toáxi ví ɔ́, Toáxi Súfu ví ɔ́, Súfu Ɛlukana ví ɔ́, Ɛlukana Maxáti ví ɔ́, Maxáti Amasayi ví ɔ́, Amasayi Ɛlukana ví ɔ́, Ɛlukana Yoɛ́li ví ɔ́, Yoɛ́li Azalya ví ɔ́, Azalya Sefaníya ví ɔ́, Sefaníya Taxati ví ɔ́, Taxati Asíi ví ɔ́, Asíi Eviyasáfu ví ɔ́, Eviyasáfu Kolée ví ɔ́, Kolée Yisexáa ví ɔ́, Yisexáa Kexáti ví ɔ́, Kexáti Levíi ví ɔ́ kpó Levíi Jakɔ́bu ví ɔ́ kpó. Azɔ̌gbɛ́ Hemani tɔn Asáfu nɔ nɔ Hemani sín ɖisíxwé. Asáfu sín tɔ́gbó lɛ́ɛ ɖíe: Asáfu Bɛlɛkiyahu ví ɔ́, Bɛlɛkiyahu Cimɛ́ya ví ɔ́, Cimɛ́ya Mikaɛli ví ɔ́, Mikaɛli Baaseya ví ɔ́, Baaseya Malukíya ví ɔ́, Malukíya Etini ví ɔ́, Etini Zeláxi ví ɔ́, Zeláxi Adaya ví ɔ́, Adaya Etáni ví ɔ́, Etáni Zimuma ví ɔ́, Zimuma Cimɛ́yi ví ɔ́, Cimɛ́yi Yaxáti ví ɔ́, Yaxáti Gɛɛcɔ́ni ví ɔ́, Gɛɛcɔ́ni Levíi ví ɔ́. Hanjigbɛ́ e ɖo Mɛlali hɛ́nnu ɔ́ mɛ lɛ́ɛ nɔ́ nɔ amyɔxwé nú yě; Etáni wɛ nɔ nɔ nukɔn nú yě; Etáni sín tɔ́gbó lɛ́ɛ ɖíe: Etáni Kíci ví ɔ́, Kíci Avudi ví ɔ́, Avudi Malulúki ví ɔ́. Malulúki Hacaviya ví ɔ́, Hacaviya Amaciya ví ɔ́, Amaciya Ilukya ví ɔ́, Ilukya Amusi ví ɔ́, Amusi Bani ví ɔ́, Bani Cɛmɛ́ɛ ví ɔ́, Cɛmɛ́ɛ Maxli ví ɔ́, Maxli Muci ví ɔ́, Muci Mɛlali ví ɔ́, Mɛlali Levíi ví ɔ́. Levíi ví ɖě lɛ́ɛ nɔ́ wa azɔ̌ e kpo ɖo Mawu xwé gbe lɛ́ɛ. Aalɔ́ɔn kpó vǐ tɔn lɛ́ɛ kpó nɔ́ xwlé vɔ̌ e è nɔ dó zo ɔ́ Mawu ɖo vɔ̌sákpe e jí è nɔ dó vɔ̌ zo ɖe ɔ́ jí, bó nɔ xwlé zǎlínkpɔ́n Mawu, ɖo vɔ̌sákpe e jí è nɔ dó zǎlínkpɔ́n zo ɖe ɔ́ jí. Yě nɔ́ kpé nukún dó azɔ̌ e ɖo Tɛn mímɛ́ bǐ ɔ́ mɛ lɛ́ɛ wú. Yě ɖokpó ɔ́ wɛ nɔ́ sá hwɛsɔ́kɛmɛvɔ́ dó Izlayɛ́li ví lɛ́ɛ tamɛ, lě e mɛsɛntɔ́ Mawu tɔn Mɔyízi ɖɔ nú yě gbɔn é. Aalɔ́ɔn ji Eleazáa, Eleazáa ji Pínxási, Pínxási ji Avicua, Avicua ji Buki, Buki ji Wúzi, Wúzi ji Zelaxiya, Zelaxiya ji Mɛlayɔ́ti, Mɛlayɔ́ti ji Amaliya, Amaliya ji Axitúvu, Axitúvu ji Sadɔ́ku, Sadɔ́ku ji Aximáasi. Fí e Aalɔ́ɔn ví lɛ́ɛ nɔ́ nɔ ɖo ayǐkúngban e è nǎ yě lɛ́ɛ jí lɛ́ɛ ɖíe: è nyi akɔ dó bɔ Aalɔ́ɔn ví e jɔ ɖo Kexáti hɛ́nnu mɛ lɛ́ɛ yí ayǐkúngban dó nukɔn. Yě yí Eblɔ́n toxo ɔ́ ɖo Judáa yíkúngban jí, kpó ayǐkúngban e lɛ́ dó e lɛ́ɛ kpó. Lo ɔ́, gle kpó ayǐkúngban kpó e ɖo toxo ɔ́ sín acɛ mɛ lɛ́ɛ ɔ́, Kalɛ́bu Yefunnɛ́ɛ ví ɔ́ wɛ è nǎ ɖ'ayǐ. Toxo e è nǎ Aalɔ́ɔn ví lɛ́ɛ bɔ è nǎ nɔ hɔn yi cí mɛ lɛ́ɛ ɖíe: Eblɔ́n, Livuna kpó ayǐkúngban e lɛ́ dó e lɛ́ɛ kpó, Yatíi, Ɛcitemɔwa kpó ayǐkúngban e lɛ́ dó e lɛ́ɛ kpó, Ilɛ́zi kpó ayǐkúngban e lɛ́ dó e lɛ́ɛ kpó, Devíi kpó ayǐkúngban e lɛ́ dó e lɛ́ɛ kpó, Acáni kpó ayǐkúngban e lɛ́ dó e lɛ́ɛ kpó, Bɛti-Cɛmɛ́ci kpó ayǐkúngban e lɛ́ dó e lɛ́ɛ kpó. Toxo e è nǎ yě ɖo akɔta Bɛnjamɛ́ɛ tɔn ɔ́ mɛ lɛ́ɛ ɖíe: Gɛva kpó ayǐkúngban e lɛ́ dó e lɛ́ɛ kpó, Alɛmɛ́ti kpó ayǐkúngban e lɛ́ dó e lɛ́ɛ kpó, Anatɔ́ti kpó ayǐkúngban e lɛ́ dó e lɛ́ɛ kpó. Toxo e è nǎ hɛ̌nnu yětɔn lɛ́ɛ bǐ bló wǒ-atɔn. Kexáti ví ɖě lɛ́ɛ ɔ́, akɔta Eflayímu tɔn, Dan tɔn kpódó akɔta vlɔ́ Manasée tɔn e ɖo gbadahwe jí ɔ́ kpó sín toxo lɛ́ɛ ɔ́, è nyi akɔ dó toxo wǒ ɖo yě mɛ, bó ná yě. Gɛɛcɔ́ni ví lɛ́ɛ ɔ́, toxo wǒ-atɔn wɛ è nǎ yě ɖo akɔta Isakáa tɔn, Acɛ́ɛ tɔn, Nɛfutali tɔn, kpódó akɔta vlɔ́ Manasée tɔn e ɖo Basáni ɔ́ kpó sín ayǐkúngban jí. Mɛlali ví lɛ́ɛ ɔ́, akɔta Hwlibɛ́ni tɔn, Gadi tɔn kpódó Zabulɔ́ɔn tɔn kpó sín toxo lɛ́ɛ ɔ́, è nyi akɔ dó toxo wěwe ɖo yě mɛ, bó ná yě. Izlayɛ́li ví lɛ́ɛ ná toxo énɛ́ lɛ́ɛ kpó ayǐkúngban e lɛ́ dó yě lɛ́ɛ kpó Levíi ví lɛ́ɛ. Yě nyi akɔ dó toxo e ɖo Judáa yíkúngban lɛ́ɛ, éé ɖo Sinmɛnyɔ́ɔ yíkúngban jí, kpó éé ɖo Bɛnjamɛ́ɛ yíkúngban jí lɛ́ɛ kpó. Kexáti ví ɖě lɛ́ɛ sín hɛ̌nnu lɛ́ɛ ɔ́, akɔta Eflayímu tɔn sín toxo lɛ́ɛ mɛ wɛ è nǎ toxo yě ɖe. Toxo e è nǎ yě bɔ è nǎ nɔ hɔn yi cí mɛ lɛ́ɛ ɖíe: Sikɛ́mu, toxo e nyí bibɛtɛn ɔ́, kpó ayǐkúngban e lɛ́ dó e lɛ́ɛ kpó, ɖo Eflayímu sókan mɛ, Gɛzɛ́ɛ kpó ayǐkúngban e lɛ́ dó e lɛ́ɛ, Yokumɛámu kpó ayǐkúngban e lɛ́ dó e lɛ́ɛ, Bɛti-Holɔ́ni kpó ayǐkúngban e lɛ́ dó e lɛ́ɛ kpó, Ayalɔ́ni kpó ayǐkúngban e lɛ́ dó e lɛ́ɛ kpó, Gati-Hlimumɔ́ni kpó ayǐkúngban e lɛ́ dó e lɛ́ɛ kpó. Bó ná Anɛ́ɛ kpó ayǐkúngban e lɛ́ dó e lɛ́ɛ kpó, Bileyamu kpó ayǐkúngban e lɛ́ dó e lɛ́ɛ kpó yě, ɖo akɔta vlɔ́ Manasée tɔn e ɖo gbadahwe jí ɔ́ sín toxo lɛ́ɛ mɛ. Kexáti ví ɖě lɛ́ɛ sín hɛ̌nnu ɔ́, nǔ e è nǎ yě lɛ́ɛ nɛ́. Toxo e è nǎ Gɛɛcɔ́ni ví lɛ́ɛ ɖo akɔta vlɔ́ Manasée tɔn e ɖo zǎnzǎnhwe jí ɔ́ sín ayǐkúngban jí lɛ́ɛ ɖíe: Goláni kpó ayǐkúngban e lɛ́ dó lɛ́ɛ kpó, ɖo Basáni; Acitalɔ́ti kpó ayǐkúngban e lɛ́ dó e lɛ́ɛ kpó. Toxo e è nǎ yě ɖo ayǐkúngban Isakáa tɔn ɔ́ jí lɛ́ɛ ɖíe: Kedɛ́ci kpó ayǐkúngban e lɛ́ dó e lɛ́ɛ kpó, Davɛlati kpó ayǐkúngban e lɛ́ dó e lɛ́ɛ kpó. Hlamɔti kpó ayǐkúngban e lɛ́ dó e lɛ́ɛ kpó, Anɛ́mu kpó ayǐkúngban e lɛ́ dó e lɛ́ɛ kpó. Toxo e è nǎ yě ɖo ayǐkúngban akɔta Acɛ́ɛ tɔn ɔ́ jí lɛ́ɛ ɖíe: Macalu kpó ayǐkúngban e lɛ́ dó e lɛ́ɛ kpó, Avidɔni kpó ayǐkúngban e lɛ́ dó e lɛ́ɛ kpó, Hukɔ́ki kpó ayǐkúngban e lɛ́ dó e lɛ́ɛ kpó, Hlexɔ́vu kpó ayǐkúngban e lɛ́ dó e lɛ́ɛ kpó. Toxo e è nǎ yě ɖo ayǐkúngban akɔta Nɛfutali tɔn ɔ́ jí lɛ́ɛ ɖíe: Kedɛ́ci kpó ayǐkúngban e lɛ́ dó e lɛ́ɛ kpó ɖo Galilée, Hamumɔ́ni kpó ayǐkúngban e lɛ́ dó e lɛ́ɛ kpó, Kiliyatayimu kpó ayǐkúngban e lɛ́ dó e lɛ́ɛ kpó. Levíi ví ɖě lɛ́ɛ e nyí Mɛlali ví lɛ́ɛ ɔ́, toxo e è nǎ yě ɖo ayǐkúngban akɔta Zabulɔ́ɔn tɔn ɔ́ jí lɛ́ɛ ɖíe: Hlimumɔ́nɔ kpó ayǐkúngban e lɛ́ dó e lɛ́ɛ kpó, Tabɔ́ɔ kpó ayǐkúngban e lɛ́ dó e lɛ́ɛ kpó. Toxo e è nǎ yě ɖo ayǐkúngban akɔta Hwlibɛ́ni tɔn ɔ́ jí ɖo Judɛ́ɛn tɔ ɔ́ gúdo dɔ̌n, ɖo Jeliko nukɔn, ɖo tɔ ɔ́ sín zǎnzǎnhwe jí lɛ́ɛ ɖíe: Bɛsɛ́ɛ ɖo gbětótló mɛ, kpó ayǐkúngban e lɛ́ dó e lɛ́ɛ kpó, Yaxisa kpó ayǐkúngban e lɛ́ dó e lɛ́ɛ kpó. Kedemɔ́ti kpó ayǐkúngban e lɛ́ dó e lɛ́ɛ kpó, Mɛfáti kpó ayǐkúngban e lɛ́ dó e lɛ́ɛ kpó. Đo ayǐkúngban akɔta Gadi tɔn ɔ́ jí ɔ́, toxo e è nǎ yě lɛ́ɛ ɖíe: Hlamɔti kpó ayǐkúngban e lɛ́ dó é lɛ́ɛ kpó ɖo Galadi, Maxanayímu kpó ayǐkúngban e lɛ́ dó e lɛ́ɛ kpó, Hɛcibɔ́ni kpó ayǐkúngban e lɛ́ dó e lɛ́ɛ kpó, Yazɛ́ɛ kpó ayǐkúngban e lɛ́ dó e lɛ́ɛ kpó. Isakáa ví lɛ́ɛ ɖíe: Tola, Púwa, Yacúvu kpódó Cimulɔ́ni kpó. Tola ví lɛ́ɛ ɖíe: Wúzi, Hlefaya, Yeliɛ́li, Yaximayi, Yivusámu kpódó Cemuyɛlu kpó. Yě mɛ énɛ́ lɛ́ɛ ɔ́, hɛ̌nnugán wɛ yě nyí ɖo Tola ví lɛ́ɛ mɛ. Gbɛtɔ́ nukúnɖéjí wɛ yě nyǐ ɖo hɛ̌nnu yětɔn lɛ́ɛ mɛ. Đo Davídi hwenu ɔ́, Tola ví lɛ́ɛ bló gbɛtɔ́ adɔ̌kpo ɖě afɔwó nǔwɔntɔn (22.600). Wúzi ji Yizláxya. Yizláxya ka ji Mikaɛli, Ovadia, Yoɛ́li kpó Yiciya kpó. Yě mɛ atɔ́ɔ́n énɛ́ lɛ́ɛ bǐ wɛ nyí hɛ̌nnugán. Nyɔ̌nu kpó súnnu kpó e ɖo hɛ̌nnu yětɔn mɛ lɛ́ɛ sukpɔ́ káká bɔ yě ɖó ná ná súnnu e ná fun ahwan lɛ́ɛ adɔ̌kpo ɖě děgba ɛnɛ (36.000). Nɔví yětɔn e ɖo Isakáa sín hɛ̌nnu lɛ́ɛ bǐ mɛ, bó nyí súnnu glegbenu, bɔ è sɔ́ kɛ́n yětɔn lɛ́ɛ bǐ bló gbɛtɔ́ adɔ̌kpo ɛnɛ děgba ɖě afɔwó-afatɔ́n (87.000). Bɛnjamɛ́ɛ ví lɛ́ɛ ɖíe: Bɛ́la, Bɛkɛ́ɛ kpó Yediaɛ́lu kpó. É bló yě mɛ atɔn. Bɛ́la ví lɛ́ɛ ɖíe: Ɛsibɔ́ni, Wúzi, Wuziyɛ́li, Yelimɔ́ti kpódó Ili kpó. Súnnu glegbenu wɛ yě nyǐ, bó nyí hɛ̌nnugán ɖo hɛ̌nnu yětɔn lɛ́ɛ ɖokpó ɖokpó mɛ. Hɛ̌nnu énɛ́ lɛ́ɛ ɔ́, è sɔ́ kɛ́n yětɔn, bɔ bǐ bló gbɛtɔ́ adɔ̌kpo ɖě afɔwó gban-nukún-ɛnɛ (22.034). Bɛkɛ́ɛ ví lɛ́ɛ ɖíe: Zemila, Yoaci, Eliezɛ́ɛ, Eliyoenayi, Ɔmúli, Yelemɔ́ti, Avíya, Anatɔ́ti kpódó Alɛmɛ́ti kpó. Yě mɛ énɛ́ lɛ́ɛ bǐ wɛ nyí Bɛkɛ́ɛ ví. Súnnu glegbenu wɛ yě nyǐ, bó nyí hɛ̌nnugán ɖo hɛ̌nnu yětɔn lɛ́ɛ ɖokpó ɖokpó mɛ. Hɛ̌nnu énɛ́ lɛ́ɛ ɔ́, è sɔ́ kɛ́n yětɔn, bɔ bǐ bló gbɛtɔ́ adɔ̌kpo ɖě afɔɖé (20.200). Yediaɛ́lu ji Biluháni. Biluháni ka ji Yewúci, Bɛnjamɛ́ɛ, Ehúdi, Kenáana, Zetáni, Taasísi kpódó Axisahaa kpó. Yediaɛ́lu ví énɛ́ lɛ́ɛ bǐ wɛ nyí súnnu glegbenu bó nyí hɛ̌nnugán ɖo hɛ̌nnu yětɔn lɛ́ɛ ɖokpó ɖokpó mɛ. Hɛ̌nnu énɛ́ lɛ́ɛ ɔ́, è sɔ́ súnnu e hɛn ɔ́, yě ná fun ahwan lɛ́ɛ sín kɛ́n, bɔ yě bǐ bló gbɛtɔ́ děgba ɛnɛ afayizɛ́n (17.200). Ii ji Cupimu kpó Hupímu kpó. Axɛ́ɛ ka ji Hucímu. Nɛfutali ví lɛ́ɛ ɖíe: Yasiyɛli, Gúni, Yesɛ́ɛ kpódó Calúmu Biluha vívú ɔ́ kpó. Manasée ji Asiliɛ́li kpó Makíi kpó ɖo asi tɔn Silíinu ɔ́ xomɛ. Makíi ka ji Galadi. Makíi da asi nú Hupímu, bó da nú Cupimu. Nɔví tɔn nyɔ̌nu ɔ́ nɔ́ nyí Maaka. Makíi lɛ́ ji vǐ ɖěvo, bɔ é nɔ́ nyí Selofɛxádi. Selofɛxádi ɔ́ ka ji nyɔ̌nu kɛ́ɖɛ́. Maaka, Makíi sín asi ɔ́ ji vǐ súnnu ɖokpó, bó sun nyǐ ɖɔ Pelɛci, é lɛ́ ji vǐ súnnu ɖěvo, bó sun nyǐ ɖɔ Cɛlɛ́ci. Cɛlɛ́ci wɛ nyí Wulámu kpó Hlɛkɛ́mu kpó sín tɔ́. Wulámu ka ji Bedáni. Galadi, Makíi ví Manasée ɔ́ sín vǐ lɛ́ɛ nɛ́. Mɔlɛkɛ́ti, Galadi nɔví nyɔ̌nu ɔ́ ji Icehodi, Aviɛzɛ́ɛ kpó Maxla kpó. Cemida ví lɛ́ɛ ɖíe: Axiyani, Cɛkɛ́mu, Liki kpódó Aniyámu kpó. Eflayímu ji Cutɛláxi, Cutɛláxi ji Bɛlɛ́di, Bɛlɛ́di ji Taxati, Taxati ji Eleada, Eleada ji Taxati, Taxati ji Zavadu, bɔ Zavadu ji Cutɛláxi; Eflayímu lɛ́ ji Ezɛ́ɛ kpó Eleadi kpó. Vǐ tɔn we énɛ́ lɛ́ɛ xwe Gatinu lɛ́ɛ sín kanlin lɛ́ɛ bɛ́ gbé bɔ Gatinu lɛ́ɛ hu yě. Tɔ́ yětɔn Eflayímu nɔ aluwɛmɛ xɔ azǎn, bɔ nɔví tɔn lɛ́ɛ wá dó gbɔ n'i. Énɛ́ ɔ́ gúdo ɔ́, Eflayímu sɛkpɔ́ asi tɔn, bɔ é mɔ xo bó ji vǐ súnnu ɖokpó. É sun nyǐ vǐ ɔ́ ɖɔ Beliya, ɖó nǔ jɛ ɖo xwé tɔn gbe. Vǐ nyɔ̌nu e é wá ji ɔ́ nyí Ceela. Ceela ɔ́ wɛ ɖó Bɛti-Holɔ́ni dodomɛ tɔn ɔ́, kpó Bɛti-Holɔ́ni kpóta tɔn ɔ́ kpó, bó ɖó Wuzɛni-Céela. Eflayímu ji Hlɛfáxi, Hlɛfáxi ji Hlecɛ́fu, Hlecɛ́fu ji Tɛlá, Tɛlá ji Taxáni. Taxáni ji Laedáni, Laedáni ji Amumihudi, Amumihudi ji Elicama, Elicama ji Nuni, Nuni ji Jozuwée. Ayǐkúngban e è nǎ Eflayímu ví lɛ́ɛ, kpó fí e yě nɔ́ nɔ lɛ́ɛ kpó wɛ nyí Betɛ́li kpó gletoxo e lɛ́ dó e lɛ́ɛ kpó, Naalani ɖo zǎnzǎnhwe jí, Gɛzɛ́ɛ ɖo gbadahwe jí kpó gletoxo e lɛ́ dó e lɛ́ɛ kpó, Sikɛ́mu kpó gletoxo e lɛ́ dó e lɛ́ɛ kpó, káká yi Aya toxo ɔ́ kpó gletoxo e lɛ́ dó e lɛ́ɛ kpó. Manasée ví lɛ́ɛ tɔn wɛ nyí Bɛti-Ceani kpó gletoxo e lɛ́ dó e lɛ́ɛ kpó; Tanaki kpó gletoxo e lɛ́ dó e lɛ́ɛ kpó, Mɛgido kpó gletoxo e lɛ́ dó e lɛ́ɛ kpó. Dɔ́ɔ kpó gletoxo e lɛ́ dó e lɛ́ɛ kpó. Toxo énɛ́ lɛ́ɛ mɛ wɛ Jozɛ́fu, Izlayɛ́li ví ɔ́ sín vǐ lɛ́ɛ nɔ. Acɛ́ɛ ví lɛ́ɛ ɖíe: Yimuna, Yicíwa, Yicíwi kpó Beliya kpó, kpódó nɔví yětɔn nyɔ̌nu Seláxi kpó. Beliya ví lɛ́ɛ ɖíe: Hebɛ́ɛ kpó Malukiyɛ́li kpó. Malukiyɛ́li ɖó Bíizayiti toxo ɔ́ ayǐ. Hebɛ́ɛ ji Yaflɛ́ti, Comɛ, Hotámu kpó nɔví yětɔn nyɔ̌nu Cuwa kpó. Yaflɛ́ti ví lɛ́ɛ ɖíe: Pasaku, Bimuhalu kpódó Aciwáti kpó. Comɛ ví lɛ́ɛ ɖíe: Axi, Hlɔxiga, Yexuba kpó Alamu kpó. Nɔví tɔn Hotámu ví lɛ́ɛ ɖíe: Sofáxi, Yimuna, Celɛ́ci kpó Amalu kpó. Sofáxi ví lɛ́ɛ ɖíe: Suwaxi, Haanɛfɛ́ɛ, Cuwálu, Belíi, Yimula, Bɛsɛ́ɛ, Hodu, Camúma, Ciluca, Yitlani kpó Beela kpó. Yɛtɛ́ɛ ví lɛ́ɛ ɖíe: Yefunnɛ́ɛ, Pisipa kpó Ala kpó. Wula ví lɛ́ɛ ɖíe: Aláxi, Hanniyɛ́li kpó Hlisía kpó. Mɛ énɛ́ lɛ́ɛ bǐ wɛ nyí Acɛ́ɛ ví. Hɛ̌nnugán ɖagbe wɛ yě nyǐ, bó nyí súnnu glegbenu, lobo nyí nukɔntɔ́ nukúnɖéjí. Súnnu e hɛn ɔ́, yě ná fun ahwan, bɔ è sɔ́ kɛ́n yětɔn lɛ́ɛ bǐ bló gbɛtɔ́ adɔ̌kpo ɖě děgba ɖě afɔwó (26.000). Bɛnjamɛ́ɛ ví lɛ́ɛ ɖíe: nukɔngbéví ɔ́ nyí Bɛ́la, mɛ wegɔ́ ɔ́ nyí Acibɛ́li, mɛ atɔngɔ́ ɔ́ nyí Ahla, mɛ ɛnɛgɔ́ ɔ́ nyí Nɔxa, bɔ mɛ atɔ́ɔ́ngɔ́ ɔ́ nyí Hlafa. Bɛ́la ví lɛ́ɛ ɖíe: Adudáa, Gela, Ehúdi tɔ́, Avicua, Naamáni, Axoaxi, Gela, Cefufáni kpódó Hulámu kpó. Ehúdi e nyí hɛ̌nnugán nú Gɛvanu lɛ́ɛ, bó kplá yě yi Manaxáti lɛ́ɛ ɖíe: Naamáni, Axiya kpó Gela kpó. Gela wɛ ji Wúza kpó Axiwudi kpó; é wɛ nɔ yě nu bɔ yě yi. Caxalayimu nya asi tɔn Hucímu kpó Baala kpó; énɛ́ gúdo ɔ́, é lɛ́ da asi bo ji vǐ ɖo Mɔwabu. Vǐ e é ji ɖo asi tɔn Hodɛ́ci Mɔwabunu ɔ́ xomɛ lɛ́ɛ ɖíe: Yovavu, Sivía, Mɛca, Malukámu, Yewúsi, Sakíya kpódó Míima kpó. Vǐ tɔn e nyí hɛ̌nnugán lɛ́ɛ nɛ́. Vǐ e é ji ɖo asi tɔn Hucímu xomɛ ɖ'ayǐ lɛ́ɛ wɛ nyí Avitúvu kpó Ɛlupáali kpó. Ɛlupáali ví lɛ́ɛ ɖíe: Ebɛ́ɛ, Miceamu kpódó Cɛmɛdi kpó. Cɛmɛdi ɔ́ wɛ ɖó Onɔ toxo ɔ́, bó ɖó Lodi toxo ɔ́ kpó gletoxo e lɛ́ dó e lɛ́ɛ kpó. Beliya kpó Cɛma kpó wɛ nyí hɛ̌nnugán nú Ayalɔ́ninu lɛ́ɛ; yě wɛ nya Gatinu lɛ́ɛ. Beliya ví lɛ́ɛ ɖíe: Axiyo, Cacáki, Yelemɔ́ti, Zevadiya, Aladi, Edɛ́ɛ, Mikaɛli, Yicipa kpó Yoxa kpó. Ɛlupáali ví lɛ́ɛ ka ɖíe: Zevadiya, Mɛculamu, Hiziki, Hebɛ́ɛ, Yicimɛlayi, Yizliya kpódó Yovavu kpó. Cimɛ́yi ví lɛ́ɛ ɖíe: Yakímu, Zikli, Zavúdi, Elienayi, Siletáyi, Eliyɛ́li, Adaya, Bɛláya kpódó Cimulati kpó. Cacáki ví lɛ́ɛ ɖíe: Yicipani, Ebɛ́ɛ, Eliyɛ́li, Avidɔni, Zikli, Hanáni, Hananiya, Elámu, Antotiya, Yifudeya kpódó Pɛnuwɛ́li kpó. Yeloxámu ví lɛ́ɛ ɖíe: Camucelayi, Cexaliya, Atalya, Yaalɛciya, Eliya kpó Zikli kpó. Mɛ énɛ́ lɛ́ɛ ɔ́, hɛ̌nnugán wɛ yě nyǐ ɖo hwe yětɔn yětɔn nu. Jeluzalɛ́mu wɛ yě nɔ́ nɔ. Mɛ e ɖó Gabawɔ́ɔn toxo ɔ́ ayǐ ɔ́, Gabawɔ́ɔn fínɛ́ wɛ é nɔ́ nɔ, bɔ asi tɔn nɔ nyí Maaka. Avidɔni wɛ nyí nukɔngbéví tɔn, bɔ Súu, Kícu, Baalu, Nɛ̌ɛ, Nadavu, Gedɔ́ɔ, Axiyo kpódó Zɛkɛ́ɛ kpó wá jɛ gǔdo tɔn. Miklɔ́ti lɔ ɔ́, vǐ tɔn wɛ; é wɛ ji Cimɛ́ya. Jeluzalɛ́mu wɛ yě kpó hɛ̌nnumɔ yětɔn lɛ́ɛ kpó nɔ́ nɔ, yě kpó nɔví yětɔn súnnu lɛ́ɛ kpó. Nɛ̌ɛ ji Kícu. Kícu ka ji Sawúlu, Sawúlu ji Jonatáan, Maluki-Cua, Avinadávu kpódó Ɛcibáalu kpó. Jonatáan ji Mɛlibaalu, Mɛlibaalu ji Mika, Mika ji Pitɔ́ni, Mɛlɛ́ki, Taléa kpódó Axázi kpó. Axázi ji Yexoada, bɔ Yexoada ji Alɛmɛ́ti, Azimawɛ́ti kpódó Zimuli kpó. Zimuli ka ji Mɔsa. Mɔsa ji Binɛya, Binɛya ji Hlafa, Hlafa ji Eleasa, bɔ Eleasa ji Asɛ́lu, Asɛ́lu ji vǐ ayizɛ́n. Nyǐkɔ yětɔn lɛ́ɛ ɖíe: Azlikámu, Boklu, Yicimayɛ́li, Cealiya, Ovadia kpó Hanáni kpó. Nɔví tɔn Ecɛ́ki ɔ́ vǐ tɔn lɛ́ɛ ɖíe: nukɔngbéví tɔn ɔ́ nɔ́ nyí Wulámu, wegɔ́ ɔ́ nɔ nyí Yewúci, bɔ atɔngɔ́ ɔ́ nɔ nyí Elifɛlɛ́ti. Wulámu ví lɛ́ɛ ɔ́, súnnu glegbenu wɛ yě nyǐ, bó nyɔ́ gǎ da. Yě ɖó vǐ súnnu gěgé, bó ɖó vǐvú gěgé bɔ bǐ bló kantɔn gban (150). Yě mɛ énɛ́ lɛ́ɛ bǐ wɛ ɖo akɔta Bɛnjamɛ́ɛ tɔn mɛ. Izlayɛ́li ví lɛ́ɛ bǐ sín kɛ́n wɛ è sɔ́ dó axɔ́sú Izlayɛ́li tɔn lɛ́ɛ sín wěma mɛ. È wlǐ akɔta Judáa tɔn ɔ́ yi kannumɔgbénu ɖo Babilɔ́nu, ɖó gbejímánɔ nú Mawu yětɔn wú. Mɛ nukɔntɔn e lɛ́ kɔ wá ayǐkúngban yětɔn lɛ́ɛ jí, bó lɛ́ kɔ wá toxo yětɔn lɛ́ɛ mɛ lɛ́ɛ wɛ nyí Izlayɛ́li ví kpaa lɛ́ɛ, vɔ̌sánú-xwlémawutɔ́ lɛ́ɛ, Levíi ví lɛ́ɛ kpódó mɛ e nɔ kpé nukún dó Mawu xwé ɔ́ wú lɛ́ɛ kpó. Judáa ví lɛ́ɛ, Bɛnjamɛ́ɛ ví lɛ́ɛ, Eflayímu ví lɛ́ɛ kpó Manasée ví lɛ́ɛ kpó ɖěe lɛ́ kɔ wá cí Jeluzalɛ́mu. Judáa ví e wá Jeluzalɛ́mu lɛ́ɛ ɖíe: Wutáyi. Wutáyi Amumihudi ví, Ɔmúli vívú, Imulíi vívú vivu Bani vitikli ɔ́. Pɛlɛ́si xwédo mɛ wɛ é jɔ ɖe. Asaya sín vǐɖaxó ɔ́ kpó vǐ tɔn lɛ́ɛ kpó; Cela kúnkan ɔ́ mɛ wɛ é jɔ ɖe. Yewuɛ́li; Zeláxi kúnkan ɔ́ mɛ wɛ é jɔ ɖe. Judáa ví e wá Jeluzalɛ́mu lɛ́ɛ bǐ bló gbɛtɔ́ nǔwɔntɔn kanwe wǒ (690). Bɛnjamɛ́ɛ ví e wá Jeluzalɛ́mu lɛ́ɛ ɖíe: Salúu Mɛculamu ví, Hodawya vívú, Ha-Senúwa vívú vivu ɔ́. Yivunɛya Yeloxámu ví ɔ́. Ela Wúzi ví, Mikli vívú ɔ́ kpódó Mɛculamu Cefátiya ví Hlewuyɛ́li vívú, Yivunɛya vívú vivu ɔ́ kpó. Yě mɛ énɛ́ lɛ́ɛ bǐ wɛ nyí hɛ̌nnugán ɖo hɛ̌n yětɔn yětɔn nu. Bɛnjamɛ́ɛ ví e wá Jeluzalɛ́mu lɛ́ɛ bǐ bló gbɛtɔ́ afɛnɛ kantɔn gbantɔ́n-nukún-ɖokpó (956). Vɔ̌sánú-xwlémawutɔ́ e wá Jeluzalɛ́mu lɛ́ɛ ɖíe: Yedaya, Yexoyalivu, Yakíni, kpódó Azalya kpó. Azalya ɔ́, Ilukya ví wɛ, bɔ Ilukya nyí Mɛculamu ví, Mɛculamu nyí Sadɔ́ku ví, bɔ Sadɔ́ku nyí Mɛlayɔ́ti ví, bɔ Mɛlayɔ́ti nyí Axitúvu e kpa acɛ dó Mawu xwé ɔ́ nu é ví. Adaya lɔ ɖo vɔ̌sánú-xwlémawutɔ́ e wá Jeluzalɛ́mu lɛ́ɛ mɛ; Adaya ɔ́, Yeloxámu ví wɛ, bɔ Yeloxámu nyí Pacehúu ví, bɔ Pacehúu nyí Malukíya ví. Masayi lɔ ɖo vɔ̌sánú-xwlémawutɔ́ e wá Jeluzalɛ́mu lɛ́ɛ mɛ. Masayi ɔ́, Adiyɛli ví wɛ, bɔ Adiyɛli nyí Yaxizeláa ví, Yaxizeláa nyí Mɛculamu ví, bɔ Mɛculamu nyí Mɛcilemiti ví, bɔ Mɛcilemiti nyí Imumɛ́ɛ ví. Vɔ̌sánú-xwlémawutɔ́ énɛ́ lɛ́ɛ kpó nɔví yětɔn e kpa acɛ dó tɔ́ yětɔn xwé nu lɛ́ɛ kpó bǐ bló gbɛtɔ́ nukúnɖéjí afɔtántɔn kɛnnɛ (1.760), bó nɔ́ wa azɔ̌ ɖo Mawu xwé gbe. Levíi ví e wá Jeluzalɛ́mu lɛ́ɛ ɖíe: Cemaya; Cemaya ɔ́, Hacúvu ví wɛ, bɔ Hacúvu nyí Azlikámu ví, bɔ Azlikámu nyí Hacaviya ví; Mɛlali xwédo mɛ wɛ é jɔ ɖe. Bakibakáa, Ɛlɛ́ci, Galali kpódó Mataniya kpó. Mataniya ɔ́, Mika ví wɛ, bɔ Mika nyí Zikli ví, Zikli ka nyí Asáfu ví. Ovadia lɔ ɖo Levíi ví e wá Jeluzalɛ́mu lɛ́ɛ mɛ. Ovadia ɔ́, Cemaya ví wɛ, bɔ Cemaya nyí Galali ví, bɔ Galali nyí Yedutún ví. Bɛlɛkya lɔ ɖo Levíi ví lɛ́ɛ mɛ. Bɛlɛkya ɔ́, Asa ví wɛ, bó nyí Ɛlukana vívú. Ɛlukana ɔ́, Nɛtofanu lɛ́ɛ sín gletoxo mɛ wɛ é nɔ́ nɔ. Hɔnjínɔtɔ́ e wá Jeluzalɛ́mu lɛ́ɛ ɖíe: Calúmu, Akúvu, Talumɔ́ni, Aximani kpódó nɔví yětɔn lɛ́ɛ kpó. Calúmu wɛ nyí gǎn yětɔn. Káká jɛ din ɔ́, vǐ yětɔn lɛ́ɛ wɛ nɔ́ nɔ axɔ́sú ɔ́ sín hɔn jí ɖo zǎnzǎnhwe jí. Tɔ́gbó yětɔn lɛ́ɛ wɛ nɔ́ nɔ hɔn jí nú ahwankpá Levíi ví lɛ́ɛ tɔn. Calúmu Kɔlée ví, Eviyasáfu vívú, Kolée vívú vivu ɔ́, kpódó mɛ ɖě lɛ́ɛ e ɖo Kolée hɛ́nnu mɛ lɛ́ɛ kpó wɛ nɔ́ nɔ goxɔ e mɛ è nɔ kpé Mawu Mavɔmavɔ ɖe ɔ́ sín ali nu, lě e tɔ́gbó yětɔn lɛ́ɛ nɔ́ bló gbɔn ɖ'ayǐ, ɖo fí e togun Mawu Mavɔmavɔ tɔn ɔ́ nɔ́ ɖó gɔnu ɖó é. Pínxási Eleazáa ví ɔ́ wɛ nyí gǎn yětɔn ɖ'ayǐ, ɖó Mawu Mavɔmavɔ ɖo kpɔ́ xá ɛ. Zekaliyahu, Mɛcelemiya ví ɔ́ lɔmɔ̌ nyí hɔnjínɔtɔ́ ɖo goxɔ Mawu Mavɔmavɔ tɔn ɔ́ sín ali nu ɖ'ayǐ. Hɔnjínɔtɔ́ lɛ́ɛ bǐ bló gbɛtɔ́ afɔɖé wěwe (212), bɔ è sɔ́ kɛ́n yětɔn gbɔn gletoxo yětɔn lɛ́ɛ mɛ. Davídi kpó gbeyíɖɔ Mawu tɔn Samuwɛ́li kpó wɛ zé azɔ̌ énɛ́ dó así nú tɔ́gbó yětɔn lɛ́ɛ, bɔ é nyí azɔ̌ yětɔn. Yědɛɛ lɛ́ɛ kpó vǐ yětɔn lɛ́ɛ kpó wɛ nɔ́ nɔ Mawu Mavɔmavɔ xwé ɔ́ sín ali nu; yě wɛ nɔ́ cɔ́ goxɔ ɔ́. Hɔnjínɔtɔ́ ɖo Mawu Mavɔmavɔ xwé ɔ́ sín hɔntogbó ɛnɛ lɛ́ɛ jí. Yě ɖo zǎnzǎnhwe jí, bo ɖo gbadahwe jí, bó ɖo totaligbé, lobo ɖo tofɔligbé. Nɔví yětɔn e ɖo gletoxo yětɔn lɛ́ɛ mɛ lɛ́ɛ ɖó ná nɔ́ wá d'alɔ yě hwɛhwɛ xɔ azǎn tɛ́nwe. Hɔnjínɔtɔ́gán ɛnɛ wɛ nɔ ɖo azɔ̌ wa wɛ tɛgbɛ; Levíi ví wɛ nú yě. Yě nɔ́ cɔ́ xɔ e ɖo Mawu xwé gbe lɛ́ɛ kpó dɔkun e ɖ'é mɛ lɛ́ɛ kpó. Mawu xwé ɔ́ kpá wɛ yě nɔ́ dɔ́, ɖó yě ɖó ná nɔ cɔ́, bó ná nɔ́ hun hɔntogbó lɛ́ɛ zǎnzǎn tɛgbɛ. Hɔnjínɔtɔ́ ɖé lɛ́ɛ tíin bó nɔ kpé nukún dó nǔ e è nɔ zán ɖo sinsɛn hwenu lɛ́ɛ wú. È bɛ̌ nǔ lɛ́ɛ xweyǐgbe ɔ́, yě nɔ́ xa kpɔ́n; è bɛ̌ yě wá ɔ́, yě nɔ́ lɛ́ xa. Hɔnjínɔtɔ́ ɖěvo lɛ́ɛ nɔ́ kpé nukún dó nǔ e è nɔ zán ɖo tɛn mímɛ́ ɔ́ mɛ lɛ́ɛ bǐ wú, bó nɔ kpé nukún dó linfín, vɛ̌ɛn, ami, zǎlínkpɔ́n kpódó nǔsáwǔ wǎnɖagbenɔ lɛ́ɛ kpó wú. Vɔ̌sánú-xwlémawutɔ́ lɛ́ɛ kɛ́ɖɛ́ wɛ nɔ ɖa nǔsáwǔ wǎnɖagbenɔ lɛ́ɛ. Levíi ví lɛ́ɛ ɖokpó nyí Matitia, bó nyí Calúmu e jɔ ɖo xwédo Kolée tɔn mɛ ɔ́ sín nukɔngbéví. Éyɛ́ wɛ nɔ sɔ atá e è nɔ xwlé Mawu Mavɔmavɔ é. Levíi ví ɖěvo lɛ́ɛ tíin ɖo Kexáti ví lɛ́ɛ mɛ, bɔ azɔ̌ yědɛɛ lɛ́ɛ tɔn wɛ nyí yě ná nɔ ɖa wɔ̌xúxú e è nǎ nɔ xwlé Mawu ɖo gbɔjɛzán gbe lɛ́ɛ é. Yě mɛ e nɔ kpé nukún dó hanjiji wú, bó nyí hɛ̌nnugán Levíi ví lɛ́ɛ tɔn lɛ́ɛ nɛ́; yě mɛ ɖokpó ɖokpó ɖó xɔ yětɔn yětɔn. Yě sɔ́ nɔ wa azɔ̌ ɖěvo ǎ, ɖó yě nɔ́ ɖo hanzɔ́ ɔ́ kɔn zǎn kpó kéze kpó. Levíi ví e nyí hɛ̌nnugán ɖě jɛ ɖě gúdo lɛ́ɛ nɛ́. Jeluzalɛ́mu wɛ yě nɔ́ nɔ. Yeyiɛ́li wɛ ɖó Gabawɔ́ɔn toxo ɔ́ ayǐ, bó nɔ́ nɔ fínɛ́; asi tɔn nyí Maaka. Yeyiɛ́li ví lɛ́ɛ ɖíe: Avidɔni wɛ nyí nukɔngbéví tɔn, bɔ Súu, Kícu, Baalu, Nɛ̌ɛ, Nadavu, Gedɔ́ɔ, Axiyo, Zekaliya kpódó Miklɔ́ti kpó jɛ gǔdo tɔn. Miklɔ́ti ji Cimɛyamu. Jeluzalɛ́mu wɛ yědɛɛ lɛ́ɛ nɔ, yě kpódó hɛ̌nnumɔ yětɔn ɖěvo lɛ́ɛ kpó. Nɛ̌ɛ ji Kícu, Kícu ji Sawúlu. Sawúlu ji Jonatáan, Maluki-Cua, Avinadávu kpódó Ɛcibáalu kpó. Jonatáan ji Mɛlibaalu. Mɛlibaalu ka ji Mika. Mika ví lɛ́ɛ ɖíe: Pitɔ́ni, Mɛlɛ́ki kpódó Taxiléya kpó. Axázi ji Yaela, Yaela ka ji Alɛmɛ́ti, Azimawɛ́ti kpódó Zimuli kpó. Zimuli ji Mɔsa, Mɔsa ji Binɛya, Binɛya ji Hlefaya, Hlefaya ji Eleasa, bɔ Eleasa ji Asɛ́lu. Asɛ́lu ji vǐ súnnu ayizɛ́n. Nyǐkɔ yětɔn lɛ́ɛ ɖíe: Azlikámu, Boklu, Yicimayɛ́li, Cealiya, Ovadia kpódó Hanáni kpó. Filisitɛ́ɛn lɛ́ɛ wá tɔ́n ahwan Izlayɛ́linu lɛ́ɛ, bó gblé wǔ yě, bɔ yě yi kú jɛ Gilubowa só ɔ́ ta. Filisitɛ́ɛn lɛ́ɛ ká zun dó Sawúlu kpó vǐ tɔn lɛ́ɛ kpó jí. Yě hu vǐ tɔn Jonatáan, Avinadávu kpódó Maluki-Cua kpó. Sawúlu gbé nya wɛ yě ɖe tawun. Mɛ e nɔ da gǎ lɛ́ɛ wá mɔ ɛ, bɔ xɛsi ɖaxó ɖé jɛ jǐ tɔn. Énɛ́ ɔ́, Sawúlu ɖɔ nú mɛ e nɔ hɛn ahwanfunnú tɔn lɛ́ɛ n'i ɔ́ ɖɔ: “Sún hwǐ towe bó hu mì, bónú mɛ e ma nɔ sɛn Mawu ǎ nɛ́ lɛ́ɛ ma wá hu mì kpó hwǐ kpó, bó wá cá mì ko ó.” Mɛ e nɔ hɛn ahwanfunnú tɔn lɛ́ɛ n'i ɔ́ ká ɖi xɛsi bo gbɛ́. Énɛ́ ɔ́, Sawúlu zé hwǐ tɔn tun te, bó zé éɖée slɔ́ nu. Ée mɛ e nɔ hɛn ahwanfunnú tɔn lɛ́ɛ n'i ɔ́ mɔ mɔ̌ ɔ́, élɔ́ sɔ́ hwǐ tɔn tun te, bó zé éɖée slɔ́ nu bó kú. Lě e Sawúlu kpó vǐ tɔn atɔn lɛ́ɛ kpó kú gbɔn ɔ́ nɛ́; lě e axɔ́súɖuɖu sú dó gbɔn ɖo axɔ́sú Sawúlu kan jí ɔ́ nɛ́. Ée Izlayɛ́li ví e ɖo tɔdo ɔ́ mɛ lɛ́ɛ mɔ ɖɔ yě hɔn, bɔ Sawúlu kpó vǐ tɔn lɛ́ɛ kpó kú ɔ́, yě hɔn jó toxo yětɔn lɛ́ɛ dó, bɔ Filisitɛ́ɛn lɛ́ɛ wá cí toxo yětɔn lɛ́ɛ mɛ. Ayǐhɔ́ngbe tɔn ɔ́, Filisitɛ́ɛn lɛ́ɛ tɔ́n gǒ mɛ kíjé nú cyɔ lɛ́ɛ gbé, bó wá mɔ ɖɔ Sawúlu kpó vǐ tɔn lɛ́ɛ kpó sín cyɔ ɖo Gilubowa só ɔ́ jí. Ée yě mɔ mɔ̌ ɔ́, yě fɔ nǔ e ɖo Sawúlu cyɔ wú lɛ́ɛ, bó zé ta tɔn kpó ahwanfunnú tɔn lɛ́ɛ kpó, bó sɛ́ mɛ dó ɖɔ yě nǐ yi jlá wɛnɖagbe énɛ́ gbɔn Filisitɛ́ɛn to ɔ́ bǐ mɛ, bónú vodún yětɔn lɛ́ɛ kpó togun ɔ́ bǐ kpó ní se. Yě bɛ̌ Sawúlu sín ahwanfunnú lɛ́ɛ yi ɖó vodún yětɔn xwé lobo sɔ́ taká tɔn kplá nǔ kɔ ɖo vodún Dagɔ́ni xɔ mɛ. Mɛ e ɖo Yavɛ́ci, ɖo Galadi yíkúngban jí lɛ́ɛ bǐ se nǔ e Filisitɛ́ɛn lɛ́ɛ dó sin xá Sawúlu é bǐ. Ée yě se mɔ̌ ɔ́, súnnu glegbenu lɛ́ɛ bǐ sí te bo yi fɔ Sawúlu kpó vǐ tɔn lɛ́ɛ kpó sín cyɔ wá Yavɛ́ci. Yě ɖi xú yětɔn lɛ́ɛ ɖó telebɛ́ntitín ɖé sá, ɖo Yavɛ́ci, lobo blá nu xɔ azǎn tɛ́nwe. Sawúlu kú, ɖó é nɔ gbejí nú Mawu Mavɔmavɔ ǎ. É xwedó Mawu Mavɔmavɔ xó ǎ; é yi kan nǔ ɖo mɛ e nɔ kan bo lɛ́ɛ gɔ́n. É kan nǔ byɔ́ Mawu Mavɔmavɔ ǎ. Énɛ́ ɔ́, Mawu Mavɔmavɔ hu i, bó zé axɔ́súɖuto ɔ́ jó nú Davídi, Jɛsée ví ɔ́. Izlayɛ́li ví lɛ́ɛ bǐ kplé ɖo Davídi gɔ́n ɖo Eblɔ́n, bó ɖɔ n'i ɖɔ: “Hun towe wɛ mǐ nyí. Đ'ayǐ e Sawúlu nyí axɔ́sú mǐtɔn ɔ́, hwi wɛ nɔ kplá ahwanfuntɔ́ Izlayɛ́li tɔn lɛ́ɛ yi ahwangbénu, bó nɔ lɛ́ kplá yě wá xwé. Mawu Mavɔmavɔ, Mawu towe ko ɖɔ nú we ɖ'ayǐ ɖɔ hwi ná kpé nukún dó togun émítɔn Izlayɛ́li ɔ́ wú lě e lɛ̌ngbɔ́nyitɔ́ nɔ kpé nukún dó lɛ̌ngbɔ́ tɔn lɛ́ɛ wú é ɖɔhun; hwi wɛ ná nyí to ɔ́ sín gǎn.” Énɛ́ ɔ́, hwenu e tomɛxó Izlayɛ́li tɔn lɛ́ɛ bǐ wǎ axɔ́sú Davídi gɔ́n ɖo Eblɔ́n ɔ́, é nu alɛ xá yě ɖo fínɛ́, ɖo Mawu Mavɔmavɔ nukɔn bɔ yě kɔn ami dó ta n'i, bó sɔ́ ɛ Izlayɛ́li xɔ́sú lě e Mawu Mavɔmavɔ kó ɖɔ gbɔn nú gbeyíɖɔ tɔn Samuwɛ́li é. Davídi kpó Izlayɛ́li ví lɛ́ɛ bǐ kpó sí te bo ná tɔ́n ahwan Jeluzalɛ́mu toxo ɔ́. Jeluzalɛ́mu ɔ́, Jebuzi wɛ è nɔ ylɔ́ ɖɔ ɖ'ayǐ, ɖó Jebuzinu lɛ́ɛ wɛ nɔ́ nɔ gbě énɛ́ ɔ́ jí. Jebuzinu lɛ́ɛ ka ɖɔ nú Davídi ɖɔ: “A nǎ byɔ́ toxo mǐtɔn mɛ ǎ.” Lo ɔ́, Davídi yí toxo e è mɛ ahohó lɛ́ lɛ̌ dó ɖo Sinyɔ́ɔ só jí é. Toxo énɛ́ ɔ́ wɛ è nɔ ylɔ́ ɖɔ Davídi Toxo. Davídi ko ɖɔ ɖ'ayǐ ɖɔ mɛ nukɔntɔn e ná hu Jebuzinu ɖokpó ɔ́ ná húzú ahwangán ɖaxó; Jowabu Selúya ví ɔ́ wɛ ká nyí mɛ nukɔntɔn e hu Jebuzinu é, bó húzú ahwangán ɖaxó. Davídi ka yi cí ahohó ɔ́ mɛ. Nǔ e wútu è nɔ ylɔ́ fínɛ́ ɖɔ Davídi Toxo ɔ́ nɛ́. Énɛ́ ɔ́ gúdo ɔ́, Davídi gbá xɔ tɛnmɛ tɛnmɛ lɛ́ dó toxo ɔ́, sín Milo kpe ɔ́ kɔn lɛ́ dó. Bɔ Jowabu bló fí e kpo ɖo toxo ɔ́ mɛ ɔ́ ɖó. Énɛ́ ɔ́, acɛkpikpa Davídi tɔn ɔ́ nɔ́ ɖo syɛ́nsyɛ́n d'é jí wɛ ɖó Mawu Mavɔmavɔ, Mawu Nǔbǐwúkpétɔ́ ɔ́ ɖo kpɔ́ xá ɛ. Ahwangán Davídi tɔn nukúnɖéjí lɛ́ɛ ɖíe. Yě kpó Izlayɛ́li togun ɔ́ bǐ kpó wɛ sɔ́ Davídi axɔ́sú lě e Mawu Mavɔmavɔ ɖɔ gbɔn nú Izlayɛ́li togun ɔ́ é. Ahwanfuntɔ́ syɛ́nsyɛ́n énɛ́ lɛ́ɛ wɛ nyí: Ɛcibáalu Hakimɔ́ni ví ɔ́, ahwangán ɖokpó wɛ. É wɛ zé hwǎn dó hu gbɛtɔ́ afɔɖé kanwe ko (300) ɖo ahwanfunfun ɖokpó tɛnmɛ. Eleazáa Dódo ví e jɔ ɖo Axoxi hɛ́nnu mɛ ɔ́ bɔ dó Icebaalu wú. É ɖo ahwanfuntɔ́ syɛ́nsyɛ́n atɔn lɛ́ɛ mɛ. É wɛ ɖo kpɔ́ xá Davídi ɖo Pasi-Damumímu fí e Filisitɛ́ɛn lɛ́ɛ kplé bó ná fun ahwan ɖe é. Ɔ́jigle ɖé ɖo fínɛ́. Ahwangɔnu Izlayɛ́li tɔn ɔ́ ká ɖo hinhɔn wɛ ɖo Filisitɛ́ɛn lɛ́ɛ nukɔn hwenɛ́nu. Eleazáa kpó ahwan tɔn lɛ́ɛ kpó ka sɔ́ ahwan nú bó cí gle ɔ́ tɛ́ntin, bó yí gle ɔ́, lobo gba Filisitɛ́ɛn lɛ́ɛ. Énɛ́ ɔ́, Mawu Mavɔmavɔ ná ɖuɖéjí ɖaxó ɖokpó Izlayɛ́li ví lɛ́ɛ. Hwenu e Filisitɛ́ɛn lɛ́ɛ wá ɖó gɔnu ɖó tɔdo Hlafa ví lɛ́ɛ tɔn mɛ ɔ́, mɛ atɔn ɖo ahwangán gban (30) lɛ́ɛ mɛ, bó wá Davídi gɔ́n ɖo awǐnnya ɖaxó ɖé jí, ɖo sóxo Adulámu tɔn ɔ́ kpá. Davídi ka ɖo ahohó ɔ́ mɛ hwenɛ́nu, bɔ Filisitɛ́ɛn lɛ́ɛ sín gɔnu ɖokpó ɖo Bɛteleyɛ́mu. Linlin ɖokpó byɔ́ ayi mɛ nú Davídi, bɔ é ɖɔ: “Mɛ̌ ká ná dun sin nú mì ɖo sitɛ́nu e ɖo Bɛteleyɛ́mu sín hɔntogbó jí ɔ́ mɛ wá, bɔ un ná nu din?” Ée é ɖɔ mɔ̌ ɔ́, sɔ́ja atɔn lɛ́ɛ byɔ́ Filisitɛ́ɛn lɛ́ɛ sín ahwankpá mɛ gǎnnugǎnnu, bó dun sin ɔ́ ɖo sitɛ́nu ɔ́ mɛ, bó zé wá nú Davídi. Lo ɔ́, Davídi jló ná nu sin ɔ́ ǎ; é yí bó húzú kɔn nyi kɔ́ mɛ nú Mawu Mavɔmavɔ, bó ɖɔ: “Mawu ce, un ná nu sin élɔ́ ǎ. Mɛ élɔ́ lɛ́ɛ e sɔ́ gbɛ yětɔn ɖó axɔ́ nu, bó yi dun sin wá nú mì ɔ́, é cí hun yětɔn nu gbé un ja ɖɔhun.” Ée é ɖɔ mɔ̌ ɔ́, é nu sin ɔ́ ǎ. Nǔ e sɔ́ja syɛ́nsyɛ́n atɔn lɛ́ɛ bló ɔ́ nɛ́. Avicáyi, Jowabu nɔví ɔ́, ahwangán ɖokpó wɛ, bó kpa acɛ dó sɔ́ja Atɔngbɛ́ta ɔ́ nu. É wɛ zé hwǎn dó hu gbɛtɔ́ afɔɖé kanwe ko (300), bɔ nyǐkɔ tɔn yi jǐ ɖo sɔ́ja Atɔngbɛ́ta ɔ́ mɛ. É nyí gbɛtɔ́ nukúnɖéjí hú yě; é wɛ kpa acɛ dó yě nu lɔ; mɛɖé hú gǎn ɛ ɖo “Sɔ́ja Gbangbɛ́ta” ɔ́ mɛ ǎ. Benayahu Kavuceyɛ́linu e nyí Yexoyada ví, bó nyí nya ahwanfuntɔ́ syɛ́nsyɛ́n ɖé sín vǐvú é; é bló nǔ ɖaxó ɖaxó lɛ́ɛ. É wɛ hu Aliɛ́li Mɔwabu tɔn we lɛ́ɛ. É ɖokpó ɔ́ wɛ avuvɔ gbɛ́ gbe ɖokpó káká, bɔ é byɔ́ sitɛ́nu mɛ, bó hu kinnikínní ɖokpó. Benayahu wɛ lɛ́ hu Ejípunu ɖé gbe ɖokpó. Ejípunu énɛ́ ɔ́, ga tɔn yi mɛ̌tlu we adaɖé; é hɛn hwǎn ɖé alɔ mɛ bɔ kpo tɔn kló sɔ avɔlɔnkpɔntín. Benayahu ɔ́, éyɛ́ ka hɛn kpo ɖokpó bó yi tɔ́n ahwan ɛ, bó xo hwǎn ɔ́ yí sín alɔ tɔn mɛ, lobo zé dó hu i ná. Nǔ ɖaxó ɖaxó e Benayahu bló lɛ́ɛ nɛ́, bɔ nyǐkɔ tɔn yi jǐ ɖo ahwanfuntɔ́ syɛ́nsyɛ́n atɔn lɛ́ɛ mɛ. Gbɛtɔ́ nukúnɖéjí ɖaxó ɖokpó wɛ é nyí ɖo ahwanfuntɔ́ gban (30) lɛ́ɛ mɛ; amɔ̌, é sixú li za xá ahwanfuntɔ́ syɛ́nsyɛ́n atɔn lɛ́ɛ ǎ. É wɛ Davídi sɔ́ ɖó sɔ́ja e nɔ cɔ́ hɔn tɔn mɛ ɔ́ lɛ́ɛ nu. Ahwanfuntɔ́ ɖě lɛ́ɛ sín nyǐkɔ ɖíe: Asaxɛli, Jowabu nɔví ɔ́; Ɛluhanani, Dódo ví, Bɛteleyɛ́munu ɔ́; Camumɔti, Halɔ́ɔnu ɔ́; Hɛlɛ́si, Bɛti-Pɛlɛ́tinu ɔ́; Ila, Ikɛ́ci ví, Tekowanu ɔ́; Aviɛzɛ́ɛ, Anatɔ́tinu ɔ́; Sibekayi, Hucanu ɔ́; Ilayi, Axoxi ví ɔ́; Maxlayi, Nɛtofanu ɔ́; Helɛ́du, Baana ví, Nɛtofanu ɔ́; Itayi, Hlivayi ví, Giveyanu ɔ́; Giveya to ɔ́, Bɛnjamɛ́ɛ yíkúngban jí wɛ é ɖe. Benaya, Pileyatɔ́ninu ɔ́; Hulayi e nɔ nɔ Gaaci tɔ lɛ́ɛ kpá é; Aviɛ́li, Bɛti-Alabanu ɔ́; Azimawɛ́ti, Bahulimunu ɔ́; Eliyaba, Caaluvímunu ɔ́; Hacɛmu ví, Gizɔ́ɔnnu lɛ́ɛ; Yexonatáni, Cagée Haláanu ɔ́ sín vǐ; Axiyamu, Sakáa ví Haláanu ɔ́; Elifali, Wúu ví ɔ́; Hefɛ́ɛ, Mɛkelanu ɔ́; Axiya Bɛti-Pɛlɛ́tinu ɔ́; Ɛsló, Kaamɛ́linu ɔ́; Naalayi, Ɛzibayi ví ɔ́; Yoɛ́li, Natáni nɔví ɔ́; Miváa, Hagli ví ɔ́; Sɛlɛ́ki, Amumɔ́ɔ ví ɔ́; Naxilayi, Beelɔ́tinu ɔ́; Naxilayi wɛ nɔ hɛn ahwanfunnú Jowabu Selúya ví ɔ́ tɔn lɛ́ɛ. Ila, Yɛtɛ́ɛ ví ɔ́; Galɛ́vu, Yɛtɛ́ɛ ví ɔ́; Ulíi, Hitíti ɔ́; Zavadu, Axlayi ví ɔ́; Adina, Ciza ví ɔ́. Adina ɔ́, akɔta Hwlibɛ́ni tɔn ɔ́ sín gǎn lɛ́ɛ ɖokpó wɛ; ahwanfuntɔ́ gban (30) nu wɛ é ɖe. Hanáni, Maaka ví ɔ́; Yocafáti, Mɛtɛ́ninu ɔ́; Wuziya, Acitalɔ́tinu ɔ́; Cama kpó Yeyiɛ́li kpó; Hotámu, Alowɛ́ɛnu ɔ́ sín vǐ wɛ yě nyǐ. Yediaɛ́lu, Cimuli ví ɔ́ kpó nɔví tɔn Yoxa, Tisinu kpó; Eliyɛ́li, Maxawímu ɔ́; Ɛlunáamu ví lɛ́ɛ: Yelivayi kpó Yocawia kpó. Yituma, Mɔwabunu ɔ́; Eliyɛ́li, Ovɛ́di kpódó Yaasiɛ́li Sovanu ɔ́ kpó. Hwenu e Davídi hɔn nú Sawúlu Kícu ví ɔ́, bó yi cí Siklági ɔ́, nya ɖé lɛ́ɛ wá gɔ̌n tɔn ɖo fínɛ́. Ahwanfuntɔ́ syɛ́nsyɛ́n wɛ yě nyǐ, bó ɖo gbesisɔ mɛ bó ná gɔ́ alɔ n'i ɖo ahwan hwenu. Yě hɛn gǎ kpó klohwán kpó. Alɔ myɔ kpó ɖisí kpó bǐ wɛ yě nɔ́ zán. Yě mɛ e gosín akɔta Bɛnjamɛ́ɛ tɔn mɛ Sawúlu ɖɔhun lɛ́ɛ ɖíe: Axiezɛ́ɛ gǎn yětɔn ɔ́, kpó nɔví tɔn Yoaci, Cemáa ví Giveyanu ɔ́ kpó; Yeziyɛ́li kpó Pɛlɛ́ti, Azimawɛ́ti ví ɔ́ kpó, Belaka kpó Yehu Anatɔ́tinu ɔ́ kpó, Yicimaya Gabawɔ́ɔnnu ɔ́; gbɛtɔ́ nukúnɖéjí wɛ é nyí ɖo mɛ gban (30) lɛ́ɛ mɛ, bó kpa acɛ dó sɔ́ja gban (30) nu, Yiimɛya, Yaxaziɛ́li, Yoxanáni kpó Yozavadi Gedelanu ɔ́ kpó. Elewuzayi, Yelimɔ́ti, Bealya, Cemaliyahu, Cefátiyahu Halifunu ɔ́, Ɛlukana, Yiciyahu, Azalɛ́li, Yoɛzɛ́ɛ kpódó Yacoveamu kpó; Koláxi ví wɛ nú yě, Yoela kpó Zevadiya kpó. Yeloxámu Gedɔ́ɔnu ɔ́ sín vǐ wɛ yě nyǐ. Mɛ ɖé lɛ́ɛ gosín akɔta Gadi tɔn mɛ bó wá Davídi gɔ́n, ɖo fí e é hɔn bɛ ɖe, ɖo gbětótló mɛ é. Yě nyɔ̌ ahwan fun ɖésú; yě hɛn gǎglónú kpó hwǎn kpó. Yě nɔ́ wa nǔ kinnikínní ɖɔhun, bó yá afɔ tɛ́ ɖo sókan mɛ gbɔn wɛ ɖɔhun. Mɛ lɛ́ɛ sín nyǐkɔ ɖíe: Ezɛ́ɛ, Ovadia, Eliavu, Micimána, Yiimɛya, Atayi, Eliyɛ́li, Yoxanáni, Ɛluzavadi, Yiimɛyahu kpó Makibánáyi kpó. Gadi ví wɛ yě nyǐ, bó nyí ahwangán. Sɔ́ja gǔdo gúdo tɔn e ɖo yě mɛ ɔ́, sɔ́ja kanwe ko do mɛ wɛ é ɖe; sɔ́ja e ka syɛ́n hú yě bǐ ɔ́, sɔ́ja afatɔ́n do mɛ wɛ é ɖe. Yě mɛ e d'asá Judɛ́ɛn tɔ ɔ́ ɖo sun nukɔntɔn ɔ́ mɛ, bó nya mɛ e ɖo tɔdo ɔ́ mɛ ɖo zǎnzǎnhwe jí lɛ́ɛ kpó mɛ e ɖo gbadahwe jí lɛ́ɛ kpó lɛ́ɛ nɛ́; hwenɛ́nu ɔ́, tɔ ɔ́ gɔ́, bó gba wu kpé fí bǐ. Bɛnjamɛ́ɛ ví ɖé lɛ́ɛ kpó Judáa ví ɖé lɛ́ɛ kpó lɔmɔ̌ yi Davídi gɔ́n, ɖo fí e é hɔn bɛ ɖe é. Davídi yi kpé yě, bó ɖɔ nú yě ɖɔ: “Ényí ayixa ɖagbe wɛ jɛ xo mitɔn mɛ, bɔ mi wá gɔ̌n ce bó ná dó alɔ mì ɔ́, un ná yí mi kpó xomɛ kpó. Amɔ̌, ényí un ɖo xomɛ vɔ́ lě, bɔ mi wá bó ná dó yɛ mì, lobo ná jó mì nú kɛntɔ́ ce lɛ́ɛ wɛ ɔ́, Mawu tɔ́gbó mǐtɔn lɛ́ɛ tɔn ní gbo hwɛ.” Ée é ɖɔ mɔ̌ ɔ́, yɛ Mawu tɔn jɛ Amasayi e kpa acɛ dó sɔ́ja Gban gbɛ́ta nu ɔ́ jí, bɔ é ɖɔ: “Davídi, towe wɛ mǐ nyǐ, jǐ towe wɛ mǐ ɖe; Jɛsée ví, fífá ní tíin nú we, bó tíin nú mɛ e ɖo alɔ gɔ́ nú we wɛ lɛ́ɛ, ɖó Mawu towe kó hwlɛ́n we gán.” Ée é ɖɔ mɔ̌ ɔ́, Davídi yí yě, bó sɔ́ yě dó ahwangán tɔn lɛ́ɛ mɛ. Hwenu e Davídi xwedó Filisitɛ́ɛn lɛ́ɛ, bɔ yě xwe ahwan tɔ́n Sawúlu gbé ɔ́, mɛ ɖé lɛ́ɛ gosín akɔta Manasée tɔn ɔ́ mɛ, bó wá gɔ́ n'i. Lo ɔ́, Davídi kpó mɛ tɔn lɛ́ɛ kpó sɔ́ xwedó Filisitɛ́ɛn lɛ́ɛ yi ahwan fun xá Sawúlu gbe ǎ, ɖó Filisitɛ́ɛn lɛ́ɛ sín gǎn lɛ́ɛ nya yě, bó ɖɔ é táá jɛ gǎn tɔn Sawúlu jí, bó ná jó émí n'i. Hwenu e Davídi yi Siklági ɔ́ wɛ Manasée sín mɛ lɛ́ɛ wá gɔ́ n'i; yě mɛ e wɛ lɛ́ɛ ɖíe: Adináxi, Yozavadi, Yediaɛ́lu, Mikaɛli, Yozavadi, Elihu kpó Siletáyi kpó. Sɔ́ja afatɔ́ngán wɛ yě nyǐ ɖo akɔta Manasée tɔn ɔ́ mɛ. Yě nɔ ahwan ɔ́ nu xá Davídi bó dó alɔ ɛ, ɖó ahwanfuntɔ́ syɛ́nsyɛ́n wɛ yě bǐ nyǐ, bó nyí gǎn ɖo ahwangɔnu ɔ́ mɛ. Ayǐhɔ́ngbe ayǐhɔ́ngbe wɛ mɛ lɛ́ɛ nɔ wá Davídi gɔ́n, bó ná gɔ́ alɔ n'i káká bɔ mɛ e ɖo ahwangɔnu tɔn mɛ lɛ́ɛ sukpɔ́ ɖésú bó vɛ́ jlɛ́. Súnnu nabí e sɔ́ ahwannú bó yi Davídi gɔ́n ɖo Eblɔ́n bo ɖo gbesisɔ mɛ bo ná fun ahwan bó ná yí axɔ́súɖuto ɔ́ sín Sawúlu sí bó ná zé jó nú Davídi, lě e Mawu Mavɔmavɔ ɖɔ gbɔn ɔ́ lɛ́ɛ ɖíe: Ahwanfuntɔ́ děgba ɖě afɔwó afɛnɛ (6.800) wɛ gosín akɔta Judáa tɔn mɛ; yě hɛn gǎglónú, bó hɛn hwǎn. Ahwanfuntɔ́ syɛ́nsyɛ́n děgba ɖě afɔwó kanwe ko (7.100) wɛ gosín akɔta Sinmɛnyɔ́ɔ tɔn ɔ́ mɛ. Ahwanfuntɔ́ děgba ɖě nǔwɔntɔn (4.600) wɛ gosín akɔta Levíi tɔn ɔ́ mɛ. Yexoyada, Aalɔ́ɔn sín hɛ̌nnugán ɔ́ lɔmɔ̌ yi Davídi gɔ́n, é kpódó ahwanfuntɔ́ afɔwó-afatɔ́n nǔwɔntɔn kanwe ko (3.700) kpó. Nyaví Sadɔ́ku ahwanfuntɔ́ syɛ́nsyɛ́n ɔ́ lɔmɔ̌ yi, é kpódó ahwangán ko-nukún-we e ɖo tɔ́ tɔn xwé lɛ́ɛ kpó. Ahwanfuntɔ́ afɔwó-afatɔ́n (3.000) wɛ gosín akɔta Bɛnjamɛ́ɛ tɔn e nyí Sawúlu ɖésúnɔ tɔn ɔ́ mɛ. Káká wá jɛ hwenɛ́nu ɔ́, mɛ gěgé ɖo yě mɛ, bó nɔ gbejí nú Sawúlu hɛ̌nnu ɔ́. Ahwanfuntɔ́ syɛ́nsyɛ́n adɔ̌kpo ɖě afɛnɛ (20.800) wɛ gosín akɔta Eflayímu tɔn mɛ. Gbɛtɔ́ ɖé wɛ yě nyǐ, bɔ nyǐkɔ yětɔn yi jǐ ɖo hɛ̌nnu yětɔn yětɔn lɛ́ɛ mɛ. Ahwanfuntɔ́ děgba ɛnɛ afɔwó (18.000) wɛ gosín akɔta vlɔ́ Manasée tɔn mɛ. È ɖe yědɛɛ lɛ́ɛ tawun, bónú yě ná yi sɔ́ Davídi axɔ́sú. Ahwangán afɔɖé kpó sɔ́ja e nu yě ɖe lɛ́ɛ kpó wɛ gosín akɔta Isakáa tɔn ɔ́ mɛ. Yědɛɛ lɛ́ɛ ɔ́, nú Izlayɛ́li ví lɛ́ɛ ja nǔɖé bló gbé ɔ́, yě nɔ́ tunwun hwenu e yě ná bló dó é, kpó lě e yě ná bló gbɔn ɔ́ kpó. Ahwanfuntɔ́ adɔ̌kpo we děgba we afɔwó (50.000) wɛ gosín akɔta Zabulɔ́ɔn tɔn mɛ. Ahwanfuntɔ́ énɛ́ lɛ́ɛ nyɔ́ ahwan fun ganjí, bó ɖo gbesisɔ mɛ bo ná fun ahwan. Ahwanfunnú alɔkpa alɔkpa wɛ yě hɛn, bó ná fun ahwan kpó ayixa ɖokpó kpó. Ahwangán kpó ahwanfuntɔ́ e hɛn gǎglónú bó hɛn hwǎn lɛ́ɛ kpó adɔ̌kpo ɖě děgba ɛnɛ afatɔ́n (37.000) wɛ gosín akɔta Nɛfutali tɔn ɔ́ mɛ. Ahwanfuntɔ́ e ko ɖo gbesisɔ mɛ bó ná fun ahwan lɛ́ɛ ɔ́, adɔ̌kpo ɖě děgba we nǔwɔntɔn (28.600) wɛ gosín akɔta Dan tɔn ɔ́ mɛ. Ahwanfuntɔ́ e nyɔ́ ahwan fun ganjí, bó ɖo gbesisɔ mɛ bó ná fun ahwan lɛ́ɛ ɔ́, adɔ̌kpo we (40.000) wɛ gosín akɔta Asɛ́ɛ tɔn mɛ. Ahwanfuntɔ́ adɔ̌kpo ayizɛ́n (120.000) wɛ gosín akɔta Hwlibɛ́ni tɔn ɔ́ kpó Gadi tɔn ɔ́ kpó, kpódó akɔta vlɔ́ Manasée tɔn ɔ́ kpó mɛ, ɖo Judɛ́ɛn tɔ ɔ́ sín zǎnzǎnhwe jí. Yě bǐ wɛ hɛn ahwanfunnú alɔkpa alɔkpa. Ahwanfuntɔ́ énɛ́ lɛ́ɛ bǐ wɛ ɖo gbesisɔ mɛ bó ná fun ahwan. Yě wá Eblɔ́n kpó ayixa ɖokpó kpó, bó ná sɔ́ Davídi axɔ́sú ɖó Izlayɛ́li togun ɔ́ bǐ nu. Izlayɛ́li ví e kpo lɛ́ɛ lɔ bǐ wɛ ɖó gbe kpɔ́, bó ná sɔ́ Davídi axɔ́sú. Yě nɔ Davídi gɔ́n fínɛ́ xɔ azǎn atɔn, bó ɖo nǔ ɖu wɛ, bó ɖo ahan nu wɛ; nɔví yětɔn e ɖo fínɛ́ lɛ́ɛ wɛ ɖo nǔɖuɖu ná yě wɛ. Mɔ̌ ɖokpó ɔ́, nɔví yětɔn e gbɔn gbě énɛ́ ɔ́ jí káká yi Isakáa, Zabulɔ́ɔn kpó Nɛfutali kpó lɛ́ɛ nɔ dó nǔɖuɖu gban dó tócí jí, lǎkúnmí jí, sɔ́tócí jí kpódó nyibú kpó jí wá nú yě: yě hɛn linfín, bó hɛn fígi xúxú kpɔ́, bó hɛn vǐwun xúxú kpɔ́, vɛ̌ɛn, ami, bɔ nyibú kpó lɛ̌ngbɔ́ kpó ɖo kpɔ́ gégé, ɖó Izlayɛ́li to ɔ́ ɖo awǎ jɛ wɛ. Davídi kpó sɔ́ja afatɔ́ngán lɛ́ɛ kpó sɔ́jakanwekogán lɛ́ɛ kpó, kpódó tonukún ɖě lɛ́ɛ kpó yi tagbesɔ. Davídi ɖɔ nú Izlayɛ́li ví e wá kplé lɛ́ɛ bǐ ɖɔ: “Ényí é nyɔ́ mi nukún mɛ, bó nyɔ́ Mawu Mavɔmavɔ, Mawu mǐtɔn lɔmɔ̌ nukún mɛ ɔ́, mǐ ná yá wǔ sɛ́ wɛn dó mɛ mǐtɔn e ɖo Izlayɛ́li yíkúngban jí lɛ́ɛ bǐ. Đo tají ɔ́, mǐ nǎ lɛ́ sɛ́ wɛn dó vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó gbɔn toxo lɛ́ɛ kpó gletoxo e lɛ́ dó yě lɛ́ɛ kpó mɛ. Mǐ ná ɖɔ nú yě ɖɔ yě ní wá kplé ɖo mǐ gɔ̌n. Mǐ ná zé akɔjijɛgbá Mawu mǐtɔn tɔn ɔ́ wá ɖó akpá, ɖó mǐ ké ya ná ɖo Sawúlu hwenu ǎ.” Ée é ɖɔ mɔ̌ ɔ́, é nyɔ́ yě mɛ e kplé lɛ́ɛ bǐ nukún mɛ, bɔ yě yí gbe ɖɔ émí ná bló nǔ e é ɖɔ ɔ́. Énɛ́ ɔ́, Davídi kplé Izlayɛ́li ví lɛ́ɛ bǐ, bɛ́ sín Ejípu dogbó jí ɖo tofɔligbé káká yi Hamáti ɖo totaligbé, bó ná zé akɔjijɛgbá Mawu tɔn ɔ́ sín Kiliyati-Yealimu. Davídi kpó togun Izlayɛ́li tɔn ɔ́ bǐ kpó yi Baala e è nɔ lɛ́ ylɔ́ ɖɔ Kiliyati-Yealimu ɖo Judáa yíkúngban jí é, bó ná yi zé akɔjijɛgbá Mawu tɔn ɔ́ wá yi. Akɔjijɛgbá ɔ́ jí wɛ, Mawu Mavɔmavɔ ɖo ayǐjínjɔ́n ɖe, ɖo axɔ́súzinkpo tɔn jí, bɔ nyǐkɔ tɔn ɖ'é wú. Yě zě akɔjijɛgbá ɔ́ ɖó kɛkɛ́ví yɔ̌yɔ́ ɖé mɛ, sín Avinadávu xwé gbe. Wúza kpó Axiyo kpó wɛ ɖo kɛkɛ́ví ɔ́ kun wɛ. Davídi kpó togun Izlayɛ́li tɔn ɔ́ bǐ kpó ɖo awǎ jɛ wɛ ɖo Mawu nukɔn kpó hlɔ̌nhlɔ́n yětɔn bǐ kpó: Yě ɖo han ji wɛ bo ɖo agǐdigbo kpó kanhún kpó xo wɛ, hǔn kpó gan kpó xo wɛ, lobo ɖo kpɛn kún wɛ. Ée yě wá jɛ Kidɔ́ni sín kɔ́xota ɔ́, nyibú lɛ́ɛ jló ná zin akɔjijɛgbá Mawu tɔn ɔ́ dɛ́, bɔ Wúza dlɛ́n alɔ bó ná hɛn ɖó te. Énɛ́ ɔ́, Mawu Mavɔmavɔ sin xomɛ dó Wúza bo dɔn tó n'i ɖó é ɖó alɔ akɔjijɛgbá ɔ́ wú. Énɛ́ ɔ́, Wúza kú ɖo Mawu nukɔn fínɛ́. Tó e Mawu Mavɔmavɔ dɔn nú Wúza gbɔn mɔ̌ ɔ́ sin xomɛ nú Davídi, bɔ é ylɔ́ tɛn énɛ́ ɔ́ mɛ ɖɔ Pelɛ́si-Wúza. È kpo ɖo fí ɔ́ ylɔ́ ɖɔ mɔ̌ wɛ káká jɛ égbé. Gbe énɛ́ ɔ́ gbe ɔ́, xɛsi ɖi Davídi dó Mawu wú, bɔ é ɖɔ: “Akɔjijɛgbá Mawu tɔn sixú yi xwé ce gbe ǎ.” Nǔgbó ɔ́, Davídi zé akɔjijɛgbá ɔ́ ɖó xwé tɔn gbe ɖo Davídi Toxo mɛ ǎ, lobo zé yi ɖó nya Gatinu ɖé xwé. È nɔ ylɔ́ nya ɔ́ ɖɔ Ovɛ́di-Edɔ́mu. Akɔjijɛgbá Mawu tɔn ɔ́ nɔ Ovɛ́di-Edɔ́mu xwé xɔ sun atɔn, bɔ Mawu Mavɔmavɔ dó acɛ Ovɛ́di-Edɔ́mu sín mɛ lɛ́ɛ jí, bó dó acɛ nǔ e nyí étɔn lɛ́ɛ bǐ jí. Ilámu Tíi xɔ́sú ɔ́ sɛ́ mɛ dó Davídi gɔ́n, bó sɛ́ sɛ́dlutín dó e, bó sɛ́ awǐnnyakpatɔ́ kpódó xɔgbátɔ́ kpó dó e, bónú yě ná gbá hɔnmɛ ɖokpó n'i. Énɛ́ ɔ́, Davídi mɔ ɖɔ Mawu Mavɔmavɔ ɖésú wɛ sɔ́ émí Izlayɛ́li xɔ́sú, bó nɔ́ ɖo axɔ́súɖuto émítɔn sɔ́ su wɛ ɖó togun tɔn Izlayɛ́li wú. Davídi lɛ́ da asi ɖěvo lɛ́ɛ ɖo Jeluzalɛ́mu, bó ji vǐ súnnu kpó nyɔ̌nu kpó ɖo xo yětɔn mɛ. Vǐ e é ji ɖo Jeluzalɛ́mu lɛ́ɛ sín nyǐkɔ ɖíe: Camumúa, Covavu, Natáni, Salomɔ́ɔ, Yiváa, Elicuwa, Ɛlupalɛ́ti, Nɔgáxi, Nɛfɛ́gi, Yafia, Elicama, Beɛlyada kpódó Elifɛlɛ́ti kpó. Filisitɛ́ɛn lɛ́ɛ se ɖɔ è kɔn ami ɖó ta nú Davídi bó sɔ́ ɛ axɔ́sú ɖó togun Izlayɛ́li tɔn ɔ́ bǐ nu. Ée yě se mɔ̌ ɔ́, yě bǐ jɛ gbě tɔn nya jí, bó ná wlí i. Davídi ka se bó sɔ́ ahwan nú, bó ná yi kpé yě. Filisitɛ́ɛn lɛ́ɛ wá, bó gba kpé Hlafa ví lɛ́ɛ sín tɔdo mɛ. Davídi kanbyɔ́ Mawu ɖɔ: “Ma yi tɔ́n ahwan Filisitɛ́ɛn lɛ́ɛ a? A nǎ jó yě nú mì a?” Bɔ Mawu Mavɔmavɔ yí gbe n'i ɖɔ: “Yi tɔ́n ahwan yě, un ná jó yě nú we.” Filisitɛ́ɛn lɛ́ɛ wá Baalu-Pelasímu, tínmɛ tɔn wɛ nyí “Aliɖedókɛntɔ́mɛtɔ́ Gán.” Fínɛ́ wɛ Davídi gba yě ɖe. Énɛ́ ɔ́ gúdo ɔ́, é ɖɔ: “Mawu zé mì dó gba kɛntɔ́ ce lɛ́ɛ dó, bɔ yě gba wu sin ɖɔhun.” Énɛ́ ɔ́ wú wɛ è sun nyǐ tɛn énɛ́ ɔ́ mɛ ɖɔ Baalu-Pelasímu. Filisitɛ́ɛn lɛ́ɛ jǒ vodún yětɔn lɛ́ɛ dó nyi fínɛ́, bɔ Davídi ná gbe ɖɔ è nǐ dó yě zo. Filisitɛ́ɛn lɛ́ɛ lɛ́ gba kpé tɔdo Hlafa ví lɛ́ɛ tɔn ɔ́ mɛ. Davídi lɛ́ kan nǔ byɔ́ Mawu, bɔ Mawu ɖɔ n'i ɖɔ: “Ma tɔ́n ahwan yě gbɔn gǔdo ó. Lɛ̌ kɔ sín gǔdo yětɔn, bó sɛ yi zɔ nú yě ganjí, lobo gbɔn mukokulitínkan mɛ wá tɔ́n dó yě jí. Hwenu e a nǎ se afɔgbe ɖo atín lɛ́ɛ sín ɖavínu ɔ́, a nǎ tɔ́n ahwan yě, ɖó nyɛ Mawu wɛ ɖo nukɔn towe, bó ná gba Filisitɛ́ɛn lɛ́ɛ sín ahwangɔnu ɔ́.” Davídi bló nǔ e Mawu ɖɔ n'i é. Énɛ́ ɔ́, Izlayɛ́li ví lɛ́ɛ ɖu ɖo Filisitɛ́ɛn lɛ́ɛ jí, bó nya yě sín Gabawɔ́ɔn káká yi Gɛzɛ́ɛ. Davídi sín nyǐkɔ gba kpé to lɛ́ɛ bǐ mɛ; Mawu Mavɔmavɔ bló bɔ akɔta lɛ́ɛ bǐ nɔ ɖi xɛsi n'i. Davídi gbá xɔ ɖó Jeluzalɛ́mu. É bló tɛnmɛ ɖokpó ɖ'ayǐ nú akɔjijɛgbá Mawu tɔn ɔ́, bó gbá goxɔ e sá akɔjijɛgbá ɔ́ ná nɔ é. Énɛ́ ɔ́ gúdo ɔ́, é ɖɔ: “Levíi ví lɛ́ɛ kɛ́ɖɛ́ wɛ ɖó acɛ bo ná zé akɔjijɛgbá Mawu tɔn ɔ́, ɖó Mawu Mavɔmavɔ wɛ ɖe yě bɔ yě ná nɔ́ zé, bɔ é nyí azɔ̌ yětɔn káká sɔ́yi.” Ée Davídi ɖɔ mɔ̌ ɔ́, é ylɔ́ togun Izlayɛ́li tɔn ɔ́ bǐ kplé ɖo Jeluzalɛ́mu, bónú è nǎ zé akɔjijɛgbá Mawu Mavɔmavɔ tɔn ɔ́ yi ɖó tɛn e é bló ɖ'ayǐ n'i é mɛ. Davídi kplé vɔ̌sánú-xwlémawutɔ́ Aalɔ́ɔn ví lɛ́ɛ kpó Levíi ví ɖě lɛ́ɛ kpó. Đo Kexáti hɛ̌nnu mɛ ɔ́, Wuliyɛ́li kpó nɔví tɔn lɛ́ɛ kpó. Yě bǐ bló gbɛtɔ́ kantɔn (120); Wuliyɛ́li wɛ ɖo yě nu. Đo Mɛlali hɛ̌nnu mɛ ɔ́, Asaya kpó nɔví tɔn lɛ́ɛ kpó. Yě bǐ bló gbɛtɔ́ afɔɖé ko (220). Asaya wɛ ɖo yě nu. Đo Gɛɛcɔ́ni hɛ̌nnu mɛ ɔ́, Yoɛ́li kpó nɔví tɔn lɛ́ɛ kpó. Yě bǐ bló gbɛtɔ́ kantɔn wǒ (130); Yoɛ́li wɛ ɖo yě nu. Đo Elisafáni hɛ̌nnu mɛ ɔ́, Cemaya kpó nɔví tɔn lɛ́ɛ kpó. Yě bǐ bló gbɛtɔ́ afɔɖé (200); Cemaya wɛ ɖo yě nu. Đo Eblɔ́n hɛ̌nnu mɛ ɔ́, Eliyɛ́li kpó nɔví tɔn lɛ́ɛ kpó. Yě bǐ bló gbɛtɔ́ kanwe (80); Eliyɛ́li wɛ ɖo yě nu. Đo Wuziyɛ́li hɛ̌nnu mɛ ɔ́, Aminadabu kpó nɔví tɔn lɛ́ɛ kpó. Yě bǐ bló gbɛtɔ́ kanwe gban-nukún-we (112); Aminadabu wɛ ɖo yě nu. Davídi ylɔ́ vɔ̌sánú-xwlémawutɔ́ Sadɔ́ku kpó Abiyatáa kpó, bó ylɔ́ Levíi ví Wuliyɛ́li, Asaya, Yoɛ́li, Cemaya, Eliyɛ́li, kpó Aminadabu kpó, bó ɖɔ nú yě ɖɔ: “Hɛ̌nnugán Levíi ví lɛ́ɛ tɔn wɛ mi nyí. Mi slá wǔ, mi kpó nɔví mitɔn lɛ́ɛ kpó, bó yi zé akɔjijɛgbá Mawu Mavɔmavɔ, Mawu Izlayɛ́li tɔn ɔ́ tɔn wá ɖó tɛn e un bló ɖ'ayǐ n'i é mɛ. Azɔn nukɔntɔn e mǐ zě ɔ́, mi ɖo tɛn tɔn mɛ ǎ; énɛ́ ɔ́ wú wɛ Mawu Mavɔmavɔ, Mawu mǐtɔn dɔn tó nú mǐ, ɖó mǐ zé lě e sɛ́n ɔ́ zɔ́n gbɔn ɔ́ ǎ.” Ée Davídi ɖɔ mɔ̌ ɔ́, vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó slá wǔ, bó ná yi zé Mawu Mavɔmavɔ, Mawu Izlayɛ́li tɔn ɔ́ sín akɔjijɛgbá ɔ́. Levíi ví lɛ́ɛ dó kpɔn akɔjijɛgbá ɔ́, lobo sɔ́ ɖó abɔ̌ta, lě e Mawu Mavɔmavɔ ɖɔ gbɔn nú Mɔyízi bɔ é ɖɔ é. Bɔ Davídi ɖɔ nú Levíi ví lɛ́ɛ sín gǎn lɛ́ɛ ɖɔ yě ní to nɔví yětɔn hanjitɔ́ lɛ́ɛ, bónú yě ná zé kanhún, agǐdigbo kpó gan kpó, bó ná xo dó ɖe awǎjijɛ yětɔn xlɛ́. Ée Davídi ɖɔ mɔ̌ ɔ́, Levíi ví lɛ́ɛ sɔ́ Hemani Yoɛ́li ví ɔ́, bó sɔ́ Asáfu Bɛlɛkiyahu ví ɔ́ ɖo nɔví tɔn lɛ́ɛ mɛ gɔ́ ná, bó sɔ́ nɔví yětɔn Etáni Kucayahu ví ɔ́ ɖo Mɛlali ví lɛ́ɛ mɛ gɔ́ ná. Levíi ví ɖěvo lɛ́ɛ ɖo fínɛ́, bó bɔ dó yě wú. Yědɛɛ lɛ́ɛ ɔ́, hɔnjínɔtɔ́ wɛ nú yě. Yě wɛ nyí Zekaliyahu, Bɛni, Yaaziɛ́li, Cemilamɔti, Yexiyɛ́li, Wunni, Eliavu, Benayahu, Maaseyahu, Matitiahu, Eliflexu, Mikinɛyahu, Ovɛ́di-Edɔ́mu kpó Yeyiɛ́li kpó. Hanjitɔ́ Hemani, Asáfu kpódó Etáni kpó ɖo gan xo wɛ, bɔ é ɖo gbe ɖi wɛ ɖésú. Gan e xo wɛ yě ɖe lɛ́ɛ ɔ́, ganvɔ wɛ è dǒ bló yě ná. Zekaliya, Aziyɛ́li, Cemilamɔti, Yexiyɛ́li, Wunni, Eliavu, Maaseyahu kpódó Benayahu kpó ɖo agǐdigbo e nɔ dó gbe wínníwínní lɛ́ɛ xo wɛ. Bɔ Matitiahu, Eliflexu, Mikinɛyahu, Ovɛ́di-Edɔ́mu, Yeyiɛ́li kpó Azaziyahu kpó ká ɖo kanhún kantántɔnnɔ e nɔ dó gbe kloklo lɛ́ɛ xo wɛ dó han ɔ́ mɛ. Kenaniya wɛ kpa acɛ dó Levíi ví e hɛn akɔjijɛgbá ɔ́ lɛ́ɛ nu. É wɛ ɖo ali xlɛ́ yě wɛ, ɖó é bí ɖésú. Hɔnjínɔtɔ́ Bɛlɛkya kpó Ɛlukana kpó ɖo akɔjijɛgbá ɔ́ kpá. Vɔ̌sánú-xwlémawutɔ́ Cevaniya, Yocafáti, Nɛtanɛli, Amasayi, Zekaliyahu, Benayahu kpódó Eliezɛ́ɛ kpó ká ɖo kpɛn kún wɛ ɖo akɔjijɛgbá Mawu tɔn ɔ́ nukɔn. Hɔnjínɔtɔ́ Ovɛ́di-Edɔ́mu kpó Yexiya kpó ɖo akɔjijɛgbá ɔ́ kpá. Davídi kpó tomɛxó Izlayɛ́li tɔn lɛ́ɛ kpó, kpódó sɔ́ja afatɔ́ngán lɛ́ɛ kpó zé akɔjijɛgbá Mawu Mavɔmavɔ tɔn ɔ́ sín Ovɛ́di-Edɔ́mu xwé, bó jɛ ali kpó awǎjijɛ kpó. Mawu wɛ gɔ́ alɔ nú Levíi ví e hɛn akɔjijɛgbá ɔ́ lɛ́ɛ. Énɛ́ ɔ́, è hu nyibúsú tɛ́nwe, agbo tɛ́nwe dó sá vɔ̌ ná. Davídi dó awu ɖaxó ɖé; kanvɔ fɛ́ɖɛ́fɛ́ɖɛ́ ɖé wɛ è dǒ tɔ. Levíi ví e hɛn akɔjijɛgbá ɔ́ lɛ́ɛ bǐ kpó nǔxotɔ́ lɛ́ɛ kpó, kpódó Kenaniya e ɖo yě nu ɔ́ kpó lɔmɔ̌ dǒ nǔ ɖokpó ɔ́. Davídi lɛ́ dó lɛ̌ɛnkanvɔ e mɛ vɔ̌sánú-xwlémawutɔ́ lɛ́ɛ nɔ nɔ ɔ́ dó éyɛ́ tɔn jí. Izlayɛ́li to ɔ́ bǐ zě akɔjijɛgbá Mawu Mavɔmavɔ tɔn ɔ́ wá Jeluzalɛ́mu bó ɖo awǒbóbó kpa wɛ, bɔ lanzo ɖo gbe jɛ wɛ, kpɛn kpó gan kpó ɖo gbe jɛ wɛ, bɔ kanhún kpó agǐdigbo kpó ɖo nǔ ɖɔ wɛ. Hwenu e akɔjijɛgbá Mawu Mavɔmavɔ tɔn ɖo Davídi Toxo mɛ byɔ́ wɛ ɔ́, Sawúlu sín vǐ nyɔ̌nu Mikali Davídi si ɔ́ kpɔ́n sɛ́ dó gbɔn flɛtɛ́li nu, bó mɔ bɔ axɔ́sú Davídi ɖo jǐ lɔ́n yi wɛ, bó ɖo awǎ jɛ wɛ, bɔ axɔ́sú Davídi sín nǔ vɛ́ wǔ tɔn ɖésú. Ée è zě akɔjijɛgbá Mawu tɔn ɔ́ wá ɔ́, è zě ɖó goxɔ e Davídi ko gbá ɖ'ayǐ n'i ɔ́ tɛ́ntin, bó sá vɔ̌ e è nɔ dó zo ɔ́ kpódó kɔnɖókpɔ́ vɔ́ kpó nú Mawu. Ée Davídi sá vɔ̌ lɛ́ɛ fó ɔ́, é xo ɖɛ dó togun ɔ́ jí ɖo Mawu Mavɔmavɔ nyǐkɔ mɛ. Énɛ́ ɔ́ gúdo ɔ́, è nǎ gbe ɖɔ è nǐ ná wɔ̌xúxú kloklo ɖokpó dǎti xúxú mlímlí ɖokpó ɖokpó kpódó vǐwun xúxú mlímlí kpó mɛ ɖokpó ɖokpó. Bɔ è mǎ nú Izlayɛ́li togun ɔ́ bǐ, súnnu kpó nyɔ̌nu kpó. Davídi ɖe Levíi ví ɖé lɛ́ɛ bɔ yě ná nɔ́ wa azɔ̌ ɖo akɔjijɛgbá Mawu Mavɔmavɔ tɔn ɔ́ nukɔn. Yě ná nɔ sú xó ylɔ́ Mawu Mavɔmavɔ, Mawu Izlayɛ́li tɔn ɔ́; yě ná nɔ xomlá ɛ, bó ná nɔ kpa susu n'i. Yě mɛ e é ɖe lɛ́ɛ ɖíe: Asáfu; é wɛ ɖo yě nu, bɔ Zekaliya bɔ dó wǔ tɔn. Aziyɛ́li, Cemilamɔti, Yexiyɛ́li, Matitiahu, Eliavu, Benayahu, Ovɛ́di-Edɔ́mu kpó Yeyiɛ́li kpó ɖo agǐdigbo kpó kanhún kpó xo wɛ, bɔ Asáfu ɖo gan xo d'é mɛ wɛ. Vɔ̌sánú-xwlémawutɔ́ Benayahu kpó Yaxaziɛ́li kpó ɖo kpɛn kún wɛ magbokɔ ɖo akɔjijɛgbá Mawu tɔn ɔ́ nukɔn. Gbe énɛ́ ɔ́ gbe wɛ Davídi ɖe Asáfu kpó azɔ̌gbɛ́ tɔn lɛ́ɛ kpó azɔn nukɔntɔn ɔ́, bónú yě ná nɔ kpa susu nú Mawu Mavɔmavɔ. Mi kpa Mawu Mavɔmavɔ, mi sú xó bó ɖɔ é wɛ nyí Mawu. Mi jlá nǔ ɖaxó ɖaxó e é bló lɛ́ɛ nú togun lɛ́ɛ. Mi ji han, mi ji han dó kpa susu n'i. Mi ɖɔ nǔ ɖagbe ɖagbe e é bló lɛ́ɛ bǐ. Mi sɔ́ nyǐkɔ tɔn mímɛ́ ɔ́ dó xɔ susu. Mɛ e ɖo Mawu Mavɔmavɔ ba wɛ lɛ́ɛ ní j'awǎ. Mi hɔn yi su Mawu Mavɔmavɔ, mi gán jɛ wǔ tɔn, mi ba ná nɔ kpɔ́ xá ɛ hwebǐnu. Mi flín nǔjíwǔ e é bló lɛ́ɛ, bó flín nǔ e é jlɛ́ lɛ́ɛ kpó hwɛ e é ɖɔ lɛ́ɛ kpó. Mɛsɛntɔ́ tɔn Izlayɛ́li ví lɛ́ɛ mi, mi Jakɔ́bu ví e é cyán lɛ́ɛ mi, mi flín nǔ énɛ́ lɛ́ɛ e Mawu Mavɔmavɔ wa lɛ́ɛ. Mawu Mavɔmavɔ wɛ nyí Mawu mǐtɔn. É wɛ nɔ́ ɖɔ hwɛ dó nǔ e ɖo ayǐkúngban jí lɛ́ɛ bǐ. Mi nɔ flín akɔ e é jɛ xá togun tɔn ɔ́ tɛgbɛ, bó nɔ́ flín akpá e é dó é káká nú jijimɛ afatɔ́n (1.000). Mi flín akɔ e é jɛ xá Ablaxámu é, mi flín akpá e é dó nú Izáki é. É lɛ́ vɔ́ tɛ ɖɛ̌ jí nú Jakɔ́bu, é wɛ nyí akɔ mavɔ mavɔ e é jɛ xá Izlayɛ́li é. Akɔ e é jɛ xá Izlayɛ́li bó ɖɔ n'i ɖɔ: “Un ná ná Kanáa to ɔ́ we, bɔ é ná nyí towe; nǔ e un ná hwi kpó vǐ towe lɛ́ɛ kpó ɔ́ nɛ́.” Hwenɛ́nu ɔ́, mi sukpɔ́ ǎ, mi sukpɔ́ ɖěbǔ ǎ, bo nyí jǒnɔ ɖo to ɔ́ mɛ, bó gosín akɔta ɖě mɛ ɔ́, mi nɔ yi ɖěvo mɛ, bó nɔ gosín axɔ́súɖuto ɖě mɛ yi ɖěvo mɛ. Mawu Mavɔmavɔ ka lɔn nú mɛɖé táfú mi ǎ; é dɔn tó nú axɔ́sú lɛ́ɛ ɖó mi wú, bó ɖɔ nú yě ɖɔ: “Mi ma ɖó alɔ mɛ e un cyán lɛ́ɛ wú ó. Mi ma wa nǔ nyanya xá gbeyíɖɔ ce lɛ́ɛ ó.” Mi mɛ e ɖo ayǐkúngban jí lɛ́ɛ bǐ ní ji han dó kpa Mawu Mavɔmavɔ. Mi jlá hwlɛngán e é nɔ́ ná mɛ ɔ́ ayǐhɔ́ngbe ayǐhɔ́ngbe. Mi jlá susu e é ɖó ɔ́ gbɔn akɔta lɛ́ɛ bǐ mɛ, bó jlá nǔjíwǔ e é nɔ́ wa lɛ́ɛ gbɔn togun lɛ́ɛ bǐ mɛ. Đó Mawu Mavɔmavɔ d'agba, é jɛ xá tawun ɖɔ è nǐ nɔ kpa susu n'i. É syɛ́n hú nǔmɛsɛn lɛ́ɛ bǐ. Đó nǔ e akɔta lɛ́ɛ nɔ sɛn lɛ́ɛ ɖě nyí nǔɖé ǎ, nǔvlɛ́nǔ wɛ; Mawu Mavɔmavɔ wɛ ka bló jǐxwé. Nǔ sa acɔ́ kpó nǔjíwǔ kpó wɛ lɛ́ lɛ̌ dó e. Hlɔ̌nhlɔ́n kpó awǎjijɛ kpó wɛ ɖo nɔtɛn tɔn. Xwédo e ɖo akɔta lɛ́ɛ mɛ é bǐ ní kpa susu nú Mawu Mavɔmavɔ. Mi jlá susu tɔn kpó hlɔ̌nhlɔ́n tɔn kpó. Mi sɔ́ Mawu Mavɔmavɔ nyíkɔ su. Mi hɛn nǔ e mi ná ná ɛ lɛ́ɛ bó byɔ́ xwé tɔn gbe. Mi ɖe kɔ́ nú Mawu Mavɔmavɔ kpó acɔ́nú mímɛ́ lɛ́ɛ kpó. Mi mɛ e ɖo ayǐkúngban jí lɛ́ɛ bǐ ní sísɔ́ ɖo nukɔn tɔn. Gbɛ ɔ́ dó ɖɔ do, é nɔ́ xo to ǎ. Nǔ e ɖo jǐxwé é bǐ ní j'awǎ, xomɛ ní hun mɛ e ɖo ayǐkúngban jí é bǐ. È nǐ nɔ́ ɖɔ ɖo akɔta lɛ́ɛ bǐ nukɔn ɖɔ Mawu Mavɔmavɔ wɛ ɖu axɔ́sú. Xu kpó nǔ e ɖ'é mɛ lɛ́ɛ bǐ kpó ní xo zǐn. Fí e nyí gběgbó é kpó nǔ e ɖ'é mɛ lɛ́ɛ kpó ní sú xó bó j'awǎ. Atín e ɖo zungbó mɛ lɛ́ɛ ní kpa awǒbóbó ɖo Mawu Mavɔmavɔ nukɔn, ɖó é jǎwe bó ná ɖɔ hwɛ xá gbɛ ɔ́. Mi kpa susu nú Mawu Mavɔmavɔ, ɖó é nyɔ́, ɖó nǔbláwǔkúnúmɛ tɔn ɖo te káká sɔ́yi. Mi ɖɔ: “Mawu Mɛhwlɛ́ngántɔ́ mǐtɔn, hwlɛ̌n mǐ gǎn. Sɛ mǐ kplé, ɖe mǐ sín akɔta lɛ́ɛ mɛ, bónú mǐ ná sɔ́ nyǐkɔ mímɛ́ towe su, bónú susu kpa nú we ná nɔ́ hun xomɛ nú mǐ.” Susu nú Mawu Mavɔmavɔ, Mawu Izlayɛ́li tɔn ɔ́ káká sɔ́yi. Bɔ togun ɔ́ bǐ ɖɔ: “ Amǐ! Mi kpa susu nú Mawu Mavɔmavɔ!” Énɛ́ ɔ́ gúdo ɔ́, Davídi ɖe gbe nú Asáfu kpó nɔví tɔn lɛ́ɛ kpó, ɖɔ yě ní nɔ akɔjijɛgbá Mawu Mavɔmavɔ tɔn ɔ́ nukɔn fínɛ́, bó nɔ́ wa azɔ̌ yětɔn lě e azǎn ɖokpó ɖokpó byɔ́ gbɔn é. É ɖe Ovɛ́di-Edɔ́mu kpó gbɛtɔ́ kanɖé koatɔ́n-nukún-atɔn (68) kpó ɖo mɛ tɔn lɛ́ɛ mɛ, bɔ yě ná nyí hɔnjínɔtɔ́; é lɛ́ ɖe Ovɛ́di-Edɔ́mu Yedutún ví ɔ́ kpó Hosa kpó lɔ. Davídi zé azɔ̌ e è nǎ wa ɖo goxɔ Mawu Mavɔmavɔ tɔn e ɖo tɛn mímɛ́ mɛ ɖo Gabawɔ́ɔn é mɛ ɔ́ dó así nú vɔ̌sánú-xwlémawutɔ́ Sadɔ́ku kpódó nɔví tɔn vɔ̌sánú-xwlémawutɔ́ lɛ́ɛ kpó, bónú yě ná nɔ xwlé vɔ̌ e è nɔ dó zo ɔ́ Mawu Mavɔmavɔ zǎnzǎn gbada tɛgbɛ ɖo vɔ̌sákpe e jí è nɔ dó vɔ̌ zo ɖe ɔ́ jí. Yě ná nɔ́ wa nǔ e Mawu Mavɔmavɔ zɔ́n Izlayɛ́li ví lɛ́ɛ, bɔ é ɖo sɛ́n ɔ́ mɛ lɛ́ɛ bǐ. Bɔ Hemani kpó Yedutún kpó, kpódó mɛ ɖě lɛ́ɛ e è ɖe tawun bɔ yě ná nɔ kpa Mawu Mavɔmavɔ lɛ́ɛ kpó ɖo akpá yětɔn. Yě ɖó ná nɔ kpa Mawu Mavɔmavɔ, ɖó nǔbláwǔ kú nú mɛ tɔn ɖo te káká sɔ́yi. Hemani kpó Yedutún kpó nɔ kpé nukún dó kpɛn lɛ́ɛ kpó gan lɛ́ɛ kpó wú, bó nɔ kpé nukún dó nǔxonú e è nɔ xo dó han e ji nú Mawu wɛ è ɖe lɛ́ɛ mɛ lɛ́ɛ wú. È ɖe Yedutún ví lɛ́ɛ bɔ yě ná nɔ́ nɔ hɔn jí. Énɛ́ ɔ́ gúdo ɔ́, mɛ ɖokpó ɖokpó yi xwé; Davídi lɔmɔ̌ lɛ́ kɔ́ wá xwé tɔn gbe, bó ná dó gbe mɛ tɔn lɛ́ɛ. Axɔ́sú Davídi jɛ hɔn tɔn mɛ. É wá su gbe ɖokpó, bɔ é ɖɔ nú gbeyíɖɔ Mawu tɔn Natáan ɖɔ: “Kpɔ́n! Xɔ e mɛ nyɛ ɖe ɔ́, sɛ́dlutín wɛ è dǒ gbá, bɔ akɔjijɛgbá Mawu Mavɔmavɔ tɔn ɔ́ ká ɖo avɔgoxɔ mɛ. Étɛ́ a lin d'é wú?” Bɔ Natáan yí gbe nú axɔ́sú ɔ́ ɖɔ: “Yi bo bló nǔ e lin wɛ a ɖe ɔ́, ɖó Mawu ɖo kpɔ́ xá we.” Lo ɔ́, gbe énɛ́ gbe zǎn mɛ ɔ́, Mawu ɖɔ xó nú Natáan. É ɖɔ n'i ɖɔ: “Yi ɖɔ nú mɛsɛntɔ́ ce Davídi ɖɔ é kún nyí é wɛ ná gbá xɔ e mɛ un ná nɔ ɔ́ ó. Sín gbe e gbe un kplá Izlayɛ́li ví lɛ́ɛ sín Ejípu ɔ́ káká wá jɛ égbé ɔ́, un nɔ xɔ ɖě mɛ kpɔ́n ǎ; goxɔ jɛ́n nyí xwé ce, bɔ un nɔ ɖe mɛ, bó nɔ́ ɖo yiyi wɛ xá yě. Fí e gbɔn wɛ nyi kpó Izlayɛ́li ví lɛ́ɛ bǐ kpó ɖe ɔ́, un zɔ́n nǔɖé Izlayɛ́li gán e un ɖɔ ná ɖɔ yě ní kpé nukún dó Izlayɛ́li to ɔ́ wú lɛ́ɛ kpɔ́n gbeɖé a? Un ka kanbyɔ́ yě ɖě ɖɔ étɛ́wú yě má gbá sɛ́dluxɔ nú mì a jí kpɔ́n a? Din ɔ́, a nǎ ɖɔ nú mɛsɛntɔ́ ce Davídi ɖɔ xó e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: ‘Sín hwenu e a ɖo lɛ̌ngbɔ́nyitɔ́ nyí wɛ ɔ́ wɛ un ylɔ́ we, bó sɔ́ we gǎn ɖó togun ce Izlayɛ́li nu. Un nɔ kpɔ́ xá we ɖo fí e a gbɔn lɛ́ɛ bǐ. Un vívá kɛntɔ́ towe lɛ́ɛ bǐ sín kún ɖo nukún towe mɛ. Un zé nyǐkɔ towe su gǎn e ɖo ayǐkúngban ɔ́ jí lɛ́ɛ ɖɔhun. Un ná ná tɛnmɛ ɖé togun ce Izlayɛ́li, bó ná sɔ́ ɛ ɖó fínɛ́, bɔ ayi tɔn ná jɛ ayǐ. Adǎnúwatɔ́ lɛ́ɛ ɖě sɔ́ ná dó ya n'i lě e yě nɔ́ bló gbɔn n'i ɖ'ayǐ é ǎ. É sɔ́ ná cí hwenu e un zé hwɛɖɔtɔ́ lɛ́ɛ bɔ yě nɔ́ kpɔ́n jǐ tɔn ɔ́ ɖɔhun ǎ. Davídi, un ná bló bɔ kɛntɔ́ towe lɛ́ɛ bǐ ná jɛ ayǐ. Nyɛ Mawu Mavɔmavɔ ɖo ɖiɖɔ nú we wɛ ɖɔ nyɛ wɛ ná sɔ́ xwé towe jínjɔ́n ayǐ. Hwenu e kú ná wá kplá we, bɔ a nǎ yi mlɔ́ tɔ́gbó towe lɛ́ɛ kpá ɔ́, un ná sɔ́ vǐ e hwi ɖésúnɔ ji lɛ́ɛ ɖokpó axɔ́sú ɖó tɛn towe mɛ, bó ná bló bɔ acɛkpikpa tɔn ná syɛ́n ɖésú. É wɛ ná gbá xɔ nú mì, bɔ un ná sɔ́ axɔ́súɖuɖu tɔn jínjɔ́n ayǐ káká sɔ́yi. Un ná nyí tɔ́ n'i, bɔ é ná nyí vǐ nú mì. Un ná gɔn hun jɛ dó jǐ tɔn ǎ; é ná cí lě e un bló gbɔn xá mɛ e jɛ nukɔn nú we ɔ́ ɖɔhun ǎ. Un ná sɔ́ ɛ axɔ́sú ɖó xwé ce nu káká sɔ́yi; é ná nɔ axɔ́súɖuto ce nu káká sɔ́yi. Nǔɖé ná yí axɔ́súɖuɖu ɔ́ sín hwɛndo tɔn mɛ ǎ.’ ” Natáan wlí nǔ e Mawu ɖe xlɛ́ ɔ́ bǐ ɖɔ nú Davídi. Ée axɔ́sú Davídi se mɔ̌ ɔ́, é yi Mawu Mavɔmavɔ nukɔn, bó ɖɔ: “Mawu Mavɔmavɔ, Mawu ce, étɛ́ un ka nyí, nɛ̌ a ka mɔ xwédo ce gbɔn, bó zé mì wá ɖó tɛn e mɛ un ɖe din é? Mawu ce, nǔ énɛ́ ɔ́ nyí nǔɖé ɖo nukún towe mɛ ǎ. Din ɔ́ ɖíe a dǒ akpá ɖ'ayǐ nú xwédo ce, bɔ é ná nɔ ayǐ káká sɔ́yi e. Mawu Mavɔmavɔ, Mawu ce, a mɔ mì dó mɔ gbɛtɔ́ nukúnɖéjí ɖé ná. Étɛ́ nyɛ Davídi ka sixú lɛ́ ɖɔ nú we dó susu e a nǎ nyɛ mɛsɛntɔ́ towe ɔ́ wú? A tunwun nyɛ mɛsɛntɔ́ towe ganjí. Mawu Mavɔmavɔ, wǎn e a yǐ nú mì ɔ́ wú wɛ a blǒ nǔ ɖaxó ɖaxó énɛ́ lɛ́ɛ, bó ná ɖe susu ɖaxó e a ɖǒ ɔ́ xlɛ́. Mawu Mavɔmavɔ, è sixú jlɛ́ we dó nǔmɛsɛn ɖěbǔ wú ǎ. Xó e è ɖɔ bɔ mǐ se lɛ́ɛ bǐ ɖe xlɛ́ ɖɔ Mawu ɖěvo kún tíin zɛ hwɛ wú ó. Mɔ̌ ɖokpó ɔ́, togun ɖěbǔ ɖo ayǐkúngban jí, bó cí togun towe Izlayɛ́li ɖɔhun ǎ. É ɖokpónɔ wɛ a wǎ hwlɛ́n gán sín tagba e dó n'i wɛ Ejípunu lɛ́ɛ ɖe ɔ́ sí, bó sɔ́ ɛ dó bló togun towe. A blǒ nǔjíwǔ lɛ́ɛ, nǔdábaɖa lɛ́ɛ, bó dó nya akɔta lɛ́ɛ sín togun towe nukɔn, bó dó sɔ́ nyǐkɔ towe su. A blǒ bɔ togun towe Izlayɛ́li ná nyí togun towe káká sɔ́yi, bɔ hwɛ Mawu Mavɔmavɔ ɔ́, a hǔzú Mawu tɔn. Óo! Mawu Mavɔmavɔ, din ɔ́, blǒ bónú xó e a ɖɔ dó nyɛ mɛsɛntɔ́ towe wú, bó ɖɔ dó xwédo tɔn wú ɔ́, ní nɔ te káká sɔ́yi. Blǒ lě e a ɖɔ gbɔn é. Nǔ e a ɖɔ ɔ́ ní jɛ, bónú è nǎ nɔ kpa susu nú nyǐkɔ towe tɛgbɛ ɖɔ: ‘Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn wɛ.’ Nyɛ mɛsɛntɔ́ towe Davídi sín xwédo ɔ́ ní lí dǒ ɖo nukɔn towe. Đó hwi ɖésú Mawu ce ɔ́, a ɖe hwiɖée xlɛ́ nyɛ mɛsɛntɔ́ towe bó ɖɔ: un ná zé xwédo towe jínjɔ́n ayǐ. Xó énɛ́ ɔ́ wɛ ná akɔ́nkpinkpan nyɛ mɛsɛntɔ́ towe, bɔ un ɖo ɖɛ élɔ́ xo wɛ. Din ɔ́, Mawu Mavɔmavɔ, Mawu wɛ a nyǐ, bó ɖɔ nyɔ̌ná énɛ́ ɔ́ xó nú nyɛ mɛsɛntɔ́ towe. Mawu Mavɔmavɔ, é jló we bɔ a xo ɖɛ dó nyɛ mɛsɛntɔ́ towe sín xwédo ɔ́ jí din, bónú é ná sixú nɔ te nukɔn towe káká sɔ́yi. Đó Mawu Mavɔmavɔ, nǔ e jí a xo ɖɛ dó ɔ́ nɔ́ nɔ mɔ̌ káká sɔ́yi.” Énɛ́ ɔ́ gúdo ɔ́, Davídi ɖu ɖo Filisitɛ́ɛn lɛ́ɛ jí, bó dó winnyá yě, bó yí Gati toxo ɔ́ kpódó gletoxo e lɛ́ dó e lɛ́ɛ kpó sín yě sí. É lɛ́ ɖu ɖo Mɔwabunu lɛ́ɛ jí, bɔ yě húzú kannumɔ tɔn, bó nɔ hɛn nǔjɔ wá n'i. Hwenu e Hadadɛzɛ́ɛ, Silíi to e ɖo Sova, ɖo Hamáti wa jí ɔ́, sín axɔ́sú jló ná gbló ada nú acɛkpikpa tɔn káká wá Efláti tɔ ɔ́ kɔn ɔ́, Davídi hu i. Davídi wlí kɛkɛ́ví afatɔ́n (1.000), bó wlí sɔ́xátɔ́ děgba ɖě afɔwó-afatɔ́n (7.000), bó wlí sɔ́ja adɔ̌kpo (20.000). Amɔ̌, é jó sɔ́ e ná dɔn ahwankɛkɛ́ví kanwe ko (100) mɔ̌ lɛ́ɛ dó, bó ká sɛ́n dɔn nú sɔ́ e kpo lɛ́ɛ bǐ. Silíinu e ɖo Damási lɛ́ɛ wá, bó ná dó alɔ Sova xɔ́sú Hadadɛzɛ́ɛ; Davídi ɖu ɖo yě lɔ jí, bó hu Silíinu adɔ̌kpo ɖě afɔwó (22.000) ɖo yě mɛ. Davídi fɔ tokpɔngán ɖó yě nu gǎnnugǎnnu, bɔ Silíinu lɛ́ɛ húzú kannumɔ tɔn, bó nɔ́ ná nǔjɔ. Mawu Mavɔmavɔ nɔ bló bɔ Davídi fun ahwan gbɔn fí ɖěbǔ ɔ́, é nɔ́ ɖu ɖ'é jí. Davídi bɛ́ gǎglónú sikánɔ e Hadadɛzɛ́ɛ sín mɛsɛntɔ́ lɛ́ɛ nɔ́ zán lɛ́ɛ, bó bɛ́ wá yi Jeluzalɛ́mu. Davídi lɛ́ bɛ́ ganvɔ wɔ̌buwɔ́bú ɖé ɖo Hadadɛzɛ́ɛ sín toxo Tivuxáti kpó Kuni kpó mɛ. Salomɔ́ɔ zé ganvɔ ɔ́ dó bló basya ɖaxó ɖaxó lɛ́ɛ, dotín lɛ́ɛ kpó nǔ e è nɔ zán ɖo sinsɛnxɔ mɛ lɛ́ɛ kpó ná. Axɔ́sú Hamáti tɔn e è nɔ ylɔ́ ɖɔ Tɔwu ɔ́ se ɖɔ Davídi ɖu ɖo Hadadɛzɛ́ɛ sín ahwangɔnu ɔ́ bǐ jí. Ée é se mɔ̌ ɔ́, é sɛ́ vǐ tɔn Hadolámu dó axɔ́sú Davídi gɔ́n, bónú é ná yi dó gbe e, bó kpa gbe n'i ɖó ahwan e é fun xá Hadadɛzɛ́ɛ, bo ɖu ɖo jǐ tɔn ɔ́ wú. Đó Tɔwu lɔ ɖo ahwan fun xá Hadadɛzɛ́ɛ wɛ. Ée Hadolámu xweyǐgbe ɔ́, é hɛn nǔ e è sɔ́ siká dó bló lɛ́ɛ, nǔ e è sɔ́ kpatágan dó bló lɛ́ɛ kpódó nǔ e è sɔ́ ganvɔ dó bló lɛ́ɛ kpó wá nú Davídi. Énɛ́ ɔ́, axɔ́sú Davídi zé nǔ énɛ́ lɛ́ɛ bǐ ɖó vo nú Mawu Mavɔmavɔ, lě e é zé kpatágan kpó siká kpó e é yí ɖo Edɔ́munu lɛ́ɛ, Mɔwabunu lɛ́ɛ, Amumɔ́ɔ ví lɛ́ɛ, Filisitɛ́ɛn lɛ́ɛ kpódó Amalɛ́ki ví lɛ́ɛ kpó sí é ɖó vo nú Mawu Mavɔmavɔ gbɔn é. Avicáyi, Selúya ví ɔ́ tɔ́n ahwan Edɔ́munu lɛ́ɛ, bó hu mɛ děgba ɛnɛ afɔwó (18.000) ɖo yě mɛ, ɖo Jɛtɔdo ɔ́ mɛ. É fɔ tokpɔngán ɖó Edɔ́munu lɛ́ɛ nu gǎnnugǎnnu, bɔ Edɔ́munu lɛ́ɛ húzú kannumɔ Davídi tɔn. Mawu Mavɔmavɔ nɔ bló bɔ Davídi fun ahwan gbɔn fí ɖěbǔ ɔ́, é nɔ́ ɖu ɖ'é jí. Davídi ɖó acɛ dó Izlayɛ́li to ɔ́ bǐ jí. É ɖɔ hwɛ jlɔ́jlɔ́ nú mɛ bǐ ɖo togun tɔn bǐ mɛ. Azɔ̌watɔ́ Davídi tɔn lɛ́ɛ ɖíe: Jowabu, Selúya ví ɔ́. É wɛ nyí ahwangán. Yexosafáti, Axiludi ví ɔ́. É wɛ nyí ɖɛ̌mɛnu axɔ́sú ɔ́ tɔn. Sadɔ́ku Axitúvu ví ɔ́ kpódó Abimɛlɛ́ki, Abiyatáa ví ɔ́ kpó; vɔ̌sánú-xwlémawutɔ́ wɛ nú yě. Cawuca; é wɛ nyí wěgbójínɔtɔ́. Benayahu, Yexoyada ví ɔ́. É wɛ nyí gǎn ɖo Keleti lɛ́ɛ kpó Pɛlɛ́ti lɛ́ɛ kpó nu; yě wɛ nɔ́ cɔ́ axɔ́sú ɔ́ sín hɔnmɛ. Davídi ví lɛ́ɛ wɛ bɔ dó axɔ́sú ɔ́ wú. Azǎn ɖé jɛ ǎ bɔ Naxáci, axɔ́sú Amumɔ́ɔ ví lɛ́ɛ tɔn zán kú, bɔ vǐ tɔn jɛ do tɔn mɛ. Davídi nɔ ɖɔ dó ayi mɛ ɖɔ: “Un ná ɖe xomɛnyínyɔ́ ce xlɛ́ Hanúni, Naxáci ví ɔ́, ɖó tɔ́ tɔn nyɔ́ xomɛ dó wǔ ce.” Ée Davídi lin mɔ̌ ɔ́, é sɛ́ mɛ dó, nú yě ná yi dó tɔ́ tɔn e kú ɔ́ sín nǔwamɛgbe e. Ée mɛsɛntɔ́ Davídi tɔn lɛ́ɛ yi Amumɔ́ɔ ví lɛ́ɛ sín tomɛ, ɖo Hanúni gɔ́n, bó ná dó nǔwamɛgbe e ɔ́, gǎn hɔn-yitɔ́ Amumɔ́ɔ ví lɛ́ɛ tɔn yi ɖɔ nú Hanúni ɖɔ: “A lin ɖɔ tɔ́ towe ná zé su wú jɛ́n Davídi sɛ́ mɛsɛntɔ́ tɔn lɛ́ɛ dó ɖɔ yě ní wá dó nǔwamɛgbe we a? Yě ná wá kpɔ́n ayǐ, bó ná wá gba to wú wɛ é sɛ́ mɛsɛntɔ́ tɔn lɛ́ɛ dó gɔ̌n towe vlafo ǎ cé?” Ée Hanúni se mɔ̌ ɔ́, é wlí mɛsɛntɔ́ Davídi tɔn lɛ́ɛ. É ɖɔ bɔ è xwlɛ́ atán yětɔn, bó zɛ awu yětɔn sín nɛgbé káká wá gogó jí, lobo nya yě. È yi ɖɔ nú Davídi. Ée é se mɔ̌ ɔ́, é sɛ́ mɛ dó gbě yětɔn mɛ, bɔ è yi kpé yě; amɔ̌, winnyá hu mɛsɛntɔ́ lɛ́ɛ ɖésú, ɖó nǔ e è wa xá yě ɔ́ wútu. Axɔ́sú Davídi ɖɔ sɛ́ dó yě ɖɔ yě ní nɔ Jeliko káká nú atán yětɔn ní wú cóbónú yě ní wá xwé. Ée Amumɔ́ɔ ví lɛ́ɛ mɔ ɖɔ émí zé émíɖée dó xomɛ nú Davídi ɔ́, Hanúni kpó Amumɔ́ɔ ví lɛ́ɛ kpó sɛ́ kpatágan tɔ́nu gban dó, bo da kɛkɛ́ví kpó sɔ́xátɔ́ lɛ́ɛ kpó ɖo Silíinu e ɖo Mɛzopotamíi lɛ́ɛ sí, bó da ɖo Silíinu e ɖo Maaka lɛ́ɛ kpó ée ɖo Sova lɛ́ɛ kpó sí. Yě da kɛkɛ́ví adɔ̌kpo ɖě děgba atɔn (32.000), bó da axɔ́sú Maaka tɔn ɔ́ kpódó togun tɔn kpó, bɔ yě wǎ ɖó gɔnu ɖó Madaba nukɔn. Amumɔ́ɔ ví lɛ́ɛ lɔmɔ̌ tɔ́n sín toxo yětɔn lɛ́ɛ mɛ, bó sɛ yěɖée kplé, bó ɖidó ahwan fun gbé. Ée Davídi se nǔ e wa wɛ Amumɔ́ɔ ví lɛ́ɛ ɖe ɔ́, é sɛ́ ahwangán Jowabu kpó ahwanfuntɔ́ syɛ́nsyɛ́n lɛ́ɛ kpó dó ahwangbénu. Amumɔ́ɔ ví lɛ́ɛ sɔ́ ahwannú, bó wá to yěɖée ɖó Hlaba, tota yětɔn ɔ́ sín hɔntogbó kpá. Axɔ́sú e wá lɛ́ɛ so gbɛ̌ ɖo akpá ɖěvo xwé ɖo ahwangbé ɔ́ nu. Jowabu mɔ ɖɔ kɛntɔ́ ɖo gǔdo nukɔn. Ée nǔ ɖo mɔ̌ ɔ́, é cyán sɔ́ja Izlayɛ́li tɔn e syɛ́n hú ɖě lɛ́ɛ bǐ lɛ́ɛ, bɔ yě húzú kpan nukɔn sɔ́ja Silíinu lɛ́ɛ. É zé nɔví tɔn Avicáyi ɖó sɔ́ja tɔn e kpo lɛ́ɛ nu, bɔ yě húzú kpan nukɔn Amumɔ́ɔ ví lɛ́ɛ. Jowabu ɖɔ nú nɔví tɔn Avicáyi ɖɔ: “Nú Silíinu lɛ́ɛ ɖo gǎn hú mì wɛ ɔ́, a nǎ wá dó alɔ mì. Nú é ka nyí ɖɔ Amumɔ́ɔ ví lɛ́ɛ wɛ ɖo gǎn hú hwɛ wɛ ɔ́, nyɛ ná wá dó alɔ we. Kpan akɔ́n. Wǎ mǐ ván kan bó fun ahwan nú togun mǐtɔn kpó toxo Mawu Mavɔmavɔ, Mawu mǐtɔn tɔn lɛ́ɛ kpó; Mawu Mavɔmavɔ ní ka bló lě e é jló gbɔn é.” Jowabu kpó ahwanfuntɔ́ tɔn lɛ́ɛ kpó sí ahwan te dó Silíinu lɛ́ɛ jí, bɔ Silíinu lɛ́ɛ hɔn ɖo Jowabu nukɔn. Ée Amumɔ́ɔ ví lɛ́ɛ mɔ ɖɔ Silíinu lɛ́ɛ hɔn ɔ́, yě lɔmɔ̌ hɔn ɖo Avicáyi, Jowabu nɔví ɔ́ nukɔn, bó yi byɔ́ toxo ɔ́ mɛ. Énɛ́ ɔ́, Jowabu lɛ́ kɔ wá Jeluzalɛ́mu. Ée Silíinu lɛ́ɛ mɔ ɖɔ Izlayɛ́li sɔ́ja lɛ́ɛ ɖu ɖo émí jí ɔ́, yě sɛ́ mɛ dó Silíinu e ɖo Efláti tɔ ɔ́ gúdo dɔ̌n lɛ́ɛ gbé mɛ, bɔ Cofáki ahwangán Hadadɛzɛ́ɛ tɔn ɔ́ zɔn yě nu. È yi ɖɔ nú Davídi. Ée é se mɔ̌ ɔ́, é kplé ahwangɔnu Izlayɛ́li tɔn ɔ́ bǐ, bó dó asá Judɛ́ɛn tɔ ɔ́; é sɛ yi yě gɔ́n, bó tɔ́n ahwan yě. Davídi húzú kpan nukɔn Silíinu e ɖo ahwan fun xá ɛ wɛ lɛ́ɛ. Silíinu lɛ́ɛ hɔn ɖo Izlayɛ́li ví lɛ́ɛ nukɔn. Davídi hu ahwanfuntɔ́ yětɔn lɛ́ɛ, bó hu sɔ́ yětɔn e nɔ́ dɔn ahwankɛkɛ́ví lɛ́ɛ děgba ɖě afɔwó-afatɔ́n (7.000), bó hu sɔ́ja adɔ̌kpo we (40.000). É hu Cofáki ahwangán ɔ́ lɔmɔ̌. Ée axɔ́sú e ɖo Hadadɛzɛ́ɛ glɔ́ lɛ́ɛ bǐ mɔ ɖɔ Izlayɛ́li ví lɛ́ɛ ɖu ɖo émí jí ɔ́, yě gbɔ bó dó hwɛ gbo xá Davídi, bó nɔ acɛkpikpa tɔn mɛ. Énɛ́ ɔ́, Silíinu lɛ́ɛ sɔ́ jló ná dó alɔ Amumɔ́ɔ ví lɛ́ɛ ǎ. Xwe e jɛ fínɛ́ ɔ́ mɛ ɔ́, hwenu e axɔ́sú lɛ́ɛ nɔ yi fun ahwan dó ɔ́, Jowabu zɔn ahwangɔnu ɔ́ nu, bó yi vívá Amumɔ́ɔ ví lɛ́ɛ sín kún, lobo xá Hlaba toxo ɔ́. Davídi ɖésú ká cí Jeluzalɛ́mu. Jowabu ɖu ɖo Hlabanu lɛ́ɛ jí, bó gba toxo ɔ́ hánnyá. Davídi yí gbǎkún e ɖo ta nú Amumɔ́ɔ ví lɛ́ɛ sín vodún Milukɔ́mu é; sikágbákún wɛ, bó da kilóo gban mɔ̌, bɔ è zě awǐnnya xɔ akwɛ́ ɖé dó ɖó acɔ́ ná. È zě gbǎkún énɛ́ xwe nú Davídi, bɔ Davídi lɛ́ hɛn nǔ ɖagbe ɖagbe ɖěvo lɛ́ɛ sín ahwangbénu wá yi xwé. Davídi kplá mɛ e ɖo Hlaba toxo ɔ́ mɛ lɛ́ɛ sín toxo yětɔn mɛ, lobo zɔ́n azɔ̌ syɛ́nsyɛ́n lɛ́ɛ yě. Mɛ ɖě nɔ́ zɛ xwlɛ́, mɛ ɖě nɔ́ kpa awǐnnya, mɛ ɖě nɔ́ mu atín. Mɔ̌ jɛ́n é wa Amumɔ́ɔ ví lɛ́ɛ sín nǔ gbɔn, gbɔn toxo lɛ́ɛ bǐ mɛ. Énɛ́ ɔ́ gúdo ɔ́, Davídi lɛ́ kɔ é kpó ahwangɔnu tɔn bǐ kpó, bó wá Jeluzalɛ́mu. Ée é wá yá é ɔ́, Izlayɛ́li ví lɛ́ɛ tɔ́n ahwan Filisitɛ́ɛn lɛ́ɛ ɖo Gɛzɛ́ɛ. Ahwan énɛ́ ɔ́ mɛ wɛ Sibekayi Hucanu ɔ́ hu Sipayi Hlafa ví ɔ́ ɖe. Nǔ énɛ́ e jɛ ɔ́ zɔ́n bɔ Filisitɛ́ɛn lɛ́ɛ ɖu winnyá. Izlayɛ́li ví lɛ́ɛ lɛ́ tɔ́n ahwan ɖěvo Filisitɛ́ɛn lɛ́ɛ. Ɛluhanani Yayíi ví ɔ́ hu Laximi Goliyati nɔví Gatinu ɔ́. Nya énɛ́ ɔ́ ɖó hwǎn ɖokpó bɔ kpo tɔn kló sɔ avɔlɔnkpɔntín. Izlayɛ́li ví lɛ́ɛ lɛ́ tɔ́n ahwan ɖěvo yě ɖo Gati. Nya gaga ɖokpó ɖo to énɛ́ mɛ; alɔví ayizɛ́n wɛ ɖo alɔ tɔn ɖokpó ɖokpó nu, bɔ afɔví ayizɛ́n ɖo afɔ tɔn ɖokpó ɖokpó nu, bɔ bǐ bló ko-nukún-ɛnɛ. Nya énɛ́ ɔ́ lɔ ɔ́, Halafa ví wɛ. É nyi gbehwán sɛ́ dó Izlayɛ́li ví lɛ́ɛ, bɔ Davídi nɔví Cimɛ́ya sín vǐ Yexonatáni ɔ́ hu i. Sɔ́ja énɛ́ lɛ́ɛ ɔ́, Filisitɛ́ɛn wɛ yě bǐ nyǐ, bó nyí Halafa ví, bó ɖo Gati. Davídi kpó sɔ́ja tɔn lɛ́ɛ kpó ka hu yě bǐ. Satáan sí te dó Izlayɛ́li ví lɛ́ɛ jí gbe ɖokpó, bó ɖɔ dó ayi mɛ nú Davídi ɖɔ é ní sɔ́ togun Izlayɛ́li tɔn ɔ́ sín kɛ́n. Bɔ Davídi ɖɔ nú Jowabu kpó ahwangɔnu ɔ́ sín gǎn ɖě lɛ́ɛ kpó ɖɔ: “Mi yi sɔ́ togun Izlayɛ́li tɔn ɔ́ sín kɛ́n, bɛ́ sín Bɛ̌-Ceva ɖo tofɔligbé káká yi Dan ɖo totaligbé. Énɛ́ ɔ́ gúdo ɔ́, mi ná ɖó gbe nú mì, bónú má tunwun mɛ nabí e ɖo to ɔ́ mɛ é.” Jowabu ka ɖɔ n'i ɖɔ: “Mawu Mavɔmavɔ ní bló bónú togun ɔ́ mɔ̌hunkɔtɔn donu kanwe ko (100) ní ji d'é jí. Égbé din ɔ́, yě bǐ wɛ ɖo azɔ̌ wa nú we wɛ. Étɛ́wú a ka ba ná sɔ́ kɛ́n yětɔn kpɔ́n, bó ná dɔn Izlayɛ́li to ɔ́ dó hwɛ mɛ?” É ɖo mɔ̌ có, xó e axɔ́sú ɔ́ ɖɔ ɔ́, é ɖɔ wɛ; Jowabu sixú gbɛ́ ǎ; énɛ́ ɔ́, Jowabu gbɔ bo tɔ́n, bó sɔ́ mɛ lɛ́ɛ bǐ sín kɛ́n gbɔn Izlayɛ́li to ɔ́ bǐ mɛ. Énɛ́ ɔ́ gúdo ɔ́, é lɛ́ kɔ wá Jeluzalɛ́mu. Ée Jowabu lɛ́ kɔ wá Jeluzalɛ́mu ɔ́, é ɖó kɛ́n e é sɔ́ ɔ́ sín gbe nú Davídi. É mɔ gbɛtɔ́ e sixú yi fun ahwan lɛ́ɛ lǐvi ɖě adɔ̌kpo atɔ́ɔ́n (1.100.000) ɖo Izlayɛ́li, bó mɔ gbɛtɔ́ adɔ̌kpo ko-nukún-atɔn děgba we afɔwó (470.000) ɖo Judáa. Jowabu ka sɔ́ akɔta Levíi tɔn ɔ́ kpó Bɛnjamɛ́ɛ tɔn ɔ́ kpó sín kɛ́n ǎ, ɖó azɔ̌ énɛ́ ɔ́ e axɔ́sú ɔ́ zɔ́n ɔ́ vɛ́ wǔ tɔn tawun. Kɛ́n énɛ́ e Davídi ɖɔ bɔ è sɔ́ ɔ́ nyɔ́ Mawu nukún mɛ ǎ, bɔ é dɔn tó nú Izlayɛ́li togun ɔ́. Énɛ́ ɔ́, Davídi ɖɔ nú Mawu ɖɔ: “Nǔ énɛ́ ɔ́ e un wa é ɔ́, hwɛ ɖaxó ɖokpó wɛ un hu dó we. Din ɔ́, kɛnklɛ́n zé hwɛ kɛ nyɛ mɛsɛntɔ́ towe, ɖó taɖunɔnú ɖésú wɛ un wa.” Mawu Mavɔmavɔ ɖɔ xó nú Gadi gbeyíɖɔ tɔn, nǔmɔtɔ́ Davídi tɔn ɔ́. Mawu Mavɔmavɔ ɖɔ n'i ɖɔ é ní yi ɖɔ nú Davídi ɖɔ: “Un sɔ́ awě atɔn ɖó te nú we. A nǎ zě ɖokpó bɔ un ná sɛ́ dó we.” Ée Mawu Mavɔmavɔ ɖɔ mɔ̌ nú Gadi ɔ́, é yi Davídi gɔ́n, bó ɖɔ n'i ɖɔ: “Đǒtó xó e Mawu Mavɔmavɔ ɖɔ é. É ɖɔ: ‘A nǎ sɔ́ nǔ ɖokpó ɖo nǔ élɔ́ lɛ́ɛ mɛ: A jlǒ ɖɔ adɔ ní tɔ́n xɔ xwe atɔn a? Abǐ a jlǒ ɖɔ kɛntɔ́ towe lɛ́ɛ ní tɔ́n ahwan we bo ɖo mɛ hu wɛ káká nú sun atɔn a? Abǐ a jlǒ ɖɔ Mawu Mavɔmavɔ ní sɛ́ wɛnsagun tɔn e nɔ vívá kún nú mɛ ɔ́ dó, nú é ní fúnfún jɛmɛjí gbɔn Izlayɛ́li to ɔ́ bǐ mɛ, bónú gbɛtɔ́ ní ɖo kúkú wɛ káká nú azǎn atɔn a? Din ɔ́, lin tamɛ kpɔ́n ganjí, bó ɖɔ nǔ e un ná yi ɖɔ nú mɛ e sɛ́ mì dó ɔ́ nú mì.’ ” Davídi ka ɖɔ nú Gadi ɖɔ: “Ado ɖaxó ɖé ɖo huhu mì wɛ. Amɔ̌, un mɔ ɖɔ un jɛ Mawu Mavɔmavɔ lɔ mɛ ɔ́, é nyɔ́ hú un jɛ gbɛtɔ́ lɔ mɛ, ɖó Mawu Mavɔmavɔ nɔ kú nǔbláwǔ nú mɛ ɖésú.” Énɛ́ ɔ́, Mawu Mavɔmavɔ sɛ́ jɛmɛjí dó Izlayɛ́li, bɔ gbɛtɔ́ adɔ̌kpo atɔn děgba we afɔwó (70.000) kú. Mawu Mavɔmavɔ sɛ́ wɛnsagun ɖokpó dó Jeluzalɛ́mu, bónú é ná vívá mɛ lɛ́ɛ sín kún. Ée é ɖo toxo ɔ́ sín kún vívá wɛ ɔ́, Mawu Mavɔmavɔ mɔ nǔ e ɖo yě gbo wɛ ɔ́, bɔ é blá wǔ n'i, bɔ é ɖɔ nú wɛnsagun ɔ́ ɖɔ: “É nyɔ́ mɔ̌. Đǒ alɔ te.” Hwenɛ́nu ɔ́, wɛnsagun Mawu Mavɔmavɔ tɔn ɔ́ ko ɖo te ɖo fí e Ɔnáni Jebuzinu ɔ́ nɔ́ fún jinukún ɖe ɔ́ kpá. Davídi zé ta bo mɔ wɛnsagun Mawu Mavɔmavɔ tɔn ɔ́ ɖo te ɖo ayǐkúngban kpó jǐnukúnsin kpó tɛ́ntin, bó ko sún hwǐ tɔn hɛn alɔ mɛ bó dlɛ́n dó Jeluzalɛ́mu. Énɛ́ ɔ́, Davídi kpó tomɛxó lɛ́ɛ kpó bɛ́ ati kplá, bó xwe agbɔ̌nnusú do. Bɔ Davídi ɖɔ nú Mawu Mavɔmavɔ ɖɔ: “Nyɛ wɛ zɔ́n ɖɔ è nǐ sɔ́ togun ɔ́ sín kɛ́n. Nyɛ wɛ hu hwɛ, nyɛ wɛ wa nǔ nyi do. Mɛ énɛ́ lɛ́ɛ ɔ́, xomɛvɔ́nɔ wɛ nú yě. Mawu Mavɔmavɔ, Mawu ce, nyɛ kpó xwédo ce kpó wɛ a nǎ dɔn tó ná. Ma wa nǔ nyanya ɖé nú togun towe ó.” Wɛnsagun Mawu Mavɔmavɔ tɔn ɔ́ ɖɔ nú Gadi ɖɔ é ní yi ɖɔ nú Davídi ɖɔ é ní mɛ vɔ̌sákpe ɖokpó nú émí, ɖó fí e Ɔnáni Jebuzinu ɔ́ nɔ́ fún jinukún ɖe é. Bɔ Davídi yi fí e Ɔnáni Jebuzinu ɔ́ nɔ́ fún jinukún ɖe é, lě e Gadi ɖɔ n'i gbɔn ɖo Mawu Mavɔmavɔ nyíkɔ mɛ é. Ɔnáni ɖo jinukún tɔn fún wɛ, bó lílɛ́ bó mɔ wɛnsagun Mawu tɔn ɔ́; ée é mɔ mɔ̌ ɔ́, é kpó vǐ tɔn ɛnɛ lɛ́ɛ kpó hɔn hwlá. Ée Davídi sɛkpɔ́ Ɔnáni ɔ́, Ɔnáni zé ta bo mɔ ɛ sɛ́ dó. Ée Ɔnáni mɔ Davídi sɛ́ dó ɔ́, é gosín fí e é nɔ fún jinukún ɖe ɔ́, bó wá ɖe kɔ́ nú Davídi. Bɔ Davídi ɖɔ n'i ɖɔ: “Sa fí e a nɔ fún jinukún ɖe ɔ́ nú mì, nú má mɛ vɔ̌sákpe ɖokpó nyi fínɛ́ nú Mawu Mavɔmavɔ, bónú awě e ɖo togun ɔ́ xo wɛ ɔ́ ná nɔ te. Sa fínɛ́ nú mì bónú má sú axɔ́ tɔn we.” Ɔnáni ka ɖɔ nú Davídi ɖɔ: “Un ná we. Sɛ́mɛɖó, è sɔ́ dó wa nǔ e jló mɛ ɔ́ ná. Nyibú ɖíe; un ná bɔ è nǎ zé yě dó sá vɔ̌ e è nɔ dó zo ɔ́ ná, un ná kɛkɛ́ví lɛ́ɛ, bɔ yě ná nyí nakí, un ná jinukún bɔ è nǎ zě dó sá nǔníná vɔ́. Un ná nǔ énɛ́ lɛ́ɛ bǐ mɛ.” Lo ɔ́, axɔ́sú Davídi ɖɔ nú Ɔnáni ɖɔ: “Éeǒ! Un jló ná xɔ ɖo así towe, bó ná sú axɔ́ wɛ, ɖó un ɖo nǔ e nyí towe ɔ́ ná sɔ́ xwlé Mawu Mavɔmavɔ wɛ ǎ. Un jló ná sɔ́ nǔ e mɛ un ma dó nǔ ɖěbǔ ǎ é dó sá vɔ̌ nú Mawu Mavɔmavɔ ǎ.” Ée Davídi ɖɔ mɔ̌ é ɔ́, é zé sikágan nǔwɔntɔn (600) bó dó xɔ fí ɔ́ ná ɖo Ɔnáni sí, bó mɛ vɔ̌sákpe ɖokpó ɖó fínɛ́ nú Mawu Mavɔmavɔ, bó sá vɔ̌ e è nɔ dó zo lɛ́ɛ kpó kɔnɖókpɔ́ vɔ́ lɛ́ɛ kpó nú Mawu Mavɔmavɔ. É ylɔ́ Mawu Mavɔmavɔ bɔ Mavɔmavɔ sɛ́ myɔ dó bɔ myɔ jɛ te sín jǐxwé dó vɔ̌sákpe ɔ́ jí, bó dó yí gbe n'i. Énɛ́ ɔ́, Mawu Mavɔmavɔ ɖɔ nú wɛnsagun ɔ́ ɖɔ é ní sɔ́ hwǐ tɔn dó akún mɛ. Hwenɛ́nu ɔ́, Davídi mɔ ɖɔ Mawu Mavɔmavɔ se ɖɛ émítɔn ɖo fí e Ɔnáni Jebuzinu ɔ́ nɔ́ fún jinukún ɖe é, bó nɔ́ sá vɔ̌ n'i ɖo fínɛ́. Nǔ ɖo mɔ̌ có, goxɔ Mawu Mavɔmavɔ tɔn e Mɔyízi dó ɖó gbětótló mɛ ɔ́ kpódó vɔ̌sákpe e jí è nɔ dó vɔ̌ zo ɖe ɔ́ kpó ɖo tɛn mímɛ́ mɛ ɖo Gabawɔ́ɔn hwenɛ́nu. Davídi ka sixú yi vɔ̌sákpe énɛ́ ɔ́ kɔn, bó yi kan nǔ byɔ́ Mawu ǎ, ɖó hwǐ e wɛnsagun Mawu Mavɔmavɔ tɔn hɛn ɔ́ dó xɛsi n'i ɖésú. Ée nǔ énɛ́ lɛ́ɛ bǐ jɛ ɔ́, Davídi ɖɔ: “Mawu Mavɔmavɔ sín xwé ɔ́ ná nɔ fí, bɔ vɔ̌sákpe e jí Izlayɛ́li ví lɛ́ɛ ná nɔ sá vɔ̌ e è nɔ dó zo ɔ́ ɖe ɔ́ ná nɔ fí.” Davídi ɖɔ bɔ è ylɔ̌ jǒnɔ e ɖo Izlayɛ́li lɛ́ɛ kplé, bɔ é ɖɔ nú yě ɖɔ yě ɖó ná kpa awǐnnya nú è nǎ dó sá xwé Mawu tɔn ná. Davídi kplé gan kpɔ́ gěgé bɔ è nǎ dó tun hǔnjɛ́n e è nǎ xwe dó hɔn lɛ́ɛ mɛ lɛ́ɛ kpódó ée è nǎ dǒ tun klɔcée lɛ́ɛ ná lɛ́ɛ kpó. É lɛ́ kplé ganvɔ kpɔ́ gěgé bɔ è sixú da ǎ. É kplé sɛ́dlutín e Sidɔ́ɔnnu lɛ́ɛ kpó Tíinu lɛ́ɛ kpó hɛn wá n'i ɔ́, bɔ é sukpɔ́ ɖésú. Davídi bló nǔ énɛ́ lɛ́ɛ bǐ, ɖó é ɖo ɖiɖɔ dó ayi mɛ wɛ ɖɔ: “Vǐ ce Salomɔ́ɔ kpo ɖo vǔ, é ɖó nǔnywɛ́ ɖé ǎ. Xwé e é ná sá ɔ́ ɖó ná d'agba bo ná nyɔ́ ɖɛkpɛ, bɔ è nǎ mɔ mɔ̌hunkɔtɔn ɖo to ɖěbǔ mɛ ǎ. Nǔ e wú un jló ná sɔ́ nǔ tɔn ɖ'ayǐ ganjí ɔ́ nɛ́.” Énɛ́ wɛ zɔ́n bɔ Davídi sɛ nǔ lɛ́ɛ gěgé xwe ɖ'ayǐ có bó kú. Davídi ylɔ́ vǐ tɔn Salomɔ́ɔ, bó ɖɔ n'i ɖɔ é ní sá xwé ɖokpó nú Mawu Mavɔmavɔ, Mawu Izlayɛ́li tɔn ɔ́. É ɖɔ n'i ɖɔ: “Vǐ ce, nyɛ ɖésú ko lin ɖɔ un ná sá xwé ɖokpó nú Mawu Mavɔmavɔ, Mawu ce. Lo ɔ́, Mawu Mavɔmavɔ ɖɔ nú mì ɖɔ: ‘A fun ahwan ɖaxó ɖaxó lɛ́ɛ ɖo nukún ce mɛ, bó hu mɛ dín. A nǎ sá xwé nú mì ǎ, ɖó a kɔn gbɛtɔ́ sín hun kɔn nyi ayǐ dín. Đǒtó! A nǎ ji vǐ súnnu ɖokpó, bɔ é ná nyí gbɛtɔ́ fífá; un ná lɔn bɔ kɛntɔ́ e lɛ́ dó e lɛ́ɛ ná dó tagba n'i ǎ. Salomɔ́ɔ wɛ nyǐkɔ tɔn ná nyí; tínmɛ tɔn wɛ nyí Gbɛtɔ́ fífá. Un ná bló bɔ fífá kpó ayij'ayǐ kpó ná tíin nú Izlayɛ́li ɖo gbɛ hwenu tɔn. É wɛ ná sá xwé nú mì. É ná nyí vǐ nú mì, bɔ un ná nyí tɔ́ n'i. Un ná sɔ́ axɔ́súɖuɖu tɔn jínjɔ́n ayǐ ɖo Izlayɛ́li káká sɔ́yi’. Davídi lɛ́ ɖɔ: din ɔ́, vǐ ce, Mawu Mavɔmavɔ ní nɔ kpɔ́ xá we, nǔ ní nyɔ́ nú we, bónú a nǎ sá xwé nú Mawu Mavɔmavɔ, Mawu towe, lě e é ɖɔ gbɔn ɖɔ hwi wɛ ná bló é. Hwenu e Mawu Mavɔmavɔ ná sɔ́ we ɖó Izlayɛ́li to ɔ́ nu ɔ́, é ní ná we nǔnywɛ́ kpó nukúnnú mɔ jɛ nǔ mɛ kpó, bónú a nǎ nɔ́ nyi sɛ́n tɔn. Nú a nɔ xwedó Mawu Mavɔmavɔ sín sɛ́n lɛ́ɛ, kpó gbeta e é ɖe tɔ́n gbɔn Mɔyízi jí nú Izlayɛ́li ví lɛ́ɛ kpó ɔ́, nǔ ná nyɔ́ nú we. Syɛ́nlǐn, bo kpan akɔ́n; ma ɖi xɛsi ó, ado ma ka hu we ó. Kpɔ́n! Nǔ e un dó gǎn bó kplé ɖ'ayǐ nú Mawu Mavɔmavɔ sín xwé ɔ́ lɛ́ɛ ɖíe: Siká hú tɔ́nu afɔwó-afatɔ́n (3.000), kpatágan hú tɔ́nu adɔ̌kpo ɖě děgba we afɔwó (30.000). Gan kpó ganvɔ kpó ɔ́, è sixú xa yě ǎ, ɖó yě sukpɔ́ dín. Un lɛ́ kplé atín kpó awǐnnya kpó ɖ'ayǐ, bɔ a nǎ lɛ́ ba gɔ́ ná. Azɔ̌watɔ́ lɛ́ɛ ɖo fínɛ́ nú we kpɔ́: mɛ e nɔ wa awǐnnyazɔ́ lɛ́ɛ kpó mɛ e nɔ wa atínzɔ́ lɛ́ɛ kpó, abǐ mɛ e nɔ wa alɔlyɛ́n ganjí lɛ́ɛ. Siká, kpatágan, ganvɔ kpódó gan kpó ɖo kpɔ́. Hǔn, bo jɛ azɔ̌ jí, Mawu Mavɔmavɔ ná nɔ kpɔ́ xá we.” Ée Davídi ɖɔ mɔ̌ ɔ́, é ɖɔ nú gǎn e ɖo Izlayɛ́li lɛ́ɛ bǐ ɖɔ yě ní wá gɔ́ alɔ nú vǐ émítɔn Salomɔ́ɔ. É ɖɔ nú yě ɖɔ: “Mi ma tunwun ɖɔ Mawu Mavɔmavɔ, Mawu mitɔn ɖo kpɔ́ xá mi a? É ná vivo mi gbɔn ɖisí amyɔ, ɖó é jó mɛ e ɖo to ɔ́ mɛ lɛ́ɛ nú mì, bɔ to ɔ́ jɛ Mawu Mavɔmavɔ kpó togun tɔn kpó sín alɔ mɛ. Hǔn din ɔ́, mi bo dó gǎn bó zé ayi mitɔn kpó lǐndɔ̌n mitɔn kpó dó ba Mawu Mavɔmavɔ, Mawu mitɔn. Mi jɛ azɔ̌ jí, bó ná sá xwé nú Mawu Mavɔmavɔ, bó ná zé akɔjijɛgbá tɔn ɔ́ kpó nǔ e è sɔ́ ɖó vo nú Mawu Mavɔmavɔ lɛ́ɛ kpó wá ɖó xwé e mi ná sá n'i ɔ́ gbe.” Ée Davídi wá kpo nyɔ̌xó bǐ ɔ́, é sɔ́ vǐ tɔn Salomɔ́ɔ axɔ́sú ɖó Izlayɛ́li togun ɔ́ nu. É ylɔ́ gǎn e ɖo Izlayɛ́li lɛ́ɛ bǐ kpó vɔ̌sánú-xwlémawutɔ́ lɛ́ɛ kpó, kpódó Levíi ví lɛ́ɛ kpó kplé. È xa Levíi ví e xwe yětɔn bɛ́ sín gban (30) káká sɔ́yi lɛ́ɛ. Súnnu lɛ́ɛ wɛ è xa, bɔ yě bló gbɛtɔ́ adɔ̌kpo ɖě děgba ɛnɛ afɔwó (38.000). Ée è xa yě mɔ̌ ɔ́, Davídi kpɔ́n yě mɛ, bó ɖe gbɛtɔ́ adɔ̌kpo ɖě děgba (24.000), bɔ yě ná nɔ Mawu Mavɔmavɔ xwé ɔ́ sín azɔ̌ lɛ́ɛ nu. Bó ɖe gbɛtɔ́ děgba ɖě afɔwó (6.000), bɔ yě ná nyí nǔjíkpɔ́ntɔ́, bó ná nyí hwɛɖɔtɔ́. É ɖe gbɛtɔ́ děgba (4.000), bɔ yě ná nyí hɔnjínɔtɔ́, bó lɛ́ ɖe gbɛtɔ́ děgba (4.000), bɔ yě ná nɔ́ ɖo Mawu Mavɔmavɔ kpa wɛ kpó nǔxonú e Davídi zɔ́n bɔ è blǒ bó ná nɔ́ dó kpa ɛ ná lɛ́ɛ kpó. Ée Davídi bló mɔ̌ ɔ́, é má Levíi ví lɛ́ɛ dó xwédo yětɔn yětɔn mɛ: xwédo Gɛɛcɔ́ni tɔn, Kexáti tɔn kpó Mɛlali tɔn kpó. Gɛɛcɔ́ni ví lɛ́ɛ ɖíe: Laedáni kpó Cimɛ́yi kpó. Laedáni ɖó vǐ súnnu atɔn. Yě wɛ nyí Yexiyɛ́li, Zetámu, kpó Yoɛ́li kpó; Yexiyɛ́li wɛ ɖo yě nu. Cimɛ́yi ɖó vǐ súnnu atɔn. Yě wɛ nyí Celomíti, Haziyɛ́li kpó Halani kpó. Yědɛɛ lɛ́ɛ wɛ nyí hɛ̌nnugán e ɖo xwédo Laedáni tɔn mɛ lɛ́ɛ. Cimɛ́yi lɛ́ ɖó vǐ súnnu ɛnɛ. Yě wɛ nyí Yaxáti, Ziza, Yewúci kpó Beliya kpó. Yaxáti ɔ́ wɛ ɖo yě nu, bɔ Ziza bɔ dó wǔ tɔn. Yewúci kpó Beliya kpó ji vǐ gěgé ǎ, bɔ è dɔn yě ɖó kpɔ́ bɔ yě nyí hɛ̌nnu ɖokpó géé. Kexáti ɖó vǐ súnnu ɛnɛ. Yě wɛ nyí Amulámu, Yisexáa, Eblɔ́n kpódó Wuziyɛ́li kpó. Amulámu ví súnnu lɛ́ɛ ɖíe: Aalɔ́ɔn kpó Mɔyízi kpó. È ɖe Aalɔ́ɔn ɖó vo, bɔ é ná nɔ́ wa azɔ̌ ɖo Tɛn mímɛ́ bǐ ɔ́ mɛ, é kpó vǐ tɔn súnnu lɛ́ɛ kpó káká sɔ́yi. Yě wɛ ná nɔ́ dó zǎlínkpɔ́n zo nú Mawu Mavɔmavɔ, bó ná nɔ́ wa azɔ̌ nú Mawu Mavɔmavɔ, lobo ná nɔ́ xo ɖɛ dó mɛ jí ɖo Mawu Mavɔmavɔ nyǐkɔ mɛ. Mɔyízi ɔ́, ɖɛ̌mɛnu Mawu tɔn wɛ, có vǐ tɔn lɛ́ɛ ɔ́, gbɛtɔ́ kpaa ɖɔhun wɛ yě cí ɖo akɔta Levíi tɔn ɔ́ mɛ. Mɔyízi ví lɛ́ɛ ɖíe: Gɛɛcɔ́mu kpó Eliezɛ́ɛ kpó. Gɛɛcɔ́mu ví ɔ́ nɔ́ nyí Cevuyɛ́li. Gǎn wɛ é nyí. Eliezɛ́ɛ ɖó vǐ súnnu ɖokpó, bɔ é nɔ́ nyí Hlexavíya. Gǎn wɛ é nyí. Eliezɛ́ɛ sɔ́ ɖó vǐ ɖě ǎ, lo ɔ́, Hlexavíya ví lɛ́ɛ sukpɔ́ ɖésú. Yisexáa ɖó vǐ súnnu ɖokpó, bɔ é nɔ́ nyí Celomɔti; gǎn wɛ é nyí. Eblɔ́n ví lɛ́ɛ ɖíe: Yeliyahu wɛ jɛ nukɔn, bɔ Amaliya nyí wegɔ́ ɔ́, Yaxaziɛ́li nyí atɔngɔ́ ɔ́, bɔ Yekamɛyamu nyí ɛnɛgɔ́ ɔ́. Wuziyɛ́li ví lɛ́ɛ ɖíe: Mika wɛ jɛ nukɔn, bɔ Yiciya nyí wegɔ́ ɔ́. Mɛlali ví lɛ́ɛ ɖíe: Maxli kpó Muci kpó. Maxli ví lɛ́ɛ ɖíe: Eleazáa kpó Kícu kpó. Eleazáa ji vǐ súnnu ɖě cóbó kú ǎ. Amɔ̌, é ɖó vǐ nyɔ̌nu, bɔ nɔví tɔn Kícu sín vǐ lɛ́ɛ da yě. Muci ɖó vǐ súnnu atɔn: Maxli, Edɛ́ɛ kpó Yelemɔ́ti kpó. Levíi ví e nyí hɛ̌nnugán bɔ è sɔ́ yě mɛ ɖokpó ɖokpó sín kɛ́n lɛ́ɛ nɛ́. Yědɛɛ lɛ́ɛ wɛ è ɖe, bɔ mɛ e ɖó bɛ́ sín xwe ko káká sɔ́yi lɛ́ɛ nɔ́ wa azɔ̌ ɖo Mawu Mavɔmavɔ xwé ɔ́ gbe. Nǔgbó ɔ́, Davídi ko ɖɔ: “Mawu Mavɔmavɔ, Mawu Izlayɛ́li tɔn ɔ́ kó ná ayij'ayǐ togun tɔn, bɔ é ɖésúnɔ ɔ́ ɖo Jeluzalɛ́mu káká sɔ́yi. Bɔ Levíi ví lɛ́ɛ sɔ́ ná nɔ́ ɖíɖá goxɔ Mawu Mavɔmavɔ tɔn ɔ́ ɖě ǎ; yě ká sɔ́ ná nɔ́ ɖíɖá nǔ e è nɔ zán ɖo goxɔ ɔ́ mɛ lɛ́ɛ ɖě ǎ.” Énɛ́ ɔ́, è sɔ́ Levíi ví e xwe yětɔn bɛ́ sín ko káká sɔ́yi lɛ́ɛ sín kɛ́n, lě e gbeta gǔdo gúdo tɔn e Davídi ɖe tɔ́n ɔ́ ɖɔ gbɔn é. È zě Levíi ví lɛ́ɛ ɖó Aalɔ́ɔn ví lɛ́ɛ sín acɛ mɛ, bɔ yě ná nɔ́ wa azɔ̌ ɖo Mawu Mavɔmavɔ xwé gbe, bó ná nɔ wa azɔ̌ ɖo kɔ́xota lɛ́ɛ, bó ná nɔ wa azɔ̌ ɖo xɔ e bɔ dó Mawu Mavɔmavɔ sín xɔ ɔ́ wú lɛ́ɛ mɛ. Yě ná nɔ́ slá wǔ nú nǔ e è nɔ zán ɖo Mawu Mavɔmavɔ xwé gbe lɛ́ɛ bǐ bó ná nɔ́ wa azɔ̌ ɖěvo ɖěvo lɛ́ɛ ɖo xwé ɔ́ gbe. Yě ná nɔ́ ɖa wɔ̌xúxú e è nǎ nɔ xwlé Mawu Mavɔmavɔ é; linfín e è nǎ nɔ́ sá jinukún vɔ́ ná ɔ́, yě wɛ ná nɔ́ wa azɔ̌ tɔn: yě ná nɔ́ ɖa acɔnmɔ tɔ́n ma ɖ'é mɛ; yě ná nɔ́ ɖa atá ɖo ganzɛ́n wɛnjɛ mɛ, bó ná nɔ́ ɖa atá ɖěvo ɖěvo lɛ́ɛ. Yě ná nɔ́ kpɔ́n ɖɔ nǔjlɛ́ká lɛ́ɛ kpó nǔjlɛ́kpo lɛ́ɛ kpó bǐ sɔgbe a jí. Yě ɖó ná nɔ́ ɖo Mawu Mavɔmavɔ xwé gbe zǎnzǎn gbada, bó ná nɔ́ mlá Mawu Mavɔmavɔ, lobo ná nɔ́ kpa susu n'i. Yě ná nɔ́ sá vɔ̌ e è nɔ dó zo lɛ́ɛ nú Mawu Mavɔmavɔ hwebǐnu ɖo gbɔjɛzán lɛ́ɛ gbe, bó ná nɔ́ sá gbe e gbe sun wá jǐ é, bó ná nɔ́ sá xwezán ɖě lɛ́ɛ bǐ gbe. Yě ná nɔ́ wa azɔ̌ yětɔn ɖo Mawu Mavɔmavɔ xwé gbe hwebǐnu; yě ná nɔ́ bló azɔn nabí e sɛ́n ɔ́ ɖɔ é. Yě ná nɔ́ kpé nukún dó goxɔ Mawu Mavɔmavɔ tɔn ɔ́ kpó tɛn mímɛ́ bǐ ɔ́ kpó wú, bó ná nɔ dó alɔ nɔví yětɔn Aalɔ́ɔn ví lɛ́ɛ ɖo azɔ̌ e yě nɔ́ wa ɖo Mawu Mavɔmavɔ xwé gbe lɛ́ɛ kɔn. Aalɔ́ɔn ví lɛ́ɛ ɔ́, è to yě ɖó sonu sonu. Aalɔ́ɔn ɖó vǐ ɛnɛ; yě wɛ nyí Nadavu, Avihu, Eleazáa kpó Itamáa kpó. Nadavu kpó Avihu kpó kú jɛ nukɔn nú tɔ́ yětɔn. Yě ká ɖó vǐ ɖě ǎ. Bɔ Eleazáa kpó Itamáa kpó kɛ́ɖɛ́ nɔ́ wa vɔ̌sánú-xwlémawutɔ́ sín azɔ̌ ɔ́. Ée é lín xóó ɔ́, Davídi má vɔ̌sánú-xwlémawutɔ́ lɛ́ɛ ɖó sonu sonu, lě e azɔ̌ e wa gbé yě ja ɔ́ byɔ́ gbɔn é; Sadɔ́ku Eleazáa ví ɔ́ kpó Aximɛlɛ́ki Itamáa ví ɔ́ kpó dó alɔ Davídi bɔ é má yě. È wǎ mɔ ɖɔ Eleazáa ví lɛ́ɛ sukpɔ́ hú Itamáa ví lɛ́ɛ. Énɛ́ ɔ́ wú wɛ è mǎ Eleazáa ví lɛ́ɛ ɖó xwédo afɔtɔn-nukún-ɖokpó, bó má Itamáa ví lɛ́ɛ ɖó xwédo tántɔn, bɔ xwédo ɖokpó ɖokpó ɖó gǎn tɔn. Akɔ wɛ è nyi bo dó má yě, ɖó gǎn e ɖo Mawu Mavɔmavɔ xwé ɔ́ sín azɔ̌ ɔ́ nu, bɔ è nɔ lɛ́ ylɔ́ yě ɖɔ “azɔ̌gán Mawu tɔn” lɛ́ɛ kó ɖo Eleazáa kpó Itamáa kpó ví lɛ́ɛ mɛ. Wěgbójínɔtɔ́ Cemaya Nɛtanɛli e jɔ ɖo akɔta Levíi tɔn ɔ́ mɛ sín vǐ ɔ́, wlán nyǐkɔ yětɔn dó wěma mɛ; axɔ́sú ɔ́, gǎn lɛ́ɛ, vɔ̌sánú-xwlémawutɔ́ Sadɔ́ku, Aximɛlɛ́ki Abiyatáa ví ɔ́, hɛ̌nnugán vɔ̌sánú-xwlémawutɔ́ lɛ́ɛ tɔn lɛ́ɛ kpó Levíi ví lɛ́ɛ tɔn kpó nukɔn wɛ é wlán nyǐkɔ énɛ́ lɛ́ɛ ɖe. È nyi akɔ azɔn we ɖě jɛ ɖě gúdo dó xwédo Eleazáa tɔn, bó nyi azɔn ɖokpó géé dó xwédo Itamáa tɔn. Gǎn e è nyi akɔ bo sɔ́ lɛ́ɛ ɖíe: Akɔ nukɔntɔn e è nyi ɔ́ sɔ́ Yexoyalivu, bɔ wegɔ́ ɔ́ sɔ́ Yedaya. Akɔ atɔngɔ́ ɔ́ sɔ́ Halimu, bɔ ɛnɛgɔ́ ɔ́ sɔ́ Seolímu. Akɔ atɔ́ɔ́ngɔ́ ɔ́ sɔ́ Malukíya, bɔ ayizɛ́ngɔ́ ɔ́ sɔ́ Miyamini. Akɔ tɛ́nwegɔ́ ɔ́ sɔ́ Hakɔ́si, bɔ tántɔngɔ́ ɔ́ sɔ́ Abiya. Akɔ tɛ́nnɛgɔ́ ɔ́ sɔ́ Yecúwa, bɔ wǒgɔ́ ɔ́ sɔ́ Cekaniyahu. Akɔ wǒ-ɖokpógɔ́ ɔ́ sɔ́ Eliyacivu, bɔ wěwegɔ́ ɔ́ sɔ́ Yakímu. Akɔ wǒ-atɔngɔ́ ɔ́ sɔ́ Hupa, bɔ wǒ-ɛnɛgɔ́ ɔ́ sɔ́ Yɛcɛveavu. Akɔ afɔtɔngɔ́ ɔ́ sɔ́ Biluga, bɔ afɔtɔn-nukún-ɖokpógɔ́ ɔ́ sɔ́ Imumɛ́ɛ. Akɔ afɔtɔn-nukún-wegɔ́ ɔ́ sɔ́ Hezíi, bɔ afɔtɔn-nukún-atɔngɔ́ ɔ́ sɔ́ Hapisɛsi. Akɔ afɔtɔn-nukún-ɛnɛgɔ́ ɔ́ sɔ́ Petaxiya, bɔ kogɔ́ ɔ́ sɔ́ Yexezikɛ́li. Akɔ ko-nukún-ɖokpógɔ́ ɔ́ sɔ́ Yakíni, bɔ ko-nukún-wegɔ́ ɔ́ sɔ́ Gamúlu. Akɔ ko-nukún-atɔngɔ́ ɔ́ sɔ́ Deláyahu, bɔ ko-nukún-ɛnɛgɔ́ ɔ́ sɔ́ Maaziyahu. Yě mɛ énɛ́ lɛ́ɛ wɛ è ɖe bo sɔ́ azɔ̌ dó así nú yě, bɔ yě ná nɔ́ wa ɖo Mawu Mavɔmavɔ xwé ɔ́ gbe lě e Mawu Mavɔmavɔ, Mawu Izlayɛ́li tɔn ɔ́ ɖɔ nú tɔ́gbó yětɔn Aalɔ́ɔn bɔ é ɖɔ nú yě gbɔn é. È sɔ́ Levíi ví ɖěvo lɛ́ɛ: È sɔ́ Cuvayɛ́li ɖo Amulámu ví lɛ́ɛ mɛ, bó sɔ́ Yɛxideyahu ɖo Cuvayɛ́li ví lɛ́ɛ mɛ. È sɔ́ Yiciya ɖo Hlexavíyahu ví lɛ́ɛ mɛ. Gǎn wɛ é nyí. È sɔ́ Celomɔti ɖo Yisexáa ví lɛ́ɛ mɛ, bó sɔ́ Yaxáti ɖo Celomɔti ví lɛ́ɛ mɛ. Eblɔ́n ví lɛ́ɛ ɖíe: Yeliyahu wɛ jɛ nukɔn, bɔ Amaliyahu nyí wegɔ́; Yaxaziɛ́li nyí atɔngɔ́ ɔ́, bɔ Yekamɛyamu nyí ɛnɛgɔ́ ɔ́. Wuziyɛ́li ví ɔ́ ɖíe: Mika. È sɔ́ Camíi ɖo Mika ví lɛ́ɛ mɛ. È sɔ́ Zekaliyahu ɖo Yiciya ví lɛ́ɛ mɛ; Yiciya ɔ́, Mika nɔví wɛ. Mɛlali vǐ lɛ́ɛ ɖíe: Maxli, Muci kpó vǐ tɔn Yaaziyahu ví lɛ́ɛ kpó. Vǐ e Yaaziyahu Mɛlali ví ɔ́ ji lɛ́ɛ ɖíe: Coxámu, Zakúu kpó Ivli kpó. Maxli ji Eleazáa, Eleazáa ka ji vǐ ɖě ǎ. Maxli lɛ́ ji Kícu, bɔ Kícu ji Yelaximɛyɛ́li. Muci ví lɛ́ɛ ɖíe: Maxli, Edɛ́ɛ kpódó Yelimɔ́ti kpó. Levíi ví lɛ́ɛ nɛ́, kpó hɛ̌nnu yětɔn yětɔn kpó. Yě lɔmɔ̌ nyi akɔ nɔví yětɔn Aalɔ́ɔn ví lɛ́ɛ ɖɔhun, bó tunwun hwenu e azɔ̌ ná jɛ mɛ ɖokpó ɖokpó jí dó é. Yě nyi akɔ ɔ́ ɖo axɔ́sú Davídi, Sadɔ́ku, Aximɛlɛ́ki, hɛ̌nnugán vɔ̌sánú-xwlémawutɔ́ lɛ́ɛ tɔn, kpódó Levíi ví lɛ́ɛ tɔn kpó nukɔn. Lě e è blǒ gbɔn nú hɛ̌nnu e mɛ vǐ e nyí mɛxó é ɖe ɔ́ jɛ́n è lɛ̌ bló gbɔn nú éé mɛ vǐ e nyí yɔkpɔ́vú ɔ́ ɖe é. Davídi kpó ahwangán lɛ́ɛ kpó ɖe Asáfu ví lɛ́ɛ, Hemani ví lɛ́ɛ kpó Yedutún ví lɛ́ɛ kpó ɖó vo bɔ yě ná nɔ́ ji han. Yědɛɛ wɛ nɔ́ ɖo xó e Mawu sɔ́ dó nu nú yě ɔ́ ɖɔ dó han mɛ wɛ sinsɛn hwenu, bó nɔ́ ɖo agǐdigbo kpó kanhún kpó xo d'é mɛ wɛ, lobo nɔ ɖo kpete kún d'é mɛ wɛ. Yě mɛ e è ɖe dó hanjiji zɔ́ ɔ́ kɔn lɛ́ɛ ɖíe: Asáfu ví lɛ́ɛ: Zakúu, Yozɛ́fu, Nɛtaniya kpó Aselela kpó. Tɔ́ yětɔn Asáfu ɔ́ wɛ ɖo yě nu, bó nɔ ɖɔ xó e Mawu sɔ́ dó nu n'i ɔ́ dó han mɛ lě e axɔ́sú ɔ́ zɔ́n gbɔn é. Yedutún ví lɛ́ɛ: Gedaliyáhu, Seli, Yecayahu, Hacaviyahu, Matitiahu kpó Cimɛ́yi kpó. É bló yě mɛ ayizɛ́n, bɔ tɔ́ yětɔn Yedutún nɔ yě nu. É wɛ nɔ́ ɖɔ xó e Mawu sɔ́ dó nu n'i ɔ́ dó han mɛ, bó nɔ xo agǐdigbo d'é mɛ dó mlá Mawu Mavɔmavɔ, bó nɔ́ sɔ́ ɛ su. Hemani ví lɛ́ɛ: Bukiyáhu, Mataniyahu, Wuziyɛ́li, Cevuyɛ́li, Yelimɔ́ti, Hananiyahu, Hanáni, Eliata, Gidaluti, Hlɔ̌mamuti-Ezɛ́ɛ, Yocibekáca, Malulɔ́ti, Hotíi kpódó Maxaziɔ́ti kpó. Mɛ énɛ́ lɛ́ɛ bǐ wɛ nyí Hemani ví. Hemani wɛ nyí nǔmɔtɔ́ axɔ́sú ɔ́ tɔn, lobo nɔ kpa susu nú hlɔ̌nhlɔ́n Mawu tɔn. Vǐ súnnu wǒ-ɛnɛ, nyɔ̌nu atɔn wɛ Mawu ná Hemani. Vǐ énɛ́ lɛ́ɛ bǐ wɛ nɔ ji han ɖo Mawu Mavɔmavɔ xwé gbe, ɖo tɔ́ yětɔn lɛ́ɛ sín acɛ mɛ. Yě nɔ́ xo hǔn, bó nɔ kún kpete, bó nɔ xo agǐdigbo d'é mɛ. Asáfu, Hemani kpó Yedutún kpó ɖo axɔ́sú ɔ́ sín acɛ mɛ. Yě kpó nɔví yětɔn e nyɔ́ han ji ganjí dó kpa Mawu Mavɔmavɔ lɛ́ɛ kpó bló gbɛtɔ́ afɔɖé kanwe tántɔn (288). Yě nyi akɔ bó ná tunwun lě e azɔ̌ ná jɛ mɛ ɖokpó ɖokpó jí gbɔn é; è ɖe mɛxó ɖó vo nú yɔkpɔ́vú ǎ, è ka ɖe mɛ e ko nyɔ́ han ji ganjí é ɖó vo nú mɛ e bɛ́ han yɔ̌yɔ́ é ǎ. Akɔ nukɔntɔn ɔ́ sɔ́ Yozɛ́fu Asáfu ví ɔ́. Akɔ wegɔ́ ɔ́ sɔ́ Gedaliyáhu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ atɔngɔ́ ɔ́ sɔ́ Zakúu. É kpó vǐ tɔn lɛ́ɛ kpó nɔví tɔn lɛ́ɛ kpó bló wěwe. Akɔ ɛnɛgɔ́ ɔ́ sɔ́ Yiselíi. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ atɔ́ɔ́ngɔ́ ɔ́ sɔ́ Nɛtaniyahu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ ayizɛ́ngɔ́ ɔ́ sɔ́ Bukiyáhu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ tɛ́nwegɔ́ ɔ́ sɔ́ Yesalela. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ tántɔngɔ́ ɔ́ sɔ́ Yecayahu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ tɛ́nnɛgɔ́ ɔ́ sɔ́ Mataniyahu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ wǒgɔ́ ɔ́ sɔ́ Cimɛ́yi. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ wǒ-ɖokpógɔ́ ɔ́ sɔ́ Azalɛ́li. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ wěwegɔ́ ɔ́ sɔ́ Hacaviyahu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ wǒ-atɔngɔ́ ɔ́ sɔ́ Cuvayɛ́li. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ wǒ-ɛnɛgɔ́ ɔ́ sɔ́ Matitiahu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ afɔtɔngɔ́ ɔ́ sɔ́ Yelemɔ́ti. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ afɔtɔn-nukún-ɖokpógɔ́ ɔ́ sɔ́ Hananiyahu. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ afɔtɔn-nukún-wegɔ́ ɔ́ sɔ́ Yocibekáca. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ afɔtɔn-nukún-atɔngɔ́ ɔ́ sɔ́ Hanáni. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ afɔtɔn-nukún-ɛnɛgɔ́ ɔ́ sɔ́ Malulɔ́ti. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ kogɔ́ ɔ́ sɔ́ Eliata. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ ko-nukún-ɖokpógɔ́ ɔ́ sɔ́ Hotíi. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ ko-nukún-wegɔ́ ɔ́ sɔ́ Gidaluti. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ ko-nukún-atɔngɔ́ ɔ́ sɔ́ Maxaziɔ́ti. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Akɔ ko-nukún-ɛnɛgɔ́ ɔ́ sɔ́ Hlɔ̌mamuti-Ezɛ́ɛ. É kpó vǐ tɔn súnnu lɛ́ɛ kpó nɔví tɔn súnnu lɛ́ɛ kpó bló wěwe. Hɔnjínɔtɔ́ lɛ́ɛ lɔmɔ̌ ɖó gbɛ̌ta. Mɛcelemiyahu Kɔlée ví, Asáfu vívú e jɔ ɖo Kolée xwédo ɔ́ mɛ ɔ́, ɖó vǐ tɛ́nwe. Vǐ lɛ́ɛ sín nyǐkɔ ɖě jɛ ɖě gúdo ɖíe: Zekaliyahu, Yediaɛ́lu, Zevadiyahu, Yatiniyɛ́li, Elámu, Yexoxanáni, Elihoenayi. Ovɛ́di-Edɔ́mu ɖó vǐ tántɔn. Vǐ lɛ́ɛ sín nyǐkɔ ɖě jɛ ɖě gúdo ɖíe: Cemaya, Yexozavadi, Yoáxi, Sakáa, Nɛtanɛli, Amumiyɛli, Isakáa, Pewuletayi, ɖó Mawu xo ɖɛ dó Ovɛ́di-Edɔ́mu jí. Vǐ súnnu ɖaxó Ovɛ́di-Edɔ́mu tɔn Cemaya ɔ́ ji vǐ, bɔ yě ɖo ali ɖaxó ɖaxó nu ɖo hɛ̌n ɔ́ nu, ɖó súnnu glegbenu akowunká wɛ nú yě. Cemaya ví lɛ́ɛ ɖíe: Ɔtini, Hlefayɛ́lu, Ovɛ́di, Ɛluzavadi kpó nɔví tɔn súnnu lɛ́ɛ kpó. Nɔví tɔn énɛ́ lɛ́ɛ ɔ́, súnnu glegbenu wɛ nú yě. Yě wɛ nyí Elihu kpó Semakiyáhu kpó. Yě bǐ wɛ nyí Ovɛ́di-Edɔ́mu ví. Yě kpó vǐ yětɔn lɛ́ɛ kpó nɔví yětɔn lɛ́ɛ kpó bló gbɛtɔ́ kanɖé ko-nukún-we (62). Súnnu glegbenu wɛ yě bǐ nyǐ bó jɛ xá azɔ̌ ɔ́. Mɛcelemiyahu ví lɛ́ɛ kpó nɔví tɔn lɛ́ɛ kpó bǐ bló gbɛtɔ́ afɔtɔn-nukún-atɔn. Súnnu glegbenu wɛ yě bǐ nyí. Mɛlali ví Hosa ɔ́ ji vǐ bó sɔ́ vǐ tɔn Cimuli gǎn, có é wɛ ka nyí nukɔngbéví ǎ. Ilukyahu wɛ nyí Mɛlali ví wegɔ́ ɔ́, bɔ Tevaliyahu nyí atɔngɔ́ ɔ́. Zekaliyahu nyí ɛnɛgɔ́ ɔ́. Hosa ví súnnu lɛ́ɛ kpó nɔví tɔn súnnu lɛ́ɛ kpó bǐ bló gbɛtɔ́ wǒ-atɔn. Hɔnjínɔtɔ́ gbɛ́ta énɛ́ lɛ́ɛ kpó gǎn yětɔn lɛ́ɛ kpó, kpódó nɔví yětɔn lɛ́ɛ kpó ɖo azɔ̌ yětɔn wa wɛ ɖo Mawu Mavɔmavɔ xwé gbe. Yě nyi akɔ gbɔn xwédo ɖokpó ɖokpó mɛ, bó tunwun mɛ e ná nɔ hɔn lɛ́ɛ ɖokpó ɖokpó jí ɖo yɔkpɔ́vú kpó mɛxó kpó mɛ é. È nyi akɔ bɔ Cɛlɛmiyahu wɛ ná nɔ́ hɔn e ɖo zǎnzǎnhwe jí ɔ́ jí. Vǐ tɔn Zekaliyahu e nyí wěɖexámɛtɔ́ titewungbe ɖokpó ɔ́ wɛ akɔ sɔ́, bɔ é ná cɔ́ hɔn e ɖo taligbé é. Hɔn e ɖo afɔligbé ɔ́, Ovɛ́di-Edɔ́mu wɛ akɔ e è nyi ɔ́ sɔ́ bɔ é ná cɔ́. Vǐ tɔn lɛ́ɛ ká ná cɔ́ xɔ e mɛ è nɔ bɛ́ agban lɛ́ɛ dó lɛ́ɛ. Cupimu kpó Hosa kpó wɛ akɔ e è nyi ɔ́ sɔ́ bɔ yě ná cɔ́ hɔn e ɖo gbadahwe jí ɔ́, kpódó hɔn Calɛ́kɛ́ti tɔn kpó; hɔn énɛ́ wɛ è nɔ hun dó ali e è nɔ gbɔn yi kpó jí ɖo toxo ɔ́ mɛ é. Levíi ví ayizɛ́n nɔ́ nɔ hɔntogbó zǎnzǎnhwe jí tɔn ɔ́ jí gbe ɖokpó, ɛnɛ nɔ́ nɔ totaligbé tɔn ɔ́ jí gbe ɖokpó, bɔ ɛnɛ nɔ́ nɔ afɔligbé tɔn ɔ́ jí gbe ɖokpó. Gbɛ̌ta we nɔ cɔ́ xɔ e mɛ è nɔ bɛ́ agban lɛ́ɛ dó lɛ́ɛ; mɛ we ɖo gbɛ̌ta ɖokpó mɛ. Mɛ ɛnɛ nɔ nɔ ali e è nɔ gbɔn yi xɔ e ɖo gbadahwe jí ɔ́ kɔn ɔ́ jí, bɔ mɛ we nɔ nɔ xɔ ɔ́ mɛ. Kolée kpó Mɛlali kpó sín vǐ e ɖo gbɛ̌ta hɔnjínɔtɔ́ lɛ́ɛ tɔn mɛ lɛ́ɛ nɛ́. Levíi ví ɖěvo lɛ́ɛ nɔ́ cɔ́ dɔkun e ɖo Mawu xwé gbe lɛ́ɛ, bó nɔ cɔ́ nǔ e è ɖe ɖó vo nú Mawu lɛ́ɛ. Laedáni ví e jɔ ɖo Gɛɛcɔ́ni xwédo ɔ́ mɛ, bó nyí hɛ̌nnugán ɖo hɛ̌n yětɔn lɛ́ɛ ɖokpó ɖokpó nu lɛ́ɛ wɛ nyí Yexiyɛ́li kpó vǐ tɔn Zetámu kpó Yoɛ́li kpó. Yědɛɛ lɛ́ɛ wɛ nɔ́ cɔ́ dɔkun e ɖo Mawu Mavɔmavɔ xwé gbe lɛ́ɛ. Đo xwédo Amulámu tɔn, Yisexáa tɔn, Eblɔ́n tɔn, kpódó Wuziyɛ́li tɔn kpó mɛ ɔ́, Cevuyɛ́lu e nyí Gɛɛcɔ́mu ví, bó nyí Mɔyízi vívú ɔ́ wɛ nyí dɔkunjíkpɔ́ntɔ́gán. Eliezɛ́ɛ, Gɛɛcɔ́ni nɔví lɛ́ɛ ɖo Cevuyɛ́li sín mɛ lɛ́ɛ mɛ; yě wɛ nyí: Hlexavíyahu Eliezɛ́ɛ ví ɔ́, bɔ Yecayahu, Yolámu, Zikli kpódó Celomíti kpó gɔ́ n'i. Celomíti kpó nɔví tɔn lɛ́ɛ kpó wɛ nɔ́ kpɔ́n nǔ e axɔ́sú Davídi kpó hɛ̌nnugán lɛ́ɛ kpó, kpó sɔ́ja afatɔ́ngán lɛ́ɛ, sɔ́jakanwekogán lɛ́ɛ kpódó ahwangán ɖě lɛ́ɛ kpó sɔ́ ɖó vo nú Mawu lɛ́ɛ bǐ jí. Nǔ e yě mɛ gǎn énɛ́ lɛ́ɛ hɛn wá sín ahwangbénu lɛ́ɛ ɖě wɛ yě sɔ́ ɖó vo nú Mawu, bó ná dó kpé nukún dó Mawu Mavɔmavɔ xwé ɔ́ wú. Celomíti kpó nɔví tɔn lɛ́ɛ kpó wɛ nɔ́ cɔ́ nǔ e Samuwɛ́li nǔmɔtɔ́ ɔ́, Sawúlu Kícu ví ɔ́, Avunɛ́ɛ Nɛ̌ɛ ví ɔ́ kpódó Jowabu Selúya ví ɔ́ kpó ɖe ɖó vo nú Mawu lɛ́ɛ bǐ. Kenaniyahu kpó vǐ tɔn lɛ́ɛ kpó wɛ nɔ́ kpé nukún dó to xó wú ɖo Izlayɛ́li. Yě wɛ nyí nǔjíkpɔ́ntɔ́, bó nyí hwɛɖɔtɔ́ ɖo Izlayɛ́li; Yisexáa kún mɛ wɛ yě jɔ ɖe. Hacaviyahu kpó súnnu glegbenu é ɖɔhun afatɔ́n nǔwɔntɔn kanwe ko (1.700) kpó wɛ nɔ kpé nukún dó Izlayɛ́li yíkúngban e ɖo gbadahwe jí nú Judɛ́ɛn tɔ é wú. Yě nɔ́ kpé nukún dó xó e ɖo sinsɛn li jí lɛ́ɛ wú, bó nɔ́ kpé nukún dó éé ɖo gbɛtɔ́ kpaa lɛ́ɛ tɛ́ntin lɛ́ɛ wú. Eblɔ́n kún mɛ wɛ yě jɔ ɖe. Yeliya kpa acɛ dó mɛ e jɔ ɖo Eblɔ́n kún mɛ lɛ́ɛ bǐ nu. Hwenu e axɔ́sú Davídi ɖo xwe kanɖé (40) bló wɛ ɖo zinkpo jí ɔ́, è ba do nú mɛ e jɔ ɖo Eblɔ́n kún mɛ lɛ́ɛ, bó wá mɔ gbɛtɔ́ súnnu glegbenu e jɔ ɖo kún énɛ́ mɛ lɛ́ɛ ɖo Yazɛ́ɛ toxo mɛ, ɖo Galadi yíkúngban jí. Yeliya kpó nɔví tɔn lɛ́ɛ kpó ɔ́, súnnu glegbenu wɛ yě nyǐ. Yě bǐ bló hɛ̌nnugán afɔwó nǔwɔntɔn kanwe ko (2.700). Axɔ́sú Davídi zé yě ɖó akɔta Hwlibɛ́ni tɔn, Gadi tɔn, kpódó akɔta vlɔ́ Manasée tɔn ɔ́ kpó nu, bónú yě ná nɔ́ kpé nukún dó xó e ɖo Mawu sinsɛn li jí lɛ́ɛ wú, bó ná nɔ́ kpé nukún dó éé ɖo gbɛtɔ́ kpaa lɛ́ɛ tɛ́ntin lɛ́ɛ wú. Izlayɛ́li ví e ɖo azɔ̌ wa nú axɔ́sú ɔ́ wɛ lɛ́ɛ ɖíe: hɛ̌nnugán lɛ́ɛ, sɔ́ja afatɔ́ngán lɛ́ɛ, sɔ́ja kanwekogán lɛ́ɛ, kpódó nǔjíkpɔ́ntɔ́ lɛ́ɛ kpó. Yě wɛ nɔ́ kpé nukún dó ahwanfuntɔ́ lɛ́ɛ sín kánɖó lɛ́ɛ wú, ɖo xwe ɔ́ mɛ. Kánɖó ɖokpó ɖokpó nɔ́ wa azɔ̌ nú sun ɖokpó xwewú xwewú. Gbɛtɔ́ adɔ̌kpo ɖě děgba (24.000) wɛ ɖo kánɖó ɖokpó ɖokpó mɛ. Sun nukɔntɔn mɛ ɔ́, kánɖó e nu Yacoveamu, Zavúdiɛ́li ví ɔ́ nɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Yacoveamu ɔ́, Pɛlɛ́si sín kún mɛ wɛ é jɔ ɖe. É wɛ kpa acɛ nú ahwangán e nɔ́ wa azɔ̌ ɖo sun nukɔntɔn ɔ́ mɛ lɛ́ɛ bǐ. Sun wegɔ́ ɔ́ mɛ ɔ́, kánɖó e nu Dodayi Axoxi ví ɔ́ nɔ ɔ́ wɛ nɔ́ wa azɔ̌. Ahwangán Miklɔ́ti wɛ nɔ kánɖó ɔ́ nu gɔ́ n'i. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun atɔngɔ́ ɔ́ mɛ ɔ́, kánɖó e nu Benayahu vɔ̌sánú-xwlémawutɔ́gán Yexoyada ví ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Benayahu ɔ́, ahwanfuntɔ́ syɛ́nsyɛ́n ɖokpó wɛ é nyí ɖo ahwangán gban (30) lɛ́ɛ mɛ; é wɛ ɖo yě nu. Ée é húzú gǎn ɖo yě nu ɔ́, vǐ tɔn Amumizavadu wɛ jɛ kánɖó tɔn nu. Sun ɛnɛgɔ́ ɔ́ mɛ ɔ́, kánɖó e nu Asaxɛli, Jowabu nɔví ɔ́ nɔ ɔ́ wɛ nɔ́ wa azɔ̌. Vǐ tɔn Zevadiya wɛ wá ɖyɔ́ ɛ. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun atɔ́ɔ́ngɔ́ ɔ́ mɛ ɔ́, kánɖó e nu Camuti, Yizláxya ví ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun ayizɛ́ngɔ́ ɔ́ mɛ ɔ́, kánɖó e nu Ila Ikɛ́ci ví Tekowanu ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun tɛ́nwegɔ́ ɔ́ mɛ ɔ́, kánɖó e nu Hɛlɛ́si Bɛti-Pɛlɛ́tinu e jɔ ɖo akɔta Eflayímu tɔn mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun tántɔngɔ́ ɔ́ mɛ ɔ́, kánɖó e nu Sibekayi, Hucanu e jɔ ɖo Zeláxi kún mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun tɛ́nnɛgɔ́ ɔ́ mɛ ɔ́, kánɖó e nu Aviɛzɛ́ɛ, Anatɔ́tinu e jɔ ɖo akɔta Bɛnjamɛ́ɛ tɔn mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun wǒgɔ́ ɔ́ mɛ ɔ́, kánɖó e nu Maxlayi, Nɛtofanu e jɔ ɖo Zeláxi kún mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun wǒ-ɖokpógɔ́ ɔ́ mɛ ɔ́, kánɖó e nu Benaya Pileyatɔ́ninu e jɔ ɖo akɔta Eflayímu tɔn mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Sun wěwegɔ́ ɔ́ mɛ ɔ́, kánɖó e nu Hɛludayi, Nɛtofanu e jɔ ɖo Ɔtiniyɛ́li kún mɛ ɔ́ nɔ ɔ́ wɛ nɔ́ wa azɔ̌. Gbɛtɔ́ adɔ̌kpo ɖě děgba (24.000) wɛ ɖo kánɖó tɔn mɛ. Akɔta Izlayɛ́li tɔn lɛ́ɛ sín gǎn lɛ́ɛ ɖíe: Eliezɛ́ɛ, Zikli ví ɔ́; é wɛ nyí akɔta Hwlibɛ́ni tɔn sín gǎn. Cefátiyahu, Maaka ví ɔ́; é wɛ nyí akɔta Sinmɛnyɔ́ɔ tɔn sín gǎn. Hacaviyahu, Kemuwɛ́li ví ɔ́; é wɛ nyí akɔta Levíi tɔn sín gǎn. Sadɔ́ku nyí gǎn ɖo Aalɔ́ɔn ví lɛ́ɛ nu. Elihu Davídi nɔví ɔ́; é wɛ nyí akɔta Judáa tɔn sín gǎn. Ɔmúli, Mikaɛli ví ɔ́; é wɛ nyí akɔta Isakáa tɔn sín gǎn. Yicimayahu, Ovadiahu ví ɔ́; é wɛ nyí akɔta Zabulɔ́ɔn tɔn sín gǎn. Yelimɔ́ti, Azliyɛ́li ví ɔ́; é wɛ nyí akɔta Nɛfutali tɔn sín gǎn. Hocea, Azaziyahu ví ɔ́; é wɛ nyí akɔta Eflayímu tɔn sín gǎn. Yoɛ́li, Pedayahu ví ɔ́; é wɛ nyí akɔtavlɔ́ Manasée tɔn sín gǎn. Idóo, Zekaliyahu ví ɔ́; é wɛ nyí akɔta vlɔ́ Manasée tɔn e ɖo Galadi ɔ́ sín gǎn. Yaasiɛ́li, Avunɛ́ɛ ví ɔ́; é wɛ nyí akɔta Bɛnjamɛ́ɛ tɔn sín gǎn. Azalɛ́li, Yeloxámu ví ɔ́; é wɛ nyí akɔta Dan tɔn sín gǎn. Akɔtagán Izlayɛ́li tɔn lɛ́ɛ nɛ́. Mɛ e ko ɖó xwe ko lɛ́ɛ kpó mɛ e ma ko ɖó xwe ko ǎ lɛ́ɛ kpó ɔ́, Davídi sɔ́ ɖě sín kɛ́n ǎ, ɖó Mawu Mavɔmavɔ kó dó akpá ɖɔ émí ná bló bɔ Izlayɛ́li ví lɛ́ɛ ná sukpɔ́ sunví e ɖo jǐnukúnsin lɛ́ɛ ɖɔhun. Jowabu Selúya ví ɔ́ kó jɛ mɛ lɛ́ɛ sín kɛ́n sɔ́ jí, lo ɔ́, é sɔ́ kɛ́n ɔ́ fó ǎ, ɖó Mawu Mavɔmavɔ sin xomɛ dó Izlayɛ́li ví lɛ́ɛ, ɖó azɔ̌ énɛ́ e yě bɛ̌ ɔ́ wú. Énɛ́ ɔ́ wú wɛ mɛ nabí e ɖo to ɔ́ mɛ ɔ́ má ɖo “Axɔ́sú Davídi sín Tan wéma lɛ́ɛ” mɛ ǎ. Azimawɛ́ti, Adiyɛli ví ɔ́; é wɛ nɔ kpɔ́n dɔkun axɔ́sú ɔ́ tɔn lɛ́ɛ jí. Yexonatáni Wuziyahu ví ɔ́; é wɛ nɔ kpɔ́n agɔ̌ e ɖo gleta lɛ́ɛ, éé ɖo toxo mɛ lɛ́ɛ, éé ɖo gletoxo mɛ lɛ́ɛ kpódó éé ɖo gletoxo kpɛví kpɛví mɛ lɛ́ɛ kpó jí. Ezli Kelúvu ví ɔ́; é wɛ nɔ́ kpɔ́n glesi e ɖo to ɔ́ mɛ lɛ́ɛ jí. Cimɛ́yi, Hlamanu ɔ́; é wɛ nɔ́ kpɔ́n vǐwungbo lɛ́ɛ jí. Zavúdi Cefámunu ɔ́; é wɛ nɔ kpɔ́n vɛ̌ɛn e è xo kplé lɛ́ɛ jí. Baalu-Hanáni, Gɛdɛ́ɛnu ɔ́; é wɛ nɔ kpɔ́n olívugbo lɛ́ɛ kpó sikomɔ́ɔgbo lɛ́ɛ kpó jí ɖo ayǐkúngban wɛnjɛ jí. Yoaci wɛ ka nɔ kpɔ́n ami e è xo kplé lɛ́ɛ jí. Citlayi Calɔ́ninu ɔ́; é wɛ nɔ kpɔ́n nyibúkpó e ɖo amagbo mɛ ɖo Calɔ́ni lɛ́ɛ jí. Cafáti Adlayi ví ɔ́; é wɛ nɔ kpɔ́n nyibúkpó e ɖo amagbo mɛ ɖo tɔdo lɛ́ɛ mɛ lɛ́ɛ jí. Ovílu Isimayɛ́li ví ɔ́; é wɛ nɔ kpɔ́n lǎkúnmí lɛ́ɛ jí. Yɛxideyahu Mɛlɔnɔtinu ɔ́; é wɛ nɔ kpɔ́n tócí asi lɛ́ɛ jí. Yazízi Hagáa ví ɔ́; é wɛ nɔ kpɔ́n gbɔ̌ lɛ́ɛ jí. Yě mɛ e nɔ kpɔ́n axɔ́sú Davídi sín dɔkun jí lɛ́ɛ nɛ́. Yexonatáni Davídi sín tɔ́ nɔví ɔ́ wɛ nɔ́ ɖe wě xá axɔ́sú Davídi. Mɛ ɖé wɛ é nyí bó ɖó nǔnywɛ́ ganjí, lobo se wěma ganjí. Yexiyɛ́li Hakimɔ́ni ví ɔ́ wɛ nɔ́ ná kplɔ́n axɔ́sú ɔ́ sín vǐ lɛ́ɛ. Axitofɛ́li lɔmɔ̌ nɔ́ ɖe wě xá axɔ́sú ɔ́. Hucáyi Aakíti ɔ́ ká nyí axɔ́sú ɔ́ sín xɔ́ntɔn. Yexoyada Benayahu ví ɔ́ kpódó Abiyatáa kpó wɛ wá nɔ Axitofɛ́li sín do mɛ, bó nɔ́ ɖe wě xá axɔ́sú ɔ́. Jowabu ka nyí ahwangán e kpa acɛ dó ahwangɔnu axɔ́sú tɔn ɔ́ nu é. Davídi kplé gǎn e ɖo Izlayɛ́li lɛ́ɛ bǐ ɖó Jeluzalɛ́mu: akɔtagán lɛ́ɛ, ahwankánɖó axɔ́sú ɔ́ tɔn sín gǎn lɛ́ɛ, sɔ́ja afatɔ́ngán lɛ́ɛ, sɔ́jakanwekogán lɛ́ɛ, gan e nɔ́ kpɔ́n dɔkun kpó kanlin kpó jí nú axɔ́sú ɔ́ lɛ́ɛ, gǎn e nɔ́ kpɔ́n dɔkun kpó kanlin kpó jí nú vǐ tɔn lɛ́ɛ, agooɖojǐe lɛ́ɛ, súnnu akowunká lɛ́ɛ, kpó súnnu glegbenu lɛ́ɛ bǐ kpó. Ée yě bǐ kplé ɔ́, axɔ́sú Davídi sí te bo ɖɔ: “Mɛ ce lɛ́ɛ mi, xɔ́ntɔn ce lɛ́ɛ mi, mi ɖótó mì. Nyɛ ɖésú kó lin ɖɔ un ná sá xwé ɖokpó, bɔ é ná nyí akɔjijɛgbá Mawu Mavɔmavɔ tɔn ɔ́ sín nɔtɛn, Mawu mǐtɔn sín afɔɖótɛn, bɔ un ko ɖo nǔ tɔn sɔ́ wɛ. Lo ɔ́, Mawu ɖɔ nú mì ɖɔ: ‘Hwi wɛ ná sá xwé nú mì ǎ, ɖó ahwanfuntɔ́ wɛ a nyǐ, bó kɔn gbɛtɔ́ sín hun kɔn nyi ayǐ.’ Nǔ ɖo mɔ̌ có Mawu Mavɔmavɔ, Mawu Izlayɛ́li tɔn ɔ́ wɛ ká sɔ́ mì ɖo tɔ́ ce sín xwédo ɔ́ bǐ mɛ, bónú nyɛ kpó vǐ ce lɛ́ɛ kpó ná ɖu axɔ́sú ɖo Izlayɛ́li káká sɔ́yi. Đó, ɖ'ayǐ xóxó ɔ́, Judáa wɛ é sɔ́ gǎn. Énɛ́ ɔ́ gúdo ɔ́, é wá sɔ́ tɔ́ ce sín xwédo ɔ́ ɖo akɔta Judáa tɔn ɔ́ mɛ. Đo tɔ́ ce sín vǐ lɛ́ɛ mɛ ɔ́, nyɛ wɛ é jló bó sɔ́ axɔ́sú ɖó Izlayɛ́li togun ɔ́ bǐ nu. Đo vǐ tobutóbú e é ná mì lɛ́ɛ mɛ ɔ́, vǐ ce Salomɔ́ɔ wɛ é sɔ́, bɔ é ná yi axɔ́súzinkpo Izlayɛ́li tɔn ɔ́ jí, bó ná ɖu axɔ́sú ɖo Mawu Mavɔmavɔ nyíkɔ mɛ. É ɖɔ nú mì ɖɔ: ‘Vǐ towe Salomɔ́ɔ wɛ ná sá xwé nú mì, bɔ é ná ɖó kɔ́xota gěgé, ɖó un sɔ́ ɛ bɔ é ná nyí vǐ nú mì, bɔ un ná nyí tɔ́ n'i. Ényí é xwédo nǔ e un zɔ́n lɛ́ɛ kpó nǔ e un ɖɔ lɛ́ɛ kpó ganjí lě e é ɖ'é wú gbɔn égbé din é ɔ́, un ná sɔ́ axɔ́súɖuɖu tɔn jínjɔ́n ayǐ káká sɔ́yi.’ Hǔn din ɔ́, ɖo Izlayɛ́li, togun Mawu Mavɔmavɔ tɔn ɔ́ nukɔn, ɖo Mawu mǐtɔn e ɖo tó ɖó mǐ wɛ é nukɔn ɔ́, mi bló nǔ e Mawu Mavɔmavɔ, Mawu mǐtɔn zɔ́n lɛ́ɛ bǐ. Mi bló mɔ̌ ɔ́, to ɖagbe ɖagbe élɔ́ e mɛ mi ɖe ɔ́ ná ɖo mitɔn nyí wɛ tɛgbɛ, bɔ mi ná jó dó nú vǐ mitɔn lɛ́ɛ, bɔ yě ná ɖu gǔ tɔn káká sɔ́yi. Vǐ ce Salomɔ́ɔ, hwɛ ɔ́, a ɖǒ ná tunwun Mawu nyɛ tɔ́ towe tɔn, lobo sɛn é ɖokpónɔ géé, kpódó ayixa towe bǐ kpó. Đó Mawu Mavɔmavɔ nɔ́ mɔ nukúnnú jɛ ayixa lɛ́ɛ bǐ mɛ, é tunwun nǔ e lin wɛ è ɖe lɛ́ɛ bǐ. Ényí a ba ɛ ɔ́, é ná jó éɖée dó bɔ a nǎ mɔ ɛ. Lo ɔ́ ényí a jǒ e dó ɔ́, é ná jó we dó bǐ gbídígbídí. A ɖǒ ná tunwun din ɖɔ Mawu Mavɔmavɔ sɔ́ we, bónú a nǎ sá xwé n'i, bɔ é ná nyí nɔtɛn tɔn. Hǔn bo kpan akɔ́n, bó jɛ azɔ̌ jí.” Davídi zé Mawu Mavɔmavɔ xwé ɔ́ kpó xɔ e ná nɔ mɛ lɛ́ɛ kpó sín ɖiɖe nú Salomɔ́ɔ: dɔkun xɔ lɛ́ɛ, xɔ e ɖo síngbó jí lɛ́ɛ, xɔ e ɖo do lɛ́ɛ, kpódó xɔ e mɛ akɔjijɛgbá Mawu Mavɔmavɔ tɔn ná nɔ ɔ́ kpó. É lɛ́ zé nǔ e é lin bó ná bló ɖó xwé ɔ́ gbe lɛ́ɛ bǐ sín ɖiɖe n'i. É zé kɔ́xota lɛ́ɛ, xɔ e ná lɛ́ dó kɔ́xota lɛ́ɛ, xɔ e mɛ è nǎ bɛ́ xwé ɔ́ sín dɔkun lɛ́ɛ kpó nǔ è ɖe ɖó vo nú Mawu lɛ́ɛ kpó dó lɛ́ɛ bǐ sín ɖiɖe n'i. É zé wěma e jí è wlǎn vɔ̌sánú-xwlémawutɔ́ lɛ́ɛ kpó Levíi ví lɛ́ɛ gbɛ́ta lɛ́ɛ kpó ɖó ɔ́ n'i, bó lɛ́ zé wěma e jí è wlǎn azɔ̌ e è nǎ wa ɖo Mawu Mavɔmavɔ xwé gbe lɛ́ɛ kpó nǔ e è nɔ zán ɖ'é mɛ lɛ́ɛ kpó n'i. É ɖɔ siká kilóo nabí e ná kpé nǔ tɛnmɛ tɛnmɛ e è nǎ zě siká dó bló lɛ́ɛ, bó ɖɔ kpatágan kilóo nabí e ná kpé nǔ tɛnmɛ tɛnmɛ e è nǎ zé kpatágan dó bló lɛ́ɛ n'i. É ɖɔ siká kilóo nabí e ná kpé sikázogbɛ́nhɛnnú kpó sikázogbɛ́n lɛ́ɛ kpó ɔ́ n'i, bó ɖɔ kpatágan kilóo nabí e ná kpé kpatáganzogbɛ́n-hɛnnú lɛ́ɛ kpó kpatáganzogbɛ́n lɛ́ɛ kpó ɔ́ n'i. Sikátávo e jí è nǎ nɔ bɛ́ wɔ̌xúxú e è nǎ nɔ́ xwlé Mawu lɛ́ɛ ɖó lɛ́ɛ ɔ́, é ɖɔ siká kilóo nabí e ná kpé ɖokpó ɖokpó ɔ́ n'i. É ɖɔ kpatágan kilóo nabí e ná kpé kpatágantávo lɛ́ɛ ɔ́ n'i. É ɖɔ siká akú kilóo nabí e ná kpé sikágáfu lɛ́ɛ, sikágannú lɛ́ɛ, kpó sikágoví lɛ́ɛ kpó ɔ́ n'i; é ɖɔ siká kilóo nabí e ná kpé sikábasya lɛ́ɛ ɔ́ n'i, bó ɖɔ kpatágan kilóo nabí e ná kpé kpatáganbasya lɛ́ɛ ɔ́ n'i. É ɖɔ siká akú kilóo nabí e ná kpé vɔ̌sákpe e jí è nǎ nɔ́ dó zǎlínkpɔ́n zo ɖe ɔ́ n'i. É ɖɔ lě e è nǎ bló kɛkɛ́ví ɔ́ gbɔn ɔ́ n'i, ɖo tají ɔ́, lě e è nǎ bló wɛnsagun susunɔ e è nǎ zé siká dó bló lɛ́ɛ, bɔ awa yětɔn lɛ́ɛ ná ɖo dlɛ̌ndlɛ́n, bó ná cyɔ́n akɔjijɛgbá Mawu Mavɔmavɔ tɔn ɔ́ é. Davídi ɖɔ: “Nǔ énɛ́ lɛ́ɛ bǐ ɖo wěma e un yí ɖo Mawu Mavɔmavɔ sí ɔ́ mɛ; wěma ɔ́ tín lě e è nǎ wa azɔ̌ lɛ́ɛ gbɔn ɔ́ mɛ ganjí.” Davídi ɖɔ nú vǐ tɔn Salomɔ́ɔ ɖɔ: “Vǐ ce, syɛ́nlǐn, kpan akɔ́n bó jɛ azɔ̌ jí. Ma ɖi xɛsi ó. Ado ní má hu we ó, Mawu Mavɔmavɔ, Mawu ce ná nɔ kpɔ́ xá we. É ná ɖe alɔ sín kan towe mɛ ǎ. É ná jó we dó ǎ káká bɔ azɔ̌ ɔ́ bǐ ná fó. Vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó sín gbɛ̌ta e ná wa sinsɛnzɔ́ ɖo Mawu Mavɔmavɔ xwé lɛ́ɛ lɔmɔ̌ ɖo akpá towe. Mɔ̌ ɖokpó ɔ́, azɔ̌ e ɖe bɔ è nǎ wa lɛ́ɛ ɔ́, gbɛtɔ́ ɖe ɖo gǎn lɛ́ɛ kpó togun ɔ́ bǐ kpó tɛ́ntin, bó ɖó jlǒ ɖagbe. Yě lɛ́ tunwun azɔ̌ ganjí, bɔ a hɛn ɔ́, a nǎ ɖeji dó yě wú.” Axɔ́sú Davídi ɖɔ nú kplékplé ɔ́ bǐ ɖɔ: “Vǐ ce Salomɔ́ɔ e Mawu sɔ́ ɔ́ kpo ɖo vǔ; é ɖó nǔnywɛ́ ɖé ǎ. Azɔ̌ e wa gbé è ja ɔ́, azɔ̌ ɖaxó ɖokpó wɛ, ɖó é nyí gbɛtɔ́ ná sá xwé ná wɛ è ɖe ǎ, Mawu Mavɔmavɔ, Mawu tɔn wɛ. Énɛ́ ɔ́, un dó gǎn bó sɔ́ xwé e ná sá nú Mawu ce wɛ é ɖe ɔ́ sín nǔ ɖ'ayǐ. Un kplé siká ɖ'ayǐ nú nǔ e è nǎ zé siká dó bló ná lɛ́ɛ, un kplé kpatágan ɖ'ayǐ nú nǔ e è nǎ zé kpatágan dó bló ná lɛ́ɛ, un kplé ganvɔ ɖ'ayǐ nú nǔ e è nǎ zě ganvɔ dó bló ná lɛ́ɛ, un kplé gan ɖ'ayǐ nú nǔ e è nǎ zé gan dó bló ná lɛ́ɛ. Un kplé atín ɖ'ayǐ nú nǔ e è nǎ zé atín dó bló ná lɛ́ɛ. Un kplé awǐnnya ɖagbe ɖagbe onísi, awǐnnya e è nɔ to dó ɖó acɔ́ lɛ́ɛ, awǐnnya e nɔ kɔ́n, bó ɖó sin tɛnmɛ tɛnmɛ lɛ́ɛ, kpódó awǐnnya xɔ akwɛ́ mǎblu kpó kpɔ́ gégé. Un lɛ́ sɔ́ siká kpó kpatágan kpó e nyí nyɛ ɖésúnɔ tɔn ɔ́ gɔ́ nú nǔ énɛ́ lɛ́ɛ nú Mawu xwé ɔ́, ɖó lě e xwé ɔ́ myá nukún nú mì sɔ ɔ́ wútu. Un ná siká akú tɔ́nu kanwe ko (100), kpatágan akú tɔ́nu afɔɖé kanɖé (240), bɔ è nǎ tɛ́ gbɔn xɔ ɔ́ sín dǒ lɛ́ɛ wú. Din ɔ́, mɛ̌ ká ɖo mi mɛ bó jló ná ná siká abǐ kpatágan Mawu Mavɔmavɔ, bónú azɔ̌watɔ́ lɛ́ɛ ná zé dó bló nǔ e è nǎ zé siká dó bló lɛ́ɛ, abǐ nǔ e è nǎ zé kpatágan dó bló lɛ́ɛ?” Ée Davídi ɖɔ mɔ̌ ɔ́, hɛ̌nnugán lɛ́ɛ, akɔta e ɖo Izlayɛ́li lɛ́ɛ sín gǎn lɛ́ɛ, sɔ́ja afatɔ́ngán lɛ́ɛ, kanwekogán lɛ́ɛ, kpódó azɔ̌gán axɔ́sú ɔ́ tɔn lɛ́ɛ kpó ná nǔ kpó yě ɖésúnɔ sín jlǒ kpó. Yě ná siká tɔ́nu kɛnnɛ wǒ (170), sikágankwɛ́ děgba we afɔwó (10.000), kpatágan tɔ́nu afɔɖé kanwe ko (300) jɛjí, ganvɔ tɔ́nu nǔwɔntɔn (600), kpódó gan tɔ́nu afɔwó-afatɔ́n (3.000) jɛjí kpó. Yě mɛ e ɖó awǐnnya xɔ akwɛ́ lɛ́ɛ bɛ́ jó nú Yexiyɛ́li e ɖo Gɛɛcɔ́ni xwédo mɛ ɔ́, bɔ è nǎ bɛ́ dó dɔkun e è nǎ mɔ ɖo Mawu Mavɔmavɔ xwé gbe lɛ́ɛ mɛ. Nǔ e yě ɖésúnɔ ɖó jlǒ bó ná Mawu Mavɔmavɔ ɔ́ dó xomɛhunhun nú yě, ɖó yě ná kpó xomɛ kpó. Xomɛ ɖaxó ɖé hun axɔ́sú Davídi lɔmɔ̌. Davídi kpa susu nú Mawu Mavɔmavɔ ɖo kplékplé bǐ nukɔn. É ɖɔ: “Mawu Mavɔmavɔ, Mawu tɔ́gbó mǐtɔn Jakɔ́bu tɔn, susu nú we káká sɔ́yi. Mawu Mavɔmavɔ, towe wɛ nyí susu, hlɔ̌nhlɔ́n, acɔ́, axɔ́súɖuɖu kpó wěziza kpó, ɖó nǔ e ɖo jǐnukúnsin kpó ayǐkúngban jí kpó lɛ́ɛ bǐ wɛ nyí towe. Đó hwi wɛ nyí axɔ́sú e kpa acɛ dó atín kpó kan kpó nu é. Gɔ̌n towe wɛ dɔkun kpó susu kpó gosín. Hwi wɛ kpa acɛ nú nǔ bǐ. Alɔ towe mɛ wɛ hlɔ̌nhlɔ́n kpó nǔbǐwúkpíkpé kpó ɖe. Hwi wɛ ɖó acɛ, bó nɔ́ sɔ́ mɛ e jló we ɔ́ su, bó ɖó acɛ bó nɔ́ dó wǔsyɛ́n lanmɛ nú mɛ e jló we é. Mawu mǐtɔn, énɛ́ wú wɛ mǐ ɖo kpikpa we wɛ, bó ɖo nyǐkɔ towe ɖagbe ɖagbe ɔ́ sɔ́ su wɛ. Đó un nyí nǔtí ǎ, togun ce lɔmɔ̌ nyí nǔtí ǎ. Ényí mǐ ɖésúnɔ sín acɛ wɛ mǐ zé dó ná nǔ énɛ́ lɛ́ɛ we ǎ. Hwi wɛ ɖó nǔ bǐ; hwi wɛ ná nǔ e mǐ ná we lɛ́ɛ mǐ. Jǒnɔ wɛ mǐ nyí ɖo to élɔ́ e a nǎ mǐ ɔ́ mɛ tɔ́gbó mǐtɔn lɛ́ɛ ɖɔhun. Mǐ ná nɔ fí káká sɔ́yi ǎ. Gbɛ mǐtɔn ɖo ayǐkúngban jí cí yɛ ɖɔhun, bó ɖo wǐwá yi wɛ. Mǐ ɖó nukún nǔɖé ǎ. Mawu Mavɔmavɔ, Mawu mǐtɔn, mǐ kplé azɔ̌wanú tobutóbú énɛ́ lɛ́ɛ, bó ná dó sá xwé e gbe mǐ ná nɔ́ yi sɛn hwi Mawu mímɛ́ ɔ́ ɖe é; hwi wɛ ka ɖó nǔ énɛ́ lɛ́ɛ bǐ, hwi gɔ́n wɛ bǐ gosín. Mawu ce, un tunwun ɖɔ a nɔ mɔ nǔ jɛ ayixa mɛtɔn mɛ. Un tunwun ɖɔ a yǐ wǎn nú nǔ jlɔ́jlɔ́. Nyɛ ɖésú wɛ jló bó ná nǔ énɛ́ lɛ́ɛ we kpó ayijlɔ́jlɔ́ kpó. Togun towe e kplé ɖo fí din ɔ́ lɔmɔ̌ ná nǔ we kpó jlǒ kpó, bɔ un mɔ bɔ é víví nú mì. Mawu Mavɔmavɔ, Mawu e tɔ́gbó mǐtɔn Ablaxámu, Izáki kpó Jakɔ́bu kpó nɔ sɛn é, hɛn ninɔmɛ énɛ́ lɛ́ɛ kpó linlin énɛ́ lɛ́ɛ kpó dó ayi mɛ nú togun towe hwebǐnu, bó bló bónú ayixa tɔn bǐ ní nɔ wǔ towe syɛ́nsyɛ́n. Nǎ ayixa ɖokpó vǐ ce Salomɔ́ɔ, bónú é ná hɛn nǔ e a zɔ̌n lɛ́ɛ, kplɔ́n towe lɛ́ɛ kpódó sɛ́n towe lɛ́ɛ kpó ayi mɛ, bó ná bló ɖ'é jí. Nǎ ɛ ayixa ɖokpó bónú é ná sá xwé e sín nǔ un sɔ́ ɖ'ayǐ é.” Ée Davídi xo ɖɛ ɔ́ fó ɔ́, é ɖɔ nú togun ɔ́ bǐ ɖɔ: “Mi dó kú nú Mawu Mavɔmavɔ, Mawu mitɔn.” Ée Davídi ɖɔ mɔ̌ ɔ́, togun ɔ́ bǐ dó kú nú Mavɔmavɔ Mawu tɔ́gbó yětɔn lɛ́ɛ tɔn. Yě jɛ kpo bó ɖe kɔ́, bó sɔ́ Mawu Mavɔmavɔ kpó axɔ́sú ɔ́ kpó su. Ayǐhɔ́ngbe tɔn ɔ́, yě hɛn nyibúsú afatɔ́n (1.000), agbo afatɔ́n (1.000), kpódó lɛ̌ngbɔ́ví afatɔ́n (1.000) kpó; yě hɛn vɛ̌ɛn e nɔ jɛ vɔ̌ lɛ́ɛ jí é, bó wá sá kɔnɖókpɔ́ vɔ́ kpó vɔ̌ e è nɔ dó zo ɔ́ kpó nú Mawu Mavɔmavɔ. Kɔnɖókpɔ́ vɔ́ lɛ́ɛ su, bɔ Izlayɛ́li ví e wá fínɛ́ gbe nɛ́ gbe lɛ́ɛ bǐ nǎ mɔ ɖu. Gbe énɛ́ ɔ́ gbe ɔ́, yě ɖu nǔ bó nu ahan ɖo Mawu Mavɔmavɔ nukɔn kpó awǎjijɛ ɖaxó kpó. Yě sɔ́ Salomɔ́ɔ Davídi ví ɔ́ axɔ́sú azɔn wegɔ́ ɔ́. Yě kɔn ami dó ta n'i ɖo Mawu Mavɔmavɔ nukɔn, bɔ é nyí gǎn; yě lɛ́ kɔn ami dó ta nú Sadɔ́ku, bɔ é nyí vɔ̌sánú-xwlémawutɔ́ ɖaxó. Salomɔ́ɔ yi axɔ́súzinkpo Mawu Mavɔmavɔ tɔn jí, bó ɖu axɔ́sú ɖó tɔ́ tɔn Davídi tɛnmɛ. Nǔ bǐ ɖo yiyi n'i wɛ ganjí, bɔ Izlayɛ́li ví lɛ́ɛ bǐ se tónú n'i. Gǎn lɛ́ɛ, sɔ́ja lɛ́ɛ, kpódó axɔ́sú Davídi ví lɛ́ɛ bǐ kpó yí gbe bó ná nɔ axɔ́sú Salomɔ́ɔ sín acɛ mɛ. Mawu Mavɔmavɔ sɔ́ Salomɔ́ɔ su hú mɛ bǐ ɖo Izlayɛ́li ví lɛ́ɛ bǐ nukɔn; Mawu Mavɔmavɔ bló bɔ axɔ́súɖuɖu tɔn nyɔ́ hú axɔ́sú Izlayɛ́li tɔn e ko jɛ nukɔn n'i lɛ́ɛ bǐ tɔn. Davídi Jɛsée ví ɔ́ ɖu axɔ́sú ɖo Izlayɛ́li togun ɔ́ bǐ nu. Xwe kanɖé (40) wɛ é ɖu axɔ́sú xɔ, ɖo Izlayɛ́li togun ɔ́ nu. É nɔ Eblɔ́n nú xwe tɛ́nwe, bó nɔ Jeluzalɛ́mu nú xwe gban-nukún-atɔn (33). Kpikpoxɔmɛ nyɔ́ n'i ɖésú; é nɔ dɔkun kpó susu kpó mɛ káká bó kú, bɔ vǐ tɔn Salomɔ́ɔ ɖu axɔ́sú ɖó tɛn tɔn mɛ. Azɔ̌ e axɔ́sú Davídi wa lɛ́ɛ bǐ ɔ́, éé é wa jɛ nukɔn lɛ́ɛ, kpódó éé é wa gbɔn gǔdo lɛ́ɛ kpó ɔ́, è wlǎn bǐ dó “Samuwɛ́li nǔmɔtɔ́ ɔ́ sín wěma” mɛ, bó wlán dó “ gbeyíɖɔ Mawu tɔn Natáan sín wěma” mɛ, lobo wlán dó “Gadi nǔmɔtɔ́ ɔ́ sín wěma” mɛ. Lě e Davídi ɖu axɔ́sú gbɔn ɔ́, lě e é syɛ́n gbɔn ɔ́, nǔ e jɛ hwetɔnnu ɖo Izlayɛ́li lɛ́ɛ kpó nǔ e jɛ ɖo axɔ́súɖuto ɖě lɛ́ɛ mɛ lɛ́ɛ kpó ɔ́, è wlǎn bǐ dó wěma énɛ́ lɛ́ɛ mɛ. Salomɔ́ɔ Davídi ví ɔ́ sín axɔ́súɖuɖu ɖo dǒ lí wɛ. Mawu Mavɔmavɔ, Mawu tɔn ɖo kpɔ́ xá ɛ, bó sɔ́ ɛ su. Salomɔ́ɔ ylɔ́ Izlayɛ́li togun ɔ́ bǐ kplé, ɖo tají ɔ́, sɔ́ja afatɔ́ngán lɛ́ɛ, sɔ́ja kanwekogán lɛ́ɛ, hwɛɖɔtɔ́ lɛ́ɛ, kpódó hɛ̌nnugán nukúnɖéjí Izlayɛ́li tɔn lɛ́ɛ kpó. Salomɔ́ɔ kpódó mɛ e é ylɔ́ lɛ́ɛ bǐ kpó yi tɛn mímɛ́ e ɖo Gabawɔ́ɔn é mɛ. Goxɔ e mɛ Mawu nɔ́ kpé togun ɔ́ ɖe, bɔ mɛsɛntɔ́ Mawu Mavɔmavɔ tɔn Mɔyízi bló ɖó gbětótló mɛ ɔ́, fínɛ́ wɛ é ɖe. Davídi ko zé akɔjijɛgbá Mawu tɔn ɔ́ sín Kiliyati-Yealimu yi goxɔ e é kó bló ɖ'ayǐ nú akɔjijɛgbá ɔ́ ɖo Jeluzalɛ́mu ɔ́ mɛ. Lo ɔ́, vɔ̌sákpe e Besalɛli Wulíi ví, Húu vívú ɔ́ zé ganvɔ dó bló ɔ́ ɖo goxɔ Mawu Mavɔmavɔ tɔn ɔ́ nukɔn, ɖo Gabawɔ́ɔn. Fínɛ́ wɛ Salomɔ́ɔ kpódó mɛ e xwedó e lɛ́ɛ kpó kan nǔ byɔ́ Mawu Mavɔmavɔ ɖe. Vɔ̌sákpe énɛ́ e ɖo goxɔ Mawu Mavɔmavɔ tɔn ɔ́ nukɔn ɔ́ jí wɛ Salomɔ́ɔ xwlé vɔ̌ e è nɔ dó zo ɔ́ afatɔ́n (1.000) Mawu Mavɔmavɔ ɖe hwenɛ́nu. Mawu tɔ́n dó Salomɔ́ɔ jí gbe nɛ́ gbe zǎn mɛ, bó ɖɔ n'i ɖɔ: “Byɔ̌ nǔ e jló we ɔ́ nú má ná we.” Bɔ Salomɔ́ɔ ɖɔ n'i ɖɔ: “A nyɔ̌ xomɛ dó tɔ́ ce Davídi wú tawun, bó sɔ́ mì axɔ́sú ɖó tɛn tɔn mɛ. Mawu Mavɔmavɔ, din ɔ́, ɖe akpá e a dǒ nú tɔ́ ce Davídi é, ɖó a sɔ́ mì axɔ́sú ɖó togun wɔ̌buwɔ́bú kɔ́gúdu ɖɔhun élɔ́ nu. Hǔn, bo ná nǔnywɛ́ kpódó nǔtunwuntunwun kpó mì, bónú ma tunwun lě e un ná wa nǔ gbɔn ɖo togun élɔ́ nu é! Đó togun ɔ́ sukpɔ́ dín! Nǔ énɛ́ lɛ́ɛ mɛ vo ɔ́, mɛɖé sixú nɔ togun e sukpɔ́ sɔ mɔ̌ ɔ́ nu ǎ.” Ée Salomɔ́ɔ ɖɔ mɔ̌ ɔ́, Mawu ɖɔ n'i ɖɔ: “Ée a ma byɔ́ dɔkun ǎ, bó má byɔ́ nǔ ɖó kan ǎ, bó má byɔ́ ɖɔ kɛntɔ́ émítɔn lɛ́ɛ ní kú ǎ, bó má tlɛ byɔ́ jidɔ́ nú hwiɖée ǎ, bɔ é nyí ɖɔ nǔnywɛ́ kpódó nǔtunwuntunwun kpó wɛ ɖo ayi towe mɛ, bɔ a byɔ́, bó ná dó nɔ togun ce e nu un sɔ́ we axɔ́sú ɖe ɔ́ nu ɔ́, un ná nǔnywɛ́ ɔ́ kpódó nǔtunwuntunwun ɔ́ kpó we; un ka ná lɛ́ ná dɔkun we, bó ná ná nǔ gěgé kpódó susu kpó we gɔ́ ná, bɔ é ná hú axɔ́sú e ko jɛ nukɔn nú we lɛ́ɛ kpó éé ná wá jɛ gǔdo towe lɛ́ɛ bǐ kpó tɔn.” Ée Mawu Mavɔmavɔ ɖɔ mɔ̌ ɔ́, Salomɔ́ɔ gosín goxɔ Mawu Mavɔmavɔ tɔn mɛ, ɖo tɛn mímɛ́ e ɖo Gabawɔ́ɔn ɔ́ mɛ, bó lɛ́ kɔ wá Jeluzalɛ́mu, bó ɖu axɔ́sú ɖo Izlayɛ́li to ɔ́ nu. Salomɔ́ɔ kplé kɛkɛ́ví lɛ́ɛ kpódó sɔ́ lɛ́ɛ kpó: kɛkɛ́ví lɛ́ɛ bló afɔtɛ́nwe (1.400), bɔ sɔ́ lɛ́ɛ bló děgba atɔn (12.000). É ɖésúnɔ hɛn ɖě ɖó Jeluzalɛ́mu, bó má éé kpo lɛ́ɛ gbɔn toxo e è ko bló ɖ'ayǐ nú kɛkɛ́ví lɛ́ɛ kpó sɔ́ lɛ́ɛ kpó lɛ́ɛ mɛ. Axɔ́sú Salomɔ́ɔ bló bɔ kpatágan e ɖo Jeluzalɛ́mu ɔ́ sukpɔ́ kɛ́n ɖɔhun. É bló bɔ sɛ́dlutín sukpɔ́ sikomɔ́ɔtín e ɖo Cefela lɛ́ɛ ɖɔhun. Ejípu kpó Kewe kpó wɛ axɔ́sú Salomɔ́ɔ sín sɔ́ lɛ́ɛ gosín. Ajɔ̌tɔ́ ɖé lɛ́ɛ wɛ nɔ́ yi xɔ wá n'i sín dɔ̌n. Gankwɛ́ nǔwɔntɔn (600) wɛ ajɔ̌tɔ́ énɛ́ lɛ́ɛ nɔ dó xɔ kɛkɛ́ví ɖokpó sín Ejípu wá, bó nɔ xɔ sɔ́ ɖokpó yí gankwɛ́ kantɔn gban (150). Ajɔ̌tɔ́ ɖokpó énɛ́ lɛ́ɛ wɛ nɔ xɔ wá nú axɔ́sú Hitíti tɔn lɛ́ɛ bǐ kpódó axɔ́sú Silíi tɔn lɛ́ɛ bǐ kpó. Salomɔ́ɔ ná gbe ɖɔ è nǐ sá xwé ɖokpó nú Mawu Mavɔmavɔ, bó sá xwé ɖokpó nú émí ɖésúnɔ. Salomɔ́ɔ cyán súnnu adɔ̌kpo atɔn děgba we afɔwó (70.000), bɔ yě ná nɔ́ bɛ́ agban. É lɛ́ cyán súnnu adɔ̌kpo ɛnɛ (80.000), bɔ yědɛɛ lɛ́ɛ ná nɔ kpa awǐnnya ɖo sókan mɛ. É lɛ́ cyán súnnu afɔwó-afatɔ́n nǔwɔntɔn (3.600) jɛjí, bɔ yě ná nɔ azɔ̌ lɛ́ɛ nu. É sɛ́ mɛ dó axɔ́sú Tíi tɔn Ilámu gɔ́n, nú yě ní yi ɖɔ n'i ɖɔ: “A nǎ sɛ́dlutín tɔ́ ce Davídi bɔ é dó gbá xwé tɔn ná. Blǒ mɔ̌ nú nyi lɔmɔ̌. Un ɖo nǔ sɔ́ wɛ, bó ná sá xwé ɖokpó nú Mawu Mavɔmavɔ, Mawu ce; un ná sɔ́ xwé ɔ́ ɖó vo n'i; è nǎ nɔ́ dó zǎlínkpɔ́n zo n'i ɖo xwé ɔ́ gbe; wɔ̌xúxú e è nɔ to ɖě ɖó ɖě jí tɛgbɛ tɛgbɛ lɛ́ɛ ɔ́, è nǎ nɔ́ xwlé e ɖo xwé ɔ́ gbe; è nǎ nɔ́ sá vɔ̌ e è nɔ dó zo ɔ́ zǎnzǎn gbada ɖo xwé ɔ́ gbe. È nǎ nɔ́ sá vɔ̌ e è nɔ dó zo ɔ́ gbɔjɛzán lɛ́ɛ gbe, bó ná nɔ́ sá gbe e gbe sun wá jǐ é kpó Mawu Mavɔmavɔ, Mawu mǐtɔn sín xwezán ɖě lɛ́ɛ gbe kpó. Izlayɛ́li ví lɛ́ɛ kpo ɖo walɔ énɛ́ lɛ́ɛ zán wɛ káká jɛ égbé. Xɔ e gbá gbé un ja ɔ́ ɖó ná sɔ́ avɔ, ɖó Mawu mǐtɔn kló hú vodún lɛ́ɛ bǐ. È ka ná ɖɔ lɔ ɔ́, mɛɖé sixú bló nɔtɛn nú Mawu ǎ. Đó jǐnukúnsin d'agba sɔ mɔ̌ có, é sixú hɛn ɛ ǎ. Nyɛ ɖésúnɔ ɔ́, un sixú glá ɖɔ un ná bló nɔtɛn n'i ǎ. Nǔ ɖokpó e un jló ná bló kpowun ɔ́ wɛ nyí fí e è nǎ nɔ́ sɛn ɛ ɖe, bó ná nɔ́ sá vɔ̌ n'i ɖe é. Din ɔ́, sɛ́ mɛ e nyɔ́ siká kpó kpatágan kpó, ganvɔ kpó gan kpó sín azɔ̌ wa ganjí é ɖokpó dó mì. Mɛ ɔ́ ná lɛ́ nyɔ́ avɔ vɔvɔ, avɔ vɔvɔ cɛ́cɛ́, kpó avɔ kwélesinnɔ kpó sín azɔ̌ wa ganjí, bó ká ná lɛ́ tunwun lě e è nɔ kun nǔ dó nǔ mɛ gbɔn ɔ́ ganjí. É ná wá gɔ́ nú azɔ̌watɔ́ ce e alɔnu yětɔn mɛ́ ganjí, bɔ daá ce ko cyán ɖ'ayǐ nú mì lɛ́ɛ, bɔ yě ná wa azɔ̌; yě mɛ ɖě ɖo Jeluzalɛ́mu toxo mɛ ɖo Judáa, abǐ Judáa toxo ɖěvo mɛ. Sɛ́ sɛ́dlutín kpó siplɛ́tín kpó santálutín kpó dó mì sín Libáan sókan mɛ. Đó un tunwun ɖɔ mɛsɛntɔ́ towe lɛ́ɛ nyɔ́ Libáan sín atín lɛ́ɛ gbo. Mɛsɛntɔ́ ce lɛ́ɛ ná wá gɔ́ alɔ nú yě, bɔ yě ná gbo atín nú mì, bɔ é ná sukpɔ́ ɖésú, ɖó xwé e un jló ná sá ɔ́ ná sɔ́ avɔ, bó ná nyɔ́ ɖɛkpɛ ganjí. Nyɛ ɔ́, un ná ná linfín tɔ́nu děgba ɖě afɔwó (6.000), ɔ́ji tɔ́nu děgba ɖě afɔwó (6.000), vɛ̌ɛn lǐtli adɔ̌kpo kanɖé (800.000), kpódó ami lǐtli adɔ̌kpo kanɖé (800.000) kpó mɛsɛntɔ́ towe e ná gbo atín lɛ́ɛ.” Ée Tíi xɔ́sú Ilámu se mɔ̌ ɔ́, é wlán wěma sɛ́ dó Salomɔ́ɔ, bó ɖɔ n'i ɖɔ: “Mawu Mavɔmavɔ yí wǎn nú togun tɔn wú wɛ é sɔ́ we axɔ́sú ɖó yě nu. È ɖǒ ná dó kú nú Mawu Mavɔmavɔ, Mawu Izlayɛ́li tɔn; é mɛ e ɖó jǐnukúnsin kpódó ayǐkúngban kpó é; é ná vǐ súnnu ɖokpó Davídi, bɔ nǔnywɛ́ kpé e, ayixa tɔn sɔgbe, é bǐ ganjí. É hɛn ɔ́, é ná sá xwé nú Mawu Mavɔmavɔ, bó ná sá xwé é ɖésúnɔ tɔn. Din ɔ́, un sɛ́ mɛ e tunwun azɔ̌ ganjí, bɔ alɔnu tɔn mɛ́ ganjí ɔ́ ɖokpó dó we. É nɔ́ nyí Ilámu-Abíi, tɔ́ tɔn nyí Tíinu, bɔ nɔ tɔn jɔ ɖo Dan sín akɔta mɛ. É nyɔ́ siká kpó kpatágan kpó, ganvɔ kpó gan kpó, awǐnnya kpódó atín kpó sín azɔ̌ wa ganjí. É lɛ́ nyɔ́ avɔ vɔvɔ, avɔ kwélesinnɔ, abǐ avɔ vɔvɔ cɛ́cɛ́ sín azɔ̌ wa ganjí. É lɛ́ nyɔ́ la sín azɔ̌ wa ganjí. É lɛ́ tunwun lě e è nɔ kun nǔ dó nǔ mɛ gbɔn é ganjí. È zě azɔ̌ ɖěbǔ dó así n'i ɔ́, é nɔ́ tunwun lě e é ná bló gbɔn bɔ é ná nyɔ́ é. É ná wá gɔ́ nú azɔ̌watɔ́ towe e alɔ yětɔn nu mɛ́ ganjí lɛ́ɛ, kpódó ée daá towe axɔ́sú Davídi ko cyán ɖ'ayǐ lɛ́ɛ kpó, bɔ yě ná wa azɔ̌. Din ɔ́, sɛ́ blěe, ɔ́ji, ami kpó vɛ̌ɛn kpó e xó a ɖɔ ɔ́ dó mǐ. Mǐ ná gbo atín e ba wɛ a ɖe ɖo Libáan lɛ́ɛ bǐ nú we. Mǐ ná to yě, bɔ yě ná gbɔn xu jí káká wá Jafa, bɔ a nǎ bɛ̌ yě sín fínɛ́ yi Jeluzalɛ́mu.” Salomɔ́ɔ xa jǒnɔ nabí e ɖo Izlayɛ́li, bɔ tɔ́ tɔn Davídi ko sɔ́ kɛ́n yětɔn ɖ'ayǐ lɛ́ɛ bǐ, bó mɔ gbɛtɔ́ adɔ̌kpo tɛ́nwe děgba atɔn afɔtántɔn (153.600). É ɖe gbɛtɔ́ adɔ̌kpo atɔn děgba we afɔwó (70.000), bɔ yě ná nɔ́ bɛ́ agban. É ɖe gbɛtɔ́ adɔ̌kpo ɛnɛ (80.000), bɔ yě ná nɔ kpa awǐnnya ɖo sókan mɛ, bó ɖe gbɛtɔ́ afɔwó-afɔtántɔn (3.600), bɔ yě ná nɔ azɔ̌ lɛ́ɛ nu, bɔ mɛ bǐ ná wa azɔ̌. Salomɔ́ɔ jɛ xwé sá nú Mawu Mavɔmavɔ jí ɖo Jeluzalɛ́mu, ɖo Mɔliya só ɔ́ jí. É jɛ xwé ɔ́ sá jí ɖo fí e Mawu Mavɔmavɔ tɔ́n dó tɔ́ tɔn Davídi jí ɖe é. Tɛn e mɛ Davídi ko sɔ́ bɔ è nǎ sá xwé ɔ́ ɖó ɖo Ɔnáni Jebuzinu ɔ́ sín kɔ́xota fí e é nɔ́ fún jinukún ɖe ɔ́ wɛ. Hwenu e Salomɔ́ɔ ɖo xwe ɛnɛ bló wɛ ɖo zinkpo jí ɔ́ wɛ é jɛ Mawu xwé ɔ́ sá jí, ɖo sun wegɔ́ ɔ́ e ɖo xwe ɔ́ mɛ é. Jlɛ̌ e xɔ ɔ́ ná ɖó, bɔ Salomɔ́ɔ ɖɔ lɛ́ɛ ɖíe: ga tɔn ná nyí mɛ̌tlu gban, bɔ gblǒ tɔn ná nyí mɛ̌tlu wǒ. Hɔnnúwa e ɖo xɔ ɔ́ nukɔn ɔ́ sín gblǒ nyí mɛ̌tlu wǒ xɔ ɔ́ sín gblǒ ɖɔhun, bɔ jǐ yiyi tɔn nyí mɛ̌tlu kanɖé ko; è kɔn siká akú dó hɔnnúwa ɔ́ gbɔn xomɛ bǐ. È tɛ́ siplɛ́tín sín xwlɛ gbɔn xɔ ɖaxó ɔ́ sín dǒ lɛ́ɛ wú, bó kɔn siká akú dó xwlɛ lɛ́ɛ, bó ɖe děma kpó wlɔ kpɛví kpɛví kpó gbɔn wú. Awǐnnya xɔ akwɛ́ wɛ è dǒ ɖó acɔ́ nú xɔ ɔ́; siká e è zǎn ɔ́, Paawayímu wɛ è hɛn sín. È kɔn siká dó kpo lɛ́ɛ, bó kɔn dó kpekán lɛ́ɛ, bó kɔn dó dǒ lɛ́ɛ kpódó hɔn lɛ́ɛ kpó, lobo ɖe wɛnsagun susunɔ lɛ́ɛ gbɔn dǒ lɛ́ɛ wú. È lɛ̌ bló fí e è nɔ ylɔ́ ɖɔ tɛn mímɛ́ bǐ ɔ́, bɔ gblǒ tɔn nyí mɛ̌tlu wǒ xɔ ɔ́ sín gblǒ ɖɔhun, bɔ ga tɔn lɔ nyí mɛ̌tlu wǒ; siká akú tɔ́nu ko wɛ è kɔn gbɔn xɔ ɔ́ sín xomɛ bǐ. Siká kilóo vlɔ́ wɛ è dǒ bló hǔnjɛ́n lɛ́ɛ. È kɔn siká gbɔn xɔ e ɖo aga lɛ́ɛ lɔ mɛ. È sínsín gan dó bló wɛnsagun susunɔ we ná, bó kɔn siká dó, bó bɛ́ yě ɖó tɛn mímɛ́ bǐ ɔ́ mɛ. Wɛnsagun susunɔ we lɛ́ɛ ɔ́, awa yětɔn ɖo kikɛ, bɔ ga yětɔn bló mɛ̌tlu wǒ. Wɛnsagun nukɔntɔn ɔ́ sín awa ɖokpó bló mɛ̌tlu we adaɖé, bó yi sɔ́ xɔ ɔ́ sín dǒ, bɔ awa tɔn wegɔ́ ɔ́ lɔ bló mɛ̌tlu we adaɖé, bó yi sɔ́ wɛnsagun wegɔ́ ɔ́ sín awa. Wɛnsagun wegɔ́ ɔ́ sín awa ɖokpó bló mɛ̌tlu we adaɖé, bó yi sɔ́ xɔ ɔ́ sín dǒ, bɔ awa tɔn wegɔ́ ɔ́ lɔ bló mɛ̌tlu we adaɖé, bó yi sɔ́ wɛnsagun nukɔntɔn ɔ́ sín awa. Wɛnsagun we lɛ́ɛ sín awa lɛ́ɛ ɖo kikɛ, bɔ ga yětɔn bló mɛ̌tlu wǒ. Wɛnsagun lɛ́ɛ ɖo te ɖě bɔ dó ɖě wú, bó kpan nukɔn ali e byɔ́ xɔ ɔ́ mɛ é. È lɔn lɛ̌ɛnkanvɔ, bó dó bló xɔmɛgbovɔ ná, bó dó ahǒ kwélesinnɔ, vɔvɔ kpódó vɔvɔ cɛ́cɛ́ kpó, lobo ɖe wɛnsagun susunɔ lɛ́ɛ ɖ'é mɛ dó ba acɔ́ ná. È blǒ dotín we, bɔ jǐ yiyi yětɔn nyí mɛ̌tlu afɔtɔn-nukún-we, bɔ yě ná nɔ xwé ɔ́ nukɔn. È ɖǒ ata dotín lɛ́ɛ ɖokpó ɖokpó jí. Ata lɛ́ɛ ɖokpó ɖokpó sín jǐ yiyi nyí mɛ̌tlu we adaɖé. È blǒ wlɔ kpɛví kpɛví dó ata lɛ́ɛ wú, è blǒ glenádi kanwe ko (100), bó sin dó wlɔ kpɛví kpɛví lɛ́ɛ wú dó ɖó acɔ́ ná. È dǒ dotín lɛ́ɛ do nyi xɔ ɔ́ nukɔn. Đokpó ɖo ɖisíxwé, bɔ ɖokpó ɖo amyɔxwé nú hɔnli ɔ́. È nɔ ylɔ́ ée ɖo ɖisíxwé ɔ́ ɖɔ Yakíni; éé ɖo amyɔxwé ɔ́ ká nɔ nyí Bowazi. È zě ganvɔ dó bló vɔ̌sákpe ɖokpó ná, bɔ ga tɔn nyí mɛ̌tlu wǒ, gblǒ tɔn lɔ ɔ́ nyí mɛ̌tlu wǒ, jǐ yiyi tɔn nyí mɛ̌tlu atɔ́ɔ́n. È zě ganvɔ dó bló basya ɖaxó tobotobo ɖokpó ná. Gblǒ tɔn nyí mɛ̌tlu atɔ́ɔ́n, jǐ yiyi tɔn nyí mɛ̌tlu we adaɖé, bɔ goto tɔn nyí mɛ̌tlu afɔtɔn. Nyibú sín ɖiɖe gbɔn tó tɔn lɛ́ dó. È to yě ko ko ɖó mɛ̌tlu ɖokpó jí lɛ́ dó, bó to hǎ we. Nyibú lɛ́ɛ kpó basya ɖaxó ɔ́ kpó wɛ è kɔn ɖó kpɔ́. Nyibúsú ganvɔ tɔn wěwe jí wɛ basya ɔ́ jínjɔ́n. Nyibúsú ɔ́ atɔn kpan nukɔn totaligbé, atɔn kpan nukɔn gbadahwe jí, atɔn kpan nukɔn tofɔligbé, bɔ atɔn kpan nukɔn zǎnzǎnhwe jí. Yonu yětɔn ka lílɛ́ byɔ́ xomɛ ɖo basya ɖaxó ɔ́ glɔ́. Basya ɖaxó ɔ́ sín tlitli yi santimɛ́tlu tántɔn; è blǒ tó tɔn, bɔ é cí kɔ́fu sín tó ɖɔhun, bó kɛ folówa ɖɔhun. É nɔ́ hɛn sin lǐtli adɔ̌kpo ayizɛ́n (120.000). È zě ganvɔ dó bló basya wǒ ná, bó bɛ́ atɔ́ɔ́n ɖó xwé ɔ́ sín ɖisíxwé, bó bɛ́ atɔ́ɔ́n ɖó amyɔ tɔn xwé, bɔ è nǎ nɔ slá wǔ ɖ'é mɛ. È nɔ lɛ́ klɔ́ kanlin e è hu bó ná dó sá vɔ̌ e è nɔ dó zo ɔ́ ná lɛ́ɛ ɖ'é mɛ. Vɔ̌sánú-xwlémawutɔ́ lɛ́ɛ wɛ nɔ zé sin e ɖo basya ɖaxó ɔ́ mɛ ɔ́ dó slá wǔ ná. È zě siká dó kɔn zogbɛ́nhɛnnú wǒ ná, bɔ é sɔgbe xá jlɛ̌ e è nǎ ɔ́, bɔ è bɛ̌ yě ɖó xɔ ɖaxó ɔ́ mɛ. Atɔ́ɔ́n ɖo ɖisíxwé, bɔ atɔ́ɔ́n ɖo amyɔxwé. È blǒ távo wǒ, bó bɛ́ dó xɔ ɖaxó ɔ́ mɛ; atɔ́ɔ́n ɖo ɖisíxwé, bɔ atɔ́ɔ́n ɖo amyɔxwé. È zě siká dó kɔn gannú kanwe ko (100) ná. È blǒ kɔ́xota ɖokpó nú vɔ̌sánú-xwlémawutɔ́ lɛ́ɛ, bó lɛ́ bló kɔ́xota ɖaxó ɖěvo; è dǒ hɔn bǐ nu, bó kɔn ganvɔ dó. È zě basya ɖaxó tobotobo ɔ́ ɖó xwé ɔ́ sín ɖisíxwé, ɖo zwe e ɖo afɔligbé zǎnzǎnhwe jí ɔ́ kpá. Ilámu bló basya lɛ́ɛ, bó bló afínbɛ́nú lɛ́ɛ, lobo bló gannú lɛ́ɛ. Ilámu bló nǔ e axɔ́sú Salomɔ́ɔ zɔ́n ɛ nú Mawu xwé ɔ́ é bǐ. É bló dotín we, ata tobotobo we, bɔ è nǎ bɛ́ yě ɖó dotín lɛ́ɛ ta. È bló nǔ ɖɔ ɖɔhun we, bɔ è nǎ bɛ́ yě cyɔ́n dó ata tobotobo lɛ́ɛ ɖo dotín lɛ́ɛ jí. É bló atínsínsɛ́n e è nɔ ylɔ́ ɖɔ glenádi ɔ́ afɔwe (400) ɖó ɖɔ we e è cyɔ́n dó ata lɛ́ɛ wú. É to glenádi lɛ́ɛ hǎ we we dó ɖɔ ɖokpó ɖokpó wú dó ata lɛ́ɛ ɖokpó ɖokpó wú. É lɛ́ bló kɛkɛ́ví lɛ́ɛ, bó bló basya ɖó yě jí. É bló basya ɖaxó tobotobo ɖokpó, bó bló nyibúsú wěwe; basya ɔ́ ɖo nyibúsú lɛ́ɛ jí. É bló afíngannú lɛ́ɛ, pɛ́li lɛ́ɛ, kpódó gǎfu lɛ́ɛ kpó. Nǔ énɛ́ lɛ́ɛ e axɔ́sú Salomɔ́ɔ ɖɔ nú Ilámu-Abíi bɔ é bló nú Mawu Mavɔmavɔ xwé ɔ́ lɛ́ɛ ɔ́, ganvɔ wɛ è dǒ bló bǐ ná, bó ɖíɖí wǔ ná. Kɔ́kpe mɛ wɛ é kɔn nǔ énɛ́ lɛ́ɛ bǐ ɖe, ɖo Judɛ́ɛn tɔdo mɛ, ɖo Sukɔ́tu kpódó Seledata kpó sín gletoxo lɛ́ɛ tɛ́ntin. Salomɔ́ɔ zɔ́n bɔ è blǒ nǔ énɛ́ lɛ́ɛ, bɔ yě sukpɔ́ káká, bɔ è sɔ́ ba ná tunwun ganvɔ kilóo nabí e è zǎn ɔ́ ǎ. Salomɔ́ɔ ɖɔ bɔ è lɛ̌ bló sikánú e è nǎ nɔ́ zán ɖo Mawu xwé gbe lɛ́ɛ bǐ: vɔ̌sákpe e jí è nɔ dó zǎlínkpɔ́n zo ɖe é; siká akú wɛ è dǒ bló ná; távo e jí è nɔ bɛ́ wɔ̌xúxú e è nɔ xwlé Mawu lɛ́ɛ ɖó lɛ́ɛ. É zé siká akú dó bló zogbɛ́nhɛnnú lɛ́ɛ, zogbɛ́n yětɔn e è ɖǒ ná tá ɖó tɛn mímɛ́ bǐ ɔ́ nukɔn, lě e sɛ́n ɔ́ zɔ́n gbɔn é. É zé siká akú dó bló távo e jí è nɔ bɛ́ wɔ̌xúxú e è nɔ xwlé Mawu lɛ́ɛ ɖó lɛ́ɛ. Siká mímɛ́, siká akú wɛ è dǒ bló folówa lɛ́ɛ, zogbɛ́n lɛ́ɛ, kpódó nǔ e è nɔ dó bló myɔ ɖó ná lɛ́ɛ kpó nú zogbɛ́nhɛnnú lɛ́ɛ. Jǐví lɛ́ɛ, gannú lɛ́ɛ, kɔ́fu lɛ́ɛ, zǎlínkpɔ́nfyɔ́nú lɛ́ɛ ɔ́, siká akú wɛ è dǒ bló yě ná; hɔn e ɖo xwé ɔ́ nu lɛ́ɛ, tɛn mímɛ́ bǐ ɔ́ kpódó tɛn mímɛ́ ɔ́ kpó sín hɔn lɛ́ɛ ɔ́, siká wɛ è dǒ bló yě ná. Ée Salomɔ́ɔ wa azɔ̌ e ɖo Mawu Mavɔmavɔ xwé wú ɔ́ bǐ fó ɔ́, é ɖɔ bɔ è bɛ̌ nǔ e tɔ́ tɔn Davídi ko bɛ́ ɖ'ayǐ nú Mawu Mavɔmavɔ lɛ́ɛ wá: kpatágan, siká kpódó nǔ ɖěvo ɖěvo lɛ́ɛ kpó. É bɛ́ nǔ énɛ́ lɛ́ɛ bǐ ɖó Mawu xwé gbe, ɖo fí e dɔkun Mawu tɔn lɛ́ɛ nɔ́ nɔ é. Ée Salomɔ́ɔ bló nǔ lɛ́ɛ fó ɔ́, é ylɔ́ tomɛxó Izlayɛ́li tɔn lɛ́ɛ, akɔtagán lɛ́ɛ, kpódó hɛ̌nnugán Izlayɛ́li tɔn lɛ́ɛ bǐ kpó ɖo Jeluzalɛ́mu, bó ná yi zé akɔjijɛgbá Mawu Mavɔmavɔ tɔn ɔ́ sín Sinyɔ́ɔ Davídi Toxo mɛ, sɔ́ yi Mawu Mavɔmavɔ xwé gbe. Énɛ́ ɔ́, Izlayɛ́li ví lɛ́ɛ bǐ wá axɔ́sú ɔ́ gɔ́n, bó ná ɖu xwe e yě nɔ́ ɖu ɖo sun tɛ́nwegɔ́ ɔ́ mɛ xwewú xwewú é. Ée tomɛxó Izlayɛ́li tɔn lɛ́ɛ wá ɔ́, Levíi ví lɛ́ɛ zé akɔjijɛgbá ɔ́. Vɔ̌sánú-xwlémawutɔ́ Levíi ví lɛ́ɛ wɛ zé akɔjijɛgbá Mawu Mavɔmavɔ tɔn ɔ́ kpó goxɔ ɔ́ kpó, bó bɛ́ nǔ e ɖo goxɔ ɔ́ mɛ lɛ́ɛ. Axɔ́sú Salomɔ́ɔ kpódó Izlayɛ́li ví e wá gɔ̌n tɔn lɛ́ɛ kpó bǐ kplé ɖo akɔjijɛgbá ɔ́ nukɔn. Gbɔ̌ kpó nyibú kpó e yě dǒ sá vɔ̌ ná lɛ́ɛ sukpɔ́ káká bɔ è sixú xa ǎ. Énɛ́ ɔ́ gúdo ɔ́, vɔ̌sánú-xwlémawutɔ́ lɛ́ɛ zé akɔjijɛgbá Mawu Mavɔmavɔ tɔn ɔ́ ɖó tɛn tɔn mɛ, ɖo Tɛn mímɛ́ bǐ ɔ́ mɛ, ɖo Mawu xwé ɔ́ gbe, ɖo wɛnsagun susunɔ lɛ́ɛ sín awa glɔ́. Akɔjijɛgbá ɔ́ sín tɛnmɛ wɛ wɛnsagun susunɔ lɛ́ɛ sín awa ɖo dlɛ̌ndlɛ́n ɖe, bɔ akɔjijɛgbá ɔ́ kpó kpo e è nɔ zé ná lɛ́ɛ kpó ná ɖo awa yětɔn lɛ́ɛ glɔ́. Kpo lɛ́ɛ ɖi ga ɖésú; nú è ɖo akɔjijɛgbá ɔ́ kpódó hɔnli ɔ́ kpó tɛ́ntin ɔ́, è nɔ mɔ kpo lɛ́ɛ sín nuvínu sɛ́ dó. È ka ɖo kɔ́xota ɔ́, è nɔ mɔ yě sɛ́ dó ǎ. Bǐ kpo ɖo mɔ̌ káká wá jɛ égbé. Nǔɖé ɖo akɔjijɛgbá ɔ́ mɛ zɛ awǐnnyatɛ we e Mɔyízi bɛ́ d'é mɛ ɖo Holɛ́bu hwenu e Izlayɛ́li ví lɛ́ɛ tɔ́n sín Ejípu, bɔ Mawu Mavɔmavɔ jɛ akɔ xá yě ɔ́ wú ǎ. Vɔ̌sánú-xwlémawutɔ́ lɛ́ɛ tɔ́n sín Tɛn mímɛ́ ɔ́ mɛ. Vɔ̌sánú-xwlémawutɔ́ e wá fínɛ́ lɛ́ɛ bǐ slá wǔ, é sɔ́ nyí gbɛ̌ta e jí azɔ̌ ɖe ɔ́ kɛ́ɖɛ́ wɛ slá wǔ ǎ. Levíi ví hansinɔ lɛ́ɛ: Asáfu, Hemani, Yedutún, kpó vǐ yětɔn lɛ́ɛ kpó, kpódó hɛ̌nnumɔ yětɔn lɛ́ɛ kpó dó lɛ̌ɛnkanvɔ ɖagbe ɖagbe. Yě hɛn agǐdigbo, bó hɛn kanhún, bó hɛn kpɛn, bó ɖo te vɔ̌sákpe ɔ́ sín zǎnzǎnhwe jí, bɔ vɔ̌sánú-xwlémawutɔ́ e nyɔ́ kpɛn kún ganjí lɛ́ɛ kantɔn (120) ɖo akpá yětɔn. Kpɛnkúntɔ́ lɛ́ɛ kpó nǔxotɔ́ lɛ́ɛ kpó bǐ ɖo kpɔ́, bó ɖo han ji dó kpa susu nú Mawu Mavɔmavɔ wɛ, bó ɖo nyǐkɔ tɔn sɔ́ su wɛ. Yě ɖo kpɛn kún wɛ, bó ɖo hǔn kpó nǔxonú ɖěvo lɛ́ɛ kpó xo wɛ; yě ɖo susu kpa nú Mawu Mavɔmavɔ wɛ ɖɔ: “Mawu Mavɔmavɔ nyɔ́. Xomɛnyínyɔ́ tɔn ɖó dogbó ǎ”. Hwenɛ́nu ɔ́, akpɔ́kpɔ́ ɖé wá gɔ́ Mawu Mavɔmavɔ xwé ɔ́. Ée akpɔ́kpɔ́ gɔ́ xwé ɔ́ mɔ̌ ɔ́, vɔ̌sánú-xwlémawutɔ́ lɛ́ɛ ɖó azɔ̌ yětɔn te, ɖó susu Mawu Mavɔmavɔ tɔn gɔ́ xwé ɔ́. Énɛ́ ɔ́, Salomɔ́ɔ sú xó bó ɖɔ: “Mawu Mavɔmavɔ! A ɖɔ émí ná nɔ zǐnflú mɛ. Nyɛ ka gbá nɔtɛn towe nú we, fí e a nǎ nɔ káká sɔ́yi é!” Izlayɛ́li togun ɔ́ bǐ kplé bó ɖo te, bɔ axɔ́sú Salomɔ́ɔ lílɛ́ kpan nukɔn yě, bó xo ɖɛ dó yě jí, bó ɖɔ: “Susu nú Mawu Mavɔmavɔ, Mawu Izlayɛ́li tɔn! É ɖésúnɔ wɛ ɖɔ xó nú tɔ́ ce, bɔ nǔ e é ɖɔ ɔ́, é ɖésúnɔ sɔ́ alɔ tɔn dó bló. É ɖɔ: ‘Sín gbe e gbe un ko ɖe togun ce Izlayɛ́li ɔ́ tɔ́n sín Ejípu ɔ́, un sɔ́ toxo ɖěbǔ ɖo Izlayɛ́li sín toxo lɛ́ɛ mɛ, bónú è nǎ sá xwé ɖé, bónú má nɔ́ ɖe susu ce xlɛ́ ɖo fínɛ́ ǎ; un ka sɔ́ mɛɖé ɖó togun ce Izlayɛ́li ɔ́ nu ǎ. Lo ɔ́, un zé Jeluzalɛ́mu bónú nyǐkɔ ce ná nɔ fínɛ́; un sɔ́ Davídi bɔ é ɖu axɔ́sú ɖo togun ce Izlayɛ́li ɔ́ nu!’ Salomɔ́ɔ lɛ́ ɖɔ: tɔ́ ce Davídi wɛ kó lin ɖɔ émí ná sá xwé nú Mawu Mavɔmavɔ, Mawu Izlayɛ́li tɔn. Bɔ Mawu Mavɔmavɔ ɖɔ n'i ɖɔ: ‘Linlin e ɖó wɛ a ɖe, bó ɖɔ émí ná sá xwé ɖokpó nú mì ɔ́, linlin ɖagbe wɛ. Amɔ̌, hwi wɛ ná sá xwé nú mì ǎ, vǐ towe jiji wɛ ná sá xwé nú mì.’ Xó énɛ́ e Mawu Mavɔmavɔ ɖɔ ɔ́, é bló ɖ'é jí. Un jɛ tɔ́ ce Davídi sín tɛnmɛ, bo jínjɔ́n axɔ́súzinkpo Izlayɛ́li tɔn ɔ́ jí, lě e Mawu Mavɔmavɔ ɖɔ gbɔn é, bó sá xwé ɔ́ nú Mawu Mavɔmavɔ, Mawu Izlayɛ́li tɔn ɔ́. Gbǎ e mɛ nǔ e Mawu Mavɔmavɔ jɛ akɔ xá Izlayɛ́li ví lɛ́ɛ ɔ́ ɖe ɔ́, un zé dó xɔ ɔ́ mɛ.” Salomɔ́ɔ yi cí vɔ̌sákpe Mawu Mavɔmavɔ tɔn ɔ́ nukɔn, bó kpan nukɔn Izlayɛ́li ví e kplé lɛ́ɛ bǐ, bó dlɛ́n alɔ. Salomɔ́ɔ ká kó zé ganvɔ dó bló nǔ kpe ɖɔhun ɖé nyi kɔ́xo ɔ́ ta. Ga tɔn nyí mɛ̌tlu we adaɖé, bɔ gblǒ tɔn lɔ ɔ́ nyí mɛ̌tlu we adaɖé, bɔ jǐ yiyi tɔn nyí mɛ̌tlu ɖokpó adaɖé. É xá nǔ ɔ́ jí, bó jɛ kpoli kpan nukɔn Izlayɛ́li ví e kplé lɛ́ɛ bǐ, bó dlɛ́n alɔ tɔn lɛ́ɛ sɛ́ dó jǐnukúnsin, bó ɖɔ: “Mawu Mavɔmavɔ, Mawu Izlayɛ́li tɔn! Nǔmɛsɛn towe ɖɔhun ɖě sɔ́ tíin ǎ; ɖě sɔ́ ɖo jǐxwé aga ǎ, ɖě ká sɔ́ ɖo do ɖo ayǐkúngban jí fí ǎ. Mɛsɛntɔ́ towe e nɔ xwedó sɛ́n towe lɛ́ɛ kpódó ayixa yětɔn bǐ kpó lɛ́ɛ ɔ́, a nɔ́ nɔ gbejí nú akɔ e a jɛ xá yě ɔ́, bó nɔ́ ɖe xomɛnyínyɔ́ towe xlɛ́ yě. Akpá e a dǒ nú tɔ́ ce Davídi mɛsɛntɔ́ towe ɔ́, a ɖe; nǔ e a ɖɔ n'i ɔ́ ɖíe hwi ɖésúnɔ bló ɖ'é jí égbé e. Din ɔ́, Mawu Mavɔmavɔ, Mawu Izlayɛ́li tɔn, lɛ̌ ɖe akpá e a dǒ nú tɔ́ ce Davídi bo ɖɔ n'i ɖɔ nú vǐ tɔn lɛ́ɛ nyi sɛ́n émítɔn lɛ́ɛ, bó xwedó émí lě e é ɖésúnɔ blǒ gbɔn ɔ́, mɛ e ná nɔ tɛn tɔn mɛ, ɖo axɔ́súzinkpo Izlayɛ́li tɔn ɔ́ jí ɔ́, é kún ná ba kpo ɖo yě mɛ gbeɖé ó. Din ɔ́, Mawu Mavɔmavɔ, Mawu Izlayɛ́li tɔn, akpá e a dǒ nú mɛsɛntɔ́ towe Davídi ɔ́ ní bó nyí mɔ̌. “Mawu ka sixú nɔ ayǐkúngban jí xá gbɛtɔ́ lɛ́ɛ nǔgbó a? Jǐnukúnsin ɖíe sɔ́ avɔ sɔ mɔ̌ cóbó ma ka sixú hɛn ɛ ǎ e! Ani ka sɔ́ nyí xɔ élɔ́ e nyɛ gbá n'i ɔ́ tɔn? Amɔ̌, Mawu Mavɔmavɔ, Mawu ce, nyi kɔ kpɔ́n mì; ɖǒtó vo e sa wɛ un ɖe ɔ́. Xó e sú wɛ nyɛ mɛsɛntɔ́ towe ɖe ɔ́ kpódó ɖɛ e xo wɛ un ɖe ɔ́ kpó ɔ́, wlǐ tó. Nukún towe ní nɔ hunhun ɖó xɔ élɔ́ jí zǎn kéze; tɛn élɔ́ e mɛ a ɖɔ émí ná nɔ é. Đǒtó ɖɛ e nyɛ mɛsɛntɔ́ towe ɖo tɛn élɔ́ mɛ bó ɖo xixo sɛ́ dó we wɛ é! Đǒtó xó e sú ylɔ́ we wɛ un ɖe é, bó ɖótó xó e togun towe Izlayɛ́li kpan nukɔn tɛn élɔ́ bó ɖo susu sɛ́ dó we wɛ é! Mawu Mavɔmavɔ, ɖǒtó mǐ ɖo jǐxwé fí e a nɔ nɔ é! Đǒtó mǐ, bó sɔ́ hwɛ kɛ mǐ! “Nú mɛɖé hu hwɛ dó nɔzo tɔn, bónú è ɖɔ n'i ɖɔ é ní xwlé nǔ dandan, bɔ é wá xwlé nǔ ɖo vɔ̌sákpe towe nukɔn, ɖo xɔ élɔ́ mɛ hǔn, Mawu Mavɔmavɔ, nɔ jǐxwé dɔ̌n bó ɖótó; blǒ gbɔn ɖě; gbo hwɛ nú mɛsɛntɔ́ towe lɛ́ɛ, nú mɛ e wa nǔ nyi do ɔ́, è nǎ dɔn tó n'i, bɔ hwɛ ka ná jó mɛ e nyí hwɛjijɔnɔ é. “Ényí Izlayɛ́li ví lɛ́ɛ hu hwɛ dó we, bónú é ná sín énɛ́ ɔ́ wú bɔ kɛntɔ́ yětɔn lɛ́ɛ ná ɖu ɖo yě jí ɔ́, nú yě byɔ́ hwɛsɔ́kɛ ɔ́, nú yě kpa susu nú we ɔ́, nú yě xo ɖɛ lobo sa vo nú we ɖo xwé élɔ́ gbe hǔn, nɔ jǐxwé dɔ̌n, bó ɖótó yě, bó sɔ́ hwɛ kɛ togun towe Izlayɛ́li ɔ́, bó kplá yě wá ayǐkúngban e a nǎ tɔ́gbó yětɔn lɛ́ɛ kpó yě ɖésúnɔ lɛ́ɛ kpó ɔ́ jí. “Hwenu e jǐnukúnsin ná sú dó togun towe Izlayɛ́li, bɔ jǐ má sɔ́ ná ja ǎ, ɖó yě hu hwɛ dó we wútu ɔ́, nú yě kpan nukɔn tɛn élɔ́ bó xo ɖɛ ɔ́, nú yě kpa susu nú we ɔ́, nú yě lɛ́ kɔ sín hwɛ yětɔn lɛ́ɛ gúdo, ɖó a dɔn tó nú yě wútu ɔ́, nɔ jǐxwé dɔ̌n, bó ɖótó yě, bó sɔ́ hwɛ kɛ togun towe mɛsɛntɔ́ towe lɛ́ɛ. Xlɛ́ ali ɖagbe e yě ɖó ná gbɔn ɔ́ yě, bó bló bónú jǐ ní ja kɔn nyi ayǐkúngban e a nǎ yě, bɔ é nyí yětɔn ɔ́ jí. “Hwenu e adɔ abǐ jɛmɛjí ná byɔ́ to ɔ́ mɛ ɔ́, hwenu e jinukún lɛ́ɛ ná fyɔ́ abǐ yě ná nyɔ dó te ɔ́, hwenu e wɛn kpó bɔkle kpó ná vun blá to ɔ́, hwenu e kɛntɔ́ lɛ́ɛ ná hun káká yi gba Izlayɛ́li ví lɛ́ɛ ɖo toxo yětɔn e yě mɛ ahohó lɛ́ lɛ̌ dó lɛ́ɛ mɛ ɔ́, hwenu e nǔ baɖabaɖa ɖěbǔ, abǐ azɔnhwi ná byɔ́ to ɔ́ mɛ ɔ́, nú togun towe Izlayɛ́li ɔ́ mɔ ɖɔ émí wa nǔ nyi do, bɔ hwɛ tɔn vɛ́ n'i, bɔ é sa vo sɛ́ dó we ɔ́, nú é kpan nukɔn xwé élɔ́, bó dlɛ́n alɔ tɔn, lobo xo ɖɛ sɛ́ dó we hǔn, nɔ jǐ, fí e a nɔ nɔ é, bó ɖótó e, bó sɔ́ hwɛ tɔn lɛ́ɛ kɛ ɛ. Blǒ nǔ e jɛ xá mɛ ɖokpó ɖokpó é, nú é ní sɔgbe xá lě e é zán gbɛ tɔn gbɔn é, ɖó a tunwun ayixa tɔn; hwi ɖokpónɔ géé wɛ tunwun gbɛtɔ́ lɛ́ɛ bǐ sín ayixa. A blǒ gbɔn mɔ̌ ɔ́, Izlayɛ́li ví lɛ́ɛ ná nɔ́ ɖó sísí nú we, bó ná nɔ́ wa nǔ lě e a jlǒ gbɔn é hwebǐnu ɖo ayǐkúngban e a nǎ tɔ́gbó mǐtɔn lɛ́ɛ ɔ́ jí. “Mɔ̌ ɖokpó ɔ́, ényí toɖévomɛnu e ma nyí Izlayɛ́li ví ǎ é ɖě se lě e nyǐkɔ towe d'agba gbɔn é, lě e mɛɖé ma nɔ sixú nɔ te hlɔ̌nhlɔ́n towe nukɔn gbɔn ǎ é, lě e a kpé nǔ bǐ wú gbɔn ɔ́, bó gosín to línlín ɖé mɛ wá, lobo xo ɖɛ ɖo xwé élɔ́ gbe hǔn, nɔ jǐxwé fí e a nɔ nɔ é, bó ɖótó e, bó ná ɛ nǔ e é byɔ́ we é; a blǒ gbɔn mɔ̌ ɔ́, togun e ɖo ayǐkúngban jí lɛ́ɛ bǐ ná tunwun we, bó ná ɖó sísí nú we togun towe Izlayɛ́li ɖɔhun, bó ná tunwun ɖɔ nyǐkɔ towe wɛ ɖo xwé élɔ́ e un sá ɔ́ jí. “Hwenu e a nǎ ná gbe Izlayɛ́li ví lɛ́ɛ, bɔ yě ná yi ahwan fun xá kɛntɔ́ yětɔn lɛ́ɛ gbé ɔ́, nú yě kpan nukɔn toxo e a sɔ́ ɔ́ kpódó xwé élɔ́ e un sá nú we ɔ́ kpó, bó xo ɖɛ sɛ́ dó hwi Mawu Mavɔmavɔ hǔn, nɔ jǐxwé dɔ̌n, bó ɖótó yě; ɖǒtó vo e sa sɛ́ dó we wɛ yě ɖe é, bó wá dó alɔ yě. “Gbɛtɔ́ ɖě nɔ́ gɔn hwɛ hu ǎ. Hwenu e Izlayɛ́li ví lɛ́ɛ ná hu hwɛ dó we, bɔ a nǎ sin xomɛ dó yě, bó ná jó yě nú kɛntɔ́ yětɔn lɛ́ɛ, bɔ yě ná wlí kannumɔ yětɔn hɛn yi to yětɔn e lín lɛ́ɛ, abǐ ée yá lɛ́ɛ ɖě mɛ ɔ́, nú yě byɔ́ yěɖée mɛ ɖo to e mɛ yě nyí kannumɔ ɖe ɔ́ mɛ ɔ́, nú yě lɛ́ kɔ wá gɔ̌n towe, bó sa vo nú we ɖo to e mɛ è wlǐ yě yi ɔ́ mɛ, bó ɖɔ: ‘Mǐ vɛ́ tóli, mǐ hu hwɛ, mǐ wa nǔ nyi do’ ɔ́, nú yě lɛ̌ kɔ wá gɔ̌n towe kpó ayixa yětɔn bǐ kpó, kpódó lǐndɔ̌n yětɔn bǐ kpó ɔ́, nú yě nɔ to e mɛ kɛntɔ́ yětɔn lɛ́ɛ wlí kannumɔ yětɔn hɛn yi ɔ́ mɛ, bó kpan nukɔn to e a nǎ tɔ́gbó yětɔn lɛ́ɛ, toxo e a sɔ́ ɔ́, xwé e un sá nú we ɔ́, bó xo ɖɛ sɛ́ dó we hǔn, nɔ jǐxwé, fí e a nɔ nɔ ɔ́, bó ɖótó yě; ɖǒtó vo e sa sɛ́ dó we wɛ yě ɖe é bó wá dó alɔ yě; sɔ́ hwɛ e togun towe hu dó we ɔ́ kɛ ɛ. “Mawu ce, kpɔ́n jǐ ce; ɖǒtó ɖɛ e xo sɛ́ dó we wɛ un ɖe sín tɛn élɔ́ mɛ é. Din ɔ́, Mawu Mavɔmavɔ, kplá akɔjijɛgbá e mɛ hlɔ̌nhlɔ́n towe ɖe ɔ́ wá tɛn élɔ́ e è blǒ ɖ'ayǐ, bɔ a nǎ gbɔjɛ́ ɖ'é mɛ é mɛ. Mawu Mavɔmavɔ, mɛ e nɔ xwlé vɔ̌sánú we lɛ́ɛ ɔ́, hwlɛngán ɔ́ ní nyí awu bó nɔ kɔ nú yě; mɛ e nɔ́ nɔ gbejí nú we lɛ́ɛ ní xlɛ́ ɖɔ nǔ nyɔ́ nú émí, lobo j'awǎ. Mawu Mavɔmavɔ, mɛ e a sɔ́ axɔ́sú ɔ́, ma jó e dó ó; ma wɔn ɖagbe e a wa nú mɛsɛntɔ́ towe Davídi lɛ́ɛ ó.” Hwenu e Salomɔ́ɔ xo ɖɛ fó ɔ́, myɔ ɖé jɛ te sín jǐxwé, bó wá fyɔ́ vɔ̌ e è nɔ dó zo ɔ́ kpódó kɔnɖókpɔ́ vɔ́ lɛ́ɛ kpó, bɔ susu Mawu Mavɔmavɔ tɔn gɔ́ xwé ɔ́. Vɔ̌sánú-xwlémawutɔ́ lɛ́ɛ sɔ́ sixú byɔ́ Mawu Mavɔmavɔ xwé ɔ́ gbe ǎ, ɖó susu Mawu Mavɔmavɔ tɔn gɔ́ xwé ɔ́. Izlayɛ́li ví lɛ́ɛ bǐ mɔ myɔ kpódó susu Mawu Mavɔmavɔ tɔn kpó jɛ te dó xwé ɔ́ jí, bɔ yě jɛ kpo bo xwe agbɔ̌nnusú do ɖo kpé ɔ́ jí, bó ɖo susu kpa nú Mawu Mavɔmavɔ wɛ ɖɔ: “Mawu Mavɔmavɔ nyɔ́, xomɛnyínyɔ́ tɔn ɖó dogbó ǎ!” Axɔ́sú Salomɔ́ɔ kpódó Izlayɛ́li togun ɔ́ bǐ kpó sá vɔ̌ nú Mawu Mavɔmavɔ. Axɔ́sú Salomɔ́ɔ fɔ nyibú adɔ̌kpo ɖě afɔwó (22.000) kpódó gbɔ̌ adɔ̌kpo ayizɛ́n (120.000) kpó dó sá vɔ̌ nú Mawu. Lě e axɔ́sú ɔ́ kpódó Izlayɛ́li togun ɔ́ bǐ kpó hun Mawu xwé ɔ́ gbɔn é nɛ́. Vɔ̌sánú-xwlémawutɔ́ lɛ́ɛ ɖo azɔ̌ yětɔn jí. Levíi ví lɛ́ɛ ɖo nǔxonú e axɔ́sú Davídi bló nú Mawu lɛ́ɛ xo wɛ. Yě ɖo susu kpa nú Mawu Mavɔmavɔ wɛ ɖó wǎn yíyí tɔn ma ɖó dogbó ɔ́ wú, lě e Davídi kplɔ́n yě gbɔn é. Vɔ̌sánú-xwlémawutɔ́ ɖé lɛ́ɛ ɖo kpɛn kún wɛ ɖo nukɔn yětɔn, bɔ Izlayɛ́li togun ɔ́ bǐ ɖo te. Énɛ́ ɔ́, Salomɔ́ɔ jó kɔ́xota e ɖo goxɔ ɔ́ nukɔn ɔ́ bǐ nú Mawu Mavɔmavɔ. Đó vɔ̌sákpe ganvɔ tɔn e Salomɔ́ɔ bló ɔ́ sixú hɛn vɔ̌ lɛ́ɛ bǐ ǎ, bɔ Salomɔ́ɔ gbɔ bó dó vɔ̌ e è nɔ dó zo lɛ́ɛ, nǔníná jinukún tɔn lɛ́ɛ kpó kanlin e è dǒ sá kɔnɖókpɔ́vɔ́ ná lɛ́ɛ sín jǒ kpó zo ɖo kɔ́xo ɔ́ ta. Salomɔ́ɔ ɖu azavaxwe ɔ́ hwe énɛ́ ɔ́ nu kpódó Izlayɛ́li ví lɛ́ɛ bǐ kpó nú azǎn tɛ́nwe. Yě gosín fí tɛnmɛ tɛnmɛ ɖo to ɔ́ mɛ. Yě gosín káká Lɛbo-Hamáti ɖo totaligbé, bó lɛ́ gosín káká tɔsisa Ejípu tɔn ɔ́ kɔn ɖo tofɔligbé. Ée yě ɖu azavaxwe ɔ́ bɔ ayǐ hɔ́n ɔ́, yě ɖu xwe gɛnnyigɛnnyi ɖokpó; hǔn azǎn tɛ́nwe wɛ yě sɔ́ ɖó te dó zé vɔ̌sákpe ɔ́ dó alɔ mɛ nú Mawu; énɛ́ ɔ́ gúdo ɔ́, yě lɛ́ sɔ́ azǎn tɛ́nwe ɖěvo ɖó te dó ɖu azavaxwe ɔ́. Azǎn ko-nukún-atɔngɔ́ ɔ́ e ɖo sun tɛ́nwegɔ́ ɔ́ mɛ ɔ́ gbe ɔ́, Salomɔ́ɔ nyi togun ɔ́, bɔ mɛ ɖokpó ɖokpó ɖidó xwé. Yě bǐ ɖo awǎ jɛ wɛ, xomɛ ɖo yě hun wɛ, ɖó ɖagbe e Mawu Mavɔmavɔ wa nú Davídi, bo wa nú Salomɔ́ɔ, lobo wa nú togun tɔn Izlayɛ́li ɔ́ wú. Hwenu e axɔ́sú Salomɔ́ɔ sá xwé nú Mawu Mavɔmavɔ fó, bó sá xwé é ɖésú tɔn, lobo bló nǔ e é lin ná bló ɖó xwé we lɛ́ɛ gbe é bǐ ɔ́, Mawu Mavɔmavɔ tɔ́n dó jǐ tɔn zǎn mɛ, bó ɖɔ n'i ɖɔ: “Un se ɖɛ towe, un yí gbe bó ná zé tɛn élɔ́, bɔ è nǎ nɔ́ sá vɔ̌ nú mì ɖo fí. Nú un sú jǐnukúnsin, bɔ jǐ má sɔ́ ná ja ǎ ɔ́, nú un ná gbe wɛn lɛ́ɛ bɔ yě ná ɖu jinukún e ɖo to ɔ́ mɛ lɛ́ɛ bǐ ɔ́, nú un sɛ́ jɛmɛjí dó togun ce, nú togun ce e wú nyǐkɔ ce ɖe ɔ́ lɛ́ kɔ sín nǔ nyanya e wa wɛ é ɖe lɛ́ɛ gúdo, bó sɔ́ éɖée hwe, bó xo ɖɛ, bó ba mì ɔ́, un ná nɔ jǐxwé dɔ̌n, bó ná ɖótó e; un ná sɔ́ hwɛ tɔn lɛ́ɛ kɛ ɛ, bó ná ɖó nǔ e ɖo jijɛ wɛ ɖo to tɔn mɛ ɔ́ bǐ te. Bɛ́ sín din ɔ́, nukún ce ná ɖo te, tó ce ná ɖo jɛ, bɔ un ná ɖótó ɖɛ e è nǎ xo ɖo tɛn élɔ́ mɛ lɛ́ɛ bǐ. Din ɔ́, un sɔ́ xwé élɔ́, un yí ɖɛ towe, bó se vo e a sa sɛ́ dó mì ɔ́. Un yí xwé élɔ́ e a sá nú mì, bɔ é ná nyí ce káká sɔ́yi ɔ́, bó ná nɔ́ ɖe nyɛɖée xlɛ́ mi ɖo fínɛ́, bɔ nukún ce kpódó ayixa ce kpó ná ɖo jǐ tɔn hwebǐnu. Hwɛ ɔ́, nú a zǎn gbɛ ganjí ɖo nukɔn ce tɔ́ towe Davídi ɖɔhun ɔ́, nú a wa nǔ e un zɔ́n we lɛ́ɛ bǐ ɔ́, nú a nyi sɛ́n ce lɛ́ɛ, bó xwedó nǔ e un ɖɔ lɛ́ɛ bǐ ɔ́, un ná sɔ́ axɔ́súzinkpo axɔ́súɖuto towe tɔn ɖó te ɖo Izlayɛ́li, lě e un ɖɔ nú tɔ́ towe Davídi gbɔn ɖɔ é kún ná ba mɛ e ná nɔ axɔ́súzinkpo tɔn jí ɖo Izlayɛ́li ɔ́ kpo gbeɖé ɖo vǐ tɔn lɛ́ɛ mɛ ó é. Amɔ̌, nú mi lɛ́ kɔ sín gǔdo ce ɔ́, nú mi ma bló nǔ e un zɔ́n mi lɛ́ɛ ǎ ɔ́, nú mi ma nyi sɛ́n ce lɛ́ɛ, bó xwedó nǔ e un ɖɔ lɛ́ɛ ǎ ɔ́, nú mi sɛn vodún bó ɖe kɔ́ nú yě ɔ́, un ná ɖe mi sín to ce e un ná mi ɔ́ mɛ. Un ná jó xwé élɔ́ e a sá nú mì bɔ un yí din ɔ́ dó, bɔ Izlayɛ́li to ɔ́ ná húzú to gbigba, bó ná húzú slǎmɛɖɔnú ɖo togun lɛ́ɛ bǐ mɛ. Bɔ xwé élɔ́ e ɖó susu sɔ mɔ̌ ɔ́, mɛɖé gbɔn akpá tɔn ɔ́, é ná nɔ kpácá ɛ, bɔ é ná nɔ́ sú xó. È nǎ nɔ́ ɖɔ: ‘Étɛ́wú wɛ Mawu Mavɔmavɔ ka wa nǔ xá to élɔ́ kpódó xwé élɔ́ kpó gbɔn mɔ̌?’ Bɔ è nǎ yí gbe nú yě ɖɔ: ‘Mawu Mavɔmavɔ, Mawu tɔ́gbó yětɔn lɛ́ɛ tɔn e ɖe yě tɔ́n sín Ejípu ɔ́ wɛ yě jó dó, bó tɛ́ dó vodún lɛ́ɛ wú, bó nɔ́ ɖe kɔ́ nú yě, lobo nɔ sɛn yě. Nǔ énɛ́ ɔ́ wú wɛ Mawu Mavɔmavɔ sɛ́ awě énɛ́ lɛ́ɛ bǐ dó yě.’ ” Xwe ko wɛ Salomɔ́ɔ sɔ́ ɖó te, bó dó sá Mawu Mavɔmavɔ xwé ɔ́ kpódó xwé é ɖésúnɔ tɔn kpó. Énɛ́ ɔ́ gúdo ɔ́, é vɔ́ toxo e axɔ́sú Tíi tɔn Ilámu ná ɛ lɛ́ɛ blóɖó, bó bɛ́ Izlayɛ́li ví lɛ́ɛ dó toxo lɛ́ɛ mɛ. Ée é bló énɛ́ ɔ́ fó ɔ́, é yi tɔ́n ahwan Hamáti-Sova toxo ɔ́. É ɖó Tadumɔ́ɔ toxo e ɖo gbětótló mɛ ɔ́ ayǐ; toxo e é kó ɖó ayi ɖo Hamáti yíkúngban jí, bó nɔ́ bɛ́ agban dó yě mɛ lɛ́ɛ ɔ́, é vɔ́ bǐ blóɖó. É ɖó Bɛti-Holɔ́ni-Aga-Tɔn ɔ́, kpódó Bɛti-Holɔ́ni-Dodomɛ-Tɔn ɔ́ kpó ayǐ. Toxo énɛ́ lɛ́ɛ ɔ́, è mɛ ahohó lɛ́ lɛ̌ dó yě, bó dó hɔntogbó ná, bɔ è nɔ sú. Salomɔ́ɔ vɔ́ Baaláti toxo ɔ́ ɖó ayǐ. É gbá toxo e mɛ é ná nɔ bɛ́ agban tɔn lɛ́ɛ dó lɛ́ɛ, bó gbá ée mɛ é ná nɔ bɛ́ ahwankɛkɛ́ví tɔn lɛ́ɛ dó lɛ́ɛ, bó gbá toxo e mɛ é ná nɔ bɛ́ sɔ́ tɔn lɛ́ɛ dó ɔ́. Salomɔ́ɔ gbá xɔ e é jló ná gbá ɖó Jeluzalɛ́mu lɛ́ɛ, bó gbá ée é jló ná gbá ɖó Libáan lɛ́ɛ kpódó ée é jló ná gbá gbɔn to e mɛ é kpa acɛ gbɔn lɛ́ɛ bǐ kpó. Hitíti lɛ́ɛ, Amɔliti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó ɖě lɛ́ɛ kpo ɖo to ɔ́ mɛ; yědɛɛ nyí Izlayɛ́li ví ǎ. Yědɛɛ lɛ́ɛ kpo ɖo to ɔ́ mɛ, ɖó Izlayɛ́li ví lɛ́ɛ hu yě bǐ sín to ɔ́ mɛ ǎ; yě mɛ énɛ́ lɛ́ɛ sín vǐ wɛ Salomɔ́ɔ nɔ sɔ́ dó wa azɔ̌ syɛ́nsyɛ́n lɛ́ɛ; é kpo ɖo mɔ̌ káká jɛ égbé. Salomɔ́ɔ nɔ sɔ́ Izlayɛ́li ví lɛ́ɛ dó wa azɔ̌ syɛ́nsyɛ́n ǎ, ɖó ahwanfuntɔ́ wɛ yě nyí, bó nyí ahwangán tɔn lɛ́ɛ, bó nyí mɛ e kpa acɛ dó kɛkɛ́ví tɔn lɛ́ɛ kpódó sɔ́ tɔn lɛ́ɛ kpó nu lɛ́ɛ. Gǎn e axɔ́sú Salomɔ́ɔ sɔ́ ɖó azɔ̌ tɔn lɛ́ɛ nu lɛ́ɛ ɔ́, yě mɛ afɔɖé kanɖé wǒ (250) wɛ, bɔ yě nɔ́ cɔ́ azɔ̌watɔ́ lɛ́ɛ. Axɔ́sú Salomɔ́ɔ ná gbe bɔ asi tɔn Ejípu xɔ́sú ɔ́ sín vǐ ɔ́ gosín Davídi Toxo mɛ, bó yi cí xwé e axɔ́sú ɔ́ sá n'i ɔ́ gbe; ɖó axɔ́sú ɔ́ nɔ́ ɖɔ: “Asi ce ná nɔ Izlayɛ́li xɔ́sú Davídi xwé ǎ, ɖó tɛn e mɛ è sɔ́ akɔjijɛgbá Mawu Mavɔmavɔ tɔn ɔ́ ɖó lɛ́ɛ ɔ́, tɛn mímɛ́ wɛ yě nyǐ.” Hwenɛ́nu ɔ́, Salomɔ́ɔ sá vɔ̌ e è nɔ dó zo lɛ́ɛ nú Mawu Mavɔmavɔ ɖo vɔ̌sákpe e é bló nú Mawu Mavɔmavɔ ɖo sinsɛnxɔ ɔ́ nukɔn ɔ́ jí. Salomɔ́ɔ nɔ sá vɔ̌ lě e Mɔyízi ɖɔ è nǎ nɔ́ sá gbɔn ɖo xwezán ɖokpó ɖokpó gbe é: è nɔ sá gbɔjɛzán gbe vɔ́ lɛ́ɛ, bó nɔ́ sá sun wá jǐ vɔ́ lɛ́ɛ kpódó vɔ̌ ɖaxó ɖaxó atɔn e è nɔ sá xwewú xwewú lɛ́ɛ kpó: wɔ̌xúxú e mɛ è ma dó tɔ́n ǎ é xwe ɔ́, Pantekótuxwe ɔ́ kpó azavaxwe ɔ́ kpó. Salomɔ́ɔ má azɔ̌ dó así nú mɛ e nɔ wa azɔ̌ ɖo Mawu xwé gbe lɛ́ɛ, lě e tɔ́ tɔn Davídi to gbɔn é: é má azɔ̌ dó así nú vɔ̌sánú-xwlémawutɔ́ gbɛ́ta lɛ́ɛ, bó má dó así nú Levíi ví lɛ́ɛ sín gbɛ̌ta lɛ́ɛ: yě ná nɔ́ ji han dó kpa Mawu ayǐhɔ́ngbe ayǐhɔ́ngbe, abǐ yě ná nɔ gɔ́ alɔ nú vɔ̌sánú-xwlémawutɔ́ lɛ́ɛ; é lɛ́ má azɔ̌ dó así nú hɔnjínɔtɔ́ gbɛ́ta lɛ́ɛ. Hɔnjínɔtɔ́ lɛ́ɛ sín gbɛ̌ta ɖokpó ɖokpó ɖó hɔn yětɔn yětɔn jí bó nɔ́ nɔ. Nǔ e Davídi ɖɛ̌mɛnu Mawu tɔn ɔ́ ɖɔ è nǐ bló é nɛ́. Nǔ e Davídi ɖɔ dó vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó wú ɔ́, è gɔn ɖě bló ǎ; è blǒ káká jɛ nǔ e kan dɔkun lɛ́ɛ ɔ́ jí. Nǔ e Salomɔ́ɔ lin ná bló lɛ́ɛ ɔ́, é bló bǐ, sín gbe e gbe é dó sinsɛnxɔ ɔ́ do ɔ́ káká jɛ gbe e gbe é fó dó é. É sá Mawu Mavɔmavɔ xwé ɔ́ bɔ nǔ bǐ vɔ ɖ'é wú. Ée Salomɔ́ɔ bló nǔ lɛ́ɛ bǐ fó ɔ́, é ɖidó Esiɔ́ni-Gevɛ́ɛ kpódó Eyilati kpó ɖo xutó, ɖo Edɔ́mu tomɛ. Axɔ́sú Ilámu sɛ́ tɔjíhún gěgé dó Salomɔ́ɔ, bɔ tɔzɔ́watɔ́ e nyɔ́ tɔzɔ́ wa ganjí lɛ́ɛ kun. Tɔzɔ́watɔ́ énɛ́ lɛ́ɛ kpódó Salomɔ́ɔ tɔn lɛ́ɛ kpó yi Ofíi, bó yi bɛ́ siká kilóo děgba atɔn afatɔ́n (13.000) wá nú axɔ́sú Salomɔ́ɔ. Axɔ́sú nyɔ̌nu Saba tɔn se lě e Salomɔ́ɔ sín nyǐkɔ ɖo jǐ yi wɛ gbɔn é. É wá gɔ̌n tɔn, bó ná nyi nǔbasɔ́ ɖé lɛ́ɛ dó e, dó tɛn ɛ kpɔ́n. É kpódó gbɛtɔ́ wɔ̌buwɔ́bú ɖé lɛ́ɛ kpó wɛ wá. É dó nǔsáwǔ wǎnɖagbenɔ, siká, kpódó awǐnnya xɔ akwɛ́ kpó sín agban dó lǎkúnmí gěgé jí wá. É yi Salomɔ́ɔ gɔ́n, bó kan nǔ e é kó lɛ́n dó ayi mɛ lɛ́ɛ bǐ byɔ́ ɛ. Salomɔ́ɔ kpé nǔ e é kanbyɔ́ ɛ lɛ́ɛ bǐ wú, bó ná sin nú yě. Nǔ ɖěbǔ kpo bɔ Salomɔ́ɔ gɔn ma tínmɛ n'i ǎ. Axɔ́sú nyɔ̌nu Saba tɔn mɔ lě e Salomɔ́ɔ ɖó nǔnywɛ́ sɔ é, bó mɔ xwé e é sá é. É mɔ nǔ e Salomɔ́ɔ nɔ ɖu lɛ́ɛ, bó mɔ fí e gǎn hɔn-yitɔ́ tɔn lɛ́ɛ nɔ́ nɔ é, bó mɔ awu e mɛ mɛ e nɔ ná ɛ nǔɖuɖu lɛ́ɛ kpó mɛ e nɔ ba ahan n'i lɛ́ɛ kpó ɖe é, é mɔ lě e è nɔ kplá axɔ́sú ɔ́ yi Mawu Mavɔmavɔ xwé gbe gbɔn é. Ée é mɔ nǔ énɛ́ lɛ́ɛ mɔ̌ ɔ́, agbɔ̌n kpé e, bɔ é ɖɔ nú axɔ́sú ɔ́ ɖɔ: “Xó e a nɔ ɖɔ bɔ un se ɖo to ce mɛ ɔ́, kpódó nǔnywɛ́ e a ɖǒ bɔ un se ɖo to ce mɛ ɔ́ kpó ɔ́, hǔn nǔgbó wɛ! Xó énɛ́ lɛ́ɛ e un se ɔ́, un ɖi cóbó wá mɔ ɖó nukún wú ǎ. Nǔnywɛ́ e a ɖǒ ɔ́, un se vlɔ̌ tɔn cóbó wá fí ǎ. A hú gǎn susu e xɔ nú we wɛ è nɔ ɖe bɔ un se é. Nǔ nyɔ́ nú mɛ towe lɛ́ɛ, nǔ nyɔ́ nú mɛsɛntɔ́ towe lɛ́ɛ; yě nɔ́ ɖo nukɔn towe hwebǐnu, bó nɔ́ ɖo nǔnywɛ́ yí ɖo así towe wɛ. Susu nú Mawu Mavɔmavɔ, Mawu towe e wa ɖagbe nú we, bó sɔ́ we axɔ́sú ɖó axɔ́súzinkpo tɔn jí, bɔ a nǎ ɖu axɔ́sú ɖo Izlayɛ́li ví lɛ́ɛ nu ɖo nyǐkɔ tɔn mɛ é. É yí wǎn nú togun Izlayɛ́li tɔn ɔ́, bó jló ná bló bɔ é ná nɔ ayǐ káká sɔ́yi; énɛ́ ɔ́ wú wɛ Mawu towe sɔ́ we axɔ́sú, bónú a nǎ wa nǔ jlɔ́jlɔ́, bó ná dó hwɛjijɔ.” Ée axɔ́sú nyɔ̌nu Saba tɔn ɔ́ ɖɔ mɔ̌ ɔ́, é ná siká tɔ́nu atɔn adaɖé mɔ̌ axɔ́sú Salomɔ́ɔ, bó ná ɛ nǔsáwǔ wǎnɖagbenɔ kɔn nyi kpɔ́ gégé, bɔ è ko mɔ mɔ̌hunkɔtɔn ɖě kpɔ́n ǎ; é ná ɛ awǐnnya xɔ akwɛ́. Sín gbe énɛ́ gbe ɔ́, è sɔ́ mɔ mɛɖé hɛn nǔsáwǔ wǎnɖagbenɔ ɖé wá Izlayɛ́li, bɔ é sukpɔ́ sɔ ée axɔ́sú nyɔ̌nu Saba tɔn wá ná axɔ́sú Salomɔ́ɔ ɔ́ kpɔ́n gbeɖé ǎ. Mɛsɛntɔ́ axɔ́sú Ilámu tɔn lɛ́ɛ kpódó Salomɔ́ɔ tɔn lɛ́ɛ kpó e hɛn siká sín Ofíi wá lɛ́ɛ lɛ́ hɛn santálutín lɛ́ɛ kpódó awǐnnya xɔ akwɛ́ lɛ́ɛ kpó wá. Axɔ́sú Salomɔ́ɔ tɛ́ santálutín lɛ́ɛ ɖó Mawu Mavɔmavɔ xwé gbe, bó lɛ́ tɛ́ dó hɔnmɛ. É lɛ́ zé dó bló agǐdigbo kpódó kanhún kpó ná nú hanjitɔ́ lɛ́ɛ. È sɔ́ hɛn santálutín wá Izlayɛ́li bɔ é sukpɔ́ sɔ mɔ̌ kpɔ́n gbeɖé ɖo Judáa ǎ. Axɔ́sú Salomɔ́ɔ ká ná nǔ e jló axɔ́sú nyɔ̌nu Saba tɔn, bɔ é byɔ́ ɛ lɛ́ɛ bǐ i. É ná ɛ nǔ bɔ é lɛ́ hú gǎn nǔ e é ɖésúnɔ hɛn wá lɛ́ɛ. Énɛ́ ɔ́ gúdo ɔ́, axɔ́sú nyɔ̌nu ɔ́ kpódó mɛsɛntɔ́ tɔn lɛ́ɛ kpó lɛ́ kɔ yi to yětɔn mɛ. Siká e nɔ wá nú Salomɔ́ɔ xwewú xwewú ɔ́ yi tɔ́nu ko. Nǔjɔ e è nɔ ɖe ɖo agban e nɔ gosín togúdo wá lɛ́ɛ jí lɛ́ɛ kpó ée è nɔ ɖe ɖo ajɔ̌nú lɛ́ɛ jí lɛ́ɛ kpó gɔ́ ná. Siká kpó kpatágan kpó e Alabíi xɔ́sú lɛ́ɛ kpó tokpɔngán Alabíi tɔn lɛ́ɛ kpó nɔ hɛn wá nú Salomɔ́ɔ lɛ́ɛ lɔ gɔ́ ná. Axɔ́sú Salomɔ́ɔ zɔ́n bɔ è blǒ gǎglónú ɖaxó ɖaxó afɔɖé (200) n'i, bó tɛ́ siká d'é wú; siká kilóo ayizɛ́n ayizɛ́n wɛ è tɛ́ dó gǎglónú ɖokpó ɖokpó wú. È lɛ̌ bló gǎglónú kpɛví kpɛví afɔɖé kanwe ko (300) n'i, bó tɛ́ siká d'é wú; siká kilóo atɔn atɔn wɛ è tɛ́ dó gǎglónú ɖokpó ɖokpó wú. É bɛ́ yě dó xwé e è nɔ ylɔ́ ɖɔ: “Zungbó Libáan tɔn” ɔ́ gbe. Axɔ́sú ɔ́ lɛ́ zɔ́n bɔ è blǒ axɔ́súzinkpo ɖaxó ɖokpó n'i, bó zé ajinakúɖú dó ɖó acɔ́ ná, bó tɛ́ siká akú d'é wú. Axɔ́súzinkpo énɛ́ ɔ́ ɖó kpekán ayizɛ́n, bɔ gǎnjɛmɛ tɔn cí toboo. É ɖó awaɖótɛn we. È kpa kinnikínní we ɖó awaɖótɛn ɖokpó ɖokpó kpá. È lɛ̌ kpa kinnikínní wěwé, bó to yě ɖó afɔɖótɛn lɛ́ɛ jí, ayizɛ́n ɖo amyɔxwé, bɔ ayizɛ́n ɖo ɖisíxwé. È blǒ nǔ mɔ̌hunkɔtɔn ɖě ɖo axɔ́súɖuto ɖě lɛ́ɛ mɛ ǎ. Siká wɛ è dǒ bló kɔ́fu axɔ́sú Salomɔ́ɔ tɔn lɛ́ɛ bǐ ná. Gannú e ɖo xwé e è nɔ ylɔ́ ɖɔ “Zungbó Libáan tɔn” ɔ́ gbe lɛ́ɛ bǐ wɛ è sɔ́ siká akú dó bló ná. È zě kpatágan dó bló nǔ ɖěbǔ ná ǎ, ɖó axɔ́sú Salomɔ́ɔ sín hwenu ɔ́, è nɔ mɔ kpatágan dó mɔ nǔɖé wa nú ǎ. Axɔ́sú Salomɔ́ɔ ɖó tɔjíhún ɖaxó ɖaxó ɖé lɛ́ɛ, bó nɔ́ sɛ́ dó gbějí zɔga. Tɔzɔ́watɔ́ axɔ́sú Ilámu tɔn lɛ́ɛ wɛ nɔ́ kun tɔjíhún lɛ́ɛ. Xwe atɔn mɛ tɛgbɛ ɔ́, tɔjíhún nɛ́ lɛ́ɛ nɔ́ hɛn siká, kpatágan, ajinakúɖú, zǐnwó kpódó ahlǐnhǎn kpó wá. Axɔ́sú Salomɔ́ɔ hú gǎn axɔ́sú e ɖo ayǐkúngban jí lɛ́ɛ bǐ, ɖo dɔkun kpódó nǔnywɛ́ kpó mɛ. Axɔ́sú e ɖo gbɛ ɔ́ mɛ lɛ́ɛ bǐ nɔ́ ba ná mɔ Salomɔ́ɔ, bó ná se nǔnywɛ́xó e Mawu sɔ́ dó ayi mɛ n'i é. Yě mɛ ɖokpó ɖokpó nɔ́ wá ná nǔ i. Yě nɔ́ hɛn nǔ e è zě kpatágan dó bló ná lɛ́ɛ, kpódó éé è zě siká dó bló ná lɛ́ɛ kpó. Yě nɔ́ hɛn avɔ, ahwanfunnú, nǔsáwǔ wǎnɖagbenɔ, sɔ́ kpódó tócí kpó wá n'i. Mɔ̌ wɛ yě nɔ́ bló xwewú xwewú tɛgbɛ. Salomɔ́ɔ bló sɔ́kpó děgba (4.000) nú sɔ́ tɔn lɛ́ɛ kpódó kɛkɛ́ví tɔn lɛ́ɛ kpó. É ɖó sɔ́xátɔ́ děgba atɔn (12.000). É bɛ́ ɖě ɖó toxo e mɛ kɛkɛ́ví lɛ́ɛ nɔ́ nɔ é mɛ, bó bɛ́ ɖě dó é ɖésúnɔ gɔ́n ɖo Jeluzalɛ́mu. Salomɔ́ɔ ɖu ɖo axɔ́sú lɛ́ɛ bǐ jí, bɛ́ sín Efláti tɔ ɔ́ kɔn, káká yi Filisitɛ́ɛn lɛ́ɛ sín to mɛ, káká yi Ejípu to ɔ́ sín dogbó jí. Axɔ́sú Salomɔ́ɔ bló bɔ kpatágan e ɖo Jeluzalɛ́mu ɔ́ sukpɔ́ kɛ́n ɖɔhun. É bló bɔ sɛ́dlutín sukpɔ́ sikomɔ́ɔtín e ɖo Cefela lɛ́ɛ ɖɔhun. Ejípu wɛ è nɔ hɛn sɔ́ lɛ́ɛ sín wá nú Salomɔ́ɔ, bó nɔ́ lɛ́ hɛn wá n'i sín to ɖěvo ɖěvo lɛ́ɛ mɛ. Salomɔ́ɔ sín tan e kpo ɔ́, è wlǎn sín fí e é bɛ́ sín ɔ́ káká yi fí e é fó dó ɔ́, bɔ é ɖo Tan wéma gbeyíɖɔ Mawu tɔn Natáan tɔn mɛ, bó ɖo xó e Axiya Silóonu ɔ́ ɖɔ ɔ́ sín wěma mɛ, lobo lɛ́ ɖo nǔ e nǔmɔtɔ́ Yedóo mɔ dó Jelobowámu Nɛvati ví ɔ́ wú sín wěma mɛ. Salomɔ́ɔ ɖu axɔ́sú ɖo Jeluzalɛ́mu, ɖo Izlayɛ́li to ɔ́ bǐ nu nú xwe kanɖé (40). Énɛ́ ɔ́ gúdo ɔ́, Salomɔ́ɔ zán wá kú, bɔ è sɔ́ ɛ ɖó tɔ́ tɔn Davídi Toxo mɛ. Vǐ tɔn Hlobowámu wɛ ɖu axɔ́sú ɖó tɛn tɔn mɛ. Hlobowámu yi Sikɛ́mu, ɖó akɔta Izlayɛ́li tɔn e ɖo Totaligbé lɛ́ɛ bǐ wá Sikɛ́mu, bó ná sɔ́ ɛ axɔ́sú. Jelobowámu Nɛvati ví ɔ́, Ejípu fí e é hɔn nú axɔ́sú Salomɔ́ɔ bo yi cí ɔ́ wɛ é ɖe, bó se ɖɔ è sɔ́ Hlobowámu axɔ́sú. Ée é se mɔ̌ ɔ́, é lɛ́ kɔ sín Ejípu wá. Énɛ́ ɔ́, è sɛ́ mɛ dó e ɖɔ è nǐ yi kplá ɛ wá, bɔ é kpó akɔta Izlayɛ́li tɔn e ɖo Totaligbé lɛ́ɛ bǐ kpó wá Hlobowámu gɔ́n, bó ɖɔ n'i ɖɔ: “Agban kpinkpɛn wɛ tɔ́ towe ɖíɖá mǐ. Hwɛ din ɔ́, nú a ɖe kan kpo nú azɔ̌ syɛ́nsyɛ́n e wa wɛ mǐ ɖe ɔ́, bó ɖe agban kpinkpɛn e tɔ́ towe ɖíɖá mǐ ɔ́ kpo nú mǐ ɔ́, mǐ nǎ wa azɔ̌ nú we.” Ée yě ɖɔ mɔ̌ ɔ́, Hlobowámu ɖɔ nú yě ɖɔ: “Mi lɛ́ kɔ wá gɔ̌n ce azǎn atɔn gbe.” Ée é ɖɔ mɔ̌ ɔ́, yě ɖidó. Ée togun ɔ́ yi ɔ́, axɔ́sú Hlobowámu yi mɔ tomɛxó e wa azɔ̌ xá tɔ́ tɔn Salomɔ́ɔ hwenu e é ɖo gbɛ ɔ́, bó kanbyɔ́ yě ɖɔ: “Nǔ tɛ́ wɛ mi ná kplɔ́n mì, nú má ɖɔ nú togun énɛ́ ɔ́?” Bɔ yě ɖɔ n'i ɖɔ: “Nú a nyɔ̌ xomɛ dó togun élɔ́ wú, bó yí yě ganjí, bó dó gbe ɖagbe nú yě ɔ́, yě ná nyí mɛsɛntɔ́ towe káká sɔ́yi.” Hlobowámu ka zé nǔ e tomɛxó lɛ́ɛ kplɔ́n ɛ ɔ́ dó wa azɔ̌ ná ǎ, lobo yi mɔ gbɛ̌ tɔn e kpó é kpó su hǎ jí, bɔ yě nɔ́ sɛn ɛ lɛ́ɛ, bó ɖɔ nú yě ɖɔ: “Togun énɛ́ wá ɖɔ nú mì ɖɔ nyɛ ní ɖe agban kpinkpɛn e tɔ́ ce dó nú émí, bó ɖɔ émí ní hɛn dandan ɔ́ kpo nú émí; nǔ tɛ́ wɛ mi ná kplɔ́n mì, nú má ɖɔ nú yě?” Ée é ɖɔ mɔ̌ ɔ́, gbɛ̌ tɔn lɛ́ɛ ɖɔ n'i ɖɔ: “Mɛ énɛ́ lɛ́ɛ ɖo vo sa wɛ ɖɔ tɔ́ hwi tɔn ɖíɖá agban kpinkpɛn émí, bó ɖo byɔ̌byɔ́ wɛ ɖɔ hwi ní ɖe agban kpo nú émí. É nyɔ́! Xó e a ɖǒ ná ɖɔ nú yě ɔ́ ɖíe: ɖɔ nú yě ɖɔ: ‘Alɔví ce tókɛ́ ɔ́ kló hú tɔ́ ce sín awa. Tɔ́ ce dó agban kpinkpɛn nú mi. Nyɛ ká ná dó agban e kpɛn hú mɔ̌ ɔ́ nú mi. Tɔ́ ce zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.’ ” Azǎn atɔn e axɔ́sú ɔ́ ɖɔ ɔ́ sɔgbe, bɔ Hlobowámu kpódó togun ɔ́ bǐ kpó wá gɔ̌n tɔn lě e é ɖɔ nú yě gbɔn é. Ée yě wá é ɔ́, é bló nǔ e tomɛxó lɛ́ɛ kplɔ́n ɛ ɔ́ ǎ; é dó gbe ɖagbe nú yě ǎ. É bló nǔ e gbɛ̌ tɔn lɛ́ɛ kplɔ́n ɛ é. É ɖɔ nú yě ɖɔ: “Un ná dó agban kpinkpɛn nú mi, bó ná fɔ́n, bó ná lɛ́ ɖo dǐdó d'é jí wɛ. Tɔ́ ce zé lanbá dó kplɔ́n mi ná, lanbá mɔ̌hun we wɛ nyɛ ka ná zé dó kplɔ́n mi ná.” Hǔn axɔ́sú ɔ́ bló nǔ e ba wɛ togun ɔ́ ɖe ɔ́ ǎ. Mawu Mavɔmavɔ wɛ ka zɔ́n bɔ nǔ nɛ́ lɛ́ɛ nyí gbɔn mɔ̌, bónú xó e é ɖɔ nú Jelobowámu Nɛvati ví ɔ́ gbɔn Axiya Silóonu ɔ́ jí ɔ́ ná dó jɛ. Ée akɔta Izlayɛ́li tɔn e ɖo Totaligbé lɛ́ɛ bǐ mɔ ɖɔ axɔ́sú ɔ́ kún bló nǔ e ba wɛ émí ɖe ɔ́ ó ɔ́, yě ɖɔ: “Ani wɛ ɖo mǐ kpódó Davídi kpó tɛ́ntin? Mǐ kpó Jɛsée ví énɛ́ ɔ́ kpó kpé nǔɖé ǎ Izlayɛ́linu e mi; mɛ ɖokpó ɖokpó ní lɛ́ kɔ yi xwé tɔn gbe! Din ɔ́, Davídi ví, kpé nukún dó axɔ́súɖuto towe wú!” Ée Izlayɛ́linu lɛ́ɛ ɖɔ mɔ̌ ɔ́, yě ɖidó. Judáanu lɛ́ɛ kɛ́ɖɛ́ jɛ́n nɔ́ mɔ Hlobowámu dó mɔ axɔ́sú. Nǔ ká ɖo mɔ̌ có, Hlobowámu sɛ́ Adolámu e kpa acɛ dó mɛɖezɔ́ nu ɔ́ dó Izlayɛ́linu e ɖo Totaligbé lɛ́ɛ gɔ́n, bɔ yě nyi hwǎn dó hu i. Énɛ́ ɔ́, Hlobowámu yá wǔ byɔ́ kɛkɛ́ví tɔn mɛ, bó hɔn yi Jeluzalɛ́mu. Lě e Izlayɛ́linu e ɖo Totaligbé lɛ́ɛ gbɛ́ ɖɔ xwédo Davídi tɔn kún ná kpa acɛ nú émí ó gbɔn ɔ́ nɛ́, bɔ é kpo ɖo mɔ̌ káká wá jɛ égbé. Ée Hlobowámu wá Jeluzalɛ́mu ɔ́, é kplé ahwanfuntɔ́ syɛ́nsyɛ́n adɔ̌kpo tɛ́nnɛ (180.000) ɖo akɔta Judáa tɔn kpódó Bɛnjamɛ́ɛ tɔn kpó mɛ, bónú yě ná yi fun ahwan xá Izlayɛ́linu e ɖo Totaligbé lɛ́ɛ, bɔ Hlobowámu ná ɖu axɔ́sú ɖo yě nu gǎnnugǎnnu. Mawu Mavɔmavɔ ká ɖɔ nú ɖɛ̌mɛnu tɔn Cemaya ɖɔ: “Đɔ nú Hlobowámu Salomɔ́ɔ ví, axɔ́sú Judáa tɔn ɔ́ kpódó Izlayɛ́li ví e ɖo akɔta Judáa tɔn ɔ́ mɛ lɛ́ɛ bǐ kpó, kpódó Bɛnjamɛ́ɛ tɔn ɔ́ bǐ kpó ɖɔ: ‘Mawu Mavɔmavɔ ɖɔ mi ní ma yi fun ahwan xá nɔví mitɔn lɛ́ɛ ó, ɖɔ mɛ ɖokpó ɖokpó ní lɛ́ kɔ yi xwé tɔn gbe, ɖó émí wɛ zɔ́n bɔ nǔ énɛ́ lɛ́ɛ bǐ jɛ.’ ” Yě se nǔ e Mawu Mavɔmavɔ ɖɔ ɔ́, bó lɛ́ kɔ, bó sɔ́ fun ahwan xá Jelobowámu ǎ. Hlobowámu wá cí Jeluzalɛ́mu, bó mɛ ahohó lɛ́ lɛ̌ dó toxo e ɖo Judáa lɛ́ɛ. É mɛ ahohó lɛ́ lɛ̌ dó Bɛteleyɛ́mu, Etámu, Tekowa, Bɛti-Súu, Soko, Adulámu, Gati, Maleca, Zifu, Adolayímu, Lakíci, Azeka, Soléa, Ayalɔ́ni kpódó Eblɔ́n kpó. Toxo énɛ́ lɛ́ɛ ɖo Judáa kpódó Bɛnjamɛ́ɛ kpó yíkúngban jí. É mɛ ahohó lɛ́ lɛ̌ dó yě, bó sɔ́ tokpɔngán ɖó toxo lɛ́ɛ ɖokpó ɖokpó nu, bó nɔ́ bɛ́ nǔɖuɖu kpódó ami kpó, kpódó vɛ̌ɛn kpó dó toxo énɛ́ lɛ́ɛ mɛ. É bɛ́ gǎglónú kpódó hwǎn kpó ɖó toxo énɛ́ lɛ́ɛ ɖokpó ɖokpó mɛ. Toxo énɛ́ lɛ́ɛ e é bló bɔ yě syɛ́n sɔ mɔ̌ ɔ́ zɔ́n, bɔ Judáa to ɔ́ kpódó Bɛnjamɛ́ɛ to ɔ́ kpó nɔ acɛ tɔn mɛ. Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó gosín fí tɛnmɛ tɛnmɛ ɖo Izlayɛ́li bó wá nɔ Jelobowámu jí. Levíi ví lɛ́ɛ jó toxo yětɔn lɛ́ɛ kpódó ayǐkúngban yětɔn lɛ́ɛ kpó dó, bó yi cí Jeluzalɛ́mu kpó Judáa kpó, ɖó Jelobowámu kpódó vǐ tɔn lɛ́ɛ kpó lɔn nǔ nú yě ná wa vɔ̌sánú-xwlémawuzɔ́ yětɔn ǎ. Jelobowámu ɖésúnɔ kó ɖe mɛɖé lɛ́ɛ, bɔ yě nyǐ vɔ̌sánú-xwlémawutɔ́ gbɔn tɛn mímɛ́ e ɖo só jí só jí lɛ́ɛ, bó ɖe mɛ ɖé lɛ́ɛ, bɔ yě nyí vodúnnɔ ɖo fí e gbǎgbá kpó nyibúví kpó sín akpajlɛ́ e é bló lɛ́ɛ nɔ́ nɔ lɛ́ɛ. Mɛ e ɖo akɔta Izlayɛ́li tɔn e ɖo Totaligbé lɛ́ɛ mɛ, bɔ Mawu Mavɔmavɔ, Mawu Izlayɛ́li tɔn ɔ́ ná sɛn myá nukún ná lɛ́ɛ bǐ jɛ Levíi ví lɛ́ɛ gúdo yi Jeluzalɛ́mu, bó xwlé vɔ̌sánú Mawu Mavɔmavɔ, Mawu tɔ́gbó yětɔn lɛ́ɛ tɔn. Nǔ énɛ́ ɔ́ zɔ́n bɔ yě ná hlɔ̌nhlɔ́n axɔ́súɖuto Judáa tɔn ɔ́, lobo dó wǔsyɛ́n lanmɛ nú Hlobowámu Salomɔ́ɔ ví ɔ́ káká nú xwe atɔn, ɖó yě zǎn gbɛ yětɔn Davídi kpódó Salomɔ́ɔ kpó ɖɔhun hwenɛ́nu. Hlobowámu da Maxaláti; asi tɔn tɔ́ nɔ́ nyí Yelimɔ́ti; Davídi ví wɛ. Asi tɔn sín nɔ nɔ nyí Avihayilu. Avihayilu ɔ́, Eliavu ví wɛ é nyí, bó nyí Jɛsée vívú. Maxaláti ji vǐ atɔn n'i: é ji Yewúci, Cemaliya kpódó Zaxámu kpó. Hlobowámu lɛ́ wá da Maaka, Abusalɔ́mu ví ɔ́. Éyɛ́ ji vǐ ɛnɛ n'i. É ji Abiya, Atayi, Ziza kpódó Celomíti kpó. Hlobowámu yí wǎn nú Maaka Abusalɔ́mu ví ɔ́ hú asi ɖě lɛ́ɛ bǐ. Asi afɔtɔn-nukún-atɔn wɛ é ɖó, bó lɛ́ ɖó asi kanɖé ko (60) ɖěvo. É ɖó vǐ súnnu koatɔ́n-nukún-atɔn (28) bó ɖó vǐ nyɔ̌nu kanɖé ko (60). Hlobowámu sɔ́ Abiya Maaka ví ɔ́ gǎn ɖó nɔví tɔn lɛ́ɛ nu, ɖó é jló ná sɔ́ ɛ axɔ́sú. Ayi tɔn yá wǔ mɔ nǔ, bɔ é má vǐ tɔn e kpo lɛ́ɛ gbɔn Judáa to ɔ́ kpódó Bɛnjamɛ́ɛ to ɔ́ kpó mɛ, ɖo toxo e é mɛ ahohó lɛ́ lɛ̌ dó lɛ́ɛ mɛ. É sɛ́ nǔɖuɖu dó yě kpɔ́ gégé, lobo da asi nú yě kɔn nyi kpɔ́. Hwenu e Hlobowámu sɔ́ axɔ́súɖuto tɔn jínjɔ́n ayǐ, bɔ acɛkpikpa tɔn lí dǒ ɔ́, é sɔ́ nɔ́ nyi Mawu Mavɔmavɔ sɛ́n ɔ́ ǎ, bɔ Izlayɛ́li togun ɔ́ lɔ sɔ́ nɔ́ nyi ǎ. Hwenu e Hlobowámu ɖo xwe atɔ́ɔ́n bló wɛ ɖo zinkpo jí ɔ́, Izlayɛ́li ví lɛ́ɛ hu hwɛ dó Mawu Mavɔmavɔ; énɛ́ ɔ́ wú wɛ Mawu Mavɔmavɔ jló ná dɔn tó nú yě, lobo jó Cicáki Ejípu xɔ́sú ɔ́ dó bɔ é tɔ́n ahwan Jeluzalɛ́mu. Cicáki Ejípu xɔ́sú ɔ́ hɛn kɛkɛ́ví afayizɛ́n (1.200), sɔ́xátɔ́ adɔ̌kpo atɔn (60.000), bó nɔ sɔ́ja maxamaxa Libíinu, Súki kpó Etiopíinu kpó nu, bɔ yě xwedó e sín Ejípu, bó tɔ́n ahwan Jeluzalɛ́mu. É yí toxo Judáa tɔn e è mɛ ahohó lɛ́ lɛ̌ dó lɛ́ɛ, bó wá káká Jeluzalɛ́mu. Hwenu e Cicáki jǎwe ɔ́, Hlobowámu kpódó Judáa gán lɛ́ɛ kpó wá kplé cí Jeluzalɛ́mu, bɔ gbeyíɖɔ Mawu tɔn Cemaya yi yě gɔ́n, bó ɖɔ nú yě ɖɔ: “Mi ɖótó nǔ e Mawu Mavɔmavɔ ɖɔ é: ‘Mi jó mì dó! Din ɔ́, nyi lɔ ná jó mi dó; un jó mi nú Cicáki.’ ” Ée yě se mɔ̌ ɔ́, axɔ́sú ɔ́ kpó gǎn lɛ́ɛ kpó yí hwɛ yětɔn lɛ́ɛ gbe, bó ɖɔ: “Mawu Mavɔmavɔ sín hwɛ jɔ.” Ée Mawu Mavɔmavɔ mɔ ɖɔ yě yí hwɛ yětɔn lɛ́ɛ gbe ɔ́, é lɛ́ ɖɔ nú Cemaya ɖɔ: “Yě kó yí hwɛ yětɔn lɛ́ɛ gbe, un sɔ́ ná vívá kún yětɔn ǎ, un ná yá wǔ hwlɛ́n yě sín adǎn élɔ́ mɛ. Un sɔ́ ná ɖo xomɛ sin dó Jeluzalɛ́mu toxo ɔ́ wɛ káká, bó ná jó Cicáki dó bɔ é ná gba ɛ ǎ. Amɔ̌, yě ná nɔ acɛ tɔn mɛ; énɛ́ ɔ́, è sɛn nyɛ abǐ è sɛn axɔ́sú gbɛmɛ fí tɔn lɛ́ɛ ɔ́, yě ná mɔ vogbingbɔn e ɖ'é mɛ é.” Ejípu xɔ́sú Cicáki tɔ́n ahwan Jeluzalɛ́mu. É bɛ́ dɔkun e ɖo Mawu Mavɔmavɔ xwé gbe lɛ́ɛ kpó éé ɖo axɔ́sú ɔ́ sín hɔnmɛ lɛ́ɛ kpó bǐ yi. É lɛ́ bɛ́ gǎglónú e Salomɔ́ɔ zé siká dó bló lɛ́ɛ bǐ. Axɔ́sú Hlobowámu zé ganvɔ dó bló gǎglónú ná ɖó tɛn yětɔn mɛ, bó bɛ́ d'alɔ mɛ nú sɔ́jagán e nɔ cɔ́ hɔnmɛ sín hɔntogbó lɛ́ɛ é. Nú axɔ́sú ɔ́ xwe Mawu Mavɔmavɔ xwé hweɖěbǔnu ɔ́, sɔ́ja lɛ́ɛ nɔ́ bɛ́ gǎglónú lɛ́ɛ, bó nɔ́ xwedó e. É ka lɛ́ kɔ wá yi ɔ́, yě nɔ́ bɛ́ yě wá ɖó xɔ yětɔn mɛ. Hlobowámu yí hwɛ tɔn lɛ́ɛ gbe; énɛ́ ɔ́ wú wɛ Mawu Mavɔmavɔ jó xomɛ e é sin ɔ́ dó, bó sɔ́ sú kún tɔn dó bǐ ǎ. Nǔ e ɖo Judáa lɛ́ɛ bǐ ká nylá ǎ. Hlobowámu ɖu axɔ́sú ɖo Jeluzalɛ́mu, bó sɔ́ acɛkpikpa tɔn jínjɔ́n ayǐ ganjí. Xwe kanɖé-nukún-ɖokpó (41) wɛ é ɖó, bó ɖu axɔ́sú. É ɖu axɔ́sú ɖo Jeluzalɛ́mu nú xwe afɔtɔn-nukún-we. Jeluzalɛ́mu ɔ́, toxo e Mawu Mavɔmavɔ sɔ́ ɖo akɔta Izlayɛ́li tɔn lɛ́ɛ bǐ mɛ, bɔ nyǐkɔ tɔn ná nɔ wú ɔ́ wɛ. Hlobowámu sín nɔ nɔ nyí Naama; Amumɔ́ɔ ví wɛ. Hlobowámu wa nǔ e nylá Mawu Mavɔmavɔ nukún mɛ é, ɖó jlǒ Mawu Mavɔmavɔ tɔn wiwa myá nukún n'i ǎ. Axɔ́sú Hlobowámu sín tan ɔ́, è wlǎn, sín fí e é bɛ́ sín ɔ́ káká yi fí e é fó dó ɔ́, dó gbeyíɖɔ Mawu tɔn Cemaya kpó nǔmɔtɔ́ Idóo kpó sín Tan wéma lɛ́ɛ mɛ, fí e è wlǎn tɔ́gbó yětɔn lɛ́ɛ sín nyǐkɔ lɛ́ɛ dó é. Ahwan fun wɛ jɛ́n Hlobowámu kpódó Jelobowámu kpó nɔ́ ɖe. Hlobowámu zán wá kú bɔ è sɔ́ ɛ ɖó Davídi Toxo mɛ bɔ vǐ tɔn Abiya ɖu axɔ́sú ɖó tɛn tɔn mɛ. Hwenu e Jelobowámu ɖo xwe afɔtɔn-nukún-atɔn bló wɛ ɖo axɔ́súzinkpo jí ɔ́, Abiya ɖu axɔ́sú ɖo Judáa. É ɖu axɔ́sú nú xwe atɔn; Jeluzalɛ́mu wɛ é nɔ́ nɔ. Nɔ tɔn nɔ nyí Mikayahu, Wuliyɛ́li Giveyanu ɔ́ ví wɛ. Abiya lɔmɔ̌ fun ahwan xá Jelobowámu. Abiya yi ahwan fun gbé kpódó ahwanfuntɔ́ syɛ́nsyɛ́n adɔ̌kpo ko (400.000) kpó. Jelobowámu ka kplá ahwanfuntɔ́ ɖaxó ɖaxó adɔ̌kpo kanɖé (800.000), bó kpé ahwan xá ɛ. Abiya xá Semalayímu só e ɖo sókan Eflayímu tɔn mɛ ɔ́ ta, bó sú xó, bó ɖɔ sɛ́ dó Jelobowámu kpódó Izlayɛ́li togun ɔ́ bǐ kpó ɖɔ: “Mi ɖótó mì! Mi tunwun ɖɔ Mawu Mavɔmavɔ, Mawu Izlayɛ́li tɔn ɔ́ kó ɖɔ Davídi kpódó kúnkan tɔn lɛ́ɛ kpó wɛ ná ɖu axɔ́sú ɖo Izlayɛ́li to ɔ́ nu káká sɔ́yi ǎ cé? Nǔ e ná húzú gbeta énɛ́ ɔ́ ɖe ǎ. Lo ɔ́, Jelobowámu Nɛvati ví e nyí Salomɔ́ɔ Davídi ví ɔ́ sín mɛsɛntɔ́ ɔ́ fɔ́n gǔ dó gǎn tɔn Salomɔ́ɔ jí. Hwenu e é fɔ́n gǔ ɔ́, gbɛtɔ́ nǔvɔ́nɔ, gbɛtɔ́ dídá ɖé lɛ́ɛ wá Jelobowámu gɔ́n, bó dɔn ɛ dó Hlobowámu Salomɔ́ɔ ví ɔ́ jí. Hlobowámu ka dɔn nǔɖé xá yě ǎ; ɖó dɔ̌nkpɛvú wɛ; é ɖó nǔnywɛ́ ɖé ǎ. Din ɔ́, mi vɛdó ɖɔ émí ná sí te dó axɔ́súɖuɖu e Mawu Mavɔmavɔ zé dó así nú Davídi ví lɛ́ɛ ɔ́ jí wɛ sín, ɖó mi sukpɔ́ ɖésú, bó hɛn sikányibúví e Jelobowámu bló nú mi, bɔ mi nɔ sɛn lɛ́ɛ. Mi nya vɔ̌sánú-xwlémawutɔ́ Aalɔ́ɔn ví lɛ́ɛ kpódó Levíi ví lɛ́ɛ kpó, bó sɔ́ vodúnnɔ ɖé lɛ́ɛ nú miɖée ɖó tɛn yětɔn mɛ lě e to ɖě lɛ́ɛ nɔ́ bló gbɔn é. Mɛ ɖé ko hɛn nyibúsú ɖokpó kpódó agbo tɛ́nwe kpó wá kpowun ɔ́, mi nɔ sɔ́ mɛ ɔ́, bɔ é nɔ́ jɛ vɔ̌sánú xwlé vodún lɛ́ɛ jí. Vodún ká nyí Mawu ǎ. Mǐdɛɛ lɛ́ɛ ɔ́, Mawu Mavɔmavɔ wɛ mǐ nɔ́ sɛn. Mǐ jó e dó ǎ. Aalɔ́ɔn ví lɛ́ɛ wɛ nyí vɔ̌sánú-xwlémawutɔ́, bɔ Levíi ví lɛ́ɛ ká nɔ ɖo azɔ̌ yětɔn wa wɛ. Zǎnzǎn gbada ɔ́, yě nɔ́ ɖo vɔ̌ e è nɔ dó zo lɛ́ɛ xwlé Mawu Mavɔmavɔ wɛ, bó nɔ́ ɖo zǎlínkpɔ́n dó zo n'i wɛ. Yě nɔ́ to wɔ̌xúxú e è nǎ Mawu lɛ́ɛ ɖó távo mímɛ́ ɔ́ jí, bɔ gbadanu tɛgbɛ ɔ́, yě nɔ́ tá zogbɛ́n lɛ́ɛ ɖó zogbɛ́nhɛnnú e è zě siká dó bló ɔ́ jí. Mǐ nɔ́ kpé nukún dó azɔ̌ e Mawu Mavɔmavɔ, Mawu mǐtɔn zɔ́n mǐ lɛ́ɛ wú, bó nɔ́ wa ganjí. Amɔ̌, midɛɛ lɛ́ɛ ɔ́, mi jó e dó. Mi ɖótó! Mawu kpódó mɛ e nɔ xwlé vɔ̌sánú i lɛ́ɛ kpó wɛ ɖo mǐ nu. Vɔ̌sánú-xwlémawutɔ́ tɔn lɛ́ɛ ɖo fínɛ́ bó ná kwín kpɛn bɔ è nǎ tɔ́n ahwan mi. Izlayɛ́linu e mi, mi ma fun ahwan xá Mawu Mavɔmavɔ, Mawu tɔ́gbó mitɔn lɛ́ɛ tɔn ó, ɖó mi ná mɔ nu tɔn ǎ.” Hwenɛ́nu ɔ́, Jelobowámu sɛ́ sɔ́ja ɖé lɛ́ɛ dó, bɔ yě yi tɔwu nú Judáanu lɛ́ɛ ɖo gǔdo, bɔ ahwangɔnu tɔn ɔ́ ɖo nukɔn, bɔ Judáanu lɛ́ɛ ɖo tɛ́ntin. Sɔ́ja Judáa tɔn lɛ́ɛ mɔ ɖɔ è tɔ́n ahwan émí ɖo gǔdo nukɔn, lobo sú xó ylɔ́ Mawu Mavɔmavɔ ɖɔ é ní wá hwlɛ́n émí, bɔ vɔ̌sánú-xwlémawutɔ́ lɛ́ɛ kwín ahwankpɛn. Ée vɔ̌sánú-xwlémawutɔ́ lɛ́ɛ kwín ahwankpɛn ɔ́, sɔ́ja Judáa tɔn lɛ́ɛ sú xó. Ée yě sú xó lě tlóló ɔ́, Mawu bló bɔ Abiya kpó Judáanu lɛ́ɛ kpó ɖu ɖo Jelobowámu kpó Izlayɛ́linu lɛ́ɛ kpó jí. Izlayɛ́linu lɛ́ɛ hɔn ɖo Judáanu lɛ́ɛ nukɔn, Mawu ká jó Izlayɛ́linu lɛ́ɛ nú yě. Abiya kpódó ahwanfuntɔ́ tɔn lɛ́ɛ kpó ɖu ɖo ahwanfuntɔ́ Izlayɛ́li tɔn lɛ́ɛ jí tawun, bó hu ahwanfuntɔ́ ɖaxó ɖaxó adɔ̌kpo ko atɔ́ɔ́n (500.000). Đo ahwan énɛ́ ɔ́ mɛ ɔ́, Izlayɛ́linu lɛ́ɛ ɖu winnyá, bɔ Judáanu lɛ́ɛ ɖu ɖ'é jí; yě ɖu ɖ'é jí, ɖó yě gán jɛ Mawu Mavɔmavɔ, Mawu tɔ́gbó yětɔn lɛ́ɛ tɔn wú. Abiya jɛ Jelobowámu gúdo, bó yí Betɛ́li toxo ɔ́, Yecana toxo ɔ́ kpó Eflɔ́ni toxo ɔ́ kpó; é lɛ́ yí gletoxo e ɖo toxo énɛ́ lɛ́ɛ kpá lɛ́ɛ sín Jelobowámu sí. Hwenu e Abiya ɖo axɔ́sú ɖu wɛ ɔ́, axɔ́sú Jelobowámu sɔ́ ɖó acɛ lě e é ɖó gbɔn ɖ'ayǐ é ǎ; ée é wá yá é ɔ́, Mawu Mavɔmavɔ sín alɔ jɛ wǔ tɔn bɔ é kú. Lo ɔ́, Abiya sɔ́ acɛkpikpa tɔn jínjɔ́n ayǐ. É da asi wǒ-ɛnɛ, bó ɖó vǐ súnnu ko-nukún-we, vǐ nyɔ̌nu afɔtɔn-nukún-ɖokpó. È wlǎn Abiya sín tan e kpo ɔ́, nǔ e é wa lɛ́ɛ kpódó xó e é ɖɔ lɛ́ɛ kpó dó wěma e è nɔ ylɔ́ ɖɔ: “Nǔtínmɛ wéma gbeyíɖɔ Mawu tɔn Idóo tɔn” ɔ́ mɛ. Abiya zán wá kú bɔ è sɔ́ ɛ ɖó Davídi Toxo mɛ, bɔ vǐ tɔn Asa ɖu axɔ́sú ɖó tɛn tɔn mɛ. Ée Asa jɛ axɔ́sú ɖu jí ɔ́, to ɔ́ mɔ agbɔ̌n nú xwe wǒ. Asa wa nǔ e nyɔ́ bó sɔgbe ɖo Mawu Mavɔmavɔ, Mawu tɔn nukún mɛ é. Asa ɖe vɔ̌sákpe e jí yě nɔ́ sá vɔ̌ nú vodún lɛ́ɛ ɖe lɛ́ɛ kpódó vodún xwé e ɖo só jí lɛ́ɛ kpó síin. É gba awǐnnya e yě tun te bó nɔ sɛn lɛ́ɛ, bó sɛ́n vodún Acela lɛ́ɛ. É ɖɔ nú Judáanu lɛ́ɛ ɖɔ yě ní sɛn Mawu Mavɔmavɔ, Mawu tɔ́gbó yětɔn lɛ́ɛ tɔn. Yě ní nyi sɛ́n tɔn, lobo wa nǔ e é zɔ́n lɛ́ɛ é. Asa ɖe vodúnxwé e ɖo só jí lɛ́ɛ kpódó vɔ̌sákpe e jí yě nɔ́ dó zǎlínkpɔ́n zo ɖe lɛ́ɛ kpó sín toxo e ɖo Judáa lɛ́ɛ bǐ mɛ. Ée é bló mɔ̌ ɔ́, fífá byɔ́ axɔ́súɖuto tɔn mɛ. Ée Asa yi zinkpo jí ɔ́, mɛ ɖěbǔ fun ahwan xá ɛ ǎ, ɖó Mawu Mavɔmavɔ ɖésú wɛ ná ɛ vivo. Ée é mɔ ɖɔ vivo ɖo to ɔ́ mɛ é ɔ́, é mɛ ahohó lɛ́ lɛ̌ dó toxo gěgé. É ɖɔ nú Judáanu lɛ́ɛ ɖɔ: “Din e to ɔ́ kpo ɖo mǐtɔn nyí wɛ ɔ́, mi nú mǐ nǎ bló toxo lɛ́ɛ ɖó; mǐ nǎ mɛ ahohó lɛ́ lɛ̌ dó toxo lɛ́ɛ, bó ná mɛ tocɔ́kpe gbɔn ahohó lɛ́ɛ jí lɛ́ lɛ̌ dó, bó ná dó hɔn toxo lɛ́ɛ nu, bó ná nɔ́ sú yě. Mǐ nǎ bló mɔ̌, ɖó mǐ nɔ gbejí nú Mawu Mavɔmavɔ, Mawu mǐtɔn, bɔ gbejíninɔ mǐtɔn zɔ́n bɔ é ná ayij'ayǐ mǐ gbɔn ɖisí amyɔ.” Ée é ɖɔ mɔ̌ ɔ́, yě jɛ azɔ̌ wú, bó bló toxo énɛ́ lɛ́ɛ bǐ ɖó. Asa sín ahwangɔnu ɔ́, gbɛtɔ́ adɔ̌kpo afɔtɔn (300.000) wɛ nyí Judáanu, bɔ yě hɛn gǎglónú ɖaxó kpódó hwǎn kpó. Bɛnjamɛ́ɛnu lɛ́ɛ ká yi gbɛtɔ́ adɔ̌kpo wɛ̌nɛ (280.000), bɔ yě hɛn gǎglónú kpɛví; yě nyɔ́ gǎ da. Yě bǐ wɛ nyí ahwanfuntɔ́ syɛ́nsyɛ́n. Zeláxi Etiopíinu ɔ́ sɔ́ ahwannú, bó kplá ahwanfuntɔ́ lǐvi (1.000.000), bó hɛn kɛkɛ́ví afɔɖé kanwe ko (300), bó hun káká wá Maleca. Asa ɖidó Zeláxi kpó ahwan tɔn lɛ́ɛ kpó kpé gbé. Ée yě jɛ dɔ̌n ɔ́, yě to yěɖée ɖó ahwan lɔ jí ɖo tɔdo Sefáta tɔn mɛ, ɖo Maleca kpá. Asa ylɔ́ Mawu Mavɔmavɔ, Mawu tɔn bó ɖɔ: “Mawu Mavɔmavɔ, mɛ e ɖó gǎn lɛ́ɛ kpódó mɛ e ma ɖó gǎn ǎ lɛ́ɛ kpó ná hwlɛ́n gán ɔ́ nyí nǔ ɖěbǔ nú we ǎ. Wǎ gɔ́ alɔ nú mǐ, Mawu Mavɔmavɔ, Mawu mǐtɔn! Đó hwi wú wɛ mǐ gǎn jɛ, nyǐkɔ towe mɛ wɛ mǐ wǎ kpé ahwan xá ahwan wɔ̌buwɔ́bú élɔ́ ɖe. Mawu Mavɔmavɔ, Mawu mǐtɔn wɛ a nyǐ. Ní má nyí ɖɔ gbɛtɔ́ wɛ ná ɖu ɖo jǐ towe ó!” Mawu Mavɔmavɔ nya Etiopíinu lɛ́ɛ ɖo Asa kpó sɔ́ja Judáanu lɛ́ɛ kpó nukɔn, bɔ yě hɔn, bɔ Asa kpódó mɛ tɔn lɛ́ɛ kpó nya yě káká wá Geláa, bɔ Etiopíinu lɛ́ɛ ɖo ayǐ kɔn nyi wɛ káká bɔ yě bǐ kú. Yě mɛ ɖěbǔ gán ǎ; Mawu Mavɔmavɔ kpódó ahwangɔnu tɔn kpó vívá kún yětɔn. Asa kpódó mɛ tɔn lɛ́ɛ kpó bɛ́ nǔ sín ahwangbénu wá xwé kpɔ́ gégé. Ée Asa kpó mɛ tɔn lɛ́ɛ kpó bló mɔ̌ ɔ́, yě wǎ yí toxo e ɖo Geláa kpá lɛ́ɛ bǐ, ɖó mɛ e ɖo toxo énɛ́ lɛ́ɛ mɛ lɛ́ɛ mɔ nǔ e Mawu Mavɔmavɔ dó sin lɛ́ɛ, bɔ xɛsi tɔn ɖo yě jí. Asa kpó mɛ tɔn lɛ́ɛ kpó bɛ́ nǔ e ɖo toxo nɛ́ lɛ́ɛ mɛ lɛ́ɛ; nǔ e yě bɛ́ lɛ́ɛ sukpɔ́ ɖésú. Yě gba nǔ káká bó gba kanlinkpó lɛ́ɛ lɔ, bó bɛ́ lǎkúnmí kpó sɔ́ kpó kɔn nyi kpɔ́ gégé. Énɛ́ ɔ́ gúdo ɔ́, yě lɛ́ kɔ yi Jeluzalɛ́mu. Yɛ Mawu tɔn wá Azalyahu Odɛ́di ví ɔ́ jí; é yi Asa gɔ́n, bó ɖɔ n'i ɖɔ: “Axɔ́sú Asa, Judáanu e mi, Bɛnjamɛ́ɛnu e mi, mi bǐ ní ɖótó mì! Nú mi ɖo kpɔ́ xá Mawu Mavɔmavɔ jɛ́n wɛ ɔ́, é lɔ ná ɖo kpɔ́ xá mi. Ényí mi ba Mawu Mavɔmavɔ ɔ́, é ná zé éɖée xlɛ́ mi, mi ka jó e dó ɔ́, é lɔ ná jó mi dó. Izlayɛ́li ví lɛ́ɛ nɔ Mawu nǔgbó ɔ́ mɛ vo; yě nɔ vɔ̌sánú-xwlémawutɔ́ e ná nɔ kplɔ́n nǔ yě ɔ́ mɛ vo, bó nɔ sɛ́n ɔ́ mɛ vo; yě nɔ mɔ̌ káká. Adǎn ká ɖo yě gbo wɛ káká bɔ yě lɛ́ kɔ wá Mawu Mavɔmavɔ, Mawu Izlayɛ́li tɔn ɔ́ gɔ́n; yě jɛ sinsɛn ɛ jí bɔ é zé éɖée xlɛ́ yě. Hwe énɛ́ ɔ́ nu ɔ́, ayi sɔ́ jɛ ayǐ nú mɛ e ɖo yiyi wɛ, bó ɖo wǐwá wɛ gbɔn to lɛ́ɛ mɛ to lɛ́ɛ mɛ lɛ́ɛ ǎ, ɖó hunnyahunnya ɖo to lɛ́ɛ bǐ mɛ. Togun ɖě nɔ́ ɖo dǎka xo ɖě ɔ́ wú wɛ, bɔ toxo ɖě nɔ́ sí te dó ɖě jí, ɖó Mawu sɔ́ nǔgbomɛ tɛnmɛ tɛnmɛ lɛ́ɛ dó ɖo cɔcɔ dó nú yě wɛ. Amɔ̌, midɛɛ lɛ́ɛ ɔ́, mi syɛ́nlǐn; awakanmɛ ní ma kú mi ó, ɖó nǔ e mi wa lɛ́ɛ bǐ sín ajɔ ɖe.” Ée Asa se xó e gbeyíɖɔ Mawu tɔn Azalyahu Odɛ́di ví ɔ́ ɖɔ ɔ́, é mɔ gǎn, bó ɖe bǒcyɔ e ɖo Judáa kpódó Bɛnjamɛ́ɛ kpó yíkúngban jí lɛ́ɛ síin. Nǔ ɖokpó ɔ́ wɛ é lɛ́ bló gbɔn toxo e é yí ɖo sókan mɛ ɖo Eflayímu sín ayǐkúngban jí lɛ́ɛ mɛ. Énɛ́ ɔ́ gúdo ɔ́, vɔ̌sákpe Mawu Mavɔmavɔ tɔn e ɖo xɔ ɔ́ nukɔn ɔ́, é blóɖó. Axɔ́sú Asa kplé Judáanu lɛ́ɛ kpó Bɛnjamɛ́ɛnu lɛ́ɛ kpó; é lɛ́ kplé Izlayɛ́linu e hɔn sín akɔta Eflayímu tɔn mɛ, Manasée tɔn mɛ, kpó Sinmɛnyɔ́ɔ tɔn kpó mɛ, bó wá cí axɔ́súɖuto tɔn mɛ lɛ́ɛ; ɖó ée Izlayɛ́linu lɛ́ɛ mɔ ɖɔ Mawu Mavɔmavɔ tɔn ɖo kpɔ́ xá ɛ ɔ́, yě nyi ahwan bo wá jɛ jǐ tɔn. Hwenu e Asa ɖo xwe afɔtɔn bló wɛ ɖo zinkpo jí ɔ́, sun tɔn atɔngɔ́ ɔ́ mɛ wɛ yě kplé ɖo Jeluzalɛ́mu. Gbe énɛ́ gbe ɔ́, yě fɔ nyibú nǔwɔntɔn kanwe ko (700) kpódó gbɔ̌ děgba ɖě afɔwó-afatɔ́n (7.000) kpó ɖo kanlin e yě bɛ́ sín kɛntɔ́ yětɔn lɛ́ɛ sí lɛ́ɛ mɛ, bó dó sá vɔ̌ nú Mawu Mavɔmavɔ. Yě lɛ̌ kɔ yi akɔ e Mawu Mavɔmavɔ jɛ xá tɔ́gbó yětɔn lɛ́ɛ ɔ́ jí, bó d'akpá ɖɔ émí ná nɔ́ sɛn Mawu Mavɔmavɔ, Mawu tɔ́gbó émítɔn lɛ́ɛ tɔn kpódó ayixa émítɔn bǐ kpó, kpódó lǐndɔ̌n émítɔn bǐ kpó. Mɛ ɖé ma ba Mawu Mavɔmavɔ, Mawu Izlayɛ́li tɔn ɔ́ mɔ ǎ ɔ́, è nǎ hu mɛ ɔ́; é sixú nyí yɔkpɔ́vú abǐ mɛxó, súnnu abǐ nyɔ̌nu, è ɖǒ ná hu i. Kpɛn kpó lanzo kpó ɖo nǔ ɖɔ wɛ bɔ yě zě gbe dó jǐ, bó dó akpá nú Mawu Mavɔmavɔ kpó awǒbóbó kpó. Akpá énɛ́ ɔ́ e yě dó ɔ́ víví nú Judáanu lɛ́ɛ bǐ, ɖó yě dó akpá ɔ́ kpódó ayixa yětɔn bǐ kpó. Yě mɛ bǐ nɔ́ sɛn Mawu Mavɔmavɔ kpó jlǒ yě ɖésúnɔ tɔn kpó, bɔ Mawu Mavɔmavɔ zé éɖée xlɛ́ yě, bó ná ayij'ayǐ yě gbɔn ɖisí amyɔ. Axɔ́sú Asa tlɛ lɛ́ yí nyɔ̌nu ɖaxó sín acɛ e tɔ́ tɔn nɔ Maaka ɖó ɔ́ sín así tɔn, ɖó é kpa vodún Acela sín bǒcyɔ bó nɔ́ sɛn. Asa gba bǒcyɔ tɔ́ tɔn sín nɔ ɔ́ tɔn hánnyá, bó dó zo ɖo tɔsisa Sedlɔ́n tɔn tó. Tɛn mímɛ́ e ɖo to ɔ́ mɛ lɛ́ɛ ɖo fínɛ́, có Asa sín ayi bǐ nɔ Mawu Mavɔmavɔ jí, ɖo gbɛzán tɔn bǐ mɛ. Kpatágan kpó siká kpó, kpódó nǔ tɛnmɛ tɛnmɛ e Asa kpó tɔ́ tɔn kpó bɛ́ ɖó vo nú Mawu Mavɔmavɔ lɛ́ɛ kpó ɔ́, é bɛ́ bǐ wá Mawu xwé. Asa fun ahwan ɖě káká có bó bló xwe gbantɔ́n (35) ɖo axɔ́súzinkpo jí ǎ. Hwenu e Asa ɖo xwe gbantɔ́n-nukún-ɖokpó (36) bló wɛ ɖo axɔ́súzinkpo jí ɔ́, axɔ́sú Izlayɛ́li tɔn Baeca yi, bó tɔ́n ahwan Judáa to ɔ́ gbe ɖokpó, bó jɛ ahohó mɛ lɛ́ dó Hlama gletoxo ɔ́ jí, bó dó gbo ali nú axɔ́sú Judáa tɔn Asa. Asa ɖe kpatágan kpódó siká kpó ɖo dɔkun e ɖo Mawu Mavɔmavɔ xwé gbe lɛ́ɛ mɛ kpódó éé ɖo axɔ́sú ɔ́ sín hɔnmɛ lɛ́ɛ kpó mɛ, bó bɛ́ sɛ́ dó axɔ́sú Silíi tɔn Bɛni-Hadadi ɖo Damási, bó ɖɔ sɛ́ dó e ɖɔ: “Wǎ nú mǐ ní jɛ akɔ lě e tɔ́ ce kpódó tɔ́ towe kpó jɛ akɔ ɔ́ ɖɔhun. Kpatágan kpódó siká kpó e un sɛ́ dó we ɔ́ ɖíe. Yi klán akɔ xá axɔ́sú Izlayɛ́li tɔn Baeca, bónú é ní gosín ayǐkúngban ce jí.” Bɛni-Hadadi yí gbe nú xó e axɔ́sú Asa ɖɔ ɔ́, bó sɛ́ ahwangán tɔn lɛ́ɛ dó, bɔ yě yi tɔ́n ahwan Izlayɛ́li sín toxo lɛ́ɛ; yě yǐ Iyɔ́ni, bó yí Dan, bó yí Avɛ́li-Mayimu. Yě yǐ agbanxɔ e ɖo Nɛfutali toxo lɛ́ɛ mɛ lɛ́ɛ bǐ. Ée Baeca se mɔ̌ ɔ́, é ɖó ahohó e è mɛ lɛ́ dó Hlama wɛ é ɖe ɔ́ te, bó ɖó azɔ̌ e wa wɛ é ɖe lɛ́ɛ bǐ te. Axɔ́sú Asa kplá Judáanu lɛ́ɛ bǐ, bɔ yě yi bɛ́ nǔ e axɔ́sú Baeca dó ɖo dǒ mɛ lɛ́ dó Hlama wɛ lɛ́ɛ bǐ: yě bɛ́ awǐnnya kpó atín kpó, bɔ Asa bɛ́ dó mɛ ahohó lɛ́ dó Gɛva, bó lɛ́ mɛ lɛ́ dó Misipa. Hwenɛ́nu ɔ́, nǔmɔtɔ́ Hanáni yi Judáa xɔ́sú Asa gɔ́n, bó ɖɔ n'i ɖɔ: “A ba ná gán jɛ Mawu Mavɔmavɔ, Mawu towe wú ǎ, bó gán jɛ Silíi xɔ́sú ɔ́ wú. Nǔ énɛ́ e a wa ɔ́ zɔ́n bɔ ahwangɔnu Silíi xɔ́sú ɔ́ tɔn gló we. Etiopíinu lɛ́ɛ kpódó Libíinu lɛ́ɛ kpó kplé, bó nyí ahwangɔnu ɖaxó ɖokpó, bó hɛn kɛkɛ́ví kpó sɔ́xátɔ́ kpó kɔn nyi kpɔ́ gégé. Ée a ká gán jɛ Mawu Mavɔmavɔ wú hwe énɛ́ ɔ́ nu ɔ́, Mawu Mavɔmavɔ jó yě nú we ǎ cé? Mawu Mavɔmavɔ bló mɔ̌, ɖó nukún tɔn ɖo ayǐkúngban ɔ́ bǐ jí, bɔ é nɔ́ dó wǔsyɛ́n lanmɛ nú mɛ e yí wǎn n'i kpó ayixa yětɔn bǐ kpó lɛ́ɛ. Din ɔ́, a wa nǔ mɛ e ayixa ma sɔgbe ná ǎ ɖɔhun; énɛ́ wú ɔ́, ahwan fun wɛ jɛ́n a nǎ nɔ ɖe.” Ée Asa se mɔ̌ ɔ́, xomɛ sin i dó nǔmɔtɔ́ ɔ́ wú, bɔ é wlí i dó gan, ɖó xó e é ɖɔ ɔ́ vɛ́ n'i dín. É lɛ́ dó ya nú toví ɖé lɛ́ɛ. Axɔ́sú Asa sín tan ɔ́, è wlǎn sín fí e é bɛ́ sín ɔ́ káká yi fí e é fó dó ɔ́, dó axɔ́sú Judáa tɔn lɛ́ɛ kpódó Izlayɛ́li tɔn lɛ́ɛ kpó sín Tan wéma mɛ. Hwenu e Asa ɖo xwe gbantɔ́n-nukún-ɛnɛ (39) bló wɛ ɖo axɔ́súzinkpo jí ɔ́, azɔn baɖabaɖa ɖé wá hɛn afɔ tɔn. É wlí azɔn mɔ̌ có, é sɛn Mawu Mavɔmavɔ ǎ, azɔngblétɔ́ lɛ́ɛ wɛ é yi mɔ. Xwe kanɖé-nukún-ɖokpó (41) bló wɛ Asa ɖe ɖo axɔ́súzinkpo jí bɔ zǎn tɔn kú. Yɔdo e é kun ɖ'ayǐ nú é ɖésúnɔ ɖo Davídi Toxo mɛ ɔ́ mɛ wɛ è sɔ́ ɛ ɖó. È sɔ́ cyɔ tɔn mlɔ́ kpe ɖé jí ɖo yɔdo ɔ́ mɛ, bó kplé nǔsáwǔ wǎnɖagbenɔ ɖó fí ɔ́; lě e nǔsáwǔ wǎnɖagbenɔ ɖa tɔ́ lɛ́ɛ nɔ ɖa gbɔn ɔ́ wɛ è ɖa gbɔn, bó dó gěgé zo dó wlí yɛ̌yi n'i. Jozafáti Asa ví ɔ́ ɖu axɔ́sú ɖó tɔ́ tɔn tɛnmɛ. É zé acɛkpikpa tɔn jínjɔ́n ayǐ ɖo Izlayɛ́li. É ɖó ahwangɔnu gbɔn Judáa toxo e è mɛ ahohó lɛ́ lɛ̌ dó lɛ́ɛ ɖokpó ɖokpó mɛ, bó ɖó ahwankpá gbɔn toxo e ɖo Judáa lɛ́ɛ ɖokpó ɖokpó mɛ, bó lɛ́ ɖó gbɔn Eflayímu toxo e tɔ́ tɔn yí lɛ́ɛ ɖokpó ɖokpó mɛ. Mawu Mavɔmavɔ ɖo kpɔ́ xá Jozafáti, ɖó é zán gbɛ tɔn lě e tɔ́gbó tɔn Davídi zán gbɛ gbɔn hwenu e é yi zinkpo jí tlóló é. É sɛn vodún Baalu lɛ́ɛ ǎ. É nyɔ́ wa ɔ́, Mawu e tɔ́ tɔn nɔ sɛn ɔ́ wɛ é xwedó bó wa nǔ e é zɔ́n lɛ́ɛ. Éyɛ́ wa nǔ lě e è nɔ bló gbɔn ɖo axɔ́súɖuto Totaligbé tɔn ɔ́ mɛ é ǎ. Mawu Mavɔmavɔ sɔ́ acɛkpikpa tɔn jínjɔ́n ayǐ. Judáanu lɛ́ɛ bǐ nɔ́ hɛn nǔ bó nɔ́ wá ná Jozafáti, káká bɔ é jɛ dɔkun, bó xɔ susu bɔ é vɛ́ jlɛ́. Mawu Mavɔmavɔ sín jlǒ wiwa wɛ nɔ́ myá nukún n'i, bɔ é ɖe vodún xwé e gbɔn só jí só jí lɛ́ɛ kpódó vodún Acela lɛ́ɛ kpó sín axɔ́súɖuto Judáa tɔn mɛ. Hwenu e Jozafáti ɖo xwe atɔn bló wɛ ɖo zinkpo jí ɔ́, é sɛ́ azaglɔ́gán tɔn Bɛni-Hayílu, Ovadiahu, Zekaliya, Nɛtanɛli kpódó Mikayahu kpó dó Judáa toxo lɛ́ɛ mɛ, bɔ yě ná nɔ́ kplɔ́n nǔ mɛ. É sɛ́ Levíi ví Cemayahu, Nɛtaniyahu, Zevadiyahu, Asaxɛli, Cemilamɔti, Yexonatáni, Adoniyahu, Toviyahu kpódó Tɔ́vu-Adoniya kpó dó, bɔ yě xwedó azaglɔ́gán lɛ́ɛ. É lɛ́ sɛ́ vɔ̌sánú-xwlémawutɔ́ Elicama kpódó Yexolámu kpó dó, bɔ yě xwedó yě. Yě hɛn sɛ́nwéma Mawu Mavɔmavɔ tɔn ɔ́ bó kplɔ́n nǔ togun ɔ́ ɖ'é mɛ gbɔn Judáa toxo lɛ́ɛ bǐ mɛ. Axɔ́súɖuto e lɛ́ lɛ̌ dó Judáa lɛ́ɛ bǐ jɛ xɛsi ɖi nú Mawu Mavɔmavɔ jí, bɔ yě ɖě nɔ́ glá tɔ́n ahwan Jozafáti ǎ. Filisitɛ́ɛn ɖé lɛ́ɛ nɔ́ hɛn nǔ bó nɔ́ wá ná Jozafáti, bó nɔ hɛn kpatágan dó wá ná nǔjɔ. Alabíinu lɛ́ɛ lɔ nɔ hɛn kanlin wá. Yě nɔ́ hɛn agbo děgba ɖě afɔwó-afatɔ́n nǔwɔntɔn kanwe ko (7.700), gbǎgbá děgba ɖě afɔwó-afatɔ́n nǔwɔntɔn kanwe ko (7.700). Acɛkpikpa Jozafáti tɔn fɔ́n bó ɖo jijɛ jí wɛ. É bló fí e mɛɖé má sixú kpé mɛ wú ɖe ǎ é gěgé ɖó Judáa, bó zé toxo gěgé bó ná nɔ́ bɛ́ agban d'é mɛ. Ée é bló mɔ̌ ɔ́, nǔɖuɖu tíin sukpɔ́ ɖo toxo e ɖo axɔ́súɖuto tɔn mɛ lɛ́ɛ bǐ mɛ; é bɛ́ ahwanfuntɔ́ e syɛ́n ganjí lɛ́ɛ ɖó Jeluzalɛ́mu. Ahwanfuntɔ́ énɛ́ lɛ́ɛ ɔ́, yě kplé ɖo hɛ̌nnu yětɔn yětɔn mɛ; ahwangán ɖaxó ɖaxó e ɖo akɔta Judáa tɔn ɔ́ mɛ lɛ́ɛ ɖíe: Adina. É kpa acɛ dó ahwanfuntɔ́ syɛ́nsyɛ́n adɔ̌kpo afɔtɔn nu (300.000). Yexoxanáni; é kpa acɛ dó ahwanfuntɔ́ adɔ̌kpo wɛ̌nɛ nu (280.000). Amasíya Zikli ví ɔ́. Éyɛ́ ɖésúnɔ wɛ ɖó jlǒ bó ná wa azɔ̌ nú Mawu Mavɔmavɔ. É kpa acɛ dó ahwanfuntɔ́ syɛ́nsyɛ́n adɔ̌kpo wǒ nu (200.000). Ahwangán ɖaxó ɖaxó e ɖo akɔta Bɛnjamɛ́ɛ tɔn mɛ lɛ́ɛ ɖíe: ahwanfuntɔ́ syɛ́nsyɛ́n Eliyada. É kpa acɛ dó ahwanfuntɔ́ adɔ̌kpo wǒ nu (200.000). Yexozavadi; é kpa acɛ dó ahwanfuntɔ́ adɔ̌kpo wɛ̌nɛ nu (280.000); yě bǐ ko sɔ́ ahwan nú. Yě mɛ e ɖo azɔ̌ wa nú axɔ́sú ɔ́ wɛ ɖo Jeluzalɛ́mu lɛ́ɛ nɛ́. È ka xa mɛ e axɔ́sú ɔ́ fɔ ɖó toxo e é mɛ ahohó lɛ́ lɛ̌ dó ɖo axɔ́súɖuto tɔn mɛ lɛ́ɛ d'é mɛ ǎ. Axɔ́sú Jozafáti jɛ dɔkun bó xɔ susu bɔ é vɛ́ jlɛ́. É byɔ́ axɔ́sú Akábu sín vǐ nú vǐ tɔn bɔ hɛ̌nnu we lɛ́ɛ jɛ akɔ. Ée yě jɛ akɔ énɛ́ ɔ́, é bló xwe ɖé ǎ, bɔ é yi Akábu gɔ́n ɖo Samalíi, bɔ Akábu hu gbɔ̌ kpódó nyibú kpó kɔn nyi kpɔ́, bó dó yí é kpódó mɛ e xwedó e wá lɛ́ɛ kpó sín jǒnɔ. Énɛ́ ɔ́ gúdo ɔ́, é ɖɔ nú Jozafáti ɖɔ émí jló ɖɔ émí kpódó é kpó ná yi tɔ́n ahwan Hlamɔti toxo ɔ́ ɖo Galadi. Akábu kanbyɔ́ Jozafáti ɖɔ: “A ma ná gɔ́ nú mì bónú mǐ nǎ yi tɔ́n ahwan Hlamɔti toxo ɔ́ ɖo Galadi yíkúngban jí a?” Bɔ Jozafáti yí gbe n'i ɖɔ: “Nyɛ kpódó hwi kpó ɔ́, nǔ ɖokpó ɔ́ wɛ mǐ nyí, togun ce ɔ́, togun towe wɛ, togun towe ɔ́, togun ce wɛ. Mǐ ná yi tɔ́n ahwan toxo ɔ́ xá we.” Énɛ́ ɔ́ gúdo ɔ́, Jozafáti ɖɔ nú axɔ́sú Izlayɛ́li tɔn ɔ́ ɖɔ: “Din ɔ́, bo kɛnklɛ́n bó kan nǔ byɔ́ Mawu Mavɔmavɔ hwɛ̌.” Axɔ́sú Izlayɛ́li tɔn ɔ́ kplé gbeyíɖɔ tɔn afɔwe (400) lɛ́ɛ bó kanbyɔ́ yě ɖɔ: “Mǐ ní yi tɔ́n ahwan Hlamɔti toxo ɔ́ ɖo Galadi yíkúngban jí a, abǐ má gbɔ?” Bɔ yě yí gbe n'i ɖɔ: “Yi! Mawu ná jó toxo ɔ́ nú we.” Jozafáti ka kanbyɔ́ ɖɔ: “ Gbeyíɖɔ Mawu Mavɔmavɔ tɔn ɖě sɔ́ ɖo fí bónú mǐ ná kan nǔ byɔ́ Mawu Mavɔmavɔ gbɔn jǐ tɔn ǎ cé?” Bɔ axɔ́sú Izlayɛ́li tɔn ɔ́ yí gbe nú Jozafáti ɖɔ: “Nya ɖokpó lɛ́ ɖo fí, bɔ mǐ sixú kan nǔ byɔ́ Mawu Mavɔmavɔ gbɔn jǐ tɔn. Un ka gbɛ́ wǎn n'i, ɖó é nɔ mɔ nǔ ɖagbe ɖé ɖɔ nú mì ǎ; nǔ nyanya kɛ́ɖɛ́ jɛ́n é nɔ mɔ ɖɔ nú mì. Micée Yimula ví ɔ́ wɛ.” Ée é ɖɔ mɔ̌ ɔ́, Jozafáti ɖɔ n'i ɖɔ: “Sɛ́mɛɖó, ma ɖɔ mɔ̌ ó.” Énɛ́ ɔ́, Izlayɛ́li xɔ́sú ɔ́ ylɔ́ agooɖojǐe tɔn ɖokpó, bó ɖɔ n'i ɖɔ ní yi kplá Micée Yimula ví ɔ́ wá din tlóló. Hwenɛ́nu ɔ́, Izlayɛ́li xɔ́sú ɔ́ kpódó Judáa xɔ́sú ɔ́ kpó ɖo ayǐjínjɔ́n ɖo axɔ́súzinkpo yětɔn yětɔn jí, bó ɖo axɔ́súwu yětɔn mɛ. Samalíi toxo ɔ́ sín hɔntogbó jí wɛ yě ɖe, ɖo gblogblo jí, bɔ gbeyíɖɔ lɛ́ɛ bǐ ɖo xó ɖɔ nú yě wɛ. Sidikíyahu Kenáana ví ɔ́ zé gan dó tun lanzo ná, bó ɖɔ: “Mawu Mavɔmavɔ ɖɔ: ‘Lanzo we élɔ́ lɛ́ɛ ná nyí hlɔ̌nhlɔ́n e a nǎ dó gba Silíinu lɛ́ɛ é sín xlɛ̌.’ ” Ée é ɖɔ mɔ̌ ɔ́, gbeyíɖɔ ɖě lɛ́ɛ bǐ ɖɔ xó ɖokpó ɔ́, bó wá ɖɔ nú Akábu ɖɔ: “Sɛ́mɛɖó! È nǐ yi Hlamɔti toxo mɛ ɖo Galadi yíkúngban jí, ahwan ɔ́ ná kpa mɛ. Mawu Mavɔmavɔ ná jó toxo ɔ́ nú mɛ.” Wɛnsagun e yi Micée ylɔ́ gbé ɔ́ ɖɔ n'i ɖɔ: “Gbeyíɖɔ ɖě lɛ́ɛ bǐ wɛ ɖɔ nǔ ɖokpó ɔ́; yě bǐ ɖɔ xó ɖagbe nú axɔ́sú ɔ́. Hwi lɔ tɛ́nkpɔ́n bó ɖɔ xó ɖagbe nú axɔ́sú ɔ́ yě ɖɔhun.” Micée ka xwlé Mawu n'i ɖɔ: “Mawu Mavɔmavɔ ɖo gbɛ! Nǔ e Mawu ce ɖɔ nyɛ ní ɖɔ ɔ́ wɛ un ná ɖɔ.” Ée gbeyíɖɔ Mawu tɔn Micée wá axɔ́sú ɔ́ gɔ́n ɔ́, axɔ́sú ɔ́ kanbyɔ́ ɛ ɖɔ: “Mǐ ní yi tɔ́n ahwan Hlamɔti toxo ɖo Galadi yíkúngban jí a, abǐ mǐ ní gbɔ?” Bɔ Micée yí gbe n'i ɖɔ: “Sɛ́mɛɖó, é ná kpa mɛ! Mawu ná jó toxo ɔ́ nú mɛ.” Axɔ́sú ɔ́ ká wá kanbyɔ́ ɛ ɖɔ: “Azɔn nabí mɔ̌ wɛ un ná byɔ́ we ɖɔ hwi ní xwlé nǔ ɖɔ nǔgbó jɛ́n ɖɔ nú mì wɛ a ɖe ɖo Mawu Mavɔmavɔ nyíkɔ mɛ?” Ée é ɖɔ mɔ̌ ɔ́, Micée ɖɔ n'i ɖɔ: “Un mɔ nǔ: un mɔ Izlayɛ́li togun ɔ́ bǐ gba dó gbɔn sókan mɛ sókan mɛ, lɛ̌ngbɔ́ e má ɖó nyinyitɔ́ ǎ lɛ́ɛ ɖɔhun, bɔ Mawu Mavɔmavɔ ɖɔ: ‘Mɛ nɛ́ lɛ́ɛ sɔ́ ɖó mɛɖé bɔ é ɖo yě nu ǎ. Mɛ ɖokpó ɖokpó ní bó lɛ́ kɔ yi xwé tɔn gbe; è ma fun ahwan ó!’ ” Énɛ́ ɔ́, axɔ́sú Izlayɛ́li tɔn ɔ́ ɖɔ nú Jozafáti ɖɔ: “Un ma ɖɔ mɔ̌ nú we a? É nɔ́ mɔ nǔ ɖagbe ɖé bó nɔ́ ɖɔ nú mì gbeɖé ǎ, xó nyanya kɛ́ɖɛ́ jɛ́n é nɔ mɔ ɖɔ nú mì.” Micée ka ɖɔ n'i ɖɔ: “Se nǔ e Mawu Mavɔmavɔ ɖɔ ɔ́. Un mɔ Mawu Mavɔmavɔ ɖo ayǐjínjɔ́n ɖo axɔ́súzinkpo tɔn jí, bɔ mɛsɛntɔ́ sɛ́xwé tɔn lɛ́ɛ bǐ ɖo gɔ̌n tɔn. Mɛ hǎbǔ ɖo ɖisí tɔn xwé, bɔ mɛ hǎbǔ ɖo amyɔ tɔn xwé. Bɔ Mawu Mavɔmavɔ ɖɔ: ‘Mɛ̌ ká ná blɛ́ Akábu axɔ́sú Izlayɛ́li tɔn ɔ́, bɔ é ná yi tɔ́n ahwan Hlamɔti toxo ɔ́ ɖo Galadi yíkúngban jí, bó ná kú?’ Bɔ yě ɖɔ yětɔn yětɔn. Hwenɛ́nu ɔ́, yɛ ɖokpó wá Mawu Mavɔmavɔ nukɔn, bó ɖɔ: ‘Nyɛ ná yi blɛ́ ɛ.’ Bɔ Mawu Mavɔmavɔ kanbyɔ́ ɛ ɖɔ: ‘Nɛ̌ wɛ a nǎ bló gbɔn?’ Bɔ é yí gbe nú Mawu Mavɔmavɔ ɖɔ: ‘Un ná yi, bó ná nyí yɛ adingbannɔ ɖo gbeyíɖɔ tɔn lɛ́ɛ bǐ sín nu mɛ.’ Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: ‘Wlɛnwín ɖagbe nɛ́! A nǎ kpé wú bó ná blɛ́ ɛ nǔgbó. Bo yi bo bló gbɔn mɔ̌.’ Bɔ nǔgbó din ɔ́, Mawu Mavɔmavɔ sɔ́ yɛ adingbannɔ dó gbeyíɖɔ towe e ɖo fínɛ́ lɛ́ɛ bǐ sín nu mɛ. Amɔ̌, nú è nǎ ɖɔ nǔgbó ɔ́, awě sɛ́ dó we wɛ Mawu Mavɔmavɔ ɖe.” Ée Micée ɖɔ mɔ̌ tlóló ɔ́, Sidikíyahu Kenáana ví ɔ́ sɛkpɔ́ ɛ, bó gba tomɛ n'i bó ɖɔ: “Fítɛ́ wɛ yɛ Mawu Mavɔmavɔ tɔn ɔ́ gbɔn, bó tɔ́n sín nyɛ mɛ, bó wá ɖɔ xó nú we?” Bɔ Micée yí gbe n'i ɖɔ: “Gbe e gbe a nǎ jɛ hinhɔn hwlá jí gbɔn xɔ mɛ xɔ mɛ ɔ́, a nǎ mɔ.” Bɔ axɔ́sú Izlayɛ́li tɔn ɔ́ ɖɔ nú mɛsɛntɔ́ tɔn lɛ́ɛ ɖɔ: “Mi wlí Micée bó kplá ɛ yi jó nú Amɔ́ni, gǎn e kpa acɛ dó toxo ɔ́ nu ɔ́ kpó vǐ ce Yoaci kpó. Mi ná ɖɔ nú yě ɖo nyǐkɔ ce mɛ ɖɔ yě ní sú nya élɔ́, bónú è nǐ nɔ́ ɖo nǔɖuɖu kpɛví ɖé, sin kpɛví ɖé ná ɛ wɛ káká bónú má lɛ́ kɔ sín ahwangbénu wǔyɛ́yɛ́ afɔyɛ́yɛ́.” Bɔ Micée ka ɖɔ n'i ɖɔ: “Nú a lɛ̌ kɔ wá wǔyɛ́yɛ́ afɔyɛ́yɛ́ hǔn, Mawu Mavɔmavɔ ɖɔ xó gbɔn jǐ ce ǎ.” Ée é ɖɔ mɔ̌ gúdo ɔ́, é ɖɔ: “Togun lɛ́ɛ bǐ ní ɖótó!” Axɔ́sú Izlayɛ́li tɔn Akábu kpódó Jozafáti axɔ́sú Judáa tɔn kpó yi tɔ́n ahwan Hlamɔti ɖo Galadi. Cóbónú yě ká ná yi ɔ́, axɔ́sú Izlayɛ́li tɔn ɔ́ ɖɔ nú Jozafáti ɖɔ: “Nyɛ ɔ́, un ná húzú kan; un ná dó axɔ́súwu ce lɛ́ɛ ǎ; amɔ̌, hwɛ ɔ́, dǒ axɔ́súwu towe lɛ́ɛ.” Ée axɔ́sú Izlayɛ́li tɔn ɔ́ ɖɔ mɔ̌ ɔ́, é dó nǔ ɖěvo lɛ́ɛ, bɔ yě ɖidó ahwangbénu. Axɔ́sú Silíi tɔn ká ko ɖɔ nú gǎn e kpa acɛ dó ahwankɛkɛ́ví tɔn lɛ́ɛ nu lɛ́ɛ ɖɔ yě ní má ɖó alɔ ahwanfuntɔ́ kpaa lɛ́ɛ wú ó, yě ní má ká ɖó alɔ ahwangán lɛ́ɛ wú ó, lo ɔ́ axɔ́sú Izlayɛ́li tɔn ɔ́ kɛ́ɖɛ́ wɛ yě ná wlí. Ée gǎn e kpa acɛ dó ahwankɛkɛ́ví lɛ́ɛ nu lɛ́ɛ mɔ Jozafáti jǎwe ɔ́, yě lin dó ayi mɛ ɖɔ: “Axɔ́sú Izlayɛ́li tɔn ɔ́ wɛ.” Énɛ́ ɔ́, yě xá ɛ bó ná wlí i. Jozafáti ka sú xó e è nɔ sú ɖo ahwangbénu é, bɔ Mawu Mavɔmavɔ nya kɛntɔ́ tɔn lɛ́ɛ, bó hwlɛ́n ɛ. Ée gǎn e kpa acɛ dó ahwankɛkɛ́ví lɛ́ɛ nu lɛ́ɛ mɔ ɖɔ é kún nyí axɔ́sú Izlayɛ́li tɔn ɔ́ wɛ ó ɔ́, yě jó e dó. Hwenɛ́nu ɔ́, sɔ́ja Silíinu ɖé ka da gǎ tɔn kpowun, bɔ gǎ ɔ́ yi gbɔn fí e ganwu e Izlayɛ́li xɔ́sú ɔ́ dó ɔ́ kpé ɖe ɔ́, bó sɔ́ ɛ, bɔ axɔ́sú ɔ́ ɖɔ nú mɛ e ɖo kunkun i wɛ ɔ́ ɖɔ: “Lɛ̌ kɔ, bó kplá mì sín ahwangbénu, ɖó un xo akpa.” Ahwan ɔ́ ká syɛ́n gbe nɛ́ gbe káká bɔ è gbɔ bo hɛn ɛ ɖó te ɖo kɛkɛ́ví tɔn mɛ, bɔ é nɔ ahwan ɔ́ nu ɖo ahwangɔnu Silíi tɔn ɔ́ nukɔn. Hwenu e hwe ɖo xɔ yi wɛ ɔ́, é kú. Axɔ́sú Judáa tɔn Jozafáti lɛ́ kɔ wá xwé tɔn gbe ɖo Jeluzalɛ́mu wǔyɛ́yɛ́ afɔyɛ́yɛ́. Nǔmɔtɔ́ Jehu Hanáni ví ɔ́ ká yi kpé e, bó ɖɔ n'i ɖɔ: “Étɛ́wú wɛ a yi gɔ́ alɔ nú nǔnyanyawatɔ́? È nǎ yí wǎn nú mɛ e gbɛ́ wǎn nú Mawu Mavɔmavɔ lɛ́ɛ wɛ a? Mawu Mavɔmavɔ sin xomɛ dó we ɖó nǔ énɛ́ e a wa ɔ́ wú. Nǔ ɖo mɔ̌ có, a wa nǔ ɖagbe gěgé, ɖó a dǒ vodún Acela e ɖo to towe mɛ lɛ́ɛ bǐ zo, lobo sɛn Mawu kpódó ayi towe bǐ kpó.” Jeluzalɛ́mu wɛ Jozafáti nɔ nɔ, có é nɔ́ lɛ́ gbɔn to ɔ́ bǐ jí, sín Bɛ̌-Ceva káká yi Eflayímu sókan mɛ, bó nɔ ɖɔ nú Izlayɛ́li ví lɛ́ɛ ɖɔ yě ní lɛ́ kɔ wá Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ gɔ́n. É sɔ́ hwɛɖɔtɔ́ ɖó toxo e è mɛ ahohó lɛ́ lɛ̌ dó ɖo Judáa lɛ́ɛ bǐ nu. Ée axɔ́sú Jozafáti sɔ́ yě ɔ́, é ɖɔ nú yě ɖɔ: “Mi kpé nukún dó azɔ̌ mitɔn wú bó wa. Đó hwɛ e ná ɖɔ wɛ mi ɖe lɛ́ɛ ɔ́, gbɛtɔ́ nyíkɔ mɛ ná ɖɔ hwɛ dó wɛ mi ɖe ǎ, lo ɔ́, Mawu Mavɔmavɔ nyíkɔ mɛ ná ɖɔ hwɛ dó wɛ mi ɖe; é ná ɖo kpɔ́ xá mi hwenu e mi ná ɖo hwɛ ɖɔ wɛ é. Mi bo ɖó sísí nú Mawu Mavɔmavɔ ganjí, bó hɛn ayi dó azɔ̌ e wa gbé mi ja ɔ́ wú, ɖó Mawu Mavɔmavɔ, Mawu mǐtɔn nɔ́ yí gbe nú hwɛagɔdídó ǎ, é ka nɔ́ yí gbe ɖɔ è nǐ nɔ gbɛtɔ́ jí ǎ, é nɔ́ ba ɖɔ è nǐ nɔ ɖu kpa ǎ.” Jozafáti bló nǔ ɖokpó ɔ́ ɖo Jeluzalɛ́mu; é ɖe Levíi ví ɖé lɛ́ɛ, vɔ̌sánú-xwlémawutɔ́ ɖé lɛ́ɛ, kpódó hɛ̌nnugán Izlayɛ́li tɔn ɖé lɛ́ɛ kpó, bɔ yě ná nɔ́ xwedó sɛ́n dó ɖɔ hwɛ ɖo Mawu Mavɔmavɔ nyǐkɔ mɛ, bó ná nɔ́ ɖɔ hwɛ gbo nú Jeluzalɛ́munu lɛ́ɛ. Ée Jozafáti ɖe yě ɔ́, é ɖɔ nú yě ɖɔ: “Mi ɖó ná ɖó sísí nú Mawu Mavɔmavɔ, bó ná sixú wa nǔ kpó ayixa mitɔn bǐ kpó, kpódó gbejíninɔ kpó. Nɔví mitɔn hwɛɖɔtɔ́ e ɖo toxo lɛ́ɛ mɛ lɛ́ɛ ɖě zě hwɛ ɖé wá gɔ̌n mitɔn hweɖěbǔnu hǔn, mi ɖe yě ɖó ali jí: é sixú nyí mɛ wɛ è hu, é sixú nyí sɛ́n ɔ́ jí dɔn nǔ dó wɛ è ɖe, abǐ nǔ e Mawu Mavɔmavɔ zɔ́n lɛ́ɛ, abǐ gbeta tɔn lɛ́ɛ, abǐ hwɛndo lɛ́ɛ; mi ɖe yě ɖó ali jí bónú yě ma wá hu hwɛ dó Mawu Mavɔmavɔ, bónú Mawu Mavɔmavɔ wá sin xomɛ dó mi kpó vǐ mitɔn lɛ́ɛ kpó ó. Lě e mi ná bló gbɔn, bó ma ná hu hwɛ ǎ é nɛ́. Amaliyahu, vɔ̌sánú-xwlémawutɔ́ ɖaxó ɔ́ ká ɖo mi nu, bó ná nɔ kpé nukún nǔ e kan Mawu Mavɔmavɔ lɛ́ɛ bǐ wǔ. Zevadiyahu, Yicimayɛ́li ví e nyí gǎn hɔn-yitɔ́ ɖo axɔ́súɖuto Judáa tɔn ɔ́ mɛ ɔ́ ná nɔ kpé nukún dó nǔ e kan axɔ́sú ɔ́ lɛ́ɛ bǐ wú. Levíi ví lɛ́ɛ ka ná nɔ́ dó alɔ mi. Mi bo ɖó kan dó azɔ̌ wú, lobo nú Mawu Mavɔmavɔ ní nɔ kpɔ́ xá mɛ e ná bló ganjí é.” Énɛ́ ɔ́ gúdo ɔ́, Mɔwabunu lɛ́ɛ, Amumɔ́ɔ ví lɛ́ɛ kpódó Mɛwun lɛ́ɛ kpó yi tɔ́n ahwan Jozafáti. Bɔ è wǎ ɖɔ nú Jozafáti ɖɔ: “Ahwangɔnu tobutóbú ɖé gosín Xu Kúkú ɔ́ sín awa jí, ɖo Edɔ́mu yíkúngban jí, bó jǎwe. Hasasɔ́ni-Tamáa wɛ yě ɖe din.” Hasasɔ́ni-Tamáa wɛ nyí Eyinu-Gɛdi. Ée Jozafáti se mɔ̌ ɔ́, ado hu i, bɔ é ɖɔ émí ná kan nǔ byɔ́ Mawu Mavɔmavɔ. Énɛ́ ɔ́, é ɖɔ bɔ mɛ bǐ ná blá nu gbɔn axɔ́súɖuto Judáa tɔn ɔ́ bǐ mɛ. Judáanu lɛ́ɛ gosín toxo e ɖo to ɔ́ mɛ lɛ́ɛ bǐ mɛ, bó wá kplé, bó ná byɔ́ alɔdó Mawu Mavɔmavɔ tɔn. Ée yě wá kplé ɔ́, Jozafáti sí te, bó kpan nukɔn kɔ́xota yɔ̌yɔ́ e ɖo Mawu xwé gbe ɔ́, bɔ Jeluzalɛ́munu lɛ́ɛ kpódó Judáanu ɖě lɛ́ɛ kpó lɛ́ dó e. Énɛ́ ɔ́, é xo ɖɛ bó ɖɔ: “Mawu Mavɔmavɔ, Mawu tɔ́gbó mǐtɔn lɛ́ɛ tɔn e, hwi wɛ ɖu axɔ́sú ɖo jǐnukúnsin. Hwi wɛ kpa acɛ dó axɔ́súɖuto e ɖo gbɛ ɔ́ mɛ lɛ́ɛ bǐ nu. Hwi wɛ ɖó acɛ bó kpé nǔ bǐ wú, bɔ mɛ ɖěbǔ nɔ sixú nɔ te ɖo nukɔn towe ǎ. Mawu mǐtɔn, hwenu e togun towe Izlayɛ́li jǎwe to mɛ fí ɔ́, hwi wɛ yí to ɔ́ sín toví lɛ́ɛ sí, bó zé ná xɔ́ntɔn towe Ablaxámu ví lɛ́ɛ, bɔ é nyí yětɔn káká sɔ́yi. Yě nɔ to ɔ́ mɛ fí, bó sá xwé nú we, bó ɖɔ: ‘Ényí awě ɖé xo mǐ ɔ́: ahwan wɛ tɔ́n mǐ oo, tó wɛ è dɔn nú mǐ oo, jɛmɛjí abǐ adɔ wɛ tɔ́n oo, mǐ ná nɔ wá gɔ̌n towe ɖo xwé élɔ́ gbe, ɖó nyǐkɔ towe wɛ ɖo xwé ɔ́ jí. Mǐ ná sú xó ylɔ́ we ɖo adǎngbomɛ hwenu, bɔ a nǎ se, bó ná hwlɛ́n mǐ gán.’ Din ɔ́, kpɔ́n! Amumɔ́ɔ ví lɛ́ɛ, Mɔwabunu lɛ́ɛ kpódó Seyíi sókanmɛnu lɛ́ɛ kpó ɖíe tɔ́n ahwan mǐ e. Hwenu e tɔ́gbó mǐtɔn lɛ́ɛ ká gosín Ejípu ɔ́, a gbɛ̌ nú yě ɖɔ yě ní má gbɔn toxo énɛ́ lɛ́ɛ sín ayǐkúngban jí ó, bɔ tɔ́gbó mǐtɔn lɛ́ɛ kpa kɛ́n nú yě, bó vívá kún yětɔn ǎ. Đagbe e yědɛɛ lɛ́ɛ ka mɔ, bó ná wa nú mǐ égbé din ɔ́ wɛ nyí ɖɔ yě wǎ, bó ná nya mǐ sín ayǐkúngban e a nǎ mǐ ɔ́ jí. Mawu mǐtɔn, a nǎ dɔn tó nú yě ǎ wɛ a? Đó mǐ kpé nǔ ɖěbǔ wú ɖo ahwan wɔ̌buwɔ́bú énɛ́ e jǎwe ahwan tɔ́n mǐ gbé ɔ́ nukɔn ǎ. Mǐ ká tunwun nǔ e mǐ ná wa ɔ́ ǎ. Amɔ̌, mǐ ɖo nukún ɖó we wɛ ɖɔ a nǎ hwlɛ́n mǐ gán.” Judáanu lɛ́ɛ bǐ ɖo te fínɛ́ ɖo Mawu Mavɔmavɔ xwé ɔ́ nukɔn, yě kpó asi yětɔn lɛ́ɛ kpó vǐ yětɔn lɛ́ɛ kpó. Énɛ́ ɔ́, yɛ Mawu Mavɔmavɔ tɔn wá Yaxaziɛ́li jí ɖo agun ɔ́ mɛ. Yaxaziɛ́li ɔ́, Zekaliyahu ví wɛ é nyí, bó nyí Benaya vívú, bó nyí Yeyiɛ́li vívú vivu, bó nyí Mataniya vitikli, bó nyí Levíi ví, bó jɔ ɖo Asáfu kún mɛ. Ée yɛ ɔ́ wá Yaxaziɛ́li jí mɔ̌ ɔ́, é ɖɔ: “Judáanu e mi, Jeluzalɛ́munu e mi, mi ɖótó mì; axɔ́sú Jozafáti, hwi lɔ ní ɖótó mì. Mi ɖótó xó e Mawu Mavɔmavɔ ɖo ɖiɖɔ nú mi wɛ é; é ɖɔ: ‘Mi ma ɖi xɛsi ó, ado ní má hu mi ɖo ahwan wɔ̌buwɔ́bú e jǎwe ɔ́ nukɔn ó, ɖó ahwan énɛ́ ɔ́, mi wɛ ɖo nǎ fun wɛ ǎ, nyɛ Mawu wɛ ɖo nǎ fun wɛ. É jɛ sɔ ɔ́, mi ná wlí ali bo ná yi mɔ kɛntɔ́ mitɔn lɛ́ɛ. Yě ná gbɔn Tisi kpó ɔ́ jí wá, mi ná mɔ yě ɖo tɔdo ɔ́ tó, ɖo gbětótló Yeluɛli tɔn ɔ́ nukɔn. Midɛɛ lɛ́ɛ wɛ xwe ahwan fun xá yě gbé ɖo fínɛ́ ǎ. Judáanu e mi, Jeluzalɛ́munu e mi, mi cí fínɛ́ kpowun, mi ma sɛ tɛn ó, bó ná kpɔ́n lě e un ná hwlɛ́n mi gán gbɔn é. Mi ma ɖi xɛsi ó, ado ní ma hu mi ó. É jɛ sɔ ɔ́, mi ná tɔ́n bó yi kpé yě. Nyɛ Mawu Mavɔmavɔ ká ná nɔ kpɔ́ xá mi.’ ” Ée Yaxaziɛ́li ɖɔ mɔ̌ ɔ́, Jozafáti xwe agbɔ̌nnusú do, bɔ Jeluzalɛ́munu lɛ́ɛ bǐ kpó Judáanu ɖě lɛ́ɛ bǐ kpó jɛ kpo bó ɖe kɔ́ nú Mawu Mavɔmavɔ, lobo sɛn ɛ. Levíi ví e ɖo Kexáti ví lɛ́ɛ kpó Kolée ví lɛ́ɛ kpó mɛ lɛ́ɛ sí te, bó sú xó, bó kpa susu nú Mawu Mavɔmavɔ, Mawu Izlayɛ́li tɔn ɔ́ kpó awǒbóbó kpó. Ayǐhɔ́ngbe tɔn zǎnzǎn tɛɛn ɔ́, yě bǐ jɛ ali ɖidó Tekowa sín gbětótló ɔ́ mɛ. Hwenu e yě jló ná jɛ ali ɔ́, Jozafáti wá ɖɔ nú yě ɖɔ: “Judáanu e mi, Jeluzalɛ́munu e mi, mi ɖótó mì. Mi ɖeji dó Mawu Mavɔmavɔ, Mawu mitɔn wú; énɛ́ ɔ́, é ná dó wǔsyɛ́n lanmɛ nú mi. Mi ɖeji dó gbeyíɖɔ tɔn lɛ́ɛ wú; énɛ́ ɔ́, mi ná ɖuɖéjí.” Jozafáti ɖɔ xá togun ɔ́, bó ɖe yě mɛ e ná ji han lɛ́ɛ, bɔ yě fɔ awu e è nɔ zán ɖo Mawu Mavɔmavɔ xwé gbe lɛ́ɛ, bó jɛ ahwangɔnu ɔ́ nukɔn, lobo ɖo Mawu Mavɔmavɔ sɔ́ su wɛ dó han mɛ ɖɔ: “Mi kpa susu nú Mawu Mavɔmavɔ, ɖó wǎn yíyí tɔn ɖó dogbó ǎ.” Hwenu e yě dó han bo ɖo susu kpa nú Mawu Mavɔmavɔ wɛ ɔ́, Mawu Mavɔmavɔ dó kíjá Amumɔ́ɔ ví lɛ́ɛ, Mɔwabunu lɛ́ɛ, kpódó Seyíi sókanmɛnu lɛ́ɛ kpó mɛ, bɔ yě jɛ yěɖée hu jí. Amumɔ́ɔ ví lɛ́ɛ kpó Mɔwabunu lɛ́ɛ kpó byɔ́ Seyíi sókanmɛnu lɛ́ɛ mɛ, bó hu yě bǐ; mɛ ɖokpó kpo ǎ. Énɛ́ ɔ́ gúdo ɔ́, yě húzú kpan nukɔn yěɖée, bó jɛ yěɖée hu jí. Ée Judáanu lɛ́ɛ wá jɛ fí e è nɔ mɔ gbětótló ɔ́ sɛ́ dó ɖe ɔ́, bó ná zé kɔ kpowun ɔ́, kɛntɔ́ yětɔn lɛ́ɛ sín cyɔ jɛ́n yě mɔ ɖo títɛ́ kpaɖaɖa. Mɛ ɖěbǔ ɖo gbɛ ǎ. Jozafáti kpó mɛ tɔn lɛ́ɛ kpó yi bɛ́ nǔ yětɔn lɛ́ɛ. Yě mɔ kanlin, dɔkun, awu kpó nǔ xɔ akwɛ́ tɛnmɛ tɛnmɛ lɛ́ɛ kpó kpɔ́ gégé. Nǔ lɛ́ɛ sukpɔ́, bɔ yě ɖo bǐbɛ́ wɛ káká nú azǎn atɔn, cóbɔ é lɛ́ kpo. Azǎn ɛnɛgɔ́ ɔ́ gbe ɔ́, yě kplé ɖo Belaka tɔdo ɔ́ mɛ. È kpo ɖo tɛn énɛ́ ɔ́ mɛ ylɔ́ ɖɔ “Belaka tɔdo” wɛ káká jɛ égbé, ɖó fínɛ́ wɛ yě dó kú nú Mawu Mavɔmavɔ ɖe. Jozafáti zɔn Jeluzalɛ́munu lɛ́ɛ kpó Judáanu ɖě lɛ́ɛ kpó nu, bɔ yě bǐ lɛ́ kɔ ɖidó Jeluzalɛ́mu kpó awǎjijɛ kpó, ɖó Mawu Mavɔmavɔ hwlɛ́n yě sín kɛntɔ́ yětɔn lɛ́ɛ sí, bó dó dó xomɛhunhun ɖaxó ɖé nú yě. Yě byɔ́ Jeluzalɛ́mu toxo ɔ́ mɛ, bɔ hǔn kpó agǐdigbo kpó, kpódó kpɛn kpó ɖo gbe jɛ wɛ, bɔ yě ɖo xixo wɛ káká yi Mawu Mavɔmavɔ xwé gbe. Axɔ́súɖuto ɖě lɛ́ɛ bǐ se lě e Mawu Mavɔmavɔ fun ahwan xá Izlayɛ́li kɛntɔ́ lɛ́ɛ gbɔn é, bó jɛ xɛsi ɖi nú Mawu Mavɔmavɔ jí. Énɛ́ ɔ́, axɔ́súɖuto Jozafáti tɔn ɔ́ mɔ agbɔ̌n, ɖó Mawu tɔn ná ɛ ayij'ayǐ gbɔn fí bǐ. Xwe gbantɔ́n (35) wɛ Jozafáti ɖó hwenu e é yi axɔ́súzinkpo jí ɖo Jeluzalɛ́mu é. É ɖu axɔ́sú nú xwe koatɔ́n (25), bó nɔ́ nɔ Jeluzalɛ́mu. Nɔ tɔn nɔ nyí Azuva; Ciluxi ví wɛ. É zán gbɛ jlɔ́jlɔ́ tɔ́ tɔn Asa ɖɔhun. É nɔ wa nǔ e sɔgbe ɖo Mawu Mavɔmavɔ nukún mɛ é. É lɛ́ kɔ sín nǔ e tɔ́ ɔ́ nɔ́ wa lɛ́ɛ ɖěbǔ gúdo ǎ. Nǔ ka ɖo mɔ̌ có, é gba vodún xwé lɛ́ɛ ǎ; énɛ́ ɔ́ zɔ́n bɔ togun ɔ́ sín ayi bǐ ɖo Mawu tɔ́gbó yětɔn lɛ́ɛ tɔn wú ǎ. Axɔ́sú Jozafáti sín tan e kpo ɔ́, è wlǎn, sín fí e é bɛ́ sín ɔ́ káká yi fí e é fó dó ɔ́, dó Tan wéma Jehu Hanáni ví ɔ́ tɔn mɛ. Wěma énɛ́ ɔ́ ɖo “Izlayɛ́li xɔ́sú lɛ́ɛ sín wěma” mɛ. Énɛ́ ɔ́ gúdo ɔ́, Judáa xɔ́sú Jozafáti dó Izlayɛ́li xɔ́sú Akaziasi sín gbɛ̌. Axɔ́sú énɛ́ ɔ́ ka nɔ́ zán gbɛ ɖagbe ǎ. Yě ɖó gbe kpɔ́, bó bló tɔjíhún e nɔ́ yi to línlín mɛ lɛ́ɛ. Tɔjíhúnglíntɛn Esiɔ́ni-Gevɛ́ɛ wɛ yě bló tɔjíhún lɛ́ɛ ɖe. Lo ɔ́, gbeyíɖɔ Mawu tɔn Eliezɛ́ɛ, Dodawahu, Malecanu ɔ́ ɖɔ nú Jozafáti ɖɔ: “A dǒ Akaziasi gbɛ́; énɛ́ wú ɔ́, Mawu Mavɔmavɔ ná hɛn azɔ̌ e a wa ɔ́ gblé.” Nǔgbó ɔ́, tɔjíhún lɛ́ɛ sixú yi tomɛ ǎ; yě bǐ gba. Jozafáti zán wá kú, bɔ è sɔ́ ɛ yi ɖó tɔ́gbó tɔn lɛ́ɛ sín yɔdo mɛ, ɖo Davídi Toxo mɛ, bɔ vǐ tɔn Yexolámu ɖu axɔ́sú ɖó tɛn tɔn mɛ. Yexolámu ɖó nɔví súnnu gěgé; yě bǐ wɛ nyí axɔ́sú Jozafáti ví. Yě wɛ nyí Azalya, Yexiyɛ́li, Zekaliyahu, Azalyahu, Mikaɛli kpódó Cefátiyahu kpó. Tɔ́ yětɔn ná nǔjɔnǔ yě. É ná yě kpatágan, siká kpó nǔ xɔ akwɛ́ tɛnmɛ tɛnmɛ lɛ́ɛ kpó, bó sɔ́ yě gǎn ɖó toxo e ɖo Judáa bɔ è mɛ ahohó lɛ́ lɛ̌ dó lɛ́ɛ gěgé nu. Lo ɔ́, Yexolámu wɛ é ɖe, bɔ é ná nɔ tɛn tɔn mɛ, ɖó é wɛ nyí vǐɖaxó tɔn. Ée Yexolámu yi zinkpo jí, bó zé acɛkpikpa tɔn jínjɔ́n ayǐ ganjí ɔ́, é zɔ́n bɔ è hu nɔví tɔn súnnu lɛ́ɛ bǐ kpódó gǎn e ɖo axɔ́súɖuto tɔn mɛ lɛ́ɛ ɖěe kpó. Xwe gban-nukún-we (32) ɖó wɛ Yexolámu ɖe bó yi zinkpo jí ɖo Jeluzalɛ́mu, bó ɖu axɔ́sú nú xwe tántɔn. É lɔmɔ̌ wa nǔ nyanya Izlayɛ́li xɔ́sú lɛ́ɛ ɖɔhun. É wa nǔ e ma nyɔ́ Mawu Mavɔmavɔ nukún mɛ ǎ é, lě e Akábu hɛ́nnu ɔ́ bló gbɔn é, ɖó é da Akábu sín vǐ ɖokpó. Lo ɔ́, Mawu Mavɔmavɔ jló ná vívá kún nú Davídi xwédo ɔ́ ǎ. É jló ná sú kún tɔn dó ǎ, ɖó akpá e é dó nú mɛsɛntɔ́ tɔn Davídi ɖɔ kúnkan tɔn ná ɖu axɔ́sú káká sɔ́yi é wú. Hwenu e axɔ́sú Yexolámu ɖo zinkpo jí ɔ́, Edɔ́mu sín togun ɔ́ fɔ́n gǔ dó acɛkpikpa Judáa tɔn jí, bó sɔ́ axɔ́sú ɖokpó ɖó Edɔ́mu to ɔ́ nu. Ée Yexolámu se mɔ̌ ɔ́, é bɛ́ ahwankɛkɛ́ví tɔn lɛ́ɛ bɔ é kpó ahwangán tɔn lɛ́ɛ bǐ kpó jɛ ali; Edɔ́munu lɛ́ɛ ká xá yě, bɔ zǎn xóxó mɛ ɔ́, Yexolámu kpó ahwangán e kpa acɛ dó ahwankɛkɛ́ví tɔn lɛ́ɛ nu lɛ́ɛ kpó tɛ́nkpɔ́n, bó ba ali bó gbɔn Edɔ́munu lɛ́ɛ tɛ́ntin. Sín gbe énɛ́ ɔ́ gbe ɔ́, Edɔ́mu to ɔ́ gosín acɛ Judáa tɔn mɛ, bó kpo ɖo mɔ̌ káká jɛ égbé. Hwenɛ́nu ɖokpó ɔ́, Livuna toxo ɔ́ lɔmɔ̌ fɔ́n gǔ dó acɛkpikpa Yexolámu tɔn jí, ɖó é jó Mawu Mavɔmavɔ, Mawu e tɔ́gbó tɔn lɛ́ɛ sɛn é dó. Yexolámu tlɛ mɛ vodúnkpe lɛ́ɛ ɖó Judáa sín só lɛ́ɛ ta. É bló mɔ̌ dó dɔn Jeluzalɛ́munu lɛ́ɛ kpódó Judáanu lɛ́ɛ kpó bɔ yě sɔ́ nɔ́ nɔ gbejí nú Mawu Mavɔmavɔ ǎ. Gbeyíɖɔ Mawu tɔn Elíi bló wěma sɛ́ dó e gbe ɖokpó, bɔ wěma ɔ́ ɖo ɖiɖɔ wɛ ɖɔ: “Xó e Mawu Mavɔmavɔ, Mawu tɔ́gbó towe Davídi tɔn ɔ́ ɖɔ ɔ́ ɖíe: ‘A wa nǔ tɔ́ towe Jozafáti ɖɔhun ǎ; a ka wa nǔ axɔ́sú Judáa tɔn Asa ɖɔhun ǎ. Izlayɛ́li xɔ́sú lɛ́ɛ ɖɔhun wɛ a wa nǔ. A wa nǔ yě ɖɔhun ɖó a dɔn Jeluzalɛ́munu lɛ́ɛ kpó Judáanu ɖě lɛ́ɛ kpó, bɔ yě jɛ vodún sɛn jí Akábu hɛ́nnu ɔ́ ɖɔhun. É víví hwe, bɔ a hu nɔví hwi ɖésúnɔ tɔn súnnu e nyɔ́ hú we lɛ́ɛ. Énɛ́ ɔ́ wú wɛ Mawu Mavɔmavɔ ná sɛ́ awě ɖaxó ɖokpó dó togun towe, bó ná sɛ́ dó vǐ towe lɛ́ɛ kpó asi towe lɛ́ɛ kpó; mɔ̌ ɖokpó ɔ́, é ná hɛn dɔkun towe lɛ́ɛ bǐ gblé. Hwi ɖésú ɔ́, é ná sɛ́ azɔn tɛnmɛ tɛnmɛ dó we, xomɛzɔn ɖé ná bɛ́ nú we bó fɔ́n ɔ́, é ná nɔ́ ɖo syɛ́nsyɛ́n d'é jí wɛ káká bɔ adɔ e ɖo xo towe mɛ lɛ́ɛ ná tɔ́n jɛ wěxo.’ ” Énɛ́ ɔ́, Mawu Mavɔmavɔ fɔ́n Filisitɛ́ɛn lɛ́ɛ kpódó Alabíinu e ɖo Etiopíinu lɛ́ɛ kpá lɛ́ɛ kpó dó Yexolámu jí. Yě wǎ tɔ́n ahwan axɔ́súɖuto Judáa tɔn ɔ́, bó nyi ahwan byɔ́ to ɔ́ mɛ, bó bɛ́ dɔkun e ɖo hɔnmɛ lɛ́ɛ bǐ, bó wlí axɔ́sú ɔ́ sín vǐ lɛ́ɛ kpó asi tɔn lɛ́ɛ kpó. Kpodé tɔn Akaziasi kɛ́ɖɛ́ wɛ yě jó dó n'i. Ée nǔ énɛ́ lɛ́ɛ bǐ jɛ wá yi ɔ́, Mawu Mavɔmavɔ sɛ́ xomɛzɔn e ma ná gbɔ gbeɖé ǎ ɔ́ dó Yexolámu. Azɔn ɔ́ fɔ́n ɔ́, é nɔ́ ɖo syɛ́nsyɛ́n d'é jí wɛ, káká bó bló xwe we kpíkpé, bɔ adɔ tɔn lɛ́ɛ tɔ́n jɛ wěxo. É ɖo wǔvɛ́ ɖaxó ɖé mɔ wɛ mɔ̌ káká bó kú. Ée é kú ɔ́, toví tɔn lɛ́ɛ flɔ́ myɔ dó wlí yɛ̌yi n'i, lě e yě bló gbɔn nú tɔ́gbó tɔn lɛ́ɛ é ǎ. Xwe gban-nukún-we (32) ɖó wɛ Yexolámu ɖe, bó yi zinkpo jí ɖo Jeluzalɛ́mu, bó ɖu axɔ́sú nú xwe tántɔn. Ée Yexolámu zán kú ɔ́, kú tɔn vɛ́ nú mɛ ɖěbǔ ǎ. È ɖi i ɖó Davídi Toxo mɛ. Amɔ̌, è sɔ́ ɛ yi ɖó yɔdo e mɛ è nɔ ɖi axɔ́sú lɛ́ɛ dó ɔ́ mɛ ǎ. Akaziasi sín vǐ kpodé Yexolámu tɔn ɔ́ wɛ Jeluzalɛ́munu lɛ́ɛ sɔ́ axɔ́sú ɖó tɔ́ tɔn tɛnmɛ. Đó vǐ tɔn mɛxó lɛ́ɛ bǐ wɛ mɛ wɔ̌buwɔ́bú e nyi ahwan xwedó Alabíinu lɛ́ɛ, bó byɔ́ ahwankpá yětɔn mɛ lɛ́ɛ hu. Lě e Akaziasi Yexolámu ví ɔ́ húzú Judáa xɔ́sú gbɔn é nɛ́. Xwe ko ɖó wɛ Akaziasi ɖe hwenu e é yi axɔ́súzinkpo jí ɖo Jeluzalɛ́mu é; é ɖu axɔ́sú nú xwe ɖokpó. Nɔ tɔn nɔ nyí Atalíi, bó jɔ ɖo Ɔmúli kún mɛ. É lɔmɔ̌ wa nǔ nyanya Akábu xwédo ɔ́ ɖɔhun, ɖó nǔ nyanya wɛ nɔ tɔn nɔ kplɔ́n ɛ. É wa nǔ e ma nyɔ́ Mawu Mavɔmavɔ nukún mɛ ǎ é, Akábu xwédo ɔ́ ɖɔhun. Đó ée tɔ́ tɔn kú ɔ́, Akábu mɛ lɛ́ɛ jɛ nǔ kplɔ́n ɛ jí, lobo dɔn ɛ bú ali. Nǔ e yě kplɔ́n Akaziasi lɛ́ɛ wɛ é xwedó, bɔ é kpó Yolámu axɔ́sú Izlayɛ́li tɔn Akábu ví ɔ́ kpó yi ahwan fun xá Hazayɛ́li Silíi xɔ́sú ɔ́ gbé, ɖo Hlamɔti, ɖo Galadi yíkúngban jí. Hwenu e yě ɖo ahwan ɔ́ fun wɛ ɔ́, Silíinu lɛ́ɛ gblé wǔ Yolámu. Énɛ́ ɔ́, axɔ́sú Yolámu lɛ́ kɔ yi Izleyɛ́li bó ná kpé nukún dó wǔ e è gblě ɔ́ wú. Judáa xɔ́sú Akaziasi yi kpɔ́n Yolámu Akábu ví ɔ́, ɖo Izleyɛ́li, ɖó é ɖo wǔvɛ́ mɔ wɛ. Mawu ɖó dó kpɔ́n e Akaziasi yi kpɔ́n Yolámu ɔ́ wú, lobo wa nǔ xá ɛ. Ée Akaziasi wá Yolámu gɔ́n ɔ́, é kpó é kpó ɖidó, bó yi kpé Jehu Nimuci ví ɔ́. Jehu ɔ́, Mawu Mavɔmavɔ ka ko sɔ́ ɛ axɔ́sú, bɔ é ná vívá kún nú Akábu xwédo ɔ́. Jehu wa nǔ xá Akábu xwédo ɔ́ lě e Mawu Mavɔmavɔ ɖɔ gbɔn é. Ée é yi Judáa gán lɛ́ɛ kpó Akaziasi nɔví súnnu lɛ́ɛ sín vǐ e nɔ wa azɔ̌ nú axɔ́sú ɔ́ lɛ́ɛ kpó gɔ́n ɔ́, é hu bǐ. Énɛ́ ɔ́ gúdo ɔ́, Jehu sɛ́ mɛ dó Akaziasi gbé mɛ bɔ yě mɔ ɛ wlí ɖo Samalíi fí e é hɔn hwlá cí é, bó kplá ɛ wá Jehu gɔ́n, bó hu i. È ka ɖi i, ɖó è mɔ ɖɔ axɔ́sú Jozafáti e sɛn Mawu Mavɔmavɔ kpó ayixa tɔn bǐ kpó ɔ́ sín vǐvú wɛ. Ée è hu i mɔ̌ ɔ́, mɛ ɖěbǔ sɔ́ kpo ɖo xwédo Akaziasi tɔn mɛ, bó sixú ɖu axɔ́sú ǎ. Ée Atalíi axɔ́sú Akaziasi sín nɔ se ɖɔ vǐ émítɔn kú ɔ́, é jɛ mɛ e ko jɔ ɖo axɔ́ví kún mɛ ɖo Judáa lɛ́ɛ bǐ hu jí. Lo ɔ́, cóbónú é ná hu mɛ lɛ́ɛ ɔ́, Yexosavati axɔ́sú Yexolámu ví nyɔ̌nu Akaziasi nɔví ɔ́ zé Joasi Akaziasi ví ɔ́ sín axɔ́sú ví lɛ́ɛ mɛ; é zé e yi hwlá hwenu e è ɖo mɛ lɛ́ɛ hu wɛ é. É zé vǐ ɔ́ kpó nyɔ̌nu e ɖo vǐ ɔ́ hɛn wɛ ɔ́ kpó yi ɖó xɔ e mɛ è nɔ dɔ́ ɖo Mawu xwé gbe ɔ́ ɖokpó mɛ. Lě e Joasi gló Atalíi, bo ma kú ǎ gbɔn é nɛ́. Vǐ ɔ́ kpó nyɔ̌nu e nɔ́ hɛn ɔ́ kpó nɔ hwlǎhwlá ɖo yě gɔ́n ɖo Mawu xwé gbe káká nú xwe ayizɛ́n. Atalíi ɔ́ ka ɖo axɔ́sú ɖu wɛ ɖo to ɔ́ nu hwenɛ́nu. Atalíi yi zinkpo jí ɔ́, xwe tɔn tɛ́nwegɔ́ ɔ́ mɛ ɔ́, Yexoyada kpan akɔ́n bó jɛ akɔ xá sɔ́ja kanwekogán Azalyahu Yeloxámu ví ɔ́, Yicimayɛ́li Yexoxanáni ví ɔ́, Azalyahu Ovɛ́di ví ɔ́, Maaseyahu Adayahu ví ɔ́, kpódó Elicafáti Zikli ví ɔ́ kpó. Sɔ́ja kanwekogán énɛ́ lɛ́ɛ gbɔn Judáa to ɔ́ bǐ mɛ. Yě gbɔn Judáa toxo lɛ́ɛ ɖokpó ɖokpó mɛ, bó kplé Levíi ví lɛ́ɛ kpó hɛ̌nnugán e ɖo Izlayɛ́li lɛ́ɛ kpó, bó kplá yě wá Jeluzalɛ́mu. Yě mɛ e wá kplé ɖo Mawu xwé gbe lɛ́ɛ bǐ jɛ akɔ dó lě e è nǎ sɔ́ axɔ́sú ɔ́ gbɔn ɔ́ tamɛ, bɔ Yexoyada ɖɔ nú yě ɖɔ: “Joasi axɔ́sú ví ɔ́ ɖíe; é wɛ ɖó ná ɖu axɔ́sú lě e Mawu Mavɔmavɔ ɖɔ gbɔn dó Davídi ví lɛ́ɛ wú é. Nǔ e mi ná wa é ɖíe: Mi vɔ̌sánú-xwlémawutɔ́ kpódó Levíi ví e ɖo azɔ̌ ná wa wɛ gbɔjɛzán gbe lɛ́ɛ kpó ná má miɖée ɖó atɔn. Atɔnvlɔ́ɖó ɖó ná nɔ Mawu xwé ɔ́ sín hɔntogbó lɛ́ɛ jí. Atɔnvlɔ́ɖó ná cɔ́ axɔ́sú ɔ́ sín hɔnmɛ, bɔ atɔnvlɔ́ɖó e kpo ɔ́ ná ɖo Dodó hɔn ɔ́ jí, bɔ togun ɔ́ bǐ ná ɖo Mawu Mavɔmavɔ xwé ɔ́ sín kɔ́xota lɛ́ɛ. Mɛ ɖěbǔ ní má byɔ́ xɔ ɔ́ mɛ zɛ vɔ̌sánú-xwlémawutɔ́ kpó Levíi ví e ɖo azɔ̌ ná wa wɛ lɛ́ɛ kpó wú ó. Yědɛɛ lɛ́ɛ ná byɔ́ mɛ, ɖó è ko ɖe yě ɖó vo nú azɔ̌ énɛ́ ɔ́. Togun ɔ́ bǐ ká ɖó ná xwedó sɛ́n e Mawu Mavɔmavɔ dó ɔ́, bó ná nɔ kɔ́xo. Levíi ví ɖě lɛ́ɛ ná hɛn ahwanfunnú yětɔn alɔ mɛ, bó ná lɛ́ lɛ̌ dó axɔ́sú ɔ́. Axɔ́sú ɔ́ sɛ afɔ ɔ́, yě lɔ ná nɔ́ sɛ. Mɛ ɖěbǔ byɔ́ xwé ɔ́ gbe ɔ́, è nǎ hu i.” Levíi ví lɛ́ɛ kpódó Judáanu lɛ́ɛ bǐ kpó bló lě e vɔ̌sánú-xwlémawutɔ́ Yexoyada ɖɔ gbɔn é. Mɛ ɖokpó ɖokpó sɛ mɛ tɔn lɛ́ɛ kplé, mɛ e ɖo azɔ̌ ná wa wɛ gbɔjɛzán gbe lɛ́ɛ kpó mɛ e ɖo te jɛ wɛ lɛ́ɛ kpó. Yexoyada jó mɛ ɖěbǔ dó ǎ. Yexoyada bɛ́ hwǎn kpó gǎglónú tɛnmɛ tɛnmɛ kpó jó nú sɔ́ja kanwekogán lɛ́ɛ. Axɔ́sú Davídi tɔn wɛ nyí ahwanfunnú énɛ́ lɛ́ɛ, bɔ è bɛ̌ yi ɖó Mawu xwé gbe. É to sɔ́ja lɛ́ɛ, bɔ ahwanlyánnú yětɔn lɛ́ɛ ɖo alɔ yětɔn mɛ; yě to lɛ́ lɛ̌ dó axɔ́sú ɔ́, bɛ́ sín sinsɛnxɔ ɔ́ sín ɖisíxwé káká yi amyɔxwé, ɖo xɔ ɔ́ kpó vɔ̌sákpe ɔ́ kpó nukɔn, bó nɔ́ cɔ́ axɔ́sú ɔ́. È kplá axɔ́ví Joasi wá, lobo zé tablá ɖokpó kpó sɛ́nwéma ɔ́ kpó jó n'i, bɔ Yexoyada kpó vǐ tɔn lɛ́ɛ kpó kɔn ami ɖó ta n'i, bó sɔ́ ɛ axɔ́sú, bó jɛ xó sú jí ɖɔ: “Susu nú axɔ́sú ɔ́!” Ée mɛ lɛ́ɛ ɖo wezun kán wɛ, bó ɖo susu kpa nú axɔ́sú ɔ́ wɛ bɔ Atalíi se ɔ́, é wá mɔ yě ɖo Mawu Mavɔmavɔ xwé gbe. Ée é wá ɔ́, é mɔ axɔ́sú yɔ̌yɔ́ e è sɔ́ ɔ́ ɖo te ɖo dotín ɔ́ wú, ɖo hɔntogbó ɔ́ kpá. Ahwangán lɛ́ɛ kpó kpɛnkúntɔ́ lɛ́ɛ kpó ɖo te akpá tɔn. Togun ɔ́ bǐ ɖo awǎ jɛ wɛ, kpɛnkúntɔ́ lɛ́ɛ ɖo kpɛn kún wɛ. Nǔxotɔ́ lɛ́ɛ ɖo nǔ xo dó susu e kpa nú axɔ́sú ɔ́ wɛ è ɖe lɛ́ɛ mɛ. Ée Atalíi mɔ mɔ̌ é ɔ́, é vún awu dó kɔ nú éɖée, bó ɖɔ: “Ahizi nɛ́! Ahizi nɛ́!” Ée é ɖɔ mɔ̌ ɔ́, vɔ̌sánú-xwlémawutɔ́ Yexoyada ylɔ́ sɔ́jakanwekogán e ɖo ahwangɔnu ɔ́ nu lɛ́ɛ wá, bó ɖɔ nú yě ɖɔ: “Mi ɖe nyɔ̌nu nɛ́ tɔ́n sín mɛ mɛ; mɛ ɖé xwedó e hǔn, mi hu mɛ ɔ́.” Yexoyada ɖɔ mɔ̌, ɖó é ba ɖɔ è nǐ hu i ɖo Mawu Mavɔmavɔ xwé gbe ǎ. Ée é ɖɔ mɔ̌ ɔ́, yě dɔn ɛ gbɔn Sɔ́ lɛ́ɛ sín Hɔntogbó nu byɔ́ hɔn ɔ́ mɛ, bó hu i ɖo fínɛ́. Yexoyada dɔn axɔ́sú ɔ́ kpó togun ɔ́ kpó, bɔ é kpó yě bǐ kpó jɛ akɔ xá Mawu Mavɔmavɔ, bó ná nyí togun Mawu Mavɔmavɔ tɔn. Bɔ togun ɔ́ bǐ sɔ́ nǔ, bó yi kíjá xwé Baalu tɔn ɔ́ bǐ. Yě gba vɔ̌sákpe lɛ́ɛ kpó bǒcyɔ lɛ́ɛ kpó, lobo lɛ́ hu Matáni. Nya énɛ́ ɔ́ vodún Baalunɔ wɛ; yě hu i nyi vɔ̌sákpe lɛ́ɛ nukɔn. Énɛ́ ɔ́ gúdo ɔ́, Yexoyada ɖe Levíi ví vɔ̌sánú-xwlémawutɔ́ lɛ́ɛ, bɔ yě ná nɔ́ cɔ́ Mawu Mavɔmavɔ xwé ɔ́. Davídi wɛ ko má yě mɛ énɛ́ lɛ́ɛ dó Mawu Mavɔmavɔ xwé gbe, bónú yě ná nɔ xwlé vɔ̌sánú e è nɔ dó zo lɛ́ɛ Mawu Mavɔmavɔ ɖo Mawu Mavɔmavɔ xwé ɔ́ gbe, lě e é ɖe gbɔn ɖo Mɔyízisɛ́n ɔ́ mɛ é. É kó ɖɔ nú yě ɖɔ yě ní nɔ́ wa azɔ̌ énɛ́ lɛ́ɛ kpó awǎjijɛ sín han lɛ́ɛ kpó. Yexoyada zé hɔnjínɔtɔ́ lɛ́ɛ ɖó Mawu Mavɔmavɔ xwé ɔ́ sín hɔntogbó lɛ́ɛ jí, bónú mɛ e wa nǔblíblí lɛ́ɛ ɖokpó ní má byɔ́ xwé ɔ́ gbe ó. Yexoyada lɛ́ kplé sɔ́ja kanwekogán lɛ́ɛ, tonukún lɛ́ɛ, gǎn lɛ́ɛ kpódó togun ɔ́ bǐ kpó, bɔ yě kplá axɔ́sú ɔ́ tɔ́n sín Mawu Mavɔmavɔ xwé ɔ́ gbe. Yě gbɔn hɔntogbó ɖaxó ɔ́ nu byɔ́ hɔn ɔ́ mɛ. Énɛ́ ɔ́, è sɔ́ Joasi jínjɔ́n axɔ́súzinkpo ɔ́ jí. Togun ɔ́ bǐ jɛ awǎ jɛ jí. Ée è hu Atalíi ɖo hɔnmɛ é ɔ́, to ɔ́ vo. Xwe tɛ́nwe wɛ Joasi ɖó bó yi zinkpo jí; é ɖu axɔ́sú ɖo Jeluzalɛ́mu nú xwe kanɖé. Nɔ tɔn ɔ́, Bɛ̌-Cevanu wɛ, bɔ è nɔ ylɔ́ ɛ ɖɔ Sivía. Joasi nɔ wa nǔ e nyɔ́ Mawu Mavɔmavɔ nukún mɛ ɔ́ hwenu e vɔ̌sánú-xwlémawutɔ́ Yexoyada ɖo gbɛ é. Yexoyada da asi we nú Joasi, bɔ é ji vǐ súnnu bó ji nyɔ̌nu. É wá jɛ hweɖénu bɔ Joasi mɔ ɖɔ émí ná bló Mawu Mavɔmavɔ xwé ɔ́ ɖó. Énɛ́ ɔ́, é kplé vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, bó ɖɔ nú yě ɖɔ: “Mi ná nɔ́ gbɔn toxo e ɖo Judáa lɛ́ɛ mɛ, bó ná nɔ́ yí akwɛ́ ɖo Izlayɛ́li ví lɛ́ɛ bǐ sí, bó ná nɔ́ dó bló xwé Mawu mitɔn tɔn ɖó xwewú xwewú. Mi ní ká yá wǔ sí te dó azɔ̌ énɛ́ ɔ́ wú.” É ɖɔ mɔ̌ có Levíi ví lɛ́ɛ yá wǔ sí te dó azɔ̌ wú ǎ. Axɔ́sú ɔ́ ylɔ́ Yexoyada vɔ̌sánú-xwlémawutɔ́ ɖaxó ɔ́, bó ɖɔ n'i ɖɔ: “Tokwɛ́ e Mɔyízi mɛsɛntɔ́ Mawu Mavɔmavɔ tɔn ɔ́ ɖɔ è nǎ yǐ ɖo Izlayɛ́linu lɛ́ɛ sí, bó ná dó bló goxɔ e mɛ akɔjijɛgbá ɔ́ ɖe ɔ́ ɖó ná bɔ Izlayɛ́li togun ɔ́ bǐ yí gbe ná ɔ́, étɛ́wú wɛ a ma kpé nukún d'é wú, bónú Levíi ví lɛ́ɛ ní yi yí ɖo Judáanu lɛ́ɛ kpó Jeluzalɛ́munu lɛ́ɛ kpó sí ǎ? Đó Atalíi, nǎwe dídá énɛ́ ɔ́ kpódó mɛ tɔn lɛ́ɛ kpó jó Mawu xwé ɔ́ dó, bɔ é gba; énɛ́ ɔ́ víví hwedó e, bɔ yě bɛ̌ nǔ e ɖo xwé ɔ́ gbe lɛ́ɛ bǐ, dó yi sɛn vodún Baalu lɛ́ɛ ná.” Énɛ́ ɔ́, axɔ́sú ɔ́ ɖe gbe ɖɔ è nǐ bló gbǎ ɖokpó, bó zé ɖó Mawu Mavɔmavɔ xwé ɔ́ sín hɔntogbó kpá ɖo kɔ́xo. Énɛ́ ɔ́ gúdo ɔ́, è ɖǒ gan gbɔn Judáa kpó Jeluzalɛ́mu kpó; è ɖǒ gan ɖɔ è nǐ zé tokwɛ́ e xó Mɔyízi mɛsɛntɔ́ Mawu Mavɔmavɔ tɔn ɔ́ ɖɔ ɖo gbětótló mɛ ɔ́ wá; tokwɛ́ e xó é ɖɔ è nǐ yǐ ɖo Izlayɛ́li ví lɛ́ɛ sí ɔ́, è ɖǒ gan ɖɔ è nǐ zé wá. Ée gǎn lɛ́ɛ bǐ kpó togun ɔ́ bǐ kpó se ɔ́, é víví nú yě, bɔ yě wá jɔ akwɛ́ dó gbǎ ɔ́ mɛ káká bɔ é gɔ́. Ée hwenu e è nǎ zé gbǎ ɔ́ wá nú Levíi ví lɛ́ɛ, bɔ yě ná kpɔ́n akwɛ́ e ɖ'é mɛ ɔ́, bó ná ɖó gbe nú axɔ́sú ɔ́ su ɔ́, è zě wá. Ée è zě wá ɔ́, akwɛ́ e yě mɔ ɖ'é mɛ ɔ́ sukpɔ́ káká bɔ wěgbójínɔtɔ́ axɔ́sú ɔ́ tɔn kpódó nǔjíkpɔ́ntɔ́ vɔ̌sánú-xwlémawutɔ́ ɖaxó ɔ́ tɔn kpó húzú akwɛ́ ɔ́ sín gbǎ ɔ́ mɛ. Ée yě húzú sín gbǎ ɔ́ mɛ ɔ́, yě lɛ́ zé gbǎ ɔ́ yi ɖó tɛn tɔn mɛ. Bɛ́ sín hwenɛ́nu ɔ́, è nɔ bló mɔ̌ ayǐhɔ́ngbe ayǐhɔ́ngbe; akwɛ́ e è nɔ mɔ ɔ́ nɔ́ sukpɔ́ ɖésú. Énɛ́ ɔ́, axɔ́sú ɔ́ kpó Yexoyada kpó bɛ́ jó nú mɛ e lɔmɛ è zě Mawu Mavɔmavɔ xwé ɔ́ sín azɔ̌ ɔ́ dó lɛ́ɛ. Bɔ yědɛɛ yí mɛ e nɔ kpa awǐnnya lɛ́ɛ, xɔgbátɔ́ lɛ́ɛ kpó mɛ e nɔ wa gan kpó ganvɔ kpó sín azɔ̌ lɛ́ɛ kpó, bónú yě ná bló Mawu Mavɔmavɔ xwé ɔ́ ɖó, bɔ é ná syɛ́n ganjí. Azɔ̌watɔ́ lɛ́ɛ jɛ azɔ̌ jí. Azɔ̌ nyɔ́ wa yětɔn zɔ́n bɔ fí e xwé ɔ́ gblé ɖe lɛ́ɛ ɔ́, yě jɛ blǒbló ɖó jí, bɔ xwé ɔ́ jɛ lě e é ɖe gbɔn ɖ'ayǐ ɔ́, bó syɛ́n ganjí. Ée yě wa azɔ̌ lɛ́ɛ fó ɔ́, mɛ e lɔmɛ è zě azɔ̌ ɔ́ dó lɛ́ɛ bɛ́ akwɛ́ e kpo ɔ́ wá nú axɔ́sú ɔ́ kpó Yexoyada kpó. Ée yě zě wá é ɔ́, axɔ́sú ɔ́ kpó Yexoyada kpó zé dó bló nǔ e è nɔ zán ɖo Mawu Mavɔmavɔ xwé gbe lɛ́ɛ ná: nǔ e è nɔ zán ɖo sinsɛn hwenu lɛ́ɛ, nǔ e è nɔ zán ɖo vɔ̌sísá hwenu lɛ́ɛ, kɔ́fu kpódó gannú kpó e è sɔ́ siká dó bló ná lɛ́ɛ, kpó ée è sɔ́ kpatágan dó bló ná lɛ́ɛ kpó. Bɔ hwenu e Yexoyada ɖo gbɛ ɔ́, è nɔ sá vɔ̌ e è nɔ dó zo ɔ́ ɖo Mawu Mavɔmavɔ xwé gbe hwɛhwɛ. Yexoyada wá kpo bǐ. Xwe kantɔn wǒ (130) wɛ é ɖó bó kú; é dɔ́ ji ɖésú. È yi ɖi i dó yɔdo e mɛ è nɔ ɖi axɔ́sú lɛ́ɛ dó ɔ́ mɛ, ɖo Davídi Toxo mɛ, ɖó é wa ɖagbe nú Izlayɛ́li togun ɔ́; é sɔ́ Mawu kpódó Mawu xwé ɔ́ kpó su. Ée Yexoyada zán wá kú ɔ́, Judáa sín gǎn lɛ́ɛ wá axɔ́sú ɔ́ gɔ́n, bó kan xwé byɔ́. Bɛ́ sín hwenɛ́nu ɔ́, é nɔ́ bló nǔ e yě nɔ́ ɖɔ n'i lɛ́ɛ é. Ée axɔ́sú ɔ́ jɛ nǔ e yě nɔ́ kplɔ́n ɛ lɛ́ɛ xwedó jí ɔ́, Izlayɛ́li ví lɛ́ɛ jó Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ sín xwé ɔ́ dó, bó jɛ vodún Acela kpó bǒcyɔ ɖěvo ɖěvo lɛ́ɛ kpó sɛn jí. Énɛ́ ɔ́ wú wɛ Mawu Mavɔmavɔ sin xomɛ dó axɔ́súɖuto Judáa tɔn ɔ́ kpó Jeluzalɛ́mu toxo ɔ́ kpó. Mawu Mavɔmavɔ wá sɛ́ gbeyíɖɔ tɔn lɛ́ɛ dó yě bónú yě ná ɖɔ xó nú yě, bónú yě ná lɛ́ kɔ wá gɔ̌n tɔn. Lo ɔ́, mɛɖé ɖótó yě ǎ. Ée mɛɖé má ɖótó yě ǎ ɔ́, Yɛ Mawu tɔn wá Zekaliya vɔ̌sánú-xwlémawutɔ́ Yexoyada ví ɔ́ jí, bɔ é nɔ te togun ɔ́ nukɔn, bó ɖɔ: “Mi ɖótó xó e ɖɔ nú mi wɛ Mawu ɖe é; é ɖɔ: ‘Étɛ́wú wɛ mi nɔ gba sɛ́n ce lɛ́ɛ? Nǔɖé sɔ́ ná nyɔ́ nú mi ǎ. Mi jó nyɛ Mawu Mavɔmavɔ dó, nyi lɔmɔ̌ ná jó mi dó.’ ” Ée Zekaliya ɖɔ mɔ̌ ɔ́, yě blá sé ta tɔn, bɔ axɔ́sú ɔ́ ná gbe lobɔ yě nyi awǐnnyaglo dó hu i sɔ́ nyi kɔ́xota ɖo Mawu Mavɔmavɔ xwé ɔ́ gbe. Axɔ́sú Joasi sɔ́ flín ɖagbe e Yexoyada Zekaliya tɔ́ ɔ́ kó wa n'i é ǎ, bó hu vǐ tɔn. Ée Zekaliya ja kúkú gbé ɔ́, é ɖɔ: “Mawu Mavɔmavɔ mɔ nǔ e wa wɛ a ɖe é, é ná byɔ́ axɔ́ tɔn we.” Ée Zekaliya kú ɔ́, xwe e jɛ fínɛ́ ɔ́ mɛ ɔ́, ahwangɔnu Silíi tɔn ɔ́ wá tɔ́n ahwan axɔ́sú Joasi, bó byɔ́ axɔ́súɖuto Judáa tɔn ɔ́ kpó Jeluzalɛ́mu toxo ɔ́ kpó mɛ. Yě hu gǎn e ɖo toxo ɔ́ mɛ lɛ́ɛ bǐ, bó bɛ́ nǔ e yě mɔ lɛ́ɛ bǐ sɛ́ dó axɔ́sú Damási tɔn. Silíinu e wá ahwan fun gbé lɛ́ɛ sukpɔ́ ǎ; yě sukpɔ́ ǎ có Mawu Mavɔmavɔ jó Judáanu tobutóbú ɖé nú yě bɔ yě hu, ɖó Judáanu lɛ́ɛ jó Mawu Mavɔmavɔ, Mawu tɔ́gbó yětɔn lɛ́ɛ tɔn dó. Lě e Mawu Mavɔmavɔ zán Silíinu lɛ́ɛ dó dɔn tó nú Joasi gbɔn ɔ́ nɛ́. Silíinu lɛ́ɛ gblé wǔ i vantankánnyá bó jó e dó bó yi. Ée yě yi ɔ́, mɛsɛntɔ́ tɔn lɛ́ɛ yi kpá dó ta tɔn, bó wá hu i nyi zan tɔn jí, dó ba vɔ̌sánú-xwlémawutɔ́ Yexoyada sín vǐ e é hu ɔ́ sín hlɔn. È sɔ́ ɛ yi ɖi dó Davídi Toxo mɛ. È ka ɖi i dó yɔdo e mɛ è nɔ ɖi axɔ́sú lɛ́ɛ dó ɔ́ mɛ ǎ. Mɛsɛntɔ́ e yi kpá dó Joasi ta lɛ́ɛ ɖíe: Zavadu kpódó Yexozavadi kpó. Zavadu ɔ́, nɔ tɔn nɔ nyí Cimɛyati; Amumɔ́ɔ ví wɛ. Yexozavadi ɔ́, nɔ tɔn nɔ nyí Cimuliti; Mɔwabunu wɛ. È wlǎn Joasi ví lɛ́ɛ sín nyǐkɔ, bó wlán xó tobutóbú e Mawu ɖɔ dó Joasi wú gbɔn gbeyíɖɔ tɔn lɛ́ɛ jí é kpódó lě e è blǒ Mawu xwé ɔ́ ɖó gbɔn ɔ́ kpó dó wěma e è nɔ ylɔ́ ɖɔ Nǔtínmɛwéma axɔ́sú lɛ́ɛ tɔn é mɛ. Vǐ tɔn Amasiyasi wɛ ɖu axɔ́sú ɖó tɛn tɔn mɛ. Xwe koatɔ́n (25) wɛ Amasiyasi ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yexoadani. Amasiyasi nɔ wa nǔ e nyɔ́ Mawu Mavɔmavɔ nukún mɛ é, amɔ̌, ayixa tɔn bǐ ɖo Mawu jí ǎ. Ée Amasiyasi sín acɛkpikpa jínjɔ́n ayǐ bǐ é ɔ́, é hu mɛsɛntɔ́ e hu tɔ́ tɔn lɛ́ɛ é. Amɔ̌, é ɖó alɔ vǐ yětɔn lɛ́ɛ ɖěbǔ wú ǎ. É bló lě e é ɖe gbɔn ɖo Mɔyízi sín sɛ́nwéma mɛ ɔ́, ɖó Mawu Mavɔmavɔ ɖɔ dó wěma ɔ́ mɛ ɖɔ: “È nǎ hu tɔ́ ɖó vǐ tɔn nu ǎ. È nǎ hu vǐ ɖó tɔ́ tɔn nu ǎ. Mɛ e wa nǔ nyi do ɔ́ wɛ è ɖǒ nǎ hu, ɖó nǔ e é wa ɔ́ nu.” Amasiyasi kplé súnnu e ɖo axɔ́súɖuto tɔn mɛ lɛ́ɛ, Judáanu kpó Bɛnjamɛ́ɛnu kpó, bó kpɔ́n hɛ̌nnu lɛ́ɛ mɛ, bó ɖe sɔ́ja afatɔ́ngán lɛ́ɛ kpó kanwekogán lɛ́ɛ kpó. È xa súnnu e sín xwe bɛ́ sín ko lɛ́ɛ bǐ, bó xa yě dó adɔ̌kpo afɔtɔn (300.000). Yě bǐ ko su ahwan yi bo nyɔ́ hwǎn kpó gǎglónú kpó zán. Amasiyasi lɛ́ sɔ́ kpatágan tɔ́nu atɔn mɔ̌ dó da sɔ́ja syɛ́nsyɛ́n e ɖo axɔ́súɖuto taligbé tɔn mɛ lɛ́ɛ adɔ̌kpo atɔ́ɔ́n (100.000) dó mɛ ɖě lɛ́ɛ jí. Lo ɔ́, ɖɛ̌mɛnu Mawu tɔn ɖokpó wá gɔ̌n tɔn, bó ɖɔ n'i ɖɔ: “Sɛ́mɛɖó, ma nú sɔ́ja Izlayɛ́li tɔn lɛ́ɛ xwedó we yi ó, ɖó Mawu Mavɔmavɔ ɖo mɛ e ɖo axɔ́súɖuto Totaligbé tɔn ɔ́ mɛ lɛ́ɛ jí ǎ. Ényí a kplá yě yi, bó ná bo dó gǎn bó fun ahwan gbɔn ɖěbǔ ɔ́, Mawu ná zin we dɛ́ ɖo kɛntɔ́ towe lɛ́ɛ nukɔn, ɖó è nǎ ɖu ɖ'é jí kpó è nǎ gbɔ kpó ɔ́, Mawu ɖokpónɔ wɛ nɔ́ ɖɔ.” Amasiyasi kanbyɔ́ ɖɛ̌mɛnu Mawu tɔn ɔ́ ɖɔ: “Nɛ̌ kpatágan tobutóbú e un sú sɔ́ja énɛ́ lɛ́ɛ ka ná nyí gbɔn?” Bɔ ɖɛ̌mɛnu Mawu tɔn ɔ́ yí gbe n'i ɖɔ: “Mawu Mavɔmavɔ hɛn ɔ́, é ná ná ée hú mɔ̌ ɔ́ we.” Ée é ɖɔ mɔ̌ ɔ́, Amasiyasi lɛ́ kɔ nú sɔ́ja Totaligbé tɔn e kplá ɛ wá lɛ́ɛ, bɔ yě ɖidó xwé kpó xomɛsin kpó. Yě sin xomɛ dó axɔ́súɖuto Judáa tɔn ɔ́ ɖésú. Ée Amasiyasi lɛ́ kɔ nú sɔ́ja énɛ́ lɛ́ɛ ɔ́, é ná glǎglá éɖée, lobo nɔ sɔ́ja e kpo lɛ́ɛ nu, bó kplá yě yi Jɛtɔdo ɔ́ mɛ, bó hu sɔ́ja Edɔ́munu děgba we afɔwó (10.000). Bɔ Judáanu lɛ́ɛ wlí sɔ́ja děgba we afɔwó (10.000) gbɛɖe gbɛɖe, bó kplá yě yi só ɖé ta aga, lobo kpíkpé yě nyi dodomɛ, bɔ yě bǐ gba hánnyá. Lo ɔ́, sɔ́ja Izlayɛ́li tɔn e Amasiyasi ma ba ɖɔ yě ní xwedó émí ǎ, bó lɛ́ kɔ nú yě lɛ́ɛ ɔ́, yě nyi ahwan byɔ́ Judáa toxo lɛ́ɛ mɛ, bɛ́ sín Samalíi káká yi Bɛti-Holɔ́ni, bó hu gbɛtɔ́ afɔwó-afatɔ́n (3.000), bó bɛ́ nǔ yětɔn lɛ́ɛ kpɔ́ gégé. Ée Amasiyasi ɖu ɖo Edɔ́munu lɛ́ɛ jí, bó lɛ́ kɔ wá xwé ɔ́, é bɛ́ vodún Edɔ́mu tɔn lɛ́ɛ wá xwé, bó sɔ́ yě dó ɖó vodún tɔn, bó nɔ́ sɛn, lobo nɔ dó zǎlínkpɔ́n zo nú yě. Ée nǔ nyí mɔ̌ ɔ́, Mawu Mavɔmavɔ sin xomɛ dó Amasiyasi ɖésú, bó sɛ́ gbeyíɖɔ tɔn ɖokpó dó e. Gbeyíɖɔ ɔ́ wá kanbyɔ́ ɛ ɖɔ: “Étɛ́wú a ka ɖo vodún e ma kpé wú bó hwlɛ́n togun yětɔn gán ɖo nukɔn towe ǎ lɛ́ɛ sɛn wɛ?” Gbeyíɖɔ Mawu tɔn ɔ́ kpo ɖo xó ɖɔ wɛ, bɔ Amasiyasi yí xó sín nu tɔn bó kanbyɔ́ ɛ ɖɔ: “Wěɖexámɛtɔ́ ce wɛ a nyǐ a? Nyɛ wɛ sɔ́ we a? Nú a ma ba nú è nǎ hu we ǎ hǔn, yǎ wǔ xwɛ.” Ée é ɖɔ mɔ̌ ɔ́, gbeyíɖɔ Mawu tɔn ɔ́ sɔ́ dɔn nǔ ǎ, amɔ̌, é ɖɔ: “Un tunwun ɖɔ Mawu ɖɔ émí ná hu we, ɖó nǔ e a dǒ sin ɔ́ kpó xó ce e a ma jló ná se ǎ ɔ́ kpó wú.” Axɔ́sú Judáa tɔn Amasiyasi ɖótó mɛ ɖěvo lɛ́ɛ, bó sɛ́ mɛ dó Yexoázi Yoakázi ví, Jehu vívú, Izlayɛ́li xɔ́sú ɔ́ ɖɔ yě nǐ yi ɖɔ n'i ɖɔ: “Wǎ mǐ ná fun ahwan.” Bɔ Yexoázi ɖɔ sɛ́ dó Amasiyasi ɖɔ: “Wunkan byɔ́ vǐ sɛ́dlutín ɖo Libáan só jí, bó ná da nú vǐ tɔn, gběkanlin ɖokpó ka gbɔn wunkan ɔ́ jí, bó gbídí i. Ée a ɖu ɖo Edɔ́munu lɛ́ɛ jí é ɔ́, a ɖo ajɔ̌ jlá wɛ; a ɖo afɔ tɛ ayǐ wɛ; a ka kpé nǔɖé wú ǎ. A gbɔ bo nɔ xwé towe gbe ɔ́, é nyɔ́ nú we hú. Étɛ́wú a jlǒ ná dó ta ahwan e mɛ hwi kpó Judáanu lɛ́ɛ kpó bǐ ná yi dɔn ɖe é mɛ?” Lo ɔ́, Amasiyasi wlí tó xó énɛ́ wú ǎ. Đó Mawu ko jló ná jó Amasiyasi kpó sɔ́ja tɔn lɛ́ɛ kpó nú kɛntɔ́ yětɔn lɛ́ɛ, ɖó yě húzú kpan nukɔn Edɔ́mu vodún lɛ́ɛ bó nɔ́ sɛn. Ée nǔ cí mɔ̌ ɔ́, Yexoázi axɔ́sú Izlayɛ́li tɔn ɔ́ sɔ́ ahwannú bɔ é kpó Amasiyasi kpó wá kplé ɖo Bɛti-Cɛmɛ́ci ɖo Judáa yíkúngban jí. Izlayɛ́linu lɛ́ɛ ɖu ɖo Judáanu lɛ́ɛ jí, bɔ Judáanu lɛ́ɛ ɖokpó ɖokpó hɔn yi xwé. Izlayɛ́li xɔ́sú Yexoázi wlí Judáa xɔ́sú Amasiyasi, Joasi ví, Akaziasi vívú ɔ́ ɖo Bɛti-Cɛmɛ́ci bó kplá ɛ yi Jeluzalɛ́mu. Ée é kplá ɛ yi Jeluzalɛ́mu é ɔ́, é mu Jeluzalɛ́mu sín ahohó ɔ́, sín Eflayímu hɔntogbó ɔ́ jí káká wá jɛ Zwemɛhɔntogbó ɔ́ jí. Fí e é mu ahohó ɔ́ gbɔn ɔ́ yi nǔjlɛ́kpo afɔɖé (200) mɔ̌. É bɛ́ siká kpó kpatágan kpó, kpódó nǔ xɔ akwɛ́ tɛnmɛ tɛnmɛ kpó e ɖo Mawu xwé gbe, bɔ Ovɛ́di-Edɔ́mu nɔ cɔ́ lɛ́ɛ kpó, kpó ée ɖo dɔkunxɔ axɔ́sú ɔ́ tɔn mɛ lɛ́ɛ kpó. É bɛ́ mɛ e è wlǐ ɖó gbanu lɛ́ɛ lɔmɔ̌, lobo lɛ́ kɔ ɖidó Samalíi. Ée Izlayɛ́li xɔ́sú Yexoázi zán kú é ɔ́, Judáa xɔ́sú Amasiyasi nɔ gbɛ xɔ xwe afɔtɔn. Axɔ́sú Amasiyasi sín tan e kpo ɔ́, è wlǎn sín fí e é bɛ́ sín ɔ́ káká yi fí e é fó dó ɔ́ dó axɔ́sú Judáa tɔn lɛ́ɛ kpó Izlayɛ́li tɔn lɛ́ɛ kpó sín “Tan wéma” mɛ. Sín hwenu e Amasiyasi lɛ́ kɔ sín Mawu Mavɔmavɔ gúdo ɔ́, lě e é kú gbɔn ɔ́ ɖíe: è blǎ gbě tɔn ɖo Jeluzalɛ́mu. É wá su gbe ɖokpó, bɔ é hɔn yi cí Lakíci toxo mɛ; amɔ̌, è tɔ́n gbě tɔn káká yi Lakíci dɔ̌n, bó hu i. Ée é kú ɔ́, è zě cyɔ tɔn ɖó kɛkɛ́ví jí bɔ sɔ́ gěgé dɔn, bɔ è wǎ ɖi ɖó tɔ́gbó tɔn lɛ́ɛ sín yɔdo mɛ, ɖo Judáa sín toxo ɖaxó ɔ́ mɛ. Judáa to ɔ́ bǐ zě Oziyási ɖó tɔ́ tɔn Amasiyasi tɛnmɛ. Xwe afɔtɔn-nukún-ɖokpó ɖó wɛ é ɖe hwenɛ́nu. Ée Oziyási tɔ́ kú ɔ́, é wɛ lɛ́ vɔ́ Eyilati toxo ɔ́ yí, bó blóɖó. Xwe afɔtɔn-nukún-ɖokpó wɛ Oziyási ɖó, bó yi axɔ́súzinkpo Judáa tɔn jí ɖo Jeluzalɛ́mu. É ɖu axɔ́sú nú xwe kanɖé wěwe (52). Nɔ tɔn ɔ́, Jeluzalɛ́munu wɛ, bɔ è nɔ ylɔ́ ɛ ɖɔ Yekolia. Oziyási nɔ wa nǔ e nyɔ́ Mawu Mavɔmavɔ nukún mɛ é tɔ́ tɔn Amasiyasi ɖɔhun. Hwenu e Zekaliyahu ɖo gbɛ, bó nɔ́ kplɔ́n sísí ɖó nú Mawu Oziyási ɔ́, Oziyási nɔ dó gǎn, bó nɔ́ wa Mawu Mavɔmavɔ sín jlǒ, bɔ Mawu nɔ bló bɔ é wa nǔɖé ɔ́, é nɔ́ mɔ nu tɔn. Oziyási yi tɔ́n ahwan Filisitɛ́ɛn lɛ́ɛ, bó mu ahohó Gati tɔn, bó mu Yavunɛ́ tɔn, kpódó Acidɔ́di tɔn kpó. Énɛ́ ɔ́ gúdo ɔ́, é mɛ ahohó lɛ́ lɛ̌ dó toxo e gbɔn Acidɔ́di gbé jí lɛ́ɛ, bó lɛ́ mɛ lɛ́ lɛ̌ dó toxo e gbɔn Filisitɛ́ɛn lɛ́ɛ yíkúngban e kpo lɛ́ɛ jí. Mawu gɔ́ alɔ n'i ɖo ahwan e é fun xá Filisitɛ́ɛn lɛ́ɛ, ée é fun xá Alabíinu Gǔu-Baalunu lɛ́ɛ kpó ée é fun xá Mɛwun lɛ́ɛ kpó é mɛ. Mɛwun lɛ́ɛ lɔ nɔ ná nǔjɔ Oziyási. É ɖó acɛ ɖésú, énɛ́ ɔ́ zɔ́n bɔ nyǐkɔ tɔn gba kpé fí bǐ, káká yi Ejípu. Oziyási mɛ tocɔ́kpe ɖé lɛ́ɛ ɖó Jeluzalɛ́mu; é mɛ ɖó Zwemɛhɔntogbó ɔ́ ta nu, bó mɛ ɖó tɔdo mɛ hɔn ɔ́ ta nu, bó lɛ́ mɛ ɖó fí e è nɔ ylɔ́ ɖɔ Zwemɛ é; é mɛ tocɔ́kpe lɛ́ɛ bɔ yě yi jǐ ganjí. É lɛ́ mɛ tocɔ́kpe kɔn nyi gbětótló mɛ; é kun dotɔ gěgé, ɖó é ɖó kanlin gěgé ɖo tɔdo lɛ́ɛ mɛ bó ɖó ɖo ayǐkúngban wɛnjɛ lɛ́ɛ jí. É ɖó glesi lɛ́ɛ kpódó vǐwunglejíkpɔ́ntɔ́ lɛ́ɛ kpó, bɔ yě ɖo azɔ̌ wa n'i wɛ ɖo sókan lɛ́ɛ mɛ kpódó Kaamɛ́li gbé ɔ́ jí kpó, ɖó é yí wǎn nú gle. Oziyási ɖó ahwangɔnu ɖokpó; sɔ́ja tɔn lɛ́ɛ bǐ ɖo gbesisɔ mɛ bó ná fun ahwan. Wěgbójínɔtɔ́ Yeyiɛ́li kpó nǔjíkpɔ́ntɔ́ Maaseyahu kpó wɛ sɔ́ kɛ́n yětɔn. Ahwangán axɔ́sú ɔ́ tɔn ɖokpó nɔ́ nyí Hananiyahu; é wɛ nɔ kɛ́nsísɔ́ ɔ́ nu. Ahwanfuntɔ́ nabí e yě mɔ ɔ́ wɛ yě kpɔ́n, bó má yě ɖó sonu sonu. Hɛ̌nnugán afɔwó nǔwɔntɔn (2.600) wɛ ɖo ahwanfuntɔ́ syɛ́nsyɛ́n énɛ́ lɛ́ɛ nu. Ahwanfuntɔ́ énɛ́ lɛ́ɛ bǐ bló gbɛtɔ́ adɔ̌kpo afɔtɔn děgba ɖě afɔtɛ́nwe kanwe ko (307.500). Yě dó hlɔ̌nhlɔ́n ganjí; yě bǐ ɖo gbesisɔ mɛ, bó ná fun ahwan xá axɔ́sú ɔ́ sín kɛntɔ́ lɛ́ɛ. Yě xwe ahwan fun gbé hweɖěbǔnu ɔ́, axɔ́sú ɔ́ nɔ́ bɛ́ gǎglónú, hwǎn, gangbákún, ganwu, gǎ kpódó hwǎn e è nɔ zé dó klohwán mɛ ɔ́ kpó nú yě. Oziyási zɔ́n nǔdówátɔ́ ɖé, bɔ é bló mɔ ɖé lɛ́ɛ ɖo Jeluzalɛ́mu. Mɔ énɛ́ lɛ́ɛ ɔ́, síngbó lɛ́ɛ jí kpó zwe lɛ́ɛ mɛ kpó wɛ è nɔ zé yě ɖó, bó nɔ dó da gǎ, abǐ nyi awǐnnya ɖaxó ɖaxó dó zɔ. Mawu gɔ́ alɔ nú Oziyási ɖésú, káká bɔ é sɔ́ acɛkpikpa tɔn jínjɔ́n ayǐ, bɔ nyǐkɔ tɔn gba kpé fí bǐ. Lo ɔ́, ée acɛkpikpa tɔn jínjɔ́n ayǐ mɔ̌ ɔ́, é jɛ go yí jí, bó sɔ́ éɖée nyi gbě. É sɔ́ nɔ́ nɔ gbejí nú Mawu Mavɔmavɔ, Mawu tɔn ǎ. É wá jɛ gbe ɖokpó, bɔ é hun káká yi Mawu Mavɔmavɔ xwé gbe, bó jló ná dó zǎlínkpɔ́n zo ɖo vɔ̌sákpe jí. Vɔ̌sánú-xwlémawutɔ́ ɖaxó Azalyahu ka kplá vɔ̌sánú-xwlémawutɔ́ e kpan akɔ́n ɔ́ kanwe (80), bó jɛ gǔdo tɔn. Yě byɔ́ xwé ɔ́ gbe, bó húzú kpan nukɔn axɔ́sú Oziyási, bó ɖɔ n'i ɖɔ: “Axɔ́sú Oziyási, a ɖǒ acɛ e xwlé zǎlínkpɔ́n Mawu Mavɔmavɔ ɔ́ ǎ. Vɔ̌sánú-xwlémawutɔ́ Aalɔ́ɔn ví lɛ́ɛ wɛ ɖó acɛ énɛ́; yědɛɛ lɛ́ɛ wɛ è sɔ́ bɔ yě ná nɔ xwlé zǎlínkpɔ́n Mawu Mavɔmavɔ. Tɔ́n, ɖó a ɖo su ɖu wɛ! Đagbe ɖě ká ɖ'é mɛ nú we ɖo Mawu Mavɔmavɔ gɔ́n ǎ.” Zǎlínkpɔ́nfyɔ́nú ká kó ɖo Oziyási lɔ mɛ hwenɛ́nu nɛ́. Ée vɔ̌sánú-xwlémawutɔ́ lɛ́ɛ ɖɔ mɔ̌ n'i ɔ́, é sin xomɛ dó yě. Hwenu e é sín xomɛ ɔ́, gudu tɔ́n ɖo nukɔngɛ́ngɛ́n tɔn jí, ɖo xwé ɔ́ gbe fínɛ́, ɖo vɔ̌sákpe e jí è nɔ dó zǎlínkpɔ́n zo ɖe ɔ́ kpá, ɖo vɔ̌sánú-xwlémawutɔ́ lɛ́ɛ bǐ nukún mɛ. Énɛ́ ɔ́, vɔ̌sánú-xwlémawutɔ́ ɖaxó Azalyahu kpódó vɔ̌sánú-xwlémawutɔ́ ɖě lɛ́ɛ kpó ɖo kpínkpɔ́n ɛ wɛ, bó mɔ ɖɔ gudu tɔ́n ɖo nukɔn tɔn, bó yá wǔ nya ɛ tɔ́n; é ɖésúnɔ ká mɔ ɖɔ Mawu Mavɔmavɔ sín alɔ ko jɛ émí wú, bó yá wǔ tɔ́n sín xwé ɔ́ gbe. Axɔ́sú Oziyási bɛ́ azɔn baɖabaɖa ɖé: é bɛ́ gudu bɔ gudu ɔ́ nɔ wǔ tɔn mɔ̌ jɛ gbe e gbe é kú é. Hwenu e é ɖo azɔn ɔ́ jɛ wɛ ɔ́, è sɔ́ ɛ yi ɖó xwé ɖé gbe ɖo zɔ nú mɛ bǐ, bónú é ma lɛ́ kɔ wá Mawu Mavɔmavɔ xwé gbe ó. È sɔ́ vǐ tɔn Yotámu e kpa acɛ ɖo hɔnmɛ ɔ́ ɖó axɔ́súɖuto ɔ́ bǐ nu Axɔ́sú Oziyási sín tan e kpo ɔ́, gbeyíɖɔ Mawu tɔn Ezayíi Amɔ̌si ví ɔ́ wlán sín fí e é bɛ́ sín ɔ́ káká yi fí e é fó dó é. Oziyási zán wá kú bɔ è sɔ́ ɛ yi ɖi dó kúxwé axɔ́sú lɛ́ɛ tɔn; è sɔ́ ɛ yi ɖó tɔ́gbó tɔn lɛ́ɛ sín yɔdo mɛ ǎ, ɖó gudu e é jɛ ɔ́ wú. Vǐ tɔn Yotámu ɖu axɔ́sú ɖó tɛn tɔn mɛ. Xwe koatɔ́n (25) wɛ Yotámu ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe afɔtɔn-nukún-ɖokpó. È nɔ ylɔ́ nɔ tɔn ɖɔ Yeluca; Sadɔ́ku ví wɛ. Yotámu nɔ wa nǔ e nyɔ́ Mawu Mavɔmavɔ nukún mɛ é. Lě e tɔ́ tɔn Oziyási wa nǔ gbɔn ɔ́ wɛ é bló gbɔn pɛ́pɛ́pɛ́. Amɔ̌, é byɔ́ Mawu Mavɔmavɔ xwé gbe ǎ. Nǔ ka ɖo mɔ̌ có, togun ɔ́ lɛ́ kpo ɖo nǔ gblégblé wa wɛ. Yotámu wɛ bló hɔntogbó aga tɔn e ɖo Mawu Mavɔmavɔ xwé ɔ́ nu ɔ́, bó gbá xɔ gěgé ɖó ahohó Ofɛ́lu slá tɔn ɔ́ jí. É ɖó toxo ɖaxó gěgé ayǐ gbɔn sókan Judáa tɔn ɔ́ mɛ, bó sá xwé ɖé lɛ́ɛ, bó mɛ ahohó lɛ́ lɛ̌ dó, bó lɛ́ bló mɛcɔ́tɔ́xɔ ɖé lɛ́ɛ gbɔn atínkan ɖé lɛ́ɛ mɛ. Yotámu fun ahwan xá Amumɔ́ɔ xɔ́sú ɔ́, bó ɖu ɖ'é jí. Xwe énɛ́ ɔ́ xwe ɔ́, Amumɔ́ɔ ví lɛ́ɛ ná nǔjɔ axɔ́sú ɔ́. Yě ná kpatágan tɔ́nu atɔn, blěe tɔ́nu afɔwó-afatɔ́n (3.000) kpódó ɔ́ji tɔ́nu afɔwó-afatɔ́n (3.000) kpó. Mɔ̌ wɛ yě lɛ́ ná ɛ xwe wegɔ́ ɔ́ mɛ, bó ná ɛ xwe atɔngɔ́ ɔ́ mɛ. Yotámu sín acɛkpikpa nɔ ɖo syɛ́nsyɛ́n d'é jí wɛ, ɖó é nɔ́ zán gbɛ tɔn ɖó jlɔ̌jlɔ́ jí ɖo Mawu Mavɔmavɔ, Mawu tɔn nukɔn. È wlǎn axɔ́sú Yotámu sín tan e kpo lɛ́ɛ, ahwan e é fun lɛ́ɛ bǐ kpó nǔ e é wa lɛ́ɛ kpó dó Izlayɛ́li xɔ́sú lɛ́ɛ kpódó Judáa xɔ́sú lɛ́ɛ kpó sín “Tan wéma” mɛ. Xwe koatɔ́n (25) wɛ é ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe afɔtɔn-nukún-ɖokpó. Yotámu zán wá kú, bɔ è sɔ́ ɛ yi ɖó Davídi Toxo mɛ, bɔ vǐ tɔn Akázi ɖu axɔ́sú ɖó tɛn tɔn mɛ. Xwe ko wɛ Akázi ɖó, bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe afɔtɔn-nukún-ɖokpó. É ka wa nǔ e má nyɔ́ Mawu Mavɔmavɔ nukún mɛ ǎ é. É bló lě e tɔ́gbó tɔn Davídi bló gbɔn ɖ'ayǐ é ǎ. É wa nǔ axɔ́sú Izlayɛ́li tɔn lɛ́ɛ ɖɔhun, káká bó sínsín gan dó bló bǒcyɔ ná nú vodún Baalu lɛ́ɛ. É dó zǎlínkpɔ́n zo ɖo Bɛni-Hinnɔ́mu tɔdo mɛ; é xwedó walɔ baɖabaɖa akɔta e Mawu Mavɔmavɔ nya bó yí ayǐkúngban yětɔn nú Izlayɛ́li lɛ́ɛ é tɔn, bó sɔ́ vǐ tɔn dó sá vɔ̌ ná. É nɔ́ zé kanlin kpó zǎlínkpɔ́n kpó dó sá vɔ̌ gbɔn vodún xwé lɛ́ɛ, gbɔn só jí só jí, gbɔn atín e dó ama lɛ́ɛ sá. Mawu Mavɔmavɔ, Mawu Akázi tɔn ɔ́ jó Akázi nú axɔ́sú Silíi tɔn ɔ́, bɔ Silíinu lɛ́ɛ ɖu ɖo jǐ tɔn, bó wlí ahwanfuntɔ́ tɔn lɛ́ɛ gěgé, lobo kplá yě yi Damási. Mɔ̌ ɖokpó ɔ́ wɛ Mawu Mavɔmavɔ lɛ́ jó e nú Izlayɛ́li xɔ́sú Pekáxi, Hlemaliyahu ví ɔ́, bɔ é wa nǔ xá ɛ bɔ é vɛ́ jlɛ́. Pekáxi hu ahwanfuntɔ́ syɛ́nsyɛ́n adɔ̌kpo ayizɛ́n (120.000) gbe ɖokpó ɖo Judáa; nǔ cí mɔ̌ ɖó yě jǒ Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ dó. Zikli ahwanfuntɔ́ ɖaxó Eflayímunu ɔ́ hu Maaseyahu axɔ́sú ɔ́ sín vǐ. É lɛ́ hu Azlikámu hɔnmɛ gán ɔ́ kpó Ɛlukana, ahwangán axɔ́sú ɔ́ tɔn kpó. Sɔ́ja Izlayɛ́li tɔn lɛ́ɛ wlí nyɔ̌nu mɛxó lɛ́ɛ, bó wlí yɔkpɔ́vú lɛ́ɛ ɖo nɔví yětɔn Judáanu lɛ́ɛ mɛ; yě bǐ bló adɔ̌kpo wǒ (200.000). Yě bɛ̌ Judáanu lɛ́ɛ sín nǔ gěgé wá yi Samalíi. Gbeyíɖɔ Mawu Mavɔmavɔ tɔn ɖokpó ɖo Samalíi, bó nɔ́ nyí Odɛ́di. É tɔ́n, bó kpé ahwangɔnu Izlayɛ́li tɔn e lɛ́ kɔ ja Samalíi é, bó ɖɔ nú yě ɖɔ: “Mawu Mavɔmavɔ, Mawu tɔ́gbó mitɔn lɛ́ɛ tɔn sin xomɛ dó Judáanu lɛ́ɛ. Énɛ́ ɔ́ wú wɛ é jó yě nú mi, bɔ midɛɛ lɛ́ɛ ka jɛ ma, bó hu yě tɛ́, bɔ xɔxɔ tɔn hun káká yi Mawu gɔ́n. Énɛ́ víví hwe bɔ mi yi bɛ́ súnnu kpó nyɔ̌nu kpó sín Judáa, sín Jeluzalɛ́mu, bó jló ná zé yě dó húzú kannumɔ. Hǔn midɛɛ lɛ́ɛ ɔ́, mi lɔmɔ̌ hu hwɛ ɖé dó Mawu Mavɔmavɔ, Mawu mitɔn ǎ cé? Mi ɖótó mì, bó jó kannumɔ énɛ́ lɛ́ɛ e mi wlí ɖo nɔví mitɔn lɛ́ɛ mɛ lɛ́ɛ dó, nú yě ní yi xwé. Đó midɛɛ lɛ́ɛ sin xomɛ dó wɛ Mawu Mavɔmavɔ ɖe din.” Ée é ɖɔ mɔ̌ ɔ́, Azalyahu, Yexoxanáni ví ɔ́, Bɛlɛkiyahu, Mɛcilemɔti ví ɔ́, Yexizikyahu, Calúmu ví ɔ́ kpódó Amasa, Hadlayi ví ɔ́ kpó húzú kpan nukɔn yě mɛ e gosín ahwangbénu lɛ́ɛ; yě mɛ énɛ́ lɛ́ɛ wɛ ɖo Eflayímunu lɛ́ɛ nu. Yě ɖɔ nú mɛ e gosín ahwangbénu wá lɛ́ɛ ɖɔ: “Mi ma kplá ahwankannumɔ énɛ́ lɛ́ɛ wá fí ó, mi wa mɔ̌ ɔ́, mi ná dó hwɛ kɔ nú mǐ ɖo Mawu Mavɔmavɔ gɔ́n; mi jló ná dó hwɛ hwɛ jí nú mǐ ɖo Mawu Mavɔmavɔ nukɔn wɛ a? Hwɛgban e ɖo kɔ nú mǐ ɖ'ayǐ é ɖíe kó kpɛn káká bɔ Mawu Mavɔmavɔ ko sin xomɛ dó Izlayɛ́li to ɔ́ ɖésú e.” Ée yě ɖɔ mɔ̌ ɔ́, sɔ́ja lɛ́ɛ jó kannumɔ lɛ́ɛ kpódó dɔkun e yě bɛ́ sín ahwangbénu lɛ́ɛ kpó dó nyi gǎn lɛ́ɛ kpó agun ɔ́ bǐ kpó nukɔn. Bɔ yě ylɔ́ mɛɖé lɛ́ɛ sín nyǐkɔ, bɔ yě sí te bo kplá kannumɔ lɛ́ɛ, lobo kpɔ́n nǔ e yě bɛ́ sín ahwangbénu wá lɛ́ɛ mɛ, bó dó awu kpó afɔkpa kpó nú mɛ e ɖo mɛ̌ lɛ́ɛ bǐ. Yě ná nǔɖuɖu yě, bó ná sin yě, bó klɔ́ akpa nú yě. Yě bɛ̌ mɛ e ma sixú ɖi zɔnlin ǎ lɛ́ɛ bǐ ɖó tócí jí, bɔ Izlayɛ́linu lɛ́ɛ kplá ahwankannumɔ lɛ́ɛ yi nɔví yětɔn, to yětɔn mɛ nu lɛ́ɛ gɔ́n ɖo Jeliko, děkan toxo ɔ́ mɛ. Ée Izlayɛ́linu lɛ́ɛ kplá yě yi ɖó Jeliko ɔ́, yě lɛ̌ kɔ yi Samalíi. Hwenɛ́nu ɔ́, axɔ́sú Akázi sɛ́ mɛ dó Asilíi xɔ́sú ɔ́, ɖɔ é ní wá gɔ́ alɔ nú émí. É bló mɔ̌ ɖó Edɔ́munu lɛ́ɛ lɛ́ wá tɔ́n ahwan to tɔn, bó wlí kannumɔ gěgé yi. Filisitɛ́ɛn lɛ́ɛ lɔmɔ̌ wá byɔ́ toxo e ɖo ayǐkúngban wɛnjɛ jí ɖo Judáa sín afɔligbé lɛ́ɛ mɛ. Yě yǐ Bɛti-Cɛmɛ́ci, Ayalɔ́ni, Gedelɔ́ti, Soko, Timuna, Gimuzo kpó gletoxo e lɛ́ dó yě lɛ́ɛ kpó, bó jɛ agban ɖó toxo énɛ́ lɛ́ɛ mɛ. Mawu Mavɔmavɔ dó winnyá axɔ́súɖuto Judáa tɔn ɔ́ mɔ̌, ɖó axɔ́sú Akázi dɔn togun tɔn bɔ yě dó vɛ̌ nú Mawu Mavɔmavɔ; é ɖésúnɔ lɔ ka nɔ gbejí nú Mawu Mavɔmavɔ ǎ. Asilíi xɔ́sú Tiglati-Pilesɛ́ɛ wá gɔ́ alɔ nú Akázi ǎ; lo ɔ́, é sɔ́ ɛ dó ɖó kɛntɔ́, lobo tɔ́n ahwan ɛ. Énɛ́ ɔ́, Akázi bɛ́ nǔ e ɖo Mawu Mavɔmavɔ xwé gbe lɛ́ɛ ɖě, éé ɖo hɔnmɛ lɛ́ɛ ɖě kpódó azaglɔ́gán tɔn lɛ́ɛ sín dɔkun lɛ́ɛ ɖě kpó, bó bɛ́ nú Asilíi xɔ́sú ɔ́. É wa mɔ̌ có, é ká mɔ nǔ e ba wɛ é ɖe ɔ́ ǎ. Axɔ́sú Akázi ɖo nukúnmyá mɛ mɔ̌, có bó lɛ́ kpo ɖo hwɛ hu dó Mawu Mavɔmavɔ wɛ. É sá vɔ̌ nú vodún e ɖo Damási lɛ́ɛ, có vodún énɛ́ lɛ́ɛ wɛ zɔ́n bɔ é jɛ ayǐ ɖo kɛntɔ́ tɔn lɛ́ɛ nukɔn. É bló mɔ̌ ɖó é nɔ́ ɖɔ: “Silíi xɔ́sú lɛ́ɛ ɔ́, vodún yětɔn lɛ́ɛ wɛ wá gɔ́ alɔ nú yě; nyi lɔmɔ̌ ɔ́, un ná sá vɔ̌ nú yě, bɔ yě ná gɔ́ alɔ nú nyɛ ɖésú.” Vodún énɛ́ lɛ́ɛ wɛ ká wa nǔ xá é kpódó Izlayɛ́li togun ɔ́ bǐ kpó. Akázi kplé nǔ e è nɔ zán ɖo Mawu Mavɔmavɔ xwé gbe lɛ́ɛ, bó gba bǐ hánnyá. É sú Mawu Mavɔmavɔ xwé ɔ́ sín hɔn lɛ́ɛ. Énɛ́ ɔ́ gúdo ɔ́, é mɛ vɔ̌sákpe gbɔn alikpléhɔ̌ntɛn e ɖo Jeluzalɛ́mu lɛ́ɛ bǐ. É sá vodún xwé gbɔn toxo e ɖo axɔ́súɖuto tɔn mɛ lɛ́ɛ ɖokpó ɖokpó mɛ, bó nɔ́ dó zǎlínkpɔ́n zo nú vodún lɛ́ɛ. Nǔ énɛ́ e é wa ɔ́ sin xomɛ nú Mawu Mavɔmavɔ, Mawu tɔ́gbó tɔn lɛ́ɛ tɔn ɔ́. Axɔ́sú Akázi sín tan e kpo ɔ́ kpó nǔ e é wa lɛ́ɛ bǐ kpó ɔ́, è wlǎn, sín fí e é bɛ́ sín ɔ́ káká yi fí e é fó dó ɔ́, dó axɔ́sú Judáa tɔn lɛ́ɛ kpó Izlayɛ́li tɔn lɛ́ɛ kpó sín “Tan wéma” mɛ. Akázi zán wá kú bɔ è sɔ́ ɛ yi ɖó Jeluzalɛ́mu, è sɔ́ ɛ ɖó axɔ́sú Izlayɛ́li tɔn lɛ́ɛ sín yɔdo mɛ ǎ. Vǐ tɔn Ezekiyási wɛ ka ɖu axɔ́sú ɖó tɛn tɔn mɛ. Xwe koatɔ́n (25) wɛ Ezekiyási ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe koatɔ́n-nukún-ɛnɛ (29). È nɔ ylɔ́ nɔ tɔn ɖɔ Avíya; Zekaliya ví wɛ. Ezekiyási nɔ́ wa nǔ e nyɔ́ Mawu Mavɔmavɔ nukún mɛ ɔ́ tɔ́gbó tɔn Davídi ɖɔhun pɛ́pɛ́pɛ́. Ezekiyási wɛ hun Mawu Mavɔmavɔ xwé ɔ́ sín hɔn lɛ́ɛ, lobo bló yě ɖó xwe e xwe é yi zinkpo jí é. Sun e mɛ é yi zinkpo jí ɔ́ jɛ́n é bló yě ɖó. É ylɔ́ vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó, bó kplé yě ɖó Zǎnzǎnhwe jí sín tɛn ɔ́ mɛ, bó ɖɔ nú yě ɖɔ: “Levíi ví lɛ́ɛ mi, mi ɖótó mì, din ɔ́, mi slá wǔ nú miɖée, bó slá wǔ nú Mawu Mavɔmavɔ, Mawu tɔ́gbó mitɔn lɛ́ɛ tɔn sín xwé ɔ́, lobo bɛ́ nǔ e nyí suɖunú lɛ́ɛ bǐ sín xwé ɔ́ gbe. Đó tɔ́gbó mǐtɔn lɛ́ɛ nɔ gbejí ǎ. Yě wa nǔ e ma nyɔ́ Mawu Mavɔmavɔ, Mawu mǐtɔn nukún mɛ ǎ lɛ́ɛ. Yě jó e dó, yě ɖe kɔ sín Mawu Mavɔmavɔ xwé ɔ́ wú, lobo dó gǔdo. Yě dǒ vɛ̌ nú Mawu Mavɔmavɔ xwé ɔ́ káká bó sú hɔn lɛ́ɛ. Yě cí zogbɛ́n lɛ́ɛ, bó dó zǎlínkpɔ́n zo nú Mawu Izlayɛ́li tɔn ɔ́ ǎ; yě ká sá vɔ̌ e è nɔ dó zo lɛ́ɛ n'i ɖo Mawu Mavɔmavɔ xwé ɔ́ gbe ǎ. Énɛ́ ɔ́, Mawu Mavɔmavɔ sin xomɛ dó Judáanu lɛ́ɛ kpó Jeluzalɛ́munu lɛ́ɛ kpó, bó dó nǔ sin xá yě; nǔ e é wa xá yě ɔ́ zɔ́n bɔ yě húzú nǔ gbɛ́hɛn, nǔdábaɖa, bó húzú nǔkiko nú mɛ lɛ́ɛ, lě e mɔ gbɔn wɛ mi ɖe din kpó nukún mi ɖésúnɔ tɔn kpó é. Nǔ e zɔ́n bɔ tɔ́gbó mǐtɔn lɛ́ɛ cí ahwan, bɔ vǐ mǐtɔn súnnu kpó nyɔ̌nu kpó, kpódó asi mǐtɔn lɛ́ɛ kpó ɖo kannumɔgbénu ɔ́ nɛ́. Din ɔ́, un jló ná jɛ akɔ xá Mawu Mavɔmavɔ, Mawu Izlayɛ́li tɔn ɔ́, bónú xomɛ tɔn ná fá dó mǐ wǔ. Vǐ ce lɛ́ɛ mi, din ɔ́, mi gɔn vɛ̌ dó nú nǔ, ɖó Mawu Mavɔmavɔ wɛ sɔ́ mi, bónú mi ná nɔ nukɔn tɔn, bó ná wa azɔ̌ n'i, bó ná nyí mɛsɛntɔ́ tɔn, bó ná nɔ́ dó zǎlínkpɔ́n zo n'i.” Ée é ɖɔ mɔ̌ ɔ́, Levíi ví e sí te lɛ́ɛ ɖíe: xwédo Kexáti tɔn mɛ ɔ́, Maxáti Amasayi ví ɔ́ kpódó Yoɛ́li Azalyahu ví ɔ́ kpó sí te. Xwédo Mɛlali tɔn mɛ ɔ́, Kícu Avudi ví ɔ́ kpódó Azalyahu Yexalelɛ́li ví ɔ́ kpó sí te. Xwédo Gɛɛcɔ́ni tɔn mɛ ɔ́, Yoáxi Zimuma ví ɔ́ kpó Edɛ́ni Yoáxi ví ɔ́ kpó sí te. Xwédo Elisafáni tɔn mɛ ɔ́, Cimuli kpó Yeyiɛ́li kpó sí te. Xwédo Asáfu tɔn mɛ ɔ́, Zekaliya kpó Mataniyahu kpó sí te. Xwédo Hemani tɔn mɛ ɔ́, Yexiyɛ́li kpó Cimɛ́yi kpó sí te. Xwédo Yedutún tɔn mɛ ɔ́, Cemaya kpó Wuziyɛ́li kpó sí te. Yě kplé nɔví yětɔn lɛ́ɛ, bɔ ée yě slá wǔ nú yěɖée fó ɔ́, yě wǎ wǔ slá nú Mawu Mavɔmavɔ xwé ɔ́ gbe lě e axɔ́sú ɔ́ ɖɔ gbɔn bɔ é sɔgbe xá jlǒ Mawu Mavɔmavɔ tɔn é. Vɔ̌sánú-xwlémawutɔ́ lɛ́ɛ byɔ́ Mawu Mavɔmavɔ xwé ɔ́ gbe, bó ná slá wǔ ná. Yě ɖe suɖunú e yě mɔ ɖo Mawu Mavɔmavɔ xwé gbe lɛ́ɛ bǐ tɔ́n, bó bɛ́ yě ɖó kɔ́xota, ɖo xwé ɔ́ gbe, bɔ Levíi ví lɛ́ɛ wá bɛ́ yě kɔn nyi tɔdo Sedlɔ́n tɔn ɔ́ mɛ. Yě bɛ́ wǔsláslá ɔ́ ɖo sun nukɔntɔn ɔ́ sín azǎn nukɔntɔn ɔ́ gbe, bɔ azǎn tɔn tántɔngɔ́ ɔ́ gbe ɔ́, yě byɔ́ Mawu Mavɔmavɔ sín hɔnnúwa sá, bó sɔ́ azǎn tántɔn ɖó te dó slá wǔ nú Mawu Mavɔmavɔ xɔ ɔ́. Yě fó nǔwiwa énɛ́ ɔ́ ɖo sun nukɔntɔn ɔ́ sín azǎn afɔtɔn-nukún-ɖokpógɔ́ ɔ́ gbe. Énɛ́ ɔ́ gúdo ɔ́, yě yi axɔ́sú Ezekiyási gɔ́n, bó ɖɔ n'i ɖɔ: “Mǐ kó slá wǔ nú Mawu Mavɔmavɔ xwé ɔ́ bǐ: mǐ slá wǔ nú vɔ̌sákpe e jí è nɔ dó vɔ̌ zo ɖe ɔ́ kpó nǔ e è nɔ zán ɖo fínɛ́ lɛ́ɛ bǐ kpó, bó slá wǔ nú távo e jí è nɔ fɔ wɔ̌xúxú e è xwlé Mawu lɛ́ɛ ɖó ɔ́ kpó nǔ e è nɔ zán ɖo fínɛ́ lɛ́ɛ bǐ kpó. Nǔ e axɔ́sú Akázi e ma nɔ gbejí nú Mawu ǎ ɔ́ ɖu su ná hwenu e é ɖo zinkpo jí lɛ́ɛ ɔ́ bǐ ɔ́, mǐ kó bló bǐ ɖó bó slá wǔ nú bǐ. Yě nɛ́ ɖo vɔ̌sákpe Mawu Mavɔmavɔ tɔn nukɔn fínɛ́ nɛ́.” Axɔ́sú Ezekiyási fɔ́n zǎn ayǐhɔ́ngbe tɔn, bó kplé toxo ɔ́ sín gǎn lɛ́ɛ, lobo yi Mawu Mavɔmavɔ xwé gbe. Yě hɛn nyibúsú tɛ́nwe, agbo tɛ́nwe, lɛ̌ngbɔ́ví tɛ́nwe kpódó gbǎgbá tɛ́nwe kpó, bó ná sá hwɛsɔ́kɛmɛvɔ́ ná dó hɛ̌nnu axɔ́sú ɔ́ tɔn ɔ́ kpó Mawu Mavɔmavɔ xwé ɔ́ kpó, kpódó Judáa to ɔ́ kpó tamɛ. Bɔ axɔ́sú ɔ́ ná gbe vɔ̌sánú-xwlémawutɔ́ Aalɔ́ɔn ví lɛ́ɛ ɖɔ yě ní sá vɔ̌ ɖo vɔ̌sákpe Mawu Mavɔmavɔ tɔn ɔ́ jí. Vɔ̌sánú-xwlémawutɔ́ lɛ́ɛ ká gbo gbe nyibú lɛ́ɛ, bó yí hun yětɔn lobo mi dó vɔ̌sákpe ɔ́ wú. Yě gbo gbe agbo lɛ́ɛ, bó yí hun yětɔn, lobo mi dó vɔ̌sákpe ɔ́ wú. Yě gbo gbe lɛ̌ngbɔ́ví lɛ́ɛ, bó yí hun yětɔn, lobo mi dó vɔ̌sákpe ɔ́ wú. Énɛ́ ɔ́ gúdo ɔ́, è bɛ̌ gbǎgbá e è nǎ dǒ sá hwɛsɔ́kɛmɛvɔ́ ná lɛ́ɛ wá axɔ́sú ɔ́ kpó agun ɔ́ kpó nukɔn, bɔ yě bɛ̌ alɔ ɖó kanlin lɛ́ɛ jí. Vɔ̌sánú-xwlémawutɔ́ lɛ́ɛ ká gbo gbe gbǎgbá lɛ́ɛ bó kɔn hun yětɔn dó vɔ̌sákpe ɔ́ jí dó sá hwɛsɔ́kɛmɛvɔ́ ná dó hwɛ e Izlayɛ́li togun ɔ́ bǐ hu lɛ́ɛ tamɛ. Đó togun Izlayɛ́li tɔn ɔ́ bǐ tamɛ wɛ axɔ́sú ɔ́ ná gbe ɖɔ è nǐ sá vɔ̌ e è nɔ dó zo ɔ́ kpó hwɛsɔ́kɛmɛvɔ́ ɔ́ kpó dó. Énɛ́ ɔ́ gúdo ɔ́, axɔ́sú ɔ́ ɖó tɛnmɛ nú Levíi ví lɛ́ɛ ɖó Mawu Mavɔmavɔ xwé gbe. Yě hɛn agǐdigbo bó hɛn kanhún bó hɛn kpɛn lě e Davídi kpó Gadi nǔmɔtɔ́ axɔ́sú ɔ́ tɔn ɔ́ kpódó Natáan gbeyíɖɔ Mawu tɔn ɔ́ kpó kó ná gbe tɔn gbɔn é. Đó Mawu Mavɔmavɔ wɛ ko ɖɔ mɔ̌ gbɔn gbeyíɖɔ tɔn lɛ́ɛ jí. Levíi ví lɛ́ɛ nɔ fínɛ́ kpó nǔxonú Davídi tɔn lɛ́ɛ kpó. Vɔ̌sánú-xwlémawutɔ́ lɛ́ɛ nɔ fínɛ́ kpó kpɛn yětɔn lɛ́ɛ kpó. Énɛ́ ɔ́, axɔ́sú Ezekiyási ná gbe ɖɔ è nǐ sá vɔ̌ e è nɔ dó zo ɔ́ ɖo vɔ̌sákpe ɔ́ jí. Bɔ ée è jɛ vɔ̌ ɔ́ sá jí ɔ́, è jɛ han ji dó kpa Mawu Mavɔmavɔ jí, bó ɖo kpɛn kún d'é mɛ wɛ, lobo ɖo axɔ́sú Izlayɛ́li tɔn Davídi sín nǔxonú lɛ́ɛ xo d'é mɛ wɛ. Togun ɔ́ bǐ ɖe kɔ́, bɔ è ɖo han ɔ́ ji wɛ, bó ɖo kpɛn kún wɛ mɔ̌ káká bó sá vɔ̌ ɔ́ fó. Ée è sá vɔ̌ ɔ́ fó ɔ́, axɔ́sú ɔ́ kpó mɛ e ɖo akpá tɔn lɛ́ɛ bǐ kpó jɛ kpo bo ɖe kɔ́. Énɛ́ ɔ́ gúdo ɔ́, axɔ́sú Ezekiyási kpó azaglɔ́gán tɔn lɛ́ɛ kpó ɖɔ nú Levíi ví lɛ́ɛ ɖɔ yě ní lɛ́ ji han e Davídi kpó nǔmɔtɔ́ Asáfu kpó kpa lɛ́ɛ dó sɔ́ Mawu Mavɔmavɔ su. Bɔ yě ji han ɔ́ kpó awǎjijɛ kpó dó kpa susu nú Mawu Mavɔmavɔ, lobo jɛ kpo bo ɖe kɔ́. Énɛ́ ɔ́, Ezekiyási yí xó bó ɖɔ: “Din ɔ́, mi mɛ e dó agban wá nú Mawu Mavɔmavɔ lɛ́ɛ ɔ́, mi wá, mi fɔ kanlin mitɔn lɛ́ɛ kpó kú dó nú Mawu vɔ́ mitɔn lɛ́ɛ kpó wá Mawu Mavɔmavɔ xwé gbe.” Ée é ɖɔ mɔ̌ ɔ́, yě bɛ̌ kanlin yětɔn lɛ́ɛ kpó kú dó nú Mawu vɔ́ yětɔn lɛ́ɛ kpó wá. Mɛ e nɔ hun alɔ bo nɔ ná nǔ mɛ ɖo yě mɛ lɛ́ɛ hɛn kanlin bó ná sá vɔ̌ e è nɔ dó zo ɔ́ ná. Vɔ̌sánú e togun ɔ́ hɛn wá bó ná dó sá vɔ̌ e è nɔ dó zo ɔ́ ná lɛ́ɛ bǐ bló nyibú kanɖé gban (70), agbo kanwe ko (100) kpódó lɛ̌ngbɔ́ví afɔɖé (200) kpó. È lɛ̌ hɛn nyibú nǔwɔntɔn (600) kpódó lɛ̌ngbɔ́ afɔwó-afatɔ́n (3.000) kpó, dó sá vɔ̌ ɖě lɛ́ɛ ná. Lo ɔ́, vɔ̌sánú-xwlémawutɔ́ lɛ́ɛ sukpɔ́ bó ná sixú kɔ́n kanlin e è dǒ sá vɔ̌ lɛ́ɛ bǐ ǎ. Énɛ́ ɔ́, nɔví yětɔn Levíi ví lɛ́ɛ gɔ́ alɔ nú yě káká bɔ yě wa azɔ̌ ɔ́ bǐ fó, yě ɖo alɔ gɔ́ nú yě wɛ káká bɔ vɔ̌sánú-xwlémawutɔ́ ɖě lɛ́ɛ slá wǔ nú yěɖée. Đó Levíi ví lɛ́ɛ ko yá wǔ slá wǔ dó nukɔn nú vɔ̌sánú-xwlémawutɔ́ lɛ́ɛ. É nyí vɔ̌ tobutóbú e è dó zo lɛ́ɛ kpó vɛ̌ɛn e jɛ jí lɛ́ɛ kpó kɛ́ɖɛ́ wɛ yě zě yi vɔ̌sákpe ɔ́ jí ǎ; yě lɛ́ zé kanlin e è dǒ sá kɔnɖókpɔ́ vɔ́ ná lɛ́ɛ sín jǒ yi vɔ̌sákpe ɔ́ jí. Lě e Ezekiyási lɛ́ vɔ́ Mawu sinsɛn ɖó ayǐ gbɔn ɖo Mawu Mavɔmavɔ xwé gbe ɔ́ nɛ́. Ezekiyási kpó togun ɔ́ bǐ kpó j'awǎ, ɖó nǔ énɛ́ e Mawu zɔ́n bɔ yě kpé wú bó bló ganjí ɔ́ wú, ɖó nǔ lɛ́ɛ yá wǔ fó. Ezekiyási sɛ́ mɛ dó Izlayɛ́li to, axɔ́súɖuto Taligbé tɔn ɔ́ bǐ, bó sɛ́ dó Judáa to ɔ́ bǐ. Ezekiyási sɛ́ mɛ dó Izlayɛ́li to ɔ́ kpó Judáa to ɔ́ kpó mɛ ɖɔ mɛ bǐ ní wá Mawu Mavɔmavɔ xwé gbe, ɖo Jeluzalɛ́mu, bó ná ɖu Dǐndínwáyixwe ɔ́ dó Mawu Mavɔmavɔ, Mawu Izlayɛ́li tɔn ɔ́ tamɛ. Wěma wɛ é wlán sɛ́ dó akɔta Eflayímu tɔn ɔ́ kpó Manasée tɔn ɔ́ kpó ɖɔ yě bǐ ní wá. Cóbónú axɔ́sú ɔ́ ná sɛ́ mɛ dó ɔ́, é kpó azaglɔ́gán tɔn lɛ́ɛ kpó, kpódó Jeluzalɛ́munu lɛ́ɛ bǐ kpó yi gbesɔ ɖo Jeluzalɛ́mu bo ɖe wě, bónú è nǎ ɖu Dǐndínwáyixwe ɔ́ ɖo sun wegɔ́ ɔ́ mɛ. È ɖu xwe ɔ́ ɖo sun nukɔn tɔn ɔ́ mɛ hwenu e è nɔ ɖu dó é ǎ, ɖó vɔ̌sánú-xwlémawutɔ́ e kó slá wǔ nú yěɖée lɛ́ɛ sukpɔ́ ǎ. Togun ɔ́ lɔmɔ̌ kplé ɖo Jeluzalɛ́mu ǎ. Axɔ́sú ɔ́ kpó togun ɔ́ bǐ kpó yí gbe nú linlin énɛ́ ɔ́, bó ɖe gbeta tɔ́n ɖɔ è nǎ jlá gbɔn Izlayɛ́li to ɔ́ bǐ mɛ, sín Bɛ̌-Ceva ɖo Tofɔligbé káká yi Dan ɖo Totaligbé, bónú mɛ bǐ ná wá Jeluzalɛ́mu bó ná ɖu Dǐndínwáyixwe ɔ́ dó Mawu Mavɔmavɔ, Mawu Izlayɛ́li tɔn ɔ́ tamɛ. Đó mɛ gěgé sɔ́ nɔ́ yi ɖu xwe ɔ́ lě e è wlǎn gbɔn ɔ́ ǎ. Mɛ e axɔ́sú ɔ́ sɛ́ dó lɛ́ɛ yi gbɔn Izlayɛ́li to ɔ́ bǐ mɛ bó gbɔn Judáa to ɔ́ bǐ mɛ kpó wěma e axɔ́sú ɔ́ kpó azaglɔ́gán tɔn lɛ́ɛ kpó wlán lɛ́ɛ kpó. Bɔ yě xwedó gbeta e axɔ́sú ɔ́ ná yě ɔ́, bó ɖɔ: “Izlayɛ́li ví lɛ́ɛ mi, mi lɛ́ kɔ wá Mawu Mavɔmavɔ, Mawu Ablaxámu tɔn, Izáki tɔn kpó Izlayɛ́li tɔn ɔ́ kpó gɔ́n, bónú é ná lɛ́ kɔ wá mi mɛ e gán ɖo axɔ́sú Silíi tɔn ɔ́ sí lɛ́ɛ gɔ́n. Mi ma wa nǔ tɔ́ mitɔn lɛ́ɛ kpó nɔví mitɔn lɛ́ɛ kpó ɖɔhun ó. Yědɛɛ lɛ́ɛ ɔ́, yě nɔ gbejí nú Mawu Mavɔmavɔ, Mawu tɔ́gbó yětɔn lɛ́ɛ tɔn ɔ́ ǎ, bɔ é dɔn yě dó lele mɛ lě e mɔ gbɔn wɛ mi ɖe é. Hǔn mi bo ma tlí tó tɔ́ mitɔn lɛ́ɛ ɖɔhun ó. Mi zin alɔ dó akɔ́n ɖɔ émí ná se tónú nú Mawu Mavɔmavɔ. Mi lɛ́ kɔ wá xwé tɔn e é sɔ́ ɖó vo bɔ è nǎ nɔ́ sɛn ɛ ɖ'é gbe káká sɔ́yi ɔ́ gbe, bó sɛn Mawu Mavɔmavɔ, Mawu mitɔn ɔ́, bónú xomɛ ɖaxó e é sin dó mi ɔ́ ná fá. Ényí mi lɛ́ kɔ wá Mawu Mavɔmavɔ gɔ́n ɔ́, mɛ e kplá nɔví mitɔn lɛ́ɛ kpó vǐ mitɔn lɛ́ɛ kpó yi kannumɔgbénu lɛ́ɛ ná kú nǔbláwǔ nú yě, bó ná jó yě dó bɔ yě ná lɛ́ kɔ wá to élɔ́ mɛ. Đó Mawu Mavɔmavɔ, Mawu mitɔn nyɔ́ xomɛ bó nɔ kú nǔbláwǔ nú mɛ. Ényí mi lɛ́ kɔ wá gɔ̌n tɔn ɔ́, é ná ɖe kɔ sín mi wú ǎ.” Énɛ́ ɔ́, wɛnsagun lɛ́ɛ yi gbɔn toxo e ɖo Eflayímu kpó Manasée kpó lɛ́ɛ mɛ, káká yi Zabulɔ́ɔn. Lo ɔ́, mɛ lɛ́ɛ nɔ́ ko yě, bó nɔ́ ɖɔ slǎmɛ yě wú. Nǔ ɖo mɔ̌ có Acɛ́ɛ kpó Manasée kpó kpódó Zabulɔ́ɔn kpó sín mɛ ɖé lɛ́ɛ mɔ ɖɔ émí wa nǔ nyi do, bó wá Jeluzalɛ́mu. Mawu sɔ́ ayi ɖokpó ɔ́ dó xomɛ nú mɛ e ɖo Judáa lɛ́ɛ lɔmɔ̌ bónú gbeta e axɔ́sú ɔ́ kpó azaglɔ́gán tɔn lɛ́ɛ kpó ɖe tɔn ɔ́, yě ná bló ɖ'é jí lě e Mawu Mavɔmavɔ ɖɔ gbɔn é. Gbɛtɔ́ wɔ̌buwɔ́bú ɖé kplé ɖo Jeluzalɛ́mu ɖo sun wegɔ́ ɔ́ mɛ, bó ná ɖu wɔ̌xúxú e mɛ è ma dó tɔ́n ǎ é sín xwe ɔ́. Yě mɛ e wá kplé lɛ́ɛ sukpɔ́ ɖésú. Yě sí te bó gba vɔ̌sákpe e jí è nɔ sá vɔ̌ nú vodún ɖe ɖo Jeluzalɛ́mu lɛ́ɛ kpó éé jí è nɔ dó zǎlínkpɔ́n zo nú vodún ɖe lɛ́ɛ bǐ kpó, bó bɛ́ yě kɔn nyi Sedlɔ́n tɔdo ɔ́ mɛ. Énɛ́ ɔ́ gúdo ɔ́, yě gbo gbe kanlin e è nǎ dó ɖu Dǐndínwáyixwe ɔ́ ná lɛ́ɛ ɖo sun wegɔ́ ɔ́ sín azǎn wǒ-ɛnɛgɔ́ ɔ́ gbe. Énɛ́ ɔ́, winnyá hu vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó, bɔ yě slá wǔ nú yěɖée, bó sá vɔ̌ e è nɔ dó zo lɛ́ɛ ɖo Mawu Mavɔmavɔ xwé gbe. Tɛn e mɛ yě nɔ́ nɔ ɖ'ayǐ ɔ́, é mɛ wɛ yě nɔ lě e ɖɛ̌mɛnu Mawu tɔn Mɔyízisɛ́n ɔ́ ɖɔ gbɔn é: Levíi ví lɛ́ɛ nɔ́ zé kanlin e è hu lɛ́ɛ sín hun nú vɔ̌sánú-xwlémawutɔ́ lɛ́ɛ, bɔ yě nɔ́ kɔn dó vɔ̌sákpe ɔ́ jí. Mɛ gěgé ɖo togun ɔ́ mɛ, bó slá wǔ nú yěɖée ǎ, bɔ Levíi ví lɛ́ɛ gbɔ bó gbo gbe kanlin e è nǎ dǒ ɖu Dǐndínwáyixwe ɔ́ ná lɛ́ɛ nú mɛ e ma mɛ́ ǎ lɛ́ɛ bǐ, bó ná sɔ́ kanlin lɛ́ɛ ɖó vo nú Mawu Mavɔmavɔ. Đó mɛ e ɖo togun ɔ́ mɛ bó má slá wǔ ǎ lɛ́ɛ sukpɔ́; ɖo tají ɔ́, mɛ e ɖo akɔta Eflayímu tɔn ɔ́ mɛ lɛ́ɛ, Manasée tɔn ɔ́ mɛ lɛ́ɛ, Isakáa tɔn ɔ́ mɛ lɛ́ɛ kpódó Zabulɔ́ɔn tɔn ɔ́ mɛ lɛ́ɛ kpó gěgé slá wǔ ǎ. Yě ɖu Dǐndínwáyixwe ɔ́; yě ká xwedó nǔ e è wlǎn dó sɛ́n ɔ́ mɛ ɖɔ è ɖǒ ná wa lɛ́ɛ dó ɖu ǎ. Énɛ́ ɔ́ wú wɛ Ezekiyási xo ɖɛ dó ta yětɔn mɛ ɖɔ: “Mawu Mavɔmavɔ, Mawu tɔ́gbó mǐtɔn lɛ́ɛ tɔn, yě mɛ e ɖo gǎn dó wɛ kpó ayi yětɔn bǐ kpó, bó ná dó tunwun jlǒ towe lɛ́ɛ bǐ ɔ́, yě ná bó ma slá wǔ bó ɖo mǐmɛ́ jí ǎ hǔn, kɛnklɛ́n bó sɔ́ hwɛ yětɔn lɛ́ɛ kɛ yě ɖo xomɛnyínyɔ́ towe mɛ.” Énɛ́ ɔ́, Mawu Mavɔmavɔ ɖótó Ezekiyási bó sɔ́ dɔn tó nú togun ɔ́ ǎ. Mɛ e kplé ɖo Jeluzalɛ́mu lɛ́ɛ bǐ ɖu wɔ̌xúxú e mɛ è ma dó tɔ́n ǎ é sín xwe ɔ́ kpó awǎjijɛ ɖaxó ɖé kpó, xɔ azǎn tɛ́nwe. Ayǐhɔ́ngbe ayǐhɔ́ngbe ɔ́, Levíi ví lɛ́ɛ kpó vɔ̌sánú-xwlémawutɔ́ lɛ́ɛ kpó nɔ́ ɖo susu kpa nú Mawu Mavɔmavɔ wɛ, kpó nǔxonú e ɖi gbe ganjí, bɔ è nɔ zán dó kpa susu nú Mawu Mavɔmavɔ lɛ́ɛ kpó. Levíi ví e ɖo gbesisɔ mɛ, bó ɖo azɔ̌ wa nú Mawu Mavɔmavɔ wɛ kpó ayi yětɔn bǐ kpó lɛ́ɛ ɔ́, xó e Ezekiyási ɖɔ lɛ́ɛ xo ayi yětɔn zlɛ́. Yě ɖu kanlin e yě hu lɛ́ɛ xɔ azǎn tɛ́nwe, bó nɔ ɖo kɔnɖókpɔ́ vɔ́ lɛ́ɛ sá wɛ, bó nɔ́ ɖo susu kpa nú Mawu Mavɔmavɔ, Mawu tɔ́gbó yětɔn lɛ́ɛ tɔn wɛ. Kplékplé mɛ ɔ́ bǐ ɖó gbe kpɔ́, bó ɖɔ émí ná lɛ́ ɖu xwe ɔ́ nú azǎn tɛ́nwe. Bɔ yě lɛ̌ sɔ́ azǎn tɛ́nwe ɖěvo ɖó te dó ɖu xwe ɔ́ kpó awǎjijɛ kpó. Đó Ezekiyási Judáa xɔ́sú ɔ́ ná nyibúsú afatɔ́n (1.000), bó ná gbɔ̌ děgba ɖě afɔwó-afatɔ́n (7.000) kplékplé mɛ ɔ́. Azaglɔ́gán lɛ́ɛ ná nyibúsú afatɔ́n (1000), bó ná gbɔ̌ děgba we afɔwó (10.000). Vɔ̌sánú-xwlémawutɔ́ e slá wǔ lɛ́ɛ sukpɔ́ ɖésú. Énɛ́ ɔ́, mɛ e wá kplé ɖo Judáa lɛ́ɛ bǐ ɖo awǎjijɛ mɛ: vɔ̌sánú-xwlémawutɔ́ lɛ́ɛ, Levíi ví lɛ́ɛ, Judáanu lɛ́ɛ, mɛ e tɔ́n xwe ɔ́ gbé sín axɔ́súɖuto Taligbé tɔn lɛ́ɛ, Izlayɛ́linu e wá cí Judáa lɛ́ɛ. Yě j'awǎ ɖésú ɖo Jeluzalɛ́mu. Sín axɔ́sú Izlayɛ́li tɔn Salomɔ́ɔ Davídi ví ɔ́ hwenu ɔ́, mɛɖé sɔ́ j'awǎ mɔ̌hunkɔtɔn kpɔ́n gbeɖé ɖo Jeluzalɛ́mu ǎ. Ée yě ɖu xwe ɔ́ fó ɔ́, vɔ̌sánú-xwlémawutɔ́ Levíi ví lɛ́ɛ sí te bó xo ɖɛ dó togun ɔ́ jí. Mawu ɖótó yě, bɔ ɖɛ yětɔn hun káká yi sɛ́xwé, nɔtɛn mímɛ́ Mawu tɔn ɔ́. Ée yě ɖu xwe ɔ́ fó ɔ́, Izlayɛ́li ví e ɖo fínɛ́ lɛ́ɛ bǐ yi Judáa sín toxo lɛ́ɛ mɛ, bó gba awǐnnya e yě tun te bo nɔ sɛn lɛ́ɛ hánnyá, bó gba vodún Acela tɔn lɛ́ɛ, lobo gba vodún xwé e ɖo só jí lɛ́ɛ, bó gba vɔ̌sákpe e gbɔn Judáa lɛ́ɛ bǐ. Mɔ̌ ɖokpó ɔ́ wɛ yě wa nǔ gbɔn ɖo Bɛnjamɛ́ɛ tomɛ, bó wa ɖo Eflayímu tomɛ, bó wa ɖo Manasée tomɛ. Énɛ́ ɔ́ gúdo ɔ́, Izlayɛ́li ví lɛ́ɛ bǐ lɛ́ kɔ wá yi toxo yětɔn yětɔn mɛ, bɔ mɛ ɖokpó ɖokpó yi ayǐkúngban tɔn jí. Ezekiyási vɔ́ vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó sín gbɛ̌ta lɛ́ɛ to, bó ná azɔ̌ mɛ ɖokpó ɖokpó ɖo gbɛ̌ta tɔn mɛ. Vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó ná nɔ kpé nukún dó vɔ̌ e è nɔ dó zo lɛ́ɛ kpó kɔnɖókpɔ́vɔ́ lɛ́ɛ kpó wú, bó ná nɔ kpé nukún dó sinsɛnxɔmɛzɔ́ lɛ́ɛ wú, bó ná nɔ́ kpé nukún dó hanjiji kpó susu kpa nú Mawu kpó wú, ɖo Mawu Mavɔmavɔ xwé gbe. Axɔ́sú ɔ́ ná dɔkun tɔn lɛ́ɛ ɖě, bɔ è nǎ nɔ́ dó sá vɔ̌ e è nɔ dó zo lɛ́ɛ ná: vɔ̌ e è nɔ dó zo zǎnzǎn lɛ́ɛ, ée è nɔ dó zo gbadanu lɛ́ɛ, ée è nɔ dó zo gbɔjɛzán gbe lɛ́ɛ, ée è nɔ dó zo sun wá jǐ lɛ́ɛ kpódó éé nɔ dó zo xwe gbe lɛ́ɛ kpó, lě e è ko wlán dó Mawu Mavɔmavɔ sɛ́n ɔ́ mɛ gbɔn é. É ɖɔ nú Jeluzalɛ́munu lɛ́ɛ bǐ ɖɔ yě ní ná nǔ e nyí vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó tɔn lɛ́ɛ yě, bónú yě ná sixú kpé nukún dó azɔ̌ e Mawu Mavɔmavɔ sín sɛ́n ɔ́ zɔ́n yě lɛ́ɛ wú bó wa ganjí. Ée mɛ bǐ se xó énɛ́ ɔ́, Izlayɛ́li ví lɛ́ɛ ná nǔ nukɔntɔn e nyɔ́ ɖo gle yětɔn mɛ lɛ́ɛ bɔ é sukpɔ́ ɖésú tawun. Yě ná blěe, vɛ̌ɛn yɔ̌yɔ́, ami, wǐin kpódó jinukún ɖě lɛ́ɛ kpó. Yě lɛ́ hɛn nǔ lɛ́ɛ bǐ sín mǎɖówǒ wá bɔ é sukpɔ́ ɖésú tawun. Mɔ̌ ɖokpó ɔ́, mɛ e gosín Izlayɛ́li bo wá ɖo Judáa lɛ́ɛ kpó Judáanu lɛ́ɛ kpó ná mǎɖówǒ nyibú yětɔn lɛ́ɛ tɔn kpó gbɔ̌ yětɔn lɛ́ɛ tɔn kpó, kpó nǔ mímɛ́ e è sɔ́ ɖó vo nú Mawu Mavɔmavɔ, Mawu tɔ́gbó yětɔn lɛ́ɛ tɔn é kpó; è kplé nǔ énɛ́ lɛ́ɛ ɖó sonu sonu bɔ yě sukpɔ́ ɖésú. È jɛ nǔ lɛ́ɛ kplé ɖó sonu sonu jí ɖo sun atɔngɔ́ ɔ́ mɛ, bó wá fó ɖo sun tɛ́nwegɔ́ ɔ́ mɛ. Ezekiyási kpó azaglɔ́gán tɔn lɛ́ɛ kpó wá kpɔ́n nǔ e mɛ lɛ́ɛ hɛn wá lɛ́ɛ, bó dó kú nú Mawu Mavɔmavɔ kpó togun tɔn Izlayɛ́li ɔ́ kpó. Ezekiyási wá kan nǔ byɔ́ vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó dó nǔ e è kplé ɖó sonu sonu lɛ́ɛ wú. Énɛ́ ɔ́, vɔ̌sánú-xwlémawutɔ́ ɖaxó Azalyahu e jɔ ɖo Sadɔ́ku hɛ́nnu mɛ ɔ́ yí gbe n'i ɖɔ: “Sín hwenu e è jɛ nǔjɔ hɛn wá Mawu Mavɔmavɔ xwé gbe jí ɔ́, nǔɖuɖu ɖe bɔ è nɔ ɖu bó nɔ́ gɔ́ xo, bɔ é nɔ́ lɛ́ kpo bɔ é nɔ́ hwe ɖěbǔ ǎ. Đó Mawu Mavɔmavɔ dó nú togun tɔn. Ée è ɖu kpo lɛ́ɛ ɖíe è kplé ɖó fí e.” Ée Ezekiyási mɔ mɔ̌ ɔ́, é ɖɔ è nǐ jlá xɔ e mɛ è nɔ bɛ́ nǔ dó ɖo Mawu Mavɔmavɔ xwé gbe lɛ́ɛ ɖó, bɔ è blǒ xɔ lɛ́ɛ mɛ ɖó. Énɛ́ ɔ́, è bɛ̌ nǔ e è jɔ lɛ́ɛ, mǎɖówǒ lɛ́ɛ kpódó nǔ mímɛ́ lɛ́ɛ kpó dó xɔ lɛ́ɛ mɛ; è ɖe ɖě kpo ǎ. Kɔnaniahu Levíi ví ɔ́ wɛ è sɔ́ ɖó nǔ énɛ́ lɛ́ɛ nu, bɔ nɔví tɔn Cimɛ́yi gɔ́ n'i. Mɛ e axɔ́sú Ezekiyási kpó Azalyahu e nyí gǎn ɖo Mawu xwé gbe ɔ́ kpó ɖe, bɔ yě nɔ Kɔnaniahu kpó nɔví tɔn Cimɛ́yi kpó glɔ́, bó kpé nukún dó nǔ lɛ́ɛ wú lɛ́ɛ ɖíe: Yexiyɛ́li, Azaziyahu, Naxáti, Asaxɛli, Yelimɔ́ti, Yozavadi, Eliyɛ́li, Yisimakiyahu, Maxáti kpódó Benayahu kpó. Levíi ví Kɔlée Yimuna ví e nɔ́ nɔ hɔn e ɖo zǎnzǎnhwe jí ɔ́ jí ɔ́ wɛ è sɔ́ ɖó nǔ e mɛ ɖésúnɔ jló bó ná ná Mawu lɛ́ɛ nu, bɔ é nɔ́ má nǔ e è jɔ nú Mawu Mavɔmavɔ lɛ́ɛ kpó nǔ mímɛ́ titewungbe lɛ́ɛ kpó. Mɛ e ɖo glɔ̌ tɔn, ɖo vɔ̌sánú-xwlémawutɔ́ lɛ́ɛ sín toxo lɛ́ɛ mɛ, bó nɔ́ má nǔɖuɖu nú nɔví yětɔn lɛ́ɛ, yɔkpɔ́vú kpó mɛxó kpó, gbɔn gbɛ̌ta yětɔn yětɔn mɛ lɛ́ɛ ɖíe: Edɛ́ni, Mɛyamini, Yecúwa, Cemayahu, Amaliyahu kpódó Cekaniyahu kpó. Yě nɔ́ má nǔɖuɖu nú súnnu e sín kɛ́n è ko sɔ́ sín hwenu e yě ko ɖó xwe atɔn kpó ée kó ɖó hú mɔ̌ cóbɔ è sɔ́ kɛ́n yětɔn lɛ́ɛ kpó kɛ́ɖɛ́ ǎ. Lo ɔ́, yě nɔ́ lɛ́ ná mɛ e nɔ yi Mawu Mavɔmavɔ xwé ayǐhɔ́ngbe ayǐhɔ́ngbe, bó nɔ́ yi wa azɔ̌ yětɔn yětɔn, ɖo gbɛ̌ta yětɔn yětɔn mɛ lɛ́ɛ. È sɔ́ vɔ̌sánú-xwlémawutɔ́ lɛ́ɛ sín kɛ́n gbɔn xwédo yětɔn yětɔn mɛ. Amɔ̌, Levíi ví lɛ́ɛ ɔ́, è kpɔ́n azɔ̌ e mɛ ɖokpó ɖokpó nɔ́ wa ɔ́ kpó gbɛ̌ta e mɛ mɛ ɖokpó ɖokpó ɖe ɔ́ kpó, bó sɔ́ mɛ e ɖó bɛ́ sín xwe ko káká sɔ́yi lɛ́ɛ sín kɛ́n. È sɔ́ mɛ ɖé sín kɛ́n ɔ́, è nɔ sɔ́ mɛ tɔn lɛ́ɛ bǐ sín kɛ́n: asi tɔn, vǐ tɔn súnnu, vǐ tɔn nyɔ̌nu kpó mɛ e va dó wǔ tɔn, bó hɛn ɔ́, yě ná ɖu nǔ mímɛ́ lɛ́ɛ bǐ kpó. Wǔ wɛ yě ká to nɔ slá hwɛ̌ cóbɔ è nɔ sɔ́ kɛ́n yětɔn. È ɖe mɛɖé lɛ́ɛ gbɔn toxo lɛ́ɛ bǐ mɛ, bónú yě ná nɔ má nǔɖuɖu nú vɔ̌sánú-xwlémawutɔ́ Aalɔ́ɔn ví e nɔ́ nɔ gletoxo e lɛ́ lɛ̌ dó vɔ̌sánú-xwlémawutɔ́ lɛ́ɛ sín toxo lɛ́ɛ mɛ lɛ́ɛ, bó ná nɔ́ má nú Levíi ví e sín kɛ́n è sɔ́ lɛ́ɛ. Azɔ̌ e Ezekiyási wa gbɔn Judáa to ɔ́ bǐ mɛ ɔ́ nɛ́. É wa nǔ ɖagbe, nǔ jlɔ́jlɔ́ kpó nǔ e nyɔ́ Mawu Mavɔmavɔ, Mawu tɔn nukún mɛ é kpó. Hwenu e é ɖo jlǒ Mawu tɔn ba ná wa wɛ, bó sí te bó ná bló Mawu xwé ɔ́ ɖó, bó ná bló bɔ è nǎ nɔ nyi sɛ́n tɔn, bó ná nɔ wa nǔ e é zɔ́n lɛ́ɛ ɔ́, é bló kpó ayi tɔn bǐ kpó. Énɛ́ ɔ́, Mawu bló bɔ é mɔ nǔ lɛ́ɛ bǐ sín nu. Ée Ezekiyási bló nǔ énɛ́ lɛ́ɛ bǐ bó dó ɖe gbejí nɔ nú Mawu tɔn xlɛ́ ɔ́, axɔ́sú Asilíi tɔn Senakelíbu wá, bó ná tɔ́n ahwan Judáa to ɔ́; é xá toxo e è mɛ ahohó lɛ́ lɛ̌ dó lɛ́ɛ, bó tunwun ɖɔ émí ná yí yě dandan. Ée Ezekiyási mɔ ɖɔ Senakelíbu wá bó ná tɔ́n ahwan Jeluzalɛ́mu ɔ́, é kplé azaglɔ́gán tɔn lɛ́ɛ kpó ahwanfuntɔ́ syɛ́nsyɛ́n lɛ́ɛ kpó, bó ɖɔ nú yě ɖɔ è nǎ sú tɔjɔtɛn e ma ɖo toxo ɔ́ mɛ ǎ lɛ́ɛ, bɔ yě yǐ gbe nú xó tɔn. Énɛ́ ɔ́, mɛ tobutóbú ɖé lɛ́ɛ kplé bó sú tɔjɔtɛn lɛ́ɛ bǐ kpó tɔ e è ɖe ali ná, bɔ é nɔ́ sa gbɔn do glɔ́ é kpó. Đó yě nɔ́ ɖɔ nú yěɖée ɖɔ: “Axɔ́sú Asilíi tɔn ɔ́ wá fí ɔ́, é ná mɔ sin gěgé bó zán ǎ.” Ezekiyási ná glǎglá éɖée; fí e ahohó lɛ́ɛ mu gbɔn ɔ́, é vɔ́ blóɖó; é mɛ kpe e jí è nɔ nɔ bo nɔ cɔ́ toxo ɔ́ lɛ́ɛ d'é nu; énɛ́ ɔ́ gúdo ɔ́, é mɛ ahohó ɖěvo gbɔn toxo ɔ́ gúdo; é bló Milo ɔ́ ɖó, ɖo Davídi Toxo ɔ́ mɛ. É tun ahwanfunnú kpó gǎglónú kpó kɔn nyi kpɔ́. É ɖe sɔ́jagán ɖé lɛ́ɛ ɖó togun ɔ́ nu. É kplé yě mɛ bǐ ɖó toxo ɔ́ sín hɔntogbó nukɔn, bó ná glǎglá yě bó ɖɔ: “Mi kpan akɔ́n bó dó gǎn. Mi ma ɖi xɛsi ó, ado ní ma hu mi ɖo axɔ́sú Asilíi tɔn ɔ́ kpódó mɛ tobutóbú e zɔn xá ɛ lɛ́ɛ kpó nukɔn ó. Đó mɛ e zɔn xá mǐ lɛ́ɛ sukpɔ́ hú mɛ e zɔn xá ɛ lɛ́ɛ. Mɛ e kpó éyɛ́ kpó zɔn lɛ́ɛ ɔ́, gbɛtɔ́ lɛ́ɛ wɛ. Lo ɔ́, Mawu Mavɔmavɔ wɛ nyí mɛ e kpó mǐdɛɛ lɛ́ɛ kpó zɔn é, é wɛ ná gɔ́ alɔ nú mǐ, bó ná fun ahwan ɔ́ nú mǐ.” Xó énɛ́ e Judáa xɔ́sú Ezekiyási ɖɔ ɔ́ dó wǔsyɛ́n lanmɛ nú togun ɔ́. Énɛ́ ɔ́ gúdo ɔ́, Asilíi xɔ́sú Senakelíbu sɛ́ mɛ dó Jeluzalɛ́mu; Lakíci toxo ɔ́ nukɔn wɛ é ɖe kpó ahwangɔnu tɔn lɛ́ɛ bǐ kpó hwenɛ́nu. Fínɛ́ wɛ é nɔ bó dó wɛn sɛ́ dó Judáa xɔ́sú Ezekiyási kpó Judáanu e ɖo Jeluzalɛ́mu lɛ́ɛ bǐ kpó ɖɔ: “Xó e axɔ́sú Asilíi tɔn Senakelíbu ɖɔ ɔ́ ɖíe: Étɛ́wú mi ka gán jɛ bó cí ahohó Jeluzalɛ́mu tɔn mɛ? Ezekiyási ná gǎnjɛwú mi ɖɔ Mawu Mavɔmavɔ, Mawu mitɔn ná hwlɛ́n mi sín alɔ ce mɛ. Blɛ̌blɛ́ mi wɛ é ɖe. Adɔ kpó sinnugblá kpó wɛ ná hu mi. É má nyí éyɛ́ Ezekiyási ɔ́ wɛ ká gba tɛn e ɖo só jí bɔ è nɔ sɛn Mawu ɖe lɛ́ɛ kpó vɔ̌sákpe Mawu tɔn lɛ́ɛ kpó, lobo ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ vɔ̌sákpe ɖokpó géé nukɔn wɛ yě ná nɔ́ ɖe kɔ́ ɖe, lobo ná nɔ dó zǎlínkpɔ́n zo ɖ'é jí ɖe ǎ cé? Mi tunwun nǔ e nyɛ kpó tɔ́gbó ce lɛ́ɛ kpó wa xá togun e ɖo to ɖě lɛ́ɛ mɛ lɛ́ɛ bǐ é ǎ cé? Nǔmɛsɛn akɔta to énɛ́ lɛ́ɛ tɔn lɛ́ɛ kpé wú bó hwlɛ́n to yětɔn lɛ́ɛ ɖo así ce a? Đo nǔmɛsɛn e ɖo to énɛ́ lɛ́ɛ e tɔ́gbó ce lɛ́ɛ gba lɛ́ɛ bǐ mɛ ɔ́, ɖě tɛ́ wɛ kpé wú bó hwlɛ́n togun tɔn ɖo así ce, bɔ é ná nyí nǔmɛsɛn midɛɛ lɛ́ɛ tɔn wɛ ná hwlɛ́n mi ɖo así ce? Hǔn, mi ma lɔn nú Ezekiyási ní ɖó adingban nú mi, bó blɛ́ mi mɔ̌ ó. Mi ma ɖi xó tɔn ó. Đó nǔmɛsɛn ɖěbǔ tíin ɖo akɔta ɖěbǔ mɛ abǐ axɔ́súɖuto ɖěbǔ mɛ bó ná kpé wú bó hwlɛ́n togun tɔn ɖo así ce ǎ, ɖě ká ɖe bó ná hwlɛ́n ɖo tɔ́gbó ce lɛ́ɛ sí ǎ. Nɛ̌ wɛ nǔmɛsɛn mitɔn ka ná kpé wú bó hwlɛ́n mi ɖo así ce gbɔn?” Mɛsɛntɔ́ Senakelíbu tɔn lɛ́ɛ ɖo slǎmɛ ɖɔ Mawu Mavɔmavɔ kpó Ezekiyási mɛsɛntɔ́ Mawu Mavɔmavɔ tɔn ɔ́ kpó wú wɛ kpowun. Senakelíbu sɛ́ wěma ɖokpó dó, bó zun Mawu Mavɔmavɔ, Mawu Izlayɛ́li tɔn ɔ́ d'é mɛ ɖɔ: “Lě e nǔmɛsɛn akɔta to ɖě lɛ́ɛ mɛ tɔn lɛ́ɛ má kpé wú bó hwlɛ́n togun yětɔn lɛ́ɛ ɖo así ce ǎ ɔ́, mɔ̌ ɖokpó ɔ́, nǔmɛsɛn Ezekiyási tɔn sixú hwlɛ́n togun tɔn ɖo así ce ǎ.” Mɛsɛntɔ́ Senakelíbu tɔn lɛ́ɛ ɖo xó sú wɛ, bó ɖo xó ɖɔ wɛ nú mɛ e ɖo ahohó Jeluzalɛ́mu tɔn jí lɛ́ɛ wɛ dó Ebléegbe mɛ, bó ná ɖó adohu nú yě, bó dó xɛsi yě, bó ná mɔ tɛn dó yí toxo ɔ́. Yě ɖo Mawu Jeluzalɛ́mu tɔn ɔ́ xó ɖɔ wɛ nǔmɛsɛn ɖé kpowun xó ɖɔ wɛ yě ɖe ɖɔhun; nǔmɛsɛn akɔta ɖě lɛ́ɛ tɔn e è sɔ́ alɔ dó bló ná lɛ́ɛ ɖɔhun. Ée nǔ cí mɔ̌ ɔ́, axɔ́sú Ezekiyási kpó gbeyíɖɔ Mawu tɔn Ezayíi Amɔ̌si ví ɔ́ kpó jɛ ɖɛ xo dó nǔ énɛ́ ɔ́ tamɛ jí. Yě sú xó ylɔ́ Mawu ɖɔ é ní wá gɔ́ alɔ nú émí. Bɔ Mawu Mavɔmavɔ sɛ́ wɛnsagun ɖokpó dó ahwankpá Asilíi xɔ́sú ɔ́ tɔn mɛ, bɔ é hu ahwanfuntɔ́ syɛ́nsyɛ́n lɛ́ɛ, ahwangán lɛ́ɛ kpódó gbɛtɔ́ nukúnɖéjí lɛ́ɛ kpó. Nǔ énɛ́ ɔ́ hu winnyá nú axɔ́sú ɔ́, bɔ é lɛ́ kɔ yi to tɔn mɛ. É ká wá su gbe ɖokpó bɔ é yi byɔ́ vodún tɔn xɔ mɛ, bɔ vǐ é ɖésúnɔ tɔn lɛ́ɛ hu i kpó hwǐ kpó. Énɛ́ ɔ́, Mawu Mavɔmavɔ hwlɛ́n Ezekiyási kpó Jeluzalɛ́munu lɛ́ɛ kpó ɖo Senakelíbu Asilíi xɔ́sú ɔ́ sí, bó hwlɛ́n yě ɖo kɛntɔ́ yětɔn lɛ́ɛ bǐ sí, bó cyɔ́n alɔ yě jí ɖo yě mɛ e lɛ́ dó yě lɛ́ɛ nukɔn. Mɛ gěgé hɛn nǔníná wá nú Mawu Mavɔmavɔ ɖo Jeluzalɛ́mu, bó lɛ́ ná nǔ ɖagbe ɖagbe lɛ́ɛ Ezekiyási Judáa xɔ́sú ɔ́, bɔ sín hwenɛ́nu ɔ́, é xɔ susu ɖo akɔta lɛ́ɛ bǐ nukɔn. Hwenɛ́nu ɔ́, Ezekiyási bɛ́ azɔn ɖé bó ná kú. É ka sú xó ylɔ́ Mawu Mavɔmavɔ, bó xo ɖɛ. Bɔ Mawu Mavɔmavɔ bló nǔjíwǔ ɖokpó bó ná dó ɖe xlɛ́ ɛ ɖɔ azɔn tɔn ná gbɔ. Lo ɔ́, ɖagbe e Mawu Mavɔmavɔ wa nú Ezekiyási ɔ́, é tunwun n'i ǎ. É nyɔ́ wa ɔ́, afɔ tɛ ayǐ jí wɛ é lɛ́ jɛ, bɔ Mawu Mavɔmavɔ sin xomɛ dó e, bó sin xomɛ dó Judáa to ɔ́ kpó Jeluzalɛ́mu toxo ɔ́ kpó. Ezekiyási ɖo afɔ tɛ ayǐ wɛ mɔ̌, có é kpó Jeluzalɛ́munu lɛ́ɛ kpó yí nǔ e yě wa nyi do lɛ́ɛ gbe, lobo sɔ́ yěɖée hwe; énɛ́ ɔ́, Mawu Mavɔmavɔ sɔ́ zé xomɛsin tɔn dó wa nǔ xá yě ɖo Ezekiyási hwenu ǎ. Ezekiyási jɛ dɔkun ɖésú, bó xɔ susu tawun. É ɖɔ bɔ è mɛ xɔ e mɛ é ná bɛ́ kpatágan dó lɛ́ɛ, éé mɛ é ná bɛ́ siká dó lɛ́ɛ, éé mɛ é ná bɛ́ awǐnnya xɔ akwɛ́ dó lɛ́ɛ, éé mɛ é ná bɛ́ nǔsáwǔ wǎnɖagbenɔ dó lɛ́ɛ, éé mɛ é ná bɛ́ gǎglónú kpódó nǔ xɔ akwɛ́ tɛnmɛ tɛnmɛ bǐ kpó dó lɛ́ɛ. É lɛ́ ɖɔ bɔ è blǒ agbanxɔ nú jinukún lɛ́ɛ, bó bló nú vɛ̌ɛn, bó bló nú ami, bó bló nǔ e mɛ kanlin tɔn tɛnmɛ tɛnmɛ lɛ́ɛ ná nɔ́ ɖu nǔ ɖe lɛ́ɛ, bó bló kpó e mɛ kanlin tɔn tɛnmɛ tɛnmɛ lɛ́ɛ ná nɔ́ nɔ lɛ́ɛ. É ɖó toxo ɖé lɛ́ɛ ayǐ; é ɖó gbɔ̌ kpódó nyibú kpó kɔn nyi kpɔ́, ɖó Mawu dǒ dɔkun n'i. Ezekiyási ɖokpó énɛ́ ɔ́ wɛ sú fí e tɔjɔtɛn Gixɔ́ni tɔn ɔ́ nɔ́ tɔ́n sin ɖe é, bó ɖe ali nú sin ɔ́ gbɔn ayǐkúngban glɔ́ yi Davídi Toxo ɔ́ sín gbadahwe jí. Nǔ e Ezekiyási wa lɛ́ɛ bǐ wɛ nyɔ́ n'i. Énɛ́ ɔ́ wú wɛ hwenu e Babilɔ́nu sín azaglɔ́gán lɛ́ɛ sɛ́ mɛ dó Ezekiyási bónú é ná ɖɔ nǔjíwǔ e jɛ ɖo to ɔ́ mɛ ɔ́ sɛ́ dó yě ɔ́, Mawu jó e dó, bó ná kpɔ́n lě e é ná bló gbɔn é; é bló mɔ̌ bó ná dó dó é kpɔ́n, bó ná tunwun nǔ e ɖo ayi tɔn mɛ é bǐ. Nǔ e kpo bɔ Ezekiyási wa lɛ́ɛ kpó azɔ̌ tɔn e ɖe lě e é nɔ́ wa nǔ dó sɛ́nxwi jí gbɔn ɔ́ xlɛ́ lɛ́ɛ kpó ɔ́, è wlǎn dó nǔ e gbeyíɖɔ Mawu tɔn Ezayíi Amɔ̌si ví ɔ́ mɔ ɔ́ sín Tan wéma mɛ, bó wlán dó axɔ́sú Judáa tɔn lɛ́ɛ kpó Izlayɛ́li tɔn lɛ́ɛ kpó sín Tan wéma mɛ. Ezekiyási zán wá kú, bɔ è sɔ́ ɛ ɖó Davídi ví lɛ́ɛ sín yɔdo mɛ ɖo fí e yi jǐ hú fí bǐ é. Judáa to ɔ́ bǐ kpó Jeluzalɛ́munu lɛ́ɛ kpó wlí yɛ̌yi n'i ɖo kú tɔn hwenu. Vǐ tɔn Manasée wɛ ɖu axɔ́sú ɖó tɛn tɔn mɛ. Xwe wěwe wɛ Manasée ɖó bó yi axɔ́súzinkpo jí ɖo Jeluzalɛ́mu. É ɖu axɔ́sú nú xwe kanɖé afɔtɔn (55). É wa nǔ e má nyɔ́ Mawu Mavɔmavɔ nukún mɛ ǎ lɛ́ɛ. É xwedó walɔ nyanya akɔta e Mawu Mavɔmavɔ nya bó yí ayǐkúngban yětɔn nú Izlayɛ́li ví lɛ́ɛ tɔn. Vɔ̌sákpe e tɔ́ tɔn Ezekiyási gba gbɔn só jí só jí lɛ́ɛ ɔ́, é lɛ́ vɔ́ bǐ blóɖó. É bló vɔ̌sákpe gěgé nú Baalu bó tun vodún Acela te. É nɔ́ sɛn nǔ e nɔ́ ná wěziza ɖo jǐxwé lɛ́ɛ. É bló vodúnkpe gbɔn Mawu Mavɔmavɔ xwé gbe, ɖo Jeluzalɛ́mu fí e Mawu Mavɔmavɔ ɖɔ émí ná ɖe émíɖée xlɛ́ ɖe káká sɔ́yi é. É bló vodúnkpe nú nǔ e nɔ́ ná wěziza ɖo jǐxwé lɛ́ɛ gbɔn kɔ́xota we e ɖo Mawu Mavɔmavɔ xwé gbe lɛ́ɛ. É bló káká bó sɔ́ vǐ tɔn sá vɔ̌ ná ɖo tɔdo Hinnɔ́mu tɔn mɛ; é nɔ́ bló majíki tɛnmɛ tɛnmɛ, lobo ɖu azě; é nɔ́ yi kan nǔ ɖo bokantɔ́ lɛ́ɛ gɔ́n. É nɔ́ fɔ́n, bó nɔ́ ɖo nǔ e ma nyɔ́ Mawu Mavɔmavɔ nukún mɛ ǎ é wa wɛ, bó dó dó xomɛsin xomɛ n'i. Vodún e sín bǒcyɔ e é bló ɔ́, é sɔ́ ɖó xwé e gbe Mawu ɖɔ nú Davídi kpó vǐ tɔn Salomɔ́ɔ kpó ɖɔ: “Xwé élɔ́ wɛ un sɔ́ ɖo Jeluzalɛ́mu, ɖo akɔta wěwe Izlayɛ́li tɔn lɛ́ɛ mɛ, bɔ nyǐkɔ ce ná nɔ fínɛ́ káká sɔ́yi. Un sɔ́ ná kplá Izlayɛ́li ví lɛ́ɛ sín to e un sɔ́ nú tɔ́gbó yětɔn lɛ́ɛ é mɛ ǎ. Yě ní vɛ́ kó bló nǔ e un zɔ́n lɛ́ɛ bǐ, bó nyi sɛ́n e un dó gbɔn Mɔyízi jí lɛ́ɛ bǐ.” Lo ɔ́, Manasée dɔn Judáa to ɔ́ kpódó Jeluzalɛ́munu lɛ́ɛ kpó bú, bɔ nǔ nyanya e yě dó sin ɔ́ hú nǔ nyanya e togun e Mawu Mavɔmavɔ nya bo yí ayǐkúngban yětɔn nú Izlayɛ́li ví lɛ́ɛ é tɔn. Mawu Mavɔmavɔ ɖɔ xó nú Manasée kpó togun tɔn kpó có yě ké ya ná ǎ. Énɛ́ ɔ́, Mawu Mavɔmavɔ sɛ́ ahwangán Asilíi xɔ́sú ɔ́ tɔn lɛ́ɛ dó Manasée kpó togun tɔn kpó, bɔ yě wlí Manasée bo dó klɔcée aglan n'i. Yě zě ganvɔ wlɔ dó dó gɛdɛ ɛ, bó sɔ́ ɛ yi Babilɔ́nu. Ée adǎn gbo e mɔ̌ ɔ́, é sú xó ylɔ́ Mawu Mavɔmavɔ, Mawu tɔn, lobo sɔ́ éɖée hwe bǐ, ɖo Mawu e tɔ́gbó tɔn lɛ́ɛ nɔ sɛn ɔ́ nukɔn. É sa vo nú Mawu ɖɔ é ní kú nǔbláwǔ nú émí, bɔ Mawu Mavɔmavɔ yí ɖɛ tɔn, bó kplá ɛ wá Jeluzalɛ́mu, bó lɛ́ sɔ́ ɛ ɖó axɔ́súzinkpo tɔn jí. Énɛ́ ɔ́, Manasée mɔ ɖɔ Mawu Mavɔmavɔ ɖokpónɔ wɛ è ɖǒ nǎ sɛn. Ée nǔ énɛ́ lɛ́ɛ jɛ wá yi ɔ́, Manasée mɛ ahohó ɖé ɖó Davídi Toxo ɔ́ gúdo, ɖo Gixɔ́ni sín gbadahwe jí, gbɔn tɔdo ɔ́ mɛ káká yi Hweví Hɔntogbó ɔ́ kɔn, bó lɛ́ dó Ofɛ́lu. É mɛ ahohó ɔ́ bɔ é yi jǐ ɖésú. É lɛ́ sɔ́ ahwangán lɛ́ɛ ɖó Judáa sín toxo e è mɛ ahohó lɛ́ lɛ̌ dó lɛ́ɛ mɛ. É ɖe nǔmɛsɛn lɛ́ɛ kpó bǒcyɔ ɔ́ kpó sín Mawu Mavɔmavɔ xwé gbe, bó gba vodúnkpe e é mɛ ɖó só e ɖo Mawu Mavɔmavɔ xwé gbe ɔ́ jí lɛ́ɛ kpó ée ɖo Jeluzalɛ́mu lɛ́ɛ kpó, lobo bɛ́ bǐ kɔn nyi gbě sín toxo ɔ́ mɛ. É lɛ́ vɔ́ vɔ̌sákpe Mawu Mavɔmavɔ tɔn ɔ́ mɛ, bó nɔ sá kɔnɖókpɔ́ vɔ́ lɛ́ɛ kpódó kú dó nú Mawu vɔ́ lɛ́ɛ kpó ɖ'é jí, lobo ɖɔ nú Judáanu lɛ́ɛ ɖɔ yě ní nɔ sɛn Mawu Mavɔmavɔ, Mawu Izlayɛ́li tɔn. Togun ɔ́ lɛ́ kpo ɖo vɔ̌ sá gbɔn só ta só ta wɛ; amɔ̌, Mawu Mavɔmavɔ, Mawu yětɔn kɛ́ɖɛ́ jɛ́n yě nɔ́ sá ná. Axɔ́sú Manasée sín tan e kpo lɛ́ɛ, xó e é xo ɖɛ bo ɖɔ nú Mawu tɔn lɛ́ɛ kpódó xó e nǔmɔtɔ́ lɛ́ɛ ɖɔ n'i dó Mawu Mavɔmavɔ, Mawu Izlayɛ́li tɔn nyíkɔ mɛ lɛ́ɛ kpó ɔ́, è wlǎn bǐ dó axɔ́sú Izlayɛ́li tɔn lɛ́ɛ sín Tan wéma mɛ. Đɛ e é xo ɔ́, lě e Mawu yǐ ɖɛ tɔn gbɔn ɔ́, hwɛ e é hu lɛ́ɛ, gbejí e é má nɔ nú Mawu ǎ é, fí e é xo vodúnkpe gbɔn só jí só jí gbɔn lɛ́ɛ, vodún Acela e é tun te é kpódó bǒcyɔ e é tun te, có bó wá yí hwɛ e é hu lɛ́ɛ gbe ɖo Mawu nukɔn lɛ́ɛ kpó ɔ́, è wlǎn bǐ dó “Hozayi sín Tan wéma” ɔ́ mɛ. Manasée zán wá kú bɔ è sɔ́ ɛ ɖó xwé tɔn gbe. Vǐ tɔn Amɔ́ni wɛ ɖu axɔ́sú ɖó tɛn tɔn mɛ. Xwe ko-nukún-we wɛ Amɔ́ni ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe we. Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ é dó sin tɔ́ tɔn Manasée ɖɔhun. É nɔ́ sá vɔ̌ nú bǒcyɔ e tɔ́ tɔn bló lɛ́ɛ bǐ, bó nɔ sɛn yě. Amɔ̌, éyɛ́ yí hwɛ e é hu lɛ́ɛ gbe ɖo Mawu Mavɔmavɔ nukɔn lě e Manasée yí hwɛ tɔn lɛ́ɛ gbe gbɔn é ǎ, ɖó éyɛ́ Amɔ́ni ɔ́, é fɔ́n ɔ́, nǔ wa nyi do d'é jí wɛ jɛ́n é nɔ ɖe. Azaglɔ́gán tɔn lɛ́ɛ blá gbě tɔn bó hu i ɖo xɔ tɔn mɛ gbe ɖokpó. Lo ɔ́, mɛ e ɖo Judáa lɛ́ɛ hu yě mɛ e blá axɔ́sú Amɔ́ni gbé bó hu i lɛ́ɛ bǐ, bó sɔ́ vǐ tɔn Joziyási ɖó zinkpo ɔ́ jí ɖó tɛn tɔn mɛ. Xwe tántɔn wɛ Joziyási ɖó bó yi axɔ́súzinkpo jí ɖo Jeluzalɛ́mu, bó ɖu axɔ́sú nú xwe gban nukún ɖokpó (31). É bló nǔ e nɔ́ nyɔ́ Mawu Mavɔmavɔ nukún mɛ lɛ́ɛ, bó gbɔn ali e tɔ́gbó tɔn Davídi gbɔn é. É zɛ sín ali ɔ́ jí, bó yi ɖisí ǎ, é ka yi amyɔ ǎ. Hwenu e Joziyási ɖo xwe tántɔn bló wɛ ɖo zinkpo jí ɔ́, é kpo ɖo vǔ, bó ka jɛ Mawu e tɔ́gbó tɔn Davídi sɛn ɔ́ sín jlǒ ba ná tunwun jí. Énɛ́ ɔ́, hwenu e é wá ɖo xwe wěwe bló wɛ ɖo zinkpo jí ɔ́, é jɛ vodún e ɖo Jeluzalɛ́mu kpó Judáa kpó lɛ́ɛ ɖe síin jí: é gba vodún xwé e ɖo só jí lɛ́ɛ, bó ɖe vodún Acela lɛ́ɛ síin, bó ɖe bǒcyɔ e è sɔ́ gan dó kɔn lɛ́ɛ kpódó ée è kpa lɛ́ɛ kpó síin. È mu vɔ̌sákpe Baalu tɔn lɛ́ɛ ɖo nukún tɔn mɛ, bɔ é gba nǔ e mɛ yě nɔ́ dó zǎlínkpɔ́n zo ɖe lɛ́ɛ. É li vodún Acela e yě tun te bó nɔ́ sɛn lɛ́ɛ kpó bǒcyɔ tɛnmɛ tɛnmɛ lɛ́ɛ kpó, bo fúnfún gbɔn mɛ e nɔ sá vɔ̌ nú yě ɖ'ayǐ bó kó kú lɛ́ɛ sín yɔta. É dó vodúnnɔ lɛ́ɛ sín xúgloxú zo ɖo vɔ̌sákpe yětɔn lɛ́ɛ jí. Lě e é slá wǔ nú Judáa kpó Jeluzalɛ́mu kpó gbɔn ɔ́ nɛ́. Énɛ́ ɔ́ gúdo ɔ́, é gbɔn toxo Manasée tɔn lɛ́ɛ, Eflayímu tɔn lɛ́ɛ, Sinmɛnyɔ́ɔ tɔn lɛ́ɛ kpódó Nɛfutali ɖésú tɔn lɛ́ɛ lɔ kpó mɛ, bó kíjé xwé lɛ́ɛ. É mu vɔ̌sákpe lɛ́ɛ bó já vodún Acela lɛ́ɛ kpódó bǒcyɔ tɛnmɛ tɛnmɛ lɛ́ɛ kpó, bó li bǐ, bó gba zǎlínkpɔ́nfyɔ́nú lɛ́ɛ gbɔn Izlayɛ́li to ɔ́ bǐ mɛ. Énɛ́ ɔ́ gúdo ɔ́, é lɛ́ kɔ yi Jeluzalɛ́mu. Hwenu e Joziyási ɖo xwe afɔtɔn-nukún-atɔn bló wɛ ɖo zinkpo jí ɔ́, é wá su gbe ɖokpó, bɔ é ɖɔ nú Cafáni Asaliyahu ví ɔ́, kpó Maaseyahu toxo ɔ́ sín gǎn ɔ́ kpó, kpódó Yoáxi Yoaxázi ví e nyí wěgbóhɛntɔ́ axɔ́sú ɔ́ tɔn ɔ́ kpó ɖɔ yě ní yi bló Mawu Mavɔmavɔ, Mawu émítɔn sín xwé ɖó; é ká kó slá wǔ nú to ɔ́ kpó Mawu Mavɔmavɔ xwé ɔ́ kpó hwenɛ́nu. Mɛ e Joziyási sɛ́ dó lɛ́ɛ yi vɔ̌sánú-xwlémawutɔ́ ɖaxó Ilukya gɔ́n, bó bɛ́ akwɛ́ e è jɔ ɖo Mawu xwé é jó n'i. Akwɛ́ énɛ́ ɔ́, Levíi ví hɔnjínɔtɔ́ lɛ́ɛ wɛ nɔ nu bó yí ɖo akɔta Manasée tɔn, Eflayímu tɔn kpó Izlayɛ́li ví ɖě lɛ́ɛ e kpo ɖo axɔ́súɖuto Taligbé tɔn mɛ é kpó sí; mɔ̌ ɖokpó ɔ́ wɛ yě lɛ́ yí ɖo akɔta Judáa tɔn ɔ́, Bɛnjamɛ́ɛ tɔn ɔ́ kpó Jeluzalɛ́munu lɛ́ɛ kpó sí. Énɛ́ ɔ́, è bɛ̌ akwɛ́ ɔ́ jó nú mɛ e ɖo azɔ̌ e wa wɛ è ɖe ɖo Mawu Mavɔmavɔ xwé ɔ́ wú é nu lɛ́ɛ. Yědɛɛ lɛ́ɛ sɔ́ dó sú axɔ́ mɛ e ɖo azɔ̌ ɔ́ wa wɛ, bó ná ná syɛ́nsyɛ́n xwé ɔ́, bó ná bló xwé ɔ́ ɖó lɛ́ɛ. Yě dó sú axɔ́ xɔgbátɔ́ lɛ́ɛ kpó xɔmɛtɔ́ lɛ́ɛ kpó. Bó ná akwɛ́ bɔ è nǎ dó xɔ awǐnnya kpikpa kpódó atín kpó, bó ná dó bló xɔ e axɔ́sú Judáa tɔn lɛ́ɛ hɛn gblé lɛ́ɛ ɖó ná. Azɔ̌watɔ́ lɛ́ɛ kpé nukún dó azɔ̌ yětɔn wú ganjí. Azɔ̌watɔ́ énɛ́ lɛ́ɛ ɔ́, Levíi ví Yaxáti kpó Ovadiahu kpó e jɔ ɖo Mɛlali kún mɛ lɛ́ɛ wɛ ɖo yě nu. Levíi ví Zekaliya kpó Mɛculamu kpó e jɔ ɖo Kexáti kún mɛ lɛ́ɛ lɔ ɖo yě nu. Levíi ví énɛ́ lɛ́ɛ bǐ wɛ nyɔ́ nǔ xo ganjí. Yě nɔ́ kpé nukún dó mɛ e ɖo azɔ̌wanú tɛnmɛ tɛnmɛ fɔ wá wɛ lɛ́ɛ wú, bó ɖo mɛ e ɖo azɔ̌ wa wɛ lɛ́ɛ bǐ jí kpɔ́n wɛ gbɔn azɔ̌ ɖokpó ɖokpó kɔn. Levíi ví ɖěvo lɛ́ɛ nyí wěgbójínɔtɔ́, nǔjíkpɔ́ntɔ́ kpó hɔnjínɔtɔ́ kpó. Akwɛ́ e è hɛn wá Mawu Mavɔmavɔ xwé gbe ɔ́, hwenu e è nǎ ɖe tɔ́n sín gbǎ ɔ́ mɛ ɔ́, vɔ̌sánú-xwlémawutɔ́ Ilukya mɔ sɛ́n e Mawu Mavɔmavɔ dó gbɔn Mɔyízi jí ɔ́ sín wěma ɖo sinsɛnxɔ mɛ. Énɛ́ ɔ́, Ilukya yí xó, bó ɖɔ nú Cafáni wěgbójínɔtɔ́ ɔ́ ɖɔ: “Un mɔ sɛ́nwéma ɔ́ ɖo Mawu Mavɔmavɔ xwé gbe.” Ée é ɖɔ mɔ̌ ɔ́, é zé wěma ɔ́ jó nú Cafáni. Bɔ Cafáni zé wěma ɔ́ wá nú axɔ́sú ɔ́, bó lɛ́ ɖó lě e nǔ lɛ́ɛ yi gbɔn ɔ́ sín gbe n'i ɖɔ: “Mɛsɛntɔ́ mɛtɔn lɛ́ɛ wa nǔ e mɛ zɔ́n yě lɛ́ɛ bǐ. Yě sɛ akwɛ́ e ɖo Mawu Mavɔmavɔ xwé gbe ɔ́ kplé, bó zé dó alɔ mɛ nú azɔ̌jíkpɔ́ntɔ́ lɛ́ɛ kpó mɛ e ɖo azɔ̌ ɔ́ wa wɛ lɛ́ɛ kpó.” Cafáni wěgbójínɔtɔ́ ɔ́ lɛ́ ɖɔ nú axɔ́sú ɔ́ ɖɔ: “Vɔ̌sánú-xwlémawutɔ́ Ilukya zé wěma ɖé nú mì.” Ée Cafáni ɖɔ mɔ̌ ɔ́, é xa wěma ɔ́ ɖo axɔ́sú ɔ́ nukɔn. Ée axɔ́sú ɔ́ se xó e ɖo sɛ́nwéma ɔ́ mɛ ɔ́, é vún awu dó kɔ nú éɖée, bó zɔ́n vɔ̌sánú-xwlémawutɔ́ Ilukya kpó Axikamu Cafáni ví ɔ́ kpó, kpó Avidɔni Mika ví ɔ́ kpó, kpó Cafáni wěgbójínɔtɔ́ ɔ́ kpó, kpódó Asaya azaglɔ́gán tɔn ɖokpó kpó ɖɔ: “Mi yi kan nǔ byɔ́ Mawu Mavɔmavɔ nú mì, bó kanbyɔ́ nú mɛ e kpo ɖo Izlayɛ́li kpó Judáa kpó lɛ́ɛ, dó xó e ɖo wěma élɔ́ e è mɔ ɔ́ mɛ é wú. Đó Mawu Mavɔmavɔ ɖo xomɛ sin jí ɖésú. É sin xomɛ dó mǐ, ɖó tɔ́gbó mǐtɔn lɛ́ɛ se tónú nú nǔ e è wlǎn dó wěma élɔ́ mɛ ɔ́ ǎ; yě ká bló ɖě ɖ'é jí ǎ.” Ilukya kpó mɛ e axɔ́sú ɔ́ ɖe gɔ́ n'i lɛ́ɛ kpó yi gbeyíɖɔ Mawu tɔn nyɔ̌nu Hulida, Calúmu sín asi ɔ́ gɔ́n. Calúmu ɔ́, Tokáti ví wɛ, bó nyí Hasla vívú; é wɛ nɔ cɔ́ awu e ɖo Mawu xwé gbe lɛ́ɛ. Jeluzalɛ́mu wɛ Hulida nɔ́ nɔ, ɖo Jeluzalɛ́mu sín slá yɔ̌yɔ́ ɔ́ mɛ. Yě yi mɔ Hulida, bó ɖɔ xó ɔ́ n'i, lě e axɔ́sú ɔ́ ɖɔ gbɔn é. É ɖɔ nú yě ɖɔ yě ní yi ɖɔ nú mɛ e sɛ́ yě dó gɔ̌n émí tɔn ɔ́ ɖɔ xó e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe; “Mawu Mavɔmavɔ ɖɔ: ‘Mi ɖótó, un ná sɛ́ awě dó toxo élɔ́, bó sɛ́ dó mɛ e ɖo toxo ɔ́ mɛ lɛ́ɛ. Un ná bló mɔ̌ bɔ nudómɛ e xó è ɖɔ dó wěma e è xa ɖo axɔ́sú Judáa tɔn ɔ́ nukɔn lɛ́ɛ bǐ ná jɛ. Đó yě jó mì dó, bó nɔ sá vɔ̌ nú nǔmɛsɛn ɖěvo lɛ́ɛ, bó ná dó sɔ́ nǔ e alɔ yětɔn bló lɛ́ɛ bǐ do dó xomɛsin nú mì. Énɛ́ ɔ́ wú wɛ un sin xomɛ dó toxo élɔ́, bó ɖo gbɔ ná se wɛ ǎ. Amɔ̌, mi ná ɖɔ nú axɔ́sú Judáa tɔn e sɛ́ mi dó ɖɔ mi ní wá kan nǔ byɔ́ Mawu Mavɔmavɔ ɔ́ ɖɔ xó e Mawu Mavɔmavɔ, Mawu Izlayɛ́li tɔn ɔ́ ɖɔ dó xó e a se lɛ́ɛ wú ɔ́ ɖíe: xó e un ɖɔ nú we ɔ́ xo ayi towe zlɛ́, a sɔ́ hwiɖée hwe ɖo Mawu nukɔn hwenu e a se xó e é ɖɔ dó Jeluzalɛ́mu kpó Jeluzalɛ́munu lɛ́ɛ kpó wú é, a sɔ́ hwiɖée hwe ɖo nukɔn ce, bó vún awu dó kɔ nú hwiɖée, bó ya avǐ ɖo nukɔn ce; énɛ́ wú ɔ́, nyi lɔ un se xó towe; un ná yí we ɖó tɔ́gbó towe lɛ́ɛ kpá; a nǎ yi yɔdo towe mɛ kpó fífá kpó bɔ nukún towe ná mɔ awě énɛ́ lɛ́ɛ e un ná sɛ́ dó Jeluzalɛ́mu kpó Jeluzalɛ́munu lɛ́ɛ kpó é ɖě ǎ.’ ” Ée yě se xó énɛ́ lɛ́ɛ ɔ́, yě yi ɖó gbe tɔn nú axɔ́sú ɔ́. Axɔ́sú Joziyási ylɔ́ tomɛxó Judáa tɔn lɛ́ɛ bǐ kpó Jeluzalɛ́mu tɔn lɛ́ɛ bǐ kpó kplé. Bɔ yě yi Mawu Mavɔmavɔ xwé gbe. Yě kpó Judáanu lɛ́ɛ bǐ kpó, Jeluzalɛ́munu lɛ́ɛ bǐ kpó, vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, kpódó togun ɔ́ bǐ kpó wɛ yi, bɛ́ sín yɔkpɔ́vú lɛ́ɛ jí, káká yi jɛ mɛxó lɛ́ɛ jí. Ée yě yi xwé ɔ́ gbe ɔ́, axɔ́sú ɔ́ zé akɔjijɛwéma e è mɔ ɖo Mawu Mavɔmavɔ xwé gbe ɔ́ bó xa bǐ nú yě. Axɔ́sú ɔ́ nɔ te ɖo tɛn tɔn mɛ, ɖo Mawu Mavɔmavɔ nukɔn, bó jɛ akɔ xá Mawu Mavɔmavɔ; mɛ ɖokpó ɖokpó ɖó ná zin alɔ dó akɔ́n ɖɔ émí ná nɔ gbejí nú Mawu Mavɔmavɔ, lobo ná nɔ́ wa nǔ e é zɔ́n lɛ́ɛ, bó ná nɔ nyi sɛ́n tɔn lɛ́ɛ kpó ayi émítɔn bǐ kpó. Émí ná wa nǔ gbɔn mɔ̌, dó nɔ gbejí nú xó e ɖo akɔjijɛwéma élɔ́ mɛ lɛ́ɛ é. Énɛ́ ɔ́, é ɖɔ bɔ yě mɛ e ɖo Jeluzalɛ́mu lɛ́ɛ kpó mɛ e ɖo akɔta Bɛnjamɛ́ɛ tɔn mɛ lɛ́ɛ kpó bǐ yí gbe bo jɛ akɔ ɖokpó énɛ́ ɔ́. Bɔ Jeluzalɛ́munu lɛ́ɛ wa nǔ lě e akɔ e Mawu tɔ́gbó yětɔn lɛ́ɛ tɔn ɔ́ jɛ xá yě ɔ́ byɔ́ gbɔn é. Walɔ baɖabaɖa e zán wɛ yě ɖe ɖo Izlayɛ́li lɛ́ɛ ɔ́, axɔ́sú Joziyási sú dó, bó ɖɔ mɛ e ɖo to ɔ́ mɛ lɛ́ɛ bǐ ɖó ná sɛn Mawu Mavɔmavɔ, Mawu yětɔn ɔ́ dandan. Ée é bló mɔ̌ ɔ́, yě mɛ ɖěbǔ sɔ́ lɛ́ kɔ sín Mawu Mavɔmavɔ, Mawu e tɔ́gbó yětɔn lɛ́ɛ nɔ sɛn ɔ́ gúdo káká có nú zǎn tɔn wá kú ǎ. Joziyási ɖu Dǐndínwáyixwe ɔ́ ɖo Jeluzalɛ́mu dó Mawu Mavɔmavɔ tamɛ; è hu kanlin e è nǎ dó ɖu xwe ɔ́ ná lɛ́ɛ ɖo sun nukɔntɔn ɔ́ sín azǎn wǒ-ɛnɛgɔ́ ɔ́ gbe. Joziyási sɔ́ vɔ̌sánú-xwlémawutɔ́ lɛ́ɛ ɖó azɔ̌ yětɔn lɛ́ɛ nu, bó dó wǔsyɛ́n lanmɛ nú yě ɖɔ yě ní kpé nukún dó azɔ̌ e yě nɔ́ wa ɖo Mawu Mavɔmavɔ xwé gbe ɔ́ wú. É ɖɔ xó nú Levíi ví lɛ́ɛ lɔ. Levíi ví lɛ́ɛ wɛ nɔ kplɔ́n nǔ Izlayɛ́li ví lɛ́ɛ bǐ bɔ è sɔ́ yě ɖó vo nú Mawu Mavɔmavɔ. É ɖɔ nú yě ɖɔ: “Mi zé akɔjijɛgbá mímɛ́ ɔ́ ɖó xwé e axɔ́sú Izlayɛ́li tɔn Salomɔ́ɔ Davídi ví ɔ́ sá nú Mawu ɔ́ gbe. Mi sɔ́ ná nɔ́ ɖíɖá ɖó abɔ̌ta ɖě ǎ. Din ɔ́, mi bo wa azɔ̌ nú Mawu Mavɔmavɔ, Mawu mitɔn ɔ́ kpó togun tɔn Izlayɛ́li ɔ́ kpó. Mi ná kpɔ́n xwédo e mɛ mɛ ɖokpó ɖokpó gosín é, bó ná kpɔ́n azɔ̌ e mɛ ɖokpó ɖokpó nɔ́ wá ɔ́, bó ná kplé miɖée gbɛ̌ta gbɛ̌ta, lě e axɔ́sú Izlayɛ́li tɔn Davídi kpó vǐ tɔn Salomɔ́ɔ kpó wlán gbɔn é. Xwédo mitɔn lɛ́ɛ sín gbɛ̌ta ɖokpó ɖokpó ní nɔ Mawu xwé gbe, bó ná dó alɔ nɔví mitɔn Izlayɛ́li ví ɖě lɛ́ɛ gbɔn xwédo yětɔn yětɔn mɛ. Mi hu kanlin e è nǎ dó ɖu Dǐndínwáyixwe ɔ́ ná lɛ́ɛ; mi slá wǔ nú miɖée, mi dó alɔ nɔví mitɔn lɛ́ɛ, bónú è nǎ bló nǔ lɛ́ɛ bǐ lě e Mawu Mavɔmavɔ ɖɔ gbɔn Mɔyízi jí é.” Joziyási kpɔ́n kanlinkpó é ɖésúnɔ tɔn mɛ, bó ná kanlin e Izlayɛ́li ví e ɖo fínɛ́ lɛ́ɛ ná hu nú Dǐndínwáyixwe ɔ́ lɛ́ɛ é: é ná lɛ̌ngbɔ́ kpó gbɔ̌ví kpó adɔ̌kpo ɖě děgba we afɔwó (30.000) yě, bó lɛ́ ná nyibú afɔwó-afatɔ́n (3.000) yě. Azaglɔ́gán tɔn lɛ́ɛ kpɔ́n yě ɖésúnɔ xomɛ bó ná kanlin togun ɔ́, vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó. Ilukya, Zekaliyahu kpódó Yexiyɛ́li kpó ɔ́, nukɔntɔ́ wɛ yě nyí ɖo Mawu xwé ɔ́ gbe; yě ná lɛ̌ngbɔ́ví kpó gbɔ̌ví kpó afɔwó nǔwɔntɔn (2.600), nyibú afɔɖé kanwe ko (300), vɔ̌sánú-xwlémawutɔ́ lɛ́ɛ nú Dǐndínwáyixwe ɔ́. Kɔnaniahu kpó nɔví tɔn Cemayahu kpó, kpódó Nɛtanɛli kpó ɔ́, gǎn wɛ yě nyǐ ɖo Levíi ví lɛ́ɛ mɛ. Mɔ̌ ɖokpó ɔ́, Hacaviyahu, Yeyiɛ́li kpódó Yozavadi kpó nyí gǎn ɖo Levíi ví lɛ́ɛ mɛ; yě ná lɛ̌ngbɔ́ví kpó gbɔ̌ví kpó děgba ɖě afatɔ́n (5.000), bó ná nyibú afɔwe kanwe ko (500) Levíi ví lɛ́ɛ nú Dǐndínwáyixwe ɔ́. Lě e è to nǔ lɛ́ɛ gbɔn é ɖíe: vɔ̌sánú-xwlémawutɔ́ lɛ́ɛ ɖo azɔ̌ yětɔn lɛ́ɛ kɔn, bɔ Levíi ví lɛ́ɛ ɖo gbɛ̌ta yětɔn yětɔn mɛ lě e axɔ́sú ɔ́ zɔ́n gbɔn é. Yě hu kanlin lɛ́ɛ nú Dǐndínwáyixwe ɔ́. Vɔ̌sánú-xwlémawutɔ́ lɛ́ɛ kɔn hun e Levíi ví lɛ́ɛ sɔ́ nú yě ɔ́ kɔn nyi vɔ̌sákpe ɔ́ jí, bɔ Levíi ví lɛ́ɛ kɔ́n kanlin lɛ́ɛ. Yě ɖe kanlin lɛ́ɛ sín akpáxwé e è nǎ dó sá vɔ̌ e è nɔ dó zo ɔ́ ná lɛ́ɛ ɖó vo bó ná bɛ́ nú togun ɔ́ sín hɛ̌nnu tɛnmɛ tɛnmɛ lɛ́ɛ bónú yě ná sá vɔ̌ nú Mawu Mavɔmavɔ lě e è wlǎn dó Mɔyízi wéma ɔ́ mɛ gbɔn é. Mɔ̌ ɖokpó ɔ́ wɛ è wa nyibú lɛ́ɛ sín nǔ gbɔn. È mɛ lɛ̌ngbɔ́ví Dǐndínwáyixwe ɔ́ tɔn ɔ́, bó ɖa vɔ̌sánú mímɛ́ lɛ́ɛ ɖo kozɛ́n kpó ganzɛ́n gɔngɔn kpó, kpódó ganzɛ́n wɛnjɛ kpó mɛ, lě e è nɔ bló gbɔn sín do é. Yě hwlɛ́n dó bó má nǔ e è ɖa lɛ́ɛ nú togun ɔ́ bǐ. Énɛ́ ɔ́ gúdo ɔ́, yě ɖa éé nyí yědɛɛ lɛ́ɛ kpó vɔ̌sánú-xwlémawutɔ́ lɛ́ɛ kpó tɔn lɛ́ɛ, ɖó vɔ̌sánú-xwlémawutɔ́ Aalɔ́ɔn ví lɛ́ɛ ɔ́, yě ɖo vɔ̌ e è nɔ dó zo lɛ́ɛ sá wɛ, bó ɖo jǒ lɛ́ɛ dó zo wɛ káká bɔ zǎn kú. Nǔ e wútu Levíi ví lɛ́ɛ ɖa éé nyí yědɛɛ lɛ́ɛ ɖésú tɔn lɛ́ɛ kpó vɔ̌sánú-xwlémawutɔ́ Aalɔ́ɔn ví lɛ́ɛ kpó tɔn ɔ́ nɛ́. Asáfu ví, hanjitɔ́ lɛ́ɛ, ɖo tɛn yětɔn lɛ́ɛ mɛ lě e gbeta e Davídi kpó Asáfu kpó, kpó Hemani kpó, kpódó Yedutún axɔ́sú ɔ́ sín nǔmɔtɔ́ ɔ́ kpó ɖe tɔ́n ɔ́ ɖɔ gbɔn é, bɔ hɔnjínɔtɔ́ lɛ́ɛ ɖo hɔn lɛ́ɛ ɖokpó ɖokpó jí. Yě gosín azɔ̌ yětɔn lɛ́ɛ kɔn ǎ, ɖó Levíi ví ɖěvo lɛ́ɛ ɖo nǔɖuɖu ɖa nú yě wɛ. Ɖó gbe énɛ́ ɔ́ gbe ɔ́, lě e è to sinsɛn Mawu Mavɔmavɔ tɔn ɔ́ gbɔn bó dó ɖu Dǐndínwáyixwe ɔ́, lobo sá vɔ̌ e è nɔ dó zo lɛ́ɛ ɖo vɔ̌sákpe Mawu Mavɔmavɔ tɔn jí gbɔn ɔ́ nɛ́; lě e axɔ́sú Joziyási ná gbe tɔn gbɔn ɔ́ wɛ è blǒ gbɔn. Izlayɛ́li ví e ɖo fínɛ́ lɛ́ɛ ɖu Dǐndínwáyixwe ɔ́ bó ɖu wɔ̌xúxú e mɛ è ma dó tɔ́n ǎ é sín xwe ɔ́ hwenɛ́nu xɔ azǎn tɛ́nwe. Sín gbeyíɖɔ Mawu tɔn Samuwɛ́li hwenu ɔ́, è ko sɔ́ ɖu Dǐndínwáyixwe mɔ̌hunkɔtɔn kpɔ́n ɖo Izlayɛ́li ǎ. Dǐndínwáyixwe élɔ́ e axɔ́sú Joziyási kpódó vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, Judáa togun ɔ́ kpó Izlayɛ́li togun ɔ́ kpó bǐ kpódó Jeluzalɛ́munu lɛ́ɛ kpó ɖu ɔ́, axɔ́sú Izlayɛ́li tɔn lɛ́ɛ ɖěbǔ kó ɖu mɔ̌hunkɔtɔn kpɔ́n ǎ. Joziyási yi zinkpo jí ɔ́, xwe tɔn afɔtɔn-nukún-atɔngɔ́ ɔ́ mɛ wɛ è ɖu Dǐndínwáyixwe énɛ́ ɔ́. Ée nǔ énɛ́ lɛ́ɛ bǐ jɛ wá yi ɔ́, ée Joziyási bló Mawu xwé ɔ́ ɖó fó ɔ́, axɔ́sú Ejípu tɔn Nɛko sɔ́ nǔ bó ná yi fun ahwan xá Babilɔ́nunu lɛ́ɛ ɖo Kaakemíci ɖo Efláti tɔ ɔ́ tó. Bɔ Joziyási yi gbo ali n'i, bɔ Nɛko sɛ́ mɛ dó e ɖɔ yě ní yi ɖɔ n'i ɖɔ: “Judáa xɔ́sú, ani wɛ ɖo hwi kpó nyɛ kpó tɛ́ntin? Un má tɔ́n gbě towe égbé nɛ́. Kɛntɔ́ ce kpó nyɛ kpó wɛ ɖo ahwan fun wɛ, bɔ un tɔ́n gbě tɔn, bɔ Mawu ɖɔ nú mì ɖɔ nyɛ ní yá wǔ. Ma fɔ́n gǔ dó Mawu e ɖo kpɔ́ xá mì ɔ́ jí ó, é táá vívá kún nú we.” Lo ɔ́, Joziyási lɛ́ kɔ sín gǔdo tɔn ǎ. É ɖótó xó e Nɛko ɖɔ lɛ́ɛ ǎ, bó húzú kan bo ná tɔ́n ahwan ɛ, có xó e axɔ́sú Nɛko ɖɔ lɛ́ɛ ɔ́, Mawu gɔ́n wɛ yě gosín. Joziyási ɖidó ayǐkúngban wɛnjɛ Mɛgido tɔn ɔ́ jí bó ná fun ahwan. Sɔ́ja e nɔ hɛn gǎ lɛ́ɛ da gǎ dó axɔ́sú Joziyási, bɔ é ɖɔ nú mɛsɛntɔ́ tɔn lɛ́ɛ ɖɔ: “Mi zé mi yi xwé, ɖó un ɖo ganjí ɖěbǔ ǎ.” Énɛ́ ɔ́, mɛsɛntɔ́ tɔn lɛ́ɛ ɖe e sín ahwankɛkɛ́ví e mɛ é ɖe bó ɖo ahwan fun wɛ ɔ́ mɛ, bó sɔ́ ɛ ɖó ahwankɛkɛ́ví tɔn ɖěvo mɛ, bó kplá ɛ yi Jeluzalɛ́mu. Joziyási zán kú bɔ è ɖi i dó yɔdo tɔ́gbó tɔn lɛ́ɛ tɔn mɛ. Judáanu lɛ́ɛ bǐ kpó Jeluzalɛ́munu lɛ́ɛ bǐ kpó nɔ aluwɛ mɛ n'i. Gbeyíɖɔ Mawu tɔn Jelemíi ji gbɛvíhan dó Joziyási sín cyɔ jí. Hanjitɔ́ súnnu kpó nyɔ̌nu kpó bǐ wɛ ɖɔ Joziyási sín xó dó gbɛvíhan yětɔn lɛ́ɛ mɛ káká wá jɛ égbé, bó ɖó hwɛndo tɔn ayǐ ɖo Izlayɛ́li. È wlǎn han énɛ́ lɛ́ɛ dó gbɛvíhan lɛ́ɛ mɛ. Ée Joziyási zán wá kú ɔ́, Judáanu lɛ́ɛ sɔ́ vǐ tɔn Yoakázi bɔ é ɖu axɔ́sú ɖó tɔ́ ɔ́ tɛnmɛ ɖo Jeluzalɛ́mu. Xwe ko-nukún-atɔn wɛ Yoakázi ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn. Ejípu xɔ́sú ɔ́ ka wá ɖe e sín axɔ́súzinkpo jí ɖo Jeluzalɛ́mu, bó byɔ́ nǔjɔ Judáa to ɔ́, bɔ yě ná kpatágan kilóo afɔwó-afatɔ́n (3.000) kpó siká kilóo gban (30) kpó. Ejípu xɔ́sú Nɛko sɔ́ Eliyakímu Yoakázi nɔví ɔ́ axɔ́sú ɖó Judáa kpó Jeluzalɛ́mu kpó nu, bó húzú nyǐkɔ n'i bɔ é nɔ nyí Yoyakímu. Axɔ́sú Nɛko kplá nɔví tɔn Yoakázi ɔ́ yi Ejípu. Xwe koatɔ́n (25) wɛ Yoyakímu ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nǔ e ma nyɔ́ Mawu Mavɔmavɔ, Mawu tɔn nukún mɛ ǎ lɛ́ɛ wɛ é wa. Axɔ́sú Babilɔ́nu tɔn Nabukodonɔzɔ́ɔ tɔ́n ahwan Yoyakímu, bó wlí i lobo blá ɛ kpó ganvɔwlɔ kpó, bó kplá ɛ yi Babilɔ́nu. Nabukodonɔzɔ́ɔ bɛ́ nǔ tɛnmɛ tɛnmɛ ɖo Mawu Mavɔmavɔ xwé gbe yi Babilɔ́nu, bó bɛ́ yě ɖó hɔnmɛ, xwé tɔn gbe ɖo Babilɔ́nu. Axɔ́sú Yoyakímu sín tan e kpo ɔ́, è wlǎn dó axɔ́sú Izlayɛ́li tɔn lɛ́ɛ, kpó Judáa tɔn lɛ́ɛ kpó sín Tan wéma mɛ; nǔ e é dó sin lɛ́ɛ kpó nǔ e gbo e lɛ́ɛ kpó bǐ wɛ è wlǎn d'é mɛ. Vǐ tɔn Yoyakini wɛ ɖu axɔ́sú ɖó tɛn tɔn mɛ. Xwe tántɔn wɛ Yoyakini ɖó bó yi zinkpo jí ɖo Jeluzalɛ́mu, bó ɖu axɔ́sú nú sun atɔn azǎn wǒ. Nǔ e ma nyɔ́ Mawu Mavɔmavɔ nukún mɛ ǎ lɛ́ɛ wɛ é wa. Hwenu e xwe yɔ̌yɔ́ ɔ́ ɖo nǎ bɛ́ wɛ ɔ́, axɔ́sú Nabukodonɔzɔ́ɔ ɖɔ bɔ è kplá Yoyakini wá yi Babilɔ́nu kpó nǔ xɔ akwɛ́ e è nɔ zán ɖo Mawu Mavɔmavɔ xwé gbe lɛ́ɛ kpó, bó sɔ́ hɛ̌nnumɔ tɔn Sedesíyasi axɔ́sú ɖó Judáa kpó Jeluzalɛ́mu kpó nu. Xwe ko-nukún-ɖokpó wɛ Sedesíyasi ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nǔ e má nyɔ́ Mawu Mavɔmavɔ, Mawu tɔn nukún mɛ ǎ lɛ́ɛ wɛ é wa, bó lɛ́ gbɛ́ ɖɔ émí kún ná sɔ́ émíɖée hwe ɖo gbeyíɖɔ Mawu tɔn Jelemíi e nɔ wá ɖɔ xó n'i ɖo Mawu Mavɔmavɔ nyǐkɔ mɛ é nukɔn ó. Axɔ́sú Nabukodonɔzɔ́ɔ ɖɔ nú Sedesíyasi ɖɔ é ní xwlé Mawu nú émí ɖɔ émí ná nɔ gbejí nú émí, bɔ é xwlé, có Sedesíyasi fɔ́n gǔ dó jǐ tɔn. É ti tamɛ bó gbɛ́ bǐ ɖɔ émí kún sɔ́ ná lɛ́ kɔ yi Mawu Mavɔmavɔ, Mawu Izlayɛ́li tɔn ɔ́ gɔ́n ó. Mɔ̌ ɖokpó ɔ́, vɔ̌sánú-xwlémawutɔ́gán lɛ́ɛ bǐ kpó togun ɔ́ kpó lɔ fɔ́n bó ɖo hwɛ baɖabaɖa hu dó hwɛ jí wɛ walɔ baɖabaɖa e akɔta e ma nɔ sɛn Mawu ǎ lɛ́ɛ nɔ́ zán lɛ́ɛ ɖɔhun. Yě ɖu su nú xwé e Mawu Mavɔmavɔ sɔ́ ɖó vo nú éɖée ɖo Jeluzalɛ́mu é. Mawu Mavɔmavɔ, Mawu tɔ́gbó yětɔn lɛ́ɛ tɔn sɛ́ mɛ dó yě dó hwe tɔn nu, bɔ yě wǎ ɖɔ xó nú yě, ɖó é jló ná hwlɛ́n togun tɔn kpó nɔtɛn é ɖésúnɔ tɔn kpó. Lo ɔ́, yě cá mɛ e Mawu sɛ́ dó lɛ́ɛ ko. Yě nɔ́ hu tɛ́ nú Mawuxó ɔ́, bó nɔ́ ɖɔ slǎmɛ gbeyíɖɔ tɔn lɛ́ɛ wú káká bɔ Mawu Mavɔmavɔ sin xomɛ dó togun tɔn, bɔ nǔ e ná fá xomɛ n'i ɔ́ ɖe ǎ. Ée Mawu Mavɔmavɔ sin xomɛ mɔ̌ ɔ́, é sɛ́ Babilɔ́nu xɔ́sú ɔ́ dó to ɔ́ mɛ bó jó nǔ e ɖo to ɔ́ mɛ lɛ́ɛ bǐ n'i. Axɔ́sú ɔ́ hu sɔ́ja lɛ́ɛ káká yi Mawu Mavɔmavɔ xwé ɔ́ gbe; é jó dɔ̌nkpɛvú dó ǎ, é jó ɖyɔ̌vǐ dó ǎ, é jó mɛxó dó ǎ, é jó degénɔ dó ǎ; mɛ bǐ wɛ é hu. Axɔ́sú Nabukodonɔzɔ́ɔ bɛ́ nǔ e è nɔ zán ɖo Mawu Mavɔmavɔ xwé gbe lɛ́ɛ bǐ, kpɛví kpó ɖaxó kpó, dɔkun e ɖo xwé ɔ́ gbe lɛ́ɛ, dɔkun e nyí axɔ́sú ɔ́ tɔn lɛ́ɛ kpó éé nyí azaglɔ́gán tɔn lɛ́ɛ tɔn lɛ́ɛ kpó yi Babilɔ́nu. Babilɔ́nunu lɛ́ɛ dó Mawu xwé ɔ́ zo. Yě mu ahohó e ɖo Jeluzalɛ́mu lɛ́ɛ, bó dó hɔnmɛ lɛ́ɛ bǐ zo lobo hɛn nǔ xɔ akwɛ́ e ɖo toxo ɔ́ mɛ lɛ́ɛ bǐ gblé. Nabukodonɔzɔ́ɔ wlí mɛ e kpo ɖo gbɛ lɛ́ɛ yi Babilɔ́nu bɔ yě húzú kannumɔ nú é kpó vǐ tɔn lɛ́ɛ kpó káká wá jɛ hwenu e Pɛ́sinu lɛ́ɛ wá xɔ to é. Énɛ́ ɔ́, xó e Mawu Mavɔmavɔ ɖɔ gbɔn gbeyíɖɔ Jelemíi nu mɛ ɔ́ jɛ; é ɖɔ: “È nǎ jó to ɔ́ dó xɔ xwe kanɖé gban (70), ɖó gbɔjɛ́ e é ɖó ná gbɔjɛ́ lě e sɛ́n ɔ́ ɖɔ gbɔn, bɔ é má ká gbɔjɛ́ ǎ ɔ́ sín tɛnmɛ.” Hwenu e Dadá Pɛ́si tɔn Silúsi ɖo xwe ɖokpó bló wɛ ɖo zinkpo jí ɔ́, Mawu Mavɔmavɔ ɖɔ émí ná bló nǔ e émí ɖɔ gbɔn Jelemíi jí é; énɛ́ ɔ́, é sɔ́ dó ayi mɛ nú Dadá Silúsi, bɔ ayi tɔn mɔ ɖɔ émí ná zé nu émítɔn dó jlá xó élɔ́ gbɔn axɔ́súɖuto émítɔn bǐ mɛ, bó ná wlán ɖɔ: “Xó e Dadá Pɛ́si tɔn Silúsi ɖɔ ɔ́ ɖíe: Mawu Mavɔmavɔ, Mawu jǐnukúnsin tɔn ɔ́ sɔ́ axɔ́súɖuto e ɖo ayǐkúngban jí lɛ́ɛ bǐ ɖó acɛ ce mɛ; é zɔ́n mì ɖɔ nyɛ ní sá xwé ɖokpó nú émí ɖó Jeluzalɛ́mu ɖo Judáa. Mi mɛ e ko sixú ɖo togun tɔn mɛ lɛ́ɛ bǐ ní lɛ́ kɔ yi Jeluzalɛ́mu. Mawu Mavɔmavɔ, Mawu mitɔn ní nɔ kpɔ́ xá mi.” Hwenu e Dadá Pɛ́si tɔn Silúsi ɖo xwe ɖokpó bló wɛ ɖo axɔ́súzinkpo jí ɔ́, Mawu Mavɔmavɔ ɖɔ émí ná bló nǔ e émí ɖɔ gbɔn gbeyíɖɔ Jelemíi jí é. Énɛ́ ɔ́, é sɔ́ dó ayi mɛ nú Dadá Silúsi, bɔ ayixa tɔn mɔ ɖɔ émí ná zé nu émítɔn dó jlá xó élɔ́ gbɔn axɔ́súɖuto émítɔn bǐ mɛ, bó ná wlán. Xó e Dadá Pɛ́si tɔn Silúsi ɖɔ ɔ́ ɖíe: “Mawu Mavɔmavɔ, Mawu jǐnukúnsin tɔn ɔ́ sɔ́ axɔ́súɖuto e ɖo ayǐkúngban jí lɛ́ɛ bǐ ɖó acɛkpikpa ce mɛ; é zɔ́n mì ɖɔ nyɛ ní vɔ́ xwé ɖokpó gbá nú émí ɖó Jeluzalɛ́mu, ɖo Judáa. Mi mɛ e ko sixú ɖo togun tɔn mɛ lɛ́ɛ bǐ ní lɛ́ kɔ yi Jeluzalɛ́mu ɖo Judáa, bó ná vɔ́ Mawu Mavɔmavɔ, Mawu Izlayɛ́li tɔn, Mawu e è nɔ sɛn ɖo Jeluzalɛ́mu ɔ́ sín xwé gbá, bónú é ná nɔ kpɔ́ xá mi. Mɛ e mɛ Izlayɛ́li ví e kpo lɛ́ɛ ná ɖe ɖo fí ɖěbǔ ɔ́, mɛ énɛ́ lɛ́ɛ ɖó ná ná nǔ yě bó dó dó alɔ yě. Yě ɖó ná ná yě kpatágan, bó ná ná yě sikánú, bó ná ná yě nǔ ɖěvo ɖěvo lɛ́ɛ, bó ná ná yě kanlin, bɔ nǔ e yě ɖésúnɔ jló bó ná ná bɔ è nǎ dó gbá Mawu xwé ɔ́ ná ɖo Jeluzalɛ́mu lɛ́ɛ ɔ́, yě ná lɛ́ ná yě.” Énɛ́ ɔ́, akɔta Judáa tɔn, kpó Bɛnjamɛ́ɛ tɔn kpó sín hɛ̌nnugán lɛ́ɛ, vɔ̌sánú-xwlémawutɔ́ lɛ́ɛ, Levíi ví lɛ́ɛ, kpódó mɛ e Mawu ko sixú sɔ́ dó ayi mɛ ná, bɔ yě ɖó jló ɖɔ émí ná yi vɔ́ Mawu Mavɔmavɔ xwé ɔ́ gbá ɖo Jeluzalɛ́mu lɛ́ɛ bǐ kpó sɔ́ nǔ bó ná yi. Bɔ mɛ e kpó yě kpó ɖo kpɔ́ lɛ́ɛ ná nǔ yě dó d'alɔ yě. Yě ná yě nǔ e è sɔ́ kpatágan dó bló ná lɛ́ɛ kpó ée è sɔ́ siká dó bló ná lɛ́ɛ kpó, kpó nǔzínzán lɛ́ɛ kpó, kpó kanlin kpó, kpódó nǔxɔ-akwɛ́ tɛnmɛ tɛnmɛ lɛ́ɛ kpó; è lɛ̌n nǔ e yě ɖésúnɔ jló bó ná ɖó Mawu xwé ɔ́ gbígbá wútu lɛ́ɛ d'é mɛ ǎ. Nǔzínzán e Nabukodonɔzɔ́ɔ ko bɛ́ sín Mawu Mavɔmavɔ xwé gbe ɖo Jeluzalɛ́mu, bó bɛ́ dó vodúnxɔ é ɖésú tɔn mɛ lɛ́ɛ ɔ́, Dadá Silúsi xo bǐ kplé, bó ná gbe Mitlɛdati e ɖo Dadá ɔ́ sín dɔkun lɛ́ɛ bǐ nu ɔ́, bɔ é bɛ́ nǔ énɛ́ lɛ́ɛ jó nú axɔ́ví Judáa tɔn Cɛcibasáa. Nǔ e é bɛ́ jó n'i lɛ́ɛ ɖíe: basya e è sɔ́ siká dó bló ná ɔ́ gban (30), ée è sɔ́ kpatágan dó bló ná ɔ́ afatɔ́n (1.000), jǐví koatɔ́n-nukún-ɛnɛ (29), kɔ́fu e è sɔ́ siká dó bló ná ɔ́ gban (30), ée è sɔ́ kpatágan dó bló ná ɔ́ afɔwe wǒ (410), nǔzínzán ɖěvo ɖěvo lɛ́ɛ afatɔ́n (1.000). Nǔ e è sɔ́ siká dó bló ná lɛ́ɛ, kpódó ée è sɔ́ kpatágan dó bló ná lɛ́ɛ kpó bǐ bló děgba ɖě afɔ tɛ́nwe (5.400). Cɛcibasáa bɛ́ nǔ énɛ́ lɛ́ɛ bǐ sín Babilɔ́nu yi Jeluzalɛ́mu hwenu e mɛ lɛ́ɛ lɛ́ kɔ sín kannumɔgbénu é. Mɛ gěgé ɖo togun Izlayɛ́li tɔn e axɔ́sú Nabukodonɔzɔ́ɔ wlí hɛn yi kannumɔgbénu ɖo Babilɔ́nu lɛ́ɛ mɛ, bó lɛ́ kɔ wá Jeluzalɛ́mu kpódó Judáa kpó. Mɛ ɖokpó ɖokpó lɛ́ kɔ wá to é ɖésúnɔ tɔn mɛ. Zolobabɛ́li kpódó Jozuwée kpó, kpódó Nɛ̌ɛmíya kpó, kpódó Selaya kpó, kpódó Hlelaya kpó, kpódó Mɔdokayi kpó, kpódó Bilucáni kpó, kpódó Misipáa kpó, kpódó Bigiwayi kpó, kpódó Hlehúmu kpó, kpódó Baana kpó wɛ zɔn yě nu wá. Izlayɛ́li ví e wá lɛ́ɛ sín nyǐkɔ kpódó mɛ nabí e ɖo gbɛ̌ta ɖokpó ɖokpó mɛ lɛ́ɛ kpó ɖíe: Xwédo Palewɔ́ci tɔn: súnnu afɔwó kɛnnɛ wěwe (2172). Xwédo Cefátiya tɔn: súnnu afɔɖé kɛnnɛ wěwe (372). Xwédo Aláxi tɔn: súnnu nǔwɔntɔn kɛnnɛ afɔtɔn (775). Xwédo Paxáti-Mɔwabu tɔn: súnnu afɔwó-afɛnɛ wěwe (2.812). Yecúwa kpó Yoavu kpó kún mɛ wɛ yě jɔ ɖe. Xwédo Elámu tɔn: súnnu afayizɛ́n kanɖé wɛ̌nɛ (1.254). Xwédo Zatú tɔn: súnnu afɛnɛ kantɔn koatɔ́n (945). Xwédo Zakáyi tɔn: súnnu nǔwɔntɔn kɛnnɛ (760). Xwédo Bani tɔn: súnnu nǔwɔntɔn kanɖé-nukún-we (642). Xwédo Bevayi tɔn: súnnu nǔwɔntɔn ko-nukún-atɔn (623). Xwédo Azigadi tɔn: súnnu afayizɛ́n ko-nukún-we (1.222). Xwédo Adonikámu tɔn: súnnu nǔwɔntɔn kanɖé koatɔ́n-nukún-ɖokpó (666). Xwédo Bigiwayi tɔn: súnnu afɔwó kanɖé afɔtɔn-nukún-ɖokpó (2.056). Xwédo Adini tɔn: súnnu afɔwe kanɖé wɛ̌nɛ (454). Xwédo Atɛ́ɛ e nyí kúnkan Yexizikiya tɔn é: súnnu kanwe afɔtɔn-nukún-atɔn (98). Xwédo Besayi tɔn: súnnu afɔɖé kantɔn-nukún-atɔn (323). Xwédo Yola tɔn: súnnu kanwe gban-nukún-we (112). Xwédo Hacúmu tɔn: súnnu afɔɖé ko-nukún-atɔn (223). Xwédo Gibáa tɔn: súnnu kanwe afɔtɔn (95). Gletoxo Bɛteleyɛ́mu tɔn mɛ nu lɛ́ɛ: súnnu kantɔn-nukún-atɔn (123). Gletoxo Nɛtofa tɔn mɛ nu lɛ́ɛ: súnnu kanɖé afɔtɔn-nukún-ɖokpó (56). Gletoxo Anatɔ́ti tɔn mɛ nu lɛ́ɛ: súnnu kantɔn tántɔn (128). Gletoxo Azimawɛ́ti tɔn mɛ nu lɛ́ɛ: súnnu kanɖé-nukún-we (42). Gletoxo Kiliyati-Yealimu tɔn, kpódó Kefila tɔn, kpódó Beelɔ́ti kpó tɔn mɛ nu lɛ́ɛ: súnnu nǔwɔntɔn kantɔn ko-nukún-atɔn (743). Gletoxo Hlama kpó Gɛva kpó tɔn mɛ nu lɛ́ɛ: súnnu nǔwɔntɔn ko-nukún-ɖokpó (621). Gletoxo Mikumasi tɔn mɛ nu lɛ́ɛ: súnnu kantɔn-nukún-we (122). Gletoxo Betɛ́li kpódó Ayíi kpó tɔn mɛ nu lɛ́ɛ: súnnu afɔɖé ko-nukún-atɔn (223). Gletoxo Nɛbo tɔn mɛ nu lɛ́ɛ: súnnu kanɖé wěwe (52). Gletoxo Magibíci tɔn mɛ nu lɛ́ɛ: súnnu kantɔn gbantɔ́n-nukún-ɖokpó (156). Xwédo Elámu ɖě ɔ́ tɔn mɛ nu lɛ́ɛ: Súnnu afayizɛ́n kanɖé wǒ ɛnɛ (1254). Gletoxo Halimu tɔn mɛ nu lɛ́ɛ: súnnu afɔɖé kantɔn (320). Gletoxo Lodi kpódó Hadídi kpó, kpódó Onɔ kpó tɔn mɛ nu lɛ́ɛ: súnnu nǔwɔntɔn kantɔn atɔ́ɔ́n (725). Toxo ɖaxó Jeliko tɔn mɛ nu lɛ́ɛ: súnnu afɔɖé kantɔn koatɔ́n (345). Toxo ɖaxó Senáa tɔn mɛ nu lɛ́ɛ: súnnu afɔwó-afatɔ́n nǔwɔntɔn gban (3.630). Mɛ e wá ɖo vɔ̌sánú-xwlémawutɔ́ lɛ́ɛ sín gbɛ̌ta mɛ lɛ́ɛ ɖíe: xwédo Yedaya tɔn e nyí kúnkan Yecúwa tɔn lɛ́ɛ: súnnu afɛnɛ kɛnnɛ wǎtɔn (973). Xwédo Imumɛ́ɛ tɔn: súnnu afatɔ́n kanɖé wěwe (1.052). Xwédo Pacehúu tɔn: súnnu afatɔ́n afɔɖé kanɖé tɛ́nwe (1.247). Xwédo Halimu tɔn: Súnnu afatɔ́n afɔtɔn-nukún-we (1.017). Mɛ nabí e wá ɖo gbɛ̌ta Levíi tɔn mɛ lɛ́ɛ ɖíe: xwédo Yecúwa kpódó Kadimiyɛ́li kpó tɔn e nyí kúnkan Hodawya tɔn lɛ́ɛ é: súnnu kanɖé gban-nukún-ɛnɛ (74). Mɛ nabí e wá ɖo hanjitɔ́ Mawu xwé ɔ́ gbe tɔn lɛ́ɛ sín gbɛ̌ta ɔ́ mɛ lɛ́ɛ ɖíe: xwédo Asáfu tɔn: súnnu kantɔn tántɔn (128). Đo hɔnjínɔtɔ́ lɛ́ɛ sín gbɛ̌ta mɛ ɔ́, súnnu kantɔn afɔtɔn-nukún-ɛnɛ (139) wɛ wá. Yě jɔ ɖo xwédo Calúmu tɔn, Atɛ́ɛ tɔn, Talumɔ́ni tɔn, Akúvu tɔn, Hatíta tɔn, kpódó Covayi tɔn kpó mɛ. Mɛ e wá ɖo mɛ e nɔ wa azɔ̌ ɖo Mawu xwé lɛ́ɛ sín gbɛ̌ta mɛ lɛ́ɛ ɖíe: kúnkan Siha kpódó Hasúfa kpó, kpódó Tabawɔ́ti kpó tɔn, kúnkan Kelɔ́si tɔn, Siaxa tɔn, kpódó Padɔ́ni tɔn kpó. Kúnkan Levana tɔn, Hagáva tɔn, kpódó Akúvu tɔn kpó, kúnkan Hagávu tɔn, Calumayi tɔn, kpódó Hanáni tɔn kpó. Kúnkan Gidɛ́li tɔn, Gaxáa tɔn, kpódó Hleaya tɔn kpó, kúnkan Hlesini tɔn, Nɛkoda tɔn, kpódó Gazamu tɔn kpó, kúnkan Wúza tɔn, Paseyaxi tɔn, kpódó Besayi tɔn kpó, kúnkan Asina kpó Mɛwunimu kpó tɔn, kpódó Nɛfusímu tɔn kpó, kúnkan Bakibúki tɔn, Hakúfa tɔn, kpódó Haahúu tɔn kpó, kúnkan Basiluti tɔn, Mɛxida tɔn, kpódó Haaca tɔn kpó, kúnkan Baakosi tɔn, Sisela tɔn, kpódó Tamáxi tɔn kpó, kúnkan Nɛsíyaxi tɔn kpódó Hatífa tɔn kpó. Mɛsɛntɔ́ Salomɔ́ɔ tɔn sín kúnkan lɛ́ɛ ɔ́, gbɛ̌ta yětɔn e wá lɛ́ɛ ɖíe: kúnkan Sotayi tɔn, Ha-Sofelɛ́ti tɔn, kpódó Pɛluda tɔn kpó, kúnkan Yaala tɔn kpódó Daakɔ́ni tɔn kpó, kpódó Gidɛ́li tɔn kpó, kúnkan Cefátiya tɔn, Hatílu tɔn, Pokelɛ́ti-Xa-Cevayímu tɔn kpódó Ami tɔn kpó. Kplékplé yě mɛ e nɔ wa azɔ̌ ɖo Mawu xwé gbe lɛ́ɛ tɔn, kpódó kúnkan mɛsɛntɔ́ Salomɔ́ɔ tɔn lɛ́ɛ tɔn kpó bló súnnu afɔɖé kɛnnɛ gban-nukún-we (392). Mɛ e lɛ́ kɔ sín kannumɔgbénu sín Tɛ́lu-Mɛláxi, Tɛ́lu-Xaaca, Kelúbi-Adidáni kpódó Imumɛ́ɛ kpó wá xwé lɛ́ɛ ɔ́, è ɖɔ xó ɖé dó xwédo yětɔn wú ǎ, è ka ɖɔ xó dó tɔ́gbó yětɔn lɛ́ɛ wú bónú è na dó tunwun ɖɔ Izlayɛ́li ví wɛ yě nyí ǎ. Yě mɛ énɛ́ lɛ́ɛ bǐ bló nǔwɔntɔn kanɖé wěwe (652), bó gosín kúnkan Deláya tɔn, Toviya tɔn, kpódó Nɛkoda tɔn kpó mɛ. Vɔ̌sánú-xwlémawutɔ́ ɖé lɛ́ɛ lɔmɔ̌ ɖo ninɔmɛ ɖokpó énɛ́ ɔ́ mɛ. Yě wɛ nyí kúnkan Hovaya tɔn, Hakɔ́si tɔn, kpódó Baaziláyi tɔn kpó. È nɔ́ ylɔ́ mɛ énɛ́ ɔ́ ɖɔ Baaziláyi, ɖó Baaziláyi Galadinu ɔ́ sín vǐ nyɔ̌nu wɛ é da. Yě ba wěma e mɛ è wlǎn tɔ́gbó yětɔn lɛ́ɛ sín nyǐkɔ dó ɔ́ káká bo ba kpo. È mɔ yě dó mɔ mɛ kwíji kwíji, bo gbɛ́ ɖɔ yě ní má wa vɔ̌sánú-xwlémawutɔ́ sín azɔ̌ ó. Tokpɔngán ɔ́ ɖésú gbɛ́ nú yě ɖɔ yě ní má ɖu nǔ mímɛ́ titewungbe e è xwlé Mawu lɛ́ɛ ɖě káká jɛ hwenu e vɔ̌sánú-xwlémawutɔ́ ɖé ná sɔ́ Wulímu kpó Tumímu kpó dó kan nǔ byɔ́ Mawu dó xó yětɔn wú bó ná ɖe gbeta ɖé tɔ́n dó é ó. Izlayɛ́li ví e lɛ́ kɔ sín kannumɔgbénu wá lɛ́ɛ bǐ bló gbɛtɔ́ adɔ̌kpo we afɔwó-afɔɖé kɛnnɛ (42.360). Mɛsɛntɔ́ yětɔn súnnu kpódó nyɔ̌nu kpó bló gbɛtɔ́ děgba ɖě afɔwó-afayizɛ́n kantɔn afɔtɔn-nukún we (7.337). È ka xa yědɛɛ lɛ́ɛ ǎ. Hanjitɔ́ súnnu kpó nyɔ̌nu kpó bló gbɛtɔ́ afɔɖé (200). Yě hɛn sɔ́ nǔwɔntɔn kantɔn afɔtɔn-nukún-ɖokpó (736), sɔ́tócí afɔɖé kanɖé atɔ́ɔ́n (245), lǎkúnmí afɔwe gbantɔ́n (435), tócí afɔwe děgba ɖě afɔwó nǔwɔntɔn kantɔn (6.720). Ée yě wǎ Jeluzalɛ́mu ɔ́, to énɛ́ e mɛ Mawu Mavɔmavɔ xwé ɔ́ ɖe ɔ́, hɛ̌nnugán ɖé lɛ́ɛ sɔ́ jlǒ yě ɖésúnɔ tɔn dó ná nǔɖé lɛ́ɛ, bónú è na gbá Mawu xwé ɔ́ ɖó tɛn e mɛ è ko gbá ɖó ɖ'ayǐ é. Akwɛ́ e wú yě kpé bó ná ná nú xwé ɔ́ sín gbǐgbá ɔ́, yě ná bǐ. Nǔ e yě ná lɛ́ɛ é ɖíe: yě ná sikágó adɔ̌kpo atɔn afatɔ́n (61.000), kpatágan kilóo afɔwó-afɔwe kanwe ko (2.500). Yě lɛ́ ná awu gaga e vɔ̌sánú-xwlémawutɔ́ lɛ́ɛ nɔ dó ɔ́ kanwe ko (100). Vɔ̌sánú-xwlémawutɔ́ lɛ́ɛ, Levíi ví lɛ́ɛ, mɛ kpaa ɖé lɛ́ɛ, hanjitɔ́ lɛ́ɛ, hɔnjínɔtɔ́ lɛ́ɛ, kpódó mɛ e nɔ wa azɔ̌ ɖo Mawu xwé gbe lɛ́ɛ kpó wá jɛ toxo e è nǎ yě lɛ́ɛ mɛ. Izlayɛ́li ví ɖě lɛ́ɛ ka jɛ toxo e ko nyí yě ɖésúnɔ tɔn ɖ'ayǐ lɛ́ɛ mɛ. Đo xwe ɔ́ sín sun tɛ́nwegɔ́ ɔ́ mɛ ɔ́, Izlayɛ́li ví e ko ɖo toxo yětɔn mɛ lɛ́ɛ bǐ ɖó gbe kpɔ́, bó kplé ɖo Jeluzalɛ́mu. Vɔ̌sánú-xwlémawutɔ́ Jozuwée Yosadaku ví ɔ́, kpódó nɔví tɔn vɔ̌sánú-xwlémawutɔ́ ɖě lɛ́ɛ kpó, kpódó Zolobabɛ́li Calutiyɛ́li ví ɔ́ kpó, kpódó Zolobabɛ́li sín mɛ lɛ́ɛ kpó jɛ Mawu sín vɔ̌sákpe Izlayɛ́li ví lɛ́ɛ tɔn ɔ́ vɔ́ mɛ jí, bó ná nɔ xwlé vɔ̌ e è nɔ dó zo ɔ́ Mawu ɖ'é jí, lě e Mɔyízi ɖɛ̌mɛnu Mawu tɔn ɔ́ sín sɛ́n ɖɔ gbɔn é. Yě ɖo xɛsi ɖi nú mɛ e ko wá hɔn hwlá cí to ɔ́ mɛ ɖ'ayǐ lɛ́ɛ wɛ, có bó ka vɔ́ vɔ̌sákpe ɔ́ mɛ ɖó dǒ dodó xóxó ɔ́ jí, bó nɔ xwlé vɔ̌ e è nɔ dó zo zǎnzǎn kpódó gbadanu kpó ɔ́ Mawu Mavɔmavɔ ɖ'é jí. Énɛ́ ɔ́ gúdo ɔ́, ayǐhɔ́ngbe ayǐhɔ́ngbe ɔ́, Izlayɛ́li ví lɛ́ɛ nɔ xwlé vɔ̌sánú kpíkpé ɔ́ Mawu azɔn nabí e yě ɖó ná xwlé ɖo kéze ɖokpó mɛ é, bó nɔ dó ɖu azavaxwe ɔ́ ná lě e è ko wlán gbɔn dó sɛ́nwéma ɔ́ mɛ é. Sín hwenɛ́nu ɔ́, yě nɔ́ xwlé vɔ̌sánú ayǐhɔ́ngbe ayǐhɔ́ngbe tɔn lɛ́ɛ Mawu, bó nɔ xwlé vɔ̌sánú e è ko wlán ɖɔ è na nɔ xwlé Mawu ɖo azǎn nukɔntɔn e ɖo sun ɖokpó ɖokpó mɛ ɔ́, kpódó ée è ɖǒ ná xwlé ɖo Mawu Mavɔmavɔ sín xwe lɛ́ɛ hwenu ɔ́ kpó é. Vɔ̌sánú e mɛ ɖésúnɔ nɔ jló bó nɔ hɛn wá nú Mawu Mavɔmavɔ lɛ́ɛ ɔ́, yě nɔ́ xwlé Mawu Mavɔmavɔ. Lě e yě lɛ́ jɛ vɔ̌ e è nɔ dó zo ɔ́ xwlé Mawu jí gbɔn ɖo azǎn nukɔntɔn e ɖo xwe ɔ́ sín sun tɛ́nwegɔ́ ɔ́ gbe gbɔn ɔ́ nɛ́, có è ka tlɛ ko dó Mawu Mavɔmavɔ xwé yɔ̌yɔ́ ɔ́ do hwenɛ́nu lɔ ǎ. Énɛ́ ɔ́ gúdo ɔ́, yě sú axɔ́ azɔ̌watɔ́ lɛ́ɛ, bɔ yě ná kpa awǐnnya lɛ́ɛ kpódó atín lɛ́ɛ kpó. Yě lɛ́ ná nǔɖuɖu kpódó ahan kpó, kpódó ami kpó Sidɔ́ɔnnu lɛ́ɛ kpódó Tíinu lɛ́ɛ kpó, bónú yědɛɛ lɛ́ɛ ná hɛn atín syɛ́nsyɛ́n Libáan tɔn lɛ́ɛ wá nú yě. Yě ná bɛ́ gbɔn xu jí káká wá ɖó Jafa xu ɔ́ tó. Dadá Pɛ́si tɔn Silúsi wɛ ná gbe tɔn yě. Ée yě lɛ́ kɔ wá Jeluzalɛ́mu toxo e mɛ Mawu xwé ɔ́ ɖe ɔ́ mɛ ɔ́, xwe e jɛ fínɛ́ ɔ́ sín sun wěwegɔ́ ɔ́ mɛ ɔ́, Zolobabɛ́li Calutiyɛ́li ví, Jozuwée Yosadaku ví, Jozuwée sín nɔví ɖě lɛ́ɛ e nyí vɔ̌sánú-xwlémawutɔ́ lɛ́ɛ, Levíi ví lɛ́ɛ kpódó yě mɛ e lɛ́ kɔ sín kannumɔgbénu wá lɛ́ɛ bǐ kpó jɛ azɔ̌ jí. Yě ɖe Levíi ví e xwe yětɔn bɛ́ sín ko káká sɔ́yi lɛ́ɛ, bó sɔ́ yě ɖó Mawu Mavɔmavɔ xwé gbígbá ɔ́ sín azɔ̌ nu. Levíi ví Jozuwée, kpódó vǐ tɔn lɛ́ɛ kpó, kpódó nɔví tɔn lɛ́ɛ kpó, Kadimiyɛ́li kpó, kpódó vǐ tɔn Hodawya sín xwédo lɛ́ɛ kpó ɖó gbe kpɔ́, bó nɔ azɔ̌watɔ́ e ɖo azɔ̌ wa wɛ ɖo Mawu xwé ɔ́ wú lɛ́ɛ nu. Levíi ví e ɖo xwédo Henadadi tɔn mɛ lɛ́ɛ gɔ́ alɔ nú yě. Ée xɔmɛtɔ́ lɛ́ɛ dó Mawu Mavɔmavɔ xwé ɔ́ do ɔ́, è ylɔ̌ vɔ̌sánú-xwlémawutɔ́ lɛ́ɛ wá, bɔ yě dó awu e mɛ yě nɔ́ nɔ bó nɔ wa sinsɛnzɔ́ lɛ́ɛ, bó hɛn kpɛn, bɔ Levíi ví e nyí kúnkan Asáfu tɔn lɛ́ɛ hɛn hǔn, bó ná kpa susu nú Mawu Mavɔmavɔ, lě e axɔ́sú Izlayɛ́li tɔn Davídi ko kplɔ́n yě gbɔn ɖ'ayǐ é. Yě ɖo han ji dó ɖo susu kpa nú Mawu wɛ, bó ɖo mlǎmlá ɛ wɛ ɖɔ: “Mawu Mavɔmavɔ nyɔ́ bɔ wǎn yíyí e é ɖó nú Izlayɛ́li ví lɛ́ɛ ɖó vivɔnu ǎ!” Togun ɔ́ lɔ ɖo awǒbóbó kpa wɛ, bó ɖo asíkpɛ́ xo wɛ, bó dó ɖo susu kpa nú Mawu Mavɔmavɔ wɛ, ɖó è ɖo xwé tɔn dó do wɛ. Vɔ̌sánú-xwlémawutɔ́ tobutóbú ɖé lɛ́ɛ, kpódó Levíi ví ɖé lɛ́ɛ kpó, kpódó hɛ̌nnugán tobutóbú ɖé lɛ́ɛ kpó tíin bó ko nyí mɛxó; yědɛɛ lɛ́ɛ mɔ Mawu xwé ɖ'ayǐ tɔn ɔ́, bɔ ée è jɛ xwé ɔ́ blóɖó jí ɖo nukún yětɔn mɛ ɔ́, yě ya avǐ ɖésú. Mɛ gěgé ɖěvo lɛ́ɛ ka ɖo awǒbóbó kpa wɛ, bo dó ɖo awǎ jɛ wɛ. Énɛ́ ɔ́, è sixú tunwun mɛ e ɖo avǐ ya wɛ ɔ́ kpódó mɛ e ɖo awǒbóbó kpa wɛ ɔ́ kpó mɛ e ɖo awǎ jɛ wɛ ɔ́ kpó ǎ, ɖó yě mɛ bǐ wɛ ɖo xó sú wɛ wooo, bɔ è nɔ se ɖo káká zɔ. Mɛ e ɖo to ɔ́ mɛ lɛ́ɛ ɔ́, akɔta Judáa tɔn kpódó Bɛnjamɛ́ɛ tɔn kpó sín kɛntɔ́ lɛ́ɛ se ɖɔ Jwifu lɛ́ɛ lɛ́ kɔ sín kannumɔgbénu wá, bó jɛ Mawu Mavɔmavɔ, Mawu Izlayɛ́li ví lɛ́ɛ tɔn ɔ́ sín xwé ɔ́ vɔ́ gbá jí. Ée yě se mɔ̌ ɔ́, yě wá mɔ Zolobabɛ́li kpódó hɛ̌nnugán lɛ́ɛ kpó, bó ɖɔ nú yě ɖɔ: “Mǐ jló ná gbá xwé ɔ́ xá mi, ɖó Mawu ɖokpó e mi nɔ sɛn ɔ́ wɛ mǐ lɔ nɔ sɛn, bó nɔ xwlé e vɔ̌sánú sín hwenu e axɔ́sú Asilíi tɔn Asaaxadɔ́ɔn ko wlí kannumɔ mǐtɔn wá fí e.” Ée yě ɖɔ mɔ̌ ɔ́, Zolobabɛ́li kpódó Jozuwée kpó, kpódó hɛ̌nnugán Izlayɛ́li ví lɛ́ɛ tɔn ɖé lɛ́ɛ kpó yí gbe nú yě ɖɔ: “É nyɔ́ bónú mi ná gbá xwé ɔ́ xá mǐ nú Mawu mǐtɔn ǎ; mǐdɛɛ lɛ́ɛ kɛ́ɖɛ́ wɛ ɖó ná gbá, lě e Dadá Pɛ́si tɔn Silúsi ɖɔ gbɔn nú mǐ é. Đó Mawu Mavɔmavɔ, Mawu Izlayɛ́li tɔn ɔ́ sín xwé wɛ é ɖó ná nyí.” Ée yě ɖɔ mɔ̌ ɔ́, mɛ e ɖo to ɔ́ mɛ lɛ́ɛ jɛ awakanmɛkú dó nú Jwifu lɛ́ɛ jí, bó jɛ xɛsi dó nú yě jí, bónú yě ná jó xwé ɔ́ gbígbá dó. Hwenu e Dadá Pɛ́si tɔn Silúsi ɖo axɔ́sú ɖu wɛ káká wá jɛ Daliwúsi sín hwenu ɔ́, mɛ e ɖo to ɔ́ mɛ lɛ́ɛ nɔ ná akwɛ́ mɛ e nɔ ɖe wě xá Dadá ɔ́ lɛ́ɛ, bónú yě ná hɛn tito Jwifu lɛ́ɛ tɔn gblé. Ée Dadá Zɛ̌ɛzɛsi wá axɔ́súzinkpo jí tlóló ɔ́, kɛntɔ́ Jwifu lɛ́ɛ tɔn lɛ́ɛ sɛ́ wěma dó e, lobo ɖó adingban dó Jwifu Jeluzalɛ́mu tɔn lɛ́ɛ kpódó Judáa tɔn lɛ́ɛ kpó nu. Mɔ̌ ɖokpó ɔ́, hwenu e Dadá Pɛ́si tɔn Aatazɛɛzɛsi ɖo axɔ́sú ɖu wɛ ɔ́, Bicilámu kpódó Mitlɛdati kpó, kpódó Tavéyɛ́lu kpó, kpódó azɔ̌gbɛ́ yětɔn lɛ́ɛ kpó sɛ́ wěma dó e. Wěkwín Alamu tɔn wɛ è dǒ wlán wěma ɔ́ ná, bó wlán dó alamugbe mɛ. Hlehúmu e nyí tokpɔngán ɖo gbě énɛ́ ɔ́ jí ɔ́, kpódó Cimucáyi wěgbójínɔtɔ́ e bɔ dó wu tɔn ɔ́ kpó lɔ wlán wěma dó Jeluzalɛ́munu lɛ́ɛ wú sɛ́ dó Dadá Aatazɛɛzɛsi. Lě e è bɛ̌ wěma énɛ́ ɔ́ wlánwlán gbɔn ɔ́ ɖíe: “Nyɛ tokpɔngán Hlehúmu kpódó Cimucáyi e bɔ dó wǔ ce ɔ́ kpó, kpódó azɔ̌gbɛ́ mǐtɔn e ɖo Dini yíkúngban jí lɛ́ɛ, éé ɖo Afaasatáki yíkúngban jí lɛ́ɛ, éé ɖo Taapɛlu yíkúngban jí lɛ́ɛ ée ɖo Afalási yíkúngban jí lɛ́ɛ, éé ɖo Elɛ́ki yíkúngban jí lɛ́ɛ, ée ɖo Babilɔ́nu yíkúngban jí lɛ́ɛ, ée ɖo Súzi yíkúngban jí lɛ́ɛ, ée ɖo Deha yíkúngban jí lɛ́ɛ, kpódó ée ɖo Elámu yíkúngban jí lɛ́ɛ kpó wɛ ɖo wěma élɔ́ sɛ́ dó wɛ. Togun ɖě lɛ́ɛ e axɔ́sú susunɔ, axɔ́sú yɛ̌yijɛxánɔ Asinapáa wlí kannumɔ yětɔn, bɔ yě ɖo toxo Samalíi abǐ tokpɔn e kpo bo ɖo Efláti tɔ ɔ́ sín gbadahwe jí lɛ́ɛ lɔ gɔ́ nú mǐ.” Nǔ e è ɖɔ dó wěma ɔ́ mɛ ɔ́ ɖíe: “Dadá Aatazɛɛzɛsi, mɛsɛntɔ́ mɛtɔn e ɖo tokpɔn e ɖo gbadahwe jí nú Efláti tɔ ɔ́ lɛ́ɛ lɔ gɔ́ nú mǐ. Sɛ́mɛɖó! Mǐ jló ná ɖɔ nú mɛ ɖɔ Jwifu e gosín to mɛtɔn mɛ bó wá to mǐtɔn mɛ ɖo Jeluzalɛ́mu lɛ́ɛ ɖo linlin wɛ ɖɔ émí ná vɔ́ toxo baɖabaɖa, adǎnúwiwa sín toxo énɛ́ ɔ́ fɔ́n. Yě kó bló dodó lɛ́ɛ ɖó, bo kó ɖo dǒ lɛ́ɛ vɔ́ mɛ wɛ. Sɛ́mɛɖó! Mǐ ká jló nú è nǐ tunwun ɖɔ ényí yě fɔ́n toxo ɔ́, lobo vɔ́ dǒ lɛ́ɛ mɛ jɛ́n wɛ ɔ́, to ɔ́ mɛ nu lɛ́ɛ sɔ́ ná nɔ jó agban ǎ, yě ká sɔ́ ná nɔ ná takwɛ́ ǎ, yě ká sɔ́ ná nɔ ná nǔ e aligbɔntɔ́ lɛ́ɛ nɔ ná ɔ́ ǎ. Nǔ énɛ́ ɔ́ ká ná wa nǔ dó akwɛ́gbá mɛtɔn wú. Énɛ́ ɔ́ wú ɔ́, mǐ mɛ e nɔ ɖu nǔ ɖo alɔ mɛtɔn nu bo ma sixú ɖo te bónú è dǒ winnyá mɛ ǎ lɛ́ɛ ɖo byɔ̌byɔ́ mɛ wɛ ɖɔ è nǐ ba do ná ɖo mɛ e ko jɛ nukɔn nú mɛ lɛ́ɛ sín wěma lɛ́ɛ mɛ. Énɛ́ ɔ́, è nǎ mɔ ɖɔ toxo énɛ́ ɔ́, gǔfínfɔ́n sín toxo wɛ é nyí. Togun ɔ́ gɔn nǔ wa dó Dadá lɛ́ɛ kpódó tokpɔngán lɛ́ɛ kpó wú kpɔ́n gbeɖé ǎ; hunnyahunnya kpó gǔfínfɔ́n kpó jɛ́n é nɔ́ dɔn dó to ɔ́ mɛ. Nǔ énɛ́ ɔ́ wɛ tlɛ zɔ́n bɔ è gba to ɔ́ ɖ'ayǐ lɔ. Sɛ́mɛɖó! Mǐ tunwun ɖɔ mǐ ná ɖɔ nú mɛ ɖɔ ényí yě vɔ̌ toxo ɔ́ fɔ́n, bó vɔ́ dǒ tɔn lɛ́ɛ mɛ ɔ́, mɛ kún sɔ́ ná nyí gǎn ɖo Efláti tɔ ɔ́ sín akpá élɔ́ xwé fí ó.” Xósin e Dadá Aatazɛɛzɛsi ná dó wěma ɔ́ wú ɔ́ ɖíe: “Nyɛ Dadá Aatazɛɛzɛsi wɛ sɛ́ wěma élɔ́ dó tokpɔngán Hlehúmu kpódó Cimucáyi e bɔ dó wu tɔn ɔ́ kpó, kpódó azɔ̌gbɛ́ yětɔn e ɖo Samalíi lɛ́ɛ kpódó ée ɖo tokpɔn e ɖo gbadahwe jí lɛ́ɛ kpó lɛ́ɛ wɛ, bó ɖo gbe dó sɛ́ dó mi wɛ. “Wěma e mi sɛ́ dó mì ɔ́, è xa bó tínmɛ nú mì. Un ko ná gbe ɖɔ è nǐ ba do nú xó e mi ɖɔ ɔ́, bɔ é ba do ná bó mɔ ɖɔ nǔgbó ɔ́, sín xóxó hwenu ɔ́, Jeluzalɛ́munu lɛ́ɛ nɔ sí te dó axɔ́sú lɛ́ɛ jí, bó nɔ dɔn hunnyahunnya kpó gǔfínfɔ́n kpó dó to ɔ́ mɛ. Đ'ayǐ xóxó ɔ́, axɔ́sú hlɔ̌nhlɔ́nnɔ lɛ́ɛ nɔ to énɛ́ ɔ́ mɛ, bó kpa acɛ nú mɛ e ɖo Efláti tɔ ɔ́ sín gbadahwe jí lɛ́ɛ bǐ, bó nɔ yí nǔjɔ, takwɛ́ kpódó aligbɔntɔ́ sín akwɛ́ kpó ɖo yě sí. Amɔ̌, din ɔ́, mi ɖó ná ɖɔ nú Jwifu lɛ́ɛ ɖɔ yě ní ɖó azɔ̌ bǐ te. Ényí nyɛ ɖésú má ná gbe tɔn ǎ ɔ́, è ɖó ná vɔ́ toxo ɔ́ blóɖó ǎ. Mi bo kpé nukún dó xó énɛ́ ɔ́ wú ganjí; mi ma dó vɛ̌ ná ɖěbǔ bónú nǔ e hú gǎn mɔ̌ ɔ́ má wá gblé dó Dadá ɔ́ sín acɛkpikpa wú ó.” Ée tokpɔngán Hlehúmu kpódó Cimucáyi e bɔ dó wu tɔn ɔ́ kpó, kpódó azɔ̌gbɛ́ yětɔn lɛ́ɛ kpó xa nǔ e Dadá Aatazɛɛzɛsi wlán sɛ́ dó yě ɔ́ lě tlóló ɔ́, yě hwlɛ́ndó bó yi Jeluzalɛ́mu, bó ɖú zǐngídi xá Jwifu lɛ́ɛ, lobo ɖɔ bɔ yě ɖó azɔ̌ ɔ́ te gǎnnugǎnnu. È to ɖó Mawu xwé gbígbá ɔ́ sín azɔ̌ te hwɛ̌ ɖo Jeluzalɛ́mu, káká wá jɛ hwenu e Dadá Pɛ́si tɔn Daliwúsi ɖo xwe we bló wɛ ɖo zinkpo jí é. Hwenɛ́nu ɔ́, Mawu Izlayɛ́li ví lɛ́ɛ tɔn ɖɔ xó nú gbeyíɖɔ tɔn Ajée kpódó Zakalíi Idóo ví ɔ́ kpó, bɔ yě wá ɖɔ nú Jwifu e ɖo Jeluzalɛ́mu lɛ́ɛ kpódó ée ɖo Judáa lɛ́ɛ kpó. Ée yě wá ɖɔ xó ɔ́ nú yě ɔ́, Zolobabɛ́li Calutiyɛ́li ví ɔ́ kpódó Jozuwée Yosadaku ví ɔ́ kpó lɛ́ jɛ azɔ̌ ɔ́ jí, bó ná vɔ́ Mawu xwé ɔ́ gbá ɖó Jeluzalɛ́mu, bɔ gbeyíɖɔ Mawu tɔn lɛ́ɛ ɖo gǔdo yětɔn. Tlóló ɔ́, tokpɔngán Tatunayi e ɖo Efláti tɔ ɔ́ sín gbadahwe jí ɔ́ kpódó Cetáa-Bozunayi kpó, kpódó tokpɔngán gbɛ̌ yětɔn lɛ́ɛ kpó wá mɔ yě bó kanbyɔ́ yě ɖɔ: “Mɛ̌ wɛ ka ná gbe mi ɖɔ mi ní vɔ́ Mawu xwé ɔ́ gbá, bó vɔ́ dǒ lɛ́ɛ mɛ? Mi ná ɖɔ mɛ e ɖó alɔ ɖo xwé élɔ́ sín vǐvɔ́gbá mɛ ɔ́ nú mǐ dandan.” Mawu ká ɖo kpɔ́ xá tomɛxó Jwifu lɛ́ɛ tɔn e ɖo azɔ̌ ɔ́ nu lɛ́ɛ; énɛ́ ɔ́ wú wɛ è ma ɖɔ nú yě ɖɔ yě ní ɖó azɔ̌ ɔ́ te hwɛ̌, bónú yě ná to sɛ́ wěma dó Dadá Daliwúsi bó ná se xó e é ná ɖɔ dó xó nɛ́ ɔ́ wú ɔ́ hwɛ̌ ǎ. Wěma e tokpɔngán Tatunayi kpódó Cetáa-Bozunayi kpó, kpódó tokpɔngán gbɛ̌ tɔn e ɖo Efláti tɔ ɔ́ sín gbadahwe jí lɛ́ɛ kpó sɛ́ dó Dadá Daliwúsi ɔ́, nǔ e yě ɖɔ d'é mɛ ɔ́ ɖíe. Xó e yě ɖɔ dó wěma ɔ́ mɛ lɛ́ɛ ɖíe: “Dadá Daliwúsi, mǐ wɛ sɛ́ wěma élɔ́ dó mɛ, bó ɖo byɔ̌byɔ́ nú mɛ wɛ ɖɔ axɔ́súɖuɖu mɛtɔn ní yi nukɔn. “Sɛ́mɛɖó! Mǐ ɖo ɖiɖɔ nú mɛ wɛ ɖɔ mǐ yi tokpɔn Judáa tɔn mɛ, xwé Mawu ɖaxó ɔ́ tɔn kɔn. Mǐ mɔ bɔ è zě awǐnnya kpikpa dó ɖo xwé ɔ́ sín dǒ lɛ́ɛ vɔ́ mɛ wɛ, bó ɖo atín bɛ́ dó dǒ ɔ́ mɛ wɛ. Yě ɖo nukún kpé dó azɔ̌ ɔ́ wú wɛ ɖésú bɔ é ɖo yiyi wɛ titewungbe. Mǐ kan nǔ byɔ́ tomɛxó Jwifu lɛ́ɛ tɔn e ɖo azɔ̌ ɔ́ nu lɛ́ɛ; mǐ kanbyɔ́ yě ɖɔ mɛ̌ wɛ ná gbe yě bɔ yě ɖo xwé ɔ́ vɔ́ blóɖó wɛ bo ɖo dǒ tɔn lɛ́ɛ vɔ́ mɛ wɛ a jí. Mǐ kan nyǐkɔ yětɔn lɔ byɔ́ yě, bó ná mɔ tɛn bo ná wlán mɛ e ɖo azɔ̌ ɔ́ nu lɛ́ɛ sín nyǐkɔ sɛ́ dó mɛ. Bɔ yě yí gbe nú mǐ ɖɔ: ‘Mawu e ɖó jǐnukúnsin kpódó ayǐkúngban kpó ɔ́ sín mɛsɛntɔ́ wɛ mǐ nyí. Xwé élɔ́ e gbá wɛ mǐ ɖe ɔ́, Mawu xwé ɔ́ wɛ bɔ axɔ́sú ɖaxó Izlayɛ́li tɔn ɖé ko gbá fó ɖ'ayǐ. Lo ɔ́, axɔ́sú Babilɔ́nu tɔn Nabukodonɔzɔ́ɔ Kaludéenu ɔ́ wá gba xwé ɔ́, bó kplá togun ɔ́ yi kannumɔgbénu, ɖo Babilɔ́nu. Nǔ nyí mɔ̌, ɖó tɔ́gbó mǐtɔn lɛ́ɛ dó xomɛsin nú Mawu e ɖó sɛ́xwé ɔ́, bɔ é jó yě nyi axɔ́sú énɛ́ ɔ́ sín acɛ mɛ. Ée Dadá Silúsi ka wá ɖo xwe nukɔn nukɔntɔn bló wɛ ɖo zinkpo jí ɖo Babilɔ́nu ɔ́, é nǎ gbe ɖɔ è nǐ vɔ́ Mawu xwé ɔ́ blóɖó. Ɖ'ayǐ ɔ́, axɔ́sú Nabukodonɔzɔ́ɔ ko bɛ́ nǔzínzán e è zě siká dó bló ná lɛ́ɛ kpó ée è zě kpatágan dó bló ná lɛ́ɛ kpó, bɔ yě ɖo Mawu xwé gbe ɖo Jeluzalɛ́mu fí lɛ́ɛ hɛn yi Babilɔ́nu, bó bɛ́ ɖó vodúnxɔ mɛ ɖo dɔ̌n. Dadá Silúsi ká bɛ́ yě sín vodúnxɔ ɔ́ mɛ ɖo Babilɔ́nu, bó bɛ́ jó nú nya ɖé; è nɔ ylɔ́ nya ɔ́ ɖɔ Cɛcibasáa. É sɔ́ nya énɛ́ ɔ́ dó ɖó tokpɔngán Judáa tɔn. É ɖe gbe n'i ɖɔ ní bɛ́ yi ɖó Mawu xwé gbe ɖo Jeluzalɛ́mu, hwenu e è na vɔ́ xwé énɛ́ gbá ɖó tɛn tɔn xóxó ɔ́ mɛ é. Hwe énɛ́ ɔ́ nu wɛ Cɛcibasáa wá Jeluzalɛ́mu fí, bó wá dó Mawu xwé yɔ̌yɔ́ ɔ́ do. Sín hwenɛ́nu ɖokpóó ɔ́ wɛ yě ko jɛ azɔ̌ jí, yě ká ko fó ǎ.’ Din ɔ́, Sɛ́mɛɖó! Ényí é jló mɛ hǔn, è nǐ kpɔ́n Dadá Babilɔ́nu tɔn lɛ́ɛ sín wěma lɛ́ɛ mɛ, bó ná kpɔ́n ɖɔ Dadá Silúsi ná gbe ɖɔ è nǐ vɔ́ Mawu xwé ɔ́ gbá ɖó Jeluzalɛ́mu nǔgbó a jí. Énɛ́ ɔ́ gúdo ɔ́, è nǎ kɛnklɛ́n bó ná ɖɔ nǔ e è lin dó xó nɛ́ ɔ́ wú ɔ́ sɛ́ dó mǐ.” Dadá Daliwúsi ná gbe ɖɔ è nǐ yi kpɔ́n wěma e mɛ è nɔ wlán nǔ e jɛ wá yi lɛ́ɛ dó ɔ́ mɛ, ɖo xɔ e mɛ è bɛ̌ wěma énɛ́ lɛ́ɛ kpódó nǔ e nyí nǔvívɛ́ lɛ́ɛ kpó dó ɖo Babilɔ́nu é. Lo ɔ́, Ɛkibatáni, tota tokpɔn Mɛdi tɔn ɔ́ mɛ wɛ è wǎ yi mɔ wěma mlámlá ɖé ɖe. Nǔflínmɛxó e è wlǎn dó wěma ɔ́ mɛ ɔ́ ɖíe: “Hwenu e Dadá Silúsi ɖo xwe nukɔn nukɔntɔn ɔ́ bló wɛ ɖo zinkpo jí ɔ́, é ɖe gbeta élɔ́ tɔ́n: È ɖǒ ná vɔ́ Mawu xwé e ɖo Jeluzalɛ́mu ɔ́ blóɖó, bɔ é ná nyí tɛn e mɛ è nǎ nɔ xwlé vɔ̌sánú lɛ́ɛ Mawu ɖe é. Dodó xóxó ɔ́ jí wɛ è nǎ vɔ́ xwé ɔ́ gbá ɖó. Jǐyiyi tɔn ná nyí mɛ̌tlu gban, bɔ gblǒ tɔn ná nyí mɛ̌tlu gban. È nǎ to awǐnnya kpikpa hǎ atɔn d'é mɛ, bó ná to atín hǎ ɖokpó ján d'é mɛ. Akwɛ́gbá Dadá ɔ́ tɔn mɛ wɛ è nǎ kpɔ́n, bó dó wa azɔ̌ lɛ́ɛ ná. Nǔzínzán e è sɔ́ siká dó bló ná lɛ́ɛ, kpódó ée è sɔ́ kpatágan dó bló ná lɛ́ɛ kpó, bɔ axɔ́sú Nabukodonɔzɔ́ɔ bɛ́ sín Mawu xwé gbe ɖo Jeluzalɛ́mu, bó bɛ́ ɖó Babilɔ́nu lɛ́ɛ ɔ́, è ɖǒ ná lɛ́ bɛ́ yě jó bɔ è nǎ lɛ́ bɛ́ yi ɖó Mawu xwé gbe ɖo Jeluzalɛ́mu. È nǎ fɔ nǔ lɛ́ɛ ɖokpó ɖokpó ɖó tɛn e mɛ yě ko nɔ́ nɔ ɖ'ayǐ é mɛ.” Ée Dadá Daliwúsi se mɔ̌ ɔ́, é sɛ́ wěma élɔ́ dó tokpɔngán Tatunayi e ɖo tokpɔn e ɖo Efláti tɔ ɔ́ sín gbadahwe jí ɔ́ nu é, bó sɛ́ wěma dó Cetáa-Bozunayi kpódó tokpɔngán gbɛ̌ yětɔn lɛ́ɛ kpó; wěma ɔ́ ɖɔ: “Mi ɖe nu sín xó énɛ́ ɔ́ mɛ. Mi jó Jwifu lɛ́ɛ dó nú yě ní vɔ́ Mawu xwé ɔ́ gbá. Tokpɔngán ɔ́ kpódó Jwifu lɛ́ɛ sín gǎn lɛ́ɛ kpó ɖó ná vɔ́ Mawu xwé ɔ́ gbá ɖó tɛn tɔn xóxó ɔ́ mɛ. Hǔn, un ná gbe mi ɖɔ mi ní gɔ́ alɔ nú Jwifu lɛ́ɛ sín gǎn lɛ́ɛ ɖo Mawu xwé sín azɔ̌ énɛ́ ɔ́ kɔn. Mi kpé nukún d'é wú, bónú akwɛ́ e è na zán dó xɔ énɛ́ wú ɔ́ bǐ sésé ɔ́, ní gosín akwɛ́gbá Dadá ɔ́ tɔn mɛ. Akwɛ́gbá tɔn e mɛ è nɔ bɛ́ takwɛ́ e è jɔ ɖo tokpɔn ɔ́ mɛ ɔ́ dó é. Ayǐhɔ́ngbe ayǐhɔ́ngbe ɔ́, mǐ ná nɔ kpé nukún dó nǔ e ná hu dó vɔ̌sánú-xwlémawutɔ́ Jeluzalɛ́mu tɔn lɛ́ɛ é wú. Mi ná nɔ ná yě lě e yě byɔ́ gbɔn é; mi ná nɔ ná yě: Nyibúsú, agbo, kpódó lɛ̌ngbɔ́ví e è na dó sá vɔ̌ e è nɔ dó zo ɔ́ nú Mawu sɛ́xwé tɔn ɔ́ kpó. Mɔ̌ ɖokpó ɔ́, mi ná nɔ ná yě blěe, jɛ, vɛ̌ɛn kpódó ami kpó. Énɛ́ ɔ́, yě ná sixú nɔ dó vɔ̌sánú wǎnɖagbenɔ zo nú Mawu e ɖó sɛ́xwé ɔ́, bó ná nɔ xo ɖɛ nú Dadá ɔ́ kpódó vǐ tɔn lɛ́ɛ kpó nú yě ná nɔ ganjí. Mɛ ɖé ma bló ɖó xó e un ɖɔ nɛ́ lɛ́ɛ jí ǎ ɔ́, un ná gbe ɖɔ è nǐ ɖe xɔtín tɔn nu xwíɖíxwíɖí ɖokpó, bó tun te bó sɔ́ ɛ slɔ́ nu, lobo zé xwé tɔn dó húzú zunkɔ́ta. Mawu e ɖo kpɔ́ xá Jeluzalɛ́mu ɔ́ ɖésú ní dɔn tó nú axɔ́sú, abǐ akɔta e ná gbɛ́ xó e un ɖɔ lɛ́ɛ xwedó, bó ná tɛ́nkpɔ́n ɖɔ émí ná gba xwé tɔn é. Nyɛ Daliwúsi wɛ ɖɔ mɔ̌; è nǐ kpé nukún d'é wú titewungbe bó bló.” Tatunayi, tokpɔngán e ɖo tokpɔn e ɖo Efláti tɔ ɔ́ sín gbadahwe jí ɔ́ nu ɔ́ kpódó Cetáa-Bozunayi kpó, kpódó tokpɔngán gbɛ̌ yětɔn lɛ́ɛ kpó xwedó xó e Dadá Daliwúsi ɖɔ lɛ́ɛ titewungbe. Wɛn e gbeyíɖɔ Mawu tɔn Ajée kpódó Zakalíi Idóo ví ɔ́ kpó wá dó tomɛxó Jwifu lɛ́ɛ tɔn ɔ́ ná akɔ́nkpinkpan yě, bɔ Mawu xwé sín azɔ̌ ɔ́ yi nukɔn ganjí. Yě gbá xwé bɔ é sɔgbe xá lě e Mawu Izlayɛ́li tɔn ɔ́ ɖɔ gbɔn é, bó sɔgbe xá gbeta e Dadá Pɛ́si tɔn Silúsi, Aatazɛɛzɛsi, kpódó Daliwúsi kpó ɖe tɔ́n é. Adáa sun ɔ́ sín azǎn atɔngɔ́ ɔ́ gbe wɛ yě gbá xwé ɔ́ fó, ɖo hwenu e Dadá Daliwúsi ɖo xwe ayizɛ́n bló wɛ ɖo zinkpo jí ɔ́. Jwifu vɔ̌sánú-xwlémawutɔ́ lɛ́ɛ, Levíi ví lɛ́ɛ, kpódó mɛ ɖě lɛ́ɛ e gosín kannumɔgbénu wá lɛ́ɛ kpó jó xwé ɔ́ nú Mawu, bó ɖu xwe tɔn kpódó awǎjijɛ kpó. Nyibúsú kanwe ko (100) kpódó agbo afɔɖé (200) kpó, kpódó lɛ̌ngbɔ́ví afɔwe kpó wɛ è do sá vɔ̌ nú Mawu ɖó xwe ɔ́ tamɛ. Yě lɛ́ zé gbǎgbá wěwe dó sá vɔ̌ nú Mawu, bónú é ná sɔ́ hwɛ kɛ Izlayɛ́li togun ɔ́ bǐ. Gbǎgbá ɖokpó ɖokpó ɖo akɔta ɖokpó ɖokpó sín tɛnmɛ. È mǎ vɔ̌sánú-xwlémawutɔ́ lɛ́ɛ ɖó vovo, bó má Levíi ví lɛ́ɛ ɖó vovo. Azɔ̌ e ɖokpó ɖokpó yětɔn nɔ wa nú Mawu ɖo Jeluzalɛ́mu ɔ́ wɛ è xwedó bo dó má yě, bɔ é sɔgbe xá nǔ e è wlǎn dó Mɔyízisɛ́n wěma mɛ é. Xwe e xwe Jwifu lɛ́ɛ lɛ́ kɔ sín kannumɔgbénu wá ɔ́, xwe e jɛ fínɛ́ ɔ́ sín sun nukɔntɔn ɔ́ mɛ, ɖo azǎn tɔn wǒ-ɛnɛgɔ́ ɔ́ gbe ɔ́, yě ɖu Dǐndínwáyixwe ɔ́. Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó nɔ kpɔ́ bó slá wǔ, bɔ yě bǐ ɖo mǐmɛ́ jí. Énɛ́ ɔ́, Levíi ví lɛ́ɛ hu Dǐndínwáyigbɔ́ ɔ́ lě e yě kó nɔ́ bló gbɔn é. Yě hu gbɔ̌ énɛ́ lɛ́ɛ nú togun ɔ́, bó hu nú nɔví yětɔn vɔ̌sánú-xwlémawutɔ́ lɛ́ɛ kpódó yě ɖésúnɔ kpó. Izlayɛ́li ví lɛ́ɛ bǐ ɖu Dǐndínwáyixwe ɔ́ sín nǔɖuɖu: mɛ e lɛ́ kɔ sín kannumɔgbénu wá lɛ́ɛ, kpódó mɛ e ko jó walɔ kwíji kwíji to ɔ́ mɛ nu lɛ́ɛ tɔn lɛ́ɛ dó é kpó. Yě mɛ énɛ́ lɛ́ɛ wá gɔ́ nú Izlayɛ́li ví ɖě lɛ́ɛ bó nɔ́ sɛn Mawu Mavɔmavɔ, Mawu Izlayɛ́li tɔn. Énɛ́ ɔ́ gúdo ɔ́, yě lɛ́ ɖu wɔ̌xúxú e mɛ è ma dó tɔ́n ǎ é sín xwe e è nɔ ɖu xɔ azǎn tɛ́nwe é kpódó awǎjijɛ kpó. Mawu Mavɔmavɔ ná yě awǎjijɛ, ɖó é ɖɔ dó ayi mɛ nú Dadá ɔ́, bɔ é nyɔ́ xomɛ dó yě wú. Énɛ́ ɔ́ wɛ ná akɔ́nkpinkpan yě, bɔ yě ɖó kan dó azɔ̌ ɔ́ wú, bó vɔ́ Mawu Izlayɛ́li tɔn sín xwé ɔ́ gbá. Ée nǔ énɛ́ lɛ́ɛ bǐ jɛ wá yi ɔ́, ɖo Dadá Pɛ́si tɔn Aatazɛɛzɛsi sín hwenu ɔ́, nya ɖé gosín Babilɔ́nu wá, nya ɔ́ nɔ́ nyí Ɛsidlási. Selaya ví wɛ é nyí; Selaya ɔ́ ká nyí Azalya ví, bɔ Azalya nyí Ilukya ví. Ilukya ka nyí Calúmu ví, bɔ Calúmu nyí Sadɔ́ku ví, Sadɔ́ku ka nyí Axitúvu ví. Axitúvu ka nyí Amaliya ví, bɔ Amaliya nyí Azalya ví, Azalya ka nyí Mɛlayɔ́ti ví. Mɛlayɔ́ti nyí Zelaxiya ví, bɔ Zelaxiya nyí Wúzi ví, bɔ Wúzi nyí Buki ví. Buki ka nyí Avicua ví, bɔ Avicua nyí Pínxási ví, bɔ Pínxási nyí Eleazáa ví, Eleazáa ka nyí vɔ̌sánú-xwlémawutɔ́ ɖaxó Aalɔ́ɔn sín vǐ. Ɛsidlási ɔ́, sɛ́nkplɔ́nmɛtɔ́ ɖaxó ɖokpó wɛ é nyí, bó tunwun sɛ́n e Mawu Mavɔmavɔ, Mawu Izlayɛ́li tɔn dó gbɔn Mɔyízi jí ɔ́ titewungbe. Mawu Mavɔmavɔ, Mawu tɔn ɔ́ ná ɛ susu sɔ mɔ̌, bɔ Dadá ɔ́ nɔ ná ɛ nǔ e é nɔ́ byɔ́ ɛ lɛ́ɛ bǐ. Hwenu e Dadá Aatazɛɛzɛsi ɖo xwe tɛ́nwe bló wɛ ɖo zinkpo jí ɔ́, Izlayɛ́li ví vɔ̌sánú-xwlémawutɔ́ lɛ́ɛ, Levíi ví lɛ́ɛ, hanjitɔ́ lɛ́ɛ, hɔnjínɔtɔ́ lɛ́ɛ kpódó mɛ e nɔ wa azɔ̌ ɖo Mawu xwé gbe lɛ́ɛ kpó lɛ́ kɔ wá Jeluzalɛ́mu. Ɛsidlási kpódó yě kpó wɛ wá, ɖo sun atɔ́ɔ́ngɔ́ ɔ́ mɛ. Ɛsidlási ɖó azǎn ɖɔ émí ná gosín Babilɔ́nu ɖo sun nukɔntɔn ɔ́ sín azǎn nukɔntɔn ɔ́ gbe; é gosín dɔ̌n nǔgbó bɔ Mawu tɔn nya xɛ ɖo jǐ tɔn, bɔ é wá Jeluzalɛ́mu ɖo sun atɔ́ɔ́ngɔ́ ɔ́ sín azǎn nukɔntɔn ɔ́ gbe. Mawu nya xɛ ɖo jǐ tɔn ɖó, é nɔ kpé nukún dó Mawu Mavɔmavɔ sín sɛ́n ɔ́ wú bó nɔ́ kplɔ́n, bó nɔ bló ɖ'é jí, lobo nɔ kplɔ́n nǔ e sɛ́n ɔ́ zɔ́n lɛ́ɛ kpódó tito e ɖo sɛ́n ɔ́ mɛ lɛ́ɛ kpó Izlayɛ́li ví lɛ́ɛ. Xó e Dadá Aatazɛɛzɛsi ɖɔ dó wěma e é sɛ́ dó vɔ̌sánú-xwlémawutɔ́ Ɛsidlási e nyí mɛ bo tunwun sɛ́n e Mawu Mavɔmavɔ dó nú Izlayɛ́li ví lɛ́ɛ, bo tunwun nǔ e sɛ́n ɔ́ zɔ́n ɖɔ yě ní wa xéɖéxéɖé tɔn lɛ́ɛ ɔ́ ɖíe: Nyɛ Dadá Aatazɛɛzɛsi wɛ ɖo wěma élɔ́ sɛ́ dó hwi vɔ̌sánú-xwlémawutɔ́ Ɛsidlási wɛ; hwi mɛ e tunwun Mawu sɛ́xwé tɔn ɔ́ sín sɛ́n xéɖéxéɖé tɔn é, Izlayɛ́li ví e jló ná yi Jeluzalɛ́mu lɛ́ɛ ɔ́, mɛ kpaa lɛ́ɛ, vɔ̌sánú-xwlémawutɔ́ lɛ́ɛ abǐ Levíi ví lɛ́ɛ ɔ́, un ná gbe ɖɔ è nǐ jó yě dó nú yě nǐ xwedó we yi. Nyɛ ɖésúnɔ kpódó wěɖexámɛtɔ́ ce tɛ́nwe lɛ́ɛ kpó wɛ ɖo sísɛ́ we dó Jeluzalɛ́mu wɛ, bɔ a na yi tokpɔn Judáa tɔn mɛ, bó ná yi kpɔ́n Mawu towe e sín sɛ́n e a hɛn wěma tɔn alɔ mɛ ɔ́, lě e yě ɖo nyinyi gbɔn wɛ ɖo dɔ̌n é. A ná bɛ́ kpatágan kpódó siká kpó e nyɛ kpódó mɛ e nɔ ɖe wě xá mì lɛ́ɛ kpó jló ná ná Mawu Izlayɛ́li tɔn e xwé tɔn ɖo Jeluzalɛ́mu ɔ́ hɛn yi. A na zé siká kpó kpatágan kpó e a yǐ ɖo tokpɔn Babilɔ́nu tɔn mɛ ɔ́ lɔ hɛn yi. A nǎ bɛ́ nǔ énɛ́ lɛ́ɛ e to towe mɛ nu lɛ́ɛ, vɔ̌sánú-xwlémawutɔ́ lɛ́ɛ kpódó mɛ kpaa lɛ́ɛ kpó hun xomɛ bó ná bɔ è nǎ dó bló Mawu xwé e ɖo Jeluzalɛ́mu ɔ́ ɖó ná lɛ́ɛ bǐ hɛn yi. Nú a jɛ dɔ̌n ɔ́, a nǎ tɛ́nkpɔ́n bó ná zé akwɛ́ ɔ́ dó xɔ nǔ e è nǎ xwlé Mawu lɛ́ɛ ná. A nǎ xɔ nyibúsú, bó ná xɔ agbo, bó ná xɔ lɛ̌ngbɔ́ví. A nǎ xɔ jinukún, bó ná jɛ vɛ̌ɛn. A nǎ bɛ́ nǔ énɛ́ lɛ́ɛ bǐ xwlé Mawu ɖo vɔ̌sákpe Mawu mitɔn tɔn e ɖo xwé tɔn gbe, ɖo Jeluzalɛ́mu ɔ́ jí. Énɛ́ ɔ́ gúdo ɔ́, hwi kpó hǎgbɛ́ towe lɛ́ɛ kpó ná zán akwɛ́ e kpo ɔ́ lě e é jló mi gbɔn é; amɔ̌, tito Mawu mitɔn tɔn wɛ mi ná xwedó dó zán. A na bɛ́ sinsɛn sín nǔzínzán e è bɛ̌ nú we lɛ́ɛ ɖó Mawu xwé gbe ɖo Jeluzalɛ́mu. Ényí nǔ ɖěvo tíin bɔ a ɖǒ ná xɔ ɖó xwé ɔ́ tamɛ ɔ́, a nǎ ɖɔ bɔ è nǎ zé akwɛ́ ɖo akwɛ́gbá Dadá ɔ́ tɔn mɛ bó ná dó xɔ. Nyɛ Dadá Aatazɛɛzɛsi, un ná gbe akwɛ́gbájínɔtɔ́ ce e ɖo Efláti tɔ gúdo dɔ̌n lɛ́ɛ é ɖɔ yě ní ná nǔ e vɔ̌sánú-xwlémawutɔ́ Ɛsidlási ná byɔ́ lɛ́ɛ bǐ i. Ɛsidlási tunwun Mawu sɛ́xwé tɔn ɔ́ sín sɛ́n xéɖéxéɖé. Yě ná ná ɛ káká yi kpatágan kilóo afɔwó-afatɔ́n (3.000), bó ná ná ɛ jinukún kilóo adɔ̌kpo ɖě děgba we afɔwó (30.000), bó ná ná ɛ vɛ̌ɛn lǐtli děgba (4.000), ami lǐtli děgba (4.000), bó ná ná ɛ jɛ lě e é jló gbɔn é. Nǔ e Mawu sɛ́xwé tɔn ɔ́ ná ɖɔ è nǐ bló ɖo xwé émítɔn wú lɛ́ɛ, bǐ wɛ è nǎ hwlɛ́ndó bó bló, bónú Mawu má wá sin xomɛ dó axɔ́súɖuto ce abǐ nyɛ ɖésú kpódó kúnkan ce lɛ́ɛ kpó ó. Mɔ̌ ɖokpó ɔ́, mǐ ɖo ɖiɖɔ nú akwɛ́gbájínɔtɔ́ lɛ́ɛ wɛ ɖɔ è kún ná gbe yě ɖɔ yě ní yí akwɛ́ ɖé ɖo vɔ̌sánú-xwlémawutɔ́ lɛ́ɛ, Levíi ví lɛ́ɛ, hanjitɔ́ lɛ́ɛ, hɔnjínɔtɔ́ lɛ́ɛ, kpódó mɛ e nɔ wa azɔ̌ ɖo Mawu xwé gbe lɛ́ɛ kpó, kpódó mɛ ɖě lɛ́ɛ e ɖo azɔ̌ wa wɛ ɖo Mawu xwé ɔ́ wú wɛ lɛ́ɛ kpó sí ó. Yě kún ná yí takwɛ́ kpódó aligbɔntɔ́kwɛ́ kpó ɖo yě sí ó. “Hwɛ Ɛsidlási ɔ́, nǔ e a na wa ɔ́ ɖíe: a nǎ xwedó nǔnywɛ́ e sɛ́n Mawu towe tɔn e a hɛn wěma tɔn alɔ mɛ ɔ́ nɔ kplɔ́n mɛ é, bó ná sɔ́ hwɛɖɔtɔ́ lɛ́ɛ kpódó hwɛɖɔtɔ́gán lɛ́ɛ kpó ɖó togun ɔ́ nu, bɔ yě ná nɔ ɖɔ hwɛ xá mɛ e ɖo tokpɔn ɔ́ mɛ, bó tunwun sɛ́n Mawu towe tɔn lɛ́ɛ bǐ; mɛ e ma ka tunwun sɛ́n ɔ́ ǎ lɛ́ɛ ɔ́, mi ná kplɔ́n yě. Énɛ́ ɔ́ gúdo ɔ́, ényí mɛɖé gbɛ́ ɖɔ émí kún ná nyi Mawusɛ́n ɔ́, abǐ Dadá ɔ́ sín sɛ́n ɔ́ ó ɔ́, è nǎ kpɔ́n hwɛ e sɔgbe dó nǔ e é wa ɔ́ nu é bó ɖó n'i; è sixú hu i, è sixú ɖe e sín gbɛ̌ kplékplé ɔ́ mɛ; è sixú yí nǔ tɔn lɛ́ɛ, è sixú sɔ́ ɛ dó gan mɛ.” Ɛsidlási ɖɔ: “È nǐ dó kú nú Mawu Mavɔmavɔ, Mawu tɔ́gbó mǐtɔn lɛ́ɛ tɔn! É sɔ́ dó ayi mɛ nú Dadá ɔ́ bɔ é ɖésú ɖó jlǒ bó ná sɔ́ Mawu Mavɔmavɔ xwé Jeluzalɛ́mu tɔn ɔ́ su. Mawu Mavɔmavɔ ɖe xomɛnyínyɔ́ tɔn xlɛ́ mì ɖo Dadá ɔ́ kpódó wěɖexámɛtɔ́ tɔn lɛ́ɛ kpó, kpódó gbeyíɖɔ nukúnɖéjí e lɛ́ lɛ̌ dó e lɛ́ɛ bǐ kpó nukɔn, bɔ alɔ e é cyɔ́n jǐ ce ɔ́ ná akɔ́nkpinkpan mì, bɔ un sixú kplé Izlayɛ́li ví lɛ́ɛ sín gǎn lɛ́ɛ, bɔ yě xwedó mì lɛ́ kɔ wá.” Hɛ̌nnugán e xwedó nyɛ Ɛsidlási sín Babilɔ́nu wá Jeluzalɛ́mu hwenu e Dadá Aatazɛɛzɛsi ɖo axɔ́sú ɖu wɛ ɔ́ lɛ́ɛ sín nyǐkɔ ɖíe: wěma e mɛ è wlǎn jijimɛ lɛ́ɛ sín nyǐkɔ dó ɔ́ mɛ wɛ è kpɔ́n bó wlán nyǐkɔ lɛ́ɛ. Gɛɛcɔ́mu gosín akɔ Pínxási tɔn mɛ; Daniyɛ́li gosín akɔ Itamáa tɔn mɛ, Hatúci Cekaniya ví ɔ́ ɖo xwédo Davídi tɔn mɛ. Cekaniya sín vǐ lɛ́ɛ ɖokpó kpódó Zekaliya kpó gosín akɔ Palewɔ́ci tɔn mɛ, bɔ súnnu kantɔn gban (150) xwedó Zakalíi sín hɛ̌nnu tɔn mɛ. Zelaxiya sín vǐ Elihoenayi gosín akɔ Paxáti-Mɔwabu tɔn mɛ, bɔ súnnu afɔɖé (200) xwedó e. Yaxaziɛ́li sín vǐ Cekaniya gosín akɔ Zatú tɔn mɛ, bɔ súnnu afɔɖé kanwe ko (300) xwedó e. Evɛ́di, Yonatáni ví ɔ́ gosín akɔ Adini tɔn mɛ, bɔ súnnu kanɖé wǒ (50) xwedó e. Yecaya, Atalya ví ɔ́ gosín akɔ Elámu tɔn mɛ, bɔ súnnu kanɖé gban (70) xwedó e. Zevadiya, Mikaɛli ví ɔ́ gosín akɔ Cefátiya tɔn mɛ, bɔ súnnu kanwe (80) xwedó e. Ovadia, Yexiyɛ́li ví ɔ́ gosín akɔ Yoavu tɔn mɛ, bɔ súnnu afɔɖé afɔtɔn-nukún-atɔn (218) xwedó e. Celomíti, Yosifía ví ɔ́ gosín akɔ Bani tɔn mɛ, bɔ súnnu kɛnnɛ (160) xwedó e. Zekaliya Bevayi sín vǐ ɔ́ gosín akɔ Bevayi tɔn mɛ, bɔ súnnu koatɔ́n-nukún-atɔn (28) xwedó e. Yoxanáni Ha-Katáni ví ɔ́ gosín akɔ Azigadi tɔn mɛ, bɔ súnnu kanwe gban (110) xwedó e. Elifɛlɛ́ti, Yeyiɛ́li kpódó Cemaya kpó gosín akɔ Adonikámu tɔn mɛ; yědɛɛ wɛ nyí yɔkpɔ́vú ɖo akɔ yětɔn mɛ; bɔ súnnu kanɖé ko (60) xwedó yě. Wutáyi kpódó Zabúdi kpó gosín akɔ Bigiwayi tɔn mɛ, bɔ súnnu kanɖé gban (70) xwedó yě. Un kplé mɛ énɛ́ lɛ́ɛ bǐ ɖó tɔsisa e gbɔn Axawa ɔ́ kpá, bɔ mǐ nɔ fínɛ́ xɔ azǎn atɔn. Un mɔ ɖɔ mɛ kpaa lɛ́ɛ kpódó vɔ̌sánú-xwlémawutɔ́ lɛ́ɛ kpó ɖo yě mɛ. Levíi ví ɖěbǔ ká ɖo yě mɛ ǎ. Hwenɛ́nu ɔ́, un ylɔ́ gǎn lɛ́ɛ: Eliezɛ́ɛ, Aliɛ́li, Cemaya, Ɛlunatáni, Yalívu, Ɛlunatáni, Natáni, Zekaliya, kpódó Mɛculamu kpó, kpódó sɛ́nkplɔ́nmɛtɔ́ Yoyalívu kpódó Ɛlunatáni kpó. Un zɔ́n yě ɖɔ yě ní yi Idóo gletoxogán Kasifía tɔn ɔ́ gɔ́n. Un ɖɔ nǔ e yě ná yi ɖɔ nú é kpódó azɔ̌gbɛ́ tɔn e nɔ wa azɔ̌ ɖo Mawu xwé gbe ɖo Kasifía lɛ́ɛ kpó ɔ́ nú yě, bónú yě ná sixú kplá mɛ e ná wa Mawu xwé ɔ́ sín azɔ̌ xá mǐ lɛ́ɛ wá. Mawu mǐtɔn ka cyɔ́n alɔ mǐ jí, bɔ yě kpé wú bó kplá Celeviya wá. Celeviya ɔ́, nya ɖé wɛ é nyí, bó mɔ nukúnnú jɛ nǔ mɛ; Maxli sín xwégbenu wɛ é nyí, bó jɔ ɖo Levíi sín kún mɛ; Jakɔ́bu sín vǐ wɛ é nyí. É kpódó vǐ tɔn lɛ́ɛ kpó, kpódó nɔví tɔn lɛ́ɛ kpó wɛ yě kplá wá; yě bǐ bló súnnu afɔtɔn nukún atɔn. Yě kplá Hacaviya lɔ wá, bɔ Yecaya Mɛlali sín xwégbenu ɔ́ lɔ xwedó e é kpódó nɔví tɔn lɛ́ɛ kpó, kpódó vǐ yětɔn lɛ́ɛ kpó; yě bǐ bló súnnu ko. Yě lɛ́ kplá súnnu afɔɖé ko (220) wá. Mɛ e nɔ wa azɔ̌ ɖo Mawu xwé gbe lɛ́ɛ mɛ wɛ è ɖe mɛ énɛ́ lɛ́ɛ ɖe tawun. Mɛ e Davídi kpó azɔ̌gbɛ́ tɔn lɛ́ɛ kpó ko sɔ́ jó nú Levíi ví lɛ́ɛ, bɔ yě ná wa azɔ̌ nú yě lɛ́ɛ mɛ wɛ è cyán yě ɖe. Yě bǐ sín nyǐkɔ wɛ yě ylɔ́. Đo tɔsisa Axawa tɔn ɔ́ kɔn fínɛ́ ɔ́, un ɖɔ mǐ bǐ ɖó ná blá nu, bó ná dó sɔ́ mǐɖée hwe ɖo Mawu mitɔn nukɔn, bónú é ná bló bónú mǐ kpódó vǐ mǐtɔn lɛ́ɛ kpó, kpódó dɔkun mǐtɔn lɛ́ɛ kpó ná yi to ɔ́ mɛ ɖagbe. Ényí ɖɔ wɛ un ko yi ɖɔ nú Dadá ɔ́ ɖɔ ní ná mǐ ahwanfuntɔ́ kpó sɔ́xátɔ́ kpó, bónú yě ná nya xɛ ɖo mǐ jí ɖo alixo, ɖó kɛntɔ́ lɛ́ɛ wú ɔ́, winnyá ná hu mì, ɖó mǐ ko ɖɔ n'i ɖ'ayǐ ɖɔ Mawu mǐtɔn nɔ nya xɛ ɖo mɛ e ɖo gbejí n'i lɛ́ɛ jí, bó ká nɔ sin xomɛ dó mɛ e nɔ dó vɛ̌ n'i lɛ́ɛ ɖésú. Énɛ́ ɔ́ wú wɛ mǐ blá nu bó byɔ́ Mawu mǐtɔn ɖɔ ní cyɔ́n alɔ jǐ mǐtɔn, bɔ é yí ɖɛ mǐtɔn. Énɛ́ ɔ́ gúdo ɔ́, un kplá vɔ̌sánú-xwlémawutɔ́gán wěwe ɖo vɔ̌sánú-xwlémawutɔ́ lɛ́ɛ mɛ, bó sɔ́ Celeviya, Hacaviya kpódó hǎgbɛ́ yětɔn wǒ kpó, bɔ kpatágan kpódó siká kpó, kpódó nǔxɔ-akwɛ́ e Dadá ɔ́ kpódó wěɖexámɛtɔ́ tɔn lɛ́ɛ, gǎn hɔn-yitɔ́ tɔn lɛ́ɛ, kpódó Izlayɛ́li ví e ɖo to ɔ́ mɛ lɛ́ɛ kpó ná ɖ'ayǐ nú Mawu mǐtɔn sín xwé ɔ́ lɛ́ɛ ɔ́, un da ɖo nukún yětɔn mɛ. Nǔ e un da bo bɛ́ nú yě lɛ́ɛ bló kpatágan kilóo adɔ̌kpo ɖokpó (20.000), nǔxɔ-akwɛ́ e è sɔ́ kpatágan dó bló ná lɛ́ɛ bló kilóo afɔwó-afatɔ́n (3.000); siká kilóo afɔwó-afatɔ́n (3.000). Siká basya ko; basya lɛ́ɛ ná xɔ sikágankwɛ́ afatɔ́n (1.000), zɛ̌n ɖagbe ɖagbe we; ganvɔ wɛ è do bló yě ná, bɔ yě nɔ́ kɔ́n. Nǔxɔ-akwɛ́ wɛ yě lɔ nyí zɛ̌n e è sɔ́ siká dó bló ná ɔ́ ɖɔhun. Un ɖɔ nú yě ɖɔ: “Lě e mi nyí mɛ bɔ è sɔ́ mi kɛ Mawu Mavɔmavɔ ɔ́, mɔ̌ ɖokpó ɔ́ wɛ è sɔ́ nǔ élɔ́ lɛ́ɛ lɔ kɛ Mawu Mavɔmavɔ. Kpatágan ɔ́ kpódó siká ɔ́ kpó ɔ́, nǔníná e mɛ lɛ́ɛ jló bó ná Mawu Mavɔmavɔ, Mawu tɔ́gbó mitɔn lɛ́ɛ tɔn ɔ́ wɛ. Mi kpé nukún dó dɔkun nɛ́ lɛ́ɛ wú ganjí, káká yi Jeluzalɛ́mu. Nú mi jɛ dɔ̌n ɔ́, mi ná da nǔ énɛ́ lɛ́ɛ bǐ ɖo vɔ̌sánú-xwlémawutɔ́gán lɛ́ɛ kpódó Levíi ví lɛ́ɛ kpó, kpódó hɛ̌nnugán lɛ́ɛ kpó sín nukún mɛ, ɖo xɔ e bɔ dó Mawu Mavɔmavɔ xɔ ɔ́ wú lɛ́ɛ mɛ.” Énɛ́ ɔ́, vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó yí nǔ e è da lɛ́ɛ bǐ: kpatágan ɔ́ kpódó siká ɔ́ kpó, kpódó nǔxɔ-akwɛ́ lɛ́ɛ kpó, bó ná bɛ́ yi Mawu mǐtɔn sín xwé gbe ɖo Jeluzalɛ́mu. Đo sun nukɔn tɔn ɔ́ sín azǎn wěwegɔ́ ɔ́ gbe ɔ́, mǐ gosín tɔsisa Axawa tɔn ɔ́ kɔn, bó ɖidó Jeluzalɛ́mu. Ée mǐ ɖo alixo ɔ́, Mawu mǐtɔn cyɔ́n alɔ jǐ mǐtɔn, bɔ kɛntɔ́ mǐtɔn lɛ́ɛ wa nǔ ɖěbǔ nú mǐ ǎ; yě ká ɖó mɔ nú mǐ bó fɔ nǔ e mǐ hɛn lɛ́ɛ ǎ. Ée mǐ jɛ Jeluzalɛ́mu ɔ́, mǐ gbɔjɛ́ nú azǎn atɔn. Azǎn tɔn ɛnɛgɔ́ ɔ́ gbe ɔ́, mǐ da kpatágan ɔ́, bó da siká ɔ́, bó da nǔxɔ-akwɛ́ lɛ́ɛ ɖo xwé Mawu mǐtɔn tɔn gbe, lobo bɛ́ yě jó nú vɔ̌sánú-xwlémawutɔ́ Mɛlemɔti Wuliya ví ɔ́, Eleazáa Pínxási ví ɔ́, kpódó Yozavadi Yecúwa ví ɔ́ kpó, kpódó Nɔadiya Binuyi ví ɔ́ kpó, Levíi ví wɛ yě mɛ we énɛ́ lɛ́ɛ nyǐ. Yě kpó e kpó wɛ ɖo fínɛ́ bɔ mǐ bɛ́ nǔ lɛ́ɛ jó n'i. È xa nǔ lɛ́ɛ bǐ bó da kpɔ́n, bɔ kilóo nabí e bǐ bló ɔ́, è wlán dó wěma mɛ tlóló. Mɛ e ko nɔ kannumɔgbénu bó lɛ́ kɔ wá xwé lɛ́ɛ bǐ xwlé vɔ̌sánú Mawu Izlayɛ́li tɔn ɔ́, ɖó Izlayɛ́li ví lɛ́ɛ bǐ tamɛ. Vɔ̌sánú e yě xwlé lɛ́ɛ ɖíe: nyibúsú wěwe, agbo kanwe afɔtɔn-nukún-ɖokpó (96), lɛ̌ngbɔ́ví kanɖé gbantɔ́n-nukún-we (77), gbǎgbá wěwe. Yě xwlé vɔ̌sánú énɛ́ lɛ́ɛ Mawu, bónú é ná sɔ́ hwɛ yětɔn lɛ́ɛ kɛ yě. Kanlin énɛ́ lɛ́ɛ bǐ wɛ è dó zo nú Mawu Mavɔmavɔ bɔ bǐ ji kɔn afín. Énɛ́ ɔ́ gúdo ɔ́, yě sɔ́ gbeta e Dadá ɔ́ ɖe tɔ́n lɛ́ɛ sín wěma nú mɛ e ɖo Dadá ɔ́ tɛnmɛ lɛ́ɛ, kpódó tokpɔngán e ɖo ayǐkúngban e ɖo gbadahwe jí nú Efláti tɔ ɔ́ lɛ́ɛ kpó. Énɛ́ ɔ́, yě gɔ́ alɔ nú Izlayɛ́li ví lɛ́ɛ, bɔ yě gbá Mawu xwé ɔ́. Ée nǔ énɛ́ lɛ́ɛ jɛ gúdo ɔ́, togun ɔ́ sín gǎn ɖé lɛ́ɛ wá ɖɔ nú mì ɖɔ: “Mɛ kpaa lɛ́ɛ kpó vɔ̌sánú-xwlémawutɔ́ lɛ́ɛ kpó, kpódó Levíi ví lɛ́ɛ kpó ɖě nɔ zɔ nú to ɔ́ mɛ nu lɛ́ɛ ǎ. Yě nɔ́ zán walɔ nyanya e Kanáanu lɛ́ɛ, Hitíti lɛ́ɛ, Pɛliziti lɛ́ɛ, Jebuzinu lɛ́ɛ, Amumɔ́ɔ ví lɛ́ɛ, Mɔwabunu lɛ́ɛ, Ejípunu lɛ́ɛ, kpódó Amɔliti lɛ́ɛ kpó nɔ zán é. Yě ɖésúnɔ da nyɔ̌nu togun énɛ́ lɛ́ɛ mɛ tɔn lɛ́ɛ, bó da nú vǐ yětɔn súnnu lɛ́ɛ, bɔ togun mímɛ́ ɔ́ ján dó to énɛ́ ɔ́ mɛ nu lɛ́ɛ mɛ. Gǎn lɛ́ɛ kpódó hwɛɖɔtɔ́ lɛ́ɛ kpó wɛ nyí mɛ nukɔntɔn e dó nǔ baɖabaɖa énɛ́ ɔ́ sin é.” Ée un se xó énɛ́ lɛ́ɛ ɔ́, un vún awu ce ɖaxó ɔ́ kpó awu ce do tɔn lɛ́ɛ kpó dó kɔ nú nyɛɖée. Un sun ɖa ce lɛ́ɛ kpódó atán ce lɛ́ɛ kpó, lobo jínjɔ́n ayǐ wǔɖéwúɖé. Un nɔ mɔ̌ káká wá jɛ hwenu e è na xwlé vɔ̌sánú gbadanu tɔn ɔ́ Mawu dó é. Mɛ e ɖo hinhɔn nú Mawu Izlayɛ́li tɔn ɔ́ sín hwɛɖónúmɛ wɛ ɖó nǔwanyido Jwifu e lɛ́ kɔ sín kannumɔgbénu wá lɛ́ɛ tɔn wú lɛ́ɛ bǐ kplé dó mì. Ée vɔ̌sísá gbadanu tɔn ɔ́ sín gan xo ɔ́, wǔ yá mì. Awu ce ɖaxó ɔ́ kpódó awu ce do tɔn lɛ́ɛ kpó e un hɛn vún ɔ́ kpo ɖo kɔ nú mì, bɔ un jɛ kpo, lobo dlɛ́n alɔ ce lɛ́ɛ sɛ́ dó Mawu Mavɔmavɔ, Mawu ce, bó ɖɔ n'i ɖɔ: “Mawu ce, winnyá tɛ́ ɖíe! Mawu ce, winnyá ɖo huhu mì wɛ dín, bɔ un sixú glá bó kpɔ́n we sɛ́ dó ǎ. Hwɛ e mǐ hu lɛ́ɛ sukpɔ́, yě yi jǐ káká bó hú taga mǐ; hwɛ mǐtɔn lɛ́ɛ kplé káká yi jǐnukúnsin. Sín tɔ́gbó mǐtɔn lɛ́ɛ hwenu káká wá jɛ din ɔ́, togun mǐtɔn hu hwɛ gěgé. Énɛ́ ɔ́ wú ɔ́, mǐ kpó axɔ́sú mǐtɔn lɛ́ɛ kpó, kpódó vɔ̌sánú-xwlémawutɔ́ mǐtɔn lɛ́ɛ kpó ɔ́, axɔ́sú to ɖěvo mɛ tɔn lɛ́ɛ hú gǎn mǐ; yě fun ahwan xá mǐ, yě wlí kannumɔ mǐtɔn hɛn yi. Yě bɛ̌ nǔ mǐtɔn lɛ́ɛ, bó dó winnyá mǐ lě e é lɛ́ nyí gbɔn nú mǐ égbé é. Amɔ̌, din ɔ́, Mawu Mavɔmavɔ, Mawu mǐtɔn, a blǒ bɔ mǐ mɛ e kpo ɖo gbɛ ɖo togun mǐtɔn mɛ lɛ́ɛ ɖě lɛ́ kɔ wá nɔ ayǐkúngban towe mímɛ́ ɔ́ jí nú hwenu kpɛɖé. A blǒ mɔ̌ bó dó ɖe nyɔ̌ná towe xlɛ́ mǐ. Énɛ́ ɔ́, hwɛ Mawu mǐtɔn ɔ́, a blǒ bɔ nukún mɛ mǐtɔn lɛ́ jɛ ayǐ. A lɛ́ ná gbɛ kpɛɖé mǐ ɖo fí e mǐ ɖe ɖo kannumɔgbénu é. Ɛɛn Mawu mǐtɔn, kannumɔ wɛ mǐ nyǐ ɖ'ayǐ, lo ɔ́, a jǒ mǐ nyi ninɔmɛ énɛ́ ɔ́ mɛ ǎ; a blǒ bɔ Dadá Pɛ́si tɔn lɛ́ɛ nyɔ́ xomɛ dó mǐ wú; yě jó mǐ dó nyi gbɛ, bó ná gbe mǐ ɖɔ mǐ ní lɛ́ vɔ́ xwé towe sín dǒ lɛ́ɛ mɛ, bó vɔ́ xɔ ɔ́ gbá. Yě blǒ bɔ mǐ mɔ fí e mǐ ná nɔ ɖo Judáa bó ná ɖó jiɖiɖe é. “Mawu mǐtɔn, ée nǔ énɛ́ lɛ́ɛ jɛ din ɔ́, étɛ́ mǐ sixú ɖɔ? Đó mǐ gba sɛ́n lɛ́ɛ. Mi gba sɛ́n e a dǒ nú mǐ gbɔn mɛsɛntɔ́ towe gbeyíɖɔ lɛ́ɛ jí lɛ́ɛ. A ko ɖɔ nú mǐ ɖ'ayǐ ɖɔ: ‘To énɛ́ ɔ́ e mɛ ná byɔ́ wɛ mi ɖe bɔ é ná nyí mitɔn ɔ́, to blíblí wɛ, ɖó akɔta e ɖo to ɔ́ mɛ lɛ́ɛ nyí mɛ blíblí, bɔ nǔ nyanya e yě nɔ́ wa lɛ́ɛ gba kpé to ɔ́ mɛ. Mi bo ma ná vǐ mitɔn mɛ énɛ́ lɛ́ɛ e ma nyí Jwifu nyɔ̌nu ǎ lɛ́ɛ sín vǐ nú yě da ó; mi ma ka da asi nú vǐ súnnu mi ɖésúnɔ tɔn lɛ́ɛ ɖo yě mɛ ó. Akɔta énɛ́ lɛ́ɛ e ma nɔ sɛn Mawu ǎ lɛ́ɛ ɔ́, ɖagbe yětɔn abǐ nyanya yětɔn ɖě ní má myá nukún nú mi gbeɖé ó. Mɔ̌ wɛ mi ná wa nǔ gbɔn, bó ná nyí togun hlɔ̌nhlɔ́nnɔ, lobo ná ɖu nǔ ɖagbe e ɖo to ɔ́ mɛ lɛ́ɛ sín gbɛ, bó ná jó dó nú vǐ mitɔn lɛ́ɛ, bɔ yě ná ɖu gǔ tɔn káká sɔ́yi.’ Óo! Mawu mǐtɔn! Nǔ nyanya e mǐ wa lɛ́ɛ kpódó hwɛ ɖaxó ɖaxó e mǐ hu lɛ́ɛ kpó wútu wɛ nyladó mǐtɔn lɛ́ɛ bǐ kɔn nyi jǐ mǐtɔn, có tó e a dɔn nú mǐ é sɔ éé jɛ xá hwɛ e mǐ hu lɛ́ɛ é ǎ, bɔ a blǒ bɔ mǐ mɛ e ɖo fí lɛ́ɛ kpo ɖo gbɛ. Ée nǔ nyí mɔ̌ ɔ́, nɛ̌ wɛ mǐ ka ná lɛ́ jɛ sɛ́n towe lɛ́ɛ gba jí, bó ná ɖó kɔnɖókpɔ́ xá akɔta énɛ́ lɛ́ɛ e nɔ ɖo nǔ nyanya lɛ́ɛ wa wɛ ɔ́ gbɔn? A na sin xomɛ dó mǐ, bó ná hu mǐ bǐ ma ɖe mɛɖé kpo ǎ cé? Mawu Mavɔmavɔ, Mawu Izlayɛ́li tɔn, nǔ jlɔ́jlɔ́ wɛ a nɔ wa, ɖó a jǒ mɛɖé lɛ́ɛ dó nyi gbɛ ɖo mǐ mɛ káká wá jɛ égbé. Mǐ ɖíe ɖo nukɔn towe kpó hwɛgban mǐtɔn lɛ́ɛ kpó e. Mɛ ɖé ká sixú nɔ mɔ̌, bó nɔ te nukɔn towe ǎ!” Hwenu e Ɛsidlási ɖo kpoli jijɛ ɖo Mawu xwé ɔ́ nukɔn bó ɖo avǐ ya wɛ, bó ɖo ɖɛ xo wɛ, lobo ɖo kɛnklɛ́n dó nú Mawu wɛ ɖɔ é ní sɔ́ hwɛ kɛ togun ɔ́ wɛ ɔ́, Izlayɛ́li ví wɔ̌buwɔ́bú súnnu kpó nyɔ̌nu kpó, kpódó yɔkpɔ́vú kpó kplé lɛ́ lɛ̌ dó e, bó ɖo avǐ ya wɛ baɖabaɖa. Hwe énɛ́ ɔ́ nu ɔ́, Cekaniya e nyí Yexiyɛ́li ví, bó nyí kúnkan Elámu tɔn ɔ́ ɖɔ nú Ɛsidlási ɖɔ: “Nyɔ̌nu e ma nyí Jwifu ǎ, bó nyí to élɔ́ mɛ nu bɔ mǐ da lɛ́ɛ ɔ́, hwɛ ɖaxó wɛ mǐ hu dó Mawu. Nǔ ka nyí mɔ̌ có, Izlayɛ́li togun ɔ́ kpo ɖo nǔ ɖó nukún wɛ. Mǐ ná dó akpá nú Mawu ɖɔ mǐ ná nya nyɔ̌nu to ɖěvo mɛ nu e mǐ da lɛ́ɛ kpódó vǐ yětɔn lɛ́ɛ kpó. Mǐ ná bló mɔ̌ bó ná xwedó nǔ e hwi Ɛsidlási kpó mɛ e nɔ xwedó nǔ e Mawu mǐtɔn zɔ́n lɛ́ɛ kpó kplɔ́n mǐ lɛ́ɛ é. Mi nú mǐ nǎ xwedó Mawusɛ́n ɔ́ dó wa nǔ. Bo sí te! Xó élɔ́ ɔ́, xó towe ɖiɖɔ wɛ. Mǐ na nɔ gúdo towe. Kpan akɔ́n, bó wa nǔ e wa gbé a ja é.” Bɔ Ɛsidlási sí te, bó ɖɔ nú Jwifu vɔ̌sánú-xwlémawutɔ́gán lɛ́ɛ, Levíi ví lɛ́ɛ, kpódó Izlayɛ́li togun ɔ́ bǐ kpó ɖɔ yě ní xwlé nǔ ɖɔ émí ná bló nǔ e Cekaniya ɖɔ din é, bɔ yě bǐ xwlé nǔ. Énɛ́ ɔ́ gúdo ɔ́, Ɛsidlási gosín Mawu xwé ɔ́ nukɔn, bó yi Yexoxanáni Eliyacivu ví ɔ́ sín xwé gbe, bó cí fínɛ́. É ɖu nǔ ǎ, é ká nu sin ǎ, ɖó wǔ kú i, ɖó hwɛ ɖaxó e to tɔn mɛ nu lɛ́ɛ hu lɛ́ɛ wú. È ɖɔ gbɔn Judáa kpó Jeluzalɛ́mu to ɔ́ bǐ kpó mɛ ɖɔ mɛ e lɛ́ kɔ sín kannumɔgbénu wá lɛ́ɛ ní wá kplé ɖo Jeluzalɛ́mu. Nú mɛɖé ma kó wá kplé ɔ́ tɛnmɛ ǎ káká nú azǎn atɔn ɔ́, è na yǐ nǔ e é ɖó lɛ́ɛ bǐ sín así tɔn, bó ná ɖe e sín mɛ e gosín kannumɔgbénu lɛ́ɛ sín gbɛ̌ta mɛ, lě e gǎn lɛ́ɛ kpó tonukún lɛ́ɛ kpó ɖɔ gbɔn é. Súnnu e ɖo akɔta Judáa tɔn mɛ lɛ́ɛ bǐ kpó éé ɖo akɔta Bɛnjamɛ́ɛ tɔn mɛ lɛ́ɛ bǐ kpó wá Jeluzalɛ́mu ɖo azǎn atɔn mɛ ɖo sun tɛ́nnɛgɔ́ ɔ́ sín azǎn kogɔ́ ɔ́ gbe. Yě bǐ kplé ɖo fí e xwé Mawu tɔn ɔ́ ɖe é. Yě bǐ ɖo sísɔ́ sísɔ́ wɛ, ɖó xó énɛ́ ɔ́ wú; jǐ ká lɛ́ ɖo jija wɛ ɖésú. Vɔ̌sánú-xwlémawutɔ́ Ɛsidlási sí te bó ɖɔ nú yě ɖɔ: “Izlayɛ́li ví lɛ́ɛ émí, nyɔ̌nu toɖévomɛnu e mi da lɛ́ɛ ɔ́, hwɛ wɛ mi hu, hwɛ wɛ mi lɛ́ dó hwɛ jí nú togun Izlayɛ́li tɔn ɔ́. Din ɔ́, mi ɖó ná yí hwɛ mitɔn lɛ́ɛ gbe, ɖo Mawu Mavɔmavɔ e nyí Mawu tɔ́gbó mitɔn lɛ́ɛ tɔn ɔ́ nukɔn, bó ná wa jlǒ tɔn. Mi ma sɔ́ kpé nǔɖé xá to ɔ́ mɛ nu lɛ́ɛ ó; mi jó nyɔ̌nu toɖévomɛnu e mi da lɛ́ɛ dó.” Ée é ɖɔ mɔ̌ ɔ́, togun ɔ́ bǐ sú xó bó ɖɔ: “Nǔgbó wɛ a ɖɔ. Mǐ ɖó ná bló nǔ e a ɖɔ nú mǐ é! Mǐ ká sukpɔ́, jǐ hwenu wɛ mǐ ká lɛ́ ɖe. Mǐ sɔ́ sixú nɔ jɔhɔn nu fí din bo ɖɔ énɛ́ ɔ́ ǎ. Mǐ ká tlɛ sixú sɔ́ azǎn ɖokpó abǐ azǎn we ɖó te, bo dó ɖɔ xó énɛ́ ɔ́ gbo ǎ, ɖó mɛ e xó ɔ́ kan ɖo mǐ mɛ lɛ́ɛ sukpɔ́. Énɛ́ ɔ́ wú ɔ́, mǐ ɖo byɔ̌byɔ́ we wɛ ɖɔ gǎn mǐtɔn lɛ́ɛ ní nɔ te ɖo Jeluzalɛ́mu fí. Énɛ́ ɔ́, è na ɖó azǎn nú Izlayɛ́li ví e da nyɔ̌nu toɖévomɛnu lɛ́ɛ bǐ, bɔ yě ná wá gǎn lɛ́ɛ nukɔn azǎn énɛ́ ɔ́ gbe. Yě kpó tomɛxó lɛ́ɛ kpó, kpó hwɛɖɔtɔ́ toxo yětɔn lɛ́ɛ ɖokpó ɖokpó tɔn kpó wɛ ná wá. Mǐ ná gbéjé xó ɔ́ kpɔ́n ganjí, káká bɔ xomɛ ɖaxó e sin dó mǐ wɛ Mawu mǐtɔn ɖe ɔ́ ná fá.” Yonatáni Asaxɛli ví ɔ́ kpó Yaxizeya, Tikwa ví ɔ́ kpó kɛ́ɖɛ́ wɛ gbɛ́ xó énɛ́ ɔ́, bɔ Mɛculamu kpó Levíi ví Cabutáyi kpó nɔ yě jí. Izlayɛ́li ví ɖě lɛ́ɛ e lɛ́ kɔ sín kannumɔgbénu wá lɛ́ɛ ká yí gbe nú xó ɔ́. Énɛ́ ɔ́, vɔ̌sánú-xwlémawutɔ́ Ɛsidlási hɛ̌nnugán lɛ́ɛ ɖo xwédo yětɔn lɛ́ɛ ɖokpó ɖokpó mɛ. Nyǐkɔ yětɔn wɛ è ylɔ̌ dó ɖe yě ná, bɔ yě jínjɔ́n ayǐ ɖo sun wǒgɔ́ ɔ́ sín azǎn nukɔntɔn ɔ́ gbe, bó ná ɖɔ xó ɔ́ gbo. Yě ɖɔ xó énɛ́ ɔ́ fó xá súnnu e da nyɔ̌nu toɖévomɛnu lɛ́ɛ bǐ, ɖo xwe e jɛ fínɛ́ ɔ́ sín sun nukɔntɔn ɔ́ sín azǎn nukɔntɔn ɔ́ gbe. Mɛ e ɖo vɔ̌sánú-xwlémawutɔ́ lɛ́ɛ mɛ, bó da nyɔ̌nu toɖévomɛnu lɛ́ɛ sín nyǐkɔ ɖíe: Kúnkan Jozuwée, Yosadaku ví ɔ́ tɔn, kpó nɔví tɔn élɔ́ lɛ́ɛ kpó: Maaseya, Eliezɛ́ɛ, Yalívu, kpó Gedaliyá kpó. Yě ɖɔ bó dó akpá ɖɔ émí ná nya asi émítɔn lɛ́ɛ, bó ná zé agbo dó sá vɔ̌ nú Mawu, bɔ é ná sɔ́ hwɛ émítɔn lɛ́ɛ kɛ émí. Kúnkan Imumɛ́ɛ tɔn lɛ́ɛ: Hanáni kpó Zevadiya kpó. Kúnkan Halimu tɔn lɛ́ɛ: Maaseya, Eliya, Cemaya, Yexiyɛ́li kpó Wuziya kpó. Kúnkan Pacehúu tɔn lɛ́ɛ: Eliyoenayi, Maaseya, Yicimayɛ́li, Nɛtanɛli, Yozavadi kpódó Eleasa kpó. Mɛ e ɖo Levíi ví lɛ́ɛ mɛ, bó da nyɔ̌nu toɖévomɛnu lɛ́ɛ ɔ́ sín nyǐkɔ ɖíe: Yozavadi, Cimɛ́yi, Kelaya abǐ Kelita, Petaxiya, Yexuda kpó Eliezɛ́ɛ kpó. Mɛ e ɖo hanjitɔ́ lɛ́ɛ mɛ, bó da nyɔ̌nu toɖévomɛnu ɔ́ sín nyǐkɔ ɖíe: Eliyacivu. Mɛ e ɖo hɔnjínɔtɔ́ lɛ́ɛ mɛ, bó da nyɔ̌nu toɖévomɛnu lɛ́ɛ sín nyǐkɔ ɖíe: Calúmu, Tɛlɛ́mu kpódó Wulíi kpán. Mɛ e ɖo Izlayɛ́li ví kpaa lɛ́ɛ mɛ, bó da nyɔ̌nu toɖévomɛnu lɛ́ɛ sín nyǐkɔ ɖíe: Kúnkan Palewɔ́ci tɔn lɛ́ɛ: Hlamiya, Yizíya, Malukíya, Miyamini, Eleazáa, Malukíya kpódó Benaya kpó. Kúnkan Elámu tɔn lɛ́ɛ: Mataniya, Zekaliya, Yexiyɛ́li, Avudi, Yelemɔ́ti kpódó Eliya kpó. Kúnkan Zatú tɔn lɛ́ɛ: Eliyoenayi, Eliyacivu, Mataniya, Yelemɔ́ti, Zavadu kpó Aziza kpó. Kúnkan Bevayi tɔn lɛ́ɛ: Yexoxanáni, Hananiya, Zabáyi kpódó Atlayi kpó. Kúnkan Bani tɔn lɛ́ɛ: Mɛculamu, Malulúki, Adaya, Yacúvu, Cealu kpódó Yelamɔ́ti kpó. Kúnkan Paxáti-Mɔwabu tɔn lɛ́ɛ: Adina, Keláli, Benaya, Maaseya, Mataniya, Besalɛli, Binuyi kpódó Manasée kpó. Kúnkan Halimu tɔn lɛ́ɛ: Eliezɛ́ɛ, Yiciya, Malukíya, Cemaya, Sinmɛnyɔ́ɔ, Bɛnjamɛ́ɛ, Malulúki kpó Cemaliya kpó. Kúnkan Hacúmu tɔn lɛ́ɛ: Matenayi, Matata, Zavadu, Elifɛlɛ́ti, Yelemayi, Manasée kpó Cimɛ́yi kpó. Kúnkan Bani tɔn lɛ́ɛ: Maadayi, Amulámu, Wuɛ́li, Benaya, Bedya, Kelúxi, Waniya, Mɛlemɔti, Eliyacivu, Mataniya, Matenayi, Yaasayi. Kúnkan Binuyi tɔn: Cimɛ́yi, Cɛlɛmiya, Natáni, Adaya, Makinadevayi, Cacáyi, Calayi, Azalɛ́li, Cɛlɛmiyahu, Cemaliya, Calúmu, Amaliya kpódó Yozɛ́fu kpó. Kúnkan Nɛbo tɔn lɛ́ɛ: Yeyiɛ́li, Matitia, Zavadu, Zevina, Yadayi, Yoɛ́li kpó Benaya kpó. Yě mɛ énɛ́ lɛ́ɛ bǐ wɛ da nyɔ̌nu toɖévomɛnu, bɔ nyɔ̌nu énɛ́ lɛ́ɛ gěgé kó ji vǐ nú yě. Yě gbɛ́ nyɔ̌nu énɛ́ lɛ́ɛ bǐ kpó vǐ yětɔn lɛ́ɛ kpó. Nɛɛmíi Hakaliya ví ɔ́ sín xó wɛ ɖo wěma élɔ́ mɛ. Hwenu e Dadá Aatazɛɛzɛsi ɖo xwe we bló wɛ ɖo zinkpo jí, ɖo Kisiléwu sín sun ɔ́ mɛ ɔ́, nyɛ Nɛɛmíi ɖo Súzi toxo ɖaxó Babilɔ́nu tɔn e è mɛ ahohó lɛ́ lɛ̌ dó é mɛ. Nɔví ce ɖokpó ká tíin bó nɔ́ nyí Hanáni; é kpó mɛɖé lɛ́ɛ kpó wɛ gosín tokpɔn Judáa tɔn mɛ wá hwenɛ́nu. Un kan nǔɖé lɛ́ɛ byɔ́ yě dó Jwifu e gán sín kannumɔgbénu bó wá lɛ́ɛ wú, bó kan nǔ byɔ́ yě dó Jeluzalɛ́mu toxo ɔ́ wú. Bɔ yě yí gbe nú mì ɖɔ: “Mɛ e lɛ́ kɔ sín kannumɔgbénu lɛ́ɛ wá cí Judáa sín tokpɔn ɔ́ mɛ; lo ɔ́, ya ɖaxó ɖé vun blá yě, bɔ ninɔmɛ yětɔn nyí winnyánú ɖé. Amɔ̌, ahohó e è mɛ lɛ́ lɛ̌ dó toxo ɔ́ mu ɖo akpá ɖé lɛ́ɛ xwé, bɔ è dǒ toxo ɔ́ sín hɔntogbó ɖé lɛ́ɛ zo.” Ée un se xó énɛ́ lɛ́ɛ ɔ́, un jínjɔ́n ayǐ, bó ya avǐ. Un nɔ aluwɛ mɛ xɔ azǎn mɔ̌kpán. Un blá nu bó xo ɖɛ ɖo Mawu nukɔn bó ɖɔ: “Áo Mawu Mavɔmavɔ, hwi mɛ e ɖo sɛ́xwé é. A kló bó nyí nǔsísí. A nɔ hɛn akɔ e a nɔ jɛ xá mɛ e nɔ nyi sɛ́n towe lɛ́ɛ é. A nɔ́ nɔ gbejí nú mɛ e yí wǎn nú we lɛ́ɛ. Nyi kɔ kpɔ́n mì, ɖǒtó mì, ɖǒtó ɖɛ ce din; ɖɛ e xo wɛ nyi mɛsɛntɔ́ towe ɔ́ ɖe é. Zǎn kpó kéze kpó ɔ́, un nɔ ɖo vo sa nú we dó mǐ Izlayɛ́li ví lɛ́ɛ tamɛ wɛ, mǐ sinsɛn we tɔ́ lɛ́ɛ. Un ɖo byɔ̌byɔ́ we wɛ ɖɔ hwi ní sɔ́ hwɛ mǐtɔn lɛ́ɛ kɛ mǐ; nyi kpó tɔ́ ce lɛ́ɛ kpó bǐ wɛ hu hwɛ. Sɛ́n towe lɛ́ɛ kpó nǔ e sɛ́n ɔ́ zɔ́n lɛ́ɛ kpó, kpódó lě e è na wa nǔ gbɔn, bɔ a ɖɔ nú mǐ gbɔn mɛsɛntɔ́ towe Mɔyízi jí lɛ́ɛ kpó ɔ́, mǐ gba bǐ bó dó jɛ agɔ dó we. Nǔ ɖo mɔ̌ có, flín xó e a ɖɔ nú mǐ gbɔn Mɔyízi jí é. A ɖɔ nú mǐ ma nɔ gbejí ǎ ɔ́, émí ná gba mǐ dó gbɔn akɔta ɖěvo lɛ́ɛ mɛ. Amɔ̌, nú mi ka wá mɔ ɖɔ émí wa nǔ nyi do, bo lɛ́ kɔ wá gɔ̌n ce, bó wlíbo nú sɛ́n ce lɛ́ɛ, bó jɛ nyinyi jí, bónú ahwan na bo wlí mi yi káká fí e gbɛ ɔ́ kponu ɖó ɔ́, un ná wá ba mi cyán, bó ná kplá mi wá fí e un sɔ́ bó nɔ ɖe susu ce xlɛ́ ɖe é. Mawu Mavɔmavɔ, mɛsɛntɔ́ towe wɛ mǐ nyǐ, bó nyí togun towe. Mǐdɛɛ lɛ́ɛ wɛ a sɔ́ hlɔ̌nhlɔ́n towe dó hwlɛ́n gán, bó sɔ́ alɔ towe hlɔ̌nhlɔ́nnɔ ɔ́ dó hwlɛ́n gán. Mawu Mavɔmavɔ, kɛnklɛ́n ɖǒtó ɖɛ ce, bó ɖótó vo e sa nú we wɛ gbejínɔtɔ́ towe ɖě lɛ́ɛ lɔ ɖe é. Gbejínɔtɔ́ e nɔ ɖi xɛsi nú we kpó xomɛhunhun kpó lɛ́ɛ é. Blǒ bónú nǔ e ná bló wɛ un ɖe é, má mɔ nu tɔn bo bló bónú Dadá ɔ́ ná yí gbe nú nǔ e ná byɔ́ ɛ wɛ un ɖe ɔ́.” Hwe énɛ́ ɔ́ nu ɔ́, nyi wɛ nɔ hɛn sinnuká nú Dadá ɔ́. Hwenu e Dadá Aatazɛɛzɛsi ɖo xwe ko bló wɛ ɖo zinkpo jí ɔ́, ɖo Nisáan sín sun ɔ́ mɛ ɔ́, gbe ɖokpó tíin bɔ Dadá ɔ́ ɖo nǔ ɖu wɛ, bɔ un sɔ́ vɛ̌ɛn bo ba n'i. Hwe énɛ́ ɔ́ nu ɔ́, wǔ kú mì; wǔ ká kú mì mɔ̌ gbeɖé kpɔ́n ɖo Dadá ɔ́ nukɔn ǎ. Énɛ́ ɔ́, Dadá ɔ́ kanbyɔ́ mì ɖɔ: “Étɛ́wú wǔ kú we mɔ̌? A ma ka ɖo azɔn jɛ wɛ nɛ́! Étɛ́ lin wɛ a ka ɖe sɔ mɔ̌?” Ée é ɖɔ mɔ̌ ɔ́, xɛsi ɖaxó ɖé jɛ jǐ ce. Xɛsi ɖo jǐ ce mɔ̌ có un ɖɔ nú Dadá ɔ́ ɖɔ: “Sɛ́mɛɖó, è nǐ nɔ gbɛ káká nú xwe maxamaxa. Dadá, wǔ sixú gɔn kúkú mì ǎ, ɖó toxo e mɛ è ɖi tɔ́gbó tɔgbo ce lɛ́ɛ dó ɔ́ gba, bɔ è dǒ toxo ɔ́ sín hɔntogbó lɛ́ɛ zo.” Ée un ɖɔ mɔ̌ ɔ́, Dadá ɔ́ lɛ́ kanbyɔ́ mì ɖɔ: “Bɔ étɛ́ byɔ́ wɛ a ka ɖe?” Tlóló ɔ́, un to xomlá Mawu sɛ́xwé tɔn. Énɛ́ ɔ́ gúdo ɔ́, un yí gbe nú Dadá ɔ́ ɖɔ: “Dadá, ényí é jló mɛ nú è na ɖe xomɛnyínyɔ́ xlɛ́ mì hǔn, è ní ná gbe mì, bónú má yi tokpɔn Judáa tɔn mɛ, ɖo toxo e mɛ è ɖi tɔ́gbó tɔgbo ce lɛ́ɛ dó é, bó ná vɔ́ toxo ɔ́ blóɖó.” Dadá ɔ́ sín asi ka ɖo ayǐjínjɔ́n akpá tɔn hwenɛ́nu, bɔ é lɛ́ vɔ́ kanbyɔ́ mì ɖɔ: “A ka yi dɔ̌n ɔ́, azǎn nabí a nǎ xɔ? Hwetɛ́nu a nǎ lɛ́ kɔ wá?” Un ɖɔ hwenu e un ná lɛ́ kɔ wá ɔ́ n'i. Dadá ɔ́ yí gbe bo ná jó mì dó bɔ un ná yi, bɔ un ɖɔ gbe e gbe un ná lɛ́ kɔ wá ɔ́ n'i. Un lɛ́ ɖɔ nú Dadá ɔ́ ɖɔ: “Sɛ́mɛɖó, é nyɔ́ mɛ nukún mɛ mɔ̌ hǔn, è kɛnklɛ́n bló wěma nú mì nú ma sɔ́ yi jó nú tokpɔngán e ɖo Efláti sín gbadahwe jí lɛ́ɛ ɖokpó ɖokpó, nú yě ná jó mì dó, nú má gbɔn fínɛ́ yi Judáa. È nǐ lɛ́ bló wěma ɖěvo nú mì nú má sɔ́ jó nú Asáfu e kpa acɛ ɖo zungbó mɛtɔn lɛ́ɛ nu é, nú é ná ná mì atín nú ahohó sín hɔntogbó lɛ́ɛ, bó ná ná atín nú ahohó e ɖo Mawu xwé ɔ́ kpá lɛ́ɛ é, lobo ná ná atín nú dǒ e è mɛ lɛ́ lɛ̌ dó toxo ɔ́ e, lobo ná ná atín nú xwé nyi ɖésú tɔn.” Dadá ɔ́ ná wěma énɛ́ lɛ́ɛ mì, ɖó Mawu ce cyɔ́n alɔ jǐ ce. Nǔgbó ɔ́, un yi tokpɔngán e ɖo Efláti gbadahwe jí lɛ́ɛ gɔ́n, bó sɔ́ Dadá ɔ́ sín wěma yi jó nú yě. Sɔ́ja e Dadá ɔ́ dó jǐ ce lɛ́ɛ, kpódó sɔ́xátɔ́ e é dó jǐ ce lɛ́ɛ kpó nyɛ kpó wɛ zɔn. Nya we ɖé lɛ́ɛ tíin ɖo toxo ɔ́ mɛ, Sanbaláti Holonayímunu ɔ́ kpódó Toviya Amumɔ́ɔ ví e xo kpó ɖó n'i ɔ́ kpó. Ée yě se ɖɔ un jǎwe ɔ́, é vɛ́ nú yě káká, ɖó yě se ɖɔ mɛɖé jǎwe bó ná wá kpé nukún dó ganjíninɔ Izlayɛ́li ví lɛ́ɛ tɔn wú. Ée un wá Jeluzalɛ́mu ɔ́, un to nɔ xwíí hwɛ̌ káká nú azǎn atɔn. Un ká ɖɔ nǔ e Mawu sɔ́ dó ayi mɛ nú mì bɔ un ná bló nú toxo ɔ́ é nú mɛɖé ǎ. Ée un bló azǎn atɔn é ɔ́, un dɔn zǎn dó wǔ, bɔ gbɛ̌ta kléwún ɖé kplá mì. Un hɛn kanlin ɖě zɛ tócí e jí un nɔ xá ɔ́ wú ǎ. Un tɔ́n sín toxo ɔ́ mɛ zǎn xóxó mɛ, bó gbɔn hɔn e è nɔ ylɔ́ ɖɔ Tɔdomɛ Hɔntogbó é nu, bó ɖidó tɔjɔtɛn dlagɔ́ɔn tɔn kpó hɔn e nɔ ylɔ́ ɖɔ Zunkɔ́ Hɔntogbó ɔ́ kpó kɔn. Un kpɔ́n Jeluzalɛ́mu dó lɛ́ɛ ganjí, bó mɔ ɖɔ dǒ lɛ́ɛ mu ɖo akpá ɖé lɛ́ɛ xwé, bɔ hɔntogbó ɔ́ ji zo. Un lɛ́ ɖidó Tɔjɔtɛn Hɔntogbó ɔ́ kpódó hɔntogbó Axɔ́sútɔ ɔ́ tɔn kpó kɔn; lo ɔ́ tócí e jí un ɖe ɔ́ sɔ́ mɔ tɛnmɛ bó ná dín ǎ. Énɛ́ ɔ́, un fán Sedlɔ́n sín tɔdokpó ɔ́ zǎn ɔ́ mɛ, bó lɛ́ jɛ dǒ lɛ́ɛ kpɔ́n jí ɖidó. Énɛ́ ɔ́ gúdo ɔ́, un lɛ́ kɔ gbɔn Tɔdomɛ Hɔntogbó ɔ́ nu, bó wá yi xwé gbe. Toxo ɔ́ sín gǎn lɛ́ɛ tunwun fí e un yi ɔ́ ǎ, yě ká tunwun nǔ e un yi wa é ǎ, ɖó káká wá jɛ hwenɛ́nu ɔ́, un ɖɔ xó ɖěbǔ nú Jwifu lɛ́ɛ ǎ, un ka ɖɔ nú vɔ̌sánú-xwlémawutɔ́ lɛ́ɛ vɔ́vɔ́ ǎ; un ɖɔ nú tonukún lɛ́ɛ lɔ ǎ, un ka ɖɔ nú toxo ɔ́ sín gǎn lɛ́ɛ ǎ, un ka ɖɔ xó ɖé nú mɛ e nyí azɔ̌gán lɛ́ɛ ɖě ǎ. Lo ɔ́, un wá ɖɔ nú yě ɖɔ: mi mɔ ya e mɛ mi ɖe ɔ́, Jeluzalɛ́mu to ɔ́ gba bǐ, bɔ è dǒ hɔntogbó tɔn lɛ́ɛ zo. Mi wá mǐ ní yi vɔ́ Jeluzalɛ́mu dǒ lɛ́ɛ mɛ, bó ná dó ɖó winnyánú élɔ́ te. Un ɖɔ lě e Mawu ce cyɔ́n alɔ jǐ ce gbɔn ɔ́, kpó xó e Dadá ɔ́ ɖɔ nú mì ɔ́ kpó nú yě, bɔ yě bǐ sú xó ɖo tɛn tɔn mɛ bó ɖɔ: “Mi wá mǐ jɛ azɔ̌ wú! Mǐ ná vɔ́ toxo mǐtɔn blóɖó.” Bɔ yě bǐ sɔ́ nǔ kpódó akɔ́nkpinkpan kpó, bó ná wa azɔ̌ ɖagbe énɛ́ ɔ́. Lo ɔ́, ée Sanbaláti Holonayímunu ɔ́ kpódó Toviya Amumɔ́ɔ ví e xo kpó ɖó n'i ɔ́ kpó, kpódó Gɛcɛ́mu Alabíinu ɔ́ kpó se xó énɛ́ ɔ́, yě jɛ cícá mǐ ko jí, bó nɔ́ ɖɔ nyɔmɛ mǐ wú ɖɔ: “Étɛ́ wa wɛ mi ka ɖe ɖo fínɛ́ nɛ́? Gǔ ná fɔ́n dó Dadá ɔ́ jí wɛ mi ka ɖe a?” Un ka ɖɔ sɛ́ dó yě ɖɔ: “Mawu e ɖo sɛ́xwé ɔ́ ɖésú wɛ ná ná ɖu ɖ'é jí mǐ ɖo azɔ̌ élɔ́ kɔn. Mǐ mɛsɛntɔ́ tɔn ná jɛ azɔ̌ jí, bó ná vɔ́ toxo ɔ́ blóɖó. Amɔ̌, midɛɛ lɛ́ɛ ɔ́, mi ɖó acɛ bo ná ɖó nǔ ɖěbǔ ɖo Jeluzalɛ́mu ǎ. Mi ka ɖó acɛ e ɖu gǎn ɖo to ɔ́ mɛ ɔ́ ɖě ǎ. Mɛ ɖé ní má flín mi ɖo to ɔ́ mɛ gbeɖé ó.” Eliyacivu vɔ̌sánú-xwlémawutɔ́ ɖaxó ɔ́ jɛ azɔ̌ jí, é kpódó gbɛ̌ tɔn vɔ̌sánú-xwlémawutɔ́ lɛ́ɛ kpó. Yě bló Lɛ̌ngbɔ́hɔntogbó lɛ́ɛ ɖó. Ée yě jó hɔntogbó énɛ́ ɔ́ nú Mawu ɔ́, yě wá dó hɔn lɛ́ɛ. Yě bló dǒ ɔ́ ɖó káká yi kpe gaga e è nɔ ylɔ́ ɖɔ kanwe ko (100) lɛ́ɛ kɔn, bó lɛ́ dín d'é nu káká wá kpe gaga e è nɔ ylɔ́ Hananɛ́li ɔ́ kɔn. Jelikonu lɛ́ɛ bɔdó yě wú fínɛ́ tlóló bó ɖo azɔ̌ wa wɛ, bɔ Zakúu Imulíi ví ɔ́ bɔd'é wú. Hweví Hɔntogbó ɔ́, Ha-Senáa ví lɛ́ɛ wɛ bló. Ée yě bló hɔntogbó ɔ́, yě gbá xɔ ɖ'é ta, bó dó gan e è nɔ dó sú hɔn lɛ́ɛ, kpódó sɛxlo lɛ́ɛ kpó. Mɛlemɔti Wuliya ví, Hakɔ́si vívú ɔ́ wɛ ɖo azɔ̌ wa wɛ ɖo Ha-Senáa ví lɛ́ɛ kpá, bɔ Mɛculamu Bɛlɛkya ví, Mɛcezaveɛli vívú ɔ́ jɛ fínɛ́, bɔ Sadɔ́ku Baana ví ɔ́ bɔ d'é wú. È mɔ mɛ énɛ́ lɛ́ɛ ɔ́, è nǎ mɔ Tekowanu lɛ́ɛ. Tekowanu lɛ́ɛ ɔ́, tonukún yětɔn lɛ́ɛ gbɛ́ ɖɔ émí kún ná nɔ mɛ e ɖo azɔ̌ ɔ́ nu lɛ́ɛ glɔ́ bó ná wa azɔ̌ ó. Hɔntogbó Yecana tɔn ɔ́, Yoyada Paseyaxi ví ɔ́ kpódó Mɛculamu Besodiya ví ɔ́ kpó wɛ bló. Ée yě bló hɔntogbó ɔ́, yě dó hɔnvǐnɔ ná, bó dó gan e è nɔ dó sú hɔn ná lɛ́ɛ kpódó sɛxlo lɛ́ɛ kpó. Bɔ Mɛlatia Gabawɔ́ɔnnu ɔ́ kpódó Yadɔ́ni Mɛlɔnɔtinu ɔ́ kpó ɖo azɔ̌ wa wɛ ɖo mɛ énɛ́ lɛ́ɛ kpá. Mɛ ɖěvo lɛ́ɛ lɛ́ ɖo fínɛ́ bó gosín Gabawɔ́ɔn kpó Misipa kpó bó ɖo azɔ̌ wa wɛ dó tokpɔngán Efláti zǎnzǎnhwe jí tɔn ɔ́ sín acɛ mɛ. È sɛ yi zaan ɔ́, è nǎ mɔ ganvɔzɔ́watɔ́ Wuziyɛ́li Haaxáya ví ɔ́, bó ná mɔ céluzɔ́watɔ́ Hananiya. Ée yě wá fí e dǒ ɔ́ gbló ɖe é ɔ́, yě fó azɔ̌ yětɔn ɖo Jeluzalɛ́mu. È mɔ yědɛɛ lɛ́ɛ ɔ́, è nǎ mɔ Hlefaya Uu ví e kpa acɛ dó tokpɔnla Jeluzalɛ́mu tɔn vlɔ̌ nu é. È yi zɔ zaan ɔ́, è nǎ mɔ Yedaya Halumafu ví ɔ́, bɔ fí e wa azɔ̌ ɖe wɛ éyɛ́ ɖe ɔ́ kpan nukɔn xwé tɔn, bɔ Hatúci Hacavunɛ́ya ví ɔ́ bɔ dó wǔ tɔn. Malukíya Halimu ví ɔ́ kpó Hacúvu Paxáti-Mɔwabu ví ɔ́ kpó ká ɖo azɔ̌ wa wɛ ɖo akpá e xwé kpe gaga myɔkpó lɛ́ɛ tɔn ɖe é. Calúmu Ha-Lohɛci ví e nyí gǎn nú tokpɔnla Jeluzalɛ́mu tɔn vlɔ̌ é ɖo azɔ̌ wa wɛ ɖo yě kpá, é kpódó vǐ tɔn nyɔ̌nu lɛ́ɛ kpó. Dodomɛ Hɔntogbó ɔ́ Hanúni kpódó Zanɔwáxinu lɛ́ɛ kpó wɛ bló. Ée yě bló hɔntogbó ɔ́, yě dó hɔnvǐnɔ ná, bó dó gan e è nɔ dó sú hɔn ná lɛ́ɛ kpó sɛxlo lɛ́ɛ kpó. Yě lɛ́ wa azɔ̌ ɖo dǒ ɔ́ wú. Fí e yě wa azɔ̌ ɖo dǒ ɔ́ wú gbɔn lɛ́ɛ ná ɖó nǔjlɛ́kpo afɔwe kanwe ko (500) mɔ̌; yě wa azɔ̌ káká wá Zunkɔ́ Hɔntogbó ɔ́ kɔn. Zunkɔ́ Hɔntogbó ɔ́, Malukíya Hlekávu ví e nyí tokpɔnla Bɛti-Kɛlɛ́mu sín gǎn ɔ́ wɛ vɔ́ bló ɖó. Ée é vɔ́ bló ɖó ɔ́, é dó hɔnvǐnɔ ná, bó dó gan e è nɔ dó sú hɔn ná lɛ́ɛ, bó dó sɛxlo lɛ́ɛ. Tɔjɔtɛn Hɔntogbó ɔ́, Calúmu Kɔlu-Hozée ví e nyí tokpɔnla Misipa tɔn ɔ́ sín gǎn ɔ́ wɛ bló. Ée é vɔ́ hɔntogbó ɔ́ bló ɖó ɔ́, é gbá xɔ ɖó ta tɔn, bó dó hɔnvǐnɔ ná, bó dó gan e è nɔ dó sú hɔn lɛ́ɛ kpódó sɛxlo lɛ́ɛ kpó. É lɛ́ wa azɔ̌ ɖo dǒ ɔ́ wú ɖo Silowée tɔ ɔ́ kpá, ɖo axɔ́sú ɔ́ sín jikpá kpódó kpekán e jí è nɔ gbɔn bo nɔ yi Davídi Toxo ɔ́ mɛ é kpán tɛ́ntin. È sɛ yi zɔ zaan ɔ́, Nɛɛmíi Azubúki ví é nyí gǎn nú tokpɔnla Bɛti-Súu tɔn sín wevlɔ́ɖó ɔ́ wɛ ɖo azɔ̌ wa wɛ ɖo fínɛ́. É wa azɔ̌ káká yi Davídi kúxwé, káká gbɔn tɔ e è kun é kɔn káká yi ahwankpá sɔ́ja e nɔ cɔ́ axɔ́sú ɔ́ lɛ́ɛ é tɔn kɔn. Levíi ví lɛ́ɛ wɛ bɔdó Nɛɛmíi wú bó ɖo azɔ̌ wa wɛ; yě wɛ nyí: Hlehúmu Bani ví ɔ́ kpódó Hacaviya e nyí gǎn nú tokpɔnla Keyila tɔn sín vlɔ̌ é kpó; tokpɔnla ɔ́ sín acɛ mɛ wa azɔ̌ dó wɛ é ɖe. É kpódó Binuyi Henadadi ví e nyí gǎn nú tokpɔnla Keyila tɔn sín vlɔ̌ é kpó, kpódó Ezɛ́ɛ Yecúwa ví e nyí gǎn ɖo Misipa é kpó. Éyɛ́ wɛ bló dǒ ɔ́ ɖó ɖo fí e kpan nukɔn xɔ e mɛ ahwanlyánnú lɛ́ɛ nɔ é, bó lɛ́ wa azɔ̌ ɖo dǒ ɔ́ sín zwe jí. Balúki Zabáyi ví ɔ́ wɛ bɔdó Ezɛ́ɛ wú bó ván kan bo wa azɔ̌ bɛ́ sín dǒzwe ɔ́ jí káká yi hɔntogbó vɔ̌sánú-xwlémawutɔ́ ɖaxó Eliyacivu tɔn ta. È yi zɔ kpɛɖé ɔ́, Mɛlemɔti Wuliya ví Hakɔ́si vívú ɔ́ wɛ wa azɔ̌ sín Eliyacivu sín hɔntogbó jí káká yi fí e xwé tɔn nɔ te ɖó é. Vɔ̌sánú-xwlémawutɔ́ e ɖo Jeluzalɛ́mu kanmɛ lɛ́ɛ ɖo azɔ̌ wa wɛ ɖo Mɛlemɔti kpá. Bɛnjamɛ́ɛ kpó Hacúvu kpó wa azɔ̌ ɖo fí e kpan nukɔn xwé yětɔn é, bɔ Azalya Maaseya ví Ananíya vívú ɔ́ ka wa azɔ̌ ɖo xwé éyɛ́ tɔn kpá. Fí e jɛ fínɛ́ ɔ́ Binuyi Henadadi vívú ɔ́ wɛ wa azɔ̌ ɖo fínɛ́ ɖo Azalya xwé kpódó dǒzwe ɔ́ kpó tɛ́ntin. Palalu Wuzáyi ví ɔ́ ká wa azɔ̌ ɖo dǒzwe ɔ́ kpódó kpe gaga ɖaxó e ɖo axɔ́sú ɔ́ xwé nukɔn ɖibla yi fí e sɔ́ja e nɔ cɔ́ hɔn ɔ́ mɛ lɛ́ɛ nɔ́ nɔ é kpó. È yi zɔ kpɛɖé ɔ́, è nǎ mɔ Pedaya Palewɔ́ci ví ɔ́, kpódó mɛ kpaa e nɔ wa azɔ̌ ɖo Mawu xwé gbe, bó nɔ́ nɔ Ofɛ́lu lɛ́ɛ kpó. Yědɛɛ lɛ́ɛ wa azɔ̌ káká yi kpe gaga e ɖo dǒzwe e ɖo zǎnzǎnhwe jí nú Sinhɔntogbó é kɔn. Tekowanu lɛ́ɛ wɛ jɛ fínɛ́ bó wa azɔ̌ ɖo fí e kpan nukɔn tɛnmɛ e ɖo kpe gaga e ɖo zwe ɔ́ kpó Ofɛ́lu dó ɔ́ kpó tɛ́ntin é. Bɛ́ sín hɔntogbó sɔ́ lɛ́ɛ tɔn kɔn ɔ́, vɔ̌sánú-xwlémawutɔ́ lɛ́ɛ wɛ wa azɔ̌ ɖo fínɛ́. Mɛ ɖokpó ɖokpó wa azɔ̌ ɖo xwé tɔn nukɔn. Đo zɔ zaan ɔ́, Sadɔ́ku Imumɛ́ɛ ví ɔ́ wɛ wa azɔ̌ ɖo fínɛ́. É lɔ ɔ́, xwé tɔn nukɔn wɛ é wa azɔ̌ ɖe. Cemaya Cekaniya ví e nɔ́ cɔ́ hɔntogbó zǎnzǎnhwe jí tɔn ɔ́ lɔ wa azɔ̌ ɖo fínɛ́. Fí e jɛ fínɛ́ ɔ́, Hananiya Cɛlɛmiya ví ɔ́ kpódó Hanúni Saláfu ví ayizɛ́ngɔ́ ɔ́ kpó wɛ wa azɔ̌ ɖo fínɛ́. Đo Hanúni kpá fínɛ́ ɔ́, Mɛculamu Bɛlɛkya ví ɔ́ wɛ wa azɔ̌ ɖo dǒ e ɖo xwé tɔn nukɔn é wú. È lɛ̌ sɛ yi zɔ kpɛɖé ɔ́, ganvɔnútuntɔ́ Malukíya wɛ wa azɔ̌ káká wá xwé e è sɔ́ nú mɛ kpaa e nɔ wa azɔ̌ ɖo Mawu xwé lɛ́ɛ kpódó ajɔ̌watɔ́ lɛ́ɛ kpó, bɔ é ɖo Mifukadi sín hɔntogbó nukɔn é kɔn. É wa azɔ̌ káká wá fí e mɛcɔ́tɔ́ lɛ́ɛ nɔ́ nɔ ɖo dǒzwe ɔ́ jí é. Ganvɔnútuntɔ́ ɖě lɛ́ɛ kpódó ajɔ̌watɔ́ lɛ́ɛ kpó wa azɔ̌ ɖo fí e kpo bó ɖo fí e mɛcɔ́tɔ́ lɛ́ɛ nɔ́ nɔ é kpódó Lɛ̌ngbɔ́ Hɔntogbó ɔ́ kpó tɛ́ntin. Ée Sanbaláti se ɖɔ mǐ Jwifu lɛ́ɛ jɛ azɔ̌ jí bó ná vɔ́ Jeluzalɛ́mu dó lɛ́ɛ bló ɖó ɔ́, é sin xomɛ n'i tlala, bɔ é jɛ mǐ ko jí. É nɔ́ ɖɔ ɖo to tɔn mɛ nu lɛ́ɛ kpódó sɔ́ja Samalíi tɔn lɛ́ɛ kpó nukɔn ɖɔ: Jwifu nǔvɔ́nɔ lɛ́ɛ ɔ́, étɛ́ ná tɛ́nkpɔ́n wɛ yě ká ɖe? Yě ná sixú kpé wú bó wa azɔ̌ ɔ́ kpé, bó ná sá vɔ̌ nú Mawu a? Awǐnnya e è ko gba hánnyá gbɔn myɔ mɛ lɛ́ɛ ɔ́, yě ná cyán bǐ, bó ná mɛ dǒ ɔ́ bǐ kpé égbé din ka wɛ a? Toviya Amumɔ́ɔ ví ɔ́ nɔ Sanbaláti kpá dɔ̌n, bó ɖɔ: “Étɛ́ mɛ wɛ yě ká ɖe? Ayǐsájɛ yǎyá na bo xá awǐnnyadó énɛ́ ɔ́ jí ɔ́, bǐ jɛ́n ná mu.” Un ka jɛ ɖɛ xo jí ɖɔ: “Mawu mǐtɔn, a se lě e kɛntɔ́ ɖo mǐ ko wɛ gbɔn é; nǔ nyanya e ɖɔ dó mǐ wú wɛ yě ɖe ɔ́, blǒ bónú bǐ ní mlɛ́ yě. Kɛntɔ́ ní vɔ yě. È nǐ bɛ́ yě bǐ yi kannumɔgbénu. Ma sɔ́ hwɛ yětɔn lɛ́ɛ kɛ yě ó; ma súnsún agɔ e yě jɛ dó we ɔ́ ó, ɖó dǒ e bló ɖó wɛ mǐ ɖe ɔ́ zɔ́n bɔ yě kpɔ́n nukún mɛ nú mǐ.” Lě e mǐ vɔ́ dǒ ɔ́ bló ɖó gbɔn é nɛ́. Mǐ bló dǒ ɔ́ ɖó mɔ̌ káká lɛ́ dó yi ɖó wevlɔ́ɖó, bɔ mɛ ɖokpó ɖokpó wa azɔ̌ kpó jlǒ ɖagbe kpó. Lo ɔ́, ée Sanbaláti kpó Toviya kpó Alabíinu lɛ́ɛ kpó, kpódó Amumɔ́ɔ ví lɛ́ɛ kpó, kpódó Acidɔ́dinu lɛ́ɛ kpó se ɖɔ è ɖo Jeluzalɛ́mu dǒ lɛ́ɛ bló ɖó wɛ, bɔ azɔ̌ ɖo nukɔn yi wɛ ganjí, bɔ fí e dǒ ɔ́ mu ɖe lɛ́ɛ ɔ́, è ɖo bǐ sú wɛ ɔ́, xomɛ sin yě tlala, bɔ yě ɖó gbe kpɔ́, bó ná wá tɔ́n ahwan Jeluzalɛ́mu toxo ɔ́, bó ná dó hunnyahunnya to ɔ́ mɛ. Énɛ́ wú ɔ́, mǐ sa vo nú Mawu mǐtɔn, bó ɖe gbɛtɔ́, bɔ mɛ ɖě nɔ́ nya xɛ ɖo mǐ jí zǎn mɛ, bɔ mɛ ɖě nɔ́ nya kéze, bónú kɛntɔ́ lɛ́ɛ ja ahwan tɔ́n mǐ gbé ɔ́, yě ná ɖɔ nú mǐ. Mǐ ɖ'é wú mɔ̌ có Judáanu lɛ́ɛ ɖɔ: “Nǔ e gblé lɛ́ɛ sukpɔ́ dín, bɔ agbɔ̌n ká kó kpé azɔ̌watɔ́ lɛ́ɛ. Mi sixú kpé wú bó bló bǐ kpé gbeɖé ǎ.” Kɛntɔ́ mǐtɔn lɛ́ɛ ɔ́, yědɛɛ lɛ́ɛ ɖo linlin wɛ ɖɔ mǐ ná ɖo manywɛ́ mɛ, bɔ émí ná wá fyán mǐ ajijimɛ bó ná vívá kún nú mǐ bɔ azɔ̌ xó ná fó. Jwifu e ɖo akpá e xwé kɛntɔ́ mǐtɔn lɛ́ɛ ɖe lɛ́ɛ wá mǐ gɔ́n azɔn wǒ, bó wá gba akpá nú mǐ; yě ɖɔ ali ɖěɖě e gbɔn gbé kɛntɔ́ mǐtɔn lɛ́ɛ ja bó ná wá kpé mǐ wú ɔ́ nú mǐ. Un wá mɔ fí ɖé lɛ́ɛ ɖo dǒ ɔ́ gúdo, fí e è ma ná mɔ mɛ ɖe ǎ é, bó ɖó sɔ́ja lɛ́ɛ fínɛ́. Un nɔ kplé akɔta ɖokpó ɔ́ sín mɛ lɛ́ɛ ɖó fí ɖokpó ɔ́, bɔ yě hɛn hwǐ kpó hwǎn kpó, kpódó aɖǐgá kpó. Ée un ɖó mɛ fí tɛnmɛ tɛnmɛ énɛ́ lɛ́ɛ ɔ́, un wá ɖɔ nú tonukún lɛ́ɛ kpódó hwɛɖɔtɔ́ to ɔ́ mɛ tɔn lɛ́ɛ kpó, kpódó mɛ e ɖo fínɛ́ lɛ́ɛ bǐ kpó ɖɔ: “Mi ma ɖi xɛsi nú kɛntɔ́ mitɔn lɛ́ɛ ó; mi flín ɖɔ Aklúnɔ ɔ́, nǔɖaxó wɛ é nyí, bó nyí nǔsísí. Mi fun ahwan dó nɔví mitɔn lɛ́ɛ, vǐ mitɔn súnnu lɛ́ɛ, vǐ mitɔn nyɔ̌nu lɛ́ɛ, asi mitɔn lɛ́ɛ kpódó mɛ e ɖo xwé mitɔn gbe lɛ́ɛ kpó tamɛ.” Kɛntɔ́ mǐtɔn lɛ́ɛ se ɖɔ gbě mǐtɔn e blá wɛ émí ɖe ɔ́, mǐ kó se, bɔ yě mɔ ɖɔ nǔ e lin dó mǐ wú wɛ émí ɖe ɔ́ Mawu kó flí xwe. Énɛ́ ɔ́, mǐ bǐ lɛ́ kɔ wá yi dǒ ɔ́ kɔn bɔ azɔ̌ ɔ́ lɛ́ bɛ́. Amɔ̌, bɛ́ sín gbe énɛ́ gbe ɔ́, azɔ̌gbɛ́ ce vlɔ̌ɖówe jɛ́n nɔ́ ɖo azɔ̌ wa wɛ, bɔ mɛ e kpo lɛ́ɛ nɔ́ hɛn hwǎn kpó gǎglónú kpó gǎ kpó, bó nɔ́ dó ganwu. Gǎn lɛ́ɛ nɔ́ ɖo nukún kpé dó Judáanu e ɖo azɔ̌ wa wɛ ɖo dǒ ɔ́ wú lɛ́ɛ bǐ wú. Mɛ e hɛn agban lɛ́ɛ ɔ́, alɔ ɖokpó wɛ yě nɔ́ dó wa azɔ̌ ná, ɖó alǐnnyánú ɖo alɔ yětɔn wegɔ́ ɔ́ mɛ. Xɔtlɛ́tɔ́ e ɖo azɔ̌ wa wɛ ɖo dǒ ɔ́ wú lɛ́ɛ ɖokpó ɖokpó blá hwǐ tɔn dó alin. Mɛ ɖokpó xwedó mì bó ɖo gbesisɔ mɛ, bó ná kún kpɛn hwebǐnu. Un ka ɖɔ nú tonukún lɛ́ɛ kpódó hwɛɖɔtɔ́ to ɔ́ mɛ tɔn lɛ́ɛ kpó, kpódó mɛ e ɖo fínɛ́ lɛ́ɛ bǐ kpó ɖɔ: “Azɔ̌ e kpo bɔ mi ná wa gbɔn dǒ ɔ́ wú káká yi fó ɔ́ sukpɔ́. Mǐ ɖíe ká má mǐɖée bó ɖo zɔzɔ bó lín dó mǐɖée e. Ényí mi ɖo fí ɖěbǔ bó se kpɛn gbe hǔn, mi sɛ kplé dó wǔ ce, nú Mawu mǐtɔn ná fun ahwan xá kɛntɔ́ mǐtɔn lɛ́ɛ nú mǐ.” Mǐ nɔ́ fɔ́n ayǐtéhɔ̌nnu bó nɔ́ jɛ azɔ̌ jí, bó nɔ́ wa azɔ̌ káká bɔ zǎn nɔ́ kú. Mǐ mɛ e ɖo azɔ̌ wa wɛ lɛ́ɛ wevlɔ́ɖó ká nɔ́ hɛn alǐnnyánú alɔ mɛ. Hwe énɛ́ ɔ́ nu ɔ́, un ná gbe bɔ gǎn ɖokpó ɖokpó kpó mɛ e ɖo azɔ̌ wa xá ɛ wɛ lɛ́ɛ kpó nɔ́ nɔ Jeluzalɛ́mu toxo ɔ́ mɛ zǎn mɛ, bó ná sixú nya xɛ ɖo mǐ jí, bó ná wa azɔ̌ kéze. Mɛ e kpó nyi kpó kpo ɖo kpɔ́ lɛ́ɛ, kpódó azɔ̌gbɛ́ ce lɛ́ɛ kpó, kpódó mɛcɔ́tɔ́ e nɔ kplá mì lɛ́ɛ kpó ɔ́, wǔ lɛ gbé jɛ́n mǐ nɔ́ ja bó nɔ́ ɖe awu mǐtɔn. Gbe ɖokpó tíin bɔ Jwifu súnnu kpódó nyɔ̌nu kpó wá jɛ nɔví yětɔn Jwifu ɖě lɛ́ɛ sín hwɛ kpó adǎn kpó. Mɛ ɖé lɛ́ɛ ɖɔ: “Mǐdɛɛ lɛ́ɛ ɔ́, vǐ mǐtɔn súnnu kpó nyɔ̌nu kpó sukpɔ́. È nǐ ná nǔɖuɖu mǐ ní sukpɔ́, bónú mǐ ná ɖu bó ná nɔ gbɛ.” Mɛ ɖě ɖɔ: “Cóbónú mǐ ná sixú mɔ nǔ ɖu adɔ hwenu ɔ́, è nɔ byɔ́ mǐ ɖɔ mǐ ní to sɔ́ gle mǐtɔn lɛ́ɛ, vǐwungbo mǐtɔn lɛ́ɛ, káká jɛ xwé mǐtɔn lɛ́ɛ ɖésú jí ɖó gbanu hwɛ̌.” Mɛ ɖěvo lɛ́ɛ lɛ́ ɖɔ: “Cóbónú mǐ ná sixú sú akwɛ́jɔ Dadá ɔ́ tɔn lɛ́ɛ ɔ́, gle mǐtɔn lɛ́ɛ kpó vǐwungbo mǐtɔn lɛ́ɛ kpó wɛ mǐ nɔ sɔ́ ɖó axɔ́nu hwɛ̌. Có akɔ ɖokpó ɔ́ wɛ mǐ ká nyí, vǐ mǐtɔn lɛ́ɛ gbɔn vo nú nɔví mǐtɔn énɛ́ lɛ́ɛ sín vǐ ǎ, bɔ mǐdɛɛ lɛ́ɛ ɔ́, vǐ mǐtɔn lɛ́ɛ wɛ mǐ nɔ sɔ́ ɖó gbanu, bɔ vǐ mǐtɔn nyɔ̌nu ɖé lɛ́ɛ ɖe, bɔ mǐ kó sa. Đěwagbɔn sɔ́ tíin nú mǐ ǎ, ɖó gle mǐtɔn lɛ́ɛ kpódó vǐwungbo mǐtɔn lɛ́ɛ kpó ko húzú axɔ́tɔ́nɔ mǐtɔn lɛ́ɛ tɔn.” Ée un se xó énɛ́ lɛ́ɛ bó se vo énɛ́ lɛ́ɛ e sa wɛ yě ɖe ɔ́, xomɛ sin mǐ ɖésú. Agban kpinkpɛn énɛ́ lɛ́ɛ e tonukún lɛ́ɛ kpó toxo ɔ́ sín gǎn lɛ́ɛ kpó ɖíɖá nɔví yětɔn lɛ́ɛ ɔ́, un tunwun ɖɔ un ná ylɔ́ kplé ɖaxó ɖokpó, bó ná kɛ nu d'é wú nú yě. Nǔgbó ɔ́, un wá kplé yě, bó ɖɔ nú yě ɖɔ: “Nɔví mǐtɔn e sɔ́ yěɖée sa xá toɖévomɛnu, bó húzú kannumɔ lɛ́ɛ ɔ́, mǐ vɔ́ yě xɔ lě e mǐ kpé wú gbɔn é. Din ɔ́, mi ɖésúnɔ wɛ nɔ́ sa nɔví mitɔn lɛ́ɛ, bɔ é ka lɛ́ nyí to mǐtɔn mɛ nu lɛ́ɛ wɛ mi nɔ sa yě xá.” Ée un ɖɔ mɔ̌ ɔ́, yě mɔ nǔɖé ɖɔ ǎ bo gbɔ bo xwɛ. Un lɛ́ yí xó bo ɖɔ: nǔ e wa wɛ mi ɖe ɔ́ nyɔ́ ǎ. Mi tunwun ɖɔ émí ɖó ná ɖó sísí nú Mawu ɖo walɔ émítɔn mɛ, bó ná gló zun ɖo kɛntɔ́ mǐtɔn akɔta ɖěvo lɛ́ɛ sí ǎ cé? Nyɛ lɔ kpó mɛ e kpó nyɛ kpó ɖo kpɔ́ lɛ́ɛ kpó, kpódó azɔ̌gbɛ́ ce lɛ́ɛ kpó nya akwɛ́ nú yě, bó nya jinukún nú yě. Nǔ ɖo mɔ̌ có un ɖo byɔ̌byɔ́ mi wɛ ɖɔ mǐ ní jó nǔ e yě nya ɖo mǐ sí lɛ́ɛ bǐ dó nú yě. Mɛ e ɖu axɔ́ dó mi lɛ́ɛ ɔ́, mi sɔ́ gle yětɔn, vǐwungbo yětɔn, olívugbo yětɔn kpó xwé yětɔn kpó jó nú yě égbé din, vǐ e akwɛ́ e mi nya nú yě ɔ́ ná ji ɔ́, vǐ e jinukún e mi nya nú yě ɔ́ ná ji ɔ́, vǐ e vɛ̌ɛn abǐ ami e mi nya nú yě ɔ́ ná ji ɔ́, mi jó bǐ dó nú yě. Énɛ́ ɔ́, yě yí gbe ɖɔ: “Mǐ ná bló nǔ e a ɖɔ nú mǐ lɛ́ɛ. Mǐ ná fɔ nǔ e mǐ yí ɖo yě sí ɖó gbanu lɛ́ɛ bǐ jó nú yě; mǐ sɔ́ ná byɔ́ nǔɖé yě ǎ.” Ée yě ɖɔ mɔ̌ ɔ́, un ylɔ́ vɔ̌sánú-xwlémawutɔ́ lɛ́ɛ kplé, bó byɔ́ axɔ́tɔ́nɔ lɛ́ɛ ɖɔ yě ní xwlé ɖo yě nukɔn ɖɔ akpá e émí dó ɔ́, émí ná bló ɖ'é jí. Énɛ́ gúdo ɔ́, un húnhún awu ce bó ɖɔ: Mawu ní húnhún mɛ e ma ná bló nǔ e yě ɖɔ din lɛ́ɛ ɖ'é jí ǎ é, lě e un húnhún awu ce gbɔn é. Ní ɖe yě sín vǐ yětɔn lɛ́ɛ kpó asi yětɔn lɛ́ɛ kpó kɔn, bó ɖe yě sín nyɔ̌ná yětɔn bǐ kɔn nú yě ní jɛ agbǎ. Énɛ́ ɔ́, kplékplémɛ ɔ́ bǐ yí gbe bó ɖɔ: “ Amǐ, ní nyí mɔ̌.” Yě bǐ kpa susu nú Mawu Mavɔmavɔ, bó ka bló nǔ e yě ɖɔ ɔ́ ɖ'é jí. Ée è sɔ́ mì tokpɔngán Jwifu lɛ́ɛ tɔn ɖó tokpɔn Judáa tɔn nu ɔ́, xwe wěwe wɛ un bló ɖo gǎn jǐ; xwe e xwe Dadá Aatazɛɛzɛsi ɖo xwe ko bló wɛ ɖo zinkpo jí ɔ́ wɛ è sɔ́ mì tokpɔngán, bɔ un nɔ gǎn jí káká jɛ hwenu e é ɖo xwe gban-nukún-we (32) bló wɛ ɖo zinkpo jí é. Đo xwe wěwe énɛ́ e un bló lɛ́ɛ mɛ ɔ́, nyɛ kpó mɛ e ɖo azɔ̌ wa xá mì wɛ lɛ́ɛ ɖě kpó yí nǔ e tokpɔngán nɔ yí ɖo toví lɛ́ɛ sí é ɖě ǎ. Lo ɔ́, tokpɔngán e jɛ nukɔn nú mì lɛ́ɛ dó tagba nú togun ɔ́ káká bó nɔ́ yí nǔɖuɖu kpó ahan kpó ɖo yě sí, bó nɔ́ lɛ́ yí akwɛ́gan kanɖé (40) ɖo yě sí d'é jí gbe ɖokpó. Mɛ e nɔ wa azɔ̌ xá tokpɔngán lɛ́ɛ lɔ nɔ táfú togun ɔ́ ɖu. Amɔ̌, nyɛ ɔ́, ɖó sísí e un ɖó nú Mawu ɔ́ wútu ɔ́, un wa nǔ gbɔn mɔ̌ gbeɖé ǎ. É nyɔ́ wa ɔ́, nyi ɖésúnɔ wa azɔ̌ ɖo dǒ ɔ́ wú. Un ɖó dó tɛn e mɛ un ɖe ɔ́ wú, bó xɔ ayǐkúngban mɛɖé tɔn kpɔcɔnu ǎ; azɔ̌gbɛ́ ce e ɖo azɔ̌ wa wɛ ɖo dǒ ɔ́ wú lɛ́ɛ lɔ wa nǔ gbɔn mɔ̌ ǎ. É ɖo mɔ̌ bɔ un nɔ ná nǔɖuɖu toxo ɔ́ sín gǎn Jwifu kantɔn gban (150) kpó jǒnɔ e nɔ gosín to e ɖo to mǐtɔn kpá wá nú mì lɛ́ɛ kpó. Ayǐhɔ́ngbe tɛgbɛ ɔ́, un nɔ ná nyibúsú ɖokpó, lɛ̌ngbɔ́ ayizɛ́n kpódó xɛ kpó. Azǎn wǒ gbe tɛgbɛ ɔ́, è nɔ hɛn vɛ̌ɛn wá nú mì bɔ é nɔ su. Un ɖo nǔ énɛ́ lɛ́ɛ wa wɛ có, nǔ e nyí nǔ bɔ tokpɔngán ɔ́ ɖó acɛ ná lɛ́ɛ ɔ́, un nɔ byɔ́ ɖě ǎ, ɖó azɔ̌ lɛ́ɛ ko nyí agban ɖokpó bó kó kpɛn togun ɔ́. Mawu ce, kpɔ́n dó nǔ e un wa nú togun élɔ́ é wú, bó ná fífá towe mì. Sanbaláti kpódó Toviya kpó, kpódó Gɛcɛ́mu Alabíinu ɔ́ kpó, kpódó kɛntɔ́ mǐtɔn ɖěvo lɛ́ɛ kpó se ɖɔ nyi bló dǒ ɔ́ ɖó kpé, bɔ é sɔ́ kpo fí e dǒ ɔ́ mu ɖe ɔ́ ɖě bɔ è gɔn blǒbló ɖó ǎ, un ka ko dó hɔn lɛ́ɛ ǎ. Sanbaláti kpó Gɛcɛ́mu kpó ka sɛ́ wɛn dó mì ɖɔ nyi ní wá kpé émí ɖo Kefilímu, ɖo Onɔ sín tɔdo ɔ́ mɛ. Yě tunwun ɖɔ émí ná wa nǔ xá mì. Xó e nyɛ ka ɖɔ sɛ́ dó yě ɔ́ ɖíe: “Azɔ̌ e kpo ɖo así ce bɔ un ná wa é sukpɔ́ ɖésú; un sixú wá mi gɔ́n din ǎ. Ényí un jó azɔ̌ dó din bo wá mɔ mi ɖo dɔ̌n ɔ́, azɔ̌ ɔ́ ná nɔ te.” Azɔn ɛnɛ wɛ yě dǒ wɛn ɖokpó ɔ́ sɛ́ dó mì, bɔ nyi lɔ ka nɔ ɖɔ xó ɖokpó ɔ́ sɛ́ dó yě. Azɔn atɔ́ɔ́ngɔ́ ɔ́, Sanbaláti sɛ́ wěma ɖokpó dó mì gbɔn azɔ̌gbɛ́ tɔn ɖokpó jí; é ka sú wěma ɔ́ ǎ. Wěma ɔ́ ɖo ɖiɖɔ wɛ ɖɔ: “È ɖo sise wɛ ɖɔ hwi kpódó mɛ towe lɛ́ɛ kpó ɖo linlin ná fɔ́n gǔ wɛ. Gɛcɛ́mu ko ɖɔ xó énɛ́ ɔ́ nú mì; xó ɔ́ ká ko gba kpé mɛ e ma nyí Jwifu ǎ lɛ́ɛ bǐ mɛ. Énɛ́ ɔ́ wú wɛ a ɖo Jeluzalɛ́mu dó ɔ́ bló ɖó wɛ. È ɖɔ hwi jló ná nyí axɔ́sú enyǐi, káká bɔ a ko ɖe gbeyíɖɔ ɖé lɛ́ɛ, bɔ yě ná jlá gbɔn Jeluzalɛ́mu ɖɔ hwi wɛ nyí Judáa xɔ́sú ɔ́. Dadá ɔ́ ná se xó énɛ́ ɔ́ din. Ényí a ma jló nú é ná se xó énɛ́ ɔ́ ǎ hǔn, wǎ nú mǐ ná ɖɔ xó dó xó ɔ́ wú.” Un ka ɖɔ sɛ́ dó e ɖɔ: “Nǔ e ba ɖɔ wɛ a ɖe nɛ́ lɛ́ɛ ɔ́, xó nǔgbó ɖokpó ɖ'é mɛ ǎ; xó ɖé wɛ a kpa ɖɔ kpowun.” Nǔ e wú yě ɖo mɔ̌ ɖɔ wɛ é ɖíe: Yě tunwun ɖɔ émí ná tɛ́nkpɔ́n bó dó xɛsi mǐ, bónú awakanmɛ ko kú mǐ ɔ́, mǐ na jó azɔ̌ ɔ́ dó. Mawu ce, din ɔ́, dǒ wǔsyɛ́n lanmɛ nú mì. Un wá yi Cemaya Deláya ví Mɛxetaveyɛ́li vívú ɔ́ gɔ́n gbe ɖokpó, ɖó é kpé wú bo wá gɔ̌n ce ǎ. Ée un yi mɔ ɛ ɔ́, é ɖɔ nú mì ɖɔ: “Wǎ mǐ yi Mawu xwé gbe, bó yi adɔ̌gba ɔ́ mɛ, bó ná sú hɔn lɛ́ɛ bǐ dó ta, ɖó kɛntɔ́ towe lɛ́ɛ ná tɔ́n gbě towe zǎn mɛ, bó ná wá hu we.” Un ka yí gbe n'i ɖɔ: un nyí mɛ ná hɔn ɖo kɛntɔ́ nukɔn ɖé ǎ. Đésú ɔ́, hwɛhutɔ́ nyɛ ɖɔhun ná byɔ́ tɛn mímɛ́ bǐ ɔ́ mɛ bó nɔ gbɛ a? Gbeɖé un ná yi dɔ̌n ǎ. Un tunwun ganjí ɖɔ é kún nyí wɛn wɛ é yí sín Mawu gɔ́n, bó ɖo dǐdó mì wɛ ó. Lo ɔ́, Toviya kpó Sanbaláti kpó wɛ dó ajɔ ɛ, bɔ é ɖo xó énɛ́ ɔ́ ɖɔ wɛ, bónú ma ɖi xɛsi bo ná bló nǔ e ɖɔ wɛ é ɖe ɔ́, bó ná jɛ hwɛ mɛ bɔ yě ná dó hɛ̌n mì, bó ná hɛn nyǐkɔ ce blí. Mawu ce, flín nǔ e Toviya kpó Sanbaláti kpó bló é, bó flín nǔ e gbeyíɖɔ nyɔ̌nu Nɔadiya kpó gbeyíɖɔ ɖěɖě e jló ná dó xɛsi mì lɛ́ɛ kpó bló é. È blǒ dǒ ɔ́ ɖó fó ɖo Elúli sun ɔ́ sín azǎn koatɔ́ngɔ́ (25) ɔ́ gbe. Azǎn kanɖé wěwe (52) wɛ è sɔ́ ɖó te bó dó bló ná. Ée kɛntɔ́ mǐtɔn e ɖo to e lɛ́ lɛ̌ dó mǐ lɛ́ɛ mɛ lɛ́ɛ se mɔ̌ ɔ́, xɛsi jɛ yě jí, bɔ winnyá hu yě káká. Yě bǐ wá mɔ ɖɔ azɔ̌ énɛ́ ɔ́, Mawu mǐtɔn sín jlǒ mɛ wɛ é nyí wiwa dó. Hwe énɛ́ ɔ́ nu ɔ́, tonukún Judáa tɔn lɛ́ɛ kpó Toviya kpó nɔ sɛ́ wěma dó yěɖée káká. Jwifu gěgé kpó e kpó nɔ́ blá gbě, ɖó Jwifu ɖé sín vǐsú wɛ é nyí; Jwifu ɔ́ nɔ́ nyí Cekaniya; Aláxi ví wɛ, bɔ éyɛ́ ɖésú ɔ́, vǐ tɔn súnnu Yexoxanáni da Mɛculamu Bɛlɛkya ví ɔ́. È nɔ wá ɖɔ lě e é kpé nǔ wú sɔ é ɖo nukɔn ce, bó nɔ sɔ́ xó ce lɛ́ɛ yi ɖɔ n'i. Mɔ̌ ɖokpó ɔ́, Toviya ɖésúnɔ sɛ́ wěma dó mì, bó ná dó dó xɛsi nú mì. Ée è blǒ dǒ ɔ́ ɖó fó ɔ́, un dó hɔn lɛ́ɛ; énɛ́ ɔ́ gúdo ɔ́, hɔnjínɔtɔ́ lɛ́ɛ, hanjitɔ́ lɛ́ɛ, kpó Levíi ví lɛ́ɛ kpó bɛ́ azɔ̌. Un sɔ́ to ɔ́ dó alɔ mɛ nú nɔví ce Hanáni kpódó Hananiya ahwangán ɔ́ kpó. Hananiya ahwangán ɔ́ wɛ kpa acɛ nú Jeluzalɛ́mu toxo ɔ́. Gbɛtɔ́ ɖeji d'é wú ɖé wɛ nyí nya énɛ́ ɔ́, bó ɖo gbejí nú Mawu hú mɛ gěgé. Énɛ́ ɔ́ gúdo ɔ́, un ɖɔ nú yě ɖɔ: cóbónú è nǎ hun hɔntogbó lɛ́ɛ ɔ́, hwe ná ko tɔ́n bó ná ko yi jǐ tawun. Gbadanu ɔ́, è na sú hɔntogbó lɛ́ɛ, bó dó gan mɛ có hɔnjínɔtɔ́ lɛ́ɛ ná gosín azɔ̌ jí. Jeluzalɛ́munu lɛ́ɛ ná ɖó tito ɖé ɖ'ayǐ nú yě, bɔ mɛ ɖokpó ɖokpó ná ɖo azɔ̌ tɔn jí, ɖo xwé tɔn nukɔn. Jeluzalɛ́mu sín toxo gbló tawun, có gbɛtɔ́ e ɖo toxo ɔ́ mɛ lɛ́ɛ sukpɔ́ ǎ, bɔ xwé gěgé tíin bɔ è ko vɔ́ bló ɖó ǎ. Mawu sɔ́ ayi dó xomɛ nú mì bɔ un kplé tonukún lɛ́ɛ, toxo ɔ́ sín gǎn lɛ́ɛ, kpódó togun ɔ́ bǐ kpó, bó sɔ́ kɛ́n yětɔn. Un mɔ wěma e mɛ è wlǎn mɛ nukɔntɔn e lɛ́ kɔ sín kannumɔgbénu wá lɛ́ɛ sín nyǐkɔ dó é. Nǔ e un mɔ ɖ'é mɛ lɛ́ɛ ɖíe: Mɛ e Dadá Babilɔ́nu tɔn Nabukodonɔzɔ́ɔ kplá yi kannumɔgbénu lɛ́ɛ ɔ́, yě mɛ e lɛ́ kɔ wá Jeluzalɛ́mu kpó yě mɛ e lɛ́ kɔ wá Judáa lɛ́ɛ kpó sukpɔ́ ɖésú. Mɛ ɖokpó ɖokpó lɛ́ kɔ wá yi to tɔn mɛ. Zolobabɛ́li kpó Jozuwée kpó, kpó Nɛ̌ɛmíya kpó, kpó Azalya kpó, kpó Hlaamiya kpó, kpó Naxámani kpó, kpó Mɔdokayi kpó, kpó Bilucáni kpó, kpó Misipɛlɛti kpó, kpó Bigiwayi kpó, kpó Nɛwúmu kpó, kpódó Baana kpó wɛ nɔ yě nu, bó kplá yě wá. Xwédo ɖěɖě e gosín kannumɔgbénu lɛ́ɛ, kpódó mɛ nabí nabí e ɖo xwédo ɖokpó ɖokpó mɛ lɛ́ɛ kpó ɖíe: Palewɔ́ci sín vǐ lɛ́ɛ ɔ́, yě mɛ afɔwó kɛnnɛ wěwe (2.172) wɛ. Cefátiya sín vǐ lɛ́ɛ ɔ́, yě mɛ afɔɖé kɛnnɛ wěwe (372) wɛ. Aláxi sín vǐ lɛ́ɛ ɔ́, yě mɛ nǔwɔntɔn kanɖé wěwe (652) wɛ. Paxáti-Mɔwabu sín vǐ lɛ́ɛ ɔ́, yě mɛ afɔwó-afɛnɛ afɔtɔn-nukún-atɔn (2.818) wɛ; Yecúwa kpó Yowábu kpó ví wɛ nú yě. Elámu sín vǐ lɛ́ɛ ɔ́, yě mɛ afayizɛ́n kanɖé wɛ̌nɛ (1.254) wɛ. Zatú sín vǐ lɛ́ɛ ɔ́, yě mɛ afɛnɛ kanɖé atɔ́ɔ́n (845); Zakáyi sín vǐ lɛ́ɛ ɔ́, yě mɛ nǔwɔntɔn kɛnnɛ (760) wɛ. Binuyi sín vǐ lɛ́ɛ ɔ́, yě mɛ nǔwɔntɔn kanɖé tántɔn (648) wɛ. Bevayi sín vǐ lɛ́ɛ ɔ́, yě mɛ nǔwɔntɔn koatɔ́n-nukún-atɔn (628) wɛ. Azigadi sín vǐ lɛ́ɛ ɔ́, yě mɛ afɔwó-afɔɖé kantɔn-nukún-we (2.322) wɛ. Adonikámu sín vǐ lɛ́ɛ ɔ́, yě mɛ nǔwɔntɔn kanɖé koatɔ́n nukún we (667) wɛ. Bigiwayi sín vǐ lɛ́ɛ ɔ́, yě mɛ afɔwó kanɖé koatɔ́n nukún we (2.067) wɛ. Adini sín vǐ lɛ́ɛ ɔ́, yě mɛ nǔwɔntɔn kanɖé afɔtɔn (655) wɛ. Atɛ́ɛ sín vǐ lɛ́ɛ ɔ́, yě mɛ kanwe afɔtɔn-nukún-atɔn (98) wɛ. Yexizikiya ví wɛ nú yě. Hacúmu sín vǐ lɛ́ɛ ɔ́, yě mɛ afɔɖé kantɔn tántɔn (328) wɛ. Besayi sín vǐ lɛ́ɛ ɔ́, yě mɛ afɔɖé kantɔn nukún-ɛnɛ (324) wɛ. Halifu sín vǐ lɛ́ɛ ɔ́, súnnu kanwe gban-nukún-we (112) wɛ. Gabawɔ́ɔnnu lɛ́ɛ ɔ́, yě mɛ kanwe afɔtɔn (95) wɛ. Bɛteleyɛ́munu lɛ́ɛ kpó Nɛtofanu lɛ́ɛ kpó ɔ́, yě mɛ kɛnnɛ koatɔ́n-nukún-atɔn (188) wɛ. Anatɔ́tinu lɛ́ɛ ɔ́, yě mɛ kantɔn tántɔn (128) wɛ. Bɛti-Azimawɛ́tinu lɛ́ɛ ɔ́, yě mɛ kanɖé-nukún-we (42) wɛ. Kiliyati-Yealimunu lɛ́ɛ kpó Kefilanu lɛ́ɛ kpó, kpó Beelɔ́tinu lɛ́ɛ kpó ɔ́, yě mɛ nǔwɔntɔn kantɔn ko nukún-atɔn (743) wɛ. Hlamanu lɛ́ɛ kpó Gɛvanu lɛ́ɛ kpó ɔ́, yě mɛ nǔwɔntɔn ko-nukún-ɖokpó (621) wɛ. Mikumasinu lɛ́ɛ ɔ́, yě mɛ kantɔn-nukún-we (122) wɛ. Betɛ́linu lɛ́ɛ kpó Ayíinu lɛ́ɛ kpó ɔ́, yě mɛ kantɔn-nukún-atɔn (123) wɛ. Nɛbo ɖě ɔ́ nu lɛ́ɛ ɔ́, yě mɛ kanɖé wěwe (52) wɛ. Elámu ɖě ɔ́ sín vǐ lɛ́ɛ ɔ́, yě mɛ afayizɛ́n kanɖé wɛ̌nɛ (1.254) wɛ. Halimu sín vǐ lɛ́ɛ ɔ́, yě mɛ afɔɖé kantɔn wɛ (320). Jelikonu lɛ́ɛ ɔ́, yě mɛ afɔɖé kantɔn ko atɔ́ɔ́n wɛ (345). Lodinu lɛ́ɛ kpó Hadídinu lɛ́ɛ kpó Onɔnu lɛ́ɛ kpó ɔ́, yě mɛ nǔwɔntɔn kantɔn-nukún-ɖokpó wɛ (721). Senáanu lɛ́ɛ ɔ́, yě mɛ afɔwó-afɔtɛ́nnɛ kantɔn wǒ (3.930) wɛ. Vɔ̌sánú-xwlémawutɔ́ gbɛ́ta lɛ́ɛ ɔ́, yě mɛ afɛnɛ kɛnnɛ wǎtɔn (973) wɛ; Yecúwa ví wɛ nú yě. Imumɛ́ɛ sín vǐ lɛ́ɛ ɔ́, yě mɛ afatɔ́n kanɖé wěwe (1.052) wɛ. Pacehúu sín vǐ lɛ́ɛ ɔ́, yě mɛ afatɔ́n afɔɖé kanɖé tɛ́nwe (1.247) wɛ. Halimu sín vǐ lɛ́ɛ ɔ́, yě mɛ afatɔ́n afɔtɔn nukún we (1.017) wɛ. Levíi ví lɛ́ɛ sín gbɛ̌ta ɔ́, yě mɛ kanɖé gban-nukún-ɛnɛ (74) wɛ ɖ'é mɛ. Yecúwa kpó Kadimiyɛ́li kpó sín vǐ wɛ nú yě; Hodiwa kún mɛ wɛ yě jɔ ɖe. Gbɛ̌ta e nɔ ji han nú Mawu lɛ́ɛ ɔ́, Asáfu sín vǐ wɛ yě nyǐ; yě mɛ kantɔn koatɔ́n-nukún-atɔn (148) wɛ. Gbɛ̌ta e nɔ́ nɔ hɔn jí lɛ́ɛ ɔ́, yě mɛ kantɔn afɔtɔn-nukún-atɔn (138) wɛ ɖ'é mɛ. Calúmu kpó Atɛ́ɛ kpó, kpó Talumɔ́ni kpó, kpó Akúvu kpó, kpó Hatíta kpó, kpódó Covayi kpó sín vǐ wɛ nú yě. Mɛ kpaa e nɔ wa azɔ̌ ɖo Mawu xwé lɛ́ɛ é ɖíe: Siha ví lɛ́ɛ, Hasafu ví lɛ́ɛ, Tabawɔ́ti ví lɛ́ɛ, Kelɔ́si ví lɛ́ɛ, Sia ví lɛ́ɛ, Padɔ́ni ví lɛ́ɛ, Levana ví lɛ́ɛ, Hagáva ví lɛ́ɛ, Calumayi ví lɛ́ɛ, Hanáni ví lɛ́ɛ, Gidɛ́li ví lɛ́ɛ, Gaxáa ví lɛ́ɛ, Hleaya ví lɛ́ɛ, Hlesini ví lɛ́ɛ, Nɛkoda ví lɛ́ɛ, Gazamu ví lɛ́ɛ, Wuza ví lɛ́ɛ, Paseya ví lɛ́ɛ, Besayi ví lɛ́ɛ, Mɛwunimu ví lɛ́ɛ, Nɛficisímu ví lɛ́ɛ, Bakibúki ví lɛ́ɛ, Hakúfa ví lɛ́ɛ, Haahúu ví lɛ́ɛ, Basiliti ví lɛ́ɛ, Mɛxida ví lɛ́ɛ, Haaca ví lɛ́ɛ, Baakosi ví lɛ́ɛ, Sisela ví lɛ́ɛ, Tamáxi ví lɛ́ɛ, Nɛsíyaxi ví lɛ́ɛ kpódó Hatífa ví lɛ́ɛ kpó. Mɛsɛntɔ́ Salomɔ́ɔ tɔn lɛ́ɛ ɔ́, vǐ yětɔn sín gbɛ̌ta ɔ́, mɛ e ɖ'é mɛ lɛ́ɛ ɖíe: Sotayi ví lɛ́ɛ, Sofelɛ́ti ví lɛ́ɛ, Pelida ví lɛ́ɛ, Yaala ví lɛ́ɛ, Daakɔ́ni ví lɛ́ɛ, Gidɛ́li ví lɛ́ɛ, Cefátiya ví lɛ́ɛ, Hatílu ví lɛ́ɛ, Pokelɛ́ti-Xa-Cevayímu ví lɛ́ɛ kpó, kpó Amɔ́ni ví lɛ́ɛ kpó. Mɛ kpaa e nɔ wa azɔ̌ ɖo Mawu xwé lɛ́ɛ kpó Salomɔ́ɔ ví lɛ́ɛ kpó bǐ kplékplé bló afɔɖé kɛnnɛ gban-nukún-we (392). Mɛ e lɛ́ kɔ sín kannumɔgbénu wá Tɛ́lu-Mɛláxi lɛ́ɛ kpó mɛ e wá Tɛlu-Xacaa lɛ́ɛ kpó, kpó mɛ e wá Kelúbi-Adidɔ́ni lɛ́ɛ kpó, kpó Imumɛ́ɛ lɛ́ɛ kpó lɛ́ɛ ɔ́, ée yě lɛ́ kɔ wá Jeluzalɛ́mu ɔ́, yě sɔ́ sixú ɖɔ kún é mɛ yě gosín é, bó ná dó ɖe xlɛ́ ɖɔ Izlayɛ́li ví wɛ émí nyí ǎ. Deláya kpó Toviya kpó, kpó Nɛkoda kpó sín vǐ lɛ́ɛ wɛ. Yě bǐ kplékplé bló nǔwɔntɔn kanɖé-nukún-we (642). Vɔ̌sánú-xwlémawutɔ́ ɖé lɛ́ɛ tíin bó ɖo ninɔmɛ ɖokpó ɔ́ mɛ. Hovaya kpó Hakɔ́si kpó Baaziláyi kpó sín vǐ lɛ́ɛ wɛ. È nɔ ylɔ́ mɛ énɛ́ ɔ́ ɖɔ Baaziláyi ɖó é da Baaziláyi Galadinu ɔ́ sín vǐ ɖokpó. Yě ba wěma e mɛ è wlǎn tɔ́gbó yětɔn lɛ́ɛ sín nyǐkɔ dó ɔ́ káká, yě ká mɔ ǎ. Bɔ Jwifu lɛ́ɛ nɔ mɔ yě dó mɔ mɛ blíblí, bo gbɛ́ ɖɔ yě kún ná wa vɔ̌sánú-xwlémawutɔ́ zɔ ɔ́ ó. Tokpɔngán ɔ́ ɖésú gbɛ́ nú yě ɖɔ yě ní má ɖu vɔ̌sánú mímɛ́ bǐ ɔ́ ó. Yě ní nɔ mɔ̌ káká jɛ hwe e nu vɔ̌sánú-xwlémawutɔ́ ɖokpó ná sɔ́ Wulímu kpó Tumímu kpó bó ná tunwun lě e yě ná wa nǔ gbɔn é. Izlayɛ́li ví e gosín kannumɔgbénu wá lɛ́ɛ ɔ́, bǐ kplékplé bló adɔ̌kpo we afɔwó-afɔɖé kɛnnɛ (42.360). Bɔ yě kplá mɛsɛntɔ́ súnnu kpó nyɔ̌nu kpó děgba ɖě afɔwó-afayizɛ́n kantɔn afɔtɔn-nukún-we (7.337). Hanjitɔ́ súnnu kpó nyɔ̌nu kpó afɔɖé kanɖé atɔ́ɔ́n (245) wɛ yě hɛn wá, bó hɛn lǎkúnmí afɔwe gbantɔ́n (435), kpó tócí děgba ɖě afɔwó nǔwɔntɔn kantɔn (6.720) kpó. Hɛ̌nnugán ɖé lɛ́ɛ ná nǔ, bɔ è do gbá Mawu xwé ɔ́ ná; tokpɔngán ɔ́ ná sikágan afatɔ́n (1.000), bó ná kɔ́fu kanɖé wǒ (50), bó ná awu gaga e vɔ̌sánú-xwlémawutɔ́ lɛ́ɛ nɔ́ dó é gban (30), bó ná kpatágan kilóo afɔɖé kanɖé wǒ (50) nú Tɛn mímɛ́ bǐ ɔ́. Nǔ e hɛ̌nnugán lɛ́ɛ ná ɔ́ yi sikágan adɔ̌kpo ɖokpó (20.000) kpó kpatágan kilóo afɔwó-afɔɖé (2.200) kpó. Izlayɛ́li ví ɖě lɛ́ɛ ná sikágan adɔ̌kpo ɖokpó (20.000), bó ná kpatágan kilóo afatɔ́n (1.000), bó ná awu gaga e vɔ̌sánú-xwlémawutɔ́ lɛ́ɛ nɔ́ dó ɔ́ kanɖé koatɔ́n-nukún-we (67). Vɔ̌sánú-xwlémawutɔ́ lɛ́ɛ, Levíi ví lɛ́ɛ, hɔnjínɔtɔ́ lɛ́ɛ, hanjitɔ́ lɛ́ɛ, mɛ e nɔ wa azɔ̌ kpaa ɖo Mawu xwé lɛ́ɛ, kpódó Izlayɛ́li ví lɛ́ɛ bǐ kpó yi toxo yětɔn yětɔn mɛ, bó nɔ fínɛ́. Sun tɛ́nwegɔ́ ɔ́ ée ɖo xwe ɔ́ mɛ ɔ́, Izlayɛ́li ví lɛ́ɛ bǐ gosín toxo e mɛ yě ɖe lɛ́ɛ bó wá Jeluzalɛ́mu. Sín ayǐtéhɔ̌nnu káká wá jɛ gan wěwe mɛ ɔ́, Ɛsidlási ɖo te ɖo fí e Sinhɔntogbó ɖe ɔ́, bó sɔ́ gbe dó jǐ, bó xa sɛ́n ɔ́ nú yě, bɔ mɛ bǐ ɖótó ganjí. È hwlǎ kpo bɔ Ɛsidlási xá jí bónú mɛ bǐ na sixú mɔ ɛ. Matitia, Cɛma, Anaya, Wuliya, Ilukya kpó Maaseya kpó ɖo ɖisíxwé n'i, bɔ Pedaya, Micaɛ́li, Malukíya, Hacúmu, Hacibadidana, Zekaliya kpó Mɛculamu kpó ɖo amyɔxwé n'i. Hǔn Ɛsidlási ɔ́, fí e é ɖe ɔ́ yi jǐ hú togun ɔ́ bǐ, bɔ hwenu e é hun sɛ́nwéma ɔ́ é ɔ́, mɛ bǐ mɔ ɛ bó sí te. Ɛsidlási dó kú nú Mawu Mavɔmavɔ, Mawu Ajalɔ̌nlɔn, bɔ mɛ bǐ sɔ́ alɔ dó jǐ, bó yí gbe ɖɔ: “ Amǐ, amǐ, bó jɛ kpo bo ɖe kɔ́, bó sɛn Mawu Mavɔmavɔ.” Yě wá jlɔ́ bɔ Levíi ví Yecúwa, Bani, Celeviya, Yamini, Akúvu, Cabutáyi, Hodya, Maaseya, Kelita, Azalya, Yozavadi, Hanáni, kpó Pelaya kpó jɛ sɛ́n lɛ́ɛ kplɔ́n yě jí. Yě nɔ́ hun ɖɛ̌ bó nɔ xa Mawusɛ́n ɔ́ céɖécéɖé, bó nɔ́ tínmɛ, bónú mɛ ɖokpó ɖokpó ná mɔ nǔ jɛ nǔ e è xa é mɛ. Ée kplékplémɛ ɔ́ se nǔ e xa wɛ è ɖe nɛ́ ɔ́, yě bǐ bɛ́ avǐ. Énɛ́ ɔ́ wú wɛ tokpɔngán Nɛɛmíi kpó Ɛsidlási sɛ́nkplɔ́nmɛtɔ́ ɔ́ kpó, kpódó Levíi ví e ɖo nǔ e è xa ɔ́ tínmɛ wɛ lɛ́ɛ kpó ɖɔ nú yě ɖɔ: “Azǎn égbé tɔn ɔ́, Mawu Mavɔmavɔ, Mawu mǐtɔn wɛ è sɔ́ ɖó te ná. Mi ma nɔ aluwɛ mɛ ó, mi ma y'avǐ ó.” Ɛsidlási lɛ́ ɖɔ nú yě ɖɔ: “Mi yi xwé mitɔn lɛ́ɛ gbe, bó ɖu nǔ ɖagbe, bó nu ahan ɖagbe lɛ́ɛ. Ényí mɛɖé tíin bó má kó ɖó nǔɖé ɖo fínɛ́ bó ná ɖu ǎ hǔn, mi má ée ɖo mi sí ɔ́ xá ɛ, ɖó azǎn égbé tɔn ɔ́, Aklúnɔ mǐtɔn wɛ è sɔ́ ɖó te ná. Mi ma nɔ aluwɛ mɛ ó. Awǎjijɛ e nɔ gosín Mawu Mavɔmavɔ gɔ́n ɔ́ ná ná hlɔ̌nhlɔ́n mi.” Levíi ví lɛ́ɛ ɖésú xo hwihwɛ́ togun ɔ́; yě ɖɔ nú yě ɖɔ: “Mi xwɛ, azǎn égbé tɔn ɔ́, Mawu wɛ è sɔ́ ɖó te ná, mi ma nɔ aluwɛ mɛ ó.” Énɛ́ ɔ́, yě bǐ yi xwé yětɔn lɛ́ɛ gbe, bó ɖu nǔ bó nu ahan, bó ná nǔ e ɖo yě sí lɛ́ɛ ɖě mɛ e ma ɖó ɖě ǎ lɛ́ɛ, bɔ yě bǐ j'awǎ káká, ɖó yě mɔ nǔ jɛ Mawuxó e è ɖɔ nú yě ɔ́ mɛ. Ayǐhɔ́ngbe tɔn ɔ́, hɛ̌nnugán e ɖo Izlayɛ́li lɛ́ɛ bǐ kpó vɔ̌sánú-xwlémawutɔ́ lɛ́ɛ bǐ kpó sɛ kplé dó Ɛsidlási sɛ́nkplɔ́nmɛtɔ́ ɔ́ wú, bó ná lɛ́ gbéjé nǔ e sɛ́n ɔ́ ɖɔ é kpɔ́n céɖécéɖé. Sɛ́n énɛ́ e Mawu Mavɔmavɔ ná yě gbɔn Mɔyízi jí ɔ́ mɛ ɔ́, yě mɔ fí e è ɖɔ nú Izlayɛ́li ví lɛ́ɛ ɖɔ yě ní nɔ́ nɔ azava sá ɖo Azavaxwe ɔ́ hwenu é. Xwe énɛ́ ɔ́, sun tɛ́nwegɔ́ ɔ́ mɛ wɛ è nɔ ɖu. Cóbónú è ka ná ɖu xwe énɛ́ ɔ́, è nɔ to jlá gbɔn toxo lɛ́ɛ bǐ mɛ hwɛ̌; è nɔ jlá ɖo Jeluzalɛ́mu ɖésú. È nɔ ɖɔ nú mɛ bǐ ɖɔ yě ní yi só jí, bó yi ba olívu e è dǒ é kpó olívu gbě tɔn kpó sín ama kpó míiti sín ama kpó, kpó děma kpó, kpódó atín ɖěvo e dó ama lɛ́ɛ kpó sín ala, bó dó wá dó azava ná. Bɔ Izlayɛ́li ví lɛ́ɛ yi ba ama bo dó dó azava ɔ́. Mɛ ɖé lɛ́ɛ dó azava ɖó xɔ yětɔn ta, mɛɖé lɛ́ɛ dó dó kɔ́xo yětɔn ta, mɛɖé lɛ́ɛ dó ɖó Mawu xwé ɔ́ sín kɔ́xota, mɛɖé lɛ́ɛ dó ɖó Sinhɔntogbó kpó Eflayímu hɔntogbó kpó ta. Togun ɔ́ bǐ kpó mɛ e gosín kannumɔgbénu wá lɛ́ɛ bǐ kpó dó azava, bó nɔ sá. Awǎjijɛnú ɖaxó ɖé wɛ, ɖó Izlayɛ́li ví lɛ́ɛ ɔ́, sín Jozuwée Nuni ví ɔ́ hwenu ɖokpóó wɛ yě kó gɔn xwe énɛ́ ɔ́ ɖu. Xwe ɔ́ sín azǎn lɛ́ɛ ɖokpó ɖokpó gbe ɔ́, sín azǎn nukɔntɔn ɔ́ gbe káká jɛ azǎn gǔdo tɔn ɔ́ gbe ɔ́, è nɔ xa fí ɖé ɖo sɛ́nwéma Mawu tɔn ɔ́ mɛ. Azǎn tɛ́nwe wɛ è nɔ ɖu xwe ɔ́ xɔ, bó nɔ wá bló kplé ɖaxó ɖokpó dó sú ta ná azǎn tántɔngɔ́ ɔ́ gbe lě e sɛ́n ɔ́ ɖɔ gbɔn é. Sun ɖokpó énɛ́ ɔ́ sín azǎn ko-nukún-ɛnɛgɔ́ ɔ́ gbe ɔ́, Izlayɛ́li ví lɛ́ɛ kplé bó ná blá nu. Yě dó caki bo lɛ kɔ́, bó dó ɖe xlɛ́ ɖɔ hwɛ e émí hu ɔ́ vɛ́ nú émí. Yě yi cí vo nú mɛ e ma nyí Jwifu ǎ lɛ́ɛ, bó ɖɔ hwɛ yětɔn lɛ́ɛ nú Mawu; yě ɖɔ nú Mawu ɖɔ hwɛhutɔ́ wɛ émí kpó tɔ́gbó émítɔn lɛ́ɛ kpó nyí. Énɛ́ ɔ́ gúdo ɔ́, yě sí te bo nɔ te mɔ̌, bó ɖótó sɛ́nwéma Mawu Mavɔmavɔ, Mawu yětɔn tɔn, bɔ è xa nú yě káká nú ganxixo atɔn. Yě lɛ́ sɔ́ ganxixo atɔn ɖěvo ɖó te, bó yi do ɖo Mawu Mavɔmavɔ, Mawu yětɔn nukɔn, bó byɔ́ hwɛsɔ́kɛ. Kpo e è hwlǎ nú Levíi ví lɛ́ɛ ɔ́, Yecúwa, Bani, Kadimiyɛ́li Cevaniya, Buwunni, Celeviya, Bani kpó Kenani kpó sí te ɖ'é ji bó sú xó bó byɔ́ alɔgɔ́ Mawu Mavɔmavɔ, Mawu yětɔn tɔn. Énɛ́ ɔ́ gúdo ɔ́, Levíi ví Yecúwa, Kadimiyɛ́li, Bani, Hacavunɛ́ya, Celeviya, Hodya, Cevaniya kpó Petaxiya kpó sú xó bó ɖɔ: “Mi sí te, mi dó kpɛ́ nú Mawu Mavɔmavɔ, Mawu mǐtɔn; mi dó kú n'i káká sɔ́yi.” “Mawu Mavɔmavɔ, mɛ ɖokpó ɖokpó ní kpa nyǐkɔ towe; nyǐkɔ towe ɔ́, susu tɔn hú gǎn nǔ e è ko sixú ɖɔ kpó nu kpó é bǐ. Hwi wɛ nyí Mawu Mavɔmavɔ, hwi ɖokpónɔ géé wɛ nyí Mawu Mavɔmavɔ. A blǒ jǐnukúnsin bɔ é d'agba, a blǒ sunví lɛ́ɛ bǐ. A blǒ ayǐkúngban, bo bló nǔ e ɖ'é jí lɛ́ɛ, bó bló xu kpó nǔ e ɖ'é mɛ lɛ́ɛ bǐ kpó. Hwi wɛ nɔ ná gbɛ nǔ e ko tíin lɛ́ɛ bǐ. Hlɔ̌nhlɔ́n sɛ́xwé tɔn lɛ́ɛ bǐ nɔ yi do ɖo nukɔn towe. Mawu Mavɔmavɔ, hwi wɛ sɔ́ Ablámu. Hwi wɛ ɖe e sín Wúu, ɖo Kaludée, bó sun nyǐ ɖɔ Ablaxámu. A mɔ lě e é ɖo gbejí nú we gbɔn é. Énɛ́ ɔ́ wútu ɔ́, a jɛ akɔ xá ɛ, bó dó akpá n'i ɖɔ émí ná ná ɛ Kanáanu lɛ́ɛ, Hitíti lɛ́ɛ, Amɔliti lɛ́ɛ, Pɛliziti lɛ́ɛ, Jebuzinu lɛ́ɛ kpó Giigacíti lɛ́ɛ kpó sín to, bónú vǐ tɔn lɛ́ɛ ná nɔ fínɛ́. Akpá e a dǒ ɔ́, a ka ɖe, a nɔ dó akpá bó nɔ gɔn ɖiɖe ǎ. A mɔ ya e ji wɛ tɔ́gbó mǐtɔn lɛ́ɛ ɖe ɖo Ejípu tomɛ ɔ́, a se bɔ yě byɔ́ alɔgɔ́ ɖo Xu Vɔvɔ ɔ́ tó. A jlɛ̌ nǔ dó dɔn tó nú axɔ́sú Ejípu tɔn kpó gǎn hɔn-yitɔ́ tɔn lɛ́ɛ kpó, kpódó togun tɔn bǐ kpó, ɖó a tunwun go e Ejípunu lɛ́ɛ nɔ yí tɔ́gbó mǐtɔn lɛ́ɛ wú é. È sɔ́ nyǐkɔ towe su ɖaxó hwenɛ́nu, bɔ nyǐkɔ towe sín susu lɛ́ kpo ɖo te káká jɛ égbé. A mǎ Xu ɔ́ ɖó we ɖo Izlayɛ́li ví lɛ́ɛ nukɔn, bɔ yě gbɔn ayǐ xúxú jí dín. A ka kpíkpé mɛ e ɖo yě nya wɛ lɛ́ɛ dó xu gɔngɔn mɛ, bɔ yě syɔ́ awǐnnya ɖɔhun, bó yi káká xuzan jí. Kéze ɔ́, azizɔ wɛ a nɔ dó kplá togun towe. Azizɔ ɖé wɛ, bó nɔ́ ɖo hwǐn mlí wɛ ɖo nukɔn yětɔn. Zǎn mɛ ɔ́, a nɔ sɔ́ myɔ dó kplá yě, bɔ myɔ ɔ́ nɔ́ ná yě wěziza, bó nɔ́ ɖo hwǐn mlí wɛ ɖo nukɔn yětɔn. A jɛ te bo wá ɖɔ xó nú yě ɖo Sinayíi só jí. A ɖɔ lě e yě ná wa nǔ gbɔn bɔ é ná sɔgbe é nú yě. A nǎ sɛ́n nǔgbó nǔgbó lɛ́ɛ yě. Kplɔ́n e a nǎ yě kpó nǔ e a ɖɔ yě ní wa lɛ́ɛ kpó nyɔ́ bɔ nǔ bǐ vɔ ɖ'é wú. A gbɔn mɛsɛntɔ́ towe Mɔyízi jí, bó xlɛ́ yě gbɔjɛzán e nyí azǎn bɔ è sɔ́ ɖó vo nú we ɔ́. A ɖɔ lě e yě ná wa nǔ gbɔn ɔ́ nú yě; a nǎ yě kplɔ́n; a ɖɔ nǔ e yě ná wa lɛ́ɛ nú yě; a nǎ sɛ́n ɖokpó yě. A nǎ yě nǔɖuɖu sín jǐxwé, bó ná dó gbɔ adɔ nú yě. A dɔn sin sín só mɛ, dó fá kɔ nú yě. A sɛ́ yě dó bɔ yě yi gba to e a zin alɔ d'akɔ́n ɖɔ émí ná ná yě é. Lo ɔ́, tɔ́gbó mǐtɔn lɛ́ɛ kpó goyíyí yětɔn kpó ɔ́, yě fɔ́n gǔ. Yě ɖótó nǔ e a zɔ̌n yě lɛ́ɛ ǎ. Yě gbɛ́ tónú se. Yě wɔn nǔ ɖagbe ɖagbe e a wa nú yě lɛ́ɛ. Yě tlí tó, bó ɖe gbeta tɔ́n ɖɔ émí ná lɛ́ lɛ́ kɔ yi kannumɔgbénu émítɔn ɖo Ejípu. Lo ɔ́, hwɛ ka jó yě dó ǎ, ɖó Mawu wɛ a nyǐ; a nɔ sɔ́ hwɛ kɛ mɛ. Mawu nǔbláwǔkúnúmɛtɔ́, xomɛnyɔ́tɔ́, hǔnkútɔ́ wɛ a nyǐ, bɔ xomɛfífá towe ɖó dogbó ǎ. Yě sínsín gan bo dó bló nyibúví ná, bó sú xó bo ɖɔ: ‘Mawu mǐtɔn ɖíe! É wɛ ɖe mǐ sín kannumɔgbénu ɖo Ejípu.’ Yě nylá jijɔ dódó! Có, ɖo wǎn yíyí towe maɖódogbó ɔ́ mɛ ɔ́, a jǒ yě dó nyi gbětótló mɛ ǎ. Azizɔ e ɖo mlǐmlí ɖo nukɔn yětɔn wɛ, bó nɔ́ ɖo ali xlɛ́ yě wɛ kéze ɔ́ jó yě dó ǎ. Đo xomɛnyínyɔ́ towe mɛ ɔ́, a nǎ yě Yɛ towe, bónú é ná ná nukúnnú-mɔjɛnǔmɛ yě. A nɔ ná yě nǔɖuɖu e è nɔ ylɔ́ ɖɔ mǎna ɔ́ hwebǐnu bɔ yě nɔ́ ɖu, bó nɔ ná sin yě bɔ yě nɔ́ nu dó fá kɔ ná. A kpé nukún dó yě wú xɔ xwe kanɖé (40) ɖo gbětótló mɛ. Nǔ ɖěbǔ hwe dó yě ǎ. Avɔ vún yě ǎ, afɔ yětɔn ká tɛ́ ǎ. A jǒ axɔ́sú ɖé lɛ́ɛ nú yě, bó jó togun ɖé lɛ́ɛ nú yě, bɔ yě yí to e yá yě lɛ́ɛ. Yě yǐ Sihɔ́ni axɔ́sú Hɛcibɔ́ni tɔn ɔ́ sín to, bó yí Ɔgu axɔ́sú Basáni tɔn sín to. A nǎ vǐ yě bɔ é sukpɔ́ káká sunví e ɖo jǐxwé lɛ́ɛ ɖɔhun. A kplá yě yi Kanáa tomɛ. Kanáa to ɔ́ wɛ a ko ná tɔ́gbó yětɔn lɛ́ɛ ɖɔ yě ní yí. Yě yi to ɔ́ mɛ, bo yí to ɔ́. A zɔ̌n bɔ Kanáa ví lɛ́ɛ jó gbe ɖo nukɔn yětɔn, bó byɔ́ acɛ yětɔn mɛ. Togun towe sɔ́ axɔ́sú e ɖo gbě énɛ́ ɔ́ jí lɛ́ɛ, kpó akɔta e ɖo gbě énɛ́ ɔ́ jí lɛ́ɛ bǐ kpó dó wa nǔ e jló yě ɔ́ ná. Yě yǐ toxo e è mɛ ahohó lɛ́ lɛ̌ dó lɛ́ɛ, bó yí ayǐkúngban ɖagbe lɛ́ɛ, xwé e dɔkun gɔ́ lɛ́ɛ, tɔ e è kun lɛ́ɛ, bó yí vǐwungbo kpó olívugbo kpó, bó yí atínsínsɛ́ngbo tɛnmɛ tɛnmɛ lɛ́ɛ kɔn nyi kpɔ́. Gbɔn xomɛnyínyɔ́ towe maɖódogbó ɔ́ mɛ ɔ́, yě mɔ nǔ bó ɖu, bó gɔ́ xo ganjí, bó ɖu gbɛ. Nǔ ɖo mɔ̌ có, yě gbɛ̌ tónú se. Yě fɔ́n gǔ dó jǐ we, bó dó gǔdo sɛ́n towe. Yě hu gbeyíɖɔ towe lɛ́ɛ; gbeyíɖɔ towe lɛ́ɛ wɛ nɔ ɖɔ nú yě ɖɔ yě ní lɛ́ kɔ wá gɔ̌n towe dandan. Yě nylá jijɔ dódó. Énɛ́ ɔ́ wútu ɔ́, a jǒ yě nú kɛntɔ́, bɔ kɛntɔ́ táfú yě. Ée yě wá ɖo wǔvɛ́ mɔ wɛ ɔ́, yě sú xó ylɔ́ we, bɔ hwɛ ɔ́, a se xósúsú yětɔn ɖo sɛ́xwé. Énɛ́ ɔ́, ɖo wǎn yíyí towe maɖódogbó ɔ́ mɛ ɔ́, a sɛ́ mɛ dó yě bɔ è yi ɖe yě sín kɛntɔ́ fɛn mɛ. Káká nú yě ká ná gosín kɛntɔ́ fɛn mɛ ɔ́, yě lɛ́ jɛ hwɛ hu dó we jí, bɔ a lɛ́ jó yě dó nú kɛntɔ́. Énɛ́ ɔ́, yě lɛ́ jɛ xó sú ylɔ́ we jí, bɔ hwɛ ɔ́, a se xósúsú yětɔn ɖo sɛ́xwé, bó ɖótó yě, bó lɛ́ hwlɛ́n yě ɖo wǎn yíyí towe mɛ, azɔn mɔ̌kpán. A ɖɔ nú yě ɖɔ yě ní yá wǔ lɛ́ kɔ wá jɛ sɛ́n émítɔn nyi jí; lo ɔ́, yědɛɛ lɛ́ɛ ɔ́, kpódó goyíyí yětɔn kpó ɔ́, yě ká bló nǔ e a zɔ̌n yě ɔ́ ɖ'é ji ǎ. Yě gba sɛ́n towe lɛ́ɛ; sɛ́n towe lɛ́ɛ ká nɔ ná gbɛ mɛ e nɔ nyi yě lɛ́ɛ. Yě ɖe nǔ e yě nyí ɔ́ xlɛ́ we. Yě ɖe xlɛ́ ɖɔ tótlítɔ́ wɛ émí nyí, bó nyí gǔfɔ́ntɔ́. Yě gbɛ́ gbídígbídí ɖɔ émí kún ná se xó towe ó. A dɛ bo hɛn yě káká nú xwe mɔ̌kpán. Gbeyíɖɔ towe lɛ́ɛ ɔ́, Yɛ towe ɖo yě jí, bó nɔ ɖɔ xó towe lɛ́ɛ nú yě; lo ɔ́, yě ɖótó yě ǎ. Énɛ́ wu ɔ́, a jǒ yě nú togun ɖěvo lɛ́ɛ. Nǔ ɖo mɔ̌ có, ɖo wǎn yíyí towe maɖódogbó ɔ́ mɛ ɔ́, a vǐvá kún yětɔn ǎ. A jǒ yě dó ǎ; Mawu nǔbláwǔkúnúmɛtɔ́ xomɛnyɔ́tɔ́ wɛ a nyǐ. Hwɛ Mawu mǐtɔn, a kló bó d'agba. A ɖǒ hlɔ̌nhlɔ́n bó jí wǔ. Akɔ e a jɛ xá mǐ ɔ́, a hɛn ɖó alɔ jí. Kɛnklɛ́n bó kpɔ́n wǔvɛ́ e mɔ wɛ togun towe ɖe sín axɔ́sú Asilíi tɔn lɛ́ɛ hwenu káká wá jɛ din é; axɔ́sú mǐtɔn lɛ́ɛ, gǎn mǐtɔn lɛ́ɛ, vɔ̌sánú-xwlémawutɔ́ mǐtɔn lɛ́ɛ, gbeyíɖɔ mǐtɔn lɛ́ɛ, tɔ́gbó mǐtɔn lɛ́ɛ, kpó mɛ lɛ́ɛ kpó bǐ wɛ ɖo wǔvɛ́ mɔ wɛ. A wa nǔ kpó hwɛjijɔ kpó, ɖo nǔ e gbo mǐ lɛ́ɛ bǐ mɛ, ɖó a ɖe gbejíninɔ towe xlɛ́, mǐdɛɛ lɛ́ɛ ka hu hwɛ dó we. Axɔ́sú mǐtɔn lɛ́ɛ, gǎn mǐtɔn lɛ́ɛ, vɔ̌sánú-xwlémawutɔ́ mǐtɔn lɛ́ɛ kpó tonukún mǐtɔn lɛ́ɛ kpó ɖó sísí nú sɛ́n towe ǎ. Yě dó vɛ̌ nú nǔ e a zɔ̌n yě lɛ́ɛ, bó dó vɛ̌ nú sɛ́n e a nɔ flín yě lɛ́ɛ. Yě ɖo nyɔ̌ná towe lɛ́ɛ tɛ́ntin, ɖo axɔ́súɖuto yě ɖésúnɔ tɔn mɛ. Hwi ɖésú wɛ sɔ́ yě ɖó to ɖaxó nɛ́ ɔ́ mɛ, to e ayǐkúngban tɔn nyí ayǐkúngban ɖagbe é mɛ. Yě ká ɖɔ émí ná jó nǔ nyanya wiwa dó bó ná sɛn we ǎ. Din ɔ́, mǐ ɖíe wá húzú kannumɔ ɖó énɛ́ ɔ́ wú e; to e a nǎ tɔ́gbó mǐtɔn lɛ́ɛ, bɔ yě ná ɖu jinukún ɖagbe e nɔ nyɔ́ ɖ'é mɛ lɛ́ɛ bǐ é mɛ wɛ mǐ ká lɛ́ wá húzú kannumɔ ɖe. To énɛ́ ɔ́ nɔ ná nǔ ɖagbe bɔ é nɔ túnflá axɔ́sú e sín acɛ mɛ a sɔ́ mǐ dó, ɖó hwɛ mǐtɔn lɛ́ɛ wútu lɛ́ɛ. Mǐ kpódó kanlin mǐtɔn lɛ́ɛ bǐ kpó wɛ ɖo alɔ yětɔn mɛ, bɔ yě nɔ́ dó wa nǔ e jló yě lɛ́ɛ ná. Aluwɛ ɖaxó ɖé mɛ wɛ mǐ ɖe.” “Nǔ e gbo mǐ lɛ́ɛ bǐ zɔ́n bɔ mǐ ɖe gbeta tɔ́n, bó zin alɔ dó akɔ́n ɖɔ mǐ ná nyi sɛ́n ɔ́. Gbeta énɛ́ ɔ́, mǐ wlán dó wěma mɛ, bó ɖó wuntun, bɔ gǎn mǐtɔn lɛ́ɛ, Levíi ví lɛ́ɛ, kpódó vɔ̌sánú-xwlémawutɔ́ mǐtɔn lɛ́ɛ kpó tɛ alɔ mɛ. Mɛ e tɛ alɔ wěma ɔ́ mɛ lɛ́ɛ sín nyǐkɔ ɖíe: Tokpɔngán Nɛɛmíi Hakaliya ví ɔ́, Sidikíya, Selaya, Azalya, Yiimɛya, Pacehúu, Amaliya, Malukíya, Hatúci, Cevaniya, Malulúki, Halimu, Mɛlemɔti, Ovadia, Daniyɛ́li, Gɛnnɛtɔ́ni, Balúki, Mɛculamu, Avíya, Miyamini, Maaziya, Bilugayi, Cemaya; vɔ̌sánú-xwlémawutɔ́ wɛ mɛ énɛ́ lɛ́ɛ bǐ nyí. Levíi ví e tɛ alɔ wěma ɔ́ mɛ lɛ́ɛ ɖíe: Yecúwa, Azaniya ví ɔ́, Binuyi e gosín Henadadi sín akɔta mɛ é, kpó Kadimiyɛ́li kpó gbɛ̌ yětɔn lɛ́ɛ kpó. Gbɛ̌ yětɔn lɛ́ɛ sín nyǐkɔ ɖíe: Cevaniya, Hodya, Kelita, Pelaya, Hanáni, Mika, Hlexɔ́vu, Hacaviya, Zakúu, Celeviya, Cevaniya, Hodya, Bani kpó Beninu kpó. Togán e tɛ alɔ wěma ɔ́ mɛ lɛ́ɛ sín nyǐkɔ ɖíe: Palewɔ́ci, Paxáti-Mɔwabu, Elámu, Zatú, Bani, Buwunni, Azigadi, Bevayi, Adoniya, Bigiwayi, Adini, Atɛ́ɛ, Yexizikiya, Azúu, Hodya, Hacúmu, Besayi, Halifu, Anatɔ́ti, Nɛvayi, Magupiyaci, Mɛculamu, Hezíi, Mɛcezaveɛli, Sadɔ́ku, Yadua, Pelatiya, Hanáni, Anaya, Hocea, Hananiya, Hacúvu, Ha-Lohɛci, Pilexa, Coveku, Hlehúmu, Hacavúna, Maaseya, Axiya, Hanáni, Anánu, Malulúki, Halimu kpó Baana kpó.” Hwenu e mǐ ɖo kannumɔgbénu ɔ́, mɛ élɔ́ lɛ́ɛ gɔ́ nú yě: vɔ̌sánú-xwlémawutɔ́ Levíi ví lɛ́ɛ, hɔnjínɔtɔ́ lɛ́ɛ, hanjitɔ́ lɛ́ɛ, kpó mɛ e nɔ wa azɔ̌ kpaa ɖo Mawu xwé lɛ́ɛ kpó; toví wɛ nú yě. Mǐ mɛ e nɔ zɔ nú toɖévomɛnu lɛ́ɛ, bó nɔ́ gbejí nú Mawusɛ́n ɔ́ lɛ́ɛ ɔ́, mǐ kpó asi mǐtɔn lɛ́ɛ kpó, vǐ mǐtɔn súnnu kpó nyɔ̌nu kpó e ko ɖó nǔnywɛ́ lɛ́ɛ bǐ kpó wɛ gɔ́ nú yě. Mǐ ɖó gbe kpɔ́, mǐ kpódó toví mǐtɔn nukúnɖéjí énɛ́ lɛ́ɛ bǐ kpó, bó xwlé nǔ ɖɔ mǐ ná nyi sɛ́n Mawu mǐtɔn tɔn. Sɛ́n tɔn e é ná mǐ gbɔn mɛsɛntɔ́ tɔn Mɔyízi jí é. Mǐ ná bló nǔ e é zɔ́n mǐ lɛ́ɛ bǐ tɛ́nwínlɛnwín; mǐ ná jó nǔ e Mawu Mavɔmavɔ, Mawu mǐtɔn ɖɔ mǐ ní bló lɛ́ɛ ɖěbǔ dó ǎ. Mǐ ná da vǐ mǐtɔn nyɔ̌nu lɛ́ɛ nú akɔta e ɖo to ɔ́ mɛ lɛ́ɛ é ǎ; mǐ ká ná da asi nú vǐ mǐtɔn lɛ́ɛ ɖo yě mɛ ǎ. Ényí mɛ énɛ́ lɛ́ɛ hɛn nǔɖé wá axi gbɔjɛzán gbe abǐ xwe gbe bó ja sisa gbé ɔ́, mǐ ná xɔ ɖo yě sí ǎ. Xwe tɛ́nwe mɛ tɛ́nwe mɛ tɛgbɛ ɔ́, mǐ ná nɔ ná gbɔjɛ ayǐkúngban mǐtɔn lɛ́ɛ; mǐ ká ná ɖɔ nú mɛ e ɖu axɔ́ dó mǐ ɔ́ ɖɔ dandan ɔ́, sú jɛ́n é ná sú ǎ. Mǐ ɖɔ mǐ ná nɔ ná gankwɛ́ ɖokpó ɖokpó xwewú xwewú tɛgbɛ, bɔ è na nɔ́ dó wa xwé Mawu mǐtɔn tɔn sín azɔ̌ ná. Akwɛ́ énɛ́ lɛ́ɛ e mǐ jɔ ɔ́ wɛ è na dó xɔ wɔ̌xúxú e è nɔ ná Mawu lɛ́ɛ, vɔ̌ e è nɔ sá ayǐhɔ́ngbe ayǐhɔ́ngbe ɔ́, ée è nɔ dó zo gbɔjɛzán Jwifu lɛ́ɛ tɔn gbe tɛgbɛ ɔ́, ée è nɔ sá gbe e gbe sun wá jí ɔ́, ée è nɔ sá xwezán ɖě lɛ́ɛ gbe é, vɔ̌sísá ɖě lɛ́ɛ e è nɔ xwlé Mawu é, kpódó vɔ̌ e Izlayɛ́li ví lɛ́ɛ nɔ sá dó byɔ́ hwɛsɔ́kɛ é kpán. Akwɛ́ énɛ́ ɔ́ wɛ è nǎ dó wa xwé Mawu mǐtɔn tɔn sín azɔ̌ lɛ́ɛ ná. Mǐ mɛ vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó, kpódó togun ɔ́ kpó wá nyi akɔ, bó ná dó tunwun hwenu e hwɛndo ɖokpó ɖokpó ná hɛn nakí wá xwé Mawu mǐtɔn tɔn gbe é. Xwewú xwewú tɛgbɛ ɔ́, mǐ nɔ ná nakí e è na dó dó vɔ̌ lɛ́ɛ zo ɖo vɔ̌sákpe Mawu Mavɔmavɔ, Mawu mǐtɔn tɔn jí lě e sɛ́n ɔ́ zɔ́n gbɔn é. Mɔ̌ ɖokpó ɔ́, xwewú xwewú tɛgbɛ ɔ́, mǐ nɔ hɛn jinukún nukɔntɔn lɛ́ɛ kpó atínsínsɛ́n nukɔntɔn lɛ́ɛ kpó wá Mawu mǐtɔn sín xwé gbe. Mǐ nɔ bɛ́ nukɔn ví mǐtɔn lɛ́ɛ yi Mawu xwé, bó nɔ bɛ́ vǐ nukɔntɔn e kanlin mǐtɔn lɛ́ɛ ji lɛ́ɛ yi Mawu xwé gbe lě e sɛ́n ɔ́ zɔ́n gbɔn é; mǐ nɔ bɛ́ vǐ nukɔntɔn e kanlin mǐtɔn ɖaxó ɖaxó lɛ́ɛ kpó kpɛví kpɛví lɛ́ɛ kpó ji lɛ́ɛ yi Mawu mǐtɔn sín xwé gbe, bó nɔ bɛ́ yě jó nú vɔ̌sánú-xwlémawutɔ́ e nɔ wa mawuxɔmɛzɔ́ lɛ́ɛ. Mɔ̌ ɖokpó ɔ́, mǐ nɔ lɛ́ ná linfín mǐtɔn e nyɔ́ dóó ɔ́ ɖě vɔ̌sánú-xwlémawutɔ́ lɛ́ɛ, bó nɔ lɛ́ ná yě atínsínsɛ́n kpó vɛ̌ɛn yɔ̌yɔ́ kpó, kpódó ami kpó. È nɔ bɛ́ nǔ énɛ́ lɛ́ɛ dó xɔ ɖé lɛ́ɛ mɛ, bɔ xɔ lɛ́ɛ bɔdó Mawuxɔ ɔ́ wú. Nǔ e nyɔ́ ɖo gle mǐtɔn mɛ lɛ́ɛ bǐ sín mǎɖówǒ ɔ́, Levíi ví lɛ́ɛ tɔn wɛ nɔ nyí énɛ́ ɔ́. Levíi ví lɛ́ɛ ɖésú wɛ nɔ yi fí e mǐ nɔ wa azɔ̌ ɖe lɛ́ɛ, bó nɔ yí mǎɖówǒ énɛ́ ɔ́. Aalɔ́ɔn ví Vɔ̌sánú-xwlémawutɔ́ ɖokpó wɛ nɔ kplá Levíi ví lɛ́ɛ; Levíi ví lɛ́ɛ ɖésú ká nɔ sɔ́ nǔ e yě yǐ ɖo mɛ lɛ́ɛ sí lɛ́ɛ sín mǎɖówǒ wá Mawu mǐtɔn xwé, bó nɔ́ bɛ́ dó xɔ e mɛ è nɔ bɛ́ dɔkun lɛ́ɛ dó lɛ́ɛ mɛ. Izlayɛ́li ví lɛ́ɛ kpó Levíi ví lɛ́ɛ kpó ná bɛ́ jinukún kpó vɛ̌ɛn yɔ̌yɔ́ kpó, kpódó ami kpó e yě ná lɛ́ɛ wá, bó bɛ́ dó xɔ e ɖo Mawuxɔ ɔ́ kpá lɛ́ɛ mɛ. Xɔ énɛ́ lɛ́ɛ mɛ wɛ è kplé Mawu xwé ɔ́ sín nǔ lɛ́ɛ ɖó, bɔ vɔ̌sánú-xwlémawutɔ́ e jí azɔ̌ ɖe lɛ́ɛ kpó hɔnjínɔtɔ́ lɛ́ɛ kpó, kpódó hanjitɔ́ lɛ́ɛ kpó nɔ́ nɔ fínɛ́. Ée nǔ ɖo mɔ̌ ɔ́, mǐ ná ɖe alɔ sín Mawu mǐtɔn sín xwé wú ǎ. Mɛ e nyí gǎn ɖo togun ɔ́ nu lɛ́ɛ wá cí Jeluzalɛ́mu, bɔ è ɖe mɛ ɖo mɛ e kpo lɛ́ɛ mɛ. È nɔ sɔ́ xwédo wǒ ɖó te, bó nɔ́ nyi akɔ dó bó nɔ́ ɖe xwédo ɖokpó ɖo yě mɛ, bó nɔ́ ɖɔ é ní yi nɔ Jeluzalɛ́mu, toxo mímɛ́ ɔ́ mɛ. Énɛ́ ɔ́, mɛ tɛ́nnɛ ɖě lɛ́ɛ e kpo lɛ́ɛ hɛn ɔ́, yě ná nɔ toxo e kpo ɖo to ɔ́ mɛ lɛ́ɛ mɛ. Amɔ̌, ényí mɛɖé tíin bó zin alɔ d'akɔ́n ɖɔ émí ná yi nɔ Jeluzalɛ́mu ɔ́, è nɔ xo ɖɛ dó mɛ énɛ́ jí. Tokpɔngán lɛ́ɛ nɔ́ nɔ Jeluzalɛ́mu, bɔ Izlayɛ́li ví ɖě lɛ́ɛ, vɔ̌sánú-xwlémawutɔ́ lɛ́ɛ, Levíi ví lɛ́ɛ, mɛ kpaa e nɔ wa azɔ̌ ɖo Mawu xwé gbe lɛ́ɛ, kpódó mɛsɛntɔ́ Salomɔ́ɔ tɔn lɛ́ɛ sín vǐ lɛ́ɛ kpó ɔ́, yědɛɛ lɛ́ɛ ɖokpó ɖokpó nɔ́ nɔ fí e nyí étɔn é. Judáa ví ɖé lɛ́ɛ kpó Bɛnjamɛ́ɛ ví ɖé lɛ́ɛ kpó wá cí Jeluzalɛ́mu. Judáa ví e wá nɔ Jeluzalɛ́mu lɛ́ɛ ɖíe: Ataya Wuziya ví ɔ́; Wuziya nyí Zekaliya ví, Zekaliya nyí Amaliya ví, Amaliya ka nyí Cefátiya ví, bɔ Cefátiya nyí Maxalalɛ́li ví; Pɛlɛ́si Judáa ví ɔ́ wɛ dó kún yětɔn. Yě kpó Maaseya Balúki ví ɔ́ kpó; Balúki ɔ́, Kɔlu-Hozée ví wɛ, bɔ Kɔlu-Hozée nyí Hazaya ví, Hazaya nyí Adaya ví, bɔ Adaya nyí Yoyalívu ví, bɔ Yoyalívu nyí Zekaliya ví, bɔ Zekaliya nyí Cela ví; Pɛlɛ́si ví e wá nɔ Jeluzalɛ́mu lɛ́ɛ ɔ́, yě mɛ afɔwe kanɖé koatɔ́n-nukún-atɔn (468) wɛ. Súnnu akowunká wɛ yě nyí. Bɛnjamɛ́ɛ ví e wá cí Jeluzalɛ́mu lɛ́ɛ ɖíe: Salúu Mɛculamu ví ɔ́, Mɛculamu ɔ́, Yoɛ́di ví wɛ, bɔ Yoɛ́di nyí Pedaya ví, Pedaya nyí Kolaya ví, Kolaya ka nyí Maaseya ví, Maaseya nyí Ityɛ́li ví, Ityɛ́li nyí Yecaya ví. Gabayi kpó Salayi kpó gɔ́ nú yě. Yě bǐ kplékplé nyí afɛnɛ kantɔn tántɔn (928). Yoɛ́li, Zikli ví ɔ́ wɛ kpa acɛ dó Bɛnjamɛ́ɛ ví lɛ́ɛ nu, bɔ Yexuda, Ha-Senúwa ví ɔ́ bɔdó gǎn e kpa acɛ dó toxo ɔ́ nu ɔ́ wú. Vɔ̌sánú-xwlémawutɔ́ e wá nɔ Jeluzalɛ́mu lɛ́ɛ ɖěe sín nyǐkɔ ɖíe: Yedaya Yoyalívu ví ɔ́ kpó Yakíni kpó, kpó Selaya e nyí gǎn ɖo Mawu xwé gbe ɔ́ kpó. Selaya ɔ́, Ilukya ví wɛ. Ilukya ka nyí Mɛculamu ví, bɔ Mɛculamu nyí Sadɔ́ku ví, Sadɔ́ku ka nyí Mɛlajɔ́ti ví, bɔ Mɛlayɔ́ti nyí Axitúvu sín vǐ. Vɔ̌sánú-xwlémawutɔ́ lɛ́ɛ kpó nɔví yětɔn lɛ́ɛ kpó wɛ nɔ́ kpé nukún dó xwé ɔ́ wú. Yě bǐ kplékplé yi afɛnɛ ko-nukún-we (822). Adaya Yeloxámu ví ɔ́ lɔ nyí vɔ̌sánú-xwlémawutɔ́. Yeloxámu ɔ́, Pelaliya ví wɛ, bɔ Pelaliya nyí Amusi ví, Amusi nyí Zekaliya ví, Zekaliya nyí Pacehúu ví, bɔ Pacehúu nyí Malukíya ví. Adaya kpó nɔví tɔn lɛ́ɛ kpó wɛ nyí hɛ̌nnugán. Yě bǐ bló gbɛtɔ́ afɔɖé kanɖé-nukún-we (242). Amacisayi Azalɛ́li ví ɔ́ lɔmɔ̌ nyí vɔ̌sánú-xwlémawutɔ́. Azalɛ́li ɔ́, Axizayi ví wɛ, bɔ Axizayi nyí Mɛcilemɔti ví, Mɛcilemɔti nyí Imumɛ́ɛ ví. É kpó nɔví tɔn lɛ́ɛ kpó ɔ́, súnnu akowunká wɛ yě nyǐ. Yě bǐ bló gbɛtɔ́ kantɔn tántɔn (128). Zavúdiɛ́li, Ha-Gedolímu ví ɔ́ wɛ nyí gǎn yětɔn. Levíi ví e wá cí Jeluzalɛ́mu lɛ́ɛ ɖěe sín nyǐkɔ ɖíe: Cemaya Hacúvu ví ɔ́; Hacúvu ɔ́, Azlikámu ví wɛ, bɔ Azlikámu nyí Hacaviya ví, bɔ Hacaviya nyí Buwunni ví. Cabutáyi kpó Yozavadi kpó gɔ́ nú yě. Yě wɛ nɔ kpé nukún dó azɔ̌ e ma nyí Mawu xwé ɔ́ gbe sín azɔ̌ ǎ lɛ́ɛ wú; yě lɔ ɖo mɛ e nyí gǎn ɖo Levíi ví lɛ́ɛ nu lɛ́ɛ mɛ. Mataniya Mika ví ɔ́, é wɛ nɔ́ dó susu kpa nú Mawu sín han lɛ́ɛ hwenu e é nɔ́ ja ɖɛ xo gbé é, bɔ nɔví tɔn Bakibukíya gɔ́ n'i. Mika ɔ́, Zavúdi ví wɛ, bɔ Zavúdi ka nyí Asáfu ví. Avuda Camumúa ví ɔ́ lɔ ɖo fínɛ́. Camumúa ɔ́, Galali ví wɛ, bɔ Galali nyí Yedutún ví. Levíi ví e ɖo toxo mímɛ́ ɔ́ mɛ lɛ́ɛ bǐ kplékplé bló afɔɖé kanwe-nukún-ɛnɛ (284). Hɔnjínɔtɔ́ e wá cí Jeluzalɛ́mu lɛ́ɛ ɖíe: Akúvu kpó Talumɔ́ni kpó, kpó nɔví yětɔn lɛ́ɛ kpó. Yě wɛ nɔ́ cɔ́ toxo ɔ́ sín hɔn lɛ́ɛ. Yě bǐ bló gbɛtɔ́ kɛnnɛ wěwe (172). Izlayɛ́li ví e kpo lɛ́ɛ ɖo Judáa sín toxo ɖě lɛ́ɛ mɛ. Vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó lɔ ɖo yě mɛ. Mɛ ɖokpó ɖokpó ɖo ayǐkúngban tɔn jí ɖo toxo tɔn mɛ. Mɛ kpaa e nɔ wa azɔ̌ ɖo Mawu xwé lɛ́ɛ ɔ́, Ofɛ́lu wɛ yě nɔ́ nɔ. Gǎn yětɔn lɛ́ɛ wɛ nyí Siha kpó Gicípa kpó. Gǎn e kpa acɛ nú Levíi ví lɛ́ɛ ɖo Jeluzalɛ́mu ɔ́ wɛ nyí Wúzi Bani ví ɔ́. Bani ɔ́, Hacaviya ví wɛ, bɔ Hacaviya nyí Mataniya ví, bɔ Mataniya nyí Mika ví. Asáfu hɛ́nnu mɛ wɛ yě jɔ ɖe. Asáfu mɛ lɛ́ɛ wɛ nɔ́ ji han ɖo Mawu sinsɛn hwenu. Axɔ́sú ɖe gbetakɛ́n ɖé tɔ́n dó hanjitɔ́ lɛ́ɛ wú. Gbetakɛ́n ɔ́ ɖɔ xó dó lě e è nǎ kpé nukún dó yě wú gbɔn ɔ́ kpó lě e yě ná wa azɔ̌ yětɔn gbɔn ayǐhɔ́ngbe ayǐhɔ́ngbe ɔ́ kpó wú. Petaxiya Mɛcezaveɛli ví ɔ́ ɖo axɔ́sú Pɛ́si tɔn ɔ́ kpá, bó nɔ́ kpé nukún dó xó e kan togun ɔ́ lɛ́ɛ wú. Zeláxi Judáa ví ɔ́ wɛ dó kún tɔn. Judáa ví ɖé lɛ́ɛ ɖo gbětótló e gbɔn zɔzɔ lɛ́ɛ mɛ; yě sá xwé ɖó Kiliyati-Aaba kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Divɔ́ni kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Yekavuseɛ́li kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Yecúwa, bó sá ɖó Mɔlada, bó sá ɖó Bɛti-Pɛlɛ́ti, bó sá xwé ɖó Hasáa-Cuwáli, bó sá ɖó Bɛ̌-Ceva kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Siklági, bó sá ɖó Mɛkona kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Eyinu-Hlimumɔ́ni, bó sá ɖó Soléa, bó sá ɖó Yaamúti, bó sá ɖó Zanɔwáxi, bó sá ɖó Adulámu kpódó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Lakíci kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Azeka kpó gletoxo e lɛ́ lɛ̌ dó e lɛ́ɛ kpó mɛ. Hǔn yě sá xwé sín Bɛ̌-Ceva káká wá tɔdo Hinnɔ́mu tɔn mɛ, ɖo Judáa sín ayǐkúngban jí. Bɛnjamɛ́ɛ ví lɛ́ɛ sá xwé ɖó Gɛva, bó sá ɖó Mikumasi, bó sá ɖó Aya, bó sá ɖó Betɛ́li kpó gletoxo e lɛ́ lɛ̌ dó yě lɛ́ɛ kpó mɛ. Yě sá xwé ɖó Anatɔ́ti, bó sá ɖó Nɔvu, bó sá ɖó Ananíya, bó sá xwé ɖó Hasɔ́ɔ, bó sá ɖó Hlama, bó sá ɖó Gitayímu, bó sá xwé ɖó Hadídi, bó sá ɖó Sevoyímu, bó sá ɖó Nɛbaláti, bó sá ɖó Lodi, bó sá ɖó Onɔ, tɔdo azɔ̌watɔ́ lɛ́ɛ tɔn mɛ. Bɛnjamɛ́ɛ yíkúngban jí wɛ gletoxo énɛ́ lɛ́ɛ bǐ ɖe. Levíi ví ɖé lɛ́ɛ gosín Judáa yíkúngban jí wá cí Bɛnjamɛ́ɛ yíkúngban jí. Vɔ̌sánú-xwlémawutɔ́ ɖé lɛ́ɛ kpó Levíi ví ɖé lɛ́ɛ kpó gosín Pɛ́si kannumɔgbénu wá xwé. Zolobabɛ́li Calutiyɛ́li ví ɔ́ kpó Jozuwée kpó wɛ yě xwedó wá. Yě mɛ e wɛ lɛ́ɛ ɖíe: Selaya, Yiimɛya, Ɛzla, Amaliya, Malulúki, Hatúci, Cekaniya, Hlehúmu, Mɛlemɔti, Idóo, Ginnɛtɔ́yi, Avíya, Miyamini, Maadiya, Biluga, Cemaya, Yoyalívu, Yedaya, Salúu, Amɔ́ku, Ilukya kpó, Yedaya kpó; yě wɛ nyí hɛ̌nnugán vɔ̌sánú-xwlémawutɔ́ lɛ́ɛ kpó nɔví yětɔn Levíi ví lɛ́ɛ kpó tɔn ɖo fínɛ́, ɖo Jozuwée hwenu. Levíi ví lɛ́ɛ ɖíe: Yecúwa, Binuyi, Kadimiyɛ́li, Celeviya, Yexuda kpó Mataniya kpó. Mataniya kpó nɔví tɔn lɛ́ɛ kpó wɛ nɔ́ nɔ hanjitɔ́ lɛ́ɛ nu. Bakibukíya kpó Wunni kpó ɖo yě mɛ; yědɛɛ lɛ́ɛ ɔ́, nɔví yětɔn lɛ́ɛ wɛ yě kpan nukɔn bó ɖo azɔ̌ wa wɛ. Jozuwée ji Yoyakímu, Yoyakímu ji Eliyacivu, Eliyacivu ji Yoyada, Yoyada ji Yonatáni, bɔ Yonatáni ji Yadua. Hwenu e Yoyakímu ɖo vɔ̌sánú-xwlémawutɔ́gán nyí wɛ ɔ́, mɛ e nyí hɛ̌nnugán vɔ̌sánú-mawutɔ́ lɛ́ɛ tɔn lɛ́ɛ sín nyǐkɔ ɖíe: Mɛlaya wɛ nyí xwédo Selaya tɔn sín hɛ̌nnugán; Hananiya ka nyí xwédo Yiimɛya tɔn sín hɛ̌nnugán. Mɛculamu nyí xwédo Ɛzla tɔn sín hɛ̌nnugán, Yexoxanáni ka nyí xwédo Amaliya tɔn sín hɛ̌nnugán. Yonatáni nyí xwédo Mɛliku tɔn sín hɛ̌nnugán, Jozɛ́fu ka nyí xwédo Cevaniya tɔn sín hɛ̌nnugán. Adina nyí xwédo Halimu tɔn sín hɛ̌nnugán, bɔ Hɛlukayi nyí xwédo Mɛlayɔ́ti tɔn sín hɛ̌nnugán, Zakalíi nyí xwédo Idóo tɔn sín hɛ̌nnugán, Mɛculamu nyí xwédo Gɛnnɛtɔ́ni tɔn sín hɛ̌nnugán, Zikli ka nyí xwédo Avíya tɔn sín hɛ̌nnugán, Pilutáyi nyí xwédo Mɛyamini kpó Mɔwadia kpó tɔn sín hɛ̌nnugán. Camumúa ka nyí xwédo Biluga tɔn sín hɛ̌nnugán, Yexonatáni ka nyí xwédo Cemaya tɔn sín hɛ̌nnugán, Matenayi ka nyí xwédo Yoyalívu tɔn sín hɛ̌nnugán, Wúzi ka nyí xwédo Yedaya tɔn sín hɛ̌nnugán, Kalayi nyí xwédo Salayi tɔn sín hɛ̌nnugán, Ebɛ́ɛ ka nyí xwédo Amɔ́ku tɔn sín hɛ̌nnugán, Hacaviya nyí xwédo Ilukya tɔn sín hɛ̌nnugán, Nɛtanɛli ka nyí xwédo Yedaya Judáa tɔn ɔ́ sín hɛ̌nnugán. Hwenu e Eliyacivu nyí vɔ̌sánú-xwlémawutɔ́gán, bɔ Yoyada wá nyí, bɔ Yoxanáni wá nyí, bɔ Yadua wá nyí ɔ́, hwe énɛ́ lɛ́ɛ nu wɛ è dǒ Levíi ví e nyí hɛ̌nnugán lɛ́ɛ sín nyǐkɔ wéma mɛ. Mɔ̌ wɛ è blǒ gbɔn káká jɛ dadá Pɛ́si tɔn Daliwúsi hwenu. Levíi ví hɛ̌nnugán lɛ́ɛ ɔ́, è wlǎn nyǐkɔ yětɔn dó wěma e nǔ ɖaxó ɖé jɛ ɔ́, è nɔ wlán d'é mɛ ɔ́ mɛ; è wlǎn nyǐkɔ yětɔn káká wá jɛ Yoxanáni Eliyacivu ví ɔ́ hwenu. Levíi ví lɛ́ɛ sín gǎn Hacaviya, Celeviya kpó Yecúwa Kadimiyɛ́li ví ɔ́ kpó, kpó nɔví yětɔn lɛ́ɛ kpó ɔ́, yě wɛ nú azɔ̌ jɛ yě jǐ ɔ́, yě nɔ́ kpan nukɔn nɔví yětɔn lɛ́ɛ, bó nɔ́ ji susu kpa nú Mawu sín han; yě nɔ́ bló lě e Davídi ɖɔ gbɔn é. Hɔnjínɔtɔ́ Mataniya, Bakibukíya, Ovadia, Mɛculamu, Talumɔ́ni kpó Akúvu kpó nɔ ɖo xɔ e mɛ è nɔ bɛ́ agban dó ɔ́ sín hɔn lɛ́ɛ cɔ́ wɛ ɖo hɔntogbó ɔ́ jí. Yoyakímu e nyí Jozuwée ví bó nyí Yosadaku vívú ɔ́ kpó Nɛɛmíi tokpɔngán ɔ́ kpó, kpódó Ɛsidlási vɔ̌sánú-xwlémawutɔ́ sɛ́nkplɔ́nmɛtɔ́ ɔ́ kpó hwenu wɛ yě wa azɔ̌. Ée è mɛ Jeluzalɛ́mu dó ɔ́ fó ɔ́, è ylɔ́ Levíi ví lɛ́ɛ, bɔ yě gosín fí e yě ɖe lɛ́ɛ bǐ bó wá Jeluzalɛ́mu, bó ná wá ɖu gbe e gbe è na jó dǒ ɔ́ nú Mawu ɔ́ sín xwe bɔ é ná fɛ́ wǔ; yě ná ji susu kpa nú Mawu sín han, bó ná xo hǔn kpó kanhún kpó agǐdigbo kpó d'é mɛ. Hanjitɔ́ e ɖo Jeluzalɛ́mu kanmɛ lɛ́ɛ, kpódó ée ɖo gletoxo Nɛtofanu lɛ́ɛ tɔn mɛ lɛ́ɛ kpó kplé. Yě mɛ e ɖo Bɛti-Gilugalu lɛ́ɛ kpó yě mɛ e ɖo Gɛva kpó Azimawɛ́ti yíkúngban jí lɛ́ɛ kpó kplé. Đó hanjitɔ́ lɛ́ɛ gbá gletoxo yětɔn lɛ́ɛ ɖó Jeluzalɛ́mu kanmɛ. Vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó slá wǔ, bó slá wǔ nú togun ɔ́, bó slá wǔ nú hɔn lɛ́ɛ kpó ahohó ɔ́ kpó. Nyɛ Nɛɛmíi ɔ́, un fɔ Judáa gán lɛ́ɛ ɖó ahohó ɔ́ jí, bó dó hanjigbɛ́ ɖaxó we. Hanjigbɛ́ nukɔntɔn ɔ́ gbɔn ɖisíxwé ɖo ahohó ɔ́ jí, bó ɖidó Zunkɔ́hɔntogbó ɔ́ kɔn. Hocaya kpó Judáa gán lɛ́ɛ wevlɔ́ɖó kpó jɛ hanjigbɛ́ énɛ́ ɔ́ gúdo, bɔ Azalya kpó Ɛzla kpó Mɛculamu kpó, kpó Yexuda kpó, Bɛnjamɛ́ɛ kpó, Cemaya kpó Yiimɛya kpó jɛ fínɛ́, bɔ vɔ̌sánú-xwlémawutɔ́ e nɔ kún kpɛn lɛ́ɛ kpó Zekaliya Yonatáni ví ɔ́ kpó bɔ d'é wú. Yonatáni ɔ́ nyí Cemaya ví, bɔ Cemaya nyí Mataniya ví, bɔ Mataniya nyí Mikaya ví, bɔ Mikaya ka nyí Zakúu ví, bɔ Zakúu nyí Asáfu ví. Zekaliya kpó nɔví tɔn Cemaya, Azalɛ́li, Milalayi, Gilaláyi, Maayi, Nɛtanɛli, Yexuda kpó Hanáni kpó hɛn nǔxonú e Davídi ɖɛ̌mɛnu Mawu tɔn ɔ́ zɔ́n bɔ è blǒ lɛ́ɛ. Ɛsidlási sɛ́nkplɔ́nmɛtɔ́ ɔ́ ɖo nukɔn yětɔn. Ée yě wá Tɔjɔtɛnhɔntogbó ɔ́ nukɔn ɔ́, yě wá mɔ yěɖée ɖo kpó e ɖo Davídi Toxo ɔ́ nukɔn ɔ́ kpá, bó fán kpó ɔ́, bó gbɔn Davídi xwé ɔ́ ta nu dín káká yi Sinhɔntogbó ɔ́ kɔn ɖo zǎnzǎnhwe jí wa jí. Hanjigbɛ́ wegɔ́ ɔ́ gbɔn amyɔxwé ɖidó, bɔ un ɖo gǔdo yětɔn nyɛ kpódó togun ɔ́ sín wevlɔ́ɖó kpó ɖo dǒ ɔ́ jí. Mǐ gbɔn Myɔkpókpe gaga lɛ́ɛ ta nu dín, bó yi káká fí e ahohó ɔ́ jɛ gblǒgbló jí ɖe é. Mǐ dlɛ́n Hɔntogbó Eflayímu tɔn ta nu, bó dlɛ́n d'é nu gbɔn Hɔntogbó Xóxó ɔ́ kpó Hweví Hɔntogbó lɛ́ɛ kpó ta nu, bó yi kpe gaga Hananɛ́li kpó Mɛya kpó tɔn kpó ta nu, káká wá jɛ Lɛ̌ngbɔ́ Hɔntogbó ɔ́ ta nu, bó dín bó yi nɔ te ɖo Gankpá mɛ Hɔntogbó ɔ́ ta nu. Hanjigbɛ́ we lɛ́ɛ nɔ te ɖo Mawu xwé, bɔ nyi lɔmɔ̌ nɔ te, nyi kpó tonukún e xwedó mì lɛ́ɛ kpó. Mǐ kpó vɔ̌sánú-xwlémawutɔ́ Eliyakímu, Maaseya, Mɛyamini, Mikaya, Eliyoenayi, Zekaliya kpó Hananiya kpó; yědɛɛ lɛ́ɛ ɖo kpɛn kún wɛ. Maaseya, Cemaya, Eleazáa, Wúzi, Yexoxanáni, Malukíya, Elámu, kpó Ezɛ́ɛ kpó ɖo mǐ mɛ. Yizláxya ɖo hanjitɔ́ lɛ́ɛ nu, bɔ yě ɖo han ji wɛ. Gbe énɛ́ ɔ́ gbe ɔ́, è sá vɔ̌ nú Mawu kpɔ́ gégé, bɔ mɛ bǐ ɖo awǎ jɛ wɛ, ɖó Mawu sɔ́ awǎjijɛnú ɖaxó ɖokpó dó así nú togun tɔn. Nyɔ̌nu lɛ́ɛ kpó yɔkpɔ́vú lɛ́ɛ kpó lɔmɔ̌ ɖo awǎ jɛ wɛ, bɔ awǎ e jɛ wɛ yě ɖe ɖo Jeluzalɛ́mu, bó ɖo xó sú wɛ ɔ́, è nɔ se ɖo zɔ. Gbe énɛ́ ɔ́ gbe ɔ́, è ɖe mɛ, bɔ è ná nɔ cɔ́ xɔ e mɛ è nɔ bɛ́ agban lɛ́ɛ dó é. Xɔ énɛ́ lɛ́ɛ mɛ wɛ è nɔ bɛ́ nǔ e è nǎ Mawu lɛ́ɛ dó: jinukún nukɔntɔn e nyɔ́ ɖo mɛ ɖokpó ɖokpó gle mɛ é, kpó mǎɖówǒ lɛ́ɛ kpó. É lɛ́ zɔ́n yě ɖɔ yě ní yi gbɔn toxo lɛ́ɛ mɛ, bó yí nǔ e nyí vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó tɔn bɔ sɛ́n ɔ́ ɖɔ é. Judáa to ɔ́ bǐ ɖo awǎ jɛ wɛ, ɖó vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó ɖo azɔ̌ yětɔn lɛ́ɛ wa wɛ. Bɔ nǔ e ko kan mawuzɔ́ é kpó, kpó éé ko kan wǔsláslá é kpó ɔ́, yě ɖo bǐ bló wɛ. Hanjitɔ́ lɛ́ɛ kpó hɔnjínɔtɔ́ lɛ́ɛ kpó lɔ ɖo azɔ̌ yětɔn wa wɛ lě e Davídi kpó vǐ tɔn Salomɔ́ɔ kpó ko ɖɔ gbɔn é. Đ'ayǐ xóxó ɔ́, ɖo Davídi kpó Asáfu kpó hwenu ɔ́, gǎn ɖé lɛ́ɛ ɖe bó kpa acɛ dó hanjitɔ́ lɛ́ɛ nu; ɖěe ɖe bó kpa acɛ dó susu kpa nú Mawu han lɛ́ɛ nu, ɖěvo lɛ́ɛ ɖe bó kpa acɛ dó kú dó nú Mawu sín han lɛ́ɛ nu. Đo Zolobabɛ́li kpó Nɛɛmíi kpó hwenu ɔ́, Izlayɛ́li to ɔ́ bǐ wɛ nɔ ná nǔ e nyí hanjitɔ́ lɛ́ɛ kpó hɔnjínɔtɔ́ lɛ́ɛ kpó tɔn ɔ́ ayǐhɔ́ngbe ayǐhɔ́ngbe. È nɔ ná nǔ e è sɔ́ ɖó vo nú Mawu lɛ́ɛ Levíi ví lɛ́ɛ, bɔ Levíi ví lɛ́ɛ nɔ́ bɛ́ wá jó nú Aalɔ́ɔn ví lɛ́ɛ. Gbe énɛ́ gbe ɔ́, è wǎ ɖo sɛ́nwéma Mɔyízi tɔn xa wɛ ɖo togun mɛ, bó mɔ ɖ'é mɛ ɖɔ mɛ e nyí Amumɔ́ɔ ví é kpó mɛ e nyí Mɔwabunu é kpó ɖě kún ná byɔ́ mavɔmavɔsɛntɔ́ lɛ́ɛ sín gbɛ̌ta mɛ gbeɖé ó. Đó ɖ'ayǐ xóxó ɔ́, yě hɛn nǔɖuɖu kpó sin kpó wá nú Izlayɛ́li ví lɛ́ɛ ǎ, bó ká lɛ́ ná nǔ Baláamu ɖɔ é ní dó nu Izlayɛ́li ví lɛ́ɛ. Lo ɔ́, Mawu sɔ́ nudómɛ énɛ́ ɔ́ dó húzú nyɔ̌ná nú Izlayɛ́li ví lɛ́ɛ. Ée è xa sɛ́n ɔ́ lě bɔ è se ɔ́, è ɖe vǐ e yě ji ɖo toɖévomɛnu xomɛ lɛ́ɛ bǐ ɖó vo nú Izlayɛ́li ví lɛ́ɛ. Cóbónú nǔ énɛ́ ɔ́ ká ná jɛ ɔ́, Eliyacivu vɔ̌sánú-xwlémawutɔ́ e è sɔ́ ɖó xɔ e ɖo Mawu mǐtɔn xwé lɛ́ɛ nu ɔ́ sɔ́ xɔ ɖaxó ɖokpó nú Toviya, ɖó mɛ tɔn wɛ. Đ'ayǐ xóxó ɔ́, nǔ e è nɔ bɛ́ dó xɔ énɛ́ ɔ́ mɛ lɛ́ɛ ɖíe: nǔ e è nǎ Mawu lɛ́ɛ, zǎlínkpɔ́n, gannú lɛ́ɛ, mǎɖówǒ jinukún e è nɔ ylɔ́ ɖɔ blěe é tɔn, mǎɖówǒ vɛ̌ɛn yɔ̌yɔ́ tɔn, mǎɖówǒ ami tɔn, nǔ e sɛ́n ɔ́ ɖɔ è nǎ ná Levíi ví lɛ́ɛ é, kpó nǔ e sɛ́n ɔ́ ɖɔ è nǎ ná hanjitɔ́ lɛ́ɛ kpó é. Hwenu e nǔ énɛ́ ɔ́ ɖo jijɛ wɛ ɔ́, nyɛ ɖo Jeluzalɛ́mu ǎ, ɖó un lɛ́ kɔ yi Babilɔ́nu Dadá Aatazɛɛzɛsi gɔ́n, hwenu e é ɖo xwe gban-nukún-we (32) bló wɛ ɖo axɔ́súzinkpo tɔn jí é. Ée xwe e mɛ un yi dɔ̌n ɔ́ fó ɔ́, Dadá ɔ́ ná gbe mì ɖɔ nyi ní lɛ́ wá yi Jeluzalɛ́mu. Ée un wá ɔ́, un wá mɔ nǔ e Eliyacivu dó sin é: é sɔ́ xɔ ɖokpó ná Toviya ɖo Mawu sín xwé gbe. Nǔ nɛ́ ɔ́ vɛ́ nú mì káká bɔ un bɛ́ nǔ e nyí Toviya tɔn ɖo xɔ ɔ́ mɛ ɔ́ bǐ kɔn nyi gbě. Un ná gbe ɖɔ è nǐ slá wǔ nú xɔ lɛ́ɛ, bó lɛ́ bɛ́ gannú e è nɔ zán ɖo Mawu xwé lɛ́ɛ, nǔ e è nǎ Mawu lɛ́ɛ kpó zǎlínkpɔ́n lɛ́ɛ kpó ɖó tɛn yětɔn mɛ. Un lɛ́ se ɖɔ nǔ e è ɖǒ ná ná Levíi ví lɛ́ɛ ɔ́, è kún sɔ́ nɔ ná yě ó, bɔ Levíi ví lɛ́ɛ kpó hanjitɔ́ e ɖo azɔ̌ wa wɛ lɛ́ɛ kpó bǐ hɔn yi ayǐkúngban yětɔn yětɔn jí. Un gblé hwɛ dó ta nú tonukún lɛ́ɛ bó ɖɔ: “Étɛ́wú mi ka jó xwé Mawu tɔn dó?” Un kplé Levíi ví lɛ́ɛ kpó hanjitɔ́ lɛ́ɛ kpó, bó lɛ́ sɔ́ azɔ̌ dó así nú yě. Énɛ́ ɔ́, Judáa toxo ɔ́ bǐ bɛ́ mǎɖówǒ blěe tɔn, kpó vɛ̌ɛn yɔ̌yɔ́ tɔn kpó ami kpó tɔn wá xɔ e mɛ è nɔ bɛ́ agban dó lɛ́ɛ. Un ɖe Cɛlɛmiya vɔ̌sánú-xwlémawutɔ́ ɔ́, Sadɔ́ku sɛ́nkplɔ́nmɛtɔ́ ɔ́ kpó Pedaya Levíi ví ɔ́ kpó, bɔ yě ná cɔ́ agbanxɔ lɛ́ɛ, un sɔ́ Hanáni Zakúu ví Mataniya vívú ɔ́ gɔ́ nú yě, ɖó yě mɛ énɛ́ lɛ́ɛ ɔ́, gbɛtɔ́ jijɔɖagbenɔ wɛ nú yě bɔ mɛ bǐ tunwun. Azɔ̌ e è sɔ́ dó así nú yě ɔ́ wɛ nyí ɖɔ yě ná nɔ má nǔ lɛ́ɛ nú nɔví yětɔn lɛ́ɛ. “Mawu ce, flín mì, ɖó nǔ énɛ́ e un wa ɔ́ wú, ma wɔn sísí e un ɖó nú Mawu ce sín xwé ɔ́ kpódó nǔ e nyí nǔ bɔ è ɖǒ ná bló lɛ́ɛ kpó é ó.” Hwe énɛ́ ɔ́ nu ɔ́, un mɔ súnnu ɖé lɛ́ɛ bɔ yě ɖo vǐwun li wɛ ɖo vǐwunto mɛ gbɔjɛzán gbe; mɛɖé lɛ́ɛ blá jinukúnkɔ, bó ɖo xwé gbe bɛ́ yi wɛ; mɛɖé lɛ́ɛ dó vɛ̌ɛn gban, vǐwun gban, fígi gban, kpódó nǔ tɛnmɛ tɛnmɛ lɛ́ɛ kpó sín agban nú tócí yětɔn lɛ́ɛ, bó ná bɛ́ nǔ énɛ́ lɛ́ɛ hɛn yi Jeluzalɛ́mu ɖo gbɔjɛzán gbe. Gbe e gbe yě ɖo nǔ yětɔn lɛ́ɛ sa wɛ ɔ́, un ɖɔ nú yě ɖɔ yě ní cɔ́ yěɖée, ɖó nǔ e wa wɛ yě ɖe ɔ́ kún nyɔ́ ó. Tíinu ɖé lɛ́ɛ tíin, bó wá cí Jeluzalɛ́mu, bó nɔ́ hɛn hweví kpó nǔ tɛnmɛ tɛnmɛ kpó wá sa xá Judáa ví lɛ́ɛ ɖo Jeluzalɛ́mu gbɔjɛzán gbe. Un gblé hwɛ dó ta nú tonukún Judáa tɔn lɛ́ɛ, bó ɖɔ nú yě ɖɔ: “Étɛ́ ká nyí nǔ baɖabaɖa énɛ́ ɔ́ bɔ mi ɖo wiwa wɛ, bó dó ɖo su ɖu nú gbɔjɛzán ɔ́ wɛ? É má nyí nǔ e tɔ́gbó tɔgbo mitɔn lɛ́ɛ wa lɛ́ɛ jɛ́n ná! É má nyí nǔ énɛ́ lɛ́ɛ wú wɛ Mawu mǐtɔn dɔn nǔ nyanya énɛ́ lɛ́ɛ bǐ dó mǐ jí, bó dɔn dó toxo élɔ́ jí a? Bɔ midɛɛ lɛ́ɛ mi ko lɛ́ ɖo su ɖu nú gbɔjɛzán ɔ́ wɛ, bó lɛ́ ɖo xomɛsin Mawu tɔn dɔn dó Izlayɛ́li to ɔ́ jí wɛ.” Bɛ́ sín gbe nɛ́ ɔ́ gbe ɔ́, un ná gbe ɖɔ nú zǎn jɛ bibɔ jí hǔn, è nǐ nɔ́ sú Jeluzalɛ́mu sín hɔntogbó lɛ́ɛ có nú gbɔjɛzán ɔ́ ná bɛ́; è ma ka nɔ hun yě có nú gbɔjɛzán ɔ́ fó ó; un sɔ́ mɛsɛntɔ́ ce lɛ́ɛ ɖě ɖó hɔntogbó lɛ́ɛ jí, bónú mɛɖé ná sɔ́ ajɔ̌nú byɔ́ Jeluzalɛ́mu toxo ɔ́ mɛ gbɔjɛzán gbe ɔ́, yě ná gbɛ́. Nǔ ɖo mɔ̌ có, nǔ tɛnmɛ tɛnmɛ sa tɔ́ lɛ́ɛ nɔ́ wá dɔ́ Jeluzalɛ́mu dó ɔ́ kpá, ɖo toxo ɔ́ gúdo nú zǎn ɖokpó abǐ zǎn we. Bɔ un wá gbɛ́ nú yě ɖɔ: “Étɛ́wú mi nɔ ɖo Jeluzalɛ́mu dó ɔ́ kpá? Ényí mi sɔ́ bló mɔ̌ ɖě ɔ́, alɔ ce ná jɛ mi wú.” Bɛ́ sín gbe nɛ́ ɔ́ gbe ɔ́, yě sɔ́ nɔ wá ɖě gbɔjɛzán gbe ǎ. Un ka ɖɔ nú Levíi ví lɛ́ɛ ɖɔ yě ní slá wǔ, bó cɔ́ hɔntogbó lɛ́ɛ gbɔjɛzán gbe, nú gbɔjɛzán ɔ́ ná nyí nǔsísí. “Mawu ce, flín mì ɖó nǔ énɛ́ ɔ́ wú, bó kpɔ́n dó nǔbláwǔkúnúmɛ towe wú, bó cyɔ́n alɔ jǐ ce.” Hwe énɛ́ ɔ́ nu ɖokpó ɔ́, un mɔ ɖɔ Jwifu lɛ́ɛ da nyɔ̌nu Acidɔ́dinu lɛ́ɛ kpódó nyɔ̌nu Amumɔ́ɔ ví lɛ́ɛ kpó, bó da nyɔ̌nu Mɔwabunu lɛ́ɛ. Vǐ yětɔn lɛ́ɛ wevlɔ́ɖó nɔ́ dó Acidɔ́digbe. Yě se Jwifu gbe ǎ. Yě mǎ dó akɔta ɖě sín gbe ǎ ɔ́, yě ká ná dó ɖě sín gbe. Un gblé hwɛ dó ta nú yě bó dó nu yě. Un xo mɛɖé lɛ́ɛ, bó sun ɖa yětɔn lɛ́ɛ ɖɔ yě ní xwlé Mawu ɖɔ émí kún ná ná vǐ nyɔ̌nu émítɔn toɖévomɛnu lɛ́ɛ nú yě ná da ó; émí kún ná da vǐ yětɔn nú vǐ súnnu émítɔn lɛ́ɛ ó, émí ɖésúnɔ kún ká ná da ó. Nǔ énɛ́ ɔ́ wɛ dɔn Salomɔ́ɔ Izlayɛ́li xɔ́sú ɔ́ dó hwɛ mɛ ǎ cé? Axɔ́sú étɔn ɖɔhun tíin ɖo to ɖěbǔ mɛ ǎ. Mawu tɔn yí wǎn n'i, bó sɔ́ ɛ axɔ́sú ɖó Izlayɛ́li to ɔ́ nu. Nǔ ɖo mɔ̌ có, toɖévomɛ nyɔ̌nu lɛ́ɛ dɔn ɛ dó hwɛ mɛ, bɔ è na lɛ́ se din ɖɔ mi da toɖévomɛ nyɔ̌nu, bɔ é nyí hwɛ ɖaxó bɔ mi hu dó Mawu mǐtɔn. Yoyada ví súnnu ɖokpó tíin, Eliyacivu vɔ̌sánú-xwlémawutɔ́ ɔ́ vívú wɛ, bó nyí Sanbaláti, Holonayímunu ɔ́ sín vǐsú; énɛ́ wú wɛ un nya ɛ sín Jeluzalɛ́mu. Mawu ce, ma wɔn nǔ e yě wa ɔ́ gbeɖé ó, ɖó vɔ̌sánú-xwlémawutɔ́zɔ́ ɔ́, yě ɖu su ná, bó gba akɔ e vɔ̌sánú-xwlémawutɔ́ lɛ́ɛ kpó ée Levíi ví lɛ́ɛ kpó jɛ xá we é. Un ɖe mɛ e kó nyí jǒnɔ ɔ́ bǐ sín togun ɔ́ mɛ, bɔ sɛ́n e ko nyí sɛ́n, bɔ vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó ɖó ná nyi ɔ́, un lɛ́ vɔ́ flín mɛ ɖokpó ɖokpó ɖo azɔ̌ tɔn kɔn. Nakí e è nɔ ná hwe ɖé lɛ́ɛ nu é, kpó jinukún nukɔntɔn e è nɔ ná lɛ́ɛ kpó ɔ́, un lɛ́ flín yě. Mawu ce, flín mì bó sɔ́ nukún ɖagbe dó kpɔ́n mì ná. Hwenu e Zɛ̌ɛzɛsi ɖo axɔ́sú ɖu wɛ ɔ́ wɛ xó e è ɖɔ dó fí ɔ́ jɛ. Tokpɔn kantɔn tɛ́nwe (127) nu wɛ é kpa acɛ dó, sín Ɛndu yi Etiopíi; axɔ́sú ɔ́ ɖo ahohó e ɖo Súzi tota ɔ́ mɛ é mɛ, hwenu e é ɖo xwe atɔn bló wɛ ɖo axɔ́súzinkpo jí ɔ́, é ylɔ́ agɔ̌ ɖaxó ɖokpó ɖó azaglɔ́gán tɔn lɛ́ɛ bǐ, kpó azɔ̌watɔ́ tɔn lɛ́ɛ kpó tamɛ; é ylɔ́ ahwangán Pɛ́si tɔn lɛ́ɛ kpó Mɛdi tɔn lɛ́ɛ kpó; bó ylɔ́ mɛ klogǎnklogǎn lɛ́ɛ kpó tokpɔngán lɛ́ɛ kpó. É fɔ dɔkun tɔn ɖagbe ɖagbe lɛ́ɛ kpó acɔ́ɖónú e nɔ ɖo kínkɔ́n wɛ bó nɔ́ ɖe axɔ́súɖuɖu tɔn sín susu xlɛ́ lɛ́ɛ kpó tɛ́. Nǔ lɛ́ɛ nɔ títɛ́ fínɛ́ xɔ azǎn. Azǎn kɛnnɛ ko (180) wɛ yě nɔ títɛ́ xɔ. Ée azǎn énɛ́ lɛ́ɛ fó ɔ́, axɔ́sú ɔ́ ylɔ́ agɔ̌ ɖaxó ɖokpó dó mɛ e ɖo ahohó Súzi tota tɔn ɔ́ mɛ lɛ́ɛ bǐ tamɛ; é ylɔ́ togun ɔ́ bǐ, bɛ́ sín gbɛtɔ́ nukúnɖéjí lɛ́ɛ jí, káká yi jɛ gbɛtɔ́ kpaa lɛ́ɛ jí. Azǎn tɛ́nwe wɛ yě ɖu agɔ̌ ɔ́ xɔ, ɖo axɔ́sú ɔ́ sín kɔ́xota ɖo hɔn ɔ́ mɛ. È zě kan vɔvɔ sin dó lɛ̌ɛnkanvɔ wěwé abǐ kwélesinnɔ wú, lobo sin dó alɔganví e è sɔ́ kpatágan dó bló ná é wú, bó sin dó dotín wú; awǐnnya e è nɔ ylɔ́ ɖɔ mǎblu ɔ́ wɛ è dǒ mɛ dotín lɛ́ɛ ná. È tɛ́ akánma e è sɔ́ siká kpó kpatágan kpó dó bló ná lɛ́ɛ dó fínɛ́. Awǐnnya e è nɔ ylɔ́ ɖɔ pɔfili ɔ́ kpó mǎblu kpó, kpó awǐnnya e è nɔ ylɔ́ ɖɔ nakli ɔ́ kpó, kpódó mǎblu wiwi kpán wɛ è tɛ́ gbɔn kɔ́ mɛ fínɛ́. Siká kɔ́fu tɛnmɛ tɛnmɛ mɛ wɛ è nǎ ahan yě dó; vɛ̌ɛn tíin bó sa tɔ bɔ axɔ́sú ɔ́ hun alɔ bo ná yě. Mɛ ɖokpó ɖokpó nɔ nu lě e é jló e gbɔn é; axɔ́sú ɔ́ ná gbe nǔjíkpɔ́ntɔ́ tɔn lɛ́ɛ ɖɔ è nǐ yí mɛ ɖokpó ɖokpó sín jǒnɔ lě e mɛ ɔ́ jló gbɔn é. Axɔ́si Vasitíi lɔ ylɔ́ agɔ̌ dó axɔ́sú ɔ́ sín hɔnmɛ dó nyɔ̌nu lɛ́ɛ tamɛ. Azǎn tɔn tɛ́nwegɔ́ ɔ́ gbe ɔ́, xomɛ hun axɔ́sú ɔ́ ɖó vɛ̌ɛn e é nu ɔ́ wú; é ylɔ́ agooɖojǐe tɔn tɛ́nwe e nɔ wa azɔ̌ n'i tawun lɛ́ɛ: yě wɛ nyí Mɛhumáni, Bizita, Haabona, Bigita, Avaguta, Zetáa, kpó Kaakási kpó. É ɖe gbe nú yě ɖɔ yě ní yi kplá axɔ́si Vasitíi wá nú émí, bónú axɔ́sigbákún tɔn ní ɖo ta tɔn. É jló ná xlɛ́ lě e axɔ́si ɔ́ nyɔ́ ɖɛkpɛ sɔ ɔ́ azɔ̌watɔ́ tɔn ɖaxó ɖaxó lɛ́ɛ kpó mɛ e ɖo fínɛ́ lɛ́ɛ kpó ɖó é nyɔ́ ɖɛkpɛ ɖésú. Agooɖojǐe lɛ́ɛ yi dó wɛn axɔ́si ɔ́; é ká gbɛ́ ɖɔ émí kún ná wá ó. Ée axɔ́sú ɔ́ se mɔ̌ ɔ́, é vɛ́ n'i, bɔ xomɛ sin i ɖésú. Axɔ́sú ɔ́ ɖó xó ɔ́ te nú nǔnywɛ́tɔ́ lɛ́ɛ, ɖó nú xó ɖěbǔ tíin ɖo hɔnmɛ ɔ́, yě mɛ énɛ́ lɛ́ɛ e tunwun sɛ́n, bó tunwun lě e è nɔ wa nǔ gbɔn ɔ́ wɛ nɔ ɖɔ gbo xá ɛ. Azaglɔ́gán Pɛ́si tɔn kpó Mɛdi tɔn kpó tɛ́nwe lɛ́ɛ ɖo axɔ́sú ɔ́ kpá; yě wɛ nyí: Kaacena, Cetáa, Adimata, Taacíci, Mɛlɛsi, Maasena kpó Mɛmukáni kpó. Yědɛɛ lɛ́ɛ wɛ sɛkpɔ́ ɛ hú mɛ ɖě lɛ́ɛ bǐ, bó ɖo tɛn nukɔntɔn lɛ́ɛ mɛ ɖo axɔ́súɖuto ɔ́ mɛ. Axɔ́sú ɔ́ ɖɔ nú yě ɖɔ: “Nyɛ axɔ́sú ɔ́, un sɛ́ agooɖojǐe ce lɛ́ɛ dó ɖɔ yě ní yi ylɔ́ axɔ́si Vasitíi wá nú mì, bɔ é ká gbɛ́ ɖɔ émí kún ná wá ó. Đo sɛ́n ɔ́ mɛ ɔ́, tó tɛ́ è sixú dɔn n'i?” Mɛmukáni ka yí xó, bó ɖɔ nú axɔ́sú ɔ́ kpó gǎn hɔn-yitɔ́ tɔn lɛ́ɛ kpó ɖɔ: “Axɔ́si Vasitíi wa nǔ nyi do ɖésú; é ká nyí axɔ́sú ɔ́ wú kɛ́ɖɛ́ wɛ é wa nǔ nyi do dó ǎ; é lɛ́ wa nǔ nyi do dó mǐ azaglɔ́gán lɛ́ɛ kpó mɛ e ko sixú ɖo axɔ́sú ɔ́ sín acɛ mɛ ɖo tokpɔn lɛ́ɛ bǐ mɛ lɛ́ɛ kpó. Đó nǔ énɛ́ e Vasitíi wa din ɔ́, nyɔ̌nu lɛ́ɛ bǐ ná se, bó ná jɛ nukún mɛ kpɔ́n nú asú yětɔn lɛ́ɛ jí. Yě ná ɖɔ: ‘Azǎn nabí ɖé ɖíe ɔ́, axɔ́sú ɔ́ ma ylɔ́ asi tɔn Vasitíi ɔ́ bɔ é gbɛ́ ɖɔ émí kún ná wá ó ǎ cé?’ Bɛ́ sín égbé din ɔ́, azaglɔ́gán Pɛ́si tɔn lɛ́ɛ kpó Mɛdi tɔn lɛ́ɛ kpó sín asi lɛ́ɛ ná se zǐnzán axɔ́si ɔ́ tɔn, bɔ yě ná ɖó dó énɛ́ ɔ́ wú, bó ná jɛ gbe kán nú asú yětɔn lɛ́ɛ jí; nukún mɛ e kpɔ́n nú asú yětɔn lɛ́ɛ wɛ nyɔ̌nu lɛ́ɛ ná ɖe ɔ́ ká ná dó xomɛsin xomɛ nú súnnu lɛ́ɛ. Sɛ́mɛɖó! Ényí é jló mɛ ɔ́, è nǎ ɖe sɛ́n ɖokpó tɔ́n; è nǎ wlán sɛ́n ɔ́ dó Pɛ́si kpó Mɛdi kpó sín sɛ́nwéma ɔ́ mɛ, bɔ è sɔ́ ná súnsún gbeɖé ǎ. Sɛ́n ɔ́ ná ɖɔ axɔ́si Vasitíi kún sɔ́ ná wá axɔ́sú ɔ́ nukɔn gbeɖé ó; bɔ mɛ ná zé axɔ́si nyínyí sín acɛ e é ɖó ɔ́ nú nyɔ̌nu ɖěvo e ná nyɔ́ hú éyɛ́ ɔ́. Hwenu e mɛ bǐ ná se gbeta mɛtɔn ɖaxó énɛ́ e mɛ ɖe tɔ́n ɔ́ gbɔn axɔ́súɖuto mɛtɔn bǐ mɛ ɔ́, nyɔ̌nu lɛ́ɛ bǐ ná nɔ se tónú nú asú yětɔn lɛ́ɛ: asú ɔ́ sixú nyí gbɛtɔ́ nukúnɖéjí; é ká sixú nyí gbɛtɔ́ kpaa.” Xó énɛ́ ɔ́ nyɔ́ axɔ́sú ɔ́ kpó azaglɔ́gán tɔn lɛ́ɛ kpó nukún mɛ, bɔ é bló lě e Mɛmukáni ɖɔ gbɔn é. Énɛ́ ɔ́, axɔ́sú ɔ́ sɛ́ wěma dó tokpɔn e nu é kpa acɛ dó lɛ́ɛ bǐ mɛ; lě e tokpɔn ɖokpó ɖokpó nɔ́ wlán nǔ gbɔn kpó gbe e togun ɖokpó ɖokpó nɔ́ dó ɔ́ kpó mɛ wɛ è wlǎn wěma ɔ́ dó. Wěma ɔ́ ɖo ɖiɖɔ wɛ ɖɔ súnnu ɖokpó ɖokpó ɖó ná nyí gǎn ɖo xwé tɔn gbe, bɔ gbe e é nɔ́ dó ɔ́ wɛ è ɖó ná nɔ́ dó ɖo xwé tɔn gbe. Ée nǔ énɛ́ lɛ́ɛ jɛ wá yi gúdo ɔ́, xomɛ e axɔ́sú Zɛ̌ɛzɛsi sin ɔ́ wá fá, bɔ é flín Vasitíi, bo flín nǔ e é wa ɔ́ kpó gbeta e è ɖe tɔ́n dó wǔ tɔn ɔ́ kpó. Énɛ́ ɔ́, mɛ e nɔ sɛn axɔ́sú ɔ́ lɛ́ɛ ɖɔ n'i ɖɔ: “È ɖǒ ná ba ɖyɔ̌vǐ e nyɔ́ ɖɛkpɛ titewungbe lɛ́ɛ nú we. Axɔ́sú ɔ́ ní ɖe mɛ bónú yě nǐ yi tokpɔn lɛ́ɛ bǐ mɛ, bó yi kplá ɖyɔ̌vǐ e nyɔ́ ɖɛkpɛ lɛ́ɛ bǐ wá. È nǎ kplé yě ɖó nyɔ̌nu lɛ́ɛ sín xwé gbe ɖo axɔ́sú ɔ́ sín hɔnmɛ, ɖo Súzi, tota ɔ́ mɛ, bónú agooɖojǐe Hegée e nɔ kpɔ́n nyɔ̌nu lɛ́ɛ jí ɔ́, ná kpé nukún dó yě wǔ. Đyɔ̌vǐ e ná nyɔ́ axɔ́sú ɔ́ nukún mɛ ɔ́ ná húzú axɔ́si, bó ná jɛ Vasitíi sín tɛnmɛ.” Xó énɛ́ e è ɖɔ ɔ́ nyɔ́ axɔ́sú ɔ́ nukún mɛ, bɔ è blǒ gbɔn mɔ̌. Nya ɖé ká tíin, bó ɖo ahohó Súzi tɔn ɔ́ mɛ fínɛ́ bɔ è nɔ ylɔ́ ɛ ɖɔ Maadocée. Yayíi ví wɛ é nyí, bó nyí Cimɛ́yi ví, bó nyí Kícu ví. Bɛnjamɛ́ɛ sín akɔta mɛ wɛ é jɔ ɖe. É ɖo mɛ e ahwan wlí kannumɔ yětɔn sín Jeluzalɛ́mu lɛ́ɛ mɛ; yě kpó axɔ́sú Judáa tɔn Yoyakini kpó wɛ è wlǐ. Axɔ́sú Babilɔ́nu tɔn Nabukodonɔzɔ́ɔ wɛ wlí kannumɔ yětɔn. Maadocée wɛ hɛn tɔ́ tɔn nɔví Hadasa e è nɔ lɛ́ ylɔ́ ɖɔ Ɛsitɛ́ɛ é; ɖó tɔ́cyɔvǐ nɔcyɔvǐ wɛ Ɛsitɛ́ɛ nyí. Vǐ mɛbámɛ ɖé wɛ, é nyɔ́ ɖɛkpɛ ɖésú. Ée tɔ́ tɔn kpó nɔ tɔn kpo kú ɔ́, Maadocée yí i dó ɖó vǐ. Ée axɔ́sú ɔ́ ɖe gbeta énɛ́ ɔ́ tɔ́n bɔ mɛ bǐ se ɔ́, è kplé ɖyɔ̌vǐ wɔ̌buwɔ́bú ɖé lɛ́ɛ ɖó hɔn ɔ́ mɛ ɖo Súzi, bɔ Hegée ɖo nukún kpé dó yě wú wɛ; è kplá Ɛsitɛ́ɛ lɔ yi hɔnmɛ, bó zé e dó alɔ mɛ nú Hegée e nɔ kpé nukún dó nyɔ̌nu lɛ́ɛ wú é. Ɛsitɛ́ɛ sín nǔ nyɔ́ Hegée nukún mɛ, bɔ é nɔ́ wa ɖagbe n'i. É yǎ wǔ ná ɛ nǔ e ɖo tají bɔ é ná nɔ́ dó bló éɖée ɖó ná é, kpó nǔ e é ná nɔ́ ɖu ɔ́ kpó; é cyán nyɔ̌nuví tɛ́nwe ɖo nyɔ̌nuví e ɖo axɔ́sú ɔ́ sín hɔnmɛ lɛ́ɛ mɛ, bó kplá é kpó yě kpó dó xɔ e nyɔ́ hú xɔ lɛ́ɛ bǐ ɖo nyɔ̌nu lɛ́ɛ sín xwé gbe ɔ́ mɛ. Ɛsitɛ́ɛ ɖɔ nú mɛ ɖěbǔ ɖɔ Jwifu wɛ émí nyí ǎ, ɖó Maadocée gbɛ́ n'i. Ayǐhɔ́ngbe ayǐhɔ́ngbe ɔ́, Maadocée nɔ ɖo xwé e gbe nyɔ̌nu lɛ́ɛ ɖe ɔ́ sín hɔn nukɔn gbɔn wɛ; é nɔ́ ɖo yiyi wɛ, bó nɔ́ ɖo wiwa wɛ, lobo nɔ ɖo do ba nú lě e Ɛsitɛ́ɛ ɖe ɔ́ kpó lě e hɛn ɛ gbɔn wɛ è ɖe ɔ́ kpó wɛ. Đyɔ̌vǐ e ɖo nyɔ̌nu lɛ́ɛ sín xwé gbe lɛ́ɛ ɖó ná zán nǔ e yě ɖó ná dó bló yěɖée ɖó ná lɛ́ɛ xɔ xwe ɖokpó: yě ná zé sun ayizɛ́n ɖó te, bó sá nǔsáwǔ e è sɔ́ mǐla dó bló ná ɔ́, bó lɛ́ sɔ́ sun ayizɛ́n ɖěvo ɖó te, bó sá nǔsáwǔ wǎnɖagbenɔ kpódó célu e nyɔ̌nu lɛ́ɛ nɔ zán lɛ́ɛ kpán. Énɛ́ ɔ́ gúdo ɔ́, yě mɛ ɖokpó ɖokpó nɔ́ yi axɔ́sú Zɛ̌ɛzɛsi nukɔn. Ényí ɖyɔ̌vǐ lɛ́ɛ ɖě ná gosín nyɔ̌nu lɛ́ɛ sín xwé gbe bó ná yi axɔ́sú ɔ́ gɔ́n ɔ́, è nɔ jó e dó bɔ é nɔ́ fɔ nǔ e jló e lɛ́ɛ bǐ. Gbadanu wɛ é nɔ yi axɔ́sú ɔ́ gɔ́n; ayǐhɔ́ngbe tɔn zǎnzǎn ɔ́, è nɔ kplá ɛ yi nyɔ̌nu lɛ́ɛ sín xwé wegɔ́ ɔ́ gbe, bɔ Caacigazi agooɖojǐe e nɔ kpé nukún dó axɔ́sú ɔ́ sín asi ɖěvo lɛ́ɛ wú ɔ́ nɔ́ kpé nukún wǔ tɔn. É sɔ́ nɔ́ lɛ́ kɔ yi axɔ́sú ɔ́ gɔ́n ǎ; afi nú axɔ́sú ɔ́ wá ɖó jlǒ tɔn bó ylɔ́ nyǐkɔ tɔn ɖɔ è nǐ yi kplá ɛ wá. Gbe ɖokpó wá su bɔ axɔ́sú ɔ́ gɔ́n yiyi jɛ Ɛsitɛ́ɛ jí; Ɛsitɛ́ɛ Avihayilu ví e tɔ́ tɔn nɔví ví Maadocée hɛn bɔ é su é. Ée é xwe axɔ́sú ɔ́ gɔ́n ɔ́, é byɔ́ nǔɖé zɛ nǔ e Hegée ɖɔ é ní fɔ lɛ́ɛ wú ǎ; Hegée wɛ nyí agooɖojǐe e nɔ kpé nukún dó nyɔ̌nu lɛ́ɛ sín xwé wú é. Ɛsitɛ́ɛ sín nǔ nɔ́ nyɔ́ mɛ e nɔ mɔ ɛ lɛ́ɛ bǐ nukún mɛ. Hwenu e axɔ́sú Zɛ̌ɛzɛsi ɖo xwe tɛ́nwe bló wɛ ɖo axɔ́súzinkpo jí ɔ́, sun tɔn wǒgɔ́ ɔ́ e nyí Tevɛ́ti sín sun ɔ́ mɛ ɔ́, è kplá Ɛsitɛ́ɛ yi gɔ̌n tɔn, ɖo fí e é nɔ́ nɔ ɖo hɔn ɔ́ mɛ é. Axɔ́sú ɔ́ yí wǎn nú Ɛsitɛ́ɛ hú nyɔ̌nu ɖě lɛ́ɛ bǐ; é nyɔ́ xomɛ dó wǔ tɔn, bó wa ɖagbe n'i hú nyɔ̌nuví ɖě lɛ́ɛ bǐ. É sɔ́ axɔ́sigbákún ɔ́ xwe n'i, bó sɔ́ ɛ axɔ́si ɖó Vasitíi tɛnmɛ. É ylɔ́ agɔ̌ ɖaxó ɖokpó dó Ɛsitɛ́ɛ tamɛ, bó ylɔ́ azaglɔ́gán tɔn lɛ́ɛ kpó azɔ̌watɔ́ lɛ́ɛ kpó. É ná gbɔjɛ́ gbɔn tokpɔn lɛ́ɛ bǐ mɛ, bó hun alɔ dó ná nǔ mɛ. È kplé ɖyɔ̌vǐ lɛ́ɛ azɔn wegɔ́ ɔ́; Maadocée ɖo azɔ̌ wa wɛ ɖo axɔ́sú ɔ́ xwé hwenɛ́nu. Ɛsitɛ́ɛ ka ko ɖɔ nú mɛɖé ɖɔ Jwifu wɛ émí nyí ǎ, ɖó é ɖo sɛ́n e Maadocée dó n'i ɔ́ xwédo wɛ. É kpo ɖo tónú se n'i wɛ hwenu e é kpó ɖo alɔ tɔn mɛ ɔ́ ɖɔhun. Maadocée ɖo azɔ̌ tɔn wa wɛ gbe ɖokpó ɖo hɔnmɛ bɔ Bigitáni kpódó Tɛlɛ́ci kpó blá sé ɖɔ émí ná hu axɔ́sú Zɛ̌ɛzɛsi, ɖó é dó xomɛsin ɖaxó ɖé xomɛ nú yě. Yě mɛ we énɛ́ lɛ́ɛ ɔ́, axɔ́sú ɔ́ sín hɔnta wɛ yě nɔ́ nɔ. Maadocée se séblá énɛ́ e yě blá ɔ́, bó ɖɔ nú axɔ́si Ɛsitɛ́ɛ. Ɛsitɛ́ɛ ka sɔ́ yi ɖɔ nú axɔ́sú ɔ́ bó ɖɔ Maadocée wɛ ɖɔ mɔ̌ nú émí. É ba do nú xó énɛ́ ɔ́ bó mɔ ɖɔ nǔgbó wɛ, bɔ è dǒ kan kɔ nú azɔ̌watɔ́ we énɛ́ lɛ́ɛ, bó sin dó atín wú, bɔ yě kú, bɔ axɔ́sú ɔ́ ná gbe bɔ è wlǎn nǔ énɛ́ lɛ́ɛ dó wěma e mɛ è nɔ kpi nǔ e kan axɔ́súɖuto ɔ́ sín tan lɛ́ɛ bǐ dó ɔ́ mɛ. Ée nǔ énɛ́ lɛ́ɛ bǐ jɛ wá yi ɔ́, axɔ́sú Zɛ̌ɛzɛsi sɔ́ Hamáa gǎn. Hamáa ɔ́, Hamumɛdata ví wɛ, bó jɔ ɖo Agagi kún mɛ. Axɔ́sú ɔ́ sɔ́ ɛ gǎn hɔn-yitɔ́ xɔ́sú. Azɔ̌watɔ́ axɔ́sú ɔ́ tɔn lɛ́ɛ bǐ nɔ jɛ kpo nú Hamáa, bó nɔ́ ɖe kɔ́ n'i ɖó axɔ́sú ɔ́ wɛ ná gbe tɔn. Maadocée kɛ́ɖɛ́ jɛ́n má nɔ́ jɛ kpo bo nɔ ɖe kɔ́ n'i ǎ. Azɔ̌watɔ́ ɖě lɛ́ɛ kanbyɔ́ Maadocée ɖɔ: “Nɛ̌ ká gbɔn bɔ hwɛ ma nɔ bló nǔ e axɔ́sú ɔ́ ɖɔ ɔ́ ǎ?” Ée yě nɔ́ fɔ́n bó nɔ ɖo ɖiɖɔ n'i wɛ bɔ é ma se ǎ ɔ́, yě yi jɛ hwɛ tɔn nú Hamáa, bó ná kpɔ́n ɖɔ é ná lɛ́ kpo ɖo nǔ e é xwe ɔ́ bló wɛ a jí; ɖó é ɖɔ nú yě ɖɔ Jwifu wɛ émí nyí. Hamáa mɔ ɖɔ Maadocée kún nɔ jɛ kpo bo nɔ ɖe kɔ́ nú émí nǔgbó ó, bɔ xomɛ sin i ɖésú. Lo ɔ́, Hamáa mɔ ɖɔ nú émí dɔn tó nú Maadocée kɛ́ɖɛ́ ɔ́, é kún kpé ó, ɖó è ko ɖɔ n'i ɖɔ Jwifu wɛ Maadocée nyí, bɔ é ɖɔ émí ná sú to tɔn mɛ nu Jwifu e ɖo axɔ́súɖuto ɔ́ mɛ lɛ́ɛ bǐ sín kún dó. Hwenu e axɔ́sú Zɛ̌ɛzɛsi ɖo xwe wěwe bló wɛ ɖo axɔ́súzinkpo jí ɔ́, sun nukɔn nukɔntɔn e è nɔ ylɔ́ ɖɔ Nisáan ɔ́ mɛ ɔ́, Hamáa nyi akɔ dó sun ɖokpó ɖokpó, bó nyi dó azǎn ɖokpó ɖokpó, bó ná tunwun azǎn e ná nyɔ́ ɔ́ kpó sun e ná nyɔ́ nú tito tɔn lɛ́ɛ é kpó, bɔ akɔ wá jɛ sun wěwegɔ́ e nyí Adáa é jí. Hamáa ɖɔ nú axɔ́sú Zɛ̌ɛzɛsi ɖɔ: “Sɛ́mɛɖó e, togun ɖé tíin bó ɖo axɔ́súɖuto mɛtɔn mɛ, bó gba kpé tokpɔn lɛ́ɛ bǐ mɛ. Togun énɛ́ ɔ́ gbɔn vo ɖo togun ɖě lɛ́ɛ bǐ mɛ, bɔ walɔ tɔn gbɔn vo nú togun ɖě lɛ́ɛ bǐ tɔn; mɛ e ɖo togun énɛ́ ɔ́ mɛ lɛ́ɛ nɔ nyi sɛ́n mɛtɔn lɛ́ɛ ǎ; è nǎ agbɔ̌n mɛ énɛ́ lɛ́ɛ ɔ́, é ná nyɔ́ nú mɛ ǎ. Nú è mɔ ɖɔ é nyɔ́ ɔ́, è nǎ ɖe gbeta ɖokpó tɔ́n ɖɔ è nǐ hu yě, bɔ è nǎ wlán gbeta énɛ́ ɔ́ dó wěma mɛ. Énɛ́ ɔ́, un ná zé kpatágan tɔ́nu afɔɖé kanwe ko (300) jó nú azɔ̌watɔ́ lɛ́ɛ, bɔ yě ná bɛ̌ dó akwɛ́gbá mɛtɔn mɛ.” Ée kɛntɔ́ Jwifu lɛ́ɛ tɔn Hamáa, Hamumɛdata ví e jɔ ɖo Agagi kún mɛ ɔ́ ɖɔ mɔ̌ ɔ́, axɔ́sú ɔ́ ɖe alɔgan sín alɔ, bó sɔ́ dó n'i, lobo ɖɔ n'i ɖɔ: “Sɔ́ akwɛ́ towe ɖ'ayǐ; un jó togun énɛ́ ɔ́ nú we; zě e dó wa nǔ e jló we ɔ́ ná.” Azǎn wǒ-atɔngɔ́ e ɖo sun nukɔntɔn ɔ́ mɛ ɔ́, è ylɔ̌ wěgbóhɛntɔ́ axɔ́sú ɔ́ tɔn lɛ́ɛ; yě wlán wěma lɛ́ɛ lě e Hamáa ɖɔ gbɔn nú yě é, bó sɛ́ dó mɛ e sɔ́ axɔ́sú ɔ́ sín afɔ ɖó te lɛ́ɛ kpó tokpɔngán lɛ́ɛ kpó, kpódó togun tɛnmɛ tɛnmɛ lɛ́ɛ sín gǎn lɛ́ɛ kpán. È wlǎn wěma lɛ́ɛ lě e tokpɔn ɖokpó ɖokpó nɔ wlán nǔ gbɔn é, bó wlán dó gbe e togun ɖokpó ɖokpó nɔ dó ɖo axɔ́súɖuto ɔ́ mɛ é mɛ. Axɔ́sú Zɛ̌ɛzɛsi sín nyǐkɔ mɛ wɛ è wlǎn wěma lɛ́ɛ dó, bó zé alɔgan tɔn dó ɖó wuntun ná. È bɛ̌ wěma lɛ́ɛ nú wɛnsagun lɛ́ɛ ɖɔ yě nǐ yi má gbɔn togun e ɖo axɔ́sú ɔ́ sín acɛ mɛ lɛ́ɛ bǐ mɛ. È wlǎn dó wěma ɔ́ mɛ ɖɔ è nǐ gbo gbe Jwifu lɛ́ɛ bǐ, è nǐ hu yě bǐ; mɛ wínnyáwínnyá lɛ́ɛ kpódó mɛ kpikpo lɛ́ɛ kpó; nyɔ̌nu lɛ́ɛ kpó yɔkpɔ́vú lɛ́ɛ kpó. Yě nǐ hu yě, bó bɛ́ nǔ yětɔn lɛ́ɛ bǐ; è ma kú nǔbláwǔ nú yě ó. Azǎn ɖokpó wɛ è nǎ sɔ́ ɖó te tawun, bó dó hu yě ná. Azǎn énɛ́ ɔ́ wɛ nyí azǎn wǒ-atɔngɔ́ e ɖo sun wěwegɔ́ ɔ́ mɛ é; sun wěwegɔ́ ɔ́ wɛ è nɔ ylɔ́ ɖɔ Adáa. Gbeta énɛ́ e axɔ́sú ɔ́ ɖe tɔ́n dó wěma mɛ ɔ́, è ɖǒ ná jlǎ gbɔn tokpɔn ɖokpó ɖokpó mɛ, bó byɔ́ togun lɛ́ɛ bǐ, ɖɔ yě nǐ ɖo gbesisɔ mɛ nú azǎn énɛ́ ɔ́. Wɛnsagun lɛ́ɛ hwlɛ́ndó bó yi lě e axɔ́sú ɔ́ ɖɔ gbɔn é. È jlǎ gbeta ɔ́ gbɔn Súzi tota ɔ́ mɛ. Hwenɛ́nu ɔ́, axɔ́sú ɔ́ kpó Hamáa kpó ɖo ayǐjínjɔ́n bó ɖo ahan nu wɛ; Súzi to ɔ́ bǐ ká wlú. Ée Maadocée se nǔ e jɛ lɛ́ɛ bǐ ɔ́, é vún awu dó kɔ nú éɖée, bó sɔ́ caki dó, bó sá afín, bó byɔ́ toxo ɔ́ mɛ kpó avǐ kpó xósúsú kpó. Ée é zɔn mɔ̌ káká wá axɔ́sú ɔ́ sín hɔn nukɔn ɔ́, é nɔ te, ɖó mɛ ɖěbǔ ɖó acɛ e zɔn caki mɛ byɔ́ hɔn ɔ́ mɛ é ǎ. Fí ɖěbǔ e axɔ́sú ɔ́ sín gbeta gbɔn ɖo tokpɔn ɖokpó ɖokpó mɛ ɔ́, Jwifu lɛ́ɛ bǐ nɔ́ byɔ́ aluwɛ ɖaxó mɛ; yě nɔ́ ɖo nu blá wɛ, bó nɔ́ ɖo avǐ ya wɛ, bó nɔ́ ɖo alě ná wɛ; yě mɛ gěgé nɔ́ fɔ caki dó, bó nɔ́ mlɔ́ afín mɛ. Mɛsɛntɔ́ Ɛsitɛ́ɛ tɔn lɛ́ɛ kpódó agooɖojǐe tɔn lɛ́ɛ kpó wá ɖɔ nǔ e ɖo jijɛ wɛ ɔ́ nú Ɛsitɛ́ɛ bɔ xɛsi ɖaxó ɖé jɛ jǐ tɔn. É sɛ́ awu dó Maadocée ɖɔ é ní ɖe caki nyi ayǐ, bó dó awu énɛ́ lɛ́ɛ, Maadocée ka gbɛ́. Énɛ́ ɔ́, Ɛsitɛ́ɛ ylɔ́ agooɖojǐe e axɔ́sú ɔ́ sɔ́ ɖó gɔ̌n tɔn lɛ́ɛ ɖokpó; è nɔ ylɔ́ ɛ ɖɔ Hatáki; é ɖɔ n'i ɖɔ ní yi kan nǔ e ɖo jijɛ wɛ ɔ́ byɔ́ Maadocée, bó kan nǔ e wú é ɖo mɔ̌ wa wɛ ɔ́ byɔ́ ɛ. Hatáki yi Maadocée gɔ́n ɖo fí e é ɖe ɖo axɔ́sú ɔ́ sín hɔn nukɔn é. Maadocée ɖɔ nǔ e jɛ lɛ́ɛ bǐ n'i. Đo ta jí ɔ́, é ɖɔ akwɛ́ nabí e Hamáa ɖɔ nú è hu Jwifu lɛ́ɛ bǐ ɔ́, émí ná kɔn dó axɔ́sú ɔ́ sín gbǎ mɛ ɔ́ n'i. É lɛ́ zé wěma e mɛ è wlǎn gbeta e ɖɔ è nǐ sú Jwifu lɛ́ɛ sín kún dó, bɔ è jlǎ ɖo Súzi é ɖokpó n'i; é ɖɔ è nǐ sɔ́ yi xlɛ́ Ɛsitɛ́ɛ, bo tín nǔ lɛ́ɛ bǐ mɛ n'i. É lɛ́ ɖɔ nú Hatáki ɖɔ é ní ɖɔ nú Ɛsitɛ́ɛ ɖɔ é ní yi sa vo nú axɔ́sú ɔ́ dó Jwifu lɛ́ɛ tamɛ. Hatáki yi dó wɛn e Maadocée dó ɔ́ Ɛsitɛ́ɛ. Ɛsitɛ́ɛ lɛ́ sɛ́ Hatáki dó Maadocée gɔ́n ɖɔ é ní yi ɖɔ n'i ɖɔ: “Mɛ bǐ wɛ tunwun sɛ́n élɔ́, bɛ́ sín mɛsɛntɔ́ axɔ́sú ɔ́ tɔn lɛ́ɛ jí káká yi jɛ mɛ e ɖo tokpɔn axɔ́sú ɔ́ tɔn mɛ lɛ́ɛ jí ɖɔ axɔ́sú ɔ́ má ylɔ́ mɛɖé ǎ, bónú mɛ ɔ́ yi axɔ́sú ɔ́ sín xwéta ɖo hɔn ɔ́ mɛ ɔ́, hu jɛ́n è nɔ hu i; é sixú nyí súnnu, é sixú nyí nyɔ̌nu; có nú è nǎ gɔn mɛ énɛ́ ɔ́ hu ɔ́, axɔ́sú ɔ́ jɛ́n ná dlɛ́n sikákpogɛ tɔn dó e; nyɛ ɔ́, axɔ́sú ɔ́ ma ka sɔ́ ylɔ́ mì din ǎ ɔ́, azǎn gban (30) ɖíe.” È yi ɖɔ xó e Ɛsitɛ́ɛ ɖɔ ɔ́ nú Maadocée, bɔ Maadocée ɖɔ è nǐ yi ɖɔ nú Ɛsitɛ́ɛ ɖɔ: “Ma vɛdó ɖɔ éé émí ko ɖo axɔ́sú ɔ́ sín xwé gbe kpowun ɔ́, émí ɖokpónɔ ná gán ɖ'é mɛ sín ó. Ényí nǔ élɔ́ lɛ́ɛ ɖo jijɛ wɛ din nú a tin dó ɔ́, alɔgɔ́númɛtɔ́ kpó mɛhwlɛ́ngántɔ́ kpó ná gosín fí ɖěvo wá nú Jwifu lɛ́ɛ, bɔ yě ná gán. Lo ɔ́, hwɛ ɔ́ a nǎ kú, bɔ tɔ́ towe sín kún ná sú dó. Mɛ̌ ká tunwun nú nǔ élɔ́ e ɖo nǎ jɛ wɛ ɔ́ wú wɛ è sɔ́ we axɔ́si?” Énɛ́ ɔ́, Ɛsitɛ́ɛ ɖɔ sɛ́ dó Maadocée ɖɔ: “Yi, bo kplé Jwifu e ɖo Súzi tomɛ lɛ́ɛ bǐ bónú mi blá nu dó ta ce mɛ. Mi ma ɖu nǔ ó, mi ma nu sin ó káká nú kéze atɔn zǎn atɔn; nyɛ kpó mɛsɛntɔ́ ce lɛ́ɛ kpó ɔ́, mi lɔ na blá nu; énɛ́ ɔ́ gúdo ɔ́, sɛ́n ɔ́ ná ɖo te có un ná yi axɔ́sú ɔ́ gɔ́n. Nú é byɔ́ ɖɔ má kú ɔ́, un ná kú.” Énɛ́ ɔ́, Maadocée ɖidó, bó bló nǔ e Ɛsitɛ́ɛ ɖɔ n'i lɛ́ɛ bǐ. Ée azǎn atɔn e yě sɔ́ ɖó te dó blá nu ɔ́ vɔ ɔ́, Ɛsitɛ́ɛ dó axɔ́si wu tɔn lɛ́ɛ, bó yi fí e axɔ́sú nɔ́ nɔ ɖo hɔn ɔ́ mɛ é, bó nɔ te ɖo kɔ́xota, ɖo axɔ́sú ɔ́ sín xɔ nukɔn. Axɔ́sú ɔ́ ká ɖo ayǐjínjɔ́n ɖo axɔ́súzinkpo tɔn jí ɖo xɔ mɛ, bó kpan nukɔn xɔli ɔ́. Ée é mɔ Ɛsitɛ́ɛ ɖo te ɖo kɔ́xota ɔ́, xomɛ hun i, bɔ é dlɛ́n sikákpogɛ e ɖo alɔ tɔn mɛ ɔ́ dó e. Ɛsitɛ́ɛ sɛkpɔ́ sikákpogɛ ɔ́, bo ɖó alɔ nuvínu tɔn. Axɔ́sú ɔ́ kanbyɔ́ ɛ ɖɔ: “Nɛ̌ ká gbɔn nú we axɔ́si Ɛsitɛ́ɛ? Étɛ́ wɛ jló we? É ná bó nyí axɔ́súɖuto ce sín vlɔ̌ɖówe wɛ jló we ɔ́, un ná ná we.” Ɛsitɛ́ɛ ka yí gbe n'i ɖɔ: “Sɛ́mɛɖó! Un ylɔ́ agɔ̌ ɖokpó dó mɛ ta mɛ; é ká jló mì ɖɔ hwi kpó Hamáa kpó ní wá.” Ée Ɛsitɛ́ɛ ɖɔ mɔ̌ ɔ́, axɔ́sú ɔ́ ɖɔ: “Mi yi kplá Hamáa wá din tlóló lě e Ɛsitɛ́ɛ byɔ́ gbɔn é.” Ée Hamáa wá ɔ́, axɔ́sú ɔ́ kpó é kpó zɔn yi agɔ̌ ɔ́ tɛnmɛ. Hwenu e yě ɖo vɛ̌ɛn nu wɛ ɔ́, axɔ́sú ɔ́ ɖɔ nú Ɛsitɛ́ɛ ɖɔ: “Étɛ́ a jlǒ ná byɔ́ mì? A byɔ́ nǔɖé ɔ́, un ná ná we. Étɛ́ wɛ jló we? É ná bó nyí axɔ́súɖuto ce sín vlɔ̌ɖówe wɛ jló we ɔ́, un ná ná we.” Ɛsitɛ́ɛ yí gbe n'i ɖɔ: “Nǔ e un jló ná byɔ́ mɛ ɔ́ ɖíe: Sɛ́mɛɖó, ényí é jló mɛ, bónú mɛ nǎ jɔwǔ mì, bó bló nǔ e ba wɛ un ɖe ɔ́ nú mì hǔn, mɛ kpó Hamáa kpó ní lɛ́ wá agɔ̌ e un ylɔ́ dó ta mitɔn mɛ sɔ ɔ́ tɛnmɛ; énɛ́ ɔ́, nǔ e kanbyɔ́ mì wɛ mɛ ɖe ɔ́, un ná ná sin tɔn mɛ.” Gbe nɛ́ ɔ́ gbe ɔ́, Hamáa tɔ́n sín Ɛsitɛ́ɛ xwé gbe kpó xomɛhunhun kpó, ayi tɔn jɛ ayǐ. Lo ɔ́, ée é jɛ axɔ́sú ɔ́ sín hɔn jí, bó mɔ ɖɔ Maadocée kún sí te ó, é kún ká kpɔ́n jɛ émítɔn jí ó ɔ́, xomɛ sin i dó wǔ tɔn tlala. Xomɛ sin i mɔ̌ có é ká ɖe xlɛ́ ǎ, bó yi xwé tɔn gbe, bó dó wɛn sɛ́ dó xɔ́ntɔn tɔn lɛ́ɛ kpó asi tɔn Zelɛ́ci kpó ɖɔ yě nǐ wá. Ée yě wá ɔ́, é jɛ lě e dɔkun tɔn lɛ́ɛ sukpɔ́ sɔ ɔ́, lě e vǐ tɔn lɛ́ɛ sukpɔ́ sɔ ɔ́ ɖó hǎ nú yě jí; é ɖó lě e axɔ́sú ɔ́ sɔ́ ɛ ɖó tɛn ɖaxó mɛ gbɔn ɔ́, lě e é sɔ́ ɛ ɖó nukɔn nú azɔ̌watɔ́ lɛ́ɛ kpó azaglɔ́gán lɛ́ɛ bǐ kpó gbɔn, bó dó sɔ́ ɛ su ɔ́ hǎ nú yě. É lɛ́ ɖɔ nú yě ɖɔ: “Nyɛ ɖokpónɔ géé wɛ nyí mɛ e Ɛsitɛ́ɛ ylɔ́ bɔ un xwedó axɔ́sú ɔ́ yi xwé tɔn gbe, bó yi ɖu agɔ̌ égbé é; é ká kó lɛ́ ylɔ́ mì, bɔ nyɛ kpó axɔ́sú ɔ́ kpó ná yi xwé tɔn gbe. Amɔ̌, ényí un kpo ɖo Maadocée, nya Jwifu énɛ́ ɔ́ mɔ wɛ ɖo azɔ̌ tɔn jí ɖo axɔ́sú ɔ́ sín hɔn jí jɛ́n wɛ ɔ́, nǔ énɛ́ lɛ́ɛ ɖěbǔ ná hun xomɛ nú mì ǎ.” Énɛ́ ɔ́, asi tɔn Zelɛ́ci kpó xɔ́ntɔn tɔn lɛ́ɛ bǐ kpó ɖɔ n'i ɖɔ: “A nǎ kpa kpo ɖokpó bɔ ga tɔn ná yi mɛ̌tlu koatɔ́n (25), bɔ sɔ zǎnzǎn ɔ́, a nǎ byɔ̌ axɔ́sú ɔ́ ɖɔ è nǐ dó kan kɔ nú Maadocée, bó sɔ́ sin dó kpo ɔ́ wú. Énɛ́ ɔ́ gúdo ɔ́, a nǎ yi agɔ̌ ɔ́ tɛnmɛ kpó xomɛhunhun kpó, hwi kpó axɔ́sú ɔ́ kpó.” Xó énɛ́ ɔ́ nyɔ́ Hamáa nukún mɛ bɔ é zɔ́n kpo ɔ́ kpa. Adɔ̌ vɛ́ axɔ́sú ɔ́ zǎn énɛ́ ɔ́ mɛ, bɔ é byɔ́ ɖɔ è ní zě wěma e mɛ è wlǎn nǔ e jɛ ɖo axɔ́súɖuto ɔ́ mɛ lɛ́ɛ dó ɔ́ wá nú émí, bɔ è zě wá bó xa nǔ e ɖ'é mɛ ɔ́ n'i. Akpá e xwé è wlǎn lě e azɔ̌watɔ́ axɔ́sú ɔ́ tɔn Bigitáni kpó Tɛlɛ́ci kpó e nɔ́ nɔ axɔ́sú ɔ́ sín hɔn jí lɛ́ɛ jló ná hu axɔ́sú ɔ́ gbɔn bɔ Maadocée se bó yi ɖɔ ɔ́ wɛ è xa n'i tawun. Đěe è xa n'i ɔ́, é kanbyɔ́ ɖɔ: “Ée Maadocée ka se xó énɛ́ ɔ́ bó wá ɖɔ ɔ́, ajɔ tɛ́ è ka ná ɛ? Yɛ̌yi tɛ́ è ka wlí n'i?” Bɔ azɔ̌watɔ́ axɔ́sú ɔ́ tɔn lɛ́ɛ yí gbe n'i ɖɔ: “È ma ná nǔ ɖěbǔ i nɛ́!” Hwenɛ́nu ɔ́, Hamáa ɖo axɔ́sú ɔ́ sín kɔ́xota jɛ wɛ, bó jló ná ɖɔ n'i ɖɔ é ní ná gbe bónú è nǎ dó kan kɔ nú Maadocée, bo sɔ́ sin dó atín e é zɔn bɔ è kpa ɔ́ wú; axɔ́sú ɔ́ kanbyɔ́ ɖɔ: “Mɛ̌ ka ɖo kɔ́xota fínɛ́?” Azɔ̌watɔ́ lɛ́ɛ yí gbe n'i ɖɔ: “Hamáa wɛ.” Bɔ axɔ́sú ɔ́ ɖɔ é ní byɔ́ xɔ mɛ. Hamáa ka byɔ́ xɔ mɛ bɔ axɔ́sú ɔ́ kanbyɔ́ ɛ ɖɔ: “Un jló ná wlí yɛ̌yi nú mɛɖé; yɛ̌yi e un ma wlí nú mɛɖé kpɔ́n gbeɖé ǎ ɔ́ wɛ un jló ná wlí nú mɛ ɔ́; nɛ̌ mɔ̌ un sixú bló gbɔn n'i?” Ée Hamáa se mɔ̌ ɔ́, é jɛ ɖiɖɔ dó xomɛ jí ɖɔ: “Mɛ̌ wɛ axɔ́sú ɔ́ ká jló ná sɔ́ su sɔ mɔ̌? Nyɛ jɛ́n é ná nyí.” Énɛ́ ɔ́, é yí gbe nú axɔ́sú ɔ́ ɖɔ: “Sɛ́mɛɖó, ényí è jlǒ ná sɔ́ mɛɖé su gbɔn mɔ̌ hǔn, è ɖɔ nú è nǐ sɔ́ axɔ́sú wú e mɛ nɔ dó lɛ́ɛ ɖokpó, bó sɔ́ mɛ ɔ́ ɖó sɔ́ e jí mɛ ɖésúnɔ nɔ jínjɔ́n bɔ axɔ́súgbákún ɖo ta tɔn ɔ́ jó nú azɔ̌watɔ́ mɛtɔn ɖaxó ɖaxó lɛ́ɛ ɖokpó, bó zɔ́n ɛ ɖɔ ní sɔ́ awu ɔ́ dó nú mɛ ɔ́, bó sɔ́ ɛ jínjɔ́n sɔ́ ɔ́ jí, lobo kplá ɛ yi ɖi sa gbɔn toxo ɔ́ mɛ; azɔ̌watɔ́ ɔ́ ná ɖo xó sú wɛ ɖo nukɔn tɔn ɖɔ: lě e è nɔ bló gbɔn nú mɛ e axɔ́sú ɔ́ jló ná sɔ́ su ɔ́ ɖíe!” Ée Hamáa ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Yi, zě awu ɔ́ kpó sɔ́ ɔ́ kpó din tlóló, bó bló nǔ e a ɖɔ nú mì din ɔ́ bǐ nú Maadocée, nya Jwifu e nɔ́ nɔ hɔn jí é; ma wɔn nǔ e a ɖɔ lɛ́ɛ ɖěbǔ ó.” Nǔgbó ɔ́, Hamáa yi zé awu ɔ́ kpó sɔ́ ɔ́ kpó; é dó awu ɔ́ nú Maadocée, bó sɔ́ ɛ jínjɔ́n sɔ́ ɔ́ jí, lobo kplá ɛ ɖi sa gbɔn toxo ɔ́ mɛ, bó ɖo xó sú wɛ ɖo nukɔn tɔn ɖɔ: “Lě e è nɔ bló gbɔn nú mɛ e axɔ́sú ɔ́ jló ná sɔ́ su ɔ́ ɖíe!” Énɛ́ ɔ́ gúdo ɔ́, Maadocée lɛ́ kɔ wá axɔ́sú ɔ́ sín hɔn jí, bɔ winnyá hu Hamáa, bɔ é cyɔ́n avɔ ta, bó ka fyá yi xwé gbe. Ée é jɛ xwé gbe ɔ́, é wlí nǔ e jɛ ɔ́ bǐ ɖɔ nú asi tɔn Zelɛ́ci kpó xɔ́ntɔn tɔn lɛ́ɛ kpó. Bɔ nǔnywɛ́tɔ́ tɔn lɛ́ɛ kpó asi tɔn kpó ɖɔ n'i ɖɔ: “Maadocée e nukɔn a ko ɖo winnyá ɖu ɖe wɛ din ɔ́, ée é nyí ɖɔ Jwifu wɛ é nyí ɔ́, a sixú wa nǔ ɖěbǔ n'i ǎ; winnyá ɖu wɛ jɛ́n a nǎ nɔ ɖe ɖo nukɔn tɔn tɛgbɛ.” Xó énɛ́ ɔ́ ɖɔ n'i wɛ yě ɖe, bɔ agooɖojǐe axɔ́sú ɔ́ tɔn lɛ́ɛ wá, bó kplá ɛ tlóló ɖidó agɔ̌ e Ɛsitɛ́ɛ ylɔ́ ɔ́ tɛnmɛ. Axɔ́sú ɔ́ kpó Hamáa kpó yi agɔ̌ ɖu gbé ɖo Ɛsitɛ́ɛ xwé azɔn wegɔ́ ɔ́. Azɔn wegɔ́ ɔ́ énɛ́ ɔ́ e yě yi ɔ́, hwenu e yě ɖo vɛ̌ɛn nu wɛ ɔ́, axɔ́sú ɔ́ lɛ́ kanbyɔ́ axɔ́si Ɛsitɛ́ɛ ɖɔ: “Étɛ́ a jlǒ ná byɔ́ mì? A byɔ́ nǔɖé ɔ́, un ná ná we. É ná bó nyí axɔ́súɖuto ce sín vlɔ̌ɖówe wɛ jló we ɔ́, un ná ná we.” Énɛ́ ɔ́, axɔ́si Ɛsitɛ́ɛ yí gbe n'i ɖɔ: “Sɛ́mɛɖó! Ényí nǔ ce nyɔ́ mɛ nukún mɛ hǔn, è hwlɛ̌n mì, bó hwlɛ́n togun ce gán; nǔ e un jló ná byɔ́ mɛ ɔ́ nɛ́; é nyɔ́ nukún mɛtɔn mɛ mɔ̌ hǔn, è xɔ mì ɖ'é mɛ. Đó è sa nyɛ kpó togun ce kpó, bɔ è nǎ vɔ mǐ; è nǎ gbo gbe mǐ; è nǎ sú kún mǐtɔn dó. Nú é ka nyí sa wɛ è sa mǐ bɔ mǐ nǎ nyí kannumɔ abǐ mɛsɛntɔ́ kpowun wɛ ɔ́, un ná kɛ nu ǎ, ɖó énɛ́ ɔ́ byɔ́ ɖɔ un ná dó ya nú mɛ ǎ.” Axɔ́sú Zɛ̌ɛzɛsi ka yí xó, bó kanbyɔ́ Ɛsitɛ́ɛ ɖɔ: “Mɛ̌ ká nyí mɛ e ɖo mɔ̌ ná wa wɛ é? Fítɛ́ mɛ ɔ́ ɖe?” Ɛsitɛ́ɛ yí gbe n'i ɖɔ: “Kɛntɔ́ mǐtɔn e ɖo ya dó nú mǐ wɛ ɔ́, Hamáa wɛ; nya dídá énɛ́ ɔ́ wɛ.” Ée Hamáa se mɔ̌ ɔ́, xɛsi jɛ jǐ tɔn ɖo axɔ́sú ɔ́ kpó axɔ́si ɔ́ kpó nukɔn. Xomɛ ka sin axɔ́sú ɔ́ ɖésú, bɔ é sí te sín fí e ɖu agɔ̌ ɔ́ ɖe wɛ yě ɖe é, bó yi cí folówakan mɛ ɖo hɔn ɔ́ mɛ. Hamáa ka cí fínɛ́ bó ɖo vo sa nú Ɛsitɛ́ɛ wɛ ɖɔ ní hwlɛ́n émí ɖo axɔ́sú ɔ́ sí, ɖó é mɔ ɖɔ axɔ́sú ɔ́ ná hu émí jɛ́n wɛ. Ée axɔ́sú ɔ́ lɛ́ kɔ sín dɔ̌n wá agɔ̌ ɔ́ tɛnmɛ ɔ́, é mɔ Hamáa ɖo zan e jí axɔ́si Ɛsitɛ́ɛ mlɔ́ ɔ́ bó ɖɔ: “Kan ná hwlɛ́n xá axɔ́si ɔ́ wɛ é ká ɖe ɖo xwé ce gbe ɖo nukún ce mɛ fí a?” Ée axɔ́sú ɔ́ ɖɔ xó énɛ́ ɔ́ tlóló ɔ́, è cyɔ́n avɔ nukún mɛ nú Hamáa, bó dó ɖe xlɛ́ ɛ ɖɔ è nǎ hu i. Agooɖojǐe lɛ́ɛ ɖokpó nɔ́ nyí Haabona; é ɖɔ: “Sɛ́mɛɖó! Hamáa ko kpa kpo ɖokpó ɖ'ayǐ ɖo xwé tɔn gbe, bó ná dó kan kɔ nú Maadocée dó kpo ɔ́ wu; Maadocée énɛ́ ɔ́, xó e é wá ɖɔ ɔ́ wɛ ká zɔ́n bɔ mɛ kpo ɖo gbɛ. Kpo ɔ́ ɖo te ɖo Hamáa sín hɔn nukɔn; ga tɔn nyí mɛ̌tlu koatɔ́n (25).” Énɛ́ ɔ́, axɔ́sú ɔ́ ɖɔ: “Mi yi dó kan kɔ nú Hamáa dó kpo énɛ́ ɔ́ wú.” Bɔ è dǒ kan kɔ nú Hamáa dó kpo e é kpa ɖ'ayǐ nú Maadocée ɔ́ wú; énɛ́ ɔ́, axɔ́sú ɔ́ sín xomɛ fá. Gbe énɛ́ gbe ɖokpó ɔ́, axɔ́sú Zɛ̌ɛzɛsi sɔ́ Hamáa, kɛntɔ́ Jwifu lɛ́ɛ tɔn sín xwé ná axɔ́si Ɛsitɛ́ɛ. Ɛsitɛ́ɛ ɖɔ nú axɔ́sú ɔ́ ɖɔ Maadocée ɔ́, mɛ émítɔn wɛ, bɔ axɔ́sú ɔ́ ylɔ́ ɛ bɔ é wá. Ée é wá ɔ́, axɔ́sú ɔ́ ɖe alɔgan tɔn e é yí sín Hamáa sí ɔ́ sín alɔ, bo sɔ́ dó nú Maadocée. Ɛsitɛ́ɛ ka sɔ́ Maadocée ɖó Hamáa sín xwé nu. Énɛ́ ɔ́ gúdo ɔ́, Ɛsitɛ́ɛ jɛ kpo ɖo axɔ́sú ɔ́ sá mɛ kpó avǐ kpó, bó sa vo n'i ɖɔ é ní gbɛ́ tito baɖabaɖa e Hamáa e tɔ́n sín Agagi kún mɛ ɔ́ ɖó ayǐ bó ná dó sú Jwifu lɛ́ɛ sín kún dó é. Đěe é ɖɔ mɔ̌ ɔ́, axɔ́sú ɔ́ dlɛ́n sikákpogɛ tɔn dó e, bɔ Ɛsitɛ́ɛ sí te bo ɖɔ n'i ɖɔ: “Sɛ́mɛɖó, nú é jló mɛ ɔ́, nú è nyɔ́ xomɛ dó wǔ ce hǔn, nú è mɔ ɖɔ é sɔgbe nukún mɛtɔn mɛ hǔn, nú è yí wǎn nú mì hǔn, è nǐ wlǎn wěma ɖokpó bó dó gbɛ́ nǔ e Hamáa Hamumɛdata ví e tɔ́n sín Agagi kún mɛ ɔ́ wlán é; wěma e é wlán bó ɖɔ è nǐ sú Jwifu e gbɔn tokpɔn mɛtɔn mɛ lɛ́ɛ bǐ sín kún dó é. Nú awě mɔ̌hunkɔtɔn xo togun ce ɔ́, nɛ̌ un ná sixú ɖó akɔ́n nu gbɔn? Nɛ̌ un ka sixú ɖo te bɔ è nǎ sú togun ce sín kún dó gbɔn?” Énɛ́ ɔ́, axɔ́sú ɔ́ ɖɔ nú Ɛsitɛ́ɛ kpó Maadocée kpó ɖɔ: “Mi ɖótó. Un zɔ́n bɔ è dó kan kɔ nú Hamáa bo hu, ɖó é ɖo kúdán gblɔ́n nú Jwifu lɛ́ɛ wɛ, bó sɔ́ xwé tɔn dó alɔ mɛ nu we, Ɛsitɛ́ɛ. Amɔ̌, wěma e è wlǎn dó nyǐkɔ ce mɛ bó sɔ́ alɔgan ce sín wuntun tɛ jí ɔ́, un sɔ́ sixú húzú gbeɖé ǎ. É ká ɖo mɔ̌ có midɛɛ ɔ́, mi sixú wlán wěma ɖokpó lě e é jló mi gbɔn ɔ́ nú ɖagbe Jwifu lɛ́ɛ tɔn. Mi wlán wěma ɔ́ dó nyǐkɔ ce mɛ, bó sɔ́ alɔgan ce sín wuntun tɛ ji.” Gbe nɛ́ gbe e ɖo azǎn ko-nukún-atɔngɔ́ ɔ́ nyí wɛ ɖo sun atɔngɔ́ ɔ́ e è nɔ ylɔ́ ɖɔ Siwáni -sun ɔ́ mɛ ɔ́, è ylɔ̌ wěgbójínɔtɔ́ axɔ́sú ɔ́ tɔn lɛ́ɛ bɔ yě wlǎn wěma lě e Maadocée ɖɔ gbɔn nú yě é. É sɛ́ wěma ɔ́ dó Jwifu lɛ́ɛ, bó sɛ́ dó tokpɔngán lɛ́ɛ kpó gǎn hɔn-yitɔ́ lɛ́ɛ kpó gbɔn tokpɔn kantɔn tɛ́nwe (127) e ɖo axɔ́súɖuto ɔ́ mɛ lɛ́ɛ mɛ, bɛ́ sín Ɛndu káká yi Etiopíi. È wlǎn wěma lɛ́ɛ lě e tokpɔn ɖokpó ɖokpó nɔ́ wlán nǔ gbɔn é, bó wlán dó gbe e togun ɖokpó ɖokpó nɔ́ dó ɖo axɔ́súɖuto ɔ́ mɛ é mɛ, bó wlán dó gbe e Jwifu lɛ́ɛ nɔ́ dó é mɛ, bó wlán lě e yě nɔ́ wlán nǔ gbɔn é. È wlǎn wěma ɔ́ dó axɔ́sú Zɛ̌ɛzɛsi sín nyǐkɔ mɛ, bó sɔ́ alɔgan tɔn sín wuntun tɛ jí. È bɛ̌ wěma lɛ́ɛ nú sɔ́xátɔ́ lɛ́ɛ bɔ yě xá sɔ́ e yě bɛ̌ sín axɔ́sú ɔ́ sín sɔ́kpó mɛ lɛ́ɛ jí, bó yi má wěma lɛ́ɛ. È wlǎn dó wěma lɛ́ɛ mɛ ɖɔ: “Axɔ́sú ɔ́ ná gbe Jwifu e ɖo toxo ɖokpó ɖokpó mɛ ɖo axɔ́súɖuto ɔ́ mɛ lɛ́ɛ bǐ, ɖɔ yě ní kplé bó hwlɛ́n gbɛ yětɔn. É ná gbe yě ɖɔ mɛ e ná hɛn alǐnnyánú bó ná tɔ́n ahwan yě lɛ́ɛ ɔ́, yě ná bó nyí akɔta ɖěbǔ nu hǔn; è nǐ gbo gbe yě, è nǐ hu yě gbɔn tokpɔn e ko sixú ɖo axɔ́súɖuto ɔ́ mɛ lɛ́ɛ bǐ mɛ. Yě sixú hu asi yětɔn lɛ́ɛ kpódó vǐ yětɔn lɛ́ɛ kpó bó bɛ́ dɔkun yětɔn lɛ́ɛ bǐ lɔ. Azǎn ɖokpó wɛ yě ná sɔ́ ɖó te tawun bó dó bló nǔ énɛ́ ɔ́ gbɔn tokpɔn axɔ́sú Zɛ̌ɛzɛsi tɔn lɛ́ɛ bǐ mɛ. Azǎn ɔ́ wɛ nyí azǎn wǒ-atɔngɔ́ ɔ́ ɖo sun wěwegɔ́ e è nɔ ylɔ́ ɖɔ Adáa ɔ́ mɛ é. Gbeta e è ɖo nǎ jlá gbɔn tokpɔn ɖokpó ɖokpó mɛ ɔ́ wɛ ɖo wěma ɔ́ mɛ, bó ɖo ɖiɖɔ nú togun lɛ́ɛ bǐ wɛ ɖɔ Jwifu lɛ́ɛ ná ɖo gbesisɔ mɛ azǎn énɛ́ ɔ́ gbe bó ná fun ahwan xá kɛntɔ́ yětɔn lɛ́ɛ.” Sɔ́xátɔ́ lɛ́ɛ yá wǔ hwlɛ́ndó lě e axɔ́sú ɔ́ ɖɔ gbɔn ɔ́ bó yi má wěma lɛ́ɛ, bɔ è jlǎ gbeta ɔ́ gbɔn Súzi tota ɔ́ bǐ mɛ. Maadocée tɔ́n sín hɔn ɔ́ mɛ, bó dó axɔ́sú wu; awu ɔ́ ɖó hwɛkan fɛ́sinnɔ kpó wěwé kpó, bɔ axɔ́súgbákún e è sɔ́ siká dó bló ná ɔ́ ɖaxó ɖé ɖo ta tɔn. É dó awu ɖaxó ɖé, lɛ̌ɛnkanvɔ vɔvɔ cɛ́cɛ́ ɖé wɛ è dǒ tɔ awu ɔ́ ná. Ée mɛ e ɖo to ɔ́ mɛ lɛ́ɛ mɔ ɛ ɔ́, yě j'awǎ jɛ jí kpó xósúsú kpó. Jwifu lɛ́ɛ ɔ́, nyɔ̌ná, xomɛhunhun kpó ɖuɖéjí kpó kɛ́ɖɛ́ mɛ yě ɖe. Fí ɖěbǔ e gbeta axɔ́sú ɔ́ tɔn gbɔn ɖo tokpɔn ɖěbǔ mɛ ɖo toxo ɖěbǔ mɛ é ɔ́, Jwifu lɛ́ɛ bǐ nɔ j'awǎ; yě nɔ́ ylɔ́ agɔ̌ bó nɔ́ ɖu xwe; mɛ gěgé ɖo togun ɖé lɛ́ɛ mɛ, bó húzú Jwifu ɖó yě ɖo xɛsi ɖi nú Jwifu lɛ́ɛ wɛ. Azǎn wǒ-atɔngɔ́ e ɖo sun wěwegɔ́ ɔ́ ée è nɔ ylɔ́ ɖɔ Adáa sun ɔ́ mɛ ɔ́, è ɖǒ nǎ bló nǔ e axɔ́sú ɔ́ ɖɔ ɔ́, bɔ kɛntɔ́ Jwifu lɛ́ɛ tɔn lɛ́ɛ kó ɖo nukún ɖó wɛ ɖɔ émí ná ɖu ɖo yě jí ɔ́; lě e yě lin gbɔn ɔ́ ká sɔ́ nyí gbɔn mɔ̌ ǎ; Jwifu lɛ́ɛ wɛ wá ɖu ɖo kɛntɔ́ yětɔn lɛ́ɛ jí. Gbe énɛ́ ɔ́ gbe ɔ́, Jwifu lɛ́ɛ kplé gbɔn toxo yětɔn lɛ́ɛ mɛ, gbɔn tokpɔn e nu Zɛ̌ɛzɛsi kpa acɛ dó lɛ́ɛ bǐ mɛ, bó ná tɔ́n ahwan mɛ e ɖo yě ba ná hu wɛ lɛ́ɛ. Mɛ ɖěbǔ ká sixú nɔ te ɖo Jwifu lɛ́ɛ nukɔn ǎ, ɖó mɛ e ɖo to ɔ́ mɛ lɛ́ɛ bǐ wɛ ɖo xɛsi ɖi nú yě wɛ. Azaglɔ́gán lɛ́ɛ, mɛ e sɔ́ axɔ́sú ɔ́ sín afɔ ɖó te lɛ́ɛ, tokpɔngán lɛ́ɛ kpódó azɔ̌watɔ́ axɔ́sú ɔ́ tɔn lɛ́ɛ kpó bǐ ɖo Jwifu lɛ́ɛ jí, ɖó yě ɖo xɛsi ɖi nú Maadocée wɛ. Đó Maadocée ɖó acɛ ɖo axɔ́sú ɔ́ sín xwé gbe, bɔ nyǐkɔ tɔn gba kpé tokpɔn lɛ́ɛ bǐ mɛ. Ayǐhɔ́ngbe ayǐhɔ́ngbe ɔ́, acɛ nɔ ɖo acɛ jí jɛ nú Maadocée wɛ. Jwifu lɛ́ɛ bɔ hwǐ nyi kɛntɔ́ yětɔn lɛ́ɛ mɛ bó hu yě bǐ, bo vívá kún yětɔn. Yě wa nǔ e jló yě ɔ́ xa mɛ e gbɛ́ wǎn nú yě lɛ́ɛ. Gbɛtɔ́ afɔwe kanwe ko (500) wɛ yě hu ɖo ahohó Súzi tɔn ɔ́ mɛ. È ɖɔ mɛ nabí e Jwifu lɛ́ɛ hu gbe énɛ́ gbe ɖo ahohó Súzi tɔn ɔ́ mɛ ɔ́ lɛ́ɛ nú axɔ́sú ɔ́. Ahohó Súzi tɔn ɔ́ mɛ kɛ́ɖɛ́ nɛ́ Jwifu lɛ́ɛ ko hu gbɛtɔ́ afɔwe kanwe ko (500) ɖe nɛ́, bo lɛ́ hu Hamáa sín vǐ wǒ lɛ́ɛ gɔ́ ná; nabí yě ká hu ɖo tokpɔn ɖě lɛ́ɛ mɛ din? Amɔ̌, ényí a lɛ̌ jló ná byɔ́ nǔɖé mì ɔ́, un ná ná we; un ná bló nǔ e ba wɛ a ɖe ɔ́ bǐ nú we. Ɛsitɛ́ɛ yí gbe n'i ɖɔ: “Sɛ́mɛɖó, nú è mɔ ɖɔ é nyɔ́ ɔ́, è nǐ nǎ gbe Jwifu e ɖo Súzi lɛ́ɛ, bónú sɔ ɔ́, è nǐ lɛ́ wa nǔ lě e gbeta ɔ́ ɖɔ gbɔn bɔ yě bló égbé ɔ́ ɖɔhun. Nǎ gbe bónú è nǎ dó kan kɔ nú Hamáa sín vǐ wǒ lɛ́ɛ sín cyɔ dó atín wú.” Axɔ́sú ɔ́ ná gbe ɖɔ è nǐ bló mɔ̌, bɔ è jlǎ gbeta ɔ́ gbɔn Súzi toxo ɔ́ mɛ, bɔ è dǒ kan kɔ nú Hamáa ví wǒ lɛ́ɛ sín cyɔ dó atín wú. Jwifu e ɖo Súzi lɛ́ɛ lɛ́ kplé ɖo Adáasun ɔ́ sín azǎn wǒ-ɛnɛgɔ́ ɔ́ gbe, bó hu gbɛtɔ́ afɔɖé kanwe ko (300); yě ká ɖó alɔ mɛ e yě hu lɛ́ɛ ɖě sín nǔ wú ǎ. Jwifu e ɖo axɔ́sú ɔ́ sín tokpɔn ɖě lɛ́ɛ mɛ lɛ́ɛ to kplé bó ná hwlɛ́n gbɛ yětɔn, bo vo ɖo kɛntɔ́ yětɔn lɛ́ɛ lɔmɛ; yě hu gbɛtɔ́ adɔ̌kpo atɔn děgba atɔn afɔwó-afatɔ́n (75.000). Yě ká ɖ'alɔ mɛ e yě hu lɛ́ɛ ɖě sín nǔ wú ǎ. Adáasun ɔ́ sín azǎn wǒ-atɔngɔ́ ɔ́ gbe wɛ nǔ énɛ́ ɔ́ jɛ. Azǎn wɛ̌nɛgɔ́ ɔ́ gbe ɔ́, yě gbɔjɛ́, bó ɖu xwe, bó j'awǎ. Jwifu e ɖo Súzi lɛ́ɛ kplé azǎn wǎtɔngɔ́ ɔ́ kpó azǎn wɛ̌nɛgɔ́ ɔ́ kpó gbe, bɔ azǎn afɔtɔngɔ́ ɔ́ gbe ɔ́, yě gbɔjɛ́, bó ɖu xwe bo j'awǎ. Énɛ́ ɔ́ wú wɛ Jwifu e ɖo gletoxo lɛ́ɛ mɛ lɛ́ɛ sɔ́ azǎn wɛ̌nɛgɔ́ e ɖo Adáasun ɔ́ mɛ ɔ́ dó ɖó xwezán ná. Yě nɔ́ ɖu xwe bo nɔ j'awǎ, bó nɔ́ ɖu xwe sɛ́ dó yěɖée. Maadocée wlán nǔ e jɛ nɛ́ lɛ́ɛ bǐ dó wěma mɛ, bó sɛ́ dó Jwifu lɛ́ɛ bǐ. É sɛ́ wěma ɔ́ dó Jwifu e gbɔn tokpɔn e nu axɔ́sú Zɛ̌ɛzɛsi kpa acɛ dó lɛ́ɛ bǐ mɛ; tokpɔn e sɛkpɔ́ ɛ lɛ́ɛ kpó éé ɖo zɔ lɛ́ɛ kpó. É ɖɔ nú yě dó wěma ɔ́ mɛ ɖɔ xwewú xwewú tɛgbɛ ɔ́, azǎn wǒ-ɛnɛgɔ́ ɔ́ kpódó azǎn afɔtɔngɔ́ ɔ́ kpó e ɖo Adáa sun ɔ́ mɛ lɛ́ɛ ní nyí xwezán bónú yě nǐ nɔ́ ɖu xwe. Nǔgbó ɔ́, azǎn énɛ́ lɛ́ɛ gbe ɔ́, Jwifu lɛ́ɛ gosín kɛntɔ́ yětɔn lɛ́ɛ sín kannu. Sun énɛ́ ɔ́ mɛ ɔ́, aluwɛ e mɛ yě ɖe ɔ́ húzú awǎjijɛ, bɔ nyladó yětɔn húzú nyɔ̌ná. Énɛ́ ɔ́ wú ɔ́, yě ɖó ná ɖu xwe kpódó awǎjijɛ kpó, bó ná ɖu xwe sɛ́ dó yěɖée, lobo ná ná nǔ wamamɔnɔ lɛ́ɛ, bó dó flín nǔ e jɛ nɛ́ lɛ́ɛ ná. Jwifu lɛ́ɛ xwedó nǔ e Maadocée ɖɔ é, lobo yí gbe ɖɔ xwe énɛ́ e yě ɖu nukɔn nukɔntɔn ɔ́ ní húzú tɛgbɛ nú. Maadocée flín yě ɖɔ: “Jwifu lɛ́ɛ sín kɛntɔ́ Hamáa ée nyí Hamumɛdata ví, bó jɔ ɖo Agagi kún mɛ ɔ́ kó ɖɔ émí ná hu Jwifu lɛ́ɛ. É nyi akɔ dó azǎn e gbe é ná vívá kún yětɔn bǐ é.” Lo ɔ́, Ɛsitɛ́ɛ yi mɔ axɔ́sú ɔ́, bɔ axɔ́sú ɔ́ ná gbe lobo wlán dó wěma mɛ ɖɔ: “Nǔ baɖabaɖa e Hamáa ɖɔ émí ná dó sin xá Jwifu lɛ́ɛ ɔ́, è nǐ dó sin xá éyɛ́.” Mɔ̌ wɛ è dó kan kɔ nú Hamáa kpó vǐ tɔn lɛ́ɛ kpó gbɔn ɔ́ nɛ́. Nǔ e zɔ́n bɔ è nɔ ylɔ́ Akɔnyinyi sín xwezán énɛ́ lɛ́ɛ dó Ebléegbe mɛ ɖɔ Pulímu ɔ́ nɛ́. Jwifu lɛ́ɛ xwedó nǔ e Maadocée ɖɔ dó wěma ɔ́ mɛ lɛ́ɛ kpódó nǔ e yě ɖésúnɔ mɔ lɛ́ɛ kpódó nǔ e gbo yě lɛ́ɛ bǐ kpó, lobo ɖó hwɛndo énɛ́ ɔ́ ayǐ nú yě ɖésúnɔ, nú kúnkan yětɔn lɛ́ɛ, kpódó mɛ e ná húzú Jwifu lɛ́ɛ kpó, bɔ yě ná nɔ́ ɖu xwe we énɛ́ lɛ́ɛ xwewú xwewú ɖó azǎn ɔ́ jí, bɔ é ná sɔgbe xá lě e Maadocée ɖɔ yě nǐ bló gbɔn é. Mɛ e ná wá jɔ sɔ lɛ́ɛ ná nɔ ɖu xwe énɛ́ lɛ́ɛ gbɔn hɛ̌nnu Jwifu lɛ́ɛ tɔn ɖokpó ɖokpó mɛ, gbɔn tokpɔn ɖokpó ɖokpó mɛ, gbɔn toxo ɖokpó ɖokpó mɛ, ɖo axɔ́súɖuto ɔ́ mɛ. Jwifu lɛ́ɛ kpódó vǐ yětɔn lɛ́ɛ kpó ɖó ná jó hwɛndo énɛ́ ɔ́ dó gbeɖé ǎ. Yě ká ɖó ná wɔn nǔ e jɛ lɛ́ɛ ǎ. Axɔ́si Ɛsitɛ́ɛ, Avihayilu ví ɔ́ kpódó Maadocée kpó wlán wěma wegɔ́ ɔ́ kpó acɛ e yě ɖó ɔ́ bǐ kpó bó dó tɛ ɖɛ̌ xwezán énɛ́ lɛ́ɛ jí. È sɛ́ wěma énɛ́ dó Jwifu e gbɔn tokpɔn kantɔn tɛ́nwe (127) e ɖo acɛkpikpa Zɛ̌ɛzɛsi tɔn mɛ lɛ́ɛ bǐ. Fífá kpó ayi jɛ ayǐ kpó wɛ è byɔ́ nú Jwifu lɛ́ɛ dó wěma ɔ́ mɛ. È ɖɔ nú Jwifu lɛ́ɛ dó wěma ɔ́ mɛ ɖɔ yě nǐ ɖu Akɔnyinyi sín xwe ɔ́ dó azǎn e è ɖǒ ɔ́ jí, bónú é sɔgbe xa lě e Ɛsitɛ́ɛ kpó Maadocée kpó ɖɔ gbɔn é. È ɖe gbeta énɛ́ ɔ́ tɔ́n nú yě kpó vǐ yětɔn lɛ́ɛ kpó gbeta e è ɖe tɔ́n dó nubláblá kpó alěníná kpó wú é ɖɔhun. Ɛsitɛ́ɛ sín gbeta lɛ́ɛ tɛ ɖɛ̌ Akɔnyinyi sín xwezán ɔ́ jí, bɔ è wlǎn gbeta lɛ́ɛ dó wěma ɔ́ mɛ. Axɔ́sú Zɛ̌ɛzɛsi ɖó azɔ̌ syɛ́nsyɛ́n nú mɛ e ɖo toxo ɔ́ mɛ lɛ́ɛ kpó mɛ e ɖo tɔtɛ́ntin to e ɖo acɛkpikpa tɔn mɛ lɛ́ɛ kpó. Nǔ ɖaxó ɖaxó e nyí akɔ́nkpinkpan sín nǔ, bɔ axɔ́sú ɔ́ wa lɛ́ɛ, kpó lě e é sɔ́ Maadocée su gbɔn ɔ́ kpó ɔ́, é ɖɔ bǐ dó Tan wéma axɔ́sú Mɛdi tɔn lɛ́ɛ kpó Pɛ́si tɔn lɛ́ɛ kpó tɔn mɛ. Nǔgbó ɔ́, Maadocée Jwifu ɔ́ húzú mɛ e kpa acɛ hú mɛ bǐ ɖo axɔ́súɖuto Zɛ̌ɛzɛsi tɔn mɛ é. To ɔ́ mɛ nu Jwifu lɛ́ɛ bǐ nɔ wlí yɛ̌yi n'i, bo yí wǎn n'i. É nɔ́ wa azɔ̌ nú ɖagbe yětɔn bó nɔ́ ɖɔ xó bónú togun tɔn sín ayi ná jɛ ayǐ. Nya ɖé tíin ɖo Wúsi bɔ è nɔ ylɔ́ ɛ ɖɔ Jɔ̌bu. È nɔ mɔ nǔ jɛ do ɖě ɖɔ dó nya énɛ́ ɔ́ wú ǎ; é nɔ́ wa nǔ jlɔ́jlɔ́, é ɖo gbejí nú Mawu, é nɔ́ hɔn nú nǔ nyanya wiwa. Nya énɛ́ ɔ́ ɖó vǐ súnnu tɛ́nwe, vǐ nyɔ̌nu atɔn. É ɖó gbɔ̌ děgba ɖě afɔwó-afatɔ́n (7.000), lǎkúnmí afɔwó-afatɔ́n (3.000), nyibú we we donu afɔwe kanwe ko (500), tócí asi afɔwe kanwe ko (500). É ɖó azɔ̌watɔ́ kɔn nyi kpɔ́. Nya nukúnɖéjí ɖaxó bǐ e ɖo to ɖěɖě e ɖo zǎnzǎnhwe jí nú Judɛ́ɛn tɔ ɔ́ lɛ́ɛ é wɛ. Vǐ tɔn súnnu lɛ́ɛ nɔ́ yi yěɖée xwé, bó nɔ́ ɖu agɔ̌ mɛ jí jɛ mɛ jí jɛ. Yě nɔ́ ylɔ́ nɔví yětɔn nyɔ̌nu atɔn lɛ́ɛ, bɔ yě nɔ́ nɔ kpɔ́ bó nɔ́ ɖu nǔ, bó nɔ́ nu ahan. Nú yě ɖu agɔ̌ fó ɔ́, Jɔ̌bu nɔ ylɔ́ yě bó nɔ́ slá wǔ nú yě. Ayǐhɔ́ngbe tɔn ɔ́, é nɔ́ fɔ́n zǎn, bó nɔ́ sá vɔ̌ e è nɔ dó zo ɔ́ nú Mawu, dó vǐ lɛ́ɛ ɖokpó ɖokpó ta mɛ, ɖó é nɔ́ ɖo ɖiɖɔ dó ayi mɛ wɛ ɖɔ: “È nɔ nywɛ́ ǎ, vǐ ce lɛ́ɛ sixú kó hu hwɛ ɖé din. Yě sixú ko dó nu Mawu ɖo ayi mɛ.” Lě e Jɔ̌bu nɔ wa nǔ gbɔn tɛgbɛ ɔ́ nɛ́. É ká wá su gbe ɖokpó, bɔ wɛnsagun Mawu tɔn lɛ́ɛ ɖo gbe ɖó nú Mawu Mavɔmavɔ wɛ, bɔ Satáan, hwɛdómɛtɔ́ ɔ́ lɔ wá xwetɔ́n ɖo yě tɛ́ntin. Mawu Mavɔmavɔ kanbyɔ́ ɛ ɖɔ: “Fítɛ́ a gosín?” Bɔ hwɛdómɛtɔ́ ɔ́ yí gbe n'i ɖɔ: “Ayǐkúngban ɔ́ jí wɛ un yi ɖi sa gbɔn.” Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “A ma mɔ mɛsɛntɔ́ ce Jɔ̌bu a? Étɔn ɖɔhun ɖě ɖo ayǐkúngban ɔ́ jí ǎ. Mɛ ɖé wɛ é nyí bɔ è nɔ mɔ nǔ jɛ do ɖě ɖɔ dó wǔ tɔn ǎ, é nɔ́ wa nǔ jlɔ́jlɔ́, é ɖo gbejí nú mì, é nɔ́ hɔn nú nǔ nyanya wiwa.” Hwɛdómɛtɔ́ ɔ́ lɛ́ yí xó, bó ɖɔ: “Yǎyá wɛ Jɔ̌bu ɖo gbejí nú we a? É má nyí hwi wɛ cyɔ́n alɔ é kpódó mɛ tɔn lɛ́ɛ kpó, kpódó dɔkun tɔn lɛ́ɛ kpó jí a? A blǒ bɔ nǔ e wa wɛ é ɖe ɔ́ ɖo yiyi n'i wɛ ganjí, bɔ kanlin tɔn lɛ́ɛ gba kpé to ɔ́ bǐ mɛ. Vɛ̌ hɛn nǔ tɔn lɛ́ɛ gblé din, bó ná kpɔ́n ɖɔ é má ná dó nu we agbawungba a jí.” Énɛ́ ɔ́, Mawu Mavɔmavɔ ɖɔ nú hwɛdómɛtɔ́ ɔ́ ɖɔ: “É nyɔ́, a hɛn ɔ́, a nǎ yí nǔ e é ɖó lɛ́ɛ bǐ, amɔ̌, ma nú alɔ towe jɛ wǔ tɔn ó.” Ée Mawu Mavɔmavɔ ɖɔ mɔ̌ ɔ́, hwɛdómɛtɔ́ ɔ́ gosín nukɔn tɔn. É wá su gbe ɖokpó, bɔ Jɔ̌bu sín vǐ lɛ́ɛ, súnnu kpó nyɔ̌nu kpó kplé ɖo fofó yětɔn ɖaxó ɔ́ xwé bó ɖo nǔ ɖu wɛ, bó ɖo vɛ̌ɛn nu wɛ, bɔ mɛsɛntɔ́ ɖokpó yi Jɔ̌bu xwé bó ɖɔ n'i ɖɔ: “Nyibú lɛ́ɛ ɖo gle lɛ wɛ, bɔ tócí asi lɛ́ɛ ɖo ama ɖu wɛ ɖo akpá yětɔn, Sevanu lɛ́ɛ ká wá zɔn kanlin lɛ́ɛ mɛ, bó bɛ́ yě yi, bó hu mɛsɛntɔ́ towe lɛ́ɛ bǐ ɖó hwǐ wú. Nyɛ ɖokpónɔ géé wɛ hɔn ɖo yě mɛ, bó ɖɔ má wá ɖɔ nú we.” Énɛ́ ɔ́ ɖɔ wɛ é kpo ɖe, bɔ mɛsɛntɔ́ ɖěvo wá, bó ɖɔ: “So jɛ lɛ̌ngbɔ́ towe lɛ́ɛ kpó mɛsɛntɔ́ towe lɛ́ɛ kpó, bɔ yě bǐ fyɔ́. Nyɛ ɖokpónɔ wɛ gán ɖ'é mɛ, bó ɖɔ má wá ɖɔ nú we.” Mɛsɛntɔ́ énɛ́ kpo ɖo xó ɖɔ wɛ, bɔ mɛsɛntɔ́ ɖěvo wá, bó ɖɔ: “Kaludéenu lɛ́ɛ so gbɛ̌ta atɔn bó wá zɔn lǎkúnmí towe lɛ́ɛ mɛ, bó bɛ́ yě yi, bó hu mɛsɛntɔ́ towe lɛ́ɛ ɖó hwǐ wú. Nyɛ ɖokpónɔ géé wɛ hɔn ɖo yě mɛ, bó ɖɔ má wá ɖɔ nú we.” Énɛ́ ɔ́ ɖɔ wɛ mɛ énɛ́ kpo ɖe, bɔ mɛsɛntɔ́ ɖěvo wá, bó ɖɔ: “Vǐ towe lɛ́ɛ ɖo nǔ ɖu wɛ, bó ɖo vɛ̌ɛn nu wɛ, ɖo fofó yětɔn xwé, bɔ jɔhɔn ɖaxó ɖé sí te sín gbětótló mɛ, bó nyi kpódó hlɔ̌nhlɔ́n kpó, bɔ xɔ e mɛ yě ɖe ɔ́ mu, bɔ mɛ wínnyáwínnyá nɛ́ lɛ́ɛ bǐ kú. Nyɛ ɖokpónɔ géé wɛ gán ɖ'é mɛ, bó ɖɔ má wá ɖɔ nú we.” Ée Jɔ̌bu se xó nɛ́ lɛ́ɛ ɔ́, é sí te, bó hɛn awu ɖaxó e ɖo kɔ tɔn é vún, bó xwlɛ́ ta, bó húzú jɛ kpoli bó ɖe kɔ́, bó ɖɔ: “Mɛ̌ wɛ un zɔn sín nɔ ce xomɛ, bó ká ná lɛ́ zɔn mɛ̌ byɔ́ kɔ́ glɔ́. Mawu Mavɔmavɔ wɛ ná, Mawu Mavɔmavɔ wɛ ka lɛ́ yí, susu nú Mawu Mavɔmavɔ.” Nǔ énɛ́ lɛ́ɛ bǐ gbo Jɔ̌bu, có é ká hu hwɛ ɖěbǔ ǎ, é ɖɔ nǔ ɖěbǔ nyi do nú Mawu ǎ. É wá su gbe ɖokpó bɔ wɛnsagun Mawu tɔn lɛ́ɛ ɖo gbe ɖó nú Mawu Mavɔmavɔ wɛ, bɔ hwɛdómɛtɔ́ ɔ́ lɔ wá xwetɔ́n ɖo tɛ́ntin yětɔn, bó ná ɖó nǔ e é lɔmɔ̌ wa ɔ́ sín gbe. Mawu Mavɔmavɔ kanbyɔ́ ɛ ɖɔ: “Fítɛ́ a gosín?” Hwɛdómɛtɔ́ ɔ́ yí gbe n'i ɖɔ: “Ayǐkúngban ɔ́ jí wɛ un yi ɖi sa gbɔn.” Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “A ma mɔ mɛsɛntɔ́ ce Jɔ̌bu a? Étɔn ɖɔhun ɖě ɖo ayǐkúngban ɔ́ jí ǎ. È nɔ mɔ nǔ jɛ do ɖě ɖɔ dó nya énɛ́ ɔ́ wú ǎ; é nɔ́ wa nǔ jlɔ́jlɔ́, é ɖo gbejí nú mì, é nɔ́ hɔn nú nǔ nyanya wiwa. Mɛ ɖěbǔ nɔ́ mɔ nǔ nyanya kwín ɖokpó lě ɖɔ dó wǔ tɔn ǎ. A ba, bɔ un dó ya n'i dó wǔvɔ́.” Hwɛdómɛtɔ́ ɔ́ ká lɛ́ yí xó bó ɖɔ: “Lɛ̌ ba ayixa ɖěvo; gbɛtɔ́ nɔ́ jó nǔ e é ɖó ɔ́ bǐ bó nɔ́ dó hwlɛ́n gbɛ éɖée tɔn gán. Vɛ̌ nú alɔ towe jɛ wǔ tɔn din, bónú a nǎ kpɔ́n ɖɔ é má ná dó nu we agbawungba a jí.” Bɔ Mawu Mavɔmavɔ ɖɔ nú hwɛdómɛtɔ́ ɔ́ ɖɔ: “É nyɔ́! Un jó e nú we, amɔ̌, ma nú alɔ towe jɛ gbɛ tɔn wú ó.” Ée Mawu Mavɔmavɔ ɖɔ mɔ̌ ɔ́, hwɛdómɛtɔ́ ɔ́ gosín nukɔn tɔn, bó yi dó wǔtuzɔn baɖabaɖa ɖé Jɔ̌bu, sín afɔ káká yi ta. Jɔ̌bu nɔ zé zɛ̌nlákwɛ́ dó klú wǔtu, bó nɔ́ jínjɔ́n afín mɛ. Asi tɔn ɖɔ n'i ɖɔ: “È nǎ mɔ nǔ jɛ do ɖé ɖɔ dó wǔ we ǎ ba wɛ jɛ́n a ɖe. A gbɔ bo dó nu Mawu bó kú ɔ́, é nyɔ́ hú.” Ée asi tɔn ɖɔ mɔ̌ ɔ́, é ɖɔ n'i ɖɔ: “A nɔ ɖɔ xó nyɔ̌nu e ayixa tɔn ma sɔgbe ǎ é ɖɔhun. Mawu sɔ́ ɖagbe wá ɔ́, mǐ nɔ yí, é sɔ́ nyanya wá ɔ́, mǐ nǎ gbɛ́ wɛ a?” Nǔ énɛ́ lɛ́ɛ bǐ gbo Jɔ̌bu, có é hu hwɛ ɖěbǔ ɖo xó ɖiɖɔ mɛ ǎ. Jɔ̌bu sín xɔ́ntɔn atɔn se nǔ e ɖo gbigbo e wɛ lɛ́ɛ. Xɔ́ntɔn tɔn atɔn lɛ́ɛ sín nyǐkɔ ɖíe: Elifázi, Temaninu wɛ; Biludádi, Cuwáxinu wɛ; Sofáa, Naamánu wɛ. Fí yětɔn yětɔn wɛ yě gosín wá. Yě ɖó gbe kpɔ́, bó ná ɖe wǎn yíyí e yě ɖǒ nú Jɔ̌bu ɔ́ xlɛ́ ɛ, bó ná dó wǔsyɛ́n lanmɛ n'i. Ée yě mɔ ɛ sɛ́ dó ɔ́, yě sɔ́ tunwun i ǎ. Énɛ́ ɔ́, yě dó avǐ gbe bó ya káká. Yě vún awu ɖaxó e ɖo kɔ yětɔn é, bó lɛ kɔ́ dó ta. Énɛ́ ɔ́ gúdo ɔ́, yě jínjɔ́n kɔ́ mɛ xá Jɔ̌bu xɔ kéze tɛ́nwe, zǎn tɛ́nwe. Yě kɛ nu dó wǔ tɔn ǎ, ɖó yě mɔ ɖɔ é ɖo wǔvɛ́ mɔ wɛ dín. Ée nǔ énɛ́ lɛ́ɛ bǐ jɛ wá yi ɔ́, Jɔ̌bu gbɔ bo kɛ nu, bó dó nu azǎn e gbe è ji i é. Xó e é ɖɔ ɔ́ ɖíe: Azǎn e gbe un jɔ ɔ́ ní bú sín azǎn lɛ́ɛ mɛ; zǎn e ɖɔ: “Vǐ súnnu ɖokpó sín kɛ́n jɛ mɛ wú” ɔ́ ní bú sín zǎn lɛ́ɛ mɛ. Azǎn nɛ́ ɔ́ ní húzú zǐnflú, Mawu ní má sɔ́ flín azǎn énɛ́ ɔ́ ó! Wěziza ní má sɔ́ hɔ́n dó azǎn nɛ́ ɔ́ jí kpɔ́n ó! Ablu gɔngɔn ní cyɔ́n azǎn énɛ́. Akpɔ́kpɔ́ ɖaxó ní bú i. Zǎn ní kú kéze! Zǎn énɛ́ ní dó ablu hú zǎn bǐ! É ní bú sín xwezán lɛ́ɛ mɛ, è ma sɔ́ lɛ́n azǎn énɛ́ dó sun sín azǎn lɛ́ɛ mɛ ó! Kɛ́n má sɔ́ jɛ mɛɖé wú zǎn énɛ́ ɔ́ mɛ ó, awǎjijɛ ɖě má sɔ́ tíin zǎn énɛ́ ɔ́ mɛ ó! Mɛ e nɔ dó nu azǎn lɛ́ɛ, yě mɛ e tunwun lě e è nɔ dó xomɛsin nú kanlin ɖaxó Levyatáan gbɔn lɛ́ɛ ní ɖe xlɛ́ ɖɔ zǎn énɛ́ ɔ́ zǎn nyanya wɛ. Sunví e nɔ tɔ́n zǎn ɖo bibɔ wɛ lɛ́ɛ ní cí zǎn énɛ́ ɔ́ mɛ. Zǎn énɛ́ ní má mɔ wěziza e ɖó nukún wɛ é ɖe ɔ́ ó! Ayǐxomɛ ní má hɔ́n dó e vɔ́vɔ́ ó! Đó é gbɛ́ gbɛ li sú dó mì, bɔ un wá ɖo ya ɖaxó élɔ́ ji wɛ égbé din. Aniwú un ma ka kú ɖo nɔ ce xomɛ ǎ? Aniwú un ma ka lɛ́ kɔ ɖo ajidonu ǎ? Aniwú un ka mɔ asá jí bó nɔ? Aniwú un mɔ anɔ̌ bó nɔ́? Un ná kó ɖo yɔdo mɛ ce xwíí égbé din, bó ná kó ɖo amlɔ dɔ́ wɛ, bó ná ɖo vivo mɛ, nyi kpó axɔ́sú lɛ́ɛ kpó, nyi kpó tonukún lɛ́ɛ kpó; mɛ énɛ́ lɛ́ɛ e nɔ́ vɔ́ xwé nukúnɖéjí e gba lɛ́ɛ bló ɖó lɛ́ɛ kpó nyi kpó ná nɔ kpɔ́. Gǎn e ɖó siká lɛ́ɛ, yě mɛ énɛ́ lɛ́ɛ e nɔ kplé kpatágan gɔ́ xwé yětɔn lɛ́ɛ kpó nyi kpó ná nɔ kpɔ́. Abǐ étɛ́wú un ma nyí vǐflɛ́kɛ́n e è sɔ́ hwlá ɔ́ ǎ? Étɛ́wú un ma nyí vǐ e má mɔ hwe ɖó nukún wú ɔ́ ǎ é? Mɛdídá lɛ́ɛ sɔ́ ɖó adǎn ɖě ɖo yɔdo mɛ fínɛ́ ǎ. Mɛ e nǔ cikɔ ná, mɛ e má ɖó gǎn ǎ lɛ́ɛ nɔ gbɔjɛ́ ɖo fínɛ́. Gantɔ́ lɛ́ɛ bǐ wɛ vo ɖo fínɛ́, azɔ̌gán ɖěbǔ sɔ́ nɔ́ sú xó dó ta nú yě ǎ. Mɛ bǐ wɛ nyí nǔ ɖokpó ɔ́ ɖo fínɛ́. Kannumɔ gosín gǎn tɔn sín acɛ mɛ. Aniwú Mawu ká nɔ gbɔ bɔ è nɔ ji lelenɔ? Aniwú é nɔ́ gbɔ bɔ è nɔ ji yě mɛ e gbɛ ná vlɛ́ nu ná lɛ́ɛ? Yě mɛ énɛ́ lɛ́ɛ nɔ́ ba kú, bó ká nɔ́ ba kpo. Yě nɔ́ nya kú gbé hú dɔkun. Nǔɖé ló kó sɔ́ yɔdo ɖó nukɔn nú yě, é ná víví nú yě kpɔ́n. Un cí mɛ e ma tunwun fí e é xwe ɔ́ ǎ é ɖɔhun, un cí mɛ e Mawu mɛ dǒ lɛ́ dó ɔ́ ɖɔhun. Azɔn winwɛn húzú nǔɖuɖu nú mì, un nɔ sú xó magbokɔ, tɔ ɖo sisa wɛ ɖɔhun. Nǔ e ɖi xɛsi ná wɛ un ɖe ɔ́ wɛ nɔ gbo mì; nǔ e hɔn ná wɛ un ɖe ɔ́ wɛ nɔ wa mì. Un vo ǎ, un mɔ agbɔ̌n ǎ, un ka mɔ gbɔjɛ ǎ; un ɖo adohu adohu jí. Elifázi Temaninu ɔ́ yí xó, bó ɖɔ: È ka ná ɖɔ xó nú we din ɔ́, é ná ɖó akpɔ nú we ǎ cé? È ká sixú tin dó we din a? A kplɔ́n nǔ mɛ gěgé; a dǒ wǔsyɛ́n lanmɛ nú mɛ e awakanmɛ gbɔ́jɔ́ lɛ́ɛ. Xó towe lɛ́ɛ hɛn mɛ e ɖo ayǐ jɛ wɛ lɛ́ɛ ɖó te. Mɛ e sín dɔnkanmɛ xo dɔjɔ lɛ́ɛ lí dǒ. Ée é ka jɛ hwi ɖésú jí din ɔ́, akpɔ ɖó we. Ée nǔ wá gbo hwi ɖésú din ɔ́, ayi towe bǐ gbadó. É má nyí Mawu wɛ a nɔ sɛn a? A sixú ɖeji dó wǔ tɔn ǎ cé? Gbɛ ɖagbe e a nɔ zán ɔ́ sixú ná nukúnɖíɖó ɖagbe we ǎ cé? Dǒ ayi mɛ kpɔ́n! A mɔ nǔ ɖo xomɛvɔ́nɔ ɖé gbo wɛ káká bɔ é dɔn ɖ'é mɛ kpɔ́n a? Abǐ nǔjlɔ́jlɔ́watɔ́ ɖé, káká bɔ é dɔn ɖ'é mɛ kpɔ́n a? Nyɛ ɔ́, un mɔ ɖɔ mɛ e nɔ wa nǔ nyanya lɛ́ɛ, abǐ yě mɛ e nɔ dó nǔ baɖabaɖa sin lɛ́ɛ ɔ́, yě nɔ́ sún sin tɔn. Yě mɛ énɛ́ lɛ́ɛ ɔ́, Mawu nɔ́ zé fúnfún tɔn dó za yě; Jɔhɔn e nɔ gosín awɔntín tɔn mɛ ɔ́ nɔ́ sú kún yětɔn dó. Gbe e dó wɛ yě nɔ́ ɖe kinnikínní ɖɔhun ɔ́, Mawu ɖó te, é lɔ́ aɖǔ yě mɛ adǎnkanlin nɛ́ lɛ́ɛ. Adǎnkanlin nɛ́ lɛ́ɛ ba lan kpo, bó kú, vǐ yětɔn lɛ́ɛ gbadó. Wɛn ɖé wá nú mì, é cí kpá ɖe mì wɛ è ɖe ɖɔhun; è zě gbe dó do bó ɖɔ xó dó tómɛ nú mì. Zǎn xóxó mɛ wɛ nǔ énɛ́ jɛ ɖo dlɔ̌ nyanya ɖé mɛ, hwenu e gbɛtɔ́ lɛ́ɛ ɖo sɛnmlɔ dɔ́ wɛ é. Xɛsi jɛ jǐ ce, ado hu mì, bɔ wǔtu ce bǐ nɔ́ sísɔ́. Jɔhɔn ɖé gbɔn jǐ ce, bɔ lanmɛ ce slɔ́ avivɔfún. Nǔɖé wá cí nukɔn ce, un mɔ nukúnnú jɛ nǔ ɔ́ wú ganjí ǎ; nǔ ɔ́ ɖo nukɔn ce. Fí bǐ cí tóó, bɔ un jɛ gbe ɖé se jí. Nǔ ɔ́ ɖɔ nú mì ɖɔ: “Gbɛtɔ́ ká sixú nyí hwɛjijɔnɔ ɖo Mawu nukɔn a? Gbɛtɔ́ sixú nyí mɛ mímɛ́ ɖo mɛ e ɖó e ɔ́ nukɔn a? Hwi ɖésú kpɔ́n! Mawu nɔ́ ɖeji dó wɛnsagun tɔn lɛ́ɛ wú ǎ, é nɔ́ mɔ hwɛ nú mɛsɛntɔ́ tɔn énɛ́ lɛ́ɛ; bɔ nɛ̌ é ká sixú ɖeji dó gbɛtɔ́ lɛ́ɛ wú gbɔn? Gbɛtɔ́ e è sɔ́ ko kpowun dó bló é, gbɛtɔ́ e agbaza tɔn nyí kɔ́gúdu yǎyá é, nǔ e è hɛn ɔ́, è nǎ zě afɔ dó gbídí wǎnvú ɖɔhun kpowun é! Gbɛtɔ́ e, có zǎn nǎ kú ɔ́ xó tɔn kó fó é, yě nɔ́ yi maɖɔnǔxwɛ; mɛɖé ka nɔ́ ké ya ná ǎ. Kan e hɛn gbɛ yětɔn ɖó te ɔ́ wɛ́n; yě ɖǒ nǔnywɛ́ nǔgbó ɔ́ cóbó kú ǎ.” Sú xó bó kpɔ́n ɖɔ mɛ ɖé ná yí gbe nú we a jí. Wɛnsagun Mawu tɔn tɛ́ a sixú ɖɔ xó ná din? Xomɛsin nɔ hu ayixa ma sɔgbe ná nɔ; aɖi ɖíɖó nɔ́ hu taɖunɔ. Un mɔ ayixa ma sɔgbe ná nɔ bɔ nǔ ɖo nyǐnyɔ́ n'i wɛ, un yi gǔdo cóbó sá heelú xwédo tɔn ǎ. Un ɖɔ: “Vǐ tɔn lɛ́ɛ ní má mɔ gǎnjɛwú ɖěbǔ ó; yě yi hwɛgun hǔn, è nǐ ɖó hwɛ nú yě, mɛ ɖěbǔ ma hwlɛ́n yě gán ó. Jinukún e é ya lɛ́ɛ ɔ́, mɛ e ɖo xovɛ́ lɛ́ɛ ní ɖu bǐ; é ná zé wun dó dó kpá lɛ́ lɛ̌ dó có yě ná bɛ́. Mɛ e ma ɖó nǔɖé ǎ lɛ́ɛ ní bɛ́ dɔkun tɔn lɛ́ɛ.” Nyladó tɔ́n sín kɔ́ glɔ́ ǎ, yajiji ka wú sín ayǐkúngban lanmɛ ǎ. Ya e gbɛtɔ́ nɔ́ ji ɔ́, gbɛtɔ́ ɖésú wɛ nɔ́ dó éɖée, lě e myɔkán e nɔ́ zlɔ́n sín myɔ mɛ ɔ́, myɔ ɖésú wɛ nɔ́ ná gbɔn é ɖɔhun. Tɛn towe mɛ wɛ un ɖe ɔ́, Mawu wɛ un nǎ ylɔ́; é wɛ un nǎ ɖɔ nǔ e ɖo gbigbo mì wɛ ɔ́ ná. Nǔ e Mawu nɔ́ wa lɛ́ɛ d'agba, è sixú mɔ nukúnnú jɛ wú ǎ. Nǔ e é nɔ́ jlɛ́ lɛ́ɛ ɔ́, è sixú xa bǐ ǎ. É nɔ́ sɛ́ jǐ dó ayǐkúngban ɔ́, é nɔ́ hú sin nú gle lɛ́ɛ. É nɔ́ sɔ́ mɛ e ɖo do lɛ́ɛ d'aga, mɛ e ɖo aluwɛ mɛ lɛ́ɛ nɔ́ mɔ awǎjijɛ. É nɔ́ flí mɛ sísɛ́ lɛ́ɛ sín tito lɛ́ɛ xwe, é nɔ́ hɛn wě e yě ɖe lɛ́ɛ gblé dó así nú yě. É nɔ́ wlí nǔnywɛ́tɔ́ lɛ́ɛ dó mɔ e yě ɖǒ ayi nukɔn nú mɛ bó ɖó lɛ́ɛ mɛ; nǔ e yě nɔ́ zé bǐbí yětɔn dó kplɔ́n mɛ lɛ́ɛ sɔ́ nɔ́ nyí nǔɖé wa nú ǎ. Zǎn nɔ́ kú dó yě kéze ɖéɖé; yě nɔ́ dlá avi hwemɛ cíɖíɖí zǎn mɛ wɛ yě ɖe ɖɔhun. Lo ɔ́, Mawu nɔ́ yí mɛ e ma ɖó gǎn ǎ ɔ́ sín nu yětɔn, é nɔ́ hwlɛ́n ɛ sín alɔ hlɔ̌nhlɔ́nnɔ yětɔn mɛ. Énɛ́ wɛ nɔ́ ná nukúnɖíɖó mɛ e ma ɖó gǎn ɖěbǔ ǎ é, bɔ nǔnyanyawatɔ́ bǐ sín nu nɔ yi xɔ. Énɛ́ ɔ́ wú ɔ́, nǔ nyɔ́ nú mɛ e Mawu nɔ́ dɔn tó ná é. Jɔ̌bu, ma gbɛ́ kplɔ́n e ná we wɛ Nǔbǐwúkpétɔ́ ɔ́ ɖe ɔ́ ó. Mawu nɔ́ gblé wǔ mɛ, é ká nɔ́ lɛ́ blá akpa nú mɛ. É wɛ nɔ́ dó akpa wǔ nú mɛ, é jɛ́n ká nɔ́ zé alɔ tɔn dó klɔ́ akpa nú mɛ. Adǎn gěgé ná gbo we adǎn ɖěbǔ ká gbo we ɔ́, é ná nɔ́ hwlɛ́n we sín mɛ, bɔ nǔɖé ná wa we gbeɖé ǎ. Adɔ hwenu ɔ́, é ná lɔn bɔ a nǎ kú ǎ. Ahwan na bo syɛ́n gbɔn ɖěbǔ ɔ́, é ná hwlɛ́n we gán. Nu nyanya e è nǎ kɛ dó wǔ we ɔ́ ɖě ná wa nǔɖé nú we ǎ; hwenu e adla ná jɛ gbě jí ɔ́, a nǎ ɖi xɛsi nú nǔ ɖěbǔ ǎ. Adla na bo jɛ gbě jí ɔ́, a nǎ ké ya ná ǎ, è ɖo xovɛ́ xó ɖɔ wɛ ɔ́, tó wú wɛ a nǎ se ɖó; xɛsi na ɖi we ɖo adǎnkanlin lɛ́ɛ nukɔn ǎ. È ɖo awǐnnyaglo nyi dó gle lɛ́ɛ mɛ wɛ, abǐ kanlin lɛ́ɛ ɖo dǐndín gbɔn gle lɛ́ɛ mɛ wɛ ɔ́, hwɛ ná ɖó jiɖiɖe ɖɔ nǔɖé kún ná gblé ɖo gle émítɔn mɛ ó. A nǎ vo ɖo xwé towe gbe; a wǎ kpɔ́n xwé towe gbe ɔ́, nǔ ɖěbǔ ná hwe ɖo xwé towe gbe ǎ. A nǎ mɔ vǐ towe lɛ́ɛ ná ɖo jijɛ jí wɛ; vǐ towe lɛ́ɛ ná ɖo kpɔ́ su wɛ gběhan ɖo wǔwú wɛ ɖɔhun. A nǎ kpo kújɛ́kújɛ́, hlɔ̌nhlɔ́n ká ná kpo ɖo wǔ we káká yi kúzán gbe towe, hlɔ̌nhlɔ́n ná kpo ɖo wǔ we, lě e jinukún nɔ́ myá, bó nɔ́ kpo ɖo ganjí káká jɛ yiya hwenu gbɔn é. Jɔ̌bu, ée mǐ lin tamɛ káká ɔ́, nǔ e mǐ mɔ é nɛ́; mɔ̌ wɛ é ká ɖe nǔgbó, yǐ gbe ná, bó zé dó wa azɔ̌ ná. Ée Jɔ̌bu sín xɔ́ntɔn Elifázi ɖɔ xó ɔ́, Jɔ̌bu yí xó bó ɖɔ: Áo! Nú è sixú da wǔvɛ́ e mɔ wɛ un ɖe ɔ́ kpɔ́n ɔ́, nú è sixú tunwun lě e adǎn e ɖo gbigbo mì wɛ ɔ́ kpɛn sɔ́ ɔ́, è nǎ mɔ ɖɔ é kpɛn hú kɔ́ e gbɔn xuta é bǐ; nǔ e wú un ɖo nǔ wlá ɖɔ wɛ é nɛ́. Đó Nǔbǐwúkpétɔ́ ɔ́ sín aɖǐgá lɛ́ɛ ɖo lan ce mɛ, bɔ lǐndɔ̌n ce ɖo aɖǐ yětɔn nu wɛ. Nǔ e Mawu nɔ́ dó dó xɛsi gbɛtɔ́ ná lɛ́ɛ bǐ ɖo ahwan fun xá mì wɛ. Tócí gbě tɔn nɔ́ mɔ gběhanmú bó nɔ́ sú xó a? Nyibú nɔ́ mɔ ama bó nɔ́ sú xó a? È sixú ɖu jɛnú jɛ mɛvo a? Azin ɔ́, wěwé e ɖ'é mɛ ɔ́, è sixú ɖu mǔ tɔn bó mɔ vǐví ɖ'é mɛ a? Un jló ná ɖ'alɔ nǔɖuɖu énɛ́ lɛ́ɛ wú ǎ. Ya e ji wɛ un ɖe ɔ́, nǔɖuɖu ɖé wɛ bɔ un ɖo ɖuɖu wɛ ɔ́, vivi nɔ sɔ́ mì. Ényí Mawu ká sixú bló nǔ e ba wɛ un ɖe ɔ́ nú mì ɔ́, ényí é sixú ná nǔ e ɖó nukún wɛ un ɖe ɔ́ mì ɔ́, é ná víví nú mì kpɔ́n! Mawu ní kɛnklɛ́n bó li mì; é ní sɔ́ alɔ tɔn dó wɛ́n gbɛkan ce. Nǔ ɖokpó nɔ́ dó gbɔ nú mì, un ɖo wǔvɛ́ mɔ wɛ cóbó ɖo awǎ jɛ wɛ, ɖó nǔ ɖokpó énɛ́ ɔ́ wú; é wɛ nyí ɖɔ: Mawu mímɛ́ ɔ́, un hɔn xó tɔn lɛ́ɛ ɖě nyi gbě ǎ. Un sɔ́ ɖó hlɔ̌nhlɔ́n e nɔ te kpɔ́n nǔɖé é ǎ, bɔ ani un ka ná nɔ gbɛ dó wa? Un sɔ́ ɖo nǔɖé ɖó nukún wɛ ǎ. Só wɛ un nyí bó ná dɛ ɖo nǔ bǐ nu a? Agbaza ce ɔ́, gan wɛ é nyí a? Nǔɖé sɔ́ ɖo nyɛ ɖésúnɔ mɛ bó ná d'alɔ mì ǎ. Un sɔ́ mɔ nǔ kpɛví títí ɖé wú bó ná gán jɛ ǎ. Mɛ e ɖo ya ji wɛ ɔ́, xɔ́ntɔn tɔn ɖě ɖó ná nyɔ́ xomɛ dó wǔ tɔn, é má nyí mɔ̌ ǎ hǔn, xɔ́ntɔn énɛ́ ɔ́ sɔ́ ɖó sísí nú Nǔbǐwúkpétɔ́ ɔ́ ǎ. Mi mɛ e nyí xɔ́ntɔn ce lɛ́ɛ ɔ́, mi flú mì tɔhwín e è ɖǒ nukún bɔ é ká kó mɛ é ɖɔhun, mi flú mì tɔhwín e kó xú dó azan é ɖɔhun. Nú avivɔ hwenu wá yi ɔ́, laglási kpó laglásilinfín kpó nɔ́ sínsín kɔn dó tɔhwín lɛ́ɛ mɛ, bɔ yě nɔ́ gɔ́ bó nɔ́ blú, bó nɔ́ sa. Alǔun ká tɔ́n lě ɔ́, tɔhwín lɛ́ɛ nɔ́ mɛ; hwesivɔ́ hun ɔ́, yě nɔ́ xú dó azan. Tomɛyitɔ́ lɛ́ɛ ɖo sin gbé mɛ bó zɛ ali, yě ɖo flúflú wɛ ɖo gbětótló mɛ káká bó kú. Tomɛyitɔ́ Téma tɔn lɛ́ɛ tunwun ɖɔ émí ná mɔ sin ɖo tɔhwín lɛ́ɛ mɛ, tomɛyitɔ́ Saba tɔn lɛ́ɛ lɔ ɖo nukún ɖó tɔhwín lɛ́ɛ wɛ, ée yě ká wá bó ba kpo ɔ́, agbɔ̌n kpé yě; awakanmɛ kú yě, ɖó tɔhwín lɛ́ɛ wú wɛ yě ɖeji dó. Tɔhwín énɛ́ lɛ́ɛ ɖɔhun wɛ mi cí din; ée mi mɔ adǎn e ɖo gbigbo mì wɛ ɔ́, mi jó agɔ dó gǔdo. Un byɔ́ nǔɖé mi wɛ a? Un ɖɔ mi ní zé dɔkun mitɔn ɖě dó xɔ gbɛ nú mì wɛ a? Un ɖɔ nú mi ɖɔ mi ní hwlɛ́n mì sín kɛntɔ́ lɔ mɛ wɛ a? Un ɖɔ nú mi ɖɔ mi ní xɔ mì ɖo acɛ gannaganna kpa nú mɛ tɔ́ sí wɛ a? Mi tín nǔ mɛ nú mì, un ná ɖótó mi; mi ɖe nǔ e un wa nyi do ɔ́ xlɛ́ mì. Xó e xwe ali ɔ́ nɔ́ vɛ́ se nú mɛɖé ǎ. Étɛ́ sín hwɛ dó mì wɛ mi ɖe? É má nyí xó e un ɖɔ ɔ́ ná sɔ́ dó ɖɔ xó wɛ mi ɖe a? Mɛ e ma sɔ́ ɖó nukún nǔɖé ǎ, bó ɖo xó ɖɔ dó jɔhɔn mɛ wɛ kpowun ɔ́ sín xó sɔ́ dó ɖɔ xó wɛ mi ɖe a? Gbɛtɔ́ e hɛn ɔ́, é ná nyi akɔ dó tɔ́cyɔvǐ ɔ́ wɛ mi nyí, gbɛtɔ́ e hɛn ɔ́, é ná sa xɔ́ntɔn é ɖésúnɔ tɔn ɔ́ wɛ mi nyí. Mi kpɔ́n nukún ce mɛ céɖécéɖé, bó kpɔ́n ɖɔ adingban ɖó wɛ un ɖe a jí? Mi jó xó dó, mi ma dó hwɛ agɔ ó. Mi jó xó dó, xomɛvɔ́nɔ wɛ un nyí. Xó ce nyí adingban wɛ a? Adǎn ɖo mɛ gbo wɛ nú un mɔ ɔ́, un nɔ tunwun ǎ wɛ a? Mɛɖe wɛ gbɛtɔ́ ɖe ɖo ayǐkúngban jí fí; gbɛ gbɛtɔ́ tɔn cí jokóxotɔ́ sín gbɛ ɖɔhun. Gbɛ gbɛtɔ́ tɔn cí kannumɔ e ɖo hwesivɔ́ gbe bó ɖo yɛtɛn ba wɛ ɔ́ ɖɔhun; é cí azɔ̌watɔ́ e ɖo nukún ɖó azɔ̌kwɛ́ tɔn wɛ ɔ́ ɖɔhun, mɔ̌ wɛ é ɖe nú nyi lɔ; sín sun mɔ̌kpán ɖíe ɔ́, gbɛ ce sɔ́ ɖó ta ɖé ǎ; zǎn e kú ɔ́ bǐ ɔ́, wǔvɛ́zán jɛ́n nɔ́ nyí nú nyɛ. Nú un mlɔ́ ayǐ ɔ́, un nɔ ɖɔ dó ayi mɛ ɖɔ: “Hwetɛ́nu un ka ná sí te dó?” Ayǐ nɔ́ gbɛ́ hǐnhɔ́n, bɔ un nɔ ɖo blǐblí wɛ ɖo zan jí káká bɔ ayǐ nɔ́ wá hɔ́n. Agbaza ce bǐ ji wě, agbaza ce flé zǎ gbɔn fí bǐ; wǔtu ce bǐ nyí akpa, bó vó. Gbɛzán ce ɖo wǐwá yi wɛ bléblé hǔntwé ɖɔhun: Vivɔ wɛ gbɛzán ce ko ɖe; nukúnɖíɖó sɔ́ ɖe ǎ. Mawu ce! Flín ɖɔ gbɛ ce ɔ́, jɔhɔn kpowun wɛ. Un sɔ́ ná mɔ gbɛ víví gbeɖé ǎ. Hwi mɛ e ɖo nukún kpé dó wǔ ce wɛ ɔ́, a sɔ́ ná mɔ mì ɖě ǎ; a nǎ zé nukún dó ba mì, a ka sɔ́ ná mɔ mì ǎ. Lě e akpɔ́kpɔ́ nɔ́ yi bɔ è nɔ ba kpo ɔ́, mɔ̌ ɖokpó ɔ́, mɛ e yi kútomɛ ɔ́ sɔ́ nɔ́ lɛ́ wá gbɛ ǎ. É sɔ́ ná lɛ́ wá xwé tɔn gbe gbeɖé ǎ; mɛɖé ka sɔ́ ná tunwun i ɖo fí e é nɔ ɖ'ayǐ ɔ́ ǎ. Énɛ́ ɔ́ wú ɔ́, un sɔ́ ná ɖó nu abwɛ̌ ǎ; nǔ wɛ ɖo gbigbo mì wɛ ɖo ayi mɛ; un ɖó ná ɖɔ xó. Un ɖo wǔvɛ́ mɔ ɖo ayi mɛ wɛ dín; un ná ɖɔ vo e sa wɛ un ɖe ɔ́. Étɛ́wú a ka ɖo cícɔ́ mì wɛ sɔ mɔ̌? Xu wɛ un nyí a, abǐ nǔdábaɖa xu mɛ tɔn lɛ́ɛ ɖě wɛ un nyí? Nú un ɖɔ un ná mlɔ́ ayǐ, bó ná mɔ agbɔ̌n kpɛɖé, abǐ ayi ce ná j'ayǐ kpɛɖé ɔ́, a nɔ dó xɛsi mì ɖo amlɔ mɛ; nǔ e a nɔ ɖe xlɛ́ mì ɔ́ nɔ́ dó adohu nú mì. Nú a gbɔ bo fyɔ́n gbekan ce káká nú un kú ɔ́, é nyɔ́ hú. Nú un gbɔ bo kú ɔ́, é nyɔ́ hú xúgloxú élɔ́ e un kpo ɔ́. É kpé mì lo! Un sɔ́ ɖo nǎ kú wɛ gbeɖé ǎ wɛ a? Gbɛ ce ɔ́, jɔhɔn kpowun wɛ; jǒ mì dó nú ma mɔ agbɔ̌n. Aniwú wɛ a ka nɔ dó ga nú gbɛtɔ́ sɔ mɔ̌? Aniwú wɛ a ka nɔ ɖó kan dó gbɛtɔ́ wú sɔ mɔ̌? Étɛ́wú a ka nɔ wá ba do nú gbɛtɔ́ zǎnzǎn tɛgbɛ? A nǎ nɔ́ wá tɛ́n ɛ kpɔ́n hwebǐnu wú wɛ a? Hwetɛ́nu wɛ a ka ná ɖe nukún sín wǔ ce? Hwetɛ́nu wɛ a ka ná jó mì dó bónú má mì atán dó kɔ? Mɛcɔ́tɔ́! Ényí hwɛ ɖé wɛ un hu dó we hǔn, ɖɔ nú mì. Étɛ́ wɛ un wa nyi do nú we? Aniwú wɛ a ka ɖó kɛ́n jǐ ce sɔ mɔ̌? Agban wɛ un húzú bó ɖo kɔ jí nú we a? A nǎ sɔ́ hwɛ ce kɛ mì ǎ cé? A nǎ wɔn nǔ e un wa nyi do lɛ́ɛ ǎ cé? Nyɛ ɖíe ɖo kúkú wɛ e; hwenu e a nǎ ba mì ɔ́, un sɔ́ ná ɖe ǎ. Biludádi Cuwáxinu ɔ́ yí xó, bó ɖɔ: Xó e wlí ɖɔ nú mǐ wɛ a ɖe nɛ́ lɛ́ɛ ɔ́, fítɛ́ ná yi fó dó wɛ ká ɖe? Xó e ɖo nu towe mɛ tɔ́n sín wɛ suu ɔ́, xó ma ɖó ta e ɖɔ wɛ a ɖe nɛ́ lɛ́ɛ ɔ́, hwetɛ́nu wɛ a nǎ ɖó te? Mawu nɔ kpé ta do nú hwɛjijɔ wɛ a vɛdó a? Nǔbǐwúkpétɔ́ ɔ́ nɔ kpé ta do nú nǔ jlɔ́jlɔ́ wɛ a vɛdó a? Hwɛ ɖé wɛ vǐ towe lɛ́ɛ ná ko hu dó e, bɔ é ná ko ɖo axɔ́ tɔn sú yě wɛ. Amɔ̌, hwɛ ɔ́, nú a ba Mawu ɔ́, nú a sa vo nú Nǔbǐwúkpétɔ́ ɔ́, nú a nɔ wa nǔ ɖó sɛ́nxwi jí, bó nɔ́ wa nǔ jlɔ́jlɔ́ ɔ́, é ná kpé nukún wǔ we, bó ná sɔ́ we ɖó tɛn towe mɛ. Énɛ́ ɔ́, a nǎ mɔ ɖɔ nǔ ná wá nyɔ́ nú émí hú lě e é kó ɖe gbɔn nú émí ɖ'ayǐ é. Ba do nú nǔnywɛ́ e mɛ e ko jɛ nukɔn nú mǐ lɛ́ɛ ɖó é, bó hɛn kplɔ́n e yě yí ɔ́ dó ayi mɛ ganjí, ɖó sɔví wɛ mǐ nyí, mǐ tunwun nǔɖé ǎ; gbɛzán mǐtɔn ɖo ayǐkúngban jí fí ɔ́ yɛ wɛ, bó ɖo wǐwá yi wɛ. A nǎ yí nǔnywɛ́ ɖo nǔnywɛ́ e mɛ e ko jɛ nukɔn nú mǐ lɛ́ɛ ɖó ɔ́ mɛ; kplɔ́n e yě yǐ ɖo gbɛzán yětɔn mɛ ɔ́ ná kplɔ́n nǔ we: “Tɔkágo nɔ́ wú ɖo ayǐ xúxú jí ǎ, tɔ mɛ jɛ́n ná nyí; fɛ́n nɔ́ wú ɖo agě jí ǎ, tɔgba mɛ jɛ́n ná nyí. Fɛ́n e má ko su ǎ ɔ́, fɛ́n e má kó zin ǎ ɔ́ ba sin kpo ɔ́, é nɔ́ yá wǔ xú jɛ nukɔn nú gběhan ɖě lɛ́ɛ.” Nǔ e nɔ́ gbo mɛ e nɔ wɔn Mawu lɛ́ɛ bǐ é nɛ́; mɛ e ma ɖo gbejí nú Mawu ǎ lɛ́ɛ ɔ́, lě e nukúnɖíɖó yětɔn ná fó gbɔn ɔ́ nɛ́. Nǔ e wú yě ɖeji dó ɔ́, avɔkan wɛ; é nɔ́ lín wɛ́n ǎ, gǎnjɛwú yětɔn ɔ́, yɛglétete dɔ́ wɛ; é nɔ́ lín wɔ ǎ. Yě gán jɛ yɛglétete dɔ́ wú, é ká nɔ te ǎ; yě zunfán syɛ́nsyɛ́n, é ká wɔ. Yě cí atín e ɖo hwesivɔ́ gbe, bó ɖo mǔ fɛɛn ɔ́ ɖɔhun, ala tɔn lɛ́ɛ vun dó jikpá e mɛ é ɖe ɔ́ ta nu. Atín ɔ́ dó ɖɔ do ɖo awǐnnyakan mɛ, bɔ ɖɔ tɔn lɛ́ɛ gbɔn só glɔ́ só glɔ́. Lo ɔ́, nú è hɔn atín ɔ́ sín tɛn e mɛ é ɖe ɔ́, mɛ ɖěbǔ sɔ́ nɔ́ tunwun ɖɔ é kó nɔ fínɛ́ kpɔ́n ǎ. Mɛ e wɔn Mawu lɛ́ɛ ɔ́, nǔnyɔ́númɛ yětɔn ɔ́, lě e é nɔ́ fó gbɔn ɔ́ nɛ́, bɔ atín ɖěvo lɛ́ɛ nɔ́ lɛ́ wú ɖo tɛn yětɔn mɛ. Mɛ e wú è ma nɔ mɔ nǔjɛdo ɖé ɖɔ dó ǎ ɔ́, Mawu nɔ́ gbɛ́ wǎn n'i ǎ; é nɔ́ nɔ mɛdídá lɛ́ɛ jí ǎ. É ná bló bɔ a nǎ ko nǔ, bó ná nɔ́ ɖo awǎjijɛ sín han lɛ́ɛ ji wɛ. Winnyá ná hu kɛntɔ́ towe lɛ́ɛ; mɛdídá lɛ́ɛ sín nɔtɛn ná bú. Ée Jɔ̌bu sín xɔ́ntɔn Biludádi ɖɔ xó ɔ́, Jɔ̌bu yí xó, bó ɖɔ: Gbɛtɔ́ sixú nyí hwɛjijɔnɔ ɖo Mawu nukɔn ǎ. Un tunwun ganjí ɖɔ mɔ̌ wɛ nyí. Nú gbɛtɔ́ jló ná dɔn nǔ xá Mawu ɔ́, nú Mawu kan nǔ afatɔ́n (1.000) byɔ́ ɛ ɔ́, é sixú mɔ sin nú ɖokpó vɔ́vɔ́ ǎ. Mawu wɛ ɖó nǔnywɛ́; hlɔ̌nhlɔ́n tɔn d'agba; mɛ̌ wɛ sixú li za xá Mawu bó tɔ́n wǔɖíɖí aji ɖɔhun? Mawu nɔ́ sɛ tɛn nú só ajijimɛ; xomɛ sin i ɔ́, é nɔ́ flí só lɛ́ɛ xwe. É nɔ́ húnhún ayǐkúngban ɔ́ ɖo azan tɔn jí; dodó tɔn lɛ́ɛ nɔ́ dán wǔ. É nɔ́ dó sɛ́n nú hwe bɔ é nɔ́ tɔ́n ǎ. É nɔ́ dó gan sunví lɛ́ɛ. Mawu ɖokpónɔ géé wɛ vlɔ́n jǐnukúnsin. É nɔ́ ɖi zɔnlin gbɔn xu jí. É wɛ bló sunvísɛkplé totaligbé tɔn lɛ́ɛ, sunvísɛkplé hweyihwǎn tɔn lɛ́ɛ, sunvísɛkplé tofɔligbé tɔn lɛ́ɛ É wɛ bló nǔ ɖaxó ɖaxó lɛ́ɛ, nǔ e è ma sixú mɔ ɖó nukún wú ǎ lɛ́ɛ; nǔ ɖagbe ɖagbe e é bló lɛ́ɛ ɔ́, maxamaxa wɛ. Mawu ná bó ɖo akpá ce gbɔn wɛ ɔ́, un sixú mɔ ɛ ǎ; é ná bó sɛ yi zɔ nú mì ɔ́, un nɔ tunwun ǎ. Nú é xo nǔɖé yí ɔ́, mɛ̌ ká sixú hwlɛ́n xá ɛ? Mɛ̌ wɛ sixú glá bó kan nǔ e wa wɛ é ɖe ɔ́ byɔ́ ɛ? Mawu sin xomɛ ɔ́, é nɔ́ lɛ́ kɔ nú xomɛsin tɔn ǎ. Nǔdábaɖa xu mɛ tɔn lɛ́ɛ bǐ: Hlaxávu kpó ahwan tɔn lɛ́ɛ kpó yi do ɖo nukɔn tɔn. Nyɛ ɔ́, xó tɛ́ un sixú ɖɔ dó xó tɔn wú? Xó tɛ́ un sixú ɖɔ dó gba xó tɔn ná? Nú hwɛ ce na bo jɔ ɔ́, un sixú ná xósin ɖé ǎ; vo jɛ́n un ná sa nú hwɛɖɔtɔ́ ce ɖɔ é ní jɔwǔ mì. Nú un na bo ylɔ́ ɛ, bɔ é yí gbe nú mì ɔ́, un sixú ɖi ɖɔ é ná ɖótó mì ǎ. É nɔ mɔ̌ kpowun bo xo mì zindɛ́; é nɔ́ nɔ dadá mɛ, bó nɔ́ jɛ wǔ gblé mì jí ma ɖó alɔ te. É nɔ́ ná agbɔ̌n mì ɖěbǔ ǎ; ya dó nú mì wɛ jɛ́n é nɔ́ ɖe. Hun wɛ un ka ná tɔ́ ɛ a? Éɖíe ká dó hlɔ̌nhlɔ́n hú mì e! Hwɛxɔsá wɛ mǐ nǎ yi ɖɔ gbo ɖe a? Bɔ mɛ̌ ká ná ylɔ́ mì ɖo hwɛɖɔxɔsá bɔ un ná yi ɖe tɔ nyiɖée? Nú hwɛ ce na bo jɔ ɔ́, nu ce ná zɔ́n bɔ è nǎ dó hwɛ mì un ná bo nyí xomɛvɔ́nɔ ɔ́, xó e nɔ́ tɔ́n sín nu ce mɛ ɔ́ wɛ è nǎ dó gblé hwɛ dó ta nú mì. Xomɛvɔ́nɔ wɛ un nyí a? Un ma ka tunwun nɛ́! Gbɛ cikɔ nú mì. Nukún ce mɛ ɔ́, xomɛvɔ́nɔ kpó mɛdídá kpó ɔ́, nǔ ɖokpó ɔ́ wɛ yě nyǐ; énɛ́ ɔ́ wú wɛ un nɔ ɖɔ: Mawu nɔ́ sú xomɛvɔ́nɔ kpó mɛdídá kpó sín kún dó. Nú awě ɖé xo xomɛvɔ́nɔ lɛ́ɛ vawun bɔ yě kú ɔ́, Mawu nɔ ko yě. Nú to ɖé jɛ adǎnúwatɔ́ lɛ́ɛ lɔ mɛ ɔ́, Mawu nɔ blá nukún mɛ nú hwɛɖɔtɔ́ tɔn lɛ́ɛ; é má nyí é wɛ nɔ́ wa mɔ̌ ǎ ɔ́, mɛ̌ ká wɛ lo? Gbɛ ce ɖo wezun jí hú wezunkántɔ́; un mɔ gbɛ víví ɖěbǔ ǎ. Gbɛzán ce ɖo yiyi wɛ bléblé tɔjíhún fúɖáfúɖá ɖɔhun; é ɖo yiyi wɛ húu gangan ja nǔ sá gbé ɖɔhun. Nú un ɖɔ un ná dó vɛ̌ nú ya e ji wɛ un ɖe lɛ́ɛ, bó gosín aluwɛ mɛ, bó vlɔ́n nukún mɛ ɔ́, wǔvɛ́ e mɔ wɛ un ɖe lɛ́ɛ bǐ nɔ́ jɛ adohu dó nú mì jí, un ka tunwun ganjí ɖɔ hwɛ Mawu ɔ́, a kún ná ɖe tɔ mì ó. È na bo ɖɔ gbɔn ɖěbǔ ɔ́, hwɛhutɔ́ jɛ́n un nyí nú we tɛgbɛ. Ani sín tagba jɛ wɛ un ka ná lɛ́ ɖe? Un na bo sɔ́ aɖǐ dó lɛ wǔ ná gbɔn ɖěbǔ ɔ́, un na bo zé aɖǐsin dó klɔ́ alɔ gbɔn ɖěbǔ ɔ́, a nǎ lɛ́ zin mì dó bɔ̌ mɛ tlóló, bɔ awu ce lɛ́ɛ ná gbɛ́ mì bó sɔ́ ná ba ná jɛ wǔ ce ǎ. Mawu ká nyí gbɛtɔ́ nyɛ ɖɔhun, bónú má kɛ nu n'i ǎ. É nyí gbɛtɔ́ nyɛ ɖɔhun bónú nyɛ kpódó e kpó ná yi hwɛ nukɔn ǎ. Hwɛgbotɔ́ ɖé ɖo tɛ́ntin mǐtɔn, bó ná gbo hwɛ nú mǐ ǎ. Ényí mɛ mɔ̌hun wɛ ɖe ɔ́, Mawu ná ɖó kpo e dó xo mì wɛ é ɖe ɔ́ te, bɔ xɛsi e dó mì wɛ é ɖe ɔ́ sɔ́ ná gba ayi dó nú mì ɖě ǎ. Nú nǔ sixú cí mɔ̌ ɔ́, un ná nɔ́ ɖɔ xó n'i ma ɖi xɛsi. Nǔ ɖíe má ká cí mɔ̌ din ǎ, bɔ un kpo nú nyiɖée e. Gbɛ cikɔ nú mì, un ná ɖɔ nǔ e ɖo xíxá mì wɛ ɔ́ lo; un ná nɔ abwɛ̌ ǎ, un ɖo wǔvɛ́ mɔ wɛ ɖo ayi mɛ dín. Un ná ɖɔ nú Mawu lo ɖɔ: Ma ɖó hwɛ nú mì ó! Đɔ nǔ e un wa nyi do ɔ́ nú mì. Ya dó nú mì nɔ́ víví nú we wɛ a? Wǎn gbɛ́ nú nǔ e hwi ɖésú zé alɔ towe dó bló ɔ́ nɔ́ víví nú we wɛ a? É nyɔ́ ɖɔ a nǐ dó alɔ mɛdídá lɛ́ɛ sín tito mɔ̌ a? Nukún towe nɔ mɔ nǔ hú gbɛtɔ́ lɛ́ɛ tɔn ǎ wɛ a? Nukúnnú mɔ jɛ nǔ mɛ gbɛtɔ́ tɔn wɛ a ɖǒ a? Xwe e gbɛtɔ́ lɛ́ɛ nɔ́ nɔ gbɛ xɔ ɔ́ jɛ́n hwi lɔ nɔ nɔ xɔ a? Xwe kpɛɖé jɛ́n hwi lɔ ná bló mǐ ɖɔhun a? Hwi ɖíe má cí mǐ gbɛtɔ́ lɛ́ɛ ɖɔhun ǎ e! Bɔ étɛ́wú a ka ɖo hwlɛndó jí bó ná tunwun nǔ e un wa nyi do é? Étɛ́wú hwɛ e un hu ɔ́ wú ná mɔ nǔ jɛ ká myá nukún nú we sɔ mɔ̌? A ka tunwun ganjí ɖɔ un kún wa nǔɖé nyi do ó; mɛɖé kún ka sixú hwlɛ́n mì ɖo así we ó. Alɔ towe ɖésú wɛ bló mì, hwi wɛ ján mì, alɔ ɖokpó énɛ́ jɛ́n a ka lɛ́ myɔ́ dó mì, bó jló ná gblé gbɛ dó nú mì. Flín ganjí: hwi wɛ sɔ́ ko dó bló mì zɛ̌n ɖɔhun! Bɔ din ɔ́, a ka ná lɛ́ sɔ́ mì dó húzú kɔ́gúdu a? Hwi wɛ kɔn mì dó nɔ ce xomɛ anɔ̌sin ɖɔhun, bɔ un wá ló amɔ̌ ɖɔhun ǎ cé? A sɔ́ xú kpó kan kpó dó ján mì; a bǔ anyǔ kpó lanti kpó dó mì. A nǎ gbɛ mì, a nyɔ̌ xomɛ dó wǔ ce; be e a lě nú mì lɛ́ɛ hɛn mì ɖó gbɛ. Lo ɔ́, a ɖo nǔɖé sɔ́ hwlá dó mì wɛ; un ka tunwun nǔ e ɖo xo towe mɛ é: Un ɖo nǔɖé wa nyi do wɛ ɔ́, a nɔ jló ná nɔ́ gbo mì dó ɖ'é kɔn, bó ná sɔ́ hwɛ ɖě kɛ mì gbeɖé ǎ. Nú un hu hwɛ hǔn, cu ta mì nɛ́! Un na bo ɖo xomɛ vɔ́ ɔ́, un ná glá zé ta ǎ, ɖó winnyá hu mì dín. Gbɛ ce blá wǔ mɛ nya! Nú un ɖɔ má zé ta lě ɔ́, a nɔ zun dó jǐ ce kinnikínní ɖɔhun; a nɔ jlɛ́ nǔ xá mì bɔ ado nɔ hu mì. A nɔ tɔ́n ahwan mì ɖě jɛ ɖě gúdo, xomɛ e sin dó mì wɛ a ɖe ɔ́ nɔ́ lɛ́ ɖo syɛ́nsyɛ́n d'é jí wɛ; a sɛ́ ahwanfuntɔ́ towe lɛ́ɛ dó mì ɖě jɛ ɖě gúdo. Aniwú wɛ a ka ɖe mì tɔ́n sín nɔ ce xomɛ? Un ná kó kú ɖo nɔ ce xomɛ, bɔ mɛɖé ná mɔ mì ǎ. Un na kó kú ɖo nɔ ce xomɛ, bó ná kó zɔn tlɔlɔ yi yɔdo mɛ. Énɛ́ ɔ́, un ná cí mɛ e ma tíin gbeɖé ǎ ɖɔhun. Gbɛ sin kpɛɖé jɛ́n kpo nú mì din. Bo gɔn ahwan tɔ́n mì sɔ mɔ̌ bó, jǒ mì dó lo, bónú má nu gbɛ sin kpɛ e kpo nú mì ɔ́. Zaanɖé din ɔ́, un ná ɖidó to e mɛ è nɔ yi bó má sɔ́ nɔ́ lɛ́ kɔ ǎ é, zǐnflú gɔngɔn sín to ɔ́ mɛ. To e mɛ zǎn kpó nǔ hannyahannya kpó ɖu axɔ́sú ɖe é, to e mɛ kéze nyí ablu gɔngɔn ɖe é. Sofáa Naamánu ɔ́ yí xó bó ɖɔ: È nǎ tin dó xó tobutóbú énɛ́ lɛ́ɛ e a ɖɔ lɛ́ɛ wɛ a? Hwɛjijɔ ɖo xónyɔ́ɖɔ nu ǎ! Nǔxweɖɔ towe ná zɔ́n bɔ è ná tin wɛ a vɛdó a? A nǎ ɖo slǎmɛ ɖɔ mɛ wú wɛ, bɔ è nǎ tin dó we wɛ a vɛ́ dó a? A glá káká bó ɖɔ: “Xó e ɖɔ wɛ un ɖe ɔ́ nǔgbó wɛ. Wǔɖíɖí aji ɖɔhun wɛ un ɖe ɖo Mawu nukɔn.” Nú Mawu ɖésú sixú ɖɔ xó nú we din ɔ́, é ká ná nyɔ́ mɛ! É sixú kɛ nu bo ɖɔ xó nú we tlɔlɔ ɔ́, é ná nyɔ́. Hwenɛ́nu ɔ́, é ná ɖe nǔnywɛ́ tɔn e wú è ma nɔ́ mɔ nǔ jɛ ǎ ɔ́ xlɛ́ we. É ná ɖe nǔnywɛ́ tɔn e hú gǎn nukúnnú mɔ jɛ nǔ mɛ gbɛtɔ́ tɔn ɔ́ xlɛ́ we; énɛ́ ɔ́, a nǎ mɔ nǔ jɛ wú ɖɔ Mawu nɔ́ jó hwɛ e a hu lɛ́ɛ ɖě dó. A sixú mɔ do nú nǔ e ɖo Mawu sín xomɛ ɔ́ wɛ a vɛdó a? Nǔ e ɖo Nǔbǐwúkpétɔ́ ɔ́ sín ayi gɔngɔn mɛ ɔ́ wɛ a vɛdó a? Nǔnywɛ́ tɔn yi jǐ hú jǐnukúnsin; étɛ́ a ka sixú bló? É yi do hú kútomɛ; étɛ́ a ka sixú tunwun? É gbló hú ayǐkúngban, é gbló hú xu. Nú Mawu ɖo dǐndín wɛ, bó wlí hwɛhutɔ́ ɖé, bó dɔn ɛ xwe hwɛ nukɔn ɔ́, mɛ̌ wɛ ká ná gbɛ́ n'i? Đó é wɛ tunwun gbɛtɔ́ nǔvɔ́nɔ lɛ́ɛ; é nɔ́ jɛ tagba ɖěbǔ cóbó nɔ́ mɔ nǔ jɛ hwɛ e gbɛtɔ́ hu ɔ́ wú ǎ. Gbe e gbe è nǎ kpé wú bó dé tócí gbě tɔn ɔ́, gbe nɛ́ gbe ɔ́, gbɛtɔ́ e má ɖó fɔn taglo mɛ ǎ é ná húzú nǔnywɛ́tɔ́. Amɔ̌, hwɛ ɔ́, a ɖǒ na sɔ́ ayi towe jó nú Mawu, bó fɔ alɔ dó jǐ bó xo ɖɛ. Nú a ɖe alɔ sín nǔ nyanya mɛ, bó ma lɔn nú è wa nǔ agɔ ɖé ɖo xwé towe gbe ǎ ɔ́, a nǎ zé ta; winnyá sɔ́ ná hu we ǎ; a nǎ lí dǒ; nǔ ɖěbǔ sɔ́ ná hu ado nú we ǎ. A sɔ́ ná flín ya e ji wɛ a ɖe din lɛ́ɛ ǎ, bǐ nǎ byɔ́ hwenuxó mɛ. Gbɛ towe ná za wě hwe yi hwǎn ɖɔhun, zǐnflú ná za wě zǎnzǎn hwe ɖɔhun. A nǎ ɖeji ganjí, ɖó a nǎ ɖó nukún nǔ; a kpɔ́n gǔdo bó kpɔ́n nukɔn ɔ́, a nǎ nɔ́ mlɔ́ ayǐ, bó ná nɔ́ dɔ́ amlɔ ganjí. Ényí a ɖo gbigbɔjɛ́ wɛ ɔ́, mɛ ɖěbǔ ná wa dó tagba nú we ǎ; é nyɔ́ wa ɔ́, yě ná nɔ́ nyi ahwan wá gɔ̌n towe, bó ná ɖíɖɔ́ wǔ nú we. Lo ɔ́, mɛdídá lɛ́ɛ ná ɖo mɛ e ná d'alɔ yě ɔ́ ɖó nukún wɛ káká, bɔ é ná nyí séé. Yě ná ba fí e yě ná nɔ ɔ́ kpo, nǔ ɖokpó e yě ná ɖó nukún ɔ́ nɛ́ nyí kú nɛ́. Ée Jɔ̌bu sín xɔ́ntɔn Sofáa ɖɔ xó ɔ́, Jɔ̌bu yí xó, bó ɖɔ: Nǔgbó wɛ, è ɖo nǔnywɛ́tɔ́ ba wɛ ɔ́, è sixú zɛ mi wú ǎ. Mi kú gbeɖé hǔn, nǔnywɛ́ vɔ. Amɔ̌, nyɛ lɔ nɔ lin tamɛ ganjí mi ɖɔhun; ényí un gɔn nǔ mɔ jɛ xó mitɔn mɛ wɛ ǎ; mɛ̌ wɛ má tunwun nǔ e ɖɔ wɛ mi ɖe ɔ́ ǎ? Un húzú nǔkiko nú mi xɔ́ntɔn ce lɛ́ɛ, nyɛ mɛ e nɔ sú xó ylɔ́ Mawu, bó nɔ́ tunwun ɖɔ é ná sɔ nú mì ɔ́; nyɛ mɛ e nyí gbɛtɔ́ hwɛjijɔnɔ, nyɛ mɛ e wú è ma nɔ mɔ nǔ jɛ do ɖé ɖɔ dó ǎ é, nyɛ ɖíe wá húzú ɖɔkwe din e! “Mɛ bǐ wɛ nɔ hu tɛ́ nú wamamɔnɔ”, lě e mɛ e nǔɖé ma gbo kpɔ́n ǎ lɛ́ɛ sín ayi nɔ mɔ nǔ gbɔn ɔ́ nɛ́; nǔ e yě nɔ́ ɖɔ dó mɛ e ɖo ayǐ jɛ wɛ lɛ́ɛ wú é nɛ́. Asúfántɔ́ lɛ́ɛ nɔ́ vo fɛɛ ɖo xwé yětɔn lɛ́ɛ gbe; yě mɛ e nɔ ba xó Mawu lɛ́ɛ ɔ́, nǔɖé nɔ́ dó xɛsi nú yě ǎ, yě nɔ́ sɛn nǔɖé zɛ hlɔ̌nhlɔ́n yětɔn wú ǎ. Kan nǔ byɔ́ kanlin lɛ́ɛ, kanlin ná kplɔ́n nǔ we; kan nǔ byɔ́ xɛ lɛ́ɛ, xɛ ná ɖe we ɖó ali jí. Đɔ xó nú ayǐkúngban, ayǐkúngban ná kplɔ́n nǔ we; ɖɔ xó nú hweví e ɖo xu mɛ lɛ́ɛ, hweví ɖó xó gěgé bó ná ɖɔ nú we. Đo kanlin énɛ́ lɛ́ɛ bǐ mɛ ɔ́, kanlin tɛ́ wɛ má tunwun ɖɔ Mawu Mavɔmavɔ wɛ ɖo nǔ bǐ bló wɛ ǎ? Mawu Mavɔmavɔ sín alɔ mɛ wɛ nǔ e ɖo gbɛ ɔ́ bǐ sín funfún ɖe; alɔ tɔn mɛ wɛ gbɛtɔ́ bǐ sín gbɛ ɖe. Tó wɛ nɔ se xó, é ɖo ɖě ɔ́ nu wɛ ka nɔ ɖɔ. È ɖo nǔnywɛ́ ba wɛ ɔ́, degénɔ lɛ́ɛ wɛ è nɔ yi mɔ, mɛ e sín xwe sɛ yi lɛ́ɛ nɔ́ mɔ nukúnnú jɛ nǔ mɛ. Lo ɔ́, nǔnywɛ́ kpódó hlɔ̌nhlɔ́n kpó ɔ́, Mawu gɔ́n wɛ è nɔ mɔ ɖe, Mawu gɔ́n wɛ nǔkplɔ́nmɛ kpódó nǔtunwuntunwun kpó ɖe. Nǔ e Mawu hɛn gblé ɔ́, mɛɖé sixú vɔ́ bló ɖó ǎ; mɛ e é wlí dó gan ɔ́, mɛɖé nɔ́ ɖe nyi te ǎ. Nú Mawu hɛn jǐ ɖó te ɔ́, akú nɔ́ ɖó; é ká ɖe alɔ sín jǐ jí ɔ́, sin nɔ hɛn ayǐkúngban ɔ́ gblé. É ɖó hlɔ̌nhlɔ́n, ayi tɔn ɖo te ganjí. Mɛ e ɖo bǔbú wɛ ɔ́ kpó mɛ e ɖo mɛ dɔn bú wɛ ɔ́ kpó ɔ́, bǐ wɛ ɖo acɛ Mawu tɔn mɛ. É nɔ́ jlɛ́ nǔ xá gbɛtɔ́ tonukún lɛ́ɛ bɔ yě nɔ́ zɔn afɔ vɔ́; é nɔ́ wlú tamɛ nú gǎn lɛ́ɛ. É yí acɛ e axɔ́sú lɛ́ɛ ɖó ɔ́ sín yě sí, bó sɔ́ gantɔ́wu dó nú yě. É nɔ́ jlɛ́ nǔ xá vɔ̌sánú-xwlémawutɔ́ lɛ́ɛ, bɔ yě lɔ nɔ zɔn afɔ vɔ́; é nɔ́ flí acɛkpikpa e wú mɛɖé má sixú glá dó ǎ é xwe. É nɔ́ xwe mɛ e wú è ɖeji dó lɛ́ɛ sín nu dó xɔ; é nɔ́ yí nukúnnú mɔ jɛ nǔ mɛ e degénɔ lɛ́ɛ ɖó ɔ́ sín yě sí. É nɔ́ dó winnyá mɛjɔmɛ lɛ́ɛ; é nɔ́ yí hlɔ̌nhlɔ́n sín acɛgannaganna-kpanúmɛtɔ́ lɛ́ɛ sí. É nɔ́ ɖe nǔ e ɖo hwlǎhwlá ɖo zǐnflú mɛ ɔ́ nyi wěxo, é nɔ́ zé nǔ e ɖo ablu gɔngɔn mɛ ɔ́ wá wěziza nu. É nɔ́ bló bɔ togun lɛ́ɛ nɔ́ ji gba, bɔ é nɔ́ vívá kún yětɔn; é nɔ́ bló bɔ yě nɔ́ gba kpé, bɔ é nɔ́ nya yě dó gbě. É nɔ́ yí nǔnywɛ́ sín gǎn e ɖo to nu lɛ́ɛ sí, bó nɔ́ jó yě dó bɔ yě nɔ́ jɛ flúflú jí gbɔn gbětótló mɛ, yě mɔ wěziza ǎ, bó nɔ́ ɖo avi dlá wɛ gbɔn zǐnflú mɛ, bó nɔ́ ɖo sa fún wɛ ahannumúnɔ ɖɔhun. Un mɔ nǔ nɛ́ lɛ́ɛ bǐ ɖó nukún ce wú, un se nǔ nɛ́ lɛ́ɛ bǐ ɖó tó ce wú, bó mɔ nukúnnú jɛ bǐ mɛ. Nǔ e mi tunwun ɔ́, nyɛ lɔ tunwun; un ɖi ɖɔ un jɔ xlo hú mi ǎ. Lo ɔ́, un jló ná ɖɔ xó nú Nǔbǐwúkpétɔ́ ɔ́; un jló ná ɖe tɔ nyɛɖée ɖo Mawu nukɔn. Đó midɛɛ lɛ́ɛ ɔ́, nǔgbó ɔ́ wɛ mi nɔ jó dó, bó nɔ́ ɖó nǔvú; azɔngblétɔ́ e ma kpé nǔɖé wú ǎ ɔ́ ɖɔhun wɛ mi cí. Mi ná kó gbɔ bó nɔ abwɛ̌; énɛ́ ɔ́, è nǎ mɔ ɖɔ mi nywɛ́ nǔ i. Mi kɛnklɛ́n bó se xó e un ná ɖɔ dó hwlɛ́n nyɛɖée é, mi wlí tó xó e ná ɖɔ dó ɖe tɔ nyiɖée wɛ un ɖe ɔ́ wú. Mi ná ɖó nǔvú dó jɛ ahwan Mawu jí wɛ a? Mi ná ɖó adingban dó ɖe kúnnu nú Mawu wɛ a? Midɛɛ lɛ́ɛ wɛ ná ɖɔ émí ɖo Mawu jǐ a? Midɛɛ lɛ́ɛ wɛ ná jɛ ahwan jǐ tɔn a? Nú Mawu kíjé ayi mitɔn mɛ kpɔ́n ɔ́, é ná kpa mi wɛ mi vɛdó a? Mawu ɔ́, gbɛtɔ́ wɛ é nyí bɔ mi ná flú i a? Nú mi na bo tlɛ nɔ nǔglɔ́ bó ɖo ahwan jɛ jǐ tɔn wɛ ɔ́, un tunwun ɖɔ é ná gbɛ́ nú mi dó nǔjɔnǔ mɛ. Susu e Mawu ɖǒ ɔ́ dó xɛsi nú mi ǎ cé? Xɛsi e Mawu dó ɔ́ ɖó adohuhu nú mi ǎ cé? Nǔ xóxó e flín mì wɛ mi ɖe ɔ́, xɛxó kpowun wɛ; hwɛjijɔ e ba wɛ mi ɖe ɔ́ ɖó bɛ̌nu ɖé ǎ. Din ɔ́, mi nɔ abwɛ̌; mi jó mì dó; un jló ná ɖɔ xó lo! Un sɔ́ gbɛ́ nǔ e ɖo nǎ jɔ wɛ é ǎ. Un ɖo gbesisɔ mɛ nú nǔ bǐ; un gbɛ́ kú ǎ. Nú é jló Mawu hǔn, é ní hu mì; un sɔ́ ɖo nǔɖé ɖó nukún wɛ ǎ. Amɔ̌, un ná jɛ ahwan walɔ ce jí ɖo nukɔn tɔn. Nú é kpa mì ɔ́, un ná mɔ hwlɛngán; ɖó nǔnyanyawatɔ́ ɖěbǔ nɔ́ glá yi Mawu nukɔn ǎ. Xó e ná ɖɔ wɛ un ɖe ɔ́, mi ɖótó ganjí; mi kɛ tó mitɔn nyi jɛ, bó ná se nǔ e ɖɔ gbé un ja é. Din ɔ́, un sɔ́ nǔ bó xwe hwɛ nukɔn; un tunwun ɖɔ hwɛ nyɛtɔn kún kú ó. Mɛ̌ ká ná glá bó ná ɖɔ hwɛ ce kún nyɔ́ ó? Nú hwɛ ce kú ɔ́, un ná gbɔ bó xwɛ, bó gbɔ bó kú. Mawu ce, nǔ we byɔ́ we wɛ jɛ́n un ɖe; énɛ́ ɔ́, un sɔ́ ná hɔn hwlá dó we ɖě ǎ: Đǒ nǔ e wa xá mì wɛ a ɖe ɔ́ te; má sɔ́ ɖó adohuhu ɖě nú mì ó. Đɔ xó nú mì, bónú má ná sin tɔn we, abǐ nyɛ ná ɖɔ xó nú we, bɔ hwɛ ná ná sin tɔn mì. Étɛ́ un wa nyi do? Hwɛ nabí un hu? Đɔ tóli e un vɛ́ nú we ɔ́ nú mì. Aniwú wɛ a ka ɖe alɔ sín kan ce mɛ? Étɛ́wú a ɖo nǔ jlɛ́ xá mì wɛ kɛntɔ́ towe wɛ un nyí ɖɔhun mɔ̌? Ama e jɔhɔn zé ɔ́ nya wɛ a ɖe a? Nǔywɛ́ xúxú ɔ́ gúdo wɛ a ɖe sɔ mɔ̌ a? A ɖo nǔ baɖabaɖa wlán dó wǔ ce wɛ; hwɛ e un hu sín vǔ é bǐ sín tó dɔ́n nú mì wɛ a ɖe. A bɛ̌ afɔ ce lɛ́ɛ dó sókpo mɛ; a ɖo nǔ e wa wɛ un ɖe lɛ́ɛ bǐ kpɔ́n wɛ tlítlí; fí e tɛ afɔ wɛ un ɖe lɛ́ɛ ɔ́, a ɖo bǐ kpɔ́n wɛ. Agbaza ce ɖo gblěgblé wɛ atín jɛ wɔvli ɖɔhun, avɔ e kɔ́súkɔ́sú nyí ɔ́ ɖɔhun. Gbɛtɔ́ ɔ́, nyɔ̌nu xomɛ wɛ é tɔ́n sín; jidɔ́ tɔn ɔ́, azǎn wɛ ɖ'é wú; nǔxámɛ wɛ gɔ́ gbɛzán tɔn. Gbɛtɔ́ ɔ́, folówa ɖɔhun wɛ é cí; é nɔ́ tɔ́n bó nɔ́ mlú. É nɔ́ nɔ te ǎ, é nɔ́ dín wá yi yɛ ɖɔhun. Gbɛtɔ́ énɛ́ cɔ́ wɛ a ka ɖe; nyɛ dɔn yi hwɛgun wɛ a ɖe. È ka sixú ɖe nǔ mímɛ́ sín nǔ kwíji kwíji mɛ a? Mɛ ɖé sixú ɖe ǎ. Gbɛzán gbɛtɔ́ tɔn ɖó dogbó, hwi wɛ ka ɖɔ xwe nabí e é ná bló é; é sixú bló zɛ jlɛ̌ e a ɖǒ n'i ɔ́ wú ǎ. Đe nukún sín wǔ tɔn; ná ɛ agbɔ̌n kpɛɖé, bónú é ná vo bó wa azɔ̌ tɔn yi fó. È gbo atín ɔ́, atín hɛn ɔ́, é ná ɖó nukún ɖɔ émí ná lɛ́ tɔ́n kun, émí hɛn ɔ́, émí ná lɛ́ zɔ́n ama. Đɔ tɔn na bo dóxó ɖo ayǐkúngban lanmɛ ɔ́, è na bo mɔ ɖɔ atínta tɔn ko kú ɔ́, é wá mɔ sin hwe ɖé ɔ́, é nɔ́ wú, é nɔ́ lɛ́ tɔ́n ama atínvú ɖɔhun. Lo ɔ́, gbɛtɔ́ ɔ́, nú éyɛ́ kú ɔ́, hlɔ̌nhlɔ́n tɔn nɔ vɔ; nú gbɔjɛ tɔn xwɛ ɔ́, xó tɔn nɔ fó. Lě e sin sixú wá mɛ sín agbetawoyó mɛ, bɔ sin e ɖo tɔ ɖaxó ɖaxó lɛ́ɛ mɛ ɔ́ nɔ́ mɛ gbɔn ɔ́, mɔ̌ wɛ gbɛtɔ́ ɖe; é kú ɔ́, é sɔ́ nɔ́ fɔ́n gbeɖé ǎ; nú jǐnukúnsin kpo ɖo te jɛ́n wɛ ɔ́, é sɔ́ ná fɔ́n ǎ; é ná nyí fɔ́n sín amlɔ e dɔ́ wɛ é ɖe ɔ́ mɛ gbeɖé ǎ. Mawu ce, nú a jlǒ nǎ zé mì hwlá ɖó kútomɛ, bɔ un ná nɔ hwlǎhwlá ɖo fínɛ́ káká bɔ xo towe mɛ ná fá dó wǔ ce, bɔ a nǎ ɖɔ hwenu e a nǎ flín mì dó ɔ́ wɛ ɔ́, é ná nyɔ́! Gbɛtɔ́ ká kú ɔ́, é ká sixú lɛ́ wá gbɛ a? Ényí gbɛ wɛ é sixú lɛ́ wá ɔ́, un na bo ɖo mɛɖezɔ́ wú ɔ́, un ná ɖo nukúnɖíɖó mɛ káká bɔ mɛ e ná ɖyɔ́ mì ɔ́ ná wá. Énɛ́ ɔ́, hwenu e a nǎ ylɔ́ mì ɔ́, un ná sɔ nú we; a nǎ ba ná mɔ nyɛ mɛ e a ɖǒ é! Din e a ɖo afɔ e ɖe wɛ un ɖe lɛ́ɛ bǐ xa wɛ ɔ́, a nǎ ɖe nukún towe sín nǔ e wa nyi do wɛ un ɖe lɛ́ɛ wú. A nǎ sú nǔ dó hwɛ e un hu lɛ́ɛ, a nǎ zě nǔ tlitli bú dó hwɛ ce lɛ́ɛ. Só nɔ́ j'ayǐ bó nɔ́ gba hánnyá; awǐnnya nɔ́ flɛ́ sín tɛn e mɛ é ɖé ɔ́. Sin nɔ́ ɖu awǐnnya; sin nɔ kplɔ́ kɔ́ hɛn yi. Mɔ̌ wɛ a nɔ hɛn nǔ e ɖó nukún wɛ gbɛtɔ́ ɖe ɔ́ gblé dó así n'i gbɔn. A nɔ zé gbɛtɔ́ nyi gbě, bɔ kɔlílɛ́ sɔ́ ɖe n'i ǎ; a nɔ hɛn nukún mɛ tɔn gblé, bó nɔ́ nya ɛ dó gbě. È na bo sɔ́ vǐ tɔn lɛ́ɛ su ɔ́, é nɔ́ tunwun ǎ; è na bo dó winnyá vǐ tɔn lɛ́ɛ ɔ́, é nɔ́ nyí nǔɖé n'i ǎ. Nǔ ɖokpó e é tunwun ɔ́ wɛ nyí vǐvɛ́ e é nɔ se ɖo agbaza mɛ ɔ́ kpó aluwɛ mɛ e é nɔ́ nɔ ɖo ayi mɛ ɔ́ kpó. Elifázi, Temaninu ɔ́ yí xó bó ɖɔ: Nǔnywɛ́tɔ́ hwɛ ɖɔhun ná lɛ́ ɖɔ gblǒ ǎ. Xósin e a nɔ ná lɛ́ɛ sɔ́ nɔ́ xwe ali ǎ. Xó e má nyí xó jɔ xó ǎ ɔ́ wɛ a ɖɔ dó ba hwɛjijɔ; xó e má ɖó ta ɖé ǎ ɔ́ wɛ a wlí ɖɔ dó ba hwɛjijɔ. Hwɛ ɔ́, a hɛn sísí e è nǎ ɖó nú Mawu ɔ́ lɔ gblé, a ɖe ayi gbɛtɔ́ tɔn sín Mawu jí. Nǔ e a wa nyi do ɔ́ wɛ ɖo xó zɔ́n ɖiɖɔ we wɛ, bɔ a sɔ́ sísɛ́ ɖó nukɔn bo ɖo adingban ɖó wɛ. Nyɛ wɛ ɖo hwɛ ɖɔ xá we wɛ ǎ, nu e kɛ wɛ a ɖe lɛ́ɛ wɛ ɖo hwɛ ɖɔ xá we wɛ; xó e ɖɔ wɛ a ɖe lɛ́ɛ wɛ ɖo hwɛ dó we wɛ. Hwi wɛ nyí gbɛtɔ́ nukɔn nukɔntɔn e Mawu ɖǒ ɔ́ a? A ko jɔ dó nukɔn nú só lɛ́ɛ wɛ a? Hwenu e Mawu ɖo tito tɔn bló wɛ ɔ́, a ɖo fínɛ́ wɛ a? Hwi ɖokpónɔ wɛ ɖó nǔnywɛ́ wɛ a vɛdó a? Ani wɛ a tunwun bɔ mǐdɛɛ lɛ́ɛ má tunwun ǎ? Étɛ́ mɛ a mɔ nukúnnú jɛ bɔ mǐ má mɔ nukúnnú jɛ ǎ? Gbɛtɔ́ ɖo mǐ mɛ, bó kó wú hwa, gbɛtɔ́ ɖo mǐ mɛ bó kó kpo; gbɛtɔ́ ɖo mǐ mɛ, bó wa ɖaxó tɔ́ towe. Gbɔ e dó nú we wɛ Mawu ɖe ɔ́ kpó gbe fífá e dó nú we wɛ mǐ ɖe lɛ́ɛ kpán nyí nǔɖé nú we ǎ wɛ a? Étɛ́ sín xomɛsin jí a ɖe sɔ mɔ̌, bɔ nukún towe bǐ myá? Étɛ́ sín xomɛ sin dó Mawu wɛ a ɖe? Étɛ́wú a ɖo nu mɔ̌hun kɛ wɛ? Ani wɛ gbɛtɔ́ ká nyí bó ná ɖɔ émí nyí mɛ mímɛ́? Ani wɛ é ká nyí bó ná ɖɔ émí nyí hwɛjijɔnɔ? Mawu ɖeji dó wɛnsagun tɔn lɛ́ɛ lɔ wú ǎ, sɛ́xwé ɔ́ lɔ nɛ́ má mɛ́ ɖo nukɔn tɔn ǎ nɛ́; étɛ́ ká sɔ́ nyí gbɛtɔ́ nǔ gbɛ́hɛn, mɛ gblégblé ɔ́ tɔn lo? Gbɛtɔ́ e nɔ ɖo nǔ nyanya wa wɛ, mɛ ɖo sin nu wɛ ɖɔhun é. Jɔ̌bu, un jló ná ɖɔ xó ɖé nú we, ɖǒtó mì! Un jló ná ɖɔ nǔ e un tunwun ɔ́ nú we. Nǔ e nǔnywɛ́tɔ́ lɛ́ɛ yí ɖo tɔ́gbó yětɔn lɛ́ɛ sí, bó má zé hwlá ǎ, bó kplɔ́n mɛ ɔ́, ɖǒtó bó ná se; yědɛɛ lɛ́ɛ kɛ́ɖɛ́ tɔn wɛ to ɔ́ nyí; jǒnɔ ɖěbǔ byɔ́ yě mɛ hwenɛ́nu ǎ. Mɛdídá lɛ́ɛ ɔ́, ado wɛ nɔ ɖo yě hu wɛ ayǐhɔ́ngbe ayǐhɔ́ngbe ɖo gbɛ yětɔn mɛ; ado nɔ ɖo yě hu wɛ káká nú xwe nabí e Mawu dó yě jí é. Zǐngídi e nɔ dó xɛsi nú mɛ ɔ́, ɖi gbe ɖo tó yětɔn mɛ; vivo mɛ wɛ yě ná ɖe bɔ nǔhɛngblétɔ́ ɔ́ ná zɔn jǐ yětɔn. Yě sɔ́ lɛ́n ɖɔ émí ná gán ɖo kú sí ǎ. Yě mɔ ɖɔ kú myɔ ɖo wǔ ɖo wu yi nú émí wɛ. Yě mɔ ɖɔ aklasú lɛ́ɛ jɛ́n émí ɖo te ná; é kún ɖó xo kpɔ́n ó, kú jɛ́n émí ná kú. Abluzán énɛ́ e ja ɔ́ ná dó xɛsi nú yě; adohuhu kpó xɛsi ɖaxó kpó ná fyán yě, axɔ́sú tɔ́n ahwan mɛ ɖɔhun. Đó yě sɔ́ alɔ Mawu, yě glá awa ɖo Nǔbǐwúkpétɔ́ ɔ́ nukɔn. Yě hɛn gǎglónú yětɔn tlitli ɔ́, bó dó kɔ do, bó zun dó Mawu jí. Nukún mɛ yětɔn ɖíɖí ganjí, yě mɔ lanmɛ ganjí. Yě nɔ toxo gbigba lɛ́ɛ mɛ, xwé e gbe mɛɖé má ɖe ǎ, xwé e kó ɖo nǎ mu wɛ lɛ́ɛ gbe. Yě sɔ́ ná jɛ dɔkun ǎ; dɔkun e yě ɖǒ ɔ́ sɔ́ ná nɔ ayǐ káká sɔ́yi ǎ; nǔɖé sɔ́ ná yi nú yě ɖo ayǐkúngban ɔ́ jí ǎ. Yě ná sixú gló ablu gɔngɔn ɔ́ ǎ; yě ná cí atín e myɔ fyɔ́ ala ná ɔ́ ɖɔhun: nǔ e ɖo te kpɔ́n yě ɔ́ nɛ́! Mawu ná fún funfún dó nya yě. Yě ɖó ná ɖeji dó nǔ nyanya wiwa wú ǎ; yě bló mɔ̌ hǔn, yě blɛ́ yěɖée, ɖó nǔ nyanya wɛ è nǎ dó sú axɔ́ yě. Nǔ énɛ́ ná kó jɛ cóbɔ yě ná kú, bɔ ala yětɔn ná xú bǐ. Yě ná cí vǐwuntín e sínsɛ́n tɔn má kó zin ǎ, bó kɔn nyi ayǐ ɔ́ ɖɔhun, abǐ olívutín e folówa tɔn kɔn ayǐ ɔ́ ɖɔhun. È nǎ mɔ vǐ ɖo nǔnyanyawatɔ́ lɛ́ɛ xwé gbe ǎ; myɔ wɛ ná fyɔ́ gbɛtɔ́ afuɖutɔ́ nɛ́ lɛ́ɛ sín xwé. Mɛ e mɔ nǔ nyanya sín xo ɔ́ ná ji awě; nǔ e ná flú i ɔ́ kpó e kpó wɛ ɖo yiyi wɛ. Ée Jɔ̌bu sín xɔ́ntɔn Elifázi ɖɔ xó ɔ́, Jɔ̌bu yí xó, bó ɖɔ: Un ko se xó mɔ̌hunkɔtɔn lɛ́ɛ azɔn gěgé. Gbɔdónúmɛtɔ́ e nɔ dó akpɔ nú mɛ ɔ́ wɛ mi bǐ nyí. Xó gbló e wlí ɖɔ wɛ a ɖe ɔ́, hwetɛ́nu wɛ é ná fó dó? Ani ka ɖo gbigbo we wɛ bɔ a ɖo gbe kán nú mɛ wɛ mɔ̌? Ényí mi ɖo tɛn ce mɛ, bɔ nyɛ ɖo tɛn mitɔn mɛ ɔ́, nyi lɔmɔ̌ ná ɖɔ xó mi ɖɔhun; xó e un ná ɖɔ dó mi wú ɔ́ ná syɛ́n ɖésú; nǔ mitɔn ná blá wǔ nú mì, bɔ un ná húnhún ta. Un ná kó ɖɔ xó dó dó wǔsyɛ́n lanmɛ nú mi, un ná ɖo xó ɖɔ nú mi wɛ káká, bɔ wǔvɛ́ e mɔ wɛ mi ɖe ɔ́ ná ɖe kpo. Lo ɔ́, un ɖo xó ɖɔ wɛ ɔ́, wǔvɛ́ e mɔ wɛ un ɖe ɔ́ nɔ́ ɖe kpo ǎ; un na bo xwɛ ɔ́, wǔvɛ́ ɔ́ nɔ́ xwɛ ǎ. Din ɔ́, Mawu yí hlɔ̌nhlɔ́n ce; é vívá kún nú mɛ e lɛ́ dó mì lɛ́ɛ bǐ. Lě e é sɔ́ mì ɖó é wɛ ɖo hwɛ dó mì wɛ: anyǔ ce bǐ wló bɔ un kpo xú kɛ́ɖɛ́, ɖi nǔ ɖɔ nǔ e ɖo gbigbo mì wɛ ɔ́, nyi ɖésú wɛ zɔ́n ɖɔhun. Mawu sin xomɛ dó mì, bɔ un húzú kanlin e é ná wlí ɖu é. É jɛ gǒ mɛ nú mì, é tɛ aɖǔma dó jǐ ce; é mɛ e nyí kɛntɔ́ ce ɔ́, nukún tɔn bǐ ɖo wǔ ce. Mɛ lɛ́ɛ nɔ́ ɖo adǎn gblɔ́n nú mì wɛ; yě nɔ́ zun mì, yě nɔ́ xo tómɛ nú mì. Yě bǐ nɔ́ nyi ahwan wá kplé dó mì. Mawu jó mì nú nǔɖégótegó lɛ́ɛ, é jó mì nú mɛdídá lɛ́ɛ. Ayǐ ce wɛ un ɖe xwíí, bɔ é wá dán mì, é hɛn kɔ ce bó zin mì d'ayǐ. É zé mì ɖó te bó da gǎ dó; gǎ tɔn lɛ́ɛ gosín ɖisí amyɔ wá gɔ̌n ce; é da gǎ dó alin mɛ nú mì, ma kú nǔbláwǔ nú mì; é gba vǐvɛ́ ce kɔn nyi kɔ́ mɛ. É nɔ́ zun dó jǐ ce ahwanfuntɔ́ ɖɔhun, é nɔ́ ɖo wǔ gblé mì wɛ. Nǔwamɛvɔ mɛ jɛ́n un nɔ ɖe, un gbɔ bo jó gbe. Un y'avǐ káká bɔ nukún ce bǐ myá, nukún ce sɔ́ ɖo nǔ mɔ wɛ ganjí ǎ. Un ma ka xo dǎka mɛɖé wú vɔ́vɔ́ nɛ́! Đɛ mímɛ́ jɛ́n un ka nɔ xo tɛgbɛ nɛ́! Ayǐkúngban e, hun ce kɔn nyi ayǐ, ma zé hwlá ó; xó e sú wɛ un ɖe ɔ́, è nǐ se gbɔn fí bǐ. Bɛ́ sín din ɔ́, un ɖó kúnnuɖetɔ́ ɖokpó ɖo jǐxwé, mɛ e nɔ jɛ ahwan jǐ ce ɔ́ ɖo jǐ aga. Xɔ́ntɔn ce lɛ́ɛ ɖo kiko mì wɛ, Mawu sa vo ná wɛ un ka ɖe kpódó avǐ kpó. Áo! Kúnnuɖetɔ́ ce ɔ́ ní nyí hwɛgbotɔ́, ɖo nyɛ kpó Mawu kpó tɛ́ntin, lě e è nɔ bló gbɔn ɖo ayǐkúngban jí, ɖo gbɛtɔ́ we tɛ́ntin é. Đó xwe nabí e un ɖó ná bló ɖo ayǐkúngban jí ɔ́ kó ɖo vivɔ wɛ, bɔ un wlí to e mɛ è nɔ yi, bó má sɔ́ nɔ́ lɛ́ kɔ wá ǎ é sín ali. Gbɔjɛ ce ɖo xwixwɛ wɛ, gbɛzán ce ɖo vivɔ wɛ; yɔdo ko ɖo te kpɔ́n mì. Slǎmɛ ɖɔ mɛ wú tɔ́ lɛ́ɛ wɛ lɛ́ lɛ̌ dó mì; ya e dó nú mì wɛ yě ɖe lɛ́ɛ nɔ́ ná adɔ̌vɛ́ mì. Mawu ce, a ɖo mɛ e ná nɔ te nú mì ɔ́ ba wɛ; hwi ɖésú ní nɔ te nú mì, ɖó mɛ ɖé sɔ́ ɖe bó ná ɖɔ xó dó nu ce zɛ hwɛ wú ǎ. Đó a yǐ nukúnnú-mɔjɛnǔmɛ e xɔ́ntɔn ce lɛ́ɛ ɖó ɔ́ sín yě sí, ma ná tɛn yě bónú yě ɖu ɖo jǐ ce ó. Yě cí mɛ e da xɔ́ntɔn tɔn lɛ́ɛ bó ná nǔɖuɖu, bó ɖó vǐ é ɖésúnɔ tɔn lɛ́ɛ xovɛ́ é ɖɔhun. Un húzú han, bó ɖo nu nú mɛ bǐ; un wá húzú mɛ e è nɔ tún atán dó nukún mɛ ná é. Un ɖo vǐvɛ́ se wɛ káká bɔ nukún ce nɔ́ xo avivi; nyi ɖésúnɔ bǐ fo yɛ. Ayijlɔ́jlɔ́nɔ lɛ́ɛ sixú xo nǔ ɖo wǔ ǎ, ɖó nǔ e ɖo xíxá mì wɛ ɔ́ wútu; xomɛvɔ́nɔ lɛ́ɛ fɔ́n gǔ dó mɛdídá lɛ́ɛ jí. Amɔ̌, nǔjlɔ́jlɔ́watɔ́ ɔ́, gbɛ na bo ɖo ɖě ɔ́, é nɔ́ ɖo gǎn dó wɛ; mɛ e ma ɖó alɔ ɖo nǔ blíblí mɛ ǎ é nɔ́ ɖo kan ván wɛ. Xɔ́ntɔn ce lɛ́ɛ mi, mi bǐ ní lɛ́ kɔ wá, mi lɛ́ jɛ xó ɖɔ nú mi jí; un ká ɖo nǔnywɛ́tɔ́ titewungbe kwín ɖokpó ná mɔ wɛ ɖo mi mɛ ǎ. Azǎn ce vɔ, tito ce lɛ́ɛ bǐ gblé, nǔ e jló mì lɛ́ɛ bǐ ci fo. Mi nɔ ɖɔ zǎn ná jó tɛn nú kéze, lé wěziza kó sɛkpɔ́; ablu ɖíe ká kpo ɖo te e. Nyɛ ɔ́, étɛ́ un ka sixú lɛ́ nɔ te kpɔ́n din? Kútomɛ wɛ ná nyí nɔtɛn ce, ablu mɛ wɛ zan ce ɖe ɖo kútomɛ. Un nɔ sú xó sɛ́ dó yɔdo ɔ́ ɖɔ: “Hwi wɛ nyí tɔ́ ce.” Un nɔ ɖɔ sɛ́ dó wěvú lɛ́ɛ ɖɔ: “Mi wɛ nyí nɔ ce; nɔví ce nyɔ̌nu lɛ́ɛ ɔ́, mi wɛ.” Fítɛ́ nukúnɖíɖó ká kpo ɖe nú mì? Mɛ̌ ká sixú mɔ nǔ e ɖó nukún wɛ un ɖe ɔ́? Nukúnɖíɖó ce kpódó nyɛ kpó ná yi kútomɛ, mǐ mɛ we lɛ́ɛ bǐ ná yi gbɔjɛ́ ɖo kɔ́ glɔ́. Biludádi Cuwáxinu ɔ́ yí xó bó ɖɔ: Xó e wlí ɖɔ wɛ mi ɖe nɛ́ lɛ́ɛ ɔ́, hwetɛ́nu wɛ mi ka ná ɖó te dó? Mi lin tamɛ ganjí, énɛ́ ɔ́, mǐ ná tunwun lě e mǐ ná ɖɔ xó gbɔn é. Aniwú wɛ mǐ ná jó Jɔ̌bu dó, bɔ é ná mɔ mǐ dó mɔ gbɔ̌? Xlo ɔ́ jɛ́n mǐ jɔ sɔ mɔ̌ a? Hwɛ Jɔ̌bu ɔ́, a ɖo xomɛsin wɛ, bó ɖo tagba dó nú hwiɖée wɛ kpowun. A vɛdó ɖɔ ayǐkúngban ɔ́ ná jɛ vɔ̌ ɖó xomɛsin towe wú wɛ sín a? A vɛdó ɖɔ Mawu ná sɛ tɛn nú só lɛ́ɛ, bó dó ná hwɛjijɔ we wɛ sín a? Mɛdídá sín hwe wɛ ná cí! Myɔ e ɖo adogwle tɔn mɛ ɔ́ sɔ́ ná ji ǎ. Wěziza e ɖo xwé tɔn gbe ɔ́ ná dó zǐnflú. Zogbɛ́n e nyí wěziza tɔn ɔ́ ná wá cí. Đ'ayǐ ɔ́, é ɖo yiyi wɛ ɔ́, afɔ tɔn nɔ kpé ayǐ; amɔ̌, din ɔ́, afɔ tɔn hwe dó ayǐ. Tito é ɖésúnɔ tɔn lɛ́ɛ ná wá zin i dɛ́. Afɔ e ɖe wɛ é ɖé ɔ́ kplá ɛ xwe mɔ mɛ, é xwe do mɛ jɛ gbé. É sɔ́ mɔ dó afɔgbɛnnu, bɔ mɔ ɔ́ hɛn ɛ syɛ́nsyɛ́n. Mɔ e è ɖǒ n'i ɔ́, è dǒ kɔ́ jí. Mɔ e ɖo nǎ wlí wɛ ɔ́ ɖo te kpɔ́n ɛ ɖo ali tɔn xo. Xɛsi ɖaxó ɖé lɛ́ lɛ̌ dó e, bó nɔ́ ɖo cɔcɔ dó n'i wɛ. Xovɛ́ sin i káká bɔ gǎn vɔ ɖo wǔ tɔn; ya blá ɖa n'i. Ya ná ɖu nǔ e ɖo agbaza tɔn wú ɔ́ bǐ vɔ, abaɖaxwéjɛsú ná ɖu wǔjɔnú tɔn lɛ́ɛ. È nǎ ɖe e sín xwé tɔn gbe, fí e é vo ɖe ɔ́, bó ná dɔn ɛ gǎnnugǎnnu yi kútomɛ xɔ́sú ɔ́ sá mɛ. Xwé tɔn ná jɛ vɔ̌ bɔ mɛ ɖěvo ná nɔ gbe; è nǎ kɔn hwemí kɔn nyi ayǐkúngban tɔn jí. É cí atín e kú ɔ́ ɖɔhun; ɖɔ tɔn lɛ́ɛ ɖo fyɔ́fyɔ́ wɛ ɖo do; bɔ ama tɔn lɛ́ɛ ɖo mlǔmlú wɛ ɖo jǐ. Mɛ ɖé sɔ́ nɔ́ flín i ɖo ayǐkúngban ɔ́ jí ǎ; mɛɖé sɔ́ nɔ́ ylɔ́ nyǐkɔ tɔn ɖo fí ɖěbǔ ǎ. È nǎ kpíkpé e sín wěziza nu yi jɛ zǐnflú mɛ; è na nya ɛ sín gbɛ ɔ́ mɛ. Vǐ e ná wá gba kún tɔn é ɖěbǔ ɖe ǎ; mɛ ɖěbǔ ná kpo ɖo gbɛ ɖo xwedó tɔn mɛ ǎ. Lě e gbɛ tɔn na vɔ gbɔn ɔ́ ná kpácá mɛ e ɖo gbɛ ɔ́ mɛ lɛ́ɛ bǐ; ahwi ná xo mɛ bǐ, sín zǎnzǎnhwe jí káká yi gbadahwe jí. Lě e hwɛhutɔ́ sín xwédo nɔ wá cí ɔ́ nɛ́; mɛ e ma tunwun Mawu ǎ ɔ́, lě e nɔtɛn tɔn nɔ cí ɔ́ nɛ́. Ée Jɔ̌bu sín xɔ́ntɔn Biludádi ɖɔ xó ɔ́, Jɔ̌bu yí xó, bó ɖɔ: Xó e wlí ɖɔ wɛ mi ɖe, bó dó ɖo ayixa gbadó nú mì wɛ, bó dó ɖo tagba dó nú mì wɛ mɔ̌ ɔ́, fítɛ́ ná yí fó dó wɛ é ɖe? Azɔn mɔ̌kpán nɛ́ mi ko zun mì nɛ́. Ya énɛ́ e dó nú mì wɛ mi ɖe ɔ́ hu winnyá nú mi ǎ cé? É ná bó nyí nǔ wɛ un wa nyi do ɔ́, nyɛ ɖokpónɔ géé wɛ é kan; é kan mi ǎ. È nǎ ɖɔ ɔ́, mi nɔ mɔ ɖɔ gbɛ émítɔn nyɔ́ hú gbɛ ce, bɔ mi nɔ ɖɔ nǔ e un wa nyi do ɔ́ wɛ zɔ́n bɔ un ɖo winnyá élɔ́ ɖu wɛ. Amɔ̌, mi ní tunwun ɖɔ Mawu wɛ wa nǔ énɛ́ ɔ́ xá mì; é wɛ wlí mì dó ɖɔ tɔn mɛ. É ɖo dǎka xo wǔ ce wɛ nú un sú xó ɔ́, un nɔ mɔ mɛɖé ǎ; nú un sú xó ylɔ́ alɔdómɛtɔ́ ɔ́, un nɔ mɔ mɛɖé bɔ é nɔ́ wá gbo hwɛ nú mǐ ǎ. Mawu sú ali dó mì, bɔ dǐndín gló mì. É jó mì dó nyi ablu mɛ. É sɔ́ mì kɔn nyi ayǐ, é kɔ́n wi sín ta nú mì. É kíjá mì bǐ xɔ ɖɔhun, bɔ afɔ ce ɖokpó kó ɖo yɔdo mɛ; nǔ e ɖó nukún wɛ un ɖe ɔ́, é hɔn síin atín ɖɔhun. É sin xomɛ dó mì ɖésú, é sɔ́ mì dó ɖó kɛntɔ́. Ahwangɔnu tɔn lɛ́ɛ dó ahwan gbě bó jɛ ali; yě ba ali káká wá gɔ̌n ce; yě ɖǒ gɔnu yětɔn lɛ́ɛ lɛ́ lɛ̌ dó nɔtɛn ce bó ná tɔ́n ahwan mì. É sɛ nɔví ce lɛ́ɛ dó zɔ nú mì, un húzú jǒnɔ nú xɔ́ntɔn ce lɛ́ɛ. Mɛ ce lɛ́ɛ jó mì dó; mɛ e kpó nyɛ kpó vɛ́ lɛ́ɛ bǐ wɔn mì. Un húzú mɛ ɖěvo nú jǒnɔ e ɖo xwé ce gbé lɛ́ɛ, bó húzú jǒnɔ nú mɛsɛntɔ́ ce nyɔ̌nu lɛ́ɛ; un húzú mɛ wá mɛ de nú yě. Un ylɔ́ mɛsɛntɔ́ ce bɔ é tin dó mì; un na bo sa vo n'i ɔ́, é nɔ́ kɛ nu ǎ. Wǎn ce sɔ́ nyɔ́ se nú asi ce ǎ. Nɔví ce lɛ́ɛ mɔ mì ɔ́, wǔ nɔ́ xíyɔ́ yě. Yɔkpɔ́vú lɛ́ɛ lɔ gbɛ́ wǎn nú mì; un sí te ɔ́, yě nɔ́ jɛ kiko mì jí. Un vɛ́ mɔ nú mɛ e un nɔ ɖɔ xomɛ ná lɛ́ɛ bǐ; mɛ e un yí wǎn ná lɛ́ɛ fɔ́n gǔ dó jǐ ce. Un xú gǒ bǐ, un kpo ta kɛ́ɖɛ́. Kú hwɛ́n wǎn dó mì. Xɔ́ntɔn ce lɛ́ɛ mi! Mi kú nǔbláwǔ nú mì; nǔ ce ní blá wǔ nú mi, ɖó alɔ Mawu tɔn jɛ wǔ e. Étɛ́wú mi lɔ ka jɛ gǒ mɛ nú mì Mawu ɖɔhun mɔ̌? Fí e mi dó ya nú mì yi jɛ ɔ́ kó jɛnu nú mi ǎ cé? Áo! Nú è sixú wlán xó élɔ́ e ɖɔ wɛ un ɖe ɔ́, é ná nyɔ́. È sixú dó yě wěma mɛ ɔ́, é ná nyɔ́. Nú è sixú zé gan nu xwíɖíxwíɖí dó kun xó e un ɖɔ lɛ́ɛ dó awǐnnya mɛ, bó sá sunmí dó, bɔ é ná nɔ só jí káká sɔ́yi ɔ́, é ná nyɔ́. Amɔ̌, nyɛ ɔ́, un tunwun ɖɔ mɛ e ɖo hun jɛ dó jǐ ce wɛ ɔ́ ɖo gbɛ; é wɛ ná kɛ nu gǔdo gúdo tɔn ɖo ayǐkúngban jí. Agbaza ce na bo gblé bǐ ɔ́, nyi ɖésúnɔ lě ɔ́, un ná mɔ Mawu. Nyɛ ɖésú ná mɔ ɛ kpó nukún ce kpó. É sɔ́ ná nyí jǒnɔ nú mì ǎ; un ɖó nukún i káká bɔ nukún ce bó. Mi nɔ kanbyɔ́ miɖée ɖɔ: “Nɛ̌ mǐ ká ná wa gbɔn bó jɛ gǒ mɛ n'i? Étɛ́wú mǐ ná ɖó dó dó ɖɔ hwɛ xá ɛ?” Mi ma lɔn nú hwǐ wá jɛ mi wú ó, ɖó adǎn e jí mi ɖe ɔ́, hu wɛ è ɖǒ ná hu mi. Énɛ́ ɔ́, mi ná tunwun ɖɔ Mawu nɔ ɖɔ hwɛ xá mɛ nǔgbó. Sofáa Naamánu ɔ́ yí xó bó ɖɔ: Ayi ce ɖo cɔcɔ dó nú mì wɛ ɖɔ má kɛ nu, nu ce ɖo hihihíhí wɛ dín. Hwɛ e dó mɛ wɛ a ɖe nɛ́ ɔ́ ɖo akpɔ ɖó nú mì wɛ; amɔ̌, un tunwun nu e un ná kɛ é. A tunwun din ǎ mɛ: sín do ɔ́, sín hwenu e Mawu sɔ́ gbɛtɔ́ ɖó ayǐkúngban jí ɔ́, mɛdídá nɔ j'awǎ nú hwenu gěgé ǎ, nǔnyanyawatɔ́ nɔ́ nɔ xomɛ hunhun mɛ yi gbada ǎ. Mɛdídá ná bó nyí mɛ bo ɖi ga káká yi sɔ́ jǐnukúnsin, bɔ ta tɔn ɖo akpɔ́kpɔ́ lɛ́ɛ sín hǎ jí ɔ́, é ná hwíhwɛ́ bǐ nǔkan mɛ e é ɖésúnɔ yi é ɖɔhun, bɔ mɛ e ko tunwun i ɖ'ayǐ lɛ́ɛ ná ɖɔ: “Fítɛ́ wɛ é ká gbɔn?” É ná bú dlɔ̌ ɖɔhun, bɔ è sɔ́ ná mɔ ɛ ǎ; é ná bú dó mɛ nǔmimɔ zǎn mɛ tɔn ɖɔhun. Nukún e mɔ ɛ kpɔ́n ɔ́ sɔ́ ná mɔ ɛ gbeɖé ǎ; tɛn e mɛ é nɔ́ ɖ'ayǐ ɔ́, mɛɖé sɔ́ ná mɔ ɛ ɖo tɛn énɛ́ ɔ́ mɛ kpɔ́n gbeɖé ǎ. É ná zé nǔ e é xo ɖu dó jɛ dɔkun ɔ́ jó kpó alɔ é ɖésúnɔ tɔn kpó; vǐ tɔn lɛ́ɛ ɖó ná sú afú e é tá wamamɔnɔ lɛ́ɛ ɔ́ sín axɔ́. É mɔ ɖɔ hlɔ̌nhlɔ́n ɖo émí wú, bɔ émí kpo ɖo dɔ̌nkpɛ mɛ, lo ɔ́, é kpó nǔ nɛ́ lɛ́ɛ bǐ kpó ná yi yɔ. Nǔ nyanya wiwa nɔ́ víví nu nú mɛdídá nǔ víví ɖɔhun; é nɔ́ zé hwlá dó ɖɛ̌ glɔ́. É nɔ́ ɖo vǐví tɔn se wɛ bó nɔ́ tún ǎ; é nɔ́ hɛn dó ɖɛxwɛ mɛ. Lo ɔ́, é nɔ́ hɛn xo tɔn mɛ gblé, é nɔ́ húzú aɖǐvɛ́ ɖo adɔgo tɔn mɛ. É bɛ́ dɔkun kplé mɛ e wlá nǔ ɖu ɔ́ ɖɔhun; amɔ̌, din ɔ́, é ná jó bǐ lě e è nɔ wlá nǔ ɖu bó nɔ́ vi ɔ́ ɖɔhun; Mawu ná ɖe bǐ sín adɔgo tɔn mɛ. Dan sín aɖǐvɛ́ wɛ é gbíngbɔ́n; é nɔ́ hu mɛ jakpata ɖu mɛ ɖɔhun. Wǐin kpó anɔ̌sin kpó sɔ́ ná sa tɔ nú mɛdídá kpɔ́n gbeɖé ǎ. Nǔ e é jɛ tagba bo mɔ lɛ́ɛ ɔ́, é ná jó bǐ; é ná ɖu ǎ; le e é ɖu ɖo ajɔ jí lɛ́ɛ ɔ́, é ná tún bǐ; é ná ɖu gbɛ tɔn ǎ. Đó é táfú mɛ ma ɖó mɛɖé lɛ́ɛ, bó jó yě dó; é ɖésúnɔ sá xwé ǎ, xwé yětɔn wɛ é yí. Adɔ tɔn ɔ́ kɔ wɛ é ɖe; nukún tɔn nɔ xwlé axi káká bɔ nǔɖé nɔ dín wǔ tɔn ǎ. Nǔ ɖěbǔ nɔ gɔ́ xo n'i ǎ; énɛ́ wú wɛ nǔɖé má nɔ́ nyɔ́ nukún tɔn mɛ yi gbada ǎ. Nǔ ná nyɔ́ nú mɛdídá ganjí mɔ̌ có adǎn ná gbó e; nǔ alɔkpa alɔkpa bǐ ná xá ɛ. Hwenu e é ná ɖo nǔ wlá ɖu wɛ magbokɔ ɔ́, Mawu ná kɔn xomɛsin tɔn kɔn nyi jǐ tɔn, bɔ é ná syɛ́n ɖésú; xomɛsin ná ja dó jǐ tɔn, xomɛsin ɔ́ wɛ ná nyí nǔɖuɖu tɔn. É ná gló ahwanfunnú e è zě gan dó bló ɔ́, gǎ e è zě ganvɔ dó bló ɔ́ ká ná wá xo e zlɛ́. É ná ɖe gǎ e ná xo nɛgbé tɔn zlɛ́ ɔ́ síin, é ná lun alǐnnyánú e ná byɔ́ alǐn tɔn mɛ ɔ́ tɔ́n, xɛsi ɖaxó ɖé ká ná jɛ jǐ tɔn tlóló. Ablu gɔngɔn ná cyɔ́n mɛdídá sín dɔkun lɛ́ɛ; zo e gbɛtɔ́ má bɔ ǎ e wɛ ná fyɔ́ mɛdídá, zo ná fyɔ́ mɛ e kpo ɖo gbɛ ɖo xwé tɔn gbe lɛ́ɛ. Jǐnukúnsin ná ɖe nǔ e é dó sin lɛ́ɛ nyi wěxo; ayǐkúngban ná sí te dó jǐ tɔn, bó ná ɖe e gba! Gbe e gbe Mawu ná ɖe xomɛsin tɔn xlɛ́ ɔ́, dɔkun e ɖo xwé tɔn gbe lɛ́ɛ ná sa yi tɔ ɖɔhun. Nǔ e Mawu sɔ́ ɖ'ayǐ nú mɛdídá ɔ́ nɛ́; nǔ e nyí étɔn bɔ Mawu sɔ́ ɖ'ayǐ n'i ɔ́ nɛ́. Ée Jɔ̌bu sín xɔ́ntɔn Sofáa ɖɔ xó ɔ́, Jɔ̌bu yí xó, bó ɖɔ: Mi ɖótó xó e ɖɔ gbé un ja ɔ́ céɖécéɖé; un sɔ́ ɖo gbɔ dó nú mɛ mitɔn ɖě ba wɛ hú mɔ̌ ǎ. Mi kɛnklɛ́n ná xó mì. Sofáa, nú un ko ɖɔ b'ayǐ ɔ́, a sixú wá ɖɔ slǎmɛ xó ce wú. Gbɛtɔ́ wɛ un dó hwɛ din a? Éeǒ! Énɛ́ ɔ́ wú wɛ un má sixú kú hǔn ǎ. Mi kpɔ́n nǔ e ɖo wiwa mì wɛ ɔ́, nú mi tunwun wɛ ɔ́, agbɔ̌n wɛ ná kpé mi; alɔ jɛ́n mi ná sɔ́ ɖó nu, mi ná sixú kɛ nu ǎ. Nyɛ ɖésúnɔ ɔ́, nú un ɖo nǔ e ɖo jijɛ dó jǐ ce wɛ ɔ́ kpɔ́n wɛ ɔ́, ado nɔ hu mì, bɔ un nɔ sísɔ́. Étɛ́wú mɛdídá lɛ́ɛ ká kpo ɖo gbɛ? Aniwú xwe ɖo xwe jí jɛ nú yě wɛ, bɔ acɛ yětɔn lɛ́ ɖo jijɛ jí wɛ? Vǐ yětɔn lɛ́ɛ ɖo kpɔ́ xá yě bó ɖo dǒ lí wɛ ɖo nukún yětɔn mɛ; vǐvú yětɔn lɛ́ɛ ɖo gbɛ ɖu wɛ ɖo akpá yětɔn. Yě vo ɖo xwé yětɔn lɛ́ɛ gbe; xɛsi ɖěbǔ ɖe ǎ. Mawu sín bǎ nɔ jɛ yě wǔ ǎ. Nyibúsú yětɔn lɛ́ɛ nɔ́ ɖo ava dó nú nyibú asi yětɔn lɛ́ɛ wɛ, bɔ yě nɔ́ ɖo xo mɔ wɛ hwɛhwɛ; nyibú yětɔn lɛ́ɛ nɔ́ lun vǐ ǎ. Yě nɔ́ jó vǐ yětɔn dó bɔ yě nɔ́ ɖo jǐ lɔ́n yi wɛ gbɔ̌ ɖɔhun; vǐvú yětɔn lɛ́ɛ nɔ́ ɖo ayihún da wɛ. È nɔ xo hǔn kpó kanhún kpó dó han yětɔn mɛ; è ɖo kpete kún wɛ, bɔ yě ɖo sise wɛ ɔ́, é nɔ́ víví nú yě. Yě nɔ́ ɖu gbɛ yětɔn ganjí, bó nɔ́ yi yɔ ɖo fífá mɛ. Mɛdídá lɛ́ɛ ká kó ɖɔ nú Mawu ɖɔ: “Nǎ agbɔ̌n mǐ, mǐ ba ná tunwun nǔ e jló we ɔ́ ǎ. Hwi mɛ e è nɔ ylɔ́ ɖɔ Nǔbǐwúkpétɔ́ ɔ́, étɛ́ wɛ a nyí bɔ mǐ nǎ sɛn we? Mǐ sa vo nú we ɔ́, étɛ́ ká ná nyɔ́ nú mǐ ɖ'é mɛ?” Nǔ ɖo mɔ̌ có nyɔ̌ná yětɔn ɖo alɔ yě ɖésúnɔ tɔn mɛ ǎ; énɛ́ wú ɔ́, un ná xwedó nǔkplɔ́nmɛ mɛdídá lɛ́ɛ tɔn gbeɖé ǎ. Mǐ ká mɔ bɔ gbɛ yětɔn cí viwun zogbɛ́n ɖɔhun kpɔ́n gbeɖé a? Nǔ xá yě bɔ mǐ mɔ kpɔ́n gbeɖé a? Mawu sin xomɛ dó yě bɔ mǐ mɔ kpɔ́n a? Jɔhɔn zé yě nǔywɛ́ ɖɔhun, bɔ mǐ mɔ kpɔ́n a? Axásáxásá jɔhɔn dó alɔ yě mɛ, afúntúntún ɖɔhun bɔ mǐ mɔ kpɔ́n a? Mi nɔ ɖɔ tó dɔn nú mɛ Mawu tɔn ɖo ayǐ nú vǐ yětɔn lɛ́ɛ; Yě ɖésúnɔ wɛ Mawu ló kó dɔn tó ná bónú yě ná tunwun nǔ e ɖ'é mɛ é. Yě ɖésúnɔ wɛ nǔ ɖó ná xá; yě ɖésúnɔ ní dó xomɛsin Nǔbǐwúkpétɔ́ ɔ́ tɔn ɖɛ̌. Đó nú yě wá kú ɔ́, nǔɖé sɔ́ nɔ́ kan yě ɖo nǔ e ɖo te kpɔ́n vǐ yětɔn lɛ́ɛ ɔ́ mɛ ǎ. Nǔ e Mawu na wa ɔ́, è nǎ lɛ́ kplɔ́n ɛ wɛ a? Éyɛ́ mɛ e nɔ ɖɔ hwɛ xá nǔɖíɖó e ɖo sɛ́xwé lɛ́ɛ ɔ́, è na lɛ́ kplɔ́n ɛ nǔ énɛ́ lɛ́ɛ wɛ a? Yě mɛ ɖé lɛ́ɛ tíin bɔ nyɔ̌ná mɛ wɛ yě nɔ́ lɛ́ kú jɛ; nǔlinkpɔ́n ɖé nɔ́ ɖo ayi mɛ nú yě ǎ; ayi yětɔn nɔ́ j'ayǐ ganjí. Nǔɖuɖu nɔ́ kpé yě; hunsin yětɔn nɔ́ ɖo gbɛ. Mɛ ɖé lɛ́ɛ ká tíin bɔ gbɛ yětɔn nɔ́ blá wǔ; yě nɔ́ mɔ gbɛ sín víví ɖěbǔ cóbó nɔ́ kú ǎ. Yě mɛ gbɛ̌ta we énɛ́ lɛ́ɛ bǐ wɛ ka nɔ wa yi kɔ́ glɔ́, bɔ agbaza yětɔn nɔ́ ji wě. Un tunwun nǔ e lin wɛ mi ɖe lɛ́ɛ; tamɛ e lin dó wǔ ce wɛ mi ɖe lɛ́ɛ ɔ́, un tunwun bǐ. Mi ná kanbyɔ́ mì ɖɔ: “Gǎnhúmɛtɔ́ lɛ́ɛ sín xwé ɔ́, mɛdídá lɛ́ɛ sín nɔtɛn ɔ́, nɛ̌ xó yětɔn wá fó gbɔn? È sɔ́ mɔ donu yětɔn ǎ.” Mi kan xó byɔ́ alitanu lɛ́ɛ ǎ cé? Nǔ e yě ɖɔ nú mi ɔ́ mi ɖi ǎ wɛ a? Nyladó zán gbé ɔ́, nǔɖé nɔ wa mɛdídá ǎ, xomɛsin Mawu tɔn nɔ́ jó e dó wǔ ɖíɖí aji ɖɔhun. Mɛ̌ ká nɔ́ glá kpan nukɔn mɛdídá, bó nɔ́ ɖɔ nǔ e é wa nyi do lɛ́ɛ n'i? Nǔ e é wa nyi do ɔ́, mɛ̌ wɛ sixú dɔn tó tɔn n'i? Nú éyɛ́ kú ɔ́, è nɔ sɔ́ yi ɖi, bó nɔ́ cɔ́ yɔdo tɔn. Mɛ bǐ nɔ jɛ cyɔ tɔn gúdo; ahwan wɔ̌buwɔ́bú nɔ́ nɔ nukɔn nú cyɔ tɔn; yɔdo e mɛ è sɔ́ ɛ mlɔ́ ɔ́ lɔ nɔ nyɔ́ xomɛ dó wǔ tɔn. Gbɔ tɛ́ dó nú mì wɛ mi ka ɖe din? Xó ɖɔ dó jɔhɔn mɛ wɛ mi ɖe! Xó e ɖɔ wɛ mi ɖe lɛ́ɛ bǐ wɛ nyí adingban. Elifázi Temaninu ɔ́ yí xó bó ɖɔ: Gbɛtɔ́ sixú jɛ alɔ nú Mawu a? Gbeɖé kpɔ́n! Gbɛtɔ́ e ɖó nǔnywɛ́ ɔ́, é ɖésúnɔ jɛ́n é sixú jɛ alɔ ná. Ényí a nyǐ nǔjlɔ́jlɔ́watɔ́ ɔ́, a nǐ wɛ ná tɔ́n ɖ'é mɛ nú Nǔbǐwúkpétɔ́ ɔ́? Nú è ma nɔ mɔ nǔjɛdo ɖěbǔ ɖɔ dó wǔ we ǎ ɔ́, le tɛ́ wɛ ɖ'é mɛ n'i? A vɛdó ɖɔ sísí e émí ɖó n'i ɔ́ wú wɛ é ɖo tó dɔn nú émí wɛ, bó ɖo hwɛ ɖɔ xá émí wɛ sín a? Éeǒ, nǔ tobutóbú e a nɔ wa nyi do lɛ́ɛ, agɔ e a nɔ fɔ́n bó nɔ ɖo jijɛ wɛ lɛ́ɛ sín tó dɔn nú we wɛ é ɖe. A nɔ yí nǔɖé lɛ́ɛ ɖó gbanu ɖo nɔví towe lɛ́ɛ sí nǔɖé ma sín nǔɖé nu; a nɔ yí awu e ɖo kɔ yětɔn ɔ́ bó nɔ jó yě nyi wěxo. A nɔ tɛ sin mɛ e sinnugblá ɖo sinsin wɛ é, a nɔ tɛ nǔɖuɖu mɛ e xovɛ́ ɖo sinsin wɛ é. A jǒ gǎnhúnǔtɔ́ lɛ́ɛ dó bɔ yě yǐ to ɔ́, goyítɔ́ lɛ́ɛ klá jɛ to ɔ́ nú. A nɔ nya asúkúsi lɛ́ɛ asígbá alɔgbá. Nǔ kpɛ e kpo nú tɔ́cyɔvǐ lɛ́ɛ ɔ́, a nɔ lɛ́ yí sín yě sí. Énɛ́ ɔ́ wú wɛ è ɖǒ mɔ lɛ́ lɛ̌ dó we, bɔ xɛsi ɖaxó ɖé jɛ jǐ towe ajijimɛ. Zǐnflú gɔngɔn ɖé vun blá we, bɔ a sɔ́ mɔ nukúnnú ǎ. Tɔ ɖi sin wá gba we. È tunwun ganjí ɖɔ Mawu ɖo jǐ aga. Kpɔ́n lě e sunví lɛ́ɛ yi jǐ sɔ́ é! Yě yi jǐ ɖésú. Bɔ hwɛ ɔ́, a nɔ ɖɔ: “Ani wɛ Mawu ká tunwun? É sixú nɔ akpɔ́kpɔ́ lɛ́ɛ gúdo dɔ̌n bó ɖɔ hwɛ xá mǐ a? Akpɔ́kpɔ́ bú i, é sixú mɔ nǔ ɖěbǔ ǎ. Jǐxwé dɔ̌n jɛ́n é sixú lɛ́ lɛ̌ gbɔn.” Étɛ́! A jlǒ nǎ gosín ali xóxó e nǔnyanyawatɔ́ lɛ́ɛ nɔ gbɔn ɔ́ jí ǎ wɛ a? Kú wá xo yě sɔ́ yi ajijimɛ, lě e ayǐsun nɔ́ wá mu dǒ zin dɛ́ ajijimɛ ɔ́ ɖɔhun. Yě nɔ́ ɖɔ xó dó Mawu wú ɖɔ é ní gbɔ nú émí; Nǔbǐwúkpétɔ́ wɛ é nyí nǔgbó, amɔ̌, étɛ́ wɛ é sixú wa nú émí a jí. Nǔ ɖo mɔ̌ có, Mawu blǒ bɔ hɛ̌nnu yětɔn lɛ́ɛ jɛ dɔkun. Un ná xwedó nǔkplɔ́nmɛ mɛdídá lɛ́ɛ tɔn gbeɖé ǎ. Nǔjlɔ́jlɔ́watɔ́ lɛ́ɛ ná mɔ lě e nǔ gblé dó mɛdídá lɛ́ɛ gbɔn ɔ́, bó ná j'awǎ, xomɛvɔ́nɔ lɛ́ɛ ná ko yě, bó ná nɔ ɖɔ: “Kɛntɔ́ mǐtɔn lɛ́ɛ sín kún nɛ́ è sú dó nɛ́. Nǔ e yě ɖǒ lɛ́ɛ nɛ́ myɔ fyɔ́ bǐ nɛ́.” Hǔn bo dó hwɛ gbɔ xá Mawu bó ná mɔ vivo, a blǒ mɔ̌ ɔ́, a nǎ ɖu gbɛ. Đǒtó nǔ e kplɔ́n we wɛ é ɖésúnɔ ɖe ɔ́; hɛn xó tɔn lɛ́ɛ dó ayi mɛ. Ényí a lɛ̌ kɔ wá Nǔbǐwúkpétɔ́ ɔ́ gɔ́n ɔ́, é ná lɛ́ sɔ́ we ɖó lě e a ɖe gbɔn ɖ'ayǐ é; ɖe nǔ nyanya bǐ sín xwé towe gbe. Nyi siká towe dó kɔ́gúdu mɛ; jǒ siká akú towe dó nyi awǐnnya e ɖo tɔsisa mɛ lɛ́ɛ tɛ́ntin. Nǔbǐwúkpétɔ́ ɔ́ ná nyí siká towe, é ná nyí kpatágan towe. Énɛ́ ɔ́, a nǎ mɔ awǎjijɛ ɖo Nǔbǐwúkpétɔ́ ɔ́ mɛ; nukúnɖíɖó towe bǐ ná nɔ Mawu wú. A nǎ sa vo n'i, bɔ é ná se ɖɛ towe, a nǎ ɖe akpá e a dǒ lɛ́ɛ. A zě nǔɖé bó ná wa ɔ́, a nǎ mɔ nu tɔn. Ali ná hun nú we. Gbɛtɔ́ ná ba ná dó winnyá we; lo ɔ́, a nǎ ɖɔ dó ayi mɛ ɖɔ: “Un ná kpan akɔ́n,” ɖó Mawu nɔ́ gɔ́ alɔ nú mɛ e nɔ sɔ́ éɖée hwe é. É ná hwlɛ́n mɛ e hu hwɛ ɔ́ lɔ gán. Gbɛ ɖagbe e zán wɛ a ɖe ɔ́ ná zɔ́n bɔ mɛ énɛ́ ɔ́ ná mɔ hwlɛngán. Ée Jɔ̌bu sín xɔ́ntɔn Elifázi ɖɔ xó ɔ́, Jɔ̌bu yí xó, bó ɖɔ: Un bló nǔ bǐ bó ná gɔn azɔn wɛn cóbɔ é gló; lo ɔ́, vo e sa wɛ un kpo ɖe égbé din ɔ́ fɔ́n bó ɖo jijɛ jí wɛ. Áo có! Ényí un tunwun fí e un ná mɔ Mawu ɖe ɔ́ wɛ ɔ́, é ná nyɔ́; ényí un sixú hun káká yi nɔtɛn tɔn wɛ ɔ́, é ná nyɔ́. Un ná ɖe xlɛ́ ɛ ɖɔ hwɛ ce jɔ; un ná ɖɔ xó e ɖo xo ce mɛ ɔ́ bǐ dó ɖe xlɛ́ ɛ ɖɔ hwɛ ce jɔ. Un ná kpɔ́n lě e é ná yí gbe nú mì gbɔn é; un ná se xó e é ná ɖɔ nú mì é. É ná zán hlɔ̌nhlɔ́n tɔn bǐ dó wa nǔ xá mì wɛ a? Éeǒ, éyɛ́ ná kú hǔn bó ɖótó mì vɔ́vɔ́. Énɛ́ ɔ́, é ná tunwun ɖɔ mɛ e ɖo nǔ dɔn xá émí wɛ ɔ́, gbɛtɔ́ gbejínɔtɔ́ wɛ; bɔ éyɛ́ mɛ e nyí hwɛɖɔtɔ́ ce ɔ́, ná gbo hwɛ nú mì azɔn ɖokpó, bɔ xó ná fó. Lo ɔ́, un yi zǎnzǎn hwe jí ɔ́, un nɔ mɔ ɛ ǎ, un yi gbada hwe jí ɔ́, un nɔ mɔ ɛ ǎ. Nǔɖé wa wɛ é ká ɖe ɖo totaligbé a? Un ma ka mɔ ɛ ɖo dɔ̌n nɛ́! Tofɔligbé wɛ é ká sɔ́ éɖée hwlá dó a? Un ma ka lɛ́ mɔ ɛ ɖo dɔ̌n nɛ́! Nǔ ɖo mɔ̌ có, é tunwun ali e jí un ɖe ɔ́ ganjí; é dó mì kpɔ́n ɔ́, un ná tɔ́n wǔ ɖiɖi aji ɖɔhun, un ná tɔ́n siká e è zě gbɔn myɔ nu, bo ɖe nǔ kwíji lɛ́ɛ sín mɛ é ɖɔhun. Un nɔ tɛ afɔ afɔdo tɔn lɛ́ɛ mɛ; fí e é gbɔn ɔ́ wɛ un nɔ gbɔn; un zɛ ali ǎ. Nǔ e é zɔ́n lɛ́ɛ ɔ́, un gbɛ́ ɖě ǎ. Nǔ e é ɖɔ ɔ́ bǐ ɖo ayi ce mɛ; un wɔn ɖě ǎ. Amɔ̌, éyɛ́ ɔ́, é húzú kpɔ́n ǎ; mɛ̌ wɛ sixú sú ali dó e? Nǔ e jló e ɔ́ wɛ é nɔ́ wa. Nǔ e é lin dó wǔ ce ɔ́ wɛ é ná wa; é lɛ́ to nǔ gěgé ɖěvo ɖ'ayǐ nú mì. Nǔ e wú gɔ̌n tɔn yiyi nɔ dó xɛsi nú mì ɔ́ nɛ́; nú un ɖo nukún dó nǔ e é hɛn ɔ́, é ná wá ɔ́ mɛ kpɔ́n wɛ ɔ́, un nɔ ɖi xɛsi n'i. Mawu gbɔ́jɔ́ kanmɛ nú mì, Nǔbǐwúkpétɔ́ ɔ́ dó xɛsi nú mì titewungbe. Zǎn kú, có un xwɛ ǎ, Mawu dɔn mì dó ablu mɛ, có un nɔ abwɛ̌ ǎ. Nɛ̌ ká gbɔn bɔ Nǔbǐwúkpétɔ́ ɔ́ má zé azǎn ɖé lɛ́ɛ ɖó vo, bó ná nɔ́ dó ɖɔ hwɛ ǎ? Nɛ̌ ká gbɔn bɔ mɛ e tunwun i lɛ́ɛ má nɔ mɔ ɖɔ é ɖo hwɛ ɖɔ wɛ nǔgbó a? Mɛ ɖé lɛ́ɛ nɔ sɛ tɛn nú gle sín dogbó lɛ́ɛ, mɛ ɖěvo lɛ́ɛ nɔ fin lɛ̌ngbɔ́, bó nɔ́ ná nǔɖuɖu yě. Mɛ ɖé lɛ́ɛ nɔ klá jɛ tócí tɔ́cyɔvǐ tɔn nu, abǐ yě nɔ́ yí nyibú asúkúsi tɔn ɖó gbanu. Yě nɔ́ kpíkpé gbɛ̌dónánɔ lɛ́ɛ sín ali jí. Wamamɔnɔ e ɖo to ɔ́ mɛ lɛ́ɛ nɔ́ gbɔ bó nɔ́ sɔ́ yěɖée hwlá. Wamamɔnɔ lɛ́ɛ nɔ wa nǔ tócí e nɔ́ nɔ gbětótló mɛ lɛ́ɛ ɖɔhun, yě nɔ́ fɔ́n zǎn dó azɔ̌ wǔ, lobo nɔ ba nǔɖuɖu nú vǐ yětɔn lɛ́ɛ ɖo zunkan mɛ. Yě nɔ́ ba gběhan gbɔn gle lɛ́ɛ mɛ. Yě nɔ́ gbɛ vǐwun mɛdídá lɛ́ɛ tɔn. Yě nɔ́ dɔ́ godé; yě ɖǒ avɔ e yě ná cyɔ́n dó glɔ́n jɔhɔn é ǎ. Sókanmɛjí nɔ́ ja bó nɔ xo yě; yě nɔ́ yí yɛ dó só wú, ɖó yě ɖǒ xɔ ta ǎ. Mɛdídá nɔ ɖe tɔ́cyɔvǐ sín nɔ tɔn kɔn. É nɔ́ ɖɔ wamamɔnɔ na zé nǔ ɖó gbanu. Wamamɔnɔ nɔ zɔn mɛ̌ jɔgbe, ɖó yě sɔ́ ɖó avɔ ɖěbǔ ǎ. Yě nɔ́ ɖo xovɛ́, nǔɖuɖu ká nɔ́ ɖo ta nú yě. Yě nɔ́ ɖa ami ɖo mɛdídá lɛ́ɛ sín xwé gbe; yě nɔ́ fyɔ́n vǐwun, bó ká nɔ sixú dó ɖɛ̌ ǎ. È nɔ se azɔn e wɛn wɛ mɛ e ɖo kúdonu lɛ́ɛ ɖe ɔ́, ɖo toxo ɔ́ mɛ. Mɛ e gblé wǔ lɛ́ɛ nɔ́ ɖo alě ná wɛ, Mawu ká ké ya nú nǔ baɖabaɖa nɛ́ lɛ́ɛ e ɖo jijɛ wɛ ɔ́ ǎ. Mɛdídá lɛ́ɛ ɖo mɛ e ma yí wǎn nú wěziza ǎ lɛ́ɛ mɛ; yě nɔ́ gbɔn ali e jí wěziza ɖe lɛ́ɛ ǎ, yě gosín ali énɛ́ lɛ́ɛ jí. Wun ɖo kinkɛn wɛ ɔ́, mɛhutɔ́ nɔ́ fɔ́n, bó nɔ́ hu wamamɔnɔ, mɛ e ma ɖó mɛɖé ǎ é. Zǎn ká bɔ ɔ́, é nɔ́ húzú ajotɔ́. Mɛsibatɔ́ nɔ́ ɖo zǎn kúkú nɔ te kpɔ́n wɛ bó nɔ́ ɖɔ mɛɖé kún ná mɔ émí ó, lobo nɔ cyɔ́n nǔ nukún mɛ. Zǎn mɛ ɔ́, ajotɔ́ lɛ́ɛ nɔ tɔ́n dǒ; kéze ɔ́, yě nɔ́ sú hɔn dó ta; yě nɔ́ ba wěziza xó ǎ. Zǎn kú ɔ́ wɛ ayǐ yětɔn nɔ́ hɔ́n. Yě wɛ nyí mɛ e nɔ dó xɛsi mɛ ɖo zǐnflú gɔngɔn mɛ lɛ́ɛ. Étɛ́ ɖíe! Mɛdídá fúɖá ɖo tɔ nukún mɛ mɛ nya! È ko dó nu nɔtɛn tɔn ɖo ayǐkúngban ɔ́ jí. É ná mɔ ali e yi vǐwungbo tɔn mɛ ɔ́ ǎ. Lě e ayǐkúngban xúxú nɔ nu kɛ́njí gbɔn ɔ́, mɔ̌ wɛ kútomɛ nɔ mi hwɛhutɔ́ gbɔn. Étɛ́! Nyɔ̌nu e ji i ɔ́ ná wɔn ɛ; é ná húzú nǔɖuɖu ɖagbe nú wǎnvú; mɛɖé sɔ́ ná flín i vɔ́vɔ́ ǎ. È nǎ fɔ ɖɔ nú nǔ nyanya atín ɖɔhun. Mɛdídá lɛ́ɛ dó ya nú nyɔ̌nu e má ɖó vǐ ǎ é, yě nyɔ́ xomɛ dó asúkúsi wú ǎ. Lo ɔ́, Mawu ɖó hlɔ̌nhlɔ́n e ná nya gǎnhúnǔtɔ́ lɛ́ɛ é; é sí te ɔ́, yě nɔ́ tunwun ɖɔ émí kún sɔ́ ná nɔ gbɛ ó. Mawu nɔ tín dó yě hwe ɖé lɛ́ɛ nu, bɔ yě nɔ́ vɛdó ɖɔ mɔ̌ wɛ sín; lo ɔ́, nukún tɔn ká nɔ ɖo nǔ e wa wɛ yě ɖe lɛ́ɛ bǐ wú. Yě nɔ́ su zogbe, bɔ nukikɛ ɖokpó mɛ kpowun ɔ́, xó yětɔn ká nɔ́ fó. Yě nɔ́ j'ayǐ, yě nɔ́ kú gbɛtɔ́ bǐ ɖɔhun. È ya yě jinukún ɖɔhun. Mɛ̌ wɛ ná ɖɔ nǔ kún nyí mɔ̌ ó? Mɛ̌ wɛ ná gbɛ́ xó e un ɖɔ é? Biludádi Cuwáxinu ɔ́ yí xó bó ɖɔ: Mawu ɔ́, hlɔ̌nhlɔ́n tɔn d'agba bó jí wǔ. É bló bɔ fífá tíin ɖo jǐxwé aga. Mɛ̌ ka sixú xa ahwangɔnu tɔn lɛ́ɛ? Mɛ̌ jí wɛ wěziza tɔn ma ka nɔ hɔ́n dó ǎ? Nɛ̌ gbɛtɔ́ ka sixú nyí hwɛjijɔnɔ ɖo Mawu nukɔn gbɔn? Nɛ̌ é sixú nyí mɛ mímɛ́ gbɔn? Sun ɖésú za wě ɖo Mawu nukún mɛ ǎ, sunví lɛ́ɛ ɖésú za wě ɖo nukún tɔn mɛ ǎ. Ényí nǔ ɖo mɔ̌ ɔ́, gbɛtɔ́ tɔn sɔ́ nyí ɖiɖɔ ǎ. Gbɛtɔ́ ɔ́ wěvú kpowun wɛ. Ée Jɔ̌bu sín xɔ́ntɔn Biludadi ɖɔ xó ɔ́, Jɔ̌bu yí xó, bó ɖɔ: A ka nyɔ́ alɔ dó mɛ e ma ɖó gǎn ǎ é ɖésú mɛ! A nyɔ́ sɔ hɛn mɛ e ma ɖó gǎnjɛwú ǎ é tawun! A nɔ kplɔ́n nǔ ɖagbe mɛ e ma bí ǎ é mɛ! A nɔ ɖe lě e a ɖǒ nǔnywɛ́ gbɔn ɔ́ xlɛ́ mɛ lóóo! Mɛ̌ ɖɔ xó énɛ́ lɛ́ɛ ná wɛ a ka ɖe? Mɛ̌ ká nɔ zé xó énɛ́ lɛ́ɛ dó ayi mɛ nú we? Mɛkúkú lɛ́ɛ nɔ́ sísɔ́ ɖo xu glɔ́, mɛkúkú lɛ́ɛ nɔ́ sísɔ́ ɖo nǔ e ɖo xu mɛ lɛ́ɛ bǐ glɔ́. Đó kútomɛ ɔ́ ɖo wěxo ɖo Mawu nukɔn, avɔ ɖěbǔ cyɔ́n ɛ ǎ. Mawu vlɔ́n jǐxwé sín taligbé nyi gblǒlǒ mɛ, é hɛn ayǐkúngban ɔ́ ɖó te; é ká sɔ́ ɖó nǔ ɖ'é jí ǎ. É nɔ́ hɛn sin ɖó te ɖo akpɔ́kpɔ́ lɛ́ɛ mɛ, akpɔ́kpɔ́ lɛ́ɛ ká nɔ́ wɔ ɖó sin ɔ́ sín kpinkpɛn wú ǎ. É nɔ́ cyɔ́n nǔ dó axɔ́súzinkpo tɔn, é nɔ́ dɔn akpɔ́kpɔ́ cyɔ́n axɔ́súzinkpo tɔn. É zɛ xwi tobotobo ɖokpó ɖó tɔ lɛ́ɛ nukún mɛ, bɔ é nyí dogbó ɖo wěziza kpó zǐnflú kpó tɛ́ntin. Mawu wa adǎn lě ɔ́, jǐnukúnsin sín dotín lɛ́ɛ nɔ́ dán wǔ, bɔ jǐnukúnsin nɔ́ sísɔ́. Mawu nɔ́ zé hlɔ̌nhlɔ́n tɔn dó ɖu ɖo xu jí; é nɔ́ zé nǔnywɛ́ tɔn dó gba nǔdábaɖa Hlaxávu ná. Funfún tɔn za jǐnukúnsin, bɔ é mɛ́; é zé alɔ dó tɔ́n adɔ Levyatáan dan gɔ́ndɔ́n gɔ́ndɔ́n ɔ́. Nǔwiwa Mawu tɔn kpɛɖé nɛ́ é ɖe xlɛ́ nɛ́, zǐngídi tɔn kpɛví ɖé wɛ mǐ se. Nú hlɔ̌nhlɔ́n tɔn ká wá dó gbe jǐ ɖɔhun ɔ́, mɛ̌ ká ná sixú se nǔ jɛ mɛ? Jɔ̌bu ɖo nukɔn yi wɛ ɖo xó tɔn mɛ; é ɖɔ: Un xwlé Mawu nú mi; Mawu e má ba hwɛjijɔ nú mì ǎ ɔ́ wɛ un xwlé nú mi. Un xwlé Nǔbǐwúkpétɔ́ ɔ́ nú mi; Nǔbǐwúkpétɔ́ e zɔ́n bɔ un ɖo wǔvɛ́ mɔ wɛ sɔ lě wɛ ɔ́ un xwlé nú mi. Un xwlé Mawu ɖɔ ényí gbɛ kpɛɖé kpo ɖo wǔ ce jɛ́n wɛ ɔ́, ényí funfún e Mawu na mì ɔ́ kpo ɖo dǐndín wɛ jɛ́n wɛ ɔ́, xó e má sɔgbe ǎ ɔ́ ɖěbǔ ná tɔ́n sín nu ce mɛ gbeɖé ǎ; un ná ɖó adingban gbeɖé ǎ. Nú un ɖɔ hwɛ mitɔn jɔ hǔn, heelú mì; un ná ɖo ɖiɖɔ wɛ káká yi kú ɖɔ xomɛvɔ́nɔ wɛ un nyí. Un ɖɔ bó tɛ afɔ jí ɖɔ lě e un nɔ zán gbɛ gbɔn ɔ́ sɔgbe, un ɖo kɔ na lɛ́ sín xó e ɖɔ wɛ un ɖe ɔ́ gúdo wɛ ǎ. Ayi ce xo hun xá mì ɖo gbɛ e zán wɛ un ɖe lɛ́ɛ ɖěbǔ mɛ ǎ. È ní wa nǔ xá kɛntɔ́ ce, lě e è nɔ wa nǔ xá mɛdídá gbɔn é; è nǐ wa nǔ xá mɛ e húzú kpan nukɔn mì ɔ́, lě e è nɔ wa nǔ xá mɛ nyanya gbɔn é. Mɛ e ma nɔ sí Mawu ǎ ɔ́, hwenu e Mawu na sɛ́n kan nú gbɛ tɔn ɔ́, hwenu e é ná yí lǐndɔ̌n tɔn sín así tɔn ɔ́, nǔ tɛ́ é ká ná lɛ́ ɖó nukún? Adǎn wa jɛ gbigbo e jí ɔ́, Mawu nɔ se xósúsú tɔn a? Mɛ nyanya ɔ́ sixú mɔ gbɛ víví ɖo Nǔbǐwúkpétɔ́ ɔ́ mɛ a? É nɔ́ sixú sú xó ylɔ́ Mawu hwebǐnu a? Nyɛ ɔ́, un ná xlɛ́ mi lě e Mawu nɔ jlɛ́ nǔ gbɔn ɔ́, un ná zé tito Nǔbǐwúkpétɔ́ ɔ́ tɔn lɛ́ɛ hwlá dó mi ǎ. Mi ɖésúnɔ ɔ́, mi ma mɔ ɖó mɔ̌ a? Bɔ étɛ́wú wɛ mi ka ɖo xó gbló ɖɔ wɛ mɔ̌? Kanta e Mawu zě ɖ'ayǐ nú mɛdídá lɛ́ɛ ɖíe, nǔ e Nǔbǐwúkpétɔ́ ɔ́ zé ɖó te nú mɛ nyanya lɛ́ɛ ɖíe: Vǐ yětɔn lɛ́ɛ ɔ́, hwenu e yě ná sukpɔ́ ɔ́, ahwan na hu yě. Vǐ lɛ́ɛ ná ba nǔɖuɖu kpo. Yě mɛ e ná gan ɖ'é mɛ lɛ́ɛ ɔ́, jɛmɛjí wɛ ná vívá kún yětɔn; asúkúsi yětɔn lɛ́ɛ ká ná ví yě ǎ. Mɛdídá lɛ́ɛ ná bó kplé kpatágan kɔ́gúdu ɖɔhun ɔ́, yě ná bó bɛ́ avɔ kplé kɔ́ nyinya ɖɔhun ɔ́, yě ní ɖo kplékplé wɛ bó! Gbɛtɔ́ hwɛjijɔnɔ ɔ́ wɛ ná nɔ fɔ yě dó, gbɛtɔ́ ayijlɔ́jlɔ́nɔ wɛ ná ɖu kpatágan ɔ́ sín gǔ. Xɔ e mɛdídá lɛ́ɛ gbá ɔ́ syɛ́n ǎ; é cí azava e sá glecɔ́tɔ́ nɔ́ nɔ ɔ́ ɖɔhun. Mɛdídá nɔ́ mlɔ́ ayǐ kpó dɔkun kpó; azɔn gǔdo gúdo tɔn e é ká ná nyí dɔkunnɔ ɔ́ nɛ́. É wá fɔ́n ɔ́, é sɔ́ nɔ́ mɔ nǔɖé ǎ. Xɛsi ɖaxó ɖé nɔ jɛ jǐ tɔn, tɔ ɖi sin wá gba mɛ ɖɔhun; axásáxásá jɔhɔn nɔ wá zé e yi zǎn xóxó mɛ. Jɔhɔn zǎnzǎnhwe jí tɔn nɔ zé e bó nɔ́ dɔn ɛ yi zɔ bǐ; jɔhɔn ɔ́ nɔ xo e sɔ́ vawun sín nɔtɛn tɔn. Mawu kú nǔbláwǔ nú mɛdídá lɛ́ɛ ǎ. É ɖo gǎ da dó yě wɛ káká, bɔ yě gbɔ bó hɔn. È mɔ adǎn ɖo mɛdídá gbo wɛ mɔ̌, lobo ɖɔ acɔnkwín. È mɔ tɛn e mɛ yě ɖe ɔ́, lobo ɖú ahwannɔwe. Nǔgbó wɛ, fí e è nɔ kun kpatágan ɖe ɔ́ tíin, fí e è nɔ kun siká bó nɔ́ kɔn ɖe ɔ́ tíin. Gan ɔ́, ayǐkúngban lanmɛ wɛ è nɔ kun sín. Ganvɔ ɔ́, awǐnnya ɖé lɛ́ɛ wɛ è nɔ sínsín bó nɔ mɔ ɖ'é mɛ. Mɛ e nɔ wa azɔ̌ énɛ́ lɛ́ɛ nɔ́ hɛn zogbɛ́n yi ayǐkúngban glɔ́; yě nɔ́ kíjé awǐnnya lɛ́ɛ káká yi kɔ́ glɔ́ bǐ bó nɔ́ yi ba awǐnnya e ɖo hwlǎhwlá ɖo nǔglɔ́ bǐ ɖo ablu mɛ lɛ́ɛ. Yě nɔ́ ɖe ali gbɔn kɔ́ glɔ́, ɖo fí e xwé ɖé má yá ǎ é. Fí ɔ́ nɔ lín dó gbɛtɔ́ lɛ́ɛ; mɛɖé nɔ gbɔn fínɛ́ ǎ, bɔ azɔ̌watɔ́ lɛ́ɛ nɔ zɔn kan mɛ, bó nɔ xo yi aɖisí amyɔ. Ayǐkúngban ɔ́ jí wɛ jinukún nɔ́ nyɔ́ ɖe. Nǔ e ká ɖo jijɛ wɛ ɖo ayǐkúngban ɔ́ glɔ́ mɔ̌ ɔ́ cí nǔ e è bɔ myɔ dó bɔ é ɖo agbǎn hun wɛ ɔ́ ɖɔhun. Awǐnnya tɔn lɛ́ɛ mɛ wɛ awǐnnya xɔ akwɛ́ safíi lɛ́ɛ ɖe; awǐnnya tɔn lɛ́ɛ ɖokpó ɔ́ mɛ wɛ è nɔ mɔ sikálinfín ɖe. Aklasú tunwun ali e ɖo ayǐkúngban glɔ́ lɛ́ɛ é ǎ; Nǔsáxɛ lɛ́ɛ ɖěbǔ mɔ kpɔ́n ǎ. Adǎnkanlin lɛ́ɛ ɖě tɛ afɔ ali énɛ́ jí kpɔ́n ǎ, kinnikínní gbɔn ali énɛ́ kpɔ́n ǎ. Gbɛtɔ́ ká nɔ́ glá káká bó nɔ́ ɖ'alɔ só énɛ́ wú, é nɔ́ fɔ ɖɔ nú só lɛ́ɛ. Gbɛtɔ́ nɔ́ ɖe ali dó só lɛ́ɛ mɛ, bɔ nukún tɔn nɔ́ mɔ nǔ e nyí nǔ xɔ akwɛ́ é bǐ. É nɔ́ ɖó tɔ e ɖo sisa wɛ ɔ́ te, é nɔ́ ɖe nǔ e ɖo hwlǎhwlá lɛ́ɛ nyi wěxo. Lo ɔ́, nǔnywɛ́ ɔ́, fítɛ́ é ká ɖe tawun? Fítɛ́ wɛ nukúnnú mɔ jɛ nǔ mɛ ɔ́ nɔ́ nɔ? Gbɛtɔ́ lɛ́ɛ tunwun lě e nǔnywɛ́ xɔ akwɛ́ sɔ é ǎ, nǔnywɛ́ ɖo hwe glɔ́ fí ǎ. Agbetɔ awoyó ɖɔ: “Nǔnywɛ́ ɖo fí ǎ”, xu ɖɔ: “É ɖo gɔ̌n ce ǎ.” Siká akú sixú nɔ nǔnywɛ́ tɛnmɛ ǎ, kpatágan kpinkpɛn ka sixú xɔ nǔnywɛ́ ǎ. È sixú jlɛ́ nǔnywɛ́ dó siká akú wú ǎ, è sixú jlɛ́ nǔnywɛ́ dó awǐnnya xɔ akwɛ́ onísi wú ǎ, è ka sixú jlɛ́ dó awǐnnya xɔ akwɛ́ safíi wú ǎ. Siká xɔ akwɛ́ sɔ nǔnywɛ́ ǎ. Wěkpɛ́n ɖagbe ɖagbe xɔ akwɛ́ sɔ nǔnywɛ́ ǎ. Siká goví sixú nɔ do tɔn mɛ ǎ. Awǐnnya xɔ akwɛ́ koláyi kpó klisutálu kpó sixú nɔ te nukɔn tɔn ǎ. Nǔnywɛ́ xɔ akwɛ́ hú jɛ̌nana. È sixú jlɛ́ nǔnywɛ́ dó awǐnnya xɔ akwɛ́ tokpázi e è nɔ mɔ ɖo Etiopíi ɔ́ wú ǎ. È sixú jlɛ́ nǔnywɛ́ dó siká akú wú ǎ. Ée nǔ cí mɔ̌ ɔ́, fítɛ́ nǔnywɛ́ ká gosín lo? Fítɛ́ wɛ nukúnnú mɔ jɛ nǔ mɛ ɔ́ nɔ́ nɔ? Nǔnywɛ́ sɔ́ éɖée hwlá dó nǔ e ɖo gbɛ lɛ́ɛ bǐ, é sɔ́ éɖée hwlá dó xɛ e ɖo jǐ aga lɛ́ɛ bǐ. Domaɖó-azan kpódó kú kpó ɖɔ: “È ko ɖɔ xó tɔn bɔ mǐ se.” Mawu wɛ tunwun nǔnywɛ́ sín ali, é wɛ tunwun nɔtɛn tɔn. Mawu nɔ́ mɔ nǔ káká yi jɛ fí e ayǐkúngban ɔ́ kponu ɖó é; é nɔ́ mɔ nǔ e ɖo gbɛ ɔ́ mɛ lɛ́ɛ bǐ sɛ́ dó. Hwenu e é ɖɔ gan nabí e jɔhɔn ná da ɔ́, hwenu e é ɖɔ bǎ e mɛ sin ná nɔ ɔ́, hwenu e é dó sɛ́n e jǐ ná nɔ́ xwedó dó ja ɔ́, hwenu e é ɖe ali nú jǐkɛwun kpó jǐdógbe kpó ɔ́, hwenɛ́nu wɛ é mɔ nǔnywɛ́ bó ɖe xlɛ́; é dó dodó tɔn lɛ́ɛ do, bó gbéjé kpɔ́n káká yi do. Énɛ́ ɔ́ gúdo ɔ́, é ɖɔ nú gbɛtɔ́ ɖɔ: “Đǒtó! Sísí ɖó nú nyɛ Aklúnɔ wɛ nyí nǔnywɛ́; è nǐ hɔn nú nǔ nyanya wiwa ka nyí nukúnnú mɔ jɛ nǔ mɛ.” Jɔ̌bu ɖo nukɔn yi wɛ ɖo xó tɔn mɛ; é ɖɔ: Áo! É jló mì ɖésú ɖɔ má lɛ́ nɔ lě e un ko nɔ gbɔn ɖo sun e wá yi lɛ́ɛ mɛ é; Mawu ɖo jǐ ce kpɔ́n wɛ hwenɛ́nu. Hwenɛ́nu ɔ́, zogbɛ́n tɔn nɔ́ hɔ́n dó jǐ ce, wěziza tɔn ɖo ali xlɛ́ mì wɛ ɖo zǐnflú mɛ. Hwenu e nyɛ kpó Mawu kpán nyí xɔ́ntɔn, bɔ é nɔ́ cɔ́ xwé ce ɔ́, nǔ wɛ nyɔ́ nú mì hwenɛ́nu. Éyɛ́ Nǔbǐwúkpétɔ́ ɔ́ kpo ɖo kpɔ́ xá mì hwenɛ́nu vǐ ce súnnu lɛ́ɛ lɛ́ lɛ̌ dó mì. Hwenɛ́nu ɔ́, un jɛ dɔkun káká bɔ é nɔ sa tɔ ɖɔhun; ami nɔ sa tɔ sín amito ce mɛ. Nú un xwe tokplétɛn ɖo toxo ɔ́ sín hɔntogbó jí lobo ná jínjɔ́n ayǐ ɔ́, mɛ wínnyáwínnyá lɛ́ɛ mɔ mì jǎwe ɔ́, yě nɔ́ jó agɔ dó gǔdo; degénɔ lɛ́ɛ nɔ sí te, bó nɔ́ nɔ te. Tomɛxó lɛ́ɛ nɔ́ ɖó xó e ɖɔ wɛ yě ɖe lɛ́ɛ te, bó nɔ sɔ́ alɔ ɖó nu. Gǎn lɛ́ɛ sín gbe nɔ ɖo do yi wɛ káká bó nɔ́ xwɛ bǐ. Mɛ e ɖo tó ɖó mì wɛ lɛ́ɛ bǐ nɔ kpa mì; mɛ e mɔ mì lɛ́ɛ bǐ nɔ ɖe kúnnu ɖagbe nú mì. Đó hwenɛ́nu ɔ́, un nɔ hwlɛ́n wamamɔnɔ e ɖo xó sú wɛ ɖɔ è nǐ wǎ gɔ̌ alɔ nú émí lɛ́ɛ gán; un nɔ hwlɛ́n tɔ́cyɔvǐ e má ɖó mɛɖé ǎ lɛ́ɛ gán. Mɛ e ɖo nǎ kú wɛ lɛ́ɛ nɔ́ xo ɖɛ dó jǐ ce; un nɔ hun alɔ bó nɔ́ ná nǔ asúkúsi lɛ́ɛ bɔ xomɛ nɔ hun yě. Hwɛjijɔ nyí awu bɔ un nɔ dó, nǔjlɔ́jlɔ́wiwa nyí awu ɖaxó kpó tablá kpó nú mì. Nukún wɛ un nyí nú nukúntíntɔ́nnɔ, afɔ wɛ un nyí nú afɔkponɔ. Hwenɛ́nu ɔ́, un húzú tɔ́ nú yatɔ́nɔ lɛ́ɛ, un nɔ kpé nukún dó jǒnɔ wú. Lo ɔ́, un nɔ fɛ́n aglan nú adǎkaxotɔ́ lɛ́ɛ, un nɔ yí mɛ e ná vún ɖu wɛ yě ɖe lɛ́ɛ sín nu yětɔn. Hwenɛ́nu ɔ́, un nɔ ɖɔ dó ayi mɛ ɖɔ: “Un na ɖó alɔ kɔ bó kú jɛ xɔ ce mɛ. Gbɛzán ce ná sukpɔ́ nyɛ̌kɛ́n e ɖo xutó e ɖɔhun. Gbɛ ce cí atín e sín ɖɔ ɖo tɔ mɛ ɔ́ ɖɔhun; ahǔn nɔ ja dó ama tɔn lɛ́ɛ jí. Susu e un ɖó ɖ'ayǐ ɔ́ ná lɛ́ ɖo jijɛ jí wɛ hwebǐnu, hlɔ̌nhlɔ́n e un nɔ dó wa nǔ na ɔ́ ná syɛ́n gǎ e è tlɔ́ ɔ́ ɖɔhun.” Hwenɛ́nu ɔ́, è nɔ ɖótó mì; è nɔ xɔ́ tó mì; un ɖo nǔnywɛ́ ná mɛ wɛ ɔ́, è nɔ wlí tó xó ce wú. Nú un ɖɔ xó fó ɔ́, mɛ ɖěbǔ nɔ mɔ nǔɖé d'é wú ǎ; xó e un ɖɔ ɔ́ nɔ́ wa ɖagbe nú yě, jǐ ja dó gle jí ɖɔhun. Mɛ lɛ́ɛ nɔ́ nɔ te kpɔ́n mì, lě e è nɔ nɔ te kpɔ́n jǐ é ɖɔhun; un ɖo xó ɖɔ wɛ ɔ́, yě nɔ́ yí xó ce lě e è nɔ hun nu bó nɔ́ yí atán nukɔntɔn e xwetají ɖe ɔ́ dó nu mɛ ɔ́ ɖɔhun. Yě nɔ́ ba ɖɔ má vlɔ́n nukún mɛ dó émí, un ka ko nǔ dó yě ɔ́, yě nɔ́ ɖi ǎ. Un nɔ nɔ yě nu, bó nɔ́ xlɛ́ ali yě; lě e axɔ́sú nɔ ɖo ahwangɔnu tɔn tɛ́ntin ɔ́ ɖɔhun wɛ un cí nú yě; mɛ e nɔ dó gbɔ nú mɛ e ɖo aluwɛ mɛ lɛ́ɛ é ɖɔhun wɛ un cí nú yě. Amɔ̌, din ɔ́, un húzú nǔkiko nú yɔkpɔ́yɔkpɔ́ lɛ́ɛ; ɖ'ayǐ ɖo fí ɔ́, tɔ́ yětɔn lɛ́ɛ sixú nɔ cukú ce lɛ́ɛ tɛ́ntin, bó cɔ́ kanlin ce lɛ́ɛ vɔ́vɔ́ ǎ. Mɛ énɛ́ lɛ́ɛ e hlɔ̌nhlɔ́n yětɔn ko ɖo vivɔ wɛ ɔ́, étɛ́ un sixú ɖó nukún ɖo yě sí hwenɛ́nu? Ya kpó xovɛ́ kpó zɔ́n bɔ yě vɔ́ da; yě ɖo nǔɖuɖu ba wɛ ɖo axéko jí, fí e nǔ bǐ gblé ɖe bɔ mɛɖé má ɖe ǎ é. Yě nɔ́ ba gběhan e ɖó jɛ lanmɛ lɛ́ɛ ɖo nǔkan mɛ, bó nɔ́ ɖu; jenɛ́ɛtín sín ɖɔ wɛ nyí nǔɖuɖu yětɔn. È nɔ nya yě sín gbɛtɔ́ lɛ́ɛ tɛ́ntin; è nɔ sú xó dó ta nú yě ajotɔ́ ɖɔhun. Énɛ́ ɔ́ wú ɔ́, yě nɔ́ nɔ tɔdomɛ tɔdomɛ, nu mɛ nu mɛ, abǐ sónu mɛ sónu mɛ. Yě nɔ́ ɖo xó sú wɛ tócí ɖɔhun ɖo zunkan tɛ́ntin; yě nɔ́ kplé cí wunkan glɔ́. Yě cí gbɛtɔ́ taɖunɔ, gbɛtɔ́ alǎnnúwatɔ́ ɖɔhun, bɔ è nya yě sín to ɔ́ mɛ. Amɔ̌, din ɔ́, nyɛ ji han dó wɛ mɛ nɛ́ lɛ́ɛ ɖe, nyɛ wú ɖɔ xó dó wɛ jɛ́n yě nɔ́ ɖe. Un húzú nǔ gbɛ́hɛn nú yě; yě dǒ gúdo mì; yě nɔ́ tún atán dó nukún mɛ nú mì. Mawu yí hlɔ̌nhlɔ́n ce bó kɔ́n wi ce; énɛ́ ɔ́, yě nɔ́ zé mì dó wa nǔ e jló yě ɔ́ ná. Yě dó ahwan gbě bó sí te dó jǐ ce, lobo dó hwɛ mì; yě ɖo biba ná zín mì dɛ́ wɛ; yě tɔ́n ahwan mì lobo ná gblé gbɛ dó nú mì. Yě sú ali bǐ dó mì, yě ɖo nǔ bǐ wa wɛ bónú má dɔn; yě ba alɔgɔ́ mɛɖé tɔn ǎ. É cí ɖɔ ali wɛ yě ɖe dó ahohó e lɛ́ lɛ̌ dó xwé ce ɔ́ mɛ, bó gbɔn kɔ́glo lɛ́ɛ tɛ́ntin, bó wá zɔn jǐ ce hawun ɖɔhun. Xɛsi ɖaxó ɖé jɛ jǐ ce. Wi e ɖo ta ce ɔ́ kɔ́n jɔhɔn wɛ zé ɖɔhun. Nyɔ̌ná e un ɖó ɔ́ gbadó akpɔ́kpɔ́ ɖɔhun. Amɔ̌, din e un byɔ́ ya mɛ, bɔ tíntɔ́n gló ɔ́, é sɔ́ kpo nǔɖé nú mì zɛ vosisa wú ǎ. Zǎn mɛ ɔ́, un nɔ mɔ wǔvɛ́ káká yi xú mɛ; wǔvɛ́ e mɔ wɛ un nɔ ɖe ɔ́ nɔ́ ná agbɔ̌n mì ɖěbǔ ǎ. Mawu wlí awu ce hɛn kpó hlɔ̌nhlɔ́n kpó, é ɖo kɔ ce fyɔ́n wɛ, awukɔ e fyɔ́n mɛ é ɖɔhun. É sɔ́ mì nyi dó babá mɛ, bɔ un cí kɔ́gúdu ɖɔhun; un cí afín ɖɔhun. Mawu ce, un sú xó ylɔ́ we, bɔ a yǐ gbe nú mì ǎ; un ɖo te ɖo nukɔn towe, bɔ a kpɔ́n jɛ ce jí ǎ. A jɛ adǎnú wa xá mì jí; a zě hlɔ̌nhlɔ́n towe bǐ dó ɖo nǔ wa xá mì wɛ. A zé mì dó jǐ aga ɖéé kpó jɔhɔn kpó, bɔ un ɖo lǐnlɔ́n wɛ ɖo jɔhɔn mɛ, jɔhɔn ɖaxó ɖé nɔ́ xo mì dó ɖisí amyɔ. Un ka tunwun ganjí ɖɔ kútomɛ kplá mì yi wɛ a ɖe, fí e nyí ɖǒkpé nú gbɛtɔ́ e ɖo gbɛ lɛ́ɛ bǐ é. Lo ɔ́, mɛ e ɖo dindɔn wɛ ɔ́ nɔ dlɛ́n alɔ ǎ cé? Mɛ e awě ɖo xixo wɛ ɔ́ nɔ́ sú xó ylɔ́ alɔgɔ́númɛtɔ́ ǎ cé? Un y'avǐ nú mɛ e gbɛdán ɖo gbigbo wɛ lɛ́ɛ ǎ cé? Byɔ̌wá gbɛ̌dónɔ lɛ́ɛ tɔn ɔ́ nɔ́ blá wǔ nú mì hwebǐnu ǎ cé? Nyɔ̌ná ɖó nukún wɛ un ɖe, nyladó ká wá; wěziza ɖó nukún wɛ un ɖe, zǐnflú ká wá cyɔ́n mì. Sín hwenu e un jɛ ya énɛ́ ji jí magbokɔ ɔ́, un sɔ́ vo ɖo nyiɖée mɛ ɖěbǔ ɖěbǔ ǎ. Un byɔ́ aluwɛ mɛ, hwe ce hun ǎ; un sí te ɖo togun mɛ agbawungba lobo sú xó ɖɔ è nǐ wá gɔ́ alɔ nú mì. Un ɖo avǐ ya wɛ avǔn gbě tɔn ɖɔhun, un wá mɔ nyɛɖée ɖo gbětótló mɛ gowungo ɖɔhun. Anyǔ e ɖo wǔ ce ɔ́ xú bǐ bó nɔ́ flé, wǔtu ce nɔ́ hun myɔ káká yi mɔ xú. Nǔwamɛ sín nǔ jɛ́n un nɔ xo kpó kanhún kpó; kpete ce ɔ́, gbɛvíhan jɛ́n un nɔ ji d'é mɛ. Un nu alɛ xá nukún ce ɖɔ un kún ná kpɔ́n ɖyɔ̌vǐ ɖé bó ná lin ná ɖó xó xá ɛ ó. Un bló mɔ̌ ɔ́, étɛ́ wɛ un ná ɖó nukún ɖo sɛ́xwé, ɖo Mawu Nǔbǐwúkpétɔ́ ɔ́ e ɖo jǐ aga dɔ̌n ɔ́ sí? Nǔgbó ɔ́, mɛdídá lɛ́ɛ ɔ́, adǎn wɛ nɔ gbo yě, nǔnyanyawatɔ́ lɛ́ɛ ɔ́, nǔ wɛ nɔ́ xá yě. Lo ɔ́, Mawu ɔ́, éyɛ́ tunwun nǔ e wa wɛ un ɖe lɛ́ɛ bǐ; afɔ e ɖe wɛ un ɖe lɛ́ɛ bǐ wɛ é nɔ́ xa. Un nɔ ɖó adingban wɛ a? Ayi ɖó nukɔn nú mɛ wɛ nɔ myá nukún nú mì a? Mawu ní sɔ́ mì ɖó gan ɖagbe jí, bó da; énɛ́ ɔ́, é ná mɔ ɖɔ xomɛvɔ́ wɛ un ɖe. Ényí un zɛ sín ali ɖagbe ɔ́ jí hǔn, ényí ayi ce ɖo nǔ e mɔ wɛ nukún ce ɖe lɛ́ɛ wú hǔn, ényí ɖɔ un ɖó alɔ ɖo nǔblíblí ɖé mɛ hǔn, mɛ ɖěvo ní ɖu nǔ e un dó ɔ́ sín le, abǐ è nǐ hɔn nǔ e un dó lɛ́ɛ bǐ. Ényí un mɔ nyɔ̌nu mɛsi ɖé bɔ é jló mì, bɔ un yi tɔ wu n'i ɖo xwé tɔn nukɔn hǔn, asi ce ní jɛ mɛ ɖěvo kan nu; è nǐ sɔ́ ɛ dó wa nǔ e jló mɛ ɔ́ ná! Đó nǔ wa gbɔn mɔ̌ ɔ́, hɛ̌n wɛ; nǔ nyanya wɛ bɔ hwɛɖɔtɔ́ lɛ́ɛ nɔ́ dɔn tó tɔn nú mɛ. Hwɛ e un hu ɔ́ ná nyí myɔ ɖé bó ná fyɔ́ mì bǐ, bó ná hɛn nǔ e un ɖó lɛ́ɛ bǐ gblé. Nú mɛsɛntɔ́ ce súnnu abǐ mɛsɛntɔ́ ce nyɔ̌nu kpó nyi kpó ɖó tagba, bɔ un gba acɛ tɔn ɔ́, hwenu e Mawu ná wá sí te dó nyɛ ɖésúnɔ jǐ ɔ́, nǔ tɛ́ un ka ná wa? Nú Mawu wá jɛ do ba nú mì jí ɔ́, xó tɛ́ un ná ɖɔ? Mawu ɖokpó ɔ́ wɛ bló mǐ bǐ; é wɛ bló nyɛ kpó yě kpán dó nɔ mǐtɔn mǐtɔn xo mɛ. Un tɛ nǔ lelenɔ kpɔ́n gbeɖé a? Un flú asúkúsi e ɖo nǔ ɖó nukún wɛ ɖo gɔ̌n ce ɔ́ kpɔ́n gbeɖé a? Un ɖu nǔ tɛ tɔ́cyɔvǐ kpɔ́n a? É nyɔ́ wa ɔ́, tɔ́cyɔvǐ ɔ́, sín vǔ ɖokpóó wɛ un nɔ tɔ́ do mɛ n'i, bɔ é nɔ akpá ce bó su; kpɛ wɛ un ɖe, bó jɛ nukún kpé dó asúkúsi wú jí. Un mɔ lelenɔ ɖo mɛ̌ bó tɛ avɔ ɛ wɛ a? Un mɔ yatɔ́nɔ bó gɔn awu ná ɛ wɛ a? É nyɔ́ wa ɔ́, avɔ e è sɔ́ lɛ̌ngbɔ́ ce lɛ́ɛ sín fún dó lɔn ná ɔ́ wɛ un nɔ ná yě, bɔ yě nɔ́ dó kú nú mì. Ényí un gblɔ́n adǎn nú tɔ́cyɔvǐ ɖo hwɛ nukɔn, bó ká tunwun ɖɔ hwɛɖɔtɔ́ lɛ́ɛ bǐ ná nɔ jǐ ce hǔn, abǎ ce ní fɛ́n sín abɔ̌ ce nu; awa ce ní wɛ́n dó awagóli. Đó un ɖi xɛsi nú tódɔnnúmɛ Mawu tɔn ɖésú; un kpé nǔɖé wú ɖo hlɔ̌nhlɔ́n tɔn nukɔn ǎ. Siká wú wɛ un gán jɛ a? Gan xɔ akwɛ́ wɛ nɔ́ ná ayi j'ayǐ mì a? Un j'awǎ ɖó dɔkun ɖaxó e un jɛ ɔ́ wú ǎ; un j'awǎ ɖó nǔ wɔ̌buwɔ́bú e un wa nǔ bó ɖó lɛ́ɛ wú ǎ. Nú un mɔ hwe hun ganjí, bó mɔ sunhwlé ɖi bó ɖo yiyi wɛ ɖo jǐxwé ɔ́, un nɔ lú dó te wɛ a? Un nɔ zé nǔ e nɛ́ lɛ́ɛ ɖó nǔmɛsɛn tɛnmɛ bó nɔ́ kpa awǒbóbó ná wɛ a? Ényí un wa nǔ gbɔn mɔ̌ ɔ́, hwɛ wɛ é nyí, bɔ hwɛɖɔtɔ́ lɛ́ɛ ná dɔn tó tɔn nú mì, ɖó Mawu e ɖó jǐxwé ɔ́ wɛ un gbɛ́ gbɔn mɔ̌. Ényí awě xo kɛntɔ́ ce ɔ́, é nɔ́ víví nú mì wɛ a? Nǔɖé xá ɛ ɔ́, un nɔ lɔ́n yi jǐ wɛ a? Nyɛ ɔ́, un lɔn bo dó nu kɛntɔ́ ce ɖɔ Mawu ní hu i ǎ; un lɔn gbeɖé bó dó nu i bó dó hu hwɛ ǎ. Mɛ̌ wɛ un ma ka ná lan, bɔ é ɖu gɔ́ xo ǎ? Mɛ e un nɔ yí dó xwé gbe lɛ́ɛ bǐ ná ɖe kúnnu tɔn nú mì. Jǒnɔ nɔ dɔ́ kɔ́xo gbeɖé ɖo xwé ce gbe ǎ; hɔn ce ɖo nuvo hwebǐnu nú aligbɔntɔ́ bǐ. Ényí un hu hwɛ ɔ́, un nɔ zé hwlá gbɛtɔ́ bǐ ɖɔhun wɛ a? Nǔ e un wa nyi do lɛ́ɛ nɔ́ nɔ nyi ɖokpónɔ xo mɛ wɛ a? Togun mɛ jijɛ dó xɛsi nú mì ǎ. Un na kpɔ́n dó wǎn e mɛ ce lɛ́ɛ ná gbɛ́ nú mì ɔ́ wú, bó gbɛ́ nu kɛ, bó cí xɔ mɛ wɛ a? Áo! Mɛ̌ wɛ ná ba mɛ e ná ɖótó mì ɔ́ xá mì? Xó gǔdo gúdo tɔn ɔ́ nɛ́ un ɖɔ nɛ́: Nǔbǐwúkpétɔ́ ɔ́ ní kɛ nu d'é wú nú mì! Nǔ e kɛntɔ́ wlán dó wǔ ce dó dó hwɛ mì ɔ́, un ná tɛ afɔ ayǐ bó gó, bó zé ɖó abɔ̌ta; un ná zé ɖó ta axɔ́súgbákún ɖɔhun. Un ná ɖó afɔ e un ɖe lɛ́ɛ bǐ sín gbe nú Mawu; un ná yi gɔ̌n tɔn kpó jiɖiɖe kpó. Nú ayǐkúngban ce lɛ́ɛ dó hwɛ mì, nú un dó avǐ nú hwɛn e ɖo ayǐkúngban ce lɛ́ɛ jí lɛ́ɛ, nú un ɖu nǔ e nyɔ́ ɖo ayǐkúngban lɛ́ɛ jí lɛ́ɛ, ma sú axɔ́, bó táfú mɛ e nɔ kpé nukún dó gle lɛ́ɛ wú lɛ́ɛ hǔn, wunkan ní wú ɖo ayǐkúngban ɔ́ jí, ayǐkúngban ɔ́ ní má sɔ́ ná ɔ́ji kpó blěe kpó gbeɖé ó. Jɔ̌bu ɖɔ xó ɖo te ɖo fí. Elifázi kpó Biludádi kpó, kpódó Sofáa kpó tin dó Jɔ̌bu, ɖó yě mɔ ɖɔ é ɖo lě e é nyí xomɛvɔ́nɔ gbɔn ɔ́ ɖe xlɛ́ wɛ magbokɔ. Énɛ́ ɔ́ wú ɔ́, nya ɖokpó ɖo fínɛ́ bó sin xomɛ dó Jɔ̌bu; nya ɔ́ nɔ nyí Elihu; Balakeɛ́li ví wɛ, é jɔ ɖo akɔta Buzi tɔn mɛ, ɖo hɛ̌nnu Hlamu tɔn mɛ. É sin xomɛ dó Jɔ̌bu ɖésú, ɖó Jɔ̌bu mɔ ɖɔ émí kún hu hwɛ ɖě dó Mawu ó. É sin xomɛ dó Jɔ̌bu sín xɔ́ntɔn atɔn lɛ́ɛ lɔmɔ̌, ɖó yě sɔ́ tunwun xó e jɛ́n yě ná ɖɔ nú Jɔ̌bu ɔ́ ǎ, bó ká ɖo hwɛ ɖó n'i wɛ. Éyɛ́ ko ɖɔ xó ɖě nú Jɔ̌bu ǎ, ɖó mɛ ɖě lɛ́ɛ bǐ nyí mɛxó n'i. Lo ɔ́, éé é mɔ ɖɔ xó ɖé kún sɔ́ ɖo nu nú yě mɛ ɖěbǔ ó ɔ́, xomɛ sin i. Elihu, Balakeɛ́li ví e jɔ ɖo akɔta Buzi tɔn mɛ ɔ́ yí xó lo, bó ɖɔ: midɛɛ lɛ́ɛ ɔ́, mɛxó wɛ nú mi, yɔkpɔ́vú wɛ nyɛ ka nyí; énɛ́ ɔ́ wú wɛ un ɖi xɛsi bó má glá ɖɔ nǔ e nyɛ tunwun ɔ́ ǎ. Un nɔ ɖɔ dó ayi mɛ ɖɔ: “Mɛxó lɛ́ɛ wɛ è nɔ jó xó ná, mɛ e xwe yětɔn ko sɛ yi lɛ́ɛ wɛ nɔ́ ná nǔnywɛ́ mɛ.” Lo ɔ́, nú è na ɖɔ nǔgbó ɔ́, yɛ Mawu tɔn, funfún Nǔbǐwúkpétɔ́ ɔ́ tɔn ɔ́ wɛ nɔ́ ná nukúnnú-mɔjɛnǔmɛ mɛ. Nǔnywɛ́ ɖíɖó ɔ́ ɖo xwe nu ǎ. Nǔ jlɔ́jlɔ́ tunwuntunwun ɖo mɛxó nyínyí nu ǎ. Énɛ́ ɔ́ wú ɔ́, Jɔ̌bu, kɛnklɛ́n, ɖǒtó mì; nyi lɔmɔ̌ jló ná ɖɔ nǔ e un tunwun é. Midɛɛ lɛ́ɛ ɔ́, káká jɛ din ɔ́, un kɛ nu dó xó mitɔn mɛ ǎ; un ɖótó xó mitɔn, bó ɖótó linlin mitɔn lɛ́ɛ; un bló mɔ̌ bó jó mi dó, bɔ mi ɖɔ xó dó Jɔ̌bu xó wú. Un wlí tó xó mitɔn wú, bó mɔ din ɖɔ mɛ ɖěbǔ kún ɖo mi mɛ bó mɔ xó ɖé ɖɔ dó Jɔ̌bu wú ó. Mɛ ɖěbǔ ɖo mi mɛ, bó mɔ xó ɖé ɖɔ dó gba xó tɔn lɛ́ɛ ǎ. Mi ma ka ɖɔ émí tunwun nǔ e wɛ tawun é ó; Mawu kɛ́ɖɛ́ wɛ ná kpé Jɔ̌bu wú, gbɛtɔ́ sixú kpé wǔ tɔn ǎ. Xó e Jɔ̌bu ɖɔ lɛ́ɛ ɔ́, nyɛ wɛ é ɖɔ ná ǎ. Un ka ná ɖɔ xó n'i lě e midɛɛ ɖɔ n'i gbɔn ɔ́ ǎ. Jɔ̌bu, xɔ́ntɔn towe lɛ́ɛ ba nu tɔn kpo bǐ, yě sɔ́ sixú kɛ nu ǎ, yě sɔ́ tunwun xó e yě ná ɖɔ ɔ́ ǎ. Un ɖo hwenu e yě ná ɖɔ xó yětɔn fó dó ɔ́ nɔ te kpɔ́n wɛ. Lo ɔ́, ée yě ma sɔ́ ɖo xó ɖé ɖɔ wɛ ǎ, bɔ nukikɛ gló yě din é ɔ́, un hɛn ɔ́, un ná ɖɔ xó lo. Nyi lɔmɔ̌ ná ɖɔ nǔ e un tunwun é. Xó e ɖo xo ce mɛ ɔ́ sukpɔ́ dín, nǔ ɔ́ nɔ́ ɖɔ nú mì ɖɔ nyi ní yá wǔ ɖɔ xó. Xo ce mɛ ɖo agbǎn hun wɛ vɛ̌ɛn e è dǒ va é ɖɔhun; é cí anyǔglo yɔ̌yɔ́ e ɖo ná wú wɛ é ɖɔhun. Un ná ɖɔ xó, bó ná mɔ agbɔ̌n; un ná hun nu lo, bɔ xó e a ɖɔ ɔ́, un ná ná sin tɔn we. Un na nɔ mɛɖé jí ǎ, un ka na wa yɛ nú mɛɖé ǎ, ɖó un nyɔ́ mɛ klɔ́ ǎ; ényí un klɔ́ mɛ ɔ́, Gbɛɖótɔ́ e ɖó mì ɔ́ ná yí gbɛ ce tlóló. Din ɔ́ Jɔ̌bu, ɖǒtó xó e un ɖó bó ná ɖɔ ɔ́. Đǒtó te bó se xó ce lɛ́ɛ ganjí. É ɖíe! Xó ɖé ɖo nu ce bɔ un ɖó ná ɖɔ. Lě e é ɖé gbɔn ɖo ayi ce mɛ ɔ́, ɖɔ nú we gbé wɛ un ja. Xó jɔ xó séé wɛ ɖo nu ce mɛ ná tɔ́n sín wɛ. Yɛ Mawu tɔn wɛ bló mì; funfún Nǔbǐwúkpétɔ́ ɔ́ tɔn wɛ ná gbɛ mì. Ényí un ɖɔ xó nú a sixú kɛ nu hǔn, kɛ nu bónú má kpɔ́n. Blǒ hwiɖée ɖó. É yá! Wa mǐ tɔ́ nyi nú. Nyi kpó hwi kpó ɔ́, nǔ ɖokpó ɔ́ wɛ mǐ nyí ɖo Mawu nukɔn; ko wɛ Mawu sɔ́ dó bló nyi lɔ. Hǔn ma vɛdó ɖɔ un hú gǎn we bó ɖi xɛsi nú mì ó; un ná ván nukún dó we ǎ. Amɔ̌, xó e a ɖɔ ɔ́ kpo ɖo tógwle ce mɛ; a ɖo ɖiɖɔ wɛ ɖ'ayǐ ɖɔ: “Un mɛ́, un hu hwɛ ɖěbǔ ǎ, xomɛvɔ́nɔ wɛ un nyí, un wa nǔ ɖěbǔ nyi do ǎ. Mawu ká kpo ɖo nǔ jɛ do mɔ ɖo wǔ ce wɛ; é mɔ mì dó mɔ kɛntɔ́. É bɛ́ afɔ ce lɛ́ɛ dó sókpo mɛ; é ɖo nǔ e wa wɛ un ɖe lɛ́ɛ bǐ kpɔ́n wɛ tlítlí.” Jɔ̌bu, xó énɛ́ e tɔ́n sín nu towe mɛ ɔ́, un ná ɖɔ nú we ɖɔ hwɛ towe kún jɔ ó, ɖó Mawu hú gǎn gbɛtɔ́. Étɛ́ sín hwɛ dó Mawu wɛ a ɖe? É ɖo nǔ e wa wɛ é ɖe ɔ́ sín gbe ná ɖó nú mɛɖé wɛ ǎ. Nú Mawu ɖo xó ɖɔ wɛ ɔ́, é ɖɔ gbɔn alɔkpa ɖě din ɔ́, é ná ɖɔ gbɔn alɔkpa ɖěvo; è ka nɔ wlí ayi wú ǎ. Hwenu e gbɛtɔ́ lɛ́ɛ nɔ́ ɖo sɛnmlɔ mɛ ɔ́, hwenu e yě nɔ́ ɖo amlɔ mɛ, ɖo adɔ̌zan yětɔn jí ɔ́, Mawu nɔ́ xo dlɔ̌ yě, é nɔ́ ɖe nǔ xlɛ́ yě zǎn mɛ dó ɖɔ xó nú yě. Mawu nɔ bló mɔ̌ dó ɖe nǔ xlɛ́ gbɛtɔ́, nǔ e ɖo te kpɔ́n ɛ ɔ́, é nɔ́ ɖe xlɛ́ ɛ nyi wɛn: é jló ná lɛ́ kɔ nú gbɛtɔ́ sín nǔ nyanya wiwa li jí, é jló ɖɔ yě ní yí go ǎ; é nɔ́ cyɔ́n alɔ yě jí mɔ̌, bónú yě má yi yɔdo mɛ ó, é jló ɖɔ yě ní kú ǎ. Lo ɔ́, wǔvɛ́ e Mawu nɔ sɛ́ dó gbɛtɔ́ ɖo azɔn zan jí ɔ́ nɔ́ kplɔ́n nǔ gbɛtɔ́: gbɛtɔ́ sín wǔtu nɔ hun zo káká bɔ é nɔ ɖo sísɔ́sísɔ́ wɛ magbokɔ. É jɛ mɔ̌ ɔ́, nǔɖuɖu ɖěbǔ sɔ́ nɔ́ jló e ǎ; é ná bó mɔ nǔɖuɖu e é yí wǎn ná ɔ́, adɔ tɔn nɔ hun ǎ. É nɔ́ xú gǒ káká bɔ è sɔ́ nɔ́ mɔ lan ɖě ɖo wǔ tɔn ǎ, é nɔ́ kpo xú kɛ́ɖɛ́ ɖo te. Afɔ tɔn ko ɖo yɔdo tó nɛ́, gbɛ tɔn ko jɛ kú lɔ mɛ. Amɔ̌, afɔ nyɔ́ ɔ́, wɛnsagun Mawu tɔn ɖokpó ná kó ɖo akpá tɔn, ɖɛ̌mɛnu Mawu tɔn wɔ̌buwɔ́bú lɛ́ɛ ɖokpó ná kó ɖo akpá tɔn, bó ná ɖɔ nǔ e é ɖó ná wá lɛ́ɛ n'i. Wɛnsagun ɔ́ ná kú nǔbláwǔ n'i, bó ná ɖɔ nú Mawu ɖɔ: “Hwlɛ̌n ɛ; é ní má yi yɔdo mɛ ó. Un ko mɔ nǔ e un ná dó xɔ gbɛ n'i é.” Énɛ́ ɔ́, gbɛ ná wá wǔ tɔn; é ná lɛ́ wínnyá. É nɔ́ sú xó ylɔ́ Mawu bɔ é nɔ ɖótó e. É nɔ́ yi Mawu gɔ̌n kpó xomɛhunhun kpó. Đó Mawu lɛ́ mɔ ɛ dó mɔ hwɛjijɔnɔ. É nɔ́ dó han ɖo mɛ bǐ nukún mɛ ɖɔ: “Un hu hwɛ, un gba sɛ́n, Mawu ká dɔn tó nú mì lě e é ɖó ná dɔn gbɔn é ǎ. É hwlɛ́n mì gán sín yɔdo tó, bɔ un ɖo gbɛ, bó ɖo hwe mɔ wɛ.” Nǔ tobutóbú e Mawu nɔ́ wa nú gbɛtɔ́ ɔ́ nɛ́! É nyí azɔn ɖokpó ǎ, é ká nyí azɔn we ǎ. É nɔ́ bló mɔ̌, bó nɔ́ ɖe gbɛtɔ́ sín yɔdo tó, bɔ wěziza ná hɔ́n dó gbɛtɔ́ jí. Jɔ̌bu, ɖǒ ayi te, ɖǒtó mì ganjí. Nɔ xwíí bónú má ɖɔ xó. Nú a ka ɖó xó ɖé bó ná ɖɔ hǔn ɖɔ nú má se. Đɔ xó, nú hwɛ towe jɔ ɔ́, un ná ɖɔ hwɛ towe jɔ. Nú a ma ka ɖó xó ɖé bó ná ɖɔ ǎ hǔn, bo gbɔ bo ɖótó mì; nɔ xwíí nú má ná nǔnywɛ́ we. Elihu lɛ́ ɖɔ: Nǔnywɛ́tɔ́ e mi, mi ɖótó xó ce! Mi mɛ e ɖó mɛxóyixa lɛ́ɛ ní wlí tó xó e ɖɔ gbé un ja ɔ́ wú. Tó wɛ nɔ́ se xó, é ɖo ɖě ɔ́ nu wɛ ka nɔ ɖɔ. Mǐ ní ba nǔ e sɔgbe ɔ́, mǐ bǐ ní tunwun nǔ e nyɔ́ é. Jɔ̌bu ɖíe ɖɔ xomɛvɔ́nɔ wɛ émí nyí, bɔ Mawu ká gba acɛ émí wú e. É ɖɔ hwɛ émítɔn jɔ, bɔ è ka ɖo émí zé dó mɔ adingbannɔ wɛ. É ɖɔ è gblě wǔ émí kúwunda gbɛwunda, có émí kún ká hu hwɛ ó. Jɔ̌bu ɔ́, gbɛtɔ́ alɔkpa tɛ́ é ká nyí? É nɔ́ bɔ nu nyi mɛcáko mɛ, sin ɖɔhun. É nɔ dó mɛ e nɔ wa nǔ nyanya lɛ́ɛ sín gbɛ̌, é nɔ́ zɔn xá mɛdídá lɛ́ɛ, ɖó é nɔ́ ɖɔ: “Ganjí ba ná nɔ́ nú Mawu ɖó le ɖěbǔ nú gbɛtɔ́ ǎ.” Hǔn, gbɛtɔ́ ayisɔgbenánɔ e mi, mi ɖótó mì: Mawu nɔ wa nǔ nyanya gbeɖé ǎ. Nǔbǐwúkpétɔ́ ɔ́ nɔ dó hwɛ agɔ gbeɖé ǎ. Amɔ̌, nǔ e jɛ xá gbɛtɔ́ lɛ́ɛ ɔ́ wɛ é nɔ́ ná yě, nǔ e mɛ ɖokpó ɖokpó wa ɔ́ sín ajɔ wɛ é nɔ ná mɛ ɔ́. É ɖo wɛn din ɖɔ Mawu kún nɔ́ wa nǔ nyanya ó. Nǔbǐwúkpétɔ́ ɔ́ nɔ kpé ta do nú hwɛjijɔ ǎ. Mɛ ɖé wɛ sɔ́ ayǐkúngban ɔ́ dó alɔ mɛ n'i a? Acɛ e é ɖó dó wɛ̌kɛ́ ɔ́ jí ɔ́, é ɖokpónɔ géé sí wɛ é ɖe. Ényí Mawu ɔ́, é ɖésúnɔ kɛ́ɖɛ́ wú jɛ́n é nɔ́ kpé nukún dó, lobo yí funfún tɔn sín nǔ e ɖo gbɛ lɛ́ɛ sí ɔ́, yě bǐ ná kú vawun, bɔ gbɛtɔ́ ná lɛ́ húzú kɔ́gúdu. Jɔ̌bu, ényí ayi towe nɔ mɔ nǔ hǔn, ɖǒtó mì, wlǐ tó xó e ɖɔ gbé un ja é wú. Nú Mawu nɔ gbɛ́ wǎn nú nǔjlɔ́jlɔ́wiwa ɔ́, é sixú ɖu gǎn a? Hwɛjijɔnɔ hlɔ̌nhlɔ́nnɔ ɖokpó géé e tíin é wɛ a nǎ dó hwɛ din a? É ɖokpó jɛ́n sixú ɖɔ nú axɔ́sú ɖɔ: “Nǔvɔ́nɔ!” Bó ɖɔ nú gǎn ɖɔ: “Adǎnúwatɔ́!” É nɔ́ kán gǎn ɖó vo nú ahwanvú ǎ, é nɔ́ tunwun dɔkunnɔ ɖó vo nú wamamɔnɔ ǎ, ɖó é wɛ bló yě bǐ. Kú fyán togun ɔ́ ɖo zǎn tɛ́ntin: mɛ bǐ nɔ dán jojo, mɛ bǐ kú; è nɔ wa nǔɖé nú acɛgannaganna-kpanúmɛtɔ́ cóbɔ é nɔ́ kú ǎ. Đó Mawu nɔ mɔ lě e zán gbɛ gbɔn wɛ mɛ bǐ ɖe ɔ́, nukún tɔn ɖo afɔ e ɖe wɛ mɛ ɖokpó ɖokpó ɖe ɔ́ wú. Zǐnflú kpó ablu gɔngɔn kpó sixú hwlá nǔnyanyawatɔ́ lɛ́ɛ dó Mawu ǎ. É byɔ́ ɖɔ Mawu ná ba do nú gbɛtɔ́ cóbɔ gbɛtɔ́ ná wá hwɛgun ɖo nukɔn tɔn ǎ. Mawu nɔ se mɛɖé xó cóbó nɔ́ gba gǎn lɛ́ɛ hánnyá, bó nɔ́ sɔ́ mɛ ɖěvo lɛ́ɛ ɖó tɛn yětɔn mɛ ǎ; ɖó é tunwun nǔwiwa yětɔn lɛ́ɛ; é nɔ́ flí gǎn lɛ́ɛ xwe zǎn mɛ bɔ è nɔ nyínyɛ́ yě. É nɔ́ xo yě ɖo mɛ bǐ nukún mɛ agbawungba nǔnyanyawatɔ́ ɖɔhun. Nǔgbó ɔ́, mɛ énɛ́ lɛ́ɛ lɛ́ kɔ sín Mawu gúdo, yě gbɛ́ nǔkplɔ́nmɛ tɔn lɛ́ɛ bǐ, lobo wa nǔ xá mɛ ma ɖó gǎn lɛ́ɛ kpódó wamamɔnɔ lɛ́ɛ kpó, bɔ yě sú xo ylɔ́ alɔdómɛtɔ́, bɔ Mawu se xósúsú yětɔn. Nú Mawu ka nɔ abwɛ̌ ɔ́, mɛ̌ wɛ ná dó hwɛ ɛ? Nú é sɔ́ éɖée hwlá ɔ́, mɛ̌ ká ná sixú mɔ ɛ? Có é nɔ́ kpé nukún dó akɔta lɛ́ɛ kpó gbɛtɔ́ lɛ́ɛ kpó wú, bónú mɛ e ma nɔ sí i ǎ ɔ́ ní ma sɔ́ ɖu axɔ́sú ó, abǐ mɛ e nɔ ɖó mɔ nú togun ɔ́ ní má sɔ́ ɖu gǎn ó. Nú mɛɖé ɖɔ nú Mawu ɖɔ: “Un kú hwɛ, un sɔ́ ná wa nǔ nyanya ɖě ǎ. Hwi ɖésúnɔ ní ɖe hwɛ e un ma tunwun ǎ bó hu ɔ́ xlɛ́ mì. Nú un wa nǔɖé nyi do ɔ́, un sɔ́ ná lɛ́ bló nǔ ɔ́ kpɔ́n ǎ.” Nú mɛ ɔ́ ɖɔ mɔ̌ nú Mawu ɔ́, Mawu na dɔn tó n'i wɛ a? Hwi mɛ e ɖo nǔ mɔ dó nǔ wú wɛ ɔ́, étɛ́ a ka mɔ d'é wú? Ée é nyí ɖɔ hwi wɛ nɔ gbo xó din, bɔ é má sɔ́ nyí nyɛ ǎ e ɔ́, ɖɔ nǔ e a mɔ d'é wú ɔ́. Gbɛtɔ́ e nɔ lin tamɛ ganjí lɛ́ɛ ná yí gbe nú xó e un ɖɔ ɔ́, lobo ná ɖɔ xó ɖokpó ɔ́ nǔnywɛ́tɔ́ e ɖo tó ɖó mì wɛ lɛ́ɛ ɖɔhun, yě ná ɖɔ: “Xlonɔ xó ɖɔ wɛ Jɔ̌bu ɖe. Xó tɔn lɛ́ɛ xwe ali ǎ. É ɖo xó ɖɔ wɛ gbɛtɔ́ baɖabaɖa ɖɔhun, hǔn é nyɔ́ ɖɔ è ní lɛ́ gbéjé xó e ɖɔ wɛ é ɖe lɛ́ɛ kpɔ́n titewungbe. É hu hwɛ lobo ka lɛ́ ɖo gǔ fɔ́n wɛ. É ɖo mǐ dɔn bú wɛ, é ɖo xó nyanya ɖɔ dó Mawu wǔ wɛ.” Elihu lɛ́ ɖɔ: A nɔ ɖɔ: “Mawu ɖésú tunwun ɖɔ un nyí hwɛjijɔnɔ!” Xó towe sɔgbe wɛ a vɛdó a? A nɔ lɛ́ ɖɔ: “Un gɔn hwɛ hu ɔ́, ani ka na nyɔ́ nú mì ɖ'é mɛ?” “Étɛ́ Mawu na sɔ́ ɖ'é mɛ?” Xó towe sɔgbe wɛ a vɛdó a? Din ɔ́, un ná ná xósin we, un ná yí gbe nú hwi kpó xɔ́ntɔn towe lɛ́ɛ kpó. Kpɔ́n jǐnukúnsin ganjí, kpɔ́n akpɔ́kpɔ́ lɛ́ɛ tlítlí: yě yi jǐ hú we. Ényí a wa nǔ nyanya ɔ́, Mawu wú wa nǔ dó wɛ a ɖe a? Ée a nɔ fɔ́n bó nɔ́ ɖo hwɛ hu dó hwɛ jí wɛ ɔ́, ani wɛ énɛ́ ɔ́ ɖɔ ɖo wǔ tɔn? É ɖɔ nǔ tí ɖo wǔ tɔn ǎ. Ényí a nɔ wa ɖagbe ɔ́, nǔ tɛ́ ná ɛ wɛ a ɖe? Nǔ tɛ́ yí ɖo así towe wɛ é ɖe? Alǎnnú e a nɔ wa lɛ́ɛ ɔ́, gbɛtɔ́ towe ɖɔhun lɛ́ɛ wú jɛ́n alǎnnú towe sixú wa nǔ dó. Nǔ jlɔ́jlɔ́ e a nɔ wa lɛ́ɛ ɔ́, gbɛtɔ́ jɛ́n sixú ɖu gbɛ tɔn. È ɖo mɛ lɛ́ɛ táfú wɛ dín; yě ɖo azɔn wɛn wɛ. Yě ɖo xó sú wɛ ɖɔ è nǐ wǎ yí émí ɖo acɛgannaganna-kpanúmɛtɔ́ lɛ́ɛ sí. Lo ɔ́, mɛ ɖěbǔ nɔ kan byɔ́ ɖɔ fítɛ́ Mawu e bló émí ɔ́ ká ɖe a jí ǎ; Mawu e nɔ́ zé awǎjijɛ sín han dó ayi mɛ nú mɛ ɖo zǎn xóxó mɛ ɔ́, Mawu e nɔ́ kplɔ́n mǐ hú kanlin e ɖo ayǐkúngban jí lɛ́ɛ ɔ́, Mawu e nɔ́ ná nǔnywɛ́ mǐ hú xɛ e nɔ zɔn gbɔn jǐxwé lɛ́ɛ ɔ́, mɛ ɖěbǔ nɔ kan byɔ́ ɖɔ fítɛ́ é ká ɖe a jí ǎ. Mɛ lɛ́ɛ nɔ ɖo xó sú wɛ gbɔn fí bǐ ɖɔ è nǐ wǎ hwlɛ́n émí ɖo gbɛtɔ́ dídá e goyíyí túnflá lɛ́ɛ sí, Mawu ká nɔ kɛ nu d'é mɛ nú yě ǎ. Mawu nɔ́ ɖótó xó gbló e sú wɛ yě ɖe ɔ́ nǔgbó ǎ, Nǔbǐwúkpétɔ́ ɔ́ nɔ́ wlí tó wú ǎ. Nɛ̌ Mawu ká ná ɖótó we gbɔn Jɔ̌bu, hwi mɛ e nɔ ɖɔ émí kún mɔ Mawu ó; émí ɖɔ nǔ e ɖo émí gbo wɛ ɔ́ n'i, é kún ká ɖo nu kɛ wɛ ó. A nɔ ɖɔ Mawu kún ko ɖo xomɛsin tɔn dó wa nǔ xá mɛ wɛ ó, é kún nɔ ké ya nú sɛ́n tɔn e gba wɛ è nɔ ɖe lɛ́ɛ ó. Xó e ɖɔ wɛ Jɔ̌bu ɖe lɛ́ɛ bǐ wɛ ɖo jɔhɔn mɛ yi wɛ; é tunwun xó e ɖo nu tɔn mɛ tɔ́n sín wɛ lɛ́ɛ bǐ ǎ. Elihu lɛ́ ɖɔ: Jɔ̌bu, lɛ̌ yi agbɔ̌n jí kpɛɖé, bónú má kplɔ́n nǔ we: un ɖó xó ɖěvo lɛ́ɛ bó ná ɖɔ nú we dó Mawu ta mɛ. Un na yí ba nǔnywɛ́ sín fí má yá fí, bó ná ɖe xlɛ́ ɖɔ mɛ e ɖó mì ɔ́ hwɛjijɔnɔ wɛ. Xó e ɖɔ gbé un ja ɔ́, xó nǔgbó séé wɛ. Gbɛtɔ́ e ɖó nǔnywɛ́ lobo ɖeji dó xó e ɖɔ wɛ é nɔ́ ɖe ɔ́ wú ɔ́, ɖokpó ɖíe mɔ wɛ a ɖe ɖo nukɔn towe e. Mawu kpé nǔ bǐ wǔ, é ká nɔ gbɛ́ wǎn nú mɛɖé ǎ. Mawu ɖó hlɔ̌nhlɔ́n ɖésú, nǔ e é ɖɔ lɛ́ɛ ɔ́ nɔ gɔn ma jɛ ǎ. É nɔ́ jó mɛdídá dó nyi gbɛ ǎ, lo ɔ́, é nɔ́ mɔ hwɛjijɔ nú wamamɔnɔ lɛ́ɛ. É nɔ ɖe nukún tɔn sín mɛ e nɔ wa nǔ jlɔ́jlɔ́ lɛ́ɛ wú ǎ; lo ɔ́, é nɔ́ zé yě jínjɔ́n axɔ́sú zinkpo jí; é nɔ́ hɛn yě lǐ dó bɔ yě nɔ́ ɖu axɔ́sú káká yi káká sá; é nɔ́ sɔ́ yě su. Ényí yě wǎ byɔ́ hɔzɔ mɛ ɔ́, ényí nukún wá jɛ yě myá jí ɔ́, hwenɛ́nu wɛ Mawu nɔ ɖe nǔ e yě wa lɛ́ɛ xlɛ́ yě, é nɔ́ ɖe nǔ e yě ɖo go yí wɛ bó wa nyi do ɖ'ayǐ lɛ́ɛ xlɛ́ yě. É nɔ ɖó afɔ afɔ jí nú yě, bónú yě ná tunwun nǔ; é ɖɔ nú yě ɖɔ yě ní lɛ́ kɔ sín nǔ nyanya e wa wɛ yě ɖe lɛ́ɛ gúdo. Ényí yě ɖǒtó Mawu bó hwíhwɛ́ yěɖée n'i ɔ́, yě ná zǎn gbɛ yětɔn yi vivɔnu ɖo nyɔ̌ná ɖaxó mɛ. Lo ɔ́, nú yě ma ɖótó e ǎ ɔ́, è nǎ sɔ́ hwǎn yě, bɔ yě ná kú, ɖó nukúnnú má mɔ jɛ nǔ mɛ yětɔn wú. Mɛdídá lɛ́ɛ nɔ ɖo xomɛsin jí. Nú yě wǎ byɔ́ hɔzɔ mɛ lo ɔ́, yě nɔ́ byɔ́ ɖɔ è nǐ wǎ gɔ́ alɔ nú émí ǎ. Yě nɔ́ zé gbɛ yětɔn nyi gbě ɖo dɔ̌nkpɛvú mɛ, yě nɔ́ kú dɔ̌nkpɛvú agalɛtɔ́ lɛ́ɛ ɖɔhun. Mawu nɔ hwlɛ́n gbɛ̌dónɔ gán gbɔn yajiji mɛ; wǔvɛ́ e mɔ wɛ é ɖe ɔ́ wɛ Mawu nɔ zé dó ɖó afɔ afɔ jí n'i. É ná ɖe hwi lɔ tɔ́n sín adǎn e ɖo gbigbo we wɛ ɔ́ mɛ, bó ná ná tɛnmɛ gblogblo we bɔ nǔɖé ná dó tagba nú we ǎ, bó ná tɛ́ nǔɖuɖu ɖagbe ɖagbe lɛ́ɛ ɖó nukɔn towe. Amɔ̌, din ɔ́, bǎ e nɔ xo mɛdídá lɛ́ɛ ɔ́ wɛ ɖo xixo we wɛ, tó e dɔn nú we wɛ è ɖe ɔ́, a sixú wa nǔ ɖěbǔ bó tɔ́n sín mɛ ǎ. Ma nú xomɛsin kun we yi gba ó! Ma nú ayi towe flú we, bónú a lin gbeɖé ɖɔ émí ná dó nǔ nu nú Mawu ó. Dɔkun towe lɛ́ɛ kpé mɛ ǎ, siká towe kpé mɛ ǎ, gǎn tobutóbú e dó wɛ a ɖe ɔ́ kpé mɛ ǎ. Zǎn e mɛ togun lɛ́ɛ ná blí bú ɔ́, ma ɖeji dó zǎn énɛ́ lɔ wú ó. Cɔ́ hwiɖée bó má lɛ́ yi jɛ nǔ nyanya wa jí ó, nǔ e wú wɛ a ɖo wǔvɛ́ mɔ wɛ ɔ́ nɛ́. Éɖíe! Mawu ɖǒ acɛ hú nǔ bǐ, ɖó hlɔ̌nhlɔ́n tɔn d'agba. Mɛ̌ wɛ ná sixú kplɔ́n nǔ mɛ éyɛ́ ɖɔhun? Mɛ̌ ká nɔ ɖɔ nǔ e é ná wa lɛ́ɛ n'i? Mɛ̌ ká ná glá ɖɔ n'i ɖɔ é wa nǔ nyi do? Azɔ̌ e Mawu wa bɔ mɛ bǐ nɔ ji dó han mɛ ɔ́, ma wɔn ó; é ní nɔ́ ɖo nu towe hwebǐnu. Gbɛtɔ́ lɛ́ɛ bǐ mɔ azɔ̌ e é wa lɛ́ɛ, bó nɔ́ kpa azɔ̌ tɔn sɛ́ dó. Mawu kló, bɔ è sixú jlɛ́ ǎ; mɛ ɖěbǔ sixú tunwun xwe e é ɖó ɔ́ ǎ. É nɔ́ sɔ́ sin dó húzú azizɔ, bɔ é nɔ́ yi jǐxwé, lobo nɔ húzú jǐ bó nɔ́ ja. Sin nɔ kun sín akpɔ́kpɔ́ lɛ́ɛ mɛ, bó nɔ́ ja dó gbɛtɔ́ e ɖo ayǐkúngban jí lɛ́ɛ jí. Mɛ̌ ká sixú mɔ nǔ jɛ lě e akpɔ́kpɔ́ nɔ́ dó gbɔn ɔ́, kpódó lě e jǐ nɔ dó gbe ɖo jǐnukúnsin gbɔn ɔ́ kpó wú? Mawu nɔ ɖe gbe bɔ jǐ nɔ kɛ wun gbɔn jǐnukúnsin ɔ́ bǐ; lo ɔ́, xuzan jí do dɔ̌n bǐ ɔ́ nɔ dó zǐnflú. Mawu nɔ zé nǔ énɛ́ lɛ́ɛ bǐ dó ɖe xlɛ́ ɖɔ émí wɛ kpa acɛ nú togun lɛ́ɛ; é nɔ́ zé nǔ énɛ́ lɛ́ɛ dó ná nǔɖuɖu yě bɔ é nɔ́ túnflá. Mawu nɔ́ bú alɔ dó jǐkɛwun, lobo nɔ nyi sɛ́ dó fí e é ɖó ná yi é. É nɔ́ ɖe gbe bɔ jǐ nɔ dó gbe dó ɖe xlɛ́ ɖɔ émí jǎwe, kanlin lɛ́ɛ lɔmɔ̌ nɔ tunwun ɖɔ Mawu ɖo sisɛkpɔ́ wɛ. Nǔ énɛ́ e ɖo jijɛ wɛ ɔ́ zɔ́n bɔ hǔn ce nɔ xo, é nɔ́ xo káká bó nɔ́ ɖibla wɛ́n. Mi ɖótó! Mi ɖótó Mawu sín gbe! É cí jǐ wɛ ɖo gbe dó wɛ ɖɔhun! Mawu sɛ́ jǐkɛwun dó bɔ é kɛ wun gbɔn jǐnukúnsin ɔ́ bǐ, é kɛ wun sín fí e ayǐkúngban bɛ́ sín ɔ́ káká yi fí e é kponu ɖó é. Énɛ́ ɔ́ gúdo ɔ́, Mawu sín gbe nɔ ɖo nǔ ɖɔ wɛ, bɔ è nɔ se. Mawu nɔ dó gbe kpó susu ɖaxó kpó. Đo tɛn tɔn mɛ tlóló ɔ́, Mawu nɔ lɛ́ sɛ́ jǐkɛwun dó, bɔ è nɔ se Mawu sín gbe. Mawu ɖe gbe bɔ jǐ dó gbe, bɔ é kpácá mɛ! Mawu nɔ bló nǔ ɖaxó ɖaxó lɛ́ɛ, bɔ agbɔ̌n nɔ kpé mǐ. Mawu ɖe gbe nú kɛ́njí ɖɔ é ní ja kɔn nyi ayǐkúngban jí, é ɖɔ nú jǐ ɖɔ é ní ja, é ɖɔ nú jǐgbó ɖɔ é ní ja. Mɔ̌ wɛ Mawu ɖó nǔ e wa wɛ gbɛtɔ́ ɖe lɛ́ɛ bǐ te gbɔn, bónú mɛ bǐ na tunwun nǔ e é wa é. Gběkanlin lɛ́ɛ nɔ yi mlɔ́ nǔglɔ́, ɖo adɔ̌tɛn yětɔn. Jɔhɔn ɖaxó nɔ́ nyi sín tofɔligbé, bɔ jɔhɔn fífá nɔ́ nyi sín totaligbé. Mawu nɔ zé funfún tɔn dó bló laglási ná, é nɔ́ bló bɔ sin nɔ syɛ́n gánwúngánwún gan ɖɔhun. Mawu nɔ zé jɔhɔn fífá dó akpɔ́kpɔ́ lɛ́ɛ lɔmɔ̌ mɛ, bó nɔ́ má yě gbɔn fí tɛnmɛ tɛnmɛ, bɔ jǐ nɔ kɛ wun gbɔn akpɔ́kpɔ́ lɛ́ɛ mɛ. Mawu wɛ nɔ dán akpɔ́kpɔ́ lɛ́ɛ yi aɖisí amyɔ, bɔ yě nɔ́ bló nǔ e é zɔ́n yě lɛ́ɛ bǐ ɖo wɛ̌kɛ́ ɔ́ mɛ lě e é lin gbɔn é. Énɛ́ ɔ́, Mawu nɔ́ wa jlǒ tɔn ɖo ayǐkúngban ɔ́ jí: é sixú nyí tó wɛ é jló ná dɔn nú mɛ, é ká sixú nyí ɖagbe wɛ é jló ná wa nú mɛ. Jɔ̌bu, nǔ énɛ́ lɛ́ɛ ní byɔ́ tó mɛ nú we. Kú hǔn, bó kpɔ́n nǔ ɖagbe ɖagbe e Mawu wa lɛ́ɛ. Hwenu e Mawu nɔ sɛ́ nǔ énɛ́ lɛ́ɛ dó ɔ́, a tunwun a? A tunwun lě e Mawu nɔ bló bɔ jǐ nɔ kɛ wun ɖo akpɔ́kpɔ́ lɛ́ɛ mɛ gbɔn ɔ́ a? A lɛ̌ tunwun lě e akpɔ́kpɔ́ lɛ́ɛ nɔ́ nɔ te gbɔn ɖo jɔhɔn mɛ é a? Nǔjíwǔ énɛ́ ɔ́, nǔnywɛ́ kpíkpé jɛ́n è sixú ɖó cóbó tunwun. Hwenu e jɔhɔn tofɔligbé tɔn ɔ́ ɖo nyinyi dó ayǐkúngban ɔ́ jí wɛ ɔ́, nǔ e a dǒ lɛ́ɛ nɔ́ kó ná yǒzo we dín. Hwenu e Mawu ɖo jǐnukúnsin é syɛ́n, bó cí ganwékpɛ́n ɖɔhun ɔ́ vlɔ́n wɛ ɔ́, a sixú dó alɔ ɛ a? A sixú ɖɔ nǔ e mǐ na ɖɔ nú Mawu ɔ́ nú mǐ a? Mǐ sixú ɖɔ xójɔxó ɖě n'i ǎ, ɖó ayi mǐtɔn tɔ́n nukún. Un ja xó ɖɔ gbé ɔ́, è nǎ ɖɔ n'i hwɛ̌ wɛ a? È nǎ yi ɖɔ n'i, bɔ é ná tunwun wɛ a? Din tlóló din ɔ́, è ba wěziza kpo, akpɔ́kpɔ́ bú i. Ée jɔhɔn ɖokpó ká nyi kpowun ɔ́, akpɔ́kpɔ́ kɔ́n sín jǐ tɔn. Wěziza siká ɖɔhun ɖé tɔ́n sín totaligbé, hǐnhɔ́n ɖaxó ɖé ɖi lɛ́ lɛ̌ dó Mawu. É wɛ nyí Nǔbǐwúkpétɔ́, mǐ sixú yi gɔ̌n tɔn ǎ. É nyí nǔ ɖaxó gbɔn hlɔ̌nhlɔ́n tɔn gbla mɛ, é nyí nǔ ɖaxó gbɔn hwɛjijɔ tɔn gbla mɛ. É nɔ́ nyínyɛ́ mɛ e ɖo gbejí bɔ nǔ bǐ vɔ̌ ɖ'é wú ɔ́ ǎ. Énɛ́ ɔ́ wú wɛ gbɛtɔ́ lɛ́ɛ ɖó ná nɔ ɖó sísí n'i. Amɔ̌, é nɔ kpɔ́n yě mɛ e nɔ mɔ yěɖée dó mɔ nǔnywɛ́tɔ́ lɛ́ɛ ɖěbǔ sín jɔ jí ǎ. Mawu Mavɔmavɔ nɔ jɔhɔn syɛ́nsyɛ́n ɖé tɛ́ntin, bó ɖɔ nú Jɔ̌bu ɖɔ: Mɛ nǎhún wɛ a nyǐ bó ná xo tito ce lɛ́ɛ kpɔ́n kpó xlonɔxó é ɖɔ wɛ a ɖe lɛ́ɛ kpó? Dǒ gǒ dó lanvɛ mɛ súnnu akowunká ɖɔhun; un ná kan nǔ byɔ́ we, bɔ a nǎ kplɔ́n nǔ mì. Jɔ̌bu, hwenu e un ɖo ayǐkúngban ɔ́ ɖó ayǐ wɛ ɔ́, fítɛ́ wɛ a ɖe hwenɛ́nu? Ényí a ɖǒ nǔnywɛ́ hǔn, ɖɔ lě e a mɔ do ná gbɔn ɔ́ nú mì. A tunwun mɛ e ɖó dogbó nú ayǐkúngban ɔ́ a? A tunwun mɛ e nyi kan tɔn ɔ́ a? A tunwun dodó e jí dotín tɔn lɛ́ɛ jínjɔ́n ɔ́ a? A tunwun mɛ e dó awǐnnya e ɖo tají ɔ́ do ɔ́ a? Hwenɛ́nu wɛ sunví zǎnzǎn tɔn lɛ́ɛ ɖo kpɔ́ bó ɖo han ji wɛ, bɔ wɛnsagun Mawu tɔn lɛ́ɛ ɖo xó sú wɛ kpó xomɛhunhun kpó. Hwenu e xu gba wu sín nɔtɛn tɔn ɖo kɔ́ glɔ́ ɔ́, a tunwun mɛ e sú ali dó e ɔ́ a? Nyɛ Mawu wɛ, nyɛ wɛ bú akpɔ́kpɔ́ dó e. Un bú ahǔn e sú ganjí ɔ́ dó e. Adǎn e jí é ɖe ɔ́, un ɖó te. Un bló dogbó dó glɔ́n ali n'i. Un ɖɔ n'i ɖɔ: “Fí e a nǎ nɔ te ɖe ɔ́ ɖíe; a nǎ zɛ fí wú ǎ; zǐngídi e jí a ɖe ɔ́, ná nɔ te fí.” A jɔ gbógbó ɔ́, a ɖe gbe dó ayǐ, bɔ é hɔ́n kpɔ́n a? A ɖɔ nú ayǐtéhɔ̌nnu ɖɔ: “Zě ayǐkúngban ɔ́ ɖo tóvínu tɔn lɛ́ɛ, lobo húnhún i avɔ ɖɔhun, bó zin gbɛtɔ́ dídá lɛ́ɛ dó ayǐ”, a ɖɔ mɔ̌ kpɔ́n a? Énɛ́ ɔ́, ayǐkúngban ɔ́ húzú bó cí lě e è nɔ zín wuntun ɖé dó ko jí ɔ́ ɖɔhun, bɔ nǔ bǐ ɖó acɔ́ lě e è nɔ ɖe nǔ dó avɔ mɛ ɔ́ ɖɔhun. Mɛdídá lɛ́ɛ ɔ́, nǔ e nyí wěziza nú yě ɔ́, è tɛ yě, bɔ awa e glá wɛ yě nɔ́ ɖe ɔ́ yi do. Jɔ̌bu, a ko hun káká yi xu ɔ́ sín jɔtɛn kpɔ́n a? A ko ba do nú nǔ gbɔn xuzan jí kpɔ́n a? Kútomɛ sín hɔn lɛ́ɛ ɔ́, è xlɛ́ yě we kpɔ́n a? A mɔ ablu gɔngɔn sín hɔn lɛ́ɛ kpɔ́n a? A tunwun káká fí e gbɛ ɔ́ gbló ada yi jɛ ɔ́ a? Ényí a mɔ do nú nǔ énɛ́ lɛ́ɛ bǐ hǔn, ɖɔ nú mì. A tunwun ali e è nɔ gbɔn yi wěziza sín nɔtɛn ɔ́ a? Ablu ɔ́, a tunwun fí e éyɛ́ nɔ́ nɔ ɔ́ a? Ényí a ko tunwun ali e è nɔ gbɔn yi fí e yě nɔ́ nɔ ɔ́ wɛ ɔ́, a nǎ kó kplá yě yi nɔtɛn yětɔn. A nǎ tunwun hǔn! Ɖó a jɔ din ɔ́, é sɔ́ hwe ǎ. Xwe towe ko sɛ yi. A yi fí e un kplé laglásilinfín ɖó ɔ́ kpɔ́n a? A mɔ fí e un kplé kɛ́njí ɖó ɔ́ a? Un kplé ɖ'ayǐ nú adǎngbomɛzán gbe, un kplé ɖ'ayǐ nú zalixámɛzán gbe, un kplé ɖ'ayǐ nú ahwanfunfunzán gbe. A tunwun fí e wěziza gosín ɔ́ a? A tunwun fí e jɔhɔn zǎnzǎnhwe jí tɔn nɔ gbɔn bó nɔ nyi dó ayǐkúngban jí ɔ́ a? Mɛ̌ wɛ hun ali nú jǐ? Mɛ̌ wɛ ɖe ali nú jǐkɛwun bɔ é nɔ́ gbɔn bó nɔ́ dɔn jǐ wa ayǐkúngban e jí mɛɖé má ɖe ǎ é? Mɛ̌ wɛ ɖe ali n'i bɔ é nɔ́ ja kɔn nyi gbětótló mɛ fí e gbɛtɔ́ ɖé má ɖe ǎ é? Mɛ̌ wɛ bló bɔ jǐ nɔ ja bɔ ayǐkúngban e xú, bó zɛ ɔ́ nɔ́ mɔ sin, bɔ nǔkún lɛ́ɛ nɔ́ wú, bɔ ama nɔ zɔ́n? Jǐ ɖó tɔ́ wɛ a? Mɛ̌ wɛ dó ahǔn é nɔ́ ja ɔ́ sín kún? Nyɔ̌nu tɛ́ sín xomɛ wɛ laglási tɔ́n sín? Mɛ̌ wɛ ji laglásilinfín e nɔ́ kplé ɖo jǐxwé é? Mɛ̌ wɛ bló bɔ sin nɔ syɛ́n awǐnnya ɖɔhun? Mɛ̌ wɛ bló bɔ aslɔkɛ́ nɔ́ syɛ́n dó te? A sixú blá sunvísɛkplé totaligbé tɔn lɛ́ɛ a? Abǐ a sixú tún kan nú sunvísɛkplé tofɔligbé tɔn lɛ́ɛ a? A sixú ɖe sunví lɛ́ɛ tɔ́n ɖo hwe yětɔn yětɔn nu a? A sixú xlɛ́ ali sunvísɛkplé totaligbé tɔn e è nɔ ylɔ́ ɖɔ Lɔnmɔ ɖaxó kpó Lɔnmɔ kpɛví kpó lɛ́ɛ ɔ́ a? A tunwun jǐnukúnsin sín sɛ́n lɛ́ɛ a? Hwi wɛ nɔ ɖɔ lě e sɛ́n énɛ́ lɛ́ɛ nɔ́ wa azɔ̌ gbɔn ɖo ayǐkúngban jí é a? A ɖe gbe sɛ́ dó akpɔ́kpɔ́ ɔ́, é kpé bɔ jǐ ná wlí bó xo we a? Hwi wɛ nɔ ɖe gbe nú jǐ bɔ é nɔ́ kɛ wun a? É nɔ se tónú nú we a? Mɛ̌ wɛ bló bɔ xɛ e è nɔ ylɔ́ ɖɔ ibísi ɔ́ ɖó nǔnywɛ́ sɔ mɔ̌? Mɛ̌ wɛ ná nukúnnú mɔ jɛ nu mɛ koklósú? Mɛ̌ wɛ ɖó nǔnywɛ́ bó ná sixú xa akpɔ́kpɔ́ e ɖo jǐxwé lɛ́ɛ? Mɛ̌ wɛ sixú húzú sin e ɖo tɔyizɛ́n jǐxwé tɔn mɛ lɛ́ɛ kɔn nyi ayǐ? Énɛ́ ɔ́, kɔ́gúdu ná xwe, bɔ kɔ́glo lɛ́ɛ ná kpan ɖó bǔ. Hwi wɛ nɔ wlí lan nú kinnikínní asi a? Xovɛ́ sin kinnikínní ví lɛ́ɛ ɔ́, hwi wɛ nɔ ná nǔɖuɖu yě a? Hwenu e yě nɔ́ yi hwlá cí nɔtɛn yětɔn abǐ hwenu e yě nɔ́ yi tɔ wu ɖo wudo mɛ ɔ́, hwi wɛ nɔ ná nǔɖuɖu yě a? Avǔnsákɔwó ví lɛ́ɛ ɔ́, mɛ̌ wɛ nɔ́ ná nǔɖuɖu yě hwenu e xovɛ́ nɔ́ sin yě, bɔ yě nɔ́ ba hlɔ̌nhlɔ́n kpo, bó nɔ́ ɖo xó sú ylɔ́ Mawu wɛ é? Jɔ̌bu, a tunwun hwenu e sógbɔ́ lɛ́ɛ nɔ́ ji vǐ dó ɔ́ a? A mɔ agbanlín ɖo vǐ ji wɛ kpɔ́n a? A xa sun nabí e yě nɔ́ hɛn xo ná ɔ́ kpɔ́n a? A tunwun hwenu e kanlin énɛ́ lɛ́ɛ nɔ ji vǐ dó ɔ́ a? Yě ja vǐ ji gbé ɔ́, yě nɔ́ fɛ bó nɔ ji vǐ, bɔ wǔvɛ́ e mɔ wɛ yě ɖe ɔ́ nɔ́ xwɛ. Wǔ nɔ syɛ́n vǐ yětɔn lɛ́ɛ, bɔ vǐ lɛ́ɛ nɔ́ jɛ susu jí kpowun, bó nɔ́ fɔ́n gbe ɖokpó, bó nɔ́ jó nɔ yětɔn dó, lobo sɔ́ nɔ́ lɛ́ kɔ wá gbeɖé ǎ. Mɛ̌ wɛ ɖe tócí gbě tɔn nyi te? Mɛ̌ wɛ tún kan n'i, bɔ é yi? Fí e gběhan má nɔ́ ɖi be ɖe ǎ ɔ́ wɛ un sɔ́ dó ɖó xwé n'i, ayǐkúngban jɛvɛ́jɛvɛ́ wɛ un sɔ́ dó ɖó nɔtɛn n'i. É nɔ́ ké ya nú zǐngídi e nɔ ɖo toxo mɛ ɔ́ ǎ, é nɔ́ se xó e tócíkplátɔ́ nɔ ɖo súsú wɛ lɛ́ɛ ɖě gbeɖé kpɔ́n ǎ. É nɔ́ gbɔn sókan mɛ sókan mɛ, bó ná mɔ nǔɖuɖu; é nɔ́ ɖo ama e ɖo mǔ ɔ́ gbé mɛ. Agbo gbě tɔn sixú wa azɔ̌ nú we a? É sixú dɔ́ kanlinkpó towe mɛ a? A nǎ sixú sin mɔ e è nɔ lɛ gle ná ɔ́ dó kɔ n'i, bɔ é ná dɔn dó lɛ gle nú we a? É ná sixú xwɛ, bó dɔn mɔ ɔ́ dó lɛ gle nú we gbɔn tɔdo mɛ a? A nǎ sixú ɖeji dó hlɔ̌nhlɔ́n tobutóbú e ɖo wǔ tɔn ɔ́ wú, bó jó azɔ̌ towe bǐ dó n'i a? A sixú ɖeji dó wǔ tɔn, bɔ é ná bɛ́ jinukún towe lɛ́ɛ wá kplé ɖó fí e è nɔ fún jinukún ɖe ɔ́ a? Gowungo nɔ ɖo awa kɛ wɛ kpó awǎjijɛ kpó; é ká sixú zɔn aɖɔwé ɖɔhun ǎ. Gowungo nɔ ɖó azin dó kɔ́gúdu mɛ, bó nɔ́ jó dó, bɔ yǒzo e nɔ́ tɔ́n sín kɔ́gúdu mɛ ɔ́ nɔ́ mɔ azin ɔ́; é sɔ́ nɔ́ flín ɖɔ è nǎ zun zɔnlin gbɔn jí ǎ, é nɔ́ flín ɖɔ gběkanlin ná tɛ afɔ jí ǎ. É nɔ́ nylá hun dó vǐ tɔn lɛ́ɛ ɖi nǔ ɖɔ é kún nyí é wɛ ji yě ó ɖɔhun. É dó ya nú éɖée kpowun azinɖíɖó hwenu, é ké ya ná ǎ. Đó nyɛ Mawu ɔ́, un ná ɛ nǔnywɛ́ ǎ, un ná ɛ nukúnnú mɔ jɛ nǔ mɛ ǎ. Amɔ̌, ényí é sí te bó bɛ́ wezun ɔ́, è xá sɔ́ bó wlí ǎ; é ké ya nú sɔ́xátɔ́ ǎ. Jɔ̌bu, hwi wɛ ná hlɔ̌nhlɔ́n sɔ́ a? Hwi wɛ zé kɔjafún dó ba acɔ́ n'i a? Hwi wɛ bló bɔ é nɔ́ lɔ́n wɛn ɖɔhun a? Gbe e ɖo kɔ tɔn nu ɔ́ nɔ́ dó xɛsi. É nɔ́ zé afɔ dó kán kɔ́ ná; hlɔ̌nhlɔ́n e é ɖó ɔ́ nɔ́ víví n'i. É nɔ́ kplɔ́ dó kɛntɔ́. É tunwun xɛsi ǎ, nǔɖé nɔ́ dó xɛsi n'i ǎ, é nɔ́ hɔn ɖo hwǐ nukɔn ǎ. Hwenu e gǎgo kpó gǎ kpó kpódó hwǎn kpó e mɛ e xá ɛ ɔ́ hɛn lɛ́ɛ nɔ́ ɖo nǔ ɖɔ wɛ ɔ́, é nɔ́ zlɔ́n kpó adǎn kpó. Ényí lanzo jɛ gbe ɔ́, akpakpa nɔ sɔ́ ɛ. Ényí lanzo ɖɔ nǔ ɔ́, é nɔ́ sú xó kpó akɔ́nkpinkpan kpó. Ahwan ja sín zɔ ɔ́, é nɔ́ tunwun; ahwangán lɛ́ɛ ɖo gbe ɖe wɛ ɔ́, é nɔ́ se; ahwanfuntɔ́ lɛ́ɛ ɖo xó sú wɛ ɔ́, é nɔ́ se. Nǔnywɛ́ towe wɛ zɔ́n bɔ gɛ̌n nɔ zɔn a? Nǔnywɛ́ towe wɛ zɔ́n bɔ é nɔ́ zɔn yi tofɔligbé a? Hwi wɛ ɖe gbe nú hɔ̌n, bɔ é nɔ́ yi jǐ a? Hwi wɛ ɖe gbe n'i, bɔ é nɔ́ w'adɔ̌ tɔn nyi nǔ ta aga a? Sókan mɛ wɛ é nɔ́ nɔ, sókan mɛ wɛ é nɔ́ dɔ́; só ta aga, fí e mɛɖé má sixú yi ǎ é wɛ é nɔ́ dɔ́. Aga dɔ̌n wɛ é nɔ́ nɔ, bó nɔ́ cɔ́ nǔ e é ná sá é; é nɔ́ ɖo aga dɔ̌n, bó nɔ́ mɔ nǔ sɛ́ dó do. Hɔ̌n ɔ́, vǐ tɔn lɛ́ɛ ɔ́, hun wɛ yě nɔ́ nu; nǔ kúkú ɖo fí ɖé ɔ́, a nǎ mɔ hɔ̌n ɖo fí ɔ́. Mawu Mavɔmavɔ húzú kpan nukɔn Jɔ̌bu lo, bó kan byɔ́ ɛ ɖɔ: “Hwi mɛ e ɖo nǔ dɔn xá nyɛ Nǔbǐwúkpétɔ́ ɔ́ wɛ ɔ́, a sixú mɔ xó ɖé ɖɔ dó xó ce wú a? Hwi mɛ e ɖo xó ce gbɛ́ wɛ ɔ́, na sin nú nǔ e un kan byɔ́ we lɛ́ɛ lo.” Ée Mawu Mavɔmavɔ ɖɔ mɔ̌ ɔ́, Jɔ̌bu yí gbe n'i ɖɔ: “Un nyí nǔtí ǎ. Xó tɛ́ un sixú mɔ ɖɔ dó xó towe wú? Un ko bɔ nu ce dó aɖǔ. Un ko ɖɔ xó, un sɔ́ ɖó nu ɖé bó ná kɛ ǎ; un ko ɖɔ xó azɔn mɔ̌kpán, xó ɖé sɔ́ kpo ɖo nu ce ǎ.” Mawu Mavɔmavɔ nɔ jɔhɔn syɛ́nsyɛ́n ɖé tɛ́ntin, bó ɖɔ nú Jɔ̌bu ɖɔ: Dǒ gǒ dó lanvɛ mɛ súnnu akowunká ɖɔhun; un ná kan nǔ byɔ́ we, bɔ a nǎ kplɔ́n nǔ mì. Hwɛ e un ɖɔ ɔ́, a jlǒ ná ɖɔ xó d'é wú jɛ́n wɛ a? A jlǒ ná gblé hwɛ dó ta nú mì, dó ba hwɛjijɔ wɛ a? A ɖǒ hlɔ̌nhlɔ́n sɔ mì a? Gbe towe nɔ dó gbe jǐ ɖɔhun, gbe ce ɖɔhun a? É nyí mɔ̌ hǔn, sɔ́ agbadídó kpódó susu kpó dó ɖó acɔ́, sɔ́ nǔ sa acɔ́ kpó nǔjíwǔ kpó dó. Kɔn xomɛsin towe dó gbɛtɔ́ lɛ́ɛ jí tɔsisa ɖɔhun. Kpɔ́n goyítɔ́ lɛ́ɛ bǐ, bó kɔ́n wi yětɔn. Kpɔ́n goyítɔ́ lɛ́ɛ bǐ, bó dó winnyá yě. Nyǐnyɛ́ mɛdídá lɛ́ɛ ɖo tɛndo ɖokpó ɔ́ mɛ. Bɛ̌ yě bǐ dó kɔ́ glɔ́, sú yě bǐ dó yɔdo mɛ. A bló mɔ̌ ɔ́, un ná zé alɔ nú we, ɖó hlɔ̌nhlɔ́n nɛ́ e a zǎn, bó ɖu ɖ'é jí ɔ́ wú. Kpɔ́n tɔkanlin ɖaxó ɔ́, nyɛ wɛ ná ɛ gbɛ, lě e un ná gbɛ hwi lɔmɔ̌ gbɔn é. Gběhan wɛ é nɔ́ ɖu nyibú ɖɔhun. Kpɔ́n! Hlɔ̌nhlɔ́n tɔn ɔ́, alin tɔn mɛ wɛ é ɖe; gǎn e é nɔ́ dó ɔ́, adɔkan tɔn lɛ́ɛ mɛ wɛ é ɖe. É nɔ́ dlɛ́n sí tɔn, bɔ é nɔ́ syɛ́n sɛ́dlutín ɖɔhun; kan e ɖo asá tɔn wú lɛ́ɛ ɖě xásá dó ɖě mɛ. Xú tɔn lɛ́ɛ cí ganvɔkpo mlímlí ɖɔhun, adajaxú tɔn lɛ́ɛ cí gankpo ɖɔhun. É wɛ nyí azɔ̌ ɖaxó ɖo azɔ̌ ce lɛ́ɛ bǐ mɛ; nyɛ wɛ bló e, nyi wɛ nyí mɛ ɖokpó e sixú gbɛ nǔ n'i é. É nɔ́ mɔ nǔɖuɖu tɔn ɖo fí e sókan ɖe lɛ́ɛ, fí e gběkanlin lɛ́ɛ bǐ nɔ́ ɖú gbojlaka ɖe é. Lo ɔ́, é nɔ́ yi mlɔ́ atín sá, é nɔ́ sɔ́ éɖée hwlá cí fánkan e ɖo gba mɛ lɛ́ɛ mɛ. Atín lɛ́ɛ nɔ dó yɛtɛn n'i, pepliyéetín e ɖo tɔ tó lɛ́ɛ nɔ́ lɛ́ lɛ̌ dó e. Tɔ na bo gba wu ɔ́, ado nɔ hu i ǎ. Judɛ́ɛn tɔ ɔ́ ná bó xo wá gba kɔn nyi nu tɔn mɛ ɔ́, é nɔ́ xosu ǎ, xɛsi nɔ ɖi i ǎ. Ényí nukún tɔn ɖo te jɛ́n wɛ ɔ́, mɛ̌ wɛ ná sixú wlí i, bó tɔ́n awɔntín tɔn? A nǎ sixú zé nǔɖuɖu dó mlɛ nu, dó wlí kanlin ɖaxó Levyatáan ná a? A nǎ sixú zé mlɛ dó wlí ɖɛ̌ tɔn ná a? A nǎ sixú tɔ́n awɔntín tɔn bó sɔ́ fántín gbɔn mɛ a? A nǎ sixú zé klɔcée dó tɔ́n aglan tɔn ná a? A vɛdó ɖɔ é ná sa vo nú we wɛ sín a? A vɛdó ɖɔ é ná dó gbe fífá nú we wɛ sín a? É ná jɛ akɔ xá we bó ná nyí kannumɔ towe káká sɔ́yi wɛ a? A nǎ sɔ́ ɛ dó da ayihún ná xɛví ɖɔhun wɛ a? Abǐ a nǎ dó kan ɛ, bó ná zé dó da ayihún xá ɖyɔ̌vǐ mɛsɛntɔ́ towe lɛ́ɛ wɛ a? Đɔnyitɔ́ lɛ́ɛ ná dó gbɛ̌, bó hu sa wɛ a? Axisinɔ lɛ́ɛ na ja má wɛ a? A nǎ sixú sɔ́ nǔ i káká bɔ é ná tɔ́n a? Hwǎn e è nɔ dó wlí hweví ɔ́, a nǎ sixú nɔ zě sɔ́ ta tɔn káká bɔ é ná xo zlɛ́ a? Đǒ alɔ wǔ tɔn: a flín lě e é nɔ fun ahwan gbɔn ɔ́, a sɔ́ ná ɖo yiyi wɛ bó ná tɛ́nkpɔ́n gbeɖé ǎ. Nú mɛ ɖé lin ɖɔ émí ná kpé kanlin ɖaxó Levyatáan tɔn wú ɔ́, mɛ ɔ́ blɛ́ éɖée. È mɔ ɛ ja lě ɔ́, ayǐ jɛ́n è nɔ dín yi jɛ. Mɛ ɖěbǔ sixú glá bó ba xó e ǎ. Nú mi ma kpé éyɛ́ wú ǎ ɔ́, mɛ̌ wɛ ná sixú nɔ te nukɔn nyɛtɔn? Un ɖu nǔɖé sín axɔ́ dó mɛ ɖé ǎ. Nǔ e ɖo hwe glɔ́ fí lɛ́ɛ bǐ wɛ nyí ce. Un na gɔn xó ɖɔ dó wǔjɔnú Levyatáan tɔn lɛ́ɛ wú ǎ, un ná gɔn xó ɖɔ dó hlɔ̌nhlɔ́n tɔn wú ǎ, un ná gɔn xó ɖɔ dó ɖɛkpɛ tɔn wú ǎ. Mɛ̌ ká sixú ɖe awu sín kɔ n'i? Mɛ̌ ka sixú xo ganwu tlitli e ɖo wǔ tɔn ɔ́ zlɛ́? Mɛ̌ ká hun gbla tɔn kpɔ́n? A hun bo mɔ aɖǔ ɖo caan lě ɖo nu tɔn mɛ ɔ́, ado jɛ́n ná hu we. Nɛgbé tɔn bǐ wɛ nyí zǎ cɛɖɛɖɛ. È to ɖě bɔdó ɖě wú, bó ján bǐ; ali yi mɛ ǎ. Yě sɛbɔ dó yěɖée wú, bɔ jɔhɔn nɔ sixú gbɔn tɛ́ntin yětɔn ǎ. Zǎ ɖě tɛ́ dó ɖě wú bó kpan, bɔ è sixú ɖe ɖě sín ɖě wú ǎ. É nyi cin lě ɔ́, é nɔ́ kán myɔ; nukún tɔn lɛ́ɛ cí hwe ɖo tíntɔ́n wɛ ɖɔhun. Zoɖɛ́ nɔ́ tɔ́n sín nu tɔn mɛ, nu tɔn mɛ nɔ kán myɔ. Azizɔ nɔ tɔ́n sín awɔntín tɔn mɛ, sin ɖo agbǎn hun ɖo ado jí wɛ ɖɔhun, azizɔ ɖo tíntɔ́n sín azɔgo mɛ wɛ ɖɔhun. Jɔhɔn e nɔ tɔ́n sín nu tɔn mɛ ɔ́ ná flɔ́ akán; myɔ nɔ tɔ́n sín nu tɔn mɛ. Kɔ tɔn mɛ wɛ hlɔ̌nhlɔ́n tɔn ɖe, mɛ bǐ nɔ́ hɔn ɖo nukɔn tɔn. Fí ɖěbǔ bɔ ɖo wǔ tɔn ǎ; è na bo zín wǔ tɔn ɔ́, é nɔ́ wán do ǎ. Hǔn e ɖo xo tɔn mɛ ɔ́ syɛ́n awǐnnya ɖɔhun, é syɛ́n sé ɖɔhun. Nú kanlin ɖaxó Levyatáan sí te ɔ́, xɛsi nɔ jɛ akowunká lɛ́ɛ jí; ado nɔ hu yě, bɔ yě nɔ́ yí yɛ dó nǔ wú. È sɔ́ hwǐ i ɔ́, é nɔ́ yi lan tɔn mɛ ǎ; hwǎn kpé wǔ tɔn ǎ, gǎ kpé wǔ tɔn ǎ, kposó kpé wǔ tɔn ǎ. Gan cí nǔywɛ́ ɖɔhun ɖo nukún tɔn mɛ, ganvɔ cí atín e jɛ wɔvli ɔ́ ɖɔhun n'i. É nɔ hɔn ɖo gǎ nukɔn ǎ; è da klohwán dó e ɔ́, nǔywɛ́ ɖɔhun wɛ é nɔ́ cí ɖo nukún tɔn mɛ. Nǔywɛ́ ɖé kpowun wɛ é nɔ́ zé kpota dó mɔ; è ɖo gyankpa xú i wɛ ɔ́, nǔ ko wɛ é nɔ́ ɖe. Nǔ nuxwíɖíxwíɖí ɖé lɛ́ɛ wɛ gbɔn adɔgo tɔn mɛ, bó nɔ kán kɔ́ alǐn ɖɔhun. É nɔ́ dán xu, bɔ xu glɔ́ nɔ́ hun agbǎn nǔ ɖo ado jí ɖɔhun; é nɔ́ zé xu dó húzú ganzɛ́n e mɛ nǔsáwǔ ɖo agbǎn hun ɖe wɛ é. É gbɔn fí ɖé dín ɔ́, wěziza nɔ́ mlí hwǐn ɖo gǔdo tɔn, bó nɔ́ wé degénɔ kpikpoe sín ɖa ɖo tɔ nukún mɛ ɖɔhun. Mɛ ɖěbǔ nyí gǎn n'i ɖo ayǐkúngban jí ǎ; un bló e bɔ é nɔ́ ɖi xɛsi nú nǔɖé ǎ. É nɔ́ hu tɛ́ nú nǔ e d'agba lɛ́ɛ bǐ, é wɛ nyí adǎnkanlin lɛ́ɛ bǐ xɔ́sú. Jɔ̌bu ɖɔ nú Mawu Mavɔmavɔ ɖɔ: un mɔ ɖɔ a kpé nǔ bǐ wǔ; un tunwun ɖɔ a nɔ bló nǔ e jló we ɔ́ bǐ. A ko ɖɔ: “Mɛ nǎhún wɛ a nyǐ bó ná xo tito ce lɛ́ɛ kpɔ́n kpó xlonɔxó e ɖɔ wɛ a ɖe lɛ́ɛ kpó?” Nǔgbó wɛ a ɖɔ, un kɛ nu dó nǔjíwǔ e hú gǎn mì lɛ́ɛ wú, un ɖɔ xó dó nǔ e wú un ma mɔ nukúnnú jɛ ǎ lɛ́ɛ wú. A ko ɖɔ nú mì ɖɔ émí ná ɖɔ xó, ɖɔ nyɛ ní ɖótó émí. A ɖɔ émí ná kan nǔ byɔ́ mì, bɔ nyɛ ná kplɔ́n nǔ émí. Káká jɛ fí ɔ́, è ɖɔ xó towe bɔ un se; amɔ̌, din ɔ́, un mɔ we ɖó nukún wú. Énɛ́ ɔ́ wú wɛ un jó xó e ɖɔ wɛ un ɖe ɔ́ dó, un jínjɔ́n kɔ́gúdu kpó afín kpó mɛ dó ɖé xlɛ́ ɖɔ un wa nǔ nyi do. Ée Mawu Mavɔmavɔ ɖɔ xó énɛ́ lɛ́ɛ nú Jɔ̌bu fó ɔ́, é ɖɔ nú Elifázi Temaninu ɔ́ ɖɔ: “Un sin xomɛ dó we ɖésú, bó sin dó xɔ́ntɔn towe we lɛ́ɛ, ɖó mi ɖɔ xó ce dó jlɔ̌jlɔ́ jí lě e mɛsɛntɔ́ ce Jɔ̌bu ɖɔ gbɔn é ǎ. Din ɔ́, mi ná zé nyibúsú tɛ́nwe, agbo tɛ́nwe bó ná yi mɔ mɛsɛntɔ́ ce Jɔ̌bu, lobo ná sá vɔ̌ e è nɔ dó zo ɔ́, ɖó nǔ e mi wa nyi do ɔ́ wú; mɛsɛntɔ́ ce Jɔ̌bu ná xo ɖɛ dó ta mitɔn mɛ. Mi ɖɔ xó ce dó jlɔ̌jlɔ́ jí lě e mɛsɛntɔ́ ce Jɔ̌bu ɖɔ gbɔn é ǎ, amɔ̌, un ná nyɔ́ xomɛ dó éyɛ́ wú, bó ná se ɖɛ tɔn, bó sɔ́ ná wa nǔ e mi wa nyi do ɔ́ sín nǔ xá mi ǎ.” Ée Mawu Mavɔmavɔ ɖɔ mɔ̌ ɔ́, Elifázi Temaninu ɔ́ kpó Biludádi Cuwáxinu ɔ́ kpó kpódó Sofáa Naamánu ɔ́ kpó yi bló nǔ e Mawu Mavɔmavɔ ɖɔ nú yě ɔ́. Énɛ́ ɔ́, Mawu Mavɔmavɔ yí ɖɛ e Jɔ̌bu xo ɔ́ kpó xomɛnyínyɔ́ kpó. Ée Jɔ̌bu xo ɖɛ nú xɔ́ntɔn tɔn lɛ́ɛ fó ɔ́, Mawu Mavɔmavɔ lɛ́ vɔ́ ninɔmɛ tɔn bǐ bló ɖó. Nǔ e Jɔ̌bu ko ɖó ɖ'ayǐ lɛ́ɛ bǐ ɔ́, Mawu Mavɔmavɔ lɛ́ ná ɛ mɔ̌hunkɔtɔn donu we. Jɔ̌bu sín nɔví súnnu lɛ́ɛ kpó nyɔ̌nu lɛ́ɛ kpó, kpódó xɔ́ntɔn tɔn xóxó lɛ́ɛ kpó bǐ wá ɖɔ nǔ dó e, bó ɖu nǔ xá ɛ ɖo xwé tɔn gbe. Yě sa vo xá ɛ; yě wa dó nǔwamɛ gbe e, ɖó nǔgbomɛ e Mawu Mavɔmavɔ sɛ́ dó e lɛ́ɛ wú. Yě mɛ ɖokpó ɖokpó ná ɛ gankwɛ́ ɖokpó ɖokpó, sikálɔkɛ́ ɖokpó ɖokpó. Đagbe e Mawu Mavɔmavɔ wa nú Jɔ̌bu xwe e wá wá lɛ́ɛ mɛ lɛ́ɛ hú ée é wa n'i ɖ'ayǐ lɛ́ɛ: é ɖó lɛ̌ngbɔ́ děgba atɔn afɔwó (14.000), lǎkúnmí děgba ɖě afɔwó (6.000), nyibú we ɖo bǔ we ɖo bǔ donu afatɔ́n (1.000) kpódó tócí asi afatɔ́n (1.000) kpó. Jɔ̌bu lɛ́ ji vǐ súnnu tɛ́nwe, nyɔ̌nu atɔn. É sun nyǐ vǐ tɔn nyɔ̌nu nukɔntɔn ɔ́ ɖɔ Yemimáxi, bó sun wegɔ́ ɔ́ ɖɔ Kesiyáxi, bó sun atɔngɔ́ ɔ́ ɖɔ Kelɛ́nu-Hapúki. Đo to ɔ́ bǐ mɛ ɔ́, nyɔ̌nu ɖěbǔ nyɔ́ ɖɛkpɛ sɔ Jɔ̌bu sín vǐ nyɔ̌nu lɛ́ɛ ǎ. Tɔ́ yětɔn má gǔ ɖ'ayǐ nú yě lɔmɔ̌ nɔví yětɔn súnnu lɛ́ɛ ɖɔhun. Ée nǔ énɛ́ lɛ́ɛ bǐ jɛ wa yi ɔ́, Jɔ̌bu lɛ́ nɔ gbɛ xɔ xwe kantɔn ko (140); é mɔ vǐ, bó mɔ vǐvú vivu káká yi jijimɛ ɛnɛgɔ́ ɔ́ jí. Jɔ̌bu ko kpo bǐ cóbó kú; é dɔ́ ji ɖésú. Nǔ nyɔ́ nú gbɛtɔ́ e ma nɔ xwedó nǔkplɔ́nmɛ mɛdídá lɛ́ɛ tɔn ǎ, bó ma nɔ́ dó hwɛhutɔ́ lɛ́ɛ gbɛ́ ǎ, bó ma nɔ jínjɔ́n ayǐ xá mɛ e nɔ ɖɔ slǎmɛ Mawu wú lɛ́ɛ ǎ é. Lo ɔ́, nǔ e é nɔ́ yí wǎn ná ɔ́ wɛ nyí kplɔ́n Mawu Mavɔmavɔ tɔn, bó nɔ́ ɖo tamɛ lin d'é wú wɛ zǎn kéze. Mɛ mɔ̌hunkɔtɔn cí atín e è tun nyi tɔ tó ɔ́ ɖɔhun: hwe tɔn nu su ɔ́, é nɔ́ sɛ́n, ama tɔn lɛ́ɛ nɔ́ ɖo zǐnzɔ́n jí tɛgbɛ. Nǔ e é nɔ́ wa ɔ́ bǐ nɔ́ nyɔ́ n'i. Amɔ̌, mɛdídá lɛ́ɛ ɔ́, yě tɔn ka nɔ́ nyí gbɔn mɔ̌ ǎ. Yědɛɛ lɛ́ɛ cí wɔn e mɛ jɔhɔn dó alɔ, bó ɖo fúnfún fúnfún kpé wɛ ɔ́ ɖɔhun. Énɛ́ ɔ́ wú ɔ́, hwɛɖɔzán gbe su ɔ́, hwɛ ná kpa mɛdídá lɛ́ɛ ǎ; nǔjlɔ́jlɔ́watɔ́ lɛ́ɛ kplé ɔ́, hwɛhutɔ́ lɛ́ɛ ná ɖó tɛnmɛ ɖo yě mɛ ǎ. Đó Mawu Mavɔmavɔ nɔ kpé nukún dó nǔjlɔ́jlɔ́watɔ́ lɛ́ɛ sín ali wú, lo ɔ́, mɛdídá lɛ́ɛ ɔ́, ali e jí yě ɖe ɔ́ wɛ nɔ́ kplá yě yi kú. Étɛ́wú akɔta lɛ́ɛ ká ɖo adǎn jí? Étɛ́wú togun lɛ́ɛ ká ɖo gbě blá wɛ dó wǔvɔ́? Axɔ́sú e ɖo wɛ̌kɛ́ ɔ́ mɛ lɛ́ɛ ɖo ahwan nú sɔ́ wɛ, gǎn lɛ́ɛ ɖó gbe kpɔ́, bó ɖo Mawu Mavɔmavɔ gbé blá wɛ; yě ɖo axɔ́sú tɔn e é sɔ́ ɔ́ sín gbě blá wɛ. Yě ɖɔ: “Mi nú mǐ nǎ wɛ́n gɛdɛ e yě dó mǐ lɛ́ɛ! Mi nú mǐ nǎ bɛ́ wlɔ e yě dó mǐ lɛ́ɛ kɔn nyi gbě!” Lo ɔ́, Aklúnɔ ɖo nǔ ko wɛ; mɛ e kpa acɛ ɖo sɛ́xwé ɔ́ ɖo aca gbɔ́ ta yětɔn wɛ. É ɖɔ xó nú yě kpó xomɛsin kpó, adǎn e wa wɛ é ɖe ɔ́ gba hǔn dó nú yě. É ɖɔ nú yě ɖɔ: “Nyɛ wɛ sɔ́ axɔ́sú ce ɖó zinkpo jí ɖo Sinyɔ́ɔ, só mímɛ́ ce jí.” Axɔ́sú ɔ́ ɖɔ: “Un ná jlá gbeta e Mawu ɖe tɔ́n é, é ɖɔ nú mì ɖɔ: ‘Vǐ ce wɛ a nyǐ, bɛ́ sín égbé ɔ́, nyɛ wɛ nyí tɔ́ towe. A byɔ̌ akɔta e ɖo gbɛ ɔ́ mɛ lɛ́ɛ bǐ ɔ́, un ná ná we, ayǐkúngban ɔ́ bǐ ná nyí towe káká yi fí e gbɛ ɔ́ kponu ɖó é. A nǎ sɔ́ gankpo dó gba yě ná; a nǎ gba yě hánnyá kozɛ́n ɖɔhun.’ ” Axɔ́sú lɛ́ɛ mi, din ɔ́, ayi mitɔn ní mɔ nǔ, gǎn gbɛmɛ fí tɔn lɛ́ɛ mi, mi gbɔ nú è nǐ kplɔ́n nǔ mi. Mi sɛn Mawu Mavɔmavɔ kpó xɛsi kpó, mi j'awǎ kpó sísí kpó. Mi sɔ́ vǐ ɔ́ su, é má nyí mɔ̌ ǎ ɔ́, Mawu Mavɔmavɔ ná sin xomɛ. Mi sɔ́ ɛ su, é má nyí mɔ̌ ǎ ɔ́, mi táá kú vawun. Đó é nɔ́ lín sin xomɛ ǎ. Nǔ nyɔ́ nú mɛ e nɔ bɛ ta ɖo glɔ̌ tɔn lɛ́ɛ bǐ. Han élɔ́ ɔ́, Davídi wɛ ji hwenu e é ɖo hinhɔn ɖo vǐ tɔn Abusalɔ́mu nukɔn wɛ é. Mawu Mavɔmavɔ, kɛntɔ́ ce lɛ́ɛ sukpɔ́ mɛ nya! Mɛ e sí te dó jǐ ce lɛ́ɛ sukpɔ́ lóóo! Yě ɖo kpɔ́ gégé, yě nɔ́ ɖɔ dó wǔ ce ɖɔ: “Hwlɛngán ɖokpó ná gosín Mawu gɔ́n wá n'i ǎ.” Amɔ̌, hwɛ Mawu Mavɔmavɔ ɔ́, hwi wɛ nyí gǎglónú ce. Hwi wɛ nyí susu ce, hwi wɛ nɔ ná akɔ́nkpinkpan mì. Un nɔ sú xó ylɔ́ Mawu Mavɔmavɔ, bɔ é nɔ́ yí gbe nú mì sín só mímɛ́ tɔn jí. Un nɔ mlɔ́ ayǐ, bó nɔ́ dɔ́ amlɔ bó nɔ́ fɔ́n, ɖó Mawu Mavɔmavɔ wɛ ɖo hinhɛn mì wɛ. Un ɖi xɛsi nú mɛ wɔ̌buwɔ́bú e ján go dó mì lɛ́ɛ ǎ. Mawu Mavɔmavɔ, Mawu ce, sí te, hwlɛ̌n mì, ɖó hwi wɛ nɔ xo tómɛ nú kɛntɔ́ ce lɛ́ɛ, hwi wɛ nɔ wɛ́n aɖǔ mɛdídá lɛ́ɛ. Mawu Mavɔmavɔ, hwi sí wɛ hwlɛngán ɔ́ ɖe, ɖɛ towe ní nɔ togun towe jí. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bó nɔ́ xo kanhún d'é mɛ. Mawu, hwi wɛ nɔ ɖe xlɛ́ ɖɔ un nyí hwɛjijɔnɔ. Un sú xó ylɔ́ we hǔn, yǐ gbe nú mì. Kɛ́mɛ dó ablu dó mì ɔ́, a nɔ hwlɛ̌n mì! Kú nǔbláwǔ ce, bó se ɖɛ ce! Gbɛtɔ́ e mi, káká hwetɛ́nu mi ná zé susu ce xo kɔ́ yi jɛ? Káká hwetɛ́nu mi ná yí wǎn nú nǔmaɖinǔ lɛ́ɛ yi jɛ? Mi ná ɖo adingban ɖó wɛ káká yi jɛ hwetɛ́nu? Mi bo tunwun ɖɔ Mawu Mavɔmavɔ wɛ ɖe gbejínɔtɔ́ tɔn ɖó vo nú éɖée. Un sú xó ylɔ́ ɛ ɔ́, é nɔ́ se. Mi sin xomɛ hǔn, mi ma hu hwɛ ó. Mi yi xɔ hǔn, kɔɖónú mitɔn ní ɖɔ xó nú mi, bónú mi nɔ abwɛ̌. Mi sá vɔ̌ lě e sɛ́n ɔ́ zɔ́n gbɔn é, bó ɖeji dó Mawu Mavɔmavɔ wú. Mɛ gěgé nɔ́ ɖo vo sa wɛ ɖɔ: “Mɛ̌ wɛ ná xlɛ́ nyɔ̌ná li ɔ́ mǐ? Mawu Mavɔmavɔ, blǒ bónú nukún mɛ towe sín wěziza ní hɔ́n dó mǐ jí.” Awǎjijɛ e a nɔ sɔ́ dó ayi nyɛtɔn mɛ ɔ́, nɔ́ hú gǎn éé yědɛɛ lɛ́ɛ nɔ́ mɔ hwenu e blěe yětɔn kpó vɛ̌ɛn yětɔn yɔ̌yɔ́ ɔ́ kpó nɔ́ túnflá é. Vivo mɛ wɛ un nɔ mlɔ́ ayǐ ɖe. Un mlɔ́ ayǐ lě tlóló ɔ́, un nɔ dɔ́ amlɔ, ɖó Mawu Mavɔmavɔ, hwi ɖokpónɔ wɛ nyí ahohó ce. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ kún kpete d'é mɛ. Mawu Mavɔmavɔ, ɖǒtó xó ce, se azɔn e wɛn wɛ un ɖe é. Axɔ́sú ce, Mawu ce, ɖǒtó xó e sú ylɔ́ we wɛ un ɖe é. Hwi ɖɔ xó ná wɛ un ɖe. Mawu Mavɔmavɔ, zǎnzǎn ɔ́, a nɔ se gbe ce, zǎnzǎn ɔ́, un nɔ ɖɔ nǔ e ɖo ayi ce mɛ ɔ́ bǐ nú we, bó nɔ́ ɖo te kpɔ́n we. Đó Mawu wɛ a nyǐ, a yǐ wǎn nú dǎka ǎ. Nǔ nyanya nɔ́ nɔ gɔ̌n towe ǎ. Ayimasɔgbenánɔ lɛ́ɛ nɔ́ nɔ te nukɔn towe ǎ. A gbɛ̌ wǎn nú nǔnyanyawatɔ́ lɛ́ɛ bǐ. Hwi Mawu Mavɔmavɔ ɔ́, a nɔ sú mɛ e ɖo adingban te lɛ́ɛ kún dó. A gbɛ̌ wǎn nú gbɛtɔ́ e nɔ́ kɔn hun kɔn nyi ayǐ é, gbɛtɔ́ e nɔ́ ɖó sísɛ́ nukɔn nú mɛ é. Amɔ̌, nyɛ ɔ́, ɖó xomɛnyínyɔ́ towe má ɖó jlɛ̌ wǔ ɔ́, un nɔ yi xwé towe gbe, un nɔ kpan nukɔn nɔtɛn mímɛ́ towe, un nɔ́ ɖe kɔ́ nú we kpó sísí e jɛ xá we ɔ́ kpó. Mawu Mavɔmavɔ e, kɛntɔ́ ce lɛ́ɛ tɔ wu nú mì; kplá mì gbɔn ali towe, hwɛjijɔli ɔ́ jí. Gbǐgbá ali towe ɖo nukɔn ce. Đó è sixú gán jɛ xó e yě nɔ́ ɖɔ lɛ́ɛ wú ǎ, xójɔxó ɖěbǔ ɖo nu yětɔn mɛ ǎ. Dǎka kɛ́ɖɛ́ wɛ ɖo xo yětɔn mɛ. Gbego yětɔn ɔ́, yɔdo wɛ bó ɖo nuvo, ɖɛ̌ yětɔn ɔ́, mɛ jɛ́n é nɔ́ klɔ́. Mawu ce, hɛn yě ɖó hwɛhutɔ́ lɔ jí. Wě e ɖe wɛ yě ɖe lɛ́ɛ ní zin yě dɛ́. Nya yě tɔ́n ɖó hwɛ yětɔn wɔ̌buwɔ́bú lɛ́ɛ wú, ɖó yě fɔ́n gǔ dó jǐ towe. Lo ɔ́, mɛ e hɔn wá su we lɛ́ɛ bǐ ná nɔ́ j'awǎ, xomɛ ná nɔ́ ɖo yě hun wɛ tɛgbɛ, a nǎ nɔ́ cyɔ́n alɔ yě jí. Mɛ e yí wǎn nú nyǐkɔ towe lɛ́ɛ ná nɔ́ hun xomɛ ɖó hwi wú. Đó Mawu Mavɔmavɔ, hwi wɛ nɔ xo ɖɛ dó hwɛjijɔnɔ jí, a nɔ zé xomɛnyínyɔ́ towe cyɔ́n n'i gǎglónú ɖɔhun. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ xo kanhún kantántɔnnɔ d'é mɛ. Mawu Mavɔmavɔ, ma ɖo xomɛsin jí, bó dɔn tó nú mì ó. Ma ɖo adǎn jí bó kplɔ́n mì ó. Mawu Mavɔmavɔ, kú nǔbláwǔ nú mì, ɖó un sɔ́ ɖó gǎn ɖé ǎ. Mawu Mavɔmavɔ, gbɔ azɔn nú mì, ɖó un sɔ́ ló dǒ ǎ. Ayi ce bǐ wɛ gbadó. Mawu Mavɔmavɔ, káká hwetɛ́nu nǔ ná nɔ lě nú mì yi jɛ? Mawu Mavɔmavɔ, lɛ̌ kɔ wá, wǎ hwlɛ̌n mì. Hwlɛ̌n mì gán ɖó xomɛnyínyɔ́ towe wú. Đó mɛ e ɖo kú lɛ́ɛ ɖě sɔ́ nɔ́ flín we ǎ; mɛ e ɖo kútomɛ lɛ́ɛ ɖě sɔ́ nɔ́ sixú kpa we ǎ. Un wɛn azɔn káká bɔ nǔ ci kɔ nú mì. Zǎn mɛ tɛgbɛ ɔ́, zan ce bǐ wɛ nɔ́ nyí ɖasin, ɖasin wɛ nɔ fá adɔ̌zan ce bǐ. Nukún ce bǐ wɛ gblé, nǔ lin wɛ un ɖe sɔ mɔ̌ nɛ́! Nukún ce sɔ́ nɔ́ mɔ nǔ ǎ, kɛntɔ́ wɛ ɖo ya dó nú mì wɛ sɔ mɔ̌. Mi sɛ yi zɔ nú mì, nǔnyanyawatɔ́ e mi, ɖó Mawu Mavɔmavɔ se avǐ e ya wɛ un ɖe é. Mawu Mavɔmavɔ se vo e sa n'i wɛ un ɖe lɛ́ɛ, é yí ɖɛ ce. Kɛntɔ́ ce lɛ́ɛ bǐ ní ɖu winnyá, xɛsi ní jɛ yě jí; yě ní j'agɔ dó gǔdo; yě ní ɖu winnyá nukúnxwixwe ɖokpó mɛ. Gbɛvíhan Davídi tɔn. É ji gbɛvíhan élɔ́ nú Mawu Mavɔmavɔ ɖó nǔ e Kúci Bɛnjamɛ́ɛ ví ɔ́ ɖɔ ɔ́ wú. Mawu Mavɔmavɔ, Mawu ce, hwi wɛ un nɔ hɔn wá su. Hwlɛ̌n mì gán ɖo mɛ e ɖo ya dó nú mì wɛ lɛ́ɛ bǐ sí; xɔ mì ɖo yě sí. É má nyí mɔ̌ ǎ ɔ́, yě ná wlí mì ɖu kinnikínní ɖɔhun; yě ná vúnvún mì; mɛ ɖé ná sixú yí mì sín yě sí ǎ. Mawu Mavɔmavɔ, Mawu ce, ényí nǔ e yě vɛdó mì ɔ́ nyí nǔgbó hǔn, ényí un ɖó alɔ ɖo nǔ nyanya ɖé mɛ hǔn, ényí un wa nyanya nú mɛ e kpó nyɛ kpó ɖo ganjí ɔ́ hǔn, ényí kɛntɔ́ ce ma wa nǔɖé nyi do nú mì ǎ, bónú un vɔ ɛ hǔn, kɛntɔ́ ní jɛ gǔdo ce, bó kpé wǔ ce, ní zin mì d'ayǐ, bó gbídí mì gbɛɖe gbɛɖe, bónú wi ce ní kɔ́n. Mawu Mavɔmavɔ, sin xomɛ bo sí te, sí te dó adǎn e wa wɛ kɛntɔ́ ce lɛ́ɛ ɖe ɔ́ jí. Kpɔ́n jǐ ce, hwi wɛ nɔ ɖɔ mɛ e nyɔ́ hwɛ é. Togun lɛ́ɛ bǐ ní kplé lɛ́ lɛ̌ dó we; ɖu axɔ́sú ɖo yě nu sín jǐ aga dɔ̌n. Mawu Mavɔmavɔ, hwi wɛ nɔ ɖɔ hwɛ xá togun lɛ́ɛ, Mawu Mavɔmavɔ, ɖe xlɛ́ ɖɔ hwɛ ce jɔ, ɖó nǔ jlɔ́jlɔ́ wɛ un wa, xomɛvɔ́nɔ wɛ un nyí. Mawu hwɛjijɔnɔ! Hwi wɛ nɔ mɔ nǔ jɛ gbɛtɔ́ xo mɛ, hwi wɛ nɔ́ mɔ nǔ jɛ gbɛtɔ́ sín ayi mɛ. Đǒ dǎka e xo wɛ mɛdídá ɖe ɔ́ te, bó ká dó wǔsyɛ́n lanmɛ nú hwɛjijɔnɔ. Mawu wɛ nyí gǎglónú ce; é wɛ nɔ́ hwlɛ́n ayijlɔ́jlɔ́nɔ lɛ́ɛ gán. Mawu wɛ nyí hwɛjlɔ́jlɔ́ɖɔtɔ́; Mawu xomɛsinnɔ wɛ é nyí tɛgbɛ. Ényí mɛdídá má húzú jijɔ ǎ ɔ́, é nɔ́ gan hwǐ tɔn, é nɔ́ tlɔ́ gǎ tɔn bó nɔ ɖo acéjí. Lo ɔ́, éɖée wɛ é fɔ mɛhulínnyánú énɛ́ lɛ́ɛ ɖ'ayǐ ná, éɖée wɛ é tlɔ́ gǎ ɖ'ayǐ ná, gǎ e nɔ́ dó nǔ zo é ɖ'ayǐ ná. Kpɔ́n! Mɛdídá jɛ flú mɛ, bó ɖo nǔ nyanya ná ji wɛ. É mɔ dǎnúwiwa xo, bó ji adingban. É sín do, é kun do gɔ́ngɔ́n ɖé, é ɖésúnɔ wɛ ka wá jɛ mɛ. É mɛ e nyi kpo ɔ́ ta wɛ kpo ɔ́ lɛ́ wá jɛ. Gɛ̌ e é ɖó ɔ́ jɛ́n lɛ́ wá fɛ́ gba ta ɛ. Un ná kpa Mawu Mavɔmavɔ ɖó hwɛjijɔ tɔn wú. Ajalɔ̌nlɔn e! Un ná nɔ́ ɖɔ xó lómílómí dó mlá nyǐkɔ towe dó han mɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ xo kanhún Gatinu lɛ́ɛ tɔn d'é mɛ. Mawu Mavɔmavɔ, Aklúnɔ mǐtɔn, nɛ̌ nyǐkɔ towe ka yi jǐ sɔ ɖo ayǐkúngban ɔ́ bǐ jí nɛ́! A nɔ́ ɖe susu towe xlɛ́ ɖo jǐxwé aga. Yɔkpɔ́vú lɛ́ɛ kpó vǐ ɖo anɔ̌ nu lɛ́ɛ kpó nɔ́ kpa susu nú we; susu e yě nɔ́ kpa nú we ɔ́ wɛ nyí hlɔ̌nhlɔ́n e a dǒ gbo ali nú kɛntɔ́ towe lɛ́ɛ é, ahohó ɖɔhun. A blǒ mɔ̌ bó dó xwe kɛntɔ́ lɛ́ɛ kpó hlɔnbatɔ́ lɛ́ɛ kpó sín nu dó xɔ. Ényí un kpɔ́n jǐxwé, alɔ towe nǔwiwa ɔ́, bó kpɔ́n sun kpó sunví kpó e a sɔ́ ɖó tɛn yětɔn yětɔn mɛ lɛ́ɛ ɔ́, un nɔ kanbyɔ́ nyɛɖée ɖɔ étɛ́ gbɛtɔ́ ká nyí, bɔ a nɔ ké ya n'i sɔ mɔ̌? Gbɛtɔ́ e ná wá hán gbe ɖokpó kpowun ɔ́, ani wɛ é nyí bɔ a nɔ lébe n'i? A blǒ gbɛtɔ́, bɔ kpɛɖé jɛ́n hwi ɖésú hú gǎn ɛ. A sɔ́ ɛ su ɖésú; a wlǐ yɛ̌yi n'i tawun. A sɔ́ ɛ ɖó alɔ towe nǔwiwa lɛ́ɛ bǐ nu, a bɛ̌ nǔ bǐ dó afɔ tɔn lɛ́ɛ glɔ́: A sɔ́ ɛ ɖó gbɔ̌, nyibú kpó gběkanlin lɛ́ɛ bǐ kpó nu, bó sɔ́ ɛ ɖó xɛ kpó hweví kpó nǔɖogbɛ e ɖo tɔxwé lɛ́ɛ bǐ kpó nu. Mawu Mavɔmavɔ, Aklúnɔ mǐtɔn, nɛ̌ nyǐkɔ towe ka yi jǐ sɔ ɖo ayǐkúngban ɔ́ jí nɛ́! Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji dó han e è nɔ ylɔ́ ɖɔ “Vǐ kú” ɔ́ sín hangbe mɛ. Mawu Mavɔmavɔ, un ná nɔ kpa we kpó ayixa ce bǐ kpó. Un ná nɔ́ jlá nǔjíwǔ towe lɛ́ɛ bǐ. Xomɛ ná nɔ́ hun mì; un ná nɔ́ j'awǎ ɖó hwi wú. Ajalɔ̌nlɔn e! Un ná nɔ́ ɖɔ xó lómílómí dó mlá nyǐkɔ towe dó han mɛ. Kɛntɔ́ ce lɛ́ɛ hɔn. Ée yě hɔn ɔ́, yě klɛ́n afɔ bó j'ayǐ, bó kú ɖo nukɔn towe. Đó a ɖe xlɛ́ ɖɔ hwɛ ce jɔ, a jɛ ahwan jǐ ce. Mawu hwɛjlɔ́jlɔ́ɖɔtɔ́, a jǐnjɔ́n axɔ́súzinkpo towe jí. A gblɔ̌n adǎn nú akɔta e ma nɔ sɛn we ǎ lɛ́ɛ, a sú dǎkaxotɔ́ lɛ́ɛ sín kún dó, a súnsún nyǐkɔ yětɔn bǐ gbídígbídí. Kɛntɔ́ sɔ́ tíin ǎ, donu tɔn vɔ bǐ gbídígbídí. Toxo yětɔn e a gba hánnyá lɛ́ɛ ɔ́, mɛɖé sɔ́ flín yě ǎ. Mawu Mavɔmavɔ ɖo axɔ́súzinkpo tɔn jí tɛgbɛ; é ɖo gbesisɔ mɛ bó ná ɖɔ hwɛ. É nɔ́ ɖɔ hwɛ xá gbɛtɔ́ lɛ́ɛ ɖó jlɔ̌jlɔ́ jí, é nɔ́ ɖɔ hwɛ xá togun lɛ́ɛ lě e é jɛ xá gbɔn é. Mawu Mavɔmavɔ wɛ nyí bibɛtɛn nú mɛ e táfú wɛ è ɖe é, é wɛ nyí ahohó adǎngbomɛ hwenu. Mawu Mavɔmavɔ! Mɛ e tunwun we lɛ́ɛ nɔ́ sɔ́ yěɖée dó alɔ mɛ nú we, ɖó a nɔ́ jó mɛ e ɖo biba we wɛ lɛ́ɛ dó ǎ. Mi ji han mlá Mawu Mavɔmavɔ, Mawu Mavɔmavɔ e axɔ́súzinkpo tɔn ɖo Sinyɔ́ɔ é; mi jlá nǔjíwǔ tɔn lɛ́ɛ gbɔn togun lɛ́ɛ mɛ! Đó è kɔn hun kɔn nyi ayǐ ɔ́, Mawu nɔ́ kanbyɔ́, ayi tɔn nɔ gosín jí ǎ, é nɔ́ wɔn xó e sú wɛ mɛ ma ɖó mɛɖé lɛ́ɛ ɖe ɔ́ ǎ. Mawu Mavɔmavɔ, jɔwǔ mì! Kpɔ́n gbɛ e mɛ kɛntɔ́ ce lɛ́ɛ ɖó mì é! Đe mì sín kú hɔn jí, bónú má ɖɔ nǔ e wú un ɖo kpikpa we wɛ lɛ́ɛ, un ná ɖɔ bó ná lɛ́ vɔ́ ɖɔ gbɔn Sinyɔ́ɔ sín hɔntogbó lɛ́ɛ jí, bónú má j'awǎ, ɖó hwlɛ̌n e a hwlɛ̌n mì gán é wú. Akɔta e ma nɔ sɛn we ǎ lɛ́ɛ jɛ do e yě ɖésúnɔ kun ɔ́ mɛ; yě jɛ mɔ e yě ɖésúnɔ ɖó é mɛ. Mawu Mavɔmavɔ ɖe mɛ e é nyí ɔ́ xlɛ́, hwɛjijɔ wɛ é nɔ́ ɖɔ. Mɔ e mɛdídá ɖésú ɖó ɔ́ wɛ é nɔ́ dó wlí i ná. Dǎkaxotɔ́ lɛ́ɛ kpan nukɔn kútomɛ, yě akɔta énɛ́ lɛ́ɛ e gbɛ́ Mawu é bǐ kpan nukɔn kútomɛ. Lo ɔ́, Mawu ná wɔn mɛ ma ɖó mɛɖé lɛ́ɛ káká sɔ́yi ǎ, wamamɔnɔ nɔ gɔn nukún ɖó nǔ gbeɖé ǎ. Mawu Mavɔmavɔ! Sí te, ma lɔn nú gbɛtɔ́ ní ɖu ɖ'é jí ó! Đɔ hwɛ xá akɔta e ma nɔ sɛn we ǎ lɛ́ɛ! Mawu Mavɔmavɔ! Dǒ xɛsi yě, togun énɛ́ lɛ́ɛ ní tunwun ɖɔ gbɛtɔ́ wɛ émí nyí, bó ná kú gbe ɖokpó. Mawu Mavɔmavɔ, étɛ́wú a ka yi cí zɔ? Étɛ́wú a ka nɔ sɔ́ hwiɖée hwlá ɖo adǎngbomɛ hwenu? Mɛdídá lɛ́ɛ nɔ́ jɛ gǒmɛ nú mɛ e ma ɖó mɛɖé ǎ lɛ́ɛ kpó goyíyí kpó; mɛdídá lɛ́ɛ ɖó mɔ nú wamamɔnɔ lɛ́ɛ bɔ yě jɛ mɛ. Mɛdídá kpé nǔ e lin wɛ é ɖe ɔ́ wú bó wa, lobo kpa éɖée. Nǔwlóɖutɔ́ nɔ́ nyi nu do nú Mawu Mavɔmavɔ, bó nɔ́ ko e. Mɛdídá ɖo awa glá wɛ, bó nɔ́ ɖɔ: “Mawu nɔ́ dɔn tó ɖě nú mɛ ǎ, Mawu ɖě ká tíin lɔ ǎ.” Fí e ayi tɔn mɔ nǔ jɛ ɔ́ bǐ nɛ́. Mɛdídá bló nǔɖé hweɖěbǔnu ɔ́, bǐ wɛ nɔ́ zɔ́n n'i; é ké ya nú hwɛɖónúmɛ Mawu tɔn ǎ. É nɔ́ xwe akpi dó mɛ e ɖo agba hwlɛ́n xá ɛ wɛ lɛ́ɛ. É nɔ́ ɖɔ dó ayi mɛ ɖɔ: “Nǔɖé nɔ́ sɛ tɛn nú mì ǎ, awě ɖě ná xo mì gbeɖé kpɔ́n ǎ.” É kɛ nu ɔ́; nu jɛ́n é nɔ́ dó mɛ, awo jɛ́n é nɔ́ ɖó, ajo wé jɛ́n é nɔ́ ɖe, nǔ nyanya kpó dǎka kpó sín xó jɛ́n nɔ́ tɔ́n sín nu tɔn mɛ. É nɔ́ yi wu nú mɛ ɖo gletoxo lɛ́ɛ kpá, é nɔ́ hu xomɛvɔ́nɔ ɖo nǔglɔ́. Nukún tɔn nɔ́ gosín mɛ e ma ɖó gǎn ɖé ǎ ɔ́ wú ǎ. É nɔ́ tɔwu kinnikínní ɖo wudo mɛ ɖɔhun. É nɔ́ tɔwu bó ná zɔn mɛ ma ɖó mɛ ɖé jí; é nɔ́ dɔn mɛ ma ɖó mɛɖé dó mɔ tɔn mɛ bó nɔ́ wlí i. Mɛdídá fɛ, é sɛ éɖée wún, bɔ mɛ ma ɖó mɛɖé jɛ fɛn tɔn mɛ. Mɛdídá nɔ́ ɖɔ dó ayi mɛ ɖɔ: “Mawu nɔ́ wɔn nǔ, é nɔ́ ɖe kɔ dó nǔ e wa wɛ un ɖe lɛ́ɛ, é nɔ́ mɔ nǔɖé gbeɖé ǎ.” Mawu Mavɔmavɔ, sí te! Mawu, blǒ gbɔn ɖě! Ma wɔn gbɛbláwǔnánɔ lɛ́ɛ ó. Étɛ́wú mɛdídá ná nɔ́ kpɔ́n nukún mɛ nú we? Étɛ́wú é ná nɔ́ hu tɛ́ nú we dó ayi mɛ ɖɔ a kún sixú wa nǔɖé nú émí ó? Mawu Mavɔmavɔ, a mɔ akpɔ e mɔ wɛ wamamɔnɔ ɖe é, a mɔ wǔvɛ́ e mɔ wɛ é ɖe é, a mɔ nǔ jɛ wǔ tɔn, lobo ná jɛ ahwan jǐ tɔn. Mɛ e ma ɖó gǎn ɖé ǎ ɔ́, hwi wɛ é nɔ́ jó éɖée ná. Hwi wɛ nɔ gɔ́ alɔ nú tɔ́cyɔvǐ. Hu acɛ nú mɛdídá, dɔn nǔ nyanya e é wa lɛ́ɛ sín tó n'i, kún tɔn bǐ ní sú dó. Mawu Mavɔmavɔ wɛ nyí axɔ́sú káká sɔ́yi. É sú mɛ e ma nɔ sɛn ɛ ǎ lɛ́ɛ kún dó sín to tɔn mɛ. Mawu Mavɔmavɔ, mɛ ma ɖó mɛɖé lɛ́ɛ ɔ́, a nɔ se ɖɛ yětɔn, a nɔ ná akɔ́nkpinkpan yě, a nɔ ɖótó yě, bó ná dó ɖe xlɛ́ ɖɔ tɔ́cyɔvǐ kpó mɛ e táfú wɛ è ɖe é kpó sín hwɛ jɔ. Énɛ́ ɔ́, mɛɖé sɔ́ ná ɖo ayǐkúngban jí, bó ná nyí acɛ gannaganna kpa nú mɛ tɔ́ ǎ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu Mavɔmavɔ gɔ́n wɛ un nɔ hɔn hwlá cí, bɔ mi ka nɔ ɖɔ nú mì ɖɔ: “Zɔn xɛ ɖɔhun yi sókan mɛ, ɖó mɛdídá lɛ́ɛ tlɔ́ gǎ, yě bló gǎ ɔ́ ɖó kan jí ganjí, bó ná nɔ ablu mɛ bó da dó gbɛtɔ́ ayijlɔ́jlɔ́nɔ lɛ́ɛ. Ée gbɛ ɔ́ gba ɔ́, nɛ̌ hwɛjijɔnɔ lɛ́ɛ ká sixú wa nǔ gbɔn?” Mawu Mavɔmavɔ ɖo nɔtɛn tɔn mímɛ́ ɔ́, axɔ́súzinkpo tɔn ɖo jǐxwé dɔ̌n. Nukún tɔn ká ɖo gbɛtɔ́ lɛ́ɛ bǐ jí; é mɔ do nú nǔ e wa wɛ yě ɖe lɛ́ɛ bǐ. Mawu Mavɔmavɔ nɔ zé mɛ ɖagbe kpɔ́n, bó nɔ́ zé mɛ nyanya kpɔ́n; é gbɛ́ wǎn nú mɛ e yí wǎn nú alǎnnúwiwa é. Mawu ní sɛ́ myɔkán kpó hwemí kpó dó, ní ja dó mɛdídá lɛ́ɛ jí jǐ ɖɔhun. É ní sɛ́ jɔhɔn e nɔ hɛn nǔ fyɔ́ ɔ́ dó yě. Nǔ e ná gbo yě ɔ́ nɛ́. Đó Mawu Mavɔmavɔ ɔ́, hwɛjijɔnɔ wɛ, é yí wǎn nú hwɛjijɔ; nǔjlɔ́jlɔ́watɔ́ lɛ́ɛ wɛ ná mɔ nukún tɔn mɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ xo kanhún kantántɔnnɔ d'é mɛ. Mawu Mavɔmavɔ, hwlɛ̌n mǐ, ɖó mɛ e nɔ wa nǔ ɖó sɛ́nxwi jí lɛ́ɛ ɖo vivɔ wɛ, mɛ e ɖo gbejí nú we lɛ́ɛ bǐ ɖo vivɔ wɛ ɖo gbɛtɔ́ lɛ́ɛ tɛ́ntin. Mɛ ɖé sí te ɔ́, adingban jɛ́n é nɔ́ ɖó nú nɔzo tɔn, yě nɔ́ ɖo xó víví ɖɔ nú yěɖée wɛ, vo wɛ é ká ɖe ɖo xo yětɔn mɛ. Mawu Mavɔmavɔ ní vívá kún nú mɛ e nɔ víví nu lɛ́ɛ, é ní vívá kún nú mɛ e nɔ dó jimakplɔ́ngbe lɛ́ɛ, é ní vívá kún nú mɛ e nɔ ɖɔ: “Đɛ̌ bí nú mǐ, mǐ nyɔ̌ xó ɖɔ, mɛ̌ ka ná sixú kpa acɛ nú mǐ” lɛ́ɛ. Mawu Mavɔmavɔ ɖɔ: “È ɖo mɛ ma ɖó mɛɖé lɛ́ɛ táfú wɛ, wamamɔnɔ lɛ́ɛ ɖo azɔn wɛn wɛ. Din ɔ́, un ná sí te. Un ná hwlɛ́n mɛ e xwe akpi dó wɛ è ɖe lɛ́ɛ gán.” Xó e Mawu Mavɔmavɔ ɖɔ lɛ́ɛ ɔ́, xó mímɛ́ ɖésú wɛ; xó tɔn lɛ́ɛ cí kpatágan e è xo zo dó bó sínsín é ɖɔhun; azɔn tɛ́nwe wɛ è xo zo dó, bó ɖe nǔ kwíji bǐ sín mɛ bɔ é mɛ́. Mawu Mavɔmavɔ, hwi wɛ ná cyɔ́n alɔ mǐ jí, hwi wɛ ná hwlɛ́n mǐ ɖo gbɛtɔ́ alɔkpa énɛ́ lɛ́ɛ sí káká sɔ́yi. Gbɛtɔ́ dídá lɛ́ɛ gba kpé gbɛ ɔ́ bǐ mɛ, bɔ nǔ nyanya kpé tókɔ awɔnkɔ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu Mavɔmavɔ, káká hwetɛ́nu a nǎ wɔn mì yi jɛ? Káká hwetɛ́nu a nǎ sɔ́ hwiɖée hwlá dó mì yi jɛ? Káká hwetɛ́nu un ná ɖo nǔ lin kpɔ́n wɛ, bɔ aɖi ná nɔ́ ɖo ɖǐɖó mì wɛ ayǐhɔ́ngbe ayǐhɔ́ngbe yi jɛ? Káká hwetɛ́nu kɛntɔ́ ná ɖu ɖo jǐ ce yi jɛ? Mawu Mavɔmavɔ, Mawu ce, kpɔ́n! Yǐ gbe nú mì! Nǎ hlɔ̌nhlɔ́n mì, bónú un ma dɔ́ amlɔ dɔ̌mányí ó. É má nyí mɔ̌ ǎ ɔ́, kɛntɔ́ ná ɖɔ: “Éénɛ́! Un kpé wǔ tɔn nɛ́!” Un jɛ ayǐ ɖo kɛn nukɔn ɔ́, kɛntɔ́ ná ɖú ahwannɔwe. Nyɛ ka gán jɛ xomɛnyínyɔ́ towe wú. Xomɛ ɖo hunhun mì wɛ ɖó hwlɛ̌n e a hwlɛ̌n mì gán é wú. Un ná ji han dó kpa susu nú Mawu Mavɔmavɔ, ɖó é wa ɖagbe nú mì. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Xlonɔ lɛ́ɛ nɔ́ ɖɔ dó ayi mɛ ɖɔ: “Mawu ɖě tíin ǎ.” Yě gblé, bó ja dɔn dě ɖɔhun; zǐnzán yětɔn gbɛ́ hɛn, mɛ ɖé ɖo yě mɛ bó nɔ wa nǔ ɖagbe ǎ. Mawu Mavɔmavɔ ka ɖo jǐxwé dɔ̌n, bó nɔ́ kpɔ́n gbɛtɔ́ lɛ́ɛ sɛ́ dó, é nɔ́ kpɔ́n ɖɔ nǔnywɛ́tɔ́ ɖé ka ɖo yě mɛ, bó ɖo émí ba wɛ a jí. Yě bǐ gosín ali ɖagbe ɔ́ jí ɖó kpɔ́; yě bǐ wɛ húzú nǔ gbɛ́hɛn. Mɛ ɖěbǔ tíin bó nɔ́ wa ɖagbe ǎ, mɛ ɖokpó géé lě tín ǎ. Mawu Mavɔmavɔ ɖɔ: “Mɛ e nɔ wa nǔ nyanya lɛ́ɛ bǐ jɛ́n ɖo manywɛ́ mɛ a? Yě nɔ́ ɖo togun ce wɔ ɖu wɛ; nǔɖuɖu yětɔn nɛ́. Yě nɔ́ sɛn mì ǎ.” Hwenu e Mawu ná ɖo hwɛjijɔnɔ lɛ́ɛ tɛ́ntin ɔ́, xɛsi ɖaxó ɖé ná jɛ yě jí. Lelenɔ zé nǔɖé bó ná wa ɔ́, mi nɔ jló ná hɛn gblé. Mawu Mavɔmavɔ wɛ ka nyí bibɛtɛn tɔn. É jló mì tawun ɖɔ hwlɛngán ní gosín Sinyɔ́ɔ wá nú Izlayɛ́li. Mawu Mavɔmavɔ ná lɛ́ fɔ́n togun tɔn sí te. É ná víví nú Jakɔ́bu ví lɛ́ɛ kpɔ́n! Izlayɛ́li ví lɛ́ɛ ná j'awǎ kpɔ́n! Davídi sín han. Mawu Mavɔmavɔ, mɛ̌ wɛ ná nɔ xwé towe gbe? Mɛ̌ wɛ ná nɔ só mímɛ́ towe jí? Mɛ e è ma nɔ mɔ nǔɖé ɖɔ dó wǔ tɔn ǎ é wɛ, mɛ e nɔ wa nǔ jlɔ́jlɔ́ é wɛ, mɛ nɔ ɖɔ nǔgbó lě e é ɖe gbɔn ɖo ayi tɔn mɛ é wɛ. É nɔ́ ɖɔ mɛ nú ǎ. É nɔ́ wa nyanya nú nɔzo tɔn ǎ. É nɔ́ kɔ́n mɛ tɔn lɛ́ɛ sín wi ǎ. É nɔ́ kpɔ́n mɛ e Mawu Mavɔmavɔ gbɛ́ wǎn ná lɛ́ɛ sín jɛ jí ǎ. Amɔ̌, é nɔ́ wlí yɛ̌yi nú mɛ e nɔ sí Mawu Mavɔmavɔ lɛ́ɛ. É dó akpá ɖé ɔ́, é nɔ́ ɖe. Nǔ ɖěbǔ ná bó gbo e ɖ'é mɛ ɔ́, é nɔ́ ɖe. É nɔ sa akwɛ́ ǎ. É nɔ́ ɖu nǔ ɖo nǔ mɛ dó táfú xomɛvɔ́nɔ ǎ. Mɛ e nɔ wa nǔ gbɔn mɔ̌ ɔ́ ná jɛ ayǐ gbeɖé ǎ. Xó lómílómí Davídi tɔn. Mawu ce, cyɔ́n alɔ jǐ ce, ɖó hwi wɛ un nɔ hɔn wá su. Un ɖɔ nú Mawu Mavɔmavɔ ɖɔ: “Hwi wɛ nyí Aklúnɔ ce, un sɔ́ ɖó nǔɖé zɛ hwɛ wú ǎ.” Un ɖó sísí ɖaxó nú mɛ e nyí towe ɖo to ɔ́ mɛ lɛ́ɛ, è ɖo nǔsúɖaxó ba wɛ ɔ́, yědɛɛ lɛ́ɛ wɛ. Yě mɛ e nɔ ɖo nyɔ̌ná ba wɛ ɖo vodún gɔ́n lɛ́ɛ ɔ́, tagba dó tagba jí nú yěɖée wɛ yě ɖe. Un ná hu nǔ dó vodún yětɔn ɖě ǎ, è ka ná se vodún yětɔn ɖě sín nyǐkɔ ɖo nu ce vɔ́vɔ́ ǎ. Mawu Mavɔmavɔ, hwi wɛ nyí gbɛ nú mì. Nǔɖé hu dó mì ɔ́, hwi wɛ nɔ ná mì. Nǔ e un ná nyí sɔ ɔ́ ɖo alɔ towe mɛ. Lě e a sɔ́ gbɛ ce ɖó ɔ́ nɔ́ dó xomɛhunhun nú mì. Gbɛ ɖaxó ɖokpó wɛ un ɖu. Un dó kú nú Mawu Mavɔmavɔ, é wɛ nɔ́ kplɔ́n nǔ mì. Zǎn mɛ ɖésú ɔ́, ayi ce nɔ ɖɔ xó nú mì dó nǔkplɔ́nmɛ tɔn lɛ́ɛ wú. Ayi ce ɖo Mawu Mavɔmavɔ jí hwebǐnu. Mawu Mavɔmavɔ ɖo kpɔ́ xá mì; nǔɖé nɔ́ gba ayi dó nú mì ǎ. Énɛ́ ɔ́ wú wɛ xomɛ hun mì, un ɖo awǎ jɛ wɛ, bɔ ayi ce jɛ ayǐ. A nǎ jó lǐndɔ̌n ce dó nyi kútomɛ ǎ, a nǎ lɔn nú mɛsɛntɔ́ towe ná yi yɔdo mɛ ǎ. A nǎ xlɛ́ gbɛli mì; awǎjijɛ ɖo gɔ̌n towe bó túnflá, gbɛ wɛ è nɔ ɖu ɖo gɔ̌n towe káká sɔ́yi. Davídi sín ɖɛ. Mawu Mavɔmavɔ, nǔ e byɔ́ we wɛ un ɖe ɔ́ sɔgbe, ɖǒtó, wlǐ tó vo e sa nú we wɛ un ɖe ɔ́ wú, se ɖɛ e xo wɛ un ɖe ɔ́ ganjí, un ɖo yɛ wa wɛ ǎ. Hwi gɔ́n wɛ hwɛ e è nǎ ɖɔ xá mì ɔ́ ɖó ná gosín. Hwi ɖésúnɔ ní kpɔ́n akpá e xwé nǔgbó ɔ́ ɖe é. A kíjé ayi ce mɛ kpɔ́n, a ba jǒnɔ mì zǎn mɛ, a dǒ mì kpɔ́n, a ka mɔ nǔ ɖěbǔ ǎ. Un ɖo nǔ vo lin wɛ, bó ɖo vo ɖɔ wɛ ǎ. Un nɔ wa nǔ mɛ ɖě lɛ́ɛ ɖɔhun ǎ; lo ɔ́, un bló lě e a ɖɔ gbɔn é; un mlɛ́ ali mɛdídá lɛ́ɛ tɔn ǎ. Afɔ ce ló dǒ ɖo ali towe jí, afɔ ce nɔ xo dɔjɔ ǎ. Mawu, un ɖo ylɔ̌ylɔ́ we wɛ, ɖó a nɔ yí ɖɛ ce, wlǐ tó xó e ɖɔ wɛ un ɖe ɔ́ wú, se xó ce. Hwi mɛ e nɔ hwlɛ́n mɛ e hɔn wá su we lɛ́ɛ é, hwi mɛ e nɔ zé aɖisílɔ towe dó yí yě sín kɛntɔ́ sí ɔ́, ɖe xomɛnyínyɔ́ towe xlɛ́ mì. Nya xɛ ɖo jǐ ce nukúnzin ɖɔhun, cyɔ́n awa towe jǐ ce; ma lɔn nú mɛdídá e ɖo ya dó nú mì wɛ lɛ́ɛ kpé wǔ ce ó, ma lɔn nú kɛntɔ́ e lɛ́ lɛ̌ dó mì lɛ́ɛ kpé wǔ ce ó. Yě nɔ́ kú nǔbláwǔ nú mɛ ǎ, goyíyí xó jɛ́n nɔ́ tɔ́n sín nu yětɔn mɛ. Yě ɖo afɔ xa nú mì wɛ, yě kó lɛ́ lɛ̌ dó mì, yě ɖo cícɔ́ mì wɛ, bó ná zin mì dɛ́. A mɔ yě ɔ́, a nǎ ɖɔ kinnikínní ví e ɖo lan ba ná vún ɖu ɔ́ wɛ. Mawu Mavɔmavɔ, sí te, yi kpé yě, zin yě dɛ́. Sɔ́ hwǐ towe dó hwlɛ́n mì sín mɛdídá nɛ́ lɛ́ɛ sí. Mawu Mavɔmavɔ, hwi ɖésú ní sú kún yětɔn dó, gbɛ yětɔn ní fó mɔ̌. Nǔ baɖabaɖa e a sɔ́ ɖó vo nú yě ɔ́, nǎ bǐ yě; yě ní ɖu bó zín hǔn; vǐ yětɔn lɛ́ɛ ní ɖu gɔ́ xo, bó kpo nú vǐvú yětɔn lɛ́ɛ. Nyɛ ɔ́, un ná mɔ we, ɖó un wa nǔɖé nyi do ǎ. Un fɔ́n bó ɖo mimɔ we wɛ ɔ́, xomɛ nɔ hun mì. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi mɛsɛntɔ́ Mawu Mavɔmavɔ tɔn ɔ́ wɛ ká kpa, gbe e gbe Mawu Mavɔmavɔ hwlɛ́n ɛ sín kɛntɔ́ tɔn lɛ́ɛ bǐ lɔ mɛ, ɖo tají ɔ́, sín Sawúlu lɔ mɛ é. Un yí wǎn nú we Mawu Mavɔmavɔ. Hwi wɛ nyí hlɔ̌nhlɔ́n ce. Mawu Mavɔmavɔ wɛ nyí só ce; é wɛ nyí ahohó ce; é wɛ nyí mɛhwlɛ́ngántɔ́ ce, é wɛ nyí Mawu ce, só ce; é glɔ́ wɛ un nɔ hɔn hwlá cí. É wɛ nyí gǎglónú ce; é wɛ nyí hlɔ̌nhlɔ́n e nɔ hwlɛ́n mì gán é. É glɔ́ wɛ un hɔn hwlá cí. Susu nú Mawu Mavɔmavɔ! Un sú xó ylɔ́ ɛ hweɖěbǔnu ɔ́, é nɔ́ yí mì sín kɛntɔ́ ce lɛ́ɛ lɔ mɛ. Kú kó dó gɛdɛ mì; kú ɖo xɛsi dó mì wɛ tɔsisa ɖo adǎn jí ɖɔhun. Yɔdo lɛ́ɛ nyi kan lɛ́ lɛ̌ dó mì; kú nyi ɖɔ dó fyán mì. Hwenu e adǎn gbo mì ɔ́, un ylɔ́ Mawu Mavɔmavɔ. Un sú xó ylɔ́ Mawu ce. É se gbe ce sɛ́ dó sín xwé tɔn gbe; xó e un sú ɔ́ yi tó tɔn mɛ. Ayǐkúngban ɔ́ húnhún bó dán wǔ; só lɛ́ɛ sín dodó lɛ́ɛ sísɔ́, bó húnhún, ɖó Mawu sin xomɛ. Azizɔ nɔ tɔ́n sín awɔntín tɔn mɛ; myɔ hɛhɛ ɖé nɔ́ tɔ́n sín nu tɔn mɛ, myɔkán nɔ́ tɔ́n sín myɔ ɔ́ mɛ. É dɔn jǐnukúnsin wá do, bó jɛ te; akpɔ́kpɔ́ tlitli ɖaxó ɖé ɖo afɔ tɔn lɛ́ɛ glɔ́. É xá wɛnsagun ɖokpó jí, bó zɔn ɖidó; é ɖo dǐndán gbɔn jɔhɔn mɛ wɛ. É sɔ́ zǐnflú dó ɖó fí e é nɔ́ hɔn hwlá cí é. É sɔ́ ablu dó ɖó nɔtɛn tɔn ná, é sɔ́ ablu gɔngɔn dó bló xwé. Wěziza ɖé nɔ́ ɖo nukɔn tɔn. Akpɔ́kpɔ́ kpó kɛ́njí kpó ɖo nukɔn tɔn; myɔkán ɖo zo da wɛ ɖo nukɔn tɔn, bó nɔ́ tɔ́n sín wěziza ɔ́ mɛ. Mawu Mavɔmavɔ dó gbe jǐ dǒ gbe ɖɔhun ɖo sɛ́xwé. Mawu Ajalɔ̌nlɔn sín gbe ɖi kpó kɛ́njí kpó, kpó myɔkán kpó. É da gǎ bó gba kɛntɔ́ ce lɛ́ɛ dó. É kɛ nu bo nyí awǎn, bɔ kɛntɔ́ lɛ́ɛ hɔn. Mawu Mavɔmavɔ! Adǎn e jɛ wɛ a ɖe ɔ́, kpó funfún e nɔ́ tɔ́n sín awɔntín towe mɛ ɔ́ sín zǐngídi kpó zɔ́n, bɔ tɔ lɛ́ɛ sín azan jɛ wěxo, bɔ è mɔ nǔ jɛ gbɛ ɔ́ sín dodó lɛ́ɛ wú. É dlɛ́n alɔ tɔn sín jǐxwé, bó hɛn mì. É ɖe mì sín tɔ ɖé mɛ. É yí mì sín kɛntɔ́ hlɔ̌nhlɔ́nnɔ ɔ́ sí, bó yí mì sín kɛntɔ́ e hú gǎn mì lɛ́ɛ sín alɔ mɛ. Hwenu e adǎn ɖo gbigbo mì wɛ ɔ́, yě wá fyán mì; lo ɔ́, Mawu Mavɔmavɔ wɛ nyí gǎnjɛwú ce. É ɖe mì tɔ́n bó ná ayi j'ayǐ mì; é yí mì sín yě sí, ɖó é yí wǎn nú mì. Mawu Mavɔmavɔ nɔ wa mɔ̌ nú mì, ɖó un ɖo gbejí n'i. É ná ajɔ mì, bɔ é sɔgbe xá walɔ ɖagbe e un ɖó é. Đó un nɔ wa nǔ e Mawu Mavɔmavɔ ɖɔ má wa lɛ́ɛ. Un nɔ wa nǔɖé nyi do nú Mavɔmavɔ ce ǎ. Sɛ́n tɔn lɛ́ɛ bǐ wɛ ɖo ayi ce mɛ. Nǔ e é zɔ́n lɛ́ɛ ɔ́, un hɔn ɖě nyi gbě ǎ. Un jló ɖɔ è nǐ mɔ nǔɖé ɖɔ dó wǔ ce ǎ; un lɔn bo jɛ hwɛ ɖé mɛ ǎ. Énɛ́ ɔ́ wú wɛ Mawu Mavɔmavɔ ná ajɔ mì, bɔ é sɔgbe xá nǔ jlɔ́jlɔ́ e un nɔ wa é, bó sɔgbe xá walɔ ɖagbe e un ɖó é. Mɛ ɖé ɖo gbejí nú we ɔ́, hwi lɔ nɔ nɔ gbejí n'i. Mɛ e ɖo sɛ́nxwi jí é ɔ́, hwi lɔ nɔ nɔ sɛ́nxwi jí n'i. Mɛ e ɖo mǐmɛ́ jí é ɔ́, a nɔ nɔ mǐmɛ́ jí xá ɛ; mɛɖé ká ɖo yɛmɛnú wa wɛ ɔ́, a nɔ ko e. A nɔ hwlɛ́n togun e nɔ sɔ́ éɖée hwe ɔ́ gán, bó nɔ́ sɔ́ mɛ e nɔ sɔ́ éɖée su ɔ́ hwe. Mawu Mavɔmavɔ, hwi wɛ nɔ tá zogbɛ́n ce nú mì. Mawu ce, hwi wɛ nɔ sɛ́ wěziza dó mì ɖo ablu mɛ. A ɖo kpɔ́ xá mì ɔ́, un nɔ zɔn mɛ e fɔ alǐnnyánú kplá, bó tɔ́n ahwan mì lɛ́ɛ jí. Mawu ce ɖo kpɔ́ xá mì ɔ́, un nɔ lɔ́n d'asá ahohó. Mawu ɔ́, alixlɛ́mɛtɔ́ e nyɔ́ bɔ nǔ bǐ vɔ ɖ'é wú ɔ́ wɛ. Xó e Mawu Mavɔmavɔ nɔ́ ɖɔ ɔ́ nɔ́ sɔgbe; gǎglónú wɛ é nyí nú mɛ e nɔ hɔn wá su i lɛ́ɛ bǐ. Mawu mǐtɔn ɖɔhun we ɖe ǎ; Mawu Mavɔmavɔ wɛ é nyí. Mawu mǐtɔn ɖokpónɔ géé wɛ nyí só e wú mǐ gán jɛ é. É wɛ nɔ́ ná hlɔ̌nhlɔ́n mì; é wɛ nɔ́ bló ali ce ɖó bɔ nǔ nɔ vɔ ɖ'é wú. É bló bɔ afɔ ce nɔ yá zungbɔ́ sín afɔ ɖɔhun. É nɔ hɛn mì bɔ un nɔ nɔ te só jí. É wɛ nɔ́ kplɔ́n ahwanfunfun mì; é wɛ nɔ́ bló bɔ awa ce lɛ́ɛ nɔ́ mɔ gǎn, bó nɔ́ da gǎ e syɛ́n lɛ́ɛ. Mawu Mavɔmavɔ, a nɔ cyɔ́n alɔ jǐ ce gǎglónú ɖɔhun, a nɔ hwlɛ́n mì gán; aɖisí lɔ towe nɔ́ hɛn mì ɖó te. Un ylɔ́ we ɔ́, a nɔ yí gbe nú mì, bó nɔ́ ná hlɔ̌nhlɔ́n mì. A nɔ bló bɔ un nɔ kán wezun blélé, un nɔ ɖe afɔ nyi do ǎ. Un nɔ jɛ kɛntɔ́ ce lɛ́ɛ gúdo, bó nɔ́ wlí yě; un ma sú kún yětɔn dó ǎ ɔ́, un nɔ lɛ́ kɔ ǎ. Un nɔ gba yě hánnyá, bɔ yě nɔ́ sixú sí te ǎ; yě nɔ́ j'ayǐ, bɔ un nɔ gbɔn yě jí. A nɔ ná hlɔ̌nhlɔ́n mì bɔ un nɔ dó fun ahwan; a nɔ zin kɛntɔ́ ce lɛ́ɛ dɛ́ ɖo nukɔn ce. A nɔ bló bɔ kɛntɔ́ ce lɛ́ɛ nɔ́ hɔn ɖo nukɔn ce; bɔ un nɔ vívá kún nú mɛ e gbɛ́ wǎn nú mì lɛ́ɛ. Yě nɔ́ ba mɛ e ná hwlɛ́n yě gán ɔ́ gbɔn fí bǐ bó nɔ́ ba kpo. Yě nɔ́ sú xó ylɔ́ Mawu Mavɔmavɔ; Mawu Mavɔmavɔ ká nɔ́ kɛ nu d'é mɛ nú yě ǎ. Un nɔ li yě kpɔ́ɖɔ́kpɔ́ɖɔ́, bɔ jɔhɔn nɔ dó alɔ mɛ afúntúntún ɖɔhun; un nɔ́ sɔ́ afɔ dó gbídí yě babá e ɖo ali jí é ɖɔhun. A ɖe mì sín gǔ e togun ɔ́ fɔ́n dó jǐ ce ɔ́ mɛ; a sɔ́ mì ɖó akɔta lɛ́ɛ nu; togun e un ma tunwun ɖ'ayǐ ǎ ɔ́ ɖo acɛ ce mɛ. Un ɖɔ xó ɖé lě tlóló kpowun ɔ́, yě nɔ́ bló ɖ'é jí; toɖévomɛnu lɛ́ɛ nɔ́ jló ná nyí mɛ ɖo así ce. Toɖévomɛnu lɛ́ɛ nɔ́ dán ɖě wa gbɔn; yě nɔ́ tɔ́n sín ahohó yětɔn lɛ́ɛ mɛ bɔ ahohó lɛ́ɛ nɔ́ jɛ vɔ̌. Susu nú Mawu Mavɔmavɔ! Un dó kú nú só e wú un gán jɛ é! È nǐ kpa susu nú Mawu Mɛhwlɛ́ngántɔ́ ce. Mawu énɛ́ wɛ nɔ́ ba hlɔn nú mì; é wɛ nɔ́ sɔ́ togun lɛ́ɛ dó acɛ ce mɛ. Mawu Mavɔmavɔ, a nɔ yí mì sín kɛntɔ́ ce lɛ́ɛ sí. Hú mɔ̌ ɔ́, a nɔ ná ɖuɖéjí mì ɖo mɛ e nɔ tɔ́n ahwan mì lɛ́ɛ jí, bó nɔ́ hwlɛ́n mì gán ɖo adǎkaxotɔ́ lɛ́ɛ sí. Mawu Mavɔmavɔ! Énɛ́ ɔ́ wú wɛ un ná nɔ́ kpa we ɖo akɔta lɛ́ɛ tɛ́ntin. Un ná nɔ́ ji han dó kpa susu nú nyǐkɔ towe. Mawu Mavɔmavɔ wa nǔ ɖaxó ɖaxó dó hwlɛ́n axɔ́sú e é sɔ́ é gán. É nyɔ́ xomɛ dó mɛ e é kɔn ami dó ta ná é wú, bó nyɔ́ xomɛ dó Davídi kpó vǐ tɔn lɛ́ɛ kpó wú káká sɔ́yi. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Jǐxwé ɖo Mawu sɔ́ su wɛ; jǐnukúnsin ɖo nǔwiwa Mawu tɔn lɛ́ɛ xlɛ́ wɛ. Nǔ énɛ́ lɛ́ɛ ɔ́, kéze ɖě nɔ́ ɖɔ nú ɖě. Zǎn ɖě nɔ́ tínmɛ nú ɖě. Xó wɛ yě nɔ́ ɖɔ bɔ è nɔ se ǎ; nu wɛ yě nɔ́ kɛ bó nɔ ɖɔ xó ǎ; tó wɛ nɔ́ se xó yětɔn ǎ. Amɔ̌, nǔ e ɖɔ wɛ yě ɖe ɔ́, è mɔ gbɔn ayǐkúngban ɔ́ bǐ jí. È mɔ nǔ jɛ xó e ɖɔ wɛ yě ɖe ɔ́ wú gbɔn gbɛ ɔ́ bǐ mɛ. Jǐxwé dɔ̌n wɛ Mawu bló nɔtɛn nú hwe ɖó. Zǎnzǎn ɔ́, hwe nɔ tɔ́n dɔ̌nkpɛvú e da asi yɔ̌yɔ́ ɔ́ tɔ́n sín xɔ mɛ ɖɔhun. A nǎ ɖɔ wezunnyɔ́kántɔ́ e zlɔ́n ɖidó kpó xomɛhunhun kpó ɔ́ wɛ. Hwe nɔ tɔ́n sín akpá ɖě xwé ɖo jǐnukúnsin, bó nɔ́ yi xɔ dó akpá ɖěvo xwé. Yǒzo tɔn nɔ́ hwedó nǔ ɖěbǔ ǎ. Sɛ́n Mawu Mavɔmavɔ tɔn ɔ́ sɔgbe bɔ nǔ bǐ vɔ ɖ'é wú; é nɔ́ ná hlɔ̌nhlɔ́n mɛ. Xó Mawu Mavɔmavɔ tɔn lɛ́ɛ ɖó gǎnjɛwú; yě nɔ́ ná nǔnywɛ́ mɛ e ma ɖó nǔnywɛ́ ɖé ǎ é. Gbeta Mawu Mavɔmavɔ tɔn lɛ́ɛ nɔ́ xwe ali; yě nɔ́ dó xomɛhunhun nú mɛ. Nǔ e Mawu Mavɔmavɔ zɔ́n mɛ lɛ́ɛ ɖo wɛn; yě nɔ́ ná nukúnnú-mɔjɛnǔmɛ mɛ. Sísí ɖó nú Mawu Mavɔmavɔ ɔ́, nǔ mímɛ́ wɛ; é ɖo ayǐ káká sɔ́yi. Gbeta e Mawu Mavɔmavɔ ɖe tɔ́n lɛ́ɛ bǐ wɛ nyí nǔgbó; bǐ wɛ sɔgbe, yě xɔ akwɛ́ hú siká; yě xɔ akwɛ́ hú siká akú, yě víví hú wǐin; yě víví hú wǐin akú. Mawu Mavɔmavɔ, nyɛ mɛsɛntɔ́ towe lɔ nɔ yí kplɔ́n ɖ'é mɛ; mɛ e nɔ xwedó nǔ e a ɖɔ lɛ́ɛ ɔ́, le e yě nɔ́ mɔ ɖ'é mɛ ɔ́ d'agba. Hwɛ e è ɖo manywɛ́ mɛ bó hu ɔ́, è sixú tunwun a? Sɔ́ hwɛ e un ma tunwun ǎ bó hu lɛ́ɛ kɛ mì. Hɛn mì ɖo goyíyí sí, ma nú goyíyí ɖu ɖo jǐ ce ó; énɛ́ ɔ́, un ná nɔ́ gbejí, un sɔ́ ná hu hwɛ ɖaxó ɖě ǎ. Mawu Mavɔmavɔ, hwi mɛ e nyí sósyɛ́n ce, bó nyí mɛhwlɛ́ngántɔ́ ce ɔ́, xó e tɔ́n sín nu ce mɛ lɛ́ɛ ní nyɔ́ nukún towe mɛ, linlin e tɔ́n sín ayi ce mɛ lɛ́ɛ ní nyɔ́ nukún towe mɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Hwenu e adǎn ná ɖo gbigbo we wɛ ɔ́, Mawu Mavɔmavɔ ní yí ɖɛ towe; Mawu Jakɔ́bu tɔn ɖésú ní cyɔ́n alɔ jǐ towe. É ní nɔ tɛn mímɛ́ tɔn mɛ dɔ̌n, bó sɛ́ alɔgɔ́ dó! É ní nɔ Sinyɔ́ɔ bó dó alɔ we! É ní flín nǔ e a nǎ ɛ lɛ́ɛ bǐ, bó yí vɔ̌ e a nɔ dó zo lɛ́ɛ. É ní ná nǔ e jló we lɛ́ɛ we, bó bló bónú nǔ e a lin ná wa lɛ́ɛ bǐ ní nyí wiwa. Mǐ nǎ kpa awǒbóbó ɖó alɔ e é dó we é wú; mǐ nǎ zé asyá dó jǐ dó kpa susu nú Mawu mǐtɔn. A byɔ̌ nǔɖé ɔ́, Mawu Mavɔmavɔ ná bló bǐ nú we. Din ɔ́, un mɔ ɖɔ Mawu Mavɔmavɔ nɔ dó alɔ mɛ e é sɔ́ é. É nɔ́ se ɖɛ tɔn sín xwé tɔn gbe ɖo sɛ́xwé; é nɔ́ zán hlɔ̌nhlɔ́n tɔn dó wa nǔ ɖaxó ɖaxó dó hwlɛ́n ɛ gán. Mɛ ɖé lɛ́ɛ nɔ́ gán jɛ ahwankɛkɛ́ yětɔn lɛ́ɛ wú, bɔ mɛɖé lɛ́ɛ nɔ́ gán jɛ sɔ́ yětɔn lɛ́ɛ wú. Amɔ̌, mǐdɛɛ lɛ́ɛ ɔ́, Mawu Mavɔmavɔ, Mawu mǐtɔn sín nyǐkɔ wú wɛ mǐ gán jɛ. Mɛ ɖě lɛ́ɛ ɔ́, agbɔ̌n nɔ́ kpé yě, bɔ yě nɔ́ jɛ ayǐ, mǐdɛɛ lɛ́ɛ ká ɖo te bo syɛ́nlǐn. Mawu Mavɔmavɔ, hwlɛ̌n axɔ́sú ɔ́ gán, énɛ́ ɔ́, nú mǐ ylɔ́ ɛ ɔ́, é ná nɔ́ gɔ́ alɔ nú mǐ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu Mavɔmavɔ, axɔ́sú ɔ́ ɖo awǎ jɛ wɛ, ɖó hlɔ̌nhlɔ́n towe wú. Alɔ e a nɔ gɔ́ n'i ɔ́ nɔ víví n'i tawun. A nǎ ɛ nǔ e jló e é; nǔ e é byɔ́ we ɔ́, a tɛ ɛ ǎ, ɖó nyɔ̌ná ɖagbe ɖagbe sín agban wɛ a nɔ dó wá n'i. A xwe siká akú gbákún n'i. É byɔ́ gbɛ we bɔ a nǎ ɛ; bɔ é ná nɔ gbɛ káká yi káká sá. Alɔ e a dǒ e ɔ́ zɔ́n bɔ é xɔ susu bɔ é vɛ́ jlɛ́. A sɔ́ ɛ axɔ́sú ɖaxó; a ɖǒ wi ta n'i. A sɔ́ ɛ bó xo ɖɛ towe tɛgbɛ tɔn dó jǐ tɔn bɔ é nyí nǔnyɔ́nánɔ. A nǎ ɛ awǎjijɛ ma ɖó jlɛ̌ bɔ nǔ vɔ ɖ'é wú ɖo gɔ̌n towe. Axɔ́sú ɔ́ ɖeji dó Mawu Mavɔmavɔ wú, bɔ gbɔn xomɛnyínyɔ́ Mawu Ajalɔ̌nlɔn ɔ́ tɔn mɛ ɔ́, nǔɖé nɔ́ sɛ tɛn n'i ǎ. Alɔ towe ná jɛ kɛntɔ́ towe lɛ́ɛ wú. Đisí lɔ towe ná jɛ mɛ e gbɛ́ wǎn nú we lɛ́ɛ wú. Gbe e gbe a nǎ ɖe hwiɖée xlɛ́ ɔ́, a nǎ sɔ́ yě dó húzú myɔkpó. Mawu Mavɔmavɔ ná wa nǔ xá yě ɖo xomɛsin tɔn mɛ, bɔ yě bǐ ná ji kɛn ɖo myɔ mɛ. A nǎ vɔ donu yětɔn sín ayǐkúngban ɔ́ jí, bó ná sú vǐ yětɔn lɛ́ɛ kún dó sín gbɛtɔ́ lɛ́ɛ tɛ́ntin. Nú yě lɛ̌n ná wa nǔ nyanya xá we ɔ́, nú yě tunwun ɖɔ émí ná xo dǎka wǔ we ɔ́, yě ná kpé wú ǎ. Đó a nǎ lɛ́ kɔ nú yě, bɔ yě ná hɔn ɖo nukɔn towe, bɔ a nǎ da gǎ towe dó yě. Mawu Mavɔmavɔ! Sí te! Sí te kpó hlɔ̌nhlɔ́n towe kpó, mǐ jló ná ji han mlá we, mǐ nǎ ɖɔ xó lómílómí. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji dó han e è nɔ ylɔ́ ɖɔ “Zungbɔ́ ayǐtéhɔ̌nnu tɔn” ɔ́ sín hangbe mɛ. Mawu ce, Mawu ce, nɛ̌ ká gbɔn bɔ a jǒ mì dó? Étɛ́wú a ka cí zɔ nú mì sɔ mɔ̌, bó má wá hwlɛ́n mì gán ǎ? Étɛ́wú a ma ɖótó gbɛ vo e sa wɛ un ɖe ɔ́ ǎ? Mawu ce, un nɔ sú xó ylɔ́ we kéze, a ka nɔ yí gbe nú mì ǎ; un nɔ lɛ́ sú xó ylɔ́ we zǎn mɛ, a ka nɔ lɛ́ xo hwihwɛ́ mì ǎ. Có hwi wɛ nyí Mawu mímɛ́ ɔ́, a ɖo ayǐjínjɔ́n ɖo axɔ́súzinkpo towe jí, bɔ Izlayɛ́li togun ɔ́ nɔ ɖo awǒbóbó kpa lɛ́ dó we wɛ. Xóxó hwenu ɔ́, hwi wú wɛ tɔ́gbó mǐtɔn lɛ́ɛ gán jɛ. Hwi wú wɛ yě gán jɛ, bɔ a nɔ hwlɛ́n yě. Yě nɔ́ sú xó ylɔ́ we, bɔ a nɔ hwlɛ́n yě; yě gán jɛ wǔ we, yě ká ɖu winnyá ǎ. Nyɛ ɔ́, wěvú wɛ è nɔ mɔ mì dó mɔ, è nɔ mɔ mì dó mɔ gbɛtɔ́ ǎ. Nǔgbɛ́hɛn wɛ un nyí ɖo gbɛtɔ́ lɛ́ɛ tɛ́ntin; mɛ bǐ wɛ gbɛ́ wǎn nú mì. Mɛ e mɔ mì é bǐ wɛ nɔ ko mì. Yě nɔ́ zun mì; yě nɔ́ xwe akpi dó mì. Yě nɔ́ ɖɔ: “É má nyí Mawu Mavɔmavɔ wú wɛ é gán jɛ ǎ cé? É nyɔ́! Mawu Mavɔmavɔ ní bo gló nǔ e ɖo gbigbo e wɛ é n'i nú mǐ ná kpɔ́n! Ma nyí wǎn wɛ Mawu Mavɔmavɔ yí n'i a? Ní bó hwlɛ́n ɛ gán bó!” Mawu Mavɔmavɔ, hwi wɛ nyí tɔn bɔ nɔ ce ji mì, hwi wɛ sɔ́ mì ɖó akɔ́n tɔn mɛ, bɔ nǔɖé nɔ́ wa mì ǎ. Hwenu e un tɔ́n sín nɔ ce xomɛ tlóló ɔ́, è sɔ́ mì dó alɔ mɛ nú we; hwenu e è ji mì é ɖokpóó wɛ a nyǐ Mawu ce. Hǔn din e adǎn ɖo nǎ gbo mì wɛ, bɔ un ma ɖó alɔgɔ́númɛtɔ́ ɖé ǎ é ɔ́, ma nɔ zɔ nú mì ó. Kɛntɔ́ ce lɛ́ɛ lɛ́ lɛ̌ dó mì agbo gbě tɔn lɛ́ɛ ɖɔhun; yě xá mì adǎnkanlin Basáni tɔn lɛ́ɛ ɖɔhun. Yě hun nu bo ɖo nǎ wlí mì ɖu wɛ kinnikínní e ɖo adǎn jí, bó ɖo gbe dó wɛ é ɖɔhun. Hlɔ̌nhlɔ́n ce ɖo vivɔ wɛ, sin ɖo sisa yi wɛ ɖɔhun; xú ce bǐ wɛ ɖo vovo jɛ wɛ; akɔ́nkpinkpan e un ɖó ɔ́ ɖo vivɔ wɛ aɖuwa ɖo sínsínsínsín wɛ ɖɔhun. Vɛ̌go ce xú bǐ; ɖɛ̌ ce tɛ́ dó gbla mɛ. A zě mì ɖó yɔdo tó. Nǔnyanyawatɔ́ wɔ̌buwɔ́bú ɖé lɛ́ɛ xá dó mì; avǔn cukú nɛ́ lɛ́ɛ ná agbɔ̌n mì ɖěbǔ ǎ; yě blá afɔ ce lɛ́ɛ, bó blá alɔ ce lɛ́ɛ. Un xú gǒ ɖésú, xú ce lɛ́ɛ ɔ́, un hɛn ɔ́, un ná xa bǐ; kɛntɔ́ ce lɛ́ɛ nɔ́ ɖo kpínkpɔ́n mì wɛ ma xwe nukún. Yě mǎ awu ce lɛ́ɛ, yě nyi akɔ dó awu ce ɖaxó ɔ́. Amɔ̌, Mawu Mavɔmavɔ, hwɛ ɔ́, ma nɔ zɔ nú mì sɔ mɔ̌ ó; hwi wɛ nyí hlɔ̌nhlɔ́n ce, yǎ wǔ wá gɔ́ alɔ nú mì. Yǐ mì sín hwǐ nu; yǐ gbɛ ce sín avǔn cukú nɛ́ lɛ́ɛ nu mɛ. Hwlɛ̌n mì sín kinnikínní nu mɛ, hwlɛ̌n mì sín agbo zo nu. Hǐn! Mawu! A yǐ ɖɛ ce. Un ná jlá nǔ e a wa lɛ́ɛ nú nɔví ce lɛ́ɛ; un ná kpa susu nú we ɖo togun mɛ: “Mi mɛ e nɔ sí Mawu Mavɔmavɔ lɛ́ɛ mi, mi kpa susu nú Mawu Mavɔmavɔ; Jakɔ́bu ví e mi, mi bǐ ní sɔ́ Mawu Mavɔmavɔ su; Izlayɛ́li ví e mi, mi bǐ ní sísɔ́ ɖo Mawu Mavɔmavɔ nukɔn. Đó lelenɔ e nǔ gbɛ́ dó ɔ́, Mawu Mavɔmavɔ nɔ gbɛ́ wǎn n'i ǎ; é ka nɔ dó vɛ̌ n'i ǎ; é nɔ́ ɖe kɔ dó e ǎ, é nɔ́ ɖótó xósúsú tɔn.” Mawu, togun towe kplé ɔ́, hwi wɛ un ná nɔ́ kpa susu ná. Un ná ɖe akpá e un dó nú we lɛ́ɛ, ɖo mɛ e nɔ sí we lɛ́ɛ nukɔn. Mɛ e nɔ zé yěɖée hwe lɛ́ɛ, ná ɖu nǔ gɔ́ xo. Mɛ e jó yěɖée nú Mawu Mavɔmavɔ lɛ́ɛ ná kpa susu n'i. Yě ná dɔ́ ji! Mɛ e ɖo wɛ̌kɛ́ ɔ́ mɛ lɛ́ɛ bǐ ná flín Mawu Mavɔmavɔ, bó ná lɛ́ kɔ wá gɔ̌n tɔn. Akɔta bǐ ná ɖe kɔ́ n'i. Đó Mawu Mavɔmavɔ wɛ nyí axɔ́sú. É wɛ kpa acɛ nú akɔta lɛ́ɛ. Mɛ e jɛ dɔkun ɖo ayǐkúngban jí fí bó ɖu nǔ gɔ́ xo lɛ́ɛ bǐ ná ɖe kɔ́; yě mɛ e ɖo kúdonu, bó má sɔ́ sixú nɔ gbɛ ǎ lɛ́ɛ, bǐ nǎ yi do n'i. Vǐ yětɔn lɛ́ɛ ná sɛn ɛ; è nǎ ɖɔ Aklúnɔxó nú vǐ e è nǎ ji sɔ lɛ́ɛ. È nǎ wá ɖɔ hwɛjijɔ tɔn xó nú togun e ná wá jɔ é, ɖó é wɛ wa azɔ̌. Davídi sín han. Mawu Mavɔmavɔ wɛ nyí lɛ̌ngbɔ́nyitɔ́ ce, nǔɖé ná hwedó mì ǎ. Fí e ama zɔ́n ɖe ɔ́ wɛ é nɔ́ kplá mì yi, bɔ un nɔ gbɔjɛ́; sin e fá ɔ́ kɔn wɛ é nɔ́ kplá mì yi. É nɔ́ lɛ́ vɔ́ hlɔ̌nhlɔ́n ná mì, é nɔ́ kplá mì gbɔn ali ɖagbe jí, ɖó mɛ e é nyí ɔ́ wú. Mawu, un na bo ɖo tɔdo mɛ gbɔn wɛ ɖo ablu gɔngɔn mɛ ɔ́, un nɔ ɖi xɛsi nú nǔɖé ǎ, ɖó a ɖo kpɔ́ xá mì; lɛ̌ngbɔ́nyitɔ́kpo towe kpó kpogɛ towe kpó nɔ ná jiɖiɖe mì. A nɔ tɛ́ távo nú mì, ɖo kɛntɔ́ ce lɛ́ɛ nukún mɛ. A nɔ kɔn ami wǎnɖagbenɔ dó ta nú mì. A nɔ kɔn vɛ̌ɛn dó kɔ́fu ce mɛ bɔ é nɔ́ gɔ́ túnflá. Ɛɛn Mawu Mavɔmavɔ, xomɛnyínyɔ́ towe kpó alɔ hun dó wa nǔ nú mɛ towe kpó ná nɔ xá mì nú gbɛzán ce bǐ. Un ná nɔ xwé towe gbe nú gbɛ hwenu ce bǐ. Davídi sín han. Mawu Mavɔmavɔ tɔn wɛ nyí ayǐkúngban ɔ́ kpó ayǐkúngban dɔkun lɛ́ɛ kpó. É tɔn wɛ nyí gbɛ ɔ́ kpó gbɛtɔ́ e ɖo gbɛ ɔ́ mɛ lɛ́ɛ kpó. Đó é wɛ dó ayǐkúngban ɔ́ do ɖó xu jí, é wɛ hɛn ɛ ɖó te ɖó tɔ lɛ́ɛ jí. Mɛ̌ wɛ sixú yi Mawu Mavɔmavɔ só ɔ́ jí? Mɛ̌ wɛ sixú nɔ tɛn mímɛ́ tɔn mɛ? Mɛ e ma nɔ wa nǔ nyanya ǎ, mɛ e ayixa tɔn mɛ́, mɛ e ma nɔ ɖó adingban ǎ, mɛ e ma nɔ xwlé nǔ dó blɛ́ mɛ ǎ ɔ́ wɛ. Mawu Mavɔmavɔ ná dó acɛ mɛ énɛ́ jí, Mawu mɛhwlɛ́ngántɔ́ tɔn ná mɔ ɛ dó mɔ xomɛvɔ́nɔ. Lě e é nɔ́ cí gbɔn nú mɛ e ɖo gbejí nú Mawu ɔ́ nɛ́; lě e é nɔ́ cí gbɔn nú mɛ e ɖo gbejí nú Mawu Jakɔ́bu tɔn e un nɔ sɛn ɔ́ nɛ́. Hɔn lɛ́ɛ mi, mi zé agba mitɔn lɛ́ɛ dó jǐ; hwexónu hɔntogbó lɛ́ɛ mi, mi hun kɛ́, bónú axɔ́sú susunɔ ɔ́ ní wá yi. Mɛ̌ wɛ nyí axɔ́sú susunɔ énɛ́ ɔ́? Mawu Mavɔmavɔ hlɔ̌nhlɔ́nnɔ, ahwanfuntɔ́ syɛ́nsyɛ́n ɔ́ wɛ; Mawu Mavɔmavɔ ahwanfuntɔ́ ɖaxó e nɔ ɖu ɖ'é jí ɔ́ wɛ. Hɔn lɛ́ɛ mi, mi zé agba mitɔn lɛ́ɛ dó jǐ. Hwexónu hɔntogbó lɛ́ɛ mi, mi hun kɛ́, bónú axɔ́sú susunɔ ɔ́ ní wá yi. Mɛ̌ ká nyí axɔ́sú susunɔ énɛ́ ɔ́ tawun? Mawu Mavɔmavɔ Nǔbǐwúkpétɔ́ ɔ́ wɛ; é wɛ nyí axɔ́sú susunɔ ɔ́. Davídi sín han. Mawu Mavɔmavɔ, hwi wɛ un sɔ́ ayi ce jó ná. Mawu ce, hwi wú wɛ un ɖeji dó; ma nú un ɖu winnyá ó! Ma nú kɛntɔ́ kpé wǔ ce ó. Mɛ e gán jɛ wǔ we lɛ́ɛ ɖěbǔ ná ɖu winnyá ǎ, mɛslɛ́tɔ́ lɛ́ɛ wɛ ná ɖu winnyá; yě ní má mɔ nu tɔn ó. Mawu Mavɔmavɔ, xlɛ́ ali e un ná gbɔn ɔ́ mì, kplɔ́n lě e un ná zán gbɛ ce gbɔn ɔ́ mì. Kplá mì gbɔn nǔgbó towe lixo, kplɔ́n nǔ mì, ɖó hwi wɛ nyí Mawu mɛhwlɛ́ngántɔ́ ce. Hwi wú wɛ un nɔ gán jɛ gbe bǐ gbe. Mawu Mavɔmavɔ, flín nǔbláwǔkúnúmɛ towe kpódó xomɛnyínyɔ́ towe kpó, ɖó a nɔ ɖe nǔbláwǔkúnúmɛ towe kpó xomɛnyínyɔ́ towe kpó xlɛ́ sín do. Ma flín hwɛ e un ko hu ɖo wǐnnyáwínnyá mɛ lɛ́ɛ ó, ma flín gǔ e un fɔ́n lɛ́ɛ ó, kpɔ́n dó nǔbláwǔkúnúmɛ towe wú, bó flín mì, ɖó Mawu Mavɔmavɔ, xomɛnyɔ́tɔ́ wɛ a nyǐ. Mawu Mavɔmavɔ nyɔ́ xomɛ; é nɔ́ wa nǔ jlɔ́jlɔ́. Énɛ́ ɔ́ wú wɛ é nɔ́ xlɛ́ ali e è ɖǒ ná gbɔn ɔ́ hwɛhutɔ́ lɛ́ɛ. É nɔ́ kplá mɛ e nɔ sɔ́ yěɖée hwe lɛ́ɛ gbɔn hwɛjijɔ li jí; É nɔ́ kplɔ́n jlǒ tɔn yě. Ali e Mawu Mavɔmavɔ nɔ xlɛ́ mɛ lɛ́ɛ ɔ́, bǐ wɛ nɔ́ ɖe xomɛnyínyɔ́ tɔn kpó gbejíninɔ tɔn kpó xlɛ́ mɛ e ɖo gbejí nú akɔ e é jɛ xá yě lɛ́ɛ. Mawu Mavɔmavɔ! Kpɔ́n dó nyǐkɔ towe wú, bó sɔ́ hwɛ ce lɛ́ɛ kɛ mì; hwɛ ce lɛ́ɛ sukpɔ́. Ényí mɛɖé ɖó sísí nú Mawu Mavɔmavɔ ɔ́, Mawu Mavɔmavɔ nɔ xlɛ́ ɛ ali e é ɖó ná sɔ́ é. Nǔ ná nyɔ́ nú mɛ énɛ́; to ɔ́ ná nyí vǐ tɔn lɛ́ɛ tɔn. Mawu Mavɔmavɔ nɔ ɖɔ nǔ e ɖo ayi tɔn mɛ ɔ́ nú mɛ e nɔ sí i lɛ́ɛ; é kplɔ́n nǔ e akɔ jɛ xá ɛ nyí ɔ́ yě. Nukún ce ɖo Mawu Mavɔmavɔ wú hwebǐnu, ɖó é wɛ nɔ́ ɖe mì sín mɔ mɛ. Mawu Mavɔmavɔ, nyi kɔ kpɔ́n mì, bó kú nǔbláwǔ nú mì, ɖó un ɖó mɛɖé ǎ, gbɛ ce blá wǔ. Un vo ɖo ayi mɛ ǎ; kɛnklɛ́n, wǎ ɖe mì sín adǎn e ɖo gbigbo mì wɛ lɛ́ɛ mɛ. Kpɔ́n ya e ji wɛ un ɖe ɔ́, kpɔ́n wǔvɛ́ e mɔ wɛ un ɖe ɔ́, bó sɔ́ hwɛ ce lɛ́ɛ bǐ kɛ mì. Kpɔ́n lě do e kɛntɔ́ ce lɛ́ɛ sukpɔ́ sɔ é, kpɔ́n lě do e yě gbɛ́ wǎn nú mì sɔ é. Cyɔ́n alɔ jǐ ce, hwlɛ̌n mì, ma nú un ɖu winnyá ó, ɖó hwi wɛ un hɔn wá su. Xomɛvɔ́ e un ɖe ɔ́ kpó nǔ jlɔ́jlɔ́ e un nɔ wa ɔ́ kpó ní hɛn mì ɖó te, ɖó hwi wú wɛ un gán jɛ. Mawu ce, hwlɛ̌n Izlayɛ́li, hwlɛ̌n ɛ sín adǎn e ɖo gbigbo e wɛ lɛ́ɛ bǐ mɛ. Davídi sín han. Mawu Mavɔmavɔ, gbo hwɛ nú mì, ɖó gbɛ ɖagbe wɛ un nɔ zán. Hwi wɛ un kpɛn zɔn. Mawu Mavɔmavɔ, tɛ́n mì kpɔ́n, ba do nú mì; ba do nú nǔ e ɖo xo ce mɛ é; gbějé ayi ce kpɔ́n. Un hɛn xomɛnyínyɔ́ towe dó ayi mɛ, gbejíninɔ towe nɔ́ xlɛ́ ali mì ɖo gbɛ ce mɛ. Un nɔ dó gbɛtɔ́ nuwenɔgbɛ́ ǎ, un nɔ zɔn xá gbɛtɔ́ yɛmɛnúwatɔ́ ǎ. Un gbɛ́ wǎn nú gbɛ̌ dó xá dǎkaxotɔ́ lɛ́ɛ; un nɔ jínjɔ́n ayǐ xá mɛdídá lɛ́ɛ ǎ. Mawu Mavɔmavɔ, un klɔ́ alɔ ce, dó ɖe xlɛ́ ɖɔ xomɛvɔ́nɔ wɛ un nyí; Mawu Mavɔmavɔ, un ná lɛ́ lɛ̌ dó vɔ̌sákpe towe, bó sɔ́ gbe d'aga dó dó nǔ e a wa nú mì ɔ́ sín kú nú we, dó ɖɔ nǔjíwǔ e a wa lɛ́ɛ é bǐ. Mawu Mavɔmavɔ, un yí wǎn nú xwé e gbe a ɖe é, fí e susu towe ɖe é. Ma wa nǔ xá mì hwɛhutɔ́ ɖɔhun ó, ma hu mì mɛhutɔ́ ɖɔhun ó. Yě mɛ énɛ́ lɛ́ɛ ɔ́, wunhínhɔ́nnú wɛ yě wa, nǔ yí ɖu dó nǔ wɛ gɔ́ alɔ yětɔn. Nyɛ ɔ́, gbɛ ɖagbe wɛ un nɔ zán; hwlɛ̌n mì, kú nǔbláwǔ nú mì. Afɔ ce ló dǒ ɖo ali jlɔ́jlɔ́ jí. Un ná kpa susu nú Mawu Mavɔmavɔ hwenu e togun ɔ́ ná kplé é. Davídi sín han. Mawu Mavɔmavɔ wɛ nyí wěziza ce, bó nyí mɛhwlɛ́ngántɔ́ ce; mɛ̌ un ka ná ɖi xɛsi ná? Mawu Mavɔmavɔ lɔmɛ wɛ gbɛ ce ɖe; mɛ̌ un ka ná hɔn ná? Ényí nǔnyanyawatɔ́ lɛ́ɛ kplɔ́ dó mì, adǎnkanlin ɖɔhun ɔ́, yě mɛ kɛntɔ́ ce énɛ́ lɛ́ɛ wɛ nɔ́ j'ayǐ. Ahwanfuntɔ́ lɛ́ɛ ná bó d'ahwan gbě bó ján go dó mì ɔ́, xɛsi nɔ ɖi mì ǎ; è tɔ́n ahwan mì ɔ́, hwenɛ́nu wɛ ji nɔ lɛ́ ɖe mì. Nǔ ɖokpó géé wɛ un nɔ byɔ́ Mawu Mavɔmavɔ, bɔ é ká myá nukún nú mì ɖésú; é wɛ nyí ɖɔ má nɔ́ nɔ xwé tɔn gbe nú gbɛ hwenu ce bǐ, bó ná nɔ́ kpɔ́n lě e é nyɔ́ xomɛ sɔ é, bó ná nɔ́ kpɔ́n lě e nɔtɛn tɔn nyɔ́ sɔ é. Đó azǎn nyanya gbe ɔ́, é ná cyɔ́n alɔ jǐ ce ɖo xɔ tɔn sá, é ná sɔ́ mì hwlá ɖó goxɔ tɔn sá, é ná sɔ́ mì yi ɖó só jí aga, fí e è ma ná kpé wǔ ce ɖe ǎ é. Énɛ́ ɔ́, un ná hú taga kɛntɔ́ e lɛ́ lɛ̌ dó mì lɛ́ɛ; un ná sá vɔ̌ n'i ɖo goxɔ tɔn mɛ kpó awǒbóbó kpó, un ná ji han nú Mawu Mavɔmavɔ, un ná ɖɔ xó lómílómí dó mlá nyǐkɔ tɔn dó han mɛ. Mawu Mavɔmavɔ! Un ɖo ylɔ̌ylɔ́ we wɛ. Đǒtó gbe ce; kú nǔbláwǔ nú mì, yǐ gbe nú mì. Un ɖo tamɛ lin dó xó e a ɖɔ ɔ́ wú wɛ; a ɖɔ: “Mi ba mì!” Din ɔ́, Mawu Mavɔmavɔ! Un ɖo biba we wɛ. Ma sɔ́ hwiɖée hwlá dó mì ó. Ma nya nyɛ mɛsɛntɔ́ towe kpó xomɛsin kpó ó; hwi wɛ nyí gbɛ nú mì. Ma jó mì dó ó; ma ɖe alɔ sín kan ce mɛ ó, Mawu Mɛhwlɛ́ngántɔ́ ce! Đó tɔ́ ce kpó nɔ ce kpó ná bó ɖe alɔ sín kan ce mɛ ɔ́, hwɛ Mawu Mavɔmavɔ ɔ́, a nǎ kɛ alɔ bo yí mì. Mawu Mavɔmavɔ! Xlɛ́ ali towe mì; kplá mì gbɔn ali ɖagbe jí ɖó kɛntɔ́ ce lɛ́ɛ wú. Ma jó mì dó nú kɛntɔ́ ní zé mì dó wa nǔ e jló e ɔ́ ná ó; ɖó kúnnu agɔɖetɔ́ lɛ́ɛ sí te dó jǐ ce, bó ɖo adǎn gblɔ́n nú mì wɛ. Nú un ma ka gán jɛ wú ɖɔ un ná mɔ xomɛnyínyɔ́ Mawu Mavɔmavɔ tɔn ɖo ayǐkúngban jí fí ǎ ɔ́, nɛ̌ gbɛ ce ka ná cí? Đǒ nukún Mawu Mavɔmavɔ, dǒ gǎn, kpan akɔ́n, ɖǒ nukún Mawu Mavɔmavɔ. Davídi sín han. Mawu Mavɔmavɔ, hwi sú xó ylɔ́ wɛ un ɖe, só ce, ma tin dó mì ó, ɖó nú a dǒ tókúse xó e sú ylɔ́ we wɛ un ɖe ɔ́ mɛ ɔ́, gbɛ ce ná vɔ. Mawu Mavɔmavɔ, nú un dlɛ́n alɔ sɛ́ dó tɛn mímɛ́ bǐ e mɛ a ɖe ɔ́ hǔn, nú un sú xó ylɔ́ we ɖɔ hwi ní wá dó alɔ mì hǔn, ɖǒtó mì. Ma xwe nyɛ kpó mɛdídá lɛ́ɛ kpó dó aja ɖokpó ɔ́ mɛ ó, ma xwe nyɛ kpó hwɛhutɔ́ lɛ́ɛ kpó dó aja ɖokpó ɔ́ mɛ ó. Yě nɔ́ ɖɔ xó víví nú nɔzo yětɔn lɛ́ɛ, lo ɔ́, adǎka kɛ́ɖɛ́ wɛ gɔ́ ayi yětɔn mɛ. Wa nǔ xá yě lě e zǐnzán yětɔn byɔ́ gbɔn é, lě e nǔ nyanya e yě wa ɔ́ byɔ́ gbɔn é; wa nǔ xá yě lě e yě wa mɛ ɖě lɛ́ɛ nú gbɔn é, sú nǔ e yě ɖésúnɔ dó sin lɛ́ɛ sín axɔ́ yě. Yě nɔ́ ké ya nú azɔ̌ e Mawu Mavɔmavɔ wa lɛ́ɛ ǎ, yě nɔ́ ké ya nú nǔ e é sɔ́ alɔ tɔn dó bló ná lɛ́ɛ é ǎ. Mawu Mavɔmavɔ ní zin yě dɛ́ bó ma sɔ́ sɔ́ yě sí te gbeɖé ó! Susu nú Mawu Mavɔmavɔ, ɖó é ɖótó vo e sa wɛ un ɖe lɛ́ɛ. Mawu Mavɔmavɔ wɛ nyí hlɔ̌nhlɔ́n ce, bó nyí gǎglónú ce. É wɛ un sɔ́ ayixa ce bǐ jó ná, bɔ é nɔ́ gɔ́ alɔ nú mì; xomɛ ɖo hunhun mì wɛ, bɔ un ɖo susu kpa n'i wɛ dó han mɛ. Mawu Mavɔmavɔ wɛ nyí hlɔ̌nhlɔ́n nú togun tɔn. É wɛ nyí ahohó nú mɛ e é kɔn ami dó ta ná é. Hwlɛ̌n togun towe gán, xo ɖɛ dó mɛ e nyí hwi ɖokpónɔ tɔn lɛ́ɛ jí! Nyǐ lɛ̌ngbɔ́nyitɔ́ yětɔn, bó nyí gǎnjɛwú yětɔn káká sɔ́yi. Davídi sín han. Wɛnsagun Mawu Mavɔmavɔ tɔn e ɖo jǐxwé lɛ́ɛ mi, mi wá sɔ́ Mawu Mavɔmavɔ su; mi wá kpa susu nú Mawu Mavɔmavɔ, mi wá kpa hlɔ̌nhlɔ́n tɔn. Mi kpa susu e jɛ xá nyǐkɔ tɔn é n'i. Mi ɖe kɔ́ n'i kpó acɔ́ɖónú sinsɛn tɔn lɛ́ɛ kpó. Mawu Mavɔmavɔ nɔ dó gbe ɖo sin jí. Mawu susunɔ ɔ́ nɔ́ dó gbe. Mawu Mavɔmavɔ ɖo sin ɖaxó jí. Mawu Mavɔmavɔ dó gbe kpó hlɔ̌nhlɔ́n kpó, Mawu Mavɔmavɔ dó gbe kpó acɛkpikpa kpó. Mawu Mavɔmavɔ dó gbe, bɔ sɛ́dlutín lɛ́ɛ gba hánnyá, sɛ́dlutín Libáan tɔn lɛ́ɛ gba hánnyá. Libáan só lɛ́ɛ nɔ́ lɔ́n nyibúví ɖɔhun, Ɛmɔ́ɔ só ɔ́ nɔ́ lɔ́n agbo wínnyáwínnyá ɖɔhun. Mawu Mavɔmavɔ dó gbe bɔ myɔ xɔ hiwun. Mawu Mavɔmavɔ dó gbe bɔ gbětótló húnhún, Mawu Mavɔmavɔ húnhún gbětótló Kadɛ́ci tɔn. Mawu Mavɔmavɔ dó gbe bɔ zungbɔ́ lɛ́ɛ ji vǐ. É dó gbe bɔ zungbó lɛ́ɛ lúnlún ama. Nǔ e kó ɖo Mawu Mavɔmavɔ sín hɔnmɛ lɛ́ɛ bǐ nɔ́ sú xó ɖɔ: “Susu nú Mawu!” Mawu Mavɔmavɔ ɖo axɔ́súzinkpo tɔn jí hwenu e tɔ gba gbɛ ɔ́ é; Mawu Mavɔmavɔ ná ɖu axɔ́sú káká sɔ́yi. Mawu Mavɔmavɔ ná ná hlɔ̌nhlɔ́n togun tɔn; Mawu Mavɔmavɔ ná xo ɖɛ dó jǐ tɔn bɔ é ná vo. Davídi sín han; hwenu e è hun Mawu xwé ɔ́ wɛ è ji. Mawu Mavɔmavɔ, un ɖo mlǎmlá we wɛ, ɖó a ɖe mì sín do gɔngɔn mɛ; a jlǒ ɖɔ kɛntɔ́ ce lɛ́ɛ ní ko mì ǎ. Mawu Mavɔmavɔ, Mawu ce, un sú xó ylɔ́ we bɔ a gbɔ azɔn nú mì. Mawu Mavɔmavɔ, a ɖe mì sín kútomɛ, bó lɛ́ sɔ́ mì wá gbɛ, bɔ un lín dó mɛ e ɖo yɔdo mɛ byɔ́ wɛ lɛ́ɛ. Mi mɛ e ɖo gbejí nú Mawu Mavɔmavɔ lɛ́ɛ ɔ́, mi ɖɔ xó lómílómí dó mlá nyǐkɔ tɔn dó han mɛ. Mi sɔ́ nyǐkɔ mímɛ́ tɔn su. Đó xomɛsin tɔn ɔ́, tɛndo ɖokpó mɛ nú wɛ. Đagbewiwa tɔn ɔ́, tɛgbɛ nú ka wɛ; a nǎ ya avǐ káká, bó ná yi xɔ d'é jí, amɔ̌, káká nú ayǐ ná hɔ́n ɔ́, a ko fɔ́n kpó awǎjijɛ kpó. Un nɔ mɔ ɖɔ ayi ce ko j'ayǐ, bó nɔ́ ɖɔ: “Adǎn ɖě ná gbo mì gbeɖé ǎ.” Mawu Mavɔmavɔ, ɖo xomɛnyínyɔ́ towe mɛ ɔ́, a sɔ́ mì jínjɔ́n ayǐ, bɔ un lí dǒ só ɖɔhun. A ka wá ɖe alɔ sín kan ce mɛ, bɔ gbɛ ce wá ɖo lě din. Mawu Mavɔmavɔ, un sú xó ylɔ́ we, Aklúnɔ, un sa vo nú we bó ɖɔ: Ényí a kɔn hun ce kɔn nyi ayǐ ɔ́, ényí a sɔ́ mì dó do gɔngɔn mɛ ɔ́, ani wɛ a nǎ mɔ ɖ'é mɛ? Kɔ́gúdu wɛ ná mlá we a? Kɔ́gúdu ná sixú ɖɔ gbejíninɔ towe a? Mawu Mavɔmavɔ, ɖǒtó mì, kú nǔbláwǔ nú mì. Mawu Mavɔmavɔ, wǎ hwlɛ́n mì. Ée un ɖɔ mɔ̌ é ɔ́, a sɔ́ aluwɛ e mɛ un ɖe ɔ́ dó húzú awǎjijɛ nú mì. A ɖe nǔwamɛwu sín kɔ nú mì, bó zé xwewu dó nú mì, bónú má ɖɔ xó lómílómí dó mlá nyǐkɔ towe dó han mɛ; un ná nɔ abwɛ̌ gbeɖé ǎ. Mawu Mavɔmavɔ, Mawu ce, un ná mlá we káká sɔ́yi. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu Mavɔmavɔ, hwi gɔ́n wɛ un wá bɛ ta dó, ma lɔn nú un ɖu winnyá gbeɖé ó. Kpɔ́n dó gbejíninɔ towe wú bó ɖe hwɛn mì. Đǒtó mì, yǎ wǔ wá hwlɛ́n mì. Nyǐ só e glɔ́ un ná hɔn hwlá cí é, nyǐ ahohó e mɛ un ná mɔ hwlɛngán ɖe é, ɖó hwi wɛ nyí awǐnnya ce, ahohó ce, a nǎ kplá mì, a nǎ xlɛ́ ali mì, ɖó mɛ e a nyǐ é wú. Ma lɔn nú ma jɛ mɔ e è ɖǒ nú mì ɔ́ mɛ ó, ɖó hwi wɛ nɔ nya xɛ ɖo jǐ ce. Mawu Mavɔmavɔ, un sɔ́ funfún ce dó alɔ mɛ nú we, Mawu gbejínɔtɔ́, hwi wɛ xɔ gbɛ nú mì. Un gbɛ́ wǎn nú mɛ e nɔ sɛn vodún lɛ́ɛ, vodún nǔ yǎyá lɛ́ɛ. Nyɛ ɔ́, Mawu Mavɔmavɔ, hwi wɛ un sɔ́ nyiɖée jó ná. Un ná hun xomɛ bo j'awǎ ɖó xomɛnyínyɔ́ towe wú, ɖó a mɔ ya e ji wɛ un ɖe é, a tunwun adǎn e ɖo gbigbo mì wɛ é. A lɔn nú un jɛ kɛntɔ́ lɔmɛ ǎ; a fɔ́n mì sí te, a ɖe mì nyi te. Mawu Mavɔmavɔ, kú nǔ blá wǔ ce, ɖó adǎn ɖo gbigbo mì wɛ. Agbaza ce kpó lǐndɔ̌n ce kpó bǐ ɖo aluwɛ mɛ; nukún ce sɔ́ nɔ́ mɔ nǔ ǎ, nǔ lin wɛ un ɖe sɔ mɔ̌ nɛ́. Nǔ e ɖo xíxá mì wɛ lɛ́ɛ ɖo huhu mì dó anyǔ mɛ wɛ. Azɔn wɛn wɛ jɛ́n un nɔ ɖe, bó ɖo da vɔ́ wɛ. Hwɛ e un hu lɛ́ɛ yí gǎn e ɖo wǔ ce é bǐ. Hlɔ̌nhlɔ́n e ɖo wǔ ce é bǐ ɖo vivɔ wɛ. Kɛntɔ́ ce lɛ́ɛ bǐ nɔ́ ɖo zunzun mì wɛ; mɛ e nyí mɛ ce lɛ́ɛ tɔn é lɛ́ nylá. Yě mɔ mì ɖo fí ɖé ɔ́, yě nɔ́ hɔn. Mɛ ɖé sɔ́ nɔ́ flín mì ǎ; mɛ bǐ ɖe ayi sín jǐ ce mɛ e ko kú é ɖɔhun, un sɔ́ nyí nǔɖéwanú nú yě ǎ. Un nɔ se nǔ ce e ɖɔ wɛ mɛ lɛ́ɛ nɔ ɖe ɔ́ bǐ. Ayi ce jɛ ayǐ ɖo fí ɖěbǔ ǎ. Yě ɖo kpá yi dó ta ce wɛ, yě ɖo gbě ce blá wɛ bó ná hu mì. Amɔ̌, nyɛ ɔ́, Mawu Mavɔmavɔ, un sɔ́ nyiɖée jó nú we. Un nɔ ɖɔ: “Mawu nyɛ tɔn ɔ́, hwi wɛ.” Gbɛ ce ɖo alɔ towe mɛ hwebǐnu; hwlɛ̌n mì ɖo kɛntɔ́ ce lɛ́ɛ sí, hwlɛ̌n mì ɖo mɛ e ɖo ya dó nú mì wɛ lɛ́ɛ sí. Nukún towe mɛ ní hɔ́n dó nyɛ mɛsɛntɔ́ towe jí, hwlɛ̌n mì ɖó xomɛnyínyɔ́ towe wú. Mawu Mavɔmavɔ, ma nú un ylɔ́ we bó lɛ́ ɖu winnyá ó. Mɛdídá lɛ́ɛ ní ɖu winnyá, nu yětɔn ní yi xɔ mɛkúkú ɖɔhun. Yě mɛ adingbannɔ nɛ́ lɛ́ɛ, goyítɔ́ nɛ́ lɛ́ɛ, wǎngbɛ́númɛtɔ́ nɛ́ lɛ́ɛ ɔ́, yě mɛ énɛ́ lɛ́ɛ e nɔ́ syɛ́n ta, bo nɔ́ kpɔ́n nukún mɛ nú hwɛjijɔnɔ é ɔ́, ɖɛ̌ yětɔn ní tɛ́. Mawu Mavɔmavɔ, mɛ e ɖo gbejí nú we lɛ́ɛ ɔ́, xomɛ e a nɔ nyɔ́ dó yě wú é d'agba mɛ nya! Mɛ e nɔ hɔn wá su we lɛ́ɛ ɔ́, xomɛnyínyɔ́ e a nɔ ɖe xlɛ́ yě ɖo gbɛtɔ́ lɛ́ɛ bǐ nukɔn ɔ́ d'agba lóóo! A nɔ sɔ́ yě hwlá ɖó fí e a ɖe é, bɔ yě nɔ́ gló gbɛtɔ́; a nɔ sɔ́ yě hwlá, bɔ nǔ nyanya e gbɛtɔ́ nɔ́ lin dó yě wú lɛ́ɛ ɖě nɔ́ ɖi yě wú ǎ. Mawu Mavɔmavɔ, un dó kú nú we, ɖó toxo e kɛntɔ́ kó xá ɔ́ ɖɔhun wɛ un cí, a ka nyɔ́ xomɛ dó wǔ ce. Ayi ce ko gbadó káká bɔ un ɖɔ: “Nyi ɖíe è nya sín nukɔn towe e.” Amɔ̌, hwenu e un ɖo vo sa wɛ, bó ɖo xó sú ylɔ́ we wɛ ɔ́, a se. Mi mɛ e ɖo gbejí nú Mawu Mavɔmavɔ lɛ́ɛ bǐ ní yí wǎn n'i, ɖó é nɔ́ nya xɛ ɖo mɛ e ɖi nǔ n'i lɛ́ɛ jí; amɔ̌, goyítɔ́ lɛ́ɛ ɔ́, Mawu Mavɔmavɔ nɔ sú nǔ e yě wa ɔ́ sín axɔ́ yě. Mi mɛ e ɖo te kpɔ́n Mawu Mavɔmavɔ lɛ́ɛ ɔ́, mi dó gǎn; mi kpan akɔ́n. È sɔ́ xó lómílómí dó han mɛ; Davídi sín han wɛ. Nǔ nyɔ́ nú mɛ e Mawu ɖe agɔ e é jɛ ɔ́ sín kɔ ná é; mɛ e Mawu sɔ́ nǔ e é wa nyi do ɔ́ kɛ é. Nǔ nyɔ́ nú mɛ e Mawu Mavɔmavɔ ma nɔ xa hwɛ dó kɔ ná ǎ é; mɛ e sín ayi mɛ ahizi ɖěbǔ ma ɖe ǎ é. Agɔ e un jɛ dó Mawu Mavɔmavɔ ɔ́, nú un ma ko ɖɔ ǎ jɛ́n wɛ ɔ́, un nɔ ɖo gbɛ vo sa wɛ ayǐhɔ́ngbe ayǐhɔ́ngbe, káká bɔ gǎn e ɖo wǔ ce ɔ́ bǐ nɔ́ jɛ vivɔ jí. Đó Mawu Mavɔmavɔ, zǎn kpó kéze kpó ɔ́, a nɔ ɖo nǔ dó sin xá mì wɛ, káká bɔ un xú dó te atín e alǔun hɛn ɔ́ ɖɔhun. Un ɖɔ dó ayi mɛ ɖɔ: “Un jɛ agɔ dó Mawu Mavɔmavɔ; un ná ɖɔ hwɛ ce lɛ́ɛ n'i.” Un ɖɔ hwɛ e un hu ɔ́ nú we, nǔ e un wa nyi do ɔ́, un hwlá dó we ǎ. Énɛ́ ɔ́, hwɛ ɔ́, a ɖe agɔ e un jɛ ɔ́ sín kɔ nú mì. Énɛ́ ɔ́ wú wɛ mɛ e ɖo gbejí nú we lɛ́ɛ wá tunwun ɖɔ émí hu hwɛ dó we ɔ́, émí ná nɔ́ xo ɖɛ sɛ́ dó we. Agbetawoyó na bo ɖi sin ɔ́, é nɔ́ yi yě gɔ́n ǎ. Hwi wɛ nyí bibɛtɛn ce; a nɔ lɔn nú adǎn nɔ gbo mì ǎ; un ná sú xó bó j'awǎ, ɖó alɔ e a nɔ cyɔ́n jǐ ce ɔ́ wú. Mawu Mavɔmavɔ ɖɔ: un ná ná nukúnnú mɔ jɛ nǔ mɛ we, un ná xlɛ́ ali e a ɖǒ ná gbɔn ɔ́ we; un ná kplɔ́n nǔ we; nukún ce ná ɖo jǐ towe: Mi ma jɔ xlo sɔ́ abǐ tócí ɖɔhun ó; ɖó gan kpó kpo kpó wɛ è nɔ dó nu nú yě, cóbɔ yě nɔ́ se gbe; énɛ́ ɔ́, nǔɖé ná wa we ǎ. Wǔvɛ́ gěgé wɛ ɖo te kpɔ́n mɛdídá. Lo ɔ́, mɛ e ɖeji dó Mawu Mavɔmavɔ wú ɔ́, xomɛnyínyɔ́ Mawu Mavɔmavɔ tɔn wɛ nɔ lɛ́ lɛ̌ dó e. Gbejínɔtɔ́ lɛ́ɛ mi, Mawu Mavɔmavɔ ní nyí awǎjijɛ mitɔn! Ayijlɔ́jlɔ́nɔ lɛ́ɛ mi, mi hun xomɛ; mi sú xó dó ɖe awǎjijɛ mitɔn xlɛ́. Gbejínɔtɔ́ lɛ́ɛ mi, mi sú xó ylɔ́ Mawu Mavɔmavɔ dó ɖe awǎjijɛ mitɔn xlɛ́. Ayijlɔ́jlɔ́nɔ lɛ́ɛ mi, susu kpa nú Mawu Mavɔmavɔ ɔ́, midɛɛ lɛ́ɛ wɛ é jɛ xá. Mi xo agǐdigbo dó kpa susu nú Mawu Mavɔmavɔ; mi ɖɔ xó lómílómí dó mlá ɛ dó han mɛ, bó xo kanhún kanwǒnɔ d'é mɛ. Mi ji han yɔ̌yɔ́ dó sɔ́ Mawu Mavɔmavɔ su; mi xo nǔ ní víví ganjí dó kpa awǒbóbó n'i, ɖó xó e Mawu Mavɔmavɔ nɔ ɖɔ ɔ́ nɔ́ xwe ali, nǔ e Mawu Mavɔmavɔ nɔ bló ɔ́ bǐ nɔ́ ná jiɖiɖe. Mawu Mavɔmavɔ yí wǎn nú hwɛjijɔ kpó nǔjlɔ́jlɔ́wiwa kpó. Xomɛnyínyɔ́ Mawu Mavɔmavɔ tɔn gba kpé gbɛ ɔ́ bǐ mɛ. Xó wɛ Mawu Mavɔmavɔ dó bló jǐnukúnsin ná; gbe wɛ é ɖe bɔ nǔ tobutóbú e nɔ́ ná wěziza ɖo jǐnukúnsin lɛ́ɛ tíin. É kplé sin lɛ́ɛ dó fí ɖokpó; é glɔ́n xusin lɛ́ɛ dó do ɖaxó ɖaxó mɛ. Ayǐkúngban ɔ́ bǐ ní ɖó sísí nú Mawu Mavɔmavɔ; gbɛtɔ́ e ɖo gbɛ ɔ́ mɛ lɛ́ɛ bǐ ní sísɔ́ ɖo nukɔn tɔn; ɖó é ɖɔ xó bɔ gbɛ ɔ́ tíin; é ɖe gbe bɔ nǔ lɛ́ɛ bǐ tɔ́n. Mawu Mavɔmavɔ nɔ hɛn wě e ɖe wɛ akɔta lɛ́ɛ ɖe ɔ́ gblé, é nɔ́ glɔ́n ali nú togun lɛ́ɛ sín tito. Wě e Mawu Mavɔmavɔ nɔ́ ɖe ɔ́ nɔ́ nyí tɛgbɛ nú, tito tɔn lɛ́ɛ nɔ́ nyí wiwa, bɛ́ sín jijimɛ ɖě mɛ yi jɛ ɖěvo mɛ káká sɔ́yi. Nǔ nyɔ́ nú akɔta e nɔ sɛn Mawu Mavɔmavɔ ɖokpónɔ é; nǔ nyɔ́ nú togun e Mawu Mavɔmavɔ sɔ́ dó ɖó togun tɔn é. Mawu Mavɔmavɔ ɖo nǔ kpɔ́n wɛ sín jǐxwé aga; é nɔ́ mɔ gbɛtɔ́ lɛ́ɛ bǐ. Mawu Mavɔmavɔ ɖo nɔtɛn tɔn, bó nyi kɔ kpɔ́n mɛ e ɖo ayǐkúngban jí lɛ́ɛ bǐ. É mɛ e bló ayi dó xomɛ nú yě bǐ ɔ́, é ɖo nǔ e wa wɛ yě ɖe lɛ́ɛ bǐ kpɔ́n wɛ tlítlí. Ahwanfuntɔ́ gěgé wɛ nɔ́ zɔ́n bɔ axɔ́sú nɔ́ gán ɖo ahwangbénu ǎ; hlɔ̌nhlɔ́n ɖaxó wɛ nɔ́ hwlɛ́n súnnu glegbenu gán ǎ. Sɔ́ hɛn yi ahwan fun gbé ɔ́, mɛɖée blɛ́blɛ́ wɛ; sɔ́ na bo dó hlɔ̌nhlɔ́n gbɔn ɖěbǔ ɔ́, é wɛ ná hwlɛ́n we ǎ. Lo ɔ́, Mawu Mavɔmavɔ sín nukún nɔ́ ɖo mɛ e nɔ́ nɔ gbejí n'i lɛ́ɛ jí, mɛ e nɔ ɖó nukún xomɛnyínyɔ́ tɔn lɛ́ɛ, bó ná dó hwlɛ́n yě sín kú sí; bɔ adɔ na bo tɔ́n ɔ́, é ná hɛn yě ɖó gbɛ. Mǐdɛɛ lɛ́ɛ ɔ́, Mawu Mavɔmavɔ wú wɛ mǐ gán jɛ; é wɛ nyí alɔdó mǐtɔn, bó nyí gǎglónú mǐtɔn. É wɛ zɔ́n bɔ xomɛ mǐtɔn bǐ gba wɔ̌. Mǐdɛɛ lɛ́ɛ ɔ́, mǐ ɖeji dó Mawu mímɛ́ ɔ́ wú. Mawu Mavɔmavɔ, xomɛnyínyɔ́ towe ní nɔ kpɔ́ xá mǐ, ɖó hwi wɛ mǐ ɖo te kpɔ́n. Davídi sín han. Hwenu e é vlɛ́ nǔwanǔmɔnɔ ɖo Abimɛlɛ́ki nukɔn, bɔ é nya ɛ, bɔ é ɖidó ɔ́ wɛ é ji han élɔ́. Un ná nɔ́ dó kú nú Mawu Mavɔmavɔ hwebǐnu, nu ce ná gɔn mlǎmlá ɛ gbeɖé ǎ. Mawu Mavɔmavɔ mɛ wɛ un nɔ gó ɖe; mɛ e zé yěɖée hwe lɛ́ɛ ní ɖótó mì bó j'awǎ. Mi kpa susu nú Mawu Mavɔmavɔ xá mì! Mi nú mǐ nǎ nɔ kpɔ́ bó ná sɔ́ nyǐkɔ tɔn su! Un ylɔ́ Mawu Mavɔmavɔ bɔ é yí gbe nú mì, é ɖe mì sín nǔ e ɖo xɛsi dó nú mì wɛ lɛ́ɛ bǐ mɛ. Mɛ e sín nukún ɖo Mawu Mavɔmavɔ wú lɛ́ɛ nɔ́ nɔ awǎjijɛ mɛ; yě nɔ́ ɖu winnyá gbeɖé ǎ. Nyɛ lelenɔ ɖíe sú xó ylɔ́ Mawu Mavɔmavɔ e, bɔ é se bó hwlɛ́n mì gán ɖo nǔ e ɖo hǔn hɛn nú mì wɛ lɛ́ɛ bǐ mɛ. Wɛnsagun Mawu Mavɔmavɔ tɔn nɔ nya xɛ ɖo mɛ e nɔ́ nɔ gbejí nú Mawu Mavɔmavɔ lɛ́ɛ jí, bó nɔ́ hwlɛ́n yě. Mi ɖɔ́ Mawu Mavɔmavɔ kpɔ́n bó kpɔ́n lě e é nyɔ́ sɔ é. Nǔ nyɔ́ nú mɛ e nɔ hɔn yi su Mawu Mavɔmavɔ é. Mi mɛ e nyí Mawu Mavɔmavɔ tɔn lɛ́ɛ mi, mi ɖó sísí nú Mawu Mavɔmavɔ, ɖó nǔɖé nɔ́ hwedó mɛ e nɔ ɖó sísí n'i lɛ́ɛ ǎ. Kinnikínní ví lɛ́ɛ nɔ́ ba nǔɖuɖu kpo, bó nɔ́ nɔ xovɛ́; lo ɔ́, mɛ e nɔ sú xó ylɔ́ Mawu Mavɔmavɔ lɛ́ɛ ɔ́, nǔ ɖěbǔ nɔ hwedó yě ǎ. Vǐ ce lɛ́ɛ mi, mi wá, mi ɖótó mì; un nǎ kplɔ́n mi sísí ɖó nú Mawu Mavɔmavɔ. Ényí a yǐ wǎn nú gbɛ, bó jló ná dɔ́ ji hǔn, hɛn nu towe, ma nɔ ɖɔ xó nyanya ó, ma nɔ ɖó adingban ó, hɔn nú nǔ nyanya wiwa, nɔ wa nǔ ɖagbe; nɔ ba fífá, bó nɔ́ jɛ hun d'é jí. Mawu Mavɔmavɔ sín nukún nɔ́ nɔ mɛ e nɔ wa nǔ jlɔ́jlɔ́ lɛ́ɛ jí. Tó tɔn ɖo te, bó nɔ se xó e yě ná sú é, Mawu Mavɔmavɔ nɔ húzú kpan nukɔn mɛdídá lɛ́ɛ, bó nɔ́ sú kún yětɔn dó, bɔ mɛɖé sɔ́ nɔ flín yě ɖo ayǐkúngban ɔ́ jí ǎ. Ényí mɛ e ɖo gbejí n'i lɛ́ɛ sú xó ɔ́, é nɔ́ se, bó nɔ́ hwlɛ́n yě ɖo nǔ e ɖo hǔn hɛn nú yě wɛ lɛ́ɛ bǐ mɛ. Mawu Mavɔmavɔ ɖo kpɔ́ xá mɛ e ayi yětɔn gbadó lɛ́ɛ, é nɔ́ hwlɛ́n mɛ e nǔ jɛ akɔ́n jí ná lɛ́ɛ. Adǎn gěgé nɔ́ gbo gbejínɔtɔ́, Mawu Mavɔmavɔ ka nɔ hwlɛ́n ɛ sín bǐ mɛ. É nɔ́ kpé nukún dó xú tɔn lɛ́ɛ bǐ wú, bɔ ɖokpó géé nɔ́ wɛ́n ǎ. Nǔnyanyawatɔ́ ná kú nǔ nyanya kú, Mawu Mavɔmavɔ ná dɔn tó nú mɛ e jɛ gǒ mɛ nú gbejínɔtɔ́ lɛ́ɛ. Mawu Mavɔmavɔ nɔ hwlɛ́n mɛsɛntɔ́ tɔn lɛ́ɛ gán; é nɔ ɖó hwɛ nú mɛ e nɔ hɔn wá su i lɛ́ɛ ɖě ǎ. Davídi sín han. Mawu Mavɔmavɔ, li za xá mɛ e ɖo za li xá mì wɛ lɛ́ɛ, fun ahwan xá mɛ e ɖo ahwan fun xá mì wɛ lɛ́ɛ. Zě gǎglónú kpɛví kpó ɖaxó kpó, sí te, bó wá gɔ́ alɔ nú mì. Zě hwǎn kpó asyɔ́ví nuwenɔ kpó dó mɛ e ɖo ya dó nú mì wɛ lɛ́ɛ jí; ɖɔ nú mì ɖɔ: “Nyi wɛ nyí hwlɛngán towe.” Mɛ e ɖo kú ce ba wɛ lɛ́ɛ ɔ́, wi yětɔn ní kɔ́n, yě ní ɖu winnyá. Mɛ e ɖo nyanya ce lin wɛ lɛ́ɛ ní ba nu tɔn kpo bo jó agɔ dó gǔdo. Hwenu e wɛnsagun Mawu Mavɔmavɔ tɔn ná ɖo yě nya wɛ ɔ́, yě ní cí nǔywɛ́ e mɛ jɔhɔn d'alɔ, bó ɖo zǐzé kpé wɛ ɔ́ ɖɔhun. Hwenu e wɛnsagun Mawu Mavɔmavɔ tɔn ná jɛ gǔdo yětɔn ɔ́, ali e jí yě ɖe ɔ́ ní d'ablu bo ɖíɖí. Un wa nǔɖé nyi do nú yě ǎ, yě ká kun do ɖó alixo nú mì, bó sɔ́ nǔ nyi nu. Un jɛ agɔ ɖé dó yě ǎ, yě ká kun do bónú ma jɛ mɛ bó kú. Adǎn ma ɖó nukún ní fyán yě, mɔ e yě ɖó nú mì ɔ́, yě ɖésú ní jɛ mɛ; yě ní jɛ yɔdo e yě kun ɖ'ayǐ nú mì ɔ́ mɛ. Énɛ́ ɔ́, un ná j'awǎ ɖo Mawu Mavɔmavɔ mɛ, xomɛ ná hun mì ɖó é hwlɛ́n mì gán. Un ná ɖɔ kpó ayi ce bǐ kpó ɖɔ: “Mɛ̌ ka sixú hwlɛ́n gbɛ̌dónɔ sín mɛ e hú gǎn ɛ ɔ́ lɔmɛ hwi ɖɔhun? A nɔ yí gbɛ̌dónɔ kpó wamamɔnɔ kpó sín mɛ e ɖo afú tá yě wɛ ɔ́ sí.” Kúnnu -agɔɖetɔ́ lɛ́ɛ sí te dó jǐ ce, yě nɔ́ kan nǔ byɔ́ mì dó nǔ e un ma mɔ do ná ǎ é wú. Yě nɔ́ sɔ́ nyanya dó sú ɖagbe xɔ́ mì; nyi ɖokpónɔ ɖíe wá kpo e. Nyɛ ɔ́, hwenu e kɛntɔ́ ce lɛ́ɛ ɖo azɔn jɛ wɛ ɔ́, wǔ kú mì bɔ un sɔ́ caki dó, bó ɖe xlɛ́, un blá nu dó sɔ́ nyɛɖée hwe. Un xo ɖɛ ɔ́, un nɔ lɛ́ xo. Un nɔ ɖo yiyi wɛ wǔbláwúblá, xɔ́ntɔn ce ɖé abǐ nɔví ce ɖé wɛ nǔ wa ɖɔhun. Un nɔ jɛ aluwɛ mɛ, bó nɔ ɖo yiyi wɛ, bó nɔ́ ɖo wǐwá wɛ nɔ ce wɛ kú ɖɔhun. Nǔɖé ka wa nyɛ ɔ́, é nɔ́ víví nú akɔta ɖěvo mɛ nu lɛ́ɛ, yě mɛ e un ma tunwun ǎ lɛ́ɛ, bɔ yě nɔ́ sɛ yěɖée kplé; yě nɔ́ kpléta dó wǔ ce, bó ná wa nǔ xá mì, yě nɔ́ ɖo tagba dó nú mì wɛ hwebǐnu, yě mɛ dǎkaxotɔ́ lɛ́ɛ kpó mɛcákotɔ́ lɛ́ɛ kpó; yě mɔ mì lě ɔ́, yě nɔ́ tɛ aɖǔma. Aklúnɔ, káká jɛ hwetɛ́nu wɛ a nǎ tin kpɔ́n nǔ mɔ̌hun yi jɛ? Cyɔ́n alɔ jǐ ce, bó ɖe mì sín ya e dó nú mì wɛ yě ɖe é mɛ, hwlɛ̌n mì ɖo kinnikínní ví nɛ́ lɛ́ɛ sí. Énɛ́ ɔ́, togun towe kplé ɔ́, un ná dó kú nú we, un ná kpa susu nú we ɖo ahwan wɔ̌buwɔ́bú énɛ́ mɛ. Ma lɔn nú yě mɛ e nɔ yǎyá bó dó kɛn mì lɛ́ɛ ɖú ahwannɔwe ó. Yě mɛ e nɔ mɔ̌ kpowun bo gbɛ́ wǎn nú mì lɛ́ɛ ɔ́, ma lɔn nú yě ko mì ó. Đó xó e nɔ tɔ́n sín nu yětɔn mɛ lɛ́ɛ ɖě nɔ́ nyí xó e nɔ́ ná fífá mɛ é ǎ. Adingban wɛ yě nɔ́ ɖó dó mɛ e ma ɖo mɛɖé xó mɛ, ɖo to ɔ́ mɛ ǎ lɛ́ɛ nu. Yě vlɔ́n vɛ̌gokan bó ɖɔ: “Wǒóo nú we! Mǐ ɖésú wɛ mɔ we ɖ'é kɔn!” Mawu Mavɔmavɔ, a ka ɖo nǔ énɛ́ lɛ́ɛ mɔ wɛ mɛ! Ma tin dó ó. Aklúnɔ, ma nɔ zɔ nú mì ó. Mawu Mavɔmavɔ, sí te! Sí te bó wá ɖɔ hwɛjlɔ́jlɔ́ nú mì. Mawu ce, Aklúnɔ ce, wǎ jɛ ahwan jǐ ce. Mawu Mavɔmavɔ, Mawu ce, ɖɔ hwɛ ce ní sɔgbe xá lě e a nɔ ɖɔ hwɛ gbɔn é, nú yě má ɖú ahwannɔwe ó. Yě ní ma ɖɔ dó xo mɛ ɖɔ: “Acɔnkwín! Nǔ e ba wɛ mǐ ɖe ɔ́ nɛ́” ó. Yě ní má ɖɔ: “Mǐ wa xá ɛ nɛ́” ó. Yě mɛ e nǔ wa mì, bɔ é víví nú yě lɛ́ɛ bǐ ní flú bó ɖu winnyá. Yě mɛ e sí te dó jǐ ce lɛ́ɛ bǐ ní ɖu winnyá bó ɖu hɛ̌n. Amɔ̌, mɛ e ɖo te kpɔ́n ɖɔ è nǐ ɖe tɔ mì, ɖɔ xomɛvɔ́ wɛ un ɖe lɛ́ɛ ɔ́, yě ní kpa awǒbóbó bó j'awǎ. Yě ní nɔ ɖɔ hwebǐnu ɖɔ: “Susu nú Mawu Mavɔmavɔ e jló ɖɔ mɛsɛntɔ́ tɔn ní mɔ fífá é.” Énɛ́ ɔ́, un ná nɔ kpa nǔjlɔ́jlɔ́wiwa towe, bó ná nɔ́ kpa susu nú we ayǐhɔ́ngbe ayǐhɔ́ngbe. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi mɛsɛntɔ́ Mawu Mavɔmavɔ tɔn ɔ́ sín han wɛ. Xó ɖé ɖo xo ce mɛ bɔ un ná ɖɔ dó gǔ e mɛdídá nɔ́ fɔ́n é wú, é tunwun nǔ e é ná ɖó sísí nú Mawu dó wa ná é ǎ. É nɔ́ mɔ ɖɔ émí kó nyɔ́ dín, bó sɔ́ nɔ́ mɔ nǔ e é nɔ́ wa nyi do é, bó ná gbɛ́ wǎn ná ǎ. É kɛ nu ɔ́, adingban jɛ́n é nɔ́ ɖó; mɛ jɛ́n é nɔ́ blɛ́; é nɔ ba ná wa nǔ kpó nǔnywɛ́ kpó ǎ, é nɔ́ ba ná wa nǔ ɖagbe ɖě ǎ. É mlɔ́ ayǐ ɔ́, nǔ ma sɔgbe kɛ́ɖɛ́ wɛ é nɔ́ lin, ali e ma nyí ali ɖagbe ǎ é wɛ é nɔ́ wlí, é nɔ́ hɔn nú nǔ nyanya wiwa ǎ. Mawu Mavɔmavɔ, xomɛnyínyɔ́ towe d'agba káká yi jǐxwé, gbejíninɔ towe yi káká akpɔ́kpɔ́ lɛ́ɛ mɛ. Hwɛjijɔ towe yi jǐ sɔ só e hú ga só lɛ́ɛ bǐ é, lě e a nɔ gbo hwɛ gbɔn ɔ́ yi do hú xu ɖaxó ɔ́ sín azan jí. Mawu Mavɔmavɔ, a nɔ hwlɛ́n gbɛtɔ́ kpó kanlin kpó. Mawu ce, xomɛnyínyɔ́ towe xɔ akwɛ́ lóóo! Gbɛtɔ́ lɛ́ɛ nɔ hɔn hwlá cí awa towe lɛ́ɛ glɔ́. Nǔɖuɖu ɖagbe ɖagbe e ɖo xwé towe gbe ɔ́ wɛ yě nɔ́ ɖu bó nɔ́ gɔ́ xo; xomɛnyínyɔ́ towe wɛ nyí tɔsisa bɔ yě nɔ́ nu. Đó hwi gɔ́n wɛ gbɛ ɔ́ jɔ sín, wěziza towe wɛ nɔ́ ná wěziza mǐ. Ma gɔn xomɛnyínyɔ́ towe ɖe xlɛ́ mɛ e tunwun we lɛ́ɛ ó, ma gɔn gbejíninɔ towe ɖe xlɛ́ mɛ e ɖó ayijlɔ́jlɔ́ lɛ́ɛ ó. Afɔ e gbɛtɔ́ goyítɔ́ nyi dó mì ɔ́ ní má jɛ wǔ ce ó; mɛdídá lɛ́ɛ ní má nya mì dó wezun nu ó. Dǎkaxotɔ́ lɛ́ɛ nɛ́ j'ayǐ nɛ́; yě j'ayǐ bɔ fínfɔ́n gló. Davídi sín han. Ma sin xomɛ dó mɛdídá lɛ́ɛ ó, ma jló mɛ e nɔ wa nǔ nyanya lɛ́ɛ sín gbɛ ó, ɖó yě ná mlú ɖa ama ɖɔhun, gběhan ɖɔhun wɛ yě ná xú. Đe ji dó Mawu Mavɔmavɔ wú, bó nɔ wa ɖagbe; nɔ to ɔ́ mɛ, bó ná mɔ fífá. Sɔ́ Mawu Mavɔmavɔ dó ɖó nǔ e víví nú we hú nǔ bǐ é; énɛ́ ɔ́, é ná ná nǔ e ɖo hǔn mɛ nú we lɛ́ɛ we. Sɔ́ gbɛ towe jó nú Mawu Mavɔmavɔ, gǎn jɛ wǔ tɔn, é ná wa azɔ̌ tɔn. É ná ɖe hwɛjijɔ towe xlɛ́ hwe tɔ́n ɖɔhun; é ná ɖe nǔjlɔ́jlɔ́wiwa towe xlɛ́, bɔ mɛ bǐ ná mɔ hwe ɖo hwǎn ɖɔhun. Tin xwíí ɖo Mawu Mavɔmavɔ nukɔn, bó nɔ te kpɔ́n ɛ, ma hwlɛ́n dó ó. Ma sin xomɛ dó mɛ e lɛ́n nǔɖé ɔ́, é nɔ́ kpé wú ɔ́ ó, ma sin xomɛ dó mɛ e nɔ ɖo ayi wínníwínní zán wɛ ɔ́ ó. Jǒ xomɛsin dó, jǒ hunnylánylá dó, ma sin xomɛ ó, a táá wa nǔ nyi do. Đó è nǎ sú mɛdídá lɛ́ɛ kún dó sín to ɔ́ mɛ, bɔ to ɔ́ ná nyí mɛ e ɖeji dó Mawu Mavɔmavɔ wú lɛ́ɛ tɔn. Zaanɖé din ɔ́, mɛdídá sɔ́ ná ɖe ǎ; a nyi kɔ kpɔ́n fí e é nɔ ɔ́, a sɔ́ ná mɔ ɛ ǎ. To ɔ́ ká ná nyí mɛ e nɔ sɔ́ yěɖée hwe lɛ́ɛ tɔn, bɔ fífá ma ɖó dogbó e yě ná mɔ ɔ́ wɛ ná nyí nǔ e ná nɔ́ víví nú yě é. Mɛdídá nɔ́ lin hwɛjijɔnɔ sín nyanya, xomɛ tɔn nɔ sin i káká bɔ é nɔ́ ɖu aɖǔkún. Lo ɔ́, Aklúnɔ nɔ ɖo kiko e wɛ, ɖó é mɔ ɖɔ azǎn tɔn kó vɔ. Mɛ nyanya lɛ́ɛ nɔ́ sún hwǐ, yě nɔ́ tlɔ́ gǎ, bó ná hu gbɛ̌dónɔ kpó mɛ ma ɖó mɛɖé kpó, bó ná gbo gbe mɛ e ɖo ali jlɔ́jlɔ́ jí é. Yě ɖésúnɔ sín hǔn wɛ hwǐ yětɔn ka ná xo zlɛ́, bɔ gǎ yětɔn ná wɛ́n. Nǔ kpɛ e ɖo hwɛjijɔnɔ sí ɔ́, nyɔ́ hú wɔ̌buwɔ́bú e ɖo mɛdídá lɛ́ɛ bǐ sí é. Đó è nǎ wɛ́n awa mɛdídá lɛ́ɛ, Mawu Mavɔmavɔ ka ná sɔ́ hwɛjijɔnɔ lɛ́ɛ sín alɔ d'aga. Mawu Mavɔmavɔ nɔ kpé nukún dó mɛ e nɔ se tónú n'i lɛ́ɛ wú, mɛ e wú è ma nɔ mɔ nǔɖé ɖɔ dó ǎ lɛ́ɛ wú; to e é ná yě ɔ́ ná nyí yětɔn káká sɔ́yi. Yě ná ɖu winnyá ɖo azǎn nyanya gbe ǎ, adɔ hwenu ɔ́, yě ná mɔ nǔ ɖu bó gɔ́ xo. Lo ɔ́, mɛdídá lɛ́ɛ ná dɔn; Mawu Mavɔmavɔ kɛntɔ́ lɛ́ɛ cí folówa e ɖo gběhan mɛ é ɖɔhun; yě ná mlú ɖa; yě ná ji kɛn ɖo myɔ mɛ. Mɛdídá nya nǔ ɖo mɛ sí ɔ́, é sɔ́ nɔ́ jó ǎ; nǔjlɔ́jlɔ́watɔ́ ká nɔ́ hun alɔ bó nɔ́ ná nǔ mɛ. To ɔ́ ná nyí mɛ e jí Mawu Mavɔmavɔ xo ɖɛ dó lɛ́ɛ tɔn; mɛ e Mawu Mavɔmavɔ dó nu lɛ́ɛ ɔ́, é ká ná sú kún yětɔn dó sín to ɔ́ mɛ. Mɛ ɖé sín walɔ nyɔ́ Mawu Mavɔmavɔ nukún mɛ ɔ́, é nɔ́ bló bɔ mɛ ɔ́ nɔ́ yi nukɔn ɖo gbɛzán tɔn mɛ kpó jiɖiɖe kpó. É ná bo j'ayǐ ɔ́, é nɔ́ cí kɔ́ mɛ ǎ, ɖó Mawu Mavɔmavɔ nɔ hɛn alɔ tɔn, bó nɔ́ sɔ́ ɛ sí te. Un ko nɔ dɔ̌nkpɛ mɛ kpɔ́n có bó wá kpo din; un ka mɔ Mawu jó hwɛjijɔnɔ lɛ́ɛ dó kpɔ́n ǎ, un ka mɔ vǐ yětɔn lɛ́ɛ ɖě byɔ́ nǔ ɖu kpɔ́n ǎ. Hwɛjijɔnɔ nɔ hun alɔ bó nɔ ná nǔ mɛ hwebǐnu, bɔ vǐ tɔn lɛ́ɛ nɔ́ ɖu le tɔn. Jǒ nyanya wiwa dó, bó wa ɖagbe; énɛ́ ɔ́, a nǎ ɖó nɔtɛn káká sɔ́yi. Đó Mawu Mavɔmavɔ yí wǎn nú nǔ wa ɖó sɛ́nxwi jí; é nɔ́ jó mɛ e nyí étɔn lɛ́ɛ dó ǎ. É nɔ́ ɖo nukún kpé dó yě wú wɛ tɛgbɛ. Lo ɔ́, Mawu Mavɔmavɔ ná sú mɛdídá lɛ́ɛ sín kún dó bǐ gbídígbídí. To ɔ́ ná nyí hwɛjijɔnɔ lɛ́ɛ tɔn, bɔ yě ná nɔ mɛ káká sɔ́yi. Hwɛjijɔnɔ kɛ nu ɔ́, nǔnywɛ́ kɛ́ɖɛ́ wɛ nɔ́ tɔ́n sín nu tɔn mɛ, xó jlɔ́jlɔ́ kɛ́ɖɛ́ wɛ é nɔ́ ɖɔ. Mawu tɔn sín sɛ́n nɔ́ nɔ ayi tɔn mɛ; é nɔ́ ɖe afɔ nyi do ǎ. Mɛdídá nɔ́ ɖo wu yi nú hwɛjijɔnɔ wɛ, bó nɔ́ ɖo hwenu e é ná mɔ tɛn ɖo wǔ tɔn bó hu i é ba wɛ. Mawu Mavɔmavɔ ka nɔ jó e dó nyi alɔ tɔn mɛ ǎ. É yi hwɛ nukɔn ɔ́, Mawu Mavɔmavɔ nɔ jó e dó bɔ è nɔ ɖó hwɛ n'i ǎ. Nɔ te kpɔ́n Mawu Mavɔmavɔ, bó nɔ ali e é ɖe nú we ɔ́ jí, é ná sɔ́ we dó jǐ, bɔ to ɔ́ ná nyí towe. A nǎ mɔ bɔ è nǎ sú mɛdídá lɛ́ɛ sín kún dó sín to ɔ́ mɛ. Un mɔ mɛdídá bɔ é ɖo hlɔ̌nhlɔ́n sa wɛ; é ɖo vunvun wɛ atín e ayǐ nyɔ́ ná ganjí é ɖɔhun. Ée un lɛ́ wá gbɔn fínɛ́ ɔ́, un sɔ́ mɔ mɛɖé ǎ, un ba ɛ káká, un ka sɔ́ mɔ ɛ ǎ. Kpɔ́n gbɛtɔ́ e xo tɔn mɛ ɖo wɛn é, kpɔ́n gbɛtɔ́ ayijlɔ́jlɔ́nɔ, a nǎ mɔ ɖɔ gbɛtɔ́ mɔ̌hun nɔ́ ɖó donu. Lo ɔ́, è nɔ vívá kún gǔfɔ́ntɔ́ lɛ́ɛ bǐ tɔn; mɛdídá lɛ́ɛ nɔ́ ɖó vǐ donu ǎ. Mawu Mavɔmavɔ gɔ́n wɛ hwɛjijɔnɔ lɛ́ɛ sín hwlɛngán nɔ́ gosín, é wɛ nyí bibɛtɛn yětɔn adǎngbomɛzán gbe. Mawu Mavɔmavɔ nɔ gɔ́ alɔ nú yě, bó nɔ́ hwlɛ́n yě; é nɔ́ yí yě sín mɛdídá lɛ́ɛ sí, bó nɔ́ hwlɛ́n yě gán, ɖó é wɛ yě nɔ́ hɔn yi su. Davídi sín han; é nɔ́ ji bónú Mawu ná flín i. Mawu Mavɔmavɔ, ma ɖo xomɛsin jí bó dɔn tó nú mì ó; ma ɖo adǎn jí, bó ɖó hwɛ nú mì ó. Gǎ towe lɛ́ɛ kó jɛ wǔ ce; alɔ towe ko jɛ wǔ ce. Nǔ ɖěbǔ sɔ́ ɖo ganjí ɖo wǔ ce ǎ, ɖó xomɛsin e jí a ɖe é wú; nǔɖé sɔ́ ɖo ganjí ɖo xú ce lɛ́ɛ wú ǎ, ɖó hwɛ e un hu lɛ́ɛ wú. Hwɛ ce lɛ́ɛ kplé káká bó yi jǐ hú mì; hwɛ ce lɛ́ɛ ɖo kpinkpɛn mì wɛ agban ɖɔhun. Akpa e ɖo wǔtu ce lɛ́ɛ dó kpan bó vó, ɖó gǔgú ce wú. Nyi ɖésúnɔ bǐ wɛ xá; adǎn wɛ ɖo gbigbo mì wɛ sɔ mɔ̌ nɛ́; un ko fɔ́n tɛgbɛ ɔ́, un nɔ ɖo yiyi wɛ wǔbláwúblá, ɖó alin ce bǐ nɔ́ ɖo wlǐwlí wɛ; nǔɖé sɔ́ ɖo ganjí ɖo wǔ ce ǎ. Gǎn ɖé sɔ́ ɖo wǔ ce ǎ; lan ce mɛ bǐ wɛ gba; wǔvɛ́ mɔ wɛ un nɔ ɖe ɖo ayi mɛ sɔ mɔ̌, bó gbɔ bó nɔ́ ɖo azɔn wɛn wɛ. Nǔ e ɖo hǔn mɛ nú mì lɛ́ɛ ɔ́, Aklúnɔ, a mɔ nǔ jɛ bǐ wǔ. Azɔn e wɛn wɛ un ɖe ɔ́, a gɔn sise ǎ. Ayi ce ɖo jojo dán wɛ, hlɔ̌nhlɔ́n ce bǐ vɔ; nukún ce sɔ́ ɖo nǔ mɔ wɛ ǎ. Xɔ́ntɔn ce lɛ́ɛ kpó hǎgbɛ́ ce lɛ́ɛ kpó hɔn nú mì ɖó azɔn e jɛ wɛ un ɖe ɔ́ wú; mɛ e nyí mɛ ce lɛ́ɛ lɔmɔ̌ sɛ yi zɔ nú mì. Mɛ e ɖo kú ce ba wɛ lɛ́ɛ nɔ́ ɖo mɔ ɖó nú mì wɛ; mɛ e ɖo nyanya ce ba wɛ lɛ́ɛ nɔ́ ɖo gbě ce blá wɛ, bó nɔ́ ɖo nǔ ce ɖɔ wɛ káká bɔ zǎn nɔ́ kú. Nyɛ ɔ́, un ka cí tókúnɔ ɖɔhun; un nɔ se nǔ ǎ. Un cí mɛ e ɖɛ̌ tɔn kú ɔ́ ɖɔhun; un nɔ kɛ nu ǎ. Un cí mɛ e ma nɔ se nǔ ǎ ɖɔhun; mɛ e ma nɔ gblɔ́n nú mɛ ǎ ɖɔhun. Mawu Mavɔmavɔ, hwi ɖó nukún wɛ un ka ɖe; Aklúnɔ Mawu ce, hwi wɛ ná gblɔ́n nú yě. Un ɖɔ: Ma lɔn nú nǔɖé wa mì, bónú yě ɖú ahwannɔwe ó; ma lɔn nú afɔ ce xo dɔjɔ, bónú yě mɔ ali dó wǔ ce ó; ɖó din ɔ́, ɖibla j'ayǐ wɛ un ko ɖe, wǔvɛ́ e mɔ wɛ un ɖe ɔ́ ká kó xwɛ ǎ. Un yí hwɛ ce lɛ́ɛ gbe. Xɛsi ɖo jǐ ce ɖó hwɛ e un hu lɛ́ɛ wú. Gbɛ ɖo kɛntɔ́ ce lɛ́ɛ wú ganjí; hlɔ̌nhlɔ́n ɖo yě wú ganjí. Mɛ e nɔ yǎyá bó gbɛ́ wǎn nú mì lɛ́ɛ sukpɔ́. Nyanya wɛ yě nɔ́ dó sú ɖagbe xɔ́ mì; ɖagbe e un wa é wɛ nyí kɛn bɔ yě dó mì. Mawu Mavɔmavɔ, ma jó mì dó ó; Mawu ce, ma nɔ zɔ nú mì ó. Aklúnɔ mɛhwlɛ́ngántɔ́ ce, yǎ wǔ wá gɔ́ alɔ nú mì! Hanjigbɛ́gán Yedutún sín hanjiwéma mɛ wɛ han élɔ́ ɖe. Davídi sín han wɛ. Đ'ayǐ ɔ́, un nɔ ɖɔ: “Un ná kpɔ́n afɔ bo ɖe, bó ma wá kɛ nu nyi do bo hu hwɛ ó; un ná nɔ́ hɛn nu ce ɖo gbɛtɔ́ mɛ, ɖo gbɛtɔ́ dídá lɛ́ɛ mɛ, nú tɛ́ntin yětɔn jɛ́n un ɖe ɔ́ nɛ́.” Énɛ́ ɔ́, un gbɔ bo bɔ nu dó aɖǔ; un sɔ́ ɖo nu kɛ wɛ ǎ; un gbɛ́ ɖɔ un kún ná ɖɔ xó ɖé ó, có nǔ e ɖo gbigbo mì wɛ ɔ́, jijɛ jí wɛ jɛ́n é ɖe. Hǔn ce nɔ́ ɖo myɔ ji wɛ ɖo xo ce mɛ; azɔn e wɛn wɛ un ɖe é ɖo myɔ kán wɛ, bɔ xó ɖé wá nu ce bɔ un ɖɔ: Mawu Mavɔmavɔ, ɖɔ hwenu e gbɛ ce ná vɔ dó ɔ́ nú mì. Đɔ azǎn nabí e un ná nɔ gbɛ xɔ ɔ́ nú mì, bónú má tunwun ɖɔ un kún nyí nǔɖé ó. Éɖíe, gbɛzán e a nǎ mì ɔ́, ga tɔn ɔ́, alɔbá ɖokpó wɛ; azǎn nabí e un ná nɔ gbɛ xɔ ɔ́ nyí nǔɖé ɖo nukɔn towe ǎ; nǔgbó wɛ, gbɛtɔ́ e ɖo te ɔ́ bǐ ɔ́, jɔhɔn kpowun wɛ. Ɛɛn, gbɛtɔ́ nɔ́ ɖo yiyi wɛ, bó nɔ́ ɖo wǐwá wɛ yɛ ɖɔhun; é nɔ́ ɖo kan xo wɛ, jɔhɔn kpowun wɛ é ká nyí; é nɔ́ ɖo dɔkun kplé ɖ'ayǐ wɛ, bó ká tunwun mɛ e ná wá ɖu ɔ́ ǎ. Aklúnɔ, din ɔ́, étɛ́ wɛ un ka sixú ɖó nukún? Hwi ɖó nukún wɛ un ɖe. Xɔ mì ɖo hwɛ e un hu lɛ́ɛ bǐ mɛ. Ma jó mì dó nú má ɖu winnyá ɖo xlonɔ lɛ́ɛ nukɔn ó. Un ɖo xwíí, un ɖo nu kɛ wɛ ǎ, ɖó hwi wɛ ɖo nǔ wa xá mì wɛ. Gbɔ, ma sɔ́ xo mì ɖě ó. Un sɔ́ sixú dɛ ɖo nǔ e dó mì wɛ a ɖe ɔ́ nu ǎ. A nɔ dɔn tó nú gbɛtɔ́ ɖó hwɛ tɔn lɛ́ɛ wú, bó ná dó gbɛ́ nǔ n'i. A nɔ hɛn nǔ e vɛ́ n'i lɛ́ɛ gblé wǎn ɖu atínsínsɛ́n ɖɔhun. Gbɛtɔ́ ɔ́, jɔhɔn kpowun wɛ; gbɛtɔ́ nyí nǔɖé ǎ. Mawu Mavɔmavɔ, se ɖɛ e xo wɛ un ɖe é; ɖǒtó xó e sú ylɔ́ we wɛ un ɖe é; ma dó tókúse avǐ e ya wɛ un ɖe ɔ́ mɛ ó; ɖó jǒnɔ kpowun wɛ un nyí ɖo xwé towe gbe, fí kpɛɖé ná nɔ wɛ jɛ́n un ɖe bó ná yi tɔ́gbó ce lɛ́ɛ ɖɔhun. Nǎ agbɔ̌n kpɛɖé mì, nú ayi ce ná j'ayǐ, cóbónú má ɖidó bó sɔ́ ná tíin ǎ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu Mavɔmavɔ wɛ un ɖo te kpɔ́n, bɔ é nyi kɔ kpɔ́n mì, bó se xó e sú ylɔ́ ɛ wɛ un ɖe é. É ɖe mì sín do e mɛ è nɔ jɛ bó nɔ́ dɔn ɔ́ mɛ; é ɖe mì sín babá glɔ́; é sɔ́ mì xwe afɔ te ɖó só jí; é bló bɔ un nɔ tɛ afɔ ayǐ bó nɔ́ gó. É zé han yɔ̌yɔ́ ɖé dó nu nú mì; han ɖé wɛ bó nɔ́ kpa susu nú Mawu mǐtɔn. Mɛ gěgé ná se bó ná ɖó sísí nú Mawu Mavɔmavɔ, lobo ná zé yěɖée jó n'i. Nǔ nyɔ́ nú mɛ e nɔ ɖeji dó Mawu Mavɔmavɔ wú é, mɛ e má nɔ dó goyítɔ́ lɛ́ɛ gbɛ́ ǎ é, mɛ e ma nɔ dó nǔhízítɔ́ lɛ́ɛ há ǎ é. Nǔ jí wǔ e a blǒ nú mǐ lɛ́ɛ sukpɔ́ mɛ nya! Mawu Mavɔmavɔ, Mawu ce, towe ɖɔhun ɖe ǎ; nǔ ɖagbe sín nɛ́ a sɔ́ ɖó te nú mǐ ná! Yě sukpɔ́ bó gégé, un sixú ɖɔ bǐ ǎ, un ka sixú jlɛ́ ǎ. A ba ɖɔ è nǐ sá vɔ̌ nú émí ǎ; a jlǒ ɖɔ è nǐ ná nǔ émí ǎ; a nǎ mɔ jɛ mɛ tɔn mì. A jlǒ ɖɔ è nǐ dó kanlin zo dó sá vɔ̌ nú émí ǎ. A ka ba ɖɔ è nǐ hu kanlin dó hwɛ mɛtɔn lɛ́ɛ tamɛ ǎ. Énɛ́ ɔ́ wú wɛ un ɖɔ: “Nyi ɖíe ja e; un hɛn wěma e ɖɔ xó dó wǔ ce ɔ́ bó ja.” Mawu ce, jlǒ towe wiwa nɔ́ víví nú mì, sɛ́n towe ɖo ayi ce mɛ ganjí. Un ɖo hwɛjijɔ towe jlá wɛ ɖo agun ɖaxó ɔ́ mɛ. Kpɔ́n, nu ce xwɛ d'é wú ǎ. Mawu Mavɔmavɔ, hwi ɖésúnɔ tunwun. Hwɛjijɔ towe ɔ́, un sɔ́ hwlá dó ayi ce mɛ ǎ Un ɖo xó sú wɛ, bó ɖo lě e a ɖo gbejí gbɔn ɔ́ ɖɔ wɛ; un ɖo lě e a hwlɛ̌n mì gbɔn é ɖɔ wɛ. Un sɔ́ xomɛnyínyɔ́ towe kpó gbejíninɔ towe kpó hwlá dó agun ɖaxó ɔ́ ǎ. Mawu Mavɔmavɔ, hwɛ ɔ́, a nǎ gbɛ́ ɖɔ émí kún ná kú nǔ blá wǔ nú mì ó ǎ; xomɛnyínyɔ́ towe kpó gbejíninɔ towe kpó ná nɔ kpɔ́ xá mì hwebǐnu. Đó adǎn e ɖo gbigbo mì wɛ gbɔn ɖisí amyɔ ɔ́, un sixú ɖɔ bǐ ǎ. Hwɛ e un hu lɛ́ɛ sín bǎ ɖo xixo mì wɛ; un sɔ́ tunwun hwɛ e un hu lɛ́ɛ bǐ lɔ ǎ; yě sukpɔ́ hú ɖa e ɖo ta ce é; un sɔ́ ɖó akɔ́nkpinkpan ɖěbǔ ǎ. Mawu Mavɔmavɔ, kɛnklɛ́n bó hwlɛ́n mì; Mawu Mavɔmavɔ, yǎ wǔ wá d'alɔ mì! Yě mɛ e ɖo kú ce ba wɛ lɛ́ɛ bǐ ní ɖu winnyá bó flú. Mɛ e ɖo nyanya ce ba wɛ lɛ́ɛ ní ba nu tɔn kpo, bó j'agɔ dó gǔdo bó dán ɖě wa gbɔn. Mɛ e nɔ ɖo kiko mì wɛ “hahaha” lɛ́ɛ ɔ́, yě ní yi winnyá xɔ. Mawu Mavɔmavɔ, mɛ e ɖo biba we wɛ lɛ́ɛ bǐ ní hun xomɛ bó j'awǎ ɖo hwɛ Mawu Mavɔmavɔ ɔ́ mɛ. Mɛ e yí wǎn nú hwlɛngán towe lɛ́ɛ ní nɔ́ ɖɔ: “Jlɛjlɛ nú Mawu Mavɔmavɔ!” Nyɛ ɔ́, gbɛ̌dónánɔ wɛ un nyí bó nyí wamamɔnɔ. Lo ɔ́, Aklúnɔ, flín mì. Aklúnɔ, hwi wɛ nyí alɔdómɛtɔ́ ce, bó nyí mɛhwlɛ́ngántɔ́ ce. Mawu ce, yǎ wǔ wá, ma lín ó! Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Nǔ nyɔ́ nú mɛ e nɔ kpɔ́n wamamɔnɔ jí é; adǎngbomɛzán gbe ɔ́, Mawu Mavɔmavɔ nɔ hwlɛ́n ɛ gán. Mawu Mavɔmavɔ nɔ́ cyɔ́n alɔ jǐ tɔn; é nɔ́ hɛn ɛ ɖó gbɛ. Nǔ nɔ́ nyɔ́ n'i ɖo ayǐkúngban jí fí; é nɔ́ jó e nú kɛntɔ́ tɔn lɛ́ɛ, bɔ yě nɔ́ zé e dó wa nǔ e jló yě ɔ́ ná ǎ. Mawu Mavɔmavɔ nɔ kpé nukún dó wǔ tɔn ɖo azɔnzan jí, é nɔ́ tɔ́jú i ɖo azɔn hwenu. Un nɔ ɖɔ: “Mawu Mavɔmavɔ, kú nǔbláwǔ ce! Un hu hwɛ dó we nǔgbó có, ka gbɔ azɔn nú mì.” Kɛntɔ́ ce lɛ́ɛ nɔ́ ɖɔ xó ce nyanya. Yě nɔ́ ɖɔ: “Hwetɛ́nu ná kú dó wɛ é ka ɖe tawun bɔ xó tɔn ná fó?” Ényí mɛɖé wá kpɔ́n mì ɔ́, nǔ ce ná ɖɔ wú wɛ é nɔ wá; é nɔ́ wá hwlɛ́n awɔntín ayǐ, bó nɔ́ ba adingban e é ná ɖó é. É gosín gɔ̌n ce lě tlóló ɔ́, é nɔ́ yi fúnfún kpé. Mɛ e gbɛ́ wǎn nú mì lɛ́ɛ bǐ nɔ́ yi ɖɔ nǔ ce ɖo kpá, yě nɔ́ lin nyanya ce, yě nɔ́ ɖɔ: “Nǔ e jɛ dó jǐ tɔn ɔ́ nyí ayihún ǎ mɛ! Ayǐ e é mlɔ́ din ɔ́, é sɔ́ ɖó fínfɔ́n ǎ mɛ!” Xɔ́ntɔn ce vívɛ́ná e wú un ɖeji dó é, mɛ e nɔ ɖu nǔɖuɖu ce ɔ́ húzú kpan nukɔn mì. Mawu Mavɔmavɔ, hwɛ ɔ́, kú nǔ blá wǔ ce, sɔ́ mì sí te sín azɔnzan jí bónú má ba hlɔn. Ényí kɛntɔ́ ce gɔn ahwannɔwe ɖú ɔ́, un ná tunwun ɖɔ a yǐ wǎn nú mì. Mawu Mavɔmavɔ, a kpé nukún dó wǔ ce ɖo gbejíninɔ ce mɛ, a nǎ hɛn mì ɖó gɔ̌n towe káká sɔ́yi. Susu nú Mawu Mavɔmavɔ, Mawu Izlayɛ́li tɔn ɔ́ sín din káká sɔ́yi! Amǐ! Amǐ! Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ. Mawu ce, lě e zungbɔ́ nɔ́ dlɔ́n dó tɔhwín gbɔn ɔ́, mɔ̌ ɖokpó ɔ́ wɛ nyɛ lɔ ɖo dlɔ̌ndlɔ́n dó we wɛ. Mawu sín kɔ ɖo xúxú mì wɛ; Mawu gbɛɖe ɔ́ sín kɔ ɖo xúxú mì wɛ. Hwetɛ́nu un ka ná sixú byɔ́ xɔ tɔn mɛ, bó ná yi nɔtɛn tɔn? Zǎn kpó kéze kpó ɔ́, ɖasin wɛ nɔ nyí nǔɖuɖu ce, bɔ hweɖěbǔnu ɔ́, è nɔ ɖo kinkanbyɔ́ mì wɛ ɖɔ: “Fítɛ́ Mawu e a nɔ sɛn é ká ɖe?” Un ka nɔ wá flín nǔɖé bɔ nǔɖé nɔ́ bló mì. Un nɔ flín hwenu e un nɔ ɖo togun towe nu xwe xwé towe gbe bɔ mǐ nɔ́ ɖo xwe ɖu wɛ é: un nɔ ɖo yiyi wɛ kpó ahwan wɔ̌buwɔ́bú ɖé kpó, bɔ mǐ nɔ́ ɖo awǎjijɛ kpó kú dó nú Mawu kpó sín han lɛ́ɛ ji wɛ. Aniwú un ka ná ɖo wǔ blá wɛ? Aniwú un ka ná ɖo gbɛvo sa wɛ? Un gán jɛ Mawu ce wú, bó lɛ́ jɛ susu kpa n'i jí ɔ́, é nyɔ́ hú. Un lɛ́ jɛ susu kpa nú éyɛ́ mɛ e nyí mɛhwlɛ́ngántɔ́ ce, bó nyí Mawu ce é jí ɔ́, é nyɔ́ nú mì hú. Mawu ce, un blá wǔ bǐ. Énɛ́ ɔ́ wú wɛ un flín we sín fí e un ɖe ɖo Judɛ́ɛn to ɔ́ mɛ é; un flín we sín Ɛmɔ́ɔ, Miseáa sókan ɔ́ mɛ. A ɖe gbe bɔ tɔ xo zǐn, bɔ sin ɔ́ ɖě mlí hwǐn ja ɔ́, ɖěvo nɔ mlí jɛ gǔdo tɔn, bɔ bǐ nɔ́ xo wá cyɔ́n mì, bɔ sin bú mì bǐ sésé. Kéze ɔ́, Mawu Mavɔmavɔ nɔ ɖe xomɛnyínyɔ́ tɔn xlɛ́ mì; zǎn mɛ ɔ́, han tɔn nɔ ɖo nu ce, han e un nɔ ji ɔ́, ɖɛ wɛ é nyí bɔ un nɔ xo sɛ́ dó Mawu ce, Mawu ce e hɛn mì ɖó gbɛ é. Un jló ná kanbyɔ́ Mawu, só e un kpɛn zɔn é ɖɔ: “Nɛ̌ ká gbɔn bɔ a wɔn mì? Nɛ̌ ká gbɔn bɔ un ná nɔ́ ɖo yiyi wɛ wǔbláwúblá ɖó ya e dó nú mì wɛ kɛntɔ́ ɖe ɔ́ wú?” Nú mɛ e ma mɔ mì gbɔ ǎ lɛ́ɛ ɖo zunzun mì wɛ bó ɖo kinkanbyɔ́ mì wɛ magbokɔ ɖɔ fítɛ́ Mawu e nyi nɔ sɛn ɔ́ ká ɖe a jí ɔ́, xú e ɖo lan ce mɛ lɛ́ɛ bǐ wɛ nɔ́ só. Aniwú un ka ná ɖo wǔ blá wɛ? Aniwú un ka ná ɖo gbɛvo sa wɛ? Un gán jɛ Mawu ce wú, bó lɛ́ jɛ susu kpa n'i jí ɔ́, é nyɔ́ hú. Un lɛ́ jɛ susu kpa nú éyɛ́ mɛ e nyí mɛhwlɛ́ngántɔ́ ce, bó nyí Mawu ce é jí ɔ́, é nyɔ́ nú mì hú. Mawu ce, gbo hwɛ nú mì, jɛ ahwan jǐ ce ɖo yě mɛ e mɛ nú má nɔ́ blá wǔ ná ǎ lɛ́ɛ é tɛ́ntin. Hwlɛ̌n mì gán ɖo gbɛtɔ́ nǔhízítɔ́ dǎkaxotɔ́ lɛ́ɛ sí! Hwi wɛ nyí Mawu ce, bó nɔ́ nya xɛ ɖo jǐ ce; nɛ̌ ka gbɔn bɔ a nya mì? Nɛ̌ ka gbɔn bɔ un ná nɔ́ ɖo yiyi wɛ wǔbláwúblá ɖo kɛntɔ́ nukɔn? Sɛ́ wěziza towe kpódó gbejíninɔ towe kpó dó, bónú yě ná xlɛ́ ali mì, bó ná kplá mì yi só e a sɔ́ ɖó vo nú hwiɖée ɔ́ jí, bó kplá mì byɔ́ nɔtɛn towe. Énɛ́ ɔ́, un ná sɛkpɔ́ vɔ̌sákpe towe, un ná sɛkpɔ́ hwi ɖésúnɔ Mawu ɔ́, hwi mɛ e nyí xomɛhunhun ce, bó nyí awǎjijɛ ce é. Hwe énɛ́ ɔ́ nu ɔ́, un ná sɔ́ kanhún ce, bó ná ji han dó kpa susu nú we; un nǎ ji han dó kpa susu nú hwi Mawu ce ɔ́. Aniwú un ka ná ɖo wǔ blá wɛ? Aniwú un ka ná ɖo gbɛvo sa wɛ? Un gán jɛ Mawu ce wú, bó lɛ́ jɛ susu kpa n'i jí ɔ́, é nyɔ́ hú. Un lɛ́ jɛ susu kpa nú éyɛ́ mɛ e nyí mɛhwlɛ́ngántɔ́ ce, bó nyí Mawu ce é jí ɔ́, é nyɔ́ nú mì hú. Xó lómílómí Kolée ví súnnu lɛ́ɛ tɔn dó han mɛ. Mawu, nǔ e a wa ɖ'ayǐ xóxó lɛ́ɛ ɔ́, tɔ́ mǐtɔn lɛ́ɛ wlí ɖɔ bɔ mǐ se kpó tó mǐtɔn kpó. A sɔ́ hlɔ̌nhlɔ́n towe dó nya akɔta ɖě lɛ́ɛ, bó sɔ́ tɔ́ mǐtɔn lɛ́ɛ ɖó tɛn yětɔn mɛ. A dǒ ya nú togun ɖě lɛ́ɛ, bó dó ná tɛnmɛ yě. Đó tɔ́ mǐtɔn lɛ́ɛ ɔ́, hwǐ yě ɖésúnɔ tɔn wɛ yě dó yí to ɔ́ ná ǎ, é ká nyí hlɔ̌nhlɔ́n yě ɖésúnɔ tɔn wɛ hwlɛ́n yě gán ɖo ahwan ɔ́ mɛ ǎ, ɖisílɔ towe wɛ, hlɔ̌nhlɔ́n towe wɛ, kpɔ́nɔxámɛ towe wɛ, ɖó a yǐ wǎn nú yě. Mawu, hwi wɛ nyí axɔ́sú ce, ɖe gbe bónú Jakɔ́bu ví lɛ́ɛ ná gán ɖo ahwan ɔ́ mɛ. Hwi wɛ nyí tɔn, mǐ nɔ zin kɛntɔ́ mǐtɔn lɛ́ɛ dɛ́. Hwi wɛ nyí tɔn, mǐ nɔ nyínyɛ́ mɛ e kpé hun xá mǐ lɛ́ɛ. Gǎ ce wú wɛ un gán jɛ ǎ; hwǐ ce wɛ ná hwlɛ́n mì gán ǎ, hwi wɛ nɔ hwlɛ́n mǐ gán ɖo kɛntɔ́ mǐtɔn lɛ́ɛ sí; hwi wɛ nɔ dó winnyá mɛ e gbɛ́ wǎn nú mǐ lɛ́ɛ. Mawu, ayǐhɔ́ngbe ayǐhɔ́ngbe ɔ́, hwi mɛ wɛ mǐ nɔ́ xɔ susu ɖe, bó nɔ́ ɖo nyǐkɔ towe mlá wɛ hwebǐnu. É ká ɖo mɔ̌ có, a jǒ mǐ dó, a dǒ winnyá mǐ, ahwangɔnu mǐtɔn lɛ́ɛ xwe ahwangbénu ɔ́, a sɔ́ nɔ́ kplá yě yi ǎ. A nɔ jó mǐ dó, bɔ mǐ nɔ́ jó agɔ yi gǔdo ɖo kɛntɔ́ nukɔn, bɔ mɛ e gbɛ́ wǎn nú mǐ lɛ́ɛ nɔ́ bɛ́ nǔ e nyí mǐtɔn lɛ́ɛ bǐ hɛn yi. A nɔ jó mǐ lě e è nɔ jó lɛ̌ngbɔ́ nú lanhutɔ́ é ɖɔhun. A nɔ gba mǐ dó kpé akɔta lɛ́ɛ mɛ. A nɔ sa togun towe kpɔcɔnu; a dǒ axivɛ́ ná ɖěbǔ ǎ. A sɔ́ mǐ dó húzú zuntín nú mɛ e ɖo akpá mǐtɔn lɛ́ɛ; mǐ húzú slǎmɛɖɔnú, mǐ húzú nǔkiko nú mɛ e lɛ́ lɛ̌ dó mǐ lɛ́ɛ. A sɔ́ mǐ dó húzú lǒdónú akɔta lɛ́ɛ tɔn, bɔ togun lɛ́ɛ nɔ́ ɖo nyɔmɛ ɖɔ mǐ wú wɛ. Nǔ énɛ́ lɛ́ɛ bǐ ɖo jijɛ dó mǐ jí wɛ, có mǐ ká wɔn we ǎ, mǐ ká jɛ do nú akɔ e a jɛ xá mǐ ɔ́ ǎ. Ayi mǐtɔn gosín wǔ we ǎ; mǐ lɛ́ kɔ sín ali e a ɖe nú mǐ ɔ́ jí ǎ. Nǔ ɖo mɔ̌ có a wa nǔ xá mǐ, mǐ ɖíe wá ɖo avǔn gbě tɔn lɛ́ɛ tɛ́ntin e; a sɔ́ mǐ dó ablu gɔngɔn mɛ. Nú mǐ kó wɔn hwi Mawu mǐtɔn ɔ́, bó yi sɛn nǔmɛsɛn to ɖěvo mɛ nu lɛ́ɛ tɔn wɛ ɔ́, a nǎ gɔn ma tunwun ǎ; ɖó hwi Mawu ɔ́, a tunwun nǔ e ɖo gbɛtɔ́ sín ayi mɛ é. Hwi wú wɛ è nɔ ɖo mǐ hu wɛ ayǐhɔ́ngbe ayǐhɔ́ngbe; è nɔ mɔ mǐ dó mɔ lɛ̌ngbɔ́ e è kplá xwe akpákpó jí é. Aklúnɔ fɔ́n! Nɛ̌ ka gbɔn bɔ a ka ɖo amlɔ dɔ́ wɛ? Fɔ́n! Ma jó mǐ dó káká sɔ́yi ó! Nɛ̌ ka gbɔn bɔ a zě hwiɖée hwlá dó mǐ? Nɛ̌ ka gbɔn bɔ a wɔn lele e sa wɛ mǐ ɖe ɔ́? Nɛ̌ ka gbɔn bɔ a wɔn ya e dó nú mǐ wɛ è ɖe ɔ́? A nǎ wɔn mǐ din e mǐ kó j'ayǐ bó ɖo kɔ́gúdu mɛ é wɛ a? Din e mǐ xwe agbɔ̌nnusú do ɖo kɔ́ mɛ é! Sí te bo wá gɔ́ alɔ nú mǐ! Kpɔ́n dó gbejí e a ɖe nú akɔ e a jɛ xá mǐ é wú bó hwlɛ́n mǐ gán. Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji dó han e è nɔ ylɔ́ ɖɔ folówa ɖagbe ɖagbe ɔ́ sín hangbe mɛ, bó nɔ́ xo kanhún d'é mɛ. Xó lómílómí Kolée ví súnnu lɛ́ɛ tɔn dó han mɛ. Wǎn yíyí sín han wɛ. Xó ɖagbe ɖagbe ɖé ɖo akpakpa sɔ́ mì wɛ. Xó mímɛ́ e ɖɔ gbé un ja ɔ́, axɔ́sú ɔ́ ná ɖɔ ná wɛ un ɖe. Un jló ná kú hǔn bó ná ɖɔ, mɛ ɖo wěkwín kun dó awǐnnya mɛ wɛ ɖɔhun. A nyɔ̌ ɖɛkpɛ hú gbɛtɔ́ lɛ́ɛ bǐ; a nyɔ̌ xó ɖɔ; énɛ́ ɔ́ wú wɛ Mawu xo ɖɛ ɖumavɔ dó jǐ towe. Ahwanfuntɔ́ akowunká, sɔ́ hwǐ towe blá, hwǐ towe wɛ nɔ́ ɖe susu towe xlɛ́, é wɛ nɔ́ ɖe lě e a nyɔ̌ kpɔ́n gbɔn é xlɛ́. Yi bó ɖu ɖ'é jí ɖo susu towe mɛ. Byɔ̌ ahwankɛkɛ́ towe mɛ, bó yi fun ahwan dó xó nǔgbó ɔ́ tamɛ; fun ahwan dó wamamɔnɔ lɛ́ɛ tamɛ, bó fun dó hwɛjijɔ ɔ́ tamɛ. Sɔ́ hlɔ̌nhlɔ́n towe dó dó nǔ sin ní vɛ́ jlɛ́. Gǎ towe lɛ́ɛ sín nu xwíɖí; gǎ towe ná xo kɛntɔ́ towe lɛ́ɛ sín hǔn zlɛ́, togun lɛ́ɛ ná j'ayǐ ɖo nukɔn towe. Axɔ́súzinkpo towe ná nɔ ayǐ káká yi káká sá, axɔ́súzinkpo Mawu tɔn ɖɔhun. Hwɛjijɔ jí wɛ axɔ́súɖuɖu towe jínjɔ́n. A yǐ wǎn nú hwɛjijɔ, a gbɛ̌ wǎn nú nǔ nyanya; énɛ́ ɔ́ wɛ zɔ́n bɔ Mawu, Mawu towe kɔn ami dó ta nú we; awǎjijɛ sín ami wɛ é kɔn dó ta nú we, bó dó sɔ́ we ɖó vo ɖo hǎgbɛ́ towe lɛ́ɛ mɛ. Célu wǎnnywɛ́ mǐla, alowɛ́si kpódó kesya kpó sín wǎn wɛ è nɔ se ɖo nǔ e a nɔ dó lɛ́ɛ mɛ. Xwé towe ɔ́, ajinakúɖú wɛ è dǒ ba acɔ́ ná; è nɔ́ ɖo nǔ xo wɛ ɖo fínɛ́, bó ná dó ɖe ayi towe ɖ'ayǐ. Axɔ́ví gěgé ɖo asi towe lɛ́ɛ mɛ. Táta ɔ́ ká ɖo ɖisí towe xwé; nǔ e é dó ba acɔ́ ná lɛ́ɛ ɔ́, siká akú wɛ è dǒ bló. Đyɔ̌vǐ, vɛ̌ kpɔ́n; ɖǒtó bó se; ɖe ayi sín togun towe wú, bó ɖe ayi sín daá towe xwé wú. Đɛkpɛ towe ní dɔn axɔ́sú ɔ́. Bɛ́ sín din ɔ́, é wɛ nyí Aklúnɔ towe. Énɛ́ wú ɔ́, nɔ ɖe kɔ́ n'i. Ahwlivú Tíi tɔn, dɔkunnɔ ɖaxó ɖaxó lɛ́ɛ, mɛ e ɖó alɔnu hú mɛ bǐ lɛ́ɛ ná nɔ́ dó agban wá nú we, bó ná dó nyɔ́ ɖo así we. Axɔ́si ɔ́ nɛ́ ɖo dadá ɔ́ hɔnmɛ byɔ́ wɛ nɛ́. É ɖésú ɔ́ bǐ nɔ́ kɔ́n; avɔ e ɖo wǔ tɔn lɛ́ɛ ɔ́, sikákan wɛ è dǒ kó. Avɔ e mɛ é zɔ́n wá axɔ́sú ɔ́ xwé lɛ́ɛ ɔ́, bǐ wɛ è kó; è sɔ́ kan tɛnmɛ tɛnmɛ dó kó; ɖyɔ̌vǐ gbɛ̌ tɔn lɛ́ɛ kplá ɛ, bɔ è kplá yě wá nú we. È kplá yě kpó awǒbóbó kpó, kpódó awǎjijɛ kpó. Yě byɔ́ axɔ́sú ɔ́ sín hɔnmɛ. Vǐ towe lɛ́ɛ ná yi tɔ́gbó towe lɛ́ɛ zinkpo jí; a nǎ sɔ́ gǎn yě gbɔn to ɔ́ bǐ mɛ. Un ná nɔ́ flín lě e a xɔ susu sɔ é vǐ, bó ná flín vǐvú. Énɛ́ ɔ́, togun lɛ́ɛ bǐ ná nɔ́ ɖo susu kpa nú we wɛ tɛgbɛ káká sɔ́yi. Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ. È nɔ ji dó hangbe e è nɔ ylɔ́ ɖɔ: “Đyɔ̌vǐ lɛ́ɛ” ɔ́ sín hangbe mɛ. Mawu ɔ́, bibɛtɛn wɛ é nyí nú mǐ, é wɛ nyí ahohó mǐtɔn. Adǎn gbo mɛ hwenu ɔ́, è nɔ ba ɛ kpo gbeɖé ɖo gǔdo ǎ. Énɛ́ ɔ́ wú wɛ ado ma nɔ hu mì ǎ; ayǐkúngban na bo ɖo wǔ dán wɛ ɔ́, só lɛ́ɛ na bo ɖo mumu wɛ ɖo xuzan mɛ ɔ́, ado nɔ hu mì ǎ. Xu na bo ɖo adǎn jí, bó ɖo fún nyɛ wɛ, bó ɖo te sí wɛ, bó ɖo só lɛ́ɛ dán wɛ ɔ́, ado nɔ hu mì ǎ. Tɔsisa ɖé nɔ́ hɛn xomɛhunhun wá nú Mawu sín toxo ɔ́, é nɔ́ hɛn awǎjijɛ wá Mawu Ajalɔ̌nlɔn sín nɔtɛn mímɛ́ ɔ́. Mawu ɖo toxo ɔ́ mɛ, toxo ɔ́ ná dán ǎ. Káká nú ayǐ ná hɔ́n ɔ́, Mawu nɔ́ wá gɔ́ alɔ n'i. Akɔta lɛ́ɛ ɖo adǎn jí, axɔ́súɖuto lɛ́ɛ ɖo dǐndán wɛ. Mawu ka kɛ nu lě ɔ́, ayǐkúngban ɖésúnɔ nɔ́ sínsín. Mawu Mavɔmavɔ Nǔbǐwúkpétɔ́ ɔ́ ɖo kpɔ́ xá mǐ, Mawu Jakɔ́bu tɔn ɔ́ wɛ nyí ahohó mǐtɔn. Mi wá kpɔ́n nǔ e Mawu Mavɔmavɔ jlɛ́ lɛ́ɛ, mi wá kpɔ́n nǔ e é hɛn gblé ɖo ayǐkúngban jí lɛ́ɛ. É wɛ sú ahwan kún dó gbɔn gbɛ ɔ́ bǐ mɛ. É wɛ́n gǎ lɛ́ɛ, é lɔ́ hwǎn lɛ́ɛ, é dó ahwankɛkɛ́ lɛ́ɛ zo. Mawu Mavɔmavɔ ɖɔ: “Mi fɔ ahwanfunnú bǐ ɖ'ayǐ! Mi bǐ ní tunwun ɖɔ nyi wɛ nyí Mawu! Un hú gǎn akɔta lɛ́ɛ bǐ. Un hú gǎn nǔ e ɖo ayǐkúngban ɔ́ jí é bǐ.” Mawu Mavɔmavɔ Nǔbǐwúkpétɔ́ ɔ́ ɖo kpɔ́ xá mǐ, Mawu Jakɔ́bu tɔn ɔ́ wɛ nyí ahohó mǐtɔn. Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ. Togun lɛ́ɛ mi, mi bǐ mi xo kpɛ́ nú Mawu! Mi sú xó bó kpa Mawu kpó awǒbóbó kpó. Đó Mawu Mavɔmavɔ, Mawu Ajalɔ̌nlɔn ɔ́ dó xɛsi; é wɛ nyí axɔ́sú ɖaxó e ɖo ayǐkúngban ɔ́ bǐ jí é. É fɔ togun lɛ́ɛ dó acɛ mǐtɔn mɛ; é fɔ akɔta lɛ́ɛ dó afɔ mǐtɔn glɔ́. É sɔ́ to e nyí mǐ Jakɔ́bu ví lɛ́ɛ tɔn ɔ́ nú mǐ, bɔ é nyí susu nú mǐ, mǐ Jakɔ́bu ví e é yí wǎn ná lɛ́ɛ. Mawu ɖo kpó fán wɛ xwe xwé tɔn gbe kpó awǒbóbó kpó. Mawu Mavɔmavɔ ɖo afɔ ɖe wɛ, bɔ è ɖo lanzo kwín d'é mɛ wɛ. Mi ɖɔ xó lómílómí dó mlá Mawu dó han mɛ! Mi ɖɔ xó lómílómí dó mlá ɛ! Mi ɖɔ xó lómílómí dó mlá axɔ́sú mǐtɔn dó han mɛ! Mi ɖɔ xó lómílómí dó mlá ɛ! Đó Mawu wɛ nyí axɔ́sú ayǐkúngban ɔ́ bǐ tɔn. Mi ɖɔ xó lómílómí dó ji han víví n'i. Mawu wɛ ɖu axɔ́sú ɖo akɔta lɛ́ɛ nu; é jínjɔ́n ayǐ ɖo axɔ́súzinkpo mímɛ́ tɔn jí. Gǎn akɔta lɛ́ɛ tɔn lɛ́ɛ nɔ́ wá sɛ ta kplé xá togun Mawu Ablaxámu tɔn ɔ́ tɔn. Gǎnhúnǔtɔ́ e ɖo gbɛmɛ fí lɛ́ɛ bǐ wɛ nyí Mawu tɔn, é wɛ hú gǎn nǔ bǐ. Kolée ví súnnu lɛ́ɛ sín han. Mawu Mavɔmavɔ d'agba; è nɔ ji han mlá ɛ mɔ̌hunkɔtɔn, ɖo só mímɛ́ tɔn jí, ɖo toxo tɔn mɛ. Só mímɛ́ tɔn nyɔ́ ɖɛkpɛ kpɔ́n! É wɛ nɔ́ ná awǎjijɛ ayǐkúngban ɔ́ bǐ. Sinyɔ́ɔ só ɔ́ wɛ nyí Mawu sín nɔtɛn; é wɛ nyí toxo axɔ́sú ɖaxó ɔ́ tɔn. Mawu ɖo ahohó Sinyɔ́ɔ tɔn mɛ; é ɖésúnɔ wɛ ka nyí bibɛtɛn ɖo ahohó ɔ́ mɛ; mɛ bǐ wɛ tunwun. Éɖíe kpɔ́n! Axɔ́sú lɛ́ɛ sɛ yěɖée kplé; yě zɔn kpɔ́ bó ná yi tɔ́n ahwan Sinyɔ́ɔ. Káká nú yě ná mɔ hlɔ̌nhlɔ́n Mawu tɔn ɔ́, hǔn yětɔn zɛ; ayi yětɔn bǐ gbadó, bɔ yě dó gblǒ mɛ. Yě bǐ jɛ sísɔ́sísɔ́ jí tɛn tɔn mɛ, yě jɛ wǔvɛ́ mɔ jí nyɔ̌nu ɖo ajidonu ɖɔhun. Mawu nya yě lě e jɔhɔn zǎnzǎnhwe jí tɔn nɔ́ dó alɔ tɔjíhún ɖaxó mɛ, bó nɔ́ dɔn yi gba ɔ́ ɖɔhun. Nǔ e è ɖɔ bɔ mǐ se ɔ́, mǐ mɔ ɖó mɔ̌, ɖo toxo ɖaxó Mawu Mavɔmavɔ Nǔbǐwúkpétɔ́ ɔ́ tɔn mɛ, ɖo toxo Mawu mǐtɔn tɔn mɛ. Mawu ná hɛn toxo tɔn ɖó te káká yi káká sá. Mawu ce, mǐ ɖo xwé towe gbe ɔ́, mǐ nɔ́ flín lě e a nyɔ̌ xomɛ sɔ é. Mawu ce, lě e nyǐkɔ towe yi sɔ ɔ́, mɔ̌ wɛ susu towe hun káká yi fí e gbɛ ɔ́ kponu ɖó é. Hwɛjijɔ wɛ gɔ́ alɔ towe ɖisí ɔ́ mɛ. Sinyɔ́ɔ só ɔ́ ɖo awǎ jɛ wɛ, xomɛ ɖo Judáa toxo lɛ́ɛ hun wɛ, ɖó hwɛ e a ɖɔ lɛ́ɛ wútu. Mi lɛ́ lɛ̌ dó Sinyɔ́ɔ toxo ɔ́, mi xa kpe e jí tocɔ́tɔ́ lɛ́ɛ nɔ́ nɔ lɛ́ɛ. Mi kpɔ́n dǒ tɔn lɛ́ɛ, mi kpɔ́n ahohó e è mɛ lɛ́ dó é ganjí; énɛ́ ɔ́, mi ná wá kpi tan tɔn nú vǐ e ná wá jɔ sɔ lɛ́ɛ. Mi ná ɖɔ: “Mawu mǐtɔn nɛ́; é wɛ nyí Mawu mǐtɔn tɛgbɛ káká sɔ́yi. É wɛ ná nɔ nukɔn nú mǐ káká yi kú.” Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ. Togun lɛ́ɛ mi, mi bǐ mi ɖótó xó élɔ́! Mi mɛ e ɖo gbɛ ɔ́ mɛ lɛ́ɛ bǐ ní ɖótó te bo se! Gbɛtɔ́ nukúnɖéjí kpó gbɛtɔ́ kpaa kpó ní ɖótó! Dɔkunnɔ ní ɖótó, bónú wamamɔnɔ lɔ ní ɖótó! Un ná kɛ nu bɔ nǔnywɛ́ ná tɔ́n sín mɛ, xó jɔ xó kɛ́ɖɛ́ wɛ ɖo ayi ce mɛ. Un nɔ ɖótó nǔ e nǔnywɛ́tɔ́ lɛ́ɛ nɔ́ kplɔ́n mɛ é; è nǎ ɖo kanhún xo wɛ, bɔ un ná tínmɛ d'é mɛ. Aniwú xɛsi ka ná ɖi mì azǎn nyanya gbe? Aniwú xɛsi ka ná ɖi mì hwenu e awlinmɛdan lɛ́ɛ ná lɛ́ lɛ̌ dó mì é? Yě ɖeji dó dɔkun yětɔn lɛ́ɛ wú, bó nɔ́ ɖo ajɔ̌ jlá wɛ. Gbɛtɔ́ sixú xɔ gbɛ nú mɛɖé ǎ; é ká sixú xɔ gbɛ nú éɖée ɖo Mawu sí ǎ. Akwɛ́ e ná xɔ gbɛ nú gbɛtɔ́ ɖokpó ɔ́ ná sukpɔ́ dín, mɛɖé sixú kpé wú bó sú ǎ kpowun bɔ xó fó. Yě vɛdó ɖɔ émí ná nɔ gbɛ káká sɔ́yi ma yi yɔ wɛ a? Gbeɖé kpɔ́n! Mɛ bǐ wɛ tunwun. Yě ná yi yɔ mɛ, nǔnywɛ́tɔ́ ná kú, xlonɔ kpó gɔgɔnɔ kpó lɔ ná kú. Yě ná kú bó ná jó dɔkun yětɔn lɛ́ɛ dó nú mɛ ɖěvo. Yě wlán nyǐkɔ yětɔn lɛ́ɛ ɖó ayǐkúngban yětɔn lɛ́ɛ jí, yɔdo wɛ ka nyí xwé yětɔn; xwé énɛ́ gbe wɛ yě ná nɔ káká sɔ́yi. Gbɛtɔ́ ɖo susu xɔ wɛ mɔ̌ có, é ná kú gbe ɖokpó kanlin ɖɔhun. Nǔ e ɖo te kpɔ́n xlonɔ énɛ́ lɛ́ɛ é ɖíe; mɛ e nɔ yí wǎn nú xó yětɔn tɔn sise lɛ́ɛ ɔ́, nǔ e ɖo te kpɔ́n yě é ɖíe: Gbɔ̌ ɖɔhun wɛ è nǎ dó kan kɔ nú yě bó dɔn yi kútomɛ, abaɖaxwéjɛsú ná nɔ́ nyi yě kanlin ɖɔhun. Zaanɖé din ɔ́, gbɛtɔ́ hwɛjijɔnɔ lɛ́ɛ ná nɔ́ tɛ afɔ yě jí; agbaza ko cá nɛ́; kútomɛ kó húzú xwé yětɔn nɛ́. Lo ɔ́, Mawu ná xɔ gbɛ nú mì ɖo kú sí; Mawu ná hwlɛ́n mì nǔgbó. Nú mɛɖé jɛ dɔkun, bɔ dɔkun tɔn ɖo jijɛ jí wɛ hǔn, ma lin kpɔ́n ó, ɖó é ɖo ɖě ná zé yi kú wɛ ǎ; dɔkun tɔn ná xwedó e byɔ́ yɔdo mɛ ǎ. Hwenu e é ɖo gbɛ ɔ́, é nɔ́ mɔ ɖɔ nǔ nyɔ́ nú émí, é ná nɔ́ sɔ́ éɖée su ɖɔ nǔ nyɔ́ nú émí. É ká ɖó ná wá yi to e mɛ tɔ́gbó tɔn lɛ́ɛ yi é, to e mɛ yě yi bó má sɔ́ ná wá gbeɖé ǎ é. Gbɛtɔ́ e nɔ́ ɖo susu xɔ wɛ, bó má ka ɖó nǔnywɛ́ ǎ ɔ́, é tunwun ɖɔ émí ná kú gbe ɖokpó kanlin ɖɔhun ǎ. Asáfu sín han. Mawu Mavɔmavɔ, Mawu Nǔbǐwúkpétɔ́ ɔ́ kɛ nu; é ylɔ́ ayǐkúngban ɔ́ bǐ kplé sín zǎnzǎn hwe jí káká yi gbadahwe jí. Sín Sinyɔ́ɔ, toxo e nyɔ́ ɖɛkpɛ bɔ nǔ vɔ ɖ'é wú ɔ́ mɛ dɔ̌n wɛ Mawu ɖe bó ɖo kínkɔ́n wɛ. É ja, Mawu mǐtɔn ja, é ɖo xwíí bó ja ǎ. Myɔ ɖaxó ɖé ɖo nukɔn tɔn, jɔhɔn ɖaxó ɖé lɛ́ lɛ̌ dó e. É ylɔ́ jǐnukúnsin sɛ́ dó jǐ aga, bó ylɔ́ ayǐkúngban, bɔ yě ná ɖo te bɔ é ná ɖɔ hwɛ xá togun tɔn. É ɖɔ: “Mi kplé mɛ e ɖo gbejí nú mì lɛ́ɛ, yě mɛ e sá vɔ̌ dó jɛ akɔ xá mì lɛ́ɛ nú mì!” Énɛ́ ɔ́, jǐxwé ɖo ɖiɖɔ wɛ ɖɔ Mawu ɔ́, nǔ jlɔ́jlɔ́ wɛ é nɔ́ wa; Mawu wɛ nɔ́ gbo hwɛ. “Togun ce, ɖǒtó mì má ɖɔ xó nú we; Izlayɛ́li, un ná dó hwɛ we, nyi wɛ nyí Mawu, Mawu towe. Vɔ̌ e a nɔ sá nú mì lɛ́ɛ wú wɛ un ɖo hwɛ ná ɖɔ xá we wɛ ǎ. A nɔ xwlé vɔ̌ e è nɔ dó zo ɔ́ mì tɛgbɛ. Un ná yi sɔ́ nyibúsú ɖo xwé towe gbe ǎ, un ka ná yi sɔ́ gbɔ̌sú ɖo gbɔ̌kpó towe mɛ ǎ, ɖó kanlin e ɖo zungbó mɛ lɛ́ɛ bǐ wɛ nyí ce. Kanlin e ɖo só maxamaxa lɛ́ɛ jí é bǐ wɛ nyí ce. Un tunwun xɛ e nɔ gbɔn jǐ lɛ́ɛ ɖokpó ɖokpó. Lan e ɖo gběhan mɛ é bǐ wɛ ɖo alɔ ce mɛ. Nú xovɛ́ sin mì ɔ́, é byɔ́ ɖɔ má ɖɔ nú we ǎ, ɖó gbɛ ɔ́ bǐ wɛ nyí ce, bɔ nǔ e ɖo gbɛ ɔ́ mɛ ɔ́ bǐ nyí ce. Nyɛ ɔ́, un nɔ ɖu nyibúsú sín lan wɛ a? Un nɔ nu gbǎgbáhun wɛ a? Vɔ̌ e a nǎ sá nú nyɛ Mawu towe ɔ́ wɛ nyí ɖɔ a nǐ tunwun nǔ e bló nú we wɛ un ɖe ɔ́ nú mì. Đe akpá e a dǒ nú nyɛ Mawu Ajalɔ̌nlɔn lɛ́ɛ. Adǎn gbo we hweɖěbǔnu hǔn, ylɔ̌ mì. Un ná hwlɛ́n we gán, bɔ a nǎ kpa susu nú mì.” Mawu ɖɔ nú mɛdídá ɖɔ: “Étɛ́! A nɔ ɖo sɛ́n ce lɛ́ɛ xa wɛ, akɔ e un jɛ xá we ɔ́ nyí han bó ɖo nu towe. Hwi mɛ e un gbɛ́ nǔɖé ná ɔ́, a ma nɔ se ǎ é! Hwi mɛ e nɔ se xó ce dó tó gúdo é! A mɔ ajotɔ́ ɖé ɔ́, a nɔ dó gbɛ̌ tɔn; mɛ e nɔ lɛ aga lɛ́ɛ wɛ a nɔ zun xɔ́ntɔn xá Xó nyanya kɛ́ɖɛ́ wɛ nɔ tɔ́n sín nu towe mɛ. A kɛ nu ɔ́, mɛ jɛ́n a nɔ blɛ́. A nɔ jínjɔ́n ayǐ bó nɔ ɖɔ nɔví towe nú. A nɔ dó hɛ̌n nɔví towe, nɔ towe xomɛ ví. Nǔ e a nɔ wa é nɛ́, bó nɔ ɖɔ nyi ma kɛ nu d'é wú ó. Towe ɖɔhun wɛ un ɖe wɛ a vɛdó a? Nǔ e a dǒ sin lɛ́ɛ bǐ nu wɛ a nǎ ɖó akɔ́n; nǔ e a dǒ sin lɛ́ɛ bǐ sín tó wɛ un ná dɔn nú we. Mi mɛ e nɔ wɔn nyɛ Mawu lɛ́ɛ ɔ́, nǔ e mi ná tunwun é nɛ́, é má nyí mɔ̌ ǎ ɔ́, un ná vúnvún mi, mɛ e ná yí mi sín así ce ɔ́ ná ɖe ǎ. Mɛ e sá vɔ̌ dó tunwun nǔ e un wa n'i ɔ́ nú mì ɔ́, mɛ e sɔ́ mì su é nɛ́; mɛ e nɔ zán gbɛ ɖagbe ɔ́, un ná ɖe xlɛ́ ɛ ɖɔ nyi wɛ nyí Mɛhwlɛ́ngántɔ́.” Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Hwenu e Davídi ɖó xó xá Bɛtisabe Ulíi sín asi, bɔ Mawu sɛ́ gbeyíɖɔ tɔn Natáan dó gɔ̌n tɔn é wú wɛ han élɔ́ ɖɔ xó dó. Mawu ce, kú nǔbláwǔ ce, ɖó a nyɔ̌ xomɛ sɔ mɔ̌. Kpɔ́n dó nǔbláwǔkúnúmɛ towe ma ɖó jlɛ̌ ɔ́ wú, bó súnsún nǔ e un dó sin lɛ́ɛ. Lɛ nǔ e un wa nyi do lɛ́ɛ bǐ sín kɔ nú mì, slá wǔ nú mì bónú hwɛ e un hu ɔ́ ná gosín kɔ ce. Đó un yí nǔ e un wa nyi do lɛ́ɛ bǐ gbe, bɔ hwɛ e un hu ɔ́ ɖo nukɔn ce hwebǐnu. Hwi ɖokpónɔ géé wɛ un hu hwɛ dó, un wa nǔ e ma nyɔ́ nukún towe mɛ ǎ lɛ́ɛ; a na bo ɖó hwɛ ɖěbǔ nú mì hǔn, hwɛ towe jɔ; mɛɖé ná mɔ hwɛ nú we ǎ. Sín hwenu e è ji mì ɔ́ wɛ hwɛhuhu sín alɔxwixwí kó ɖo wǔ ce, bó ɖo wǔ ce sín nɔ ce xomɛ. Ée è dǒ xo ce é jɛ́n hwɛhuhu tɔ́ dó wǔ ce. Gbɛtɔ́ ɖó sísí nú nǔgbó ɖo ayi mɛ ɔ́, xomɛ nɔ hun we. Blǒ bónú má mɔ nǔ jɛ nǔnywɛ́ towe wú ɖo ayi ce mɛ. Zě izɔ́puma dó slá wǔ nú mì, énɛ́ ɔ́, un ná húzú mɛ mímɛ́. Lɛ wǔ nú mì, énɛ́ ɔ́, un ná wé, bó wé hú kɛ́njí. Đɔ nú mì ɖɔ émí sɔ́ hwɛ kɛ mì, énɛ́ ɔ́, xomɛ ná hun mì bó ná túnflá, bɔ xú e a cɛ́ dó lanmɛ nú mì lɛ́ɛ lɔ ná ɖú we. Đe nukún sín hwɛ e un hu lɛ́ɛ wú, súnsún nǔ e un wa nyi do lɛ́ɛ bǐ síin. Mawu ce, sɔ́ ayi mímɛ́ dó xomɛ nú mì; lɛ̌ vɔ́ ayixa ce bló ɖó, bónú ayixa ce ní lí dǒ ganjí. Ma zé mì nyi gbě, bónú un nɔ zɔ nú we ó. Ma ɖe Yɛsinsɛn towe sín jǐ ce ó. Nǎ awǎjijɛ mì ɖó hwlɛ̌n e a hwlɛ̌n mì gán é wú. Sɔ́ ayixa e nɔ ɖɔ bó nɔ́ bló ɖ'é jí é dó xomɛ nú mì. Yě mɛ e nɔ fɔ́n gǔ dó jǐ towe lɛ́ɛ ɔ́, un nǎ xlɛ́ ali towe yě. Énɛ́ ɔ́, hwɛhutɔ́ lɛ́ɛ ná lɛ́ kɔ wá gɔ̌n towe. Mawu mɛhwlɛ́ngántɔ́ ce, un kɔn kanjɔ kɔn nyi ayǐ; hwlɛ̌n mì ɖ'é mɛ, bónú má sú xó bó ɖɔ nú mɛ bǐ ɖɔ a hwlɛ̌n mì. Aklúnɔ, hun ɖɛ̌ nú mì, bónú má sɔ́ nu ce dó kpa susu nú we. A ba vɔ̌ ǎ, nú vɔ̌ wɛ a ko nɔ ba ɔ́, un ná kó xwlé vɔ̌sánú we; un na bo sá vɔ̌ e è nɔ dó zo ɔ́ nú we ɔ́, a ba ǎ. Mawu ce, vɔ̌ e nɔ́ nyɔ́ nukún towe mɛ ɔ́ wɛ nyí ɖɔ hwɛ e è hu lɛ́ɛ ní vɛ́ nú mɛ ɖo ayixa mɛ. A nɔ gbɛ́ wǎn nú mɛ e hwɛ tɔn lɛ́ɛ vɛ́ n'i tlílí ɖo ayi mɛ bɔ wǔ kú ɔ́ ǎ. Nyɔ̌ xomɛ dó Sinyɔ́ɔ wú, bó kɔn nyɔ̌ná dó jǐ tɔn. Lɛ̌ vɔ́ Jeluzalɛ́mu sín dǒ lɛ́ɛ mɛ. Hwe énɛ́ ɔ́ nu lo ɔ́, nú è xwlé vɔ̌sánú e sɔgbe ɔ́ we ɔ́, a nǎ yí, bó ná yí vɔ̌ e è nɔ dó zo lɛ́ɛ. Énɛ́ ɔ́, è nǎ nɔ́ zé nyibúsú dó sá vɔ̌ nú we ɖo vɔ̌sákpe towe jí. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. Hwenu e Dowɛgi Edɔ́munu ɔ́ yi ɖɔ nú Sawúlu ɖɔ Davídi yi cí Aximɛlɛ́ki xwé é wɛ Davídi ji. Hwi mɛ e nyí ahwannusyá ɖokpó ɔ́, nɛ̌ ka gbɔn bɔ é nyí nǔ nyanya e a nɔ dó sin é wɛ a nǎ dó jlá ajɔ̌ ná? Kpɔ́n! Mawu nɔ́ ɖe xomɛnyínyɔ́ tɔn xlɛ́ gbe bǐ gbe. Nǔ nyanya wé jɛ́n a nɔ ɖe. Nu towe ɖá hú hǎ; mɛ nú ɖɔ wɛ jɛ́n a nɔ ɖe. A yí wǎn nú nyanya wiwa hú ɖagbewiwa; a yí wǎn nú adingban hú nǔgbó. Xó e nɔ́ hɛn nǔ gblé lɛ́ɛ kɛ́ɖɛ́ wɛ a nɔ yí wǎn ná; xó e a nɔ ɖɔ ɔ́ ɖě nɔ́ nyí nǔgbó ǎ. Énɛ́ ɔ́ wú ɔ́, Mawu ná hɛn gbɛ towe gblé bɔ é ná nɔ mɔ̌ káká sɔ́yi. É ná zin we dɛ́, é ná ɖe we sín xwé towe gbe, é ná ɖe we sín ayǐkúngban ɔ́ jí. Mɛ e ɖo gbejí nú Mawu lɛ́ɛ ná mɔ nǔ e jɛ dó jǐ towe ɔ́, bó ná ɖó sísí nú Mawu, bó ká ná cá hwɛ ko ɖɔ: “Mi kpɔ́n nya mitɔn, nya mitɔn e nɔ gán jɛ dɔkun tɔn wú é, nya mitɔn e má nɔ́ sɔ́ Mawu dó ɖó bibɛtɛn ná ǎ é, nya mitɔn e nǔ nyanya e é dó sin ɔ́ wɛ é nɔ́ dó jɛ adǎnnyí ná é, mi kpɔ́n ɛ.” Nyɛ ɔ́, un ɖo ganjí ɖo Mawu sín xwé gbe olívutín e zɔ́n ama ganjí é ɖɔhun. Xomɛnyínyɔ́ Mawu tɔn wú wɛ nyɛ gán jɛ káká yi káká sá. Mawu, un ná nɔ́ ɖo susu kpa nú we wɛ káká sɔ́yi, ɖó nǔ e a blǒ é wú. Hwi wɛ un ná ɖó nukún, ɖó a nyɔ̌ nú mɛ e ɖo gbejí nú we lɛ́ɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ; Davídi sín han wɛ. È nɔ ji dó han e è nɔ ylɔ́ ɖɔ “Mahalati” ɔ́ sín hangbe mɛ. Xlonɔ lɛ́ɛ nɔ́ ɖɔ dó ayi mɛ ɖɔ: “Mawu ɖě tíin ǎ.” Yě gblé, bó ja dɔn dě ɖɔhun; zǐnzán yětɔn gbɛ́ hɛn, mɛ ɖé ɖo yě mɛ bó nɔ́ wa nǔ ɖagbe ǎ. Mawu ka ɖo jǐxwé dɔ̌n, bó nɔ́ kpɔ́n gbɛtɔ́ lɛ́ɛ sɛ́ dó; é nɔ́ kpɔ́n ɖɔ nǔnywɛ́tɔ́ ɖé ka ɖo yě mɛ, bó ɖo émí ba wɛ a jí. Gbɛtɔ́ lɛ́ɛ bǐ gosín ali ɖagbe ɔ́ jí ɖó kpɔ́, yě bǐ wɛ húzú nǔ gbɛ́hɛn. Mɛ ɖěbǔ tíin bó nɔ́ wa ɖagbe ǎ, mɛ ɖokpó géé lě tíin ǎ. Mawu ɖɔ: “Mɛ e nɔ wa nǔ nyanya lɛ́ɛ bǐ jɛ́n ɖo manywɛ́ mɛ a? Yě nɔ́ ɖo togun ce wɔ ɖu wɛ; nǔɖuɖu yětɔn nɛ́. Yě nɔ́ ylɔ́ mì ǎ.” Xɛsi ɖaxó ɖé ná jɛ yě jí, bɔ yě ná nɔ́ sísɔ́, có xɛsi nú ɖé ká ná gbo yě ǎ. Yě mɛ e nɔ kplé dó wǔ we, bó ná wa nǔ xá we lɛ́ɛ ɔ́, Mawu ná fúnfún xú yětɔn; yě ná ɖu winnyá, ɖó Mawu jó yě dó. É jló mì tawun ɖɔ hwlɛngán ní gosín Sinyɔ́ɔ wá nú Izlayɛ́li. Mawu ná lɛ́ fɔ́n togun tɔn sí te. É ná víví nú Jakɔ́bu ví lɛ́ɛ kpɔ́n! Izlayɛ́li ví lɛ́ɛ ná j'awǎ kpɔ́n! Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji bó nɔ́ xo kanhún d'é mɛ. Hwenu e Zifunu lɛ́ɛ wá ɖɔ nú Sawúlu ɖɔ Davídi wá sɔ́ éɖée hwlá dó émí gɔ́n ɔ́ wɛ Davídi ji. Mawu, wǎ gɔ́ alɔ nú mì dó ɖe nǔ e a nyǐ ɔ́ xlɛ́. Sɔ́ hlɔ̌nhlɔ́n towe dó gbo hwɛ nú mì. Mawu, se ɖɛ ce, ɖǒtó xó e ɖo nu ce mɛ tɔ́n sín wɛ é, ɖó jǒnɔ ɖé lɛ́ɛ sí te dó jǐ ce. Dǎkaxotɔ́ ɖé lɛ́ɛ ɖo kú ce ba wɛ. Yě mɛ énɛ́ lɛ́ɛ ɔ́, Mawu ɖó tɛnmɛ ɖě ɖo ayi yětɔn mɛ ǎ. Éɖíe Mawu ɔ́ wɛ ka nɔ gɔ́ alɔ nú nyɛ e! Aklúnɔ ce ɖokpó wɛ nyí mɛ e wú un gán jɛ é. Yě mɛ e ɖo tagba dó nú mì wɛ lɛ́ɛ ɔ́, Aklúnɔ, hǔzú nyanya e lin wɛ yě ɖe ɔ́ xwe dó ta nú yě. Sɔ́ nǔgbó towe dó xwe nu yětɔn dó xɔ. Mawu Mavɔmavɔ, un ná xwlé vɔ̌sánú we kpódó ayi ce bǐ kpó. Un ná nɔ́ ylɔ́ nyǐkɔ towe dó kpa susu nú we, ɖó a nyɔ̌. Đó a hwlɛ́n mì sín nǔ e nɔ gbo mì lɛ́ɛ bǐ mɛ, bɔ nukún ce mɔ kɛntɔ́ sín ayǐjijɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji bó nɔ́ xo kanhún d'é mɛ. Mawu, ɖǒtó ɖɛ ce! Ma dó tókúse vo e sa nú we wɛ un ɖe ɔ́ mɛ ó. Kpɔ́n nǔ e ɖo wiwa mì wɛ ɔ́ ganjí, bó ná sin tɔn mì! Un ɖo wǔvɛ́ mɔ wɛ, un ɖo flúflú kpé wɛ, un ɖo jojo dán wɛ, ɖó nǔ e ɖɔ nú mì wɛ kɛntɔ́ ɖe é wú, ɖó ya e dó nú mì wɛ mɛdídá ɖe é wú. Yě ɖo nǔ nyanya dɔn dó jǐ ce wɛ, bó ɖo hwɛ dó mì wɛ kpó adǎn kpó. Hǔn ce nɔ́ xo ɖo xo ce mɛ, bɔ kú ɖo ado hu nú mì wɛ. Xɛsi jɛ jǐ ce, ta mɛ ce nɔ kɔ́yi, bɔ avivɔfún blá mì. Bɔ un nɔ ɖɔ nǔɖé ló ná awa mì ahwannɛ́ ɖɔhun, énɛ́ ɔ́, un ná zɔn, bó ná yi vo ɖo fí ɖé. Un ná hɔn yi zɔ aga, un ná yi nɔ gbětótló mɛ. Un ná hwlɛ́ndó yi ba adɔ̌tɛn, fí e un ná nɔ bɔ jɔhɔn ɖaxó ɖé ma ná dó tagba nú mì ǎ é. Aklúnɔ, wlǔ tito kɛntɔ́ ce lɛ́ɛ tɔn, klán gbe dó nu nú yě. Ɖó dǎka kpó jlɛ kpó kɛ́ɖɛ́ jɛ́n un mɔ ɖo toxo ɔ́ mɛ. Dǎka kpó jlɛ kpó jɛ́n nɔ́ ɖo lɛ́ lɛ̌ dó toxo ɔ́ wɛ zǎn kéze. Nǔ nyanya kpó ya kpó wɛ ɖo toxo ɔ́ mɛ. Nǔɖé sɔ́ ɖo nǔɖé hwínnu ɖo toxo ɔ́ mɛ ǎ. Ahizi kpó ayi ɖó nukɔn nú mɛ kpó nɔ́ hán ɖo toxo ɔ́ mɛ ǎ. Nú kɛntɔ́ ce wɛ ɖo tagba dó nú mì wɛ ɔ́, un ná ɖó akɔ́n nu. Nú mɛ e gbɛ́ wǎn nú mì é wɛ sí te dó jǐ ce ɔ́, un ná ko hɔn bú dó e. Lo ɔ́, hwi mɛ e kpó nyɛ kpó nɔ́ dó gbɛ̌ ɔ́, hwi mɛ e kpó nyɛ kpó má ɔ́, hwi mɛ e un tunwun ganjí é wɛ ɖo tagba dó nú mì wɛ. Mǐ nɔ́ ɖɔ xomɛ nú mǐɖée, hwi kpó nyɛ kpó nɔ́ zɔn kpɔ́ yi Mawu xwé. Kɛntɔ́ ce lɛ́ɛ ní wɛ́n kú, yě nǐ yi kútomɛ gbɛɖe gbɛɖe. Yě gbɔn fí ɖé dín ɔ́, alǎnnú kɛ́ɖɛ́ wɛ è nɔ mɔ ɖo fínɛ́; adǎka wa xwé nyi tɛ́ntin yětɔn. Nyɛ ɔ́, un ɖo xó sú ylɔ́ Mawu Mavɔmavɔ wɛ, bɔ é ná hwlɛ́n mì gán. Un nɔ ɖo azɔn wɛn wɛ zǎnzǎn, hwemɛ, gbada, bó nɔ́ ɖo alě ná wɛ bɔ Mawu Mavɔmavɔ se gbe ce. Hwenu e yě tɔ́n ahwan mì ɔ́, fífá wɛ é dó hwlɛ́n mì, hwenu e yě so gbɛ̌ bó sí te dó jǐ ce ɔ́, fífá wɛ é dó hwlɛ́n mì. Mawu ná se xó e sú ylɔ́ ɛ wɛ un ɖe é bó ná dó winnyá yě, Mawu e ɖu axɔ́sú sín dodó donu é ná dó winnyá yě, ɖó yě húzú ǎ, yě ká nɔ́ sí Mawu ǎ. Lɛdatɔ́ ɔ́ sí te dó xɔ́ntɔn tɔn lɛ́ɛ jí, akɔ e é kpó yě kpó jɛ ɔ́, é gba akɔ ɔ́. Xó e nɔ́ tɔ́n sín nu tɔn mɛ ɔ́ nɔ́ víví hú wǐin; lo ɔ́, ɖo xo tɔn mɛ ɔ́, ahwannú sɔ́ wɛ é ɖe. Xó tɔn ɖíɖí wǔ hú lǐmu; lo ɔ́, xó tɔn ɔ́, dɛnkpe e ma ɖo akún mɛ ǎ é wɛ. Sɔ́ nǔ linlin towe dó alɔ mɛ nú Mawu Mavɔmavɔ; é ná hɛn we ɖó te. Hwɛjijɔnɔ na bo j'ayǐ ɔ́, é ná jó e dó bɔ é ná nɔ mɔ̌ káká sɔ́yi ǎ. Mawu, sɛ́ gbɛtɔ́ mɛhutɔ́ ahizinɔ lɛ́ɛ dó yɔdo mɛ; xwe e a nǎ yě ɔ́, yě ná bló wevlɔ́ɖó ǎ. Amɔ̌, nyɛ ɔ́, hwi wú wɛ un gán jɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ahwannɛ́ ɖo zɔ xwíí” é sín hangbe mɛ. Hwenu e Filisitɛ́ɛn lɛ́ɛ wlí Davídi ɖo Gati ɔ́ wɛ é ji. Mawu, kú nǔbláwǔ ce, ɖó gbɛtɔ́ lɛ́ɛ nɔ́ ɖo cɔcɔ dó nú mì wɛ. Ayǐ hɔ́n tɛgbɛ ɔ́, yě nɔ́ nyɛ́sú mì, bó nɔ́ ɖo zǐngídi ɖú xá mì wɛ. Ayǐ hɔ́n tɛgbɛ ɔ́, kɛntɔ́ ce lɛ́ɛ nɔ́ bɔ ɖó nú mì. Yě mɛ e nɔ dó ahwan gbě bó nɔ xísí dó mì lɛ́ɛ sukpɔ́ lóóo! Xɛsi ka jɛ jǐ ce gbeɖé ɔ́, hwi wú wɛ un nɔ gán jɛ. Mawu mɛ wɛ un ɖe bó nɔ́ kpa susu nú xó tɔn; Mawu wú wɛ un gán jɛ; nǔɖé nɔ́ dó xɛsi nú mì ǎ. Ani gbɛtɔ́ ka sixú wa nú mì? Ayǐ hɔ́n tɛgbɛ ɔ́, yě nɔ́ ɖo xó ɖɔ dó dó akpɔ nú mì wɛ; nǔ nyanya kɛ́ɖɛ́ jɛ́n yě nɔ́ lin dó wǔ ce. Yě nɔ́ blá gbě ce; yě nɔ́ ɖo wu yi nú mì wɛ. Un jɛ fí ɖé ɔ́, yě nɔ́ jɛ, ɖó yě ɖo biba ná hu mì wɛ. Yě ná dó nǔ sin sɔ mɔ̌ bó ná gán ɖ'é mɛ wɛ a? Mawu, zin yě dɛ́ kpó xomɛsin kpó. Hwi ɖésú tunwun ganjí ɖɔ hɔn wɛ un gbɔ bo hɔn; ɖasin e gosín nukún ce jí ɔ́, a yǐ bǐ dó nǔ mɛ. A ma ka ko wlán bǐ dó wěma towe mɛ a? Énɛ́ ɔ́ wú ɔ́, un ylɔ́ we gbeɖé ɖɔ hwi ní wá gɔ́ alɔ nú mì ɔ́, kɛntɔ́ ce lɛ́ɛ nɔ́ jó agɔ dó gǔdo. Un tunwun ɖɔ hwi Mawu ɔ́, a ɖo jǐ ce. Mawu Mavɔmavɔ mɛ wɛ un ɖe bó nɔ́ kpa susu nú xó tɔn; Mawu wú wɛ un gán jɛ; nǔɖé nɔ́ dó xɛsi nú mì ǎ. Ani gbɛtɔ́ ká sixú wa nú mì. Mawu, un ɖó ná ɖe akpá e un dó nú we lɛ́ɛ. Un ná nɔ́ sá kúdónúmɛvɔ́ nú we, dó ɖe akpá e un dó nú we é. Đó a hwlɛ̌n mì sín kú; a lɔn bɔ un ɖe afɔ nyi do ǎ, énɛ́ wú wɛ un ná ɖi zɔnlin ɖo nukɔn towe, ɖo wěziza gbɛmɛ fí tɔn nu. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ. Hwenu e Sawúlu ɖo Davídi nya wɛ, bɔ é yi hɔn hwlá cí sónu mɛ ɔ́ wɛ é ji. Sɔ́ nukún ɖagbe dó kpɔ́n mì; Mawu ce, sɔ́ nukún ɖagbe dó kpɔ́n mì, ɖó hwi gɔ́n wɛ un wá bɛ ta ɖe. Un hɔn wá bɛ ta ɖo awa towe lɛ́ɛ glɔ́, káká bɔ adǎn ɖaxó e ɖo gbigbo mì wɛ ɔ́ ná vɔ. Mawu Ajalɔ̌nlɔn ɔ́ sú xó ylɔ́ wɛ un ɖe, Mawu e nɔ́ bló nǔ ce bǐ ɖó é ylɔ́ wɛ un ɖe. É ní sɛ́ hwlɛngán dó mì sín jǐxwé aga, é ní dó winnyá mɛ e ɖo gbě ce nya wɛ é, é ní ɖe xomɛnyínyɔ́ tɔn e má nɔ́ gblá gbeɖé ǎ é xlɛ́ mì. Kinnikínní lɛ́ɛ tɛ́ntin wɛ un ɖe. Mɛ e nɔ tlɛ́n gbɛtɔ́ ɖu lɛ́ɛ tɛ́ntin wɛ un mlɔ́. Aɖǔ yětɔn ɔ́, gǎ nu xwíɖíxwíɖí wɛ, hwǎn wɛ; ɖɛ̌ e ɖo nu yětɔn mɛ ɔ́, hwǐ nuwenɔ wɛ. Mawu, ɖe susu towe xlɛ́ zɛ jǐxwé wú; ɖe susu towe xlɛ́ gbɔn ayǐkúngban ɔ́ bǐ jí! Yě ɖó ɖɔ dó ali ce jí, yě dó kan nyɔxwle bó ná nyi dó kɔ nú mì. Yě kun do ɖó nukɔn ce, yě ɖésú wɛ ka wá jɛ mɛ. Ayi ce j'ayǐ, Mawu ce, ayi ce wá j'ayǐ lo! Din ɔ́, un ná ji han; un ná ɖɔ xó lómílómí dó han mɛ. Lǐndɔ̌n ce ní fɔ́n sí te; kanhún ce ní fɔ́n, nú agǐdigbo ce ní fɔ́n, ɖó hangbe ce ná kó ɖi có ayǐ ná zɛ kpɔn. Aklúnɔ, un ná kpa susu nú we ɖo togun lɛ́ɛ mɛ; un ná ji han dó mlá we ɖo akɔta lɛ́ɛ tɛ́ntin, ɖó xomɛnyínyɔ́ towe hun káká yi jǐnukúnsin, gbejíninɔ towe zɛ akpɔ́kpɔ́ lɛ́ɛ wú. Mawu, ɖe susu towe xlɛ́ káká zɛ jǐxwé wú; ɖe susu towe xlɛ́ gbɔn ayǐkúngban ɔ́ bǐ jí! Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ. Nu e mi ma nɔ kɛ dó nǔɖé mɛ ǎ ɔ́ wɛ nyí hwɛ e mi nɔ gbo é a? Mi gbɛtɔ́ lɛ́ɛ ɔ́, lě e mi nɔ ɖɔ hwɛjlɔ́jlɔ́ gbɔn é ná? Hwɛjlɔ́jlɔ́ nɛ́ ǎ; mi ɖésúnɔ wɛ nɔ́ xo ahizi. Mi ɖésúnɔ nɔ́ zé alɔ mitɔn dó xo dǎka gbɔn to ɔ́ bǐ mɛ. Mɛdídá lɛ́ɛ ɔ́, sín ajidonu wɛ yě kó nyí gbɛtɔ́ nyanya sín; è ko ji yě zinzin có yě gosín ali ɖagbe ɔ́ jí ǎ, adingban wɛ yě nɔ́ ɖó. Yě vɛ́ aɖǐ dan ɖɔhun, jakpata e sú tó, bó ma nɔ se jɔ ǎ é ɖɔhun. Mɛ e nɔ jlɛ́ nǔ hú mɛ bǐ, bó nɔ́ wlí dan é ná bó ɖo nǔ xo n'i wɛ ɔ́, é nɔ́ wlí tó wú ǎ. Mawu e, nǔ mɛdídá nɛ́ lɛ́ɛ ɔ́, wɛ̌n aɖǔ dó nu mɛ nú yě; Mawu Mavɔmavɔ e, nǔ kinnikínní ví ɖɔhun nɛ́ lɛ́ɛ ɔ́, só aglan yě. Yě ní sa yi ayǐsun ɖɔhun, yě da gǎ hǔn, ní má yi zɔ ó. Mɛdídá lɛ́ɛ ní cí agwǐn ma ɖó go e nɔ ɖo yiyi wɛ, bó nɔ́ ɖo sínsínsínsín wɛ é ɖɔhun. Énɛ́ ɔ́, yě ná mɔ hwe ǎ, vǐ e flɛ́ kɛ́n é ɖɔhun. Wunkan wɛ yě nyí; cóbónú wunkan ɔ́ ká ná dó wunkan ɔ́, axásáxásá jɔhɔn ní wá bɛ́ bǐ yi, é sixú kó xú, é ká sixú kpo ɖo mǔ. Nǔjlɔ́jlɔ́watɔ́ ká ná j'awǎ, ɖó Mawu ná ba hlɔn n'i, é ná lɛ wǔ ɖo mɛdídá lɛ́ɛ sín kanjɔ mɛ. Énɛ́ ɔ́, gbɛtɔ́ lɛ́ɛ bǐ ná ɖɔ: “Anhɛɛn! Mɛ e nɔ wa nǔ jlɔ́jlɔ́ lɛ́ɛ ná mɔ ajɔ yětɔn. Anhɛɛn! Mawu ɖe bó nɔ́ gbo hwɛ.” Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ. Hwenu e Sawúlu sɛ́ mɛ dó Davídi xwé gbe ɖɔ è nǐ yi cɔ́ ɛ káká bó hu i ɔ́ wɛ Davídi ji. Mawu ce, hwlɛ̌n mì ɖo kɛntɔ́ ce lɛ́ɛ sí, cyɔ́n alɔ jǐ ce ɖo mɛ e sí te dó jǐ ce lɛ́ɛ nukɔn. Hwlɛ̌n mì ɖo acɛgbatɔ́ lɛ́ɛ sí, hwlɛ̌n mì gán ɖo mɛhutɔ́ lɛ́ɛ sí. Mawu Mavɔmavɔ, kpɔ́n; yě tɔwu nú mì, bó ná hu mì. Gǎnhúnǔtɔ́ lɛ́ɛ ɖo gbě ce blá wɛ, un ka wa nǔɖé nyi do ǎ, un ka hu hwɛ ɖé ǎ. Un wa nǔɖé nyi do ǎ; yě ká ɖo wezun jí ja; yě sɔ́ nǔ bó ná tɔ́n ahwan mì, Mawu Mavɔmavɔ, fɔ́n bó wá káká gɔ̌n ce bó wá dó alɔ mì. Mawu Mavɔmavɔ, Mawu Nǔbǐwúkpétɔ́, Mawu Izlayɛ́li tɔn, sí te bó dɔn tó nú akɔta lɛ́ɛ bǐ; ma kú nǔbláwǔ nú nǔ mɛdídá, mɛsaɖutɔ́ nɛ́ lɛ́ɛ ɖěbǔ ó. Gbadanu tɛgbɛ ɔ́, yě nɔ́ lɛ́ kɔ wá, yě nɔ́ ɖo nǔ hó wɛ avǔn ɖɔhun, bó nɔ́ ɖo lɛ́ lɛ̌ dó toxo ɔ́ wɛ. Kpɔ́n, nu yětɔn nɔ́ nyɛ afúntúnkplɔ̌. Hwǐ wɛ ɖo nu yětɔn mɛ; xó e nɔ́ tɔ́n sín nu yětɔn mɛ ɔ́, mɛ̌ ká sixú se? Amɔ̌, hwɛ Mawu Mavɔmavɔ ɔ́, a ɖo yě ko wɛ, a ɖo slǎmɛ ɖɔ akɔta e nyí akɔta ɖěvo lɛ́ɛ bǐ wú wɛ. Hwi mɛ e nɔ cyɔ́n alɔ jǐ ce ɔ́ gɔ́n wɛ un nɔ kpɔ́n; Mawu, hwi wɛ nyí ahohó ce. Mawu ce xomɛnyɔ́tɔ́ ɔ́ nɔ́ wá gɔ̌n ce bó nɔ́ gɔ́ alɔ nú mì. Mawu ce nɔ́ zin kɛntɔ́ ce lɛ́ɛ dɛ́, bó nɔ́ sɔ́ xlɛ́ mì. Aklúnɔ, ma hu yě din tlóló ó, togun ce táá wɔn lě e a kpé nǔ wú gbɔn é. Aklúnɔ gǎglónú mǐtɔn, zě hlɔ̌nhlɔ́n towe dó dán yě bó zin yě dɛ́, ɖó yě kɛ nu ɔ́, hwɛ jɛ́n yě nɔ́ hu dó we. Goyíyí yě ɖésúnɔ tɔn ní nyí mɔ nú yě jɛ mɛ. Đó nu dó mɛ wɛ jɛ́n yě nɔ́ ɖe, adingban ɖó wɛ jɛ́n yě nɔ́ ɖe. Nɔ xomɛsin jí bó sú kún yětɔn dó. Sú kún yětɔn dó bónú yě ní ma sɔ́ tíin nyǐ ó. È nǐ tunwun ɖɔ hwi Mawu ɔ́ wɛ kpa acɛ ɖo Izlayɛ́li, bó kpa acɛ káká yi fí e ayǐkúngban ɔ́ kponu ɖó é. Gbadanu tɛgbɛ ɔ́, yě nɔ́ lɛ́ kɔ wá, yě nɔ́ ɖo nǔ hó wɛ avǔn ɖɔhun, bó nɔ́ ɖo lɛ́ lɛ̌ dó toxo ɔ́ wɛ. Yě nɔ́ ɖo dǐndán kpé wɛ, bó nɔ́ ɖo nǔɖuɖu ba wɛ. Nú yě má gɔ́ xo ǎ ɔ́, yě nɔ́ jɛ nǔ hó jí. Nyɛ ɔ́, un ná ji han dó kpa hlɔ̌nhlɔ́n towe. Ayǐ hɔ́n tlóló ɔ́, un ná jlá lě e a nyɔ̌ xomɛ gbɔn é, ɖó ahohó wɛ a nyǐ nú mì. Hwi wɛ nyí bibɛtɛn ce, fí e un nɔ hɔn hwlá cí adǎngbomɛzán gbe é. Mawu, hwi wɛ un ná ji han dó kpa susu ná, ɖó hwi Mawu ce ɔ́, hwi Mawu xomɛnyɔ́tɔ́ ɔ́, hwi wɛ nyí ahohó ce, hwi wɛ nyí hlɔ̌nhlɔ́n ce. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. Davídi sín han wɛ. È nɔ ji dó han e è nɔ ylɔ́ ɖɔ “Folówa ɖagbe ɖagbe kúnnuɖiɖe tɔn” é sín hangbe mɛ dó kplɔ́n nǔ mɛ. Hwenu e Davídi fun ahwan xá Silíinu e ɖo Mɛzopotamíi lɛ́ɛ kpódó éé ɖo Sova lɛ́ɛ kpó wɛ é ji han élɔ́; hwe énɛ́ nu wɛ Jowabu lɛ́ kɔ sín dɔ̌n bó wá hu Edɔ́munu děgba atɔn (12.000) ɖo Jɛtɔdo ɔ́ mɛ. Mawu, a nya mǐ, a gba mǐ dó; a ɖo xomɛsin jí nǔgbó, amɔ̌, kɛnklɛ́n, lɛ̌ sɔ́ mǐ ɖó tɛn mǐtɔn xóxó ɔ́ mɛ bó vɔ́ mǐ to. A hǔnhún ayǐkúngban ɔ́, a gba ayǐkúngban ɔ́ hánnyá; blǒ fí e é gba ɖe lɛ́ɛ ɖó, ɖó é ɖo dǐndán wɛ. Nǔ e a sɔ́ togun towe sín nukún dó mɔ é syɛ́n, a kpé vɛ̌ɛn gláglá ɖé nú mǐ. Mɛ e ɖo gbejí nú we lɛ́ɛ ɔ́, a ɖɔ hwenu e yě ná hɔn bɔ gǎ má ná jɛ yě wú ǎ nú yě. Sɔ́ ɖisí lɔ towe dó hwlɛ́n mǐ; yǐ gbe nú ɖɛ mǐtɔn; énɛ́ ɔ́, mǐ wǎnyínámɔ towe lɛ́ɛ ná gán. Mawu ɖɔ ɖo xwé tɔn gbe ɖɔ: “Đuɖéjí ɔ́ ce wɛ. Un ná má Sikɛ́mu toxo ɔ́. Sukɔ́tu tɔdo ɔ́, un ná má mɛtɔn mɛtɔn nú mɛ. Galadi to ɔ́, ce wɛ, Manasée to ɔ́, ce wɛ. Eflayímu to ɔ́, ahwanfungbákún ce wɛ, Judáa to ɔ́, makpo ce wɛ. Mɔwabu to ɔ́, wǔlɛgbán ce wɛ. Edɔ́mu to ɔ́, un ko ɖó afɔ jí bó ná yí. Un sú xó bó tɔ́n ahwan Filisitɛ́ɛn lɛ́ɛ.” Mɛ̌ ká ná kplá mì yi Edɔ́mu to ɔ́ mɛ din? Éɖíe è mɛ ahohó lɛ́ lɛ̌ dó toxo tɔn bǐ e! Mɛ̌ ká ná jó nú mì? Mɛ̌ ká sɔ́ sixú nyí zɛ hwi Mawu ɔ́ wú? Hwi ɖíe ká kó gbɛ́ mǐ, bó má sɔ́ nɔ́ kplá mǐ yi ahwangbénu ɖě ǎ e! Gɔ̌ alɔ nú mǐ nú mǐ nǎ ɖu ɖo kɛntɔ́ jí. Gbɛtɔ́ wú gán jɛ ɔ́, nǔ yǎyá wɛ. Mawu ɖo kpɔ́ xá mǐ ɔ́, mǐ ná wa adǎn. É wɛ ná zin kɛntɔ́ mǐtɔn lɛ́ɛ dɛ́. Hanjigbɛ́gán ɔ́ sín hanjiwéma mɛ wɛ han élɔ́ ɖe. È sɔ́ xó lómílómí dó han mɛ. È nɔ ji bó nɔ́ xo kanhún d'é mɛ. Davídi sín han wɛ. Mawu, se xó e sú wɛ un ɖe é; ɖǒtó ɖɛ e xo wɛ un ɖe é. Un ɖo xó sú ylɔ́ we wɛ sín fí e ayǐkúngban ɔ́ bɛ́ sín é, awakanmɛ bǐ wɛ kú mì. Kplá mì yi só e jí un ma sixú yi ǎ é jí. Đó bibɛtɛn wɛ a nyǐ nú mì, ahohó wɛ a nyǐ nú mì ɖo kɛntɔ́ nukɔn. É jló mì ɖɔ má ɖo xwé towe gbe káká sɔ́yi; é jló mì ɖɔ má hɔn hwlá cí awa towe lɛ́ɛ glɔ́, ɖó hwi Mawu ɔ́, a nɔ se akpá e un dó é. Mɛ e nɔ sí we lɛ́ɛ ɔ́, hwi wɛ nɔ ná nǔ e nyí yětɔn ɔ́ yě. Dǒ azǎn azǎn jí nú axɔ́sú ɔ́; xwe ní jɛ xwe jí n'i káká sɔ́yi. Mawu, blǒ bónú axɔ́sú ɔ́ ní nɔ zinkpo jí ɖo nukɔn towe káká sɔ́yi; xomɛnyínyɔ́ towe kpó gbejíninɔ towe kpó ní kpɔ́n jǐ tɔn! Énɛ́ ɔ́, un ná nɔ́ ɖo han ji mlá we wɛ hwebǐnu, bó ná dó ɖe akpá e un dó lɛ́ɛ ayǐhɔ́ngbe ayǐhɔ́ngbe. Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji dó Yedutún sín hangbe mɛ. Davídi sín han wɛ. Mawu ɖokpónɔ géé gɔ́n wɛ un nɔ vo ɖe; gɔ̌n tɔn wɛ hwlɛngán ce nɔ́ gosín. É ɖokpó géé wɛ nyí só e wú un gán jɛ é, é wɛ nyí hwlɛngán ce, é wɛ nyí ahohó ce, nǔɖé ná dán mì ǎ. Káká hwetɛ́nu wɛ mi ka ná xísí dó gbɛtɔ́ ɖokpó ɔ́ dó yi jɛ? Mi xísí dó e, bó ná hu i; mi jló ná tun i gba dǒ e kó ɖo tɔ́tɔ́ é ɖɔhun. Mi jló ná mu i zindɛ́ kpá e kó nyi akɔ́n wɛn é ɖɔhun. Nǔgbó wɛ, mi ɖó gbe kpɔ́, bó ná ɖe e sín tɛn ɖaxó e mɛ é ɖe é. Adingban ɖíɖó wɛ nɔ víví nú mi. Yě nɔ́ sɔ́ nu yětɔn dó ɖo ɖɛ ɖagbe xo nú mɛ wɛ, ayi yětɔn mɛ ɔ́, ɖɛ nyanya xo wɛ yě ká ɖe. Mawu ɖokpónɔ géé gɔ́n wɛ un ɖó ná ba vivo ce ɖe, ɖó é ɖokpó wɛ un ɖó nukún. É ɖokpónɔ géé wɛ nyí só e wú un gán jɛ é, é wɛ nyí hwlɛngán ce, é wɛ nyí ahohó ce, nǔɖé ná dán mì ǎ. Mawu jí wɛ hwlɛngán ce kpódó susu ce kpó jínjɔ́n. É wɛ nyí só e nɔ nya xɛ ɖo jǐ ce é. É wɛ nyí bibɛtɛn ce. Mi mɛ e ɖo togun ce mɛ lɛ́ɛ e mi, mi sɔ́ miɖée dó alɔ mɛ nú Mawu hwebǐnu. Mi ɖɔ nǔ e ɖo ayi mǐtɔn mɛ lɛ́ɛ bǐ n'i, é wɛ nyí bibɛtɛn mǐtɔn. Nǔgbó wɛ, gbɛtɔ́ lɛ́ɛ ɔ́, nǔ yǎyá wɛ yě nyí. Gbɛtɔ́ lɛ́ɛ ɖésú ɔ́, adingbannɔ kpowun wɛ yě nyí. Gbɛtɔ́ lɛ́ɛ ɔ́, nú è bɛ̌ yě bǐ ɖó gan jí ɔ́, yě fúɖá hú jɔhɔn. Mi ma gán jɛ mɛ táfútáfú wú ó, mi ma ka ɖó nukún nǔ e è fán asú bó yí é ó, nukúnɖíɖó yǎyá wɛ é ná nyí. Dɔkun ɖo dɔkun jí jɛ nú mi wɛ hǔn, ayixa mitɔn ní má nɔ wú ó. Đó Mawu kó ɖɔ xó ɖé; azɔn ɖokpó kɛ́ɖɛ́ wɛ é ka ɖɔ ǎ; é ɖɔ: “Hlɔ̌nhlɔ́n ɔ́, ce wɛ.” Aklúnɔ, xomɛnyínyɔ́ ɔ́ lɔmɔ̌ ɔ́, towe wɛ é nyí, ɖó hwi wɛ nɔ sú nǔ e mɛ ɖokpó ɖokpó wa ɔ́ sín axɔ́ ɛ. Davídi sín han. Hwenu e é ɖo gbětótló Judáa tɔn mɛ é wɛ é ji. Mawu, hwi wɛ nyí Mawu ce, bɔ un ɖo biba we wɛ; kɔ towe nɔ xú mì; nyi ɖésúnɔ ɔ́ bǐ ɖo biba we wɛ, lě e sin nɔ jló ayǐkúngban xúxú é ɖɔhun. Ninɔmɛ énɛ́ mɛ wɛ un ɖe, bó zé nukún dó ba we ná ɖo xwé towe gbe, bó ná kpɔ́n hlɔ̌nhlɔ́n towe, bó kpɔ́n susu towe, ɖó xomɛnyínyɔ́ towe nyɔ́ hú gbɛ. Un ná nɔ́ ɖo mlǎmlá we wɛ. Un ná nɔ́ dó kú nú we ɖo gbɛzán ce lɛ́ɛ bǐ mɛ. Un ná dlɛ́n alɔ sɛ́ dó we, bó ná ɖɔ xó nú we. Énɛ́ ɔ́, ji mɛ ná jɛ mì, mɛ e ɖu nǔ ɖagbe ɖagbe, nǔjɔnǔ gɔ́ xo é ɖɔhun. Un ná nɔ́ j'awǎ, bó ná nɔ́ mlá we. Nú un mlɔ́ adɔ̌zan ce jí ɔ́, un nɔ́ ɖo flínflín we wɛ; un nɔ ɖo tamɛ lin dó wǔ towe wɛ ɖo zǎn ɔ́ mɛ. Đó hwi wɛ nyí alɔgɔ́númɛtɔ́ ce, bɔ un ɖo xó sú wɛ kpó awǎjijɛ kpó ɖo awa towe lɛ́ɛ glɔ́. Hwi wú wɛ un tlɛ́ dó, aɖisí lɔ towe wɛ a dǒ hɛn mì. Lo ɔ́, mɛ e ɖo biba ná gblé gbɛ dó nú mì wɛ lɛ́ɛ ná yi ayǐkúngban glɔ́ ɖo kútomɛ. Hwǐ wɛ ná ɖu lan yětɔn, avǔn gbě tɔn lɛ́ɛ sín nǔɖuɖu wɛ yě ná nyí. Axɔ́sú ɔ́ ká ná j'awǎ ɖo Mawu mɛ. Mɛ e ná ɖɔ xó ɖé bó xwlé Mawu d'é jí lɛ́ɛ ɔ́, nǔ ná nyɔ́ nú yě, amɔ̌, adingbannɔ lɛ́ɛ ɔ́, è nǎ xwe nu yětɔn dó xɔ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu, un ɖo azɔn wɛn wɛ, ɖǒtó mì! Hwlɛ̌n gbɛ ce ɖo kɛntɔ́ e ɖi xɛsi ná wɛ un ɖe ɔ́ sí. Đe mì sín gbě ce e dǎkaxotɔ́ lɛ́ɛ blá é mɛ; ɖe mì sín nǔagɔagɔwatɔ́ e sɛ yěɖée kplé, bó ɖo zǐngídi jí lɛ́ɛ mɛ. Yě nɔ́ gan ɖɛ̌ e ɖo nu yětɔn mɛ é hwǐ ɖɔhun; xó baɖabaɖa e nɔ tɔ́n sín nu yětɔn mɛ ɔ́ aɖǐgá wɛ, bɔ yě nɔ́ nɔ nǔglɔ́ bó nɔ́ da dó gbɛtɔ́ xomɛvɔ́nɔ lɛ́ɛ. Ajijimɛ wɛ yě nɔ́ da dó mɛ; ta yětɔn ka nɔ́ kínkɔ́n anyǔ ǎ. Yě nɔ́ ná akɔ́nkpinkpan yěɖée ɖɔ yě ní xo dǎka. Yě nɔ́ kplé bó nɔ́ ɖó mɔ nú mɛ, bó nɔ́ ɖɔ: “Mɛ ɖé ná mɔ ǎ.” Yě nɔ́ ɖe wě nyanya bó nɔ́ ɖɔ: “Mǐ ɖo gbesisɔ mɛ, mǐ ko to nǔ mǐtɔn.” Ayixa e ɖo gbɛtɔ́ xo mɛ é kpó linlin e ɖo xo tɔn mɛ é kpó gɔ́ngɔ́n. Mawu da gǎ dó yě ajijimɛ. Kpɔ́n, yě yí kpɛ́n. Đɛ̌ yětɔn wɛ zin yě dɛ́; mɛ e mɔ yě lɛ́ɛ bǐ wɛ nɔ́ húnhún ta bo nɔ ko yě. Xɛsi jɛ gbɛtɔ́ lɛ́ɛ bǐ jí; yě nɔ́ ɖo nǔ e Mawu wa ɔ́ jlá wɛ; yě mɔ nǔ jɛ nǔ e Mawu wa é wú. Nǔjlɔ́jlɔ́watɔ́ lɛ́ɛ ní j'awǎ ɖo Mawu Mavɔmavɔ mɛ, yě ní bɛ ta ɖo gɔ̌n tɔn, bónú é víví nú mɛ e ɖó ayijlɔ́jlɔ́ lɛ́ɛ bǐ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu, é jɛ xá ɖɔ è nǐ kpa susu nú we ɖo Sinyɔ́ɔ, toxo towe mɛ. É jɛ xá ɖɔ akpá e è dǒ nú we lɛ́ɛ ɔ́, è nǐ ɖe. Hwi wɛ nɔ se ɖɛ, énɛ́ wú ɔ́, gbɛtɔ́ lɛ́ɛ bǐ ná wá gɔ̌n towe. Hwɛ e un hu lɛ́ɛ hú gǎn mì. Amɔ̌, hwɛ ɔ́, a nǎ súnsún hwɛ sín kɔ nú mì. Nǔ nyɔ́ nú mɛ e a sɔ́, bó dɔn dó wǔ, bɔ é ná nɔ xwé towe gbe é. Mǐ ná ɖu nǔ ɖagbe e ɖo xwé towe gbe lɛ́ɛ sín gbɛ. Mǐ ná ɖu nǔ mímɛ́ e ɖo nɔtɛn towe lɛ́ɛ sín gbɛ. Mawu Mɛhwlɛ́ngántɔ́ mǐtɔn, a nɔ wa nǔ ɖagbe ɖagbe lɛ́ɛ nú mǐ ɖo hwɛjijɔ towe mɛ, dó yí gbe nú ɖɛ mǐtɔn. Hwi wú wɛ gbɛtɔ́ e gbɔn agěwají xuwa jí é bǐ gán jɛ. Hlɔ̌nhlɔ́n towe wɛ a zě dó hɛn só lɛ́ɛ ɖó te. A dǒ gbli bɔ é vɛ́ jlɛ́. Xu lɛ́ɛ ɖo adǎn jí ɔ́, a nɔ hwíhwɛ́ yě. Xu lɛ́ɛ ɖo mlǐmlí wɛ kpó adǎn kpɔ́ ɔ́, a nɔ hwíhwɛ́ yě, bó nɔ́ hwíhwɛ́ togun e ɖo adǎn jí lɛ́ɛ. Mɛ e ɖo ayǐkúngban ɔ́ jí é bǐ ɖo xɛsi jí káká yi fí e gbɛ ɔ́ kponu ɖó é, ɖó nǔjíwǔ e a nɔ bló lɛ́ɛ wú. A nɔ dó xomɛhunhun nú gbɛtɔ́ lɛ́ɛ, sín zǎnzǎn hwe jí káká yi gbada hwe jí. A nɔ kpé nukún dó ayǐkúngban ɔ́ wú, bó nɔ́ hú sin ná, bɔ é nɔ́ kpé. A nɔ ná dɔkun wɔ̌buwɔ́bú ayǐkúngban. Tɔsisa hwi Mawu ɔ́ tɔn ɖo gǐgɔ́ jí tɛgbɛ. A nɔ bló ayǐkúngban ɔ́ ɖó nú jinukún lɛ́ɛ. A nɔ hú sin nú gle lɛ́ɛ. A nɔ jíjé ayǐkúngban ɔ́. A nɔ sɛ́ jǐ gbó dó, bɔ é nɔ́ ja, bɔ ayǐkúngban nɔ nu sin bɔ é nɔ́ kpé lan tɔn mɛ. A nɔ dó acɛ nǔ e nɔ́ wú sín lan tɔn mɛ lɛ́ɛ jí. A nɔ ná ji bɔ é nɔ jɛ, bɔ xwe ɔ́ nɔ́ fó dó ɖagbe jí. A gbɔn fí ɖé dín ɔ́, dɔkun nɔ sa tɔ. Gbětótló mɛ bǐ wɛ ama zɔ́n gbɔn kpɛɛn. Só kpɛví kpɛví lɛ́ɛ ɔ́, awǎjijɛ wɛ nyí gǒjíblánú bɔ yě sin. Kanlin ɖo amagbo mɛ winnini. Jinukún wɛ nyí avɔ bɔ tɔdo lɛ́ɛ cyɔ́n. Nǔ bǐ ɖo han ji dó kpa we wɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Mi mɛ e ɖo ayǐkúngban ɔ́ jí lɛ́ɛ bǐ ní kpa awǒbóbó nú Mawu. Mi ɖɔ xó lómílómí dó sɔ́ nyǐkɔ tɔn su dó han mɛ. Mi kpa susu nú Mawu dó sɔ́ ɛ su. Mi ɖɔ n'i ɖɔ: “Mawu, nɛ̌ nǔwiwa towe lɛ́ɛ ká dó xɛsi sɔ nɛ́! Hlɔ̌nhlɔ́n towe d'agba sɔ mɔ̌, bɔ kɛntɔ́ towe lɛ́ɛ nɔ́ wá jɛ kpo ɖo asá towe mɛ kpó xɛsi kpó. Ayǐkúngban ɔ́ bǐ ɖo kɔ́ ɖe wɛ ɖo nukɔn towe, bó ɖo han ji dó mlá we wɛ. Ayǐkúngban ɔ́ ɖo xó lómílómí ɖɔ dó sɔ́ nyǐkɔ towe su wɛ.” Mi wá kpɔ́n azɔ̌ e Mawu wa lɛ́ɛ. Nǔjíwǔ wɛ é wa nú gbɛtɔ́ lɛ́ɛ. É zé xu dó húzú ayǐkúngban xúxú, bɔ è zɔn afɔ gbɔn xuzan ɔ́ mɛ dín, bɔ mǐ j'awǎ ɖó nǔ ɖaxó énɛ́ e é wa é wú. É sɔ́ gǎnhúnǔ tɔn dó ɖu axɔ́sú, bó ná ɖu káká sɔ́yi. Nukún tɔn ɖo akɔta lɛ́ɛ jí. Mɛ e nɔ fɔ́n gǔ dó jǐ tɔn lɛ́ɛ ní má yí nugo ó. Togun lɛ́ɛ mi, mi dó kú nú Mawu mǐtɔn. Mi sú xó bó kpa susu n'i. É wɛ ná gbɛ lǐndɔ̌n mǐtɔn; é lɔn bónú mǐ ɖe afɔ nyi do ǎ. Mawu ce, a dǒ mǐ kpɔ́n. A xo zo dó mǐ kpatágan ɖɔhun. A kplá mǐ yi dó ɖɔ mɛ; a sɔ́ agban kpinkpɛn ɖó ta nú mǐ. A jǒ kɛntɔ́ mǐtɔn lɛ́ɛ dó bɔ yě xá sɔ́ gbɔn ta mǐtɔn jí. Mǐ xo zo zlɛ́, bó xo tɔ zlɛ́. A ka ɖe ɖɛ mǐ wǔyɛ́yɛ́ afɔyɛ́yɛ́, bó ná gbɔjɛ́ mǐ. Mawu ce, un ná yi xwé towe gbe, bó ná hɛn vɔ̌ e è nɔ dó zo é; un ná ɖe akpá e un dó nú we lɛ́ɛ, akpá e un sɔ́ nu ce dó dó nú we, hwenu e adǎn ɖo gbigbo mì wɛ é. Un ná fɔ kanlin e kló lɛ́ɛ dó sá vɔ̌ e è nɔ dó zo ɔ́ nú we; un ná hɛn agbo kpó zǎlínkpɔ́n kpó, un ná sɔ́ nyibú kpó gbǎgbá kpó dó sá vɔ̌ nú we. Mi mɛ e ɖó sísí nú Mawu lɛ́ɛ e mi, mi bǐ wá ɖótó bó se; mi wá má kpi tan nú mi; má ɖɔ nǔ e Mawu wa nú mì lɛ́ɛ nú mi ná se. Hwenu e un sɔ́ nu ce dó ɖo ylɔ̌ylɔ́ ɛ wɛ ɔ́ wɛ ɖɛ̌ ce kó ɖo susu kpa n'i wɛ. Ényí ayixa nyanya ɖé kó ɖo xo ce mɛ wɛ ɔ́, Aklúnɔ ná yí ɖɛ ce ǎ. É ká yí ɖɛ ce. É ɖótó ɖɛ e xo wɛ un ɖe ɔ́ ganjí. Un dó kú nú Mawu. É dó tókúse ɖɛ e xo wɛ un ɖe lɛ́ɛ mɛ ǎ; é ɖe xomɛnyínyɔ́ tɔn sín wǔ ce ǎ. Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji bó nɔ́ xo kanhún d'é mɛ. Mawu ce, ɖe xomɛnyínyɔ́ towe xlɛ́ mǐ, bó xo ɖɛ dó mǐ jí. Nukún towe mɛ ní hɔ́n dó mǐ jí; énɛ́ ɔ́, è nǎ tunwun lě e a nɔ wa nǔ gbɔn ɔ́ ɖo ayǐkúngban jí, akɔta lɛ́ɛ bǐ ná tunwun ɖɔ hwi wɛ nɔ́ hwlɛ́n mɛ gán. Mawu ce, togun lɛ́ɛ ní kpa we, togun lɛ́ɛ bǐ ní kpa we. Akɔta lɛ́ɛ ní j'awǎ; yě ní ji han dó ɖe awǎjijɛ yětɔn xlɛ́, ɖó a nɔ ɖɔ hwɛ xá togun lɛ́ɛ ɖó sɛ́nxwi jí, bó nɔ́ xlɛ́ ali akɔta lɛ́ɛ ɖo ayǐkúngban ɔ́ jí. Mawu ce, togun lɛ́ɛ ní kpa we, togun lɛ́ɛ bǐ ní kpa we. Ayǐkúngban ná jinukún tɔn lɛ́ɛ, Mawu dó nú mǐ, Mawu mǐtɔn dó nú mǐ. Mawu ní dó nú mǐ, bónú wɛ̌kɛ́zo ɛnɛ lɛ́ɛ bǐ ní ɖó sísí n'i. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu nɔ sí te bɔ kɛntɔ́ tɔn lɛ́ɛ nɔ kɛn; mɛ e gbɛ́ wǎn n'i lɛ́ɛ nɔ hɔn ɖo nukɔn tɔn. Lě e azizɔ nɔ kɛn gbɔn ɖo jɔhɔn mɛ ɔ́, mɔ̌ wɛ yě nɔ́ kɛn gbɔn ɖo nukɔn tɔn. Lě e aɖuwa nɔ sínsín gbɔn ɖo myɔ nu ɔ́, mɔ̌ wɛ mɛdídá lɛ́ɛ nɔ sínsín gbɔn ɖo nukɔn tɔn. Lo ɔ́, mɛ e nɔ wa nǔ ɖó sɛ́nxwi jí lɛ́ɛ nɔ ɖo xomɛhunhun jí ɖo nukɔn tɔn; yě nɔ́ j'awǎ káká, yě nɔ́ j'awǎ bɔ é nɔ́ vɛ́ jlɛ́, yě nɔ́ ɖo xomɛ hun mɛ wá ɖó wɛ. Mi ji han mlá Mawu, mi ɖɔ xó lómílómí dó mlá nyǐkɔ tɔn dó han mɛ. Mi ɖe ali nú Mawu e nɔ́ zɔn akpɔ́kpɔ́ jí sɔ́ jí ɖɔhun é. Mawu Mavɔmavɔ wɛ nyǐkɔ tɔn nyí. Mi j'awǎ ɖo nukɔn tɔn. Mawu ɖo nɔtɛn mímɛ́ tɔn, bó nyí tɔ́ nú tɔ́cyɔvǐ lɛ́ɛ, bó nyí xɛnyaɖomɛjítɔ́ nú asúkúsi lɛ́ɛ. Mawu wɛ nɔ́ ná hɛ̌nnu mɛ e ma ɖó mɛɖé ǎ lɛ́ɛ; é wɛ nɔ́ ɖe gantɔ́ lɛ́ɛ nyi te, bónú yě ná mɔ vivo. Lo ɔ́, mɛ e nɔ fɔ́n gǔ dó Mawu jí lɛ́ɛ nɔ́ nɔ axéko jí. Mawu ce, hwenu e a ɖo togun towe nu ɔ́, hwenu e a zun zɔnlin ɖo gbětótló mɛ ɔ́, ayǐkúngban dán wǔ, jǐ ja bɔ é vɛ́ jlɛ́, ɖó hwi Mawu Sinayíi só ɔ́ tɔn wɛ jǎwe; hwi Mawu Izlayɛ́li tɔn ɔ́ wɛ ɖo dǐndín wɛ. Mawu ce, a sɛ́ jǐ gbó ɖé dó bɔ é ja. A nǎ hlɔ̌nhlɔ́n to towe hwenu e to towe gblé bǐ é. Togun towe sá xwé nyi fínɛ́, fí e a blǒ ɖ'ayǐ ɖo xomɛnyínyɔ́ towe mɛ nú wamamɔnɔ lɛ́ɛ é. Aklúnɔ ɖɔ xó ɖé, bɔ nyɔ̌nu lɛ́ɛ dó ahwan gbě bó ɖo jlǎjlá wɛ bó nɔ́ ɖɔ: “Axɔ́sú e ɖo kɛntɔ́ lɛ́ɛ sín ahwangɔnu lɛ́ɛ nu lɛ́ɛ dó afɔ wezun mɛ; yě hɔn yi!” Nyɔ̌nu xwési lɛ́ɛ ɖo nǔ e è hɛn wá sín ahwangbénu lɛ́ɛ má wɛ. Ahwannɛ́ e mi mɔ ɔ́, awa tɔn lɛ́ɛ bǐ wɛ nyí kpatágan, bɔ fún tɔn lɛ́ɛ bǐ nyí siká akú, bɔ midɛɛ lɛ́ɛ ká yi mlɔ́ kanlinkpó mɛ. Hwenu e Nǔbǐwúkpétɔ́ ɔ́ gba axɔ́sú lɛ́ɛ dó ɖo to ɔ́ mɛ ɔ́, laglásilinfín ɖo gbigba wɛ fo ɖɔhun ɖo Só Wiwi ɔ́ jí. Basáni só ɔ́, só mímɛ́ ɖé wɛ; só Basáni tɔn ɔ́, só ɖé wɛ bó ɖó nuvínu gěgé. Bɔ hwi só nuvínu gěgé nɔ, étɛ́wú a ɖo wǔ hwan só e Mawu sɔ́ bó ná nɔ jí é wɛ? Só e Mawu Mavɔmavɔ sɔ́ bɔ é ná nyí nɔtɛn tɔn káká sɔ́yi é wɛ. Ahwankɛkɛ́ Mawu tɔn lɛ́ɛ sukpɔ́ lóóo! Afatɔ́n (1.000) afatɔ́n wɛ è nɔ xa. Aklúnɔ kpó ahwankɛkɛ́ tɔn lɛ́ɛ kpó wá, Sinayíi só ɔ́ ɖo tɛn mímɛ́ ɔ́ mɛ. Mawu Mavɔmavɔ, a xá só ta aga ɖéé. A kplá gantɔ́ lɛ́ɛ yi; a yǐ nǔníná ɖo gbɛtɔ́ lɛ́ɛ sí, káká bó yí ɖo mɛ e nɔ fɔ́n gǔ lɛ́ɛ sí. Mawu Mavɔmavɔ, a wǎ sá xwé ɖó Sinyɔ́ɔ. Jɛlijɛli nú Aklúnɔ ayǐhɔ́ngbe ayǐhɔ́ngbe. É wɛ nɔ́ yí agban mǐtɔn lɛ́ɛ hɛn. É wɛ nyí Mawu mɛhwlɛ́ngántɔ́ mǐtɔn. Mawu énɛ́ ɔ́, é wɛ nyí Mawu e nɔ́ hwlɛ́n mǐ gán é. Mawu Mavɔmavɔ, Aklúnɔ tunwun lě e é ná hwlɛ́n mǐ gán gbɔn ɖo kú sí é. Kɛntɔ́ mǐtɔn lɛ́ɛ ɔ́, Mawu ná gba taká yě; é ná fɛ́n ahɔnká mɛ e nɔ fɔ́n bó nɔ́ ɖo gbɛ nyanya zán wɛ lɛ́ɛ. Aklúnɔ ɖɔ: “Un ná kplá yě sín Basáni só jí wá; un ná kplá yě sín xuzan mɛ wá, bónú afɔ towe ná gbɔn kɛntɔ́ towe lɛ́ɛ sín kanjɔ mɛ, bɔ cukú towe lɛ́ɛ ná ɖíɖɔ́ kanjɔ yětɔn lě e é jló yě gbɔn é.” Mawu ce, è mɔ lě e a zɔn mɛ towe lɛ́ɛ tɛ́ntin byɔ́ xwé towe gbe gbɔn é; Mawu ce, axɔ́sú ce, è mɔ lě e a byɔ́ tɛn mímɛ́ ɔ́ mɛ gbɔn é. Hansinɔ lɛ́ɛ ɖo nukɔn, nǔxotɔ́ lɛ́ɛ bɔ d'é wú, bɔ ahwli lɛ́ɛ ɖo tɛ́ntin bó ɖo hǔnví xo wɛ. Mi mlá Mawu ɖo kplékplé mɛ mitɔn lɛ́ɛ. Mi mɛ e tɔ́n sín Izlayɛ́li kún mɛ lɛ́ɛ e mi, mi mlá Mawu Mavɔmavɔ. Énɛ́! Bɛnjamɛ́ɛ e nyí yɔkpɔ́vú ɖo nɔví tɔn lɛ́ɛ mɛ ɔ́ sín akɔta wɛ ɖo nukɔn. Akɔta Judáa tɔn sín gǎn lɛ́ɛ ba acɔ́ bó jɛ fínɛ́. Akɔta Zabulɔ́ɔn tɔn sín gǎn lɛ́ɛ bɔ dó yě wú, lobɔ akɔta Nɛfutali tɔn sín gǎn lɛ́ɛ wá jɛ fínɛ́. Mawu ce, ɖe gbeta ɖé tɔ́n ní sɔgbe xá hlɔ̌nhlɔ́n towe, hlɔ̌nhlɔ́n towe e dó alɔ mǐ sɔ mɔ̌ é! Xwé towe hú ga Jeluzalɛ́mu toxo ɔ́ bǐ, fínɛ́ wɛ axɔ́sú lɛ́ɛ nɔ́ hɛn nǔ wá nú we ɖe. Gbɛ̌ nǔ nú Ejípu, Ejípu gběkanlin e nɔ́ nɔ fɛ́n kan mɛ é. Gbɛ̌ nǔ nú akɔta lɛ́ɛ; yě nyibúsú e dó ahwan gbě, yě kpó nyibúví yětɔn lɛ́ɛ kpó é; gbɛ̌ nǔ nú yě káká bónú yě bǐ wá jɛ kpo ɖo nukɔn towe kpó kpatágan yětɔn lɛ́ɛ kpó. Gba togun e yí wǎn nú ahwanfunfun lɛ́ɛ dó. Mɛ e sɔ́ Ejípu fɔ ɖó te lɛ́ɛ ɖo wǐwá wɛ. Etiopíinu lɛ́ɛ hɔn wá su Mawu bó kɛ alɔ n'i. Axɔ́súɖuto e ɖo ayǐkúngban jí lɛ́ɛ e mi, mi ji han nú Mawu, mi ɖɔ xó lómílómí dó han mɛ dó sɔ́ Aklúnɔ su. Mi ji han nú Mawu e nɔ zɔn akpɔ́kpɔ́ jí ɖo jǐxwé aga é, jǐxwé aga e ko tíin sín do é. Mi ɖótó! È ɖo gbe tɔn se wɛ. É dó gbe bɔ é syɛ́n ɖésú. Mi kpa susu nú Mawu; é wɛ ɖu axɔ́sú ɖo Izlayɛ́li; akpɔ́kpɔ́ lɛ́ɛ ɖésú nɔ́ ɖe hlɔ̌nhlɔ́n tɔn xlɛ́. Mawu ɖe lě e é dó xɛsi gbɔn é xlɛ́ sín xwé tɔn gbe. É wɛ nyí Mawu Izlayɛ́li tɔn. É wɛ nɔ́ ná hlɔ̌nhlɔ́n kpó nǔwúkpíkpé kpó togun tɔn. Mi mlá Mawu. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. È nɔ ji dó han e è nɔ ylɔ́ ɖɔ “Folówa ɖagbe ɖagbe” ɔ́ sín hangbe mɛ. Mawu ce, hwlɛ̌n mì gán, ɖó un ɖo tɔ ná kú wɛ; sin ko fán mì dó kɔ. Un ɖo bɔ̌ yi wɛ, bɔ nǔ e wú un nǎ gán dó é ɖe ǎ. Nyi ɖíe wá ɖo tɔzan jí e, tɔ ɖi bú mì bǐ sésé. Un sú xó káká bɔ nǔ cikɔ nú mì, vɛ̌go ce bǐ wɛ xú. Un ɖó nukún Mawu káká bɔ nukún ce bo. Mɛ e nɔ yǎyá bó gbɛ́ wǎn nú mì lɛ́ɛ ɔ́, yě sukpɔ́ hú ɖa e ɖo ta ce é. Yě mɛ e jló ná sɛ́ mì dó maɖɔnǔxwɛ lɛ́ɛ ɔ́, yě syɛ́n hú mì ɖésú. Un ma ka wa nǔɖé nú yě nɛ́! Yě ká nɔ mɔ̌ kpowun bo dó kɛn mì. Maɖumaɖuxɔ́ tɛ́ ɖíe ná sú wɛ un ka ɖe e! Mawu ce, taɖunɔnú e un wa lɛ́ɛ ɔ́, a tunwun bǐ. Nǔ e un wa nyi do lɛ́ɛ ɔ́, a dǎn yě ǎ. Aklúnɔ, Mawu Mavɔmavɔ Nǔbǐwúkpétɔ́, ma jó mì dó nú un dó winnyá mɛ e ɖi nǔ nú we lɛ́ɛ ó, ma ka lɔn nú mɛ e nɔ sɛn we lɛ́ɛ bú ali ɖó nyɛ wú ó mɛ, Mawu Izlayɛ́li tɔn! Đó hwi wú wɛ è ɖo cí kɔn dó kɔ nú mì wɛ, hwi wú wɛ è ɖo winnyá dó mì wɛ. Un húzú jǒnɔ nú nɔví ce lɛ́ɛ, un húzú mɛ ɖěvo nú nɔ ce xomɛ ví lɛ́ɛ, ɖó wǎn yíyí e un ɖó nú xwé towe ɔ́, wǎn yíyí ma ɖó jlɛ̌ ɖé wɛ, bó nɔ́ sɔ́ akpakpa mì, bɔ zun e nyí zun towe ɔ́, nyɛ wɛ yí bǐ. Un nɔ ɖo avǐ ya wɛ, bó nɔ́ ɖo nu blá wɛ, bɔ é lɛ́ húzú zun nú mì. Un sɔ́ caki dó, bó húzú slǎmɛɖɔnú yětɔn. Mɛ e jínjɔ́n acakpo jí ɖo to ɔ́ sín hɔnto lɛ́ɛ nɔ́ ɖo xó ce ɖɔ wɛ, bɔ un nyí han bó ɖo nu nú ahannumúnɔ lɛ́ɛ. Amɔ̌, nyɛ ɔ́, un ɖo vo sa nú we wɛ; Mawu Mavɔmavɔ, hwenu e a nǎ yí vosisa ce dó ɔ́ su. Mawu ce, xomɛnyínyɔ́ towe d'agba, un ɖeji ɖɔ a nǎ hwlɛ́n mì gán; hǔn bo yí ɖɛ ce. Dɔn mì sín bɔ̌ mɛ, bónú un ma sɔ́ yi ɖě ó. Hwlɛ̌n mì ɖo kɛntɔ́ ce lɛ́ɛ sí, ɖe mì sín tɔzan jí. Tɔ ma sɔ́ xo wá gba mì ɖě ó, do gɔngɔn ɔ́ ní ma bú mì ó, dotɔ ní ma sú dó mì ó. Mawu Mavɔmavɔ, yǐ ɖɛ ce, ɖó a nyɔ̌ bó nɔ́ wa ɖagbe. Lɛ̌ kɔ kpɔ́n mì ɖó nǔbláwǔkúnúmɛ towe ɖaxó ɔ́ wú. Ma ɖe kɔ dó nyɛ mɛsɛntɔ́ towe ɔ́ ó, adǎn ɖo gbigbo mì wɛ, yǎ wǔ yí ɖɛ ce. Sɛkpɔ́ mì bó hwlɛ́n mì, hwlɛ̌n mì gán, ɖó kɛntɔ́ ce lɛ́ɛ wú. A tunwun cí e è kɔn dó kɔ nú mì é, a tunwun winnyá e un ɖu é, bó tunwun lě e wi ce kɔ́n gbɔn é, a mɔ nǔ jɛ kɛntɔ́ ce lɛ́ɛ bǐ wú. Cí e è kɔn dó kɔ nú mì ɔ́ gba hǔn dó nú mì, bɔ un ɖo azɔn jɛ wɛ. Un ɖo te kpɔ́n mɛ e ná kú nǔbláwǔ nú mì é, un ka mɔ mɛɖé ǎ. Un ɖo te kpɔ́n mɛ e ná dó gbɔ nú mì é, un ka mɔ mɛ ɖěbǔ ǎ. Yě dó nǔ nǔɖuɖu mɛ nú mì. Sinnugblá sin mì bɔ yě ná vɛ̌ɛn sinvɛ́sinvɛ́ mì. Nǔɖuɖu ɖagbe ɖagbe e yě ɖa ɔ́ ní nyí mɔ nú yě kpó jǒnɔ yětɔn lɛ́ɛ kpó. Nukún mɛ yětɔn ní gbá zǐn, bónú yě ní ba nukúnnú kpo. Hɛn alin yětɔn lɔ́ nú yě ní nɔ́ zɔn tɔ́tɔ́. Kɔn xomɛsin towe dó yě jí, xomɛ ɖaxó e a sin dó yě ɔ́ ní hun káká yi yě gɔ̌n. Asangokan ní blá xwé yětɔn, é ní má sɔ́ kpo mɛɖé ɖo goxɔ yětɔn lɛ́ɛ mɛ ó. Đó yě lɛ̌ bɔ ɖó nú mɛ e hwi ɖésúnɔ kó dɔn tó ná yi ɖó tɛn tɔn mɛ é. Wǔvɛ́ e mɔ wɛ mɛ e wú alɔ towe ko jɛ lɛ́ɛ ɖe é wɛ nyí han bó ɖo nu yětɔn. Sɔ́ hwɛ énɛ́ dó hwɛ e yě kó hu ɖ'ayǐ lɛ́ɛ jí, ma sɔ́ kɛ yě gbeɖé ó. Súnsún nyǐkɔ yětɔn sín gbɛwéma ɔ́ mɛ; ma lɛ́n yě dó hwɛjijɔnɔ lɛ́ɛ mɛ ó. Nyɛ ɔ́, wamamɔnɔ wɛ un nyí, bó ɖo wǔvɛ́ mɔ wɛ. Mawu ce, hwlɛngán towe ní nya xɛ ɖo jǐ ce. Un ná mlá Mawu nyíkɔ dó han mɛ, un ná ji han dó kpa susu n'i. Énɛ́ ɔ́ nɔ́ nyɔ́ Mawu Mavɔmavɔ nukún mɛ hú nyibú dó sá vɔ̌ n'i, nyibúsú zo jangan jangan, afɔ kpanwunkpanwun dó sá vɔ̌ n'i. Mɛ e nɔ sɔ́ yěɖée hwe lɛ́ɛ ná mɔ lě e Mawu Mavɔmavɔ hwlɛ́n mì gbɔn é bó ná j'awǎ. Mi mɛ e ɖo Mawu ba wɛ lɛ́ɛ ɔ́, è nǎ dó wǔsyɛ́n lanmɛ nú mi, ɖó Mawu Mavɔmavɔ nɔ ɖótó wamamɔnɔ lɛ́ɛ. É nɔ́ dó vɛ̌ nú mɛ tɔn e ɖo ganxó lɛ́ɛ é ǎ. Sɛ́xwé kpó ayǐkúngban kpó ní mlá Mawu Mavɔmavɔ. Xu lɛ́ɛ ní mlá Mawu Mavɔmavɔ. Nǔ e kó nɔ́ dán wǔ ɖo xu mɛ lɛ́ɛ bǐ ní mlá ɛ. Đó Mawu ná hwlɛ́n Sinyɔ́ɔ gán; é ná vɔ́ Judáa sín toxo ɖaxó ɖaxó lɛ́ɛ bló ɖó. Gbɛtɔ́ ná lɛ́ nɔ fí énɛ́ lɛ́ɛ bɔ é ná nyí yětɔn. Sinyɔ́ɔ ná nyí mɛ e nɔ sɛn Mawu lɛ́ɛ sín vǐ lɛ́ɛ tɔn, mɛ e yí wǎn n'i lɛ́ɛ ná nɔ nɔ fínɛ́. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; é nɔ́ ji bó nɔ́ dó flín Mawu. Mawu ce, wǎ hwlɛ́n mì! Mawu Mavɔmavɔ, yǎ wǔ wá gɔ́ alɔ nú mì. Mɛ e ɖo kú ce ba wɛ lɛ́ɛ ní ɖu winnyá bó flú. Mɛ e ɖo nyanya ce lin wɛ lɛ́ɛ ní jó agɔ dó gǔdo, wi yětɔn ní kɔ́n. Mɛ e nɔ ko mì, bó nɔ́ ɖú ahwannɔwe lɛ́ɛ ní ɖu winnyá gɔtii bó lɛ́ kɔ. Mɛ e ka wá hwi Mawu Mavɔmavɔ gɔ́n lɛ́ɛ ní ki jo. Mɛ e yí wǎn nú hwlɛngán hwi Mawu Mavɔmavɔ ɔ́ tɔn lɛ́ɛ ní nɔ́ ɖɔ hwebǐnu ɖɔ: “Mawu kló mɛ!” Nyɛ ɔ́, gbɛ̌dónánɔ wɛ un nyí, bó nyí wamamɔnɔ. Mawu ce, wǎ gɔ̌n ce; hwlɛ̌n dó mì. Hwi wɛ nyí gǎnjɛwú ce, bó nyí mɛhwlɛ́ngántɔ́ ce. Mawu Mavɔmavɔ, ma lín ó mɛ! Mawu Mavɔmavɔ, hwi wɛ un hɔn wá su, ma nú un ɖu winnyá gbeɖé ó. Xɔ mì ɖo hwɛjijɔ towe mɛ; ɖe mì sɔ́ nyi te. Đǒtó mì bó hwlɛ́n mì gán. Mawu Mavɔmavɔ, nyǐ só e glɔ́ un ná nɔ́ hɔn hwlá cí é, só e glɔ́ un ná nɔ́ yi hwebǐnu é, a zin alɔ dó akɔ́n ɖɔ émí ná hwlɛ́n mì gán, nǔgbó wɛ, hwi wɛ nyí só ce, hwi wɛ nyí ahohó ce. Mawu ce, hwlɛ̌n mì ɖo mɛdídá sí, hwlɛ̌n mì ɖo mɛ nyanya, dǎkaxotɔ́ ɔ́ sí. Đó hwi wɛ un ɖo nukún ɖó wɛ, Aklúnɔ Mawu Mavɔmavɔ, hwi wú wɛ un ɖeji dó sín dɔ̌nkpɛ mɛ, sín nɔ ce xomɛ ɔ́, hwi wú wɛ un gán jɛ, hwi wɛ ɖe mì tɔ́n sín nɔ ce xomɛ, hwi wɛ un nɔ ɖo susu kpa ná wɛ hwebǐnu. Mɛ gěgé nɔ́ mɔ mì dó mɔ lɔ̌jɔ́, hwi wɛ ka nyí bibɛtɛn ce fí e nǔɖé má nɔ wa mì ɖe ǎ é. Han towe ní nɔ́ ɖo nu ce tɛgbɛ; susu kpa nú we sín han ní nɔ́ ɖo nu ce; lě e a d'agba sɔ é sín han ní ɖo nu ce ayǐhɔ́ngbe ayǐhɔ́ngbe. Un jɛ kpikpoxɔmɛ hǔn, ma ɖe alɔ sín kan ce mɛ ó. Hwenu e hlɔ̌nhlɔ́n ná vɔ ɖo wǔ ce ɔ́, ma jó mì dó ó. Đó kɛntɔ́ ce lɛ́ɛ ɖo xó ce ɖɔ wɛ, mɛ e ɖo wu tɔ nú mì wɛ bó ná hu lɛ́ɛ ɖo kpá yi wɛ; yě nɔ́ ɖɔ: “Acɔnkwín! Mawu jó e dó, mi jɛ gǔdo tɔn. Mi wlí i. Mɛ ɖěbǔ ɖe bó ná hwlɛ́n ɛ gán ǎ.” Mawu ce, ma nɔ zɔ nú mì ó. Mawu ce, wǎ gɔ́ alɔ nú mì; ma lín ó; yǎ wǔ. Mɛ e ɖo hwɛ dó mì wɛ lɛ́ɛ ní ɖu winnyá, yě bǐ ní kú. Mɛ e ɖo nyanya ce lin wɛ lɛ́ɛ ní ɖu winnyá bó ɖu hɛ̌n. Nyɛ ɔ́, un ka ná ɖo te kpɔ́n we tɛgbɛ, un ná kpa susu nú we, bó ná nɔ́ lɛ́ kpa susu nú we. Ayǐ hɔ́n tɛgbɛ ɔ́, hwɛjijɔ towe kpó hwlɛngán towe kpó nyí han bo ɖo nu ce, yě sukpɔ́ bó gégé, un sixú xa bǐ ǎ. Aklúnɔ Mawu Mavɔmavɔ, un ɖo azɔ̌ ɖaxó ɖaxó e a wa lɛ́ɛ ɖɔ wɛ dó han mɛ, bó ja gɔ̌n towe; un ná flín hwɛjijɔ towe, hwɛjijɔ towe ɖokpónɔ wɛ un ná flín. Mawu ce, a kplɔ́n nǔ mì sín dɔ̌nkpɛ mɛ, bɔ káká wá jɛ égbé ɔ́, un ɖo azɔ̌ ɖagbe ɖagbe e a wa lɛ́ɛ jlá wɛ. Mɔ̌ ɖokpó ɔ́, Mawu ce, hɛn mì káká yi kpikpo hwenu; hwenu e ɖa e ɖo ta ce ɔ́ bǐ ná nyí hwa ɔ́, ma jó mì dó ó; énɛ́ ɔ́, un nǎ ɖɔ lě e a ɖǒ hlɔ̌nhlɔ́n sɔ é nú din ví lɛ́ɛ, un nǎ ɖɔ lě e a kpé nǔ wú gbɔn é nú mɛ e ná wá jɔ sɔ lɛ́ɛ. Mawu ce, nǔ wa ɖó sɛ́n jí towe d'agba lóóo. A wa azɔ̌ ɖaxó ɖaxó lɛ́ɛ. Mawu ce, mɛ̌ è ka sixú jlɛ́ dó wǔ towe? A sɔ́ nǔ xlɛ́ mì: adǎn gbo mì, awě xo mì, amɔ̌, hwi jɛ́n ná lɛ́ ɖe mì sín mɛ. A nǎ wá ɖe mì tɔ́n sín do gɔngɔn mɛ. Sɔ́ mì su. Lɛ̌ vɔ́ dó gbɔ nú mì. Nyɛ ɔ́, un ka ná xo kanhún dó kpa we. Mawu ce, un ná kpa we ɖó a ɖo gbejí. Un ná mlá we kpódó agǐdigbo kpó, Mɛ mímɛ́ Izlayɛ́li tɔn. Un ɖo xó lómílómí ɖɔ dó han mɛ dó sɔ́ we su wɛ, un sɔ́ nu ce dó ɖo mlǎmlá we wɛ, bɔ lǐndɔ̌n ce e a hwlɛ̌n gán é ná nɔ́ ɖo mlǎmlá we wɛ. Đɛ̌ ce lɔ ná nɔ́ ɖɔ lě e a nɔ wa nǔ ɖó sɛ́nxwi jí gbɔn é, ɖó mɛ e ɖo nyanya ce lin wɛ lɛ́ɛ ɔ́, yě ɖu winnyá, wi yětɔn kɔ́n. Salomɔ́ɔ sín han. Mawu ce, nǎ nǔnywɛ́ axɔ́sú ɔ́, bónú é ná nɔ́ ɖɔ hwɛ hwi ɖɔhun. Blǒ bónú axɔ́sú mǐtɔn ní nɔ́ ɖɔ hwɛ nú é nɔ́ sɔgbe hwi ɖɔhun. É ní nɔ́ xwedó hwɛjijɔ dó ɖɔ hwɛ xá togun towe, é ní nɔ́ ɖɔ hwɛ xá lelenɔ towe lɛ́ɛ dó jlɔ̌jlɔ́ jí. Só ɖaxó ɖaxó lɛ́ɛ ní nɔ́ hɛn fífá wá nú togun ɔ́, só kpɛví kpɛví lɛ́ɛ lɔmɔ̌ ní nɔ́ hɛn hwɛjijɔ wá n'i. Wamamɔnɔ e ɖo togun ɔ́ mɛ lɛ́ɛ ɖě sín hwɛ jɔ hǔn, axɔ́sú ɔ́ ní nɔ́ ɖɔ hwɛ tɔn jɔ. É ní nɔ́ nya xɛ ɖo mɛ ma ɖó mɛ ɖé lɛ́ɛ jí, bó ka nɔ́ li mɛ e ɖo ya dó nú yě wɛ lɛ́ɛ. Axɔ́sú ɔ́ ní nɔ gbɛ káká sɔ́yi sun kpó hwe kpó ɖɔhun. É ní cí jǐ e ɖo jija dó gle mɛ wɛ é ɖɔhun. É ní cí jǐ ɖaxó e nɔ ja bɔ ayǐkúngban nɔ fá é ɖɔhun. Hwɛjijɔ ní gba kpé axɔ́sú ɔ́ hwenu, bɔ nú sun vɛ́ kó nɔ́ tɔ́n ɔ́, vivo ní tíin ɖo to ɔ́ mɛ. É ní kpa acɛ sín xu ɖě tó káká yi xu ɖě tó, é ní kpa acɛ sín Nilu tɔ ɔ́ tó, káká yi fí e ayǐkúngban ɔ́ kponu ɖó é. Mɛ e ɖo gbětótló mɛ lɛ́ɛ ná jɛ kpo ɖo nukɔn tɔn, bɔ kɛntɔ́ tɔn lɛ́ɛ ná dó nu do n'i; Taasísi xɔ́sú lɛ́ɛ kpódó tɔtɛ́ntinto lɛ́ɛ sín axɔ́sú lɛ́ɛ kpó ná nɔ́ hɛn nǔjɔ wá n'i, Saba xɔ́sú lɛ́ɛ kpódó Seva xɔ́sú lɛ́ɛ kpó ná hɛn nǔ wá ná ɛ. Axɔ́sú lɛ́ɛ bǐ ná jɛ kpo bo ɖe kɔ́ n'i. Akɔta lɛ́ɛ bǐ ná nyí mɛsɛntɔ́ tɔn. É ná hwlɛ́n wamamɔnɔ e ɖo xó sú wɛ ɔ́, bó ná hwlɛ́n lelenɔ e ma ɖó ɖɔxátɔ́ ɖě ǎ é. É ná kú nǔbláwǔ nú mɛ e ma ɖó hlɔ̌nhlɔ́n ɖé ǎ lɛ́ɛ kpó gbɛ̌dónánɔ lɛ́ɛ kpó; é ná hwlɛ́n wamamɔnɔ lɛ́ɛ sín gbɛ gán. É ná yí yě sín mɛ e nɔ kpa acɛ gannaganna lɛ́ɛ kpó dǎkaxotɔ́ lɛ́ɛ kpó sí, ɖó gbɛ yětɔn xɔ akwɛ́ ɖo nukún tɔn mɛ. Axɔ́sú ɔ́ ní dɔ́ ji, afɔfún hwa alɔfún hwa; è nǐ nɔ́ hɛn siká sín Saba wá n'i. È nǐ nɔ́ xo ɖɛ n'i hwebǐnu; Mawu nǐ xo ɖɛ dó jǐ tɔn hwebǐnu. Ji ní jɛ ɖo to ɔ́ mɛ káká bó túnflá. Atínsínsɛ́n ní blá ta nú só lɛ́ɛ Libáan só lɛ́ɛ ɖɔhun. Gbɛtɔ́ ní ji gba gbɔn toxo lɛ́ɛ mɛ; gbɛtɔ́ ní kpé fí bǐ gběhan ɖɔhun. Nyǐkɔ tɔn ní ɖo te káká sɔ́yi. Nú hwe nɔ tɔ́n jɛ́n wɛ ɔ́, nyǐkɔ tɔn ní ɖo te. È nǐ kpɔ́n lě e nǔ nyɔ́ n'i gbɔn ɔ́ dó xo nyɔ̌ná ɖɛ nú mɛɖée, akɔta lɛ́ɛ bǐ ní nɔ́ ɖɔ nǔ nyɔ̌ n'i. Jɛlijɛli nú Mawu Mavɔmavɔ, Mawu Izlayɛ́li tɔn. É ɖokpónɔ jɛ́n nɔ́ wa nǔjíwǔ lɛ́ɛ. Jɛlijɛli nú nyǐkɔ tɔn káká sɔ́yi. Susu tɔn ní gba kpé ayǐkúngban ɔ́ bǐ jí. Amǐ! Amǐ! Davídi, Jɛsée ví ɔ́ sín ɖɛxixo lɛ́ɛ fó ɖó fí. Asáfu sín han. Mawu nyɔ́ nú Izlayɛ́li nǔgbó, é nyɔ́ nú mɛ e ɖó ayi mímɛ́ lɛ́ɛ bǐ. Nyɛ ɔ́, un ko ɖibla ɖe afɔ nyi do. Kpɛví títí ɖé wɛ kpo bɔ un ná ɖíɖí nǔ. Đó un mɔ nǔ ɖo nyǐnyɔ́ nú mɛ e nɔ yí go lɛ́ɛ wɛ, gbɛtɔ́ e má ɖó nǔnywɛ́ lɛ́ɛ wɛ, bɔ nǔ yětɔn su nukún ce mɛ. Nǔɖé nɔ́ hwedó yě cóbónú yě nɔ́ kú ǎ. Yě bǐ wɛ kló bó ɖíɖí wǔ. Wǔvɛ́ e gbɛtɔ́ nɔ́ mɔ ɖo gbɛmɛ ɔ́, yě nɔ́ mɔ ɖě ǎ; adǎn e nɔ́ gbo gbɛtɔ́ ɔ́, ɖě nɔ́ gbo yě ǎ. Énɛ́ ɔ́, yě nɔ́ zé goyíyí dó kɔjɛ́ ɖɔhun. Dǎka xixo nyí avɔ bɔ yě nɔ́ cyɔ́n. Nukún mɛ yětɔn bǐ wɛ dó jǒ, bɔ nukún yětɔn nɔ́ ɖo zo da ɖ'é mɛ wɛ. Ayi nyanya wɛ gɔ́ xo yětɔn mɛ bó túnflá. Yě nɔ́ ɖo mɛ cá ko wɛ, bó nɔ́ ɖo nu vawun vawun kɛ wɛ; yě nɔ́ ɖo lě e yě ná táfú mɛ gbɔn é ɖɔ wɛ gannaganna; yě nɔ́ jí nǔɖé ǎ. Yě nɔ́ ɖo nu gblogblo kɛ wɛ káká bó nɔ́ ɖɔ nǔ nyi do nú Mawu; yě nɔ́ gɔn nǔ mɔ ɖɔ dó mɛ e ɖo ayǐkúngban jí lɛ́ɛ ɖě wú ǎ. Énɛ́ ɔ́ wú wɛ togun ɔ́ bǐ nɔ́ ɖo wezun nu ɖo gǔdo yětɔn, bó nɔ́ nu xó yětɔn sin ɖɔhun, bó nɔ́ ɖɔ: “Mawu tunwun nǔɖé a! É mɛ e ɖo jǐ aga dɔ̌n é, nɛ̌ é ká sixú mɔ do nú nǔɖé gbɔn?” Lě e mɛdídá lɛ́ɛ ɖe gbɔn é ɖíe: yě nɔ́ ɖo vivo mɛ tɛgbɛ, bó nɔ́ ɖo dɔkun jɛ dó dɔkun jí wɛ. Hǔn ayi ce e un lɛ bɔ é mɛ́, bɔ un ma lɔn bó ɖó alɔ ɖo nǔ nyanya ɖé mɛ ǎ ɔ́, nǔ yǎyá wɛ é nyí nɛ́ hǔn! Ayǐ hɔ́n tɛgbɛ ɔ́, è nɔ ɖo xixo mì wɛ. Zǎnzǎn tɛgbɛ ɔ́, è nɔ dó ya nú agbaza ce. Nú un ka ɖɔ un ná ɖɔ xó yě ɖɔhun ɔ́, un ná sa vǐ towe lɛ́ɛ. Un gbɔ bo lin tamɛ d'é wú, bó ná mɔ nukúnnú jɛ mɛ; é ká vɛ́ wǔ dín ɖo nukún ce mɛ. Gbe e gbe un byɔ́ tɛn mímɛ́ towe mɛ ɔ́, gbe énɛ́ gbe jɛ́n un wá mɔ nukúnnú jɛ nǔ e ɖo te kpɔ́n mɛdídá lɛ́ɛ é wú. È nǎ ɖɔ xó nǔgbó ɔ́, ali e ɖíɖí é jí wɛ a nɔ sɔ́ yě ɖó, bó nɔ́ kpíkpé yě dó hɔzɔ mɛ. Étɛ́! Nukikɛ ɖokpó kpowun ɔ́, è ba yě kpo, yě ɖě sɔ́ tíin ǎ, xɛsi ɖaxó ɖé fó xó yětɔn. Aklúnɔ, a sí te dó yě jí ɔ́, yě nɔ́ bú bléwún; yě nɔ́ bú bléwún mɛ ɖo nǔɖé mɔ ɖo dlɔ̌ mɛ wɛ bó nyí fɔ́n bó ba kpo ɖɔhun. Hwenu e un ɖo xomɛ sin jí ɔ́, hwenu e é vɛ́ nú mì káká bó vɛ́ nú sɛ́ ce ɔ́, a ɖo xlonɔ ce kpɔ́n wɛ, a ɖo mɛ ma ɖó nǔnywɛ́ ce kpɔ́n wɛ, bɔ un cí gbɔ̌ ɖɔhun ɖo nukɔn towe. É ká ɖo mɔ̌ có un ɖo gɔ̌n towe tɛgbɛ; a hɛn mì; ɖisí lɔ ce ɖo alɔ towe mɛ. Nǔ e a nɔ kplɔ́n mì lɛ́ɛ nɔ́ xlɛ́ ali mì; a nɔ bló mɔ̌, bó ná yí mì dó susu towe mɛ. Mɛ̌ un ka ɖó ɖo jǐnukúnsin zɛ hwɛ wú? Hwi mɛ vo ɔ́, gbɛ víví ɖé ɖo ayǐkúngban jí fí nú nyɛ ǎ. Agbaza ce kpó ayi ce kpó sixú wá ba hlɔ̌nhlɔ́n kpo; amɔ̌, hwi Mawu wɛ ná nyí sósyɛ́n ce, bó ná nyí nyɔ̌ná nyi ɖokpónɔ géé tɔn káká sɔ́yi. Éɖíe! Mɛ e nɔ́ nɔ zɔ nú we lɛ́ɛ ɔ́, dɔn wɛ yě nɔ́ dɔn. Mɛ e ma nɔ nɔ gbejí nú we ǎ lɛ́ɛ ɔ́, a nɔ sɛ́ yě dó maɖɔnǔxwɛ. Nyɛ ɔ́, Mawu kpá ninɔ wɛ nyí ɖagbe nú nyɛ. Aklúnɔ Mawu Mavɔmavɔ, hwi wɛ un dó ɖó bibɛtɛn, bó ná mɔ tɛn dó ɖɔ nǔ e a wa lɛ́ɛ bǐ. Xó lómílómí Asáfu tɔn. Mawu ce, nɛ̌ ka gbɔn bɔ a jó mǐ dó bǐ mɔ̌? Nɛ̌ ka gbɔn bɔ a ɖo xomɛ sin dó lɛ̌ngbɔ́ e ɖo wutó towe mɛ lɛ́ɛ wɛ mɔ̌? Flín togun towe, togun towe e a sɔ́ ɖ'ayǐ xóxó bɔ é nyí towe é; Flín akɔta e a hwlɛ̌n gán é; é wɛ nyí akɔta towe. Flín Sinyɔ́ɔ só ɔ́, Sinyɔ́ɔ fí e a sɔ́ nɔtɛn towe ɖó é. Sɔ́ afɔ towe bo wá kpɔ́n fí ɖěɖě è gba, bɔ é kpo ɖo mɔ̌ káká jɛ din é. Nǔ e ɖo xwé towe gbe lɛ́ɛ bǐ wɛ kɛntɔ́ hɛn gblé. Kɛntɔ́ towe lɛ́ɛ ɖo adǎn jí, bó ɖo xó sú wɛ ɖo nɔtɛn towe fí e a nɔ kpé mǐ ɖe é. Asyá yětɔn wɛ yě tun te fínɛ́, ɖɔ émí wɛ ɖo mɔ̌ nyí wɛ. Yě cí atíngbotɔ́ e ɖe asyɔ́ nyi zungbó ɖé mɛ, bó ná sú kún tɔn dó é ɖɔhun, bɔ din ɔ́, yě fɔ asyɔ́ kpó zǔn kpó, dó gba acɔ́nú lɛ́ɛ bǐ. Yě dó xwé towe zo. Yě mu dǒ lɛ́ɛ bǐ, bó ɖu su nú xwé towe. Yě nɔ́ ɖɔ dó ayi mɛ ɖɔ: “Mǐ ná vívá kún yětɔn zɛ̌nzɛ̌n.” Énɛ́ ɔ́, yě dǒ fí e è nɔ kplé bó nɔ́ sɛn Mawu ɖe ɖo to ɔ́ mɛ lɛ́ɛ bǐ zo. Mǐ sɔ́ nɔ́ mɔ asyá mǐtɔn ɔ́ ɖě ǎ. Gbeyíɖɔ Mawu tɔn ɖě sɔ́ ɖe ǎ. Mɛ ɖěbǔ ka ɖo mǐ mɛ bó tunwun hwenu e é ná fó dó ɔ́ ǎ. Mawu ce, káká jɛ hwetɛ́nu acɛgannaganna-kpanúmɛtɔ́ ɔ́ ná dó hɛ̌n we yi jɛ? Kɛntɔ́ ná fɔ́n, bó ɖo nyǐkɔ towe cá ko wɛ tɛgbɛ wɛ a? Étɛ́wú a ka ɖe alɔ towe sín mǐ wǔ, ɖisí lɔ towe sín mǐ wǔ? Ma blá alɔ dó wǔ ó, hu yě. Mawu wɛ kó nyí axɔ́sú ce sín do. Mawu ce ɔ́ wɛ nɔ́ hwlɛ́n mɛ gán ɖo ayǐkúngban ɔ́ jí. Hwi wɛ sɔ́ hlɔ̌nhlɔ́n towe dó má xu ɖó we. A gba nǔdábaɖa e nɔ́ nɔ tɔ lɛ́ɛ mɛ lɛ́ɛ sín ta. Hwi wɛ gba Levyatáan lɛ́ɛ sín ta hánnyá, bó sɔ́ nú mɛ e ɖo gbětótló mɛ lɛ́ɛ ɖɔ yě ní ɖu. Hwi wɛ ɖe sin tɔ́n sín ayǐkúngban lanmɛ, bɔ tɔsisa lɛ́ɛ tíin. Hwi wɛ ɖɔ bɔ tɔsisa e ma nɔ xú gbeɖé ǎ lɛ́ɛ xú. Towe wɛ nyí kéze, zǎn lɔmɔ̌ ɔ́, towe wɛ. Hwi wɛ ɖó sun kpó hwe kpó. Hwi wɛ ɖó dogbó nú ayǐkúngban, hwi wɛ ɖó alǔun kpó avivɔ hwenu kpó. Mawu Mavɔmavɔ, flín ɖɔ kɛntɔ́ ɖo hɛ̌n dó émí wɛ. Flín ɖɔ togun ma ɖó nǔnywɛ́ ɖé ɖo tɛ́ hu nú nyǐkɔ émítɔn wɛ. Ma jó Izlayɛ́li ahwannɛ́ towe sín gbɛ nú kanlin lɛ́ɛ ó; mɛ towe e adǎn gbo lɛ́ɛ ɔ́, ma wɔn gbɛ yětɔn káká sɔ́yi ó. Kpɔ́n dó akɔ e a jɛ xá mǐ ɔ́ wú, ɖó fí e jɛ nǔglɔ́ ɖo to ɔ́ mɛ lɛ́ɛ ɔ́, dǎkaxotɔ́ lɛ́ɛ sín avatɛn wɛ kpé fí énɛ́ lɛ́ɛ. Mɛ e táfú wɛ è ɖe ɔ́ ní má ɖu winnyá bó lɛ́ kɔ ó. Gbɛ̌dónɔ kpó wamamɔnɔ kpó ní nɔ́ mlá nyǐkɔ towe. Mawu ce, sí te; jɛ ahwan hwiɖée jí. Ma wɔn adǎn e gblɔ́n nú we wɛ mɛ e ma ɖó nǔywɛ́ ɖé lɛ́ɛ ɖe hwebǐnu é ó. Ma wɔn xó e sú wɛ kɛntɔ́ towe lɛ́ɛ ɖe ɔ́ ó. Ma wɔn zǐngídi e ɖú wɛ mɛ e sí te dó jǐ towe lɛ́ɛ ɖe hwebǐnu ɔ́ ó. Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji dó han e è nɔ ylɔ́ ɖɔ “Ma hɛn nǔ gblé ó” é sín hangbe mɛ. Mawu, mǐ ɖo kpikpa we wɛ, Mawu, mǐ ɖo kpikpa we wɛ, mǐ ɖo mɛ e a nyǐ é ɖɔ wɛ. Mǐ ɖo nǔ ɖaxó ɖaxó e a blǒ lɛ́ɛ jlá wɛ. Hwenu e un ɖó ɔ́ su ɔ́, un ná nɔ́ ɖɔ hwɛjijɔ. Ayǐkúngban kpó nǔ e ɖ'é ji lɛ́ɛ bǐ kpó ɖo wǔ dán wɛ. Lo ɔ́, nyɛ wɛ hɛn dotín e jí é jínjɔ́n é ɖó te. “Un nɔ ɖɔ nú mɛ e nɔ ɖo yěɖée sɔ́ su wɛ lɛ́ɛ ɖɔ: Mi ma nɔ sɔ́ miɖée su ó.” Bó nɔ́ ɖɔ nú mɛdídá lɛ́ɛ ɖɔ: “Mi ma nɔ zé miɖée d'aga ó. Mi ma nɔ sɔ́ miɖée d'aga sɔ mɔ̌ ó. Mi ma sɔ́ nɔ́ ɖɔ alǎkalí ɖě ó. Mi tunwun ɖɔ susu Mawu tɔn kún nɔ́ gosín zǎnzǎnhwe jí ó, é ka gosín gbadahwe jí ǎ, é ka gosín gbětótló mɛ ǎ. Lo ɔ́, Mawu wɛ nyí mɛ e nɔ ɖɔ hwɛ é: É nɔ́ sɔ́ mɛ ɖě hwe, bó ká nɔ́ sɔ́ mɛ ɖě su.” Mawu Mavɔmavɔ hɛn kɔ́fu ɖé alɔ mɛ, bɔ vɛ̌ɛn gɔ́ bó ɖo syɛ́nsyɛ́n wɛ; vɛ̌ɛn xo kplé wɛ. É húzú kɔ́fu ɔ́, bɔ mɛdídá e ɖo gbɛ ɔ́ mɛ lɛ́ɛ bǐ nɔ́ ɖo xwíxwí wɛ. Yě ɖo nunu wɛ; yě nu káká yi azan jí. Nyɛ ɔ́, un ná nɔ́ ɖo Mawu Jakɔ́bu tɔn xó ɖɔ wɛ káká sɔ́yi káká sá. Un ná nɔ́ ɖɔ xó lómílómí dó han mɛ dó mlá nyǐkɔ tɔn. Un ná dɔn mɛdídá lɛ́ɛ sín kɔ dó do, bó ná zé hwɛjijɔnɔ lɛ́ɛ sín kɔ d'aga. Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji bó nɔ́ xo kanhún d'é mɛ. Mawu ɖe éɖée xlɛ́ ɖo Judáa; nyǐkɔ tɔn yi jǐ tawun ɖo Izlayɛ́li. Salɛ́mu wɛ goxɔ tɔn ɖe, nɔtɛn tɔn ɖo Sinyɔ́ɔ. Fínɛ́ wɛ é hɛn ahwanlyánnú lɛ́ɛ wɛ́n ɖe: é hɛn gǎ wɛ́n, é hɛn gǎglónú wɛ́n, bó hɛn hwǐ wɛ́n. Mawu ce, hwi ɖésúnɔ bǐ wɛ nɔ́ kɔ́n! A jǐ wǔ hú só jɔwámɔ lɛ́ɛ. Ahwanfuntɔ́ e syɛ́n sɔ mɔ̌ lɛ́ɛ, yě ɖíe wá ba nǔ bǐ kpo e; din ɔ́, yě dɔ́ amlɔ dɔ̌mányí; yě kpé wú bó gán ɖo ahwan ɔ́ mɛ ǎ. Mawu Jakɔ́bu tɔn, ée a kɛ nu kpowun é ɔ́, sɔ́ kpó sɔ́xátɔ́ kpó bǐ yi maɖɔnǔxwɛ. Nǔgbó ɔ́, hwi Mawu ɔ́, a dǒ xɛsi; nú a sin xomɛ ɔ́, mɛ̌ ká sixú nɔ te ɖo nukɔn towe? A nɔ jǐxwé dɔ̌n bó gbo hwɛ sɛ́ dó, a gbo hwɛ bɔ mɛɖé sɔ́ sixú dó fɛn kpá ǎ, ɖó ayǐkúngban ɔ́ bǐ wɛ ɖo xɛsi jí hwenu e a sí te bo ná ɖɔ hwɛjijɔ é, hwenu e a sí te bó ná hwlɛ́n mɛ e è dǒ winnyá lɛ́ɛ gán é. Adǎn e jí gbɛtɔ́ lɛ́ɛ ɖe é ɖésú ɖo susu kpa nú we wɛ, bɔ mɛ e ná gán ɖo adǎn énɛ́ mɛ lɛ́ɛ ná nyí jɛ̌gbákún bó nɔ ta nú we. Mi dó akpá nú Mawu Mavɔmavɔ, Mawu mitɔn. Mi dó, bó ɖe. Mɛ e lɛ́ dó e lɛ́ɛ bǐ ní hɛn nǔ wá n'i; yě bǐ ní hɛn nǔ wá nú Mawu e dó xɛsi é. Gǎn e ɖo go yí wɛ lɛ́ɛ ɔ́, Mawu nɔ́ gba wigo yětɔn dó; Mawu dó xɛsi ɖo axɔ́sú gbɛmɛ fí tɔn lɛ́ɛ nukún mɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji dó Yedutún sín hangbe mɛ. Un ɖo xó sú ylɔ́ Mawu wɛ; un ɖo xó sú ylɔ́ Mawu wɛ bónú é ná ɖótó mì. Adǎngbomɛ hwenu ɔ́, un nɔ ba Aklúnɔ. Zǎn mɛ ɔ́, un nɔ ɖo alɔ dlɛ́n sɛ́ dó e wɛ; alɔ nɔ kú mì ǎ. Un nɔ ɖ'é wú bó nɔ́ se gbɔ ǎ. Un flín Mawu lě ɔ́, un nɔ wɛn azɔn; un ɖo tamɛ lin kpɔ́n wɛ ɔ́, awakanmɛ nɔ kú mì. Mawu, a ɖǒ mì wunzɛn; ayi ce gbadó bɔ un ka sɔ́ ɖɔ xó ɖé ǎ. Un nɔ ɖo tamɛ lin dó azǎn e kó jɛ wá yi lɛ́ɛ wú wɛ, bó nɔ́ ɖo tamɛ lin dó xwe e ko jɛ wá yi lɛ́ɛ wú wɛ. Zǎn mɛ ɔ́, un nɔ ɖo han e un nɔ ji é flín wɛ, un nɔ ɖo tamɛ lin kpɔ́n wɛ, ayi ce nɔ ɖo nǔ ba wɛ: Aklúnɔ ka jló ná jó mǐ dó káká sɔ́yi wɛ a? É sɔ́ ná nyi kɔ kpɔ́n mǐ gbeɖé ǎ cé? Xomɛnyínyɔ́ tɔn kó vɔ bǐ sésé jɛ́n nɛ́ ǎ? Xó e é nɔ́ ɖɔ nú mǐ ɔ́, é sɔ́ ná ɖɔ ɖě gbeɖé ǎ cé? Mawu sɔ́ flín ɖɔ émí nɔ́ wa fɛ́nú nú mǐ ǎ cé? É sin xomɛ ɔ́, é sɔ́ ná kú nǔbláwǔ nú mǐ ǎ wɛ a? Un nɔ́ ɖɔ: “Nǔ e ɖo vǐvɛ́ nú mì wɛ ɔ́ wɛ nyí ɖɔ Mawu Ajalɔ̌nlɔn ɔ́ sɔ́ wa nǔ ɖ'ayǐ tɔn ɖɔhun ǎ.” Mawu Mavɔmavɔ, un ná nɔ́ flín azɔ̌ e a nɔ wa lɛ́ɛ, ɖo tají ɔ́, un nɔ flín nǔjíwǔ e a blǒ ɖ'ayǐ xóxó lɛ́ɛ. Un ná lin tamɛ dó nǔ e a blǒ lɛ́ɛ wú, un ná lin tamɛ dó azɔ̌ ɖaxó ɖaxó e a wa lɛ́ɛ wú. Mawu ce, nǔ e a wa e bǐ wɛ nyí nǔ mímɛ́; nǔmɛsɛn tɛ́ ka kló hwi Mawu ɔ́ ɖɔhun? Hwi Mawu ɔ́, hwi ɖokpónɔ géé wɛ nɔ́ wa nǔjíwǔ; a ɖe hlɔ̌nhlɔ́n towe xlɛ́ ɖo togun lɛ́ɛ tɛ́ntin. A zě hlɔ̌nhlɔ́n towe dó hwlɛ́n togun towe gán, togun towe Jakɔ́bu kpó Jozɛ́fu kpó sín vǐ lɛ́ɛ gán. Mawu ce, tɔ lɛ́ɛ mɔ we; ée yě mɔ we lě ɔ́, sin e ɖo tɔ lɛ́ɛ mɛ é jɛ agbǎn hun jí; nǔgbó wɛ, domaɖó-azan lɛ́ɛ jɛ ɖoɖo. Sin e ɖo akpɔ́kpɔ́ lɛ́ɛ mɛ é bǐ kɔn nyi ayǐ; jǐ ɖo gbe dó wɛ ɖo akpɔ́kpɔ́ mɛ, bɔ gǎ towe lɛ́ɛ gbɔn ɖisí amyɔ; jǐ towe ɖo gbe dó wɛ ɔ́, é nɔ́ lɛ́ ɖo wun kɛ wɛ; é nɔ́ kɛ wun gbɔn aɖisí amyɔ, bɔ gbɛ ɔ́ mɛ bǐ nɔ́ za wě; ayǐkúngban ɔ́ dán wǔ bó sísɔ́. A ɖe ali gbɔn xu mɛ, a ɖe ali gbɔn sin ɖaxó ɖaxó lɛ́ɛ mɛ; mɛ ɖěbǔ ká mɔ afɔdo towe lɛ́ɛ ǎ. A xlɛ́ ali togun towe lɛ̌ngbɔ́ ɖɔhun gbɔn Mɔyízi kpó Aalɔ́ɔn kpó jí. Xó lómílómí Asáfu tɔn. Togun ce, ɖǒtó nǔ e kplɔ́n we wɛ un ɖe é; tɛ́ tó bó se xó e ɖɔ wɛ un ɖe é. Un hun nu bó ná dó lǒ ɖokpó, nǔbasɔ́ xóxó hwenu tɔn lɛ́ɛ ná ɖɔ wɛ un ɖe. Nǔ e mǐ se ɔ́, nǔ e mǐ tunwun ɔ́, nǔ e sín tan tɔ́ mǐtɔn lɛ́ɛ lɛ́ vɔ́ kpi nú mǐ ɔ́, mǐ ná zé hwlá dó vǐ mǐtɔn lɛ́ɛ ǎ. Mǐ ná ɖɔ lě e Mawu Mavɔmavɔ xɔ susu gbɔn ɔ́ nú yě, lě e é ɖó hlɔ̌nhlɔ́n sɔ ɔ́ nú yě; mǐ ná ɖɔ nǔjíwǔ e é wa lɛ́ɛ nú yě. É ɖó tito ɖé ayǐ nú togun Izlayɛ́li tɔn; é ɖó sɛ́n ɖé ayǐ nú Jakɔ́bu ví lɛ́ɛ, bó ɖɔ nú tɔ́gbó mǐtɔn lɛ́ɛ ɖɔ yě ní kplɔ́n vǐ yětɔn lɛ́ɛ. Énɛ́ ɔ́, vǐ e ná wá jɔ lɛ́ɛ lɔmɔ̌ ná tunwun sɛ́n ɔ́, bɔ yě lɔ ná wa ɖɔ xó tɔn nú vǐ yětɔn lɛ́ɛ, bɔ vǐ yětɔn lɛ́ɛ ná ɖeji dó Mawu wú, bó ná wɔn azɔ̌ e é wa lɛ́ɛ ǎ, lobo ná nɔ́ nyi sɛ́n tɔn lɛ́ɛ, bó má wá cí tɔ́gbó yětɔn lɛ́ɛ ɖɔhun ó, bó má nyí gbɛtɔ́ tótlítɔ́, gǔfɔ́ntɔ́ ó, gbɛtɔ́ e ayi tɔn ma nɔ́ nɔ fí ɖokpó ǎ é, gbɛtɔ́ e má ɖo gbejí nú Mawu ǎ é ó. Eflayímu ví lɛ́ɛ hɛn gǎ bó xwe ahwan fun gbé, gbe e gbe è nǎ fun ahwan ɔ́ ká su, bɔ yě dó gblǒ mɛ. Yě nɔ gbejí nú akɔ e Mawu jɛ xá yě ɔ́ ǎ; yě sɔ́ xwedó Mawusɛ́n ɔ́ ǎ. Yě wɔn azɔ̌ ɖaxó ɖaxó e Mawu bló lɛ́ɛ, nǔjíwǔ e é blǒ bɔ yě mɔ lɛ́ɛ ɔ́, yě wɔn. Mawu wa nǔjíwǔ ɖo tɔ́gbó yětɔn lɛ́ɛ nukún mɛ ɖo Ejípu, ɖo Sowáan gbé jí: É má xu ɖó we, bó ɖe ali gbɔn mɛ nú yě; É sɛ sin kplé glélé ahohó ɖɔhun. É nɔ́ zé akpɔ́kpɔ́ dó xlɛ́ ali yě kéze. É jɛ zǎn mɛ ɔ́, é nɔ́ sɔ́ myɔ dó xlɛ́ ali yě. É zɛ só ɖo gbětótló mɛ, bɔ sin sa sín mɛ hohoho tɔsisa ɖɔhun, bɔ yě nu. É ɖe gbe bɔ sin tɔ́n sín awǐnnya mɛ, bó nɔ́ sa tɔsisa ɖɔhun. É wa mɔ̌ có, yě lɛ́ fɔ́n bó ɖo hwɛ hu dó e wɛ. Yě fɔ́n, bó ɖo gǔ fɔ́n dó éyɛ́ Mawu Ajalɔ̌nlɔn ɔ́ jí wɛ ɖo akúgbéjí. Yě syɛ́n ta káká bó tɛ́n Mawu kpɔ́n; yě byɔ́ nǔɖuɖu i dó tɛ́n ɛ kpɔ́n. Yě ɖɔ xó nyanya dó Mawu wú ɖɔ: “Mawu ka sixú ná nǔɖuɖu mǐ ɖo gbětótló mɛ a? É nɛ́ zin nǔ dó awǐnnya wú, bɔ sin tɔ́n bó sa tɔ nɛ́, é ká sixú ná nǔɖuɖu abǐ lan togun tɔn a?” Ée Mawu Mavɔmavɔ se xó énɛ́ ɔ́, xomɛ sin i; é sin xomɛ dó Jakɔ́bu ví lɛ́ɛ bɔ é vɛ́ jlɛ́; Mawu sin xomɛ dó Izlayɛ́li ví lɛ́ɛ. É sin xomɛ dó yě, ɖó nǔ e yě má ɖi n'i ǎ é wú; é sin xomɛ dó yě, ɖó yě gán jɛ hwlɛngán tɔn wú ǎ. É ɖe gbe dó akpɔ́kpɔ́ e ɖo jǐxwé lɛ́ɛ, é hun sɛ́xwé sín hɔn lɛ́ɛ. É ɖe gbe bɔ mǎna ja kɔn nyi ayǐ bɔ yě ɖu; é ná blěe yě sín jǐxwé. Yě mɛ bǐ ɖu nǔɖuɖu wɛnsagun lɛ́ɛ tɔn. Mawu sɛ́ nǔɖuɖu dó yě bɔ yě ɖu gɔ́ xo. Mawu ɖe gbe bɔ jɔhɔn zǎnzǎnhwe jí tɔn jɛ nyinyi jí ɖo jǐxwé; é ɖe gbe dó jɔhɔn afɔligbé tɔn ɔ́, bɔ é jɛ nyinyi jí gǎnnugǎnnu. É ɖe gbe bɔ lan ja kɔn nyi yě jí, xɛ ɖé lɛ́ɛ ja kɔn nyi yě jí, bó sukpɔ́ káká xuta nyɛ́kɛ́n ɖɔhun. É ɖe gbe bɔ nǔ énɛ́ lɛ́ɛ ja kɔn nyi fí e yě ɖó gɔnu ɖó ɔ́ lɛ́ lɛ̌ dó goxɔ yětɔn lɛ́ɛ. Yě ɖu nǔ gɔ́ xo. Mawu ná yě nǔ e jló yě lɛ́ɛ. Nǔ e jló yě bɔ yě ná ɖu ɔ́, yě ko ɖu kpé ǎ, nǔɖuɖu kpo ɖo nu yětɔn mɛ, có xomɛsin Mawu tɔn jɛ yě jí, Mawu hu mɛ e dó hlɔ̌nhlɔ́n ganjí ɖo yě mɛ lɛ́ɛ; é zin dɔ̌nkpɛvú Izlayɛ́li tɔn lɛ́ɛ dɛ́. Mawu wa nǔ xá yě mɔ̌ có yě fɔ́n bó kpo ɖo hwɛ hu wɛ; Mawu bló nǔjíwǔ énɛ́ lɛ́ɛ bǐ có yě ɖi nǔ n'i ǎ. Énɛ́ ɔ́ wú wɛ é zé fúnfún dó za yě sín gbɛ ɔ́ mɛ; é sɛ́ awě ɖé dó yě vawun dó ɖó nǔ gbɛzán yětɔn nu. Hwenu e Mawu jɛ yě hu jí ɔ́, yě jɛ biba ɛ jí, yě lɛ́ kɔ wá bó jɛ Mawu ba jí. Yě wá flín ɖɔ Mawu wɛ nyí sósyɛ́n émítɔn; yě flín ɖɔ Mawu Ajalɔ̌nlɔn wɛ nyí Mɛhwlɛ́ngántɔ́ émítɔn. Lo ɔ́, yě jɛ xó víví ɖɔ jí, bó ná dó klɔ́ Mawu, yě sɔ́ nu yětɔn dó jɛ adingban ɖó n'i jí. Yě jó ayixa yětɔn bǐ dó nú Mawu ǎ, yě ɖo gbejí nú akɔ e é jɛ xá yě ɔ́ ǎ. Amɔ̌, éyɛ́ ɔ́, mɛ nú nɔ́ blá wǔ n'i, bɔ é nɔ́ sɔ́ hwɛ kɛ yě, bó sú kún yětɔn dó ǎ. Hwe gěgé nu ɔ́, é nɔ́ jó xó dó; é nɔ́ lɔn bó nɔ́ sin xomɛ ǎ, é nɔ́ lɔn bó nɔ́ zé adǎn e jí é ɖe ɔ́ bǐ dó wa nǔ ná ǎ. É nɔ́ wá flín ɖɔ gbɛtɔ́ kpowun wɛ yě nyǐ, nǔ funfún ɖo xomɛ kpowun wɛ yě nyí, funfún ɔ́ yi hǔn, é vɔ nɛ́. Azɔn mɔ̌kpán wɛ yě fɔ́n gǔ dó jǐ tɔn ɖo gbětótló mɛ; azɔn mɔ̌kpán wɛ yě dó xomɛsin n'i ɖo axéko énɛ́ lɛ́ɛ jí. Yě lɛ́ jɛ Mawu tɛ́nkpɔ́n jí, yě lɛ̌ jɛ agɔ jɛ dó Mɛ mímɛ́ Izlayɛ́li tɔn ɔ́ jí. Yě sɔ́ flín hlɔ̌nhlɔ́n tɔn ǎ, yě ká sɔ́ flín gbe e gbe é hwlɛ́n yě ɖo kɛntɔ́ sí ɔ́ ǎ. Mɔ̌ ɖokpó ɔ́, yě sɔ́ flín nǔ e é jlɛ́ ɖo Ejípu lɛ́ɛ é ǎ, yě ká sɔ́ flín nǔjíwǔ e é wa ɖo Sowáan gbé jí lɛ́ɛ é ǎ: É zé tɔsisa yětɔn Nilu ɔ́ sín ala lɛ́ɛ dó húzú kanjɔ, bɔ yě sɔ́ sixú nu ɖě ǎ. É sɛ́ sukpɔ aɖǐvɛ́nɔ ɖé lɛ́ɛ dó yě, bɔ sukpɔ lɛ́ɛ nɔ́ kán yě ɖu; é sɛ́ běsé dó yě, bɔ běsé lɛ́ɛ nɔ́ gblé gbɛ dó nú yě. É jó nǔkún yětɔn nú wɛn lɛ́ɛ, nǔ e yě jɛ dɛ̌n bó wa ɔ́, é jó nú bɔkle lɛ́ɛ. Mawu sɔ́ kɛ́njí dó hɛn vǐwungbo yětɔn lɛ́ɛ gblé; é sɔ́ jǐ ɖaxó ɖé dó hɛn sikomɔ́ɔtín yětɔn lɛ́ɛ gblé. É sɔ́ kɛ́njí dó vívá kanlin yětɔn lɛ́ɛ sín kún, é jó kanlin hwan yětɔn lɛ́ɛ dó bɔ so jɛ yě. É sin xomɛ dó yě bɔ é syɛ́n ɖésú, xomɛsin ɔ́ syɛ́n káká bó vɛ́ jlɛ́, é sɛ́ wɛnsagun nǔhɛngblétɔ́ wɔ̌buwɔ́bú ɖé dó yě. Xomɛ e é sin é ɔ́, é jó dó ǎ; é sɔ́ gbɛ́ kú yětɔn ǎ, é jó yě nú azɔnhwi. É hu nukɔngbéví e ɖo Ejípu lɛ́ɛ, nukɔngbéví e ɖo Cámu ví lɛ́ɛ sín tomɛ lɛ́ɛ, vǐ e è ji ɖo wǐnnyáwínnyá mɛ lɛ́ɛ. É ɖe togun tɔn tɔ́n, bɔ é ɖidó lɛ̌ngbɔ́hwan ɖɔhun; é kplá yě gbɔn gbětótló mɛ lɛ̌ngbɔ́ ɖɔhun. É cyɔ́n alɔ yě jí, bɔ xɛsi ɖi yě ǎ; xu ka nyɛ sú kɛntɔ́ yětɔn lɛ́ɛ. É kplá togun tɔn ɖidó ayǐkúngban tɔn mímɛ́ ɔ́ jí, só e é fun ahwan bó yí é jí. É nya akɔta ɖě lɛ́ɛ sín ayǐkúngban énɛ́ ɔ́ jí; é má to ɔ́ dó así nú yě, bɔ é húzú yětɔn; é ɖó tɛnmɛ nú akɔta Izlayɛ́li ví lɛ́ɛ tɔn lɛ́ɛ ɖo Kanáanu lɛ́ɛ xwé gbe. Lo ɔ́, yě tɛ́n Mawu Ajalɔ̌nlɔn ɔ́ kpɔ́n, yě fɔ́n gǔ dó jǐ tɔn, yě sɔ́ nɔ́ nyi sɛ́n tɔn lɛ́ɛ ǎ. Yě sɛ yi zɔ nú Mawu, yě nɔ gbejí n'i ǎ tɔ́gbó yětɔn lɛ́ɛ ɖɔhun; yě zɛ ali gǎ e má jlɔ́ ǎ é ɖɔhun. Yě nɔ́ ɖo vodún xwé vodún xwé gbɔn wɛ, bó nɔ́ ɖo bǒcyɔ lɛ́ɛ sɛn wɛ; yě wa mɔ̌ bɔ xomɛ sin Mawu. Mawu mɔ mɔ̌ bó sin xomɛ ɖésú, Izlayɛ́li sín nǔ vɛ́ wǔ tɔn titewungbe. É jó nɔtɛn Silóo tɔn ɔ́ dó, goxɔ e mɛ é nɔ ɖo gbɛtɔ́ lɛ́ɛ tɛ́ntin é. Akɔjijɛgbá e nyí hlɔ̌nhlɔ́n tɔn sín wuntun ɔ́, yě jó dó bɔ kɛntɔ́ lɛ́ɛ sɔ́yi. É jó susu tɔn dó nyi kɛntɔ́ lɛ́ɛ sín alɔ mɛ. É sin xomɛ dó mɛ e nyí étɔn lɛ́ɛ, é jó togun tɔn dó nú kú. Myɔ fyɔ́ dɔ̌nkpɛvú lɛ́ɛ, ɖyɔ̌vǐ lɛ́ɛ sɔ́ mɔ asú ǎ. È hu vɔ̌sánú-xwlémawutɔ́ lɛ́ɛ, asúkúsi yětɔn lɛ́ɛ ka ya avǐ ǎ. Aklúnɔ fɔ́n mɛ e ɖo amlɔ dɔ́ wɛ é ɖɔhun, gbɛtɔ́ asúká e vɛ̌ɛn fɔ́n kanmɛ ná ɔ́ ɖɔhun. Alɔ tɔn jɛ kɛntɔ́ tɔn e ɖo hinhɔn wɛ lɛ́ɛ wú, é dó hɛ̌n mavɔ mavɔ ɖé yě. É gbɛ́ wǎn nú Jozɛ́fu ví lɛ́ɛ, é sɔ́ akɔta Eflayímu tɔn ɔ́ ǎ; lo ɔ́, é sɔ́ akɔta Judáa tɔn, Sinyɔ́ɔ e é yí wǎn ná é. Fínɛ́ wɛ Mawu gbá sinsɛnxɔ tɔn ɖó bɔ é ná sɛ tɛn ǎ jǐnukúnsin ɖɔhun; é ná sɛ tɛn ǎ ayǐkúngban e é dó do bɔ é ɖo mɔ̌ káká sɔ́yi é ɖɔhun. É sɔ́ mɛsɛntɔ́ tɔn Davídi ɖó vo; é ɖe e sín lɛ̌ngbɔ́kpó mɛ. É zé e sín lɛ̌ngbɔ́ e ɖo anɔ̌ ná vǐ wɛ lɛ́ɛ gúdo, bónú é ná kplá togun tɔn Jakɔ́bu, Izlayɛ́li e nyí étɔn é. Davídi nyí lɛ̌ngbɔ́nyitɔ́ ɖagbe nú yě, lɛ̌ngbɔ́nyitɔ́ e wú è ma nɔ mɔ nǔɖé ɖɔ dó ǎ é; é xlɛ́ ali yě kpó nǔnywɛ́lɔ kpó. Asáfu sín han. Mawu ce, akɔta ɖěvo ɖěvo lɛ́ɛ vun gba ayǐkúngban towe; yě ɖu su nú sinsɛnxɔ mímɛ́ towe; yě zé Jeluzalɛ́mu dó húzú dǒglin. Yě jǒ mɛ e nɔ sɛn we lɛ́ɛ sín cyɔ dó nú xɛ, bɔ xɛ ɖu; yě jǒ mɛ e ɖo gbejí nú we lɛ́ɛ sín lan dó nú gběkanlin, bɔ gběkanlin ɖu. Yě kɔn hun yětɔn kɔn nyi ayǐ sin ɖɔhun lɛ́ lɛ̌ dó Jeluzalɛ́mu, mɛ ɖěbǔ ká ɖe bó ná ɖi cyɔ yětɔn ǎ. A sɔ́ mǐ dó húzú zuntín nú mɛ e ɖo akpá mǐtɔn lɛ́ɛ; mǐ húzú slǎmɛ ɖɔ nú, mǐ húzú nǔkiko nú mɛ e lɛ́ lɛ̌ dó mǐ lɛ́ɛ. Mawu Mavɔmavɔ, xomɛ e sin dó mǐ wɛ a ɖe ɔ́, hwetɛ́nu wɛ a nǎ jǒ dó dó? Xomɛsin towe e ɖo nǔ fyɔ́ wɛ myɔ ɖɔhun ɔ́, hwetɛ́nu wɛ a nǎ jǒ dó dó? Sin xomɛ dó akɔta e ma tunwun we ǎ lɛ́ɛ, sin dó axɔ́súɖuto e ma nɔ sɛn we ǎ lɛ́ɛ. Đó yě vúnvún Jakɔ́bu togun ɔ́; yě gba nɔtɛn tɔn hánnyá. Ma sɔ́ flín hwɛ e tɔ́gbó mǐtɔn lɛ́ɛ hu lɛ́ɛ ó. Nǔbláwǔkúnúmɛ towe ní yá wǔ wá, ɖó mǐ jɛ ayǐ bǐ sésé. Mawu gbɛxɔnúmɛtɔ́ mǐtɔn, gɔ̌ alɔ nú mǐ, ɖó susu e nyǐkɔ towe ɖó ɔ́ wú; hwlɛ̌n mǐ, bó sɔ́ hwɛ mǐtɔn lɛ́ɛ kɛ mǐ, ɖó nyǐkɔ towe wú. Étɛ́wú akɔta ɖě lɛ́ɛ ná kanbyɔ́ ɖɔ: “Fítɛ́ Mawu yětɔn ká ɖe?” Mɛsɛntɔ́ towe e sín hun è kɔn nyi ayǐ lɛ́ɛ ɔ́, lě e a nɔ ba hlɔn nú yě gbɔn ɔ́, ɖe xlɛ́ akɔta énɛ́ lɛ́ɛ ɖo nukún mǐtɔn mɛ. Mavɔmavɔ, vo e sa wɛ gantɔ́ ɖe ɔ́ ní hun káká wá gɔ̌n towe. Hwlɛ̌n mɛ e ɖo nǎ dɔn wɛ lɛ́ɛ gán, ɖó a dǒ hlɔ̌nhlɔ́n sɔ mɔ̌. Aklúnɔ, togun e ɖo akpá mǐtɔn lɛ́ɛ ɔ́, cí e yě kɔn dó wǔ we lɛ́ɛ ɔ́, sú axɔ́ tɔn yě; sú axɔ́ tɔn yě azɔn tɛ́nwe. Énɛ́ ɔ́, mǐdɛɛ lɛ́ɛ e nyí togun towe ɔ́, mǐ lɛ̌ngbɔ́hwan e a nyǐ lɛ̌ngbɔ́nyitɔ́ ná lɛ́ɛ ɔ́, mǐ ná nɔ́ ji han dó kpa we káká sɔ́yi; mǐ nǎ nɔ́ kpa susu nú we sín jijimɛ ɖě jí yi ɖě jí. Hanjigbɛ́gán ɔ́ sín hanjiwéma mɛ wɛ han élɔ́ ɖe. È nɔ ji dó han e è nɔ ylɔ́ ɖɔ “Folówa ɖagbe ɖagbe” ɔ́ sín hangbe mɛ. Kúnnuɖiɖe Asáfu tɔn sín han wɛ. Lɛ̌ngbɔ́nyitɔ́ Izlayɛ́li tɔn, ɖǒtó! Hwi mɛ e nɔ xlɛ́ ali Jozɛ́fu ví lɛ́ɛ lɛ̌ngbɔ́nyitɔ́ ɖɔhun ɔ́, hwi mɛ e ɖo ayǐjínjɔ́n ɖo wɛnsagun susunɔ lɛ́ɛ jí ɔ́, ɖe hwiɖée xlɛ́ ɖo susu towe mɛ. Zǎn hlɔ̌nhlɔ́n towe ɖo akɔta Eflayímu tɔn nukɔn, zǎn ɖo akɔta Bɛnjamɛ́ɛ tɔn nukɔn, zǎn hlɔ̌nhlɔ́n towe ɖo akɔta Manasée tɔn nukɔn, wǎ hwlɛ́n mǐ. Mawu ce, zě mǐ ɖó tɛn e mɛ mǐ ɖe ɖ'ayǐ é mɛ; zě nukún ɖagbe dó kpɔ́n mǐ; énɛ́ ɔ́, mǐ nǎ gán. Mawu Mavɔmavɔ, Mawu Nǔbǐwúkpétɔ́, káká jɛ hwetɛ́nu ɖɛ e xo wɛ togun towe ɖe é ká ná dó xomɛsin nú we yi jɛ? Đasin wɛ nyí nǔɖuɖu e a nɔ ná yě ɔ́, a nɔ ná yě bɔ yě nɔ́ nu bɔ é nɔ́ kpé yě kpo. A sɔ́ mǐ dó húzú nǔhwlɛ́nhwlɛ́n nú mɛ e ɖo akpá mǐtɔn lɛ́ɛ, bɔ kɛntɔ́ mǐtɔn lɛ́ɛ ɖo mǐ kó wɛ. Mawu Nǔbǐwúkpétɔ́, zě mǐ ɖó tɛn e mɛ mǐ ɖe ɖ'ayǐ é mɛ, zě nukún ɖagbe dó kpɔ́n mǐ; énɛ́ ɔ́, mǐ nǎ gán. A hɔn vǐwuntín ɖé sín Ejípu, bó nya akɔta lɛ́ɛ, bó sɔ́ tun ɖó to yětɔn mɛ. A blǒ tɛnmɛ ɖó ɖ'ayǐ nú vǐwuntín ɔ́, bɔ é dó ɖɔ do bó vun kan kpé to ɔ́ mɛ bǐ. Yɛtɛn tɔn kpé só lɛ́ɛ jí, ala tɔn lɛ́ɛ vun káká yi sɛ́dlutín e d'agba hú ɖě lɛ́ɛ bǐ é jí. É vun ala káká yi Mɛditɛlanɛ́ɛ xu ɔ́ tó, é jɔ vǐ káká yi Nilu tɔ ɔ́ mɛ. Étɛ́wú a ka mu dǒ e è mɛ lɛ́ lɛ̌ dó vǐwuntín ɔ́ é, bɔ aligbɔntɔ́ ɖé jɛ fínɛ́ ɔ́, é nɔ́ yi gbɛ lě e é jló e gbɔn ɔ́? Aglǔza gbě tɔn lɛ́ɛ nɔ́ wá dó awɔnnu mɛ bó nɔ kíjé, gběkanlin lɛ́ɛ nɔ wá ɖu nǔ ɖo fínɛ́. Mawu Nǔbǐwúkpétɔ́, lɛ̌ kɔ wá; nɔ jǐxwé dɔ̌n bó kpɔ́n nǔ e ɖo jijɛ wɛ ɔ́ sɛ́ dó. Wǎ kpé nukún dó vǐwuntín énɛ́ wú. Nya xɛ ɖo atín e hwi ɖésúnɔ sɔ́ alɔ towe dó tun ɔ́ jí, nya xɛ ɖo vǐ súnnu e a hɛn bɔ é su é jí. Kɛntɔ́ mǐtɔn lɛ́ɛ gbo atín ɔ́ bó dó zo; sɔ́ nukún nyanya dó kpɔ́n yě, sú kún yětɔn dó. Alɔ towe ní nɔ mɛ e ɖo ayǐjínjɔ́n ɖo aɖisí towe xwé ɔ́ jí, éyɛ́ mɛ e a sɔ́ su ɔ́ jí. Énɛ́ ɔ́, mǐ sɔ́ ná nɔ́ sɛ yi zɔ nú we ɖě ǎ. Lɛ̌ ná gbɛ mǐ, bónú mǐ ná nɔ́ xomlá nyǐkɔ towe. Mawu Mavɔmavɔ, Mawu Nǔbǐwúkpétɔ́, zě mǐ ɖó tɛn e mɛ mǐ ɖe ɖ'ayǐ é mɛ, zě nukún ɖagbe dó kpɔ́n mǐ; énɛ́ ɔ́, mǐ nǎ gán. Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji bo nɔ xo kanhún Gatinu lɛ́ɛ tɔn d'é mɛ. Mi sú xó kpó xomɛhunhun kpó sɛ́ dó Mawu hlɔ̌nhlɔ́n mǐtɔn ɔ́; mi kpa awǒbóbó sɛ́ dó Mawu Jakɔ́bu tɔn. Mi dó han víví bó ji; mi xo hǔnví, mi xo kanhún e nyɔ́ gbe ganjí é, mi xo kanhún kanwǒnɔ. Mi kún lanzo xwezán mǐtɔn gbe: sun wá jǐ hǔn, mi kún lanzo, sun kpé ká hǔn, mi kún. Đó nǔ wɛ nyí bɔ Mawu zɔ́n Izlayɛ́li ví lɛ́ɛ, Mawu Jakɔ́bu tɔn sín gbeta wɛ; é sɔ́ dó ɖó sɛ́n nú Jozɛ́fu ví lɛ́ɛ, hwenu e é tɔ́n ahwan Ejípu é. Un se gbe ɖé, un ka tunwun mɛ e sín gbe wɛ ɔ́ ǎ. Gbe ɔ́ ɖɔ nú mì ɖɔ: “Un ɖe agban kpinkpɛn sín abɔ̌ towe ta, bɔ alɔ towe gosín xasun kpinkpɛn ɔ́ wú. Adǎn ɖo gbigbo we wɛ bɔ a sú xó ylɔ́ mì, bɔ un hwlɛ́n we. Un zɔn jɔhɔn ɖaxó ɖé mɛ bó wá hwlɛ́n we gán. Un tɛ́n we kpɔ́n ɖo Mɛliba sin ɔ́ kɔn. Togun ce, ɖǒtó mì, un ná gba akpá ɖé nú we. Izlayɛ́li, tó wɛ a lo kó ɖó mì. È ma mɔ vodún ɖo gɔn towe ó, ma sɛn vodún ó. Nyɛ wɛ nyí Mawu Mavɔmavɔ, Mawu towe; nyɛ wɛ ɖe we tɔ́n sín Ejípu. Kɛ nu gblogblo, un ná bɛ́ nǔɖuɖu d'é mɛ bɔ é ná gɔ́. Lo ɔ́, togun ce ɖótó gbe ce ǎ; Izlayɛ́li ví lɛ́ɛ ba xó ce ǎ. Énɛ́ ɔ́, un gbɔ bo jó yě dó nyi tó tlítlí yětɔn mɛ, bɔ yě xwedó linlin yě ɖésúnɔ tɔn lɛ́ɛ. Áo! Ényí togun ce nɔ ɖótó mì wɛ ɔ́, ényí Izlayɛ́li ví lɛ́ɛ sixú nɔ ali e un ɖe nú yě ɔ́ jí wɛ ɔ́, un ná ko dó winnyá kɛntɔ́ yětɔn lɛ́ɛ ɖo cɛ́jú mɛ, un ná húzú kpan nukɔn mɛ e ma ɖo yě jí ǎ lɛ́ɛ.” Énɛ́ ɔ́, mɛ e gbɛ́ wǎn nú Mawu Mavɔmavɔ lɛ́ɛ ná jó goyíyí bǐ dó, bɔ Izlayɛ́li ví lɛ́ɛ ná mɔ agbɔ̌n káká sɔ́yi. Jinukún e nyɔ́ hú ɖě lɛ́ɛ bǐ ɔ́ wɛ ná nyí nǔɖuɖu e Mawu ná ná yě ɔ́; é ná ná wǐin e è nɔ fɔ ɖo sókan mɛ é yě, bɔ yě ná nɔ́ ɖu gɔ́ xo. Asáfu sín han. Mawu ɖǒ nǔmɛsɛn lɛ́ɛ sín kplé, Mawu ɖo te ɖo yě tɛ́ntin bó ɖo hwɛ ɖɔ wɛ: “Káká jɛ hwetɛ́nu wɛ mi ná nɔ́ dó hwɛ agɔ yi jɛ? Mi ná nɔ́ ɖo hwɛ yí dó ta nú mɛdídá lɛ́ɛ wɛ káká yi jɛ hwetɛ́nu? Mɛmaɖómɛɖé hwɛ jɔ hǔn, mi ɖɔ hwɛ tɔn jɔ; tɔ́cyɔvǐ hwɛ jɔ hǔn, mi ɖɔ hwɛ tɔn jɔ. Mi ɖɔ hwɛjijɔ nú gbɛ̌dónánɔ kpó wamamɔnɔ kpó. Mi ná ayi jɛ ayǐ mɛmaɖómɛɖé kpó lelenɔ kpó, mi yí yě sín mɛdídá lɛ́ɛ fɛn mɛ.” Nǔmɛsɛn lɛ́ɛ tunwun nǔɖé ǎ, yě ɖó nǔnywɛ́ ǎ, zǐnflú mɛ gbɔn wɛ yě ɖe; énɛ́ wú wɛ gbɛ ɔ́ ɖo na gba wɛ. Un ko ɖɔ ɖ'ayǐ ɖɔ mawu wɛ mi mɛ ɖokpó ɖokpó nyí, mi bǐ wɛ nyí Mawu Ajalɔ̌nlɔn sín vǐ. Un ɖɔ mɔ̌ có mi ná kú gbɛtɔ́ bǐ ɖɔhun, mi ná j'ayǐ gǎn bǐ ɖɔhun. Mawu ce, sí te, ɖɔ hwɛ xá gbɛ ɔ́ bǐ, ɖó akɔta lɛ́ɛ bǐ wɛ nyí towe. Asáfu sín han. Mawu ce, ma tin dó nǔ e ɖo jijɛ wɛ é ó. Ma nɔ abwɛ̌ ó, ma nɔ xwíí dó nǔ e ɖo jijɛ wɛ é wú ó. Vɛ̌ kpɔ́n! Kɛntɔ́ towe lɛ́ɛ ɖo adǎn jí, mɛ e gbɛ́ wǎn nú we lɛ́ɛ ɖo te sí dó mǐ jí wɛ. Yě ɖo kpá yi dó togun towe ta wɛ, togun towe e jí a nɔ nya xɛ ɖe ɔ́, yě blá gbě tɔn. Yě ɖɔ: “Mi wá mǐ ní ɖe yě sín ayǐkúngban ɔ́ jí, bónú mɛɖé ma sɔ́ flín nyǐkɔ Izlayɛ́li tɔn gbeɖé ó.” Yě bǐ ɖó gbe kpɔ́ bó yi kpá, yě nu alɛ dó ta towe mɛ, ɖɔ émí ná wa nǔ xá we. Yě mɛ e wɛ lɛ́ɛ ɖíe: Edɔ́mu ví lɛ́ɛ, Isimayɛ́li ví lɛ́ɛ, Mɔwabu ví lɛ́ɛ, Hagáa ví lɛ́ɛ, Gevalunu lɛ́ɛ, Amumɔ́ɔ ví lɛ́ɛ, Amalɛ́ki ví lɛ́ɛ, Filisitɛ́ɛn lɛ́ɛ kpódó Tíinu lɛ́ɛ kpó. Asilíinu lɛ́ɛ lɔmɔ̌ gɔ́ nú yě, bó gɔ́ alɔ nú Lɔ̌ti ví lɛ́ɛ: Mɔwabu ví lɛ́ɛ kpó Amumɔ́ɔ ví lɛ́ɛ kpó. Mawu ce, wa nǔ xá yě lě e a wa xá Madiáani gbɔn é, wa nǔ xá yě lě e a wa xá Sisela gbɔn é, wa nǔ xá yě lě e a wa xá Yavíni gbɔn ɖo tɔsisa Kicɔ́ni tɔn kɔn é. A sú kún yětɔn dó ɖo Eyinu-Dɔ́ɔ, yě húzú jɛ nú ayǐkúngban ɔ́. Wa nǔ xá gbɛtɔ́ nukúnɖéjí e ɖo yě mɛ lɛ́ɛ lě e a wa xá Olɛ́vu kpó Zéɛvu kpó gbɔn é; wa nǔ xá gǎn yětɔn lɛ́ɛ bǐ, lě e a wa xá Zɛváxi kpó Salumúna kpó gbɔn é. Wa nǔ xá yě mɛ énɛ́ lɛ́ɛ e ɖɔ émí ná klá jɛ ayǐkúngban towe nu lɛ́ɛ. Mawu ce, fúnfún yě kpé nǔywɛ́ e mɛ axásáxásá jɔhɔn dó alɔ é ɖɔhun. Wa nǔ xá yě lě e myɔ nɔ ɖíɖɔ́ zunkan gbɔn é; wa nǔ xá yě lě e myɔ nɔ vun blá só ɖaxó gbɔn é; nya yě dó wezun nu kpó jɔhɔn ɖaxó ɖé kpó; sɔ́ jɔhɔn towe e nukɔn nǔɖé má nɔ́ nɔ te ɖe ǎ ɔ́ dó dó xɛsi yě. Mawu Mavɔmavɔ, dǒ winnyá yě, bónú yě ní lɛ́ kɔ wá gɔ̌n towe. Wi yětɔn ní kɔ́n, xɛsi ní ɖo yě jí káká sɔ́yi, yě ní ɖu hɛ̌n, yě ní kú. Yě ní tunwun ɖɔ hwi ɖokpónɔ géé sín nyǐkɔ wɛ nyí Mawu Mavɔmavɔ, hwi wɛ nyí Mawu Ajalɔ̌nlɔn ɖo ayǐkúngban ɔ́ bǐ jí. Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ; è nɔ ji bo nɔ xo kanhún Gatinu lɛ́ɛ tɔn d'é mɛ. Mawu Mavɔmavɔ Nǔbǐwúkpétɔ́, un yí wǎn nú nɔtɛn towe lɛ́ɛ mɛ nya! Kɔ́xo towe lɛ́ɛ ta wíwá ɖo nukún myá nú mì wɛ ɖésú. Nyi ɖésú ɔ́ bǐ ɖo xixo mlá hwi Mawu gbɛɖe ɔ́ wɛ. Títígwetí ɖésú nɔ́ mɔ fí e é ná xo adɔ̌ ɖó é, azɔnxɛ nɔ mɔ adɔ̌ e mɛ é ná bɛ́ vǐ tɔn lɛ́ɛ dó é. Mawu Mavɔmavɔ Nǔbǐwúkpétɔ́, axɔ́sú ce, Mawu ce! Vɔ̌sákpe towe lɛ́ɛ kpá wɛ nyí fí e yě bǐ mɔ é. Nǔ nyɔ́ nú mɛ e nɔ́ nɔ xwé towe gbe lɛ́ɛ lóóo! Yě ná nɔ́ ɖo susu kpa nú we wɛ hwebǐnu. Nǔ nyɔ́ nú mɛ e a nǎ hlɔ̌nhlɔ́n lɛ́ɛ, yě mɛ e gɔ̌n towe wíwá ɖo hǔn mɛ ná lɛ́ɛ ɔ́, nǔ nyɔ́ nú yě mɛ nya. Nú yě ɖo tɔdo Baka tɔn e ko xú bǐ é mɛ gbɔn wɛ ɔ́, yě nɔ́ sɔ́ dó húzú fí e tɔjɔtɛn sukpɔ́ ɖe é; xwejí nɔ́ ja dó ylɔ́ fífá dó tɔdo ɔ́ mɛ. Yě ɖo yiyi wɛ ɔ́, yě nɔ́ ɖo hlɔ̌nhlɔ́n mɔ dó hlɔ̌nhlɔ́n jí wɛ, káká bó nɔ́ wá gɔ̌n towe ɖo Sinyɔ́ɔ. Mawu Mavɔmavɔ, Mawu Nǔbǐwúkpétɔ́, ɖǒtó vo e sa wɛ un ɖe ɔ́. Mawu Jakɔ́bu tɔn! Đǒtó mì. Mawu ce, hwi mɛ e nyí gǎglónú mǐtɔn ɔ́, nyi kɔ bó kpɔ́n mɛ e a sɔ́ é. Nǔgbó ɔ́, è nɔ kɔ́xo towe lɛ́ɛ ta xɔ azǎn ɖokpó ɔ́, é nyɔ́ hú è blǒ azǎn afatɔ́n ɖo fí ɖěvo. Mawu ce, un yí wǎn nú xwé towe lihɛ́nnu ninɔ hú adǎkaxotɔ́ lɛ́ɛ xwé ninɔ. Nǔgbó ɔ́, Mawu Mavɔmavɔ ɔ́, hwe wɛ, gǎglónú wɛ. Mawu Mavɔmavɔ nɔ nyɔ́ xomɛ dó mɛ wú; é nɔ sɔ́ mɛ su. É nɔ́ tɛ nyɔ̌ná mɛ e nɔ wa nǔ jlɔ́jlɔ́ lɛ́ɛ é ǎ. Mawu Mavɔmavɔ Nǔbǐwúkpétɔ́, nǔ nyɔ́ nú mɛ e ɖeji dó wǔ we lɛ́ɛ. Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ. Mawu Mavɔmavɔ, a sɔ́ nukún ɖagbe dó kpɔ́n to towe; a zě Jakɔ́bu ví lɛ́ɛ ɖó tɛn e mɛ yě ɖe ɖ'ayǐ é mɛ. A sɔ́ nǔ e togun towe wa nyi do ɔ́ kɛ ɛ; a súnsún hwɛ e é hu lɛ́ɛ bǐ. A jǒ xomɛ e sin dó e wɛ a ɖe ɔ́ dó; a sɔ́ ɖo adǎn jí ǎ. Mawu Mɛhwlɛ́ngántɔ́ mǐtɔn, zě mǐ ɖó tɛn e mɛ mǐ ɖe ɖ'ayǐ é mɛ; nǔ mǐtɔn ní má sɔ́ vɛ́ wǔ towe ɖě ó. A nǎ ɖo xomɛ sin dó mǐ wɛ tɛgbɛ wɛ a? Xomɛsin towe ná nɔ ayǐ káká sɔ́yi wɛ a? A nǎ lɛ́ wá ná gbɛ mǐ, bónú mǐ mɛ e nyí togun towe ɔ́ ná mɔ awǎjijɛ ɖo gɔ̌n towe ǎ cé? Mawu Mavɔmavɔ, sɔ́ xomɛnyínyɔ́ towe xlɛ́ mǐ, hwlɛ́n mǐ gán. Un ná ɖótó nǔ e ɖɔ wɛ Mawu Mavɔmavɔ, Mawu mǐtɔn ɖe ɔ́, ɖó é ɖo fífá sín akpá dó nú togun tɔn wɛ, bó dó fífá sín akpá nú mɛ e ɖo gbejí n'i lɛ́ɛ, bónú yě ma sɔ́ bló nǔ dǎkɔdǎkɔ ɖě ó. Nǔgbó ɔ́, mɛ e nɔ sí Mawu lɛ́ɛ ɔ́, hwlɛngán tɔn ko sɛ yá yě, bónú susu tɔn ná nɔ to mǐtɔn mɛ. Xomɛnyínyɔ́ kpó gbejíninɔ kpó ná nɔ́ kplé; hwɛjijɔ kpó fífá kpó ná nɔ́ kplá así kɔ nú yěɖée. Gbejíninɔ ná wú kun sín ayǐkúngban glɔ́, hwɛjijɔ ná jɛ te sín jǐxwé. Mawu Mavɔmavɔ ɖésú ná ná nyɔ̌ná mǐ, bɔ ayǐkúngban mǐtɔn ná ná sínsɛ́n tɔn. Hwɛjijɔ ná nɔ zun zɔnlin ɖo nukɔn tɔn, bó ná ɖe ali e jí é ná gbɔn ɔ́ ɖo nukɔn tɔn. Davídi sín ɖɛ. Mawu Mavɔmavɔ, ɖǒtó mì, yǐ ɖɛ ce, ɖó gbɛ̌dónɔ, mɛmaɖómɛɖé wɛ un nyí. Nya xɛ ɖo jǐ ce, ɖó un ɖo gbejí nú we. Mawu ce, hwlɛ̌n nyɛ mɛsɛntɔ́ towe e sɔ́ nyɛɖée jó nú we ɔ́ gán. Aklúnɔ, kú nǔbláwǔ nú mì, ɖó hwi wɛ un nɔ ylɔ́ ayǐhɔ́ngbe ayǐhɔ́ngbe. Aklúnɔ, dǒ xomɛhunhun nú nyɛ mɛsɛntɔ́ towe, ɖó hwi wɛ un sɔ́ ayi ce jó ná. Hwi wɛ nyí Aklúnɔ, a nyɔ̌, a ɖo gbesisɔ mɛ bó ná sɔ́ hwɛ kɛ mɛ; a nɔ nyɔ́ xomɛ dó mɛ e nɔ ylɔ́ we lɛ́ɛ bǐ wú. Mawu Mavɔmavɔ, ɖǒtó ɖɛ ce, se vo e sa wɛ un ɖe lɛ́ɛ é. Adǎn gbo mì ɔ́, hwi wɛ un nɔ ylɔ́, ɖó a nɔ yí ɖɛ ce. Aklúnɔ, nǔmɛsɛn ɖě cí hwi ɖɔhun ǎ; nǔmɛsɛn ɖě sixú wa azɔ̌ e a nɔ wa lɛ́ɛ ǎ. Aklúnɔ, akɔta e a blǒ lɛ́ɛ bǐ nǎ wá ɖe kɔ́ nú we, bǐ nǎ kpa susu nú nyǐkɔ towe. Đó a d'agba, a nɔ wa nǔjíwǔ, hwi ɖokpónɔ wɛ nyí Mawu. Mawu Mavɔmavɔ, xlɛ́ ali e un ná gbɔn é mì, énɛ́ ɔ́, un ná xwedó xó towe dó wa nǔ ná. Sɔ́ ayixa e ná ɖó sísí nú we ɔ́ dó xomɛ nú mì. Aklúnɔ Mawu ce, un ná nɔ́ kpa we kpó ayixa ce bǐ kpó, un ná nɔ́ kpa susu nú nyǐkɔ towe káká sɔ́yi, ɖó xomɛ e a nyɔ̌ dó wǔ ce ɔ́ d'agba, a hwlɛ̌n mì sín kútomɛ, do gɔngɔn ɔ́ mɛ. Mawu ce, gbɛtɔ́ goyítɔ́ lɛ́ɛ sí te dó jǐ ce, adǎkaxotɔ́ lɛ́ɛ dó ahwan gbě bó ɖo nǎ hu mì wɛ. Hwɛ Mawu ɔ́, a ɖǒ tɛnmɛ ɖě ɖo ayi yětɔn mɛ ǎ. Amɔ̌, hwɛ Aklúnɔ ɔ́, Mawu xomɛfátɔ́ wɛ a nyǐ, nǔbláwǔkúnúmɛtɔ́ wɛ a nyǐ, a nɔ yá wǔ sin xomɛ ǎ, xomɛnyɔ́tɔ́ wɛ a nyǐ, gbejínɔtɔ́ wɛ a nyǐ. Nyi kɔ kpɔ́n mì, kú nǔ blá wǔ ce; nǎ hlɔ̌nhlɔ́n nyɛ mɛsɛntɔ́ towe, hwlɛ́n nyɛ mɛsɛntɔ́ towe ví ɔ́ gán. Sɔ́ wuntun ɖé xlɛ́ mì ɖɔ nǔ ná nyɔ́ nú mì; énɛ́ ɔ́, hwenu e mɛ e gbɛ́ wǎn nú mì lɛ́ɛ ná mɔ ɖɔ hwɛ Mawu Mavɔmavɔ wɛ gɔ́ alɔ nú mì bó dó gbɔ nú mì é ɔ́, winnyá ná hu yě. Kolée ví súnnu lɛ́ɛ sín han. Mawu ɖó Jeluzalɛ́mu toxo ɔ́ ayǐ ɖó só mímɛ́ lɛ́ɛ jí. Mawu Mavɔmavɔ yí wǎn nú Sinyɔ́ɔ toxo hú Jakɔ́bu ví lɛ́ɛ sín toxo ɖě lɛ́ɛ bǐ. Toxo Mawu tɔn, è nɔ ɖɔ xó e nɔ́ sɔ́ mɛ su lɛ́ɛ dó wǔ towe; é nɔ́ ɖɔ: “Ejípunu ɖo mɛ e tunwun mì lɛ́ɛ mɛ, Babilɔ́nunu kpó Filisitɛ́ɛn kpó ɖo yě mɛ, Tíinu kpó Etiopíinu kpó lɔ ɖo yě mɛ; è ji yě ɖó to yětɔn yětɔn mɛ. È ka jɛ Sinyɔ́ɔ ɔ́, è nɔ ɖɔ: Fí élɔ́ wɛ nyí mɛ énɛ́ lɛ́ɛ bǐ sín toxo. Mawu Ajalɔ̌nlɔn ɔ́ wɛ ɖó toxo élɔ́ ayǐ.” Mawu Mavɔmavɔ ɖo togun lɛ́ɛ sín nyǐkɔ wlán dó wěgbó togun lɛ́ɛ tɔn mɛ wɛ; é nɔ́ wlán ɖɔ: “Sinyɔ́ɔ fí wɛ togun lě jɔ ɖe.” Mɛ e ɖo han ji wɛ lɛ́ɛ, kpó mɛ e ɖo we ɖú wɛ lɛ́ɛ kpó nɔ́ sú xó ɖɔ: “Gɔ̌n towe wɛ donu ce bǐ ɖe!” Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ; è nɔ ji dó han e è nɔ ylɔ́ ɖɔ “Mahalati Leyanɔti” ɔ́ sín hangbe mɛ. Xó lómílómí Hemani Zeláxi ví ɔ́ tɔn dó han mɛ. Mawu Mavɔmavɔ, Mawu ce, Mɛhwlɛ́ngántɔ́ ce, un ɖo xó sú wɛ zǎn kpó kéze kpó ɖo nukɔn towe. Đɛ e xo wɛ un ɖe ɔ́ ní wá gɔ̌n towe. Đǒtó vo e sa wɛ un ɖe é. Nǔ nyanya kɛ́ɖɛ́ wɛ xá mì ɖo gbɛ ce mɛ, un ko ɖo kútomɛ mɔ sɛ́ dó wɛ. È ko lɛ́n mì dó mɛ e è nǎ sɛ xwe zaanɖé din lɛ́ɛ mɛ; un cí mɛ e ma sɔ́ ɖó hlɔ̌nhlɔ́n ǎ é ɖɔhun. Tɛn ce ɔ́, mɛkúkú lɛ́ɛ mɛ wɛ é kó ɖe; un cí mɛ e ko kú bɔ è sɔ́ mlɔ́ yɔdo mɛ lɛ́ɛ ɖɔhun, xó yětɔn kó fó ɖo gɔ̌n towe, a sɔ́ nɔ́ kpé nukún dó yě wú ǎ. A zě mì nyi dó domaɖó-azan mɛ, zǐnflú mɛ, do gɔngɔn mɛ. Adǎn e jí a ɖe ɔ́ hú gǎn mì, é nɔ́ xo wá gba mì aslɔkɛ́ ɖɔhun. A nya xɔ́ntɔn ce lɛ́ɛ dó zɔ nú mì, a sɔ́ mì dó húzú nǔvɛ́mɔ nú yě. Un ɖo hɔn sú dó bó sixú tɔ́n ǎ. Un mɔ wǔvɛ́ káká bɔ nukún ce sɔ́ nɔ́ mɔ nǔ ǎ. Mawu Mavɔmavɔ, ayǐhɔ́ngbe ayǐhɔ́ngbe ɔ́, un nɔ ɖo ylɔ̌ylɔ́ we wɛ; un nɔ ɖo alɔ dlɛ́n sɛ́ dó we wɛ. Mɛkúkú lɛ́ɛ wɛ a nǎ jlɛ́ nǔ ná a? Yě wɛ ná fɔ́n bó ná kpa we a? Lě e a nyɔ̌ sɔ ɔ́, è sixú ɖɔ ɖo yɔdo mɛ a? Lě e a ɖo gbejí gbɔn ɔ́, è sixú ɖɔ ɖo do gɔngɔn mɛ a? È nɔ mɔ nǔjíwǔ towe lɛ́ɛ ɖo zǐnflú mɛ wɛ a? È nɔ mɔ hwɛjijɔ towe ɖo ayǐkúngban e mɛɖé má sɔ́ flín ǎ é jí wɛ a? Nyɛ ɔ́, hwi Mawu Mavɔmavɔ ɔ́ wɛ un sú xó ylɔ́; zǎnzǎn ɔ́, un nɔ ɖɔ nǔ e ba wɛ un ɖe lɛ́ɛ nú we. Mawu Mavɔmavɔ, nɛ̌ ká gbɔn bɔ a gbɛ̌ mì? Nɛ̌ ká gbɔn bɔ a zě hwiɖée hwlá dó mì? Wamamɔnɔ wɛ un nyí, un nyí mɛ bo ɖo kúdonu sín vǔ ɖokpóó. Nǔ e wa xá mì wɛ a ɖe ɔ́ syɛ́n ɖésú; ayi ce bǐ wɛ gbadó. Xomɛsin ɖaxó e jí a ɖe é ɖo nǔ wa xá mì wɛ, nǔ e dó sin xá mì wɛ a ɖe ɔ́ hu acɛ ce bǐ. Tɔ ɖɔhun wɛ yě ɖi bú mì; ayǐ hɔ́n tɛgbɛ ɔ́, yě nɔ́ xá mì gbɔn fí bǐ. A nya mɛmɔgbɔ ce lɛ́ɛ kpó hǎgbɛ́ ce lɛ́ɛ kpó dó zɔ nú mì; Xɔ́ntɔn ɖokpó e kpo nú mì ɔ́ wɛ nyí ablu. Xó lómílómí Etáni, Zeláxi ví ɔ́ tɔn dó han mɛ. Mawu Mavɔmavɔ, un ná nɔ́ ji xomɛnyínyɔ́ towe dó han mɛ tɛgbɛ; un ná nɔ́ jlá gbejíninɔ towe káká sɔ́yi. Un ná nɔ ɖɔ: “Xomɛnyínyɔ́ towe ɖo ayǐ káká sɔ́yi; gbejíninɔ towe dó ɖɔ do ɖo jǐxwé.” A ɖɔ: “Un jɛ akɔ ɖokpó xá mɛ e un sɔ́ é, un dó akpá ɖokpó nú mɛsɛntɔ́ ce Davídi ɖɔ: Un ná nɔ sɔ́ vǐ towe ɖokpó ɖó axɔ́súzinkpo jí káká sɔ́yi; un ná hɛn axɔ́súzinkpo towe ɖó te káká sɔ́yi.” Mawu Mavɔmavɔ, jǐnukúnsin ɖo nǔ ɖagbe ɖagbe e a wa lɛ́ɛ ɖɔ wɛ dó han mɛ; mɛ e ɖo jǐxwé lɛ́ɛ nɔ́ sɔ́ we su ɖó gbejíninɔ towe wú. Mɛ̌ è ka sixú jlɛ́ dó hwi Mawu Mavɔmavɔ wú ɖo jǐnukúnsin? Nǔmɛsɛn lɛ́ɛ ɖě tɛ́ ká yá ga we? Mawu, nǔsísí ɖaxó ɖokpó wɛ a nyí ɖo wɛnsagun lɛ́ɛ tɛ́ntin, nǔdóxɛsi wɛ a nyǐ ɖo tɛ́ntin yětɔn. Mawu Mavɔmavɔ, Mawu Nǔbǐwúkpétɔ́, mɛ̌ ká syɛ́n hwɛ ɖɔhun? Mawu Mavɔmavɔ, a ɖo gbejí tɛgbɛ. Xu nɔ ɖo adǎn jí, é nɔ́ ɖo awa kɛ wɛ, hwi wɛ ka nɔ kpé jǐ tɔn; xu sí te ɔ́, hwi wɛ nɔ hwíhwɛ́ ɛ. Hwi wɛ xo Hlaxávu nǔdábaɖa ɔ́ zlɛ́ gǎ ɖɔhun, bó nyínyɛ́ ɛ; hwi wɛ sɔ́ hlɔ̌nhlɔ́n towe dó gba kɛntɔ́ towe lɛ́ɛ dó. Towe wɛ nyí jǐxwé ɔ́; towe wɛ nyí ayǐkúngban ɔ́ lɔ. Hwi wɛ bló gbɛ ɔ́ kpó nǔ e ɖ'é mɛ lɛ́ɛ bǐ kpó. Hwi wɛ bló Tofɔligbé, hwi wɛ bló Totaligbé. Tabɔ́ɔ só ɔ́ kpó Ɛmɔ́ɔ só ɔ́ kpó ɖo asíkpɛ́ xo nú nyǐkɔ towe wɛ. Hlɔ̌nhlɔ́n ɖo awa towe mɛ bó vɛ́ jlɛ́; alɔ towe syɛ́n, alɔ towe aɖisí ɔ́ ɖó hlɔ̌nhlɔ́n ɖésú. Hwɛjijɔ kpó nǔjlɔ́jlɔ́wiwa kpó jí wɛ axɔ́súzinkpo towe jínjɔ́n. Xomɛnyínyɔ́ kpó gbejíninɔ kpó wɛ nɔ zɔn xá we. Nǔ nyɔ́ nú togun e nɔ xomlá we é; Mawu Mavɔmavɔ, togun énɛ́ ɔ́ nɔ́ zun zɔnlin ɖo wěziza towe nu. Togun énɛ́ ɔ́ nɔ́ ɖo awǎjijɛ mɛ tɛgbɛ ɖó nyǐkɔ towe wú, é nɔ́ ɖo te ɖó hwɛjijɔ towe wú. Đó hwi wɛ nɔ sɔ́ ɛ su, hwi wɛ nɔ ná ɛ hlɔ̌nhlɔ́n. Wǔjɔmɛ towe mɛ wɛ hlɔ̌nhlɔ́n nɔ́ jɛ hlɔ̌nhlɔ́n jí nú mǐ ɖe. Mawu Mavɔmavɔ, hwi wɛ ná mɛ e ná cyɔ́n alɔ mǐ jí ɔ́ mǐ; Mɛ mímɛ́ Izlayɛ́li tɔn, hwi wɛ ná axɔ́sú mǐ. A sɔ́ hwiɖée xlɛ́ mɛ e ɖo gbejí nú we lɛ́ɛ gbe ɖokpó, bó ɖɔ nú yě ɖɔ: “Un gɔ́ alɔ nú súnnu glegbenu ɖokpó. Un zé dɔ̌nkpɛvú ɖokpó d'aga ɖo togun ɔ́ mɛ. Un mɔ Davídi, bó kɔn ami ce mímɛ́ ɔ́ dó ta n'i, bɔ é ná nyí mɛsɛntɔ́ ce. Alɔ ce ná hɛn ɛ ɖó te, awa ce ná nyí sósyɛ́n tɔn bɔ é ná lí dǒ. Kɛntɔ́ ná sixú fyán ɛ ǎ, mɛdídá ná sixú dó tagba n'i ǎ. Un ná já mɛ e ma ɖo jǐ tɔn ǎ lɛ́ɛ ɖo nukɔn tɔn, un ná hu mɛ e gbɛ́ wǎn n'i lɛ́ɛ. Gbejíninɔ ce kpó xomɛnyínyɔ́ ce kpó ná nɔ kpɔ́ xá ɛ, bɔ hlɔ̌nhlɔ́n tɔn ná yi jǐ ɖó nyɛ wú. Un ná ná ɛ acɛ, bɔ é ná kpa acɛ nú xu kpó tɔsisa kpó. Éyɛ́ ɔ́, é ná nɔ́ sú xó ylɔ́ mì ɖɔ: ‘Hwi wɛ nyí tɔ́ ce, hwi wɛ nyí Mawu ce, hwi wɛ nyí só e hwlɛ́n mì gán é.’ Nyɛ ɔ́, un ná sɔ́ ɛ dó ɖó nukɔn ví ce; é ná hú gǎn axɔ́sú e ɖo ayǐkúngban jí lɛ́ɛ bǐ. Un ná nɔ́ nyɔ́ xomɛ dó wǔ tɔn tɛgbɛ; nǔɖé ná sɛ do ɖo akɔ e un jɛ xá ɛ ɔ́ mɛ gbeɖé ǎ. Un ná nɔ́ sɔ́ vǐ tɔn ɖokpó ɖó zinkpo tɔn jí tɛgbɛ; jǐnukúnsin vɛ́ kó ɖo te ɔ́, axɔ́súzinkpo tɔn ná ɖo te. Ényí vǐ tɔn lɛ́ɛ jó sɛ́n ce dó, bó ma nɔ́ wa nǔ e un zɔ́n lɛ́ɛ ǎ ɔ́, ényí yě ma nɔ́ xwedó gbetakɛ́n ce lɛ́ɛ ǎ, bó nɔ gba tito ce lɛ́ɛ ɔ́, un ná zé bǎ dó xo yě, ɖó tónú e yě ma se ǎ é wú; un ná dɔn tó nú yě ɖó hwɛ e yě hu lɛ́ɛ wú. Lo ɔ́, un ná gɔn xomɛ nyɔ́ dó yě wú ǎ, un ka ná gɔn gbejí nɔ nú yě ǎ. Un ná gba akɔ e un jɛ xá yě ɔ́ ǎ, akpá e un dó ɔ́ ná húzú gbeɖé ǎ. Un xwlé mɛ mímɛ́ e un nyí ɔ́ gbe ɖokpó ɖɔ: Gbeɖé, un ná ɖɔ vo nú Davídi bo ka ná wa vo n'i ǎ. É ná kpo kún gbeɖé ǎ; nú hwe vɛ́ kó sixú nɔ́ tɔ́n ɔ́, axɔ́súzinkpo tɔn ná ɖo te tɛgbɛ. Axɔ́súzinkpo tɔn ná ɖo te káká sɔ́yi sun ɖɔhun, lě e sun nɔ wá jǐ tɛgbɛ ɖo jǐxwé ɔ́ ɖɔhun.” É ɖo mɔ̌ có, a gbɛ̌ axɔ́sú e a sɔ́ é, a jǒ e dó, a sin xomɛ dó e. A gbɛ́ wǎn nú akɔ e a jɛ xá mɛsɛntɔ́ towe é; a sɔ́ axɔ́súgbákún tɔn xo kɔ́, a ɖu su nú axɔ́súgbákún tɔn. A ɖe ali dó ahohó tɔn lɛ́ɛ mɛ, a gba fí e é nɔ́ nɔ bɔ nǔɖé má nɔ́ sixú wa ɛ ǎ lɛ́ɛ. Aligbɔntɔ́ lɛ́ɛ bǐ nɔ́ bɛ́ nǔ tɔn lɛ́ɛ, é húzú nǔkiko nú mɛ e ɖo akpá tɔn lɛ́ɛ. A nǎ ɖuɖéjí mɛ e ma ɖo jǐ tɔn ǎ lɛ́ɛ, a dǒ xomɛhunhun nú kɛntɔ́ tɔn lɛ́ɛ bǐ. A hɛn hwǐ tɔn wló nu, a nɔ jǐ tɔn ɖo ahwangbénu ǎ. A ɖǒ susu e xɔ wɛ é ɖe ɔ́ te, a zin axɔ́súzinkpo tɔn dó ayǐ. A ɖe xwe nabí e é ná dó nɔ dɔ̌nkpɛ mɛ ná é kpo; a dǒ winnyá ɛ. Mawu Mavɔmavɔ, káká jɛ hwetɛ́nu wɛ a nǎ zé hwiɖée hwlá dó yi jɛ? Káká jɛ hwetɛ́nu wɛ xo towe mɛ ná hun agbǎn yi jɛ? Flín ɖɔ azǎn ywɛywɛ ɖé ná bló wɛ jɛ́n un ɖe ɖo ayǐkúngban jí fí; flín ɖɔ gbɛtɔ́ e a blǒ lɛ́ɛ bǐ wɛ ná kú. Gbɛtɔ́ ɖě tíin bó ná sixú nɔ gbɛ káká bó ná gɔn kú a? Gbɛtɔ́ ɖě tíin bó ná sixú hwlɛ́n lǐndɔ̌n é ɖésúnɔ tɔn gán sín kútomɛ a? Aklúnɔ, ɖagbe e a nɔ wa ɖ'ayǐ xóxó lɛ́ɛ ɔ́, fítɛ́ bǐ ká gbɔn? Đagbe e sín akpá a dǒ nú Davídi ɖo gbejíninɔ towe mɛ lɛ́ɛ ɔ́, fítɛ́ yě ká ɖe? Aklúnɔ, flín cí e è kɔn dó mɛsɛntɔ́ towe lɛ́ɛ wú é; flín ɖɔ nyɛ wɛ ɖo agban mɛ énɛ́ lɛ́ɛ bǐ tɔn hɛn wɛ. Mawu Mavɔmavɔ, flín hɛ̌n e kɛntɔ́ towe lɛ́ɛ dó axɔ́sú e a sɔ́ é, flín hɛ̌n e yě dó e é. Mi nú mǐ nǎ kpa Mawu Mavɔmavɔ káká sɔ́yi. Amǐ! Amǐ! Mɔyízi ɖɛ̌mɛnu Mawu tɔn ɔ́ sín ɖɛ. Aklúnɔ, hwi wɛ nyí bibɛtɛn mǐtɔn tɛgbɛ tɔn. Cóbónú só lɛ́ɛ ná jɔ ɔ́, cóbónú a nǎ ɖó ayǐkúngban ɔ́, bó ná ɖó gbɛ ɔ́, a ko nyí Mawu, bó ná nyí Mawu káká sɔ́yi. A nɔ lɛ́ sɔ́ gbɛtɔ́ dó húzú kɔ́, a nɔ ɖɔ nú yě ɖɔ: “Mi lɛ́ kɔ yi fí e mi gosín é.” Mawu, xwe afatɔ́n (1.000) ɔ́, nǔ kléwún ɖé wɛ nyí ɖo nukɔn towe, bó nɔ́ wá yi sɔ yí e ko hɔ́n wá yi é ɖɔhun; é nɔ́ dín bléwún ayǐtéhɔ̌nnu ɖɔhun. A nɔ kplá gbɛtɔ́ sín gbɛ ɔ́ mɛ, lě e è nɔ wlí yɛ bléwún bó nɔ́ fɔ́n é ɖɔhun. É cí folówa ɖɔhun, zǎnzǎn su ɔ́, é nɔ́ tɔ́n, bó nɔ́ vlɔ́n; gbadanu su ɔ́, é nɔ mlú, bó nɔ́ j'ayǐ. Xomɛsin towe wɛ nɔ ɖe mǐ sín gbɛ ɔ́ mɛ, adǎnwiwa towe nɔ́ ɖó adohu nú mǐ. A nɔ ɖe hwɛ e mǐ hu lɛ́ɛ bǐ gba; nǔ e mǐ wa ɖo nǔglɔ́ lɛ́ɛ bǐ wɛ ɖo wěziza nu ɖo nukɔn towe. A sin xomɛ ɔ́, gbɛzán mǐtɔn nɔ́ ɖe kpo; gbɛ mǐtɔn nɔ́ vɔ nukikɛ ɖokpó mɛ. Jidɔ́ mǐtɔn nɔ te ɖó xwe kanɖé gban (70); mɛ e wú gbɛ ɖe ganjí lɛ́ɛ tɔn nyí xwe kanwe (80). Yě ká sɔ́ nɔ́ mɔ nǔɖé ɖ'é mɛ zɛ tagba kpó ya kpó wú ǎ, ɖó gbɛzán mǐtɔn nɔ́ wá yi bléwún, bɔ mǐ nɔ́ zɔn xɛ ɖidó kú. Mɛ̌ ka tunwun lě e xomɛsin towe syɛ́n gbɔn é? Mɛ̌ ká nɔ́ ɖó sísí nú we yi ɖó bǎ e mɛ a nɔ wa adǎn yi ɖó é? Xlɛ́ mǐ ɖɔ azǎn nabí e mǐ ná nɔ gbɛ ná ɔ́, nǔ xixa wɛ. Énɛ́ ɔ́, ayi mǐtɔn ná mɔ nǔ. Mawu Mavɔmavɔ, káká jɛ hwetɛ́nu a ka ná sin xomɛ dó mǐ yi ɖó? Kɛnklɛ́n bó jó xomɛsin dó. Kú nǔbláwǔ nú mɛsɛntɔ́ towe lɛ́ɛ. Nɔ nyɔ́ xomɛ dó mǐ wú sín zǎnzǎn káká yi gbada; énɛ́ ɔ́, mǐ ná ɖo awǎjijɛ mɛ tɛgbɛ, mǐ ná ɖo xomɛhunhun jí káká sɔ́yi. Nǎ awǎjijɛ mǐ xɔ azǎn nabí e a dó ya nú mǐ xɔ é. Nǎ gbɛ mǐ nú mǐ nǎ ɖu xɔ xwe nabí e mǐ ji ya xɔ é. Mǐ mɛsɛntɔ́ towe lɛ́ɛ ní mɔ nǔ jɛ nǔwiwa towe lɛ́ɛ wú; vǐ mǐtɔn lɛ́ɛ lɔmɔ̌ ní mɔ susu towe. Wǎn yíyí Aklúnɔ Mawu mǐtɔn tɔn ní nɔ mǐ jí. Blǒ bónú nǔ e mǐ sɔ́ alɔ mǐtɔn dó bló lɛ́ɛ ní lí dǒ, nǔ e alɔ mǐtɔn wa lɛ́ɛ ní lí dǒ. Mɛ e hɔn yi su Mawu Ajalɔ̌nlɔn ɔ́ nɔ́ mɔ fí ɖagbe bó nɔ́ gbɔjɛ́ ɖe; é nɔ́ gbɔjɛ́ ɖo Mawu Nǔbǐwúkpétɔ́ ɔ́ sín yɛtɛn. Un ɖɔ nú Mawu Mavɔmavɔ ɖɔ: “Hwi wɛ nyí bibɛtɛn ce, hwi wɛ nyí ahohó ce, hwi wɛ nyí Mawu ce e wú un nɔ gán jɛ é.” Mawu Mavɔmavɔ wɛ nɔ ɖe we sín mɔ e è ɖǒ nú we lɛ́ɛ mɛ; é nɔ́ ɖe we sín jɛmɛjí kpó nǔ e é nɔ́ dó sin lɛ́ɛ kpó mɛ. É ná cyɔ́n awa jǐ towe kokló vǐnɔ ɖɔhun, bɔ a nǎ mɔ tɛnmɛ ɖo awa tɔn lɛ́ɛ glɔ́. Gbejíninɔ tɔn ɔ́, ganwu wɛ, gǎglónú wɛ. A nǎ ɖi xɛsi nú adǎn e nɔ́ gbo mɛ zǎn mɛ é ǎ, a ka ná ɖi xɛsi nú gǎ e è nɔ da dó mɛ kéze lɛ́ɛ ɖě ǎ. A nǎ ɖi xɛsi nú jɛmɛjí e nɔ́ ɖo ablu mɛ é ǎ, a ka ná ɖi xɛsi nú azɔnhwi e nɔ zɔn mɛ jí hwemɛ cíɖíɖí é ǎ. Gbɛtɔ́ afatɔ́n (1.000) ná bó j'ayǐ bó kú ɖo akpá towe, bónú děgba we afɔwó (10.000) j'ayǐ ɖo aɖisí towe xwé ɔ́, hwɛ ɔ́, nǔɖé ná wa we ǎ. Sɔ́ nukún ɖó te kpowun bó ná kpɔ́n lě e Mawu ná dɔn tó nú mɛdídá gbɔn é. Nyɛ ɔ́, Mawu Mavɔmavɔ, hwi wɛ nyí bibɛtɛn ce. Nú a sɔ́ Mawu Ajalɔ̌nlɔn ɔ́ dó ɖó bibɛtɛn ɔ́, awě ɖěbǔ ná xo we ǎ, nǔ nyanya ɖěbǔ ná sɛkpɔ́ goxɔ towe ǎ, ɖó é ná ɖe gbe nú wɛnsagun tɔn lɛ́ɛ, bɔ yě ná kpé nukún wǔ we gbɔn fí bǐ. Yě ná hɛn we dó alɔ mɛ, bónú a ma yi klɛ́n afɔ dó awǐnnya ɖé wú ó. A nǎ ɖi zɔnlin gbɔn kinnikínní jí, bó ɖi gbɔn jakpata jí, a nǎ tɛ afɔ adǎnkanlin jí, bó tɛ afɔ dan jí. Mawu ɖɔ: “Un ná hwlɛ́n ɛ gán ɖó é tlɛ́ dó wǔ ce; un ná nya xɛ ɖo jǐ tɔn, ɖó é tunwun mì. É ná ylɔ́ mì bɔ un ná sɔ n'i. Adǎngbomɛ hwenu ɔ́, un ná nɔ kpɔ́ xá ɛ. Un ná hwlɛ́n ɛ gán, bó ná sɔ́ ɛ su. Un ná dó azǎn azǎn jí n'i bɔ é ná dɔ́ ji. Un ná ɖe xlɛ́ ɛ ɖɔ nyi wɛ nɔ hwlɛ́n ɛ gán.” Han e è nɔ ji gbɔjɛzán gbe é. Susu kpa nú we nyɔ́ mɛ Mawu Mavɔmavɔ! Han ji dó mlá nyǐkɔ towe nyɔ́ lóóo Mawu Ajalɔ̌nlɔn! È ɖɔ lě e a nyɔ̌ xomɛ gbɔn é zǎnzǎn, bó ɖɔ lě e a ɖo gbejí gbɔn é zǎn mɛ ɔ́, é nyɔ́ mɛ! È ɖo ɖiɖɔ wɛ, bó ɖo kanhún kanwǒnɔ xo d'é mɛ wɛ, bó ɖo kanhún kan atɔn nɔ xo d'é mɛ wɛ, bó ɖo kpete kún d'é mɛ wɛ ɔ́, é nyɔ́ lóóo! Mawu Mavɔmavɔ, a nɔ sɔ́ nǔ e a blǒ lɛ́ɛ dó dó xomɛhunhun nú mì. Un nɔ ji han kpó awǎjijɛ kpó dó kpa nǔ e a sɔ́ alɔ towe dó bló lɛ́ɛ é. Mawu Mavɔmavɔ, nǔ e a blǒ lɛ́ɛ d'agba mɛ nya! Linlin towe lɛ́ɛ ɔ́, è sixú mɔ do ná gbeɖé ǎ. Gbɛtɔ́ e ma bí ǎ é nɔ́ tunwun nǔ ɖěbǔ ɖ'é mɛ ǎ, xlonɔ nɔ mɔ nǔ jɛ mɛ ǎ. Mɛdídá lɛ́ɛ ɖo zǐnzɔ́n wɛ gběhan ɖɔhun. Mɛ e nɔ xo dǎka lɛ́ɛ bǐ ɖo sɛ́ gba wɛ folówa ɖɔhun; kún yětɔn ká ná wá sú dó bǐ gbídí gbídí. Amɔ̌, hwɛ Mawu Mavɔmavɔ ɔ́, hwi wɛ hú gǎn nǔ bǐ káká sɔ́yi. Kɛntɔ́ towe lɛ́ɛ ɔ́, mɛ e nyí kɛntɔ́ towe lɛ́ɛ ɔ́, yě bǐ wɛ nɔ́ sú kún dó, bɔ mɛ e nɔ dó nǔ nyanya sin lɛ́ɛ ɔ́, è nɔ gba yě bǐ dó. Mawu Mavɔmavɔ, a nǎ hlɔ̌nhlɔ́n mì, bɔ un dó hlɔ̌nhlɔ́n agbo ɖɔhun. A nɔ kɔn ami fífá ɖé dó ta nú mì. Kɛntɔ́ ce lɛ́ɛ ɖo ayǐ jɛ wɛ bɔ un ɖo yě kpɔ́n wɛ; yě ɖo alě ná wɛ, bɔ un ɖo sise wɛ ɖótó wú. Mɛ e nyí hwɛjijɔnɔ ɔ́ nɔ́ su dětín ɖɔhun; é nɔ́ yi jǐ sɛ́dlutín Libáan tɔn ɖɔhun. Mawu Mavɔmavɔ sín xwé gbe wɛ è tun sɔ́ nyi; é nɔ́ su ɖo Mawu mǐtɔn sín kɔ́xota. É ná bó kó kpo ɔ́, é nɔ́ lɛ́ sɛ́n. Gbɛ nɔ kpo ɖo wǔ tɔn, ama tɔn lɛ́ɛ nɔ́ ɖo mǔ tɛgbɛ. Énɛ́ nɔ́ ɖe xlɛ́ ɖɔ Mawu Mavɔmavɔ wɛ nyí hwɛjijɔnɔ. Mawu Mavɔmavɔ wɛ nyí só e jí un dó ɖɔ do ɖó é; è nɔ mɔ nǔ jɛ do ɖé ɖo wǔ tɔn ǎ. Mawu Mavɔmavɔ wɛ nyí axɔ́sú, susu wɛ nyí avɔ bɔ é nyi kɔ; é cyɔ́n susu avɔ ɖɔhun, hlɔ̌nhlɔ́n nyí gǒjíblánú bɔ é sin. É sɔ́ ayǐkúngban ɔ́ jínjɔ́n ayǐ bɔ é dó ɖɔ do ganjí; é ná dán wǔ ǎ. Mawu Mavɔmavɔ, axɔ́súɖuɖu towe ɖo te din ɔ́, é nyí mɛɖé hwenu xó ǎ; Mawu Mavɔmavɔ, sín do ɔ́, hwi wɛ tíin. Mawu Mavɔmavɔ, tɔ lɛ́ɛ nɔ́ sí te; tɔ lɛ́ɛ nɔ́ sí te kpó adǎn kpó; tɔ lɛ́ɛ nɔ́ sí te kpó zǐngídi kpó; lo ɔ́, hwɛ Mawu Mavɔmavɔ ɔ́, a hú hlɔ̌nhlɔ́n nǔ bǐ, a ɖo jǐ aga dɔ̌n bó hú hlɔ̌nhlɔ́n adǎn e jí tɔ lɛ́ɛ nɔ́ ɖe é; a hú hlɔ̌nhlɔ́n aslɔkɛ́ e nɔ́ sí te ɖo xu jí lɛ́ɛ bǐ. Mawu Mavɔmavɔ, sɛ́n e a dǒ lɛ́ɛ bǐ wɛ nyí sɛ́n jɔ sɛ́n. É jɛ xá bɔ xwé towe ná nyí nǔ mímɛ́ káká sɔ́yi. Mawu Mavɔmavɔ, Mawu hlɔnbanúmɛtɔ́, hwi Mawu hlɔnbanúmɛtɔ́ ɔ́, ɖe hwiɖée xlɛ́ ɖo susu towe mɛ. Hwi mɛ e nɔ ɖɔ hwɛ xá gbɛtɔ́ lɛ́ɛ bǐ é, sí te! Kpɔ́n nǔ e goyítɔ́ lɛ́ɛ dó sin é, bó ɖó hwɛ tɔn nú yě. Mawu Mavɔmavɔ, káká jɛ hwetɛ́nu wɛ xomɛ ná nɔ́ ɖo mɛdídá hun wɛ yi jɛ? Káká jɛ hwetɛ́nu wɛ mɛdídá ná nɔ́ ɖo awǎ ɖó wɛ yi jɛ? Yě nɔ́ ɖo xó gblégblé ɖé lɛ́ɛ wlí ɖɔ wɛ, yě nɔ́ ɖo jimakplɔ́ngbe dó wɛ; yě mɛ énɛ́ lɛ́ɛ e nɔ́ ɖo nǔ nyanya dó sin wɛ lɛ́ɛ bǐ nɔ́ ɖo yěɖée sɔ́ su wɛ. Mawu Mavɔmavɔ, yě ɖo togun towe gbídí ɖó afɔ wú wɛ; yě ɖo tagba dó nú mɛ e nyí towe lɛ́ɛ wɛ. Yě nɔ́ hu asúkúsi lɛ́ɛ kpó jǒnɔ e ɖo to yětɔn mɛ lɛ́ɛ kpó; yě nɔ́ hu tɔ́cyɔvǐ lɛ́ɛ, bó nɔ́ ɖɔ: “Mawu Mavɔmavɔ ɖo nǔ énɛ́ lɛ́ɛ ɖě mɔ wɛ ǎ, Mawu Jakɔ́bu tɔn mɔ nǔ énɛ́ lɛ́ɛ ɖě ǎ.” Gɔgɔnɔ e mi, mi cɔ́ miɖée. Xlonɔ e mi, hwetɛ́nu wɛ mi ka ná nyɔ́ nǔ i? Mɛ e bló tó ɖó ta wú nú gbɛtɔ́ é ná se xó ǎ o? Mɛ e bló nukún ɖó ta wú nú gbɛtɔ́ é ná mɔ nǔ ǎ o? Mɛ e nɔ dɔn tó nú gbɛtɔ́ é ná gbɛ́ nǔ nú mi ǎ wɛ mi vɛdó a? Éyɛ́ mɛ e ná nǔnywɛ́ gbɛtɔ́ ɔ́, tunwun linlin e gbɛtɔ́ nɔ́ ɖó é; é tunwun ɖɔ gbɛtɔ́ sín linlin bǐ wɛ nyí lɛ̌lo. Mawu Mavɔmavɔ, nǔ nyɔ́ nú mɛ e a nɔ dɔn tó ná é, nǔ nyɔ́ nú mɛ a nɔ sɔ́ sɛ́n towe dó kplɔ́n é; a nǎ xo hwihwɛ́ ɛ adǎngbomɛ hwenu. Lo ɔ́, do gɔngɔn wɛ è nɔ kun dó glɔ̌ nú mɛdídá lɛ́ɛ. Đó Mawu Mavɔmavɔ nɔ jó togun tɔn dó ǎ, é nɔ́ jó mɛ e nyí étɔn lɛ́ɛ dó ǎ. È nǎ lɛ́ xwedó sɛ́n dó ɖɔ hwɛ, bɔ mɛ e ɖó ayixa ɖagbe é bǐ ná yí gbe ná. Mɛ̌ ka ná sí te dó mɛdídá nɛ́ lɛ́ɛ jí nú mì din? Mɛ̌ ka ná húzú kpan nukɔn dǎkaxotɔ́ nɛ́ lɛ́ɛ nú mì din? Ényí Mawu Mavɔmavɔ ma ko nyí mɔ̌ nú mì ǎ ɔ́, lǐndɔ̌n ce ná ko yi maɖɔnǔxwɛ xóxó; Mawu Mavɔmavɔ, ényí un ɖɔ afɔ ce xo dɔjɔ ɔ́, xomɛnyínyɔ́ towe wɛ nɔ́ hɛn mì ɖó te. Ényí nǔ gěgé ɖo hǔn mɛ nú mì ɔ́, gbɔ e a nɔ dó nú mì é wɛ nɔ́ dó xomɛhunhun nú mì. Hwɛɖɔtɔ́ alǎnnúwatɔ́ e tunwun sɛ́n ɔ́, có bó ká ɖo dǎka xo wɛ lɛ́ɛ kpó hwi kpó sixú kpé dó nǔɖé ǎ. Yě nɔ́ kplé dó mɛ e nɔ wa nǔ jlɔ́jlɔ́ lɛ́ɛ bó ná hu; yě nɔ́ ɖó hwɛ nú xomɛvɔ́nɔ. Amɔ̌, Mawu Mavɔmavɔ wɛ nyí ahohó ce; Mawu ce wɛ nyí só e glɔ́ un nɔ hɔn hwlá cí é. É ná sú hwɛ e yě hu lɛ́ɛ bǐ sín axɔ́ yě; é ná sɔ́ dǎka e yě nɔ́ xo ɔ́ dó sú kún yětɔn dó; Mawu Mavɔmavɔ, Mawu mǐtɔn ná sú kún yětɔn dó. Mi wá mǐ ji han nú Mawu Mavɔmavɔ kpó awǎjijɛ kpó, mi wá mǐ sú xó sɛ́ dó só e hwlɛ́n mǐ gán é kpó xomɛhunhun kpó. Mi wá mǐ ní ɖo kpikpa ɛ wɛ káká yi gɔ̌n tɔn. Mi wá mǐ ní kpa awǒbóbó dó sɔ́ ɛ su, ɖó Mawu Mavɔmavɔ wɛ nyí Mawu, axɔ́sú ɖaxó wɛ é nyí bó hú gǎn nǔmɛsɛn lɛ́ɛ bǐ. É wɛ kpa acɛ nú ayǐkúngban ɔ́ bǐ, bɛ́ sín ayǐkúngban ɔ́ sín dodó jí, káká yi só e yi jǐ hú só lɛ́ɛ bí é sín nuvínu. Xu ɔ́, étɔn wɛ; é wɛ bló. Ayǐkúngban ɔ́, étɔn wɛ; é wɛ sɔ́ alɔ tɔn dó bló. Mi wá mǐ ɖe kɔ́ nú Mawu Mavɔmavɔ, mi wá mǐ yi do n'i, mi wá mǐ jɛ kpo nú Mawu Mavɔmavɔ e bló mǐ é. Đó é wɛ nyí Mawu mǐtɔn, bɔ mǐdɛɛ lɛ́ɛ nyí togun tɔn; é wɛ nyí lɛ̌ngbɔ́nyitɔ́ mǐtɔn, bɔ mǐdɛɛ lɛ́ɛ nyí lɛ̌ngbɔ́ hwan e wú é nɔ́ kpé nukún dó é. Mi ɖótó xó e ɖɔ nú mi wɛ é ɖe égbé din é; é ɖɔ: “Mi ma tlí tó lě e togun mitɔn bló gbɔn ɖo Mɛliba é ó, abǐ lě e yě bló gbɔn ɖo Masa ɖo gbětótló mɛ é ó. Tɔ́gbó mitɔn lɛ́ɛ tɛ́n mì kpɔ́n gbɔn fí énɛ́ lɛ́ɛ, yě ko mɔ nǔ e un nɔ jlɛ́ lɛ́ɛ có bó nɔ́ lɛ́ tɛ́n mì kpɔ́n. Yě mɛ énɛ́ lɛ́ɛ dó akpɔ nú mì xɔ xwe kanɖé (40), bɔ un ɖɔ togun élɔ́ sɔ́ ɖó ta ɖé ǎ. Yě mlɛ́ ali e un ɖe nú yě ɔ́ kpɛɖé ǎ. Énɛ́ ɔ́, un sin xomɛ bó xwlé nǔ ɖɔ: Yě ná byɔ́ to e mɛ un ná ná gbɔjɛ́ yě ɖe ɔ́ mɛ ǎ.” Mi ji han yɔ̌yɔ́ nú Mawu Mavɔmavɔ. Mi mɛ e ɖo ayǐkúngban jí lɛ́ɛ e mi, mi ji han dó kpa Mawu Mavɔmavɔ. Mi ji han dó kpa Mawu Mavɔmavɔ, mi xo mlá nyǐkɔ tɔn. Mi jlá hwlɛngán e é nɔ́ ná mɛ ɔ́ ayǐhɔ́ngbe ayǐhɔ́ngbe. Mi jlá susu e é ɖó ɔ́ gbɔn akɔta lɛ́ɛ bǐ mɛ, mi jlá nǔjíwǔ e é nɔ́ wa lɛ́ɛ gbɔn togun lɛ́ɛ bǐ mɛ. Đó Mawu Mavɔmavɔ d'agba, é jɛ xá tawun ɖɔ è nǐ kpa susu n'i. É syɛ́n hú nǔmɛsɛn lɛ́ɛ bǐ. Đó nǔ e akɔta lɛ́ɛ nɔ́ sɛn lɛ́ɛ ɖě nyí nǔɖé ǎ, nǔvlɛ́nǔ wɛ. Mawu Mavɔmavɔ wɛ ka bló jǐxwé. Nǔsacɔ́ kpó nǔjíwǔ kpó wɛ lɛ́ lɛ̌ dó e. Hlɔ̌nhlɔ́n kpó awǎjijɛ kpó wɛ ɖo xwé tɔn gbe. Xwédo e ɖo akɔta lɛ́ɛ mɛ é bǐ kpa susu nú Mawu Mavɔmavɔ. Mi jlá susu tɔn kpó hlɔ̌nhlɔ́n tɔn kpó. Mi sɔ́ Mawu Mavɔmavɔ nyíkɔ su. Mi hɛn nǔ e mi ná ná ɛ lɛ́ɛ bó byɔ́ xwé tɔn gbe. Mi ɖe kɔ́ nú Mawu Mavɔmavɔ kpó acɔ́nú mímɛ́ lɛ́ɛ kpó. Mi mɛ e ɖo ayǐkúngban jí lɛ́ɛ bǐ ní sísɔ́ ɖo Mawu Mavɔmavɔ nukɔn. Mi ɖɔ gbɔn akɔta lɛ́ɛ bǐ nukɔn ɖɔ: “Mawu Mavɔmavɔ wɛ nyí axɔ́sú. Énɛ́ ɔ́ wú ɔ́, gbɛ ɔ́ dó ɖɔ do; é nɔ́ xo to ǎ. Mawu Mavɔmavɔ nɔ ɖɔ hwɛ xá gbɛtɔ́ lɛ́ɛ ɖó sɛ́nxwi jí.” Nǔ e ɖo jǐxwé é bǐ ní j'awǎ, nú xomɛ ní hun mi mɛ e ɖo ayǐkúngban ɔ́ jí lɛ́ɛ bǐ, xu kpó nǔ e ɖ'é mɛ lɛ́ɛ bǐ kpó ní xo zǐn. Fí e nyí gběgbó é kpó nǔ e ɖ'é mɛ lɛ́ɛ kpó ní sú xó bó j'awǎ. Atín e ɖo zungbó mɛ lɛ́ɛ ní kpa awǒbóbó ɖo Mawu Mavɔmavɔ nukɔn, ɖó é jǎwe; é ja, bó ná ɖɔ hwɛ xá gbɛ ɔ́. É ná ɖɔ hwɛ xá gbɛ ɔ́ kpó hwɛjijɔ kpó. É ná xwedó nǔgbó dó ɖɔ hwɛ xá togun lɛ́ɛ. Mawu Mavɔmavɔ wɛ nyí axɔ́sú, gbɛ ɔ́ bǐ ní j'awǎ; xomɛ ní hun tɔtɛ́ntinto wɔ̌buwɔ́bú lɛ́ɛ. Akpɔ́kpɔ́ wiwi lɛ́ lɛ̌ dó e. Hwɛjijɔ kpó nǔ wa ɖó sɛ́nxwi jí kpó jí wɛ axɔ́súzinkpo tɔn jínjɔ́n. Myɔ ɖo yiyi wɛ ɖo nukɔn tɔn, bó nɔ́ ɖo kɛntɔ́ tɔn lɛ́ɛ fyɔ́ lɛ́ lɛ̌ dó e wɛ. É nɔ́ kɛ wun jǐ ɖɔhun, bó nɔ́ hɔ́n dó gbɛ ɔ́ bǐ jí, bɔ ayǐkúngban nɔ mɔ bó nɔ sísɔ́. Só lɛ́ɛ nɔ́ sínsín aɖuwa ɖɔhun ɖo Mawu Mavɔmavɔ nukɔn, ɖo Aklúnɔ ayǐkúngban ɔ́ tɔn nukɔn. Jǐxwé nɔ́ ɖe nǔjlɔ́jlɔ́wiwa tɔn xlɛ́, bɔ togun lɛ́ɛ bǐ nɔ́ mɔ lě e é xɔ susu sɔ é. Yě mɛ e nɔ ɖo bǒcyɔ sɛn wɛ lɛ́ɛ bǐ wɛ ná ɖu winnyá; yě mɛ e nǔ ma nyí nǔɖé sinsɛn nyí nǔgɛ́n bɔ yě wa lɛ́ɛ bǐ wɛ ná ɖu winnyá, ɖó nǔmɛsɛn lɛ́ɛ bǐ wɛ nɔ yi do ɖo Mawu Mavɔmavɔ nukɔn. Mawu Mavɔmavɔ, Sinyɔ́ɔ toxo ɔ́ se nǔ e a wa é, bɔ xomɛ hun i; Judáa gletoxo lɛ́ɛ ɖo awǎ jɛ wɛ, ɖó lě e a gbo hwɛ gbɔn é wú. Đó hwɛ Mawu Mavɔmavɔ ɔ́, hwi wɛ nyí Mawu Ajalɔ̌nlɔn ɖo ayǐkúngban ɔ́ jí; a hǔ gǎn nǔmɛsɛn lɛ́ɛ bɔ é vɛ́ jlɛ́. Mi mɛ e yí wǎn nú Mawu Mavɔmavɔ lɛ́ɛ e mi, mi gbɛ́ wǎn nú nǔ nyanya. Mawu Mavɔmavɔ nɔ nya xɛ ɖo mɛ e ɖo gbejí n'i lɛ́ɛ jí; é nɔ́ hwlɛ́n yě gán sín mɛdídá fɛn mɛ. Wěziza ɖo te nú mɛ e nɔ wa nǔ jlɔ́jlɔ́ lɛ́ɛ, mɛ e sín ayi ɖo wɛn lɛ́ɛ tɔn wɛ nyí awǎjijɛ. Mi mɛ e nɔ wa nǔ jlɔ́jlɔ́ lɛ́ɛ e mi, mi j'awǎ ɖo Mawu Mavɔmavɔ mɛ. Mi sɔ́ han dó kpa lě e Mawu Mavɔmavɔ mɛ́ gbɔn é. Ɖɛhan. Mi ji han yɔ̌yɔ́ dó kpa Mawu Mavɔmavɔ, ɖó é jlɛ́ nǔ ɖaxó ɖaxó. É sɔ́ nǔwúkpíkpé tɔn kpó hlɔ̌nhlɔ́n tɔn kpó dó ɖu ɖ'é jí. Mawu Mavɔmavɔ ɖe ɖuɖéjí tɔn xlɛ́, é ɖe lě e é nɔ wa nǔ ɖó sɛ́nxwi jí gbɔn é xlɛ́ akɔta lɛ́ɛ. É flín lě e é nyɔ́ xomɛ dó Izlayɛ́li togun ɔ́ wú gbɔn é, é flín lě e é ɖo gbejí nú Izlayɛ́li togun ɔ́ gbɔn é. Mɛ e ɖo ayǐkúngban ɔ́ jí káká yi fí e gbɛ ɔ́ kponu ɖó lɛ́ɛ bǐ mɔ ɖɔ Mawu mǐtɔn hwlɛ́n mǐ gán. Mi gbɛtɔ́ e ɖo ayǐkúngban ɔ́ jí lɛ́ɛ e mi, mi sú xó sɛ́ dó Mawu Mavɔmavɔ kpódó awǎjijɛ kpó, mi ɖe xomɛhunhun mitɔn xlɛ́, mi ɖɔ xó lómílómí dó mlá nyǐkɔ tɔn dó han mɛ. Mi ɖɔ xó lómílómí dó mlá nyǐkɔ tɔn bó xo kanhún d'é mɛ, mi sɔ́ kanhún dó ji han bo mlá Mawu Mavɔmavɔ. Mi kún kpete bó kún lanzo dó kpa Mawu Mavɔmavɔ; mi sú xó kpó awǎjijɛ kpó ɖo Mawu Mavɔmavɔ axɔ́sú ɔ́ nukɔn. Xu ní xo zǐn, nǔ e ɖo xu mɛ lɛ́ɛ bǐ ní xo zǐn, gbɛ ɔ́ kpó mɛ e ɖo gbɛ ɔ́ mɛ lɛ́ɛ kpó bǐ ní sú xó, tɔsisa lɛ́ɛ bǐ ní xo kpɛ́, só lɛ́ɛ bǐ ní sú xó zɛ̌nzɛ̌n kpó awǎjijɛ kpó, ɖo Mawu Mavɔmavɔ nukɔn, ɖó é jǎwe, bó ná wá ɖɔ hwɛ xá ayǐkúngban ɔ́; é ná ɖɔ hwɛ xá gbɛ ɔ́ ɖó sɛ́nxwi jí, bó ɖɔ hwɛ xá togun lɛ́ɛ lě e é sɔgbe gbɔn é. Mawu Mavɔmavɔ ɖo axɔ́sú ɖu wɛ: togun lɛ́ɛ nɔ́ sísɔ́. É jínjɔ́n ayǐ ɖo wɛnsagun susunɔ lɛ́ɛ jí: ayǐkúngban ɔ́ nɔ́ dán wǔ. Mawu Mavɔmavɔ ɔ́, nǔsúɖaxó wɛ é nyí ɖo Sinyɔ́ɔ, é hú gǎn togun lɛ́ɛ bǐ. Mawu Mavɔmavɔ, togun lɛ́ɛ bǐ ní kpa nyǐkɔ towe; a d'agba bó dó xɛsi. Mɛ mímɛ́ wɛ a nyǐ. È nǐ kpa hlɔ̌nhlɔ́n nú hwi axɔ́sú e yí wǎn nú hwɛjijɔ é. Hwi wɛ sɔ́ nǔ wa ɖó sɛ́nxwi jí jínjɔ́n ayǐ. Hwi wɛ nɔ wa nǔ ɖó sɛ́nxwi jí, bó nɔ́ xwedó hwɛjijɔ dó wa nǔ ɖo Izlayɛ́li. Mi kpa susu nú Mawu Mavɔmavɔ, Mawu mǐtɔn. Mi ɖe kɔ́ ɖo axɔ́súzinkpo ɔ́ nukɔn. Mɛ mímɛ́ wɛ é nyí. Mɔyízi kpó Aalɔ́ɔn kpó ɖo vɔ̌sánú-xwlémawutɔ́ tɔn lɛ́ɛ mɛ. Samuwɛ́li ɖo mɛ e nɔ xomlá nyǐkɔ tɔn lɛ́ɛ mɛ; mɛ énɛ́ lɛ́ɛ nɔ́ ylɔ́ Mawu Mavɔmavɔ bɔ é nɔ́ sɔ nú yě. É nɔ́ ɖɔ xó nú yě sín akpɔ́kpɔ́ e nɔ ɖo mlǐmlí wɛ é mɛ. Yě nɔ́ bló nǔ e é zɔ́n yě lɛ́ɛ, bó nɔ́ nyi sɛ́n e é ná yě lɛ́ɛ. Mawu Mavɔmavɔ, Mawu mǐtɔn, a nɔ se ɖɛ yětɔn. Mawu e nɔ́ sɔ́ hwɛ kɛ mɛ é wɛ a nyǐ nú yě, có hwɛ e yě hu lɛ́ɛ ɔ́, a nɔ dɔn tó tɔn nú yě. Mi kpa susu nú Mawu Mavɔmavɔ, Mawu mǐtɔn, mi ɖe kɔ́ ɖo só mímɛ́ tɔn jí, ɖó Mawu Mavɔmavɔ, Mawu mǐtɔn ɔ́, mɛ mímɛ́ wɛ é nyí. Kú dó nú Mawu Mavɔmavɔ sín han. Gbɛtɔ́ e ɖo gbɛ ɔ́ mɛ lɛ́ɛ e mi, mi kpa awǒbóbó nú Mawu Mavɔmavɔ. Mi sɛn Mawu Mavɔmavɔ kpó xomɛhunhun kpó. Mi wá gɔ̌n tɔn kpó awǎjijɛ kpó. Mi ní tunwun ɖɔ Mawu Mavɔmavɔ, Mawu ɖokpónɔ wɛ è ɖǒ ná sɛn, é wɛ bló mǐ, bɔ mǐ nyí étɔn; togun tɔn wɛ mǐ nyǐ, é wɛ nyí lɛ̌ngbɔ́nyitɔ́ mǐtɔn. Mi byɔ́ xwé tɔn gbe kpó kúdónúmɛ sín han kpó. Mi yi kɔ́xo tɔn lɛ́ɛ ta kpó han kpó. Mi sɔ́ ɛ su, mi kpa susu nú nyǐkɔ tɔn. Ɖó Mawu Mavɔmavɔ nyɔ́, xomɛnyínyɔ́ tɔn nɔ vɔ gbeɖé ǎ, gbejíninɔ tɔn ɖo te káká sɔ́yi. Davídi sín han. Xó e un jló ná nɔ́ ɖɔ dó han mɛ é ɖíe: un ná nɔ́ ɖɔ xó dó xomɛnyínyɔ́ kpó nǔ wa ɖó sɛ́nxwi jí kpó wú. Mawu Mavɔmavɔ, hwi ná ɖɔ xó lómílómí dó mlá dó han mɛ wɛ un ɖe. Un jló ná ɖó walɔ e wú è ma nɔ mɔ nǔɖé ɖɔ dó ǎ é. Hwetɛ́nu a ka ná wá gɔ̌n ce? Un ná sɔ́ ayi mímɛ́ dó wa nǔ ɖo xwé ce gbe. Un jló ná ɖó alɔ ɖo nǔ e má nyɔ́ ǎ é ɖě mɛ gbeɖé ǎ. Un gbɛ́ wǎn nú walɔ gbɛtɔ́ e má nɔ́ nɔ gbejí nú Mawu ǎ lɛ́ɛ tɔn. Nǔ mɔ̌hunkɔ ɖě ná va dó wǔ ce gbeɖé ǎ. Ayixa nyanya ní nɔ zɔ nú mì, nyi kpó nǔ nyanya kpó ná kpé nǔɖé gbeɖé ǎ. Mɛ e nɔ ɖɔ nɔzo tɔn nú ɖo nǔglɔ́ ɔ́, un nǎ xwe nu tɔn dó xɔ. Mɛ e nɔ mɔ ɖɔ émí jɛ́n tíin, bó nɔ́ ɖo éɖée mɔ wɛ ɔ́, nyi kpó é kpó ná vɛ́ ǎ. Un ná cyán mɛ e ɖo gbejí ɖo to ɔ́ mɛ lɛ́ɛ, bónú yě ná nyí gǎn hɔn-yitɔ́ ce. Mɛ e ɖó walɔ e wú è ma nɔ mɔ nǔɖé ɖɔ dó ǎ lɛ́ɛ wɛ ná wa azɔ̌ xá mì. Mɛ e nɔ hízí nǔ ɖu é ná nɔ xwé ce gbe ǎ. Mɛ e nɔ ɖó adingban é ná sixú nɔ te nukɔn ce ǎ. Zǎnzǎn tɛgbɛ ɔ́, nǎ nɔ́ sú mɛdídá e ɖo to ɔ́ mɛ lɛ́ɛ sín kún dó, bó ná dó ɖe mɛ e nɔ wa nǔ nyanya lɛ́ɛ bǐ sín Mawu Mavɔmavɔ sín toxo ɔ́ mɛ. Adǎn ɖo nya ɖé gbó wɛ bɔ é dán ɖě wa gbɔn, bó ɖɔ nǔ e ɖo gbigbo e wɛ é nú Mawu Mavɔmavɔ. Mawu Mavɔmavɔ, ɖǒtó ɖɛ ce, xó e sú wɛ un ɖe ɔ́ ní hun káká wá gɔ̌n towe. Gbe e gbe adǎn ná gbo mì ɔ́, ma sɔ́ hwiɖée hwlá dó mì ó. Un sú xó ylɔ́ we hǔn, ɖǒtó mì. Se ɖɛ ce, ma lín ó! Đó gbɛzán ce ɖo kinkɛn wɛ azizɔ ɖɔhun, bɔ xú ce lɛ́ɛ ɖo jiji wɛ myɔtín ɖɔhun. Ayi e ɖo xo ce mɛ é sɔ́ ɖó gǎn ɖé ǎ gběhan e è xo ɔ́ ɖɔhun, un sɔ́ nɔ́ flín nǔɖuɖu lɔ bo nɔ ɖu ǎ. Un ɖo azɔn wɛn wɛ káká bó wá kpo xú kɛ́ɖɛ́, un cí gbětótló mɛ xɛ ɖɔhun, un cí kwlele e ɖo xwé gbigba gbe é ɖɔhun. Un sɔ́ nɔ́ dɔ́ amlɔ ǎ, un cí xɛ goɖokpónɔ ɖé ɖɔhun ɖo xɔ ta. Ayǐ hɔ́n tɛgbɛ ɔ́, kɛntɔ́ ce lɛ́ɛ nɔ́ ɖo zunzun mì wɛ, yě nɔ́ ɖo cícá mì ko wɛ; yě ja nu dó mɛɖé gbé ɔ́, yě nɔ́ ɖɔ nú mɛ ɔ́ ɖɔ nǔ e wa mì ɔ́ ní wa mɛ ɔ́. Afín wɛ un nɔ ɖu ɖó nǔɖuɖu do mɛ, un ná nu nǔɖé ɔ́, ɖasin ce nɔ hán ɖ'é mɛ ǎ; a sɔ́ mì nyi dó gbě, ɖó a ɖo xomɛsin jí, bó ɖo adǎn jɛ wɛ. Gbɛzán ce ɖo wǐwá yi wɛ gbada yɛ ɖɔhun, un ɖo xúxú wɛ gběhan ɖɔhun. Amɔ̌, hwɛ Mawu Mavɔmavɔ ɔ́, a ɖo axɔ́sú ɖu wɛ káká sɔ́yi; gbɛtɔ́ e kó jɔ wá gbɛ ɔ́ mɛ ɔ́ bǐ wɛ tunwun we, mɛ e ná wá jɔ sɔ lɛ́ɛ lɔ ná tunwun we. A nǎ sí te bó kú nǔbláwǔ nú Sinyɔ́ɔ, ɖó hwenu e a ɖǒ, bɔ nǔ tɔn ná blá wǔ nú we é su. Mɛsɛntɔ́ towe lɛ́ɛ yí wǎn nú awǐnnya Sinyɔ́ɔ tɔn lɛ́ɛ. Sinyɔ́ɔ ɔ́ bǐ wɛ gba hánnyá có yě nɔ́ kpo ɖo wǎn yí ná wɛ. Énɛ́ ɔ́, akɔta lɛ́ɛ bǐ ná ɖó sísí nú nyǐkɔ Mawu Mavɔmavɔ tɔn, bɔ axɔ́sú e ɖo ayǐkúngban ɔ́ jí lɛ́ɛ bǐ ná ɖó sísí nú Mawu Mavɔmavɔ sín susu, hwenu e Mawu Mavɔmavɔ ná lɛ́ vɔ́ Sinyɔ́ɔ to ɔ́ bló ɖó, bó ná ɖe éɖée xlɛ́ gbɔn susu tɔn mɛ é, hwenu e é ná nɔ́ ɖótó lelenɔ lɛ́ɛ sín ɖɛ, bó ma sɔ́ ná gbɛ́ ɖɛ yětɔn se ɖě ǎ é. È nǐ wlán nǔ élɔ́ lɛ́ɛ dó wěma mɛ ɖ'ayǐ nú vǐ tɔn e ná wá jɔ sɔ lɛ́ɛ é, bónú togun e ná lɛ́ vɔ́ ɖ'ayǐ wɛ è ɖe é ná sɔ́ Mawu Mavɔmavɔ su: jǐ aga wɛ Mawu Mavɔmavɔ ɖe bó nɔ́ kpɔ́n nǔ sɛ́ dó. Mawu Mavɔmavɔ nɔ́ nɔ jǐ aga dɔ̌n, bó nɔ́ kpɔ́n ayǐkúngban ɔ́ jí sɛ́ dó, bó nɔ́ se azɔn e wɛn wɛ mɛ e ɖo gan mɛ lɛ́ɛ ɖe é, bó nɔ́ hwlɛ́n mɛ e ɖo nǎ kú wɛ lɛ́ɛ gán. Énɛ́ ɔ́, yě ná jlá Mawu Mavɔmavɔ nyíkɔ ɖo Sinyɔ́ɔ; yě ná nɔ́ mlá ɛ ɖo Jeluzalɛ́mu, hwenu e togun lɛ́ɛ bǐ ná kplé ɖo fínɛ́, bɔ axɔ́súɖuto lɛ́ɛ bǐ ná kplé bó ná sɛn Mawu Mavɔmavɔ é. Mawu ɖe hlɔ̌nhlɔ́n ce kpo ɖo alixo, é ɖe gbɛzán ce kpo. Un ɖɔ nú we ɖɔ: “Mawu ce, ma lɔn nú un wɛ́n kú ó, hwi mɛ e ɖo gbɛ káká sɔ́yi é.” Hwi wɛ ɖó ayǐkúngban ɔ́ ayǐ sín do, bɔ jǐxwé ɔ́ nyí alɔ towe núwiwa. Nǔ nɛ́ lɛ́ɛ bǐ ná vɔ, hwɛ ka ná ɖe tɛgbɛ. Bǐ wɛ ná gbi avɔ ɖɔhun; a nǎ ɖyɔ́ bǐ awu ɖɔhun, bɔ yě bǐ nǎ vɔ. Lo ɔ́, mɛ e a nyǐ ɔ́ jɛ́n a nyǐ tɛgbɛ; gbɛ towe ná vɔ gbeɖé ǎ. Mɛsɛntɔ́ towe lɛ́ɛ sín vǐ lɛ́ɛ ná ɖó nɔtɛn, vǐ yětɔn lɛ́ɛ ná nɔ nukɔn towe. Davídi sín han. Lǐndɔ̌n ce ní kpa susu nú Mawu Mavɔmavɔ; nǔ e ɖo wǔ ce é bǐ ní sɔ́ nyǐkɔ mímɛ́ tɔn su. Lǐndɔ̌n ce ní kpa susu nú Mawu Mavɔmavɔ. Ní ma wɔn ɖagbe e é wa lɛ́ɛ kwín ɖokpó ó. Mawu Mavɔmavɔ wɛ nɔ́ sɔ́ hwɛ e un hu lɛ́ɛ bǐ kɛ mì. É wɛ nɔ́ gbɔ azɔn ce lɛ́ɛ bǐ nú mì. É wɛ nɔ́ hwlɛ́n mì gán ɖo kú sí, é nɔ́ nyɔ́ xomɛ dó wǔ ce ɖésú; é nɔ́ kú nǔbláwǔ nú mì tawun. É bló bɔ nǔ nyɔ́ nú mì sín zǎnzǎn bó ná nyɔ́ nú mì káká yi gbada; é nɔ́ sɔ́ mì dó húzú mɛ wínnyáwínnyá, bɔ un nɔ ɖo wǐnnyáwínnyá mɛ gangan ɖɔhun. Mawu Mavɔmavɔ ɔ́, hwɛ jlɔ́jlɔ́ wɛ é nɔ́ ɖɔ, é wɛ nɔ́ gbo hwɛ nú mɛ e blɛ́ ɖu wɛ è ɖe lɛ́ɛ bǐ. É ɖe tito tɔn lɛ́ɛ xlɛ́ Mɔyízi, é ɖe nǔ ɖaxó ɖaxó e é bló lɛ́ɛ xlɛ́ Izlayɛ́li ví lɛ́ɛ. Mawu Mavɔmavɔ ɔ́, xomɛfátɔ́ wɛ, nǔbláwǔkúnúmɛtɔ́ wɛ; é nɔ́ yá wǔ sin xomɛ ǎ, é nyɔ́ xomɛ ɖésú. É nɔ́ dó hwɛ mɛ káká sɔ́yi ǎ, É nɔ́ nɔ xomɛsin jí káká sɔ́yi ǎ, É nɔ́ kpɔ́n dó hwɛ e mǐ hu é wú, bó nɔ́ wa nǔ tɔn xá mǐ ǎ. É nɔ́ sɔ́ nǔ e mǐ wa nyi do é sín bǎ dó xo mǐ ǎ. Lě do jǐnukúnsin yi jǐ sɔ ɔ́, mɔ̌ do wɛ xomɛ e Mawu Mavɔmavɔ nyɔ́ dó mɛ e nɔ ɖó sísí n'i lɛ́ɛ wú é yi jǐ sɔ é nɛ́. Lě do gbadahwe jí lín dó zǎnzǎnhwe jí sɔ ɔ́, mɔ̌ do wɛ Mawu Mavɔmavɔ nɔ́ sɛ nǔwanyido mǐtɔn lɛ́ɛ dó zɔ nú mǐ sɔ. Mawu Mavɔmavɔ nɔ ɖe wǎn yíyí xlɛ́ mɛ e nɔ ɖó sísí n'i lɛ́ɛ é, lě e tɔ́ nɔ́ ɖe wǎn yíyí xlɛ́ vǐ gbɔn é. É tunwun nǔ e é dó bló mǐ é; É tunwun ɖɔ kɔ́gúdu kpowun wɛ mǐ nyǐ; é wɔn ǎ. Gbɛtɔ́ a! É nɔ́ dɔ́ ji ɖé ǎ, a nǎ ɖɔ gběhan wɛ, É nɔ́ jɛ sɛ́ gba jí. Jɔhɔn ɖé ká nɔ́ wá nyi bɔ é nɔ́ xú; è sɔ́ nɔ́ mɔ ɛ ǎ, è sɔ́ nɔ́ tunwun fí e é nɔ lɔ é ǎ. Amɔ̌, xomɛnyínyɔ́ Mawu Mavɔmavɔ tɔn ɔ́, é ɖe nú mɛ e nɔ ɖó sísí n'i lɛ́ɛ tɛgbɛ, bɔ gbejíninɔ tɔn nɔ́ hun káká yi vǐ yětɔn ví lɛ́ɛ jí. Nú yě ɖó sísí nú nǔ e ɖo akɔ e yě jɛ xá Mawu Mavɔmavɔ é mɛ, bó tunwun ɖɔ émí ná bló nǔ e é byɔ́ émí lɛ́ɛ ɔ́, xomɛnyínyɔ́ tɔn nɔ́ nɔ yě jí. Mawu Mavɔmavɔ sɔ́ axɔ́súzinkpo tɔn ɖó jǐnukúnsin; axɔ́súɖuɖu tɔn hú gǎn nǔ bǐ. Wɛnsagun lɛ́ɛ e mi, mi kpa susu nú Mawu Mavɔmavɔ! Mi mɛ e nɔ zé hlɔ̌nhlɔ́n mitɔn dó bló nǔ e é zɔ́n mi lɛ́ɛ, bó nɔ́ dó ɖe xlɛ́ ɖɔ émí se tónú n'i lɛ́ɛ mi, mi kpa susu n'i. Mi kpa susu nú Mawu Mavɔmavɔ, mi ahwangɔnu tɔn lɛ́ɛ. Mi mɛ e nyí mɛsɛntɔ́ tɔn bó nɔ́ wa jlǒ tɔn lɛ́ɛ bǐ ní kpa susu n'i. Mi nǔɖíɖó Mawu Mavɔmavɔ tɔn lɛ́ɛ e mi, mi kpa susu n'i gbɔn fí e é kpa acɛ gbɔn lɛ́ɛ bǐ. Lǐndɔ̌n ce ní kpa susu nú Mawu Mavɔmavɔ. Lǐndɔ̌n ce ní kpa susu nú Mawu Mavɔmavɔ. Mawu Mavɔmavɔ, Mawu ce, a dǒ agba bɔ é vɛ́ jlɛ́; nǔsacɔ́ kpó nǔjíwǔ kpó wɛ nyí awu e a dǒ é. A sɔ́ wěziza dó awu ɖaxó ɖé ɖɔhun, a vlɔ̌n jǐxwé avɔgoxɔ ɖɔhun. Sin e ɖo jǐxwé lɛ́ɛ jí wɛ a sɔ́ nɔtɛn towe ɖó, akpɔ́kpɔ́ lɛ́ɛ wɛ nyí ahwanhún towe, jɔhɔn mɛ wɛ a nɔ gbɔn. Jɔhɔn wɛ nyí wɛnsagun towe, bɔ myɔ ka nyí mɛsɛntɔ́ towe. A ɖǒ ayǐkúngban ɔ́ ɖó dodó tɔn jí, bɔ é ná dán wǔ gbeɖé ǎ. A sɔ́ xu bo cyɔ́n n'i avɔ ɖɔhun, sin ɔ́ nɔ́ hun káká yi só lɛ́ɛ sín nuvínu. A ka wa adǎn dó sin kpowun ɔ́, é nɔ́ hɔn. Jǐ towe dó gbe lě kpowun ɔ́, sin ɔ́ nɔ bɔ wezun nyi do, bó nɔ́ gbɔn só ta só ta, tɔdomɛ tɔdomɛ, káká yi fí e a ɖǒ tɛn n'i ɖó é. A ɖǒ dogbó nú sin ɔ́, bɔ é sixú dó asá ǎ, a ɖǒ dogbó nú sin bónú é má sɔ́ wá gba kpé ayǐkúngban jí ɖě ó. Hwi wɛ nɔ xlɛ́ ali sin e nɔ tɔ́n sín tɔjɔtɛn lɛ́ɛ mɛ é; é nɔ́ sa gbɔn sókan mɛ sókan mɛ. Gběkanlin lɛ́ɛ bǐ nɔ́ wá nu, tócí gbě tɔn lɛ́ɛ nɔ́ wá fá kɔ. Xɛ lɛ́ɛ nɔ́ xo adɔ̌ gbɔn tɔ tó tɔ tó, yě nɔ́ ɖo han ji wɛ gbɔn atínma mɛ atínma mɛ. A nɔ nɔ jǐxwé bó nɔ́ sɛ́ jǐ dó, bɔ é nɔ́ ja dó só lɛ́ɛ jí, nǔ ɖagbe ɖagbe e a sɔ́ alɔ towe dó bló lɛ́ɛ kpé ayǐkúngban ɔ́ jí. A nɔ ná gbe bɔ gběhan nɔ́ wú, bɔ kanlin lɛ́ɛ nɔ́ ɖu; mɔ̌ ɖokpó ɔ́, jinukún e gbɛtɔ́ lɛ́ɛ nɔ́ dó lɛ́ɛ nɔ́ wú; énɛ́ ɔ́, ayǐkúngban ɔ́ nɔ́ ná nǔ e è nǎ ɖu é: é nɔ́ ná vɛ̌ɛn e nɔ dó wǔyá lanmɛ nú mɛ é, é nɔ́ ná ami e nɔ zɔ́n bɔ nukún mɛ nɔ́ kɔ́n é, é nɔ́ ná nǔɖuɖu e nɔ́ ná hlɔ̌nhlɔ́n mɛ é. Atín ɖaxó ɖaxó lɛ́ɛ ɔ́, sin nɔ kpé yě, sɛ́dlutín Libáan tɔn e a tun lɛ́ɛ ɔ́, sin nɔ kpé yě. Atín énɛ́ lɛ́ɛ jí wɛ xɛ lɛ́ɛ nɔ́ xo adɔ̌ ɖó, bɔ aɖɔwé lɛ́ɛ nɔ́ wa adɔ̌ nyi siplɛ́tín lɛ́ɛ jí. Só ɖaxó ɖaxó lɛ́ɛ jí wɛ sógbɔ́ lɛ́ɛ nɔ́ nɔ, bɔ agidigbǎnwún lɛ́ɛ nɔ́ nɔ sókan mɛ. A blǒ sun bɔ è nǎ nɔ́ dó tunwun hwenu lɛ́ɛ, a blǒ hwe bɔ é tunwun hwenu e é ná nɔ yi xɔ dó é. A nɔ sɛ́ ablu dó bɔ zǎn nɔ́ kú, bɔ kanlin e ɖo zun mɛ lɛ́ɛ nɔ́ jɛ dǐndán kpé jí. Kinnikínní ví lɛ́ɛ nɔ́ jɛ lan lɛ́ɛ gúdo bó nɔ́ dó gbe, yě nɔ́ byɔ́ we nǔɖuɖu e a nɔ ná yě é. Hwe ka tɔ́n ɔ́, yě nɔ́ yi xɔ. Hwe énɛ́ nu wɛ gbɛtɔ́ ka nɔ́ tɔ́n, bó nɔ́ ɖidó nǔɖé wa gbé, bó nɔ́ yi wa azɔ̌ káká jɛ gbadanu. Mawu Mavɔmavɔ, nǔɖíɖó towe lɛ́ɛ sukpɔ́ lóóo! A blǒ nǔ énɛ́ bǐ kpó nǔnywɛ́ kpó. Nǔ e a blǒ lɛ́ɛ wɛ gɔ́ ayǐkúngban ɔ́ jí. Kpɔ́n xu, é ɖo faɖaɖa xweyǐgbe, kanlin kpɛví ɖ'é mɛ, kanlin ɖaxó ɖ'é mɛ, è sixú xa yě lɔ ǎ. Tɔjíhún ɖaxó ɖaxó lɛ́ɛ ɖ'é jí, nǔdábaɖa Levyatáan lɔ ɖ'é mɛ, a blǒ e bó ná dó da ayihún ná. Kanlin lɛ́ɛ bǐ wɛ nɔ́ ɖó nukún we, bónú a nǎ ná nǔɖuɖu yě hwenu e xovɛ́ ná sin yě é, a nɔ ná nǔɖuɖu yě bɔ yě nɔ́ yí, a nɔ hun alɔ bó nɔ ná nǔɖuɖu yě, bɔ yě nɔ́ ɖu nǔ gɔ́ xo. A sɔ́ hwiɖée hwlá dó yě ɔ́, xɛsi nɔ jɛ yě jí. A yǐ funfún sín yě sí ɔ́, yě nɔ́ bɔnu, yě nɔ́ lɛ́ húzú kɔ́gúdu. A ka lɛ́ sɛ́ funfún towe dó yě ɔ́, yě nɔ́ lɛ́ wá gbɛ, bɔ gbɛ yɔ̌yɔ́ ɖěvo nɔ lɛ́ bɛ́ ɖo ayǐkúngban ɔ́ jí. Mawu Mavɔmavɔ sín susu ní nɔ te káká sɔ́yi. Xomɛ ní hun i dó nǔ e é bló lɛ́ɛ wú. Mawu Mavɔmavɔ nɔ kpɔ́n ayǐkúngban ɔ́ bɔ é nɔ́ dán wǔ, é nɔ́ ɖó alɔ só lɛ́ɛ wú bɔ yě nɔ́ jɛ azɔ si jí. Nú ta ce ɖo gbɛ jɛ́n wɛ ɔ́, un ná nɔ́ kpa Mawu Mavɔmavɔ; nú un ko sixú nɔ́ fɔ́n ɔ́, un ná nɔ́ ɖɔ xó lómílómí dó mlá Mawu ce dó han mɛ. Xó lómílómí e ɖɔ wɛ un ɖe lɛ́ɛ ní nyɔ́ se n'i. Un jló ná j'awǎ ɖo Mawu Mavɔmavɔ mɛ. Hwɛhutɔ́ sín kún ní vɔ sín ayǐkúngban ɔ́ jí, bónú mɛdídá ɖě má sɔ́ ɖe ó. Lǐndɔ̌n ce, kpa susu nú Mawu Mavɔmavɔ! Mi kpa Mawu Mavɔmavɔ! Mi kpa Mawu Mavɔmavɔ, mi sú xó bó ɖɔ é wɛ nyí Mawu. Mi jlá nǔ ɖaxó ɖaxó e é bló lɛ́ɛ nú togun lɛ́ɛ. Mi ji han, mi ɖɔ xó lómílómí dó kpa susu n'i, mi ɖɔ nǔ ɖagbe ɖagbe e é bló lɛ́ɛ bǐ. Mi sɔ́ nyǐkɔ mímɛ́ tɔn dó xɔ susu. Mɛ e ɖo Mawu Mavɔmavɔ ba wɛ lɛ́ɛ ní j'awǎ. Mi hɔn yi su Mawu Mavɔmavɔ; Mawu Mavɔmavɔ ɖó hlɔ̌nhlɔ́n. Mi nɔ ba ná nɔ kpɔ́ xá ɛ hwebǐnu. Mi flín nǔjíwǔ e é bló lɛ́ɛ, mi flín nǔ e é jlɛ́ lɛ́ɛ kpó hwɛ e é ɖɔ lɛ́ɛ kpó. Mɛsɛntɔ́ tɔn Ablaxámu ví lɛ́ɛ mi, Jakɔ́bu ví e Mawu Mavɔmavɔ cyán lɛ́ɛ mi, mi flín nǔ énɛ́ lɛ́ɛ e é wa lɛ́ɛ. Mawu Mavɔmavɔ wɛ nyí Mawu mǐtɔn. É wɛ nɔ́ ɖɔ hwɛ dó nǔ e ɖo ayǐkúngban jí lɛ́ɛ bǐ. Akɔ e é jɛ xá togun tɔn ɔ́, é nɔ́ flín tɛgbɛ, mi nɔ́ flín akpá e é dó é káká nú jijimɛ afatɔ́n (1.000). Mi flín akɔ e é jɛ xá Ablaxámu é, mi flín akpá e é dó nú Izáki é. É lɛ́ vɔ́ tɛ ɖɛ̌ jí nú Jakɔ́bu, é wɛ nyí akɔ mavɔ mavɔ e é jɛ xá Izlayɛ́li é. Akɔ e é jɛ xá Izlayɛ́li bó ɖɔ n'i ɖɔ: “Un na ná Kanáa to ɔ́ we, bɔ é ná nyí towe, nǔ e un ná hwi kpó vǐ towe lɛ́ɛ kpó ɔ́ nɛ́.” Hwenɛ́nu ɔ́, yě ká sukpɔ́ ǎ. Yě sukpɔ́ ɖěbǔ ǎ, yě nyí jǒnɔ ɖo to ɔ́ mɛ, yě gosín akɔta ɖě mɛ ɔ́, yě nɔ́ yi ɖěvo mɛ, yě gosín axɔ́súɖuto ɖě mɛ ɔ́, yě nɔ́ yi ɖěvo mɛ. Mawu ka lɔn nú mɛɖé táfú yě ǎ, é dɔn tó nú axɔ́sú lɛ́ɛ ɖó yě wú, bó ɖɔ nú yě ɖɔ: “Mi ma ɖó alɔ mɛ e un cyán lɛ́ɛ wú ó. Mi ma wa nǔ nyanya xá gbeyíɖɔ ce lɛ́ɛ ó.” É sɛ́ adɔ dó to ɔ́ mɛ, é sú lě e yě ná wa gbɔn bó nɔ gbɛ ɔ́ bǐ sín ali dó yě. É sɛ́ mɛ ɖokpó dó yě: Jozɛ́fu wɛ nyí mɛ e é sɛ́ dó é, è ka wa sa kannumɔ tɔn. È dǒ gɛdɛ ɛ, è dǒ kan kɔ n'i, káká jɛ hwenu e xó e é se ɖo Mawu Mavɔmavɔ nu é ná ɖe mɛ alɔkpa e é nyí é xlɛ́ é. Axɔ́sú ɔ́ ná gbe bɔ è tún i; mɛ e kpa acɛ ɖo to ɔ́ mɛ ɔ́ ná gbe bɔ è ɖe e nyi te. É sɔ́ ɛ gǎn ɖó to tɔn nu, é sɔ́ ɛ ɖó dɔkun tɔn lɛ́ɛ nu, bónú é ná sixú nɔ gǎn hɔn-yitɔ́ tɔn lɛ́ɛ nu, bó ná nǔnywɛ́ tomɛxó lɛ́ɛ. Énɛ́ ɔ́ gúdo ɔ́, Izlayɛ́li wá cí Ejípu, Jakɔ́bu nyí jǒnɔ ɖo Cámu. Mawu bló bɔ togun tɔn gba kún, bó syɛ́n hú kɛntɔ́ tɔn lɛ́ɛ. Mawu húzú kɛntɔ́ lɛ́ɛ sín ayixa káká bɔ yě gbɛ́ wǎn nú togun tɔn, bó nɔ́ wa alǎnnú xá yě. Énɛ́ ɔ́ wú ɔ́, é sɛ́ mɛsɛntɔ́ tɔn Mɔyízi dó, é kpódó Aalɔ́ɔn e é sɔ́ ɔ́ kpó. Mɔyízi kpódó Aalɔ́ɔn kpó jlɛ́ nǔjíwǔ tɛnmɛ tɛnmɛ ɖo Ejípu togun ɔ́ mɛ, ɖo Mawu sín nyǐkɔ mɛ; yě jlɛ́ nǔ tɛnmɛ tɛnmɛ ɖo Cámu. Mawu dɔn zǐnflú wá, bɔ to ɔ́ byɔ́ ablu gɔngɔn mɛ; mɛɖé ká gbɛ́ xó tɔn ǎ. É sɔ́ sin yětɔn dó húzú kanjɔ, bó hu hweví e ɖo tɔ yětɔn mɛ lɛ́ɛ. Běsé gɔ́ to ɔ́ mɛ káká bó kpé axɔ́sú ɔ́ xwé. É ná gbe kpowun bɔ asɔfin ɖé lɛ́ɛ wá, bɔ jɔ̌ kpé to yětɔn mɛ bǐ. É sɛ́ kɛ́njí dó yě ɖó jǐ tɛn mɛ, é sɛ́ myɔ dó to yětɔn mɛ. É hɛn vǐwungbo yětɔn lɛ́ɛ kpó fígigbo yětɔn lɛ́ɛ kpó gblé, é hu atín e ɖo to yětɔn mɛ lɛ́ɛ. É ná gbe kpowun bɔ wɛn tɔ́n, wɛn ɖo kpɔ́ gěgé; wɛn ɖu gběhan e ɖo to ɔ́ mɛ lɛ́ɛ bǐ, wɛn ɖu nǔ e ɖo gle yětɔn jí lɛ́ɛ bǐ. Mawu hu nukɔn ví e ɖo to yětɔn mɛ lɛ́ɛ bǐ, bɔ nǔ nukɔn tɔn e yě sɔ́ hlɔ̌nhlɔ́n yětɔn dó wa lɛ́ɛ bǐ kú. É ɖe togun tɔn tɔ́n; kpatágan kpó siká kpó sín agban wɛ yě dǒ bó tɔ́n; mɛ e ɖo akɔta tɔn lɛ́ɛ mɛ lɛ́ɛ ɖě nɔ gǔdo ǎ. Ée yě xweyǐgbe ɔ́, é víví nú Ejípunu lɛ́ɛ káká, ɖó yě ɖo xɛsi ɖi dó yě wú wɛ bɔ é vɛ́ jlɛ́. Mawu sɛ́ akpɔ́kpɔ́ dó bɔ é cyɔ́n yě, é sɛ́ myɔ dó yě bɔ yě nɔ́ dó mɔ nukúnnú zǎn mɛ. Yě byɔ́, bɔ é ná xɛ e è nɔ ylɔ́ ɖɔ káyi lɛ́ɛ yě; é nɔ́ sɛ́ wɔ̌xúxú dó yě sín jǐxwé, bɔ yě nɔ́ ɖu gɔ́ xo. É ɖe ali dó só mɛ nú yě bɔ sin nɔ tɔ́n sín mɛ, bó nɔ́ sa gbɔn axéko ɔ́ jí bǐ tɔ ɖɔhun. É flín akpá mímɛ́ e é dó é, akpá e é dó nú mɛsɛntɔ́ tɔn Ablaxámu é. É ɖe togun tɔn tɔ́n kpó awǎjijɛ kpó, é ɖe mɛ e é cyán lɛ́ɛ tɔ́n kpó awǒbóbó kpó. É sɔ́ akɔta lɛ́ɛ sín ayǐkúngban jó nú yě, bɔ nǔ e togun ɖěvo lɛ́ɛ wa lɛ́ɛ húzú yětɔn bónú yě ná hɛn sɛ́n tɔn lɛ́ɛ, bó ná bló nǔ e é ɖɔ lɛ́ɛ. Mi kpa Mawu Mavɔmavɔ! Mi kpa Mawu Mavɔmavɔ! Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi. Mɛ̌ ká sixú ɖɔ nǔ ɖaxó ɖaxó e Mawu Mavɔmavɔ bló lɛ́ɛ? Mɛ̌ ká sixú jlá susu e jɛ xá ɛ lɛ́ɛ gbɔn fí bǐ? Nǔ nyɔ́ nú mɛ e nɔ nyi Mawu Mavɔmavɔ sɛ́n ɔ́, bó nɔ́ wa nǔ dó sɛ́nxwi jí hwebǐnu lɛ́ɛ é. Mawu Mavɔmavɔ, hwenu e a nǎ wa ɖagbe nú togun towe ɔ́, flín mì; hwenu e a nǎ hwlɛ́n togun towe gán ɔ́, kpé nukún wǔ ce. Énɛ́ ɔ́, nyi lɔ ná mɔ ɖagbe e a nɔ wa nú mɛ e a sɔ́ ɖó vo lɛ́ɛ é, awǎ e jɛ wɛ togun towe ɖe ɔ́ ná dó xomɛhunhun nú mì, nyi lɔ ná gó togun e nyí towe é ɖɔhun. Mǐ hu hwɛ tɔ́gbó mǐtɔn lɛ́ɛ ɖɔhun, mǐ jɛ agɔ, mǐ wa nǔ nyi do. Tɔ́gbó mǐtɔn lɛ́ɛ ké ya nú nǔ e Mawu jlɛ́ ɖo Ejípu lɛ́ɛ é ǎ, yě sɔ́ flín xomɛ tobutóbú e é nyɔ́ dó yě wú é ǎ. Yě wǎ fɔ́n gǔ ɖo xutó, ɖo Xu Vɔvɔ ɔ́ tó. Lo ɔ́, é ka kpɔ́n dó nyǐkɔ tɔn wú bó hwlɛ́n yě gán, bó dó ɖe hlɔ̌nhlɔ́n tɔn xlɛ́. Mawu ɖe gbe dó Xu Vɔvɔ ɔ́ bɔ é mɛ, bɔ é kplá yě gbɔn xuzan jí, ayǐ xúxú jí gbɔn wɛ yě ɖe ɖɔhun. É hwlɛ́n yě gán ɖo mɛ e gbɛ́ wǎn nú yě ɔ́ sí, é yí yě sín kɛntɔ́ lɔ mɛ. Sin ɔ́ ɖi bú kɛntɔ́ yětɔn lɛ́ɛ; mɛ ɖěbǔ gán ɖ'é mɛ ǎ. Énɛ́ ɔ́, yě ɖi nǔ nú xó e Mawu ɖɔ é, bó ji han dó mlá ɛ. Tlóló jɛ́n yě ká lɛ́ wɔn nǔ e é bló lɛ́ɛ, yě sɔ́ nɔ te bɔ nǔ e é ɖɔ ɔ́ jɛ vɔ́vɔ́ ǎ. Nǔ jɛ yě jló jí ɖo gbětótló mɛ, bɔ yě jɛ Mawu tɛ́nkpɔ́n jí. Mawu ná nǔ e byɔ́ wɛ yě ɖe ɔ́ yě, bó ka sɛ́ azɔn dó yě bɔ yě jɛ gǒ xú jí. Yě jɛ wǔ hwan Mɔyízi wú jí ɖo fí e yě ɖó gɔnu ɖó ɔ́, yě jɛ wǔ hwan Aalɔ́ɔn mɛ e Mawu Mavɔmavɔ sɔ́ ɖó vo é wú jí, Énɛ́ ɔ́ wú ɔ́, ayǐkúngban kɛ nu bó mi Datáni, bó mi Abilámu sín ahwangbɛ́ lɛ́ɛ. Mɛdídá nɛ́ lɛ́ɛ bǐ ji zo, yě bǐ fyɔ́. Yě bló nyibúví ɖokpó ɖo Holɛ́bu só ɔ́ kɔn, yě jɛ akpajlɛ́ e è sínsín gan dó bló é sɛn jí. Mawu e nyí susu yětɔn ɔ́, yě sɔ́ nyibú dó ɖyɔ́ ɛ, nyibú amaɖukanlin ɖé kpowun dó ɖyɔ́ ɛ. Yě wɔn Mawu, Mɛhwlɛ́ngántɔ́ yětɔn ɔ́; Yě wɔn Mawu e bló nǔ ɖaxó tɛnmɛ tɛnmɛ ɖo Ejípu ɔ́. É jlɛ́ nǔ tɛnmɛ tɛnmɛ ɖo Cámu, é bló nǔjíwǔ alɔkpa alɔkpa ɖo Xu Vɔvɔ ɔ́ kɔn. É ɖe gbe ɖɔ è nǐ vívá kún yětɔn bǐ. Lo ɔ́, Mɔyízi e é sɔ́ ɔ́ sa vo n'i dó ta yětɔn mɛ, bó yí yě sín xomɛsin Mawu tɔn sí, bónú é má sú kún yětɔn dó ó. Yě hu tɛ́ nú to e mɛ gbɛ ɖe é, ɖó yě ɖi nǔ nú xó e Mawu Mavɔmavɔ ɖɔ ɔ́ ǎ. Yě nɔ́ húnhún nǔ ɖɔ ɖo goxɔ yětɔn lɛ́ɛ mɛ, yě bló nǔ e é ɖɔ é ɖě ɖ'é jí ǎ. Énɛ́ ɔ́ wú ɔ́, é wá sɔ́ alɔ dó jǐ, bó xwlé ɖɔ émí ná jó yě dó, bɔ yě bǐ ná kú ɖo gbětótló mɛ. É xwlé ɖɔ émí ná jó vǐ yětɔn lɛ́ɛ dó, émí ná gba yě dó gbɔn tomɛ tomɛ, bɔ yě ná kú jɛ gbě. Yě jɛ vodún Baalu sɛn jí ɖo Peɔ́ɔ, yě nɔ́ ɖu kanlin e è hu dó vodún lɛ́ɛ é sín lan; vodún énɛ́ lɛ́ɛ ɔ́, nǔ kúkú wɛ yě ká nyí. Nǔ e yě nɔ́ wa lɛ́ɛ dó xomɛsin nú Mawu; awě ɖokpó wá xo yě. Pínxási ka sí te bo ɖɔ xó ɔ́ gbo; énɛ́ ɔ́, awě e ɖo yě xo wɛ é nɔ te. Mawu mɔ Pínxási dó mɔ hwɛjijɔnɔ káká sɔ́yi, é nyí hwɛjijɔnɔ tɛgbɛ káká sɔ́yi. Yě dó xomɛsin nú Mawu ɖo Mɛliba sin ɔ́ kɔn, bɔ Mawu dɔn tó nú Mɔyízi ɖó yědɛɛ lɛ́ɛ wú, ɖó yě dó xomɛsin nú Mɔyízi bɔ é kɛ nu nyi do. Yě sɔ́ vívá kún nú togun lɛ́ɛ lě e Mawu Mavɔmavɔ zɔ́n gbɔn é ǎ. Yě dǒ xɔ́ntɔn akɔta énɛ́ lɛ́ɛ, yě jɛ walɔ yětɔn lɛ́ɛ xwedó jí. Yě jɛ vodún yětɔn lɛ́ɛ sɛn jí, bɔ énɛ́ ɔ́ nyí mɔ bɔ yě jɛ mɛ. Yě nɔ́ hu vǐ yětɔn súnnu kpó nyɔ̌nu kpó dó vodún. Yě kɔn xomɛvɔ́nɔ sín kanjɔ kɔn nyi ayǐ, yě kɔn vǐ yětɔn súnnu kpó nyɔ̌nu kpó sín kanjɔ kɔn nyi ayǐ, yě hu yě dó vodún Kanáa tɔn lɛ́ɛ, énɛ́ nyí su bɔ yě ɖu nú to ɔ́. Nǔ énɛ́ lɛ́ɛ hɛn yě blí; yě nɔ gbejí nú Mawu ǎ nyɔ̌nu e dó afɔ gbě ɔ́ ɖɔhun. Mawu sin xomɛ dó togun tɔn bɔ é vɛ́ jlɛ́, é gbɛ́ wǎn nú togun e nyí étɔn é. É jó yě nú akɔta lɛ́ɛ, bɔ mɛ e gbɛ́ wǎn nú yě lɛ́ɛ kpa acɛ nú yě. Kɛntɔ́ yětɔn lɛ́ɛ táfú yě, yě húzú alɔnugbɔ́ví yětɔn. É hwlɛ́n yě gán azɔn mɔ̌kpán, lo ɔ́, yě ká fɔ́n gǔ gbɔn walɔ gblégblé yětɔn lɛ́ɛ mɛ, yě húzú lelenɔ ɖó hwɛ yětɔn wú. Mawu se vo e sa wɛ yě ɖe é, é mɔ aluwɛ e mɛ yě ɖe é. É flín akɔ e é jɛ xá yě é, bɔ nǔ yětɔn blá wǔ n'i, ɖó xomɛnyínyɔ́ tɔn d'agba. Énɛ́ ɔ́, Mawu bló bɔ mɛ e wlí kannumɔ yětɔn lɛ́ɛ bǐ kú nǔbláwǔ nú yě. Mawu Mavɔmavɔ, Mawu mǐtɔn, hwlɛ̌n mǐ, ɖe mǐ sín akɔta lɛ́ɛ mɛ, bó xo mǐ kplé, bónú mǐ ná sɔ́ nyǐkɔ mímɛ́ towe su, bónú susu kpa nú we ná nɔ́ hun xomɛ nú mǐ. Susu nú Mawu Mavɔmavɔ, Mawu Izlayɛ́li tɔn káká sɔ́yi. Togun ɔ́ bǐ ní ɖɔ: “ Amǐ! Mi kpa Mawu Mavɔmavɔ!” “Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi.” Xó e mɛ e Mawu Mavɔmavɔ xɔ gbɛ ná lɛ́ɛ bǐ ná vɔ́ ɖɔ ɔ́ nɛ́, mɛ e é hwlɛ́n gán ɖo kɛntɔ́ sí lɛ́ɛ bǐ ná vɔ́ ɖɔ é nɛ́; yě wɛ é kplé sín to lɛ́ɛ mɛ, to lɛ́ɛ mɛ, sín Zǎnzǎnhwe jí, sín Gbadahwe jí, sín Totaligbé, sín Tofɔligbé. Mɛ ɖé lɛ́ɛ nɔ́ ɖo flúflú wɛ gbɔn gbětótló mɛ; yě tunwun ali e yě ná gbɔn, bó yi mɔ fí ɖé, bó nɔ é ǎ. Adɔ nɔ ɖo nǔ yětɔn wa wɛ, yě nɔ́ mɔ sin nu ǎ, énɛ́ ɔ́, awakanmɛ kú yě. Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é wá xɔ yě ɖo adǎn e ɖo yě gbo wɛ lɛ́ɛ mɛ. É kplá yě gbɔn ali e jlɔ́ é jí, bónú yě ná yi mɔ to ɖé bó nɔ mɛ. Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú. É ná sin mɛ e kɔ xú lɛ́ɛ, é hun alɔ bó ná nǔɖuɖu mɛ e xovɛ́ sin lɛ́ɛ. Mɛ ɖěvo lɛ́ɛ ɖo ganxó, yě ɖo ayǐjínjɔ́n ɖo ablu mɛ, yě ɖo wlɔ mɛ, yě ɖo aluwɛ mɛ, ɖó yě fɔ́n gǔ dó xó e Mawu ɖɔ é jí, yě hu tɛ́ nú nǔ e Mawu Ajalɔ̌nlɔn kplɔ́n yě é. Mawu sɔ́ ya dó wa nǔ xá yě, yě ɖo ayǐ jɛ wɛ, mɛɖé ka ɖe bó ná dó alɔ yě ǎ. Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é wá hwlɛ́n yě gán sín adǎn e ɖo yě gbo wɛ lɛ́ɛ mɛ. É ɖe yě sín ganxó, é ɖe yě sín ablu mɛ, é wɛ́n wlɔ e mɛ yě ɖe é. Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú. É fó ganhɔn lɛ́ɛ, é wɛ́n sɛxlo lɛ́ɛ. Mɛ ɖěvo lɛ́ɛ sín walɔ nɔ ɖe xlɛ́ ɖɔ taglo mɛ yětɔn kún ɖo ganjí ó, yě ɖo wǔvɛ́ mɔ wɛ ɖó hwɛ e yě hu lɛ́ɛ wú. Yě mɔ nǔɖuɖu ɖěbǔ lě ɔ́, jigbɔ́ nɔ́ tɔ́ yě; afɔ yětɔn ɖokpó ko ɖo yɔdo mɛ. Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é wá hwlɛ́n yě gán sín adǎn e ɖo yě gbo wɛ lɛ́ɛ mɛ. É kɛ nu kpowun bɔ xó tɔn gbɔ azɔn nú yě, é yí yě sín kú sí. Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú. Yě ní sá vɔ̌ dó dó kú n'i, yě ní jlá nǔ ɖaxó ɖaxó e é wa lɛ́ɛ kpó awǒbóbó kpó. Mɛ ɖěvo lɛ́ɛ sɔ́ tɔjíhún nyi xu jí, yě ɖo ajɔ̌ yětɔn wa wɛ bó ɖo yiyi wɛ; yědɛɛ lɛ́ɛ nɔ́ mɔ nǔ e Mawu Mavɔmavɔ bló lɛ́ɛ, nǔjíwǔ e é bló ɖo xuzan mɛ lɛ́ɛ. É ɖɔ xó kpowun bɔ jɔhɔn ɖaxó ɖé nyi, bɔ aslɔkɛ́ lɛ́ɛ sí te. Aslɔkɛ́ nɔ́ sɔ́ tɔjíhún yi jǐ ɖéé bó nɔ́ sɔ́ wá do; xɛsi jɛ yě jí, ɖó nǔ e mɔ wɛ yě ɖe ɔ́ wú. Nukún mɛ yětɔn nɔ́ gba zǐn, yě nɔ́ dán gɔgɔgɔ ahannumúnɔ ɖɔhun, nǔ e yě nyɔ́ wa é bǐ bú dó yě. Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é ɖe yě sín adǎn e ɖo yě gbo wɛ lɛ́ɛ mɛ. É ɖó jɔhɔn ɔ́ te, bɔ xu ɔ́ hwíhwɛ́ bǐ tótótó. Ée xu ɔ́ hwíhwɛ́ ɔ́, é víví nú yě, bɔ Mawu kplá yě yi tɔjíhúnglíntɛn e yě xwe é. Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú. Yě ní ɖɔ lě e é d'agba gbɔn ɔ́ ɖo togun ɔ́ sín kplékplé mɛ, yě ní kpa susu n'i ɖo tomɛxó lɛ́ɛ sín kplé jí. Mawu wɛ nɔ sɔ́ tɔsisa ɖaxó lɛ́ɛ dó húzú axéko, é wɛ nɔ́ sɔ́ tɔjɔtɛn lɛ́ɛ dó húzú ayǐ xúxú, é wɛ nɔ́ sɔ́ to e sín ayǐkúngban nɔ hwán nǔ ɔ́ dó húzú ayǐkúngban jɛvɛ́jɛvɛ́, ɖó adǎka e to ɔ́ mɛ nu lɛ́ɛ nɔ́ xo é wú. É nɔ́ sɔ́ axéko dó húzú tán, é nɔ́ sɔ́ ayǐkúngban xúxú dó húzú tɔjɔtɛn. Fínɛ́ wɛ é ɖó tɛnmɛ nú mɛ e adɔ ɖo nǔ yětɔn wa wɛ lɛ́ɛ ɖe, bɔ yě nɔ́ wa xwé nyi fínɛ́. Yě nɔ́ dó jinukún, yě nɔ́ tun vǐwuntín, yě nɔ́ ya nǔ e yě dó lɛ́ɛ. É nɔ́ xo ɖɛ dó yě jí, bɔ yě nɔ́ ji gba, é nɔ́ lɔn nú kanlin yětɔn lɛ́ɛ nɔ́ ɖe kpo ǎ. Mɛ ɖěvo lɛ́ɛ nɔ́ ɖo vivɔ wɛ, yě nɛ́ ɖo azɔn wɛn wɛ ɖo kannumɔgban, yagban kpó aluwɛgban kpó e ɖo ta nú yě lɛ́ɛ glɔ́ nɛ́. Mawu nɔ dó winnyá mɛjɔmɛ lɛ́ɛ, é nɔ́ jó yě dó bɔ yě nɔ́ yi bú ali ɖo gbětótló mɛ. Lo ɔ́, é nɔ́ hwlɛ́n yatɔ́nɔ lɛ́ɛ gán sín ya mɛ, é nɔ́ bló bɔ hɛ̌nnu yětɔn lɛ́ɛ nɔ sukpɔ́ winnini kanlin hwan ɖɔhun. Ayijlɔ́jlɔ́nɔ lɛ́ɛ nɔ́ mɔ nǔ e jɛ é, bó nɔ́ j'awǎ. Lo ɔ́, nǔnyanyawatɔ́ lɛ́ɛ sín nu nɔ yi xɔ. Mɛ e ɖó nǔnywɛ́ ɔ́ ní ɖó ayi nǔ nɛ́ lɛ́ɛ jí, é ní tunwun ɖagbe e Mawu Mavɔmavɔ nɔ wa lɛ́ɛ. Davídi sín han. Ayi ce jɛ ayǐ, Mawu ce, ayi ce wá jɛ ayǐ lo! Din ɔ́, un ná ji han nú we kpó ayi ce bǐ kpó; un ná ɖɔ xó lómílómí dó han mɛ. Kanhún ce ní fɔ́n, agǐdigbo ce ní fɔ́n, ɖó hangbe ce wɛ ná fɔ́n ayǐtéhɔ̌nnu nyi te. Mawu Mavɔmavɔ, un ná kpa susu nú we ɖo togun lɛ́ɛ mɛ; un ná ji han dó mlá we ɖo akɔta lɛ́ɛ tɛ́ntin, ɖó xomɛnyínyɔ́ towe ɖo aga nú jǐnukúnsin, gbejíninɔ towe hun káká yi akpɔ́kpɔ́ lɛ́ɛ mɛ. Mawu, ɖe susu towe xlɛ́ zɛ jǐxwé wú; ɖe susu towe xlɛ́ gbɔn ayǐkúngban ɔ́ bǐ jí! Sɔ́ ɖisí lɔ towe dó hwlɛ́n wǎnyínámɔ towe lɛ́ɛ gán; yǐ gbe nú ɖɛ ce. Mawu ɖɔ ɖo xwé tɔn gbe ɖɔ: “Đuɖéjí ɔ́ ce wɛ. Un ná má Sikɛ́mu toxo ɔ́. Sukɔ́tu tɔdo ɔ́, un ná má mɛtɔn mɛtɔn. Galadi to ɔ́, ce wɛ, Manasée to ɔ́, ce wɛ. Eflayímu to ɔ́, ahwanfungbákún ce wɛ, Judáa to ɔ́, makpo ce wɛ. Mɔwabu to ɔ́, wǔlɛgbán ce wɛ. Edɔ́mu to ɔ́, un ko ɖó afɔ jí bó ná yí. Un sú xó bó tɔ́n ahwan Filisitɛ́ɛn lɛ́ɛ.” Mɛ̌ ká ná kplá mì yi Edɔ́mu to ɔ́ mɛ din? Éɖíe è mɛ ahohó lɛ́ lɛ̌ dó toxo tɔn bǐ e! Mɛ̌ ká ná jó nú mì? Mɛ̌ ká sɔ́ sixú nyí zɛ hwi Mawu ɔ́ wú? Hwi ɖíe ká kó gbɛ́ mǐ, bó má sɔ́ nɔ́ kplá mǐ yi ahwangbénu ɖě ǎ e! Gɔ̌ alɔ nú mǐ nú mǐ nǎ ɖu ɖo kɛntɔ́ jí. Gbɛtɔ́ wú gán jɛ ɔ́, nǔ yǎyá wɛ. Mawu ɖo kpɔ́ xá mǐ ɔ́, mǐ ná wa adǎn. É wɛ ná zin kɛntɔ́ mǐtɔn lɛ́ɛ dɛ́. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu, hwi wɛ nyí mɛ e un nɔ kpa é; ma tin dó mì ó, ɖó gbɛtɔ́ nyanya, gbɛtɔ́ adingbannɔ lɛ́ɛ ɖo adǎn sin nú mì wɛ; xó e ɖɔ dó wǔ ce wɛ yě ɖe ɔ́ bǐ wɛ nyí adingban. Xó nyanya kɛ́ɖɛ́ wɛ yě nɔ́ ɖɔ dó wǔ ce gbɔn aɖisí amyɔ, yě nɔ́ nɔ yǎyá bó nɔ́ tɔ́n ahwan mì. Nyɛ ɖó wǎn yíyí nú yě, yědɛɛ lɛ́ɛ ka sɔ́ mì dó ɖó kɛntɔ́. Nǔ ka ɖo mɔ̌ có ɖɛ kɛ́ɖɛ́ jɛ́n un nɔ xo. Un wa ɖagbe nú yě ɔ́, nyanya wɛ yě nɔ́ dó sú axɔ́ mì. Un yí wǎn nú yě, yě ká gbɛ́ wǎn nú nyɛ. Nǔ e yě nɔ́ ɖɔ dó wǔtu ce é ɖíe: “Sɔ́ ɛ dó así nú mɛhutɔ́ ɖé, hwɛdómɛtɔ́ ɖokpó ní cí aɖisí tɔn xwé. Hwenu e è nǎ ɖɔ hwɛ xá ɛ ɔ́, è nǐ ɖɔ é kú hwɛ, ɖɛ e xo wɛ é ɖe ɔ́ è nǐ mɔ dó mɔ hwɛhuhu. Azǎn e é ná nɔ gbɛ ná é ní má sukpɔ́ ó, mɛ ɖěvo ní jɛ tɛn tɔn mɛ. Vǐ tɔn lɛ́ɛ ní húzú tɔ́cyɔvǐ, asi tɔn ní húzú asúkúsi. Vǐ tɔn lɛ́ɛ ní nɔ́ ɖo flúflú kpé wɛ, yě ní húzú nǔbyɔ́ɖutɔ́. Yě ní nɔ ɖo nǔ byɔ́ ɖu kpé wɛ gbɔn zɔzɔ nú xwé yětɔn e è gba lɛ́ɛ. Axɔ́tɔ́nɔ ní sá kan ɛ bó bɛ́ nǔ tɔn bǐ, to ɖěvo mɛ nu lɛ́ɛ ní bɛ́ nǔ e é jɛ dɛ̌n bó mɔ lɛ́ɛ. Mɛ ɖokpó má wa ɖagbe n'i ó. Vǐ tɔn e é jó dó lɛ́ɛ sín nǔ má blá wǔ nú mɛɖé ó. È nǐ sú vǐ tɔn lɛ́ɛ sín kún dó, nyǐkɔ yětɔn ní bú ɖo vǐ e è nǎ wá ji sɔ gǔdo lɛ́ɛ mɛ. Mawu Mavɔmavɔ ní ma wɔn nǔ e tɔ́gbó tɔn lɛ́ɛ wa nyi do lɛ́ɛ ó, nǔ ɖěbǔ ní ma súnsún hwɛ e nɔ tɔn hu lɛ́ɛ ó. Mawu Mavɔmavɔ ní nɔ́ flín tɛgbɛ, é ní ɖe nyǐkɔ yětɔn sín gbɛ ɔ́ mɛ. Nya énɛ́ nɔ lin ná wa ɖagbe nú mɛɖé ǎ, é dó ya nú gbɛtɔ́ wamamɔnɔ, lelenɔ, mɛ e gbɛ bú nu dó ɔ́ káká bó hu. É yí wǎn nú nudómɛ káká, bɔ é flí jɛ jǐ tɔn. É gbɛ́ wǎn nú ɖɛ ɖagbe xo nú mɛ káká, bɔ ɖagbe sɛ yi zɔ n'i. Nudómɛ ní nyí awu n'i, é ní byɔ́ xo tɔn mɛ sin ɖɔhun, é ní yi lanmɛ n'i ami ɖɔhun. É ní nyí avɔ n'i, é ní nyí gǒjíblánú ɖo alin tɔn tɛgbɛ.” Axɔ́ e Mawu Mavɔmavɔ ná sú kɛntɔ́ ce lɛ́ɛ é nɛ́, axɔ́ e é ná sú mɛ e nɔ ɖɔ nǔ ce lɛ́ɛ é nɛ́. Mawu Mavɔmavɔ, Aklúnɔ, gɔ̌ alɔ nú mì ɖó nyǐkɔ towe wú, hwlɛ̌n mì gán, ɖó xomɛnyínyɔ́ towe d'agba. Lelenɔ wɛ un nyí, un ɖó nǔɖé ǎ, ayi ce bǐ wɛ xo akpa. Gbɛ ce ɖo yiyi wɛ gbadayɛ ɖɔhun. È ɖo fífɛ́ mì sín wǔ wɛ wɛn ɖɔhun. Un nɔ nǔ ma ɖu káká bɔ afɔ ce lɛ́ɛ nɔ́ xo dɔjɔ; énɛ́ ɔ́ zɔ́n bɔ un kpo xú kɛ́ɖɛ́. Un húzú nǔkiko nú mɛ lɛ́ɛ; yě nɔ́ kpɔ́n mì bó nɔ́ xwe akpi. Mawu Mavɔmavɔ, Mawu ce, wǎ gɔ́ alɔ nú mì; sɔ́ xomɛnyínyɔ́ towe dó hwlɛ́n mì gán. Énɛ́ ɔ́, kɛntɔ́ ce lɛ́ɛ ná tunwun ɖɔ nǔ towe wiwa wɛ, yě ná tunwun ɖɔ hwi Mawu Mavɔmavɔ wɛ bló mɔ̌. Nu wɛ yědɛɛ lɛ́ɛ nɔ́ dó mɛ, hwɛ ka nɔ xo ɖɛ dó mɛ jí. Nú yě sí te dó jǐ ce ɔ́, yě ná ɖu winnyá, bɔ nyɛ mɛsɛntɔ́ towe ná j'awǎ. Hɛ̌n ní nyí awu nú kɛntɔ́ ce lɛ́ɛ, winnyá ní nyí avɔ nú yě. Un ná sɔ́ gbe d'aga bó mlá Mawu Mavɔmavɔ; un ná kpa susu n'i ɖo togun mɛ, ɖó é nɔ́ nɔ aɖisíxwé nú wamamɔnɔ, bó nɔ́ hwlɛ́n ɛ gán ɖo mɛ e ɖo hwɛ ɖó n'i wɛ lɛ́ɛ sí. Davídi sín han. Mawu Mavɔmavɔ ɖɔ nú axɔ́sú sɛ́mɛɖó ce ɖɔ: “Jǐnjɔ́n aɖisí ce xwé fí káká jɛ hwenu e un ná sɔ́ kɛntɔ́ towe lɛ́ɛ dó húzú nǔ e jí a nǎ nɔ́ bɛ́ afɔ ɖó é.” Mawu Mavɔmavɔ ná vlɔ́n kan nú axɔ́súɖuto towe, Sinyɔ́ɔ wɛ é ná bɛ́ sín; hwɛ ɔ́, a nǎ kpa acɛ nú kɛntɔ́ towe lɛ́ɛ. Gbe e gbe a nǎ sɔ́ ahwannú bó xwe ahwan ɔ́, ahwanfuntɔ́ akowunká kɛ́ɖɛ́ wɛ ná kplá we yi. Dɔ̌nkpɛvú towe lɛ́ɛ ná sɛ kplé dó wǔ we, ɖo só mímɛ́ ɔ́ jí, ahǔn e nɔ́ ja ayǐtéhɔ̌nnu é ɖɔhun. Mawu Mavɔmavɔ wɛ ɖɔ bó xwlé nǔ dó é jí, é sɔ́ ná húzú gbeɖé ǎ, é ɖɔ: “Vɔ̌sánú-xwlémawutɔ́ wɛ a nyǐ káká sɔ́yi mavɔ mavɔ, Mɛlukisedɛ́ki ɖɔhun.” Aklúnɔ ɖo akpá towe. Gbe e gbe é ná sin xomɛ ɔ́, é ná gblé gbɛ dó nú axɔ́sú lɛ́ɛ. É ɖo hwɛ ɖó nú akɔta lɛ́ɛ wɛ, cyɔ kpé fí bǐ, é gblé gbɛ dó nú gǎn lɛ́ɛ gbɔn ayǐkúngban ɔ́ bǐ jí. Axɔ́sú ɔ́ ɖo ali jí ɔ́, é nɔ́ nu sin ɖo tɔsisa nu bɔ é nɔ kpé e. Énɛ́ ɔ́ gúdo ɔ́, é nɔ́ zé ta. Mi kpa Mawu Mavɔmavɔ! Un ná nɔ kpa Mawu Mavɔmavɔ kpó ayi ce bǐ kpó, un ná nɔ́ kpa ɛ ɖo ayijlɔ́jlɔ́nɔ lɛ́ɛ tɛ́ntin, un ná nɔ́ kpa ɛ ɖo kplékplé mɛ e nɔ sɛn ɛ lɛ́ɛ tɔn mɛ. Mawu Mavɔmavɔ sín azɔ̌ lɛ́ɛ d'agba, mɛ e yí wǎn ná lɛ́ɛ nɔ́ lin tamɛ dó azɔ̌ énɛ́ lɛ́ɛ wú. Nǔ e é bló lɛ́ɛ bǐ wɛ nyí nǔsacɔ́, nǔjíwǔ, é nyí hwɛjijɔnɔ káká sɔ́yi. É jló ɖɔ nǔjíwǔ e émí nɔ́ bló lɛ́ɛ ɔ́, è nǐ nɔ́ flín. Mawu Mavɔmavɔ nyɔ́ xomɛ, mɛ nú nɔ́ blá wǔ n'i. É nɔ ná nǔɖuɖu mɛ e nɔ ɖó sísí n'i lɛ́ɛ, é nɔ́ flín akɔ e é jɛ xá togun tɔn é tɛgbɛ. Mawu sɔ́ akɔta ɖě lɛ́ɛ sín to jó nú togun tɔn; é bló mɔ̌ dó ɖe hlɔ̌nhlɔ́n e é nɔ́ dó wa nǔ é xlɛ́ togun tɔn. Nǔ e é sɔ́ alɔ tɔn dó bló lɛ́ɛ nɔ́ ɖe xlɛ́ ɖɔ é nyí gbejínɔtɔ́, é nyí hwɛjijɔnɔ. Nǔ e é zɔ́n ɖɔ è wa lɛ́ɛ bǐ wɛ nyí nǔ ɖeji d'é wú, yě ná nɔ te káká sɔ́yi, ɖó yě nyí nǔgbó, yě ɖo xwi jí. É sɛ́ hwlɛngán dó togun tɔn, é jɛ akɔ mavɔ mavɔ xá ɛ. Mawu nyí Mɛ mímɛ́, é dó xɛsi. Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é. Mɛ e nɔ wa nǔ gbɔn mɔ̌ lɛ́ɛ bǐ sín linlin wɛ nɔ mɛ́. Susu Mawu Mavɔmavɔ tɔn ɖo te káká sɔ́yi. Mi kpa Mawu Mavɔmavɔ! Nǔ nyɔ́ nú mɛ e nɔ ɖó sísí nú Mawu Mavɔmavɔ é, mɛ e nǔ e é zɔ́n lɛ́ɛ wiwa nɔ́ víví ná é. Vǐ tɔn lɛ́ɛ ná nyí tonukún ɖo to ɔ́ mɛ, ɖó Mawu nɔ xo ɖɛ dó ayijlɔ́jlɔ́nɔ jí. Mɛ mɔ̌hun ɔ́, nǔɖókan kpó dɔkun kpó nɔ́ ɖo xwé tɔn gbe, é nɔ́ nyí hwɛjijɔnɔ tɛgbɛ ɖo Mawu nukɔn. Hwenu e kɛ́ mɛ nɔ́ dó ablu dó mɛ ɔ́, wěziza ɖé nɔ́ hɔ́n nú ayijlɔ́jlɔ́nɔ. É nyɔ́ xomɛ, mɛ nú nɔ blá wǔ n'i, hwɛjijɔnɔ wɛ. É nyɔ́ ɖɔ gbɛtɔ́ ní nɔ hun alɔ bó nɔ́ nya nǔ nú mɛ, é nyɔ́ ɖɔ gbɛtɔ́ ní nɔ wa nǔ tɔn lɛ́ɛ bǐ lě e sɛ́n ɔ́ ɖɔ gbɔn é. Mɛ e nɔ wa nǔ gbɔn mɔ̌ ɔ́ nɔ́ jɛ ayǐ gbeɖé ǎ; è nǎ nɔ flín i tɛgbɛ. É nɔ́ ɖo xɛsi jí ɖɔ wɛn nyanya ná wá din ǎ, ayixa tɔn nɔ jɛ ayǐ, bɔ é nɔ́ ɖeji dó Mawu Mavɔmavɔ wú. É nɔ́ lí dǒ, é nɔ́ ɖi xɛsi ǎ, é ɖó gǎnjɛwú ɖɔ émí ná mɔ kɛntɔ́ sín ayǐjijɛ. É nɔ́ hun alɔ dó ná nǔ mɛ, é nɔ́ ná nǔ wamamɔnɔ lɛ́ɛ, é nɔ́ nyí hwɛjijɔnɔ ɖo Mawu nukɔn tɛgbɛ, hlɔ̌nhlɔ́n tɔn nɔ ɖo jijɛ jí wɛ kpó susu kpó. Mɛdídá nɔ́ mɔ ɛ, bɔ xomɛ nɔ sin i; é nɔ́ ɖu aɖǔkún bɔ é nɔ́ mɛ dó wǔ tɔn. Nǔ e é nɔ́ lin é bǐ nɔ cí xo tɔn mɛ. Mi kpa Mawu Mavɔmavɔ! Mi Mawu Mavɔmavɔ sɛn tɔ́ lɛ́ɛ mi, mi kpa Mawu Mavɔmavɔ! Mi sɔ́ nyǐkɔ Mawu Mavɔmavɔ tɔn su. È nǐ dó kú nú Mawu Mavɔmavɔ, sín din káká sɔ́yi. È nǐ kpa susu nú Mawu Mavɔmavɔ sín zǎnzǎnhwe jí káká yi gbadahwe jí. Mawu Mavɔmavɔ hú gǎn akɔta lɛ́ɛ bǐ; susu tɔn zɛ jǐxwé wú. Mɛ̌ è ka sixú jlɛ́ dó Mawu Mavɔmavɔ, Mawu mǐtɔn wú? É ɖo axɔ́súzinkpo tɔn jí ɖo jǐ aga bǐ, é nɔ nya bó nɔ́ kpɔ́n jǐxwé kpó ayǐkúngban kpán sɛ́ dó. É nɔ́ sɔ́ wamamɔnɔ sí te sín kɔ́gúdu mɛ, é nɔ́ sɔ́ lelenɔ sí te sín zunkɔ́ta, é nɔ́ sɔ́ ɛ jínjɔ́n mɛjɔmɛ lɛ́ɛ kpá, gbɛtɔ́ nukúnɖéjí e ɖo togun tɔn mɛ lɛ́ɛ é kpá. É nɔ́ ná xwédo mɛ e nyí wɛnsinɔ é, bɔ é nɔ́ húzú nyɔ̌nánɔ ɖo vǐ tɔn lɛ́ɛ tɛ́ntin. Mi kpa Mawu Mavɔmavɔ! Hwenu e Izlayɛ́li tɔ́n sín Ejípu ɔ́, hwenu e Jakɔ́bu ví lɛ́ɛ gosín akɔta e nɔ flán gbe é mɛ ɔ́, Judáa to ɔ́ húzú Tɛn mímɛ́ Mawu tɔn, Izlayɛ́li to ɔ́ húzú ayǐkúngban tɔn. Xu mɔ Izlayɛ́li ví lɛ́ɛ bó hɔn, Judɛ́ɛn tɔ ɔ́ mɔ yě bó jó agɔ yi gǔdo, só lɛ́ɛ lɔ́n agbo ɖɔhun, só kpɛví kpɛví lɛ́ɛ lɔ́n lɛ̌ngbɔ́ví ɖɔhun. Xu, nɛ̌ ka gbɔn nú we bɔ a hɔn? Judɛ́ɛn tɔ, nɛ̌ ka gbɔn nú we bɔ a jǒ agɔ yi gǔdo? Só lɛ́ɛ mi, nɛ̌ ka gbɔn nú mi bɔ mi lɔ́n agbo ɖɔhun? Só kpɛví kpɛví e mi, étɛ́ ká wa mi bɔ mi lɔ́n lɛ̌ngbɔ́ví ɖɔhun? Ayǐkúngban, hwɛ ɔ́, dǎn wǔ ɖo Aklúnɔ nukɔn, dǎn wǔ ɖo Mawu Jakɔ́bu tɔn nukɔn. É wɛ sɔ́ só dó húzú tán, é wɛ sɔ́ awǐnnya dó húzú tɔjɔtɛn. Mawu Mavɔmavɔ, susu jɛ xá mǐ ǎ, é jɛ xá mǐ ǎ. Hwi wɛ susu jɛ xá, ɖó xomɛnyínyɔ́ towe wú, ɖó gbejíninɔ towe wú. Étɛ́wú akɔta lɛ́ɛ nɔ́ ɖɔ: “Fítɛ́ Mawu yětɔn ka ɖe?” Mawu mǐtɔn ɖo sɛ́xwé; nǔ e jló e lɛ́ɛ bǐ wɛ é nɔ́ bló. Amɔ̌, vodún yětɔn lɛ́ɛ ɔ́, siká kpó kpatágan kpó wɛ è nɔ dó bló yě; gbɛtɔ́ sín nǔwiwa kpowun wɛ. Nu ɖo ta yětɔn wú, yě ká nɔ́ ɖɔ xó ǎ. Nukún ɖo ta yětɔn wú, yě ká nɔ́ mɔ nǔ ǎ. Tó ɖo ta yětɔn wú, yě ká nɔ́ se nǔ ǎ. Awɔntín ɖo ta yětɔn wú, yě ká nɔ́ se nǔ wán ǎ. Yě ɖó alɔ, yě ká nɔ́ sixú ɖó alɔ nǔɖé wú ǎ. Yě ɖó afɔ, yě ká nɔ́ sixú ɖi zɔnlin ǎ. Xó ɖé nɔ́ tɔ́n sín vɛ̌gokan yětɔn mɛ ǎ. Mɛ e nɔ bló vodún énɛ́ lɛ́ɛ ní cí vodún e yě bló lɛ́ɛ ɖɔhun, mɛ e nɔ gán jɛ yě wú lɛ́ɛ ní cí yě ɖɔhun. Izlayɛ́li ví lɛ́ɛ mi, mi jó miɖée dó nú Mawu Mavɔmavɔ. - É wɛ nyí alɔgɔ́númɛtɔ́ yětɔn, é wɛ nyí gǎglónú yětɔn. Aalɔ́ɔn ví lɛ́ɛ mi, mi jó miɖée dó nú Mawu Mavɔmavɔ. - É wɛ nyí alɔgɔ́númɛtɔ́ yětɔn, é wɛ nyí gǎglónú yětɔn. Mi mɛ e nɔ ɖó sísí nú Mawu Mavɔmavɔ lɛ́ɛ mi, mi jó miɖée dó n'i. - É wɛ nyí alɔgɔ́númɛtɔ́ yětɔn, é wɛ nyí gǎglónú yětɔn. Mawu Mavɔmavɔ nɔ flín mǐ, é jló ná xo ɖɛ dó mǐ jí. É ná xo ɖɛ dó Jakɔ́bu ví lɛ́ɛ jí, é ná xo ɖɛ dó Aalɔ́ɔn ví lɛ́ɛ jí, é ná xo ɖɛ dó mɛ e nɔ ɖó sísí n'i lɛ́ɛ jí, mɛxó kpó yɔkpɔ́vú kpó. Mawu Mavɔmavɔ ní ná vǐ mi, bónú mi ji, é ní ná vǐ mitɔn lɛ́ɛ, bónú yě ji. Mawu Mavɔmavɔ, jǐxwé kpó ayǐkúngban kpó ɖó tɔ́ ɔ́ ní xo ɖɛ dó mi jí. Jǐxwé ɔ́, jǐxwé Mawu Mavɔmavɔ ɖokpónɔ géé tɔn wɛ, lo ɔ́, é ná ayǐkúngban ɔ́ gbɛtɔ́ lɛ́ɛ. Mɛkúkú lɛ́ɛ wɛ nɔ́ kpa Mawu Mavɔmavɔ ǎ, mɛ e yi maɖɔnǔxwɛ lɛ́ɛ wɛ nɔ́ kpa ɛ ǎ. Lo ɔ́, midɛɛ lɛ́ɛ wɛ ná ɖo susu kpa n'i wɛ sín din káká sɔ́yi. Mi kpa Mawu Mavɔmavɔ! Un yí wǎn nú Mawu Mavɔmavɔ, ɖó un sú xó ylɔ́ ɛ ɔ́, é nɔ́ se. É ɖo tó ɖó mì wɛ tlítlí, un ná nɔ sú xó ylɔ́ ɛ ɖo gbɛzán ce bǐ mɛ. Kú ko dó wlɔ mì bǐ, xɛsi jɛ jǐ ce mɛ ɖo yɔdo tó ɖɔhun, ahwi xo mì bɔ un ɖo aluwɛ mɛ. Lo ɔ́, un sú xó ylɔ́ Mawu Mavɔmavɔ nyíkɔ bó ɖɔ: “Mawu Mavɔmavɔ, kɛnklɛ́n, hwlɛ̌n mì!” Mawu Mavɔmavɔ nɔ nyɔ́ xomɛ, é nɔ́ wa nǔ jlɔ́jlɔ́, Mawu mǐtɔn ɔ́, mɛ nú nɔ́ blá wǔ n'i. Mawu Mavɔmavɔ nɔ hɛn mɛ e ma nɔ ɖó ayi we ǎ lɛ́ɛ. Gǎn kó vɔ ɖo wǔ ce, é ka wá hwlɛ́n mì gán. Din ɔ́, un ɖó ná mɔ vivo, ɖó Mawu Mavɔmavɔ wa ɖagbe nú mì. Nǔgbó wɛ, é hwlɛ́n mì gán ɖo kú sí, é súnsún ɖasin nú mì, é lɔn bɔ un ɖe afɔ nyi do ǎ. Un ná zun zɔnlin ɖo nukɔn tɔn ɖo ayǐkúngban jí fí, ɖo mɛ e ɖo gbɛ lɛ́ɛ tɛ́ntin. Un ɖɔ: “Gbɛ ce blá wǔ mɛ nya!” Un ɖɔ mɔ̌, có un kpo ɖo nǔɖiɖi ɖó nú Mawu Mavɔmavɔ wɛ. Un dán ɖě wa gbɔn káká bó ɖɔ: “È sixú gán jɛ gbɛtɔ́ ɖě wú ǎ.” Nǔ e Mawu Mavɔmavɔ wa nú mì lɛ́ɛ ɔ́, étɛ́ un ka sixú wa dó sú i axɔ́ tɔn? Un ná nɔ sɔ́ hwlɛngán kɔ́fu ɔ́ dó jǐ, un ná nɔ́ xomlá Mawu Mavɔmavɔ nyíkɔ. Akpá e un dó nú Mawu Mavɔmavɔ lɛ́ɛ ɔ́, un ná ɖe yě ɖo togun tɔn bǐ nukɔn. Mɛ e ɖo gbejí nú Mawu Mavɔmavɔ lɛ́ɛ ɔ́, kú yětɔn nɔ́ vɛ́ n'i tawun. Mawu Mavɔmavɔ, mɛsɛntɔ́ towe wɛ un nyí, mɛsɛntɔ́ towe nyɔ̌nu sín vǐ wɛ un nyí, a tún mì sín wlɔ mɛ. Mawu Mavɔmavɔ, un ná sá vɔ̌ ɖokpó dó dó kú nú we, un ná nɔ́ xomlá nyǐkɔ towe. Akpá e un dó nú Mawu Mavɔmavɔ lɛ́ɛ ɔ́, un ná ɖe yě ɖo togun tɔn bǐ nukɔn, ɖo Mawu Mavɔmavɔ xwé gbe, ɖo kɔ́xo tɔn lɛ́ɛ ta, ɖo Jeluzalɛ́mu toxo ɔ́ mɛ. Mi kpa Mawu Mavɔmavɔ! Akɔta akɔta lɛ́ɛ mi, mi bǐ ní kpa Mawu Mavɔmavɔ. Togun lɛ́ɛ mi, mi bǐ ní kpa susu n'i, ɖó lě e é nyɔ́ xomɛ dó mǐ wú gbɔn ɔ́ d'agba, gbejíninɔ tɔn ɖo te tɛgbɛ. Mi kpa Mawu Mavɔmavɔ! Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi. Izlayɛ́li ví lɛ́ɛ ní ɖɔ: “Wǎn yíyí tɔn ɖo te káká sɔ́yi.” Aalɔ́ɔn ví lɛ́ɛ ní ɖɔ: “Wǎn yíyí tɔn ɖo te káká sɔ́yi.” Mɛ e nɔ ɖó sísí nú Mawu Mavɔmavɔ lɛ́ɛ ní ɖɔ: “Wǎn yíyí tɔn ɖo te káká sɔ́yi.” Aluwɛ mɛ wɛ un ɖe bó sú xó ylɔ́ Mawu Mavɔmavɔ, é sɔ nú mì, é ɖe mì nyi te. Mawu Mavɔmavɔ ɖo jǐ ce, un ɖi xɛsi ǎ. Étɛ́ gbɛtɔ́ ka sixú wa nú mì? Mawu Mavɔmavɔ ɖo jǐ ce, é wɛ nyí alɔgɔ́númɛtɔ́ ce, un ná mɔ ayǐ jijɛ kɛntɔ́ ce lɛ́ɛ tɔn. È hɔn yi su Mawu Mavɔmavɔ ɔ́, é nyɔ́ hú è gǎn jɛ gbɛtɔ́ wú. È hɔn yi su Mawu Mavɔmavɔ ɔ́, é nyɔ́ hú è gǎn jɛ gbɛtɔ́ nukúnɖéjí wú. Akɔta lɛ́ɛ bǐ wɛ lɛ́ lɛ̌ dó mì, un ka nɔ ɖu ɖo yě jí ɖo Mawu Mavɔmavɔ sín acɛ mɛ. Yě nɔ́ lɛ́ lɛ̌ dó mì, yě nɔ́ vun blá mì, un ka nɔ ɖu ɖo yě jí ɖo Mawu Mavɔmavɔ sín acɛ mɛ. Yě nɔ́ vun blá mì wǐin ɖɔhun, lo ɔ́, yě nɔ́ kɛn nǔywɛ́ myɔ ɖɔhun, un nɔ ɖu ɖo yě jí ɖo Mawu Mavɔmavɔ sín acɛ mɛ. È tun mì kpó hlɔ̌nhlɔ́n kpó, bó ná zin mì dɛ́, Mawu Mavɔmavɔ ka gɔ́ alɔ nú mì. Mawu Mavɔmavɔ wɛ nyí hlɔ̌nhlɔ́n ce, é wɛ nyí han bo ɖo nu ce, é wɛ hwlɛ́n mì gán. Đuɖéjí kpó hwlɛngán kpó sín axwá wɛ nɔ́ ɖi, ɖo mɛ e nɔ wa nǔ jlɔ́jlɔ́ lɛ́ɛ sín goxɔ sá, bɔ yě nɔ́ ɖɔ: “Mawu Mavɔmavɔ bló nǔ ɖaxó ɖé! Mawu Mavɔmavɔ ná ɖuɖéjí mǐ! Mawu Mavɔmavɔ bló nǔ ɖaxó ɖé!” Éeǒ, un ná kú ǎ, un ná nɔ gbɛ, bó ná ɖɔ nǔ e Mawu Mavɔmavɔ bló lɛ́ɛ. Mawu Mavɔmavɔ dɔn tó nú mì, lo ɔ́, é jó mì dó nú kú ǎ. Mi hun hwɛjijɔ sín hɔn lɛ́ɛ kɛ́ nú mì, nú ma byɔ́ mɛ, bó ná mlá Mawu Mavɔmavɔ. Hɔn Mawu Mavɔmavɔ tɔn ɖíe, fínɛ́ wɛ mɛ e nɔ wa nǔ jlɔ́jlɔ́ lɛ́ɛ nɔ́ gbɔn. Mawu, un ná mlá we, ɖó a se ɖɛ ce, a hwlɛ̌n mì gán. Awǐnnya e xɔmɛtɔ́ lɛ́ɛ xo nyi kɛ́n é, wɛ wá húzú awǐnnya tají e ɖo zwe jí é. Mawu Mavɔmavɔ sín nǔwiwa wɛ, nǔjíwǔ wɛ é nyí ɖo nukún mǐtɔn mɛ. Égbé wɛ nyí azǎn e Mawu Mavɔmavɔ bló é, mi wá mǐ ní j'awǎ, mi wá mǐ ní hun xomɛ ɖó azǎn énɛ́ ɔ́ wú! Mawu Mavɔmavɔ, kɛnklɛ́n, hwlɛ̌n mǐ gán! Mawu Mavɔmavɔ, kɛnklɛ́n, nǎ ɖuɖéjí mǐ! Mawu Mavɔmavɔ ní xo ɖɛ dó mɛ e jǎwe ɖo nyǐkɔ tɔn mɛ é jí. Mǐ ɖo ɖɛ xo dó mi jí wɛ sín Mawu Mavɔmavɔ xwé gbe. Mawu Mavɔmavɔ wɛ nyí Mawu, é wɛ nɔ́ ná wěziza mǐ. Mi dó kan kanlin e ná hu wɛ è ɖe lɛ́ɛ, bó dɔn yě yi káká vɔ̌sákpe ɔ́ sín zwe lɛ́ɛ kɔn. Mawu Mavɔmavɔ, hwi wɛ nyí Mawu ce, un ná kpa susu nú we. Mawu ce, un ná ɖɔ lě e a dǒ agba sɔ é. Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi. Nǔ nyɔ́ nú mɛ e nǔɖé má jɛ do ɖo walɔ yětɔn wú ǎ lɛ́ɛ, mɛ e nɔ xwedó Mawu Mavɔmavɔ sɛ́n ɔ́ dó wa nǔ lɛ́ɛ. Nǔ nyɔ́ nú mɛ e nɔ nyi sɛ́n tɔn lɛ́ɛ, mɛ e nɔ ba ɛ kpó ayi yětɔn bǐ kpó lɛ́ɛ. Mɛ énɛ́ lɛ́ɛ ɔ́, yě nɔ́ wa nǔ agɔ ǎ, ali Mawu tɔn jí wɛ yě nɔ́ gbɔn. Mawu, hwɛ ɔ́, a nǎ sɛ́n towe lɛ́ɛ, bónú è nǎ kpé nukún yě wú bó nyi ganjí tɔn. Walɔ ce lɛ́ɛ ní lí dǒ bó xwetɛ́, bónú má xwedó tito towe lɛ́ɛ. Énɛ́ ɔ́, nú un wá ɖo nǔ e a zɔ́n lɛ́ɛ xa wɛ ɔ́, winnyá sɔ́ ná hu mì ǎ. Un ɖo gbeta e a ɖe tɔ́n bɔ é sɔgbe lɛ́ɛ ɔ́ kplɔ́n wɛ ɔ́, un ná sɔ́ ayi ɖó wɛn bó ná mlá we. Un ná ɖó kan dó jlǒ towe wú bó wa, ma jó mì dó gbeɖé ó. Mawu, è ɖo wǐnnyáwínnyá mɛ ɔ́, nɛ̌ è ka sixú bló gbɔn bó ná nɔ́ zán gbɛ ɖagbe? Xó towe jɛ́n è nǎ nɔ́ xwedó dó wa nǔ. Un ɖo biba we wɛ kpó ayi ce bǐ kpó. Ma jó mì dó nú un nɔ zɔ nú nǔ e a zɔ̌n lɛ́ɛ, bó bú ali ó. Un hɛn nǔ e a ɖɔ lɛ́ɛ ayi mɛ, bó ma wá hu hwɛ dó we ó. Jɛlijɛli nú we Mawu Mavɔmavɔ. Kplɔ́n tito towe lɛ́ɛ mì. Un sɔ́ nu ce dó xa gbeta e tɔ́n sín nu towe mɛ lɛ́ɛ bǐ. Sɛ́n towe nyinyi nɔ́ dó xomɛhunhun nú mì, dɔkun ɖaxó ɖé wɛ un jɛ ɖɔhun. Un ná lin tamɛ dó sɛ́n towe lɛ́ɛ wú, un ná kpɔ́n ali e a ɖe lɛ́ɛ. Tito e a ɖǒ ayǐ lɛ́ɛ xwedó mɛ wɛ un ná mɔ gbɛ víví ɖe, un ná wɔn xó towe ǎ. Wa ɖagbe nú nyi mɛsɛntɔ́ towe, bónú ma nɔ gbɛ bó ná xwedó xó towe. Hun nukún nú mì, bónú má mɔ nǔjíwǔ e ɖo sɛ́n towe mɛ lɛ́ɛ ganjí. Jǒnɔ kpowun wɛ un nyí ɖo ayǐkúngban jí fí; ma sɔ́ nǔ e a zɔ̌n lɛ́ɛ hwlá dó mì ó. Gbeta towe lɛ́ɛ tunwuntunwun sín akpakpa nɔ sɔ́ mì hwebǐnu. A nɔ gblɔ́n adǎn nú gbɛtɔ́ goyítɔ́, yě mɛ e gbɛ́ nǔ e a zɔ̌n lɛ́ɛ bló lɛ́ɛ, ali bú wɛ yě ɖe; yě wɛ a dǒ nu. Đe hɛ̌ngban e ɖo ta ce é síin, ɖe mì sín winnyá mɛ, ɖó un nɔ nyi sɛ́n towe lɛ́ɛ. Gǎn lɛ́ɛ ɖo sé ce blá wɛ, nǔ ɖo mɔ̌ có un ɖo tamɛ lin dó tito towe lɛ́ɛ wú wɛ, ɖó mɛsɛntɔ́ towe wɛ un nyí. Sɛ́n towe lɛ́ɛ xwedó wɛ nɔ́ víví nú mì, ɖó sɛ́n towe lɛ́ɛ wɛ nɔ́ kplɔ́n nǔ mì. Kpɔ́n, un ko jɛ ayǐ, gbɛ ce ko xo kɔ́; hɛn mì ɖó gbɛ lě e xó towe ɖɔ gbɔn é. Un ɖɔ lě e un zán gbɛ ce gbɔn ɔ́, bɔ a se; din ɔ́, kplɔ́n tito towe lɛ́ɛ mì. Tín nǔ e ɖɔ wɛ sɛ́n towe lɛ́ɛ ɖe ɔ́ mɛ nú mì, bónú ma lin tamɛ dó nǔjíwǔ e a nɔ wa lɛ́ɛ wú. Akpɔ nɔ dó avǐ nu nú mì, zě mì sí te lě e a ɖɔ gbɔn é. Đe mì sín ali e ma nyí ali ɖagbe ǎ é jí, bó jɔwǔ mì, nú ma sixú nyi sɛ́n towe. Gbejíninɔ sín ali ɔ́ wɛ un wlí, gbeta towe lɛ́ɛ wɛ un nɔ xwedó. Un hɛn sɛ́n towe lɛ́ɛ syɛ́nsyɛ́n. Mawu Mavɔmavɔ, ma lɔn nú un ɖu winnyá ó. Nǔ e a zɔ̌n lɛ́ɛ sín wezun jí wɛ un ɖe, ɖó a nǎ ɖo nukúnnú mɔ jɛ nǔ mɛ ná mì d'é jí wɛ. Mawu Mavɔmavɔ, xlɛ́ ali e un ɖó ná gbɔn é mì nú má mlɛ́, bó nɔ jí káká sɔ́yi. Nǎ nukúnnú mɔ jɛ nǔ mɛ mì, nú má hɛn sɛ́n towe bó nyi kpó ayi ce bǐ kpó. Kplá mì gbɔn nǔ e a zɔ̌n lɛ́ɛ sín ali jí, ɖó nǔ e a zɔ̌n lɛ́ɛ wiwa nɔ́ víví nú mì. Sɔ́ ayi ce ɖó sɛ́n towe lɛ́ɛ jí, ma sɔ́ ayi ce ɖó dɔkun jí ó. Đe nukún ce sín nǔ ma xɔ akwɛ́ lɛ́ɛ jí, bló bónú ma zán gbɛ ce lě e a jlǒ gbɔn é. Đe akpá e a dǒ nú nyɛ mɛsɛntɔ́ towe é, akpá e a dǒ nú mɛ e nɔ ɖó sísí nú we lɛ́ɛ. Ma lɔn nú un ɖu hɛ̌n ó, hɛ̌n ɖuɖu nɔ́ dó adohu nú mì, gbeta e a nɔ ɖe tɔ́n lɛ́ɛ wɛ nyɔ́. Kpɔ́n, sɛ́n towe lɛ́ɛ nyinyi sín kɔ ɖo xúxú mì wɛ; hɛn mì ɖó gbɛ, ɖó hwɛjijɔ e a nyǐ é wútu. Mawu Mavɔmavɔ, xomɛnyínyɔ́ towe ní jɛ te dó jǐ ce, hwlɛ̌n mì gán lě e a dǒ akpá tɔn gbɔn é. Énɛ́ ɔ́, un ná tunwun nu e un ná kɛ nú mɛ e nɔ zun mì lɛ́ɛ é, ɖó xó towe wú wɛ un ɖeji dó. Ma lɔn gbeɖé bónú un húzú nǔgbó ɔ́ xwe ó, ɖó hwɛgbigbo towe wɛ un ɖo te kpɔ́n. Un ná nyi sɛ́n towe hwebǐnu, un ná nyi káká yi káká sá. Énɛ́ ɔ́, un ná vo bó ɖo yiyi wɛ ɖo gbɛ ɔ́ mɛ, ɖó un nɔ xwedó sɛ́n towe lɛ́ɛ. Un ná ɖɔ sɛ́n towe lɛ́ɛ nú axɔ́sú lɛ́ɛ, winnyá ná hu mì ǎ. Nǔ e a zɔ̌n lɛ́ɛ wiwa wɛ nɔ́ víví nú mì, ɖó un yí wǎn nú nǔ e a zɔ̌n lɛ́ɛ; yě gɔ̌n ɖó nukún gǎnjɛwú sín wɛ un ɖe. Un yí wǎn nú nǔ e a zɔ̌n lɛ́ɛ, un ná lin tamɛ dó tito towe lɛ́ɛ wú. Flín xó e a ɖɔ nú nyɛ mɛsɛntɔ́ towe é, xó e a ɖɔ nú mì bɔ un ɖo te kpɔ́n é. Un ɖo ya ji wɛ, adɔ ka gbó mì, ɖó akpá e a dǒ nú mì ɔ́ wɛ nɔ́ ná gbɛ mì. Mɛ e nɔ mɔ yěɖée lɛ́ɛ nɔ́ ɖo nyɔmɛ ɖɔ wǔ ce wɛ mɔ̌hunkɔ, nǔ ɖo mɔ̌ có, un jó sɛ́n towe dó ǎ. Mawu Mavɔmavɔ, un flín hwɛ e a ɖɔ ɖ'ayǐ lɛ́ɛ ɔ́, adɔ nɔ gbó mì. Un mɔ mɛdídá lɛ́ɛ ɔ́, yě mɛ énɛ́ lɛ́ɛ e jó sɛ́n towe dó lɛ́ɛ ɔ́, xomɛ ɖaxó ɖé nɔ́ sin mì. Tito towe lɛ́ɛ wɛ nyí han ɖo nu ce ɖo gbɛgleta fí élɔ́ e un ɖe é. Mawu Mavɔmavɔ, zǎn mɛ ɔ́, un nɔ flín nyǐkɔ towe lobo nɔ́ nyi sɛ́n towe. Azɔ̌ e nyí ce tawun ɔ́ wɛ nyí ɖɔ má sɔ́ nǔ e a zɔ̌n lɛ́ɛ ylɔ́ ɖɔ nǔ. Mawu Mavɔmavɔ, un ɖɔ ɔ́, un nɔ ɖɔ: azɔ̌ e nyí azɔ̌ ce ɔ́ wɛ nyí ɖɔ má xwedó xó towe. Un jló ná nyɔ́ ɖo así we kpó xomɛ kpó; nyɔ̌ xomɛ dó wǔ ce lě e a dǒ akpá tɔn gbɔn é. Un lin tamɛ dó gbɛ e un zán é wú, bó jló ná lɛ́ jɛ sɛ́n towe lɛ́ɛ nyí jí. Un ɖo hwlɛndó jí bó ná bló nǔ e a zɔ̌n lɛ́ɛ, un zé ɖó nǎ mɛ ǎ. Mɔ e mɛdídá lɛ́ɛ ɖó nú mì lɛ́ɛ lɛ́ lɛ̌ dó mì, un ka wɔn sɛ́n towe ǎ. Un nɔ fɔ́n zǎnxwete bó nɔ́ mlá we, ɖó hwɛ e a ɖɔ bɔ é sɔgbe lɛ́ɛ wú. Mɛ e nɔ ɖó sísí nú we, bó nɔ́ nyi sɛ́n towe lɛ́ɛ bǐ kpó nyi kpó wɛ nyí xɔ́ntɔn. Mawu Mavɔmavɔ, xomɛnyínyɔ́ towe gba kpé gbɛ ɔ́ bǐ mɛ, kplɔ́n tito towe lɛ́ɛ mì. Mawu Mavɔmavɔ, a wa ɖagbe nú mɛsɛntɔ́ towe, lě e a dǒ akpá tɔn gbɔn é. Kplɔ́n lě e un ná ɖɔ hwɛ gbɔn é mì, kplɔ́n lě e un ná tunwun nǔ e a zɔn lɛ́ɛ gbɔn ɔ́ mì, ɖó yě wú wɛ un ɖeji dó. Cóbónú è nǎ sɔ́ mì hwe ɔ́, ali bú wɛ un ko ɖe; amɔ̌, din ɔ́, nǔ e a ɖɔ lɛ́ɛ wa wɛ un ɖe. A nyɔ̌, a nɔ wa ɖagbe nú mɛ, kplɔ́n tito towe lɛ́ɛ mì. Mɛ e nɔ mɔ ɖɔ émí sɔ lě lɛ́ɛ nɔ́ ɖó adingban dó nu ce dó hɛn mì blí, amɔ̌, nyɛ ɔ́, sɛ́n towe lɛ́ɛ nyinyi wɛ nɔ myá nukún nú mì. Ayi yětɔn nɔ́ mɔ nǔ ǎ, amɔ̌, nyɛ ɔ́, sɛ́n towe lɛ́ɛ nyinyi wɛ nɔ víví nú mì. Wǔvɛ́ e un mɔ é ɔ́, ɖagbe wɛ é nyí nú mì, énɛ́ wɛ zɔ́n bɔ un kplɔ́n tito towe lɛ́ɛ. Sɛ́n e tɔ́n sín nu towe mɛ ɔ́ xɔ akwɛ́ nú mì hú nǔ e è sɔ́ siká abǐ kpatágan dó bló lɛ́ɛ afatɔ́n (1.000). Alɔ towe lɛ́ɛ wɛ bló mì bó hɛn mì ɖó te, nǎ nukúnnú mɔ jɛ nǔ mɛ mì, nú má kplɔ́n nǔ e a zɔ̌n lɛ́ɛ. Mɛ e ɖó sísí nú we lɛ́ɛ nɔ́ mɔ mì bó nɔ́ j'awǎ, ɖó un ɖo te kpɔ́n xó e a nǎ ɖɔ é. Mawu Mavɔmavɔ, un tunwun ɖɔ hwɛ e a nɔ ɖɔ lɛ́ɛ nɔ sɔgbe, nǔ e xó towe ɖɔ é wɛ a xwedó dó dɔn tó nú mì. Xomɛnyínyɔ́ towe ní súnsún ɖasin nú mì, lě e a dǒ akpá tɔn nú nyɛ mɛsɛntɔ́ towe gbɔn é. Xlɛ́ mì ɖɔ a yǐ wǎn nú mì, bónú má nɔ gbɛ, ɖó sɛ́n towe nyinyi wɛ nɔ víví nú mì. Yě mɛ e nɔ ɖo yěɖée mɔ wɛ, bó nɔ́ nɔ yǎyá bó nɔ́ ɖo ya dó nú mì wɛ lɛ́ɛ bǐ ní ɖu winnyá. Nyɛ ɔ́, sɛ́n towe lɛ́ɛ wú wɛ un nɔ lin tamɛ dó. Mɛ e nɔ ɖó sísí nú we lɛ́ɛ ní lɛ́ kɔ wá gɔ̌n ce, bó ná tunwun sɛ́n towe lɛ́ɛ. Má nɔ gbejí nú tito towe lɛ́ɛ, bó má wá ɖu winnyá ó. Un ɖo hwlɛngán ba ɖo gɔ̌n towe wɛ káká bɔ agbɔ̌n kpé mì, un ɖo te kpɔ́n xó e a nǎ ɖɔ é. Un ɖo nukún ɖó xó e ɖɔ wɛ a ɖe é káká bɔ nukún ce bó bɔ un ɖɔ: “Hwetɛ́nu a nǎ dó gbɔ nú mì dó?” Wǔtu ce bǐ wló anyǔglo e ɖo azɔ nu é ɖɔhun, có un wɔn tito towe lɛ́ɛ ǎ. Azǎn nabí ká kpo nú mì bɔ un ná nɔ gbɛ xɔ? Hwetɛ́nu a nǎ ɖó hwɛ nú mɛ e ɖo ya dó nú mì wɛ lɛ́ɛ? Goyítɔ́ lɛ́ɛ nɔ́ kun do ɖó nukɔn nú mì; yě nɔ́ wa nǔ lě e sɛ́n towe ɖɔ gbɔn é ǎ. Nǔ e a zɔ̌n lɛ́ɛ bǐ wɛ sɔgbe. Goyítɔ́ lɛ́ɛ nɔ́ nɔ yǎyá bó nɔ́ ɖo ya dó nú mì wɛ; wǎ dó alɔ mì. Kpɛɖé wɛ kpo bɔ yě ná hu mì; nyɛ ɔ́, un ka gɔn sɛ́n towe lɛ́ɛ nyi gbeɖé ǎ. Kpɔ́n dó xomɛnyínyɔ́ towe wú bó hɛn mì ɖó gbɛ, hɛn mì ɖó gbɛ, bónú má nɔ gbejí nú sɛ́n e tɔ́n sín nu towe mɛ lɛ́ɛ. Mawu Mavɔmavɔ, xó towe ná nɔ ayǐ káká sɔ́yi, tɛnmɛ tɔn ɖo sɛ́xwé tɛgbɛ. Gbejíninɔ towe ná nɔ ayǐ káká yi káká sá. A lǐ ayǐkúngban ɔ́ bɔ é lí dǒ ganjí. Gbeta towe e a ɖe tɔ́n lɛ́ɛ wú wɛ nǔ bǐ ɖo te káká wá jɛ égbé, ɖó nǔ bǐ wɛ ɖo acɛ towe glɔ́. Ényí sɛ́n towe nyinyi má kó nɔ́ víví nú mì ǎ ɔ́, un ná kó kú dó ya ce mɛ. Un ná wɔn nǔ e a ɖɔ lɛ́ɛ gbeɖé ǎ, ɖó yě jí wɛ a nǎ gbɛ mì gbɔn. Towe wɛ un nyí, hwlɛ̌n mì, ɖó un ɖo sɛ́n towe lɛ́ɛ ba wɛ. Mɛdídá lɛ́ɛ ɖo te bó ná hu mì, lo ɔ́, ayi ce ɖo sɛ́n towe lɛ́ɛ jí. Un mɔ ɖɔ nǔ bǐ wɛ ɖó vivɔnu, lo ɔ́, nǔ e a zɔ̌n ɔ́ ɖó vivɔnu ǎ. Un yí wǎn nú sɛ́n towe lóóo. É wú wɛ un nɔ lin tamɛ dó hwebǐnu. Nǔ e a zɔ̌n ɔ́ wú wɛ un ɖó nǔnywɛ́ hú kɛntɔ́ ce lɛ́ɛ, ɖó é ná nɔ ayi ce mɛ káká sɔ́yi. Un tunwun nǔ hú mɛ̌si ce lɛ́ɛ bǐ, ɖó sɛ́n towe lɛ́ɛ wú wɛ un nɔ lin tamɛ dó. Un ɖó nukúnnú mɔ jɛ nǔ mɛ hú degénɔ kpikpoe lɛ́ɛ, ɖó sɛ́n towe lɛ́ɛ nyínyí nɔ́ myá nukún nú mì. Un nɔ lɔn nú afɔ ce nɔ tɛ ali nyanya ɖé jí ǎ, bó ná dó sixú xwedó xó towe. Un nɔ ɖó wǔ zɔ nú gbeta e a ɖe tɔ́n lɛ́ɛ ǎ, ɖó hwi wɛ ɖo nǔ kplɔ́n mì wɛ. Xó towe víví ɖo nu ce mɛ mɛ nya! É víví ɖo nu ce mɛ hú wǐin. Sɛ́n towe lɛ́ɛ wɛ nɔ́ ná nukúnnú mɔ jɛ nǔ mɛ mì; énɛ́ wú wɛ un gbɛ́ wǎn nú ahizi. Xó towe wɛ nyí zogbɛ́n e nɔ́ xlɛ́ fí e un ná tɛ afɔ é mì, é wɛ nyí wěziza ɖo ali ce jí. Un xwlé nǔ ɖɔ un ná xwedó gbeta towe lɛ́ɛ; gbeta towe lɛ́ɛ sɔgbe; un ná ɖe akpá e un dó é. Gbɛ ce blá wǔ mɛ nya! Mawu Mavɔmavɔ, hɛn mì ɖó gbɛ lě e a ɖɔ gbɔn é. Mawu Mavɔmavɔ, kɛnklɛ́n yí kú e dó nú we wɛ un ɖe gbɔn ɖɛ mɛ é; kplɔ́n gbeta towe lɛ́ɛ mì. Gbɛ ce ɔ́, agbǎgbáɖá jɛ́n é ɖe tɛgbɛ, có un ka wɔn sɛ́n towe gbeɖé ǎ. Mɛdídá lɛ́ɛ nɔ́ ɖo mɔ ɖó nú mì wɛ, có un jó sɛ́n towe lɛ́ɛ dó ǎ. Sɛ́n towe lɛ́ɛ wɛ nyí dɔkun tɛgbɛ tɔn ɖo así ce, yě nɔ́ dó xomɛhunhun nú mì. Un zin alɔ dó akɔ́n bó ná xwedó tito towe lɛ́ɛ hwebǐnu, un ná xwedó káká sɔ́yi. Un gbɛ́ wǎn nú ɖɛ̌ we ɖiɖɔ, bó ka yí wǎn nú sɛ́n towe. Hwi wɛ nyí bibɛtɛn ce, bó nyí gǎglónú ce, un ɖo te kpɔ́n xó e a nǎ ɖɔ é. Mɛdídá lɛ́ɛ e mi, mi sɛ yi zɔ nú mì; mi yi zɔ bónú ma bló nǔ e Mawu ce zɔ́n lɛ́ɛ. Mawu, hɛn mì lě e a ɖɔ gbɔn é, bónú ma nɔ gbɛ; un ɖo nukún ɖó we wɛ, ma dó winnyá mì ó. Nyǐ gǎnjɛwú ce bónú ma gán, jlǒ towe wíwá ná nɔ́ myá nukún nú mì hwebǐnu. A gbɛ̌ wǎn nú mɛ e jó tito towe lɛ́ɛ dó bó ɖo ali bǔ wɛ lɛ́ɛ, ɖó nǔ e yě nɔ́ lin é bǐ wɛ nyí adingban. A nǎ kplɔ́ mɛdídá lɛ́ɛ bǐ sín ayǐkúngban ɔ́ jí zunkɔ́ ɖɔhun; énɛ́ ɔ́ wú wɛ un yí wǎn nú sɛ́n towe lɛ́ɛ. Un nɔ ɖo sísɔ́ sísɔ́ wɛ, ɖó a dǒ xɛsi, un nɔ ɖó sísí nú hwɛ e a nɔ ɖɔ lɛ́ɛ. Un nɔ wa nǔ ɖó sɛ́nxwi jí bó nɔ́ zán hwɛjijɔ; ma jó mì nú mɛ e ɖo títáfú mì wɛ lɛ́ɛ ó. Zin alɔ dó akɔ́n nú mì ɖɔ nǔ ce ná nyɔ́; ma jó mì dó nú goyítɔ́ táfú mì ó. Un ɖo nukún ɖó hwlɛngán towe wɛ káká bɔ nukún ce bo. Mɔ̌ ɖokpó ɔ́ wɛ un ɖo nukún ɖó hwɛjijɔ e sín akpá a dǒ é wɛ. Nyɔ̌ xomɛ dó wǔ ce, kplɔ́n tito towe lɛ́ɛ mì. Mɛsɛntɔ́ towe wɛ un nyí, nǎ nukúnnú mɔ jɛ nǔ mɛ mì, bónú ma mɔ nǔ jɛ sɛ́n towe lɛ́ɛ wú. Mawu Mavɔmavɔ, hwenu su bɔ a nǎ kɛ nu, ɖó è ɖo sɛ́n towe gba wɛ. Nyɛ ɔ́, un yí wǎn nú nǔ e a zɔ̌n lɛ́ɛ hú siká, un yí wǎn nú yě hú siká akú. Un mɔ ɖɔ sɛ́n towe lɛ́ɛ bǐ sɔgbe bɔ nǔ vɔ ɖ'é wú. Un gbɛ́ wǎn nú adingbanxó bǐ. Sɛ́n towe lɛ́ɛ nyɔ́ bɔ nǔ vɔ ɖ'é wú, énɛ́ wú wɛ un ɖó kan dó yě wú bó nyi. È tín xó towe mɛ nú mɛɖé ɔ́, mɛ ɔ́ nɔ́ mɔ wěziza; è tínmɛ nú xlonɔ ɔ́, é nɔ́ mɔ nukúnnú jɛ nǔ mɛ. Un nɔ nu xó towe mɛ e kɔ xú é ɖɔhun, ɖó nǔ e a zɔ̌n lɛ́ɛ wíwá sín akpakpa nɔ sɔ́ mì. Nyi kɔ kpɔ́n mì, nyɔ́ xomɛ dó wǔ ce, lě e a nɔ bló gbɔn nú mɛ e yí wǎn nú we lɛ́ɛ é. Sɔ́ xó towe dó hɛn mì ɖó te bónú má lí dǒ, ma lɔn nú nǔ nyanya ɖu ɖo jǐ ce ó. Hwlɛ̌n mì gán ɖo ya e dó nú mì wɛ gbɛtɔ́ lɛ́ɛ ɖe é mɛ, bónú má sixú nyi sɛ́n towe lɛ́ɛ. Nukún towe mɛ ní za wě dó nyɛ mɛsɛntɔ́ towe jí; kplɔ́n tito towe lɛ́ɛ mì. Đasin nɔ sa sín nukún ce jí tɔ ɖɔhun, ɖó è sɔ́ nɔ́ nyi sɛ́n towe ǎ. Mawu Mavɔmavɔ, hwɛjijɔnɔ wɛ a nyǐ, hwɛ e a nɔ ɖɔ lɛ́ɛ nɔ́ sɔgbe. A nǎ sɛ́n towe lɛ́ɛ dó ɖe hwɛjijɔ towe ma ɖó blɔ̌ ɔ́ kpó gbejíninɔ towe ma ɖó blɔ̌ ɔ́ kpó xlɛ́. Kɛntɔ́ ce lɛ́ɛ sín aɖi nɔ ɖó mì káká, ɖó yě jǒ nǔ e a ɖɔ lɛ́ɛ dó. Xó towe nɔ wa azɔ̌ tɔn tɛgbɛ, nyɛ mɛsɛntɔ́ towe yí wǎn nú xó towe. Gbɛ̌gɔ́nú wɛ un nyí; mɛɖé nɔ́ ké ya nú mì ǎ, có un ka wɔn sɛ́n towe gbeɖé ǎ. Hwɛjijɔ towe ɔ́, hwɛjijɔ e ɖo ayǐ káká sɔ́yi ɔ́ wɛ, sɛ́n towe nɔ́ húzú gbeɖé ǎ. Aluwɛ kpó xɛsi kpó wá xwedó wǔ ce; amɔ̌, nǔ e a zɔ̌n lɛ́ɛ wíwá nɔ víví nú mì. Sɛ́n towe lɛ́ɛ ɔ́, hwɛjijɔ e ɖo ayǐ káká sɔ́yi ɔ́ wɛ, blǒ bónú má mɔ nǔ jɛ yě wú, bó ná nɔ gbɛ. Mawu Mavɔmavɔ, un ɖo xó sú ylɔ́ we wɛ kpó ayi ce bǐ kpó; sɔ nú mì, un jló ná xwedó tito towe lɛ́ɛ. Un ɖo xó sú ylɔ́ we wɛ, wǎ hwlɛ́n mì, un ná nyi sɛ́n towe lɛ́ɛ. Un nɔ ko ɖo xó sú ylɔ́ we wɛ có ayǐtéhɔ̌nnu nɔ su, un ɖo te kpɔ́n xó e a nǎ ɖɔ é. Un nɔ ko fɔ́n có ayǐ nɔ hɔ́n, bó nɔ́ ɖo tamɛ lin dó xó towe wú wɛ. Kpɔ́n dó xomɛnyínyɔ́ towe wú, bó ɖótó gbe ce. Mawu Mavɔmavɔ, hɛn mì ɖó gbɛ lě e a ɖɔ gbɔn é. Mɛ e adǎka xixo kɛ́ɖɛ́ nɔ́ myá nukún ná lɛ́ɛ ɖo sisɛwá wɛ, yě nɔ́ xwedó sɛ́n towe ǎ. Amɔ̌, Mawu Mavɔmavɔ, hwɛ ɔ́, a ɖo akpá ce, nǔ e a zɔ̌n lɛ́ɛ bǐ wɛ nyí nǔgbó. Sɛ́n towe lɛ́ɛ ɖo ayǐ káká sɔ́yi, un tunwun mɔ̌ din ɔ́ é kó lín. Kpɔ́n ya e mɛ un ɖe ɔ́ bó hwlɛ́n mì gán, ɖó un wɔn sɛ́n towe gbeɖé ǎ. Jɛ ahwan jǐ ce bó xɔ gbɛ nú mì, hɛn mì ɖó gbɛ lě e a dǒ akpá tɔn gbɔn é. Hwlɛngán ɔ́ lín dó mɛdídá lɛ́ɛ, ɖó yě sɔ́ tito towe lɛ́ɛ dó ylɔ́ nǔɖé ǎ. Mawu Mavɔmavɔ, nǔbláwǔ kú nú mɛ towe d'agba, hɛn mì ɖó gbɛ lě e a ɖɔ gbɔn é. Mɛ e ɖo ya dó nú mì wɛ lɛ́ɛ kpó kɛntɔ́ ce lɛ́ɛ kpó sukpɔ́ ɖésú, un ka jó sɛ́n towe lɛ́ɛ dó ǎ. Un mɔ mɛsaɖutɔ́ lɛ́ɛ ɔ́, akpɔ yětɔn nɔ́ ɖó mì; un mɔ yě mɛ e ma nɔ xwedó xó towe ǎ lɛ́ɛ ɔ́, akpɔ yětɔn nɔ́ ɖó mì. Kpɔ́n lě e un yí wǎn nú sɛ́n towe lɛ́ɛ sɔ é, Mawu Mavɔmavɔ, kpɔ́n dó xomɛnyínyɔ́ towe wú bó hɛn mì ɖó gbɛ. Xó towe bǐ wɛ nyí nǔgbó, gbeta e a ɖe tɔ́n lɛ́ɛ bǐ wɛ sɔgbe, bǐ wɛ ɖo ayǐ káká sɔ́yi. Gǎn lɛ́ɛ nɔ yǎyá bó jɛ ya dó nú mì jí, amɔ̌, xó towe lɛ́ɛ kɛ́ɖɛ́ jɛ́n nyí nǔ e nɔ́ dó xɛsi nú mì é. Xó towe nɔ́ dó xomɛhunhun nú mì, dɔkun ɖaxó ɖé wɛ un jɛ ɖɔhun. Un gbɛ́ wǎn nú adingban, adingbanxó nɔ́ vɛ́ se nú mì, amɔ̌, un yí wǎn nú sɛ́n towe. Un nɔ xomlá we azɔn tɛ́nwe gbe ɖokpó, ɖó hwɛ jlɔ́jlɔ́ e a ɖɔ lɛ́ɛ wú. Sɛ́n towe ɔ́, mɛ e yí wǎn ná lɛ́ɛ ɔ́, fífá ɖaxó ɖé wɛ yě ɖó; afɔklɛ́nnú ɖěbǔ ɖe nú yě ǎ. Mawu Mavɔmavɔ, hwi ɖó nukún wɛ un ɖe bɔ a nǎ hwlɛ́n mì; énɛ́ ɔ́ wú wɛ un ɖo nǔ e a zɔ̌n lɛ́ɛ wa wɛ. Un nɔ nyi sɛ́n towe lɛ́ɛ kpó ayixa ce bǐ kpó, un yí wǎn nú sɛ́n towe lɛ́ɛ tawun. Un nɔ bló nǔ e a ɖɔ lɛ́ɛ, un nɔ nyi sɛ́n towe lɛ́ɛ; a mɔ nukúnnú jɛ nǔ e un nɔ bló lɛ́ɛ bǐ wú. Mawu Mavɔmavɔ, xó e sú wɛ un ɖe ɔ́ ní hun káká wá gɔ̌n towe. Nǎ nukúnnú mɔ jɛ nǔ mɛ mì lě e a dǒ akpá tɔn gbɔn é. Vo e sa wɛ un ɖe ɔ́ ní hun káká wá gɔ̌n towe; hwlɛ̌n mì lě e a ɖɔ gbɔn é. Un ná sɔ́ nu ce dó mlá we, ɖó a nɔ kplɔ́n tito towe lɛ́ɛ mì. Un ná sɔ́ ɖɛ̌ ce dó ɖɔ xó towe dó han mɛ, ɖó nǔ e a zɔ̌n lɛ́ɛ bǐ wɛ sɔgbe. Wǎ dó alɔ mì kpó alɔ towe kpó, ɖó sɛ́n towe lɛ́ɛ wɛ un sɔ́. Mawu Mavɔmavɔ, é jló mì tawun ɖɔ a nǐ hwlɛ́n mì; sɛ́n towe nyinyi wɛ nɔ́ víví nú mì. Mawu Mavɔmavɔ, má nɔ gbɛ, má nɔ mlá we, bónú gbeta e a ɖe tɔ́n lɛ́ɛ ní dó alɔ mì. Un ɖo flúflú wɛ lɛ̌ngbɔ́ e bú é ɖɔhun, wǎ ba nyɛ mɛsɛntɔ́ towe mɔ, ɖó un wɔn nǔ e a zɔ̌n lɛ́ɛ gbeɖé ǎ. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Hwenu e adǎn gbo mì é ɔ́, Mawu Mavɔmavɔ wɛ un sú xó ylɔ́ bɔ é sɔ nú mì. “Mawu Mavɔmavɔ, xɔ mì ɖo adingbannɔ lɛ́ɛ sí, hwlɛ̌n mì ɖo mɛblɛ́tɔ́ lɛ́ɛ sí.” Mi mɛblɛ́tɔ́ lɛ́ɛ ɔ́, étɛ́ Mawu ka ná wa xá mi? Nɛ̌ é ká ná dɔn tó nú mi gbɔn? Ahwangá nu xwíɖíxwíɖí kpó myɔkán kpó wɛ é ná da dó mi. Un ɖo toɖévomɛnu lɛ́ɛ tɛ́ntin, kanlin gbɛtɔ́ lɛ́ɛ tɛ́ntin, gbɛ ce blá wǔ mɛ nya! Un ɖo mɛ e ma nɔ ba fífá ɖěbǔ ǎ lɛ́ɛ tɛ́ntin, un ɖo yě mɛ din ɔ́, é kó lín. Un kɛ nu bó ɖɔ fífá xó lě ɔ́, ahwan te jɛ́n yě nɔ́ sí. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Un ɖo só lɛ́ɛ kpɔ́n sɛ́ dó wɛ: Fítɛ́ alɔdó ná gosín wá nú mì? Alɔdó ɔ́, Mawu Mavɔmavɔ gɔ́n wɛ é nɔ́ gosín wá nú mì, Mawu e ɖó jǐxwé kpó ayǐkúngban kpó é. É ná lɔn bɔ a nǎ ɖe afɔ nyi do ǎ. Éyɛ́ mɛ e nɔ nya xɛ ɖo jǐ we é nɔ́ dɔ́ amlɔ ǎ. Gbeɖé! Mɛ e nɔ nya xɛ ɖo Izlayɛ́li jí ɔ́, é nɔ́ sa kɔmlɔgɔ́ ǎ, é nɔ́ dɔ́ amlɔ ǎ. Mawu Mavɔmavɔ wɛ nɔ nya xɛ ɖo jǐ we, é wɛ nɔ́ cyɔ́n alɔ jǐ towe, é ɖo akpá towe. Kéze ɔ́, hwe ná wa nǔɖé nú we ǎ, zǎn mɛ ɔ́, sun ná wa nǔɖé nú we ǎ. Mawu Mavɔmavɔ ná hɛn we; nǔ ɖěbǔ ná wa we ǎ. É ná hɛn gbɛ towe. Mawu Mavɔmavɔ ná nya xɛ ɖo jǐ we ɖo yiyi towe, kpó wiwa towe kpó mɛ, sín din káká sɔ́yi. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Davídi sín han wɛ. Hwenu e è ɖɔ nú mì ɖɔ nyi ní wá mǐ ní yi Mawu Mavɔmavɔ xwé é ɔ́, é víví nú mì kpɔ́n. Jeluzalɛ́mu, mǐ ɖíe wá hɔntogbó towe lɛ́ɛ jí e! Jeluzalɛ́mu, toxo e è gbǎ ganjí é, hwi mɛ e è mɛ ahohó lɛ́ lɛ̌ dó mlɛlɛn é. Gɔ̌n towe wɛ akɔta lɛ́ɛ nɔ wá, akɔta Mawu Mavɔmavɔ tɔn lɛ́ɛ nɔ wá mlá nyǐkɔ tɔn, lě e Izlayɛ́li sín sɛ́n ɔ́ ɖɔ gbɔn é; hwi gɔ́n wɛ mɛ e nɔ ɖɔ hwɛ lɛ́ɛ sín zinkpo ɖe, axɔ́súzinkpo Davídi ví lɛ́ɛ tɔn ɖo gɔ̌n towe. Mi byɔ́ fífá nú Jeluzalɛ́mu: “Jeluzalɛ́mu, mɛ e yí wǎn nú we lɛ́ɛ ní mɔ vivo, fífá ní nɔ ahohó towe mɛ, ayi ní jɛ ayǐ nú mɛ e ɖo hɔn towe lɛ́ɛ mɛ lɛ́ɛ. Nɔví ce lɛ́ɛ kpó xɔ́ntɔn ce lɛ́ɛ kpó wú wɛ un ɖɔ fífá ní tíin nú we. Wǎn e un yí nú Mawu Mavɔmavɔ, Mawu mǐtɔn xwé ɔ́ wú wɛ un ɖo nyɔ̌ná byɔ́ nú we wɛ.” È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Un jlɔ́ kɔ bó kpɔ́n we sɛ́ dó, un kpɔ́n hwi mɛ e axɔ́súzinkpo towe ɖo sɛ́xwé ɔ́ sɛ́ dó. Kpɔ́n lě e mɛsɛntɔ́ nɔ́ ɖo gǎn tɔn lɔ nu kpɔ́n wɛ gbɔn é! Lě e mɛsɛntɔ́ nyɔ̌nu nɔ́ ɖo gǎn tɔn nyɔ̌nu lɔ nu kpɔ́n wɛ gbɔn é! Mɔ̌ wɛ mǐ ɖo Mawu Mavɔmavɔ, Mawu mǐtɔn kpɔ́n sɛ́ dó wɛ gbɔn, káká jɛ hwenu e é ná nyɔ́ xomɛ dó mǐ wú é. Kú nǔbláwǔ nú mǐ, Mawu Mavɔmavɔ, kú nǔbláwǔ nú mǐ, ɖó è sɔ́ mǐ xo kɔ́ dín. Fí e goyítɔ́ lɛ́ɛ ɖɔ slǎmɛ mǐ wú jɛ é kpé, fí e afɔtɛayǐtɔ́ lɛ́ɛ hu tɛ́ nú mǐ yi jɛ é kpé. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Davídi sín han wɛ. Ényí Mawu Mavɔmavɔ ma ka ko ɖo mǐ jí ǎ ɔ́... Izlayɛ́li togun ɔ́ ní ɖɔ mɔ̌. Ényí Mawu Mavɔmavɔ ma ka ko ɖo mǐ jí ǎ ɔ́, hwenu e gbɛtɔ́ lɛ́ɛ sí te dó mǐ jí ɔ́, hwenu e yě ɖo adǎn jí ɔ́, yě ná ko ɖi mǐ gbɛɖe gbɛɖe. Sin e ɖo hwǐn mlí wɛ é ná kó sɔ́ mǐ, tɔ ná kó bú mǐ, sin e ɖo adǎn jí ɔ́ ná kó sa gbɔn mǐ jí. Susu nú Mawu Mavɔmavɔ, ɖó é lɔn nú aɖǔ yětɔn tɛ lan mǐtɔn jí ǎ. Mǐ gló yě, xɛ jɛ te sín xɛgbényatɔ́ mɔ mɛ ɖɔhun; mɔkan ɔ́ wɛ́n, bɔ mǐ jɛ te. Alɔdó ɔ́, Mawu Mavɔmavɔ ɖésú gɔ́n wɛ é nɔ́ gosín wá nú mǐ, Mawu Mavɔmavɔ e ɖó jǐxwé kpó ayǐkúngban kpó ɔ́. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mɛ e ɖeji dó Mawu Mavɔmavɔ wú lɛ́ɛ cí Sinyɔ́ɔ só ɖɔhun: é nɔ́ dán wǔ gbeɖé ǎ, é dó ɖɔ do bó ná nɔ mɔ̌ káká sɔ́yi. Só lɛ́ lɛ̌ dó Jeluzalɛ́mu toxo ɔ́, mɔ̌ wɛ Mawu Mavɔmavɔ lɛ́ lɛ̌ dó togun tɔn gbɔn sín din káká sɔ́yi. Acɛkpikpa e nɔ xo adǎka é sixú nɔ mɛ e nɔ wa nǔ ɖó sɛ́nxwi jí lɛ́ɛ sín tomɛ ǎ; é má nyí mɔ̌ ǎ ɔ́, yě lɔ táá wá jɛ nǔ nyanya dó sin jí. Mawu Mavɔmavɔ, wa ɖagbe nú gbɛtɔ́ ɖagbe lɛ́ɛ, wa ɖagbe nú ayijlɔ́jlɔ́nɔ lɛ́ɛ! Lo ɔ́, mɛ e ɖo ali gɔ́ndɔ́n gɔ́ndɔ́n jí lɛ́ɛ ɔ́, Mawu Mavɔmavɔ, za yě kpó mɛ e nɔ wa nǔ nyanya lɛ́ɛ kpó. Mawu Mavɔmavɔ ní ná fífá Izlayɛ́li! È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Hwenu e Mawu Mavɔmavɔ lɛ́ sɔ́ Sinyɔ́ɔ ɖó tɛn e mɛ é ɖe ɖ'ayǐ é mɛ ɔ́, é cí dlɔ̌ ɖɔhun nú mǐ. Énɛ́ ɔ́, mǐ nɔ́ ɖo nǔ ko wɛ, mǐ nɔ́ ɖo xó sú wɛ kpó awǎjijɛ kpó, bɔ akɔta ɖě lɛ́ɛ nɔ́ ɖɔ: “Mawu Mavɔmavɔ bló nǔ ɖaxó nú yě.” Nǔgbó wɛ, Mawu Mavɔmavɔ bló nǔ ɖaxó nú mǐ, bɔ mǐ ɖo awǎ jɛ wɛ. Mawu Mavɔmavɔ, lɛ̌ sɔ́ mǐ ɖó tɛn e mɛ mǐ ɖe ɖ'ayǐ é mɛ, lě e a nɔ bló gbɔn bɔ tɔ nɔ sa ɖo gbětótló mɛ é. Mɛ e dó nǔkún kpó avǐ kpó ɔ́, awǎjijɛ mɛ wɛ é nɔ́ ya ɖe. Mɛ e ɖidó nǔkún dó gbé kpó avǐ kpó ɔ́, nú é yi ya nǔkún bó lɛ́ kɔ ja xwé ɔ́, é nɔ́ víví n'i. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Salomɔ́ɔ sín han wɛ. Mawu Mavɔmavɔ má mɛ xɔ ɖé ǎ ɔ́, tagba yǎyá wɛ xɔmɛtɔ́ lɛ́ɛ nɔ́ jɛ. Mawu Mavɔmavɔ ma nya xɛ ɖo toxo ɖé jí ǎ ɔ́, tagba yǎyá wɛ mɛ e ɖo toxo ɔ́ cɔ́ wɛ lɛ́ɛ ɔ́ nɔ́ jɛ. Nǔ yǎyá wa wɛ mi nɔ ɖe, bó nɔ́ fɔ́n zǎn, bó nɔ́ wá mlɔ́ ayǐ zǎn xóxó mɛ; mi nɔ ɖo tagba jɛ wɛ, bó nɔ́ ɖo nǔ e mi ná ɖu é ba wɛ. Lo ɔ́, mɛ e vɛ́ nú Mawu Mavɔmavɔ lɛ́ɛ ɔ́, amlɔ dɔ́ wɛ yědɛɛ nɔ́ ɖe bɔ é nɔ́ ná nǔɖuɖu yě. Vǐ ɔ́ dɔkun wɛ é nyí bɔ Mawu Mavɔmavɔ dó nú mɛ, vǐ wɛ nyí ajɔ bɔ é nɔ́ ná mɛ. Vǐ súnnu e è ji ɖo wǐnnyáwínnyá mɛ lɛ́ɛ ɔ́ cí gǎ e ahwanfuntɔ́ ɖé hɛn alɔ mɛ ɔ́ ɖɔhun. Nǔ nyɔ́ nú mɛ e ɖó gǎ mɔ̌hun káká bɔ gǎhɛnnú tɔn gɔ́ é; kɛntɔ́ yětɔn lɛ́ɛ kpó yě kpó kplé ɖo hwɛgun ɔ́, winnyá nɔ́ hu yě ǎ. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Nǔ nyɔ́ nú mɛ e nɔ ɖó sísí nú Mawu Mavɔmavɔ lɛ́ɛ, mɛ e nɔ mlɛ́ ali e Mawu Mavɔmavɔ ɖe lɛ́ɛ. Azɔ̌ e a wa kpó alɔ towe kpó ɔ́, a nǎ mɔ bó ɖu. Nǔ ná nyɔ́ nú we, nǔ bǐ ná zɔn nú we. Asi towe ná cí vǐwuntín e sɛ́n ganjí é ɖɔhun, ɖo xwé towe gbe; vǐ towe lɛ́ɛ ná cí olívutín ɖɔhun lɛ́ lɛ̌ dó távo towe. Mɛ e ɖó sísí nú Mawu Mavɔmavɔ ɔ́, lě e é nɔ́ xo ɖɛ dó jǐ tɔn gbɔn ɔ́ nɛ́. Mawu Mavɔmavɔ ná xo ɖɛ dó jǐ we sín Sinyɔ́ɔ só ɔ́ jí. Énɛ́ ɔ́, a nǎ mɔ̌ lě e nǔ nyɔ́ nú Jeluzalɛ́mu gbɔn ɔ́ káká jɛ kúzán towe gbe. A nǎ lɛ́ mɔ vǐ towe ví lɛ́ɛ. Mawu ní ná fífá Izlayɛ́li! È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Sín dɔ̌nkpɛ mɛ ce ɖokpóó wɛ kɛntɔ́ kó ɖo ahwan tɔ́n mì wɛ... Izlayɛ́li togun ɔ́ ní ɖɔ mɔ̌. Sín dɔ̌nkpɛ mɛ ce ɖokpóó wɛ kɛntɔ́ kó ɖo ahwan tɔ́n mì wɛ, amɔ̌, yě ká ɖu ɖo jǐ ce ǎ. Yě ɖó bǎ nú mì káká bɔ nɛgbé ce lí; yě lɛ hwɛn gbɔn nɛgbé ce. Lo ɔ́, Mawu Mavɔmavɔ ɔ́, hwɛjijɔnɔ wɛ; é sɛ́n kan e mɛdídá lɛ́ɛ dó blá mì lɛ́ɛ. Mɛ e gbɛ́ wǎn nú Sinyɔ́ɔ lɛ́ɛ bǐ ní ɖu winnyá, bó jó agɔ. Yě ní cí nǔkún e wú ɖo xɔ ta ɔ́ ɖɔhun, é nɔ́ lín cóbó nɔ́ fyɔ́ ǎ. Nǔkún-yatɔ́ nɔ mɔ hɛn alɔ mɛ ǎ, é ká kpé lɔ bónú è nǎ blá kɔ tɔn ǎ. Aligbɔntɔ́ nɔ́ ɖɔ nú yě ɖɔ Mawu Mavɔmavɔ ní dó acɛ yě jí ǎ. Mǐ xo ɖɛ dó mi jí ɖo Mawu Mavɔmavɔ nyǐkɔ mɛ. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mawu Mavɔmavɔ, adǎn wɛ ɖo gbigbo mì wɛ bɔ un dán ɖě wa gbɔn, bó ɖo xó sú ylɔ́ we wɛ. Aklúnɔ, se xó e sú ylɔ́ we wɛ un ɖe ɔ́! Đǒtó vo e sa nú we wɛ un ɖe ɔ́! Mawu Mavɔmavɔ, ényí a nǎ kpɔ́n dó hwɛ e mǐ nɔ́ hu lɛ́ɛ wú ɔ́, mɛ̌ ká ná gán ɖ'é mɛ? Amɔ̌, hwɛsɔ́kɛ ɔ́, hwi gɔ́n wɛ è nɔ mɔ ɖe, énɛ́ wú wɛ è ɖǒ ná ɖó sísí nú we. Mawu Mavɔmavɔ wɛ un ɖo te kpɔ́n, é ɖó nukún wɛ un ɖe kpó ayi ce bǐ kpó, un ɖeji dó xó tɔn wú. Un ɖo te kpɔ́n Aklúnɔ; lě e un ɖo te kpɔ́n ɛ gbɔn ɔ́ syɛ́n hú te e zǎncɔ́tɔ́ nɔ́ nɔ kpɔ́n ayǐhínhɔ́n é. Izlayɛ́li, gǎn jɛ Mawu Mavɔmavɔ wú, ɖó Mawu Mavɔmavɔ nyɔ́ xomɛ, lě e é ná bló gbɔn bó hwlɛ́n we gán ɔ́ sukpɔ́ ɖo así tɔn. Mawu Mavɔmavɔ wɛ ná hwlɛ́n Izlayɛ́li gán ɖo hwɛ tɔn lɛ́ɛ bǐ mɛ. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mawu Mavɔmavɔ, un nɔ yí go ǎ, un nɔ mɔ nyiɖée ǎ, un nɔ dó nukún kɛn ǎ, nǔ e hú gǎn mì ɔ́ nɔ́ jló mì ǎ. É nyɔ́ wa ɔ́, un ɖo fɛɛ mɛ, un vo, vǐ ɖo nɔ tɔn kɔ́n mɛ ɖɔhun. Vǐ mɔ̌hun ɖɔhun wɛ un cí, ayi ce jɛ ayǐ. Izlayɛ́li, gǎn jɛ Mawu Mavɔmavɔ wú sín din káká sɔ́yi. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mawu Mavɔmavɔ, flín Davídi, flín tagba e é jɛ lɛ́ɛ é bǐ. Flín Davídi e dó akpá nú hwi Mawu Mavɔmavɔ bo xwlé nǔ d'é jí é, flín akpá e é dó nú hwi Mawu hlɔ̌nhlɔ́nnɔ Jakɔ́bu tɔn é, é dó akpá ɖɔ: Mǐ se bɔ é ɖɔ: Akɔjijɛgbá mímɛ́ ɔ́ ɖo Efláta, bɔ mǐ yi mɔ ɖo Yaa nǔkan mɛ. Mi wá mǐ ní yi Mawu xwé gbe. Mi wá mǐ ní ɖe kɔ́ ɖo nǔ e jí é nɔ́ bɛ́ afɔ ɖó ɔ́ nukɔn. Mawu Mavɔmavɔ, kplá akɔjijɛgbá e mɛ hlɔ̌nhlɔ́n towe ɖe ɔ́ wá tɛn élɔ́ e è blǒ ɖ'ayǐ, bɔ a nǎ gbɔjɛ́ ɖe é mɛ. Mɛ e nɔ xwlé vɔ̌sánú we lɛ́ɛ ɔ́, nǔ jlɔ́jlɔ́ ní nyí awu bó nɔ kɔ nú yě; mɛ e nɔ nɔ gbejí nú we lɛ́ɛ ní nɔ sú xó kpó awǎjijɛ kpó. Kpɔ́n dó mɛsɛntɔ́ towe Davídi wú, bó má jó mɛ e a sɔ́ axɔ́sú ɔ́ dó ó. Mawu Mavɔmavɔ dó akpá nú Davídi bó xwlé éɖée n'i, akpá ɔ́ ná húzú gbeɖé ǎ; é ɖɔ: “Vǐ towe lɛ́ɛ mɛ wɛ un ná sɔ́ axɔ́sú e ná nɔ zinkpo towe jí ɔ́ ɖe. Ényí vǐ towe lɛ́ɛ nɔ gbejí nú akɔ e un jɛ xá we ɔ́, bó nyi sɛ́n e un ná kplɔ́n yě lɛ́ɛ ɔ́, vǐ yětɔn lɛ́ɛ lɔ ná nɔ zinkpo towe jí, ɖě jɛ ɖě gúdo káká sɔ́yi.” Mawu Mavɔmavɔ sɔ́ Sinyɔ́ɔ; é jló e bɔ é sɔ́ bó ná dó ɖó nɔtɛn tɔn. É ɖɔ: “Fí e ná nyí vivotɛn ce káká sɔ́yi ɔ́ ɖíe. Fí wɛ un ná nɔ, ɖó fí jló mì. Un ná ná nǔɖuɖu Sinyɔ́ɔ dó wa ɖagbe n'i, nǔɖuɖu e hu dó wamamɔnɔ e ɖo fí lɛ́ɛ ɔ́, un ná ná bǐ yě. Un ná dó hwlɛngán nú mɛ e nɔ xwlé vɔ̌sánú mì ɖo fí lɛ́ɛ awu ɖɔhun, bɔ mɛ e ɖo gbejí nú mì ɖo fí lɛ́ɛ ná sú xó kpó awǎjijɛ kpó. Un ná sɔ́ axɔ́sú syɛ́nsyɛ́n ɖokpó ɖo fí ɖo Davídi ví lɛ́ɛ mɛ ɖó zinkpo tɔn jí. Un ná hɛn axɔ́sú e un sɔ́ ɔ́ ɖó te ɖo zinkpo tɔn jí zogbɛ́n ɖo te ɖɔhun. Un ná dó winnyá kɛntɔ́ tɔn lɛ́ɛ, gǎngbákún tɔn ka ná nɔ kɛn ɖo ta tɔn.” È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́, Davídi sín han wɛ. Nɔví nɔví lɛ́ɛ ɖó gbe kpɔ́ ɔ́, é nɔ́ nyɔ́, é nɔ́ víví mɛ nya! É cí ami wǎnɖagbenɔ ɖɔhun, ami wǎnɖagbenɔ e è kɔn dó ta nú Aalɔ́ɔn é ɖɔhun, é sa gbɔn atán tɔn mɛ, é sa káká wá awu tɔn kɔ. É cí ahǔn e ja dó Ɛmɔ́ɔ só jí é ɖɔhun, ahǔn e ja dó Ɛmɔ́ɔ só jí, bó sa káká yi Sinyɔ́ɔ só lɛ́ɛ jí é ɖɔhun, ɖó fínɛ́ wɛ Mawu Mavɔmavɔ nɔ ná nyɔ̌ná tɔn mɛ ɖe, é nɔ́ ná gbɛ mɛ káká sɔ́yi káká sá. È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mi mɛ e ɖo azɔ̌ wa nú Mawu Mavɔmavɔ wɛ ɖo xwé tɔn gbe zǎn mɛ lɛ́ɛ mi, mi kpa susu nú Mawu Mavɔmavɔ. Mi dlɛ́n alɔ mitɔn dó tɛn mímɛ́ ɔ́, bó kpa susu nú Mawu Mavɔmavɔ. Mawu Mavɔmavɔ ní xo ɖɛ dó mi jí sín Sinyɔ́ɔ, é wɛ nyí jǐxwé kpó ayǐkúngban kpó ɖó tɔ́. Mi kpa Mawu Mavɔmavɔ! Mi mlá Mawu Mavɔmavɔ! Mi mɛsɛntɔ́ tɔn lɛ́ɛ mi, mi mlá ɛ! Mi mɛ e ɖo te ɖo Mawu Mavɔmavɔ xwé, ɖo Mawu Mavɔmavɔ, Mawu mitɔn sín sinsɛnxɔ mɛ lɛ́ɛ e mi, mi mlá ɛ! Mi mlá Mawu Mavɔmavɔ, ɖó Mawu Mavɔmavɔ nyɔ́. Mi mlá ɛ dó han mɛ, ɖó é fá. Mawu Mavɔmavɔ sɔ́ Jakɔ́bu bɔ é nyí étɔn; é sɔ́ Izlayɛ́li bɔ é nyí étɔn tunwuntunwun. Un tunwun ɖɔ Mawu Mavɔmavɔ kló, Aklúnɔ mǐtɔn hú gǎn nǔmɛsɛn lɛ́ɛ bǐ. Nǔ e jló Mawu Mavɔmavɔ é bǐ wɛ é nɔ́ bló. É nɔ́ bló ɖo jǐxwé, bó nɔ́ bló ɖo ayǐkúngban jí; é nɔ́ bló gbɔn xu lɛ́ɛ mɛ, bó nɔ́ bló ɖo ayǐkúngban glɔ́. É nɔ́ sɔ́ akpɔ́kpɔ́ sí te sín fí e ayǐkúngban kponu ɖó lɛ́ɛ. É nɔ́ ɖɔ bɔ jǐ nɔ́ kɛ wun bó nɔ́ ja. É nɔ́ sɔ́ jɔhɔn e é hɛn ɖó te é sí te. É hu nukɔngbéví lɛ́ɛ ɖo Ejípu, é hu nukɔngbéví gbɛtɔ́ lɛ́ɛ tɔn, é hu nukɔngbéví kanlin lɛ́ɛ tɔn. Mawu ɖe wuntun tɛnmɛ tɛnmɛ xlɛ́, é jlɛ́ nǔ tɛnmɛ tɛnmɛ ɖo Ejípu; é wa nǔ xá Ejípu xɔ́sú ɔ́ kpó azaglɔ́gán tɔn lɛ́ɛ kpó. É gba akɔta gěgé, é hu axɔ́sú syɛ́nsyɛ́n gěgé. É hu Sihɔ́ni, axɔ́sú Amɔliti lɛ́ɛ tɔn ɔ́, bó hu Ɔgu Basáni xɔ́sú ɔ́, bó hu Kanáa xɔ́sú lɛ́ɛ bǐ. É hu yě, bó sɔ́ to yětɔn jó nú togun Izlayɛ́li tɔn. Mawu Mavɔmavɔ, nyǐkɔ towe ná nɔ ayǐ káká sɔ́yi. Mawu Mavɔmavɔ, mɛ e ná wá jɔ sɔ lɛ́ɛ bǐ ná tunwun we, ɖó Mawu Mavɔmavɔ ná gbo hwɛ nú togun tɔn; mɛsɛntɔ́ tɔn lɛ́ɛ sín nǔ ná blá wǔ n'i. Nǔ e akɔta lɛ́ɛ nɔ sɛn ɔ́, kpatágan kpó siká kpó wɛ è dǒ bló, gbɛtɔ́ núwiwa wɛ ká nyí nǔ nɛ́ lɛ́ɛ bǐ. Yě ɖǒ nu, yě ká nɔ́ ɖɔ xó ǎ, yě ɖǒ nukún, yě ká nɔ́ mɔ nǔ ǎ, yě ɖǒ tó, yě ká nɔ́ se nǔ ǎ, yě ɖǒ funfún ǎ. Mɛ e bló nǔmɛsɛn énɛ́ lɛ́ɛ kpó mɛ e nɔ sɛn yě lɛ́ɛ kpó bǐ wɛ nyí nǔ ɖokpó ɔ́. Izlayɛ́li ví lɛ́ɛ e mi, mi dó kú nú Mawu Mavɔmavɔ. Aalɔ́ɔn ví lɛ́ɛ e mi, mi dó kú nú Mawu Mavɔmavɔ. Levíi ví lɛ́ɛ e mi, mi dó kú nú Mawu Mavɔmavɔ. Mi mɛ e nɔ ɖó sísí nú Mawu Mavɔmavɔ lɛ́ɛ e mi, mi dó kú nú Mawu Mavɔmavɔ. È nǐ dó kú ɖaxó ɖé nú Mawu Mavɔmavɔ sín Jeluzalɛ́mu. É ɖo Sinyɔ́ɔ só ɔ́ jí. È nǐ kpa susu nú Mawu Mavɔmavɔ. Mi kpa susu nú Mawu Mavɔmavɔ, ɖó é nyɔ́, ɖó xomɛnyínyɔ́ tɔn ɖo te káká sɔ́yi. Mi kpa susu nú Mawu Nǔbǐwúkpétɔ́, ɖó xomɛnyínyɔ́ tɔn ɖo te káká sɔ́yi. Mi kpa susu nú Aklúnɔ aklúnɔ lɛ́ɛ tɔn, ɖó xomɛnyínyɔ́ tɔn ɖo te káká sɔ́yi. É ɖokpónɔ wɛ nɔ́ bló nǔjíwǔ ɖaxó ɖaxó lɛ́ɛ, ɖó xomɛnyínyɔ́ tɔn ɖo te káká sɔ́yi. É wɛ sɔ́ nǔnywɛ́ tɔn dó bló jǐxwé, ɖó xomɛnyínyɔ́ tɔn ɖo te káká sɔ́yi. É wɛ vlɔ́n ayǐkúngban ɔ́ sɔ́ nyi sin nukún mɛ; ɖó xomɛnyínyɔ́ tɔn ɖo te káká sɔ́yi. É wɛ bló nǔ e nɔ ná wěziza ɖo jǐnukúnsin lɛ́ɛ, ɖó xomɛnyínyɔ́ tɔn ɖo te káká sɔ́yi. É bló hwe bɔ é nɔ́ kpa acɛ kéze, ɖó xomɛnyínyɔ́ tɔn ɖe káká sɔ́yi; bó ɖó sun bɔ éyɛ́ nɔ́ ɖu gǎn zǎn mɛ; ɖó xomɛnyínyɔ́ tɔn ɖe káká sɔ́yi. É wɛ hu Ejípunu lɛ́ɛ sín nukɔngbéví lɛ́ɛ; ɖó xomɛnyínyɔ́ tɔn ɖe káká sɔ́yi. É wɛ ɖe togun tɔn Izlayɛ́li tɔ́n sín yě tɛ́ntin; ɖó xomɛnyínyɔ́ tɔn ɖe káká sɔ́yi. É wɛ ɖe yě tɔ́n kpó hlɔ̌nhlɔ́n ɖaxó ɖé kpó; ɖó xomɛnyínyɔ́ tɔn ɖo te káká sɔ́yi. É wɛ má Xu Vɔvɔ ɔ́ ɖó we; ɖó xomɛnyínyɔ́ tɔn ɖo te káká sɔ́yi; bó ɖe togun tɔn Izlayɛ́li tɔ́n sín mɛ; ɖó xomɛnyínyɔ́ tɔn ɖo te káká sɔ́yi mavɔ. É ka dɔn Ejípu xɔ́sú ɔ́ kpó ahwangɔnu tɔn kpó dó é mɛ; ɖó xomɛnyínyɔ́ tɔn ɖo te káká sɔ́yi. É wɛ kplá togun tɔn yi gbětótló mɛ; ɖó xomɛnyínyɔ́ tɔn ɖo te káká sɔ́yi. É wɛ hu axɔ́sú ɖaxó ɖaxó lɛ́ɛ; ɖó xomɛnyínyɔ́ tɔn ɖo te káká sɔ́yi. É wɛ hu axɔ́sú syɛ́nsyɛ́n lɛ́ɛ; ɖó xomɛnyínyɔ́ tɔn ɖo te káká sɔ́yi. É hu Sihɔ́ni, axɔ́sú Amɔliti lɛ́ɛ tɔn ɔ́, ɖó xomɛnyínyɔ́ tɔn ɖo te káká sɔ́yi; bó hu Ɔgu Basáni xɔ́sú ɔ́, ɖó xomɛnyínyɔ́ tɔn ɖo te káká sɔ́yi; bó sɔ́ to yětɔn jó bɔ è ɖu gǔ tɔn; ɖó xomɛnyínyɔ́ tɔn ɖo te káká sɔ́yi. É ná to yětɔn mɛsɛntɔ́ tɔn Izlayɛ́li bɔ é ɖu gǔ tɔn; ɖó xomɛnyínyɔ́ tɔn ɖo te káká sɔ́yi. É wɛ flín mǐ hwenu e adǎn ɖo mǐ gbo wɛ é; ɖó xomɛnyínyɔ́ tɔn ɖo te káká sɔ́yi. É hwlɛ́n mì gán ɖo mɛ e ɖo tagba dó nú mǐ wɛ lɛ́ɛ sí, ɖó xomɛnyínyɔ́ tɔn ɖo te káká sɔ́yi. É wɛ nɔ́ ná nǔɖuɖu mɛ bǐ; ɖó xomɛnyínyɔ́ tɔn ɖo te káká sɔ́yi. Mi kpa susu nú Mawu e ɖo jǐxwé é; ɖó xomɛnyínyɔ́ tɔn ɖo te káká sɔ́yi. Mǐ jínjɔ́n Babilɔ́nu tɔ lɛ́ɛ tó; bó ɖo Sinyɔ́ɔ flín sɛ́ dó wɛ, bó ɖo avǐ ya wɛ. Mǐ fɔ kanhún mǐtɔn lɛ́ɛ kplá atín e ɖo tɔ lɛ́ɛ tó é wú. Tɔ tó fínɛ́ ɔ́, mɛ e wlí kannumɔ mǐtɔn lɛ́ɛ nɔ́ ɖɔ mǐ ní ji han; Yě nɔ́ ɖɔ: “Mi dó Sinyɔ́ɔ sín han ɖokpó bó ji nú mǐ.” Nɛ̌ mǐ ká ná ji Mawu Mavɔmavɔ sín han ɖo ayǐkúngban ɖěvo jí gbɔn? Óo! Jeluzalɛ́mu! Un wɔn we gbeɖé hǔn, alɔ ce ɖisí ɔ́ ní wɔn mì. Ényí un ma sɔ́ flín we ǎ hǔn, ényí nǔɖé sɔ́ dó xomɛhunhun nú mì hú Jeluzalɛ́mu hǔn, ɖɛ̌ ce ní tɛ́ ɖo gbla mɛ. Mawu Mavɔmavɔ, flín nǔ e Edɔ́munu lɛ́ɛ wa gbe e gbe ahwan gba Jeluzalɛ́mu é. Yě nɔ́ sú xó bó nɔ́ ɖɔ: “Mi gba toxo ɔ́ bǐ, mi gba káká bónú nǔɖé má sɔ́ ɖo te ɖo toxo ɔ́ mɛ ó.” Babilɔ́nu, zaanɖé din ɔ́, è gba hwi lɔ bǐ hánnyá. Nǔ ná nyɔ́ nú mɛ e ná sú nǔ e a wa nú mǐ ɔ́ sín axɔ́ we é. Nǔ ná nyɔ́ nú mɛ e ná wlí vǐ towe lɛ́ɛ, bó sɔ́ xo dó só wú bɔ yě ná gba hánnyá lɛ́ɛ. Davídi sín han. Mawu Mavɔmavɔ, un ɖo mlǎmlá we wɛ kpó ayi ce bǐ kpó. Un ná ɖɔ xó lómílómí dó hangbe mɛ ɖo Mawu nukɔn. Un jɛ kpo ɖo sinsɛnxɔ mímɛ́ towe nukɔn, bó ɖo mlǎmlá we wɛ, ɖó xomɛnyínyɔ́ towe ma ɖó blɔ̌ ɔ́ wú, ɖó akpá e a dǒ lɛ́ɛ kɛ́ɖɛ́ wɛ a ɖe ǎ, a lɛ̌ bló hú mɔ̌. A blǒ hú nǔ e ɖó nukún wɛ e ɖe ɖo gɔ̌n towe é. Gbe e gbe un sú xó ylɔ́ we ɔ́, a sɔ nú mì. A nǎ akɔ́nkpinkpan mì, bó ná hlɔ̌nhlɔ́n mì. Óo! Mawu Mavɔmavɔ! Axɔ́sú e ɖo ayǐkúngban jí lɛ́ɛ bǐ ná mlá we. Yě se xó e nɔ́ gosín nu towe mɛ ɔ́, yě ná mlá we. Yě ná ɖɔ nǔ e a wa lɛ́ɛ dó han mɛ: “Susu Mawu Mavɔmavɔ tɔn d'agba.” Mawu Mavɔmavɔ ɖo káká jǐxwé aga nǔgbó; é ná mɔ mɛ e nɔ sɔ́ yěɖée hwe lɛ́ɛ. É mɔ goyítɔ́ lɛ́ɛ ja sín zɔ ɔ́, é nɔ́ tunwun yě. Adǎn ɖo gbigbo mì wɛ ɔ́, a nɔ cyɔ́n alɔ xomɛsin kɛntɔ́ ce lɛ́ɛ tɔn jí, bó nɔ́ sɔ́ alɔ towe aɖisí ɔ́ dó hwlɛ́n mì. Mawu Mavɔmavɔ, nǎ jɛ hun dó jǐ we. Mawu Mavɔmavɔ, xomɛnyínyɔ́ towe ɖo te káká sɔ́yi. Ma jó nǔ e a zě alɔ towe dó bló lɛ́ɛ dó ó. Hanjigbɛ́gán ɔ́ sín Ɖɛhanwéma mɛ wɛ han élɔ́ ɖe. Davídi sín han wɛ. Mawu Mavɔmavɔ, a mɔ nukúnnú jɛ ayi ce mɛ, a tunwun mì bǐ. A nɔ tunwun hwenu e un nɔ jínjɔ́n ayǐ é, bó nɔ́ tunwun hwenu e un nɔ sí te é. Un ɖo nǔɖé lin wɛ ɔ́, a nɔ ko mɔ sɛ́ dó. A nɔ tunwun hwenu e un nɔ ɖi zɔnlin é, bó nɔ́ tunwun hwenu e un nɔ mlɔ́ ayǐ é. A nɔ tunwun nǔ e un nɔ wa lɛ́ɛ bǐ. Mawu Mavɔmavɔ, xó ɔ́ nɔ́ kó tɔ́n sín nu ce mɛ, cóbónú a nɔ ko tunwun xó e ɖɔ gbé un ja é bǐ ǎ. A ɖo nukɔn ce, a ɖo gǔdo ce, a lɛ́ lɛ̌ dó mì bǐ, alɔ towe ɖo jǐ ce. Káká bǎ e mɛ a tunwun mì yi jɛ ɔ́ kpácá mì, un tunwun lě e un ná jlɛ́ gbɔn ɔ́ lɔ ǎ. Fítɛ́ un ka sixú yi bɔ a ma sixú yi ǎ? Fítɛ́ un ka sixú hɔn yi bɔ a ma sixú mɔ mì ǎ? Un yi jǐxwé ɔ́, a ɖo dɔ̌n. Un yi kútomɛ ɔ́, a ɖo dɔ̌n. Un na bo zɔn xɛ ɖɔhun, bó yi cí fí e hwe nɔ tɔ́n sín é, abǐ fí e hwe nɔ yi xɔ ɖe ɔ́, a ɖo fínɛ́ lɔmɔ̌, bó ná kplá mì, aɖisí lɔ towe ná hɛn mì. Ényí un ɖɔ: “Ablu ní cyɔ́n mì, kéze ní húzú zǎn lɛ́ lɛ̌ dó mì.” Nú un ɖɔ mɔ̌ ɔ́, ablu ɔ́ nɔ́ lɛ́ húzú wěziza nú hwɛ, zǎn nɔ́ lɛ́ za wě kéze ɖɔhun; zǐnflú kpó wěziza kpó ɔ́, nǔ ɖokpó ɔ́ wɛ yě nyí nú hwɛ. Hwi wɛ bló ayi e ɖo xo ce mɛ é, hwi wɛ ján mì ɖo nɔ ce xo mɛ. Un dó kú nú we ɖó a blǒ mì bɔ un nyɔ́ kpɔ́n ɖésú. Nǔ e a blǒ lɛ́ɛ bǐ nyɔ́ kpɔ́n, un tunwun ganjí. Hwenu e a ɖo blǒbló mì wɛ ɖo nǔglɔ́ ɔ́, hwenu e a ɖo jǐnján mì wɛ ɖo nɔ ce xomɛ ɔ́, agbaza ce sixú hwlá nǔ ɖěbǔ dó we ǎ. Hwenu e kɛ́n jɛ nɔ ce wú é jɛ́n a ko mɔ mì, a ko wlán azǎn nabí e un ná nɔ gbɛ xɔ é dó wěma towe mɛ, có azǎn énɛ́ lɛ́ɛ ɖokpó ká kó wá ǎ. Mawu, nǔ e ɖo ayi towe mɛ lɛ́ɛ ɔ́, un sixú mɔ nǔ jɛ wú gbeɖé ǎ; nǔ e ɖo ayi towe mɛ lɛ́ɛ sukpɔ́ lóóo! Un sixú xa bǐ ǎ; yě sukpɔ́ hú kɔ́ e ɖo xuta é. Un na bo kpé wú bó xa bǐ ɔ́, un ná sixú mɔ nukúnnú jɛ wǔ we yi kpé ǎ. Mawu ce, nú a hu mɛdídá lɛ́ɛ ɔ́, nú a sɛ mɛhutɔ́ énɛ́ lɛ́ɛ dó zɔ nú mì ɔ́, é ná nyɔ́ mɛ! Kɛntɔ́ towe lɛ́ɛ nɔ́ sɔ́ nyǐkɔ towe dó blɛ́ mɛ, yě nɔ́ sɔ́ nyǐkɔ towe ɖó nu dó xo dǎka. Mawu Mavɔmavɔ, nɛ̌ un ma ka ná gbɛ́ wǎn nú mɛ e gbɛ́ wǎn nú we lɛ́ɛ ǎ gbɔn? Mɛ e nɔ tɔ́n ahwan we lɛ́ɛ ɔ́, un mɔ yě ɔ́, nǔ yětɔn ma ná vɛ́ wǔ ce ǎ gbɔn? Un gbɛ́ wǎn nú yě titewungbe, kɛntɔ́ wɛ un sɔ́ yě dó ɖó. Mawu ce, kpɔ́n xo ce mɛ bǐ! Kpɔ́n lě e un ɖe é, kpɔ́n nǔ e ɖo gbigbo mì wɛ ɖo ayi mɛ é! Kpɔ́n ɖɔ ali nyanya wɛ un wlí a jí, bó dɔn mì ɖó ali e nyí towe é jí, ali e nyí towe káká sɔ́yi é jí. Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu Mavɔmavɔ, hwlɛ̌n mì ɖo mɛdídá lɛ́ɛ sí, xɔ mì ɖo alǎnnúwatɔ́ lɛ́ɛ sí. Nǔ nyanya e yě ná dó sin é wú lin tamɛ dó wɛ jɛ́n yě nɔ́ ɖe, ayǐ hɔ́n tɛgbɛ ɔ́, ahwan te jɛ́n yě nɔ́ ɖe; ɖɛ̌ yětɔn ɔ́, dan aɖǐvɛ́nɔ wɛ, Xó e nɔ́ tɔ́n sín nu yětɔn mɛ ɔ́ nɔ́ hu mɛ jakpata sín aɖǐvɛ́ ɖɔhun. Mawu Mavɔmavɔ, ma nú un jɛ mɛdídá lɛ́ɛ sín fɛn mɛ ó, xɔ mì ɖo alǎnnúwatɔ́ lɛ́ɛ sí. Lě e yě ná wa gbɔn bó zin mì dɛ́ ɔ́ jɛ́n ɖo ayi yětɔn mɛ. Goyítɔ́ lɛ́ɛ ɖó mɔ nú mì, yě ɖó kanmɔ nú mì; yě dlɛ̌n ɖɔ ɖó alixo nú mì, yě ɖó gɛ̌ nú mì. Un ɖɔ nú Mawu Mavɔmavɔ ɖɔ: “Mawu Mavɔmavɔ, Mawu ce wɛ a nyǐ, kɛnklɛ́n, ɖǒtó vo e sa nú we wɛ un ɖe é! Mawu Mavɔmavɔ, Aklúnɔ ce, hwi wɛ nyí hlɔ̌nhlɔ́n ce, hwi wɛ nyí mɛhwlɛ́ngántɔ́ ce, hwi wɛ nɔ nya xɛ ɖo jǐ ce ɖo ahwangbénu. Mawu Mavɔmavɔ, ma lɔn nú mɛdídá lɛ́ɛ kpé nǔ e yě lin lɛ́ɛ wú bó wa ó; ma lɔn nú yě kpé tito yětɔn lɛ́ɛ wú bó bló ó, yě táá wá tɛ afɔ ayǐ.” Mɛ e lɛ́ dó mì lɛ́ɛ ɔ́, nǔ nyanya e yě sɔ́ nu yětɔn dó byɔ́ nú mì lɛ́ɛ ní jɛ dó yě jí; myɔkán ní kɔn dó yě jí; è nǐ kpíkpé yě dó myɔ mɛ, è nǐ kpíkpé yě dó do gɔngɔn mɛ, fí e yě má ná sixú tɔ́n sín gbeɖé ǎ é. Mɛ e nɔ ɖɔ mɛnú é ní ma nɔ to ɔ́ mɛ ó. Awě ní xo alǎnnúwatɔ́ hwebǐnu. Un tunwun ɖɔ Mawu Mavɔmavɔ nɔ gbo hwɛ nú lelenɔ, é nɔ́ jɛ hun dó wamamɔnɔ jí. Nǔgbó wɛ, hwɛjijɔnɔ ná mlá we, ayijlɔ́jlɔ́nɔ ná nɔ gɔ̌n towe. Davídi sín han wɛ Mawu Mavɔmavɔ, un ɖo xó sú ylɔ́ we wɛ, wǎ dó alɔ mì, hwlɛ̌n dó mì. Un ɖo xó sú ylɔ́ we wɛ hǔn, nɔ ɖótó mì. Un dlɛ́n alɔ sɛ́ dó we, ɖɛ e xo wɛ un ɖe ɔ́ ní wá gɔ̌n towe zǎlínkpɔ́n sín azɔ ɖɔhun; ɖɛ ce ní wá gɔ̌n towe gbada vɔ́ ɖɔhun. Mawu Mavɔmavɔ, nɔ hɛn nu ce, cɔ́ nufló ce lɛ́ɛ sín hɔn. Ma lɔn nú un ɖɔ xó nyanya ɖé, abǐ un wa nǔ baɖabaɖa ɖé mɛdídá lɛ́ɛ ɖɔhun ó. Ma lɔn nú un ɖu agɔ̌ xá yě ó. Ayijlɔ́jlɔ́nɔ dɔn tó nú mì, abǐ é kɛ nu dó nǔɖé wú nú mì ɔ́, wǎn e é yí nú mì é wú wɛ; un sixú gbɛ́ ǎ. Mɛdídá lɛ́ɛ nɔ́ ɖo dǎka xo wɛ, nyɛ ka nɔ ɖo ɖɛ xo wɛ tɛgbɛ. Un ɖo yɛ wa wɛ ǎ: kɛntɔ́ ce lɛ́ɛ ɔ́, nú è ko kpíkpé gǎn yětɔn lɛ́ɛ gba dó só wú ɔ́, yě ná tunwun nǔ e wú un ɖo xó ɖɔ wɛ é. Lě e ayǐ nɔ́ kɛ nu ɔ́, mɔ̌ wɛ kútomɛ ná kɛ nu bó bɛ́ xú yětɔn e gbɔn tánmɛ tánmɛ é mi. Mawu Mavɔmavɔ, Aklúnɔ ce, hwi ɖó nukún wɛ un ɖe; hwi wɛ un hɔn wá su; hɛn mì ɖó gbɛ. Hwlɛ̌n mì ɖo mɔ e yě ɖó nú mì ɔ́ mɛ, hwlɛ̌n mì ɖo gɛ̌ e ɖó nú mì wɛ nǔnyanyawatɔ́ lɛ́ɛ nɔ́ ɖe é mɛ. Dǎkaxotɔ́ lɛ́ɛ ní jɛ mɔ e yě ɖésú ɖó lɛ́ɛ mɛ, bónú nyɛ ná gán ɖ'é mɛ. Xólómílómí Davídi tɔn dó han mɛ; hwenu e é yi cí sóxo mɛ é wɛ é ji. Un ɖo axwá dó ylɔ́ Mawu Mavɔmavɔ wɛ ɖɔ é ní gɔ́ alɔ nú mì; un ɖo vo sa sɛ́ dó Mawu Mavɔmavɔ wɛ. Un sa gbɛvo ɖo nukɔn tɔn; un ɖɔ adǎn e ɖo gbigbo mì wɛ é n'i. Mawu Mavɔmavɔ, hwenu e awakanmɛ kú mì ɔ́, hwi wɛ tunwun tɔ e mɛ hwe ɖa wɛ un ɖe é; kɛntɔ́ ɖó mɔ gbɔn ali e jí un ɖe é. Nyi kɔ kpɔ́n akpá ce, kpɔ́n, mɛɖé ɖo jɛ ce jí kpɔ́n wɛ ǎ; un ka sɔ́ ɖó fí ɖé bó ná hɔn yi ǎ, mɛɖé ɖo ce ɖɔ wɛ ǎ. Mawu Mavɔmavɔ, hwi sú xó ylɔ́ wɛ un ɖe, bó nɔ́ ɖɔ: Hwi wɛ nyí bibɛtɛn ce; hwi wɛ nyí dɔkun ɖokpó e un jɛ ɖo ayǐkúngban jí fí é. Đǒtó vo e sa nú we wɛ un ɖe é, un sɔ́ ɖó hlɔ̌nhlɔ́n ɖěbǔ ǎ. Hwlɛ̌n mì gán ɖo mɛ e ɖo ya dó nú mì wɛ lɛ́ɛ sí, yě hú hlɔ̌nhlɔ́n mì. Đe mì tɔ́n sín gantɔ́ gbɛ e mɛ un ɖe é mɛ, bónú má mlá nyǐkɔ towe, ɖo gbɛtɔ́ hwɛjijɔnɔ lɛ́ɛ tɛ́ntin, ɖó ɖagbe énɛ́ e a nǎ wa nú mì é wú. Davídi sín han Mawu Mavɔmavɔ, se ɖɛ ce, ɖǒtó vo e sa nú we wɛ un ɖe é. Hwɛjijɔnɔ wɛ a nyǐ, bó nyí gbejíninɔ; bo se ɖɛ ce! Ma ɖɔ émí ná ɖɔ hwɛ xá mɛsɛntɔ́ towe ó, ɖó mɛ e ɖo gbɛ mɛ fí é ɖěbǔ mɛ́ ɖo nukɔn towe ǎ. Kɛntɔ́ ɖo gǔdo ce malɛ́málɛ́; é jló ná sɔ́ gbɛ ce xo kɔ́; é sɔ́ mì dó zǐnflú mɛ, mɛ e ko kú xóxó lɛ́ɛ ɖɔhun. Wǔ kú mì bǐ, ayi ce bǐ gbadó ɖo xomɛ. Un nɔ flín azǎn e ko wá yi lɛ́ɛ sɛ́ dó, bó nɔ́ lin tamɛ dó nǔ e a blǒ lɛ́ɛ é wú; un nɔ kpɔ́n nǔ e a zě alɔ towe dó bló lɛ́ɛ sɛ́ dó. Un kɛ awa nú we vǐ ɖo anɔ̌nu ɖɔhun; kɔ towe nɔ xú mì ayǐkúngban e ba sin kpo é ɖɔhun. Mawu Mavɔmavɔ ce, kɛnklɛ́n yǎ wǔ se ɖɛ ce; un sɔ́ tunwun nǔ e ɖo wiwa mì wɛ é bǐ ǎ; ma ɖe kɔ dó mì ó, é má nyí mɔ̌ ǎ ɔ́, un táá cí mɛ e sɔ́ dó yɔdo mɛ wɛ è ɖe é ɖɔhun. Ayǐ hɔ́n tlóló hǔn, nɔ ɖɔ lě e a nyɔ̌ xomɛ sɔ é nú mì, ɖó hwi wú wɛ un ɖeji dó; xlɛ́ ali e un ná gbɔn é mì, ɖó hwi ɖó nukún wɛ un ɖe. Mawu Mavɔmavɔ, hwlɛ̌n mì gán ɖo kɛntɔ́ ce lɛ́ɛ bǐ sí; ɖó hwi gɔ́n wɛ un hɔn wá bɛ ɖe. Kplɔ́n mì lě e un ná bló jlǒ towe gbɔn é, ɖó hwi wɛ nyí Mawu ce. Yɛ towe ɖagbe ɔ́ ní kplá mì gbɔn ali jlɔ́jlɔ́ jí. Mawu Mavɔmavɔ, nǎ gbɛ mì ɖó nyǐkɔ towe wú. Kpɔ́n dó hwɛjijɔ towe wú, bó hwlɛ́n mì sín adǎn e ɖo gbigbo mì wɛ lɛ́ɛ mɛ. Kpɔ́n dó xomɛnyínyɔ́ towe wú, bó vívá kɛntɔ́ ce lɛ́ɛ sín kún. Hu mɛ e ɖo ya dó nú mì wɛ lɛ́ɛ bǐ, ɖó mɛsɛntɔ́ towe wɛ un nyí. Davídi sín han Susu nú Mawu Mavɔmavɔ, só ce e wú un gán jɛ é! É mɛ e nɔ kplɔ́n mì ahwanfunfun, bó nɔ́ kplɔ́n mì lě e è nɔ kpé hun xá mɛ gbɔn é. Đagbewatɔ́ ce ɔ́, ahohó ce ɔ́, bibɛtɛn ce ɔ́, hwɛnɖemɛtɔ́ ce ɔ́, é wɛ nyí gǎglónú ce e glɔ́ un nɔ bɛ ta dó é. É wɛ sɔ́ togun ce ɖó acɛ ce glɔ́. Mawu Mavɔmavɔ, étɛ́ gbɛtɔ́ ka nyí lɔ tawun bɔ a ka ná tunwun i? Jinúkánɖutɔ́ alɔ atɔ́ɔ́n ɔ́, étɛ́ é ká nyí bɔ a ka ná flín i? Gbɛtɔ́ ɔ́, jɔhɔn ɖɔhun kpowun wɛ wá yi; azǎn tɔn lɛ́ɛ nɔ́ dín wá yi léwún yɛ ɖɔhun. Mawu Mavɔmavɔ, dɔn jǐnukúnsin wá do bo jɛ te. Đǒ alɔ só lɛ́ɛ wú bónú yě ní si azɔ. Đe gbe nú jǐ ní kɛwun bo gba kɛntɔ́ ce lɛ́ɛ dó. Da gǎ dó fí e yě kplé ɖe é bónú wezun kan gǎn. Dlɛ̌n alɔ towe lɛ́ɛ sín jǐ dɔ̌n bó hwlɛ́n mì gán. Yǐ mì sín tɔ e ɖi sin bó ɖo bǔbú mì wɛ lɛ́ɛ lɔ mɛ. Xó jɔ xó ɖé ɖo yě nu ǎ, nǔ e yě dó akpá ɖɔ émí ná bló lɛ́ɛ ɔ́, yě nɔ́ bló ɖě ǎ. Mawu ce, un ná ji han yɔ̌yɔ́ ɖokpó nú we. Un ná zé kanhún kanwǒnɔ dó ji han mlá we. Hwi mɛ e nɔ hwlɛ́n axɔ́sú lɛ́ɛ gán ɔ́. Hwi mɛ e hwlɛ́n mɛsɛntɔ́ towe Davídi gán ɖo hwǐ ɖíɖá nu ɔ́. Wǎ hwlɛ́n mì gán; wǎ yǐ mì sín toɖévomɛnu lɛ́ɛ sí. Xójɔxó ɖé ɖo nu yětɔn ǎ. Nǔ e yě dó akpá tɔn ɖɔ émí ná wa lɛ́ɛ ɔ́, yě bló ɖě ǎ. Vǐ súnnu mǐtɔn lɛ́ɛ ní cí atín e ɖo vǔ, bɔ ayǐ nyɔ́ ná é ɖɔhun. Vǐ nyɔ̌nu mǐtɔn lɛ́ɛ cí dotín e wú è ɖe nǔ tɛnmɛ tɛnmɛ dó ɖo hɔnmɛ é ɖɔhun. Agɔ̌ mǐtɔn lɛ́ɛ gɔ́, nǔ tɛnmɛ tɛnmɛ wɛ gɔ́ agɔ̌ mitɔn lɛ́ɛ. Gbɔ̌ mǐtɔn lɛ́ɛ ji gba; afatɔ́n (1.000) afatɔ́n wɛ yě nɔ́ ji, bó nɔ́ yi afatɔ́n afatɔ́n do wǒ wǒ gbɔn gle mǐtɔn lɛ́ɛ ta. Nyibúkpó mǐtɔn lɛ́ɛ ní nɔ́ ɖo ada gbló wɛ; ahwan ma sɔ́ wá gba mǐ ɖě ó; è sɔ́ ná wlí mɛ ɖě yi kannumɔgbénu ǎ, mi ɖě sɔ́ ná ɖo xó sú gbɔn ali jí wɛ ɖo alě ná wɛ ǎ. Nǔ nyɔ́ nú togun e nǔ ɖo mɔ̌ ná é. Nǔ nyɔ́ nú togun e sɔ́ Mawu Mavɔmavɔ dó ɖó Mawu é. Davídi sín han Mawu ce, axɔ́sú ce! Un ná nɔ́ mlá we, un ná nɔ́ dó kú nú we tɛgbɛ. Un ná dó kú nú we gbe bǐ gbe. Un ná nɔ́ mlá nyǐkɔ towe tɛgbɛ, bó ná mlá káká yi káká sá. Mawu Mavɔmavɔ kló, susu jɛ xá ɛ ɖě ɖo ɖě jí. É kló bɔ é sixú jlɛ́ ǎ. Gbɛtɔ́ lɛ́ɛ bǐ ní ɖɔ nǔ e Mawu bló lɛ́ɛ nú vǐ yětɔn, nú vǐ ná wá ɖɔ nú vǐ e yě ɖésúnɔ ná wá ji lɛ́ɛ é. Yě ní jlá nǔ ɖaxó ɖaxó e a blǒ lɛ́ɛ. Un ná ɖɔ lě e a kpé nǔ wú gbɔn é, lě e a xɔ susu sɔ é, bó ɖɔ lě e a nyɔ̌ kpɔ́n sɔ é. Un ná lin tamɛ dó nǔ ɖagbe ɖagbe e a wa lɛ́ɛ wú. Un ná ɖɔ lě e acɛkpikpa towe syɛ́n gbɔn é. Nyɛ ɔ́, un ná nɔ́ ɖɔ nǔ ɖaxó ɖaxó e a nɔ bló lɛ́ɛ. Nǔ ɖagbe ɖagbe ɖaxó ɖaxó e a blǒ lɛ́ɛ ní jlá gbejíninɔ towe. Mawu Mavɔmavɔ nyɔ́ xomɛ; mɛ nú nɔ́ blá wǔ n'i. É nɔ́ yá wǔ sin xomɛ ǎ; xomɛnyínyɔ́ tɔn d'agba. Mawu Mavɔmavɔ nyɔ́ nú mɛ bǐ. Wǎn yíyí tɔn ɖo nǔ e è blǒ lɛ́ɛ bǐ jí. Mawu Mavɔmavɔ! Nǔ e a blǒ lɛ́ɛ bǐ ná mlá we, bɔ mɛ e ɖo gbejí nú we lɛ́ɛ ná dó kú nú we. Yě ná ɖɔ lě e axɔ́súɖuɖu towe ɖó susu sɔ é, bó ná jlá lě e a kpé nǔ wú gbɔn é. Énɛ́ ɔ́, yě ná ɖɔ nǔ ɖaxó ɖaxó e a nɔ wa é nú gbɛtɔ́ lɛ́ɛ, bó ná ɖɔ lě e axɔ́súɖuɖu towe xɔ susu sɔ é nú yě. Axɔ́súɖuɖu towe ɔ́, axɔ́súɖuɖu mavɔ mavɔ wɛ, bɔ gǎnhúnǔ towe ɖo te káká sɔ́yi. Mawu Mavɔmavɔ nɔ dó alɔ mɛ e j'ayǐ lɛ́ɛ bǐ, bó nɔ́ jlɔ́ mɛ e ɖo tɔ́tɔ́ lɛ́ɛ. Hwi lɔnu wɛ mɛ bǐ nɔ́ kpɔ́n, bɔ a nɔ ná nǔɖuɖu mɛ bǐ dó gan mɛ. A nɔ hun alɔ bo nɔ ná nǔɖuɖu nǔ e kó sixú ɖo gbɛ é bǐ, bɔ yě nɔ́ ɖu nǔ gɔ́ xo. È nɔ mɔ gbejíninɔ Mawu Mavɔmavɔ tɔn ɖo nǔ e é nɔ́ wa lɛ́ɛ bǐ mɛ. È nɔ mɔ lě e é nyɔ́ xomɛ gbɔn é gbɔn nǔ e é nɔ́ wa lɛ́ɛ bǐ mɛ. Mawu Mavɔmavɔ ɖo kpɔ́ xá mɛ e nɔ sú xó ylɔ́ ɛ lɛ́ɛ bǐ; yě mɛ e nɔ ylɔ́ ɛ kpó ayi yětɔn bǐ kpó lɛ́ɛ. Nǔɖé jló mɛ e ɖó sísí n'i lɛ́ɛ ɔ́, é nɔ́ bló nú yě. Yě sú xó ɔ́, é nɔ́ se, bó nɔ́ hwlɛ́n yě gán. Mawu Mavɔmavɔ nɔ hɛn mɛ e yí wǎn n'i lɛ́ɛ bǐ, bó nɔ́ vívá mɛdídá lɛ́ɛ bǐ sín kún. Nu ce ní mlá Mawu Mavɔmavɔ, nǔ e ko sixú ɖo gbɛ é bǐ ní kpa susu n'i sín din káká sɔ́yi. Mi kpa Mawu Mavɔmavɔ! Un ɖo susu kpa nú we wɛ Mawu Mavɔmavɔ! Un kpo ɖo gbɛ ɔ́, un ná kpa susu nú Mawu Mavɔmavɔ. Afɔ ce ɖo kɔ́ gbo wɛ ɔ́, un ná mlá Mawu ce dó han mɛ. Mi ma gán jɛ gǎnhúnǔtɔ́ gbɛmɛ fí tɔn lɛ́ɛ wú ó. Gbɛtɔ́ wɛ yě nyí, yě kpé wú bó ná hwlɛ́n mɛ gán ǎ. Funfún ná jó yě dó gbe ɖokpó, bɔ yě ná lɛ́ kɔ yi kɔ́ glɔ́, bɔ gbe nɛ́ ɔ́ gbe ɔ́, linnáwa yětɔn lɛ́ɛ ná fó ɖó fínɛ́. Nǔ nyɔ́ nú mɛ e Mawu Jakɔ́bu tɔn nyí gǎnjɛwú ná é, mɛ e sɔ́ nukúnɖíɖó tɔn bǐ dó Mawu Mavɔmavɔ, Mawu tɔn jí é. É wɛ bló jǐxwé kpó ayǐkúngban kpó, bó bló xu kpó nǔ e ɖ'é mɛ lɛ́ɛ kpó; é ɖo gbejí káká sɔ́yi. É nɔ́ gbo hwɛ nú mɛ e è táfú lɛ́ɛ. É nɔ́ ná nǔɖuɖu mɛ e xovɛ́ sin lɛ́ɛ; Mawu Mavɔmavɔ nɔ ɖe mɛ e è wlǐ lɛ́ɛ nyi te. Mawu Mavɔmavɔ nɔ hun nukún nú mɛ e tɔ́n nukún lɛ́ɛ. Mawu Mavɔmavɔ nɔ jlɔ́ mɛ e ɖo tɔ́tɔ́ lɛ́ɛ. Mawu Mavɔmavɔ nɔ yí wǎn nú hwɛjijɔnɔ lɛ́ɛ. Mawu Mavɔmavɔ nɔ hɛn jǒnɔ lɛ́ɛ. Mawu Mavɔmavɔ nɔ nya xɛ ɖo tɔ́cyɔvǐ lɛ́ɛ kpó asúkúsi lɛ́ɛ kpó jí. Lo ɔ́, é nɔ́ gba tito mɛdídá tɔn lɛ́ɛ. Mawu Mavɔmavɔ ɖu axɔ́sú káká sɔ́yi. Óo! Sinyɔ́ɔ, Mawu towe tíin káká sɔ́yi. Mi kpa Mawu Mavɔmavɔ! Mi kpa Mawu Mavɔmavɔ! É nyɔ́ bɔ mǐ nǎ ji han mlá Mawu mǐtɔn, ɖó susu kpa n'i nɔ́ nyɔ́ bó sɔgbe. Mawu Mavɔmavɔ vɔ́ Jeluzalɛ́mu toxo ɔ́ bló ɖó. É kplá Izlayɛ́li ví e ɖo gbějí lɛ́ɛ bǐ wá xwé. É gbɔ azɔn nú mɛ e ayi yětɔn xo akpa lɛ́ɛ, bó súnsún ɖasin nú yě. É xa sunví nabí e ɖo jǐ é, bó ná nyǐkɔ ɖokpó ɖokpó. Mawu Mavɔmavɔ mǐtɔn kló, hlɔ̌nhlɔ́n tɔn d'agba. Nǔnywɛ́ tɔn ɖó dogbó ǎ. Mawu Mavɔmavɔ nɔ dó alɔ mɛ e nɔ sɔ́ yěɖée hwe lɛ́ɛ bɔ yě nɔ́ sí te, bó ká nɔ́ sɔ́ mɛdídá lɛ́ɛ hwe káká bɔ yě nɔ́ j'ayǐ. Mi ji han nú Mawu Mavɔmavɔ dó dó kú n'i. Mi sɔ́ kanhún dó mlá Mawu mǐtɔn. É wɛ nɔ́ sɔ́ akpɔ́kpɔ́ dó bú jǐnukúnsin ná, é wɛ ɖó jǐ bɔ é nɔ́ ja dó ayǐkúngban jí. É wɛ ɖó gběhan bɔ é nɔ́ wú gbɔn só jí. É nɔ́ ná nǔɖuɖu kanlin lɛ́ɛ. Avǔnsákɔwó lɛ́ɛ ɖo xovɛ́ ví ya wɛ ɔ́, é wɛ nɔ́ ná nǔɖuɖu yě. Hlɔ̌nhlɔ́n e ɖo ahwan-yisɔ́sú wú é wɛ nyí nǔ e xɔ akwɛ́ nukún tɔn mɛ é ǎ. Hlɔ̌nhlɔ́n e ɖo ahwanfuntɔ́ syɛ́nsyɛ́n ɖé wú ɔ́ wɛ ka nyí nǔ e nɔ́ víví n'i é ǎ. Mɛ e sín nǔ nɔ́ nyɔ́ Mawu Mavɔmavɔ nukún mɛ é wɛ nyí mɛ e nɔ sí i lɛ́ɛ; yě mɛ e nɔ gán jɛ wǔ tɔn lɛ́ɛ. Jeluzalɛ́mu, mlǎ Mawu Mavɔmavɔ. Sinyɔ́ɔ, kpa susu nú Mawu towe, ɖó é ná syɛ́nsyɛ́n nǔ e a nɔ dó sú hɔntogbó towe lɛ́ɛ é, bó xo ɖɛ dó vǐ towe lɛ́ɛ jí ɖo toxo towe mɛ. É ná fífá we ɖo ayǐkúngban towe jí, bó ná jinukún e nyɔ́ ganjí lɛ́ɛ we bɔ a ɖu gɔ́ xo. É nɔ́ ɖɔ xó nú ayǐkúngban ɔ́, bɔ nǔ e é zɔ́n wiwa lɛ́ɛ bǐ nɔ́ nyí wiwa bléwún. É nɔ́ sɛ́ laglási dó bɔ é nɔ́ wé avɔkanfún ɖɔhun; laglási ɔ́ nɔ́ gba fo jí ɖɔhun. Laglási jí ɔ́ nɔ́ ja, bó nɔ́ ná avuvɔ ɖésú. Mɛ̌ ka sixú nɔ te avuvɔ tɔn nukɔn? É ká nɔ́ lɛ́ ɖɔ xó kpowun bɔ laglási ɔ́ bǐ nɔ́ sínsín. É nɔ́ sɛ́ jɔhɔn dó bɔ laglási ɔ́ bǐ nɔ́ húzú sin bó nɔ́ sa tɔ. É ɖɔ xó tɔn nú togun tɔn Jakɔ́bu ví lɛ́ɛ. É ná sɛ́n tɔn lɛ́ɛ kpó gbeta tɔn lɛ́ɛ kpó Izlayɛ́li. É bló mɔ̌ nú akɔta ɖěvo, akɔta ɖěvo sɔ́ tunwun nǔ e é zɔ́n lɛ́ɛ ǎ. Mi kpa Mawu Mavɔmavɔ! Mi kpa Mawu Mavɔmavɔ! Mi kpa susu nú Mawu Mavɔmavɔ sín jǐxwé! Mi kpa susu n'i ɖo jǐnukúnsin! Mi wɛnsagun tɔn lɛ́ɛ mi, mi bǐ mi kpa susu n'i! Mi ahwangɔnu tɔn lɛ́ɛ mi, mi bǐ mi kpa susu n'i! Sun kpó hwe kpó e mi, mi bǐ mi kpa susu n'i! Mi sunví e nɔ kɛn lɛ́ɛ mi, mi bǐ mi kpa susu n'i! Jǐnukúnsin, hwi mɛ e ɖo aga dɔ̌n é, kpa susu n'i! Sin e ɖo jǐnukúnsin aga dɔ̌n é, hwi lɔmɔ̌ ní mlá Mawu Mavɔmavɔ, Yě ní kpa susu n'i, ɖó xó kpowun wɛ é ɖɔ bɔ yě bǐ tíin. É ɖó yě, bɔ yě tíin tɛgbɛ káká sɔ́yi. É dó sɛ́n, é ká ná gba sɛ́n lɛ́ɛ gbeɖé kpɔ́n ǎ. Nǔ e kó sixú ɖo ayǐkúngban jí lɛ́ɛ mi, mi bǐ mi kpa susu nú Mawu Mavɔmavɔ! Kanlin ɖaxó ɖaxó e ɖo xu mɛ lɛ́ɛ mi, domaɖó-azan lɛ́ɛ mi, laglási jí e nɔ gba fo ɖɔhun é, ahǔn, xu jɔhɔn, mi mɛ e nɔ se gbe n'i lɛ́ɛ, mi kpa susu n'i! Myɔ, kɛ́njí, laglási jí e nɔ́ gba fo ɖɔhun é, ahǔn, xu jɔhɔn, mi mɛ e nɔ se gbe n'i lɛ́ɛ mi, mi kpa susu n'i! Só ɖaxó ɖaxó lɛ́ɛ, kpɛví kpɛví lɛ́ɛ, atínsínsɛ́n lɛ́ɛ, mi sɛ́dlutín lɛ́ɛ, mi bǐ mi kpa susu n'i, mi gběkanlin lɛ́ɛ, kanlin e ɖo xwé gbe lɛ́ɛ, kanlin e nɔ sá gbɔn kɔ́ mɛ lɛ́ɛ, kpó ée nɔ́ zɔn gbɔn jǐ lɛ́ɛ kpó, mi kpa susu n'i! Mi axɔ́sú e ɖo ayǐkúngban jí lɛ́ɛ mi, akɔta akɔta lɛ́ɛ mi, mi gǎn gǎn lɛ́ɛ mi, mi hwɛɖɔtɔ́ ayǐkúngban jí tɔn lɛ́ɛ mi, dɔ̌nkpɛvú kpó ɖyɔ̌vǐ kpó, degénɔ kpó yɔkpɔ́vú kpó, mi bǐ mi kpa susu n'i! Mi bǐ mi kpa susu nú nyǐkɔ Mawu Mavɔmavɔ tɔn, ɖó nyǐkɔ tɔn wɛ ɖo aga nú nyǐkɔ bǐ, susu tɔn gba kpé ayǐkúngban jí, bó gba kpé sɛ́xwé. É dó hlɔ̌nhlɔ́n togun tɔn jí, Énɛ́ ɔ́ wú wɛ mɛ e ɖo gbejí n'i lɛ́ɛ nɔ́ ji han mlá ɛ; togun tɔn Izlayɛ́li nɔ ji han mlá ɛ. Mi kpa susu nú Mawu Mavɔmavɔ! Mi kpa Mawu Mavɔmavɔ! Mi ji han yɔ̌yɔ́ ɖokpó nú Mawu Mavɔmavɔ. Mi kpa susu nú Mawu Mavɔmavɔ ɖo gbejínɔtɔ́ lɛ́ɛ sín agun ɔ́ mɛ. Izlayɛ́li, j'awǎ ɖó mɛ e ɖó we é wú. Sinyɔ́ɔ ví lɛ́ɛ mi, Xomɛ ní hun mi ɖó axɔ́sú mitɔn wú. Yě ní ɖú we dó zé nyǐkɔ tɔn su. Yě ní xo hǔnví bó xo agǐdigbo dó ná susu nyǐkɔ tɔn. Đó nǔ nɔ́ víví nú Mawu Mavɔmavɔ ɖo togun tɔn mɛ. É nɔ́ ná ɖuɖéjí mɛ e è sɔ́ xo kɔ́ lɛ́ɛ bó nɔ́ dó sɔ́ yě su. Mɛ e nɔ sɛn Mawu lɛ́ɛ ní ɖu xwe bó kpa susu n'i; yě ná bó ɖo adɔ̌zan yětɔn jí hǔn, yě ní sú xó kpó awǎjijɛ kpó. Yě ní sɔ́ nu yětɔn dó ɖo Mawu mlá wɛ, bónú dɛnkpe ɖíɖá nuwenɔ ka ɖo alɔ yětɔn mɛ, bo ná ba hlɔn ɖo akɔta lɛ́ɛ mɛ, bó ná dɔn tó nú togun lɛ́ɛ. Yě ná dó wlɔ axɔ́sú yětɔn lɛ́ɛ, bó ná sɔ́ hwǐ dó hu gǎn hɔn-yitɔ́ yětɔn lɛ́ɛ. Yě ná wa nǔ yětɔn lě e Mawu kó ɖó hwɛ nú yě gbɔn bɔ è wlǎn é. Susu wɛ é nyí nú mɛ e nɔ sɛn Mawu lɛ́ɛ bǐ. Mi kpa Mawu Mavɔmavɔ! Mi kpa Mawu Mavɔmavɔ! Mi kpa susu nú Mawu ɖo nɔtɛn mímɛ́ tɔn. Mi kpa susu n'i ɖo jǐxwé, fí e hlɔ̌nhlɔ́n tɔn ɖo azɔ̌ wa ɖe wɛ é. Mi kpa susu n'i ɖó nǔ ɖaxó ɖaxó e é bló lɛ́ɛ tamɛ. Mi kpa susu n'i ɖó lě e é xɔ susu sɔ é tamɛ. Mi kún lanzo dó kpa susu n'i, mi xo kanhún kanwǒnɔ kpó kantántɔnnɔ kpó dó kpa susu n'i. Mi xo hǔnví bó ɖú we dó kpa susu n'i, mi xo kanhún dó kpa susu n'i. Mi kún kpete dó kpa susu n'i. Mi xo gan e ɖi gbe ganjí é dó kpa susu n'i. Mi xo gan sú dó kpa susu n'i. Nǔ e ɖó funfún é bǐ ní kpa susu nú Mawu Mavɔmavɔ. Mi kpa Mawu Mavɔmavɔ! Nǔnywɛ́xó Salomɔ́ɔ, Davídi ví, Izlayɛ́li xɔ́sú ɔ́ tɔn lɛ́ɛ. Xó tɔn lɛ́ɛ nɔ́ ná nǔnywɛ́ mɛ, yě nɔ́ ná kplɔ́n mɛ. Yě nɔ́ dó alɔ mɛ bɔ è nɔ mɔ nukúnnú jɛ xó jɔ xó lɛ́ɛ mɛ. Yě nɔ́ kplɔ́n nǔnywɛ́gbɛ zínzán mɛ, nǔ e sɔgbe lɛ́ɛ mɛ, nǔ e ɖo sɛ́nxwi jí lɛ́ɛ kpó nǔ e nyí nǔ jlɔ́jlɔ́ lɛ́ɛ kpó mɛ. Yě nɔ́ kplɔ́n mɛ e ma ɖó nǔnywɛ́ ɖé ǎ lɛ́ɛ, bɔ yě nɔ́ tunwun afɔ e yě ná ɖe é. Yě nɔ́ dó alɔ mɛ wínnyáwínnyá lɛ́ɛ, bɔ yě nɔ́ tunwun nǔ, yě nɔ́ lin tamɛ kpɔ́n. Mɛ e ɖó nǔnywɛ́ é ní ɖótó, bó ná yí nǔnywɛ́ dó nǔnywɛ́ jí; mɛ e nyí mɛ bíbí é lɔ ná kplɔ́n lě e é ná nɔ́ wa nǔ gbɔn é; è dǒ lǒ ɔ́, mɛ e ɖó nǔnywɛ́ é kpó mɛ e nyí mɛ bíbí é kpó ná mɔ nǔ jɛ mɛ; è ɖɔ nǔnywɛ́xó ɖé abǐ è so nǔ dó mɛ ɔ́, yě ná mɔ nǔ jɛ mɛ. Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é. Xlonɔ lɛ́ɛ wɛ nɔ́ hu tɛ́ nú nǔnywɛ́, bó nɔ́ hu nú nǔkplɔ́nkplɔ́n. Vǐ ce, ɖǒtó te bo yí kplɔ́n e ná we wɛ tɔ́ towe ɖe lɛ́ɛ; ma hɔn nǔ e nɔ towe nɔ kplɔ́n we lɛ́ɛ nyi gbě ó. Đó jɛ̌gbákún wɛ nǔ énɛ́ lɛ́ɛ nyí ɖo ta nú we, jɛ̌ wɛ yě nyí ɖo kɔ nú we. Vǐ ce, ényí nǔnyanyawatɔ́ lɛ́ɛ jló ná dɔn we dó awo mɛ hǔn, ma lɔn ó. Ényí yě ɖɔ nú we ɖɔ: “Wǎ mǐ yi! Wǎ mǐ yi tɔ wu bó ná kɔn hun kɔn nyi ayǐ! Wǎ mǐ yi ɖó mɔ nú xomɛvɔ́nɔ bó dó da ayihún ná. Mǐ nǎ mi yě gbɛɖe gbɛɖe kútomɛ ɖɔhun, mǐ nǎ bú yě kpéte yɔdo ɖɔhun. Mǐ nǎ mɔ nǔ ɖagbe ɖagbe alɔkpa alɔkpa, bɔ dɔkun ná gɔ́ xwé mǐtɔn. Wǎ mǐ yi! Hwi lɔ ná mɔ towe ɖ'é mɛ. Dɔkun mǐtɔn lɛ́ɛ bǐ ná nɔ kpɔ́.” Vǐ ce, ma xwedó mɛ mɔ̌hun lɛ́ɛ ó. Nɔ zɔ nú yě. Đó wezun wɛ yě nɔ́ dó bó nɔ yí wa nǔ nyanya. Nǔ e yě nɔ́ hwlɛ́n dó ɔ́ wɛ nyí yě ná kɔn hun kɔn nyi ayǐ. È nɔ ɖó xɛ mɔ ɖo xɛ nukún mɛ ǎ, nǔ yǎyá wɛ é ná nyí. Amɔ̌, nǔnyanyawatɔ́ lɛ́ɛ ɔ́, yě ná kɔn hun yě ɖésúnɔ tɔn kɔn nyi ayǐ wú wɛ yě nɔ́ yi tɔwu; yě ná gblé gbɛ dó nú yěɖée wú wɛ yě nɔ́ yi cí nǔglɔ́ bó nɔ́ ɖo mɛ cɔ́ wɛ. Nǔ e nɔ́ gbo mɛ e nɔ gba acɛ dó jɛ dɔkun lɛ́ɛ é nɛ́: acɛ gba dó jɛ dɔkun ɔ́, mɛ wɛ é nɔ́ hu. Nǔnywɛ́ nɔ ɖo xó sú wɛ gbɔn alixo alixo. É nɔ zé gbe dó jǐ, bó nɔ́ ɖɔ xó gbɔn tokplétɛn tokplétɛn. Gbɛtɔ́ sukpɔ́ ɖo fí ɖé ɔ́, nǔnywɛ́ nɔ́ sú xó, bó nɔ́ ɖɔ xó nú mɛ ɖo fínɛ́; é nɔ́ ɖɔ xó nú mɛ ɖo fí e è nɔ kplé xó ɖɔ ɖe lɛ́ɛ; é nɔ́ ɖɔ: “Gɔgɔnɔ e mi, káká jɛ hwetɛ́nu wɛ gɔgɔmɛninɔ ná víví nú mi yi jɛ? Mɛcákotɔ́ e mi, káká jɛ hwetɛ́nu wɛ mɛcáko ná víví nú mi yi jɛ? Xlonɔ e mi, káká jɛ hwetɛ́nu wɛ mi ná gbɛ́ wǎn nú nǔtunwuntunwun yi jɛ? Mi ɖótó nǔ e gbɛ́ nú mi wɛ un ɖe é. Énɛ́ ɔ́, un ná kɔn yɛ ce kɔn nyi mi jí, un ná bló bɔ mi ná tunwun xó ce lɛ́ɛ. Un ylɔ́ mi, mi ka dó tókúse mɛ. Un kɛ alɔ nú mi, mɛɖé ká kpɔ́n jɛ ce jí ǎ. Mi hɔn nǔ e un kplɔ́n mi lɛ́ɛ bǐ nyi gbě; mi ba ɖɔ má gba nǔɖé sín akpá nú mi ǎ. Énɛ́ ɔ́ wú wɛ hwenu e gbɛmɛwé ná xo mi ɔ́, un ná ko mi; hwenu e xɛsi ná ɖo mi jí ɔ́, un ná ɖɔ ɖɔɖɔ mi wú. Hwenu e xɛsi ná jɛ mi jí ajijimɛ jǐ e nɔ wɔ́ kpó jɔhɔn ɖaxó kpó é ɖɔhun, bɔ gbɛmɛwé ná xo mi ajijimɛ axásáxásá jɔhɔn ɖɔhun, bɔ mi ná ɖo aluwɛ mɛ, bó ná ɖo adohu adohu jí ɔ́, mi ná ylɔ́ mì, un ka ná kɛ nu ǎ; mi ná ba mì, mi ka ná mɔ mì ǎ. Mi gbɛ́ ɖɔ émí kún ná kplɔ́n lě e è nɔ nɔ gbɛmɛ gbɔn ɔ́ ó, mi gbɛ́ ɖɔ émí kún ná ɖó sísí nú nyɛ Mawu Mavɔmavɔ ó. Mi gbɛ́ wǎn nú nǔ e un kplɔ́n mi lɛ́ɛ, mi hu tɛ́ nú akpá e un gba nú mi lɛ́ɛ. Lě e mi jɔ ɔ́, mi ná ɖu le tɔn. Nǔ nyanya e mi ɖésú nɔ́ lin lɛ́ɛ ɔ́, mi ná ɖu káká bɔ é ná kpé kɔ nú mi. Đó xlonɔ ɔ́, tónú má se tɔn wɛ nɔ hu i; gɔgɔnɔ ɔ́, nǔɖé má sɔ́ ylɔ́ ɖɔ nǔ tɔn nɔ zɔ́n bɔ é nɔ́ yi dɔn. Amɔ̌, mɛ e nɔ ɖótó mì é ná nɔ vivo mɛ; ayi tɔn ná jɛ ayǐ; nǔ nyanya ɖé ná dó adohu n'i ǎ.” Vǐ ce, hɛn xó ce lɛ́ɛ ayi mɛ, hɛn nǔ e un kplɔ́n we lɛ́ɛ dó wǔ. Đǒtó nǔnywɛ́xó, nɔ́ tɛ́nkpɔ́n, bó nɔ́ mɔ nǔ jɛ mɛ. Ylɔ̌ nǔtunwuntunwun ɖɔ é ní wá gɔ́ alɔ nú émí, sú xó ylɔ́ tamɛbibɔ. Ba tamɛbibɔ ɔ́ akwɛ́ ɖɔhun; nya gbě tɔn dɔkun ɖɔhun. Énɛ́ ɔ́, a nǎ mɔ nǔ jɛ nǔ e nyí sísí ɖó nú Mawu Mavɔmavɔ ɔ́ mɛ, bó ná mɔ nǔ jɛ lě e è nɔ tunwun Mawu gbɔn é wú. Đó Mawu Mavɔmavɔ wɛ nɔ ná nǔnywɛ́, nu tɔn mɛ wɛ nǔtunwuntunwun kpó tamɛbibɔ kpó nɔ́ gosín. É nɔ́ dó alɔ hwɛjijɔnɔ lɛ́ɛ, é nɔ́ gló nǔ nú mɛ e wú è ma nɔ mɔ nǔɖé bó nɔ́ ɖɔ dó ǎ lɛ́ɛ gǎglónú ɖɔhun; é nɔ hɛn mɛ e nɔ wa nǔ ɖó sɛ́nxwi jí lɛ́ɛ, é nɔ́ kpé nukún dó mɛ e nɔ nɔ gbejí n'i lɛ́ɛ wú. Vǐ ce, nú a ɖǒtó mì ɔ́, a nǎ tunwun nǔ e nyí hwɛjijɔ é, nǔ e nyí nǔ jlɔ́jlɔ́ é, nǔ e sɔgbe é; a tunwun nǔ énɛ́ lɛ́ɛ ɔ́, a ɖo nyɔ̌ná li ɔ́ jí. Énɛ́ ɔ́, nǔnywɛ́ ná wá ayi towe mɛ, nǔtunwuntunwun wɛ ná nyí nǔ e nɔ́ víví nú we é; tamɛlinlin ná hɛn we; tamɛbibɔ ná nya xɛ ɖo jǐ we; nǔ énɛ́ lɛ́ɛ ná ɖe we sín nǔ nyanya li jí; yě ná ɖe we sín adingbannɔ lɛ́ɛ sín fɛn mɛ; yě ná hwlɛ́n we gán ɖo mɛ e nɔ jó nǔjlɔ́jlɔ́wiwa sín ali ɔ́ dó, bó nɔ́ wlí ablu mɛ li lɛ́ɛ sí. Mɛ énɛ́ lɛ́ɛ ɔ́, nǔ nyanya wiwa nɔ víví nú yě, dǎka xixo nɔ hun xomɛ nú yě. Walɔ yětɔn hízí; yě nɔ́ ɖɔ vo, bó ka nɔ wa vo. Énɛ́ ɔ́, a nǎ gló nyɔ̌nu mɛsi e nɔ ɖɔ xó víví dó flú mɛ é, a nǎ gló nyɔ̌nu e ma nyí asi towe ǎ é. A nǎ gló nyɔ̌nu e nɔ jó asú e é da ɖo wínnyáwínnyá mɛ é dó e, é wɔn akpá e é ko dó ɖo Mawu nukɔn é. Nyɔ̌nu mɔ̌hun ɔ́, xwé tɔn ɔ́, kú lixo wɛ é ɖe, zǐnzán tɔn ɔ́, kútomɛ wɛ é nɔ́ dɔn mɛ yi. Mɛ e yi gɔ̌n tɔn lɛ́ɛ ɖě sɔ́ nɔ́ lɛ́ kɔ wá ǎ, ɖě sɔ́ nɔ́ mɔ ali e è nɔ gbɔn bo nɔ wá gbɛ é ǎ. Nú a ɖǒtó nǔ e kplɔ́n we wɛ un ɖe lɛ́ɛ ɔ́, a nǎ nɔ mɛ ɖagbe lɛ́ɛ sín ali jí, a nǎ nɔ mɛ e nɔ wa nǔ jlɔ́jlɔ́ lɛ́ɛ sín ali jí. Đó mɛ e nɔ wa nǔ ɖó sɛ́nxwi jí lɛ́ɛ wɛ ná nɔ to ɔ́ mɛ, mɛ e ɖo gbejí lɛ́ɛ ná nɔ fínɛ́. Amɔ̌, mɛdídá lɛ́ɛ ɔ́, è nǎ ɖe yě sín to ɔ́ mɛ; ahizinɔ lɛ́ɛ ɔ́, è nǎ nya yě tɔ́n sín to ɔ́ mɛ. Vǐ ce, ma wɔn nǔ e un kplɔ́n we lɛ́ɛ ó; ayi towe ní nɔ nǔ e un ɖɔ hwi ní bló lɛ́ɛ jí. Đó yě wɛ ná dó azǎn azǎn jí nú we, bó dó xwe xwe jí nú we; yě ná zɔ́n bɔ nǔ ná nyɔ́ nú we. Ma gɔn xomɛ nyɔ́ gbeɖé ó, ma gɔn gbejí nɔ gbeɖé ó; sin yě dó kɔ kɔjɛ́ ɖɔhun, wlǎn yě dó ayi towe mɛ. Énɛ́ ɔ́, Mawu kpó gbɛtɔ́ lɛ́ɛ kpó ná yí wǎn nú we, bó ná mɔ ɖɔ hwi nɔ lin tamɛ kpɔ́n ganjí. Đe ji dó Mawu Mavɔmavɔ wú kpó ayixa towe bǐ kpó. Ma gán jɛ nǔnywɛ́ hwi ɖésúnɔ tɔn wú ó. Ba jlǒ Mawu Mavɔmavɔ tɔn ɖo nǔ e a nɔ wa lɛ́ɛ bǐ mɛ; énɛ́ ɔ́, é ná xlɛ́ ali we. Ma nɔ mɔ hwiɖée dó mɔ nǔnywɛ́tɔ́ ó; lo ɔ́, nɔ ɖó sísí nú Mawu Mavɔmavɔ bó jó nǔ nyanya wiwa dó. Énɛ́ wɛ ná nyí amasin nú agbaza towe, bó ná ná fífá xú e ɖo lan towe mɛ lɛ́ɛ. Sɔ́ dɔkun towe lɛ́ɛ dó sɔ́ Mawu Mavɔmavɔ su, nǎ ɛ nǔkún nukɔn nukɔntɔn e nyɔ́ ɖo gle towe mɛ lɛ́ɛ. Énɛ́ ɔ́, jinukún ná gɔ́ agɔ̌ towe lɛ́ɛ túnflá, bɔ vɛ̌ɛn ná gɔ́ vɛ̌ɛnhɛnnú towe túnflá. Vǐ ce, Mawu Mavɔmavɔ dɔn tó nú we hǔn, ma hu tɛ́ ná ó; é gbɛ́ nǔɖé nú we hǔn, ma nú é kpé agbɔ̌n nú we ó. Đó Mawu Mavɔmavɔ nɔ gbɛ́ nǔ nú mɛ e é yí wǎn ná é, lě e tɔ́ nɔ́ gbɛ́ nǔ nú vǐ e é yí wǎn ná é. Nǔ nyɔ́ nú mɛ e húzú nǔnywɛ́tɔ́ é! Nǔ nyɔ́ nú mɛ e ɖó tamɛbibɔ é! Nǔnywɛ́ ɖíɖó nyɔ́ hú akwɛ́ ɖíɖó; le e nɔ tɔ́n sín nǔnywɛ́ mɛ é xɔ akwɛ́ hú siká. Nǔnywɛ́ xɔ akwɛ́ hú jɛ̌. È xo nǔ e nɔ́ jló we lɛ́ɛ bǐ kplé ɔ́, yě xɔ akwɛ́ sɔ nǔnywɛ́ ǎ. Jidɔ́ ɖo alɔ tɔn ɖokpó mɛ, bɔ dɔkun kpó susu kpó ɖo alɔ tɔn wegɔ́ mɛ. Ali e nǔnywɛ́ nɔ́ kplá mɛ gbɔn lɛ́ɛ bǐ wɛ nyí ali ɖagbe. Ali tɔn lɛ́ɛ bǐ wɛ nɔ́ ná fífá mɛ. Nǔnywɛ́ ɔ́, atín e nɔ́ ná gbɛ mɛ é wɛ é nyí nú mɛ e ɖó lɛ́ɛ; nǔ nɔ́ nyɔ́ nú mɛ e nɔ hɛn nǔnywɛ́ majómájó lɛ́ɛ. Nǔnywɛ́ wɛ Mawu Mavɔmavɔ dó ɖó ayǐkúngban ɔ́ ná, bó sɔ́ nukúnnú mɔ jɛ nǔ wú tɔn dó ɖó jǐnukúnsin ɔ́ ná. Mawu Mavɔmavɔ ɔ́, do mɔ nú nǔ tɔn wɛ é zán bɔ sin e ɖo domaɖó-azan mɛ ɔ́ gba wu kɔn nyi ayǐkúngban ɔ́ jí bɔ akpɔ́kpɔ́ húzú jǐ. Vǐ ce, ma nú ayi ɖo te kpó tamɛ lin cóbó wa nǔ kpó nɔ zɔ nú we ó; hɛn yě. Yě wɛ ná nyí gbɛ towe, bó nyí acɔ́nú nú kɔ towe. Énɛ́ ɔ́, a ɖo ali towe jí bó ɖo yiyi wɛ ɔ́, a nǎ ɖeji, a nǎ klɛ́n afɔ ǎ. A xwe xɔ ɔ́, a nǎ ɖi xɛsi ǎ, amlɔ towe ná víví. Ma ɖi xɛsi nú adǎn e nɔ́ wá gbo mɛ ajijimɛ ɔ́ ó; ma ɖi xɛsi ɖɔ mɛdídá ná wá tɔ́n ahwan émí ó. Đó Mawu Mavɔmavɔ wɛ ná nyí gǎnjɛwú towe; é ná lɔn bónú afɔ towe ná tɛ mɔ ɖé mɛ ǎ. Ényí nǔɖé hu dó mɛ ɖé, bɔ a ɖǒ hlɔ̌nhlɔ́n tɔn bó ná bló n'i hǔn, ma gbɛ́ ó. Nǔ e ba wɛ nɔzo towe ɖe ɔ́ ɖo así towe bɔ a hɛn ɔ́ a nǎ ná ɛ azɔn ɖokpó hǔn, ma ɖó sɔ n'i ó. Nɔzo towe e kpó hwi kpó ɖo kpɔ́ bɔ é ɖeji dó wǔ towe ɔ́, ma lin nyanya tɔn ó. Mɛ e ma wa nǔɖé nú we ǎ ɔ́, ma ba jlɛ ɛ ó. Ma nú dǎkaxotɔ́ sín gbɛ jló we ó; ma kpɔ́n dó walɔ tɔn lɛ́ɛ wú dó wa nǔ ɖěbǔ ó. Đó Mawu Mavɔmavɔ gbɛ́ wǎn nú mɛdídá lɛ́ɛ, bó ká nɔ́ zun xɔ́ntɔn xá mɛ e nɔ wa nǔ jlɔ́jlɔ́ lɛ́ɛ. Nu wɛ Mawu Mavɔmavɔ nɔ dó mɛdídá lɛ́ɛ sín xwédo, bó ká nɔ xo ɖɛ dó mɛ e nɔ wa nǔ jlɔ́jlɔ́ lɛ́ɛ sín xwédo jí. Mawu Mavɔmavɔ nɔ ko mɛcákotɔ́ lɛ́ɛ, bó ká nɔ ná fɛ́nú mɛ e nɔ sɔ́ yěɖée hwe lɛ́ɛ. Mɛ e ɖó mɛxóyixa lɛ́ɛ ɔ́, Mawu Mavɔmavɔ ná sɔ́ yě su; amɔ̌, xlonɔ lɛ́ɛ ɔ́, winnyá wɛ ɖo te kpɔ́n yě. Vǐ ce lɛ́ɛ mi, mi ɖótó nǔ e kplɔ́n mi wɛ tɔ́ mitɔn ɖe é. Mi ɖótó te ganjí bó ná dó mɔ nukúnnú jɛ nǔ mɛ, ɖó nǔ ɖagbe kplɔ́n mi wɛ un ɖe. Mi ma hɔn xó ce lɛ́ɛ nyi gbě ó. Hwenu e un ɖo vǔ ɔ́, nɔ ce yí wǎn nú mì ɖésú vǐ ɖokpónɔ ɖɔhun; tɔ́ ce nɔ́ ɖo nǔ kplɔ́n mì wɛ; é nɔ́ ɖɔ: “Hɛn xó ce lɛ́ɛ ayi mɛ, xwedó nǔ e un ɖɔ nú we lɛ́ɛ; énɛ́ ɔ́, a nǎ nɔ gbɛ. Yǐ nǔnywɛ́, ɖǒ nukúnnú mɔ jɛ nǔ mɛ. Ma wɔn xó e ɖɔ nú we wɛ un ɖe lɛ́ɛ ó. Ma dó vɛ̌ nú xó e nɔ́ gosín nu ce mɛ lɛ́ɛ ó. Ma jó nǔnywɛ́ dó ó, é ná hɛn we; yí wǎn nú nǔnywɛ́, é ná nya xɛ ɖo jǐ we. Fí e nǔnywɛ́ bɛ́ sín ɔ́ ɖíe: Nɔ yí nǔnywɛ́, bɛ̌ nǔ e ɖo así towe lɛ́ɛ bǐ jó dó yí nukúnnú mɔ jɛ nǔ mɛ. Sɔ́ nǔnywɛ́ ɖó tɛn ɖaxó mɛ; énɛ́ ɔ́, é ná sɔ́ we d'aga. A kplá así kɔ n'i ɔ́, é ná wlí yɛ̌yi nú we. É ná sɔ́ jɛ̌gbákún ɖo ta nú we; é ná sɔ́ axɔ́súwuntun ɖó ta nú we.” Vǐ ce, ɖǒtó mì, se xó ce lɛ́ɛ; énɛ́ ɔ́, xwe ná jɛ xwe jí nú we. Un xlɛ́ nǔnywɛ́ sín ali we, un kplá we ɖó nǔjlɔ́jlɔ́wiwa sín ali jí. A ɖo yiyi wɛ ɔ́, a nǎ klɛ́n afɔ ǎ; a ɖo wezun jí ɔ́, a nǎ nyi afɔ dǎmɛ ǎ. Hɛn nǔ e a kplɔ́n é, ma jó dó ó; hɛn dó wǔ syɛ́nsyɛ́n, ɖó é wɛ nyí gbɛ towe. Ma sɔ́ mɛdídá lɛ́ɛ sín ali ó; ma gbɔn mɛ nyanya lɛ́ɛ sín ali jí ó. Ma lɔn bo sɔ́ ali énɛ́ gbeɖé ó, gbɔn zɔ ná. Mɛ énɛ́ lɛ́ɛ má dó nǔ nyanya sin ǎ ɔ́, yě nɔ́ dɔ́ amlɔ ǎ. Gbɛtɔ́ má jɛ ayǐ dó alɔ yětɔn kɔ ǎ ɔ́, adɔ̌ wɛ nɔ vɛ́ yě. Adǎka e yě nɔ́ xo ɔ́ wɛ nyí nǔɖuɖu yětɔn; alǎnnú e yě nɔ́ wa ɔ́ wɛ nyí vɛ̌ɛn bɔ yě nɔ́ nu. Mɛ e nɔ wa nǔ jlɔ́jlɔ́ lɛ́ɛ sín ali cí wěziza zǎnzǎn tɔn ɖɔhun; é nɔ́ ɖo hǐnhɔ́n wɛ, é nɔ́ ɖo hǐnhɔ́n wɛ káká bó nɔ́ wá hɔ́n bǐ, bó nɔ́ cí wěziza hwemɛ tɔn ɖɔhun. Mɛdídá lɛ́ɛ sín ali ka cí ablu ɖɔhun; yě nɔ́ tunwun nǔ e ɖo yě ná zindɛ́ wɛ é ǎ. Vǐ ce, ɖǒtó xó ce; xó e ɖɔ wɛ un ɖe lɛ́ɛ ɔ́, ɖǒtó te ganjí bó se. Ma nú xó énɛ́ lɛ́ɛ nɔ zɔ nú we ó, hɛn yě dó ayi towe mɛ syɛ́nsyɛ́n, ɖó xó énɛ́ lɛ́ɛ wɛ nɔ ná gbɛ mɛ e nɔ yí yě lɛ́ɛ, bó nɔ́ hɛn lanmɛ yětɔn ɖó ganjí. Hɛn ayi towe hú nǔ bǐ, ɖó fí e gbɛ towe sín azinkan ɖe ɔ́ nɛ́. Ma dó nu adingbanxó mɛ ó, ma nɔ ɖɔ mɛ nǔ ó; a ɖo gbɛtɔ́ ná kpɔ́n wɛ hǔn, nɔ kpɔ́n nukún tɔn mɛ tlɔlɔ, nɔ́ kpan nukɔn mɛ ɔ́ ganjí bó nɔ́ kpɔ́n ɛ. Cóbónú a nǎ sɔ́ ali ɖé hǔn, nɔ lin tamɛ kpɔ́n ganjí; ali e ɖó gǎnjɛwú é wɛ a nǎ mlɛ́. Ma zɛ dó aɖisí ó, ma ka zɛ dó amyɔ ó. Nɔ zɔ nú nǔ nyanya. Vǐ ce, ɖǒtó te ganjí bó se xó e ɖɔ wɛ un ɖe é; nǔnywɛ́xó wɛ, bǐbíxó wɛ. Énɛ́ ɔ́, a nǎ nɔ́ lin tamɛ kpɔ́n, bɔ xó towe lɛ́ɛ ná ɖe xlɛ́ ɖɔ a tunwun nǔ. Xó e nɔ́ tɔ́n sín mɛ ɖěvo sín asi banáwatɔ́ sín nu mɛ ɔ́, nɔ́ víví ɖi wǐin, é nɔ́ fá ami ɖɔhun. É ká wá yá ɔ́, é nɔ́ vɛ́ amavívɛ́ ɖɔhun, é nɔ́ ɖá hwǐ nuwenɔ ɖɔhun. Walɔ nyɔ̌nu mɔ̌hun tɔn ɔ́, kú wɛ é nɔ kplá mɛ yi. A jɛ gúdo tɔn ɔ́, kútomɛ wɛ é ná kplá we yi tlɔlɔ. É nɔ́ mlɛ́ gbɛli ɔ́ ǎ, é nɔ́ kó bú ali bó ká nɔ́ kó tunwun lɔ ǎ. Din ɔ́, vǐ ce, ɖǒtó mì. Ma jó xó e un ɖɔ nú we lɛ́ɛ dó ó. Hɔn nú nyɔ̌nu mɔ̌hun, ma gbɔn hɔn tɔn to lɔ vɔ́vɔ́ ó. É má nyí mɔ̌ ǎ ɔ́, é ná ɖe wi sín ta nú we, bɔ asisúnɔ ɔ́ ná gblé gbɛ dó nú we; é ná kú nǔbláwǔ nú we ǎ. Mɛ ɖěvo ná wá ɖu nǔ e a jɛ tagba bó wa lɛ́ɛ; nǔ e a jɛ dɛ̌n bó wá lɛ́ɛ ɔ́, mɛ ɖěvo wɛ ná ɖu. Fí e é ná wá fó dó ɔ́ wɛ nyí a nǎ ɖo gbɛvo sa wɛ, gbɛ towe ka ko gblé nɛ́; a sɔ́ sixú gán ǎ. Énɛ́ ɔ́, a nǎ nɔ́ ɖɔ: “Nɛ̌ ká gbɔn bɔ hwenu e è ɖo ɖiɖɔ nú mì wɛ ɔ́, un ma ka se ǎ? Nɛ̌ ká gbɔn bɔ nǔ e è gbɛ́ nú mì lɛ́ɛ ɔ́, un ma ka se ǎ? Nɛ̌ un ka bló gbɔn bó má ɖótó mɛ̌si ce lɛ́ɛ ǎ? Nɛ̌ un ka bló gbɔn bó má ɖótó nǔ e yě kplɔ́n mì lɛ́ɛ ǎ? Din ɔ́, gbɛ ce blá wǔ; mɛ bǐ kó gbɛ́ mì kɛn ɖo togun ɔ́ mɛ.” Asi towe cí tɔjɔtɛn, fí e sin ɖiɖi nɔ tɔ́n sín é ɖɔhun. Nu tɔ towe sín sin. A nǎ jó tɔ towe dó bɔ é ná sa gbɔn ali jí ali jí, toxo mɛ toxo mɛ wɛ a? Tɔ énɛ́ ní nyí hwi ɖokpónɔ géé tɔn. Ma nú mɛ ɖěvo nu xá we ó. Nǔ ní nyɔ́ nú tɔjɔtɛn towe; nyɔ̌nu e a da ɖo dɔ̌nkpɛ mɛ ɔ́ ní nyí awǎɖónú towe. Asi towe wɛ nyí wǎnyínámɔ towe. Nǔwiwa tɔn bǐ wɛ ɖo yɛ̌yi jí. Acɔ́ɖíɖó tɔn, heɖíɖó tɔn ní nɔ mú we ahan ɖɔhun. Ma nú wǎn yíyí e a ɖǒ n'i ɔ́ ɖe kpo gbeɖé ó. Vǐ ce, étɛ́wú mɛ ɖěvo nyɔ̌nu ná jló we? Étɛ́wú a nǎ ɖó he xá mɛsi? Flín ɖɔ Mawu Mavɔmavɔ ɖo nǔ e wa wɛ mɛ ɖokpó ɖokpó ɖe ɔ́ kpɔ́n wɛ. É mɔ nǔ e wa wɛ mɛ ɖokpó ɖokpó ɖe lɛ́ɛ ɖokpó ɖokpó. Mɛ e nɔ wa nyanya ɔ́, nǔ nyanya e é nɔ́ wa lɛ́ɛ jɛ́n nɔ́ wa nǔ xá ɛ; nǔ nyanya e é nɔ́ wa lɛ́ɛ wɛ nɔ́ nyí mɔ bɔ é nɔ́ sɔ́. Mɛ e ma nɔ ba ná ɖu ɖo éɖée jí ǎ ɔ́, éɖée wɛ é nɔ́ sɔ́ nyi gbě. Nǔ wa zɛ jlɛ̌ wú tɔn wɛ nɔ́ dɔn ɛ yi bú. Vǐ ce, mɛ ɖé ja axɔ́ ɖu gbé bɔ a nɔ te n'i, bó zin alɔ dó akɔ́n ɖɔ émí ná sú a? A zin alɔ mɔ̌hun dó akɔ́n nú mɛɖé a? A dǒ akpá mɔ̌hun nú mɛɖé dó dó kan hwiɖée a? Ényí nǔ nyí mɔ̌ hǔn, a jɛ axɔ́tɔ́nɔ lɔ mɛ. Din ɔ́, vǐ ce, nǔ e a nǎ wa dó ɖe ɖɛ hwiɖée ɔ́ ɖíe: yǎ wǔ yi mɔ axɔ́tɔ́nɔ ɔ́, bó sa vo n'i, bó ɖe ta sín mɛ. A ma ɖe hwiɖée sín hɔzɔ énɛ́ ɔ́ mɛ ǎ hǔn, ma gbɔjɛ́ ó; ma sa kɔmlɔgɔ́ ó. Wa nǔ agbanlín e jɛ mɔ mɛ bó lun afɔ sín mɛ ɔ́ ɖɔhun; wa nǔ xɛ e jɛ ɖɔ mɛ bó lɛ́ zɔn sín mɛ é ɖɔhun. Fɔnlínnɔ, kpɔ́n ayǐsínzɛn! Kpɔ́n nǔ dó wǔ tɔn bó dó nyɔ́ nǔ i. Ayǐsínzɛn ɔ́, mɛɖé nɔ́ nɔ azɔ̌ e wa wɛ é ɖe ɔ́ nu ǎ; é ɖó gǎn ǎ; mɛɖé nɔ́ cɔ́ ɛ ǎ. Nǔkún ya hwenu ɔ́, é nɔ ba nǔ e é ná ɖu ɔ́ ɖ'ayǐ; nǔ e é ná ɖu é ɔ́, é nɔ́ ɖó kpasin tɔn ɖ'ayǐ. Fɔnlínnɔ, káká jɛ hwetɛ́nu a ka ná nɔ ayǐmlɔ́mlɔ́ yi jɛ? Hwetɛ́nu a nǎ fɔ́n? Vɛ̌ kó ɖo má dɔ́ amlɔ kpɛɖé, má gbɔjɛ́ kpɛɖé, má mlɔ́ ayǐ, bó blá alɔ dó wǔ kpɛɖé ɖɔ wɛ. A nǎ ɖo mɔ̌ bló wɛ bɔ ya ná wá fyán we ajotɔ́ ɖɔhun; adɔ ná wá fyán we axánsúnxó ɖɔhun. Mɛ e nɔ fɔ́n bó nɔ́ ɖo adingban te ɖo yiyi wɛ ɔ́ nyí mɛɖé ǎ, gbɛtɔ́ nyanya wɛ. É nɔ́ sɔ́ nukún dó ɖɔ xó, é nɔ́ sɔ́ afɔ dó ɖɔ xó, é nɔ́ sɔ́ alɔ dó ɖɔ xó; é nɔ́ bló mɔ̌ dó blɛ́ mɛ. Ayixa nyanya kɛ́ɖɛ́ wɛ ɖo xo tɔn mɛ; nǔ nyanya lin wɛ jɛ́n é nɔ ɖe hwebǐnu, é nɔ́ dɔn hun kpé. Énɛ́ ɔ́ wú wɛ ya tɔn ná kpɔ ɖo cɛ́jú mɛ. È nǎ gblé gbɛ dó n'i ɖo nukún xwixwe ɖokpó mɛ, bɔ ɖě wa gbɔn ná hán. Vǐ ce, hɛn lě e tɔ́ towe ɖɔ hwi ní nɔ́ wa nǔ gbɔn ɔ́ ayi mɛ, má hɔn nǔ e nɔ towe kplɔ́n we lɛ́ɛ nyi gbě ó. Hɛn nǔ énɛ́ lɛ́ɛ dó ayi mɛ hwebǐnu; fɔ yě dó kɔ kɔjɛ́ ɖɔhun. A ɖo yiyi wɛ ɔ́, nǔ énɛ́ lɛ́ɛ ná nɔ́ xlɛ́ ali we, yě ná nɔ́ hɛn we ɖo adɔ̌zan towe jí; a fɔ́n ɔ́, yě ná nɔ ɖɔ xó nú we. Đó lě e a nǎ wa nǔ gbɔn bɔ è ɖɔ nú we lɛ́ɛ ɔ́, zogbɛ́n wɛ é nyí nú we; kplɔ́n lɛ́ɛ ɔ́, wěziza wɛ yě nyí nú we, nǔ gbɛ́ nú mɛ ká nyí gbɛli nú we. Nǔ énɛ́ lɛ́ɛ ná dó alɔ we bɔ a nǎ gló nyɔ̌nu banáwatɔ́, bó ná gló xó víví e nɔ tɔ́n sín nyɔ̌nu mɛ ɖěvo tɔn nu mɛ é. Ma nú nyɔ̌nu énɛ́ jló we ɖó ɖɛkpɛ tɔn wú ó. Ma ka lɔn nú é bló nukún nú we dó dɔn we ó. Nǔgbó wɛ, nyɔ̌nu agalɛtɔ́ mɔ nǔ kpɛɖé ɔ́, é nɔ́ víví n'i; amɔ̌, nyɔ̌nu afɔdógbětɔ́ ɔ́, gbɛ towe bǐ wɛ é ná yí. È sixú sɔ́ myɔ dó akpo mɛ, bɔ awu mɛtɔn gɔn zo wlí a? È ka sixú ɖi zɔnlin gbɔn myɔkán jí ma ji myɔ a? Nǔ e nɔ́ gbo mɛ e nɔ ɖo nyɔ̌nu mɛsi gúdo é nɛ́. É ɖó alɔ mɛsi wú ɔ́, é ná tɔ́n sín mɛ wǔɖíɖí ǎ. Mɛ ɖé ja ajo bó ná dó gbɔ adɔ ɔ́, è nɔ gbɛ́ wǎn n'i ǎ. É ɖo mɔ̌ có, nú è ka wlí i ɔ́, nǔ e é fin ɔ́, é ná ná mɔ̌hunkɔtɔn donu tɛ́nwe; é ná bɛ́ dɔkun e ɖo xwé tɔn gbe é bǐ dó sú axɔ́. Mɛ e ba mɛsi ɔ́, tamɛ tɔn sɔgbe ǎ; mɛ e jló ná dɔn ɔ́ wɛ nɔ́ wa nǔ gbɔn mɔ̌. Mɛ mɔ̌hun ɔ́, è nǎ dɔn tó n'i, é ná ɖu winnyá, hɛ̌n e é ná ɖu ɔ́ ná gosín wǔ tɔn gbeɖé ǎ. Đó ma wɛ wǔhwan nɔ dó asisúnɔ, bɔ é ja hlɔn ba gbé ɔ́, é sɔ́ nɔ́ se gbɔ ǎ. É ná ba lɔ ɖɔ è nǐ sú hwɛxɔ́ émí ǎ. È na bo ɖɔ è nǎ ná ɛ nǔ kɔn nyi kpɔ́ gěgé ɔ́, é ná gbɛ́. Vǐ ce, flín xó ce lɛ́ɛ; nǔ e un zɔ́n we ɖɔ hwi ní bló lɛ́ɛ ɔ́, hɛn bǐ ayi mɛ. Blǒ nǔ e un ɖɔ hwi ní bló lɛ́ɛ; énɛ́ ɔ́, a nǎ nɔ gbɛ. Hɛn nǔ e un kplɔ́n we lɛ́ɛ nukúnzin towe ɖɔhun. Yě ní nyí alɔkɛ́, bó nɔ alɔ nú we; wlǎn yě dó ayi towe mɛ. Sɔ́ nǔnywɛ́ dó ɖó nɔví, sɔ́ bǐbí dó ɖó xɔ́ntɔn. Énɛ́ ɔ́, yě ná cyɔ́n alɔ jǐ towe ɖo nyɔ̌nu e má nyí asi towe ǎ é nukɔn; yě ná cyɔ́n alɔ jǐ we ɖo mɛsi e nɔ ɖɔ xó víví dó dɔn mɛ dó nǔ nyanya mɛ ɔ́ nukɔn. Un ɖo flɛtɛ́li nu ɖo xɔ ce mɛ gbe ɖokpó, bó ɖo kɔ́xo kpɔ́n sɛ́ dó wɛ, bó mɔ súnnuví e má ko tunwun gbɛxó ɖé ǎ lɛ́ɛ ɖo yiyi wɛ, bɔ nyaví xlonɔ ɖokpó ɖo yě mɛ. Nyaví ɔ́ wlí ali ɖé, ali ɔ́ gbɔn fí e nyɔ̌nu ɖé nɔ́ nɔ é kpá; é sɔ́ ali e yi nyɔ̌nu ɔ́ xwé é. Gbadanu, hwenu e zǎn nɔ́ ɖo bibɔ wɛ, bɔ ablu nɔ ɖo dǐdó wɛ é wɛ. Kpowun ɔ́, nyɔ̌nu ɔ́ jɛ́n wá kpé e. Nyɔ̌nu ɔ́ sɔ́ nǔ agalɛtɔ́ ɖɔhun; é nyí mɛɖé bó sɛ́. Wǔ yá ɛ káká, winnyá ɖěbǔ ɖo nukún tɔn jí ǎ. Yonu tɔn nɔ hu ayǐsínzɛn ɖo xwé tɔn gbe ǎ. A mɔ ɛ ɖo alitó din ɔ́, a nǎ lɛ́ mɔ ɛ ɖo tokplétɛn din; a nǎ mɔ ɛ ɖo fí bǐ, bɔ é ná ɖo súnnu gbé mɛ. Nyɔ̌nu énɛ́ ɔ́ zunfán nyaví ɔ́, bó kí si n'i, bó ɖɔ n'i kpó wunhínhɔ́n kpó ɖɔ: “Un ko dó akpá nú Mawu ɖɔ un ná sá vɔ̌ ɖé dó dó kú n'i. Égbé din wɛ un hu kanlin dó sá vɔ̌ ɔ́; énɛ́ wú wɛ un tɔ́n din bó wá kpé we. Un ɖo biba we wɛ, din ɔ́, un mɔ we. Un ko ɖó zan ce bǐ ɖo xwé gbe; kanvɔ wɛ un tɛ́ ɖ'é jí; Ejípu wɛ kanvɔ ɔ́ gosín, é ɖó sin tɛnmɛ tɛnmɛ. Un vun célu alɔkpa alɔkpa dó zan ce jí: un vun mǐla, alowɛ́si kpó sinnamɔmi kpó dó zan ce jí. Wǎ mǐ yi ɖó he káká nú ayǐ ná hɔ́n: Wǎ mǐ yi ɖu gbɛ bó ɖɔ éé ɖo mɔ̌ é. Asú ce ɖo xwé ǎ; to línlín ɖé mɛ wɛ é yi. É hɛn akwɛ́ bɔ é tlí. Sun jɛ́n ná kpé ká cóbɔ é ná wá.” Nyɔ̌nu énɛ́ dó jɔngwín jɔngwín nú nyaví ɔ́ káká bɔ é se xó tɔn. É sɔ́ xó víví tɔn dó dɔn ɛ. Énɛ́ ɔ́, nyaví ɔ́ jɛ gǔdo tɔn kpowun nyibú e è kplá xwe lanhutɛn é ɖɔhun; é jɛ gǔdo tɔn xlonɔ e è blǎ bó dɔn xwe xixo gbé é ɖɔhun. É ɖo nyɔ̌nu ɔ́ gǔdo káká bɔ gǎ xo hǔn tɔn zlɛ́; é cí xɛ e zɔn bó yi jɛ mɔ mɛ é ɖɔhun; é tunwun ɖɔ gbɛ émí tɔn ko vɔ ǎ. Din ɔ́, vǐ ce lɛ́ɛ mi, mi ɖótó mì, mi ɖótó xó e ɖɔ nú mi wɛ un ɖe lɛ́ɛ. Mi ma lɔn nú nyɔ̌nu mɔ̌hun dɔn mi dó nǔ nyanya mɛ ó; mi ma ɖo bǔbú wɛ lɔ bó yi gbɔn ali tɔn jí ó. Đó mɛ e é hu lɛ́ɛ sukpɔ́ dín, có mɛ énɛ́ lɛ́ɛ ɖěbǔ nyí mɛɖé kpowun ǎ. Nú mɛ ɖé yi xwé tɔn gbe hǔn, mɛ ɔ́ ní tunwun ɖɔ ali e è nɔ gbɔn yi kútomɛ é jí wɛ émí ɖe. Maɖɔnǔxwɛ wɛ ali énɛ́ nɔ́ kplá mɛ yi. Nǔnywɛ́ ɖo xó sú ylɔ́ we wɛ, nukúnnú mɔ jɛ nǔ mɛ zé gbe dó jǐ bó ɖo xó ɖɔ wɛ; mi se ǎ cé? Nǔnywɛ́ ɖo te só e ɖo alitó alitó lɛ́ɛ jí, é ɖo alikpléhɔ̌ntɛn lɛ́ɛ. É ɖo hɔntogbó jí, fí e è nɔ gbɔn byɔ́ toxo ɔ́ mɛ é, é ɖo xó sú wɛ ɖɔ: “Gbɛtɔ́ lɛ́ɛ e mi, mi sú xó ylɔ́ wɛ un ɖe! Xó e ɖɔ wɛ un ɖe ɔ́, mɛ bǐ ɖɔ ná wɛ un ɖe. Gɔgɔnɔ e mi, mi kplɔ́n tamɛlinkpɔ́n! Xlonɔ e mi, mi kplɔ́n nukúnnú mɔ jɛ nǔ mɛ! Mi ɖótó, ɖó un ɖó xó jɔ xó bó ná ɖɔ; un ná kɛ nu bó ná ɖɔ xomɛ nú mi. Xó nǔgbó wɛ nɔ tɔ́n sín nu ce mɛ; nu ce gbɛ́ wǎn nú adingban ɖíɖó. Xó e nɔ tɔ́n sín nu ce mɛ lɛ́ɛ bǐ wɛ sɔgbe, adingbanxó ɖě ɖ'é mɛ ǎ, mɛblɛ́blɛ́ xó ɖě ká ɖ'é mɛ ǎ. Xó ce bǐ wɛ ɖo wɛn nú mɛ e nɔ mɔ nukúnnú jɛ nǔ mɛ lɛ́ɛ, yě sɔgbe nú mɛ e mɔ nǔ jɛ nǔ mɛ lɛ́ɛ. Nǔ e un kplɔ́n mi lɛ́ɛ ní myá nukún nú mi, kpatágan ní má myá nukún nú mi ó; nǔtunwuntunwun ní myá nukún nú mi, siká akú ní má myá nukún nú mi ó. Đó nyɛ nǔnywɛ́ ɔ́, un xɔ akwɛ́ hú jɛ̌nana, un xɔ akwɛ́ hú nǔ e nɔ́ jló mɛ lɛ́ɛ bǐ sín kplékplé.” “Nyɛ nǔnywɛ́ ɔ́, un ɖo kpɔ́ xá tamɛlinkpɔ́n; un nɔ lin tamɛ kpɔ́n cóbó nɔ́ wa nǔ. Sísí ɖó nú Mawu Mavɔmavɔ wɛ nyí wǎn gbɛ́ nú nǔ nyanya; un gbɛ́ wǎn nú jimakplɔ́ngbedídó, un gbɛ́ wǎn nú goyíyí, un gbɛ́ wǎn nú alǎnnúwiwa, un gbɛ́ wǎn nú adingban ɖíɖó. Azɔ̌ e nyí ce ɔ́ wɛ nyí nǔ kplɔ́n mɛ bónú è lɛ̌n nǔ dó nukɔn mɛ. Nyɛ wɛ nyí nukúnnú mɔ jɛ nǔ mɛ; nyɛ wɛ nɔ ná hlɔ̌nhlɔ́n mɛ. Nyi wɛ nyí tɔn axɔ́sú lɛ́ɛ nɔ ɖu axɔ́sú; nyi wɛ nyí tɔn nukɔntɔ́ lɛ́ɛ nɔ zɔ́n nǔ e sɔgbe é. Nyi wɛ nyí tɔn gǎn lɛ́ɛ nɔ́ kpa acɛ; nyi wɛ nyí tɔn gbɛtɔ́ nukúnɖéjí lɛ́ɛ kpó hwɛɖɔtɔ́ e ɖo ayǐkúngban jí lɛ́ɛ bǐ kpó nɔ́ kpa acɛ. Nyɛ ɔ́, un yí wǎn nú mɛ e yí wǎn nú mì lɛ́ɛ; mɛ e ɖo biba mì wɛ lɛ́ɛ nɔ mɔ mì. Nyi wɛ nɔ ná dɔkun kpó susu kpó mɛ, nyi wɛ nɔ ná nǔ ɖagbe e nɔ nɔ ayǐ lɛ́ɛ kpódó nukɔn yiyi kpó mɛ. Đagbe e un nɔ wa nú mɛ ɔ́ nyɔ́ hú siká, é nyɔ́ hú siká akú; nǔ e un nɔ ná mɛ ɔ́ nyɔ́ hú kpatágan akú. Hwɛjijɔ sín ali wɛ un nɔ gbɔn, un nɔ ɖi zɔnlin gbɔn nǔ jlɔ́jlɔ́ sín ali jí; un nɔ bló mɔ̌ dó wa ɖagbe nú mɛ e yí wǎn nú mì lɛ́ɛ, un nɔ dó dɔkun nú yě bɔ xwé yětɔn nɔ gɔ́. Nyi wɛ Mawu Mavɔmavɔ ɖó jɛ nukɔn nú nǔ e é bló lɛ́ɛ bǐ; é kó ɖó mì cóbó wá jɛ nǔ e é kó bló sín dodó donu lɛ́ɛ bló jí. É ɖó mì sín do, é ɖó mì sín bǐbɛ́mɛ, é ɖó mì có ayǐkúngban ɔ́ wá tíin. Hwenu e è ji mì ɔ́, xu ɖě kó tíin ǎ, tɔjɔtɛn ɖě tíin bɔ sin nɔ tɔ́n sín mɛ ǎ. Cóbónú só lɛ́ɛ ná tíin, bɔ kpó lɛ́ɛ ná wá tíin ɔ́, un ko tíin. Mawu kó bló ayǐkúngban ɔ́ hwenɛ́nu ǎ, é kó bló gle lɛ́ɛ ǎ; è ko bló ayǐkúngban ɔ́ sín kɛ́n kwín ɖokpó vɔ́vɔ́ ǎ. Hwenu e é ɖo jǐnukúnsin sɔ́ ɖ'ayǐ wɛ ɔ́, un ɖo fínɛ́; hwenu e é ɖo fí e jǐnukúnsin kpó ayǐkúngban kpó kplé ɖe é bló ɖó xu nukún mɛ wɛ ɔ́, un ɖo fínɛ́; hwenu e é ɖo akpɔ́kpɔ́ lɛ́ɛ kplé ɖó jǐ wɛ ɔ́, un ɖo fínɛ́; hwenu e é ɖo sin ɖe tɔ́n sín tɔjɔtɛn e ɖo xu glɔ́ lɛ́ɛ wɛ kpó hlɔ̌nhlɔ́n kpó ɔ́, un ɖo fínɛ́; hwenu e é ɖó dogbó é wú xu ma na zɛ ǎ é ɔ́, un ɖo fínɛ́; hwenu e é bló ayǐkúngban sín dodó lɛ́ɛ ɔ́, un ɖo fínɛ́. Un ɖo azɔ̌ wú ɖo akpá tɔn hwebǐnu azɔ̌gán ɖɔhun, bɔ ayǐhɔ́ngbe ayǐhɔ́ngbe ɔ́, un nɔ dó xomɛhunhun n'i; un nɔ ɖo ayihún da wɛ ɖo gɔ̌n tɔn hwebǐnu. Un nɔ ɖo ayihún da wɛ ɖo ayǐkúngban e é bló ɔ́ jí, un nɔ ɖo gbɛ ɖu wɛ ɖo gbɛtɔ́ lɛ́ɛ tɛ́ntin.” “Din ɔ́, vǐ ce lɛ́ɛ mi, mi ɖótó mì. Nǔ nyɔ́ nú mɛ e nɔ́ bló nǔ e un ɖɔ nú yě lɛ́ɛ é. Mi ɖótó nǔ e un kplɔ́n mi lɛ́ɛ; énɛ́ ɔ́, mi ná nyɔ́ nǔ i; mi ma dó vɛ̌ nú kplɔ́n ce lɛ́ɛ ó. Nǔ ná nyɔ́ nú mɛ e nɔ ɖótó mì lɛ́ɛ é, mɛ e nɔ wá dɔ́ wunzɛn ɖo hɔn ce ta ayǐhɔ́ngbe ayǐhɔ́ngbe lɛ́ɛ é, mɛ e nɔ wá cí hɔntogbó ce jí lɛ́ɛ é. Đó mɛ e mɔ mì ɔ́ mɔ gbɛ, Mawu Mavɔmavɔ nɔ yí gbe nú xó tɔn. Mɛ e ma se tónú nú mì ǎ ɔ́, éɖée nú wɛ é wa; mɛ e gbɛ́ wǎn nú mì ɔ́, kú wɛ é yí wǎn ná.” Nǔnywɛ́ kpa dotín tɛ́nwe, bó dó bló xɔ tɔn. É hu kanlin, é ɖa vɛ̌ɛn, bó tɛ́ távo. É sɛ́ mɛsɛntɔ́ tɔn nyɔ̌nu lɛ́ɛ dó, bónú yě ná yi xá fí e yi jǐ ganjí ɖo toxo ɔ́ mɛ lɛ́ɛ jí, bó ná sú xó, bó da mɛ lɛ́ɛ ɖɔ: “Mi nǔmanywɛ́tɔ́ e mi, mi wá fí!” Yě nɔ́ ɖɔ nú xlonɔ lɛ́ɛ ɖɔ: “Mi wá bó wá ɖu nǔ e un ɖa ɔ́, bó nu vɛ̌ɛn e un ɖa é! Mi gosín gɔgɔnɔ lɛ́ɛ tɛ́ntin bó ná nɔ gbɛ! Mi wá ɖi zɔnlin gbɔn nukúnnú mɔ jɛ nǔ mɛ sín ali ɔ́ jí!” Mɛ e nɔ kɛ nu dó nǔ wú nú mɛ e nɔ yí go ɔ́, wǎn wɛ è nɔ gbɛ́ n'i. Mɛ e nɔ gbɛ́ nǔ nú mɛdídá ɔ́, xó wɛ é nɔ́ ba do kɔ. Ma gbɛ́ nǔ nú mɛ e nɔ yí go ɔ́ ó; é táá wá gbɛ́ wǎn nú we. Lo ɔ́, gbɛ̌ nǔ nú mɛ e ɖó nǔnywɛ́ é; énɛ́ ɔ́, é ná yí wǎn nú we. Đɔ xó nú nǔnywɛ́tɔ́, énɛ́ ɔ́, é ná lɛ́ nyɔ́ nǔ i d'é jí. Kplɔ́n nǔ mɛ e nɔ wa nǔ ɖó sɛ́nxwi jí é, bónú é ná lɛ́ tunwun nǔ d'é jí. Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é; mɛ e tunwun Mawu mɛ mímɛ́ ɔ́, Mawu nɔ ná mɛ ɔ́ nukúnnú mɔ jɛ nǔ mɛ. Đó nyɛ nǔnywɛ́ ɔ́, nyi wɛ ná dó azǎn azǎn jí nú we, un ná dó xwe xwe jí nú we. A nyɔ̌ nǔ i ɔ́, a nǎ nyɔ́ nǔ i nú hwiɖée. A ka nɔ yí go ɔ́, hwi ɖokpónɔ wɛ ná mɔ nǔ e ɖo goyíyí mɛ é. Xlojijɔ cí nyɔ̌nu tagbanɔ ɖɔhun, nyɔ̌nu yɛyinɔ ɖɔhun, nyɔ̌nu e má tunwun nǔɖé ǎ é ɖɔhun. É nɔ́ jínjɔ́n zinkpo jí ɖo xwé tɔn sín alihɛ́nnu, ɖo fí e yi jǐ ganjí ɖo toxo ɔ́ mɛ é; é nɔ́ nɔ fínɛ́ bó nɔ́ sú xó ylɔ́ mɛ e ɖo ali yětɔn jí tlélé bó ɖo yiyi wɛ lɛ́ɛ ɖɔ: “Mɛ e ma ɖó nǔywɛ́ ǎ é ní wá fí!” É nɔ́ sú xó ylɔ́ xlonɔ lɛ́ɛ ɖɔ: “Sin e è fin ɔ́ nɔ́ nyɔ́ nu tawun! Nǔ e è nɔ nɔ nǔglɔ́ bó nɔ ɖu ɔ́ nɔ víví tawun!” Lo ɔ́, mɛ énɛ́ lɛ́ɛ tunwun ɖɔ kú wɛ ɖo fínɛ́ ǎ; yě tunwun ɖɔ mɛ e xlojijɔ ylɔ́ lɛ́ɛ ɔ́, kútomɛ wɛ yě kó ɖe ǎ. Nǔnywɛ́xó Salomɔ́ɔ tɔn lɛ́ɛ ɖíe: Vǐ ɖé ɖó mɛxóyixa ɔ́, é nɔ́ víví nú tɔ́ tɔn. Vǐ ɖé ká jɔ xlo ɔ́, é nɔ nyí linkpɔ́n nú nɔ tɔn. Dɔkun e è jɛ dó acɛ jí ɔ́, è nɔ ɖu ǎ; amɔ̌, walɔ ɖagbe nɔ hwlɛ́n mɛ ɖo kú sí. Mawu Mavɔmavɔ nɔ jó hwɛjijɔnɔ dó nú adɔ nɔ dó ya n'i ǎ. É ka nɔ lɔn nú mɛdídá nɔ mɔ nǔ e ɖo nukún myá n'i wɛ é ǎ. Fɔnlín ɔ́, ya wɛ é nɔ́ dó mɛ; kan ván bó wa nǔ ká nɔ́ dó dɔkun nú mɛ. Mɛ e nɔ kplé jinukún dó agɔ̌ mɛ ji yiya hwenu ɔ́, vǐ bǐbí nɛ́. Mɛ e ka nɔ dɔ́ amlɔ ji yiya hwenu ɔ́, vǐ e nɔ dó winnyá mɛ é nɛ́. Mɛ e nɔ wa nǔ ɖó sɛ́nxwi jí ɔ́, nyɔ̌ná ɖɛ wɛ ɖo jǐ tɔn. Mɛdídá lɛ́ɛ ɔ́, a ka fɛ kpɔ́n xó yětɔn glɔ́ ɔ́, a nǎ mɔ dǎka. Mɛ e nɔ wa nǔ ɖó sɛ́nxwi jí ɔ́ nɔ́ jó flín ɖagbe dó bɔ è nɔ dó flín i ná. Mɛdídá ɔ́, è ka nɔ wɔn ɛ káká bó nɔ́ wɔn nyǐkɔ tɔn lɔ. Gbɛtɔ́ e sín ayi xwe tɛ́ ɔ́ nɔ ɖótó te bó nɔ́ se lě e è ɖǒ ná wa nǔ gbɔn é. Mɛ e ma ka nɔ hɛn nu tɔn ǎ ɔ́ nɔ́ sɔ́ éɖée nyi gbě. Mɛ e nɔ sɔ́ ayi ɖó wɛn dó wa nǔ ɔ́ nɔ́ nɔ vivo mɛ. Lo ɔ́, mɛ e nɔ sɔ́ ayi hízíhízí dó wa nǔ ɔ́, è nǎ wá mɔ nǔ jɛ wǔ tɔn. Mɛ e nɔ sɔ́ nukún dó ɖɔ xó dó blɛ́ mɛ ɔ́, ayimɛya wɛ é nɔ́ dó nú mɛ. Mɛ e ma nɔ hɛn nu tɔn ǎ ɔ́ nɔ́ sɔ́ éɖée nyi gbě. Gbɛtɔ́ hwɛjijɔnɔ sín xó lɛ́ɛ ɔ́, gbɛjɔtɛn wɛ é nyí nú mɛ. Mɛdídá lɛ́ɛ ɔ́, a fɛ kpɔ́n xó yětɔn glɔ́ ɔ́, a nǎ mɔ dǎka. Wǎngbɛ́númɛ ɔ́, jlɛ wɛ é nɔ́ dɔn wá; wǎn yíyí ka nɔ́ bú nǔ dó hwɛ e è hu lɛ́ɛ bǐ. Gbɛtɔ́ e nɔ́ lin tamɛ ganjí ɔ́, nǔnywɛ́xó wɛ è nɔ́ se ɖo nu tɔn; mɛ e ma ka ɖó tamɛ ǎ ɔ́, kpo wɛ è nɔ ɖó n'i. Mɛ e ɖó nǔnywɛ́ ɔ́, nǔtunwuntunwun jí wɛ é jínjɔ́n. Xlonɔ xó ɖo nǔ ná hɛn gblé dó wǔ nú mɛ wɛ ɔ́ gosín fí jɛ fínɛ́ ǎ. Dɔkun e ɖo dɔkunnɔ sí é wɛ nyí ahohó tɔn; wamamɔnɔ ɔ́, nǔ ma ɖo mɛ sí wɛ ká nyí dǒglin tɔn. Nǔ e hwɛjijɔnɔ nɔ wa nǔ bó nɔ́ mɔ ɔ́ nɔ ná ɛ gbɛ; nǔ e mɛdídá ká nɔ́ mɔ ɔ́, é nɔ́ zé dó wa nǔ nyanya. Gbɛtɔ́ e è gbɛ̌ nǔ ná ɔ́ é nɔ́ se ɔ́, é nɔ yi nukɔn ɖo gbɛ tɔn mɛ; mɛ e ma ka nɔ se mɛɖé xó ǎ ɔ́, ali wɛ é nɔ́ bú. Mɛ e gbɛ́ wǎn nú mɛ bó nɔ́ zé hwlá ɔ́, yɛmɛnúwatɔ́ wɛ; mɛ e nɔ ɖo mɛ nú ɖɔ kpé wɛ ɔ́, ta tɔn mɛ sɔgbe ǎ. Mɛ e nɔ ɖɔ xó dín é nɔ́ gɔn xó ɖɔ nyi do nú mɛ ǎ; mɛ e ka nɔ hɛn nu tɔn ɔ́, ayi tɔn ɖo te. Xó e nɔ́ tɔ́n sín hwɛjijɔnɔ nu mɛ ɔ́ cí kpatágan akú ɖɔhun. Mɛdídá sín ayixa ká xɔ akwɛ́ ɖé ǎ. Gbɛtɔ́ hwɛjijɔnɔ nɔ sɔ́ nu tɔn dó ɖe mɛ gěgé ɖó ali jí; xlonɔ ɔ́, nǔmanywɛ́ tɔn wɛ nɔ́ hu i. Đɛ e Mawu Mavɔmavɔ nɔ xo dó mɛ jí é kɛ́ɖɛ́ wɛ nɔ́ dó dɔkun nú mɛ; gǎndídó gbɛtɔ́ tɔn nɔ́ dó nǔɖé jí ǎ. Dǎkaxixo ɔ́, ayihún wɛ é nyí nú mɛ e tamɛ tɔn ma sɔgbe ǎ é. Mɔ̌ ɖokpó ɔ́, nǔnywɛ́ ɖíɖó ɔ́, ayihún wɛ é nyí nú mɛ e nɔ mɔ nukúnnú jɛ nǔ mɛ é. Nǔ e ɖi xɛsi ná wɛ mɛdídá ɖe ɔ́ wɛ nɔ gbo e. Nǔ e ba wɛ hwɛjijɔnɔ ka ɖe ɔ́, Mawu nɔ́ ná ɛ. Jɔhɔn ɖaxó nyi ɔ́, è nɔ ba mɛdídá kpo; hwɛjijɔnɔ ka nɔ́ dó ɖɔ do, bo nɔ ɖo te tɛgbɛ. Vɛ̌ɛn sinvɛ́sinvɛ́ nɔ́ jí aɖǔ; azɔ nɔ dó ya nú nukún; mɔ̌ ɖokpó ɔ́ wɛ fɔnlínnɔ nɔ́ ɖó akpɔ nú gǎn tɔn. Sísí ɖó nú Mawu Mavɔmavɔ nɔ dó azǎn azǎn jí nú mɛ; mɛdídá lɛ́ɛ ká nɔ́ wɛ́n kú. Mɛ e nɔ wa nǔ ɖó sɛ́nxwi jí ɔ́ nɔ́ ɖo nukún ɖó nǔ wɛ kpó awǎjijɛ kpó; mɛ e ka nɔ wa nǔ nyanya ɔ́ ɖó nukún nǔɖé ǎ. Tito Mawu Mavɔmavɔ tɔn lɛ́ɛ ɔ́, ahohó wɛ yě nyí nú mɛ e sín ayi ɖo wɛn lɛ́ɛ, yě ká nɔ́ hɛn mɛdídá lɛ́ɛ sín gbɛ gblé. Nǔ ɖěbǔ ná zin hwɛjijɔnɔ dɛ́ gbeɖé ǎ; lo ɔ́, mɛdídá lɛ́ɛ ná nɔ ayǐkúngban ɔ́ jí ǎ. Mɛ e nɔ wa nǔ ɖó sɛ́nxwi jí ɔ́, nǔnywɛ́xó wɛ gɔ́ nu tɔn mɛ; mɛ e ka nyí adingbannɔ ɔ́, ɖɛ̌ tɔn ɔ́, sɛ́n wɛ è nǎ sɛ́n. Mɛ e nɔ wa nǔ ɖó sɛ́nxwi jí ɔ́ kɛ nu ɔ́, xó ɖagbe wɛ é nɔ́ ɖɔ; mɛdídá ká kɛ nu ɔ́, xó nyanya jɛ́n é nɔ́ ɖɔ. Nǔdagan e má sɔgbe ǎ é nɔ́ vɛ́ mɔ nú Mawu Mavɔmavɔ, nǔdagan e ka sɔgbe é nɔ́ nyɔ́ mɔ n'i. Goyíyí ɔ́, tɛ́ hu nú mɛ wɛ é nɔ́ dɔn wá. Amɔ̌, nǔwaɖójlɛ̌jí ɔ́, nǔnywɛ́tɔ́ lɛ́ɛ sí wɛ è nɔ mɔ ɖe. Ayi ɖo wɛn ɖíɖó wɛ nɔ́ xlɛ́ ali ayijlɔ́jlɔ́nɔ lɛ́ɛ; nǔhízíhízí wɛ ká nɔ́ dɔn adingbannɔ lɛ́ɛ yi bú. Hwɛɖɔzán gbe su ɔ́, dɔkun nɔ gɔ́ alɔ nú mɛ ǎ, nǔ wa ɖó sɛ́nxwi jí kɛ́ɖɛ́ jɛ́n nɔ́ hwlɛ́n mɛ ɖo kú sí. Nǔjlɔ́jlɔ́wiwa gbejínɔtɔ́ tɔn wɛ nɔ bló ali tɔn ɖó; amɔ̌, mɛdídá ɔ́, dǎka e é nɔ́ xo ɔ́ wɛ nɔ́ zin i dɛ́. Ayijlɔ́jlɔ́nɔ ɔ́, nǔ wa ɖó sɛ́nxwi jí tɔn wɛ nɔ́ hwlɛ́n ɛ. Amɔ̌, ahizinɔ lɛ́ɛ ɔ́, nǔ e ba wɛ yě ɖe lɛ́ɛ wɛ nɔ́ nyí mɔ bɔ yě nɔ́ jɛ mɛ. Mɛdídá kú ɔ́, nǔ e ɖó nukún wɛ é ɖe é lɔ nɔ kú; gǎnjɛwú e é ɖó dó dɔkun tɔn lɛ́ɛ wú ɔ́ nɔ́ húzú nǔ yǎyá. Mɛ e nɔ wa nǔ ɖó sɛ́nxwi jí ɔ́, è nɔ hwlɛ́n ɛ sín adǎngbomɛ mɛ, bɔ mɛdídá nɔ́ jɛ tɛn tɔn mɛ. Mɛ nyanya nɔ sɔ́ nu tɔn dó hɛn nɔzo tɔn sín gbɛ gblé; amɔ̌, mɛ e nɔ wa nǔ ɖó sɛ́nxwi jí lɛ́ɛ ɔ́, nǔtunwuntunwun yětɔn wɛ nɔ́ hwlɛ́n yě sín mɛ. Nú nǔ nyɔ́ nú mɛ e nɔ wa nǔ ɖó sɛ́nxwi jí ɔ́, xwe wɛ é nɔ́ nyí nú toví lɛ́ɛ. Nú mɛdídá ká kú ɔ́, awǎ wɛ è nɔ jɛ kpó xósúsú kpó. Đagbewiwa ayijlɔ́jlɔ́nɔ tɔn nɔ́ bló to ɖó. Mɛdídá ká nɔ́ sɔ́ nu tɔn dó gba to. Mɛ e ma ɖo lugbe ǎ ɔ́ nɔ hu tɛ́ nú nɔzo tɔn; mɛ e ka bí ɔ́ nɔ́ kɛ nu ǎ. Mɛnúɖɔtɔ́ nɔ́ hɛn xó xomɛ ǎ, gbɛtɔ́ ɖeji d'é wú ká nɔ hɛn xó xomɛ. To e ma ɖó nusú ǎ ɔ́, gba wɛ é nɔ gba; mɛ e ná ɖe wě dó to wú lɛ́ɛ sukpɔ́ ɔ́, to nɔ́ nɔ te. Mɛ e nɔ te nú mɛ e é má tunwun ǎ bɔ é ɖu axɔ́ ɔ́, xó wɛ é ba dó kɔ; mɛ e ayi tɔn ka ɖo te bɔ é gbɛ́ ɔ́, nɔ́ nɔ vivo mɛ. Nyɔ̌nu e nyɔ́ xomɛ ɔ́, è nɔ sɔ́ ɛ su; súnnu e nɔ́ ván kan bó nɔ́ wa nǔɖé ɔ́ nɔ jɛ dɔkun. Mɛ e nɔ́ nyɔ́ xomɛ dó mɛ wú ɔ́, éɖée wɛ é wa ɖagbe ná; mɛ e ká nɔ́ xo dǎka ɔ́, éɖée wú wa nyanya dó wɛ é ɖe. Nǔ e mɛdídá nɔ mɔ ɔ́ nɔ́ ɖó ta ɖé ǎ; mɛ e ka nɔ vlɔ́n kan nú nǔ wa ɖó sɛ́nxwi jí ɔ́, tunwun ɖɔ émí ná ɖu le tɔn dandan. Mɛ e zin alɔ dó akɔ́n ɖɔ émí ná nɔ́ wa nǔ jlɔ́jlɔ́ ɔ́, é ná nɔ gbɛ; mɛ e ka nɔ ɖo nǔ nyanya wiwa gúdo ɔ́ ná kú. Mɛ e ɖó ayi hízíhízí lɛ́ɛ nɔ́ vɛ́ mɔ nú Mawu Mavɔmavɔ; mɛ e ɖo gbejí lɛ́ɛ ká nɔ́ nyɔ́ mɔ n'i. Mawu Mavɔmavɔ ná dɔn tó nú mɛdídá, é ɖó gblǎ ǎ; é ká ná hwlɛ́n mɛ e nɔ wa nǔ ɖó sɛ́nxwi jí lɛ́ɛ bǐ gán. Nyɔ̌nu e nyɔ́ ɖɛkpɛ bó má ká ɖo lugbe ǎ ɔ́, ɖɛkpɛ tɔn ɔ́, sikálɔkɛ́ wɛ bɔ è dǒ awɔntín nú aglǔza. Nǔ ɖagbe wiwa kɛ́ɖɛ́ wɛ mɛ e nɔ wa nǔ ɖó sɛ́nxwi jí é nɔ́ ba; xomɛsin wɛ ka ɖo te kpɔ́n mɛdídá lɛ́ɛ. Mɛ e nɔ hun alɔ bó nɔ́ ná nǔ mɛ ɔ́ nɔ́ jɛ dɔkun dó dɔkun jí; mɛ e ka nɔ sɛ nǔ xwe zɛ xwé wú ɔ́, ya wɛ é nɔ́ ji. Mɛ e nɔ ná nǔ mɛ ɔ́, è nǎ ná nǔ i bɔ é ná sukpɔ́; mɛ e nɔ ná sin mɛ ɔ́, è nǎ ná é lɔmɔ̌, bɔ é ná nu bó ɖi kɔ. Mɛ e nɔ kplé jinukún dó agɔ̌ mɛ, bó nɔ́ gbɛ́ sisa ɔ́, to wɛ nɔ dó nu i; mɛ e ka nɔ sa ɔ́, to nɔ xo ɖɛ n'i. Mɛ e ɖagbewiwa nɔ myá nukún ná ɔ́, nǔ tɔn nɔ́ nyɔ́ gbɛtɔ́ lɛ́ɛ sín nukún mɛ; mɛ e nǔ nyanya wiwa ka nɔ myá nukún ná ɔ́, awě wɛ nɔ xo e. Mɛ e nɔ gán jɛ dɔkun tɔn lɛ́ɛ wú ɔ́, ayǐ wɛ é nɔ́ jɛ; mɛ e nɔ wa nǔ ɖó sɛ́nxwi jí lɛ́ɛ ɔ́, nǔ wɛ nɔ́ ɖo nyǐnyɔ́ nú yě wɛ atín e ɖo zǐnzɔ́n wɛ é ɖɔhun. Mɛ e hɛn xwé tɔn nyi do ɔ́ nɔ́ mɔ nǔɖé sɔ́ ɖ'é mɛ ǎ; mɛ énɛ́ e jɔ xlo ɔ́ mɔ̌ ɔ́, kannumɔ wɛ é ná wá nyí nú mɛ e ɖó nǔnywɛ́ é. Mɛ e nɔ wa nǔ ɖó sɛ́nxwi jí ɔ́, nǔ e é nɔ́ wa ɔ́, atín e nɔ́ ná gbɛ mɛ ɔ́ wɛ; mɛ e ɖó nǔnywɛ́ ɔ́, gbɛtɔ́ nɔ ɖeji dó wǔ tɔn. Mɛ e nɔ wa nǔ ɖó sɛ́nxwi jí ɔ́ nɔ́ ɖu nǔ e é wa ɔ́ sín le ɖo ayǐkúngban jí fí; hǔn mɛdídá kpó hwɛhutɔ́ kpó lɔ ná ɖu nǔ e yě wa ɔ́ sín le dandan. Mɛ e è kɛ nu dó nǔ wú n'i ɔ́, è nɔ́ se ɔ́, yí wǎn nú nǔtunwuntunwun; mɛ e ma ka nɔ ba ɖɔ mɛɖé ní gbɛ́ nǔ nú émí ǎ ɔ́, xlo wɛ é jɔ. Mawu Mavɔmavɔ nɔ nyɔ́ xomɛ dó mɛ ɖagbe wú; lo ɔ́, é nɔ́ ɖó hwɛ nú mɛ e ɖó linlin nyanya é. Dǎkaxixo wɛ nɔ́ zɔ́n bɔ è nɔ lí dǒ ǎ; lo ɔ́, nǔ wa ɖó sɛ́nxwi jí wɛ nɔ́ zɔ́n bɔ è nɔ dó ɖɔ do. Nyɔ̌nu e nyí nyɔ̌nu jɔ nyɔ̌nu ɔ́, wi wɛ é nyí bó ɖo ta nú asú tɔn. Nyɔ̌nu e nɔ́ dó winnyá mɛ é ká nyí xúɖuxúɖu ɖo lanmɛ nú asú tɔn. Mɛ e nɔ wa nǔ ɖó sɛ́nxwi jí ɔ́, nǔ jlɔ́jlɔ́ kɛ́ɖɛ́ wɛ é nɔ́ lin ná bló. Mɛdídá lɛ́ɛ ɔ́, yě ká nɔ́ lin nǔ ɖěvo zɛ ahizi wú ǎ. Xó e mɛdídá nɔ́ ɖɔ ɔ́ wɛ nyí mɔ e mɛ é nɔ jɛ bó nɔ́ kú é; xó e ká nɔ́ tɔ́n sín ayijlɔ́jlɔ́nɔ nu mɛ é wɛ nɔ́ hwlɛ́n ɛ gán. Mɛdídá lɛ́ɛ jɛ ayǐ ɔ́, kún yětɔn nɔ́ sú dó; nǔjlɔ́jlɔ́watɔ́ lɛ́ɛ sín xwé ká nɔ́ lí. Mɛ e nɔ lin tamɛ kpɔ́n ɔ́, è nɔ kpa susu n'i, bó ka nɔ hu tɛ́ nú gbɛtɔ́ ayi hízíhízínɔ. È ɖǒ mɛsɛntɔ́ ɖokpó lě e agbɔ̌n tɔn ɖo mɛ wú gbɔn ɔ́, é nyɔ́ hú è blǒ nyɛ wɛ sɔ lě, bó ká ba nǔ e è nǎ ɖu ɔ́ kpo. Mɛ e nɔ wa nǔ ɖó sɛ́nxwi jí ɔ́ nɔ́ ké ya nú nǔ e hu dó kanlin tɔn lɛ́ɛ é; lo ɔ́ mɛdídá ɔ́, alǎnnúwiwa kɛ́ɖɛ́ wɛ ká ɖo ayi tɔn mɛ. Mɛ e nɔ lɛ gle tɔn ɔ́ ná mɔ nǔ ɖu, bó gɔ́ xo; mɛ e ka nɔ ɖó kan dó nǔ ma nyí nǔɖé wú ɔ́, taglo mɛ tɔn wa azɔ̌ ǎ. Mɛdídá ɔ́, nukún tɔn nɔ́ ɖo nǔ e mɛdídá lɛ́ɛ ɖó ɔ́ wú; mɛ e ka nɔ wa nǔ ɖó sɛ́nxwi jí ɔ́ sín ɖɔ nɔ ná nǔ ɖagbe. Xó nyanya e tɔ́n sín mɛ nú mɛ é wɛ nɔ́ lɛ́ nyí fɛ́ca nú mɛ; mɛ e nɔ wa nǔ ɖó sɛ́nxwi jí ɔ́ ká nɔ́ tɔ́n sín hɔzɔ bǐ mɛ. Xó e nɔ́ tɔ́n sín mɛ nu mɛ ɔ́ hɛn ɔ́, é ná dó dɔkun nú mɛ; azɔ̌ e è wa ɔ́ wɛ è nɔ ɖu. Xlonɔ nɔ mɔ ɖɔ nǔ e émí nɔ́ wa ɔ́ bǐ wɛ nɔ́ nyɔ́; è ka kplɔ́n nǔ mɛ e ɖó nǔnywɛ́ ɔ́, é nɔ́ se. Xlonɔ sin xomɛ ɔ́, é nɔ́ ɖe xlɛ́ ɖo tɛn tɔn mɛ; lo ɔ́, mɛ e ayi tɔn ɖo te ɔ́ sin xomɛ ɔ́, é nɔ́ yi agbɔ̌n jí. Mɛ e nɔ ɖɔ xó nǔgbó ɔ́ nɔ́ zɔ́n bɔ è nɔ gbo hwɛ ganjí; mɛ e ka nɔ ɖe kúnnu agɔ ɔ́ nɔ́ zɔ́n bɔ è nɔ gbo hwɛ nyi do. Mɛ e nɔ ɖɔ xó dín ɔ́, xó tɔn nɔ́ gblé wǔ mɛ hwǐ ɖɔhun; mɛ e ka ɖó nǔnywɛ́ ɔ́, xó tɔn nɔ́ gbɔ azɔn. Xó e nyí xó nǔgbó ɔ́ nɔ ɖo te tɛgbɛ; lo ɔ́, adingbanxó ɔ́, nukúnxwixwe ɖokpó mɛ jɛ́n é nɔ́ gba. Mɛ e nɔ ɖo nyanya mɛtɔn lin wɛ ɔ́, ahizi wɛ gɔ́ ayi tɔn mɛ; mɛ e ka nɔ kplɔ́n nǔ ɖagbe mɛ ɔ́ nɔ́ mɔ awǎjijɛ ɖ'é mɛ. Awě ɖě nɔ́ xo mɛ e nɔ wa nǔ ɖó sɛ́nxwi jí ɔ́ ǎ; lo ɔ́, nǔgbomɛ wɛ nɔ vun blá mɛdídá. Mawu Mavɔmavɔ mɔ adingbannɔ ɔ́, é nɔ́ vɛ́ mɔ n'i; é ká mɔ mɛ e nɔ ɖɔ xó nǔgbó ɔ́, xomɛ nɔ hun i. Gbɛtɔ́ e ɖó ayi te é nɔ́ ɖó nǔnywɛ́ tɔn hǎ ǎ; xlonɔ ka nɔ sɔ́ lɛ̌lo tɔn ɖó agban. Mɛ e nɔ ɖó kan dó nǔ wú bó nɔ́ wa ɔ́ nɔ́ wá nɔ mɛ nu; lo ɔ́, fɔnlínnɔ ɔ́, mɛ kannu wɛ é nɔ́ wá nɔ. Linkpɔ́n ɖo ayi mɛ nú mɛ ɔ́, kanmɛ nɔ gbɔ́jɔ́ mɛ; è ka ɖɔ xó ɖagbe nú mɛ ɔ́, wǔ nɔ yá mɛ. Mɛ e nɔ wa nǔ sɛ́nxwi jí ɔ́ nɔ ɖe nɔzo tɔn ɖó ali jí; lo ɔ́ mɛdídá sín walɔ nɔ dɔn mɛ bú. Fɔnlínnɔ nɔ ɖó lan agba ǎ; azɔ̌ wɛ ká nyí gbɛtɔ́. Hwɛjijɔ li jí wɛ è nɔ mɔ gbɛ ɖe; mɛ e mlɛ́ ali énɛ́ ɔ́ nɔ́ kú ǎ. Vǐ e ɖó nǔnywɛ́ ɔ́ nɔ ɖótó te, bó nɔ́ yí kplɔ́n ɖo tɔ́ sí; è ka gbɛ́ nǔ nú vǐ e nɔ́ yí go ɔ́, é nɔ se ǎ. Gbɛtɔ́ ɖagbe nɔ ɖu xó e nɔ́ tɔ́n sín nu tɔn mɛ é sín le; mɛ nyanya lɛ́ɛ ɔ́, alǎnnúwiwa te jɛ́n yě ɖe. Mɛ e nɔ kpɔ́n nu bó nɔ́ kɛ ɔ́ nɔ́ wa éɖée nú ǎ; mɛ e ka nɔ kɛ nu nyi do ɔ́ nɔ́ wa éɖée nú. Nǔɖé jló fɔnlínnɔ ɔ́, mɛ jɛ́n é nɔ́ mɛ dó wǔ tɔn; nǔɖé ká jló mɛ e yí wǎn nú azɔ̌ ɔ́, é nɔ́ mɔ. Gbɛtɔ́ hwɛjijɔnɔ nɔ gbɛ́ wǎn nú adingbanxó; mɛdídá ká nɔ́ zun mɛ, bó nɔ́ lɛ hɛ̌n nú mɛ. Hwɛjijɔ nɔ nya xɛ ɖo mɛ e nɔ wa nǔ ɖó sɛ́nxwi jí é jí; dǎka xixo ká nɔ́ hɛn mɛdídá sín gbɛ gblé. Mɛ ɖé lɛ́ɛ nɔ́ bló dɔkunnɔ, nǔɖé ká ɖo yě sí ǎ; mɛɖé lɛ́ɛ ká nɔ bló wamamɔnɔ, nǔ ká ɖó yě sí kpɔ́. Dɔkunnɔ ɔ́, dɔkun tɔn wɛ é nɔ́ sɔ́ dó xɔ gbɛ nú éɖée; wamamɔnɔ ɔ́, mɛɖé ká nɔ́ gblɔ́n adǎn n'i ǎ. Hwɛjijɔnɔ ɔ́, zogbɛ́n e ɖo te bo ɖo wě za wɛ é ɖɔhun wɛ é ɖe; lo ɔ́, mɛdídá ɔ́, éyɛ́ cí zogbɛ́n e ɖo cící wɛ ɔ́ ɖɔhun. Goyíyí ɔ́, tagba wɛ é nɔ́ dɔn wá; lo ɔ́, mɛ e è kplɔ́n nǔ i ɔ́ é nɔ́ se ɔ́, mɛ énɛ́ ɔ́ ɖó nǔnywɛ́. Mɛ e nɔ jɛ dɔkun ma xo kan ɔ́, dɔkun tɔn ɔ́ gba wɛ é nɔ́ gbadó; mɛ e ka nɔ jɛ dɔkun tɔn kpɛɖé kpɛɖé ɔ́, dɔkun tɔn nɔ ɖo jijɛ jí wɛ. È ɖo nǔɖé ɖó nukún wɛ bó má ɖo mimɔ wɛ ǎ ɔ́, azɔn wɛ é nɔ́ dó mɛ; è ka ɖo nǔɖé ba wɛ bó mɔ ɔ́, é nɔ́ cí atín e nɔ́ ná gbɛ ɔ́ ɖɔhun nú mɛ. Mɛ e ma nɔ se mɛ xó ǎ ɔ́, é ji nǔɖé ɔ́, é ná sɔ́ kpan; mɛ e è ka zɔ́n nǔ i ɔ́ é nɔ́ wa ɔ́, é ná ɖu le tɔn. Nǔ e nǔnywɛ́tɔ́ nɔ́ kplɔ́n mɛ ɔ́, gbɛjɔtɛn ɖé wɛ é nyí; é nɔ́ zɔ́n bɔ è nɔ jɛ kú sín mɔ mɛ ǎ. Mɛ e nɔ lin tamɛ ganjí ɔ́, nǔ tɔn nɔ́ nyɔ́ gbɛtɔ́ nukún mɛ; mɛsaɖutɔ́ sín ali ka nɔ kplá mɛ yi fí ɖé ǎ. Gbɛtɔ́ ayiɖotenánɔ nɔ́ lin tamɛ cóbó nɔ wa nǔ; lo ɔ́, xlonɔ ɔ́, gǔgú tɔn wɛ é nɔ́ ɖó agban. Mɛ e ma nɔ dó wɛn ganjí ǎ ɔ́, nǔ wɛ é nɔ́ hɛn gblé; mɛ e ka nɔ dó wɛn ganjí ɔ́ nɔ́ bló nǔ ɖó. Mɛ e nɔ gbɛ́ ɖɔ mɛɖé kún ná kplɔ́n nǔ émí ó ɔ́, ya wɛ é nɔ́ ji, bɔ mɛ bǐ nɔ́ hu tɛ́ n'i. Mɛ e è ka gbɛ́ nǔ ná ɔ́, é nɔ́ se ɔ́, è nɔ sɔ́ ɛ su. È ɖo nǔɖé ba ná wa wɛ, bó kpé wú ɔ́, é nɔ́ víví nú mɛ; énɛ́ wú wɛ mɛdídá lɛ́ɛ ma ɖo nǔ nyanya wa wɛ ɔ́, é nɔ́ víví nú yě ǎ. A dǒ nǔnywɛ́tɔ́ há ɔ́, a nǎ húzú nǔnywɛ́tɔ́; a ka dó xlonɔ há ɔ́, a nǎ wa nǔ dó hwiɖée wú. Mɛ e nɔ wa nǔ nyanya ɔ́, nǔ nyanya wɛ nɔ jɛ gǒ mɛ n'i; lo ɔ́, hwɛjijɔnɔ ɔ́, ɖagbe wɛ ka nyí ajɔ tɔn. Đagbewatɔ́ nɔ́ ɖu nǔ kpo nú vǐvú tɔn lɛ́ɛ; hwɛhutɔ́ sín dɔkun ka ná wá jɛ hwɛjijɔnɔ sín alɔ mɛ. Wamamɔnɔ kpé nukún dó gle tɔn wú ɔ́, ji nɔ jɛ n'i; lo ɔ́, nǔ má wa ɖó sɛ́nxwi jí nɔ́ yí bǐ sín así tɔn. Mɛ e ma nɔ xo vǐ ǎ ɔ́ yí wǎn nú vǐ tɔn ǎ; mɛ e ka nɔ xo vǐ ɔ́ yí wǎn nú vǐ. Hwɛjijɔnɔ nɔ ɖu nǔ, bɔ é nɔ jɛ mɛ n'i; lo ɔ́, mɛdídá ɔ́, adɔ nɔ dó ya n'i. Nyɔ̌nu e ɖó nǔnywɛ́ ɔ́ nɔ́ hɛn xwé; nyɔ̌nu xlonɔ ka nɔ gba xwé. Gbɛtɔ́ e nɔ wa nǔ ɖó sɛ́nxwi jí é nɔ́ ɖó sísí nú Mawu Mavɔmavɔ; mɛ e ka nɔ wa nǔ agɔ agɔ é nɔ́ hu tɛ́ n'i. Xlonɔ ɔ́, xó e é ɖésú ɖɔ ɔ́ wɛ è nɔ xwedó dó dɔn go e yí wɛ é ɖe ɔ́ sín tó n'i; amɔ̌, nǔnywɛ́tɔ́ ɔ́, xó e é ɖésúnɔ nɔ́ ɖɔ ɔ́ wɛ nɔ́ nya xɛ ɖo yě jí. Fí e nyibú má ɖe ǎ ɔ́, nǔ e mɛ yě nɔ́ ɖu nǔ ɖe ɔ́ nɔ́ nɔ vɔ̌; amɔ̌, cóbónú è nǎ ya jinukún sukpɔ́ ɔ́, è ɖǒ ná ɖó nyibú e è nɔ dó lɛ gle ná é. Kúnnuɖetɔ́ e nɔ́ ɖɔ nǔgbó ɔ́ nɔ́ bú mɛ ǎ; lo ɔ́, kúnnu-agɔɖetɔ́ nɔ́ ɖo adingban te. Mɛ e nɔ yí go ɔ́ ná bó ba nǔnywɛ́ káká ɔ́, é ná mɔ ǎ; mɛ e ka nɔ lin tamɛ kpɔ́n ɔ́ nɔ́ yá wǔ tunwun nǔ. Ma dó xlonɔ há ó; a ɖo nǔnywɛ́ ɖé ná mɔ yí wɛ ɖo xó tɔn mɛ ǎ. Gbɛtɔ́ e ɖó ayi te ɔ́ nɔ́ kpɔ́n afɔ bo nɔ ɖe, ɖó nǔnywɛ́tɔ́ wɛ; mɛ e ma ɖó nǔnywɛ́ ǎ é ká nɔ́ bú ali ɖó xlo tɔn wú. Xlonɔ hu hwɛ ɔ́, é nɔ́ mɔ ɖɔ é kún byɔ́ ɖɔ émí ní sú hwɛ xɔ́ ó; mɛ e nɔ wa nǔ ɖó sɛ́nxwi jí lɛ́ɛ ká nɔ́ dó hwɛ gbɔ xá yěɖée. Mɛ e ɖo wǔvɛ́ mɔ wɛ ɔ́, é ɖokpó géé wɛ tunwun bǎ e mɛ é ɖo wǔvɛ́ mɔ wɛ yi jɛ é; mɔ̌ ɖokpó ɔ́, mɛ e ɖo awǎ jɛ wɛ ɔ́, é ɖokpó géé wɛ tunwun bǎ e mɛ é ɖo awǎ jɛ wɛ yi jɛ é. Mɛdídá lɛ́ɛ sín xwé ná gba; hwɛjijɔnɔ lɛ́ɛ sín xwé ká ná ɖo ada gbló wɛ. Gbɛtɔ́ ɖé lɛ́ɛ nɔ́ mɔ ɖɔ ali ɖagbe jí wɛ émí ɖe; có, ali énɛ́ ɔ́ sixú wá kplá ɛ yi kú. È nɔ ɖo wǔvɛ́ mɔ wɛ ɖo ayi mɛ cóbó nɔ́ ko nǔ; è nɔ ɖo awǎjijɛ mɛ có awǎjijɛ ɔ́ sixú wá húzú aluwɛ. Mɛdídá ɔ́, nyanya e é wa ɔ́ sín le wɛ é nɔ́ ɖu; gbɛtɔ́ ɖagbe ɔ́, ɖagbe e é wa ɔ́ sín ajɔ wɛ é nɔ mɔ. Gbɛtɔ́ e ayivɔ vún ɔ́ nɔ́ ɖi nǔ nú nǔ e è ɖɔ n'i lɛ́ɛ bǐ; mɛ e ayi tɔn ka ɖo te ɔ́ nɔ́ lin tamɛ cóbó nɔ wa nǔ. Gbɛtɔ́ e ɖó nǔnywɛ́ ɔ́ nɔ́ ɖi xɛsi nú nǔ nyanya bó nɔ́ kpa kɛ́n ná; xlonɔ ka nɔ ɖo wǔyámɛsin dun wɛ bó nɔ́ jɛ nǔ nyanya mɛ. Mɛ e nɔ yá wǔ sin xomɛ ɔ́ nɔ wa nǔ nyi do; mɛ e ɖó ayi nyanya xomɛ ɔ́, wǎn wɛ è nɔ gbɛ́ n'i. Gbɛtɔ́ e ayivɔ vún lɛ́ɛ ɔ́, xlonɔ wɛ yě nɔ́ wá húzú; lo ɔ́, gbɛtɔ́ e ayi yětɔn ɖo te lɛ́ɛ ɔ́, nǔtunwuntunwun wɛ nɔ nyí jɛ̌gbákún nú yě. Mɛ nyanya lɛ́ɛ ná wá yi do nú mɛ ɖagbe lɛ́ɛ; bɔ mɛdídá lɛ́ɛ ná wá nɔ te ɖo hwɛjijɔnɔ lɛ́ɛ sín hɔn ta. Mɛ bǐ nɔ gbɛ́ wǎn nú wamamɔnɔ káká jɛ mɛ tɔn lɛ́ɛ jí; dɔkunnɔ sín xɔ́ntɔn lɛ́ɛ ká nɔ́ sukpɔ́. Wǎn gbɛ́ nú nɔzo ɔ́, hwɛ wɛ; mɛ e ka nɔ kú nǔbláwǔ nú wamamɔnɔ ɔ́, nǔ nyɔ́ n'i. Gbɛtɔ́ e ɖó ayi nyanya ɔ́, ali wɛ é nɔ́ bú; mɛ e ka ɖó linlin ɖagbe ɔ́, è nɔ nyɔ́ xomɛ dó wǔ tɔn, è nɔ nɔ gbejí n'i. Azɔ̌ bǐ wɛ ɖó le; amɔ̌, xó zɔ́ ɔ́, ya wɛ é nɔ́ dɔn wá. Dɔkun wɛ nyí mɛ e ɖó nǔnywɛ́ lɛ́ɛ sín ajɔ; xlonɔ lɛ́ɛ nɔ́ tɔ́n sín xlo yětɔn mɛ gbeɖé ǎ. Kúnnuɖetɔ́ e nɔ ɖɔ nǔgbó ɔ́ nɔ xɔ gbɛ nú mɛ gěgé; lo ɔ́, kúnnu-agɔɖetɔ́ nɔ́ bú mɛ. Mɛ e nɔ ɖó sísí nú Mawu Mavɔmavɔ ɔ́, ayi tɔn nɔ jɛ ayǐ, ɖó Mawu wɛ nyí bibɛtɛn nú vǐ tɔn lɛ́ɛ. Sísí ɖó nú Mawu Mavɔmavɔ ɔ́, gbɛjɔtɛn wɛ é nyí, é nɔ́ zɔ́n bɔ è nɔ jɛ kú sín mɔ mɛ ǎ. Gbɛtɔ́ sukpɔ́ ɖo to ɖé mɛ ɔ́, susu wɛ é nyí nú axɔ́sú ɔ́; axɔ́sú ɖé sín to ka jɛ vɔ̌ ɔ́, acɛkpikpa tɔn nɔ jɛ ayǐ. Mɛ e ma nɔ yá wǔ sin xomɛ ǎ ɔ́ mɔ nukúnnú jɛ nǔ mɛ titewungbe; lo ɔ́, mɛ e nɔ yá wǔ sin xomɛ ɔ́ nɔ ɖe taɖu tɔn xlɛ́. Ayi jɛ ayǐ nú mɛ ɔ́, agbaza mɛtɔn nɔ́ nɔ ganjí; wǔhwinhwan ɔ́, xúɖuxúɖu ká wɛ. Mɛ e nɔ gba acɛ lelenɔ wú ɔ́, agɔ tawun wɛ é nyí bɔ é jɛ dó mɛ e bló e é. Mɛ e ka nɔ kú nǔbláwǔ nú wamamɔnɔ ɔ́ sɔ́ mɛ e bló e ɔ́ su. Kpo e mɛdídá nyi é jɛ́n nɔ́ wa jɛ ta tɔn. Hwɛjijɔnɔ na bo ka ɖo kú nukɔn ɔ́, é nɔ́ ɖeji. Gbɛtɔ́ e nɔ́ lin tamɛ kpɔ́n ganjí ɔ́, nǔnywɛ́ wɛ ɖó zan nyi xo tɔn mɛ; è ka nɔ mɔ nǔnywɛ́ ɖo xlonɔ lɛ́ɛ gɔ́n ǎ. Hwɛjijɔ nɔ sɔ́ to dó jǐ; amɔ̌, nǔ agɔ wiwa ɔ́, winnyá wɛ é nyí nú to. Axɔ́sú nɔ́ nyɔ́ xomɛ dó azaglɔ́gán e tunwun azɔ̌ ganjí ɔ́ wú; é ká nɔ́ sin xomɛ dó azaglɔ́gán e nɔ dó winnyá ɛ é. È sɔ́ gbe fífá dó ná xósin mɛ ɔ́, xomɛ nɔ fá; è ka kán gbe nú mɛ ɔ́, xomɛsin ɔ́ ɖě nɔ́ jɛ ɖě jí. Nǔnywɛ́tɔ́ lɛ́ɛ ɖɔ xó ɔ́, nǔnywɛ́ ɖíɖó nɔ́ jló mɛ; amɔ̌, xlonɔ lɛ́ɛ ɔ́, lɛ̌lo wɛ nɔ́ tɔ́n sín nu yětɔn mɛ. Mawu Mavɔmavɔ sín nukún mɔ nǔ jɛ fí bǐ; é nɔ́ ɖo mɛdídá kpó mɛ ɖagbe kpó kpɔ́n wɛ. Xó e nɔ dó wǔsyɛ́n lanmɛ nú mɛ ɔ́, atín ɖé wɛ é nyí bó nɔ́ ná gbɛ mɛ; alǎnnú ɖɔ nú mɛ ka nɔ kú wǔ nú mɛ. Vǐ e ma bí ǎ é nɔ́ hu tɛ́ nú kplɔ́n e tɔ́ tɔn nɔ́ ná ɛ é; lo ɔ́, vǐ e è gbɛ̌ nǔ ná ɔ́, é nɔ se ɔ́, vǐ ayiɖotenánɔ nɛ́. Hwɛjijɔnɔ ɔ́, dɔkun wɛ nɔ gɔ́ xwé tɔn; lo ɔ́, mɛdídá ɔ́, nǔ e é wa nǔ bó mɔ ɔ́ nɔ́ dɔn awě wá n'i. Nǔnywɛ́tɔ́ xó ɔ́, nǔ wɛ é nɔ́ kplɔ́n mɛ; xlonɔ sín ayixa ká gbɔn vo. Mawu Mavɔmavɔ nɔ gbɛ́ wǎn nú vɔ̌sísá mɛdídá tɔn; lo ɔ́, é nɔ́ se hwɛjijɔnɔ sín ɖɛ kpó xomɛ ɖagbe kpó. Mawu Mavɔmavɔ nɔ gbɛ́ wǎn nú mɛdídá sín walɔ; lo ɔ́, é nɔ yí wǎn nú mɛ e nɔ xwedó hwɛjijɔ dó wa nǔ é. Mɛ e zɛ sín ali ɖagbe ɔ́ jí ɔ́, è nǎ dɔn tó n'i bɔ é ná vɛ́ jlɛ́; mɛ e è ka gbɛ̌ nǔ ná ɔ́ é ma nɔ́ se ǎ é ná kú. Mawu Mavɔmavɔ mɔ nǔ jɛ kútomɛ, é mɔ jɛ domaɖó-azan ɔ́ mɛ; ani ka sɔ́ nyí gbɛtɔ́ sín ayi mɛ tɔn? Mɛ e nɔ yí go é nɔ́ ba nú è nǐ kɛ nu dó nǔ e wa wɛ é ɖe lɛ́ɛ ɖě wú ǎ; énɛ́ wú wɛ é má nɔ́ kan nǔ byɔ́ mɛ e ɖó nǔnywɛ́ lɛ́ɛ ǎ. Xomɛ hun mɛ ɔ́, nukún mɛtɔn mɛ nɔ nyɔ́ kpɔ́n; linkpɔ́n ká ɖo ayi mɛ nú mɛ ɔ́, wǔ nɔ kú mɛ. Mɛ e ayi tɔn nɔ mɔ nǔ ɔ́ nɔ́ ba ná tunwun nǔ dó nǔ jí; lo ɔ́, xlonɔ lɛ́ɛ ɔ́, lɛ̌lo ɖɔ wɛ jɛ́n yě nɔ́ ɖe tɛgbɛ. Wamamɔnɔ ɔ́, gbɛ nɔ nyɔ́ n'i gbeɖé ǎ; mɛ e gbɛ ká nyɔ́ ná ɔ́ nɔ́ fɔ́n bó nɔ́ ɖo agɔ̌ ɖu wɛ. È ɖǒ nǔ kpɛɖé lobo ɖó sísí nú Mawu Mavɔmavɔ ɔ́, é nyɔ́ hú è jɛ dɔkun kpɔ́ gěgé, bɔ linkpɔ́n ká hú gǎn mɛ. È ɖu nǔ lan ma ɖ'é mɛ ɖo fí e wǎn yíyí ɖe ɔ́, é nyɔ́ hú è ɖu lan kloklo ɖo fí e è gbɛ́ wǎn nú mɛ ɖe é. Gbɛtɔ́ xomɛsinnɔ nɔ dɔn hun wa; gbɛtɔ́ e fá xomɛ é ká nɔ́ dɔn hun wá ǎ. Ali e jí fɔnlínnɔ ɖe ɔ́, wunkan wɛ gɔ́; mɛ e nɔ wa nǔ jlɔ́jlɔ́ ɔ́, ali e jí é ɖe ɔ́ ká mɛ́. Vǐ ɖé ɖó mɛxóyixa ɔ́, é nɔ́ víví nú tɔ́ tɔn; vǐ e jɔ xlo ɔ́ nɔ hu tɛ́ nú nɔ tɔn. Mɛ e ayivɔ vún ɔ́ zɛ xlohwɛ ɔ́, vǐví wɛ é nɔ́ lɛ́ víví n'i; mɛ e ka nɔ lin tamɛ kpɔ́n ɔ́, núwiwa tɔn nɔ́ xwe ali. È lɛ̌n nǔɖé ná wa bó má ɖó te nú mɛ ɖé ǎ ɔ́, é nɔ́ yi ta ǎ; mɛ gěgé ká ɖe wě d'é wú xá mɛ ɔ́, è nɔ mɔ nu tɔn. Xósin ɖagbe tɔ́n sín gbɛtɔ́ nu mɛ ɔ́, xomɛ nɔ hun i. È ɖɔ xó nú é jɛ gan ɔ́, é nɔ́ nyɔ́ tawun! Gbɛtɔ́ e ayi tɔn ɖo te ɔ́, gbɛligbó wɛ é nɔ́ mlɛ́; é nɔ mlɛ́ ali e yi kútomɛ é ǎ. Mawu Mavɔmavɔ nɔ gba goyítɔ́ sín xwé, bó ká nɔ́ kpé nukún dó asúkúsi sín ayǐkúngban wú. Mawu Mavɔmavɔ nɔ gbɛ́ wǎn nú linlin nyanya lɛ́ɛ; lo ɔ́, xó ɖagbe lɛ́ɛ nɔ́ nyɔ́ nukún tɔn mɛ. Mɛ e nɔ gba acɛ dó ɖó akwɛ́ ɔ́, xwé é ɖésúnɔ tɔn wɛ é nɔ́ dɔn dó ya mɛ. Mɛ e ka gbɛ́ wǎn nú nǔ ɖu ɖo nǔ mɛ é ná dɔ́ ji. Gbɛtɔ́ hwɛjijɔnɔ nɔ́ lin tamɛ cóbó nɔ́ kɛ nu dó xó wú. Mɛdídá lɛ́ɛ ká nɔ́ ɖɔ alǎnnú kɔn nyi ayǐ kpowun. Mawu Mavɔmavɔ nɔ kpɔ́n mɛdídá lɛ́ɛ sín jɔ jí ǎ; lo ɔ́, é nɔ́ ɖótó hwɛjijɔnɔ lɛ́ɛ sín ɖɛ. È ko nǔ dó mɛ ɔ́, xomɛ nɔ hun mɛ; wɛn ɖagbe nɔ dó wǔsyɛ́n lanmɛ nú mɛ. Mɛ e è gbɛ̌ nǔ ná bó ná ɖe e ɖó ali jí ɔ́, é nɔ́ ɖótó te bó nɔ́ se ɔ́, nǔnywɛ́tɔ́ lɛ́ɛ mɛ wɛ é ɖe. Mɛ e è kplɔ́n nǔ ɔ́ é má nɔ se ǎ ɔ́, éɖée wú wɛ é wa nǔ dó; lo ɔ́, mɛ e è gbɛ́ nǔ ná ɔ́, é nɔ se ɔ́ ayi tɔn nɔ ɖo nǔ mɔ wɛ. Sísí ɖó nú Mawu Mavɔmavɔ ɔ́, nǔnywɛ́ sín azɔ̌mɛ yiyi wɛ. Mɛɖée wɛ è nɔ sɔ́ hwe hwɛ̌ có è nɔ wá sɔ́ mɛ su. Nǔ gěgé lin wɛ gbɛtɔ́ ɖe bó ná wa, amɔ̌, éé Mawu Mavɔmavɔ ɖɔ ɔ́ wɛ nɔ nyí wiwa. Mɛ ɖokpó ɖokpó nɔ mɔ ɖɔ walɔ émí tɔn nyí walɔ mímɛ́; amɔ̌, Mawu Mavɔmavɔ wɛ tunwun nǔ e ɖo mɛ ɖokpó ɖokpó sín ayi gɔngɔn mɛ é. Sɔ́ azɔ̌ towe dó alɔ mɛ nú Mawu Mavɔmavɔ, énɛ́ ɔ́, nǔ e lin ná wa wɛ a ɖe lɛ́ɛ ná jɛ nu. Mawu Mavɔmavɔ tunwun nǔ e wú é bló nǔ ɖokpó ɖokpó é; azǎn e gbe é nǎ dɔn tó nú mɛ é wú wɛ é tlɛ bló mɛdídá. Mawu Mavɔmavɔ gbɛ́ wǎn nú gbɛtɔ́ e nɔ yí go lɛ́ɛ, é ná gɔn tó dɔn nú yě ǎ. Mɛ e nyɔ́ xomɛ bó ɖo gbejí ɔ́, è nɔ sɔ́ hwɛ kɛ ɛ; mɛ e nɔ ɖó sísí nú Mawu Mavɔmavɔ ɔ́ nɔ́ hɔn nú hwɛhuhu. Nú walɔ mɛɖé tɔn nyɔ́ Mawu Mavɔmavɔ nukún mɛ ɔ́, Mawu nɔ bló bɔ kɛntɔ́ tɔn lɛ́ɛ ɖésú nɔ́ dó hwɛ gbɔ xá ɛ. È wǎ nǔ ɖó sɛ́nxwi jí bó mɔ akwɛ́ kpɛɖé ɖ'é mɛ ɔ́, é nyɔ́ hú è xo ahizi bó jɛ dɔkun. Gbɛtɔ́ nɔ bló tito é ɖésúnɔ tɔn lɛ́ɛ; amɔ̌, fí e é ná yi ɔ́, Mawu Mavɔmavɔ wɛ nɔ ɖɔ. Axɔ́sú ɖo xó ɖɔ wɛ ɔ́, é nɔ́ cí Mawu wɛ ɖo xó ɖɔ wɛ ɖɔhun; é ɖo hwɛ ɖɔ wɛ ɔ́, é nɔ́ ɖó adingban ǎ. Mawu Mavɔmavɔ jló ɖɔ nǔdagan ní nyí nǔdagan kpíkpé, bónú nǔjlɛ́ká ní nyí nǔjlɛ́ká kpíkpé; é wɛ bló nǔ énɛ́ lɛ́ɛ bǐ. Axɔ́sú nɔ́ gbɛ́ wǎn nú nǔ e má sɔgbe ǎ é wiwa, ɖó nǔ wa ɖó sɛ́nxwi jí jí wɛ acɛkpikpa tɔn jínjɔ́n. Mɛ e nɔ ɖɔ xomɛ nú axɔ́sú ɔ́ sín nǔ nɔ́ nyɔ́ nukún tɔn mɛ; é nɔ́ yí wǎn nú mɛ e nɔ ɖɔ nǔgbó é. Axɔ́sú sin xomɛ ɔ́, é hɛn ɔ́, é ná ná gbe bɔ è nǎ hu mɛ; lo ɔ́, gbɛtɔ́ e ɖó nǔnywɛ́ ɔ́ hɛn ɔ́, é ná xo hwihwɛ́ ɛ. Axɔ́sú ko nǔ dó mɛ ɔ́, gbɛ wɛ; xomɛnyínyɔ́ tɔn cí jǐ e nɔ ja bó nɔ hɛn ɖagbe wá é ɖɔhun. È ɖǒ nǔnywɛ́ ɔ́, é nyɔ́ hú è ɖǒ siká; è ɖǒ nukúnnú-mɔjɛnǔmɛ ɔ́, é nyɔ́ hú è ɖǒ kpatágan. Mɛ e nɔ wa nǔ ɖó sɛ́nxwi jí lɛ́ɛ nɔ́ hɔn nú nǔ nyanya wiwa. Mɛ e nɔ lin tamɛ cóbó nɔ́ wa nǔ ɔ́ nɔ́ nya xɛ ɖo éɖée jí. Mɛ ɖé ja cu kpé gbé ɔ́, goyíyí wɛ é nɔ́ bɛ́. Mɛ e nɔ mɔ éɖée ɔ́ nɔ́ sɔ́ éɖée nyi gbě. È wǎ nǔ ɖó jlɛ̌ jí, bó dó hǎ xá wamamɔnɔ lɛ́ɛ ɔ́, é nyɔ́ hú è mǎ dɔkun e è bɛ̌ sín ahwangbénu lɛ́ɛ xá gbɛtɔ́ e nɔ́ yí go lɛ́ɛ. Mɛ e nɔ lin tamɛ kpɔ́n ganjí cóbó nɔ́ jɛ nǔɖé wú ɔ́ nɔ́ mɔ nu tɔn. Nǔ nɔ́ nyɔ́ nú mɛ e nɔ ɖeji dó Mawu Mavɔmavɔ wú ɔ́. Mɛ e ɖó nǔnywɛ́ ɔ́, è nɔ ylɔ́ ɛ ɖɔ nukúnnú-mɔjɛnǔmɛtɔ́. Ényí è ɖɔ xó nú mɛ kpó wǎn yíyí kpó ɔ́, mɛ ɔ́ nɔ́ yí xó mɛtɔn. Ayi ɖó te dó wa nǔ ɔ́ gbɛjɔtɛn wɛ; xlonɔ lɛ́ɛ ɔ́, xlo yětɔn wɛ nɔ́ wa nǔ xá yě. Mɛ e ɖó nǔnywɛ́ ɔ́ ja xó ɖɔ gbé ɔ́, é nɔ́ tó lin tamɛ kpɔ́n hwɛ̌; énɛ́ wú wɛ é ɖɔ xó ɔ́, è nɔ ɖi nǔ nú xó tɔn. È ɖɔ xó nú mɛ kpó wǎn yíyí kpó ɔ́, é nɔ́ víví nú mɛ ɔ́ wǐin ɖɔhun; é nɔ́ cí lě e wǐin nɔ́ víví bó nɔ́ wa ɖagbe nú agbaza ɔ́ ɖɔhun. Gbɛtɔ́ ɖé lɛ́ɛ nɔ́ mɔ ɖɔ ali ɖagbe jí wɛ émí ɖe; có, ali énɛ́ ɔ́ sixú wá kplá yě yi kú. Azɔ̌watɔ́ ɔ́, adɔ wɛ nɔ zɔ́n azɔ̌ wa ɛ; nǔ ná ɖu wú wɛ é nɔ́ yi azɔ̌ wa gbé. Nǔvɔ́nɔ nɔ́ ɖe nǔ nyanya wé; xó e nɔ́ tɔ́n sín nu tɔn mɛ lɛ́ɛ cí myɔ nǔhɛngblétɔ́ ɖé ɖɔhun. Gbɛtɔ́ e nyí mɛdídá ɔ́ nɔ́ dɔn hun kpé; mɛnúɖɔtɔ́ ka nɔ klán hǎ. Gbɛtɔ́ dǎnúwatɔ́ nɔ flú nɔzo tɔn; é nɔ́ dɔn ɛ dó nǔ nyanya mɛ. Mɛ e ɖo nǔ nyanya lin ná wá wɛ, bó ɖo nukún myɔ́ wɛ, bó ɖo aɖǔma tɛ wɛ é kó dó nǔ e lin wɛ é ɖe é sin. Hwa e nɔ wú ɖo ta ɔ́, jɛ̌gbákún ɖagbe ɖagbe wɛ; mɛ e nɔ wa nǔ jlɔ́jlɔ́ lɛ́ɛ ta wɛ è nɔ mɔ ɖe. Mɛ e ma nɔ yá wǔ sin xomɛ ǎ ɔ́, é nyɔ́ hú mɛ e ɖó ɖuɖéjí é. È ɖu ɖo mɛ ɖésúnɔ jí ɔ́, é nyɔ́ hú è ɖu ɖo toxo ɖokpó jí. È nɔ kan nǔ, bó ná tunwun nǔ e ná wá jɛ lɛ́ɛ; lo ɔ́, Mawu Mavɔmavɔ kɛ́ɖɛ́ wɛ tunwun lě e nǔ ná cí gbɔn é. È ɖu wɔ̌ flú ɖo fí e ayi jɛ ayǐ ɖe ɔ́ nyɔ́ hú è ɖu wɔ̌ kpó lan kpó ɖo fí e jlɛ ɖe é. Mɛsɛntɔ́ e bí ganjí ɔ́ ná yí vǐ e nɔ́ dó winnyá mɛ ɔ́ sín tɛnmɛ, bó ná ɖu gǔ xá vǐ winnyádómɛtɔ́ ɔ́ sín nɔví lɛ́ɛ. Siká kpó kpatágan kpó ɔ́, zo wɛ è nɔ xo dó, bó nɔ́ tunwun ɖagbe kpó nyanya kpó. Amɔ̌, gbɛtɔ́ lɛ́ɛ ɔ́, Mawu Mavɔmavɔ wɛ nɔ mɔ nǔ jɛ ayixa yětɔn mɛ, bó nɔ́ tunwun ayixa ɖagbe kpó ayixa nyanya kpó. Gbɛtɔ́ e nɔ́ xo dǎka ɔ́ nɔ́ wlí tó dǎkaxotɔ́ lɛ́ɛ sín xó wú; adingbannɔ nɔ ɖótó xó e nɔ hɛn mɛ gblé lɛ́ɛ. Mɛ e nɔ ko wamamɔnɔ ɔ́, agɔ tawun wɛ é jɛ dó mɛ e bló wamamɔnɔ ɔ́ é. Mɛ e nǔ wa mɛ ɔ́, é nɔ́ víví n'i ɔ́, è nǎ gɔn tó dɔn n'i ǎ. Vǐvú lɛ́ɛ wɛ nyí jɛ̌gbákún ɖo ta nú degénɔ kpikpoe lɛ́ɛ, bɔ tɔ́ lɛ́ɛ nyí susu vǐ yětɔn lɛ́ɛ tɔn. Xó mímɛ́ sɔgbe xá xlonɔ ǎ; mɔ̌ ɖokpó ɔ́, adingban jɛ xá mɛ e nyí gǎn é ǎ. Mɛ e nɔ dó nǔ nu nú mɛ ɔ́ nɔ́ mɔ ɖɔ nǔ xɔ akwɛ́ ɖaxó ɖokpó wa wɛ émí ɖe; é nɔ́ mɔ ɖɔ è dǒ nǔ nu nú mɛ ɔ́, è nɔ mɔ nǔ e ba wɛ è ɖe ɔ́. Mɛ e sɔ́ hwɛ kɛ mɛ ɔ́, xɔ́ntɔn ba wɛ é ɖe; mɛ e ka fɔ́n ɔ́, é nɔ ɖo flínflín wɛ é ɖo xɔ́ntɔn tɔn lɛ́ɛ nya wɛ. È gbɛ̌ nǔ nú mɛ e nɔ mɔ nukúnnú jɛ nǔ mɛ ɔ́ azɔn ɖokpó géé ɔ́, é xɔ akwɛ́ hú è sɛ́n bǎ nú xlonɔ azɔn kanwe ko (100). Mɛdídá ɔ́, gǔ fɔ́n wɛ jɛ́n é nɔ́ ɖe, káká bɔ mɛ e ma nɔ kú nǔbláwǔ nú mɛ ǎ ɔ́ nɔ́ jɛ gbě tɔn mɛ. È yi kpé lɔnmɔ e ba vǐ tɔn kpo ɔ́, é nyɔ́ hú è yi kpé xlonɔ e ɖo xlohwɛ zɛ wɛ é. Mɛ e nɔ sɔ́ nyanya dó sú ɖagbe xɔ́ ɔ́, nǔ nyanya nɔ hán ɖo xwé tɔn gbe ǎ. È bɛ̌ jlɛ hǔn, è hun ali nú tagba nɛ́; è bo yá wǔ ɖe afɔ sín mɛ cóbónú hun ná bɛ́. Mɛ e yí hwɛ dó mɛdídá jí é, kpó mɛ e ɖó hwɛ nú hwɛjijɔnɔ é kpó bǐ wɛ Mawu Mavɔmavɔ gbɛ́ wǎn ná. Akwɛ́ jɛ xlonɔ lɔ mɛ ɔ́, ani wɛ é ná dó wa? Nǔnywɛ́ wɛ é ná sɔ́ dó yí ná a? Ayi tɔn sixú mɔ mɔ̌ ǎ. Xɔ́ntɔn nyɔ́ hwebǐnu. È nɔ ɖó nɔví bɔ é ná dó alɔ mɛ adǎngbomɛ hwenu. Xlonɔ wɛ mɛ ɖěvo nɔ ja axɔ́ ɖu gbé, bɔ é nɔ́ nɔ te n'i bó nɔ́ zin alɔ dó akɔ́n ɖɔ émí ná sú. Mɛ e yí wǎn nú jlɛ ɔ́, yí wǎn nú hwɛhuhu; lo ɔ́, mɛ e nɔ yí go ɔ́ ná hɛn gbɛ éɖée tɔn gblé. Mɛ e ɖó ayi hízíhízí ɔ́, nǔɖé nɔ nyɔ́ n'i ǎ; mɛ e nɔ ɖó adingban ɔ́, nǔ wɛ nɔ́ gbo e. Mɛ e ji vǐ xlonɔ ɔ́ nɔ mɔ akpɔ. Mɛ e ji taɖunɔ ɔ́ sixú j'awǎ gbeɖé ǎ. Ayi jɛ ayǐ nú mɛ ɔ́, azɔn nɔ yá wǔ gbɔ; wǔ ká kú mɛ ɔ́, gǎn wɛ nɔ hwedó mɛ. Mɛdídá nɔ ɖu kpa ɖo nǔglɔ́, lobo nɔ húzú hwɛjijɔ xwe. Gbɛtɔ́ e nɔ́ mɔ nǔ jɛ nǔ mɛ ɔ́, nǔnywɛ́ yíyí wɛ nɔ myá nukún n'i; lo ɔ́, xlonɔ sín nukún nɔ́ ɖo ma ná xɔ xi xwlé wɛ. Vǐ xlonɔ nɔ ɖó akpɔ nú tɔ́ tɔn; é nɔ́ nyí linkpɔ́n nú mɛ e zɛn bó ji i é. É nyɔ́ ɖɔ è nǐ dɔn tó nú xomɛvɔ́nɔ ǎ; è dɔn tó nú gbɛtɔ́ e mɛ lɛ́ɛ nɔ sí ɔ́, acɛ wɛ é nyí bɔ è gba. Mɛ e tunwun nǔ ɔ́ nɔ ɖɔ xó dín ǎ; mɛ e sín ayi ɖo te ɔ́ nɔ yi agbɔ̌n jí. Mɛ ɖé ná bó nyí taɖunɔ bó ká nɔ́ cí xwíí ɔ́, è nɔ mɔ ɛ dó mɔ gbɛtɔ́ nǔnywɛ́tɔ́; mɛ e bɔ nu dó aɖǔ ɔ́, è nɔ mɔ ɛ dó mɔ gbɛtɔ́ bíbí. Gbɛtɔ́ e nɔ́ ɖɔ émí ɖokpó tɔn jɛ́n ná nyɔ́ ɔ́, wǔ wɛ é nɔ́ ɖó zɔ nú mɛ bǐ; è kplɔ́n nǔ i ɔ́, xomɛ wɛ é nɔ́ sin. Xlonɔ nɔ ba ná mɔ nukúnnú jɛ nǔ mɛ ǎ; nǔ e ɖo taglo tɔn mɛ ɔ́ jlá kpé wɛ nɔ́ myá nukún n'i. Dǐdá ɔ́, wǎn gbɛ́ nú mɛ wɛ nɔ jɛ gǔdo tɔn; zun nɔ dɔn winnyá wá. Xó e nɔ́ tɔ́n sín gbɛtɔ́ nu mɛ ɔ́, agbetawoyó wɛ, é gɔ́ngɔ́n ɖésú; nǔnywɛ́ sín jɔtɛn ka nyí tɔsisa e gba wu é. É nyɔ́ nú è na nɔ mɛ e wa nǔ nyi do ɔ́ jí, lobo gblé hwɛ dó ta nú mɛ e hwɛ tɔn jɔ é ǎ. Xlonɔ xó ɔ́, jlɛ wɛ é nɔ́ dɔn nyi ayǐ; nukikɛ tɔn nɔ dɔn akpotokwín wá. Xó e nɔ́ tɔ́n sín xlonɔ nu mɛ ɔ́ jɛ́n nɔ́ lɛ́ wa nǔ dó wǔ tɔn; xó é ɖésúnɔ tɔn nɔ nyí mɔ bɔ é nɔ́ jɛ mɛ. Mɛnúɖɔtɔ́ sín xó nɔ́ víví wǐin ɖɔhun; è nɔ nu, bɔ é nɔ́ kpé kan mɛ nú mɛ. Mɛ e nɔ dó vɛ̌ nú azɔ̌ é ɖésúnɔ tɔn ɔ́, kpó mɛ e nɔ hɛn azɔ̌ é ɖésúnɔ tɔn gblé ɔ́ kpó ɔ́, nɔví nɔví wɛ yě nyí. Mawu Mavɔmavɔ ɔ́, ahohó wɛ é nyí; hwɛjijɔnɔ nɔ bɛ ta ɖo glɔ̌ tɔn bó nɔ́ gló nǔ. Dɔkunnɔ nɔ mɔ dɔkun tɔn dó mɔ ahohó; é nɔ́ mɔ ɖɔ dɔkun ná gló nǔ bǐ nú émí. Gbɛtɔ́ bɛ́ goyíyí ɔ́, nǔ tɔn nɔ jɛ gblégblé jí; mɛ e ka sɔ́ éɖée hwe ɔ́, è nɔ sɔ́ ɛ su. Mɛ e ma nɔ kú hǔn bó nɔ́ se xó cóbó nɔ́ kɛ nu d'é wú ǎ ɔ́, é nɔ́ ɖe xlonɔ e é nyí ɔ́ xlɛ́, bó nɔ́ dó winnyá éɖée. Azunzɔnnɔ e kpan akɔ́n ɔ́ nɔ́ dɛ ɖo azɔn tɔn mɛ; wǔ ka kú azunzɔnnɔ ɔ́, étɛ́ ka sixú dó wǔ yá lanmɛ n'i? Gbɛtɔ́ e mɔ nukúnnú jɛ nǔ mɛ ɔ́ nɔ́ ba ná tunwun nǔ; gbɛtɔ́ nǔnywɛ́tɔ́ nɔ ba ná se xó e nɔ ná kplɔ́n mɛ é. Nǔnámɛ nɔ hun ali nú mɛ, bɔ è nɔ tunwun gbɛtɔ́ nukúnɖéjí. Mɛ ɖé wá jɛ hwɛ dó nukɔn ɔ́, è nɔ mɔ ɖɔ hwɛ tɔn jɔ; mɛ e é dó hwɛ ɔ́ ká wá ɔ́, é nɔ́ flí xó tɔn xwe. Akɔ wɛ è nɔ nyi bó nɔ́ ɖó nǔdindɔn te; gbɛtɔ́ nukúnɖéjí lɛ́ɛ ná bó ɖo nǔ dɔn wɛ ɔ́, akɔ wɛ è nɔ nyi bó nɔ́ gbo xó nú yě. Nɔví e è jɛ do ná ɔ́ nɔ́ sú ayi mɛ hɔn dó mɛ, bɔ é nɔ́ syɛ́n hú ahohó; mɔ̌ ɖokpó ɔ́, adɔndindɔn nɔ sú ayi mɛ hɔn dó mɛ, bɔ é nɔ́ syɛ́n hɔntogbó e è glǎ ɔ́ ɖɔhun. Xó e nɔ́ tɔ́n sín gbɛtɔ́ nu mɛ ɔ́ hɛn ɔ́, é ná ná ɛ nǔɖuɖu; xó e é nɔ́ ɖɔ ɔ́ ná dó alɔ ɛ bɔ é ná mɔ gbɛ tɔn nu. Xó ɔ́, kú kpó gbɛ kpó bǐ wɛ ɖ'é mɛ; mɛ e yí wǎn nú xó ɔ́, xó ɔ́ ji nǔɖé ɔ́, é ná sɔ́ kpan. Mɛ e mɔ asi ɔ́, nǔ wɛ nyɔ́ n'i; Mawu Mavɔmavɔ wɛ wa ɖagbe énɛ́ ɔ́ n'i. Wamamɔnɔ ɖo xó ɖɔ nú mɛ wɛ ɔ́, vo wɛ é nɔ sa nú mɛ; dɔkunnɔ ká nɔ kán gbe nú mɛ. Xɔ́ntɔn ɖé lɛ́ɛ nɔ́ wá húzú awě bó nɔ́ xo mɛ; lo ɔ́, xɔ́ntɔn zɔnjɛzɔnfɔ́n ɔ́, è nɔ mɔ ɛ ɖo gúdo hú nɔví. È nyǐ wamamɔnɔ bónú ayi mɛtɔn ka ɖo wɛn ɔ́, é nyɔ́ hú è nyǐ adingbannɔ bó nyí xlonɔ. Nǔ ba ná wa hawun ma yi agbɔ̌n jí hwɛ̌ ɔ́, è nɔ mɔ nu tɔn ǎ; è ɖo hwlɛ́ndó jí dín ɔ́, nǔ wɛ è nɔ wa nyi do. Xlojijɔ gbɛtɔ́ tɔn nɔ́ kplá ɛ yi dó kɔ́blúmánya mɛ, bɔ é nɔ́ jɛ wunvo ba Mawu Mavɔmavɔ jí. Nǔ ɖo mɛ sí ɔ́, xɔ́ntɔn nɔ́ sukpɔ́; lo ɔ́, xɔ́ntɔn ɖokpó e wamamɔnɔ ɖó ɔ́ kpó é kpó nɔ́ lɛ́ gblé. Mɛ e nɔ ɖe kúnnu agɔ ɔ́, è nǎ wá dɔn tó n'i gbe ɖokpó; adingbannɔ ɔ́, è nǎ gɔn tó dɔn n'i ǎ. Mɛ gěgé nɔ́ klɔ́ gbɛtɔ́ nukúnɖéjí lɛ́ɛ; mɛ bǐ nɔ dó xɔ́ntɔn mɛ e nɔ ná nǔ mɛ é. Wamamɔnɔ ɔ́, nɔví tɔn lɛ́ɛ ɖésú nɔ gbɛ́ wǎn n'i; xɔ́ntɔn tɔn lɛ́ɛ tɔn sɔ́ nyí ɖiɖɔ ǎ; yě bǐ nɔ́ nɔ zɔ n'i; é nɔ́ mɔ yě mɛ ɖěbǔ bó ná ɖɔ xó xá ǎ. Nǔ kplɔ́n dó nǔ jí ɔ́, wǎn yí nú mɛ ɖésúnɔ wɛ; mɛ e nɔ ba ná mɔ nukúnnú jɛ nǔ wú ɔ́, nǔ nɔ nyɔ́ n'i. Mɛ e nɔ ɖe kúnnu agɔ ɔ́, è nǎ dɔn tó n'i; mɛ e nɔ ɖó adingban ɔ́ ná sɔ́ éɖée nyi gbě. É jɛ xá ɖɔ xlonɔ ní ɖu gbɛ ǎ; mɔ̌ ɖokpó ɔ́, kannumɔ ɖó ná kpa acɛ nú gǎn tɔn gbeɖé ǎ. Gbɛtɔ́ e bí é nɔ́ yá wǔ sin xomɛ ǎ; wi e ɖo ta tɔn ɔ́ wú wɛ é nɔ́ kpɔ́n dó dó wɔn agɔ e è jɛ dó e lɛ́ɛ. Axɔ́sú e ɖo xomɛsin jí é dó xɛsi kinnikínní ɖo adǎn jí ɖɔhun; xomɛnyínyɔ́ tɔn ka nɔ wa ɖagbe, ahǔn ja dó gběhan jí ɖɔhun. Vǐ xlonɔ ɔ́, afɔkú wɛ é nyí nú tɔ́ tɔn; nyɔ̌nu jlɛɖɔtɔ́ cí gɔ̌ta e ma nɔ gɔn sin kun ǎ é ɖɔhun. Tɔ́ mɛtɔn sín dɔkun kpó xwé tɔn kpó ɔ́, è hɛn ɔ́, è nǎ ɖu gǔ tɔn; amɔ̌, nyɔ̌nu e ayi tɔn nɔ ɖo te ɔ́, Mawu Mavɔmavɔ ɖokpónɔ wɛ nɔ ná mɛ. Fɔnlín ɔ́, amlɔ wɛ é nɔ́ zɔ́n mɛ hwebǐnu; mɛ e ma nɔ wa nǔɖé ǎ ɔ́, xovɛ́ wɛ é nɔ́ nɔ. Mɛ e nɔ nyi sɛ́n ɔ́ nɔ́ nya xɛ ɖo gbɛ éɖée tɔn jí; mɛ e ma nɔ lin tamɛ cóbó nɔ́ wa nǔ ǎ ɔ́ ná kú. Mɛ e nɔ ná nǔ wamamɔnɔ ɔ́, nǔ wɛ é nya nú Mawu Mavɔmavɔ; Mawu ná ná ajɔ tɔn ɛ. Nɔ dɔn tó nú vǐ towe din e a hɛn ɔ́, a nǎ kplɔ́n ɛ é; amɔ̌, ma ɖo xomɛsin jí bó xo ɖó nǎ hu do mɛ ó. Mɛ e sin xomɛ ɖaxó ɔ́, è ɖǒ ná kán akwɛ́ ɖé n'i bɔ é ná sú; nǔ má nyí mɔ̌ ǎ hǔn, kan wɛ è dǒ kan jí n'i. Nɔ ɖótó kplɔ́n; è kplɔ́n nǔ we hǔn nɔ se; énɛ́ ɔ́, a nǎ húzú nǔnywɛ́tɔ́. Gbɛtɔ́ nɔ́ lin nǔ gěgé bó ná wa, amɔ̌, jlǒ Mawu Mavɔmavɔ tɔn wɛ nɔ nyí wiwa. Xomɛnyínyɔ́ wɛ nyí nǔ e ba wɛ è ɖe ɖo gbɛtɔ́ sí é; è nyǐ wamamɔnɔ ɔ́, é nyɔ́ hú è nyí adingbannɔ. Sísí ɖó nú Mawu Mavɔmavɔ mɛ wɛ è nɔ mɔ gbɛ ɖe; nǔɖé nɔ́ hwedó mɛ ǎ; zǎn mɛ ɔ́, è nɔ dɔ́ amlɔ ganjí, gbɛwé ɖé nɔ́ xo mɛ ǎ. Fɔnlínnɔ zé alɔ dó nǔɖuká mɛ ɔ́, nu sɔ́ yi tɔn nɔ́ nyí azɔ̌ n'i. È xo goyítɔ́ ɖo xlonɔ nukún mɛ ɔ́, xlonɔ sín ayi ná mɔ nǔ; è gbɛ̌ nǔ nú gbɛtɔ́ e ɖó nǔnywɛ́ ɔ́, é nɔ mɔ nǔ jɛ nǔ e è ba ɖɔ é ní tunwun ɔ́ mɛ. Vǐ e nɔ́ sí hun te dó tɔ́ tɔn jí ɔ́, vǐ e nɔ́ nya nɔ tɔn ɔ́, vǐ winnyá dó mɛ tɔ́ wɛ, vǐ hɛ̌ndómɛtɔ́ wɛ. Vǐ ce, nú a ma sɔ́ nɔ́ ɖótó te bó nɔ́ yí kplɔ́n e ná we wɛ è ɖe lɛ́ɛ ǎ ɔ́, nǔtunwuntunwun vɛ́ we. Kúnnuɖetɔ́ nǔvɔ́nɔ nɔ́ ké ya nú sɛ́n ǎ; mɛdídá lɛ́ɛ ɔ́, alǎnnú ɖiɖɔ wɛ nɔ́ víví nú yě. Goyítɔ́ lɛ́ɛ ɔ́, hwɛ e è nǎ ɖó nú yě é kó ɖo te; xlonɔ lɛ́ɛ ɔ́, nɛgbé yětɔn ɖo te nú bǎ. Vɛ̌ɛn nɔ zɔ́n goyíyí mɛ; ahan syɛ́nsyɛ́n nɔ́ zɔ́n zǐngídiɖúɖú mɛ; mɛ e nɔ nu mú é ɖě ná ɖó nǔnywɛ́ gbeɖé ǎ. Axɔ́sú e ɖo xomɛsin jí é dó xɛsi kinnikínní e ɖo adǎn jí é ɖɔhun; mɛɖé dó xomɛsin xomɛ nú axɔ́sú hǔn, mɛ ɔ́ sɔ́ gbɛ éɖée tɔn dó da ayihún. Mɛ e hɔn nú jlɛ ɔ́, wi wɛ é nyí bó ɖo ta n'i; xlonɔ ka nɔ jɛ kú d'é jí. Fɔnlínnɔ nɔ́ sí avuvɔ bó nɔ́ gɔn gle lɛ, é ká su nǔkún-yiya hwenu ɔ́, é nɔ́ ba ná ya nǔkún; é ká nɔ́ mɔ nǔɖé ǎ. Nǔ e lin dó ayi mɛ wɛ gbɛtɔ́ ɖe ɔ́ cí sin e ɖo ayǐkúngban glɔ́ é ɖɔhun; gbɛtɔ́ e ɖó nǔnywɛ́ ɔ́ nɔ́ mɔ ayi e é ná dó ɖe sin ɔ́ tɔ́n ná é. Gbɛtɔ́ gěgé nɔ́ ɖo lě e yě nyɔ́ xomɛ gbɔn ɔ́ ɖó hǎ wɛ; è ka sixú mɔ gbɛtɔ́ e wú è nǎ ɖeji dó ɔ́ nǔgbó a? Gbɛtɔ́ hwɛjijɔnɔ nɔ sɔ́ ayi ɖó wɛn dó wa nǔ; nǔ nyɔ́ nú vǐ e é ji lɛ́ɛ. Axɔ́sú jínjɔ́n ayǐ bó ɖo hwɛ ɖɔ wɛ ɔ́, tlóló jɛ́n nukún tɔn nɔ́ mɔ nǔ e jɛ do é. Mɛ ɖé sixú glá ɖɔ émí bló ayi émítɔn ɖó bɔ é mɛ́, bɔ hwɛ ɖěbǔ kún ɖo kɔ nú émí ó a? Mawu Mavɔmavɔ gbɛ́ wǎn nú mɛ e ɖó nǔdagan e má sɔgbe ǎ é kpó mɛ e ɖó nǔjlɛ́ká e má sɔgbe ǎ é kpó. Ényí vǐ ɖé ɖo walɔ ɖé lɛ́ɛ zán wɛ ɔ́, è nɔ ko tunwun vǐ alɔkpa e é nyí é; é ɖo gbɛ ɖagbe, gbɛ jlɔ́jlɔ́ zán wɛ kpó é gbɔ kpó ɔ́, è nɔ ko tunwun. Tó e ɖo nǔ se wɛ ɔ́ kpó nukún e ɖo nǔ mɔ wɛ ɔ́ kpó ɔ́, Mawu Mavɔmavɔ wɛ bló bǐ. Ma yí wǎn nú amlɔ ó, a táá wá ji ya; nukún towe ní nɔ́ ɖo te ganjí; énɛ́ ɔ́, a nǎ mɔ nǔ ɖu bó gɔ́ xo. Nǔxɔtɔ́ nɔ ɖɔ: “É vɛ́ axi dín.” É ka xɔ bó yi lo ɔ́, é nɔ́ víví n'i, bɔ é nɔ́ ɖɔ é kpé tawun. Siká ɖe, jɛ̌nana tɛnmɛ tɛnmɛ ɖe; amɔ̌, nǔ e nyí nǔ xɔ akwɛ́ nǔgbó ɔ́ wɛ nyí xó e nɔ́ ná nǔnywɛ́ mɛ é. Ényí mɛ ɖé ná nɔ te nú mɛ e a ma tunwun ǎ bɔ mɛ ɔ́ ná nya akwɛ́ ɖo gɔ̌n towe hǔn, yǐ awu tɔn ɖó gbanu, ɖó é nɔ te nú mɛ e a ma tunwun ǎ é bɔ é ɖu axɔ́. Ényí mɛ ɖé fin nǔɖuɖu bó zé dó nu mɛ tlóló ɔ́, é nɔ́ víví ɖo nu tɔn mɛ, é ká wá gɔ́ nu tɔn mɛ ɔ́, é nɔ́ cí kɛ́n ɖɔhun. Mɛ ɖé lin nǔɖé ná wa bónú è kplɔ́n ɛ nǔ ɖagbe d'é wú ɔ́, é ná kpé nǔ ɔ́ wú bó ná wa; mɛ ɖé xwe ahwan fun gbé hǔn, é ní sɔ́ nǔ tɔn ganjí cóbó yi. Mɛ e nɔ ɖo mɛ nú ɖɔ kpé wɛ ɔ́ nɔ́ hɛn xó xomɛ ǎ; bo nɔ hɔn nú mɛ e xó hú gǎn lɛ́ɛ. Mɛ ɖé dó nu tɔ́ tɔn abǐ nɔ tɔn ɔ́, gbɛ tɔn ná cí zogbɛ́n cí ɖo zǐnflú gɔngɔn mɛ ɖɔhun. Dɔkun e è jɛ zogbe é ɔ́, è nɔ mɔ nu tɔn sɔ́yi ǎ. Ma ɖɔ: “Un ná sɔ́ nyanya dó sú nyanya xɔ́” ó; nɔ te kpɔ́n Mawu Mavɔmavɔ, é ná hwlɛ́n we gán. Mawu Mavɔmavɔ gbɛ́ wǎn nú nǔjlɛ́ká e má sɔgbe ǎ lɛ́ɛ; nǔdagan e má sɔgbe ǎ é nyí nǔ ɖagbe ǎ. Mawu Mavɔmavɔ wɛ sɔ́ mɛ ɖokpó ɖokpó ɖó ali e jí é ɖe é; nɛ̌ gbɛtɔ́ sixú tunwun ali e ná gbɔn wɛ é ɖe é gbɔn? È ma lin tamɛ kpɔ́n ǎ, bó dó akpá ɖɔ émí ná sɔ́ nǔɖé ɖó vo nú Mawu, abǐ è ko dó akpá ɔ́ cóbó wá jɛ tamɛ lin jí ɔ́, nǔ nyanya wɛ. Axɔ́sú e ɖó nǔnywɛ́ ɔ́ nɔ́ mɔ nǔ jɛ mɛdídá lɛ́ɛ wú, bó nɔ́ nyínyɛ́ yě. Ayixa e ɖo gbɛtɔ́ xomɛ é wɛ nyí zogbɛ́n e Mawu Mavɔmavɔ ná ɛ é; zogbɛ́n ɔ́ nɔ́ mɔ nǔ káká yi jɛ gbɛtɔ́ xomɛ. Xomɛnyínyɔ́ kpó gbejíninɔ kpó wɛ nɔ́ hɛn axɔ́sú ɖó zinkpo jí; xomɛnyínyɔ́ wɛ nɔ sɔ́ acɛkpikpa tɔn jínjɔ́n ayǐ. Hlɔ̌nhlɔ́n zínzán mɛ wɛ dɔ̌nkpɛvú lɛ́ɛ nɔ́ xɔ susu ɖe; hwa ká nyí acɔ́ nú mɛ kpikpo lɛ́ɛ. È ɖǒ bǎ nú mɛ ɔ́, bǎkpa lɛ́ɛ nɔ́ dó hunnylánylá do nú mɛ; è xo mɛ ganjí ɔ́, é nɔ́ wlí ayi dó xomɛ nú mɛ. Ayixa e ɖo axɔ́sú xomɛ ɔ́, tɔsisa wɛ bó ɖo Mawu Mavɔmavɔ sín alɔ mɛ; fí e jló e wɛ é nɔ́ ɖe ali n'i gbɔn. Mɛ ɖokpó ɖokpó nɔ mɔ ɖɔ walɔ émí tɔn sɔgbe; amɔ̌, Mawu Mavɔmavɔ wɛ tunwun nǔ e ɖo mɛ ɖokpó ɖokpó sín ayi gɔngɔn mɛ é. Hwɛjijɔ xwedó kpó nǔ wa ɖó sɛ́nxwi jí kpó xɔ akwɛ́ ɖo Mawu Mavɔmavɔ nukún mɛ hú vɔ̌sísá. Nyi wɛ sɔ lě kpó goyíyí kpó wɛ nɔ́ ɖe mɛdídá lɛ́ɛ sín hwɛ xlɛ́. Mɛ e nɔ kú hǔn bó nɔ́ to nǔ e wa gbé é ja ɔ́, nɔ́ mɔ nǔ gěgé ɖ'é mɛ; mɛ e ka nɔ zɔn nǔ jí bó nɔ́ bló ɔ́, nɔ́ byɔ́ ya mɛ. Mɛ e nɔ ɖó adingban dó jɛ dɔkun lɛ́ɛ ɔ́, kú hwlɛ́n dó wɛ yě ɖe; dɔkun e yě nɔ́ jɛ lɛ́ɛ nɔ́ nyí nǔ tí ǎ; bǐ wɛ nɔ́ gbadó azizɔ ɖɔhun. Dǎka e mɛdídá lɛ́ɛ nɔ́ xo ɔ́ wɛ nɔ kplá yě yi kú, ɖó yě nɔ́ gbɛ́ ɖɔ émí kún ná xwedó hwɛjijɔ ó. Mɛ e ɖó ayi hízíhízí ɔ́, ali gɔ́ndɔ́n gɔ́ndɔ́n wɛ é nɔ́ mlɛ́; mɛ e ayi tɔn mɛ ɖo wɛn ɔ́ ká nɔ́ wa nǔ ɖó sɛ́nxwi jí. È yi cí xɔ ta ɔ́, é nyɔ́ hú è yi nɔ xwé ɖokpó ɔ́ gbe xá nyɔ̌nu jlɛɖɔtɔ́. Mɛdídá ɔ́, nǔ nyanya wiwa kɛ́ɖɛ́ wɛ nɔ myá nukún n'i; xɔ́ntɔn tɔn ɖésú sín nǔ tlɛ nɔ blá wǔ n'i ǎ. È xo goyítɔ́ ɖo xlonɔ nukún mɛ ɔ́, xlonɔ sín ayi ná mɔ nǔ; è gbɛ́ nǔ nú gbɛtɔ́ e ɖó nǔnywɛ́ ɔ́, é ná mɔ nǔ jɛ nǔ e è ba ɖɔ é ní tunwun ɔ́ mɛ. Hwɛjijɔnɔ ɖo nǔ e ɖo jijɛ wɛ ɖo mɛdídá lɛ́ɛ sín xwé gbe ɔ́ bǐ kpɔ́n wɛ; é kpíkpé yě dó nǔ nyanya mɛ. Mɛ e lelenɔ ɖo xó sú wɛ ɔ́, é nɔ́ dó tókúse mɛ ɔ́, é lɔmɔ̌ wá ɖo xó sú wɛ ɔ́, mɛɖé ná ɖótó e ǎ. Mɛ e ɖo xomɛsin jí ɔ́, è yi ná ɛ nǔ ɖo nǔglɔ́ ɔ́, xo tɔn mɛ nɔ fá; mɛ e ɖo adǎn jí ɔ́, è zɔn kuuu bó yi mɔ ɛ ɔ́, adǎn tɔn nɔ́ cí. Nǔ wa ɖó sɛ́nxwi jí ɔ́, awǎjijɛ nú wɛ é nyí nú hwɛjijɔnɔ; mɛ e nɔ wa nǔ nyanya ɔ́ ká nɔ́ ɖi xɛsi ná. Mɛ e nɔ jó nǔnywɛ́ sín ali dó ɔ́, zaanɖé din ɔ́, é kpó mɛkúkú lɛ́ɛ kpó ná dó gbɛ̌. Mɛ e yí wǎn nú gbɛ ɖuɖu ɔ́, nǔɖé nɔ́ nɔ así tɔn ǎ; mɛ e yí wǎn nú agɔ̌ ɔ́ nɔ́ jɛ dɔkun ǎ. Nǔ e mɛdídá ba ɖɔ é ní jɛ dó hwɛjijɔnɔ jí ɔ́, éyɛ́ jí wɛ é ná jɛ dó; nǔ e mɛsaɖutɔ́ ba ɖɔ é ní jɛ dó nǔjlɔ́jlɔ́watɔ́ jí ɔ́, é ɖésú jí wɛ é ná jɛ dó. È gbɔ bo yi nɔ gbětótló mɛ ɔ́, é nyɔ́ hú è nɔ kpɔ́ xá nyɔ̌nu jlɛɖɔtɔ́ e nɔ dó akpɔ xomɛ nú mɛ é. Nǔ xɔ akwɛ́ kpó dɔkun kpó ɖo nǔnywɛ́tɔ́ xwé; xlonɔ ká nɔ́ hɛn étɔn lɛ́ɛ bǐ fun. Mɛ e nɔ ɖo hwɛjijɔ kpó xomɛnyínyɔ́ kpó gbé mɛ ɔ́ ná dɔ́ ji; è nǎ nɔ wa hwɛjijɔnɔnú n'i; è nǎ nɔ sɔ́ ɛ su. Mɛ e ɖó nǔnywɛ́ ɔ́ nɔ́ tɔ́n ahwan toxo e ɖo sɔ́ja syɛ́nsyɛ́n lɛ́ɛ lɔ mɛ é, bó nɔ́ gba ahohó e wú yě ɖeji dó é. Mɛ e nɔ hɛn nu ɔ́, nɔ́ ba xó dó kɔ ǎ. Mɛ e nɔ mɔ ɖɔ émí wɛ sɔ lě, bó nɔ́ ɖo go yí wɛ ɔ́, nǔ bǐ wɛ é nɔ́ hu tɛ́ ná; é nɔ́ wa nǔ bǐ kpó goyíyí kpó; goyíyí tɔn zɛ xwé wú. Fɔnlínnɔ ɔ́, nǔjlómɛ tɔn lɛ́ɛ wɛ nɔ hu i; ɖó é nɔ́ gbɛ́ ɖɔ émí kún ná sɔ́ gběyɛ ó. Ayǐ hɔ́n tɛgbɛ ɔ́, mɛ ɖěvo sín nǔ nɔ́ ɖo jlǒjló e wɛ; mɛ e ka nɔ bló nǔ jlɔ́jlɔ́ ɔ́ nɔ́ hun alɔ bó nɔ́ ná nǔ mɛ; é nɔ́ kpo ɖě ǎ. Vɔ̌sísá mɛdídá lɛ́ɛ tɔn ɔ́, nǔ baɖabaɖa wɛ; ée lɛ́ nylá bǐ é nɛ́ nyí yě lɛ́ sá vɔ̌ ɔ́ kpó linlin nyanya kpó nɛ́. Kúnnu -agɔɖetɔ́ ná kú; lo ɔ́, mɛ e nyɔ́ tó ɖó mɛ ɔ́, ná nɔ́ ɖó acɛ tɛgbɛ bó ná nɔ́ ɖɔ xó. Mɛdídá nɔ wa nǔ mɛ e ɖeji dó éɖée wú ɔ́ ɖɔhun; lo ɔ́, nǔjlɔ́jlɔ́watɔ́ ɔ́, éyɛ́ nɔ́ gbó adɔ dó nǔ e wa wɛ é ɖe ɔ́ wú. Nǔnywɛ́ gbɛtɔ́ tɔn, bǐbí gbɛtɔ́ tɔn abǐ tamɛ linlin gbɛtɔ́ tɔn nɔ te Mawu Mavɔmavɔ nukɔn ǎ. È nɔ blá akpa nú sɔ́ ɖó ahwan lɔ jí, amɔ̌, Mawu Mavɔmavɔ wɛ nɔ ná ɖuɖéjí mɛ. È mlǎ nyǐkɔ ɖagbe mɛɖé ɔ́, é nyɔ́ hú mɛ ɔ́ jɛ dɔkun gbɔn tókɔ awɔnkɔ. Wǎn yí nú mɛ xɔ akwɛ́ hú kpatágan; é xɔ akwɛ́ hú siká. Dɔkunnɔ kpó wamamɔnɔ kpó kpé dó nǔ ɖokpó: Mawu Mavɔmavɔ e bló dɔkunnɔ ɔ́ jɛ́n bló wamamɔnɔ lɔ. Gbɛtɔ́ e ayi tɔn ɖo te ɔ́ mɔ nǔ nyanya ja ɔ́, é nɔ́ hɔn bɛ; xlonɔ ka nɔ zɔn mɔ̌ bó nɔ́ yi zɔn mɛ. Sɔ́ hwiɖée hwe, bó ɖó sísí nú Mawu Mavɔmavɔ; énɛ́ ɔ́, a nǎ jɛ dɔkun, a nǎ xɔ susu, a nǎ dɔ́ ji. Mɛdídá ɔ́, wunkan kpó fɛ́ca kpó ɖo ali tɔn jí; mɛ e ma jló ná sɔ́ gbɛ éɖée tɔn nyi gbě ǎ ɔ́, é nɔ́ hɔn nú ali énɛ́. Vǐ e ɖo kpɛví ɔ́, sɔ́ ɛ ɖó ali e jí é ɖó ná nɔ é; énɛ́ ɔ́, é ná bo kpo ɔ́, é ná ɖo ali ɔ́ jí. Dɔkunnɔ nɔ kpa acɛ nú wamamɔnɔ lɛ́ɛ; axɔ́ɖutɔ́ ká nyí kannumɔ nú axɔ́tɔ́nɔ. Nǔ e è dǒ é wɛ è nɔ ya: è dǒ ahizi ɔ́, è nǎ ya awě, bɔ acɛ gannaganna e kpa wɛ è ɖe ɔ́ nɔ́ vɔ. Mɛ e nɔ sɔ́ nukún ɖagbe dó kpɔ́n mɛ ɔ́, Mawu ná dó n'i; ɖó é nɔ ná nǔɖuɖu tɔn ɖě wamamɔnɔ. È nya goyítɔ́ ɔ́, è nɔ sú nǔ dó jlɛ; adɔndindɔn kpó mɛzunzun kpó nɔ́ yi xɔ. Mɛ e ayi tɔn ɖo wɛn, bɔ xó tɔn nɔ́ jɛ gan ɔ́, axɔ́sú nɔ́ zun xɔ́ntɔn xá ɛ. Mawu Mavɔmavɔ nɔ kpé nukún dó mɛ e tunwun nǔ ɔ́ wú; lo ɔ́, é nɔ́ ɖe mɛ baɖabaɖa lɛ́ɛ sín xó gba. Fɔnlínnɔ nɔ ɖɔ: “Kinnikínní ɖo kɔ́xo; é táá wá wlí mì ɖu ɖo ali jí agbawungba.” Xó e nɔ́ tɔ́n sín nyɔ̌nu banáwatɔ́ lɛ́ɛ nu mɛ ɔ́, do gɔngɔn wɛ; mɛ e Mawu Mavɔmavɔ sin xomɛ dó ɔ́ ná jɛ mɛ. Yɔkpɔ́vú ɔ́, xlonɔnú wɛ é nɔ́ wa; bǎ wɛ ká nɔ́ wlí ayi dó xomɛ n'i. Mɛ e nɔ táfú wamamɔnɔ dó jɛ dɔkun abǐ mɛ e nɔ ná nǔ dɔkunnɔ ɔ́, ya wɛ é nɔ́ wá ji. Đǒtó te bó se nǔnywɛ́tɔ́ lɛ́ɛ xó; sɔ́ ayi towe ɖó te, bó se nǔ e kplɔ́n we wɛ un ɖe é. Đó é nyɔ́ bɔ a nǎ hɛn bǐ dó ayi mɛ, bó ná ɖo gbesisɔ mɛ bó ná ɖɔ hwebǐnu. Un jló ɖɔ a nǐ sɔ́ jiɖiɖe towe bǐ ɖó Mawu Mavɔmavɔ jí; énɛ́ wú wɛ un jló ná kplɔ́n nǔ élɔ́ lɛ́ɛ we égbé. Un ba ɖɔ hwi lɔ ní tunwun. Nǔ tɛnmɛ tɛnmɛ gban (30) wɛ un wlán ɖ'ayǐ nú we: lě e a ɖǒ ná wa nǔ gbɔn lɛ́ɛ kpó nǔ e jí a nǎ lin tamɛ dó lɛ́ɛ kpó wɛ, bɔ a nǎ dó tunwun xó e wú a nǎ gǎn jɛ é, xó e nyí xó jɔ xó ɔ́ é; énɛ́ ɔ́, mɛɖé sɛ́ we dó nǔgbó ɔ́ ba gbé ɔ́, a nǎ sixú mɔ, bó ɖɔ n'i, bɔ é ná gán jɛ wú. Ma kpɔ́n ɖɔ wamamɔnɔ kún ɖó mɛɖé ó, bó blɛ́ ɛ ɖu, bó yí nǔ tɔn lɛ́ɛ ó. A yi hwɛgun hǔn, ma kpɔ́n ɖɔ mɛ ɖě ɔ́ kún ɖó mɛɖé ó, bó táfú i ó. Đó Mawu Mavɔmavɔ wɛ ná jɛ ahwan yě jí; mɛ e yí nǔ yětɔn lɛ́ɛ ɔ́, Mawu ná yí gbɛ yětɔn sín yě sí. Ma zun xɔ́ntɔn xá xomɛsinnɔ ó; ma dó mɛ e aɖi nɔ ɖo ɖǐɖó wɛ ɔ́ sín gbɛ̌ ó. É má nyí mɔ̌ ǎ ɔ́, a táá wá cí étɔn ɖɔhun, bó ná jɛ kú sín mɔ mɛ. Ma nú mɛ ɖé ja axɔ́ ɖu gbé bónú a nɔ te nú mɛ ɔ́, bó zin alɔ dó akɔ́n ɖɔ émí ná sú ó. A ma wá kpé wú bó sú axɔ́ ɔ́ ǎ ɔ́, adɔ̌zan towe wɛ è nǎ wá mlá sín glɔ̌ towe. Awǐnnya e tɔ́gbó towe lɛ́ɛ dó ɖó wuntun fí e ayǐkúngban mitɔn sín dogbó gbɔn lɛ́ɛ ɔ́, ma sɛ do nú yě ó. Kpɔ́n mɛ e nɔ wa azɔ̌ ganjí lɛ́ɛ; axɔ́sú lɛ́ɛ wɛ yě nɔ́ wa azɔ̌ ná; yě nɔ́ wa azɔ̌ nú gbɛtɔ́ kpaa ǎ. A ɖo nǔ ɖu xá gǎn wɛ hǔn, tunwun mɛ e nukɔn a ɖe é. Nǔɖuɖu ná bó víví nú we gbɔn ɖěbǔ hǔn, kpɔ́n nǔ bó ɖu. Nukún towe ní má nɔ nǔɖuɖu ɖagbe e ɖo gǎn nukɔn lɛ́ɛ wú ó; nǔɖuɖu énɛ́ lɛ́ɛ sixú nyí mɔ bɔ è ɖǒ nú we. Ma nɔ ɖo hlɔ̌nhlɔ́n dó wɛ ɖɔ dɔkun jɛ́n émí ná jɛ dandan ó; ma sɔ́ lin nǔ mɔ̌hun kpɔ́n lɔ ó. Dɔkun jijɛ wú wɛ nukún towe ɖe a? Ma sɔ́ ɖó nukún ó; awa wɛ é wú, bó kó zɔn yi jǐxwé gangan ɖɔhun. Gbɛtɔ́ e ayi tɔn ma nyɔ́ ǎ é ɔ́, ma ɖu nǔ tɔn xá ɛ ó; ma nú nukún towe nɔ nǔɖuɖu ɖagbe e ɖo así tɔn ɔ́ wú lɔ ó. Nǔ vo wɛ ɖo ayi tɔn mɛ, vo ɖɔ wɛ é ká ɖe; é ná ɖɔ nú we ɖɔ: “Đu nǔ bó nu ahan.” Lo ɔ́, é yi xo mɛ ǎ. É wá yá ɔ́, a nǎ vi nǔ tɔn e a ɖu lɛ́ɛ bǐ, bɔ xó víví e a ko ɖɔ n'i lɛ́ɛ bǐ ná nyí nǔ yǎyá. Ma xa ji bo ɖɔ xó towe nú xlonɔ ó; nǔnywɛ́ towe e a fɔ tɛ́ n'i lɛ́ɛ bǐ wɛ é ná hu tɛ́ ná. Ma sɛ do nú awǐnnya e è dó ɖó wuntun fí e dogbó towe gbɔn ɖ'ayǐ lɛ́ɛ ó; ma yí tɔ́cyɔvǐ lɛ́ɛ sín ayǐkúngban dó towe jí ó. Đó mɛ e nɔ jɛ hun yě jí ɔ́ syɛ́n ɖésú; é wɛ ná jɛ ahwan yě jí. Sɔ́ ayi towe nyi wɛn bó yí kplɔ́n; ɖǒtó te bó se xó e nɔ́ ná nǔnywɛ́ mɛ é. Vǐ wa nǔ nyi do hǔn, ma gɔn tó dɔn n'i ó; a xo e ɔ́, é ná kú ɖó mɔ̌ wú ǎ; é nyɔ́ wa ɔ́, xo e a xo e ɔ́, hwlɛ̌n wɛ a hwlɛ̌n ɛ gán ɖo kú sí. Vǐ ce, nú ayi towe fɔ kɛ́n ɖo xomɛ ɔ́, é ná víví nú mì ɖésú. Ényí a nɔ kɛ nu bó nɔ́ ɖɔ xó e xwe ali ɔ́, xomɛ ná hun mì ɖésú. Ma jló mɛdídá lɛ́ɛ sín gbɛ ó; lo ɔ́, nɔ ɖó sísí nú Mawu Mavɔmavɔ tɛgbɛ. Énɛ́ ɔ́, sɔ ná nyɔ́ nú we, bɔ nǔ e ɖó nukún wɛ a ɖe ɔ́ ná nyí yǎyá ǎ. Vǐ ce, ɖǒtó mì; énɛ́ ɔ́, a nǎ nyɔ́ nǔ i, bó ná nɔ ali ɖagbe jí. Ma dó ahannumúnɔ sín gbɛ̌ ó; ma ka dó mɛ e nɔ ɖu lan dín lɛ́ɛ sín gbɛ̌ ó. Đó ahannumúnɔ kpó adɔtɔ́nɔ kpó ɔ́, ya wɛ yě ná ji. Yě ná nɔ ɖo lɛngbɛnlɛngbɛn dán wɛ bó ná kpo nú nǔkíja kɛ́ɖɛ́. Vǐ ce, nɔ ɖótó tɔ́ towe; é wɛ ji we. Nɔ towe wá kpo hǔn, ma hu tɛ́ n'i ó. Nɔ ba ná tunwun nǔ e nyí nǔgbó ɔ́, nǔ e nɔ́ ná nǔnywɛ́ mɛ ɔ́, nǔ e nɔ́ ná kplɔ́n mɛ ɔ́, nǔ e nɔ́ ná nukúnnú-mɔjɛnǔmɛ mɛ é; a ɖǒ nǔ ɖagbe énɛ́ lɛ́ɛ hǔn, ma sɔ́ yě sa nú mɛɖé ó. Vǐ e nɔ wa nǔ ɖó sɛ́nxwi jí ɔ́, xomɛ nɔ hun tɔ́ tɔn titewungbe. Mɛ e ji vǐ e ɖó nǔnywɛ́ ɔ́, nǔ nɔ víví nú mɛ ɔ́. Vǐ ce, hwi lɔ ɔ́, bo ɖó nǔnywɛ́ bónú tɔ́ towe kpó nɔ towe kpó ní j'awǎ; xomɛ ní hun nyɔ̌nu e hɛn xo towe é. Vǐ ce, ɖeji dó wǔ ce; nǔ wa nyi ɖɔhun ní nɔ́ víví nú we. Tunwun ɖɔ nyɔ̌nu agalɛtɔ́ ɔ́, do gɔngɔn wɛ; nyɔ̌nu mɛsi ɔ́, do sóbwé sóbwé wɛ. Wu wɛ yě nɔ́ tɔ nú mɛ ajotɔ́ axánsúnxó ɖɔhun; yě dɔn súnnu gěgé, bɔ yě sɔ́ ɖo gbejí nú asi yětɔn ǎ. Mɛ̌ wɛ nyí gbɛ̌dónánɔ? Mɛ̌ ká nɔ́ ɖɔ un ko nywɛ́ ɔ́? Mɛ̌ ká nɔ́ ɖo jlɛ ɖɔ wɛ bó nɔ́ ɖo vo sa wɛ magbokɔ? Mɛ̌ wɛ nɔ́ nɔ mɔ̌ kpowun bó nɔ́ tɔ́ hun mɛ, bɔ è nɔ gblé wǔ i? Mɛ̌ sín nukún nɔ́ ɖa so ɖo ta wú? Mɛ e nɔ jínjɔ́n ahan kɔn bó nɔ gbɛ́ te sí ɔ́ wɛ; mɛ e nɔ xo ahan kplé ɔ́ wɛ. Ma nú lě e vɛ̌ɛn nyɔ́ kpɔ́n gbɔn ɖo nǔ mɛ ɔ́ jló we ó; ma kpɔ́n lě e é dó jɛ̌ kɔ gbɔn ɖo nǔ mɛ ɔ́ ó. É ná nyɔ́ kɔ yi nú we ganjí, é ká yá ɔ́, é ná xú aɖǔ we dan ɖɔhun; é ná ɖu we jakpata ɖɔhun, bɔ nukún towe ná jɛ nǔ we we mɔ jí; a nǎ jɛ xógbló ɖɔ jí, bɔ é ná cí ɖɔ xu mɛ wɛ a ɖe abǐ tɔjíhún ɖaxó ɖé ta aga wɛ a ɖe ɖɔhun. A nǎ ɖɔ: “È dǒ nǔ mì, é ká vɛ́ ǎ. È xo mì, un ka tunwun lɔ ǎ. Ahan ɔ́ hɔ́n nú mì ɔ́, un ná lɛ́ nu?” Ma jló mɛdídá lɛ́ɛ sín gbɛ ó; ma nɔ dó gbɛ̌ yětɔn ó; ɖó nǔ nyanya wɛ yě nɔ́ lin; yě kɛ nu ɔ́, lě e yě ná dó nǔ sin gbɔn ɔ́ kɛ́ɖɛ́ jɛ́n yě nɔ́ ɖɔ. Nǔnywɛ́ nɔ́ sá xwé, ayiɖote nɔ lí xwé. Nǔ nyɔ́ wa wɛ nɔ́ nyí tɔn, bɔ nǔ ɖagbe kpó nǔ xɔ akwɛ́ kpó nɔ́ gɔ́ xwé. Mɛ e ɖó nǔnywɛ́ ɔ́ ɖó hlɔ̌nhlɔ́n; mɛ e tunwun nǔ ɔ́, hlɔ̌nhlɔ́n nɔ́ jɛ hlɔ̌nhlɔ́n jí n'i. Nǔgbó ɔ́, a ja ahwan fun gbé bó ɖe wě d'é wú ganjí ɔ́, a nǎ ɖu ɖ'é jí; mɛ e ná ɖe wě dó to wú lɛ́ɛ sukpɔ́ ɔ́, to nɔ nɔ te. Nǔnywɛ́ ɖíɖó ɔ́, nǔɖé wɛ é nyí bɔ xlonɔ na ɖó ɔ́ é ná vɛ́ wǔ; énɛ́ ɔ́ wú wɛ to kplé ɔ́, yě má nɔ́ sixú kɛ nu dó xó mɛ ǎ. Mɛ e nɔ ɖo nǔ nyanya lin ná wa wɛ ɔ́, ayi wínníwínní gán wɛ è nɔ ylɔ́ mɛ mɔ̌hun. Xlonɔ lin nǔ ɖěbǔ bó ná wa ɔ́, do jɛ́n nǔ ɔ́ nɔ́ jɛ. Mɛ e nɔ yí go nǔ bǐ wú ɔ́, nǔvɛ́mɔ wɛ é nɔ́ nyí nú gbɛtɔ́ lɛ́ɛ. Ényí kanmɛ gbɔ́jɔ́ we adǎngbomɛzán gbe hǔn, hlɔ̌nhlɔ́n hwedó we tawun nɛ́. Hwlɛ̌n mɛ e è ɖǒ kúhwɛ ná lɛ́ɛ; hwlɛ̌n mɛ e è dǒ ji bó dɔn xwe huhu gbé lɛ́ɛ gán. Ényí a ma hwlɛ́n yě ǎ, bó wá ɖɔ ayi émítɔn kún mɔ ó ɔ́, mɛ e nɔ mɔ nǔ jɛ mɛ ɖokpó ɖokpó sín ayi gɔngɔn mɛ ɔ́ mɔ do ná ǎ wɛ a vɛdó a? Éyɛ́ mɛ e ɖo lǐndɔ̌n towe jí kpɔ́n wɛ é tunwun nǔ bǐ; lě e mɛ ɖokpó ɖokpó wa nǔ gbɔn é sín ajɔ wɛ é nɔ́ ná mɛ ɔ́. Vǐ ce, nɔ ɖu wǐin, ɖó é nyɔ́ nú we; é ná víví ɖo nu towe mɛ. Mɔ̌ ɖokpó ɔ́, tunwun ɖɔ nǔnywɛ́ lɔ nyɔ́ nú gbɛ towe; ényí a ɖǒ nǔnywɛ́ ɔ́, gbɛ ná nyɔ́ nú we, bɔ nǔ e ɖó nukún wɛ a ɖe ɔ́ ná nyí yǎyá ǎ. Mɛdídá, ma ɖe wě nyanya dó hwɛjijɔnɔ xwé wú ó; ma vívá nɔtɛn tɔn ó; ɖó hwɛjijɔnɔ jɛ ayǐ azɔn tɛ́nwe ɔ́, é ná sí te azɔn tɛ́nwe; amɔ̌, mɛdídá lɛ́ɛ ɔ́, awě wɛ ná xo yě. Kɛntɔ́ towe jɛ ayǐ hǔn, ma nú é víví nú we ó; adǎn ɖo gbigbo e wɛ hǔn, ma ɖú ahwannɔwe ó. A bló mɔ̌ ɔ́, Mawu Mavɔmavɔ ná mɔ, bɔ é ná vɛ́ n'i, bɔ é ná jó xomɛ e sin dó kɛntɔ́ towe wɛ é ɖe ɔ́ dó. Ma nɔ sin xomɛ dó mɛ e nɔ wa nǔ nyanya lɛ́ɛ ó; ma nú mɛdídá lɛ́ɛ sín gbɛ jló we ó; nǔnyanyawatɔ́ lɛ́ɛ ɔ́, nǔɖé ná nyɔ́ nú yě ǎ; mɛdídá lɛ́ɛ ɔ́, gbɛ yětɔn ná cí zogbɛ́n cí ɖɔhun. Vǐ ce, ɖǒ sísí nú Mawu Mavɔmavɔ kpó axɔ́sú kpó; ma dó gǔfɔ́ntɔ́ lɛ́ɛ sín gbɛ̌ ó. Đó ajijimɛ wɛ è nɔ gbo xó yětɔn; mɛɖé tunwun awě e Mawu Mavɔmavɔ kpó axɔ́sú kpó ná sɛ́ dó yě ɔ́ ǎ. Xó e nǔnywɛ́tɔ́ lɛ́ɛ ɖɔ é ɖěvo ɖíe: È ɖo hwɛ ná ɖɔ wɛ ɔ́, é nyɔ́ ɖɔ è nɔ gbɛtɔ́ jí ǎ. Hwɛɖɔtɔ́ ɖé ɖɔ nú mɛ e kú hwɛ ɔ́ ɖɔ hwɛ tɔn jɔ ɔ́, mɛ bǐ wɛ nɔ́ gbɛ́ wǎn n'i; to ɔ́ bǐ wɛ nɔ́ dó nu i. Amɔ̌, hwɛɖɔtɔ́ e nɔ́ ɖó hwɛ nú mɛ e kú hwɛ lɛ́ɛ ɔ́, hwɛɖɔtɔ́ énɛ́ lɛ́ɛ nɔ́ mɔ fífá; acɛ nɔ kɔn dó yě jí, nǔ nɔ́ nyɔ́ nú yě. Mɛ e è kan nǔ byɔ́, bɔ é ɖɔ xomɛ nú mɛ ɔ́, é ɖe xlɛ́ ɖɔ émí nyí xɔ́ntɔn jɔ xɔ́ntɔn. Azɔ̌ e a ɖǒ ná wa ɖo glegbe ɔ́ ní tó jínjɔ́n ayǐ hwɛ̌; blǒ gle towe bǐ ganjí; énɛ́ gúdo ɔ́, a nǎ ɖó hwɛndo ayǐ. Ma nɔ yǎyá kpowun bó dó hwɛ nɔzo towe ó; ma sɔ́ nu towe dó ɖó adingban ná ó. Ma ɖɔ nǔ e mɛ ɖé wa xá émí ɔ́, émí ná wa xá mɛ ɔ́ ó; ma ɖɔ mɛ ɖé byɔ́ tɔ́ xɔ́ émí ɔ́, émí ná sú nɔ xɔ́ mɛ ɔ́ ó. Un gbɔn fɔnlínnɔ gle tó gbe ɖokpó, mɛ ma ɖó ta ɖé sín vǐwungle tó gbe ɖokpó, wunkan blá ɖa nú gle ɔ́; gběhan ɖɔ émí ɖíe ɖo fí e; awǐnnya e é to lɛ́ lɛ̌ dó gle ɔ́ bǐ kó gbádá. Un lin tamɛ dó nǔ énɛ́ e un mɔ ɔ́ jí, bɔ é kplɔ́n nǔ mì: “Vɛ̌ kó ɖo má dɔ́ amlɔ kpɛɖé, má gbɔjɛ́ kpɛɖé, má mlɔ́ ayǐ, bó blá alɔ dó wǔ kpɛɖé ɖɔ wɛ. A nǎ ɖo mɔ̌ ɖɔ wɛ bɔ ya ná wá fyán we; adɔ ná wá fyán we axánsúnxó ɖɔhun.” Nǔnywɛ́xó Salomɔ́ɔ tɔn ɖěvo lɛ́ɛ ɖíe: Judáa xɔ́sú Ezekiyási sín mɛ lɛ́ɛ wɛ wlán. Mǐ nɔ́ kpa susu nú Mawu ɖó é nɔ́ sɔ́ nǔɖé lɛ́ɛ hwlá; mǐ nɔ́ kpa susu nú axɔ́sú lɛ́ɛ, ɖó yě nɔ́ ba do nú nǔ céɖécéɖé. Mǐ sixú mɔ do nú fí e jǐnukúnsin yi jǐ yi fó dó é ǎ; mǐ ká sixú mɔ do nú fí e ayǐkúngban yi do yi fó dó ɔ́ ǎ. Mɔ̌ ɖokpó ɔ́, mǐ sixú mɔ nǔ jɛ ayi e ɖo axɔ́sú sín xomɛ é wú ǎ. È ɖe nǔ kwíji e ɖo kpatágan mɛ lɛ́ɛ sín mɛ ɔ́, nǔtuntɔ́ ná sɔ́ dó tun nǔ ɖagbe ná. È ɖe gbɛtɔ́ nyanya e ɖo kpɔ́ xá axɔ́sú ɔ́ lɛ́ɛ sín gɔ̌n tɔn ɔ́, axɔ́sú ɔ́ ná nɔ́ wa nǔ ɖó sɛ́nxwi jí bɔ acɛkpikpa tɔn na lí dǒ. Ma sɔ́ hwiɖée ɖó tɛn ɖaxó mɛ ɖo axɔ́sú nukɔn ó; ma sɔ́ hwiɖée ɖó hǎga jí ó. Đó è ɖɔ nú we ɖɔ: “Wǎ jínjɔ́n tɛn ɖaxó élɔ́ mɛ fí” ɔ́, é nyɔ́ hú è sɔ́ we hwe ɖo gbɛtɔ́ nukúnɖéjí nukɔn. Nukún towe ná bo mɔ nǔɖé hǔn, ma yá wǔ sɔ́ yi hwɛgun ó. É má nyí mɔ̌ ǎ ɔ́, nú nɔzo towe ɔ́ wá ɖɔ xó dó gba xó towe ɔ́, nɛ̌ a ka sɔ́ sixú bló gbɔn? Hwi kpó mɛ ɖé kpó ɖo tagba jɛ wɛ hǔn, ɖɔ gbo xá ɛ; amɔ̌, xó vívɛ́ e mɛ ɖěvo ɖɔ nú we ɔ́, ma ɖe tɔ́n ó. É má nyí mɔ̌ ǎ ɔ́, é táá wá se, bó zun we, bɔ wi e ɖo ta towe ɔ́ ná kɔ́n bǐ sésé. Xó e è ɖɔ bɔ é jɛ gan ɔ́, cí nǔ xɔ akwɛ́ sikánú ɖɔhun, sikánú e è blǒ kpatágan gbɔn wú dó ɖó acɔ́ ná é ɖɔhun. Nǔgbɛ́númɛ nǔnywɛ́tɔ́ tɔn nɔ́ cí alɔkɛ́ abǐ wlɔ e è zě siká akú dó bló ɔ́ ɖɔhun nú mɛ e ɖótó e bó bló ɖ'é jí é. Sin e fá ganjí é nɔ́ ná hlɔ̌nhlɔ́n mɛ e ɖo azɔ̌ wa wɛ ɖo hwesivɔ́ gbe é; mɔ̌ ɖokpó ɔ́, mɛ e nyɔ́ wɛn dó ganjí ɔ́ nɔ́ ná hlɔ̌nhlɔ́n gǎn tɔn. Mɛ e nɔ ɖo nu flé wɛ ɖɔ émí ná ná nǔ mɛ ɔ́, cí jǐ e nɔ́ wu, bɔ jɔhɔn nɔ nyi, bɔ é má sɔ́ nɔ́ ja ǎ é ɖɔhun. Mɛ e xwesɔ ganjí é hɛn ɔ́, é ná ɖɔ xó nú gǎn hwɛɖɔtɔ́, bɔ é ná se xó tɔn. Mɔ̌ ɖokpó ɔ́, gbe fífá hɛn ɔ́ é ná gbɛ́ nǔ nú mɛ ɖo fí e adɔn jínjɔ́n ayǐ ɖe é. A mɔ wǐin hǔn, ɖu; ɖu éé ná nyɔ́ nú we é; é má nyí mɔ̌ ǎ ɔ́, é táá wá kpé kɔ nú we bɔ a nǎ vi. Ma nɔ tíin ɖo xɔ́ntɔn towe gɔ́n dín ó; é má nyí mɔ̌ ǎ ɔ́, a táá wá cikɔ n'i, bɔ é ná gbɛ́ wǎn nú we. Mɛ e ɖe kúnnu agɔ dó nɔzo tɔn wú ɔ́, mɛ mɔ̌hun ɔ́, kpota wɛ, hwǐ wɛ, aɖǐgá wɛ. Mɛ e nɔ flú nɔzo tɔn ɔ́, ji ɖe dó wǔ tɔn ɖo adǎngbomɛ hwenu ɔ́, nǔ ɖu ɖo aɖǔ e ko ɖo wǔ dǎn wɛ ɔ́ jí wɛ, te nɔ ɖo afɔ e xo dɔjɔ ɔ́ jí wɛ. Han ji nú mɛ e ɖo aluwɛ mɛ ɔ́, awu yí sín kɔ n'i avuvɔ mɛ wɛ; vɛ̌ɛn sinvɛ́sinvɛ́ kɔn dó akpa mɛ n'i wɛ. Ényí xovɛ́ sin kɛntɔ́ towe hǔn, nǎ nǔɖuɖu i; ényí kɔ xú i hǔn, nǎ sin i. Ényí a ɖo mɔ̌ wa wɛ ɔ́, winnyá ná hu i káká bɔ é ná mɔ wǔvɛ́ ɖi myɔkán wɛ è kplé ɖó ta n'i ɖɔhun, bɔ Mawu Mavɔmavɔ ná ná ɖagbe e a wa ɔ́ sín ajɔ we. Jɔhɔn e nɔ nyi sín totaligbé ɔ́ nɔ́ dɔn jǐ wá; mɔ̌ ɖokpó ɔ́, mɛ nú ɖɔ gbɔn xɔ glɔ́ xɔ glɔ́ nɔ́ dɔn xomɛsin wá. È yi cí xɔ ta ɔ́, é nyɔ́ hú è yi nɔ xwé ɖokpó ɔ́ gbe xá nyɔ̌nu jlɛɖɔtɔ́. Kɔxúmɛ ganjí nú è nu sin fífá ɔ́, lě e é nɔ́ víví nú mɛ gbɔn ɔ́, mɔ̌ wɛ wɛn ɖagbe gosín to línlín mɛ wá nú mɛ ɔ́, é nɔ́ víví nú mɛ gbɔn. Gbɛtɔ́ hwɛjijɔnɔ wá jɛ sísɔ́sísɔ́ jí ɖo mɛdídá nukɔn hǔn, tɔjɔtɛn wɛ gblé nɛ́; sin ɖiɖi wɛ blú nɛ́. É nyɔ́ ɖɔ è nǐ ɖu wǐin dín ǎ; mɔ̌ ɖokpó ɔ́, é nyɔ́ ɖɔ è nǐ ba ná xɔ susu dín ǎ. Mɛ e sin xomɛ ɔ́, é má nɔ́ sixú yi agbɔ̌n jí ǎ ɔ́, cí toxo e ahohó tɔn lɛ́ɛ mu, bɔ é ɖo nuvo ɔ́ ɖɔhun. É jɛ xá ɖɔ avuvɔ ní gbɛ́ akú mɛ ǎ; é jɛ xá ɖɔ jǐ ní ja jinukún sɔ́ hwenu ǎ; mɔ̌ ɖokpó ɔ́, é jɛ xá ɖɔ è nǐ kpa susu nú xlonɔ ǎ. Mɛ e nɔ yǎyá kpowun bó dó nu mɛ ɔ́, xó wɛ é ɖɔ dó jɔhɔn mɛ; nudómɛ énɛ́ cí xɛ ɖo jɔhɔn mɛ ɖɔhun; é cí azɔnxɛ e ɖo yiyi wɛ kpowun ɔ́ ɖɔhun. Sɔ́ ɔ́, lanbá wɛ è nɔ dó xo; tócí ɔ́, gan wɛ è nɔ dó nu n'i; xlonɔ ɔ́, è ka nɔ ɖó kpo nú éyɛ́ dó nɛgbé. Xlonɔ bɛ́ yɛyinɔ xó tɔn kpan ta we hǔn, ma ná ɛ sin yɛyinɔ ɖɔhun ó; a táá wá cí étɔn ɖɔhun. Xlonɔ ɖɔ yɛyinɔ xó tɔn hǔn, gbɛ́ n'i lě e é jɛ xá gbɔn é; é má nyí mɔ̌ ǎ ɔ́, é táá wá mɔ éɖée dó mɔ nǔnywɛ́tɔ́. Mɛ e sɛ́ xlonɔ dó wɛn dó gbé ɔ́, xlohwɛ wɛ élɔ́ zɛ; é cí mɛ e sɛ́n afɔ éɖée ɔ́ ɖɔhun; tagba ɖaxó wɛ é ba nyi ayǐ. Xlonɔ ná dó lǒ dó ɖɔ xó ɔ́, xó tɔn ná vɔ́ da sékúnɔ sín afɔ ɖɔhun. Susu kpa nú xlonɔ ɔ́, é cí awǐnnya blá dó klohwán mɛ ɖɔhun; nǔ yǎyá wɛ. Xlonɔ ná dó lǒ dó ɖɔ xó ɔ́, wuntín e ahannumúnɔ sɔ́ dó jǐ é jɛ́n ná nyí. Gǎn e mɔ xlonɔ ɖé, abǐ mɛ ɖé kpowun ɔ́, é nɔ yí dó azɔ̌ mɛ ɔ́, nǔ wɛ é nɔ wa dó to wú. Xlonɔ fɔ́n ɔ́ yɛyizɔ́ tɔn wa wɛ jɛ́n é nɔ́ ɖe; é cí cukú e nɔ́ vi bó nɔ́ lɛ́ bɛ́ ɖu ɔ́ ɖɔhun. Nú a mɔ mɛɖé bɔ é ɖésú kó mɔ ɖɔ émí nyɔ́ nǔ i hǔn, tunwun ɖɔ è nǎ ɖó nukún nǔ ɖo mɛ e nyí xlonɔ ɔ́ gɔ́n hú éyɛ́ gɔ́n. Fɔnlínnɔ nɔ́ ɖɔ: “Kinnikínní ɖo alixo, adǎnkanlin ɖo toxo ɔ́ mɛ.” Lě e hɔn nɔ ɖo lǐlɛ́lílɛ́ wɛ ɖo hɔnsóswé jí ɔ́, mɔ̌ wɛ fɔnlínnɔ nɔ ɖo aja húzú wɛ ɖo zan tɔn jí. Fɔnlínnɔ zé alɔ dó nǔɖuká mɛ ɔ́, alɔ ná sɔ́ yi nu ɔ́, azɔ̌ wɛ é nɔ́ lɛ́ nyí n'i. Fɔnlínnɔ nɔ mɔ ɖɔ émí nyɔ́ nǔ i hú gbɛtɔ́ ayiɖotenánɔ tɛ́nwe. Alitanu e kɛ nu dó jlɛ e ma kan ɛ ǎ é mɛ ɔ́, cí mɛ e ja cukú wlí gbé bó hɛn tó tɔn é ɖɔhun. Nakí vɔ ɖo ado mɛ ɔ́, myɔ nɔ cí; mɔ̌ ɖokpó ɔ́, mɛnúɖɔtɔ́ má sɔ́ ɖo mɛ tɛ́ntin ǎ ɔ́ tagba nɔ xwɛ. È kɔn akán dó myɔ mɛ ɔ́, myɔ nɔ wlí; è sɛ myɔ dó ɔ́, myɔ nɔ wlí; mɔ̌ ɖokpó ɔ́, gbɛtɔ́ tagbanɔ nɔ sɛ́ hun dó. Mɛnúɖɔtɔ́ sín xó nɔ́ víví wǐin ɖɔhun; è nɔ nu, bɔ é nɔ́ kpé kan mɛ nú mɛ. Wǔ yá dó mɛ, bɔ vo ka ɖo mɛ xomɛ ɔ́, é cí kpatágan sínsín dó kozɛ́n wú ɖɔhun. Mɛ e gbɛ́ wǎn nú gbɛtɔ́ ɔ́ ɖo xó ɖɔ wɛ ɔ́, a nǎ ɖɔ é wɛ yí wǎn nú gbɛtɔ́ hú mɛ bǐ; vo wɛ ka ɖo xo tɔn mɛ. É ɖo xó ɖagbe ɖɔ wɛ hǔn, ma ɖi ó; ɖó ayixa nyanya mɔ̌kpán wɛ ɖo xo tɔn mɛ. Ayixa nyanya e ɖo xo tɔn mɛ dó gbɛtɔ́ wú ɔ́, é ná bó sɔ́ hwlá káká ɔ́, mɛ bǐ nɔ́ wá mɔ nǔ jɛ lě e é dá gbɔn é wú. Mɛ e kun do ɔ́, é ɖésúnɔ ná wá jɛ mɛ; mɛ e ɖó mɔ ɔ́, é ɖésúnɔ ná wá jɛ mɛ. Mɛ e nɔ ɖó adingban dó hɛn mɛ gblé ɔ́, wǎn wɛ é gbɛ́ nú mɛ; mɛ e nɔ klɔ́ mɛ ɔ́, mɛ wɛ é nɔ́ zín dó do. A lɛ̌n nǔɖé bó ná bló sɔ hǔn, ma dó yí go ná ó, ɖó a tunwun lě e sɔ ná cí ɔ́ ǎ. Gbɔ nú mɛ ɖěvo ní kpa we, ma kpa hwiɖée ó; mɛ ɖěvo kpa we ɔ́, é nyɔ́ hú é tɔ́n sín hwi ɖésú sín mɛ. Awǐnnyagban ɔ́, nǔ kpinkpɛn wɛ, kɔ́gban lɔ ɔ́, nǔ kpinkpɛn wɛ; amɔ̌, xomɛsin e nǔlúnɔ nɔ́ dó xomɛ nú mɛ ɔ́ kpɛn mɛ hú nǔ we énɛ́ lɛ́ɛ bǐ. Adǎn nɔ wa nǔ kanlin ɖɔhun; xomɛsin nɔ hɛn nǔ gblé; amɔ̌, wǔhwinhwan ɔ́, mɛ̌ ká sixú nɔ te nukɔn tɔn? È gbɛ̌ nǔ nú mɛ ɖo togun mɛ ɔ́, é nyɔ́ hú è tin dó mɛ ɖó xɔ́ntɔn e è nyǐ ɔ́ wútu. Xɔ́ntɔn mɛ tɔn gbɛ́ nǔ nú mɛ ɔ́, wǎn e é yí nú mɛ ɔ́ wú wɛ; kɛntɔ́ ká nɔ́ ɖo jasísi xo dó mɛ wɛ magbokɔ. Mɛ e gɔ́ xo ɔ́ mɔ wǐinkpa ɖo kɔ́ mɛ ɔ́, afɔ wɛ é nɔ tɛ jí; lo ɔ́, mɛ e xovɛ́ sin ɔ́ ná bó ɖu nǔ e vlɛ́ ɔ́, é nɔ mɔ ɖɔ é víví. Mɛ e ɖo zɔ nú to tɔn bo ɖo flúflú wɛ ɔ́ cí xɛ e jó adɔ̌ tɔn dó bó ɖo flúflú wɛ ɔ́ ɖɔhun. Nǔsáwǔ wǎnnywɛ́ lɛ́ɛ kpó célu lɛ́ɛ kpó nɔ́ ná bɔ xomɛ nɔ hun mɛ; amɔ̌, xomɛfífá e xɔ́ntɔn nɔ́ ɖó dó mɛ wú ɔ́ nyí célu ɖé ɔ́, é nyɔ́ wǎn hú nǔ énɛ́ lɛ́ɛ bǐ. Ma jó xɔ́ntɔn towe lɛ́ɛ dó ó; ma jó tɔ́ towe xɔ́ntɔn lɛ́ɛ lɔ dó ó. Adǎn gbo we hǔn, ma yi mɛ towe gɔ́n ó, ɖó nɔzo mɛtɔn e sɛkpɔ́ mɛ ɔ́ nyɔ́ hú mɛ mɛtɔn e lín dó mɛ é. Vǐ ce, yǐ nǔnywɛ́, bónú xomɛ ná hun mì; énɛ́ ɔ́, un hɛn ɔ́, un ná kɛ nu nú mɛ e nɔ ɖo nǔ ce ɖɔ wɛ é. Gbɛtɔ́ e ayi tɔn ɖo te ɔ́ mɔ nǔ nyanya ja ɔ́, é nɔ́ hɔn bɛ; xlonɔ ka nɔ zɔn mɔ̌ bó nɔ́ yi zɔn mɛ. Ényí mɛɖé ná nɔ te nú mɛ e a ma tunwun ǎ bɔ mɛ ɔ́ ná nya akwɛ́ ɖo gɔ̌n towe hǔn, yǐ awu tɔn ɖó gbanu; yǐ nǔ tɔn ɖé ɖó gbanu, ɖó é nɔ te nú mɛ e a ma tunwun ǎ é bɔ mɛ ɔ́ ɖu axɔ́. Ényí è fɔ́n zǎnzǎn tɛɛn, bó sú xó dó dó gbe nɔzo mɛtɔn ɔ́, é nɔ́ cí nu wɛ è dǒ e ɖɔhun. Nyɔ̌nu jlɛɖɔtɔ́ cí gɔ̌ta e jǐ ja ɔ́ é nɔ́ kɔn sin sooo é ɖɔhun. Ényí mɛɖé sixú yí jlɛ sín nyɔ̌nu tagbanɔ sí ɔ́, hǔn mɛ énɛ́ hɛn ɔ́, é ná wlí jɔhɔn abǐ é ná wún ami dó alɔgogo mɛ bɔ é ná nɔ te nɛ́. Alǐnnyánú ɖě wɛ nɔ́ gan ɖě; mɔ̌ ɖokpó ɔ́, gbɛtɔ́ ɖě wɛ nɔ́ yi dó ɖě wú bó nɔ́ dó nyɔ́ nǔ i. Mɛ e nɔ kpé nukún dó atín ɖé wú ɔ́ ná ɖu sínsɛ́n tɔn; mɔ̌ ɖokpó ɔ́, mɛ e nɔ sɛn gǎn tɔn ɔ́, è nǎ sɔ́ ɛ su. È kpɔ́n sin mɛ ɔ́, è nɔ mɔ mɛɖée ɖ'é mɛ; mɔ̌ ɖokpó ɔ́, è kpɔ́n ayixa mɛ ɖésúnɔ tɔn mɛ ɔ́, è nɔ mɔ mɛɖée ɖ'é mɛ. Kútomɛ nɔ́ gɔ́ xo gbeɖé ǎ; domaɖó-azan nɔ gɔ́ xo gbeɖé ǎ; mɔ̌ ɖokpó ɔ́, nǔ nɔ kpé gbɛtɔ́ gbeɖé ǎ. Siká kpó kpatágan kpó ɔ́, zo wɛ è nɔ xo dó, bó nɔ́ tunwun ɖagbe kpó nyanya kpó; amɔ̌, gbɛtɔ́ ɔ́, walɔ tɔn wɛ è ka nɔ kpɔ́n bó nɔ́ tunwun mɛ alɔkpa e é nyí é. È na bo sɔ́ xlonɔ dó to mɛ bo só nukún ɖɔhun ɔ́, è nǎ ɖe yɛyi sín ayi tɔn mɛ gbeɖé ǎ. Kpé nukún dó lɛ̌ngbɔ́ towe lɛ́ɛ ɖokpó ɖokpó wú ganjí, lěbe nú yě; ɖó dɔkun nɔ nɔ ayǐ káká sɔ́yi ǎ; mɔ̌ ɖokpó ɔ́, axɔ́súgbákún nɔ́ nɔ ayǐ káká sɔ́yi ǎ. Yi ba gběhan ɖo gle mɛ; lo ɔ́, hwenu e ɖěvo ná jɛ wǔwú jí ɔ́, yi ba gbɔn só jí só jí. A blǒ mɔ̌ ɔ́, a nǎ ɖǒ lɛ̌ngbɔ́ lobo ná kpa fún yětɔn dó bló awu bó ná dó; a nǎ ɖó gbǎgbá bó ná sa dó xɔ gle yɔ̌yɔ́. Xwégbɔ́ towe lɛ́ɛ ná nɔ́ ná anɔ̌sin gěgé, bɔ hwi kpó xwédo towe kpó, kpódó nyɔ̌nu e nɔ wa azɔ̌ nú we lɛ́ɛ kpó ná nɔ nu bɔ é ná kpé mi. Mɛ e nɔ wa nǔ nyanya ɔ́, mɛɖé nɔ́ ɖo nyinya ɛ wɛ cóbónú é nɔ́ ɖo hinhɔn wɛ ǎ; lo ɔ́, hwɛjijɔnɔ nɔ ɖeji dó éɖée wú kinnikínní wínnyáwínnyá ɖɔhun. To e mɛ toví lɛ́ɛ nɔ́ ɖo gǔ fɔ́n ɖe wɛ ɔ́, gǎn wɛ nɔ sukpɔ́. Amɔ̌, gǎn ɖé ká tíin bó ɖó nǔnywɛ́, bó tunwun nǔ ɔ́, acɛkpikpa tɔn nɔ jínjɔ́n ayǐ. Wamamɔnɔ e nɔ táfú mɛ e ma ɖó mɛɖé ǎ ɔ́, é cí jǐgbó e nɔ́ ja bó nɔ́ hɛn gle bǐ gblé é ɖɔhun. Mɛ e ma nɔ xwedó sɛ́n ǎ lɛ́ɛ nɔ́ kpa susu nú mɛdídá lɛ́ɛ; mɛ e ka nɔ xwedó sɛ́n lɛ́ɛ nɔ́ tɔ́n ahwan yě. Mɛ nyanya lɛ́ɛ nɔ́ ba ná mɔ nǔ jɛ lě e è nǎ nyi sɛ́n gbɔn é wú ɖěbǔ ǎ; lo ɔ́, mɛ e nɔ ba ná se tónú nú Mawu Mavɔmavɔ lɛ́ɛ nɔ́ mɔ nǔ jɛ nǔ bǐ wú. È nyǐ wamamɔnɔ nú ayi mɛtɔn ɖo wɛn ɔ́, é nyɔ́ hú è ɖu ahizi dó jɛ dɔkun. Mɛ e nɔ xwedó sɛ́n dó wá nǔ ɔ́, vǐ nǔnywɛ́tɔ́ nɛ́; lo ɔ́, mɛ e nɔ dó lǐkpánɔ lɛ́ɛ sín gbɛ̌ ɔ́, é nɔ́ dó winnyá tɔ́ tɔn. Ényí mɛ ɖé nya akwɛ́ nú mɛ, lobo yí akwɛ́ví kpɔ́ gěgé dó jɛ dɔkun ɔ́, dɔkun tɔn ɔ́, mɛ e nɔ kú nǔbláwǔ nú wamamɔnɔ ɔ́ wɛ ná ɖu. Mɛ e nɔ dó tókúse sɛ́n ɔ́ mɛ ɔ́, ɖɛ e é nɔ xo ɔ́ nɔ́ vɛ́ se nú Mawu. Mɛ e nɔ dɔn mɛ e nɔ wa nǔ ɖó sɛ́nxwi jí lɛ́ɛ dó ali nyanya jí ɔ́, é ná jɛ mɔ e é ɖésúnɔ ɖó é mɛ; amɔ̌, gbɛtɔ́ gbejínɔtɔ́ lɛ́ɛ ɔ́, nyɔ̌ná wɛ ɖo te nú yě. Dɔkunnɔ nɔ mɔ ɖɔ émí nyɔ́ nǔ i; amɔ̌, wamamɔnɔ e ɖó nǔnywɛ́ ɔ́ tunwun mɛ alɔkpa e dɔkunnɔ nyí tawun é. Gbɛtɔ́ hwɛjijɔnɔ ɖó ɖuɖéjí ɔ́, xwe wɛ é nɔ́ nyí; amɔ̌, mɛdídá ɖu gǎn ɔ́, mɛ bǐ wɛ nɔ́ hɔn hwlá. Mɛ e nɔ sɔ́ hwɛ tɔn hwlá ɔ́ nɔ yi nukɔn ǎ; amɔ̌, mɛ e nɔ ɖɔ hwɛ tɔn lɛ́ɛ, bó nɔ jó dó ɔ́, è nɔ sɔ́ hwɛ tɔn kɛ ɛ. Nǔ nyɔ́ nú mɛ e nɔ ɖó sísí nú Mawu hwebǐnu é; amɔ̌, mɛ e nɔ syɛ́n ta lɛ́ɛ ɔ́, awě wɛ nɔ́ xo yě. Acɛgannaganna-kpanúmɛtɔ́ ɖu gǎn ɖo wamamɔnɔ lɛ́ɛ nu ɔ́, kinnikínní ɖɔhun wɛ é nɔ́ dó gbe dó ta nú yě, bó nɔ́ kplɔ́ dó yě lɔnmɔ e xovɛ́ sin é ɖɔhun. Gǎn xlonɔ ɔ́, alɔ sló dó gǔdo nú mɛ tɔn ɔ́, ɖě wɛ nɔ́ ɖo ɖě jí jɛ wɛ; amɔ̌, mɛ e ma yí wǎn nú ahizi ǎ ɔ́, é nɔ́ dɔ́ ji. Mɛ e hu mɛ ɔ́, hɔn wɛ é nɔ́ hɔn káká yi byɔ́ yɔdo mɛ: mɛɖé má ɖó e te ó! Mɛ e nɔ sɔ́ ayi ɖó wɛn dó wa nǔ ɔ́ nɔ́ nɔ vivo mɛ; amɔ̌, mɛ e nɔ mlɛ́ ali we ɖó kpɔ́ jí lɛ́ɛ ná yi jɛ ayǐ ɖo ali we lɛ́ɛ ɖokpó xo. Mɛ e nɔ lɛ gle tɔn ɔ́ ná mɔ nǔ ɖu, bó gɔ́ xo; mɛ e ka nɔ ɖó kan dó nǔ ma nyí nǔɖé wú ɔ́, ya wɛ nɔ blá ta n'i. Gbɛtɔ́ e ná ɖɔ xó bɔ è nǎ ɖeji dó wǔ tɔn ɔ́, è nǎ xo nyɔ̌ná ɖɛ dó jǐ tɔn ɖě jɛ ɖě jí; amɔ̌, mɛ e jló ná jɛ dɔkun zogbe ɔ́, è nǎ gɔn tó dɔn n'i ǎ. É nyɔ́ bónú è nǎ nɔ gbɛtɔ́ jí ǎ; nǔ ɖo mɔ̌ có mɛ ɖé lɛ́ɛ nɔ́ kpɔ́n dó nǔɖuɖu gǒbǔ ɖé wú, bó nɔ́ hu hwɛ. Mɛ e nǔ nɔ jló dín ɔ́, nɔ́ ba ná jɛ dɔkun zogbe; é ká nɔ́ tunwun ɖɔ ya ná wa vun blá émí ǎ. Mɛ e nɔ gbɛ́ nǔ nú nɔzo tɔn ɔ́, nɔzo tɔn nɔ wá yí wǎn n'i hú mɛ e nɔ klɔ́ ɛ é. Mɛ e nɔ ja ajo dó tɔ́ kpó nɔ kpó, bó nɔ́ ɖɔ é kún nyí hwɛ ó ɔ́, é kpó ajotɔ́ axánsúnxó kpó wɛ nyí nǔ ɖokpó ɔ́. Mɛ e nǔɖé má nɔ́ kpé ǎ ɔ́, hun wɛ é nɔ́ dɔn kpé. Mɛ e ka nɔ jó éɖée dó nú Mawu Mavɔmavɔ ɔ́, nǔ nɔ nyɔ́ n'i. Mɛ e ɖeji dó nǔ e ɖo ayi tɔn mɛ é kɛ́ɖɛ́ wú ɔ́, xlonɔ wɛ; mɛ e ka nɔ wa nǔ kpó nǔnywɛ́ kpó ɔ́ ná gló nǔ nyanya. Mɛ e nɔ ná nǔ wamamɔnɔ ɔ́, nǔɖé ná hwe dó e ǎ; amɔ̌, mɛ e nɔ ɖe kɔ dó wamamɔnɔ ɔ́, nu gěgé wɛ è dó e. Mɛdídá ɖu gǎn ɔ́, mɛ bǐ wɛ nɔ́ hɔn hwlá; yě kú ɔ́, hwɛjijɔnɔ lɛ́ɛ nɔ́ sukpɔ́. Mɛ e è gbɛ́ nǔ ná ɔ́, é nɔ́ ɖo ta syɛ́n wɛ é ɔ́, è nǎ gblé gbɛ dó n'i ɖo nukún xwixwe ɖokpó mɛ, bɔ ɖě wa gbɔn ná hán. Hwɛjijɔnɔ kpa acɛ ɖo to mɛ ɔ́, toví lɛ́ɛ nɔ́ j'awǎ; é ká nyí mɛdídá wɛ ɖo tonu ɔ́, toví lɛ́ɛ nɔ́ sa vo. Mɛ e yí wǎn nú nǔnywɛ́ ɔ́ nɔ́ dó xomɛhunhun nú tɔ́ tɔn. Mɛ e ka nɔ dó agalɛtɔ́ gbɛ́ ɔ́, nǔ tɔn bǐ wɛ é nɔ́ hɛn fúnfún. Axɔ́sú e nɔ́ xwedó sɛ́n dó hɛn to ɔ́, to tɔn nɔ yi nukɔn; axɔ́sú e ká nɔ́ ɖo nǔjɔ yí dó nǔjɔ jí wɛ ɖo toví lɛ́ɛ sí ɔ́ ká nɔ́ zin to ɔ́ dɛ́. Mɛ e nɔ klɔ́ nɔzo tɔn ɔ́, mɔ wɛ é ɖó n'i. Nǔ e dó sin wɛ mɛdídá nɔ́ ɖe ɔ́ wɛ nyí mɔ bɔ é nɔ́ jɛ mɛ; lo ɔ́, hwɛjijɔnɔ lɛ́ɛ nɔ́ ɖo awǎjijɛ mɛ, bó nɔ́ ɖo we ɖú wɛ. Hwɛjijɔnɔ tunwun acɛ e nyí wamamɔnɔ tɔn é; énɛ́ ká myá nukún nú mɛdídá ǎ. Todɔnfúnlɛ̌ntɔ́ lɛ́ɛ nɔ́ flɔ́ zo dó to mɛ; nǔnywɛ́tɔ́ lɛ́ɛ ká nɔ́ xo zo cí. Nú nǔnywɛ́tɔ́ kpó xlonɔ kpó yi hwɛgun ɔ́, nǔnywɛ́tɔ́ ɔ́ sin xomɛ oo, é ko nǔ oo, xlonɔ ɖo agbɔ̌n na ná ɛ wɛ gbeɖé ǎ. Mɛ e nɔ kɔn kanjɔ kɔn nyi ayǐ lɛ́ɛ nɔ́ gbɛ́ wǎn nú gbejínɔtɔ́; lo ɔ́, mɛ e nɔ wa nǔ ɖó sɛ́nxwi jí lɛ́ɛ nɔ́ nya xɛ ɖo gbejínɔtɔ́ jí. Xlonɔ sin xomɛ ɔ́, é nɔ́ ɖe xlɛ́ kpó zǐngídi kpó; mɛ e ɖó nǔnywɛ́ ɔ́ ká nɔ yi agbɔ̌n jí, bó nɔ́ ɖe xomɛsin tɔn xlɛ́ ǎ. Ényí mɛ e ɖo gǎn jí ɔ́ nɔ́ ɖótó adingbanxó ɔ́, mɛ e ɖo glɔ̌ tɔn lɛ́ɛ bǐ wɛ nɔ́ húzú mɛ nyanya. Acɛgannaganna-kpanúmɛtɔ́ kpó gbɛ̌dónánɔ kpó ɔ́, nǔɖé tíin bɔ yě mɛ we lɛ́ɛ bǐ ɖǒ: Mawu Mavɔmavɔ ná nukún yě mɛ we lɛ́ɛ bǐ bɔ yě nɔ́ dó mɔ nǔ. Axɔ́sú e nɔ́ nɔ xó jí dó gbo hwɛ nú wamamɔnɔ lɛ́ɛ ɔ́, axɔ́súɖuɖu tɔn ná jínjɔ́n ayǐ káká sɔ́yi. Bǎ kpó nǔgbɛ́númɛ kpó nɔ́ wlí ayi dó xomɛ nú mɛ; amɔ̌, vǐ e è jǒ dó nyi gbawunjo mɛ ɔ́, winnyá wɛ é nɔ́ dó nɔ tɔn. Mɛdídá sukpɔ́ ɔ́, nǔ dó sin nɔ kpé tókɔ awɔnkɔ; amɔ̌, hwɛjijɔnɔ lɛ́ɛ ná mɔ lě e yě ná jɛ ayǐ gbɔn é. Kplɔ́n vǐ towe ganjí, énɛ́ ɔ́, ayi towe ná jɛ ayǐ dó wǔ tɔn; xomɛ ná hun we dó wǔ tɔn. Mawu ma ɖo nǔ ɖe xlɛ́ to ɖé wɛ gbɔn nǔmimɔ mɛ ǎ ɔ́, toví lɛ́ɛ ɔ́, gbɛ hannyahannya wɛ yě nɔ́ zán. Nǔ nyɔ́ nú mɛ e nɔ nyi sɛ́n é. È nɔ sɔ́ xó dó kplɔ́n mɛsɛntɔ́ ná ǎ, ɖó é ná bó mɔ nukúnnú jɛ nǔ e ɖɔ wɛ a ɖe ɔ́ mɛ ɔ́, é ná bló ǎ. Ényí a mɔ mɛ e ma nɔ lin tamɛ cóbó nɔ́ ɖɔ xó ǎ ɔ́ ɖo xó ɖɔ wɛ hǔn, tunwun ɖɔ è nǎ ɖó nukún nǔ ɖo mɛ e nyí xlonɔ ɔ́ gɔ́n hú éyɛ́ gɔ́n. Mɛsɛntɔ́ e è hɛn vǐbóɖó tɔn sín vǔ ɔ́ sɔ́ nɔ́ sí mɛɖé ǎ. Gbɛtɔ́ xomɛsinnɔ nɔ dɔn hun wá; mɛ e nɔ ɖo adǎn jí hwebǐnu ɔ́, é nɔ́ hu hwɛ gěgé. Mɛ e nɔ yí go ɔ́, goyíyí tɔn ná sɔ́ ɛ kɔn nyi ayǐ; mɛ e ka nɔ sɔ́ éɖée hwe ɔ́, è nǎ sɔ́ ɛ su. Mɛ e nɔ dó ajotɔ́ gbɛ́ ɔ́ yí wǎn nú éɖée ǎ; é tunwun nǔ e ɖo te kpɔ́n mɛ e mɔ do nú ajo bo má ká ɖɔ ǎ é, cóbó ká gbɛ́ ajotɔ́ ɖe gba. Mɛ e nɔ ɖi xɛsi nú gbɛtɔ́ ɔ́ dɔn éɖée dó kɔ́blúmánya mɛ; mɛ e ka nɔ gán jɛ Mawu Mavɔmavɔ wú ɔ́ nɔ́ vo. Mɛ gěgé nɔ ba wǔjɔmɛ ɖo gǎn yětɔn lɛ́ɛ gɔ́n; a ka ɖo hwɛjijɔ towe ba wɛ ɔ́ Mawu Mavɔmavɔ ɖokpónɔ gɔ́n wɛ a na mɔ ɖe. Hwɛjijɔnɔ ɔ́, é nɔ́ gbɛ́ wǎn nú nǔhízítɔ́; lo ɔ́, mɛdídá ɔ́, éyɛ́ ká nɔ́ gbɛ́ wǎn nú nǔ e wa wɛ nǔjlɔ́jlɔ́watɔ́ ɖe é. Nǔnywɛ́xó élɔ́ lɛ́ɛ ɔ́, Agúu, Yakɛ ví ɔ́ wɛ ɖɔ. Ityɛ́li wɛ é ɖɔ xó élɔ́ lɛ́ɛ ná; Ityɛ́li kpódó Wukáli kpó wɛ é ɖɔ ná. É ɖɔ: “Nǔgbó wɛ, un gú hú mɛ bǐ. Un nɔ lin tamɛ gbɛtɔ́ ɖɔhun ǎ. Un ɖó nǔnywɛ́ ǎ; un tunwun mɛ e nyí mɛ mímɛ́ é ǎ. Mɛ̌ ká yi jǐxwé, bó wá kpɔ́n? Mɛ̌ ká myɔ́ alɔ dó jɔhɔn kpɔ́n? Mɛ̌ ká wún sin bó blá dó avɔ mɛ kpɔ́n? Mɛ̌ ká ɖó dogbó ayǐkúngban ɔ́ tɔn lɛ́ɛ? Nɛ̌ mɛ ɔ́ ká nyí? Nɛ̌ vǐ tɔn ká nyí? A tunwun hǔn, ɖɔ nú mì. “Xó e Mawu ɖɔ lɛ́ɛ bǐ wɛ sɔgbe. Mawu nɔ́ cyɔ́n alɔ mɛ e nɔ gán jɛ wǔ tɔn lɛ́ɛ jí gǎglónú ɖɔhun. Ma gɔ́ xó ɖé nú xó tɔn ó. É má nyí mɔ̌ ǎ ɔ́, é táá wá gbɛ́ nú we, bɔ è nǎ mɔ ɖɔ hwi nyí adingbannɔ. “Mawu ce, un ɖo nǔ we byɔ́ we wɛ; ma gɔn yě ná mì cóbónú má kú ó. Sɛ ahizi kpó adingban kpó dó zɔ nú mì; ma ná ya mì ó, ma ka ná dɔkun mì ó; nǎ nǔɖuɖu e un nǎ ɖu bó nɔ gbɛ é mì kpowun. Ényí un ɖó nǔ dín ɔ́, un táá wá hu tɛ́ nú we bó ɖɔ: ‘Mawu Mavɔmavɔ tɛ́! Mɛ̌ wɛ nyí mɔ̌?’ Un ka ɖo ya mɛ ɔ́, un táá ja ajo, bó ná dó hɛ̌n hwi Mawu ce. “Ma ɖɔ mɛsɛntɔ́ sín nǔ ɖo gǎn tɔn gɔ́n ó; é má nyí mɔ̌ ǎ ɔ́, é ná dó nu we, bɔ a nǎ mɔ wǔvɛ́ ɖó nǔ e a wa nyi do ɔ́ wú. “Mɛ ɖé lɛ́ɛ tíin, bó nɔ́ nylá nu dó tɔ́ yětɔn, bó nɔ́ ɖɔ nɔ yětɔn sín xó ɖagbe ǎ. “Mɛ ɖé lɛ́ɛ tíin, bó nɔ́ mɔ ɖɔ émí nyí mɛ mímɛ́, yě ká lɛ nǔ kwíji e ɖo wǔtu yětɔn lɛ́ɛ síin vɔ́vɔ́ ǎ. “Mɛ ɖé lɛ́ɛ tíin, bó nɔ́ mɔ ɖɔ émí ɖokpó jɛ́n tíin, bó nɔ́ hu tɛ́ nú mɛ bǐ. “Mɛ ɖé lɛ́ɛ tíin, bɔ aɖǔ yětɔn nyí hwǐ, aglanká yětɔn nyí jǐví; yě ná tlɛ́n lelenɔ lɛ́ɛ ɖu, yě ná ɖe yě sín ayǐkúngban ɔ́ jí, yě ná sú wamamɔnɔ lɛ́ɛ sín kún dó sín gbɛtɔ́ lɛ́ɛ mɛ.” Asán ɖó vǐ nyɔ̌nu we; yě nɔ́ nyí: “Nǎ mì nǎ mì”. Nǔ atɔn tíin; nǔ ɛnɛ wɛ lɔ; yě nɔ́ ɖɔ é kpé émí gbeɖé ǎ: kútomɛ ɖíe; nyɔ̌nu wɛnsinɔ ɖíe; ayǐkúngban e ɖo sin ba wɛ é ɖíe; myɔ ɖíe; myɔ nɔ ɖɔ é kpé émí gbeɖé ǎ. Mɛ e nɔ ko tɔ́ tɔn ɔ́, mɛ e ma nɔ se tónú nú nɔ tɔn ǎ ɔ́, avǔnsákɔwó tɔdo mɛ tɔn lɛ́ɛ ná tɔ́n nukún i, bɔ gangan lɛ́ɛ ná vún lan tɔn ɖu. Nǔ atɔn tíin bó hú gǎn mì; nǔ ɛnɛ wɛ lɔ: un sixú dó mɔ̌ nú gangan gbɔn jɔhɔn mɛ ǎ, un sixú dó mɔ̌ nú dan gbɔn sókan mɛ ǎ, un sixú dó mɔ̌ nú tɔjíhún gbɔn xuzan mɛ ǎ, un sixú dó mɔ̌ nú súnnu e ɖo nyɔ̌nu gúdo é ǎ. Nyɔ̌nu e nɔ́ dó afɔ gbě ɔ́, lě e é nɔ́ wa nǔ gbɔn ɔ́ ɖíe: é nɔ́ ɖu nǔ bó nɔ́ súnsún nu, bó nɔ́ ɖɔ: “Un wa nǔ nyanya ɖé ǎ!” Nǔ atɔn tíin bó nɔ́ húnhún ayǐkúngban ɔ́; nǔ ɛnɛ wɛ lɔ, bɔ ayǐkúngban ɔ́ sixú hɛn ǎ: kannumɔ ná wá ɖu axɔ́sú, taɖunɔ ná ɖu nǔ, bɔ é ná kpé e kpo, nyɔ̌nu e mɛ bǐ sɔ́ wǎn ná ɔ́, ná mɔ asú, nyɔ̌nu mɛsɛntɔ́ ná yí gǎn tɔn sín tɛnmɛ. Kanlin ɛnɛ tíin ɖo ayǐkúngban ɔ́ jí; yě hwe ɖésú, yě ká ɖó nǔnywɛ́ bɔ é vɛ́ jlɛ́: Ayǐsínzɛn lɛ́ɛ, yě ɖó gǎn ǎ; é ká su nǔkún-yiya hwenu ɔ́, yě nɔ́ ba nǔ e yě ná ɖu ɔ́ ɖ'ayǐ. Agidigbǎnwún lɛ́ɛ, yě ɖó hlɔ̌nhlɔ́n ǎ; lo ɔ́, yě nɔ́ sá xwé nyi sóxo mɛ. Bɔkle lɛ́ɛ, axɔ́sú ɖě ɖo yě nu ǎ, yě ká nɔ to yěɖée lyɛ̌ngbe lyɛ̌ngbe bó nɔ́ ɖo yiyi wɛ. Alɔ̌tlɔ lɛ́ɛ, è hɛn ɔ́, è nǎ wlí yě kpó alɔ kpó; é ɖo mɔ̌ có yě nɔ́ yi axɔ́sú xwé gbe. Nǔɖíɖó e ɖó funfún lɛ́ɛ atɔn tíin, ɛnɛ wɛ lɔ, bɔ zɔnlin yětɔn nyɔ́ kpɔ́n, afɔɖiɖe yětɔn wlí yɛ̌yi: kinnikínní, é wɛ kpan akɔ́n hú lan lɛ́ɛ bǐ; é nɔ́ hɔn ɖo nǔɖé nukɔn ǎ; koklósú, é ɖo yiyi wɛ ɔ́, é nɔ́ gó; gbǎgbá kpó, axɔ́sú e ɖo ahwangɔnu tɔn nukɔn, bó ɖo yiyi wɛ ɔ́ kpó. Ényí a ko wa xlonɔnú bó kó yí nugo, abǐ a ɖǒ tito nyanya lɛ́ɛ hǔn, tunwun ɖɔ bɛ́ sín din ɔ́, émí ná nɔ abwɛ̌; ɖó è xo anɔ̌sin ɔ́, é nɔ́ húzú bɔ̌ta; è dó nǔ awɔntín jí ɔ́, kanjɔ nɔ tɔ́n; xomɛsin dó xomɛ nú mɛ wɛ nɔ dɔn jlɛ wá. Nǔnywɛ́xó e axɔ́sú Masa tɔn Lemuwɛ́li sín nɔ ɖɔ dó kplɔ́n nǔ i lɛ́ɛ ɖíe: “Vǐ ce, xó tɛ́ un ka ná ɖɔ nú we din? Aɖiví ce, étɛ́ un ka ná kplɔ́n we? Hwi mɛ e un byɔ́ Mawu bó ji é, xó tɛ́ un ná ɖɔ nú we! Ma zán hlɔ̌nhlɔ́n towe dó nyɔ̌nu wú ó; nyɔ̌nu e nɔ́ bú axɔ́sú lɛ́ɛ ɔ́, ma jó hwiɖée dó nú yě ó. Lemuwɛ́li, axɔ́sú lɛ́ɛ ɖó ná nu vɛ̌ɛn ǎ. Gǎn e ɖo to nu ɔ́ ɖó ná nu ahan syɛ́nsyɛ́n ǎ. Yě ɖo ahan nu wɛ ɔ́, yě táá wá wɔn gbeta e è ɖe tɔ́n lɛ́ɛ, bó ná gba lelenɔ lɛ́ɛ sín acɛ. Mi ná ahan syɛ́nsyɛ́n mɛ e ɖo kúkú wɛ é, bó ná vɛ̌ɛn mɛ e ɖo wǔvɛ́ mɔ wɛ ɖo ayi mɛ é, ní nu, bó wɔn ya e ji wɛ é ɖe é, bó má sɔ́ flín wǔvɛ́ e mɔ wɛ é ɖe ɔ́ ɖě ó. Mɛ e ma ɖó gbe ǎ lɛ́ɛ ɔ́, nɔ ɖɔ xó dó jɛ ahwan yě jí; mɛ e ma ɖó mɛɖé ǎ lɛ́ɛ ɔ́, nɔ nya xɛ ɖo yě jí. Đɔ xó, xwedó sɛ́n dó ɖɔ hwɛ; jɛ ahwan lelenɔ kpó wamamɔnɔ kpó jí.” Nǔ nyɔ́ nú mɛ e mɔ nyɔ̌nu jɔ nyɔ̌nu é. Nyɔ̌nu jɔ nyɔ̌nu xɔ akwɛ́ hú jɛ̌ nana. Asú tɔn nɔ ɖeji dó wǔ tɔn; nǔɖé nɔ́ hwedó e ǎ. Ayǐ hɔ́n tɛgbɛ ɔ́, ɖagbe wa nú asú tɔn wɛ jɛ́n é nɔ́ ɖe; é nɔ́ wa nyanya n'i ǎ. É nɔ́ yi ba gbɔ̌fún kpó lɛ̌ɛnkan kpó, bó nɔ́ zé dó lɔn avɔ; alɔ tɔn nu nɔ nɔ vɔ̌ gbeɖé ǎ. Tɔjíhún e nɔ́ bɛ́ agban sín zɔ é ɖɔhun wɛ é ɖe; é nɔ́ yi ba nǔɖuɖu sín zɔ. É nɔ́ fɔ́n zǎn bó nɔ́ ɖa nǔ e mɛ tɔn lɛ́ɛ ná ɖu é; é nɔ́ ná azɔ̌ nyɔ̌nu mɛsɛntɔ́ tɔn lɛ́ɛ. É mɔ ayǐkúngban ɖé bónú é jló e ɔ́, é nɔ́ ɖe wě d'é wú, bó nɔ́ xɔ; é nɔ́ sɔ́ akwɛ́ tɔn dó tun vǐwuntín ɖ'é jí. É nɔ́ ván kan dó azɔ̌ wǔ; é nɔ́ blá alɔ dó wǔ ǎ. É nɔ́ mɔ ɖɔ azɔ̌ émítɔn ɖo nukɔn yi wɛ; zǎn xóxó mɛ ɔ́, zogbɛ́n tɔn nɔ kpo ɖo te. É nɔ́ sɛ́ kɛkɛ́ dó gbɛ avɔkan, lobo nɔ lɔn avɔ. É nɔ́ hun alɔ bó nɔ́ ná nǔ lelenɔ lɛ́ɛ; é nɔ́ hɛn sɔ wamamɔnɔ lɛ́ɛ. É su avuvɔ hwenu ɔ́, é nɔ́ lin nǔ ǎ, ɖó awu we we wɛ mɛ e ɖo xwé tɔn gbe lɛ́ɛ ɖokpó ɖokpó ɖó. É nɔ́ lɔn jɔhɔnmɛvɔ tlitli; é ɖó awu e è zě kanvɔ mímɛ́, kanvɔ vɔvɔ cɛ́cɛ́ dó tɔ ná lɛ́ɛ. Asú tɔn ɔ́, gbɛtɔ́ nukúnɖéjí wɛ; è nɔ ɖó sísí n'i; é nɔ́ yi tomɛxó lɛ́ɛ sín kplé. Nyɔ̌nu jɔ nyɔ̌nu nɔ́ lɔn awu bó nɔ́ sa; é nɔ́ lɔn aɖɔkɛn bó nɔ́ sa xá axisinɔ lɛ́ɛ. Hlɔ̌nhlɔ́n kpódó susu kpó nyí acɔ́ɖónú tɔn; é flín sɔ e ja ɔ́, é nɔ́ ɖeji. É ɖɔ xó ɔ́, nǔnywɛ́xó wɛ nɔ́ tɔ́n sín nu tɔn mɛ; é nɔ́ kplɔ́n nǔ mɛ kpó xomɛ ɖagbe kpó. É nɔ́ kpé nukún dó nǔ e ɖo jijɛ ɖo xwé tɔn gbe wɛ é bǐ wú; azɔ̌ wa wɛ jɛ́n é nɔ́ ɖe. Vǐ tɔn lɛ́ɛ nɔ́ kpa ɛ; asú tɔn nɔ́ mlá ɛ. Asú tɔn nɔ́ ɖɔ: “Nyɔ̌nu gěgé ɖó zǐnzán ɖagbe, amɔ̌, towe hú yě bǐ tɔn.” Nǔ e nyɔ́ kpɔ́n ɔ́, nɔ́ blɛ́ mɛ; ɖɛkpɛ nɔ wá cá. Nyɔ̌nu e ɖó sísí nú Mawu Mavɔmavɔ ɔ́, nyɔ̌nu e è ɖǒ ná sɔ́ su ɔ́ nɛ́. Azɔ̌ e nyɔ̌nu mɔ̌hun nɔ́ wa ɔ́, è nǐ bó ná ɛ ajɔ tɔn; to ɔ́ bǐ ní kpa azɔ̌ tɔn. Davídi ví, Jeluzalɛ́mu xɔ́sú, nǔnywɛ́tɔ́ ɔ́, xó e é ɖɔ lɛ́ɛ ɖíe; é ɖɔ: Nǔ bǐ wɛ nyí nǔ yǎyá, nǔ bǐ wɛ nyí walá. Nyɛ nǔnywɛ́tɔ́ ɔ́ wɛ ɖɔ mɔ̌. Étɛ́ gbɛtɔ́ nɔ́ mɔ ɖo tagba e é nɔ́ jɛ ɖo hwe glɔ́ fí é mɛ? Mɛ ɖě nɔ́ ɖo kúkú wɛ, mɛ ɖě nɔ́ ɖo gbɛ wá wɛ, ayǐkúngban ɔ́ ká húzú ǎ. Hwe nɔ tɔ́n, bó nɔ́ yi xɔ, bó nɔ́ lɛ́ jɛ fí e é tɔ́n sín ɔ́ hwlɛ́n dó jí. Jɔhɔn nɔ nyi dó tofɔligbé, bó nɔ́ lílɛ́ wá yi totaligbé, bó nɔ́ lɛ́ lɛ́ kɔ wá tofɔligbé; mɔ̌ wɛ é nɔ́ ɖo yiyi wɛ, bó nɔ́ ɖo wǐwá wɛ. Tɔsisa lɛ́ɛ bǐ ɔ́, xu mɛ wɛ yě bǐ nɔ́ sa yi kɔn dó; có xu ɔ́ ká nɔ́ gɔ́ gbeɖé ǎ. Fí ɖokpó ɔ́ jɛ́n tɔsisa lɛ́ɛ nɔ́ fɔ́n bó nɔ́ ɖo sisa yi wɛ tɛgbɛ. Nǔ e ɖo jijɛ wɛ lɛ́ɛ bǐ wɛ cikɔ, é cikɔ káká bɔ è sixú ɖɔ ǎ. Nukún mɔ bó kpo ɖo biba ná mɔ wɛ, tó se bó kpo ɖo biba ná se wɛ. Nǔ e tíin wá yi ɔ́ jɛ́n ná lɛ́ wá tíin; nǔ e è ko bló ɖ'ayǐ ɔ́ jɛ́n è nǎ lɛ́ wá bló. Nǔɖé nyí dǒ wá ɖo hwe glɔ́ fí ǎ. Ényí nǔɖé tíin bɔ è ɖɔ: “Hǐn! Nǔ yɔ̌yɔ́ ɖíe” hǔn, tunwun ɖɔ nǔ énɛ́ kó tíin ɖ'ayǐ ɖo xóxó hwenu. Nǔ e wɛ kpowun ɔ́ wɛ nyí ɖɔ mǐ sɔ́ nɔ́ flín nǔ e jɛ dó tɔ́gbó tɔgbo mǐtɔn lɛ́ɛ jí é ǎ. Mɛ e ná wá jɛ mǐ gúdo lɛ́ɛ lɔ sɔ́ ná flín nǔ e jɛ dó mǐ tɔ́gbó tɔgbo yětɔn lɛ́ɛ jí é ǎ. Nyɛ nǔnywɛ́tɔ́ ɔ́, un ko nyí Izlayɛ́li xɔ́sú bó nɔ Jeluzalɛ́mu kpɔ́n. Nǔ e nɔ́ ɖo jijɛ wɛ ɖo hwe glɔ́ fí lɛ́ɛ ɔ́, un ɖɔ un ná zán nǔnywɛ́ ce dó ba do ná céɖécéɖé, bó ná tunwun nǔ e ɖo mɔ̌ zɔ́n wɛ ɔ́. Azɔ̌ syɛ́nsyɛ́n ɖokpó wɛ bɔ Mawu zɔ́n gbɛtɔ́. Un mɔ nǔ e ɖo jijɛ wɛ ɖo hwe glɔ́ fí lɛ́ɛ bǐ; un kpɔ́n mɛ káká ɔ́, un wá mɔ ɖɔ nǔ énɛ́ lɛ́ɛ bǐ ɔ́, nǔ yǎyá wɛ; wezun kán ɖo jɔhɔn gúdo wɛ. Nǔ e xá ɔ́, è sixú jlɔ́ ǎ; è sixú xa nǔ e má tíin ǎ é ǎ. Un ɖɔ nú nyiɖée ɖɔ: “Un yí nǔnywɛ́ dó nǔnywɛ́ jí, un ɖó nǔnywɛ́ hú mɛ e ɖu axɔ́sú ɖo Jeluzalɛ́mu dó nukɔn nú mì lɛ́ɛ bǐ.” Nǔ e un mɔ lɛ́ɛ ná nǔnywɛ́ mì, un mɔ nukúnnú jɛ nǔ e gbɛ ɔ́ nyí ɔ́ wú. Un ɖɔ un ná ba do ná céɖécéɖé bó ná tunwun vogbingbɔn e ɖo nǔnywɛ́ kpó xlojijɔ kpó mɛ é, bó wá mɔ ɖɔ énɛ́ ɔ́ lɔmɔ̌ ɔ́, wezun kán ɖo jɔhɔn gúdo wɛ. È ɖo nǔnywɛ́ yí dó nǔnywɛ́ jí wɛ ɔ́, tagba dó tagba jí nú mɛɖée wɛ; è ɖo nǔ tunwun dó nǔ e è ko tunwun ɔ́ jí wɛ ɔ́, wǔvɛ́ dó wǔvɛ́ jí nú mɛɖée wɛ. Un wá ɖɔ nú nyɛɖée ɖɔ: “Din ɔ́, un ná ɖu gbɛ ce lě e é jló mì gbɔn é, un ná mɔ nǔ jɛ gbɛ víví wú.” Énɛ́ lɔ ɔ́, un mɔ ɖɔ nǔ yǎyá ɖokpó wɛ. Un ka mɔ ɖɔ nǔkiko lɔ ɔ́, xlojijɔ wɛ, bɔ nǔɖé ká ɖo awǎjijɛ lɔ mɛ ǎ. Un gblɔ́n adǎn ɖɔ un ná wa nǔ xlonɔ lɛ́ɛ ɖɔhun bó ná nu vɛ̌ɛn ganjí; un ná bló mɔ̌, bɔ ayi ce ka na kpo ɖo te, bɔ un ná nɔ kanbyɔ́ nyɛɖée ɖɔ é ká nyɔ́ ɖɔ gbɛtɔ́ ná zán gbɛ tɔn gbɔn mɔ̌ ɖo hwe glɔ́ fí a jí. Nǔ ɖaxó ɖaxó e un wa lɛ́ɛ ɖíe: Un sá xwé; un tun vǐwun; un bló jikpá; un tun atínsínsɛ́n tɛnmɛ tɛnmɛ dó ayǐkúngban ce lɛ́ɛ jí. Un kun tɔ, bó nɔ́ hú sin tɔn nú atín ce lɛ́ɛ. Un xɔ kannumɔ súnnu kpó nyɔ̌nu kpó, bɔ yě ji vǐ, bɔ vǐ yětɔn lɛ́ɛ lɔ nyí kannumɔ ce. Un ɖó gbɔ̌ kpó nyibú kpó hú mɛ e nɔ Jeluzalɛ́mu dó nukɔn nú mì lɛ́ɛ bǐ. Un kplé kpatágan kpó siká kpó kɔn nyi kpɔ́; dɔkun énɛ́ lɛ́ɛ ɔ́, axɔ́sú e ɖo acɛ ce mɛ lɛ́ɛ gɔ́n wɛ yě gosín, bó gosín tokpɔn e ɖo acɛ ce mɛ lɛ́ɛ mɛ. Un ɖó hansinɔ súnnu kpó nyɔ̌nu kpó, bɔ yě nɔ́ wá ji han dó ɖe ayi ɖ'ayǐ nú mì. Nǔ e nyí gbɛ bɔ súnnu lɛ́ɛ nɔ́ ɖu ɔ́, un ɖu; un da asi kɔn nyi kpɔ́. Un húzú nǔsúɖaxó, bó hú gǎn mɛ e nɔ Jeluzalɛ́mu dó nukɔn nú mì lɛ́ɛ bǐ, ayivɔ ka vún mì ǎ. Nǔ e nukún ce mɔ bɔ é jló mì lɛ́ɛ ɔ́, un gɔn ɖě ɖó ǎ; gbɛɖuɖu e nɔ jló mì ɔ́, un gɔn ɖě ɖu ǎ. Azɔ̌ e un wa lɛ́ɛ ɔ́, un ɖu bǐ sín le bɔ é jɛ mɛ nú mì. Énɛ́ lɛ́ɛ wɛ nyí le e nyí ce ɖo azɔ̌ e un wa lɛ́ɛ mɛ é. Ée un ka wá kpɔ́n nǔ e un wa lɛ́ɛ bǐ mɛ sɛ́ dó, bó kpɔ́n wǔvɛ́ e un mɔ ɖ'é mɛ lɛ́ɛ bǐ sɛ́ dó ɔ́, un mɔ ɖɔ nǔ énɛ́ lɛ́ɛ bǐ ɔ́, nǔ yǎyá wɛ; wezun kán ɖo jɔhɔn gúdo wɛ. Nǔ e wa wɛ è nɔ ɖe ɖo hwe glɔ́ fí ɔ́, le ɖé ɖ'é mɛ ǎ. Un wá jɛ tamɛ lin kpɔ́n dó nǔ e nyí nǔnywɛ́ é, nǔ e nyí taɖu é, kpódó nǔ e nyí xlo é kpó wú jí, bó wá kanbyɔ́ nyɛɖée ɖɔ nú un wá gosín fí ɔ́, axɔ́sú e ná wá jɛ tɛn ce mɛ ɔ́, étɛ́ wɛ é ká ná bló bɔ é ná gbɔn vo nú ée axɔ́sú e jɛ nukɔn n'i lɛ́ɛ ko bló é. Nǔ e un wá mɔ ɔ́ ɖíe: un mɔ ɖɔ lě e wěziza nyɔ́ hú ablu gbɔn ɔ́ mɔ̌ wɛ nǔnywɛ́ nyɔ́ hú xlo. Nǔgbó wɛ, mɛ e ɖó nǔnywɛ́ ɔ́, ayi tɔn nɔ mɔ nǔ; xlonɔ ɔ́, ayi tɔn ka tɔ́n nukún; amɔ̌, un mɔ ɖɔ yě mɛ we lɛ́ɛ ɔ́, tɔ ɖokpó ɔ́ mɛ hwe ɖa wɛ yě ɖe. Ényí nǔ ɖokpó ɔ́ wɛ ɖo te kpɔ́n nyi kpó xlonɔ kpó ɔ́, étɛ́ un ka ɖó nǔnywɛ́ hú i dó wa ná? Un lɛ́ mɔ ɖo fínɛ́ ɖɔ nǔnywɛ́ ɖó hú mɛ ɔ́, nǔ yǎyá wɛ. Nǔnywɛ́tɔ́ ɔ́, è nɔ flín i káká sɔ́yi ǎ; mɔ̌ ɖokpó ɔ́, è nɔ flín xlonɔ lɔmɔ̌ káká sɔ́yi ǎ. Ayǐ ɖo hǐnhɔ́n dó ayǐ jí wɛ ɔ́, è nɔ wɔn yě. Nǔnywɛ́tɔ́ nɔ́ kú, xlonɔ lɔ nɔ kú. Ée un mɔ mɔ̌ é ɔ́, un gbɛ́ wǎn nú gbɛ ɔ́, ɖó nǔ e gbɛtɔ́ nɔ wa ɖo hwe glɔ́ fí ɔ́ ɖě nyí nǔɖé wa nú ǎ; un mɔ ɖɔ nǔ énɛ́ lɛ́ɛ bǐ ɔ́, nǔ yǎyá wɛ; wezun kán ɖo jɔhɔn gúdo wɛ. Tagba e jɛ wɛ un ɖe ɖo hwe glɔ́ fí, bó ɖo nǔ wa wɛ ɔ́ bǐ vɛ́ nú mì, ɖó un ná jó nǔ énɛ́ lɛ́ɛ bǐ dó nú mɛ e ɖo do ce mɛ ná nɔ wɛ é. Azɔ̌ e un zán nǔnywɛ́ ce bó wa ɖo hwe glɔ́ fí ɔ́, mɛ e ɖo do ce mɛ ná wá nɔ wɛ ɔ́ wɛ ɖo acɛ ná kpa ná wɛ; é to ká ná ɖó nǔnywɛ́ kpó é ná jɔ xlo kpó ɔ́, mɛ̌ ká tunwun; énɛ́ lɔ ɔ́ un mɔ ɖɔ nǔ yǎyá wɛ. Din ɔ́, un dán nǔ e dó mì bɔ un jɛ tagba bó wa azɔ̌ sɔ mɔ̌ ɖo hwe glɔ́ fí é. Gbɛtɔ́ zé nǔnywɛ́ tɔn, bó zé lě e é mɔ nukúnnú jɛ gbɛ ɔ́ wú gbɔn ɔ́ dó wa nǔ ná, bó mɔ nu tɔn, có é ná jó nǔ énɛ́ bǐ dó nú mɛ e ná wá nɔ do tɔn mɛ é; mɛ énɛ́ ká mɔ wǔvɛ́ ɖé xá ɛ ǎ. Énɛ́ lɔ ɔ́ un mɔ ɖɔ nǔ yǎyá wɛ, nǔ ɖǒ ná nyí mɔ̌ ǎ. Ée nǔ ká ɖo mɔ̌ din ɔ́, tagba e gbɛtɔ́ jɛ ɖo hwe glɔ́ fí bó wa azɔ̌, bó bló nǔ e ɖo ayi tɔn mɛ ɔ́, le tɛ́ é ká mɔ ɖ'é mɛ? Đó ayǐ hɔ́n tɛgbɛ ɔ́, adǎn jɛ́n nɔ́ ɖo gbigbo e wɛ; nǔ lin wɛ jɛ́n é nɔ́ ɖe, bó nɔ́ ɖo kéve xo wɛ ɖo gbɛ nukɔn. Zǎn na bo kú ɔ́, é nɔ́ vo ɖo ayi mɛ ǎ. Nǔ énɛ́ lɔ ɔ́ un mɔ ɖɔ nǔ yǎyá wɛ. Nǔɖé sɔ́ nyɔ́ nú gbɛtɔ́ ɖo gbɛmɛ zɛ é ná ɖu nǔ, bó nu ahan, bó ɖu azɔ̌ e é wa ɔ́ sín gbɛ wú ǎ. Nǔ énɛ́ lɛ́ɛ lɔ ɔ́, un mɔ ɖɔ Mawu wɛ nɔ hun alɔ bo nɔ ná mɛ. Đó xó e Mawu ɖɔ é ɖíe: “Mɛ̌ ká sixú ɖu nǔ, bó ɖu gbɛ víví nyɛ mɛ vo?” Nǔgbó ɔ́, Mawu wɛ nɔ́ ná nǔnywɛ́, nukúnnú mɔ jɛ nǔ mɛ kpó awǎjijɛ kpó mɛ e nɔ wa jlǒ tɔn é; lo ɔ́, é nɔ́ zɔ́n azɔ̌ mɛ e nɔ wa nǔ nyanya é, bɔ é nɔ́ wa azɔ̌, bó nɔ́ kplé dɔkun nú mɛ e nɔ wa jlǒ éyɛ́ Mawu ɔ́ tɔn é; dɔkun kplé ɖ'ayǐ ɔ́, un mɔ ɖɔ énɛ́ lɔ ɔ́ nǔ yǎyá wɛ; wezun kán ɖo jɔhɔn gúdo wɛ. Nǔ bǐ wɛ ɖó hwenu. Nǔ ɖokpó ɖokpó ɖó hwenu tɔn ɖo hwe glɔ́ fí. Hwenu e è nǎ jɔ dó ɔ́ ɖe, bɔ hwenu e è nǎ kú dó é ɖe. Hwenu e è nǎ dó nǔ dó ɔ́ ɖe, bɔ hwenu e è nǎ hɔn dó é ɖe. Hwenu e è nǎ hu mɛ dó ɔ́ ɖe, bɔ hwenu e è nǎ gbɔ azɔn nú mɛ dó é ɖe. Hwenu e è nǎ mu xɔ dó ɔ́ ɖe, bɔ hwenu e è nǎ mɛ xɔ dó é ɖe. Hwenu e è nǎ ya avǐ dó ɔ́ ɖe, bɔ hwenu e è nǎ ko nǔ dó é ɖe. Hwenu e è nǎ sa gbɛvo dó ɔ́ ɖe, bɔ hwenu e è nǎ ɖú we dó é ɖe. Hwenu e è nǎ nyi hwǎn dó ɔ́ ɖe, bɔ hwenu e è nǎ cyán hwǎn dó é ɖe. Hwenu e è nǎ kplá así kɔ nú mɛ dó ɔ́ ɖe, bɔ hwenu e è ma ná kplá así kɔ nú mɛ dó ǎ é ɖe. Hwenu e è nǎ ba nǔ dó ɔ́ ɖe, bɔ hwenu e è nǎ hɛn nǔ bǔ dó é ɖe. Hwenu e è nǎ hɛn nǔ dó ɔ́ ɖe, bɔ hwenu e è nǎ sɔ́ nǔ nyi gbě dó é ɖe. Hwenu e è nǎ hɛn nǔ tlɛ́n dó ɔ́ ɖe, bɔ hwenu e è nǎ tɔ nǔ dó é ɖe. Hwenu e è nǎ nɔ abwɛ̌ dó ɔ́ ɖe, bɔ hwenu e è nǎ ɖɔ xó dó é ɖe. Hwenu e è nǎ yí wǎn nú mɛ dó ɔ́ ɖe, bɔ hwenu e è nǎ gbɛ́ wǎn nú mɛ dó é ɖe. Hwenu e è nǎ fun ahwan dó ɔ́ ɖe, bɔ hwenu e è nǎ nɔ fífá mɛ dó é ɖe. Étɛ́ azɔ̌watɔ́ ká nɔ́ mɔ ɖo tagba e é nɔ́ jɛ bó nɔ́ wa nǔ é mɛ? Un mɔ kpowun ɖɔ tagba wɛ bɔ Mawu dó gbɛtɔ́ jí. Mawu bló hwenu e nǔ ɖokpó ɖokpó ná jɛ dó bɔ é ná nyɔ́ é. Mawu sɔ́ dó ayi mɛ nú gbɛtɔ́, bɔ é nɔ́ ba ná tunwun nǔ e kó jɛ wá yi lɛ́ɛ kpódó nǔ e ná wá jɛ káká sɔ́yi lɛ́ɛ kpó; lo ɔ́, nǔ e Mawu bló lɛ́ɛ ɔ́, gbɛtɔ́ sixú tunwun bǐ yi fó ǎ. Énɛ́ ɔ́, un wá mɔ ɖɔ nǔ ɖokpó e nyí nǔ bó nyɔ́ hú nǔ bǐ nú gbɛtɔ́ ɔ́, é wɛ nyí é ná ɖu gbɛ, bó mɔ gbɛ víví hwenu e é ɖo gbɛ é. Ényí mɛɖé nɔ́ ɖu nǔ, bó nɔ́ nu ahan, bó ɖu azɔ̌ e é jɛ tagba bo wa ɔ́ sín gbɛ hǔn, Mawu wɛ ná ɛ. Un wá mɔ nǔ jɛ wú ɖɔ nǔ e Mawu bló ɔ́ ná ɖo ayǐ káká sɔ́yi. Nǔɖé tíin bɔ è ɖo nǎ sɔ́ gɔ́ ná wɛ ǎ, nǔɖé ká tíin bɔ è nǎ ɖe sín mɛ ǎ. Mawu bló mɔ̌ bónú gbɛtɔ́ ná sí i. Nǔ e ɖe égbé din ɔ́ kó tíin ɖo xóxó hwenu, bɔ nǔ e ká ná wá tíin ɔ́ lɔ ko tíin kpɔ́n. Nǔ e kó jɛ wá yi lɛ́ɛ ɔ́, Mawu nɔ́ lɛ́ ɖo bǐ sɔ́ wá wɛ. Un lɛ́ mɔ nǔ ɖěvo ɖo hwe glɔ́ fí: fí e è ɖǒ ná wa nǔ ɖó sɛ́nxwi jí ɖe ɔ́, è nɔ wa nǔ agɔ ɖo fínɛ́; fí e è ɖǒ ná ɖɔ hwɛ jlɔ́jlɔ́ ɖe ɔ́, è nɔ dó hwɛ agɔ ɖo fínɛ́. Énɛ́ ɔ́, un ɖɔ dó xomɛ ɖɔ: “Mawu ná ɖɔ hwɛ xá hwɛjijɔnɔ, bó ɖɔ hwɛ xá dǎkaxotɔ́; ɖó hwenu e Mawu ná ɖɔ hwɛ dó nǔ ɖokpó ɖokpó ɔ́ ɖe; nǔ e nɔ jɛ lɛ́ɛ ɖokpó ɖokpó ɖó hwenu; nǔ e è nɔ wa lɛ́ɛ ɖokpó ɖokpó ɖó hwenu.” Un lɛ́ ɖɔ dó xomɛ ɖɔ: “Mawu ná ɖe nǔ xlɛ́ gbɛtɔ́ dó xlɛ́ ɛ ɖɔ é kún gbɔn vo nú kanlin ó.” Đó nǔ e ɖo te kpɔ́n kanlin ɔ́ jɛ́n ɖo te kpɔ́n gbɛtɔ́ lɔ; funfún e ɖo kanlin xomɛ é jɛ́n ɖo gbɛtɔ́ xomɛ; kanlin ná kú, gbɛtɔ́ lɔ ná kú. Gbɛtɔ́ nyí nǔɖé hú kanlin ǎ; ɖó nǔ lɛ́ɛ bǐ wɛ nyí nǔ yǎyá. Nǔ e ɖo gbɛ é bǐ wɛ è zě kɔ́ dó bló; bǐ wɛ ná lɛ́ húzú kɔ́; fí ɖokpó ɔ́ wɛ bǐ xwe. Mɛ ɖé tunwun fí e gbɛtɔ́ sín funfún nɔ́ yi é ǎ; mɛɖé ká tunwun fí e kanlin tɔn nɔ́ yi é ǎ. É tó nyí jǐxwé wɛ gbɛtɔ́ tɔn nɔ yi oo, é tó nyí ayǐkúngban glɔ́ wɛ kanlin tɔn nɔ yi oo, mɛ ká tunwun? Nǔgbó ɔ́, un wá mɔ ɖɔ gbɛ ɖé kún sɔ́ kpo nú gbɛtɔ́ zɛ é ná ɖu nǔ e é wa lɛ́ɛ sín gbɛ wú ó; ée nyí étɔn é nɛ́. Đó nǔ e ná wá jɛ dó gǔdo tɔn lɛ́ɛ ɔ́, mɛ̌ ká ná kplá ɛ wá, bɔ é ná mɔ? Un lɛ́ mɔ lě e gbɛtɔ́ lɛ́ɛ nɔ́ dó ya nú nɔzo yětɔn lɛ́ɛ gbɔn ɖo hwe glɔ́ fí é. Mi kpɔ́n! Mɛ e dó ya ná wɛ è ɖe lɛ́ɛ ɖo avǐ ya wɛ. Mɛ ɖěbǔ ká ɖe bó ná dó gbɔ nú yě ǎ. Mɛ e ɖo ya dó nú yě wɛ lɛ́ɛ sí wɛ acɛkpikpa ɔ́ ɖe; énɛ́ wú wɛ mɛ ɖěbǔ má ɖe bó ná dó gbɔ nú yě ǎ. Un mɔ din ɖɔ mɛ e ko kú lɛ́ɛ ɖu gbɛ hú mɛ e kpo ɖo gbɛ din lɛ́ɛ. Lo ɔ́, mɛ e ma jɔ wá gbɛ ɔ́ mɛ ǎ ɔ́ ɖu gbɛ hú yě bǐ; ɖó éyɛ́ mɔ nǔ agɔ e è nɔ wa ɖo hwe glɔ́ fí lɛ́ɛ kpɔ́n ǎ. Un lɛ́ mɔ nǔ jɛ wú ɖɔ gbɛtɔ́ nɔ́ jɛ tagba bó nɔ lébe nú azɔ̌ tɔn. Nǔ e wú é nɔ́ ɖo mɔ̌ wa wɛ ɔ́ wɛ nyí ɖɔ nǔ ná nyɔ́ nú éyɛ́ hú mɛ bǐ. Un mɔ ɖɔ nǔ énɛ́ lɔ ɔ́, nǔ yǎyá wɛ; wezun kán ɖo jɔhɔn gúdo wɛ. Xlonɔ nɔ gbɛ́ nǔɖé wa; Nǔ ɖo mɔ̌ có, éɖée nú wa wɛ é ɖe; è ɖǒ nǔ kpɛɖé bó ná agbɔ̌n mɛɖée ɔ́, é nyɔ́ hú è ɖo azɔ̌ wa wɛ hwebǐnu, káká bó ba agbɔ̌n kpo. Un lɛ́ mɔ nǔ yǎyá ɖěvo ɖo hwe glɔ́ fí: Nya ɖé tíin, bɔ é ɖokpó wɛ ɖo ayǐ, mɛɖé ɖo kpɔ́ xá ɛ ǎ. Nya ɔ́ ɖó vǐ ǎ, é ɖó nɔví ǎ, é ká fɔ́n ɔ́, azɔ̌ wa wɛ jɛ́n é nɔ́ ɖe; dɔkun kplé dó dɔkun jí wɛ jɛ́n é nɔ́ ɖe. É nɔ́ wá kanbyɔ́ éɖée ɖɔ: “Mɛ̌ kplé dɔkun ɔ́ ɖ'ayǐ ná wɛ un ka ɖe bó gbɛ́ gbɛ ce ɖu?” Un mɔ ɖɔ nǔ énɛ́ lɔ ɔ́, nǔ yǎyá wɛ; gbɛ mɛtɔn zán nyi do wɛ. Mɛ we ɖó gbe kpɔ́ bó wa azɔ̌ ɔ́, é nyɔ́ hú è nɔ mɛ ɖokpó géé; ɖó è kpé we ɖo azɔ̌ kɔn ɔ́, è nɔ mɔ nu tɔn. Nú mɛ ɖě jɛ ayǐ ɔ́, mɛ ɖě ɔ́ ná sɔ́ ɛ sí te; amɔ̌, mɛ e nyí é ɖokpónɔ bó jɛ ayǐ ɔ́, nǔ tɔn blá wǔ, ɖó é ná mɔ mɛɖé bónú é ná dó alɔ ɛ, bɔ é ná sí te ǎ. Mɔ̌ ɖokpó ɔ́, nú mɛ we mlɔ́ zan ɖokpó ɔ́ jí ɔ́, yě nɔ́ glɔ́n jɔhɔn nú yěɖée; é ká nyí mɛ ɖokpó wɛ ɔ́, mɛ̌ ná glɔ́n jɔhɔn n'i? Ényí mɛɖé tɔ́n hun mɛ we ɔ́, yě mɛ we lɛ́ɛ hɛn ɔ́, yě ná gló mɛ ɔ́; é ká nyí mɛ ɖokpó wɛ è tɔ́n ahwan ɔ́, è nǎ kpé wǔ tɔn. È fɔ kan atɔn kplé bó gbɛ ɔ́, é nɔ́ wɛ́n vawun ǎ. Yɔkpɔ́vú e nyí yatɔ́nɔ bó ká ɖó nǔnywɛ́ ɔ́ nyɔ́ hú axɔ́sú e nyí mɛxó, bó ka jɔ xlo, bó má sɔ́ nɔ́ ɖótó mɛɖé xó ǎ é. Yɔkpɔ́vú énɛ́ ɔ́, é ná bó nyí ya mɛ wɛ è ji i dó, abǐ é ná bó nyí gankpá mɛ é gosín bó wá yi zinkpo jí ɔ́, un mɔ ɖɔ yɔkpɔ́vú ɔ́ jí wɛ gbɛtɔ́ e ɖo hwe glɔ́ fí lɛ́ɛ ná nɔ; yě ná nɔ axɔ́sú e do mɛ é wá ɖe ɔ́ jí ǎ. Yɔkpɔ́vú énɛ́ ɔ́ ná ɖu axɔ́sú ɖo mɛ gěgé nu; é ká ɖo mɔ̌ có axɔ́súɖuɖu tɔn sɔ́ nɔ́ wá nyí xomɛhunhunnú ɖe nú mɛ e ná wá jɔ sɔ lɛ́ɛ ǎ; un mɔ ɖɔ nǔ énɛ́ lɔ ɔ́, nǔ yǎyá wɛ; wezun kán ɖo jɔhɔn gúdo wɛ. Nɔ lin tamɛ ganjí có bó nɔ́ yi Mawu xwé gbe. Tunwun dó ayi towe mɛ ɖɔ xó se gbé wɛ émí xwe. È wa nǔ gbɔn mɔ̌ ɔ́, é nyɔ́ hú è nǐ xwlé vɔ̌sánú Mawu mɛ e ma nɔ lin tamɛ ǎ lɛ́ɛ ɖɔhun; ɖó yě tunwun ɖɔ émí ɖo nǔ wa nyi do wɛ ǎ. Ma nɔ yá wǔ ɖɔ xó ó. Ma nɔ hwlɛ́n dó bó nɔ́ dó akpá nú Mawu ó. Mawu ɔ́, jǐxwé wɛ é ɖe, bɔ hwɛ ka ɖo ayǐkúngban jí; hǔn ma nɔ ɖɔ xó dín ó. Nǔ linlin hú gǎn mɛ ɔ́, dlɔ̌ wɛ è nɔ kú; mɔ̌ ɖokpó ɔ́, è ɖo xó ɖɔ wɛ dín ɔ́, xó gbló wɛ è nɔ ɖɔ. Nú a dǒ akpá nú Mawu hǔn, ɖe; ma nú é nɔ lǐnlín mɛ ó, ɖó Mawu nɔ́ yí wǎn nú xlonɔ lɛ́ɛ ǎ. Akpá e a dǒ ɔ́, bo ɖe. A gbɔ bo gɔn akpá dó ɔ́, é nyɔ́ hú a dǒ bó gɔn ɖiɖe. Ma lɔn nú nu towe dɔn we dó hwɛ mɛ ó. Ma lɔn bo wá yi ɖo ɖiɖɔ nú vɔ̌sánú-xwlémawutɔ́ ɔ́ wɛ ɖɔ: “Akpá e un dó ɔ́, un lin tamɛ ganjí cóbó dó ǎ” ó. Étɛ́wú a ka ná ɖɔ xó dó dó xomɛsin nú Mawu, bɔ Mawu ná hɛn nǔ e wa wɛ a ɖe ɔ́ gblé? Xó sukpɔ́ dín ɔ́, gblǒ wɛ é nɔ́ wá húzú; mɔ̌ ɖokpó ɔ́, dlɔ̌ kú sukpɔ́ ɔ́, gblǒ wɛ é nɔ́ nyí. Hǔn, bo ɖó sísí nú Mawu. Nú a mɔ bɔ è ɖo wamamɔnɔ blɛ́ ɖu wɛ, bó ɖo hwɛ agɔ dó wɛ, bó ɖo mɛ táfú wɛ ɖo tokpɔn ɖé mɛ hǔn, ma nú é kpácá we ó, ɖó azɔ̌watɔ́ ɖaxó ɖokpó ɖokpó ɖó gǎn bɔ é nɔ́ nya xɛ ɖo jǐ tɔn, bɔ mɛ ɖěvo lɛ́ ɖe bó nyí gǎn nú yě mɛ we lɛ́ɛ, lobo nɔ nya xɛ ɖo yě jí. Ényí to ɖé ká tíin bó ɖó axɔ́sú, bɔ axɔ́sú ɔ́ nɔ́ jɛ hun dó glezɔ́ jí ɔ́, énɛ́ ná nyɔ́ hú. Mɛ e yí wǎn nú akwɛ́ ɔ́, akwɛ́ nɔ́ kpé e gbeɖé ǎ; mɛ e yí wǎn nú dɔkun ɔ́, nǔ e é ɖó ɔ́ nɔ kpé e gbeɖé ǎ. Un mɔ ɖɔ énɛ́ lɔ ɔ́, nǔ yǎyá ɖokpó wɛ. Ényí mɛ ɖé jɛ dɔkun sukpɔ́ ɔ́, ɖuɖutɔ́ nɔ́ sukpɔ́; ényí nǔ ká ɖo mɔ̌ ɔ́, mɛ e jɛ dɔkun ɔ́, le tɛ́ ká ɖ'é mɛ n'i nɛ́? É ná kpɔ́n dɔkun tɔn lɛ́ɛ ɖó nukún wú kpowun. Azɔ̌watɔ́ ɔ́, é ná bó ɖó nǔ e é ná ɖu ɔ́ kpɛví ɖé, abǐ gěgé ɔ́, amlɔ víví wɛ é nɔ́ dɔ́; amɔ̌, dɔkunnɔ nɔ sixú dɔ́ amlɔ ǎ, ɖó dɔkun tɔn sukpɔ́ dín. Nǔ baɖabaɖa ɖokpó tíin bɔ un mɔ ɖo hwe glɔ́ fí: mɛ e ɖó dɔkun ɔ́ nɔ́ kplé ɖ'ayǐ bɔ énɛ́ ɔ́ nɔ́ nyí kú n'i. É nɔ́ bɛ́ dɔkun tɔn dó nǔɖé mɛ bɔ bǐ nɔ́ gbadó, bɔ é sɔ́ nɔ́ wá jó gǔ ɖé dó nú vǐ tɔn ǎ. Mɛ̌ wɛ gbɛtɔ́ zɔn bó gosín nɔ tɔn xo mɛ; mɛ̌ mɔ̌ jɛ́n é ká ná lɛ́ zɔn bó lɛ́ kɔ sín gbɛ ɔ́ mɛ. Nǔ e é wa ɖo gbɛmɛ fí ɔ́, é nɔ́ hɛn kpɛví ɖé vɔ́vɔ́ yi ǎ. Lě e é zɔn wá ɔ́, mɔ̌ jɛ́n é lɛ́ zɔn yi; é blá wǔ mɛ! Tagba e é jɛ bó wa azɔ̌ ɔ́, le tɛ́ ká ɖ'é mɛ n'i? É wa azɔ̌ dó wǔvɔ́ kpowun. Ée lɛ́ nylá ɔ́ wɛ nyí hwenu e é ɖo gbɛ ɔ́, adǎn nɔ́ ɖo gbigbo e wɛ, é nɔ́ ɖo nǔ lin wɛ, é nɔ́ ɖo wǔvɛ́ mɔ wɛ, é nɔ́ ɖo akpɔ mɔ wɛ. Nǔ e un mɔ dó xó énɛ́ lɛ́ɛ wú ɔ́ ɖíe: nǔ e nyɔ́ nú gbɛtɔ́ ɔ́ wɛ nyí é ná ɖu nǔ, bó nu ahan, bó ɖu azɔ̌ e é wa ɔ́ sín gbɛ, ɖo azǎn nabí e Mawu ná ɛ, bɔ é ná nɔ gbɛ xɔ é mɛ, ɖó éé nyí étɔn ɔ́ nɛ́. Nǔgbó ɔ́, Mawu sixú dó dɔkun nú mɛ ɖé, bɔ é jɛ dɔkun bó mɔ ɖu. Mɛ énɛ́ ɔ́ hɛn ɔ́, é ná ɖu éé nyí étɔn é, é ná ɖu azɔ̌ e é wá ɔ́ sín gbɛ. É cí mɔ̌ nú mɛ ɖé hǔn, Mawu wɛ ná ɛ. Nǔ cí mɔ̌ nú mɛ ɖé ɔ́, mɛ ɔ́ sɔ́ nɔ́ flín ɖɔ émí kún ɖo gbɛ nabí ɖé ná nɔ wɛ ó ǎ, ɖó gbɛ e Mawu ná ɛ bɔ é ɖo ɖuɖu wɛ ɔ́ wú. Un lɛ́ mɔ nǔ nyanya ɖokpó ɖo hwe glɔ́ fí; bɔ nǔ énɛ́ ɔ́ nyí nǔ baɖabaɖa ɖaxó ɖokpó nú gbɛtɔ́ lɛ́ɛ. Mawu nɔ́ ná dɔkun mɛ ɖé bɔ é nɔ́ jɛ, bó nɔ́ ɖó nǔ kɔ́n nyi kpɔ́, bó nɔ́ xɔ susu. Nǔɖé nɔ́ hwedó e ǎ; nǔ e ko sixú jló e ɔ́, é nɔ́ ɖó bǐ. Mawu ká nɔ́ jó e dó nú é nɔ́ ɖu ǎ; mɛ ɖěvo wɛ nɔ wá ɖu bǐ. Énɛ́ ɖésú ɔ́, nǔ yǎyá wɛ, bó nɔ́ zɔ́n bɔ è nɔ mɔ wǔvɛ́ ɖésú. Mɛ ɖé sixú ɖó vǐ kɔn nyi kpɔ́, bó lɛ́ dɔ́ ji káká bɔ afɔfún nyí hwa bɔ alɔfún nyí hwa. Nú é má ká ɖu gbɛ ɖé ɖo gbɛ tɔn mɛ ǎ ɔ́, étɛ́ é ká nɔ gbɛ dó wa? Nú è ma ka lɛ́ ɖi i dó yɔdo mɛ ǎ ɔ́, étɛ́ é ká nɔ gbɛ dó wa? Nyɛ mɔ ɖɔ vǐ e flɛ́ kɛ́n ɔ́ tɔn nyɔ́ hú éyɛ́ tɔn, ɖó vǐ e flɛ́ kɛ́n wá gbɛ ɔ́ mɛ dó wǔvɔ́; é lɛ́ kɔ yi zǐnflú mɛ, bɔ mɛɖé sɔ́ nɔ́ flín i ǎ, É mɔ hwe ɖó nukún wú ǎ, é tunwun nǔ e ɖo jijɛ wɛ ɖo gbɛ ɔ́ mɛ ɔ́ ɖě ǎ; é vo hú nya énɛ́ e dɔ́ ji káká é. Gbɛtɔ́ ná bó nɔ gbɛ xɔ xwe afɔwó (2.000), bó má ká mɔ gbɛ víví ǎ ɔ́, gbɛ wɛ nyí gbɛ énɛ́ ɔ́ a? Nǔ e ɖó funfún e bǐ jɛ́n ná wá kú ǎ cé? Nǔ ná gló wú wɛ gbɛtɔ́ nɔ́ wa azɔ̌; nǔ ká nɔ́ kpé e gbeɖé ǎ. Étɛ́ mɛ e ɖó nǔnywɛ́ ɔ́ ká ɖó hú xlonɔ? Mɛ e nyí wamamɔnɔ bó ká tunwun afɔ bó nɔ́ ɖe ɖo gbɛtɔ́ mɛ ɔ́, le tɛ́ ká ɖ'é mɛ n'i? Nukún mɛtɔn nɔ nǔ e è ɖǒ ɔ́ wú bɔ é víví nú mɛ ɔ́, é nyɔ́ hú nukún mɛtɔn nɔ nǔ e è jlǒ ɔ́ wú. Un mɔ ɖɔ énɛ́ lɔ ɔ́, nǔ yǎyá wɛ; wezun kán ɖo jɔhɔn gúdo wɛ. Nǔ e tíin din ɔ́, è ko tunwun ɖ'ayǐ xóxó; nǔ e gbɛtɔ́ nyí ɔ́ è ko tunwun ganjí; gbɛtɔ́ sixú dɔn nǔ xá mɛ e tunwun nǔ hú i é ǎ, ɖó è ɖo xó ɖɔ wɛ magbokɔ ɔ́, xógbló nɔ́ sukpɔ́ ɖ'é mɛ. Étɛ́ è ka nɔ mɔ ɖo xó ɖɔ magbokɔ ɔ́ mɛ? Gbɛtɔ́ sín gbɛ nɔ dín wá yi bléwún yɛ ɖɔhun; mɛ̌ ká tunwun nǔ e nyɔ́ nú gbɛtɔ́ ɖo azǎn kpɛ e é ná bló ɖo hwe glɔ́ fí é mɛ é? Nǔ e ná wá jɛ ɖo kú tɔn gúdo ɖo hwe glɔ́ fí ɔ́, mɛ̌ ká sixú tunwun bó ɖɔ n'i? È mlǎ nyǐkɔ ɖagbe mɛ ɔ́, é nyɔ́ hú célu e nyɔ́ wǎn ganjí é. Azǎn e gbe è kú ɔ́ nyɔ́ hú azǎn e gbe è jɔ é. È yi xwé e gbe mɛ kú bɔ è ɖo avǐ ya ɖe wɛ ɔ́ gbe ɔ́, é nyɔ́ hú è yi xwé e gbe è ɖo awǎ jɛ ɖe wɛ é gbe; ɖó mǐ mɛ bǐ wɛ ná kú, bɔ é nyɔ́ ɖɔ mɛ ɖokpó ɖokpó ní lin tamɛ dó kú ɔ́ wú. Aluwɛ nyɔ́ hú nǔkiko, ɖó aluwɛ nɔ zɔ́n bɔ è nɔ blá wǔ ɖo nukún mɛ, lo ɔ́ é nɔ́ wlí ayi dó xomɛ nú mɛ. Nǔnywɛ́tɔ́ sín ayi nɔ ɖo xwé e gbe avǐ ɖe ɔ́ gbe; xlonɔ sín ayi ka nɔ ɖo xwé e gbe awǎjijɛ ɖe é gbe. Nǔnywɛ́tɔ́ gbɛ́ nǔ nú mɛ bɔ è se ɔ́, é nyɔ́ hú xlonɔ ɖo mɛ kpa wɛ bɔ è ɖǒtó; ɖó xlonɔ ɖo nǔ ko wɛ ɔ́, é nɔ́ cí lě e nǔywɛ́ nɔ́ ɖo adomɛ bo nɔ ɖo wǔwú wɛ bó má ká nɔ́ sixú bí nǔ ǎ é ɖɔhun; un mɔ ɖɔ énɛ́ lɔ ɔ́, nǔ yǎyá ɖokpó wɛ. Nǔnywɛ́tɔ́ e nɔ kpa acɛ gannaganna nú mɛ ɔ́ hɛn ɔ́, é ná wa nǔ xlonɔ ɖɔhun; akpaɖuɖu nɔ́ zɔ́n bɔ é nɔ́ húzú ahizinɔ. Hwenu e è fó nǔɖé dó ɔ́, é nyɔ́ hú hwenu e è bɛ̌ é. È xwesɔ ɔ́, é nyɔ́ hú è blǒ glagla. È ma nɔ yá wǔ sin xomɛ ó, ɖó mɛ e ma nɔ lin tamɛ ganjí ǎ lɛ́ɛ wɛ má nɔ́ lín sin xomɛ ǎ. Ma nɔ kanbyɔ́ ɖɔ: “Étɛ́wú gbɛ ɖ'ayǐ tɔn ká nyɔ́ hú gbɛ din tɔn” ó, ɖó mɛ e nyɔ̌ nǔ i ɔ́ nɔ́ kan nǔ mɔ̌hun byɔ́ ǎ. Nǔnywɛ́ ɔ́, nǔ xɔ akwɛ́ gǔ ɖɔhun wɛ, bɔ mɛ e ɖo gbɛ lɛ́ɛ ná ɖu gbɛ tɔn. Nǔnywɛ́ nɔ́ nya xɛ ɖo mɛ jí lě e akwɛ́ nɔ́ nya xɛ ɖo mɛ jí é ɖɔhun, lo ɔ́, nǔ e nǔnywɛ́ ɔ́ ɖó hú akwɛ́ é wɛ nyí mɛ e ɖó nǔnywɛ́ ɔ́ nɔ́ nɔ gbɛ. Mi kpɔ́n nǔ e Mawu nɔ bló lɛ́ɛ: nǔ e Mawu xá ɔ́, mɛ̌ wɛ sixú jlɔ́? Nǔ nyɔ́ nú we hǔn, j'awǎ; nǔ ká gblé dó we hǔn, lin tamɛ. Mawu wɛ nɔ́ bló bɔ nǔ nɔ nyɔ́ nú mɛ abǐ nǔ nɔ gblé dó mɛ: é nɔ́ bló mɔ̌ bónú gbɛtɔ́ ní má tunwun nǔ e ɖo nǎ wá jɛ wɛ sɔ é ó. Gbɛ kpɛ e un nɔ ɖo ayǐkúngban jí fí ɔ́, un mɔ nǔ bǐ: un mɔ nǔjlɔ́jlɔ́watɔ́ bɔ é kú, ɖó nǔ jlɔ́jlɔ́ e é nɔ́ wa ɔ́ wú; un mɔ nǔnyanyawatɔ́ bɔ é ɖo gbɛ, ɖó nǔ nyanya e é nɔ́ wa ɔ́ wú. Hǔn, bo ma wa nǔ jlɔ́jlɔ́ zɛ jlɛ̌ wú ó; ma ka nyɔ́ nǔ i zɛ xwé wú ó. Étɛ́wú a na wa mɔ̌ bó hɛn gbɛ hwiɖée tɔn gblé? Mɔ̌ ɖokpó ɔ́, ma xo dǎka zɛ jlɛ̌ wú ó, ma wa xlonɔ nú ó. É má nyí mɔ̌ ǎ ɔ́, étɛ́wú a nǎ wa mɔ̌ bó wɛ́n kú. Xwedó xó nukɔntɔn énɛ́ ɔ́, ma ka wɔn wegɔ́ ɔ́ lɔ ó; nǔgbó wɛ, mɛ e nɔ ɖó sísí nú Mawu lɛ́ɛ ná sɔ́ xó we énɛ́ lɛ́ɛ dó wa azɔ̌ ná. Nǔnywɛ́ nɔ́ ná hlɔ̌nhlɔ́n nǔnywɛ́tɔ́ bɔ acɛ tɔn nɔ syɛ́n hú acɛ e gǎn wǒ nɔ kpa dó toxo ɖokpó nu é. Gbɛtɔ́ hwɛjijɔnɔ e nɔ wa ɖagbe bó ma nɔ hu hwɛ ǎ é ɖokpó géé tíin ɖo ayǐkúngban jí fí ǎ. Ma nɔ ɖótó xó e è nɔ ɖɔ lɛ́ɛ bǐ ó; é má nyí mɔ̌ ǎ ɔ́, a nǎ yi se ɖɔ mɛsɛntɔ́ towe ɖɔ xó nyanya dó wǔ we. Đó hwi ɖésúnɔ tunwun dó ayi towe mɛ ɖɔ émí lɔ ko ɖɔ xó nyanya dó mɛ ɖěvo wú azɔn mɔ̌kpán. Un zé nǔnywɛ́ dó ba do nú nǔ énɛ́ lɛ́ɛ bǐ. Un nɔ ɖɔ: “Un ná ɖó nǔnywɛ́.” Un ka kpé wú ǎ. Nukúnnú mɔ jɛ nǔ e ɖo gbɛ ɔ́ mɛ lɛ́ɛ wú bǐ wɛ lín dó mɛ, bǐ wɛ gɔ́ngɔ́n, é gɔ́ngɔ́n ɖésú. Mɛ̌ ká sixú mɔ nukúnnú jɛ wú? Énɛ́ ɔ́, un zin alɔ dó akɔ́n bó jɛ nǔ kplɔ́n jí, bó jɛ do ba nú nǔ jí. Un jló ná tunwun nǔ e nyí nǔnywɛ́ ɔ́ é, un jló ná tunwun nǔ e wú nǔ lɛ́ɛ nɔ́ jɛ gbɔn mɔ̌ é. Un lɛ́ jló ná tunwun nǔ e nyí dǎkaxixo é, nǔ e nyí xlojijɔ é, nǔ e nyí taɖuhunhun é kpó nǔ e nyí tamɛmasɔgbe é kpó. Un ka wá mɔ nǔɖé: un mɔ ɖɔ nyɔ̌nu e ayixa tɔn nyí gɛ̌ bó nyí fɛ́ca, bɔ awa tɔn lɛ́ɛ nyí gɛdɛ é. A jɛ nyɔ̌nu mɔ̌hun sín alɔ mɛ ɔ́, é ná vlɛ́ nu nú we hú kú. Mɛ e nyɔ́ Mawu nukún mɛ ɔ́ nɔ́ gló e; mɛ e ka nyí hwɛhutɔ́ ɔ́ nɔ́ jɛ fɛn tɔn mɛ. Nyɛ nǔnywɛ́tɔ́ ɔ́, un ba do nú nǔ lɛ́ɛ ɖokpó ɖokpó, bó ná mɔ do nú nǔ e wú nǔ lɛ́ɛ nɔ́ jɛ gbɔn mɔ̌ é. È nǎ ɖɔ lɔ ɔ́, un kpo ɖo nǔ do ba wɛ, un ka ko mɔ ǎ. Amɔ̌, ɖo gbɛtɔ́ afatɔ́n (1.000) mɛ ɔ́, un mɔ súnnu e nyí gbɛtɔ́ jɔ gbɛtɔ́ é ɖokpó. Un kpɔ́n nyɔ̌nu lɛ́ɛ bǐ mɛ, un ka mɔ nyɔ̌nu e nyí gbɛtɔ́ jɔ gbɛtɔ́ é ɖokpó vɔ́vɔ́ ǎ. Nǔ e un mɔ kpowun ɔ́ wɛ nyí ɖɔ Mawu bló ayi ɖagbe dó xomɛ nú gbɛtɔ́, lo ɔ́ gbɛtɔ́ hɛn nǔ bǐ hízí. Mɛ̌ ká nyí nǔnywɛ́tɔ́, bɔ nǔɖé jɛ ɔ́, é nɔ́ tunwun nǔ e ɖɔ wɛ nǔ ɔ́ ɖe ɔ́ bó nɔ́ tínmɛ? Mɛ ɖé ɖó nǔnywɛ́ ɔ́, é sɔ́ nɔ́ dɔn nukún mɛ nyɔ ǎ; nukún mɛ tɔn nɔ́ vlɔ́n. Axɔ́sú ɖɔ xó ɔ́, mǐ ɖǒ ná se tónú n'i, lě e mǐ dó akpá tɔn gbɔn ɖo Mawu nukɔn é. Mǐ ní má nɔ́ yá wǔ hɔn acɛ tɔn nyi gbě ó. Mǐ ní má nɔ ɖo nǔ e má nɔ́ nyɔ́ nukún tɔn mɛ ǎ lɛ́ɛ wa wɛ ó; ɖó axɔ́sú ɔ́, nǔ e jló ɔ́ wɛ é nɔ́ bló. Nǔgbó ɔ́, xó e axɔ́sú ɖɔ ɔ́ wɛ ɖó acɛ hú xó bǐ; mɛ ɖé sixú kanbyɔ́ axɔ́sú ɖɔ étɛ́wú é ka wa nǔ lě é jí ǎ. Mɛ e nɔ se tónú nú axɔ́sú ɔ́, nǔ nyanya ɖé nɔ́ wa ɛ ǎ. Nǔnywɛ́tɔ́ tunwun dó ayi tɔn mɛ ɖɔ nǔ ɖokpó ɖokpó ɖó hwe tɔn nú, bó lɛ́ tunwun lě e é ná bló gbɔn bɔ é ná nyɔ́ é. Nǔgbó ɔ́, nǔ bǐ wɛ ɖó hwenu; bɔ lě e è nǎ bló gbɔn bɔ é ná nyɔ́ ɔ́ ɖe. Amɔ̌, awě ɖaxó ɖokpó ɖo te kpɔ́n gbɛtɔ́. É wɛ nyí ɖɔ: mɛɖé tunwun nǔ e ɖo nǎ wá jɛ wɛ é ǎ. Mɛ ɖé ká sixú ɖɔ lě e nǔ lɛ́ɛ ná wá jɛ gbɔn é ǎ Mɛ ɖé kpa acɛ nú funfún e ɖo xo tɔn mɛ é ǎ, mɛɖé sixú hɛn funfún ɖó te ǎ. Mɛ ɖé ɖó acɛ dó kúzán tɔn jí ǎ. Kú ɔ́, ahwan ɖé wɛ, mɛɖé sixú gán ɖ'é mɛ ǎ; dǎkaxixo ná hwlɛ́n mɛ e nɔ xo dǎka ɔ́ gán ɖo ahwan énɛ́ ɔ́ mɛ ǎ. Nǔ énɛ́ lɛ́ɛ ɔ́, un mɔ bǐ. Un lin tamɛ dó nǔ e wa wɛ è ɖe ɖo hwe glɔ́ fí lɛ́ɛ bǐ wú. Un mɔ ɖɔ gbɛtɔ́ ɖě nɔ́ kpa acɛ gannaganna nú nɔzo tɔn, bó nɔ́ wa nǔ dó wǔ tɔn. Un mɔ è ɖo mɛdídá lɛ́ɛ sín cyɔnú wa wɛ: mɛ e wá cyɔnu lɛ́ɛ ɖo Mawu xwé ɔ́ gbe byɔ́ wɛ bó ɖo tíntɔ́n wɛ. Yě ko wɔn nǔ e mɛ énɛ́ lɛ́ɛ dó sin lɛ́ɛ ɖo toxo ɔ́ mɛ. Un mɔ ɖɔ énɛ́ lɔ ɔ́, nǔ yǎyá wɛ. Mɛ e wa nǔ nyanya ɔ́, è nɔ dɔn tó tɔn n'i ɖo tɛn tɔn mɛ ǎ. Énɛ́ ɔ́ wɛ zɔ́n bɔ gbɛtɔ́ lɛ́ɛ nɔ́ ɖo nǔ nyanya wa wɛ sɔ mɔ̌. É ká ɖo mɔ̌ có, nú hwɛhutɔ́ ná bó ɖo dǎka xo wɛ magbokɔ bó ká nɔ́ lɛ́ dɔ́ ji ɔ́, nyɛ ɔ́, un tunwun ɖɔ mɛ e nɔ ɖó sísí nú Mawu lɛ́ɛ wɛ nǔ na nyɔ́ ná, ɖó sísí e yě nɔ́ ɖó nú Mawu ɔ́ wú. Amɔ̌, nǔ ɖó ná nyɔ́ nú mɛdídá ǎ; yɛ ɖɔhun wɛ é ná dín wá yi. É ná wɛ́n kú, é ná dɔ́ ji ǎ, ɖó é ɖó sísí ɖěbǔ nú Mawu ǎ. Nǔ walá ɖokpó ɖíe, bó nɔ́ jɛ ɖo ayǐkúngban jí fí: nǔjlɔ́jlɔ́watɔ́ ɖé lɛ́ɛ tíin, bɔ nǔ e ɖó ná gbo mɛdídá lɛ́ɛ wɛ nɔ́ gbo yě. Mɛdídá ɖé lɛ́ɛ ká tíin bɔ lě e nǔ ná nɔ́ gbɔn nú nǔjlɔ́jlɔ́watɔ́ ɔ́, mɔ̌ wɛ é nɔ́ nɔ gbɔn nú yě. Un mɔ ɖɔ énɛ́ lɔ ɔ́, nǔ yǎyá wɛ. Énɛ́ ɔ́ wú wɛ nyɛ mɔ ɖɔ é nyɔ́ ɖɔ mɛ bǐ ní j'awǎ, ɖó nǔ ɖagbe ɖěbǔ ɖe nú gbɛtɔ́ ɖo hwe glɔ́ fí zɛ é ná ɖu nǔ, bó nu ahan, bó ɖu gbɛ wú ǎ. Awǎjijɛ e gbɛtɔ́ ná mɔ ɖo nǔ énɛ́ lɛ́ɛ mɛ é wɛ nyí nǔ e ná dó vǐví n'i ɖo gbɛzán e Mawu ná ɛ ɖo ayǐkúngban jí fí ɔ́ mɛ é; awǎjijɛ e é ná mɔ ɔ́ wɛ nyí nǔ e ná dó vǐví n'i ɖo tagba e jɛ wɛ é nɔ́ ɖe ɖo hwe glɔ́ fí é mɛ é. Gbɛtɔ́ nɔ́ dɔ́ amlɔ zǎn mɛ ǎ, é ká nɔ́ lɛ́ dɔ́ kéze ǎ. Un tɛ́nkpɔ́n bó ná tunwun nǔ e nǔnywɛ́ nyí é, un tɛ́nkpɔ́n bó ná mɔ nukúnnú jɛ tagba e gbɛtɔ́ nɔ́ jɛ ɖo ayǐkúngban jí fí ɔ́ wú, lobo mɔ azɔ̌ e Mawu wa é bǐ. Din ɔ́, gbɛtɔ́ sixú mɔ nukúnnú jɛ nǔ e ɖo jijɛ wɛ ɖo hwe glɔ́ fí ɔ́ wú nǔgbó ǎ; nǔ e gbɛtɔ́ ɖo tagba jɛ wɛ bó ɖo biba wɛ ɔ́, é ná mɔ ǎ. Nǔnywɛ́tɔ́ ná bó ɖɔ émí tunwun ɔ́, é sixú mɔ do ná ǎ. Énɛ́ ɔ́, un lin tamɛ dó nǔ énɛ́ lɛ́ɛ bǐ jí; nǔ e un ka wá mɔ ɔ́ ɖíe: nǔjlɔ́jlɔ́watɔ́ lɛ́ɛ kpó nǔnywɛ́tɔ́ lɛ́ɛ kpó, kpódó azɔ̌ e yě nɔ́ wa lɛ́ɛ kpó bǐ wɛ ɖo Mawu lɔ mɛ. Wǎn tó ná yí gbɛtɔ́ kpó wǎn ná gbɛ́ ɛ kpó ɔ́, gbɛtɔ́ sixú tunwun ɖ'ayǐ ǎ. Gbɛtɔ́ tunwun nǔ e ná jɛ dó jǐ tɔn é ɖě ǎ. Nǔ ɖokpó ɔ́ wɛ nɔ́ jɛ dó mɛ bǐ jí; nǔ e jɛ dó nǔjlɔ́jlɔ́watɔ́ jí ɔ́ wɛ nɔ́ jɛ dó mɛdídá jí; nǔ e nɔ́ jɛ dó mɛ ɖagbe kpó mɛ mímɛ́ kpó jí ɔ́ wɛ nɔ́ jɛ dó mɛ blíblí jí. Nǔ e nɔ́ jɛ dó mɛ e nɔ sá vɔ̌ é jí ɔ́ wɛ nɔ́ jɛ dó mɛ e ma nɔ sá vɔ̌ ǎ é jí; nǔ e nɔ́ jɛ dó mɛ e nɔ wa nǔ ɖó sɛ́nxwi jí ɔ́ jí ɔ́ wɛ nɔ́ jɛ dó hwɛhutɔ́ jí; nǔ e nɔ́ jɛ dó mɛ e nɔ dó akpá ɔ́ jí ɔ́ wɛ nɔ́ jɛ dó mɛ e ma nɔ glá dó akpádídó wú ǎ e jí. Nǔ e nylá hú nǔ bǐ ɖo hwe glɔ́ fí lɛ́ɛ ɔ́ ɖokpó nɛ́ nyí nǔ ɖokpó ɔ́ e nɔ́ jɛ dó gbɛtɔ́ lɛ́ɛ bǐ jí é nɛ́. Énɛ́ wɛ zɔ́n bɔ dǎkaxixo kpó nǔ agɔ agɔ wiwa kpó nɔ́ gɔ́ gbɛtɔ́ sín ayi mɛ hwebǐnu. Énɛ́ ɔ́ gúdo ɔ́, gbɛtɔ́ nɔ́ yi maɖɔnǔxwɛ. Amɔ̌, mɛ e ɖo gbɛ lɛ́ɛ ɔ́, yě hɛn ɔ́, yě ná ɖó nukún nǔ. Nǔ nyɔ́ nú cukú gbɛɖe hú kinnikínní kúkú ǎ cé? Nǔgbó ɔ́, mɛ e ɖo gbɛ lɛ́ɛ má tunwun ɖɔ émí ná kú vɔ́vɔ́ a? Lo ɔ́, mɛ e ko kú lɛ́ɛ sɔ́ tunwun nǔɖé ǎ. Nǔ ɖó nukún ɖěbǔ sɔ́ ɖe nú yě ǎ, ɖó è ko wɔn yě. Mɛ e ko kú lɛ́ɛ sɔ́ ɖo wǎn yí nú mɛ ɖě wɛ ǎ, yě sɔ́ ɖo wǎn gbɛ́ nú mɛ ɖě wɛ ǎ, nǔɖé ká sɔ́ ɖo yě jlǒ wɛ ǎ. Yě sɔ́ ɖó nu ɖo nǔ e nɔ jɛ ɖo hwe glɔ́ fí ɔ́ ɖě mɛ gbeɖé ǎ. Hǔn, bo ɖu nǔ kpó awǎjijɛ kpó, nu vɛ̌ɛn towe kpó xomɛhunhun kpó. Đó nǔ e wa wɛ a ɖe ɔ́ kó nyɔ́ Mawu nukún mɛ. Nɔ dó awu wěwé hwebǐnu; mi ma ka gɔn nǔsáwǔ wǎnɖagbenɔ sá dó ta gbeɖé ó. Đu gbɛ xá nyɔ̌nu e a yí wǎn ná é ɖo hwenu kpɛ e Mawu ná we bɔ a nǎ bló ɖo ayǐkúngban jí fí ɔ́ mɛ. Đó nǔ e nyí towe ɖo tagba e jɛ wɛ a ɖe ɖo hwe glɔ́ fí ɔ́ mɛ ɔ́ nɛ́. Alɔ towe jɛ nǔ ɖěbǔ wú hǔn, zě hlɔ̌nhlɔ́n towe bǐ dó bló, ɖó kútomɛ fí e a xwe ɔ́, nǔɖé ɖo dɔ̌n bɔ è nɔ wa ǎ; tamɛlinlin ɖě ɖo dɔ̌n ǎ, nǔtunwuntunwun ɖě ɖo dɔ̌n ǎ, nǔnywɛ́ ɖě ɖo dɔ̌n ǎ. Un lɛ́ mɔ nǔ ɖěvo ɖěvo ɖo hwe glɔ́ fí. È yi agbahwlɛ́nhwlɛ́n tɛnmɛ ɔ́, wezunkántɔ́ e yá afɔ hú mɛ bǐ é jɛ́n nɔ́ ɖu ɖ'é jí tɛgbɛ ǎ. Mɔ̌ ɖokpó ɔ́, mɛ e dó hlɔ̌nhlɔ́n hú mɛ bǐ é jɛ́n nɔ́ ɖu ɖo ahwan jí tɛgbɛ ǎ. Mɛ e nyí nǔnywɛ́tɔ́ é jɛ́n nɔ́ ɖu nǔ gɔ́ xo tɛgbɛ ǎ. Mɛ e bí é jɛ́n nɔ́ jɛ dɔkun tɛgbɛ ǎ. Mɛ e tunwun nǔ hú mɛ bǐ é kɛ́ɖɛ́ jɛ́n ɖagbe nɔ hun hɔn ná tɛgbɛ ǎ. Đó hwe ɖé lɛ́ɛ nú ɔ́, é nɔ́ nyí ta ɖagbe nú mɛ ɖě, hwe ɖé lɛ́ɛ nú ka nɔ́ nyí ta kúkú nú mɛ ɖě. Nǔgbó ɔ́, gbɛtɔ́ tunwun nǔ e ɖo te kpɔ́n ɛ é ǎ. Gbɛtɔ́ cí hweví e má mɔ ɖɔ ǎ bó yí byɔ́ mɛ é ɖɔhun; é cí xɛ e nɔ ɖo yiyi wɛ bó nɔ́ yi jɛ mɔ mɛ é ɖɔhun. Ayǐ wɛ gbɛtɔ́ nɔ́ ɖe kpowun bɔ awě nɔ́ wá fyán ɛ. Un lɛ́ mɔ nǔ ɖěvo dó azɔ̌ e wa wɛ nǔnywɛ́ ɖe ɖo hwe glɔ́ fí ɔ́ wú, bó mɔ ɖɔ nǔnywɛ́ ɔ́, nǔ tají wɛ. Nǔ e un mɔ ɔ́ ɖíe: Toxo kpɛví ɖé tíin bɔ mɛ e ɖ'é mɛ lɛ́ɛ sukpɔ́ ǎ. Axɔ́sú hlɔ̌nhlɔ́nnɔ ɖokpó ká wá tɔ́n ahwan toxo ɔ́; é xá toxo ɔ́, bó kun agbǒdo lɛ́ lɛ̌ dó toxo ɔ́ bǐ. Nya wamamɔnɔ ɖé ká ɖo toxo ɔ́ mɛ bó nyɔ́ nǔ i. Nya énɛ́ ɔ́ hɛn ɔ́, é ná zán nǔnywɛ́ tɔn dó hwlɛ́n toxo ɔ́ gán; lo ɔ́, mɛ ɖěbǔ flín i lɔ, bó ná yi kan nǔɖé byɔ́ ɛ ǎ. Mɛ bǐ gbɛ́ wǎn nú wamamɔnɔ énɛ́ e ɖó nǔnywɛ́ é, bó nɔ́ ɖótó xó tɔn ǎ, có nyɛ ɔ́, un mɔ ɖɔ nǔnywɛ́ nyɔ́ hú hlɔ̌nhlɔ́n. È ɖǒtó xó e ɖɔ wɛ nǔnywɛ́tɔ́ ɖe kpó gbe fífá kpó ɔ́, é nyɔ́ hú è ɖǒtó xó e ɖɔ wɛ gǎnhúnǔtɔ́ ɖe kpó adǎn kpó ɖo xlonɔ lɛ́ɛ tɛ́ntin é. Nǔnywɛ́ nyɔ́ hú ahwanfunnú lɛ́ɛ; lo ɔ́, mɛ e ma nɔ lin tamɛ cóbó nɔ́ wa nǔ ǎ ɖokpó géé nɔ́ hɛn nǔ ɖagbe e nǔnywɛ́ nɔ́ ná mɛ ɔ́ gěgé gblé. Nú sukpɔ kúkú ɖo célu mɛ ɔ́, é nɔ́ hɛn célu ɔ́ gblé, bɔ é nɔ́ hwɛ́n nǔ kúkú. Mɔ̌ ɖokpó ɔ́, nǔgblégbléwiwa kpɛví ɖé nɔ́ hɛn nǔnywɛ́ kpó susu kpó gblé. Nǔnywɛ́tɔ́ sín ayixa nɔ zɔ́n bɔ é nɔ́ wa nǔ ɖagbe; xlonɔ tɔn ka nɔ zɔ́n bɔ é nɔ́ wa nǔ nyanya. Ényí xlonɔ ɖé ɖo yiyi wɛ ɖo ali jí ɔ́, nǔ ma sɔgbe e wa wɛ é nɔ́ ɖe ɔ́ nɔ́ zɔ́n bɔ mɛ bǐ nɔ́ tunwun ɖɔ xlonɔ wɛ. Ényí gǎn towe sin xomɛ dó we hǔn, ma jó azɔ̌ towe dó ó; ɖó è nɔ xwíí ɔ́, è nɔ gbɛ́ tagba alɔkpa bǐ. Gǎn hɛn ɔ́, é ná wa nǔ nyi do, ɖó un mɔ nǔ agɔ agɔ gěgé ɖo hwe glɔ́. Nǔ agɔ ɖé lɛ́ɛ ɖíe: Gǎn ɖě lɛ́ɛ nɔ zé xlonɔ ɖó tɛn ɖaxó mɛ hwe ɖé lɛ́ɛ nu, bó ká nɔ́ zé mɛjɔmɛ ɖó tɛn kpɛví mɛ. Un mɔ kannumɔ ɖo sɔ́ jí, bɔ gǎn ká ɖo afɔ zɔn wɛ kannumɔ ɖɔhun. Mɛ e kun do ɔ́ sixú wá jɛ mɛ; mɛ e ka ɖo dǒ só wɛ ɔ́, dan sixú wá ɖu i. Mɛ e ɖo awǐnnya gba wɛ ɔ́, awǐnnya sixú wá gblé wǔ i; mɛ e ɖo nakí zɛ wɛ ɔ́, awǒvinú sixú wá jɛ dó jǐ tɔn. Ényí asyɔ́ví ɖé kpo nu bónú è ma gan ǎ ɔ́, è nɔ zǎn hlɔ̌nhlɔ́n dín. È sɔ́ nǔnywɛ́ dó wa nǔ ɔ́, è nɔ mɔ nu tɔn. Ényí mɛ e nɔ sa gbe dó dan bó nɔ́ wlí ɔ́, má sa gbe dó dan ɔ́ ǎ bónú é ɖu i ɔ́, ani é ká nyɔ́ gbe sa dó dan dó wa lo? Nǔnywɛ́tɔ́ ɖo xó ɖɔ wɛ ɔ́, xó tɔn nɔ́ zɔ́n bɔ è nɔ ɖó sísí n'i. Xlonɔ ka yí xó ɔ́, é nɔ́ ɖɔ xó bó nɔ́ kɔ́n wi éɖée tɔn. Xlonɔ kɛ nu ɔ́, xó majɛtó majɛtó ɖé wɛ é nɔ́ bɛ́; é nɔ́ ɖo xó gblégblé, xó má nyɔ́ se ɖɔ wɛ káká yí fó. Xlonɔ ɔ́, xó ɖɔ wɛ é nɔ́ ɖe magbokɔ. Nǔ ka ɖo mɔ̌ có gbɛtɔ́ tunwun nǔ e ɖo nǎ jɛ wɛ sɔ ɔ́ ǎ. Énɛ́ ɔ́ wú ɔ́, mɛ̌ wɛ sixú tunwun nǔ e ná jɛ ɖo kú tɔn gúdo ɔ́, bó ná ɖɔ n'i? Azɔ̌ e xlonɔ nɔ wa é nɔ́ cikɔ n'i káká, bɔ é sɔ́ nɔ́ tunwun ali e é ná gbɔn yi toxo mɛ ɔ́ ǎ. Ényí to ɖé tíin bɔ axɔ́sú e ɖo to ɔ́ nu ɔ́ nyí yɔkpɔ́vú, bɔ adɔ jɛ nukɔn nú azaglɔ́gán tɔn lɛ́ɛ hǔn, to énɛ́ ɔ́ sín nǔ blá wǔ. Nǔ ka nyɔ́ nú to e axɔ́sú tɔn jɔ ɖo axɔ́ví kún mɛ bɔ azaglɔ́gán tɔn lɛ́ɛ nɔ́ ɖu nǔ hwenu e é jɛ xá ɖɔ è nǐ ɖu nǔ, bó ná dó mɔ hlɔ̌nhlɔ́n é; é nyí yě ná nɔ ɖo ahan mú wɛ ǎ. Mɛ e ɖi fɔnlín dín ɔ́, xɔ tɔn nɔ wán zɔn mɛ. Mɛ e nɔ dó vɛ̌ nú nǔ ɔ́, xɔ tɔn nɔ kun sin. Dɔkunnɔ nɔ ɖu nǔ bó nɔ́ dó ɖe ayi ɖ'ayǐ; é nɔ́ nu vɛ̌ɛn dó j'awǎ; akwɛ́ tɔn nɔ́ zɔ́n bɔ é nɔ́ ɖó nǔ bǐ. Ma ɖɔ xó nyanya dó axɔ́sú wú ó; ma lin vɔ́vɔ́ lɔ ó. Ma ɖɔ xó nyanya dó mɛjɔmɛ wú ó; hwi ɖokpónɔ ná bó ɖo xɔnɔnɔ towe mɛ hǔn, ma ɖɔ xó nyanya dó wǔ tɔn ó, ɖó xɛ sixú zé xó towe yi ɖɔ; nǔ e ɖó awa e sixú zé xó towe yi ɖɔ. È ma sɔ́ nǔ nyi gbě ǎ ɔ́, è nɔ mɔ nǔ sɔ́ ǎ. Zě akwɛ́ towe dó ajɔ̌ tɛnmɛ tɛnmɛ mɛ, ɖó a tunwun nǔ nyanya e ná wá jɛ ɖo gbɛ ɔ́ mɛ sɔ ɔ́ ǎ. Ényí jǐ wu ganjí ɔ́, é nɔ́ ja. Atín ɖé mu jɛ tofɔligbé abǐ totaligbé ɔ́, fí e é mu jɛ ɔ́ jɛ́n é nɔ́ cí. Nú a kpɔ́n dó jɔhɔn wú dín ɔ́, a nǎ dó jinukún ǎ; nú a kpɔ́n dó jǐ wú dín ɔ́, a nǎ ya jinukún ǎ. A tunwun lě e kɛ́n jɛ nyɔ̌nu wú ɔ́, é nɔ́ su gbɔn ɔ́ a? A tunwun fí e funfún e nɔ ná gbɛ mɛ ɔ́ gosín ɔ́ a? A tunwun ɖěbǔ ǎ. Mɔ̌ ɖokpó ɔ́, a sixú tunwun lě e Mawu nɔ wa azɔ̌ tɔn gbɔn é ǎ. Mawu wɛ bló nǔ bǐ. Énɛ́ ɔ́ wú ɔ́, jɛ nǔ dǒ jí sín zǎnzǎn káká yi gbada; ma gɔn azɔ̌ wa ó, ɖó a tunwun azɔ̌ e ɖo nǎ nyɔ́ wɛ é ǎ; ɖě má nyɔ́ ǎ ɔ́, ɖě ná nyɔ́. We lɛ́ɛ bǐ sixú nyɔ́. Wěziza ɔ́, nǔ ɖagbe wɛ. Nukún mɔ hwe ɔ́, nǔ ɖagbe wɛ. Gbɛtɔ́ ɖó ná j'awǎ ɖo gbɛzán tɔn bǐ mɛ; é ná bó dɔ́ ji káká ɔ́, é ɖó ná j'awǎ. É ní ká flín ɖɔ azǎn gěgé ná tíin bɔ zǎn ná kú dó émí kéze. Nǔ e ná wá jɛ lɛ́ɛ bǐ wɛ nyí nǔ yǎyá. Mɛ wínnyáwínnyá, din e a kpo ɖo wǐnnyáwínnyá mɛ ɔ́, j'awǎ. Awǎjijɛ ní gɔ́ ayi towe mɛ hwenu e a kpo ɖo wǐnnyáwínnyá mɛ é. Ayi towe mɔ nǔɖé hǔn blǒ; nǔɖé nyɔ́ nukún towe mɛ hǔn, wa. Lo ɔ́, tunwun ganjí ɖɔ Mawu ná wá ɖɔ hwɛ xá we ɖó nǔ e a wa lɛ́ɛ ɖokpó ɖokpó wú. Hɔn nú nǔ e ná zɔ́n bɔ a nǎ jɛ aluwɛ mɛ lɛ́ɛ, bó hɔn nú nǔ e ná zɔ́n bɔ a nǎ jɛ azɔn lɛ́ɛ é, ɖó wǐnnyáwínnyá mɛ sín hwenu nɔ wá yi azizɔ ɖɔhun. Mɛwínnyáwínnyá, flín mɛ e ɖó we ɔ́ ɖo hwenu e a kpo ɖo wǐnnyáwínnyá mɛ é; flín i cóbónú azǎn nyanya lɛ́ɛ ná wá; flín i cóbónú xwe e mɛ a nǎ wa ɖɔ émí kún sɔ́ mɔ gbɛ ɔ́ sín vǐví ɖé ó ɔ́ ná wá. Flín i cóbónú hwe kpó wěziza kpó, sun kpódó sunví lɛ́ɛ kpó ná yi xɔ, bɔ zǐnflú ná dó. Flín i cóbónú jǐ ná kɛn bó ná lɛ́ vɔ́ wu. Hwenɛ́nu wɛ zǎncɔ́tɔ́ towe lɛ́ɛ nɔ́ ɖo sísɔ́sísɔ́ wɛ; súnnu glegbenu towe lɛ́ɛ nɔ́ ɖo tɔ́tɔ́; nyɔ̌nu towe e ɖo nǔ li wɛ lɛ́ɛ nɔ́ ɖó nǔ lili te, ɖó yě sɔ́ sukpɔ́ ǎ; zǐnflú nɔ́ dó dó mɛ e ɖo nǔ kpɔ́n wɛ gbɔn flɛtɛ́li nu lɛ́ɛ. Hwenɛ́nu wɛ hɔn towe vǐwenɔ lɛ́ɛ ná sú, bɔ zǐngídi bǐ ná xwɛ; a sɔ́ ná se xɛ ɖě ɖo han ji wɛ ǎ; han bǐ ná yi xɔ. Kpófínfán ná dó xɛsi nú we; ado ná hu we ɖo ali xo; ɖa towe ná wé, amaditín gba sɛ́ ɖɔhun; agbaza towe ná kpɛn, nǔ cikɔ nú bɔkle ɖɔhun; nǔɖuɖu sɔ́ ná jló we ǎ; ɖó nɔtɛn towe mavɔ mavɔ ɔ́ yi wɛ a ɖe. Avǐyatɔ́ lɛ́ɛ ko ɖo ali jí. Mɛwínnyáwínnyá, flín mɛ e ɖó we ɔ́ cóbónú kan e è sɔ́ kpatágan dó bló ɔ́ ná tún; flín i cóbónú zɛ̌n e è sɔ́ siká dó bló ɔ́ ná gba, flín i cóbónú tɔká ɔ́ ná wɛ́n jɛ tɔ; flín i cóbónú kpulúlúí ɔ́ ná wɛ́n jɛ tɔ. Flín i cóbónú agbaza towe ná húzú kɔ́gúdu, bó ná lɛ́ kɔ yi kɔ́gúdu mɛ fí e é gosín é, bɔ funfún ná tɔ́n sín agbaza towe mɛ bó ná lɛ́ kɔ yi Mawu e nɔ ná funfún ɔ́ gɔ́n. Nyɛ nǔnywɛ́tɔ́ ɔ́, un mɔ ɖɔ nǔ bǐ wɛ nyí nǔ yǎyá, nǔ bǐ wɛ nyí walá. Nyɛ nǔnywɛ́tɔ́ ɔ́, ényí nǔnywɛ́ kɛ́ɖɛ́ wɛ un ɖó ǎ; gɔ́ nú nǔnywɛ́ ɔ́, un lɛ́ kplɔ́n nǔ togun ɔ́. Un gbéjé nǔ gěgé kpɔ́n, un ba do nú nǔ, lobo to lǒ wɔ̌buwɔ́bú ɖé lɛ́ɛ. Un tɛ́nkpɔ́n bó mɔ xó ɖagbe lɛ́ɛ bó wlán bɔ yě sɔgbe. Xó nǔgbó kɛ́ɖɛ́ wɛ. Nǔnywɛ́tɔ́ sín xó lɛ́ɛ cí kpo nu xwíɖíxwíɖí e è nɔ sɔ́ kanlin lɛ́ɛ bɔ zɔnlin yětɔn nɔ́ yá ɔ́ ɖɔhun. È dɔn nǔnywɛ́ yětɔn lɛ́ɛ kplé ɔ́, yě cí hǔnjɛ́n e è xwe ganjí ɔ́ ɖɔhun. Nǔnywɛ́ énɛ́ lɛ́ɛ bǐ ɔ́, Mawu wɛ nɔ ná. Mawu ɖokpó wɛ nyí lɛ̌ngbɔ́nyitɔ́ nǔgbó ɖokpó e ɖe é. Vǐ ce, ma lɔn bo gɔ́ nǔɖé nú xó énɛ́ lɛ́ɛ ó. Gbɛtɔ́ lɛ́ɛ fɔ́n bó kpo ɖo wěma wlán wɛ magbokɔ. Amɔ̌, è fɔ́n bó ɖo wěma kplɔ́n wɛ magbokɔ ɔ́, é nɔ́ cikɔ. Xó e ká sú ta nú xó énɛ́ lɛ́ɛ bǐ é ɖíe: Đǒ sísí nú Mawu bó bló nǔ e é zɔ́n lɛ́ɛ; nǔ e ɖo ta jí bɔ gbɛtɔ́ bǐ ɖó ná wa é nɛ́. Đó Mawu ná ɖɔ hwɛ dó nǔ e è wa lɛ́ɛ bǐ, káká jɛ éé è wa dó nǔglɔ́ lɛ́ɛ jí; é sixú nyí nǔ ɖagbe, é ká sixú nyí nǔ nyanya. Han e víví hú han lɛ́ɛ bǐ é. Salomɔ́ɔ sín han wɛ. Wǎ kí si nú mì, kí si nú mì bó! Wǎn e a yǐ nú mì ɔ́ nɔ́ mú mì hú vɛ̌ɛn. Wǎn towe nyɔ́ se tawun! Nyǐkɔ towe nyí ami wǎnɖagbenɔ ɖé bó gba kpé fí bǐ. Énɛ́ wú wɛ ɖyɔ̌vǐ lɛ́ɛ yí wǎn nú we. Hɛn alɔ ce bónú mǐ ná kán wezun. Sɛ́mɛɖó ce, kplá mì byɔ́ xɔ towe mɛ. Nǔ ná nyɔ́ nú mǐ, mǐ ná ɖu gbɛ, hwi wɛ ka ná nyí mɔ̌. Mǐ ná kpa susu nú wǎn yíyí towe, é nɔ́ mú mɛ hú vɛ̌ɛn. Đyɔ̌vǐ e yí wǎn nú we lɛ́ɛ sín hwɛ jɔ titewungbe! Đyɔ̌vǐ Jeluzalɛ́mu tɔn lɛ́ɛ mi, mi ɖótó, un wi, un nyɔ́ ɖɛkpɛ. Un wi Kedáa sín goxɔ lɛ́ɛ ɖɔhun. Un nyɔ́ ɖɛkpɛ xɔmɛgbovɔ e ɖo Salomɔ́ɔ hɔnmɛ lɛ́ɛ ɖɔhun. Mi ma ké ya nú wi e un wi é ó. Hwesivɔ́ wɛ fyɔ́ mì mɔ̌. Nɔ ce ví súnnu lɛ́ɛ sin xomɛ dó mì; yě sɔ́ mì dó ɖó vǐwunglecɔ́tɔ́. Vǐwungbo nyɛ tɔn ɔ́, nyɛ ba ɖɔ mɛɖé ní cɔ́ ǎ. Hwi wɛ un yí wǎn ná, ɖɔ fí e a nɔ kplá kanlin towe lɛ́ɛ gbɔn é nú mì; ɖɔ fí e yě nɔ́ ɖu ama gbɔn ɔ́ nú mì; ɖɔ fí e a nɔ kplá yě yi hwemɛ, bɔ yě nɔ́ gbɔjɛ́ ɔ́ nú mì. Énɛ́ ɔ́, un sɔ́ ná ɖo gbě towe mɛ ɖo hǎgbɛ́ towe lɛ́ɛ sín kanlin lɛ́ɛ gúdo ǎ. Tɔ́nnúhwecí ce, a ma tunwun fí ɔ́ ǎ hǔn, bo dó gbɔ̌ lɛ́ɛ sín afɔ, kplá lɛ̌ngbɔ́ví towe lɛ́ɛ gbɔn fí e lɛ̌ngbɔ́nyitɔ́ lɛ́ɛ dó goxɔ gbɔn é. Kóɖó ce, a nyɔ̌ kpɔ́n mɛ nya! Un mɔ we ɔ́, sɔ́ ɖɛkpɛ ɖɛkpɛ e nɔ dɔn Ejípu xɔ́sú ɔ́ sín kɛkɛ́ví ɔ́ jɛ́n un nɔ flín. Tógbé e a dǒ lɛ́ɛ ɖe klɛ̌n towe sín ɖɛkpɛ xlɛ́. Kɔjɛ́ towe ɖe kɔ towe sín ɖɛkpɛ xlɛ́. Mǐ nǎ bló sikánú nú we, bó bló kpatágan d'é wú téwún téwún. Hwenu e sɛ́mɛɖó ce ɖo agɔ̌ ɖu wɛ ɔ́, náa e un sá ɔ́ sín wǎn gba kpé. Wǎnyínámɔ ce cí mǐla mlímlí wǎnɖagbenɔ ɖɔhun nú mì, é cí mǐla mlímlí wǎnɖagbenɔ ɖɔhun ɖo anɔ̌ ce lɛ́ɛ tɛ́ntin bó ɖo gbigbɔ jɛ wɛ. Mɛ e un yí wǎn ná ɔ́, hɛnnɛ́ɛsɛ́ ɖɔhun wɛ é cí nú mì ɖo vǐwungbo mɛ ɖo Eyinu-Gɛdi. Kóɖó ce, a nyɔ̌ ɖɛkpɛ mɛ nya! A nyɔ̌ kpɔ́n tawun. Nukún towe lɛ́ɛ nyɔ́ kpɔ́n ahwannɛ́ ɖɔhun. Wǎnyínámɔ ce, a nyɔ̌ ɖɛkpɛ mɛ! Un mɔ we ɔ́, é nɔ́ víví nú mì! Gběhan wɛ nyí zan mǐtɔn ɖo fí. Sɛ́dlutín lɛ́ɛ wɛ nyí azakpo mǐtɔn; siplɛ́tín lɛ́ɛ wɛ nyí dǒ mǐtɔn. Nyɛ ɔ́, folówa wɛ nú mì; folówa e nɔ wú ɖo ayǐkúngban wɛnjɛ Calɔ́ni tɔn jí é wɛ nú mì, folówa ɖagbe ɖagbe e nɔ wú ɖo tɔdomɛ ɔ́ wɛ un nyí. Un mɔ kóɖó ce ɖo ɖyɔ̌vǐ lɛ́ɛ tɛ́ntin ɔ́, é nɔ́ cí folówa ɖagbe ɖagbe ɖo wunkan tɛ́ntin ɖɔhun. Un mɔ wǎnyínámɔ ce ɖo dɔ̌nkpɛ lɛ́ɛ tɛ́ntin ɔ́, é nɔ́ cí atín e è nɔ ɖu sínsɛ́n tɔn ɔ́ ɖo atín e ɖo zungbó mɛ lɛ́ɛ tɛ́ntin ɖɔhun. Xɔ́ntɔn ce ɔ́, un mɔ yɛtɛn tɔn lě ɔ́, ayǐjínjɔ́n jɛ́n nɔ́ jló mì. Sínsɛ́n tɔn nɔ́ víví nu ce kpɔ́n! Wǎnyínámɔ ce kplá mì yi fí e mǐ ná nu wǎn yíyí mǐtɔn ɖe ɔ́. Wǎn yíyí wɛ nyí hwexɔ́ bɔ é kɛ́ nú mì. Mi zé vǐwun xúxú mlímlí dó dó hlɔ̌nhlɔ́n lanmɛ nú mì. Mi zé atínsínsɛ́n dó dó wǔsyɛ́n lanmɛ nú mì, ɖó wǎn yíyí dó azɔn mì. Xɔ́ntɔn ce ní sɔ́ amyɔlɔ tɔn ɖó kɔ nú mì, bó sɔ́ aɖisílɔ tɔn dó dɔn mì dó wǔ. Đyɔ̌vǐ Jeluzalɛ́mu tɔn lɛ́ɛ mi, kɛnklɛ́n wɛ un dó nú mi; mi kpɔ́n dó tɛ́ wú, bó kpɔ́n dó zungbɔ́ wú, bó ma fɔ́n wǎn yíyí ó; mi ma fɔ́n wǎn yíyí cóbónú é ɖésúnɔ ɖó jlǒ tɔn ó. Un ɖo wǎnyínámɔ ce sín gbe se wɛ. É nɛ́ ja nɛ́. É nɛ́ ɖo só ɖaxó ɖaxó kpó kpɛví kpɛví kpó fán wɛ bó ja nɛ́. A mɔ wǎnyínámɔ ce ɔ́, a nǎ ɖɔ tɛ́ wɛ; é cí zungbɔ́ví ɖɔhun. Éyɛ́ nɛ́ kó wá nɛ́! É nɛ́ ɖo dǒ mǐtɔn gúdo nɛ́! É ɖo nǔ kpɔ́n sɛ́ dó wɛ gbɔn flɛtɛ́li nu, nukún tɔn lɛ́ɛ ɖo ganjali lɛ́ɛ nu. Wǎnyínámɔ ce ɖɔ xó; é ɖɔ nú mì ɖɔ: “Kóɖó ce, sí te! Sinsinmilinsin ce, bo ka wá bó! Jǐ hwenu kó wá yi, jǐ ɖě sɔ́ ɖo jija wɛ ǎ, din ɔ́, folówa ko kpé to ɔ́ mɛ. Hwenu e han nɔ kpé fí bǐ ɔ́ ɖíe su e; axwá lɛ́ɛ ɖo han ji wɛ gbɔn gle mǐtɔn lɛ́ɛ ta. Fígi e jɛ nukɔn lɛ́ɛ kó jɛ myǎmyá jí ɖo fígitín lɛ́ɛ jí, vǐwuntín lɛ́ɛ kó gba sɛ́, bó ɖo wǎn ɖe wɛ. Kóɖó ce, sí te! Sinsinmilinsin ce, bo ka wá bó! Ahwannɛ́ ce, sónu mɛ wɛ a yi cí, fí e afɔ ma sixú yi ɖo só ɔ́ jí ǎ ɔ́ wɛ a yi bɛ ta dó, ɖe ta tɔ́n bónú má kpɔ́n nukún towe mɛ, ɖɔ xó bónú má se gbe towe. Gbe towe fá, nukún towe mɛ nyɔ́ kpɔ́n tawun.” Mi wlí ayǐsájɛ énɛ́ lɛ́ɛ nú mǐ, mi wlí kanlin kpɛví kpɛví énɛ́ lɛ́ɛ nú mǐ; yě ɖo vǐwungbo mǐtɔn lɛ́ɛ hɛn gblé wɛ. Vǐwuntín lɛ́ɛ ká kó wlí sɛ́. Wǎnyínámɔ ce ɔ́, ce wɛ é nyí, bɔ nyi lɔ ka nyí étɔn. Amagbo mɛ fí e folówa ɖagbe ɖagbe ɖe é wɛ é nɔ́ kplá gbɔ̌ tɔn lɛ́ɛ gbɔn. Wǎnyínámɔ ce, hwenu e yɛ ná fá ɔ́, hwenu e yɛ ná jɛ ga ɖi jí ɔ́, a nǎ lɛ́ kɔ wá gɔ̌n ce. A nǎ dó wezun tɛ́ ɖɔhun gbɔn só jí só jí, a nǎ dó wezun zungbɔ́ví ɖɔhun gbɔn só tɛnmɛ tɛnmɛ jí. Un ɖo amlɔ dɔ́ wɛ zǎn mɛ bó kú dlɔ̌, bó ɖo mɛ e un yí wǎn ná ɔ́ ba wɛ ɖo adɔ̌zan ce jí; un ba ɛ, un ka mɔ ɛ ǎ. Énɛ́ ɔ́, un gbɔ bo ɖɔ un ná sí te, bó ná ba ɛ gbɔn toxo ɔ́ bǐ mɛ; un ná ba ɛ gbɔn alixo alixo, bó ná ba ɛ gbɔn tokplétɛn tokplétɛn; un ná ba mɛ e un yí wǎn ná é; un ba ɛ, un ka mɔ ɛ ǎ. Tocɔ́tɔ́ e nɔ́ ɖo toxo ɔ́ mɛ gbɔn wɛ lɛ́ɛ mɔ mì, bɔ un kán byɔ́ yě ɖɔ: “Mi mɔ mɛ e un yí wǎn ná ɔ́ nú mì vlafo a?” Un zɛ yě wǔ zaan bó mɔ wǎnyínámɔ ce. Un hɛn alɔ tɔn; un sɔ́ jó e dó ǎ, un kplá ɛ káká yi nɔ ce xɔ mɛ, xɔ e mɛ nɔ ce mɔ xo ce ɖe ɔ́ mɛ. Đyɔ̌vǐ Jeluzalɛ́mu tɔn lɛ́ɛ mi, kɛnklɛ́n wɛ un dó nú mi; mi kpɔ́n dó tɛ́ wú, bó kpɔ́n dó zungbɔ́ wú, bó ma fɔ́n wǎn yíyí ó; mi ma fɔ́n wǎn yíyí cóbónú é ɖésúnɔ ɖó jlǒ tɔn ó. Mɛ̌ ká nɛ́! Mɛ̌ ká nɛ́ jǎwe sín gbětótló mɛ nɛ́? Mɛ̌ ká jǎwe azizɔ ɖo mlǐmlí wɛ ɖɔhun nɛ́? Mɛ̌ ká jǎwe mǐla kpó zǎlínkpɔ́n kpó ɖo azɔ mlí wɛ ɖɔhun nɛ́? Mɛ̌ ká jǎwe bɔ è ɖo célu axivɛ́xivɛ́ lɛ́ɛ sín wǎn se wɛ mɔ̌? Axɔ́sú Salomɔ́ɔ wɛ ɖo kpɔn mɛ ja; súnnu glegbenu kanɖé ko (60) wɛ lɛ́ lɛ̌ dó e; ahwanfuntɔ́ syɛ́nsyɛ́n Izlayɛ́li tɔn lɛ́ɛ wɛ. Yě bǐ wɛ hɛn hwǐ. Yě bǐ wɛ nyɔ́ ahwan fun. Yě bǐ blá hwǐ, bó ná fun ahwan xá adǎn e sixú wá gbo yě zan mɛ lɛ́ɛ. Atín Libáan tɔn wɛ Salomɔ́ɔ ɖɔ bɔ è dǒ bló kpɔn ɔ́ ná. Nǔ e jí kpɔn ɔ́ jínjɔ́n ɔ́, kpatágan wɛ è dǒ bló, bó zé siká dó bló nǔ e wú è nɔ gán jɛ é; avɔ vɔvɔ cɛ́cɛ́ ɖé wɛ è dǒ bló zinkpo tɔn ná; ɖyɔ̌vǐ Jeluzalɛ́mu tɔn e yí wǎn nú axɔ́sú ɔ́ lɛ́ɛ wɛ bló xo tɔn mɛ ɖó. Đyɔ̌vǐ Sinyɔ́ɔ tɔn lɛ́ɛ mi! Mi tɔ́n! Mi wá kpɔ́n axɔ́sú Salomɔ́ɔ! É xwe axɔ́súgbákún tɔn, axɔ́súgbákún tɔn e nɔ tɔn ná ɛ gbe e gbe é wlí alɔ é; gbe e gbe é ɖo awǎjijɛ ɖaxó ɖé mɛ é. Kóɖó ce, a nyɔ̌ ɖɛkpɛ mɛ nya! A nyɔ̌ ɖɛkpɛ tawun. Nukún towe lɛ́ɛ nyɔ́ kpɔ́n ahwannɛ́ ɖɔhun ɖo avɔ e a cyɔ́n ta é glɔ́. Đa towe dó gbɔ̌hwan ɖo te jɛ sín Galadi só jí wɛ ɖɔhun. Aɖǔ towe wé lɛ̌ngbɔ́hwan e è lɛ wǔ ná bó kplá xwe fún kpa ná gbé é ɖɔhun. Yě nɔ́ zɔn webɔ webɔ, ɖě nɔ́ zɔn é ɖokpó ǎ. Nufló towe cí avɔxwɛ vɔvɔ lɛ́ɛ́n ɖé ɖɔhun; nu towe nyɔ́ kpɔ́n. Klɛ̌n towe ɖo tówún tówún atínsínsɛ́n ɖɔhun ɖo avɔ e a cyɔ́n ta é glɔ́. Kɔ towe cí Davídi sín atɔxwɛ ɖɔhun, è gbǎ bɔ é jínjɔ́n ayǐ ganjí. Kɔjɛ́ towe lɛ́ɛ cí gǎglónú afatɔ́n e è kplá atɔxwɛ ɔ́ wú lɛ́ɛ ɖɔhun, ahwanfuntɔ́ syɛ́nsyɛ́n lɛ́ɛ sín gǎglónú wɛ. Anɔ̌ towe lɛ́ɛ cí zungbɔ́ví we ɖɔhun, yě cí tɛ́ví hǒxo e ɖo ama ɖu wɛ ɖo folówa gbo mɛ lɛ́ɛ ɖɔhun. Hwenu e yɛ ná fá ɔ́, hwenu e yɛ ná jɛ ga ɖi jí ɔ́, un ná yi mǐla só ɔ́ kɔn, un ná yi zǎlínkpɔ́n kpó ɔ́ kɔn. Kóɖó ce, a nyɔ̌ ɖɛkpɛ kpɔ́n! Blɔ̌ ɖěbǔ ɖo wǔ towe ǎ. Asixɔ́ntɔn ce, xwedó mì, gosín Libáan só ɔ́ jí bó xwedó mì; jɛ te sín Amana só ɔ́ jí; jɛ te sín Seníi só ɔ́ kpó Ɛmɔ́ɔ só ɔ́ kpó jí. Gosín kinnikínní sín nɔtɛn énɛ́ lɛ́ɛ; gosín só énɛ́ lɛ́ɛ jí, kpɔ lɛ́ɛ wɛ nɔ́ nɔ fínɛ́. Nɔví ce nyɔ̌nu, asixɔ́ntɔn ce, a kpɔ́n mì lě ɔ́, ayi ce nɔ gbadó. Jɛ̌ e a dǒ kɔ lɛ́ɛ ɔ́, un mɔ nǔdójɛ̌nu e ɖo yě nu lɛ́ɛ ɖokpó lě ɔ́, hǔn ce nɔ́ xo. Nɔví ce nyɔ̌nu, asixɔ́ntɔn ce, wǎn e a yí nú mì ɔ́ nɔ́ dó vǐví lan ce mɛ, wǎn e a yí nú mì ɔ́ nɔ́ mú mì hú vɛ̌ɛn; wǎn towe nyɔ́ se nú mì hú célu bǐ. Asixɔ́ntɔn ce, un kí si nú we dó nufló jí ɔ́, nufló towe nɔ́ víví ɖi wǐin akú; wǐin kpó nyibúnɔ́sin kpó wɛ ɖo ɖɛ̌ towe glɔ́. Nǔ e a dǒ lɛ́ɛ nɔ́ hwɛ́n zungbó Libáan tɔn sín wǎn. Nɔví ce nyɔ̌nu, asixɔ́ntɔn ce, jikpá ɖé wɛ a nyǐ bó ɖo súsú, tɔjɔtɛn ɖé wɛ a nyǐ bó ɖo súsú, tɔ ɖé wɛ a nyǐ bó ɖo vo nú mì. Ala e a zɛ lɛ́ɛ nɔ́ sa gbɔn glenádigbo mɛ; glenádi e sínsɛ́n tɔn nɔ́ víví káká é gbo mɛ: hɛnnɛ́ɛ kpó náa kpó ɖo fínɛ́. È nɔ mɔ náa, saflán kpó kanɛ́lu wǎnɖagbenɔ kpó ɖo fínɛ́, è nɔ mɔ sinnamɔmi kpó atín tɛnmɛ tɛnmɛ e nɔ́ ná zǎlínkpɔ́n lɛ́ɛ kpó ɖo fínɛ́, è nɔ mɔ mǐla kpódó alowɛ́si kpó ɖo fínɛ́. Nǔ ɖagbe tɛnmɛ tɛnmɛ lɛ́ɛ bǐ ɖo fínɛ́; Hwi wɛ nyí tɔjɔtɛn e nɔ sa gbɔn jikpá lɛ́ɛ mɛ é; hwi wɛ nyí tɔ e mɛ sin zinzin ɖe é; hwi wɛ nyí sin e nɔ sa sín Libáan é. Jɔhɔn totaligbé tɔn e, sí te! Jɔhɔn tofɔligbé tɔn e, wǎ! Sí te bó nyi dó jikpá ce mɛ bónú wǎn ɖagbe e ɖo jikpá ce mɛ lɛ́ɛ ná gba kpé. Wǎnyínámɔ ce, byɔ́ jikpá towe mɛ! Wǎ ɖu atínsínsɛ́n ɖagbe ɖagbe e ɖ'é mɛ lɛ́ɛ. Nɔví ce nyɔ̌nu, asixɔ́ntɔn ce, un jǎwe jikpá ce mɛ, un jǎwe bó ná ba mǐla ce, un jǎwe bó ná gbɛ nǔhwɛ́nkún ce lɛ́ɛ. Un jǎwe bó ná ɖu wǐinkpa ce kpó wǐin ce kpó; un jǎwe bó ná nu vɛ̌ɛn ce kpódó anɔ̌sin ce kpó. Xɔ́ntɔn xɔ́ntɔn e mi, mi ɖu nǔ! Mi nu vɛ̌ɛn; wǎn yíyí ní mú mi! Un ɖo amlɔ dɔ́ wɛ zǎn mɛ có ayi ce ɖo wunzɛn; un se mɛɖé ɖo hɔn xúxú wɛ, wǎnyínámɔ ce wɛ ɖo hɔn xúxú wɛ; é nɔ́ ɖɔ: “Nɔví ce, kóɖó ce, ahwannɛ́ ce, a nyɔ̌ bɔ nǔ vɔ ɖ'é wú; hun hɔn nú mì! Ahǔn ɖo jija kɔn nyi ta nú mì wɛ, amǔ ɖo kunkun kɔn nyi ta nú mì wɛ, ɖa e ɖo ta ce é bǐ kó fá.” Énɛ́ ɔ́, un ɖɔ: un ko ɖe awu ce ɖaxó ɔ́ sín kɔ: Nɛ̌ un ná lɛ́ vɔ́ dó gbɔn? Un ko klɔ́ afɔ ce lɛ́ɛ, nɛ̌ un ná lɛ́ hɛn yě kwíji gbɔn? Ée un ɖɔ mɔ̌ ɔ́, wǎnyínámɔ ce sɔ́ alɔ gbɔn hɔnlinu, bɔ hǔn ce jɛ xixo jí. Un sí te bo ná hun hɔn nú wǎnyínámɔ ce, bɔ mǐla e un sá ɔ́ jɛ kunkun jí sín alɔ ce; ami wǎnɖagbenɔ énɛ́ jɛ kunkun jí sín alɔví ce bó nɔ́ kɔn nyi fí e è nɔ hɛn bó nɔ́ hun hɔn ɔ́ é. Un hun hɔn nú wǎnyínámɔ ce; é ká kó yi, é sɔ́ ɖo fínɛ́ ǎ. Hwenu e é ɖo xó ɖɔ wɛ ɔ́, un sɔ́ tunwun gbɛ e mɛ un ɖe ɔ́ ǎ. Un ba ɛ, un ka sɔ́ mɔ ɛ ǎ. Un ylɔ́ ɛ, é ká sɔ nú mì ǎ. Tocɔ́tɔ́ e ɖo toxo ɔ́ mɛ gbɔn wɛ lɛ́ɛ kpé mì, yě mɛ énɛ́ lɛ́ɛ e ɖo ahohó ɔ́ cɔ́ wɛ lɛ́ɛ mɔ mì; yě xo mì, yě dó ya nú mì, yě yí avɔ e un sɔ́ nyi kɔ é. Đyɔ̌vǐ Jeluzalɛ́mu tɔn lɛ́ɛ mi, un ɖo kɛnklɛ́n dó nú mi wɛ, nú mi mɔ wǎnyínámɔ ce ɔ́, xó tɛ́ mi ná ɖɔ n'i? Nú mi mɔ ɛ hǔn, mi ɖɔ n'i ɖɔ wǎn yíyí dó azɔn mì. Hwi mɛ e nyɔ́ ɖɛkpɛ hú nyɔ̌nu lɛ́ɛ bǐ ɔ́, étɛ́ ká ɖo wǎnyínámɔ towe sí, bó má ɖo súnnu ɖě lɛ́ɛ sí ǎ? Étɛ́ ká ɖo así tɔn, bó má ɖo súnnu ɖě lɛ́ɛ sí ǎ, bɔ a wǎ ɖo kɛnklɛ́n dó nú mǐ wɛ? Wǎnyínámɔ ce ɔ́, wǔtu tɔn ɖíɖí bó nɔ́ kɔ́n. To na bo kplé bónú é ɖ'é mɛ ɔ́, è nɔ tunwun i. Ta tɔn nɔ kɛn siká akú ɖɔhun; ɖa e ɖo ta tɔn ɔ́ mlí hwǐn, bó wi avǔnsákɔwó fún ɖɔhun. Nukún tɔn lɛ́ɛ nyɔ́ kpɔ́n ahwannɛ́ ɖo tɔ tó ɖɔhun, nukúnzin tɔn lɛ́ɛ cí anɔ̌sin mɛ wɛ yě ɖe ɖɔhun, yě cí kɔ́fu mɛ wɛ yě ɖe ɖɔhun. Klɛ̌n tɔn lɛ́ɛ cí fí e è dǒ folówa wǎnɖagbenɔ ɖó ɖo jikpá mɛ é ɖɔhun; yě cí fí e è dǒ gběhan wǎnɖagbenɔ ɖó é ɖɔhun. Nufló tɔn lɛ́ɛ ɔ́, folówa wɛ, folówa e mɛ mǐla nɔ kun sín é wɛ. Awa tɔn lɛ́ɛ cí sikálɔgan ɖɔhun, sikálɔgan e è blǒ awǐnnya xɔ akwɛ́ klizolíti gbɔn mɛ é ɖɔhun. Wǔtu tɔn cí ajinakúɖú ɖɔhun, ajinakúɖú e awǐnnya xɔ akwɛ́ safíi gbɔn wú bǐ ɔ́ ɖɔhun. Asá tɔn lɛ́ɛ cí mǎblu dotín ɖɔhun, mǎblu dotín e è sɔ́ siká akú dó bló dodó ná é ɖɔhun. È mɔ ɛ ɔ́, é nɔ́ cí Libáan zungbó ɖɔhun; é nyɔ́ kpɔ́n sɛ́dlutín Libáan tɔn lɛ́ɛ ɖɔhun. Nufló tɔn nɔ víví ɖo nu ce mɛ. Nǔ e ɖo wǔ tɔn lɛ́ɛ bǐ wɛ nɔ́ dɔn mì. Đyɔ̌vǐ Jeluzalɛ́mu tɔn lɛ́ɛ mi, lě e wǎnyínámɔ ce cí é nɛ́, lě e xɔ́ntɔn ce cí é nɛ́! Hwi mɛ e nyɔ́ ɖɛkpɛ hú nyɔ̌nu lɛ́ɛ bǐ ɔ́, fítɛ́ wǎnyínámɔ towe ká yi? Ali tɛ́ wǎnyínámɔ towe ká gbɔn? Đɔ nú mǐ, mǐ jló ná yi ba ɛ xá we. Wǎnyínámɔ ce yi jikpá tɔn mɛ, fí e gběhan wǎnɖagbenɔ ɖe é, bó ná kplá gbɔ̌ tɔn lɛ́ɛ yi amagbo mɛ ɖo fínɛ́, lobo ná ba folówa ɖagbe ɖagbe lɛ́ɛ ɖo fínɛ́. Nyɛ ɔ́, wǎnyínámɔ ce tɔn wɛ un nyí, bɔ élɔ́ nyí ce. Amagbo mɛ fí e folówa ɖagbe ɖagbe ɖe é wɛ é nɔ́ kplá gbɔ̌ tɔn lɛ́ɛ gbɔn. Kóɖó ce, a nyɔ́ ɖɛkpɛ mɛ! A nyɔ̌ ɖɛkpɛ Tíisa toxo ɔ́ ɖɔhun. A nyɔ̌ kpɔ́n Jeluzalɛ́mu toxo ɔ́ ɖɔhun. È ɖǒ ná nɔ sí we lě e è nɔ sí ahwanfuntɔ́ lɛ́ɛ gbɔn ɖo ahwangbénu é. Đe nukún towe sín jǐ ce, ɖó yě ɖo ayi gbadó nú mì wɛ. Đa towe dó gbɔ̌hwan ɖo te jɛ sín Galadi só jí wɛ ɖɔhun. Aɖǔ towe wé lɛ̌ngbɔ́hwan e è lɛ wǔ ná bó kplá xwe fún kpa ná gbé é ɖɔhun. Yě nɔ́ zɔn webɔ webɔ, ɖě nɔ́ zɔn é ɖokpó ǎ. Klɛ̌n towe ɖo tówún tówún atínsínsɛ́n ɖɔhun ɖo avɔ e a cyɔ́n ta é glɔ́. Axɔ́sú ɔ́, asi kanɖé ko (60) wɛ é da, bó lɛ́ ɖó asi kanwe (80) ɖěvo, bó ɖó ɖyɔ̌vǐ maxamaxa. Amɔ̌, nú nyɛ ɔ́, nyɔ̌nu ɖokpó géé wɛ tíin ɖo gbɛ ɔ́ mɛ; é wɛ nyí ahwannɛ́ ce, é nyɔ́ nú mì bɔ nǔ vɔ ɖ'é wú. É ɖokpónɔ géé wɛ nɔ tɔn ji, é ɖokpónɔ géé wɛ nɔ tɔn yí wǎn ná. Nyɔ̌nu lɛ́ɛ mɔ ɛ ɔ́, yě nɔ́ ylɔ́ ɛ ɖɔ nǔnyɔ́nánɔ. Axɔ́si lɛ́ɛ kpó axɔ́sú ɔ́ sín asi ɖěvo lɛ́ɛ kpó mɔ ɛ ɔ́, yě nɔ́ kpa. Mɛ̌ ká ja nɛ́? Nyɔ̌nu tɛ́ ká tɔ́n sín dɔ̌n bó ja ayǐtéhɔ̌nnu ɖɔhun nɛ́? É nyɔ́ ɖɛkpɛ sun ɖɔhun, é nɔ́ kɔ́n hwe ɖɔhun. È ɖǒ ná nɔ́ sí i lě e è nɔ sí ahwanfuntɔ́ lɛ́ɛ gbɔn ɖo ahwangbénu é. Un jɛ te atínsínsɛ́ngbo ɔ́ mɛ; bó ná kpɔ́n atín e zɔ́n ama yɔ̌yɔ́ ɖo tɔdo ɔ́ mɛ lɛ́ɛ, un ná kpɔ́n ɖɔ vǐwuntín lɛ́ɛ kó tɔ́n kun a jí, bó ná kpɔ́n ɖɔ glenáditín lɛ́ɛ kó gba sɛ́ a jí. Un sɔ́ tunwun nǔ e ɖo wiwa mì wɛ ɔ́ bǐ ǎ: mɛjɔmɛví, a dǒ yɛyi mì. Sulamunu, ɖǔ we! Đǔ we bo lílɛ́ bónú mǐ ná kpɔ́n we. Mi kpɔ́n, mi mɔ è dɔn Sulamunu ɔ́, bó ɖo we ɖú xá ɛ wɛ ɖo gbɛ̌ta we sín agun mɛ wɛ a? Axɔ́ví nyɔ̌nu, afɔ towe lɛ́ɛ nyɔ́ kpɔ́n ɖo afɔkpa towe lɛ́ɛ mɛ lóóo! Alin towe cí kɔjɛ́ e alɔnuzɔ́watɔ́ bló é ɖɔhun. Hɔ̌nví towe cí kɔ́fu tobotobo e mɛ vɛ̌ɛn wǎnɖagbenɔ ma ɖó ná hán ɖe ǎ é ɖɔhun. Adɔgo towe cí jinukún e è kplé bó to folówa ɖagbe ɖagbe lɛ́ lɛ̌ dó é ɖɔhun. Anɔ̌ towe lɛ́ɛ cí zungbɔ́ví we ɖɔhun, yě cí tɛ́ví hǒxo ɖɔhun. Kɔ towe cí atɔxwɛ e è sɔ́ ajinakúɖú dó bló ná ɔ́ ɖɔhun. Nukún towe lɛ́ɛ cí Hɛcibɔ́ni sín tán lɛ́ɛ ɖɔhun. Yě cí tán e ɖo toxo ɖaxó énɛ́ nukɔn lɛ́ɛ ɖɔhun. Awɔntín towe nyɔ́ kpɔ́n atɔxwɛ Libáan tɔn e kpan nukɔn Damási ɔ́ ɖɔhun. Ta e ɖo kɔ towe nu ɔ́ jlɔ́ Kaamɛ́li só ɖɔhun, ɖa e ɖo ta towe ɔ́ ɖi ga, é nɔ́ kɛn siká xóxó ɖɔhun. Nyɛ axɔ́sú towe ɔ́, un dɔn cí ɖa towe mɛ. Wǎnyínámɔ ce, nyɔ̌nu fífá, a nyɔ̌ ɖɛkpɛ, a nyɔ̌ kpɔ́n mɛ. A ɖi ga; è mɔ we ɔ́, a cí dětín ɖɔhun; anɔ̌ e ɖo akɔ́n towe mɛ lɛ́ɛ cí děhwín ɖɔhun. Énɛ́ wɛ zɔ́n bɔ un ɖɔ: Un ná xá dětín ɔ́ jí, bó ná ɖó alɔ děhwín lɛ́ɛ wú. Anɔ̌ towe lɛ́ɛ ní nyí vǐwun nú mì. Wǎn e nɔ́ tɔ́n sín nu towe mɛ ɔ́ ní nyɔ́ se nú mì. Nu towe ní nyí vɛ̌ɛn ɖagbe nú mì. Nǔgbó wɛ, nu ce ní nyí vɛ̌ɛn ɖagbe nú wǎnyínámɔ ce, bó sa gbɔn nufló tɔn ɖo amlɔ mɛ. Nyɛ ɔ́, wǎnyínámɔ ce tɔn wɛ un nyí, nyi ba wɛ é ɖe. Wǎnyínámɔ ce, wǎ! Wǎ mǐ yi dɔ́ hɛnnɛ́ɛsɛ́ lɛ́ɛ mɛ! Ayǐ hɔn tlóló ɔ́, mǐ nǎ yi vǐwungbo mɛ, mǐ ná yi kpɔ́n ɖɔ vǐwuntín lɛ́ɛ kó wlí sɛ́ a jí; mǐ ná kpɔ́n ɖɔ sɛ́ lɛ́ɛ kó hun a jí; mǐ ná yi kpɔ́n ɖɔ glenáditín lɛ́ɛ kó gba sɛ́ a jí. Fínɛ́ wɛ un ná jó nyɛɖée nú we ɖe. Wǎn yíyí sín atínsínsɛ́n lɛ́ɛ kó ɖo wǎn ɖe wɛ. Atínsínsɛ́n ɖagbe alɔkpa alɔkpa lɛ́ɛ ɖo hɔn mǐtɔn ta, atínsínsɛ́n yɔ̌yɔ́ kpó xóxó kpó. Wǎnyínámɔ ce, hwi wɛ un fɔ ɖ'ayǐ ná. Ényí nɔví ce, nɔ ce xomɛ tɔn wɛ a nyǐ din ɔ́, un mɔ we ɖo toxo mɛ ɔ́, un hɛn ɔ́, un ná kplá así kɔ nú we, bɔ mɛɖé ká ná vɛ nǔ dó mǐ ǎ; un ná kplá we bɔ mǐ ná yi nɔ ce xɔ mɛ, bɔ mɛɖé ká ná nɔ́ vɛ nǔ dó mǐ ǎ. Mǐ jɛ dɔ̌n ɔ́, a nǎ kplɔ́n heɖíɖó mì, bɔ un ná ná vɛ̌ɛn ce wǎnɖagbenɔ ɔ́ we, bɔ a nǎ nu; un ná ná glenádi ce sín ahan we, bɔ a nǎ nu. Xɔ́ntɔn ce sɔ́ amyɔlɔ tɔn ɖó kɔ nú mì, bó sɔ́ aɖisílɔ tɔn dó dɔn mì dó wǔ. Đyɔ̌vǐ Jeluzalɛ́mu tɔn lɛ́ɛ mi, kɛnklɛ́n wɛ un dó nú mi, mi ma fɔ́n wǎn yíyí ó, mi ma fɔ́n wǎn yíyí cóbónú é ɖésúnɔ ɖó jlǒ tɔn ó. Mɛ̌ ká nɛ́! Mɛ̌ ká jǎwe sín gbětótló mɛ nɛ́? Nyɔ̌nu tɛ́ ká ɖo wǎnyínámɔ tɔn sín awa mɛ jǎwe nɛ́? Atín e è nɔ ɖu sínsɛ́n tɔn ɔ́ sá wɛ un fɔ́n we ɖe; fínɛ́ wɛ nɔ towe mɔ xo towe ɖe, fínɛ́ wɛ mɛ e ji we ɔ́ mɔ xo towe ɖe. Sɔ́ mì tɛ́ ɖó akɔ́n towe nu, nú má cí wuntun ɖɔhun ɖo wǔ towe, gbɔ nú má tɛ́ dó wǔ towe alɔgan ɖɔhun. Đó wǎn yíyí ɖó hlɔ̌nhlɔ́n kú ɖɔhun. Nǔ e hun zo dó mɛ ɔ́, è nɔ hɛn ɖó te ǎ, kú ɖɔhun wɛ é ɖe. Nǔ e hun zo dó mɛ ɔ́, zo wɛ, myɔ hɛhɛ wɛ. Sin e ɖo agbetawoyó mɛ ɔ́ sixú xo wǎn yíyí sín myɔ cí ǎ. Sin e ɖo tɔsisa lɛ́ɛ mɛ ɔ́ sixú ɖi bú i ǎ. Gbɛtɔ́ ná bó bɛ́ nǔ e ɖo así tɔn lɛ́ɛ bǐ jó, bó ná dó xɔ wǎn yíyí ná ɔ́, wǎngbígbɛ́ jɛ́n é ná mɔ. Mǐ ɖǒ nɔví ɖokpó, é kpo ɖo vǔ; é kó tɔ́n anɔ̌ ǎ. Asúdida hwenu tɔn ká su ɔ́, nɛ̌ mǐ ká ná bló gbɔn n'i? Hwe ɔ́ nu su ɔ́, nú ahohó wɛ é nyí ɔ́, mǐ nǎ zé kpatágan dó ɖó ata ná dó ba acɔ́ n'i. É ká nyí hɔn ɖé wɛ é nyí ɔ́, mǐ nǎ zě sɛ́dluxwlɛ dó sú ná. Nyɛ ɔ́, ahohó wɛ un nyí; anɔ̌ ce lɛ́ɛ wɛ nyí atɔxwɛ tɔn. Énɛ́ ɔ́, wǎnyínámɔ ce sɔ́ mì dó ɖó toxo e mɛ fífá ɖe é. Salomɔ́ɔ ɖó vǐwungbo ɖokpó ɖo Baalu-Hamɔ́ni. É zé vǐwungbo ɔ́ dó alɔ mɛ nú vǐwunglecɔ́tɔ́ lɛ́ɛ. Gankwɛ́ afatɔ́n (1.000) wɛ è nɔ ná ɛ bó nɔ́ gbɛ vǐwun tɔn. Hwɛ Salomɔ́ɔ ɔ́, a hɛn ɔ́, a nǎ yí gankwɛ́ towe afatɔ́n (1.000) lɛ́ɛ, bó ná afɔɖé (200) vǐwunglecɔ́tɔ́ lɛ́ɛ. Amɔ̌, vǐwungbo nyɛtɔn ɔ́, nyɛ ɖésúnɔ lɔ mɛ wɛ é ɖe. Kóɖó ce, hwi mɛ e nɔ nɔ jikpá mɛ ɔ́, gbɛ̌ ce lɛ́ɛ ɖo gbe towe ba ná se wɛ. Amɔ̌, nyɛ ɖokpó wɛ a nǎ ɖɔ xó ná. Wǎnyínámɔ ce, hɔn! Dǒ wezun tɛ́ abǐ zungbɔ́ví ɖɔhun gbɔn só wǎnɖagbenɔ lɛ́ɛ jí. Mawu ɖɔ xó nú Ezayíi Amɔ̌si ví ɔ́ ɖo nǔmimɔ mɛ. É ɖɔ xó n'i dó axɔ́súɖuto Judáa tɔn kpó Jeluzalɛ́mu toxo ɔ́ kpó wú. Axɔ́sú Judáa tɔn Oziyási, Yotámu, Akázi kpó Ezekiyási kpó hwenu wɛ é ɖɔ xó ɔ́. Xó e é ɖɔ n'i ɔ́ ɖíe. Jǐnukúnsin kpó ayǐkúngban kpó, mi ɖótó mì, mi tɛ́ tó. Mawu Mavɔmavɔ wɛ ɖo xó ɖɔ wɛ: “Un hɛn Izlayɛ́li ví lɛ́ɛ káká bɔ yě su; un kplɔ́n yě. Lo ɔ́, yě fɔ́n gǔ dó jǐ ce. Nyibú nɔ́ tunwun mɛ e ɖó e é, tócí nɔ́ tunwun mɛ e nɔ ná nǔɖuɖu i é. Lo ɔ́, Izlayɛ́li ví lɛ́ɛ tunwun mì ǎ, togun ce Izlayɛ́li mɔ nǔ jɛ nǔɖé wú ǎ.” Heelú we akɔta hwɛhutɔ́, togun hwɛgban ɖo tanánɔ, mɛdídá kúnkan; vǐ gblégblé wɛ mi nyí, mi jó Mawu Mavɔmavɔ dó. Mi gbɛ́ wǎn nú Mɛ Mímɛ́ Izlayɛ́li tɔn ɔ́, mi dó gǔdo e. Ée mi ka fɔ́n ɔ́, mi nɔ ɖo gǔ fɔ́n wɛ ɔ́, fítɛ́ mi ka jló ɖɔ Mawu ní lɛ́ dó nǔ mi dó? Ta mitɔn bǐ wɛ kó nyí akpa, bɔ ayi mitɔn lɔ ko xo akpa. Sín afɔ káká yi ta ɔ́, nǔɖé sɔ́ ɖo ganjí ɖo mi wú ǎ; akpa wɛ kpé fí bǐ nú mi, wǔtu mitɔn bǐ wɛ nylɔ́ wi, bɔ agadá kpé fí bǐ vannyaa; mɛ ɖé ɖe bó ná klɔ́ ǎ; mɛ ɖé ɖe bó ná blá ǎ, mɛ ɖé ká ɖe bó ná ɖó ami mɛ ǎ. To mitɔn gba; toxo mitɔn lɛ́ɛ ji zo. Toɖévomɛnu lɛ́ɛ nɔ́ bɛ́ jinukún mitɔn lɛ́ɛ ɖo nukún mitɔn mɛ. To ɔ́ jɛ vɔ̌ ahwangbamɛ ɖɔhun. Sinyɔ́ɔ toxo ɔ́ kɛ́ɖɛ́ wɛ kpo ɖo te; é cí goxɔ e ɖo vǐwungbo mɛ é ɖɔhun, é cí azava e ɖo cɛ́gbákan mɛ é ɖɔhun, é cí toxo e kɛntɔ́ xá é ɖɔhun. Ényí Mawu Mavɔmavɔ Nǔbǐwúkpétɔ́ ɔ́ má kó jó mɛɖé lɛ́ɛ dó nyi gbɛ ɖo mǐ mɛ ǎ ɔ́, mǐ nǎ kó cí Sodɔ́mu toxo ɔ́ ɖɔhun, mǐ nǎ kó ɖo Gomɔ́ɔ toxo ɔ́ ɖɔhun égbé din. Mi Sodɔ́mu gán e mi, mi ɖótó xó e ɖɔ wɛ Mawu Mavɔmavɔ ɖe é. Mi Gomɔ́ɔ togun e mi, mi wlí tó Mawu Mavɔmavɔ mǐtɔn sín nǔkplɔ́nmɛ lɛ́ɛ wú. Mawu Mavɔmavɔ ɖɔ: “Vɔ̌ tobutóbú e sá nú mì wɛ mi nɔ ɖe lɛ́ɛ ɔ́, étɛ́ un nǎ dó wa? Agbo e mi nɔ dó sá vɔ̌ e è nɔ dó zo ɔ́ ná nú mì lɛ́ɛ, kpó nyibúví sín jǒ e mi nɔ xwlé mì lɛ́ɛ bǐ kpó kpé kɔ nú mì. Nyibúsú kpó lɛ̌ngbɔ́ví kpó, kpó gbǎgbá kpó sín hun sɔ́ nɔ́ dó xomɛhunhun nú mì ǎ. Nyi wɛ ɖɔ nú mi ɖɔ mi ní wá xwé ce gbe bɔ mi nɔ wá ɖo kɔ́xo ce ta gbídí wɛ a? Mi ma sɔ́ hɛn nǔɖé bó wá ná mì ó, nǔ yǎyá wa wɛ mi ɖe. Mi ma sɔ́ xwlé zǎlínkpɔ́n ɖě mì ó, é nɔ vɛ́ mɔ nú mì. Sunwájǐxwe, gbɔjɛzán xwe, abǐ sinsɛn sín xwe e mi nɔ ɖu lɛ́ɛ nɔ́ nyɔ́ mɔ nú mì ǎ. Mi ná kplé bó ɖo sinsɛn mì wɛ, bó ká ná ɖo dǎka xo wɛ ɔ́, un sixú yí gbe ǎ. Un gbɛ́ wǎn nú sunwájǐxwe mitɔn kpó sinsɛn nǔwiwa mitɔn lɛ́ɛ kpó; agban wɛ yě nyí ɖo kɔ jí nú mì, bɔ hinhɛn tɔn cikɔ nú mì. Mi sɔ́ alɔ dó jǐ bó ɖo ɖɛ na xó wɛ ɔ́, un nɔ ɖó kɔ mi wú ǎ, mi ɖo ɖɛ ɖě ɖo ɖě jǐ lɛ́ɛ xo wɛ ɔ́, un nɔ ɖótó mi ǎ, ɖó gbɛtɔ́ kanjɔ ɖo alɔ nú mi. Mi lɛ miɖée sín nǔ nyanya wiwa mɛ, mi slá wǔ, mi ma sɔ́ xo dǎka ɖě ɖo nukún ce mɛ ó, mi jó nǔ nyanya wiwa dó. Mi kplɔ́n nǔ ɖagbe wiwa, mi nɔ xwedó hwɛjijɔ; mi gbɛ́ nǔ nú mɛ e ɖo mɛ táfú wɛ ɔ́, mi wa nǔ ɖó sɛ́nxwi jí xá tɔ́cyɔvǐ, mi jɛ ahwan asúkúsi jí.” Mawu Mavɔmavɔ ɖɔ: “Mi wá nú mǐ nǎ se nǔ jɛ mǐɖée gbe mɛ. Ényí hwɛ mitɔn lɛ́ɛ na bo myá cɛ́cɛ́ ɔ́, yě ná wé tété avɔkanfún ɖɔhun. Yě ná bó myá káká bó wi d'é mɛ ɔ́, yě ná wé la ɖɔhun. Ényí mi ɖó jlǒ ɖagbe bo se tónú nú mì ɔ́, mi ná ɖu nǔ ɖagbe e ɖo to ɔ́ mɛ lɛ́ɛ. Lo ɔ́, ényí mi gbɛ́, bó ɖo gǔ fɔ́n dó nyɛ Mawu Mavɔmavɔ jí wɛ ɔ́, ahwan wɛ ná gba mi.” Nyɛ Mawu Mavɔmavɔ wɛ kɛ nu bó ɖɔ mɔ̌. Étɛ́ o, Jeluzalɛ́mu toxo e ɖo gbejí ɔ́ wɛ húzú agalɛtɔ́ mɔ̌ a? Đ'ayǐ ɔ́, nǔ jlɔ́jlɔ́ kɛ́ɖɛ́ wɛ è nɔ wa ɖo toxo énɛ́ ɔ́ mɛ, hwɛjijɔ kɛ́ɖɛ́ wɛ mɛ lɛ́ɛ nɔ xwedó ɖo toxo énɛ́ ɔ́ mɛ; amɔ̌, égbé din ɔ́, mɛhutɔ́ lɛ́ɛ sín nɔtɛn wɛ é nyí. Jeluzalɛ́mu, kpatágan towe húzú zunkɔ́, vɛ̌ɛn towe ɖagbe ɖagbe ɔ́, è kɔn sin d'é jí. Gǎn towe lɛ́ɛ ɔ́, gǔfɔ́ntɔ́ wɛ nú yě, yě nɔ́ nɔ awo mɛ nú ajotɔ́ lɛ́ɛ. Nǔwlóɖutɔ́ wɛ nú yě, nǔ ɖu ɖo nǔ mɛ ba wɛ jɛ́n yě nɔ́ ɖe. Yě nɔ́ táfú tɔ́cyɔvǐ lɛ́ɛ, yě nɔ́ ɖótó hwɛ e jɛ nú yě wɛ asúkúsi ɖe é ǎ. Énɛ́ ɔ́ wú wɛ Aklúnɔ, Mawu Mavɔmavɔ Nǔbǐwúkpétɔ́, Mawu hlɔ̌nhlɔ́nnɔ Izlayɛ́li tɔn ɔ́ ɖɔ: “Éénɛ́! Din ɔ́, mɛ e ma ɖo jǐ ce ǎ lɛ́ɛ ɔ́, un ná wa nǔ xá yě bɔ xo ce mɛ ná fá; un ná wa nǔ xá kɛntɔ́ ce lɛ́ɛ dó ba hlɔn. Jeluzalɛ́mu, alɔ ce ná lɛ́ jɛ wǔ we; un ná zé zo dó slá wǔ nú we, lě e è nɔ xo zo dó gan bó nɔ́ ɖe nǔ kwíji kwíji sín mɛ ɔ́ ɖɔhun; un ná ɖe ɖɛ zunkɔ́ towe lɛ́ɛ bǐ. Un ná zé hwɛɖɔtɔ́ towe lɛ́ɛ dó húzú hwɛɖɔtɔ́ ɖ'ayǐ tɔn lɛ́ɛ, un ná zé azaglɔ́gán towe lɛ́ɛ dó húzú azaglɔ́gán xóxó tɔn lɛ́ɛ; énɛ́ ɔ́, è nǎ nɔ́ ylɔ́ we ɖɔ ‘Toxo hwɛjijɔ tɔn’ ‘Toxo gbejínɔtɔ́.’ ” Mawu ná zé hwɛjijɔ tɔn dó hwlɛ́n Sinyɔ́ɔ gán, bɔ mɛ e ɖo Sinyɔ́ɔ bó lɛ́ kɔ sín hwɛ yětɔn gúdo lɛ́ɛ bǐ ná mɔ hwlɛngán. Lo ɔ́, è nǎ gblé gbɛ dó nú gǔfɔ́ntɔ́ lɛ́ɛ kpó hwɛhutɔ́ lɛ́ɛ kpó zɛ̌nzɛ̌n, bɔ mɛ e jó Mawu Mavɔmavɔ dó lɛ́ɛ tɔn ná fó. Nǔ e mi yí wǎn nú atín ɖaxó ɖaxó énɛ́ lɛ́ɛ dó wa ɔ́, mi ná dán ɛ; jikpá énɛ́ lɛ́ɛ e mɛ mi nɔ yi wa sinsɛn nú mitɔn lɛ́ɛ ɖe ɔ́ ná nyí winnyá nú mi. Mi ná cí atín e mlú ɖa é ɖɔhun, mi ná cí jikpá e ba sin kpo é ɖɔhun. Súnnu glegbenu ná cí nǔywɛ́ ɖɔhun, bɔ nǔwiwa tɔn ná cí myɔkán ɖɔhun, bó ná dó nǔywɛ́ ɔ́ zo, bɔ yě mɛ we lɛ́ɛ bǐ ná ji bɔ mɛ e ná cí é ná ɖe ǎ. Xó e Mawu ɖɔ nú Ezayíi Amɔ̌si ví ɔ́ ɖo nǔmimɔ mɛ dó Judáa kpó Jeluzalɛ́mu kpó wú é ɖíe. Gbe ɖokpó ná wá su, bɔ só e jí Mawu Mavɔmavɔ xwé ɔ́ ɖe ɔ́ ná hú ga só kpɛví kpɛví lɛ́ɛ, é ná yi jǐ hú só ɖě lɛ́ɛ bǐ. Énɛ́ ɔ́, akɔta lɛ́ɛ bǐ ná nyi ahwan wá gɔ̌n tɔn. Akɔta gěgé ná jɛ ali ɖidó dɔ̌n bó ná ɖɔ: “Mi wá mǐ yi Mawu Mavɔmavɔ só ɔ́ ta, mi wá mǐ yi Mawu Jakɔ́bu tɔn xwé. É ná kplɔ́n nǔ e é jló ɖɔ mǐ nǎ wa é mǐ, bɔ mǐ nǎ xwedó ali e é ɖe nú mǐ é.” Nǔgbó ɔ́, Sinyɔ́ɔ wɛ Mawu Mavɔmavɔ sɛ́n ɔ́ ná gosín, Jeluzalɛ́mu wɛ Mawu Mavɔmavɔ xó ɔ́ ná gosín wá nú mǐ. É ná ɖɔ hwɛ xá akɔta lɛ́ɛ, é wɛ ná dó hwɛ gbo nú togun lɛ́ɛ bǐ. Énɛ́ ɔ́, yě ná zé hwǐ yětɔn lɛ́ɛ dó tun alǐn ná, bó ná zé gǎ yětɔn lɛ́ɛ dó tun aɖǎ ná. Akɔta ɖě sɔ́ ná tɔ́n ahwan ɖě ǎ. Mɛ ɖé sɔ́ ná kplɔ́n lě e è nɔ fun ahwan gbɔn é ǎ. Jakɔ́bu ví lɛ́ɛ mi! Mi wá mǐ ní ɖi zɔnlin ɖo Mawu Mavɔmavɔ sín wěziza nu. Mawu Mavɔmavɔ, a jǒ togun towe Jakɔ́bu ví lɛ́ɛ dó, ɖó nǔkantɔ́ zǎnzǎnhwe jí tɔn lɛ́ɛ ɖo yě mɛ kpɔ́ gégé; yě nɔ́ bló majíki Filisitɛ́ɛn lɛ́ɛ ɖɔhun, bó nɔ́ dó toɖévomɛnu lɛ́ɛ sín gbɛ̌. Kpatágan kpó siká kpó ɖo to yětɔn mɛ kpɔ́ gégé, dɔkun ɖo yě sí bó vɛ́ jlɛ́, sɔ́ ɖo to yětɔn mɛ kpɔ́ gégé, ahwankɛkɛ́ví e ɖo yě sí lɛ́ɛ ɔ́, è sixú xa ǎ. Mɔ̌ ɖokpó ɔ́, vodún wɛ gɔ́ to yětɔn; yě nɔ́ ɖe kɔ́ nú nǔ e yě ɖésúnɔ bló lɛ́ɛ, nǔ e yě ɖésúnɔ zé alɔ yětɔn dó bló lɛ́ɛ wɛ yě nɔ́ sɛn. Énɛ́ ɔ́, yě j'ayǐ, yě sɔ́ yěɖée xo kɔ́. Mawu, ma sɔ́ hwɛ kɛ yě ó. Mi hɔn hwlá cí só lɛ́ɛ glɔ́, mi byɔ́ kɔ́ glɔ́ bó ná hɔn nú xɛsi e dó mi wɛ Mawu Mavɔmavɔ ɖe é, bó ná hɔn nú susu tɔn e nɔ kɔ́n lánlánlán é. Mɛ e nɔ́ ɖo éɖée mɔ wɛ ɔ́, è nǎ sɔ́ ɛ hwe, mɛ e nɔ ɖo go yí wɛ ɔ́ ná ɖu winnyá. Mawu Mavɔmavɔ kɛ́ɖɛ́ wɛ è nǎ sɔ́ su gbe énɛ́ gbe. Mawu Mavɔmavɔ Nǔbǐwúkpétɔ́ ɔ́ zé azǎn ɖokpó ɖó te, bó ná ɖó hwɛ nú mɛ e nɔ mɔ éɖée é, mɛ e nɔ yí go é, mɛ e nɔ zé éɖée su é bó ná sɔ́ ɛ hwe. Mawu Mavɔmavɔ ná ɖó hwɛ nú sɛ́dlutín Libáan tɔn e yi jǐ hú atín bǐ lɛ́ɛ. É ná ɖó hwɛ nú cɛ́nitín Basáni tɔn lɛ́ɛ bǐ. É na ɖó hwɛ nú só ɖaxó ɖaxó lɛ́ɛ; é ná ɖó hwɛ nú só kpɛví kpɛví lɛ́ɛ bǐ. Mawu Mavɔmavɔ ná ɖó hwɛ nú kpe gaga e jí mɛcɔ́tɔ́ lɛ́ɛ nɔ́ nɔ lɛ́ɛ bǐ. É ná ɖó hwɛ nú ahohó e è ma sixú fán ǎ lɛ́ɛ bǐ. É ná ɖó hwɛ nú tɔjíhún ɖaxó ɖaxó lɛ́ɛ bǐ, bó ná ɖó hwɛ nú tɔjíhún ɖɛkpɛ ɖɛkpɛ lɛ́ɛ bǐ. Mɛ e nɔ mɔ éɖée ɔ́, è nǎ sɔ́ ɛ hwe, mɛ e nɔ yí go ɔ́ ná ɖu winnyá. Mawu Mavɔmavɔ kɛ́ɖɛ́ wɛ è nǎ sɔ́ su gbe énɛ́ gbe. Vodún lɛ́ɛ bǐ ná sú kún dó. Hwenu e Mawu Mavɔmavɔ ná sí te bó dó xɛsi gbɛ ɔ́ é ɔ́, è nǎ byɔ́ sóxo mɛ, è nǎ byɔ́ do mɛ ɖo kɔ́ glɔ́ bó ná yi do bǐ, bó ná hɔn nú xɛsi e dó mɛ wɛ é ɖe é, bó ná hɔn nú susu tɔn e nɔ kɔ́n lánlánlán é. Gbe énɛ́ gbe ɔ́, gbɛtɔ́ lɛ́ɛ ná bɛ́ vodún e yě zé kpatágan abǐ siká dó bló, bó nɔ́ sɛn lɛ́ɛ nyi dó acú lɛ́ɛ kpó afluiflui lɛ́ɛ kpó. Hwenu e Mawu Mavɔmavɔ ná sí te bó ná dó xɛsi gbɛ ɔ́ é ɔ́, è nǎ byɔ́ só vla lɛ́ɛ mɛ, è nǎ byɔ́ sónu lɛ́ɛ mɛ, bó ná hɔn nú xɛsi e dó mɛ wɛ Mawu Mavɔmavɔ ɖe é, bó ná hɔn nú susu tɔn e nɔ kɔ́n lánlánlán é. Mi ma ɖó gbɛ nú gbɛtɔ́ ó, gbɛ tɔn ɔ́, funfún kpowun wɛ. Gbɛtɔ́ nyí nǔɖé ǎ. Mi kpɔ́n! Aklúnɔ, Mawu Mavɔmavɔ Nǔbǐwúkpétɔ́ ɔ́ ɖo nǔɖuɖu kpó sin kpó ná yí sín nu nú Jeluzalɛ́mu toxo wɛ; é ɖo nǔɖuɖu kpó sin kpó ná yí sín nu nú axɔ́súɖuto Judáa tɔn wɛ. É ná yí nǔ e wú yě nɔ́ gán jɛ lɛ́ɛ bǐ sín yě sí: é ná yí ahwanfuntɔ́ syɛ́nsyɛ́n kpó ahwanfuntɔ́ kpaa kpó sín yě sí, é ná yí hwɛɖɔtɔ́ kpó gbeyíɖɔ tɔn kpó sín yě sí, é ná yí nǔkantɔ́ kpó tomɛxó kpó sín yě sí, é ná yí ahwangán kpó tonukún kpó sín yě sí, é ná yí azaglɔ́gán kpó majíkiblótɔ́ kpó, kpódó azěgán kpó sín yě sí. Mawu ɖɔ: “Un ná cyán yɔkpɔ́vú lɛ́ɛ ɖó yě nu, bɔ yě ná kpa acɛ nú yě lě e jló yě gbɔn é.” Mɛ ɖé gbo mɛɖé ɖo togun ɔ́ mɛ ɔ́, é ná nɔ́ táfú, mɛ ɖokpó ɖokpó ná nɔ́ táfú nɔzo tɔn, yɔkpɔ́vú ná nɔ́ kpɔ́n mɛxó nukún mɛ, bɔ mɛ ma nyí mɛɖé ná nɔ́ kpɔ́n mɛjɔmɛ nukún mɛ. Mɛ ɖě ná yi daá tɔn xwé, bó ná ɖɔ nú nɔví tɔn ɖě ɖɔ: “Hwɛ ɔ́, awu gaga ɖaxó ɖokpó kpo ɖo hwɛ sí, wǎ nyǐ gǎn ɖo mǐ nu, kpa acɛ nú nǔ élɔ́ lɛ́ɛ e ɖo gblěgblé wɛ lɛ́ɛ.” Nɔví tɔn ɔ́ ká ná sú xó bó ɖɔ: “Un sixú kpé nǔ ɖěbǔ wǔ bó wa nú mi ǎ, un ɖó nǔɖuɖu ǎ, un ɖó awu ǎ. Mi ma sɔ́ gǎn mì ó.” Jeluzalɛ́mu klɛ́n afɔ, Judáa jɛ ayǐ; yě nɔ́ fɔ́n gǔ dó susu Mawu Mavɔmavɔ tɔn jí, gbɔn xóɖiɖɔ mɛ, gbɔn nǔwiwa mɛ. Gbɛtɔ́ jí e yě nɔ́ nɔ ɔ́ wɛ ɖe xlɛ́ ɖɔ yě ɖo nǔ wa nyi do wɛ. Sodɔ́munu lɛ́ɛ ɖɔhun wɛ yě ɖe, yě ja nǔ nyanya e yě nɔ́ dó sin lɛ́ɛ ɖɔ dó to gbé ɔ́, é nɔ́ nyí nǔɖé nú yě ǎ. Heelú yě! Yěɖée nú wa wɛ yě ɖe. Mi hɛn ɔ́, mi ná ɖɔ: nǔ bǐ nɔ́ yi linsinlinsin nú nǔjlɔ́jlɔ́watɔ́ lɛ́ɛ. Nǔ e yě wa ɔ́, yě nɔ́ ɖu. Amɔ̌, heelú adǎkaxotɔ́ lɛ́ɛ! Nǔɖé nɔ́ nyɔ́ nú yě ǎ, nǔ e yě nɔ́ wa ɔ́ sín bǎ wɛ nɔ xo yě. Mawu ɖɔ: “Áo togun ce! Yɔkpɔ́vú kpɛví kpɛví ɖé lɛ́ɛ wɛ ɖo acɛ kpa nú we wɛ; nyɔ̌nu lɛ́ɛ wɛ ɖo gǎn ɖu wɛ. Áo togun ce! Nukɔntɔ́ towe lɛ́ɛ nɔ́ ɖo dindɔn we bú wɛ. Fí e kplá we yi wɛ yě ɖe ɔ́ nyɔ́ ǎ.” Mawu Mavɔmavɔ ja hwɛ ɖɔ xá togun lɛ́ɛ gbé, é ɖo te, bó ná ɖó hwɛ nú togun lɛ́ɛ. É dó hwɛ tomɛxó e ɖo togun tɔn mɛ lɛ́ɛ kpó gǎn e ɖo togun tɔn nu lɛ́ɛ kpó ɖɔ: “Mi wɛ hɛn vǐwuntín lɛ́ɛ gblé. Wamamɔnɔ lɛ́ɛ sín nǔ e mi fin lɛ́ɛ ɖo xwé mitɔn lɛ́ɛ gbe. Acɛ tɛ́ mi ka ɖó bó ɖo togun ce gbídí ɖó afɔ wú wɛ, bó ɖo asú fán wamamɔnɔ lɛ́ɛ wɛ?” Xó e Aklúnɔ, Mawu Mavɔmavɔ Nǔbǐwúkpétɔ́ ɔ́ kanbyɔ́ yě ɔ́ nɛ́. Mawu Mavɔmavɔ ɖɔ: “Nyɔ̌nu Jeluzalɛ́mu tɔn lɛ́ɛ nɔ mɔ yěɖée dódó; yě ɖo yiyi wɛ ɔ́, yě nɔ́ ɖo kɔ xo wɛ, bó nɔ́ ɖo nukún bló nú mɛ wɛ; bó nɔ́ ɖo afɔ kpɔ́n ɖe wɛ dɛ̌dɛ̌ dɛ̌dɛ̌, bó nɔ́ ɖo gan e yě dó afɔ lɛ́ɛ xúxú wɛ.” Énɛ́ ɔ́ wú wɛ Aklúnɔ ná mɔ́ ta nú yě, bó ná ɖe yě nyi mɛ̌. Gbe énɛ́ gbe ɔ́, Aklúnɔ ná ɖe nǔ e yě nɔ́ dó ba acɔ́ ná lɛ́ɛ bǐ sín yě wǔ: gan e yě nɔ́ dó afɔgókɔ lɛ́ɛ, ɖɔ e yě nɔ́ dó hɛn ɖa ná é, tógbé e nɔ cí sun wá jǐ ɖɔhun lɛ́ɛ, tógbé lɛ́ɛ, alɔgan lɛ́ɛ, sɛ́da e yě nɔ́ cyɔ́n ta é, tablá lɛ́ɛ, wlɔ e yě nɔ́ dó afɔ lɛ́ɛ, anyǔkan lɛ́ɛ, tíla lɛ́ɛ, bǒ lɛ́ɛ, alɔkɛ́ lɛ́ɛ, ganví e yě nɔ́ dó awɔntín lɛ́ɛ, awu ɖagbe ɖagbe lɛ́ɛ, awu gaga lɛ́ɛ, tablánú lɛ́ɛ, alɔnuglo lɛ́ɛ, wěkpɛ́n lɛ́ɛ, awu fɛ́ɖɛ́fɛ́ɖɛ́ lɛ́ɛ, avɔxwɛ e yě nɔ́ lɛ́ dó ta é, dǔkwi e yě nɔ́ zé nyi kɔlivla mɛ é. Nǔ énɛ́ lɛ́ɛ bǐ wɛ Mawu Mavɔmavɔ ná yí sín yě sí. Hwe énɛ́ ɔ́ nu ɔ́, nǔ e lun wǎn é wɛ ná nɔ célu tɛn mɛ, kan wɛ ná nɔ anyǔkan tɛn mɛ. Ta xwlɛ́xwlɛ́ wɛ è nǎ mɔ ɖo ɖa bláblá ɖagbe ɖagbe tɛn mɛ, ati wɛ ná nɔ akwɛ́núvɔ tɛn mɛ, wuntun e è nǎ sɔ́ gan dó ɖó yě ɔ́ wɛ ná nɔ ɖɛkpɛ tɛn mɛ nú yě. Jeluzalɛ́mu, súnnu e ɖo toxo towe mɛ lɛ́ɛ ná kú ɖo ahwangbénu, sɔ́ja towe lɛ́ɛ ná cí ahwan. Énɛ́ ɔ́, mɛ e ɖo toxo ɔ́ mɛ lɛ́ɛ bǐ ná sa vo, bó ná ya gbɛvíhan. Toxo ɔ́ ná cí nyɔ̌nu e nǔ tɔn bǐ dɔn, bɔ é jínjɔ́n kɔ́ mɛ é ɖɔhun. Hwenɛ́nu ɔ́, nyɔ̌nu tɛ́nwe ná jɛ kɔ nú súnnu ɖokpó géé, bó ná ɖɔ n'i ɖɔ: “Mǐ nǎ nɔ́ ná nǔɖuɖu mǐɖée, mǐ nǎ nɔ́ xɔ avɔ nú mǐɖée; vɛ̌ kó nyí asú nú mǐ bó ɖe winnyá nú mǐ kpowun.” Ayǐ ɖokpó ná hɔ́n, bɔ nǔ e Mawu Mavɔmavɔ ná nyí tɔn bɔ é ná wú ɖo to ɔ́ mɛ ɔ́, ná nyí wi kpó susu kpó nú mɛ e kpo ɖo gbɛ ɖo Jeluzalɛ́mu lɛ́ɛ. Sínsɛ́n e ná tɔ́n ɖo to ɔ́ mɛ lɛ́ɛ ná sɔ́ yě su, bó ná wlí yɛ̌yi nú yě. Énɛ́ ɔ́, mɛ e kpo ɖo Jeluzalɛ́mu lɛ́ɛ ɔ́, mɛ e kpo ɖo gbɛ ɖo Sinyɔ́ɔ lɛ́ɛ ɔ́, è nǎ nɔ́ ylɔ́ yě ɖɔ: “Mɛɖeɖóvo Mawu tɔn.” Yě mɛ énɛ́ lɛ́ɛ wɛ nyí mɛ e Mawu wlán nyǐkɔ yětɔn, bɔ yě ná nɔ gbɛ ɖo Jeluzalɛ́mu lɛ́ɛ é. Aklúnɔ ná sɛ́ hwɛjijɔ kpó wǔsláslá kpó sín jɔhɔn dó. É ná klɔ́ nǔ kwíji sín Jeluzalɛ́mu nyɔ̌nu lɛ́ɛ wú, é ná klɔ́ kanjɔ e Sinyɔ́ɔnu lɛ́ɛ kɔn nyi ayǐ ɖo to ɔ́ mɛ é sín yě wú. Kéze ɔ́, Mawu Mavɔmavɔ ná bló akpɔ́kpɔ́ ɖó Sinyɔ́ɔ só ɔ́ bǐ ta nu, bó ná bló ɖó mɛ e kplé ɖo Sinyɔ́ɔ só ɔ́ jí é bǐ ta nu; é su zǎn mɛ ɔ́, é ná bló myɔ kpó azizɔ kpó ɖó ta yětɔn nu. Mawu Mavɔmavɔ ná nyí goxɔ ɖaxó ɖé ɖo nǔ e nɔ ná susu Jeluzalɛ́mu lɛ́ɛ é bǐ ta nu. É ná nyí azava bó ná nɔ́ ná yɛtɛn hwesivɔ́ mɛ, bónú jǐ ɖo jija wɛ ɔ́, è nǎ nɔ́ bɛ yɛ ɖo fínɛ́; jɔhɔn ɖo nyinyi wɛ ɔ́, è nǎ nɔ́ bɛ yɛ ɖo fínɛ́. Un ná ji han dó mlá xɔ́ntɔn ce ná; han ɔ́ ɖɔ xó dó xɔ́ntɔn ce kpó vǐwungbo tɔn kpó wú. Xɔ́ntɔn ce ɖó vǐwungbo ɖokpó; vǐwungbo ɔ́ ɖo kpó ɖé jí, nǔkún nɔ́ nyɔ́ ganjí ɖo kpó ɔ́ jí. Xɔ́ntɔn ce lɛ gle ɔ́, bó cyán awǐnnyaglo sín gle ɔ́ mɛ. É tun vǐwuntín e nyɔ́ ganjí ɔ́ ɖ'é jí, é bló atɔxwɛ ɖokpó ɖó gle ɔ́ tɛ́ntin, bó kun do e mɛ è nɔ li vǐwun ɖe ɔ́ ɖokpó. É ɖo nukún ɖó wɛ ɖɔ vǐwungle émítɔn ná ná sínsɛ́n ɖagbe, lo ɔ́, é ná sínsɛ́n ɖagbe ɖěbǔ ǎ. Énɛ́ ɔ́, xɔ́ntɔn ce ɖɔ: “Din ɔ́, mi mɛ e nɔ́ nɔ Jeluzalɛ́mu lɛ́ɛ, mi mɛ Judáanu lɛ́ɛ ɔ́, mi wɛ ná gbo hwɛ nú nyi kpó vǐwungle ce kpó. Étɛ́ ká kpo bɔ un ɖó ná bló nú vǐwungle ce bó má kó bló ǎ? Étɛ́wú wɛ hwenu e un ɖó nukún ɖɔ é ná ná sínsɛ́n ɖagbe ɔ́, é sɛ́n sínsɛ́n gblégblé ɖé lɛ́ɛ? Étɛ́wú ká wɛ? Din ɔ́, un ná ɖɔ nǔ e un ná wa xá vǐwungle ce ɔ́ nú mi: un ná hɔn kpá e un dó lɛ́ lɛ̌ dó é, bɔ kanlin lɛ́ɛ ná ɖu. Un ná mu dǒ e un mɛ lɛ́ lɛ̌ dó é, bɔ aligbɔntɔ́ lɛ́ɛ ná gbídí i. Un ná jó e dó bɔ bǐ ná nyí gběhan; mɛɖé ná xwa ǎ, mɛɖé ná kpé nukún d'é wú ǎ, wunkan ná vun blá ɛ bǐ; un ná gbɛ́, bɔ akpɔ́kpɔ́ ɖěbǔ ná ɖó, bɔ jǐ ná ja d'é jí ǎ.” Mawu Mavɔmavɔ Nǔbǐwúkpétɔ́ ɔ́ sín vǐwungle ɔ́, akɔta Izlayɛ́li tɔn wɛ. Vǐwuntín e nyɔ́ nukún tɔn mɛ ɖésú ɔ́, Judáa togun ɔ́ wɛ. Mawu Mavɔmavɔ ɖó nukún yě ɖɔ yě ná nɔ nyi sɛ́n, lo ɔ́, sɛ́n wɛ yě nɔ́ gba; Mawu Mavɔmavɔ ɖó nukún yě ɖɔ yě ná nɔ́ xwedó hwɛjijɔ, lo ɔ́, alě e ná wɛ mɛ e táfú wɛ yě ɖe lɛ́ɛ kɛ́ɖɛ́ wɛ è nɔ́ se. Heelú yě mɛ e nɔ ɖo xwé sá dó xwé jí wɛ, bó nɔ́ ɖo gle kán dó gle jí wɛ, káká bó nɔ́ yí tɛn lɛ́ɛ bǐ, bɔ yě ɖokpónɔ nɔ́ nɔ to ɔ́ mɛ lɛ́ɛ. Mawu Mavɔmavɔ Nǔbǐwúkpétɔ́ ɔ́ zin alɔ dó akɔ́n bó ɖɔ nú mì ɖɔ: “Xwé tobutóbú énɛ́ lɛ́ɛ bǐ ná gba dandan; xɔ ɖaxó ɖaxó ɖagbe ɖagbe énɛ́ lɛ́ɛ bǐ ná jɛ vɔ̌; mɛ ɖěbǔ ná nɔ xɔ énɛ́ lɛ́ɛ mɛ ǎ. È zě vǐwungle ɛtáa atɔn ɖó te ɔ́, é ná ná vɛ̌ɛn lǐtli kanɖé wǒ (50) ǎ. Mɛ ɖé dó blěe kilóo kanwe ko (100) ɔ́, kilóo wǒ jɛ́n é ná ya.” Heelú mɛ e nɔ fɔ́n zǎn dó ahan syɛ́nsyɛ́n wú, bó nɔ́ ɖo vɛ̌ɛn nu wɛ káká bɔ zǎn nɔ sɛ yi lɛ́ɛ. Yě nɔ́ nu ahan mú, bó nɔ́ dó hǔn gbe, bó nɔ́ j'awǎ; yě nɔ́ xo kanhún, bó nɔ́ xo gbǎhún, yě nɔ́ kún kpete. Lo ɔ́, yě nɔ́ tunwun ɖɔ Mawu Mavɔmavɔ ɖo azɔ̌ wa wɛ ǎ; yě nɔ́ mɔ azɔ̌ e wa wɛ é ɖe ɔ́ ǎ. Énɛ́ ɔ́ wú wɛ Mawu ɖɔ: “È nǎ wlí togun ce yi to ɖěvo mɛ, ɖó yě tunwun nǔ e wa wɛ un ɖe é ǎ. Tonukún lɛ́ɛ ná kú adɔ. Toví tɔn lɛ́ɛ bǐ ná kú bo.” Énɛ́ ɔ́ wú ɔ́, kú ná hun nu nyi wɛn gblagada, bó ná vlɔ́n vɛ̌go tɔn; gǎn kpó ahwanvú kpó e ɖo Jeluzalɛ́mu lɛ́ɛ ná ɖo agɔ̌ ɖu wɛ mɔ̌ bó ná jɛ mɛ. Énɛ́ ɔ́ wú wɛ gbɛtɔ́ lɛ́ɛ bǐ ɖó ná jɛ kpo bó dó nu do. Gbɛtɔ́ e nɔ ɖo kɔ tɛ wɛ ɔ́ ná dó kɔ do. Mawu Mavɔmavɔ Nǔbǐwúkpétɔ́ ɔ́ ná ɖó nǔ wa ɖó sɛ́nxwi jí ayǐ, dó ɖe susu tɔn xlɛ́. Mawu mímɛ́ ɔ́ ná lɛ́ hɛn hwɛjijɔ wá, dó ɖe lě e é nyí mɛ mímɛ́ gbɔn ɔ́ xlɛ́. Gbɔ̌ lɛ́ɛ ná wá ɖu ama ɖo nǔ e gúdú ɖo toxo ɔ́ mɛ lɛ́ɛ mɛ, amagbo mɛ wɛ yě ɖe ɖɔhun, gbɔ̌ví e è ɖo nǔɖuɖu ná wɛ ganjí lɛ́ɛ lɔ ná wá ba nǔɖuɖu yětɔn ɖo fínɛ́. Heelú yě mɛ e nɔ sɔ́ adingban dó ɖó kan lɛ́ɛ, adingban nyí kan, bɔ yě nɔ́ dó dɔn hwɛhuhu kpó nǔwanyido kpó. Yě nɔ́ ɖɔ: “Nǔ e Mawu Mavɔmavɔ ɖo nǎ wa wɛ ɔ́, é ní yá wǔ bló nú mǐ ná kpɔ́n. Nǔ ɔ́ ní yá wǔ jɛ nú mǐ ná kpɔ́n. Nǔ e bló gbé Mɛ mímɛ́ Izlayɛ́li tɔn ja ɔ́, ní bló. Mǐ jló ná tunwun nǔ e bló gbé é ja é.” Heelú yě mɛ e nɔ ylɔ́ nǔ nyanya ɖɔ nǔ ɖagbe, bó nɔ́ ylɔ́ nǔ ɖagbe ɖɔ nǔ nyanya lɛ́ɛ é! Yě mɛ e nɔ zé zǐnflú dó ɖó wěziza, bó nɔ́ zé wěziza dó ɖó zǐnflú lɛ́ɛ é. Yě mɛ e nɔ zé nǔ e vlɛ́ ɔ́ dó ɖó nǔ víví, bó nɔ́ zé nǔ e víví ɔ́ dó ɖó nǔ e vlɛ́ lɛ́ɛ é. Heelú yě mɛ énɛ́ lɛ́ɛ e nɔ́ mɔ yěɖée dó mɔ nǔnywɛ́tɔ́, bó nɔ́ ɖɔ émí bí lɛ́ɛ. Heelú yě mɛ e mɛɖé má nɔ́ nu ahan hú ǎ lɛ́ɛ é, yě mɛ e nyɔ́ ahan syɛ́nsyɛ́n tɛnmɛ tɛnmɛ cáká hú mɛ bǐ lɛ́ɛ é! Yě nɔ́ yí nǔ ɖu ɖo mɛ e kú hwɛ ɔ́ sí, bó nɔ́ ɖɔ hwɛ tɔn nyɔ́; xomɛvɔ́nɔ ná bo nyɔ́ hwɛ ɔ́, yě nɔ́ kpɔ́n énɛ́ ǎ. Énɛ́ ɔ́ wú ɔ́, yě ná cí nǔywɛ́ e myɔ ɖíɖɔ́ é ɖɔhun, yě ná cí gběhan xúxú e ji kɛn ɖo myɔ mɛ é ɖɔhun; yě ná nyɔ dó ɖɔ, bɔ jɔhɔn ná d'alɔ folówa yětɔn mɛ afúntúntún ɖɔhun, ɖó yě hɔn Mawu Mavɔmavɔ Nǔbǐwúkpétɔ́ ɔ́ sín sɛ́n nyi gbě, yě gbɛ́ wǎn nú Mɛ Mímɛ́ Izlayɛ́li tɔn ɔ́ sín xó. Énɛ́ ɔ́ wú wɛ Mawu Mavɔmavɔ sin xomɛ ɖaxó ɖé dó togun tɔn. É dlɛ́n alɔ bó dó nǔ i. Só lɛ́ɛ dán wǔ, cyɔ gbɔn ali jí ali jí zunkɔ́ ɖɔhun. Énɛ́ ká kó fá xomɛ nú Mavɔmavɔ ǎ, alɔ tɔn kpo ɖo dlɛ̌ndlɛ́n. Mawu Mavɔmavɔ zé ahwansyá dó jǐ nú togun e ɖo zɔ é; é kún kwín, bó ná dó ylɔ́ ɛ sín fí e gbɛ ɔ́ kponu ɖó é. É ɖíe fyá jǎwe e! Mɛ ɖěbǔ ɖo togun énɛ́ mɛ bɔ nǔ cikɔ n'i ǎ, mɛ ɖěbǔ sɛ afɔ dó ayǐ ǎ, mɛ ɖěbǔ sa kɔmlɔgɔ́ ǎ, mɛ ɖěbǔ dɔ́ amlɔ ǎ; gǒjíblánú mɛ ɖěbǔ tɔn tún ǎ, afɔkpakan mɛ ɖěbǔ tɔn wɛ́n ǎ. Gǎ yětɔn lɛ́ɛ ɖá nu káká, da yětɔn bǐ ɖo dlɛ̌ndlɛ́n, sɔ́ yětɔn lɛ́ɛ sín afɔ xú káká, è nǎ ɖɔ awǐnnya wɛ; kɛkɛ́ví yětɔn lɛ́ɛ sín afɔ ɖo lǐlɛ́lílɛ́ wɛ, bɔ a nǎ ɖɔ axásáxásá jɔhɔn wɛ. Yě nɔ́ dó gbe kinnikínní ɖɔhun, yě nɔ́ dó gbe kinnikínníví lɛ́ɛ ɖɔhun, yě nɔ́ ɖo adǎn jí; yě zɔn kanlin e ná ɖu wɛ yě ɖe ɔ́ jí, bó zé yi bɔ mɛ ɖěbǔ sixú yí sín yě sí ǎ. Gbe énɛ́ gbe ɔ́, jǐ ná dó gbe dó Izlayɛ́li togun ɔ́ jí xu ɖo adǎn jí ɖɔhun; ablu gɔngɔn ná gɔ́ to ɔ́ bǐ, bɔ è kpɔ́n to ɔ́ lě ɔ́, è sɔ́ ná mɔ nǔ ɖěbǔ hú mɔ̌ ǎ. Akpɔ́kpɔ́ ɖaxó ɖé ná cyɔ́n hwe e tɔ́n é, bɔ fí bǐ ná dó zǐnflú. Xwe e xwe axɔ́sú Oziyási zán kú ɔ́, un mɔ nǔ, bó mɔ Aklúnɔ ɖo ayǐjínjɔ́n axɔ́súzinkpo tɔn jí; axɔ́súzinkpo ɔ́ yi jǐ káká. Awu tɔn sín tó gɔ́ sinsɛnxɔ ɔ́. Wɛnsagun akpé ɖé lɛ́ɛ ɖo ta tɔn nu. Wɛnsagun lɛ́ɛ ɖokpó ɖokpó ɖó awa ayizɛ́n: Yě cyɔ́n awa we nukún mɛ, bó blá we dó wǔ, bó nɔ́ sɔ́ we dó zɔn. Yě nɔ́ sú xó sɛ́ dó yěɖée ɖɔ: “ Mǐmɛ́! Mǐmɛ́! Mǐmɛ́ wɛ Mawu Mavɔmavɔ Nǔbǐwúkpétɔ́ ɔ́ nyí. Susu tɔn gɔ́ gbɛ ɔ́ bǐ.” Gbe yětɔn nɔ́ húnhún hɔnkpo lɛ́ɛ, bɔ azizɔ nɔ gɔ́ xwé ɔ́. Énɛ́ ɔ́, un ɖɔ: “Yéége gbɛ ce vɔ! Đó nu ce mɛ́ ǎ, togun e mɛ un jɔ ɖe ɔ́ lɔ sín nu mɛ́ ǎ, nyi ɖíe ka mɔ axɔ́sú Mawu Mavɔmavɔ Nǔbǐwúkpétɔ́ ɔ́ ɖó nukún wú e!” Ée un ɖo mɔ̌ ɖɔ wɛ ɔ́, wɛnsagun akpé lɛ́ɛ ɖokpó sɔ́ bɛ̌kpa dó sɔ́ myɔkán ɖokpó ɖo vɔ̌sákpe ɔ́ jí, bó zɔn wá gɔ̌n ce. É sɔ́ myɔkán ɔ́ sɔ́ nu ce bó ɖɔ: “Ée myɔkán élɔ́ jɛ nu towe wú din ɔ́, Mawu ɖe nǔ nyanya e a wa lɛ́ɛ sín kɔ nú we, bó súnsún hwɛ towe lɛ́ɛ sín kɔ nú we.” Énɛ́ ɔ́, un se Aklúnɔ ɖo kinkanbyɔ́ wɛ ɖɔ: “Mɛ̌ un ka ná sɛ́ dó? Mɛ̌ ka ná nyí gbeyíɖɔ mǐtɔn?” Bɔ un yí gbe n'i ɖɔ: “Nyɛ ná yi, sɛ́ mì dó.” Ée un ɖɔ mɔ̌ ɔ́, Aklúnɔ lɛ́ ɖɔ: “Yi ɖɔ nú togun énɛ́ ɖɔ: ‘Mi ná se céɖécéɖé, mi ka ná mɔ nǔ jɛ mɛ ǎ; mi na mɔ ganjí, có mi ka na mɔ ǎ.’ Blǒ bónú ayixa yětɔn ní syɛ́n, yě nǐ tlí tó bó tɔ́n nukún; ma lɔn nú nukún yětɔn mɔ nǔ ó, ma lɔn nú tó yětɔn se nǔ ó, ma lɔn nú ayixa yětɔn mɔ nǔ ó; é má nyí mɔ̌ ǎ ɔ́, yě táá lɛ́ kɔ́ wá gɔ̌n ce, bónú azɔn yětɔn ná gbɔ.” Ée Aklúnɔ ɖɔ mɔ̌ ɔ́, un kanbyɔ́ ɛ ɖɔ: “Aklúnɔ, hwetɛ́nu é ná fó dó?” Bɔ é yí gbe nú mì ɖɔ: “Nǔ ná nɔ mɔ̌ káká jɛ hwenu e toxo lɛ́ɛ bǐ ná gba bó jɛ vɔ̌, bɔ xwé lɛ́ɛ bǐ ná jɛ vɔ̌, lobɔ to ɔ́ bǐ ná húzú gbětótló é.” Mawu Mavɔmavɔ ná sɛ́ to ɔ́ mɛ nu lɛ́ɛ dó fí ɖěvo, bɔ è nǎ jó gle gěgé dó. Ényí mɛ e ɖo to ɔ́ mɛ lɛ́ɛ vlɔ̌ɖówǒ kpo ɖo to ɔ́ mɛ ɔ́, mɛ énɛ́ lɛ́ɛ ná ji zo. Amɔ̌, lě e è nɔ gbo telebɛ́ntitín abǐ cɛ́nitín, bɔ ta tɔn nɔ kpo ɖo do mɛ ɔ́, mɛ ywɛywɛ e ná kpo ɖo togun ɔ́ mɛ ɔ́ ná dó kún mímɛ́. Axɔ́sú Judáa tɔn Akázi e nyí Yotámu ví, bó nyí Oziyási vívú ɔ́ sín hwenu wɛ axɔ́sú Silíi tɔn Hlesini kpódó axɔ́sú Izlayɛ́li tɔn Pekáxi Hlemaliyahu ví ɔ́ kpó ɖidó ahwan tɔ́n Jeluzalɛ́mu toxo ɔ́ gbé; lo ɔ́, yě kpé wú bó tɔ́n ahwan ɛ ǎ. È yi ɖɔ nú Akázi, Davídi ví ɔ́, é kpódó mɛ e ɖo xwé tɔn gbe lɛ́ɛ kpó ɖɔ Silíinu lɛ́ɛ ɖó gɔnu ɖó Eflayímu yíkúngban jí. Xó énɛ́ e axɔ́sú ɔ́ kpó togun ɔ́ kpó se ɔ́ dán yě, lě e jɔhɔn nɔ dán atín e ɖo zungbó mɛ é ɖɔhun. Énɛ́ ɔ́, Mawu Mavɔmavɔ ɖɔ nú Ezayíi ɖɔ: “Kplá vǐ towe Cea-Yacúvu bó yi mɔ Akázi. É ɖo ali e è nɔ gbɔn yi Avɔnyatɔ́ lɛ́ɛ gle mɛ ɔ́ jí, ɖo fí e ali e è ɖe nú sin e nɔ gosín sindo e ɖo só ta é mɛ ɔ́ fó dó é. A mɔ ɛ ɔ́, a nǎ ɖɔ n'i ɖɔ: ‘Đǒ ayi te, ma dán jojo ó, ma ɖi xɛsi ó, ma nú xomɛsin e jí Silíi xɔ́sú Hlesini kpó nyaví Hlemaliyahu ví ɔ́ kpó ɖe ɔ́ ɖó adohu nú we ó. Myɔtín wɛ nú yě mɛ we énɛ́ lɛ́ɛ, bɔ yě ɖo azɔ si wɛ kpowun. Un tunwun ganjí ɖɔ Silíinu lɛ́ɛ kpó nyaví Hlemaliyahu ví ɔ́ kpó, kpódó yě mɛ e ɖó gɔnu ɖó Eflayímu lɛ́ɛ kpó, ɖo gbě towe blá wɛ bɔ é syɛ́n ɖésú.’ Yě ɖɔ: ‘Mi wá mǐ ní yi tɔ́n ahwan Judáa to ɔ́! Mi nú mǐ nǎ dó xɛsi i; mi nú mǐ nǎ dɔn ɛ byɔ́ gbɛ̌ mǐtɔn mɛ gǎnnugǎnnu. Mi nú mǐ ná zé Tavéyɛ́lu ví ɔ́ axɔ́sú ɖó do tɔn mɛ.’ Lo ɔ́, xó e Aklúnɔ Mavɔmavɔ ɖɔ é ɖíe: ‘Nǔ sixú nyí mɔ̌ ǎ. Nǔ mɔ̌hun ná jɛ ǎ. Mawu Mavɔmavɔ lɛ́ ɖɔ nú Akázi ɖɔ: “Byɔ̌ Mawu Mavɔmavɔ, Mawu towe ɖɔ é ní ná xlɛ̌ ɖé émí. Byɔ̌ ɛ! Xlɛ̌ ɔ́ sixú gosín kútomɛ, é sixú gosín sɛ́xwé.” Lo ɔ́, Akázi ɖɔ: “Éeǒ, un ná byɔ́ nǔ ɖěbǔ ǎ, un jló ná tɛ́n Mawu Mavɔmavɔ kpɔ́n ǎ.” Bɔ Ezayíi ɖɔ n'i ɖɔ: “Hwi kpó hɛ̌nnu towe kpó ní ɖótó mì. Davídi ví lɛ́ɛ mi, mi ɖótó mì! Nǔ e dó sin wɛ mi ɖe káká bɔ é kpé kɔ nú gbɛtɔ́ lɛ́ɛ é víví hwe dó mi, bɔ mi ná ɖ'é wú káká bɔ é ná kpé kɔ nú Mawu ce wɛ a? Din ɔ́, Aklúnɔ ɖésú ɖo xlɛ̌ ɖokpó ná mi wɛ: Éɖíe, ɖyɔ̌vǐ ɔ́ ná mɔ xo, bó ná ji vǐ súnnu ɖokpó. É ná sun nyǐ vǐ ɔ́ ɖɔ Emanuwɛ́li, ‘Mawu ɖo kpɔ́ xá mǐ.’ Vǐ ɔ́ ná ɖo amɔ̌ kpó wǐin kpó ɖu wɛ káká jɛ hwenu e é ná ɖó xwe e ná tunwun nǔ nyanya ɖo nǔ ɖagbe mɛ é. Cóbónú vǐ súnnuví ɔ́ ná tunwun nǔ nyanya ɖo nǔ ɖagbe mɛ ɔ́, axɔ́sú we e ɖo xɛsi dó nú we lɛ́ɛ ɔ́, mɛ e ɖo to yětɔn lɛ́ɛ mɛ lɛ́ɛ bǐ ná jó to yětɔn lɛ́ɛ dó, bɔ to lɛ́ɛ bǐ ná jɛ vɔ̌. Amɔ̌, hwi kpó togun towe kpó mɛ e ɖo xwé towe gbe lɛ́ɛ kpó ɔ́, Mawu Mavɔmavɔ ná sɛ́ nǔɖé lɛ́ɛ dó mi; nǔ énɛ́ ɖě kó sɔ́ jɛ sín gbe e gbe axɔ́súɖuto Izlayɛ́li tɔn jɛ vo nú axɔ́súɖuto Judáa tɔn é ǎ. Nǔ e axɔ́sú Asilíi tɔn ná wa é wú ɖɔ xó dó wɛ è ɖe mɔ̌.” É ná su gbe ɖokpó, bɔ Mawu Mavɔmavɔ ná kún kwín, bó ná ylɔ́ sukpɔ e ɖo fí e Nilu tɔ ɔ́ yi jɛ xu mɛ ɖe é, bó ná ylɔ́ wǐin e ɖo Asilíi lɛ́ɛ. Sukpɔ lɛ́ɛ bǐ kpó wǐin lɛ́ɛ bǐ kpó ná wá ɖó kɔn nyi dodo hoo lɛ́ɛ mɛ, yě ná ɖó kɔn nyi só xo lɛ́ɛ mɛ, yě ná ɖó kɔn nyi zunkan lɛ́ɛ bǐ mɛ, bó ná ɖó kɔn nyi fí e kanlin lɛ́ɛ nɔ́ ɖu ama ɖe é bǐ. É ná su gbe ɖokpó, bɔ Aklúnɔ ná xáya hǎ ɖokpó sín Efláti tɔ ɔ́ gúdo; é ná sɔ́ hǎ ɔ́ dó xwlɛ́ ta kpó wǔtu kpó atán kpó nú mi bǐ. Axɔ́sú Asilíi tɔn xó ɖɔ wɛ è ɖe mɔ̌. Hwenɛ́nu ɖokpó ɔ́, mɛ e ɖo to ɔ́ mɛ lɛ́ɛ ɖokpó ɖokpó ná nyi nyibú asi ɖokpó kpó gbɔ̌ we kpó; yě ná ná anɔ̌sin káká bɔ è nǎ mɔ amɔ̌ ɖu. Mɛ e ná nɔ to ɔ́ mɛ lɛ́ɛ bǐ ná nɔ ɖu amɔ̌ kpó wǐin kpó. Hwenɛ́nu ɖokpó ɔ́, è nǎ jó gle e mɛ vǐwuntín afatɔ́n (1.000) ɖe, bɔ é ná xɔ akwɛ́gan afatɔ́n (1.000) mɔ̌ é dó, bɔ wun kpó kpɔvɛwun kpó ná vun blá bǐ. È nǎ nɔ́ hɛn da kpó gǎ kpó, bó ná nɔ́ wá nya gbě ɖo fínɛ́; wun kpó kpɔvɛwun kpó wɛ ná vun blá to ɔ́ bǐ. Mɛ ɖěbǔ ná glá yi só kpɛví kpɛví e è nɔ zé alǐn dó lɛ ná é ta ǎ, ɖó è nǎ ɖo wun kpó kpɔvɛwun kpó hɔn ná wɛ; è nǎ jó fí énɛ́ lɛ́ɛ dó nú nyibú lɛ́ɛ kpó gbɔ̌ lɛ́ɛ kpó. Mawu Mavɔmavɔ ɖɔ nú mì ɖɔ: zě tɛ gblogblo ɖokpó bó wlán xó élɔ́ d'é jí ní ɖi wun ganjí: “Dɔkun-jɛ-agba-Zɔnmɛ-bo-bɛ́”. Un zé tɛ ɔ́ xlɛ́ gbɛtɔ́ e wú è hɛn ɔ́, è nǎ ɖeji dó é we: vɔ̌sánú-xwlémawutɔ́ Wuliya kpó Zekaliyahu Yevelɛkiyahu ví ɔ́ kpó, bɔ yě ná nyí kúnnuɖetɔ́ ce. Énɛ́ ɔ́ gúdo ɔ́, un ɖó xó xá asi ce; gbeyíɖɔ Mawu tɔn wɛ. É mɔ xo bó ji vǐ súnnu ɖokpó. Bɔ Mawu Mavɔmavɔ ɖɔ nú mì ɖɔ: “A nǎ sun nyǐ i ɖɔ: ‘Dɔkun-jɛ-agba-Zɔnmɛ-bo-bɛ́’. Đó cóbónú vǐ ɔ́ ná ɖɔ ‘Daá’ abǐ ‘Nǎna’ ɔ́, è nǎ bɛ́ dɔkun e ɖo Damási lɛ́ɛ kpó nǔ e è fun ahwan bó bɛ́ sín Samalíi lɛ́ɛ kpó wá nú Asilíi xɔ́sú ɔ́.” Mawu Mavɔmavɔ lɛ́ ɖɔ nú mì ɖɔ: “Togun élɔ́ gbɛ́ wǎn nú sin Silowée tɔn, sin e nɔ́ sa dɛ̌dɛ̌ sín Silowée tɔ mɛ é, bɔ akɔ jɛ xá Hlesini kpó nyaví Hlemaliyahu ví ɔ́ kpó wɛ nɔ́ hun xomɛ n'i. Énɛ́ ɔ́ wú wɛ un ná sɛ́ axɔ́sú Asilíi tɔn kpó acɛkpikpa tɔn bǐ kpó dó, bɔ yě ná wá tɔ́n ahwan Judáa to ɔ́; yě ná wa adǎn Efláti tɔ ɔ́ wɛ ɖi sin bó gba kpé ɖɔhun. Yě ná húzú sin bó ɖi bú Judáa to ɔ́, bó ná fán ɛ dó káká kɔ; sin ná bú to ɔ́ bǐ. Emanuwɛ́li, sin ná bú ayǐkúngban e ɖo to towe mɛ é bǐ.” Togun lɛ́ɛ mi, mi na bo sɛ miɖée kplé gbɔn ɖěbǔ ɔ́, nǔ baɖabaɖa wɛ ɖo te kpɔ́n mi. Ayi mitɔn ní ɖo te, mi mɛ e ɖo to línlín mɛ lɛ́ɛ. Mi sixú sɔ́ ahwannú gbɔn ɖěbǔ, nǔ baɖabaɖa ɖo te kpɔ́n mi; nǔgbó wɛ, mi sixú sɔ́ ahwannú gbɔn ɖěbǔ; nǔ baɖabaɖa ɖo te kpɔ́n mi. Mi ɖe wě mitɔn lɛ́ɛ ganjí, bǐ wɛ ná gba hánnyá. Mi yi kpá lě e é jló mi gbɔn é, nǔ e mi to é ná nyí wiwa gbeɖé ǎ, ɖó Mawu ɖo kpɔ́ xá mǐ. Mawu Mavɔmavɔ sín hlɔ̌nhlɔ́n wá jǐ ce, bó gbɛ́ nú mì ɖɔ nyi ma wa nǔ togun élɔ́ ɖɔhun ó. Xó e é ɖɔ nú mì ɔ́ ɖíe: “Nǔ e togun élɔ́ nɔ́ ylɔ́ ɖɔ sébláblá ɔ́, mi ma ylɔ́ ɖěbǔ ɖɔ sébláblá ó; mi ná ɖi xɛsi nú nǔ e é nɔ́ ɖi xɛsi ná ɔ́ ǎ. Ado ma hu mi ó.” Mi ná tunwun ganjí ɖɔ Mawu Mavɔmavɔ Nǔbǐwúkpétɔ́ ɔ́ wɛ nyí Mɛ Mímɛ́. É wɛ mi ná ɖi xɛsi ná; é wú wɛ ado ná hu mi dó. Đó é ná húzú tɛn mímɛ́ ɖé nú axɔ́súɖuto Izlayɛ́li tɔn we lɛ́ɛ. É ná nyí awǐnnya e wú è nǎ klɛ́n afɔ dó é, só e ná zin mɛ dɛ́ é. É ná nyí fɛ́ca ɖé nú Jeluzalɛ́munu lɛ́ɛ. Mɛ gěgé ná klɛ́n afɔ dó wǔ tɔn, bó ná jɛ ayǐ bó ná gba hánnyá. Yě ná sɔ́ fɛ́ca bó ná ján cí mɛ, bɔ ɖiɖe tɔ́n ná gló. Un sɔ́ xó élɔ́ ɖó fí e é ná nɔ ganjí ɖe é; un sɔ́ kplɔ́n élɔ́ ɖó fí e nǔɖé ma ná wa ɛ ɖe ǎ é; ahwanvú ce lɛ́ɛ kɛ́ɖɛ́ jɛ́n se. Un ɖo te kpɔ́n Mawu Mavɔmavɔ; amɔ̌, din ɔ́, é tó dó gǔdo Jakɔ́bu ví lɛ́ɛ hwɛ̌; lo ɔ́, un ɖo nukún ɖó e wɛ ɖésú. Nyi ɖésúnɔ kpó vǐ e Mawu Mavɔmavɔ ná mì lɛ́ɛ kpó ɔ́, wuntun wɛ mǐ nyí bó nyí xlɛ̌ ɖo Izlayɛ́li, ɖo Mawu Mavɔmavɔ Nǔbǐwúkpétɔ́ e nɔtɛn tɔn ɖo Sinyɔ́ɔ só ɔ́ jí ɔ́ nyǐkɔ mɛ. Mɛ ɖé lɛ́ɛ nɔ́ ɖɔ: “Mi yi kan nǔ ɖo bokantɔ́ lɛ́ɛ gɔ́n; yě wɛ nɔ́ ɖo xó ɖɔ dó vɛ̌go mɛ wɛ bó nɔ́ ɖo awɔntín mɛ gbe dó wɛ, bó nɔ́ ɖo nǔ e ná jɛ sɔ lɛ́ɛ ɖɔ wɛ. É nyɔ́ nú togun ɖokpó ɖokpó ní yi kan nǔ byɔ́ nǔmɛsɛn tɔn lɛ́ɛ; togun ɖokpó ɖokpó ní yi ɖɔ xó xá mɛkúkú dó mɛ e ɖo gbɛ lɛ́ɛ ta mɛ.” Nú yě ɖɔ mɔ̌ nú mi hǔn, mi ɖɔ nú yě ɖɔ: “Kplɔ́n Mawu tɔn lɛ́ɛ kpó wɛn tɔn lɛ́ɛ kpó wɛ è nǎ xwedó.” Mɛ e ma ná ɖɔ mɔ̌ ǎ ɔ́, ayǐ ná hɔ́n dó e ǎ. Toví lɛ́ɛ ná ɖo to ɔ́ mɛ gbɔn wɛ, wǔ ná kú yě bǐ, xovɛ́ ná sin yě. Xovɛ́ ná sin yě káká bɔ yě ná sin xomɛ; yě ná dó nu axɔ́sú yětɔn bó dó nu Mawu yětɔn. Yě ná kpɔ́n jǐ, bó kpɔ́n do; yě ká ná mɔ nǔɖé zɛ aluwɛ wú ǎ; fí bǐ ná dó ablu, xɛsi ná ɖo to ɔ́ jí mɔ̌hunkɔtɔn, ablu ná dó bó vɛ́ jlɛ́. Lo ɔ́, to e ko ɖo aluwɛ mɛ ɖ'ayǐ ɔ́ ná nɔ zǐnflú mɛ káká sɔ́yi ǎ. Xóxó hwenu ɔ́, Mawu kɔ́n wi nú Zabulɔ́ɔn gbé ɔ́ kpó Nɛfutali gbé ɔ́ kpó. É ká wá yá ɔ́, é ná ná susu ali e gbɔn xutó é, bó ná ná susu to e ɖo zǎnzǎnhwe jí nú Judɛ́ɛn tɔ ɔ́ é, bó ná ná susu Galilée e nyí jǒnɔ lɛ́ɛ sín tokpɔnla é. Togun e ɖo zǐnflú mɛ ɔ́ mɔ wěziza ɖaxó ɖé. Wěziza hɔ́n dó mɛ e ɖo ablu gɔngɔn to mɛ lɛ́ɛ jí. Mawu, a nǎ vǐ akɔta ɔ́ bɔ é ji gba, a dǒ xomɛhunhun xomɛhunhun jí nú yě, yě ɖo awǎ jɛ wɛ ɖo nukɔn towe mɛ e ji jɛ ná é ɖɔhun; yě ɖo xwe ɖu wɛ lě e è nɔ yi gba to ɖé, bó nɔ wá ɖo nǔ e è bɛ̌ sín ahwangbénu lɛ́ɛ má wɛ é ɖɔhun. A ɖe togun towe sín mɛ kannu, mɛ kannu e yě ɖe bɔ é nyí agban bo ɖo yě kpɛn wɛ ɔ́, a zlɔ̌n yě. A hɛn kpo gaga e ɖo abɔ̌ yětɔn ta é wɛ́n; a hɛn bǎ e ɖo yě xo wɛ é lɔ́, lě e a blǒ gbɔn gbe e gbe a gba Madiáani ví lɛ́ɛ dó é. Kɛntɔ́ lɛ́ɛ sín ahwanfɔkpa e fúnfún kpé kɔ́ mɛ lɛ́ɛ ɔ́, è dǒ bǐ zo; awu ɖaxó yětɔn e kanjɔ kpé mɛ lɛ́ɛ ɔ́, è dǒ bǐ zo, bǐ wɛ ji bó kɔn afín. Đó è ji vǐ ɖokpó nú mǐ, è nǎ vǐ ɖokpó mǐ. Mawu ná ɛ acɛ bɔ é ná ɖu axɔ́sú. È nɔ ylɔ́ ɛ ɖɔ Wěɖexámɛtɔ́ kpíkpé, Mawu hlɔ̌nhlɔ́nnɔ, Tɔ́ tɛgbɛ tɔn, Gǎn fífánɔ. É ná gbló ada nú acɛkpikpa tɔn, bó ná bló bɔ fífá e má ná vɔ gbeɖé ǎ ɔ́ ná tíin. É ná jínjɔ́n axɔ́súzinkpo Davídi tɔn jí, bó ná kpa acɛ dó axɔ́súɖuto tɔn nu. É ná ɖó nǔ wa ɖó sɛ́nxwi jí ayǐ, bó ɖó hwɛjijɔ ayǐ dó sɔ́ axɔ́súɖuɖu tɔn jínjɔ́n ayǐ ganjí sín din káká sɔ́yi. Nǔ e Mawu Mavɔmavɔ Nǔbǐwúkpétɔ́ ɔ́ ná bló kpó wǎn yíyí tɔn ɖaxó ɔ́ kpó é nɛ́. Aklúnɔ ɖɔ xó dó Jakɔ́bu ví lɛ́ɛ wú; xó e é ɖɔ ɔ́ jɛ dó axɔ́súɖuto Izlayɛ́li tɔn ɔ́ jí. Mɛ bǐ wɛ tunwun, mɛ e ɖo Samalíi é kpó toví ɖě lɛ́ɛ bǐ kpó wɛ mɔ do nú xó e Aklúnɔ ɖɔ é; ɖ'ayǐ ɔ́, yě nɔ́ ɖo jǐjéjíjé wɛ bó nɔ́ ɖo go yí wɛ bó nɔ́ ɖɔ: “Dǒ e è zě blǐki dó mɛ ná é mu; lo ɔ́, mǐdɛɛ lɛ́ɛ ná vɔ́ dǒ ɔ́ mɛ kpó awǐnnya kpikpa kpó. Atín yǎyánɔ e è dǒ bló xɔ ɔ́ ná lɛ́ɛ jɛ ayǐ; lo ɔ́, mǐdɛɛ lɛ́ɛ ná fɔ sɛ́dlutín dó ɖyɔ́ yě ná.” Énɛ́ ɔ́, Mawu Mavɔmavɔ hun ali nú kɛntɔ́ axɔ́sú Hlesini tɔn Asilíinu lɛ́ɛ, bɔ yě ɖu ɖo Izlayɛ́li jí. Mawu Mavɔmavɔ lɛ́ fɔ́n kɛntɔ́ ɖěvo lɛ́ɛ dó yě jí: Silíinu lɛ́ɛ gbɔn zǎnzǎnhwe jí, bɔ Filisitɛ́ɛn lɛ́ɛ gbɔn gbadahwe jí, bɔ yě wá tɔ́n ahwan yě. Yě wlɔ́ Izlayɛ́li to ɔ́ ɖu lě e é jló yě gbɔn é. Énɛ́ ka kó fá xomɛ nú Mawu Mavɔmavɔ ǎ; alɔ tɔn kpo ɖo dlɛ̌ndlɛ́n bó ná xo yě. Mawu Mavɔmavɔ dɔn tó nú togun tɔn Izlayɛ́li ɔ́ mɔ̌ có, Izlayɛ́li lɛ́ kɔ wá gɔ̌n tɔn ǎ; é hɔn wá su Mawu Mavɔmavɔ Nǔbǐwúkpétɔ́ ɔ́ ǎ. Énɛ́ ɔ́ wú wɛ Mawu Mavɔmavɔ zé kéze ɖokpó ɖó te, bó gbo ta Izlayɛ́li, bó sɛ́n sí tɔn; é sɛ́n děma kpó fántín kpó. É hu azaglɔ́gán lɛ́ɛ kpó tonukún lɛ́ɛ kpó; yědɛɛ lɛ́ɛ wɛ nyí ta to ɔ́ tɔn. É hu gbeyíɖɔnyíjɛtɔ́ lɛ́ɛ; yědɛɛ lɛ́ɛ wɛ nyí sí to ɔ́ tɔn. Togán togun élɔ́ tɔn lɛ́ɛ dɔn togun ɔ́ bú, bɔ mɛ e xlɛ́ ali wɛ yě ɖe lɛ́ɛ wlí ali nyanya ɔ́. Énɛ́ ɔ́ wú wɛ xomɛ ma hun Mawu Mavɔmavɔ dó dɔ̌nkpɛvú lɛ́ɛ wú ǎ; tɔ́cyɔvǐ lɛ́ɛ kpó asúkúsi lɛ́ɛ kpó sín nǔ blá wǔ n'i ǎ, ɖó yě mɛ bǐ wɛ nyí mɛdídá, yě bǐ wɛ nɔ wa nǔ nyanya; xó blíblí wɛ nɔ tɔ́n sín nu yětɔn mɛ. Tó e dɔn nú yě wɛ Mawu Mavɔmavɔ ɖe ɔ́ ká kó fá xomɛ n'i ǎ; alɔ tɔn kpo ɖo dlɛ̌ndlɛ́n bó ná xo togun tɔn. Dǎkaxixo nɔ́ wlí myɔ bó nɔ́ dó nǔ zo, lě e gbě nɔ́ wlí zo bɔ wun kpó kpɔvɛwun kpó nɔ́ fyɔ́ é ɖɔhun. É nɔ́ dó zungodwe e ɖo zungbó ɔ́ mɛ lɛ́ɛ zo, bɔ azɔ nɔ mlí hwǐn ɖidó jǐ. Xomɛsin jí wɛ Mawu Mavɔmavɔ Nǔbǐwúkpétɔ́ ɔ́ ɖe, bɔ to ɔ́ ji zo. È nǎ ɖɔ ɔ́, togun ɔ́ wɛ wlí zo. Mɛ ɖokpó ɖokpó nɔ́ sí te dó nɔzo tɔn jí. È nɔ kán ɖu ɖo aɖisíxwé, xovɛ́ ka nɔ́ kpo ɖo mɛ sin wɛ. È nɔ́ tlɛ́n ɖu ɖo amyɔxwé có è nɔ gɔ́ xo ǎ. Mɛ ɖokpó ɖokpó nɔ tɔ́n ahwan nɔzo tɔn. Akɔta Manasée tɔn tɔ́n ahwan akɔta Eflayímu tɔn, bɔ Eflayímu tɔn lɔ tɔ́n ahwan akɔta Manasée tɔn. Yě mɛ we lɛ́ɛ nɔ kpɔ́ bó tɔ́n ahwan Judáa. Tó e dɔn nú yě wɛ Mawu Mavɔmavɔ ɖe ɔ́ ká kó fá xomɛ n'i ǎ, alɔ tɔn kpo ɖo dlɛ̌ndlɛ́n bó ná xo togun tɔn. Heelú yě mɛ e nɔ ɖe gbetakɛ́n nyanya tɔ́n lɛ́ɛ é; heelú yě mɛ e nɔ wlán sɛ́n e nɔ́ dɔn toví dó ya mɛ é dó wěma mɛ lɛ́ɛ é! Yě nɔ́ dó sɛ́n énɛ́ lɛ́ɛ dó sú ali dó mɛmaɖómɛɖé, nú é má yi ylɔ́ hwɛ bó byɔ́ nǔ e é ɖó acɛ ná é ó; yě gba acɛ wamamɔnɔ e ɖo togun ce mɛ lɛ́ɛ wú. Yě nɔ́ táfú asúkúsi, yě nɔ́ yí nǔ e nyí tɔ́cyɔvǐ tɔn lɛ́ɛ sín así tɔn. Hwenu e Mawu ká ná dɔn tó nú mɛ ɔ́, hwenu e jɔhɔn ná sí te sín zɔ kpó zǐngídi kpó jǎwe ɔ́, nɛ̌ mi nǎ wa nǔ gbɔn? Mɛ̌ xwé mi ná hɔn yi hwlá cí bɔ é ná dó alɔ mi? Fítɛ́ mi ná bɛ́ dɔkun mitɔn lɛ́ɛ ɖó? Gantɔ́ lɛ́ɛ tɛ́ntin jɛ́n mi na gbɔ bó sɔ́ miɖée yi kɔn nyi ayǐ ɖe; é gló ɔ́, mi ná j'ayǐ kɔ́ mɛ, ɖo mɛ e è hu lɛ́ɛ tɛ́ntin. Nǔ énɛ́ lɛ́ɛ bǐ ná bó jɛ ɔ́, xomɛ Mawu tɔn ná ko fá ǎ; alɔ tɔn ná kpo ɖo dlɛ̌ndlɛ́n, bó ná xo togun tɔn. Mawu ɖɔ: “Heelú Asilíi, bǎ e un dó ɖe xomɛsin ce xlɛ́ é! Kpo e ɖo alɔ mɛ nú Asilíi é wɛ nyí xomɛsin ce. Un sɛ́ ɛ dó akɔta gbejímánɔtɔ́ ɖokpó, un zɔ́n ɛ ɖɔ é ní fun ahwan xá togun e ɖo xomɛsin dó nú mì wɛ é, bó bɛ́ nǔ tɔn lɛ́ɛ bǐ wá yi xwé bó má, lobo gbídí togun ɔ́ ɖó afɔ wú babá e ɖo ali jí é ɖɔhun. Nǔ e myá nukún nú éyɛ́ é ká nɛ́ ǎ, lě e é ná wa gbɔn bó sú akɔta gěgé sín kún dó, bó gba to yětɔn é wɛ ɖo ayi mɛ n'i. Asilíi xɔ́sú ɔ́ nɔ́ ɖo ajɔ̌ jlá wɛ bó nɔ́ ɖɔ: ‘Ahwangán ce lɛ́ɛ ɔ́, axɔ́sú wɛ yě nyí; mɛ̌ ká ná dɔn xá mì? É má ká nyí nǔ e xá Kaakemíci toxo é jɛ́n ká xá Kalunɔ́ toxo ɔ́ ǎ cé? Lě e un wa Aapadu toxo ɔ́ nú gbɔn ɔ́, jɛ́n un wa Hamáti toxo ɔ́ nú gbɔn ǎ cé? Lě e un wa Damási toxo ɔ́ nú gbɔn ɔ́, jɛ́n un wa Samalíi toxo ɔ́ nú gbɔn ǎ cé? Un yí axɔ́súɖuto e syɛ́n ɖo vodún mɛ hú Jeluzalɛ́mu, abǐ Samalíi lɛ́ɛ é. Un hɛn ɔ́, un ná wa nǔ xá Jeluzalɛ́mu kpó vodún tɔn lɛ́ɛ kpó lě e un wa nǔ xá Samalíi kpó vodún tɔn lɛ́ɛ kpó gbɔn é ǎ cé? Un ɖó hlɔ̌nhlɔ́n mɔ̌hun ǎ wɛ a?’ ” Hwenu e Aklúnɔ ná fó azɔ̌ tɔn bǐ ɖo Sinyɔ́ɔ só ɔ́ jí, bó fó ɖo Jeluzalɛ́mu ɔ́, é ná sí te dó axɔ́sú Asilíi tɔn jí; axɔ́sú énɛ́ ɔ́ nɔ́ yí go, bɔ mɛ ma sí ɖo nukún tɔn ta. É nɔ́ ɖɔ: “Nǔ e un wa lɛ́ɛ bǐ ɔ́, hlɔ̌nhlɔ́n ce kpó nǔnywɛ́ ce kpó wɛ un dó bló yě ná, ɖó un bí. Un ɖe dogbó ɖěɖě e ɖo togun lɛ́ɛ tɛ́ntin lɛ́ɛ sín, un gba agɔ̌ yětɔn lɛ́ɛ, un fɛ́ zinkpo sín axɔ́sú lɛ́ɛ glɔ́. Un bɛ́ dɔkun e ɖo togun lɛ́ɛ sí é, lě e è nɔ fɔ xɛdɔ́ gbɔn é. Un fɔ nǔ e ɖo ayǐkúngban jí lɛ́ɛ bǐ, lě e xɛ nɔ́ jó azin dó, bɔ è nɔ yi bɛ́ é ɖɔhun. Mɛ ɖěbǔ ká glá bó dán wǔ ǎ; mɛ ɖěbǔ kɛ nu ǎ, xɛ ɖɔ hwǐ ǎ.” Asyɔ́ nɔ́ yí go mɛ e lɔ mɛ é ɖe ɔ́ wú wɛ a? Sá nɔ́ ɖɔ nyɛ wɛ sɔ lě ɖo mɛ e ɖo zǐnzán ɛ é lɔ mɛ wɛ a? É wá cí ɖɔ kpo wɛ ɖo mɛ e lɔ mɛ é ɖe ɔ́ zán wɛ ɖɔhun, abǐ makpo wɛ ɖo mɛ e hɛn é sɔ́ dó jǐ wɛ ɖɔhun. Énɛ́ ɔ́ wú wɛ Aklúnɔ, Mawu Mavɔmavɔ Nǔbǐwúkpétɔ́ ɔ́ ná ɖe lan sín tókɔ nú yě, bɔ yě ná xú gǒ; myɔ ɖé ná wlí ɖo nǔ e ɖo susu ná yě wɛ lɛ́ɛ mɛ, sin ɖa nǔ ɖɔhun. Mawu e nyí wěziza Izlayɛ́li tɔn é ná húzú myɔ, Mawu Mɛ mímɛ́ Izlayɛ́li tɔn ɔ́ ná húzú myɔɖɛ́, bó ná dó wun kpó kpɔvɛwun kpó zo, bɔ bǐ ná ji kɔn afín gbe ɖokpó. É ná fyɔ́ zungbó ɖɛkpɛ ɖɛkpɛ lɛ́ɛ, kpó atínkan lɛ́ɛ kpó káká dó ɖɔ. È mɔ zungbó ɔ́, é ná cí ɖi gbɛtɔ́ e azɔn ɖo ya dó ná wɛ é mɔ wɛ è ɖe ɖɔhun. É sɔ́ ná kpo atín nabí ɖé ɖo zungbó Asilíi tɔn ɔ́ mɛ ǎ; atín e ná kpo ɔ́ ná hwe káká bɔ yɔkpɔ́vú kpɛví hɛn ɔ́, é ná xa. Gbe énɛ́ gbe ɔ́, mɛ e ná kpo ɖo gbɛ ɖo Izlayɛ́li ví lɛ́ɛ mɛ lɛ́ɛ ɔ́, mɛ e ná kpo ɖo gbɛ ɖo Jakɔ́bu ví lɛ́ɛ mɛ lɛ́ɛ sɔ́ ná yí gbe bó ná gán jɛ mɛ e nɔ xo yě lɛ́ɛ wú ǎ. Lo ɔ́, yě bǐ ná gán jɛ Mawu Mavɔmavɔ Mɛ mímɛ́ Izlayɛ́li tɔn ɔ́ wú bǐ gbídígbídí. Mɛ e kpo ɖo gbɛ lɛ́ɛ ná lɛ́ kɔ wá, Jakɔ́bu ví e kpo lɛ́ɛ ná lɛ́ kɔ wá Mawu hlɔ̌nhlɔ́nnɔ ɔ́ gɔ́n. Izlayɛ́li, togun towe ná bó sukpɔ́ nyɛ̌kɛ́n e ɖo xutó ɔ́ ɖɔhun ɔ́, mɛ ywɛywɛ ɖé jɛ́n ná kpo, bó ná lɛ́ kɔ wá Mawu gɔ́n. Nǔ hɛn gblé sín te wɛ è ko sí, bɔ hwɛɖiɖɔ ɖó sɛ́nxwi jí ná kpé tókɔ awɔnkɔ tɔ ɖi sin ɖɔhun. Nǔgbó wɛ, Aklúnɔ, Mawu Mavɔmavɔ Nǔbǐwúkpétɔ́ ɔ́ ná hɛn nǔ gblé gbɔn to ɔ́ bǐ mɛ lě e é ko ɖɔ gbɔn é. Énɛ́ ɔ́ wú ɔ́, mi ɖótó xó e Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ é; é ɖɔ: “Togun ce, hwi mɛ e ɖo Sinyɔ́ɔ é, ma ɖi xɛsi ɖěbǔ nú Asilíi e zé bǎ bó ɖo xixo we wɛ é ó; ma ɖi xɛsi nú Asilíi e zé kpo dó jǐ we, lě e Ejípunu lɛ́ɛ bló gbɔn xóxó hwenu ɔ́ ó, ɖó kpɛɖé jɛ́n kpo din bɔ tó e dɔn nú mi wɛ un ɖe ɔ́ ná fó, bɔ xomɛsin ce ná húzú kpan nukɔn ɛ, bɔ un ná sú kún tɔn dó.” Mawu Mavɔmavɔ Nǔbǐwúkpétɔ́ ɔ́ ná zé lanbá tɔn, bó ná xo Asilíi lě e é bló gbɔn xá Madiáani ví lɛ́ɛ, ɖo Awǐnnya Olɛ́vu tɔn kɔn é. É ná dlɛ́n kpo tɔn dó xu jí lě e é bló gbɔn xá Ejípunu lɛ́ɛ é. Gbe énɛ́ ɔ́ gbe ɔ́, é ná zlɔ́n we agban e ɖo abɔ̌ towe ta, bó ɖo kpinkpɛn we wɛ é; é ná ɖe agban kpinkpɛn énɛ́ e ɖo kɔ jí nú we ɔ́ síin, bó ná zé nyɔ̌ná ɖó tɛn tɔn mɛ. Kɛntɔ́ ɔ́ sɛkpɔ́ Ayati. É gbɔn Miglɔni bó jó agban tɔn lɛ́ɛ dó nyi Mikumasi. Sónufɛ́nu we tɛ́ntin wɛ é gbɔn dín, bó ɖɔ: “Mi wá mǐ ní ɖó gɔnu ɖó Gɛva.” Hlamanu lɛ́ɛ ɖi xɛsi bó nɔ́ sísɔ́. Mɛ e ɖo Giveya Sawúlu sín toxo ɔ́ mɛ lɛ́ɛ bǐ hɔn. Galímunu lɛ́ɛ e mi, mi sú xó! Layicanu e mi, mi ɖo tó jí! Anatɔ́tinu e mi, heelú mi! Madumɛnanu lɛ́ɛ bǐ gbadó. Gevímunu lɛ́ɛ ɖo fí e yě ná hɔn hwlá cí é ba wɛ. Gbe énɛ́ gbe ɖokpó ɔ́, kɛntɔ́ ɔ́ ɖó gɔnu ɖó Nɔvu. É myɔ́ akpotokwín bó ná dó Sinyɔ́ɔ, Jeluzalɛ́mu só ɔ́. Aklúnɔ, Mawu Mavɔmavɔ Nǔbǐwúkpétɔ́ ɔ́ ná sɛ́n atínla lɛ́ɛ kpó zǐngídi kpó. È nǎ gbo atín ɖaxó ɖaxó lɛ́ɛ, è nǎ mu atín e yi jǐ lɛ́ɛ. È nǎ gbo atín kpɛví kpɛví e ɖo zungbó ɔ́ mɛ lɛ́ɛ ɖó asyɔ́ wú. Sɛ́dlutín ɖaxó gɛnnyigɛnnyi Libáan tɔn lɛ́ɛ jɛ ayǐ ɖo Mawu aditi ɔ́ nukɔn. Atínta Jɛsée tɔn ná tɔ́n ama; ɖɔ tɔn ná tɔ́n kun. Yɛ Mawu Mavɔmavɔ tɔn ná nɔ jǐ tɔn; yɛ e nɔ ná nǔnywɛ́ mɛ, bó nɔ́ ná nukúnnú mɔ jɛ nǔ mɛ mɛ é wɛ; yɛ e nɔ ɖe wě xá mɛ, bó nɔ́ ná hlɔ̌nhlɔ́n e è nǎ dó bló ná ɔ́ mɛ é wɛ; yɛ e nɔ zɔ́n bɔ è nɔ tunwun Mawu Mavɔmavɔ, bó nɔ́ ɖó sísí n'i é wɛ. Sísí ɖó nú Mawu Mavɔmavɔ ná nɔ́ hun xomɛ n'i; é nɔ́ kpɔ́n lě e è ɖe ɔ́ dó ɖɔ hwɛ xá mɛ ǎ, é ko se xó ɖé kpowun ɔ́, é nɔ́ zé dó ɖɔ hwɛ ǎ. É nɔ́ dó hwɛjijɔ nú wamamɔnɔ; hwɛjijɔ wɛ é nɔ́ xwedó dó ɖɔ hwɛ xá mɛ e ma ɖó mɛɖé ǎ é; xó tɔn cí kpo ɖɔhun, bɔ é ná dó xo to ɔ́, xó e ná tɔ́n sín nu tɔn mɛ ɔ́ wɛ ná hu mɛdídá. Hwɛjijɔ kpó gbejíninɔ kpó ná cí gǒjíblánú ɖɔhun n'i, gǒjíblánú e nɔ́ ɖo alinkan nú mɛ hwebǐnu ɔ́ ɖɔhun n'i. Énɛ́ ɔ́, hla ná nɔ kpɔ́ xá lɛ̌ngbɔ́ví, bɔ kpɔ kpó gbɔ̌ví kpó ná dɔ́ kpɔ́. Nyibúví kpó kinnikínníví kpó ná ɖu nǔ ɖó kpɔ́, bɔ yɔkpɔ́vú ɖokpó ná nɔ́ kplá yě. Nyibú asi kpó lɔnmɔ asi kpó ná zun xɔ́ntɔn; vǐ yětɔn lɛ́ɛ ná nɔ́ dɔ́ fí ɖokpó ɔ́. Kinnikínní ná nɔ́ ɖu gběhan nyibú ɖɔhun. Yɛ̌yɛ́ví ná da ayihún ɖo amanɔnú jakpata sín do mɛ; yɔkpɔ́vú ná dó alɔ do e mɛ amanɔnú jakpata ɖe é. È nǎ wa nǔ nyanya ɖěbǔ ǎ, è nǎ hɛn nǔ ɖěbǔ gblé ɖo só mímɛ́ tɔn jí ǎ, ɖó Mawu Mavɔmavɔ tunwuntunwun ná gɔ́ to ɔ́, lě e sin gɔ́ xuzan jí é ɖɔhun. Gbe énɛ́ gbe ɔ́, Jɛsée ví ɔ́ ná cí asyá e è tun te ɔ́ ɖɔhun nú togun e ɖo gbɛ ɔ́ mɛ lɛ́ɛ bǐ. Akɔta lɛ́ɛ ná nɔ́ wá ɖó xó te n'i, bó ná nɔ́ se xó ɖo nu tɔn, bɔ susu Mawu tɔn ná hɔ́n ɖo fí e é ɖe ɔ́. Gbe énɛ́ gbe ɔ́, Aklúnɔ ná lɛ́ vɔ́ zán hlɔ̌nhlɔ́n tɔn, bó ná xɔ gbɛ nú mɛ e kpo ɖo gbɛ ɖo togun tɔn mɛ lɛ́ɛ: é ná xɔ gbɛ nú mɛ e kpo ɖo gbɛ ɖo Asilíi lɛ́ɛ, mɛ e kpo ɖo gbɛ ɖo Ejípu lɛ́ɛ, mɛ e kpo ɖo gbɛ ɖo Patlɔ́si lɛ́ɛ, mɛ e kpo ɖo gbɛ ɖo Nubíi lɛ́ɛ, mɛ e kpo ɖo gbɛ ɖo Elámu lɛ́ɛ, mɛ e kpo ɖo gbɛ ɖo Babilɔ́nu lɛ́ɛ, mɛ e kpo ɖo gbɛ ɖo Hamáti lɛ́ɛ, kpó mɛ e kpo ɖo gbɛ ɖo tɔtɛ́ntinto mɛ lɛ́ɛ kpó. É ná zé asyá ɖokpó dó jǐ, bó ná xlɛ́ akɔta énɛ́ lɛ́ɛ ɖɔ émí ná kplé Izlayɛ́li ví e ahwan wlí yi toɖěvo mɛ lɛ́ɛ, kpó Judáanu e gba kpé wɛ̌kɛ́zo ɛnɛ lɛ́ɛ mɛ lɛ́ɛ kpó. Énɛ́ ɔ́, wǔ e hwan dó Judáa wɛ Eflayímu ɖe ɔ́ ná fó, bɔ è nǎ sú kɛntɔ́ Judáa tɔn lɛ́ɛ sín kún dó. Eflayímu sɔ́ ná hwan wǔ dó Judáa ǎ, bɔ Judáa sɔ́ ná nyí Eflayímu kɛntɔ́ ǎ. Yě bǐ ná zɔn kpɔ́, bó zun dó Filisitɛ́ɛn lɛ́ɛ jí ɖo gbadahwe jí, bó ná lɛ́ zɔn kpɔ́ bó yi fɔ akɔta e ɖo gbětótló mɛ lɛ́ɛ sín nǔ ɖo zǎnzǎnhwe jí. Yě ná gbló ada nú acɛkpikpa yětɔn yi Edɔ́mu kpó Mɔwabu kpó, bɔ Amumɔ́ɔ ví lɛ́ɛ ná nɔ acɛ yětɔn mɛ. Mawu Mavɔmavɔ ná hɛn Xu Vɔvɔ ɔ́ xú. É ná zé alɔ dó jǐ dó ɖe gbe dó Efláti tɔ ɔ́. Funfún tɔn sín hlɔ̌nhlɔ́n ná má tɔ ɔ́, bɔ é ná húzú tɔhwín tɛ́nwe, bɔ è nǎ zɔn afɔ gbɔn mɛ dín. Ali ɖokpó ná ɖo te nú mɛ e kpo ɖo gbɛ ɖo togun tɔn mɛ ɖo Asilíi lɛ́ɛ, lě e ali ɖokpó ɖo te nú Izlayɛ́li ví lɛ́ɛ hwenu e yě gosín Ejípu é. Izlayɛ́li, gbe énɛ́ gbé ɔ́, a nǎ ɖɔ: “Mawu Mavɔmavɔ, un ɖo kú dó nú we wɛ, ɖó a sin xomɛ dó mì ɖ'ayǐ, amɔ̌, din ɔ́, xo towe mɛ ko fá, bɔ a dǒ gbɔ nú mì. Mawu Mɛhwlɛ́ngántɔ́ ce ɔ́ ɖíe, un ɖeji dó wǔ tɔn, xɛsi sɔ́ ɖi mì ǎ, ɖó Mawu Mavɔmavɔ wɛ nyí hlɔ̌nhlɔ́n ce, bó nyí han ɖo nu ce; é wɛ nyí hwlɛngán ce.” Din ɔ́, mi ná dun sin kpó awǎjijɛ kpó ɖo hwlɛngán tɔ nu. Gbe énɛ́ gbe ɔ́, mi ná ɖɔ: “Mi kpa susu nú Mawu Mavɔmavɔ! Mi xomlá nyǐkɔ tɔn! Mi jlá nǔ e é wa lɛ́ɛ ɖo togun lɛ́ɛ tɛ́ntin! Mi flín lě e nyǐkɔ tɔn kló sɔ́ é mɛ bǐ! Mi ji han dó kpa susu nú Mawu Mavɔmavɔ, ɖó é bló nǔ ɖaxó ɖaxó. Mi jlá nú gbɛ ɔ́ bǐ!” Sinyɔ́ɔ nu lɛ́ɛ mi, mi ɖe awǎjijɛ mitɔn xlɛ́! Mi sú xó kpó xomɛhunhun kpó, ɖó mɛ e ɖo gɔ̌n mitɔn ɔ́, Mawu mímɛ́ Izlayɛ́li tɔn ɔ́, nǔ ɖaxó wɛ. Wɛn e Ezayíi, Amɔ̌si ví ɔ́ yí ɖo Mawu sí dó Babilɔ́nu jí ɔ́ ɖíe: Mawu ɖɔ: “Mi tun ahwansyá ɖokpó te ɖó só e jí nǔ ɖěbǔ má ɖe ǎ é. Mi sú xó bó ɖɔ sɛ́ dó ahwanfuntɔ́ lɛ́ɛ. Mi bló alɔ nú yě bónú yě ní gbɔn gǎn lɛ́ɛ sín hɔntogbó wá. Nyi ɖésú wɛ ɖe gbe nú mɛ e un sɔ́ ɖó vo nú nyiɖée lɛ́ɛ; un ylɔ́ ahwanfuntɔ́ syɛ́nsyɛ́n ce lɛ́ɛ lɔ, yě mɛ e un xɔ susu ɔ́ yě nɔ́ j'awǎ lɛ́ɛ, un ylɔ́ yě bó ná ɖe xomɛsin ce xlɛ́.” Mi ɖótó xósúsú e ɖo só lɛ́ɛ jí é, é cí ahwan wǒkógo ɖé wɛ ɖo xó sú wɛ ɖɔhun. Mi ɖótó zǐn e xo wɛ axɔ́súɖuto lɛ́ɛ ɖe é, zǐngídi e ɖú wɛ akɔta e kplé lɛ́ɛ ɖe é. Mawu Mavɔmavɔ Nǔbǐwúkpétɔ́ ɔ́ wɛ ɖo ahwangɔnu e xwe ahwan fun gbé ɔ́ kpɔ́n wɛ ɖɔ é ɖo gbesisɔ mɛ a jí. Káká to línlín mɛ, fí e gbɛ ɔ́ kponu ɖó ɔ́ wɛ sɔ́ja énɛ́ lɛ́ɛ gosín, bó ja to ɔ́ bǐ gba gbé: Mawu Mavɔmavɔ kpó mɛ e é nɔ́ zé dó ɖe xomɛsin tɔn xlɛ́ lɛ́ɛ kpó wɛ. Mi dó nǔwamɛhan ɖokpó, ɖó Mawu Mavɔmavɔ sín azǎn ɔ́ kó sɛkpɔ́. Azǎn ɔ́ ná wá lě e awě ɖaxó ɖé nɔ́ gosín Mawu Nǔbǐwúkpétɔ́ ɔ́ gɔ́n, bó nɔ́ xo mɛ é ɖɔhun. Énɛ́ ɔ́ wú wɛ awakanmɛ kú mɛ bǐ, mɛɖé sɔ́ sixú xo nǔ ɖo wǔ ǎ. Yě ɖíe zun sofin e, lanmɛ yětɔn bǐ vɛ̌, wǔtu yětɔn bǐ ján, yě ɖo wǔvɛ́ mɔ wɛ nyɔ̌nu e ɖo ajidonu é ɖɔhun. Yě bǐ cí jɛjɛɛ, bó jɛ yěɖée kpɔ́n jí. Nukún yětɔn bǐ húzú ɖo ta wú. Mawu Mavɔmavɔ sín azǎn ɔ́ ɖíe ja e, azǎn e gbe mɛ ɖé nú má ná blá wǔ nú Mawu ǎ é wɛ. Mawu ná ɖe xomɛsin tɔn xlɛ́; é ná gba to ɔ́ bǐ, bó ná sú hwɛhutɔ́ lɛ́ɛ sín kún dó. Sunví lɛ́ɛ kpó sunví e sɛ kplé lɛ́ɛ kpó ɖě sɔ́ ná kɛn ǎ. Hwe tɔ́n lě tlóló ɔ́, é ná nɔ́ dó zǐnflú. Sun sɔ́ ná za wě ǎ. Mawu ɖɔ: “Un ná dɔn tó nú gbɛ ɔ́ ɖó dǎkaxixo tɔn wú, un ná dɔn tó nú mɛ nyanya lɛ́ɛ, ɖó nǔ baɖabaɖa e yě dó sin lɛ́ɛ wú. Jimakplɔ́n e nɔ ɖo go yí wɛ lɛ́ɛ ɔ́, un ná sú kún yětɔn dó, acɛgannaganna-kpanúmɛtɔ́ e nɔ ɖo afɔ tɛ ayǐ wɛ lɛ́ɛ ɔ́, un ná zin yě dɛ́. Hwenu e un ná bló mɔ̌ é ɔ́, gbɛtɔ́ ná hán hú siká akú; yě ná hán hú siká e nɔ gosín Ofíi é. Gbe e gbe un ná sin xomɛ bó má ná se vɛ ǎ ɔ́, un ná húnhún jǐnukúnsin ɔ́, bɔ ayǐkúngban ná nɔ tɛn ɖokpó mɛ bó ná nɔ́ lɔ́n yi jǐ.” Jǒnɔ e ɖo Babilɔ́nu tomɛ lɛ́ɛ bǐ ná ɖo wezun jí tɛ́ e jí è zun dó é ɖɔhun; yě ná gbadó gbɔ̌ e mɛɖé má kplá ǎ lɛ́ɛ é ɖɔhun. Mɛ ɖokpó ɖokpó ná yi togun tɔn mɛ; mɛ ɖokpó ɖokpó ná hɔn yi to tɔn mɛ. Mɛ e è nǎ mɔ lɛ́ɛ bǐ wɛ è nǎ da gǎ dó; mɛ e è nǎ wlí lɛ́ɛ bǐ wɛ è na hu kpó hwǐ kpó. È nǎ sɔ́ vǐ yětɔn lɛ́ɛ xo dó só wú ɖo nukún yětɔn mɛ; è nǎ bɛ́ nǔ e ɖo xwé yětɔn gbe lɛ́ɛ, è nǎ ɖó xó xá asi yětɔn lɛ́ɛ. Éɖíe, un ná fɔ́n Mɛdinu lɛ́ɛ dó jǐ nú yě; akwɛ́ nyí nǔ ɖěbǔ nú yě ǎ, siká ká nɔ́ jló yě ǎ. Yě ná da gǎ dó hu dɔ̌nkpɛvú lɛ́ɛ; yě ná jó vǐ yɛ̌yɛ́ lɛ́ɛ dó nyi gbɛ ǎ, yɔkpɔ́vú lɛ́ɛ sín nǔ ká ná blá wǔ nú yě ǎ. Mawu ná gba Babilɔ́nu e nyɔ́ ɖɛkpɛ hú axɔ́súɖuto lɛ́ɛ bǐ é; Babilɔ́nu e Kaludéenu lɛ́ɛ nɔ́ dó yí go é. É ná gba Babilɔ́nu lě e é bló gbɔn nú Sodɔ́mu kpó Gomɔ́ɔ kpó é. Mɛ ɖěbǔ sɔ́ ná nɔ to énɛ́ mɛ kpɔ́n gbeɖé ǎ; to ɔ́ ná nɔ vɔ̌ káká sɔ́yi. Alabíinu lɛ́ɛ sɔ́ ná ɖó gɔnu ɖó fínɛ́ kpɔ́n ǎ; lɛ̌ngbɔ́nyitɔ́ lɛ́ɛ sɔ́ ná xwe kanlin yětɔn lɛ́ɛ dó xɔ ɖo fínɛ́ kpɔ́n gbeɖé ǎ. Kanlin e ɖo gbětótló mɛ lɛ́ɛ ná wa xwé nyi fínɛ́. Kwlele lɛ́ɛ ná gɔ́ xwé lɛ́ɛ bǐ, gowungo lɛ́ɛ ná nɔ́ nɔ xwé lɛ́ɛ gbe. Gbǎgbá lɛ́ɛ ná nɔ́ ɖú agbojlaka ɖo xwé lɛ́ɛ gbe. Gběkanlin lɛ́ɛ ná nɔ́ hó asúkúsi e ɖo to ɔ́ mɛ lɛ́ɛ, bɔ cukú gbě tɔn lɛ́ɛ ná nɔ́ hó nǔ ɖo axɔ́sú lɛ́ɛ sín hɔnmɛ, hɔn yětɔn ɖagbe ɖagbe e ɖo to ɔ́ mɛ lɛ́ɛ mɛ. Hwenu e Babilɔ́nu ná gba ɔ́, gan tɔn ɔ́, xo wɛ é kó xo; azǎn tɔn lɛ́ɛ ɖě sɔ́ ɖo nǎ jɛ jí wɛ ǎ. Mawu Mavɔmavɔ ná ɖe xlɛ́ ɖɔ émí yí wǎn nú Jakɔ́bu ví lɛ́ɛ. É ná lɛ́ vɔ́ ɖe xlɛ́ ɖɔ Izlayɛ́li to ɔ́ wɛ nyí to e émí sɔ́ é. É ná lɛ́ zé mɛ tɔn lɛ́ɛ ɖó tɛn yětɔn mɛ, ɖo ayǐkúngban yě ɖésú tɔn jí. Jǒnɔ e wá cí Izlayɛ́li lɛ́ɛ ná wá gɔ́ nú yě, bɔ yě bǐ ná jɛ kpɔ́ xá Jakɔ́bu ví lɛ́ɛ. Togun ɖěvo lɛ́ɛ ná dó alɔ yě, bó ná kplá yě wá Izlayɛ́li, to yětɔn mɛ. Yě ná nyí kannumɔ yětɔn súnnu, nyɔ̌nu, ɖo Mawu Mavɔmavɔ sín ayǐkúngban jí fínɛ́. Énɛ́ ɔ́, mɛ e Izlayɛ́li ko nyí gantɔ́ ná ɖ'ayǐ lɛ́ɛ ná húzú gantɔ́ tɔn. É ná nyí gǎn nú mɛ e ko kpa acɛ n'i ɖ'ayǐ lɛ́ɛ. Izlayɛ́li, a ɖo mɛ kannu, bó ɖo wǔvɛ́ mɔ wɛ, bɔ adǎn alɔkpa alɔkpa bǐ ɖo gbigbo we wɛ. Hwenu e nǔ énɛ́ bǐ ná fó, bɔ Mawu Mavɔmavɔ ná ɖe ayi towe ɖ'ayǐ, bɔ a nǎ vo ɔ́, a nǎ ji han élɔ́ dó Babilɔ́nu xɔ́sú ɔ́: Nɛ̌ nǔ ká sixú cí mɔ̌ gbɔn? Gǎnhúmɛtɔ́, mɛtáfútɔ́ ɔ́ sín xó wɛ kó fó mɔ̌ a? Mawu Mavɔmavɔ wɛ́n adǎkaxotɔ́ lɛ́ɛ sín kpo, é wɛ́n acɛgannaganna-kpanúmɛtɔ́ lɛ́ɛ sín makpo; kpo e dó xo togun lɛ́ɛ wɛ yě nɔ́ ɖe kpó hlɔ̌nhlɔ́n kpó ma ɖ'alɔ te ɔ́, Mawu Mavɔmavɔ hɛn wɛ́n; kpo e dó kpa acɛ gannaganna nú akɔta lɛ́ɛ wɛ yě nɔ́ ɖe ɔ́, Mawu Mavɔmavɔ hɛn wɛ́n; kpo e dó dó ya nú akɔta lɛ́ɛ wɛ yě nɔ́ ɖe lě e é jló yě gbɔn ɔ́, é hɛn wɛ́n. Mɛ e ɖo gbɛ ɔ́ mɛ lɛ́ɛ bǐ vo lo, bɔ ayi yětɔn jɛ ayǐ. Yě nɔ́ sú xó bó nɔ́ ji han ɔ́ kpó awǎjijɛ kpó. Atín lɛ́ɛ lɔ ɖo awǎ jɛ wɛ, ɖó Babilɔ́nu xɔ́sú ɔ́, xó tɔn fó. Siplɛ́tín lɛ́ɛ kpó sɛ́dlutín Libáan tɔn lɛ́ɛ kpó nɔ́ ɖɔ: “Sín gbe e gbe a jɛ ayǐ ɔ́, mɛ ɖé sɔ́ nɔ́ wá gbo mǐ zindɛ́ ǎ.” Babilɔ́nu xɔ́sú, ée a jǎwe bɔ kútomɛ se ɔ́, é xo zǐn, gbɛtɔ́ klogǎnklogǎn e kó kú lɛ́ɛ ɔ́, é fɔ́n yě bǐ sí te ɖó hwɛ wú, bónú yě ná yí jǒnɔ towe. É fɔ axɔ́sú akɔta akɔta lɛ́ɛ tɔn lɛ́ɛ sí te sín zinkpo yětɔn lɛ́ɛ jí. Yě bǐ nɔ́ yí xó bó nɔ́ ɖɔ: “Hwi lɔ nɛ́ ba hlɔ̌nhlɔ́n kpo bó cí mǐ ɖɔhun nɛ́. Din ɔ́, mǐ kpó hwi kpó wɛ nyí nǔ ɖokpó ɔ́.” È kpíkpé susu towe kpó kanhún towe lɛ́ɛ sín gbe kpó dó kútomɛ. Wě wɛ nyí zan bɔ a nɔ mlɔ̌ jí, bó nyí avɔ bɔ a nɔ cyɔ́n. Nɛ̌ nǔ ká sixú cí mɔ̌ gbɔn? Hwi mɛ e nyí sunví zǎnzǎn tɔn é! Sunví zǎnzǎn tɔn e nɔ́ kɛn é; hwi ɖíe sún sín jǐxwé bó wá jɛ kɔ́ mɛ e! Hwi wɛ ka ɖu ɖo akɔta lɛ́ɛ bǐ jǐ nɛ́! A nɔ ɖɔ dó ayi mɛ ɖɔ: “Un ná hun káká yi jǐnukúnsin; un ná sɔ́ axɔ́súzinkpo ce dó jǐ, bɔ é ná nɔ aga nú sunví Mawu tɔn lɛ́ɛ. Un ná kpa acɛ dó só e ta vodún lɛ́ɛ nɔ́ yi kplé ɖe é ɖo totaligbé aga dɔ̌n. Un ná yi akpɔ́kpɔ́ lɛ́ɛ ta, un ná nɔ Mawu Ajalɔ̌nlɔn ɔ́ há.” Lo ɔ́, do gɔngɔn mɛ wɛ a wǎ tɔ́n ɖe ɖo kútomɛ. Mɛ e mɔ we jǎwe lɛ́ɛ ɖo kpínkpɔ́n we wɛ ganjí, yě bɔ nukún nyi wǔ we bó nɔ́ ɖɔ: “Nya e nɔ dán ayǐkúngban ɔ́ bǐ, bó nɔ́ dán axɔ́súɖuto lɛ́ɛ é jɛ́n ɖíe a? Nya e nɔ́ zé gbɛ ɔ́ dó húzú gbětótló, bó nɔ́ gba toxo lɛ́ɛ, bó nɔ́ gbɛ́ gantɔ́ e é wlí lɛ́ɛ ɖe nyi te ɔ́, nya ɔ́ jɛ́n ɖíe a?” Axɔ́sú akɔta akɔta lɛ́ɛ tɔn lɛ́ɛ bǐ wɛ ɖo fí e è sá xwé nú yě ɖó é; yě bǐ wɛ ɖo ayǐmlɔ́mlɔ́ kpó yɛ̌yi kpó ɖo xwé yětɔn yětɔn gbe. Amɔ̌, hwɛ ɔ́, è sɔ́ we nyi dó gbě, è sɔ́ we nyi dó zɔ nú yɔdo e è kun nú we é; è sɔ́ we nyi dó gbě atínla e ma nyɔ́ kpɔ́n ǎ é ɖɔhun. A cí cyɔ e è gbǐdí ɖó afɔ wú é ɖɔhun, è bɛ̌ hwi kpó mɛ e kú ɖo ahwangbénu lɛ́ɛ kpó dó yɔdo ɖokpó ɔ́ mɛ; yě gɔ́ yɔdo ɔ́ sín azan tɔn jí, bó bú we avɔ ɖɔhun. Hwɛ ɔ́, è nǎ ɖi we lě e è ɖi axɔ́sú ɖě lɛ́ɛ gbɔn é ǎ, ɖó a gba to towe, a hu togun towe. Mɛ ɖé sɔ́ ná ɖo yiyi wɛ, bó ylɔ́ kún baɖabaɖa e mɛ a tɔ́n sín ɔ́ sín nyǐkɔ gbeɖé kpɔ́n ǎ. È nǐ sɔ́ nǔ bó hu vǐ lɛ́ɛ, ɖó nǔ baɖabaɖa e tɔ́ yětɔn lɛ́ɛ dó sin ɔ́ wú. È nǐ hu yě, é má nyí mɔ̌ ǎ ɔ́, yě ná wá fɔ́n gǔ, bó ná yí gbɛ ɔ́, bó ná ɖó toxo ayǐ gbɔn ayǐkúngban ɔ́ bǐ jí. Mawu Mavɔmavɔ Nǔbǐwúkpétɔ́ ɔ́ ɖɔ: “Un ná húzú kpan nukɔn Babilɔ́nunu lɛ́ɛ, bó ná gbídí Babilɔ́nu sín nyǐkɔ, bó gbídí toví tɔn lɛ́ɛ, bó gbídí vǐ e yě ná ji lɛ́ɛ sín nyǐkɔ. Un ná zé to ɔ́ dó húzú tɔgba fí e aɖɔwé lɛ́ɛ ná nɔ́ nɔ é. Un ná zé akíza e nɔ́ hɛn nǔ gblé ɔ́ dó za yě.” Mawu Mavɔmavɔ Nǔbǐwúkpétɔ́ ɔ́ zin alɔ dó akɔ́n bó ɖɔ: “Un zin alɔ dó akɔ́n, bó ɖɔ nǔ e un lin ɔ́, nǔ ɔ́ wɛ ná jɛ. Nǔ e un jló ɖɔ é ná jɛ é wɛ ná jɛ. Un ná gba acɛkpikpa Asilíi tɔn hánnyá ɖo to ce mɛ. Un ná flí i xwe ɖo só ce lɛ́ɛ ta. É nɔ́ hú gǎn mɛ ce lɛ́ɛ; din ɔ́, un ná bú i. É dó agban kpinkpɛn ɖó ta nú yě, din ɔ́, un ná zlɔ́n agban énɛ́ yě.” Nǔ e Mawu ɖɔ émí ná wa gbɔn ayǐkúngban ɔ́ bǐ jí é nɛ́; alɔ e é sɔ́ dó jǐ bó ná wa nǔ xá akɔta lɛ́ɛ bǐ é nɛ́. Nǔ e Mawu Mavɔmavɔ Nǔbǐwúkpétɔ́ ɔ́ ɖɔ é ná jɛ ɔ́, mɛ̌ ká ná gbɛ́? É dlɛ́n alɔ dó mɛ ɖé ɔ́, mɛ̌ ká ná wún alɔ tɔn? Xwe e xwe axɔ́sú Akázi zán kú ɔ́, wɛ è sɛ́ wɛn élɔ́ dó: Filisitɛ́ɛn lɛ́ɛ e mi, è wɛ̌n kpo e è nɔ dó xo mi ná lɛ́ɛ é có, xomɛ ní má hun mi ɖó mɔ̌ wú ó, ɖó dan ɖěvo ná tɔ́n sín dan kúkú ɔ́ sín xomɛ, bó ná lɛ́ ɖó aɖǐvɛ́ hú ɖě ɔ́, bɔ dan ɖaxó e nɔ zɔn é ná tɔ́n sín azin e é ɖó ɔ́ mɛ. Énɛ́ ɔ́, mɛ e nyí wamamɔnɔ gǔdo tɔn ɔ́ ná mɔ nǔ ɖu kanlin e ɖo amagbo mɛ é ɖɔhun. Mɛ e ma ɖó mɛɖé ǎ lɛ́ɛ sín ayi ná jɛ ayǐ bɔ yě ná vo. Amɔ̌, mi Filisitɛ́ɛn lɛ́ɛ ɔ́, un ná sɔ́ adɔ dó vɔ donu mitɔn bǐ, mɛ mitɔn e ná kpo ɖo gbɛ lɛ́ɛ ɔ́, un ná hu yě bǐ. Toxo e è mɛ ahohó lɛ́ lɛ̌ dó lɛ́ɛ e mi, mi dó nǔwamɛhan, bó sú xó bó ji. Filisitíi to ɔ́ bǐ sín ayi gba dó: Akpɔ́kpɔ́ ɖé sí te sín totaligbé, bó jǎwe azizɔ ɖɔhun. Mɛ ɖěbǔ ɖo kɛntɔ́ ɔ́ sín ahwan mɛ bó gɔn kplé wá ǎ. Xó tɛ́ mǐ ká ná ɖɔ nú mɛsɛ́dó Filisitíi tɔn lɛ́ɛ? Mǐ nǎ ɖɔ sɛ́ dó yě ɖɔ: “Mawu Mavɔmavɔ ɖésú wɛ ɖó Sinyɔ́ɔ toxo ɔ́ ayǐ, fínɛ́ wɛ wamamɔnɔ e ɖo togun tɔn mɛ lɛ́ɛ ná mɔ gǎnjɛwú syɛ́nsyɛ́n ɔ́ ɖe.” Xó e Mawu ɖɔ dó Mɔwabu jí é ɖíe: È sɔ́ zǎn ɖokpó ɖó te bó gba Aa-Mɔwabu, zǎn ɖokpó mɛ kpowun ɔ́, è ba ɛ kpo. È sɔ́ zǎn ɖokpó ɖó te bó gba Kíi-Mɔwabu, zǎn ɖokpó mɛ kpowun ɔ́, è ba ɛ kpo. È nɔ yi vodún mɛtɔn xwé, è nɔ yi Divɔ́ni; è nɔ yi vodún xwé e gbɔn só jí só jí lɛ́ɛ, bó nɔ́ yi ya avǐ gbɔn fí énɛ́ lɛ́ɛ; Mɔwabunu lɛ́ɛ ji nǔwamɛhan ɖo Nɛbo kpó Madaba kpó. Mɛ bǐ xwlɛ́ ta bó kpa atán. Mɛ bǐ dó nǔwamɛvɔ bó ɖo ali lɛ́ɛ jí ɖo toxo lɛ́ɛ mɛ. Mɛ bǐ dó nǔwamɛhan bó ɖo jiji wɛ gbɔn xɔ ta xɔ ta, gbɔn tokplétɛn tokplétɛn; mɛ bǐ ɖo avǐ ya wɛ agba. È ɖo xó sú ylɔ́ mɛ wɛ sín Hɛcibɔ́ni, è ɖo xó sú ylɔ́ mɛ wɛ sín Eleale; è ɖo xó sú ylɔ́ mɛ wɛ ɖɔ è nǐ wá hwlɛ́n émí gán, bɔ è ɖo káká Yaxisa bó se. Énɛ́ ɔ́ wú wɛ sɔ́ja Mɔwabu tɔn lɛ́ɛ ɖo xó sú wɛ, awakanmɛ kú yě. Un sú xó ylɔ́ mɛ ɖɔ è nǐ wá hwlɛ́n Mɔwabu to ɔ́. Mɛ e ɖo to ɔ́ mɛ lɛ́ɛ hɔn káká yi Sowáa; yě hɔn káká yi Eglati-Celiciya. Yě ɖo Luxíti kpó ɔ́ fán wɛ kpó avǐ kpó; yě ɖo Holonayímu-li jí, bó ɖo heelú sá wɛ. Nimulímu tɔ lɛ́ɛ bǐ wɛ mɛ, gběhan lɛ́ɛ bǐ fyɔ́, ɖě sɔ́ wú ǎ; ama mǔ ɖě sɔ́ ɖe ǎ, gběhan mǔ ɖě sɔ́ ɖe ǎ. Dɔkun kpɛ e kpo bɔ yě tɛ́nkpɔ́n bó bɛ́ ɖó vo ɔ́, yě bɛ̌ yi Solutín-tɔhwín ɔ́ gúdo. È se xó e sú wɛ yě ɖe ɔ́ gbɔn Mɔwabu to ɔ́ bǐ mɛ. È ɖo káká Eglayímu bó se vo e sa wɛ yě ɖe ɔ́; è lɛ̌ ɖo káká Elimu bó se. Divɔ́ni tɔ ɔ́ bǐ wɛ nyí hun. Mawu ɖɔ: “Un ná lɛ́ sɛ́ awě ɖěvo dó. Kinnikínní ɖokpó ná wá zɔn Mɔwabunu e ma kú ǎ lɛ́ɛ jí, yě mɛ e kpo ɖo to ɔ́ mɛ lɛ́ɛ jí.” Mɔwabu sín gǎn lɛ́ɛ ɖɔ: “Mi sɛ́ lɛ̌ngbɔ́ví dó Judáa xɔ́sú ɔ́ ɖo Sinyɔ́ɔ só ɔ́ jí; mi sɛ́ lɛ̌ngbɔ́ví dó e sín awǐnnya gidigbája gbětótló mɛ tɔn ɔ́ kɔn.” Mɔwabu nyɔ̌nu lɛ́ɛ ɖo flúflú wɛ xɛ e è nya sín adɔ̌ mɛ é ɖɔhun; yě ɖo flúflú wɛ ɖo fí e è nɔ zɔn afɔ gbɔn Aanɔ́ni tɔ ɔ́ mɛ ɖe é. Mɔwabunu lɛ́ɛ ɖɔ nú Jeluzalɛ́mu ɖɔ: “Đɔ nǔ e mǐ ná wa é nú mǐ. Đe gbeta ɖokpó tɔ́n. Cyɔ́n alɔ mǐ jí hwemɛ cíɖíɖí lě e zǎn kú ɔ́ ablu nɔ cyɔ́n nǔ bǐ é ɖɔhun; kɛnklɛ́n zé mɛ mǐtɔn e ɖo hinhɔn wɛ lɛ́ɛ hwlá. Ma ɖe yě gba ó. Kɛnklɛ́n ba tɛn nú mɛ mǐtɔn e ɖo hinhɔn wɛ lɛ́ɛ, nú yě ní nɔ gɔ̌n towe. Nǎ fí e yě ná bɛ yɛ ɖe ɔ́ yě, bónú nǔhɛngblétɔ́ ɔ́ má kpé yě wú ó. Hwenu e mɛ táfú táfú bǐ ná fó ɔ́, hwenu e adǎnúwiwa bǐ nǎ nɔ te ɔ́, hwenu e mɛ e ɖo afɔ tɛ mǐ jí wɛ ɔ́ ná tɔ́n sín to mǐtɔn mɛ ɔ́, hwenɛ́nu wɛ axɔ́sú towe sín acɛkpikpa ná jínjɔ́n ayǐ ganjí; acɛkpikpa tɔn ná jínjɔ́n xomɛnyínyɔ́ tɔn jí; axɔ́sú ɔ́ ná nyí Davídi ví, bó ná nɔ gbejí. É ná nyí hwɛɖɔtɔ́, é ná nɔ́ nyi sɛ́n, bɔ nǔjlɔ́jlɔ́wiwa ná nɔ́ myá nukún n'i.” Mǐ se lě do Mɔwabu nɔ yí go sɔ é, lě do é nɔ́ tɛ afɔ ayǐ sɔ é, lě do é nɔ́ ɖɔ mɛjɔmɛ sɔ é, lě do é nɔ́ dó nukúnkɛn sɔ é, lě do é nɔ́ flé nu sɔ é. Amɔ̌, égbé din ɔ́, Mɔwabunu lɛ́ɛ ɖésú sín nǔ blá wǔ nú yěɖée, bɔ yě ɖo alě ná wɛ, mɛ bǐ ɖo gbɛvíhan ji wɛ dó vǐwun xúxú mlímlí e è nɔ mɔ ɖo Kíi-Alɛsɛ́ti é tamɛ. É vɛ́ nú yě káká, bɔ yě nɔ́ ɖo alě ná wɛ. Jikpá e gbɔn só jí só jí ɖo Hɛcibɔ́ni lɛ́ɛ bǐ wɛ fyɔ́. Vǐwungbo e ɖo Sivuma lɛ́ɛ lɔ fyɔ́; vǐwunhan Sivuma tɔn wɛ gǎn gǎn lɛ́ɛ nɔ́ nu mú ɖ'ayǐ, gǎn e gbɔn akɔta akɔta lɛ́ɛ mɛ lɛ́ɛ. Vǐwungbo énɛ́ lɛ́ɛ wɛ zɔn mɔ̌ káká yi Yazɛ́ɛ, bó lɛ́ zɔn mɔ̌ káká yi bú ɖo gbětótló mɛ; vǐwuntín lɛ́ɛ dlɛ́n ala káká yi Xu Kúkú ɔ́ gúdo. Nǔ énɛ́ wú wɛ un ɖo avǐ ya xá Yazɛ́ɛnu lɛ́ɛ wɛ ɖó vǐwungbo Sivuma tɔn e fyɔ́ é tamɛ. Hɛcibɔ́ni, Eleale, un ya avǐ, bɔ ɖasin sa tɔ ɖó ta mitɔn mɛ, ɖó ahwan dó tagba nú vǐwun gbigbɛ kpó nǔkúnsísɔ́ mitɔn kpó. Mɛ ɖé sɔ́ ɖo awǎ jɛ wɛ ɖo atínsínsɛ́ngbo mitɔn lɛ́ɛ mɛ ǎ, xomɛ sɔ́ hun mɛɖé ǎ. Han e ji wɛ è nɔ ɖe, bó nɔ́ ɖo kpɛ́ xo wɛ ɖo vǐwungbo lɛ́ɛ mɛ é bǐ fó; vǐwungbɛtɔ́ lɛ́ɛ sɔ́ nɔ́ li vǐwun ɖě ɖo vǐwundo lɛ́ɛ mɛ ǎ. Xó e sú wɛ yě nɔ́ ɖe kpó awǎjijɛ kpó ɔ́, bǐ nɔ te. Énɛ́ ɔ́ wú wɛ un blá wǔ sín ta káká yi afɔ ɖó Mɔwabu wú; un ɖo alě ná wɛ ɖó Kíi-Ɛlɛ́si wú. È nǎ mɔ Mɔwabu ɖo gǎn dó wɛ, bó xwe só jí ɖo vodún tɔn xwé, bó ná sa vo nú vodún tɔn; é ká ná mɔ nǔɖé nu ǎ. Xó e Mawu Mavɔmavɔ ko ɖɔ dó Mɔwabu wú ɖ'ayǐ ɔ́ nɛ́. Amɔ̌, din ɔ́, Mawu Mavɔmavɔ ɖɔ: “Káká nú è nǎ xa xwe atɔn ɔ́, azǎn ɖě má hwe, ɖě má jɛ jí ɔ́, gbɛtɔ́ nukúnɖéjí Mɔwabu tɔn lɛ́ɛ, kpó toví tɔn wɔ̌buwɔ́bú lɛ́ɛ kpó sɔ́ ná nyí nǔɖé wa nú ǎ. Mɛ e ná kpo n'i ɔ́ sɔ́ ná su vo ǎ; mɛ kpɛví ɖé jɛ́n ná nyí.” Xó e Mawu ɖɔ dó Damási jí é ɖíe: Zaanɖé din ɔ́, è sɔ́ ná xa Damási dó toxo lɛ́ɛ mɛ ǎ. É ná húzú awǐnnyaglo kɛ́ɖɛ́. Toxo Alowɛ́ɛ tɔn lɛ́ɛ ɔ́, è nǎ ɖe alɔ sín yě wǔ káká sɔ́yi. Toxo énɛ́ lɛ́ɛ ná húzú kanlin lɛ́ɛ tɔn; kanlin lɛ́ɛ ná nɔ́ wá dɔ́ toxo énɛ́ lɛ́ɛ mɛ, bɔ mɛ ɖěbǔ ná dó tagba nú yě ǎ. Nǔ e wú axɔ́súɖuto Eflayímu tɔn gán jɛ lɛ́ɛ ɔ́, è nǎ yí sín así tɔn. È nǎ yí axɔ́súɖuɖu Damási tɔn lɔ. Nǔ e ná kpo nú Silíinu lɛ́ɛ ná hú éé kpo nú Izlayɛ́linu lɛ́ɛ é ǎ. Xó e Mawu Mavɔmavɔ Nǔbǐwúkpétɔ́ ɔ́ ɖɔ é nɛ́. Gbe énɛ́ gbe ɔ́, Izlayɛ́li sɔ́ ná ɖó zin ɖěbǔ ǎ; é ná xú gǒ. Izlayɛ́li to ɔ́ ná jɛ vɔ̌, lě e è nɔ ya nǔkún bɔ gle nɔ jɛ vɔ̌ é ɖɔhun; to ɔ́ ná jɛ vɔ̌ lě e è nɔ sɔ́ jinukún sín Hlafa ví lɛ́ɛ sín tɔdo mɛ bɔ é nɔ́ jɛ vɔ̌ é ɖɔhun. Nǔ ɖokpó ɖokpó ɖé jɛ́n ná kpo ɖo Izlayɛ́li, bɔ è hɛn ɔ́, è nǎ cyán. É ná cí lě e è nɔ sɔ́ akpalá dó gbɛ olívu, bɔ é nɔ́ kpo we abǐ atɔn ɖo atín ɔ́ jí ɖo agǎn mɛ é ɖɔhun, abǐ é nɔ́ kpo olívu ɛnɛ abǐ atɔ́ɔ́n ɖo ala ɖé wú é ɖɔhun. Xó e Mawu Mavɔmavɔ, Mawu Izlayɛ́li tɔn ɖɔ é nɛ́. Gbe énɛ́ gbe ɔ́, gbɛtɔ́ ná lílɛ́ bó kpan nukɔn mɛ e ɖó e ɔ́, bɔ nukún tɔn bǐ ná ɖo Mawu mímɛ́ Izlayɛ́li tɔn ɔ́ wú. É ná ɖe nukún sín vodúnxɔ e é gbá lɛ́ɛ wú; é sɔ́ ná kpɔ́n vodún e é zé alɔví tɔn wǒ lɛ́ɛ dó bló é ǎ; é ná ɖe nukún sín vodún Acela lɛ́ɛ wú, bó ɖe nukún sín nǔ e mɛ è nɔ dó zǎlínkpɔ́n zo ɖe ɔ́ wú. Gbe énɛ́ gbe ɔ́, è nǎ jó toxo e è mɛ ahohó lɛ́ lɛ̌ dó lɛ́ɛ bǐ dó. È nǎ jó toxo lɛ́ɛ dó bɔ yě ná cí toxo gbigba e è nɔ mɔ gbɔn zunkan tɛ́ntin lɛ́ɛ kpó ée è nɔ mɔ gbɔn só jí só jí lɛ́ɛ kpó é ɖɔhun. Mɛ e ɖo toxo énɛ́ lɛ́ɛ mɛ lɛ́ɛ jó toxo yětɔn dó hwenu e yě ɖo hinhɔn wɛ ɖo Izlayɛ́li ví lɛ́ɛ nukɔn é. Énɛ́ ɔ́, toxo e è mɛ ahohó lɛ́ lɛ̌ dó lɛ́ɛ ná cí gbětótló ɖɔhun. Izlayɛ́li, a wɔn Mawu towe e hwlɛ́n we gán é, a sɔ́ flín Só e nyí ahohó towe é ǎ; énɛ́ wú wɛ a blǒ jikpá nú vodún e nɔ́ dɔn mɛ é, bó dó jinukún ɖó jikpá ɔ́ mɛ bó nɔ́ dó sɔ́ ɛ su. Gbe e gbe a dǒ jinukún ɔ́ jɛ́n é nɔ́ wú, bó nɔ́ jɛ susu jí bɔ a nɔ mɔ; nǔkún e a dǒ zǎnzǎn ɔ́ nɔ́ gba sɛ́ gbe ɖokpó ɔ́. Lo ɔ́, é jɛ hwenu e è nǎ ya nǔ e è dǒ é ɔ́, è nɔ mɔ jinukún ǎ, azɔn wɛ è nɔ mɔ ɖó tɛn tɔn mɛ, azɔn jɛ ma gbɔ. Heelú! Étɛ́ ká ɖíe! Mi se zǐngídi e jí togun wɔ̌buwɔ́bú élɔ́ lɛ́ɛ ɖe é! Yě ɖo adǎn jí bɔ a nǎ ɖɔ xu wɛ ɖo zǐn xo wɛ. Akɔta lɛ́ɛ ɖo zǐngídi jí bɔ a nǎ ɖɔ xu ɖaxó ɖaxó lɛ́ɛ wɛ ɖo xixo wɛ kpó hlɔ̌nhlɔ́n kpó. Yě ɖo zǐngídi jí bɔ a nǎ ɖɔ tɔsisa ɖaxó ɖaxó lɛ́ɛ wɛ ɖo adǎn jí. Lo ɔ́, hwenu e Mawu ná sí te dó yě jí ɔ́, yě ná hɔn yi zɔ nǔywɛ́ e mɛ jɔhɔn d'alɔ sín só jí bó sɔ́yi é ɖɔhun, yě ná yi zɔ afúntúntún e mɛ axásáxásá jɔhɔn d'alɔ é ɖɔhun. Gbadanu ɔ́, yě ná ɖo adohu ɖó nú mɛ wɛ mɔ̌hunkɔtɔn. Cóbónú ayǐ ká ná hɔ́n ɔ́, yě ɖěbǔ sɔ́ ná kpo ǎ. Nǔ e ɖo te kpɔ́n mɛ e nɔ fɔ nǔ mǐtɔn lɛ́ɛ é nɛ́, mɛ e nɔ wá vɔ mǐ lɛ́ɛ ɔ́, nǔ e ná jɛ dó yě jí ɔ́ nɛ́. Heelú to e mɛ nǔvínúví awanɔ gɔ́ é! To ɔ́ gbɔn Etiopíi tɔ lɛ́ɛ tó káká yi. É nɔ́ sɛ́ tofɔzéɖótetɔ́ lɛ́ɛ dó, bɔ yě nɔ́ dó akló e è zě fɛ́n dó bló é, lobo nɔ gbɔn Nilu tɔ ɔ́ jí yi to mɛ. Wɛnsagun e mi, mi mɛ e xwe fí ɖé ɔ́ mi nɔ yá wǔ yi lɛ́ɛ e mi, mi lɛ́ kɔ yi mɛ mitɔn lɛ́ɛ gɔ́n, mɛ mitɔn sakasaka, wǔtu ɖíɖíɖíɖí énɛ́ lɛ́ɛ gɔ́n. Togun énɛ́ ɔ́ nɔ́ dó adohu nú mɛ e ɖo gbɛ ɔ́ mɛ lɛ́ɛ bǐ. Mi yi togun mitɔn syɛ́nsyɛ́n énɛ́ e nɔ́ ɖo kɛntɔ́ tɔn lɛ́ɛ nyínyɛ́ wɛ é gɔ́n. Mi lɛ́ kɔ yi to mitɔn e tɔ ɖo mǐmá wɛ é mɛ. Midɛɛ lɛ́ɛ ɔ́, mi mɛ e ɖo gbɛ ɔ́ mɛ lɛ́ɛ ɔ́, mi mɛ e ɖo ayǐkúngban ɔ́ jí lɛ́ɛ ɔ́, mi kpɔ́n asyá e è nǎ zé tun te ɖó só lɛ́ɛ ta é, lobo ɖo tó ɖó hwenu e lanzo ɔ́ ná ɖɔ nǔ dó é wɛ. Đó Mawu Mavɔmavɔ ɖɔ nú mì ɖɔ: “Un ɖo xwé ce gbe aga dɔ̌n, bó ɖo cúɖúɖú hwe ɖo hwǎn ɖɔhun; bó ɖo nǔ e ɖo jijɛ wɛ é bǐ mɔ wɛ; Un ɖo cúɖúɖú amǔ e sú nǔkún-yahwenu é ɖɔhun bó ɖo nǔ e ɖo jijɛ wɛ ɔ́ kpɔ́n sɛ́ dó wɛ.” Hwenu e nǔkún nɔ́ jɛ nyǐnyɔ́ jí ɔ́, hwenu e vǐwun ko gba sɛ́ fó, bɔ sɛ́ lɛ́ɛ kó ná sínsɛ́n bó jɛ zinzin jí ɔ́, è nǎ zé jǐví dó ɖe ala e ma ɖó sínsɛ́n ǎ lɛ́ɛ síin, bó ná ɖe ama e ɖo zǐnzɔ́n wɛ lɛ́ɛ síin. Mɔ̌ wɛ è nǎ jó kɛntɔ́ lɛ́ɛ sín cyɔ dó, bɔ aklasú e ɖo zunkan mɛ lɛ́ɛ kpó gběkanlin lɛ́ɛ kpó ná ɖu; è nǎ jó yě dó bɔ aklasú e è nɔ mɔ nǔkún-yiya hwenu lɛ́ɛ, kpó gběkanlin e è nɔ mɔ avivɔ hwenu lɛ́ɛ kpó ná ɖu. É jɛ hwenɛ́nu lo ɔ́, è nǎ hɛn nǔ, bó wá ná Mawu Mavɔmavɔ Nǔbǐwúkpétɔ́ ɔ́ dó togun énɛ́ tamɛ: togun e mɛ gbɛtɔ́ sakasaka wǔtu ɖíɖíɖíɖí lɛ́ɛ ɖe ɔ́, togun énɛ́ e nɔ́ dó adohu nú gbɛtɔ́ e ɖo gbɛ ɔ́ mɛ lɛ́ɛ bǐ é, togun syɛ́nsyɛ́n énɛ́ e nɔ ɖo kɛntɔ́ tɔn lɛ́ɛ nyínyɛ́ wɛ é, togun énɛ́ e tɔ ɖo to yětɔn má wɛ é. È nǎ hɛn nǔ énɛ́ lɛ́ɛ wá fí e Mawu Mavɔmavɔ Nǔbǐwúkpétɔ́ ɔ́ nɔ́ nɔ ɖo Sinyɔ́ɔ só ta é. Xó e Mawu ɖɔ dó Ejípu jí é ɖíe: Mawu Mavɔmavɔ ɖíe zɔn akpɔ́kpɔ́ ɖé jí ja Ejípu e! Akpɔ́kpɔ́ e jí é ɖe é ɖo wezun jí. Vodún Ejípu tɔn lɛ́ɛ ɖo sísɔ́sísɔ́ wɛ ɖo nukɔn tɔn, bɔ awakanmɛ kú Ejípunu lɛ́ɛ bǐ. Mawu ɖɔ: “Un ná dɔn Ejípunu ɖě dó ɖě jí, bɔ yě ná wlí yěɖée ɖu; yě mɛ we ná kpé ta bó ná xo hun, toxo ɖě ná sí te dó ɖě jǐ, axɔ́súɖuto ɖě ná sí te dó ɖě jǐ. Ejípunu lɛ́ɛ sín hǔn ná gbadó, bɔ un ná hɛn tito yětɔn bǐ dó agudu. Un bló mɔ̌ lo ɔ́, yě ná yi mɔ vodún yětɔn lɛ́ɛ, bokantɔ́ lɛ́ɛ kpódó bokɔ́nɔ lɛ́ɛ kpó, bó ná kan nǔ ɖo yě gɔ́n. Un ná jó Ejípu nú gǎn e syɛ́n ganjí é ɖokpó, un ná jó e nú axɔ́sú hunnylámɔnɔ ɖokpó, bɔ é na kpa acɛ dó nu tɔn.” Xó e Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ é nɛ́. Nilu tɔ ɔ́ ná mɛ; é ná xú bǐ sésé. Fí e Nilu tɔ sín ala gbɔn lɛ́ɛ bǐ ná nɔ́ lun wǎn; Ejípu tɔ ɔ́ sín ala lɛ́ɛ sín hlɔ̌nhlɔ́n ná ɖe kpo bɔ yě ná mɛ. Fɛ́n lɛ́ɛ kpó fántín lɛ́ɛ kpó ná mlú; è sɔ́ ná mɔ gběhan ɖě gbɔn Nilu tɔ ɔ́ tó ǎ; nǔ e è dǒ gbɔn Nilu tɔ ɔ́ kpá lɛ́ɛ bǐ ná fyɔ́, jɔhɔn ná nyi bó ná za bǐ, bɔ nǔ ɖěbǔ sɔ́ ná kpo ǎ. Đɔnyitɔ́ lɛ́ɛ ɖo azɔn wɛn wɛ, mɛ e nɔ nyi mlɛ ɖo Nilu tɔ ɔ́ mɛ lɛ́ɛ bǐ ná nɔ aluwɛ mɛ, yě mɛ e nɔ nyi ɖɔ ɖo tɔ ɔ́ jí lɛ́ɛ bǐ ná blá wǔ. É ná vɛ́ nú yě mɛ e nɔ wa lɛ̌ɛnkan sín azɔ̌ lɛ́ɛ káká: nyɔ̌nu e nɔ́ tɛ́n lɛ̌ɛnkan lɛ́ɛ, kpó súnnu e nɔ́ lɔn lɛ̌ɛnvɔ lɛ́ɛ kpó bǐ ná wlí azɔn dó te, yě ná byɔ́ linkpɔ́n mɛ. Nǔ jɛ́n gbo avɔlɔntɔ́ lɛ́ɛ. Awakanmɛ ná kú yě mɛ e nɔ wa azɔ̌ énɛ́ lɛ́ɛ có bó nɔ́ mɔ nǔ ɖu lɛ́ɛ é bǐ. Gǎn Sowáan tɔn lɛ́ɛ bí ɖěbǔ ǎ; toxóɖɔtɔ́ Ejípu xɔ́sú ɔ́ tɔn lɛ́ɛ sín gbɛ̌ta jɔ xlo ɖésú. Nɛ̌ ká gbɔn bɔ mi ná yi mɔ Ejípu xɔ́sú ɔ́, bó ná ɖɔ n'i ɖɔ: “Nyɛ ɔ́, toxóɖɔtɔ́ ví wɛ nú mì, axɔ́sú ɖ'ayǐ tɔn lɛ́ɛ sín vǐ wɛ un nyí.” Nɛ̌ mi ná ɖɔ mɔ̌ gbɔn? Ejípu xɔ́sú, fítɛ́ toxóɖɔtɔ́ towe lɛ́ɛ ɖe? Yě ní ɖɔ nǔ e ná sɔ́ Ejípu to ɔ́ dó wa wɛ Mawu Mavɔmavɔ Nǔbǐwúkpétɔ́ ɔ́ ɖe ɔ́ nú we, yě ní ɖɔ nú we bónú a tunwun! Gǎn Sowáan tɔn lɛ́ɛ húzú xlonɔ, Mɛfísi sín gǎn lɛ́ɛ sín ayi sɔ́ ɖo nǔ mɔ wɛ ganjí ǎ. Yě wɛ nyí tokpɔnlagán e ɖo Ejípu dɔn bú wɛ é. Mawu Mavɔmavɔ hɛn taglo mɛ yětɔn wlú, bɔ yě bló nǔ ɖěbǔ ɔ́, yě nɔ́ dɔn toví lɛ́ɛ bú ali. Énɛ́ ɔ́, Ejípu to ɔ́ ná cí mɛ e nu ahan mú, bó slú lobo ɖo nǔ ɖíɖí ɖ'é mɛ wɛ é ɖɔhun. Mɛ ɖěbǔ ɖo toví lɛ́ɛ mɛ, bó ná zé nǔɖé bó wa bɔ é ná yi ta ǎ; gbɛtɔ́ nukúnɖéjí kpó gbɛtɔ́ kpaa kpó, dɔkunnɔ kpó wamamɔnɔ kpó ɖě sɔ́ nɔ́ wa nǔɖé bɔ é nɔ́ yi ta ǎ. Ayǐ ɖokpó ná wá hɔ́n, bɔ Ejípunu lɛ́ɛ ná cí nyɔ̌nu ɖɔhun; yě ná sísɔ́ hwenu e Mawu Mavɔmavɔ ná zé alɔ, bó ná ja nǔ wa xá yě gbé é. Judáa yíkúngban ná ɖó adohu nú yě. È ɖɔ xó tɔn ɖo yě gɔ́n gbeɖé ɔ́, xɛsi ná jɛ yě jǐ, ɖó nǔ e Mawu Mavɔmavɔ Nǔbǐwúkpétɔ́ ɔ́ ɖɔ émí ná wa xá yě ɔ́ wú. Ayǐ ɖokpó ná wá hɔ́n, bɔ è nǎ mɔ toxo e mɛ è nɔ dó Ebléegbe ɖe ɔ́ atɔ́ɔ́n ɖo Ejípu, bɔ toxo énɛ́ lɛ́ɛ bǐ ná zin alɔ dó akɔ́n ɖɔ émí nyí Mawu Mavɔmavɔ Nǔbǐwúkpétɔ́ ɔ́ tɔn. È nǎ ylɔ́ toxo énɛ́ lɛ́ɛ ɖokpó ɖɔ Hwesivɔ́-Toxo. Ayǐ ɖokpó ná wá hɔ́n, bɔ è nǎ mɛ vɔ̌sákpe ɖokpó nú Mawu Mavɔmavɔ ɖó Ejípu to ɔ́ tɛ́ntin, bó ná dó awǐnnya ɖokpó do ɖó to ɔ́ sín dogbó jí, bó ná dó zé Mawu Mavɔmavɔ su. Énɛ́ ná xlɛ́ ɖɔ Mawu Mavɔmavɔ Nǔbǐwúkpétɔ́ ɔ́ ɖo Ejípu to ɔ́ mɛ. Hwenu e Ejípunu lɛ́ɛ ná sú xó ylɔ́ Mawu Mavɔmavɔ ɖɔ é ní wá hwlɛ́n émí ɖo mɛ e ɖo émí táfú wɛ lɛ́ɛ sí ɔ́, Mawu Mavɔmavɔ ná sɛ́ mɛhwlɛ́ngántɔ́ dó yě, bɔ é ná wá jɛ ahwan yě jí bó hwlɛ́n yě. Hwenɛ́nu lo ɔ́, Mawu Mavɔmavɔ ná ɖe éɖée xlɛ́ Ejípunu lɛ́ɛ, bɔ yě ná tunwun i, bó ná nɔ́ sɛn ɛ kpó vɔ̌ yětɔn lɛ́ɛ kpó nǔníná yětɔn lɛ́ɛ kpó. Yě ná nɔ́ dó akpá n'i, bó ná nɔ́ ɖe. Mawu Mavɔmavɔ gblé wǔ Ejípunu lɛ́ɛ ɔ́, é ná lɛ́ gbɔ azɔn nú yě; yě ɖésú ná lɛ́ kɔ wá Mawu Mavɔmavɔ gɔ́n, bɔ é ná yí gbe nú nǔ e byɔ́ ɛ wɛ yě ɖe lɛ́ɛ, bó ná gbɔ azɔn nú yě. Ayǐ ɖokpó ná wá hɔ́n, bɔ è nǎ bló agbǎsa ɖokpó sín Ejípu yi Asilíi, bɔ Asilíinu lɛ́ɛ ná nɔ́ wá Ejípu, bɔ Ejípunu lɛ́ɛ ná nɔ́ yi Asilíi. Yě bǐ ná nɔ́ nɔ kpɔ́, bó ná nɔ́ sɛn Mawu Mavɔmavɔ. Ayǐ ɖokpó ná wá hɔ́n, bɔ Izlayɛ́li ná xo kpó ɖó nú Ejípu kpó Asilíi kpó. É ná nyí kpɔ́ndéwú gbɛɖe ɖɛ ɖagbe e Mawu ná xo dó gbɛ ɔ́ jí é tɔn. Mawu Mavɔmavɔ ná dó acɛ gbɛ ɔ́ jí, bó ná ɖɔ: “Un dó acɛ togun ce Ejípu jí; un dó acɛ Asilíi e un zé alɔ ce dó bló ná é jí, un dó acɛ Izlayɛ́li e nyí nǔ ce ɔ́ jí.” Axɔ́sú Asilíi tɔn Saagɔ́ɔn ná gbe ahwangán tɔn ɖaxó e kpa acɛ dó ahwangɔnu Asilíi tɔn nu é, bɔ é yi tɔ́n ahwan Acidɔ́di toxo ɔ́ bó ɖu ɖ'é jí. É kpo xwe atɔn bɔ è nǎ yí Acidɔ́di toxo ɔ́, Mawu Mavɔmavɔ ɖɔ nú Ezayíi Amɔ̌si ví ɔ́ ɖɔ: “A nǎ tún nǔwamɛvɔ e a sin dó alin é, bó ná ɖe afɔkpa e a dǒ é.” Énɛ́ ɔ́, Ezayíi bló nǔ e Mawu Mavɔmavɔ ɖɔ é, bó jɛ goklé, bó ɖo sa ɖi wɛ afɔvɔ́. Hwenu e è yǐ Acidɔ́di é ɔ́, Mawu Mavɔmavɔ ɖɔ gbɔn Ezayíi jí ɖɔ: “Xwe atɔn ɖíe bló wɛ é ɖe din, bɔ mɛsɛntɔ́ ce Ezayíi ɖo goklé, bó ɖo sa ɖi wɛ afɔvɔ́ e. Nǔ énɛ́ ɔ́, nǔ e ná jɛ dó Ejípu kpó Etiopíi kpó wú ɔ́ sín xlɛ̌ wɛ. Axɔ́sú Asilíi tɔn ná wlí Ejípunu lɛ́ɛ kpó Etiopíinu lɛ́ɛ kpó. É ná wlí yɔkpɔ́vú kpó mɛxó kpó hɛn yi, bɔ yě ná húzú gantɔ́ tɔn. Yě ná nɔ mɛ̌, bó nɔ afɔvɔ́ Ezayíi ɖɔhun bɔ é ná kplá yě yi. Yonu yětɔn ná nɔ wěxo. Winnyánú tɛ́ ɖíe ká ɖo Ejípunu lɛ́ɛ ná gbo wɛ e! Nǔ énɛ́ e jɛ dó Ejípu e wú mɛ lɛ́ɛ nɔ́ ɖeji dó ɔ́, bó lɛ́ jɛ dó Etiopíi e wú mɛ lɛ́ɛ nɔ́ ɖo afɔ tɛ ayǐ wɛ ɔ́, dó awakanmɛ kú nú yě, bɔ yě flú.” Gbe énɛ́ gbe ɔ́, mɛ e ɖo gbě e jí mǐ ɖe lɛ́ɛ sú xó bó ɖɔ: “Nǔ e gbo mɛ e ɖó nukún wɛ mǐ ɖe lɛ́ɛ é nɛ́! Mǐ tunwun ɖɔ mǐ nǎ hɔn yi su yě, bɔ yě ná hwlɛ́n mǐ bó yí mǐ sín axɔ́sú Asilíi tɔn sí... Din ɔ́, mɛ̌ mǐ ká ná mɔ bɔ é ná hwlɛ́n mǐ gán?” Xó e Mawu ɖɔ dó gbětótló e ɖo xutó é jí é ɖíe: Kɛntɔ́ gosín gbětótló mɛ ja, é gosín to dó xɛsi ɖé mɛ ja, é ja axásáxásá jɔhɔn ɖo Nɛgɛ́vu dín gbɔn wɛ ɖɔhun. Nǔ baɖabaɖa ɖé wɛ Mawu hun xlɛ́ mì. Mɛ e kpó mɛ kpó jɛ akɔ ɔ́ húzú mɛsaɖutɔ́. Nǔhɛngblétɔ́ ɔ́ ná hɛn nǔ gblé. Mawu ɖɔ: “Elámunu lɛ́ɛ e mi, mi yi fun ahwan. Mɛdinu lɛ́ɛ e mi, mi yi xá to ɔ́. Un ná ɖó wǔvɛ́ bǐ te.” Énɛ́ ɔ́ wú wɛ alin ce ɖo ɖuɖu wɛ. Un ɖo wǔvɛ́ mɔ wɛ nyɔ̌nu ɖo ajidonu ɖɔhun. Nǔ e se wɛ un ɖe ɔ́ ɖo ayi gbadó nú mì wɛ. Nǔ e mɔ wɛ un ɖe ɔ́ ɖo xɛsi dó nú mì wɛ. Ayi ce j'ayǐ ǎ, xɛsi ɖo jǐ ce. Un ɖo nukún ɖó zǎn wɛ ɖɔ ní kú bónú ayi ce ná jɛ ayǐ; é ká cí nukún ce mɛ ɖɔ xɛsi zán wɛ ɖo nǎ kú nú mì wɛ ɖɔhun. È tɛ́ nǔɖuɖu, bó tɛ́ nǔ gbɔn kɔ́ mɛ. È ɖu nǔ, bó nu ahan... Zaanɖé kpowun ɔ́, mɛɖé sú xó bó ɖɔ: “Sɔ́jagán lɛ́ɛ e mi! Mi sí te bó fɔ ahwanfunnú mitɔn lɛ́ɛ!” Xó e Aklúnɔ ɖɔ nú mì é ɖíe: “Sɛ́ mɛcɔ́tɔ́ ɖokpó dó fí e è nɔ cɔ́ mɛ ɖe é; bónú é ní ɖo nǔ e ɖo jijɛ wɛ ɔ́ ɖɔ wɛ. Ényí é mɔ ahwankɛkɛ́ví bónú yě slɛ́ dó, bɔ sɔ́ ɖo dindɔn wɛ, tócí abǐ lǎkúnmí ɖo dindɔn wɛ hǔn, é ní cɔ́ éɖée, é ní cɔ́ éɖée ɖésú!” Nǔgbó ɔ́, mɛcɔ́tɔ́ ɔ́ sú xó bó ɖɔ: “Gǎn e, un nɔ ahohó ɔ́ jí kéze káká bɔ zǎn kú; un nɔ azɔ̌ jí zǎn mɛ káká bɔ ayǐ hɔ́n, bó ɖo nǔ e ɖo nǎ jɛ wɛ é cɔ́ wɛ. Un ná mɔ nǔɖé kpowun ɔ́, un mɔ dǎwe ɖokpó ɖo ahwankɛkɛ́ví mɛ, bɔ sɔ́ ɖo dindɔn wɛ. Nya ɔ́ kɛ nu, bó sú xó bó ɖɔ: ‘Babilɔ́nu jɛ ayǐ! Babilɔ́nu jɛ ayǐ! Vodún tɔn lɛ́ɛ bǐ sín bǒcyɔ jɛ ayǐ bó gba hánnyá!’ ” Togun ce, hwi mɛ e è só lě e è nɔ só jinukún ɖo kɔ́xota gbɔn ɔ́, nǔ e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́ ɖɔ bɔ un se ɔ́ nɛ́. Xó e un hɛn wá nú we ɔ́ nɛ́. Xó e Mawu ɖɔ dó Duma jí é ɖíe: “Un se gbe ɖé sín Seyíi, bɔ é ɖɔ nú mì ɖɔ: ‘Mɛcɔ́tɔ́, zǎn ká ko sɛ yi kpɛɖé din a?’ ” Bɔ mɛcɔ́tɔ́ ɔ́ yí gbe, bó ɖɔ: “Ayǐ nǎ hɔ́n, zǎn ká ná lɛ́ kú. Ényí mi jló ná lɛ́ kan nǔ byɔ́ hǔn, mi kanbyɔ́ bó yi bó wá hweɖévonu.” Xó e Mawu ɖɔ dó Alabíi jí é ɖíe: Mi Dedáninu e dó ahwan gbě lɛ́ɛ e mi! Mi yi dɔ́ gběhan Alabíi tɔn lɛ́ɛ mɛ. Mi mɛ e ɖo Téma lɛ́ɛ e mi! Mi hɛn sin bó yi kpé mɛ e vɛ̌ ɖo xúxú wɛ lɛ́ɛ é. Mi hɛn nǔɖuɖu yi jó nú mɛ e ɖo hinhɔn wɛ lɛ́ɛ. Đó yě ɖo hinhɔn nú hwǐ wɛ; yě ɖo hinhɔn nú hwǐ e nǔɖé má nɔ́ hɛn ɖó te ǎ é wɛ. Yě ɖo hinhɔn nú gǎ e è sɔ́ dó yě jí ɔ́ wɛ. Yě ɖo hinhɔn nú ahwan e è tɔ́n yě ɔ́ wɛ. Xó e Aklúnɔ ka ɖɔ nú mì é ɖíe: “Káká nú mǐ ná mɔ xwe ɖokpó kpíkpé lě ɔ́, susu Kedáa tɔn ná xo kɔ́ bǐ. Gǎdatɔ́ tɔn lɛ́ɛ kpó sɔ́ja tɔn syɛ́nsyɛ́n lɛ́ɛ kpó sɔ́ ná kpo gěgé ɖé ǎ. Yě mɛ kpɛɖé jɛ́n ná kpo.” Xó e Mawu Mavɔmavɔ, Mawu Izlayɛ́li tɔn ɖɔ é nɛ́. Xó e Mawu ɖɔ dó Nǔɖexlɛ́mɛ tɔdo ɔ́ wú é ɖíe: Jeluzalɛ́mu! Nɛ̌ ká gbɔn nú we? Étɛ́wú toví towe lɛ́ɛ bǐ xá xɔ ta? Étɛ́wú axi ɖo jijɛ wɛ mɔ̌? Étɛ́wú a ɖo xó sú wɛ mɔ̌? Étɛ́wú a ɖo agbojlaka ɖú wɛ mɔ̌? Mɛ towe e kú lɛ́ɛ ɔ́, é nyí ahwan wɛ hu yě ǎ, ahwangbénu wɛ yě kú ɖe ǎ. Ahwangán towe lɛ́ɛ bǐ hɔn, gǎdatɔ́ lɛ́ɛ da gǎ vɔ́vɔ́ có bó wlí yě ǎ. Yě mɛ e wú kɛntɔ́ xwedó lɛ́ɛ bǐ wɛ é wlí dó gan; é wlí yě káká jɛ mɛ e hɔn yi zɔ lɛ́ɛ jí. Énɛ́ ɔ́ wú wɛ un ɖɔ nú mi ɖɔ: “Mi ma ɖɔ émí ná ɖó kɔ wǔ ce ó, mi jó mì dó nú má ya avǐ nú é ná jɛ mɛ nú mì. Mi ma ɖɔ émí ná ɖó alɔ akɔ́n jí nú mì, ɖó awě ɖaxó e xo togun ce ɔ́ wú ó. Đó égbé din ɔ́, Aklúnɔ, Mawu Mavɔmavɔ Nǔbǐwúkpétɔ́ ɔ́ dó hunnyahunnya mǐ mɛ, mǐ j'ayǐ ɖo ahwan nukɔn; mǐ sɔ́ tunwun lě e mǐ nǎ wa nǔ gbɔn é ǎ.” Zǐngídi e ɖo Nǔɖexlɛ́mɛ tɔdo ɔ́ mɛ é syɛ́n ɖésú. È nɔ sú xó bó nɔ́ byɔ́ alɔgɔ́ sɛ́ dó só lɛ́ɛ ta. Sɔ́ja Elámu tɔn lɛ́ɛ hɛn da kpó gǎ kpó, mɛ ɖě ɖo ahwankɛkɛ́ví mɛ, mɛ ɖě ɖo sɔ́ jí, bɔ sɔ́ja Kíi tɔn lɛ́ɛ ɖe gǎglónú yětɔn lɛ́ɛ tɔ́n. Jeluzalɛ́mu! Ahwankɛkɛ́ví kpé tɔdo towe e nyɔ́ ɖɛkpɛ hú tɔdo lɛ́ɛ bǐ é mɛ. Sɔ́xátɔ́ lɛ́ɛ sí ahwan te ɖo toxo ɔ́ sín hɔntogbó jí. Judáa sɔ́ ɖó nǔ e wú é ná gán jɛ é ɖěbǔ ǎ. Gbe énɛ́ gbe ɔ́, mi ɖó nukún ahwanfunnú e ɖo xɔ e è nɔ ylɔ́ ɖɔ “Zungbó ɔ́” mɛ lɛ́ɛ. Mi mɔ ali e è tɔ́n dó ahohó e è mɛ lɛ́ lɛ̌ dó Davídi toxo ɔ́ mɛ lɛ́ɛ. Mi ɖó sin kpasin dó sindo e ɖo do ɔ́ mɛ. Mi xa xwé e ɖo Jeluzalɛ́mu lɛ́ɛ, bó gba ɖě dó yi ná hlɔ̌nhlɔ́n ahohó ɔ́. Mi kun do ɖokpó ɖó ahohó we lɛ́ɛ tɛ́ntin, bónú sin e ná sa sín sindo xóxó ɔ́ mɛ é ná kɔn d'é mɛ. Mi ka flín mɛ e zɔ́n bɔ nǔ énɛ́ lɛ́ɛ ɖo mi gbo wɛ é ǎ. É ɖo nǔ tɔn sɔ́ wɛ ɔ́, é kó lín, lo ɔ́, mi mɔ ɛ ǎ. Gbe énɛ́ gbe ɔ́, Aklúnɔ, Mawu Mavɔmavɔ Nǔbǐwúkpétɔ́ ɔ́ byɔ́ mi ɖɔ mi ní ya avǐ, mi ní dó gbɛvíhan, mi ní xwlɛ́ ta, mi ní dó nǔwamɛ vɔ. Lo ɔ́, mi bló gbɔn mɔ̌ ǎ; mi ɖo awǎ jɛ wɛ, bó ɖo gbɛ ɖu wɛ: è ɖo nyibú hu wɛ, bó ɖo gbɔ̌ hu wɛ, è ɖo lan ɖu wɛ, bó ɖo vɛ̌ɛn nu wɛ... Mi nɔ ɖɔ: “Mi nú mǐ nǎ ɖu nǔ bó nu ahan, ɖó sɔ ɔ́ mǐ nǎ kú.” Amɔ̌, Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Un xwlé nyǐkɔ ce nú mi, nǔ énɛ́ e mi wa nyi do ɔ́, un ná sɔ́ kɛ mi có mi ná kú ǎ.” Xó e Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ é nɛ́. Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Yi mɔ Cevúna nǔjíkpɔ́ntɔ́ e kpa acɛ dó hɔnmɛ nu é, bó ɖɔ n'i ɖɔ: A kun yɔdo nú hwiɖée ɖó fí, a kun ɖó aga ɖéé, a kun nɔtɛn ɖokpó dó sóxo mɛ; ayǐkúngban tɛ́ a ɖǒ ɖo fí? Hɛ̌nnumɔ towe tɛ́ wɛ nyí fí nu? A mɔ ɖɔ émí dó hlɔ̌nhlɔ́n; Mawu Mavɔmavɔ ná sɔ́ we nyi dó gbě ɖo cɛ́jú mɛ; é ná xásá kan dó we, bó ná nyi we, bɔ a nǎ blí bɔ̌lu ɖɔhun gbɔn to gblogblo ɖé mɛ, bó ná kú jɛ fínɛ́; hwi mɛ e ɖo hɛ̌n dó gǎn towe xwé wɛ ɔ́, fínɛ́ wɛ hwi kpó ahwankɛkɛ́ví towe ɖagbe ɖagbe lɛ́ɛ kpó ná dɔn cí. Mawu ɖɔ: Un ná ɖe we sín azɔ̌ towe kɔn, un ná nya we sín tɛn towe mɛ. Gbe énɛ́ gbe ɔ́, un ná ylɔ́ mɛsɛntɔ́ ce Eliyakímu Ilukyahu ví ɔ́. Un ná zé azɔ̌wu towe dó n'i, un ná sin gǒjíblánú towe dó alin n'i. Un ná zé acɛ e a ɖǒ ɔ́ n'i. É ná nyí tɔ́ nú Jeluzalɛ́munu lɛ́ɛ; é ná nyí tɔ́ nú axɔ́súɖuto Judáa tɔn ɔ́ bǐ. Un ná zé Davídi xwé ɔ́ sín cávi dó alɔ mɛ n'i. É hun hɔn ɖé ɔ́, mɛ ɖěbǔ ná sú ǎ; é sú hɔn ɖé ɔ́, mɛ ɖěbǔ ná hun ǎ. Un ná xwe e só ɖɔhun, ɖó fí e syɛ́n ganjí é. É ná nyí wi bó nɔ ta nú daá tɔn xwé.” Mɛ e ɖo hɛ̌n tɔn nu lɛ́ɛ bǐ ná nyí agban bo nɔ kɔ tɔn: mɛ e ɖo xwé é kpó mɛ e ɖo gle é kpó bǐ ná nyí agban bó nɔ kɔ tɔn. É ná cí só e è xwe bó fɔ gannú kpó basya kpó zɛ̌n kpó bǐ kplá kɔ é ɖɔhun. Agban tawun wɛ mɛ! Mawu Mavɔmavɔ Nǔbǐwúkpétɔ́ ɔ́ ɖɔ: “Ayǐ ɖokpó ná wá hɔ́n, bɔ só ɔ́ ná sún j'ayǐ. È xwe e dó fí e syɛ́n ganjí é có é ná sún. É ná sún j'ayǐ, bɔ agban e ɖo kɔ tɔn lɛ́ɛ ná jɛ ayǐ bó gba hánnyá.” Xó e Mawu Mavɔmavɔ ɖɔ é nɛ́. Xó e Mawu ɖɔ dó “Tíi” wú é ɖíe: “Tɔjíhún ɖaxó ɖaxó lɛ́ɛ mi, mi dó gbɛvíhan. Mi dó gbɛvíhan, ɖó è gba Tíi toxo ɔ́ bǐ; mi sɔ́ ɖó fí e mi ná nɔ́ yi glín ɖó é ǎ.” Hwenu e tɔjíhún lɛ́ɛ lɛ́ kɔ sín tɔtɛ́ntinto Cíplu tɔn mɛ wá ɔ́ wɛ yě se xó énɛ́. Mi mɛ e nɔ nɔ xutó xutó lɛ́ɛ mi, ahwi ní xo mi. Mi ajɔ̌watɔ́ Sidɔ́ɔn tɔn e nɔ sɛ́ mɛ dó xu jí xu jí lɛ́ɛ mi, ahwi ní xo mi. Jinukún e è nɔ dó gbɔn Nilu tɔ ɔ́ tó káká yi lɛ́ɛ, ée è nɔ ya ɖo Nilu tɔ ɔ́ kpá lɛ́ɛ wɛ nɔ́ dó dɔkun nú Sidɔ́ɔn. Sidɔ́ɔn toxo ɔ́ húzú axi bɔ akɔta lɛ́ɛ bǐ nɔ́ xwlé. Sidɔ́ɔn, winnyá ní hu we; ɖó xu ɖɔ, agbetawoyó ɖɔ: “Un cí mɛ ma yi ajidonu kpɔ́n ɖɔhun, un cí mɛ ma jǐ vǐ kpɔ́n ɖɔhun, un cí mɛ ma hɛn vǐ súnnu kpɔ́n ɖɔhun, un cí mɛ ma hɛn vǐ nyɔ̌nu kpɔ́n ɖɔhun.” Hwenu e Ejípu ná se nǔ e gbo Sidɔ́ɔn ɔ́, é ná jɛ wǔvɛ́ mɔ jí. Nǔ e wa ɛ hwenu e é se ɖɔ Tíi gba é wɛ ná wa ɛ. “Mi mɛ e nɔ nɔ xutó xutó lɛ́ɛ mi, mi gbɔn xu jí káká yi Taasísi, mi dó gbɛvíhan! Toxo mitɔn e nɔ jɛ axi ɖɔhun ɖ'ayǐ é jɛ́n nɛ́ a? Toxo mitɔn e ko ɖo te sín xóxó hwenu ɔ́ jɛ́n nɛ́ a? Toxo mitɔn e nɔ sɛ́ mɛ dó to línlín mɛ bɔ yě nɔ́ yi wa ajɔ̌ é jɛ́n nɛ́ a?” Tíi toxo ɔ́ wɛ nɔ sɔ́ axɔ́sú; mɛ e ɖo ajɔ̌ jí n'i lɛ́ɛ ɔ́, gǎn wɛ yě nyí; ajɔ̌watɔ́ tɔn lɛ́ɛ ɔ́, mɛ e mɛ bǐ nɔ́ sɔ́ su ɖo gbɛmɛ fí lɛ́ɛ mɛ wɛ yě ɖe. Mɛ̌ ka ɖɔ émí ná gba toxo énɛ́ hánnyá? Mawu Mavɔmavɔ Nǔbǐwúkpétɔ́ ɔ́ wɛ; é wɛ ɖɔ mɔ̌, bó ná dó winnyá yě mɛ énɛ́ lɛ́ɛ e nɔ́ ɖo susu xɔ wɛ lɛ́ɛ bǐ; é ná kɔ́n wi sín ta nú yě mɛ énɛ́ lɛ́ɛ e mɛ bǐ nɔ́ sɔ́ su é. “Tíinu lɛ́ɛ mi, mi yi lɛ ayǐkúngban mitɔn lɛ́ɛ! Đó fí ɖé sɔ́ ɖe bɔ tɔjíhún ná wá glín dó ǎ.” Mawu Mavɔmavɔ gblɔ́n adǎn nú xu, é dó xɛsi nú axɔ́súɖuto lɛ́ɛ; é ná gbe ɖɔ è nǐ gba ahohó Kanáa tɔn lɛ́ɛ. É ɖɔ: “Sidɔ́ɔnnu lɛ́ɛ mi, fí e mi j'awǎ jɛ ɔ́ kpé. Mi cí ɖyɔ̌vǐ e è hwlɛ̌n kan xá bó gbá avɔ ná é ɖɔhun. Mi na bo wlí ali bó gbɔn xu jí káká yi tɔtɛ́ntinto Cíplu tɔn mɛ ɔ́, mi ná mɔ agbɔ̌n ɖo dɔ̌n lɔmɔ̌ ǎ. Mi kpɔ́n nǔ dó Babilɔ́nu to ɔ́ wú; togun énɛ́ sɔ́ ɖe ǎ. Asilíinu lɛ́ɛ sɔ́ to énɛ́ ɔ́ dó húzú gběkanlin to; Asilíinu lɛ́ɛ mɛ tocɔ́kpe ɖé lɛ́ɛ bó tɔ́n ahwan yě, yě gba hɔnmɛ e ɖo to ɔ́ mɛ lɛ́ɛ, yě zé to ɔ́ dó húzú awǐnnyaglo. Tɔjíhún ɖaxó ɖaxó lɛ́ɛ mi! Mi dó gbɛvíhan. Mi dó gbɛvíhan, ɖó è gba fí e mi nɔ yi glín ɖe bɔ nǔɖé ma nɔ kpé mi wú ǎ é.” É jɛ hwenɛ́nu ɔ́, è nǎ wɔn Tíi káká nú xwe kanɖé gban (70); xwe énɛ́ kó bló axɔ́sú ɖokpó sín jidɔ́. Xwe kanɖé gban (70) lɛ́ɛ wá yi ɔ́, han e è ji dó agalɛtɔ́ ɔ́ ná ɖi Tíi wú. Han ɔ́ ɖɔ: Hwi nyɔ̌nu agalɛtɔ́ e mɛɖé ma sɔ́ flín ǎ é, zě kanhún towe, bó xo lɛ́ lɛ̌ dó toxo ɔ́; xo lě e a kpé wú gbɔn é. Đo han ji wɛ ɖo gbɛ mɛ, bónú gbɛtɔ́ lɛ́ɛ ná nɔ́ flín we. Xwe kanɖé gban (70) lɛ́ɛ wá yi ɔ́, Mawu Mavɔmavɔ ná húzú kpan nukɔn Tíi. Mawu Mavɔmavɔ ná jó Tíi dó bɔ é ná lɛ́ jɛ azɔ̌ tɔn kwíji kwíji ɔ́ wa jí xá axɔ́súɖuto e ɖo gbɛ ɔ́ mɛ lɛ́ɛ bǐ, lobo ná mɔ akwɛ́. Lo ɔ́, nǔ e é ná mɔ ɖ'é mɛ é, akwɛ́ e è nǎ nɔ́ sú i é bǐ wɛ è nǎ sɔ́ ɖó vo nú Mawu Mavɔmavɔ. È nǎ bɛ́ kplé ǎ, è nǎ hɛn ɖ'ayǐ ǎ; é wɛ è nǎ nɔ zé dó ná nǔɖuɖu mɛ e nɔ sɛn Mawu Mavɔmavɔ lɛ́ɛ, bɔ yě ná nɔ́ ɖu nǔ gɔ́ xo. É wɛ è nǎ nɔ́ zé dó tɔ nǔzínzán ɖagbe ɖagbe nú yě. Éɖíe! Mawu Mavɔmavɔ ná hɛn ayǐkúngban ɔ́ gblé; ayǐkúngban ɔ́ ná húzú gbětótló. Mawu Mavɔmavɔ ná kíjá nǔ e ɖo ayǐkúngban jí é bǐ, é ná gba mɛ e ɖo ayǐkúngban jí lɛ́ɛ dó. Nǔ ɖokpó ɔ́ wɛ ɖo te kpɔ́n vɔ̌sánú-xwlémawutɔ́ kpó mɛ e nɔ dó alɔ ɛ é kpó, gǎn kpó mɛsɛntɔ́ kpó, nyɔ̌nu xwési kpó vǐ ɖo mɛ gɔ́n kpó, nǔsatɔ́ kpó nǔxɔtɔ́ kpó, akwɛ́satɔ́ kpó akwɛ́nyatɔ́ kpó, axɔ́tɔ́nɔ kpó axɔ́ɖutɔ́ kpó. To ɔ́ ná gba hánnyá, è nǎ fin nǔ e ɖo to ɔ́ mɛ lɛ́ɛ bǐ. Gbeta e Mawu Mavɔmavɔ ɖe tɔ́n é nɛ́. Ayǐkúngban ɔ́ ɖo aluwɛ mɛ, ayǐkúngban ɔ́ ɖo gblěgblé wɛ. Gbɛ ɔ́ sɔ́ ɖo gbɛ ganjí ǎ. Gbɛ ɔ́ ɖo gblěgblé wɛ. Ayǐkúngban sɔ́ nyí ayǐkúngban ǎ. Jǐnukúnsin lɔ sɔ́ nyí jǐnukúnsin ǎ. Gbɛtɔ́ lɛ́ɛ ɖu su nú ayǐkúngban ɔ́ ɖó yě gba sɛ́n; yě hɛn nǔ e Mawu to lɛ́ɛ gba; yě hɛn akɔ mavɔ mavɔ e Mawu jɛ xá yě ɔ́ gba. Énɛ́ wú wɛ Mawu dó nu ayǐkúngban ɔ́, bɔ nǔ e ɖ'é jí lɛ́ɛ sú kún dó, bɔ gbɛtɔ́ lɛ́ɛ ɖo nǔ e yě wa ɔ́ sín sin sún wɛ? Yě kú, bɔ é sɔ́ kpo mɛ nabí ɖé ǎ. Vɛ̌ɛn yɔ̌yɔ́ ɖo mimɛ wɛ, vǐwungbo lɛ́ɛ jɛ jeké. Din ɔ́, gbɛɖutɔ́ lɛ́ɛ bǐ ɖo azɔn wɛn wɛ. Hǔn e xo wɛ è nɔ ɖe, bɔ awǒbóbó nɔ ɖ'é nu ɔ́ nyí kplówún. Ayihún e da wɛ è nɔ ɖe, bɔ xósúsú nɔ ɖ'é nu ɔ́ fó. Kanhún e xo wɛ è nɔ ɖe, bɔ awǒbóbó nɔ ɖ'é nu ɔ́ nyí kplówún. Mɛ ɖé sɔ́ ná ɖo han ji wɛ bó ɖo vɛ̌ɛn nu wɛ ǎ; ahan syɛ́nsyɛ́n ná vlɛ́ nu nú ahannutɔ́ lɛ́ɛ. Toxo e mɛ bǐ hɔn jó dó ɔ́ ɖo gblěgblé wɛ. È sú xwé lɛ́ɛ bǐ, mɛɖé sɔ́ nɔ́ byɔ́ xwé lɛ́ɛ gbe ǎ. Mɛ bǐ ɖo vo sa wɛ ɖó vɛ̌ɛn vɔ. Awǎjijɛ bǐ yi xɔ. Xomɛhunhun ɖěbǔ sɔ́ ɖo to ɔ́ mɛ ǎ. Nǔ e ɖo toxo ɔ́ mɛ lɛ́ɛ bǐ gblé, toxo ɔ́ sín hɔntogbó lɛ́ɛ bǐ wɛ fɛ́n kɔn nyi kɔ́ mɛ. Nǔ nabí ɖé sɔ́ ná kpo ɖo togun lɛ́ɛ mɛ ɖo ayǐkúngban ɔ́ jí ǎ; é ná cí lě e è nɔ gbɛ olívu, bɔ é nɔ kpo ɖokpó ɖokpó ɖ'é jí é ɖɔhun; é ná cí lě e è nɔ gbɛ vǐwun, bɔ é nɔ kpo ɖokpó ɖokpó ɖ'é jí é ɖɔhun. Mɛ ɖokpó ɖokpó e kpo ɖo gbɛ lɛ́ɛ ɖo susu kpa nú Mawu Mavɔmavɔ wɛ, bó ɖo xó sú wɛ kpó awǎjijɛ kpó sín gbadahwe jí. Yě nɔ́ ɖɔ: “Mi mɛ e ɖo zǎnzǎnhwe jí lɛ́ɛ mi! Mi kpa susu nú Mawu Mavɔmavɔ! Mi mɛ e ɖo xutó xutó lɛ́ɛ mi! Mi xomlá nyǐkɔ tɔn bó ɖɔ Mawu Mavɔmavɔ wɛ nyí Mawu Izlayɛ́li tɔn.” Mǐ se bɔ è ɖo han jí wɛ sín fí e gbɛ ɔ́ kponu ɖó é. Han ɔ́ ɖɔ: “Susu nú Mawu hwɛjijɔnɔ!” Lo ɔ́, nyɛ ɔ́, un nɔ ɖɔ: “Gbɛ ce vɔ, gbɛ ce vɔ! Awě tɛ́ ɖíe xo mì e!” Mɛsaɖutɔ́ lɛ́ɛ ɖo mɛ sa ɖu wɛ, yě ɖo kan ván d'é wú wɛ ɖésú. Mi mɛ e ɖo gbɛ ɔ́ mɛ lɛ́ɛ ɔ́, nǔ e ɖo te kpɔ́n mi lɛ́ɛ ɖíe: xɛsi ɖaxó ɖo te kpɔ́n mi, kɔ́do ɖo te kpɔ́n mi, mɔ ɖo te kpɔ́n mi. Nú xɛsi jɛ mɛɖé jí bónú mɛ ɔ́ hɔn ɔ́, é ná yi jɛ kɔ́do mɛ; nú é tɛ́nkpɔ́n bó tɔ́n ɔ́, é ná yi jɛ mɔ mɛ. È nǎ hun hɔn nú sin e ɖo jǐnukúnsin é, bɔ ayǐkúngban ɔ́ sín dodó ná húnhún. Ayǐkúngban ɔ́ ná zɛ, é ná gba, é ná dán wǔ. Ayǐkúngban ɔ́ ná nɔ́ fún sa ahannumúnɔ ɖɔhun; é ná nɔ́ dán jɔhɔn dó alɔ azava mɛ ɖɔhun. Hwɛgban tɔn lɛ́ɛ ɖo kpinkpɛn ɛ wɛ; é ná jɛ ayǐ bó sɔ́ ná fɔ́n gbeɖé ǎ. Gbe énɛ́ gbe ɔ́, Mawu Mavɔmavɔ ná dɔn tó nú nǔɖíɖó e ɖo jǐxwé lɛ́ɛ, bó ná dɔn tó nú axɔ́sú e ɖo ayǐkúngban jí lɛ́ɛ. É ná kplé yě bǐ dó do mɛ; è nǎ bɛ́ yě bǐ sú dó gankpá mɛ. Yě ná nɔ fínɛ́ sɛ yi bó ná wá hwɛ nukɔn. Wun ná kpɛn sun, winnyá ná hu hwe. Mawu Mavɔmavɔ Nǔbǐwúkpétɔ́ ɔ́ wɛ ná ɖu axɔ́sú ɖo Sinyɔ́ɔ só ɔ́ jí, é wɛ ná ɖu axɔ́sú ɖo Jeluzalɛ́mu. Susu tɔn ná hɔ́n dó mɛ e ɖo togun tɔn nu lɛ́ɛ jí. Mawu Mavɔmavɔ, hwi wɛ nyí Mawu ce; un jló ná sɔ́ we su, un jló ná ji han dó kpa susu nú nyǐkɔ towe, ɖó a blǒ nǔ ɖagbe ɖagbe gěgé. Nǔ énɛ́ lɛ́ɛ ɖe din ɔ́, é kó lín, bɔ è hɛn ɔ́, è nǎ ɖeji dó yě wú. A zě toxo ɔ́ dó húzú awǐnnyaglo kɛ́ɖɛ́. A gba toxo e è mɛ ahohó lɛ́ lɛ̌ dó ɔ́ hánnyá. Jǒnɔ lɛ́ɛ sín toxo e è mɛ ahohó lɛ́ lɛ̌ dó ɔ́ sɔ́ hwɛ́n toxo ǎ; è sɔ́ sixú vɔ́ gbá gbeɖé ǎ. Énɛ́ wú wɛ togun syɛ́nsyɛ́n ɖokpó ná sí te, bó kpa susu nú we. Akɔta e nɔ kpa acɛ gannaganna nú mɛ lɛ́ɛ sín toxo lɛ́ɛ ná nɔ́ ɖó sísí nú we, ɖó mɛ e ma ɖó gǎn ɖé ǎ lɛ́ɛ ɔ́, hwi wɛ nyí bibɛtɛn yětɔn. Nǔgbó wɛ, ényí adǎn gbo mɛ e ma ɖó mɛɖé ǎ lɛ́ɛ ɔ́, hwi wɛ yě nɔ́ hɔn wá su. Hwi wɛ nyí fí e è nɔ bɛ sin ɖe é. Hwesivɔ́ hun ɔ́, hwi glɔ́ wɛ è nɔ wá bɛ yɛ ɖe, ɖó adǎn e jí acɛgannaganna-kpanúmɛtɔ́ lɛ́ɛ nɔ́ ɖe ɔ́ cí jǐ ɖaxó ɖé wɛ ɖo jija wɛ ɖɔhun; é cí lě e hwesivɔ́ nɔ́ hun dó ayǐkúngban xúxú ɖé jí é ɖɔhun. Lo ɔ́ hwɛ ɔ́, zǐngídi e jí mɛ e nɔ kpa acɛ gannaganna nú mɛ lɛ́ɛ nɔ́ ɖe ɔ́, a nɔ ɖó te. A cí adǎn nú mɛ e nɔ kpa acɛ gannaganna nú mɛ lɛ́ɛ, lě e akpɔ́kpɔ́ nɔ́ cí adǎn nú hwesivɔ́ é ɖɔhun. Mawu Mavɔmavɔ Nǔbǐwúkpétɔ́ ɔ́ ná ylɔ́ agɔ̌ ɖokpó nú togun lɛ́ɛ bǐ ɖo Sinyɔ́ɔ só ta; yě ná ɖu lan ɖagbe ɖagbe lɛ́ɛ, bó ná nu vɛ̌ɛn ɖagbe ɖagbe lɛ́ɛ d'é jí. Lan ɖagbe e bɔ ganjí é wɛ yě ná ɖu, bó ná nu vɛ̌ɛn atata lɛ́ɛ d'é jí. Só ɔ́ jí fínɛ́ wɛ Mawu Mavɔmavɔ ná hɛn nǔwamɛvɔ e mɛ togun lɛ́ɛ ɖe ɔ́ vún ɖe. Fínɛ́ wɛ é ná hɛn nǔwamɛvɔ ɖaxó e togun lɛ́ɛ cyɔ́n ɔ́ vún ɖe. Mawu Mavɔmavɔ ná sú kú sín kún dó káká sɔ́yi; Aklúnɔ Mavɔmavɔ ná súnsún ɖasin sín nukún mɛ nú mɛ bǐ. É ná ɖe winnyá nú togun tɔn gbɔn to ɔ́ bǐ mɛ. Xó e Mawu Mavɔmavɔ ɖɔ é nɛ́. Gbe énɛ́ gbe ɔ́, è nǎ ɖɔ: “Mawu Mavɔmavɔ wɛ nyí Mawu mǐtɔn, é wɛ mǐ nɔ te kpɔ́n bɔ é wá hwlɛ́n mǐ gán. Nǔgbó wɛ; Mawu Mavɔmavɔ wɛ mǐ ɖó nukún; é wɛ nyí mɛhwlɛ́ngántɔ́ mǐtɔn; énɛ́ wú ɔ́, xomɛ ní hun mǐ, mǐ ní j'awǎ. Mawu Mavɔmavɔ ná cyɔ́n alɔ Sinyɔ́ɔ só ɔ́ jí.” Lo ɔ́, Mawu Mavɔmavɔ ná gbídí Mɔwabu ɖó afɔ wú ɖo tɛndo ɖokpó mɛ, lě e è nɔ bɛ́ sɛníyɔ dó zunkɔ́ sín do mɛ, bó nɔ́ gbídí é ɖɔhun. Mɔwabu ná ɖo awa nyi wɛ tɔlintɔ́ ɖɔhun; é ná ɖo gǎn dó wɛ mɔ̌ có Mawu ná kɔ́n wi n'i. Mɔwabu e, ahohó towe lɛ́ɛ ɔ́, dǒ e a mɛ lɛ́ lɛ̌ dó toxo towe bɔ kɛntɔ́ má nɔ́ sixú fán ǎ lɛ́ɛ ɔ́, Mawu mu bǐ; é zin bǐ dɛ́, bǐ ɖo kɔ́ mɛ ɖo afúntúntún tɛ́ntin. Gbe énɛ́ gbe ɔ́, è nǎ ji han élɔ́ ɖo Judáa to ɔ́ mɛ ɖɔ: “Mǐ ɖǒ toxo e è mɛ ahohó lɛ́ lɛ̌ dó é ɖokpó. Mawu wɛ mɛ ahohó we lɛ́ lɛ̌ dó toxo ɔ́, bónú mɛɖé ní má kpé nǔɖé wú bó wa nú mǐ ó. Mi hun hɔntogbó lɛ́ɛ kɛ́. Mi jó togun e se tónú nú Mawu bó ɖo gbejí n'i ɔ́ dó bónú é byɔ́ xwé gbe. Mawu, mɛ e ɖeji dó wǔ we kpó ayi tɔn bǐ kpó, bó má nɔ́ húzú ǎ ɔ́, a nɔ ná ɛ ayi jɛ ayǐ. Mi ɖeji dó Mawu Mavɔmavɔ wú kúgbe gbɛgbe. Mi ɖeji dó wǔ tɔn, só wɛ é nyí, é ɖo te tɛgbɛ. Mawu Mavɔmavɔ zin mɛ e ɖo só ta lɛ́ɛ é dɛ́; é kpíkpé toxo e ɖo ji aga ɖéé ɔ́ wá dodomɛ, é sɔ́ ɛ xo dó kɔ́ mɛ, ɖo afúntúntún mɛ. Mawu Mavɔmavɔ zin i dɛ́ bɔ wamamɔnɔ gbɛ̌dónánɔ lɛ́ɛ gbídí i ɖó afɔ wú.” Hwɛjijɔnɔ sín ali ɔ́, ali jlɔ́jlɔ́ wɛ. Hwi mɛ e nɔ wa nǔ jlɔ́jlɔ́ ɔ́, a nɔ bló ali ɖó nú hwɛjijɔnɔ. Mawu Mavɔmavɔ, mǐ ɖo nukún ɖó we wɛ ɖo ali e a ɖɔ mǐ ní gbɔn é jí. Mǐ nɔ́ flín we, bó nɔ́ ylɔ́ nyǐkɔ towe, nǔ e nɔ́ myá nukún nú mǐ é nɛ́. Zǎn mɛ ɔ́, nyi lɔ nɔ ba ná mɔ we, ayi ce bǐ nɔ ɖo wǔ we. A dɔn tó nú gbɛtɔ́ lɛ́ɛ lě e a ɖɔ gbɔn é; mɛ bǐ nɔ́ mɔ ɖɔ émí ɖó ná zán gbɛ lě e é jɛ xá gbɔn é. Lo ɔ́, ényí è kú nǔbláwǔ nú adǎkaxotɔ́ lɛ́ɛ ɔ́, ayi yětɔn nɔ́ mɔ nǔ ǎ, yě ná bó ɖo to e mɛ è nɔ wa nǔ ɖó sɛ́nxwi jí ɖe ɔ́ mɛ ɔ́, nǔ agɔ jɛ́n yě nɔ́ wa; Mawu Mavɔmavɔ, yě tunwun susu e a ɖǒ ɔ́ ǎ. Mawu Mavɔmavɔ, alɔ towe ɖo adǎn jí, yě ká mɔ ǎ. Yě ná mɔ lě e a nɔ jɛ hun dó togun towe jí kpó wǎn yíyí kpó gbɔn é, bɔ winnyá ná hu yě; zo e a zě ɖó te nú kɛntɔ́ towe lɛ́ɛ ní fyɔ́ yě. Mawu Mavɔmavɔ, a nǎ ayi jɛ ayǐ mǐ, ɖó mǐ sɔ́ nǔ ɖěbǔ bó ná bló ɔ́, hwi wɛ nɔ bló nú mǐ. Mawu Mavɔmavɔ, Mawu mǐtɔn, gǎn ɖěvo ɖěvo lɛ́ɛ kó kpa acɛ dó mǐ nu kpɔ́n, lo ɔ́, hwi ɖokpó géé wɛ mǐ nɔ́ kpa susu ná. Gǎn énɛ́ lɛ́ɛ kó kú bó sɔ́ ná lɛ́ fɔ́n ǎ; yě húzú nǔ kúkú, yě sixú fɔ́n sí te ǎ. Nǔgbó wɛ, a dɔn tó nú yě, lobo sú kún yětɔn dó; a ɖe nǔ e è nǎ mɔ bó ná dó flín yě lɛ́ɛ bǐ síin. Mawu Mavɔmavɔ, a blǒ bɔ togun mǐtɔn ji d'é jí; énɛ́ ɔ́ wɛ sɔ́ we su. A blǒ bɔ togun mǐtɔn ji d'é jí, a sɛ to ɔ́ sín dogbó lɛ́ɛ bǐ dó gǔdo. Mawu Mavɔmavɔ, adǎn ɖo gbigbo mǐ wɛ ɔ́, hwi wɛ mǐ nɔ́ hɔn wá su; a ɖo tó dɔn nú mǐ wɛ ɔ́, mǐ nɔ́ sa vo nú we dó ayi mɛ. Mawu Mavɔmavɔ, mǐ mɔ wǔvɛ́ ɖo nukɔn towe nyɔ̌nu e ɖo ajidonu é ɖɔhun; nyɔ̌nu e ɖo ajidonu bó ɖo éɖée sló ɖo wǔvɛ́ nu wɛ, bó ɖo xó sú wɛ é ɖɔhun. Kɛ́n jɛ mǐ wǔ, mǐ mɔ wǔvɛ́; lo ɔ́, jɔ kpowun wɛ mǐ ɖe. Mǐ bló nǔ e ná hwlɛ́n mɛ gán ɖo ayǐkúngban ɔ́ jí é ɖě ǎ. Mǐ ji vǐ ɖě dó gbɛ ɔ́ mɛ ǎ. Mawu Mavɔmavɔ, mɛ towe e kú lɛ́ɛ ná fɔ́n; togun ce sín mɛ e kú lɛ́ɛ ná fɔ́n. Mi mɛ e ɖo kɔ́ glɔ́ lɛ́ɛ mi, mi fɔ́n; mi j'awǎ, ɖó Mawu Mavɔmavɔ, a nǎ sɛ́ wěziza towe dó ahǔn ɖɔhun, bɔ ayǐkúngban ɔ́ nɔ́ ná gbɛ mɛ e kú lɛ́ɛ. Togun ce e mi, mi yi xɔ mitɔn lɛ́ɛ mɛ, mi dɔn hɔn mitɔn sú dó ta, bó nɔ fínɛ́ kpɛɖé, bónú xomɛsin Mawu tɔn ní wá yi. Mawu Mavɔmavɔ ɖíe ɖo tíntɔ́n sín nɔtɛn tɔn ja wɛ e; é ɖo tó ná dɔ́n nú mɛ e ɖo ayǐkúngban jí lɛ́ɛ wɛ, ɖó nǔ nyanya e yě wa lɛ́ɛ wú. Ayǐkúngban ná tún kanjɔ e é nu é; ayǐkúngban ná jó mɛ e è hu, bó zé hwlá dó lan tɔn mɛ lɛ́ɛ. Gbe énɛ́ gbe ɔ́, Mawu Mavɔmavɔ ná zé hwǐ tɔn dó wǎ nǔ xá Levyatáan; hwǐ ɖaxó ɖé wɛ, hwǐ syɛ́nsyɛ́n ɖé wɛ, hwǐ ɖé wɛ bɔ nǔɖé nɔ́ nɔ te nukɔn tɔn ǎ; Levyatáan ɔ́, dan ɖé wɛ bɔ è nɔ sixú wlí i ǎ; dan ɖé wɛ bó sɛ́. Mawu Mavɔmavɔ ka ná hu xumɛkanlin ɖaxó énɛ́ ɔ́. Gbe énɛ́ gbe su hǔn, mi dó han ɖokpó, bó ji dó kpa vǐwungbo ɔ́; vɛ̌ɛn tɔn nɔ nyɔ́ ɖésú. “Nyɛ Mawu Mavɔmavɔ wɛ ɖo jǐ tɔn kpɔ́n wɛ. Un nɔ hú sin n'i hwebǐnu. Un nɔ ɖo vǐwungbo ɔ́ cɔ́ wɛ zǎn kéze, bónú mɛɖé má wá ɖo sa ɖi gbɔn gbo tɔn mɛ wɛ ó. Un sɔ́ ɖo xomɛ sin dó e wɛ ǎ; ényí un mɔ kpɔvɛwun, abǐ wunkan ɖěbǔ ɖ'é mɛ ɔ́, un ná hɔn bǐ kplé bó dó zo. Afi nú è hɔn wá su mì, bó ɖɔ hwɛ gbo xá mì. Hwɛ jɛ́n è ɖɔ gbo xá mì bɔ nǔ nyɔ́.” Nú azǎn ɖo azǎn jí jɛ wɛ, bɔ ga ɖo ga jí jɛ wɛ ɔ́, Jakɔ́bu togun ɔ́ ná dó ɖɔ do; Izlayɛ́li ná zɛ ala bó ná wlí sɛ́, bɔ sínsɛ́n tɔn ná gba kpé gbɛ ɔ́ bǐ mɛ. Mawu ka wa nǔ xá mɛ tɔn lɛ́ɛ lě e é wa xá mɛ e nɔ wa nǔ xá yě lɛ́ɛ ɖɔhun a? Abǐ é hu yě lě e é bló gbɔn xá mɛ e nɔ hu yě lɛ́ɛ ɖɔhun a? Éeǒ, é bló mɔ̌ ǎ; amɔ̌, é gba yě dó kpé to ɖěvo mɛ to ɖěvo mɛ. É dó jɔhɔn yě mɛ bó gba yě dó, a nǎ ɖɔ jɔhɔn e nɔ sí te sín zǎnzǎnhwe jí ɔ́ wɛ. Énɛ́ ɔ́, Mawu ná súnsún hwɛ e togun Jakɔ́bu tɔn hu é; nǔ e ká ná jɛ ɖ'é mɛ é ɖíe: togun ɔ́ ná gba awǐnnya e è dǒ mɛ vɔ̌sákpe ɔ́ é, hwě ɖɔhun; è sɔ́ ná mɔ vodún Acela abǐ zǎlínkpɔ́nfyɔ́nú ɖě ɖo te ǎ. Mɛ ɖěbǔ sɔ́ ná ɖo toxo e è mɛ ahohó lɛ́ lɛ̌ dó é mɛ ǎ; toxo ɔ́ ná ɖo te bɔ mɛ bǐ ná hɔn jó dó, bɔ é ná jɛ vɔ̌. Nyibúví lɛ́ɛ ná nɔ́ yi ɖu ama ɖo fínɛ́, bó ná nɔ́ dɔ́ fínɛ́, bó ná nɔ́ wínnyɔ́ gbě ɖu. Atínla xú ɔ́, é nɔ́ fɛ́n j'ayǐ, bɔ nyɔ̌nu lɛ́ɛ nɔ́ wá cyán bó nɔ́ dó zo. Togun énɛ́ ɖó nǔnywɛ́ ɖěbǔ ǎ. Énɛ́ wú wɛ mɛ e ɖó e ɔ́ sɔ́ kú nǔbláwǔ ɖěbǔ n'i ǎ; mɛ e bló e ɔ́, sɔ́ hwɛ kɛ ɛ ǎ. Azǎn énɛ́ gbe ɔ́, Mawu Mavɔmavɔ ná ya mi jinukún ɖɔhun sín Efláti tɔ ɔ́ kɔn káká wá Ejípu tɔ ɔ́ kɔn bó só. É ná cyán mi mɛ Izlayɛ́li ví lɛ́ɛ ɖokpó ɖokpó nǔkún ɖɔhun. Gbe énɛ́ gbe ɔ́, lanzo ɖaxó ɔ́ ná jɛ gbe, bɔ mi mɛ e ahwan kplá yi Asilíi lɛ́ɛ, abǐ mi mɛ e è gba dó bɔ mi yi ɖo Ejípu lɛ́ɛ bǐ ná lɛ́ kɔ wá, bó ná jɛ kpo ɖo Mawu Mavɔmavɔ nukɔn, ɖo Jeluzalɛ́mu, ɖo só mímɛ́ ɔ́ jí. Heelú Samalíi! Ahannumúnɔ Eflayímu to ɔ́ tɔn lɛ́ɛ ɖo afɔ tɛ ayǐ wɛ ɖó toxo énɛ́ ɔ́ wú, toxo ɖuɖéjígbákún ɖɔhun ɔ́ wú. É ɖo só e ɖo tɔdo e nɔ hwán jinukún ɔ́ ta nu é jí, bó nyɔ́ kpɔ́n ganjí. Lo ɔ́, toxo ɔ́ ná cí folówa xúxú ɖɔhun ɖo mɛ énɛ́ lɛ́ɛ e vɛ̌ɛn lú bǐ lɛ́ɛ sín ta. Hlɔ̌nhlɔ́nnɔ, nǔwúkpétɔ́ ɖokpó ɖíe Aklúnɔ sɛ́ dó bɔ é ja e. É ɖo nǔ wa wɛ ɔ́, a nǎ ɖɔ kɛ́njí wɛ ɖo jija wɛ, a nǎ ɖɔ jɔhɔn ɖaxó nǔhɛngblétɔ́ ɖé wɛ ɖo nyinyi wɛ, a nǎ ɖɔ jǐ ɖaxó ɖé wɛ ja káká bɔ tɔ ɖi sin kpé fí bǐ. É ná flí nǔ bǐ xwe kpó hlɔ̌nhlɔ́n kpó. Toxo ɖuɖéjígbákún ɖɔhun e wú ahannumúnɔ Eflayímu tɔn lɛ́ɛ nɔ tɛ afɔ ayǐ ɔ́, è nǎ gba bǐ hánnyá. Samalíi toxo, é ɖo só e ɖo tɔdo e nɔ hwán jinukún ɔ́ ta nu ɔ́ jí, bó nyɔ́ kpɔ́n ganjí; é cí folówa xúxú ɖɔhun; é ná cí fígi nukɔntɔn e myá cóbɔ fígigbigbɛ hwenu su é ɖɔhun; mɛɖé mɔ lě tlóló ɔ́, é nɔ́ gbɛ bó nɔ́ ɖu. Gbe énɛ́ gbe ɔ́, Mawu Mavɔmavɔ Nǔbǐwúkpétɔ́ ɔ́ ɖésúnɔ ná húzú ɖuɖéjígbákún ɖagbe ɖagbe, acɔ́ɖónú ɖagbe ɖagbe nú mɛ e kpo ɖo gbɛ ɖo togun tɔn mɛ lɛ́ɛ. É ná ná linlin ɖagbe e è nɔ dó ɖɔ hwɛ jlɔ́jlɔ́ ná é mɛ e nɔ ɖɔ hwɛ lɛ́ɛ. Mɛ e nɔ nya kɛntɔ́ lɛ́ɛ sín toxo ɔ́ sín hɔntogbó jí lɛ́ɛ ɔ́, é ná ná glǎglá yě. Gbeyíɖɔ Mawu tɔn lɛ́ɛ kpó vɔ̌sánú-xwlémawutɔ́ lɛ́ɛ kpó lɔ nu vɛ̌ɛn mú, bó nɔ́ ɖo gblǒ ɖɔ wɛ. Yě nɔ́ nu ahan mú bó nɔ́ ɖo sa fún wɛ. Vɔ̌sánú-xwlémawutɔ́ lɛ́ɛ kpó gbeyíɖɔ Mawu tɔn lɛ́ɛ kpó nɔ́ nu ahan mú, bó nɔ́ ɖo gblǒ ɖɔ wɛ. Yě nɔ́ nu vɛ̌ɛn mú, bɔ ayi yětɔn sɔ́ ɖo te ǎ. Yě nɔ́ nu ahan mú bó nɔ́ ɖo sa fún wɛ. Mawu ɖe nǔ xlɛ́ yě bónú yě ja ɖiɖɔ gbé ɔ́, gblǒ wɛ yě nɔ́ ɖɔ. Yě ɖo hwɛ ɖɔ wɛ ɔ́, xó yětɔn nɔ xwe ali ǎ. Nǔ e yě vi lɛ́ɛ wɛ kpé nǔɖutɛn yětɔn lɛ́ɛ bǐ, fí bǐ kwíji. Ahannumúnɔ énɛ́ lɛ́ɛ nɔ kanbyɔ́ ɖɔ: “Ezayíi ɔ́, mɛ̌ ná kplɔ́n nǔ wɛ é ka ɖe? Mɛ̌ ná tín nǔ mɛ ná wɛ é ka ɖe? Vǐ e è ɖe anɔ̌ ná yɔ̌yɔ́ ɔ́ wɛ mǐ ká nyí a? Yɔkpɔ́vú e è ɖe sín nɔ tɔn kɔn é wɛ mǐ ká nyí a? Mi vɛ́ se xó e ɖɔ wɛ é ɖe é; é nɔ́ ɖɔ: D-A DA...DA D-O DO...DO B-A BA...BA B-O BO...BO!” Ée mi sɔ́ ɖó mɔ̌ din é ɔ́, mɛ e nɔ ɖo gbe flán wɛ, bó nɔ́ ɖo gbe ɖěvo dó wɛ lɛ́ɛ jí wɛ Mawu ná ɖɔ xó nú mi gbɔn. Mawu ko ɖɔ nú togun tɔn ɖɔ: “Mi ná mɔ agbɔ̌n ɖo fí; mi jó mɛ e nǔ cikɔ ná lɛ́ɛ dó nú yě gbɔjɛ́ ɖo fí. Fí e è nɔ gbɔjɛ́ ɖe ɔ́ ɖíe.” Yě ká jló ná se ǎ. Énɛ́ wú ɔ́, Mawu Mavɔmavɔ xó ɔ́ D-A DA...DA D-O DO...DO B-A BA...BA B-O BO...BO tɔn jɛ́n yě ná se. Énɛ́ ɔ́, yě ná nyi agbo bɔ xú yětɔn ná cɛ́; yě ná sɔ́ mɔ bɔ è nǎ wlí kannumɔ yětɔn. Fanfúnɖɔtɔ́ e ɖo Jeluzalɛ́mu toxo ɔ́ nu lɛ́ɛ mi, mi ɖótó xó e Mawu Mavɔmavɔ ɖɔ é. Mawu ɖɔ, mi nɔ ɖɔ: “Mǐ ko jɛ akɔ xá kú, mǐ ko nu alɛ xá kú tomɛ, nǔ baɖabaɖa ɖěbǔ ná bó ɖo jijɛ wɛ ɔ́, ɖě ná jɛ dó mǐ jí ǎ. Mǐ gán jɛ adingban mǐtɔn wú, mǐ ɖeji dó awo mǐtɔn wú.” Mi bo ɖótó xó e Aklúnɔ Mavɔmavɔ ɖɔ é: “Un ná zé awǐnnya dodó ɖokpó tun te ɖó Sinyɔ́ɔ, bó ná tɛ́n mi kpɔ́n; awǐnnya tají wɛ, awǐnnya dodó wɛ. Mɛ e ná gán jɛ awǐnnya ɔ́ wú ɔ́ ado ná hu i ǎ. “È nǎ nɔ́ wa nǔ bɔ é ná nɔ́ jlɔ́ xɔkan ɖɔhun. È nǎ nɔ́ xwedó hwɛjijɔ télélé dǒxwetekan ɖɔhun.” Lo ɔ́, kɛ́njí ná ja bó kplɔ́ bibɛtɛn mitɔn e nyí adingban ɔ́. Sin ná sa bó dɔn nǔ e gúdo mi hɔn wlá cí ɔ́ yi. Akɔ e mi jɛ xá kú ɔ́ ná gblé, alɛ e mi nu xá kútomɛ ɔ́ sɔ́ ná wa azɔ̌ ǎ. Hwenu e nǔ baɖabaɖa ɔ́ ná wá é ɔ́, é ná gba mi hánnyá. Nǔ baɖabaɖa ɔ́ dín hweɖěbǔnu, bónú mɛ lɛ́ɛ mɔ nǔ jɛ nǔ e ɖe xlɛ́ wɛ é ɖe ɔ́ mɛ ɔ́, ahwi ná xo yě; é sixú nyí zǎnzǎn, é sixú nyí kéze, é ka sixú nyí zǎn mɛ; è ɖɔ xó tɔn bɔ è se yǎyá ɔ́, hǔn mɛtɔn ná nɔ́ zɛ. È ko nɔ dó lǒ ɖé ɖɔ: “È nɔ mlɔ zan gli jí bó nɔ́ dlɛ́n afɔ ǎ; avɔ kpɛví nɔ́ bú ta kpó afɔ kpó ǎ.” Mɔ̌ jɛ́n é ná nyí. Đó Mawu Mavɔmavɔ ná jlɛ́ nǔ lě e é jlɛ́ gbɔn ɖo Pelasímu só jí é; é ná sin xomɛ ɖésú lě e é sin gbɔn ɖo Gabawɔ́ɔn tɔdo mɛ é, é ná jlɛ́ nǔ lobo ná wa azɔ̌ e é jló ná wa é; azɔ̌ ɔ́ ná kpácá ɖésú; é ná jí wǔ. É nyí mɔ̌ hǔn, mi bo jó fanfún dó; é má nyí mɔ̌ ǎ ɔ́, kan e è dó kɔ nú mi ɔ́ ná nyɔ kɔ nú mi. Đó un se bɔ Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ émí ná gbɔ bó vívá to ɔ́ bǐ sín kún. Mi ɖótó mì ganjí, mi wlí tó xó e ɖɔ gbé un ja é wú: Glesi e ja jinukún dó gbe ɔ́ ná ɖo hwɛn kɛ́ɖɛ́ lɛ wɛ abǐ é ná ɖo ayǐkúngban kɛ́ɖɛ́ jíjé wɛ a? Gbeɖé kpɔ́n! Nǔ e é nɔ́ bló ɔ́ ɖíe: É nɔ́ lɛ hwɛn bó nɔ́ hú nǔhwɛ́nkún nigɛ́li kpó kumɛ́ɛ kpó sín kwín, bó nɔ́ dó jinukún tɛnmɛ tɛnmɛ; é nɔ́ dó blěe, milɛ́ɛ, ɔ́ji; énɛ́ gúdo ɔ́, é nɔ́ dó jinukún ɖěvo lɛ́ɛ gbɔn gle ɔ́ tó lɛ́ lɛ̌ dó. Mawu tɔn wɛ kplɔ́n ɛ gbɔn mɔ̌; é wɛ ná ɛ nǔnywɛ́ mɔ̌. È nɔ́ zé kɛkɛ́ví abǐ kɛkɛ́ví sín afɔ dó só nǔhwɛ́nkún énɛ́ lɛ́ɛ ná ǎ; lo ɔ́, kpo wɛ è nɔ zé dó só ná. È ja blěe só gbé ɔ́, è nɔ dɔn kɛkɛ́ví gbɔn jí nǔgbó, è ka nɔ dɔn gbɔn jí ma nɔ te ǎ. Kɛkɛ́ví sín afɔ kpó sɔ́ e ɖo kɛkɛ́ví ɔ́ dɔn wɛ ɔ́ kpó nɔ́ gbɔn jí nǔgbó, yě ká nɔ dɔn gbɔn jí káká bó nɔ li kwín lɛ́ɛ ǎ. Walɔ énɛ́ e glesi ɖó ɔ́, Mawu Mavɔmavɔ Nǔbǐwúkpétɔ́ ɔ́ wɛ ná ɛ; Mawu ɔ́, nǔkplɔ́nmɛ tɔn nyɔ́ bó vɛ́ jlɛ́; nǔnywɛ́ tɔn d'agba. Mawu ɖɔ: “Heelú we Aliɛ́li! Aliɛ́li, heelú we! Jeluzalɛ́mu toxo e Davídi ɖó gɔnu lɛ́ lɛ̌ dó bó yí é, heelú we! A nǎ bo nɔ nyi xwezán lɛ́ɛ xwe mɛ xwe mɛ lě e é jɛ xá gbɔn é ɔ́, un ná dó ya nú we. Adǎn ná nɔ ɖo gbigbo we wɛ, bɔ a nǎ nɔ ɖo alě ná wɛ; un ná sɔ́ we dó húzú vɔ̌sákpe e jí è nɔ dó vɔ̌ zo ɖe é. Nyi lɔmɔ̌ ná ɖó gɔnu lɛ́ lɛ̌ dó we; sɔ́ja ce lɛ́ɛ ná sú ali dó we bɔ a nǎ sixú tɔ́n ǎ; un ná kplé kɔ́ bó cí gúdo, bó ná tɔ́n ahwan we. A nǎ jɛ ayǐ bó ná yi do bǐ; gbe towe ná cí mɛ e ɖo kɔ́ glɔ́ é sín gbe ɖɔhun; è nǎ nɔ́ xɔ́ tó ɖésú cóbó ná nɔ́ se. É ná cí mɛkúkú wɛ ɖo xó ɖɔ wɛ sín ayǐkúngban glɔ́ ɖɔhun, è nǎ nɔ́ se nǔ jɛ mɛ ǎ. Kɛntɔ́ towe lɛ́ɛ ná sukpɔ́; amɔ̌, afúntúntún ɖɔhun wɛ yě ná cí. Yě ná cí nǔywɛ́ e mɛ jɔhɔn dó alɔ é ɖɔhun. Nukún xwixwe ɖokpó mɛ wɛ nǔ énɛ́ lɛ́ɛ ná jɛ.” Mawu Mavɔmavɔ Nǔbǐwúkpétɔ́ ɔ́ wɛ ja kpínkpɔ́n we gbé; é ná wá kpó zǐngídi ɖaxó ɖé kpó; jǐ ná ɖo gbe dó wɛ, ayǐkúngban ná ɖo wǔ dán wɛ, jǐ ɖaxó ɖé ná ɖo jija wɛ kpó jɔhɔn ɖaxó ɖé kpó, myɔ ná ɖo jiji wɛ hɛhɛhɛ. Aliɛ́li, akɔta wɔ̌buwɔ́bú e ɖo ahwan fun xá we wɛ lɛ́ɛ, yě mɛ e ɖo ahwan tɔ́n we wɛ lɛ́ɛ: yě mɛ énɛ́ lɛ́ɛ e sín sɔ́ja sú ali dó we, bó ɖo ya dó nú we wɛ lɛ́ɛ ɔ́, yě bǐ nǎ bú nǔ e è mɔ ɖo dlɔ̌ mɛ ɔ́ ɖɔhun, yě bǐ nǎ bú nǔ e è mɔ ɖo amlɔ mɛ zǎn mɛ ɔ́ ɖɔhun. Xovɛ́ sin nya ɖé bɔ é kú dlɔ̌ ɖɔ émí ɖo nǔ ɖu wɛ; ée é ká fɔ́n ɔ́, adɔgo tɔn kpo ɖo vɔ̌. Kɔ xú nya ɖé bɔ é kú dlɔ̌ ɖɔ émí ɖo sin nu wɛ; ée é ká fɔ́n ɔ́, nǔ ci kɔ n'i, bɔ kɔ kpo ɖo xúxú i wɛ. Mɔ̌ wɛ é ná cí nú akɔta wɔ̌buwɔ́bú e ɖo ahwan fun xá Sinyɔ́ɔ só ɔ́ wɛ lɛ́ɛ. Mi cí jɛjɛɛ bónú nukikɛ ní gló mi; mi ní nyí nukúntíntɔ́nnɔ, bó má mɔ nǔɖé ó; mi nu vɛ̌ɛn ǎ bɔ vɛ̌ɛn ka mú mi; mi nu ahan ǎ bó ka ɖo sa fún wɛ, ɖó Mawu Mavɔmavɔ xwé nǔ dó ayi mitɔn nu; é blá nukún mɛ nú mi. Nukún mitɔn lɛ́ɛ wɛ nyí gbeyíɖɔ Mawu tɔn lɛ́ɛ. Mawu Mavɔmavɔ cyɔ́n nǔ dó ta nú mi; ta mitɔn lɛ́ɛ wɛ nyí nǔmɔtɔ́ lɛ́ɛ. Nǔɖexlɛ́mɛ énɛ́ lɛ́ɛ ɔ́, mi tunwun ǎ; é cí wěma e è wlǎn bó sú, bó ɖó wuntun é ɖɔhun. È zě nú mɛ e nyɔ́ nǔ xa ɔ́ ɖokpó bó ɖɔ: “Xa” bɔ é ɖɔ: “Un sixú xa ǎ, sú wɛ è sú bó ɖó wuntun.” È zě wěma ɖokpó énɛ́ ɔ́ nú mɛ e ma nyɔ́ nǔ xa ǎ é ɖokpó, bó ɖɔ: “Xa”. Lo ɔ́, é ɖɔ: “Un nyɔ́ nǔ xa ǎ”. Aklúnɔ ɖɔ dó togun élɔ́ wú ɖɔ: “Togun élɔ́ ɔ́, nu kɛ́ɖɛ́ jɛ́n é nɔ́ víví nú mì; nu jɛ́n é nɔ́ sɔ́ mì su ɖe; ayi tɔn ɖo wǔ ce ǎ. Sísí e ɖó nú mì wɛ é ɖe bó ɖɔ ɔ́, nǔdówá gbɛtɔ́ tɔn wɛ; nǔ wɛ é nyí bɔ è kplɔ́n dó ta mɛ kpowun. Énɛ́ ɔ́ wú wɛ un ná nɔ́ ɖo nǔ jlɛ́ wɛ bɔ ado ná hu i. Nǔnywɛ́tɔ́ tɔn lɛ́ɛ sín nǔnywɛ́ ná nɔ́ xo akpó. Gbɛtɔ́ bíbí tɔn lɛ́ɛ sín bǐbí bǐ ná húzú nǔ yǎyá.” Heelú mɛ énɛ́ lɛ́ɛ e nɔ ɖo nǔ wa dó nǔglɔ́ wɛ lɛ́ɛ; yě mɛ e nɔ hwlá tito yětɔn lɛ́ɛ dó Mawu Mavɔmavɔ, bó nɔ́ ɖo nǔ wa dó nǔglɔ́ wɛ lɛ́ɛ ɔ́, heelú yě. Yě nɔ́ lin ɖɔ mɛ ɖé kún sixú mɔ émí ó; mɛɖé kún sixú tunwun nǔ e wa wɛ émí ɖe ɔ́ ó. Xlo jɛ́n mi jɔ sɔ mɔ̌ a? È sixú zé ko kpó zɛ̌nmɛtɔ́ kpó ɖó hǎ ɖokpó ɔ́ jí a? Nǔ e è zě alɔ dó bló ɔ́ sixú ɖɔ nú mɛ e bló e ɔ́ ɖɔ é kún nyí é wɛ bló émí ó a? Zɛ̌n sixú ɖɔ nú zɛ̌nmɛtɔ́ ɖɔ é kún nyɔ́ zɛ̌n mɛ ó a? Hwenu kpɛɖé jɛ́n kpo din, bɔ Libáan zungbó ɔ́ ná húzú atínsínsɛ́ngbo, bɔ atínsínsɛ́ngbo ná húzú zungbó. Gbe nɛ́ gbe ɔ́, mɛ e kú tó lɛ́ɛ ná se nǔ e è wlán dó wěma ɔ́ mɛ é, bɔ mɛ e tɔ́n nukún lɛ́ɛ ná tɔ́n sín zǐnflú mɛ, bó ná jɛ nǔ mɔ jí. Mɛ e nɔ sɔ́ yěɖée hwe lɛ́ɛ ɔ́, yě ná nɔ́ ɖo awǎ jɛ dó awǎ jí wɛ ɖó Mawu Mavɔmavɔ wú. Wamamɔnɔ gǔdo gúdo tɔn lɛ́ɛ ɔ́, xomɛ ɖaxó ɖé ná nɔ́ hun yě ɖó Mɛ Mímɛ́ Izlayɛ́li tɔn ɔ́ wú. Đó acɛgannaganna-kpanúmɛtɔ́ lɛ́ɛ sín xó ná fó; è nǎ sú mɛ e ma nɔ sí mɛ ǎ lɛ́ɛ sín kún dó; è nǎ sú mɛ e nɔ wa nǔ nyanya dó mɛ wú lɛ́ɛ sín kún dó. Yě wɛ nɔ ɖó nǔvú dó mɛ nu, ɖɔ è wa nǔ nyanya; yě wɛ nɔ́ ɖó xómɔ nú hwɛɖɔtɔ́ lɛ́ɛ, yě wɛ nɔ́ ɖó hwɛ nú xomɛvɔ́nɔ. Énɛ́ wú ɔ́, xó e Mawu Mavɔmavɔ, mɛhwlɛ́ngántɔ́ Ablaxámu tɔn ɔ́ ɖɔ nú togun Jakɔ́bu tɔn ɔ́ ɖíe: “Bɛ́ sín din ɔ́, mɛɖé sɔ́ ná kɔ́n Jakɔ́bu togun ɔ́ sín wi ǎ; é sɔ́ ná ɖu winnyá ɖě ǎ. Đó hwenu e yědɛɛ lɛ́ɛ, abǐ vǐ yětɔn lɛ́ɛ ná jɛ nǔ e bló wɛ un ɖe ɖo tɛ́ntin yětɔn lɛ́ɛ mɔ jí é ɔ́, yě ná tunwun mɛ e nyɛ Mawu Mɛ Mímɛ́ Jakɔ́bu tɔn nyí é; yě sɔ́ ná nɔ́ glá bó nɔ wa nǔ e má nyɔ́ nyɛ Mawu Izlayɛ́li tɔn nukún mɛ lɛ́ɛ ǎ. Yě mɛ e ma sɔ́ tunwun nǔ e wa wɛ yě ɖe ɔ́ ǎ lɛ́ɛ ɔ́, yě ná jɛ tɛn ce mɛ tunwun nú mì jí. Yě mɛ e nɔ fɔ́n, bó nɔ́ ɖo nǔ hlún ɖɔ wɛ lɛ́ɛ ná yí gbe bó yí kplɔ́n.” Mawu Mavɔmavɔ ɖɔ: “Heelú mi vǐ gǔfɔ́ntɔ́ lɛ́ɛ! Heelú mi mɛ e bló tito mitɔn lɛ́ɛ nyɛ mɛ vo lɛ́ɛ! Heelú mi mɛ e jɛ akɔ xá toxo ɖěvo jlǒ ce mɛ vo lɛ́ɛ! Hwɛ hu dó hwɛ jí wɛ mi nɔ ɖe gbɔn mɔ̌. Mi ɖɔ xó ɖé nú mì cóbó yi Ejípu ǎ. Mi yi hɔn hwlá cí Ejípu xɔ́sú ɔ́ glɔ́. Mi yi bɛ ta ɖo Ejípu. Lo ɔ́, Ejípu xɔ́sú ɔ́ gɔ́n e mi hɔn yi cí ɔ́ ná nyí winnyá nú mi; Ejípu e mi yi bɛ ta ɖó ɔ́ ná nyí hɛ̌n nú mi. Gǎn hɔn-yitɔ́ mitɔn lɛ́ɛ kó ɖo Sowáan, tofɔzéɖótetɔ́ mitɔn lɛ́ɛ lɔ ko hun káká yi Hanɛ́si ɖo Ejípu. Lo ɔ́, togun énɛ́ ɔ́ ná dó winnyá yě, ɖó togun énɛ́ ɔ́ nɔ́ dó alɔ mɛɖé ǎ; é ná hwlɛ́n yě gán ǎ; é ná dó alɔ yě ǎ; togun ɔ́ ná dó winnyá yě, é ná kɔ́n wi yětɔn.” Xó e Mawu ɖɔ dó kanlin e ɖo gbětótló tofɔligbé tɔn mɛ lɛ́ɛ wú ɔ́ ɖíe: “To e mɛ gbɛwúvɛ́ kpó adohuhu kpó ɖe ɔ́, to e kinnikínní asú kpó asi kpó gɔ́ ɔ́, to e jakpata kpó dan ɖaxó e nɔ zɔn lɛ́ɛ kpó gɔ́ ɔ́, toví lɛ́ɛ dó dɔkun e ɖo to yětɔn mɛ lɛ́ɛ sín agban nú lǎkúnmí yětɔn lɛ́ɛ, lobo bɛ́ xweyǐgbe to e ma sixú kpé nǔɖé wú nú yě ǎ é mɛ. Đó alɔdó Ejípu tɔn nyí nǔɖé ǎ, nǔ yǎyá kpowun wɛ. Énɛ́ ɔ́ wú wɛ un nɔ ɖɔ n'i ɖɔ: ‘Jojodántɔ́! Yǐ agbɔ̌n!’ ” Mawu ɖɔ nú Ezayíi ɖɔ: “Din ɔ́, yi wlán nǔ énɛ́ lɛ́ɛ ɖó atɛ jí ɖo Jeluzalɛ́munu lɛ́ɛ nukún mɛ. Wlǎn dó nǔ jí. Đó é ná wá nyí xlɛ́ ɖokpó nú yě sɔ; é ná nɔ ayǐ káká sɔ́yi.” Đó gǔfɔ́ntɔ́ wɛ nú yě, vǐ masetɔ́gbe wɛ yě nyí. Vǐ ɖé wɛ yě nyí bó nɔ́ nyi Mawu Mavɔmavɔ sɛ́n ɔ́ ɖěbǔ ǎ. Yě nɔ́ ɖɔ nú nǔmɔtɔ́ lɛ́ɛ ɖɔ: “Nǔ yǎyá wɛ nyí nǔ e mɔ wɛ mi ɖe lɛ́ɛ.” Yě nɔ́ ɖɔ nú gbeyíɖɔ lɛ́ɛ ɖɔ: “Mǐ ba ɖɔ mi ní ɖɔ xó nǔgbó nú mǐ ǎ. Mi ɖɔ xó víví nú mǐ, abǐ mi ba adlǔ ɖé bó dó nú mǐ, énɛ́ nyɔ́ hú. Mi jó ali e gbɔn wɛ mi ɖe ɔ́ dó, mi gosín ali énɛ́ jí; mi ɖe Mɛ Mímɛ́ Izlayɛ́li tɔn sín nukún mɛ nú mǐ.” Énɛ́ ɔ́ wú wɛ Mɛ Mímɛ́ Izlayɛ́li tɔn ɖɔ: “Mi gbɛ́ xó énɛ́ ɔ́, bó kpo nú adǎkaxixo kpó ahizi kpó, lobo mɔ ɖɔ émí ɖo nǔ ganjí wa wɛ. Din ɔ́, nǔ e ná gbo mi ɔ́ ná cí lě e ahohó nɔ́ zɛ, bó nɔ́ nya akɔ́n wɛn, bó nɔ́ hɔ́ viwun é ɖɔhun. Ahohó ɔ́ ná gba hánnyá lě e kozɛ́n nɔ́ gba hánnyá, bɔ xwɛ tɔn ma sixú bɛ́ myɔkán ǎ, é má ka sixú wún sin ǎ é ɖɔhun.” Xó e Aklúnɔ Mavɔmavɔ, Mɛ Mímɛ́ Izlayɛ́li tɔn ɖɔ é ɖíe, é ɖɔ: “Gɔ̌n ce jɛ́n mi ná lɛ́ kɔ wá, cóbó ná mɔ hwlɛngán. Hlɔ̌nhlɔ́n ɖokpó e kpo nú mi ɔ́ wɛ nyí ɖɔ mi ná fá xomɛ, bó ná ɖeji dó wǔ ce; mi ka ba mɔ̌ ǎ.” Mi nɔ ɖɔ: “Gbeɖé kpɔ́n! Mǐ ná xá sɔ́ bó hɔn yi!” Énɛ́ ɔ́ wú wɛ mi ná hɔn nǔgbó. Mi nɔ ɖɔ: “Mǐ nǎ zé sɔ́ e yá afɔ ganjí lɛ́ɛ.” Énɛ́ ɔ́ wú wɛ mɛ e ná nya mi lɛ́ɛ lɔmɔ̌ ná yá afɔ ganjí. Kɛntɔ́ ɖokpó géé ná gblɔ́n adǎn nú mi, bɔ mi mɛ afatɔ́n (1.000) ná jɛ sísɔ́sísɔ́ jí; kɛntɔ́ atɔ́ɔ́n ná gblɔ́n adǎn nú mi, bɔ mi bǐ ná hɔn. Nǔ ná ɖo mɔ̌ nyi wɛ káká bɔ mɛ e ná kpo ɖo gbɛ ɖo mi mɛ lɛ́ɛ ná cí lě e è nɔ tun kpo gaga ɖokpó ɖó só ɖé jí é ɖɔhun, é ná cí asyá ɖo só kpɛví ɖé ta ɖɔhun. Nǔ ɖo mɔ̌ có, Mawu Mavɔmavɔ ɖó jlǒ bó ná wa ɖagbe nú mi. É ná sí te bó ná kú nǔbláwǔ nú mi, ɖó Mawu Mavɔmavɔ ɔ́, Mawu hwɛjijɔnɔ wɛ. Nǔ nyɔ́ nú mɛ e ɖo nukún ɖó e wɛ lɛ́ɛ bǐ. Sinyɔ́ɔ togun e, hwi mɛ e nɔ nɔ Jeluzalɛ́mu é! A sɔ́ ná ya avǐ kpɔ́n gbeɖé ǎ. Hwenu e a nǎ sú xó ylɔ́ Mawu é ɔ́, é ná ɖo gbesisɔ mɛ bó ná ɖótó we. É se gbe towe lě tlóló ɔ́, é ná sɔ nú we. Aklúnɔ ná ná nǔɖuɖu we hwenu e adǎn ná gbo we é. É ná ná sin we hwenu e a nǎ ɖo aluwɛ mɛ é. Éyɛ́ mɛ e ɖo kplɔ́nkplɔ́n we wɛ ɔ́, a sɔ́ ná ba ɛ kpo ɖě ǎ; a nǎ mɔ ɛ ɖó nukún towe wú. Hwenu e a ɖǒ ná yi aɖisíxwé abǐ amyɔxwé ɔ́, a nǎ se gbe ɖé ɖo gǔdo towe bɔ é ná ɖɔ: “Ali ɔ́ ɖíe, wlǐ bó ɖidó.” Vodún towe e è kɔn kpatágan dó lɛ́ɛ, kpó bǒcyɔ towe e è kɔn siká dó lɛ́ɛ kpó ɔ́, a nǎ nɔ́ mɔ yě dó mɔ nǔ blíblí; a nǎ bɛ̌ yě nyi gbě nǔ e ko nyɔ é ɖɔhun, bó ná ɖɔ: “Cí”. Énɛ́ ɔ́, Mawu ná ná jǐ dó gle towe mɛ, bɔ jinukún e ayǐkúngban ɔ́ ná ná ɔ́ ná nyɔ́ bó ná sukpɔ́ ɖésú. Hwenɛ́nu ɔ́, kanlin towe lɛ́ɛ ná mɔ gběhan faɖaɖa, bó ná byɔ́ mɛ bó ɖu ama. Nyibú kpó tócí kpó e è nɔ dó lɛ gle ná lɛ́ɛ ná mɔ jinukún sín ama ɖagbe bo ɖu; jinukún sín ama e è fún jinukún bɔ é kpé fí bǐ é. Azǎn e gbe tocɔ́kpe kɛntɔ́ towe lɛ́ɛ tɔn lɛ́ɛ ná mu, bɔ è nǎ hu yě tɛ́ ɔ́, sin ná sa sín só ɖaxó ɖaxó lɛ́ɛ bǐ jǐ, bó ná sa sín só kpɛví kpɛví lɛ́ɛ bǐ jí. Azǎn e gbe Mawu Mavɔmavɔ ná blá akpa nú togun tɔn ɔ́, hwenu e akpa tɔn lɛ́ɛ ná kú é ɔ́, sun ná za wě hwe ɖɔhun, hwe ná za wě lě e é nɔ́ za gbɔn ɔ́ donu tɛ́nwe. Mawu Mavɔmavɔ ɖésúnɔ ɖíe jǎwe sín zɔ dɔ̌n e; xomɛsin ɖaxó jí wɛ é ɖe, xomɛsin ɔ́ syɛ́n ɖésú; Mawu Mavɔmavɔ ɖo adǎn jí; xó e ɖo tíntɔ́n sín nu tɔn mɛ wɛ é cí myɔ ɖaxó ɖé ɖɔhun. Funfún e ɖo tíntɔ́n sín nu tɔn mɛ wɛ ɔ́ cí tɔ e ɖi sin, bó gba wu bó yi jǐ káká bó hɛn mɛ dó kɔ é ɖɔhun. É wá dó jɔwunkɔ́ nú akɔta lɛ́ɛ, bɔ awě xo yě gbɔn ɖisí amyɔ. É dó gan nu nú togun lɛ́ɛ sɔ́ ɖɔhun, bó ná dɔn yě yi fí e má jló yě ǎ é. Jeluzalɛ́munu lɛ́ɛ mi, midɛɛ lɛ́ɛ ɔ́, mi ná ɖo han ji wɛ è ɖo xwe dlɔ̌ wɛ ɖɔhun. Xomɛ ná ɖo mi hun wɛ è ɖo kpete kún xwe Mawu Mavɔmavɔ só jí, Mawu e nyí Izlayɛ́li Só ɔ́ gɔ́n é ɖɔhun. Mawu Mavɔmavɔ ná dó gbe; é ná ɖe lě e é nɔ́ dlɛ́n alɔ bó nɔ́ xo mɛ gbɔn ɔ́ xlɛ́. É ná ɖe xomɛsin tɔn xlɛ́ ɖo myɔ ɖaxó ɖ'é mɛ, ɖo jǐ kpó jɔhɔn kpó, kpó kɛ́njí kpó tɛ́ntin; nǔɖé nɔ́ nɔ te xomɛsin tɔn nukɔn ǎ. Énɛ́ ɔ́, Asilíi se Mawu Mavɔmavɔ sín gbe lě tlóló ɔ́, é ná jɛ sísɔ́sísɔ́ jí. Mawu Mavɔmavɔ ná ɖó kpo n'i. Mawu Mavɔmavɔ ná ɖo kpo ɖó n'i wɛ, bɔ è nǎ ɖo hǔn kpó kanhún kpó xo d'é mɛ wɛ. Mawu Mavɔmavɔ ná gblɔ́n adǎn nú Asilíi, bó ná fun ahwan xá ɛ. Fí e è nǎ dó axɔ́sú ɔ́ zo ɖe ɔ́, è blǒ ɖ'ayǐ din ɔ́, é kó lín; fí ɔ́ gbló bó gɔ́ngɔ́n bɔ è to nakí d'é mɛ. Mawu Mavɔmavɔ sín funfún ná dó nakí ɔ́ zo, bɔ é ná ji hɛhɛ hwemí ɖɔhun. Heelú mɛ e nɔ ɖo alɔgɔ́ ba wɛ bó nɔ́ yi Ejípu lɛ́ɛ! Yě nɔ́ ɖeji dó sɔ́ e ɖo Ejípu lɛ́ɛ wú, bó nɔ́ gán jɛ ahwankɛkɛ́ví e ɖo dɔ̌n lɛ́ɛ wú, ɖó nǔ énɛ́ lɛ́ɛ sukpɔ́ ɖésú ɖo Ejípu. Sɔ́xátɔ́ yětɔn lɛ́ɛ lɔmɔ̌ syɛ́n ɖésú. Lo ɔ́, yě sɔ́ nɔ́ kpɔ́n Mɛ Mímɛ́ Izlayɛ́li tɔn ɔ́ sɛ́ dó ǎ; yě nɔ́ hɔn yi su Mawu Mavɔmavɔ ǎ. Mawu lɔ ka tunwun lě e é ná wa nǔ gbɔn é: é sɛ́ nǔ nyanya dó, nǔ e é ɖɔ émí ná wa lɛ́ɛ ɔ́, é gɔn ɖě wa ǎ. É sí te dó nǔnyanyawatɔ́ lɛ́ɛ jí, bó sí te dó mɛ e nɔ dó alɔ mɛdídá énɛ́ lɛ́ɛ jí, ɖó gbɛtɔ́ kpowun jɛ́n Ejípunu lɛ́ɛ lɔ nyí, yě nyǐ Mawu ǎ. Sɔ́ yětɔn lɛ́ɛ ɔ́, sɔ́ kpowun jɛ́n yě nyí; yě ɖó nǔɖé hú sɔ́ ɖě lɛ́ɛ ǎ. Mawu Mavɔmavɔ vɛ́ kó dlɛ́n alɔ tɔn kpowun ɔ́, mɛ e ɖo mɛ hwlɛ́n gán wɛ ɔ́ ná klɛ́n afɔ, bɔ mɛ e hwlɛ́n gán wɛ è ɖe ɔ́ ná j'ayǐ, bɔ yě mɛ we lɛ́ɛ bǐ sín xó ná fó. Xó e Mawu Mavɔmavɔ ɖɔ nú mì ɔ́ ɖíe: “Nú kinnikínní abǐ kinnikínníví wlí lan, bó ɖo adǎn jí ɔ́, gbɔ̌nyitɔ́ lɛ́ɛ ná bó dó ahwan gbě bó ɖo xó sú dó jǐ tɔn wɛ ɔ́, xɛsi nɔ ɖi i ǎ; é nɔ́ jó lan ɔ́ dó ɖó zǐngídi e ɖú wɛ yě ɖe ɔ́ wú ǎ. Mɔ̌ wɛ nyɛ Mawu Mavɔmavɔ Nǔbǐwúkpétɔ́ ɔ́ ná bló gbɔn hwenu e un ná jɛ te Sinyɔ́ɔ só ta, bó ná yi fun ahwan é.” Mawu Mavɔmavɔ Nǔbǐwúkpétɔ́ ɔ́ ná kɛ awa xɛ ɖɔhun, bó ná cyɔ́n Jeluzalɛ́mu jí, bó ná nya xɛ ɖo jǐ tɔn. Tɛn tɔn mɛ ɔ́, é ná hwlɛ́n ɛ gán, bó ná gló nǔ baɖabaɖa e ɖo nǎ gbo e wɛ é n'i. Izlayɛ́li ví lɛ́ɛ mi, mi jó Mawu dó bǐ gbídígbídí; mi bo lɛ́ kɔ wá gɔ̌n tɔn lo! Ayǐ ɖokpó ná wá hɔ́n, bɔ mi mɛ ɖokpó ɖokpó ná bɛ́ vodún mitɔn e mi zé kpatágan abǐ siká dó bló lɛ́ɛ nyi gbě; vodún énɛ́ lɛ́ɛ e mi zé alɔ mitɔn dó bló dó hu hwɛ dó Mawu ɔ́, mi ná bɛ́ nyi gbě. È nǎ tɔ́n ahwan ɖé Asilíi, bɔ Asilíi ná j'ayǐ bǐ ɖo ahwan énɛ́ mɛ; ahwan énɛ́ ná gosín gbɛtɔ́ gɔ́n ǎ. Ahwan e ná gba Asilíi ɔ́ ná nyí gbɛtɔ́ sín ahwan ǎ. Asilíinu lɛ́ɛ ná hɔn ɖo ahwan ɔ́ nukɔn, bɔ ahwanfuntɔ́ syɛ́nsyɛ́n tɔn lɛ́ɛ ná húzú kannumɔ bó ná yi mɛɖe. Mɛ e nyí sósyɛ́n yětɔn ɔ́ ná hɔn yi kpó ta kpó ɖo xɛsi nukɔn, bɔ awakanmɛ ná kú ahwangán lɛ́ɛ, bɔ yě ná hɔn jó asyá yětɔn dó. Mawu Mavɔmavɔ wɛ ɖɔ mɔ̌; Mawu e sín myɔ ɖo te ɖo Sinyɔ́ɔ é wɛ ɖɔ mɔ̌; myɔ ɖé wɛ bó ɖo jiji wɛ ɖo Jeluzalɛ́mu. Axɔ́sú ɖokpó ná tíin, bó ná xwedó hwɛjijɔ dó ɖu axɔ́sú, bɔ gǎn e kpó e kpó ná nɔ to ɔ́ nu lɛ́ɛ ná kpa acɛ ɖó sɛ́nxwi jí. Yě mɛ ɖokpó ɖokpó ná cí fí e è nɔ bɛ yɛ ɖe bó nɔ́ gló jɔhɔn é ɖɔhun; yě ná cí fí e è nɔ bɛ sin ɖe é ɖɔhun, yě ná cí tɔhwín e ɖo ayǐkúngban xúxú jí é ɖɔhun, yě ná cí só ɖaxó ɖé sín yɛtɛn ɖɔhun ɖo to e mɛ hwesivɔ́ nɔ́ hun ɖe ganjí é. Mɛ e sín nukún ɖó ná nɔ́ mɔ nǔ lɛ́ɛ ɔ́, nukún yětɔn ná ɖo te, mɛ e sín tó ná nɔ́ se nǔ lɛ́ɛ ɔ́, tó yětɔn ná ɖo te. Mɛ e ma bí ǎ lɛ́ɛ ná jɛ nukúnnú mɔ jɛ nǔ mɛ jí. Mɛ e nɔ kúkú ɖɛ̌ lɛ́ɛ ná nɔ́ ɖɔ xó ganjí, bɔ è nǎ nɔ́ mɔ nǔ jɛ mɛ céɖécéɖé. È sɔ́ ná nɔ́ mɔ gbɛtɔ́ ma ɖó ta ɖé lɛ́ɛ dó mɔ gbɛtɔ́ nukúnɖéjí ǎ, è sɔ́ ná nɔ́ mɔ awlinmɛdan lɛ́ɛ dó mɔ mɛjɔmɛ ǎ. Xó ma ɖó ta ɖé jɛ́n gbɛtɔ́ maɖóta ɖé lɛ́ɛ nɔ́ ɖɔ; nǔ baɖabaɖa e yě ná dó sin ɔ́ lin wɛ jɛ́n yě nɔ́ ɖe; yě nɔ́ xo dǎka, bó nɔ́ ɖo xó nyanya ɖɔ dó Mawu Mavɔmavɔ wú wɛ; yě nɔ́ tɛ nǔɖuɖu mɛ e ɖo xovɛ́ é, bó nɔ́ tɛ sin mɛ e kɔ xú é. Awlinmɛdan lɛ́ɛ ɔ́, alǐnnyánú e nɔ́ dó nǔ baɖabaɖa sin é ɖo yě sí; yě nɔ́ ɖe wě bó nɔ́ ɖó adingban dó wa nǔ xá wamamɔnɔ lɛ́ɛ; amɔ̌, lelenɔ lɛ́ɛ ɔ́, nǔ e yě ɖó acɛ ná ɔ́ kɛ́ɖɛ́ jɛ́n yě nɔ́ byɔ́. Mɛ e ɖó ayi ɖagbe ɔ́, linlin ɖagbe kɛ́ɖɛ́ jɛ́n é nɔ́ ɖó; é sí te ɔ́, nǔ e nyí nǔ ɖagbe é kɛ́ɖɛ́ jɛ́n é nɔ́ wa. Jeluzalɛ́mu nyɔ̌nu e mi, nǔɖé má nyí nǔɖé ná nɔ e mi, mi sí te, mi ɖótó mì. Mi ɖyɔ̌vǐ lɛ́ɛ e mi, mi nɔ mɔ ɖɔ nǔɖé kún ɖo gbɛ émítɔn wú ó; mi bo ɖótó mì. Káká nú mǐ nǎ mɔ xwe ɖokpó jɛjí din ɔ́, mi mɛ e nɔ mɔ ɖɔ nǔɖé kún ɖo gbɛ émítɔn wú ó lɛ́ɛ ɔ́, wǔ ná kú mi, ɖó vǐwun gbigbɛ sɔ́ ná ɖe ǎ; mi sɔ́ ná mɔ vǐwun ɖě gbɛ ǎ. Nǔɖé má nyí nǔɖé ná nɔ e mi, xɛsi ní bó ɖi mi. Mi mɛ e nɔ mɔ ɖɔ nǔɖé kún ɖo gbɛ émítɔn wú ó lɛ́ɛ e mi, wǔ ná kú mi; mi ɖe avɔ mitɔn lɛ́ɛ, mi ɖe nǔ e mi dó lɛ́ɛ, bó sɔ́ nǔwamɛvɔ gbá. Mi ná alě, mi ví gle ɖagbe ɖagbe ɔ́; mi ví vǐwungbo e nɔ sɛ́n káká é. Mi ví togun ce sín ayǐkúngban e bǐ sú gbě é; mi ví xwé énɛ́ lɛ́ɛ e gbe è nɔ ɖo awǎ jɛ wɛ ɖe é; mi ví toxo énɛ́ e mɛ axi nɔ jɛ ɖe é. Mɛ bǐ hɔn jó axɔ́sú ɔ́ sín xwé dó. Toxo e mɛ axi nɔ jɛ ɖe é jɛ vɔ̌. Mɛ bǐ jó Ofɛ́lu slǎ ɔ́ dó, bó jó tocɔ́kpe e ta sɔ́ja lɛ́ɛ nɔ́ nɔ é dó, bɔ tócí gbě tɔn lɛ́ɛ nɔ́ wá vo ɖo fínɛ́, bɔ kanlin lɛ́ɛ nɔ́ yi ɖu ama ɖo fínɛ́. Ayǐ ɖokpó ná wá hɔ́n, bɔ Mawu ná kɔn yɛ tɔn dó mǐ jí. Énɛ́ ɔ́, fí e nyí axéko jí é ná húzú atínsínsɛ́ngbo, bɔ atínsínsɛ́ngbo ná húzú zungbó. Nǔ wa ɖó sɛ́nxwi jí kpó hwɛjijɔ kpó ná jínjɔ́n ayǐ gbɔn fí bǐ ɖo to ɔ́ mɛ; nǔ ná nyí mɔ̌ ɖo axéko jí, bó nyí mɔ̌ ɖo atínsínsɛ́ngbo mɛ. Hwɛjijɔ ná hɛn fífá wá; é ná ná mɛ ayi jɛ ayǐ kpó jiɖiɖe kpó káká sɔ́yi. Togun Mawu tɔn ná mɔ fífá; é ná vo, é sɔ́ ná nɔ́ lin nǔɖé ǎ. Kɛ́njí ná ja dó zungbó ɔ́ jí, bɔ atín lɛ́ɛ bǐ ná lɔ́, bɔ toxo ɔ́ bǐ ná gba. Amɔ̌, ɖagbe wɛ é ná nyí nú mi bǐ; mi ná dó nǔ gbɔn tɔkpá tɔkpá, bó ná jó tócí mitɔn lɛ́ɛ kpó nyibú mitɔn lɛ́ɛ kpó dó, bɔ yě ná nɔ́ ɖo yiyi wɛ bó ná nɔ́ ɖo wǐwá wɛ. Heelú we, hwi mɛ e nɔ hɛn nǔ bǐ gblé, bɔ mɛ ɖé má ka nɔ hɛn hwɛ gblé ǎ é. Heelú we, hwi mɛ e nɔ flú mɛ, bɔ mɛ ɖé ma ka nɔ́ flú hwɛ ǎ é. Ényí a ko hɛn nǔ gblé fó ɔ́, è nǎ wá hɛn hwi lɔ gblé. A ko flú mɛ fó ɔ́, è nǎ wá flú hwi lɔmɔ̌. Mawu Mavɔmavɔ, kú nǔbláwǔ mǐtɔn. Mǐ ɖo nukún ɖó we wɛ. Nyǐ hlɔ̌nhlɔ́n mǐtɔn zǎnzǎn tɛgbɛ, bó nyí mɛhwlɛ́ngántɔ́ mǐtɔn adǎngbomɛ hwenu. A ɖɔ xó lě ɔ́, togun lɛ́ɛ nɔ́ hɔn; a sí te ɔ́, akɔta lɛ́ɛ nɔ́ gbadó. Énɛ́ ɔ́, è nɔ zɔn dɔkun kɛntɔ́ tɔn mɛ bó nɔ́ wlá, wɛn kɔn nyi gběhan jí ɖɔhun. È nɔ vun blá dɔkun yětɔn bɔkle vun blá gle ɖɔhun. Mawu Mavɔmavɔ hú gǎn nǔ bǐ; jǐ aga wɛ é nɔ́ nɔ. É sɔ́ hwɛjijɔ kpó nǔ jlɔ́jlɔ́ kpó ɖó ayǐ gbɔn Jeluzalɛ́mu toxo ɔ́ bǐ mɛ. Din ɔ́, hwi mɛ e nyí togun Mawu Mavɔmavɔ tɔn ɔ́, a nǎ nɔ vivo mɛ ɖo to towe mɛ. È ɖǒ nǔnywɛ́ bó tunwun Mawu wɛ nyí dɔkun e nɔ hwlɛ́n mɛ gán é. Sísí ɖó nú Mawu Mavɔmavɔ wɛ nyí dɔkun. Aliɛ́linu lɛ́ɛ ɖíe tɔ́n jɛ ali jí bó ɖo xó sú wɛ e! Fífáwɛndótɔ́ lɛ́ɛ lɛ́ kɔ jǎwe kpó avǐ kpó, ɖasin hoho. Ali lɛ́ɛ bǐ wɛ wɛ́n; mɛ ɖé sɔ́ ɖo ali lɛ́ɛ jí ǎ. Acɛgannaganna-kpanúmɛtɔ́ ɔ́ da alɛ; é gba akɔ e é jɛ ɖo kúnnuɖetɔ́ nukɔn é; é hu tɛ́ nú mɛ bǐ. To ɔ́ ɖo aluwɛ mɛ; sin ɖo vivɔ sín to ɔ́ mɛ wɛ. Akú hɛn Libáan só ɔ́, bɔ winnyá hu i. Calɔ́ni gbé ɔ́ jí bǐ ba sin kpo bó cí gbětótló ɖé ɖɔhun. Atín e ɖo Basáni só ɔ́ jí lɛ́ɛ kpó ée ɖo Kaamɛ́li só ɔ́ jí lɛ́ɛ kpó bǐ ɖo ɖa lúnlún wɛ. Mawu Mavɔmavɔ ɖɔ: “Din ɔ́, un ná sí te; din ɔ́, un ná ɖe hlɔ̌nhlɔ́n ce xlɛ́. Nǔ e lin wɛ mi ɖe bɔ é nyí xo bɔ mi mɔ ɔ́, hankán kpowun wɛ; mi ja jiji gbé ɔ́, nǔywɛ́ kpowun wɛ mi ná ji, bɔ funfún mi ɖésúnɔ tɔn ná dó nǔnywɛ́ ɔ́ zo myɔ ɖɔhun. È nǎ dó togun lɛ́ɛ zo bɔ yě ná ji kɔn afín; yě ná ji zo gběhan e è xo é ɖɔhun. Mi mɛ e ɖo zɔ lɛ́ɛ ɔ́, mi ɖótó nǔ e wá é! Mi mɛ e sɛkpɔ́ mì lɛ́ɛ ɔ́, mi ní tunwun ɖɔ un ɖó hlɔ̌nhlɔ́n.” Xɛsi jɛ hwɛhutɔ́ e ɖo Sinyɔ́ɔ lɛ́ɛ jí. Mɛ e ma ɖo gbejí ǎ lɛ́ɛ ɖo sísɔ́sísɔ́ wɛ. Yě nɔ́ ɖɔ: “Mɛ̌ wɛ ɖo mǐ mɛ bó ná sixú nɔ myɔ hɛhɛ ɔ́ kpá? Mɛ̌ ká ɖo mǐ mɛ bó ná sixú nɔ zojimací ɔ́ kpá?” Mɛ e sixú nɔ zo mɔ̌hun kpá é ɖíe: mɛ e nɔ ɖi zɔnlin gbɔn hwɛjijɔ li jí é, mɛ e nɔ ɖɔ xó e sɔgbe é, mɛ e ma nɔ fán asú mɛ ǎ é, mɛ e ma nɔ ɖu nǔ ɖo nǔ mɛ ǎ é, mɛ e ma nɔ lɔn bó nɔ́ se xó nyanya dó tó mɛ ǎ é, mɛ e ma nɔ lɔn nú nukún tɔn nɔ́ mɔ nǔ nyanya ǎ ɔ́, mɛ ɔ́ wɛ. Mɛ mɔ̌hun ná nɔ só jí aga ɖéé, só e jí mɛɖé má sixú wa nǔɖé nú mɛ ɖe ǎ é wɛ ná nyí nɔtɛn tɔn. È nǎ ná ɛ nǔɖuɖu, bɔ sin ná ɖo gɔ̌n tɔn tɛgbɛ. Nukún towe ná mɔ axɔ́sú ɔ́ kpó susu tɔn bǐ kpó. A nǎ gbɔn to ɔ́ bǐ mɛ, bó ná ná nǔɖuɖu nukún. Énɛ́ ɔ́, ayi towe ná wá flín nǔ baɖabaɖa e ko jɛ wá yi lɛ́ɛ, bɔ a nǎ kanbyɔ́ ɖɔ: “Fítɛ́ wěgbójínɔtɔ́ e nɔ́ kpɔ́n ɖɔ mɛ bǐ ná nǔjɔ é ká ɖe? Fítɛ́ mɛ e nɔ yí nǔjɔ lɛ́ɛ bó nɔ́ da kpɔ́n é ká ɖe? Mɛ e nɔ kpɔ́n ɖɔ ahohó ɔ́ ɖo ganjí a jí ɔ́, fítɛ́ é ka ɖe?” Énɛ́ ɔ́, a sɔ́ ná mɔ togun tonuklájɛtɔ́ ɔ́ ɖě ǎ. Togun e nɔ́ dó gbe hízíhízí ɖé, bɔ mɛɖé má nɔ́ se ǎ é; Togun e nɔ ɖo gbe flán wɛ, bɔ è ma nɔ mɔ nǔ jɛ mɛ ǎ ɔ́, a sɔ́ ná mɔ ɛ ɖě ǎ. Nú a kpɔ́n Jeluzalɛ́mu toxo ɔ́, nú a kpɔ́n Sinyɔ́ɔ, toxo e mɛ mǐ nɔ́ ɖu xwe mǐtɔn lɛ́ɛ ɖe ɔ́, a nǎ mɔ bɔ é ná nyí bibɛtɛn ɖé ɖo nukún towe mɛ; é ná nyí goxɔ ɖé, bó ná ɖo te tɛgbɛ; è sɔ́ ná hɔn dotín tɔn lɛ́ɛ ɖě ǎ; è ka sɔ́ ná wɛ́n kan e è dǒ kpɛ́n ná lɛ́ɛ ɖě ǎ. Fínɛ́ wɛ Mawu Mavɔmavɔ ná xlɛ́ susu tɔn mǐ ɖe; tɔsisa kpɛví kpɛví lɛ́ɛ ná ɖo fínɛ́, tɔsisa ɖaxó ɖaxó lɛ́ɛ ná ɖo fínɛ́, bɔ ahwanhún e nɔ gbɔn tɔ jí é ɖě ká ná gbɔn jí ǎ. Tɔjíhún ɖaxó ɖě ká ná gbɔn jí ǎ. Mawu Mavɔmavɔ wɛ nyí gǎn mǐtɔn; Mawu Mavɔmavɔ wɛ nyí alixlɛ́mɛtɔ́ mǐtɔn; Mawu Mavɔmavɔ wɛ nyí axɔ́sú mǐtɔn. É wɛ nyí mɛhwlɛ́ngántɔ́ mǐtɔn. Tɔjíhún kɛntɔ́ mǐtɔn lɛ́ɛ tɔn ɔ́, kan tɔn lɛ́ɛ túntún; yě sɔ́ hɛn asyákpo ɔ́ ɖó te ǎ; kan lɛ́ɛ ka sɔ́ nɔ́ dɔn avɔ e è dǒ nú tɔjíhún ɔ́ é ǎ. Énɛ́ ɔ́ wú wɛ mǐ nǎ zɔn dɔkun mɛ bó wlá; afɔtɔ́nɔ lɛ́ɛ lɔ ná mɔ yětɔn ɖ'é mɛ. Toví ɖé sɔ́ ná ɖɔ: “Un ɖo azɔn jɛ wɛ” ǎ. Togun Jeluzalɛ́mu tɔn ɔ́, Mawu ná sɔ́ hwɛ tɔn kɛ ɛ. Akɔta akɔta lɛ́ɛ mi, mi wá bó wá se! Togun lɛ́ɛ mi, mi ɖótó ganjí! Ayǐkúngban ɔ́ ní se, bónú nǔ e ɖo ayǐkúngban ɔ́ jí lɛ́ɛ bǐ ní se! Gbɛ ɔ́ ní se, bónú nǔ e ɖo gbɛ ɔ́ mɛ lɛ́ɛ bǐ ní se! Mawu Mavɔmavɔ sin xomɛ dó akɔta lɛ́ɛ bǐ, bó sin dó ahwankpá yětɔn lɛ́ɛ bǐ. É ɖó hwɛ nú yě ɖɔ kún yětɔn ná sú dó, é jó yě bɔ è hu yě bǐ. Mɛ yětɔn e kú lɛ́ɛ kpé kɔ́ mɛ kɔ́ mɛ; cyɔ yětɔn ɖo wǎn lun wɛ, kanjɔ yětɔn ɖo tɔ sa wɛ gbɔn só jí só jí. Sunví lɛ́ɛ bǐ bú, jǐnukúnsin mlá wěma ɖɔhun. Sunví lɛ́ɛ ɖo ayǐ kɔn nyi wɛ vǐwunma xúxú abǐ fígima xúxú ɖɔhun. Hwǐ Mawu tɔn ɔ́ tɔ́n ɖo jǐxwé; é nɛ́ jɛ Edɔ́munu lɛ́ɛ wú nɛ́! Togun énɛ́ ɔ́, Mawu wɛ ɖó hwɛ n'i ɖɔ kún tɔn ná sú dó. Kanjɔ kpé hwǐ Mawu Mavɔmavɔ tɔn wú vɛɛn, a nǎ ɖɔ lɛ̌ngbɔ́ví abǐ gbǎgbá sín kanjɔ wɛ; jǒ kpé hwǐ Mawu Mavɔmavɔ tɔn wú bǐ, a nǎ ɖɔ agbo sín ayi wɛ; ɖó Mawu Mavɔmavɔ sá vɔ̌ ɖaxó ɖokpó ɖo toxo Bosla tɔn mɛ. É hu mɛ vantankánnyá ɖo Edɔ́mu tomɛ. Hwe énɛ́ nu ɖokpó ɔ́, agbo gbě tɔn lɛ́ɛ ná jɛ ayǐ; nyibúsú kpó nyibú asi kpó ná jɛ ayǐ. Ayǐkúngban ɔ́ ná nu hun bɔ é ná kpé e kpo; jǒ ná kpé kɔ nú ayǐkúngban ɔ́. Hlɔn sín azǎn ɖé wɛ azǎn énɛ́ ɔ́ nyí nú Mawu Mavɔmavɔ; mɛ e nɔ nya xɛ ɖo Sinyɔ́ɔ jí ɔ́, nǔ e kɛntɔ́ wa nyi do nú togun tɔn ɔ́, é ná sú axɔ́ tɔn ɛ xwe énɛ́ xwe. Tɔsisa e ɖo Edɔ́mu lɛ́ɛ ná húzú awɔn; ayǐkúngban ɔ́ ná húzú hwemí. Gle lɛ́ɛ bǐ ná húzú awɔn bɔ myɔ ná ɖ'é jí, bó ná ɖo jiji wɛ zǎn kéze, bɔ azɔ tɔn ná ɖo jǐxwé yi wɛ hwebǐnu. To ɔ́ ná nɔ vɔ̌ káká sɔ́yi. Mɛ ɖě sɔ́ ná gbɔn fínɛ́ gbeɖé ǎ. To ɔ́ ná húzú kwlele lɛ́ɛ kpó ajijá lɛ́ɛ kpó tɔn, bó ná nyí agbigbi kpó avǔnsákɔwó kpó sín nɔtɛn. È nǎ dlɛ́n to gbigba kan ɔ́ dó to ɔ́ jí; è nǎ gbígbá to ɔ́ bǐ; é ná cí to ɖě nɔ fínɛ́ kpɔ́n gbeɖé ǎ ɖɔhun. Nǔ ɖěbǔ sɔ́ ná ɖo fínɛ́ ǎ. Gbɛtɔ́ nukúnɖéjí ɖě sɔ́ ná ɖo to ɔ́ mɛ, bó ná sɔ́ axɔ́sú ɖě ɖó to ɔ́ nu ǎ. Gǎn xó ɔ́ ná fó ɖó fínɛ́. Wunkan wɛ ko wú gbɔn xwé ɖaxó ɖaxó lɛ́ɛ gbe; asangokan kpó atínkan wunnɔ lɛ́ɛ kpó vun blá ahohó lɛ́ɛ; avǔn gbě tɔn lɛ́ɛ xwé wɛ, gowungo lɛ́ɛ sín adɔ̌tɛn wɛ. Awǐi gbě tɔn lɛ́ɛ nɔ́ wá kpé hla lɛ́ɛ ɖo fínɛ́. Fínɛ́ wɛ gbǎgbá lɛ́ɛ nɔ́ ɖó goxo ɖó. Fínɛ́ wɛ yɛ nyanya Lilíti nɔ wá nɔ, bó nɔ́ mɔ fí e é ná gbɔjɛ́ ɖe é. Fínɛ́ ɖokpó ɔ́ wɛ dan nɔ xo do ɖó, bó nɔ́ ɖó azin d'é mɛ, bo nɔ́ cɔ́ hwenu e é ná flé dó é. Fínɛ́ wɛ aklasú lɛ́ɛ nɔ́ ɖó gɔnu ɖó. Ényí mi ba ɖo Mawu Mavɔmavɔ sín wěma ɔ́ mɛ ɔ́, mi ná mɔ xa ɖɔ: Kanlin e è xa lɛ́ɛ ɖokpó kún gɔn ó, ɖokpó kún hwe ɖo fínɛ́ ó, ɖó Mawu kannu wɛ yě ɖe; Mawu ɖésú wɛ kplé yě. É nyi akɔ bó kpɔ́n tɛnmɛ e ná nyí mɛ ɖokpó ɖokpó tɔn é, bó sɔ́ nǔjlɛ́kan tɔn, bó má to ɔ́ dó así nú kanlin lɛ́ɛ ɖokpó ɖokpó, bɔ é ná nyí yětɔn káká sɔ́yi, bɔ xwé yětɔn ná nɔ fínɛ́. Gbětótló kpó ayǐkúngban xúxú kpó ní j'awǎ. Nǔ ní víví nú to e mɛ sin ma ɖe ǎ é, bónú é ní gba sɛ́ folówa ɖɔhun. Folówa ní gbɔn to ɔ́ bǐ mɛ, bónú xomɛ ní hun to ɔ́; to ɔ́ ní sú xó kpó awǎjijɛ kpó. É ná nyɔ́ ɖɛkpɛ Libáan só lɛ́ɛ ɖɔhun; é ná nyɔ́ ɖɛkpɛ Kaamɛ́li só ɔ́ ɖɔhun; é ná nyɔ́ ɖɛkpɛ ayǐkúngban wɛnjɛ Calɔ́ni tɔn ɖɔhun. Énɛ́ ɔ́, mɛ bǐ ná mɔ susu Mawu Mavɔmavɔ tɔn, hǐnhɔ́n Mawu mǐtɔn tɔn. Mi ná hlɔ̌nhlɔ́n awa e nǔ cikɔ ná é; mi dó wǔsyɛ́n kanmɛ nú koli e gbɔ́jɔ́ é. Mi ɖɔ nú mɛ e awakanmɛ ɖo kúkú wɛ lɛ́ɛ ɖɔ: “Mi dó wǔsyɛ́n lanmɛ nú miɖée; mi má sɔ́ ɖi xɛsi ɖě ó. Mi kpɔ́n, Mawu mitɔn ɖíe! É ja, bó ná wá ba hlɔn nú mi, bó ná sú nǔ e kɛntɔ́ mitɔn lɛ́ɛ wa xá mi ɔ́ sín axɔ́ yě. É ɖésúnɔ wɛ ja bó ná hwlɛ́n mi gán.” Énɛ́ ɔ́, nukúntíntɔ́nnɔ lɛ́ɛ ná mɔ nǔ, tókúnɔ lɛ́ɛ ná se nǔ. Sékúnɔ lɛ́ɛ ná lɔ́n yi jǐ tɛ́ ɖɔhun; ɖɛ̌kúnánɔ lɛ́ɛ ná ɖɔ xó dó ɖe awǎjijɛ yětɔn xlɛ́. Sin ná tɔ́n ɖo gbětótló mɛ; tɔ ná sa ɖo ayǐkúngban xúxú jí. Fí e kɔ́gúdu ɖe bó nɔ́ sɛ́ gáɖágáɖá hwesivɔ́ mɛ ɔ́ ná húzú tán; to e mɛ è ma nɔ mɔ sin nu ɖe ǎ é ná húzú tɔjɔtɛn. Fí e kó nyí xwé nú avǔn gbě tɔn lɛ́ɛ ɖ'ayǐ ɔ́, fán kpó fɛ́n kpó wɛ ná wú ɖo fínɛ́. Fí énɛ́ wɛ ali ɖaxó ɖokpó ná gbɔn, bɔ è nǎ ylɔ́ ɖɔ “Ali mímɛ́”. Mɛ blíblí ɖokpó ná sixú gbɔn ali énɛ́ jí ǎ. Hunsɛntɔ́ ɖě ká ná gbɔn fínɛ́ ǎ. Mawu sín togun ɔ́ kɛ́ɖɛ́ tɔn wɛ é ná nyí, bɔ é nǎ nɔ́ gbɔn jí. Kinnikínní ná gbɔn ali énɛ́ ɔ́ jí ǎ, adǎnkanlin ɖé ka ná sixú yi jí ǎ. Ali énɛ́ ɔ́ jí wɛ mɛ e Mawu Mavɔmavɔ tún kan ná lɛ́ɛ ná zun zɔnlin gbɔn. Mɛ e é hwlɛ́n gán lɛ́ɛ ná lɛ́ kɔ wá; Sinyɔ́ɔ wɛ yě ná wá, kpó awǎjijɛ kpó, kpó xósúsú kpó. Awǎjijɛ mavɔ mavɔ ɖé ná ɖo nukún yětɔn ta, xomɛ ná ɖo yě hun wɛ mɔ̌hunkɔtɔn; nǔ linlin kpó azɔn winwɛn kpó bǐ ná vɔ. Hwenu e Ezekiyási ɖo xwe wǒ-ɛnɛ bló wɛ ɖo zinkpo jí ɔ́, Senakelíbu Asilíi xɔ́sú ɔ́ wá tɔ́n ahwan Judáa toxo e è mɛ ahohó lɛ́ lɛ̌ dó lɛ́ɛ bǐ, bó yí. Asilíi xɔ́sú ɔ́, Lakíci wɛ é ɖe hwenɛ́nu; é nɔ Lakíci fínɛ́ bó sɛ́ ahwangán e nɔ kplá ɛ ɔ́ dó axɔ́sú Ezekiyási gɔ́n ɖo Jeluzalɛ́mu. Ahwangán ɔ́, sɔ́ja wɔ̌buwɔ́bú ɖé nu wɛ é zɔn yi Jeluzalɛ́mu. Ée ahwangán ɔ́ wá ɔ́, é nɔ te ɖo ali e è nɔ gbɔn yi avɔnyatɔ́ lɛ́ɛ gle mɛ ɔ́ jí, ɖo fí e sin nɔ tɔ́n gbɔn ɖo toxo ɔ́ sín taligbé é. Énɛ́ ɔ́, Eliyakímu Ilukyahu ví e nɔ kpé nukún dó axɔ́sú ɔ́ sín dɔkun lɛ́ɛ wú ɔ́ yi gɔ̌n tɔn, é kpó Cevúna wěgbójínɔtɔ́ ɔ́ kpó, kpó Yoáxi Asáfu ví wěgbóhɛntɔ́ ɔ́ kpó. Ahwangán e nɔ́ kplá Asilíi xɔ́sú ɔ́ ɖɔ nú yě ɖɔ: “Mi ɖɔ nú Ezekiyási ɖɔ nǔ e axɔ́sú ɖaxó Asilíi tɔn ɖɔ ɔ́ ɖíe: ‘Étɛ́wú gán jɛ wɛ a ka ɖe tawun? È ja ahwan fun gbé ɔ́, wě tɔn wɛ è nɔ ɖe, bó nɔ́ ɖó akɔ́nkpinkpan. Hwɛ ka vɛdó ɖɔ xó kpowun wɛ nɔ fun ahwan sín. Mɛ̌ wú a ka ɖeji dó tawun bó fɔ́n gǔ dó jǐ ce? É má nyí Ejípu wú wɛ a ɖeji dó a? Ejípu e nyí fántín lúlɔ́, bɔ mɛɖé gán jɛ wǔ tɔn ɔ́, é nɔ́ gbo alɔ nú mɛ ɔ́, bó nɔ́ byɔ́ lan tɔn mɛ ɔ́, é wú wɛ hwɛ ɖeji dó a? Mɔ̌ wɛ Ejípu xɔ́sú ɔ́ cí gbɔn nú mɛ e nɔ gán jɛ wǔ tɔn lɛ́ɛ bǐ. A nǎ ɖɔ nú mì din ɖɔ Mawu Mavɔmavɔ, Mawu mitɔn wú wɛ mi gán jɛ. É má ká nyí hwi ɖésúnɔ wɛ gbɔn só jí só jí, bó gba vɔ̌sákpe lɛ́ɛ, bó ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ yě má sɔ́ jɛ kpo ɖo vɔ̌sákpe ɖěvo nukɔn zɛ Jeluzalɛ́mu tɔn wú ó a?’ Din ɔ́, nú a mɔ ɖɔ émí ná kpé nǔɖé wú hǔn, wǎ gbo gbě xá gǎn ce Asilíi xɔ́sú ɔ́. Nú a nǎ mɔ sɔ́xátɔ́ ɔ́, un ɖo gbesisɔ mɛ, bó ná ná we sɔ́ afɔwó (2.000). A ka sixú kpé gǎn ce sín ahwangán lɛ́ɛ ɖěbǔ wú ǎ; mɛ gǔdo gúdo tɔn e ɖo yě mɛ ɔ́, a sixú kpé wǔ tɔn ǎ. A ɖo ji ɖe ɖó dó Ejípu wú wɛ ɖɔ émí ná mɔ ahwankɛkɛ́ví kpó sɔ́xátɔ́ kpó. Nǔ e un ka ná kanbyɔ́ we lɔ ɔ́, Mawu Mavɔmavɔ ɔ́ mɛ vo wɛ un tɔ́n ahwan to élɔ́, bó ná gba wɛ a vɛdó a? Gbeɖé! Mawu Mavɔmavɔ ɖésú wɛ ɖɔ nú mì ɖɔ nyɛ ní wá tɔ́n ahwan to élɔ́ bó gba.” Énɛ́ ɔ́, Eliyakímu, Cevúna kpó Yoáxi kpó ɖɔ nú ahwangán ɔ́ ɖɔ: “Kɛnklɛ́n, dǒ alamugbe nú mǐ; mǐ se gbe énɛ́ ɔ́ ganjí. Ma sɔ́ dó Ebléegbe ɖě nú mǐ ó; é má nyí mɔ̌ ǎ ɔ́, mɛ e ɖo ahohó ɔ́ ta lɛ́ɛ bǐ ɖo tó ɖó mǐ wɛ.” Lo ɔ́, ahwangán ɔ́ yí gbe nú yě ɖɔ: “Axɔ́sú mitɔn kpó midɛɛ lɛ́ɛ kpó wɛ gǎn ce ɖɔ xó énɛ́ lɛ́ɛ sɛ́ dó wɛ mi vɛdó a? Yě mɛ énɛ́ lɛ́ɛ e ɖo ahohó ɔ́ ta fínɛ́, bɔ zaanɖé din ɔ́, yě ná nɔ nyɛ mǐ bó ná nɔ ɖu, bó ná nɔ ɖɔ́ aɖɔ̌ bó ná nɔ sɔ́ nu lɛ́ɛ, é má nyí yě wɛ gǎn ce ɖɔ xó énɛ́ lɛ́ɛ sɛ́ dó a?” Ée ahwangán ɔ́ ɖɔ mɔ̌ ɔ́, é jlɔ́ bó sú xó, bó ɖɔ dó Ebléegbe mɛ ɖɔ: “Mi ɖótó xó e Axɔ́sú ɖaxó, axɔ́sú Asilíi tɔn ɔ́ ɖɔ é: É ɖɔ: ‘Mi ma jó miɖée dó nú Ezekiyási flú mi ó, ɖó é sixú hwlɛ́n mi sín fɛn ce mɛ ǎ. É nɔ ɖɔ mi ní ɖeji dó Mawu Mavɔmavɔ wú, ɖɔ é ná hwlɛ́n mi dandan, é kún ná lɔn nú nyɛ Asilíi xɔ́sú ɔ́ ná yí to mitɔn ó. Mi ma ɖótó Ezekiyási ó; xó e nyɛ axɔ́sú Asilíi tɔn ɖɔ é wɛ mi ná ɖótó; un ɖɔ: Mi gɔn nǔ xwe, bó wá jó ta nú mì; énɛ́ ɔ́, mɛ ɖokpó ɖokpó ná ɖu vǐwun tɔn, bó ná ɖu fígi tɔn, bó ná nu sin e ɖo tɔ tɔn mɛ é. Mi ná ɖ'é wú mɔ̌ káká bɔ un ná wá kplá mi yi to e cí to mitɔn ɖɔhun é mɛ, to e mɛ blěe kpó vɛ̌ɛn kpó ɖe é; to e mɛ wɔ̌xúxú kpó vǐwun kpó ɖe é mɛ. Mi má jó miɖée dó nú Ezekiyási flú mi ó; ɖó é ɖɔ nú mi ɖɔ: Mawu Mavɔmavɔ ná hwlɛ́n mi gán. Akɔta lɛ́ɛ ɖě sín nǔmɛsɛn gbɛ́ nú nyɛ axɔ́sú Asilíi tɔn, ɖɔ nyɛ kún ná yí to yětɔn lɛ́ɛ ɖě ó a? Fítɛ́ vodún Hamáti tɔn kpó Aapadu tɔn ɔ́ kpó ká yi? Fítɛ́ vodún Sefáawayímu tɔn lɛ́ɛ ká yi? Yě kpé wú bó gbɛ́ nú mì bɔ un gɔn Samalíi toxo ɔ́ yí a? Vodún to énɛ́ lɛ́ɛ tɔn ɖě tɛ́ ká gbɛ́ nú mì ɖɔ nyɛ ní má yí to yětɔn ó, bɔ é ná nyí Mawu Mavɔmavɔ wɛ ná wá gbɛ́ nú mì ɖɔ nyɛ ní má yí Jeluzalɛ́mu toxo ɔ́ ó?’ ” Ée é ɖɔ mɔ̌ ɔ́, yě bǐ nɔ tóó; yě ɖɔ xó ɖokpó géé lě ǎ, ɖó axɔ́sú ɔ́ kó ɖɔ nú yě ɖɔ: “Mi ma kɛ nu d'é mɛ n'i ó.” Bɔ Eliyakímu Ilukyahu ví hɔnmɛgán ɔ́, é kpó Cevúna wěgbójínɔtɔ́ ɔ́ kpó, kpó Yoáxi Asáfu ví wěgbóhɛntɔ́ ɔ́ kpó vún awu dó kɔ nú yěɖée bó wá yi Ezekiyási gɔ́n, bó ɖɔ xó e ahwangán Asilíi xɔ́sú ɔ́ tɔn ɖɔ lɛ́ɛ n'i. Ée axɔ́sú Ezekiyási se xó e ahwangán Asilíi xɔ́sú ɔ́ tɔn ɖɔ sɛ́ dó e ɔ́, é vún awu dó kɔ nú éɖée, bó sɔ́ ati dó, bó ɖidó Mawu Mavɔmavɔ xwé gbe. É sɛ́ Eliyakímu hɔnmɛgán ɔ́, kpó Cevúna wěgbójínɔtɔ́ ɔ́ kpó mɛ e ko nyí vɔ̌sánú-xwlémawutɔ́ jɛ nukɔn nú ɖě lɛ́ɛ bǐ lɛ́ɛ kpó dó, bɔ yě dǒ ati, bó ɖidó Amɔ̌si ví Ezayíi, gbeyíɖɔ Mawu tɔn ɔ́ gɔ́n. Yě jɛ dɔ̌n ɔ́, yě ná ɖɔ n'i ɖɔ: “Wɛn e axɔ́sú ɔ́ dó sɛ́ dó we ɔ́ ɖíe: Azǎn égbé tɔn ɔ́, aluwɛ zán ɖé wɛ, tódɔnnúmɛ zán ɖé wɛ, bó nyí hɛ̌n zán. Mǐ cí nyɔ̌nu e jɛ flú mɛ bó má ká ɖó hlɔ̌nhlɔ́n bó ná zɛn ǎ é ɖɔhun. Asilíi xɔ́sú ɔ́ sɛ́ ahwangán e nɔ kplá ɛ ɔ́ dó, bɔ é wá zun Mawu gbɛɖe ɔ́. Kóóyi nya! Ényí Mawu Mavɔmavɔ, Mawu towe se zun é nɛ́ lɛ́ɛ din, bó dɔn tó n'i ɔ́, é ná nyɔ́ mɛ nya! Hwɛ ɔ́, bo xo ɖɛ nú mɛ e kpo ɖo togun ɔ́ mɛ lɛ́ɛ.” Mɛ e axɔ́sú Ezekiyási sɛ́ dó lɛ́ɛ yi dó wɛn ɔ́ Ezayíi. Bɔ Ezayíi ɖɔ nú yě ɖɔ: “Mi yi ɖɔ nú gǎn mitɔn ɖɔ Mawu Mavɔmavɔ ɖɔ: ‘Xó é nɛ́ lɛ́ɛ e a se ɔ́ ní má dó xɛsi nú we ó. Xó énɛ́ lɛ́ɛ e azaglɔ́gán axɔ́sú Asilíi tɔn lɛ́ɛ ɖɔ dó ɖɔ slǎmɛ wǔ ce ɔ́, ní ma dó xɛsi nú we ó. Axɔ́sú Asilíi tɔn ɔ́ ná se xó ɖé, bɔ un ka na ɖɔ dó ayi tɔn mɛ ɖɔ é ní lɛ́ kɔ yi to tɔn mɛ. É jɛ dɔ̌n ɔ́, un ná zɔ́n bɔ è nǎ hu i.’ ” Ahwangán e nɔ kplá axɔ́sú ɔ́ se ɖɔ axɔ́sú Asilíi tɔn ɔ́ kó gosín Lakíci bó yi tɔ́n ahwan Livuna. Énɛ́ ɔ́, é yi mɔ ɛ ɖo dɔ̌n. Lo ɔ́, Asilíi xɔ́sú ɔ́ se xó ɖé dó Tilaka Etiopíi xɔ́sú ɔ́ wú; é se ɖɔ axɔ́sú énɛ́ ɔ́ sɔ́ nǔ bó ná wá fun ahwan xá émí. Ée Asilíi xɔ́sú ɔ́ se mɔ̌ kpowun ɔ́, é lɛ́ sɛ́ wɛn dó Ezekiyási bó ɖɔ sɛ́ dó e ɖɔ: Xó e mi ná ɖɔ nú Ezekiyási Judáa xɔ́sú ɔ́ ɖíe: “A nɔ gán jɛ Mawu towe wú dín! A nɔ gán jɛ wǔ tɔn ɖɔ é kún ná lɔn nú un ná yí Jeluzalɛ́mu ó. Ma lɔn nú é blɛ́ we ó. A se lě e Asilíi xɔ́sú lɛ́ɛ wa to ɖě lɛ́ɛ bǐ sín nǔ gbɔn é; yě vǐvá kún yětɔn bǐ, bɔ hwɛ ka ná gán ɖ'é mɛ a? Hwenu e tɔ́gbó ce lɛ́ɛ gba Gozáni, Haláani, Hlɛsɛ́fu kpó Telasáa tota Edɛ́ninu lɛ́ɛ tɔn kpó ɔ́, fí ɖé wɛ nǔmɛsɛn yětɔn lɛ́ɛ yi a? Fítɛ́ axɔ́sú Hamáti tɔn, axɔ́sú Aapadu tɔn, axɔ́sú Layíi tɔn, axɔ́sú Sefáawayímu tɔn, axɔ́sú Hena tɔn kpó axɔ́sú Iwa tɔn kpó ká ɖe égbé din?” Ezekiyási yí wěma ɔ́ ɖo mɛ e Asilíi xɔ́sú ɔ́ sɛ́ dó e lɛ́ɛ sí bó xa, bó yi Mawu Mavɔmavɔ xwé gbe, bó vlɔ́n wěma ɔ́ ɖo nukɔn tɔn. Énɛ́ ɔ́ gúdo ɔ́, é jɛ ɖɛ xo jí ɖɔ: “Mawu Mavɔmavɔ Nǔbǐwúkpétɔ́, Mawu Izlayɛ́li tɔn e, hwi mɛ e ɖo ayǐjínjɔ́n ɖo wɛnsagun susunɔ lɛ́ɛ ta nu é ɔ́, hwi ɖokpónɔ géé wɛ nyí Mawu; hwi ɖokpónɔ géé wɛ kpa acɛ nú axɔ́súɖuto e ɖo ayǐkúngban jí lɛ́ɛ bǐ. Hwi wɛ bló jǐ kpó do kpó. Mawu Mavɔmavɔ, ɖǒtó ganjí; kpɔ́n ganjí. Hwi Mawu gbɛɖe ɔ́, kpɔ́n lě do mɛ e Senakelíbu sɛ́ dó lɛ́ɛ zun we sɔ é. Mawu Mavɔmavɔ, axɔ́sú Asilíi tɔn lɛ́ɛ vívá kún nú akɔta ɖě lɛ́ɛ, bó gba to yětɔn lɛ́ɛ, bó bɛ́ nǔmɛsɛn yětɔn lɛ́ɛ dó myɔ mɛ nǔgbó. Amɔ̌, nǔmɛsɛn yětɔn énɛ́ lɛ́ɛ cí hwi ɖɔhun ǎ. Nǔdówá gbɛtɔ́ lɛ́ɛ tɔn wɛ, atín kpó awǐnnya kpó wɛ, bɔ yě vívá kún ná. Din ɔ́, Mawu Mavɔmavɔ, Mawu mǐtɔn, hwlɛ̌n mǐ sín Senakelíbu sí, bónú axɔ́súɖuto e ɖo gbɛ ɔ́ mɛ lɛ́ɛ bǐ ná tunwun ɖɔ hwi Mawu Mavɔmavɔ ɔ́, hwi ɖokpónɔ géé wɛ nyí Mawu.” Énɛ́ ɔ́, Ezayíi Amɔ̌si ví ɔ́ ɖɔ sɛ́ dó Ezekiyási ɖɔ: “Gbe e Mawu Mavɔmavɔ, Mawu Izlayɛ́li tɔn yí nú ɖɛ e a xo dó Asilíi xɔ́sú Senakelíbu tamɛ ɔ́ ɖíe: Xó e Mawu Mavɔmavɔ ɖɔ dó Senakelíbu wú ɔ́ ɖíe: Senakelíbu, ɖyɔ̌vǐ nyɔ̌nu ɖo alɔ jí Jeluzalɛ́mu ɖo tɛ́ hu nú we wɛ. É ɖo cícá we ko wɛ. Đyɔ̌vǐ Jeluzalɛ́mu nɔ kpɔ́n we, bó nɔ́ húnhún ta. Senakelíbu, mɛ̌ wɛ a zun? Mɛ̌ wɛ a ba hǎ? Mɛ̌ wɛ a wa adǎn dó ta ná? Mɛ̌ wɛ a kpɔ́n wunvɔ? Nyɛ Mawu, mɛ mímɛ́ Izlayɛ́li tɔn ɔ́ wɛ a? A sɛ́ mɛsɛntɔ́ towe lɛ́ɛ dó nyɛ Mawu Mavɔmavɔ ɔ́, bó zun mì sɛ́ dó ɖɔ: ‘Nyɛ Senakelíbu ɔ́, un fɔ ahwankɛkɛ́ví ce wɔ̌buwɔ́bú lɛ́ɛ, bó xá Libáan só lɛ́ɛ jí káká yi Libáan só e vɛ́ xá lɛ́ɛ bǐ jí; un gbo sɛ́dlutín tɔn e yi jǐ hú ɖě lɛ́ɛ bǐ é, un gbo sikplɛ́tín tɔn e nyɔ́ ɖɛkpɛ hú ɖě lɛ́ɛ bǐ é. Un hun káká yi só tɔn gǔdo gúdo tɔn lɛ́ɛ jí, zungbó tɔn e dó ganjí lɛ́ɛ mɛ. Un kun tɔ, bó nu to ɖěvo mɛ sin; un tɛ afɔ Ejípu to ɔ́ mɛ kpowun ɔ́, tɔsisa e ɖo to ɔ́ mɛ lɛ́ɛ bǐ mɛ.’ A tunwun ɖɔ nyɛ Mawu Mavɔmavɔ ɔ́, nyi wɛ ko to nǔ énɛ́ lɛ́ɛ bǐ ɖ'ayǐ sín do ǎ cé? Un ko tunwun sín do ɖɔ nǔ énɛ́ lɛ́ɛ ná jɛ. Din ɔ́, un jló ɖɔ nǔ énɛ́ lɛ́ɛ ní jɛ, bónú a nǐ gba toxo e è mɛ ahohó lɛ́ lɛ̌ dó lɛ́ɛ hánnyá. Mɛ e ɖo to énɛ́ lɛ́ɛ mɛ lɛ́ɛ kpé nǔɖé wú ǎ. Xɛsi jɛ yě jí; winnyá hu yě. Yě cí gběhan e ɖo gle mɛ lɛ́ɛ ɖɔhun, gběhan e wú tlóló lɛ́ɛ ɖɔhun. Yě cí gběhan wlɛ́wlɛ́ e nɔ́ wú ɖo xɔ ta é ɖɔhun; yě cí nǔkún e má wú zinzin ǎ bó fyɔ́ é ɖɔhun. Amɔ̌, un tunwun hwenu e a nɔ jínjɔ́n ayǐ é. Un tunwun hwenu e a nɔ tɔ́n é, un tunwun hwenu e a nɔ wá xwé gbe é, un tunwun hwenu e a nɔ sin xomɛ dó mì é. A sin xomɛ dó mì, bó dó mɛmasígbe bɔ é wá káká gɔ̌n ce. Énɛ́ wú ɔ́, un ná dó gan awɔntín mɛ nú we, bó ná dó aja nu nú we, bó ná lɛ́ kɔ nú we gbɔn ali e a gbɔn wá é. “Amɔ̌, hwɛ ɔ́, Ezekiyási, nǔ e ná nyí xlɛ̌ nú we ɔ́ ɖíe: Xwe élɔ́ mɛ ɔ́, nǔkún flá lɛ́ɛ wɛ è nǎ ɖu; xwe wegɔ́ ɔ́ mɛ ɔ́, è nǎ ɖu nǔ ɖokpó ɔ́. Amɔ̌, xwe atɔngɔ́ ɔ́ mɛ ɔ́, nǔ e mi ɖésúnɔ ná dó ɔ́ wɛ mi ná ɖu. Mi ná dó nǔkún bó ná ya; mi ná tun vǐwuntín bɔ é ná sɛ́n, bɔ mi ná ɖu. Mɛ e ná kpo ɖo axɔ́súɖuto Judáa tɔn mɛ lɛ́ɛ ná dó ɖɔ do atín ɖɔhun, bó ná sɛ́n. Đó mɛ ɖé lɛ́ɛ ná kpo ɖo gbɛ, gbɛtɔ́ ná kpo ɖo gbɛ ɖo Jeluzalɛ́mu, ɖo Sinyɔ́ɔ só ɔ́ jí.” Ezayíi lɛ́ ɖɔ: “Nǔ e Mawu Mavɔmavɔ Nǔbǐwúkpétɔ́ ɔ́ ná bló ɖo wǎn yíyí ɖaxó e é ɖó ɔ́ mɛ é nɛ́. Nǔ énɛ́ lɛ́ɛ wú wɛ Mawu Mavɔmavɔ ɖɔ xó élɔ́ dó axɔ́sú Asilíi tɔn wú: ‘É ná byɔ́ toxo élɔ́ mɛ ǎ, é ná da gǎ ɖo toxo ɔ́ mɛ ǎ. É ná zán gǎglónú tɔn ɖo toxo élɔ́ mɛ ǎ; é ná kplé kɔ́ bó nɔ gúdo, bó tɔ́n ahwan toxo élɔ́ ǎ. Ali e é gbɔn bó wá é wɛ é ná gbɔn bó lɛ́ kɔ. É ná byɔ́ toxo élɔ́ mɛ ǎ; nyɛ Mawu Mavɔmavɔ wɛ ɖɔ mɔ̌. Un ná cyɔ́n alɔ toxo élɔ́ jí, bó ná hwlɛ́n ɛ gán ɖó Mawu wɛ un nyí; un ná bló mɔ̌ ɖó akpá un dó nú mɛsɛntɔ́ ce Davídi ɔ́ wú.’ ” Wɛnsagun Mawu Mavɔmavɔ tɔn ɖokpó tɔ́n, bó hu gbɛtɔ́ adɔ̌kpo tɛ́nnɛ děgba ɖě afatɔ́n (185.000), ɖo Asilíinu lɛ́ɛ sín ahwankpá mɛ. Ée ayǐ hɔ́n zǎnzǎn ɔ́, mɛ e kpo lɛ́ɛ ná mɔ nǔɖé kpowun ɔ́, cyɔ yětɔn jɛ́n yě mɔ. Énɛ́ ɔ́, Senakelíbu Asilíi xɔ́sú ɔ́ sɔ́ nǔ kpó ahwangɔnu tɔn kpó, bó lɛ́ kɔ bo yi cí Ninívu. É ká wá su gbe ɖokpó, bɔ Senakelíbu ɖo kɔ́ ɖe nú vodún tɔn Nislɔki ɔ́ wɛ, bɔ vǐ tɔn Adlamɛlɛ́ki kpó Salɛsɛ́ɛ kpó sɔ́ hwǐ i, bó hu i, bó hɔn yi Alaláti; ée é kú ɔ́, vǐ tɔn Asaaxadɔ́ɔn ɖu axɔ́sú ɖó tɛn tɔn mɛ. Hwenɛ́nu ɔ́, Ezekiyási wlí azɔn, bó kó ɖo kú lixo, bɔ gbeyíɖɔ Mawu tɔn Ezayíi Amɔ̌si ví ɔ́ wá gɔ̌n tɔn, bó ɖɔ n'i ɖɔ: “Xó e Mawu Mavɔmavɔ ɖɔ ɔ́ ɖíe: É ɖɔ: Nǔ nǎ nɔ gbɔn ɖě hǔn, ɖɔ nú mɛ towe lɛ́ɛ, ɖó azɔn élɔ́ e a wlǐ din ɔ́, a ɖo nǎ gán ɖ'é mɛ wɛ ǎ.” Ée é ɖɔ mɔ̌ n'i ɔ́, Ezekiyási húzú kpan nukɔn dǒ, bó xo ɖɛ ɖɔ: “Mawu Mavɔmavɔ, flín ɖɔ un nɔ gbejí ɖo nukɔn towe bo wa azɔ̌ kpó ayijlɔ́jlɔ́ kpó; un bló nǔ e nɔ nyɔ́ nukún towe mɛ lɛ́ɛ.” Ée é ɖɔ mɔ̌ n'i ɔ́, é wlí avǐ bó ya ɖasin hoho. Énɛ́ ɔ́, Mawu Mavɔmavɔ ɖɔ nú Ezayíi ɖɔ é ní ɖɔ nú Ezekiyási ɖɔ: “Nyɛ Mawu Mavɔmavɔ, Mawu tɔ́gbó tɔn Davídi tɔn ɔ́ ɖɔ: ‘Un se ɖɛ towe; un mɔ avǐ e ya wɛ a ɖe é; un ná dó xwe afɔtɔn xwe towe jí. Un ná hwlɛ́n hwi kpó toxo élɔ́ kpó gán ɖo axɔ́sú Asilíi tɔn sí; un ná cyɔ́n alɔ toxo élɔ́ jí.’ ” Ezayíi ɖɔ n'i ɖɔ: “Nǔ e ná ɖe xlɛ́ we ɖɔ Mawu Mavɔmavɔ ná gbɔ azɔn nú we ɔ́ ɖíe: É ná dɔn yɛtɛn e ko jɛ Akázi sín kpekán jí ɔ́ dó gúdo nú afɔɖiɖe wǒ. Nǔgbó ɔ́, yɛtɛn ɔ́ wá yi gúdo ɖo kpekán ɔ́ jí nú afɔɖiɖe wǒ.” Ée Ezekiyási Judáa xɔ́sú ɔ́ jɛ azɔn bɔ azɔn gbɔ n'i ɔ́, xó lómílómí e é ɖɔ ɔ́ ɖíe: Un nɔ ɖɔ nú nyiɖée ɖɔ: un ma ka ko nɔ gbɛ ɖé nɛ́, bó ka ná kó ɖi dó sava din! Xwe e kpo bɔ un ná dó nɔ gbɛ ná ɔ́, un ná yi bló ɖo mɛ e ma sɔ́ ɖo fí ǎ lɛ́ɛ tɛ́ntin! Un nɔ lɛ́ ɖɔ nú nyiɖée ɖɔ: Nukún ce sɔ́ ná mɔ Mawu Mavɔmavɔ ɖě ɖo ayǐkúngban jí fí ǎ. Un ka sɔ́ ná mɔ gbɛtɔ́ e ɖo ayǐhínhɔ́n mɛ fí é ɖě ǎ. Agbaza ce e nyí goxɔ nú mì ɔ́, è tún bó sɔ́ xweyǐgbe, a nǎ ɖɔ lɛ̌ngbɔ́nyitɔ́ lɛ́ɛ sín goxɔ wɛ; gbɛ ce wá vivɔnu avɔ e è ko lɔn, bó sɛ́n kan ná, bó kó ɖo mlǎmlá wɛ é ɖɔhun; Mawu, cóbónú gbadanu ná su ɔ́, a nǎ ko ɖɔ xó ce gbo. Cóbónú ayǐ ná hɔ́n ɔ́, kú ná kó wá sɔ́ mì. Mawu, a gba xú ce lɛ́ɛ kinnikínní ɖɔhun. Cóbónú gbadanu ná su ɔ́, a nǎ kó ɖɔ xó ce gbo. Un ɖo xó ɖɔ wɛ ɖo kɔ gúdo azɔnxɛ ɖo finfan wɛ ɖɔhun; un ɖo azɔn wɛn wɛ xwelé ɖo finfan wɛ ɖɔhun. Un kpɔ́n jǐxwé káká bɔ nukún ce bo. Aklúnɔ, adǎn élɔ́ e ɖo gbigbo mì wɛ ɔ́, blǒ gbɔn ɖě nú mì. Lo ɔ́, xó tɛ́ un ná ɖɔ n'i, bɔ é ná ɖɔ xó nú mì? É wɛ bló nǔ énɛ́ lɛ́ɛ bǐ. Un ɖo akpɔ mɔ wɛ káká bɔ adɔ̌ vɛ́ mì. Aklúnɔ, nǔ e ɖo wiwa mì wɛ ɔ́, a tunwun. A fɔ́n mì sí te, bó lɛ́ ná hlɔ̌nhlɔ́n mì, bó hɛn mì ɖó gbɛ. Din ɔ́, akpɔ e mɔ wɛ un ɖe ɔ́ húzú nǔkiko, ɖó a yǐ wǎn nú mì tawun, bó hwlɛ́n mì ɖo kú sí. A ɖe hwɛ e un hu lɛ́ɛ bǐ ɖó zɔ nú mì. Kútomɛ ɔ́, mɛ ɖé ma ka nɔ́ mlá we nɛ́! Mɛkúkú lɛ́ɛ wɛ ná xo kpɛ́ nú we ǎ. Mɛ e yi yɔdo mɛ lɛ́ɛ sɔ́ sixú ɖó nukún gbejíninɔ towe ɖě ǎ. Mɛ e ɖo gbɛ lɛ́ɛ kɛ́ɖɛ́ jɛ́n hɛn ɔ́, yě ná xo mlá we, lě e un ɖ'é wú gbɔn égbé din é. Mɛjitɔ́ lɛ́ɛ ɖɔ lě e a ɖo gbejí gbɔn é nú vǐ yětɔn lɛ́ɛ. Mawu Mavɔmavɔ, a hwlɛ̌n mì. Mawu Mavɔmavɔ, mǐ nǎ nɔ kpa susu nú we dó han mɛ, ɖo gbɛzán mǐtɔn bǐ mɛ, ɖo xwé towe gbe. Énɛ́ ɔ́, Ezayíi ɖɔ: “Mi li fígi bó mlí, bó ɖó akpa ɔ́ mɛ n'i bónú azɔn tɔn ná gbɔ!” Ée è blǒ mɔ̌ ɔ́, Ezekiyási kanbyɔ́ Ezayíi ɖɔ: “Étɛ́ ká ná ɖe xlɛ́ mì ɖɔ un ná lɛ́ yi Mawu Mavɔmavɔ xwé gbe?” Hwe énɛ́ ɔ́ nu ɖokpó ɔ́, Mɛlodaki-Baladáni, Baladáni ví Babilɔ́nu xɔ́sú ɔ́ sɛ́ wěma dó Ezekiyási, bó lɛ́ ná ɛ nǔ d'é ji, ɖó é se ɖɔ é jɛ azɔn bɔ azɔn ɔ́ gbɔ n'i. Ée mɛ lɛ́ɛ wá ɔ́, é víví nú Ezekiyási káká bɔ é kplá yě yi fí e nǔ xɔ akwɛ́ tɔn lɛ́ɛ ɖe é: kpatágan, siká, nǔhwɛ́nkún lɛ́ɛ, ami ɖagbe ɖagbe lɛ́ɛ, ahwanfunnú tɔn lɛ́ɛ, bó xlɛ́ dɔkun tɔn lɛ́ɛ bǐ yě. É kpo nǔɖé ɖo xwé tɔn gbe abǐ axɔ́súɖuto tɔn mɛ bɔ é má xlɛ́ yě ǎ. Énɛ́ ɔ́ gúdo ɔ́, gbeyíɖɔ Mawu tɔn Ezayíi wá axɔ́sú Ezekiyási gɔ́n, bó kan byɔ́ ɛ ɖɔ: étɛ́ mɛ énɛ́ lɛ́ɛ ka wá ɖɔ nú we? Fí e yě ká gosín bó wá gɔ̌n towe lɔ? Bɔ Ezekiyási yí gbe n'i ɖɔ: Fí e yě gosín é lín; Babilɔ́nu wɛ yě gosín, bó wá gɔ̌n ce. Ezayíi lɛ́ kanbyɔ́ ɛ ɖɔ: “Étɛ́ yě ká mɔ ɖo xwé towe gbe?” Ezekiyási ka yí gbe n'i ɖɔ: “Yě mɔ nǔ e ɖo xwé ce gbe lɛ́ɛ bǐ. Dɔkun ce ɖě kpo bɔ un ma xlɛ́ yě ǎ.” Énɛ́ ɔ́, Ezayíi ɖɔ nú Ezekiyási ɖɔ: “Đǒtó xó e Mawu Mavɔmavɔ Nǔbǐwúkpétɔ́ ɔ́ ɖɔ é. É ɖɔ: ‘Gbe ɖokpó ná wá su, bɔ è nǎ bɛ̌ nǔ e ɖo xwé towe gbe lɛ́ɛ bǐ yi Babilɔ́nu, bó ná bɛ́ nǔ e tɔ́gbó towe lɛ́ɛ ko wa ɖ'ayǐ káká wá jɛ égbé lɛ́ɛ bǐ yi Babilɔ́nu. É ná kpo ɖokpó ǎ. Mawu Mavɔmavɔ wɛ ɖɔ mɔ̌. È nǎ kplá vǐ towe lɛ́ɛ ɖě; vǐ e a ji lɛ́ɛ ɖě, bɔ yě ná nyí agooɖojǐe ɖo Babilɔ́nu xɔ́sú ɔ́ sín hɔnmɛ.’ ” Ezekiyási ka ɖɔ nú Ezayíi ɖɔ: “Xó e Mawu Mavɔmavɔ ɖɔ bɔ a ɖɔ ɔ́ nyɔ́.” Đó é tunwun dó xo tɔn mɛ ɖɔ: “Nú un ɖo gbɛ jɛ́n wɛ ɔ́, mǐ na mɔ fífá kpó ayi j'ayǐ kpó.” Mawu mitɔn ɖɔ: “Mi dó wǔsyɛ́n lanmɛ nú togun ce. Mi dó wǔsyɛ́n lanmɛ n'i. Mi ná akɔ́nkpinkpan Jeluzalɛ́mu. Mi sú xó bó ɖɔ n'i ɖɔ é kún sɔ́ ná yi mɛɖe ɖě ó; mi ɖɔ n'i ɖɔ é kó sú hwɛ xɔ́ fó, ɖó hwɛ e é hu lɛ́ɛ ɔ́, Mawu Mavɔmavɔ dɔn bǐ sín tó n'i.” Un se mɛ ɖé ɖo xó sú wɛ ɖɔ: “Mi ɖe ali ɖokpó nú Mawu Mavɔmavɔ ɖo gbětótló mɛ. Mi bló ali ɖokpó ɖó nú Mawu mǐtɔn ɖo axéko nɛ́ jí. Mi sú tɔdo lɛ́ɛ bǐ; mi gba só lɛ́ɛ bǐ; mi gbígbá kpó lɛ́ɛ bǐ. Mi jlɔ́ fí e nyí kpóɖědoɖě lɛ́ɛ bónú yě húzú ayǐkúngban wɛnjɛ. Mi zé só ɖaxó ɖaxó lɛ́ɛ dó húzú tɔdo. Énɛ́ ɔ́, susu Mawu Mavɔmavɔ tɔn ná jɛ wěxo, bɔ mɛ bǐ ná mɔ. Nu e Mawu Mavɔmavɔ kɛ ɔ́ nɛ́.” Un se gbe ɖé bɔ é ɖɔ nú mì ɖɔ: “Sú xó bó ɖɔ.” Un ka kanbyɔ́ ɖɔ: “Étɛ́ un ka ná sú xó bó ɖɔ?” Bɔ gbe ɔ́ lɛ́ ɖɔ nú mì ɖɔ: “Xó e a nǎ ɖɔ ɔ́ ɖíe, a nǎ ɖɔ: Gbɛtɔ́ lɛ́ɛ bǐ cí gběhan ɖɔhun, bɔ susu yětɔn bǐ cí folówa ɖɔhun; Mawu Mavɔmavɔ sín funfún wá yi lě ɔ́, gběhan nɔ́ fyɔ́, folówa nɔ mlú ɖa. Ji e gběhan nɔ́ dɔ́ é wɛ gbɛtɔ́ nɔ́ dɔ́. Nǔgbó ɔ́, gběhan nɔ́ xú, folówa nɔ́ mlú ɖa, amɔ̌, xó e Mawu mǐtɔn ɖɔ ɔ́ ná nɔ ayǐ káká sɔ́yi.” Jeluzalɛ́mu togun, xá só ɖaxó ɖokpó jí. Sinyɔ́ɔ togun, sú xó kpó hlɔ̌nhlɔ́n towe bǐ kpó. È dǒ wɛn ɖagbe ɖé we. Sú xó bó dó wɛn ɔ́; ma ɖi xɛsi ó. Đɔ nú Judáa toxo lɛ́ɛ ɖɔ: “Mi kpɔ́n Mawu mitɔn. Mi kpɔ́n Aklúnɔ Mavɔmavɔ; é jǎwe kpó hlɔ̌nhlɔ́n kpó, é ɖó hlɔ̌nhlɔ́n e ɖu axɔ́sú é; é bɛ́ nǔ e é mɔ lɛ́ɛ jǎwe; azɔ̌ e é wa ɔ́, é bɛ́ nǔ e é mɔ ɖ'é mɛ lɛ́ɛ ja. É cí lɛ̌ngbɔ́nyitɔ́ e kplá gbɔ̌ tɔn lɛ́ɛ é ɖɔhun. É bló alɔ nú yě bó kplé yě; é bɛ́ lɛ̌ngbɔ́ví lɛ́ɛ dó awa mɛ, bó ɖo nukún kpé dó lɛ̌ngbɔ́ vǐnɔ lɛ́ɛ wú wɛ.” Mɛ̌ ká sixú sɔ́ alɔgogo tɔn dó jlɛ́ sin e ɖo xu mɛ é? Mɛ̌ ká sixú zé alɔbá tɔn dó jlɛ́ jǐxwé? Mɛ̌ ká sixú bɛ́ kɔ́ e ɖo ayǐkúngban jí ɔ́ dó nǔ mɛ bó jlɛ́? Mɛ̌ ká sixú bɛ́ só ɖaxó ɖaxó lɛ́ɛ ɖó gan jí bó da? Mɛ̌ ká sixú bɛ́ só kpɛví kpɛví lɛ́ɛ ɖó gan jí bó da? Mɛ̌ ká sixú mɔ nǔ jɛ linlin Mawu Mavɔmavɔ tɔn wú? Mɛ̌ ká sixú kplɔ́n nǔ Mawu? Mɛ̌ Mawu Mavɔmavɔ ka nɔ kan nǔ byɔ́, bó ná dó mɔ nukúnnú jɛ nǔ mɛ, bó tunwun lě e é ná wa nǔ ɖó sɛ́nxwi jí gbɔn é? Mɛ̌ é ká nɔ́ kan nǔ byɔ́, bɔ mɛ ɔ́ nɔ́ ná ɛ nǔnywɛ́, bó nɔ́ ɖɔ lě e è ɖǒ ná mɔ nukúnnú jɛ nǔ mɛ gbɔn ɔ́ n'i? Akɔta lɛ́ɛ sɔ sin e kun téwún j'ayǐ é ɖo Mawu nukɔn ǎ; yě da gan sɔ kɔ́kwín ɖokpó ɖo nukɔn tɔn ǎ. Akɔta e gbɔn zɔ zɔ lɛ́ɛ fúɖá hú afúntúntún ɖo nukɔn tɔn. Kanlin e ɖo Libáan zungbó mɛ lɛ́ɛ ɔ́, è na bo kplé yě bǐ ɔ́, é kpé bɔ è nǎ dó sá vɔ̌ e jɛ xá Mavɔmavɔ é n'i ǎ. Atín e ɖo Libáan zungbó mɛ lɛ́ɛ ɔ́, yě kpé bɔ è nǎ dó bɔ myɔ e è nǎ dó dó vɔ̌ ɔ́ zo ná é ǎ. Akɔta lɛ́ɛ bǐ kplékplé ɖó zin ɖé ɖo Mawu nukɔn ǎ. Nǔ yǎyá, nǔ tófwe wɛ yě nyí ɖo nukɔn tɔn. Mɛ̌ wǔ mi ka jló ná jlɛ́ Mawu dó? Étɛ́ ɖɔhun é ká cí? Bǒcyɔ wú wɛ mi ná jlɛ́ ɛ dó a? Bǒcyɔ ɔ́, alɔlyɛ́nzɔ́watɔ́ wɛ sínsín gan bó kɔn, bɔ alɔlyɛ́nzɔ́watɔ́ ɖěvo kɔn siká dó, bó tun kpatágan wlɔ dó ba acɔ́ ná. Mɛ e nyí wamamɔnɔ, bó ma sixú zán kwɛ́ sɔ mɔ̌ ǎ ɔ́, é nɔ́ ba atín e ma nɔ jɛ wɔvli ǎ é. Énɛ́ ɔ́ gúdo ɔ́, é nɔ́ ba alɔlyɛ́nzɔ́watɔ́ ɖagbe ɖokpó; alɔlyɛ́nzɔ́watɔ́ e ná sixú bló bǒcyɔ e má ná xo to ǎ é. Mi tunwun ǎ cé? Mi se ǎ cé? È ɖɔ nú mi sín do ǎ cé? Mi mɔ nukúnnú jɛ lě e è bló ayǐkúngban ɔ́ gbɔn é wú ǎ cé? Mawu ɔ́, axɔ́súzinkpo tɔn ɖo jǐ aga ɖéé; é yi jǐ káká bɔ é kpɔ́n gbɛtɔ́ lɛ́ɛ sɛ́ dó ɔ́, yě nɔ́ cí ayǐsínzɛn ɖɔhun. É vlɔ́n jǐxwé avɔ ɖaxó ɖé ɖɔhun. É vlɔ́n jǐxwé goxɔ ɖɔhun bɔ é nyí nɔtɛn tɔn. Gǎn e ɖo gbɛmɛ fí lɛ́ɛ ɔ́, é sɔ́ yě dó húzú nǔ yǎyá. Mɛ e lɔmɛ acɛkpikpa ɖe ɖo gbɛmɛ fí lɛ́ɛ ɔ́, é zin yě dɛ́ bɔ yě sɔ́ nyí nǔɖé ǎ. Yě cí atínvú ɖɔhun: yě nɔ́ kó wú zinzin ǎ, ɖɔ ná dó do wɛ yě nɔ́ ɖe kɛ́ɖɛ́, bɔ jɔhɔn Mawu tɔn nɔ za yě; jɔhɔn ɔ́ nɔ xú yě bɔ a nǎ mɔ nǔɖé ɔ́, yě nɔ́ kó ɖo jɔhɔn mɛ nǔywɛ́ ɖɔhun. Mawu mímɛ́ ɔ́ kanbyɔ́ ɖɔ: “Mɛ̌ wú mi ka ná jlɛ́ mì dó? Mɛ̌ sín gbɛ̌ un ka nyí?” Mi kpɔ́n jǐxwé aga dɔ̌n sɛ́ dó: Mɛ̌ ká bló sunví lɛ́ɛ? Mɛ̌ ká nɔ́ ná gbe yě bɔ yě nɔ́ ɖo yiyi wɛ, sɔ́ja e ɖo ahwangbénu lɛ́ɛ ɖɔhun? Mɛ e tunwun nyǐkɔ yě ɖokpó ɖokpó tɔn bó nɔ́ ylɔ́ yě ɔ́ wɛ. Hlɔ̌nhlɔ́n tɔn kpó acɛkpikpa tɔn kpó sɔ mɔ̌, bɔ é ylɔ́ yě ɔ́, yě ɖě nɔ́ gɔn gbe yí ǎ. Izlayɛ́li, togun Jakɔ́bu tɔn! A nɔ ɖɔ: “Mawu Mavɔmavɔ tunwun nǔ e ɖo gbigbo mì we é ǎ. Hwɛ ce na bo jɔ bónú è ɖo títáfú mì wɛ ɔ́, é nɔ́ ɖɔ nǔɖé n'i ǎ.” Étɛ́wú a nɔ ɖɔ mɔ̌? A tunwun ǎ cé? È ɖɔ nú we kpɔ́n ǎ cé? Mawu Mavɔmavɔ ɔ́, Mawu wɛ é nyí káká yi mavɔ. É wɛ ɖó ayǐkúngban ɔ́, sín fí e é bɛ́ sín ɔ́, káká yi fí e é fó dó ɔ́; kanmɛ nɔ gbɔ́jɔ́ ɛ gbeɖé ǎ, nǔ ka nɔ cikɔ n'i gbeɖé ǎ. Nǔnywɛ́ Mawu tɔn ɖó dogbó ǎ. É nɔ́ ná hlɔ̌nhlɔ́n ɖěvo mɛ e nǔ cikɔ ná é, bó nɔ́ dó wǔsyɛ́n lanmɛ nú mɛ e agbɔ̌n kpé é. Dɔ̌nkpɛvú lɛ́ɛ ɖésú ɔ́, nǔ nɔ́ wá cikɔ nú yě. Mɛ e nyí asúká lɛ́ɛ lɔ nɔ wá j'ayǐ. Amɔ̌, mɛ e nɔ gán jɛ Mawu Mavɔmavɔ wú lɛ́ɛ ɔ́, hlɔ̌nhlɔ́n ɖěvo nɔ wá nú yě; yě nɔ́ zɔn hɔ̌nsúhɔ́nsú ɖɔhun; yě nɔ́ ɖo wezun kán wɛ, nǔ ká nɔ́ cikɔ nǔ yě ǎ; Yě nɔ́ ɖo yiyi wɛ, hlɔ̌nhlɔ́n yětɔn ka nɔ́ vɔ ǎ. Mawu ɖɔ: “Mi togun e gbɔn zɔ zɔ lɛ́ɛ mi! Mi nɔ abwɛ̌ xwíí bó ɖótó mì. Togun lɛ́ɛ mi! Mi sɔ́ nǔ bó wá hwɛxɔsá; mi wá ɔ́, mi ná yí xó. Mi nú mǐ nǎ zɔn kpɔ́ yi hwɛxɔsá. Nya ɖé ɖo zǎnzǎnhwe jí bó jɛ ali; é gbɔn fí ɖěbǔ ɔ́, é nɔ́ ɖu ɖ'é jí. Mɛ̌ ká sɛ́ ɛ dó? Mɛ̌ wɛ nɔ jó togun lɛ́ɛ n'i? Mɛ̌ wɛ nɔ zé axɔ́sú lɛ́ɛ ɖó acɛ tɔn mɛ? Hwǐ tɔn nɔ́ vúnvún yě, bɔ gǎ tɔn nɔ́ gba yě dó, jɔhɔn dó alɔ nǔywɛ́ mɛ ɖɔhun. É nɔ́ zun dó yě jí; é nɔ́ gba yě bléwún bó nɔ́ dín wǔyɛ́yɛ́ afɔyɛ́yɛ́; é yá afɔ káká bɔ a nǎ ɖɔ afɔ tɔn kún nɔ́ jɛ kɔ́ mɛ ó. Mɛ̌ wɛ zɔ́n nǔ énɛ́ lɛ́ɛ? Nyɛ Mawu Mavɔmavɔ wɛ; nyɛ wɛ nɔ zɔ́n nǔ e nɔ jɛ ɖo gbɛ ɔ́ mɛ lɛ́ɛ sín do. Có nú nǔ nukɔntɔn e jɛ ɔ́ ná bɛ́ ɔ́, un ɖo tɛn tɔn mɛ; nǔ gǔdo gúdo tɔn e ka ná wá jɛ ɔ́, un ná lɛ́ ɖo tɛn tɔn mɛ. Togun e gbɔn zɔ zɔ lɛ́ɛ mɔ nǔ e jɛ ɔ́, bɔ xɛsi jɛ yě jí. Mɛ e ɖo wɛ̌kɛ́zo ɛnɛ lɛ́ɛ mɛ lɛ́ɛ ɖo sísɔ́sísɔ́ wɛ; yě ɖo sisɛkpɔ́ wɛ, yě ja. Mɛ lɛ́ɛ nɔ́ dó alɔ yěɖée ɖo azɔ̌ kɔn. Mɛ ɖě nɔ́ ɖɔ nú mɛ ɖě ɔ́ ɖɔ: ‘É yá!’ Alɔlyɛ́nzɔ́watɔ́ nɔ́ ná akɔ́nkpinkpan nǔtuntɔ́; mɛ e nɔ tɛ́ gan ɔ́ nɔ́ ná akɔ́nkpinkpan mɛ e ɖo wan ɔ́ jí é. Yě nɔ́ ɖɔ: ‘Lě e è cá gan ɔ́ gbɔn é nyɔ́.’ Énɛ́ ɔ́ gúdo ɔ́, yě nɔ́ sɔ́ hǔnjɛ́n dó hɛn bǒcyɔ ɔ́ ɖó te.” “Mɛsɛntɔ́ ce Izlayɛ́li, ɖǒtó mì; hwi togun Jakɔ́bu tɔn e un sɔ́ é, hwi xɔ́ntɔn ce Ablaxámu kún ɔ́. Hwi mɛ e un ylɔ́ sín káká fí e gbɛ ɔ́ kponu ɖó ɔ́, hwi mɛ e un ylɔ́ sín to ɖé má yá to ɖé mɛ ɔ́, hwi wɛ un ɖɔ ná ɖɔ: ‘Éeǒ, un jó we dó ǎ; é nyɔ́ wa ɔ́, hwi wɛ un sɔ́; hwi wɛ nyí mɛsɛntɔ́ ce.’ Din ɔ́, ma ɖi xɛsi ó, ɖó un ɖo kpɔ́ xá we. Ma ɖo nukún dó gbɛmɛ kpɔ́n wɛ ó, ɖó nyi wɛ nyí Mawu towe. Un ná ná akɔ́nkpinkpan we; un ná gɔ́ alɔ nú we; un ɖo xɛ nya ɖo jǐ we wɛ kpódó aɖisí lɔ ce, ɖuɖéjí lɔ ɔ́ kpó. Ɛɛn! Mɛ e ɖo gbě towe nya wɛ lɛ́ɛ bǐ ná ɖu hɛ̌n; yě ná ɖu winnyá. Kɛntɔ́ towe lɛ́ɛ sɔ́ ná nyí nǔɖé ǎ, kún yětɔn ná sú dó. Mɛ e ɖo za li xá we wɛ lɛ́ɛ ɔ́, a nǎ ba yě káká, a ka sɔ́ ná mɔ yě ǎ; Mɛ e nɔ tɔ́n ahwan we lɛ́ɛ sín kún ná sú dó. Đó nyɛ Mawu Mavɔmavɔ ɔ́, nyi wɛ nyí Mawu towe. Un hɛn alɔ towe bó ɖo ɖiɖɔ nú we wɛ ɖɔ: ‘Ma ɖi xɛsi ó, un ná gɔ́ alɔ nú we.’ ” Mawu Mavɔmavɔ ɖɔ: “Izlayɛ́li, togun Jakɔ́bu tɔn, hwi mɛ e ma ɖó gǎn ɖé ǎ dohɔ́nví ɖɔhun é, ma ɖi xɛsi ó. Nyɛ Mawu Mavɔmavɔ ɔ́ ɖésú wɛ ja alɔ gɔ́ nú we gbé. Nyɛ Mɛ Mímɛ́ Izlayɛ́li tɔn wɛ ná hwlɛ́n we gán. Un ná sɔ́ we dó húzú blěesónú e kanlin nɔ dɔn é yɔ̌yɔ́ ɖokpó; aɖǔ tɔn lɛ́ɛ ná syɛ́n ɖésú. A nǎ gba só ɖaxó ɖaxó lɛ́ɛ hánnyá, a nǎ zé yě dó húzú afúntúntún; a nǎ zé só kpɛví kpɛví lɛ́ɛ dó húzú nǔywɛ́. A nǎ nyi yě dó jɔ mɛ, bɔ jɔhɔn ná dó alɔ mɛ; axásáxásá jɔhɔn ɖé ná fúnfún yě; lo ɔ́, hwɛ ɔ́, a nǎ sú xó bó j'awǎ ɖó Mawu Mavɔmavɔ wú. A nǎ nɔ́ gó ɖó Mɛ Mímɛ́ Izlayɛ́li tɔn ɔ́ wú.” Wamamɔnɔ lɛ́ɛ kpó lelenɔ lɛ́ɛ kpó ɖo sin ba wɛ; yě ká mɔ ǎ. Kɔ xú yě káká bɔ atán vɔ sín nu yětɔn mɛ; amɔ̌, nyɛ Mawu Mavɔmavɔ ɔ́, un ná yí gbe nú nǔ e byɔ́ mì wɛ yě ɖe é; nyɛ Mawu Izlayɛ́li tɔn ɔ́, un ná jó yě dó ǎ. Un ná ná sin bɔ é ná sa sín só lɛ́ɛ jí; só e ta nǔ ɖěbǔ má ɖe ǎ lɛ́ɛ jí; tɔjɔtɛn ná gbɔn dodo lɛ́ɛ mɛ; un ná sɔ́ fí e nyí akúgbéjí é dó húzú tɔ, bó ná sɔ́ fí e nyí ayǐ xúxú jí é dó húzú tán. Un ná tun sɛ́dlutín kpó kasyatín kpó gbɔn akúgbéjí, bó ná tun míititín kpó olívutín kpó. Un ná tun siplɛ́tín kpó bwisitín kpó, kpó pɛ́ɛntín kpó gbɔn gbě e jí sin ma ɖe ǎ é. Énɛ́ ɔ́, mɛ bǐ ná mɔ, mɛ bǐ ná tunwun, mɛ bǐ ná mɔ bó mɔ nukúnnú jɛ wú ɖɔ Mawu Mavɔmavɔ, Mɛ Mímɛ́ Izlayɛ́li tɔn ɔ́ sín nǔwiwa wɛ. Mawu Mavɔmavɔ, togun Jakɔ́bu tɔn xɔ́sú ɔ́ ɖɔ: “Mi vodún akɔta lɛ́ɛ tɔn lɛ́ɛ mi, mi wá ɖɔ lě e hwɛ mitɔn jɔ gbɔn é; mi wá ɖe nǔ e wú mi kpé ɔ́ xlɛ́. Mi wá ɖɔ nǔ e ná jɛ ɔ́ nú mǐ. Nǔ tɛ́ ka ko jɛ wá yi? Mi ɖɔ bónú mǐ nǎ lin ta mɛ d'é wú kpɔ́n; é gló hǔn, mi ɖɔ nǔ e ná wá jɛ sɔ ɔ́ nú mǐ; énɛ́ ɔ́, mǐ nǎ tunwun nǔ e ɖo nǎ jɛ wɛ é. Ɛɛn, mi ɖɔ nǔ e ɖo nǎ wǎ jɛ wɛ é nú mǐ; énɛ́ ɔ́, mǐ ná tunwun ɖɔ mi lɔ ɔ́ Mawu wɛ mi nyí. Mi vɛ́ kó sixú bló nǔɖé bónú mǐ nǎ mɔ, é sixú nyí nǔ ɖagbe, é sixú nyí nǔ nyanya; énɛ́ ɔ́, mǐ ná ɖó sísí nú mi. Amɔ̌, midɛɛ lɛ́ɛ ɔ́, mi xɔ akwɛ́ sɔ nǔ e nyí nǔ yǎyá é ǎ, bɔ nǔ e mi nɔ wa lɛ́ɛ nyí nǔ yǎyá. Mɛ e sɔ́ mi dó ɖó nǔmɛsɛn ɔ́, nǔ gbɛ́hɛn mi ɖɔhun wɛ é nyí. Un sɔ́ mɛ ɖokpó ɖó ali jí sín totaligbé bɔ é jǎwe. Nyǐkɔ ce ɖo nu tɔn. É nɔ́ gbídí gǎn lɛ́ɛ ɖó afɔ wú, mɛ ɖo kɔ́ nya wɛ ɖɔhun; é nɔ́ gbídí yě zɛ̌nmɛtɔ́ ɖo ko nya wɛ ɖɔhun. Mɛ̌ ká ɖɔ nǔ énɛ́ ɖ'ayǐ bónú mǐ nǎ tunwun? Mɛ̌ ká ko ɖɔ nǔ mɔ̌hun ná wá jɛ bónú mǐ nǎ ɖɔ: ‘Nǔgbó wɛ é ɖɔ’ Mɛ ɖé ɖo mi mɛ bó kpé nǔ mɔ̌hun wú ǎ. Mi ɖɔ xó ɖé bɔ mɛɖé se ǎ. Nyi wɛ nyí mɛ nukɔntɔn e ɖɔ nú Sinyɔ́ɔ ɖɔ: ‘Kpɔ́n! Yě ɖíe’ é. Un sɛ́ mɛ ɖokpó dó Jeluzalɛ́mu bɔ é hɛn wɛnɖagbe ɖé bó ná yi dó. Un kpɔ́n vodún lɛ́ɛ mɛ káká ɔ́, un mɔ ɖě ɖo yě mɛ bónú é ná ɖɔ nǔ e é lin ɔ́ nú mì ǎ; un mɔ ɖě ɖo yě mɛ bónú un kan nǔ byɔ́ ɛ ɔ́, é ná mɔ sin tɔn bó ná mì ǎ. Nǔgbó ɔ́, yě ɖěbǔ nyí nǔɖé ǎ, nǔ e yě nɔ́ wa lɛ́ɛ bǐ wɛ nyí nǔ yǎyá; vodún énɛ́ lɛ́ɛ ɔ́, jɔhɔn kpowun wɛ, bó nyí nǔ tófwe.” Mawu ɖɔ: “Mɛsɛntɔ́ ce ɖíe; un hɛn alɔ tɔn, nyi wɛ sɔ́ ɛ, bɔ xomɛ nɔ hun mì dó wǔ tɔn; un sɔ́ yɛ ce ɖó jǐ tɔn, bɔ é ná sɔ́ hwɛjijɔ jínjɔ́n ayǐ gbɔn akɔta lɛ́ɛ mɛ. É ná sú xó ǎ, é ná zé gbe yi jǐ ǎ; è ná se gbe tɔn ɖo toligbó lɛ́ɛ xo ǎ. É ná nyínyɛ́ fántín e kó tɔ é ǎ, é ná cí myɔ e ko ɖo cící wɛ é ǎ; lo ɔ́, é ná sɔ́ hwɛjijɔ jínjɔ́n ayǐ nǔgbó. Nǔ ná cikɔ n'i ǎ, kan mɛ ná gbɔ́jɔ́ ɛ káká cóbónú é ná sɔ́ hwɛjijɔ jínjɔ́n ayǐ gbɔn gbɛ ɔ́ mɛ ǎ. Togun e gbɔn zɔ zɔ lɛ́ɛ ná ɖo te kpɔ́n nǔkplɔ́nmɛ tɔn.” Mawu Mavɔmavɔ ɖɔ xó nú mɛsɛntɔ́ tɔn; é mɛ e bló jǐxwé, bó vlɔ́n é, é mɛ e ɖó ayǐkúngban kpó nǔ e ɖ'é jí lɛ́ɛ bǐ kpó ɔ́, é mɛ e ná gbɛ gbɛtɔ́ lɛ́ɛ ɖo ayǐkúngban jí, bó ná funfún yě ɔ́, xó e é ɖɔ nú mɛsɛntɔ́ tɔn ɔ́ ɖíe: “Nyɛ Mawu Mavɔmavɔ ɔ́, un ylɔ́ we ɖó un ɖo gbejí nú xó e un ɖɔ é; un ná gǎnjɛwú we; un bló we bó ná sɔ́ we dó jɛ akɔ xá gbɛtɔ́ lɛ́ɛ; a nǎ nyí wěziza nú akɔta lɛ́ɛ. A nǎ hun nukún nú nukúntíntɔ́nnɔ lɛ́ɛ, bó ná ɖe gantɔ́ lɛ́ɛ sín xɔ e mɛ è sú yě dó ɔ́ mɛ, mɛ e ɖo gankpá mɛ ɖo ablu mɛ lɛ́ɛ ɔ́, a nǎ ɖe yě tɔ́n.” Nyi wɛ nyí Mawu Mavɔmavɔ; mɔ̌ wɛ nyǐkɔ ce nyí; susu e nyí ce ɔ́, un nɔ jó dó nú mɛ ɖé ǎ. Un ka nɔ jó yɛ̌yi e nyí ce ɔ́ dó nú bǒcyɔ ɖé ǎ. Nǔ nukɔntɔn lɛ́ɛ kó jɛ; yɔ̌yɔ́ e ná jɛ ɔ́ ɖɔ wɛ un ɖe din; un ɖo ɖiɖɔ nú mi wɛ cóbɔ é ná wá jɛ. Mi ji han yɔ̌yɔ́ ɖokpó dó sɔ́ Mawu Mavɔmavɔ su. Mi mɛ e nɔ gbɔn xu jí xu jí lɛ́ɛ mi, nǔɖogbɛ e nɔ́ nɔ xu mɛ lɛ́ɛ mi, togun e gbɔn zɔ zɔ lɛ́ɛ mi, mi kpa susu n'i sín fí e gbɛ ɔ́ kponu ɖó é. È nǐ ji han gbɔn toxo e ɖo akúgbéjí lɛ́ɛ mɛ. Mɛ e ɖo gletoxo Kedáa tɔn lɛ́ɛ mɛ lɛ́ɛ ní ji han. Mɛ e ɖo Sɛla toxo mɛ lɛ́ɛ ní j'awǎ; yě nǐ ɖe awǎjijɛ yětɔn xlɛ́ sín só ta aga. Togun e gbɔn zɔ zɔ lɛ́ɛ ní kpa susu nú Mawu Mavɔmavɔ, bó sú xó dó sɔ́ ɛ su. Mawu Mavɔmavɔ ɖo zɔnlin jí jǎwe ahwanfuntɔ́ syɛ́nsyɛ́n ɖé ɖɔhun; ahwanfunfun ɖo akpakpa sɔ́ ɛ wɛ ahwan-yitɔ́ ɖɔhun. É sú xó e è nɔ sú, bɔ è nɔ tunwun ɖɔ ahwan bɛ́ é; é ɖe lě e é hú gǎn kɛntɔ́ tɔn lɛ́ɛ gbɔn é xlɛ́ yě. Mawu ɖɔ: “Sín tɛgbɛ ɔ́, un tin, un kɛ nu ǎ. Amɔ̌, din ɔ́, un ɖo azɔn wɛn wɛ nyɔ̌nu e ɖo ajidonu é ɖɔhun; agbɔ̌n kpé mì, un nɔ gbɔjɛ́ ganjí ǎ. Un ná gba só ɖaxó kpó só kpɛví kpó, bɔ gběhan kpó atín kpó e ɖo yě jí lɛ́ɛ bǐ ná xú. Un ná sɔ́ tɔ lɛ́ɛ dó húzú ayǐkúngban xúxú, bɔ tán lɛ́ɛ ná xú. Un ná kplá nukúntíntɔ́nnɔ lɛ́ɛ gbɔn ali ɖé jí, ali e yě ma gbɔn gbeɖé ǎ é jí. Yědɛɛ lɛ́ɛ ɔ́, un ná sɔ́ zǐnflú dó húzú wěziza nú yě, bó ná gbígbá nǔ e wú yě ná klɛ́n afɔ dó é. Nǔ e un lɛ́n bó ná wa lɛ́ɛ nɛ́. Un ná jó dó gbeɖé ǎ; un ná bló géé. Mi mɛ e nɔ gán jɛ vodún wú, bó nɔ́ ɖɔ nú bǒcyɔ mitɔn lɛ́ɛ ɖɔ yě wɛ nyí nǔmɛsɛn émítɔn lɛ́ɛ ɔ́, mi ná j'agɔ dó gǔdo, mi ná ɖu winnyá.” Tókúnɔ e mi, mi ɖótó ganjí; Nukúntíntɔ́nnɔ e mi, mi ɖó nukún te ganjí. Mɛ̌ wɛ tɔ́n nukún? Mɛsɛntɔ́ ce jɛ́n ná nyí. Mɛ̌ wɛ kú tó? Mɛ e un sɛ́ dó ɔ́ jɛ́n ná nyí. Mɛ̌ ká tɔ́n nukún gbeyíɖɔ Mawu tɔn ɖɔhun? Mɛ̌ ká tɔ́n nukún mɛsɛntɔ́ Mawu Mavɔmavɔ tɔn ɖɔhun? É mɔ nǔ gěgé; é ká sɔ́ flín ɖě ǎ. Tó tɔn nɔ́ se nǔ ganjí; é ká se xó ɖě ǎ. Énɛ́ ɔ́, Mawu Mavɔmavɔ jló ná ɖe lě e sɛ́n tɔn nyí nǔ ɖaxó sɔ, bó nyɔ́ sɔ ɔ́ xlɛ́, ɖó é ɖo gbejí nú xó e é ɖɔ é. Togun ɔ́ ɖíe è vɔ bǐ e; è bɛ̌ nǔ tɔn bǐ. Mɛ tɔn lɛ́ɛ bǐ ɖíe húzú gantɔ́ e; yě bǐ ɖíe è sú dó xɔ mɛ e! È nɔ mɔ yě dó mɔ nǔ e è bɛ̌ wá sín ahwangbénu é, mɛ e ahwan wlí é. Mɛ ɖé ká kɛ nu d'é wú ǎ, mɛ ɖé zin alɔ dó akɔ́n bó ɖɔ: “Mi bɛ́ yě nú mì” ǎ. Mɛ̌ ká ɖo mi mɛ bó ná wlí tó xó énɛ́ wú? Mɛ̌ ká ná ɖótó xó énɛ́? Bɛ́ sín din ɔ́, mɛ̌ ká ná nɔ se? Mɛ̌ ká jó Izlayɛ́li, togun Jakɔ́bu tɔn ɔ́ nú mɛ e bɛ́ nǔ tɔn lɛ́ɛ bǐ é? Mɛ̌ ká jó e nú mɛ e vɔ ɛ lɛ́ɛ? É má nyí Mawu Mavɔmavɔ e mǐ hu hwɛ dó é wɛ a? Izlayɛ́li jló ná xwedó ali e Mawu tɔn ɖe n'i é ǎ; é ɖótó sɛ́n tɔn ǎ. Énɛ́ ɔ́ wú wɛ Mawu kɔn xomɛsin tɔn dó togun tɔn jí, bó kɔn adǎnú e è nɔ wa ɖo ahwangbénu ɔ́ dó jǐ tɔn. Xomɛsin Mawu tɔn bɔ myɔ lɛ́ lɛ̌ dó Izlayɛ́li bǐ. Ayi tɔn ka mɔ nǔ ǎ. Myɔ bǐ wɛ é ji có bo ká lin tamɛ kpɔ́n ǎ. Din ɔ́, Izlayɛ́li togun Jakɔ́bu tɔn, Mawu Mavɔmavɔ e ɖó we ɔ́, xó e é ɖɔ ɔ́ ɖíe; Mawu Mavɔmavɔ e bló we ɔ́, xó e é ɖɔ nú we ɔ́ ɖíe: “Ma ɖi xɛsi ó, un xɔ gbɛ nú we; un ylɔ́ we, ce wɛ a nyǐ. A ɖo tɔ mɛ gbɔn wɛ ɔ́, un ná ɖo kpɔ́ xá we; a ɖo tɔ gbo wɛ ɔ́, a nǎ kú tɔ ǎ. A ɖo zɔnlin ɖi gbɔn myɔ mɛ wɛ ɔ́, a nǎ ji myɔ ǎ, myɔ ná wa nǔɖé nú we ǎ. Đó nyɛ Mawu Mavɔmavɔ wɛ nyí Mawu towe; nyɛ Mɛ Mímɛ́ Izlayɛ́li tɔn ɔ́, nyɛ wɛ nyí Mɛhwlɛ́ngántɔ́ towe. Un ná Ejípu dó xɔ gbɛ nú we, un sɔ́ Etiopíi kpó Seva kpó jó ɖó tɛn towe mɛ. Nǔgbó wɛ, a xɔ akwɛ́ nukún ce mɛ, a ɖo ayi ce mɛ, un yí wǎn nú we. Énɛ́ ɔ́ wú wɛ un fɔ gbɛtɔ́ jó ɖó tɛn towe mɛ, un fɔ togun jó dó ɖyɔ́ we. Ma ɖi xɛsi ó, un ɖo kpɔ́ xá we; un ná kplá vǐ towe lɛ́ɛ wá sín zǎnzǎnhwe jí, un ná ylɔ́ mɛ towe lɛ́ɛ kplé sín gbadahwe jí. Un ɖɔ nú Totaligbé ɖɔ: ‘Jǒ yě dó!’ Bó ɖɔ nú Tofɔligbé ɖɔ: ‘Ma hɛn yě ɖó te ó.’ Mi kplá vǐ ce súnnu lɛ́ɛ wá nú mì sín dɔ̌n, bó kplá vǐ ce nyɔ̌nu lɛ́ɛ wá nú mì sín fí e gbɛ ɔ́ kponu ɖó é. Mi kplá mɛ e wú nyǐkɔ ce ɖe lɛ́ɛ bǐ wá; mi kplá mɛ e un ɖó lɛ́ɛ bǐ wá, mi kplá mɛ e un bló lɛ́ɛ bǐ wá, Mi kplá yě wá bónú yě ná nɔ kpa susu nú mì.” È nǐ dɔn togun élɔ́ yi hwɛ nukɔn; é ɖó nukún, é ká nɔ́ mɔ nǔ ǎ, é ɖó tó, é ká nɔ́ se nǔ ǎ. Akɔta lɛ́ɛ ní sɛ yěɖée kplé, togun lɛ́ɛ ní kplé yěɖée. Éénɛ́! Vodún tɛ́ ká ɖo vodún yětɔn lɛ́ɛ mɛ, bó sixú ɖɔ nǔ e ná wá jɛ ɔ́ nú mǐ? Abǐ vodún tɛ́ ká ɖo yě mɛ, bó sixú ɖɔ nǔ e ko jɛ wá yi ɔ́ nú mǐ? Yě ní ba mɛ e ná ɖe kúnnu nú yě lɛ́ɛ, bó ná dó ɖe xlɛ́ ɖɔ hwɛ émítɔn jɔ. Kúnnuɖetɔ́ énɛ́ lɛ́ɛ ní ɖótó yě ganjí, bó yí gbe ɖɔ xó ɔ́ nǔgbó wɛ. Mawu Mavɔmavɔ ɖɔ nú togun tɔn ɖɔ: “Midɛɛ lɛ́ɛ wɛ nyí kúnnuɖetɔ́ ce, mi wɛ nyí mɛsɛntɔ́ ce e un sɔ́ é, bónú mi ná tunwun bó ɖi nǔ nú mì, bó mɔ nukúnnú jɛ mɛ ɖɔ nyɛ wɛ nyí Mawu. Mawu ɖě kó ɖe dó nukɔn nú mì ǎ; ɖo gǔdo ce ɔ́, Mawu ɖě ká ná ɖe ǎ. Nyɛ wɛ nyí Mawu Mavɔmavɔ; nyi ɖokpónɔ géé wɛ nyí mɔ̌. Nyɛ mɛ vo ɔ́, mɛhwlɛ́ngántɔ́ ɖě sɔ́ ɖe ǎ. Nyɛ wɛ hwlɛ́n mi gán, nyɛ wɛ ɖɔ un ná hwlɛ́n mi gán bɔ mi se. Nǔmɛsɛn to ɖěvo mɛ tɔn e è nɔ mɔ ɖo xwé mitɔn gbe é wɛ ǎ. Mi ɖe kúnnu nú mì ɖɔ nyi wɛ nyí Mawu, bó ná nyí Mawu káká sɔ́yi; mɛ ɖé sixú yí nǔ sín así ce ǎ, nǔ e un bló ɔ́, mɛɖé ká nɔ́ húzú ǎ.” Xó e nyɛ Mawu Mavɔmavɔ, Mɛ Mímɛ́ Izlayɛ́li tɔn Mɛhwlɛ́ngántɔ́ mitɔn ɔ́ ɖɔ ɔ́ ɖíe: “Mi wú wɛ un sɛ́ mɛ ɖokpó dó Babilɔ́nu; un ná fó hɔntogbó e è dǒ toxo ɔ́ nu lɛ́ɛ. Énɛ́ ɔ́, awǎ e jɛ wɛ Babilɔ́nunu lɛ́ɛ ɖe ɔ́ ná húzú gbɛvíhan. Nyɛ wɛ nyí Mawu Mavɔmavɔ, Mɛ Mímɛ́ mitɔn; nyi wɛ ɖó Izlayɛ́li, nyi wɛ nyí axɔ́sú mitɔn.” Đ'ayǐ xóxó ɔ́, Mawu Mavɔmavɔ ɖe ali ɖé gbɔn xu mɛ; é ɖe ali gbɔn sin ɖaxó ɖé mɛ, sin ɔ́ ɖo adǎn jí. É kplá ahwangɔnu syɛ́nsyɛ́n ɖé bó wá sú kún yětɔn dó, é sú ahwangɔnu ɔ́ kpó ahwankɛkɛ́ tɔn lɛ́ɛ kpó sɔ́ lɛ́ɛ kpó sín kún dó; yě bǐ j'ayǐ bɔ te sísí gló; yě ji kɛn myɔtágbɛ́nkan ɖɔhun. Xó e Mawu ɖɔ ɔ́ ɖíe: “Mi ma sɔ́ lin nǔ e jɛ wá yi lɛ́ɛ kpɔ́n ó; mi ma sɔ́ nǔ e jɛ ɖo xóxó hwenu lɛ́ɛ ɖó hǔn mɛ ó, ɖó un ná bló nǔ yɔ̌yɔ́ ɖěvo. Nǔ ɔ́ ko jǎwe bɔ è ko ɖo mimɔ sɛ́ dó wɛ; mi ko ɖo nǔ ɔ́ mɔ wɛ ǎ cé? Nǔgbó wɛ, un nǎ tɔ́n ali ɖokpó gbɔn gbětótló mɛ, un ná ná gbe bɔ tɔsisa ná jɔ gbɔn ayǐkúngban xúxú lɛ́ɛ jí. Gběkanlin lɛ́ɛ, cukú gbě tɔn lɛ́ɛ, kpó tátábolí lɛ́ɛ kpó ná nɔ́ kpa susu nú mì, ɖó un ná gbe bɔ tɔ ɖo sisa wɛ gbɔn gbětótló mɛ, un ná gbe bɔ tɔsisa gbɔn ayǐkúngban xúxú énɛ́ lɛ́ɛ jí. Nǔgbó wɛ, un jló ná ná sin togun e un sɔ́ é; togun énɛ́ e un bló nú nyiɖée é ná kpá susu nú mì.” Mawu ɖɔ: “Izlayɛ́li, nyɛ wɛ a nɔ ylɔ́ ǎ; Jakɔ́bu togun, kɔ wɛ un ko ci nú we. Nyɛ wɛ a nɔ hu lɛ̌ngbɔ́ví ná ǎ. Nyɛ wɛ a nɔ wlí yɛ̌yi ná ǎ. È ɖɔ nyi sɔ́ we dó ɖó kannumɔ, bó nɔ́ ɖɔ dandan hwi ní ná nǔ mì, abǐ un nɔ cí kɔ jí nú we, bó nɔ́ ɖɔ hwi ní dó zǎlínkpɔ́n zo nú mì; adingban wɛ. Nyɛ wɛ a ka nɔ xɔ nǔ wǎnɖagbenɔ axivɛ́nu lɛ́ɛ ná ǎ. É ká nyí nyi wɛ a nɔ ná kanlin e a nɔ hu lɛ́ɛ sín jǒ ǎ. É nyɔ́ wá ɔ́, nǔ e a nɔ wa nyi do lɛ́ɛ wɛ a sɔ́ dó húzú mì kannumɔ. Nǔ nyanya e dó sin wɛ a ɖe lɛ́ɛ cikɔ nú mì. Amɔ̌, nyɛ wɛ sɔ́ hwɛ towe lɛ́ɛ kɛ we, ɖó é jló mì mɔ̌; un ka sɔ́ ná lɛ́ wá jí ǎ. Nǔ e sín hwɛ dó mì wɛ a ɖe ɔ́, lɛ̌ vɔ́ wá jí. Mǐ ná ɖɔ hwɛ dó mǐɖée. Đɔ nǔ e ɖe xlɛ́ ɖɔ hwɛ towe jɔ e. Tɔ́gbó towe nukɔntɔn ɔ́ ɖíe kó hu hwɛ e, ɖɛ̌mɛnu towe lɛ́ɛ fɔ́n gǔ dó jǐ ce. Énɛ́ ɔ́, un kɔ́n gǎn gǎn e un sɔ́ lɛ́ɛ, un jó Jakɔ́bu togun ɔ́ bɔ è gba, un jó Izlayɛ́li dó bɔ é húzú slǎmɛɖɔnú nú kɛntɔ́ tɔn lɛ́ɛ.” Mawu ɖɔ: “Din ɔ́, Jakɔ́bu togun, mɛsɛntɔ́ ce, ɖǒtó; Izlayɛ́li, hwi mɛ e un sɔ́ é, ɖǒtó mì. Nyɛ Mawu Mavɔmavɔ wɛ ɖó we, nyɛ wɛ bló we dó nɔ towe xomɛ; nyɛ wɛ ja alɔ gɔ́ nú we gbé; xó e ɖɔ nú we wɛ un ɖe ɔ́ ɖíe: Jakɔ́bu togun, mɛsɛntɔ́ ce, Yeculunu, nyɛ wɛ sɔ́ we, ma ɖi xɛsi ó. Đó un ná ná sin to e mɛ akú ɖó ɖe ɔ́, un ná ɖe gbe bɔ tɔsisa ná gbɔn ayǐkúngban xúxú jí. Un ná gba yɛ ce kɔn nyi vǐ towe lɛ́ɛ jí, bó ná gba nyɔ̌ná ce kɔn nyi vǐvú towe lɛ́ɛ bǐ jí. Yě ná tɔ́n kun bó ná su fántín e ɖo tɔ mɛ é ɖɔhun, sólutín e ɖo tɔ kpá é ɖɔhun. Mɛ ɖě ná ɖo yě mɛ bó ná ɖɔ: ‘Mawu Mavɔmavɔ tɔn wɛ un nyí.’ Mɛ ɖěvo ná ɖɔ: ‘Jakɔ́bu ví wɛ un nyí.’ Mɛ ɖěvo ná wlán dó alɔ ɖɔ: ‘Mawu Mavɔmavɔ tɔn’, bó ná sɔ́ Izlayɛ́li nyíkɔ ɔ́ dó yí go ná.” Mawu Mavɔmavɔ, Izlayɛ́li xɔ́sú ɔ́, Mɛhwlɛ́ngántɔ́ Izlayɛ́li tɔn ɔ́, Mawu Mavɔmavɔ Nǔbǐwúkpétɔ́ ɔ́, xó e é ɖɔ ɔ́ ɖíe: “Nyi wɛ nyí bǐbɛ́mɛ, bó lɛ́ nyí vivɔnu nǔ bǐ tɔn. Nyɛ mɛvo ɔ́, Mawu ɖě sɔ́ tíin ǎ. Mɛ̌ wɛ sɔ ga mì? Mɛ ɔ́ ní sú xó bó ɖɔ; mɛ ɔ́ ní tínmɛ nú mì. Mɛ ɔ́ ní ɖɔ nǔ e ko jɛ sín hwenu un ɖó gbɛtɔ́ nukɔn tɔn lɛ́ɛ é; mɛ ɔ́ ní ɖɔ nǔ e ɖo nǎ wá jɛ wɛ lɛ́ɛ. Togun ce e mi, mi ma ɖi xɛsi ó, ado ma hu mi ó; un ko ɖɔ nú mi, un ko ɖe xlɛ́ mi ɖ'ayǐ, mi ko tunwun ganjí, mi wɛ nyí kúnnuɖetɔ́ ce. Nyɛ mɛvo ɔ́, Mawu ɖěvo ɖe wɛ a? Gbeɖé, Só ɖěvo ɖe ǎ. Nyɛ sɔ́ mɔ ǎ.” Bǒcyɔkpatɔ́ lɛ́ɛ ɔ́, nǔvɔ́nɔ wɛ yě nyǐ, nǔ e yě nɔ́ dó ɖó nǔgɛ́n é ɖě nyí nǔɖé wa nú ǎ. Bǒcyɔ énɛ́ lɛ́ɛ wɛ nɔ́ ɖe xlɛ́ ɖɔ bǒcyɔkpatɔ́ lɛ́ɛ nyí nǔvɔ́nɔ, ɖó bǒcyɔ nɔ́ mɔ nǔ ǎ; bǒcyɔ ká tunwun nǔɖé ǎ, winnyá wɛ é ná dó yě. Gbɛtɔ́ nɔ lí vodún, gbɛtɔ́ nɔ́ kɔn bǒcyɔ; bǒcyɔ ɔ́ nǔ yǎyá ká wɛ; Lǔlú nɛ́ ǎ cé? Mɛ e ko ɖó alɔ ɖ'é mɛ lɛ́ɛ bǐ wɛ ná ɖu winnyá; alɔnuzɔ́watɔ́ e nɔ́ kpa bǒcyɔ énɛ́ lɛ́ɛ ɔ́, gbɛtɔ́ kpowun wɛ yě nyí. Yě ní sɛ yěɖée kplé bó wá hwɛ nukɔn; yě bǐ wɛ ná ɖi xɛsi, yě bǐ wɛ ná ɖu winnyá. Fletuntɔ́ nɔ́ sɔ́ gan dó ado mɛ, bó nɔ́ xo zo dó; é nɔ́ sɔ́ zǔnkpé, bó nɔ́ dó hlɔ̌nhlɔ́n e ɖo lan tɔn mɛ é bǐ d'é wú, bó nɔ tun bǒcyɔ. Lo ɔ́, xovɛ́ sin i lě tlóló ɔ́, gǎn ɖě sɔ́ nɔ ɖo wǔ tɔn ǎ. Ényí é má nu sin kpɛɖé ǎ ɔ́, nǔ nɔ cikɔ n'i bǐ. Bǒcyɔkpatɔ́ ɔ́, kan wɛ é nɔ́ dó jlɛ́ kpo e é ná zé dó kpa bǒcyɔ ɔ́ ná, é nɔ́ sɔ́ hwě mlímlí bó nɔ́ dó ɖe bǒcyɔ ɔ́ ɖó kpo ɔ́ wú, bó nɔ́ sɔ́ hanví dó kpa, lobo nɔ zé akutɛ dó ɖíɖí wǔ ná. Bǒcyɔkpatɔ́ ɔ́ nɔ́ sɔ́ atín ɔ́ dó kpa gbɛtɔ́, bó nɔ́ bló nukún tɔn mɛ ɖó, bɔ é nɔ́ nyɔ́ ɖɛkpɛ, lobɔ è nɔ sɔ́ ɖó xwé gbe. È nɔ xásá sɛ́dlutín ɖé ɖó bó ná wa gbo, abǐ è nɔ kpɔ́n cɛ́nitín ɖé abǐ telebɛ́ntitín ɖé, bó nɔ́ jó e dó nyi zunkan ɔ́ tɛ́ntin bɔ é nɔ́ su, abǐ è nɔ tun pɛ́ɛntín, bɔ jǐ nɔ ja bɔ é nɔ́ su. Atín nɛ́ ɔ́, è nɔ dó nakí tɔn zo, è nɔ sɔ́ nakí énɛ́ dó bɔ myɔ bó nɔ́ xú, è nɔ lɛ́ dó ɖa nǔ ná. É gló ɔ́, è nɔ sɔ́ dó ɖó vodún, bó nɔ jɛ kpo ɖo nukɔn tɔn. È nɔ sɔ́ dó kpa bǒcyɔ, bó nɔ́ yi xo ɖɛ ɖo asá tɔn mɛ. Énɛ́ ɔ́, è nɔ dó atín e è sɛ́n ɔ́ vlɔ̌ zo, è nɔ dó mɛ lan bó nɔ́ ɖu, abǐ è nɔ dó bɔ myɔ bó nɔ́ xú bó nɔ́ ɖɔ: “Éénɛ́! Un xú myɔ bɔ é jɛ mɛ nú mì. Myɔ nyɔ́ mɛ!” Atín e kpo ɔ́, yě nɔ́ dó kpa bǒcyɔ, bó nɔ́ sɔ́ dó ɖó vodún; yě nɔ́ jɛ kpo ɖo nukɔn tɔn, bɔ mɛ ɖokpó ɖokpó nɔ́ xo ɖɛ bó nɔ́ ɖɔ: “Vodún, hwi wɛ un nɔ sɛn; hwlɛ̌n mì gán.” Mɛ énɛ́ lɛ́ɛ ɔ́, nǔɖé ɖo ta yětɔn mɛ ǎ; yě tunwun nǔ ɖěbǔ ǎ. Nukún yětɔn ɖo myɔ̌myɔ́, yě mɔ nǔɖé ǎ; ayǐ yětɔn ká nɔ́ mɔ nǔ, bónú yě ná mɔ nukúnnú jɛ nǔɖé wǔ ǎ. Yě ɖě nɔ́ lin tamɛ kpɔ́n ǎ; ayi yě ɖě tɔn ɖo te ǎ; yě ɖě ká ɖó nǔnywɛ́ bó ná ɖɔ: “Un dó atín e un sɛ́n ɔ́ vlɔ̌ zo, bó ɖa nǔ e un ɖu ɔ́ ɖo akán tɔn jí, un mɛ lan ɖ'é jí bó ɖu. Atín e kpo ɔ́ un sɔ́ dó kpa bǒcyɔ ná, bǒcyɔ suɖunú ná. Atín yǎyá kpowun nukɔn wɛ un nɔ jɛ kpo ɖe din.” Linlin yětɔn nɔ́ nɔ nǔ e nyí afín kpowun é jí. Ayi yětɔn e kó flú ɔ́ nɔ́ zɔ́n, bɔ yě nɔ́ ɖɔ gblǒ; vodún yětɔn lɛ́ɛ nɔ́ hwlɛ́n yě gán ǎ; lo ɔ́, yě ɖésúnɔ nɔ́ mɔ ɖɔ nǔ e émí zunfán ɔ́, xɛblɛ́nú kpowun wɛ ǎ. Mawu ɖɔ: “Izlayɛ́li, togun Jakɔ́bu tɔn, flín nǔ élɔ́ ganjí: Hwi wɛ nyí mɛsɛntɔ́ ce, un bló we bónú a nǎ wa azɔ̌ nú mì. Izlayɛ́li, un wɔn we ǎ. Un ko dɔn nǔ gbɔn gǔ e a fɔ́n dó jǐ ce ɔ́ jí, un dɔn nǔ gbɔn hwɛ e a hu dó mì lɛ́ɛ jí. Bǐ wɛ kó súnsún, bǐ wɛ kó wá yi akpɔ́kpɔ́ ɖɔhun. Un ko hwlɛ́n we gán, lɛ̌ kɔ wá gɔ̌n ce.” Jǐnukúnsin e, j'awǎ, ɖó Mawu Mavɔmavɔ wɛ wa nǔ; nǔ e ɖo ayǐkúngban ɔ́ glɔ́ lɛ́ɛ mi, mi kpa awǒbóbó n'i; só lɛ́ɛ mi, atín lɛ́ɛ mi, zungbó lɛ́ɛ mi, mi hun xomɛ bó sú xó. Mi hun xomɛ bó sú xó, ɖó Mawu Mavɔmavɔ hwlɛ́n togun tɔn gán, é ɖe susu tɔn xlɛ́ ɖo Izlayɛ́li. Izlayɛ́li, Mawu Mavɔmavɔ, Mɛhwlɛ́ngántɔ́ towe e bló we dó nɔ towe xomɛ ɔ́, xó e é ɖɔ ɔ́ ɖíe: “Nyɛ Mawu Mavɔmavɔ ɔ́, nyɛ wɛ bló nǔ bǐ. Nyɛ ɖokpó géé wɛ vlɔ́n jǐxwé. Nyɛ ɖokpó géé wɛ tɛ́ ayǐkúngban ɔ́. Mɛ ɖěbǔ dó alɔ mì ǎ. Din ɔ́, nǔ e ná wá jɛ bɔ nǔkantɔ́ lɛ́ɛ nɔ́ ɖɔ lɛ́ɛ ɔ́, un sɔ́ bǐ dó húzú nǔ yǎyá. Nǔmɔtɔ́ lɛ́ɛ ɔ́, un sɔ́ yě dó húzú xlonɔ; un nya nǔnywɛ́tɔ́ lɛ́ɛ dó gbě, un sɔ́ nǔnywɛ́ yětɔn dó húzú gblǒ. Amɔ̌, nǔ e mɛsɛntɔ́ ce lɛ́ɛ ɖɔ ɔ́, un nɔ bló, xó e mɛsɛ́dó ce lɛ́ɛ ɖɔ lɛ́ɛ ɔ́, un nɔ bló bɔ bǐ nɔ́ nyí wiwa. Un ɖɔ dó Jeluzalɛ́mu wú ɖɔ: ‘É ná vɔ́ ji gba. È nǎ bló nǔ e gblé lɛ́ɛ bǐ ɖó.’ Un ɖɔ dó toxo Judáa tɔn lɛ́ɛ wú ɖɔ: ‘È nǎ vɔ̌ toxo lɛ́ɛ gbá.’ Un ɖe gbe dó xu lɛ́ɛ bó ɖɔ: ‘Xu, mi bǐ ní mɛ. Un ná ɖe gbe dó tɔ e nɔ sa kɔn dó mi mɛ lɛ́ɛ, bɔ bǐ ná mɛ.’ Un ɖɔ dó Silúsi wú ɖɔ: ‘É wɛ nyí lɛ̌ngbɔ́nyitɔ́ e un sɔ́ é; é ná bló bɔ nǔ e jló mì lɛ́ɛ bǐ ná nyí wiwa. É ná ná gbe bɔ è nǎ vɔ́ Jeluzalɛ́mu gbá, bó ná vɔ́ xwé ce sá.’ ” Mawu Mavɔmavɔ ɖɔ nú Silúsi, axɔ́sú e é sɔ́ é ɖɔ: “Un ná ná gǎnjɛwú we, bó ná bɛ́ akɔta lɛ́ɛ dó acɛ towe glɔ́, un ná yí acɛ sín axɔ́sú lɛ́ɛ sí; un ná hun toxo lɛ́ɛ sín hɔntogbó e ɖo súsú lɛ́ɛ nú we. Nyi ɖésú ná ɖo zɔnlin ɖi wɛ ɖo nukɔn towe, un ná gbígbá kpó e ɖo nukɔn towe lɛ́ɛ, un ná gba ganvɔhɔn lɛ́ɛ, un ná fó gan e è dǒ sú yě ná lɛ́ɛ. Un ná ná dɔkun e ɖo nǔglɔ́ lɛ́ɛ we; un ná ná dɔkun e ɖo hwlǎhwlá lɛ́ɛ we. Énɛ́ ɔ́, a nǎ tunwun ɖɔ nyi wɛ nyí Mawu Mavɔmavɔ; a na tunwun ɖɔ nyɛ Mawu Izlayɛ́li tɔn ɔ́ wɛ ylɔ́ we. Un ylɔ́ we ɖó Izlayɛ́li, togun ce, mɛsɛntɔ́ ce un sɔ́ é wú. A tunwun mì ǎ, có un ka sɔ́ we su. Nyɛ wɛ nyí Mawu Mavɔmavɔ; é sɔ́ kpo mɛ ɖěvo ǎ. Nyɛ mɛvo ɔ́, Mawu ɖě sɔ́ ɖe ǎ. A tunwun mì ǎ, amɔ̌, un zɔ́n azɔ̌ we. Énɛ́ ɔ́, sín zǎnzǎnhwe jí káká yi gbadahwe jí ɔ́, mɛ bǐ ná tunwun ɖɔ nyɛ mɛvo ɔ́, Mawu ɖě kún sɔ́ ɖé ó. Nyɛ wɛ nyí Mawu Mavɔmavɔ ɔ́; é sɔ́ kpo mɛɖé ǎ. Un nɔ bló wěziza, bó nɔ́ bló ablu, nyi wɛ nɔ ná nyɔ̌ná mɛ; nyi wɛ nɔ dɔn tagba wá. Nǔgbó wɛ, nyɛ Mawu Mavɔmavɔ wɛ nɔ bló nǔ énɛ́ lɛ́ɛ bǐ. Jǐnukúnsin e, hwɛjijɔ towe ní gba fo ɖɔhun sín jǐxwé aga dɔ̌n; hwɛjijɔ towe ní ja jǐ ɖɔhun, bó sa tɔ; ayǐkúngban ní hun bónú hwlɛngán ní gba sɛ́, bónú hwɛjijɔ ní wú. Nyɛ Mawu Mavɔmavɔ wɛ bló nǔ énɛ́ lɛ́ɛ bǐ.” Heelú gbɛtɔ́ e ɖo nǔ dɔ́n xá mɛ e bló e ɔ́ wɛ é; gbɛtɔ́ ɔ́, kogbán kpowun wɛ é nyí ɖo mɛ lɛ́ɛ tɛ́ntin. Ko nɔ kanbyɔ́ mɛ e ɖo nyinya ɛ wɛ é ɖɔ: “Ani wa wɛ a ka ɖe ɖo fínɛ́ nɛ́” a jí a? Zɛ̌n nɔ ɖɔ nú zɛ̌nmɛtɔ́ ɖɔ: “A nylá alɔvínu” a? Heelú vǐ e ná ɖɔ nú tɔ́ tɔn ɖɔ: “Vǐ alɔkpa tɛ́ ká nyí énɛ́ bɔ a ji?” Heelú vǐ e ná ɖɔ nú nɔ tɔn ɖɔ: “Vǐ tɛ́ a ka ji nɛ́?” Mawu Mavɔmavɔ, Mɛ mímɛ́ Izlayɛ́li tɔn ɔ́, éyɛ́ mɛ e bló togun tɔn ɔ́, xó e é ɖɔ ɔ́ ɖíe: “Mi ná syɛ́n ta káká bó ná kan nǔ byɔ́ mì dó nǔ e ná wá jɛ sɔ ɔ́ wú wɛ a? Abǐ mi wɛ ná ɖɔ lě e un ná wa nǔ gbɔn xá vǐ ce lɛ́ɛ ɔ́ nú mì a? Abǐ mi wɛ ná kan nǔ byɔ́ mì dó nǔ e un sɔ́ alɔ ce dó bló ná lɛ́ɛ wú a? Nyɛ wɛ ɖó ayǐkúngban ɔ́, nyɛ wɛ ɖó gbɛtɔ́ e ɖ'é jí lɛ́ɛ. Nyɛ wɛ vlɔ́n jǐxwé, bó nɔ́ ɖe gbe dó nǔ e ɖo jǐxwé lɛ́ɛ bǐ. Nyɛ wɛ sɛ́ nya é nɛ́ e mi tunwun ɔ́ dó, bɔ é jɛ ali, ɖó un ɖo gbejí nú xó e un ɖɔ é. É sɔ́ nǔɖé bó ná wa ɔ́, un ná hun ali tɔn n'i. É wɛ ná vɔ́ toxo ce Jeluzalɛ́mu ɔ́ gbá, bó ná jó mɛ e nyí ce bɔ ahwan wlí yi to ɖěvo mɛ lɛ́ɛ dó, bɔ yě ná yi. É ná byɔ́ nǔ ɖěbǔ ǎ. Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.” Izlayɛ́li, Mawu Mavɔmavɔ ɖɔ nú we ɖɔ: Ejípunu lɛ́ɛ ɔ́, nǔ e tɔ́n ɖo azɔ̌ yětɔn mɛ lɛ́ɛ, nǔ e nyí Etiopíinu lɛ́ɛ tɔn lɛ́ɛ kpó éé nyí Sevanu lɛ́ɛ tɔn kpó lɛ́ɛ ɔ́, yě ná bó d'agba gbɔn ɖěbǔ ɔ́, nǔ yětɔn lɛ́ɛ bǐ ná wá to towe mɛ; nǔ yětɔn bǐ ná húzú towe. Mɛ énɛ́ lɛ́ɛ ná nɔ wɔlɔ mɛ, bó ná xwedó we; yě ná jɛ kpo ɖo nukɔn towe, bó ná nɔ sa vo nú we ɖɔ: “Hwi ɖokpónɔ gɔ́n jɛ́n Mawu ɖe, Mawu ɖěvo tíin ǎ.” Mawu Izlayɛ́li tɔn, hwi mɛ e nɔ hwlɛ́n mɛ gán ɔ́, Mawu wɛ a nyǐ bó ɖo hwlǎhwlá nǔgbó. Kpɔ́n, bǒcyɔkpatɔ́ lɛ́ɛ ɖu winnyá, wi yětɔn bǐ kɔ́n; yě bǐ dó kɔ do bó ɖo yiyi wɛ. Amɔ̌, Izlayɛ́li togun ɔ́, Mawu Mavɔmavɔ hwlɛ́n ɛ gán káká sɔ́yi. Mi mɛ e nyí togun tɔn ɔ́, mi sɔ́ ná ɖu winnyá gbeɖé ǎ, wi mitɔn ɖě sɔ́ ná kɔ́n gbeɖé ǎ. Mawu Mavɔmavɔ wɛ bló jǐnukúnsin. É wɛ nyí Mawu; é wɛ ɖó ayǐkúngban ɔ́. É wɛ bló ayǐkúngban ɔ́ ɖó alɔ tɔn wú, bó bló bɔ é syɛ́n; é ká ɖó e sɔ́ nyí vɔ̌ ǎ. Lo ɔ́, é bló bɔ è nǎ nɔ jí wɛ. Din ɔ́, xó e é ɖɔ ɔ́ ɖíe: “Nyɛ wɛ nyí Mawu Mavɔmavɔ ɔ́, ɖěvo sɔ́ ɖe ǎ. Xó e ɖɔ wɛ un ɖe ɔ́, un ɖɔ ɖo nǔglɔ́, ɖo ablu mɛ fí ɖé ǎ. Un ɖɔ nú Jakɔ́bu ví lɛ́ɛ ɖɔ yě yi ba mì ɖo fí e nǔ ɖěbǔ má ɖe é ǎ. Nyɛ Mawu Mavɔmavɔ ɔ́, xó e sɔgbe ɔ́ wɛ un nɔ ɖɔ; xó nǔgbó wɛ un nɔ ɖɔ.” Mawu ɖɔ: “Mi mɛ e kpo ɖo gbɛ ɖo akɔta lɛ́ɛ mɛ lɛ́ɛ mi, mi sɛ miɖée kplé, bó wá; mi zɔn kpɔ́ bó wá. Yě mɛ e nɔ zé bǒcyɔ yětɔn lɛ́ɛ dó jǐ, bó nɔ́ ɖo nǔ e má sixú hwlɛ́n yě ǎ lɛ́ɛ xomlá wɛ lɛ́ɛ ɔ́, yě tunwun nǔɖé ǎ. Mi wá ɖɔ nǔ e lin wɛ mi ɖe lɛ́ɛ, bó ɖe xlɛ́ ɖɔ nǔgbó wɛ; É jló mi hǔn, mi nɔ kpɔ́ bó kplɔ́n nǔ miɖée. Nǔ e ɖo jijɛ wɛ égbé din ɔ́, mɛ̌ ká ɖɔ ɖ'ayǐ sín do? Mɛ̌ kó ɖɔ ɖ'ayǐ ɖɔ yě ná jɛ? É má nyí nyɛ Mawu Mavɔmavɔ ɔ́ wɛ a? Nyɛ mɛvo ɔ́, Mawu ɖě sɔ́ ɖe ǎ. Nyɛ wɛ nyí Mawu, nyi wɛ nɔ wa nǔ ɖó sɛ́nxwi jí, nyi wɛ nɔ hwlɛ́n mɛ gán, mɛ ɖě sɔ́ ɖe zɛ nyɛ wú ǎ. Mi mɛ e ɖo wɛ̌kɛ́ ɔ́ mɛ lɛ́ɛ bǐ ní wá gɔ̌n ce; énɛ́ ɔ́, un ná hwlɛ́n mi gán. Đó nyi wɛ nyí Mawu; é sɔ́ kpo mɛɖé ǎ. Nyɛ wɛ nyí Mawu nǔgbó; énɛ́ wú ɔ́, un xwlé nyɛ ɖésú nú mi; xó e tɔ́n sín nu ce mɛ lɛ́ɛ bǐ wɛ nyí xó nǔgbó; xó ɖokpó ɖíe, bɔ un ná húzú ǎ: gbɛtɔ́ e ɖo ayǐkúngban ɔ́ jí lɛ́ɛ bǐ ná jɛ kpo ɖo nukɔn ce, bó ná xwlé nǔ bó ɖɔ: ‘Mawu Mavɔmavɔ kɛ́ɖɛ́ gɔ́n wɛ è nɔ mɔ nǔ wa ɖó sɛ́nxwi jí ɖe, é gɔ́n wɛ è nɔ mɔ hlɔ̌nhlɔ́n ɖe.’ Mɛ e tɔ́n ahwan mì lɛ́ɛ bǐ wɛ ná wá gɔ̌n ce, bɔ winnyá ná hú yě. Amɔ̌, Izlayɛ́li ví lɛ́ɛ bǐ ná mɔ hwɛjijɔ ɖo gɔ̌n ce bɔ é ná víví nú yě.” Mawu ɖɔ: “Vodún Bɛ́lu ɖíe ɖo tɔ́tɔ́ e; vodún Nɛbo ɖíe jɛ ayǐ e. È dǒ bǒcyɔ yětɔn lɛ́ɛ sín agban nú nyibú lɛ́ɛ; ɖ'ayǐ ɔ́, è sɔ́ yě kɛɛ ɖo nǔwiwa lɛ́ɛ hwenu, amɔ̌, din ɔ́, agban kpinkpɛn ɖé wɛ yě nyǐ bɔ è dǒ nú kanlin e nǔ ko cikɔ ná lɛ́ɛ. Vodún lɛ́ɛ ɖo tɔ́tɔ́, yě bǐ wɛ jɛ ayǐ ɖó kpɔ́; yě sixú hwlɛ́n bǒcyɔ yětɔn lɛ́ɛ gán ǎ, bɔ è wlǐ yě lɔ xwe kannumɔgbénu. Izlayɛ́li ví e mi, mi togun Jakɔ́bu tɔn e kpo lɛ́ɛ, mi mɛ e nu un ɖe sín hwenu e è ko ji mi ɔ́, mi mɛ e un hɛn sín gbe e gbe è ko ji mi ɔ́, mi ɖótó mì. Lě e un ɖe é jɛ́n un ná nɔ káká yi kpikpo hwenu mitɔn. Un ná hɛn mi káká bɔ ɖa mitɔn ná wé. Nyɛ wɛ bló mi, nyɛ wɛ ná hɛn mi. Nǔgbó wɛ, un ná kpé nukún dó mi wú, bó ná hwlɛ́n mi gán. Mɛ̌ wú mi ka ná jlɛ́ mì dó? Mɛ̌ kpó nyi kpó ká nyí gbɛ̌? Mɛ̌ kpó nyi kpó mi ka ná sɔ́ ɖó hǎ, bó jlɛ́ ɖě dó ɖě wǔ? Mi kpɔ́n mɛ e nɔ zán dɔkun yětɔn bǐ, bó nɔ́ da kpatágan, bó nɔ́ da siká, bó nɔ́ yí nǔtuntɔ́ ɖokpó bɔ é nɔ́ bló nǔmɛsɛn nú yě, bɔ yě nɔ́ jɛ kpo ɖo asá tɔn mɛ, bó nɔ́ sɛn ɛ lɛ́ɛ. Énɛ́ ɔ́, yě nɔ́ ɖíɖá nǔmɛsɛn yětɔn ɖó abɔ̌ta, bó nɔ́ sɔ́ yi ɖó tɛn tɔn mɛ, bɔ é nɔ́ nɔ fínɛ́, é sɔ́ ná sɛ tɛn gbeɖé ǎ. È ylɔ̌ ɛ ɔ́, é nɔ́ kɛ nu ǎ; adǎn ká ná gbo mɛ ɖé bɔ é ná hwlɛ́n ɛ gán ǎ.” Mawu ɖɔ: “Gbejímánɔtɔ́ lɛ́ɛ mi, mi flín nǔ élɔ́ ganjí. Mi byɔ́ miɖée mɛ bó lin tamɛ. Mi flín nǔ nukɔn nukɔntɔn e jɛ ɖ'ayǐ xóxó lɛ́ɛ. Nyɛ wɛ nyí Mawu, é sɔ́ kpo mɛɖé ǎ. Mawu nyi ɖɔhun ɖě tíin ǎ. Un ko ɖɔ nǔ e ná wa wɛ un ɖe ɔ́ sín do. Nǔ e má kó jɛ ǎ, bó ká ná wá jɛ ɔ́, un ko ɖɔ ɖ'ayǐ sín tɛgbɛ. Un ɖɔ: nǔ e ná bló wɛ un ɖe ɔ́ ɖíe, bɔ é ká ná jɛ. Nǔ e jló mì lɛ́ɛ ɔ́, un nɔ bló bǐ. Un ylɔ́ nǔsáxɛ ɖokpó sín fí e hwe nɔ tɔ́n sín é; Mɛ e ná bló nǔ e un lɛ́n ɔ́ wɛ; un ylɔ́ ɛ sín to línlín ɖé mɛ; un ɖɔ xó lě tlóló ɔ́, tlóló jɛ́n nǔ e un ɖɔ ɔ́ nɔ́ nyí wiwa. Un lɛ́n nǔɖé bó ná wa ɔ́, un nɔ wa. Gbɛtɔ́ ayisyɛ́nsyɛ́nnɔ lɛ́ɛ mi, mi ɖótó mì. Mi mɛ énɛ́ lɛ́ɛ e ɖo zɔ ɖésú nú hwɛjijɔ lɛ́ɛ ɔ́, mi ɖótó mì. Un sɛ́ hwɛjijɔ ce dó bɔ é ja; é kó sɛkpɔ́ bǐ kɛ́nnɛ́kɛ́nnɛ́ wɛ lɔ; hwlɛngán ɔ́ ná lín có bó wá ǎ, nyi ɖésú wɛ ná hɛn wá Sinyɔ́ɔ. Nǔgbó wɛ, un hɛn nǔ ɖagbe ɖagbe ɖé já nú Izlayɛ́li.” Mawu ɖɔ: “Đyɔ̌vǐ Babilɔ́nu, jɛ te sín axɔ́súzinkpo jí; jǐnjɔ́n kɔ́gúdu mɛ. Toxo Babilɔ́nunu lɛ́ɛ tɔn e, jǐnjɔ́n kɔ́ mɛ, ma sɔ́ ba zinkpo ó. È sɔ́ ná nɔ́ ylɔ́ we ɖɔ nyɔ̌nu fífá, nyɔ̌nu ɖagbe ɖagbe ɖě ǎ. Yi jɛ sé ta bó li linfín; ɖe avɔ sín nukún mɛ; kplɔ́ sɛ́ya towe d'aga nú asá towe jɛ wěxo, nú a nǎ gbo tɔ. Mɛ lɛ́ɛ ná mɔ we ɖo mɛ̌ jɔgbe, yě ná mɔ nǔ e hwlá wɛ a ɖe ɔ́. Un ná ba hlɔn, mɛ ɖěbǔ ná sixú hɛn mì ɖó te ǎ.” Mɛ e nɔ hwlɛ́n mǐ ɔ́, nyǐkɔ tɔn nɔ́ nyí Mawu Mavɔmavɔ Nǔbǐwúkpétɔ́, Mɛ Mímɛ́ Izlayɛ́li tɔn. Mawu ɖɔ: “Babilɔ́nu, ɖǒ nu abwɛ̌ bó jínjɔ́n ayǐ; yi hɔn hwlá cí ablu mɛ fí ɖé, ɖó è sɔ́ ná nɔ́ ylɔ́ we ɖɔ ‘Gǎn axɔ́súɖuto lɛ́ɛ tɔn’ ɖě ǎ. Xomɛ sin mì dó togun ce wú; énɛ́ ɔ́, un jó mɛ e nyí ce lɛ́ɛ nú we dó dó winnyá yě. Nǔ yětɔn ká blá wǔ nú we ǎ; a zǎn acɛ e a ɖǒ ɔ́ dó dó tagba nú degénɔ lɛ́ɛ zɛ jlɛ̌ wú. A nɔ ɖɔ: ‘Un ná nɔ gbɛ káká sɔ́yi, un ná ɖu gǎn ɖo gbɛ ɔ́ nu káká sɔ́yi.’ A ka lin tamɛ dó nǔ e ɖo jijɛ wɛ lɛ́ɛ wú ǎ; a lin nǔ e ná wá jɛ sɔ ɔ́ kpɔ́n ǎ. Din ɔ́, gbɛɖutɔ́, ɖǒtó mì; a jǐnjɔ́n ayǐ towe, bó vo bó nɔ ɖɔ dó ayi mɛ ɖɔ: ‘Nyɛ ɔ́, è sixú jlɛ́ mì dó mɛɖé wú ǎ; un ná nyí asúkúsi gbeɖé ǎ; vǐ ce lɛ́ɛ ɖě ká ná hwe gbeɖé ǎ.’ É nyɔ́, gbe ɖokpó ɔ́ wɛ adǎn we énɛ́ lɛ́ɛ bǐ ká ná gbo we ɖo ajijimɛ. A sɔ́ ná ɖó vǐ ǎ, a nǎ húzú asúkúsi. Azě towe lɛ́ɛ kpó majíki towe lɛ́ɛ kpó ná ɖo fínɛ́, có nǔ énɛ́ lɛ́ɛ bǐ ká ná gbo we. Dǎka e a nɔ xo lɛ́ɛ wú wɛ a nɔ ɖeji dó; a nɔ́ ɖɔ: ‘Mɛ ɖé mɔ mì ǎ.’ Nǔnywɛ́ towe kpó nǔ e a tunwun ɔ́ kpó wɛ flú we, bɔ a nɔ ɖɔ: ‘Nyɛ ɔ́, è sixú jlɛ́ mì dó mɛɖé wú ǎ.’ Nǔgbó wɛ, awě ɖokpó ná xo we, bɔ a nǎ sixú gló ǎ; adǎn baɖabaɖa ɖokpó ná gbo we, bɔ a nǎ sixú nya ta ɖ'é nu ǎ. Jǐ ɖaxó ma ɖó ayi tɔn ɖé ná wá fyán we. A fɔ́n hǔn, nɔ ɖo azě gbo mɛ wɛ, bó nɔ́ ɖo majíki bló wɛ. Sín vǔ wɛ a ko ván kan d'é wú sín, bó tunwun ɖɔ nǔ ná nyɔ́ nú émí ɖ'é mɛ abǐ émí ná dó dó xɛsi nú mɛ. A nɔ ɖo tagba jɛ wɛ, bó nɔ́ ɖo nǔ kan kpé wɛ gbɔn fí bǐ. Yě mɛ énɛ́ lɛ́ɛ e nɔ́ kpɔ́n jǐxwé, bó nɔ́ kpɔ́n sunví lɛ́ɛ, bó nɔ́ ɖɔ nǔ e ná jɛ dó jǐ towe lɛ́ɛ nú we ɖo sun mɛ sun mɛ lɛ́ɛ ɔ́, yě ní bó wá hwlɛ́n we gán din bó! Nǔ e nɔ́ gbo sɛníyɔ é wɛ ná gbo yě; yě ná ji bó kɔn afín; yě ɖě ná xo zo zlɛ́ ǎ; myɔ ɔ́ ná syɛ́n hú myɔkán e è nɔ dó ɖa wɔ̌xúxú é tawun; myɔ ɔ́ ná nyí adogwle mɛ myɔ ɖé kpowun bɔ è nǎ xú ǎ. Nǔ e ná gbo mɛ e a nɔ ɖo kan ván wɛ, bó nɔ́ ɖo nǔ kan ɖo gɔ̌n yětɔn wɛ, sín vǔ lɛ́ɛ é nɛ́. Yě bǐ wɛ ná ba ali ɖó ta wú; mɛ ɖokpó ɖokpó ná yi fí e wú é kpé é; yě mɛ ɖěbǔ ná hwlɛ́n we gán ǎ.” Jakɔ́bu togun e mi, mi ɖótó; mi nɔ ɖɔ Izlayɛ́li ví wɛ émí nyí, bó jɔ ɖo Judáa kún mɛ. Mi nɔ xwlé nǔ dó Mawu Mavɔmavɔ nyíkɔ mɛ, mi nɔ xomlá Mawu Izlayɛ́li tɔn ɖo ɖɛ mitɔn lɛ́ɛ mɛ. Lo ɔ́, nǔ e ɖɔ wɛ mi ɖe ɔ́ ká yi xo mitɔn mɛ ǎ, mi nɔ wa nǔ ɖó sɛ́nxwi jí ǎ. Mi nɔ ylɔ́ miɖée ɖɔ toxo mímɛ́ ɔ́ mɛ nu, mi nɔ gán jɛ Mawu Izlayɛ́li tɔn e nyǐkɔ tɔn nɔ nyí “Mawu Mavɔmavɔ Nǔbǐwúkpétɔ́” ɔ́ wú; din ɔ́, mi bo ɖótó xó élɔ́: “Nǔ nukɔntɔn e jɛ lɛ́ɛ ɔ́, un ko ɖɔ yě sín tɛgbɛ; un ko ɖɔ xó tɔn; un ɖɔ bɔ è se; Ée é wá yá é ɔ́, un sí te d'é wú cɛ́jú mɛ, bɔ nǔ énɛ́ lɛ́ɛ bǐ jɛ. Un ka tunwun mi: ta wɛ mi nɔ syɛ́n, nǔ wɛ mi nɔ xwe, tó wɛ mi nɔ tlí. Énɛ́ ɔ́ wú wɛ un ko ɖɔ nǔ énɛ́ lɛ́ɛ nú mi ɖ'ayǐ xóxó; un ko ɖɔ nú mi cóbɔ nǔ énɛ́ lɛ́ɛ ná jɛ. Un ɖɔ nú mi bónú mi ma wá ɖɔ vodún émítɔn wɛ bló nǔ énɛ́ lɛ́ɛ ó; bónú mi ma wá ɖɔ bǒcyɔ émítɔn e è sɔ́ kpo dó kpa é, abǐ ée è sɔ́ gan dó kɔn ná é wɛ bló ó. Nǔ e un ɖɔ ɖ'ayǐ ɖɔ é ná jɛ bɔ mi se lɛ́ɛ ɔ́, mi mɔ bɔ bǐ jɛ. Étɛ́wú mi ma ka ná yí gbe ɖɔ un ɖɔ nǔɖé ɔ́, nǔ ɔ́ nɔ́ jɛ ǎ? Din ɔ́, bɛ́ sín égbé ɔ́, nǔ yɔ̌yɔ́ e ɖo nǎ jɛ wɛ lɛ́ɛ ɔ́, un ná ɖɔ bɔ mi ná se. Nǔ énɛ́ lɛ́ɛ ɔ́, hwlǎhwlá wɛ yě ɖe, bɔ mi mɔ do ná ɖěbǔ ǎ. Ényí nǔ xóxó wɛ ǎ, din wɛ un ná ɖó nǔ énɛ́ lɛ́ɛ ayǐ; káká wá jɛ égbé ɔ́, mi se nǔ mɔ̌hunkɔ kpɔ́n gbeɖé ǎ; hǔn, mi sixú ɖɔ émí kó tunwun ɖ'ayǐ ǎ. È nǎ ɖɔ lɔ ɔ́, mi wlí tó wú ǎ, mi jló ná mɔ nǔ jɛ nǔɖé mɛ ǎ; mi ka kú hǔn bó ba do ná gbeɖé ǎ. Un tunwun ɖɔ mɛsaɖutɔ́ wɛ nú mi; sín gbe e gbe è ji mi ɔ́, è sun nyǐ mi ɖɔ gbejímánɔtɔ́. Amɔ̌, un ɖó xomɛsin ce te, ɖó nyǐkɔ ce wú; un ɖe mi sín nǔ nyanya mɛ, ɖó susu ce wú; un gbɛ́ ɖɔ un kún sɔ́ ná sú kún mitɔn dó ó. Un ɖe nǔ kwíji kwíji sín mi mɛ; é ká nyí lě e è nɔ xo zo dó kpatágan bó nɔ́ ɖe nǔ kwíji kwíji sín mɛ ɔ́ ɖɔhun ǎ. Lo ɔ́, wǔvɛ́ sín zo wɛ un xo dó mi. Ée un wa nǔ gbɔn mɔ̌ ɔ́, nyi ɖokpónɔ géé wú wɛ, ɖó un sixú yí gbe bɔ è sɔ nyǐkɔ ce xo kɔ́ ǎ; susu e nyí ce é ɔ́, un jló ná sɔ́ nú mɛ ɖěvo ǎ.” Mawu ɖɔ: “Togun Jakɔ́bu tɔn, ɖǒtó mì; Izlayɛ́li, hwi mɛ e un ylɔ́ ɔ́, ɖǒtó mì. Mɛ ɖokpó ɔ́ nyí wɛ jɛ́n un kpo ɖe tɛgbɛ; nyi wɛ ɖo bǐbɛ́mɛ, bó lɛ́ ɖo vivɔnu. Nyi ɖésú wɛ sɔ́ alɔ ce dó ɖó ayǐkúngban ɔ́ ayǐ, nyi wɛ vlɔ́n jǐnukúnsin ɔ́ avɔ ɖɔhun; un ylɔ́ ayǐkúngban kpó jǐnukúnsin kpó lě kpowun ɔ́, tlóló jɛ́n yě nɔ́ wá. Mi kplé miɖée, mi bǐ ɖótó: Un ɖó xɔ́ntɔn ɖokpó, bɔ nǔ e lin dó Babilɔ́nu wú wɛ un ɖe ɔ́, é ná bló, é ná ɖe hlɔ̌nhlɔ́n ce xlɛ́ Babilɔ́nunu lɛ́ɛ. Mɛ̌ ká ɖo mi mɛ bó kó ɖɔ nǔ énɛ́ ɔ́ ná jɛ? Nyɛ wɛ ɖɔ xó, nyɛ wɛ; nyɛ wɛ ylɔ́ ɛ, nyɛ wɛ ɖɔ bɔ é wá. É sɔ́ nǔɖé bó ná bló ɔ́, un ná bló bɔ bǐ ná nyɔ́. Mi sɛkpɔ́ mì bó ná se xó élɔ́: Sín bǐbɛ́mɛ ɔ́, un ko ɖɔ xó sɔ́ nyi wɛn. Sín gbe e gbe nǔ énɛ́ lɛ́ɛ bɛ́ ɔ́, un ɖo fínɛ́.” Din ɔ́, Aklúnɔ Mavɔmavɔ wɛ sɛ́ mì dó, bɔ yɛ tɔn ɖo kpɔ́ xá mì. Xó e Mawu Mavɔmavɔ, Mɛhwlɛ́ngántɔ́ towe, Mɛ Mímɛ́ Izlayɛ́li tɔn ɖɔ ɔ́ ɖíe: “Nyɛ Mawu Mavɔmavɔ ɔ́, nyɛ wɛ nyí Mawu towe; nyi wɛ ná ɖɔ nǔ e ná nyɔ́ nú we ɔ́ nú we. Nyi wɛ ɖo ali xlɛ́ we wɛ ɖo ali e a mlɛ̌ ɔ́ jí. Ényí a ko wlí tó nǔ e un zɔ́n we lɛ́ɛ wú wɛ ɔ́, nyɔ̌ná sín tɔ ɖé ná kó sa wá gɔ̌n towe; hwlɛngán ɔ́ ná kó xo wá gɔ̌n towe xu ɖɔhun. Vǐ towe lɛ́ɛ ná sukpɔ́ wɔɖɔɖɔ xuta kɔ́ ɖɔhun, nyǐkɔ yětɔn ná ɖo nukɔn ce tɛgbɛ.” Izlayɛ́li ví e mi, mi tɔ́n sín Babilɔ́nu, mi yá wǔ, mi gosín fínɛ́. Mi jlá xó énɛ́ ɔ́ kpódó awǎjijɛ kpó, káká yi fí e gbɛ ɔ́ kponu ɖó é. Mi jlá, mi ɖɔ gbɔn fí bǐ ɖɔ: “Mawu Mavɔmavɔ hwlɛ́n mɛsɛntɔ́ tɔn Izlayɛ́li ɔ́.” É nɔ́ xlɛ́ ali mɛ e nyí étɔn lɛ́ɛ gbɔn gbětótló mɛ, bɔ sinnugblá ká nɔ sin yě ǎ. É nɔ́ dɔn sin sín só lɛ́ɛ mɛ nú yě; é nɔ́ zɛ só ɔ́ bɔ sin nɔ tɔ́n bó nɔ́ sa. Amɔ̌, Mawu Mavɔmavɔ ɖɔ: “Nyɔ̌ná énɛ́ lɛ́ɛ nyí mɛdídá lɛ́ɛ tɔn ǎ.” Xó lómílómí wegɔ́ ɔ́ Togun e ɖo to línlín mɛ lɛ́ɛ e mi, mi ɖótó mì. Mi mɛ e ɖo zɔga lɛ́ɛ mi, mi wlí tó xó ce wú. Cóbónú un ná jɔ ɔ́, Mawu Mavɔmavɔ ko ylɔ́ mì; un kpo ɖo nɔ ce xo mɛ hwenu e é ylɔ́ nyǐkɔ ce é. É sɔ́ nu ce dó húzú hwǐ ɖíɖá, é cyɔ́n alɔ jǐ ce. É sɔ́ mì dó húzú gǎ nuxwíɖíxwíɖí, bó sɔ́ dó gǎgo tɔn mɛ. É ɖɔ nú mì ɖɔ: “Izlayɛ́li, hwi wɛ nyí mɛsɛntɔ́ ce; hwi wɛ un nɔ sɔ́ dó ɖe susu ce xlɛ́.” Nyɛ ka ko mɔ ɖɔ tagba yǎyá wɛ un jɛ, un zán hlɔ̌nhlɔ́n ce dó wǔvɔ́, bó wa nǔ dó jɔhɔn mɛ kpowun. Lo ɔ́, Mawu Mavɔmavɔ ná sɔ́ nǔ e nyí ce ɔ́ nú mì; ajɔ ce ɖo Mawu ce lɔ mɛ. Amɔ̌, din ɔ́, Mawu Mavɔmavɔ ɖɔ nú mì ɖɔ émí kó bló nyi bónú nyi ná nyí mɛsɛntɔ́ émí tɔn có nyi wá jɔ. É jló ɖɔ nyi ní kplá Jakɔ́bu ví lɛ́ɛ wá nú émí; é jló ɖɔ nyi ní kplá Izlayɛ́li togun ɔ́ wá nú émí. Mawu Mavɔmavɔ tunwun akwɛ́ e nǔ e wa wɛ un ɖe ɔ́ xɔ é; Mawu ce wɛ nyí hlɔ̌nhlɔ́n ce. É ɖɔ nú mì ɖɔ: “Azɔ̌ e wa nú mì wɛ a ɖe, bó ɖo akɔta Jakɔ́bu tɔn lɛ́ɛ sɔ́ sí te wɛ, bó ɖo mɛ e kpo ɖo Izlayɛ́li lɛ́ɛ kplá wá wɛ ɔ́, azɔ̌ énɛ́ ɔ́ kɛ́ɖɛ́ kpé ǎ. Un lɛ́ sɔ́ we dó ɖó wěziza nú akɔta ɖě lɛ́ɛ, bónú hwlɛngán ce ná yi káká fí e gbɛ ɔ́ kponu ɖó é.” Mawu Mavɔmavɔ ɖo xó ɖɔ nú we wɛ; é mɛ e hwlɛ́n togun tɔn gán ɔ́, é mɛ e nyí Mɛ Mímɛ́ Izlayɛ́li tɔn ɔ́ ɖo xó ɖɔ nú we wɛ; é ɖo xó ɖɔ nú hwi mɛ e è hu tɛ́ ná, bɔ mɛ lɛ́ɛ gbɛ́ wǎn ná é wɛ, é ɖo xó ɖɔ nú hwi mɛ e nyí kannumɔ acɛgannaganna-kpanúmɛtɔ́ lɛ́ɛ tɔn ɔ́ wɛ; é ɖɔ: “Ényí axɔ́sú lɛ́ɛ mɔ we ɔ́, yě ná sí te sín zinkpo yětɔn jí. Gǎn lɛ́ɛ mɔ we jǎwe ɔ́, yě ná ɖe kɔ́.” Yě ná bló mɔ̌ dó ɖe xlɛ́ ɖɔ émí ɖó sísí nú Mawu Mavɔmavɔ, Mawu Mavɔmavɔ wɛ nɔ́ nɔ gbejí nú xó e é ɖɔ é; yě nɔ́ bló mɔ̌ nú Mɛ mímɛ́ Izlayɛ́li tɔn; é wɛ sɔ́ we. Xó e Mawu Mavɔmavɔ ɖɔ ɔ́ ɖíe: “Ée hwenu e nyɔ́ bɔ un ná sɔ ylɔ̌ nú we ɔ́ su ɔ́, ée hwlɛngánzán gbe su ɔ́, un wá gɔ́ alɔ nú we; nyi wɛ bló we, bó ná sɔ́ we dó jɛ akɔ xá togun ɔ́; un ná sɔ́ to ɔ́ sí te, bó ná má ayǐkúngban ɔ́ mɛtɔn mɛtɔn nú mɛ. Égbé din ɔ́, nǔ e ɖo ayǐkúngban énɛ́ jí ɔ́ bǐ wɛ è ka hɛn gblé. Un ɖɔ nú gantɔ́ lɛ́ɛ, mɛ e ɖo ablu mɛ lɛ́ɛ ɖɔ: ‘Mi tɔ́n, mi wá wěziza nu.’ Énɛ́ ɔ́, yě ná cí kanlin hwan e nɔ ɖo ama ɖu wɛ gbɔn ali kpá ali kpá, bó nɔ́ mɔ nǔɖuɖu yětɔn gbɔn só jí só jí lɛ́ɛ ɖɔhun. Yě sɔ́ ná ji nǔɖuɖu ya ɖě ǎ; yě ká sɔ́ ná ji sin ya ɖě ǎ; jɔhɔn e nɔ dó ya nú yě ɖo akúgbéjí ɔ́ sɔ́ ná dó ya ɖě nú yě ǎ; hwesivɔ́ ɖě ká sɔ́ ná hun dó ta yětɔn ǎ. Un nǎ kplá yě kpó wǎn yíyí kpó, bɔ yě ná nɔ́ fá kɔ ɖo tɔjɔtɛn. Un na sɔ́ fí e só ɖe lɛ́ɛ bǐ dó húzú ali, bɔ yě ná nɔ́ gbɔn; un ná bló ali lɛ́ɛ bǐ ɖó. Kpɔ́n, yě nɛ́! Yě gosín to línlín mɛ ja: mɛ ɖě gosín totaligbé, mɛ ɖě gosín gbadahwe jí bó gbɔn xu jí, mɛ ɖě gosín tofɔligbé, ɖo Ejípu tomɛ.” Jǐxwé, j'awǎ! Ayǐkúngban, xomɛ ní hun we! Só lɛ́ɛ mi, mi kpa awǒbóbó, ɖó Mawu Mavɔmavɔ ɖo wǔsyɛ́n dó lanmɛ nú togun tɔn wɛ; é nɔ́ ɖe wǎn yíyí tɔn xlɛ́ mɛ e sɔ́ yěɖée hwe lɛ́ɛ. Jeluzalɛ́mu nɔ ɖɔ: “Mawu Mavɔmavɔ jó mì dó, Aklúnɔ ce wɔn mì.” Mawu ka ɖɔ n'i ɖɔ: “Nyɔ̌nu nɔ́ wɔn vǐ e ɖo anɔ̌ nɔ́ wɛ ɖo akɔ́n tɔn mɛ ɔ́ a? É nɔ́ gbɛ́ wǎn nú vǐ e é hɛn xo tɔn ɔ́ a? É ná bó ká nɔ wɔn ɛ ɔ́, nyɛ ɔ́, nyɛ ná wɔn we ǎ. Éɖíe kpɔ́n! Nyǐkɔ towe ɔ́, alɔkpákpá ce mɛ wɛ un wlán dó. Un gɔn ahohó e è mɛ lɛ́ lɛ̌ dó we ɔ́ flín gbeɖé ǎ. Jeluzalɛ́mu, mɛ e ná vɔ́ we bló ɖó lɛ́ɛ kó ja; yě ɖo hwlɛndó jí ja; mɛ e gba we, bó bɛ́ nǔ e a ɖǒ lɛ́ɛ ɔ́, yědɛɛ lɛ́ɛ ɖo zɔ sɛ yi wɛ. Kpɔ́n gǔdo bó kpɔ́n nukɔn, kpɔ́n aɖisí bó kpɔ́n amyɔ: vǐ towe lɛ́ɛ bǐ ɖo yěɖée sɛ kplé wɛ bó ja gɔ̌n towe. Nyɛ Mawu Mavɔmavɔ ɖɔ: Un xwlé nyiɖée nú we: jɛ̌ wɛ vǐ towe lɛ́ɛ ná nyí ɖo kɔ nú we; sɔ́nyijí e nyɔ̌nu e xwe asúxwé yɔ̌yɔ́ é nɔ́ gbá é wɛ yě ná nyí ɖo alin nú we. Din ɔ́, a ɖo awǐnnyaglo lɛ́ɛ tɛ́ntin, è gba slá towe lɛ́ɛ bǐ, mɛ ɖé sɔ́ ɖo to towe mɛ ǎ. Amɔ̌, din zaanɖé ɔ́, to ɔ́ ná hwe dó toví towe lɛ́ɛ, bɔ mɛ e ɖo gbɛ gblé dó nú we wɛ lɛ́ɛ ná hɔn yi zɔ nú we. A mɔ ɖɔ émí kún sɔ́ ɖó vǐ ɖě ó. Amɔ̌, a nǎ se din bɔ vǐ towe lɛ́ɛ ná ɖo vo sa wɛ ɖɔ: ‘Un mɔ tɛn mɛ ǎ, sɛ kpɛɖé nú má nɔ fí.’ Énɛ́ ɔ́, a nǎ nɔ́ kanbyɔ́ hwiɖée ɖɔ: ‘Mɛ̌ ká ná vǐ élɔ́ lɛ́ɛ bǐ mì? Un ma ka sɔ́ ɖó vǐ ɖě nɛ́? Un sɔ́ ɖó nukún ɖɔ un ná mɔ vǐ ɖě gbeɖé ǎ. È ko ɖe mì sín tomɛ fí, bó sɔ́ mì ɖó vo; bɔ vǐ énɛ́ lɛ́ɛ ɔ́, mɛ̌ ká hɛn yě? Nyi ɖokpónɔ géé wɛ ká kpo ɖ'ayǐ hǔn! Mɛ énɛ́ lɛ́ɛ ɔ́, fítɛ́ yě ká ɖe ɖ'ayǐ?’ Xó e Aklúnɔ Mavɔmavɔ ɖɔ ɔ́ ɖíe: ‘Un ná bló alɔ nú akɔta ɖě lɛ́ɛ, un ná sɔ́ nǔ ɖe xlɛ́ togun lɛ́ɛ; énɛ́ ɔ́, yě ná bɛ́ vǐ towe súnnu lɛ́ɛ dó awa mɛ wá nú we, yě ná fɔ vǐ towe nyɔ̌nu lɛ́ɛ ɖó abɔ̌ta wá nú we. Axɔ́ví nyɔ̌nu lɛ́ɛ wɛ ná nɔ́ ná nǔɖuɖu vǐ towe lɛ́ɛ, bɔ axɔ́sú lɛ́ɛ na nɔ kplɔ́n nǔ yě. Yě ná nɔ́ jɛ kpo ɖo nukɔn towe, bó ná nɔ́ ɖe kɔ́, bó ná nɔ́ ɖíɖɔ́ afúntúntún e ɖo afɔ nú we lɛ́ɛ. Énɛ́ ɔ́, a nǎ tunwun ɖɔ nyi wɛ nyí Mawu Mavɔmavɔ, ɖɔ mɛ e nɔ gán jɛ wǔ ce lɛ́ɛ kún nɔ ɖu winnyá gbeɖé ó.’ Ahwanfuntɔ́ e hɛn nǔɖé sín ahwangbénu wá ɔ́, è sixú yí sín así tɔn a? Mɛ ɖé sixú yí kannumɔ sín gǎnhúnǔtɔ́ sí a? Mawu Mavɔmavɔ ka ɖɔ: ‘Mɛ ɖé sixú yí ǎ. Nyɛ ka ná yí mɛ e ahwanfuntɔ́ hɛn sín ahwangbénu é sín así tɔn, un ná yí kannumɔ sín gǎnhúnǔtɔ́ sí. Jeluzalɛ́mu, nyi ɖésú wɛ ná tɔ́n ahwan kɛntɔ́ towe lɛ́ɛ, bó ná hwlɛ́n vǐ towe lɛ́ɛ gán. Un ná hú gǎn mɛ e ɖo tagba dó nú we wɛ lɛ́ɛ, bɔ yě ná ɖu lan yě ɖésúnɔ tɔn; yě ná nu kanjɔ yě ɖésúnɔ tɔn bɔ é ná mú yě vɛ̌ɛn yɔ̌yɔ́ ɖɔhun. Énɛ́ ɔ́, mɛ e ɖo gbɛ ɔ́ mɛ lɛ́ɛ bǐ ná mɔ ɖɔ nyɛ wɛ nyí Mawu Mavɔmavɔ, nyɛ wɛ nyí mɛhwlɛ́ngántɔ́ towe; nyɛ wɛ xɔ gbɛ nú we; nyɛ wɛ nyí Mawu hlɔ̌nhlɔ́nnɔ Jakɔ́bu togun ɔ́ tɔn.’ ” Xó e Mawu Mavɔmavɔ ɖɔ ɔ́ ɖíe: “Mi nɔ ɖɔ nyi nya nɔ émítɔn Jeluzalɛ́mu. É nyɔ́, mi bo xlɛ́ wěma e un wlán dó así n'i, bó gbɛ́ ɛ, lobo nya ɛ ɔ́ mì. Mi nɔ ɖɔ nyi sa émí kannumɔ ɖɔhun, bó ná sɔ́ akwɛ́ ɔ́ dó sú axɔ́ e un ɖu ɔ́ ná. É nyɔ́, mi bo ɖɔ mɛ e un sa mi xá ɔ́ nú mì. Ényí un sa mi hǔn, nǔ e mi wa nyi do lɛ́ɛ wú wɛ un sa mi; ényí un nya nɔ mitɔn hǔn, hwɛ e mi hu lɛ́ɛ wú wɛ un nya ɛ. Hwenu e un wá ɔ́, étɛ́ wú un ma ka mɔ mɛ ɖěbǔ ǎ? Hwenu e un ɖo mɛ ylɔ́ wɛ ɔ́, étɛ́ wú mɛɖé má ká sɔ nú mì ǎ? Alɔ ce hwe ga ná dó hwlɛ́n mi gán wɛ a? Un ɖó hlɔ̌nhlɔ́n e un ná dó hwlɛ́n mi é ǎ cé? Nyɛ mɛ e nɔ ɖɔ xó kpowun nú xu, bɔ xu nɔ mɛ é, xó kpowun wɛ un nɔ ɖɔ nú tɔsisa bɔ é nɔ́ xú, bɔ hweví lɛ́ɛ nɔ́ ba sin kpo bo nɔ kú, bó nɔ́ jɛ nyinyɔ jí. Un hɛn ɔ́, un ná sɔ́ avɔ wiwi cyɔ́n nú jǐnukúnsin, nǔwamɛwu wɛ é dó ɖɔhun.” Xó lómílómí atɔngɔ́ ɔ́ Aklúnɔ Mavɔmavɔ nɔ ɖɔ xó e un ná ɖɔ ɔ́ nú mì, é nɔ́ ɖɔ xó e un ná ɖɔ dó dó wǔsyɛ́n lanmɛ nú mɛ e ma sɔ́ ɖó hlɔ̌nhlɔ́n ǎ é nú mì. É su zǎnzǎn ɔ́, é nɔ́ fɔ́n mì, bónú má ɖótó e, ahwanvú ɖɔhun. Aklúnɔ Mavɔmavɔ hun tó ce, énɛ́ ɔ́, nyi lɔ sɔ́ gbɛ́ ɖɔ un kún ná se xó tɔn ó ǎ; un sɔ́ ɖe afɔ dó gǔdo ǎ. Un jó nɛgbé ce nú mɛ e ɖo xixo mì wɛ lɛ́ɛ, un jó gbakɔ ce nú mɛ e ɖo atán ce sun wɛ lɛ́ɛ. Un jó nukún mɛ ce nú mɛ e ɖo atán tún dó nukún mɛ nú mì wɛ lɛ́ɛ, un ka hɔn nú zun e zun mì wɛ è ɖe lɛ́ɛ ǎ. Aklúnɔ Mavɔmavɔ nɔ wá gɔ́ alɔ nú mì; énɛ́ wú wɛ un ma nɔ mɔ ɖɔ è kó ɖu ɖo jǐ ce ǎ. Un bló nyiɖée ɖó bó syɛ́n awǐnnya ɖɔhun; un tunwun ɖɔ un kún ná ɖu winnyá gbeɖé ó. Mawu Mavɔmavɔ ɖo akpá ce, é ná ɖɔ hwɛ ce jɔ. Mɛ̌ ká ná glá ylɔ́ hwɛ mì? Mɛ ɔ́ ní wá mǐ yi hwɛɖɔtɔ́ nukɔn. Mɛ̌ ká jló ná dó hwɛ mì? Mɛ ɔ́ ní wá. Nǔgbó wɛ, Aklúnɔ Mavɔmavɔ wɛ nɔ wá gɔ́ alɔ nú mì. Mɛ̌ ká ná ɖó hwɛ nú mì? Kɛntɔ́ ce lɛ́ɛ bǐ wɛ ná gbi avɔ e kɔ́súkɔ́sú ɖu é ɖɔhun. Ényí mɛɖé ɖo mi mɛ, bó nɔ́ ɖó sísí nú Mawu Mavɔmavɔ hǔn, mɛ ɔ́ ní nɔ́ ɖótó mɛsɛntɔ́ tɔn. Ényí mɛ ɖé ɖo zɔnlin ɖi wɛ ɖo ablu mɛ, bó má mɔ nukúnnú ɖěbǔ ǎ hǔn, mɛ ɔ́ ní sɔ́ éɖée jó nú Mawu Mavɔmavɔ, é ní gán jɛ Mawu tɔn wú. Mi mɛ e ka flɔ́ myɔ, bó hɛn gǎ e nɔ́ dó nǔ zo lɛ́ɛ ɔ́, nǔ e ɖo te kpɔ́n mi ɔ́ ɖíe: myɔ e mi flɔ́ é kpó gǎ e mi hɛn lɛ́ɛ kpó wɛ Mawu sɔ́ ɖó te nú mi. Wǔvɛ́ mɛ wɛ mi ná kú dó. Mawu Mavɔmavɔ ɖɔ: “Mi mɛ e ɖo hwlɛngán ba wɛ nukún myámyá lɛ́ɛ, mi mɛ e ɖo biba ná tunwun mì wɛ lɛ́ɛ mi, mi ɖótó mì. Mi kpɔ́n só e mɛ è kun mi sín é, mi kpɔ́n awǐnnyakan e mɛ è dɔn mi sín é: Mi kpɔ́n tɔ́ mitɔn Ablaxámu ɔ́, bó kpɔ́n Sala e ji mi é. Ablaxámu ɔ́, é ɖó vǐ ɖě cóbónú un ylɔ́ ɛ ǎ. Lo ɔ́, un kɔn nyɔ̌ná dó jǐ tɔn, bó sɔ́ ɛ dó ɖó tɔ́ nú togun wɔ̌buwɔ́bú ɖé.” Sinyɔ́ɔ sín nǔ blá wǔ nú Mawu Mavɔmavɔ. Lě e to ɔ́ bǐ gba gbɔn é blá wǔ n'i; fí énɛ́ e nyí akúgbéjí ɔ́, é ná zé dó húzú jikpá Edɛ́ni tɔn. Ayǐkúngban xúxú énɛ́ ɔ́, é ná zé dó húzú jikpá Mawu Mavɔmavɔ tɔn, bɔ xomɛ ná nɔ́ hun mɛ ɖo fínɛ́, è nǎ nɔ́ j'awǎ ɖo fínɛ́, bó ná nɔ́ ji han dó kpa susu nú Mawu, bó ná nɔ́ xo nǔ tɛnmɛ tɛnmɛ. Mawu ɖɔ: “Mi togun ce e mi, mi ɖótó mì. Mi akɔta ce e mi, mi ɖótó ganjí: nyi wɛ ná ná sɛ́n e è nǎ xwedó e, bɔ nǔ wa ɖó sɛ́nxwi jí e un ɖó ayǐ ɔ́ ná nyí wěziza nú togun lɛ́ɛ. Zaanɖé din ɔ́, un ná hɛn hwlɛngán wá; mɛ bǐ ná mɔ hwlɛngán e un hɛn wá é; un ná kpa acɛ nú togun lɛ́ɛ bɔ é ná syɛ́n ɖésú. Togun e gbɔn zɔzɔ lɛ́ɛ ná ɖo nukún ɖó mì wɛ, yě ná ɖeji dó hlɔ̌nhlɔ́n e un nɔ dó hwlɛ́n mɛ ná é wú. Mi kpɔ́n jǐxwé aga dɔ̌n sɛ́ dó; mi kpɔ́n do, bó kpɔ́n ayǐkúngban ɔ́; jǐnukúnsin ná kɛn azizɔ ɖɔhun, ayǐkúngban ná gbi avɔ ɖɔhun, bɔ mɛ e ɖo ayǐkúngban ɔ́ jí lɛ́ɛ ná kɔn nyi ayǐ sukpɔ ɖɔhun; amɔ̌, hwlɛngán e un ná hɛn wá ɔ́ ná nɔ ayǐ káká sɔ́yi; hwɛjijɔ ce ná ɖó dogbó ǎ. Mi ɖótó mì, mi mɛ e tunwun nǔ e nyí nǔ wa ɖó sɛ́nxwi jí lɛ́ɛ, mi mɛ e hɛn sɛ́n ce dó ayi mɛ lɛ́ɛ, mi ɖótó mì. Mi ma ɖi xɛsi nú zun e gbɛtɔ́ lɛ́ɛ ná zun mi é ó; mi ma nú zun yětɔn ɖɔ nǔɖé nú mi ó. Đó nǔ e gbo sɛ́davɔ e kɔ́súkɔ́sú ɖu ɔ́ wɛ ná gbo yě. Amɔ̌, hwlɛngán e un ná hɛn wá ɔ́ ná nɔ te káká sɔ́yi, hwlɛngán ce ná nɔ te káká yi gbɛ mavɔ mavɔ.” Mawu Mavɔmavɔ, fɔ́n, yǎ wǔ fɔ́n! Đe hlɔ̌nhlɔ́n towe xlɛ́! Fɔ́n lě e a fɔ́n gbɔn ɖ'ayǐ é, lě e a fɔ́n gbɔn xóxó hwenu é! É má nyí hwi wɛ hu Hlaxávu a? É má nyí hwi wɛ hu nǔdábaɖa xu mɛ tɔn ɔ́ a? É má nyí hwi wɛ ɖe gbe bɔ xu mɛ a? É má nyí hwi wɛ ɖe gbe bɔ agbetawoyó mɛ a? É má nyí hwi ɖokpó ɔ́ wɛ ɖe ali gbɔn xuzan mɛ, bɔ mɛ e a hwlɛ̌n gán lɛ́ɛ gbɔn mɛ a? Mawu Mavɔmavɔ ná hwlɛ́n mɛ e nyí étɔn lɛ́ɛ gán, bɔ yě ná lɛ́ kɔ wá Jeluzalɛ́mu, yě ná byɔ́ toxo ɔ́ mɛ kpó awǒbóbó kpó, yě ná ɖo awǎjijɛ mɛ tɛgbɛ, yě ná ɖo xomɛhunhun kpó awǎjijɛ kpó mɛ hwebǐnu, bɔ azɔnwinwɛn kpó nǔ linlin kpó ná gosín gbɛzán yětɔn mɛ. Mawu ɖɔ: “Nyi wɛ nɔ dó wǔsyɛ́n lanmɛ nú mi; nyi wɛ nɔ bló mɔ̌; togun ce, étɛ́wú a ka nɔ ɖi xɛsi nú gbɛtɔ́? Gbɛtɔ́ bǐ wɛ nɔ́ kú; gběhan gbɛ mɛ wɛ yě ɖe. A wɔn nyɛ Mawu Mavɔmavɔ e bló we é; nyɛ Mawu Mavɔmavɔ e vlɔ́n jǐnukúnsin ɔ́, bó ɖó ayǐkúngban ɔ́ ayǐ ɔ́, a wɔn mì. A nɔ ɖo sísɔ́sísɔ́ wɛ hwebǐnu, ɖó adǎn e jí mɛ e ɖo acɛ gannaganna kpa nú we wɛ lɛ́ɛ ɖe ɔ́ wú, ɖi nǔ yě kó sɔ́ nǔ bó ja gbɛ gblé dó nú we gbé ɖɔhun. Adǎn e jí yě ɖe ɔ́, fítɛ́ adǎn ɔ́ ká ɖe? Đo malín málín mɛ din ɔ́, gantɔ́ e dó tagba ná wɛ è ɖe ɔ́ ná jɛ te. É ná kú dó gankpá mɛ ǎ; é ká sɔ́ ná ba nǔɖuɖu kpo ɖě ǎ. Nyɛ Mawu Mavɔmavɔ ɔ́, nyɛ wɛ nyí Mawu towe. Nyɛ wɛ nɔ sɔ́ xu sí te; nyɛ wɛ nɔ ɖe gbe bɔ xu nɔ dó gbe. Nyǐkɔ ce wɛ nyí Mawu Mavɔmavɔ Nǔbǐwúkpétɔ́. Nyɛ wɛ sɔ́ xó ce dó nu towe mɛ; nyɛ wɛ cyɔ́n alɔ jǐ we; nyɛ wɛ vlɔ́n jǐnukúnsin; nyɛ wɛ ɖó ayǐkúngban ɔ́ ayǐ; nyɛ wɛ ɖɔ nú Jeluzalɛ́mu ɖɔ é wɛ nyí togun ce.” Jeluzalɛ́mu, fɔ́n! Fɔ́n, sí te! Mawu Mavɔmavɔ ná xomɛsin tɔn we dó kɔ́fu mɛ bɔ a nu; a nu káká bó lólwé nu. A nu káká bɔ nukún towe mɛ gbá zǐn. Vǐ e a ji lɛ́ɛ ɖě xlɛ́ ali we ǎ. Vǐ e a hɛn bɔ yě su lɛ́ɛ ɖokpó hɛn sɔ we ǎ. Awě lɛ́ɛ xo we webɔ webɔ: è gba to towe bó bɛ́ nǔ e ɖ'é mɛ lɛ́ɛ bǐ. Adɔ kpó ahwan kpó hu mɛ e ɖo to towe mɛ lɛ́ɛ. Adǎn lɛ́ɛ nɛ́ gbo we nɛ́, bɔ mɛ̌ ká ná dó gbɔ nú we? Mɛ̌ ná dó wǔsyɛ́n lanmɛ nú we? Vǐ towe lɛ́ɛ ɖo ayǐmlɔ́mlɔ́ gbɔn ali kpá ali kpá; yě cí agbanlín e ɖo fɛ́ca mɛ é ɖɔhun; yě sɔ́ ɖó hlɔ̌nhlɔ́n ɖě ǎ; xomɛsin Mawu Mavɔmavɔ tɔn wɛ ɖo nǔ wa xá yě wɛ; adǎn e Mawu gblɔ́n nú yě ɔ́ wɛ ɖo nǔ dó sin xá yě wɛ. Din ɔ́, ɖǒtó, Jeluzalɛ́mu gbɛbláwǔnánɔ, hwi mɛ e ma nu ahan ǎ, bɔ ahan ka mú we é. Xó e Aklúnɔ towe, Mawu Mavɔmavɔ, Mawu towe e nɔ́ jɛ hun dó togun tɔn jí ɔ́ ɖɔ ɔ́ ɖíe: “Un ná yí kɔ́fu e ɖo alɔ towe mɛ, bɔ nukún towe mɛ nɔ́ gbá zǐn é sín así we; kɔ́fu e mɛ xomɛsin ce ɖe é, bɔ a sɔ́ ná nu ɖě ǎ. Un ná sɔ́ kɔ́fu ɔ́ dó alɔ mɛ nú mɛ e ɖo ya dó nú we wɛ lɛ́ɛ, mɛ e nɔ ɖɔ nú we ɖɔ: ‘Mlɔ̌ ayǐ nú mǐ ná gbɔn jǐ we.’ Bɔ a nɔ sɔ́ nɛgbé towe dó húzú ayǐkúngban bɔ yě nɔ́ gbɔn jí lɛ́ɛ; a nɔ sɔ́ nɛgbé towe dó húzú ali bɔ yě nɔ́ gbɔn jí.” Jeluzalɛ́mu fɔ́n, yǎ wǔ fɔ́n! Đe hlɔ̌nhlɔ́n towe xlɛ́! Sinyɔ́ɔ, toxo mímɛ́, dǒ nǔzínzán towe e nyɔ́ ɖɛkpɛ hú ɖě lɛ́ɛ bǐ é, ɖó toɖévomɛnu ɖě sɔ́ ná tɛ afɔ to towe mɛ ǎ; mɛ blíblí ɖě sɔ́ ná tɛ afɔ toxo towe mɛ ǎ. Jeluzalɛ́mu, fɛ́ kɔ́ e ɖo wǔ we ɔ́ síin; Jeluzalɛ́mu, sí te bo yi tɛn towe mɛ. Gantɔ́ Sinyɔ́ɔ tɔn, tún kan nǔ hwiɖée, tun kan e è dǒ kɔ nú we é! Xó e Mawu Mavɔmavɔ ɖɔ nú togun tɔn ɔ́ ɖíe: “Hwenu e un sa kannumɔ mitɔn ɔ́, un yí akwɛ́ ǎ; mɔ̌ ɖokpó ɔ́, hwenu e un ná vɔ́ gbɛ mitɔn xɔ ɔ́, un ná ná fánlan ɖokpó ǎ.” Aklúnɔ Mavɔmavɔ ɖɔ: “Ejípu wɛ togun ce to yi hwɛ̌, bó yi nɔ dɔ̌n. Ée é wá yá ɔ́, Asilíinu lɛ́ɛ ká nɔ yǎyá mɔ̌ bó dó tagba nú togun ce. Nǔ e ká ɖo jijɛ wɛ din ɔ́, étɛ́ un ka mɔ ɖ'é mɛ? È kplá togun ce yi kannumɔgbénu ma ná nǔ ɖěbǔ mì. Mɛ e ɖo acɛ gannaganna kpa n'i wɛ lɛ́ɛ mɔ ɖɔ émí ɖu ɖ'é jí, bó nɔ́ sɔ́ nyǐkɔ ce dó nɔ acakpo jí hwebǐnu. Énɛ́ ɔ́ wú wɛ togun ce ná wá tunwun mɛ e un nyí é gbe ɖokpó. É ná wá tunwun ɖɔ nyɛ wɛ nyí mɛ e ɖɔ un jǎwe é.” È mɔ mɛ e hɛn wɛn ɖagbe ɖé jǎwe ɔ́ ɖo só jí ɔ́, é nɔ́ nyɔ́ kpɔ́n mɛ! É nɔ́ wá dó fífá wɛn, nyɔ̌ná wɛn, bó nɔ́ dó hwlɛngán wɛn; é nɔ́ ɖɔ nú Sinyɔ́ɔ ɖɔ: “Mawu towe wɛ nyí axɔ́sú.” Din ɔ́, ɖǒtó mɛ e a sɔ́ bɔ yě ɖo mɛ cɔ́ wɛ lɛ́ɛ! Yě bǐ ɖó gbe kpɔ́ bo sú xó kpó awǎjijɛ kpó, ɖó yě ɖésú mɔ Mawu Mavɔmavɔ kpó nukún yětɔn kpó, bɔ é jǎwe Sinyɔ́ɔ. Dǒglin Jeluzalɛ́mu tɔn lɛ́ɛ mi, mi sú xó bó j'awǎ, ɖó Mawu Mavɔmavɔ ɖo wǔsyɛ́n dó lanmɛ nú togun tɔn wɛ. É ɖe Jeluzalɛ́mu sín mɛ kannu. Mawu Mavɔmavɔ ɖe hlɔ̌nhlɔ́n mímɛ́ tɔn xlɛ́ ɖo akɔta lɛ́ɛ bǐ nukɔn; akɔta lɛ́ɛ bǐ ná mɔ lě e Mawu mǐtɔn nɔ́ hwlɛ́n mǐ gán gbɔn é; yě ná mɔ káká yi fí e gbɛ ɔ́ kponu ɖó é. Mi mɛ e lɛ́ kɔ nú nǔ e è nɔ zán sinsɛn hwenu lɛ́ɛ sín Babilɔ́nu xwe Jeluzalɛ́mu lɛ́ɛ ɔ́, mi ɖidó, mi gosín Babilɔ́nu, mi yá wǔ; mi ma ɖ'alɔ nǔ kwíji ɖěbǔ wú ó. Mi hɛn miɖée ɖó mǐmɛ́ jí bó tɔ́n sín fí. Din ɔ́, midɛɛ lɛ́ɛ ɔ́, é sɔ́ nyí ɖɔ mi gosín to ɔ́ mɛ, mɛ e ahwan nya é ɖɔhun ǎ; mi zɔn adohu adohu jí bó xweyǐgbe ǎ, ɖó Mawu Mavɔmavɔ, Mawu Izlayɛ́li tɔn ɔ́ wɛ ɖo nukɔn nú mi, bó ɖo gǔdo nú mi. Xó lómílómí ɛnɛgɔ́ ɔ́ Mawu ɖɔ: “Mɛsɛntɔ́ ce ɔ́, nǔ e é ná bló lɛ́ɛ bǐ wɛ ná zɔn n'i, bɔ é ná xɔ susu dó susu jí. Mɛ e mɔ mɛsɛntɔ́ ce lɛ́ɛ é gěgé wɛ sú alɔ nukún mɛ. Nukún mɛ tɔn wɛ è hɛn gblé sɔ mɔ̌; a mɔ ɛ ɖo te ɔ́, a sɔ́ ná tunwun ɖɔ gbɛtɔ́ wɛ ǎ. Amɔ̌, din ɔ́, xó tɔn kpácá togun gěgé; axɔ́sú lɛ́ɛ sɔ́ ná tunwun nǔ e yě ná ɖɔ ɖo nukɔn tɔn é ǎ, ɖó nǔ e mɔ wɛ yě ɖe ɔ́ gbɔn vo nú nǔ e è ɖɔ nú yě ɔ́. Nǔ e kpɔ́n wɛ yě ɖe é kpó nǔ e yě se ɔ́ kpó nyí nǔ ɖokpó ɔ́ ǎ.” Mɛ̌ ka ɖo mǐ mɛ bó ɖi nǔ nú xó e mǐ se é? Mɛ̌ Mawu Mavɔmavɔ ka ɖe hlɔ̌nhlɔ́n tɔn xlɛ́? Đó mɛsɛntɔ́ Mawu Mavɔmavɔ tɔn su ɖo nukɔn tɔn, lě e nǔɖé nɔ́ wú kpowun é ɖɔhun, lě e atín ɖé nɔ́ tɔ́n kun sín ayǐkúngban xúxú mɛ é ɖɔhun. Đɛkpɛ ɖé wɛ é nyɔ́, abǐ nyɔ̌ wɛ é nyɔ́ kpɔ́n, bónú è nǎ bɔ nukún nyi wǔ tɔn ǎ. É ká ɖó nǔɖé bɔ é ná dɔn mɛ, nú è nǎ kpɔ́n ɛ ǎ. Mɛ bǐ nɔ́ hu tɛ́ n'i bó jó e dó. É nyí mɛ ɖé bó mɔ wǔvɛ́ bó ji ya bɔ é kó dó étɔn; é cí mɛ e sín jɛ jí mɛɖé má nɔ́ ba ná kpɔ́n ǎ é ɖɔhun. Mǐ nɔ́ hu tɛ́ n'i, mǐ sɔ́ ɛ dó mɔ nǔɖé ǎ. Nǔ ɖo mɔ̌ có, ya mǐtɔn lɛ́ɛ sín agban wɛ é ɖíɖá, wǔvɛ́ e mǐ ná mɔ lɛ́ɛ mɛ wɛ é dó kɔ, bɔ mǐdɛɛ lɛ́ɛ ká vɛdó ɖɔ Mawu wɛ dɔn tó n'i sín, mǐ vɛdó ɖɔ Mawu sín alɔ wɛ jɛ wǔ tɔn bó dó winnyá ɛ sín. Lo ɔ́, hwɛ mǐtɔn lɛ́ɛ wú wɛ è gblě wǔ i; nǔwanyido mǐtɔn lɛ́ɛ hu i dó anyǔ mɛ. Tódɔnnúmɛ e ná fífá mǐ ɔ́, é wɛ è dɔn ná, bɔ wǔ e è gblě e ɔ́ gbɔ azɔn nú mǐ. Mǐ bǐ wɛ ɖo flúflú wɛ lɛ̌ngbɔ́ e bú é ɖɔhun, mɛ ɖokpó ɖokpó mlɛ́ ali e jló e é, Mawu Mavɔmavɔ ka ɖíɖá ɛ hwɛgban mǐ bǐ tɔn. È dǒ tagba n'i, è táfú i, é ká kɛ nu ǎ; é kɛ nu ǎ lɛ̌ngbɔ́ví e è kplá xwe lanhutɛn é ɖɔhun; é kɛ nu ǎ lɛ̌ngbɔ́ e kpa fún ná wɛ è ɖe é ɖɔhun. È wlǐ i, bó ɖɔ hwɛ xá ɛ, bó bú i. Mɛ ɖé ká sɔ́ dó ga nú nǔ énɛ́ e gbo e ɔ́ ǎ. Hwɛ e togun tɔn hu ɔ́ wɛ zɔ́n bɔ è ɖe e sín gbɛ ɔ́ mɛ, è hu i. È ɖi i dó mɛdídá lɛ́ɛ tɛ́ntin, yɔdo tɔn ɖo dɔkunnɔ lɛ́ɛ tɛ́ntin, có é xo dǎka ɖě ǎ, è ká se adingbanxó ɖo nu tɔn kpɔ́n ǎ. Amɔ̌, Mawu Mavɔmavɔ sɔ́ wǔvɛ́ dó dó ya nú mɛsɛntɔ́ tɔn bɔ é vɛ́ jlɛ́; ényí é sɔ́ éɖée dó sá hwɛsɔ́kɛmɛvɔ́ ná ɔ́, é ná ɖó vǐ. Mɛsɛntɔ́ tɔn ná ɖó vǐ bó ná lɛ́ nɔ gbɛ káká. É jí wɛ Mawu Mavɔmavɔ ná gbɔn bó ná bló nǔ e é to lɛ́ɛ. Mawu ɖɔ: “Mɛsɛntɔ́ ce ji ya tobutóbú énɛ́ lɛ́ɛ mɔ̌ ɔ́, é ná wá mɔ wěziza; nǔ ná nyɔ́ n'i káká. Mɛsɛntɔ́ ce ɔ́, hwɛjijɔnɔ nǔgbó ɔ́ ná sɔ́ mɛ gěgé dó húzú hwɛjijɔnɔ, ɖó é wɛ ɖíɖá hwɛgban yětɔn. Énɛ́ wɛ zɔ́n bɔ un sɔ́ ɛ ɖó mɛ klogǎnklogǎn lɛ́ɛ há jí, é kpó mɛ e syɛ́n lɛ́ɛ kpó wɛ ná má nǔ e è hɛn sín ahwangbénu wá lɛ́ɛ, ɖó é sɔ́ éɖée hwe káká bó kú; é sɔ́ éɖée ɖó nǔ nyanyawatɔ́ lɛ́ɛ mɛ. É ɖíɖá hwɛgban mɛ gěgé tɔn, é sa vo dó hwɛhutɔ́ lɛ́ɛ tamɛ.” Jeluzalɛ́mu, hwi mɛ e nyí wɛnsinɔ ɔ́, hwi mɛ e ma ji vǐ kpɔ́n ǎ ɔ́, hwi mɛ e ma mɔ wǔvɛ́ ɖo ajidonu kpɔ́n ǎ ɔ́, sú xó bó j'awǎ. Đó Mawu Mavɔmavɔ ɖo ɖiɖɔ nú we wɛ ɖɔ: “Hwi mɛ e asú towe gbɛ́ we ɔ́, a nǎ ɖó vǐ hú nyɔ̌nu e ɖo asúxwé é.” Énɛ́ ɔ́ wú ɔ́, gblǒ ada nú goxɔ towe; vlɔ̌n goxɔ towe sín avɔ lɛ́ɛ ganjí, ma ɖɔ avɔ lɛ́ɛ vɛ́ axi ó. Nyi xɔkan towe ní ɖi ga, xwe só towe lɛ́ɛ ganjí. Đó a nǎ gbló ada yi ɖisí amyɔ; vǐ towe lɛ́ɛ ná yí to e ɖo akpá towe lɛ́ɛ. Yě ná gba kpé toxo towe e mɛ mɛɖé má sɔ́ ɖe ǎ lɛ́ɛ mɛ. Ma ɖi xɛsi ó, a sɔ́ ná ɖu winnyá ɖě ǎ; ayi towe ní má gbadó ó, wi towe sɔ́ ná kɔ́n ɖě ǎ. Winnyá e a ɖu ɖo wǐnnyáwínnyá mɛ ɔ́, a nǎ wɔn; hɛ̌n e a ɖu hwenu e a ɖo asúkúkúxɔmɛ ɔ́, a sɔ́ ná flín ɖě ǎ. Đó mɛ e ɖó we é wɛ ná nyí asú nú we, Mawu Mavɔmavɔ Nǔbǐwúkpétɔ́ wɛ nyǐkɔ tɔn nyí, Mɛ mímɛ́ Izlayɛ́li tɔn ɔ́ wɛ vɔ́ gbɛ towe xɔ. Mawu wɛ̌kɛ́ ɔ́ bǐ tɔn wɛ nyǐkɔ tɔn nyí. Aluwɛ ɖaxó ɖé mɛ wɛ a ɖe nyɔ̌nu e asú gbɛ́ ɔ́ ɖɔhun, lo ɔ́, Mawu Mavɔmavɔ lɛ́ vɔ́ ylɔ́ we. Mawu towe ɖɔ: “Nyɔ̌nu e è da ɖo wǐnnyáwínnyá mɛ ɔ́, è ka sixú gbɛ́ ɛ nǔgbó cé? Un jó we dó nú hwenu kpɛví ɖé; amɔ̌, un ná lɛ́ yí we ɖó wǎn yíyí ɖaxó e un ɖó nú we ɔ́ wú. Xomɛ ɖaxó ɖé wɛ un sin dó we, bó gbɛ́ ɖɔ un kún ná mɔ we ó nú hwenu kpɛví ɖé. Amɔ̌, din ɔ́, ɖó wǎn yíyí ma ɖó dogbó e un ɖó ɔ́ wú ɔ́, un ná kú nǔbláwǔ nú we; nyɛ Mawu Mavɔmavɔ e vɔ́ gbɛ towe xɔ ɔ́ wɛ ɖɔ mɔ̌ nú we. Égbé din ɔ́, un ná wa nǔ lě e un wa nǔ gbɔn ɖo Nɔwée hwenu é; hwenɛ́nu ɔ́, un dó akpá ɖɔ tɔ ɖě kún sɔ́ ná gba ayǐkúngban ɔ́ gbeɖé ó. Mɔ̌ ɖokpó ɔ́, un dó akpá ɖɔ un kún sɔ́ ná sin xomɛ dó we gbeɖé kpɔ́n ó, un kún sɔ́ ná dó ya nú we gbeɖé ó. Ényí só ɖaxó ɖaxó lɛ́ɛ ná bó húnhún ɔ́, só kpɛví kpɛví lɛ́ɛ ná bó sɛ tɛn ɔ́, wǎn yíyí e un ɖó nú we ɔ́ ná húzú gbeɖé ǎ. Akɔ e un jɛ xá we bɔ nǔ ná nyɔ́ nú we ɔ́ ná húzú gbeɖé ǎ. Nyɛ Mawu Mavɔmavɔ wɛ ɖɔ mɔ̌ nú we, nyɛ mɛ e yí wǎn nú we ɔ́ wɛ ɖɔ mɔ̌ nú we.” Mawu ɖɔ: “Jeluzalɛ́mu gbɛ̌dónánɔ, jɔhɔn ɖaxó ɖé ɖo dǐndán we wɛ; mɛ ɖé ka ɖe bó ná dó wǔsyɛ́n lanmɛ nú we ǎ. Nyɛ Mawu Mavɔmavɔ ɔ́, un ná vɔ́ we gbá kpó awǐnnya ɖagbe ɖagbe kpó. Awǐnnya safíi wɛ un ná dó dó dǒ towe do. Awǐnnya hwlibí wɛ ná ɖo dǒ towe lɛ́ɛ jí aga, awǐnnya wěkpɛ́n ɖɔhun ɖé wɛ un ná sɔ́ dó bló hɔn towe lɛ́ɛ, bó ná sɔ́ awǐnnya xɔ akwɛ́ ɖé lɛ́ɛ dó mɛ ahohó lɛ́ lɛ̌ dó we. Un ná kplɔ́n nǔ vǐ towe lɛ́ɛ bǐ; yě bǐ ná vo bɔ nǔ ná nyɔ́ nú yě tawun. A nǎ nɔ́ xwedó hwɛjijɔ dó wa nǔ; mɛ ɖěbǔ sɔ́ ná dó tagba nú we ǎ; a sɔ́ ná ɖi xɛsi nú nǔɖé ǎ; mɛ ɖěbǔ sɔ́ ná nɔ́ dó adohuhu nú we ǎ; ado sɔ́ ná hu we ǎ. Ényí è nǎ wá tɔ́n ahwan we ɔ́, é ná gosín nyɛ gɔ́n ǎ. Mɛ ɖěbǔ tɔ́n ahwan we ɔ́, é ná jɛ ayǐ ɖo nukɔn towe. A mɔ a? Nyɛ wɛ ɖó fletuntɔ́, éyɛ́ mɛ e nɔ flɔ́ akán bó nɔ́ tun alǐnnyánú tɛnmɛ tɛnmɛ lɛ́ɛ ɔ́, nyɛ wɛ ɖó e. Nyi wɛ lɛ́ ɖó gbɛtɔ́ e hɛn ɔ́, é ná hɛn alǐnnyánú énɛ́ lɛ́ɛ gblé é. Alǐnnyánú e è nǎ tun bó ná sɔ́ dó jǐ we ɔ́ ɖě ná wa nǔtí nú we ǎ. Mɛ ɖé kɛ nu bó dó hwɛ we ɔ́, a nǎ ɖe xlɛ́ mɛ ɔ́ ɖɔ éyɛ́ wɛ hu hwɛ. Nǔ e un sɔ́ ɖ'ayǐ nú mɛ e nyí mɛsɛntɔ́ ce lɛ́ɛ é nɛ́. Nǔ e yě ɖó acɛ ná bɔ un sɔ́ ɖ'ayǐ nú yě ɔ́ nɛ́. Xó e nyɛ Mawu Mavɔmavɔ ɖɔ ɔ́ nɛ́.” Mawu ɖɔ: “Mi mɛ e kɔ xú lɛ́ɛ mi, sin ɖíe, mi bǐ ní wá! Mi na bo ma ɖó akwɛ́ ǎ hǔn, mi wá. Mi wá yí nǔɖuɖu; vɔ̌nu wɛ. Mi wá yí vɛ̌ɛn kpó nyibúnɔ́sin kpó. É byɔ́ ɖɔ mi na hɛn akwɛ́ ǎ, é ká byɔ́ ɖɔ mi ná sú axɔ́ ǎ. Étɛ́wú mi ka nɔ zán akwɛ́ mitɔn dó nǔ e má nyí nǔɖuɖu ǎ é mɛ? Étɛ́wú mi ka nɔ jɛ tagba dó nǔ e má nɔ gɔ́ xo ǎ é tamɛ? Mi bo ɖótó mì ganjí, énɛ́ ɔ́, mi ná mɔ nǔ ɖagbe ɖu; mi ná ɖu nǔɖuɖu e víví ganjí é. Mi ɖótó te, mi wá gɔ̌n ce. Mi ɖótó mì, bó ná nɔ gbɛ.” Mawu ɖɔ: “Un ná jɛ akɔ mavɔ mavɔ ɖokpó xá mi; un ná bló mɔ̌, bó ná dó hɛn ɖagbe e sín akpá un dó nú Davídi é ɖó te káká sɔ́yi. Đó Davídi wɛ un sɔ́, bɔ é nyí acɛkpikpa ce sín kpɔ́ndéwú nú togun lɛ́ɛ; é wɛ un sɔ́ bɔ é nyí gǎn, bó kpa acɛ nú togun lɛ́ɛ. Izlayɛ́li, a nǎ ylɔ́ akɔta e a ma tunwun ǎ ɔ́, bɔ akɔta e ma tunwun we ǎ ɔ́ ná bɛ́ wezun wá gɔ̌n towe. É ná wá ɖó nyɛ Mawu Mavɔmavɔ, Mawu towe wútu, é ná wá ɖó nyɛ Mɛ mímɛ́ Izlayɛ́li tɔn e nɔ sɔ́ we su ɔ́ wú.” Mi ba Mawu Mavɔmavɔ din e è hɛn ɔ́, è nǎ mɔ ɛ é. Mi ylɔ́ ɛ din e é yá dó mi é. Mɛdídá lɛ́ɛ ní jó walɔ nyanya dó, mɛ nyanya lɛ́ɛ ní jó linlin baɖabaɖa dó. Yě bǐ ní lɛ́ kɔ wá Mawu Mavɔmavɔ gɔ́n, ɖó é ná kú nǔbláwǔ nú yě. Yě bǐ ní wá Mawu mǐtɔn gɔ́n, ɖó Mawu mǐtɔn ɔ́, hwɛsɔ́kɛmɛ nɔ cikɔ n'i ǎ. Mawu Mavɔmavɔ ɖɔ: “Linlin mitɔn lɛ́ɛ nyí linlin ce lɛ́ɛ ǎ. Walɔ mitɔn lɛ́ɛ nyí walɔ ce lɛ́ɛ ǎ. Lě e jǐxwé yi jǐ hú ayǐkúngban sɔ ɔ́, mɔ̌ wɛ walɔ ce lɛ́ɛ yi jǐ hú walɔ mitɔn lɛ́ɛ sɔ. Mɔ̌ ɖokpó ɔ́ wɛ linlin ce lɛ́ɛ yi jǐ hú linlin mitɔn lɛ́ɛ sɔ. Jǐ nɔ́ ja sín jǐxwé, laglási linfín nɔ́ ja sín jǐxwé; yě ɖě ká nɔ́ lɛ́ lɛ́ kɔ yi ma wa nǔ e gbé yě tɔ́n é ǎ: yě nɔ́ hú sin nú ayǐkúngban ɔ́ bɔ nǔ nɔ́ nyɔ́ ɖ'é jí; énɛ́ ɔ́, è nɔ mɔ jinukún bó nɔ́ dó, bó nɔ́ mɔ nǔ bó nɔ́ ɖu. Mɔ̌ ɖokpó ɔ́, xó e nɔ́ tɔ́n sín nu ce mɛ ɔ́ nɔ́ lɛ́ kɔ wá gɔ̌n ce agba ǎ; é nɔ́ bló nǔ e un lɛ́n é, é nɔ́ bló nǔ e gbé un sɛ́ ɛ dó é.” Awǎjijɛ mɛ wɛ mi ná gosín Babilɔ́nu, vivo mɛ wɛ è nǎ kplá mi wá to mitɔn mɛ. Mi ɖo dǐndín wɛ ɔ́, só ɖaxó ɖaxó lɛ́ɛ kpó kpɛví kpɛví lɛ́ɛ kpó ná nɔ́ ɖo awǎ jɛ wɛ. Atín e ɖo gběhan mɛ lɛ́ɛ bǐ ná nɔ́ xo kpɛ́ nú mi. Énɛ́ ɔ́, fí e wunkan ɖe ɔ́, siplɛ́tín ná wú ɖo fínɛ́. Fí e atín wunnɔ ɖe ɔ́, ama wǎnɖagbenɔ ná wú ɖo fínɛ́; nǔ énɛ́ lɛ́ɛ bǐ ná jɛ bɔ è nǎ sɔ́ Mawu Mavɔmavɔ sín nyǐkɔ su; é ná nyí wuntun ɖé bó ná súnsún gbeɖé ǎ. Xó e Mawu Mavɔmavɔ ɖɔ ɔ́ ɖíe: “Mi bló nǔ e sɔgbe é, bó nɔ́ xwedó hwɛjijɔ, ɖó hwlɛngán e ná hɛn wá wɛ un ɖe ɔ́ kó sɛ yá. Hwɛjijɔ ce ko ɖo kɛ́nnɛ́kɛ́nnɛ́ bó ná ɖe éɖée xlɛ́. Nǔ nyɔ́ nú mɛ e nɔ wa nǔ e un ɖɔ é, mɛ e nɔ ɖó kan d'é wú bó nɔ́ wa é; nǔ nyɔ́ nú mɛ e nɔ nyi gbɔjɛzán ɔ́ ganjí é, mɛ e ma nɔ lɔn bo nɔ wa nǔ nyanya ɖěbǔ ǎ é.” Mɛ e nyí akɔta ɖěvo, bó xwedó Mawu Mavɔmavɔ ɔ́ má lɛ́n ɖɔ Mawu Mavɔmavɔ ná ɖe émí sín togun tɔn mɛ jɛ́n wɛ ó. Mɛ e nyí agooɖojǐe ɔ́ má ká ɖɔ: “Nyɛ ɔ́, atín xúxú ɖé kpowun wɛ un nyí” ó. Đó xó e Mawu Mavɔmavɔ ɖɔ ɔ́ ɖíe: “Agooɖojǐe e nɔ nyi gbɔjɛzán ce lɛ́ɛ ganjí, bó nɔ́ wa nǔ e nɔ́ nyɔ́ nukún ce mɛ lɛ́ɛ, bó sɔgbe xá akɔ e un jɛ xá togun ce ɔ́, un ná tun awǐnnya ɖokpó te ɖo xwé ce gbe, bó ná wlán nyǐkɔ yětɔn d'é wú; énɛ́ ɔ́ ná xɔ akwɛ́ nú yě hú vǐ súnnu kpó nyɔ̌nu kpó. Nyǐkɔ e un ná ná yě ɔ́ ná nɔ te káká sɔ́yi, é ná súnsún gbeɖé ǎ.” Jǒnɔ ɖé lɛ́ɛ tíin bó xwedó Mawu Mavɔmavɔ; yě nɔ́ sɔ́ ɛ su, yě yí wǎn n'i, mɛsɛntɔ́ tɔn wɛ yě nyí; mɛ énɛ́ lɛ́ɛ ɔ́, xó e Mawu Mavɔmavɔ ɖɔ dó yě wú ɔ́ ɖíe: “Mɛ e nɔ nyi gbɔjɛzán ɔ́ ganjí lɛ́ɛ ɔ́, mɛ e sɔgbe xá akɔ e un jɛ xá togun ɔ́ lɛ́ɛ ɔ́, un ná kplá yě bǐ wá só mímɛ́ ce jí; un ná ná awǎjijɛ ɖaxó ɖé yě ɖo xwé ce gbe, fí e è nɔ xo ɖɛ ɖe é. Un ná yí vɔ̌ e yě ná sá nú mì ɖo vɔ̌sákpe ce jí lɛ́ɛ, kpódó nǔ e yě ná ná mì lɛ́ɛ kpó. Đó xwé ce ɔ́, è nǎ ylɔ́ ɖɔ: ‘Đɛxwé togun lɛ́ɛ bǐ tɔn.’ ” Aklúnɔ Mavɔmavɔ e kplé Izlayɛ́li ví e gbadó gbɔn to ɖěvo mɛ to ɖěvo mɛ lɛ́ɛ ɔ́ ɖɔ: “Un ko kplé mɛ ɖé lɛ́ɛ gɔ́ nú yě, un ka ná lɛ́ kplé mɛ ɖěvo lɛ́ɛ gɔ́ nú yě.” Mi gběkanlin lɛ́ɛ mi, mi bǐ ní wá, mi kanlin e ɖo zunkan mɛ lɛ́ɛ mi, mi wá ba nǔ ɖu. Mɛ e ɖo Izlayɛ́li cɔ́ wɛ lɛ́ɛ ɔ́, yě bǐ wɛ nyí wunvanɔ; yě nɔ́ tunwun nǔɖé gbeɖé ǎ. Cukú e ma nɔ hun nu ǎ é wɛ nú yě; yě nɔ́ sixú hó nǔ ǎ. Ayǐ wɛ yě nɔ́ mlɔ́ bó nɔ́ ɖo dlɔ̌ kú wɛ; kɔmlɔgɔ́ wɛ yě yí wǎn ná, bó nɔ́ sa. Cukú wɛ nú yě; nǔ e yě mɔ ɔ́ bǐ wɛ yě nɔ́ vún ɖu; nǔɖuɖu nɔ́ kpé yě gbeɖé ǎ. Nǔ ɖo mɔ̌ bɔ yě ká ɖo togun ce nu; yě tunwun ɖagbe ɖo nyanya mɛ ǎ; nǔ e jló yě lɛ́ɛ kɛ́ɖɛ́ wɛ yě nɔ́ bló; mɛ ɖokpó ɖokpó nɔ́ ɖo ɖagbe é ɖésúnɔ tɔn ba wɛ; yě ɖě hwe ɖ'é mɛ ǎ. Yě nɔ́ ɖɔ: “Mi wá mǐ nǎ yi nya vɛ̌ɛn gbé, mǐ ná nu ahan syɛ́nsyɛ́n. Lě e égbé tɔn cí ɔ́, mɔ̌ jɛ́n sɔ tɔn ná cí. É kpo ahan kpɔ́ gégé.” Mɛ e nɔ wa nǔ jlɔ́jlɔ́ ɔ́ nɔ kú, mɛɖé ká nɔ́ kanbyɔ́ ǎ. Mɛ e nɔ wa nǔ ɖó sɛ́nxwi jí ɔ́, è nɔ ɖe e síin; mɛdídá lɛ́ɛ nǔwiwa nɛ́. Lo ɔ́, fífá ná wá, bɔ mɛ e nɔ wa nǔ jlɔ́jlɔ́ ɔ́ ná dɔ́ amlɔ tɔn ɖo vivo mɛ. Mawu ɖɔ: “Midɛɛ lɛ́ɛ ɔ́, mi wá fí; azětɔ́ ví e mi, afɔdógbětɔ́ e mi, agalɛtɔ́ e mi, mi wá fí. Mɛ̌ ko wɛ mi ka ɖe? Mɛ̌ kɛ nu gblogblo ná wɛ mi ka ɖe? Mɛ̌ sín ɖɛ̌ dɔn wɛ mi ka ɖe? Vǐ e ma se tónú ǎ é wɛ mi nyí; adingban gbɛ́ wɛ mi dó. Mi nɔ ɖo he ɖó wɛ gbɔn atín ɖaxó ɖaxó lɛ́ɛ sá, mi nɔ ɖo he ɖó wɛ gbɔn atín e ko dó ama lɛ́ɛ bǐ sá. Mi nɔ hu yɔkpɔ́vú lɛ́ɛ dó sá vɔ̌ gbɔn tɔkpá tɔkpá, mi nɔ hu dó sá vɔ̌ gbɔn sóxo mɛ sóxo mɛ. Izlayɛ́li, awǐnnya wǔ ɖíɖí e gbɔn tɔdo mɛ tɔdo mɛ lɛ́ɛ wɛ nyí nǔ e hwɛ sɔ́ bó ná nɔ́ sɛn é. Yě jí wɛ a nɔ kɔn vɛ̌ɛn dó; yě wɛ a nɔ ná nǔ. Nǔ énɛ́ lɛ́ɛ má ná nyɔ́ nyɛ Mawu nukún mɛ a? A nɔ ɖó zan gbɔn só e yi jǐ lɛ́ɛ bǐ jí; fí énɛ́ lɛ́ɛ ɖokpó ɔ́ wɛ a nɔ yi sá vɔ̌ ɖe. A dǒ vodún kan ɖó hɔn towe gúdo, a dǒ kan ɖó agba towe wú. A hɔn bú dó mì, bó ɖe nǔ bó xá zan towe gblogblo ɔ́ jí. A gblǒ ada nú zan towe, bó nɔ ɖɔ xá súnnu lɛ́ɛ bɔ hwi kpó yě kpó nɔ́ mlɔ́ ayǐ, bɔ mɛ̌ yětɔn mimɔ nɔ́ víví nú we. A sɛ́ ami kpó célu kpó dó vodún Mɔlɛ́ki, bó sɛ́ mɛ dó to línlín mɛ. Énɛ́ ɔ́, a j'ayǐ bǐ; a j'ayǐ káká bó yi kú tomɛ. Ée a ɖo zɔnlin nu, bó ɖo énɛ́ gbé mɛ ɔ́, nǔ wá cikɔ nú we. A ka sixú ɖɔ: ‘Ée nǔ cí mɔ̌ din é ɔ́, un ná gbɔ bó gbɔjɛ́’ ǎ. Hlɔ̌nhlɔ́n lɛ́ wá nú we. Énɛ́ ɔ́, a sɔ́ flín nǔcikɔnúmɛ ǎ. Nǔmɛsɛn tɛ́ lɛ́ɛ ká ɖo xɛsi dó nú we wɛ sɔ mɔ̌? Nǔmɛsɛn tɛ́ wɛ ɖo xɛsi dó nú we wɛ káká bɔ a ɖǒ adingban nú mì, bó wɔn mì bǐ gbídígbídí? Ée un cí xwíí bó má ɖo nu kɛ wɛ ǎ wú wɛ a ma sɔ́ nɔ́ sí mì a? Amɔ̌ nyɛ ɔ́, nǔ e hwɛjijɔ towe nyí ɔ́, un ná ɖɔ bɔ mɛ bǐ ná se, bɔ nǔ e wa wɛ a ɖe lɛ́ɛ ɔ́, nǔɖé ná nyɔ́ nú we ɖ'é mɛ ǎ. Adǎn gbo we bónú a sú xó hǔn, nǔmɛsɛn towe e a kplé lɛ́ɛ ní hwlɛ́n we gán bó! Nǔmɛsɛn towe énɛ́ lɛ́ɛ ɔ́, jɔhɔn wɛ ná bɛ́ yě bǐ; jɔhɔn wɛ́lɛ́wɛ́lɛ́ ɖé wɛ ná za yě bǐ. Mɛ e ká ná bɛ yɛ ɖo nyɛ gɔ́n lɛ́ɛ ná yí ayǐkúngban ɔ́, bɔ só mímɛ́ ce ná nyí yětɔn.” Mawu ɖɔ: “Mi bló ali ɖó. Mi yá wǔ, mi ɖe ali ɖokpó; mi ɖe afɔklɛ́nnú e ɖo ali ɔ́ jí lɛ́ɛ bǐ síin nú togun ce.” Mawu mímɛ́ ɔ́, éyɛ́ mɛ e hú gǎn nǔ bǐ, bɔ nɔtɛn tɔn ɖo te káká sɔ́yi é ɔ́, xó e é ɖɔ ɔ́ ɖíe: “Nyɛ Mawu mímɛ́ ɔ́, jǐxwé aga wɛ un nɔ nɔ. Amɔ̌, un ɖo kpɔ́ xá mɛ e nǔ cikɔ ná lɛ́ɛ, mɛ e sɔ́ yěɖée hwe lɛ́ɛ; un ɖo kpɔ́ xá mɛ e sɔ́ yěɖée hwe lɛ́ɛ bó ná ná gbɛ yě; un ɖo kpɔ́ xá mɛ e nǔ cikɔ ná lɛ́ɛ bó ná ná gbɛ yě. Đó un ná ɖo nǔ gbɛ́ nú mɛ wɛ magbokɔ ǎ; un ná ɖo xomɛsin jí hwebǐnu ǎ; é má nyí mɔ̌ ǎ ɔ́, mɛ e un bló lɛ́ɛ bǐ sín gbɔjɛ ná xwɛ. Izlayɛ́li togun ɔ́ nɔ́ dó nukúnkɛn ɖésú. Nǔ énɛ́ sin xomɛ nú mì, bɔ un ɖo xomɛsin jí bó dɔn tó n'i; un sɔ́ jló ná mɔ ɛ ɖě ǎ; có é nɔ́ ti tamɛ; nǔ e jló e ɔ́ wɛ é nɔ́ wa. Un mɔ nǔ e wa wɛ é ɖe lɛ́ɛ ganjí, amɔ̌, un ná gbɔ azɔn n'i. Un ná ɖe e ɖó ali jí, un ná ná ɛ akɔ́nkpinkpan. Un ná dó gbɔ n'i; bó dó gbɔ nú mɛ e kpó é kpó ɖo aluwɛ mɛ lɛ́ɛ. Un ná sɔ́ awǎjijɛ han dó nu nú yě.” Mawu Mavɔmavɔ ɖɔ: “Fífá ní tíin nú mɛ e ɖo zɔ nú mì lɛ́ɛ, fífá ní tíin nú mɛ e sɛkpɔ́ mì lɛ́ɛ. Nǔgbó wɛ, un ná gbɔ azɔn nú togun ce.” Lo ɔ́, mɛdídá lɛ́ɛ ɔ́, xu ɖɔhun wɛ yě cí; xu nɔ ɖo xixo wɛ bó nɔ́ sixú nɔ te ǎ, xu ɖo xixo wɛ ɔ́ é nɔ́ ɖo nǔ kwíji kwíji lɛ́ɛ ɖe tɔ́n wɛ. Mawu ce ɖɔ: “Fífá ɖě ɖe nú mɛdídá lɛ́ɛ ǎ.” Mawu ɖɔ: “Sú xó kpó hlɔ̌nhlɔ́n kpó, ma gɔn xó sú ó. Sú xó nú gbe towe ní yi zɔ lanzo ɖɔhun; sú xó bó ɖɔ nǔ e wa nyi do wɛ togun ce ɖe ɔ́ n'i, ɖɔ hwɛ e hu wɛ Jakɔ́bu ví lɛ́ɛ ɖe é nú yě. Yě nɔ́ ɖo nǔ kanbyɔ́ mì wɛ ayǐhɔ́ngbe ayǐhɔ́ngbe; yě nɔ́ jló ná tunwun nǔ e ba ɖo así yětɔn wɛ un ɖe é, yě cí togun e nɔ wa nǔ ɖó sɛ́nxwi jí é ɖɔhun; yě cí togun e ma nɔ jó Mawu tɔn sín sɛ́n ɔ́ dó ǎ é ɖɔhun. Yě nɔ́ byɔ́ ɖɔ nyi ní xwedó hwɛjijɔ dó gbo hwɛ nú émí; yě nɔ́ jló ɖɔ nyi ní ɖo kpɔ́ xá émí tɛgbɛ.” Yě nɔ́ ɖɔ nú mì ɖɔ: “Mǐ ɖo nu blá wɛ bɔ hwɛ ka mɔ ǎ, bɔ ani mǐ ká blá nu dó wa? Mǐ nɔ́ sɔ́ mǐɖée hwe bɔ hwɛ ka tunwun ǎ, bɔ étɛ́ mǐ ká sɔ́ mǐɖée hwe dó wa?” Ée yě ɖo mɔ̌ ɖɔ wɛ ɔ́, un ɖɔ nú yě ɖɔ: “Gbe e gbe mi nɔ blá nu ɔ́, mi nɔ ɖo nǔ e myá nukún nú mi ɔ́ kan xo wɛ, bó nɔ́ ɖo tagba dó nú mɛ e ɖo azɔ̌ wa nú mi lɛ́ɛ wɛ. Gbe e gbe mi ɖo nu blá wɛ ɔ́, mi nɔ ɖo jlɛ ɖɔ wɛ, bó nɔ́ ɖo akpotokwín dó miɖée wɛ. Mi blá nu gbɔn mɔ̌ ɔ́, ɖɛ mitɔn nɔ wá gɔ̌n ce ǎ. Nubláblá e un nɔ yí wǎn ná ɔ́, mɔ̌ wɛ è nɔ blá gbɔn a? Lě e è nɔ sɔ́ mɛɖée hwe gbɔn ɖo nukɔn ce ɔ́ ná? È ko dó kɔ do fántín ɖɔhun, bó sɔ́ ati kplá, bó mlɔ́ afín mɛ ɔ́, énɛ́ ɔ́ wɛ mi nɔ ylɔ́ ɖɔ nubláblá a? Azǎn énɛ́ ɔ́ sixú nyí azǎn ɖé, bó ná nyɔ́ nukún ce mɛ a? Nubláblá e un nɔ yí wǎn ná é ɖíe: tún kan nú mɛ e è dǒ wlɔ dó acɛ jí é, zlɔ̌n agban e ɖo kpinkpɛn yě wɛ lɛ́ɛ yě, jǒ mɛ e táfú wɛ è ɖe lɛ́ɛ dó nú yě ní vo. Đo kléwún mɛ kpowun ɔ́, è nǐ sú nǔ e zɔ́n bɔ yě nyí kannumɔ lɛ́ɛ bǐ dó. Nǎ nǔɖuɖu towe ɖě mɛ e ɖo xovɛ́ é, wamamɔnɔ e má ɖó xɔ ǎ ɔ́, yǐ i dó xwé gbe; nǎ avɔ mɛ e ɖo mɛ̌ é. Ma gɔn alɔ gɔ́ nú nɔzo towe ó. Énɛ́ ɔ́, wěziza towe ná hɔ́n hwe tɔ́n ɖɔhun, bɔ akpa towe ná yá wǔ kú; ɖagbe e a nɔ wa ɔ́ ná ɖo nukɔn nú we, bɔ susu Mawu Mavɔmavɔ tɔn ná ɖo gǔdo nú we. Énɛ́ ɔ́, a ylɔ́ Mawu Mavɔmavɔ ɔ́, é ná sɔ nú we. A sú xó bó byɔ́ alɔgɔ́ ɔ́, é ná ɖɔ nú we ɖɔ: ‘Un ɖo fí.’ Ényí a sú acɛ gannaganna kpikpa dó sín to towe mɛ, nú a jǒ adǎn gblɔ́n nú mɛ dó, nú a jǒ dǎka ɖiɖɔ dó, nú a nɔ ná nǔɖuɖu towe ɖě mɛ e ɖo xovɛ́ ɔ́, nú a nɔ ná nǔɖuɖu mɛ e ma ɖó ǎ ɔ́, wěziza ná hɔ́n nú we ɖo ablu mɛ, bɔ ablu e mɛ a ɖe ɔ́ ná zǎ wě bǐ hwe yi hwǎn ɖɔhun. Mawu Mavɔmavɔ ná nɔ́ xlɛ́ ali we hwebǐnu. A na bo ɖo axéko jí ɔ́, é ná nɔ́ ná nǔɖuɖu we; é ná nɔ́ ná hlɔ̌nhlɔ́n we. A nǎ cí jikpá e sin kpé ɔ́ ɖɔhun, bó ná cí tɔjɔtɛn e ma nɔ mɛ gbeɖé ǎ é ɖɔhun. Énɛ́ ɔ́, dǒ e kó mu ɖ'ayǐ lɛ́ɛ ɔ́, a nǎ vɔ́ bǐ mɛ. Xɔ e ko mu sín xóxó hwenu lɛ́ɛ ɔ́, a nǎ vɔ́ yě mɛ ɖó dodó yětɔn jí. È nǎ nɔ́ ylɔ́ we ɖɔ ‘Fí e dǒ mu ɖé lɛ́ɛ blóɖótɔ́.’ Bó ná nɔ́ ylɔ́ we ɖɔ ‘Ali e gblé lɛ́ɛ blóɖótɔ́.’ ” Mawu Mavɔmavɔ ɖɔ: “Ényí a ma sɔ́ nɔ́ wa azɔ̌ gbɔjɛzán gbe ǎ, bó má sɔ́ nɔ́ ɖo nǔ e myá nukún nú we é bló wɛ azǎn e è sɔ́ ɖó vo nú mì ɔ́ gbe ǎ, ényí gbɔjɛzán ɔ́ húzú awǎjijɛzán nú we, nú azǎn énɛ́ e è sɔ́ ɖó vo nú mì ɔ́, nyí azǎn ɖé bɔ a yǐ wǎn ná, bó má sɔ́ nɔ́ ɖo nǔ e jló we lɛ́ɛ bló wɛ, bó má sɔ́ nɔ́ ɖo nǔ hwi ɖésúnɔ tɔn lɛ́ɛ gbé mɛ, bó má sɔ́ nɔ́ ɖo xó wlí ɖɔ wɛ ǎ ɔ́, nyɔ̌ná towe ná gosín gɔ̌n ce; un ná kplá we gbɔn só e ɖo to ɔ́ mɛ lɛ́ɛ jí; un ná sɔ́ gǔ e nyí tɔ́gbó towe Jakɔ́bu tɔn ɔ́ nú we bɔ a nǎ ɖu. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ sín alɔ hwe gli, bó ná gɔn mi hwlɛ́n gán ǎ; tó tɔn ká kú, bó ná gɔn xó mitɔn se ǎ. Lo ɔ́, nǔ e mi wa nyi do lɛ́ɛ wɛ gbo do mɛ nú mi kpó Mawu kpó; hwɛ e mi nɔ hu lɛ́ɛ wɛ sɔ́ ɛ hwlá dó mi, bó nɔ́ lɔn nú é ná se xó mitɔn ǎ. Đó gbɛtɔ́ kanjɔ ɖo alɔ mitɔn, nǔ nyanya e mi dó sin lɛ́ɛ hɛn alɔví mitɔn lɛ́ɛ kwíji. Mi kɛ nu ɔ́, adingban jɛ́n mi nɔ ɖó, ɖɛ̌ mitɔn dan wǔ ɖo gbla mɛ ɔ́, xó nyanya jɛ́n é nɔ ɖɔ. Mi yi hwɛ ylɔ́ mɛ gbé ɔ́, adingban wɛ mi nɔ yi ɖó. Mi nɔ xwedó nǔgbó dó jɛ ahwan mɛ jí ǎ. Xó ma ɖó ta ɖé lɛ́ɛ wú wɛ mi nɔ gán jɛ, bó nɔ́ ɖo adingban ɖó wɛ. Nǔ nyanya xo wɛ mi mɔ, bo ji awě. Mi nɔ fɛ jakpata zin; mi nɔ lɔn yɛglétete dɔ́. Mɛ ɖé ɖu azin mitɔn ɔ́, mɛ ɔ́ nɔ́ kú. Azin ɔ́ ka gba ɔ́, dan ɖé nɔ́ tɔ́n sín mɛ. Avɔ mitɔn ɔ́, è sixú dó tɔ nǔzínzán ná ǎ. È sixú cyɔ́n nǔ e mi sɔ́ alɔ mitɔn dó bló é ǎ; nǔ e mi sɔ́ alɔ mitɔn dó bló é bǐ wɛ nyí nǔ nyanya; alɔ mitɔn ɔ́, dǎka kɛ́ɖɛ́ wɛ é nɔ́ xo. Afɔ e ɖo glɔ̌ mitɔn lɛ́ɛ nɔ́ ɖo wezun jí xwe nǔ nyanya kɔn, bó nɔ́ ɖo hwlɛndó jí bó ná kɔn xomɛvɔ́nɔ kanjɔ kɔn nyi ayǐ. Ayi e ɖo xo mitɔn mɛ ɔ́ dá kpɔ́n! Mi gbɔn fí ɖé ɔ́, dǎka xixo kpó nǔ gblégblé kpó kɛ́ɖɛ́ jɛ́n è nɔ mɔ gbɔn fí ɔ́. Mi tunwun ali e jí è nɔ gbɔn bó nɔ́ mɔ fífá é ǎ; nǔ wa ɖó sɛ́nxwi jí ɖě ká ɖo ali e mi nɔ́ gbɔn ɔ́ jí ǎ. Ali e mi nɔ gbɔn ɔ́, ali gɔ́ndɔ́n gɔ́ndɔ́n jɛ́n é nɔ́ nyí. Mɛ ɖé mlɛ́ ali énɛ́ ɔ́, mɛ ɔ́ nɔ́ mɔ fífá ǎ. Togun Mawu tɔn ɔ́ ɖɔ: “Énɛ́ ɔ́ wú wɛ Mawu ɖo te, bó má kó wá gbo hwɛ nú mǐ ǎ. Wěziza wɛ mǐ kó ɖo te kpɔ́n, bó ká kpo ɖo ablu mɛ. Mǐ ɖo te bó tunwun ɖɔ ayǐ ná hɔ́n, lo ɔ́, mǐ ɖo zɔnlin zun wɛ gbɔn zǐnflú gɔngɔn mɛ. Mǐ nɔ ɖo avi dlá wɛ gbɔn dǒ wú dǒ wú nukúntíntɔ́nnɔ ɖɔhun; mǐ nɔ ɖo ali ba wɛ mɛ e ma ɖó nukún ǎ é ɖɔhun. Hwe mɛ cíɖíɖí wɛ mǐ nɔ́ klɛ́n afɔ zǎn mɛ wɛ mǐ ɖe ɖɔhun; lanmɛ mǐtɔn ɖo ganjí, mǐ ká cí mɛkúkú ɖɔhun. Mǐ nɔ́ ɖo gbe dó wɛ kinnikínní ɖɔhun, bó nɔ́ ɖo gbɛvíhan ji wɛ ahwannɛ́ ɖɔhun. Mǐ nɔ́ ɖo te kpɔ́n Mawu, bɔ é ká nɔ nyí séé. Mǐ ɖo te kpɔ́n Mawu ɖɔ é ná wá hwlɛ́n mǐ, Mawu ká ɖo zɔ dó mǐ. Mawu, hwɛ e mǐ hu dó we lɛ́ɛ sukpɔ́; hwɛ e mǐ hu lɛ́ɛ ɖo hwɛ dó mǐ wɛ, mǐ nɔ́ ɖo gǔ e mǐ fɔ́n é flín wɛ hwebǐnu, mǐ tunwun nǔ e mǐ wa nyi do lɛ́ɛ ganjí. Mǐ se tónú nú we ǎ, mǐ nɔ gbejí nú we ǎ, mǐ gbɛ́ ɖɔ mǐ kún ná xwedó hwi Mawu mǐtɔn ɔ́ ó. Lě e mǐ ná wa gbɔn bó táfú mɛ, bó fɔ́n gǔ é kɛ́ɖɛ́ xó wɛ mǐ nɔ́ ɖɔ. Nǔ e ɖo xo mǐtɔn mɛ ɔ́, adingban wɛ. Nǔ e ɖo ayi mǐtɔn mɛ ɔ́, adingban wɛ. Énɛ́ ɔ́ wú ɔ́, nǔjlɔ́jlɔ́wiwa yi gǔdo; nǔ wa ɖó sɛ́nxwi jí sɔ́ ɖe ǎ, mɛɖé sɔ́ nɔ́ ɖɔ xó nǔgbó ɖo tokplétɛn lɛ́ɛ ǎ; ayijlɔ́jlɔ́nɔ ɖě sɔ́ nɔ́ yi fínɛ́ ǎ. Nǔgbó ɖě sɔ́ ɖe ǎ. Mɛ ɖé ɖɔ émí kún sɔ́ ná wa nǔ nyanya ɖě ó ɔ́, è nɔ bɛ́ nǔ e ɖo así tɔn lɛ́ɛ bǐ.” Mawu Mavɔmavɔ mɔ nǔ e ɖo jijɛ wɛ lɛ́ɛ bǐ. Ée hwɛjijɔ ma sɔ́ tíin ǎ ɔ́, é nyí nǔɖé bó nyɔ́ nukún tɔn mɛ ǎ. É mɔ ɖɔ mɛɖé kún mɔ nǔ énɛ́ lɛ́ɛ sín do jijɛ ó; ée mɛɖé má ɖo nu kɛ dó nǔ énɛ́ lɛ́ɛ wú wɛ ǎ ɔ́, é nyí nǔɖé bó kpácá ɛ. Énɛ́ ɔ́, é ɖésú sí te d'é wú, bɔ hwɛjijɔ tɔn ka ná ɛ hlɔ̌nhlɔ́n. Hwɛjijɔ énɛ́ ɔ́ nyí ganwu bɔ é sɔ́ dó, bɔ hwlɛngán ɔ́ nyí gangbákún bɔ é xwe, hlɔnbiba wɛ nyí awu bɔ é sɔ́ dó, hlɔ̌nhlɔ́n e é nɔ́ dó fun ahwan ná ɔ́ wɛ nyí awu gaga bɔ é sɔ́ dó. Nǔ e jɛ xá mɛ ɖokpó ɖokpó ɔ́ wɛ é ná bló n'i. É ná dɔn tó nú kɛntɔ́ tɔn lɛ́ɛ bɔ é ná syɛ́n ɖésú; yě ná bó ɖo zɔ fí ɖěbǔ ɔ́, é ná dɔn tó nú yě. Énɛ́ ɔ́, è nǎ ɖó sísí n'i sín zǎnzǎnhwe jí, káká yi gbadahwe jí, bó ná ɖó sísí nú susu tɔn. Đó é ná wá kpó zǐngídi kpó, tɔ e ɖi sin ja kpó jɔhɔn kpó é ɖɔhun. Mawu Mavɔmavɔ ná wá Jeluzalɛ́mu, bó ná hwlɛ́n Izlayɛ́li ví lɛ́ɛ, Izlayɛ́li ví e ná lɛ́ kɔ sín hwɛ yětɔn gúdo lɛ́ɛ. Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Nyɛ ɔ́, akɔ e un jɛ xá mi ɔ́ ɖíe: Yɛ ce ɖo mi jí; un sɔ́ xó ce dó nu nú mi, xó énɛ́ ɔ́ ná nɔ mi nu, bó nɔ vǐ mitɔn lɛ́ɛ nu, bó nɔ vǐvú mitɔn lɛ́ɛ nu, sín din káká sɔ́yi; un ná yí xó ce sín mi nu gbeɖé ǎ; nyɛ Mawu Mavɔmavɔ wɛ ɖɔ mɔ̌.” Jeluzalɛ́mu, sí te, kɔ́n hwe ɖɔhun, ɖó wěziza towe wá, susu Mawu Mavɔmavɔ tɔn tɔ́n dó jǐ towe. Kpɔ́n, zǐnflú ɖíe cyɔ́n ayǐkúngban ɔ́, bɔ ablu cyɔ́n togun lɛ́ɛ e. Amɔ̌, hwɛ ɔ́ Mawu Mavɔmavɔ tɔ́n dó jǐ towe hwe ɖɔhun, bɔ susu tɔn ná wěziza we. Énɛ́ ɔ́, akɔta lɛ́ɛ ɖo zɔnlin jí ja zogbɛ́n towe nu, bɔ axɔ́sú lɛ́ɛ ɖo zɔnlin jí ja wěziza e hɔ́n dó jǐ towe ɔ́ nu. Jeluzalɛ́mu, jlɔ̌ kɔ bó kpɔ́n nǔ lɛ́ lɛ̌ dó hwiɖée; vǐ towe lɛ́ɛ ja, yě kplé bó ja gɔ̌n towe: vǐ towe súnnu lɛ́ɛ jǎwe sín to ma yá to ɖé mɛ, bɔ vǐ towe nyɔ̌nu lɛ́ɛ ɔ́, è hɛn yě awa mɛ jǎwe. A mɔ yě ɔ́, xomɛ ná hun we, nǔ ná víví nú we mɔ̌hunkɔtɔn, a nǎ j'awǎ; ɖó è nǎ bɛ́ xu mɛ dɔkun lɛ́ɛ wá gɔ̌n towe, dɔkun akɔta lɛ́ɛ tɔn ná wá gɔ̌n towe. Lǎkúnmí ná gbɔn fí bǐ ɖo to towe mɛ, lǎkúnmí wínnyáwínnyá Madiáani tɔn lɛ́ɛ kpó Eyifa tɔn lɛ́ɛ kpó ná gosín Saba wá. Sabanu lɛ́ɛ ná dó siká kpó zǎlínkpɔ́n kpó sín agban bó wá. Yě wɛ ná wá ji han dó kpa susu nú Mawu Mavɔmavɔ ɖo mɛ bǐ nukɔn. Mawu ɖɔ: “Gbɔ̌ Kedáa togun ɔ́ tɔn lɛ́ɛ bǐ ná wá gɔ̌n towe. Agbo Nɛbayɔ́ti togun ɔ́ tɔn lɛ́ɛ bǐ ná ɖo te nú we. È nǎ fɔ yě bǐ dó sá vɔ̌ nú mì ɖo vɔ̌sákpe ce jí, bɔ é ná nyí vɔ̌ ɖé bó ná nyɔ́ nukún ce mɛ; énɛ́ ɔ́, un ná ɖe susu xwé ce tɔn xlɛ́. Mɛ̌ e mɛ̌ e ká ja nɛ́? É cí akpɔ́kpɔ́ wɛ ja ɖɔhun, é cí ahwannɛ́ lɛ́ kɔ xwe awǎjí ɖɔhun. To e ɖo zɔ lɛ́ɛ xo yěɖée kplé bó ɖo nukún ɖó mì wɛ, tɔjíhún lɛ́ɛ ja, tɔjíhún ɖaxó ɖaxó lɛ́ɛ wɛ ɖo yě nu, bó ná kplá vǐ towe lɛ́ɛ sín to línlín mɛ wá. Yě ná hɛn siká, bó ná hɛn kpatágan, bó ná dó sɔ́ nyɛ Mawu Mavɔmavɔ, Mawu towe su. Nyɛ Mɛ mímɛ́ Izlayɛ́li tɔn ɔ́ su, ɖó nyɛ wɛ ɖo hwi togun ce ɔ́ sɔ́ su wɛ mɔ̌.” Mawu ɖɔ nú Jeluzalɛ́mu ɖɔ: “Toɖévomɛnu lɛ́ɛ ná vɔ́ dǒ towe lɛ́ɛ mɛ, bɔ axɔ́sú yětɔn lɛ́ɛ ná wa azɔ̌ nú we. Đó xomɛsin jí wɛ un ɖe, bó dɔn tó nú we. Amɔ̌, ɖo xomɛnyínyɔ́ ce mɛ ɔ́, un ná ɖe wǎn yíyí ce xlɛ́ we. Hɔntogbó towe lɛ́ɛ ná ɖo nuvo hwebǐnu. È nǎ sú hɔntogbó towe lɛ́ɛ zǎn mɛ ǎ, è ka ná sú kéze ǎ, bónú è nǎ bɛ́ dɔkun akɔta lɛ́ɛ tɔn wá nú we, axɔ́sú yětɔn lɛ́ɛ ná zɔn jí bó wá. “Ényí akɔta ɖé abǐ axɔ́súɖuto ɖé gbɛ́ ɖɔ émí kún ná wa azɔ̌ nú we ó ɔ́, è nǎ sú kún tɔn dó bǐ gbídígbídí. È nǎ hɛn atín ɖagbe ɖagbe e nɔ sɔ́ Libáan to ɔ́ su lɛ́ɛ wá nú we Jeluzalɛ́mu. È nǎ hɛn siplɛ́tín, pɛ́ɛntín kpó bwisitín kpó wá, bó ná dó bló xwé ce ɖó, bɔ un ná sɔ́ fí e un nɔ nɔ ɔ́ su. Mɛ e dó ya nú we ɖ'ayǐ lɛ́ɛ ɔ́, vǐ yětɔn lɛ́ɛ ná wá dó kɔ do ɖo gɔ̌n towe; mɛ e hu tɛ́ nú we ɖ'ayǐ lɛ́ɛ bǐ ná wá jɛ kpo ɖo akɔ́n towe mɛ, bó ná nɔ́ ylɔ́ we ɖɔ: ‘Toxo Mawu Mavɔmavɔ tɔn’, ‘ Sinyɔ́ɔ mɛ mímɛ́ Izlayɛ́li tɔn ɔ́ tɔn.’ Đ'ayǐ ɔ́, mɛ bǐ wɛ jó we dó, mɛ bǐ wɛ gbɛ́ wǎn nú we; mɛɖé nɔ́ wá gɔ̌n towe ǎ. Amɔ̌, din ɔ́, un ná sɔ́ we dó húzú nǔ ɖagbe ɖagbe ɖé, bɔ è mɔ we ɔ́, xomɛ ná nɔ́ hun mɛ, bɔ é ná nɔ mɔ̌ káká sɔ́yi. Akɔta ɖě lɛ́ɛ wɛ ná nɔ́ wa nǔ nú we bɔ a nǎ nɔ́ ɖu; nǔ e nyí axɔ́sú yětɔn lɛ́ɛ tɔn ɔ́ wɛ ná nɔ́ dó dɔkun nú we. Énɛ́ ɔ́, a nǎ tunwun ɖɔ nyɛ Mawu Mavɔmavɔ wɛ nyí mɛhwlɛ́ngántɔ́ towe, nyɛ wɛ nyí Mawu hlɔ̌nhlɔ́nnɔ Jakɔ́bu togun ɔ́ tɔn. Siká wɛ un ná hɛn wá nú we ɖó ganvɔ tɛnmɛ; kpatágan wɛ un ná hɛn wá nú we ɖó gan tɛnmɛ; ganvɔ wɛ un ná hɛn wá nú we ɖó atín tɛnmɛ; gan wɛ un ná hɛn wá nú we ɖó awǐnnya tɛnmɛ. Un ná sɔ́ fífá ɖó to ɔ́ nu, bɔ hwɛjijɔ ná kpa acɛ ɖo to ɔ́ mɛ. È sɔ́ ná se dǎka xó ɖě ɖo to towe mɛ gbeɖé ǎ. È ka sɔ́ ná se nǔhɛngblé kpó nǔ nyanya dó sin kpó xó ɖě ɖo dogbó towe jí gbeɖé ǎ. A nǎ nɔ́ ylɔ́ ahohó towe lɛ́ɛ ɖɔ ‘Hwlɛngán’, bó ná nɔ́ ylɔ́ hɔntogbó towe lɛ́ɛ ɖɔ ‘Susu nú Mawu’. Ényí a nǎ mɔ nukúnnú ɔ́, é sɔ́ ná nyí hwe wɛ ná tɔ́n cóbɔ a nǎ mɔ nukúnnú kéze ǎ; é ká sɔ́ ná nyí sun wɛ ná tɔ́n cóbɔ a nǎ mɔ nukúnnú zǎn mɛ ǎ; nyɛ Mawu Mavɔmavɔ, Mawu towe wɛ ná nyí zogbɛ́n nú we hwebǐnu, wěziza ce bǐ ná hɔ́n dó jǐ we. Hwe towe sɔ́ ná yi xɔ gbeɖé ǎ; sun towe ka sɔ́ ná kú gbeɖé ǎ. Nyɛ Mawu Mavɔmavɔ towe ná nyí zogbɛ́n nú we káká sɔ́yi. Aluwɛ e mɛ a ɖe ɔ́ ná vɔ. Mɛ e ɖo togun towe mɛ lɛ́ɛ bǐ ná nɔ́ se tónú nú mì. To élɔ́ ná nyí yětɔn káká sɔ́yi; nyi wɛ sɔ́ alɔ ce dó bló yě bónú yě ná ɖe susu ce xlɛ́; yě cí atín e nyi ɖésúnɔ tun é ɖɔhun. Xwéta e hwe hú xwéta lɛ́ɛ bǐ ɔ́ ná ɖó gbɛtɔ́ afatɔ́n (1.000); xwéta e ma ka ɖó gǎn ɖěbǔ ǎ ɖo xwéta lɛ́ɛ mɛ ɔ́ ná húzú togun syɛ́nsyɛ́n. Nyɛ Mawu Mavɔmavɔ ɔ́, é jɛ hwe tɔn nu ɔ́, un ná bló nǔ énɛ́ bléwún.” Yɛ Aklúnɔ Mavɔmavɔ tɔn ɖo jǐ ce, ɖó Mawu Mavɔmavɔ wɛ sɔ́ mì ɖó vo; é sɛ́ mì dó ɖɔ má yi dó wɛn ɖagbe ɖé wamamɔnɔ lɛ́ɛ, má yi hɛn sɔ mɛ e ɖo wǔvɛ́ mɔ wɛ ɖo ayi mɛ lɛ́ɛ, má yi ɖɔ nú kannumɔ lɛ́ɛ ɖɔ yě jɛ yěɖée sí, má yi ɖɔ nú gantɔ́ lɛ́ɛ ɖɔ è jó yě. É sɛ́ mì dó ɖɔ má yi ɖɔ nú mɛ bǐ ɖɔ xwe e mɛ Mawu Mavɔmavɔ ná jɔwǔ mɛ é wá, má yi ɖɔ nú mɛ bǐ ɖɔ azǎn e gbe Mawu mǐtɔn ná ba hlɔn kɛntɔ́ tɔn lɛ́ɛ wú é wá, má yi dó wǔsyɛ́n lanmɛ nú mɛ e ɖo aluwɛ mɛ lɛ́ɛ. Sinyɔ́ɔ wú wɛ yě ɖo aluwɛ mɛ; lo ɔ́, azɔ̌ e Mawu Mavɔmavɔ zɔ́n mì ɔ́ wɛ nyí ɖɔ má zé aluwɛ e mɛ yě ɖe ɔ́ dó húzú xomɛhunhun nú yě: un nǎ zé afín e yě lɛ dó ta ɔ́ dó húzú tablá ɖagbe ɖagbe ɖé. Un ná kɔn ami wǎnɖagbenɔ ɖé dó ta nú yě, bɔ é ná nyí awǎjijɛ sín wuntun, é sɔ́ ná nyí aluwɛ sín wuntun ǎ. Acɔ́wu wɛ un ná dó nú yě, ɖó awakanmɛ e kú yě ɔ́ tɛnmɛ. Énɛ́ ɔ́, è nǎ nɔ́ ylɔ́ yě ɖɔ hwɛjijɔtín ɖaxó ɖaxó e Mawu tun, bɔ yě nɔ́ ɖe susu tɔn xlɛ́ lɛ́ɛ; è nǎ nɔ́ zé yě jlɛ́ dó jikpá e nɔ ɖe susu Mawu Mavɔmavɔ tɔn xlɛ́ é wú. Dǒ e kó mu sín xóxó hwenu lɛ́ɛ ɔ́, yě ná vɔ́ mɛ. Xwé e è ko gba bɔ é ko lín lɛ́ɛ ɔ́, yě ná bló ɖó. Toxo e è ko gba bɔ yě ɖo mɔ̌ sín tɔ́gbó tɔgbo yětɔn lɛ́ɛ hwenu ɔ́, yě ná vɔ́ bló ɖó. Jǒnɔ lɛ́ɛ ná wá, bó ná nɔ́ kplá kanlin mitɔn lɛ́ɛ yi ama gbo mɛ. To ɖěvo mɛ nu lɛ́ɛ wɛ ná nɔ́ lɛ gle nú mi, bó ná nɔ́ kpé nukún dó vǐwungbo mitɔn lɛ́ɛ wú. Amɔ̌, midɛɛ lɛ́ɛ ɔ́, è nǎ nɔ́ ylɔ́ mi ɖɔ “Vɔ̌sánú-xwlémawutɔ́.” È nǎ nɔ́ ylɔ́ mi ɖɔ “Mɛsɛntɔ́ Mawu Mavɔmavɔ tɔn.” Dɔkun akɔta lɛ́ɛ tɔn ná nyí mitɔn. Mi ná nɔ́ gó, ɖó dɔkun yětɔn ɔ́, mitɔn wɛ. Mawu ɖɔ: “É sɔ́ ná nyí winnyá wɛ mi ná ɖu ǎ, susu ɖě ɖo ɖě jí wɛ mi ná xɔ; é sɔ́ ná nyí hɛ̌n wɛ mi ná ɖu ǎ, mi ná nɔ́ ɖo xó sú wɛ kpó awǎjijɛ kpó, ɖó kanta e ná nyí mitɔn é wú; énɛ́ ɔ́, ɖo to mitɔn mɛ ɔ́, nǔ e ɖó ná nyí mitɔn ɔ́ mɔ̌hunkɔ donu we wɛ è nǎ ná mi; awǎjijɛ mavɔ mavɔ wɛ ná nyí mitɔn. Đó nyɛ Mawu Mavɔmavɔ ɔ́, nǔjlɔ́jlɔ́wiwa wɛ un nɔ ba; un gbɛ́ wǎn nú ajogbomɛ. Énɛ́ ɔ́ wú ɔ́, un ná sú nǔ mitɔn e yě fin é sín axɔ́ mi, bó ná jɛ akɔ mavɔ mavɔ ɖé xá mi.” Akɔta lɛ́ɛ bǐ wɛ ná tunwun vǐ mitɔn lɛ́ɛ; gbɛtɔ́ nukúnɖéjí wɛ yě ná nyí gbɔn akɔta lɛ́ɛ bǐ mɛ; mɛɖé mɔ yě ɔ́, è na tunwun ɖɔ togun e jí Mawu Mavɔmavɔ xo ɖɛ dó é ɖíe. Un ɖo awǎjijɛ mɛ ɖě ɖo ɖě jí ɖó Mawu Mavɔmavɔ wútu. Xomɛ ɖo hunhun mì wɛ ɖó Mawu ce wú. Nǔgbó wɛ, é hwlɛ́n mì gán, bó sɔ́ hwlɛngán tɔn dó nú mì awu ɖaxó ɖé ɖɔhun; é sɔ́ ɖuɖéjí tɔn cyɔ́n nú mì avɔ ɖɔhun; un cí dɔ̌nkpɛvú e da asi yɔ̌yɔ́, bó sɔ́ tablá ɖagbe ɖagbe ɖé ɖó ta ɔ́ ɖɔhun; un cí ɖyɔ̌vǐ e da asú yɔ̌yɔ́, bó dó sikánú yɛɖɛɖɛ ɔ́ ɖɔhun. Lě e atín nɔ́ tɔ́n sín ayǐkúngban lanmɛ gbɔn, bɔ nǔ e è hǔ ɖó jikpá mɛ ɔ́ nɔ́ wú gbɔn ɔ́, mɔ̌ wɛ Aklúnɔ Mavɔmavɔ ná ɖe ɖuɖéjí tɔn kpó susu tɔn kpó xlɛ́ ɖo akɔta lɛ́ɛ bǐ nukɔn. Jeluzalɛ́mu e, wǎn yíyí e un ɖó nú we ɔ́ wú wɛ un ma sɔ́ ná xwɛ ǎ; Sinyɔ́ɔ e, wǎn yíyí e un ɖó nú we ɔ́ wú wɛ un ma sɔ́ ná cí xwíí ǎ, un ná xwɛ cóbónú hwɛ e Mawu ná gbo nú we ɔ́ ná wá ayǐ hɔ́n jǎwe ɖɔhun ǎ; un ná cí xwíí cóbónú hwlɛngán towe ná ɖi ɖɛ̌ myɔ e è tá é ɖɔhun ǎ. Énɛ́ ɔ́, akɔta lɛ́ɛ bǐ ná mɔ ɖɔ Mawu Mavɔmavɔ hwlɛ́n we, axɔ́sú lɛ́ɛ bǐ ná mɔ susu e a xɔ é. Mawu Mavɔmavɔ ná ná nyǐkɔ yɔ̌yɔ́ we, bɔ nyǐkɔ énɛ́ wɛ è nǎ nɔ́ ylɔ́ we. A nǎ nyí axɔ́súgbákún ɖɛkpɛ ɖɛkpɛ ɖo Mawu Mavɔmavɔ lɔ mɛ, a nǎ nyí tablá ɖagbe ɖagbe ɖo Mawu towe sín alɔkpákpá mɛ. Mɛ ɖé sɔ́ ná ylɔ́ we ɖɔ “Toxo e è jǒ dó é” ǎ. È ká sɔ́ ná ylɔ́ ayǐkúngban towe ɖɔ “Ayǐkúngban e jí mɛ ɖé má ɖe ǎ é” ǎ. Lo ɔ́, è nǎ nɔ́ ylɔ́ we ɖɔ “Wǎnyínámɔ Mawu Mavɔmavɔ tɔn”, bó ná nɔ́ ylɔ́ ayǐkúngban towe ɖɔ: “Nyɔ̌nu xwési”, ɖó hwi wɛ Mawu Mavɔmavɔ ná yí wǎn ná, bɔ ayǐkúngban towe ná ɖó asú. Nǔgbó ɔ́, lě e dɔ̌nkpɛvú nɔ́ da ɖyɔ̌vǐ si ɔ́, mɔ̌ wɛ mɛ e ɖo vǐvɔ́ we bló ɖó wɛ ɔ́ ná nyí asú nú we. Lě e nyɔ̌nu yɔ̌yɔ́ nɔ́ dó xomɛhunhun nú asú tɔn gbɔn ɔ́, mɔ̌ wɛ a nǎ dó xomɛhunhun nú Mawu towe gbɔn. Jeluzalɛ́mu, un ɖó mɛ ahohó towe ta; yě ná xwɛ zǎn mɛ ǎ, yě ká ná xwɛ kéze ǎ. Un ɖɔ nú yě ɖɔ: “Mi mɛ e nɔ flín Jeluzalɛ́mu Mawu Mavɔmavɔ lɛ́ɛ ɔ́, mi ma gbɔjɛ́ ó. Mi ma ná gbɔjɛ́ Mawu Mavɔmavɔ ó; mi ma ná ɛ gbɔjɛ́ káká jɛ hwenu e é ná sɔ́ Jeluzalɛ́mu sí te bǐ dó é ó; mi ma ná ɛ gbɔjɛ́ káká jɛ hwenu e é ná sɔ́ Jeluzalɛ́mu dó bló mɛ e è nǎ nɔ́ kpa susu ná ɖo ayǐkúngban ɔ́ bǐ jí dó é ó.” Mawu Mavɔmavɔ xwlé ɖisí lɔ tɔn, é xwlé hlɔ̌nhlɔ́n lɔ tɔn bó ɖɔ: “Un sɔ́ ná sɔ́ jinukún towe lɛ́ɛ dó ná nǔɖuɖu kɛntɔ́ towe lɛ́ɛ gbeɖé ǎ. Vɛ̌ɛn towe e tamɛ a ji ya dó ɔ́, toɖévomɛnu lɛ́ɛ sɔ́ ná nu gbeɖé ǎ. Lo ɔ́, mɛ e sɔ́ jinukún lɛ́ɛ wɛ ná ɖu, bó ná kpa susu nú nyɛ Mawu Mavɔmavɔ, bɔ mɛ e ná gbɛ vǐwun lɛ́ɛ ná nu vɛ̌ɛn ɖo xwé ce sín kɔ́xota.” Jeluzalɛ́munu lɛ́ɛ mi, mi tɔ́n; mi tɔ́n sín toxo ɔ́ mɛ, bó ɖe ali nú mɛ e lɛ́ kɔ ja lɛ́ɛ. Mi bló ali lɛ́ɛ ɖó; mi ɖe awǐnnya e ɖo ali jí lɛ́ɛ síin. Mi dó asyá ɖokpó dó xlɛ́ ali togun lɛ́ɛ. Mawu Mavɔmavɔ ná ɖɔ xó élɔ́ káká yi fí e gbɛ ɔ́ kponu ɖó é; é ná ɖɔ: “Mi ɖɔ nú Sinyɔ́ɔ nu lɛ́ɛ ɖɔ: Éɖíe, Mɛhwlɛ́ngántɔ́ mitɔn jǎwe; é bɛ́ nǔ e é mɔ lɛ́ɛ jǎwe; azɔ̌ e é wa ɔ́, é bɛ́ nǔ e é mɔ ɖ'é mɛ lɛ́ɛ ja.” È nǎ nɔ́ ylɔ́ yě ɖɔ: “Togun e Mawu sɔ́ ɖó vo nú éɖée” é, “mɛ e Mawu Mavɔmavɔ tún kan ná lɛ́ɛ” é. Jeluzalɛ́mu, hwɛ ɔ́, è sɔ́ ná nɔ́ ylɔ́ we ɖě ɖɔ: “Toxo e è jǒ dó ɔ́” ǎ, lo ɔ́, è nǎ nɔ́ ylɔ́ we ɖɔ: “Toxo e ba wɛ mɛ bǐ ɖe” é. Mɛ̌ ká nyí mɛ énɛ́ e jǎwe sín Edɔ́mu é? Mɛ énɛ́ e jǎwe sín Bosla toxo ɔ́ mɛ bɔ nǔ vɔvɔ kɔn nyi awu tɔn mɛ mɔ̌ é? É ɖo zɔnlin jí ɖo awu gaga ɖagbe ɖagbe ɖé mɛ bó nɔ́ gó, ɖó é ɖeji dó hlɔ̌nhlɔ́n tɔn wú. Mawu yí gbe ɖɔ: “Nyɛ wɛ; nyɛ wɛ nɔ ɖɔ hwɛ jlɔ́jlɔ́, bó ɖó acɛ bó ná hwlɛ́n mi gán.” “Bɔ étɛ́wú nǔ vɔvɔ ka gbɔn awu towe mɛ mɔ̌? Étɛ́wú awu towe ka cí mɛ li vǐwun ɖo vǐwunto mɛ ɖɔhun mɔ̌?” Mawu yí gbe ɖɔ: “Nyi ɖokpó géé wɛ li vǐwun e ɖo vǐwunto ɔ́ mɛ é; mɛ ɖé gosín togun ɖé mɛ bó dó alɔ mì ǎ. Un gbídí gbɛtɔ́ lɛ́ɛ ɖó afɔ wú kpó xomɛsin kpó, adǎn jí wɛ un ɖe bó tɛ afɔ yě jí, bɔ kanjɔ yětɔn zlɔ́n kɔn nyi awu ce mɛ, bɔ awu ce gblé bǐ. Un ko tunwun dó ayi ce mɛ ɖɔ un ná ba hlɔn nú togun ce gbe ɖokpó; azǎn ɔ́ wɛ kpé. Xwe e xwe un ná hwlɛ́n togun ce gán ɔ́ wɛ su. Un ba mɛ e ná dó alɔ mì é gbɔn fí bǐ, un ka mɔ mɛɖé ǎ. É kpácá mì bɔ un mɔ mɛɖé nú é ná gɔ́ alɔ nú mì ǎ. Énɛ́ ɔ́, un sí te ɖɔ nyi ɖésú ná bló, bɔ xomɛsin e jí un ɖe ɔ́ ná hlɔ̌nhlɔ́n mì. Un ɖo xomɛsin jí bó gbídí togun lɛ́ɛ ɖó afɔ wú; adǎn e jí un ɖe ɔ́ mú yě ahan ɖɔhun; un kɔn kanjɔ yětɔn kɔn nyi ayǐ.” Un ná flín xomɛnyínyɔ́ Mawu Mavɔmavɔ tɔn lɛ́ɛ, bó ná flín nǔ e wú è nǎ kpa susu n'i lɛ́ɛ: é bló nǔ bǐ nú mǐ; un ná ɖɔ nǔ ɖagbe tobutóbú e é wa nú Izlayɛ́li kpó xomɛfífá tɔn kpó lɛ́ɛ, nǔ ɖagbe ɖagbe e é wa n'i kpó xomɛnyínyɔ́ ɖaxó ɖé kpó lɛ́ɛ. Mawu ɖɔ dó Izlayɛ́li ví lɛ́ɛ wú ɖɔ: “Togun ce wɛ yě nyí. Vǐ e má ná flú mì ǎ lɛ́ɛ wɛ yě nyǐ.” Ée é ɖɔ mɔ̌ ɔ́, é hwlɛ́n yě. Yě ɖo aluwɛ mɛ ɔ́, é ɖésú nɔ́ nɔ aluwɛ mɛ xá yě, bɔ wɛnsagun e nɔ ɖo kpɔ́ xá ɛ ɔ́ nɔ hwlɛ́n yě; éyɛ́ Mawu ɔ́ ɖésú xɔ yě ɖo wǎn yíyí tɔn kpó nǔbláwǔkúnúmɛ tɔn kpó mɛ; é wɛ kpé nukún dó yě wú, bó hɛn sɔ yě ɖo hwe yětɔn nu. Lo ɔ́, yě fɔ́n gǔ dó jǐ tɔn, yě dó awakanmɛ kú nú yɛ mímɛ́ tɔn. Bɛ́ sín hwenɛ́nu ɔ́, é húzú kɛntɔ́ yětɔn, bó fun ahwan xá yě. Énɛ́ ɔ́, togun tɔn wá flín nǔ e jɛ xóxó hwenu lɛ́ɛ, bó flín Mɔyízi bó ɖɔ: “Fítɛ́ mɛ e ɖe togun tɔn tɔ́n sín xu mɛ ɔ́ ká ɖe? Mɛ e ɖe lɛ̌ngbɔ́ tɔn lɛ́ɛ kpó lɛ̌ngbɔ́nyitɔ́ tɔn lɛ́ɛ kpó tɔ́n sín xu mɛ ɔ́, fítɛ́ é ká ɖe? Fítɛ́ mɛ e sɛ́ yɛ mímɛ́ tɔn dó bɔ é wá nɔ yě mɛ ɔ́ ká ɖe? Hwenu e yě ɖo yiyi wɛ ɔ́, é wɛ zé hlɔ̌nhlɔ́n lɔ tɔn dó ná gǎnjɛwú Mɔyízi. É má xu ɔ́ ɖó we bó ná dó xɔ susu káká sɔ́yi. É wɛ kplá yě gbɔn xuzan jí, yě ɖo yiyi wɛ ɔ́, a nǎ ɖɔ sɔ́ wɛ ɖo yiyi wɛ ɖo ayǐkúngban xúxú jí; yě klɛ́n afɔ ǎ. Hwenu e yɛ Mawu Mavɔmavɔ tɔn kplá yě xwe gbɔjɛtɛn ɔ́, yě cí lɛ̌ngbɔ́hwan e xwe tɔdo mɛ é ɖɔhun.” Mawu Mavɔmavɔ, hǔn lě e a hɛn togun towe gbɔn, bó dó xɔ susu ɔ́ nɛ́. Mawu Mavɔmavɔ, nɔ jǐxwé aga dɔ̌n, ɖo xwé towe ɖagbe ɖagbe ɔ́ gbe, xwé towe mímɛ́ ɔ́ gbe, bó kpɔ́n nǔ e ɖo mǐ gbo wɛ ɔ́. Fítɛ́ wǎn yíyí ma ɖó dogbó e a ɖǒ nú mǐ ɔ́ ká ɖe? Fítɛ́ hlɔ̌nhlɔ́n towe ká ɖe? Mǐ sɔ́ nɔ́ mɔ walɔ towe fífá ɔ́ kpó xomɛnyínyɔ́ towe kpó ɖě ǎ. Có hwi wɛ nyí tɔ́ mǐtɔn. Ablaxámu tɔ́gbó mǐtɔn ɔ́ tunwun mǐ ǎ. Izlayɛ́li lɔ ka tunwun mǐ ǎ. Hwɛ Mawu Mavɔmavɔ ɔ́ wɛ nyí tɔ́ mǐtɔn. Mɛhwlɛ́ngántɔ́ wɛ nyǐkɔ towe nyí sín do. Mawu Mavɔmavɔ, étɛ́wú a ká jó mǐ dó bɔ mǐ ɖo flúflú wɛ ɖo zɔ nú ali towe? Étɛ́wú a ka jǒ mǐ dó bɔ mǐ sú ayi mǐtɔn sín hɔn dó we, bó gbɛ́ ɖɔ mǐ kún sɔ́ ná ɖó sísí nú we ó? Mawu Mavɔmavɔ wǎ, ɖó wǎn yíyí e a ɖǒ nú mǐ mɛ e nyí mɛsɛntɔ́ towe lɛ́ɛ wútu; mǐ mɛ e nyí togun towe lɛ́ɛ wútu. Mǐ togun towe e a sɔ́ ɖó vo é ɔ́, hwenu kpɛɖé jɛ́n to e a nǎ mǐ ɔ́ nyí mǐtɔn xɔ; kɛntɔ́ mǐtɔn lɛ́ɛ gbídí tɛn mímɛ́ towe ɖó afɔ wú. Sín tɛgbɛ ɔ́, é cí ɖɔ a sɔ́ nyí axɔ́sú mǐtɔn ǎ ɖɔhun; é cí ɖɔ nyǐkɔ towe sɔ́ ɖo mǐ wú ǎ ɖɔhun. Mawu Mavɔmavɔ, nú a vǔn jǐnukúnsin bó jɛ te ɔ́, só lɛ́ɛ bǐ ná sísɔ́ ɖo nukɔn towe. Myɔ wɛ a nyǐ: myɔ jɛ nǔywɛ́ mɛ ɔ́, é nɔ́ wlí zo; è sɔ́ sin ɖ'é jí ɔ́, sin ɔ́ nɔ hun agbǎn. Lě e a nǎ ɖe mɛ e a nyǐ ɔ́ xlɛ́ kɛntɔ́ towe lɛ́ɛ gbɔn é nɛ́; akɔta lɛ́ɛ ná sísɔ́ ɖo nukɔn towe, hwenu e a nǎ bló nǔdábaɖa e mǐ ma ɖó ayi tɔn ǎ é; a nǎ jɛ te bɔ só lɛ́ɛ ná sísɔ́ ɖo nukɔn towe. Nǔmɛsɛn ɖě nɔ́ wa nǔ gbɔn mɔ̌ zɛ hwɛ wú ǎ; nǔmɛsɛn ɖě nɔ́ wa nǔ gbɔn mɔ̌ nú mɛ e ɖeji dó wǔ tɔn lɛ́ɛ ǎ; è se kpɔ́n ǎ, è ka mɔ kpɔ́n ǎ. Mɛ e nɔ xwedó hwɛjijɔ kpó awǎjijɛ kpó lɛ́ɛ ɔ́, mɛ e nɔ́ nɔ ali towe jí bó nɔ́ flín we lɛ́ɛ ɔ́, a nɔ wá yě gɔ́n. A sin xomɛ ɖó nǔwanyido mǐtɔn lɛ́ɛ wú. Lo ɔ́, ali xóxó e a ɖe nú mǐ ɔ́ wɛ mǐ ná mlɛ́ bó ná mɔ hwlɛngán. Mǐ bǐ wɛ cí mɛ blíblí ɖɔhun, bɔ ɖagbe e mǐ nɔ́ wa ɔ́ nɔ́ vɛ́ mɔ nú we, lě e avɔ e mɛ kanjɔ kɔn nyi é nɔ́ vɛ́ mɔ nú we gbɔn é. Hwɛ e mǐ nɔ́ hu lɛ́ɛ zɔ́n bɔ mǐ cí ama xúxú e mɛ jɔhɔn d'alɔ é ɖɔhun. Mɛ ɖé sɔ́ nɔ́ xomlá we ǎ. Mɛ ɖé sín ayi ka sɔ́ mɔ nǔ bónú é ná wá su we ǎ. Đó a ɖe kɔ dó mǐ, a jǒ mǐ dó nyi hwɛgban mǐtɔn lɛ́ɛ glɔ́. Nǔ ká ɖo mɔ̌ có, Mawu Mavɔmavɔ, hwi wɛ nyí tɔ́ mǐtɔn. Mǐdɛɛ lɛ́ɛ ɔ́, ko wɛ mǐ nyí, hwi wɛ ka nyí zɛ̌nmɛtɔ́ ɔ́; mǐ bǐ wɛ nyí alɔ towe nǔwiwa. Mawu Mavɔmavɔ, ma sin xomɛ ó, ma sin xomɛ ní dín gbě ó. Hwɛ e mǐ hu lɛ́ɛ ɔ́, ma ɖo flínflín wɛ káká sɔ́yi ó. Lo ɔ́, kɛnklɛ́n bó kpɔ́n mǐ jí; kpɔ́n mǐ mɛ e nyí togun towe lɛ́ɛ bǐ jí. Mawu Mavɔmavɔ, toxo mímɛ́ towe lɛ́ɛ ɔ́, mɛ ɖé sɔ́ ɖo yě mɛ ǎ; gbɛtɔ́ ɖokpó sɔ́ ɖo Jeluzalɛ́mu ǎ, Sinyɔ́ɔ húzú to gbigba. Xwé e è sɔ́ ɖó vo nú we ɔ́, xwé ɖagbe ɖagbe e gbe tɔ́gbó mǐtɔn lɛ́ɛ nɔ́ ji han dó kpa susu nú we ɖe ɔ́ bǐ wɛ ji myɔ, bɔ nǔ e vɛ́ nú mǐ lɛ́ɛ bǐ gba hánnyá. Mawu Mavɔmavɔ, a nǎ mɔ awě énɛ́ lɛ́ɛ ɖo xixo mǐ wɛ bó ná kɛ nu ǎ wɛ a? A nǎ tin bó kpɔ́n, bó dó winnyá ɖaxó énɛ́ mǐ wɛ ǎ? Mawu ɖɔ: “Un ɖo gbesisɔ mɛ ɖɔ è nǐ wá kan nǔ byɔ́ mì, mɛɖé ká nɔ́ kan nǔɖé byɔ́ mì ǎ. Un ɖo gbesisɔ mɛ ɖɔ è nǐ wá mɔ mì; mɛɖé ká nɔ́ wá gɔ̌n ce ǎ. Un ɖɔ nú togun ɖé ɖɔ: ‘Nyi ɖíe ɖo fí e, nyi ɖíe ɖo fí e’. Togun énɛ́ ka nɔ́ xomlá mì ǎ. Un nɔ dlɛ́n alɔ nú togun gǔfɔ́ntɔ́ ɔ́, togun e ɖo ali nyanya jí é, togun e nǔ e wá tamɛ n'i é jɛ́n é nɔ́ bló é; un nɔ dlɛ́n alɔ n'i hwebǐnu. Togun énɛ́ ká nɔ́ ɖo nǔɖɔ ba mì wɛ gannaganna hwebǐnu; yě nɔ́ ɖo vɔ̌ sá wɛ gbɔn vodúnzun mɛ vodúnzun mɛ, bó nɔ́ ɖo zǎlínkpɔ́n dó zo wɛ gbɔn vodúnkpe jí vodúnkpe jí. Yě nɔ́ yi sá xwé ɖó yɔdo mɛ, yě nɔ́ yi cí sónu mɛ sónu mɛ; yě nɔ́ ɖu aglǔza lan, nǔ e yě nɔ́ ɖu lɛ́ɛ bǐ wɛ nyí nǔ blíblí. Yě nɔ́ ɖɔ nú mɛ lɛ́ɛ ɖɔ: ‘Ma sɛkpɔ́ mì ó, ma ɖó alɔ wǔ ce ó. A sɛkpɔ́ mì ɔ́, é ná vɛ́ afɔ nú we, ɖó nyɛ ɔ́, vo wɛ è sɔ́ mì ɖó nú Mawu.’ Un mɔ nǔ énɛ́ lɛ́ɛ e wa wɛ mi nɔ ɖe ɔ́, xomɛ nɔ sin mì bɔ xo ce mɛ nɔ hun agbǎn. Nǔ énɛ́ lɛ́ɛ bǐ wɛ ɖo wěma mɛ ɖo gɔ̌n ce. Énɛ́ wú ɔ́, un ma sú axɔ́ tɔn yě ǎ ɔ́, un ná gbɔjɛ́ ǎ; un ná sú axɔ́ tɔn yě ganjí. Un ná sú nǔ e yě wa ɔ́ sín axɔ́ yě, bó ná lɛ́ sú nǔ e tɔ́gbó yětɔn lɛ́ɛ wa é lɔ sín axɔ́ yě, ɖó yě nɔ́ dó zǎlínkpɔ́n zo gbɔn só jí só jí; yě nɔ́ ba nǔɖɔ mì gbɔn só kpɛví kpɛví lɛ́ɛ jí. Nǔ e yě wa ɖ'ayǐ lɛ́ɛ ɔ́, un ná sú bǐ sín axɔ́ yě. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ ɖɔ: “Ényí è mɔ vǐwun bɔ é kó myá ɔ́, è nɔ́ ɖɔ: ‘Ma hɛn gblé ó, ɖó é ná ná vɛ̌ɛn ɖagbe.’ Mɔ̌ wɛ nyi lɔ ná bló gbɔn: un ná sú mɛ bǐ sín kún dó ǎ, ɖó mɛ e nɔ sɛn mì lɛ́ɛ wú. Un ná ná vǐ Jakɔ́bu sín togun ɔ́, akɔta Judáa tɔn ɔ́, só ce lɛ́ɛ ná nyí yětɔn; só ce lɛ́ɛ ná nyí mɛ e un sɔ́ lɛ́ɛ tɔn; mɛ e nɔ sɛn mì lɛ́ɛ ná nɔ só ce lɛ́ɛ jí. Ayǐkúngban wɛnjɛ Calɔ́ni tɔn ná húzú amagbo nú gbɔ̌ lɛ́ɛ, bɔ tɔdo Akɔ́ɔ tɔn ná húzú fí e nyibú togun ce tɔn lɛ́ɛ ná nɔ́ nɔ é, nyibú togun ce e ná lɛ́ kɔ wá gɔ̌n ce lɛ́ɛ tɔn ná nɔ é. Amɔ̌, mi mɛ e jó nyɛ Mawu Mavɔmavɔ dó lɛ́ɛ ɔ́, mi mɛ e wɔn só mímɛ́ ce, bó nɔ́ tɛ́ távo nú Gadi ‘taɖagbevodún’, bó nɔ́ ba ahan nú Mɛni ‘byɔ̌wá’ vodún lɛ́ɛ ɔ́, un ná cyán mi ɖó te nú hwǐ. Mi bǐ ná jɛ kpo, bɔ è nǎ gbo gbe mi. Đó un ylɔ́ mi bɔ mi ka sɔ ǎ; un ɖɔ xó, mi ka ɖótó mì ǎ, bɔ nǔ e má nɔ́ jló mì ǎ é wiwa nɔ́ víví nú mi. Énɛ́ ɔ́ wú ɔ́, xó e nyɛ Aklúnɔ Mavɔmavɔ ɖɔ ɔ́ ɖíe: Mɛsɛntɔ́ ce lɛ́ɛ ná mɔ nǔ e yě ná ɖu é, bɔ midɛɛ lɛ́ɛ ka ná nɔ xovɛ́. Mɛsɛntɔ́ ce lɛ́ɛ ná mɔ sin bó nu, midɛɛ lɛ́ɛ ka ná nɔ nugblá. Mɛsɛntɔ́ ce lɛ́ɛ ná ɖo awǎjijɛ mɛ, midɛɛ lɛ́ɛ ka ná ɖu winnyá. Mɛsɛntɔ́ ce lɛ́ɛ ná nɔ́ ɖo xó sú wɛ kpó awǎjijɛ kpó, ɖó nǔ ná nyɔ́ nú yě; midɛɛ lɛ́ɛ ká ná ɖo wǔvɛ́ mɔ wɛ bó ná ɖo xó sú wɛ. Mi ná dán ɖě wa gbɔn bó ná ɖo alě ná wɛ. Mɛ e un sɔ́ lɛ́ɛ ɔ́, nyǐkɔ mitɔn wɛ yě ná nɔ́ dó dó nu mɛ, yě ná nɔ́ ɖɔ: ‘Aklúnɔ Mavɔmavɔ ní hu we mɛ lě, abǐ keté lě ɖɔhun.’ Amɔ̌, mɛ e nyí mɛsɛntɔ́ ce lɛ́ɛ ɔ́, nyǐkɔ ɖěvo wɛ un ná ná yě. Mɛ ɖěbǔ jló ná byɔ́ fífá nú mɛ ɖo to ɔ́ mɛ ɔ́, é ná byɔ́ nú mɛ ɔ́ ɖo Mawu gbejínɔtɔ́ ɔ́ sín nyǐkɔ mɛ. Mɛ ɖěbǔ ná xwlé nǔ ɖo to ɔ́ mɛ ɔ́, é ná xwlé ɖo Mawu gbejínɔtɔ́ ɔ́ sín nyǐkɔ mɛ.” Mawu ɖɔ: “Tagba xóxó tɔn lɛ́ɛ ɔ́, è nǎ wɔn yě. Yě ná bú sín nukún ce mɛ. É ɖíe, un ná bló jǐnukúnsin yɔ̌yɔ́, bó ná bló ayǐkúngban yɔ̌yɔ́. Énɛ́ ɔ́, mɛ ɖé sɔ́ ná flín nǔ xóxó lɛ́ɛ ǎ. Yě sɔ́ ná wá ayi mɛ nú mɛ ɖé ǎ. Xomɛ ní hun mi, mi nɔ j'awǎ hwebǐnu ɖó nǔ e ná bló wɛ un ɖe lɛ́ɛ wú: un ná sɔ́ Jeluzalɛ́mu dó húzú toxo e mɛ awǎjijɛ ná gɔ́ é, un ná sɔ́ Jeluzalɛ́munu lɛ́ɛ dó húzú togun e ná nɔ ɖo awǎjijɛ mɛ é. Un ná nɔ́ j'awǎ ɖó Jeluzalɛ́mu wú, xomɛ ná nɔ́ hun mì ɖésú ɖó togun ce wú. È sɔ́ ná se avǐ kpó xósúsú kpó ɖě gbeɖé ɖo fínɛ́ ǎ. Yɔkpɔ́vú ɖě sɔ́ ná flɛ́ kɛ́n ǎ; Degénɔ ɖě sɔ́ ná kú azǎn tɔn má sɔgbe ǎ; mɛ e ná ɖó xwe kanwe ko (100), bó ná kú ɔ́, è nǎ ɖɔ dɔ̌nkpɛ mɛ wɛ é ɖe bó kú. Mɛ e ma ná ɖó xwe kanwe ko (100), có bó kú ǎ ɔ́, è nǎ ɖɔ nu wɛ è dǒ e. Yě ná sá xwé bó nɔ ɛ mɛ. Yě ná tun vǐwun bó ná ɖu sínsɛ́n tɔn. Yě sɔ́ ná sá xwé ɖě, bɔ mɛ ɖěvo ná nɔ mɛ ǎ; yě ká sɔ́ ná tun vǐwun ɖě, bɔ mɛ ɖěvo ná wá ɖu sínsɛ́n tɔn ǎ. Ji e atín nɔ́ dɔ́ é wɛ togun ce ná dɔ́. Mɛ e un sɔ́ lɛ́ɛ ɔ́, nǔ e yě sɔ́ alɔ yětɔn dó bló lɛ́ɛ ɔ́, yě ná ɖu le tɔn. Yě sɔ́ ná jɛ tagba dó wǔvɔ́ ɖě ǎ. Vǐ e yě ná ji lɛ́ɛ ɖě sɔ́ ná kú ɖo nukún yětɔn mɛ ǎ, ɖó mɛ e jí un xo ɖɛ dó lɛ́ɛ wɛ yě nyí, yě kpó vǐ yětɔn lɛ́ɛ kpó. Cóbónú yě ná ylɔ́ mì ɔ́, un ná kó sɔ nú yě, yě ná kpo ɖo xó ɖɔ wɛ cóbɔ un ná kó se xó yětɔn. Hla kpó lɛ̌ngbɔ́ví kpó ná ɖu ama ɖó kpɔ́; kinnikínní ná ɖu ama nyibú ɖɔhun; dan ná nɔ́ ɖu kɔ́. Mɛ ɖé sɔ́ ná wa nyanya nú mɛ ɖé ǎ, mɛɖé ká sɔ́ ná hɛn nǔ gblé ɖo só mímɛ́ ce ɔ́ jí ǎ. Xó e nyɛ Mawu Mavɔmavɔ ɖɔ ɔ́ nɛ́.” Xó e Mawu Mavɔmavɔ ɖɔ ɔ́ ɖíe: “Jǐnukúnsin ɔ́, axɔ́súzinkpo ce wɛ, ayǐkúngban ka nyí afɔɖótɛn ce. Énɛ́ ɔ́, xwé alɔkpa tɛ́ mi ná sixú sá nú mì? Fítɛ́ mi ka sixú bló bɔ un ná nɔ? Nyi wɛ sɔ́ alɔ ce dó bló nǔ énɛ́ lɛ́ɛ bǐ, bɔ nǔ énɛ́ lɛ́ɛ bǐ tíin. Nyɛ ɔ́, mɛ e un nɔ sɔ́ nukún ɖagbe dó kpɔ́n é ɖíe: lelenɔ e awakanmɛ kú é, mɛ e nɔ se xó ce bó nɔ́ ɖó sísí ɖaxó ná é. È ja vɔ̌ sá gbé ɔ́, mɛ lɛ́ɛ nɔ hu nyibú; hwenu e yě ɖo nyibú hu wɛ ɔ́, yě nɔ́ lɛ́ hu gbɛtɔ́. Yě nɔ́ lɛ́ hu gbɔ̌; hwenu e yě ɖo gbɔ̌ hu wɛ ɔ́, yě nɔ́ hu cukú. Yě nɔ́ hɛn vɔ̌sánú bó nɔ́ wá xwlé mì; hwenu e yě ɖo vɔ̌sánú xwlé mì wɛ ɔ́, yě nɔ́ lɛ́ ɖo aglǔza kanjɔ kɔn nyi ayǐ wɛ. Yě nɔ́ ɖo zǎlínkpɔ́n dó zo nú mì wɛ; hwenu e yě ɖo zǎlínkpɔ́n dó zo nú mì wɛ ɔ́, yě nɔ́ lɛ́ ɖo vodún xomlá wɛ. Mɛ énɛ́ lɛ́ɛ ɔ́, nǔ e jló yě lɛ́ɛ wa wɛ yě ɖe; nǔ baɖabaɖa énɛ́ lɛ́ɛ wiwa wɛ nɔ́ víví nú yě. Ée é cí mɔ̌ din é ɔ́, nyi lɔmɔ̌ ɔ́, un ná jó yě dó, bɔ nǔ e ɖo tónúmase yětɔn mɛ ɔ́, yě ná mɔ. Nǔ e ná dó adohu nú yě ɔ́ wɛ un ná dɔn wá nú yě, ɖó un ylɔ́ yě, bɔ yě ɖě ká sɔ ǎ; un ɖɔ xó, yě ɖě ká ɖótó mì ǎ; nǔ e má nɔ́ nyɔ́ nukún ce mɛ ǎ lɛ́ɛ wɛ yě wa, bó sɔ́ ali e ma jló mì ǎ é.” Mi mɛ e se Mawu Mavɔmavɔ xó ɔ́, mi nɔ ɖó sísí ná lɛ́ɛ ɔ́, mi ɖótó xó e Mawu Mavɔmavɔ ɖɔ é: “Nɔví mitɔn e gbɛ́ wǎn nú mi ɖó nyǐkɔ ce wú, bó nɔ́ ɖo mi nya wɛ lɛ́ɛ nɔ́ ɖo slǎmɛ ɖɔ mi wú wɛ ɖɔ: ‘Mawu Mavɔmavɔ ní bó ɖe susu tɔn xlɛ́ bó! Énɛ́ ɔ́, nǔ ná víví nú mi bɔ mǐ ná mɔ.’ Amɔ̌, yě mɛ e ɖo mɔ̌ ɖɔ wɛ lɛ́ɛ ná ɖu winnyá.” Mi ɖótó xó e sú wɛ è ɖe ɖo toxo ɔ́ mɛ é; xó e sú wɛ è ɖe sín Mawu xwé ɔ́ gbe é; Mawu Mavɔmavɔ wɛ ɖo nǔ e kɛntɔ́ tɔn lɛ́ɛ wa é sín axɔ́ sú yě wɛ. Cóbónú Jeluzalɛ́mu ná jɛ flú mɛ ɔ́, é kó ji vǐ. Cóbónú vǐ nǔ ná jɛ wiwa ɛ jí ɔ́, é kó ji vǐ súnnu ɖokpó. Mɛ̌ ká se xó mɔ̌hun kpɔ́n gbeɖé? Mɛ̌ ká mɔ nǔ mɔ̌hun kpɔ́n gbeɖé? To nɔ sɔ́ azǎn ɖokpó ɖó te, bó nɔ jɔ wɛ a? Akɔta ɖokpó ɔ́, gbe ɖokpó wɛ é nɔ́ jɔ a? Lě e Jeluzalɛ́mu ka wa nǔ gbɔn ɔ́ nɛ́: káká e Jeluzalɛ́mu ná jɛ flú mɛ ɔ́, é kó ji vǐ tɔn lɛ́ɛ. Mawu Mavɔmavɔ ɖɔ: “Un ná hɛn xoxónɔ káká bɔ vǐ ji hwenu tɔn ná su, bó ná gɔn blǒbló bɔ é ná ji vǐ ɔ́ wɛ a?” Mawu towe ɖɔ: “Nyɛ mɛ e nɔ ná gbɛ mɛ ɔ́, è nǎ ja gbɛ wá gbé, bɔ un ná lɛ́ gbɛ́ a?” Mi j'awǎ xá Jeluzalɛ́mu. Mi mɛ e yí wǎn n'i lɛ́ɛ, xomɛ ní hun mi bǐ dó wǔ tɔn. Mi mɛ e ko nɔ aluwɛ mɛ xá ɛ lɛ́ɛ ɔ́, mi bǐ ní j'awǎ xá ɛ. Énɛ́ ɔ́, é ná ná akɔ́nkpinkpan mi; mi ná gɔ́ xo, lě e vǐnɔ sín anɔ̌ nɔ́ só ganjí, bɔ vǐ yɛ̌yɛ́ nɔ́ nɔ́ kpó awǎjijɛ kpó é ɖɔhun. Mawu Mavɔmavɔ ɖɔ: “É ɖíe, un ná sɛ́ nyɔ̌ná dó Jeluzalɛ́mu, bɔ é ná sukpɔ́ káká bó ná sa yi gɔ̌n tɔn tɔsisa ɖɔhun; dɔkun akɔta lɛ́ɛ tɔn ná sukpɔ́ ɖo así tɔn káká bó túnflá tɔ ɖi sin ɖɔhun. Un ná kpé nukún dó mi wú vǐnɔ ɖɔhun; un ná dó anɔ̌ nú mi, un ná sɔ́ mi dó nɛgbé, un ná sɔ́ mi ɖó akɔn bó xwe mì dó amlɔ mɛ. Un ná dó gbɔ nú mi vǐnɔ ɖo gbɔ dó nú vǐ tɔn wɛ ɖɔhun. Un ná dó gbɔ nú mi ɖo Jeluzalɛ́mu. Mi ɖésúnɔ ná mɔ bɔ xomɛ ná hun mi; gbɛ ná wá mi wú, jǐhwenugběhan ɖɔhun.” Mawu Mavɔmavɔ ná sɔ́ hlɔ̌nhlɔ́n tɔn dó wa ɖagbe nú mɛsɛntɔ́ tɔn lɛ́ɛ, bó ká ná sin xomɛ dó kɛntɔ́ tɔn lɛ́ɛ. Đó Mawu Mavɔmavɔ ná zɔn myɔ mɛ wá; ahwankɛkɛ́ví tɔn lɛ́ɛ ná wá kpó hlɔ̌nhlɔ́n kpó jɔhɔn ɖaxó ɖé ɖɔhun; Mawu Mavɔmavɔ ná kɔn xomɛsin tɔn kɔn nyi ayǐ kpó adǎn kpó, é ná zɔn myɔ mɛ bó wá bló nǔ e sín adǎn é gblɔ́n é. Myɔ kpó hwǐ kpó wɛ Mawu Mavɔmavɔ ná dó ɖɔ hwɛ xá gbɛtɔ́ lɛ́ɛ bǐ. Mɛ e Mawu Mavɔmavɔ ná hu lɛ́ɛ ná sukpɔ́. Mɛ e nɔ slá wǔ ɖó vodúnzun mɛ ná yi wú lɛ́ɛ xó ɖɔ wɛ un ɖe ɖo fí. Yě nɔ́ kplé bó nɔ́ cí mɛ e ɖo tɛ́ntin ɔ́ gúdo; yě nɔ́ ɖu aglǔza, yě nɔ́ ɖu ajaka, yě nɔ́ ɖu kanlin baɖabaɖa lɛ́ɛ; yě bǐ wɛ ná kú zɛ̌ɛ́n. Xó e Mawu Mavɔmavɔ ɖɔ ɔ́ nɛ́. Mawu ɖɔ: “Un tunwun nǔ e yě nɔ́ wa ɔ́, bó tunwun nǔ e yě nɔ́ lin ɔ́. Un ná wá bó ná kplé togun e nɔ dó gbe tɛnmɛ tɛnmɛ lɛ́ɛ bǐ; yě bǐ ná wá bó ná mɔ susu ce. Un ná sɔ́ wuntun ɖé ɖó tɛ́ntin yětɔn. Mɛ e ná gán ɖo hwɛ e un ná ɖɔ xá yě ɔ́ mɛ lɛ́ɛ ɔ́, un nǎ sɛ́ yě dó togun Taasísi tɔn mɛ, un nǎ sɛ́ yě dó togun Púti tɔn mɛ, bó ná sɛ́ yě dó togun Lǔdi tɔn mɛ. Mɛ énɛ́ lɛ́ɛ nyɔ́ gǎ da mɔ̌hunkɔtɔn. Un ná sɛ́ yě dó mɛ e ɖo Tubalu lɛ́ɛ gɔ́n, un nǎ sɛ́ yě dó mɛ e ɖo Glɛ̌si lɛ́ɛ gɔ́n, bó ná sɛ́ yě dó tɔtɛ́ntinto e ɖo to ɖé má yá to ɖé mɛ, bó má se xó ce kpɔ́n gbeɖé ǎ lɛ́ɛ gɔ́n; è mɔ susu ce ɖo fí énɛ́ lɛ́ɛ gbeɖé ǎ; yě ná ɖe susu ce xlɛ́ togun énɛ́ lɛ́ɛ. Énɛ́ ɔ́, mɛ énɛ́ lɛ́ɛ ná kplá nɔví mitɔn e ɖo yě gɔ́n lɛ́ɛ bǐ wá nú mì nǔníná ɖɔhun; è nǎ bɛ́ yě ɖó sɔ́ jí; è nǎ bɛ́ yě dó ahwankɛkɛ́ví mɛ; è nǎ bɛ́ yě ɖó kɛkɛ́ví e è cyɔ́n nǔ ta ná é mɛ; è nǎ bɛ́ yě ɖó tócí abǐ lǎkúnmí jí, bó ná kplá yě káká wá só mímɛ́ ɔ́ kɔn, ɖo Jeluzalɛ́mu. É ná nyí nǔníná bɔ yě ná hɛn wá nú mì, bɔ un ná yí, nǔníná e Izlayɛ́li ví lɛ́ɛ nɔ hɛn dó agbǎn mímɛ́ mɛ wá nú mì é ɖɔhun. Un ná fɔ mɛ ɖé lɛ́ɛ ɖo yě mɛ dó ɖó vɔ̌sánú-xwlémawutɔ́ kpó Levíi ví kpó. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ ɖɔ: “Lě e jǐnukúnsin yɔ̌yɔ́ e un ná bló é, kpó ayǐkúngban yɔ̌yɔ́ e un ná bló é kpó ná nɔ te káká sɔ́yi ɔ́, mɔ̌ ɖokpó ɔ́ wɛ vǐ mitɔn lɛ́ɛ kpó nyǐkɔ mitɔn lɛ́ɛ kpó ná nɔ te káká sɔ́yi. Énɛ́ ɔ́, sun wá jǐ tɛgbɛ ɔ́, gbɛtɔ́ lɛ́ɛ bǐ ná nɔ́ wá ɖe kɔ́ nú mì. Gbɔjɛzán gbe tɛgbɛ ɔ́, gbɛtɔ́ lɛ́ɛ bǐ ná nɔ́ wá ɖe kɔ́ nú mì. Nú è tɔ́n sín Jeluzalɛ́mu toxo ɔ́ mɛ ɔ́, è nǎ nɔ́ mɔ mɛ e fɔ́n gǔ dó jǐ ce lɛ́ɛ sín cyɔ; wě e ná ɖo yě ɖu wɛ lɛ́ɛ ná kú gbeɖé ǎ; myɔ e mɛ yě ká ná ɖe ɔ́ ná cí gbeɖé ǎ. Nǔ baɖabaɖa wɛ é ná nyí nú gbɛtɔ́ lɛ́ɛ bǐ.” Xó e Jelemíi Ilukyahu ví ɔ́ ɖɔ lɛ́ɛ wɛ ɖo wěma élɔ́ mɛ. Jelemíi ɔ́, vɔ̌sánú-xwlémawutɔ́ lɛ́ɛ sín hɛ̌nnu mɛ wɛ é jɔ ɖe. Anatɔ́ti toxo mɛ wɛ é nɔ́ nɔ, ɖo akɔta Bɛnjamɛ́ɛ tɔn sín ayǐkúngban jí. Xwe e xwe Joziyási Judáa xɔ́sú, Amɔ́ni ví ɔ́ ɖo xwe wǒ-atɔn bló ɖo gǎn jí é wɛ Mawu Mavɔmavɔ ɖɔ xó nú Jelemíi azɔn nukɔntɔn. Mawu Mavɔmavɔ lɛ́ ɖɔ xó n'i hwenu e Yoyakímu Joziyási ví ɔ́ lɔ wá ɖo axɔ́sú ɖu ɖo Judáa to ɔ́ nu wɛ é. É ɖɔ xó n'i azɔn gǔdo gúdo tɔn ɔ́ hwenu e Sedesíyasi e nyí Joziyási ví ɖěvo ɔ́ lɔ wá ɖo axɔ́sú ɖu wɛ ɖo Judáa to ɔ́ nu ɔ́, ɖo xwe tɔn wǒ-ɖokpógɔ́ ɔ́ sín sun atɔ́ɔ́ngɔ́ ɔ́ mɛ. Hwenɛ́nu wɛ è kplá Jeluzalɛ́munu lɛ́ɛ yi kannumɔgbénu, bɔ axɔ́súɖuɖu Sedesíyasi tɔn fó. Xó e Mawu ɖɔ nú mì é ɖíe: “Cóbónú un ná bló we dó nɔ towe xomɛ ɔ́, un ko tunwun we; cóbónú a nǎ jɛ te sín nɔ towe xomɛ ɔ́, un ko sɔ́ we ɖó vo, bɔ a nǎ wa azɔ̌ nú mì; un sɔ́ we bɔ a nǎ nyí gbeyíɖɔ ce nú akɔta lɛ́ɛ.” Ée Mawu ɖɔ mɔ̌ ɔ́, un ɖɔ: “Yéége Aklúnɔ, Mawu Mavɔmavɔ, un ma nyɔ́ xó ɖɔ nɛ́! Yɔkpɔ́vú wɛ nú mì.” Bɔ Mawu Mavɔmavɔ ɖɔ nú mì ɖɔ: “Ma ɖɔ émí nyí yɔkpɔ́vú ó; mɛ e gɔ́n un ná sɛ́ we dó lɛ́ɛ ɔ́, a nǎ yi bǐ gɔ́n bó ná ɖɔ nǔ e un zɔ́n we lɛ́ɛ bǐ nú yě. Ma ɖi xɛsi nú yě ó, ɖó un ɖo kpɔ́ xá we; un ná hwlɛ́n we gán. Nyɛ Mawu Mavɔmavɔ wɛ ɖɔ mɔ̌ nú we.” Énɛ́ ɔ́, Mawu Mavɔmavɔ dlɛ́n alɔ, bó ɖó nu ce wú, bó ɖɔ nú mì ɖɔ: “Énɛ́! Un sɔ́ xó ce lɛ́ɛ dó nu towe mɛ. Kpɔ́n! Égbé din ɔ́, un sɔ́ we ɖó akɔta lɛ́ɛ kpó axɔ́súɖuto lɛ́ɛ kpó nu: un ná acɛ we bɔ a nǎ hɔn yě atín ɖɔhun, a nǎ mu yě zin dɛ́ atín ɖɔhun; a nǎ hɛn nǔ gblé, a nǎ dó nǔ ahannya; a nǎ gbá xɔ, a nǎ tun atín.” Xó e Mawu Mavɔmavɔ lɛ́ ɖɔ nú mì ɔ́ ɖíe: “Jelemíi, étɛ́ mɔ wɛ a ka ɖe nɛ́?” Bɔ un yí gbe n'i ɖɔ amaditín sín ala wɛ, atín e nɔ ɖo gbesisɔ mɛ bó nɔ́ yá wǔ gba sɛ́ é. Bɔ Mawu Mavɔmavɔ ɖɔ nú mì ɖɔ: “A mɔ ganjí, ɖó un nɔ ɖo gbesisɔ mɛ, bɔ un ɖɔ nǔɖé ɔ́ un nɔ bló ɖ'é jí.” Mawu Mavɔmavɔ lɛ́ ɖɔ nú mì azɔn wegɔ́ ɖɔ: “Étɛ́ mɔ wɛ a ka ɖe nɛ́?” Bɔ un yí gbe n'i ɖɔ: “Un mɔ ganzɛ́n ɖokpó, bɔ nǔ e ɖ'é mɛ ɔ́ ɖo agbǎn hun wɛ. É nya dó kɛ́n sín totaligbé tunta mì.” Ée un ɖɔ mɔ̌ ɔ́, Mawu Mavɔmavɔ ɖɔ nú mì ɖɔ: “Totaligbé wɛ awě ná gosín bó ná wá gba mɛ e ɖo Judáa to ɔ́ mɛ lɛ́ɛ bǐ. Nyɛ Mawu Mavɔmavɔ ɖo ɖiɖɔ wɛ ɖɔ: Un ná ylɔ́ togun ɖěɖě e ɖo axɔ́súɖuto e ɖo totaligbé lɛ́ɛ mɛ lɛ́ɛ bǐ; yě ná wá bɔ axɔ́sú yětɔn lɛ́ɛ ɖokpó ɖokpó ná sɔ́ zinkpo tɔn ɖó Jeluzalɛ́mu toxo ɔ́ sín hɔntogbó lɛ́ɛ jí. Yě ná xá ahohó tɔn lɛ́ɛ, bó ná tɔ́n ahwan Judáa toxo lɛ́ɛ bǐ. Un na bló mɔ̌ dó dɔn tó nú toví lɛ́ɛ, ɖó hwɛ e yě hu ɔ́ wú: yě jǒ mì dó; yě dó zǎlínkpɔ́n zo nú vodún; yě ɖe kɔ́ nú nǔ e yě sɔ́ alɔ yě ɖésúnɔ tɔn dó bló lɛ́ɛ. Jelemíi, hwɛ ɔ́, sí te, sɔ́ nǔ bó ná yi ɖɔ nǔ e un zɔ́n we lɛ́ɛ nú yě. Ma ɖi xɛsi ɖo nukɔn yětɔn ó, é má nyí mɔ̌ ǎ ɔ́, un ná dó xɛsi we ɖo nukɔn yětɔn. Éɖíe, égbé din ɔ́, un ná hlɔ̌nhlɔ́n we bɔ a nǎ syɛ́n toxo e è mɛ ahohó lɛ́ lɛ̌ dó é ɖɔhun; a nǎ syɛ́n ahohó ɖɔhun; a nǎ syɛ́n gandotín ɖɔhun; a nǎ syɛ́n ganvɔdó ɖɔhun. Mɔ̌ wɛ a nǎ nɔ ɖo to ɔ́ bǐ nukɔn: Judáa xɔ́sú lɛ́ɛ, gǎn hɔn-yitɔ́ lɛ́ɛ, vɔ̌sánú-xwlémawutɔ́ lɛ́ɛ kpó toví lɛ́ɛ bǐ kpó nukɔn. Yě ná tɔ́n ahwan we, yě ká ná kpé wǔ we ǎ, ɖó un ɖo kpɔ́ xá we bó ná hwlɛ́n we gán. Nyɛ Mawu Mavɔmavɔ wɛ ɖɔ mɔ̌ nú we.” Xó e Mawu Mavɔmavɔ ɖɔ nú mì é ɖíe: “Yi, bó ɖɔ dó Jeluzalɛ́munu lɛ́ɛ tó mɛ ɖɔ nyɛ Mawu Mavɔmavɔ ɖɔ: Jeluzalɛ́mu, un nɔ flín wǎn yíyí e a ɖó nú mì hwenu e a ɖo ɖyɔ̌vǐ mɛ é. Un nɔ flín lě e wǎn ce yí we gbɔn hwenu e a nyí yawó é. Hwenɛ́nu ɔ́, a ɖo xwixwedó mì wɛ ɖo gbětótló mɛ, fí e jinukún ɖě má nɔ nyɔ́ ɖe ǎ é. Izlayɛ́li, nyɛ Mawu Mavɔmavɔ ɖokpónɔ tɔn wɛ a nyǐ; jinukún nukɔntɔn e nɔ nyɔ́ ɖo gle mɛ é ɖɔhun wɛ a cí nú mì. Mɛ e wa nǔ xá we lɛ́ɛ bǐ wɛ un dɔn tó ná: Awě xo yě. Xó e nyɛ Mawu Mavɔmavɔ ɖɔ ɔ́ nɛ́. Jakɔ́bu ví e mi! Mi ɖótó nyɛ Mawu Mavɔmavɔ! Hɛ̌nnu e ɖo Izlayɛ́li tomɛ lɛ́ɛ mi, mi bǐ ɖótó mì. Mi ɖótó xó e ɖɔ wɛ nyɛ Mawu Mavɔmavɔ ɖe ɔ́: Hɛ̌n tɛ́ tɔ́gbó mitɔn lɛ́ɛ ka mɔ ɖo wǔ ce bó hɔn nú mì? Étɛ́wú yě jɛ vodún nǔ ma ɖó ta ɖé lɛ́ɛ xwe dó jí, bɔ yě ɖésúnɔ wá húzú nǔ ma ɖó ta ɖé? Yě kanbyɔ́ yěɖée vɔ́vɔ́ ɖɔ fítɛ́ Mawu Mavɔmavɔ e kplá émí sín Ejípu tomɛ ɔ́ ka ɖe é jí ǎ; yě kanbyɔ́ yěɖée ɖɔ Mawu Mavɔmavɔ e kplá émí gbɔn gbětótló mɛ, axéko jí fí e do gbɔn fí bǐ ɖe ɔ́, fí e jǐ ma nɔ ja ɖe gbeɖé ǎ ɔ́, fí e ablu ɖu axɔ́sú ɖe ɔ́, fí e mɛɖé má nɔ gbɔn gbeɖé ǎ ɔ́, fí e mɛɖé ma nɔ nɔ gbeɖé ǎ é ɔ́, yě kanbyɔ́ yěɖée ɖɔ fí e Mawu énɛ́ ɔ́ ka ɖe a jí ǎ. To e mɛ un ka kplá mi wá ɔ́, to ɖé wɛ ayǐkúngban tɔn nɔ nyɔ́ jinukún, bónú mi ná nɔ́ ɖu jinukún ɖagbe ɖagbe e ná nɔ nyɔ́ ɖo to ɔ́ mɛ lɛ́ɛ. Lo ɔ́, ée mi wá to ɔ́ mɛ é ɔ́, mi wá hɛn to ɔ́ blí, bɔ to e nyí ce bɔ un sɔ́ ɖó ayǐ nú mi ɔ́, mi wá zé dó húzú suɖunú. Vɔ̌sánú-xwlémawutɔ́ lɛ́ɛ kan fí e nyɛ Mawu Mavɔmavɔ ɖe ɔ́ byɔ́ ǎ; sɛ́ngán lɛ́ɛ lɔ ka tunwun mì ǎ; agunnukɔntɔ́ lɛ́ɛ fɔ́n gǔ dó jǐ ce; gbeyíɖɔ lɛ́ɛ nɔ ɖɔ xó dó Baalu nyíkɔ mɛ; yě bǐ nɔ xwedó vodún, vodún ka nɔ kpé nǔ ɖěbǔ wú ǎ. Énɛ́ ɔ́ wú wɛ un ɖo hwɛ dó mi wɛ, bó ná lɛ́ dó hwɛ vǐ mitɔn lɛ́ɛ. Xó e nyɛ Mawu Mavɔmavɔ ɖɔ ɔ́ nɛ́. Mi yi tɔtɛ́ntinto Cíplu tɔn lɛ́ɛ mɛ ɖo gbadahwe jí, bó kpɔ́n nǔ ganjí; mi sɛ́ mɛ dó Kedáa gbé jí, ɖo zǎnzǎnhwe jí, bó kpɔ́n ɖɔ nǔ mɔ̌hunkɔtɔn ɖě jɛ ɖo dɔ̌n kpɔ́n a jí? Akɔta ɖě tíin bó gbɛ́ nǔmɛsɛn tɔn lɛ́ɛ, bó jɛ ɖěvo sɛn jí kpɔ́n a? Có nǔmɛsɛn énɛ́ lɛ́ɛ ká nyí Mawu ǎ. Lo ɔ́, togun ce sɔ́ vodún dó ɖyɔ́ nyɛ mɛ e nyí susu tɔn é ná; vodún ka nɔ kpé nǔ ɖěbǔ wú ǎ. Nǔ énɛ́ ɔ́ ní hu ado nú jǐxwé, é ní dó xɛsi n'i, é ní kú wǔ n'i. Xó e nyɛ Mawu Mavɔmavɔ ɖɔ ɔ́ nɛ́. Hwɛ hǒxo wɛ togun ce hu: yě jǒ nyɛ mɛ e nyí tɔjɔtɛn e mɛ sin e nɔ ná gbɛ mɛ ɔ́ nɔ sa sín ɔ́ dó, bó yi kun sitɛ́nu; sitɛ́nu lɛ́ɛ bǐ ká gba, ɖě nɔ́ hɛn sin ǎ.” Mawu ɖɔ: “Izlayɛ́li ɔ́, kannumɔ wɛ é nyí a? Vǐ ɖo mɛ gɔ́n wɛ é nyí a? Étɛ́wú é ká ná húzú alɔnugbɔ́ví nú akɔta ɖě lɛ́ɛ lo? Akɔta lɛ́ɛ kplɔ́ dó e kinnikínní ví ɖɔhun; yě nɔ́ dó gbe dó jǐ tɔn. Yě vívá to tɔn bɔ é dó xɛsi. Yě dǒ toxo tɔn lɛ́ɛ bǐ zo, mɛ ɖěbǔ sɔ́ nɔ́ nɔ toxo lɛ́ɛ mɛ ǎ. Mɛfísinu lɛ́ɛ kpó Tapanɛ́sinu lɛ́ɛ kpó ɔ́, yě lɔ wá zɔn Izlayɛ́li jí bó xwlɛ́ ta n'i. Hwɛ Izlayɛ́li, ée nyɛ Mawu Mavɔmavɔ, Mawu towe ɖo ali ɖagbe jí kplá we gbɔn wɛ, bɔ hwɛ ka jó mì dó ɔ́, nǔ mɔ̌hun ná gɔn gbigbo we wɛ a? Din ɔ́, nú a yi Ejípu tomɛ, bó ná yi nu Nilu tɔ ɔ́ sín sin ɔ́, ɖagbe tɛ́ wɛ sin ɔ́ ná wa nú we? Nú a yi Asilíi tomɛ, bó ná yi nu Efláti tɔ ɔ́ sín sin ɔ́, ɖagbe tɛ́ wɛ sin ɔ́ ná wa nú we? Nǔ nyanya wiwa towe ná wa nǔ xá we; gbejí ma nɔ towe ná dɔn tó nú we, bɔ a nǎ mɔ ɖɔ nyɛ Mawu Mavɔmavɔ, Mawu towe e a jǒ dó ɔ́, tɛn ce mɛ e a ma tunwun nú mì ǎ ɔ́ ná vlɛ́ nu nú we; é ná nylá nú we ɖésú. Xó e nyɛ Aklúnɔ Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.” Mawu ɖɔ: “Izlayɛ́li, a ɖo gǔ fɔ́n dó jǐ ce wɛ din ɔ́, é kó lín. A dǒ gúdo mì bǐ, lobo nɔ ɖɔ fí e émí nɔ mɛ kannu jɛ ɔ́ kpé, bó ka nɔ jɛ wɛn gbɔn só bǐ jí; a nɔ ɖo wɛn gbɔn atínmú bǐ sá agalɛtɔ́ ɖɔhun. Vǐwuntín ɖagbe ɖagbe ɖé ɖɔhun wɛ a cí, bɔ un tun. Atín ɖagbe ɖé wɛ a nyǐ bɔ un tunwun ɖɔ a na sɛ́n ganjí; nɛ̌ ká gbɔn bɔ a húzú mɔ̌? Nɛ̌ ká gbɔn bɔ a cí vǐwuntín gbě tɔn ɖɔhun mɔ̌? A na bo sɔ́ klé dó lɛ wǔ ná ɔ́, a na bó sɔ́ aɖǐ dó lɛ wǔ ɔ́, hwɛ towe lɛ́ɛ ná súnsún sín nukɔn ce gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́. Nɛ̌ a ka na ɖɔ émí kún hɛn émíɖée blí ó gbɔn? Nɛ̌ a ka na ɖɔ émí kún sɛn Baalu lɛ́ɛ ɖě ó gbɔn? Kpɔ́n afɔ e a ɖe ɖo tɔdo mɛ e! Yǐ gbe ɖɔ émí wa nǔ nyi do. A cí lǎkúnmísixwɛ e asú jló bɔ é ɖo biba kpé gbɔn fí bǐ wɛ ɔ́ ɖɔhun. A cí tócí asi gbě tɔn ɖɔhun, axéko jí gbíngbɔ́n kó má hwi lɔ; asú yíyí byɔ́ ta mɛ nú tócí asi gbě tɔn bɔ é má ko mɔ ǎ ɔ́, é nɔ́ ɖo tócí asú sín wǎn dó wɛ. Mɛ̌ ka sixú gbɛ́ n'i ɖɔ é má gbɔ jlǒ tɔn ó? Tócí asú ɖé ɖo biba ɛ wɛ ɔ́, é ɖó tagba ǎ. Asú yíyí byɔ́ ta mɛ n'i ɔ́, asú lɛ́ɛ nɔ mɔ ɛ. Nyɛ ɔ́, un ɖɔ nú we ɖɔ hwi ní bló dɛ̌dɛ̌; un ɖɔ nú we ɖɔ hwi ɖo gblagbla dán wɛ mɔ̌ ɔ́, hwi ná gblé wǔ dó afɔ. A ka ɖɔ: ‘Ma jɛ tagba dó ta ce mɛ ó; un yí wǎn nú vodún bó ná xwedó yě.’ È yi gbo ajotɔ́ dó ɔ́, lě e é nɔ́ ɖu winnyá gbɔn ɔ́, mɔ̌ wɛ Izlayɛ́li to ɔ́ ná ɖu winnyá gbɔn: Izlayɛ́li ví lɛ́ɛ, axɔ́sú yětɔn lɛ́ɛ, gǎn hɔn-yitɔ́ yětɔn lɛ́ɛ, vɔ̌sánú-xwlémawutɔ́ yětɔn lɛ́ɛ kpó gbeyíɖɔ yětɔn lɛ́ɛ kpó bǐ na ɖu winnyá. Izlayɛ́li, a nɔ ɖɔ nú bǒcyɔ ɖɔ: ‘Hwi wɛ nyí tɔ́ ce’, bó nɔ́ ɖɔ nú awǐnnya ɖɔ: ‘Hwi wɛ ná gbɛ mì!’ A nɔ jló ná kpɔ́n gɔ̌n ce ǎ; a nɔ dó gǔdo mì. Adǎn ká wá gbo we ɔ́, a nǎ sú xó ylɔ́ mì, bó ná ɖɔ: ‘Sí te, bó hwlɛ́n mì gán.’ Lo ɔ́, un ka na kán byɔ́ we ɖɔ: ‘Fítɛ́ vodún e a bló lɛ́ɛ ká yi? Nú yě sixú hwlɛ́n we gán ɖo adǎngbomɛ hwenu hǔn, yě ní wa bló bó! Judáa, vodún nabí e a ɖǒ ɔ́ sɔ toxo nabí e a ɖǒ é.’ ” Mawu Mavɔmavɔ ɖɔ: “Judáa ví e mi, étɛ́wú mi ka ɖo hwɛ dó mì wɛ? Mi bǐ wɛ fɔ́n gǔ dó jǐ ce. Un dɔn tó nú mi, é ká nyí nǔɖé nú mi ǎ. Nǔ e gbɛ́ nú mi wɛ un ɖe ɔ́, mi se ǎ. Mi wa nǔ kinnikínní ɖɔhun; mi sɔ́ hwǐ dó vúnvún gbeyíɖɔ e ɖo mi mɛ lɛ́ɛ. Dinví e mi, mi ɖótó xó e ɖɔ wɛ Mawu Mavɔmavɔ ɖe ɔ́ ganjí. Gbětótló wɛ un nyí nú Izlayɛ́li to ɔ́ a? To e dó ablu ɔ́ wɛ un nyí n'i a? Étɛ́wú togun ce ka nɔ ɖɔ: ‘Mǐ ɖo jlokoko, mǐ jló ná lɛ́ kɔ wá gɔ̌n towe ǎ?’ Đyɔ̌vǐ nɔ wɔn acɔ́ɖónú tɔn lɛ́ɛ wɛ a? Nyɔ̌nu xwési nɔ́ wɔn aɖɔkɛn tɔn wɛ a? É jɔ kpɔ́n ǎ, amɔ̌ midɛɛ lɛ́ɛ e nyí togun ce ɔ́, mi wɔn mì; mi wɔn mì bɔ azǎn tɔn sɔ́ nyí xixa ǎ.” “Súnnu jló mi lě ɔ́, ayi wínníwínní ɖo mi sí bɔ mi nɔ dó ba. Nǔ énɛ́ ná wa dandan zɔ́n bɔ mɛhuhu tlɛ má mi. Mi hu mɛ káká bɔ xomɛvɔ́nɔ sín kanjɔ kɔn nyi awu mitɔn sín kɛyɛ lɛ́ɛ mɛ. Yě ká ɖo hɔn mitɔn gba wɛ bɔ mi wá gbo yě dó ǎ. Mi ɖo nǔ wa gbɔn mɔ̌ wɛ, bó nɔ́ ɖɔ xomɛvɔ́nɔ wɛ émí nyí, Mawu kún ɖo xomɛ ɖě ná sin dó émí wɛ ó. Xomɛvɔ́nɔ e mi nɔ ɖɔ émí nyí ɔ́ wú wɛ un ná dɔn mi yi hwɛgun.” “Mi ka nɔ yá wǔ húzú gbe mɛ nya! Lě e mi ɖu winnyá ɖo Asilíi nukɔn gbɔn ɔ́, mɔ̌ wɛ mi ná ɖu gbɔn ɖo Ejípu nukɔn. Mi ná ɖu winnyá, mi ná cyɔ́n alɔ nukún mɛ bó ná lɛ́ kɔ wá xwé. Nǔgbó ɔ́, nyɛ Mawu Mavɔmavɔ ɔ́, un gbɛ́ wǎn nú mɛ e wú mi ɖeji dó lɛ́ɛ. Mi ná mɔ nǔɖé nu ɖo yě gɔ́n ǎ.” Mawu Mavɔmavɔ ɖɔ: ényí mɛ ɖé nya asi tɔn bónú é yi da súnnu ɖěvo ɔ́, asú tɔn xóxó ɔ́ nɔ́ lɛ́ lɛ́ kɔ yi nyɔ̌nu ɖokpó énɛ́ ɔ́ gɔ́n wɛ a? Nǔ cí mɔ̌ ɔ́, su wɛ è ɖu nú to ɔ́ nɛ́ ǎ cé? Izlayɛ́li, hwɛ ɔ́, xɔnnɔ towe e ɖó xó xá we din lɛ́ɛ ko sukpɔ́ bɔ a nǎ lɛ́ lɛ́ kɔ wá gɔ̌n ce wɛ a? Xó e nyɛ Mawu Mavɔmavɔ ɖɔ ɔ́ nɛ́. Izlayɛ́li, sɔ́ kɔ dó jǐ bó kpɔ́n só lɛ́ɛ jí. Fítɛ́ ká kpo bɔ a ma ko dó afɔ gbě ɖe ǎ? A jǐnjɔ́n alitó, bó ɖo te kpɔ́n súnnu agalɛtɔ́ towe lɛ́ɛ, mɛ e nɔ ɖo gbětótló mɛ lobo nɔ ɖo te kpɔ́n mɛ e na jɛ mɔ tɔn mɛ é ɖɔhun. A zě aga towe kpó adǎka towe kpó dó ɖu su nú to ɔ́. É sín énɛ́ ɔ́ wú bɔ jǐ gbɛ́ jija, xwejí ja ǎ. Lo ɔ́, a ɖǒ wunhínhɔ́n ná agalɛtɔ́ ɖɔhun; a jlǒ ná yí gbe ɖɔ émí wa nǔ nyi do ǎ. Din ɔ́, a ka nɔ ɖo xó sú ylɔ́ mì wɛ ɖɔ: “Daá ce, kpɛxɔ́ntɔn ce wɛ a nyǐ! Xomɛ sin dó mì wɛ jɛ́n a nǎ ɖe tɛgbɛ a? A nǎ jó xomɛsin ɔ́ dó gbeɖé ǎ cé?” Mɔ̌ jɛ́n a nɔ ɖɔ, a ka fɔ́n bó gɔn nǔ nyanya wa gbeɖé ǎ; azɔ̌ towe wɛ é kó nyí. Hwenu e Joziyási ɖo axɔ́sú ɖu wɛ ɔ́, Mawu Mavɔmavɔ ɖɔ nú mì ɖɔ: “A mɔ nǔ e Izlayɛ́li gbejímánɔtɔ́ ɔ́ bló é a? É dó afɔ gbě gbɔn só bǐ jí, gbɔn atínmú bǐ sá. Amɔ̌, nyɛ ɔ́, un ka mɔ ɖɔ ée Izlayɛ́li dó nǔ énɛ́ lɛ́ɛ bǐ sin din é ɔ́, é ná lɛ́ kɔ wá gɔ́n ce. É ká lɛ́ kɔ wá ǎ mɛ! Nɔví tɔn Judáa afɔdógbětɔ́ ɔ́ ka mɔ nǔ énɛ́ lɛ́ɛ bǐ. Un nya Izlayɛ́li gbejímánɔtɔ́ ɔ́, ɖó afɔ e é dó gbě ɔ́ wú, lobo wlán wěma dó así n'i ɖɔ un gbɛ́ ɛ, có nɔví tɔn Judáa ɔ́ ɖi xɛsi ǎ mɛ! É lɔ yi dó afɔ gbě Izlayɛ́li ɖɔhun. Afɔ e Izlayɛ́li dó gbě bó ɖu winnyá ɔ́ wɛ nyí su bɔ é ɖu nú to ɔ́. É lɛ aga xá vodún e è sɔ́ awǐnnya dó lí lɛ́ɛ kpó ée è sɔ́ atín dó lí lɛ́ɛ kpó. Nǔ ɖo mɔ̌ có nɔví tɔn Judáa afɔdógbětɔ́ ɔ́ lɛ́ kɔ wá gɔ̌n ce kpó ayi tɔn bǐ kpó ǎ. Yɛmɛnú wɛ é wa.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ nú mì ɖɔ: “Nú è sɔ́ Izlayɛ́li gbejímánɔtɔ́ ɔ́ kpó Judáa afɔdógbětɔ́ ɔ́ kpó ɖó te ɔ́, è nǎ mɔ ɖɔ Izlayɛ́li kún wa nǔ nyi do sɔ mɔ̌ ó. Yi, yi bó sú xó sɛ́ dó totaligbé ɖɔ Mawu Mavɔmavɔ ɖɔ: ‘Izlayɛ́li gbejímánɔtɔ́! Lɛ̌ kɔ wá. Un ná sɔ́ nukún nyanya dó kpɔ́n we ǎ. Un nɔ kú nǔbláwǔ nú mɛ. Un na nɔ xomɛsin jí káká sɔ́yi ǎ. Vɛ̌ ko tunwun kpowun ɖɔ émí hu hwɛ; tunwun ɖɔ émí kún nɔ gbejí nú nyɛ Mawu Mavɔmavɔ, Mawu towe ó, tunwun ɖɔ émí nɔ hwlɛ́n dó vodún lɛ́ɛ gbɔn atínmú sá atínmú sá, tunwun ɖɔ émí kún ɖótó mì ó.’ ” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Vǐ gbejímánɔtɔ́ e mi, mi lɛ́ kɔ wá gɔ̌n ce! Đó nyi wɛ ɖó mi. Un ná cyán mi kplé, un ná kplá mɛ ɖokpó abǐ mɛ we sín toxo mitɔn lɛ́ɛ ɖokpó ɖokpó mɛ, bó ná lɛ́ kplá sín hɛ̌nnu mitɔn lɛ́ɛ ɖokpó ɖokpó mɛ, lobo na kplá mi wa Sinyɔ́ɔ. Un na ná mi lɛ̌ngbɔ́nyitɔ́ e nɔ wa nǔ e jló mì lɛ́ɛ. Yě ná nɔ mi nu kpó nǔnywɛ́ kpó. “Hwenɛ́nu ɔ́, mi ná sukpɔ́ ɖo to ɔ́ mɛ, mi ná ji gba; è sɔ́ ná ɖɔ akɔjijɛgbá ce sín xó ɖě ǎ. È ka sɔ́ ná flín lɔ ǎ, xó tɔn ká sɔ́ ná nɔ ayi mɛ nú mɛɖé ǎ. Mɛ ɖé ká sɔ́ ná mɔ ɖɔ akɔjijɛgbá ɔ́ kún ɖo fínɛ́ ó ǎ; è ka sɔ́ ná bló ɖěvo ǎ. Hwe nɛ́ nu ɔ́, è nǎ ylɔ́ Jeluzalɛ́mu ɖɔ axɔ́súzinkpo Mawu Mavɔmavɔ tɔn. Akɔta lɛ́ɛ bǐ ná kplé ɖo fínɛ́ ɖo gɔ̌n ce. Yě sɔ́ ná xwedó ayixa baɖabaɖa e ɖo xo yětɔn mɛ lɛ́ɛ ɖě dó wa nǔ ǎ. Énɛ́ ɔ́, mi Judáa togun ɔ́ ná wá gɔ́ nú Izlayɛ́li togun ɔ́, bɔ mi bǐ nǎ zɔn kpɔ́ sín to e ɖo taligbé ɔ́ mɛ, fí e è kplá mi yi é, bó ná lɛ́ kɔ wá to élɔ́ e un ná tɔ́gbó mitɔn lɛ́ɛ ɔ́ mɛ.” Mawu ɖɔ: “Đ'ayǐ ɔ́, un nɔ ɖɔ un ná zé we bɔ hwi lɔ ná nyí vǐ nú mì, bɔ un ná ná we gbɛɖuto, to e nyɔ́ hú nǔ bǐ ɖo gbɛ ɔ́ mɛ e. Un nɔ ɖɔ a nǎ ylɔ́ mì ɖɔ tɔ́; un nɔ ɖɔ a kún sɔ́ ná lɛ́ kɔ sín gǔdo ce ɖě ó. Amɔ̌, Izlayɛ́li, lě e nyɔ̌nu nɔ ɖo asúxwé bó nɔ́ dó afɔ gbě ɔ́, mɔ̌ wɛ a blǒ xá mì gbɔn. Xó e nyɛ Mawu Mavɔmavɔ ɖɔ ɔ́ nɛ́. È se xósúsú ɖé sín só jí aga: Izlayɛ́li ví lɛ́ɛ wɛ ɖo avǐ ya wɛ bó ɖo vo sa wɛ. Đó yě zɛ ali, yě wɔn nyɛ Mawu Mavɔmavɔ, Mawu yětɔn ɔ́. Vǐ gbejímánɔtɔ́ e mi, mi lɛ́ kɔ wá! Gbejímánɔ sín azɔn e jɛ wɛ mi ɖe ɔ́, un ná gbɔ nú mi!” Togun ɔ́ ɖɔ: “Mǐ ɖíe! Mǐ ja gɔ̌n towe ɖó hwi wɛ nyí Mawu Mavɔmavɔ, Mawu mǐtɔn. Vodún e mǐ sɛn gbɔn sókan mɛ sókan mɛ nɛ́ lɛ́ɛ ɔ́, mǐɖée wɛ mǐ blɛ̌; xó wɛ mǐ sú gbɔn só ta só ta dó wǔvɔ́. Hwi Mawu Mavɔmavɔ, Mawu mǐtɔn ɖokpó gɔ́n jɛ́n mǐ Izlayɛ́li ví lɛ́ɛ na mɔ hwlɛngán ɖe. Sín vǔ mǐtɔn ɖokpóó ɔ́, vodún Baalu e mɛjitɔ́ mǐtɔn lɛ́ɛ nɔ sɛn ɔ́ zɔ́n bɔ nǔ e yě ɖó lɛ́ɛ bǐ vɔ: gbɔ̌ yětɔn kpó nyibú yětɔn kpó vɔ, vǐ súnnu yětɔn kpó vǐ nyɔ̌nu yětɔn kpó vɔ; sinsɛn yětɔn énɛ́ ɔ́, winnyánú wɛ. Winnyá húzú adɔ̌zan nú mǐ, bɔ hɛ̌n nú e mǐ wa lɛ́ɛ nyí wǔcyɔ́n nú mǐ; ɖó mǐ hu hwɛ dó hwi Mawu Mavɔmavɔ, Mawu mǐtɔn. Tɔ́gbó mǐtɔn lɛ́ɛ bǐ hu hwɛ dó we sín vǔ yětɔn, bɔ mǐ lɔ ɖo hwɛ hu dó we wɛ sín vǔ mǐtɔn káká wá jɛ égbé. Mǐ hu hwɛ, mǐ se tónú nú xó e hwi Mawu Mavɔmavɔ, Mawu mǐtɔn ɖɔ nú mǐ ɔ́ ǎ.” Mawu Mavɔmavɔ ɖɔ: “Izlayɛ́li e, nú a lɛ̌ kɔ ɔ́, gɔ̌n ce wɛ a ɖǒ ná lɛ́ kɔ wá; nú a ɖe vodún suɖunú towe lɛ́ɛ sín nukɔn ce ɔ́, a sɔ́ ná flú ɖě ǎ. Hwe nɛ́ nu ɔ́, a nǎ xwlé nyɛ Mawu Mavɔmavɔ e ɖo gbɛ ɔ́, a nǎ xwlé nǔgbó nǔgbó tɔn, a nǎ xwlé ɖó sɛ́nxwi jí, a nǎ xwlé kpó ayi towe bǐ kpó. A blǒ mɔ̌ ɔ́, akɔta ɖě lɛ́ɛ na byɔ́ mì ɖɔ nyɛ ní xo ɖɛ dó émí jí, yě ná zé mì dó xɔ susu ná. Nǔ e Mawu Mavɔmavɔ ɖɔ nú Judáanu lɛ́ɛ kpó Jeluzalɛ́munu lɛ́ɛ kpó é ɖíe; é ɖɔ: Mi xwa gle yɔ̌yɔ́ ɖokpó. Mi ma dó nǔkún nyi wunkan mɛ ó. Judáanu e mi! Jeluzalɛ́munu e mi! Mi ko gbo ada, amɔ̌, ada e mi gbo ɔ́ ní wa azɔ̌ ɖo ayi mitɔn lɔ wú, bónú mi jó gbɛ mitɔn bǐ dó nú mì. É má nyi mɔ̌ ǎ ɔ́, xomɛsin ce táá wá xɔ myɔ ɖɔhun. É ná xɔ myɔ ɖɔhun bɔ cící ná gló, ɖó lě e dǎka e mi xo lɛ́ɛ syɛ́n sɔ é wú.” Xó e mi ná ɖɔ gbɔn Judáa yíkúngban jí ɔ́ ɖíe, xó e mi ná jlá ɖo Jeluzalɛ́mu ɔ́ ɖíe, mi ɖɔ: Mi bǐ mi kún lanzo gbɔn to ɔ́ bǐ mɛ! Mi sú xó bó ɖɔ: Mi wá kplé miɖée ɖó toxo e è mɛ ahohó lɛ́ lɛ̌ dó lɛ́ɛ mɛ. Mi sɔ́ asyá dó jǐ ɖo Sinyɔ́ɔ! Mi hɔn! Mi ma nɔ te ó! Đó un sɛ́ awě ɖé dó sín totaligbé, nǔ baɖabaɖa wɛ. Kinnikínní tɔ́n sín zun tɔn mɛ, mɛ e nɔ gblé gbɛ dó nú akɔta lɛ́ɛ e ko gosín fí e é nɔ́ nɔ é, é jǎwe, é ná wá vɔ to mitɔn. É ná gba toxo mitɔn lɛ́ɛ bǐ, mɛɖé sɔ́ ná kpo ɖo toxo lɛ́ɛ mɛ ǎ. Énɛ́ ɔ́ wú ɔ́, mi cyɔ́n ati, mi ya avǐ, mi ná alě, ɖó xomɛ e Mawu Mavɔmavɔ sin dó mǐ ɔ́ ko vɔ ǎ. Mawu Mavɔmavɔ ɖɔ jí, gbe énɛ́ ɔ́ gbe ɔ́, axɔ́sú kpó gǎn hɔn-yitɔ́ kpó bǐ ná bɛ́ xɛsi. É ná kpácá vɔ̌sánú-xwlémawutɔ́ lɛ́ɛ, ado ná hu gbeyíɖɔ lɛ́ɛ. Lo ɔ́, un ɖɔ: “Yéége Aklúnɔ Mavɔmavɔ, a blɛ̌ togun élɔ́; a blɛ̌ Jeluzalɛ́mu; a ɖɔ mǐ na vo, hwǐ ɖíe ka ɖo kɔ mǐtɔn gúdo din e.” Hwenɛ́nu ɔ́, Mawu ná ɖɔ nú Jeluzalɛ́munu lɛ́ɛ ɖɔ: “Jɔhɔn zozo e nɔ nyi ɖo sókan mɛ ɔ́ sí te sín gbětótló mɛ já, é ná nyi dó mi mɛ e nyí togun ce ɔ́ jí. É ká nyí jɔhɔn flɛ́flɛ́ e nɔ nyi bɔ è nɔ dó fún jinukún é ǎ. Jɔhɔn ɖaxó ɖé wɛ bɔ un sɛ́ dó sín gbětótló mɛ dɔ̌n, bɔ é jǎwe. Lo ɖó hwɛ nú mi wɛ un ɖe nɛ́.” Bɔ togun ɔ́ ná ɖɔ: “Mi kpɔ́n! Kɛntɔ́ ɖíe jǎwe jǐ wɔ̌ ɖɔhun e! Ahwanhún tɔn lɛ́ɛ ɖo zǐngídi jí jǎwe jɔhɔn ɖaxó ɖɔhun! Sɔ́ tɔn lɛ́ɛ kplɔ́ jǎwe gangan xwe nǔ sá gbe ɖɔhun! Heelú! Gbɛ mǐtɔn vɔ lo!” Mawu ná ɖɔ: “Jeluzalɛ́mu, ɖe linlin nyanya sín ayi mɛ, lobo gán. Káká hwetɛ́nu ayi towe ná nɔ jikwíkwí mɔ̌ yi jɛ? È ɖo xó ɖé se wɛ sín Dan gbé jí ɖɔ nǔ baɖabaɖa ɖé ná jɛ; Eflayímu sókan mɛ se xó ɔ́ sín wɛ è ɖe ɖo totaligbé. Mi ɖɔ nú akɔta lɛ́ɛ; mi nú Jeluzalɛ́munu bǐ ní tunwun: Kɛntɔ́ lɛ́ɛ gosín fímáyáfí ɖé bó wá; yě ɖo xó sú dó Judáa toxo lɛ́ɛ jí wɛ. Yě lɛ́ lɛ̌ dó Jeluzalɛ́mu toxo ɔ́ glecɔ́tɔ́ lɛ́ɛ lɛ́ lɛ̌ dó gle ɖɔhun. Gǔ e Jeluzalɛ́mu toxo ɔ́ fɔ́n dó jǐ ce ɔ́ wú wɛ un ɖɔ mɔ̌. Xó e nyɛ Mawu Mavɔmavɔ ɖɔ ɔ́ nɛ́. Jeluzalɛ́mu, nǔ e a dǒ sin lɛ́ɛ sín le nɛ́! Dǎka e a xo lɛ́ɛ sín le nɛ́! Awě e xo we ɔ́ vɛ́ dín. É hun káká yi ayi towe mɛ.” Adɔgo ce! Adɔgo ce! Un ɖo slósló ɖo wǔvɛ́ nu wɛ; hǔn ce nɔ́ xo káká bó nɔ́ ɖibla wɛ́n. Kotokítí tɛ́ ɖíe ɖo xo ce mɛ e! Un sixú nɔ xwíí ǎ; un se lanzo ɖo nǔ ɖɔ wɛ; un ɖo xósúsú se wɛ, mɛ ɖo ahwangbénu ɖɔhun. È ɖɔ nǔ na gblé, bó ná lɛ́ gblé d'é jí. Nǔ e ɖo toxo ɔ́ mɛ lɛ́ɛ bǐ hánnyá. Goxɔ mǐtɔn bǐ gba ɖo cɛ́jú mɛ; xɔ mǐtɔn lɛ́ɛ bǐ mu ɖo nukún xwixwe ɖokpó mɛ. Káká hwetɛ́nu un ka ná mɔ ahwansyá yi jɛ? Káká hwetɛ́nu un ná ɖo lanzo gbe se wɛ yi jɛ? Mawu ɖɔ: “Dandan mɛ ɔ́, togun ce ɔ́, taɖu wɛ é hun; é tunwun mì ǎ. Vǐ ɖé lɛ́ɛ wɛ yě nyǐ bó ɖó tamɛ ǎ. Yě bǐ ǎ; nǔ nyanya kɔn wɛ yě nɔ́ yá alɔ ɖe. Yě nyɔ́ nǔ ɖagbe wa ǎ.” Un kpɔ́n ayǐkúngban ɔ́: ayǐkúngban ɔ́ ɖo mɔ̌ kpowun, nǔ ɖěbǔ ɖ'é jǐ ǎ. Un kpɔ́n jǐnukúnsin bó ba wěziza tɔn kpo. Un kpɔ́n só lɛ́ɛ bó mɔ bɔ bǐ xo to. Kpó lɛ́ɛ bǐ nɔ sísɔ́. Un kpɔ́n fí bǐ lɛ̌ dó, bɔ gbɛtɔ́ ɖěbǔ sɔ́ ɖe ǎ, xɛ lɛ́ɛ bǐ hɔn yi. Un kpɔ́n fí bǐ, bɔ to énɛ́ e nyí atínsínsɛ́n gbo ɔ́ húzú gbětótló. È gba toxo tɔn lɛ́ɛ bǐ. Mawu Mavɔmavɔ sín xomɛsin wɛ jlɛ́ nǔ mɔ̌. Xó e Mawu Mavɔmavɔ ɖɔ ɔ́ ɖíe: “To ɔ́ bǐ ná jɛ vɔ̌. Lo ɔ́, un ná gba nǔ e ɖo to ɔ́ mɛ lɛ́ɛ bǐ ǎ. Énɛ́ wɛ zɔ́n bɔ to ɔ́ ɖo aluwɛ mɛ, bɔ jǐxwé dó ablu. Đó un ko ɖɔ lě e un ba gbɔn ɔ́ nɛ́. É ná wá vɛ́ nú mì ǎ, un sɔ́ ná lɛ́ wá jí ǎ.” Hwenu e sɔ́xátɔ́ lɛ́ɛ kpó gǎdatɔ́ lɛ́ɛ kpó jǎwe, bɔ è se ɔ́, mɛ e ɖo to ɔ́ mɛ e bǐ hɔn. Mɛ ɖě hɔn byɔ́ zunkan mɛ, mɛ ɖě hɔn yi bɛ ɖó sókan mɛ. Mɛ bǐ hɔn sín toxo lɛ́ɛ mɛ; é sɔ́ kpo mɛ ɖěbǔ ǎ. Jeluzalɛ́mu, hwi ɖíe è gba bǐ e! Nɛ̌ a ka ná wa nǔ gbɔn din? A nɔ dó awu ɖagbe ɖagbe lɛ́ɛ, a nɔ́ dó sikánú lɛ́ɛ; a nɔ tá nǔ dó nukún. A nɔ ɖo kan xo wɛ bó nɔ́ ɖo hwiɖée bló ɖó wɛ mɔ̌ có, nǔ yǎyá wa wɛ a ɖe; xɔnnɔ towe lɛ́ɛ ɖo xó towe ba wɛ ǎ, kú towe ba wɛ yě ɖe. Nǔgbó wɛ, un se mɛɖé ɖo xó sú wɛ nyɔ̌nu ɖo ajidonu ɖɔhun; é ɖo xó sú wɛ mɛ ja nukɔn ví jí gbé ɖɔhun. Sinyɔ́ɔ toxo, hwi wɛ ɖo xó sú wɛ. Hwi wɛ ɖo azɔn wɛn wɛ bó nɔ dlɛ́n alɔ bo nɔ ɖɔ: “Un jɛ mɛhutɔ́ lɛ́ɛ lɔ mɛ! Gbɛ ce vɔ!” Mawu ɖɔ: “Mi yi gbɔn ali e ɖo Jeluzalɛ́mu toxo mɛ lɛ́ɛ bǐ jí. Mi kpɔ́n nǔ ganjí, mi ba do nú nǔ, mi ba do ná gbɔn tokplétɛn lɛ́ɛ. Nú mi mɔ mɛ e nɔ wa nǔ ɖó sɛ́nxwi jí ɔ́, mɛ e nɔ ba ná ɖɔ nǔgbó ɔ́ ɖokpó ɖo toxo ɔ́ mɛ ɔ́, un ná kpɔ́n dó mɛ énɛ́ ɔ́ wú, bó ná sɔ́ hwɛ kɛ Jeluzalɛ́mu.” Jelemíi ɖɔ: “Jeluzalɛ́munu lɛ́ɛ nɔ xwlé nǔ bó nɔ́ ɖɔ: ‘Mǐ xwlé Mawu Mavɔmavɔ, mɛ e ɖo gbɛ é.’ Nǔ yǎyá wɛ yě wa, adingban wɛ yě ɖó. Mawu Mavɔmavɔ, nǔgbó ba wɛ a ɖe ǎ cé? A xo yě, é ká nyí nǔɖé nú yě ǎ. A hɛn nǔ gblé dó yě wǔ, yě ká yí gbe nú xó e ɖɔ nú yě wɛ a ɖe lɛ́ɛ ǎ. Ta wɛ yě lɛ́ syɛ́n d'é jí bó gbɛ́ ɖɔ émí kún ná lɛ́ kɔ wá hwi gɔ̌n ó. Un nɔ ɖɔ: ‘Mɛ kpaa wɛ nú yě, yě nɔ́ lin tamɛ kpɔ́n cóbó nɔ́ wa nǔ ǎ; yě tunwun jlǒ Mawu Mavɔmavɔ tɔn ǎ, yě tunwun Mawu yětɔn sín sɛ́n lɛ́ɛ ǎ. Din ɔ́, un ná yi mɛxó lɛ́ɛ gɔ́n bó ná yi ɖɔ xó nú yě. Đó yědɛɛ lɛ́ɛ tunwun Mawu Mavɔmavɔ sín jlǒ, yě tunwun Mawu yětɔn sín sɛ́n lɛ́ɛ.’ Lo ɔ́, yě lɔmɔ̌ fɔ́n gǔ dó Mawu jí, yě dǒ gúdo e bǐ. Énɛ́ ɔ́ wú wɛ kinnikínní zungbó mɛ tɔn wlí yě ɖu. Hla já yě. Kpɔ ɖo wudo mɛ ɖo toxo yětɔn lɛ́ɛ sín hɔntogbó lɛ́ɛ jí. Mɛ e tɔ́n sín toxo lɛ́ɛ mɛ é bǐ wɛ kpɔ vúnvún, ɖó hwɛ yětɔn lɛ́ɛ sukpɔ́ dín, nǔwanyido yětɔn nɔ́ ɖo jijɛ jí wɛ.” Mawu ɖɔ: “Jeluzalɛ́mu, étɛ́wú un ka ná sɔ́ hwɛ kɛ we? Vǐ towe lɛ́ɛ ɖíe ko jó mì dó e. Yě nɔ́ xwlé vodún, vodún ká nyí Mawu ǎ. Un na nǔ bǐ yě, yě ká lɛ́ dó afɔ gbě. Ahwan wɛ yě nɔ́ dó gbě yi agalɛtɔ́ xwé. Yě cí sɔ́ e nyɔ́ wǔ ganjí, bɔ asi nɔ ɖo jlǒjló wɛ lɛ́ɛ ɖɔhun. Jeluzalɛ́munu lɛ́ɛ ɖokpó ɖokpó nɔ́ ɖo wezun nu, ɖo nɔzo yětɔn lɛ́ɛ sín asi gúdo, bó nɔ́ ɖo hǎ byɔ́ yě wɛ. Un na dɔn tó nú yě ɖó nǔ énɛ́ lɛ́ɛ wú ǎ cé? Togun mɔ̌hunkɔ ɔ́, un ná wa nǔ xá ɛ ǎ cé? Xó e nyɛ Mawu Mavɔmavɔ ɖɔ ɔ́ nɛ́. Mi byɔ́ vǐwungbo yětɔn lɛ́ɛ mɛ, bó sú kún yětɔn dó. Amɔ̌, mi ma sú bǐ sín kún dó ó. Mi jlá ala lɛ́ɛ síin, ɖó ala lɛ́ɛ nyí nyɛ Mawu Mavɔmavɔ tɔn ǎ; Nǔgbó wɛ, Izlayɛ́li togun ɔ́ kpó Judáa togun ɔ́ kpó nɔ gbejí nú nyɛ Mawu Mavɔmavɔ ǎ. Xó e nyɛ Mawu Mavɔmavɔ ɖɔ ɔ́ nɛ́.” Mawu ɖɔ: “Izlayɛ́li togun ɔ́ kpó Judáa togun ɔ́ kpó nɔ hu tɛ́ nú nyɛ Mawu Mavɔmavɔ; yě nɔ́ ɖɔ nyɛ Mawu Mavɔmavɔ ɔ́ kún ɖó acɛ ɖé ó. Awě ɖě kún ɖo émí ná xo wɛ ó. Ahwan ɖě kún ká ɖo émí ná tɔ́n wɛ ó, adɔ ɖě kún ká ɖo nǎ tɔ́n émí wɛ ó. Gbeyíɖɔ Mawu tɔn lɛ́ɛ ɔ́, nǔvɔ́nɔ kpowun wɛ nú yě. Xó ɖé ɖo nu yětɔn ǎ. Nǔ e yě ɖɔ ɔ́ ní gbo yě.” Énɛ́ ɔ́ wú ɔ́, nyɛ Mawu Mavɔmavɔ, Mawu Nǔbǐwúkpétɔ́ ɔ́ ɖɔ: Jelemíi, ée yě ɖo xó ɖɔ gbɔn mɔ̌ wɛ é ɔ́, xó e un ná zé dó ayi towe mɛ ɔ́ ná cí zo ɖɔhun, bɔ togun élɔ́ ná nyí nakí e zo ɔ́ ná ji é. Éɖíe, Izlayɛ́li togun e mi, un sɛ́ akɔta ɖokpó dó mi sín fímáyáfí ɖé. Akɔta ɖé wɛ bó ɖó hlɔ̌nhlɔ́n ɖésú, akɔta xóxó ɖé wɛ. Mi se gbe yětɔn ǎ, yě ɖo xó ɖɔ wɛ ɔ́ mi na mɔ nǔ jɛ mɛ ǎ. Gǎ yětɔn lɛ́ɛ nɔ hu mɛ tɛ́; sɔ́ja yětɔn lɛ́ɛ bǐ wɛ syɛ́n. Yě ná vívá nǔ mitɔn lɛ́ɛ bǐ: agɔ̌ mitɔn lɛ́ɛ, nǔɖuɖu mitɔn lɛ́ɛ, vǐ mitɔn súnnu lɛ́ɛ, nyɔ̌nu lɛ́ɛ, gbɔ̌ mitɔn lɛ́ɛ, nyibú mitɔn lɛ́ɛ, vǐwungbo mitɔn lɛ́ɛ, fígigbo mitɔn lɛ́ɛ yě ná vívá bǐ. Toxo mitɔn e mi mɛ ahohó lɛ́ lɛ̌ dó, bó nɔ́ dó yí go na lɛ́ɛ ɔ́, ahwan ná gba bǐ. “Amɔ̌, azǎn énɛ́ lɛ́ɛ gbe ɔ́, un ná sú mi bǐ sín kún dó ǎ. Xó e nyɛ Mawu Mavɔmavɔ ɖɔ ɔ́ nɛ́. Jelemíi, ényí mɛ towe lɛ́ɛ wá jɛ nǔ e wú nyɛ Mawu Mavɔmavɔ, Mawu yětɔn ɖo nǔ wa xá yě gbɔn mɔ̌ wɛ ɔ́ kan byɔ́ jí ɔ́, a nǎ yí gbe nú mɛ towe lɛ́ɛ ɖɔ yě jó nyɛ Mawu yětɔn dó bó ɖo vodún sɛn wɛ, énɛ́ wú wɛ yě ná sɛn jǒnɔ lɛ́ɛ ɖo to ɖěvo mɛ.” Mawu ɖɔ: “Mi ɖɔ xó élɔ́ nú Jakɔ́bu ví lɛ́ɛ, mi jlá gbɔn Judáa yíkúngban ɔ́ bǐ jí. Mi ɖɔ nú yě ɖɔ xlonɔ e mi! Mi ɖótó xó élɔ́! Ayivɔ vún mi. Mi ɖó nukún, mi ká nɔ mɔ nǔ ǎ; mi ɖó tó, mi ka nɔ se nǔ ǎ. Mi ná ɖó sísí nú mì ǎ cé? Mi ná sísɔ́ ɖo nukɔn ce ǎ cé? Nyɛ wɛ sɔ́ kɔ́ dó ɖó dogbó nú xu. Xu sixú dó asá dogbó énɛ́ ɔ́ gbeɖé ǎ. Aslɔkɛ́ lɛ́ɛ ɖo te sí wɛ, yě ká kpé wú ǎ. Aslɔkɛ́ lɛ́ɛ nɔ́ ɖo adǎn jí, amɔ̌, yě sixú zɛ dogbó ɔ́ wú ǎ. Midɛɛ lɛ́ɛ ɔ́, togun ɖé wɛ mi nyí bó se tónú ǎ; gǔ wɛ mi fɔ́n. Mi jó agɔ, lobo ɖi dó. Nyɛ Mawu Mavɔmavɔ, Mawu mitɔn ɔ́, un nɔ ná jǐ mi ɖo jǐ hwenu, un nɔ ná xwejí kpó zǒjí kpó mi, un zé hwenu ɖó te nú mi bɔ mi nɔ ya jinukún ná. Un bló nǔ énɛ́ lɛ́ɛ bǐ nú mi có mi ka ɖɔ: ‘Mi wá nú mǐ ná ɖó sísí nú Mawu Mavɔmavɔ, Mawu mǐtɔn’ ǎ. Nǔ e mi wa nyi do lɛ́ɛ wú wɛ mi ma mɔ nǔ énɛ́ lɛ́ɛ ǎ. Hwɛ e mi hu lɛ́ɛ wɛ sú nǔ énɛ́ lɛ́ɛ sín ali dó mi. Nǔgbó wɛ, adǎkaxotɔ́ lɛ́ɛ ɖo togun ce mɛ. Yě nɔ́ ɖo mɛ cɔ́ wɛ, yě nɔ́ ɖó mɔ nú mɛ gběnyatɔ́ ɖɔhun. Yě nɔ́ ɖó mɔ bó nɔ wlí gbɛtɔ́. Nǔ e yě hízí mɛ bó yí lɛ́ɛ gɔ́ xwé yětɔn, xɛ gɔ́ aja ɖɔhun. Énɛ́ wɛ dó dɔkun nú yě, bɔ yě ɖǒ acɛ. Adǎkaxotɔ́ lɛ́ɛ ɖu nǔ ɖagbe ɖagbe lɛ́ɛ bó kló, wǔtu yětɔn bǐ ɖǐɖí. Yě nɔ́ ɖo adǎka xo wɛ magbokɔ. Yě nɔ́ jɛ ahwan tɔ́cyɔvǐ jí ǎ. É má nyí mɔ̌ ǎ ɔ́, hwɛ ná ko kpa mɛ énɛ́ lɛ́ɛ. Wamamɔnɔ sín hwɛ jɔ ɔ́, yě nɔ́ yí hwɛ n'i ǎ. Nǔ ɖo mɔ̌ ɔ́, un ná dɔn tó nú mɛ ǎ cé? Un ná ba hlɔn ɖó adǎka e togun énɛ́ ɔ́ xo lɛ́ɛ wú ǎ cé? Xó e nyɛ Mawu Mavɔmavɔ ɖɔ ɔ́ nɛ́. Nǔ baɖabaɖa, nǔvɛ́mɔ wɛ yě nɔ́ dó sin ɖo to ɔ́ mɛ: Gbeyíɖɔ lɛ́ɛ nɔ ɖó adingban, vɔ̌sánú-xwlémawutɔ́ lɛ́ɛ ɔ́, ɖuɖu jɛ́n yě nɔ́ ba ɖo nǔ bǐ mɛ. Bɔ nǔ énɛ́ lɛ́ɛ ká nyɔ́ togun ce nukún mɛ. Mi ka zán gbɛ mɔ̌ káká yi fó ɔ́, nɛ̌ mi ná wa nǔ gbɔn?” Mawu ɖɔ: “Bɛnjamɛ́ɛ ví e mi, mi hɔn sín Jeluzalɛ́mu! Mi kún lanzo ɖo Tekowa, bónú mɛ bǐ ní nɔ acéjí. Mi zé ahwansyá dó jǐ ɖo Bɛti-Kɛlɛ́mu. Đó awě ɖé jǎwe, nǔ baɖabaɖa ɖé lɛ́ɛ ja sín totaligbé. Un hánnyá Sinyɔ́ɔ nɛ́! Toxo ɖɛkpɛ ɖɛkpɛ, toxo ɖagbe ɖagbe ɔ́, un hánnyá ɛ lo! Mɛ ɖé lɛ́ɛ hun káká yi gɔ̌n tɔn; yě cí lɛ̌ngbɔ́nyitɔ́ lɛ́ɛ kpó kanlin wɔ̌buwɔ́bú kpó ɖɔhun. Yě ɖó gɔnu yětɔn lɛ́ lɛ̌ dó e, bɔ mɛ ɖokpó ɖokpó ɖo tɛn tɔn mɛ ɖo sɔ́jakánɖó tɔn nu. Yě nɔ́ sú xó ɖɔ: ‘Mi sɔ́ ahwan nú, mi wa mǐ tɔ́n ahwan ɛ hwemɛ cíɖíɖí! Yéége! Mi kpɔ́n! Zǎn ɖo kúkú dó mǐ wɛ, hwe ko ɖo xɔ yi wɛ! Ɔɔɔ! Amɔ̌, mi wá mǐ yi, mǐ na gbɔ bó tɔ́n ahwan ɛ zǎn mɛ; mǐ na gba xwé tɔn ɖagbe ɖagbe lɛ́ɛ.’ Xó e nyɛ Mawu Mavɔmavɔ Nǔbǐwúkpétɔ́ ɖɔ ɔ́ ɖíe: Mi gbo atín bó to ɖó Jeluzalɛ́mu toxo ɔ́ wú; mi to káká yi dǒ ɔ́ ta nu. Mɛtáfútɔ́ kɛ́ɖɛ́ wɛ gɔ́ toxo ɔ́. È mɔ xlɛ̌ tɔn. É nɔ́ ɖe adǎkaxixo tɔn tɔ́n lě e tɔjɔtɛn nɔ ɖe sin tɔ́n gbɔn é! A se è ɖo xó sú wɛ ɖo toxo ɔ́ mɛ hǔn, tunwun ɖɔ alǎnnú wa wɛ è ɖe abǐ è ɖo nǔ hɛn gblé wɛ. Mɛ e ɖo wǔvɛ́ mɔ wɛ lɛ́ɛ kpó mɛ e gblé wǔ wɛ è ɖe lɛ́ɛ kpó nɔ́ ɖo jijɛ jí wɛ bɔ un nɔ ɖo mimɔ wɛ hwebǐnu. Jeluzalɛ́mu, yǐ kplɔ́n ɖo nǔ e ɖo gbigbo we wɛ lɛ́ɛ mɛ, é má nyí mɔ̌ ǎ ɔ́, un táá wá sɛ yi zɔ nú we, bó ná wá sɔ́ we dó húzú gbětótló, ayǐkúngban e jí mɛɖé má ɖe ǎ é.” Xó e Mawu Mavɔmavɔ Nǔbǐwúkpétɔ́ ɖɔ ɔ́ ɖíe: “È nǎ cyán Izlayɛ́li ví ɖokpó ɖokpó e ná kpo lɛ́ɛ bǐ, lě e è gbɛ vǐwun ɔ́, è nɔ lɛ́ wá gbɔn gbo tɔn mɛ ɔ́ ɖɔhun. Jelemíi, alɔ towe ní nɔ́ vɔ́ gbɔn vǐwuntín ɔ́ sín ala lɛ́ɛ wú, lě e vǐwunsínsɛ́ngbɛtɔ́ nɔ́ bló gbɔn ɖo vǐwunsínsɛ́ngbigbɛ hwenu é.” Jelemíi ɖɔ: “Mɛ̌ un ka ná ɖó xó élɔ́ te ná? Mɛ̌ un ka na ɖɔ ná, bɔ é ná sé xá mì? Tó yětɔn ɖíe sú gbɔn, bɔ yě ma nɔ sixú se nǔ ǎ e. Mawu Mavɔmavɔ, xó towe ɔ́, ɖɔɖɔ wɛ yě nɔ́ ɖɔ d'é wú. Xó towe nɔ́ nyí nǔɖé nú yě ǎ. Mawu, xomɛsin towe gɔ́ ayi ce, un sixú hɛn ɖó te ǎ.” Mawu ɖɔ: “Ényí mɔ̌ hǔn, gba kɔn dó yɔkpɔ́vú lɛ́ɛ jí gbɔn alixo alixo; gba kɔn dó mɛ wínnyáwínnyá lɛ́ɛ jí, ɖo fí e yě kplé ɖe lɛ́ɛ. Đó è nǎ zě asú kpó asi kpó yi. È nǎ zě mɛ kpikpo yi; è nǎ zě mɛ e dɔ́ ji é yi. Xwé yětɔn, gle yětɔn kpó asi yětɔn kpó bǐ nǎ húzú mɛ ɖěvo tɔn. Alɔ ce ná jɛ mɛ e ɖo to élɔ́ mɛ lɛ́ɛ wú. Xó e nyɛ Mawu Mavɔmavɔ ɖɔ ɔ́ nɛ́. Đó yě bǐ wɛ dɔkun gbo vɛ̌, bɛ́ sín yɔkpɔ́vú lɛ́ɛ jí, káká yi mɛxó lɛ́ɛ jí. Gbeyíɖɔ kpó vɔ̌sánú-xwlémawutɔ́ kpó bǐ wɛ nɔ xo awo. Awě e ɖo togun ce xo wɛ ɔ́, yě sɔ́ dó ylɔ́ nǔɖé ǎ, bó nɔ́ ɖɔ: ‘Nǔ bǐ ɖo yiyi wɛ; nǔ bǐ ɖo yiyi wɛ linsinlinsin;’ nǔ ɖěbǔ ká ɖo yiyi wɛ ǎ; winnyá wɛ ɖó ná hu yě, ɖó nǔ baɖabaɖa e yě dó sin lɛ́ɛ wú. Winnyá ká hu yě lɔ vɔ́vɔ́ ǎ. Énɛ́ wú wɛ yě ná j'ayǐ kpó mɛ e ɖo ayǐ jɛ wɛ lɛ́ɛ kpó. Hwenu e un ná wa nǔ xá yě ɔ́, yě ná mɔ yěɖée ɖo kɔ́ mɛ. Xó e nyɛ Mawu Mavɔmavɔ ɖɔ ɔ́ nɛ́. Mi ɖótó mì: Mi nɔ te lobo kpɔ́n ali e gbɔn wɛ mi ɖe lɛ́ɛ ganjí. Mi kan ali e tɔ́gbó mitɔn lɛ́ɛ gbɔn ɔ́ byɔ́. Ali ɖě tɛ́ ká nyí ali ɖagbe ɔ́? Mi ba ali énɛ́ ɔ́ lobo wlí. Énɛ́ ɔ́, lǐndɔ̌n mitɔn ná mɔ vivo. Lo ɔ́, mi ɖɔ: ‘Mǐ ba ná gbɔn ali énɛ́ ǎ.’ Un ɖó tɛnmɛ nú mɛ e ná kpɔ́n ali nú mi lɛ́ɛ: Mi bo ɖo tó ɖó lanzo yětɔn wɛ. Lo ɔ́, mi ɖɔ: ‘Mǐ nǎ ɖótó ǎ.’ Énɛ́ ɔ́ wú ɔ́, akɔta ɖě lɛ́ɛ mi, mi ɖótó mì! Gbɛ ɔ́ bǐ ní zé nukún ɖó te, bó ná dó kpɔ́n nǔ e ɖo yě ná xá wɛ é! Gbɛtɔ́ e gbɔn ayǐkúngban ɔ́ jí lɛ́ɛ bǐ ní ɖótó! Éɖíe, un ná sɛ́ awě dó togun élɔ́, yě ná ɖu linlin nyanya e yě ɖǒ ɔ́ sín le. Đó yě wlí tó xó ce lɛ́ɛ wú ǎ, yě hu tɛ́ nú sɛ́n ce. Zǎlínkpɔ́n e è hɛn sín Saba e ba wɛ un ɖe a? Fántín wǎnɖagbenɔ e è hɛn sín to linlin mɛ ɔ́ ba wɛ un ɖe a? Vɔ̌ e yě nɔ́ dó zo nú mì lɛ́ɛ ba wɛ un ɖe ǎ. Vɔ̌ e yě nɔ́ sá nú mì lɛ́ɛ nɔ nyɔ́ nukún ce mɛ ǎ. Énɛ́ ɔ́ wú wɛ nyɛ Mawu Mavɔmavɔ ɔ́, un ná to afɔklɛ́nnú ɖó alixo nú yě, bɔ tɔ́ kpó vǐ kpó bǐ na jɛ ayǐ bó ná kú; mɛ bǐ ná kú: mɛ e kpó mɛ kpó ɖo kpɔ́ é ná kú, xɔ́ntɔn xɔ́ntɔn ná kú.” Mawu Mavɔmavɔ ɖɔ: “Éɖíe, togun ɖokpó gosín to e ɖo taligbé ɔ́ mɛ jǎwe. Akɔta ɖaxó ɖokpó sí te sín fí e gbɛ ɔ́ kponu ɖó é, bó jǎwe. Yě hɛn gǎ kpó hwǎn kpó. Yě jɔ lan ɖésú, yě nɔ́ se gbɔ ǎ. Yě ɖo zǐngídi jí xu ɖɔhun. Sinyɔ́ɔ toxo e, yě bǐ xá sɔ́ bó já; sɔ́ja lɛ́ɛ to yěɖée lyɛ̌ngbe lyɛ̌ngbe, bó ja ahwan tɔ́n we gbé.” Togun ɔ́ ɖɔ: “Ée mǐ se xó énɛ́ ɔ́, awakanmɛ kú mǐ. Akpɔ ɖó mǐ, mǐ jɛ wǔvɛ́ mɔ jí nyɔ̌nu ɖo ajidonu ɖɔhun. Sinyɔ́ɔnu e mi, mi ma yi gle mɛ ó, mi ma jɛ ali ó, ɖó kɛntɔ́ gan hwǐ, bó ɖo te. Xɛsi ɖo fí bǐ.” Mawu ɖɔ: “Togun ce, sɔ́ caki dó lobo lɛ afín. Byɔ̌ aluwɛ mɛ vǐ ɖokpónɔ kú nú mɛ ɖɔhun. Ya avǐ hoho, ɖó hwi ná fyán wɛ nǔhɛngblétɔ́ ɔ́ ɖe.” Mawu ɖɔ: “Jelemíi, un sɔ́ we bɔ a nǎ gbéjé togun ce kpɔ́n, bó ná tunwun nǔ e wa nú wɛ é nyí é. A ɖǒ ná tunwun i; a ɖǒ ná gbéjé zǐnzán tɔn kpɔ́n. Lě e gansínsíntɔ́ nɔ́ sínsín gan bó nɔ́ mɔ do nú nǔ kwíji kwíji e ɖe mɛ ɔ́ gbɔn ɔ́, mɔ̌ wɛ a ná mɔ do nú togun ce gbɔn.” Jelemíi ɖɔ: “Yě bǐ wɛ nɔ fɔ́n gǔ, yě bǐ wɛ nɔ́ ɖɔ mɛ nú, yě bǐ wɛ syɛ́n ɖo azɔ̌ énɛ́ ɔ́ mɛ ganvɔ ɖɔhun; yě bǐ wɛ nɔ xo dǎka. Fletuntɔ́ nɔ́ lɔn bɔ myɔ tɔn nɔ cí ǎ. Nǔ ɖo nǔ ganjí ɔ́, sunmí ɖó ná sínsín ɖo zo nu. Fletuntɔ́ nɔ́ tɛ́nkpɔ́n bó nɔ ɖe nǔ kwíji kwíji sín kpatágan mɛ, bónú é ná húzú kpatágan akú. Amɔ̌, togun élɔ́ tɔn ɔ́, nǔ yǎyá wɛ è wa, nǔ kwíji kwíji tɔn lɛ́ɛ wá yi ǎ. Bɔ è gbɔ bo ylɔ́ togun énɛ́ ɖɔ kpatágan ma ɖo ta ɖé. Đó Mawu Mavɔmavɔ sɔ́ yě nyi gbě.” Xó e Mawu Mavɔmavɔ ɖɔ nú Jelemíi é ɖíe: “Yi cí Mawu Mavɔmavɔ xwé ɔ́ sín hɔnta bó jlá xó élɔ́: Judáanu e mi, mi mɛ e nɔ gbɔn hɔntogbó élɔ́ lɛ́ɛ nu, bó nɔ́ yi ɖe kɔ́ nú Mawu Mavɔmavɔ lɛ́ɛ, mi ɖótó Mawuxó! Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn ɖɔ: Mi húzú jijɔ, mi ɖyɔ́ walɔ; énɛ́ ɔ́, un ná jó mi dó, bɔ mi ná nɔ to mɛ fí. Mɛblɛ́blɛ́ sín xó e sú wɛ è nɔ ɖe, bo nɔ ɖɔ: ‘Xwé e gbe Mawu Mavɔmavɔ nɔ nɔ ɔ́ ɖíe ɖo fí e, Mawu Mavɔmavɔ xwé ɔ́ ɖíe, fí e Mawu Mavɔmavɔ xwé ɔ́ ɖe ɔ́ jɛ́n ɖíe’ é ɔ́, mi ma gán jɛ wú ó. Ényí mi húzú jijɔ, bɔ walɔ mitɔn lɛ́ɛ ɖyɔ́ ɔ́, ényí mi nɔ wa nǔ ɖó sɛ́nxwi jí nú miɖée ɔ́, ényí mi ma nɔ táfú tɔ́cyɔvǐ ǎ, asúkúsi ǎ, jǒnɔ e ɖo to mitɔn mɛ lɛ́ɛ ǎ ɔ́, ényí mi ma nɔ kɔn xomɛvɔ́nɔ sín kanjɔ kɔn nyi ayǐ ɖo fí ǎ ɔ́, ényí mi ma nɔ sɛn vodún lɛ́ɛ dó ba xó dó kɔ nú miɖée ǎ ɔ́, un ná jó mi dó, bɔ mi na nɔ to mɛ fí, to élɔ́ e un ná tɔ́gbó mitɔn lɛ́ɛ sín do bɔ è ná nyí yětɔn káká sɔ́yi ɔ́ mɛ. “Mi ɖíe ká gán jɛ mɛblɛ́blɛ́ xó, xó ma ɖó ta ɖé e sú wɛ è ɖe ɔ́ wú e. Étɛ́! Mi ná nɔ ɖo ajo ja wɛ, mi ná nɔ ɖo mɛ hu wɛ, mi ná nɔ ɖo aga lɛ wɛ, mi ná nɔ ɖo nyǐkɔ ce xwlé dó wǔvɔ́ wɛ, mi ná nɔ ɖo zǎlínkpɔ́n dó zo nú vodún Baalu wɛ, mi ná nɔ ɖo vodún e mi ma tunwun kpɔ́n ǎ lɛ́ɛ sɛn wɛ! Mi ná nɔ ɖo nǔ énɛ́ lɛ́ɛ bló wɛ, bó ká ná nɔ́ lɛ́ kɔ wá gɔ̌n ce, ɖo xwé élɔ́ e è sɔ́ ɖó vo nú mì ɔ́ gbe, bó ná nɔ́ ɖɔ: ‘Éénɛ́, mǐ gǎn!’ Mi nɔ bló mɔ̌, bó nɔ́ mɔ tɛn bó nɔ́ dó nǔ nyanya e jló mi lɛ́ɛ bǐ sin. Xwé élɔ́ e è sɔ́ ɖó vo nú mì ɔ́, é má nyí ajotɔ́ lɛ́ɛ sín avatɛn wɛ mi dó mɔ a? Nyɛ Mawu Mavɔmavɔ ɖésú wɛ mɔ mɔ̌. Xó e nyɛ Mawu Mavɔmavɔ ɖɔ ɔ́ nɛ́. “Mi bo yi Silóo, fí e xwé ce nɔ ɖ'ayǐ é, bó kpɔ́n lě e un hánnyá Silóo énɛ́ gbɔn é. Adǎka e xo wɛ togun ce Izlayɛ́li ɖe ɔ́ wú wɛ un wa nǔ gbɔn mɔ̌. É nyɔ́! Nǔ nyanya e é wa ɔ́ wɛ mi lɔ wa. Un ɖɔ mɔ̌ nú mi, bó fɔ́n bó nɔ́ ɖo ɖiɖɔ nú mi wɛ, mi ka ɖótó mì ǎ; un ylɔ́ mi, mi ka sɔ nú mì ǎ. Énɛ́ ɔ́ wú wɛ xwé élɔ́ e è sɔ́ ɖó vo nú mì ɔ́, xwé élɔ́ e wú mi gán jɛ ɔ́, tɛn élɔ́ e un ná tɔ́gbó mitɔn lɛ́ɛ, bó ná mi lɔmɔ̌ ɔ́, un ná wa nǔ tɔn lě e un wa Silóo sín nǔ gbɔn é. Un ná nya mi dó zɔ, lě e un nya nɔví mitɔn Eflayímu ví énɛ́ lɛ́ɛ bǐ gbɔn é.” Mawu Mavɔmavɔ ɖɔ: “Jelemíi, hwɛ ɔ́, ma xo ɖɛ dó togun élɔ́ ta mɛ ó; ma sa vo nú mì ɖó ta yětɔn mɛ ó! Ma ka byɔ́ nǔɖé mì nú yě ó; ma jɛ kɔ nú mì ɖó ta yětɔn mɛ ó, ɖó un ná ɖótó we ǎ. A mɔ nǔ e dó sin wɛ yě ɖe gbɔn Judáa toxo lɛ́ɛ mɛ é ǎ cé? A lɛ̌ mɔ éé jlɛ́ wɛ yě ɖe gbɔn Jeluzalɛ́mu sín ali lɛ́ɛ jí é ǎ cé? Vǐ lɛ́ɛ nɔ yi cyán nakí, nú tɔ́ yětɔn lɛ́ɛ ná bɔ myɔ; nɔ yětɔn lɛ́ɛ nɔ wún linfín, bó nɔ́ nya, bó nɔ́ ɖa wɔ̌xúxú nú Axɔ́si jǐxwé tɔn. Yě nɔ́ ba ahan nú vodún lɛ́ɛ. Yě nɔ́ bló nǔ énɛ́ dó dó xomɛsin nú nyɛ Mawu Mavɔmavɔ. Bɔ un nɔ ɖɔ: Nyɛ wú wa nǔ dó wɛ yě ɖe a? Gbeɖé, yě ɖésúnɔ wú wa nǔ dó wɛ yě ɖe, amɔ̌, yě ná ɖu winnyá.” Énɛ́ ɔ́ wú wɛ nyɛ Aklúnɔ Mavɔmavɔ ɖɔ: “Xomɛsin ce ná jɛ te dó toxo élɔ́ jí bó ná syɛ́n ɖésú: alɔ ce na jɛ gbɛtɔ́ kpó kanlin kpó, atín kpó nǔ e ayǐkúngban nɔ na lɛ́ɛ kpó bǐ wú. Xomɛsin ce ná cí zo e ma nɔ cí gbeɖé ǎ ɔ́ ɖɔhun.” “Xó e nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe: Kanlin e mi na dó sá vɔ̌ e è nɔ dó zo lɛ́ɛ, kpó kanlin e mi na hu dó sá vɔ̌ xolólo lɛ́ɛ kpó lɛ́ɛ ɔ́, mi xo bǐ sín lan kplé bó ɖu kpowun. Đó gbe e gbe un kplá tɔ́gbó mitɔn lɛ́ɛ sín Ejípu tomɛ ɔ́, un zɔ́n yě ɖɔ yě ní hu kanlin dó sá vɔ̌ e è nɔ dó zo lɛ́ɛ nú mì ǎ, un zɔ́n yě ɖɔ yě ní hu kanlin dó sá vɔ̌ xolólo lɛ́ɛ nú mì ǎ. Nǔ e un zɔ́n yě ɔ́ ɖíe: un ɖɔ nú yě ɖɔ yě ní se xó ce, bónú má nyí Mawu yětɔn, bɔ yě ná nyí togun ce. Ali e un ɖe nú yě ɔ́, yě ní gbɔn ali ɔ́ tlélé, bónú nǔ nǎ nyɔ́ nú yě. Yě ká se ǎ, yě ɖǒtó xó ce ǎ. Nǔ e yě xwe ɔ́ wɛ yě wa; linlin nyanya yětɔn lɛ́ɛ wɛ yě xwedó. Gǔdo wɛ yě yi, yě yi nukɔn ǎ. Sín gbe e gbe tɔ́gbó mitɔn lɛ́ɛ gosín Ejípu ɔ́, un fɔ́n ɔ́ un nɔ ɖo mɛsɛntɔ́ ce gbeyíɖɔ lɛ́ɛ sɛ́ dó mi wɛ káká wá jɛ égbé. Mi ká se ǎ, mi ɖótó xó ce ǎ, nǔ e mi xwe ɔ́ jɛ́n mi wa. Mi gbɛ́ hɛn hú tɔ́gbó mitɔn lɛ́ɛ.” Mawu ɖɔ: “Jelemíi, a na bó ɖɔ xó énɛ́ lɛ́ɛ bǐ nú yě ɔ́, yě ná ɖótó we ǎ. A na bó sú xó bó ɖɔ xó nú yě ɔ́, yě ná kɛ nu d'é mɛ nú we ǎ. Énɛ́ ɔ́ wú ɔ́, gbɔ bo ɖɔ nú yě ɖɔ: togun e ma nɔ ɖótó Mawu Mavɔmavɔ, Mawu tɔn ǎ ɔ́ wɛ mi nyí; togun e ma nɔ se nǔ e Mawu tɔn gbɛ́ n'i lɛ́ɛ ǎ ɔ́ wɛ mi nyí. Nǔgbó ɖiɖɔ vɛ́ mi. Nǔgbó ɖě ɖo nu mitɔn ǎ.” Mawu Mavɔmavɔ ɖɔ: “Judáa togun e mi, mi jó ɖa dó nyi ta dó ɖe xlɛ́ ɖɔ è sɔ́ mi ɖo vo nú mì, mi kpa bǐ, bó bɛ́ kɔ́n nyi gbě. Mi nɔ só tá bó dó gbɛvíhan. Đó mi dó xomɛsin nú mì, un sɔ́ ba mi ǎ, un ɖe alɔ sín kan mitɔn mɛ. “Judáanu e mi, mi dó nǔ e ma nyɔ́ nukún ce mɛ ǎ lɛ́ɛ sin. Mi bɛ́ bǒcyɔ mitɔn lɛ́ɛ wá ɖó xwé ce gbe, xwé e è sɔ́ ɖó vo nú mì é gbe, lobo ɖu su nú xwé ce. Xó e nyɛ Mawu Mavɔmavɔ ɖɔ ɔ́ nɛ́. Mi lí vodún ɖo Tafɛ́ti, ɖo Hinnɔ́ɔ tɔdo ɔ́ mɛ, lobo nɔ dó vǐ mitɔn súnnu kpó nyɔ̌nu kpó zo ɖo fínɛ́ dó sá vɔ̌. Un ka zɔ́n nú mɔ̌ ɖé mi ǎ; é wá ayi mɛ nú mì gbeɖé kpɔ́n lɔ ǎ. “Énɛ́ ɔ́ wú ɔ́, ayǐ ɖokpó ná wá hɔ́n, bɔ mɛɖé sɔ́ ná ɖɔ: ‘Tafɛ́ti’ ɖíe, ‘Hinnɔ́mu tɔdo’ ɖíe ǎ; è nǎ ɖɔ: ‘Mɛ huhu sín tɔdo’ ɖíe. Fínɛ́ wɛ è nǎ ɖi mɛ kúkú lɛ́ɛ ɖó, ɖó tɛn sɔ́ ná tíin ɖo fí ɖěvo ǎ. Cyɔ mitɔn lɛ́ɛ ná húzú nǔɖuɖu nú aklasú lɛ́ɛ kpó ayǐsájɛ lɛ́ɛ kpó. Mɛ ɖěbǔ ná nya yě ǎ. Mɛ ɖé sɔ́ ná se xwe ɖuɖu, awǎjijɛ, alɔwlíhan ɖě ɖo Judáa toxo lɛ́ɛ mɛ ǎ, è nǎ se ɖo Jeluzalɛ́mu sín ali lɛ́ɛ ɖě xo ǎ. Un ná ɖó bǐ te, ɖó to ɔ́ bǐ ná gba hánnyá.” Mawu Mavɔmavɔ ɖɔ: “Hwe énɛ́ ɔ́ nu ɔ́, è nǎ yi bɛ́ gǎn Judáa tɔn lɛ́ɛ sín xú sín yɔdo mɛ: è nǎ yi bɛ́ axɔ́sú lɛ́ɛ sín xú, gǎn hɔn-yitɔ́ lɛ́ɛ sín xú, vɔ̌sánú-xwlémawutɔ́ lɛ́ɛ sín xú, gbeyíɖɔ lɛ́ɛ sín xú, bó ná bɛ́ Jeluzalɛ́munu lɛ́ɛ sín xú, bó tɛ́ xú énɛ́ lɛ́ɛ gbɔn fí bǐ; è nǎ tɛ́ ɖó hwe kpó sun kpó sunví lɛ́ɛ bǐ kpó nukɔn; nǔ énɛ́ lɛ́ɛ wɛ mɛ énɛ́ lɛ́ɛ yí wǎn ná bó sɛn. Nǔ énɛ́ lɛ́ɛ wɛ yě xwedó, nǔ énɛ́ lɛ́ɛ wɛ yě nɔ́ kan nǔ byɔ́, nǔ énɛ́ lɛ́ɛ wɛ yě nɔ́ ɖe kɔ́ ná hwenu e yě ɖo gbɛ é. Mɛ ɖé ná ɖ'alɔ xú énɛ́ lɛ́ɛ wú ǎ; mɛɖé ká ná ɖi yě ǎ; yě ná nyí zunkɔ́ kpowun ɖo ayǐkúngban jí. Mɛ e ka ná kpo ɖo gbɛ ɖo togun dídá élɔ́ mɛ lɛ́ɛ ɔ́, fí e un ná gba yě dó kpé lɛ́ɛ ɔ́, kú ná nyɔ́ hú gbɛ nú yě ɖo fínɛ́; Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.” “Jelemíi, a nǎ ɖɔ nú yě ɖɔ nyɛ Mawu Mavɔmavɔ ɖɔ: È jɛ ayǐ ɔ́, è sɔ́ nɔ́ sí te ǎ cé? Fí e è xwe ɔ́ bú dó mɛ ɔ́, fí e è gosín ɔ́ nɔ́ bú dó mɛ wɛ a? Bɔ étɛ́wú Jeluzalɛ́mu togun ɔ́ ka bú ali, bó ká ná lɛ́ kɔ bɔ é gló? Yě kpo ɖo yěɖée blɛ́ wɛ ɖo vodún yětɔn lɛ́ɛ gúdo bó gbɛ́ kɔ lɛ́ wá gɔ̌n ce. Un ɖo tó ɖó xó e ɖɔ wɛ yě ɖe ɔ́ ganjí: xó yětɔn xwe ali ǎ. Yě ɖěbǔ ba ná jó nǔ nyanya e wa wɛ yě ɖe ɔ́ dó ǎ. Mɛ ɖé ká ɖɔ: ‘Étɛ́ un ka wa nɛ́’ ǎ. Yě bǐ lɛ́ bɔ wezun nyi do, sɔ́ ɖo ahwangbénu ɖɔhun. Aɖɔwé lɛ́ɛ tunwun hwenu e yě ná wá dó ɔ́; axwá lɛ́ɛ, azɔnxɛ lɛ́ɛ kpó tátábolí lɛ́ɛ kpó lɔ tunwun hwenu e yě nɔ́ wá dó ɔ́; togun ce ɔ́ ká tunwun tito e un zé ɖ'ayǐ lɛ́ɛ ɖěbǔ ǎ!” Nɛ̌ mi ka sixú ɖɔ nǔnywɛ́tɔ́ wɛ émí nyí, ɖɔ sɛ́n Mawu Mavɔmavɔ tɔn ɔ́ ɖo émí lɔ mɛ gbɔn? Nɛ̌ mi ná ɖɔ mɔ̌ gbɔn? Mi sixú ɖɔ mɔ̌ ǎ, ɖó mɛ e wlán sɛ́n lɛ́ɛ ɔ́, ahizinɔ wɛ nú yě; yě húzú ada nú sɛ́n ɔ́. Nǔnywɛ́tɔ́ lɛ́ɛ ɖu winnyá bǐ, ahwi xo yě, yě sɔ́ mɔ; ɖó yě hu tɛ́ nú Mawu Mavɔmavɔ xó ɔ́, bɔ nǔnywɛ́ tɛ́ yě ká ɖó lo? Mawu ɖɔ: “Yě bǐ wɛ dɔkun gbo vɛ̌, bɛ́ sín yɔkpɔ́vú jí káká yi mɛxó jí. Gbeyíɖɔ kpó vɔ̌sánú-xwlémawutɔ́ kpó bǐ wɛ nɔ xo awo. Énɛ́ ɔ́ wú wɛ un ná sɔ́ asi yětɔn lɛ́ɛ jó nú mɛ ɖěvo lɛ́ɛ, bó sɔ́ gle yětɔn lɛ́ɛ jó nú mɛ e ná wá vɔ yě lɛ́ɛ. Awě e ɖo togun ce xo wɛ ɔ́, yě sɔ́ dó ylɔ́ nǔɖé ǎ; bó nɔ́ ɖɔ: ‘Nǔ bǐ ɖo yiyi wɛ linsinlinsin’, nǔ ɖěbǔ ká ɖo yiyi wɛ ǎ. Winnyá wɛ ɖó ná hu yě ɖó nǔ baɖabaɖa e yě dó sin lɛ́ɛ wú. Winnyá ká hu yě lɔ vɔ́vɔ́ ǎ. Énɛ́ wú wɛ yě ná j'ayǐ kpó mɛ e ɖo ayǐ jɛ wɛ lɛ́ɛ kpó. Hwenu e un ná wa nǔ xá yě ɔ́, yě ná mɔ yěɖée ɖo kɔ́ mɛ. Nyɛ Mawu Mavɔmavɔ ɔ́ wɛ ɖɔ mɔ̌.” Mawu mɔ nǔ e ba wɛ é ɖe ɖo togun ɔ́ sí ɔ́ ɖo así tɔn ǎ Mawu Mavɔmavɔ ɖɔ: “Nú un ɖo nǔɖé ba ɖo yě gɔ́n wɛ ɔ́, un nɔ mɔ ǎ. Un nɔ mɔ vǐwun ɖěbǔ ɖo vǐwungbo lɛ́ɛ mɛ ǎ; un mɔ fígi ɖěbǔ ɖo fígitín lɛ́ɛ jí ǎ; atín bǐ wɛ mlú ɖa. Un gbɔ bo jó bǐ nú aligbɔntɔ́ lɛ́ɛ.” Togun ɔ́ ɖɔ: “Étɛ́wú mǐ ká ɖo ayǐjínjɔ́n fí din? Mi xo miɖée kplé nú mǐ ná yi toxo e è mɛ ahohó lɛ́ lɛ̌ dó lɛ́ɛ mɛ, bó ná yi nɔ te kpɔ́n kú ɖo dɔ̌n, ɖó Mawu Mavɔmavɔ, Mawu mǐtɔn ɔ́, kú wɛ é jó mǐ ná; sin e é ná mǐ bɔ mǐ nu ɔ́, nǔ wɛ è d'é mɛ, ɖó mǐ hu hwɛ dó e. Fífá wɛ mǐ ɖo te kpɔ́n, nǔ ɖagbe ɖě ká wá ǎ. Mǐ ɖo nukún ɖó wɛ ɖɔ azɔn mǐtɔn ná gbɔ, awě wɛ ká wá xo mǐ. Kɛntɔ́ mǐtɔn lɛ́ɛ jǎwe, bó kó ɖo Dan. Sɔ́ yětɔn lɛ́ɛ gbɔjɛ́ lě ɔ́, è nɔ se sín káká dɔ̌n. Yě sú xó ɔ́, ayǐkúngban ɔ́ bǐ nɔ dán wǔ. Kɛntɔ́ mǐtɔn lɛ́ɛ jǎwe, bó ná wá gba to mǐtɔn, bó hɛn nǔ e ɖ'é mɛ lɛ́ɛ bǐ gblé: yě ná gba toxo mǐtɔn lɛ́ɛ bǐ, yě ná gblé gbɛ dó nú mɛ bǐ.” Mawu ɖɔ: “Un ná sɛ́ dan dó mi, un ná sɛ́ amǎsɛ́ dó mi, mɛ ɖěbǔ ná sixú bló nǔɖé dó hɛn yě ɖó te nú yě ná gɔn mi ɖu ǎ; yě ná ɖu mi jɛ́n wɛ; nyɛ Mawu Mavɔmavɔ wɛ ɖɔ mɔ̌.” Jelemíi ɖɔ: “Un vo ɖo ayi mɛ ǎ. Nǔ e ná xo hwihwɛ́ mì é ɖě ká ɖe ǎ. Togun ce ɖo xó sú wɛ sín to línlín mɛ bó nɔ́ ɖɔ: ‘Mawu Mavɔmavɔ ka sɔ́ ɖo Sinyɔ́ɔ ǎ wɛ a? Sinyɔ́ɔ sɔ́ ɖó axɔ́sú ǎ cé?’ ” Mawu ɖɔ: “Étɛ́wú yě ká sɛn vodún dó dó xomɛsin nú mì? Yě sɛn nǔ énɛ́ lɛ́ɛ e to ɖěvo mɛ nu lɛ́ɛ nɔ́ sɔ́ alɔ yětɔn dó bló bɔ é má ká nyí nǔɖé ǎ lɛ́ɛ dó dó xomɛsin nú mì?” Jelemíi ɖɔ: “È ko sɔ́ nǔkún fó, hwenu e è nɔ sɔ́ nǔkún dó ɔ́ kó ɖo vivɔ wɛ, mǐ ká kó mɔ hwlɛngán ǎ. Adǎn e ɖo togun ce gbo wɛ ɔ́ gba lanmɛ nú mì. Wǔ kú mì, ahwi xo mì. Atínkɛn e nɔ dɛn wǔ nú mɛ é ɖě ɖo Galadi to ɔ́ mɛ ǎ cé? Dotóo ɖě ɖo fí ǎ cé? Bɔ étɛ́wú togun ce sín azɔn ma ka gbɔ ǎ? Nú mɛɖé sixú sɔ́ ta ce dó húzú tɔjɔtɛn din ɔ́, nú mɛ ɖé sixú sɔ́ nukún ce dó húzú tɔsisa din ɔ́, un ná ya avǐ zǎn kéze, bó ná ví mɛ e kú ɖo togun ce mɛ lɛ́ɛ.” Ényí fí e alitanu lɛ́ɛ nɔ gbɔjɛ́ ɖe ɖo gbětótló mɛ ɔ́ ɖě wɛ un sixú mɔ din ɔ́, un ná jó togun ce dó, bó hɔn yi zɔ n'i bǐ. Đó yě bǐ wɛ dó afɔ gbě; yě bǐ wɛ nyí mɛsaɖutɔ́. Mawu Mavɔmavɔ ɖɔ: “Yě ɖo adingban ɖó wɛ ɔ́, a nǎ ɖɔ gǎ wɛ bó ɖo nu yětɔn mɛ, bɔ yě ɖo dida wɛ. Adingban wɛ kplá hwǐ bɔ é sɛ ayǐ ɖo to ɔ́ mɛ; nǔgbó ɖó acɛ ǎ. Đó yě fɔ́n ɔ́, yě nɔ́ ɖo dǎka xo dó dǎka jí wɛ. Yě tunwun nyɛ Mawu Mavɔmavɔ ɔ́ ǎ. Mɛ ɖokpó ɖokpó ní cɔ́ éɖée dó xɔ́ntɔn tɔn wú; è ma ka gán jɛ nɔví mɛ tɔn wú ó, ɖó nɔví ɖo nɔví tɔn ba ná flú wɛ, bɔ xɔ́ntɔn ɖo xɔ́ntɔn tɔn nǔ ɖɔ kpé wɛ. Yě nɔ́ ɖo yěɖée blɛ́ wɛ, mɛɖé nɔ ɖɔ nǔgbó nú mɛɖé ǎ. Yě kplɔ́n ɖɛ̌ yětɔn ɖó adingban lɔ jí. Yě nɔ́ wa nǔ nyanya káká bó sɔ́ sixú lɛ́ kɔ wá gɔ̌n ce ǎ. Yě xo dǎka gbɔn dě ɔ́, yě nɔ́ xo gbɔn dě; yě ɖó adingban gbɔn dě ɔ́, yě nɔ́ ɖó gbɔn dě. Yě ba ná tunwun nyɛ Mawu Mavɔmavɔ ɔ́ ǎ.” Xó e Mawu Mavɔmavɔ ɖɔ ɔ́ nɛ́. Énɛ́ wú wɛ Mawu Mavɔmavɔ Nǔbǐwúkpétɔ́ ɔ́ ɖɔ: “Un ná zé myɔ dó slá wǔ nú yě bó ná kpɔ́n nǔ e yě nyí é. Lě e un sixú wa nǔ xá togun ce gbɔn é jɛ́n nɛ́. Đɛ̌ yětɔn cí aɖǐgá ɖɔhun. Adingban jɛ́n yě nɔ́ ɖó. Yě nɔ́ ɖɔ xó ɖagbe nú nɔzo yětɔn, ayi yětɔn mɛ ɔ́, mɔ ɖó n'i wɛ yě ká ɖe.” Mawu Mavɔmavɔ ɖɔ: “Un ná dɔn tó nú yě ɖó nǔ énɛ́ lɛ́ɛ nu ǎ cé? Togun mɔ̌hunkɔ ɔ́, un ná wa nǔ xá ɛ ǎ cé?” Un ya avǐ bó ná alě ɖó só lɛ́ɛ tamɛ. Un dó gbɛvíhan ɖó fí e kanlin lɛ́ɛ nɔ́ ɖu ama ɖe lɛ́ɛ tamɛ. Gběhan lɛ́ɛ bǐ wɛ ji zo; mɛɖé sɔ́ nɔ gbɔn fínɛ́ ǎ, kanlin ɖě sɔ́ nɔ́ sú xó ɖo fínɛ́ ǎ; xɛ kpó kanlin kpó bǐ wɛ hɔn bó yi. Mawu ɖɔ: “Un ná sɔ́ Jeluzalɛ́mu dó húzú dǒglin; un ná sɔ́ dó húzú nɔtɛn nú ayǐsájɛ lɛ́ɛ. Un ná sɔ́ Judáa toxo ɖě lɛ́ɛ dó húzú gbětótló, mɛɖé ná nɔ fínɛ́ ǎ.” Gbɛtɔ́ e ɖó nǔnywɛ́ bó mɔ nukúnnú jɛ nǔ énɛ́ lɛ́ɛ mɛ é ɖě ká ɖe a? Ényí Mawu Mavɔmavɔ ɖɔ xó nú mɛ mɔ̌hunkɔtɔn hǔn, é ní bó ɖɔ nǔ e wú to ɔ́ gba ɔ́, nǔ e wú é ji zo bó cí gbětótló e mɛ mɛɖé má nɔ́ gbɔn ǎ é ɖɔhun é. Énɛ́ ɔ́, Mawu Mavɔmavɔ yí gbe ɖɔ: “Sɛ́n ce e un ná yě ɔ́ wɛ yě jǒ dó wú wɛ nǔ cí mɔ̌. Yě ɖótó gbe ce ǎ. Yě xwedó xó ce ǎ. Nǔ e yě xwe ɔ́ wɛ yě nɔ́ wa; yě nɔ́ sɛn vodún Baalu lě e tɔ́gbó yětɔn lɛ́ɛ kplɔ́n yě gbɔn é. Énɛ́ wú wɛ nyɛ Mawu Mavɔmavɔ Nǔbǐwúkpétɔ́ ɔ́, nyɛ Mawu Izlayɛ́li tɔn ɔ́, un ɖɔ un ná ná ama e vɛ́ dódó ɔ́ togun élɔ́, bɔ é ná ɖu. Un ná ná ɛ sin e mɛ è kɔn nǔvɛ́nu dó é, bɔ é ná nu. Un ná gba yě dó akɔta e yě ma tunwun ǎ lɛ́ɛ mɛ, akɔta e tɔ́gbó yětɔn lɛ́ɛ má tunwun ǎ lɛ́ɛ mɛ. Un na sɛ́ ahwan dó yě, bó ná vívá kún yětɔn bǐ.” Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Mi lin tamɛ kpɔ́n ganjí! Mi yi da mɛ e nɔ ya avǐ lɛ́ɛ bónú yě ní wá; nyɔ̌nu e nyɔ́ avǐ ya ganjí lɛ́ɛ ní wá.” Togun ɔ́ ɖɔ: “Yě ní yá wǔ wá dó gbɛvíhan dó mǐ jí. Đasin ní ɖo nukún mǐtɔn jí gosín wɛ; ɖasin ní ɖo nukún mǐtɔn jí.” Jelemíi ɖɔ: “È ɖo gbɛvíhan se wɛ sín Sinyɔ́ɔ: ‘Étɛ́ ɖíe! Gbɛ mǐtɔn vɔ lo. Mǐ ɖu winnyá; mǐ na hɔn jó to mǐtɔn dó. È gba xwé mǐtɔn bǐ.’ Nyɔ̌nu lɛ́ɛ e mi, mi ɖótó Mawu Mavɔmavɔ xó ɔ́; tó mitɔn ní se xó e ɖo nu tɔn mɛ tɔ́n sín wɛ ɔ́. Mi kplɔ́n gbɛvíhan nyɔ̌nuví mitɔn lɛ́ɛ, mi kplɔ́n nǔwamɛhan élɔ́ miɖée: ‘Kú fán dǒ mǐtɔn; kú byɔ́ xwé mǐtɔn ɖagbe ɖagbe lɛ́ɛ gbe. Kú hu yɔkpɔ́vú lɛ́ɛ kɔn nyi alixo alixo; é hu dɔ̌nkpɛvú lɛ́ɛ kɔn nyi tokplétɛn lɛ́ɛ.’ ” Mawu ɖɔ: “Jelemíi, ɖɔ nú yě ɖɔ nyɛ Mawu Mavɔmavɔ ɖɔ: mɛ kúkú gbɔn kɔ́ mɛ, è fúnfún zunkɔ́ gbɔn gle mɛ ɖɔhun. Mɛ kúkú tɛ́ gbɔn kɔ́ mɛ è xo hankán kɔn nyi ayǐ ɖo nǔkún-yatɔ́ lɛ́ɛ gúdo ɖɔhun, mɛɖé ká ɖe bó ná bɛ́ ǎ.” Xó e Mawu Mavɔmavɔ ɖɔ ɔ́ ɖíe: “Mɛ e ɖó nǔnywɛ́ ɔ́ má sɔ́ nǔnywɛ́ tɔn dó yí go ná ó; mɛ e dó hlɔ̌nhlɔ́n ɔ́ má sɔ́ hlɔ̌nhlɔ́n tɔn dó yí go ná ó. Mɛ e jɛ dɔkun ɔ́ má sɔ́ dɔkun tɔn dó yí go ná ó. Nú mɛɖé jló ná jlá ajɔ̌ nú éɖée ɔ́, nǔ e mɛ ɔ́ ná sɔ́ dó jlá ajɔ̌ nú éɖée ɔ́ wɛ nyí tunwun e é tunwun mì ɔ́; tunwun e é tunwun mì ɖɔ nyɛ Mawu Mavɔmavɔ wɛ nɔ wa ɖagbe, nyɛ wɛ nɔ wa nǔ jlɔ́jlɔ́, nyɛ wɛ nɔ wa nǔ ɖó sɛ́nxwi jí ɖo ayǐkúngban jí ɔ́, wɛ é ná sɔ́ dó jlá ajɔ̌ nú éɖée; ɖó mɛ mɔ̌hunkɔ lɛ́ɛ sín nǔ wɛ nɔ́ nyɔ́ nyɛ Mawu Mavɔmavɔ nukún mɛ.” Mawu Mavɔmavɔ ɖɔ: “Éɖíe, azǎn ɔ́ jǎwe, bɔ un ná dɔn tó nú mɛ e gbo ada, bo ká jɛ ada gbigbo nyí kpowun lɛ́ɛ. Un ná dɔn tó nú Ejípunu lɛ́ɛ, nú Judáanu lɛ́ɛ, nú Edɔ́munu lɛ́ɛ. Un na dɔn tó nú Mɔwabunu lɛ́ɛ, un ná dɔn tó nú Amumɔ́ɔ ví lɛ́ɛ, bó dɔn tó nú yě mɛ e nɔ nɔ gbětótló mɛ bó nɔ́ xwlɛ́ gekplá yětɔn lɛ́ɛ, ɖó mɛ énɛ́ lɛ́ɛ ɖěbǔ gbo ada ǎ, bɔ Izlayɛ́li togun ɔ́ ká jɛ adagbotɔ́ nyí kpowun.” Izlayɛ́li togun e mi, mi ɖótó xó e ɖɔ nú mi wɛ Mawu Mavɔmavɔ ɖe ɔ́! Xó e é ɖɔ ɔ́ ɖíe: “Mi ma xwedó walɔ akɔta ɖě lɛ́ɛ tɔn ó; mi ma ɖi xɛsi nú wuntun e è nɔ mɔ ɖo jǐxwé lɛ́ɛ ó; akɔta énɛ́ lɛ́ɛ wɛ nɔ ɖi xɛsi nú wuntun jǐxwé tɔn lɛ́ɛ. Sinsɛn akɔta ɖě lɛ́ɛ tɔn ɔ́, nǔ yǎyá wɛ, jɔhɔn kpowun wɛ, é hú mɔ̌ ǎ. È nɔ yi zunkan mɛ bó nɔ́ yi gbo atín bɔ alɔnuzɔ́watɔ́ nɔ́ bɔ asyɔ́ nyi wú. È nɔ kɔn kpatágan kpó siká kpó dó atín. È nɔ sɔ́ zǔnkpé bó nɔ xwe hǔnjɛ́n d'é mɛ, bónú é má dán ó. Nǔmɛsɛn énɛ́ lɛ́ɛ cí xɛblɛ́nú e ɖo kákan mɛ ɔ́ ɖɔhun; yě nɔ́ ɖɔ xó ǎ; mɛ wɛ nɔ sɔ́ nǔmɛsɛn énɛ́ lɛ́ɛ, ɖó yě sixú ɖi zɔnlin ǎ. Mi ma ɖi xɛsi nú yě ó; yě sixú wa ɖagbe ǎ, yě ká sixú wa nyanya ǎ.” Mawu Mavɔmavɔ, mɛ ɖé ka sixú cí hwɛ ɖɔhun a? A d'agba bɔ nyǐkɔ towe yi jǐ tawun ɖó hlɔ̌nhlɔ́n towe wú. Akɔta lɛ́ɛ bǐ xɔ́sú, mɛ̌ ma ká ná ɖó sísí nú we ǎ? Hwi wɛ è ɖǒ ná ɖó sísí ná, ɖó nǔnywɛ́tɔ́ e ɖo axɔ́súɖuto lɛ́ɛ bǐ mɛ, gbɔn akɔta lɛ́ɛ bǐ mɛ ɔ́, è sixú jlɛ́ ɖě dó wǔ we ǎ. Yě bǐ wɛ jɔ xlo, bó jɔ yɛyi. Vodún sinsɛn ɔ́, nǔ yǎyá kpowun wɛ. Nǔmɛsɛn énɛ́ lɛ́ɛ ɔ́, kpatágan gbajagbaja e è hɛn sín Taasísi, abǐ siká e è hɛn sín Wufázi ɔ́ wɛ è nɔ dó ba acɔ́ ná. Alɔnuzɔ́watɔ́ ɖé wɛ nɔ́ tun yě, nǔtuntɔ́ ɖé wɛ nɔ wa azɔ̌ yětɔn. È nɔ zé avɔ vɔvɔ abǐ fɛ́sinnɔ dó ba acɔ́ nú yě. Nǔmɛsɛn énɛ́ lɛ́ɛ ɔ́, gbɛtɔ́ sín alɔ wɛ bló bǐ. Lo ɔ́, Mawu Mavɔmavɔ wɛ nyí Mawu ɖokpó e tíin é; é wɛ nyí Mawu, bó nyí axɔ́sú káká yi káká sá. È sin xomɛ ɔ́ ayǐkúngban nɔ dán wǔ, akɔta lɛ́ɛ nɔ́ sixú nɔ te xomɛsin tɔn nukɔn ǎ. Xó e mi ná ɖɔ nú akɔta lɛ́ɛ ɔ́ ɖíe, mi ná ɖɔ: Nǔmɛsɛn e é má nyí yě wɛ ɖó jǐnukúnsin ɔ́ ǎ, é má ká nyí yě wɛ ɖó ayǐkúngban ɔ́ ǎ lɛ́ɛ ɔ́, yě bǐ wɛ ná bú sín ayǐkúngban ɔ́ jí; yě bí wɛ ná bú sín hwe glɔ́ fí. Mawu ɔ́, hlɔ̌nhlɔ́n tɔn wɛ é dó ɖó ayǐkúngban ɔ́, nǔwúkpíkpé tɔn wɛ é dó ɖó gbɛ ɔ́, nǔnywɛ́ tɔn wɛ é dó ɖó jǐnukúnsin ɔ́. Mawu kɛ nu ɔ́, sin nɔ sɛ kplé ɖo jǐxwé, akpɔ́kpɔ́ lɛ́ɛ nɔ sí te sín fí e jǐnukúnsin kpó ayǐkúngban kpó kplé ɖe é, jǐ nɔ kɛwun bo nɔ ja; jɔhɔn nɔ sí te sín fí e é ɖó tɛnmɛ n'i ɖó é. Gbɛtɔ́ lɛ́ɛ mɔ mɔ̌ ɔ́, yě bǐ nɔ́ jɔ yɛyi dó te, yě sɔ́ nɔ́ tunwun nǔ e yě ná ɖɔ é ǎ. Énɛ́ ɔ́, nǔtuntɔ́ e tun nǔmɛsɛn yětɔn nú yě lɛ́ɛ ɔ́, winnyá nɔ́ hu yě, ɖó bǒcyɔ énɛ́ lɛ́ɛ bǐ wɛ nyí xɛblɛ́nú; gbɛ ɖě ɖo yě mɛ ǎ. Nǔ yǎyá wɛ yě nyí, yě hwɛ̌n. Hwenu e Mawu ná dɔn tó nú mɛ ɔ́, yě bǐ wɛ è nǎ vívá kún ná. Amɔ̌, Mawu Jakɔ́bu ví lɛ́ɛ tɔn ɔ́, è sixú jlɛ́ ɛ dó nǔmɛsɛn yětɔn énɛ́ lɛ́ɛ wú ǎ, ɖó é wɛ ɖó nǔ bǐ; togun Izlayɛ́li tɔn wɛ ka nyí togun e é sɔ́ bɔ é nyí étɔn é. Nyǐkɔ tɔn nyí Mawu Mavɔmavɔ Nǔbǐwúkpétɔ́. Jelemíi ɖɔ: “Jeluzalɛ́mu toxo, hwi ɖíe è ko xá bǐ e; din ɔ́, dó agban towe, ɖó xó e Mawu Mavɔmavɔ ɖɔ ɔ́ ɖíe: ‘Din yɛ tɔn ɔ́, un ná dó ya nú we káká bɔ a nǎ mɔ nǔ e ɖ'é mɛ ɔ́.’ ” Jeluzalɛ́mu ɖɔ: “Heelú! Étɛ́ ɖíe ká gbo mì e? È gba mì hánnyá bǐ. Akpa e ɖo wǔ ce ɔ́ dó kpan, bɔ un nɔ ɖɔ dó ayi mɛ ɖɔ: Wǔvɛ́ e mɔ wɛ un ɖe ɔ́ syɛ́n ǎ, un hɛn ɔ́, un ná nɔ nu. Goxɔ ce vún, kan e hɛn goxɔ ce ɖó te lɛ́ɛ wɛ́n, vǐ ce lɛ́ɛ jó mì dó, yě sɔ́ ɖe ǎ. Un sɔ́ ɖó mɛɖé bɔ é ná gbá goxɔ ɖěvo nú mì, bó sɔ́ xwé ce sí te ǎ.” Jelemíi ɖɔ: “Xlonɔzɔ́ wɛ gǎn lɛ́ɛ wa; yě ba Mawu Mavɔmavɔ ɔ́ ǎ. Énɛ́ ɔ́ wú wɛ nǔ e wa wɛ yě ɖe lɛ́ɛ ɖě ma yi nukɔn ǎ. Bɔ mɛ e nu yě ɖe lɛ́ɛ bǐ gbadó. É ɖíe: è ɖo xó ɖé se wɛ. Zǐngídi ɖaxó ɖé wɛ bó gosín to e ɖo taligbé ɔ́ mɛ bó ná gba Judáa to ɔ́ bǐ hánnyá, bɔ è sɔ́ ná mɔ mɛɖé ɖo fínɛ́ ǎ. É ná húzú cukú gbě tɔn lɛ́ɛ sín xwé.” Mawu Mavɔmavɔ, un tunwun ɖɔ ali e jí gbɛtɔ́ nɔ́ gbɔn ɖo gbɛmɛ fí ɔ́, é kún nyí é ɖésú wɛ nɔ́ ɖe ó. Gbɛtɔ́ ɖésú sixú xlɛ́ ali e é ná gbɔn é éɖée ǎ. Dɔn tó nú mì Mawu Mavɔmavɔ, dɔn tó nú mì ɖó jlɛ̌ jí, ma ɖo xomɛsin jí bó dɔn tó nú mì ó, a blǒ mɔ̌ hǔn gbɛ ce vɔ. Amɔ̌, ɖe xomɛsin towe xlɛ́ akɔta e ma tunwun we ǎ lɛ́ɛ; ɖe xlɛ́ togun e ma nɔ́ xo mlá nyǐkɔ towe ǎ lɛ́ɛ, ɖó yě gba Jakɔ́bu to ɔ́, yě gba to ɔ́ bǐ hánnyá, yě bɛ́ nǔ e ɖo to ɔ́ mɛ lɛ́ɛ bǐ; to ɔ́ jɛ vɔ̌. Xó e Mawu Mavɔmavɔ ɖɔ nú nyɛ Jelemíi ɖɔ má yi ɖɔ nú togun ɔ́ é ɖíe, é ɖɔ: “Xó e un ɖɔ bó dó jɛ akɔ xá mi lɛ́ɛ ɔ́, mi xwédo.” Mawu lɛ́ ɖɔ: “Jelemíi, ɖɔ xó énɛ́ lɛ́ɛ nú Judáa ví lɛ́ɛ kpó Jeluzalɛ́munu lɛ́ɛ kpó. Đɔ nú yě ɖɔ Mawu Mavɔmavɔ, Mawu Izlayɛ́li tɔn ɖɔ: Akɔjijɛ xó élɔ́ ɔ́, mɛ e ma na ɖótó ǎ ɔ́, heelú i. Đ'ayǐ ɔ́, un ɖe tɔ́gbó mitɔn lɛ́ɛ sín Ejípu, zo hɛhɛ mɛ. Hwenɛ́nu wɛ un ko ɖɔ akɔjijɛ énɛ́ ɔ́ sín xó nú yě. Un ɖɔ nú yě ɖɔ: ‘Mi ɖótó xó ce lɛ́ɛ, mi bló nǔ e un ná ɖɔ nú mi lɛ́ɛ. Ényí mi bló ɔ́, mi ná nyí togun ce, bɔ un ná nyí Mawu mitɔn. Énɛ́ ɔ́, un ná ɖe akpá e un dó nú tɔ́gbó mitɔn lɛ́ɛ é. Akpá e un dó nú yě ɖɔ un ná ná yě to e mɛ wǐin kpó nyibúnɔ́sin kpó nɔ́ sa tɔ ɖe é. To ɔ́ mɛ ɖíe mi ɖe din e.’ ” Ée Mawu ɖɔ mɔ̌ ɔ́, un ɖɔ: “Mawu Mavɔmavɔ, nǔgbó wɛ a ɖɔ.” Mawu Mavɔmavɔ ɖɔ nú mì ɖɔ: “Jlǎ xó énɛ́ lɛ́ɛ bǐ gbɔn Judáa toxo lɛ́ɛ bǐ mɛ, gbɔn Jeluzalɛ́mu li lɛ́ɛ bǐ jí, bó ɖɔ: ‘Xó e un ɖɔ bó dó nu alɛ xá mi lɛ́ɛ ɔ́, mi xwédo, bó bló bǐ ɖ'é jí. Đó un kó ɖɔ bó tɛ ɖɛ̌ jí ɖésú nú tɔ́gbó mitɔn lɛ́ɛ, sín gbe e gbe un kplá yě sín Ejípu, bó fɔ́n bó lɛ́ ɖo ɖiɖɔ nú mi lɔmɔ̌ wɛ káká wá jɛ égbé ɖɔ: Mi ɖótó xó ce lɛ́ɛ. Yě ká se ǎ, yě ɖótó xó ce lɛ́ɛ ǎ. Nǔ e yě xwe ɔ́ wɛ yě wa; linlin nyanya yětɔn lɛ́ɛ wɛ yě xwedó. Énɛ́ ɔ́, tódɔnnúmɛ e ɖo alɛnunu énɛ́ ɔ́ mɛ bɔ è wlǎn ɔ́, un dɔn nú yě, ɖó xó e un ɖɔ bó dó nu alɛ énɛ́ ɔ́ xá yě, bó ɖɔ yě ní xwedó, bɔ yě ma xwedó ǎ ɔ́ wú.’ ” Mawu Mavɔmavɔ ɖɔ nú mì ɖɔ: “Judáa ví lɛ́ɛ kpó Jeluzalɛ́munu lɛ́ɛ kpó blá sé ɖé. Yě blá sé bɔ hwɛ e tɔ́gbó yětɔn lɛ́ɛ gbɛ́ ɖɔ émí kún ná se xó ce ó lobo hu ɖ'ayǐ lɛ́ɛ ɔ́, yě lɔ jɛ huhu jí. Yě lɛ́ kɔ yi nǔmɛsɛn ɖěvo lɛ́ɛ kɔn. Izlayɛ́li ví lɛ́ɛ kpó Judáa ví lɛ́ɛ kpó da alɛ wǔ ce; yě nɔ́ gbejí nú alɛ e un nu xá tɔ́gbó yětɔn lɛ́ɛ ɔ́ ǎ. “Énɛ́ ɔ́ wú wɛ Mawu Mavɔmavɔ ɖɔ: ‘Un na dó nǔ sin xá yě, bɔ yě ná sixú ɖe ta sín mɛ ǎ. Yě ná sú xó ylɔ́ mì, un ka ná se xó yětɔn ǎ. Hwenɛ́nu ɔ́, Jeluzalɛ́munu lɛ́ɛ kpó mɛ e ɖo Judáa toxo ɖě lɛ́ɛ mɛ lɛ́ɛ kpó ná sú xó ylɔ́ nǔmɛsɛn e yě nɔ́ xwlé zǎlínkpɔ́n lɛ́ɛ, ɖɔ yě ní wá gɔ́ alɔ nú émí. Un dó nǔ sin xá yě ɔ́, nǔmɛsɛn énɛ́ lɛ́ɛ ná sixú hwlɛ́n yě gán ǎ. Judáa e, vodún nabí e a ɖǒ ɔ́, sɔ toxo nabí e a ɖǒ é. Jeluzalɛ́mu li lɛ́ɛ bǐ jí wɛ è mɛ vɔ̌sákpe nú vodún Baalu gbɔn, lobo nɔ sá vɔ̌ n'i. Vodún Baalu ɔ́, winnyá dó mɛ tɔ́ wɛ.’ Amɔ̌, Jelemíi, hwɛ ɔ́, ma xo ɖɛ dó togun élɔ́ ta mɛ ó. Ma xo ɖɛ ó, ma ka sa vo nú mì dó togun élɔ́ ta mɛ ó. Đó hwenu e yě ná ɖo xó sú ylɔ́ mì wɛ, ɖó adǎn e ná ɖo yě gbo wɛ lɛ́ɛ wú ɔ́, un ná se ǎ.” Mawu ɖɔ: “Izlayɛ́li togun e, hwi mɛ e un yí wǎn na ɔ́, a ɖo nǔ ma sɔgbe wa wɛ. Étɛ́ a wǎ ba ɖo xwé ce gbe? A vɛdó ɖɔ akpá e a dǒ lɛ́ɛ, abǐ vɔ̌ e a nɔ sá lɛ́ɛ ná zɔ́n bɔ awě kún ná xó we ó wɛ sín a? A nǎ gán ɖ'é mɛ wɛ a vɛdó a? Izlayɛ́li togun, ‘ Olívutín amanɔ’, sínsɛ́n towe nyɔ́; é wɛ è nɔ dó dó we gesí. Nyǐkɔ e nyɛ Mawu Mavɔmavɔ ná, bɔ è nɔ dó mlá we ɖ'ayǐ ɔ́ nɛ́. Zǐngídi ɖaxó ɖokpó jɛ́n un sɛ́ dó, bɔ a fyɔ́, bɔ ala towe bǐ gblé.” Olívutín, nyɛ Mawu Mavɔmavɔ Nǔbǐwúkpétɔ́ e tun we ɔ́, un ɖɔ nǔ baɖabaɖa e ɖo nǎ jɛ wɛ ɔ́ nú we. Un ɖɔ nú we, ɖó nǔ nyanya e mi Izlayɛ́li ví lɛ́ɛ kpó Judáa ví lɛ́ɛ kpó wa lɛ́ɛ wú. Un ɖɔ nú we, ɖó zǎlínkpɔ́n e a nɔ dó zo nú vodún Baalu dó dó xomɛ sin nú mì ɔ́ wú. Mawu Mavɔmavɔ gba nǔ e lin wɛ mɛ ce lɛ́ɛ ɖe ɔ́ sín akpá nú mì. É ɖe nǔ e wa wɛ yě ɖe ɖo nǔglɔ́ ɔ́ xlɛ́ mì. Lɛ̌ngbɔ́ví ɖɔhun wɛ un cí bɔ yě kplá mì xwe akpákpó jí; un tunwun nǔ nyanya e lin dó wǔ ce wɛ yě ɖe lɛ́ɛ ǎ. Yě nɔ́ ɖɔ dó gúdo ce ɖɔ: “Mi wá mǐ gblé gbɛ dó nú atín kpó sínsɛ́n tɔn kpó. Mi wǎ mǐ ɖe e sín gbɛ élɔ́ mɛ fí. Mɛ ɖé má sɔ́ flín nyǐkɔ tɔn gbeɖé ó.” Amɔ̌, Mawu Mavɔmavɔ Nǔbǐwúkpétɔ́, hwɛ ɔ́, hwɛjlɔ́jlɔ́ wɛ a nɔ ɖɔ. A nɔ mɔ nǔ jɛ mɛ xomɛ; a nɔ tunwun nǔ e lin wɛ gbɛtɔ́ ɖe ɖo ayi tɔn mɛ é. Mawu Mavɔmavɔ, un ná kpɔ́n lě e a nǎ ba hlɔn nú mì gbɔn ɔ́, ɖó hwi wɛ nɔ jɛ hǔn dó jǐ ce. Anatɔ́tinu lɛ́ɛ ɖo kú ce ba wɛ bó nɔ́ ɖɔ: “Ma ɖɔ xó ɖé nú mǐ bó ɖɔ Mawu Mavɔmavɔ wɛ ɖɔ ó, é má nyí mɔ̌ ǎ ɔ́, a nǎ kú ɖo alɔ mǐtɔn mɛ.” Énɛ́ ɔ́ wú wɛ Mawu Mavɔmavɔ ɖɔ xó dó yě wú. Mawu Mavɔmavɔ Nǔbǐwúkpétɔ́ ɔ́ ɖɔ: “Éɖíe, un ná dɔn tó nú Anatɔ́tinu nɛ́ lɛ́ɛ; dɔ̌nkpɛvú yětɔn lɛ́ɛ ná kú ɖo ahwangbénu; vǐ yětɔn súnnu kpó nyɔ̌nu kpó bǐ nǎ kú adɔ. Yě mɛ ɖěbǔ ná gló ǎ. Un ná sɛ́ awě ɖaxó ɖokpó dó Anatɔ́tinu lɛ́ɛ xwe e xwe un ná dɔn tó nú yě é.” Mawu Mavɔmavɔ, a nyǐ hwɛjijɔnɔ sɔ mɔ̌ bɔ un sixú mɔ nǔ jɛ do ɖěbǔ ɖo nǔ e a wa lɛ́ɛ wú ǎ. É ká ɖo mɔ̌ có, un jló ná ɖɔ xó xá we dó hwɛjijɔ wú: Étɛ́wú mɛ e ka nyí mɛdídá lɛ́ɛ ɔ́ nǔ ka nɔ́ nyɔ́ nú yě? Étɛ́wú gbɛtɔ́ e nyí nuwenɔ lɛ́ɛ bǐ ká nɔ́ vo? A tun yě atín ɖɔhun, yě dó ɖɔ do, yě su bó sɛ́n. Nyǐkɔ towe ɖo nu yětɔn, ayi yětɔn ka lín dó we. Amɔ̌, hwɛ Mawu Mavɔmavɔ ɔ́, a ka tunwun mì. A ɖo mimɔ mì wɛ, ayi ce ɖó kpɔ́ xá we, bɔ a mɔ nǔ jɛ mɛ. Amɔ̌, yědɛɛ lɛ́ɛ ɔ́, è zé yě ɖó vo, lě e è nɔ zé lɛ̌ngbɔ́ ɖó vo bó nɔ́ kplá yi lanhutɛn é; zě yě ɖó vó nú gbe e gbe è nǎ vɔ kún yětɔn é. Káká jɛ hwetɛ́nu to ɔ́ ká ná nɔ aluwɛ mɛ yi jɛ? Káká jɛ hwetɛ́nu gběhan ká ná nɔ xúxú ɖo gle mɛ yi jɛ? Mɛ e ɖo to ɔ́ mɛ lɛ́ɛ ɔ́, dídá yětɔn zɔ́n bɔ kanlin kpó xɛ kpó bǐ ɖo kúkú wɛ. Yě nɔ́ ɖɔ: “Mawu nǎ mɔ fí e mǐ na yi vɔ dó ɔ́ ǎ.” Mawu ɖɔ nú mì ɖɔ: “Ée hwi kpó gbɛtɔ́ kpó ɖo wezun nu, bɔ nǔ ko cikɔ nú we sɔ lě din ɔ́, a nǎ sixú wá dó wezun xá sɔ́ a? Bɔ é ka nyí fí e fífá ɖe ɔ́ kɛ́ɖɛ́ jɛ́n a nɔ mɔ ɖɔ émí ɖó vivo ɖe ɔ́, nɛ̌ a ka ná wa nǔ gbɔn ɖo Judɛ́ɛn tɔ ɔ́ tó, fí e zunkan ɖe é? “Đó nɔví towe lɛ́ɛ ɖésúnɔ kpó mɛ e ɖo xwé towe gbe lɛ́ɛ kpó nɔ sa we. Yě ɖésúnɔ nɔ ɖo vɛ̌gokan vlɔ́n wɛ, bó nɔ́ ɖo xó sú wɛ ɖo gǔdo towe. Yě wá gɔ̌n towe bó wá ɖo xó víví ɖɔ nú we wɛ hǔn, ma ɖi ó.” Mawu ɖɔ nú mì ɖɔ: “Un jó xwé ce dó, un jó togun e nyí ce ɔ́ dó. Togun e un yí wǎn ná ɔ́, un jó e dó nú kɛntɔ́ tɔn lɛ́ɛ. Togun e nyí ce ɔ́ wá cí kinnikínní ɖɔhun nú mì ɖo zungbó mɛ, bó nɔ́ dó gbe dó jǐ ce. Énɛ́ wɛ zɔ́n bɔ un gbɛ́ wǎn n'i. Togun e nyí ce ɔ́ wa cí xɛ e ɖó sin tɛnmɛ tɛnmɛ é ɖɔhun, bɔ aklasú gosín ɖisí amyɔ bó wá zɔn jǐ tɔn. Mi yi kplé gběkanlin lɛ́ɛ bǐ! Mi kplá yě wá, bónú yě ná vúnvún i! Lɛ̌ngbɔ́nyitɔ́ lɛ́ɛ dó ahwan gbě bó ɖo vǐwungbo ce vɔ wɛ. Yě ɖo gle ce gbídí ɖó afɔ wú wɛ. Gle ce ɖagbe ɖagbe ɔ́, yě zě dó húzú gbětótló, fí e mɛɖé ma nɔ́ gbɔn ǎ é. Gle ce ɖíe ɖo aluwɛ mɛ bó ɖo nǔbláwǔ wa wɛ ɖo nukɔn ce e. To ɔ́ bǐ wɛ jɛ vɔ̌, bɔ mɛɖé sɔ́ nɔ ké ya ná ǎ. Nǔhɛngblétɔ́ lɛ́ɛ nyi ahwan sín só e ɖo gbětótló mɛ lɛ́ɛ bǐ jí, bó jǎwe. Hwǐ nyɛ Mawu Mavɔmavɔ tɔn ɔ́ ɖo to ɔ́ bǐ vúnvún wɛ, sín fí e to ɔ́ bɛ́ sín ɔ́ káká yi fí e é fó dó é. Mɛ ɖokpó ná mɔ agbɔ̌n ǎ. Blěe wɛ mi dó, wunkan wɛ mi ka ya. Mi jɛ tagba, mi ka mɔ le ɖě ɖ'é mɛ ǎ. Nǔ énɛ́ e mi ya ɔ́, winnyá wɛ. Xomɛ ɖaxó ɖé wɛ nyɛ Mawu Mavɔmavɔ sin bó sɛ́ dó mi.” Xó e Mawu Mavɔmavɔ ɖɔ dó togun dídá e lɛ́ lɛ̌ dó Izlayɛ́li to ɔ́ wú lɛ́ɛ ɖíe: “Yě klá jɛ nǔ e nyí ce ɔ́ nu, yě klá jɛ ayǐkúngban e un ná Izlayɛ́li togun ce ɔ́ nu. Éɖíe, un ná ɖe togun dídá énɛ́ lɛ́ɛ tɔ́n sín to yětɔn mɛ. Un ná ɖe Judáa sín fɛn yětɔn mɛ. Un ɖe togun énɛ́ lɛ́ɛ tɔ́n sín to yětɔn mɛ gúdo ɔ́, un ná lɛ́ wá kú nǔ blá wǔ nú yě, bó ná kplá mɛ ɖokpó ɖokpó wá ayǐkúngban tɔn jí, ɖo to tɔn mɛ. Togun dídá énɛ́ lɛ́ɛ kplɔ́n nǔ togun ce bɔ é nɔ xwlé nǔ dó vodún Baalu nyíkɔ mɛ. Amɔ̌, nú yědɛɛ lɛ́ɛ zán gbɛ yětɔn ganjí lě e togun ce ɖó ná bló gbɔn ɔ́, nú yě nɔ́ xwlé nǔ dó nyǐkɔ ce mɛ bó nɔ ɖɔ ‘Mawu Mavɔmavɔ ɖo gbɛ’ ɔ́, yě ná mɔ tɛn ɖo togun ce tɛ́ntin. Nǔ ɖo mɔ̌ có, nú togun énɛ́ lɛ́ɛ ɖě gbɛ́ tó ɖó mì ɔ́, un ná ɖe e sín to tɔn mɛ bǐ, bó ná jó e nú kú.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ nú mì ɖɔ: “Yi xɔ gǒjíblánú ɖokpó lobo sin; ma ka zé dó sin mɛ ó.” Ée Mawu Mavɔmavɔ ɖɔ mɔ̌ ɔ́, un yi xɔ gǒjíblánú ɔ́ lě e é ɖɔ gbɔn ɔ́, bó sɔ́ sin. Mawu Mavɔmavɔ ka lɛ́ ɖɔ nú mì ɖɔ: “Đe gǒjíblánú e a xɔ bo sin ɔ́, bó yi Efláti tɔ ɔ́ nu, bó sɔ́ dó sónu mɛ.” Énɛ́ ɔ́, un ɖe gǒjíblánú ɔ́, bó sɔ́ yi sɛxwe ɖo Efláti tɔ ɔ́ nu, lě e Mawu Mavɔmavɔ ɖɔ nú mì gbɔn é. É kó lín ɖaxó, bɔ Mawu Mavɔmavɔ lɛ́ wá ɖɔ nú mì ɖɔ: “Sɔ́ nǔ bó yi Efláti tɔ ɔ́ nu, bó yi sɔ́ gǒjíblánú e un ɖɔ hwi sɔ́ sɛxwe é.” Bɔ un yi Efláti tɔ ɔ́ nu, bó kíjé fí e un zé gǒjíblánú ɔ́ sɛxwe ɖó é; un mɔ bó sɔ́, bɔ é kó gblé bǐ; è sɔ́ sixú zé dó wa nǔɖé ná ǎ. Mawu Mavɔmavɔ lɛ́ ɖɔ xó nú mì. Xó e é ɖɔ ɔ́ ɖíe: “Lě e gǒjíblánú ɔ́ gblé gbɔn ɔ́, mɔ̌ wɛ un ná kɔ́n wi sín ta nú Judáa bɔ é ná gblé; un ná kɔ́n wi ɖaxó e ɖo ta nú Jeluzalɛ́mu ɔ́ síin. Togun baɖabaɖa wɛ, é nɔ́ gbɛ́ gbe nú mì. Nǔ e é xwe ɔ́ wɛ é nɔ́ wa; é nɔ́ sɛn vodún: é nɔ́ xwlé vɔ̌sánú yě, é nɔ́ ɖe kɔ́ nú yě. Togun nɛ́ ɔ́ ní cí gǒjíblánú élɔ́ ɖɔhun; é má sɔ́ nyí nǔɖé wá nú gbeɖé ó. Lě e è nɔ sin gǒjíblánú dó alin syɛ́nsyɛ́n ɔ́, mɔ̌ wɛ un dɔn Izlayɛ́li ví lɛ́ɛ kpódó Judáa ví lɛ́ɛ kpó dó wǔ syɛ́nsyɛ́n. Un bló mɔ̌ bónú yě ná nyí togun ce, bó sɔ́ nyǐkɔ ce yi jǐ, bó nyí susu ce, bó nyí acɔ́ɖónú ce. Lo ɔ́, yě ɖótó mì ǎ. Xó e nyɛ Mawu Mavɔmavɔ ɖɔ ɔ́ nɛ́.” Mawu ɖɔ nú mì ɖɔ: “A nǎ ɖɔ xó élɔ́ nú yě. Đɔ nú yě ɖɔ nyɛ Mawu Mavɔmavɔ, Mawu Izlayɛ́li tɔn ɖɔ: ‘Vɛ̌ɛn ná gɔ́ zɛ̌n bǐ.’ Énɛ́ ɔ́, yě ná ɖɔ nú we ɖɔ: ‘Mǐ tunwun ɖɔ vɛ̌ɛn ná gɔ́ zɛ̌n sín!’ Yě ɖɔ mɔ̌ hǔn ɖɔ nú yě ɖɔ nyɛ Mawu Mavɔmavɔ ɖɔ: ‘Un na ná vɛ̌ɛn to élɔ́ mɛ nu lɛ́ɛ. Un na ná vɛ̌ɛn axɔ́sú e ɖo Davídi zinkpo jí é; un ná ná vɔ̌sánú-xwlémawutɔ́ lɛ́ɛ, bó ná ná gbeyíɖɔ lɛ́ɛ kpó Jeluzalɛ́munu lɛ́ɛ bǐ kpó, bɔ yě ná nu mú. Un na gba ta yětɔn ɖě dó ɖě wú. Un na dɔn tɔ́ kpó vǐ kpó sín ta kpé go. Un na jó yě ɖě dó ǎ; mɛɖé sín nǔ ká ná blá wǔ nú mì ǎ; kɛnklɛ́n ná nɔ mɛ ǎ; nǔ ɖěbǔ na ɖó mì te, bɔ un ná gɔn kún yětɔn sú dó ǎ. Xó e nyɛ Mawu Mavɔmavɔ ɖɔ ɔ́ nɛ́.’ ” Mi ɖótó te bó se xó e ɖɔ nú mì wɛ Mawu Mavɔmavɔ ɖe é; mi ma nɔ́ yi go ó. Mawu Mavɔmavɔ wɛ ɖo xó ɖɔ nú mi wɛ. Mi kpa susu nú Mawu Mavɔmavɔ, Mawu mitɔn cóbónú é ná dɔn mi dó ablu mɛ; mi kpa susu n'i cóbó ná jɛ afɔ gba dó só wú jí, ɖo ablu mɛ. Mi ná ɖo te kpɔ́n wěziza, Mawu Mavɔmavɔ ka ná sɔ́ dó húzú zǐnflú gɔngɔn, é ná sɔ́ dó húzú ablu ɖaxó. Ényí mi ma ɖótó Mawu ǎ ɔ́, un ná nɔ nǔglɔ́ bó ya avǐ, ɖó go e yí wɛ mi ɖe ɔ́ wú. Un ná kun ɖasin cɛɖɛcɛɖɛ, ɖó ahwan na wlí togun Mawu Mavɔmavɔ tɔn. Mawu ɖɔ nú mì ɖɔ: Jelemíi, ɖɔ nú axɔ́sú ɔ́ kpó na kpɔjitɔ́ ɔ́ kpó ɖɔ: “Mi jínjɔ́n kɔ́ mɛ! Đó jɛ̌gbákún e ɖo ta mitɔn e j'ayǐ. Toxo e ɖo to ɔ́ sín afɔligbé lɛ́ɛ bǐ sín hɔntogbó wɛ è sú bɔ mɛɖé sixú hun ǎ. Judáa to ɔ́ bǐ wɛ ahwan wlí, to ɔ́ jɛ vɔ̌ bǐ.” “Jeluzalɛ́mu, jlɔ̌ kɔ bó kpɔ́n: kɛntɔ́ towe lɛ́ɛ gosín totaligbé jǎwe. Fítɛ́ togun e è zé dó así nú we ɔ́ ka ɖe? Fítɛ́ ahwan e a nɔ dó yi go na ɔ́ ka ɖe? Hwi ɖésú wɛ dɔn togun ɖé lɛ́ɛ dó gbɛ̌ mɛ. Hwenu e togun énɛ́ lɛ́ɛ ka ná sí te dó jǐ towe bó ná jɛ gǎn ɖu nú we jí ɔ́, étɛ́ a nǎ ɖɔ? Hwenɛ́nu ɔ́, a nǎ mɔ wǔvɛ́ nyɔ̌nu e jɛ flú mɛ é ɖɔhun. A nǎ wá kanbyɔ́ hwiɖée ɖɔ: ‘Aniwú nǔ mɔ̌hun ká ɖo gbigbo mì wɛ?’ Tunwun ɖɔ hwɛ tobutóbú e a nɔ hu lɛ́ɛ wú wɛ. Hwɛ towe lɛ́ɛ wú wɛ è tún avɔ sín alin nú we ɖo togun mɛ. Hwɛ towe lɛ́ɛ wú wɛ è hwlɛ́n kan xá we. Etiopíinu ɖé sixú ɖyɔ́ anyǔ tɔn a? Abǐ kpɔ sixú ɖyɔ́ hwɛkan tɔn a? Gbeɖé kpɔ́n! Ényí mɔ̌ hǔn, mi mɛ e nɔ ɖo nǔ nyanya wa wɛ lɛ́ɛ ɔ́, mi sixú wa nǔ ɖagbe ǎ. Un ná gba mi dó gbɔn gbětótló mɛ jɔhɔn d'alɔ nǔywɛ́ mɛ, bó fúnfún ɖɔhun. Nǔ e ɖo te kpɔ́n we ɔ́ nɛ́, nǔ e ná wa xá we wɛ un ɖe ɔ́ nɛ́! Đó a wɔn mì; a sɔ́ jiɖiɖe towe ɖó vodún jí. Un na kplɔ́ avɔ towe dó jǐ káká yi nukún mɛ, bɔ mɛ bǐ ná mɔ hɛ̌n towe. Yéége! A nɔ ɖo afɔ dó gbě wɛ, a nɔ ɖo axi ylɔ́ wɛ, a nɔ ɖo aga lɛ wɛ, winnyánú wɛ. Un mɔ vodún, nǔ baɖabaɖa lɛ́ɛ gbɔn só ta só ta; un mɔ gbɔn gle mɛ gle mɛ. Jeluzalɛ́mu, heelúnú tɛ́ ɖíe! A jlǒ ná slá wǔ nú hwiɖée ǎ! Káká jɛ hwetɛ́nu wɛ é ná lɛ́ nɔ mɔ̌ nú we yi jɛ?” Mawu Mavɔmavɔ ɖɔ xó nú Jelemíi dó akú e ɖó é wú. É ɖɔ n'i ɖɔ: “Judáa to ɔ́ ɖo aluwɛ mɛ; toxo tɔn lɛ́ɛ ɖo nǔwamɛxɔmɛ, wǔ kú yě, yě blá wǔ. Jeluzalɛ́mu ɖo xó sú wɛ bɔ gbe tɔn ɖo zɔ yi wɛ. Gǎn lɛ́ɛ nɔ sɛ́ mɛsɛntɔ́ yětɔn lɛ́ɛ dó tɔ nu, bónú yě ná yi dun sin, yě ká nɔ́ mɔ sin ɖě ɖo tɔ ɔ́ mɛ ǎ, yě nɔ́ yi flú, bó nɔ́ lɛ́ kɔ asígbá alɔgbá kpó winnyá kpó, lobo nɔ cyɔ́n alɔ nukún mɛ. Ayǐkúngban ɔ́ zɛ, ɖó jǐ kwín ɖokpó sɔ́ ja ɖo to ɔ́ mɛ ǎ. Awakanmɛ kú glesi lɛ́ɛ, bɔ yě nɔ́ cyɔ́n alɔ nukún mɛ. Zungbɔ́ e ɖo gběhan mɛ lɛ́ɛ ɖésúnɔ ji vǐ bó nɔ jó dó, ɖó ama ɖě sɔ́ ɖě ǎ. Tócí gbě tɔn lɛ́ɛ nɔ́ yi cí só jí, bó nɔ́ ɖo jɔ xwí wɛ avǔn gbě tɔn ɖɔhun. Yě nɔ́ ɖo nukún dó gbɛ mɛ kpɔ́n wɛ, bó nɔ́ ɖo gběhan bá wɛ, káká bɔ nukún yětɔn nɔ vɛ́.” Togun ɔ́ ɖɔ: “Mawu Mavɔmavɔ, ényí nǔ e mǐ wa nyi do lɛ́ɛ na bó ɖó hwɛ nú mǐ hǔn, kɛnklɛ́n bó kpɔ́n dó nyǐkɔ towe wú, bó bló gbɔn ɖě nú mǐ, ɖó agɔ e mǐ jɛ dó we lɛ́ɛ gégé; hwɛ wɛ mǐ hu dó we. Hwi mɛ e Izlayɛ́li ɖo nukún ɖó wɛ é, hwi mɛ e adǎn gbo e ɔ́, a nɔ ɖe e sín mɛ é ɔ́, étɛ́wú a ka ná cí jǒnɔ ɖɔhun din ɖo to ɔ́ mɛ? Étɛ́wú a nǎ cí alitanu e zǎn kú dó, bɔ é dɔ́ ayǐ bó fɔ́n bó ɖidó é ɖɔhun? Étɛ́wú a nǎ cí mɛ ma kpé nǔɖé wú ɖɔhun? Étɛ́wú a nǎ cí mɛ e è ylɔ́ ɖɔ nǔsúɖaxó, bɔ é má ká kpé nǔɖé wǔ bó ná hwlɛ́n mɛ gán ǎ é ɖɔhun? Mawu Mavɔmavɔ, a ka ɖo tɛ́ntin mǐtɔn sín! Towe wɛ mǐ nyí hǔn! Bo ma jó mǐ dó ó.” Xó e Mawu Mavɔmavɔ ɖɔ dó togun tɔn wú ɔ́ ɖíe, é ɖɔ: “Wezun kán yi dě yi dě wɛ nɔ víví nú yě. Yě nɔ́ sixú hwíhwɛ́ hǔn bó nɔ tɛndo ɖokpó mɛ ǎ.” Mawu Mavɔmavɔ ɖɔ mɔ̌ ɖó nǔ yětɔn nyɔ́ nukún tɔn mɛ ǎ; é wɔn hwɛ e yě hu lɛ́ɛ ǎ; é ná dɔn tó tɔn nú yě. É ɖɔ nú mì ɖɔ: “Jelemíi, ma xo ɖɛ dó togun énɛ́ tamɛ ó; yě ná bó blá nu ɔ́, un ná ɖótó vosisa yětɔn ǎ. Yě ná bó sá vɔ̌ e è nɔ dó zo ɔ́, yě ná bó ná nǔ mì ɔ́, nǔ yětɔn ná nyɔ́ nukún ce mɛ ǎ. Đó un jló ná sɔ́ ahwan kpó adɔ kpó azɔn kpó dó fó xó yětɔn.” Ée Mawu ɖɔ mɔ̌ ɔ́, un ɖɔ: “Yéége! Aklúnɔ Mavɔmavɔ! Gbeyíɖɔ lɛ́ɛ ko ɖɔ nú yě ɖɔ hwi ɖɔ ahwan kún ná wá to yětɔn mɛ gbeɖé ó; adɔ kún ná tɔ́n ɖo to yětɔn mɛ gbeɖé ó. Yě ɖɔ nú yě ɖɔ hwi ɖɔ émí ná ayi j'ayǐ yě bɔ nǔ bǐ na vɔ́ ɖ'é wú.” Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ: “Gbeyíɖɔ énɛ́ lɛ́ɛ ɔ́, yě nɔ́ zé nyǐkɔ ce ɖó nu bo nɔ ɖó adingban nú mi. Nyi wɛ ka sɛ́ yě dó fí ɖé ǎ; un zɔ́n nǔɖé yě ǎ; un ka ɖɔ xó ɖě nǔ yě ǎ. Nǔ e yě nɔ́ mɔ bó nɔ́ ɖɔ lɛ́ɛ ɔ́, adingban kɛ́ɖɛ́ wɛ. Nǔ e ná wá jɛ, bɔ yě ɖɔ lɛ́ɛ bǐ wɛ nyí nǔ yǎyá; xó e jló yě ɔ́ wɛ yě nɔ́ kpa bó nɔ́ ɖɔ nú mi. Énɛ́ ɔ́ wú wɛ nyɛ Mawu Mavɔmavɔ ɖɔ: gbeyíɖɔ e un ma sɛ́ dó ǎ, bɔ yě ká nɔ́ ɖɔ xó dó nyǐkɔ ce mɛ, bó nɔ́ ɖɔ: ahwan ná byɔ́ to élɔ́ mɛ ǎ, adɔ ka ná tɔ́n ɖo fí ǎ lɛ́ɛ ɔ́, gbeyíɖɔ énɛ́ lɛ́ɛ ɔ́, ahwan ná ɖo yě hu wɛ, adɔ ná ɖo yě hu wɛ, káká bɔ yě bǐ nǎ vɔ. Mɛ e yě ká nɔ́ ɖó adingban ná lɛ́ɛ ɔ́, adɔ kpó ahwan kpó wɛ ná hu yě tɛ́ gbɔn Jeluzalɛ́mu sín ali lɛ́ɛ jí. Mɛ ɖěbǔ ná ɖe bó ná sɔ́ yě yi ɖi ǎ; è nǎ ɖi asi yětɔn lɛ́ɛ ǎ, è ka ná ɖi vǐ yětɔn súnnu abǐ nyɔ̌nu ǎ. Dǎka e yě nɔ́ xo ɔ́ yě ná sún sin tɔn. Jelemíi, ɖɔ nú yě ɖɔ émí ɖo avǐ ya wɛ ɖasin hoho zǎn kéze, magbokɔ. Đó è dó nǔ togun émítɔn bɔ é syɛ́n ɖésú, akpá ɖaxó wɛ jɛ wǔ tɔn, ɖɔ ée émí yi gle mɛ é ɔ́, ahwan ko hu gbɛtɔ́ kɔn nyi kpɔ́, émí wá toxo mɛ é ɔ́, adɔ ko hu gbɛtɔ́ tɛ́ kpaɖaɖa. Gbeyíɖɔ lɛ́ɛ kpó vɔ̌sánú-xwlémawutɔ́ lɛ́ɛ kpó ɖésú ɖo wezun jí ɖo to ɔ́ mɛ. Yě kún sɔ́ tunwun nǔ e wa wɛ yě ɖě ɔ́ ó.” Judáa togun ɔ́ ɖɔ: “Mawu, a jǒ mǐ dó bǐ wɛ a? Wǎn wɛ a gbɛ́ nú Sinyɔ́ɔ ɔ́ din a? Étɛ́wú a ka gblé wǔ mǐ, bɔ akpa jɔmakú jɛ mǐ wǔ lě? Ayi j'ayǐ ɖó nukún wɛ mǐ ɖe, nǔ ɖagbe ɖě ká ɖo wǐwá wɛ ǎ. Azɔn mǐtɔn ní gbɔ ɖó nukún wɛ mǐ ɖe, awě kɛ́ɖɛ́ wɛ ká ɖo mǐ xo wɛ. Mawu Mavɔmavɔ, mǐ tunwun ɖɔ mǐ xo dǎka, mǐ tunwun ɖɔ tɔ́gbó mǐtɔn lɛ́ɛ wa nǔ nyi do. Mǐ lɔ hu hwɛ dó we. Kpɔ́n dó nyǐkɔ towe wú, bó má jó mǐ dó ó. Ma sɔ́ axɔ́súzinkpo towe susunɔ ɔ́ xo kɔ́ ó. Ma wɔn akɔ e a jɛ xá mǐ ɔ́ ó; ma hɛn gblé ó. Vodún e togun ɖě lɛ́ɛ nɔ sɛn ɔ́ ɖě nɔ́ ná jǐ a? Abǐ jǐnukúnsin wɛ nɔ́ ná jǐ a? É má nyí hwɛ Mawu Mavɔmavɔ, Mawu mǐtɔn ɔ́ wɛ nɔ ná a ce? Mǐ ɖo nukún ɖó we wɛ, ɖó hwi wɛ nɔ bló nǔ énɛ́ lɛ́ɛ bǐ.” Mawu Mavɔmavɔ ɖɔ nú mì ɖɔ: “Mɔyízi kpó Samuwɛ́li kpó ná bó wá sa vo nú mì dó togun élɔ́ tamɛ ɔ́, un ná húzú nǔ e un lin ná wá xá togun élɔ́ ɔ́ ǎ. Jelemíi, nya yě sín nukɔn ce, yě ní yi. Nú yě kan byɔ́ we ɖɔ: ‘Fítɛ́ mǐ ká ná yi’ hǔn, ɖɔ nú yě ɖɔ nyɛ Mawu Mavɔmavɔ ɖɔ: ‘Mɛ e ná kú lɛ́ɛ ná kú; mɛ e ahwan ná hu lɛ́ɛ ɔ́, ahwan ná hu; mɛ e ná kú adɔ lɛ́ɛ ɔ́, ná kú adɔ; mɛ e ahwan ná wlí lɛ́ɛ ɔ́, ahwan ná wlí.’ “Awě alɔkpa alɔkpa ɛnɛ wɛ un ná sɛ́ dó yě. Un ná sɛ́ ahwan dó yě, bɔ ahwan ná hu yě. Un ná sɛ́ cukú dó yě, bɔ cukú ná dɔn lan yětɔn gbɔn kɔ́ mɛ. Un ná sɛ́ xɛ e nɔ sá nǔ lɛ́ɛ dó yě; un ná sɛ́ adǎnkanlin lɛ́ɛ dó yě; yě ná vún lan yětɔn ɖu, bó ná sú kún yětɔn dó. Énɛ́ ɔ́, nú togun e ɖo ayǐkúngban ɔ́ jí lɛ́ɛ mɔ yě lě ɔ́, xɛsi ná jɛ yě jí, bɔ yě ná jɛ sísɔ́sísɔ́ jí. Nǔ e Manasée, Judáa xɔ́sú, Ezekiyási ví ɔ́ dó sin ɖo Jeluzalɛ́mu ɔ́, nǔ e ná gbo yě ɖ'é mɛ ɔ́ nɛ́.” Mawu Mavɔmavɔ ɖɔ: “Jeluzalɛ́mu, mɛ̌ nǔ towe ká ná blá wǔ ná? Mɛ̌ ká ná ví we? Mɛ̌ ká ná jɛ tagba bó ná kan we byɔ́? A jǒ mì dó, a lɛ̌ kɔ sín gúdo ce. Amɔ̌, alɔ ce jɛ wǔ towe; un ná sú kún towe dó; fí e un kú nú blá wǔ nú we yi jɛ ɔ́ kpé. Jeluzalɛ́mu, vǐ towe lɛ́ɛ ɔ́, jinukún ɖɔhun wɛ un ná fún yě, ɖo to ɔ́ sín toxo lɛ́ɛ ɖokpó ɖokpó mɛ, bó ná gba yě dó. Un ná tɛ ví yě bó ná vɔ kún yětɔn. Đó yě lɛ́ kɔ sín hwɛ yětɔn lɛ́ɛ gúdo ǎ. Asúkúsi towe lɛ́ɛ sukpɔ́ hú kɔ́ e ɖo xutó é. Hwemɛ cíɖíɖí wɛ awě xo nyɔ̌nu e ɖó vǐ wínnyáwínnyá bɔ yě yi ahwan fun gbe lɛ́ɛ. Un dó xɛsi ɖaxó ɖé yě ajijimɛ. Nyɔ̌nu e ji vǐ tɛ́nwe ɔ́ ba éɖée kpo; gbɛ tɔn sɔ́ nyí nǔɖé wa nǔ ǎ; kéze kpo ɖo te bɔ hwe tɔn cí. É ɖu winnyá, bó flú. Jeluzalɛ́mu, vǐ towe e kpó ɖo gbɛ lɛ́ɛ ɔ́, un ná jó yě, bɔ yě ná kú ɖo ahwangbénu ɖo kɛntɔ́ yětɔn lɛ́ɛ nukɔn; Xó e nyɛ Mawu Mavɔmavɔ ɖɔ ɔ́ nɛ́.” Nɔ ce, adǎn nǎ gbo mì wú wɛ a ji mì a! Mɛ bǐ wɛ gbɛ́ wǎn nú mì ɖo to ɔ́ bǐ mɛ, bó nɔ́ ɖo xó ba mì wɛ. Un nya nǔɖé ɖo mɛɖé sí ǎ, un ka yí nǔɖé ɖo mɛɖé sí ǎ, nǔ ɖo mɔ̌ có, mɛ bǐ gbɛ́ wǎn nú mì. Mawu Mavɔmavɔ ka ɖɔ: “Un zin alɔ dó akɔ́n ɖɔ un ná hwlɛ́n we gán, bɔ nǔ na nyɔ́ nú we. Un zin alɔ dó akɔ́n ɖɔ hwenu e nukún ná myá kɛntɔ́ towe lɛ́ɛ, abǐ hwenu e yě ná ɖo aluwɛ mɛ ɔ́, yě ná wá sa vo nú we. Gan ɖě sixú hɛn ganwlíwlí wɛ́n a? Gan ɖě sixú hɛn ganvɔ wɛ́n a?” Mawu ɖɔ: “Judáa, nǔ e nyí towe lɛ́ɛ, dɔkun towe lɛ́ɛ ɔ́, un ná jó bǐ nú kɛntɔ́ vɔ̌nu, bɔ kɛntɔ́ ná vɔ bǐ, ɖó hwɛ e a hu gbɔn ayǐ towe lɛ́ɛ bǐ jí lɛ́ɛ wú. Un ná jó we nú kɛntɔ́, bɔ a nǎ nɔ kɛntɔ́ kan nu, ɖo to e a ma tunwun ǎ ɔ́ mɛ. Đó xomɛ sin mì, bɔ xo ce mɛ nɔ hun agbǎn; un ná fyɔ́ we.” Mawu Mavɔmavɔ, hwi wɛ tunwun nǔ bǐ! Ma wɔn mì ó, ba hlɔn nú mì ɖo kɛntɔ́ ce lɛ́ɛ gɔ́n. A yá wǔ sin xomɛ dó mɛ e ɖo ya dó nú mì wɛ lɛ́ɛ ǎ, énɛ́ wɛ zɔ́n bɔ un ɖo wǔvɛ́ mɔ wɛ. Ma lɔn nú é nɔ mɔ̌ sɔ́ yi ó. Mawu Mavɔmavɔ, a tunwun ɖɔ hwi wú wɛ un ɖo winnyá élɔ́ lɛ́ɛ bǐ mɔ wɛ. Nú xó ɖé tɔ́n sín nu towe mɛ bó jɛ tó ce mɛ lě ɔ́, tlóló jɛ́n un nɔ wɔ ɖu; xó towe nɔ́ dó xomɛhunhun nú mì, bó nɔ ná awǎjijɛ mì. Mawu Mavɔmavɔ, Mawu Nǔbǐwúkpétɔ́, nyǐkɔ towe wɛ ɖo wǔ ce. Un yi jínjɔ́n mɛcákotɔ́ lɛ́ɛ sín ahwan mɛ ǎ; un yi jínjɔ́n ahwan yětɔn mɛ, bó j'awǎ xá yě ǎ. A zě hlɔ̌nhlɔ́n towe dó ɖe mì ɖó zɔ nú yě, ɖó xomɛsin towe gɔ́ ayi ce. Étɛ́wú ya ce ma ka ná gbokɔ ǎ? Étɛ́wú akpa ce ka ɖo nǔ wa xá mì wɛ, bó má ka ná kú ǎ? Mawu Mavɔmavɔ, a na wa yɛ nú mì tɔ e wú è nɔ ɖeji dó bó ká nɔ́ yi ba sin kpo ɖ'é mɛ é ɖɔhun wɛ a? Ée un ɖɔ mɔ̌ ɔ́, Mawu Mavɔmavɔ ɖɔ nú mì ɖɔ: “Ényí a lɛ́ kɔ wá ɔ́, un ná yí we, bɔ a nǎ nɔ wa azɔ̌ nú mì. Ényí a ɖo gbesisɔ mɛ bó ná nɔ́ ɖɔ xójɔxó, bó ná jó xógblóɖiɖɔ dó ɔ́, a nǎ lɛ́ nyí gbeyíɖɔ ce. Amɔ̌, hwi wɛ ka na lɛ́ kɔ yi Judáanu lɛ́ɛ gɔ̌n ǎ, yě wɛ na lɛ́ kɔ wá gɔ̌n towe. Un na bló bɔ a nǎ syɛ́n ɖo nukɔn yětɔn; a nǎ cí ganvɔdó ɖɔhun, yě ná tɔ́n ahwan we, yě ká ná kpé wǔ we ǎ. Đó un ɖo kpɔ́ xá we, bó ná hwlɛ́n we; un yí we sín fɛ́n yětɔn mɛ. Xó e nyɛ Mawu Mavɔmavɔ ɖɔ ɔ́ nɛ́. Un nǎ hwlɛ́n we gǎn sín mɛdídá lɛ́ɛ lɔ mɛ; un ná ɖe we sín dǎkaxotɔ́ lɛ́ɛ lɔ mɛ.” Xó e Mawu Mavɔmavɔ ɖɔ nú mì é ɖíe: “Jelemíi, a nǎ da asi ǎ, a ka ná ɖó vǐ súnnu abǐ nyɔ̌nu ɖo to mɛ fí ǎ. Xó e nyɛ Mawu Mavɔmavɔ ɖɔ dó vǐ súnnu kpó vǐ nyɔ̌nu kpó e è nǎ ji ɖo to mɛ fí lɛ́ɛ wú ɔ́ ɖíe; ée un ɖɔ dó nyɔ̌nu kpó súnnu kpó e ná ji yě lɛ́ɛ wú ɔ́ ɖíe: yě ná jɛ azɔn bó ná kú; mɛɖé ná ví yě ǎ; mɛɖé ká ná ɖi yě ǎ. Zunkɔ́ kpowun wɛ yě ná nyí ɖo ayǐkúngban ɔ́ jí. Adɔ ná hu yě; ahwan ná hu yě. Cyɔ yětɔn lɛ́ɛ ná húzú nǔɖuɖu nú aklasú lɛ́ɛ kpó ayǐsájɛ lɛ́ɛ kpó.” Mawu Mavɔmavɔ lɛ́ ɖɔ nú mì ɖɔ: “Jelemíi, ma yi xwé e gbe cyɔ kú ɖe ɔ́ ó. Ma yi cyɔnu ó, ma yi ya avǐ xá yě ó. Đó un ɖe fífá ce sín togun élɔ́ mɛ. Un ɖe xomɛnyínyɔ́ ce kpó nǔbláwǔ kú nú mɛ ce kpó sín to ɔ́ mɛ. Xó e nyɛ Mawu Mavɔmavɔ ɖɔ ɔ́ nɛ́. Mɛ kpaa lɛ́ɛ kpó gbɛtɔ́ nukúnɖéjí lɛ́ɛ kpó bǐ ná kú ɖo to ɔ́ mɛ. Mɛ ɖé ná ɖe bó ná zé yě dó do ǎ. Mɛ ɖé ka ná ví yě ǎ. Mɛ ɖé ná já wǔtu dó yě ta mɛ ǎ. Mɛ ɖé ka ná xwlɛ́ ta ɖó yě wú ǎ. Mɛ ɖé ná yi cyɔ yětɔn nu, bó ná yi ɖu nǔ, bó ná dó xo hwihwɛ́ mɛ e nǔ wa lɛ́ɛ e ǎ. Mɛ ɖé ka ná ba ahan nú mɛ e tɔ́ kú ná é, abǐ nɔ kú ná é dó dó gbɔ n'i ǎ. “Ma ka yi xwé e gbe è ɖo agɔ̌ ɖu ɖe wɛ ɔ́ ó. Ma yi dɔ̌n bó yi jínjɔ́n ayǐ bó ɖu nǔ bó nu ahan xá yě ó. Nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́, xó e un ɖɔ ɔ́ ɖíe: ‘Mɛ ɖé sɔ́ ná se xweɖuɖu, awǎjijɛ, alɔwlíhan ɖě ɖo fí ǎ. Un ná ɖó bǐ te ɖo hwe mitɔn nu, ɖo nukún mitɔn mɛ.’ “Hwenu e a nǎ ɖɔ xó énɛ́ lɛ́ɛ bǐ nú togun ɔ́ é ɔ́, yě ná kanbyɔ́ we ɖɔ: ‘Étɛ́wú Mawu Mavɔmavɔ ka ɖo adǎn tobutóbú énɛ́ lɛ́ɛ gblɔ́n nú mǐ wɛ? Hwɛ tɛ́ mǐ ka hu? Étɛ́ mǐ ká wa nyi do nú Mawu Mavɔmavɔ, Mawu mǐtɔn?’ Yě kan mɔ̌ byɔ́ ɔ́, a nǎ yí gbe nú yě ɖɔ: ‘Mawu Mavɔmavɔ ɖɔ: Tɔ́gbó mitɔn lɛ́ɛ wɛ jó mì dó bó sɛn nǔmɛsɛn ɖěvo lɛ́ɛ. Yě nɔ́ sɛn yě, bó nɔ́ ɖe kɔ́ nú yě. Yě jǒ mì dó, yě xwe dó sɛ́n ce ǎ. Amɔ̌, midɛɛ lɛ́ɛ ɔ́, nǔ e mi dó sin lɛ́ɛ hú ée tɔ́gbó mitɔn lɛ́ɛ dó sin é. Nǔ e mi xwe ɔ́ wɛ mi nɔ wa, mi jló ná ɖótó mì ǎ. Un ná nya mi sín to mɛ fí yi to e mi ma tunwun kpɔ́n gbeɖé ǎ é mɛ. To énɛ́ ɔ́, mi tunwun ǎ, tɔ́gbó mitɔn lɛ́ɛ lɔ ka tunwun ǎ; mi ná sɛn nǔmɛsɛn ɖěvo lɛ́ɛ ɖo fínɛ́ zǎn kéze. Đó nǔ mitɔn sɔ́ ná blá wǔ nú mi ǎ.’ ” Mawu Mavɔmavɔ ɖɔ: “Gbe ɖokpó ná wá su, bɔ mɛɖé sɔ́ ná xwlé nǔ dó nyǐkɔ ce mɛ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín Ejípu’ ǎ. Lo ɔ́, è nǎ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín to e ɖo taligbé ɔ́ mɛ, bó ɖe yě tɔ́n sín to ɖěvo e mɛ é gba yě dó gbɔn lɛ́ɛ bǐ mɛ.’ Yě ná xwlé nǔ mɔ̌, ɖó un ná kplá yě wá to e un ko ná tɔ́gbó yětɔn lɛ́ɛ ɔ́ mɛ.” Mawu Mavɔmavɔ ɖɔ: “Un ná sɛ́ ɖɔnyitɔ́ gěgé dó Izlayɛ́li ví lɛ́ɛ gbé mɛ, bɔ yě ná yi wlí yě wá hweví ɖɔhun. Énɛ́ ɔ́ gúdo ɔ́, un ná sɛ́ gbětɔ́ gěgé dó gbě yětɔn mɛ, bɔ yě ná yi nya gbě yětɔn gbɔn só ta só ta, sókan mɛ sókan mɛ, sónu mɛ sónu mɛ, bó ná wlí yě. Đó nǔ e wa wɛ yě ɖe lɛ́ɛ bǐ mɔ wɛ un ɖe, ɖě ɖo nǔglɔ́ nú mì ǎ; hwɛ e hu wɛ yě ɖe lɛ́ɛ bǐ mɔ wɛ un ɖe. Hwɛ e hu wɛ yě ɖe lɛ́ɛ kpó nǔ e wa nyi do wɛ yě ɖe lɛ́ɛ kpó ɔ́, un ná dɔn bǐ sín tó nú yě hwɛ̌ ɖó azɔn we jí. Đó yě ɖu su nú to ce; to e nyí ce ɔ́, nǔmɛsɛn yětɔn lɛ́ɛ wɛ yě bɛ̌ d'é mɛ bɔ é gɔ́; nǔmɛsɛn yětɔn énɛ́ lɛ́ɛ ɔ́, cyɔ wɛ nú yě, nǔvɛ́mɔ yětɔn lɛ́ɛ wɛ yě bɛ́ gɔ́ to ce.” Mawu Mavɔmavɔ wɛ nyí gǎnjɛwú ce, é wɛ nyí sósyɛ́n ce. Adǎngbomɛ hwenu ɔ́, é wɛ nɔ́ nyí bibɛtɛn ce. Akɔta akɔta lɛ́ɛ ná gosín wɛ̌kɛ́zo ɛnɛ lɛ́ɛ bǐ jí wá mɔ we, bó ná ɖɔ nú we ɖɔ: “Nǔ e tɔ́gbó mǐtɔn lɛ́ɛ nɔ́ sɛn lɛ́ɛ bǐ wɛ nyí awo, nǔ yǎyá wɛ, yě kpé nǔɖé wú ǎ. Gbɛtɔ́ ɖó ná bló nǔmɛsɛn ǎ. Nǔ e é bló lɛ́ɛ nyí Mawu ǎ.” Mawu ɖɔ: “Din tɔn ɔ́, un ná ɖe nǔwúkpíkpé ce kpó acɛkpikpa ce kpó xlɛ́ yě, bɔ yě ná tunwun ganjí; énɛ́ ɔ́, yě ná mɔ nukún jɛ wú ɖɔ Mawu Mavɔmavɔ wɛ un nyí.” Mawu ɖɔ: “Hwɛ e Judáa togun ɔ́ hu ɔ́ cí nǔwlánwlán e è zě ganswe abǐ diamáaswe dó kun dó nǔ mɛ ɔ́ ɖɔhun. È wlǎn dó ayi yětɔn mɛ; è wlán dó vɔ̌sákpe yětɔn lɛ́ɛ sín zwe lɛ́ɛ mɛ. Ayi yětɔn nɔ ɖo vɔ̌sákpe yětɔn lɛ́ɛ, vodún Acela yětɔn lɛ́ɛ, kpódó atínmú e gbɔn só jí só jí lɛ́ɛ kpó jí, lě e ayi yětɔn nɔ ɖo vǐ yětɔn lɛ́ɛ jí é. Judáa togun e, hwi mɛ e nɔ sɛn vodún gbɔn só jí só jí, bó nɔ́ sɛn gbɔn nǔkan mɛ nǔkan mɛ ɔ́, nǔ e nyí towe lɛ́ɛ, dɔkun towe lɛ́ɛ kpó fí e a nɔ yi sɛn vodún gbɔn lɛ́ɛ kpó ɔ́, un jó bǐ nǔ kɛntɔ́, bɔ kɛntɔ́ ná vɔ bǐ, ɖó hwɛ e a hu gbɔn ayǐ towe lɛ́ɛ jí lɛ́ɛ wú. To e un ná we, bɔ é nyí towe ɔ́, a nǎ jó. Un na jó we nú kɛntɔ́, bɔ a na yi nɔ kannumɔgbénu, ɖo to e a ma tunwun ǎ é mɛ. Xomɛsin e a dó nú mì ɔ́ cí myɔ ɖɔhun, nǔɖé sixú xo cí ǎ.” Xó e Mawu Mavɔmavɔ ɖɔ ɔ́ ɖíe: “Mɛ e nɔ ɖeji dó gbɛtɔ́ wú ɔ́, mɛ e nɔ sɔ́ gbɛtɔ́ dó ɖó gǎnjɛwú ɔ́, mɛ e nɔ lɛ́ kɔ sín nyɛ Mawu Mavɔmavɔ gúdo ɔ́, un ná dó nu i. Mɛ énɛ́ ɔ́ cí zungodwe ɖo axéko jí ɖɔhun. Nyɔ̌ná já ɔ́, é nɔ tunwun lɔ ǎ. Fí e gběhan bǐ fyɔ́ ɖe ɖo axéko ɔ́ jí ɔ́ wɛ é ɖe. Jɛ wɛ ɖo ayǐkúngban énɛ́ ɔ́ sín lanmɛ, mɛɖé nɔ́ nɔ fínɛ́ ǎ. Nǔ nyɔ́ nú mɛ e ɖeji dó nyɛ Mawu Mavɔmavɔ wú é, mɛ e gán jɛ nyɛ Mawu Mavɔmavɔ wú ɔ́, nǔ tɔn nyɔ́. É cí atín e è tun ɖó tɔsisa tó, bɔ é nyi ɖɔ dó tɔ ɔ́ mɛ é ɖɔhun. Atín énɛ́ nɔ́ tunwun akú ǎ. Ama tɔn lɛ́ɛ nɔ́ ɖo mǔ tɛgbɛ. Xwe ɖé su bónú jǐ na bó má ja ǎ ɔ́, ado nɔ hu i ǎ. É nɔ gɔn sínsɛ́n gbeɖé ǎ. Gbɛtɔ́ sín ayixa hízí; ayixa tɔn dá hú nǔ bǐ. È sixú gbɔ azɔn n'i ǎ; è sixú mɔ nǔ jɛ ayi tɔn mɛ ǎ. Nyɛ Mawu Mavɔmavɔ ɔ́, un nɔ tunwun nǔ e lin wɛ gbɛtɔ́ ɖe ɖo ayi tɔn mɛ é. Nǔ e ɖo mɛ xomɛ ɔ́, un nɔ mɔ bó nɔ́ da kpɔ́n. Énɛ́ ɔ́, un nɔ wa nǔ nú mɛ lě e walɔ mɛ ɔ́ tɔn byɔ́ gbɔn é; nǔ e mɛɖé wa ɔ́ sín axɔ́ wɛ un nɔ sú mɛ ɔ́. Mɛ e nɔ jɛ dɔkun dó acɛ jí ɔ́ cí asɔklé e fɛ azin e é má ɖó ǎ é ɖɔhun. É ná kpo ɖo gbɛ céɖécéɖé lě bɔ dɔkun tɔn ná jó é dó, gbɛ tɔn sín vivɔnu ɔ́, é ná cí yɛyinɔ ɖé ɖɔhun ɖo gbɛ ɔ́ mɛ.” Axɔ́súzinkpo susunɔ ɖé tíin, sín do ɔ́, susu tɔn zɛ axɔ́súzinkpo e ɖo gbɛ ɔ́ mɛ lɛ́ɛ bǐ tɔn wú, fínɛ́ wɛ mǐ nɔ sɛn Mawu ɖe. Mawu Mavɔmavɔ! Hwi wɛ nyí mɛ e Izlayɛ́li ɖo nukún ɖó wɛ é. Mɛ e jó hwɛ Mawu Mavɔmavɔ dó lɛ́ɛ bǐ wɛ ná ɖu winnyá. Mɛ e lɛ́ kɔ sín gúdo towe lɛ́ɛ bǐ ná cí nyǐkɔ e è wlǎn dó kɔ́gúdu mɛ ɔ́ ɖɔhun. Đó yě jó hwi Mawu Mavɔmavɔ e nyí tɔjɔtɛn e mɛ sin e nɔ ná gbɛ mɛ ɔ́ nɔ sa sin é dó. Mawu Mavɔmavɔ, a gbɔ azɔn nú mì ɔ́, azɔn ce ná gbɔ bǐ; a hwlɛ̌n mì ɔ́, un ná gán, ɖó hwi wɛ un nɔ ɖo mlǎmlá wɛ. Xó e mɛ lɛ́ɛ nɔ ɖɔ nú mì ɔ́ ɖíe, yě nɔ́ ɖɔ: “Nǔ e a nɔ ɖɔ Mawu Mavɔmavɔ ɖɔ é na jɛ ɔ́, é jɛ din a? É ní jɛ nú mǐ ná kpɔ́n bó!” Mawu Mavɔmavɔ, nyɛ ɔ́, un gbɛ́ ɖɔ un kún ná nyí lɛ̌ngbɔ́nyitɔ́ bó wa azɔ̌ nú we ó ǎ. A ka tunwun ɖɔ un kún ba nú awě ní xo mǐ ó. Xó e nɔ tɔ́n sín nu ce mɛ lɛ́ɛ ɔ́, nukɔn towe wɛ un ɖɔ bǐ ɖe. Hwi mɛ e adǎn gbo mì ɔ́, un nɔ hɔn wá su ɔ́, ma wá fyán mì bónú un ɖi xɛsi ó. Mɛ e ɖo ya dó nú mì wɛ lɛ́ɛ ní ɖu winnyá, nyɛ ní ma ka ɖu ɖě ó. Xɛsi ní jɛ yě jí, nyɛ ní ma ká ɖi xɛsi ɖě ó. Sɛ́ awěxomɛ zán ɔ́ dó yě, alɔ towe ní jɛ yě wǔ, bónú nǔ ní xá yě gbɔn zǔndohlando. Mawu Mavɔmavɔ ɖɔ nú mì ɖɔ: “Nǔ e a na bló lɛ́ɛ ɖíe: Yi, yi cí toxo ɔ́ sín hɔntogbó e è nɔ ylɔ́ ɖɔ Hɔntogbó toví lɛ́ɛ tɔn ɔ́ jí. Fínɛ́ wɛ Judáa xɔ́sú lɛ́ɛ nɔ gbɔn. A na lɛ́ yi cí hɔntogbó Jeluzalɛ́mu tɔn e kpo lɛ́ɛ ɖokpó ɖokpó jí. A nǎ ɖɔ nú yě ɖɔ: ‘Judáa xɔ́sú e mi! Judáanu e mi! Jeluzalɛ́munu e mi! Mɛ e nɔ gbɔn hɔntogbó élɔ́ lɛ́ɛ nu lɛ́ɛ bǐ ní ɖótó xó e Mawu Mavɔmavɔ ɖɔ é! Mawu Mavɔmavɔ ɖɔ: Mi cɔ́ miɖée. Mi ma hɛn agban gbɔjɛzán gbe ó, mi má hɛn agban gbɔn hɔntogbó Jeluzalɛ́mu tɔn lɛ́ɛ ɖě nu gbɔjɛzán gbe ó. Mi ma ka ɖe agban ɖé tɔ́n sín xwé mitɔn gbe gbɔjɛzán gbe ó. Mi ma ka wa azɔ̌ ɖěbǔ azǎn énɛ́ ɔ́ gbe ó. Lo ɔ́, mi sɔ́ gbɔjɛzán ɔ́ ɖó vo nú mì, lě e un ɖɔ gbɔn nú tɔ́gbó mitɔn lɛ́ɛ é. Un ɖɔ mɔ̌ nú yě, yě ká ɖótó mì ǎ, yě dǒ tókúse mɛ; yě ci tamɛ, ɖó yě jló ná se ǎ, yě jló ná yí kplɔ́n ǎ.’ “Amɔ̌, midɛɛ lɛ́ɛ ɔ́, mi ɖótó mì, mi má hɛn agban gbɔn hɔntogbó Jeluzalɛ́mu tɔn lɛ́ɛ nu gbɔjɛzán gbe ó, mi sɔ́ gbɔjɛzán gbe ɔ́ ɖó vo nú mì, mi má nɔ́ wa azɔ̌ ɖěbǔ gbe énɛ́ gbe ó. Mi bló mɔ̌ ɔ́, axɔ́súzinkpo Davídi tɔn ná nɔ vɔ̌ gbeɖé ǎ, axɔ́sú e ɖo zinkpo ɔ́ jí ɔ́ na nɔ zɔn sɔ́ jí, abǐ kɛkɛ́ví mɛ, bó ná nɔ gbɔn hɔntogbó lɛ́ɛ nu. Gǎn Judáa tɔn lɛ́ɛ, Jeluzalɛ́mu tɔn lɛ́ɛ, Judáanu lɛ́ɛ, kpó Jeluzalɛ́munu lɛ́ɛ kpó bǐ na nɔ gbɔn hɔntogbó lɛ́ɛ nu. Gbɛtɔ́ ná hán ɖo toxo ɔ́ mɛ gbeɖé ǎ. Gbɛtɔ́ ná gosín Judáa toxo lɛ́ɛ mɛ, bó gosín fí e sɛkpɔ́ Jeluzalɛ́mu lɛ́ɛ, bó gosín Bɛnjamɛ́ɛ yíkúngban ɔ́ jí, bó gosín tɔdo lɛ́ɛ mɛ; gbɛtɔ́ ná gosín sókan lɛ́ɛ mɛ, yě ná gosín tofɔligbé, bó ná hɛn kanlin e è nɔ dó sá vɔ̌ e è nɔ́ dó zo lɛ́ɛ, vɔ̌ kpaa lɛ́ɛ, zǎlínkpɔ́n núníná lɛ́ɛ kpó kú dó nú mì sín vɔ̌ lɛ́ɛ kpó wá nyɛ Mawu Mavɔmavɔ xwé gbe. Amɔ̌, ényí mi ma se xó e un ɖɔ nú mi ɔ́ ǎ ɔ́, ényí mi ma zé gbɔjɛzán ɔ́ ɖó vo nú mì ǎ ɔ́, ényí mi hɛn agban gbɔn hɔntogbó Jeluzalɛ́mu tɔn lɛ́ɛ nu gbɔjɛzán gbe ɔ́, un ná flɔ́ myɔ ɖokpó ɖó toxo ɔ́ sín hɔntogbó lɛ́ɛ jí, bɔ Jeluzalɛ́mu sín hɔn lɛ́ɛ kpó xwé ɖagbe ɖagbe lɛ́ɛ kpó ná fyɔ́. Myɔ ɔ́ na cí gbeɖé ǎ.” Xó e Mawu Mavɔmavɔ ɖɔ nú mì ɔ́ ɖíe: “Jelemíi, sɔ́ nǔ bó yi zɛ̌nmɛtɔ́ xwé, nú má ɖɔ xó nú we ɖo fínɛ́.” Ée Mawu ɖɔ mɔ̌ ɔ́, un yi zɛ̌nmɛtɔ́ xwé, bɔ alɔ tɔn ɖo ko mɛ, ɖo zɛ̌nto mɛ. Ényí zɛ̌n e mɛ wɛ é ɖe ɔ́ má nyɔ́ ǎ ɔ́, é nɔ́ vɔ́ ko e é dó mɛ zɛ̌n ɔ́ ná ɔ́ nya d'é wú, bó nɔ́ dó bló ɖěvo, bɔ é nɔ́ cí lě e é ba gbɔn é. É nɔ jɛ mɔ̌ tɛgbɛ. Énɛ́ ɔ́, Mawu Mavɔmavɔ ɖɔ nú mì ɖɔ: “Mi Izlayɛ́li ví lɛ́ɛ ɔ́, lě e zɛ̌nmɛtɔ́ énɛ́ ɔ́ ɖo ko sín nǔ wa gbɔn wɛ ɔ́, nyɛ lɔ sixú wa nǔ mitɔn gbɔn mɔ̌ ǎ cé? Lě e ko nɔ cí gbɔn ɖo zɛ̌nmɛtɔ́ lɔ mɛ ɔ́, mɔ̌ wɛ mi ɖe ɖo alɔ ce mɛ. Xó e nyɛ Mawu Mavɔmavɔ ɖɔ ɔ́ nɛ́. É nɔ́ wá su hwe ɖe nú, bɔ un nɔ ɖɔ xó dó akɔta ɖé abǐ axɔ́súɖuto ɖé wú ɖɔ: un ná hɔn ɛ atín ɖɔhun, un ná mu i zin dɛ́ atín ɖɔhun, un ná hɛn ɛ gblé. Lo ɔ́, nú akɔta élɔ́ e xó ɖɔ wɛ un ɖe ɔ́ ká jó nyanya wiwa dó, bó lɛ́ kɔ sín hwɛ e hu wɛ é ɖe ɔ́ gúdo ɔ́, un nɔ jó nǔ e un ɖɔ un ná wa xá ɛ ɔ́ dó. É ká nɔ́ wá su hwe ɖé nu, bɔ un nɔ ɖɔ xó dó akɔta ɖé abǐ axɔ́súɖuto ɖé wú ɖɔ: un ná gbá we xɔ ɖɔhun, un ná tun we atín ɖɔhun. Lo ɔ́, nú akɔta énɛ́ bló nǔ e un gbɛ́ wǎn ná ɔ́, bó má ɖótó mì ǎ ɔ́, un ná jó nǔ ɖagbe e un ko ɖɔ un ná bló n'i ɔ́ dó. “Din ɔ́, Jelemíi, ɖɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ: ‘Nyɛ Mawu Mavɔmavɔ ɖɔ: Un ɖo nǔ nyanya ɖé lin dó mi wú wɛ. Mɛ ɖokpó ɖokpó ní lɛ́ kɔ sín ali nyanya e jí é ɖe é jí, bó mlɛ́ ali ɖagbe, bó húzú walɔ.’ ” Lo ɔ́, yě ná ɖɔ: “Xó ɖé kpowun wɛ nyí xó énɛ́; nǔ e mǐ xwe ɔ́ wɛ mǐ na wa. Mɛ ɖokpó ɖokpó ná bló nǔ nyanya e ayi tɔn ɖɔ n'i é.” Din ɔ́, mi bo ɖótó xó e Mawu Mavɔmavɔ ɖɔ ɔ́, é ɖɔ: “Izlayɛ́li ví e mi, mi kan nǔ byɔ́ gbɔn akɔta ɖě lɛ́ɛ mɛ, bó kpɔ́n ɖɔ mɛɖé se xó mɔ̌hunkɔ gbeɖé ɖo fí ɖé a jí! Nǔ e mi dó sin ɔ́ zɛ kpá. Laglásilinfín nɔ́ hán ɖo Libáan só lɛ́ɛ jí gbeɖé a? Sin e nɔ sa sín Libáan dɔ̌n ɔ́, sin fífá énɛ́ ɔ́ gɔn sisa kpɔ́n a? Mi mɛ e nyí togun ce ɔ́, mi ka wɔn mì. Mi wɔn mì, bó nɔ́ xwlé zǎlínkpɔ́n vodún lɛ́ɛ. Vodún énɛ́ lɛ́ɛ nyí afɔklɛ́nnú nú mi ɖo ali e mi mlɛ́ lɛ́ɛ jí. Yě ɖe mi sín ali mitɔn xóxó lɛ́ɛ jí, bɔ mi wlí ali e è ma ɖe ǎ lɛ́ɛ. Mi sɔ́ to mitɔn dó húzú nǔ vɛ́ mɔ, to mitɔn húzú nǔkiko. Mɛ ɖěbǔ wá mɔ ɔ́, é nɔ́ kpácá mɛ ɔ́, bɔ é nɔ́ húnhún ta. Lě e jɔhɔn zǎnzǎnhwe jí tɔn nɔ d'alɔ nǔywɛ́ mɛ, bó nɔ́ fúnfún gbɔn ɔ́, mɔ̌ wɛ un ná fúnfún mi gbɔn, ɖo kɛntɔ́ nukɔn. Adǎngbomɛ hwenu ɔ́, un ná dó gúdo mi, un ná kpɔ́n jɛ mitɔn jí ǎ.” Énɛ́ ɔ́ gúdo ɔ́, mɛ ɖé lɛ́ɛ nɔ ɖɔ ɖo yěɖée tɛ́ntin ɖɔ: “Mi wá mǐ blá Jelemíi gbé. Vɔ̌sánú-xwlémawutɔ́ e ná kplɔ́n sɛ́n ɔ́ mǐ ɔ́ hán ǎ. Nǔnywɛ́tɔ́ e ná kplɔ́n nǔ mǐ ɔ́ hán ǎ. Gbeyíɖɔ e ná ɖɔ Mawuxó nú mǐ ɔ́ hán ǎ. Mi wá mǐ ní kpa xó ɖɔ dó nu tɔn, dó ba xó e. Mǐ nǎ ké ya nú xó e wlí ɖɔ wɛ é nɔ́ ɖe lɛ́ɛ ǎ.” Jelemíi ɖɔ: “Mawu Mavɔmavɔ, ɖǒtó mì! Se xó e ɖɔ wɛ kɛntɔ́ ce lɛ́ɛ ɖe é. Yě kun do gɔngɔn bɔ un ná jɛ mɛ. È nɔ wa ɖagbe bo nɔ yí alɔgúdokpɛ́ a? Mawu, flín ɖɔ nukɔn towe wɛ un nɔ, bó byɔ́ ɖɔ hwi ní jó xomɛ e a sin dó yě ɔ́ dó. Énɛ́ wú ɔ́, jó vǐ yětɔn lɛ́ɛ dó nú adɔ ní hu yě; sɔ́ hwǐ dó hu yě tɛ́. Asi yětɔn lɛ́ɛ ní ba vǐ kpo; yě ní húzú asúkúsi; jɛmɛjí ní hu asú yětɔn lɛ́ɛ. Ahwan ní hu mɛ wínnyáwínnyá yětɔn lɛ́ɛ. Hwenu e a na sɛ́ kɛntɔ́ dó yě ajijimɛ ɔ́, xósúsú ní mlí ɖo xwé yětɔn lɛ́ɛ gbe. Đó yě kun do gɔngɔn bó ná kpé wǔ ce. Yě ɖǒ mɔ nú mì. Mawu Mavɔmavɔ, hwɛ ka mɔ lě e yě blá gbě ce gbɔn, lobo ná gblé gbɛ dó nú mì é. Ma sɔ́ hwɛ yětɔn lɛ́ɛ kɛ yě ó. Ma wɔn nǔ e yě wa nyi do nú we lɛ́ɛ ɔ́ ó. Yě ní j'ayǐ ɖo nukɔn towe. Nɔ xomɛsin jí, bó wa nǔ xá yě.” Mawu Mavɔmavɔ ɖɔ nú Jelemíi ɖɔ: “Yi zɛ̌nmɛtɔ́ xwé bó xɔ tɔyizɛ́n ɖokpó, bó kplá tomɛxó ɖé lɛ́ɛ kpó vɔ̌sánú-xwlémawutɔ́ ɖé lɛ́ɛ kpó, lobo gbɔn Zɛ̌nxwɛ Hɔntogbó ɔ́ sín ali nu, bó yi Hinnɔ́ɔ tɔdo mɛ. A jɛ dɔ̌n ɔ́, a na ɖɔ xó e un ná ɖɔ nú we ɔ́. A nǎ ɖɔ: Judáa xɔ́sú e mi, Jeluzalɛ́munu e mi, mi ɖótó xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́, é ɖɔ: Un ná dó nǔ nyanya ɖé sin ɖo to élɔ́ mɛ, bɔ mɛɖé se ɔ́ tó tɔn ná sú gbɔn. Yě jǒ mì dó; yě hɛn tɛn élɔ́ mɛ gblé; yě hɛn gblé káká bɔ è mɔ ɔ́, è sɔ́ tunwun ɖɔ tɛn élɔ́ wɛ ǎ; yě dǒ zǎlínkpɔ́n zo nú vodún lɛ́ɛ ɖo fí. Yě ká tunwun vodún énɛ́ lɛ́ɛ kpɔ́n ǎ; tɔ́gbó yětɔn lɛ́ɛ tunwun ǎ; axɔ́sú Judáa tɔn lɛ́ɛ lɔ ka tunwun ǎ, yě kɔn xomɛvɔ́nɔ sín kanjɔ kɔn nyi ayǐ ɖo fí, bɔ é sa tɔ. Yě lí vodún Baalu, bó nɔ dó vǐ yětɔn lɛ́ɛ zo dó sá vɔ̌ n'i. Nyɛ zɔ́n nǔ mɔ̌hunkɔtɔn kpɔ́n gbeɖé ǎ; un ka ɖɔ xó tɔn nú mɛɖé ǎ; ayixa mɔ̌hunkɔtɔn ká wá xo ce mɛ lɔ gbeɖé ǎ. “Énɛ́ ɔ́ wú wɛ nyɛ Mawu Mavɔmavɔ ɖɔ é ná jɛ hwe ɖé nu, bɔ è sɔ́ ná ylɔ́ fí élɔ́ ɖɔ ‘Tafɛ́ti’ abǐ ‘Hinnɔ́ɔ tɔdo’ ɖě ǎ. Lo ɔ́, è nǎ nɔ ylɔ́ ɖɔ: ‘Mɛ huhu tɔdo’. Un ná zin toxóɖɔgbɛ́ Judáa tɔn kpó Jeluzalɛ́mu tɔn kpó dɛ́. Un ná sɛ́ kɛntɔ́ yětɔn lɛ́ɛ dó, bɔ yě ná tɔ́n ahwan yě bó hu yě. Un ná zɔ́n mɛ e ma mɔ yě gbɔ ǎ lɛ́ɛ, bɔ yě ná hu yě; un ná ná cyɔ yětɔn aklasú lɛ́ɛ kpó ayǐsájɛ lɛ́ɛ kpó, bɔ yě ná vún ɖu. Un ná wa nǔ xá toxo élɔ́, bɔ mɛ e na mɔ lɛ́ɛ ɔ́ ná sɔ́ alɔ ɖó nu. Mɛ e ɖo dǐndín wɛ lɛ́ɛ mɔ ɔ́, avuvɔfún ná blá yě, yě ná sá heelú. Kɛntɔ́ e ɖo kú yětɔn ba wɛ lɛ́ɛ ná xá toxo yětɔn bó ná tɔ́n ahwan yě. Ya ná blá ta nú mɛ e ɖo toxo ɔ́ mɛ lɛ́ɛ, káká bɔ yě ná nɔ ɖu vǐ yě ɖésúnɔ tɔn lɛ́ɛ, bó ná nɔ́ vún nɔzo yětɔn lɛ́ɛ ɖu. “A ɖɔ mɔ̌ ɔ́, a na hɛn tɔyizɛ́n ɔ́ gba, ɖo mɛ e kpó hwi kpó zɔn wá lɛ́ɛ nukún mɛ, bó ná ɖɔ nú yě ɖɔ: Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe, é ɖɔ: Un ná gba togun élɔ́ kpó toxo élɔ́ kpó tɔyizɛ́n ɖɔhun, bɔ xó bǐ ná fó. “Tafɛ́ti fí wɛ è na ɖi cyɔ lɛ́ɛ ɖó, ɖó tɛn sɔ́ ná tíin ɖo fí ɖěvo ǎ. Mɔ̌ wɛ un na bló gbɔn xá toxo élɔ́ kpó mɛ e ɖo toxo ɔ́ mɛ lɛ́ɛ kpó. Un ná húzú toxo ɔ́, bɔ é ná cí Tafɛ́ti tɔdo élɔ́ ɖɔhun. Xó e nyɛ Mawu Mavɔmavɔ ɖɔ ɔ́ nɛ́. Xwé e ɖo Jeluzalɛ́mu lɛ́ɛ kpó Judáa xɔ́sú lɛ́ɛ sín xwé kpó ná húzú nǔ blíblí Tafɛ́ti tɔdo élɔ́ ɖɔhun, ɖó xwé énɛ́ lɛ́ɛ bǐ sín xɔ ta wɛ yě nɔ́ dó zǎlínkpɔ́n zo nú nǔɖíɖó sɛ́xwé tɔn lɛ́ɛ gbɔn, bó nɔ́ ba ahan nú vodún lɛ́ɛ gbɔn.” Jelemíi lɛ́ kɔ sín Tafɛ́ti tɔdo mɛ, fí e Mawu Mavɔmavɔ sɛ́ ɛ dó ɖɔ é ní yi ɖɔ xó dó nyǐkɔ émítɔn mɛ ɖe é; ée é lɛ́ kɔ wá ɔ́, é cí kɔ́xota ɖo Mawu Mavɔmavɔ xwé ɔ́ gbe, bó ɖɔ nú togun ɔ́ bǐ ɖɔ: “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe, é ɖɔ: ‘Nǔ e un ɖɔ un na dó sín xá toxo élɔ́ kpó toxo e lɛ́ lɛ̌ dó e lɛ́ɛ kpó ɔ́, un na dó bǐ sin xá yě. Đó yě ci ta mɛ; yě ɖótó xó ce ǎ.’ ” Vɔ̌sánú-xwlémawutɔ́ Pacehúu, Imumɛ́ɛ ví ɔ́ wɛ kpa acɛ dó mɛ e nɔ kpé nukún dó Mawu Mavɔmavɔ xwé ɔ́ wú lɛ́ɛ nu; é se xó énɛ́ lɛ́ɛ e gbeyíɖɔ Mawu tɔn Jelemíi ɖɔ é. Ée é se ɔ́, é wlí Jelemíi bó nyi zo n'i, bó blá ɛ dó atín wú. Atín ɔ́ ɖo hɔntogbó e è nɔ ylɔ́ ɖɔ Bɛnjamɛ́ɛ Hɔntogbó ɔ́ kpá. Hɔntogbó ɔ́ ɖo aga, ɖo Mawu Mavɔmavɔ xwé gbe. Ayǐhɔ́ngbe tɔn ɔ́, Pacehúu tún Jelemíi, bɔ Jelemíi ɖɔ n'i ɖɔ: “Pacehúu wɛ nyí nyǐkɔ e Mawu Mavɔmavɔ ná we é ǎ, ‘Xɛsiɖofíbǐ’ wɛ nyǐkɔ towe nyí. Đó Mawu Mavɔmavɔ ɖɔ: ‘Un ná dó xɛsi nú we; un ná dó xɛsi nú hwi kpó xɔ́ntɔn towe lɛ́ɛ bǐ kpó. Kɛntɔ́ yětɔn lɛ́ɛ ná tɔ́n ahwan yě bó hu yě, bɔ a nǎ mɔ kpó nukún towe kpó. Un na jó Judáa to ɔ́ bǐ nú Babilɔ́nu xɔ́sú ɔ́, bɔ é ná wlí ahwankannumɔ yětɔn yi to tɔn mɛ, abǐ é ná hu yě ɖó hwǐ wú. Dɔkun e nyí toxo élɔ́ tɔn lɛ́ɛ, nǔ e toxo élɔ́ jɛ dɛ̌n lobo wa lɛ́ɛ, nǔ e vɛ́ nú toxo élɔ́ lɛ́ɛ kpó dɔkun e nyí Judáa xɔ́sú lɛ́ɛ tɔn lɛ́ɛ kpó ɔ́, un ná jó bǐ nú kɛntɔ́ yětɔn lɛ́ɛ, bɔ yě ná bɛ́ bǐ hɛn yi Babilɔ́nu. Pacehúu, ahwan ná wlí hwi kpó mɛ e ɖo xwé towe gbe lɛ́ɛ bǐ kpó yi Babilɔ́nu; a nǎ kú ɖo dɔ̌n, bɔ è nǎ ɖi we. È nǎ ɖi xɔ́ntɔn towe lɛ́ɛ ɖó dɔ̌n. Xɔ́ntɔn towe énɛ́ lɛ́ɛ e a ɖǒ adingban ná ɖɔ xó e Mawu sɔ́ dó nu nú émí ɔ́ ɖɔ nú yě wɛ émí ɖe lɛ́ɛ.’ ” Mawu Mavɔmavɔ, a ɖɔ xó nú mì káká, bɔ un gbɔ bo jó gbe. A hɛn mì kpó hlɔ̌nhlɔ́n kpó, a hú gǎn mì. Ayǐ hɔn tɛgbɛ ɔ́, un nɔ nyí nǔkiko; mɛ bǐ wɛ nɔ gbɔ aca ta ce. Un hun nu ce hweɖěbǔnu bó ja xó ɖɔ gbé ɔ́, xó wɛ un nɔ sú bó nɔ ɖɔ è ɖo alǎnnú wa wɛ! Un nɔ sú xó bó nɔ ɖɔ è ɖo nǔ hɛn gblé wɛ! Ayǐhɔ́ngbe ayǐhɔ́ngbe ɔ́, un nɔ dó wɛn towe yě. Un ka dó ɔ́, yě nɔ́ cá mì ko; yě nɔ́ bɔ zun nyi gǒ mɛ nú mì. Ényí un ɖɔ nú nyiɖée ɖɔ: “Din ɔ́, un sɔ́ ná sɔ́ Mawu Mavɔmavɔ xó dó hǔn mɛ ɖě ǎ, un sɔ́ ná ɖɔ xó ɖě dó nyǐkɔ tɔn mɛ ǎ.” Un ɖɔ mɔ̌ ɔ́, é nɔ́ cí ɖɔ myɔ wɛ ɖo xo ce mɛ, bó ɖo jiji wɛ ɖɔhun, bɔ un nɔ tɛ́nkpɔ́n bó ná dɛ ɖ'é nu, un ka nɔ kpé wú ǎ. Mɛ gěgé ɖo xó nyanya ɖɔ dó wǔ ce wɛ, bɔ un se. Yě nɔ́ ylɔ́ mì ɖɔ: “Xɛsiɖofíbǐ.” Mɛ ɖé lɛ́ɛ nɔ́ ɖɔ: “Mǐ ní ɖe e gba!” Mɛ ɖěvo lɛ́ɛ nɔ́ ɖɔ: “Nǔgbó wɛ, mǐ ní ɖe e gba!” Xɔ́ntɔn ce lɛ́ɛ ɖésú nɔ́ ɖo cícɔ́ mì wɛ, bó ná kpɔ́n ɖɔ nyi ná ɖe afɔ nyi do a jí. Yě nɔ́ ɖɔ: “É lóó ká jɛ mɛ, nú mǐ nǎ bló n'i nɛ́! Mǐ nǎ ba hlɔn.” Lo ɔ́, Mawu Mavɔmavɔ, a dǒ hlɔ̌nhlɔ́n, bó ɖo ahwan fun nú mì wɛ. Yě mɛ e ɖo ya dó nú mì wɛ lɛ́ɛ ɔ́, yě wɛ ná klɛ́n afɔ. É ná gbo dó yětɔn jí ǎ. Yě ná ba nu tɔn kpo bó ɖu winnyá; wi ná kɔ́n sín ta nú yě káká sɔ́yi; mɛ ɖěbǔ ná wɔn ǎ. Mawu Mavɔmavɔ Nǔbǐwúkpétɔ́, a nɔ gbéjé gbɛtɔ́ kpɔ́n. A nɔ mɔ nǔ jɛ mɛ xomɛ, a nɔ tunwun nǔ e lin wɛ gbɛtɔ́ ɖe ɖo ayi tɔn mɛ é. Un na kpɔ́n lě e a nǎ ba hlɔn nú mì gbɔn é, ɖó hwi wɛ un jó gbɛ ce ná. Mi ji han bó kpa Mawu Mavɔmavɔ, ɖó é hwlɛ́n lelenɔ sín mɛdídá lɛ́ɛ fɛn mɛ. Heelú azǎn e gbe è ji mì é; azǎn e gbe nɔ ce ji mì ɔ́, mɛɖé ní má ɖɔ azǎn énɛ́ ɔ́ sín nǔ ɖagbe ó. Heelú mɛ e yi dó wɛn tɔ́ ce ɖɔ è ji vǐ súnnu ɖokpó n'i bɔ xomɛ hun i é. Mɛ énɛ́ ní cí toxo e Mawu Mavɔmavɔ vívá kún ná, bɔ é ma ka sɔ́ wá vɛ́ n'i ǎ é ɖɔhun. Zǎnzǎn ɔ́, gbɛvíhan wɛ é ná se. Hwe mɛ ɔ́, ahwan zǐngídi wɛ é ná se. Nú gbɔ wɛ è ko gbɔ bo hu mì dó nɔ ce xo mɛ ɔ́, é ná nyɔ́! Nɔ ce na ko húzú yɔdo ce, lobo ná hɛn mì dó adɔgo tɔn mɛ káká sɔ́yi. Étɛ́wú un ka tɔ́n sín xo tɔn mɛ bó wá ɖo wǔvɛ́ kpó aluwɛ kpó mɛ lě? Étɛ́wú un tɔ́n sín xo tɔn mɛ bó wá ɖo hɛ̌n ɖu wɛ lě? Mawu Mavɔmavɔ dó wɛn Jelemíi ɖɔ é ní dó axɔ́sú Sedesíyasi. Sedesíyasi ko sɛ́ Pacehúu Malukíya ví ɔ́ kpó vɔ̌sánú-xwlémawutɔ́ Sefaníyahu Maaseya ví ɔ́ kpó dó Jelemíi ɖ'ayǐ; é sɛ́ yě dó ɖɔ yě ní yi ɖɔ n'i ɖɔ: “Kan nǔ byɔ́ Mawu Mavɔmavɔ nú mǐ, ɖó Nabukodonɔzɔ́ɔ Babilɔ́nu xɔ́sú ɔ́ ɖo ahwan fun xá mǐ wɛ. Afɔ nyɔ́ ɔ́, Mawu Mavɔmavɔ sixú bló nǔjíwǔ tɔn ɖokpó nú mǐ, bó nya dǎwe énɛ́ dó zɔ nú mǐ.” Jelemíi ka ɖɔ sɛ́ dó e ɖɔ Mawu Mavɔmavɔ, Mawu Izlayɛ́li tɔn ɖɔ: “Babilɔ́nu xɔ́sú ɔ́ kpó ahwanfuntɔ́ tɔn lɛ́ɛ kpó xá mi, bɔ mi ɖo ahwan fun xá yě wɛ. Amɔ̌, un na zín mɛ mitɔn e ɖo ahwan fun wɛ ɖo ahohó lɛ́ɛ nukɔn lɛ́ɛ jí, bɔ yě ná hɔn byɔ́ toxo ɔ́ mɛ. Énɛ́ ɔ́, nyɛ ɖésúnɔ ná zé hlɔ̌nhlɔ́n ce e nukɔn nǔɖé má nɔ́ nɔ te ɖe ǎ ɔ́ dó fun ahwan xá mi, kpó adǎn kpó, kpó xomɛsin ɖaxó kpó. Alɔ ce ná jɛ nǔ e ɖo toxo élɔ́ mɛ lɛ́ɛ bǐ wǔ, gbɛtɔ́ kpó kanlin kpó bǐ ná bɛ́ jɛmɛjí baɖabaɖa ɖé, bó kú. Énɛ́ ɔ́ gúdo ɔ́, un ná jó Sedesíyasi Judáa xɔ́sú ɔ́, un ná jó gǎn hɔn-yitɔ́ tɔn lɛ́ɛ, un ná jó togun tɔn bǐ, mɛ e ná gán ɖo jɛmɛjí sí lɛ́ɛ, mɛ e ná gán ɖo ahwan sí lɛ́ɛ kpó mɛ e ná gán ɖo adɔ sí lɛ́ɛ kpó ɔ́, un ná jó yě bǐ nú Nabukodonɔzɔ́ɔ Babilɔ́nu xɔ́sú ɔ́; un ná jó yě nú kɛntɔ́ yětɔn, mɛ e jló ná hu yě lɛ́ɛ. Un ná jó yě, bɔ Nabukodonɔzɔ́ɔ ná hu yě bǐ tɛ́; é ná jó mɛ ɖokpó dó ǎ. É ká ná lɛ́n nǔɖé kpɔ́n ǎ, mɛɖé nǔ ná blá wǔ n'i ǎ. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ lɛ́ ɖɔ nú mì ɖɔ, Jelemíi, a nǎ ɖɔ nú togun ɔ́ ɖɔ: “Nyɛ Mawu Mavɔmavɔ sɔ́ gbɛli kpó kúli kpó ɖó nukɔn nú mi. Mi sɔ́ ɖokpó. Nú mɛ ɖé nɔ toxo élɔ́ mɛ ɔ́, ahwan ma hu mɛ ɔ́ ǎ ɔ́, adɔ ka ná hu i; é má ka nyí mɔ̌ ǎ ɔ́, é ná bɛ́ jɛmɛjí ɖaxó ɖé, bó kú. Mɛ e ka ná sɔ́ éɖée yi jó nú Babilɔ́nunu e xá toxo ɔ́ lɛ́ɛ ɔ́, mɛ ɔ́ ná gán, bɔ gǎn e é gán ɔ́ wɛ ná nyí le ɖokpó e é ɖu é. Đó nyɛ Mawu Mavɔmavɔ ɖɔ, un ná húzú kpan nukɔn toxo élɔ́, un ka ɖo nǔ ɖagbe ná wa n'i wɛ ǎ, nǔ ná dó sin xá ɛ wɛ un ɖe, bɔ é ná vɛ́ jlɛ́ ɖésú. Toxo ɔ́ ná jɛ Babilɔ́nu xɔ́sú ɔ́ lɔ mɛ, bɔ é ná dó zo. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ ɖɔ xó dó Judáa xɔ́sú ɔ́ kpó mɛ tɔn lɛ́ɛ kpó wú; é ɖɔ: “Mi ɖótó nyɛ Mawu Mavɔmavɔ sín xó! Axɔ́sú Davídi ví e mi! Ayǐ hɔ́n lě tlóló hǔn, mi nɔ jɛ hwɛjijɔ dó jí. Mi hwlɛ́n mɛ e dó ya ná wɛ è ɖe é gán ɖo mɛ e ɖo ya dó n'i wɛ é lɔ mɛ. É má nyí mɔ̌ ǎ ɔ́, xomɛsin ce ná xɔ myɔ ɖɔhun, bɔ cící tɔn ná gló, ɖó nǔ e dó sin wɛ mi ɖe lɛ́ɛ wútu. Nǔ mitɔn vɛ́ wǔ ce. Mi mɛ e nɔ́ nɔ tɔdo mɛ, ɖo fí wɛnjɛ e ɖo só jí lɛ́ɛ ɔ́, un ɖo mi ba wɛ vɛvɛ. Mi mɛ e nɔ ɖɔ mɛɖé kún sixú wa nǔɖé nú émí ó, mɛɖé kún sixú byɔ́ nɔtɛn émítɔn mɛ ó lɛ́ɛ ɔ́, un ɖo mi ba wɛ vɛvɛ. Xó e nyɛ Mawu Mavɔmavɔ ɖɔ ɔ́ nɛ́. Nyɛ Mawu Mavɔmavɔ ɔ́, un ná dɔn tó nú mi bɔ é ná sɔgbe xá nǔ e mi dó sin é. Un ná dó zungbó mitɔn zo, bɔ nǔ e lɛ́ lɛ̌ dó mi ɔ́ bǐ ná ji. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú Jelemíi ɖɔ: “Yi Judáa xɔ́sú ɔ́ hɔnmɛ; a jɛ dɔ̌n ɔ́, a nǎ ɖɔ xó. A nǎ ɖɔ: ‘Judáa xɔ́sú, ɖǒtó xó e Mawu Mavɔmavɔ ɖɔ é. Hwi mɛ e ɖo axɔ́sú Davídi zinkpo jí é, gǎn hɔn-yitɔ́ towe lɛ́ɛ, togun towe kpó mi mɛ e nɔ gbɔn hɔntogbó élɔ́ lɛ́ɛ nu, bó nɔ́ byɔ́ hɔn ɔ́ mɛ lɛ́ɛ kpó, mi bǐ ní ɖótó xó e Mawu Mavɔmavɔ ɖɔ é!’ É ɖɔ mi wa nǔ kpó hwɛjijɔ kpó, mi wa nǔ ɖó sɛ́nxwi jí. Mi hwlɛ́n mɛ e dó ya ná wɛ è ɖe é gán ɖo mɛ e ɖo ya dó n'i wɛ é lɔ mɛ. Mi ma dó ya nú jǒnɔ ó; mi má dó ya nú tɔ́cyɔvǐ ó; mi ma ka do ya nú asúkúsi ó. Mi ma xo dǎka yě wú ó; mi má sɔ́ kɔn xomɛvɔ́nɔ ɖé sín kanjɔ kɔn nyi ayǐ ɖo fí ó. É ɖɔ nú mǐ bló mɔ̌ ɔ́, axɔ́súzinkpo Davídi tɔn kún ná nɔ vɔ̌ gbeɖé ó, axɔ́sú e ɖo zinkpo ɔ́ jí ɔ́ na nɔ zɔn sɔ́ jí, abǐ kɛkɛ́ví mɛ, bó ná nɔ gbɔn hɔntogbó élɔ́ lɛ́ɛ nu. Gǎn hɔn-yitɔ́ Judáa tɔn lɛ́ɛ lɔ ná nɔ́ gbɔn hɔntogbó lɛ́ɛ nu, bɔ togun ɔ́ lɔ ná nɔ́ gbɔn hɔntogbó lɛ́ɛ nu. Amɔ̌, é ɖɔ nú mi ma ka ɖótó xó émítɔn ǎ ɔ́, xwé élɔ́ bǐ ná gba hánnyá; xó e Mawu Mavɔmavɔ xwlé é ɖésúnɔ bó ɖɔ ɔ́ nɛ́. “Xó e Mawu Mavɔmavɔ ɖɔ dó Judáa xɔ́sú ɔ́ sín hɔnmɛ wú ɔ́ ɖíe: Galadi zungbó ɖɔhun wɛ a cí ɖo nukún ce mɛ nǔgbó; a cí Libáan só ɖɔhun ɖo nukún ce mɛ nǔgbó. Amɔ̌, din ɔ́, un ná sɔ́ we dó húzú gbětótló, toxo e mɛ mɛɖé má ɖe ǎ é. Un sɛ́ kɛntɔ́, nǔhɛngblétɔ́ ɖé lɛ́ɛ dó we, bɔ yě bǐ ná hɛn ahwanfunnú yětɔn yětɔn; yě ná gbo sɛ́dlutín ɖagbe ɖagbe lɛ́ɛ, bó dó zo. “Akɔta gěgé ná gbɔn toxo élɔ́ mɛ, bó ná nɔ ɖɔ nú yěɖée ɖɔ: ‘Étɛ́wú Mawu Mavɔmavɔ ka wa toxo ɖaxó élɔ́ sín nǔ gbɔn lě?’ Bɔ è nǎ yí gbe nú yě ɖɔ: ‘ Akɔ e Mawu Mavɔmavɔ, Mawu yětɔn jɛ xá yě bɔ yě má nɔ́ nɔ gbejí ná ǎ ɔ́ wú wɛ nǔ cí mɔ̌. Yě jɛ kpo ɖo vodún lɛ́ɛ nukɔn bó sɛn yě.’ ” Judáanu e mi, axɔ́sú Joziyási kú, mi ma ka ví i ó; mi ma sa vo dó ta tɔn mɛ ó. Lo ɔ́, mi ví axɔ́sú Calúmu; éyɛ́ xweyǐgbe, é sɔ́ ná lɛ́ kɔ wá to e mɛ è ji i ɖe é gbeɖé ǎ. É wɛ jɛ tɔ́ tɔn Joziyási e ma sɔ́ ɖo fí din ǎ é sín do mɛ. Mawu Mavɔmavɔ ɖɔ dó wǔ tɔn ɖɔ: “É sɔ́ ná lɛ́ kɔ wá gbeɖé ǎ. É ná kú ɖo fí e ahwan wlí i xwe é; é sɔ́ ná mɔ to tɔn kpɔ́n gbeɖé ǎ.” Mawu ɖɔ: “Heelú we Yoyakímu, a ɖo xwé ɖagbe gbá nú hwiɖée wɛ; a ka nɔ xwedó hwɛjijɔ ǎ. A nɔ ɖo xwé ɖě gbá ɖó ɖě jǐ wɛ, mɛ wɛ a ka nɔ táfú dó gbá xwé towe lɛ́ɛ. A nɔ sɔ́ mɛ lɛ́ɛ dó wa azɔ̌ ná, a ka nɔ sú axɔ́ yě ǎ; yě nɔ́ wa azɔ̌ nú we vɔ̌nu. A ɖɔ: ‘Un ná mɛ hɔnmɛ ɖokpó, bɔ xɔ e ná nɔ aga lɛ́ɛ ná gbló ɖésú.’ A tɔ́n flɛtɛ́li d'é wú kɔn nyi kpɔ́, a tɛ́ sɛ́dlu xwlɛ d'é wú gbɔn fí bǐ, bó sá sɛn vɔvɔ d'é wú. A jlǒ na ɖé xlɛ́ ɖɔ émí nyí axɔ́sú wú wɛ a yí wǎn nú sɛ́dlutín a? A jlǒ na ɖé xlɛ́ ɖɔ émí gbɔn vo nú mɛ ɖě lɛ́ɛ wú wɛ a yí wǎn nú sɛ́dlutín a? Hwenu e tɔ́ towe ɖo zinkpo ji ɔ́, é nɔ ɖu nǔ ǎ cé? É nɔ́ nu ahan ǎ cé? É ká nɔ́ xwedó hwɛjijɔ lě e un ba gbɔn ɔ́, bɔ nǔ nyɔ́ n'i. É nɔ́ gbo hwɛ nú wamamɔnɔ lɛ́ɛ kpó lelenɔ lɛ́ɛ kpó, bɔ nǔ nyɔ́ n'i. Mɛ e ɖo nǔ wa gbɔn mɔ̌ wɛ ɔ́, é ɖo ɖiɖe xlɛ́ wɛ ɖɔ émí tunwun mì ganjí. Xó e nyɛ Mawu Mavɔmavɔ ɖɔ ɔ́ nɛ́. Amɔ̌, hwɛ ɔ́, nǔ e ná wa ɖagbe nú hwi ɖokpó ɔ́ jɛ́n nɔ myá nukún nú we. Lě e a na wa gbɔn bó hu xomɛvɔ́nɔ ɔ́ jɛ́n nɔ ɖo ayi mɛ nú we; lě e a nǎ xo dǎka, lobo táfú mɛ gbɔn ɔ́ te jɛ́n a nɔ ɖe.” Énɛ́ wú wɛ nyɛ Mawu Mavɔmavɔ ɖɔ dó Judáa xɔ́sú Yoyakímu, Joziyási ví ɔ́ wú ɖɔ: “É kú ɔ́, mɛɖé ná ví i ɖo yɔdo tɔn nu ǎ. Mɛ ɖé ná ɖɔ: ‘Yéége nɔví ce!’ ‘Áo gǎn ce!’ ‘Áo sɛ́mɛɖó ce!’ È nǎ se mɔ̌ ǎ. È nǎ ɖi i kanlin ɖɔhun. È nǎ dɔn ɛ gbɔn kɔ́ mɛ, bó dɔn ɛ nyi Jeluzalɛ́mu toxo ɔ́ gúdo.” Mawu ɖɔ: “Jeluzalɛ́mu, yi Libáan sókan mɛ bó sú xó, yi Basáni sókan mɛ bó sú cáxóxowǒóo, yi Avalímu sókan mɛ bó dó axwá, ɖó mɛ e yi wǎn nú we lɛ́ɛ bǐ wɛ è gblé gbɛ dó ná. Hwenu e ayi towe j'ayǐ ɔ́, un ɖó afɔ afɔ jí nú we, a ka ba na se xó ce ǎ. Mɔ̌ bló wɛ a ɖe sín vǔ, bó se xó ce nǔgbó ǎ. Mɛ e nyí gǎn lɛ́ɛ ɔ́, jɔhɔn ná za yě; ahwan ná wlí mɛ e yí wǎn nú we lɛ́ɛ bǐ. Énɛ́ ɔ́, a na ɖu winnyá, wi towe ná kɔ́n, ɖó dǎka e a xo lɛ́ɛ wú. Égbé din ɔ́, a nɔ nɔ Libáan sókan mɛ, a xo adɔ̌ towe nyi sɛ́dlutín jí aga ɖéé; amɔ̌, hwenu e wǔvɛ́ ná wá fyán we ɔ́, a nǎ jɛ aɖǔkún ɖu jí. A nǎ mɔ wǔvɛ́ nyɔ̌nu jɛ flú mɛ ɖɔhun.” Mawu Mavɔmavɔ ɖɔ nú Jelemíi ɖɔ é ní ɖɔ nú Yoyakini Judáa xɔ́sú, Yoyakímu ví ɔ́ ɖɔ: “A na bo cí alɔkɛ́ e nɔ ɖo alɔ aɖisí nú mɛ bɔ è nɔ dó ɖó wuntun nǔ ná ɔ́ ɖɔhun nú mì ɔ́, un na ɖe we sín alɔ. Un na jó we nú mɛ e ɖo kú towe ba wɛ lɛ́ɛ. Un ná jó we nú mɛ e nukɔn a nɔ sísɔ́ ɖe lɛ́ɛ. Un na jó we nú Nabukodonɔzɔ́ɔ, Babilɔ́nu xɔ́sú ɔ́ kpó ahwanfuntɔ́ tɔn lɛ́ɛ kpó. Un ná nya we; un ná nya hwi kpó nɔ towe kpó sɛ́ dó to e mi ma tunwun ǎ é mɛ, bɔ mi bǐ nǎ kú ɖo dɔ̌n. Mi yi to ɔ́ mɛ ɔ́, to mitɔn mɛ ná jló mi. Mi ka ná sixú lɛ́ kɔ wá ǎ.” È na nɔ kanbyɔ́ ɖɔ: “Étɛ́! Yoyakini sín nǔ wɛ è wa zɛ̌n ɖɔhun mɔ̌ a? Nǔ tɔn wɛ è wa zɛ̌n ɖé ján ɖɔhun kpowun mɔ̌ a? Zɛ̌n tló ɖé kpowun abǐ nǔ ma xɔ akwɛ́ ɖé kpowun ɖɔhun mɔ̌ a? Étɛ́wú è ka sɔ́ é kpó vǐ tɔn lɛ́ɛ kpó nyi dó gbě? Étɛ́wú è sɔ́ yě nyi dó to e yě ma tunwun ǎ é mɛ?” Áo to ce! To ce! Đǒtó Mawu Mavɔmavɔ! Mawu Mavɔmavɔ ɖɔ: “Mi wlán nya élɔ́ sín nyǐkɔ dó wěma mɛ, mi wlán: ‘É ji vǐ kpɔ́n ǎ. É xo gbɛ tɔn kpo.’ Mi ná wlán mɔ̌, ɖó vǐ tɔn lɛ́ɛ ɖěbǔ ná yi axɔ́súzinkpo Davídi tɔn jí, bó ná ɖu axɔ́sú ɖo Judáa ǎ.” Mawu Mavɔmavɔ ɖɔ: “Heelú lɛ̌ngbɔ́nyitɔ́ e má nɔ́ kpé nukún dó lɛ̌ngbɔ́ ce lɛ́ɛ wú ǎ, bɔ yě gba dó lɛ́ɛ. Énɛ́ ɔ́ wú wɛ nyɛ Mawu Mavɔmavɔ, Mawu Izlayɛ́li tɔn ɖɔ xó dó lɛ̌ngbɔ́nyitɔ́ énɛ́ lɛ́ɛ wú; un ɖɔ: ‘Mi gba lɛ̌ngbɔ́ ce lɛ́ɛ dó, mi nya yě. Mi kpé nukún dó yě wú ǎ. Énɛ́ wú ɔ́, un na dɔn tó nú mi, ɖó dǎka mitɔn lɛ́ɛ wú.’ Xó e nyɛ Mawu Mavɔmavɔ ɖɔ ɔ́ nɛ́. “Lɛ̌ngbɔ́ ce e kpo lɛ́ɛ ɔ́, nyɛ ɖésú ná yi xo yě kplé gbɔn to e mɛ un fúnfún yě gbɔn lɛ́ɛ mɛ. Un na kplá yě wá kpó yětɔn mɛ, bɔ yě ná ji, bó ná gba kún. Un na fɔ lɛ̌ngbɔ́nyitɔ́ ɖagbe ɖó lɛ̌ngbɔ́ ce lɛ́ɛ nu, bɔ yě ná nɔ kplá yě yi amagbo mɛ, yě sɔ́ ná ɖi xɛsi nú nǔɖé ǎ; awě ɖě sɔ́ ná xo yě ǎ, yě ɖěbǔ ná hwe ǎ. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ ɖɔ: “Ayǐ ɖé ná wá hɔ́n, bɔ un na bló bɔ vǐ ayijlɔ́jlɔ́nɔ ɖokpó ná jɔ ɖo Davídi kún mɛ. É ná ɖu axɔ́sú ɖo to mɛ fí; é ná ɖó nǔnywɛ́. É ná nɔ xwedó hwɛjijɔ; é ná nɔ́ wa nǔ ɖó sɛ́nxwi jí. Axɔ́sú énɛ́ hwenu ɔ́, Judáa ví lɛ́ɛ ná mɔ hwlɛngán, Izlayɛ́li ví lɛ́ɛ ná vo ɖo to yětɔn mɛ; è nǎ nɔ́ ylɔ́ axɔ́sú énɛ́ ɔ́ ɖɔ: ‘Mawu Mavɔmavɔ wɛ nyí hwlɛngán mǐtɔn.’ “Mawu Mavɔmavɔ ɖɔ gbe ɖokpó ná wá su, bɔ mɛɖé sɔ́ ná xwlé nǔ dó nyǐkɔ ce mɛ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín Ejípu’ ǎ. Lo ɔ́, è nǎ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín to e ɖo taligbé ɔ́ mɛ, bó ɖe yě tɔ́n sín to ɖěvo e mɛ é gba yě dó gbɔn lɛ́ɛ bǐ mɛ bɔ yě lɛ́ kɔ wá to yětɔn mɛ.’ ” Xó e è ɖɔ dó gbeyíɖɔ Mawu tɔn nyí jɛ tɔ́ lɛ́ɛ wú lɛ́ɛ: Ayi ce bǐ wɛ gbadó ɖo xomɛ; xú ce bǐ xo to ɖo lanmɛ. Un cí ahannumúnɔ ɖɔhun, mɛ e nu ahan gɔ́ xo e ɖɔhun. Un cí mɔ̌, ɖó Mawu Mavɔmavɔ wú, ɖó xó e Mawu Mavɔmavɔ ɖɔ lɛ́ɛ wú. Nǔ e è nɔ ɖɔ dó gbeyíɖɔnyíjɛtɔ́ lɛ́ɛ wu ɔ́ ɖíe: “Mɛ e nɔ dó afɔ gbě lɛ́ɛ wɛ gɔ́ to ɔ́. To ɔ́ bǐ ɖo aluwɛ mɛ, ɖó Mawu dó nu to ɔ́. Ayǐkúngban wɛnjɛ e ɖo gbětótló mɛ é bǐ xú; nǔ nyanya wiwa wɛ yě nɔ́ hwlɛ́n dó, nǔ nyanya wiwa kɛ́ɖɛ́ wú jɛ́n yě nɔ́ ván kan dó.” Mawu Mavɔmavɔ ɖɔ: “Gbeyíɖɔ kpó vɔ̌sánú-xwlémawutɔ́ kpó bǐ wɛ ɖu kpa. Un mɔ dǎka e yě nɔ́ xo ɔ́; yě nɔ́ xo dǎka káká bó nɔ lɛ́ wá xo ɖo xwé ce gbe. Énɛ́ ɔ́ wú wɛ ali e jí gbɔn wɛ yě ɖě ɔ́ ná ɖíɖí, é ná dó ablu. Đó xwe e xwe un na sɛ́ awě ɖé dó yě, bó dɔn tó nú yě ɔ́, yě ná sɔ́ ta yěɖée bó ná jɛ ayǐ. Xó e nyɛ Mawu Mavɔmavɔ ɖɔ ɔ́ nɛ́.” Mawu ɖɔ: “Gbeyíɖɔ Samalíi tɔn lɛ́ɛ ɔ́, nǔ wa zɛ jlɛ́ wǔ wɛ un mɔ ɖo yě sí. Vodún Baalu sí wɛ yě nɔ́ yí xó ɖe, bó nɔ́ ɖɔ lobo nɔ́ dɔn togun ce Izlayɛ́li bú ali. Gbeyíɖɔ Jeluzalɛ́mu tɔn lɛ́ɛ ɔ́, nǔ e un ka nɔ mɔ ɖo yě sí ɔ́, nǔ baɖabaɖa wɛ, é vɛ́ jlɛ́. Afɔ wɛ yě nɔ́ dó gbě; yě nɔ́ nɔ adingban gbɛ mɛ. Adǎkaxotɔ́ lɛ́ɛ wɛ yě nɔ́ sɔ́ alɔ ná, bónú yě má jó adǎkaxixo dó ó. Nukún ce mɛ ɔ́, mɛ bǐ wɛ cí Sodɔ́mu nu lɛ́ɛ ɖɔhun; Jeluzalɛ́mu nu lɛ́ɛ lɔ cí Gomɔ́ɔ nu lɛ́ɛ ɖɔhun. Énɛ́ ɔ́ wú wɛ nyɛ Mawu Mavɔmavɔ, Mawu Nǔbǐwúkpétɔ́ ɔ́, un ɖɔ dó gbeyíɖɔ lɛ́ɛ wú ɖɔ: Un ná ná yě ama e vɛ́ dódó é; un ná ná yě sin e mɛ è kɔn nǔvɛ́nu dó é, bɔ yě ná nu. Đó gbeyíɖɔ Jeluzalɛ́mu tɔn lɛ́ɛ jí wɛ nǔ nyanya gbɔn, bó byɔ́ to ɔ́ mɛ.” Mawu Mavɔmavɔ, Mawu Nǔbǐwúkpétɔ́ ɔ́ ɖɔ: “Mi ma ɖótó gbeyíɖɔ e ɖo xó ɖɔ wɛ lɛ́ɛ ó. Nǔ e ma sixú jɛ ǎ lɛ́ɛ ɖɔ nú mi wɛ yě ɖe; nǔ e wá ayi yětɔn mɛ lɛ́ɛ wɛ yě nɔ́ ɖɔ nú mi, é nyí xó e nɔ tɔ́n sín nu ce mɛ ɔ́ wɛ yě nɔ́ ɖɔ ǎ. Yě nɔ́ ɖɔ nú mɛ e nɔ wa nǔ e yě xwe lɛ́ɛ ɖɔ: ‘Mawu Mavɔmavɔ ɖɔ: Mi bǐ ná vo.’ Yě nɔ́ ɖɔ nú mɛ e nɔ wa nǔ e jló yě lɛ́ɛ ɖɔ: ‘Nǔ ɖěbǔ ná wa mi ǎ.’ Mɛ̌ kpó nyɛ Mawu Mavɔmavɔ kpó ká yi tagbesɔ ɖo yě mɛ? Mɛ̌ wɛ mɔ mì ɖo xó ɖɔ wɛ ɖo yě mɛ? Mɛ̌ wɛ ná ɖo yě mɛ, bó ná ɖɔ nyɛ ɖɔ xó bɔ émí se?” Jelemíi ɖɔ: “Éɖíe, jɔhɔn Mawu Mavɔmavɔ tɔn ɖo nǎ nyi wɛ, xomɛ sin Mawu Mavɔmavɔ. Jɔhɔn ɖaxó wɛ, é ɖo nyinyi wɛ jǎwe mɛdídá lɛ́ɛ gɔ́n. Xomɛ e sin Mawu Mavɔmavɔ ɔ́ ɖo na fá wɛ ǎ. É ná fá káká cóbónú é ná wa nǔ e lɛ́n wɛ é ɖe é ǎ. Mi ná mɔ nǔ jɛ nǔ énɛ́ lɛ́ɛ bǐ mɛ gbe ɖokpó.” Mawu ɖɔ: “Gbeyíɖɔ énɛ́ lɛ́ɛ ɔ́, un sɛ́ yě dó fí ɖé ǎ, bɔ yě ká ɖo wezun nu; un ɖɔ xó ɖé nú yě ǎ, bɔ yě ká ɖo xó ɖɔ dó nu ce wɛ. Ényí yě kó yi tagbesɔ xá mì wɛ ɔ́, yě ná kó se xó e un ɖɔ sɛ́ dó togun ce é. Yě ná ko se, bó ná ko ɖɔ nú togun ce bɔ é ná lɛ́ kɔ sín ali nyanya jí, lobo na jó dǎkaxixo dó.” Mawu Mavɔmavɔ ɖɔ: “Mawu e un nyi ɔ́, nǔ e ɖo akpá ce lɛ́ɛ kɛ́ɖɛ́ wɛ un nɔ mɔ a? Un nyí Mawu e nɔ lɛ́ mɔ nǔ jɛ zɔ e ǎ cé? Mɛ ɖé hɔn yi bɛ ɖo fí ɖé ɔ́, un nɔ mɔ ɛ jɛ́n wɛ. Un ɖo fí bǐ ɖo jǐxwé, bó lɛ́ ɖo fí bǐ ɖo ayǐkúngban ɔ́ jí. Xó e nyɛ Mawu Mavɔmavɔ ɖɔ ɔ́ nɛ́.” Mawu ɖɔ: “Un se xó e ɖɔ wɛ gbeyíɖɔ lɛ́ɛ ɖé é. Gbeyíɖɔ e nɔ́ ɖo adingban ɖó dó nu ce wɛ ɖɔ: ‘Un kú dlɔ̌ ɖokpó! Un kú dlɔ̌ ɖokpó’ lɛ́ɛ ɔ́, hwe étɛ́ nu wɛ yě ná jó adingbanɖíɖó dó? Gbeyíɖɔ énɛ́ lɛ́ɛ nɔ ɖo adingban ɖó nú mɛ lɛ́ɛ wɛ kpowun, yě nɔ́ ɖo xó kpa ɖɔ dó blɛ́ mɛ wɛ. Ani ka ɖo ayi yětɔn mɛ tawun? Yě lɛ́n ɖɔ émí ná ɖe mì sín ayi mɛ nú togun ce, bó nɔ́ ɖo dlɔ̌ e yě kú bó ɖɔ ɔ́ wlí ɖɔ nú yěɖée wɛ, lě e togun ce sín tɔ́gbó lɛ́ɛ bló gbɔn, bó jó mì dó, bó xwedó vodún Baalu é. Gbeyíɖɔ ɖé kú dlɔ̌ ɖé hǔn, é ní wlí ɖɔ bó! Nú un ka ɖɔ xó nú mɛ ɖé hǔn, mɛ ɔ́ ní ɖɔ lě e un ɖɔ gbɔn n'i ɔ́ pɛ́pɛ́pɛ́. È ma sɔ́ jinukún ɖó wɔn tɛnmɛ ó. Xó e nyɛ Mawu Mavɔmavɔ ɖɔ ɔ́ nɛ́. Xó ce ɔ́, myɔ ɖɔhun wɛ é cí ǎ cé? Zǔnkpé e nɔ gba só é ɖɔhun wɛ é cí ǎ cé? “Énɛ́ ɔ́ wú ɔ́, gbeyíɖɔ e nɔ fin mɛ ɖěvo xó bó nɔ́ ɖɔ, lobo nɔ ɖɔ xó ce wɛ lɛ́ɛ ɔ́, un ɖo yě ba wɛ vɛ́návɛ́ná. Gbeyíɖɔ e nɔ ɖɔ xó yě ɖésúnɔ tɔn, bó nɔ́ ɖɔ nyi wɛ ɖɔ lɛ́ɛ ɔ́, un ɖo yě ba wɛ vɛ́návɛ́ná. Xó e nyɛ Mawu Mavɔmavɔ ɖɔ ɔ́ nɛ́. Yě mɛ gbeyíɖɔ énɛ́ lɛ́ɛ e nɔ ɖó adingban, bó nɔ́ ɖɔ émí kú dlɔ̌, bó nɔ́ wlí ɖɔ nú togun ce, bó ná dó dɔn ɛ bú ali lɛ́ɛ ɔ́, un ɖo yě ba wɛ vɛ́návɛ́ná. Adingban yětɔn lɛ́ɛ kpó xógbló yětɔn lɛ́ɛ kpó wɛ yě nɔ́ dó dɔn togun ce bú ali; un ka sɛ́ yě dó fí ɖé ǎ, un ka zɔ́n nǔɖé yě ǎ, yě ká ɖo nǔ ɖagbe ɖěbǔ wa nú togun élɔ́ wɛ ǎ. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú Jelemíi ɖɔ: “Ényí gbeyíɖɔ ɖé, vɔ̌sánú-xwlémawutɔ́ ɖé abǐ mɛ ɖé kanbyɔ́ we ɖɔ: ‘Wɛn tɛ́ wɛ Mawu Mavɔmavɔ ka dó sɛ́ dó mǐ? Agban tɛ́ wɛ é ka sɔ́ ɖó ta nú mǐ’ hǔn, yǐ gbe nú mɛ ɔ́ ɖɔ: ‘Mawu Mavɔmavɔ ɖɔ: Midɛɛ lɛ́ɛ wɛ nyí agban bɔ un ná ɖe ɖɛ.’ Gbeyíɖɔ ɖé abǐ vɔ̌sánú-xwlémawutɔ́ ɖé, abǐ toví ɖé ɖɔ Mawu Mavɔmavɔ zé agban kpinkpɛn ɖó ta nú émí ɔ́, un ná dɔn tó n'i, bó dɔn nú xwé tɔn. Nǔ e mi ɖó ná kanbyɔ́ miɖée ɔ́ wɛ nyí ɖɔ: ‘Sin tɛ́ Mawu Mavɔmavɔ ka ná? Nɛ̌ Mawu Mavɔmavɔ ka ɖɔ?’ Mɛ ɖé sɔ́ ná ɖɔ: ‘Mawu Mavɔmavɔ sín xó wɛ nyí agban bo ɖo kpinkpɛn émí wɛ’ ǎ. É má nyí mɔ̌ ǎ ɔ́, xó e mɛ ɔ́ ɖɔ ɔ́ ná húzú agban bo kpɛn mɛ ɔ́, ɖó mi húzú ada nú xó nyɛ Mawu gbɛɖe ɔ́ tɔn. Mi flí nyɛ Mawu Nǔbǐwúkpétɔ́, Mawu mitɔn ɔ́ sín xó xwe. Nǔ e mi ná nɔ́ wa ɔ́ wɛ nyí ɖɔ mi ná nɔ́ kanbyɔ́ gbeyíɖɔ ɔ́ ɖɔ: ‘Sin tɛ́ Mawu Mavɔmavɔ ka ná nú xó lě? Nɛ̌ é ká ɖɔ?’ Un gbɛ́ nú mi ɖɔ mi ma sɔ́ ɖɔ Mawu Mavɔmavɔ dó agban kpinkpɛn ɖó ta nú émí ɖě ó; ényí mi ka gbɛ́ d'é wú jɛ́n wɛ ɔ́, xó e nyɛ Mawu Mavɔmavɔ ɖɔ é ɖíe: ‘Un ná dó kɔ mi mɛ agban ɖɔhun, bó ná sɔ́ mi nyi dó gbě, mi kpó toxo e un ná tɔ́gbó mitɔn lɛ́ɛ, bó ná mi lɔ é kpó. Un ná dó winnyá mi; wi mitɔn ná kɔ́n, bɔ è nǎ wɔn ɔ́, é ná lín.’ ” Mawu Mavɔmavɔ xlɛ́ mì fígi xasun we, bɔ è fɔ ɖó xwé tɔn sín alihɛ́nnu. Nabukodonɔzɔ́ɔ Babilɔ́nu xɔ́sú ɔ́ kó wlí Jeluzalɛ́munu lɛ́ɛ kpó Yoyakini Yoyakímu ví Judáa xɔ́sú ɔ́ kpó, gǎn hɔn-yitɔ́ tɔn lɛ́ɛ kpó alɔnuzɔ́watɔ́ lɛ́ɛ kpó fletuntɔ́ lɛ́ɛ kpó yi Babilɔ́nu nɛ́. Xasun we lɛ́ɛ ɔ́, ɖokpó tíin, bɔ fígi ɖagbe ɖ'é mɛ, bó nyɔ́ káká bó cí fígi nukɔn nukɔntɔn e è nɔ gbɛ ɔ́ ɖɔhun; xasun ɖě ɔ́, fígi e ɖ'é mɛ ɔ́ gblé, bó gblé káká bɔ è sixú ɖu ǎ. Mawu Mavɔmavɔ kanbyɔ́ mì ɖɔ: “Jelemíi, étɛ́ mɔ wɛ a ka ɖe nɛ́?” Bɔ un yí gbe n'i ɖɔ: “Un mɔ fígi do we: do ɖokpó nyí ɖagbe bó nyɔ́ káká. Do wegɔ́ ɔ́ gblé, bó gblé káká bɔ è sixú ɖu ǎ, ɖó é gblé dín.” Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ: “Xó e nyɛ Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: lě e fígi ɖagbe lɛ́ɛ nyɔ́ kpɔ́n gbɔn ɔ́, mɔ̌ wɛ nyi lɔ ná sɔ́ nukún ɖagbe dó kpɔ́n mɛ e ahwan wlí sín Judáa lɛ́ɛ, yě mɛ e un nya sín fí káká yi ɖó Babilɔ́nu lɛ́ɛ gbɔn. Un ná sɔ́ nukún ɖagbe dó kpɔ́n yě, bó ná kplá yě wá to élɔ́ mɛ fí; un sɔ́ ná gba yě hánnyá xɔ ɖɔhun ǎ; lo ɔ́, un na gbá yě xɔ ɖɔhun; un sɔ́ ná hɔn yě atín ɖɔhun ǎ; lo ɔ́, un na tun yě atín ɖɔhun. Un na ná ayixa yě, bɔ yě ná tunwun ɖɔ nyi wɛ nyí Mawu Mavɔmavɔ; yě ná lɛ́ kɔ wá gɔ̌n ce kpó ayi yětɔn bǐ kpó; énɛ́ ɔ́, yě ná nyí togun ce bɔ un ná nyí Mawu yětɔn. “Lě e fígi gblé ɔ́, è ma nɔ sixú ɖu ǎ, ɖó é gblé wú ɔ́, mɔ̌ wɛ un ná wa nǔ gbɔn xá Sedesíyasi Judáa xɔ́sú ɔ́ kpó gǎn hɔn-yitɔ́ tɔn lɛ́ɛ kpó, kpó mɛ e cí Jeluzalɛ́mu lɛ́ɛ kpó, kpódó mɛ e yi cí Ejípu lɛ́ɛ kpó. Énɛ́ ɔ́, axɔ́súɖuto e ɖo gbɛ ɔ́ mɛ lɛ́ɛ ɖěbǔ mɔ yě ɔ́, xɛsi ɖaxó ɖé ná nɔ́ jɛ yě jí. Fí e un ná gba yě dó gbɔn lɛ́ɛ bǐ ɔ́, è ja mɛ zun gbé oo, è ja mɛ cá ko gbé oo, è ja han kpa dó mɛ gbé oo, è ja nu dó mɛ gbé oo ɔ́, yě wú wɛ è nǎ nɔ́ jlɛ́ dó. Un ná sɛ́ ahwan dó yě, un ná sɛ́ adɔ dó yě, bó ná sɛ́ jɛmɛjí dó yě, un ná wa nǔ xá yě káká, bɔ yě bǐ nǎ vɔ ɖo to e un ná tɔ́gbó yětɔn lɛ́ɛ kpó yě kpó ɔ́ mɛ!” Hwenu e Yoyakímu Joziyási ví Judáa xɔ́sú ɔ́ ɖo xwe ɛnɛ bló wɛ ɖo zinkpo jí ɔ́, Mawu ɖɔ xó nú Jelemíi dó Judáa togun ɔ́ bǐ wú. Xwe e xwe Nabukodonɔzɔ́ɔ Babilɔ́nu xɔ́sú ɔ́ yi zinkpo jí é wɛ. Xó ɔ́ wɛ Jelemíi ɖɔ ɖo Judáa togun ɔ́ bǐ kpó Jeluzalɛ́mu ví lɛ́ɛ bǐ kpó nukɔn; é ɖɔ: “Sín xwe ko-nukún-atɔn ɖíe wɛ Mawu Mavɔmavɔ jɛ xó ɖɔ nú mì jí, bɔ un ɖo ɖiɖɔ nú mi wɛ káká jɛ égbé, mi ka ɖótó mì ǎ. Xwe wǎtɔn bló wɛ Joziyási Amɔ́ni ví ɔ́ ɖe ɖo axɔ́súzinkpo Judáa tɔn jí bɔ Mawu Mavɔmavɔ jɛ xó ɖɔ nú mì jí. Mawu Mavɔmavɔ nɔ sɛ́ mɛsɛntɔ́ tɔn gbeyíɖɔ lɛ́ɛ dó hwebǐnu ɖě jɛ ɖě gúdo, mi ka ɖótó yě ǎ; mi wlí tó xó yětɔn wú bó ná se ǎ. Mawu Mavɔmavɔ ɖɔ nú mi ɖɔ: ‘Ali nyanya e mi wlí ɔ́, mi lɛ́ kɔ sín jí, mi jó dǎka dó, bó jó nǔ baɖabaɖa e mi nɔ bló lɛ́ɛ dó; énɛ́ ɔ́, mi ná nɔ to e un ná tɔ́gbó mitɔn lɛ́ɛ kpó mi kpó é mɛ káká sɔ́yi. Mi ma sɛn vodún ó, mi ma jɛ kpo nú vodún ó. Ényí mi ma sɔ́ nǔ énɛ́ lɛ́ɛ e è nɔ sɔ́ alɔ dó bló lɛ́ɛ dó dó xomɛsin nú mì ǎ ɔ́, un ná wa nǔ nyanya ɖěbǔ nú mi ǎ.’ Mawu Mavɔmavɔ ɖɔ: ‘Un ɖɔ xó énɛ́ lɛ́ɛ nú mi có, mi ka ɖótó mì ǎ, lobo nɔ sɔ́ nǔ e mi zé alɔ mitɔn dó bló lɛ́ɛ dó dó xomɛsin nú mì. Mi ɖésúnɔ wú wa nǔ dó wɛ mi ɖe.’ “Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: ‘Ée mi ma se xó ce ǎ e ɔ́, un ná sɛ́ mɛ dó togun e gbɔn totaligbé dɔ̌n lɛ́ɛ bǐ; un ná sɛ́ mɛ dó Nabukodonɔzɔ́ɔ Babilɔ́nu xɔ́sú e nɔ wa azɔ̌ nú mì é, un ná kplá yě wá to mɛ fí, bɔ yě ná wá gba to élɔ́, bó dó ya nú togun élɔ́ kpó togun e lɛ́ lɛ̌ dó e lɛ́ɛ bǐ kpó, bó sú kún yětɔn dó, bó ná gba nǔ e ɖo to ɔ́ mɛ lɛ́ɛ bǐ hánnyá káká yi mavɔ mavɔ. Mɛ ɖé wá mɔ ɔ́, mɛ ɔ́ ná sú alɔ nu; yě ná nyí nǔkiko. Xó e nyɛ Mawu Mavɔmavɔ ɖɔ é nɛ́. Mɛ ɖé sɔ́ ná se xweɖuɖu, awǎjijɛ, alɔwlíhan ɖě ɖo mi gɔ́n ǎ. È sɔ́ ná se sé sín gbe ɖě ɖo to ɔ́ mɛ ǎ; un ná xo zogbɛ́n e ɖo títá ɔ́ cí. To élɔ́ bǐ ná gba hánnyá bó húzú gbětótló, bɔ akɔta énɛ́ lɛ́ɛ bǐ ná nɔ Babilɔ́nu xɔ́sú ɔ́ sín acɛ mɛ nú xwe kanɖé gban (70).’ “Mawu Mavɔmavɔ ɖɔ: ‘Nú xwe kanɖé gban (70) lɛ́ɛ ka wá yi ɔ́, alɔ ce ná jɛ Babilɔ́nu xɔ́sú wú, bó ná jɛ togun tɔn wú, ɖó dǎka yětɔn lɛ́ɛ wú. Un ná dɔn tó nú Babilɔ́nunu lɛ́ɛ bó ná sɔ́ to yětɔn dó húzú gbětótló káká sɔ́yi. Xó e nyɛ Mawu Mavɔmavɔ ɖɔ ɔ́ nɛ́. Nǔ e un ɖɔ un ná wa xá to élɔ́ ɔ́, un ná wa bǐ xá ɛ. Un ná wa nǔ e è wlǎn dó wěma élɔ́ mɛ lɛ́ɛ bǐ xá ɛ; bó wa nǔ e Jelemíi ɖɔ dó nyǐkɔ ce mɛ dó akɔta ɖě lɛ́ɛ bǐ wú ɔ́ bǐ xá ɛ. Đó yě ná húzú kannumɔ nú akɔta e syɛ́n hú yě lɛ́ɛ kpó axɔ́sú e hú gǎn yě lɛ́ɛ kpó. Lě e yě nɔ́ bló xá mɛ gbɔn é wɛ un ná wa nǔ xá yě gbɔn. Lě e yě sɔ́ alɔ yětɔn dó wa nǔ gbɔn é wɛ un na bló xá yě gbɔn.’ ” Mawu Mavɔmavɔ, Mawu Izlayɛ́li tɔn ɖɔ nú mì ɖɔ: “Yǐ vɛ̌ɛnkɔ́fu élɔ́ ɖo alɔ ce mɛ. Xomɛsin ce wɛ gɔ́. Nǎ akɔta e gɔ́n un ná sɛ́ we dó lɛ́ɛ bǐ, nú yě nu. Yě ná nu, bɔ nukún mɛ yětɔn ná lɛ́ lɛ̌, bɔ yě ná hun taɖu ɖó ahwan e un ná sɛ́ dó yě ɔ́ wú.” Énɛ́ ɔ́, un yí kɔ́fu ɔ́ ɖo Mawu Mavɔmavɔ sín alɔ mɛ, bó ná akɔta e mɛ Mawu Mavɔmavɔ sɛ́ mì dó lɛ́ɛ bǐ, bɔ yě nu. Un ná mɛ e ɖo Jeluzalɛ́mu lɛ́ɛ, bó ná mɛ e ɖo Judáa toxo ɖě lɛ́ɛ mɛ lɛ́ɛ. Un ná axɔ́sú yětɔn lɛ́ɛ, bó ná gǎn hɔn-yitɔ́ e ɖo to ɔ́ mɛ lɛ́ɛ, bó ná zé to ɔ́ dó húzú to gbigba, nǔkiko, bɔ mɛɖé mɔ ɔ́, é ná sɔ́ alɔ dó nu; è ja nu dó toxo ɖé gbé ɔ́, yě wú wɛ è nǎ nɔ́ jlɛ́ dó, lě e é ɖe gbɔn égbé din é. Un ná akɔta ɖě lɛ́ɛ lɔ: Ejípu xɔ́sú ɔ́ kpó mɛsɛntɔ́ tɔn lɛ́ɛ kpó, gǎn hɔn-yitɔ́ tɔn lɛ́ɛ, kpó togun tɔn bǐ kpó. Un ná akɔta akɔta e ɖo Ejípu to ɔ́ mɛ lɛ́ɛ bǐ; un ná Wúsi xɔ́sú lɛ́ɛ bǐ; un ná Filisitɛ́ɛn lɛ́ɛ xɔ́sú lɛ́ɛ bǐ: Acikelɔ́ni xɔ́sú ɔ́, Gaza xɔ́sú ɔ́, Eklɔ́ni xɔ́sú ɔ́, bó ná Acidɔ́di xɔ́sú ɔ́, có Acidɔ́di toxo ɔ́ kpɛɖé jɛ́n kpo ɖo te. Un ná mɛ e ɖo Edɔ́mu lɛ́ɛ, un ná mɛ e ɖo Mɔwabu lɛ́ɛ, un ná Amumɔ́ɔ ví lɛ́ɛ. Un ná Tíi xɔ́sú lɛ́ɛ bǐ, un ná Sidɔ́ɔn xɔ́sú lɛ́ɛ bǐ, bó ná to e ɖo xu gúdo lɛ́ɛ sín axɔ́sú lɛ́ɛ bǐ. Un ná mɛ e ɖo Dedáni lɛ́ɛ, mɛ e ɖo Téma lɛ́ɛ, mɛ e ɖo Buzu lɛ́ɛ kpó mɛ e nɔ xwlɛ́ gekplá yětɔn lɛ́ɛ kpó. Un ná Alabíinu xɔ́sú lɛ́ɛ bǐ, bó ná axɔ́sú togun e nɔ nɔ gbětótló mɛ lɛ́ɛ tɔn lɛ́ɛ bǐ. Un ná Zimuli xɔ́sú lɛ́ɛ bǐ, Elámu xɔ́sú lɛ́ɛ bǐ, bó ná Mɛdi xɔ́sú lɛ́ɛ bǐ. Un ná axɔ́sú e ɖo totaligbé lɛ́ɛ, éé ɖo tófí lɛ́ɛ abǐ éé ɖo zɔ lɛ́ɛ. Yě bǐ sésé nu. Axɔ́súɖuto e gbɔn ayǐkúngban ɔ́ jí ɖo gbɛ ɔ́ mɛ lɛ́ɛ bǐ nu. Énɛ́ ɔ́ gúdo ɔ́, Cecáki xɔ́sú ɔ́ wá nu. Mawu Mavɔmavɔ ɖɔ má ɖɔ nú yě bǐ ɖɔ: “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́ ɖɔ ɔ́ ɖíe: ‘Mi nu káká bó mú; mi nu káká bó slú; mi nu káká bó j'ayǐ nú te sísí gló, ɖó ahwan e un ná sɛ́ dó mi é wú.’ Ényí yě gbɛ́ ɖɔ émí kún ná yí kɔ́fu ɔ́ ɖo alɔ towe mɛ, bó nu ó hǔn, ɖɔ nú yě ɖɔ: ‘É gbɔn ɖěbǔ ɔ́ mi ná nu. Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Đó un jó Jeluzalɛ́mu, toxo e è sɔ́ ɖó vo nú mì ɔ́ dó ǎ, bó sɛ́ awě dó e, bɔ midɛɛ lɛ́ɛ wɛ un ná jó dó, bó gɔn awě sɛ́ dó mi, xomɛ vɔ́ wɛ mi ɖe ɖɔhun a? Gbeɖé kpɔ́n! Un na sɛ́ ahwan dó mɛ e ɖo ayǐkúngban ɔ́ jí lɛ́ɛ bǐ. Nǔ e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.’ ” Mawu Mavɔmavɔ lɛ́ ɖɔ nú mì ɖɔ: “A nǎ ɖɔ xó énɛ́ lɛ́ɛ bǐ nú yě, bó ná lɛ́ ɖɔ nú yě ɖɔ: ‘Mawu Mavɔmavɔ nɔ jǐ dɔ̌n ɖo xwé tɔn gbe, bó dó gbe. É nɔ nɔtɛn tɔn mímɛ́ ɔ́ dɔ̌n, bó sú xó dó to tɔn jí. É sú xó, mɛ ɖo vǐwun li wɛ ɖo vǐwunto mɛ ɖɔhun, dó mɛ e ɖo ayǐkúngban ɔ́ jí lɛ́ɛ bǐ ta. Zǐngídi e jí é ɖe é hun káká yi fí e gbɛ ɔ́ kponu ɖó é, ɖó Mawu Mavɔmavɔ wɛ ɖo hwɛ dó akɔta lɛ́ɛ wɛ. É ɖo hwɛ ɖɔ xá gbɛtɔ́ lɛ́ɛ bǐ wɛ; é jó mɛdídá lɛ́ɛ nú hwǐ, ɖɔ hwǐ ní wa nǔ yětɔn. Xó e Mawu Mavɔmavɔ ɖɔ ɔ́ nɛ́.’ ” Xó e Mawu Mavɔmavɔ Nǔbǐwúkpétɔ́ ɖɔ ɔ́ ɖíe: “Awě xo akɔta ɖě ɔ́, é ná nɔ́ xo ɖě, jɔhɔn nyanya ɖé wɛ sí te sín fí e ayǐkúngban ɔ́ kponu ɖó é wá xweyǐgbe.” Mɛ e Mawu Mavɔmavɔ ná hu gbe nɛ́ gbe sín fí e ayǐkúngban ɔ́ bɛ́ sín e káká yi fí e é kponu ɖó é lɛ́ɛ ɔ́, mɛɖé ná ɖe, bó ví yě ǎ, mɛɖé ná sɔ́ yě ǎ, mɛɖé ká ná sá xwé gǔdo gúdo tɔn nú yě ǎ. Zunkɔ́ kpowun wɛ yě ná nyí ɖo ayǐkúngban ɔ́ jí. Gbɔ̌nyitɔ́ lɛ́ɛ mi, mi dó gbɛvíhan, mi ya avǐ. Mi mɛ e cí gbɔ̌nyitɔ́ ɖɔhun nú togun lɛ́ɛ e mi, mi blí gbo gbɔn kɔ́ mɛ, ɖó gbe e gbe è nǎ gbo ta mi ɔ́ ja; mi ná j'ayǐ bó gba hánnyá lě e è nɔ gba zɛ̌n xɔ akwɛ́ ɖé é ɖɔhun. Lɛ̌ngbɔ́nyitɔ́ lɛ́ɛ sɔ́ ná mɔ fí ɖé nɔ ǎ. Hwlɛngán ɖě sɔ́ ɖe nú kanlinnyitɔ́ lɛ́ɛ ǎ. È se lɛ̌ngbɔ́nyitɔ́ lɛ́ɛ ɖo xó sú wɛ. Kanlinkplátɔ́ lɛ́ɛ ɖo gbɛvíhan dó wɛ, ɖó Mawu Mavɔmavɔ vívá fí e kanlin yětɔn lɛ́ɛ nɔ yi ɖu ama ɖe é. È gba ayǐkúngban e jí ayi j'ayǐ ɖe lɛ́ɛ bǐ. Xomɛsin Mawu Mavɔmavɔ tɔn wɛ wa mɔ̌ xá yě. É jó xwé tɔn dó, lě e kinnikínní ví nɔ́ jó nɔtɛn tɔn dó é ɖɔhun. Nǔ baɖabaɖa e ahwan dó sin ɔ́ zɔ́n bɔ to yětɔn húzú gbětótló, mɛɖé sɔ́ nɔ gbɔn fínɛ́ ǎ. Xomɛsin Mawu Mavɔmavɔ tɔn wɛ wa mɔ̌ xá yě. Ée Yoyakímu Joziyási ví ɔ́ yi axɔ́súzinkpo jí ɖo Judáa, bɔ é nɔ zaan é ɔ́, Mawu Mavɔmavɔ ɖɔ xó élɔ́ nú Jelemíi; é ɖɔ n'i ɖɔ: “Nyɛ Mawu Mavɔmavɔ wɛ ɖo xó ɖɔ nú we wɛ, yi nɔ te ɖo xwé ce sín kɔ́xota, bó ɖɔ xó nú mɛ e ná gosín Judáa toxo lɛ́ɛ mɛ, bó ná tɔ́n kɔ́ ɖe nú mì gbé lɛ́ɛ bǐ. Wlǐ xó e un ná ɖɔ nú we lɛ́ɛ bǐ ɖɔ nú yě, ma ɖe ɖěbǔ kpo ó. Afɔ nyɔ́ ɔ́, yě ná ɖótó we, bɔ mɛ ɖokpó ɖokpó ná jó gbɛ nyanya e é nɔ́ zán ɔ́ dó. Un ko lin ná sɛ́ awě dó yě, ɖó nǔ nyanya e yě nɔ́ wa é wú; ényí yě ká ɖótó we ɔ́, un ná gbɔ bó jó dó. Hǔn a nǎ ɖɔ nú yě ɖɔ Mawu Mavɔmavɔ ɖɔ: ‘Mi ɖótó mì, mi nyi sɛ́n e un ná mi lɛ́ɛ, wɛn e gbeyíɖɔ ce, mɛsɛntɔ́ ce lɛ́ɛ dó mi lɛ́ɛ ɔ́, mi sɔ́ ylɔ́ nǔ. Un nɔ sɛ́ mɛsɛntɔ́ ce gbeyíɖɔ lɛ́ɛ dó hwebǐnu, mi ka ɖótó yě ǎ. Ényí mi ma ɖótó yě ǎ ɔ́, un ná gba xwé élɔ́ lě e un gba éé ɖo Silóo é gbɔn é. Un ná bló bɔ akɔta e ɖo ayǐkúngban jí lɛ́ɛ é ɖěbǔ ja nu dó mɛɖé gbé ɔ́, é ná ɖɔ: Nǔ e gbo Jeluzalɛ́mu é wɛ ná gbo we.’ ” Nǔgbó ɔ́, Jelemíi yi Mawu Mavɔmavɔ xwé ɔ́ sín kɔ́xo ɔ́ ta bó dó wɛn ɔ́, bɔ vɔ̌sánú-xwlémawutɔ́ lɛ́ɛ, gbeyíɖɔ lɛ́ɛ, kpó mɛ e ɖo fínɛ́ lɛ́ɛ bǐ kpó se. Ée Jelemíi ɖɔ xó e Mawu Mavɔmavɔ ɖɔ n'i é fó é ɔ́, yě bǐ kplé bó zɔn jǐ tɔn, bó nɔ́ ɖɔ: “Hu jɛ́n è nǎ hu we. Étɛ́wú a ka glá káká bó ɖɔ dó Mawu Mavɔmavɔ nyǐkɔ mɛ ɖɔ è na gba xwé élɔ́ Silóo tɔn ɖɔhun, lobɔ toxo élɔ́ ná gba hánnyá, káká bɔ mɛ ɖěbǔ kún sɔ́ ná kpo ɖo toxo ɔ́ mɛ ó? Étɛ́wú a ka ɖɔ mɔ̌?” Énɛ́ ɔ́, mɛ e ɖo Mawu Mavɔmavɔ xwé ɔ́ gbe lɛ́ɛ bǐ xísí dó Jelemíi. Ée gǎn hɔn-yitɔ́ Judáa tɔn lɛ́ɛ se nǔ e ɖo jijɛ wɛ ɔ́, yě tɔ́n sín hɔn ɔ́ mɛ, bó wá Mawu Mavɔmavɔ xwé ɔ́ gbe, lobo jínjɔ́n xwé ɔ́ sín hɔntogbó Yɔ̌yɔ́ ɔ́ nukɔn, bó ná ɖɔ hwɛ xá Jelemíi. Vɔ̌sánú-xwlémawutɔ́ lɛ́ɛ kpó gbeyíɖɔ lɛ́ɛ kpó ɖɔ nú gǎn hɔn-yitɔ́ lɛ́ɛ kpódó togun ɔ́ bǐ kpó ɖɔ: “Nya élɔ́ ɔ́, hu jɛ́n è nǎ hu i, ɖó é ɖɔ xó dó Jeluzalɛ́mu wú, bɔ mi ɖésú se kpó tó mitɔn kpó.” Lo ɔ́, Jelemíi ɖɔ nú gǎn hɔn-yitɔ́ lɛ́ɛ bǐ kpó togun ɔ́ kpó ɖɔ: “Xó e un ɖɔ bɔ mi se ɔ́, Mawu Mavɔmavɔ wɛ sɛ́ mì dó ɖɔ nyi ní wá ɖɔ dó xwé élɔ́ kpó toxo élɔ́ kpó wú. Din ɔ́, mi bo zán gbɛ mitɔn ganjí; mi wa nǔ ganjí lě e é jɛ xá gbɔn é, mi ɖótó nǔ e Mawu Mavɔmavɔ, Mawu mitɔn ɖɔ é. Énɛ́ ɔ́, é sɔ́ ná sɛ́ awě e xó é ɖɔ nú mi ɔ́ dó ǎ. Amɔ̌, nyɛ ɔ́, un ɖo alɔ mitɔn mɛ, nǔ e mi mɔ ɖɔ é nyɔ́ bó sɔgbe ɔ́, mi sɔ́ mì dó wa. Nǔ ɖokpó e ɖ'é mɛ ɔ́, ényí mi hu mì hǔn, mi tunwun ɖɔ émí hu xomɛvɔ́nɔ ɖokpó, bɔ é ká ji nǔɖé ɔ́, mi kpó mɛ e ɖo toxo élɔ́ mɛ lɛ́ɛ bǐ kpó ná sɔ́ kpan. Đó Mawu Mavɔmavɔ wɛ sɛ́ mì dó nǔgbó, bónú mi ní se xó élɔ́ lɛ́ɛ bǐ.” Énɛ́ gúdo ɔ́, gǎn hɔn-yitɔ́ lɛ́ɛ kpó togun ɔ́ kpó ɖɔ nú vɔ̌sánú-xwlémawutɔ́ lɛ́ɛ kpódó gbeyíɖɔ lɛ́ɛ kpó ɖɔ: “È nǎ hu nya élɔ́ ǎ, ɖó wɛn wɛ é yí ɖo Mawu Mavɔmavɔ, Mawu mǐtɔn sí, bó dó mǐ nǔgbó.” Mɛ e ɖo tomɛxó lɛ́ɛ sín gbɛ̌ta mɛ lɛ́ɛ ɖěe ɖo fínɛ́, bó sɛ wá agun ɔ́ tɛ́ntin, bó ɖɔ nú kplékplé mɛ ɔ́ bǐ ɖɔ: “Axɔ́sú Judáa tɔn Ezekiyási hwenu ɖo fí ɔ́, nya gbeyíɖɔ Mawu tɔn ɖé tíin, bɔ è nɔ ylɔ́ ɛ ɖɔ Micée; nya énɛ́ ɔ́ Mɔlɛcɛ́tinu wɛ. É ɖɔ nú Judáa togun ɔ́ bǐ ɖɔ: Mi ɖótó xó e Mawu Mavɔmavɔ Nǔbǐwúkpétɔ́ ɔ́ ɖɔ é, é ɖɔ: ‘ Sinyɔ́ɔ ná húzú gle lilɛ, Jeluzalɛ́mu ná húzú dǒglin, bɔ gběhan ná cyɔ́n só é jí Mawu Mavɔmavɔ sín xwé ɔ́ ɖe é.’ Ée gbeyíɖɔ Micée ka ɖɔ mɔ̌ ɔ́, axɔ́sú Ezekiyási kpódó Judáa togun ɔ́ kpó hu i wɛ a? Yě ma hu i nɛ́! É nyɔ́ wá ɔ́, yě ɖǒ sísí nú Mawu Mavɔmavɔ, lobo ba lě e yě ná wa gbɔn bó fá xomɛ n'i é, bɔ Mawu Mavɔmavɔ sɔ́ sɛ́ awě e xó é ɖɔ ɔ́ dó yě ǎ. Amɔ̌, ényí mǐ ɖó hwɛ nú nya élɔ́ din ɔ́, nǔ ɖaxó ɖokpó wɛ ná nyí bɔ mǐ nǎ wa dó mǐɖée.” Ga nɛ́ mɛ ɔ́, gbeyíɖɔ ɖěvo ɖe, bó nɔ́ yí wɛn ɖo Mawu Mavɔmavɔ sí, bó nɔ́ dó. Wuliyahu Cemayahu ví ɔ́ wɛ, Kiliyati-Yealimunu wɛ. Élɔ́ mɔ̌ ɖɔ xó e Mawu ɖɔ n'i dó Jeluzalɛ́mu kpódó Judáa kpó wú é, Jelemíi ɖɔhun. Axɔ́sú Yoyakímu, kpódó sɔ́ja e nɔ kplá ɛ lɛ́ɛ kpó, kpódó gǎn hɔn-yitɔ́ tɔn lɛ́ɛ kpó se nǔ e Wuliyahu ɖɔ é. Énɛ́ ɔ́, axɔ́sú ɔ́ jɛ lě e é ná wa gbɔn bó hu i ɔ́ bá jí. Amɔ̌, Wuliyahu se, bɔ xɛsi jɛ jǐ tɔn, bɔ é hɔn ɖidó Ejípu. Ée axɔ́sú Yoyakímu se mɔ̌ ɔ́, é sɛ́ Ɛlunatáni Akubɔ́ɔ ví ɔ́ kpódó mɛ ɖé lɛ́ɛ kpó dó Ejípu, bɔ yě yi Ejípu, bó yi kplá Wuliyahu, bó sɔ́ ɛ wá jó nú axɔ́sú ɔ́. Axɔ́sú ná gbe, bɔ è hu Wuliyahu, bó yi ɖi i dó do e mɛ è nɔ ɖi toví kpaa lɛ́ɛ dó ɔ́. Amɔ̌, Jelemíi ɔ́, Axikamu Cafáni ví ɔ́ nya xɛ ɖo jǐ tɔn; Axikamu lɔn nú è jǒ Jelemíi nú togun ɔ́ bónú yě hu i ǎ. Ée Sedesíyasi Joziyási ví ɔ́ yi axɔ́súzinkpo jí ɖo Judáa, bɔ é nɔ zaan ɔ́, Mawu Mavɔmavɔ ɖɔ xó élɔ́ nú Jelemíi; é ɖɔ n'i ɖɔ: “Xó e ɖɔ nú we wɛ nyɛ Mawu Mavɔmavɔ, Mawu Nǔbǐwúkpétɔ́ ɔ́ ɖe ɔ́ ɖíe: Kpa agbanhɛnkpo, bó gbɛ kan. A nǎ bɛ́ kan lɛ́ɛ kpó agbanhɛnkpo lɛ́ɛ kpó ɖó abɔ̌ta, bó ná bɛ́ sɛ́ dó axɔ́sú Edɔ́mu tɔn, bó sɛ́ dó axɔ́sú Mɔwabu tɔn, axɔ́sú Amumɔ́ɔ ví lɛ́ɛ tɔn, axɔ́sú Tíi tɔn kpódó axɔ́sú Sidɔ́ɔn tɔn kpó. A nǎ bɛ̌ kan lɛ́ɛ kpó agbanhɛnkpo lɛ́ɛ kpó nú tofɔzéɖótetɔ́ e wá Judáa xɔ́sú Sedesíyasi gɔ́n ɖo Jeluzalɛ́mu lɛ́ɛ, bónú yě ná bɛ́ yi jó nú axɔ́sú énɛ́ lɛ́ɛ. Đɔ nú yě ɖɔ yě ní dó wɛn élɔ́ ɔ́ gǎn yětɔn lɛ́ɛ céɖécéɖé tɔn, ɖɔ nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: “Un bló ayǐkúngban, bó bló gbɛtɔ́ lɛ́ɛ, bó bló kanlin e ɖo ayǐkúngban ɔ́ jí lɛ́ɛ bǐ dó ɖe hlɔ̌nhlɔ́n ce kpódó nǔwúkpíkpé ce kpó xlɛ́. Nǔ e un bló lɛ́ɛ ɔ́, un nɔ ná mɛ e jló mì lɛ́ɛ. Din ɔ́, un ná jó to élɔ́ lɛ́ɛ bǐ nú mɛsɛntɔ́ ce Nabukodonɔzɔ́ɔ Babilɔ́nu xɔ́sú ɔ́; un ná jó nǔ bǐ n'i káká jɛ gběkanlin lɛ́ɛ bǐ jí bɔ yě ná se tónú n'i. Akɔta lɛ́ɛ bǐ ná nɔ acɛ tɔn mɛ, bǐ ná nɔ vǐ tɔn sín acɛ mɛ, bó nɔ vǐvú tɔn lɛ́ɛ sín acɛ mɛ, káká wá jɛ hwenu e to é ɖésúnɔ tɔn ná jɛ akɔta e syɛ́n hú i lɛ́ɛ kpó axɔ́sú e hú gǎn ɛ lɛ́ɛ kpó sín acɛ mɛ dó é. “Ényí Akɔta ɖé abǐ axɔ́súɖuto ɖé gbɛ́ ɖɔ émí kún ná se tónú nú Nabukodonɔzɔ́ɔ ó ɔ́, ényí akɔta ɖé gbɛ́ ɖɔ émí kún ná zé Babilɔ́nu xɔ́sú ɔ́ sín agbanhɛnkpo ɖó abɔ̌ta bó nɔ acɛ tɔn mɛ ó ɔ́, un ná sɔ́ ahwanfunfun kpó adɔ kpó jɛmɛjí kpó dó dɔn tó n'i, un ná sɛ́ Nabukodonɔzɔ́ɔ dó e, bó ná hu acɛ tɔn bǐ. Xó e nyɛ Mawu Mavɔmavɔ ɖɔ ɔ́ nɛ́. “Din ɔ́, midɛɛ lɛ́ɛ ɔ́, mi ma ɖótó gbeyíɖɔ mitɔn lɛ́ɛ ó, mi ma ɖótó bokɔ́nɔ mitɔn lɛ́ɛ ó, mi ma ɖótó mɛ e nɔ tín dlɔ̌ mɛ nú mi lɛ́ɛ ó, mi ma ɖótó bokantɔ́ mitɔn lɛ́ɛ ó, mi ma ɖótó majíkiblótɔ́ mitɔn lɛ́ɛ ɖěbǔ ó. Yě mɛ énɛ́ lɛ́ɛ bǐ wɛ nɔ ɖɔ mi kún ɖo Babilɔ́nu xɔ́sú ɔ́ sín acɛ mɛ ná nɔ́ wɛ ó. Nǔ e yě nɔ́ ɖɔ nú mi lɛ́ɛ ɔ́ bǐ wɛ nyí adingban; ényí mi ka ɖótó yě ɔ́, è nǎ kplá mi bɔ mi na nɔ zɔ nú to mitɔn, un ná nya mi, bɔ mi na dɔn. “Lo ɔ́, é ká nyí akɔta ɖé yí gbe, bó sɔ́ axɔ́sú Babilɔ́nu tɔn sín agbanhɛnkpo ɖó abɔ̌ta, bó nɔ acɛ tɔn mɛ ɔ́, un ná jó akɔta énɛ́ ɔ́ dó bɔ é ná nɔ ayǐkúngban tɔn jí, bó lɛ gle ɖo ayǐkúngban tɔn jí. Xó e nyɛ Mawu Mavɔmavɔ ɖɔ ɔ́ nɛ́.” Xó ɖokpó ɔ́ wɛ un ɖɔ nú Judáa xɔ́sú Sedesíyasi; un ɖɔ n'i ɖɔ: “Hwi kpó togun towe kpó ɖó ná yí gbe nú agbanhɛnkpo e Babilɔ́nu xɔ́sú ɔ́ sɔ́ ɖó abɔ̌ta nú mi é, bó se tónú nú é kpódó togun tɔn kpó, énɛ́ ɔ́ mi ná nɔ gbɛ. Mawu Mavɔmavɔ ɖɔ nú mɛɖé má se tónú nú Babilɔ́nu xɔ́sú ɔ́ ǎ ɔ́, émí ná sɛ́ ahwan kpó adɔ kpó jɛmɛjí kpó dó e; bɔ étɛ́wú hwi kpó togun towe kpó ká ná gbɛ́ tónú se nú Babilɔ́nu xɔ́sú ɔ́, bɔ ahwan kpó adɔ kpó jɛmɛjí kpó ná hu mi? Gbeyíɖɔ ɖé lɛ́ɛ tíin, bó nɔ́ ɖɔ é kún byɔ́ ɖɔ mi ná nɔ Babilɔ́nu xɔ́sú ɔ́ sín acɛ mɛ ó; xó énɛ́ lɛ́ɛ e yě nɔ́ ɖɔ nú mi ɔ́, adingban wɛ, mi ma ɖótó yě ó. Mawu Mavɔmavɔ ɖɔ: ‘Un sɛ́ yě dó ǎ. Wɛn ce dó mi wɛ yě ɖe bó ɖɔ, lo ɔ́ adingban ɖó wɛ yě ká ɖe. Ényí mi ɖótó yě ɔ́, un ná nya mi sín fí, bɔ mi kpó gbeyíɖɔ e nɔ ɖo xó énɛ́ lɛ́ɛ ɖɔ nú mi wɛ lɛ́ɛ kpó bǐ ná kú.’ ” Énɛ́ ɔ́ gúdo ɔ́, un ɖɔ xó nú vɔ̌sánú-xwlémawutɔ́ lɛ́ɛ kpódó mɛ e ɖo fínɛ́ lɛ́ɛ bǐ kpó; un ɖɔ nú yě ɖɔ: “Xó e Mawu Mavɔmavɔ ɖɔ ɔ́ ɖíe: ‘Gbeyíɖɔ e nɔ ɖɔ nú mi ɖɔ zaanɖé din ɔ́, è nǎ bɛ́ nǔ e è nɔ zán ɖo xwé ce gbe lɛ́ɛ sín Babilɔ́nu wá lɛ́ɛ ɔ́, mi ma ɖótó yě ó, adingban wɛ yě nɔ́ ɖó nú mi.’ Mi ma ɖótó yě ó; mi se tónú nú Babilɔ́nu xɔ́sú ɔ́, énɛ́ ɔ́ mi ná nɔ gbɛ. Abǐ toxo élɔ́ ɔ́ gba jɛ́n è nǎ gba dandan a? “Ényí gbeyíɖɔ Mawu tɔn jɛ́n yě nyí nǔgbó hǔn, ényí Mawu Mavɔmavɔ dó wɛn yě nǔgbó hǔn, yě ní bó sa vo nú Mawu Mavɔmavɔ Nǔbǐwúkpétɔ́ ɔ́, ní má lɔ́n nú è bɛ̌ nǔxɔ-akwɛ́ e kpo ɖo Mawu Mavɔmavɔ xwé ɔ́ gbe lɛ́ɛ, éé ɖo axɔ́sú Judáa tɔn sín hɔnmɛ lɛ́ɛ, kpó éé ɖo toxo ɔ́ mɛ lɛ́ɛ kpó yi Babilɔ́nu ó. Nǔgbó ɔ́, Mawu Mavɔmavɔ Nǔbǐwúkpétɔ́ ɔ́ ɖó xó ɖé, bó ná ɖɔ dó dotín lɛ́ɛ, ganzɛ́n ɖaxó ɔ́, basya e ɖó zɔn lɛ́ɛ, kpódó nǔ ɖěvo ɖěvo e kpo ɖo Jeluzalɛ́mu lɛ́ɛ kpó wú. Đó hwenu e Nabukodonɔzɔ́ɔ Babilɔ́nu xɔ́sú ɔ́ wlí Judáa xɔ́sú Yoyakini, Yoyakímu ví ɔ́, bó wlí tonukún Judáa tɔn lɛ́ɛ kpódó Jeluzalɛ́mu tɔn lɛ́ɛ kpó yi Babilɔ́nu ɔ́, é bɛ́ nǔ énɛ́ lɛ́ɛ sín Jeluzalɛ́mu ǎ. Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́, xó e é ɖɔ dó nǔxɔ-akwɛ́ énɛ́ lɛ́ɛ e kpo ɖo Mawu Mavɔmavɔ xwé ɔ́ gbe lɛ́ɛ kpó, éé kpo ɖo axɔ́sú Judáa tɔn sín hɔnmɛ lɛ́ɛ kpó, éé kpo ɖo Jeluzalɛ́mu toxo ɔ́ mɛ lɛ́ɛ kpó ɔ́ wú ɔ́ ɖíe: É ɖɔ: ‘È nǎ bɛ́ nǔ énɛ́ lɛ́ɛ bǐ yi Babilɔ́nu, bɔ yě ná nɔ dɔ̌n káká jɛ gbe e gbe nyi ɖésúnɔ ná ɖɔ bɔ è nǎ bɛ́ yě wá fí é.’ ” Xó e Mawu Mavɔmavɔ ɖɔ é nɛ́. Xwe énɛ́ xwe ɖokpó ɔ́, gbeyíɖɔ Hananiya Azúu ví, Gabawɔ́ɔnnu ɔ́ ɖɔ xó nú mì ɖo Mawu Mavɔmavɔ xwé gbe, ɖo vɔ̌sánú-xwlémawutɔ́ lɛ́ɛ kpó togun ɔ́ bǐ kpó nukɔn. Xwe e xwe Judáa xɔ́sú Sedesíyasi ɖo xwe ɛnɛ bló wɛ ɖo zinkpo jí ɔ́, sun tɔn atɔ́ɔ́ngɔ́ mɛ wɛ é ɖɔ xó nú mì; é ɖɔ nú mì ɖɔ: “Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Acɛ e kpa nú mi wɛ Babilɔ́nu xɔ́sú ɔ́ ɖe, bɔ é cí agbanhɛnkpo ɖɔhun ɖo kɔ nú mi ɔ́, un ná hɛn wɛ́n. Cóbónú é ná su xwe we mɛ lěhwenu ɔ́, nǔ e è nɔ zán ɖo xwé ce gbe, bɔ Babilɔ́nu xɔ́sú Nabukodonɔzɔ́ɔ bɛ́ yi Babilɔ́nu lɛ́ɛ ɔ́, un ná lɛ́ kɔ nú bǐ wá fí. Un ná kplá Judáa xɔ́sú Yoyakini Yoyakímu ví ɔ́ kpódó Judáanu e è wlǐ yi Babilɔ́nu lɛ́ɛ é bǐ kpó wá. Nǔgbó wɛ, acɛ e kpa nú mi wɛ Babilɔ́nu xɔ́sú ɔ́ ɖe, bɔ é cí agbanhɛnkpo ɖɔhun ɖo kɔli mɛ nú mi ɔ́, un ná hɛn wɛ́n.’ Xó e Mawu Mavɔmavɔ ɖɔ ɔ́ nɛ́.” Gbeyíɖɔ Jelemíi ka yí gbe nú gbeyíɖɔ Hananiya ɖo vɔ̌sánú-xwlémawutɔ́ lɛ́ɛ kpó mɛ e ɖo Mawu Mavɔmavɔ xwé lɛ́ɛ bǐ kpó nukɔn ɖɔ: “ Amǐ, Mawu Mavɔmavɔ ní bló gbɔn mɔ̌! Mawu Mavɔmavɔ ní bló ɖó xó e a ɖɔ é jí, bónú nǔ e è bɛ̌ ɖo Mawu Mavɔmavɔ xwé gbe lɛ́ɛ kpó mɛ e è wlǐ lɛ́ɛ kpó bǐ ní wá xwé. Amɔ̌, wlǐ tó xó e ná ɖɔ dó tó towe mɛ wɛ un ɖe é wú ganjí, togun ɔ́ lɔ ní ɖótó. Xóxó hwenu ɔ́, gbeyíɖɔ e jɛ nukɔn nú nyi kpó hwi kpó lɛ́ɛ ɔ́, to ɖaxó ɖaxó lɛ́ɛ kpó axɔ́súɖuto nukúnɖéjí lɛ́ɛ kpó wɛ yě dó wɛn. Ahwanfunfun kpó, awě kpó jɛmɛjí kpó sín wɛn wɛ yě dǒ. Lo ɔ́, ényí gbeyíɖɔ ɖé dó fífá sín wɛn ɔ́, nǔ e é ɖɔ ɔ́ wɛ ná jɛ, bɔ è nǎ tunwun ɖɔ Mawu Mavɔmavɔ wɛ sɛ́ ɛ dó nǔgbó.” Énɛ́ ɔ́ gúdo ɔ́, gbeyíɖɔ Hananiya ɖe agbanhɛnkpo e ɖo kɔli mɛ nú gbeyíɖɔ Jelemíi ɔ́, lobo hɛn wɛ́n, bó ɖɔ ɖo togun ɔ́ bǐ nukɔn ɖɔ: “Mawu Mavɔmavɔ ɖɔ: ‘Cóbónú é ná su xwe we mɛ lěhwenu ɔ́, mɔ̌ wɛ un ná wɛ́n agbanhɛnkpo e Babilɔ́nu xɔ́sú Nabukodonɔzɔ́ɔ sɔ́ ɖó kɔli mɛ nú akɔta lɛ́ɛ bǐ é.’ ” Énɛ́ ɔ́ gúdo ɔ́, gbeyíɖɔ Jelemíi ɖidó. Ée gbeyíɖɔ Hananiya lɔ́ agbanhɛnkpo e ɖo kɔli mɛ nú gbeyíɖɔ Jelemíi ɔ́, Mawu Mavɔmavɔ ɖɔ nú Jelemíi ɖɔ: “Yi ɖɔ nú Hananiya ɖɔ Mawu Mavɔmavɔ ɖɔ: ‘Ée a hɛn kpo ɔ́ lɔ́ din ɔ́, a ɖǒ ná zé gankpo ɖó tɛn tɔn mɛ.’ ” Bɔ Jelemíi ɖɔ: “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ é ɖíe, é ɖɔ: ‘Din ɔ́, gankpo wɛ un sɔ́ ɖó kɔli mɛ nú akɔta e ɖo gbě jí fí lɛ́ɛ é bǐ, nǔ e ɖo gbě jí fí é bǐ ná nɔ axɔ́sú Babilɔ́nu tɔn Nabukodonɔzɔ́ɔ sín acɛ mɛ, káká jɛ gběkanlin lɛ́ɛ lɔ jí.’ ” Énɛ́ ɔ́ gúdo ɔ́, Jelemíi lɛ́ ɖɔ nú gbeyíɖɔ Hananiya ɖɔ: “Hananiya, ɖǒtó mì ganjí, Mawu Mavɔmavɔ sɛ́ we dó ǎ, bɔ a ka ɖo adingban ɖó dó ná gǎnjɛwú togun élɔ́ wɛ kpowun. Énɛ́ ɔ́ wú wɛ Mawu Mavɔmavɔ ɖɔ: ‘Éɖíe, un ná ɖe we sín ayǐkúngban ɔ́ jí. Cóbónú xwe élɔ́ ná fó ɔ́, a nǎ nyí cyɔ, ɖó a fun togun ɔ́, bɔ yě fɔ́n gǔ dó nyɛ Mawu Mavɔmavɔ jí.’ ” Gbeyíɖɔ Hananiya kú nǔgbó, ɖo sun tɛ́nwegɔ́ e ɖo xwe ɔ́ mɛ é mɛ. Gbeyíɖɔ Jelemíi nɔ Jeluzalɛ́mu, bó sɛ́ wěma ɖokpó dó tomɛxó e kpo ɖo gbɛ ɖo Babilɔ́nu lɛ́ɛ, vɔ̌sánú-xwlémawutɔ́ lɛ́ɛ, gbeyíɖɔ lɛ́ɛ kpódó mɛ e Nabukodonɔzɔ́ɔ wlí sín Jeluzalɛ́mu yi Babilɔ́nu lɛ́ɛ bǐ kpó. Axɔ́sú Yoyakini kpó nɔ tɔn kpó, gǎn hɔn-yitɔ́ lɛ́ɛ kpó, Judáa gán lɛ́ɛ kpó Jeluzalɛ́mu gán lɛ́ɛ kpó, alɔnuzɔ́watɔ́ lɛ́ɛ, kpódó fletuntɔ́ lɛ́ɛ kpó ɔ́, è ko kplá yě sín Jeluzalɛ́mu có Jelemíi wlán wěma élɔ́. É sɔ́ wěma ɔ́ jó nú Eleasa Cafáni ví ɔ́ kpódó Gemaliya Ilukya ví ɔ́ kpó; yě wɛ Judáa xɔ́sú Sedesíyasi sɛ́ dó Babilɔ́nu xɔ́sú Nabukodonɔzɔ́ɔ gɔ́n, ɖo Babilɔ́nu. Xó e ɖo wěma ɔ́ mɛ ɔ́ ɖíe: “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́ ɖɔ sɛ́ dó mɛ e è kplá sín Jeluzalɛ́mu yi Babilɔ́nu lɛ́ɛ ɔ́ ɖíe: É ɖɔ: ‘Mi sá xwé bó nɔ gbe; mi bló jikpá bó ɖu nǔ e ná nyɔ́ ɖ'é mɛ lɛ́ɛ. Mi da asú, mi da asi, mi ji vǐ súnnu, bó ji vǐ nyɔ̌nu. Mi da asi nú vǐ mitɔn súnnu lɛ́ɛ, mi sɔ́ vǐ mitɔn nyɔ̌nu lɛ́ɛ ná asú, bónú yě ji vǐ. Mi gba kún ɖo dɔ̌n; mi ma nú kún mitɔn yi gǔdo ó! Mi ba lě e toxo e mɛ un sɔ́ ahwan dó wlí mi yi ɖó ɔ́ ná yi nukɔn gbɔn é; mi xo ɖɛ nú Mawu Mavɔmavɔ dó toxo ɔ́ tamɛ, ɖó nyɔ̌ná mitɔn ɖo nukɔn yiyi to ɔ́ tɔn sí.’ “Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe: ‘Mi ma lɔn nú gbeyíɖɔ e ɖo tɛ́ntin mitɔn lɛ́ɛ blɛ́ mi ó; amɔɛkantɔ́ lɛ́ɛ lɔ ma blɛ́ mi ó. Mi ma ɖótó mɛ e nɔ tín dlɔ̌ mɛ nú mi lɛ́ɛ ó. Đó adingban wɛ yě nɔ́ zé nyǐkɔ ce ɖó nu, bó nɔ́ wá ɖó nú mi. Un ka sɛ́ yě dó ǎ.’ Xó e Mawu Mavɔmavɔ ɖɔ ɔ́ nɛ́. “Din ɔ́, Mawu Mavɔmavɔ lɛ́ ɖɔ: ‘Nú acɛkpikpa Babilɔ́nu tɔn bló xwe kanɖé gban (70) wá yi ɔ́, akpá e un dó nú mi ɔ́, un ná ɖe: un ná lɛ́ kɔ nú mi wá Jeluzalɛ́mu fí. Đó nyɛ Mawu Mavɔmavɔ ɔ́, un tunwun tito e un sɔ́ ɖó te nú mi é; fífá wɛ un sɔ́ ɖó te nú mì, ényí nǔ nyanya wɛ un sɔ́ ɖó te nú mi ǎ, bónú sɔ ná nyɔ́ nú mi Hwenɛ́nu ɔ́, mi ná sú xó ylɔ́ mì, bó ná xwedó mì, lobo ná sa vo nú mì, bɔ un ná ɖótó mi. Mi ná ba mì, bó ná mɔ mì, ɖó mi ná ba mì kpó ayi mitɔn bǐ kpó. Nyɛ Mawu Mavɔmavɔ ɖo ɖiɖɔ nú mi wɛ ɖɔ: Un ná jó nyiɖée dó bɔ mi ná mɔ mì; un ná kplá mɛ mitɔn e ahwan wlí yi to ɖěvo mɛ lɛ́ɛ wá. Un ná xúxú mi kplé gbɔn akɔta e mɛ un gba mi dó gbɔn lɛ́ɛ, fí e un gba mi dó kpé gbɔn lɛ́ɛ bǐ, lobo ná kplá mi wá fí e un ɖe mi sín bó kplá yi to ɖěvo mɛ é.’ “Mawu Mavɔmavɔ ɖɔ xó énɛ́ lɛ́ɛ bǐ nú mi, ɖó mi ɖɔ é sɔ́ gbeyíɖɔ gěgé nú émí ɖo Babilɔ́nu. “Axɔ́sú e ɖo Davídi zinkpo jí ɔ́ kpó mɛ e ɖo Jeluzalɛ́mu toxo mɛ fí lɛ́ɛ kpó, kpó nɔví mitɔn e ahwan ma wlí yi to ɖěvo mɛ ǎ lɛ́ɛ kpó ɔ́, Mawu Mavɔmavɔ ɖɔ xó ɖé dó yě wú. Xó e Mawu Mavɔmavɔ Nǔbǐwúkpétɔ́ ɖɔ dó yě wú ɔ́ ɖíe: ‘É ɖíe, un ná sɛ́ ahwan kpó adɔ kpó jɛmɛjí kpó dó yě. Un ná wa nǔ xá yě bɔ yě ná cí fígi e gblé, bó gblé káká bɔ è ma sɔ́ sixú ɖu ǎ ɔ́ ɖɔhun, ɖó é kó gblé dín. Un ná zé ahwan kpó adɔ kpó jɛmɛjí kpó dó jɛ gǒ mɛ nú yě. Un ná bló mɔ̌ xá yě, bɔ è ja nu dó mɛɖé gbé ɔ́, yě wú wɛ è nǎ nɔ́ jlɛ́ dó; axɔ́súɖuto e ɖo gbɛ ɔ́ mɛ lɛ́ɛ mɔ ɔ́, xɛsi ná jɛ yě jí; è mɔ yě ɔ́, è nǎ nɔ́ sɔ́ alɔ ɖó nu; yě ná húzú nǔkiko; yě ná húzú winnyá ɖo akɔta e mɛ un ná gba yě dó gbɔn lɛ́ɛ, ɖó yě ɖǒtó xó e ɖɔ nú yě wɛ un ɖe lɛ́ɛ ǎ, có un ka nɔ gɔn mɛsɛntɔ́ ce gbeyíɖɔ lɛ́ɛ sɛ́ dó yě ɖě jɛ ɖě gúdo ǎ; yě ká ɖótó gbeyíɖɔ lɛ́ɛ ǎ. Nyɛ Mawu Mavɔmavɔ wɛ ɖɔ mɔ̌.’ “Mi mɛ e Mawu Mavɔmavɔ sɔ́ ahwan dó kplá sín Jeluzalɛ́mu yi Babilɔ́nu lɛ́ɛ e mi! Midɛɛ lɛ́ɛ ɔ́, mi ɖótó Mavɔmavɔ! “Din ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ xó dó gbeyíɖɔ Akábu Kolaya ví ɔ́ kpó gbeyíɖɔ Sedesíyasi Maaseya ví ɔ́ kpó wú; gbeyíɖɔnyíjɛtɔ́ wɛ nú yě mɛ we lɛ́ɛ bǐ, yě ká nɔ́ ɖɔ émí ɖo Mawu sín wɛn dó wɛ. Mawu ɖɔ dó yě wǔ ɖɔ: ‘Un na jó yě nú Babilɔ́nu xɔ́sú Nabukodonɔzɔ́ɔ, bɔ é ná hu yě ɖo nukún mitɔn mɛ. Énɛ́ ɔ́, è nǎ nɔ zé yě mɛ we lɛ́ɛ sín nyǐkɔ dó dó nu mɛ, ɖo mi Judáanu e ahwan wlí yi Babilɔ́nu lɛ́ɛ tɛ́ntin. È nǎ nɔ́ ɖɔ: Lě e Babilɔ́nu xɔ́sú ɔ́ mɛ ajotín gbeyíɖɔ Sedesíyasi kpó gbeyíɖɔ Akábu kpó tɔn gbɔn ɔ́, Mawu Mavɔmavɔ ní wa nǔ mitɔn gbɔn mɔ̌. Nǔ nǎ cí mɔ̌ nú yě, ɖó yě wa hɛ̌nnú ɖo Izlayɛ́li: yě ba nɔzo yětɔn sín asi, nǔ e un ma sɛ́ yě dó ɖɔ yě ní yi ɖɔ ǎ ɔ́, yě nɔ́ yi ɖɔ; adingban ka wɛ. Un mɔ do nú nǔ énɛ́ lɛ́ɛ bǐ, ɖě nyí gúdo ce nú ǎ.’ ” Mawu Mavɔmavɔ wɛ ɖɔ mɔ̌. Mawu ɖɔ nú Jelemíi ɖɔ: “A nǎ ɖɔ nú Cemaya Nɛxlamíti ɔ́ ɖɔ: ‘Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: A sɛ́ wěma dó Jeluzalɛ́mu togun ɔ́ bǐ, kpó vɔ̌sánú-xwlémawutɔ́ Sefaníyahu Maaseya ví ɔ́ kpó, kpó vɔ̌sánú-xwlémawutɔ́ ɖě lɛ́ɛ bǐ kpó, bó ɖɔ: Mawu Mavɔmavɔ sɔ́ we vɔ̌sánú-xwlémawutɔ́ ɖó vɔ̌sánú-xwlémawutɔ́ Yexoyada tɛn mɛ, bɔ a nǎ cɔ́ mɛ e hun alɛ bó nɔ́ zé yěɖée gbeyíɖɔ ɖo Mawu Mavɔmavɔ xwé gbe lɛ́ɛ; a mɔ mɛ mɔ̌hun ɔ́, a nǎ dó wlɔ ɛ, bó ná sú i dó gankpá mɛ; bɔ étɛ́wú a ma ka gbɛ́ nǔ nú Jelemíi Anatɔ́tinu e ɖo éɖée sɔ́ gbeyíɖɔ wɛ ɖo tɛ́ntin mitɔn ɔ́ ǎ? Ée é ɖo wěma sɛ́ dó mǐ wɛ ɖo Babilɔ́nu fí din ɖɔ Mawu ɖɔ mǐ nǎ lín ɖo to e mɛ ahwan kplá mǐ wá é mɛ ɔ́, hwɛ énɛ́ ɔ́ hwɛ towe wɛ. É glá káká bó wlán dó wěma ɔ́ mɛ ɖɔ mǐ ní sá xwé bó nɔ gbe; ɖɔ mǐ ní bló jikpá bó ɖu nǔ e ná nyɔ́ ɖo jikpá lɛ́ɛ mɛ lɛ́ɛ!’ ” Jelemíi nukún mɛ wɛ vɔ̌sánú-xwlémawutɔ́ Sefaníyahu xa wěma ɔ́ ɖe, bɔ Mawu Mavɔmavɔ ɖɔ nú Jelemíi ɖɔ: “Đɔ sɛ́ dó mɛ e ahwan wlí yi Babilɔ́nu lɛ́ɛ bǐ ɖɔ xó e Mawu Mavɔmavɔ ɖɔ dó Cemaya Nɛxlamíti ɔ́ wú é ɖíe: ‘Đó ée un ma sɛ́ Cemaya dó ǎ, bɔ é sɔ́ nyǐkɔ ce ɖó nu, bó dɔn mi, bɔ mi ɖi nǔ nú adingban e é ɖó lɛ́ɛ é ɔ́, un ná dɔn tó nú Cemaya Nɛxlamíti ɔ́, é kpódó vǐ tɔn lɛ́ɛ kpó; mɛ tɔn lɛ́ɛ ɖěbǔ nǎ nɔ togun élɔ́ tɛ́ntin ǎ. Yě mɛ ɖěbǔ ná mɔ nǔ ɖagbe e un ná wa nú togun ce ɔ́ ǎ. Đó é ɖɔ xó bó dɔn togun ɔ́, bɔ togun ɔ́ fɔ́n gǔ dó nyɛ Mawu Mavɔmavɔ jí. Nyɛ Mawu Mavɔmavɔ wɛ ɖɔ mɔ̌.’ ” Mawu Mavɔmavɔ ɖɔ xó nú Jelemíi. “Xó e nyɛ Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: Wlǎn xó e un ɖɔ nú we lɛ́ɛ bǐ dó wěma mɛ. Un ɖo ɖiɖɔ nú we wɛ, hwe ɔ́ nu ná wá su, bɔ un na lɛ́ kɔ nú mɛ e ahwan wlí ɖo togun ce Izlayɛ́li kpó Judáa kpó mɛ lɛ́ɛ, bɔ yě ná wá xwé. Un ná kplá yě wá to e un ná tɔ́gbó yětɔn lɛ́ɛ é mɛ, bɔ é ná nyí yětɔn.” Xó e Mawu Mavɔmavɔ ɖɔ dó Izlayɛ́li kpó Judáa kpó wú é ɖíe: “Mǐ ɖo xósúsú ɖé se wɛ, xɛsi xósúsú ɖé wɛ; xɛsi ɖaxó ɖé sín xósúsú wɛ; ényí fífá sín xósúsú wɛ ǎ. Mi yi ba do ná kpɔ́n! Súnnu nɔ́ ji vǐ wɛ a? Étɛ́wú súnnu lɛ́ɛ bǐ ka ɖo alin hɛn wɛ, nyɔ̌nu jɛ flú mɛ ɖɔhun mɔ̌? Étɛ́wú mɛ bǐ ká blá wǔ ɖo nukún mɛ mɔ̌? Awě tɛ́ ɖíe! Azǎn baɖabaɖa ɖé wɛ, ayǐ mɔ̌hun ko hɔ́n kpɔ́n ǎ. Aluwɛ zán wɛ é nyí nú Jakɔ́bu ví lɛ́ɛ! Amɔ̌, yě ná tɔ́n sín mɛ, wǔyɛ́yɛ́ afɔyɛ́yɛ́.” Mawu Mavɔmavɔ Nǔbǐwúkpétɔ́ ɔ́ ɖɔ: “Gbe énɛ́ gbe su ɔ́, agbanhɛnkpo e ɖo kɔli mɛ nú yě ɔ́, un ná hɛn lɔ́; un ná tún kan nú yě, bɔ toɖévomɛnu lɛ́ɛ sɔ́ ná kpa acɛ nú yě ǎ. Yě ná sɛn nyɛ Mawu Mavɔmavɔ, Mawu yětɔn, bɔ un ná lɛ́ sɔ́ mɛ ɖokpó ɖó axɔ́sú yětɔn Davídi sín zinkpo jí, bɔ é ná nyí axɔ́sú yětɔn bɔ yě ná nɔ́ sɛn ɛ.” Mawu Mavɔmavɔ ɖɔ: “Togun ce Izlayɛ́li, ado ma hu we o! Mi togun ce, mi Jakɔ́bu ví lɛ́ɛ, mi ma ɖi xɛsi ó. Đó, un ná hwlɛ́n mi gán sín to ma yá to énɛ́ mɛ, un ná hwlɛ́n vǐ mitɔn lɛ́ɛ gán sín to e mɛ ahwan wlí yě yi é. Jakɔ́bu ví lɛ́ɛ ná lɛ́ kɔ wá, bó ná gbɔjɛ́, bó ná vo; mɛ ɖěbǔ ná dó tagba nú yě ǎ. Un ɖo kpɔ́ xá yě bó ná hwlɛ́n yě gán. Akɔta e mɛ un gba yě kpé gbɔn lɛ́ɛ ɔ́, un ná sú akɔta énɛ́ lɛ́ɛ sín kún dó. Amɔ̌, yědɛɛ lɛ́ɛ ɔ́, un nǎ dɔn tó nú yě lě e é jɛ xá gbɔn é, un ka ná sú kún yětɔn dó ǎ. Un sixú jó yě dó, xomɛvɔ́ wɛ yě ɖe ɖɔhun ǎ.” Mawu Mavɔmavɔ wɛ ɖɔ mɔ̌. Mawu Mavɔmavɔ ɖɔ: “Jeluzalɛ́mu, wǔ e a gblě ɔ́ syɛ́n dín; akpa towe ɔ́ jɔmakú wɛ. Mɛ ɖé ká ɖe bó ná klɔ́ akpa ɔ́ nú we ǎ. Nǔ e ná hu akpa towe ɔ́ ɖe ǎ. Mɛ e yí wǎn nú we ɖ'ayǐ lɛ́ɛ bǐ wɔn we; yě mɛ ɖěbǔ sɔ́ nɔ́ kpɔ́n jɛ towe jí ǎ, ɖó un xo we lě e kɛntɔ́ ná xo we gbɔn é; un dɔn tó nú we bɔ é vɛ́ ɖésú. Hwɛ tobutóbú e a hu lɛ́ɛ wú wɛ un ɖo nǔ énɛ́ lɛ́ɛ wa xá we wɛ. Lě e hwɛ towe lɛ́ɛ syɛ́n sɔ́ ɔ́ wú wɛ un ɖo nǔ énɛ́ lɛ́ɛ wa xá we wɛ. Étɛ́wú a ka ɖo akpa towe sín vo sa wɛ, bó ɖo wǔvɛ́ e mɔ wɛ a ɖe ɔ́ sín xó ɖɔ wɛ? Hwɛ tobutóbú e a hu é wú wɛ un ɖo nǔ énɛ́ lɛ́ɛ wa xá we wɛ, hwɛ baɖabaɖa e a hu lɛ́ɛ wú wɛ un ɖo nǔ énɛ́ lɛ́ɛ wa xá we wɛ. Amɔ̌, mɛ e nɔ wá bɛ́ dɔkun mitɔn lɛ́ɛ bǐ ɖu lɛ́ɛ ɔ́, è nǎ bɛ́ dɔkun yětɔn lɛ́ɛ bǐ ɖu. Kɛntɔ́ towe lɛ́ɛ ɔ́, ahwan na wlí yě bǐ yi. Mɛ e nɔ fin nǔ towe lɛ́ɛ ɔ́, è nǎ fin nǔ yětɔn lɛ́ɛ. Mɛ e nɔ hɛn nǔ towe gblé lɛ́ɛ ɔ́, è nǎ hɛn nǔ yě lɔmɔ̌ tɔn gblé. Amɔ̌, un ná klɔ́ akpa towe lɛ́ɛ nú we, un ná hu akpa towe lɛ́ɛ nú we, ɖó yě nɔ́ ylɔ́ we ɖɔ: Mɛ e sín kan mɛ è ɖe alɔ sín é, Sinyɔ́ɔ e jɛ jí mɛɖé má nɔ́ kpɔ́n ǎ é.” Mawu Mavɔmavɔ wɛ ɖɔ mɔ̌. Mawu Mavɔmavɔ ɖɔ: “Jakɔ́bu ví e ahwan wlí yi to ɖěvo mɛ lɛ́ɛ ɔ́, un ná kplá yě wá xwé. Xwé yětɔn lɛ́ɛ sín nǔ nǎ blá wǔ nú mì. È nǎ vɔ̌ toxo yětɔn e ko gba bǐ ɔ́ bló ɖó. È nǎ vɔ̌ axɔ́sú ɔ́ sín hɔnmɛ bló, ɖó tɛn tɔn xóxó ɔ́ mɛ. Yě ná nɔ́ ji han dó dó kú, yě ná nɔ́ sú xó kpó awǎjijɛ kpó. Un ná bló bɔ yě ná gba kún, kún yětɔn ná ɖe kpo ǎ. Un ná sɔ́ yě su, mɛɖé sɔ́ ná gbɛ́ wán nú yě ǎ. Nǔ nǎ nyɔ́ nú Jakɔ́bu ví lɛ́ɛ, lě e yě ɖe gbɔn ɖ'ayǐ xóxó é. Yě ná nɔ́ kplé ɖo nukɔn ce káká sɔ́yi, bɔ un ná dɔn tó nú mɛ e ná táfú yě lɛ́ɛ. Mɛ e ná nyí gǎn ɖo yě nu ɔ́, un ná sɔ́ ɖo tɛ́ntin yětɔn; mɛ e ná kpa acɛ dó yě nu ɔ́, un ná sɔ́ ɖo yě mɛ. Un ná dɔn ɛ bɔ é ná sɛkpɔ́ mì, ɖó nú un ma ylɔ́ mɛɖé ǎ ɔ́, mɛ ɔ́ sixú syɛ́n ta bó sɛkpɔ́ mì ǎ. Nyɛ Mawu Mavɔmavɔ wɛ ɖɔ mɔ̌. Énɛ́ ɔ́, mi ná nyí togun ce, bɔ un ná nyí Mawu mitɔn.” Xomɛsin Mawu Mavɔmavɔ tɔn ɖíe sí te jǎwe jɔhɔn ɖaxó ɖé ɖɔhun e. É ɖo nyinyi dó ta nú mɛdídá lɛ́ɛ wɛ. Xomɛsin ɖaxó e jí Mawu Mavɔmavɔ ɖe ɔ́ ɖo nǎ xwɛ wɛ ǎ. É ná xwɛ cóbónú Mawu Mavɔmavɔ ná wa nǔ e é lin lɛ́ɛ bǐ ǎ. Ayǐ ɖo hǐnhɔ́n wɛ ɔ́, mi ná mɔ nǔ jɛ nǔ énɛ́ lɛ́ɛ bǐ mɛ. Mawu Mavɔmavɔ ɖɔ: “Hwenɛ́nu su ɔ́, un ná nyí Mawu nú Izlayɛ́li hɛ̌nnu lɛ́ɛ bǐ, bɔ yě ná nyí togun ce.” Xó e Mawu Mavɔmavɔ ɖɔ ɔ́ ɖíe: “Mɛ e kú xo kpo ɖo togun ce mɛ lɛ́ɛ mɔ fɛ́nú ɖo gbětótló mɛ. Izlayɛ́li xwe fí e é ná vo ɖe ɔ́.” É nɔ́ ɖɔ: “Mawu Mavɔmavɔ ɖe éɖée xlɛ́ mì sín zɔ.” Mawu Mavɔmavɔ yí gbe n'i ɖɔ: “Un yí wǎn nú we sín do, bó ná yí wǎn nú we káká sɔ́yi; énɛ́ wú wɛ un nɔ gbejí nú we. Izlayɛ́li, ɖyɔ̌vǐ, un ná lɛ́ zé we sí te. A nǎ lɛ́ zé hǔnví towe bó jɛ agun mɛ bó ɖú we xá weɖútɔ́ lɛ́ɛ. Izlayɛ́li, a nǎ lɛ́ tun vǐwuntín gbɔn Samalíi só lɛ́ɛ jí, vǐwuntuntɔ́ lɛ́ɛ ná ɖu vǐwun le lo. Đó ayǐ ɖokpó ná wá hɔ́n, bɔ glecɔ́tɔ́ lɛ́ɛ ná sú xó ɖo Samalíi só lɛ́ɛ jí, bó ná ɖɔ: ‘Mi sí te, bó wá mǐ yi Mawu Mavɔmavɔ, Mawu mǐtɔn gɔ́n ɖo Sinyɔ́ɔ só jí.’ ” Xó e Mawu Mavɔmavɔ ɖɔ ɔ́ ɖíe, é ɖɔ: “Mi sú xó, bó j'awǎ dó Jakɔ́bu tamɛ; mi ɖe xomɛ hunhun mitɔn xlɛ́ dó akɔta e ɖo nukɔn ɔ́ tamɛ. Mi zé gbe yi jǐ, bó ji han, bó kpa susu nú Mawu Mavɔmavɔ bó ɖɔ: ‘Mawu Mavɔmavɔ, hwlɛ̌n togun towe, hwlɛ̌n Izlayɛ́li ví e kpo lɛ́ɛ bǐ gán.’ É ɖíe un ná kplá yě sín to ɖé mɛ ɖo Taligbé wá. Un ná cyán yě gbɔn ayǐkúngban ɔ́ bǐ jí, bó kplé yě. Nukúntíntɔ́nnɔ kpó afɔkponɔ kpó ɖo yě mɛ; nyɔ̌nu xoxónɔ kpó nyɔ̌nu e vǐ tɔ́n é kpó ɖo yě mɛ. Togun ce ɔ́ bǐ wɛ ná lɛ́ kɔ wá fí. Yě ná wá kpó avǐ kpó, kpó vosisa kpó bɔ un ná kplá yě. Un ná kplá yě gbɔn ali e jí yě ma ná klɛ́n afɔ ɖe ǎ é, bɔ yě ná yi fí e tɔsisa ɖe é; ɖó tɔ́ wɛ un nyí nú Izlayɛ́li, bɔ Eflayímu nyí nukɔngbéví ce.” Akɔta akɔta lɛ́ɛ e mi! Mi ɖótó xó e Mawu Mavɔmavɔ ɖɔ é, bó jlá nú tɔtɛ́ntinto e gbɔn zɔ lɛ́ɛ bǐ, bó ɖɔ: “Mawu Mavɔmavɔ gba Izlayɛ́li ví lɛ́ɛ dó; amɔ̌, din ɔ́, é ná kplé yě, bó ná tɔ́jú yě lě e lɛ̌ngbɔ́nyitɔ́ nɔ́ kpé nukún dó lɛ̌ngbɔ́ tɔn lɛ́ɛ wú é.” Đó Mawu Mavɔmavɔ ná tún kan nú Jakɔ́bu togun ɔ́; é ná xɔ gbɛ n'i ɖo kɛntɔ́ e hú gǎn ɛ ɔ́ sí. Yě ná wá Sinyɔ́ɔ só ɔ́ ta kpó awǎjijɛ kpó xósúsú kpó. Yě ná dó ahwan gbě, bó yi nǔ ɖagbe ɖagbe e Mawu Mavɔmavɔ ná ná yě lɛ́ɛ kɔn; é ná ná blěe yě, bó ná vɛ̌ɛn yɔ̌yɔ́ yě, bó ná ami yě, bó ná gbɔ̌ kpódó nyibú kpó yě. Yě ná cí jikpá e è hǔ sin ná ganjí é ɖɔhun, yě sɔ́ ná nɔ adohu adohu jí ɖě ǎ. “Énɛ́ ɔ́, xomɛ ná hun ɖyɔ̌vǐ lɛ́ɛ bɔ yě ná ɖú we; xomɛ ná hun dɔ̌nkpɛvú lɛ́ɛ kpó mɛxó lɛ́ɛ lɔmɔ̌ kpó. Un ná sɔ́ aluwɛ yětɔn dó húzú awǎjijɛ; un ná súnsún ɖasin nú yě ɖo wǔvɛ́ yětɔn lɛ́ɛ mɛ, yě ká mɔ wǔvɛ́ fó ɔ́, un ná ná awǎjijɛ ɖaxó yě. Un ná ná lan ɖagbe gěgé vɔ̌sánú-xwlémawutɔ́ lɛ́ɛ; togun ce ná mɔ nǔ ɖagbe bo ɖu gɔ́ xo.” Xó e Mawu Mavɔmavɔ ɖɔ ɔ́ nɛ́. Xó e Mawu Mavɔmavɔ ɖɔ ɔ́ ɖíe: “È se mɛɖé ɖo xó sú wɛ ɖo Hlama, mɛ ɔ́ ɖo avǐ ya wɛ, bó ɖo alě ná wɛ tlala; Hlacɛ́li wɛ ɖo vǐ tɔn lɛ́ɛ ví wɛ. É jló ná se gbɔ ǎ, ɖó vǐ tɔn lɛ́ɛ sɔ́ ɖo fí ǎ.” Lo ɔ́, Mawu Mavɔmavɔ ɖɔ n'i ɖɔ: “Ma ya avǐ ó, súnsún nukún mɛ; un ná dó gbɔ nú we ɖó wǔvɛ́ e a mɔ lɛ́ɛ wú. Nyɛ Mawu Mavɔmavɔ wɛ ɖɔ mɔ̌. Vǐ towe lɛ́ɛ ná gosín kɛntɔ́ yětɔn lɛ́ɛ sín to mɛ bó lɛ́ kɔ wá.” Mawu Mavɔmavɔ ɖɔ: “Sɔ ná nyɔ́ nú we. Vǐ towe lɛ́ɛ ná lɛ́ kɔ wá to yětɔn mɛ. Togun ce Eflayímu ɖo alě ná wɛ bɔ un se céɖécéɖé; yě ɖo alě ná wɛ ɖɔ: ‘Mawu Mavɔmavɔ, a dɔn tó nú mǐ, nyibúsú e má se xwe ǎ é ɖɔhun. Lɛ̌ kɔ nú mǐ, bónú mǐ ná lɛ́ kɔ wá gɔ̌n towe nǔgbó, ɖó hwi wɛ nyí Mawu Mavɔmavɔ, Mawu mǐtɔn. Mǐ nɔ zɔ nú we, amɔ̌, din ɔ́, mɔ̌ e mǐ wa ɔ́ vɛ́ nú mǐ; mǐ mɔ nǔ jɛ hwɛ mǐtɔn lɛ́ɛ wú bɔ din ɔ́, mǐ yǐ hwɛ mǐtɔn lɛ́ɛ gbe. Wi mǐtɔn kɔ́n bɔ winnyá hu mǐ. Mǐ wa nǔ nyi do ɖo wǐnnyáwínnyá mɛ mǐtɔn, bó ɖo sin tɔn sún wɛ.’ ” Mawu Mavɔmavɔ ɖɔ: “Eflayímu ɔ́, vǐ vívɛ́ ce wɛ, un yí wǎn n'i tawun. Un ɖo xó tɔn ɖɔ wɛ lě ɔ́, un nɔ lɛ́ ɖo flínflín i d'é jí wɛ. Un yí wǎn n'i ɖésú. Nǔ tɔn nɔ́ blá wǔ nú mì titewungbe. Izlayɛ́li, ɖyɔ̌vǐ, ɖǒ wuntun ali e gbɔn wɛ a ɖe ɔ́, tun kpo gbɔn ali e jí a ɖe ɔ́ jí. Hɛn ayi towe ɖo ali e jí a ɖe ɔ́, kpɔ́n ali e a wlǐ é ganjí. Izlayɛ́li ɖyɔ̌vǐ, lɛ̌ kɔ wá, lɛ̌ kɔ wá toxo élɔ́ lɛ́ɛ e nyí towe lɛ́ɛ mɛ. Yɔkpɔ́víyɛ, a bǔ bǐ; flú e flú wɛ a ɖe ɔ́, hwetɛ́nu a nǎ ɖó te? Nyɛ Mawu Mavɔmavɔ bló nǔ yɔ̌yɔ́ ɖokpó dó gbɛ ɔ́ mɛ: nyɔ̌nu wɛ ná nɔ́ byɔ́ hǎ súnnu.” Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe, é ɖɔ: “Hwenu e un ná kplá mɛ e ahwan wlí yi to ɖěvo mɛ lɛ́ɛ wá xwé ɔ́, è nǎ ɖɔ gbɔn fí bǐ ɖo Judáa to ɔ́ mɛ ɖɔ: ‘Izlayɛ́li, Mawu Mavɔmavɔ ní xo ɖɛ dó jǐ we, só mímɛ́, só e jí hwɛjijɔ dó ɖɔ do nyi é.’ “Énɛ́ ɔ́, mɛ e ɖo Judáa toxo lɛ́ɛ mɛ lɛ́ɛ kpó mɛ e ɖo gletoxo lɛ́ɛ mɛ lɛ́ɛ kpó ná nɔ kpɔ́ ɖo to ɔ́ mɛ. Glesi lɛ́ɛ kpó kanlinnyitɔ́ lɛ́ɛ kpó ná nɔ to ɔ́ mɛ, kpó kanlin yětɔn lɛ́ɛ kpó. Đó un ná dó wǔsyɛ́n lanmɛ nú mɛ e nǔ cikɔ ná lɛ́ɛ, bó ná ná nǔ e hu dó mɛ e ma sɔ́ ɖó gǎn ǎ lɛ́ɛ é.” Xó énɛ́ jí wɛ un fɔ́n dó, lobo hun nukún. Un mɔ ɖɔ amlɔ e un dɔ́ ɔ́ wa ɖagbe nú mì ɖésú. Mawu Mavɔmavɔ ɖɔ: “Azǎn ɖé lɛ́ɛ ná wá, bɔ un ná fúnfún gbɛtɔ́ kpó kanlin kpó gbɔn axɔ́súɖuto Izlayɛ́li tɔn lɛ́ɛ kpó Judáa tɔn lɛ́ɛ kpó mɛ, lě e è nɔ hú nǔkún kɔ́n nyi gle mɛ é. Káká jɛ din ɔ́, un húzú kpan nukɔn yě, bó hɔn yě atín ɖɔhun; un gbo yě atín ɖɔhun; un hɛn nǔ gblé; un dó nǔ ahannya; un wa nǔ xá yě; amɔ̌, din ɔ́, un ná bló nǔ bǐ nú yě bó ná vɔ́ yě gbá xɔ ɖɔhun; un ná vɔ́ yě tun atín ɖɔhun. Nyɛ Mawu Mavɔmavɔ wɛ ɖɔ mɔ̌. Azǎn énɛ́ lɛ́ɛ gbe ɔ́, mɛ ɖěbǔ sɔ́ ná dó lǒ élɔ́ ǎ: ‘Tɔ́ kpó nɔ kpó ɖu vǐwun xɛ́lú, lo ɔ́, vǐ yětɔn sín aɖǔ wɛ ká jí.’ Ɖó hwɛ e mɛ ɖokpó ɖokpó hu ɔ́ sín kú wɛ ná hu i. Mɛ e ɖu vǐwun xɛ́lú e sín aɖǔ wɛ ná jí.” Mawu Mavɔmavɔ ɖɔ: “Azǎn ɖé lɛ́ɛ ná wá, bɔ un ná jɛ akɔ yɔ̌yɔ́ ɖé xá Izlayɛ́li togun ɔ́ kpó Judáa togun ɔ́ kpó. É ná cí akɔ e un jɛ xá tɔ́gbó yětɔn lɛ́ɛ, gbe e gbe un hɛn alɔ yětɔn, bó ɖe yě tɔ́n sín Ejípu, lobɔ yě ma nɔ gbejí ná ǎ é ɖɔhun ǎ. Nyi wɛ kpa acɛ nú tɔ́gbó yětɔn lɛ́ɛ có yě ká nɔ gbejí nú akɔ e un jɛ xá yě ɔ́ ǎ.” Mawu Mavɔmavɔ ɖɔ: “Azǎn énɛ́ lɛ́ɛ gúdo ɔ́, akɔ e un ná jɛ xá Izlayɛ́li togun ɔ́ ɖíe: Un ná wlán sɛ́n ce dó taglo yětɔn mɛ, un ná wlán dó ayi yětɔn mɛ. Un ná nyí Mawu yětɔn, bɔ yě ná nyí togun ce. Mɛ ɖěbǔ ná ɖo yě mɛ, bó ná ɖɔ émí ná yi mɔ nɔzo émítɔn lɛ́ɛ, nɔví émí tɔn lɛ́ɛ, bó ná kplɔ́n nǔ yě ɖɔ yě ní wá tunwun nyɛ Mawu Mavɔmavɔ ǎ, ɖó yě bǐ na ko tunwun mì, bɛ́ sín yɔkpɔ́vú jí káká yi jɛ mɛxó jí. Un ná sɔ́ nǔ e yě wa nyi do ɔ́ bǐ kɛ yě, bó sɔ́ ná flín hwɛ e yě hu dó mì lɛ́ɛ ǎ.” Xó e Mawu Mavɔmavɔ ɖɔ é nɛ́. Mawu Mavɔmavɔ wɛ bló hwe, bɔ é nɔ́ za wě kéze; é wɛ bló sun kpó sunví lɛ́ɛ kpó, bɔ yě nɔ́ za wě zǎn mɛ; é wɛ nɔ́ dán xu, bɔ aslɔkɛ́ lɛ́ɛ nɔ sí te; nyǐkɔ tɔn nɔ́ nyí Mawu Mavɔmavɔ Nǔbǐwúkpétɔ́. Xó e é ɖɔ ɔ́ ɖíe: “Gbe e gbe nǔ énɛ́ lɛ́ɛ ná hwe dó azɔ̌ e un zɔ́n yě lɛ́ɛ wú ɔ́, gbe énɛ́ gbe ɔ́, Izlayɛ́li ví lɛ́ɛ lɔmɔ̌ sɔ́ ná nyí akɔta ɖo nukɔn ce gbeɖé ǎ.” Mawu Mavɔmavɔ ɖɔ: “Ényí mɛ ɖé sixú jlɛ́ jǐ yiyi jǐnukúnsin tɔn, abǐ mɛ ɖé sixú mɔ nǔ jɛ ayǐkúngban sín dodó lɛ́ɛ wú ɔ́, énɛ́ ɔ́, un ná ɖe alɔ sín Izlayɛ́li ví lɛ́ɛ bǐ sín kan mɛ, ɖó nǔ nyanya e yě dó sin lɛ́ɛ wú.” Xó e Mawu Mavɔmavɔ ɖɔ é nɛ́. Mawu Mavɔmavɔ ɖɔ: “Azǎn ɖé lɛ́ɛ ná wá, bɔ è na vɔ̌ toxo ɔ́ bló ɖó, bó ná dó sɔ́ mì su. È nǎ vɔ̌ Jeluzalɛ́mu toxo ɔ́ bló ɖó, bɛ́ sín mɛcɔ́kpe Hananɛ́li tɔn kɔn káká wá Zwemɛhɔntogbó ɔ́ jí. Toxo ɔ́ sín dogbó yɔ̌yɔ́ ɔ́, è nǎ nyi kan tɔn ɖidó Galɛ́vu só ɔ́ kɔn kpan ta gbadahwe jí, bó ná lílɛ́ sín fínɛ́ ɖidó Gowa. Énɛ́ ɔ́, mɛkúkú lɛ́ɛ sín tɔdo e mɛ afín gɔ́ ɔ́, kpódó ayǐkúngban vɔ̌tɔ́ e zɔn mɔ̌ káká yi Sedlɔ́n tɔ ɔ́ kɔn, bó zɔn mɔ̌ káká yi sɔ́ lɛ́ɛ sín hɔntogbó sín zwe mɛ ɖo zǎnzǎnhwe jí ɔ́, è nǎ sɔ́ ayǐkúngban énɛ́ lɛ́ɛ bǐ ɖó vo nú mì. Mɛ ɖé sɔ́ ná yí ayǐkúngban énɛ́ lɛ́ɛ ɖě ǎ, mɛɖé ká sɔ́ ná gba nǔ ɖo ayǐkúngban énɛ́ lɛ́ɛ jí ǎ.” Hwenu e Judáa xɔ́sú Sedesíyasi ɖo xwe wǒ bló wɛ ɖo zinkpo jí ɔ́, Mawu Mavɔmavɔ ɖɔ xó nú Jelemíi. Hwenɛ́nu ɔ́, Nabukodonɔzɔ́ɔ Babilɔ́nu xɔ́sú ɔ́ ɖo xwe afɔtɔn-nukún-atɔn bló wɛ ɖo zinkpo jí. Hwenɛ́nu wɛ axɔ́sú Babilɔ́nu tɔn sín ahwangɔnu xá Jeluzalɛ́mu toxo ɔ́; gbeyíɖɔ Jelemíi ka ɖo gankpá mɛ ɖo axɔ́sú Judáa tɔn sín hɔnmɛ, ɖo fí e sɔ́ja e nɔ cɔ́ axɔ́sú ɔ́ lɛ́ɛ nɔ́ nɔ ɔ́ sín kɔ́xota. Judáa xɔ́sú Sedesíyasi wɛ wlí i ɖó fínɛ́, ɖó xó e Jelemíi ɖɔ dó Mawu nyíkɔ mɛ ɔ́ vɛ́ wǔ tɔn; xó é Jelemíi ɖɔ ɔ́ ɖíe: “Mawu Mavɔmavɔ ɖɔ: ‘Un ná jó Jeluzalɛ́mu nú Babilɔ́nu xɔ́sú ɔ́, bɔ é ná yí. Judáa xɔ́sú Sedesíyasi lɔ ná gló Babilɔ́nunu lɛ́ɛ ǎ, ɖó un ná jó e nú Babilɔ́nu xɔ́sú ɔ́, bɔ é ná yi Babilɔ́nu xɔ́sú ɔ́ nukɔn, bɔ yě ná kpé nu bo ɖɔ xó. Axɔ́sú Babilɔ́nu tɔn ná kplá Sedesíyasi yi Babilɔ́nu, bɔ é ná nɔ fínɛ́ káká jɛ hwenu e un ná flín i dó é. Ényí mi fun ahwan xá Babilɔ́nunu lɛ́ɛ ɔ́, é ná kpa mi gbeɖé kpɔ́n ǎ. Xó e nyɛ Mawu Mavɔmavɔ ɖɔ é nɛ́.’ ” Jelemíi ɖɔ: “Mawu Mavɔmavɔ ɖɔ nú mì ɖɔ: ‘Éɖíe, Calúmu tɔ́ towe nɔví ví ɔ́, vǐ tɔn Hanamɛ́li ná wá mɔ we, bó ná ɖɔ nú we ɖɔ hwi ní xɔ gle émítɔn e ɖo Anatɔ́ti é, ɖó hwi wɛ nyí mɛ tɔn e sɛkpɔ́ ɛ ganjí é; hǔn hwi wɛ nyí mɛ nukɔntɔn e ɖó acɛ e ná vɔ́ gle ɔ́ xɔ é.’ ” Nǔgbó ɔ́, tɔ́ ce nɔví ví Hanamɛ́li ɔ́ wá gɔ̌n ce, lě e Mawu Mavɔmavɔ ɖɔ gbɔn é. É wá gɔ̌n ce ɖo fí e sɔ́ja e nɔ cɔ́ axɔ́sú ɔ́ lɛ́ɛ nɔ́ nɔ é sín kɔ́xota, bó ɖɔ: “Wǎ xɔ gle ce e ɖo Anatɔ́ti, ɖo Bɛnjamɛ́ɛ yíkúngban jí é, ɖó hwi wɛ nyí mɛ ce e sɛkpɔ́ mì ganjí é; hǔn hwi wɛ nyí mɛ nukɔntɔn e ɖó acɛ e ná vɔ́ gle ɔ́ xɔ é, bɔ é ná nyí towe.” Ée é ɖɔ mɔ̌ ɔ́, un mɔ ɖɔ Mawu Mavɔmavɔ wɛ ɖɔ xó nú mì nǔgbó. Un xɔ Hanamɛ́li sín gle e ɖo Anatɔ́ti é nǔgbó, bó sú axɔ́. Gankwɛ́ afɔtɔn-nukún-we wɛ un sú i. Un bló gle ɔ́ sín wěma ɖó we jí; un sú wěma ɔ́ ɖokpó ɖo kúnnuɖetɔ́ nukɔn, bó sɔ́ nǔ e un nɔ dó ɖó wuntun nǔ ná ɔ́ dó ɖó wuntun, bó da akwɛ́ e un dó xɔ gle ɔ́ ná é kpɔ́n ɖo gan jí. Un zé wěma e un sú bó ɖó wuntun é, lě e sɛ́n ɔ́ kpódó walɔ mǐtɔn kpó ɖɔ gbɔn ɔ́, lobo sɔ́ ée è ma sú ǎ é lɔmɔ̌. Un bɛ́ wěma we lɛ́ɛ bǐ nú Baalúki Nɛliya ví, Maxiseya vívú ɔ́. Tɔ́ ce nɔví ví Hanamɛ́li e sa gle ɔ́ ɖo te, kúnnuɖetɔ́ ce e dó alɔ wěma ɔ́ mɛ lɛ́ɛ ɖo te, Judáanu e ɖo fí e sɔ́ja e nɔ cɔ́ axɔ́sú ɔ́ nɔ́ nɔ é sín kɔ́xota lɛ́ɛ bǐ ɖo fínɛ́. Un ɖɔ nú Baalúki ɖo mɛ bǐ nukún mɛ ɖɔ: “Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Zě wěma e è sú bó ɖó wuntun é kpódó ée ɖo nuvo e kpó, bó bɛ́ bǐ dó kozɛ́n ɖokpó mɛ, bónú yě ná nɔ ayǐ ganjí.’ “Nyɛ Mawu Mavɔmavɔ Nǔbǐwúkpétɔ́ Mawu Izlayɛ́li tɔn ɖɔ: ‘É ná lɛ́ wá su gbe ɖokpó ɖo to mɛ fí, bɔ è nǎ lɛ̌ xɔ xwé, bó xɔ gle, bó xɔ vǐwungbo.’ ” Ée un zé wěma ɔ́ jó nú Baalúki Nɛliya ví ɔ́, un ɖɔ xó xá Mawu Mavɔmavɔ; un ɖɔ n'i ɖɔ: “Aklúnɔ Mavɔmavɔ, a sɔ́ hlɔ̌nhlɔ́n towe ɖaxó ɔ́ dó bló jǐnukúnsin kpó ayǐkúngban kpó dó ɖe gǎnhúnǔ towe xlɛ́. Nǔɖé syɛ́n bó hú gǎn we ǎ. A nɔ ɖe xomɛnyínyɔ́ towe xlɛ́ gbɛtɔ́ afatɔ́n (1.000) afatɔ́n (1.000) do mɔ̌kpán; amɔ̌, a nɔ lɛ́ dɔn tó nú mɛ lɛ́ɛ, ɖó hwɛ e mɛjitɔ́ yětɔn lɛ́ɛ hu é wú. Hwi wɛ nyí Mawu ɖaxó hlɔ̌nhlɔ́nnɔ ɔ́, nyǐkɔ towe nɔ́ nyí Mawu Mavɔmavɔ Nǔbǐwúkpétɔ́. Hwi wɛ ɖó tito ɖaxó ɖaxó lɛ́ɛ, bó nɔ́ kpé yě wǔ bó nɔ́ bló. A nɔ kpɔ́n nǔ e wa wɛ mɛ ɖokpó ɖokpó ɖe ɔ́ céɖécéɖé, lobo nɔ́ bló nǔ nú mɛ ɖokpó ɖokpó, bɔ é nɔ́ sɔgbe xá lě e é zán gbɛ tɔn gbɔn é, bó nɔ́ sɔgbe xá nǔ e é bló lɛ́ɛ. “A jlɛ̌ nǔ tɛnmɛ tɛnmɛ lɛ́ɛ, bó bló nǔjíwǔ tɛnmɛ tɛnmɛ ɖo Ejípu, bó lɛ́ ɖ'é wú ɖo Izlayɛ́li, bó ɖ'é wú ɖo gbɛtɔ́ lɛ́ɛ tɛ́ntin káká wá jɛ égbé, bó dó jɛ nyǐkɔ lě e mɔ gbɔn wɛ è ɖe égbé din é. A jlɛ̌ nǔ ɖaxó ɖaxó, nǔ hu ado dó ɖe togun towe tɔ́n sín Ejípu; a blǒ mɔ̌ dó ɖe hlɔ̌nhlɔ́n towe kpó nǔwúkpíkpé towe kpó xlɛ́. A dǒ akpá nú tɔ́gbó mǐtɔn lɛ́ɛ bó xwlé nǔ d'é jí ɖɔ émí ná ná yě to élɔ́; to élɔ́ e mɛ wǐin kpó anɔ̌sin kpó nɔ́ sa ɖe é, bó ka ná yě nǔgbó. Yě wá yí to ɔ́. Amɔ̌, yě ɖótó gbe towe ǎ, yě nyi sɛ́n towe ǎ. Nǔ e a ɖɔ yě ní wa lɛ́ɛ ɔ́, yě bló ǎ. Énɛ́ ɔ́ wú wɛ a sɛ́ nǔ nyanya e ɖo jijɛ wɛ égbé din ɔ́ bǐ dó. “Din ɔ́, Babilɔ́nunu lɛ́ɛ ɖíe sɔ́ ahwannú, bó ɖo sisɛkpɔ́ toxo ɔ́ wɛ, bó ná wá yí toxo ɔ́. Hwǐ kpó adɔ kpó jɛmɛjí kpó wɛ yě jló ná dó yí toxo ɔ́; hwi ɖésú mɔ din ɖɔ nǔ e a ɖɔ ɔ́ jɛ. Énɛ́! Toxo ɔ́ bǐ ɖíe ko ɖibla jɛ Babilɔ́nunu lɛ́ɛ lɔ mɛ e. Aklúnɔ, Mawu Mavɔmavɔ, nɛ̌ ká gbɔn bɔ a nǎ gbe mì ɖɔ nyi ní xɔ gle énɛ́, bó sú axɔ́ ɖo kúnnuɖetɔ́ nukɔn?” Mawu Mavɔmavɔ ɖɔ nú Jelemíi ɖɔ: “Nyɛ wɛ nyí Mawu Mavɔmavɔ, Mawu gbɛtɔ́ lɛ́ɛ bǐ tɔn. Nǔ ɖěbǔ gló mì ǎ. Énɛ́ wú wɛ nyɛ Mawu Mavɔmavɔ ɔ́, un na jó toxo élɔ́ nú Nabukodonɔzɔ́ɔ Babilɔ́nu xɔ́sú ɔ́ kpó ahwanfuntɔ́ tɔn lɛ́ɛ kpó, bɔ é ná yí. Babilɔ́nunu e ɖo ahwan tɔ́n ɛ wɛ lɛ́ɛ ná byɔ́ toxo ɔ́ mɛ, bó ná dó toxo ɔ́ zo; ɖo tají ɔ́, xwé e gbe è nɔ dó zǎlínkpɔ́n zo nú vodún Baalu ɖe, bó nɔ ba ahan nú nǔmɛsɛn lɛ́ɛ ɖe, bó ná dó dó xomɛsin nú mì ɖe lɛ́ɛ ɔ́, Babilɔ́nunu lɛ́ɛ na dó bǐ zo. “Đó Izlayɛ́li ví lɛ́ɛ kpó Judáanu lɛ́ɛ kpó ɔ́, sín vǔ wɛ yě kó ɖo nǔ e má nyɔ́ nukún ce mɛ ǎ lɛ́ɛ wa wɛ. Izlayɛ́li ví lɛ́ɛ ɔ́, nǔwiwa yětɔn lɛ́ɛ bǐ wɛ nɔ dó xomɛsin nú mì; nyɛ Mawu Mavɔmavɔ wɛ ɖɔ mɔ̌. Sín gbe e gbe è ɖǒ Jeluzalɛ́mu toxo ɔ́ ayǐ ɔ́ jɛ́n é kó ɖo xomɛsin dó nú mì wɛ, bó ɖo winnyá dó mì wɛ káká wá jɛ égbé; nǔ énɛ́ wɛ zɔ́n bɔ un ma sɔ́ jló ná mɔ ɛ ɖó nukún wú ǎ. Nǔ nyanya e Izlayɛ́linu lɛ́ɛ kpó Judáanu lɛ́ɛ kpó wa ɔ́ vɛ́ nú mì. Nǔ e yě kpó axɔ́sú yětɔn lɛ́ɛ, gǎn yětɔn lɛ́ɛ, vɔ̌sánú-xwlémawutɔ́ yětɔn lɛ́ɛ, gbeyíɖɔ yětɔn lɛ́ɛ, Jeluzalɛ́munu lɛ́ɛ kpó Judáanu ɖě lɛ́ɛ kpó wa ɔ́ vɛ́ nú mì. Yě mɛ énɛ́ lɛ́ɛ e ɖó ná wá gɔ̌n ce ɔ́ dó gǔdo mì. Un ka ná gɔn nǔ kplɔ́n yě ǎ; un dó vɛ̌ nú yě ǎ. Lo ɔ́, yě ɖótó mì ǎ; yě yí gbe bó yí kplɔ́n ǎ. Yě bɛ́ bǒcyɔ yětɔn lɛ́ɛ wá ɖó xwé ce gbe, xwé e è sɔ́ ɖó vo nú mì é gbe, lobo ɖu su nú xwé ce. Yě blǒ tɛnmɛ ɖó gbɔn tɔdo Hinnɔ́ɔ tɔn mɛ nú vodún Baalu, bó nɔ hu vǐ yětɔn súnnu kpó nyɔ̌nu kpó dó vodún Mɔlɛ́ki gbɔn fí énɛ́ lɛ́ɛ. Un ka zɔ́n nǔ mɔ̌hun yě gbeɖé kpɔ́n ǎ; un ka lin lɔ ɖɔ yě ná dó nǔ mɔ̌hun sin kpɔ́n ǎ. Nǔ baɖabaɖa énɛ́ lɛ́ɛ e yě dó sin ɔ́ dɔn togun Judáa tɔn dó hwɛ mɛ. “Mi ɖɔ dó Jeluzalɛ́mu toxo ɔ́ wú ɖɔ ahwan, adɔ kpó jɛmɛjí kpó wɛ jó Jeluzalɛ́mu toxo ɔ́ nú Babilɔ́nu xɔ́sú ɔ́. É nyɔ́, din ɔ́, xó e nyɛ Mawu Mavɔmavɔ, Mawu Izlayɛ́li tɔn ɖó bó ná ɖɔ dó toxo élɔ́ wú ɔ́ nɛ́. Đ'ayǐ ɔ́, un sin xomɛ dó toxo élɔ́ ɖésú; énɛ́ wú wɛ un ɖo xomɛsin jí bó gba yě dó gbɔn tomɛ tomɛ. Amɔ̌, din ɔ́, un ná xo yě kplé, un ná kplá yě wá fí, bɔ yě ná vo. Énɛ́ ɔ́, yě ná lɛ́ nyí togun ce, bɔ un ná nyí Mawu yětɔn. Un nǎ sɔ́ ayixa ɖokpó ɔ́ dó xomɛ nú yě, bó ná ná walɔ ɖokpó ɔ́ yě, bɔ yě ná nɔ́ ɖó sísí nú mì káká sɔ́yi; énɛ́ ɔ́, nǔ ná nyɔ́ nú yě, bó ná nyɔ́ nú vǐ yětɔn lɛ́ɛ. Un zin alɔ dó akɔ́n ɖɔ un kún sɔ́ ná ɖe alɔ sín kan yětɔn mɛ ɖě ó; lo ɔ́, un ná wa ɖagbe nú yě. Énɛ́ ɔ́, wú ɔ́, un ná jɛ akɔ mavɔ mavɔ ɖokpó xá yě; un ná kplɔ́n yě bɔ yě ná ɖó sísí nú mì káká bó sɔ́ ná jó mì dó ɖě ǎ. Đagbe wa nú yě ná nɔ víví nú mì; un ná ɖó tɛnmɛ nú yě ɖó to ɔ́ mɛ fí kpó xomɛ kpó, bɔ yě ná nɔ to ɔ́ mɛ sɔ́yi. “Xó e Mawu Mavɔmavɔ lɛ́ ɖɔ ɔ́ ɖíe: nyɛ wɛ sɛ́ awě ɖaxó énɛ́ dó bɔ é xo togun Judáa tɔn; mɔ̌ ɖokpó ɔ́, ɖagbe e sín akpá un dó nú yě ɔ́, nyɛ jɛ́n ná lɛ́ ná bǐ yě. Mi nɔ ɖɔ: toxo élɔ́ ɔ́, Babilɔ́nunu lɛ́ɛ lɔ mɛ wɛ é ɖe; din ɔ́, gbětótló wɛ; mɛɖé sɔ́ ɖ'é mɛ ǎ, kanlin vɔ́vɔ́ ɖ'é mɛ ǎ. Mi nɔ ɖɔ mɔ̌ có è nǎ lɛ́ jɛ gle xɔ jí ɖo to énɛ́ mɛ. Nǔgbó wɛ, è nǎ xɔ gle gbɔn Bɛnjamɛ́ɛ yíkúngban ɔ́ jí, bó xɔ gbɔn Jeluzalɛ́mu sín tokpɔnla ɔ́ mɛ, bó xɔ gbɔn Judáa toxo lɛ́ɛ mɛ, bó xɔ gbɔn toxo e ɖo só jí lɛ́ɛ mɛ, bó xɔ gbɔn toxo e ɖo dodomɛ lɛ́ɛ mɛ, bó xɔ gbɔn toxo ɔ́ sín afɔligbé. Énɛ́ ɔ́, è nǎ nɔ́ bló wěma e ɖe xlɛ́ ɖɔ è sa gle lɛ́ɛ ɖo kúnnuɖetɔ́ nukɔn bó sú axɔ́ bó ɖó wuntun. Un ná bló bɔ yě ná ɖó ninɔmɛ e yě kó ɖó ɖ'ayǐ é.” Xó e Mawu Mavɔmavɔ ɖɔ ɔ́ nɛ́. Hwenu e Mawu Mavɔmavɔ ɖɔ xó nú Jelemíi azɔn wegɔ́ ɔ́, é kpo ɖo gankpá mɛ, ɖo sɔ́ja e nɔ cɔ́ axɔ́sú ɔ́ lɛ́ɛ sín kɔ́xota. Xó e Mawu Mavɔmavɔ ɖɔ ɔ́ ɖíe; Mawu Mavɔmavɔ e bló ayǐkúngban, bó ɖó tɛn ná ɔ́, éyɛ́ mɛ e nyǐkɔ tɔn nɔ́ nyí Mawu Mavɔmavɔ ɔ́, xó e é ɖɔ é ɖíe: “Sú xó ylɔ́ mì, un nǎ sɔ́ nú we; nǔ ɖaxó ɖaxó, nǔ e ɖo hwlǎhwlá bɔ a ma tunwun ǎ lɛ́ɛ ɔ́, un nǎ ɖɔ yě nú we. Xó e Nyɛ Mawu Mavɔmavɔ, Mawu Izlayɛ́li tɔn ɖɔ dó xwé e ɖo toxo élɔ́ mɛ lɛ́ɛ kpódó Judáa xɔ́sú lɛ́ɛ sín xwé lɛ́ɛ kpó wú é ɖíe: è nǎ xá toxo ɔ́ bó tɔ́n ahwan toxo ɔ́, bó gba xwé lɛ́ɛ. Mi má xaji ɖɔ émí ná fun ahwan xá Babilɔ́nunu e wá tɔ́n ahwan mi lɛ́ɛ é ó; mi bló mɔ̌ ɔ́, un ná hu gbɛtɔ́ tɛ́ gbɔn toxo ɔ́ mɛ ɖó nǔ nyanya e mi wa bɔ xomɛ mitɔn sin mì lɛ́ɛ wú. Jeluzalɛ́munu lɛ́ɛ dó nǔ nyanya sin káká bɔ un ɖe alɔ sín toxo yětɔn wú. “É ká ɖo mɔ̌ có un ná kpé nukún dó toxo ɔ́ wú lě e è nɔ kpé nukún dó mɛ e gblé wǔ é wú ɔ́ ɖɔhun. Un ná gbɔ azɔn n'i, bɔ é ná jɛ te. Un ná ná fífá kpó ayij'ayǐ kpó mɛ e ɖo toxo ɔ́ mɛ lɛ́ɛ. Un ná lɛ́ sɔ́ togun Judáa tɔn ɔ́, kpó togun Jeluzalɛ́mu tɔn kpó sí te; un ná lɛ́ sɔ́ yě ɖó tɛn e mɛ yě kó ɖe ɖ'ayǐ ɔ́ mɛ. Un ná súnsún hwɛ e yě hu dó mì lɛ́ɛ bǐ, bɔ gǔ e yě fɔ́n dó jǐ ce tɛnmɛ tɛnmɛ ɔ́, un ná zé bǐ kɛ yě, lobo ná zé yě dó húzú mɛ mímɛ́. Hwenɛ́nu lo ɔ́, un ylɔ́ Jeluzalɛ́mu sín nyǐkɔ ɔ́, é ná nɔ́ víví nú mì. É wɛ un ná nɔ́ dó ba acɔ́ ná ɖo akɔta e ɖo ayǐkúngban ɔ́ jí lɛ́ɛ bǐ nukɔn. Hwenu e akɔta lɛ́ɛ na se ɖagbe e wa nú Jeluzalɛ́mu gbé un ja ɔ́, xɛsi ná ɖi yě, bɔ yě ná sísɔ́. Nú yě mɔ nyɔ̌ná e un ná Jeluzalɛ́mu ɔ́, kpó lě e nǔ tɔn lɛ́ɛ ɖo nukɔn yi gbɔn wɛ ɔ́ kpó ɔ́, ado ná hu yě.” Mawu Mavɔmavɔ ɖɔ: “Mi Judáanu lɛ́ɛ ɔ́, mi nɔ ɖɔ to émítɔn gba, gbɛtɔ́ ɖě kún sɔ́ ɖo to ɔ́ mɛ ǎ. Nǔgbó wɛ, Judáa toxo lɛ́ɛ kpó Jeluzalɛ́mu sín ali lɛ́ɛ kpó bǐ jɛ vɔ̌; nǔ ɖěbǔ sɔ́ ɖo gbɛ ɖo to ɔ́ mɛ ǎ, gbɛtɔ́ bǐ kú, kanlin bǐ kú. Amɔ̌, din ɔ́, è nǎ lɛ̌ se bɔ è nǎ ɖo xwe ɖu wɛ bó ɖo awǎ jɛ wɛ, bó ná lɛ́ se mɛ e wlí alɔ yɔ̌yɔ́ lɛ́ɛ ɖo han ji wɛ. È nǎ lɛ́ se bɔ mɛ lɛ́ɛ ná ɖo han ji wɛ ɖɔ: ‘Mi kpa Mawu Mavɔmavɔ, Nǔbǐwúkpétɔ́ ɔ́, ɖó é nyɔ́. Wǎn yíyí tɔn ɖó dogbó ǎ.’ È nǎ lɛ́ se mɛ lɛ́ɛ ɖo han ji wɛ xwe vɔ̌ sá gbé ɖo Mawu Mavɔmavɔ xwé. Đó nyɛ Mawu Mavɔmavɔ ná lɛ́ sɔ́ to élɔ́ ɖó lě e é kó ɖe ɖ'ayǐ é.” Mawu Mavɔmavɔ wɛ ɖɔ mɔ̌. Xó e Mawu Mavɔmavɔ Nǔbǐwúkpétɔ́ ɖɔ é ɖíe: “To élɔ́ e jɛ vɔ̌, bɔ è ma sɔ́ nɔ́ mɔ gbɛtɔ́ kpó kanlin kpó ɖěbǔ ɖe ǎ é mɛ jɛ́n è nǎ lɛ́ mɔ kanlinnyitɔ́ lɛ́ɛ ɖe, bɔ yě ná nɔ́ kpé nukún dó lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó wú zǎn mɛ. È nǎ lɛ́ mɔ kanlinnyitɔ́ bɔ yě ná ɖo lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó xa wɛ, ɖo toxo e ɖo só jí lɛ́ɛ kpó toxo e ɖo dodomɛ lɛ́ɛ mɛ, bó ná mɔ ɖo toxo e ɖo tofɔligbé lɛ́ɛ kpó toxo e ɖo Bɛnjamɛ́ɛ gbé ɔ́ jí lɛ́ɛ kpó mɛ, bó ná lɛ́ mɔ ɖo tokpɔnla lɛ́ɛ kpó toxo e ɖo Judáa lɛ́ɛ kpó mɛ.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Azǎn e gbe un ná ɖe akpá e un dó nú Izlayɛ́li togun ɔ́ kpó Judáa togun ɔ́ kpó é ja. Hwenɛ́nu su ɔ́, un ná sɛ́ Davídi ví nǔgbó ɖokpó dó. É ná xwedó sɛ́n dó wa nǔ ɖo to ɔ́ mɛ, bó na nɔ́ wa nǔ lě e un jló gbɔn é. Énɛ́ ɔ́, axɔ́súɖuto Judáa tɔn ná jɛ éɖée sí; Jeluzalɛ́mu ná mɔ agbɔ̌n bó vo. Hwenɛ́nu ɔ́, è nǎ nɔ́ ylɔ́ Jeluzalɛ́mu ɖɔ: ‘Mawu Mavɔmavɔ wɛ nyí hwɛjijɔ mǐtɔn.’ ” Đó xó e Mawu Mavɔmavɔ ɖɔ é ɖíe: “Axɔ́sú Davídi ná ba vǐ tɔn e ná nɔ Izlayɛ́li zinkpo jí ɔ́ kpo gbeɖé ǎ. Mɔ̌ ɖokpó ɔ́, vɔ̌sánú-xwlémawutɔ́ Levíi ví ná hán gbeɖé ǎ; Levíi ví ɖě ná tíin dandan, bó ná ɖo gɔ̌n ce, bó ná xwlé vɔ̌sánú blěbǔ mì, bó ná nɔ́ xwlé vɔ̌ e è nɔ dó zo é mì, bɔ azɔ tɔn ná nɔ́ si wá gɔ̌n ce; é ná nɔ́ xwlé kɔnɖókpɔ́ vɔ́ mì.” Mawu Mavɔmavɔ ɖɔ nú Jelemíi ɖɔ: “Nyɛ Mawu Mavɔmavɔ wɛ ɖo xó ɖɔ wɛ; mi sixú gba akɔ e un jɛ xá kéze kpó zǎn kpó é ǎ; mi sixú gba bɔ é su hwenu e zǎn nɔ́ kú ɔ́, zǎn ná gɔn kúkú, bɔ é su hwenu e ayǐ nɔ́ hɔ́n ɔ́, ayǐ ná gɔn hǐnhɔ́n a? Mɔ̌ ɖokpó ɔ́, akɔ e un jɛ xá mɛsɛntɔ́ ce Davídi ɔ́ sixú ɖo nǎ gblé wɛ káká bónú vǐ e ná ɖu axɔ́sú ɖo do tɔn mɛ ɔ́ ná han ǎ. Akɔ e un ka jɛ xá vɔ̌sánú-xwlémawutɔ́ Levíi ví lɛ́ɛ ɔ́ sixú ɖo nǎ gblé wɛ bónú yě ná gɔn azɔ̌ ce wa ǎ. Un ná bló bɔ mɛsɛntɔ́ ce Davídi sín ví lɛ́ɛ kpódó Levíi ví e nɔ́ xwlé vɔ̌sánú mì lɛ́ɛ kpó ná gba kún; yě ná sukpɔ́ sunví e ɖo jǐxwé lɛ́ɛ ɖɔhun, è nǎ sixú xa yě ǎ; yě ná sukpɔ́ nyɛ̌kɛ́n e ɖo xutó é ɖɔhun.” Mawu Mavɔmavɔ ɖɔ xó nú Jelemíi, bó ɖɔ: “Nǔ e ɖɔ wɛ mɛ lɛ́ɛ ɖe ɔ́, a se ǎ cé? Yě nɔ́ ɖɔ nyi ɖe alɔ sín togun we e un sɔ́ lɛ́ɛ sín kan mɛ; yě ɖɔ nyi ɖe alɔ sín Judáa kpó Jeluzalɛ́mu kpó sín kan mɛ. Yě mɛ e nɔ ɖo mɔ̌ ɖɔ wɛ lɛ́ɛ sɔ́ nɔ́ mɔ togun ce dó mɔ akɔta ná ǎ, yě nɔ́ ké ya n'i ǎ. Lo ɔ́, xó e un ɖɔ é ɖíe: un jɛ akɔ xá zǎn kpó kéze kpó; un ɖɔ lě e jǐnukúnsin kpó ayǐkúngban kpó ná wa nǔ gbɔn é nú yě. Ée nǔ ɖo mɔ̌ ɔ́, è sixú lin ɖɔ nyi ná jó Jakɔ́bu sín vǐ lɛ́ɛ kpó mɛsɛntɔ́ ce Davídi sín ví lɛ́ɛ kpó dó a? Abǐ è sixú lin ɖɔ gǎn e ná kpa acɛ dó Ablaxámu ví lɛ́ɛ, Izáki ví lɛ́ɛ kpó Jakɔ́bu ví lɛ́ɛ kpó nu lɛ́ɛ ɔ́, un kún ná zé ɖo yě mɛ ó a? “Un sixú bló mɔ̌ gbeɖé kpɔ́n ǎ! Un yí wǎn nú yě ɖésú. Un ná lɛ́ sɔ́ yě ɖó lě e yě kó ɖe ɖ'ayǐ é.” Axɔ́sú Babilɔ́nu tɔn Nabukodonɔzɔ́ɔ tɔ́n ahwan Jeluzalɛ́mu kpó Judáa toxo ɖě lɛ́ɛ kpó. É kplá ahwangɔnu tɔn bǐ: É cyán sɔ́ja gbɔn axɔ́súɖuto lɛ́ɛ bǐ mɛ, bó cyán gbɔn togun e ɖo acɛ tɔn mɛ lɛ́ɛ mɛ. Hwe énɛ́ nu wɛ Mawu Mavɔmavɔ ɖɔ xó élɔ́ nú Jelemíi. “Xó e nyɛ Mawu Mavɔmavɔ, Mawu Izlayɛ́li tɔn ɖɔ é ɖíe: un jló ná sɛ́ we dó Judáa xɔ́sú Sedesíyasi gɔ́n; yi mɔ ɛ, bó ɖɔ n'i ɖɔ Mawu Mavɔmavɔ ɖɔ un ná jó toxo élɔ́ nú Babilɔ́nu xɔ́sú ɔ́, bɔ é ná dó zo. Hwɛ ɔ́, a sixú gló e ǎ; è nǎ wlí we, bó ná jó we n'i. A ɖǒ ná yi mɔ ɛ, bɔ mi ná kpan nukɔn miɖée, bɔ a nǎ sɔ́ nu towe dó ɖɔ lě e a wa nǔ gbɔn é n'i cóbó ná yi Babilɔ́nu. “Axɔ́sú Sedesíyasi, nǔ ka ɖo mɔ̌ có, ényí a wa nǔ e un ɖɔ nú we ɔ́, a nǎ kú hwǐ kú ǎ. Nyɛ Mawu Mavɔmavɔ ɔ́ wɛ ɖɔ mɔ̌ nú we. Alɔ wɛ a ɖó ná ɖó kɔ bó kú, bɔ è nǎ wa nǔ towe lě e è wa tɔ́gbó towe e ɖu axɔ́sú dó nukɔn nú we lɛ́ɛ tɔn gbɔn é. È nǎ dó zǎlínkpɔ́n zo ɖo cyɔ towe nu, bó ji nǔwamɛhan dó ví we ɖɔ: ‘Cóxóxowǒóo, zǎn kú ɖo hɔnmɛ!’ Nyɛ Mawu Mavɔmavɔ wɛ ɖɔ mɔ̌ nú we.” Wɛn e gbeyíɖɔ Jelemíi dó Judáa xɔ́sú Sedesíyasi é nɛ́. Jeluzalɛ́mu wɛ nǔ énɛ́ ɔ́ ɖo jijɛ ɖe wɛ. Hwenɛ́nu ɔ́, ahwangɔnu Babilɔ́nu xɔ́sú ɔ́ tɔn ɖo ahwan fun xá Jeluzalɛ́mu kpódó Judáa toxo e è mɛ ahohó lɛ́ lɛ̌ dó lɛ́ɛ wɛ. Toxo lɛ́ɛ wɛ nyí Lakíci kpó Azeka kpó. Axɔ́sú Sedesíyasi jɛ akɔ ɖokpó xá Jeluzalɛ́munu lɛ́ɛ, bó ɖɔ nú yě ɖɔ mɛ e nyí kannumɔ lɛ́ɛ bǐ jɛ yěɖée sí. Hwe énɛ́ nu wɛ Mawu Mavɔmavɔ ɖɔ xó ɖokpó nú Jelemíi. Eblée súnnu abǐ nyɔ̌nu e ɖo mɛ kannu lɛ́ɛ bǐ jɛ yěɖée sí; énɛ́ ɔ́, mɛ ɖé sɔ́ ná zé nɔví tɔn Judáanu dó ɖó kannumɔ ná ǎ. Togun ɔ́ bǐ kpó gǎn yětɔn lɛ́ɛ kpó yí gbe bó ná jó kannumɔ yětɔn súnnu kpó nyɔ̌nu kpó, bó sɔ́ ná sɔ́ yě dó ɖó kannumɔ gbeɖé ǎ. Nǔgbó ɔ́, yě jǒ mɛ e nyí kannumɔ lɛ́ɛ bǐ. Ée é ká wá yá ɔ́, yě lɛ́ húzú gbe, bó lɛ́ wlí mɛ lɛ́ɛ, bó sɔ́ yě dó húzú kannumɔ ná gǎnnugǎnnu. Énɛ́ ɔ́, Mawu Mavɔmavɔ ɖɔ nú Jelemíi ɖɔ: “Xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: Nyɛ lɔmɔ̌ jɛ akɔ ɖokpó xá tɔ́gbó mitɔn lɛ́ɛ, hwenu e un ɖe yě tɔ́n sín Ejípu, fí e yě ɖo mɛ kannu ɖe é. Un ɖɔ nú yě ɖɔ: ényí nɔví mitɔn Eblée ɖé sɔ́ éɖée sa nu mi, bó húzú kannumɔ mitɔn, bó wa azɔ̌ nú mi xɔ xwe ayizɛ́n ɔ́, xwe tɛ́nwegɔ́ ɔ́ mɛ ɔ́, mi ná jó e dó bɔ é ná jɛ éɖée sí. Lo ɔ́ tɔ́gbó mitɔn lɛ́ɛ ɖótó mì ǎ; nǔ e un ɖɔ ɔ́ nyí nǔɖé nú yě ǎ. Amɔ̌, midɛɛ lɛ́ɛ ɔ́, zǐnzán mitɔn gbɔn vo nú yětɔn. Mi mɛ ɖokpó ɖokpó kó jó kannumɔ mitɔn lɛ́ɛ dó bɔ yě jɛ yěɖée sí, káká bɔ mi jɛ akɔ ɖokpó dó nǔ énɛ́ tamɛ, ɖo xwé e è sɔ́ ɖó vo nú mì ɔ́ gbe. Nǔ e nylá ɖ'é mɛ ɔ́, mi lɛ́ húzú gbe, bó hu tɛ́ nú mì, ɖó mi ko jó kannumɔ mitɔn súnnu kpó nyɔ̌nu kpó dó, bɔ yě jɛ jlokoko bó ɖidó fí e jló yě lɛ́ɛ. É ká lɛ́ wá yá bɔ mi yi wlí yě, bó lɛ́ sɔ́ yě dó húzú kannumɔ gǎnnugǎnnu.” “Énɛ́ wú ɔ́, xó e Mawu Mavɔmavɔ ɖɔ ɔ́ ɖíe: Mɛ ɖokpó ɖokpó ɖó ná jó kannumɔ tɔn dó, kannumɔ tɔn e nyí nɔví tɔn, bó nyí nɔzo tɔn é dó, bɔ é ná jɛ jlokoko, lo ɔ́, mi se xó ce ǎ. Énɛ́ ɔ́ wú wɛ nyɛ Mawu Mavɔmavɔ ná sɛ́ ahwan dó mi, bó sɛ́ adɔ dó mi, bó sɛ́ jɛmɛjí dó mi. Un ná wa mɔ̌ xá mi, bɔ axɔ́súɖuto e ɖo gbɛ ɔ́ mɛ lɛ́ɛ ɖěbǔ mɔ mi ɔ́, hǔn tɔn ná zɛ. “Un ná wa nǔ xá yě mɛ e má nyibúví ɖó we, bó gbɔn tɛ́ntin tɔn dó jɛ akɔ ɖo nukɔn ce, bó ma ká nɔ gbejí nú akɔ e yě jɛ é ǎ lɛ́ɛ é. Un ná wa nǔ xá gǎn hɔn-yitɔ́ Judáa tɔn lɛ́ɛ, Jeluzalɛ́mu tɔn lɛ́ɛ, gǎn e nɔ wa azɔ̌ ɖo axɔ́sú ɔ́ xwé lɛ́ɛ, vɔ̌sánú-xwlémawutɔ́ lɛ́ɛ kpó mɛ e ɖo togun ɔ́ mɛ, bó gbɔn nyibúví e è mǎ ɖó we é tɛ́ntin bó dín é bǐ kpó. Un ná jó yě nú kɛntɔ́ yětɔn lɛ́ɛ, mɛ e ɖo kú yětɔn bá wɛ lɛ́ɛ, bɔ cyɔ yětɔn ná húzú nǔɖuɖu nú xɛ e nɔ gbɔn jǐ lɛ́ɛ kpódó kanlin e ɖo ayǐkúngban jí lɛ́ɛ kpó. Mɔ̌ ɖokpó ɔ́, un ná jó Judáa xɔ́sú Sedesíyasi kpó gǎn hɔn-yitɔ́ tɔn lɛ́ɛ kpó nú kɛntɔ́ yětɔn lɛ́ɛ, mɛ e ɖo kú yětɔn bá wɛ lɛ́ɛ. Un na jó yě nú axɔ́sú Babilɔ́nu tɔn sín ahwangɔnu. Égbé din ɔ́, ahwangɔnu énɛ́ sɔ́ ɖo tagba dó nú mi wɛ ǎ; amɔ̌, un ɖe gbe, bɔ é ná lɛ́ wá tɔ́n ahwan toxo élɔ́, bó ná yí, bó ná dó zo. Un na zé Judáa toxo lɛ́ɛ dó húzú gbětótló, bɔ toxo lɛ́ɛ bǐ ná jɛ vɔ̌.” Xó e Mawu Mavɔmavɔ ɖɔ é nɛ́. Hwenu e Yoyakímu, Joziyási ví ɔ́ ɖo axɔ́sú ɖu wɛ ɖo Judáa to ɔ́ nu ɔ́ wɛ Mawu Mavɔmavɔ ɖɔ xó élɔ́ nú Jelemíi; é ɖɔ n'i ɖɔ: “Yi mɔ Hlekávu ví lɛ́ɛ, bó ɖɔ xó nú yě bó kplá yě wá xɔ e ɖo Mawu Mavɔmavɔ xwé lɛ́ɛ ɖokpó mɛ, bó ná vɛ̌ɛn yě nú yě nu.” Énɛ́ ɔ́, un yi kplá Yaazaniya Yiimɛyahu ví, Havasiníya vívú ɔ́. Un kplá é kpódó nɔví tɔn lɛ́ɛ kpó vǐ tɔn lɛ́ɛ kpó. È nǎ ɖɔ kpowun ɔ́, Hlekávu ví lɛ́ɛ bǐ wɛ un kplá. Un kplá yě wá Mawu Mavɔmavɔ xwé, bó kplá yě dó Hanáni ví lɛ́ɛ sín xɔ mɛ, ɖo gǎn hɔn-yitɔ́ lɛ́ɛ sín xɔ kpá, ɖo Calúmu ví Maaseyahu e nyí gǎnhɔnjí ɔ́ sín xɔ ta nu. Hanáni ɔ́, Yigidaliyahu ví wɛ, bó ká nyí mɛɖé bó ɖo gbejí nú Mawu. Un fɔ vɛ̌ɛn tɔyizɛ́n mɔ̌kpán wá ɖó nukɔn yětɔn, bó fɔ sinnugannú nú yě, bó ɖɔ nú yě ɖɔ yě ní nu vɛ̌ɛn kpɛɖé. Lo ɔ́, yě ɖɔ: “Mǐ nɔ nu vɛ̌ɛn ǎ, ɖó tɔ́gbó mǐtɔn Hlekávu ví Yonadávu dó sɛ́n nú mǐ ɖɔ: ‘Mi ná nu vɛ̌ɛn gbeɖé ǎ, vǐ mitɔn lɛ́ɛ lɔ ná nu gbeɖé ǎ. Mi ná gbá xɔ ǎ, mi ná dó jinukún ǎ, mi ná tun vǐwun ǎ, mi ka ná ɖó vǐwungbo ǎ. Lo ɔ́, goxɔ mɛ wɛ mi ná nɔ nú gbɛzán mitɔn bǐ. Énɛ́ ɔ́, mi ná dɔ́ ji ɖo to élɔ́ e mɛ mi nyí jǒnɔ ɖe ɔ́ mɛ.’ Mǐ nyi sɛ́n e tɔ́gbó mǐtɔn Yonadávu Hlekávu ví ɔ́ dó nú mǐ é; mǐ nu vɛ̌ɛn kpɔ́n ǎ, asi mǐtɔn lɛ́ɛ ɖě nu vɛ̌ɛn kpɔ́n ǎ, vǐ mǐtɔn súnnu kpó nyɔ̌nu kpó ɖěbǔ nu vɛ̌ɛn kpɔ́n ǎ. Mǐ sá xwé bó nɔ gbe ǎ, mǐ ɖǒ vǐwungbo ǎ, mǐ ká ɖó gle ǎ. Goxɔ mɛ wɛ mǐ nɔ́ nɔ. Nǔ e tɔ́gbó mǐtɔn Yonadávu ɖɔ nú mǐ ɔ́, mǐ xwedó bǐ, mǐ bló bǐ. Ée Babilɔ́nu xɔ́sú Nabukodonɔzɔ́ɔ tɔ́n ahwan to ɔ́ é ɔ́, mǐ gbɔ bó ɖɔ mǐ ná yi cí Jeluzalɛ́mu bó ná gló ahwangɔnu Babilɔ́nu tɔn kpó Silíi tɔn kpó. Lě e mǐ wǎ cí Jeluzalɛ́mu gbɔn ɔ́ nɛ́.” Ée yě ɖɔ mɔ̌ ɔ́, Mawu Mavɔmavɔ ɖɔ nú Jelemíi ɖɔ: “Đɔ nú Judáanu lɛ́ɛ kpó Jeluzalɛ́munu lɛ́ɛ kpó ɖɔ: Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe: mi ná ɖótó mì bó ná se nǔ e kplɔ́n mi wɛ un ɖe ɔ́ ǎ cé? Sɛ́n e Yonadávu Hlekávu ví ɔ́ dó nú vǐ tɔn lɛ́ɛ ɖɔ yě ní má nu vɛ̌ɛn ó ɔ́, yě nyi. Yě nu vɛ̌ɛn nǔgbó ǎ káká jɛ égbé, ɖó tɔ́ yětɔn wɛ dó sɛ́n nú yě. Nyɛ ɔ́, nyɛ ka gɔn xó ɖɔ nú mi gbeɖé ǎ, mi ka ɖótó mì gbeɖé ǎ. Mɛsɛntɔ́ ce, gbeyíɖɔ ce lɛ́ɛ ɔ́, un gɔn yě sɛ́ dó mi ǎ; un sɛ́ yě dó mi, bɔ yě nɔ́ ɖɔ nú mi ɖɔ: ‘Mɛ ɖokpó ɖokpó ní jó gbɛ nyanya e zán wɛ é ɖe ɔ́ dó; mi wa nǔ lě e é jɛ xá gbɔn é. Mi ma sɔ́ jɛ kpo nú nǔmɛsɛn lɛ́ɛ ɖě ó. Énɛ́ ɔ́, mi ná nɔ to e un ná mi kpó tɔ́gbó mitɔn lɛ́ɛ kpó ɔ́ mɛ.’ Mi ka wlí tó xó e un ɖɔ ɔ́ wú ǎ, mi dó tókúse mɛ. Hlekávu ví lɛ́ɛ ɔ́, yě nyi sɛ́n e tɔ́gbó yětɔn Yonadávu dó nú yě ɔ́; lo ɔ́, mi Judáanu lɛ́ɛ ɔ́, midɛɛ lɛ́ɛ dó tókúse xó ce mɛ.” “Énɛ́ ɔ́ wú wɛ Mawu Mavɔmavɔ togun e mi! Jeluzalɛ́munu lɛ́ɛ e mi! Nyladó e sín xó un ɖɔ ɖ'ayǐ lɛ́ɛ ɔ́, un na sɛ́ dó mi. Đó un ɖɔ xó nú mi, bɔ mi dó tókúse mɛ; un ylɔ́ mi, bɔ mi kɛ nu d'é mɛ nú mì ǎ.” Énɛ́ ɔ́ gúdo ɔ́, Jelemíi ɖɔ nú Hlekávu ví lɛ́ɛ ɖɔ: Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ nú mi ɔ́ ɖíe, é ɖɔ: “Mi nyi sɛ́n e tɔ́gbó mitɔn Yonadávu dó nú mi é, mi wa nǔ e é ɖɔ nú mi lɛ́ɛ bǐ ɖó ganjí. Énɛ́ ɔ́ wú wɛ un ma ná ba mɛ e ná nɔ nukɔn ce ɔ́ kpo gbeɖé ɖo Yonadávu Hlekávu ví ɔ́ sín vǐ lɛ́ɛ mɛ ǎ. “Xó e nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ nɛ́.” Hwenu e Joziyási ví Yoyakímu ɖo xwe ɛnɛ bló wɛ ɖo axɔ́súzinkpo Judáa tɔn jí ɔ́ wɛ Mawu Mavɔmavɔ ɖɔ xó nú Jelemíi. É ɖɔ n'i ɖɔ: “Xó e ɖɔ nú we wɛ un ɖe dó Izlayɛ́li kpó Judáa kpó, kpódó akɔta lɛ́ɛ kpó wú sín axɔ́sú Joziyási hwenu ɔ́, sɔ́ anyǔwéma ɖokpó bó vlɔ́n, bó wlán bǐ d'é jí. Bóyá Judáa ví lɛ́ɛ se nǔ nyanya e un jló ná wa xá yě lɛ́ɛ ɔ́, yě sixú jó gbɛ nyanya e zán wɛ yě ɖe ɔ́ dó, bɔ un ná zé hwɛ e yě hu lɛ́ɛ kpó nǔ e yě wa nyi do lɛ́ɛ kpó kɛ yě.” Ée Jelemíi se mɔ̌ ɔ́, é ylɔ́ Baalúki Nɛliya ví ɔ́, lobo ɖɔ xó e Mawu Mavɔmavɔ ɖɔ n'i lɛ́ɛ ɖokpó ɖokpó n'i, bɔ Baalúki dó bǐ wěma mɛ. Énɛ́ ɔ́ gúdo ɔ́, Jelemíi ɖɔ nú Baalúki ɖɔ: “È gbɛ̌ nú mì ɖɔ nyi ní má yi Mawu Mavɔmavɔ xwé ó, hǔn un sixú yi dɔ̌n ǎ. Hwɛ na yi, bɔ xó e Mawu Mavɔmavɔ ɖɔ bɔ un wlí ɖɔ nú we, bɔ a wlǎn lɛ́ɛ ɔ́, a na xa nú mɛ lɛ́ɛ ɖo Mawu Mavɔmavɔ xwé, gbe e gbe yě ná ɖo nu blá wɛ é. A nǎ xa ɖo Judáanu e na gosín toxo yětɔn mɛ bó wá lɛ́ɛ nukɔn, bɔ yě lɔ na se. Vlafo, yě sixú sa vo nú Mawu Mavɔmavɔ bɔ é ná se, bɔ mɛ ɖokpó ɖokpó ná jó gbɛ nyanya e zán wɛ é ɖe ɔ́ dó. Đó xomɛsin e jí Mawu Mavɔmavɔ ɖe ɔ́ syɛ́n ɖésú; adǎn yětɔn e gblɔ́n wɛ é ɖe ɔ́ vɛ́ jlɛ́.” Baalúki bló nǔ e gbeyíɖɔ Jelemíi ɖɔ n'i lɛ́ɛ bǐ. É yi Mawu Mavɔmavɔ xwé gbe, bó zé gbe d'aga bó xa Mawu Mavɔmavɔ xó e yě wlán ɖó anyǔwéma ɔ́ jí é. Hwenu e Joziyási ví Yoyakímu ɖo xwe atɔ́ɔ́n bló wɛ ɖo axɔ́súzinkpo Judáa tɔn jí ɔ́ wɛ nǔ énɛ́ ɔ́ ɖo jijɛ wɛ, ɖo sun tɛ́nnɛgɔ́ ɔ́ mɛ. È ylɔ̌ Jeluzalɛ́mu to ɔ́ bǐ kplé, bó ylɔ́ Judáanu lɛ́ɛ bǐ kplé, bɔ yě ɖo nu blá wɛ ɖo Mawu Mavɔmavɔ nukɔn. Xɔ ɖokpó ɖo Mawu xwé ɔ́ gbe; wěgbójínɔtɔ́ Gemaliyáhu sín xɔ wɛ. Gemaliyáhu ɔ́, Cafáni ví wɛ. Xɔ ɔ́ ɖo hɔntogbó yɔ̌yɔ́ ɔ́ kpá, ɖo sinsɛnxɔ ɔ́ sín kɔ́xota e ɖo aga ɔ́ jí. Dɔ̌n wɛ Baalúki nɔ bó zé gbe dó jǐ, bó xa Jelemíi xó e yě wlán dó anyǔwéma ɔ́ jí é. Mikayehu, Gemaliyáhu ví, Cafáni vívú ɔ́ se Mawu Mavɔmavɔ xó e Baalúki xa é bǐ. Énɛ́ ɔ́, é yi wěgbójínɔtɔ́ Elicama sín xɔ mɛ, ɖo hɔnmɛ. Gǎn hɔn-yitɔ́ lɛ́ɛ bǐ ɖo kplé jí ɖo Elicama xɔ sá: wěgbójínɔtɔ́ Elicama ɔ́, Deláyahu Cemayahu ví ɔ́, Ɛlunatáni Akubɔ́ɔ ví ɔ́, Gemaliyáhu Cafáni ví ɔ́, Sedesíyasi Hananiyahu ví ɔ́ kpódó gǎn hɔn-yitɔ́ ɖé lɛ́ɛ kpó. Énɛ́ ɔ́, xó e Baalúki Nɛliya vívú ɔ́ sɔ́ gbe dó jǐ bó xa nú togun ɔ́ ɖo anyǔwéma ɔ́ jí ɔ́, Mikayehu wlí bǐ ɖɔ nú yě. Lo ɔ́, gǎn hɔn-yitɔ́ lɛ́ɛ ɖó gbe kpɔ́, bó sɛ́ Yexudi dó Baalúki, ɖɔ é ní yi ɖɔ n'i ɖɔ é ní zé wěma e é xa nú togun ɔ́, lobo wá. Yexudi ɔ́, Nɛtaniyahu ví wɛ, bó nyí Cɛlɛmiyahu vívú, lobo nyí Kúcí vívú vivu. Ée Yexudi yi ɖɔ nú Baalúki ɔ́, é zé wěma ɔ́ nǔgbó, bó ɖidó gɔ̌n yětɔn. Ée Baalúki wá ɔ́, yě ɖɔ n'i ɖɔ: “Jǐnjɔ́n ayǐ bó xa wěma ɔ́ nú mǐ nǎ se.” Bɔ Baalúki xa wěma ɔ́ nú yě. Ée yě se xó lɛ́ɛ bǐ ɔ́, xɛsi jɛ yě jí, bɔ yě nɔ́ kpɔ́n yěɖée, lobo ɖɔ nú Baalúki ɖɔ: “Mǐ ɖó ná wlí xó énɛ́ lɛ́ɛ bǐ ɖɔ nú axɔ́sú ɔ́.” Énɛ́ ɔ́ gúdo ɔ́, yě kanbyɔ́ Baalúki ɖɔ: “A sixú tín lě e a wlǎn nǔ énɛ́ lɛ́ɛ bǐ gbɔn é mɛ nú mǐ a?” Énɛ́ ɔ́, Baalúki ɖɔ nú yě ɖɔ: “Jelemíi wɛ ɖɔ xó énɛ́ lɛ́ɛ bǐ nú mì; é ɖo ɖiɖɔ wɛ ɔ́, un nɔ ɖo ɖokpó ɖokpó wlán dó anyǔwéma élɔ́ jí wɛ, kpódó kwéle kpó.” Gǎn hɔn-yitɔ́ lɛ́ɛ ɖɔ nú Baalúki ɖɔ: “Hwi kpó Jelemíi kpó bǐ ní yi hɔn hwlá, bónú mɛ ɖěbǔ ní ma tunwun fí e mi ɖe ɔ́ ó.” Gǎn hɔn-yitɔ́ lɛ́ɛ jó wěma ɔ́ dó nyi wěgbójínɔtɔ́ Elicama xɔ mɛ dɔ̌n, bó yi axɔ́sú ɔ́ sín kɔ́xota ɖo hɔnmɛ, bó wlí nǔ e jɛ é bǐ ɖɔ n'i. Énɛ́ ɔ́, axɔ́sú ɔ́ ɖɔ nú Yexudi ɖɔ é ní yi zé wěma ɔ́ wá, bɔ é yi zé wěma ɔ́ ɖo Elicama xɔ mɛ, bó sɔ́ gbe dó jǐ bó jɛ xixa jí ɖo axɔ́sú ɔ́ kpó gǎn hɔn-yitɔ́ e ɖo gɔ̌n tɔn lɛ́ɛ bǐ kpó nukɔn. Sun tɛ́nnɛgɔ́ ɔ́ mɛ wɛ è ɖe hwenɛ́nu, bɔ axɔ́sú ɔ́ ɖo ayǐjínjɔ́n ɖo xwé e gbe é nɔ́ nɔ avivɔ hwenu é, bó ɖo myɔ xú wɛ. Énɛ́ ɔ́, nú Yexudi xa wěma ɔ́ sín akpáxwé atɔn abǐ ɛnɛ ɔ́, axɔ́sú ɔ́ nɔ́ sɔ́ jǐví bó nɔ́ sɛ́n, bó nɔ́ sɔ́ dó myɔ ɔ́ mɛ; mɔ̌ bló wɛ é ɖe káká bó dó wěma ɔ́ bǐ zo. Axɔ́sú ɔ́ kpó azaglɔ́gán tɔn lɛ́ɛ kpó mɔ nǔ jɛ nǔ e è wlǎn ɔ́ mɛ ganjí; xɛsi ka ɖi yě ǎ, yě vún awu dó kɔ nú yěɖée dó ɖe xlɛ́ ɖɔ wǔ kú émí ǎ. Ɛlunatáni kpó Deláyahu kpó, kpódó Gemaliyáhu kpó ɖɔ nǔ bǐ nú axɔ́sú ɔ́ ɖɔ é ní má dó wěma ɔ́ zo ó có axɔ́sú ɔ́ se xó yětɔn ǎ. É nyɔ́ wa ɔ́, gbe wɛ é ná vǐ tɔn kpó Yelaximɛyɛ́li ɔ́, kpó Selayahu, Azliyɛ́li ví ɔ́ kpó, kpó Cɛlɛmiyahu, Avudéɛli ví ɔ́ kpó ɖɔ yě ní wlí wěgbójínɔtɔ́ Baalúki kpódó gbeyíɖɔ Jelemíi kpó. Lo ɔ́, Mawu Mavɔmavɔ zé yě hwlá. Ée axɔ́sú ɔ́ dó wěma e jí Baalúki wlán xó e Jelemíi ɖɔ n'i lɛ́ɛ dó é zo ɔ́, Mawu Mavɔmavɔ ɖɔ nú Jelemíi ɖɔ: “Lɛ̌ sɔ́ anyǔwéma ɖěvo bó vlɔ́n, bó wlán xó e ɖo wěma nukɔn tɔn e Judáa xɔ́sú Yoyakímu dó zo ɔ́ jí lɛ́ɛ d'é jí. Énɛ́ ɔ́ gúdo ɔ́, a nǎ ɖɔ dó Judáa xɔ́sú Yoyakímu wú ɖɔ: “Xó e Mawu Mavɔmavɔ ɖɔ ɔ́ ɖíe: ‘Jelemíi wlán dó anyǔwéma jí ɖɔ Babilɔ́nu xɔ́sú ɔ́ ná wá gba to élɔ́ dandan, lobo ná sú gbɛtɔ́ kpó kanlin kpó sín kún dó. Lo ɔ́, Yoyakímu gbɛ́ nǔ nú Jelemíi bó dó wěma ɔ́ zo. Énɛ́ wú ɔ́, Mawu Mavɔmavɔ ɖɔ dó Yoyakímu wú ɖɔ: Yoyakímu ví ɖě ná yi Davídi zinkpo jí ǎ. Cyɔ tɔn ná nɔ agě jí, bɔ hwe ná hun d'é jí, bɔ ahǔn na nɔ ja d'é jí. Un ná wa nǔ xá é kpódó vǐ tɔn lɛ́ɛ kpó azaglɔ́gán tɔn lɛ́ɛ kpó ɖó hwɛ yětɔn lɛ́ɛ wútu. Awě e sín adǎn e un gblɔ́n nú yě, bɔ yě má ké ya ná ǎ lɛ́ɛ ɔ́, un ná sɛ́ dó yě kpódó Jeluzalɛ́munu lɛ́ɛ kpó, kpódó Judáanu lɛ́ɛ bǐ kpó.’ ” Jelemíi lɛ́ sɔ́ anyǔwéma ɖěvo, bó vlɔ́n, bó sɔ́ jó nú wěgbójínɔtɔ́ Baalúki, lobo lɛ́ ɖɔ xó e ɖo wěma nukɔn tɔn e Yoyakímu dó zo ɔ́ jí lɛ́ɛ bǐ nú Baalúki, bɔ é wlán xó e Jelemíi ɖɔ lɛ́ɛ ɖokpó ɖokpó ɖ'é jí. Xó mɔ̌hun gěgé ɖěvo lɛ́ɛ lɛ́ ɖo wěma ɔ́ jí. É su gbe ɖokpó bɔ Babilɔ́nu xɔ́sú Nabukodonɔzɔ́ɔ ɖe Yoyakini, Yoyakímu ví ɔ́ sín axɔ́súzinkpo Judáa tɔn jí, bó sɔ́ Joziyási ví Sedesíyasi ɖó tɛn tɔn mɛ. Amɔ̌, Sedesíyasi kpó gǎn hɔn-yitɔ́ tɔn lɛ́ɛ kpódó toví tɔn lɛ́ɛ kpó ɖěbǔ nɔ́ ɖótó xó e Mawu Mavɔmavɔ nɔ́ ɖɔ gbɔn gbeyíɖɔ Jelemíi jí ɔ́ ǎ. É ká ɖo mɔ̌ có, axɔ́sú Sedesíyasi sɛ́ Yexukali Cɛlɛmiya ví ɔ́, kpó vɔ̌sánú-xwlémawutɔ́ Sefaníyahu Maaseya ví ɔ́ kpó dó gbeyíɖɔ Jelemíi gɔ́n, ɖɔ yě ní yi ɖɔ n'i ɖɔ: “Sa vo nú Mawu Mavɔmavɔ, Mawu mǐtɔn dó ta mǐtɔn mɛ.” È ko wlí Jelemíi sú hwenɛ́nu ǎ; é ɖo togun ɔ́ mɛ, bɔ fí ɖé jló e ɔ́, é nɔ́ yi bó nɔ́ wá. Hwe énɛ́ nu ɔ́, ahwangɔnu Ejípu xɔ́sú ɔ́ tɔn gosín Ejípu bó jǎwe. Ée Babilɔ́nunu e ɖo Jeluzalɛ́mu toxo ɔ́ yí wɛ lɛ́ɛ se mɔ̌ ɔ́, yě jó agɔ dó gǔdo, bó sɛ yěɖée kplé ɖo zɔ. Énɛ́ ɔ́, Mawu Mavɔmavɔ ɖɔ nú gbeyíɖɔ tɔn Jelemíi ɖɔ: “Xó e nyɛ Mawu Mavɔmavɔ, Mawu Izlayɛ́li tɔn ɖɔ é ɖíe: ‘Mi yi ɖɔ nú Judáa xɔ́sú e sɛ́ mi dó gɔ̌n ce, bó ɖɔ mi ní wá kan nǔ byɔ́ mì é ɖɔ ahwangɔnu Ejípu xɔ́sú ɔ́ tɔn e wá alɔ gɔ́ nú mi gbé ɔ́ kó lɛ́ kɔ yi Ejípu, to tɔn mɛ. Hǔn, Babilɔ́nunu lɛ́ɛ na lɛ́ kɔ wá, bó ná tɔ́n ahwan toxo élɔ́, bó ná yí, lobo ná dó toxo ɔ́ zo. Nyɛ Mawu Mavɔmavɔ ɔ́, un ɖo ɖiɖɔ nú mi wɛ: mi ma wa yɛ nú miɖée ó, mi ma vɛdó ɖɔ Babilɔ́nunu lɛ́ɛ ko yi sín ó. Yě xweyǐgbe ǎ. Mi na bo ɖu ɖo ahwangɔnu Babilɔ́nu tɔn e ɖo ahwan fun xá mi wɛ ɔ́ jí, bónú é kpo mɛ e gblé wǔ lɛ́ɛ kɛ́ɖɛ́ ɔ́, yě mɛ énɛ́ lɛ́ɛ ná sí te sín goxɔ yětɔn lɛ́ɛ mɛ, lobo ná dó toxo élɔ́ zo.’ ” Hwenu e ahwangɔnu Babilɔ́nu tɔn ɔ́ jó agɔ dó gǔdo, bó sɛ yěɖée kplé ɖo zɔ, lobo ɖo te kpɔ́n ahwangɔnu Ejípu xɔ́sú ɔ́ tɔn ɔ́, Jelemíi jló ná tɔ́n sín Jeluzalɛ́mu, bó ná yi Bɛnjamɛ́ɛ yíkúngban jí, bó ná yi gletoxo tɔn mɛ, bó ná nɔ ayǐkúngban e má wɛ yě ɖe ɔ́ sín tɛn mɛ. Ée Jelemíi jɛ toxo ɔ́ sín hɔntogbó jí ɔ́, sɔ́ja e nɔ cɔ́ toxo ɔ́ lɛ́ɛ sín gǎn, ahwangán Yiliya ɖo fínɛ́, bó mɔ ɛ, lobo wlí i, bó ɖɔ: “A jlǒ ná yi jɛ Babilɔ́nunu lɛ́ɛ jí!” Yiliya ɔ́, Cɛlɛmiya ví wɛ, bó nyí Hananiya vívú. Ée Yiliya ɖɔ mɔ̌ ɔ́, Jelemíi ɖɔ: “Mɔ̌ wɛ ǎ, un jló ná yi jɛ Babilɔ́nunu lɛ́ɛ jí ǎ.” Yiliya ka yí gbe nú xó tɔn ǎ, bó wlí i, bó dɔn ɛ yi gǎn lɛ́ɛ gɔ́n. Gǎn lɛ́ɛ sin xomɛ dó Jelemíi, lobo xo e, bó zé e sú dó Yexonatáni wěgbójínɔtɔ́ to ɔ́ tɔn sín xwé gbe; xwé énɛ́ ɔ́, yě sɔ́ dó húzú gankpá mɛ. Yě sɔ́ Jelemíi sú dó xɔ ɖé mɛ ɖo gankpá ɔ́ mɛ; xɔ ɔ́ sín aza cí toboo. Jelemíi ɖo fínɛ́ ɔ́, é kó lín cóbɔ axɔ́sú Sedesíyasi wá sɛ́ mɛ dó, bɔ è yi kplá ɛ wá n'i, bɔ é kan nǔ byɔ́ ɛ dó nǔglɔ́. É kanbyɔ́ ɛ ɖɔ: “Mawu Mavɔmavɔ ɖɔ xó ɖé nú we, bɔ a nǎ ɖɔ nú mì a?” Bɔ Jelemíi yí gbe n'i ɖɔ: “Ɛɛn, é ɖɔ nú mì ɖɔ è nǎ jó we nú Babilɔ́nu xɔ́sú ɔ́.” Énɛ́ ɔ́ gúdo ɔ́, Jelemíi kanbyɔ́ axɔ́sú Sedesíyasi ɖɔ: “Hwɛ tɛ́ un ka hu dó we, bó hu dó gǎn hɔn-yitɔ́ towe lɛ́ɛ, bó hu dó mɛ e ɖo toxo élɔ́ mɛ lɛ́ɛ bɔ mi wlí mì dó gan? Gbeyíɖɔ mitɔn e ka ɖɔ axɔ́sú Babilɔ́nu tɔn kún ná tɔ́n ahwan mi ó, é kún ná wa nǔɖé nú to élɔ́ ó lɛ́ɛ ɔ́, nɛ̌ yě ká ná ɖɔ gbɔn din? “Axɔ́sú Sɛ́mɛɖó, ɖǒtó mì. Yǐ vo e sa nú we wɛ un ɖe ɔ́! Ma lɛ́ kɔ nú mì sɛ́ dó wěgbójínɔtɔ́ Yexonatáni xwé gbe ó; un yi dɔ̌n ɔ́, un ná kú jɛ dɔ̌n.” Énɛ́ ɔ́, axɔ́sú Sedesíyasi ná gbe ɖɔ è nǐ hɛn Jelemíi ɖó sɔ́ja e nɔ cɔ́ axɔ́sú ɔ́ lɛ́ɛ sín kɔ́xota, bó ɖɔ è nǐ nɔ́ ná ɛ wɔ̌xúxú ɖokpó ayǐhɔ́ngbe ayǐhɔ́ngbe. Wɔ̌xúxú e è ɖa ɖo fí e ali e è nɔ ylɔ́ ɖɔ wɔ̌xúxúɖatɔ́ lɛ́ɛ sín ali ɔ́ gbɔn é wɛ è nǎ nɔ́ hɛn wá n'i. Nú wɔ̌xúxú ɖo toxo ɔ́ mɛ hǔn, è ma gɔn nǐná ɛ gbeɖé ó. Lě e Jelemíi nɔ gankpá mɛ ɖo sɔ́ja énɛ́ lɛ́ɛ sín kɔ́xota gbɔn ɔ́ nɛ́. Gǎn ɖé lɛ́ɛ tíin; yě wɛ nyí Cefátiya Matáni ví ɔ́, Gedaliyáhu Pacehúu ví ɔ́, Yukálu Cɛlɛmiya ví ɔ́, kpódó Pacehúu Malukíya ví ɔ́ kpó; yě se xó e ɖɔ nú togun ɔ́ wɛ Jelemíi nɔ ɖe é; yě ɖɔ nú togun ɔ́ ɖɔ: “Mawu Mavɔmavɔ ɖɔ: ‘Mɛ e ná nɔ Jeluzalɛ́mu fí ɔ́, ahwan ma hu i ǎ ɔ́, adɔ ka ná hu i; é má nyí mɔ̌ ǎ ɔ́, jɛmɛjí ná hu i. Mɛ e na tɔ́n sín toxo ɔ́ mɛ, bó ná zé éɖée yi jó nú Babilɔ́nunu lɛ́ɛ ɔ́, mɛ énɛ́ ná kú ǎ; gbɛ tɔn wɛ ná nyí nǔ e é ná hɛn sín ahwangbénu wá é.’ ” Đó Mawu Mavɔmavɔ ɖɔ è nǎ jó toxo élɔ́ nú Babilɔ́nu xɔ́sú ɔ́ sín ahwangɔnu bɔ é ná yí. Gǎn lɛ́ɛ se xó énɛ́ lɛ́ɛ, bó ɖɔ nú axɔ́sú ɔ́ ɖɔ: “Nya énɛ́ ɔ́, è nǐ hu i! Đó xó e ɖɔ wɛ é ɖe ɔ́ ɖo awakanmɛ kú dó nú ahwanfuntɔ́ e kpo ɖo toxo ɔ́ mɛ lɛ́ɛ kpó togun ɔ́ bǐ kpó wɛ. Nya énɛ́ ɖo ɖagbe togun élɔ́ tɔn ba wɛ ǎ; nǔ hɛn gblé wɛ é ɖe.” Énɛ́ ɔ́, axɔ́sú Sedesíyasi ɖɔ: “É ɖíe; mi bo sɔ́ ɛ dó wa nǔ e jló mi é ná, ɖó nyɛ wɛ nyí axɔ́sú mitɔn nǔgbó, un ka ɖó acɛ dó mi jí ǎ.” Ée axɔ́sú ɔ́ ɖɔ mɔ̌ ɔ́, yě yi zé Jelemíi, bó sɔ́ ɛ dó axɔ́sú ɔ́ sín vǐ Malukíya sín sitɛ́nu mɛ ɖo gankpá ɔ́ sín kɔ́xota. Kan wɛ è dó Jelemíi, bó zé e dó sitɛ́nu ɔ́ mɛ. Sin ɖěbǔ sɔ́ ɖo tɔ ɔ́ mɛ ǎ, babá kɛ́ɖɛ́ wɛ kpo ɖ'é mɛ. Bɔ Jelemíi jɛ bɔ̌ yi jí ɖo tɔ ɔ́ mɛ. Evɛ́di-Mɛlɛ́ki agooɖojǐe Etiopíinu e nɔ wa azɔ̌ ɖo axɔ́sú ɔ́ xwé gbe ɔ́ se ɖɔ è sɔ́ Jelemíi dó sitɛ́nu mɛ. Axɔ́sú ɔ́ ka ɖo kplé jí ɖo toxo ɔ́ sín hɔntogbó e è nɔ ylɔ́ ɖɔ Bɛnjamɛ́ɛ Hɔntogbó ɔ́ jí. Énɛ́ ɔ́, Evɛ́di-Mɛlɛ́ki tɔ́n, bó yi mɔ axɔ́sú ɔ́ ɖo dɔ̌n, bó ɖɔ n'i ɖɔ: “Axɔ́sú Sɛ́mɛɖó, gǎn ɖé lɛ́ɛ dó nǔ baɖabaɖa ɖokpó sin: yě zě gbeyíɖɔ Jelemíi dó sitɛ́nu mɛ. É ná bó nɔ agě jí ɔ́, é ná kú adɔ, ɖó nǔɖuɖu ɖěbǔ sɔ́ ɖo toxo ɔ́ mɛ ǎ.” Ée Evɛ́di-Mɛlɛ́ki ɖɔ mɔ̌ ɔ́, axɔ́sú ɔ́ ɖɔ n'i ɖɔ: “Kplá gbɛtɔ́ gban (30) dó hwiɖée jí sín fí, bó yi ɖe Jelemíi tɔ́n sín tɔ ɔ́ mɛ, bónú é má kú ó.” Evɛ́di-Mɛlɛ́ki kplá mɛ lɛ́ɛ nǔgbó, bó yi axɔ́sú ɔ́ xwé. É bɛ́ avɔ xóxó, avɔ vúnvún lɛ́ɛ ɖo agbanxɔ ɔ́ mɛ, bó yi sitɛ́nu ɔ́ kɔn bó dó kan avɔ lɛ́ɛ, bó zé nú Jelemíi ɖo sitɛ́nu ɔ́ mɛ, bó ɖɔ n'i ɖɔ: “Bɛ̌ avɔ xóxó énɛ́ lɛ́ɛ dó awǎdá mɛ, bó dɔn kan gbɔn jí.” Bɔ Jelemíi bló nǔ e é ɖɔ é. Énɛ́ ɔ́, yě dɔn kan ɔ́ bó ɖe e tɔ́n sín tɔ ɔ́ mɛ. Ée yě ɖe e tɔ́n ɔ́, é nɔ sɔ́ja e nɔ cɔ́ axɔ́sú ɔ́ lɛ́ɛ sín kɔ́xota ɖo hɔnmɛ. Axɔ́sú Sedesíyasi sɛ́ mɛ dó, bɔ è yi kplá Jelemíi wá; ée Jelemíi wá ɔ́, axɔ́sú ɔ́ kplá ɛ jɛ vo, ɖo Mawu Mavɔmavɔ xwé ɔ́ sín hɔntogbó atɔngɔ́ ɔ́ jí, bó ɖɔ n'i ɖɔ: “Jelemíi, un jló ná kan nǔ ɖokpó byɔ́ we, ma hwlá nǔ ɖěbǔ dó mì ó.” Ée axɔ́sú ɔ́ ɖɔ mɔ̌ ɔ́, Jelemíi ɖɔ n'i ɖɔ: “Ényí un ɖɔ xó nǔgbó nú we ɔ́, a nǎ hu mì. Un ná bó kplɔ́n nǔ we din ɔ́, a nǎ bló ǎ.” Ée Jelemíi ɖɔ mɔ̌ ɔ́, axɔ́sú ɔ́ dó akpá n'i ɖo nǔglɔ́ ɖɔ: “Mawu Mavɔmavɔ e ná gbɛ mǐ ɔ́ ɖo gbɛ, un na hu we ǎ, un ka ná jó we nú mɛ e jló ná hu we lɛ́ɛ ǎ.” Jelemíi ɖɔ nú Sedesíyasi ɖɔ: “Mawu Mavɔmavɔ, Mawu Nǔbǐwúkpétɔ́, Mawu Izlayɛ́li tɔn ɔ́ ɖɔ: ‘Ényí a sɔ́ hwiɖée yi jó nú Babilɔ́nu xɔ́sú ɔ́ sín gǎn lɛ́ɛ ɔ́, a nǎ gán, bɔ è sɔ́ ná dó toxo élɔ́ zo ǎ, bɔ hwi kpó mɛ towe lɛ́ɛ kpó ná gán. Amɔ̌, ényí a ma sɔ́ hwiɖée yi jó nú axɔ́sú Babilɔ́nu tɔn sín gǎn lɛ́ɛ ǎ ɔ́, è nǎ jó Jeluzalɛ́mu toxo ɔ́ nú Babilɔ́nunu lɛ́ɛ, bɔ yě ná dó zo; hwi lɔ ka ná gló yě ǎ.’ ” Axɔ́sú Sedesíyasi ka ɖɔ nú Jelemíi ɖɔ: “Mɛ e ɖi xɛsi ná wɛ un ɖe lɛ́ɛ wɛ nyí Judáanu e yi gɔ́ nú Babilɔ́nunu lɛ́ɛ é; è nǎ wlí mì yi jó nú yě, bɔ yě ná ko mì.” Énɛ́ ɔ́, Jelemíi ɖɔ: “È nǎ jó we nú yě ǎ. Tunwun ɖɔ xó e ɖɔ nú we wɛ un ɖe ɔ́, Mawu Mavɔmavɔ wɛ ɖo ɖiɖɔ nú we wɛ; bo ɖótó mì, énɛ́ ɔ́, nǔ towe bǐ ná nyɔ́, bɔ nǔɖé ná wa we ǎ. Ényí a ka gbɛ́ ɔ́, nǔ e ná wa we, bɔ Mawu Mavɔmavɔ ɖɔ nú mì é ɖíe: è nǎ kplá nyɔ̌nu e ɖo hɔn ɔ́ mɛ lɛ́ɛ bǐ yi jó nú Babilɔ́nu xɔ́sú ɔ́ sín gǎn lɛ́ɛ, bɔ yě ná ji han dó we ɖɔ: ‘Xɔ́ntɔn towe alɔmayimɛ lɛ́ɛ nɔ́ klɔ́ we ganjí. Adǎn ká wá gbo we ɔ́, yě nɔ́ jó we dó.’ È nǎ wlí asi towe lɛ́ɛ kpódó vǐ towe lɛ́ɛ kpó bǐ yi jó nú Babilɔ́nunu lɛ́ɛ, hwi lɔ ɔ́, a ka ɖo yě ná gló wɛ ǎ. Axɔ́sú Babilɔ́nu tɔn sín alɔ ná jɛ wǔ we. È nǎ dó toxo élɔ́ zo.” Énɛ́ ɔ́ gúdo ɔ́, Sedesíyasi ɖɔ nú Jelemíi ɖɔ: “Ényí a ma jló ná kú ǎ hǔn, mɛ ɖěbǔ ní ma se xó e mǐ ɖɔ lɛ́ɛ ó. Gǎn lɛ́ɛ ná se ɖɔ un ɖɔ xó xá we, lobo ná wá mɔ we, bó ná ɖɔ nú we ɖɔ: ‘Xó e a ɖɔ nú axɔ́sú ɔ́ kpó xó e axɔ́sú ɔ́ ɖɔ nú we lɛ́ɛ kpó ɔ́, ɖɔ nú mǐ, ma hwlá ɖěbǔ dó mǐ ó; é má nyí mɔ̌ ǎ ɔ́, mǐ na hu we.’ Nú yě wǎ ɖɔ mɔ̌ nú we hǔn, ɖɔ nú yě ɖɔ: ‘Vo wɛ un sa nú axɔ́sú ɔ́ ɖɔ é ní ma nyi mì sɛ́ dó Yexonatáni xwé ó, é má nyí mɔ̌ ǎ ɔ́, un táá kú.’ ” Nǔgbó ɔ́, gǎn lɛ́ɛ bǐ yi Jelemíi gɔ́n, bó kan xó byɔ́ ɛ. Jelemíi ka yí gbe nú yě lě e axɔ́sú ɔ́ ɖɔ gbɔn n'i é, lobɔ yě xwɛ bó wá yi, ɖó xó ɔ́ kó gba ǎ. Jelemíi nɔ sɔ́ja e nɔ cɔ́ axɔ́sú ɔ́ lɛ́ɛ sín kɔ́xota fínɛ́, káká jɛ gbe e gbe Babilɔ́nunu lɛ́ɛ yí Jeluzalɛ́mu é. Nǔ e jɛ hwenu e Babilɔ́nunu lɛ́ɛ yí Jeluzalɛ́mu ɔ́ ɖíe: Hwenu e Judáa xɔ́sú Sedesíyasi ɖo xwe tɛ́nnɛ bló wɛ ɖo zinkpo jí ɔ́, sun tɔn wǒgɔ́ ɔ́ mɛ ɔ́, Babilɔ́nu xɔ́sú Nabukodonɔzɔ́ɔ kplá ahwangɔnu tɔn bǐ, bó wá xá Jeluzalɛ́mu toxo ɔ́. Yě xá toxo ɔ́ mɔ̌ káká jɛ hwenu e Sedesíyasi bló xwe wǒ-ɖokpó ɖo zinkpo jí é. Azǎn tɛ́nnɛgɔ́ e ɖo sun ɛnɛgɔ́ ɔ́ mɛ ɔ́ gbe ɔ́, Babilɔ́nunu lɛ́ɛ tɔ́n ali ɖokpó dó ahohó e è mɛ lɛ́ lɛ̌ dó toxo ɔ́ é mɛ. Énɛ́ ɔ́, Babilɔ́nu xɔ́sú ɔ́ sín ahwangán lɛ́ɛ byɔ́ toxo ɔ́ mɛ, bó yi cí toxo ɔ́ sín hɔntogbó e è nɔ ylɔ́ ɖɔ Hɔntogbó Tɛ́ntin tɔn é jí; yě mɛ e yi cí fínɛ́ lɛ́ɛ ɖíe: Nɛ̌ɛgali-Salɛsɛ́ɛ ahwangán lɛ́ɛ sín gǎn ɔ́, Samugáa-Nɛbu, Nɛbu-Saasekímu, mɛ e wú axɔ́sú ɔ́ ɖeji dó hú mɛ bǐ ɔ́ kpó ahwangán ɖě lɛ́ɛ bǐ kpó. Ée axɔ́sú Sedesíyasi kpó sɔ́ja tɔn lɛ́ɛ kpó mɔ yě ɔ́, yě dɔn zǎn dó wǔ, bó hɔn gbɔn axɔ́sú ɔ́ sín jikpá mɛ, bó gbɔn hɔntogbó e ɖo ahohó we lɛ́ɛ tɛ́ntin e nu, bó wlí ali e yi tɔdo Judɛ́ɛn tɔn mɛ é. Ahwangɔnu Babilɔ́nunu lɛ́ɛ tɔn ká jɛ yě gúdo, bó yi xwedó Sedesíyasi wú, ɖo ayǐkúngban wɛnjɛ Jeliko tɔn jí; yě wlí i, bó kplá ɛ yi Babilɔ́nu xɔ́sú Nabukodonɔzɔ́ɔ gɔ́n. Hwenɛ́nu ɔ́, axɔ́sú ɔ́ ɖo Hlivla ɖo Hamáti tomɛ. Fínɛ́ wɛ Nabukodonɔzɔ́ɔ ɖó hwɛ nú Sedesíyasi ɖe. È gbo gbe axɔ́sú Sedesíyasi ví lɛ́ɛ ɖo nukún tɔn mɛ; mɔ̌ ɖokpó ɔ́, è hu gbɛtɔ́ klogǎnklogǎn Judáa tɔn lɛ́ɛ ɖo fínɛ́. Énɛ́ ɔ́ gúdo ɔ́, axɔ́sú Babilɔ́nu tɔn ná gbe, bɔ è tɔ́n nukún Sedesíyasi tɔn we lɛ́ɛ, lobo dó wlɔ ɛ bó kplá ɛ yi Babilɔ́nu. Babilɔ́nunu lɛ́ɛ dó axɔ́sú ɔ́ sín xwé zo ɖo Jeluzalɛ́mu, bó dó xwé ɖě lɛ́ɛ zo; yě gba ahohó e è mɛ lɛ́ lɛ̌ dó Jeluzalɛ́mu lɛ́ɛ. Nɛbuzaladáni, sɔ́ja e nɔ cɔ́ axɔ́sú ɔ́ lɛ́ɛ sín gǎn ɔ́ wlí mɛ e ɖo toxo ɔ́ mɛ lɛ́ɛ, kpó mɛ e wá zé yěɖée jó n'i lɛ́ɛ kpó, kpó mɛ e kpo lɛ́ɛ kpó, bó kplá yě bǐ yi Babilɔ́nu. Amɔ̌, mɛ e nyí wamamɔnɔ klókló ɖo Judáa to ɔ́ mɛ, bó má ɖó nǔ ɖěbǔ ǎ lɛ́ɛ ɔ́, Nɛbuzaladáni jó mɛ énɛ́ lɛ́ɛ dó nyi to ɔ́ mɛ, bó ná yě vǐwungbo kpó gle kpó. Nǔ e Babilɔ́nu xɔ́sú Nabukodonɔzɔ́ɔ zɔ́n Nɛbuzaladáni ɖɔ é ní bló nú Jelemíi lɛ́ɛ ɖíe: É ɖɔ n'i ɖɔ: “Yi kplá Jelemíi, kpé nukún wǔ tɔn nú mɛɖé ma dó ya n'i ó; é byɔ́ nǔɖé we hǔn, blǒ n'i.” Nǔgbó ɔ́, ahwangán Nɛbuzaladáni kpó Nɛbucazibáni e wú Babilɔ́nu xɔ́sú ɔ́ ɖeji dó hú mɛ bǐ é kpó, kpó Nɛ̌ɛgali-Salɛsɛ́ɛ ahwangán lɛ́ɛ sín gǎn ɔ́ kpó, kpódó ahwangán Babilɔ́nu xɔ́sú ɔ́ tɔn ɖě lɛ́ɛ bǐ kpó, ɖó gbe kpɔ́; yě ɖó gbe kpɔ́ bó sɛ́ mɛ dó ɖɔ è nǐ yi kplá Jelemíi sín sɔ́ja e cɔ́ axɔ́sú Sedesíyasi ɖ'ayǐ lɛ́ɛ sín kɔ́xota; ée yě mɔ ɛ ɔ́, yě kplá ɛ yi jó nú Gedaliyási. Gedaliyási ɔ́, Axikamu ví wɛ é nyí, bó nyí Cafáni vívú, bónú é ná kplá ɛ yi xwé gbe. Énɛ́ ɔ́, Jelemíi nɔ togun tɔn mɛ. Hwenu e Jelemíi ɖo gan sɛn wɛ, ɖo sɔ́ja e nɔ cɔ́ axɔ́sú ɔ́ lɛ́ɛ sín kɔ́xota ɔ́, Mawu Mavɔmavɔ ɖɔ xó ɖé n'i. É ɖɔ n'i ɖɔ: “Yi Evɛ́di-Mɛlɛ́ki Etiopíinu ɔ́ gɔ́n, bó ɖɔ n'i ɖɔ: ‘Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ é ɖíe: un ɖɔ nú mɛ e ɖo toxo élɔ́ mɛ lɛ́ɛ ɖɔ nǔɖé ná jɛ dó yě jí, é kún ka ná nyí nǔ ɖagbe ó; nǔ nyanya wɛ é ná nyí. Énɛ́ ɔ́, nǔ e un ko ɖɔ ɖ'ayǐ ɔ́ ná jɛ din bɔ hwi ɖésú ná mɔ. Amɔ̌, gbe nɛ́ gbe ɔ́, un na hwlɛ́n we gán; un ná lɔn bónú a nǎ jɛ mɛ e ɖi xɛsi ná wɛ a ɖe lɛ́ɛ lɔ mɛ ǎ. Xó e nyɛ Mawu Mavɔmavɔ ɖɔ ɔ́ nɛ́. Nǔgbó wɛ, un ná hwlɛ́n we ɖo kú sí, bɔ a nǎ gán bó ná nɔ gbɛ, ɖó a ɖeji dó wǔ ce. Xó e nyɛ Mawu Mavɔmavɔ ɖɔ ɔ́ nɛ́.’ ” Nɛbuzaladáni, sɔ́ja e nɔ cɔ́ Babilɔ́nu xɔ́sú ɔ́ lɛ́ɛ sín gǎn ɔ́ jó Jelemíi ɖo Hlama. Énɛ́ gúdo wɛ Mawu Mavɔmavɔ lɛ́ ɖɔ xó nú Jelemíi. Wɔlɔ mɛ wɛ é ɖe bɔ è kplá yi dɔ̌n; é kpó mɛ e ahwan wlí sín Jeluzalɛ́mu lɛ́ɛ kpó, kpó mɛ e ahwan wlí sín Judáa toxo ɖě lɛ́ɛ mɛ lɛ́ɛ kpó wɛ è kplá ɛ yi dɔ̌n. Babilɔ́nu wɛ è jlǒ ná kplá ahwankannumɔ énɛ́ lɛ́ɛ yi. Cóbónú Jelemíi ná yi Misipa ɔ́, Nɛbuzaladáni kplá ɛ jɛ vo, bó ná jó e, bó ká ɖɔ n'i ɖɔ: “Mawu Mavɔmavɔ, Mawu towe wɛ ko ɖɔ awě élɔ́ lɛ́ɛ ná xo toxo élɔ́. Awě e xó Mawu Mavɔmavɔ ɖɔ lɛ́ɛ ɔ́, é sɛ́ yě dó nǔgbó, ɖó lě e é ɖɔ togun towe ní wa nǔ gbɔn ɔ́, é bló gbɔn mɔ̌ ǎ; hwɛ énɛ́ e togun towe hu é wú wɛ nǔ élɔ́ lɛ́ɛ bǐ ɖo mi gbo wɛ. Din ɔ́, wlɔ e ɖo alɔ towe lɛ́ɛ ɔ́, un ná ɖe yě síin. Ényí a jlǒ ná xwedó mì yi Babilɔ́nu hǔn, wa mǐ yi, un na kpé nukún dó wǔ we. É má ká jló we ǎ hǔn, nɔ ayǐ. Kpɔ́n, to ɔ́ bǐ nɛ́ mɔ wɛ a ɖe nɛ́; yi fí e nyɔ́ nukún towe mɛ é.” Ée Jelemíi ɖo xó e é ná ɖɔ ɔ́ xo kpɔ́n wɛ ɔ́, Nɛbuzaladáni ɖɔ: “Lɛ̌ kɔ yi Gedaliyási e Babilɔ́nu xɔ́sú ɔ́ zé ɖó Judáa toxo lɛ́ɛ nu ɔ́ gɔ́n; Gedaliyási ɔ́, Axikamu ví wɛ, Cafáni vívú wɛ. Yi nɔ gɔ̌n tɔn ɖo togun ɔ́ mɛ; é ma ká nyí mɔ̌ ǎ hǔn, yi fí e nyɔ́ nukún towe mɛ ɖo to ɔ́ mɛ é.” Ée Nɛbuzaladáni ɖɔ mɔ̌ n'i ɔ́, é ná ɛ nǔ e é ná ɖu ɖo ali jí ɔ́, bó lɛ́ ná ɛ nǔ ɖěvo ɖěvo lɛ́ɛ bó nyi i. Énɛ́ ɔ́, Jelemíi lɛ́ kɔ yi Gedaliyási gɔ́n ɖo Misipa, bó nɔ mɛ e kpo ɖo to ɔ́ mɛ lɛ́ɛ tɛ́ntin. Ahwanfuntɔ́ ɖé lɛ́ɛ kpó gǎn yětɔn lɛ́ɛ kpó kpo ɖo Judáa gbé ɔ́ jí; yě se ɖɔ Babilɔ́nu xɔ́sú ɔ́ zé to ɔ́ dó alɔ mɛ nú Gedaliyási Axikamu ví ɔ́ bó bɛ́ mɛ e kpo bɔ ahwan ma wlí yi Babilɔ́nu ǎ lɛ́ɛ, súnnu kpó nyɔ̌nu kpó yɔkpɔ́vú kpó bǐ dó alɔ mɛ n'i ɖɔ ní kpé nukún dó yě wǔ; yě bǐ wɛ nyí wamamɔnɔ. Ée yě se mɔ̌ ɔ́, yě yi mɔ Gedaliyási ɖo Misipa. Yě mɛ e yi lɛ́ɛ wɛ nyí: Yicimayɛ́li Nɛtaniya ví ɔ́, Kaleyaxi ví súnnu we lɛ́ɛ: Yoxanáni kpó Yonatáni kpó, Selaya Tanxumɛti ví ɔ́, Ofáyi Nɛtofanu ɔ́ sín vǐ lɛ́ɛ, kpó Yezaniyahu Maaka ví ɔ́ kpó. Gǎn énɛ́ lɛ́ɛ kpó ahwanfuntɔ́ yětɔn lɛ́ɛ kpó wɛ ɖidó Gedaliyási gɔ́n. Ée yě yi ɔ́, Gedaliyási ɖɔ nú yě ɖɔ: “Mi ma ɖi xɛsi bó gɔn gbe yí nú acɛkpikpa Babilɔ́nunu lɛ́ɛ tɔn ó; mi sɛn Babilɔ́nu xɔ́sú ɔ́. Nyɛ dó akpá nú mi ɖo mɛ bǐ nukɔn ɖɔ mi bló mɔ̌ ɔ́, nǔ ná nyɔ́ nú mi. Nyɛ ɔ́, un ná nɔ Misipa fí, bó ná sɔ́ afɔ mitɔn ɖó te, ɖo Babilɔ́nunu e ná wá mǐ gɔ̌n lɛ́ɛ nukɔn. Midɛɛ lɛ́ɛ ɔ́, mi gbɛ vǐwun lɛ́ɛ, mi gbɛ atínsínsɛ́n lɛ́ɛ, mi ɖa ami. Mi kplé nǔ énɛ́ lɛ́ɛ ɖó toxo mitɔn e mɛ mi lɛ́ kɔ wá lɛ́ɛ mɛ.” Mɔ̌ ɖokpó ɔ́, Judáa ví e ɖo Mɔwabu lɛ́ɛ, éé ɖo Amumɔ́ɔ ví lɛ́ɛ mɛ lɛ́ɛ, éé ɖo Edɔ́mu yíkúngban jí lɛ́ɛ, kpó éé ɖo to ɖěvo ɖěvo mɛ lɛ́ɛ kpó bǐ se ɖɔ Babilɔ́nu xɔ́sú ɔ́ jó mɛ ɖé lɛ́ɛ dó nyi Judáa to ɔ́ mɛ, bó sɔ́ Gedaliyási ɖó yě nu. Ée Judáa ví énɛ́ lɛ́ɛ se mɔ̌ ɔ́, yě bǐ nyi ahwan sín fí tɛnmɛ tɛnmɛ e ahwan gba yě, bɔ yě yi cí lɛ́ɛ, lobo wá Judáa ɖo Gedaliyási gɔ́n ɖo Misipa. Ée yě wá ɔ́, yě gbɛ vǐwun kpó atínsínsɛ́n tɛnmɛ tɛnmɛ kpó, bɔ é sukpɔ́ ɖésú. É wá su gbe ɖokpó, bɔ Yoxanáni Kaleyaxi ví ɔ́ kpó ahwanfuntɔ́ lɛ́ɛ sín gǎn e ɖo gbě énɛ́ lɛ́ɛ jí ɔ́ kpó wá Gedaliyási gɔ́n ɖo Misipa, bó ɖɔ n'i ɖɔ: “A tunwun ɖɔ Baalisi Amumɔ́ɔ ví lɛ́ɛ sín axɔ́sú ɔ́ zɔ́n Yicimayɛ́li Nɛtaniya ví ɔ́ ɖɔ é ní hu we a?” Gedaliyási ka ɖi ɖɔ xó nǔgbó ɖɔ nú émí wɛ yě ɖe ǎ. Nǔ ɖo mɔ̌ có, Yoxanáni zɔn vo, bó yi mɔ Gedaliyási ɖo Misipa fínɛ́, bó ɖɔ n'i ɖo nǔglɔ́ ɖɔ: “Nǎ gbe mì, nú ma yi hu Yicimayɛ́li énɛ́. Mɛ ɖěbǔ na tunwun ǎ. Étɛ́wú a nǎ jó hwiɖée dó bɔ é ná hu? É hu we din ɔ́, Judáa ví e lɛ́ dó we lɛ́ɛ bǐ na lɛ́ gba dó, bɔ Judáa to ɔ́ ná lɛ́ jɛ vɔ̌.” Ée Yoxanáni ɖɔ mɔ̌ ɔ́, Gedaliyási ɖɔ n'i ɖɔ: “Ma bló mɔ̌ ó. Nǔ e ɖɔ dó Yicimayɛ́li wú wɛ a ɖe ɔ́ sɔ gbe ǎ.” Xwe énɛ́ ɔ́ sín sun tɛ́nwegɔ́ ɔ́ mɛ ɔ́, Yicimayɛ́li Nɛtaniya ví, Elicama vívú ɔ́ wá Gedaliyási gɔ́n ɖo Misipa. Yicimayɛ́li ɔ́, axɔ́sú kún mɛ é jɔ ɖe, bó nɔ axɔ́sú sín mɛ lɛ́ɛ mɛ. É kpódó gbɛtɔ́ wǒ kpó wɛ wá Gedaliyási gɔ́n. Hwenu e yě ɖo nǔ ɖu wɛ ɖo Gedaliyási xwé ɔ́, Yicimayɛ́li sí te, bɔ mɛ wǒ e kplá lɛ́ɛ lɔmɔ̌ sí te, bɔ yě bǐ kplé dó Gedaliyási bó hu i ɖó hwǐ wú. Lě e yě hu mɛ e Babilɔ́nu xɔ́sú ɔ́ zé ɖó to ɔ́ nu gbɔn ɔ́ nɛ́. Yicimayɛ́li lɛ́ hu Judáanu e ɖo Gedaliyási gɔ́n ɖo Misipa lɛ́ɛ bǐ; é hu Babilɔ́nunu ahwanfuntɔ́ e ɖo fínɛ́ lɛ́ɛ bǐ. È hu Gedaliyási ɔ́, é kó bló azǎn we, bɔ mɛ ɖěbǔ ka ko tunwun ǎ. Gbe nɛ́ gbe ɔ́, gbɛtɔ́ kanwe (80) gosín Sikɛ́mu, Silóo kpódó Samalíi kpó; yě hɛn nǔníná, kpó zǎlínkpɔ́n kpó, bó ná yi xwlé Mawu ɖo Mawu Mavɔmavɔ xwé. Yě xwlɛ́ atán yětɔn lɛ́ɛ, bó dó awu vúnvún, bó já wǔtu bǐ. Yě bló mɔ̌ dó ɖe xlɛ́ ɖɔ émí ɖo aluwɛ mɛ. Ée Yicimayɛ́li Nɛtaniya ví ɔ́ se ɖɔ mɛ ɖé lɛ́ɛ jǎwe ɔ́, é gosín Misipa, bó ɖidó yě kpé gbé kpó avǐ kpó. Ée é kpé yě ɔ́, é dó kɛnklɛ́n nú yě ɖɔ yě ní wá mǐ yi Gedaliyási Axikamu ví ɔ́ xwé. Lo ɔ́, ée yě jɛ toxo tɛ́ntin ɔ́, Yicimayɛ́li kpó ahwan tɔn lɛ́ɛ kpó gbo gbe mɛ gěgé ɖo yě mɛ, bó bɛ́ yě dó sitɛ́nu mɛ. É ká jó mɛ wǒ dó ɖo yě mɛ, ɖó yě ɖɔ n'i ɖɔ é ní má hu émí ó, émí hɛn nǔɖuɖu gban bó zé sɛxwe dó nǔkan mɛ fí ɖé; émí hɛn blěe, ɔ́ji, ami kpódó wǐin kpó. Ée yě ɖɔ mɔ̌ ɔ́, Yicimayɛ́li sɔ́ hu yě ǎ. Sitɛ́nu e mɛ Yicimayɛ́li bɛ́ mɛ e é wá hu gɔ́ nú Gedaliyási lɛ́ɛ sín cyɔ kɔn dó ɔ́, sitɛ́nu e axɔ́sú Asa kun hwenu e é kpó Izlayɛ́li xɔ́sú Baeca kpó ɖo ahwan fun wɛ é wɛ. Sitɛ́nu énɛ́ mɛ wɛ Yicimayɛ́li bɛ́ cyɔ lɛ́ɛ dó bɔ é gɔ́. Ée Yicimayɛ́li dó nǔ énɛ́ lɛ́ɛ sin ɔ́, é wlí mɛ e kpo ɖo Misipa lɛ́ɛ bǐ, káká jɛ axɔ́sú ɔ́ sín vǐ nyɔ̌nu lɛ́ɛ jí; è nǎ ɖɔ ɔ́, é wlí mɛ e Nɛbuzaladáni sɔ́ dó así nú Gedaliyási lɛ́ɛ bǐ sín kannumɔ, bó kplá ɖidó Amumɔ́ɔ ví lɛ́ɛ gɔ́n. Nɛbuzaladáni ɔ́, sɔ́ja e nɔ cɔ́ Babilɔ́nu xɔ́sú ɔ́ sín gǎn wɛ. Yoxanáni Kaleyaxi ví ɔ́ kpódó ahwanfuntɔ́ lɛ́ɛ sín gǎn ɖě lɛ́ɛ e ɖo kpɔ́ xá ɛ lɛ́ɛ kpó se nǔ e Yicimayɛ́li Nɛtaniya ví ɔ́ dó sin é. Ée yě se mɔ̌ ɔ́, yě kplá ahwanfuntɔ́ yětɔn lɛ́ɛ bǐ, bó ɖidó ahwan fun xá Yicimayɛ́li gbé. Yě wá yi xwedó wǔ tɔn ɖo tɔ ɖaxó e ɖo Gabawɔ́ɔn é kpá. Ée mɛ e Yicimayɛ́li wlí lɛ́ɛ mɔ Yoxanáni kpó ahwanfuntɔ́ lɛ́ɛ sín gǎn ɖě lɛ́ɛ kpó ɔ́, é víví nú yě ɖésú. Mɛ énɛ́ lɛ́ɛ e Yicimayɛ́li kplá sín Misipa lɛ́ɛ bǐ lɛ́ kɔ, bó yi su Yoxanáni. Ée Yicimayɛ́li mɔ mɔ̌ ɔ́, é hɔn, é kpó mɛ tɔn tántɔn kpó, bó yi Amumɔ́ɔ ví lɛ́ɛ gɔ́n, bó gló Yoxanáni. Yoxanáni kpó gǎn ɖě lɛ́ɛ e zɔn xá ɛ lɛ́ɛ kpó kplá mɛ e Yicimayɛ́li hu Gedaliyási bó kplá sín Misipa lɛ́ɛ; é kplá ahwanfuntɔ́ lɛ́ɛ, nyɔ̌nu lɛ́ɛ, yɔkpɔ́vú lɛ́ɛ kpó agooɖojǐe lɛ́ɛ kpó. Yě nɔ́ Gabawɔ́ɔn ǎ, yě wlí ali, bó wá nɔ te ɖo jǒnɔyítɛn Kimuxámu tɔn, ɖo malín málín mɛ dó Bɛteleyɛ́mu, lobo ná dín yi Ejípu. Đó yě ko ɖo xɛsi ɖi nú Babilɔ́nunu lɛ́ɛ wɛ sín hwenu e Yicimayɛ́li hu Gedaliyási, mɛ e Babilɔ́nu xɔ́sú ɔ́ zé ɖó yě nu é. Yoxanáni Kaleyaxi ví ɔ́, kpó ahwanfuntɔ́ lɛ́ɛ sín gǎn ɖě lɛ́ɛ kpó, kpó Azalya Hocaya ví ɔ́ kpó, kpódó mɛ e xwedó yě lɛ́ɛ bǐ kpó, bɛ́ sín yɔkpɔ́vú jí káká yi jɛ mɛxó jí bǐ zɔn kpɔ́, bó yi mɔ gbeyíɖɔ Mawu tɔn Jelemíi, bó ɖɔ n'i ɖɔ: “Kɛnklɛ́n bó bló nǔ e na byɔ́ we wɛ mǐ ɖe ɔ́ nú mǐ. Sa vo nú Mawu Mavɔmavɔ, Mawu towe dó mǐ mɛ élɔ́ lɛ́ɛ e kpo ɖo gbɛ lɛ́ɛ bǐ tamɛ. Mǐ sukpɔ́ hú lě ɖ'ayǐ, mǐ mɛ e kpo din lɛ́ɛ ɔ́, bǐ ɖíe mɔ wɛ a ko ɖe e. Mawu Mavɔmavɔ, Mawu towe ní xlɛ́ ali e mǐ ná gbɔn é mǐ; é ní ɖɔ nǔ e mǐ ná wa é nú mǐ.” Ée yě ɖɔ mɔ̌ ɔ́, gbeyíɖɔ Mawu tɔn Jelemíi ɖɔ nú yě ɖɔ: “Un se xó e mi ɖɔ é. Un na sa vo nú Mawu Mavɔmavɔ, Mawu mǐtɔn lě e mi ɖɔ gbɔn ɔ́. É ká ɖɔ xó ɖé ɔ́, un ná ɖɔ bǐ nú mi, un ná hwlá ɖěbǔ dó mi ǎ.” Énɛ́ ɔ́, yě ɖɔ nú Jelemíi ɖɔ: “Mǐ yí gbe, mǐ nǎ bló nǔ e Mawu Mavɔmavɔ, Mawu towe ná ɖɔ nú we ɔ́ bǐ ɖ'é jí pɛ́pɛ́pɛ́. Mawu Mavɔmavɔ, Mawu towe ɔ́, éyɛ́ mɛ e nyí nǔgbóɖɔtɔ́, bó nyí gbejínɔtɔ́ ɔ́ ní se akpá e dó nú we wɛ mǐ ɖe é. Mǐ wɛ ɖɔ nú we ɖɔ hwi ní kan xó byɔ́ Mawu Mavɔmavɔ, Mawu mǐtɔn nú mǐ. Hǔn nǔ e é na ɖɔ ɔ́ nyɔ́ mǐ nukún mɛ kpó é nylá mǐ nukún mɛ kpó ɔ́, mǐ ɖǒ ná bló. Nǔ ɖǒ ná nyɔ́ nú mǐ, ɖó nǔ e Mawu Mavɔmavɔ, Mawu mǐtɔn ɖɔ é wɛ mǐ bló.” Ée yě ɖɔ xó nú Jelemíi ɔ́, é bló azǎn wǒ bɔ Mawu Mavɔmavɔ ɖɔ xó n'i. Énɛ́ ɔ́, Jelemíi ylɔ́ Yoxanáni Kaleyaxi ví ɔ́ kpó gǎn ɖě lɛ́ɛ kpó, kpódó mɛ e xwedó yě lɛ́ɛ bǐ kpó, bɛ́ sín yɔkpɔ́vú jí káká yi jɛ mɛxó jí. É ɖɔ nú yě ɖɔ: “Mi zɔ́n mì ɖɔ má kan nǔ byɔ́ Mawu Mavɔmavɔ, Mawu Izlayɛ́li tɔn nú émí; xó e é ɖɔ ɔ́ ɖíe: ‘Ényí mi nɔ to mitɔn mɛ ɔ́, un ná vɔ́ mi gbá xɔ ɖɔhun, un sɔ́ ná gba mi xɔ ɖɔhun ǎ. Un ná vɔ́ mi tun atín ɖɔhun, un sɔ́ ná hɔn mi atín ɖɔhun ǎ. Awě e un sɛ́ dó mi ɔ́ ná lɛ́ vɛ́ nú mì. Din ɔ́, mi ma sɔ́ ɖi xɛsi ɖěbǔ nú Babilɔ́nu xɔ́sú ɔ́ ó. Nyɛ Mawu Mavɔmavɔ wɛ ɖɔ mɔ̌ nú mi; mi ma ɖi xɛsi n'i ó, ɖó un ɖo kpɔ́ xá mi, un ná hwlɛ́n mi, un ná yí mi sín alɔ tɔn mɛ. Un ná bló bɔ é na yí wǎn nú mi, nǔ mitɔn nǎ blá wǔ n'i, bɔ é ná jó mi dó bɔ mi na lɛ́ kɔ wá ayǐkúngban mitɔn jí.’ ” “Lo ɔ́, ényí mi ma bló nǔ e Mawu Mavɔmavɔ, Mawu mitɔn ɖɔ é ǎ, bó ɖɔ: mǐ nǎ nɔ to élɔ́ mɛ fí ǎ, gbeɖé, mi gbɔ bó yí Ejípu ɔ́, é nyɔ́ hú. Ahwan ɖě ɖo dɔ̌n ǎ, mǐ ná se lanzo sín gbe e nɔ ɖe xlɛ́ ɖɔ ahwan bɛ́ ɔ́ ɖě ɖo dɔ̌n ǎ, adɔ ɖě ná dó ya nú mǐ ɖo Ejípu ǎ. Dɔ̌n wɛ mǐ na yí nɔ. Ényí mi ɖɔ mɔ̌ ɔ́, mi mɛ e kpo ɖo Judáa lɛ́ɛ ɔ́, mi ɖótó xó e Mawu Mavɔmavɔ ɖɔ é. Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Ényí mi ɖɔ émí ná yi Ejípu jɛ́n wɛ, bó hɔn yi dɔ̌n nǔgbó ɔ́, ahwan e ɖi xɛsi ná wɛ mi ɖe ɔ́, ná wá gba mi ɖo dɔ̌n, adɔ e hɔn ná wɛ mi ɖe ɔ́ ná wá hɛn mi ɖo dɔ̌n, bɔ mi ná kú jɛ dɔ̌n. Mɛ e ná xwe nǔ, bó ná yi Ejípu lɛ́ɛ ɔ́, ahwan, adɔ kpódó jɛmɛjí kpó ná hu yě. Awě e un ná sɛ́ dó yě lɛ́ɛ ɔ́, mɛ ɖěbǔ na gló ɖo yě mɛ ǎ.’ ” Jelemíi lɛ́ vɔ́ ɖɔ: “Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Ényí mi yi Ejípu ɔ́, lě e un ɖe xomɛsin ce kpó adǎn ce kpó xlɛ́ Jeluzalɛ́munu lɛ́ɛ gbɔn ɔ́, wɛ un ná ɖe xlɛ́ mi lɔmɔ̌. Bɔ è ja nu dó mɛ ɖé gbé ɔ́, è ja nǔ baɖabaɖa ɖé sín xó ɖɔ gbé ɔ́, è ja hɛ̌nnú ɖé abǐ winnyánú ɖé sín xó ɖɔ gbé ɔ́, mi wú wɛ è nǎ nɔ́ jlɛ́ dó. Mi ka sɔ́ ná mɔ to élɔ́ ɖó nukún wú gbeɖé ǎ.’ ” Jelemíi lɛ́ ɖɔ: “Judáanu lɛ́ɛ mi, mi mɛ e kpo lɛ́ɛ ɔ́, Mawu Mavɔmavɔ gbɛ́ nú mi ɖɔ mi ma yi Ejípu ó. Mi ní ka tunwun ganjí ɖɔ un ɖɔ nú mi égbé din. Mi ɖésúnɔ wú wa nǔ dó wɛ mi ka ɖe, ɖó mi ɖɔ nú mì ɖɔ: ‘Sa vo nú Mawu Mavɔmavɔ, Mawu mǐtɔn dó ta mǐtɔn mɛ, bó ɖɔ nǔ e é ɖɔ ɔ́ bǐ nú mǐ, bónú mǐ ná bló.’ Égbé din ɔ́, un ka ɖɔ nǔ e Mawu Mavɔmavɔ, Mawu mǐtɔn ɖɔ ɔ́ nú mi, mi ka ɖótó ǎ, mi ka yí gbe nú nǔ e é ɖɔ nú mì ɖɔ nyi ní ɖɔ nú mi lɛ́ɛ ɖěbǔ ǎ. Hǔn mi bo tunwun égbé din ɖɔ ahwan, adɔ, kpódó jɛmɛjí kpó ná hu mi ɖo to e mɛ nɔ gbé mi xwe é.” Xó e Mawu Mavɔmavɔ ɖɔ nú Jelemíi ɖɔ é ní ɖɔ nú togun ɔ́, Jelemíi ɖɔ bǐ nú yě. Ée Jelemíi ɖɔ xó fó ɔ́, Azalya Hocaya ví ɔ́, kpó Yoxanáni Kaleyaxi ví ɔ́ kpó mɛ ɖě lɛ́ɛ bǐ kpó syɛ́n ta, bó ɖɔ nú Jelemíi ɖɔ: “Adingban ɖó wɛ a ɖe. Mawu Mavɔmavɔ, Mawu mǐtɔn wɛ ɖɔ nú we ɖɔ hwi ní ɖɔ nú mǐ ɖɔ mǐ ní ma yi Ejípu bó nɔ dɔ̌n ó ǎ, adingban wɛ. Baalúki Nɛliya ví ɔ́ wɛ ɖe we kpé nú mǐ, bó ná mɔ tɛn bó jó mǐ nú Babilɔ́nunu lɛ́ɛ, bɔ yě ná hu mǐ, abǐ yě ná kplá mǐ yi Babilɔ́nu gǎnnugǎnnu.” Énɛ́ ɔ́, Yoxanáni Kaleyaxi ví ɔ́, kpó ahwanfuntɔ́ lɛ́ɛ sín gǎn ɖě lɛ́ɛ kpó, kpódó mɛ e xwedó yě lɛ́ɛ kpó ɖěbǔ nɔ Judáa lě e Mawu Mavɔmavɔ ɖɔ nú yě gbɔn ɔ́ ǎ. Yě mɛ e kpo ɖo Judáa lɛ́ɛ yi Ejípu; yě mɛ e ahwan nya dó gbě bɔ yě lɛ́ kɔ wá Judáa lɛ́ɛ wɛ. Súnnu lɛ́ɛ, nyɔ̌nu lɛ́ɛ, yɔkpɔ́vú lɛ́ɛ, Judáa xɔ́sú ví nyɔ̌nu lɛ́ɛ, kpódó mɛ e è sɔ́ dó alɔ mɛ nú Gedaliyási Axikamu ví, Cafáni vívú ɔ́ lɛ́ɛ kpó yi; Nɛbuzaladáni, sɔ́ja e nɔ cɔ́ Babilɔ́nu xɔ́sú ɔ́ lɛ́ɛ sín gǎn ɔ́ wɛ sɔ́ yě dó alɔ mɛ nú Gedaliyási; yě kplá gbeyíɖɔ Jelemíi kpó Baalúki Nɛliya ví ɔ́ kpó, bó yi. Yě vɛ́ tóli nú Mawu Mavɔmavɔ; yě yi Ejípu, bó yi cí Tapanɛ́si toxo mɛ. Tapanɛ́si fínɛ́ wɛ Judáanu lɛ́ɛ ɖe, bɔ Mawu Mavɔmavɔ ɖɔ xó nú Jelemíi; é ɖɔ n'i ɖɔ: “Cyán awǐnnya kloklo kpɛɖé, ɖó alɔ towe wú, bó kun do dó kpe e è tɛ́ gbɔn Ejípu xɔ́sú ɔ́ sín azɔ̌xwé nukɔn lɛ́ɛ glɔ́ lobo ɖi yě. Blǒ ɖo Judáanu lɛ́ɛ bǐ nukún mɛ. A bló mɔ̌ ɔ́, a nǎ ɖɔ nú yě ɖɔ: ‘Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: Un ná zɔ́n bɔ è nǎ ylɔ́ mɛsɛntɔ́ ce Nabukodonɔzɔ́ɔ, Babilɔ́nu xɔ́sú ɔ́ nú mì; un ná zé axɔ́súzinkpo tɔn ɖó awǐnnya élɔ́ lɛ́ɛ e a dǒ do lɛ́ɛ jí, é ná dó goxɔ tɔn ɖó awǐnnya lɛ́ɛ jí. É ná wá, bó ná gba to élɔ́, bɔ mɛ e ná kú lɛ́ɛ ná kú, mɛ e è nǎ wlí yi lɛ́ɛ ɔ́, è nǎ wlí yě yi, mɛ e ahwan ná hu lɛ́ɛ ɔ́, ahwan ná hu. Un ná dó nǔmɛsɛn e ɖo Ejípu lɛ́ɛ sín xwé zo. Nabukodonɔzɔ́ɔ ná dó vodún lɛ́ɛ zo, abǐ é sixú bɛ́ yě yi to tɔn mɛ. É ná ɖe ɖɛ dɔkun e ɖo Ejípu lɛ́ɛ ɖokpó ɖokpó, lě e kanlinnyitɔ́ nɔ́ ɖe ɖɛ jɔ̌ sín avɔ mɛ é ɖɔhun. É bló mɔ̌ ɔ́, é ná yi bɔ mɛ ɖěbǔ ná kɛ nu dó wǔ tɔn ǎ. É ná gba bǒcyɔ e ɖo Heliopolísi ɖo Ejípu fí lɛ́ɛ, bó ná dó nǔmɛsɛn sín xwé lɛ́ɛ zo.’ ” Judáanu lɛ́ɛ hɔn yi cí Ejípu toxo ɖé lɛ́ɛ mɛ; toxo lɛ́ɛ wɛ nyí Migidɔ́lu, Tapanɛ́si kpó Mɛfísi kpó; mɛɖé lɛ́ɛ ká hɔn yi cí Patlɔ́si gbé jí ɖo Ejípu dɔ̌n; Mawu ɖɔ xó sɛ́ dó yě gbɔn Jelemíi jí. Bɔ Jelemíi ɖɔ nú yě ɖɔ: “Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Mi mɔ awě e un sɛ́ dó Jeluzalɛ́mu kpó Judáa toxo ɖě lɛ́ɛ kpó é. Toxo énɛ́ lɛ́ɛ bǐ wɛ ko gba égbé din; bǐ kó jɛ vɔ̌. Nǔ nyanya e mɛ e ɖo toxo énɛ́ mɛ lɛ́ɛ wa bó dó xomɛsin nú mì é wɛ zɔ́n. Yě nɔ́ xwlé zǎlínkpɔ́n vodún, bó nɔ́ sɛn yě. Lo ɔ́, yě ká kpé nǔɖé xá vodún énɛ́ lɛ́ɛ ɖ'ayǐ ǎ, mi kpó tɔ́gbó mitɔn lɛ́ɛ kpó tunwun yě ɖ'ayǐ ǎ. Nyɛ ɔ́, un ka nɔ gɔn gbeyíɖɔ ce lɛ́ɛ sɛ́ dó mi ǎ, un nɔ sɛ́ yě dó mi, bónú mi na jó walɔ nyanya énɛ́ lɛ́ɛ e un gbɛ́ wǎn ná lɛ́ɛ dó. Lo ɔ́, mi ɖótó yě ǎ, mi ké ya ná ǎ, mi jó gbɛ nyanya e zán wɛ mi ɖe ɔ́ dó ǎ, mi gɔn zǎlínkpɔ́n xwlé vodún ǎ. Ée mi bló mɔ̌ ɔ́, un gbɔ bo ɖe xomɛsin ce kpó adǎn ce kpó xlɛ́ gbɔn Judáa toxo lɛ́ɛ mɛ, bó ɖe xlɛ́ gbɔn Jeluzalɛ́mu li lɛ́ɛ jí. Dǒglin kɛ́ɖɛ́ wɛ kpo ɖo te, nǔ bǐ wɛ gúdú lě e é ɖe gbɔn égbé din é.’ ” Jelemíi lɛ́ ɖɔ: “Din ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖo nǔ élɔ́ lɛ́ɛ kanbyɔ́ mi wɛ: ‘Étɛ́wú mi ka ɖo nǔ wa dó miɖée wú wɛ sɔ́ mɔ̌? Mi jló ná sú Judáa ví súnnu, nyɔ̌nu, dɔ̌nkpɛvú kpó yɔkpɔ́vú kpó sín kún dó wɛ a? Mi jló nú donu mitɔn ɖě ná kpo ǎ wɛ a? Étɛ́wú mi nɔ wa nǔ dó dó xomɛsin nú mì mɔ̌? Mi nɔ xwlé zǎlínkpɔ́n vodún ɖo Ejípu fí e mi hɔn wá cí é. Mi jló ná sú miɖée sín kún dó, lobo ná húzú awě kpó hɛ̌n kpó sín kpɔ́ndéwú, ɖo akɔta e ɖo gbɛ ɔ́ mɛ lɛ́ɛ tɛ́ntin wɛ a? Nǔ baɖabaɖa e tɔ́gbó mitɔn, Judáa xɔ́sú lɛ́ɛ kpó asi yětɔn lɛ́ɛ kpó dó sin, kpódó ée mi kpó asi mitɔn lɛ́ɛ kpó dó sin ɖo Judáa, bó dó sin ɖo Jeluzalɛ́mu li lɛ́ɛ jí lɛ́ɛ kpó ɔ́, mi wɔn yě wɛ a? Káká jɛ égbé din ɔ́, mɛ ɖěbǔ ko sɔ́ éɖée hwe ǎ, mɛ ɖěbǔ ɖó sísí nú mì ǎ. Un kplɔ́n nǔ yě, bó dó sɛ́n nú yě, lě e un bló gbɔn nú mi kpó tɔ́gbó mitɔn lɛ́ɛ kpó ɔ́, yě mɛ ɖěbǔ ká bló nǔ e un ɖɔ é ǎ.’ ” “Énɛ́ wú wɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Un jló ná sɛ́ awě dó mi, bó ná sú Judáa togun ɔ́ sín kún dó. Un ná kplá Judáanu e kpo bó hɔn yi Ejípu lɛ́ɛ, bɔ mi bǐ ná kú. Ejípu wɛ mi nǎ kú jɛ. Ahwan kpó adɔ kpó ná gbo xó mitɔn, mi bǐ ná kú, bɛ́ sín yɔkpɔ́vú jí káká jɛ mɛxó jí. Mɔ̌ wɛ mi ná kú gbɔn, bɔ è ja nu dó mɛ gbé ɔ́, è ja nǔ baɖabaɖa ɖé sín xó ɖɔ gbé ɔ́, è ja hɛ̌nnú ɖé, abǐ winnyánú ɖé sín xó ɖɔ gbé ɔ́, mi wú wɛ è nǎ nɔ́ jlɛ́ dó. Un ná dɔn tó nú mi mɛ e wá cí Ejípu lɛ́ɛ, lě e un zé ahwan, adɔ kpódó jɛmɛjí kpó dó dɔn tó nú Jeluzalɛ́munu lɛ́ɛ gbɔn é. Mɛ ɖěbǔ ná sixú hɔn ɖo mi mɛ e wá cí Ejípu fí lɛ́ɛ mɛ ǎ, mi mɛ ɖěbǔ ná gló nǔ e ná jɛ ɔ́ ǎ. Judáa to e ɖó nukún wɛ mi ɖe ɖɔ émí ná lɛ́ kɔ wá mɛ gbe ɖokpó ɔ́ ná gló mi bǐ; mɛ ɖokpó ɖokpó ɖé lɛ́ɛ jɛ́n ná lɛ́ kɔ wá ɖo mi mɛ.’ ” Judáanu e wá cí Patlɔ́si ɖo Ejípu lɛ́ɛ bǐ ɖɔ xó nú Jelemíi. Yě mɛ e tunwun ganjí ɖɔ asi émítɔn lɛ́ɛ nɔ́ xwlé zǎlínkpɔ́n vodún lɛ́ɛ bǐ ɖo fínɛ́ lɛ́ɛ é. Nyɔ̌nu lɛ́ɛ lɔmɔ̌ kplé ɖo fínɛ́ bó sukpɔ́ ɖésú. Súnnu lɛ́ɛ ɖɔ n'i ɖɔ: “A nɔ ɖɔ émí ɖo xó ɖɔ nú mǐ wɛ dó Mawu Mavɔmavɔ nyíkɔ mɛ; mǐdɛɛ lɛ́ɛ ká jló ná ɖótó we ǎ. Nǔ e mǐ kó zé nu mǐtɔn dó ɖɔ ɔ́ wɛ mǐ jló ná bló, é wɛ nyí ɖɔ mǐ nǎ xwlé zǎlínkpɔ́n vodún Axɔ́si jǐxwé tɔn ɔ́, mǐ ná ba ahan n'i, lě e mǐ kpó mɛ mǐtɔn lɛ́ɛ, axɔ́sú mǐtɔn lɛ́ɛ, kpódó gǎn mǐtɔn lɛ́ɛ kpó nɔ́ bló gbɔn ɖo Judáa, bó nɔ́ bló gbɔn ɖo Jeluzalɛ́mu li lɛ́ɛ jí ɖ'ayǐ é. Hwenu e mǐ nɔ́ wa nǔ gbɔn mɔ̌ ɔ́, mǐ nɔ́ mɔ nǔ bó nɔ́ ɖu, bó nɔ́ gɔ́ xo, mǐ nɔ́ ɖu gbɛ, adǎn ɖěbǔ nɔ́ gbo mǐ ǎ. Amɔ̌, sín hwenu e mǐ ma sɔ́ xwlé zǎlínkpɔ́n ɖě vodún Axɔ́si jǐxwé tɔn ɔ́ ǎ, bó má sɔ́ nɔ́ ba ahan ɖě n'i ǎ ɔ́, nǔ bǐ hán mǐ, ahwan kpó adɔ kpó hu mǐ.” Ée súnnu lɛ́ɛ ɖɔ mɔ̌ ɔ́, nyɔ̌nu lɛ́ɛ ɖɔ nú Jelemíi ɖɔ: “Hwenu e mǐ ɖo zǎlínkpɔ́n xwlé vodún Axɔ́si jǐxwé tɔn ɔ́ wɛ ɔ́, é má nyí asú mǐtɔn lɛ́ɛ jɛ́n yí gbe nú mǐ ǎ cé? Yě tunwun ganjí ɖɔ vodún Axɔ́si jǐxwé tɔn ɔ́, atá e mǐ nɔ́ xwlé e ɔ́, akpajlɛ́ tɔn wɛ; yě tunwun ɖɔ é wɛ mǐ nɔ́ lɛ́ ba ahan ná.” Lo ɔ́, Jelemíi ɖɔ nú súnnu kpó nyɔ̌nu kpó e ɖɔ xó n'i lɛ́ɛ bǐ ɖɔ: “Zǎlínkpɔ́n e mi kpó tɔ́gbó mitɔn lɛ́ɛ kpó axɔ́sú mitɔn lɛ́ɛ kpó gǎn mitɔn lɛ́ɛ kpó, kpódó togun ɔ́ bǐ kpó nɔ́ dó zo gbɔn Judáa toxo lɛ́ɛ mɛ, bó nɔ́ dó zo ɖo Jeluzalɛ́mu li lɛ́ɛ jí ɖ'ayǐ ɔ́, mi tunwun ɖɔ Mawu Mavɔmavɔ flín ǎ cé? É wɔn wɛ mi vɛdó a? Éeǒ, nǔ e wa wɛ mi ɖe nɛ́ lɛ́ɛ kpé kɔ nú Mawu Mavɔmavɔ, walɔ mitɔn baɖabaɖa nɛ́ lɛ́ɛ cikɔ n'i. Énɛ́ ɔ́ wútu wɛ to mitɔn gba, bó jɛ vɔ̌. È ja nǔ baɖabaɖa ɖě ɖɔ gbé ɔ́, è nǎ nɔ xa to mitɔn dó ná kpɔ́ndéwú; mɛ bǐ wɛ mɔ ɖó mɔ̌. Vodún lɛ́ɛ e mi sá vɔ̌ ná ɔ́ wú wɛ awě élɔ́ ɖo mi xo wɛ égbé din, mi hu hwɛ dó Mawu Mavɔmavɔ ɖó mi ɖótó nǔ e é ɖɔ nú mi ɔ́ ǎ, mi ké ya nú nǔ e é kplɔ́n mi é ǎ, mi nyi sɛ́n e é dó nú mi lɛ́ɛ ǎ, mi wa nǔ e é zɔ́n mi lɛ́ɛ ǎ.” Jelemíi lɛ́ ɖɔ nú togun ɔ́ bǐ, súnnu kpó nyɔ̌nu kpó ɖɔ: “Mi Judáanu e ɖo Ejípu lɛ́ɛ, mi ɖótó xó e Mawu Mavɔmavɔ ɖɔ é: Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖo ɖiɖɔ nú mi wɛ ɖɔ: ‘Mi kpó asi mitɔn lɛ́ɛ kpó ɖɔ gbɛ na bo gbɔn ɖě ɔ́, émí ná ɖe akpá ɖěɖě émí dó nú vodún Axɔ́si jǐxwé tɔn lɛ́ɛ, émí ná xwlé zǎlínkpɔ́n ɛ, lobo ná ba ahan n'i. Mi ɖɔ mɔ̌ bó ká bló nǔgbó. É nyɔ́, nǔ e mi ɖɔ ɔ́, mi bo bló kpowun! Amɔ̌, mi bǐ ní ɖótó xó e ɖɔ nú mi wɛ un ɖe ɔ́ ganjí, nyɛ Mawu Mavɔmavɔ ɔ́ wɛ ɖo xó ɖɔ nú mi wɛ. Nyǐkɔ ce ɖaxó ɔ́ wɛ un xwlé nú mi, Judáanu ɖěbǔ ná ɖo Ejípu fí, bó ná ja nǔ xwlé gbé, bó ná ɖɔ émí xwlé Mawu e ɖo gbɛ tɛgbɛ é, émí xwlé Mawu Mavɔmavɔ ǎ; un sɔ́ ná se mɔ̌ ɖo nu yětɔn gbeɖé ǎ. Un ná wa nǔ xá mi, un ná wa ɖagbe nú mi ǎ, un ná jó dó ǎ. Ahwan kpó adɔ kpó ná hu mi Judáanu e ɖo fí lɛ́ɛ bǐ, mi bǐ nǎ vɔ. Mi mɛ kpɛ e ná kpo, bɔ ahwan ma ná hu ǎ lɛ́ɛ ná lɛ́ kɔ sín Ejípu fí, bó ná yi xwé. Mi ná kpɔ́n ɖɔ nǔ e un ɖɔ ɔ́ má ná jɛ a jí, abǐ nǔ e mi ɖɔ ɔ́ wɛ ná jɛ. Xó e nyɛ Mawu Mavɔmavɔ ɖo ɖiɖɔ nú mi wɛ ɔ́ ɖíe: Un na wa nǔ xá mi ɖo fí, un na ná xlɛ̌ ɖokpó mi, énɛ́ ɔ́, mi ná mɔ ɖɔ un na wa nǔ e un ɖɔ un na wa xá mi ɔ́ nǔgbó. Xlɛ̌ e ná ná mi wɛ un ɖe ɔ́ ɖíe: Un ná jó Ejípu xɔ́sú Hofla nú kɛntɔ́ tɔn lɛ́ɛ, un ná jó e nú mɛ e ɖo kú tɔn ba wɛ lɛ́ɛ, bɔ yě ná wlí i. Un ná jó e, lě e un jó Judáa xɔ́sú Sedesíyasi nú kɛntɔ́ tɔn Babilɔ́nu xɔ́sú Nabukodonɔzɔ́ɔ gbɔn ɔ́. Xó e nyɛ Mawu Mavɔmavɔ ɖɔ ɔ́ nɛ́.’ ” Hwenu e Yoyakímu Joziyási ví ɔ́ ɖo xwe ɛnɛ bló wɛ ɖo axɔ́súzinkpo Judáa tɔn jí ɔ́ wɛ Baalúki Nɛliya ví ɔ́ wlán xó e gbeyíɖɔ Jelemíi ɖɔ n'i lɛ́ɛ. Jelemíi ɖɔ nú Baalúki ɖɔ: “Baalúki, xó e Mawu Mavɔmavɔ, Mawu Izlayɛ́li tɔn ɖɔ dó wǔ we ɔ́ ɖíe, é ɖɔ jí hwi nɔ ɖɔ: ‘Gooyi, nǔ gblé dó mì, linkpɔ́n gɔ́ ayi mɛ nú mì, bɔ Mawu Mavɔmavɔ lɛ́ ɖo ayimɛya ɖěvo dó nú mì wɛ. Un mɔ wǔvɛ́ káká bɔ agbɔ̌n kpé mì, un ɖó gbɔjɛ gbeɖé ǎ.’ Mawu Mavɔmavɔ ko ɖɔ nyi ní ɖɔ nú we ɖɔ: ‘Un ɖo xɔ e un gbá ɔ́ gba wɛ, un ɖo atín e un tun ɔ́ hɔn wɛ. Un ná ɖo mɔ̌ bló wɛ gbɔn to ɔ́ bǐ mɛ, bɔ hwɛ ɔ́, a ka ɖo nukúnkɛn dó wɛ. Ma blɛ́ hwi ɖé e ó, ɖó awě e ná sɛ́ dó wɛ un ɖe ɔ́ ná xásá nǔ e ɖo gbɛ ɔ́ ɖěbǔ ɖó ǎ. Amɔ̌, un ná hwlɛ́n gbɛ towe gán ɖo awě énɛ́ lɛ́ɛ bǐ mɛ, ɖo fí e a nǎ gbɔn lɛ́ɛ bǐ. Xó e nyɛ Mawu Mavɔmavɔ ɖɔ ɔ́ nɛ́.’ ” Mawu Mavɔmavɔ ɖɔ xó nú gbeyíɖɔ Jelemíi dó akɔta lɛ́ɛ wú. Mawu ɖɔ xó dó Ejípu kpó ahwangɔnu Ejípu xɔ́sú Nɛko tɔn kpó wú. Kaakemíci wɛ Ejípu xɔ́sú Nɛko ɖe ɖo Efláti tɔ ɔ́ kpá, hwenu e Babilɔ́nu xɔ́sú Nabukodonɔzɔ́ɔ fun ahwan xá ɛ, bó ɖu ɖ'é jí é. Hwenɛ́nu ɔ́, Judáa xɔ́sú Yoyakímu, Joziyási ví ɔ́ ɖo xwe ɛnɛ bló wɛ ɖo zinkpo jí. Ahwangán Ejípu tɔn lɛ́ɛ nɔ́ sú xó, bó nɔ́ ɖɔ: “Mi bló gǎglónú mitɔn lɛ́ɛ ɖó; mi bló gǎglónú kpɛví kpó ɖaxó kpó ɖó. Mi yi, mi yi bo fun ahwan! Sɔ́xátɔ́ e mi, mi blá akpa nú sɔ́ lɛ́ɛ! Mi xá sɔ́ mitɔn lɛ́ɛ! Mi xwe ganza mitɔn lɛ́ɛ! Mi to miɖée bó ɖidó! Mi gan hwǎn mitɔn lɛ́ɛ! Mi dó ganwu mitɔn lɛ́ɛ!” Mawu Mavɔmavɔ ka ɖɔ: “Étɛ́ ka ɖo jijɛ wɛ? Étɛ́ ɖíe mɔ wɛ un ka ɖe e? Xɛsi jɛ yě jí, yě dó gbló mɛ. É kpa ahwanfuntɔ́ syɛ́nsyɛ́n yětɔn lɛ́ɛ ɖěbǔ ǎ. A ma ná yi ǎ hǔn ago ma yi wɛ, mɛ ɖěbǔ sɔ́ nɔ́ lɛ́ kɔ kpɔ́n gǔdo ǎ. Xɛsi ɖo fí bǐ. Mɛ e yá afɔ ganjí ɔ́ na bo hɔn ɔ́, nǔ yǎyá kpowun wa wɛ é ɖe. Ahwanfuntɔ́ syɛ́nsyɛ́n lɛ́ɛ na bo jló ná hɔn ɔ́, nǔ yǎyá wɛ ná nyí. Đo totaligbé dɔ̌n ɔ́, yě nɔ́ klɛ́n afɔ, yě klɛ́n afɔ kpowun ɔ́, kɔ́ mɛ jɛ́n yě nɔ́ jɛ. Mɛ̌ ká nɔ́ wa nǔ Nilu ɖi sin ɖɔhun? Mɛ̌ ká nɔ́ wa nǔ tɔ énɛ́ e nɔ́ ɖo adǎn jí é ɖɔhun? Ejípu to ɔ́ wɛ nɔ́ wa nǔ gbɔn mɔ̌. É nɔ́ ɖɔ un gba wu Nilu ɖi sin ɖɔhun. Un ná hun agbǎn Nilu ɖo adǎn jí ɖɔhun, bó ɖi bú ayǐkúngban ɔ́ bǐ. Un ná ɖi bú toxo lɛ́ɛ, bó ɖi bú mɛ e ɖo toxo lɛ́ɛ mɛ lɛ́ɛ. É yá, mi sɔ́ja e xá sɔ́ lɛ́ɛ mi, mi tɔ́n ahwan yě. Sɔ́ja e ɖo kɛkɛ́ví mɛ lɛ́ɛ mi, mi zlɔ́n byɔ́ yě mɛ. Ahwanfuntɔ́ syɛ́nsyɛ́n lɛ́ɛ mi, é yá, mi ɖidó. Etiopíinu e mi, é yá. Pútinu e mi, é yá. Mi mɛ e nɔ hɛn gǎglónú lɛ́ɛ, kpó mi Lǔdinu gǎdatɔ́ lɛ́ɛ kpó, é yá, mi ɖidó! Amɔ̌, Aklúnɔ, Mawu Mavɔmavɔ Nǔbǐwúkpétɔ́ ɔ́ tɔn wɛ azǎn énɛ́ ɔ́ nyí. Azǎn e gbe é ná ba hlɔn é wɛ. É ná wa nǔ xá kɛntɔ́ tɔn lɛ́ɛ. Hwǐ ɖo mɛ já wɛ, xovɛ́ sin i mɔ̌hunkɔtɔn. Nɛ̌ Aklúnɔ, Mawu Mavɔmavɔ Nǔbǐwúkpétɔ́ ɔ́ ká hu mɛ sɔ e! Nɛ̌ é ká hu mɛ sɔ ɖo totaligbé Efláti tɔ ɔ́ tó dɔ̌n e! Ejípu, gbɔ bo yi Galadi bo yi ba ami ɖé, bó ná sá dó akpa towe lɛ́ɛ mɛ. A na bo ka wa nǔ ɖěbǔ ɔ́, nǔ yǎyá wɛ ná nyí ɖó akpa ɔ́ ɖo nǎ kú wɛ ǎ. Akɔta lɛ́ɛ se lě e a ɖu winnyá gbɔn é, ɖó mɛ bǐ se vo e sa wɛ a ɖe ɔ́. Đó ahwanfuntɔ́ syɛ́nsyɛ́n towe lɛ́ɛ ɖě nɔ́ ya aglo ɖě, bɔ yě bǐ nɔ́ fún sa bó nɔ́ dín yi jɛ ayǐ.” Hwenu e Babilɔ́nu xɔ́sú Nabukodonɔzɔ́ɔ wá ahwan fun xá Ejípu gbé ɔ́, Mawu Mavɔmavɔ ɖɔ nú gbeyíɖɔ Jelemíi ɖɔ: “Đɔ nǔ e ɖo nǎ jɛ wɛ ɔ́ ɖo Ejípu. Đɔ nú mɛ e ɖo Migidɔ́lu lɛ́ɛ, ɖɔ nú mɛ e ɖo Mɛfísi lɛ́ɛ kpó mɛ e ɖo Tapanɛ́si lɛ́ɛ kpó ɖɔ: ‘Mi sɔ́ ahwannú, ahwanfunnú mitɔn lɛ́ɛ ní nɔ alɔ jí.’ Đó ahwan ko gba mɛ e lɛ́ dó mi lɛ́ɛ. Nɛ̌ ká gbɔn, bɔ ahwanfuntɔ́ towe syɛ́nsyɛ́n lɛ́ɛ ɖo ayǐ jɛ wɛ mɔ̌? Yě sixú syɛ́n dɔn ǎ, ɖó nyɛ Mawu Mavɔmavɔ wɛ kpíkpé yě. Sɔ́ja wɔ̌buwɔ́bú ɖé lɛ́ɛ fún sa bó jɛ ayǐ. Yě nɔ́ ɖɔ nú yěɖée ɖɔ: ‘Mi wá mǐ lɛ́ kɔ yi mɛ mǐtɔn lɛ́ɛ mɛ; mi wa mǐ yi to e mɛ è ji mǐ ɖe é; énɛ́ ɔ́, mǐ ná nɔ zɔ nú nǔ nyanya e ɖo jijɛ wɛ ɖo ahwangbénu fí é.’ Ejípu xɔ́sú ɔ́, nyǐkɔ e è nǎ sun i ɔ́ ɖíe: ‘Xóvɔ́sútɔ́’. Nyɛ mɛ e nyǐkɔ ce nɔ́ nyí Mawu Mavɔmavɔ Nǔbǐwúkpétɔ́ ɔ́, un xwlé gbɛ nyi ɖésúnɔ tɔn nú mi ɖɔ: lě e Tabɔ́ɔ só ɔ́ hú ga só lɛ́ɛ bǐ, lě e Kaamɛ́li só ɔ́ hú ga xu ɔ́, kɛntɔ́ e ná hú ga mi ɔ́ ja; nǔɖé ná húzú ǎ. Ejípunu e mi, hwenu e mi ná dó agban, bó ná yi mɛ ɖěvo tomɛ é ɖíe su e. Đó Mɛfísi to sɔ́ ná nyɔ́ kpɔ́n ǎ, è nǎ dó zo, mɛɖé sɔ́ ná ɖo fínɛ́ ǎ. Ejípu to ɔ́, kanlin ɖé wɛ é nyí bó nyɔ́ ɖɛkpɛ ɖésú. Asɔfin ɖé ká gosín totaligbé bó wá ɖó jɛ wǔ tɔn. Sɔ́ja to ɖěvo mɛ nu e Ejípu da bó nɔ́ sú axɔ́ lɛ́ɛ ɔ́, yě nyɔ́ ahwan fun mɔ̌hunkɔtɔn, amɔ̌, yě lɔmɔ̌ hɔn; yě bǐ ɖó gbe kpɔ́ bó hɔn. Adǎngbomɛ zán ɔ́ gbe ɔ́, yě ɖě sixú nɔ te ǎ. Ée un húzú kpan nukɔn yě ɔ́, yě ɖě nɔ te ǎ. Kɛntɔ́ dó ahwan gbě, bó zɔn Ejípu jí, a nǎ ɖɔ atíngbotɔ́ lɛ́ɛ wɛ byɔ́ zungbó mɛ kpó asyɔ́ kpó. Énɛ́ ɔ́, sɔ́ja Ejípu tɔn lɛ́ɛ línlín dan ɖɔhun bo hɔn; è se nǔwiwa yětɔn ǎ. Zungbó tɔn e dó káká bɔ è ma nɔ sixú byɔ́ mɛ ǎ ɔ́, yě byɔ́ mɛ bó gbo atín lɛ́ɛ bǐ. Đó yě dó ahwan gbě wɛn ɖɔhun, è sixú xa yě ǎ. Xó e nyɛ Mawu Mavɔmavɔ ɖɔ é nɛ́. Ejípu ɖu winnyá: Mawu jó e nú togun e gosín totaligbé é.” Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: “Un ná wa nǔ xá Amɔ́ni vodún Tɛ́bu ɔ́, un ná wa nǔ xá Ejípu to ɔ́, bó wa nǔ xá vodún tɔn lɛ́ɛ kpódó axɔ́sú tɔn lɛ́ɛ kpó. Un ná wa nǔ xá Ejípu xɔ́sú ɔ́ kpódó mɛ e nɔ gán jɛ wǔ tɔn lɛ́ɛ kpó. Un na jó yě nú mɛ e ɖo kú yětɔn ba wɛ lɛ́ɛ. Un ná jó yě nú Babilɔ́nu xɔ́sú Nabukodonɔzɔ́ɔ kpódó sɔ́ja tɔn lɛ́ɛ kpó. “Amɔ̌, é wá yá ɔ́, Ejípu ná lɛ́ wá cí lě e é ko ɖe ɖ'ayǐ é.” Xó e Mawu Mavɔmavɔ ɖɔ é nɛ́. Mawu ɖɔ: “Mɛsɛntɔ́ ce Izlayɛ́li, hwɛ ɔ́, ma ɖi xɛsi ó. Jakɔ́bu ví, ado ma hu we ó. Đó un na hwlɛ́n we gán ɖo gbě ji fí e a ɖe ɔ́. Un na hwlɛ́n vǐ towe lɛ́ɛ gán ɖo to e mɛ yě ɖo mɛ kan nu ɖe é. Izlayɛ́li, a nǎ lɛ́ kɔ wá, bó ná vo, bɔ ayi towe ná jɛ ayǐ; mɛ ɖěbǔ sɔ́ ná dó ya nú we ǎ. Mɛsɛntɔ́ ce Izlayɛ́li, ma sɔ́ ɖi xɛsi ɖě ó, ɖó un ɖo kpɔ́ xá we. Togun e mɛ un gba mi dó gbɔn lɛ́ɛ ɔ́, un ná sú bǐ kún dó. Amɔ̌, hwɛ ɔ́, un ná sú kún towe dó ǎ, lo ɔ́, un dɔn tó nú we lě e é jɛ xá gbɔn é. Un sixú jó we dó xomɛvɔ́ wɛ a ɖe ɖɔhun ǎ.” Cóbónú Ejípu xɔ́sú ɔ́ ná yi gba Gaza ɔ́, Mawu Mavɔmavɔ ɖɔ xó nú Jelemíi dó Filisitɛ́ɛn lɛ́ɛ wú. É ɖɔ n'i ɖɔ: “Tɔ ɖé sí te sín totaligbé ja, tɔ ɔ́ ɖo yiyi wɛ ɔ́, é nɔ́ ɖo gǐgɔ́ d'é jí wɛ. Zaanɖé kpowun ɔ́, adǎn e jí tɔ ɔ́ ɖe ɔ́ syɛ́n bǐ. Tɔ ɔ́ gba toxo lɛ́ɛ, bɔ mɛ e ɖo toxo lɛ́ɛ mɛ lɛ́ɛ bǐ kú tɔ. Mɛ bǐ ɖo xó sú wɛ, to ɔ́ bǐ ɖo nǔwamɛhan ji wɛ. È ɖo sɔ́ lɛ́ɛ sín afɔ gbe se wɛ, ahwankɛkɛ́ví lɛ́ɛ ɖo gbǐgbó wɛ, ahwankɛkɛ́fɔ lɛ́ɛ ɖo zǐngídi ɖú wɛ. Tɔ́ sɔ́ flín vǐ ǎ, nɔ lɔ ká sɔ́ flín vǐ ǎ. Awakanmɛ kú yě bǐ. Azǎn e gbe Filisitɛ́ɛn lɛ́ɛ bǐ ná sú kún dó é wɛ su. Énɛ́ wú wɛ mɛɖé sɔ́ ɖe, bó ná gɔ́ alɔ nú Tíi kpó Sidɔ́ɔn kpó ǎ. Đó Mawu Mavɔmavɔ na vívá kún nú Filisitɛ́ɛn lɛ́ɛ bǐ, yě mɛ e gán ɖo tɔtɛ́ntinto Kafutɔ́ɔ tɔn mɛ lɛ́ɛ bǐ. Gaza to ɔ́ bǐ nǎ xwlɛ́ ta, aluwɛ mɛ wɛ yě ɖe. Acikelɔ́ni toxo ɔ́ bǐ nǎ cí tóó, mi gbɛtɔ́ sakasaka ví e kpo ɖo gbɛ lɛ́ɛ, káká jɛ hwetɛ́nu wɛ mi ka ná já wǔtu mitɔn yi ɖó? Mi nɔ ɖɔ: ‘Kóóyi nya! Hwǐ Mawu Mavɔmavɔ tɔn, nǔ nɔ́ cikɔ nú we ǎ wɛ a? Byɔ̌ akún mɛ, nɔ xwíí, gbɔjɛ́ ɖě!’ Nɛ̌ é ná gbɔjɛ́ gbɔn? Mawu Mavɔmavɔ wɛ ɖɔ nǔ e é ná wa lɛ́ɛ n'i, bó sɛ́ ɛ dó xutó, bó sɛ́ ɛ dó Acikelɔ́ni. Mawu wɛ sɛ́ ɛ dó.” Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ dó Mɔwabu wú é ɖíe: “Awě tɛ́ ɖíe ká xo mɛ e ɖo Nɛbo toxo ɔ́ mɛ lɛ́ɛ e! È gba toxo yětɔn bǐ. Ahwi xo Kiliyatayimu toxo ɔ́, din ɔ́, kɛntɔ́ lɔ mɛ wɛ é ɖe. Ahwi xo toxo énɛ́ e mɛ kɛntɔ́ ma nɔ́ sixú byɔ́ gbeɖé ǎ é, é ɖu winnyá, è gba to ɔ́ bǐ. Mɔwabunu lɛ́ɛ sín susu vɔ, kɛntɔ́ lɛ́ɛ ɖo wě baɖabaɖa ɖe dó mi wú wɛ ɖo Hɛcibɔ́ni; yě nɔ́ ɖɔ: ‘Mi wa mǐ yi sú Mɔwabunu lɛ́ɛ sín kún dó sín ayǐkúngban ɔ́ jí.’ Madumɛ́ɛnu lɛ́ɛ mi, ahwan ná gba mi lɔ. Kɛntɔ́ kó ɖo ali jí ja mi gɔ́n. È nɔ se xósúsú sín Holonayímu toxo mɛ ɖɔ: ‘Heelú, è ɖo nǔ gba wɛ!’ Mɔwabu to ɔ́ gba hánnyá. Xó e sú wɛ Mɔwabunu lɛ́ɛ ɖe ɔ́, è nɔ se ɖo káká Sowáa. Mɛ e kpo ɖo gbɛ lɛ́ɛ ɖo Luxíti kpó ɔ́ fán wɛ ɖasin ɖo nukún mɛ. È ka ɖo te jɛ sín Holonayímu só ɔ́ jí wɛ ɔ́, è nɔ se mɛ lɛ́ɛ ɖo alě ná wɛ ɖɔ: ‘Mi hɔn sín fí! Mɛ ɖokpó ɖokpó ní hwlɛ́n ta tɔn! Mi yi ba tɛn ɖo gbětótló mɛ.’ Mɔwabu, a ɖeji dó nǔ e a wa lɛ́ɛ kpó dɔkun towe lɛ́ɛ kpó wú. Énɛ́! Alɔ nɛ́ jɛ hwi lɔ wú nɛ́! Vodún Kemɔci ɖésú ɔ́, è kplá é kpódó hunnɔ tɔn lɛ́ɛ kpó hunví tɔn nukúnɖéjí lɛ́ɛ kpó bǐ yi kannumɔgbénu. Nǔhɛngblétɔ́ ɔ́ byɔ́ toxo ɖokpó ɖokpó mɛ, toxo ɖěbǔ gló e ǎ. È gba nǔ e ɖo tɔdo mɛ lɛ́ɛ, bó gba éé ɖo só ta lɛ́ɛ bǐ.” Xó e nyɛ Mawu Mavɔmavɔ ɖɔ ɔ́ nɛ́. Mi ba awa nú Mɔwabu nú é zɔn, bó yi cí jɔmɛ. Toxo tɔn lɛ́ɛ bǐ ná jɛ vɔ̌, è sɔ́ ná mɔ mɛ ɖěbǔ ɖo toxo lɛ́ɛ mɛ ǎ. Mɛ e ma nɔ lébe nú nyɛ Mawu Mavɔmavɔ sín azɔ̌ ǎ lɛ́ɛ ɔ́, un ná dó nu yě. Mɛ e ma nɔ fun ahwan nú mì ǎ lɛ́ɛ ɔ́, un ná dó nu yě. Mawu ɖɔ: “Mɔwabu ɔ́, vivo mɛ jɛ́n é ɖe sín do; ahwan sɛ tɛn nú mɛ tɔn lɛ́ɛ kpɔ́n ǎ. Mɛ ɖěbǔ húzú i sín zɛ̌n e mɛ é ɖe ɔ́ dó zɛ̌n ɖěvo mɛ kpɔ́n ǎ. É cí vɛ̌ɛn e è sɔ́ ɖ'ayǐ é ɖɔhun. Nyɛ Mawu ɖɔ: vɛ̌ɛn ɖagbe nyí wɛ jɛ́n é ɖe tɛgbɛ; é ɖyɔ́ wǎn ǎ. “Énɛ́ ɔ́ wú wɛ nyɛ Mawu Mavɔmavɔ ɖɔ: ayǐ ɖé lɛ́ɛ ná wá hɔ́n, bɔ un ná sɛ́ mɛ dó, bɔ yě ná húzú i sín zɛ̌n e mɛ é ɖe ɔ́ dó zɛ̌n ɖěvo mɛ, bɔ zɛ̌n e mɛ é ɖe ɖ'ayǐ ɔ́ ná jɛ vɔ̌, bɔ yě ná gba hánnyá. Vodún Kemɔci ná dó winnyá Mɔwabu, lě e Izlayɛ́li togun ɔ́ ɖeji dó Betɛ́li sín vodún wú bó ɖu winnyá é.” Mawu ɖɔ: “Mɔwabunu lɛ́ɛ mi, mi nɔ ɖɔ ahwanfuntɔ́ syɛ́nsyɛ́n wɛ émí nyí; émí kó sɔ́ ahwannú bó ko ɖo acéjí; nɛ̌ mi ka ná ɖɔ mɔ̌ gbɔn? Kɛntɔ́ e ɖo Mɔwabu to ná gba wɛ ɔ́ kó xwe toxo tɔn lɛ́ɛ gba gbé. Dɔ̌nkpɛvú tɔn ahwanfuntɔ́ syɛ́nsyɛ́n lɛ́ɛ ɔ́, è kplá yě xwe huhu gbé ɖo ahwangbénu.” Xó e Axɔ́sú ɖaxó, Mawu Mavɔmavɔ Nǔbǐwúkpétɔ́ ɔ́ ɖɔ é ɖíe: Mɔwabu ko ja gbigba gbé. Awě e ɖo nǎ xo e wɛ ɔ́ ɖo wezun nu jǎwe. Mi mɛ e sɛkpɔ́ ɛ lɛ́ɛ, mi ya avǐ n'i. Mi mɛ e tunwun i lɛ́ɛ, mi ɖɔ: “Nɛ̌ makpo syɛ́nsyɛ́n énɛ́ ná wɛ́n gbɔn? Nɛ̌ axɔ́súkpogɛ énɛ́ ná wɛ́n gbɔn?” Divɔ́ni toxo, gbɔ bo gosín gǎn tɛnmɛ; yi jínjɔ́n zunkɔ́ta. Mɛ e ɖo Mɔwabu toxo gba wɛ ɔ́ ja gɔ̌n towe; é ɖo ahohó towe lɛ́ɛ mu wɛ. Alowɛ́ɛnu lɛ́ɛ mi, mi yi cí alitó bó kpɔ́n mɛ e ɖo hinhɔn wɛ lɛ́ɛ; mi kan nǔ e jɛ bɔ yě ɖo hinhɔn wɛ ɔ́ byɔ́ yě. Mi kan mɔ̌ byɔ́ yě ɔ́, yě ná ɖɔ nú mi ɖɔ: “Mɔwabu to ɔ́ ɖu winnyá, Mɔwabu to ɔ́ gba hánnyá bǐ.” Mi sú xó, mi dó axwá. Mi jlá gbɔn Aanɔ́ni gbé ɔ́ bǐ jǐ ɖɔ Mɔwabu gba. Nǔgbó wɛ, Mawu ɖo tó dɔn nú toxo e ɖo só jí lɛ́ɛ wɛ; toxo lɛ́ɛ ɖíe: Holɔ́ni, Yaxisa, Mɛfáti, Divɔ́ni, Nɛbo, Bɛti-Divlatayímu, Kiliyatayimu, Bɛti-Gamulu, Bɛti-Mɛwɔ́ni, Keliyɔ́ti kpó Bosla kpó. É ɖo tó dɔn nú Mɔwabu toxo e sɛkpɔ́ lɛ́ɛ kpó éé lín lɛ́ɛ kpó bǐ wɛ. “Mɔwabu vɔ da, acɛ tɔn vɔ bǐ.” Xó e Mawu Mavɔmavɔ ɖɔ ɔ́ nɛ́. Mɔwabu mɔ ɖɔ émí hú gǎn Mawu Mavɔmavɔ. Ényí mɔ̌ hǔn, mi ná ɛ ahan nú é nu mú. É ní vi, bó blí gbo gbɔn mɛ babá ɖɔhun. É ní húzú nǔkiko. Hwɛ ɔ́, Izlayɛ́li húzú nǔkiko nú we ɖo fí ǎ cé? Ajotɔ́ lɛ́ɛ mɛ wɛ a nɔ lɛ́n Izlayɛ́li dó, lobo ja xó ɖɔ dó wǔ tɔn gbé hweɖěbǔnu ɔ́, a nɔ mi ta. Mɔwabunu e mi, mi tɔ́n sín toxo lɛ́ɛ mɛ, mi yi cí sóxo mɛ. Mi ní cí ahwannɛ́ e bló adɔ̌ tɔn ɖó sóxo mɛ ɔ́ ɖɔhun. Mǐ tunwun lě e Mɔwabu nɔ mɔ éɖée gbɔn é, lě e é nɔ ɖó ta hǎ gbɔn é, lě e é nɔ tɛ afɔ ayǐ gbɔn é, lě e é nɔ yí go gbɔn é, lě e é nɔ́ mɔ éɖée hú mɛ bǐ gbɔn é, mǐ tunwun bǐ. Mawu Mavɔmavɔ ɖɔ: “Un tunwun ɖɔ Mɔwabu nɔ́ zɛn nǔ, é nɔ́ flé nu. Lo ɔ́, é ká zé nǔɖé ɔ́, é nɔ́ yi ta ǎ. Énɛ́ ɔ́ wú wɛ un nɔ dó gbɛvíhan dó Mɔwabu ta mɛ. Un nɔ sú xó dó Mɔwabu to ɔ́ bǐ ta mɛ; un nɔ ná alě, ɖó Kíi-Ɛlɛ́sinu lɛ́ɛ sín nǔbláwǔ. Vǐwun Sivuma tɔn, un ya avǐ nú we hú éé un ya nú Yazɛ́ɛ é. Vǐwun Sivuma tɔn, a nyi kan káká yi Xu kúkú ɔ́ gúdo. A nyi kan káká yi Yazɛ́ɛ. Amɔ̌, nǔhɛngblétɔ́ ɔ́ ká byɔ́ vǐwun e è gbɛ lɛ́ɛ mɛ bó hɛn bǐ gblé. Xomɛ sɔ́ hun glesi ɖěbǔ ɖo Mɔwabu gbé jí ǎ; yě mɛ ɖěbǔ sɔ́ j'awǎ ǎ. Vɛ̌ɛn vɔ ɖo gbǎ lɛ́ɛ bǐ mɛ. Mɛ e ná li vǐwun é ɖěbǔ ɖe ǎ. Nǔ víví nú mɛ sín han bǐ yi xɔ.” Hɛcibɔ́ninu lɛ́ɛ ɖo xó sú wɛ. È se gbe yětɔn ɖo káká Eleale. È se ɖo káká Yaxisa, è se ɖo káká Sowáa, bó se ɖo káká Holonayímu kpó Eglati-Celiciya kpó. Tɔ e ɖo Nimulímu lɛ́ɛ lɔ sɔ́ ɖo sisa wɛ ǎ. “Mɛ e ɖo Mɔwabu, bó nɔ́ sá vɔ̌ nú nǔmɛsɛn yětɔn lɛ́ɛ gbɔn só jí só jí lɛ́ɛ ɔ́, un na sú yě bǐ sín kún dó.” Xó e Mawu Mavɔmavɔ ɖɔ ɔ́ nɛ́. Énɛ́ ɔ́ wú wɛ ayi ce bǐ fan dó Mɔwabu ta mɛ, è ɖo nǔwamɛhan ji dó kpete mɛ wɛ ɖɔhun. Yéége, ayi ce fan è ɖo nǔwamɛhan ji dó kpete mɛ wɛ ɖɔhun dó Kíi-Ɛlɛ́sinu lɛ́ɛ ta mɛ, ɖó dɔkun e yě bɛ́ kplé lɛ́ɛ bǐ yi. Mɛ bǐ xwlɛ́ ta, bó xwlɛ́ atán, bó já alɔkpákpá mɛ, bó fɔ ati kplá dó ɖe xlɛ́ ɖɔ émí ɖo aluwɛ mɛ. È ɖo alě ná wɛ ɖo tokplétɛn Mɔwabu tɔn lɛ́ɛ, è ɖo alě ná wɛ ɖo xɔ bǐ ta, ɖó un gba Mɔwabu, zɛ̌n e è ma sɔ́ jló ná zán ǎ é ɖɔhun. Xó e nyɛ Mawu Mavɔmavɔ ɖɔ ɔ́ nɛ́. Mi kpɔ́n lě e Mɔwabu gba gbɔn é. Mi dó gbɛvíhan n'i; mi kpɔ́n lě e é ɖu winnyá bó lɛ́ kɔ gbɔn é. Mɔwabu húzú nǔkiko, é húzú nǔ baɖabaɖa nú to e lɛ́ dó e lɛ́ɛ. Xó e Mawu Mavɔmavɔ ɖɔ é ɖíe: “Kɛntɔ́ zɔn gangan hɔ̌nsúhɔ́nsú ɖɔhun, bó kɛ awa ɖo Mɔwabu ta nu. Kɛntɔ́ ná yí toxo lɛ́ɛ; toxo e è mɛ ahohó lɛ́ lɛ̌ dó lɛ́ɛ bǐ ná jɛ kɛntɔ́ lɔ mɛ. Gbe nɛ́ gbe ɔ́, ahwanfuntɔ́ syɛ́nsyɛ́n lɛ́ɛ bǐ sín ayi ná fun nyɔ̌nu e jɛ flú mɛ ɔ́ ɖɔhun. Énɛ́ ɔ́, Mɔwabu ná gba bǐ; é sɔ́ ná nyí togun ɖo te ǎ, ɖó é mɔ ɖɔ émí hú gǎn nyɛ Mawu Mavɔmavɔ.” “Mɔwabunu e mi, adohuhu, do gɔngɔn kpó mɔ kpó wɛ ɖo te kpɔ́n mi. Mɛ e ado na hu bɔ é ná hɔn ɔ́ ná jɛ do mɛ. É ká dó gǎn bó tɔ́n ɔ́, é ná jɛ mɔ mɛ. Đó xwe énɛ́ ɔ́, tó dɔn nú mɛ sín xwe wɛ é ná nyí nú Mɔwabu. Xó e nyɛ Mawu Mavɔmavɔ ɖɔ ɔ́ nɛ́. Mɛ e ná hɔn lɛ́ɛ ɔ́, nǔ ná ci kɔ nú yě, bɔ yě ná ɖɔ émí ná hwlá cí Hɛcibɔ́ni. Lo ɔ́, myɔ ɖokpó ná wlí ɖo Hɛcibɔ́ni to ɔ́ mɛ, ɖo axɔ́sú Sihɔ́ni sín hɔnmɛ. Zo ɔ́ ná fyɔ́ zǐngídiɖútɔ́ énɛ́ lɛ́ɛ sín to, bɛ́ sín to ɔ́ sín dogbó lɛ́ɛ jí káká wá to ɔ́ tɛ́ntin. Mɔwabunu e mi, heelú mi! Vodún Kemɔci togun e mi, mi dɔn bǐ. Ahwan wlí vǐ mitɔn súnnu kpó nyɔ̌nu kpó yi. Amɔ̌, ayǐ ɖo hǐnhɔ́n wɛ ɔ́, un ná zé yě ɖó ninɔmɛ e mɛ yě nɔ ɖ'ayǐ xóxó é. Xó e nyɛ Mawu Mavɔmavɔ ɖɔ ɔ́ nɛ́.” Lě e Mawu gbo Mɔwabu sín hwɛ gbɔn ɔ́ nɛ́. Xó e Mawu Mavɔmavɔ ɖɔ dó Amumɔ́ɔ ví lɛ́ɛ wú ɔ́ ɖíe: “Izlayɛ́li sɔ́ ɖó vǐ e ná ɖu toxo énɛ́ lɛ́ɛ sín gǔ ɔ́ ɖě ǎ wɛ a? Étɛ́wú vodún Milukɔ́mu ka klá jɛ Gadi yíkúngban ɔ́ nu ɖo Izlayɛ́li mɔ̌? Étɛ́wú Amumɔ́ɔ ví lɛ́ɛ wá cí toxo e ɖo Gadi yíkúngban jí lɛ́ɛ mɛ?” Énɛ́ ɔ́ wú wɛ nyɛ Mawu Mavɔmavɔ ɖɔ: “Ayǐ ɖé lɛ́ɛ ná hɔ́n, bɔ un ná zɔ́n bɔ ahwan ná tɔ́n, ahwan ná tɔ́n ɖo Amumɔ́ɔ ví lɛ́ɛ sín tota Hlaba ɔ́ mɛ, bɔ xósúsú ná ɖ'é nu. Hlaba ná húzú axéko. Gletoxo tɔn lɛ́ɛ bǐ ná fyɔ́. Hwenɛ́nu su ɔ́, Izlayɛ́li ná bɛ́ nǔ tɔn lɛ́ɛ, nǔ tɔn e Amumɔ́ɔ ví lɛ́ɛ ko fɔ ɖ'ayǐ lɛ́ɛ bǐ.” Xó e Mawu Mavɔmavɔ ɖɔ ɔ́ nɛ́. Hɛcibɔ́ninu lɛ́ɛ mi, mi ya avǐ, ɖó Ayíi to ɔ́ gba! Hlaba gletoxo mɛ nu lɛ́ɛ mi, mi sú xó, mi fɔ ati kplá dó ɖe xlɛ́ ɖɔ mi ɖo aluwɛ mɛ; mi dó gbɛvíhan, mi kan wezun gbɔn ɖisí amyɔ gbɔn gle lɛ́ɛ mɛ. Đó Milukɔ́mu vodún Amumɔ́ɔ ví lɛ́ɛ tɔn xwe kannumɔgbénu, é kpódó vɔ̌sátɔ́ tɔn lɛ́ɛ kpó hunnɔ tɔn lɛ́ɛ kpó. Hlaba, étɛ́wú a ɖo tɔdo towe zé dó yí go na wɛ? Đyɔ̌vǐ tótlítɔ́, a gán jɛ dɔkun e ɖo tɔdo towe ɖagbe ɖagbe ɔ́ mɛ lɛ́ɛ wú, bó ɖɔ: “Mɛ̌ ka sixú kpé wǔ ce?” Aklúnɔ, Mawu Mavɔmavɔ Nǔbǐwúkpétɔ́ ɔ́ ká ɖɔ: “Amumɔ́ɔ ví lɛ́ɛ mi, éɖíe, un ná dɔn xɛsi dó to mitɔn mɛ. Xɛsi ná gosín to e lɛ́ dó mi lɛ́ɛ bǐ mɛ, bó ná wá. Mi bǐ ná gba dó, mɛɖé ná kpɔ́n gúdo ǎ. Mɛ ɖěbǔ ná sixú kplé mɛ e hɔn lɛ́ɛ ǎ. Amɔ̌, énɛ́ jɛ wá yi ɔ́, un ná lɛ́ zé Amumɔ́ɔ ví lɛ́ɛ ɖó ninɔmɛ e mɛ yě kó nɔ ɖ'ayǐ xóxó é.” Xó e Mawu Mavɔmavɔ ɖɔ ɔ́ nɛ́. Xó e Mawu Mavɔmavɔ Nǔbǐwúkpétɔ́ ɖɔ dó Edɔ́munu lɛ́ɛ wú ɔ́ ɖíe: “Nǔnywɛ́tɔ́ bǐ vɔ ɖo Temani wɛ a? Nǔtunwuntɔ́ lɛ́ɛ sín ayi fɛ́ da wɛ a? Nǔnywɛ́ yětɔn ɔ́, gúdo wɛ é ká yi a? Dedáninu lɛ́ɛ mi, mi lɛ́ kɔ, mi hɔn, mi hɔn yi hwlá cí sóxo mɛ. Din ɔ́, un ɖo Esawu sín vǐ lɛ́ɛ sín kún ná sú dó wɛ. Hwenu e un ná wa nǔ xá yě ɔ́ ɖíe. Edɔ́mu, vǐwungbɛtɔ́ lɛ́ɛ wá vǐwungbo towe mɛ ɔ́, yě na jó vǐwun ɖě dó wɛ a? Ajotɔ́ dɔn zǎn dó wǔ, bó yi ajo gbé ɔ́, nǔ e é sixú hɛn gblé lɛ́ɛ bǐ wɛ é nɔ́ hɛn gblé. Lo ɔ́, Esawu ví lɛ́ɛ e mi, nyɛ ɔ́, un ná ɖe mi nyi mɛ̌, un ná mɔ fí e mi nɔ hɔn hwlá cí lɛ́ɛ. Mi sɔ́ ná sixú hwlá cí fí énɛ́ lɛ́ɛ ɖě ǎ. Nǔ gblé dó mi kpó mɛ e jɔ ɖo kún mitɔn mɛ lɛ́ɛ kpó. Mi sɔ́ ná mɔ mɛɖé bɔ é ná d'alɔ mi ǎ. Nú mi wá kú ɔ́, mɛ ɖěbǔ sɔ́ ná kpo bó ná kpé nukún dó vǐ mitɔn lɛ́ɛ wú ǎ, mɛ ɖěbǔ ká sɔ́ ná kpo bó ná ɖɔ asi mitɔn lɛ́ɛ ní ɖeji dó émí wú ǎ.” Xó e Mawu Mavɔmavɔ ɖɔ ɔ́ ɖíe: “Edɔ́mu, mɛ e ma ɖó ná nu wǔvɛ́ kɔ́fu ǎ lɛ́ɛ ná nu, bɔ è ná jó hwɛ dó wɛ a? È nǎ jó we dó gbeɖé ǎ, hwi lɔ ná nu. Un xwlé nyɛ ɖésúnɔ ɔ́ nú we ɖɔ tota towe Bosla kpó toxo towe lɛ́ɛ kpó ná húzú dǒglin, bó ná nɔ mɔ̌ káká sɔ́yi. È ja winnyánú ɖé, hɛ̌n nǔɖé, nǔ baɖabaɖa ɖé, abǐ nudómɛ sín xó ɖé ɖɔ gbé ɔ́, hwi wú wɛ è nǎ nɔ́ jlɛ́ dó. Xó e nyɛ Mawu Mavɔmavɔ ɖɔ ɔ́ nɛ́.” Mawu Mavɔmavɔ dó wɛn ɖé sɛ́ dó akɔta lɛ́ɛ bɔ nyi lɔ se. Mawu Mavɔmavɔ ɖɔ: “Mi kplé miɖée, bó sí te dó Edɔ́mu jí. Mi sí ahwan te dó jǐ tɔn.” Xó e Mawu ɖɔ dó Edɔ́mu wú ɔ́ ɖíe; é ɖɔ: “Edɔ́mu, un na sɔ́ we dó húzú akɔta kpɛví ɖo akɔta lɛ́ɛ bǐ tɛ́ntin; mɛ bǐ na gbɛ́ wǎn nú we. Hwiɖée mimɔ kpó goyíyí towe kpó dɔn we bú. Hwi wɛ nɔ nɔ sóxo mɛ, hwi wɛ nɔ nɔ só ta aga, a xo adɔ̌ towe ɖó jǐ gangan ɖɔhun, un ka na zé we wá do. Xó e nyɛ Mawu Mavɔmavɔ ɖɔ ɔ́ nɛ́.” “Edɔ́mu ná húzú zunkɔ́ta. Mɛ e ɖo dǐndín wɛ lɛ́ɛ mɔ ɔ́, avuvɔfún ná blá yě; yě ná sá heelú. Lě e Sodɔ́mu kpó Gomɔ́ɔ kpó, kpódó toxo e ɖo akpá yětɔn lɛ́ɛ kpó gba bó hánnyá gbɔn ɔ́ wɛ é ná cí. Mɛ ɖěbǔ sɔ́ ná nɔ to ɔ́ mɛ ǎ, mɛɖé sɔ́ ná zɛ ali gbɔn fínɛ́ ǎ.” Xó e Mawu Mavɔmavɔ ɖɔ ɔ́ nɛ́. Lě e kinnikínní nɔ yi wu ɖo zunkan mɛ ɖo Judɛ́ɛn tɔ ɔ́ tó nú kanlin e ɖo gběhan mɛ lɛ́ɛ, bó nɔ́ wlí ɖě, bɔ ée kpo lɛ́ɛ nɔ́ gbadó gbɔn ɔ́, mɔ̌ wɛ un ná fyán Edɔ́mu to ɔ́ kpó toxo tɔn lɛ́ɛ kpó. Un ná gba mɛ bǐ dó sín fínɛ́, ɖo nukúnxwixwe ɖokpó mɛ, bó ná zé mɛ e un sɔ́ ɔ́ ɖó Edɔ́mu to ɔ́ nu. Mɛ̌ ka ɖó acɛ nyɛ ɖɔhun? Nú un wa nǔɖé ɔ́, mɛ̌ ka sixú kan nǔ e wú un wa mɔ̌ ɔ́ byɔ́ mì? Gǎn tɛ́ sixú nɔ te nukɔn ce? Énɛ́ ɔ́ wú ɔ́, mi bo ɖótó gbeta e nyɛ Mawu Mavɔmavɔ ɖe tɔ́n dó Edɔ́mu wú é, bó ɖótó tito e un sɔ́ ɖó te nú mɛ e ɖo Temani gbé jí lɛ́ɛ é: È nǎ dɔn yě bǐ yi kanlin ɖɔhun, é ná gblá ǎ; è nǎ jó mɛ ɖěbǔ dó ǎ; è nǎ gba xwé yětɔn bǐ, nǔ wɛ nyí bó ná jɛ jɛ́n wɛ. Yě ná jɛ ayǐ, bɔ ayǐkúngban ná dán wǔ. Yě ná sú xó, bɔ è nǎ se gbe yětɔn ɖo káká Fántín xu ɔ́ kɔn. Kpɔ́n kɛntɔ́ ɔ́! È nǎ ɖɔ gangan hɔ̌nsúhɔ́nsú wɛ zɔn, bó kɛ awa ɖó Bosla ta nu. Gbe nɛ́ gbe ɔ́, ahwanfuntɔ́ syɛ́nsyɛ́n Edɔ́mu tɔn lɛ́ɛ bǐ sín ayi ná fun nyɔ̌nu ɖo ajidonu ɖɔhun. Mawu ɖɔ xó dó Damási wú, é ɖɔ: “Mɛ e ɖo Hamáti toxo ɔ́ mɛ lɛ́ɛ kpó mɛ e ɖo Aapadu toxo ɔ́ mɛ lɛ́ɛ kpó ná se xó baɖabaɖa ɖokpó, bɔ xɛsi ɖaxó ɖé ná jɛ yě jí, bɔ yě ná ɖu hɛ̌n xoxónɔ. Xɛsi ɔ́ ná cí lě e xu nɔ ɖo adǎn jí bó má nɔ hwíhwɛ́ ǎ ɖɔhun. Awakanmɛ kú Damásinu lɛ́ɛ bɔ yě lɛ́ kɔ, bó hɔn. Xɛsi jɛ yě jí, yě mɔ wǔvɛ́, bɔ ayi yětɔn fun nyɔ̌nu ɖo ajidonu ɖɔhun. Toxo e nɔ dó xomɛhunhun nú mì ɔ́, toxo ɖaxó nɛ́ e xɔ susu sɔ mɔ̌ ɔ́, é wɛ è jó dó mɔ̌ a? Nǔgbó wɛ, dɔ̌nkpɛvú tɔn lɛ́ɛ ná kú jɛ tokplétɛn lɛ́ɛ, ahwanfuntɔ́ tɔn lɛ́ɛ bǐ na kú gbe nɛ́ gbe. Xó e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́. Un ná dó Damási toxo ɔ́ zo, myɔ ná fyɔ́ axɔ́sú Bɛni-Hadadi sín hɔnmɛ.” Mawu ɖɔ xó dó Kedáa kpó axɔ́súɖuto Hasɔ́ɔ́ tɔn lɛ́ɛ kpó wú; Babilɔ́nu xɔ́sú Nabukodonɔzɔ́ɔ wɛ yí fí énɛ́ lɛ́ɛ. Mawu Mavɔmavɔ ɖɔ: “Mi sí te dó Kedáa wú, bó tɔ́n ahwan ɛ. Mi fɔ gbětótló mɛ nu énɛ́ lɛ́ɛ sín nǔ bǐ. Mi bɛ́ nǔ yětɔn lɛ́ɛ bǐ; mi bɛ́ goxɔ yětɔn lɛ́ɛ, kanlin yětɔn lɛ́ɛ, azava yětɔn lɛ́ɛ kpó lǎkúnmí yětɔn lɛ́ɛ kpó. Mi sú xó dó ta yětɔn ɖɔ: ‘Xɛsi ɖo fí bǐ.’ Hasɔ́ɔnu e mi! Mi hɔn, mi gba dó, mi yi cí sóxo mɛ. Xó e nyɛ Mawu Mavɔmavɔ ɖɔ ɔ́ nɛ́. Đó Babilɔ́nu xɔ́sú Nabukodonɔzɔ́ɔ sí te dó mi wú, é ko to lě e é ná wa nǔ mitɔn gbɔn é.” Mawu Mavɔmavɔ ɖɔ nú Babilɔ́nu xɔ́sú ɔ́ ɖɔ: “Sí te! Yi tɔ́n ahwan akɔta énɛ́ e ma ɖo nǔɖé lin kpɔ́n wɛ ǎ é; é nɔ́ mɔ ɖɔ nǔɖé kún sixú dó tagba nú émí ó; é ɖo xɛsi ɖi nú nǔɖé wɛ káká bó ná dó hɔn xɔnu ǎ. É yi cí zɔ nú mɛ bǐ. Yi tɔ́n ɛ ahwan. Fɔ lǎkúnmí yětɔn lɛ́ɛ bǐ, bɛ̌ kanlin yětɔn lɛ́ɛ bǐ yi xwé. Yě mɛ énɛ́ lɛ́ɛ e nɔ xwlɛ́ gekplá yětɔn lɛ́ɛ ɔ́, un ná fún yě dó gbě. Un ná nɔ́ sɛ́ awě dó yě gbɔn zǔndohlando. Xó e nyɛ Mawu Mavɔmavɔ ɖɔ ɔ́ nɛ́. Hasɔ́ɔ́ ná húzú adɔ̌tɛn nú avǔn gbě tɔn lɛ́ɛ; é ná húzú gbětótló, bó ná jɛ vɔ̌, lobo ná nɔ mɔ̌ káká sɔ́yi. Mɛ ɖěbǔ sɔ́ na nɔ to ɔ́ mɛ ǎ, mɛɖé sɔ́ ná zɛ ali gbɔn fínɛ́ ǎ.” Hwenu e Judáa xɔ́sú Sedesíyasi jɛ gǎn ɖu jí ɔ́ wɛ Mawu Mavɔmavɔ ɖɔ xó nú gbeyíɖɔ Jelemíi dó Elámunu lɛ́ɛ wú. Mawu Mavɔmavɔ Nǔbǐwúkpétɔ́ ɖɔ: “Un ná wɛ́n gǎ Elámu tɔn, hlɔ̌nhlɔ́n ɖaxó ɖokpó é wú é nɔ́ gán jɛ é! Un ná sɛ́ jɔhɔn ɛnɛ dó sín wɛ̌kɛ́zo ɛnɛ lɛ́ɛ mɛ, bɔ jɔhɔn ɔ́ ná nyi dó Elámu to ɔ́ jí. “Un ná zé jɔhɔn énɛ́ lɛ́ɛ dó gba yě dó. Elámunu lɛ́ɛ ná hɔn yi akɔta lɛ́ɛ bǐ mɛ, è nǎ ba yě kpo ɖo akɔta ɖěbǔ mɛ ǎ. Un ná dó xɛsi Elámunu lɛ́ɛ, bɔ yě ná sísɔ́ ɖo kɛntɔ́ yětɔn lɛ́ɛ nukɔn, yě mɛ e ɖo kú yětɔn bá wɛ lɛ́ɛ nukɔn. Un ná ɖo xomɛsin ɖaxó jí bó ná sɛ́ awě dó yě. Un ná ɖo ahwan fun xá yě wɛ káká bó ná sú kún yětɔn dó. Un ná hu Elámu xɔ́sú ɔ́ kpó gǎn Elámu tɔn lɛ́ɛ kpó, lobo ná zé axɔ́súzinkpo ce ɖ'ayǐ ɖo Elámu to ɔ́ mɛ dɔ̌n. Xó e nyɛ Mawu Mavɔmavɔ ɖɔ ɔ́ nɛ́. Amɔ̌, ayǐ ɖo hinhɔn wɛ ɔ́, un ná zé Elámunu lɛ́ɛ ɖó ninɔmɛ e mɛ yě nɔ ɖ'ayǐ xóxó é.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ xó dó Babilɔ́nu toxo wú, é ɖɔ xó dó Babilɔ́nunu lɛ́ɛ sín to wú gbɔn gbeyíɖɔ Jelemíi jí. Mawu ɖɔ: “Mi jlá wɛn élɔ́ akɔta lɛ́ɛ bǐ, mi ɖɔ nú mɛ bǐ se. Mi ná xlɛ̌ ɖé bónú mɛ bǐ ní tunwun. Mi ɖɔ bǐ, mi ma ɖe ɖě kpo ó. Mi ɖɔ: è yǐ Babilɔ́nu; vodún Bɛ́lu ɔ́ ɖu winnyá. Vodún Maadúki gba hánnyá. Bǒcyɔ tɔn lɛ́ɛ sín wi kɔ́n, vodún tɔn lɛ́ɛ gba. Akɔta ɖokpó ná gosín totaligbé, bó ná wá fun ahwan xá Babilɔ́nu. É ná zé to ɔ́ dó húzú gbětótló, mɛ bǐ ná hɔn sín to ɔ́ mɛ. Gbɛtɔ́ kpó kanlin kpó bǐ ná hɔn; to ɔ́ bǐ ná jɛ vɔ̌. Azǎn énɛ́ lɛ́ɛ mɛ ɔ́, Izlayɛ́linu lɛ́ɛ kpó Judáanu lɛ́ɛ kpó ná zɔn kpɔ́ sín dɔ̌n wá. Yě ná ɖo zɔnlin jí bó ná ɖo avǐ ya wɛ, bó ná ɖo nyɛ Mawu Mavɔmavɔ, Mawu yětɔn ɔ́ ba wɛ. Yě ná kan ali e yě ná gbɔn bó lɛ́ kɔ yi Sinyɔ́ɔ byɔ́, bó ná wlí ali ɔ́ tunta dɔ̌n, ma zɛ dó ɖisí ma zɛ dó amyɔ; yě ná ɖɔ: mi wá mǐ ní zunfán Mawu Mavɔmavɔ, Mawu mǐtɔn; mi jɛ akɔ e è ma ná wɔn gbeɖé ǎ ɔ́ xá ɛ. Togun ce ɔ́, lɛ̌ngbɔ́ e bú lɛ́ɛ ɖɔhun wɛ é cí ɖ'ayǐ. Lɛ̌ngbɔ́nyitɔ́ lɛ́ɛ dɔn yě bú. Yě jó lɛ̌ngbɔ́ lɛ́ɛ dó bɔ yě ɖo flúflú wɛ gbɔn sókan mɛ sókan mɛ. Yě gbɔn só ta só ta káká bó wɔn adɔ̌tɛn yětɔn. Kɛntɔ́ yětɔn lɛ́ɛ xo go yě ɔ́, yě nɔ́ hu yě tɛ́, bó nɔ ɖɔ: ‘É nyí hwɛ bɔ mǐ hu ǎ, yědɛɛ lɛ́ɛ wɛ hu hwɛ dó Mawu Mavɔmavɔ, Mawu Mavɔmavɔ e gɔ́n è nɔ mɔ hwlɛngán ɖe é; é wɛ tɔ́gbó yětɔn lɛ́ɛ nɔ́ ɖó nukún.’ Mawu ɖɔ: Izlayɛ́li ví lɛ́ɛ mi, mi hɔn sín Babilɔ́nu jɛ nukɔn, mi tɔ́n sín Babilɔ́nunu lɛ́ɛ sín to mɛ. Mi tɔ́n jɛ nukɔn lě e gbɔ̌sú lɛ́ɛ nɔ́ lɔ́n bó nɔ́ jɛ nukɔn nú gbɔ̌ lɛ́ɛ é ɖɔhun. Un ná dɔn to e ɖo totaligbé lɛ́ɛ gěgé dó Babilɔ́nu jí. To énɛ́ lɛ́ɛ bǐ ná fun ahwan xá Babilɔ́nu to ɔ́ bó ná yí. Gǎ yětɔn lɛ́ɛ nɔ xo nǔ kpo ǎ. Gǎ yětɔn lɛ́ɛ cí ahwanfuntɔ́ syɛ́nsyɛ́n e ma nɔ́ lɛ́ kɔ wá xwé asígbá alɔgbá ǎ é ɖɔhun. Kɛntɔ́ ná fɔ nǔ e ɖo Babilɔ́nu lɛ́ɛ bǐ, nǔ ná kpé yě bó kpo. Xó e nyɛ Mawu Mavɔmavɔ ɖɔ ɔ́ nɛ́. Babilɔ́nunu lɛ́ɛ mi, ɖ'ayǐ ɔ́, mi vɔ togun ce; hwenɛ́nu ɔ́, mi j'awǎ, xomɛ hun mi. Mi tlɔ́ gbo nyibúví ɖo amagbo mɛ ɖɔhun. Mi sú xó sɔ́ ɖɔhun. Amɔ̌, din ɔ́, ayǐkúngban mitɔn ɖu winnyá; ayǐkúngban e jí mi ɖe ɔ́ sín wi kɔ́n. Akɔta mitɔn húzú gǔdonú ɖo akɔta lɛ́ɛ mɛ. Xɛ sɔ́ ɖo to ɔ́ mɛ ǎ, ayǐkúngban bǐ xú.” Xomɛsin Mawu Mavɔmavɔ tɔn zɔ́n bɔ mɛɖé sɔ́ nɔ to ɔ́ mɛ ǎ. To ɔ́ jɛ vɔ̌ bǐ. Mɛ e ɖo dǐndín wɛ lɛ́ɛ mɔ ɔ́, avuvɔfún ná blá yě; yě ná sá heelú. Gǎdatɔ́ lɛ́ɛ mi, mi sɔ́ ahwan nǔ, bó lɛ́ lɛ̌ dó Babilɔ́nu. Mi da gǎ dó e, mi ma wa ko tɔn ó, ɖó é hu hwɛ dó nyɛ Mawu Mavɔmavɔ. Ahwanfuntɔ́ lɛ́ɛ mi! Mi sú xó dó Babilɔ́nu jí gbɔn ɖisí amyɔ. É wá sɔ́ éɖée jó, dǒ tɔn lɛ́ɛ mu, ahohó tɔn lɛ́ɛ hɔ́, ɖó nyɛ Mawu Mavɔmavɔ wɛ ɖo hlɔn ba wɛ. Akɔta lɛ́ɛ mi, nǔ e Babilɔ́nu wa xá mi ɔ́, mi yi ba hlɔn tɔn. Mi sú nǔ e é wa nú mɛ ɖě lɛ́ɛ ɔ́ sín axɔ́ ɛ. Mi hu nǔkúndótɔ́ kpó nǔkún-yatɔ́ kpó e ɖo Babilɔ́nu lɛ́ɛ bǐ. Nǔ baɖabaɖa e ná jɛ ahwan hwenu lɛ́ɛ ní zɔ́n, bónú mɛ ɖokpó ɖokpó ní lɛ́ kɔ yi togun tɔn mɛ, mɛ ɖokpó ɖokpó ní hɔn yi to tɔn mɛ. Đ'ayǐ ɔ́, Izlayɛ́li cí lɛ̌ngbɔ́ búbú e kinnikínní ɖo nyinya wɛ ɔ́ ɖɔhun. Asilíi xɔ́sú ɔ́ wɛ vúnvún i jɛ nukɔn, bɔ Babilɔ́nu xɔ́sú Nabukodonɔzɔ́ɔ wá gba xú tɔn. Énɛ́ ɔ́ wú wɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: “Un ná wa nǔ xá Babilɔ́nu xɔ́sú ɔ́ kpó Babilɔ́nu to ɔ́ kpó, lě e un wa xá Asilíi xɔ́sú ɔ́ gbɔn é. Un ná kplá Izlayɛ́li wá nɔtɛn tɔn. É ná mɔ nǔ ɖu ɖo Kaamɛ́li só jí, bó ná mɔ ɖu ɖo Basáni só jí. Nǔ ɖěbǔ ná hwedó e ɖo Eflayímu só jí ǎ; nǔ ɖěbǔ ná hwedó e ɖo Galadi yíkúngban jí ǎ. Nyɛ Mawu Mavɔmavɔ ɖɔ: azǎn énɛ́ lɛ́ɛ mɛ ɔ́, è na ba nǔ e Izlayɛ́li wa nyi do ɔ́ kpo. È nǎ mɔ hwɛ e Judáa hu ɔ́ ǎ, ɖó un ná zé hwɛ kɛ mɛ e un ná jó dó nyi gbɛ lɛ́ɛ. Xó e nyɛ Mawu Mavɔmavɔ ɖɔ ɔ́ nɛ́. Akɔta lɛ́ɛ mi, mi sí te dó Malatímu to ɔ́ jí. Mi sí te dó Pekɔ́dinu lɛ́ɛ jí. Mi jɛ yě gúdo, mi hu yě bǐ, mi vívá kún yětɔn. Mi wa nǔ e un ɖɔ lɛ́ɛ bǐ. Xó e nyɛ Mawu Mavɔmavɔ ɖɔ ɔ́ nɛ́. È ɖo ahwanfuntɔ́ e ɖo ahwan fun wɛ lɛ́ɛ sín zǐngídi se wɛ ɖo to ɔ́ mɛ. Nǔ e gblé ɖo to ɔ́ mɛ ɔ́ vɛ́ jlɛ́! Étɛ́ o! Zǔnkpé e gba gbɛ ɔ́ bǐ ɔ́ wa étɛ́ o! È gba Babilɔ́nu hánnyá o! Babilɔ́nu gba ɖo akɔta lɛ́ɛ bǐ tɛ́ntin. Étɛ́ o! Babilɔ́nu, un ɖó mɔ nú we, bɔ a jɛ mɛ, a ɖǒ ayi tɔn ǎ. A jɛ wlɔ mɛ, ɖó nyɛ Mawu Mavɔmavɔ wɛ a fun ahwan xá.” Un fɔ ahwanlyánnú ce lɛ́ɛ tɔ́n. Ahwanlyánnú e un sin xomɛ ɔ́ un nɔ zán lɛ́ɛ ɔ́, un ɖe yě tɔ́n. Nǔ e nyɛ Mawu Mavɔmavɔ Nǔbǐwúkpétɔ́ bló ɖo Babilɔ́nunu lɛ́ɛ sín to mɛ é nɛ́. Mi tɔ́n ahwan to ɔ́ gbɔn aɖisí amyɔ. Mi gba agɔ̌ lɛ́ɛ. Nǔ e mi mɔ ɖo to ɔ́ mɛ lɛ́ɛ ɔ́, mi kplé yě ɖó kɛ́n ɖokpó, lobo dó to ɔ́ zo. Nǔ ɖěbǔ ní má kpo ɖo to ɔ́ mɛ ó. Mi hu ahwanfuntɔ́ syɛ́nsyɛ́n lɛ́ɛ bǐ, mi kplá yě yi fí e è nǎ hu yě ɖe é. Heelú yě, ɖó azǎn yětɔn wɛ sɔgbe. Hwenu e è nǎ wa nǔ xá yě ɔ́ sín gan wɛ xo. Mi ɖótó mɛ e ɖo hinhɔn wɛ lɛ́ɛ, mi ɖótó mɛ e ɖo hinhɔn sín Babilɔ́nu wɛ lɛ́ɛ; yě ɖo ɖiɖɔ nú Sinyɔ́ɔnu lɛ́ɛ wɛ ɖɔ: “Mawu Mavɔmavɔ, Mawu mǐtɔn ba hlɔn nú mi, yě ɖu su nú xwé tɔn bɔ é ba hlɔn.” Mi da gǎdatɔ́ lɛ́ɛ bǐ dó Babilɔ́nu wú. Mi ɖó gɔnu lɛ́ lɛ̌ dó Babilɔ́nu, mɛ ɖěbǔ ní ma gló mi ó. Mi sú nǔ e é wa lɛ́ɛ sín axɔ́ ɛ. Mi bló n'i, lě e é nɔ́ bló nú mɛ gbɔn é. Đó é nɔ́ ba hǎ Mawu Mavɔmavɔ, Mawu Izlayɛ́li tɔn. “Mɔ̌ wɛ dɔ̌nkpɛvú asásyɛ́n tɔn lɛ́ɛ ná kú gbɔn ɖo tokplétɛn lɛ́ɛ, ahwanfuntɔ́ tɔn lɛ́ɛ bǐ na kú gbe nɛ́ gbe.” Xó e Mawu Mavɔmavɔ ɖɔ ɔ́ nɛ́. Aklúnɔ, Mawu Mavɔmavɔ Nǔbǐwúkpétɔ́ ɔ́ ɖɔ: “Babilɔ́nu goyítɔ́, nǔ towe wɛ vɛ́ wǔ ce, ayǐ towe ɖíe hɔ́n e, hwenu e un ná wa nǔ xá we ɔ́ ɖíe su lo e. Goyítɔ́, a nǎ fún sa, bó ná jɛ ayǐ. Mɛ ɖěbǔ ná fɔ́n we sí te ǎ. Un ná dó toxo towe lɛ́ɛ zo. Fí e sɛkpɔ́ toxo towe lɛ́ɛ lɔmɔ̌ ná wlí zo.” Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Izlayɛ́linu lɛ́ɛ kpó Judáanu lɛ́ɛ kpó mɔ agbɔ̌n ɖěbǔ ǎ. Mɛ e wlí yě yi kannumɔgbénu lɛ́ɛ hɛn yě, bó gbɛ́ yě jó. Nyɛ wɛ ɖo yě hwlɛ́n gán wɛ; un syɛ́n ɖésú; nyǐkɔ ce nyí Mawu Mavɔmavɔ Nǔbǐwúkpétɔ́. Un ná jɛ ahwan yě jí, bɔ to ɔ́ ná mɔ agbɔ̌n, un ka ná dó jɔwunkɔ́ nú Babilɔ́nunu lɛ́ɛ.” Mawu Mavɔmavɔ ɖɔ: “Ahwanfunfun ɖo te kpɔ́n Babilɔ́nunu lɛ́ɛ. Ahwanfunfun ɖo te kpɔ́n mɛ e ɖo Babilɔ́nu tota mɛ lɛ́ɛ; é ɖo te kpɔ́n gǎn hɔn-yitɔ́ lɛ́ɛ kpó nǔnywɛ́tɔ́ lɛ́ɛ kpó. É ɖo te kpɔ́n nǔkantɔ́ lɛ́ɛ, ayi yětɔn ní fɛ́ da. Ahwanfunfun ɖo te kpɔ́n ahwanfuntɔ́ syɛ́nsyɛ́n lɛ́ɛ. Ahwi ní xo yě. Ahwanfunfun ɖo te kpɔ́n sɔ́ tɔn lɛ́ɛ kpó kɛkɛ́ví tɔn lɛ́ɛ kpó. É ɖo te kpɔ́n togun tɛnmɛ tɛnmɛ e ɖo Babilɔ́nu lɛ́ɛ bǐ. Yě ní cí nyɔ̌nu e ba gǎn kpo ɔ́ ɖɔhun. Ahwanfuntɔ́ lɛ́ɛ ní mɔ dɔkun tɔn lɛ́ɛ; yě ní fɔ bǐ yi. Tɔ e ɖo to ɔ́ mɛ lɛ́ɛ bǐ ní xú, bǐ ní mɛ. Đó vodún wɛ yě nɔ́ sɛn ɖo to ɔ́ mɛ; vodún xɛblɛ́nú énɛ́ lɛ́ɛ wɛ gba ta mɛ nú yě. Énɛ́ ɔ́ wútu wɛ ayǐsájɛ lɛ́ɛ ná ɖó gɔnu ɖó to ɔ́ mɛ, cukú gbě tɔn lɛ́ɛ ná wa xwé nyi toxo ɔ́ mɛ. Gowungo lɛ́ɛ ná ɖó nɔtɛn yětɔn ɖó toxo ɔ́ mɛ. Babilɔ́nu ná jɛ vɔ̌, bó ná nɔ mɔ̌ káká sɔ́yi. Gbɛtɔ́ ɖěbǔ sɔ́ ná nɔ toxo ɔ́ mɛ ǎ. Lě e Sodɔ́mu kpó Gomɔ́ɔ kpó, kpódó toxo e ɖo akpá yětɔn lɛ́ɛ kpó gba bó hánnyá gbɔn ɔ́ ɖɔhun wɛ Babilɔ́nu ná cí. Mɛ ɖěbǔ sɔ́ ná nɔ toxo ɔ́ mɛ ǎ, mɛɖé sɔ́ ná zɛ ali gbɔn fínɛ́ ǎ. Xó e nyɛ Mawu Mavɔmavɔ ɖɔ ɔ́ nɛ́. Éɖíe, togun ɖokpó ná gosín totaligbé bó ná wá. Akɔta ɖaxó ɖokpó wɛ; é kpó axɔ́sú syɛ́nsyɛ́n ɖé lɛ́ɛ kpó ná gosín vǒvólívwé jí bó ná wá. Yě hɛn gǎ kpó hwǎn kpó. Yě jɔ lan ɖésú, yě nɔ́ se gbɔ ǎ. Yě ɖo zǐngídi jí xu ɖɔhun. Babilɔ́nu e, yě xá sɔ́ ja; yě to yěɖée lyɛ̌ngbe lyɛ̌ngbe bó ja ahwan tɔ́n we gbé. Ée Babilɔ́nu xɔ́sú ɔ́ se ɖɔ ahwan ja ɔ́, awakanmɛ kú i, akpɔ ɖó e; é jɛ wǔvɛ́ mɔ jí nyɔ̌nu ɖo ajidonu ɖɔhun. Lě e kinnikínní nɔ́ yi wu ɖo zunkan mɛ ɖo Judɛ́ɛn tɔ ɔ́ tó, nú kanlin e ɖo gběhan mɛ lɛ́ɛ, bó nɔ́ wlí ɖě bɔ ée kpo lɛ́ɛ nɔ́ gbadó ɔ́ ɖɔhun wɛ kɛntɔ́ ná fyán Babilɔ́nu kpó toxo tɔn lɛ́ɛ kpó. Un ná gba mɛ bǐ dó sín fínɛ́ ɖo nukúnxwixwe ɖokpó mɛ, bó ná zé mɛ e un sɔ́ ɔ́ ɖó to ɔ́ nu. Mɛ̌ ká ɖó acɛ nyɛ ɖɔhun? Nú un wa nǔɖé ɔ́, mɛ̌ ka sixú kan nǔ e wú un wa mɔ̌ ɔ́ byɔ́ mì? Gǎn tɛ́ sixú nɔ te nukɔn ce?” Énɛ́ ɔ́ wú ɔ́, mi bo ɖótó gbeta e Mawu Mavɔmavɔ ɖe tɔ́n dó Babilɔ́nu wú é, mi ɖótó tito e é sɔ́ ɖó te nú Babilɔ́nunu lɛ́ɛ é; è nǎ dɔn yě kanlin e ma ɖó gǎn ǎ é ɖɔhun. È nǎ gba xwé yětɔn. È nǎ yí Babilɔ́nu bɔ ayǐkúngban ná dán wǔ. Babilɔ́nu ná sú xó bɔ è nǎ se gbe tɔn ɖo akɔta lɛ́ɛ bǐ tɛ́ntin. Xó e Mawu Mavɔmavɔ ɖɔ ɔ́ ɖíe, é ɖɔ: “Un ná sɛ́ jɔhɔn e nɔ hɛn nǔ gblé ɔ́ dó Babilɔ́nunu lɛ́ɛ; un ná sɛ́ jɔhɔn énɛ́ dó kɛntɔ́ ce énɛ́ lɛ́ɛ. Un ná sɛ́ mɛ dó yě, bɔ è nǎ fúnfún yě gbɔn fí bǐ, lě e jɔhɔn nɔ d'alɔ wɔn mɛ, bó nɔ fúnfún é ɖɔhun; è nǎ gba Babilɔ́nu to ɔ́. Azǎn nyanya énɛ́ gbe ɔ́, kɛntɔ́ yětɔn lɛ́ɛ ná ján go dó yě gbɔn ɖisí amyɔ. Gǎdatɔ́ lɛ́ɛ ní da gǎ dó mɛ e ɖo toxo ɔ́ mɛ lɛ́ɛ; yě ní ma zé ganwu yětɔn lɛ́ɛ ó. Yě ní hu dɔ̌nkpɛvú ahwanfuntɔ́ tɔn lɛ́ɛ. Yě ní vívá kún nú ahwangɔnu tɔn. Mɛ e gblé wǔ lɛ́ɛ ná tɛ́ kpaɖaɖa ɖo Babilɔ́nu to ɔ́ mɛ. Mɛkúkú lɛ́ɛ ná ɖo kpɔ́ ɖo ali lɛ́ɛ jí. Đó hwɛ e yě hu dó nyɛ Mawu Izlayɛ́li tɔn, nyɛ Mawu ɖokpó géé e tíin ɔ́ wɛ gɔ́ to yětɔn. Lo ɔ́, Mawu Mavɔmavɔ, Mawu Nǔbǐwúkpétɔ́ ɔ́ ɖo nukún kpé dó Izlayɛ́li kpó Judáa kpó wú wɛ.” Mi hɔn sín Babilɔ́nu to ɔ́ mɛ, mɛ ɖokpó ɖokpó ní hwlɛ́n ta tɔn gán! É má nyí mɔ̌ ǎ ɔ́, mi táá wa dɔn ɖ'é mɛ! Đó hwenu e Mawu Mavɔmavɔ ná ba hlɔn ɔ́ wɛ su. É ná bló xá ɛ lě e é jɛ xá gbɔn é. Babilɔ́nu cí sikákɔ́fu e mɛ vɛ̌ɛn ɖe ɔ́ ɖɔhun ɖo Mawu Mavɔmavɔ lɔ mɛ, bɔ gbɛ ɔ́ bǐ nu mú. Akɔta lɛ́ɛ nu vɛ̌ɛn ɖo kɔ́fu ɔ́ mɛ. Énɛ́ ɔ́ wú wɛ akɔta lɛ́ɛ bǐ cí mɛ e tamɛ ma sɔgbe ná ǎ é ɖɔhun. Tlóló kpowun ɔ́, Babilɔ́nu j'ayǐ bó gba hánnyá. Énɛ́ ɔ́, mɛ ɖé lɛ́ɛ ɖɔ: “Mi dó gbɛvíhan dó jǐ tɔn; mi sɔ́ nǔ bó blá akpa n'i. Bóyá é sixú gán.” Lo ɔ́, mɛ ɖěvo lɛ́ɛ ɖɔ: “Mǐ lébe nú Babilɔ́nu, azɔn tɔn ka gbɔ ǎ. Mi wá mǐ jó e dó bó ná yi to mǐtɔn mǐtɔn mɛ. Đó tó e ná dɔn n'i wɛ Mawu ɖe ɔ́ d'agba, é yi jǐxwé káká bó byɔ́ akpɔ́kpɔ́ lɛ́ɛ mɛ. Mawu Mavɔmavɔ jɛ ahwan mǐ jí. Mi wá mǐ lɛ́ kɔ yi Sinyɔ́ɔ lobo ná yi ɖɔ nǔ e Mawu Mavɔmavɔ, Mawu mǐtɔn wa nú mǐ é.” Mawu Mavɔmavɔ fɔ́n hun dó jǐ nú Mɛdi xɔ́sú lɛ́ɛ, bó jló ná vívá kún nú Babilɔ́nu to ɔ́. Mawu Mavɔmavɔ wɛ ɖo hlɔn ba wɛ, ɖó yě ɖu su nú xwé tɔn. Mi gan gǎ mitɔn lɛ́ɛ ganjí, mi fɔ gǎglónú mitɔn lɛ́ɛ. Mi zé ahwansyá mitɔn ɖó jǐ, mi ɖe xlɛ́ ɖɔ ahwan yá mi ɖe xlɛ́ ɖɔ émí ná mu ahohó Babilɔ́nu tɔn lɛ́ɛ, mi cyán sɔ́ja dó miɖée jí, mi to sɔ́ja mɛcɔ́tɔ́ lɛ́ɛ. Mi tɔ wu gbɔn fí bǐ. Nǔ e Mawu Mavɔmavɔ ɖɔ émí ná wa xá Babilɔ́nu lɛ́ɛ ɔ́, lě e é ná bló gbɔn ɔ́ nɛ́. Babilɔ́nu, hwi mɛ e ɖo tɔ ɖaxó tó, bó ɖo dɔkun tɛ́ntin ɔ́, fí e a wlǒ mɛ ɖu jɛ ɔ́ kpé, xó towe fó lo. Mawu Mavɔmavɔ Nǔbǐwúkpétɔ́ ɔ́ xwlé éɖée bó ɖɔ: “Un na sɛ́ gbɛtɔ́ dó bɔ yě ná wá vun blá we wɛn ɖɔhun, lobo ná tɔ́n ahwan we, bó ná ɖu ɖo jǐ towe; nǔ ná víví nú yě bɔ yě ná sú xó.” Mawu ɔ́, hlɔ̌nhlɔ́n tɔn wɛ é dó ɖó ayǐkúngban ɔ́. Nǔwúkpíkpé tɔn wɛ é dó ɖó gbɛ ɔ́. Nǔnywɛ́ tɔn wɛ é dó ɖó jǐnukúnsin. Mawu kɛ nu ɔ́, sin nɔ sɛ kplé ɖo jǐxwé, akpɔ́kpɔ́ lɛ́ɛ nɔ sí te sín fí e jǐnukúnsin kpó ayǐkúngban kpó kplé ɖe é, jǐ nɔ kɛwun bó nɔ́ ja; jɔhɔn nɔ sí te sín fí e é ɖó tɛnmɛ n'i ɖó é. Gbɛtɔ́ lɛ́ɛ mɔ mɔ̌ ɔ́, yě bǐ nɔ́ jɔ yɛyi dó te; yě sɔ́ nɔ́ tunwun nǔ e yě ná ɖɔ é ǎ. Énɛ́ ɔ́, nǔkantɔ́ e tun nǔmɛsɛn yětɔn lɛ́ɛ nú yě ɔ́, winnyá nɔ́ hu yě, ɖó bǒcyɔ énɛ́ lɛ́ɛ bǐ wɛ nyí xɛblɛ́nú; gbɛ ɖě ɖo yě mɛ ǎ. Nǔ yǎyá wɛ yě nyí; yě hwɛ̌n. Hwenu e Mawu ná dɔn tó nú mɛ ɔ́, yě bǐ sín kún wɛ è nǎ vívá. Amɔ̌, Mawu Jakɔ́bu ví lɛ́ɛ tɔn ɔ́, è sixú jlɛ́ ɛ dó nǔmɛsɛn yětɔn lɛ́ɛ wú ǎ, ɖó é wɛ ɖó nǔ bǐ. Nyǐkɔ tɔn nyí Mavɔmavɔ Mawu Nǔbǐwúkpétɔ́. Mawu ɖɔ: “Babilɔ́nu, zǔnkpé wɛ a nyǐ ɖo alɔ ce mɛ ɖ'ayǐ, a nyǐ ahwanlyánnú ɖo alɔ mɛ nú mì, bɔ un sɔ́ we dó gba akɔta lɛ́ɛ ná, un sɔ́ we dó gba axɔ́súɖuto lɛ́ɛ ná. Hwi wɛ un dó gblé gbɛ dó nú sɔ́ kpó sɔ́xátɔ́ kpó. Hwi wɛ un dó hu kɛkɛ́ví kpó kɛkɛ́víkuntɔ́ kpó. Hwi wɛ un dó gblé gbɛ dó nú súnnu kpó nyɔ̌nu kpó, hwi wɛ un dó gblé gbɛ dó nú degénɔ kpó yɔkpɔ́vú kpó, hwi wɛ un dó gblé gbɛ dó nú dɔ̌nkpɛvú kpó ɖyɔ̌vǐ kpó. Hwi wɛ un dó gblé gbɛ dó nú kanlin kpó kanlinnyitɔ́ kpó. Hwi wɛ un dó gblé gbɛ dó nú glesi kpó nyibúsú e é nɔ dó lɛ gle ná lɛ́ɛ kpó. Hwi wɛ un dó gblé gbɛ dó nú gǎn hɔn-yitɔ́ lɛ́ɛ kpó tokpɔngán lɛ́ɛ kpó.” Mawu Mavɔmavɔ ɖɔ: “Nǔ e Babilɔ́nu xɔ́sú ɔ́ kpó Babilɔ́nunu lɛ́ɛ kpó wa xá Sinyɔ́ɔ ɔ́ bǐ sín axɔ́ wɛ un na sú yě ɖo nukún mitɔn mɛ. Babilɔ́nu, din ɔ́, un ná wa nǔ xá we; só nǔhɛngblétɔ́, hwi mɛ e gblé nǔ gbɔn ayǐ élɔ́ bǐ jí é, alɔ ce ná jɛ wǔ we, un ná flí we sín aga; só ɖaxó, a nǎ ji kɔn afín. Xó e nyɛ Mawu Mavɔmavɔ ɖɔ ɔ́ nɛ́. È sɔ́ ná mɔ awǐnnya e è nɔ dó ján xɔ ná ɔ́ ɖo só towe jí ǎ; è sɔ́ ná mɔ awǐnnya e è nɔ dó dó xɔ do ná ɔ́ ɖo só towe jí ǎ. A nǎ gba hánnyá bǐ. Xó e nyɛ Mawu Mavɔmavɔ ɖɔ ɔ́ nɛ́.” Mawu ɖɔ: “Babilɔ́nu kɛntɔ́ lɛ́ɛ mi, mi kún lanzo ɖo akɔta lɛ́ɛ tɛ́ntin. Mi fɔ́n ahwanfuntɔ́ yětɔn lɛ́ɛ dó Babilɔ́nu jí. Mi fɔ́n axɔ́súɖuto Alaláti tɔn, Mɛni tɔn kpó Acikenázi tɔn kpó dó jǐ tɔn. Mi fɔ́n mɛ bǐ dó jǐ tɔn, mi dɔn Mɛdi xɔ́sú lɛ́ɛ, gǎn hɔn-yitɔ́ Mɛdi tɔn lɛ́ɛ kpó dó tokpɔngán Mɛdi tɔn lɛ́ɛ kpó dó jǐ tɔn. Fí e ɖo Mɛdi sín acɛ mɛ lɛ́ɛ bǐ ní fɔ́n gǔ dó jǐ tɔn.” Hwenu e nǔ e Mawu Mavɔmavɔ lin dó Babilɔ́nu wú ɔ́ ná ɖo jijɛ wɛ ɔ́, ayǐkúngban ná sísɔ́, é ná dán wǔ. Mawu Mavɔmavɔ ná sɔ́ Babilɔ́nu to ɔ́ dó húzú gbětótló, mɛɖé sɔ́ ná zɛ gbɔn fínɛ́ ǎ. Ahwanfuntɔ́ Babilɔ́nu tɔn lɛ́ɛ ko fɔ tú kɔn nyi ayǐ; yě yi hɔn bɛ́ cí ahohó lɛ́ɛ mɛ. Hlɔ̌nhlɔ́n yětɔn vɔ; nyɔ̌nu e ba gǎn kpo ɔ́ ɖɔhun wɛ yě cí din. È ɖo xwé lɛ́ɛ dó zo wɛ, è ɖo hɔn lɛ́ɛ fó wɛ. Wɛnsagun lɛ́ɛ ɖo wezun nu bó nɔ́ ɖo wɛn yi dó wɛ, mɛ ɖě ɖo yiyi wɛ ɔ́, mɛ ɖě nɔ́ ɖo wiwa wɛ; yě nɔ́ yi ɖɔ nú Babilɔ́nu xɔ́sú ɔ́ ɖɔ: “È jǎn to ɔ́ gbɔn fí bǐ. Gbɛtɔ́ ján ali lɛ́ɛ bǐ; è dǒ zohúnglíntɛn lɛ́ɛ bǐ zo, xɛsi jɛ ahwanfuntɔ́ lɛ́ɛ bǐ jí.” Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe, é ɖɔ: “Babilɔ́nu cí ayǐkúngban e è zǐn ganjí, bó ná só jinukún ɖ'é jí ɔ́ ɖɔhun. Zaanɖé din ɔ́, yiya hwenu tɔn ná su.” Sinyɔ́ɔnu lɛ́ɛ ɖɔ: “Nabukodonɔzɔ́ɔ, Babilɔ́nu xɔ́sú ɔ́ vúnvún mǐ, é fyɔ́n mǐ bó nu, lobo jó mǐ dó agbǎn vɔ̌tɔ́ ɖɔhun. É mi mǐ dlagɔ́ɔn ɖɔhun. É mi nǔ ɖagbe e ɖo mǐ sí lɛ́ɛ, bɔ adɔgo tɔn gɔ́. Énɛ́ gúdo ɔ́, é zé mǐ nyi gbě. Adǎka e Babilɔ́nu xo mǐ wǔ ɔ́, é ní sú axɔ́ tɔn. Hun mǐtɔn e Babilɔ́nunu lɛ́ɛ kɔn nyi ayǐ ɔ́, è nǐ dɔn tó tɔn nú yě.” Xó e Jeluzalɛ́munu lɛ́ɛ ɖɔ ɔ́ nɛ́. Énɛ́ ɔ́ wú wɛ Mawu Mavɔmavɔ ɖɔ: “Jeluzalɛ́mu, un ná hwlɛ́n we gán. Un ná ba hlɔn dó ta towe mɛ. Un ná ɖɔ bɔ tɔsisa Babilɔ́nu tɔn bǐ ná xwí. Un ná ɖɔ bɔ tɔjɔtɛn tɔn ná mɛ. Babilɔ́nu ná húzú dǒglin, é ná húzú xwé nú ayǐsájɛ lɛ́ɛ; é ná jɛ vɔ̌ bɔ mɛ e mɔ lɛ́ɛ ɔ́, avivɔfún ná blá yě; yě ná sá heelú. Égbé din ɔ́, Babilɔ́nunu lɛ́ɛ ɖo gbe dó wɛ kinnikínní ɖɔhun. Yě ɖo xó sú wɛ kinnikínní ví ɖɔhun. Hwenu e nǔ ná jɛ yě jlǒ jí ɔ́, un ná ylɔ́ agɔ̌ ɖokpó nú yě, un ná ná ahan yě, bɔ yě ná nu mú, bó sɔ́ ná tunwun nǔ e ɖɔ wɛ yě ɖe ɔ́ ǎ. Yě ná dɔ́ amlɔ dɔ̌mányí; yě sɔ́ ná fɔ́n gbeɖé ǎ. Xó e nyɛ Mawu Mavɔmavɔ ɖɔ ɔ́ nɛ́. Un na kplá yě lɛ̌ngbɔ́ e è kplá xwe akpákpó jí ɔ́ ɖɔhun. Un ná kplá yě agbo kpó gbǎgbá kpó e è kplá xwe huhu gbe ɔ́ ɖɔhun.” Étɛ́! È yǐ Cecáki wɛ è ɖɔ a? Cecáki e susu tɔn gba kpé ayǐkúngban ɔ́ bǐ jí é, è yǐ o! Étɛ́! Babilɔ́nu húzú gbětótló ɖo akɔta lɛ́ɛ tɛ́ntin o! Xu ɖi sin bó gba Babilɔ́nu to, tɔ bú i bǐ. È gba Babilɔ́nu toxo lɛ́ɛ bǐ. Ayǐkúngban ɔ́ bǐ nyí axéko, bǐ nyí gbětótló. Mɛ ɖěbǔ sɔ́ ɖo to ɔ́ mɛ ǎ, mɛɖé sɔ́ nɔ́ gbɔn fínɛ́ ǎ. Un ná dɔn tó nú Babilɔ́nu vodún Bɛ́lu ɔ́. Un ná bló bɔ é ná vi nǔ e wló ɖu wɛ é ɖe lɛ́ɛ bǐ. Akɔta lɛ́ɛ sɔ́ ná nyi ahwan wá gɔ̌n tɔn ɖě ǎ. Babilɔ́nu sín ahohó ɔ́ mu. Togun ce e mi, mi hɔn sín Babilɔ́nu. Mɛ ɖokpó ɖokpó ní hwlɛ́n ta tɔn, cóbónú xomɛsin ce ná wá. “Mi má nú ayixa mitɔn gbadó ó, mi ma ɖi xɛsi ó. Zǐngídi ná gba kpé to ɔ́ bǐ mɛ. Xó ɖě tɔ́n xwe élɔ́ mɛ ɔ́, ɖěvo ná tɔ́n xwe e ja ɔ́ mɛ; a nǎ se adǎkaxixo xó ɖo fí ɖě, bó ná se ɖo fí ɖěvo ɖɔ gǎnhúnǔtɔ́ ɖě sí te dó ɖě jí.” Mawu ɖɔ: “Ayǐ ɖokpó ka ná hɔ́n, bɔ un ná wa nǔ xá Babilɔ́nu vodún lɛ́ɛ. Babilɔ́nu ná nɔ winnyá mɛ. Mɛ e è hu lɛ́ɛ ná ɖo kpaɖaɖa ɖo to ɔ́ mɛ. Hwenɛ́nu ɔ́, è nǎ se bɔ è ɖo awǎ jɛ wɛ ɖo jǐxwé, bó ná se ɖo ayǐkúngban jí ɖó nǔ e gbo Babilɔ́nu ɔ́ wú. Mɛ e ná gba Babilɔ́nu lɛ́ɛ ná gosín totaligbé, bó ná wá tɔ́n ahwan ɛ.” Xó e Mawu Mavɔmavɔ ɖɔ ɔ́ nɛ́. Izlayɛ́li ví e Babilɔ́nu hu lɛ́ɛ gégé. Mɛ e é hu ɖo gbɛ ɔ́ mɛ lɛ́ɛ flá. Din ɔ́, ahwan jɛ jǐ tɔn; é ɖó ná j'ayǐ. Mi mɛ e kú xo kpo lɛ́ɛ mi, mi hɔn, mi ma nɔ te ó. Mi mɛ énɛ́ lɛ́ɛ e ɖo Babilɔ́nu dɔ̌n lɛ́ɛ mi, mi flín Mawu Mavɔmavɔ. Jeluzalɛ́mu ní nɔ ayi mitɔn mɛ hwebǐnu. “Ée mǐ se hɛ̌nnú énɛ́ e ɖɔ wɛ è ɖe lɛ́ɛ ɔ́, mǐ dán ɖě wa gbɔn. Hwenu e mǐ se ɖɔ to ɖěvo mɛ nu lɛ́ɛ byɔ́ Mawu Mavɔmavɔ xwé gbe ɔ́, winnyá hu mǐ, mǐ sɔ́ sixú zé ta ǎ.” Énɛ́ ɔ́ wú wɛ Mawu Mavɔmavɔ ɖɔ: “Éɖíe, ayǐ ɖokpó ná hɔ́n, bɔ un na jlɛ́ nǔ xá vodún Babilɔ́nu tɔn lɛ́ɛ. Mɛ yětɔn e gblé wǔ lɛ́ɛ ná ɖo azɔn wɛn wɛ gbɔn fí bǐ ɖo to ɔ́ mɛ. Babilɔ́nu na bo yi jǐ káká yi jǐxwé ɔ́, é ná bo hɔn yi hwlá ɖo ahohó tɔn lɛ́ɛ mɛ bó mɔ ɖɔ émí gló nǔ ɔ́, un ná sɛ́ nǔhɛngblétɔ́ lɛ́ɛ dó e. Xó e nyɛ Mawu Mavɔmavɔ ɖɔ ɔ́ nɛ́.” Jelemíi ɖɔ: “Mi ɖótó, è ɖo xósúsú se wɛ sín Babilɔ́nu. Awě wɛ ɖo Babilɔ́nunu lɛ́ɛ xo wɛ sɔ mɔ̌. Mawu Mavɔmavɔ wɛ ɖo Babilɔ́nu to ɔ́ vɔ wɛ. É ná ɖó xó e sú wɛ Babilɔ́nu kɛntɔ́ lɛ́ɛ ɖe ɖo dɔ̌n ɔ́ te. Yě ɖo zǐngídi ɖú wɛ jǐ dó gbe ɖɔhun; yě ɖo zǐngídi ɖú wɛ aslɔkɛ́ sí te ɖo xu jí ɖɔhun. Nǔhɛngblétɔ́ lɛ́ɛ wɛ ɖo Babilɔ́nu sɛkpɔ́ wɛ; yě ná wlí sɔ́ja Babilɔ́nu tɔn lɛ́ɛ; yě ná wɛ́n gǎ yětɔn lɛ́ɛ. Yě ná bló mɔ̌, ɖó Mawu Mavɔmavɔ ɔ́, Mawu wɛ é nyí; lě e mɛ ɖé wa nǔ gbɔn ɔ́ wɛ é nɔ́ ná mɛ ɔ́ gbɔn. É nɔ́ sú axɔ́ mɛ ɖokpó ɖokpó lě e é jɛ xá gbɔn é. Nyɛ Axɔ́sú e nyǐkɔ ce nɔ́ nyí Mawu Mavɔmavɔ Nǔbǐwúkpétɔ́ ɔ́ ɖɔ: Un ná ɖó ahan kɔ jí nú gǎn hɔn-yitɔ́ tɔn lɛ́ɛ, azaglɔ́gán tɔn lɛ́ɛ, tokpɔngán tɔn lɛ́ɛ, axɔ́sú tɔn lɛ́ɛ kpó ahwanfuntɔ́ syɛ́nsyɛ́n tɔn lɛ́ɛ kpó bɔ yě ná nu mú; yě ná dɔ́ amlɔ dɔ̌mányí; yě ná fɔ́n gbeɖé ǎ.” Xó e é lɛ́ ɖɔ ɔ́ ɖíe: “Ahohó gblɛlɛ Babilɔ́nu tɔn lɛ́ɛ mu. Hɔntogbó ɖaxó ɖaxó Babilɔ́nu tɔn lɛ́ɛ fyɔ́. Togun lɛ́ɛ jɛ tagba dó wǔvɔ́, myɔ fyɔ́ nǔ e Babilɔ́nu ji ya bó mɔ lɛ́ɛ bǐ.” Hwenu e Judáa xɔ́sú Sedesíyasi ɖo xwe ɛnɛ bló wɛ ɖo zinkpo jí ɔ́, é kpódó ahwangán tɔn Nɛliya kpó zɔn kpɔ́ sín Jeluzalɛ́mu yi Babilɔ́nu. Selaya ɔ́, Nɛliya ví wɛ, bó nyí Maxiseya vívú. Cóbónú yě ná jɛ ali ɔ́, gbeyíɖɔ Mawu tɔn Jelemíi wlán wěma ɖokpó dó así nú Selaya. É wlán awě e ɖo te kpɔ́n Babilɔ́nu to ɔ́ bǐ dó anyǔwéma mlámlá ɖokpó jí; nǔ e è ɖɔ dó Babilɔ́nu wú bó wlán ɔ́ bǐ ɖo anyǔwéma ɔ́ jí. Énɛ́ ɔ́, Jelemíi ɖɔ nú Selaya ɖɔ: “A jɛ Babilɔ́nu ɔ́, a nǎ zé gbe dó jǐ bó xa xó e ɖo anyǔwéma élɔ́ jí é bǐ. A xa fó ɔ́, a nǎ ɖɔ: ‘Mawu Mavɔmavɔ, hwi wɛ ɖɔ toxo élɔ́ ná gba, bɔ gbɛtɔ́ kpó kanlin kpó bǐ na vɔ; hwi wɛ ɖɔ toxo ɔ́ ná húzú gbětótló, bó ná nɔ mɔ̌ káká sɔ́yi.’ A xa wěma ɔ́ fó bǐ ɔ́, a nǎ sin awǐnnya dó anyǔwéma ɔ́ wú, bó ná zé nyi dó Efláti tɔ mɛ, bó ná ɖɔ: ‘Lě e Babilɔ́nu ná kú tɔ gbɔn ɔ́ nɛ́; é ná gán ɖo awě e Mawu ná sɛ́ dó e lɛ́ɛ mɛ ǎ. Akɔta lɛ́ɛ jɛ tagba dó wǔvɔ́.’ ” Jelemíi ɖɔ xó ɖó te fí. Xwe ko-nukún-ɖokpó wɛ Sedesíyasi ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nɔ tɔn nɔ nyí Hamutálu; Yiimɛyahu Livunanu ɔ́ sín ví wɛ. Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ é bló gbɔn ali bǐ xo Yoyakímu ɖɔhun, ɖě hwe ɖ'é mɛ ǎ. Énɛ́ ɔ́, nǔ e jɛ ɖo Jeluzalɛ́mu kpó Judáa kpó ɔ́ zɔ́n bɔ xomɛ sin Mawu Mavɔmavɔ bɔ é nya togun tɔn dó zɔ nú éɖée. Sedesíyasi wá fɔ́n gǔ dó Babilɔ́nu xɔ́sú Nabukodonɔzɔ́ɔ jí. Hwenu e Sedesíyasi ɖo xwe tɛ́nnɛ bló wɛ ɖo zinkpo jí ɔ́, sun tɔn wǒgɔ́ ɔ́ mɛ, ɖo azǎn tɔn wǒgɔ́ ɔ́ gbe ɔ́, Nabukodonɔzɔ́ɔ, Babilɔ́nu xɔ́sú ɔ́ wá tɔ́n ahwan Jeluzalɛ́mu, é kpódó ahwangɔnu tɔn bǐ kpó. Yě wǎ ɖó gɔnu ɖó Jeluzalɛ́mu nukɔn bó xá toxo ɔ́, bó kun agbǒdo lɛ́ lɛ̌ dó. Yě xá toxo ɔ́ mɔ̌ káká jɛ hwenu e axɔ́sú Sedesíyasi ɖo xwe wǒ-ɖokpó bló wɛ ɖo zinkpo jí é. Énɛ́ ɔ́, adɔ tɔ́n ɖo toxo ɔ́ mɛ bó syɛ́n ɖésú, bɔ toví lɛ́ɛ sɔ́ mɔ nǔɖé ná ɖu ǎ. Sun ɛnɛgɔ́ ɔ́ e ɖo xwe énɛ́ mɛ ɔ́, azǎn tɔn tɛ́nnɛgɔ́ ɔ́ gbe ɔ́, Babilɔ́nunu lɛ́ɛ tɔ́n ali ɖokpó dó ahohó e è mɛ lɛ́ lɛ̌ dó toxo ɔ́ é mɛ. Yě xá toxo ɔ́ mɔ̌ có ahwanfuntɔ́ Judáa tɔn lɛ́ɛ dɔn zǎn dó wǔ, bó hɔn gbɔn hɔntogbó e ɖo ahohó lɛ́ɛ tɛ́ntin ɖo axɔ́sú ɔ́ sín jikpá kpá é nu. Yě wlí ali e yi Judɛ́ɛn tɔdo ɔ́ mɛ é. Lo ɔ́, ahwangɔnu Babilɔ́nunu lɛ́ɛ tɔn lɛ́ɛ jɛ axɔ́sú Sedesíyasi gúdo, bó yi xwedó wǔ tɔn ɖo ayǐkúngban wɛnjɛ Jeliko tɔn jí; ahwanfuntɔ́ tɔn lɛ́ɛ bǐ hɔn jó e dó, bɔ yě wlí i bó kplá ɛ yi Babilɔ́nu xɔ́sú Nabukodonɔzɔ́ɔ gɔ́n ɖo Hlivla ɖo Hamáti tomɛ. Fínɛ́ wɛ Nabukodonɔzɔ́ɔ ɖó hwɛ nú Sedesíyasi ɖe. Nabukodonɔzɔ́ɔ hu Sedesíyasi ví lɛ́ɛ ɖo nukún tɔn mɛ. É ná gbe bɔ è hu gǎn Judáa tɔn lɛ́ɛ bǐ ɖo Hlivla. Énɛ́ ɔ́ gúdo ɔ́, é ná gbe bɔ è tɔ́n nukún Sedesíyasi tɔn we lɛ́ɛ, bó dó wlɔ ɛ, bó kplá ɛ yi Babilɔ́nu, bó sɔ́ ɛ sú dó ganxó, bɔ é nɔ fínɛ́ káká bó kú. Hwenu e Nabukodonɔzɔ́ɔ ɖo xwe afɔtɔn-nukún-ɛnɛ bló wɛ ɖo axɔ́súzinkpo Babilɔ́nu tɔn jí ɔ́, azǎn wǒgɔ́ ɔ́ e ɖo sun atɔ́ɔ́ngɔ́ ɔ́ mɛ ɔ́ gbe ɔ́, Nɛbuzaladáni ahwangán e nɔ́ nɔ axɔ́sú ɔ́ sín xwé gbe ɔ́ wá Jeluzalɛ́mu. É dó Mawu Mavɔmavɔ xwé ɔ́ zo, bó dó hɔnmɛ ɔ́ kpó xwé e ɖo Jeluzalɛ́mu lɛ́ɛ bǐ kpó zo. Đo tají ɔ́, é dó gbɛtɔ́ nukúnɖéjí lɛ́ɛ sín xwé zo. Babilɔ́nu sín ahwangɔnu ɔ́ bǐ wɛ xwedó Nɛbuzaladáni, bó wá gba ahohó e è mɛ lɛ́ lɛ̌ dó Jeluzalɛ́mu lɛ́ɛ bǐ. Nɛbuzaladáni wlí wamamɔnɔ lɛ́ɛ kpó mɛ e kpo ɖo toxo ɔ́ mɛ lɛ́ɛ kpó, kpó mɛ e sɔ́ yěɖée jó nú Babilɔ́nu xɔ́sú ɔ́ lɛ́ɛ, kpó alɔlyɛ́nzɔ́watɔ́ e kpo ɖo to ɔ́ mɛ lɛ́ɛ kpó; é wlí mɛ e cí to ɔ́ mɛ lɛ́ɛ bǐ hɛn yi Babilɔ́nu. Amɔ̌, é jó wamamɔnɔ e ɖo to ɔ́ mɛ lɛ́ɛ ɖě dó, bɔ yědɛɛ lɛ́ɛ ná nɔ kpé nukún dó vǐwungbo lɛ́ɛ kpó gle lɛ́ɛ kpó wú. Babilɔ́nunu lɛ́ɛ gba dotín e è sɔ́ ganvɔ dó bló ná ɖo Mawu Mavɔmavɔ xwé ɔ́ gbe lɛ́ɛ kpó ganvɔ basya e ɖo kɔ́xo jí é kpó kɛkɛ́ví lɛ́ɛ kpó hánnyá, bó bɛ́ ganvɔ lɛ́ɛ bǐ hɛn yi Babilɔ́nu. Yě bɛ́ nǔ e è zě ganvɔ dó bló bɔ è nɔ zán ɖo sinsɛn hwenu lɛ́ɛ bǐ: afíngannú lɛ́ɛ, afínbɛ́nú lɛ́ɛ, nǔ e è nɔ dó bló myɔ ɖó ná lɛ́ɛ, gannú lɛ́ɛ kpódó kɔ́fu lɛ́ɛ kpó. Nɛbuzaladáni lɛ́ fɔ nǔ e è zě siká kpó kpatágan kpó dó bló lɛ́ɛ; é fɔ basya lɛ́ɛ, zǎlínkpɔ́nfyɔ́nú lɛ́ɛ, gannú lɛ́ɛ, afíngannú lɛ́ɛ, zogbɛ́nhɛnnú lɛ́ɛ, agbǎn lɛ́ɛ, sinnuká lɛ́ɛ. Nǔ énɛ́ lɛ́ɛ e Salomɔ́ɔ bló ɖó Mawu Mavɔmavɔ xwé gbe lɛ́ɛ kpɛn káká, bɔ è sixú da bó tunwun nabí e yě da é ǎ. Nǔ lɛ́ɛ wɛ nyí dotín we lɛ́ɛ, basya ɖaxó ɔ́ kpó ganvɔ nyibú wěwe e jí basya ɔ́ ɖe lɛ́ɛ kpó, kpódó kɛkɛ́ví lɛ́ɛ kpó. Dotín lɛ́ɛ ɖokpó ɖokpó sín jǐyiyi bló mɛ̌tlu tɛ́nnɛ, bɔ è zě kan bó lɛ́ dó; kan ɔ́ sín ga yi mɛ̌tlu ayizɛ́n. Dotín ɖokpó ɖokpó sín avɔsísɔ́ yi alɔbá ɛnɛ. Ata ɖokpó sín jǐ yiyi bló mɛ̌tlu we adaɖé. È zě ganvɔ dó lɔn ganja, bó bló lɛ́ lɛ̌ dó ata e ɖo dotín ɖokpó ɖokpó jí é, bó zé ganvɔ dó bló glenádi ná, bó to lɛ́ lɛ̌ dó ata e ɖo dotín lɛ́ɛ jí é. Dotín wegɔ́ ɔ́ lɔ ɖó jlɛ ɖokpó ɔ́ lɛ́ɛ, glenádi ɖokpó ɔ́ lɛ́ɛ. Glenádi kanwe afɔtɔn nukún ɖokpó (96) wú wɛ è mɔ nǔ jɛ ɖo xɔ ɔ́ wú. Glenádi e lɛ́ dó xɔ ɔ́ yi kanwe ko (100). Nɛbuzaladáni ahwangán e kpa acɛ dó mɛ e nɔ cɔ́ axɔ́sú ɔ́ lɛ́ɛ nu ɔ́ kplá Selaya vɔ̌sánú-xwlémawutɔ́ ɖaxó ɔ́, bó kplá Sefaníyahu mɛ e bɔ dó wǔ tɔn é, kpódó vɔ̌sánú-xwlémawutɔ́ atɔn e nɔ́ nɔ ali nu lɛ́ɛ kpó. Ée é wá toxo ɔ́ mɛ ɔ́, é wlí ahwangán e kpa acɛ dó sɔ́ja lɛ́ɛ nu é, bó wlí mɛ tɛ́nwe ɖo mɛ e kpó axɔ́sú ɔ́ kpó nɔ́ ɖe wě lɛ́ɛ mɛ, bó wlí ahwangán wěgbójínɔtɔ́ e nɔ́ yí mɛ dó ahwanmɛ é, bó lɛ́ wlí toví kanɖé ko (60) ɖo toxo ɔ́ mɛ gɔ́ ná. Nɛbuzaladáni kplá mɛ e é wlí lɛ́ɛ hɛn yi Babilɔ́nu xɔ́sú ɔ́ gɔ́n ɖo Hlivla. Babilɔ́nu xɔ́sú ɔ́ xo yě, bó hu yě bǐ ɖo fínɛ́ ɖo Hamáti to ɔ́ mɛ. Judáanu e è wlǐ hɛn yi to línlín ɖé mɛ lɛ́ɛ sín tan nɛ́. Mɛ nabí e Nabukodonɔzɔ́ɔ wlí e ɖíe: Hwenu e é byɔ́ xwe tɛ́nwegɔ́ ɔ́ mɛ ɔ́, é wlí Judáanu afɔwó-afatɔ́n ko-nukún-atɔn (3.023). Hwenu e é byɔ́ xwe afɔtɔn nukún atɔngɔ́ ɔ́ mɛ ɔ́, é wlí gbɛtɔ́ nǔwɔntɔn afɔɖé gban nukún we (832) ɖo Jeluzalɛ́mu. Hwenu e axɔ́sú Nabukodonɔzɔ́ɔ byɔ́ xwe ko-nukún-atɔngɔ́ ɔ́ mɛ ɔ́, sɔ́ja mɛcɔ́tɔ́ lɛ́ɛ sín gǎn Nɛbuzaladáni ɔ́ wlí Judáanu nǔwɔntɔn kantɔn koatɔ́n (745). Bɔ mɛ e ahwan wlí lɛ́ɛ bǐ kplékplé bló gbɛtɔ́ děgba nǔwɔntɔn (4.600). Hwenu e Yoyakini ɖo xwe gbantɔ́n-nukún-we (37) bló wɛ ɖo gankpá mɛ ɔ́, sun wěwegɔ́ ɔ́ e ɖo xwe énɛ́ mɛ ɔ́, azǎn koatɔ́ngɔ́ (25) ɔ́ gbe ɔ́, Babilɔ́nu xɔ́sú Ewilu-Mɛlodaki ɖe Yoyakini Judáa xɔ́sú ɔ́ sín gankpá mɛ, bó ɖe winnyá n'i. Xwe e xwe Ewilu-Mɛlodaki yi zinkpo jí ɔ́ wɛ é ɖe e tɔ́n sín gankpá mɛ. É ɖɔ xó nú Yoyakini kpó xomɛfífá kpó, bó sɔ́ ɛ ɖó tɛn ɖé mɛ, bɔ tɛn ɔ́ ɖo nukɔn nú axɔ́sú e kpó é kpó ɖo Babilɔ́nu lɛ́ɛ bǐ tɔn. Axɔ́sú ɔ́ ná gbe ɖɔ è nǐ má sɔ́ dó gantɔ́wu nú Yoyakini ɖě ó, bɔ bɛ́ sín hwenɛ́nu ɔ́, é nɔ ɖu nǔ xá axɔ́sú ɔ́ tɛgbɛ tɛgbɛ. Axɔ́sú ɔ́ nɔ ná nǔ e hu dó e lɛ́ɛ bǐ i ayǐhɔ́ngbe ayǐhɔ́ngbe. É gɔn nǐná ɛ gbeɖé káká có nú Yoyakini kú ǎ. Áo! Jeluzalɛ́mu ɖíe wá ɖo é ɖokpónɔ e! Toxo e mɛ gbɛtɔ́ sukpɔ́ ɖe ɖ'ayǐ káká é! Éɖíe wá ɖo é ɖokpónɔ din e! É mɛ e nyǐkɔ tɔn yi jǐ ɖo akɔta lɛ́ɛ tɛ́ntin káká ɔ́, é ɖíe wá cí asúkúsi ɖɔhun e! Đ'ayǐ ɔ́, é wɛ nyí axɔ́sú nú tokpɔn lɛ́ɛ, é wɛ kpa acɛ nú yě; é ɖíe ká wá ɖo mɛ kannu din e. Zǎn mɛ hweɖěbǔnu ɔ́, avǐ ya wɛ jɛ́n é nɔ ɖe, ɖasin nɔ sa tɔ gbɔn nukún tɔn mɛ. Mɛ ɖěbǔ ká ɖe bó ná dó gbɔ n'i ǎ; mɛ e yí wǎn n'i lɛ́ɛ ɖě dó gbɔ n'i ǎ. Xɔ́ntɔn tɔn lɛ́ɛ bǐ hɔn jó e dó; kɛntɔ́ tɔn lɛ́ɛ wɛ yě húzú din. È wlǐ mɛ e ɖo Judáa lɛ́ɛ yi to ɖěvo mɛ; ya blá ta nú yě, kannumɔ zɔ́ wɛ yě nɔ́ wa. Akɔta ɖěvo lɛ́ɛ mɛ wɛ yě ɖe; yě mɔ fí ɖé bó ná nɔ tawun ǎ. Mɛ e ɖo gbě yětɔn nya wɛ lɛ́ɛ sɔ gba yě, yě ján go dó yě, bɔ yě sɔ́ tunwun fí e yě ná gbɔn é ǎ. Ali e è nɔ gbɔn yi Sinyɔ́ɔ lɛ́ɛ ɖo aluwɛ mɛ, mɛɖé sɔ́ nɔ́ yi ɖu xwe ɖo Sinyɔ́ɔ ǎ. È sɔ́ nɔ́ mɔ mɛɖé ɖo tokplétɛn lɛ́ɛ ǎ. Vɔ̌sánú-xwlémawutɔ́ Sinyɔ́ɔ tɔn lɛ́ɛ ɖo gbɛvo sa wɛ. Đyɔ̌vǐ Sinyɔ́ɔ tɔn lɛ́ɛ ɖo lele mɛ. Sinyɔ́ɔ ɖésú ɖo akpɔ mɔ wɛ. Kɛntɔ́ tɔn lɛ́ɛ ɖu ɖo jǐ tɔn; kɛntɔ́ tɔn lɛ́ɛ ɖo vivo mɛ. Mawu Mavɔmavɔ wɛ ɖo ya dó n'i wɛ; é ɖo ya dó n'i wɛ ɖó nǔ nyanya tobutóbú e é dó sin lɛ́ɛ wú. Mɛ e ɖu ɖo jǐ tɔn lɛ́ɛ wlí vǐ tɔn lɛ́ɛ hɛn yi. Nǔ e mɛ Sinyɔ́ɔ nɔ́ xɔ susu ɖe lɛ́ɛ bǐ ɖo yiyi wɛ; é ɖo kpínkpɔ́n wɛ bɔ bǐ ɖo yiyi wɛ. Gǎn tɔn lɛ́ɛ cí zungbɔ́ e ba ama kpo lɛ́ɛ ɖɔhun, yě ba ama kpo bó sɔ́ ɖó gǎn ɖé ǎ; yě sɔ́ ɖó gǎn ɖé ǎ bó ká ɖo wezun nu ɖo gbětɔ́ nukɔn. Jeluzalɛ́mu ɔ́, hwenu e adǎn ɖo gbigbo e wɛ ɔ́, é tunwun fí e é ná yi é ǎ. Énɛ́ ɔ́, é wá flín nǔ ɖagbe ɖagbe e é ɖó ɖ'ayǐ xóxó lɛ́ɛ bǐ. Hwenu e togun tɔn jɛ kɛntɔ́ lɛ́ɛ lɔmɛ ɔ́, mɛ ɖěbǔ wá gɔ́ alɔ n'i ǎ. Kɛntɔ́ tɔn lɛ́ɛ nɔ́ kpɔ́n ɛ bó nɔ́ ko e, ɖó é gba. Jeluzalɛ́mu hu hwɛ dín; énɛ́ ɔ́ wú wɛ nǔ tɔn má sɔ́ nɔ́ jɛ mɛɖé tɔn jí ǎ. Mɛ e nɔ sí i ɖ'ayǐ lɛ́ɛ ɔ́, din e yě mɔ ɛ ɖo mɛ̌ jɔgbe ɔ́, yě sɔ́ mɔ ɛ dó mɔ nǔɖé ǎ. Ée é jɛ mɛ̌ din ɔ́, nǔ e kpo n'i ɔ́ ɖíe: é ná jɛ gbɛvo sa jí bó ná ba fí ɖé gbɔn. Nǔ kwíji kwíji e é wa lɛ́ɛ hɛn awu tɔn blí; é lɛ́n nǔ e ná wá jɛ ɔ́ kpɔ́n ɖ'ayǐ ǎ. Éɖíe ká wá mɔ ajijimɛ ɖɔ émí j'ayǐ e; mɛ ɖěbǔ ká ɖe bó ná dó wǔsyɛ́n lanmɛ n'i ǎ. É ɖɔ: “Mawu Mavɔmavɔ, kpɔ́n ya e ji wɛ un ɖe ɔ́! Kpɔ́n lě e kɛntɔ́ ɖu ɖo jǐ ce gbɔn é.” Mɛ e ɖu ɖo jǐ tɔn lɛ́ɛ ɖ'alɔ dɔkun tɔn lɛ́ɛ jí. Jeluzalɛ́mu mɔ jǒnɔ lɛ́ɛ byɔ́ Mawuxɔ ɔ́ mɛ. Mawu, a ma ka ko gbɛ́ ɖɔ yě kún ná byɔ́ mɛ émítɔn lɛ́ɛ mɛ ó ǎ cé? Togun Jeluzalɛ́mu tɔn ɔ́ bǐ ɖo azɔn wɛn wɛ; é ɖo nǔɖuɖu ba wɛ; é sɔ́ nǔ e vɛ́ n'i hú nǔ bǐ ɔ́ jó, bó ná dó mɔ nǔɖuɖu ɖu, bó ná dó mɔ hlɔ̌nhlɔ́n; Jeluzalɛ́mu sa vo nú Mawu bó ɖɔ: “Mawu Mavɔmavɔ, kpɔ́n lě e yě gbɛ́ wǎn nú mì sɔ é!” Alitanu lɛ́ɛ mi, nǔ ce blá wǔ nú mi ǎ cé? Nǔ gbo mɛɖé bɔ é syɛ́n sɔ ée gbo mì ɔ́ a? Mawu Mavɔmavɔ wɛ dɔn tó élɔ́ nú mì gbe e gbe é sin xomɛ dó mì é. É sɛ́ myɔ ɖé dó lan ce mɛ sín jǐxwé; myɔ ɔ́ byɔ́ lan ce mɛ káká bó yi mɔ xú ce. É ɖó mɔ dó afɔ ce lɛ́ɛ glɔ́, bó zin mì dɛ́, bɔ un jɛ wɛn. É ɖe mì sín mɛ mɛ bǐ gbídígbídí, bɔ un ɖo azɔn tɔn jɛ wɛ tɛgbɛ. Nukún tɔn ɖo nǔ e un wa nyi do lɛ́ɛ jí; Mawu blá nǔ e un wa nyi do lɛ́ɛ ɖó kpɔ́ bó sɔ́ nyi abɔ̌ ce ta; é ɖe hlɔ̌nhlɔ́n ce kpo, é jó mì nú mɛɖé lɛ́ɛ bɔ un sixú xo nǔ ɖo wǔ ɖo nukɔn yětɔn ǎ. Aklúnɔ ɖe alɔ sín ahwanfuntɔ́ syɛ́nsyɛ́n e ɖo xwé ce gbe lɛ́ɛ bǐ sín kanmɛ. É sɛ́ ahwangɔnu ɖokpó dó mì, bó ná dó vívá kún nú dɔ̌nkpɛvú ce lɛ́ɛ. Nyɛ Sinyɔ́ɔ Judáa toxo ɔ́, é li mì lě e è nɔ li vǐwun gbɔn ɖo vǐwun to mɛ é. Énɛ́ ɔ́ wú wɛ un ɖo avǐ ya wɛ; ɖasin ɖo sisa sín nukún ce jí wɛ; mɛ e sixú dó gbɔ nú mì bó ná hlɔ̌nhlɔ́n mì ɔ́ sɛ yi zɔ nú mì; mɛ e ná ná gbɛ mì ɔ́ sɛ yi zɔ nú mì. Ahwi xo vǐ ce lɛ́ɛ bǐ ɖó kɛntɔ́ ɖu ɖo jǐ ce. Sinyɔ́ɔ ɖo alɔ nyi alɔ mɛ wɛ, mɛ ɖěbǔ ká ɖe bó ná dó wǔsyɛ́n lanmɛ n'i ǎ. Mawu Mavɔmavɔ ɖe gbe bɔ to e lɛ́ lɛ̌ dó Izlayɛ́li lɛ́ɛ lɛ́ húzú kɛntɔ́ tɔn. Yě ɖěbǔ mɔ Jeluzalɛ́mu ɔ́, ji mɛ jɛ́n nɔ́ nylá yě. Mawu Mavɔmavɔ wa nǔ xá mì gbɔn mɔ̌, hwɛ tɔn ka jɔ, ɖó un ko fɔ́n gǔ dó nǔ e é ɖɔ lɛ́ɛ jí ɖ'ayǐ. Mi togun lɛ́ɛ mi, mi bǐ ní ɖótó ganjí. Mi kpɔ́n ya e ji wɛ un ɖe ɔ́: ahwan wlí ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó yi to ɖěvo mɛ. Un ylɔ́ mɛ e yí wǎn nú mì ɖ'ayǐ lɛ́ɛ, có yě jó mì dó bɔ un j'ayǐ; vɔ̌sánú-xwlémawutɔ́ lɛ́ɛ kpódó gǎn lɛ́ɛ kpó ɖo nǔ e yě ná ɖu bó ná mɔ hlɔ̌nhlɔ́n ɔ́ ba wɛ, káká bó kú ɖo toxo ɔ́ mɛ. “Mawu Mavɔmavɔ, kpɔ́n adǎn e ɖo gbigbo mì wɛ é! Kpɔ́n wǔvɛ́ e mɔ wɛ un ɖe ɖo agbaza mɛ é; ayixa ce bǐ wɛ gbadó, ɖó lě e un fɔ́n gǔ dó jǐ we sɔ é wú. Ahwan hu vǐ ce lɛ́ɛ bǐ, è wǎ gɔ̌n ce ɔ́, è nǎ ɖɔ kúxwé wɛ. È se azɔn e wɛn wɛ un ɖe ɔ́, mɛ ɖěbǔ ká wá dó gbɔ nú mì ǎ; kɛntɔ́ ce lɛ́ɛ bǐ se nǔ e ɖo gbigbo mì wɛ é; nǔ e a wa xá mì ɔ́ víví nú yě. Azǎn e xó a ɖɔ ɔ́ wá, nǔ e ɖo gbigbo mì wɛ ɔ́ ní gbo yě lɔmɔ̌. Kpɔ́n dǎka e xo wɛ yě ɖe ɔ́ ganjí; wa nǔ xá yě lě e a wa xá mì gbɔn é; nǔ e a wa xá mì ɖó tónú e un ma se nú we ǎ wú é. A mɔ a? Azɔn wɛn wɛ jɛ́n un nɔ ɖe, un ɖo azɔn jɛ wɛ tawun.” Áo! Aklúnɔ sin xomɛ. É sin xomɛ bó sɛ́ ablu gɔngɔn ɖé dó Sinyɔ́ɔ. É kpíkpé nǔ e mɛ Izlayɛ́li nɔ xɔ susu ɖe ɔ́ sín jǐxwé nyi dó kɔ́ mɛ; hwenu e Aklúnɔ sin xomɛ dó Sinyɔ́ɔ ɔ́, é sɔ́ flín ɖɔ afɔɖótɛn émítɔn wɛ é nyí ǎ. Aklúnɔ kú nǔbláwǔ nú togun tɔn ǎ; é gba nɔtɛn togun tɔn tɔn lɛ́ɛ bǐ. Hwenu e Aklúnɔ ɖo xomɛsin jí ɔ́, é gba toxo e è mɛ ahohó lɛ́ lɛ̌ dó ɖo Judáa lɛ́ɛ bǐ; é zin axɔ́súɖuto ɔ́ kpódó gǎn e ɖ'é mɛ lɛ́ɛ kpó dɛ́, é kɔ́n wi yětɔn. Hwenu e Aklúnɔ ɖo xomɛsin ɖaxó énɛ́ jí ɔ́, é hɛn nǔ e wú Izlayɛ́li nɔ ɖo afɔ tɛ ayǐ wɛ lɛ́ɛ bǐ gblé. Hwenu e kɛntɔ́ ɔ́ wá ɔ́, Aklúnɔ gbɛ́ ɖɔ émí kún ná dó alɔ togun émítɔn ó. É nyɔ́ wa ɔ́, myɔ ɖaxó ɖé wɛ é flɔ́ ɖo togun tɔn tɛ́ntin, bó fyɔ́ nǔ e gbɔn fínɛ́ é bǐ. É tlɔ́ gǎ tɔn kɛntɔ́ ɖɔhun, bó ɖo gbesisɔ mɛ bó ná da. É hu mɛ e sín nǔ nyɔ́ nukún mǐtɔn mɛ lɛ́ɛ bǐ, bó dó ɖe xlɛ́ ɖɔ kɛntɔ́ mǐtɔn wɛ émí nyí. É gba xomɛsin tɔn kɔn nyi Sinyɔ́ɔ toxo ɔ́ jí myɔ ɖɔhun. Aklúnɔ wa nǔ xá mǐ kɛntɔ́ ɖɔhun. É gba Izlayɛ́li to ɔ́ bǐ hánnyá. É gba hɔnmɛ lɛ́ɛ bǐ hánnyá. É mu ahohó e ɖo Izlayɛ́li lɛ́ɛ. É dɔn aluwɛ kpódó awě kpó dó fí bǐ ɖo togun Judáa tɔn ɔ́ mɛ. É byɔ́ xwé tɔn gbe kpó hlɔ̌nhlɔ́n kpó, é gba fí e é nɔ́ kplé xá mǐ ɖe é; mɛɖé sɔ́ nɔ́ flín xwezán lɛ́ɛ ɖo Sinyɔ́ɔ ǎ, mɛɖé ká sɔ́ nɔ́ flín gbɔjɛzán lɛ́ɛ lɔ ǎ. Hwenu e Mawu Mavɔmavɔ ɖo xomɛsin jí ɔ́, é kɔ́n axɔ́sú ɔ́ kpódó vɔ̌sánú-xwlémawutɔ́ lɛ́ɛ kpó sín wi. Aklúnɔ jó vɔ̌sákpe tɔn dó, é jó tɛn mímɛ́ tɔn dó. É jó hɔnmɛ e ɖo Sinyɔ́ɔ lɛ́ɛ dó nú kɛntɔ́ lɛ́ɛ. Kɛntɔ́ lɛ́ɛ ɖú zǐngídi ɖo Mawu Mavɔmavɔ xwé ɔ́ gbe xwe ɖu wɛ è ɖe ɖɔhun. Mawu Mavɔmavɔ ɖe gbeta tɔ́n ɖɔ émí ná mu ahohó e è mɛ lɛ́ lɛ̌ dó Sinyɔ́ɔ toxo ɔ́ é; é nyi kan bo ná gbígbá Sinyɔ́ɔ toxo ɔ́ bǐ; é ɖó alɔ te cóbó hɔ́ Sinyɔ́ɔ toxo ɔ́ bǐ ǎ; é mu ahohó we e è mɛ lɛ́ lɛ̌ dó toxo ɔ́ lɛ́ɛ é. Toxo ɔ́ sín hɔnnúwa lɛ́ɛ hɔ́, aglin mu kɔn nyi yě jí; Mawu hɛn gankpo e è nɔ dó sú hɔntogbó lɛ́ɛ wɛ́n; é hɛn bǐ cɛ́; toxo ɔ́ sín axɔ́sú ɔ́ kpódó gǎn e ɖo glɔ̌ tɔn lɛ́ɛ kpó jɛ akɔta ɖěvo lɛ́ɛ lɔ mɛ. Mɛ ɖěbǔ sɔ́ ɖe bó ná kplɔ́n sɛ́n Mawu tɔn mɛ ǎ. Gbeyíɖɔ lɛ́ɛ lɔ sɔ́ nɔ́ yí wɛn ɖě sín Mawu Mavɔmavɔ gɔ́n ǎ. Tomɛxó Sinyɔ́ɔ tɔn lɛ́ɛ ɖo ayǐjínjɔ́n ɖo kɔ́ mɛ, yě ɖo nu kɛ wɛ ǎ, yě lɛ kɔ́gúdu dó ta, yě dó caki. Đyɔ̌vǐ Jeluzalɛ́mu tɔn lɛ́ɛ dó kɔ do. Un y'avǐ káká bɔ nukún ce ɖibla tɔ́n; ahwi xo mì, awakanmɛ ce bǐ wɛ kú ɖó nǔ e ɖo togun ce gbo wɛ é wútu; nǔgbó ɔ́, yɔkpɔ́vú lɛ́ɛ ɖo kúkú wɛ gbɔn alixo alixo ɖo toxo ɔ́ mɛ. Vǐ lɛ́ɛ nɔ kanbyɔ́ nɔ yětɔn lɛ́ɛ ɖɔ: “Fítɛ́ mǐ nǎ mɔ nǔɖuɖu ɖe? Fítɛ́ mǐ nǎ mɔ sin ɖe?” Hwenu e yě ɖo mɔ̌ ɖɔ wɛ ɔ́, hlɔ̌nhlɔ́n wɛ ɖo vivɔ ɖo yě wú wɛ, bɔ yě nɔ́ kú jɛ akɔn nú nɔ yětɔn lɛ́ɛ gbɔn alixo alixo. Jeluzalɛ́mu e! Un sɔ́ tunwun nǔ e un ná ɖɔ nú we ɔ́ ǎ; nǔ e ɖo gbigbo we wɛ ɔ́ gbo mɛɖé ǎ. Áo! Sinyɔ́ɔ, mɛ̌ sín kpɔ́ndéwú un ka ná ná we, bó ná dó dó gbɔ nú we? Đó nǔ e ɖo gbigbo we wɛ ɔ́ d'agba sɔ xu; mɛ̌ wɛ ná sixú gbɔ azɔn nú we? Gbeyíɖɔ towe lɛ́ɛ ɔ́, xó e yě nɔ́ wá ɖɔ nú we, bó nɔ́ ɖɔ nyi wɛ ɖɔ lɛ́ɛ ɔ́, nǔ yǎyá wɛ, adingban wɛ. Yě nɔ́ ɖe hwɛ e a hu lɛ́ɛ gba ǎ; ényí hwɛ towe lɛ́ɛ wɛ yě kó ɖe gba ɔ́, adǎn élɔ́ ná ɖo gbigbo we wɛ ǎ. Xó e yě nɔ́ wá ɖɔ nú we bó nɔ́ ɖɔ nyi wɛ ɖɔ lɛ́ɛ ɔ́, nǔ yǎyá wɛ, adingban wɛ. Jeluzalɛ́mu, aliwáyitɔ́ lɛ́ɛ mɔ we ɔ́, yě nɔ́ xo alɔ, yě nɔ́ húnhún ta, bó nɔ́ kwínkwín lobo nɔ ɖɔ: “A! Toxo e è nɔ ylɔ́ ɖ'ayǐ ɖɔ ɖɛkpɛ vɔ é jɛ́n ɖíe a? Toxo e è nɔ ylɔ́ ɖɔ awǎjijɛ gbɛ ɔ́ bǐ tɔn é jɛ́n ɖíe a?” Kɛntɔ́ towe lɛ́ɛ bǐ nɔ́ ɖɔ xó nyanya dó wǔ we; yě ɖo kwínkwín wɛ; yě jɛ ma dó jǐ towe, bó nɔ́ ɖɔ: “Mǐ sɔ́ ɛ mi nɛ́! Azǎn e nɔ te kpɔ́n wɛ mǐ ɖe ɔ́ ɖíe; azǎn ɔ́ kpé, mǐ sɔgba ɛ lo.” Mawu Mavɔmavɔ bló nǔ e é lin ɖɔ émí ná bló é; é bló nǔ e é kó ɖɔ ɖ'ayǐ xóxó ɖɔ émí ná bló é: é gba toxo ɔ́ ma kú nǔbláwǔ n'i. É wa nǔ xá we dó dó xomɛhunhun nú kɛntɔ́ towe lɛ́ɛ, é dó goyíyí goyíyí jí nú mɛ e ma mɔ we gbɔ ǎ lɛ́ɛ. Sinyɔ́ɔ toxo ɖo xó sú sɛ́ dó Aklúnɔ wɛ. Ahohó Sinyɔ́ɔ tɔn e, ɖasin ní húzú tɔsisa bó nɔ sa sín nukún towe jí zǎn kpó kéze kpó. Ma ná gbɔjɛ́ ɖěbǔ hwiɖée ó, ma ɖó avǐ e ya wɛ a ɖe ɔ́ te ó. Sí te, sú xó ylɔ́ Aklúnɔ, sú xó ylɔ́ Aklúnɔ gan bǐ mɛ, ɖɔ nǔ e ɖo xo towe mɛ lɛ́ɛ bǐ n'i; dlɛ̌n alɔ towe lɛ́ɛ bó sa vo sɛ́ dó Aklúnɔ; sa vo sɛ́ dó Aklúnɔ dó hwlɛ́n vǐ towe lɛ́ɛ gán, vǐ towe e ɖo adɔ kú wɛ gbɔn alixo alixo lɛ́ɛ gán. Mawu Mavɔmavɔ! Hwi ɖésú bo kpɔ́n, mɛ̌ e mɛ̌ e wa nǔ xá wɛ a ka ɖe gbɔn mɔ̌? Nyɔ̌nu lɛ́ɛ nɔ́ ɖu vǐ e yě ɖésúnɔ ji bó wlíbo ná é sín lan; è nɔ hun káká yi hu vɔ̌sánú-xwlémawutɔ́ abǐ gbeyíɖɔ ɖo xwé towe gbe. Nǔ ná nɔ mɔ̌ a? Yɔkpɔ́vú kpódó degénɔ kpó ɖo títɛ́ gbɔn kɔ́ mɛ kɔ́ mɛ ɖo alixo alixo. È hu ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó ɖo ahwangbénu. Gbe e gbe a sin xomɛ ɔ́, a hu yě; a gbo gbe yě ma kú nǔbláwǔ nú yě. A da kɛntɔ́ ce lɛ́ɛ sín fí bǐ agɔ̌ wɛ a ylɔ̌ ɖɔhun. Mawu Mavɔmavɔ, gbe e gbe a ɖo xomɛ sin wɛ ɔ́, mɛɖé hwe ɖ'é mɛ ǎ, mɛɖé ká gán ɖ'é mɛ ǎ, vǐ e un wlíbo ná lɛ́ɛ ɔ́, kɛntɔ́ sú kún yětɔn dó. Nyɛ wɛ awě xo, ɖó Mawu sin xomɛ, é dɔn tó nú mì. É kplá mì gbɔn ablu mɛ, ablu gɔngɔn mɛ. Nyɛ ɖokpónɔ géé wɛ é fɔ́n bó ɖo nǔ wa xá wɛ ayǐhɔ́ngbe ayǐhɔ́ngbe. É wa nǔ xá mì bɔ un xú gǒ sín ta káká wá afɔ; é wɛ́n xú dó lanmɛ nú mì. É fɔ akpɔ kpódó wǔvɛ́ kpó lɛ́ lɛ̌ dó mì ahohó ɖɔhun. É sɔ́ mì dó ablu mɛ, mɛ e ko kú sín tɛgbɛ lɛ́ɛ ɖɔhun. É mɛ dǒ lɛ́ lɛ̌ dó mì, bónú un ma tɔ́n ó; é dó wlɔ kpinkpɛn lɛ́ɛ mì. Un sú xó káká, un ylɔ́ ɛ káká; é ká se ɖɛ ce ǎ. É zé awǐnnya ɖaxó ɖaxó lɛ́ɛ dó gbo ali nú mì; é sɔ́ mì ɖó ali nyanya jí. É nɔ́ ɖo cícɔ́ mì wɛ lɔnmɔ ɖo wudo mɛ ɖɔhun; é nɔ́ ɖo cícɔ́ mì wɛ kinnikínní ɖo wudo mɛ ɖɔhun. É dó gbɛya bǐ nú mì, é hu mì ɖó akpo; un sɔ́ ɖó gbe ǎ. É dlɛ́n gǎ tɔn dó jǐ ce. É da gǎ e ɖo glo tɔn mɛ lɛ́ɛ dó xo alin ce zlɛ́. Un húzú nǔkiko nú mɛ bǐ; ayǐ hɔ́n ɔ́, nyɛ wɛ nɔ nyí han bo nɔ ɖo nu nú mɛ bǐ. Akpɔ wɛ nyí nǔɖuɖu bɔ é ná mì, bɔ un ɖu káká bó gɔ́ xo; é kpé nǔvɛ́nu nú mì. É bɛ́ gbadakɛ́nwó dó nu mɛ nú mì ɖɔ má ɖu bɔ aɖǔ ce bǐ fɛ́n; é lɛ afín nú mì. É yí ayij'ayǐ sín así ce; un sɔ́ tunwun nǔ e è nɔ ylɔ́ ɖɔ nyɔ̌ná é ǎ. Énɛ́ ɔ́, un ɖɔ: É vɔ; nǔɖé sɔ́ ɖo nǎ nyɔ́ nú mì wɛ ǎ. Un sɔ́ ɖo te kpɔ́n nǔɖé ɖo Mawu Mavɔmavɔ gɔ́n ǎ. Adǎn ɖo gbigbo mì wɛ, un dán ɖěwagbɔn; un nɔ flín nǔ e ɖo gbigbo mì wɛ ɔ́, bɔ é nɔ́ cí nǔvívɛ́ kpó nǔvɛ́nu kpó ɖu wɛ un ɖe ɖɔhun. Nǔ e ɖo gbigbo mì wɛ ɔ́ nɔ́ ɖo ayi ce mɛ hwebǐnu, bɔ wǔ nɔ́ kú mì. Lo ɔ́, nǔ e un jló ná flín nyɛɖée ɔ́ ɖíe, nǔ e wútu un ná ɖó nukún nǔ ɔ́ ɖíe: Xomɛnyínyɔ́ Mawu Mavɔmavɔ tɔn nɔ vɔ ǎ, wǎn yíyí tɔn ɖo te káká sɔ́yi. Zǎnzǎn tɛgbɛ ɔ́, xomɛnyínyɔ́ tɔn nɔ́ húzú yɔ̌yɔ́. Mawu, gbejíninɔ towe d'agba mɛ nya! Un nɔ ɖɔ dó ayi mɛ ɖɔ: Mawu Mavɔmavɔ wɛ nyí dɔkun ce; nǔ e wú un gán jɛ wǔ tɔn ɔ́ nɛ́. Mawu Mavɔmavɔ nɔ nyɔ́ xomɛ dó mɛ e ɖeji dó wǔ tɔn ɔ́ wú; é nɔ́ nyɔ́ xomɛ dó mɛ e ɖo biba ɛ wɛ lɛ́ɛ wú. É nyɔ́ bónú è nǐ nɔ xwíí, bó nɔ te nú Mawu Mavɔmavɔ hwlɛ́n mɛ gán. É nyɔ́ bónú gbɛtɔ́ ní hɛn agban kpinkpɛn sín vǔ. Ényí Mawu ɖo dǐdó e kpɔ́n wɛ hǔn, é ní yi cí zɔ fí ɖé bó nɔ xwíí. Ní dó nu do bó ɖe kɔ́, ní nɔ te kpɔ́n Mawu. Ní sɔ́ tókpá ɖó te nú mɛ e ɖo tómɛ xo n'i wɛ é; ní jó éɖée dó nú è nǐ lɛ zun n'i. Aklúnɔ nɔ́ jó mɛ dó káká sɔ́yi ǎ. É ná bó ɖo ya dó nú mɛ wɛ ɔ́, é nɔ́ wá kú nǔbláwǔ nú mɛ, xomɛnyínyɔ́ tɔn d'agba sɔ mɔ̌. É nɔ́ jló e có é nɔ́ kɔ́n wi mɛtɔn ǎ; é nɔ́ jló e có é nɔ́ dó ya nú gbɛtɔ́ lɛ́ɛ ǎ. È ɖo mɛ e ahwan wlí lɛ́ɛ gbídí ɖó afɔ wú wɛ ɔ́, Aklúnɔ nɔ́ mɔ ǎ cé? È ɖo gbɛtɔ́ sín acɛ gba wɛ ɖo Mawu Ajalɔ̌nlɔn nukɔn ɔ́, é nɔ́ mɔ ǎ cé? È yi hwɛgun bó ɖo hwɛ agɔ dó wɛ ɔ́, Aklúnɔ nɔ́ mɔ ǎ cé? Aklúnɔ mɛ vo ɔ́, mɛ̌ ká sixú ɖɔ nǔ lě ní tíin, bɔ nǔ ɔ́ tíin? Mawu Ajalɔ̌nlɔn wɛ nɔ́ ɖɔ bɔ nǔ nyanya abǐ nǔ ɖagbe nɔ jɛ ǎ cé? Mɛ e nɔ ɖo nǔ wa nyi do wɛ cóbó ká nɔ́ kpo ɖo gbɛ ɔ́, étɛ́ sín vo é ká ná lɛ́ sa? Mi wá mǐ kpɔ́n lě e mǐ ɖo gbɛ zán gbɔn wɛ ɔ́ ganjí, bó lɛ́ kɔ wá Mawu Mavɔmavɔ gɔ́n. Mi wá mǐ bɛ́ alɔ dó jǐ bó ɖɔ xó kpó ayi mǐtɔn bǐ kpó nú Mawu ɖo jǐxwé. Mǐ tlí tó, mǐ fɔ́n gǔ dó jǐ towe; Mawu, a ká sɔ́ kɛ mǐ ǎ. A zě xomɛsin towe cyɔ́n; a jɛ gǔdo mǐtɔn, bó hu mǐ tɛ́; a kú nǔbláwǔ nú mǐ ǎ. A yi cí akpɔ́kpɔ́ mɛ, bónú ɖɛ mǐtɔn lɛ́ɛ ma wá gɔ̌n towe ó. A sɔ́ mǐ dó húzú zunkɔ́, nǔvɛ́mɔ ɖo togun ɖě lɛ́ɛ tɛ́ntin. Kɛntɔ́ mǐtɔn lɛ́ɛ bǐ nɔ́ ɖɔ xó nyanya dó mǐ wú. Nǔ e ɖo te kpɔ́n mǐ lɛ́ɛ ɖíe: xɛsi, do gɔngɔn, nǔ mǐtɔn bǐ ná gblé kpódó nǔ baɖabaɖa lɛ́ɛ kpó. Đasin nɔ gosín nukún ce jí, bó nɔ́ sa tɔ ɖɔhun, ɖó nǔ e ɖo togun ce gbo wɛ ɔ́ wú. Nukún ce lɛ́ɛ gbɔ bó húzú tɔjɔtɛn, ɖasin jɛ́n nɔ́ ɖo sisa sín nukún ce jí wɛ hwebǐnu; gbɔjɛ́ ɖěbǔ ɖ'é mɛ ǎ. Đasin ɖo wǐwá yi wɛ káká bɔ Mawu Mavɔmavɔ mɔ sín jǐxwé. Nú un mɔ nǔ e ɖo jijɛ dó mɛ e ɖo toxo ce mɛ lɛ́ɛ jí wɛ ɔ́, nǔ ce nɔ́ blá wǔ káká. Mɛ e nɔ mɔ̌ kpowun bó dó kɛn mì lɛ́ɛ jɛ gǔdo ce mɛ ɖo xɛ nya wɛ ɖɔhun. Yě sɔ́ mì dó sitɛ́nu mɛ gbɛɖe gbɛɖe, bó sɔ́ awǐnnya nyi jǐ ce. Sin ɔ́ hɛn mì káká wá ta, bɔ un ɖɔ: Gbɛ ce vɔ! Mawu Mavɔmavɔ, un ɖo sitɛ́nu ɔ́ mɛ dɔ̌n, bó sú xó ylɔ́ we. Ma dó tókúse azɔn e wɛn wɛ un ɖe é mɛ ó, ma dó tókúse alě e ná wɛ un ɖe é mɛ ó. Ée un sú xó ylɔ́ we ɔ́, a se. Gbe e gbe un sú xó ylɔ́ we ɔ́, a sɛkpɔ́ mì bó ɖɔ nú mì ɖɔ: “Ma ɖi xɛsi ó!” Aklúnɔ, a jɛ ahwan jǐ ce, a hwlɛ̌n gbɛ ce gán. Mawu Mavɔmavɔ, a mɔ nǔ e yě wa xá mì ɔ́; gbo hwɛ nú mì. A mɔ lě e yě ɖo kɛn li dó kɛn mɛ nú mì wɛ gbɔn é, a mɔ lě e yě blá gbě ce gbɔn é. Mawu Mavɔmavɔ, a se zun e zun mì wɛ yě ɖe lɛ́ɛ; a se gbě ce e blá wɛ yě ɖe lɛ́ɛ. Ayǐhɔ́ngbe ayǐhɔ́ngbe ɔ́, kɛntɔ́ ce lɛ́ɛ nɔ́ ɖo xó ɖɔ dó wǔ ce wɛ, bó nɔ́ ɖo nyanya ce lin wɛ. Kpɔ́n! Yě ɖo ayǐjínjɔ́n oo, yě ɖo te oo, xó jɛ́n nɔ́ nyí han ɖo nu yětɔn. Mawu Mavɔmavɔ, a nǎ sú nǔ e yě wa ɔ́ sín axɔ́ yě. A nǎ xwe nǔ dó ayi yětɔn nu; a nǎ dó nǔ nyanya sin xá yě. A nǎ jɛ gǔdo yětɔn kpódó xomɛsin kpó; a nǎ sú kún yětɔn dó sín ayǐkúngban jí. Áo! Siká ɔ́ kú awi! Gan ɖagbe ɖagbe ɔ́ sɔ́ nɔ́ kɔ́n ǎ. Awǐnnya e è fɔ ɖó vo nú Mawu lɛ́ɛ fúnfún gbɔn alitó alitó. Sinyɔ́ɔnu mɛjɔmɛ, siká akú lɛ́ɛ ɔ́, nɛ̌ è ka sixú mɔ yě dó mɔ kozɛ́n yǎyá ɖé gbɔn? Nǔ e zɛ̌nmɛtɔ́ zé alɔ tɔn dó bló ná é! Avǔn gbě tɔn lɛ́ɛ ɔ́, yě ji vǐ ɔ́, yě nɔ́ tunwun ɖɔ émí wɛ nyí nɔ yětɔn, bó nɔ́ ná anɔ̌ vǐ lɛ́ɛ. Lo ɔ́, vǐnɔ alɔkpa e togun ce nyí ɔ́, un tunwun ǎ; é dá hú gowungo gbětótló mɛ tɔn. Kɔ xú vǐ ɖo anɔ̌nu lɛ́ɛ káká bɔ ɖɛ̌ yětɔn tɛ́ dó ɖɛxwɛ wú. Yɔkpɔ́vú lɛ́ɛ nɔ́ ɖo nǔɖuɖu byɔ́ wɛ, mɛ ɖěbǔ ká nɔ́ ná yě ǎ. Yě mɛ e nɔ ɖu nǔ ɖagbe ɖ'ayǐ lɛ́ɛ ɔ́, hlɔ̌nhlɔ́n vɔ ɖo yě wú, bɔ yě nɔ́ jɛ ayǐ gbɔn alixo alixo; yě mɛ e è hɛn ganjí bɔ nǔɖé má hwedó yě ǎ lɛ́ɛ ɔ́, yě wá ɖo zunkɔ́ kíjé wɛ kpó alɔ kpó. Hwɛ e togun ce hu ɔ́ syɛ́n hú hwɛ e Sodɔ́mu toxo ɔ́ hu é. Sodɔ́mu toxo e è gba hánnyá ɖo nukún xwixwe ɖokpó mɛ é, gbɛtɔ́ ká ɖó alɔ ɖ'é mɛ có nú é gba hánnyá ǎ. Gǎn e ɖo toxo ɔ́ mɛ lɛ́ɛ ɔ́, wǔtu yětɔn ɖó blɔ̌ ɖěbǔ ǎ. Agbaza yětɔn wé hú nyibúnɔ́sin; wǔtu yětɔn myá hú awǐnnya koláyi; kan e ɖo lan yětɔn mɛ lɛ́ɛ nyí fɛ́sinnɔ awǐnnya safíi ɖɔhun. Amɔ̌, din ɔ́, yě wi hú avi; è mɔ yě ɖo ali lɛ́ɛ xo ɔ́, è sɔ́ nɔ́ tunwun yě ǎ; yě kpo xú kɛ́ɖɛ́, yě xú nakí ɖɔhun. È cí ahwan ɔ́, é nyɔ́ hú è kú adɔ. È cí ahwan ɔ́, é nyɔ́ hú è nǐ ba nǔɖuɖu kpo, bó xú gǒ, é nyɔ́ hú è nǐ ba nǔɖuɖu kpo nú hlɔ̌nhlɔ́n vɔ ɖo mɛ wú. Nyɔ̌nu ɖé lɛ́ɛ tíin, bɔ é sɔ́n nǔ e ɖo togun ce gbo wɛ ɔ́ wú, bɔ yě nɔ́ ɖa vǐ e yě ɖésúnɔ ji sín xomɛ lɛ́ɛ ɖu; có yě ká yí wǎn nú vǐ yětɔn lɛ́ɛ ganjí. Xomɛsin e jí Mawu Mavɔmavɔ ɖe ɔ́, é zé dó wa nǔ xá togun ɔ́ bɔ é jɛ mɛ n'i; é flɔ́ myɔ ɖaxó ɖokpó ɖó Sinyɔ́ɔ, bɔ toxo ɔ́ ji zo káká bɔ dodó tɔn lɛ́ɛ fyɔ́. Mɛ ɖě lɛ́n gbeɖé ɖɔ kɛntɔ́ ná ɖu ɖo Jeluzalɛ́mu jí ǎ, axɔ́sú lɛ́ɛ lɔ lɛ́n ǎ. Yě lɛ́n ɖɔ mɛɖé ná ɖu ɖo Jeluzalɛ́mu jí bó dó asá hɔntogbó tɔn gbeɖé ǎ. Hwɛ e gbeyíɖɔ lɛ́ɛ hu lɛ́ɛ wɛ zɔ́n bɔ nǔ baɖabaɖa énɛ́ ɔ́ jɛ; nǔ e vɔ̌sánú-xwlémawutɔ́ lɛ́ɛ dó sin lɛ́ɛ wɛ zɔ́n bɔ nǔ baɖabaɖa énɛ́ ɔ́ jɛ; yě kɔn hwɛjijɔnɔ lɛ́ɛ sín hun kɔn nyi ayǐ ɖo toxo ɔ́ mɛ. Gbeyíɖɔ lɛ́ɛ kpódó vɔ̌sánú-xwlémawutɔ́ lɛ́ɛ kpó ɖo avi dlá wɛ; yě ɖo avi dlá wɛ gbɔn alixo alixo nukúntíntɔ́nnɔ ɖɔhun; yě hu mɛ bó hɛn yěɖée blí, mɛɖé nɔ lɔn ɖ'alɔ awu yětɔn wú vɔ́vɔ́ ǎ. Ényí è mɔ yě jǎwe ɔ́, è nɔ sú xó bó nɔ́ ɖɔ: “Mi nɔ zɔ nú yě! Mɛ blíblí wɛ yě nyǐ! Mi nɔ zɔ! Mi ma sɛkpɔ́ yě ó!” Énɛ́ ɔ́, yě nɔ́ hɔn, yě nɔ́ hɔn bó nɔ ɖo flúflú wɛ gbɔn tomɛ tomɛ. Togun ɖě lɛ́ɛ ká nɔ́ ɖɔ nú yě ɖɔ: “Mi ná nɔ fí ǎ.” Mawu Mavɔmavɔ ɖésú wɛ gba yě dó, é sɔ́ jló ná mɔ yě ǎ; mɛɖé sɔ́ nɔ́ ké ya nú vɔ̌sánú-xwlémawutɔ́ lɛ́ɛ ǎ, mɛɖé ká sɔ́ nɔ́ ɖó sísí nú mɛ e nyí gǎn ɖo togun ɔ́ nu lɛ́ɛ ǎ. Mǐ ɖo nukún ɖó alɔgɔ́númɛtɔ́ wɛ káká bɔ nukún mǐtɔn bo, alɔgɔ́númɛtɔ́ ɔ́ wá ǎ; mǐ ɖo mɛcɔ́kpe mǐtɔn jí bó ɖo ali kpɔ́n nú akɔta ɖé wɛ; mǐ ɖo ali kpɔ́n nú akɔta ɖé wɛ bónú é ná wá hwlɛ́n mǐ gán, akɔta e kpɔ́n ali ná wɛ mǐ ɖe ɔ́ ká wá ǎ. Kɛntɔ́ mǐtɔn lɛ́ɛ ɖo mǐ cɔ́ wɛ, mǐ sɔ́ sixú tɔ́n ǎ. Gbɛ mǐtɔn kó ɖo nǎ vɔ wɛ, azǎn mǐtɔn vɔ, xó mǐtɔn fó. Mɛ e ɖo ya dó nú mǐ wɛ lɛ́ɛ yá afɔ hú gangan ɖo jǐxwé; yě ɖo nyinya mǐ wɛ gbɔn só ta, só ta, yě ɖǒ mɔ nú mǐ ɖo gbětótló mɛ. Mɛ e sín alɔ mɛ gbɛ mǐtɔn ɖe ɔ́ nɛ́ jɛ mɔ yětɔn mɛ din nɛ́; axɔ́sú e Mawu Mavɔmavɔ sɔ́ é wɛ; éyɛ́ sín xó ɖɔ wɛ mǐ nɔ́ ɖe bó nɔ́ ɖɔ: “Nú mǐ bɛ yɛ ɖo glɔ̌ tɔn ɔ́, akɔta ɖě lɛ́ɛ ná sixú wa nǔɖé nú mǐ ǎ.” Togun Edɔ́mu tɔn, a hɛn ɔ́, a nǎ hun xomɛ bó j'awǎ, hwi mɛ e nɔ nɔ Wúsi é! Amɔ̌, hwi lɔmɔ̌ ná nu xomɛsin Mawu tɔn sín kɔ́fu ɔ́; a nǎ nu mú, bó ná jɛ mɛ̌ jɔgbe. Sinyɔ́ɔ, fí e è dɔn tó nú we yi jɛ ɔ́ kpé. È sɔ́ ná kplá we yi to ɖěvo mɛ ɖě ǎ. Amɔ̌, hwɛ Edɔ́mu ɔ́, Mawu ná dɔn tó nú we, ɖó hwɛ e a hu lɛ́ɛ wú; é ná ɖe acɛ e a gba lɛ́ɛ nyi wěxo. Mawu Mavɔmavɔ, ma wɔn nǔ e gbo mǐ ɔ́ ó, kpɔ́n winnyá e ɖu wɛ mǐ ɖe é! To e a nǎ mǐ ɔ́ húzú mɛ ɖěvo lɛ́ɛ sín to, xwé mǐtɔn lɛ́ɛ húzú mɛ e mǐ ma tunwun ǎ lɛ́ɛ sín xwé. Tɔ́ mǐtɔn lɛ́ɛ kú bɔ mǐ húzú tɔ́cyɔvǐ; nɔ mǐtɔn lɛ́ɛ húzú asúkúsi. Akwɛ́ wɛ mǐ nɔ́ ná có bó nɔ́ nu sin e ɖo dotɔ e mǐ kun lɛ́ɛ é mɛ é; atín e nyí mǐ ɖésúnɔ tɔn ɔ́, nakí tɔn ɔ́, xɔ wɛ mǐ nɔ́ xɔ. Mɛ e ɖo ya dó nú mǐ wɛ lɛ́ɛ kpo ɖo gǔdo mǐtɔn; agbɔ̌n kpé mǐ, mǐ sɔ́ ɖó gbɔjɛ́ ǎ. Cóbónú mǐ ná ɖu nǔ ɔ́, alɔ wɛ mǐ nɔ́ tɛ́ nú Ejípunu lɛ́ɛ kpódó Asilíinu lɛ́ɛ kpó. Tɔ́ mǐtɔn lɛ́ɛ hu hwɛ; yě kó kú; mǐdɛɛ lɛ́ɛ wɛ ká ɖo sin tɔn sún wɛ. Kannumɔ lɛ́ɛ wɛ ɖo acɛ kpa nú mǐ wɛ, mɛ ɖěbǔ ká yí mǐ sín yě sí ǎ. Cóbónú mǐ nǎ mɔ nǔ ɖu ɔ́, gbɛ mǐtɔn wɛ mǐ nɔ́ sɔ́ ɖó axɔ́nu; dǎkaxotɔ́ gbětótló mɛ tɔn lɛ́ɛ nɔ́ tɔ́n ahwan mǐ. Xovɛ́ nɔ́ sin mǐ káká bɔ anyǔ mǐtɔn nɔ́ wló; anyǔ mǐtɔn nɔ́ wló myɔkpó mɛ wɛ mǐ gbɔn ɖɔhun. Kɛntɔ́ mǐtɔn lɛ́ɛ nɔ́ hwlɛ́n kan xá nyɔ̌nu lɛ́ɛ ɖo Sinyɔ́ɔ, yě nɔ́ hwlɛ́n kan xá nyɔ̌nu lɛ́ɛ bó nɔ́ ɖó xó xá yě; Kɛntɔ́ mǐtɔn lɛ́ɛ nɔ́ hwlɛ́n kan xá ɖyɔ̌vǐ lɛ́ɛ ɖo Judáa toxo lɛ́ɛ mɛ, yě nɔ́ hwlɛ́n kan xá yě bó nɔ́ ɖó xó xá yě. Yě sɔ́ alɔ yětɔn dó dó kan kɔ nú gǎn lɛ́ɛ; yě ɖó sísí ɖěbǔ nú tomɛxó lɛ́ɛ ǎ. Dɔ̌nkpɛvú lɛ́ɛ nɔ́ ɖíɖá ségban, yɔkpɔ́vú lɛ́ɛ nɔ́ ɖo ayǐ jɛ wɛ ɖo nakígban glɔ́. Tomɛxó lɛ́ɛ sɔ́ nɔ́ yi kplé xó ɖɔ ɖě ɖo toxo ɔ́ sín hɔntogbó jí ǎ, dɔ̌nkpɛvú lɛ́ɛ ɖó han e ji wɛ yě ɖe lɛ́ɛ te. Awǎjijɛ vɔ sín xo mǐtɔn mɛ, awǎ e jɛ wɛ mǐ ɖe bó ɖo we ɖú wɛ ɔ́ húzú aluwɛ. Wi e ɖo ta mǐtɔn ɔ́ kɔ́n; heelú mǐ, ɖó mǐ hu hwɛ. Mǐ ɖo azɔn jɛ wɛ ɖo ayi mɛ, nukún mǐtɔn sɔ́ nɔ́ mɔ nǔ ganjí ǎ, ɖó Sinyɔ́ɔ só ɔ́ húzú gbětótló, é húzú ayǐsájɛ lɛ́ɛ sín avatɛn. Amɔ̌, hwɛ ɔ́, Mawu Mavɔmavɔ, a nyǐ axɔ́sú káká sɔ́yi; axɔ́súɖuɖu towe ɖo te tɛgbɛ. Aniwú a ka ná wɔn mǐ káká sɔ́yi? Aniwú a ka ná jó mǐ dó káká sɔ́yi? Mawu Mavɔmavɔ, lɛ̌ kɔ nú mǐ wá gɔ̌n towe, bónú mǐ nǎ lɛ́ kɔ wá nǔgbó. Lɛ̌ ná gbɛ mǐ ɖ'ayǐ tɔn ɖɔhun. A nǎ gbɛ́ mǐ bǐ gbídígbídí wɛ a? Xomɛ mǐtɔn ná ɖo sinsin we wɛ káká sɔ́yi wɛ a? Sun ɛnɛgɔ́ ɔ́ e ɖo xwe gbangɔ́ (30) ɔ́ mɛ ɔ́ sín azǎn atɔ́ɔ́ngɔ́ ɔ́ gbe ɔ́, un ɖo mɛ e ahwan wlí, bó kplá yě yi ɖó Kebáa tɔ ɔ́ tó lɛ́ɛ mɛ; fínɛ́ wɛ un ɖe bo mɔ jǐnukúnsin hun, bɔ Mawu ɖe nǔ xlɛ́ mì. Ahwan wlí axɔ́sú Yoyakini ɔ́, xwe atɔ́ɔ́ngɔ́ ɔ́ bló wɛ é ɖe hwenɛ́nu. Mawu Mavɔmavɔ ɖɔ xó ɖé nú nyɛ vɔ̌sánú-xwlémawutɔ́ Ezekiyɛ́li Buzi ví ɔ́, ɖo Babilɔ́nunu lɛ́ɛ sín to mɛ dɔ̌n, ɖo Kebáa tɔ ɔ́ tó; fínɛ́ wɛ hlɔ̌nhlɔ́n Mawu Mavɔmavɔ tɔn wá jǐ ce ɖe. Nǔ e un mɔ lɛ́ɛ ɖíe: un mɔ jɔhɔn ɖaxó ɖé bɔ é nyi sín totaligbé jǎwe; un mɔ akpɔ́kpɔ́ ɖaxó ɖokpó, bɔ myɔ nɔ bló mlamla ɖ'é mɛ, bɔ wěziza lɛ́ dó akpɔ́kpɔ́ ɔ́; nǔɖé nɔ́ kán zo ɖo akpɔ́kpɔ́ ɔ́ tɛ́ntin gan wɛ ɖo kínkɔ́n ɖ'é mɛ wɛ ɖɔhun. Un lɛ́ mɔ nǔ ɛnɛ ɖé lɛ́ɛ ɖo akpɔ́kpɔ́ ɔ́ tɛ́ntin, bɔ yě cí nǔɖogbɛ ɖɔhun. Nǔɖogbɛ lɛ́ɛ ɖokpó ɖokpó ɖó nukún mɛ ɛnɛ, awa ɛnɛ. Afɔ yětɔn lɛ́ɛ jlɔ́ ganjí, bɔ afɔkpákpá yětɔn lɛ́ɛ cí nyibúví fɔ ɖɔhun, bó nɔ́ kɔ́n ganvɔ e è ɖǐɖí wǔ ná ɔ́ ɖɔhun. Alɔ yětɔn lɛ́ɛ cí gbɛtɔ́ sín alɔ ɖɔhun, alɔ ɛnɛ wɛ yě ɖokpó ɖokpó ɖó; alɔ ɖokpó ɖokpó ɖo awa yětɔn lɛ́ɛ ɖokpó ɖokpó glɔ́; alɔ lɛ́ɛ kpan nukɔn wɛ̌kɛ́zo ɛnɛ lɛ́ɛ, nukún mɛ yětɔn lɛ́ɛ kpó awa yětɔn lɛ́ɛ kpó ɖɔhun. Nǔɖogbɛ lɛ́ɛ sín awa lɛ́ɛ sín nuvínu ɖě sɔ́ ɖě; yě ɖo yiyi wɛ ɔ́, yě nɔ́ lílɛ́ kpan nukɔn fí ɖěvo ǎ; mɛ ɖokpó ɖokpó nɔ́ kpan nukɔn fí e yi wɛ é ɖe ɔ́. Nǔɖogbɛ lɛ́ɛ ɖokpó ɖokpó ɖó nukún mɛ ɛnɛ: nukún mɛ e ɖo nukɔn ɔ́ cí gbɛtɔ́ nukún mɛ ɖɔhun, aɖisíxwé tɔn cí kinnikínní nukún mɛ ɖɔhun, amyɔxwé tɔn cí nyibúsú nukún mɛ ɖɔhun, bɔ gǔdo tɔn cí gangan nukún mɛ ɖɔhun. Lě e nukún mɛ yětɔn lɛ́ɛ cí é nɛ́. Nǔɖogbɛ lɛ́ɛ dlɛ́n awa yětɔn lɛ́ɛ we we dó jǐ, bɔ ɖě bɔ dó ɖě wú, bɔ yě cyɔ́n awa yětɔn we we e kpo lɛ́ɛ. Yě ɖokpó ɖokpó ɖo yiyi wɛ télélé; fí e jlǒ yětɔn yi ɔ́ wɛ yě nɔ́ yi télélé; yě nɔ́ lɛ́ kɔ ǎ. Nǔɖogbɛ énɛ́ lɛ́ɛ cí hɛɛ myɔkán ɖɔhun; é cí lě e è nɔ tá zohwín é ɖɔhun, bɔ myɔ ɖé nɔ́ ɖo nǔɖogbɛ lɛ́ɛ tɛ́ntin gbɔn wɛ; yě nɔ́ kɔ́n myɔ ɔ́ ɖɔhun, bɔ myɔkán nɔ́ wú sín myɔ ɔ́ mɛ. Nǔɖogbɛ lɛ́ɛ nɔ́ yi dě léwún bó nɔ́ wá léwún jǐkɛwun ɖɔhun. Un ɖo nǔɖogbɛ lɛ́ɛ kpɔ́n wɛ, bó mɔ kɛkɛ́fɔ ɖo kɔ́ mɛ, ɖo akpá yětɔn, ɖo yě ɖokpó ɖokpó nukɔn. Kɛkɛ́fɔ lɛ́ɛ nɔ́ kɔ́n awǐnnya xɔ akwɛ́ klizolíti ɖɔhun. Kɛkɛ́fɔ lɛ́ɛ bǐ wɛ ɖó ninɔmɛ ɖokpó ɔ́; é cí ɖě byɔ́ ɖě mɛ ɖɔhun. Kɛkɛ́fɔ lɛ́ɛ hɛn ɔ́, yě ná yi ɖisí, amyɔ, gǔdo, nukɔn; é byɔ́ ɖɔ yě ná lílɛ́ ɖo tɛndo ɖokpó mɛ kpan ta fí e yě xwe ɔ́ cóbó yi ǎ. Kɛkɛ́fɔ ɛnɛ lɛ́ɛ ɔ́, hlúu yětɔn lɛ́ɛ sɔ́ avɔ káká bó dó xɛsi, bɔ nukún kpé hlúu lɛ́ɛ wú bǐ lɛ́ lɛ̌ dó. Nǔɖogbɛ lɛ́ɛ ɖo tɛn sɛ wɛ ɔ́, kɛkɛ́fɔ lɛ́ɛ kpó yě kpó nɔ́ ɖo yiyi wɛ; yě sí te sín kɔ́ mɛ ɔ́, kɛkɛ́fɔ lɛ́ɛ lɔ nɔ sí te kpó yě kpó. Fí e jlǒ nǔɖogbɛ lɛ́ɛ tɔn yi ɔ́ wɛ kɛkɛ́fɔ lɛ́ɛ nɔ́ yi, bɔ kɛkɛ́fɔ lɛ́ɛ nɔ́ xwedó yě, ɖó jlǒ nǔɖogbɛ lɛ́ɛ tɔn kpó jlǒ kɛkɛ́fɔ lɛ́ɛ tɔn kpó ɔ́, nǔ ɖokpó ɔ́ wɛ. Nǔɖogbɛ lɛ́ɛ sɛ tɛn ɔ́, kɛkɛ́fɔ lɛ́ɛ lɔ nɔ sɛ tɛn; yě nɔ te ɔ́, kɛkɛ́fɔ lɛ́ɛ lɔ nɔ nɔ te, yě sí te sín kɔ́ mɛ ɔ́, yě lɔ nɔ sí te sín kɔ́ mɛ; ɖó jlǒ nǔɖogbɛ lɛ́ɛ tɔn kpó jlǒ kɛkɛ́fɔ lɛ́ɛ tɔn kpó ɔ́, nǔ ɖokpó ɔ́ wɛ. Nǔɖé wá ɖo jǐ ɖo nǔɖogbɛ lɛ́ɛ ta nu, bó cí jǐnukúnsin ɖɔhun; nǔ ɔ́ cí awǐnnya wěwé ɖagbe ɖagbe ɖé ɖɔhun bó nɔ́ kɔ́n. Yě dlɛ́n awa yětɔn we we gbánnáná, bɔ ɖě bɔ dó ɖě wú ɖo nǔ jǐnukúnsin ɖɔhun ɔ́ glɔ́, bɔ yě cyɔ́n awa yětɔn we we e kpo lɛ́ɛ. Yě ɖo yiyi wɛ ɔ́, awa yětɔn lɛ́ɛ nɔ́ ɖo nǔ ɖɔ wɛ bɔ un nɔ se. É nɔ́ cí xu wɛ ɖo adǎn jí abǐ jǐ wɛ ɖo gbe dó wɛ ɖɔhun; é cí ahwangɔnu ɖaxó ɖé sín zǐngídi ɖɔhun. Nú yě nɔ te ɔ́, yě nɔ́ bɔ awa yětɔn lɛ́ɛ dó. È nɔ se zǐngídi ɖé sín nǔ jǐnukúnsin ɖɔhun e ɖo ta yětɔn nu ɔ́ mɛ. Hwenu e yě nɔ te bó bɔ awa yětɔn lɛ́ɛ dó ɔ́ wɛ un nɔ se zǐngídi ɔ́. È nɔ mɔ nǔɖé ɖo fínɛ́ axɔ́súzinkpo ɖɔhun, bɔ é cí awǐnnya xɔ akwɛ́ safíi wɛ è dǒ bló ɖɔhun. Nǔ gbɛtɔ́ ɖɔhun ɖé ɖo axɔ́súzinkpo ɔ́ jí ɖo aga dɔ̌n. Un lɛ́ mɔ ɖɔ nǔ ɔ́ ɖo kínkɔ́n wɛ gan e è ɖǐɖí wǔ ná ɔ́ ɖɔhun; é cí myɔ wɛ lɛ́ lɛ̌ dó ɖɔhun; un mɔ nǔ myɔ ɖɔhun ɖé bɔ é za wě sín alinkan káká yi ta, bó lɛ́ za wě sín alinkan káká yi do. Wěziza ɔ́ cí lě e jǐ nɔ ja bɔ nyǐ nɔ ɖi ɔ́ ɖɔhun. Susu Mawu Mavɔmavɔ tɔn sín xlɛ̌ wɛ. Ée un mɔ mɔ̌ ɔ́, un xwe agbɔ̌nnusú do; énɛ́ ɔ́, un se mɛ ɖé ɖo xó ɖɔ nú mì wɛ. Mɛ e ɖo xó ɖɔ wɛ ɔ́ ɖɔ nú mì ɖɔ: “Hwi gbɛtɔ́ ɔ́, sí te bó nɔ te, un ɖó xó ɖé bó ná ɖɔ nú we.” Ée mɛ ɔ́ ɖɔ mɔ̌ nú mì tlóló ɔ́, yɛ Mawu tɔn wá jǐ ce, bó zé mì sí te, bɔ un jɛ tó ɖó mɛ e ɖo xó ɖɔ nú mì wɛ é jí. Énɛ́ ɔ́, mɛ ɔ́ ɖɔ nú mì ɖɔ: “Hwi gbɛtɔ́, un sɛ́ we dó Izlayɛ́li ví lɛ́ɛ gɔ́n; yě fɔ́n gǔ dó jǐ ce, yě se tónú ǎ; yě kpó tɔ́gbó yětɔn lɛ́ɛ kpó fɔ́n gǔ dó jǐ ce, bó kpo ɖo mɔ̌ káká jɛ égbé. Vǐ ɖé wɛ yě nyí, bó nɔ́ se tónú ǎ; yě gbɛ́ hɛn. Un sɛ́ we dó yě gɔ́n, bɔ a ja xó ɖɔ nú yě gbé ɔ́, a nǎ nɔ́ ɖɔ nú yě ɖɔ: ‘Xó e Aklúnɔ Mavɔmavɔ ɖɔ é ɖíe.’ A ɖɔ mɔ̌ nú yě ɔ́, yě sixú ɖótó we, yě ká sixú lɛ́ gɔn tó ɖó we, ɖó yě nɔ́ se tónú ǎ; amɔ̌, yě ná tunwun ɖɔ gbeyíɖɔ Mawu tɔn ɖokpó ɖo émí mɛ. “Hwɛ gbɛtɔ́ ɔ́, ma ka ɖi xɛsi nú yě ó; ma nú adǎn e gblɔ́n nú we wɛ yě ɖe lɛ́ɛ dó xɛsi nú we ó. Mɛ énɛ́ lɛ́ɛ ɔ́, wunkan kpó hɔnkéklě kpó wɛ yě nyí. Amɔ̌, ma nú adǎn e gblɔ́n nú we wɛ yě ɖe lɛ́ɛ dó xɛsi nú we ó, ma nú nukún e dó kpɔ́n we wɛ vǐ tónúmasetɔ́ énɛ́ lɛ́ɛ ɖe ɔ́ dó xɛsi nú we ó. Xó e un ná ɖɔ nú we ɔ́, a nǎ ɖɔ nú yě; yě sixú ɖótó we, yě ká sixú lɛ́ gɔn tó ɖó we, ɖó yě nɔ́ se tónú ǎ. “Hwɛ gbɛtɔ́ ɔ́, ɖǒtó xó e ɖɔ nú we gbé un ja ɔ́, ma cí vǐ énɛ́ lɛ́ɛ e má nɔ́ se tónú ǎ lɛ́ɛ ɖɔhun ó. Kɛ nu towe bó ná ɖu nǔ e ná we gbé un ja é.” Ée mɛ ɔ́ ɖɔ mɔ̌ ɔ́, un mɔ alɔ ɖé dlɛ́n wěma mlámlá ɖé dó mì. Alɔ ɔ́ vlɔ́n wěma ɔ́ ɖo nukɔn ce bɔ è wlǎn vosisa, alěníná kpó azɔnwinwɛn kpó sín xó d'é jí gbɔn gǔdo nukɔn. Mɛ ɔ́ ɖɔ nú mì ɖɔ: “Hwɛ gbɛtɔ́ ɔ́, ɖu wěma élɔ́ bó mi, lobo yi ɖɔ xó nú Izlayɛ́li ví lɛ́ɛ.” Ée é ɖɔ mɔ̌ ɔ́, un kɛ nu, bɔ é zé wěma ɔ́ dó nu ce mɛ ɖɔ má ɖu; Énɛ́ ɔ́ gúdo ɔ́, é ɖɔ nú mì ɖɔ: “Hwɛ gbɛtɔ́ ɔ́, ɖu wěma e un sɔ́ nú we ɔ́, bónú adɔgo towe ní gɔ́, bó dó ná nǔɖuɖu agbaza towe.” Énɛ́ ɔ́, un ɖu wěma ɔ́, bɔ é víví ɖo nu ce mɛ wǐin ɖɔhun. Énɛ́ ɔ́ gúdo ɔ́, é lɛ́ ɖɔ: “Din ɔ́, hwɛ gbɛtɔ́ ɔ́, wlǐ ali bó ɖidó Izlayɛ́li ví lɛ́ɛ gɔ́n, bó ɖɔ xó e ɖɔ nú we wɛ un ɖe lɛ́ɛ nú yě. Un sɛ́ we dó togun e nɔ dó gbe ɖěvo é gɔ́n ǎ, togun e nɔ dó gbe e mɛ a ma sixú mɔ nǔ jɛ ǎ é gɔ́n ǎ; lo ɔ́, Izlayɛ́li togun ɔ́ gɔ́n wɛ un sɛ́ we dó. É na bó nyí togun e nɔ dó gbe ɖěvo ɖěvo e mɛ a ma mɔ nǔ jɛ ǎ lɛ́ɛ, togun e nɔ dó gbe gɛ́dɛ́gɛ́dɛ́ lɛ́ɛ gɔ́n wɛ un sɛ́ we dó ɔ́, yědɛɛ lɛ́ɛ ná ɖótó we. Izlayɛ́li ví lɛ́ɛ ká ná ba ná ɖótó we ǎ, ɖó yě jló ná se xó ce ǎ; yě bǐ wɛ gbɛ́ hɛn, ali yi tó yětɔn mɛ ǎ. Din ɔ́, un ná sɔ́ hwi lɔ dó húzú nǔ gbɛ́hɛn, ali ná yi tó hwi lɔ tɔn mɛ ǎ yě ɖɔhun. Un ná sɔ́ we dó húzú mɛɖé bɔ a na syɛ́n awǐnnya xɔ akwɛ́ diamáá ɖɔhun; a nǎ syɛ́n hú só. Énɛ́ ɔ́ wú ɔ́, ma ɖi xɛsi nú yě ó; ma sísɔ́ ɖo togun gǔfɔ́ntɔ́ énɛ́ ɔ́ nukɔn ó.” Mɛ ɔ́ lɛ́ ɖɔ nú mì ɖɔ: “Hwɛ gbɛtɔ́ ɔ́, ɖǒtó xó e ɖɔ nú we gbé un ja é céɖécéɖé bó hɛn ayi mɛ. Yi mɛ towe e ahwan wlí wá fí lɛ́ɛ gɔ́n, bó ɖɔ nú yě ɖɔ: ‘Xó e Aklúnɔ Mavɔmavɔ ɖɔ é ɖíe’ Yě ɖótó we kpó yě má ɖótó we kpó ɔ́, vɛ̌ ɖɔ nú yě.” Ée é ɖɔ mɔ̌ ɔ́, yɛ Mawu tɔn zé mì sín kɔ́ mɛ, bɔ un se zǐngídi ɖaxó ɖé ɖo gǔdo ce; un nɔ se: “È nǐ kpa susu nú Mawu Mavɔmavɔ ɖo fí e é nɔ́ nɔ é.” Nǔɖogbɛ lɛ́ɛ sín awa ɖě nɔ́ xo dó ɖě wú; kɛkɛ́fɔ e ɖo akpá yětɔn lɛ́ɛ lɔ ɖo nǔ ɖɔ wɛ. Zǐngídi e se wɛ un ɖe ɔ́ syɛ́n ɖésú. Yɛ Mawu tɔn zé mì sín kɔ́ mɛ, bó sɔ́ mì ɖidó. Ayi ce j'ayǐ ǎ, wǔ kú mì, bɔ un ɖo yiyi wɛ. Hlɔ̌nhlɔ́n Mawu Mavɔmavɔ tɔn wá jǐ ce bɔ é syɛ́n ɖésú. Un wá jɛ te ɖo Tɛ́li-Avívu ɖo Kebáa tɔ ɔ́ tó fí e mɛ e ahwan wlí lɛ́ɛ ɖe é. Azǎn tɛ́nwe wɛ un xɔ ɖo fínɛ́, ado ka ɖo huhu mì wɛ ɖésú. Ée un bló azǎn tɛ́nwe lɛ́ɛ é ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, un ná sɔ́ we mɛcɔ́tɔ́ Izlayɛ́li ví lɛ́ɛ tɔn. A nǎ nɔ́ se xó ɖo nu ce, bó ná nɔ́ ɖɔ nú yě, bónú yě ná tunwun nǔ e ɖo nǎ jɛ wɛ ɔ́. Nú un ɖɔ nú mɛdídá ɖé ɖɔ é ná kú, bónú a ma ɖɔ nǔ e wa nyi do wɛ é ɖe lɛ́ɛ n'i ǎ ɔ́, a ma ɖɔ xó n'i bónú é húzú jijɔ bó nɔ gbɛ ǎ bó kú ɖó hwɛ tɔn lɛ́ɛ wú ɔ́, hwi wɛ un ná kan kanjɔ tɔn byɔ́. Nú hwɛ ka ɖɔ nǔ e wa nyi do wɛ é ɖe lɛ́ɛ n'i, bónú é má húzú jijɔ bó lɛ́ kɔ ǎ ɔ́, é ná kú ɖó hwɛ tɔn lɛ́ɛ wú; amɔ̌, hwɛ ɔ́, kú tɔn ná nɔ kɔ nú we ǎ. Mɔ̌ ɖokpó ɔ́, nú hwɛjijɔnɔ ɖé dó vɛ̌ nú nǔ jlɔ́jlɔ́ e é nɔ wa ɔ́, lobo jɛ nǔ nyanya wa jí, bónú a ma ɖɔ nǔ e wa nyi do wɛ é ɖe é n'i ǎ ɔ́, un ná ɖó mɔ n'i bɔ é ná jɛ mɛ, bó ná kú dó hwɛ tɔn lɛ́ɛ mɛ. È sɔ́ ná kpɔ́n nǔ jlɔ́jlɔ́ e é nɔ́ wa ɖ'ayǐ é ǎ; amɔ̌, hwi wɛ un ná kan kanjɔ tɔn byɔ́. A ka ɖɔ nú hwɛjijɔnɔ énɛ́ ɔ́ ɖɔ é ní má sɔ́ nɔ́ hu hwɛ ɖě ó, bɔ é jó hwɛhuhu dó ɔ́, é ná nɔ gbɛ ɖó é se tónú nú nǔ e è ɖɔ n'i ɔ́, bɔ hwɛ ɔ́, a nǎ hwlɛ́n gbɛ towe gán.” Hlɔ̌nhlɔ́n Mawu Mavɔmavɔ tɔn lɛ́ wá jǐ ce ɖo fínɛ́. Mawu ɖɔ nú mì ɖɔ: “Sí te bó yi tɔdo ɔ́ mɛ, bónú má ɖɔ xó nú we.” Ée é ɖɔ mɔ̌ ɔ́, un wlí ali ɖidó tɔdo ɔ́ mɛ. Mawu Mavɔmavɔ ko ɖo susu tɔn ɖe xlɛ́ wɛ ɖo tɔdo ɔ́ mɛ lě e un mɔ gbɔn ɖo Kebáa tɔ ɔ́ tó é. Énɛ́ ɔ́, un xwe agbɔ̌nnusú do. Yɛ Mawu tɔn ka wá jǐ ce, bó zé mì sí te, bɔ Mawu ɖɔ nú mì ɖɔ: “Yi xwé towe gbe bó sú hɔn dó ta. A jɛ fínɛ́ ɔ́, è nǎ zé kan dó blá we, bɔ a sɔ́ ná sixú tɔ́n bó byɔ́ gbɛtɔ́ mɛ ǎ. Ɖɛ̌ towe ná tɛ́ dó ɖɛxwɛ towe wú; nyi wɛ ná bló mɔ̌ nú we, bɔ nu kikɛ ná gló we, bɔ a nǎ sixú kɛ nu dó nǔ e wa wɛ tónúmasetɔ́ énɛ́ lɛ́ɛ ɖe ɔ́ wú nú yě ǎ. Amɔ̌, hwenu e un ná ɖó xó ɖé bó ná ɖɔ gbɔn jǐ towe ɔ́, un ná tún kan nú ɖɛ̌ towe; énɛ́ ɔ́, a nǎ ɖɔ xó nú yě; a nǎ ɖɔ: ‘Xó e Aklúnɔ Mavɔmavɔ ɖɔ é ɖíe.’ Mɛ ɖé lɛ́ɛ ná ɖótó we, mɛ ɖé lɛ́ɛ ká ná gbɛ́ tó ɖó we, ɖó yě nɔ́ se tónú ǎ.” Mawu ɖɔ: “Hwɛ gbɛtɔ́ ɔ́, zě blǐki ɖokpó ɖó nukɔn towe bó ɖe toxo ɖé d'é wú; ɖe Jeluzalɛ́mu toxo ɔ́ d'é wú. Énɛ́ ɔ́ gúdo ɔ́, a nǎ ɖe xlɛ́ ɖɔ kɛntɔ́ lɛ́ lɛ̌ dó toxo ɔ́ bǐ: a nǎ ɖe do e mɛ kɛntɔ́ ná nɔ bó tɔ́n ahwan toxo ɔ́ é; a nǎ ɖe kɔ́ e kɛntɔ́ kplé bó ná nɔ gúdo bó tɔ́n ahwan togun ɔ́ é; a nǎ ɖe dǒ e jí kɛntɔ́ ná nɔ bó kpé toxo ɔ́ wú é, bó ná ɖe ahwanfunnú lɛ́ lɛ̌ dó toxo ɔ́ bǐ. Zě ganxwɛ ɖokpó dó gbo toxo ɔ́ kpó hwi ɖésúnɔ kpó dǒ ɖɔhun; bɔ nukún nyi toxo ɔ́ wú, bó ɖe xlɛ́ ɖɔ è tɔ́n ahwan toxo ɔ́; amɔ̌, hwi wɛ nyí ahwan e tɔ́n toxo ɔ́ é. Énɛ́ ní nyí xlɛ̌ ɖé nú Izlayɛ́li togun ɔ́. “Mlɔ̌ amyɔ jí, bó zé nǔ e Izlayɛ́li togun ɔ́ wa nyi do lɛ́ɛ sín agban ɖó hwiɖée jí. Azǎn nabí e a nǎ nɔ ayǐmlɔ́mlɔ́ amyɔ jí mɔ̌ xɔ ɔ́, a nǎ hɛn hwɛ e Izlayɛ́li togun ɔ́ hu lɛ́ɛ sín agban n'i. Azǎn nabí e un nǎ ɖɔ bɔ a nǎ nɔ mɔ̌ xɔ ɔ́ ná sɔgbe xá xwe nabí e Izlayɛ́li togun ɔ́ hu hwɛ ná é; hǔn azǎn ɖokpó ɖo xwe ɖokpó nyí wɛ; hǔn a nǎ hɛn hwɛgban Izlayɛ́li togun ɔ́ tɔn nú azǎn afɔɖé kɛnnɛ gban (390). Ényí a blǒ azǎn énɛ́ lɛ́ɛ fó ɔ́, a nǎ mlɔ́ aɖisí jí, bó ná hɛn hwɛgban Judáa togun ɔ́ tɔn nú azǎn kanɖé (40); un ná zé azǎn ɖokpó dó lɛ́n xwe ɖokpó. A nǎ kpɔ́n Jeluzalɛ́mu toxo e è tɔ́n ahwan ɔ́ tlítlí, bó ná dlɛ́n alɔ towe sɛ́ dó toxo ɔ́; awa towe ɔ́, wěxo wɛ é ná ɖe bɔ a nǎ ɖɔ xó dó toxo ɔ́ wú dó nyǐkɔ ce mɛ. Éɖíe, hwɛ ɔ́, un ná blá we, bɔ a nǎ sixú kózó ǎ káká nú azǎn nabí e a ma sixú byɔ́ gbɛtɔ́ mɛ xɔ ǎ é. “A nǎ fɔ jinukún tɛnmɛ tɛnmɛ: blěe, ɔ́ji, fɛ́vu, lantílu, milɛ́ɛ kpódó blěe xúxú kpó, bó ná xo bǐ kplé dó gannú ɖokpó mɛ, bó ná nɔ́ dó ɖa wɔ̌xúxú ná. Nǔɖuɖu énɛ́ wɛ a nǎ ɖu káká nú azǎn afɔɖé kɛnnɛ gban (390) e a nǎ bló ɖo adaja ɖokpó jí é. Nǔɖuɖu e a nǎ nɔ́ ɖu gbe ɖokpó ɔ́ ná nyí kilóo vlɔ́ ɖó ɛnɛ. Sin e a nǎ nɔ́ nu gbe ɖokpó ɔ́ ná ɖó jlɛ̌; sin lǐtli ɖokpó wɛ a nǎ nɔ́ nu gbe ɖokpó. Nǔɖuɖu towe ná cí ɔ́ji sín wɔ̌xúxú ɖɔhun, bɔ è nǎ zé gbɛtɔ́ sín mǐ xúxú dó ɖa ná ɖo mɛ bǐ nukún mɛ.” Mawu Mavɔmavɔ lɛ́ ɖɔ: “Lě e Izlayɛ́li ví lɛ́ɛ ná ɖu nǔ e nyí suɖunú é gbɔn, ɖo to ɖěvo mɛ fí e un ná nya yě sɛ́ dó ɔ́ nɛ́.” Ée Mawu ɖɔ mɔ̌ ɔ́, un sú xó bó ɖɔ: “Á! Aklúnɔ Mavɔmavɔ, un hɛn nyɛɖée blí kpɔ́n gbeɖé ǎ! Sín vǔ ce káká wá jɛ din ɔ́, un ɖu kanlin kúkú kpɔ́n ǎ, abǐ kanlin e gběkanlin ɖé hu ɔ́ kpɔ́n ǎ; lan e nyí su nú mǐ lɛ́ɛ ɔ́, ɖěbǔ jɛ nu ce kpɔ́n ǎ.” Mawu ka ɖɔ nú mì ɖɔ: “Éénɛ́, din ɔ́, a nǎ zé nyibúmí dó ɖyɔ́ gbɛtɔ́mí ɔ́ ná, lobo ɖa nǔɖuɖu towe ɖ'é jí.” Mawu lɛ́ ɖɔ nú mì ɖɔ: “Hwɛ gbɛtɔ́ ɔ́, ɖǒtó mì: nǔɖuɖu sín kpasin e yě ɖǒ ɖo Jeluzalɛ́mu ɔ́, un ná hɛn bǐ gblé; nǔɖuɖu e yě ná nɔ́ ɖu kpó sin e yě ná nɔ́ nu gbe ɖokpó kpó ɔ́ ná ɖó jlɛ̌; énɛ́ ɔ́ ná zɔ́n bɔ yě ná ɖo adohu adohu jí. Yě ná ba nǔɖuɖu kpó sin kpó, bó ná ba kpo; ɖě wa gbɔn ná hán yě; yě ná xú dó te ɖó hwɛ yětɔn lɛ́ɛ wú.” Mawu ɖɔ nú mì ɖɔ: “Hwɛ gbɛtɔ́ ɔ́, zě hwǐ e ɖá ganjí ɔ́ dó xwlɛ́ ta towe kpó atán towe kpó ná. A nǎ bɛ̌ ɖa kpó atán kpó e a xwlɛ́ ɔ́ dó gan jí bó ná da, lobo ná má ɖó do atɔn. Ée a ɖe xlɛ́ fó ɖɔ kɛntɔ́ lɛ́ɛ xá toxo ɔ́ é ɔ́, a nǎ bɔ myɔ ɖó toxo ɔ́ tɛ́ntin, bó ná dó ɖa ɔ́ kpó atán ɔ́ kpó atɔnvlɔ́ɖó zo. A nǎ zé hwǐ ɔ́ dó já atɔnvlɔ́ɖó lɛ́ lɛ̌ dó toxo ɔ́; a nǎ nyi atɔnvlɔ́ɖó e kpo ɔ́ dó jɔhɔn mɛ, bɔ nyɛ ɔ́, un ná zé hwǐ bó jɛ gǔdo tɔn. Amɔ̌, a nǎ kán ɖa ɔ́ kpó atán ɔ́ kpó kpɛɖé bó ná slɛ́ gǒ dó awu towe ɖaxó ɔ́ tó. Kpɛ énɛ́ e ná ɖo awu towe tó ɔ́, a nǎ sun kpɛɖé ɖ'é wú dó myɔ mɛ, bɔ é ná wlí zo; myɔ énɛ́ ɔ́ wɛ ná wa nǔ xá Izlayɛ́li togun ɔ́. “Nǔ e nyɛ Aklúnɔ Mavɔmavɔ ɖɔ ɔ́ ɖíe: Nǔ e ná jɛ dó Jeluzalɛ́mu toxo ɔ́ jí ɔ́ nɛ́; Jeluzalɛ́mu toxo e un zé ɖó akɔta lɛ́ɛ tɛ́ntin, bɔ to lɛ́ lɛ̌ dó e é. Lo ɔ́, Jeluzalɛ́munu lɛ́ɛ gba sɛ́n ce lɛ́ɛ, Jeluzalɛ́munu lɛ́ɛ xwedó nǔ e un zɔ́n lɛ́ɛ ǎ; yě wa nǔ nyanya hú togun e ɖo to e lɛ́ lɛ̌ dó yě lɛ́ɛ mɛ lɛ́ɛ, ɖó yě gbɛ̌ sɛ́n ce lɛ́ɛ kpó nǔ e un zɔ́n lɛ́ɛ kpó. Énɛ́ wú wɛ nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Mi zán gbɛ hannyahannya hú mɛ e lɛ́ lɛ̌ dó mi lɛ́ɛ. Mi wa nǔ lě e sɛ́n ce lɛ́ɛ kpó nǔ e un zɔ́n lɛ́ɛ kpó byɔ́ gbɔn é ǎ, mi nyi sɛ́n ce lɛ́ɛ ǎ, mi ka nyi togun e kpá mi ɖe lɛ́ɛ sín sɛ́n ǎ. Énɛ́ wɛ zɔ́n bɔ nyɛ Aklúnɔ Mavɔmavɔ ɖɔ un ná jɛ gǔdo mitɔn ma lɛ́ ma lɛ́, bó ná dɔn tó nú mi ɖo togun mɛ agbawungba, bɔ togun ɖě lɛ́ɛ bǐ ná mɔ. Nǔ baɖabaɖa e mi dó sin lɛ́ɛ ná zɔ́n bɔ un ná dɔn tó e un ma dɔn nú mɛɖé gbeɖé kpɔ́n ǎ é nú mi; un ka sɔ́ ná dɔn tó mɔ̌hun nú mɛɖé gbeɖé ǎ. Énɛ́ ɔ́ wútu ɔ́, tɔ́ ná wlí vǐ ɖu, bɔ vǐ ná wlí tɔ́ ɖu. Un ná ɖó hwɛ nú mi, bó ná nya mɛ e ná kpo ɖo gbɛ ɖo mi mɛ lɛ́ɛ dó gbě, bɔ yě ná gba kpé wɛ̌kɛ́zo ɛnɛ lɛ́ɛ mɛ. “Nyɛ Aklúnɔ Mavɔmavɔ ɔ́, un xwlé gbɛ ce bó tɛ ɖɛ̌ jí ɖɔ mi zé bǒcyɔ mitɔn lɛ́ɛ kpó suɖunú mitɔn lɛ́ɛ kpó dó hɛn xwé ce blí. Din ɔ́, ahwan ná wlí mi bǐ; è nǎ xwlɛ́ ta nú mi bó xwlɛ́ atán nú mi; mɛ ɖěbǔ sín nǔ ná blá wǔ nú mì ǎ; un ná ɖe mɛɖé kpo ǎ, ɖó mi mɛ́ ǎ. Jɛmɛjí abǐ adɔ ná hu mi mɛ atɔnvlɔ́ɖó ɖo toxo ɔ́ mɛ; mi mɛ atɔnvlɔ́ɖó ná cí ahwan ɖo to e lɛ́ lɛ̌ dó Jeluzalɛ́mu toxo ɔ́ lɛ́ɛ é mɛ; un ná gba mɛ atɔnvlɔ́ɖó e kpo lɛ́ɛ dó wɛ̌kɛ́zo ɛnɛ lɛ́ɛ mɛ, bó ná sɔ́ ahwan dó jɛ yě gúdo. Nǔɖé ná hɛn xomɛsin ce ɖó te ǎ; fí e é vɛ́ nú mì yi jɛ ɔ́ jɛ́n un ná wa nǔ yi fó ɖó; un ná ɖe hlɔnbiba ce xlɛ́ mi. Hwenɛ́nu ɔ́, mi mɛ bǐ ná mɔ ɖɔ nyɛ Mawu Mavɔmavɔ wɛ ɖɔ xó nú mi, ɖó agɔ e jɛ wɛ mi ɖe lɛ́ɛ wá hú gǎn. Mɛ e ɖo to e lɛ́ lɛ̌ dó mi lɛ́ɛ mɛ lɛ́ɛ, kpó aligbɔntɔ́ lɛ́ɛ kpó ná mɔ ɖɔ un gba Jeluzalɛ́mu toxo ɔ́ hánnyá, bó kɔ́n wi tɔn. Hwɛ e un ɖó nú mi lɛ́ɛ ɔ́, un ná dɔn tó tɔn nú mi kpó xomɛsin ɖaxó ɖé kpó, bó ná gbɛ́ nǔ nú mi kpó adǎn kpó. Togun e lɛ́ lɛ̌ dó mi lɛ́ɛ ná nɔ́ ko mi bó ná nɔ́ zun mi. Un ná sɔ́ mi dó dó sɛ́n ná dó kplɔ́n nǔ togun énɛ́ lɛ́ɛ, bó ná dó adohu nú yě titewungbe. Nyɛ Mawu Mavɔmavɔ wɛ ɖɔ mɔ̌ nú mi. “Un ná sɛ́ adɔ dó mi bɔ adɔ ná dó ya nú mi káká, bɔ mi ná kú. Adɔ ná wa nǔ xá mi káká bɔ mi ná nɔ mɔ wǔvɛ́ aɖǐgá wɛ è sɔ́ mi ɖɔhun. Un ná hɛn nǔɖuɖu kpasin e mi ɖó ɖ'ayǐ lɛ́ɛ gblé, bɔ mi ná kú adɔ. Un ná sɛ́ adɔ kpó adǎnkanlin kpó dó mi, bɔ yě ná hu vǐ mitɔn lɛ́ɛ. Jɛmɛjí kpó mɛhuhu kpó ahwan kpó ná vívá kún mitɔn. Nyɛ Mawu Mavɔmavɔ wɛ ɖɔ mɔ̌ nú mi.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, lǐ lɛ́ kpan nukɔn Izlayɛ́li só lɛ́ɛ, bó dó wɛn ce mɛ e ɖo dɔ̌n lɛ́ɛ. A nǎ ɖɔ: Izlayɛ́li só lɛ́ɛ mi, mi ɖótó Aklúnɔ Mavɔmavɔ xó. Aklúnɔ Mavɔmavɔ ɖo ɖiɖɔ nú mɛ e ɖo só ɖaxó ɖaxó jí lɛ́ɛ, mɛ e ɖo só kpɛví kpɛví jí lɛ́ɛ, mɛ e ɖo dodomɛ lɛ́ɛ kpódó mɛ e ɖo tɔdo mɛ lɛ́ɛ kpó ɖɔ: Nyɛ ɖíe; un ná sɛ́ ahwan dó mi, bó ná gba vodún xwé mitɔn e gbɔn só jí só jí lɛ́ɛ hánnyá. È nǎ gba vɔ̌sákpe mitɔn lɛ́ɛ, è nǎ gba zǎlínkpɔ́nfyɔ́nú mitɔn lɛ́ɛ hánnyá. Mɛ gěgé ná ɖo mi mɛ, bó ná kú jɛ vodún mitɔn lɛ́ɛ sá mɛ. Un ná fɔ Izlayɛ́li ví lɛ́ɛ sín cyɔ tɛ́ ɖó vodún yětɔn lɛ́ɛ sá mɛ, bó ná fúnfún xúgloxú yětɔn lɛ́ɛ lɛ́ lɛ̌ dó vɔ̌sákpe yětɔn lɛ́ɛ. Mi ɖo fí ɖěbǔ ɖo to ɔ́ mɛ ɔ́, toxo lɛ́ɛ bǐ ná gba, mɛ ɖěbǔ sɔ́ ná nɔ́ kplé ɖo vodún xwé mitɔn e gbɔn só jí só jí lɛ́ɛ ǎ. Vɔ̌sákpe mitɔn lɛ́ɛ ná gba hánnyá, bɔ nǔɖé sɔ́ ná ɖo nǔɖé hwínnu ǎ; è nǎ gba vodún mitɔn lɛ́ɛ, bó ná sú kún yětɔn dó; è nǎ gba zǎlínkpɔ́nfyɔ́nú mitɔn lɛ́ɛ; è nǎ hɛn nǔ e mi bló lɛ́ɛ bǐ gblé. Mi mɛ gěgé ná sún j'ayǐ bó ná kú; énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ. Amɔ̌, un ná bló bɔ mi mɛɖé lɛ́ɛ ná gán ɖo ahwan ɔ́ mɛ, bɔ yě mɛ énɛ́ lɛ́ɛ e má cí ahwan ǎ lɛ́ɛ ná gba kpé to ɖěvo ɖěvo lɛ́ɛ mɛ. Énɛ́ ɔ́, yě mɛ e ná kpo ɖo gbɛ bɔ ahwan ná wlí yě yi lɛ́ɛ ná nɔ́ flín mì ɖo fí e ahwan ná wlí yě yi lɛ́ɛ; yě ná nɔ́ flín lě e un wa nǔ xá yě gbɔn é; nǔgbó ɔ́, mɛ ɖé lɛ́ɛ wɛ yě nyí bó ɖo gbejí nú mì ǎ; yě jǒ mì dó bó jɛ vodún sɛn jí; énɛ́ ɔ́, nǔ baɖabaɖa e yě ɖésú dó sin lɛ́ɛ ná vlɛ́ nu yětɔn. Yě ná tunwun ɖɔ nyɛ Mawu Mavɔmavɔ ɔ́, hwenu e un ɖɔ awě ná xo yě ɔ́, é kún nyí xó wɛ un ɖɔ dó jɔhɔn mɛ ó.” Xó e Aklúnɔ Mavɔmavɔ ɖɔ nú mì ɔ́ ɖíe: “Xo alɔ bo zin afɔ dó ayǐ bó ɖɔ: ‘Áo!’ Walɔ baɖabaɖa tɛ́ ɖíe Izlayɛ́li ví lɛ́ɛ zán e! Walɔ gblégblé tɛ́ ɖíe yě zǎn e! Ahwan, adɔ kpó jɛmɛjí kpó wɛ ná sú kún yětɔn dó. Jɛmɛjí ná hu mɛ e ɖo zɔ lɛ́ɛ, ahwan ná hu mɛ e ɖo tó fí lɛ́ɛ, adɔ ná hu mɛ e ná gán ɖo nǔ énɛ́ lɛ́ɛ mɛ lɛ́ɛ. Nǔɖé ná hɛn xomɛsin ce ɖó te ǎ. Cyɔ yětɔn ná fúnfún kpé fí bǐ, è nǎ mɔ cyɔ yětɔn lɛ́ɛ gbɔn vodún yětɔn lɛ́ɛ xwé, cyɔ yětɔn ná lɛ́ lɛ̌ dó vɔ̌sákpe yětɔn lɛ́ɛ, cyɔ yětɔn lɛ́ɛ ná gbɔn só ɖaxó ɖaxó lɛ́ɛ jí, bó ná gbɔn só kpɛví kpɛví lɛ́ɛ jí, cyɔ yětɔn lɛ́ɛ ná gbɔn atín mǔ lɛ́ɛ kpó cɛ́nitín e dó ama lɛ́ɛ kpó sá, bó ná lɛ́ gbɔn fí ɖěvo ɖěvo e kpo bɔ yě nɔ́ sá vɔ̌ nú vodún yětɔn lɛ́ɛ gbɔn lɛ́ɛ. Hwenɛ́nu ɔ́, mɛ ɖokpó ɖokpó ná tunwun ɖɔ nyɛ wɛ nyí Mawu Mavɔmavɔ. Un ná ɖe nǔ e un nyí ɔ́ xlɛ́ yě; un ná vɔ to yětɔn; mɛ ɖěbǔ sɔ́ ná nɔ fí e yě ɖe ɔ́ ǎ; bɛ́ sín gbětótló mɛ ɖo tofɔligbé káká wá Hlivla toxo mɛ, ɖo totaligbé. Énɛ́ ɔ́, mɛ bǐ ná tunwun lo ɖɔ nyɛ wɛ nyí Mawu Mavɔmavɔ.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, ɖǒtó xó e nyɛ Aklúnɔ Mavɔmavɔ ɖo ɖiɖɔ nú Izlayɛ́li toví lɛ́ɛ wɛ é: xó bǐ fó lo; nǔ baɖabaɖa gǔdo gúdo tɔn ɔ́ jɛ gbɔn to ɔ́ bǐ mɛ lo. Din ɔ́, xó mitɔn fó lo; un ná ɖe xomɛsin ce xlɛ́ mi, un ná ɖɔ hwɛ xá mi lě e walɔ e mi zǎn ɔ́ byɔ́ gbɔn é; un ná sú nǔ baɖabaɖa e mi dó sin lɛ́ɛ bǐ sín axɔ́ mi. Nǔ mitɔn ná blá wǔ nú mì ǎ; kpɔ́n bó bló ná nɔ mɛ ǎ, ɖó nyi lɔ ná wa nǔ e mi dó sin lɛ́ɛ bǐ sín nǔ xá mi; énɛ́ ɔ́, nǔ baɖabaɖa e mi dó sin lɛ́ɛ ɔ́, mi ná sixú zé hwlá ǎ. Un ná wa nǔ mɔ̌, bɔ mi ná tunwun ɖɔ nyɛ wɛ nyí Mawu Mavɔmavɔ. “Nǔ e nyɛ Aklúnɔ Mavɔmavɔ ɖɔ é ɖíe: Nǔ nyanya ɖokpó ja jijɛ gbé; nǔ nyanya e ma ko jɛ kpɔ́n gbeɖé ǎ é ja jijɛ gbé. Xó bǐ fó: nǔ baɖabaɖa gǔdo gúdo tɔn ɔ́ jǎwe; é ná zɔn mi jí; é nɛ́ kó wá nɛ́! Izlayɛ́linu e mi, gan mitɔn xo, hwe ɔ́ nu su, azǎn e gbe è nǎ ɖɔ hwɛ xá mi ɔ́ ko sɛkpɔ́; mɛɖé sɔ́ ná j'awǎ ɖě ɖo só lɛ́ɛ jí ǎ, xɛsi wɛ ɖo só lɛ́ɛ jí. Din zaanɖé ɔ́, un ná ɖe xomɛsin ce xlɛ́ mi, bɔ mi ná tunwun ɖɔ un sin xomɛ dó mi. Un ná ɖɔ hwɛ xá mi lě e walɔ e mi zán ɔ́ byɔ́ gbɔn é. Un ná sú nǔ baɖabaɖa e mi dó sin lɛ́ɛ bǐ sín axɔ́ mi. Nǔ mitɔn ná blá wǔ nú mì ǎ, kpɔ́n bó bló ná nɔ mɛ ǎ, ɖó nyi lɔ ná wa nǔ e mi dó sin lɛ́ɛ bǐ sín nǔ xá mi. Énɛ́ ɔ́, nǔ baɖabaɖa e mi dó sin lɛ́ɛ ɔ́, mi ná sixú zé hwlá ǎ. Un ná wa nǔ mɔ̌, bɔ mi ná tunwun ɖɔ nyɛ wɛ nyí Mawu Mavɔmavɔ, nyi wɛ ɖo nǔ wa xá mi wɛ. “Azǎn ɔ́ ɖíe sɔgbe e! Nǔhɛngblézán ɔ́ sín gan xo; dǎkaxixo ɖo kan vlɔ́n wɛ, afɔ tɛ ayǐ ɔ́ wá gbɛ́gbɛ́. Alǎnnú sí te, bó nyí kpo ɖo dǎka lɔ mɛ bó ɖo nǔ dó sin wɛ; nǔɖé sɔ́ ná kpo ǎ: togun élɔ́ ɖě sɔ́ ná kpo ǎ; mɛ tɔn e nɔ ɖo zǐngídi ɖú wɛ lɛ́ɛ ɖě sɔ́ ná kpo ǎ; zǐngídi e ɖú wɛ è ɖe ɖo toxo ɔ́ mɛ ɔ́ ná nɔ te bɔ susu e toxo ɔ́ xɔ ɔ́ lɔ ná nɔ te. Hwe ɔ́ nu su! Ayǐ ɔ́ hɔ́n! Nǔxɔtɔ́, ma j'awǎ ó! Nǔsatɔ́, ma sa vo ó! Ɖó xomɛsin ce ná jɛ te dó mɛ bǐ jí. Nǔsatɔ́ sɔ́ ná mɔ nǔ e é nɔ́ sa lɛ́ɛ ǎ, é ná bó kpo ɖo gbɛ ɔ́, é ná mɔ ǎ. Ɖó ée Mawu ɖɔ è nǎ vívá togun ɔ́ bǐ sín kún ɔ́, è nǎ vívá. Mɛ ɖé ná gán ɖ'é mɛ ǎ. Mi ná ɖo ahwankpɛn kún wɛ kpowun, bó ɖɔ é yá, ahwan ɔ́ yá; mi ka ná mɔ mɛ ɖokpó tɔ́n bó yi ahwan fun gbé ǎ, ɖó xomɛsin ce ná jɛ te dó togun ɔ́ bǐ jí.” “Ahwan ná tɔ́n gbɔn gle lɛ́ɛ mɛ; jɛmɛjí kpó adɔ kpó ná ɖo mɛ hu wɛ gbɔn xwé gbe xwé gbe. Mɛ e ɖo gle mɛ lɛ́ɛ ná kú ɖo ahwangbénu. Adɔ kpó azɔn kpó ná hu mɛ e ɖo toxo mɛ lɛ́ɛ. Mɛ e kpo ɖo gbɛ ɖo yě mɛ lɛ́ɛ ná hɔn yi cí sókan mɛ, tɔdomɛ sín ahwannɛ́ lɛ́ɛ ɖɔhun; mɛ ɖokpó ɖokpó ná ɖo alě ná wɛ, ɖó nǔ e é wa nyi do ɔ́ wú. Alɔ yětɔn lɛ́ɛ bǐ ná ba gǎn kpo; koligó yětɔn lɛ́ɛ ɖě ná nɔ́ xo dó ɖě wú. Yě ná bɛ́ ati kplá; xɛsi ɖaxó ɖé ná ɖo yě jí; winnyá ná ɖo nukún yětɔn ta; yě ná xwlɛ́ ta, ɖó yě ɖo aluwɛ mɛ. Yě ná fúnfún kpatágan yětɔn gbɔn ali jí ali jí. Yě ná sɔ́ siká yětɔn dó mɔ zunkɔ́. Xomɛsin Mawu Mavɔmavɔ tɔn sín azǎn gbe ɔ́, kpatágan yětɔn kpó siká yětɔn kpó sixú hwlɛ́n yě gan ǎ. Yě ná ba nǔ e yě ná ɖu bó gɔ́ xo ɔ́ kpo; yě ná ba nǔ e ná ná vivo lǐndɔ̌n yětɔn ɔ́ kpo, ɖó kpatágan kpó siká kpó wɛ dɔn yě dó hwɛ mɛ. Sikánú ɖagbe ɖagbe e yě nɔ́ dó lɛ́ɛ wɛ zɔ́n bɔ yě nɔ́ ɖo afɔ tɛ ayǐ wɛ. Yě fɔ sikánú yětɔn énɛ́ lɛ́ɛ dó bló vodún ná, vodún suɖunú, nǔvɛ́mɔ ná. Énɛ́ ɔ́ wú wɛ un ná zé vodún yětɔn énɛ́ lɛ́ɛ dó húzú zunkɔ́ nú yě. Un ná jó toxo ɔ́ nú akɔta ɖěvo lɛ́ɛ, bɔ yě ná fɔ nǔ e ɖ'é mɛ lɛ́ɛ bǐ. Mɛ ma nyí mɛɖé énɛ́ lɛ́ɛ ná bɛ́ nǔ e ɖo toxo ɔ́ mɛ lɛ́ɛ bǐ, bó ɖu su nú toxo ɔ́. Hwenu e è nǎ ɖu su nú xwé ce ɔ́, un ná ɖe kɔ sín yě wú, ajotɔ́ axánsúnxó ɖé lɛ́ɛ ná yi fínɛ́, bó ná ɖu su ná. Mi bló wlɔ e è nǎ dó mi lɛ́ɛ, ɖó mɛhutɔ́ kɛ́ɖɛ́ wɛ ɖo to ɔ́ mɛ. Yě ɖo alǎnnú wa wɛ gbɔn fí bǐ ɖo toxo ɔ́ mɛ. Énɛ́ ɔ́ wú ɔ́, un ná sɛ́ togun e nɔ xo dǎka titewungbe lɛ́ɛ dó to ɔ́ mɛ, bɔ yě ná yǐ xwé yětɔn lɛ́ɛ. Un ná hu acɛ nú gǎnhúnǔtɔ́ énɛ́ lɛ́ɛ e nɔ́ ɖo afɔ tɛ ayǐ wɛ lɛ́ɛ, bɔ è nǎ ɖu sú nú vodún xwé yětɔn lɛ́ɛ. Xɛsi ɖo to ɔ́ jí ná jɛ wɛ lo! Yě ná ba fí e yě ná mɔ fífá ɖe ɔ́, yě ká ná mɔ ǎ. Nǔ nyanya ná jɛ ɖě jɛ ɖě gúdo; è nǎ se wɛn nyanya ɖě jɛ ɖě gúdo. Yě ná nɔ́ yi kanbyɔ́ gbeyíɖɔ Mawu tɔn lɛ́ɛ ɖɔ Mawu ka ɖe nǔɖé xlɛ́ yě dó nǔ e ɖo jijɛ wɛ ɔ́ wú nú émí ají. Vɔ̌sánú-xwlémawutɔ́ sɔ́ ná kplɔ́n nǔɖé mɛ ǎ. Tomɛxó lɛ́ɛ lɔ sɔ́ ná tunwun nǔnywɛ́ ɖé bó ná ná mɛ ǎ. Axɔ́sú ɔ́ ná byɔ́ aluwɛ mɛ; wǔ ná kú vǐ e ɖo do tɔn mɛ ná nɔ wɛ é; toví bǐ sín alɔ ná ɖo sísɔ́sísɔ́ wɛ. Lě e walɔ e yě zán ɔ́ byɔ́ gbɔn ɔ́ wɛ un ná wa nǔ xá yě gbɔn. Un ná ɖó hwɛ nú yě lě e é jɛ xá gbɔn é. Énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.” Ahwan wlí mǐ Izlayɛ́li ví lɛ́ɛ yi Babilɔ́nu ɔ́, é ɖo xwe ayizɛ́n bló wɛ. Sun ayizɛ́ngɔ́ e ɖo xwe énɛ́ ɔ́ mɛ ɔ́ sín azǎn atɔ́ɔ́ngɔ́ ɔ́ gbe ɔ́, un ɖo ayǐjínjɔ́n ɖo xwé ce gbe, nyi kpó tomɛxó Judáa tɔn lɛ́ɛ kpó. Fínɛ́ wɛ mǐ ɖe bɔ Aklúnɔ Mavɔmavɔ sín hlɔ̌nhlɔ́n wá jǐ ce ajijimɛ. Kpowun ɔ́, un mɔ nǔ gbɛtɔ́ ɖɔhun ɖé. Nǔ ɔ́ cí myɔ ɖɔhun sín alin káká yi afɔ, bó ká cí gansinnɔ ɖɔhun sín alin káká yi ta. Nǔ dlɛ́n nǔ alɔ ɖɔhun ɖé, bó wlí ɖa ce. Énɛ́ ɔ́, ɖo nǔmimɔ énɛ́ e Mawu sɛ́ dó mì ɔ́ mɛ ɔ́, yɛ Mawu tɔn zé mì yi jɔmɛ, bó sɔ́ mì yi Jeluzalɛ́mu. Un wá mɔ nyɛɖée ɖo Mawu xwé gbe, ɖo hɔntogbó taligbé tɔn ɔ́ kɔn, fí e è tun bǒcyɔ nǔvɛ́mɔ Mawu tɔn ɔ́ ɖó é. Fínɛ́ wɛ un ɖe, bɔ Mawu Izlayɛ́li tɔn ɔ́ ɖe susu tɔn xlɛ́ mì ɖo fínɛ́, lě e é kó ɖe xlɛ́ mì ɖokpó gbɔn ɖo tɔdomɛ é. Mawu ɖɔ nú mì ɖɔ: “Hwɛ gbɛtɔ́ ɔ́, kpɔ́n totaligbé dɔ̌n sɛ́ dó.” Nǔgbó ɔ́, un kpɔ́n totaligbé sɛ́ dó, bó mɔ bǒcyɔ nǔvɛ́mɔ Mawu tɔn ɔ́ ɖo vɔ̌sákpe ɔ́ sín taligbé, ɖo hɔntogbó ɔ́ nu. Mawu lɛ́ ɖɔ nú mì ɖɔ: “Hwɛ gbɛtɔ́ ɔ́, a ma ɖo nǔ e wa wɛ yě ɖe ɔ́ mɔ wɛ ganjí a? Izlayɛ́li ví lɛ́ɛ ɖo nǔ baɖabaɖa énɛ́ lɛ́ɛ dó sin wɛ, bó ná mɔ tɛn dó sɛ mì dó zɔ nú xwé ce; a ka ná lɛ́ mɔ nǔ ɖěvo bɔ é ná nylá hú mɔ̌.” Yɛ ɔ́ kplá mì sín fínɛ́ yi jɛ hɔntogbó e tɔ́n jɛ kɔ́xota ɔ́ jí; ée un jɛ fínɛ́ ɔ́, un mɔ ɖɔ è tɔ́n ali ɖokpó dó ahohó ɔ́ mɛ. Bɔ Mawu ɖɔ nú mì ɖɔ: “Hwɛ gbɛtɔ́ ɔ́, tɔ́n ahohó ɔ́.” Bɔ un tɔ́n ahohó ɔ́, bó ɖe ali ɖokpó d'é mɛ. Ée un ɖe ali dó ahohó ɔ́ mɛ é ɔ́, é ɖɔ nú mì ɖɔ: “Byɔ̌ xwé ɔ́ gbe bó kpɔ́n nǔ kwíji kwíji, nǔ baɖabaɖa e dó sin wɛ yě ɖe ɖo fínɛ́ lɛ́ɛ é.” Énɛ́ ɔ́, un byɔ́ xwé ɔ́ gbe nǔgbó, bó mɔ ɖɔ è ɖe nǔ dó ahohó ɔ́ wú ɖo ɖisí amyɔ: è ɖe kanlin e nɔ sá lɛ́ɛ kpó kanlin baɖabaɖa lɛ́ɛ kpó, bó ɖe vodún tɛnmɛ tɛnmɛ e Izlayɛ́li ví lɛ́ɛ nɔ́ sɛn lɛ́ɛ bǐ dó ahohó ɔ́ wú. Un mɔ tomɛxó Izlayɛ́li tɔn kanɖé gban (70) ɖo ɖiɖe énɛ́ lɛ́ɛ nukɔn; Yaazaniyahu Cafáni ví ɔ́ ɖo yě mɛ. Tomɛxó lɛ́ɛ ɖokpó ɖokpó hɛn zǎlínkpɔ́nfyɔ́nú alɔ mɛ, bɔ zǎlínkpɔ́n ɖo azɔ si ɖ'é mɛ wɛ gɔgɔgɔ. Mawu kanbyɔ́ mì ɖɔ: “Hwɛ gbɛtɔ́ ɔ́, a mɔ nǔ e wa wɛ tomɛxó Izlayɛ́li tɔn énɛ́ lɛ́ɛ ɖe ɖo ablu mɛ, bɔ mɛ ɖokpó ɖokpó ɖo vodún tɔn nukɔn ɔ́ a? Yě ɖo nǔ wa wɛ gbɔn mɔ̌ bó ká nɔ́ ɖo hwɛjijɔ ba wɛ bó nɔ́ ɖɔ: ‘Mawu Mavɔmavɔ ɖo mǐ mɔ wɛ ǎ; é kó jó to ɔ́ dó.’ ” Mawu lɛ́ ɖɔ nú mì ɖɔ: “A nǎ lɛ́ mɔ ɖěvo lɛ́ɛ bɔ yě ná nylá hú mɔ̌; bǐ kó nɛ́ ǎ.” Ée é ɖɔ mɔ̌ é ɔ́, é zé mì yi hɔntogbó e ɖo xwé tɔn sín taligbé ɔ́ jí; fínɛ́ ɔ́, un mɔ nyɔ̌nu ɖé lɛ́ɛ ɖo ayǐjínjɔ́n, bɔ yě ɖo vodún Tamumuzi ví wɛ ɖɔ é kú. Bɔ Mawu kanbyɔ́ mì ɖɔ: “Hwɛ gbɛtɔ́ ɔ́, a mɔ nǔ énɛ́ lɛ́ɛ ganjí a? É kó vɔ ǎ, a nǎ lɛ́ mɔ nǔ baɖabaɖa e hú énɛ́ lɛ́ɛ é.” Ée é ɖɔ mɔ̌ é ɔ́, é zé mì yi Mawu Mavɔmavɔ xwé ɔ́ sín kɔ́xota. Un mɔ súnnu koatɔ́n (25) mɔ̌ ɖo hɔnnúwa ɔ́ kpó vɔ̌sákpe ɔ́ kpó tɛ́ntin, ɖo sinsɛnxɔ ɔ́ lihɛ́nnu. Yě dó gǔdo xɔ ɔ́, bó kpan nukɔn zǎnzǎnhwe jí, bó jɛ kpo bó ná ɖe kɔ́ nú hwe. Mawu kanbyɔ́ mì ɖɔ: “Hwɛ gbɛtɔ́ ɔ́, a ma mɔ nǔ énɛ́ lɛ́ɛ ganjí a? Judáanu énɛ́ lɛ́ɛ ɖo nǔ baɖabaɖa énɛ́ lɛ́ɛ dó sin wɛ ɖo xwé ce gbe fí có é kpé yě ǎ. Yě lɛ́ ɖo adǎnú wa wɛ ɖo to ɔ́ mɛ, bó ná dó dó xomɛsin nú mì. Énɛ́ ɔ́, yě nɛ́ ɖo dězan zé ɖó awɔntínnu dó dó xomɛsin nú mì wɛ nɛ́. Énɛ́ ɔ́ wú wɛ nyi lɔmɔ̌ ná ɖe xomɛsin ce xlɛ́ yě, bɔ yě ná tunwun ɖɔ nǔ tíin; mɛ ɖé nú ná blá wǔ nú mì ǎ, un ka ná jó mɛɖé dó ǎ; yě ná bó dó hlɔ̌nhlɔ́n bó sú xó ylɔ́ mì ɖɔ nyɛ ní wá dó alɔ émí ɔ́, un ná ɖótó yě ǎ.” Énɛ́ ɔ́ gúdo ɔ́, un se Mawu sú xó syɛ́nsyɛ́n, bó ɖɔ: “Mi mɛ e ɖo tó ná dɔn nú toxo ɔ́ wɛ lɛ́ɛ mi, mi wá! Mɛ ɖokpó ɖokpó ní hɛn alǐnnyánú tɔn e é ná dó sú gbɛtɔ́ lɛ́ɛ sín kún dó é.” Ée Mawu ɖɔ mɔ̌ é ɔ́, un mɔ súnnu ayizɛ́n gosín hɔntogbó aga tɔn e ɖo xɔ ɔ́ sín taligbé ɔ́ kɔn ja, bɔ mɛ ɖokpó ɖokpó hɛn alǐnnyánú tɔn. Nya ɖěvo ɖo tɛ́ntin yětɔn, bó dó kanvɔ wěwé ɖé, lobo sɔ́ nǔwlánnú ɖokpó slɔ́ gǒ mɛ. Yě bǐ zɔn bó wá nɔ te vɔ̌sákpe e è zě ganvɔ dó bló ɔ́ nukɔn. Susu Mawu Izlayɛ́li tɔn ɔ́ tɔn e ɖo wɛnsagun susunɔ lɛ́ɛ ta nu, ɖo sinsɛnxɔ ɔ́ mɛ ɔ́ sí te bó ɖidó sinsɛnxɔ ɔ́ sín alihɛ́nnu. Mawu Mavɔmavɔ ylɔ́ nya e dó kanvɔ wěwé, bó sɔ́ nǔwlánnú ɖokpó slɔ́ gǒ mɛ é, bó ɖɔ n'i ɖɔ: “Gbɔn Jeluzalɛ́mu toxo ɔ́ bǐ mɛ, bó ɖó wuntun nukɔn nú mɛ e ɖo alě ná wɛ, bó ɖo wǔvɛ́ mɔ wɛ, ɖó nǔ baɖabaɖa e dó sin wɛ è ɖe ɖo toxo ɔ́ mɛ lɛ́ɛ wú lɛ́ɛ.” Énɛ́ ɔ́ gúdo ɔ́, un se bɔ Mawu ɖo ɖiɖɔ nú mɛ ayizɛ́n e kpo lɛ́ɛ wɛ ɖɔ: “Mi xwedó nya élɔ́ gbɔn toxo ɔ́ bǐ mɛ, bó hu mɛ e mi ná mɔ lɛ́ɛ bǐ. Mɛ ɖé nú ní ma blá wǔ nú mi ó, mi ma jó mɛɖé dó ó. Mi hu degénɔ lɛ́ɛ, bó hu dɔ̌nkpɛvú lɛ́ɛ, bó hu ɖyɔ̌vǐ lɛ́ɛ, bó hu yɔkpɔ́vú lɛ́ɛ kpó nyɔ̌nu lɛ́ɛ kpó. Amɔ̌, mi ma ɖ'alɔ mɛ e wuntun ɖo nukɔn ná lɛ́ɛ ɖěbǔ wú ó. Mɛ e ɖo xwé ce gbe lɛ́ɛ jí wɛ mi ka ná bɛ́ sín.” Nǔgbó ɔ́, yě bɛ́ sín tomɛxó e ɖo Mawu xwé gbe ɖo sinsɛnxɔ ɔ́ nukɔn lɛ́ɛ jí. Mawu ɖɔ nú yě ɖɔ: “Mi yi ɖu su nú xwé ce; mi bɛ́ cyɔ lɛ́ɛ kɔn nyi kɔ́xo lɛ́ɛ ta.” Nǔgbó ɔ́, yě tɔ́n bó byɔ́ toxo ɔ́ mɛ bó hu mɛ lɛ́ɛ tɛ́. Ée un ɖo te bɔ yě ɖo mɛ hu wɛ é ɔ́, un jɛ ayǐ bó xwe agbɔ̌nnusú do, bó sú xó bó ɖɔ: “Áo, Aklúnɔ Mavɔmavɔ! Ée a sin xomɛ bo ɖo nǔ wa xá Jeluzalɛ́mu toxo ɔ́ wɛ gbɔn mɔ̌ din ɔ́, a jlǒ ná sú Izlayɛ́li ví e kpo lɛ́ɛ sín kún dó wɛ a?” Bɔ Mawu yí gbe nú mì ɖɔ: “Hwɛ e hu wɛ Izlayɛ́li ví lɛ́ɛ kpó Judáanu lɛ́ɛ kpó ɖe ɔ́ d'agba bó vɛ́ jlɛ́. Mɛhutɔ́ kɛ́ɖɛ́ wɛ gɔ́ to ɔ́; nǔ agɔ agɔ kɛ́ɖɛ́ wɛ yě nɔ́ wa ɖo toxo élɔ́ mɛ, ɖó mɛ lɛ́ɛ nɔ́ ɖɔ: ‘Mawu Mavɔmavɔ ɖo mǐ mɔ wɛ ǎ, é kó jó to ɔ́ dó.’ Ée é nyí mɔ̌ ɔ́, mɛ ɖé nú ɖo wǔ ná blá nú mì wɛ ǎ; un ná jó mɛɖé dó ǎ. Un ná sú nǔ e yě wa ɔ́ sín axɔ́ yě.” Hwenu e Mawu ɖo mɔ̌ ɖɔ wɛ é ɔ́, nya e dó kanvɔ wěwé ɔ́ wá, lobo ɖó lě e é wa nǔ gbɔn ɔ́ sín gbe nú Mawu bó ɖɔ: “Un bló nǔ e a zɔ̌n mì é.” Un lɛ́ mɔ nǔ jǐnukúnsin ɖɔhun ɔ́ ɖo wɛnsagun susunɔ lɛ́ɛ ta nu; un mɔ nǔ awǐnnya xɔ akwɛ́ safíi ɖɔhun ɖé ɖ'é mɛ, bɔ é cí axɔ́súzinkpo ɖɔhun. Bɔ Mawu ɖɔ nú nya e dó kanvɔ wěwé é ɖɔ: “Gbɔn kɛkɛ́fɔ e ɖo wɛnsagun susunɔ lɛ́ɛ glɔ́ ɔ́ tɛ́ntin; wǔn myɔkán gɔ́ alɔgogo towe, ɖo wɛnsagun susunɔ lɛ́ɛ tɛ́ntin, bó yi fúnfún gbɔn toxo ɔ́ mɛ.” Nyi ɖésú mɔ nya ɔ́ kpó nukún ce kpó, bɔ é ɖidó myɔkán ɔ́ wún gbé. Hwenu e nya ɔ́ xweyǐgbe ɔ́, wɛnsagun susunɔ lɛ́ɛ ɖo aɖisíxwé nú sinsɛnxɔ ɔ́, bɔ akpɔ́kpɔ́ gɔ́ Mawu xwé ɔ́ sín kɔ́xota. Mawu Mavɔmavɔ sín susu sí te sín zinkpo tɔn jí ɖo sinsɛnxɔ ɔ́ mɛ, bó ɖidó sinsɛnxɔ ɔ́ lihɛ́nnu. Akpɔ́kpɔ́ ɖo xwé ɔ́ bǐ jí, bɔ susu Mawu Mavɔmavɔ tɔn hɔ́n dó kɔ́xo ɔ́ ta. È ɖo xwé ɔ́ sín hɔntogbó jí ɔ́, è nɔ ɖo wɛnsagun susunɔ lɛ́ɛ sín awa gbe se wɛ, Mawu Nǔbǐwúkpétɔ́ ɔ́ wɛ ɖo xó ɖɔ wɛ ɖɔhun. Nya e dó kanvɔ wěwé ɔ́ ɖo te kɛkɛ́fɔ lɛ́ɛ ɖokpó kpá; fínɛ́ wɛ é ɖe hwenu e Mawu ɖɔ n'i ɖɔ é ní gbɔn kɛkɛ́fɔ lɛ́ɛ tɛ́ntin, bó yi wún myɔkán e ɖo wɛnsagun susunɔ lɛ́ɛ tɛ́ntin é. Énɛ́ ɔ́, wɛnsagun susunɔ lɛ́ɛ ɖokpó dlɛ́n alɔ, bó wún myɔkán e ɖo tɛ́ntin yětɔn ɔ́ gɔ́ alɔ mɛ, bó kɔn dó alɔ gogo mɛ nú nya e dó kanvɔ wěwé ɔ́, bɔ é ɖidó. Nǔ gbɛtɔ́ sín alɔ ɖɔhun ɖé lɛ́ɛ ɖo wɛnsagun susunɔ lɛ́ɛ sín awa lɛ́ɛ glɔ́. Un lɛ́ mɔ kɛkɛ́fɔ ɛnɛ, bɔ ɖokpó ɖokpó ɖo wɛnsagun susunɔ lɛ́ɛ ɖokpó ɖokpó kpá; kɛkɛ́fɔ énɛ́ lɛ́ɛ nɔ́ kɔ́n awǐnnya xɔ akwɛ́ klizolíti ɖɔhun. Nú è ɖo kɛkɛ́fɔ lɛ́ɛ kpɔ́n wɛ ɔ́, è nɔ mɔ ɖɔ ɖě kún gbɔn vo nú ɖě ó. É cí ɖě wɛ ɖo ɖě xomɛ ɖɔhun. Hǔn kɛkɛ́fɔ lɛ́ɛ hɛn ɔ́, yě ná yi gǔdo, nukɔn, aɖisí, amyɔ; é byɔ́ ɖɔ yě ná lílɛ́ ɖo tɛn do ɖokpó ɔ́ mɛ cóbó yi fí e yě xwe ɔ́ ǎ; fí e wɛnsagun susunɔ lɛ́ɛ kpan nukɔn ɔ́ wɛ yě nɔ́ yi; yě ká nɔ́ lílɛ́ cóbó nɔ ɖidó ǎ. Nǔkún gbɔn wɛnsagun susunɔ lɛ́ɛ wú bǐ; é gbɔn wǔtu yětɔn, é gbɔn nɛgbé yětɔn, é gbɔn alɔ yětɔn, é gbɔn awa yětɔn, bó gbɔn kɛkɛ́fɔ ɛnɛ lɛ́ɛ lɔ wú. Un se bɔ è nɔ ylɔ́ kɛkɛ́fɔ lɛ́ɛ ɖɔ “axásáxásá jɔhɔn”. Wɛnsagun susunɔ lɛ́ɛ ɖokpó ɖokpó ɖó nukún mɛ ɛnɛ: nukún mɛ nukɔntɔn ɔ́ nyí wɛnsagun susunɔ sín nukún mɛ, nukún mɛ wegɔ́ ɔ́ nyí gbɛtɔ́ sín nukún mɛ, atɔngɔ́ ɔ́ nyí kinnikínní sín nukún mɛ, bɔ ɛnɛgɔ́ ɔ́ nyí gangan sín nukún mɛ. Wɛnsagun susunɔ ɛnɛ lɛ́ɛ yi jɔhɔn mɛ: wɛnsagun susunɔ énɛ́ lɛ́ɛ ɔ́, nǔɖogbɛ e un ko mɔ ɖo Kebáa tɔ ɔ́ tó lɛ́ɛ wɛ. Nǔɖogbɛ lɛ́ɛ ɖo tɛn sɛ wɛ ɔ́, kɛkɛ́fɔ lɛ́ɛ kpó yě kpó nɔ́ ɖo yiyi wɛ. Yě vlɔ́n awa bo ná sí te sín kɔ́ mɛ ɔ́, kɛkɛ́fɔ lɛ́ɛ nɔ́ jó yě dó ǎ. Nǔɖogbɛ lɛ́ɛ nɔ te ɔ́, kɛkɛ́fɔ lɛ́ɛ lɔ nɔ nɔ te. Yě zɔn ɔ́, kɛkɛ́fɔ lɛ́ɛ lɔ nɔ zɔn, ɖó nǔɖogbɛ lɛ́ɛ sín jlǒ wɛ yě nɔ́ wa. Susu Mawu Mavɔmavɔ tɔn gosín sinsɛnxɔ ɔ́ lihɛ́nnu, bó yi cí wɛnsagun susunɔ lɛ́ɛ jí. Un ɖo te bó mɔ wɛnsagun susunɔ lɛ́ɛ vlɔ́n awa bó zɔn kpó kɛkɛ́fɔ lɛ́ɛ kpó. Yě wǎ nɔ te ɖo Mawu Mavɔmavɔ xwé ɔ́ sín hɔntogbó e kpan nukɔn zǎnzǎnhwe jí é, bɔ Mawu Izlayɛ́li tɔn ɔ́ sín susu ɖo kínkɔ́n wɛ ɖo ta yětɔn nu. Nǔɖogbɛ e un mɔ ɖo Mawu Izlayɛ́li tɔn glɔ́ ɖo Kebáa tɔ ɔ́ tó lɛ́ɛ wɛ. Un wá mɔ nǔ jɛ wú lo ɖɔ wɛnsagun susunɔ wɛ yě nyí. Yě mɛ ɖokpó ɖokpó ɖó nukún mɛ ɛnɛ, awa ɛnɛ, bɔ nǔ gbɛtɔ́ sín alɔ ɖɔhun ɖokpó ɖokpó ɖo nǔɖogbɛ lɛ́ɛ sín awa lɛ́ɛ ɖokpó ɖokpó glɔ́. Nukún mɛ ɖokpó ɔ́ wɛ yě ɖǒ xá nǔɖogbɛ e un mɔ ɖo Kebáa tɔ ɔ́ tó lɛ́ɛ. Wɛnsagun susunɔ lɛ́ɛ ɖokpó ɖokpó ɖo ali tɔn jí télélé, bó ɖo yiyi wɛ. Yɛ Mawu tɔn zé mì bó kplá mì yi Mawu Mavɔmavɔ xwé ɔ́ sín hɔntogbó e kpan nukɔn zǎnzǎnhwe jí ɔ́ jí. Un mɔ súnnu koatɔ́n (25) ɖo hɔntogbó ɔ́ jí. Un mɔ togun ɔ́ sín gǎn we ɖo tɛ́ntin yětɔn: Yaazaniya Azúu vǐ ɔ́ kpó Pelatiyahu Benaya ví ɔ́ kpó. Mawu ɖɔ nú mì ɖɔ: “Hwɛ gbɛtɔ́ ɔ́, yě mɛ e nɔ ɖo nǔ nyanya sín wě ɖe wɛ, bó nɔ́ ɖo kplɔ́n nyanya ná mɛ wɛ ɖo Jeluzalɛ́mu toxo ɔ́ mɛ lɛ́ɛ ɔ́, yě nɛ́. Yě nɔ́ ɖɔ: ‘Káká jɛ hwe ɖé nu ɔ́, mɛ ɖé sɔ́ ná gbá xɔ ɖo fí ǎ. Jeluzalɛ́mu toxo ɔ́ cí nǔsúnnúzɛ́n ɖɔhun bɔ mǐdɛɛ lɛ́ɛ nyí lan bó ɖ'é mɛ.’ Énɛ́ ɔ́ wú ɔ́, hwɛ gbɛtɔ́ ɔ́, nǔ e ɖo te kpɔ́n yě bɔ un ɖɔ nú we ɔ́, yi ɖɔ nú yě.” Énɛ́ ɔ́, yɛ Mawu Mavɔmavɔ tɔn wa jǐ ce, bó ɖɔ nyi ní ɖɔ nǔ yě ɖɔ: “Xó e Mawu Mavɔmavɔ ɖɔ ɔ́ ɖíe: Izlayɛ́li togun e mi, un tunwun nǔ e ɖɔ wɛ mi ɖe ɔ́, bó tunwun linlin e ɖo ayi mitɔn mɛ wá wɛ é. Mi hu mɛ ɖo toxo ɔ́ mɛ, káká bɔ cyɔ kpé ali kpá ali kpá. Énɛ́ ɔ́ wú wɛ nyɛ Aklúnɔ Mavɔmavɔ ɖɔ: nǔgbó wɛ, Jeluzalɛ́mu toxo ɔ́ cí nǔsúnnúzɛ́n ɖɔhun lě e mi ɖɔ gbɔn é; amɔ̌, lan e ɖ'é mɛ lɛ́ɛ ɔ́, mɛ e mi hu lɛ́ɛ wɛ, ényí midɛɛ lɛ́ɛ wɛ ǎ. Midɛɛ lɛ́ɛ ɔ́, un ná nya mi tɔ́n. Mi ɖo xɛsi ɖi nú ahwanfunfun wɛ. Abǐ Ahwan ɔ́ ná sɛ́ dó mi wɛ nyɛ ka ɖe. Nyɛ Aklúnɔ Mavɔmavɔ wɛ ɖɔ mɔ̌ nú mi. Un ná nya mi tɔ́n sín toxo ɔ́ mɛ; un ná jó mi nú akɔta ɖěvo lɛ́ɛ. Un ná dɔn tó nú mi. Mi ná kú ɖo ahwangbénu ɖo Izlayɛ́li yíkúngban jí fí; un ná ɖó hwɛ nú mi, bɔ mi ná tunwun ɖɔ nyɛ wɛ nyí Mawu Mavɔmavɔ. Toxo élɔ́ ná nyí nǔsúnnúzɛ́n nú mi, bónú mi ná nyí lan bo nɔ mɛ ǎ. Izlayɛ́li yíkúngban jí wɛ un ná dɔn tó nú mi ɖe. Bɔ mi ná tunwun ɖɔ nyɛ wɛ nyí Mawu Mavɔmavɔ; mi xwedó nǔ e un zɔ́n mi lɛ́ɛ ǎ, mi nyi sɛ́n ce lɛ́ɛ ǎ; lo ɔ́, mi xwedó togun e lɛ́ lɛ̌ dó mi lɛ́ɛ sín walɔ.” Hwenu e un ɖo xó e Mawu ɖɔ nú mì lɛ́ɛ ɖɔ nú yě wɛ ɔ́, Pelatiyahu Benaya ví ɔ́ kú. Nyɛ ɖésú jɛ ayǐ, bó xwe agbɔ̌nnusú do, bó sú xó bó ɖɔ: “Áo, Aklúnɔ Mavɔmavɔ! A jlǒ ná sú Izlayɛ́li ví e kpo lɛ́ɛ sín kún dó wɛ a?” Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ: “È nɔ ɖɔ: Izlayɛ́li ví e ahwan wlí yi to ɖěvo mɛ lɛ́ɛ ɔ́, yě ní nɔ zɔ dɔ̌n ɖó to élɔ́ ɔ́, mǐdɛɛ lɛ́ɛ wɛ è nǎ bɔ é nyí mǐtɔn. Hwɛ gbɛtɔ́ ɔ́, a tunwun mɛ e ɖɔ mɔ̌ ná wɛ Jeluzalɛ́munu lɛ́ɛ ɖe ɔ́ a? Nɔví towe lɛ́ɛ wɛ; nɔví towe jiji lɛ́ɛ wɛ; Izlayɛ́li togun ɔ́ ɖɔ mɔ̌ ná wɛ Jeluzalɛ́munu lɛ́ɛ ɖe. Din ɔ́, ɖɔ nú mɛ e kpó hwi kpó ahwan wlí yi to ɖěvo mɛ lɛ́ɛ ɖɔ nyɛ Aklúnɔ Mavɔmavɔ ɖɔ: ‘Un sɛ́ mi dó zɔ zɔ; un gba mi dó kpé to ɖěvo mɛ to ɖěvo mɛ nǔgbó, amɔ̌, un ɖo kpɔ́ xá mi ɖo fí e mi ɖe lɛ́ɛ xwé ce gbe wɛ mi ɖe ɖɔhun.’ Hǔn, bo ɖɔ nú yě ɖɔ nyɛ Aklúnɔ Mavɔmavɔ ɖo ɖiɖɔ nú mi wɛ ɖɔ: ‘Un ná cyán mi sín akɔta e tɛ́ntin mi ɖe lɛ́ɛ mɛ; un ná kplá mi sín to e mɛ un gba mi dó gbɔn lɛ́ɛ mɛ. Un ná kplé mi bó ná zé Izlayɛ́li to ɔ́ nú mi Ée mi ná wá é ɔ́, mi ná sú vodún sinsɛn alɔkpa alɔkpa e ɖo to ɔ́ mɛ lɛ́ɛ bǐ dó, bó ná sú nǔ baɖabaɖa alɔkpa alɔkpa e ko sixú tíin ɖo to ɔ́ mɛ lɛ́ɛ bǐ dó. Un ná ná ayixa yɔ̌yɔ́ mi, un ná ná linlin yɔ̌yɔ́ mi. Un ná ɖe ayixa mitɔn e syɛ́n awǐnnya ɖɔhun ɔ́ síin, bó ná zé ayixa e nɔ se tónú é ɖó tɛn tɔn mɛ. Énɛ́ ɔ́, mi ná xwedó nǔ e un zɔ́n lɛ́ɛ, mi ná wlí ayi sɛ́n ce lɛ́ɛ wú, bó ná nyi, bɔ mi ná nyí togun ce, bɔ un ná nyí Mawu mitɔn. Amɔ̌, mɛ e nɔ ɖo vodún sɛn wɛ, bó nɔ́ ɖo nǔ baɖabaɖa lɛ́ɛ dó sin wɛ, bó nɔ́ ɖo nǔ e ayi yětɔn ɖɔ nú yě lɛ́ɛ kɛ́ɖɛ́ wa wɛ lɛ́ɛ ɔ́, walɔ yětɔn énɛ́ lɛ́ɛ ji nǔɖé ɔ́, yě ná sɔ́ kpan.’ Xó e nyɛ Aklúnɔ Mavɔmavɔ mitɔn ɖɔ ɔ́ nɛ́.” Hwe énɛ́ nu ɔ́, wɛnsagun susunɔ lɛ́ɛ vlɔ́n awa yětɔn lɛ́ɛ, bɔ kɛkɛ́fɔ lɛ́ɛ lɔ jɛ wǔ dǎn jí. Susu Mawu tɔn ɖo kínkɔ́n wɛ ɖo wɛnsagun susunɔ lɛ́ɛ ta nu. Énɛ́ ɔ́ gúdo ɔ́, susu Mawu Mavɔmavɔ tɔn sí te sín Jeluzalɛ́mu toxo ɔ́ tɛ́ntin, bó yi nɔ te ɖo só ɖé jí, ɖo zǎnzǎnhwe jí nú toxo ɔ́. Nǔmimɔ ɖokpó énɛ́ ɔ́ mɛ ɔ́, yɛ Mawu tɔn zé mì, bó lɛ́ kɔ nú mì yi mɛ e ahwan wlí yi ɖó Babilɔ́nu lɛ́ɛ mɛ, bɔ nǔmimɔ ɔ́ nɔ te. Ée un wá nyiɖée mɛ ɔ́, un wlí nǔ e Mawu Mavɔmavɔ xlɛ́ mì ɖo nǔmimɔ ɔ́ mɛ ɔ́ ɖɔ nú mɛ e kpó nyi kpó ahwan wlí yi Babilɔ́nu lɛ́ɛ. Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, mɛ e ma nɔ se tónú ǎ lɛ́ɛ tɛ́ntin wɛ a ɖe. Yě ɖó nukún yě ká nɔ́ mɔ nǔ ǎ; yě ɖǒtó, yě ká nɔ́ se nǔ ǎ. Yě tlí tó ɖésú. Din ɔ́, hwɛ gbɛtɔ́ ɔ́, sɔ́ nǔ bó dó agban towe mɛ e ahwan nya sín to tɔn mɛ é ɖɔhun; sɔ́ nǔ có zǎn ní kú; mɛ bǐ nukún mɛ wɛ a ka ná sɔ́ nǔ ɖe. Afɔ nyɔ́ ɔ́, énɛ́ ɔ́ sixú ɖe xlɛ́ yě ɖɔ yě kún nɔ́ se tónú ó. A nǎ ɖe agban ɔ́ tɔ́n kéze bɔ mɛ bǐ ná mɔ. É su gbadanu ɔ́, a nǎ sɔ́ nǔ bó ɖidó mɛ e ahwan nya sín to tɔn mɛ é ɖɔhun. A nǎ tɔ́n ahohó e è mɛ lɛ́ lɛ̌ dó toxo ɔ́ é ɖo mɛ bǐ nukún mɛ, bó ná bɛ́ agban towe lɛ́ɛ gbɔn fínɛ́. A nǎ tɔ́n, bó bɛ́ agban towe lɛ́ɛ ɖó abɔ̌ta ɖo mɛ bǐ nukún mɛ. A nǎ blá nukún mɛ, bó ná mɔ fí e yi wɛ a ɖe ɔ́ ǎ. Nǔ e ɖo Izlayɛ́li togun ɔ́ ná gbo wɛ ɔ́ hwi wɛ ná nyí xlɛ̌ tɔn nú yě.” Un bló nǔ e Mawu zɔn mì é: un bɛ́ nǔ ce lɛ́ɛ tɔ́n kéze, bó dó agban mɛ e ahwan nya sín to tɔn mɛ é ɖɔhun; ée gbadanu su é ɔ́, un tɔ́n dǒ ɔ́ bó ɖíɖá agban ɔ́ ɖó abɔ̌ta, bó ɖidó zǎn mɛ ɖo mɛ bǐ nukún mɛ. Ayǐhɔ́ngbe tɔn zǎnzǎn ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, Izlayɛ́li ví lɛ́ɛ ɔ́, nǔ tónúmasetɔ́ énɛ́ lɛ́ɛ ɔ́, yě má kan nǔ e wú a ɖo mɔ̌ bló wɛ ɔ́ byɔ́ we a? Din ɔ́, yǐ gbe nú yě ɖɔ: ‘Aklúnɔ Mavɔmavɔ wɛ ɖɔ xó dó Jeluzalɛ́mu xɔ́sú ɔ́ kpó togun Izlayɛ́li tɔn e kpo ɖo Jeluzalɛ́mu toxo ɔ́ mɛ dɔ̌n lɛ́ɛ bǐ kpó wú.’ Ɖɔ nú yě ɖɔ: ‘Xlɛ̌ ɖokpó wɛ un nyí nú mi.’ Ɖó nǔ e un bló ɔ́, nǔ mɔ̌hunkɔ ná gbo yě; è nǎ wlí yě yi to ɖěvo mɛ; è nǎ nya yě sín to yětɔn mɛ. Axɔ́sú e ɖo yě nu ɔ́ ná dó agban tɔn ɖó abɔ̌ta zǎn mɛ, bó tɔ́n sín toxo ɔ́ mɛ. È nǎ ɖe ali dó dǒ ɔ́ mɛ, bɔ é ná mɔ ali bo tɔ́n. É ná blá nukún mɛ, bó ná mɔ fí e yi wɛ é ɖe ɔ́ ǎ. Bɔ nyɛ Mawu Mavɔmavɔ ɔ́, un ná ɖó mɔ n'i, bó ná wlí i, bó ná kplá ɛ yi Babilɔ́nunu lɛ́ɛ sín to mɛ, bɔ é ná kú ɖo fínɛ́. É sɔ́ ná mɔ to tɔn ɖó nukún wú gbeɖé cóbó kú ǎ. Un ná gba mɛ tɔn lɛ́ɛ dó gbɔn wɛ̌kɛ́zo ɛnɛ lɛ́ɛ mɛ: sɔ́ja e nɔ cɔ́ ɛ lɛ́ɛ wɛ a, ahwangɔnu tɔn wɛ a, un ná gba yě bǐ dó, bó ná zé hwǐ ce bó jɛ yě gúdo. Ényí un ko gba yě dó gbɔn akɔta lɛ́ɛ mɛ, gbɔn to ɖěvo ɖěvo lɛ́ɛ mɛ ɔ́, yě ná tunwun lo ɖɔ nyɛ wɛ nyí Mawu Mavɔmavɔ. Ɖó un ná jó súnnu ɖé lɛ́ɛ dó, bɔ yědɛɛ lɛ́ɛ ná gán ɖo ahwan ɔ́ mɛ; adɔ ná hu yě ǎ, jɛmɛjí ná hu yě ǎ. Yě ná nɔ gbɛ, bó ná wlí nǔ baɖabaɖa e yě dó sin lɛ́ɛ ɖɔ gbɔn akɔta e tɛ́ntin un ná gba yě dó gbɔn lɛ́ɛ. Énɛ́ ɔ́, akɔta énɛ́ lɛ́ɛ lɔ ná tunwun ɖɔ nyɛ wɛ nyí Mawu Mavɔmavɔ.” Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ ɔ́, a ɖo nǔ ɖu wɛ ɔ́, a nǎ ɖo sísɔ́sísɔ́ wɛ ɖo kú nukɔn; a ɖo sin nu wɛ ɔ́, a nǎ nɔ́ ɖo xɛsi jí bó ná nɔ́ ɖo adohu adohu jí; énɛ́ gúdo ɔ́, a nǎ ɖɔ nú Izlayɛ́li ví lɛ́ɛ ɖɔ: Jeluzalɛ́munu e mi, xó e Aklúnɔ Mavɔmavɔ ɖɔ dó Jeluzalɛ́munu e kpo ɖo Izlayɛ́li yíkúngban jí lɛ́ɛ wú ɔ́ ɖíe: yě ná ɖu nǔ kpó xɛsi kpó, bó ná nu sin wǔbláwúblá, ɖó è nǎ gba to yětɔn bǐ hánnyá, nǔɖé sɔ́ ná kpo ɖo to ɔ́ mɛ ǎ, ɖó adǎnú kɛ́ɖɛ́ wɛ mɛ e ɖo to ɔ́ mɛ lɛ́ɛ nɔ́ wa. È nǎ nya mɛ lɛ́ɛ bǐ sín toxo lɛ́ɛ mɛ, bɔ to ɔ́ bǐ ná húzú gbětótló. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.” Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ ɔ́, étɛ́wú Izlayɛ́li ví lɛ́ɛ ká nɔ dó acagbe, bó nɔ́ ɖɔ: ‘Azǎn ɖo azǎn jí jɛ wɛ, bɔ nǔ e è ka mɔ nǔ bó ɖɔ é ná jɛ lɛ́ɛ ɔ́, ɖě ɖo jijɛ wɛ ǎ.’ Din ɔ́, a nǎ ɖɔ nú yě ɖɔ nyɛ Aklúnɔ Mavɔmavɔ ɔ́, un ná sú acagbe énɛ́ lɛ́ɛ dó; è sɔ́ ná se ɖě ɖo Izlayɛ́li ǎ. A ka ná ɖɔ nú yě ɖɔ: ‘Hwenu e nǔ e è mɔ nǔ bó ɖɔ lɛ́ɛ bǐ ná jɛ dó é ɖíe.’ Mɛ ɖé sɔ́ ná ɖó adingban ɖɔ émí mɔ nǔ ǎ; nǔ e má ná jɛ ǎ ɔ́, è sɔ́ ná ɖɔ é ná jɛ ɖo togun Izlayɛ́li tɔn tɛ́ntin ǎ Ɖó nyɛ Mawu Mavɔmavɔ ɔ́, un ná ɖɔ xó, bɔ nǔ e un ná ɖɔ ɔ́ ná jɛ; é ná gblá ǎ. Nǔgbó wɛ, mi mɛ tónúmasetɔ́ élɔ́ lɛ́ɛ ɔ́, gbɛ hwenu mitɔn wɛ nǔ e un ɖɔ dó mi wú lɛ́ɛ ná jɛ. Nyɛ Aklúnɔ Mavɔmavɔ wɛ ɖɔ mɔ̌.” Énɛ́ gúdo ɔ́, Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ ɔ́, xó e Izlayɛ́li ví lɛ́ɛ nɔ́ ɖɔ é ɖíe: yě nɔ́ ɖɔ: ‘Nǔ e é nɔ́ mɔ lɛ́ɛ ɖo nǎ jɛ wɛ égbé abǐ sɔ ǎ. Káká nukɔnmɛ ɖɔ xó dó wɛ è ɖe.’ Énɛ́ ɔ́ wútu ɔ́, ɖɔ nú yě ɖɔ: Nyɛ Aklúnɔ Mavɔmavɔ ɔ́, un ná ɖó yibowá nú xó un ɖɔ lɛ́ɛ ɖěbǔ ǎ. Nyɛ Aklúnɔ Mavɔmavɔ wɛ ɖɔ mɔ̌.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, yě mɛ e nɔ ɖo yěɖée mɔ dó mɔ gbeyíɖɔ Izlayɛ́li tɔn wɛ, bó nɔ́ ɖo nǔ e wá ayi yětɔn mɛ lɛ́ɛ ɖɔ wɛ, bó nɔ́ ɖɔ nyi wɛ ɖɔ xó nú émí lɛ́ɛ ɔ́, ɖɔ nú yě ɖɔ yě ní ɖótó nyɛ Mawu Mavɔmavɔ xó. Xó e nyɛ Aklúnɔ Mavɔmavɔ ɖɔ ɔ́ ɖíe: heelú gbeyíɖɔ xlonɔ énɛ́ lɛ́ɛ; nǔ e wá ayi yětɔn mɛ ɔ́ wɛ yě nɔ́ ɖɔ; ɖó nyɛ ɖe nǔɖé xlɛ́ yě ǎ. Áo Izlayɛ́li, gbeyíɖɔ towe lɛ́ɛ cí ayǐsájɛ e ɖo sa ɖi gbɔn xwé gbigba gbe wɛ lɛ́ɛ ɖɔhun. Yě yi bló fí e ahohó ɔ́ mu ɖe lɛ́ɛ ɖó ǎ; yě mɛ dǒ lɛ́ lɛ̌ dó mi, bónú mi ná gló ahwan azǎn e gbe Mawu Mavɔmavɔ ná dɔn tó nú mi é ǎ. Nǔ wɛ yě nɔ́ kpa ɖɔ bó nɔ́ ɖɔ émí mɔ nǔ; nǔ e yě nɔ́ ɖɔ é ná wá jɛ lɛ́ɛ ɔ́, adingban kɛ́ɖɛ́ wɛ; adingban ɖó wɛ yě nɔ́ ɖe bó nɔ́ ɖɔ: ‘Mawu Mavɔmavɔ ɖɔ lě’; nyɛ Mawu Mavɔmavɔ ka zɔ́n nǔɖé yě ǎ. Yě nɔ́ wa mɔ̌, bó nɔ́ ɖo te nɔ kpɔ́n wɛ ɖɔ nyɛ ná wa nǔ dó ɖe xlɛ́ ɖɔ émí ɖɔ nǔgbó. Lo ɔ́, nǔ e mɔ wɛ mi nɔ ɖe, bó nɔ́ ɖo ɖiɖɔ wɛ énɛ́ lɛ́ɛ ɔ́, mi ɖésú má tunwun ɖɔ nǔ kpa ɖɔ wɛ émí ɖe a? Mi nɔ ɖó adingban nú mɛ lɛ́ɛ, bó nɔ́ ɖɔ Mawu Mavɔmavɔ ɖɔ lě, nyɛ ka ɖɔ xó ɖé nú mi ǎ. Énɛ́ ɔ́ wú ɔ́, un ɖo ɖiɖɔ nú mi wɛ: Mi nɔ ɖó adingban dó nu ce, mi nɔ́ kpa xó ɖɔ dó nu ce, bó nɔ́ ɖɔ nǔ wɛ émí mɔ; énɛ́ wú ɔ́, un ná húzú kpan nukɔn mi lo. Xó e nyɛ Aklúnɔ Mavɔmavɔ ɖɔ ɔ́ nɛ́. “Un ná wa nǔ xá gbeyíɖɔ e nɔ́ ɖo nǔ kpa ɖɔ wɛ, bó nɔ́ ɖɔ nǔ wɛ émí mɔ lɛ́ɛ. Yě ná nɔ togun ce mɛ ǎ. È nǎ wlán nyǐkɔ yětɔn dó Izlayɛ́li ví lɛ́ɛ mɛ ǎ; yě ná lɛ́ kɔ wá Izlayɛ́li yíkúngban ɔ́ jí ǎ. Énɛ́ ɔ́, yě ná tunwun ɖɔ nyɛ wɛ nyí Aklúnɔ Mavɔmavɔ. “Gbeyíɖɔnyíjɛtɔ́ lɛ́ɛ flú togun ce, bɔ nǔ ná bó ɖo gblěgblé wɛ ɔ́, yě nɔ́ ɖɔ nǔ ɖo nyǐnyɔ́ wɛ. Togun ce nɔ mɛ dǒ, bɔ yědɛɛ nɔ́ wá tlɛ́ kpowun. Ɖɔ nú mɛ e ɖo dǒ tlɛ́ wɛ lɛ́ɛ ɖɔ dǒ ɔ́ ná mu bǐ. Jǐ ɖaxó ɖokpó ná wɔ́, kɛ́njí ná ja, bɔ jɔhɔn ɖaxó ɖokpó ná nyi, bɔ dǒ ɔ́ ná mu; énɛ́ ɔ́, è nǎ kan nǔ byɔ́ mi ɖɔ: ‘Bɔ étɛ́ mi ka tlɛ́ dǒ ɔ́ dó wá ná lo?’ Nǔ e ɖɔ nú mi wɛ nyɛ Aklúnɔ Mavɔmavɔ ɖe ɔ́ ɖíe: Un ɖo xomɛsin jí; un ná sɛ́ jɔhɔn ɖaxó ɖé dó, un ná sɛ́ jǐ ɖaxó ɖé dó. Kɛ́njí ná ja kpó hlɔ̌nhlɔ́n kpó, bó ná hɛn nǔ bǐ gblé. Un ná mu dǒ e mi tlɛ́ é, un ná mu sín aga káká yi do, bɔ è nǎ mɔ nǔ jɛ dodó ɔ́ wú. É ná mu jɛ mi jí, bó ná vó mi. Énɛ́ ɔ́, mɛ bǐ ná tunwun ɖɔ nyɛ wɛ nyí Mawu Mavɔmavɔ. Un ná wa dǒ ɔ́ kpo mɛ e tlɛ́ lɛ́ɛ kpó sín nǔ lě e é jló mì gbɔn é, ɖó adǎn e jí un ná ɖe ɔ́ wú. Un ná ɖɔ nú mi ɖɔ: ‘Acɔnkwín! Dǒ ɔ́ sɔ́ ɖo te ǎ, mɛ e tlɛ́ lɛ́ɛ lɔ sɔ́ ɖe ǎ. Gbeyíɖɔnyíjɛtɔ́ Izlayɛ́li tɔn e nɔ ɖo lě e nǔ ná wá nɔ gbɔn nú Jeluzalɛ́mu é ɖɔ wɛ lɛ́ɛ ɔ́, yě ɖě sɔ́ ɖe ǎ. Ɖ'ayǐ ɔ́, yě nɔ́ mɔ nǔ bó nɔ́ ɖɔ nǔ bǐ ɖo yiyi wɛ ganjí; lo ɔ́, nǔ ɖokpó ká ɖo yiyi wɛ ǎ.’ Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu ɖɔ nú mì ɖɔ: “Din ɔ́, hwɛ gbɛtɔ́ e, nyɔ̌nu Izlayɛ́li tɔn e nɔ ɖo nǔ e ɖo ayi yětɔn mɛ lɛ́ɛ ɖɔ wɛ, bó nɔ́ ɖɔ émí ɖo Mawu wɛn dó wɛ lɛ́ɛ ɔ́, ɖe yě gba ɖo nyǐkɔ ce mɛ. Ɖɔ nú yě ɖɔ nyɛ Aklúnɔ Mavɔmavɔ ɖɔ: Heelú mi! Mi nɔ lɔn kan, bó nɔ́ sin dó alɔgókɔ nú mɛ; mi nɔ lɔn tablá mɛxó tɔn kpó yɔkpɔ́vú tɔn kpó, bó nɔ́ xwe nú yě; mi nɔ bló mɔ̌, bó ná sixú wlí lǐndɔ̌n yětɔn. Mi vɛdó ɖɔ émí ná dó kan mɛ e ɖo togun ce mɛ lɛ́ɛ sín lǐndɔ̌n, bó ná hwlɛ́n midɛɛ lɛ́ɛ tɔn gán wɛ a? Mi nɔ yí jinukún alɔgogo kpɛɖé, abǐ wɔ̌xúxú gǒ ɖokpó ɖé ɖo mɛ lɛ́ɛ sí, bó nɔ́ dó hɛn nyǐkɔ ce blí ɖo togun ce mɛ. Mi nɔ yí nǔ énɛ́ lɛ́ɛ, bó nɔ́ hu mɛ e è ma ɖó ná hu ǎ lɛ́ɛ, bó nɔ́ jó mɛ e è ɖǒ ná hu lɛ́ɛ dó nyi gbɛ. Mi nɔ ɖó adingban nú togun ce bɔ yě lɔ nɔ ɖi nǔ nú mi. Énɛ́ ɔ́ wú ɔ́, nyɛ Aklúnɔ Mavɔmavɔ ɔ́, un ɖo ɖiɖɔ nú mi wɛ; un gbɛ́ wǎn nú kan mitɔn e mi nɔ dó wlí mɛ ná xɛ ɖɔhun lɛ́ɛ; un ná hɛn bǐ wɛ́n; un ná ɖe lǐndɔ̌n e mi wlí lɛ́ɛ nyi te. Un ná vún tablá lɛ́ɛ; un na bló mɔ̌ bó ná ɖe togun ce sín acɛ mitɔn mɛ. Yě sɔ́ ná nyí xɛ bó ná nɔ aja mɛ nú mi ǎ. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ. Mi nɔ ɖó adingban dó dó awakanmɛ kú nú mɛ e nɔ wa nǔ jlɔ́jlɔ́ lɛ́ɛ; nyɛ ka lin nǔ nyanya ɖěbǔ dó yě wú ǎ. Mi nɔ dó wǔsyɛ́n lanmɛ nú mɛ nyanya lɛ́ɛ, bɔ yě nɔ́ lɛ́ ɖó kan dó gbɛ nyanya zínzán wú; gbɛ yětɔn wɛ mi ɖó axɔ́ nu. Din ɔ́, nǔmimɔ e yě nɔ́ kpa ɖɔ lɛ́ɛ, kpó nǔ e mi nɔ ɖɔ yě ná wá jɛ sɔ lɛ́ɛ bǐ kpó sín xó fó lo. Un ná ɖe togun ce sín acɛ mitɔn mɛ. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.” Tomɛxó Izlayɛ́li tɔn ɖé lɛ́ɛ wá gɔ̌n ce gbe ɖokpó, bó jínjɔ́n ayǐ ɖo nukɔn ce; énɛ́ ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ ɔ́, hwi ɖɔ xó ná wɛ un ɖe; yě mɛ énɛ́ lɛ́ɛ ɔ́, vodún yětɔn lɛ́ɛ jí jɛ́n ayi yětɔn ɖe. Nǔ e dɔn yě dó hwɛ mɛ lɛ́ɛ wɛ yě jó yěɖée dó ná. Un ná jó nyiɖée dó bɔ yě ná nɔ́ wá kan nǔ byɔ́ mì wɛ yě vɛdó a? Énɛ́ ɔ́ wú ɔ́, a nǎ ɖɔ xó nú yě; a nǎ ɖɔ nú yě ɖɔ: Xó e Aklúnɔ Mavɔmavɔ ɖɔ ɔ́ ɖíe: Ényí Izlayɛ́li ví e vodún tɔn jí jɛ́n ayi tɔn nɔ ɖe, bɔ é jó éɖée dó nú nǔ e nɔ dɔn ɛ dó hwɛ mɛ lɛ́ɛ ɖě wá kan nǔ byɔ́ gbeyíɖɔ ce lɛ́ɛ ɖě ɔ́, nyɛ Mawu Mavɔmavɔ ɖésú wɛ ná yí gbe n'i. Lě e vodún e é nɔ́ sɛn lɛ́ɛ sukpɔ́ gbɔn ɔ́ wɛ un ná kpɔ́n dó ɖɔ xó n'i. Gbe e un ná yí n'i ɔ́ ná hɛn hǔn nú Izlayɛ́li ví e jó mì dó, bó ɖó kan dó vodún yětɔn lɛ́ɛ wú lɛ́ɛ bǐ. Énɛ́ wú wɛ a nǎ ɖɔ nú Izlayɛ́li ví lɛ́ɛ ɖɔ: ‘Aklúnɔ Mavɔmavɔ ɖo byɔ̌byɔ́ mi wɛ ɖɔ mi ní húzú jijɔ, bó jó vodún mitɔn lɛ́ɛ dó, bó lɛ́ kɔ sín walɔ baɖabaɖa mitɔn lɛ́ɛ bǐ gúdo.’ “Ɖó ényí Izlayɛ́li ví ɖé abǐ jǒnɔ e ɖo Izlayɛ́li to ɔ́ mɛ lɛ́ɛ ɖě jó mì dó, bó sɔ́ ayi tɔn ɖó vodún tɔn lɛ́ɛ jí, bó jó éɖée dó nú nǔ e nɔ dɔ́n ɛ dó hwɛ mɛ lɛ́ɛ ɖě wá gbeɖé, bó wá kan nǔ byɔ́ gbeyíɖɔ ce lɛ́ɛ ɖě, bó ná tunwun jlǒ ce ɔ́, nyɛ Mawu Mavɔmavɔ ɖésú wɛ ná yí gbe n'i! Un ná wa nǔ xá ɛ, bɔ è nǎ nɔ́ dó gesí i, dó dó lǒ. Un ná ɖe e sín togun ce mɛ. Un bló mɔ̌ ɔ́, mi ná tunwun ɖɔ nyɛ wɛ nyí Mawu Mavɔmavɔ. “Ényí gbeyíɖɔ ɖé jó éɖée dó, bónú mɛ ɖé dɔn ɛ d'é mɛ, bónú é ɖésú yí gbe ɔ́, nyɛ Mawu Mavɔmavɔ ná dɔn ɛ d'é mɛ d'é jí, bɔ é ná bú ali; énɛ́ ɔ́, alɔ ce ná jɛ wǔ tɔn, bɔ un ná ɖe e sín togun ce Izlayɛ́li mɛ. Hǔn gbeyíɖɔ énɛ́ ɔ́ kpódó mɛ e wá kan nǔ byɔ́ ɛ ɔ́ kpó bǐ wɛ kplé bó hu hwɛ nɛ́, bɔ bǎ tɔn ná xo yě bǐ. Nú un bló mɔ̌ ɔ́, Izlayɛ́li ví lɛ́ɛ sɔ́ ná nɔ zɔ nú mì bó bú ali ɖě ǎ; yě sɔ́ ná wa nǔ nyi do, bó ná húzú mɛ blíblí ǎ; lo ɔ́, yě ná nyí togun ce, bɔ un nǎ nyí Mawu yětɔn. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ényí to ɖé tíin, bɔ mɛ e ɖ'é mɛ lɛ́ɛ hu hwɛ dó mì, bó jó mì dó ɔ́, alɔ ce ná jɛ yě wǔ. Un ná hɛn nǔɖuɖu e yě kplé ɖó ayǐ lɛ́ɛ bǐ gblé; un ná sɛ́ adɔ dó to ɔ́ mɛ, bɔ gbɛtɔ́ kpó kanlin kpó bǐ ná kú. Nɔwée kpó Daniyɛ́li kpó Jɔ̌bu kpó ná bó ɖo to ɔ́ mɛ ɔ́, gbejí e yě ɖe nú mì ɔ́ jɛ́n ná zɔ́n bɔ yě ná hwlɛ́n gbɛ yěɖée tɔn gán. Xó e nyɛ Aklúnɔ Mavɔmavɔ ɖɔ ɔ́ nɛ́. “É gló ɔ́, un ná sɛ́ adǎnkanlin lɛ́ɛ dó to ɔ́ mɛ, bɔ yě ná hu mɛ e ɖo to ɔ́ mɛ lɛ́ɛ bǐ, bɔ mɛ ɖěbǔ sɔ́ ná glá bó byɔ́ to ɔ́ mɛ ǎ. To ɔ́ ná húzú gbětótló ɖó adǎnkanlin lɛ́ɛ wútu. Ényí Nɔwée kpó Daniyɛ́li kpó Jɔ̌bu kpó ɖo fínɛ́ ɔ́, yědɛɛ lɛ́ɛ kɛ́ɖɛ́ jɛ́n ná nɔ gbɛ. Nyɛ Aklúnɔ Mavɔmavɔ ɔ́, un xwlé nyiɖée nú mi, yě ná kpé wú bó hwlɛ́n vǐ yě ɖésúnɔ tɔn gán lɔ ǎ. To ɔ́ bǐ wɛ ná húzú gbětótló. “É gló ɔ́, un ná sɛ́ ahwan dó to ɔ́ mɛ, bó ná ná gbe sɔ́ja lɛ́ɛ, bɔ yě ná gbɔn to ɔ́ mɛ bó sú gbɛtɔ́ kpó kanlin kpó bǐ kún dó. Ényí yě mɛ atɔn e sín nyǐkɔ un ylɔ́ lɛ́ɛ ɖo fínɛ́ ɔ́, yědɛɛ kɛ́ɖɛ́ jɛ́n ná nɔ gbɛ. Nyɛ Aklúnɔ Mavɔmavɔ ɔ́, un xwlé nyiɖée nú mi, yě ná kpé wú bó hwlɛ́n vǐ yětɔn súnnu abǐ nyɔ̌nu gán lɔ ǎ. “É gló ɔ́, un ná sɛ́ jɛmɛjí dó toxo ɔ́ mɛ. Un ná sɔ́ xomɛsin ce dó wa nǔ xá to ɔ́, bó sú gbɛtɔ́ kpó kanlin kpó bǐ kún dó. Ényí Nɔwée kpó Daniyɛ́li kpó Jɔ̌bu kpó ɖo toxo ɔ́ mɛ ɔ́, gbejí e yě ɖe nú mì ɔ́ jɛ́n ná zɔ́n, bɔ yě ná hwlɛ́n gbɛ yěɖée tɔn gán. Nyɛ Aklúnɔ Mavɔmavɔ ɔ́, un xwlé nyiɖée nú mi, yě ná kpé wú bó hwlɛ́n vǐ yětɔn súnnu abǐ nyɔ̌nu gán ǎ.” Énɛ́ ɔ́ gúdo ɔ́, Aklúnɔ Mavɔmavɔ ɖɔ nú mì ɖɔ: “Awě ɖaxó ɛnɛ énɛ́ lɛ́ɛ bǐ wɛ un sɛ́ dó Jeluzalɛ́mu: un sɛ́ ahwan dó, un sɛ́ adɔ dó, un sɛ́ adǎnkanlin kpó jɛmɛjí kpó dó, bó ná sú gbɛtɔ́ kpó kanlin kpó bǐ kún dó ɖo toxo ɔ́ mɛ. É ka ɖo mɔ̌ có é ná kpo súnnu kpó nyɔ̌nu kpó ɖé lɛ́ɛ, bɔ è nǎ ɖe yě tɔ́n sín toxo ɔ́ mɛ; yě ná wá mi gɔ́n ɖo Babilɔ́nu fí; yě wá mi gɔ́n bónú mi mɔ ninɔmɛ yětɔn kpó walɔ yětɔn nyanya lɛ́ɛ kpó ɔ́, mi ná mɔ ɖɔ awě e un sɛ́ dó Jeluzalɛ́mu lɛ́ɛ kpó nǔ e un wa xá ɛ lɛ́ɛ kpó ɔ́, hwɛ ce jɔ. Mi ko mɔ ninɔmɛ yětɔn kpó walɔ yětɔn nyanya ɔ́ kpó ɔ́, mi ná mɔ ɖɔ nǔ e un wa xá Jeluzalɛ́mu toxo ɔ́ é ɔ́, hwɛ ce jɔ. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, étɛ́ vǐwuntín ka dó nyɔ́ hú atín e ɖo zunkan mɛ lɛ́ɛ bǐ? Étɛ́ vǐwuntín sín ala lɛ́ɛ ka dó nyɔ́ hú atín e ɖo zunkan mɛ lɛ́ɛ bǐ sín ala? È nɔ sixú zé atín énɛ́ dó kpa nǔɖé ná a? È nɔ sixú zé dó kpa só ná vɔ́vɔ́, bó zé nǔ kplá kɔ a? Éeǒ! Nǔ ɖokpó e è nɔ dó wa ɔ́ jɛ́n nyí è nɔ dó zo. É ji zo ɔ́, nuvínu tɔn we lɛ́ɛ kpó tɛ́ntin tɔn kpó bǐ wɛ nɔ́ ji zo, bó nɔ́ kɔn afín. È sɔ́ sixú dó wa nǔ ɖěvo a? Hwenu e vǐwuntín ɔ́ ɖo ganjí é ɔ́, è ko tunwun nǔ e è nǎ zé dó wa ná lɔ é ǎ, ani ka sɔ́ nyí hwenu e é ji zo ɔ́ tɔn? É kó lɛ́ nylá bǐ nɛ́ hǔn! È sɔ́ sixú sɔ́ dó wa nǔɖé ná ǎ. “Nǔ e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Vǐwuntín nyɔ́ hú atín ɖě lɛ́ɛ ée ɖo zunkan mɛ é ǎ; myɔ mɛ wɛ xó tɔn nɔ́ wá fó dó. Mɔ̌ wɛ Jeluzalɛ́munu lɛ́ɛ xó ná fó gbɔn; un ná wa nǔ xá yě. È ko ɖe yě tɔ́n sín myɔ ɔ́ mɛ ɖokpó, lo ɔ́, myɔ ɔ́ jɛ́n ɖo yě ná fyɔ́ wɛ. Ée un ná wa nǔ xá yě gbɔn mɔ̌ ɔ́, mi ná tunwun ɖɔ nyɛ wɛ nyí Mawu Mavɔmavɔ. Un nǎ zé to yětɔn dó húzú gbětótló, ɖó yě nɔ gbejí nú mì ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ɖe nǔ baɖabaɖa e Jeluzalɛ́mu dó sin lɛ́ɛ xlɛ́ ɛ. Ɖɔ n'i ɖɔ nyɛ Aklúnɔ Mavɔmavɔ ɖɔ: Tɔ́gbó towe lɛ́ɛ sín to wɛ nyí Kanáa; fínɛ́ wɛ è ji we ɖe. Tɔ́ towe ɔ́, Amɔliti wɛ, bɔ nɔ towe nyí Hitíti. Gbe e gbe è ji we é ɔ́, mɛɖé gbo hɔ̌nkan nú we ǎ; è zě we dó sin mɛ bo lɛ wǔ nú we ǎ, è zě jɛ dó tíntɛ́n wǔ nú we ǎ; è bǔ avɔ dó we ǎ. Nǔ towe blá wǔ nú mɛɖé, bónú mɛ ɔ́ bló nǔ énɛ́ lɛ́ɛ ɖokpó nú we vɔ́vɔ́ ǎ. Mɛɖěbǔ yí wǎn nú we, bó wlíbo nú we ǎ. É nyɔ́ wa ɔ́, nǔ gbɛ́hɛn wɛ è mɔ we dó mɔ, bó sɔ́ we nyi gbě. Un wá ɖo dǐndín gbɔn akpá towe wɛ, bó mɔ we ɖo sugbaja xo wɛ ɖo kanjɔ mɛ. A ɖo kanjɔ mɛ mɔ̌ có un ɖɔ hwi ná gán; un ɖɔ hwi ná gán dandan. Un ɖɔ nú we ɖɔ: ‘Su folówa e ɖo gběhan mɛ é ɖɔhun’, bɔ a su, bó nyɔ́ ɖɛkpɛ káká: anɔ̌ towe bǐ tɔ́n, bɔ a wǔ fún bǐ. Lo ɔ́, a kpo ɖo mɛ̌ jɔgbe. Un lɛ́ gbɔn akpá towe, bó mɔ ɖɔ a ko wínnyá bǐ bó ko su xɔ́ntɔn ɖó. Énɛ́ ɔ́, un vlɔ́n awu ce bo cyɔ́n nú we, bó hwlá mɛ̌ nú we. Un zin alɔ dó akɔ́n ɖɔ un ná nɔ gbejí nú we, lobo jɛ akɔ xá we. Lě e a hǔzú ce gbɔn é nɛ́; nyɛ Aklúnɔ Mavɔmavɔ wɛ ɖɔ mɔ̌. “Un zé sin bó klɔ́ kanjɔ e ɖo wǔ towe ɔ́ síin, bó sá nǔsáwǔ wǎnɖagbenɔ nú we. Un zé awu kíkó ɖé dó nú we, bó zé anyǔfɔkpa ɖagbe ɖagbe ɖé dó nú we, bó sɔ́ kanvɔ bo sin nú we, bó dó sɛ́dawu ɖaxó ɖé nú we. Un ba acɔ́ nú we: un dó alɔgan alɔ nú we, un dó wlɔ kɔ nú we. Un dó alɔganví awɔntín nú we, bó dó tógbé tómɛ nú we, bó zé axɔ́súgbákún ɖagbe ɖagbe ɖé xwé nú we. Siká kpó kpatágan kpó wɛ a dǒ ba acɔ́ ná, kanvɔ wěwé ɖagbe ɖagbe, sɛ́da kpó avɔ kíkó kpó wɛ a dǒ. Linfín e mɛ́ ganjí ɔ́ kpó wǐin kpó olívumi kpó wɛ a nɔ ɖu. Énɛ́ ɔ́, a nyɔ̌ ɖɛkpɛ sɔ mɔ̌, bɔ axɔ́sú jɛ we. Nyǐkɔ towe gba kpé gbɛ ɔ́ bǐ mɛ, ɖó ɖɛkpɛ towe wú; a nyɔ̌ ɖɛkpɛ bɔ nǔ bǐ vɔ ɖ'é wú, ɖó un ba acɔ́ nú we bɔ é vɛ́ jlɛ́. Xó e nyɛ Mawu Mavɔmavɔ ɖɔ é nɛ́.” “Hwɛ Jeluzalɛ́mu ɔ́, a tunwun ɖɔ émí nyɔ́ ɖɛkpɛ, bɔ nyǐkɔ émítɔn yi jǐ; a kpɔ́n dó énɛ́ wú bó jɛ aga lɛ jí; a lɛ aga xá alitanu bǐ, bó gbɔ bó húzú yětɔn. A kpɔ́n avɔ towe lɛ́ɛ mɛ, bó cyán ɖagbe ɖagbe e ɖ'é mɛ lɛ́ɛ dó ba acɔ́ nú vodún xwé e gbɔn só jí só jí lɛ́ɛ, bɔ è nɔ ɖó xó xá we ɖ'é jí. Nǔ mɔ̌hun ɖě kó jɛ kpɔ́n gbeɖé ǎ, é ká sɔ́ ná jɛ kpɔ́n ǎ. Nǔzínzán ɖagbe ɖagbe e è zě siká kpó kpatágan kpó dó bló ná, bɔ un ná we lɛ́ɛ ɔ́, a sínsín dó kɔn súnnu sín bǒcyɔ ná, bó nɔ́ lɛ aga xá yě. A bǔ avɔ towe e è kó lɛ́ɛ dó yě, bó kɔn ami ce kpó nǔsáwǔ wǎnɖagbenɔ ce kpó dó yě jí. Linfín ɖagbe ɖagbe kpó ami kpó wǐin kpó e un ná we bɔ a nǎ nɔ́ ɖu ɔ́, a nɔ xwlé bǒcyɔ towe lɛ́ɛ, bónú é ná nyí vɔ̌sísá wǎnɖagbenɔ nú yě. Xó e nyɛ Mawu Mavɔmavɔ ɖɔ ɔ́ nɛ́. Vǐ súnnu kpó nyɔ̌nu kpó e a ji nú mì lɛ́ɛ ɔ́, a fɔ yě hu dó bǒcyɔ énɛ́ lɛ́ɛ. Hǔn afɔ e dó gbě wɛ a ɖe ɔ́ kpé ǎ, bɔ vǐ nyɛ tɔn lɛ́ɛ wɛ a hu dó vodún towe lɛ́ɛ! Hwenu e a ɖo gbɛ baɖabaɖa énɛ́ zán wɛ ɔ́, Jeluzalɛ́mu, hwenu e a nɔ ɖo afɔ dó gbě wɛ ɔ́, a ka sɔ́ nɔ flín vǔ towe a? A nɔ flín hwenu e a ɖo mɛ̌ jɔgbe, bó ɖo kanjɔ mɛ blí gbo gbɔn wɛ é a? “Nyɛ Aklúnɔ Mavɔmavɔ ɖɔ: Heelú we! Ée a dǒ nǔ nyanya lɛ́ɛ bǐ sin é ɔ́, gbɛ towe ɖíe wá blá wǔ bǐ din e. Nǔ ɖo mɔ̌ có, a kpo ɖo kɔ́ lí wɛ, bó kpo ɖo vɔ̌sákpe xo wɛ gbɔn tokplétɛn tokplétɛn; a nɔ xo bɔ é nɔ́ yi jǐ. A blǒ nǔ énɛ́ lɛ́ɛ gbɔn alikpléhɔ̌ntɛn lɛ́ɛ bǐ; a jǒ hwiɖée dó nú aligbɔntɔ́ lɛ́ɛ bǐ, bó fɔ́n bó ɖo aga lɛ wɛ, bó hɛn ɖɛkpɛ towe gblé. A lɛ aga xá Ejípunu lɛ́ɛ, ɖó yě jɔ asú bɔ to yětɔn ɖo to towe kpá; a ɖo aga lɛ wɛ kpowun; a lɛ xá mɛ ɖě ɔ́, a nɔ lɛ xá mɛ ɖě, bó dó xomɛsin nú mì. Énɛ́ ɔ́, un ɖe xomɛsin ce xlɛ́ we: un tɛ nǔɖuɖu we; un jó we nú kɛntɔ́ towe lɛ́ɛ, un jó we nú toxo Filisitɛ́ɛn lɛ́ɛ tɔn, ɖó Filisitɛ́ɛn lɛ́ɛ ɖésú ɔ́, nǔ blíblí e wa wɛ a ɖe ɔ́ nyɔ́ yě nukún mɛ ǎ. Aga énɛ́ lɛ́ɛ e a lɛ ɔ́ ká kó jɛ mɛ nú we ǎ, bɔ a lɛ̌ yi lɛ aga xá Asilíinu lɛ́ɛ. Énɛ́ lɔ ka víví hwedó we, bɔ a lɛ̌ bɔ aga nyi do xá Babilɔ́nunu lɛ́ɛ, Babilɔ́nunu ajɔ̌watɔ́ lɛ́ɛ; có nǔ e ɖo wiwa we wɛ ɔ́ jɛ́n kpo ɖo wiwa we wɛ. Kóóyi Jeluzalɛ́mu! A nyɔ̌ un gbɛ́ ɖɔ nú súnnu ǎ; a wa nǔ agalɛtɔ́ e gbɛ́ hɛn hú agalɛtɔ́ lɛ́ɛ bǐ é ɖɔhun. Xó e nyɛ Aklúnɔ Mavɔmavɔ ɖɔ ɔ́ nɛ́. A lǐ kɔ́ towe lɛ́ɛ gbɔn alikpléhɔ̌ntɛn lɛ́ɛ bǐ, bó xo vɔ̌sákpe towe lɛ́ɛ gbɔn fí bǐ; a xo bɔ é yi jǐ. A ka nɔ yí nǔɖé ɖo súnnu lɛ́ɛ sí lě e agalɛtɔ́ lɛ́ɛ nɔ́ bló gbɔn é ǎ. A cí nyɔ̌nu afɔdógbětɔ́ e nɔ́ jó asú tɔn dó, bó nɔ́ yi ba súnnu ɖěvo é ɖɔhun. Agalɛtɔ́ bǐ wɛ nɔ́ yí nǔ ɖo súnnu sí; towe ka nyí mɔ̌ ǎ; hwi wɛ nɔ lɛ́ dó ajɔ yě, dó dɔn yě, bɔ yě nɔ́ gosín fí bǐ bó nɔ́ wá ɖó xó xá we. Aga hwɛ tɔn gbɔn vo nú agalɛtɔ́ ɖě lɛ́ɛ bǐ tɔn: súnnu lɛ́ɛ wɛ nɔ́ ba we ǎ, yě nɔ́ ná nǔɖé we ǎ, hwi wɛ nɔ ná akwɛ́ yě. Aga towe ɔ́, vo wɛ. “Énɛ́ ɔ́ wú ɔ́, Jeluzalɛ́mu agalɛtɔ́, se xó e ɖɔ nú we wɛ nyɛ Mawu Mavɔmavɔ ɖe é. Xó e nyɛ Aklúnɔ Mavɔmavɔ ɖó bó ná ɖɔ nú we ɔ́ ɖíe: A nɔ jɛ mɛ̌ jɔgbe. A nɔ ɖe wǔtu towe bǐ xlɛ́ bó nɔ́ lɛ aga xá xɔnnɔ towe kpó vodún nǔvɛ́mɔ lɛ́ɛ kpó. A nɔ ɖ'é wú káká bó nɔ́ hu vǐ towe lɛ́ɛ dó vodún towe lɛ́ɛ. Énɛ́ ɔ́ wútu ɔ́, un ná kplé xɔnnɔ towe e a jǒ hwiɖée ná lɛ́ɛ bǐ dó wǔ we, un ná kplé yě mɛ e a yí wǎn ná lɛ́ɛ kpódó mɛ e a gbɛ́ wǎn ná lɛ́ɛ kpó dó wǔ we, bɔ a nǎ ɖo tɛ́ntin yětɔn, bɔ un ná ɖe avɔ sín wǔ we ɖo yě bǐ nukún mɛ, bɔ yě ná mɔ we ɖo mɛ̌ jɔgbe. Jeluzalɛ́mu, tó e è nɔ dɔn nú nyɔ̌nu e dó afɔ gbe ɔ́ abǐ nyɔ̌nu e hu mɛ ɔ́ wɛ un ná dɔn nú we. Kanjɔ towe wɛ a nǎ dó sú wǔ e hwan wɛ un ɖe é kpó adǎn e jí un ɖe é kpó sín axɔ́. Un ná jó we nú xɔnnɔ towe lɛ́ɛ, bɔ yě ná gba kɔ́ e a lǐ lɛ́ɛ bó gba vɔ̌sákpe e a xo lɛ́ɛ. Yě ná ɖe avɔ sín wǔ we; yě ná yí sikánú e a dǒ lɛ́ɛ, bó ná jó we dó nyi mɛ̌ jɔgbe. Énɛ́ ɔ́ gúdo ɔ́, yě ná kplé to dó wǔ we; yě ná nyi hwǎn dó we; yě ná já we ɖó hwǐ wú. Yě ná dó xwé towe lɛ́ɛ zo. Hwɛ e un ɖó nú we ɔ́, yě wɛ ná wa nǔ e ɖ'é mɛ ɔ́ bǐ xá we ɖo nyɔ̌nu gěgé nukún mɛ. Un ná bló mɔ̌ dó ɖó agagbɛ e zán wɛ a ɖe ɔ́ te, bɔ a sɔ́ ná nɔ́ ná nǔ xɔnnɔ towe lɛ́ɛ ɖěbǔ ǎ. Énɛ́ ɔ́, xomɛ ce ná fá dó wǔ we, bɔ un sɔ́ ná mɔ nǔ e ná dɔn wǔhwinhwan wá nú mì é ɖě ǎ; un ná vo ɖo ayi mɛ. A sɔ́ flín nǔ e un nyí nú we hwenu e a ɖo vǔ é ǎ, bó blǒ nǔ énɛ́ lɛ́ɛ dó dó xomɛsin nú mì. Din ɔ́, un ná zé nǔ e a wa ɔ́ sín bǎ dó xo we. É má nyí hɛ̌nnú nɛ́ a wa gɔ́ nú nǔ baɖabaɖa e a dǒ sin lɛ́ɛ é nɛ́ ǎ cé? Xó e nyɛ Aklúnɔ Mavɔmavɔ ɖɔ é nɛ́.” Mawu lɛ́ ɖɔ: “Jeluzalɛ́mu, mɛ e yí wǎn nú lǒdídó lɛ́ɛ ja xó towe ɖɔ gbé ɔ́, yě ná nɔ́ ɖɔ: ‘Nɔ ɖo mɔ̌, vǐ nyɔ̌nu lɔ ɖo mɔ̌.’ Nɔ towe sín vǐ jɛ́n a nyǐ nǔgbó; nyɔ̌nu énɛ́ e gbɛ́ wǎn nú asú tɔn kpó vǐ tɔn lɛ́ɛ kpó é jɛ́n ji we nǔgbó. Nǔ ɖokpó ɔ́ wɛ hwi kpó nɔví towe nyɔ̌nu lɛ́ɛ kpó nyí; nɔví towe nyɔ̌nu lɛ́ɛ gbɛ́ wǎn nú asú yětɔn lɛ́ɛ kpó vǐ yětɔn lɛ́ɛ kpó. Hitíti wɛ nú nɔ mitɔn, bɔ tɔ́ mitɔn nyí Amɔliti. Dadá towe e nɛ́gbé a jɛ ɔ́ wɛ nyí Samalíi kpó vǐ tɔn nyɔ̌nu lɛ́ɛ kpó ɖo totaligbé. Nɔví towe nyɔ̌nu e jɛ nɛ́gbé towe ɔ́ ka nyí Sodɔ́mu kpó vǐ tɔn nyɔ̌nu lɛ́ɛ kpó ɖo tofɔligbé. Ényí walɔ yětɔn lɛ́ɛ kɛ́ɖɛ́ wɛ a xwedó, bó wa nǔ baɖabaɖa yě ɖɔhun ǎ, nǔ e hwɛ dó sin ɔ́ zɛ yě bǐ tɔn wú gbɔn alɔ bǐ mɛ. Nyɛ Aklúnɔ Mavɔmavɔ ɖɔ: un xwlé nyiɖée nú we! Nɔví towe Sodɔ́mu kpó vǐ tɔn nyɔ̌nu lɛ́ɛ kpó wa nǔ nyanya sɔ hwi kpó vǐ towe nyɔ̌nu lɛ́ɛ kpó ǎ. Nǔ e nɔví towe nyɔ̌nu Sodɔ́mu ɔ́ dó sin lɛ́ɛ ɖíe: é kpódó vǐ tɔn nyɔ̌nu lɛ́ɛ kpó nɔ́ yí go, ɖó yě jɛ dɔkun kpɔ́ gégé; yě ɖo nǔɖé lin wɛ ǎ. Yě nɔ́ dó alɔ wamamɔnɔ lɛ́ɛ kpó gbɛ̌dónánɔ lɛ́ɛ kpó ǎ. Yě nɔ́ ɖo yěɖée mɔ wɛ, bó nɔ́ ɖo nǔ baɖabaɖa lɛ́ɛ dó sin wɛ ɖo nukún ce mɛ. Énɛ́ ɔ́ wú wɛ un ɖe yě sín gbɛ ɔ́ mɛ bɔ hwi ɖésú mɔ. Samalíi ɔ́, éyɛ́ hu hwɛ e a hu lɛ́ɛ vlɔ̌ɖówe ǎ. Nǔ baɖabaɖa e hwɛ dó sin lɛ́ɛ sukpɔ́ hú ée éyɛ́ dó sin lɛ́ɛ. Nɔví towe nyɔ̌nu Sodɔ́mu kpó Samalíi kpó ɔ́, nú è nǎ zé yě jlɛ́ dó wǔ we ɔ́, è nǎ ɖɔ yědɛɛ kún hu hwɛ ɖé ó. Hɛ̌ngban e a nɔ ɖíɖá nɔví towe lɛ́ɛ ɔ́, hwi wɛ ná ɖíɖá din. Nǔ nyanya e a dǒ sin bɔ é hú gǎn ée nɔví towe lɛ́ɛ dó sin é zɔ́n bɔ é cí ɖɔ nɔví towe lɛ́ɛ nyí hwɛjijɔnɔ hú we. Din ɔ́, hwi wɛ ná ɖíɖá hɛ̌ngban towe bó ɖu winnyá, ɖó nǔ e a dǒ sin lɛ́ɛ zɔ́n bɔ nɔví towe lɛ́ɛ cí hwɛjijɔnɔ ɖɔhun. Un ná lɛ́ sɔ́ toxo énɛ́ lɛ́ɛ ɖo tɛn e mɛ yě kó ɖe ɖ'ayǐ lɛ́ɛ mɛ: un ná húzú ninɔmɛ Sodɔ́mu kpódó vǐ tɔn nyɔ̌nu lɛ́ɛ kpó tɔn. Énɛ́ ɔ́ gúdo lo ɔ́, Jeluzalɛ́mu, un nǎ lɛ́ sɔ́ hwi lɔmɔ̌ ɖó tɛn e mɛ a ko ɖe ɖ'ayǐ ɔ́ mɛ, bɔ winnyá ná hu we, ɖó nǔ tobutóbú e a dǒ sin lɛ́ɛ wú. Nǔ e ná gbo we ɔ́ ná súnsún ɖasin nú nɔví towe lɛ́ɛ kpó vǐ yětɔn lɛ́ɛ kpó. Nɔví towe nyɔ̌nu Sodɔ́mu kpó Samalíi kpó, kpó vǐ yětɔn nyɔ̌nu lɛ́ɛ kpó ná jɛ lě e yě kó ɖe gbɔn ɖ'ayǐ é. Hwi lɔ kpó vǐ towe nyɔ̌nu lɛ́ɛ kpó ná lɛ́ jɛ lě e mi ko ɖe gbɔn ɖ'ayǐ é. Hwenu e a ɖo afɔ tɛ ayǐ wɛ ɔ́, a nɔ hu tɛ́ nú nɔví towe nyɔ̌nu Sodɔ́mu; a ko bló mɔ̌ cóbɔ è wǎ mɔ nǔ jɛ nǔ e dó sin wɛ a ɖe lɛ́ɛ wú. Din ɔ́, hwi wɛ Silíi toxo lɛ́ɛ kpó gletoxo yětɔn lɛ́ɛ kpó ná hu tɛ́ ná; Filisitɛ́ɛn lɛ́ɛ lɔ ná hu tɛ́ nú we; Filisitɛ́ɛn e lɛ́ lɛ̌ dó we bó nɔ́ ɖe xlɛ́ ɖɔ émí gbɛ́ wǎn nú we lɛ́ɛ ná hu tɛ́ nú we. Din ɔ́, nǔ baɖabaɖa e a dǒ sin lɛ́ɛ ɔ́, hɛ̌nnú e a dǒ sin lɛ́ɛ ɔ́, nǔ e yě ji ɔ́, a nǎ sɔ́ kpan. Xó e nyɛ Aklúnɔ Mavɔmavɔ ɖɔ ɔ́ nɛ́. “Aklúnɔ Mavɔmavɔ lɛ́ ɖɔ: lě e a wa nǔ gbɔn ɔ́ wɛ nyɛ lɔ ná wa nǔ xá we gbɔn, ɖó hwɛ ɔ́, a nɔ gbejí nú nǔ e a ɖɔ é ǎ, bó gba akɔ e nyi kpó hwi kpó jɛ é. Amɔ̌, nyɛ ɔ́, un flín akɔ e un jɛ xá we sín hwenu e a ɖo vǔ é; énɛ́ wú ɔ́, un ná jɛ akɔ ɖěvo xá we, bɔ é ná nɔ ayǐ káká sɔ́yi. Hwenu e nɔví towe nyɔ̌nu mɛxó kpó yɔkpɔ́vú kpó ná wá gɔ̌n towe é ɔ́, a nǎ flín gbɛ e a ko zán ɖ'ayǐ é, bɔ é ná hu winnyá nú we. Un ná sɔ́ yě dó ɖó vǐ nú we; é nɛ́ ká ɖo akɔ e un jɛ xá we ɔ́ mɛ ǎ. Un ná jɛ akɔ xá we, bɔ a nǎ tunwun ɖɔ nyɛ wɛ nyí Mawu Mavɔmavɔ. Énɛ́ ɔ́, a nǎ flín gbɛ e a ko zán ɖ'ayǐ é, bɔ é ná hu winnyá nú we; hwenu e un ná sɔ́ hwɛ towe lɛ́ɛ kɛ we ɔ́, a nǎ dán ɖě wa gbɔn káká bɔ nukikɛ ná gló we. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, nyi nǔbasɔ́ ɖokpó dó Izlayɛ́li togun ɔ́; dǒ lǒ ɖokpó nú yě. A nǎ ɖɔ nú yě ɖɔ nyɛ Aklúnɔ Mavɔmavɔ wɛ dó lǒ ɔ́ nú yě. Lǒ ɔ́ ɖíe: ‘Gangan ɖaxó ɖé tíin; awa tɔn lɛ́ɛ d'agba ɖésú; é kɛ awa ɔ́, é nɔ́ gbló káká; fún tɔn sukpɔ́ káká bó ɖó hwɛkan tɛnmɛ tɛnmɛ. Gangan ɔ́ zɔn bó yi Libáan sókan mɛ, bó yi tɔ́ dó sɛ́dlutín ɖokpó sín ɖavínu wú, bó wɛ́n síin; é wɛ́n ala e yi jǐ hú ala ɖě lɛ́ɛ bǐ é, bó zé yi to e mɛ è nɔ wa ajɔ̌ ɖe ɔ́ mɛ, bó zé ɖó ajɔ̌watɔ́ lɛ́ɛ sín toxo ɖokpó mɛ. Énɛ́ ɔ́ gúdo ɔ́, gangan ɔ́ zé atínvú ɖokpó ɖo Izlayɛ́li to mɛ, bó sɔ́ yi tun ɖó fí e è nɔ va atínkwín ɖó é; é tun atínvú ɔ́ ɖó tɔsisa ɖaxó ɖé tó, sólutín ɖɔhun. Atínvú ɔ́ gbɛ, bó wá nyí vǐwuntín ɖagbe ɖagbe ɖé bó vun kan; é ká yi jǐ dín ǎ. É vun ɖidó fí e gangan ɔ́ ɖe é; atín ɔ́ dó ɖɔ do, bó nɔ́ zɛ ala. Gangan ɖaxó ɖěvo tíin, bɔ élɔ́ ɔ́, awa tɔn lɛ́ɛ d'agba ɖésú; é ɖó fún kpɔ́ gégé. Din ɔ́, vǐwuntín ɔ́ nyi ɖɔ tɔn lɛ́ɛ dó gangan énɛ́ ɔ́ gɔ̌n, bɔ ala tɔn lɛ́ɛ tunta fí e é ɖe é. Vǐwuntín ɔ́ bló mɔ̌ ɖó é vɛdó ɖɔ émí ná mɔ sin ɖo gangan énɛ́ ɔ́ gɔ̌n hú fí e émí ɖe é wɛ sín. Có gle ɖagbe jí wɛ é ká ɖe, bó ɖo tɔsisa ɖaxó ɖé tó, bó hɛn ɔ́, é ná zɛ ala, bó sɛ́n, bó ná nyí vǐwuntín e nyɔ́ bɔ nǔ vɔ ɖ'é wú é.’ “Nǔ e nyɛ Aklúnɔ Mavɔmavɔ ka nɔ kanbyɔ́ ɔ́ ɖíe: ‘Vǐwuntín énɛ́ ká sixú nɔ gbɛ bó ná ɖo ala vun wɛ káká sɔ́yi a? Gangan nukɔntɔn ɔ́ ná wá hɔn vǐwuntín ɔ́ ǎ cé? É ná wá hɔn vǐwuntín ɔ́, bó gbɛ sínsɛ́n tɔn lɛ́ɛ kɔn nyi ayǐ, bɔ ama tɔn lɛ́ɛ bǐ ná mlú ǎ cé? Ma ɖɔ nú we: É byɔ́ ɖɔ è nǎ dó hlɔ̌nhlɔ́n abǐ è nǎ dó ahwan gbě cóbó hɔn ǎ. Vǐwuntín ɔ́ nɛ́ è tun ganjí nɛ́, é ká sixú ɖo gbɛ ná nɔ wɛ bó ná vun ǎ; jɔhɔn zǎnzǎnhwe jí tɔn nyi dó jǐ tɔn ɔ́, é ná fyɔ́ bǐ. Ayǐkúngban e jí é ɖe, bó ná vun ganjí ɔ́ jí jɛ́n é ná ɖe bó ká ná fyɔ́.’ ” Mawu Mavɔmavɔ ɖɔ nú mì ɖɔ: “Kanbyɔ́ tónúmasetɔ́ énɛ́ lɛ́ɛ ɖɔ yě mɔ nǔ jɛ xó énɛ́ ɔ́ mɛ ǎ wɛ a jí. Flín yě lě e axɔ́sú Babilɔ́nu tɔn byɔ́ Jeluzalɛ́mu, bó wlí axɔ́sú yětɔn kpó gǎn yětɔn lɛ́ɛ kpó hɛn yi to tɔn mɛ gbɔn é. É sɔ́ mɛ ɖokpó ɖo axɔ́ví lɛ́ɛ mɛ, bó jɛ akɔ xá ɛ, bó ɖɔ n'i ɖɔ é ní zin alɔ dó akɔ́n ɖɔ émí ná nɔ gbejí nú akɔ e émí jɛ xá émí é, bó ká kplá gbɛtɔ́ nukúnɖéjí e ɖo to ɔ́ mɛ lɛ́ɛ hɛn yi. É bló mɔ̌ bónú axɔ́súɖuto ɔ́ sín hlɔ̌nhlɔ́n ná nɔ bǎ mɛ, bónú to ɔ́ má sɔ́ fɔ́n gǔ ó; énɛ́ ɔ́, to ɔ́ ná nɔ gbejí nú akɔ e Babilɔ́nu xɔ́sú ɔ́ jɛ xá ɛ é. Lo ɔ́, axɔ́sú yɔ̌yɔ́ ɔ́ fɔ́n gǔ dó Babilɔ́nu xɔ́sú ɔ́ jí, bó sɛ́ mɛ dó Ejípu ɖɔ è nǐ sɛ́ sɔ́ kpó sɔ́ja kpó dó émí ní sukpɔ́. É ká ná kpa ɛ a? Mɛ e wa nǔ gbɔn mɔ̌ ɔ́ ná mɔ nu tɔn a? É gba akɔ e é jɛ é; é sixú gán ɖ'é mɛ cé? “Nǔ e nyɛ Aklúnɔ Mavɔmavɔ ɖo ɖiɖɔ wɛ é ɖíe; un xwlé nyiɖée ɖɔ: Judáa xɔ́sú ɔ́ ná yi kú ɖo Babilɔ́nu xɔ́sú e sɔ́ ɛ ɖó zinkpo jí ɔ́ to mɛ; ɖó é nɔ gbejí nú akɔ e é jɛ ɔ́ ǎ. Énɛ́ ɔ́ wú ɔ́, Babilɔ́nu wɛ Judáa xɔ́sú ɔ́ ná yi kú jɛ. Hwenu e sɔ́ja Babilɔ́nu tɔn lɛ́ɛ ná kplé kɔ́, bó cí gúdo, lobo ná kun do bó cí mɛ, bó ná hu mɛ kɔn nyi kpɔ́ é ɔ́, Ejípu xɔ́sú ɔ́ ɖó ahwangɔnu syɛ́nsyɛ́n kɔn nyi kpɔ́, có yě sixú gló nǔ nú Judáa xɔ́sú ɔ́ ǎ, ɖó Judáa xɔ́sú ɔ́ nɔ gbejí nú nǔ e é zin alɔ dó akɔ́n bó ɖɔ é ǎ; é gba akɔ e é jɛ é, có é ɖésú wɛ yí gbe ná; nǔ énɛ́ e é wa ɔ́, ná kpa ɛ ǎ. “Énɛ́ ɔ́ wútu wɛ nyɛ Aklúnɔ Mavɔmavɔ ɖo ɖiɖɔ wɛ ɖɔ: un xwlé nyiɖée nú we ɖɔ, axɔ́sú Judáa tɔn nɔ gbejí nú nǔ e é zin alɔ dó akɔ́n ɖo nyǐkɔ ce mɛ ɖɔ émí ná bló é ǎ. É ká ji nǔɖé ɔ́, un ná zé kpan n'i. Un ná ɖó mɔ n'i, bó ná wlí i. Un ná kplá ɛ yi Babilɔ́nu, bó ná ɖó hwɛ n'i ɖó gbejí e é má nɔ nú mì ǎ é wú. È nǎ hu sɔ́ja tɔn e alɔ se kpɛ́n ná lɛ́ɛ ɖo ahwangbénu, bɔ mɛ e kpo lɛ́ɛ ná gba kpé wɛ̌kɛ́zo ɛnɛ lɛ́ɛ bǐ mɛ. Énɛ́ ɔ́, yě ná tunwun ɖɔ nyɛ Mawu Mavɔmavɔ wɛ ɖɔ xó nú émí.” “Xó e nyɛ Aklúnɔ Mavɔmavɔ ɖɔ ɔ́ ɖíe: Un ná wɛ́n sɛ́dlutín sín alavínu ɖokpó; ɖavínu wɛ un ná wɛ́n ala ɔ́ ɖe, bó ná yi tun ɖó só ɖaxó ɖokpó jí. Un ná zé yi tun ɖó Izlayɛ́li só ɖaxó ɖokpó jí, bɔ é ná zɛ ala bó ná sɛ́n. É ná nyí sɛ́dlu ɖagbe ɖagbe ɖokpó. Xɛ alɔkpa alɔkpa bǐ ná nɔ́ wá ɖó ɖ'é jí. Nǔ e kó sixú nyí xɛ lɛ́ɛ bǐ ná wá nɔ yɛtɛn tɔn. Énɛ́ ɔ́, atín e ɖo zunkan mɛ lɛ́ɛ bǐ ná tunwun ɖɔ nyɛ wɛ nyí Mawu Mavɔmavɔ. Un nɔ mu atín e yi jǐ dín lɛ́ɛ, bó nɔ́ bló bɔ ée hwe hú bǐ lɛ́ɛ nɔ su. Un nɔ ɖe sin sín atín e ɖo mǔ fɛɛn ɔ́ mɛ, bó nɔ́ ná hinhɔ́n dó ée xú ɔ́ mɛ. Nyɛ Mawu Mavɔmavɔ wɛ ɖo xó ɖɔ wɛ, un ɖɔ nǔɖé ɔ́, un ka nɔ bló.” Mawu Mavɔmavɔ ɖɔ nú mì ɖɔ: “Étɛ́wú è ka nɔ dó lǒ ɖo Izlayɛ́li ɖɔ: ‘Mɛjitɔ́ lɛ́ɛ ɖu vǐwun xɛ́lú ɔ́, vǐ yětɔn lɛ́ɛ sín aɖǔ wɛ nɔ jí?’ Nyɛ Aklúnɔ Mavɔmavɔ xwlé nyiɖée nú mi, bó ɖo ɖiɖɔ nú mi wɛ, mi sɔ́ ná dó lǒ énɛ́ ɖě gbeɖé kpɔ́n ɖo Izlayɛ́li ǎ. Éɖíe, mɛ bǐ sín gbɛ wɛ ɖo alɔ ce mɛ, tɔ́ wɛ a, vǐ wɛ a, mɛ bǐ sín gbɛ wɛ ɖo alɔ ce mɛ. Mɛ e hu hwɛ é wɛ ná sú hwɛ tɔn xɔ́: mɛ ɔ́ wɛ ná kú. “Kpɔ́ndéwú ɖokpó ɖíe: gbɛtɔ́ ɖé tíin, bó nɔ́ wa ɖagbe; é nɔ́ xwedó sɛ́n, bó nɔ́ wa nǔ jlɔ́jlɔ́; é nɔ ɖu nǔ e è nɔ yi xwlé vodún gbɔn só jí só jí é ǎ; è nɔ sɛn vodún ɖo Izlayɛ́li có éyɛ́ nɔ́ sɛn vodún ɖě ǎ; é nɔ́ dó afɔ gbě nú mɛsi ǎ; nyɔ̌nu ɖo gǒdó mɛ ɔ́, é nɔ́ sɛkpɔ́ ɛ ǎ; é nɔ́ táfú mɛ ǎ; è sɔ́ nǔ ɖó gbanu ɖo gɔ̌n tɔn bó wá sú axɔ́ ɔ́, é nɔ́ zé jó; é nɔ́ ja ajo ǎ; é nɔ́ ná nǔɖuɖu mɛ e xovɛ́ sin é, bó nɔ́ ná avɔ mɛ e ɖo mɛ̌ é; é nɔ́ sa akwɛ́ nú mɛ ǎ, é nɔ́ nya akwɛ́ nú mɛ, bó nɔ́ yí akwɛ́ví ǎ; é nɔ́ ɖó alɔ ɖo nǔ nyanya mɛ ǎ; é ja hwɛ gbo gbé ɔ́, é nɔ́ kán zǐn tɔn nú zǐn, bó nɔ́ kán sa tɔn nú sa; é nɔ́ nyi sɛ́n ce lɛ́ɛ, bó nɔ́ bló nǔ e un zɔ́n lɛ́ɛ ɖó xwi jí; gbɛtɔ́ mɔ̌hun ɔ́, hwɛjijɔnɔ wɛ; é ná nɔ gbɛ. Xó e nyɛ Aklúnɔ Mavɔmavɔ ɖɔ ɔ́ nɛ́. “Amɔ̌, nú mɛ mɔ̌hun ká ɖó vǐ ɖé, bɔ vǐ ɔ́ nyí ajotɔ́ axánsúnxó, bó nɔ́ hu mɛ, bó nɔ́ ɖo nǔ nyanya lɛ́ɛ dó sin wɛ, tɔ́ tɔn ká nɔ́ wa nǔ mɔ̌hun ɖé ǎ; éyɛ́ ká nɔ ɖu nǔ e è nɔ xwlé vodún gbɔn só jí só jí é; é nɔ́ dó afɔ gbě nú mɛsi; é nɔ́ táfú wamamɔnɔ lɛ́ɛ kpó gbɛ̌dónánɔ lɛ́ɛ kpó; é nɔ́ jɛ ajo; è sɔ́ nǔ ɖó gbanu ɖo gɔ̌n tɔn ɔ́, é sɔ́ nɔ́ zé jó ǎ; é nɔ́ sɛn vodún, bɔ nǔ baɖabaɖa e yě nɔ́ dó sin ɖo vodún xwé lɛ́ɛ ɔ́, é lɔmɔ̌ nɔ dó sin; é nɔ́ sa akwɛ́ bó nɔ́ yí akwɛ́ví d'é jí. Vǐ mɔ̌hun ná nɔ gbɛ wɛ a vɛdó a? É ná kú dandan, ɖó nǔ baɖabaɖa énɛ́ lɛ́ɛ e é dó sin é wútu; é ná kú, é wɛ ka sɔ́ éɖée nyi gbě. “Ényí vǐ énɛ́ lɔ ka ɖó vǐ ɖé, bɔ vǐ ɔ́ mɔ nǔ nyanya e wa wɛ tɔ́ tɔn ɖe lɛ́ɛ, bó má ká nɔ́ wa nǔ tɔ́ tɔn ɖɔhun ǎ, é nɔ́ ɖu nǔ e è nɔ xwlé vodún gbɔn só jí só jí é ǎ, é nɔ́ sɛn vodún Izlayɛ́li tɔn lɛ́ɛ ɖě ǎ, é nɔ́ dó afɔ gbě nú mɛsi ǎ, é nɔ́ táfú mɛ ǎ, é nɔ́ yí mɛ ɖé nú ɖó gbanu ǎ, é nɔ́ ja ajo ǎ, é nɔ́ ná nǔɖuɖu mɛ e xovɛ́ sin é, bó nɔ́ ná avɔ mɛ e ɖo mɛ̌ é, é nɔ́ táfú wamamɔnɔ ǎ, é nɔ sa akwɛ́ ǎ, é nɔ́ nya akwɛ́ nú mɛ bó nɔ́ yi akwɛ́ví ǎ, é nɔ́ nyi sɛ́n ce lɛ́ɛ bó nɔ́ xwedó nǔ e un zɔ́n lɛ́ɛ. Vǐ mɔ̌hun ná kú ɖó hwɛ e tɔ́ tɔn hu lɛ́ɛ nu ǎ. É ná nɔ gbɛ. Tɔ́ tɔn wɛ táfú mɛ, é wɛ ja ajo, é wɛ dó ya nú mɛ e tɛ́ntin é ɖe lɛ́ɛ; hǔn é wɛ ná kú ɖó nǔ e é wa lɛ́ɛ tamɛ. “Mi nɔ kanbyɔ́ ɖɔ: étɛ́wú vǐ má ka ná sú hwɛ e tɔ́ tɔn hu ɔ́ sín axɔ́ ǎ? Nǔ é wú wɛ ɔ́ ɖíe: vǐ ɔ́ wa nǔ ɖó sɛ́nxwi jí; é xwedó hwɛjijɔ, é nɔ́ nyi sɛ́n ce lɛ́ɛ, bó nɔ́ bló nǔ e un zɔ́n lɛ́ɛ; énɛ́ wú wɛ é ná nɔ gbɛ. Mɛ e hu hwɛ é wɛ ná kú. Vǐ ná sú hwɛ e tɔ́ tɔn hu ɔ́ sín axɔ́ ǎ, tɔ́ ka ná sú hwɛ e vǐ tɔn hu ɔ́ sín axɔ́ ǎ. Mɛ e wa ɖagbe ɔ́ ná ɖu le tɔn, mɛ e wa nyanya ɔ́ ná sún sin tɔn.” “Ényí mɛ nyanya jó nǔ nyanya wiwa dó, bó nɔ́ bló nǔ e un zɔ́n lɛ́ɛ bǐ, bó nɔ́ xwedó hwɛjijɔ bó nɔ́ wa nǔ dó sɛ́nxwi jí ɔ́, é ná kú ǎ, é ná nɔ gbɛ. Ɖó din ɔ́, gbɛ ɖagbe wɛ é nɔ́ zán; énɛ́ wú ɔ́, è sɔ́ ná kpɔ́n hwɛ e é ko hu ɖ'ayǐ lɛ́ɛ ǎ, bɔ é ná nɔ gbɛ. Nǔ e ba wɛ un ɖe tawun ɔ́ wɛ nyí ɖɔ mɛdídá ní kú wɛ mi vɛdó a? Nǔ e ba nyɛ Aklúnɔ Mavɔmavɔ ɖe ɔ́ wɛ nyí ɖɔ mɛdídá ní húzú walɔ bó nɔ gbɛ. Lo ɔ́, é nyí hwɛjijɔnɔ lɛ́ kɔ sín walɔ tɔn ɖagbe ɔ́ gúdo, bó jɛ hwɛ hu jí, bó jɛ nǔ baɖabaɖa bǐ dó sin jí mɛ nyanya ɖɔhun ɔ́, é ná nɔ gbɛ wɛ a? Gbeɖé kpɔ́n! È sɔ́ ná kpɔ́n nǔ ɖagbe e é kó wa lɛ́ɛ ǎ; é ná kú, ɖó é sɔ́ ɖo gbejí ǎ, é jɛ hwɛ hu jí. Mi nɔ ɖɔ: ‘Aklúnɔ nɔ dó atɔ́ɔ́nnu nǔ jí.’ Izlayɛ́li togun e mi, mi ɖótó mì ganjí: nyɛ wɛ ɖo atɔ́ɔ́nnu dó nǔ jí wɛ a, abǐ mi wɛ ma ɖo nǔ wa ɖó nǔ gan jí wɛ ǎ? Ényí hwɛjijɔnɔ jó nǔjlɔ́jlɔ́wiwa dó, bó jɛ nǔ nyanya dó sin jí bó kú ɔ́, nǔ nyanya e é dó sin ɔ́ wɛ zɔ́n bɔ é kú. Ényí mɛ nyanya ka lɛ́ kɔ sín gbɛ nyanya e zán wɛ é ɖe ɔ́ gúdo, bó jɛ sɛ́n ce lɛ́ɛ nyi jí, bó jɛ nǔ jlɔ́jlɔ́ wa jí ɔ́, é ná hwlɛ́n gbɛ tɔn gán. Ényí é mɔ nǔ jɛ nǔ e é wa nyi do lɛ́ɛ wú bó jó nyanya wiwa dó ɔ́, é ná nɔ gbɛ, é ná kú ǎ. Lě e un to nǔ lɛ́ɛ gbɔn ɔ́ nɛ́, có mi Izlayɛ́li togun ɔ́, mi nɔ ɖɔ: ‘Aklúnɔ nɔ dó atɔ́ɔ́nnu nǔ jǐ.’ Nǔvú wɛ; nyɛ wɛ ɖo atɔ́ɔ́nnu dó nǔ jǐ wɛ ǎ, mi wɛ ma ɖo nǔ wa ɖó nǔ gan jí wɛ ǎ. Énɛ́ ɔ́ wú ɔ́, Izlayɛ́li togun e mi, lě e mɛ ɖokpó ɖokpó wa nǔ gbɔn ɔ́ wɛ un ná kpɔ́n dó ɖɔ hwɛ xá mɛ ɔ́; xó e nyɛ Aklúnɔ Mavɔmavɔ ɖɔ ɔ́ nɛ́. Mi bo húzú jijɔ; mi lɛ́ kɔ sín nǔ nyanya e wa wɛ mi ɖe lɛ́ɛ gúdo. Mi ma lɔn gbeɖé nú nǔ wa nyi do mitɔn zɔ́n bónú mi zé gbɛ mitɔn nyi gbě ó. Mi jó walɔ nyanya mitɔn lɛ́ɛ dó, mi húzú ayixa; mi húzú linlin. Izlayɛ́li togun e mi! Étɛ́wú mi ká ná mɔ kú ɖo te mɔ̌, bó ná yi? Nyɛ Aklúnɔ Mavɔmavɔ ɔ́, un ba gbeɖé ɖɔ mɛɖé ní kú ǎ; hǔn mi bo vɔ́ jɔ bó nɔ gbɛ.” Mawu ɖɔ nú mì ɖɔ: Hwɛ ɔ́, ji gbɛvíhan élɔ́ dó Izlayɛ́li sín gǎn lɛ́ɛ tamɛ ɖɔ: “Nɔ mitɔn ɔ́, kinnikínní asi nukúnɖéjí ɖokpó wɛ é nyí; kinnikínní nukúnɖéjí ɖokpó wɛ é nyí ɖo kinnikínní lɛ́ɛ mɛ. É mlɔ́ ayǐ ɖo vǐ tɔn lɛ́ɛ tɛ́ntin; é ɖo nukún kpé dó vǐ tɔn lɛ́ɛ wú wɛ. É zé vǐ tɔn lɛ́ɛ ɖokpó bó kplɔ́n ɛ ganjí; kinnikínní ví ɔ́ wínnyá; é kplɔ́n ɛ lě e è nɔ wlí lan bó nɔ́ vún ɖu gbɔn é; kinnikínní wínnyáwínnyá ɔ́ jɛ gbɛtɔ́ vún ɖu jí. Toɖévomɛnu lɛ́ɛ se xó tɔn bó ɖó mɔ n'i bó wlí i; yě dó gan awɔntín mɛ n'i bó dɔn ɛ yi Ejípu. Nɔ tɔn nɔ te kpɔ́n ɛ káká. É ká wá mɔ ɖɔ émí kún sɔ́ sixú mɔ ɛ ó. Énɛ́ ɔ́, é gbɔ bó zé vǐ tɔn ɖěvo bó kplɔ́n, vǐ énɛ́ lɔ wá nyí kinnikínní ɖé, bó dó hlɔ̌nhlɔ́n ganjí. É nɔ kinnikínní hwan mɛ káká bó wínnyá. É kplɔ́n lě e è nɔ wlí lan bó nɔ́ vún ɖu gbɔn é, kinnikínní wínnyáwínnyá ɔ́ jɛ gbɛtɔ́ vún ɖu jí. É mu ahohó yětɔn lɛ́ɛ; é gba toxo yětɔn lɛ́ɛ hánnyá. É dó gbe lě ɔ́, xɛsi nɔ jɛ mɛ e ɖo to ɔ́ mɛ lɛ́ɛ bǐ jí. Énɛ́ ɔ́, toɖévomɛnu lɛ́ɛ gosín fí tɛnmɛ tɛnmɛ bó wá xá ɛ. Yě ɖó mɔ n'i, bɔ é jɛ mɛ. Yě dǒ gan awɔntín mɛ n'i; yě wlí i dó aja mɛ, yě zé e yi jó nú axɔ́sú Babilɔ́nu tɔn ɔ́. È zě e sú dó gan mɛ; è sú i bónú é má sɔ́ dó gbe ɖě gbɔn só jí só jí ó, é má sɔ́ dó gbe ɖo Izlayɛ́li ó.” “Nɔ mitɔn cí vǐwuntín ɖé ɖɔhun; vǐwuntín e è tun nyi tɔ tó é ɖɔhun. É sɛ́n kpɔ́ gégé, é dó ama ganjí, ɖó é nɔ́ mɔ sin ganjí. Ala e é zɛ lɛ́ɛ kló, ala tɔn lɛ́ɛ wá húzú axɔ́súkpogɛ. Vǐwuntín énɛ́ yi jǐ hú atín ɖě lɛ́ɛ bǐ. È ɖo fí ɖěbǔ ɔ́, è nɔ mɔ sɛ́ dó, ɖó é yi jǐ, bó zɛ ala gěgé. Lo ɔ́, è hɔn zindɛ́ kpó adǎn kpó. Jɔhɔn zǎnzǎnhwe jí tɔn nyi bɔ vǐwuntín ɔ́ xú; sínsɛ́n tɔn lɛ́ɛ kɔn nyi ayǐ. Ala kloklo e é zɛ nɛ́ lɛ́ɛ bǐ xú, bó ji zo. Vǐwuntín ɔ́ ɖíe è wǎ tun sɔ́ nyi gbětótló mɛ din e; è tun sɔ́ nyi akúgbéjí, ɖo ayǐkúngban xúxú jí. Myɔ ɖé tɔ́n sín vǐwuntín ɔ́ mɛ, myɔ ɔ́ fyɔ́ ala lɛ́ɛ kpó sínsɛ́n lɛ́ɛ kpó. Vǐwuntín ɔ́ sɔ́ ɖó ala kloklo ɖě ǎ, é sɔ́ ɖó ala kloklo e ná húzú axɔ́súkpogɛ é ɖě ǎ. Xó énɛ́ wɛ ná nyí gbɛvíhan e mɛ bǐ ná nɔ́ ji é.” Ahwan wlí mǐ Izlayɛ́li ví lɛ́ɛ yi Babilɔ́nu ɔ́, é ɖo xwe tɛ́nwe bló wɛ; sun atɔ́ɔ́ngɔ́ e ɖo xwe énɛ́ ɔ́ mɛ ɔ́ sín azǎn wǒgɔ́ ɔ́ gbé ɔ́; tomɛxó Izlayɛ́li tɔn ɖé lɛ́ɛ wá jínjɔ́n ayǐ gɔ̌n ce ɖo Babilɔ́nu dɔ̌n, bó kan nǔ byɔ́ Mawu Mavɔmavɔ. Énɛ́ ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ɖɔ nú tomɛxó Izlayɛ́li tɔn lɛ́ɛ ɖɔ: Nyɛ Aklúnɔ Mavɔmavɔ ɖɔ: É má nyí nǔ kanbyɔ́ mì gbé wɛ mi tɔ́n a? Un xwlé nyiɖée nú mi, un sixú jó mi dó nú mi kan nǔ byɔ́ mì ǎ. Xó e nyɛ Aklúnɔ Mavɔmavɔ ɖɔ ɔ́ nɛ́. “Hwɛ gbɛtɔ́ e, ɖo gbesisɔ mɛ bó ná ɖɔ hwɛ yětɔn; ma xo kpɔ́n ó. Ɖɔ nǔ baɖabaɖa e tɔ́gbó yětɔn lɛ́ɛ dó sin lɛ́ɛ nú yě. Ɖɔ nú yě ɖɔ: Xó e nyɛ Aklúnɔ Mavɔmavɔ ɖɔ nú tɔ́gbó yětɔn lɛ́ɛ ɔ́ ɖíe: hwenu e un sɔ́ Izlayɛ́li togun Jakɔ́bu ví lɛ́ɛ ɔ́, un zin alɔ dó akɔ́n nú yě bǐ, bó ɖe nyiɖée xlɛ́ yě ɖo Ejípu. Un zin alɔ dó akɔn nú yě ɖɔ nyɛ wɛ nyí Mawu Mavɔmavɔ, Mawu yětɔn. Hwenɛ́nu ɔ́, un dó akpá nú yě ɖɔ un ná ɖe yě tɔ́n sín Ejípu, bó kplá yě yi to e un ko ba do ná ɖ'ayǐ ɔ́ mɛ; anɔ̌sin kpó wǐin kpó nɔ́ sa tɔ ɖo to ɔ́ mɛ. To ɔ́ nyɔ́ ɖɛkpɛ hú to lɛ́ɛ bǐ. Un ka ɖɔ nú yě ɖɔ: ‘Mi jó nǔmɛsɛn lɛ́ɛ dó, mi jó nǔ baɖabaɖa énɛ́ lɛ́ɛ dó; mi ma sɔ́ sɛn vodún ɖě ó, mi ma sɛn vodún Ejípu tɔn lɛ́ɛ bó hɛn miɖée blí ó. Nyɛ wɛ nyí Mawu Mavɔmavɔ, Mawu mitɔn.’ “Lo ɔ́, tɔ́gbó mitɔn lɛ́ɛ fɔ́n gǔ dó jǐ ce; yě jló ná ɖótó mì ǎ; mɛ ɖěbǔ ɖo yě mɛ bó jó nǔmɛsɛn dó ǎ; yě ɖě jó nǔ baɖabaɖa énɛ́ lɛ́ɛ e nɔ́ dɔn yě lɛ́ɛ dó ǎ; yě jó Ejípu vodún lɛ́ɛ dó ǎ. Énɛ́ ɔ́, un tunwun ɖɔ un ná ɖe adǎn e jí un ɖe ɔ́ xlɛ́ yě; un ná ɖe xomɛsin e jí un ɖe ɔ́ xlɛ́ yě ɖo Ejípu bɔ é ná jɛ mɛ nú mì. Un ka kpɔ́n dó nyǐkɔ ce wú, bó sɔ́ wa nǔ xá Izlayɛ́li togun ɔ́ gbɔn mɔ̌ ǎ; é má nyí mɔ̌ ǎ ɔ́, togun e mɛ yě ɖe lɛ́ɛ táá wá hu tɛ́ nú mì. Ɖó togun énɛ́ lɛ́ɛ tunwun ɖɔ un sɔ́ nyiɖée xlɛ́ Izlayɛ́li togun ɔ́, bó ná ɖe yě tɔ́n sín Ejípu wɛ. Nǔgbó ɔ́, un ɖe yě tɔ́n sín Ejípu, bó kplá yě yi gbětótló mɛ. Un ná sɛ́n ce lɛ́ɛ yě, bó ɖɔ nǔ e un zɔ́n lɛ́ɛ nú yě, bónú mɛɖé bló ɖ'é jí ɔ́, mɛ ɔ́ ná nɔ gbɛ. Un ɖó gbɔjɛzán ayǐ, bɔ é nyí wuntun ɖé bó ɖe xlɛ́ yě ɖɔ nyɛ Aklúnɔ Mavɔmavɔ ɔ́, un sɔ́ yě ɖó vo nú nyiɖée. Lo ɔ́, yě fɔ́n gǔ dó jǐ ce ɖo gbětótló mɛ. Yě nɔ́ dó vɛ̌ nú sɛ́n ce lɛ́ɛ kpó nǔ e un zɔ́n bɔ mɛ ɖé xwedó ɔ́, mɛ ɔ́ ná nɔ gbɛ lɛ́ɛ kpó. Yě ɖu su nú gbɔjɛzán ɔ́ hwebǐnu lě e é jló yě gbɔn é; énɛ́ ɔ́, un lin ɖɔ un ná ɖe xomɛsin ce xlɛ́ yě ɖo gbětótló ɔ́ mɛ, bó ná sú kún yětɔn dó. Un ka kpɔ́n dó nyǐkɔ ce wú, bó sɔ́ wa nǔ xá Izlayɛ́li togun ɔ́ gbɔn mɔ̌ ǎ, bónú togun e mɔ mì bɔ un kplá Izlayɛ́li ví lɛ́ɛ sín Ejípu ɔ́ má hu tɛ́ nú mì ó. Amɔ̌, un ɖɔ nú yě ɖo gbětótló ɔ́ mɛ dɔ̌n ɖɔ un kún sɔ́ ná kplá yě yi to e mɛ anɔ̌sin kpó wǐin kpó nɔ́ sa tɔ ɖe, bɔ un dó akpá tɔn nú yě ɔ́ mɛ ó; to e nyɔ́ ɖɛkpɛ hú to lɛ́ɛ bǐ ɔ́ wɛ. Un ɖɔ bó xwlé nǔ d'é jí, ɖó yě nɔ gbejí nú sɛ́n ce lɛ́ɛ ǎ; yě xwedó nǔ e un zɔ́n yě lɛ́ɛ ǎ; yě nyi gbɔjɛzánsɛ́n ɔ́ ǎ; vodún yětɔn lɛ́ɛ jɛ́n nyí nǔ e myá nukún nú yě ɔ́. Nǔ yětɔn ká blá wǔ nú mì bɔ un sɔ́ hu yě ǎ, un sɔ́ sú kún yětɔn dó ɖo gbětótló ɔ́ mɛ ǎ.” “Tɔ́gbó mitɔn lɛ́ɛ ɔ́, un ɖɔ nú vǐ yětɔn lɛ́ɛ ɖo gbětótló ɔ́ mɛ ɖɔ: ‘Mi ma nyi sɛ́n tɔ́ mitɔn lɛ́ɛ tɔn ó, mi ma xwedó nǔ e yě zɔ́n mi lɛ́ɛ ó, mi ma sɛn vodún yětɔn lɛ́ɛ bó dó hɛn miɖée blí ó. Nyɛ wɛ nyí Mawu Mavɔmavɔ, Mawu mitɔn; mi xwedó sɛ́n ce lɛ́ɛ, mi bló nǔ e un zɔ́n lɛ́ɛ. Mi zé gbɔjɛzán ɔ́ ɖó vo nú mì, bónú é ná nyí wuntun ɖé ɖo nyɛ kpó mi kpó tɛ́ntin, bónú mi ná tunwun ɖɔ nyɛ wɛ nyí Mawu Mavɔmavɔ, Mawu mitɔn.’ Lo ɔ́, vǐ yětɔn énɛ́ lɛ́ɛ lɔ fɔ́n gǔ dó jǐ ce; yě nyi sɛ́n ce lɛ́ɛ ǎ; yě bló nǔ e zɔ́n lɛ́ɛ ǎ; sɛ́n énɛ́ lɛ́ɛ wɛ gbɛtɔ́ ká ɖó ná nyi bó ná nɔ gbɛ. Yě lɛ́ nyi gbɔjɛzánsɛ́n ɔ́ ǎ. Énɛ́ ɔ́, un tunwun ɖɔ un ná ɖe adǎn e jí un ɖe ɔ́ xlɛ́ yě; un ná ɖe xomɛsin e jí un ɖe ɔ́ xlɛ́ yě ɖo gbětótló ɔ́ mɛ bɔ é ná jɛ mɛ nú mì. Un ka kpɔ́n dó nyǐkɔ ce wú, bó sɔ́ wa nǔ xá yě lě e un ɖó ná wa nǔ xá yě gbɔn é ǎ, bónú togun e mɛ yě ɖe lɛ́ɛ má hu tɛ́ nú mì ó. Ɖó togun énɛ́ lɛ́ɛ tunwun ɖɔ un ɖe tɔ́gbó mitɔn lɛ́ɛ tɔ́n sín Ejípu. Lo ɔ́, un ko gblɔ́n adǎn nú yě ɖo gbětótló mɛ bó xwlé nǔ d'é jí ɖɔ un ná gba yě dó kpé akɔta lɛ́ɛ bǐ mɛ, bó fúnfún yě gbɔn to ɖěvo mɛ to ɖěvo mɛ, ɖó yě nyi sɛ́n ce lɛ́ɛ ǎ; yě xwedó nǔ e un zɔ́n lɛ́ɛ ǎ. Yě nyi gbɔjɛzánsɛ́n ɔ́ ǎ, tɔ́gbó yětɔn lɛ́ɛ sín vodún wɛ nyí nǔ e myá nukún nú yě ɔ́. Énɛ́ ɔ́ wú wɛ un ná sɛ́n e má ná wa ɖagbe nú yě ǎ lɛ́ɛ yě, bó zɔ́n nǔ e yě xwedó ɔ́, yě ma sixú nɔ gbɛ ǎ lɛ́ɛ yě. Un jó yě dó bɔ yě ɖu su: yě nɔ́ yi dó nukɔngbéví yětɔn súnnu lɛ́ɛ zo dó sá vɔ̌. Un jló bónú nǔ e dó sin wɛ yě ɖe ɔ́ ná ɖó adohu nú yě; énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.” Mawu ɖɔ nú mì ɖɔ: “Hwɛ gbɛtɔ́ e, ɖɔ nú Izlayɛ́li togun ɔ́ ɖɔ nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Lě e tɔ́gbó mitɔn lɛ́ɛ lɔ jɛ agɔ dó mì, bó má nɔ gbejí nú mì ǎ gbɔn é ɖíe: Un kplá yě yi to e sín akpá un dó nú yě ɔ́ mɛ. Ée yě jɛ dɔ̌n ɔ́, yě mɔ só ɖé abǐ atín ɖé nú é dó ama ɔ́, yě nɔ́ ná nǔɖuɖu vodún yětɔn lɛ́ɛ ɖo fínɛ́, bó nɔ́ dó nǔ wǎnɖagbenɔ zo nú yě, lobo nɔ ba ahan nú yě ɖo fínɛ́, bó nɔ́ dó xomɛsin nú mì. Énɛ́ ɔ́, un kanbyɔ́ yě ɖɔ: ‘Étɛ́ ba wɛ mi ka nɔ ɖe gbɔn só jí só jí?’ Bɔ bɛ́ sín hwenɛ́nu ɔ́, è nɔ ylɔ́ tɛn énɛ́ lɛ́ɛ mɛ ɖɔ vodún xwé e gbɔn só jí só jí lɛ́ɛ. Hǔn din ɔ́, ɖɔ nú Izlayɛ́li togun ɔ́ ɖɔ nyɛ Aklúnɔ Mavɔmavɔ ɖɔ: Mi ma ɖo miɖée hɛn blí wɛ tɔ́gbó mitɔn lɛ́ɛ ɖɔhun a? Mi ma ɖo vodún yětɔn lɛ́ɛ sɛn wɛ a? Izlayɛ́li togun e mi, ée mi ɖo nǔɖuɖu ná vodún mitɔn lɛ́ɛ wɛ, bó ɖo vǐ mitɔn lɛ́ɛ dó zo dó sá vɔ̌ nú yě wɛ, bó dó ɖo miɖée hɛn blí wɛ ɔ́, mi vɛdó ɖɔ nú mi wá kan nǔ byɔ́ mì ɔ́, un ná yí gbe nú mi wɛ sín a? Gbeɖé kpɔ́n. Nyɛ Aklúnɔ Mavɔmavɔ ɔ́, un xwlé nyiɖée nú mi, un ná lɔn nú mi ǎ. Xó e nyɛ Aklúnɔ Mavɔmavɔ ɖɔ ɔ́ nɛ́. Mi nɔ ɖɔ: Mǐ jló ná cí togun ɖě lɛ́ɛ ɖɔhun, mǐ ná cí akɔta e ɖo to ɖěvo mɛ lɛ́ɛ ɖɔhun, mǐ lɔ ná nɔ́ ɖo atín sɛn wɛ, bó ná nɔ́ ɖo awǐnnya sɛn wɛ; lo ɔ́, nǔ e lin wɛ mi ɖe ɔ́ ná jɛ gbeɖé ǎ. Nyɛ Aklúnɔ Mavɔmavɔ ɔ́, un xwlé nyiɖée nú mi ɖɔ: Acɛkpikpa kpó hlɔ̌nhlɔ́n kpó adǎn kpó wɛ un ná dó kpa acɛ nú mi. Mɔ̌ ɖokpó ɔ́, un ná sɔ́ acɛkpikpa kpó hlɔ̌nhlɔ́n kpó adǎn kpó dó kplé mi sín to ɖěvo ɖěvo e mɛ mi gba kpé gbɔn lɛ́ɛ. Un ná kplá mi yi ɖó vo nú akɔta ɖě lɛ́ɛ ɖo gbětótló mɛ, bó ná húzú kpan nukɔn mi bó ɖɔ hwɛ xá mi. Un ná ɖó hwɛ nú mi lě e un ɖó hwɛ nú tɔ́gbó mitɔn lɛ́ɛ gbɔn ɖo gbětótló Ejípu tɔn mɛ é. Xó e nyɛ Aklúnɔ Mavɔmavɔ ɖɔ é nɛ́. Un ná xa mi kpɔ́n lě e gbɔ̌nyitɔ́ nɔ́ xa gbɔ̌ tɔn lɛ́ɛ kpɔ́n gbɔn é; un ná hɛn mi syɛ́nsyɛ́n, bɔ mi ná nɔ gbejí nú akɔ e mǐ jɛ é. Un ná ɖe mɛ e fɔ́n gǔ dó jǐ ce ɖo mi mɛ lɛ́ɛ kpó mɛ e jɛ agɔ dó mì lɛ́ɛ kpó sín mi mɛ. Un ná ɖe yě sín to ɖěvo ɖěvo e mɛ yě ɖe din lɛ́ɛ mɛ; amɔ̌, yě sɔ́ ná yi Izlayɛ́li yíkúngban ɔ́ jí ǎ. Énɛ́ ɔ́, mi ná tunwun ɖɔ nyɛ wɛ nyi Mawu Mavɔmavɔ. Izlayɛ́li togun e mi, xó e ɖɔ nú mi wɛ nyɛ Aklúnɔ Mavɔmavɔ ɖe ɔ́ ɖíe: É jló mi hǔn mɛ ɖokpó ɖokpó ní ɖo vodún tɔn lɛ́ɛ sɛn wɛ. Amɔ̌, é wá yá ɔ́, mǐ ná kpɔ́n ɖɔ mi ná sixú kpo ɖo gbǐgbɛ́ wɛ ɖɔ émí kún ná se tónú nú mì ó a jí; mǐ nǎ kpɔ́n ɖɔ mi ná kpo ɖo nǔɖuɖu ná vodún mitɔn lɛ́ɛ wɛ, bó ná ɖo nyǐkɔ nyɛ mɛ mímɛ́ ɔ́ tɔn dó xo kɔ́ wɛ a jí. Ɖó só mímɛ́ ce jí, só ɖaxó e ɖo Izlayɛ́li e jí wɛ Izlayɛ́li to ɔ́ bǐ ná wá sɛn mì ɖe; fínɛ́ wɛ mi mɛ e ná ɖo Izlayɛ́li lɛ́ɛ ná wá sɛn mì ɖe. Xó e nyɛ Aklúnɔ Mavɔmavɔ ɖɔ é nɛ́. Un ná yí mi kpó xomɛ kpó ɖo fínɛ́. Un ná ɖo te kpɔ́n ɖɔ mi ná hɛn nǔ e nyɔ́ hú nǔ bǐ ɖo nǔ e ɖo mi sí lɛ́ɛ mɛ lɛ́ɛ wá nú mì ɖo fínɛ́, bó ná ɖo te kpɔ́n nǔ e mi ná hɛn dó wá sá vɔ̌ nú mì lɛ́ɛ bǐ ɖo fínɛ́. Un ná yí nǔníná mitɔn lɛ́ɛ, kpó nǔ e nyɔ́ hú nǔ bǐ ɖo nǔ e mi wá xwlé mì lɛ́ɛ mɛ lɛ́ɛ kpó. Lě e un ko ɖɔ gbɔn ɔ́, un ná ɖe mi sín akɔta ɖěvo ɖěvo lɛ́ɛ mɛ, bó ná ɖe mi sín to ɖěvo ɖěvo e mɛ è gba mi dó kpé gbɔn lɛ́ɛ bǐ mɛ, bó ná kplé mi ɖó fí. Énɛ́ ɔ́ gúdo ɔ́, un ná yí vɔ̌ wǎnɖagbenɔ e mi ná nɔ́ sá nú mì lɛ́ɛ kpó xomɛnyínyɔ́ kpó. Un wa nǔ gbɔn mɔ̌ nú mi ɔ́, un ná ɖe xlɛ́ akɔta ɖě lɛ́ɛ bǐ ɖɔ nyɛ nyí Mawu mɛ mímɛ́ ɔ́. Un ná kplá mi yi Izlayɛ́li, to e un ɖɔ un ná ná tɔ́gbó mitɔn lɛ́ɛ, bó xwlé nǔ d'é jí ɔ́ mɛ; hwenɛ́nu ɔ́, mi ná tunwun ɖɔ un nyí Mawu Mavɔmavɔ. Énɛ́ ɔ́, mi ná flín gbɛ e mi ko zán ɖ'ayǐ ɔ́, kpó walɔ nyanya e hɛn mi blí lɛ́ɛ kpó. Nǔ nyanya énɛ́ lɛ́ɛ e mi dó sin lɛ́ɛ ná zɔ́n bɔ mi ɖésúnɔ sín nǔ ná nɔ́ vɛ́ mi ɖésúnɔ wú. Un ná kpɔ́n dó gbɛ nyanya e mi Izlayɛ́li ví lɛ́ɛ zán ɔ́ kpó walɔ mitɔn blíblí lɛ́ɛ kpó wú dó wa nǔ xá mi ǎ. Lo ɔ́, nyǐkɔ ce wú wɛ un ná kpɔ́n dó, dó wa nǔ xá mi. Énɛ́ ɔ́, mi bǐ ná tunwun ɖɔ nyɛ wɛ nyí Mawu Mavɔmavɔ. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, kpan nukɔn tofɔligbé, bó ɖɔ adǎn e un gblɔ́n sɛ́ dó mɛ e ɖo zungbó tofɔligbé tɔn mɛ lɛ́ɛ ɔ́ nú yě; ɖɔ nǔ e un ɖɔ nú we ɖɔ é ná jɛ dó yě jí lɛ́ɛ nú yě. Ɖɔ nú zungbó tofɔligbé tɔn ɔ́ ɖɔ: Se xó e ɖɔ wɛ nyɛ Aklúnɔ Mavɔmavɔ ɖe é: Un ná dó we zo, bɔ atín towe mǔ lɛ́ɛ kpó xúxú lɛ́ɛ kpó bǐ nǎ ji; myɔ ɖaxó énɛ́ ɔ́ ná ji sín tofɔligbé káká yi totaligbé; myɔ énɛ́ ná slɔ́ mɛ bǐ; nǔɖé ná sixú xo myɔ énɛ́ cí ǎ. Énɛ́ ɔ́, mɛ bǐ nǎ tunwun ɖɔ nyɛ Mawu Mavɔmavɔ wɛ flɔ́ myɔ ɔ́; é sixú cí ǎ.” Un ka sú xó bó ɖɔ nú Mawu ɖɔ: “Á! Aklúnɔ Mavɔmavɔ, mɛ lɛ́ɛ nɔ kó ɖɔ dó wǔ ce ɖɔ: ‘Lǒ dó wɛ jɛ́n é nɔ́ ɖe.’ ” Ée un ɖɔ mɔ̌ ɔ́, Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ e, kpan nukɔn Jeluzalɛ́mu, bó ɖɔ xó dó tɛn mímɛ́ lɛ́ɛ wú, bó ɖɔ nǔ e un ɖɔ é ná jɛ dó Izlayɛ́li to ɔ́ wú é. Ɖɔ nú Izlayɛ́li ví lɛ́ɛ ɖɔ nyɛ Mawu Mavɔmavɔ ɖo ɖiɖɔ nú yě wɛ ɖɔ: Un ná wa nǔ xá mi, un ná ɖe hwǐ ce sín akún mɛ, bó ná hu hwɛjijɔnɔ lɛ́ɛ kpó mɛdídá lɛ́ɛ kpó bǐ. Un ná hu hwɛjijɔnɔ lɛ́ɛ kpó mɛdídá lɛ́ɛ kpó wú wɛ un ná ɖe hwǐ ce sín akún mɛ, bó ná hu mɛ bǐ sín tofɔligbé káká yi totaligbé. Énɛ́ ɔ́, mɛ bǐ ná mɔ nǔ jɛ wú ɖɔ nyɛ Mawu Mavɔmavɔ ɔ́, un ɖe hwǐ ce sín akún mɛ nǔgbó, un ka sɔ́ ná zé d'é mɛ ǎ. Hwɛ gbɛtɔ́ e, hwɛ ɔ́, a nǎ nɔ ɖo azɔn wɛn wɛ ɖo mɛ bǐ nukún mɛ, ɖó a mɔ ɖɔ nǔ bǐ kó gblé, bó ɖo akpɔ mɔ wɛ. Ényí yě wǎ kan nǔ e wú a ɖo azɔn wɛn wɛ ɔ́ byɔ́ we hǔn, ɖɔ nú yě ɖɔ: ‘Nǔ nyanya ɖé wɛ ɖo nǎ jɛ wɛ bɔ un se. É ná hɛn hǔn nú mɛ bǐ, awakanmɛ ná kú mɛ bǐ, mɛ bǐ ná dán ɖě wa gbɔn, afɔ bǐ ná xo dɔjɔ. Nǔ e ná jɛ ɔ́ nɛ́; é ká sɔ́ ɖo lǐnlín mɛ ǎ, é ná jɛ din tlóló. Xó e nyɛ Aklúnɔ Mavɔmavɔ ɖɔ ɔ́ nɛ́.’ ” Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ e, ɖɔ nǔ e ɖo nǎ jɛ wɛ ɔ́ nú yě. Ɖɔ nú yě ɖɔ: Hwǐ ɖokpó ɖíe; é ɖá ganjí, é nɔ́ kɔ́n. Mɛ ná dó hu wɛ è ɖe wú wɛ è gan. É ná kɔ́n wú wɛ è ɖǐɖí wǔ ná. Nǔ ná ɖo mɔ̌ bɔ mǐ ná j'awǎ wɛ a? Togun ce sín gǎn ɔ́ ké ya nú kpo ǎ bó gbɛ́ tónú se. Énɛ́ ɔ́, un sɔ́ hwǐ ɔ́ jó; un sɔ́ jó nú è nǎ ɖǐɖí wǔ ná; un sɔ́ jó nú è nǎ zǎn. È gan hwǐ ɔ́ ganjí, hwǐ ɔ́ nɔ́ kɔ́n; è nǎ sɔ́ hwǐ ɔ́ dó alɔ mɛ nú mɛhutɔ́ ɔ́. Hwɛ gbɛtɔ́ e, sú xó, dǒ gbɛvíhan; ɖó hwǐ énɛ́ ɔ́, togun ce jí wɛ è sɔ́ dó, Izlayɛ́li sín gǎn lɛ́ɛ jí wɛ è sɔ́ dó. È nǎ hu yě bǐ ɖó hwǐ wú; è nǎ hu togun yětɔn bǐ ɖó hwǐ wǔ. Hǔn bo nyi alɔ alɔ mɛ, ɖó nukún ɖó nǔɖé sɔ́ ɖe ǎ. È nǎ dó togun ɔ́ kpɔ́n. Ényí togun ce sín gǎn ɔ́ ma ká ké ya nú kpo ǎ ɔ́, étɛ́ ká ná jɛ? Xó e nyɛ Aklúnɔ Mavɔmavɔ ɖɔ ɔ́ nɛ́. Din ɔ́, hwi gbɛtɔ́ e, ɖɔ nǔ e ɖo nǎ jɛ wɛ bɔ un ɖɔ nú we ɔ́ nú yě; zin alɔ dó alɔ mɛ azɔn ɖě, azɔn we, azɔn atɔn. Ɖó mɛhuhwí wɛ, hwǐ e nɔ hu mɛ bǐ é wɛ, hwǐ e ɖo mɛ hu gbɔn fí bǐ wɛ é wɛ. Un jló ná dó kpo awakanmɛ nú yě bó ná hu yě. Un sɔ́ mɛhuhwí ɔ́ ɖó hɔn ɖokpó ɖokpó ta. Hwǐ ɔ́ nɔ́ kɔ́n jǐkɛwun ɖɔhun; è gan hwǐ ɔ́ bɔ é ná nɔ́ hu mɛ ganjí. Hwǐ ɖíɖá, hu mɛ ɖo aɖisí, hu mɛ ɖo amyɔ, hu gbɔn fí bǐ. Din ɔ́, nyi lɔmɔ̌ ná zin alɔ dó alɔ mɛ, bó dó nǔ sin yi jɛ bǎ e mɛ xomɛ sin mì yi ɖó é. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ɖe ali we nú axɔ́sú Babilɔ́nu tɔn ɔ́ ná gbɔn kpó ahwangɔnu tɔn kpó. A nǎ ɖe ali we lɛ́ɛ bǐ sín to ɖokpó ɔ́ mɛ. Blǒ wuntun ɖokpó ɖó ali lɛ́ɛ ɖokpó ɖokpó sín bǐbɛ́mɛ dó xlɛ́ toxo e mɛ ali ɔ́ yi é. Ali we lɛ́ɛ ɖokpó yi Hlaba ɖo Amumɔ́ɔ ví lɛ́ɛ to mɛ; wegɔ́ ɔ́ yi ahohó Jeluzalɛ́mu toxo ɔ́ tɔn kɔn, ɖo Judáa. Axɔ́sú Babilɔ́nu tɔn nɔ te fí e ali we lɛ́ɛ bɛ́ sín ɔ́, bó kan nǔ bó ná tunwun toxo e sín ali e é ná sɔ́ é: é sɔ́ gǎ tɔn lɛ́ɛ dó kan nǔ, bó kan nǔ byɔ́ bǒcyɔ tɔn lɛ́ɛ, é kpɔ́n lě e kanlin e é dó sá vɔ̌ ná lɛ́ɛ sín alǐn ɖe é. Ée é ɖo nǔ kan wɛ ɔ́, gǎ e ɖɔ Jeluzalɛ́mu wɛ é ná yi ɔ́ jɛ alɔ tɔn aɖisí ɔ́ mɛ. É jɛ Jeluzalɛ́mu ɔ́, é ná gblɔ́n ahwan dán bó ná sú xó bɔ ahwan ná bɛ́. É ná ɖó mɔ e nɔ gba nǔ ɔ́ nú hɔntogbó Jeluzalɛ́mu toxo ɔ́ tɔn lɛ́ɛ; é ná kplé kɔ́ e gúdo sɔ́ja lɛ́ɛ ná nɔ é, bó ná kun do e mɛ sɔ́ja lɛ́ɛ ná nɔ́ ɔ́ lɛ́ lɛ̌ dó toxo ɔ́. Jeluzalɛ́munu lɛ́ɛ mɔ ɖɔ nǔ énɛ́ e è kan bɔ é sɔ́ toxo émítɔn ɔ́, xó énɛ́ ɔ́, xó yǎyá wɛ, ɖó è dǒ akpá nú yě ɖɔ émí ná nya xɛ ɖo yě jí, bɔ yě ɖeji d'é wú. Lo ɔ́, Babilɔ́nu xɔ́sú ɔ́ flín yě ɖɔ yě kún nɔ gbejí ó, bó ɖɔ nú yě ɖɔ émí ná wlí kannumɔ yětɔn. Énɛ́ ɔ́ wú ɔ́, nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Nǔ e dó sin wɛ mi ɖe lɛ́ɛ nɔ́ flín agɔ e mi jɛ lɛ́ɛ mì hwebǐnu; nǔwiwa mitɔn lɛ́ɛ nɔ́ ɖe hwɛ e mi nɔ hu lɛ́ɛ kpó nǔ e mi nɔ dó sin lɛ́ɛ kpó nyi wěxo. Ée mi ma jló ná jó hwɛhuhu dó ǎ é ɔ́, un ná jó mi nú kɛntɔ́. “Hwɛ gbejímánɔtɔ́ Izlayɛ́li tɔn, nǔ nyanya e dó sin wɛ a ɖe lɛ́ɛ ɔ́, gan ɔ́ ná wá xo bɔ è nǎ ɖó bǐ te. Nǔ e ɖɔ nú we wɛ nyɛ Aklúnɔ Mavɔmavɔ ɖe ɔ́ ɖíe: È nǎ yí tablá towe sín ta nú we; è nǎ ɖe axɔ́súgbákún sín ta nú we; nǔ bǐ nǎ húzú. Mɛ e nyí gbɛtɔ́ kpaa lɛ́ɛ ɔ́, è nǎ zé yě su, bɔ mɛ e nyí gbɛtɔ́ nukúnɖéjí lɛ́ɛ ɔ́, è nǎ zé yě hwe. Aglingbigba, aglingbigba! Un ná zé Jeluzalɛ́mu toxo ɔ́ dó húzú aglingbigba. È nǎ gba toxo ɔ́ bǐ hánnyá, bɔ é ná nɔ mɔ̌ káká jɛ hwenu e mɛ e lɔ mɛ un sɔ́ hwɛɖiɖɔ dó así ná ɔ́ ná wá é.” Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ ɔ́, ɖɔ xó e ɖɔ nú we wɛ un ɖe ɔ́ nú Amumɔ́ɔ ví lɛ́ɛ; ɖɔ lě e yě nɔ́ zun Izlayɛ́li ví lɛ́ɛ gbɔn é nú yě; ɖɔ nú yě ɖɔ: È zé hwǐ ɖokpó ɖó te bɔ é ná hɛn nǔ gblé; è ɖǐɖí wǔ ná bɔ é ná hu mɛ; è ɖǐɖí wǔ ná bɔ é ná kɔ́n jǐkɛwun ɖɔhun. Hwenu e mi nɔ ɖo xó kpa ɖɔ wɛ, bó nɔ́ ɖɔ nǔ wɛ émí mɔ ɔ́, hwenu e mi nɔ ɖo awo ɖó wɛ, bó nɔ́ ɖɔ nǔ kan wɛ émí ɖe ɔ́, hwǐ ɔ́ ná jɛ kɔ gbo mɛ e ma nɔ ɖó sísí nú Mawu ǎ lɛ́ɛ kpó adǎkaxotɔ́ lɛ́ɛ kpó jí. Ɖó hwenu e nǔ nyanya e dó sin wɛ mi ɖe ɔ́ ná nɔ te dó ɔ́ su. Din ɔ́, mi bo fɔ hwǐ mitɔn lɛ́ɛ dó akún mɛ. Fí e è dǒ kún mitɔn ɖe ɔ́, to e mɛ mi jɔ ɖe ɔ́ mɛ wɛ un ná wa nǔ xá mi ɖe. Un ná ɖe xomɛsin ce xlɛ́ mi; un ɖo adǎn jí ɔ́, lě e un nɔ dó nǔ sin gbɔn ɔ́, un ná ɖe xlɛ́ mi. Un ná jó mi nú gbɛtɔ́ alǎnnúwatɔ́ e nǔhɛngblé nɔ́ myá nukún ná lɛ́ɛ. Zo ná fyɔ́ mi; hun mitɔn ná sa gbɔn to ɔ́ bǐ mɛ. Énɛ́ ɔ́ gúdo ɔ́, mɛ ɖěbǔ sɔ́ ná flín mi ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́, hwɛ ɔ́, blǒ hwiɖée ɖó bó ná ɖɔ hwɛ xá Jeluzalɛ́mu mɛhutɔ́ toxo ɔ́; ma xo nǔ kpɔ́n ó. Ɖɔ nǔ baɖabaɖa e é dó sin lɛ́ɛ bǐ. Ɖɔ nǔ e nyɛ Aklúnɔ Mavɔmavɔ ɖɔ é n'i. Ɖɔ n'i ɖɔ: Toxo ɖé wɛ a nyǐ bɔ mɛ towe lɛ́ɛ nɔ́ ɖo mɛ hu wɛ; nǔ énɛ́ e wa wɛ yě ɖe ɔ́, hwi wú wa nǔ dó wɛ yě ɖe, ɖó hwenu e è nǎ gba we ɔ́ sín nǔ sɔ́ wɛ yě ɖe mɔ̌. Yě lǐ vodún tɛnmɛ tɛnmɛ lɛ́ɛ bó ɖu su nú ayǐkúngban towe. Mɛ e a hu lɛ́ɛ ɔ́, hwɛ tɔn ɖo kɔ nú we. Vodún e a lǐ lɛ́ɛ hɛn we blí. Nǔ énɛ́ lɛ́ɛ e a blǒ lɛ́ɛ zɔ́n bɔ è sɛ azǎn e è nǎ dó ɖó hwɛ nú we ɔ́ wá do, bɔ xwe e xwe è nǎ fó xó towe ɔ́ kó ja. Énɛ́ ɔ́ wú wɛ un ná jó we nú togun ɖě lɛ́ɛ, bɔ yě ná nɔ zun we; akɔta ɖě lɛ́ɛ bǐ ná nɔ́ ɖɔ nyɔmɛ wǔ we. Nǔ hannyahannya e wa wɛ a ɖe ɔ́ wɛ zɔ́n bɔ wi towe kɔ́n, bɔ to e ɖo zɔ nú we lɛ́ɛ kpó to e sɛkpɔ́ we lɛ́ɛ kpó ná nɔ́ ko we. “Izlayɛ́li, mɛ e nyí gǎn ɖo ayǐkúngban towe jí lɛ́ɛ ɔ́, yě nɔ́ mɔ ɖɔ émí wɛ ɖó acɛ bó nɔ́ hu mɛ. È nɔ kpɔ́n nukún mɛ nú tɔ́ mɛtɔn kpó nɔ mɛtɔn kpó ɖo ayǐkúngban towe jí; è nɔ xo jǒnɔ lɛ́ɛ ɖu, è nɔ táfú tɔ́cyɔvǐ lɛ́ɛ kpó asúkúsi lɛ́ɛ kpó. È nɔ ɖó sísí ɖěbǔ nú tɛn e nyí ce lɛ́ɛ é ǎ; è nɔ nyi gbɔjɛzánsɛ́n ɔ́ ǎ. Mɛ ɖé lɛ́ɛ ɖo ayǐkúngban towe jí, bó nɔ́ ɖɔ xó nyanya dó nɔzo yětɔn lɛ́ɛ wú, bó ná hu yě. Mɛ towe lɛ́ɛ nɔ́ ɖu nǔ e è xwlé vodún é, gbɔn só jí só jí; nǔ baɖabaɖa wɛ mɛ lɛ́ɛ nɔ́ dó sin ɖo ayǐkúngban towe jí. Yě mɛ ɖé lɛ́ɛ nɔ́ ba tɔ́ yětɔn sín asi, abǐ yě nɔ́ hwlɛ́n kan xá nyɔ̌nu e jɛ glegbe é bó nɔ́ ɖó xó xá. Nǔ baɖabaɖa e yě nɔ́ dó sin lɛ́ɛ ɖě lɛ́ɛ ɖíe: mɛ ɖě nɔ́ ba nɔzo tɔn sín asi; mɛ ɖě nɔ́ ɖó xó xá vǐ tɔn sín asi; mɛ ɖě nɔ́ hwlɛ́n kan xá nɔví tɔn, tɔ́ tɔn ví, bó nɔ́ ɖó xo xá. Yě nɔ́ ɖu nǔ ɖo nǔ mɛ, bó nɔ́ kɔn kanjɔ kɔn nyi ayǐ; yě nɔ́ sa akwɛ́ nú mɛ; yě nɔ́ táfú to yětɔn mɛ nu lɛ́ɛ, bó nɔ́ jɛ dɔkun. Yě nɔ́ wɔn mì. Xó e nyɛ Aklúnɔ Mavɔmavɔ ɖɔ ɔ́ nɛ́. “Jeluzalɛ́munu e mi, din ɔ́, un myɔ́ akpotokwín dó mi jí, ɖó nukúnkɛndídó mitɔn kpó mɛhuhu mitɔn kpó wú. Hwenu e un ná húzú kpan nukɔn mi ɔ́, mi ná sixú kpan akɔ́n a? Awakanmɛ mitɔn ná sixú syɛ́n bɔ mi ná nɔ te nukɔn ce a? Nyɛ Mawu Mavɔmavɔ wɛ ɖɔ bó ká ná bló. Un ná gba mi dó kpé akɔta ɖě lɛ́ɛ mɛ, bɔ mi ná gbɔn to lɛ́ɛ bǐ mɛ. Un ná ɖó nǔ kwíji kwíji e wa wɛ mi ɖe lɛ́ɛ bǐ te. Mi ná ɖu winnyá ɖo akɔta ɖě lɛ́ɛ nukɔn ɖó nǔ e mi nɔ dó sin lɛ́ɛ wú; hwenɛ́nu lo ɔ́, mi ná tunwun ɖɔ nyɛ wɛ nyí Mawu Mavɔmavɔ.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, Izlayɛ́li ví lɛ́ɛ bǐ wɛ cí nǔ e má sɔ́ xɔ akwɛ́ ɖé ǎ é ɖɔhun ɖo nukún ce mɛ. Yě cí nǔ kwíji e è nɔ xo zo dó kpatágan, ganvɔ, aflélé abǐ gan, bɔ é nɔ́ gosín mɛ é ɖɔhun. Énɛ́ ɔ́ wú wɛ nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Mi bǐ wɛ cí nǔ kwíji énɛ́ e má sɔ́ xɔ akwɛ́ ɖé ǎ é ɖɔhun, bɔ un ná kplé mi bǐ ɖó Jeluzalɛ́mu toxo ɔ́ tɛ́ntin. Lě e è nɔ kplé kpatágan, ganvɔ, gan, sunmí abǐ aflélé dó myɔ mɛ bó nɔ́ xo zo dó, bó nɔ́ sínsín gbɔn é wɛ un ná nɔ adǎn jí, bó ná kplé mi bǐ kpó xomɛsin kpó, bó sínsín ɖo myɔ nu. Un ná kplé mi, bó ná sɔ́ xomɛsin ce dó xo zo dó mi, bɔ mi ná sínsín, ɖo Jeluzalɛ́mu toxo ɔ́ tɛ́ntin. Mi ná cí kpatágan e ɖo sínsín sínsín wɛ ɖo myɔ mɛ é ɖɔhun, ɖo Jeluzalɛ́mu toxo ɔ́ mɛ. Énɛ́ ɔ́, mi ná tunwun ɖɔ nyɛ Mawu Mavɔmavɔ wɛ ɖo xomɛsin ce ɖe xlɛ́ mi wɛ.” Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ e, ɖɔ nú Izlayɛ́li ví lɛ́ɛ ɖɔ ayǐkúngban yětɔn cí ayǐkúngban e è ma slá wǔ ná ǎ é ɖɔhun; azǎn e gbe un ɖo xomɛsin jí ɔ́, Izlayɛ́li to ɔ́ cí to e mɛ jǐ ma ja dó, bó ɖe nǔ kwíji kwíji sín mɛ ǎ é ɖɔhun. Gbeyíɖɔ yětɔn lɛ́ɛ nɔ́ ɖó gbe kpɔ́ bó nɔ́ dó nǔ sin; yě cí kinnikínní e wlí lan bó ɖo vǔnvún ɖu wɛ, bó ɖo gbe dó ɖ'é kɔn wɛ é ɖɔhun; yě nɔ́ hu mɛ lɛ́ɛ, yě nɔ́ yí dɔkun mɛ lɛ́ɛ tɔn kpó nǔ xɔ akwɛ́ mɛ lɛ́ɛ tɔn kpó; yě nɔ́ ɖo mɛ lɛ́ɛ hu wɛ bɔ asúkúsi ɖo kpɔ́. Vɔ̌sánú-xwlémawutɔ́ yětɔn lɛ́ɛ nɔ gba sɛ́n ce lɛ́ɛ; yě nɔ́ ɖu su nú tɛn e è sɔ́ ɖó vo nú mì lɛ́ɛ. Yě tunwun nǔ e è sɔ́ ɖó vo nú mì é ɖo nǔ e nyí nǔ yǎyánɔ é mɛ ǎ. Yě kplɔ́n mɛ lɛ́ɛ nú yě ná tunwun nǔ e nyí nǔ mímɛ́ ɔ́ ɖó vo nú nǔ e nyí nǔ blíblí é ǎ; yě ɖésúnɔ jló bó gɔn gbɔjɛzánsɛ́n ɔ́ nyi; énɛ́ ɔ́, un sɔ́ nyí nǔɖé ɖo yě nukún mɛ ǎ. Togun ɔ́ sín gǎn lɛ́ɛ cí hla e wlí lan bó ɖo vǔnvún ɖu wɛ é ɖɔhun. Yě nɔ́ kɔn kanjɔ kɔn nyi ayǐ; yě nɔ́ hu mɛ lɛ́ɛ bó nɔ́ bɛ́ nǔ yětɔn. Gbeyíɖɔ yětɔn lɛ́ɛ nɔ́ bú nǔ dó nǔ nyanya énɛ́ lɛ́ɛ e dó sin wɛ yě ɖe lɛ́ɛ bǐ. Nǔ e yě má mɔ ǎ é wɛ yě nɔ́ ɖɔ, bó nɔ́ ɖo adingban ɖó kpé wɛ. Yě nɔ́ ɖɔ émí ɖo wɛn ce dó wɛ, nyɛ Mawu Mavɔmavɔ ka ɖɔ xó ɖěbǔ nú yě ǎ. Mɛ e ɖo to ɔ́ mɛ lɛ́ɛ nɔ́ ɖo adǎka xo wɛ; yě nɔ́ ja ajo, yě nɔ́ táfú wamamɔnɔ lɛ́ɛ kpó gbɛ̌dónánɔ lɛ́ɛ kpó; yě nɔ́ gba acɛ jǒnɔ lɛ́ɛ wú. Un ba mɛ e ná sixú yí gbe ɖo yě mɛ bó mɛ ahohó lɛ́ lɛ̌ dó to é, mɛ e ná nɔ te ɖo fí e ahohó ɔ́ mu ɖe é ɖo nukɔn ce é, bó ná jɛ ahwan to ɔ́ jí, bónú un ma gba to ɔ́ ó é. Un ba mɛ mɔ̌hun ɖo yě mɛ, un ka mɔ mɛɖé ǎ. Énɛ́ ɔ́ wú ɔ́, un ná ɖe adǎn e jí un ɖe ɔ́ xlɛ́ yě; un ná sɔ́ xomɛsin ce sín zo dó fyɔ́ yě bǐ, bó sú gbɛ nyanya e yě zán ɔ́ sín axɔ́ yě. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ɖǒtó hwenuxó nyɔ̌nu we élɔ́ lɛ́ɛ tɔn; nɔ ɖokpó ɔ́ ví wɛ nú yě. Hwenu e yě wínnyá é ɔ́, yě hun aga ɖo Ejípu fí e yě ɖe é. Fínɛ́ wɛ è lǐlí alɔ anɔ̌ yětɔn wú ɖe; fínɛ́ wɛ è gbǎ avɔ nú yě ɖe. È nɔ ylɔ́ mɛxó ɔ́ ɖɔ Oxóla, bó nɔ́ ylɔ́ bɔd'é wú ɔ́ ɖɔ Oxoliba. Mɛxó ɔ́ wɛ nyí Samalíi, bɔ bɔd'é wú ɔ́ nyí Jeluzalɛ́mu; yě mɛ we lɛ́ɛ bǐ wɛ un da bɔ yě jǐ vǐ súnnu kpó nyɔ̌nu kpó nú mì. Lo ɔ́, Oxóla ɔ́ ɖo asi ce nyí wɛ cóbó ká nɔ́ lɛ aga. É yí wǎn nú Asilíinu lɛ́ɛ bɔ é vɛ́ jlɛ́ bó sɔ́ yě dó ɖó xɔnnɔ. Xɔnnɔ tɔn lɛ́ɛ ɔ́, awu vɔvɔ cɛ́cɛ́ wɛ yě nɔ́ dó, ɖó tokpɔngán wɛ yě nyí, hwɛɖɔtɔ́ wɛ nú yě. Dɔ̌nkpɛvú wɛ nú yě, yě nyɔ̌ ɖɛkpɛ ɖésú, bó nyɔ́ sɔ́ kun tawun. Oxóla nɔ nyɔ́ ɖo azɔ̌watɔ́ ɖaxó ɖaxó Asilíinu énɛ́ lɛ́ɛ sí; nú yě ɖě jló e ɔ́, é nɔ yi sɛn vodún yětɔn lɛ́ɛ, bó nɔ́ hɛn éɖée blí. Agalɛtɔ́ gbɛ e é zán ɖo Ejípu ɔ́, é jó dó ǎ. Hwenu e é ɖo ɖyɔ̌vǐ mɛ ɖo Ejípu ɔ́, Ejípunu lɛ́ɛ nɔ́ ɖó xó xá ɛ; yě nɔ́ hɛn anɔ̌ tɔn bó nɔ́ ɖó xó xá ɛ. Énɛ́ ɔ́, un gbɔ bo jó e nú xɔnnɔ tɔn Asilíinu e é yí wǎn ná bɔ é vɛ́ jlɛ́ lɛ́ɛ. Ée un jó e nú yě ɔ́, yě ɖe e nyi mɛ̌ bó wlí vǐ tɔn súnnu kpó nyɔ̌nu kpó. Énɛ́ ɔ́ gúdo ɔ́, yě sɔ́ hwǐ dó hu i, bó sɔ́ ɛ dó dó sɛ́n dó kplɔ́n nǔ nyɔ̌nu lɛ́ɛ, ɖó è dɔn nǔ e é wa ɔ́ sín tó n'i.” “Oxoliba mɔ nǔ e jɛ dó dadá tɔn Samalíi jí lɛ́ɛ bǐ có súnnu jló mɛ éyɛ́ tɔn ɔ́, é lɛ́ dó atɔ́ɔ́nnu jí; é hɛn éɖée blí hú dadá tɔn; aga e éyɛ́ lɛ ɔ́ lɛ́ hú aga e dadá tɔn lɛ é. Asilíi tokpɔngán lɛ́ɛ, Asilíi sín hwɛɖɔtɔ́ lɛ́ɛ kpó ahwanfuntɔ́ tɔn lɛ́ɛ kpó ɔ́, é yí wǎn nú yě bɔ é vɛ́ jlɛ́. Asilíinu énɛ́ lɛ́ɛ nɔ dó awu ɖagbe ɖagbe; dɔ̌nkpɛvú wɛ nú yě; yě nyɔ́ ɖɛkpɛ ɖésú bó nyɔ́ sɔ́ kun tawun. É lɔmɔ̌ nɔ hɛn éɖée blí; é kpó dadá tɔn kpó bǐ wɛ sɔ́ ali ɖokpó ɔ́. Amɔ̌, aga Oxoliba tɔn ɔ́ zɛ kpá. É su gbe ɖokpó, bɔ é mɔ bɔ è ɖe Babilɔ́nunu súnnu ɖé lɛ́ɛ dó dǒ wǔ, bó sá nǔ vɔvɔ dó. Yě sin gǒjíblánú gbajagbaja ɖé lɛ́ɛ, bɔ tablá ɖagbe ɖagbe ɖé lɛ́ɛ ɖo ta yětɔn; ahwanfuntɔ́ Babilɔ́nu tɔn e nyɔ́ ahwan fun, bó ɖeji d'é wú lɛ́ɛ sín ɖiɖe wɛ. A mɔ yě lě ɔ́, a nǎ ɖɔ Babilɔ́nu ví jiji lɛ́ɛ wɛ. Ée Oxoliba mɔ ɖiɖe yětɔn lě tlóló é ɔ́, súnnu Babilɔ́nu tɔn lɛ́ɛ jló e káká, bɔ é sɛ́ wɛn dó yě ɖo to yětɔn mɛ. Énɛ́ ɔ́, Babilɔ́nunu lɛ́ɛ wá gɔ̌n tɔn, bó ɖó xó xá ɛ, bó hɛn ɛ blí. Ée yě ɖó xó xá ɛ, bó hɛn ɛ blí ɔ́, nǔ yětɔn jɛ wǔ tɔn vɛ́ jí. É wa nǔ agalɛtɔ́ ɖɔhun; é jɛ mɛ̌ ɖo togun mɛ agbawungba; énɛ́ ɔ́, nǔ tɔn vɛ́ wǔ ce lě e dadá tɔn nú vɛ́ wǔ ce gbɔn é. Lo ɔ́, é fɔ́n ɔ́, é nɔ́ ɖo aga te, bɔ énɛ́ nɔ́ flín mì lě e é lɛ aga gbɔn hwenu e é ɖo ɖyɔ̌vǐ mɛ ɖo Ejípu é. Ɖo Ejípu dɔ̌n ɔ́, súnnu e nɔ zán gbɛ kanlin ɖɔhun lɛ́ɛ wɛ é yí wǎn ná bó nɔ́ ba; kanlin ɖɔhun wɛ súnnu énɛ́ lɛ́ɛ nɔ́ ba nyɔ̌nu. È nǎ ɖɔ lɔ ɔ́, mɛ énɛ́ lɛ́ɛ nyí gbɛtɔ́ ǎ, tócí abǐ sɔ́ wɛ nú yě.” “Oxoliba, a jló ná lɛ́ zán gbɛ e a zǎn hwenu e a ɖo ɖyɔ̌vǐ mɛ ɖo Ejípu, bɔ Ejípunu lɛ́ɛ nɔ hɛn anɔ̌ towe bó nɔ́ lílí alɔ wú, bó nɔ́ ɖó xó xá we é. Énɛ́ ɔ́ wú wɛ nyɛ Aklúnɔ Mavɔmavɔ ɖo ɖiɖɔ nú we wɛ ɖɔ: Oxoliba, un ná fɔ́n xɔnnɔ towe lɛ́ɛ dó jǐ towe; yě mɛ e a gbɛ́ wǎn ná din lɛ́ɛ ɔ́, un ná kplá yě sín fí bǐ, bɔ yě ná xísí dó we. Babilɔ́nunu lɛ́ɛ, Kaludéenu lɛ́ɛ bǐ, Pekɔ́dinu lɛ́ɛ, Coanu lɛ́ɛ kpó Koanu lɛ́ɛ kpó Asilíinu lɛ́ɛ bǐ kpó; yě dɔ̌nkpɛvú ɖagbe ɖagbe tokpɔngán lɛ́ɛ, hwɛɖɔtɔ́ lɛ́ɛ, ahwangán nukúnɖéjí lɛ́ɛ, azɔ̌watɔ́ nukúnɖéjí lɛ́ɛ; yě mɛ énɛ́ lɛ́ɛ e nyɔ́ sɔ́ kun ganjí lɛ́ɛ. Yě ná bɛ̌ ahwanfunnú yětɔn lɛ́ɛ bó wá tɔ́n ahwan we; yě ná hɛn ahwankɛkɛ́ví, ahwanhún tɛnmɛ tɛnmɛ; ahwanfuntɔ́ yětɔn lɛ́ɛ ná hɛn gǎglónú ɖaxó kpó kpɛví kpó, bó ná xwe ahwangbákún. Xɔnnɔ towe lɛ́ɛ ná xá we kpó ahwanfuntɔ́ énɛ́ lɛ́ɛ kpó. Un ná ná acɛ yě bɔ yě ná ɖɔ hwɛ xá we; sɛ́n yě ɖésúnɔ tɔn wɛ yě ná dó ɖɔ hwɛ xá we. Oxoliba, un sin xomɛ dó we, ɖó asi ce wɛ a nyǐ bó ká ɖo aga lɛ wɛ; énɛ́ wú wɛ yě ná kpa awɔntín towe, bó kpa tó towe, bó hu hwi ɖésúnɔ ɔ́ ɖó hwǐ wú. Yě ná wlí vǐ towe súnnu kpó nyɔ̌nu kpó. Yě mɛ e ná kpo lɛ́ɛ ɔ́, è nǎ dó yě zo. Yě ná fɔ avɔ towe kpó sikánú towe lɛ́ɛ bǐ kpó. Un wa mɔ̌ xá we ɔ́, nǔ blíblí e wa wɛ a ɖe lɛ́ɛ, kpó aga e a bɛ̌ lilɛ sín Ejípu ɔ́ kpó ɔ́, un ná ɖó bǐ te. Énɛ́ ɔ́, súnnu ɖě sɔ́ ná jló we ǎ, a ka sɔ́ ná flín Ejípunu lɛ́ɛ ɖě ǎ. “Ɖó xó e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Un ná jó we nú mɛ e a gbɛ̌ wǎn ná lɛ́ɛ, mɛ e sín xó a ma sɔ́ ba ǎ lɛ́ɛ. Mɛnúvɛ́mɛwú sín nǔ wɛ yě ná wa xá we. Yě ná bɛ́ nǔ e a jɛ dɛ̌n bó wá lɛ́ɛ bǐ, bó ná jó we dó nyi mɛ̌ jɔgbe, bó ná dó winnyá we ɖo togun mɛ agbawungba; nǔ blíblí e a wa lɛ́ɛ, aga e a hun ɔ́ kpó hɛ̌nnú e a wa lɛ́ɛ kpó wɛ ɖó we mɔ̌. A lɛ aga xá to ɖěvo mɛ nu lɛ́ɛ; a sɛn vodún yětɔn lɛ́ɛ, bó hɛn hwiɖée blí. Dadá towe sín afɔdo mɛ wɛ a tɛ afɔ; énɛ́ wútu ɔ́, xomɛsin ce e un kpé nú dadá towe ahan ɖɔhun ɔ́, un ná kpé nú hwi lɔmɔ̌. Nǔ e ɖɔ nú we wɛ nyɛ Aklúnɔ Mavɔmavɔ ɖe ɔ́ ɖíe; ɖǒtó: Kɔ́fu e mɛ dadá towe nu xomɛsin ce ɖe ahan ɖɔhun ɔ́, hwi lɔ ná nu xomɛsin ce ɖo kɔ́fu ɖokpó ɔ́ mɛ; kɔ́fu ɖaxó hotohoto ɖé wɛ bó gɔ́ bǐ. Mɛ ɖé mɔ kɔ́fu ɔ́, è nǎ nɔ ko we, è nǎ nɔ́ gbɔ́ aca ta towe, ɖó kɔ́fu ɔ́ d'agba dín. Wǔvɛ́ e a nǎ mɔ ɔ́ ná mú we ahan ɖɔhun; nǔhɛngblé kɔ́fu wɛ, wǔblánɔnú kɔ́fu wɛ; kɔ́fu e dadá towe Samalíi nu ɔ́ wɛ. A nǎ nu kɔ́fu ɔ́ káká dó azan, a nǎ nu káká bó gba kɔ́fu ɔ́, a nǎ sɔ́ aɖǔ towe dó gba kɔ́fu ɔ́, bó ná sɔ́ xwɛ tɔn tlɛ́n anɔ̌ ta. Xó e nyɛ Aklúnɔ Mavɔmavɔ ɖɔ ɔ́ nɛ́. Énɛ́ ɔ́ wú wɛ nyɛ Aklúnɔ Mavɔmavɔ ɖo ɖiɖɔ wɛ ɖɔ: Ɖó a wɔn mì bó jó mì dó wútu ɔ́, è nǎ dɔn tó nú hwi lɔ ɖó aga e a lɛ lɛ́ɛ kpó nǔ blíblí e a wa lɛ́ɛ kpó wú.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, sɔ́ nǔ bó ná yi ɖɔ hwɛ xá Oxóla kpó Oxoliba kpó. Ɖɔ nǔ baɖabaɖa e yě dó sin lɛ́ɛ. Yě bǐ wɛ dó afɔ gbě; gbɛtɔ́ kanjɔ ɖo alɔ yětɔn; yě sɛn vodún; aga lɛ xá vodún lɛ́ɛ wɛ yě ɖe, yě hu vǐ súnnu e yě ji nú mì lɛ́ɛ dó vodún. Nǔ e yě dó sin gbe nɛ́ gbe ɔ́ lɛ́ hú mɔ̌; yě mɛ we lɛ́ɛ ɖu su nú sinsɛnxɔ ce, bó ɖu su nú gbɔjɛzán ce. Nǔgbó ɔ́, hwenu e yě ɖo vǐ yětɔn súnnu lɛ́ɛ hu dó vodún yětɔn wɛ ɔ́, yě byɔ́ xwé ce gbe gbe ɖokpó ɔ́, bó ɖu su nú xwé ce. Nǔ e yě dó sin ɖo sinsɛnxɔ ce mɛ ɔ́ nɛ́. Hú mɔ̌ ɔ́, yě sɛ́ wɛn dó súnnu ɖěvo lɛ́ɛ ɖo to ɖěvo mɛ ɖɔ yě ní wá. Ée súnnu lɛ́ɛ se wɛn yětɔn lě tlóló ɔ́, yě wǎ gɔ̌n yětɔn; Oxóla kpó Oxoliba kpó ba acɔ́ ɖ'ayǐ nú súnnu lɛ́ɛ; yě lɛ wǔ ganjí bó sá nǔ dó wundama bó dó sikánú tɛnmɛ tɛnmɛ. Énɛ́ ɔ́ gúdo ɔ́, yě mlɔ́ ayǐ wɛn ɖo zan ɖagbe ɖagbe jí, bó sɔ́ távo ɖokpó ɖó zan ɔ́ nukɔn, bó bɛ́ zǎlínkpɔ́n kpó ami wǎnɖagbenɔ e nyí ce lɛ́ɛ kpó ɖ'é jí. Mɛ e wá lɛ́ɛ sukpɔ́; è ɖo xósúsú yětɔn se wɛ, mɛ e ma ɖo nǔɖé lin wɛ ǎ lɛ́ɛ ɖo xó sú wɛ ɖɔhun. È dǒ wɛn sɛ́ dó Sabenyɛ́ɛ lɛ́ɛ bɔ yě gosín akúgbéjí bó wá. Yě sɔ́ alɔgan dó alɔ nú nɔví nɔví we lɛ́ɛ, bó xwe jɛ̌gbákún nú yě. Énɛ́ ɔ́, un kanbyɔ́ nyiɖée ɖɔ: ‘Mɛ e ko lɛ aga káká, bɔ anyǔ tɔn bǐ kó wló mɔ̌ é ɔ́, é ná lɛ́ kpo ɖo aga lɛ wɛ a? Súnnu ná kpo ɖo gɔ̌n tɔn wá wɛ mɛ dó avɔ xɔnu ɖɔhun a? Mɔ̌ wɛ súnnu ká kpo ɖo Oxóla kpó Oxoliba kpó gɔ́n wá wɛ mɛ e hun aga é ɖɔhun.’ Amɔ̌, gbɛtɔ́ hwɛjijɔnɔ lɛ́ɛ ná ɖɔ hwɛ xá nyɔ̌nu we énɛ́ lɛ́ɛ, lě e è nɔ ɖɔ hwɛ xá mɛ e dó afɔ gbě é kpó mɛ e hu mɛ é kpó é ɖɔhun. Ɖó yě dǒ afɔ gbě; gbɛtɔ́ kanjɔ ɖo alɔ yětɔn. “Nǔ e nyɛ Aklúnɔ Mavɔmavɔ ɖɔ ɔ́ ɖíe: Mi kplé ahwan wɔ̌buwɔ́bú dó yě wú; è nǐ dó xɛsi ɖaxó ɖé yě; è nǐ bɛ̌ nǔ yětɔn lɛ́ɛ bǐ. Hwenu e mɛ bǐ ná kplé dó yě ɔ́, mi nyi hwǎn dó yě, mi já yě ɖó hwǐ wú; mi hu vǐ yětɔn súnnu kpó nyɔ̌nu kpó; mi dó xwé yětɔn lɛ́ɛ zo. Énɛ́ ɔ́, un ná ɖó nǔ kwíji kwíji e wa wɛ è ɖe ɖo to ɔ́ mɛ lɛ́ɛ te. É ná kplɔ́n nǔ nyɔ̌nu e ɖo to ɔ́ mɛ lɛ́ɛ, bɔ yě ɖě ná wá nǔ nyɔ̌nu we énɛ́ lɛ́ɛ ɖɔhun ǎ. Nǔ kwíji kwíji e wa wɛ Oxóla kpó Oxoliba kpó ɖe lɛ́ɛ ɔ́, yě ná sún sin tɔn. Nǔ e vodún e sɛn wɛ yě ɖe ɔ́ ji ɔ́, yě ná kpan. Énɛ́ ɔ́, mi ná tunwun ɖɔ nyɛ wɛ nyí Aklúnɔ Mavɔmavɔ.” Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn tɛ́nnɛgɔ́ ɔ́ mɛ, ɖo azǎn wǒgɔ́ ɔ́ e ɖo sun wǒgɔ́ ɔ́ xwe énɛ́ xwe é tɔn gbe ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, wlǎn azǎn e gbe mǐ ɖe égbé é, sun e mɛ mǐ ɖe é, xwe e mɛ mǐ ɖe ɔ́, ɖó égbé wɛ axɔ́sú Babilɔ́nu tɔn ná xá Jeluzalɛ́mu toxo ɔ́. A nǎ dó lǒ ɖokpó nú togun ce tónúmasetɔ́ ɔ́, bó ná ɖɔ n'i ɖɔ nyɛ Aklúnɔ Mavɔmavɔ wɛ dó lǒ ɔ́ sɛ́ dó e. Lǒ ɔ́ ɖíe: ‘Sɔ́ ganzɛ́n ɖokpó ɖó ado jí, bó kɔn sin d'é mɛ; a nǎ fɔ langó, lan kloklo e nɔ nyɔ́ ɖu lɛ́ɛ d'é mɛ, a nǎ fɔ asá kpódó abɔ̌ kpó, kpódó lanxú e nɔ́ nyɔ́ ɖu ganjí lɛ́ɛ kpó d'é mɛ káká bɔ é ná gɔ́. Gbɔ̌ ɖagbe e ɖo gbɔ̌ lɛ́ɛ mɛ é wɛ a nǎ hu; a nǎ to nakí dó ganzɛ́n ɔ́ glɔ́ ganjí, bó ná ɖa lan ɔ́ káká bɔ xú lɛ́ɛ lɔ ná bí. Xó e nyɛ Aklúnɔ Mavɔmavɔ ɖo ɖiɖɔ nú Jeluzalɛ́mu wɛ ɔ́ ɖíe: Heelú toxo e mɛ gbɛtɔ́ kanjɔ gɔ́ é. Ganzɛ́n e jɛ ko bɔ è ma sixú ɖe ko sín wú ǎ é ɖɔhun wɛ é cí. Fɔ lan lɛ́ɛ ɖokpó ɖokpó sín zɛ̌n ɔ́ mɛ; ma sɔ́ ɖě bó jó ɖě dó ó. Kanjɔ e Jeluzalɛ́mu kɔn nyi ayǐ é kpo ɖo toxo ɔ́ mɛ, ɖó awǐnnya jí wɛ é kɔn kanjɔ ɔ́ kɔn nyi; é kɔn nyi kɔ́ mɛ bónú ayǐkúngban ná nu ǎ, mɛɖé ká dɔn kɔ́ d'é mɛ ǎ. Nyɛ ka jó kanjɔ ɔ́ dó nyi awǐnnya ɔ́ jí, fí e é ná nɔ bó ma ná bú wǎn ǎ é, fí e é ná nɔ bó ná dó xomɛ sin nú mì, bónú má ba hlɔn tɔn é. Énɛ́ ɔ́ wú wɛ nyɛ Aklúnɔ Mavɔmavɔ ɖɔ: Heelú toxo e mɛ gbɛtɔ́ kanjɔ gɔ́ é, ɖó un ná bló agba ɖaxó ɖokpó. To nakí d'agba ɔ́ glɔ́ ganjí bó flɔ́ myɔ ɔ́. Ɖa lan ɔ́ ní bí ganjí, bó kɔn nǔhwɛ́nkún d'é jí; jǒ xú lɛ́ɛ dó nú bǐ ní fyɔ́ bó ji akán. Énɛ́ ɔ́ gúdo ɔ́, a nǎ sɔ́ ganzɛ́n vɔ̌tɔ́ ɔ́ ɖó myɔkán ɔ́ jí, bɔ é ná hun myɔ káká bó ná myá hɛɛ, bónú nǔ kwíji e ɖ'é mɛ lɛ́ɛ bǐ ná fyɔ́, bónú ko e é jɛ ɔ́ ná fyɔ́.’ Lo ɔ́, tagba énɛ́ lɛ́ɛ bǐ ɔ́, nǔ yǎyá wɛ. Nǔ e kó jɛ ko sɔ mɔ̌ ɔ́, myɔ sixú ɖe síin ǎ. Jeluzalɛ́mu, nǔ gblégblé e a dǒ sin lɛ́ɛ wɛ hɛn we blí; un jló ná lɛ we bɔ a nǎ mɛ́, a ka lɔn ǎ. Énɛ́ wú ɔ́, a sɔ́ ná mɛ́ gbeɖé káká có nú xomɛsin ce ná jɛ te dó jǐ we ǎ. Nyɛ Mawu Mavɔmavɔ wɛ ɖɔ xó, bɔ nǔ e un ɖɔ ɔ́ un ná bló. Un ná dó nǔ sin, ma kpɔ́n gǔdo; é ká ná vɛ́ nú mì ǎ; mɛ nú ká ná blá wǔ nú mì ǎ. Un ná ɖó hwɛ nú we, ɖó nǔ e a dó sin lɛ́ɛ kpó walɔ towe kpó wú. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, nyɔ̌nu e a yǐ wǎn ná ganjí ɔ́, un ná sɔ́ ɛ sín akpá towe vawun. A ka ná nɔ aluwɛ mɛ ǎ, a ka ná ya avǐ ǎ, ɖasin kwín ɖokpó ka ná kun sín nukún towe jí ǎ. Ya avǐ dó xo mɛ; cyɔ kú mɛ ɔ́, yɛsu e è nɔ fɔ ɔ́, ma fɔ ɖě ó. Lo ɔ́, sɔ́ tablá towe ɖó ta, bó dó afɔkpa towe. Ma sɔ́ nǔ cyɔ́n nukún mɛ ó, ma ka ɖu aluwɛ mɛ nǔɖuɖu ó.” Un ɖɔ xó ɔ́ nú togun ɔ́ zǎnzǎn, bɔ gbadanu ɔ́, asi ce ka kú. Ayǐhɔ́ngbe ɔ́, un wa nǔ lě e Mawu zɔ́n mì gbɔn é. Mɛ lɛ́ɛ ɖɔ nú mì ɖɔ nyi ní tín nǔ e wú nyi ɖo mɔ̌ wa wɛ é mɛ nú émí; énɛ́ ɔ́, un ɖɔ nú yě ɖɔ: “Wɛn e Mawu Mavɔmavɔ dó mì ɖɔ má dó mi Izlayɛ́li ví lɛ́ɛ é ɖíe: ‘Nyɛ Aklúnɔ Mavɔmavɔ ɔ́, xwé ce e mi yí wǎn ná ganjí ɔ́, un ná jó dó bɔ è nǎ ɖu su ná; xwé énɛ́ wú wɛ mi ka nɔ ɖo gǔgó wɛ; mi mɔ xwé énɛ́ ɔ́, é nɔ́ víví nú mi; é wɛ nyí nǔ e mi ɖó nukún é. Vǐ mitɔn súnnu kpó nyɔ̌nu kpó e mi jó dó nyi Jeluzalɛ́mu lɛ́ɛ ɔ́, è nǎ hu bǐ. Nǔ cí mɔ̌ ɔ́, mi ná wa nǔ nyɛ ɖɔhun. Mi ná sɔ́ nǔ cyɔ́n nukún mɛ ǎ, mi ka ná ɖu aluwɛ mɛ nǔɖuɖu ǎ. Tablá mitɔn ná ɖo ta nú mi bɔ afɔkpa mitɔn ná ɖo afɔ nú mi. Mi ná nɔ aluwɛ mɛ ǎ, mi ka ná ya avǐ ǎ. Amɔ̌, mi ná jɛ gǒ xú jí, ɖó hwɛ e mi hu lɛ́ɛ wú, bɔ mi ná nɔ́ sa vo ɖo miɖée gɔ́n. Nǔ e Ezekiyɛ́li bló ɔ́ ná nyí xlɛ́ ɖokpó nú mi. Hwenu e nǔ e un ɖɔ lɛ́ɛ ná jɛ ɔ́, mi ná wa nǔ é ɖɔhun pɛ́pɛ́pɛ́, énɛ́ ɔ́, mi ná tunwun ɖɔ nyɛ wɛ nyí Aklúnɔ Mavɔmavɔ.’ ” Mawu lɛ́ ɖɔ nú mì ɖɔ: “Hwɛ gbɛtɔ́ e, hwɛ ɔ́, ɖǒtó mì: é ná wá su gbe ɖokpó, bɔ un ná yí sinsɛnxɔ e nyí bibɛtɛn yětɔn ɔ́ sín yě sí; un ná yí nǔ e ɖo xomɛhunhun dó nú yě wɛ ɔ́ sín yě sí; un ná yí fí e wú yě ɖo afɔ tɛ ayǐ wɛ, bó ɖo nukún ɖó nǔ wɛ ɔ́ sín yě sí. Un ná lɛ́ yí vǐ yětɔn súnnu kpó nyɔ̌nu kpó sín yě sí. Gbe énɛ́ gbe ɔ́, mɛ e ná gán ɖ'é mɛ é ɖokpó ná wá ɖɔ nǔ e jɛ ɔ́ nú we. Amɔ̌, hwɛ ɔ́, bɛ́ sín gbe énɛ́ gbe ɔ́, ɖɛ̌ towe ná tún kan. A nǎ jɛ xó ɖɔ jí, bó ná ɖɔ xó xá mɛ e gán ɖo nǔ e jɛ ɔ́ mɛ é. Nǔ e jɛ dó jǐ towe ɔ́ ná nyí xlɛ̌ ɖokpó nú togun ce. Énɛ́ ɔ́, yě ná tunwun ɖɔ nyi wɛ nyí Mawu Mavɔmavɔ.” Mawu Mavɔmavɔ ɖɔ nú mì ɖɔ: “Din ɔ́, hwɛ gbɛtɔ́ e, Amumɔ́ɔ ví lɛ́ɛ gɔ́n wɛ a nǎ yi, bó ná ɖɔ xó e un ɖɔ nú we dó yě wú ɔ́ nú yě. Ɖɔ nú yě ɖɔ yě ní ɖótó xó e ɖɔ nú yě wɛ nyɛ Aklúnɔ Mavɔmavɔ ɖe é. Hwenu e è ɖu su nú xwé ce ɔ́, mi ko nǔ hahaha; hwenu e è gba Izlayɛ́li to ɔ́, mi ko nǔ; hwenu e è bɛ̌ Judáa ví lɛ́ɛ yi to ɖěvo mɛ ɔ́, mi ko nǔ. Énɛ́ ɔ́ wú ɔ́, un ná jó to mitɔn nú mɛ e nɔ gosín zǎnzǎnhwe jí lɛ́ɛ, bɔ yě ná yí; yě ná ɖó gɔnu ɖó ayǐkúngban mitɔn jí; yě ná sá xwé nyi to mitɔn mɛ. Yě wɛ ná ɖu atínsínsɛ́n mitɔn lɛ́ɛ, bó ná nu nyibúnɔ́sin mitɔn lɛ́ɛ. Un ná sɔ́ Hlaba, tota ɔ́ dó húzú amaɖutɛn nú lǎkúnmí lɛ́ɛ; Amumɔ́ɔ ví lɛ́ɛ sín to ɔ́ bǐ ná húzú gbɔ̌ kpó. Énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ. “Ɖó xó e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Ée awě xo Izlayɛ́li ɔ́, é víví nú mi bɔ mi lɔ́n yi jǐ, bó xo kpɛ́. Nǔ énɛ́ e mi bló ɔ́, ɖe lě do e mi gbɛ́ wǎn nú togun ce sɔ ɔ́ xlɛ́. Énɛ́ ɔ́ wú ɔ́, un ná ɖe hlɔ̌nhlɔ́n ce xlɛ́ mi, bó jó mi nú togun ɖěvo lɛ́ɛ, bɔ yě ná wá bɛ́ nǔ mitɔn lɛ́ɛ bǐ. Togun mitɔn sɔ́ ná tín nyǐ ǎ; mi sɔ́ ná ɖó to ɖě ǎ; un ná gba to mitɔn bǐ gbídígbídí. Énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ.” “Xó e nyɛ Aklúnɔ Mavɔmavɔ ɖɔ ɔ́ ɖíe: Mi Mɔwabu ví lɛ́ɛ kpó Seyíinu lɛ́ɛ kpó ɖɔ: ‘Judáa togun ɔ́, togun ɖé kpowun wɛ élɔ́ nyí togun ɖě lɛ́ɛ bǐ ɖɔhun.’ Énɛ́ wú ɔ́, toxo e nɔ́ zɔ́n, bɔ è ma nɔ sixú byɔ́ Mɔwabu ví lɛ́ɛ sín to ɔ́ mɛ ǎ lɛ́ɛ ɔ́, un ná ɖɔ bɔ è nǎ tɔ́n ahwan bǐ. Un ná gba toxo énɛ́ lɛ́ɛ bǐ ɖě jɛ ɖě gúdo, káká jɛ toxo e nyɔ́ ɖɛkpɛ dóó ɖ'é mɛ lɛ́ɛ jí; è nǎ gba Bɛti-Yesimɔ́ti, è nǎ gba Baalu-Mɛyɔ́ni, bó gba Kiliyatayimu. Un ná jó mɛ e nɔ gosín zǎnzǎnhwe jí lɛ́ɛ dó, bɔ yě ná yí Amumɔ́ɔ ví lɛ́ɛ sín to ɔ́; un ná to ɔ́ yě bɔ é ná nyí yětɔn. Énɛ́ ɔ́, mɛ ɖé sɔ́ ná flín Amumɔ́ɔ ví lɛ́ɛ ɖo akɔta lɛ́ɛ mɛ ǎ. Un ná ɖó hwɛ nú Mɔwabu ví lɛ́ɛ, bɔ yě ná tunwun ɖɔ nyɛ wɛ nyí Mawu Mavɔmavɔ.” “Xó e nyɛ Aklúnɔ Mavɔmavɔ ɖɔ ɔ́ ɖíe: Edɔ́munu lɛ́ɛ ɔ́, hwenu e yě ɖo hlɔn ba togun Judáa tɔn ɔ́ wú wɛ ɔ́, yě wa nǔ zɛ jlɛ̌ wú; énɛ́ wɛ nyí hwɛ bɔ yě hu dó mì. Énɛ́ wú wɛ nyɛ Aklúnɔ Mavɔmavɔ ɖɔ: Un ná ɖe hlɔ̌nhlɔ́n ce xlɛ́ Edɔ́mu to ɔ́. Un ná hu gbɛtɔ́ kpó kanlin kpó e ɖo to ɔ́ mɛ é bǐ, bó ná sɔ́ to ɔ́ dó húzú gbětótló sín Temani toxo ɔ́ mɛ káká wá Dedáni toxo ɔ́ mɛ. È nǎ hu Edɔ́munu lɛ́ɛ ɖo ahwangbénu. Un ná zɔ́n togun ce Izlayɛ́li, bɔ é ná ba hlɔn Edɔ́munu lɛ́ɛ wú nú mì. Izlayɛ́li ví lɛ́ɛ ná wa nǔ xá yě lě e xomɛ ɖaxó e un sin ɔ́ byɔ́ gbɔn é, bó ná xlɛ́ yě ɖɔ nú è ba xó mì ɔ́, é kún nɔ́ fá ó. Xó e nyɛ Aklúnɔ Mavɔmavɔ ɖɔ é nɛ́.” “Xó e nyɛ Aklúnɔ Mavɔmavɔ ɖɔ ɔ́ ɖíe: Nǔ e Filisitɛ́ɛn lɛ́ɛ wa ɔ́, hlɔn wɛ yě ba. Yě ba hlɔn kɛntɔ́ yětɔn tɛgbɛ tɔn e yě gbɛ́ wǎn ná lɛ́ɛ wú, bó hu yě bǐ. Énɛ́ wú ɔ́, xó e nyɛ Aklúnɔ Mavɔmavɔ ɖɔ ɔ́ ɖíe: Un ná ɖe hlɔ̌nhlɔ́n ce xlɛ́; un ná hu Keletyɛn e wá ɖo xutó lɛ́ɛ, un ná zɔ́n bɔ è nǎ hu mɛ e kpo bó cí xutó lɛ́ɛ bǐ. Hlɔn e un ná ba yě wú é kpó tó e un ná dɔn nú yě ɔ́ kpó ná dó xɛsi ɖésú. Ényí énɛ́ gbo yě ɔ́, yě ná tunwun ɖɔ nyi wɛ nyí Mawu Mavɔmavɔ.” Ée ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wǒ-ɖokpógɔ́ ɔ́ mɛ, ɖo azǎn nukɔn tɔn e ɖo sun ɔ́ mɛ ɔ́ gbe ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, Tíinu lɛ́ɛ nɔ́ ko Jeluzalɛ́mu hahaha, bó nɔ́ ɖɔ: ‘Toxo e mɛ mɛ bǐ nɔ́ yi é ɔ́, è gba bǐ hánnyá. Mǐdɛɛ lɛ́ɛ gɔ́n wɛ mɛ bǐ ná wá. Din e è gba Jeluzalɛ́mu toxo ɔ́ bǐ é ɔ́, mǐdɛɛ lɛ́ɛ wɛ ná jɛ dɔkun.’ Énɛ́ wú wɛ nyɛ Aklúnɔ Mavɔmavɔ ɖɔ: Tíi toxo, un ná wa nǔ xá we, un ná sɛ́ togun wɔ̌buwɔ́bú ɖé lɛ́ɛ dó, bɔ yě ná ɖo adǎn jí xu ɖɔhun bó wá gba we. Yě ná gba ahohó towe lɛ́ɛ, bó mu kpe gaga e jí mɛ e nɔ cɔ́ toxo ɔ́ lɛ́ɛ nɔ́ nɔ lɛ́ɛ; un ná za fínɛ́ bǐ, bɔ è sɔ́ ná mɔ nǔɖé ɖo fínɛ́ zɛ só ɔ́ kɛ́ɖɛ́ wú ǎ. Toxo ɔ́ ná húzú fí ɖé kpowun ɖo xu ɔ́ tɛ́ntin, bɔ ɖɔnyitɔ́ lɛ́ɛ ná nɔ́ xyá ɖɔ ɖ'é jí. Xó e nyɛ Aklúnɔ Mavɔmavɔ ɖɔ ɔ́ nɛ́. To ɖěvo mɛ nu lɛ́ɛ ná wá bó vɔ toxo ɔ́ bǐ, bó ná gba toxo e lɛ́ lɛ̌ dó e gbɔn tɔ ɔ́ tó lɛ́ɛ bǐ. Énɛ́ ɔ́, è nǎ tunwun ɖɔ nyɛ wɛ nyí Mawu Mavɔmavɔ. “Xó e nyɛ Mawu Mavɔmavɔ lɛ́ ɖɔ ɔ́ ɖíe: Hwi Tíi toxo, un ná kplá axɔ́sú e syɛ́n hú axɔ́sú lɛ́ɛ bǐ é, Babilɔ́nu xɔ́sú Nabukodonɔzɔ́ɔ sín totaligbé, bɔ é ná wá tɔ́n ahwan we. É ja ahwan tɔ́n we gbé ɔ́, é ná hɛn sɔ́, bó ná hɛn ahwankɛkɛ́ví kpó sɔ́xátɔ́ lɛ́ɛ kpó. Ahwangɔnu e é ná hɛn dó wá fun ahwan xá we ɔ́ ná sukpɔ́ ɖésú. É ná tɔ́n ahwan toxo e ɖo akpá towe, ɖo xutó xutó lɛ́ɛ, bó hu mɛ e gbɔn fí énɛ́ lɛ́ɛ bǐ. Énɛ́ ɔ́ gúdo ɔ́, sɔ́ja lɛ́ɛ ná kplé kɔ́ e gúdo yě ná nɔ bó fun ahwan xá we é; bó ná kun do e mɛ yě ná nɔ bó fun ahwan xá we é, yě ná hɛn gǎglónú yětɔn lɛ́ɛ ɖě bɔdó ɖě wú, bɔ é ná cí dǒ ɖɔhun bɔ yě nɔ gúdo bó fun ahwan xá we. Yě ná zé mɔ e è nɔ́ dó gba nǔ ɔ́ dó gba ahohó towe lɛ́ɛ, bó ná sɔ́ gankpo dó mu kpe gaga towe e jí mɛ e nɔ cɔ́ toxo towe lɛ́ɛ nɔ́ nɔ lɛ́ɛ. Sɔ́ yětɔn wɔ̌buwɔ́bú lɛ́ɛ ɖo wezun jí xweyǐgbe ɔ́, afúntúntún yětɔn ná vun blá we bǐ. Sɔ́ lɛ́ɛ kpó ahwankɛkɛ́ lɛ́ɛ kpó ɖo dǐndín wɛ ɔ́, toxo towe sín dǒ lɛ́ɛ ná húnhún. Yě ná gbɔn hɔntogbó towe, bó ná byɔ́ toxo towe mɛ kpó hlɔ̌nhlɔ́n kpó lě e è nɔ tɔ́n ali dó toxo ɖé wú, bó nɔ́ byɔ́ mɛ kpó hlɔ̌nhlɔ́n kpó é ɖɔhun. Sɔ́ yětɔn lɛ́ɛ ná gbɔn toxo towe sín ali lɛ́ɛ jí, bó ná hɛn bǐ gba; yě ná tɔ́n ahwan we, bó ná hu toví tosi towe lɛ́ɛ, bó ná mu dotín ɖaxó ɖaxó e hɛn nǔmɛsɛn towe sín xɔ ɖó te é. Yě ná bɛ́ dɔkun towe lɛ́ɛ, yě ná fɔ nǔ towe lɛ́ɛ bǐ. Yě ná mu dǒ towe lɛ́ɛ, bó ná gba xwé towe ɖagbe ɖagbe lɛ́ɛ; yě ná bɛ́ awǐnnya e a dǒ mɛ xɔ lɛ́ɛ, kpó atín e a dǒ gbá xɔ lɛ́ɛ é kpó bǐ kɔn dó xu mɛ, bó za do tɔn nu kɔn dó xu mɛ. Un ná ɖó han e ji wɛ a ɖe lɛ́ɛ te; è sɔ́ ná se kanhún towe lɛ́ɛ ɖě sín gbe ǎ. È nǎ sɔ́ toxo towe dó húzú só nǔ ɖ'é má ɖ'é jí, bɔ ɖɔnyitɔ́ lɛ́ɛ ná nɔ́ xyá ɖɔ ɖ'é jí. È ka sɔ́ ná vɔ́ toxo ɔ́ bló ɖó gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.” “Xó e nyɛ Aklúnɔ Mavɔmavɔ lɛ́ ɖɔ nú Tíi toxo ɔ́ é ɖíe: Hwenu e è nǎ gba toxo towe, bó hu mɛ e ɖ'é mɛ lɛ́ɛ bǐ, bɔ mɛ e ɖo kúdonu lɛ́ɛ ná ɖo alě ná wɛ ɔ́, mɛ e ɖo tɔtɛ́ntinto mɛ lɛ́ɛ se nǔ e jɛ ɔ́, yě ná sísɔ́. Axɔ́sú e to yětɔn lɛ́ɛ ɖo xutó lɛ́ɛ ná sí te sín zinkpo yětɔn lɛ́ɛ jí, bó ná ɖe gǎnwu e ɖo kɔ yětɔn é, bó ɖe awu kíkó e ɖo kɔ yětɔn lɛ́ɛ, bɔ xɛsi ná nyí awu bɔ yě ná dó, bó ná jínjɔ́n kɔ́ mɛ; yě ná nɔ́ sísɔ́ bɔ ahwi ná xo yě ɖó nǔ nyanya e jɛ dó wǔ towe ɔ́ wú. Yě ná ji nǔwamɛhan ɖokpó nú we ɖɔ: Yéége! È gba we. Hwi mɛ e nyí toxo nukúnɖéjí ɖokpó ɔ́, è sɔ́ nɔ́ mɔ tɔjíhún towe lɛ́ɛ ɖě ɖo xu jí ǎ. Toví towe lɛ́ɛ ɔ́, mɛ syɛ́nsyɛ́n wɛ yě nyí ɖo xu jí; mɛ bǐ wɛ nɔ́ ɖi xɛsi dó yě wú. Din ɔ́, togun e gbɔn tɔ tó tɔ tó lɛ́ɛ bǐ ɖo sísɔ́sísɔ́ wɛ ɖó a sɔ́ ɖe ǎ; mɛ e ɖo tɔtɛ́ntinto mɛ lɛ́ɛ bǐ ɖo xɛsi jí, ɖó a sɔ́ tíin ǎ. “Xó e nyɛ Aklúnɔ Mavɔmavɔ ɖɔ ɔ́ ɖíe: Hwenu e un ná sɔ́ we dó húzú toxo gbigba, toxo e mɛ mɛɖé má sɔ́ ɖe ǎ ɔ́, hwenu e un ná sɔ́ sin sí te, bɔ sin ná wá ɖi bú we ɔ́, un ná ɖi we bɔ a nǎ yi mɔ mɛ e ko kú xóxó lɛ́ɛ. Un ná yi sá xwé nú we ɖó kútomɛ; a nǎ nɔ yɔdo mɛ xá mɛ e ko kú bó má sɔ́ ɖo nǎ fɔ́n wɛ ǎ lɛ́ɛ. Mɛ ɖé sɔ́ ná nɔ ayǐkúngban towe jí gbeɖé ǎ; énɛ́ ɔ́, a sɔ́ ná ɖó tɛnmɛ ɖě ɖo mɛ e ɖo gbɛ lɛ́ɛ sín to mɛ ǎ. Xɛsi ná ɖo mɛ bǐ jí bɔ mɛ bǐ ná nɔ́ ɖo sísɔ́sísɔ́ wɛ, ɖó xó towe kó fó. Mɛ lɛ́ɛ ná ba we, yě ká sɔ́ ná mɔ we gbeɖé ǎ. Xó e nyɛ Aklúnɔ Mavɔmavɔ ɖɔ é nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ji nǔwamɛhan ɖokpó nú Tíi toxo. Ji nǔwamɛhan ɖokpó nú toxo énɛ́ ɔ́ kpó zohúnglíntɛn tɔn lɛ́ɛ kpó; ji nǔwamɛhan nú ajɔ̌watɔ́ lɛ́ɛ sín toxo énɛ́ ɔ́; ajɔ̌watɔ́ ée ɖo toxo énɛ́ ɔ́ mɛ lɛ́ɛ nɔ́ wa ajɔ̌ dó toxo gěgé mɛ; yě nɔ́ wa ajɔ̌ dó toxo e gbɔn xutó xutó lɛ́ɛ mɛ. Ji nǔwamɛhan nú yě ɖɔ: xó e nyɛ Aklúnɔ Mavɔmavɔ ɖɔ ɔ́ ɖíe: Tíi toxo! A nɔ ɖɔ: ‘Un nyɔ́ ɖɛkpɛ bɔ nǔ vɔ ɖ'é wú’. Ayǐkúngban towe hun káká yi xu mɛ; mɛ e gbá we lɛ́ɛ ɔ́, yě bló we ɖó bɔ a nyɔ̌ ɖɛkpɛ bɔ nǔ vɔ ɖ'é wú. Yě bló we bɔ a cí tɔjíhún ɖaxó ɖé ɖɔhun; yě sɔ́ siplɛ́tín Seníi tɔn dó bló wǔtu towe bǐ; yě sɔ́ sɛ́dlutín Libáan tɔn dó bló asyákpo towe. Yě sɔ́ cɛ́nitín Basáni tɔn dó kpa zɛn towe lɛ́ɛ; fí e è nɔ nɔ bó nɔ́ kun tɔjíhún ɔ́ é ɔ́, sɛ́dlutín wɛ è dǒ bló; sɛ́dlutín tɔtɛ́ntinto Glɛ̌si tɔn lɛ́ɛ wɛ è dǒ bló, bó sɔ́ ajinakúɖú dó ba acɔ́ ná. Avɔ e è nɔ dó nú we ɔ́ lɛ̌ɛnkan Ejípu tɔn wɛ è dǒ lɔn bó kó. Lɛ̌ɛnvɔ kíkó énɛ́ ɔ́ nɔ́ zɔ́n bɔ è ɖo zɔ ɔ́, è nɔ ko tunwun ɖɔ hwi wɛ. Avɔ kwélesinnɔ kpó vɔvɔ kpó e a nɔ cyɔ́n dó agban towe lɛ́ɛ ɔ́, tɔtɛ́ntinto Ciplu tɔn mɛ wɛ yě gosín. Zɛnkuntɔ́ towe lɛ́ɛ ɔ́, Sidɔ́ɔn kpó Aavadi kpó wɛ yě gosín; Tíinu e nyɔ́ hǔn kun dóó lɛ́ɛ wɛ nɔ́ xlɛ́ ali tɔjíhún ɔ́. Mɛ e nyɔ́ alɔlyɛ́nzɔ́ wa dódó lɛ́ɛ wɛ nɔ́ wa azɔ̌ ɖo tɔjíhún ɔ́ wú. Gebali wɛ yě gosín. Tɔjíhún e ko nɔ gbɔn xu jí lɛ́ɛ bǐ wɛ nɔ́ wá glín ɖo to towe mɛ, bɔ tɔzɔ́watɔ́ lɛ́ɛ nɔ́ xɔ ajɔ̌nú towe lɛ́ɛ. Sɔ́ja e ɖo ahwangɔnu towe lɛ́ɛ mɛ lɛ́ɛ ɔ́, Pɛ́sinu ɖo yě mɛ, Lǔdinu ɖo yě mɛ, Pútinu ɖo yě mɛ. Yě fɔ gangbákún yětɔn lɛ́ɛ kpó gǎglónú yětɔn lɛ́ɛ kpó kplá nǔ kɔ ɖo ahwankpá towe lɛ́ɛ mɛ; sɔ́ja énɛ́ lɛ́ɛ zɔ́n bɔ nyǐkɔ towe yi jǐ. Sɔ́ja Aavadinu lɛ́ɛ kpó sɔ́ja towe lɛ́ɛ kpó nɔ́ cɔ́ ahohó towe lɛ́ɛ. Gamumadinu lɛ́ɛ nɔ́ nɔ mɛcɔ́kpe lɛ́ɛ ta. Yě nɔ́ fɔ gǎglónú yětɔn lɛ́ɛ kplá dǒ e è mɛ lɛ́ lɛ̌ dó we é. Yě wɛ zɔ́n bɔ ɖɛkpɛ towe ɔ́, nǔ vɔ ɖ'é wú.” “Taasísinu lɛ́ɛ nɔ wá xɔ ajɔ̌nú tɛnmɛ tɛnmɛ ɖo gɔ̌n towe, bó nɔ́ sɔ́ kpatágan, gan, aflélé kpó sunmí kpó dó sú axɔ́ we. Glɛ̌sinu lɛ́ɛ, Tubalunu lɛ́ɛ kpó Mɛcɛ́kinu lɛ́ɛ kpó nɔ́ xɔ nǔ ɖo gɔ̌n towe; yě nɔ́ sɔ́ kannumɔ kpó nǔ tɛnmɛ tɛnmɛ e è sɔ́ ganvɔ dó bló lɛ́ɛ kpó dó wá ɖyɔ́ nǔ e a nɔ sa lɛ́ɛ ná. Bɛti-Togáamanu lɛ́ɛ nɔ́ hɛn sɔ́ e a nɔ dó wa azɔ̌ lɛ́ɛ kpó sɔ́ e a nɔ hɛn yi ahwan lɛ́ɛ kpó, kpó sɔ́tócí kpó wá nú we. Dedáninu lɛ́ɛ nɔ́ wa ajɔ̌ xá we. Mɛ e nɔ wa ajɔ̌ ɖo tɔtɛ́ntin to lɛ́ɛ mɛ lɛ́ɛ gěgé sín agban nɔ gbɔn jǐ towe. Bɔ yě nɔ́ sɔ́ ajinakúɖú kpó atín e è nɔ ylɔ́ ɖɔ ebɛ́ni é kpó dó sú axɔ́ we. Silíinu lɛ́ɛ nɔ́ wá xɔ nǔ gěgé ɖo así we, bó nɔ́ sɔ́ awǐnnya e è nɔ ylɔ́ ɖɔ emɛlodu é kpó avɔ kwélesinnɔ ɖé lɛ́ɛ kpó, kpó avɔ kíkó lɛ́ɛ kpó, kpó awǐnnya e è nɔ ylɔ́ ɖɔ lubi é kpó nǔ awǐnnya ɖɔhun e è nɔ ylɔ́ ɖɔ koláyi é kpó, dó sú axɔ́ we. Judáa togun ɔ́ kpó Izlayɛ́li togun ɔ́ kpó nɔ́ wa ajɔ̌ xá we; yě nɔ́ hɛn blěe Mɛniti tɔn, kpó wɔ̌xúxú kpó wǐin kpó, ami kpó, kpódó atínhúnhɔ́n wǎnɖagbenɔ kpó wá, bó nɔ́ wá ɖyɔ́ kpó nǔ e a nɔ sa lɛ́ɛ kpó. Damásinu lɛ́ɛ nɔ́ xɔ nǔ ɖagbe tɛnmɛ tɛnmɛ e a nɔ sa lɛ́ɛ, káká bó nɔ́ sɔ́ vɛ̌ɛn ɖagbe ɖagbe Hɛlubɔ́ni tɔn kpó gbɔ̌fún Saxáa tɔn kpó dó sú axɔ́ we. Dan sín akɔta lɛ́ɛ kpó Yaváni-Mɛwuzálu sín akɔta lɛ́ɛ kpó nɔ́ sɛ́ alǐnnyánú kpó atínfló kpó fántín wǎnɖagbenɔ kpó dó we sín Uzalu toxo ɔ́ mɛ, dó sú nǔ e yě xɔ ɖo así we lɛ́ɛ sín axɔ́. Dedáninu lɛ́ɛ ɔ́, nǔ e è nɔ sɔ́ ɖó sɔ́ jí, bó nɔ́ jínjɔ́n jí é sín ajɔ̌ wɛ yě nɔ́ wa xá we. Alabíinu lɛ́ɛ kpódó gǎn Kedáa tɔn lɛ́ɛ kpó ɔ́, ajɔ̌tɔ́ towe wɛ yě nyǐ. Lɛ̌ngbɔ́ví kpó lɛ̌ngbɔ́ kpó gbɔ̌ kpó wɛ yě nɔ́ dó sú axɔ́ we. Ajɔ̌tɔ́ Saba tɔn lɛ́ɛ kpó Hlaema tɔn lɛ́ɛ kpó ɔ́, nǔsáwǔ wǎnɖagbenɔ lɛ́ɛ kpó awǐnnya xɔ akwɛ́ tɛnmɛ tɛnmɛ lɛ́ɛ kpó siká kpó wɛ yě nɔ́ hɛn dó wá ɖyɔ́ ajɔ̌nú ná ɖo gɔ̌n towe. Haláani toxo ɔ́, Kannɛ́ɛ toxo ɔ́ kpódó Edɛ́ni toxo ɔ́ kpó nɔ́ wa ajɔ̌ xá we; mɔ̌ ɖokpó ɔ́, ajɔ̌tɔ́ Saba tɔn lɛ́ɛ, Asilíi toxo ɔ́ kpódó Kilumadi toxo ɔ́ tɔn kpó nɔ́ wa ajɔ̌ xá we. Nǔzínzán ɖagbe ɖagbe lɛ́ɛ wɛ yě nɔ́ wá sa xá we. Yě nɔ́ hɛn avɔ kwélesinnɔ, avɔ kíkó lɛ́ɛ kpó avɔ e è nɔ tɛ́ ɖó xɔ mɛ, bɔ é nɔ́ ɖó sin tɛnmɛ tɛnmɛ lɛ́ɛ kpó, bó nɔ́ hɛn kan gbigbɛ ɖagbe ɖagbe lɛ́ɛ wá gɔ̌n towe bó nɔ́ wá sa. Tɔjíhún ɖaxó ɖaxó lɛ́ɛ wɛ nɔ́ kun agban tɛnmɛ tɛnmɛ nú we.” “Hwɛ Tíi toxo, hwɛ tɔjíhún ɖɛkpɛ ɖɛkpɛ, agban gɔ́ we ɖo xuzan mɛ. Zɛnkuntɔ́ towe lɛ́ɛ kun we yi xuzan mɛ aga ɖéé. Jɔhɔn zǎnzǎnhwe jí tɔn sí te, jɔhɔn ɔ́ sí te bo flí we gba dó xuzan mɛ. Ajɔ̌nú towe lɛ́ɛ, agban towe lɛ́ɛ, dɔkun towe lɛ́ɛ, tɔjíhúnkuntɔ́ towe lɛ́ɛ, tɔzɔ́watɔ́ towe lɛ́ɛ, mɛ e nɔ bló we ɖó lɛ́ɛ, axisinɔ towe e zɔ́n bɔ ajɔ̌ towe ɖo yiyi wɛ lɛ́ɛ, sɔ́ja e ɖo azɔ̌ wa nú we wɛ lɛ́ɛ, kpódó mɛ tobutóbú e a hɛn lɛ́ɛ bǐ kpó hwi kpó syɔ́. Mɛ e nɔ kpé nukún dó wǔ we lɛ́ɛ sú xó; mɛ e sín xwé ɖo tɔ tó lɛ́ɛ se bó nɔ́ sísɔ́. Énɛ́ ɔ́, mɛ e ɖo zɛn kun wɛ lɛ́ɛ bǐ gosín tɔjíhún yětɔn yětɔn mɛ, mɛ e ɖo tɔjíhún lɛ́ɛ mɛ lɛ́ɛ bǐ jɛ te wá agě jí. Yě bǐ byɔ́ aluwɛ mɛ; yě ɖo avǐ ya wɛ, yě ɖo vo sa wɛ, yě nɔ́ wún kɔ́ dó ta, yě nɔ́ blí gbo gbɔn afín mɛ. Yě bǐ xwlɛ́ ta, yě dó nǔwamɛwu; yě ɖo vǐví we wɛ, yě ɖo alě ná wɛ. Ɖo aluwɛ yětɔn mɛ ɔ́, yě ji gbɛvíhan nú we ɖɔ: ‘Tíi toxo! Ɖ'ayǐ ɔ́, è sixú sɔ́ we jlɛ́ dó toxo ɖé wú ǎ. Hwi ɖíe ká nɔ nu ma kɛ bo vɔ ɖo xu tɛ́ntin din e!’ Nú a yi ɖe agban ɖó fí ɖé ɔ́, togun gěgé nɔ́ mɔ agban. Dɔkun towe wɔ̌buwɔ́bú lɛ́ɛ kpó ajɔ̌nú towe lɛ́ɛ kpó ɔ́, yě nɔ́ dó dɔkun nú axɔ́sú e ɖo ayǐkúngban jí lɛ́ɛ. Hwi ɖíe aslɔkɛ́ lɛ́ɛ ká gba din e! Hwi ɖíe syɔ́ ɖo xuzan mɛ e! Azɔ̌watɔ́ towe lɛ́ɛ kpó nǔ e a hɛn lɛ́ɛ kpó bǐ syɔ́. Hwi kpó yě kpó bǐ wɛ syɔ́, bó yi xuzan jí. Mɛ e ɖo tɔtó tɔtó ɖo zɔzɔ lɛ́ɛ ɔ́, ado hu yě bǐ, ahwi xo axɔ́sú yětɔn lɛ́ɛ; xɛsi ɖo nukún yětɔn ta. Nǔ e jɛ dó jǐ towe ɔ́ hu ado; ajɔ̌tɔ́ to ɖěvo mɛ tɔn lɛ́ɛ bǐ nɔ́ sá heelú; xó towe fó bǐ gbídí gbídí.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, yi ɖɔ xó nú axɔ́sú Tíi tɔn; ɖɔ n'i ɖɔ xó e nyɛ Aklúnɔ Mavɔmavɔ ɖɔ sɛ́ dó e ɔ́ ɖíe: A yǐ go bo ɖɔ: ‘Nyɛ ɔ́, Mawu wɛ un nyí, bó jínjɔ́n axɔ́súzinkpo ce jí ɖo xu jí.’ Lo ɔ́, gbɛtɔ́ kpowun wɛ a nyǐ; a sixú sɔ́ hwiɖée jlɛ́ dó nyɛ wú ǎ. A nɔ sɔ́ linlin towe ɖó nyɛ Mawu sín linlin há jí. A mɔ ɖɔ nǔɖé kún tíin bónú émí dán do ná ó. A vɛdó ɖɔ émí ɖó nǔnywɛ́ hú Daniyɛ́li wɛ sín a? A sɔ́ nǔnywɛ́ towe kpó bǐbí towe kpó dó jɛ dɔkun. Dɔkun ɖo así towe bó dó nǔɖé wa ná ǎ; a ɖǒ sikágan kpó kpatágan kpó kɔn nyi kpɔ́. Bǐbí e a nɔ dó wa ajɔ̌ ná ɔ́ zɔ́n bɔ a kplé dɔkun dó dɔkun jí; dɔkun towe zɔ́n bɔ a jɛ afɔ tɛ ayǐ jí. “Énɛ́ wú wɛ nyɛ Aklúnɔ Mavɔmavɔ ɖɔ: A nɔ sɔ́ linlin towe ɖó nyɛ Mawu sín linlin há jí. Énɛ́ ɔ́ wú ɔ́, un ná ɖó toɖévomɛnu e nɔ xo dǎka hú mɛ bǐ lɛ́ɛ nú we, bɔ yě ná tɔ́n ahwan we; yě ná hɛn nǔ e a sɔ́ bǐbí towe dó wa lɛ́ɛ bǐ gblé. Yě ná hɛn ɖɛkpɛ towe gblé. È nǎ sɔ́ we dó do gɔngɔn mɛ, bɔ a nǎ kú adǎn kú ɖo xuzan mɛ. Hwenu e a nǎ ɖo mɛ e ɖo nǎ hu we wɛ ɔ́ nukɔn ɔ́, a nǎ sixú lɛ́ glá ɖɔ émí nyí Mawu a? A nǎ sixú lɛ́ nyí Mawu ɖo mɛ e ɖo nǎ hu we wɛ lɛ́ɛ lɔ mɛ a? Éeǒ! Gbɛtɔ́ kpowun wɛ a nyǐ. Kú e nɔ hu mɛ e ma nɔ gbo ada ǎ lɛ́ɛ wɛ ná hu we. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ e, ji nǔwamɛhan ɖokpó nú Tíi xɔ́sú ɔ́. A nǎ ɖɔ n'i ɖɔ nyɛ Mawu Mavɔmavɔ wɛ ɖo han ɔ́ ji n'i wɛ; han ɔ́ ɖíe: ‘Tíi xɔ́sú e, a ɖǒ nǔnywɛ́ ɖaxó, a nyɔ̌ ɖɛkpɛ bɔ nǔ vɔ ɖ'é wú; énɛ́ ɔ́ zɔ́n bɔ a nyǐ nǔ e nyɔ́ yi fó é sín kpɔ́n d'é wú. Edɛ́ni wɛ a ɖe ɖ'ayǐ, ɖo jikpá Mawu tɔn mɛ, bɔ è sɔ́ awǐnnya ɖagbe ɖagbe tɛnmɛ tɛnmɛ dó ba acɔ́ nú we: saadwáni, tokpázi, dyamáa, klizolíti, onísi, jasípu, safíi, ɛsikabukli kpó emɛlodu kpó. Sikánú tɛnmɛ tɛnmɛ e a nɔ dó ɔ́, gbe e gbe è blǒ we ɔ́ wɛ è blǒ yě lɔ. Wɛnsagun susunɔ wɛ a nyǐ, bɔ awa towe lɛ́ɛ ɖo dlɛ̌ndlɛ́n; a nɔ nya xɛ ɖo mɛ jí; un sɔ́ we ɖó só mímɛ́ ce jí, bɔ a nɔ ɖo sa ɖi wɛ ɖo awǐnnya e nɔ́ da zo lɛ́ɛ tɛ́ntin. Sín gbe e gbe un ɖó we ɔ́, è mɔ nǔ jɛ do ɖé ɖo walɔ towe mɛ ǎ, káká jɛ gbe e gbe è wǎ mɔ nǔ nyanya ɖo walɔ towe mɛ é. Ajɔ̌ towe e zɔn nú we ganjí ɔ́ dɔn we dó dǎkaxixo mɛ, bɔ a jɛ nǔ nyanya wa jí. A hu hwɛ; énɛ́ wú ɔ́, un nya we sín só mímɛ́ ce jí; hwɛ wɛnsagun susunɔ ɔ́, un nya we sín awǐnnya énɛ́ lɛ́ɛ e nɔ́ da zo lɛ́ɛ tɛ́ntin. Ɖɛkpɛ towe wú wɛ a jɛ go yí jí; lě e nǔ nyɔ́ nú we sɔ ɔ́ zɔ́n bɔ a sɔ́ nɔ́ lin tamɛ kpɔ́n ǎ; énɛ́ ɔ́ wú wɛ un kpíkpé we nyi dó ayǐkúngban jí, bó dó winnyá we ɖo axɔ́sú lɛ́ɛ nukɔn. A nɔ xo ahizi ɖo ajɔ̌ towe mɛ; a hu hwɛ gěgé; a ɖu su nú tɛn mímɛ́ lɛ́ɛ; énɛ́ wú wɛ un bɔ myɔ ɖó toxo towe mɛ, bó vívá kún nú we. Un dó we zo bɔ a ji kɔn afín ɖo mɛ bǐ nukún mɛ. Nǔ e gbo we ɔ́ hu ado nú togun e ko tunwun we lɛ́ɛ bǐ; ahwi xo yě. Xó towe fó bǐ gbídí gbídí.’ ” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, lǐlɛ́ kpan nukɔn Sidɔ́ɔn toxo ɔ́, bó ɖɔ xó e un ɖɔ nú we dó wǔ tɔn é n'i. A nǎ ɖɔ n'i ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: hwɛ Sidɔ́ɔn toxo, un ná wa nǔ xá we. Un ná ɖe susu ce xlɛ́ we ɖo mɛ towe lɛ́ɛ mɛ; un ná wa nǔ xá we bɔ é ná sɔgbe xá hwɛ e un ɖó nú we é; énɛ́ ɔ́, mɛ bǐ ná tunwun ɖɔ nyɛ wɛ nyí Mawu Mavɔmavɔ. Hwe énɛ́ nu ɔ́, un ná ɖe xlɛ́ ɖɔ nyɛ wɛ nyí Mawu mímɛ́ ɔ́. Un ná sɛ́ jɛmɛjí dó we, kanjɔ ná sa gbɔn ali towe lɛ́ɛ jí. È nǎ tɔ́n ahwan we gbɔn aɖisí amyɔ, bó ná hu toví towe lɛ́ɛ gěgé ɖo toxo ɔ́ mɛ. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.” Mawu Mavɔmavɔ ɖɔ: “To e lɛ́ lɛ̌ dó Izlayɛ́li lɛ́ɛ ɖě sɔ́ ná hu tɛ́ n'i gbeɖé ǎ. To ɖě sɔ́ ná tɔ́n ɛ wunkan ɖɔhun ǎ, to ɖě ká sɔ́ ná tlɛ́n ɛ atín wunnɔ ɖɔhun ǎ. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ. “Xó e nyɛ Aklúnɔ Mavɔmavɔ lɛ́ ɖɔ é ɖíe: un ná kplé Izlayɛ́li ví lɛ́ɛ sín togun e mɛ un gba yě dó kpé gbɔn lɛ́ɛ. Yě ná wá nɔ to yě ɖésú tɔn mɛ; to e un ná mɛsɛntɔ́ ce tɔ́gbó yětɔn Jakɔ́bu é. Énɛ́ ɔ́, un ná ɖe xlɛ́ togun ɖě lɛ́ɛ ɖɔ nyi wɛ nyí Mawu mímɛ́ ɔ́. Yě ná sá xwé bó vo ɖo fínɛ́, bó ná tun vǐwuntín. Yě ná vo, ɖó un ná dɔn tó nú to e lɛ́ lɛ̌ dó yě bó nɔ́ hu tɛ́ nú yě lɛ́ɛ bǐ. Énɛ́ ɔ́, mɛ bǐ ná tunwun ɖɔ nyi wɛ nyí Aklúnɔ Mavɔmavɔ, Mawu yětɔn.” Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wǒgɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn wěwegɔ́ ɔ́ e ɖo sun wǒgɔ́ ɔ́ xwe énɛ́ xwe é mɛ; é ɖɔ nú mì ɖɔ: “Hwɛ gbɛtɔ́, lǐlɛ́ kpan nukɔn Ejípu xɔ́sú ɔ́, bó ɖɔ nǔ e ná wá gbo éé kpó Ejípu to ɔ́ bǐ kpó ɔ́ n'i. Xó e nyɛ Aklúnɔ Mavɔmavɔ ɖɔ sɛ́ dó e ɔ́ ɖíe: un ná wa nǔ xá we Ejípu xɔ́sú. Un ná wa nǔ xá we; lǒ ɖaxó ɖé wɛ a nyǐ, bó mlɔ́ tɔ e ɖo to towe mɛ lɛ́ɛ tɛ́ntin, bó nɔ́ ɖɔ: Nilu tɔ ɔ́ kpó ala tɔn lɛ́ɛ kpó ɔ́, nyi wɛ bló yě. Énɛ́ ɔ́ wú ɔ́, un ná dó gan nu nú we, bó ná blá hweví e ɖo tɔ towe mɛ lɛ́ɛ dó wǔtu towe, bó ná ɖe we sín tɔ ɔ́ mɛ, hwi kpó hweví e ɖo tɔ ɔ́ mɛ lɛ́ɛ bǐ kpó; hweví lɛ́ɛ ná ɖo wǔ towe mɔ̌, bɔ un ná bɛ́ mi yi kɔn nyi gbě ɖo gbětótló mɛ, hwi kpó hweví lɛ́ɛ bǐ kpó, bɔ a nǎ kú dó kɔ́ mɛ fínɛ́. Mɛ ɖé ná wá sɔ́ cyɔ towe bó ɖi ǎ. Kanlin lɛ́ɛ kpó xɛ lɛ́ɛ kpó wɛ un ná lan towe bɔ yě ná ɖu. Énɛ́ ɔ́, mɛ e ɖo Ejípu tomɛ lɛ́ɛ bǐ ná tunwun ɖɔ nyi wɛ nyí Mawu Mavɔmavɔ. “Gǎnjɛwú e a nǎ Izlayɛ́li togun ɔ́ nyí gǎnjɛwú ɖé ǎ; é cí mɛ e gán jɛ fántín wú é ɖɔhun. Yě zun fán we bɔ a wɛ̌n dó alɔ mɛ nú yě, bó gblé wǔ yě dó abɔ̌ta; yě gán jɛ wǔtu towe bɔ a wɛ̌n, bɔ awakanmɛ kú yě. Énɛ́ ɔ́ wú wɛ nyɛ Aklúnɔ Mavɔmavɔ ɖɔ: un ná sɛ́ ahwan dó we, bó ná vívá gbɛtɔ́ kpó kanlin kpó e ɖo to towe mɛ lɛ́ɛ bǐ sín kún. Ejípu to ɔ́ ná jɛ vɔ̌ káká bó cí gbětótló ɖɔhun, bɔ è nǎ tunwun ɖɔ nyi wɛ nyí Mawu Mavɔmavɔ. “A ɖɔ Nilu tɔ ɔ́, émítɔn tɔn wɛ, émí ɖésú wɛ bló. Énɛ́ ɔ́ wú ɔ́, un ná wa nǔ xá hwi kpó tɔ towe kpó. Un ná gba Ejípu to ɔ́ bǐ; un ná sɔ́ to ɔ́ dó húzú gbětótló sín Migidɔ́lu toxo ɔ́ mɛ ɖo taligbé, gbɔn Siɛni toxo ɔ́ mɛ, káká yi Etiopíi sín dogbó ɔ́ kɔn ɖo afɔligbé. Gbɛtɔ́ kpó kanlin kpó ɖěbǔ sɔ́ ná nɔ gbɔn fínɛ́ ǎ; nǔ e ɖó funfún xomɛ é ɖěbǔ sɔ́ ná gbɔn fínɛ́ ǎ, káká nú xwe kanɖé (40). Un ná sɔ́ Ejípu dó húzú gbětótló ɖé, bɔ è ko mɔ gbětótló mɔ̌hunkɔtɔn kpɔ́n ɖo ayǐkúngban ɔ́ jí ǎ. È nǎ gba toxo tɔn lɛ́ɛ bǐ hánnyá; lě e è nǎ gba toxo tɔn lɛ́ɛ gbɔn ɔ́, nǔ mɔ̌hunkɔtɔn kó jɛ kpɔ́n ɖo fí ɖé ǎ. É ná nɔ mɔ̌ káká nú xwe kanɖé (40); un ná gba Ejípunu lɛ́ɛ dó gbɔn to ɖěvo ɖěvo lɛ́ɛ mɛ. “Nǔ e nyɛ Aklúnɔ Mavɔmavɔ ɖɔ ɔ́ ɖíe: xwe kanɖé (40) gúdo ɔ́, un ná kplé Ejípunu lɛ́ɛ sín to e mɛ un gba yě dó gbɔn lɛ́ɛ mɛ. Un ná húzú ninɔmɛ Izlayɛ́li ví lɛ́ɛ tɔn; un ná kplá yě wá Patlɔ́si, Ejípu to fɔligbé, to e mɛ yě jɔ ɖe é mɛ, bɔ yě ná sɔ́ axɔ́súɖuto ɖokpó jínjɔ́n ayǐ. Amɔ̌, axɔ́súɖuto énɛ́ ná ɖó gǎn ɖé ǎ. Axɔ́súɖuto énɛ́ ná ɖó hlɔ̌nhlɔ́n sɔ axɔ́súɖuto ɖě ǎ; é sɔ́ ná hú gǎn togun ɖě ǎ. Un ná ɖe gbɛtɔ́ kpo sín yě mɛ, bɔ yě sɔ́ ná hú gǎn to ɖě ǎ. Ejípu sɔ́ ná nyí gǎnjɛwú ɖě nú Izlayɛ́li togun bónú yě ná ɖeji dó wǔ tɔn ǎ. Yě sɔ́ ná byɔ́ alɔgɔ́ ɖě Ejípu dó hu hwɛ ǎ. Énɛ́ ɔ́, yě ná tunwun ɖɔ nyɛ wɛ nyí Aklúnɔ Mavɔmavɔ.” Ahwan wlǐ Izlayɛ́li ví lɛ́ɛ yi Babilɔ́nu ɔ́, xwe tɔn koatɔ́n-nukún-wegɔ́ (27) ɔ́ mɛ ɔ́, Mawu Mavɔmavɔ ɖɔ xó nú mì azǎn nukɔn tɔn e ɖo sun nukɔn tɔn xwe énɛ́ ɔ́ xwe é mɛ. É ɖɔ nú mì ɖɔ: “Hwɛ gbɛtɔ́ e, axɔ́sú Nabukodonɔzɔ́ɔ zɔ́n azɔ̌ syɛ́nsyɛ́n ɖé ahwangɔnu tɔn hwenu e é xá Tíi toxo ɔ́ é. Sɔ́ja tɔn lɛ́ɛ hɛn agban káká bɔ ta yětɔn bǐ sún, bɔ abɔ̌ta yětɔn bǐ sún gló; yě jɛ tagba énɛ́ ɔ́ káká có axɔ́sú ɔ́ kpó mɛtɔn lɛ́ɛ kpó ká mɔ nǔɖé ɖ'é mɛ ǎ. Énɛ́ ɔ́ wú ɔ́, nǔ e nyɛ Aklúnɔ Mavɔmavɔ ɖɔ ɔ́ ɖíe: un ná jó Ejípu nú Nabukodonɔzɔ́ɔ Babilɔ́nu xɔ́sú ɔ́. É ná wá gba to ɔ́ bǐ, bó ná bɛ́ nǔ e ɖo to ɔ́ mɛ lɛ́ɛ bǐ, bó ná má nú sɔ́ja tɔn lɛ́ɛ dó sú axɔ́ yě. Un ná sɔ́ Ejípu dó sú axɔ́ ɛ, ɖó nyi wa azɔ̌ ná wɛ ahwangɔnu tɔn ɖe. Nyɛ Aklúnɔ Mavɔmavɔ wɛ ɖɔ mɔ̌.” “Hwenu e nǔ énɛ́ lɛ́ɛ ná jɛ ɔ́, un ná ná hlɔ̌nhlɔ́n Izlayɛ́li togun ɔ́, bó ká ná ná acɛ hwɛ Ezekiyɛ́li ɔ́, bɔ a nǎ ɖɔ xó nú yě, bónú yě ná tunwun ɖɔ nyɛ wɛ nyí Mawu Mavɔmavɔ.” Mawu Mavɔmavɔ lɛ́ ɖɔ nú mì ɖɔ: Hwɛ gbɛtɔ́ e, ɖɔ xó e un ɖɔ nú we é. A nǎ ɖɔ: “Xó e Aklúnɔ Mavɔmavɔ ɖɔ é ɖíe; mi dó gbɛvíhan ɖɔ: Azǎn tɛ́ ɖíe! Azǎn nyanya tɛ́ ɖíe! Azǎn ɔ́ kó sɛ yá bǐ kɛ́nnɛ́kɛ́nnɛ́; Azǎn Mawu Mavɔmavɔ tɔn ɔ́ kó ja. Azǎn énɛ́ gbe ɔ́, akpɔ́kpɔ́ ná ɖó gbɔn jǐnukúnsin ɔ́ bǐ; azǎn e gbe è nǎ ɖɔ hwɛ xá togun ɖě lɛ́ɛ é wɛ. Ahwan ná dó nǔ sin ɖo Ejípu. Hwenu e è nǎ hu gbɛtɔ́ kɔn nyi kpɔ́ ɖo Ejípu ɔ́, hwenu e è nǎ bɛ́ nǔ yětɔn lɛ́ɛ bǐ ɔ́, hwenu e è nǎ gba to ɔ́ bǐ ɔ́, mɛ bǐ ná ɖo adohu adohu jí káká yi Etiopíi. Etiopíinu lɛ́ɛ ná kú, Pútinu lɛ́ɛ ná kú, Lǔdinu lɛ́ɛ ná kú, to e jɛ akɔ xá yě lɛ́ɛ ɔ́, mɛ e ɖ'é mɛ lɛ́ɛ lɔ ná kú; Kúvu lɛ́ɛ ná kú, togun ce sín mɛ lɛ́ɛ lɔ ná kú ɖo ahwan ɔ́ mɛ. Xó e nyɛ Mawu Mavɔmavɔ ɖɔ ɔ́ ɖíe: Bɛ́ sín Migidɔ́lu ɖo taligbé káká wá Siɛni ɖo afɔligbé ɔ́, è nǎ hu mɛ e nɔ nya xɛ ɖo Ejípu jí lɛ́ɛ bǐ ɖo ahwan ɔ́ mɛ, bɔ nǔ e wú Ejípu gán jɛ, bó nɔ́ ɖo go yí wɛ ɔ́ bǐ ná vívá. Xó e nyɛ Aklúnɔ Mavɔmavɔ ɖɔ ɔ́ nɛ́. Ejípu to ɔ́ bǐ ná húzú gbětótló; toxo lɛ́ɛ bǐ ná húzú aglingbigba. Hwenu e un ná dó Ejípu to ɔ́ zo, bó hu mɛ e nɔ nya xɛ ɖo Ejípu to ɔ́ jí lɛ́ɛ bǐ ɔ́, è nǎ tunwun ɖɔ nyɛ wɛ nyí Mawu Mavɔmavɔ. Gbe e gbe un ná gba Ejípu to ɔ́ bǐ ɔ́, un ná sɛ́ mɛ dó Etiopíi, bɔ yě ná hɛn tɔjíhún bó ná yi gba ayi dó nú Etiopíinu lɛ́ɛ, bó ɖe jiɖiɖe vɔ́tɔ́ e ɖó wɛ yě ɖe ɔ́ síin, bɔ yě bǐ ná jɛ xɛsi jí. Azǎn énɛ́ ɔ́ ko ja. “Xó e nyɛ Aklúnɔ Mavɔmavɔ lɛ́ ɖɔ é ɖíe: Nabukodonɔzɔ́ɔ Babilɔ́nu xɔ́sú ɔ́ wɛ un nǎ zɔ́n bɔ é ná hu gbɛtɔ́ wɔ̌buwɔ́bú e ɖo Ejípu lɛ́ɛ. É kpó mɛ e nyɔ́ dǎka xo ganjí ɖo akɔta tɔn mɛ lɛ́ɛ kpó ná wá gba to ɔ́ hánnyá. Yě ná hu Ejípunu lɛ́ɛ, bɔ cyɔ ná kpé toxo ɔ́ mɛ. Un ná ɖɔ bɔ Nilu kpó ala tɔn lɛ́ɛ kpó ná xú, bɔ un ná jó Ejípunu lɛ́ɛ nú mɛdídá lɛ́ɛ. Un ná zɔ́n toɖévomɛnu lɛ́ɛ bɔ yě ná gba to ɔ́, bó ná bɛ́ dɔkun e ɖo to ɔ́ mɛ lɛ́ɛ bǐ. Xó e nyɛ Mawu Mavɔmavɔ ɖɔ ɔ́ nɛ́. “Xó e nyɛ Aklúnɔ Mavɔmavɔ lɛ́ ɖɔ é ɖíe: Un ná sú vodún tɔn lɛ́ɛ kún dó, un ná vívá kún nú bǒcyɔ tɔn e ɖo Mɛfísi lɛ́ɛ bǐ sésé. Mɛ ɖokpó sɔ́ ná ɖe, bó ná ɖu axɔ́sú ɖo Ejípu ǎ, bɔ un ná ɖó adohu nú Ejípu to ɔ́ bǐ. Un ná gba Ejípu sín afɔligbé ɔ́, un ná dó Sowáan toxo ɔ́ zo, bó ná ɖó hwɛ nú Tɛ́bu toxo ɔ́. Un ná dó nǔ sin xá Sínu toxo ɔ́ kpó xomɛsin kpó, ɖó é wɛ nyí ahohó e nɔ cyɔ́n alɔ Ejípu to ɔ́ jí é: un ná hu gbɛtɔ́ kɔn nyi só ɖo Tɛ́bu. Un ná dó Ejípu to ɔ́ zo. Ahwi ná xo Sínunu lɛ́ɛ. È nǎ tɔ́n ali dó dǒ e è mɛ lɛ́ lɛ̌ dó Tɛ́bu toxo ɔ́ é mɛ; Mɛfísi toxo ɔ́, kéze ɖéɖé wɛ kɛntɔ́ lɛ́ɛ ná gba bó yí. Dɔ̌nkpɛvú e ɖo Ɔnu toxo ɔ́ mɛ lɛ́ɛ kpó éé ɖo Pi-Bɛsɛ́ti toxo ɔ́ mɛ lɛ́ɛ kpó ná cí ahwan, bɔ ahwan ná wlí mɛ e kpo lɛ́ɛ yi to ɖěvo mɛ. Zǎn ná kú kéze ɖo Tapanɛ́si gbe e gbe un ná gbídí acɛkpikpa Ejípu tɔn ɔ́ é, bɔ goyíyí tɔn ná nɔ te. Akpɔ́kpɔ́ ɖé ná cyɔ́n to ɔ́ bǐ, bɔ è nǎ wlí mɛ e ɖo gbě énɛ́ jí lɛ́ɛ yi to ɖěvo mɛ. Un ná ɖó hwɛ nú Ejípu; énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.” Ée ahwan wlǐ Izlayɛ́li ví lɛ́ɛ yi Babilɔ́nu ɔ́, xwe tɔn wǒ-ɖokpógɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn tɛ́nwegɔ́ ɔ́ e ɖo sun nukɔn tɔn ɔ́ mɛ é gbe; Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, un wɛ́n awa nú Ejípu xɔ́sú ɔ́. Bo ka kpɔ́n! Mɛ ɖé ɖe bó ná kpé nukún dó awa ɔ́ wú n'i ǎ. Mɛ ɖé ɖó nǔ mɛ n'i ǎ; mɛɖé blá n'i ǎ. Mɛ ɖé blá n'i bónú alɔ ná jɛ alɔ tɛnmɛ bónú é ná dó hɛn hwǐ ǎ. Énɛ́ ɔ́ wú wɛ nyɛ Aklúnɔ Mavɔmavɔ ɖɔ: Un ná tɔ́n ahwan Ejípu xɔ́sú ɔ́; awa tɔn we lɛ́ɛ bǐ wɛ un ná wɛ́n; ée un ko wɛ́n ɖ'ayǐ é kɛ́ɖɛ́ wɛ ǎ; un ná wɛ́n ée kpo ɖo ganjí é lɔmɔ̌, bɔ hwǐ tɔn ná jɛ ayǐ. Énɛ́ ɔ́, un ná gba Ejípunu lɛ́ɛ dó kpé gbɔn akɔta ɖěvo ɖěvo lɛ́ɛ mɛ. Un ná gba yě dó gbɔn to lɛ́ɛ mɛ to lɛ́ɛ mɛ. Un ná dó hlɔ̌nhlɔ́n hlɔ̌nhlɔ́n jí nú axɔ́sú Babilɔ́nu tɔn, bó ná sɔ́ hwǐ nyɛ ɖésúnɔ tɔn dó así n'i, bɔ Ejípu xɔ́sú e un ko wɛ́n awa ná ɔ́ ná ɖo azɔn wɛn wɛ káká, bó ná kú ɖo kɛntɔ́ tɔn nukɔn. Mɔ̌ wɛ, Ejípu xɔ́sú ɔ́ sín awa lɛ́ɛ bǐ ná tɔ, bó ná sixú wa nǔɖé ǎ; un ka ná dó hlɔ̌nhlɔ́n awa mɛ nú Babilɔ́nu xɔ́sú ɔ́, bɔ é ná sɔ́ dó wa nǔ xá Ejípu. Énɛ́ ɔ́, yě ná tunwun ɖɔ nyi wɛ nyí Mawu Mavɔmavɔ. Un ná gba Ejípunu lɛ́ɛ dó gbɔn akɔta ɖěvo ɖěvo lɛ́ɛ mɛ. Un ná gba yě dó gbɔn to lɛ́ɛ mɛ to lɛ́ɛ mɛ. Énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.” Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wǒ-ɖokpógɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn nukɔn tɔn e ɖo sun atɔngɔ́ ɔ́ xwe énɛ́ xwe é gbe. Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, xó e a nǎ ɖɔ nú Ejípu xɔ́sú ɔ́ kpó mɛ tobutóbú e nu é kpa acɛ dó lɛ́ɛ kpó ɔ́ ɖíe: ‘Étɛ́wú un ka ná jlɛ́ we dó? Hwi mɛ syɛ́nsyɛ́n ɖokpó ɔ́, étɛ́ wú un ná jlɛ́ we dó? Asilíi wú wɛ un ná jlɛ́ we dó! Asilíi ɔ́, sɛ́dlutín wɛ, sɛ́dlutín Libáan tɔn wɛ. Ala tɔn lɛ́ɛ nyɔ́ ɖɛkpɛ káká, é dó ama ɖo gbɛ mɛ, yɛtɛn tɔn kpé fí bǐ, é yi jǐ káká bɔ ɖa tɔn byɔ́ akpɔ́kpɔ́ mɛ. É mɔ sin ganjí bó su, é mɔ sin e ɖo do glɔ́ é bó yi jǐ. Sin kplé lɛ́ lɛ̌ dó ɖɔ tɔn lɛ́ɛ, sin ɔ́ kplé káká bó nɔ́ sa gbɔn atín e ɖo gběhan mɛ lɛ́ɛ bǐ kɔ. É nɔ́ mɔ sin ganjí, énɛ́ wú wɛ é yi jǐ hú atín e ɖo gběhan mɛ lɛ́ɛ bǐ; é zɛ ala kɔn nyi kpɔ́; ala tɔn lɛ́ɛ ɖo ga ɖi wɛ kpowun. Xɛ lɛ́ɛ bǐ nɔ wá xo adɔ̌ nyi ala tɔn lɛ́ɛ mɛ. Asá tɔn mɛ wɛ lan lɛ́ɛ nɔ́ wá ji vǐ ɖe; akɔta lɛ́ɛ bǐ nɔ́ wá nɔ yɛtɛn tɔn. É yi jǐ ɖésú; ala tɔn lɛ́ɛ d'agba bɔ é nyɔ̌ ɖɛkpɛ hú atín lɛ́ɛ bǐ; ɖó sin kpé fí e é dó ɖɔ do ɖó é. Sɛ́dlutín tɛ́ è ka sixú jlɛ́ dó wǔ tɔn ɖo jikpá Mawu tɔn mɛ? É ɖe ǎ. Siplɛtín ɖě ká ɖo fínɛ́ bɔ è nǎ jlɛ́ dó ala tɔn lɛ́ɛ wú ǎ. Platánitín ɖě dó ama sɔ ɛ ǎ; Atín e ɖo jikpá Mawu tɔn mɛ lɛ́ɛ ɖě nyɔ́ ɖɛkpɛ tɔn ǎ. Ala e un ná ɛ lɛ́ɛ nyɔ́ ɖɛkpɛ mɔ̌hunkɔtɔn. Atín e ɖo jikpá ce mɛ ɖo Edɛ́ni lɛ́ɛ bǐ ɖo wǔ hwan wɛ, yě ɖo wǔ hwan wɛ ɖó énɛ́ wú.’ ” “Xó e nyɛ Aklúnɔ Mavɔmavɔ ɖɔ é ɖíe: Sɛ́dlutín ɔ́ su bó yi jǐ káká bɔ ɖa tɔn byɔ́ akpɔ́kpɔ́ mɛ, bɔ goyíyí tɔn fɔ́n ɔ́, é nɔ́ ɖo jijɛ jí wɛ. Énɛ́ ɔ́ wú wɛ un jó e dó, bɔ lě do e é dá sɔ ɔ́, axɔ́sú e syɛ́n hú axɔ́sú lɛ́ɛ bǐ ɖo ayǐkúngban ɔ́ jí ɔ́ wa nǔ xá ɛ káká yi tɛn tɔn mɛ. Toɖévomɛnu e nɔ xo dǎka hú mɛ bǐ lɛ́ɛ wá gbo e zindɛ́, bó jó e dó. Ala tɔn lɛ́ɛ kpó ama tɔn lɛ́ɛ kpó gbɔn só ta só ta, tɔdo mɛ tɔdo mɛ. Akɔta tɛnmɛ tɛnmɛ e nɔ wá bɛ yɛ ɖo asá tɔn mɛ lɛ́ɛ bǐ wɛ jó e dó bó hɔn yi. Xɛ lɛ́ɛ bǐ ná wá ɖó jɛ atín e è mu zindɛ́ bó já ala tɔn lɛ́ɛ é jí, bɔ gběkanlin lɛ́ɛ bǐ ná wa xwé nyi ala tɔn e è jǎ kɔn nyi ayǐ lɛ́ɛ tɛ́ntin. È blǒ mɔ̌, bónú atín e nɔ́ mɔ sin ganjí, bɔ sin kpé kpo lɛ́ɛ ɖě ma sɔ́ yi jǐ káká bónú ɖa tɔn byɔ́ akpɔ́kpɔ́ mɛ, bónú é sɔ́ énɛ́ bó dó jɛ go yí jí ó; ɖó atín bǐ wɛ ɖó ná kú bó ná yi kɔ́ glɔ́, bó yi mɔ mɛ e ko kú bó yi doxwé lɛ́ɛ. “Xó e nyɛ Aklúnɔ Mavɔmavɔ ɖɔ é ɖíe: Gbe e gbe un sɛ́ sɛ́dlutín ɔ́ dó doxwé ɔ́, un sɔ́ gbɛ ɔ́ bǐ dó aluwɛ mɛ; un ɖó tɔ e nɔ sa gbɔn ayǐkúngban glɔ́ é te, bó ɖó ala tɔn lɛ́ɛ bǐ te ɖó éyɛ́ wú. É sɔ́n éyɛ́ wú, bɔ un sɛ́ ablu dó Libáan sókan ɔ́ mɛ; atín e ɖo gběhan mɛ lɛ́ɛ bǐ xú ɖó éyɛ́ wú. Ée un zin atín énɛ́ ɔ́ dɛ́, bɔ é ná yi mɔ mɛ e ko kú lɛ́ɛ ɔ́, gbɛ ɔ́ bǐ se hwenu e é jɛ ayǐ é, bó nɔ́ sísɔ́. Ɖo doxwé ɔ́, atín Edɛ́ni tɔn lɛ́ɛ kpó atín ɖagbe ɖagbe Libáan tɔn e nɔ mɔ sin ganjí lɛ́ɛ kpó bǐ ká se bó nɔ́ j'awǎ. Yě kpó e kpó bǐ yi doxwé, bó yi mɔ mɛ e ahwan hu lɛ́ɛ bǐ; yě yi mɔ mɛ énɛ́ lɛ́ɛ e nyí sósyɛ́n tɔn gbɔn akɔta akɔta lɛ́ɛ mɛ, bɔ ahwan hu lɛ́ɛ bǐ. “Ejípu xɔ́sú, atín e ɖo Edɛ́ni lɛ́ɛ ɖě nyɔ́ ɖɛkpɛ towe ǎ, ɖě ká d'agba sɔ we ǎ. Nǔ ɖo mɔ̌ có, è nǎ kpíkpé we dó do gɔngɔn mɛ, mɛ ɖě lɛ́ɛ e ma nɔ́ gbo ada é ɖɔhun, bɔ hwi kpó mɛ e ma nɔ sɛn mì ǎ lɛ́ɛ kpó, kpódó mɛ e kú ɖo ahwangbénu lɛ́ɛ kpó bǐ ná yi do gɔngɔn mɛ. Lě e è nǎ wa hwi Ejípu xɔ́sú ɔ́ kpó mɛ e ɖo to towe mɛ lɛ́ɛ kpó nú gbɔn é nɛ́. Xó e nyɛ Aklúnɔ Mavɔmavɔ ɖɔ ɔ́ nɛ́.” Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wěwegɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn nukɔn tɔn e ɖo sun wěwegɔ́ ɔ́ xwe énɛ́ ɔ́ xwe é gbe. Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ji nǔwamɛhan élɔ́ nú Ejípu xɔ́sú ɔ́: A cí kinnikínní wínnyáwínnyá ɖɔhun ɖo akɔta lɛ́ɛ tɛ́ntin. A ka nɔ lɛ́ wa nǔ lǒ ɖɔhun. A nɔ yi xo babá ɖo tɔ towe mɛ; a nɔ́ sɔ́ afɔ towe dó hɛn tɔ ɔ́ blú, a nɔ́ xo tɔ ɔ́ bɔ tɔ ɔ́ nɔ́ wɔ́. Ɖǒ tó xó e Aklúnɔ Mavɔmavɔ ɖɔ é: Togun gěgé wɛ ná kplé bɔ un ná nyi ɖɔ dó wlí we, bɔ yě ná dɔn we wá agě jí. Un ná sɔ́ we zin dó kɔ́ mɛ, un ná sɔ́ we nyi dó nǔkan mɛ, un ná ɖɔ bɔ xɛ lɛ́ɛ bǐ ná ɖó jɛ jǐ towe, gběkanlin e ɖo ayǐkúngban ɔ́ jí lɛ́ɛ ná ɖu lan towe bó gɔ́ xo. Un ná fúnfún lan towe gbɔn só jí só jí, un ná fúnfún lan towe e ná kpo, bó ná nyɔ lɛ́ɛ gbɔn tɔdo mɛ tɔdo mɛ. Un ná ná hun e ná sa sín lan towe mɛ ɔ́ ayǐkúngban bɔ é ná nu; hun towe ná sa gbɔn só lɛ́ɛ jí, hun towe ná gɔ́ tɔdo lɛ́ɛ. Hwenu e gbɔjɛ towe ná xwɛ ɔ́, un ná bú nǔ dó jǐnukúnsin ɔ́, sunví lɛ́ɛ ná dó ablu; un ná bú akpɔ́kpɔ́ dó hwe, sun sɔ́ ná za wě ǎ; hwi wú wɛ un ná bú nǔ dó nǔ e nɔ ná wěziza ɖo jǐxwé lɛ́ɛ, bɔ to towe ná byɔ́ ablu mɛ. Xó e nyɛ Aklúnɔ Mavɔmavɔ ɖɔ ɔ́ nɛ́. Ahwi ná xo gbɛ ɔ́ bǐ hwenu e un ná ɖɔ lě e xó towe fó gbɔn ɔ́ nú yě ɔ́; un ná ɖɔ xó énɛ́ káká yi to e a ma tunwun ǎ é mɛ. Ahwi ná xo yě, ɖó nǔ e un ná dó sin xá we é wú. Gbe e gbe a nǎ kú ɔ́, yě ná nɔ́ ɖo xɛsi jí magbokɔ; hwenu e un ná ɖe hwǐ ce xlɛ́ axɔ́sú yětɔn lɛ́ɛ ɔ́, hǔn yětɔn ná zɛ; mɛ ɖokpó ɖokpó ná ɖo ta tɔn hwlɛ́n wɛ. “Xó e Aklúnɔ Mavɔmavɔ ɖɔ é ɖíe: Ahwangɔnu axɔ́sú Babilɔ́nu tɔn ná wá tɔ́n ahwan we. Un ná sɛ́ ahwanfuntɔ́ e nɔ́ xo dǎka hú mɛ lɛ́ɛ bǐ ɖo ayǐkúngban jí lɛ́ɛ dó, bɔ yě ná wá hu mɛ wɔ̌buwɔ́bú e ɖo to towe mɛ lɛ́ɛ. Yě ná gba nǔ e wú Ejípu to ɔ́ nɔ́ yí go lɛ́ɛ bǐ hánnyá, bó ná hu mɛ e ɖo to ɔ́ mɛ lɛ́ɛ bǐ. Un ná hu kanlin e a ɖǒ lɛ́ɛ bǐ ɖo Nilu tɔ ɔ́ tó. Nilu tɔ sɔ́ ná blú ɖě ǎ; gbɛtɔ́ kpó kanlin kpó ɖě sɔ́ ná ɖe, bó ná dó afɔ tɔ ɔ́ mɛ, bó hɛn blú ǎ. Un ná jó tɔ ɔ́ dó, bɔ é ná lílɛ́ bó zin; é ná nɔ́ sa tiin ami ɖɔhun. Xó e nyɛ Aklúnɔ Mavɔmavɔ ɖɔ ɔ́ nɛ́. Un ná sɔ́ Ejípu to ɔ́ dó húzú gbětótló; un ná bɛ́ dɔkun e ɖo to ɔ́ mɛ lɛ́ɛ bǐ; un ná hu mɛ e ɖo to ɔ́ mɛ lɛ́ɛ bǐ. Hwenu e un ná bló mɔ̌ ɔ́, è nǎ tunwun ɖɔ nyi wɛ nyí Mawu Mavɔmavɔ. “Nǔwamɛhan e nyɔ̌nu e gbɔn akɔta akɔta lɛ́ɛ bǐ mɛ lɛ́ɛ ná ji nú Ejípu kpó toví tɔn wɔ̌buwɔ́bú lɛ́ɛ kpó é nɛ́. Xó e nyɛ Aklúnɔ Mavɔmavɔ ɖɔ ɔ́ nɛ́.” Ahwan wlí Izlayɛ́li ví lɛ́ɛ yi Babilɔ́nu ɔ́, xwe tɔn wěwegɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn afɔtɔngɔ́ ɔ́ e ɖo sun wěwegɔ́ ɔ́ xwe énɛ́ xwe é gbe. Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ji nǔwamɛhan nú Ejípu togun ɔ́ bǐ. Nǔwamɛhan e a nǎ ji ɔ́ ní kpíkpé Ejípu kpó togun syɛ́nsyɛ́n ɖě lɛ́ɛ kpó dó do gɔngɔn mɛ fí e mɛ kúkú lɛ́ɛ nɔ́ nɔ é. Kanbyɔ́ Ejípu to ɔ́ ɖɔ: A nyɔ̌ hú togun ɖě lɛ́ɛ wɛ a? Hwi lɔ bo byɔ́ yɔdo mɛ, bónú è sɔ́ we mlɔ́ akɔta e ma nɔ gbo ada ǎ lɛ́ɛ kpá. Nǔgbó ɔ́, Ejípunu lɛ́ɛ ná jɛ ayǐ ɖo ahwangbénu. È ko sún hwǐ lɛ́ɛ sín akún mɛ; ahwan ní hu mɛ e ɖo Ejípu to ɔ́ mɛ lɛ́ɛ bǐ. Ɖo kútomɛ dɔ̌n ɔ́, mɛ e kpó Ejípu kpó jɛ akɔ ɔ́ kpó ahwanfuntɔ́ syɛ́nsyɛ́n lɛ́ɛ kpó ɖɔ: ‘Ejípunu lɛ́ɛ wá mlɔ́ mǐ mɛ, yě mɛ e ma gbo ada ǎ mǐ ɖɔhun, bó kú ɖo ahwangbénu lɛ́ɛ wá mlɔ́ mǐ mɛ.’ “Asilíi xɔ́sú ɔ́ sín yɔdo ɖo fínɛ́, bó ɖo ahwanfuntɔ́ tɔn e kú ɖo ahwangbénu lɛ́ɛ sín yɔdo tɛ́ntin. Fí e gɔ́ngɔ́n hú fí lɛ́ɛ bǐ ɖo kú tomɛ é wɛ yɔdo yětɔn lɛ́ɛ ɖe, bó lɛ́ lɛ̌ dó yɔdo axɔ́sú ɔ́ tɔn. Yě bǐ wɛ kú ɖo ahwangbénu; yě mɛ e xóxó ɖ'ayǐ ɔ́, yě nɔ́ dó adohu nú mɛ bǐ ɖo gbɛ ɔ́ mɛ, bɔ xɛsi jɛ́n nɔ́ ɖo mɛ bǐ jí lɛ́ɛ. “Elámu xɔ́sú ɔ́ sín yɔdo ɖo fínɛ́, bɔ sɔ́ja tɔn e è hu ɖo ahwangbénu lɛ́ɛ bǐ sín yɔdo lɛ́ lɛ̌ dó e. Yě mɛ énɛ́ lɛ́ɛ e ma nɔ́ gbo ada ǎ lɛ́ɛ, bó nɔ́ dó adohu nú mɛ bǐ ɖo gbɛ ɔ́ mɛ lɛ́ɛ lɔ yi kɔ́ glɔ́. Yě ɖu winnyá, bɔ yě kpó mɛ kúkú ɖě lɛ́ɛ kpó bǐ nyí nǔ ɖokpó ɔ́. Nǔgbó wɛ, axɔ́sú Elámu tɔn ɔ́ kpó sɔ́ja tɔn lɛ́ɛ kpó bǐ wɛ è hu ɖo ahwangbénu; yɔdo tɔn ɖo sɔ́ja tɔn lɛ́ɛ sín yɔdo tɛ́ntin. Yě mɛ énɛ́ lɛ́ɛ e ma nɔ gbo ada ǎ lɛ́ɛ bǐ wɛ kú ɖo ahwangbénu; yě wɛ nɔ dó adohu nú mɛ bǐ ɖo gbɛ ɔ́ mɛ; yě nɛ́ winnyá ká blá ta ná din nɛ́, yě kpó mɛ ɖě lɛ́ɛ e kú ɖo ahwangbénu lɛ́ɛ kpó. “Axɔ́sú Mɛcɛ́ki tɔn kpó Tubalu tɔn kpó ɖo fínɛ́; yě kpó ahwangɔnu yětɔn lɛ́ɛ kpó; yɔdo yětɔn lɛ́ɛ ɖo yɔdo sɔ́ja yětɔn lɛ́ɛ tɔn lɛ́ɛ tɛ́ntin; yě mɛ énɛ́ lɛ́ɛ e ma nɔ́ gbo ada ǎ lɛ́ɛ bǐ wɛ kú ɖo ahwangbénu; yě wɛ nɔ dó adohu nú mɛ bǐ ɖo gbɛ ɔ́ mɛ. È ɖi yě ɖó ahwanfuntɔ́ syɛ́nsyɛ́n xóxó tɔn lɛ́ɛ kpá ǎ; ahwanfuntɔ́ syɛ́nsyɛ́n xóxó e nɔ dó adohu nú mɛ bǐ ɖo gbɛ ɔ́ mɛ lɛ́ɛ ɔ́, è ja yě ɖi gbé ɔ́, è nɔ sɔ́ hwǐ yětɔn lɛ́ɛ ɖó kɔ nú yě, bó nɔ́ sɔ́ gǎglónú yětɔn lɛ́ɛ ɖó jǐ yětɔn. Din ɔ́, ahwan jɛ mi Ejípunu lɛ́ɛ jí; mi ná kú bɔ è nǎ ɖi mi ɖó mɛ e ma gbo ada ǎ bɔ è hu ɖo ahwangbénu lɛ́ɛ tɛ́ntin. “Edɔ́munu lɛ́ɛ kpó axɔ́sú yětɔn lɛ́ɛ kpó gǎn hɔn-yitɔ́ yětɔn lɛ́ɛ kpó lɔmɔ̌ sín yɔdo ɖo fínɛ́. Lě e yě syɛ́n sɔ é nɛ́, có è ka hu yě, mɛ e kú ɖo ahwangbénu lɛ́ɛ ɖɔhun, bó ɖi yě ɖó mɛ e ma nɔ gbo ada ǎ bó kú ɖo ahwangbénu lɛ́ɛ kpó mɛ e kú lɛ́ɛ bǐ kpó kpá. “Gǎn e ɖo togun e ɖo totaligbé lɛ́ɛ nu lɛ́ɛ lɔmɔ̌ sín yɔdo ɖo fínɛ́; yě bǐ ɖo fínɛ́, yě kpó Sidɔ́ɔnnu lɛ́ɛ kpó. Mɛ syɛ́nsyɛ́n wɛ yě nyǐ, bó nɔ́ dó adohu nú mɛ bǐ. Amɔ̌, din ɔ́, yě lɔ ko yi mlɔ́ ayǐ ɖo yɔdo mɛ kpó winnyá kpó; yě kpó mɛ e kú ɖo ahwangbénu lɛ́ɛ kpó. Yě ɖu winnyá mɛ e ko yi kɔ́ glɔ́ lɛ́ɛ bǐ ɖɔhun. “Nú Ejípu xɔ́sú ɔ́ mɔ nǔ énɛ́ lɛ́ɛ bǐ ɔ́, nǔ e ɖo nǎ jɛ dó ahwangɔnu tɔn jí wɛ ɔ́ sɔ́ ná hu ado n'i sɔ mɔ̌ ǎ, ɖó è nǎ hu é kpó sɔ́ja tɔn lɛ́ɛ kpó ɖo ahwangbénu. Xó e nyɛ Aklúnɔ Mavɔmavɔ ɖɔ ɔ́ nɛ́. Un jó Ejípu xɔ́sú ɔ́ dó, bɔ é dó nǔ baɖabaɖa lɛ́ɛ sin bó dó adohu nú mɛ e ɖo gbɛ ɔ́ mɛ lɛ́ɛ bǐ. Amɔ̌, éé kpó sɔ́ja tɔn lɛ́ɛ kpó ɔ́, è nǎ ɖi yě ɖó mɛ e ma gbo ada ǎ lɛ́ɛ tɛ́ntin, yě lɔmɔ̌ ná kú ɖo ahwangbénu. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, nú un sɛ́ ahwan dó to ɖé mɛ ɔ́, nǔ e nɔ jɛ lɛ́ɛ ɔ́, flín Izlayɛ́li ví lɛ́ɛ. To ɔ́ mɛ ví lɛ́ɛ nɔ́ kpɔ́n yěɖée mɛ, bó nɔ́ ɖe súnnu ɖokpó, bɔ é nɔ́ nyí mɛcɔ́tɔ́. Mɛcɔ́tɔ́ ɔ́ mɔ ahwangɔnu kɛntɔ́ tɔn jǎwe lě tlóló ɔ́, é nɔ́ kún lanzo, bó nɔ́ ɖɔ nú mɛ tɔn lɛ́ɛ. Ényí mɛɖé se lanzo ɔ́ gbe, bó má ké ya ná ǎ, bó jó éɖée dó bɔ kɛntɔ́ wá hu i hǔn, é ɖésú wú wɛ é sɔ́n nɛ́. É se lanzo gbe ɔ́ ganjí bó ká ké ya ná ǎ; hǔn é ɖésú wɛ jló bó kú; é kó ké ya ná wɛ ɔ́, é ná gán. Ényí mɛcɔ́tɔ́ ɔ́ ká mɔ ahwangɔnu kɛntɔ́ lɛ́ɛ tɔn jǎwe, bó má kún lanzo ǎ, bónú mɛtɔn lɛ́ɛ ɖo manywɛ́ mɛ, bɔ kɛntɔ́ wá fyán yě, bó hu mɛɖé ɔ́, mɛ ɔ́ ná kú ɖó hwɛ tɔn lɛ́ɛ wú, amɔ̌, mɛcɔ́tɔ́ ɔ́ wɛ un ná kan mɛ e kú ɔ́ sín hun byɔ́. “Hwɛ gbɛtɔ́ e, hwi wɛ un sɔ́ mɛcɔ́tɔ́ ɖó Izlayɛ́li ví lɛ́ɛ nu, bónú yě ɖo nǔ nyanya ɖé mɛ ná jɛ wɛ ɔ́, a nǎ nɔ́ ɖɔ nú yě. A nǎ nɔ́ ɖótó mì, bɔ nú un dó wɛn ɖé we ɔ́, a nǎ nɔ́ dó yě. Ényí mɛdídá ɖo nǔ wa nyi do wɛ, bónú un ɖɔ mɛdídá énɛ́ ɔ́ ná kú, nú hwɛ ma ka ɖɔ n'i bónú é jó jijɔ nyanya dó ǎ ɔ́, mɛdídá ɔ́ ná kú ɖó hwɛ tɔn lɛ́ɛ wú; amɔ̌, hwi wɛ un ná kan kanjɔ tɔn byɔ́. A ka dó wɛn mɛ ɔ́ ɖɔ é ní húzú jijɔ, bónú é má húzú jijɔ ǎ ɔ́, é ná kú ɖó hwɛ tɔn lɛ́ɛ wútu; hwɛ ka ná hwlɛ́n gbɛ towe.” “Hwɛ gbɛtɔ́ e, din ɔ́, ɖɔ nú Izlayɛ́li ví lɛ́ɛ ɖɔ mi nɔ gɔn ɖiɖɔ gbeɖé ɖɔ: ‘Hwɛ e mǐ hu lɛ́ɛ sín agban ɖo mǐ kpɛn wɛ, bɔ mǐ ɖo xúxú dó te wɛ. Nɛ̌ mǐ ná wa gbɔn din bó ná gán’ ǎ. Ɖɔ nú yě ɖɔ nyɛ Aklúnɔ Mavɔmavɔ ɔ́, un xwlé nyiɖée ɖɔ: Un ba gbeɖé kpɔ́n ɖɔ mɛ nyanya ní kú ǎ. Nǔ ɖokpó e ba wɛ un ɖe ɔ́ wɛ nyí ɖɔ é ní lɛ́ kɔ sín hwɛ tɔn lɛ́ɛ gúdo, bó nɔ gbɛ. Izlayɛ́li ví lɛ́ɛ mi, kɛnklɛ́n wɛ un dó nú mi, mi lɛ́ kɔ sín hwɛ mitɔn lɛ́ɛ gúdo. Étɛ́wú mi ɖésúnɔ ká ná jló bó ná kú? “Hwɛ gbɛtɔ́ e, ɖɔ xó élɔ́ nú to towe mɛ nu lɛ́ɛ: ‘Ényí gbɛtɔ́ e ko nɔ wa nǔ ɖó sɛ́nxwi jí ɔ́ wá jɛ nǔ nyanya wa jí ɔ́, nǔ e é nɔ́ wa ɖó sɛ́nxwi jí ɖ'ayǐ é nɔ́ zɔ́n bónú è nɔ gɔn tó dɔn n'i ǎ. Mɛ e ka ko nyí mɛdídá é wá jɛ nǔ wa ɖó sɛ́nxwi jí jí ɔ́, nyanya e é kó wa ɖ'ayǐ ɔ́ nɔ́ zɔ́n bónú è nɔ dɔn tó n'i ǎ. Ényí mɛ e nyí mɛ jlɔ́jlɔ́ ɔ́ wá jɛ nǔ nyanya wa jí ɔ́, tónú e é kó se ɖ'ayǐ ɔ́ nɔ́ zɔ́n nú é nɔ́ nɔ gbɛ ǎ. Ényí mɛ ɖé tíin, bó nɔ́ wa nǔ jlɔ́jlɔ́, nú un dó gbɛ sín akpá n'i, bónú é kó mɔ ɖɔ nǔ jlɔ́jlɔ́ e émí wa e kó kpé, bó jɛ nǔ nyanya wa jí ɔ́, nǔ jlɔ́jlɔ́ e é kó wa ɖ'ayǐ ɔ́, è nǎ wɔn bǐ, bɔ é ná kú ɖó nyanya e é wa ɔ́ wú. Ényí un ka ɖɔ nú mɛdídá ɖé ɖɔ é ná kú bónú é lɛ́ kɔ sín nǔ nyanya e dó sin wɛ é ɖe ɔ́ gúdo, bó jɛ nǔ e sɔgbe bó nyí nǔ jlɔ́jlɔ́ ɔ́ wa jí ɔ́, é ná nɔ gbɛ. Nú mɛ ɔ́ sɔ́ nǔ e é yí ɖó gbanu ɔ́ jó, bó sɔ́ nǔ e é fin é jó bó ma sɔ́ wa nyanya ɖé ǎ, bó jɛ tónú se nú sɛ́n e nɔ́ ná gbɛ mɛ lɛ́ɛ jí ɔ́, é sɔ́ ná kú ǎ; é ná nɔ gbɛ. Hwɛ e é ko hu lɛ́ɛ ɔ́, è nǎ wɔn bǐ, ɖó nǔ sɔgbe, nǔ jlɔ́jlɔ́ e é jɛ wiwa jí ɔ́ wú.’ “Mɛ towe lɛ́ɛ nɔ́ ɖɔ nyɛ Aklúnɔ, nyɛ nɔ́ dó atɔ́ɔ́nnu nǔ jí. Nyɛ wɛ ka nɔ dó atɔ́ɔ́nnu nǔ jí ǎ, yědɛɛ lɛ́ɛ wɛ ma ɖo nǔ wa ɖó nǔ gan jí wɛ ǎ. Ényí mɛ jlɔ́jlɔ́ ɖé jó ɖagbewiwa dó, bó jɛ nǔ nyanya wa jí ɔ́, é ná kú ɖó énɛ́ ɔ́ wú. Lo ɔ́, ényí mɛdídá jó nyanya wiwa dó, bó jɛ nǔ jlɔ́jlɔ́, nǔ e sɔgbe lɛ́ɛ wa jí ɔ́, é ná nɔ gbɛ ɖó énɛ́ ɔ́ wú. “Mi Izlayɛ́li ví lɛ́ɛ mi, mi nɔ ɖɔ nyi nɔ dó atɔ́ɔ́nnu nǔ jí. Nǔ e mi ná tunwun ɔ́ wɛ nyí ɖɔ lě e mɛ ɖokpó ɖokpó nɔ́ wa nǔ gbɔn ɔ́ wɛ un ná kpɔ́n dó ɖɔ hwɛ xá ɛ.” Ahwan wlí mǐ Izlayɛ́li ví lɛ́ɛ yi Babilɔ́nu ɔ́, xwe tɔn wěwegɔ́ ɔ́ mɛ ɔ́, mɛ e gán hwenu e è yǐ Jeluzalɛ́mu toxo ɔ́ ɖokpó wá ɖɔ xó nú mì ɖo azǎn atɔ́ɔ́ngɔ́ e ɖo sun wǒgɔ́ ɔ́ xwe énɛ́ xwe é gbe; é ɖɔ nú mì ɖɔ: “Kɛntɔ́ yí toxo ɔ́!” É kpo sɔ bɔ mɛ ɔ́ ná wá ɖɔ xó nú mì ɔ́, gbadanu tɔn ɔ́, Mawu Mavɔmavɔ sín hlɔ̌nhlɔ́n kó wá jǐ ce, bó tún kan nú ɖɛ̌ ce bɔ un ko jɛ xó ɖɔ jí cóbɔ mɛ ɔ́ wá ayǐhɔ́ngbe tɔn zǎnzǎn; Mawu ko tún kan nú ɖɛ̌ ce bɔ un sɔ́ nyí mɛ e ma nɔ ɖɔ xó ǎ é ǎ; hǔn un hɛn ɔ́, un ná ɖɔ xó. Énɛ́ ɔ́, Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, mɛ e kpo ɖo Izlayɛ́li toxo e è gba lɛ́ɛ mɛ lɛ́ɛ ɔ́, xó e yě nɔ́ ɖɔ é ɖíe: ‘Ablaxámu ɔ́, é ɖokpónɔ géé wɛ, bɔ to ɔ́ bǐ ká nyí étɔn; mǐdɛɛ lɛ́ɛ ká sukpɔ́; hǔn, mǐdɛɛ lɛ́ɛ tɔn wɛ to ɔ́ ɖó ná nyí din.’ Din ɔ́, ɖɔ nú yě ɖɔ: Xó e nyɛ Aklúnɔ Mavɔmavɔ ɖɔ ɔ́ ɖíe: Mi nɔ ɖu lan kpó kanjɔ kpó, mi nɔ sɛn vodún, mi nɔ hu mɛ; nɛ̌ to ɔ́ ká ná nyí mitɔn gbɔn? Ahwanlyánnú mitɔn lɛ́ɛ wú wɛ mi nɔ gán jɛ, mi nɔ dó nǔ baɖabaɖa lɛ́ɛ sin; mi bǐ wɛ nɔ ba nɔzo mitɔn lɛ́ɛ sín asi. Nɛ̌ to ɔ́ ná nyí mitɔn gbɔn? “Hwɛ gbɛtɔ́ e, dǒ wɛn élɔ́ yě nú mì. Ɖɔ nú yě ɖɔ: ‘Nyɛ Aklúnɔ Mavɔmavɔ ɔ́, un xwlé nyiɖée nú mi ɖɔ: Mi mɛ e kpo bo ɖo toxo e è ko gba lɛ́ɛ mɛ lɛ́ɛ ɔ́, è nǎ hu mi bǐ. Mi mɛ e hɔn yi cí gběgbó mɛ lɛ́ɛ ɔ́, kanlin ná wlí mi ɖu. Mi mɛ e hɔn yi cí sókan mɛ, bó ɖo sónu mɛ sónu mɛ lɛ́ɛ ɔ́, jɛmɛjí ná hu mi. Un ná gba to ɔ́ bǐ hánnyá, bó ná sɔ́ dó húzú gbětótló; hlɔ̌nhlɔ́n e é ɖó bó nɔ́ dó yí go ná ɔ́, é ná ba kpo. Mɛ ɖé sɔ́ ná nɔ só e ɖo Izlayɛ́li lɛ́ɛ ɖě jí gbeɖé ǎ; mɛɖé sɔ́ ná zɛ gbɔn fínɛ́ gbeɖé ǎ.’ Nú un gba Izlayɛ́li to ɔ́ bǐ bó sɔ́ dó húzú gbětótló, bó dó dɔn tó nú Izlayɛ́li ví lɛ́ɛ ɖó nǔ baɖabaɖa e yě dó sin lɛ́ɛ wútu ɔ́, yě ná tunwun ɖɔ nyɛ wɛ nyí Mawu Mavɔmavɔ nǔgbó. “Hwɛ gbɛtɔ́ e, mɛ e kpó hwi kpó ahwan wlí wá to ɖěvo mɛ fí lɛ́ɛ ɖo nǔ towe ɖɔ wɛ ɖo yěɖée tɛ́ntin; yě nɔ́ ɖo nǔ towe ɖɔ wɛ gbɔn dǒ e è mɛ lɛ́ lɛ̌ dó toxo ɔ́ lɛ́ɛ wú; yě nɔ́ ɖo nǔ towe ɖɔ wɛ gbɔn hɔn yětɔn lɛ́ɛ ta, hɔn yětɔn lɛ́ɛ ta. Yě nɔ́ ɖɔ: ‘Mi wá mǐ yi se xó e Mawu Mavɔmavɔ ɖɔ é mɛ!’ Énɛ́ ɔ́, yě nɔ́ dó ahwan gbě kpɔ́ gégé bó ná ɖótó we; yě nɔ́ jínjɔ́n ayǐ bó nɔ́ ɖótó we ganjí; amɔ̌, yě nɔ́ xwédo xó towe dó wa nǔ ǎ. Nǔ e jló yě lɛ́ɛ kɛ́ɖɛ́ wɛ yě nɔ́ wa; yě nɔ́ bló nǔ e ná nyí ɖagbe nú yě ɖokpónɔ lɛ́ɛ kɛ́ɖɛ́. Hanvívíjitɔ́ ɖé kpowun wɛ yě sɔ́ we dó mɔ, hanvívíjitɔ́ e ɖó gbe ɖagbe kɔ nu bó nɔ́ dó ji han, bó nɔ́ ɖo nǔ xo d'é mɛ wɛ ɔ́ wɛ yě sɔ́ we dó mɔ. Yě nɔ́ se xó e a ɖɔ lɛ́ɛ; yě mɛ ɖěbǔ ka nɔ bló ɖ'é ji ǎ. Amɔ̌, hwenu e nǔ e a ɖɔ lɛ́ɛ ná jɛ ɔ́, é ká sɔ́ ɖo lǐnlín mɛ lɔ ǎ; nǎ jɛ wɛ é kó ɖe; hwe énɛ́ ɔ́ nu ɔ́, yě ná tunwun ɖɔ gbeyíɖɔ Mawu tɔn ɖokpó ɖo yě tɛ́ntin.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, gǎn e ɖo Izlayɛ́li ví lɛ́ɛ nu lɛ́ɛ ɔ́, xó e ɖɔ dó yě wú wɛ un ɖe lɛ́ɛ ɔ́, ɖɔ nú yě. Ɖɔ nú yě ɖɔ xó e Aklúnɔ Mavɔmavɔ ɖɔ ɔ́ ɖíe: heelú mi mɛ e nyí lɛ̌ngbɔ́nyitɔ́ Izlayɛ́li tɔn lɛ́ɛ. Miɖée kɛ́ɖɛ́ wú wɛ mi nɔ kpé nukún dó. É má ká nyí lɛ̌ngbɔ́ lɛ́ɛ wú wɛ lɛ̌ngbɔ́nyitɔ́ lɛ́ɛ ɖó ná kpé nukún dó ǎ cé? Mi nɔ fyɔ́n anɔ̌sin lɛ̌ngbɔ́ lɛ́ɛ tɔn bó nɔ́ nu; mi nɔ kpa fún yětɔn, bó nɔ́ dó bló awu, bó nɔ́ dó; mi nɔ kpɔ́n lɛ̌ngbɔ́ e kló ganjí ɖ'é mɛ lɛ́ɛ, bó nɔ́ hu. Mi ka nɔ kpé nukún dó lɛ̌ngbɔ́ lɛ́ɛ wú ǎ. Lɛ̌ngbɔ́ e nǔ gbɛ́ dó lɛ́ɛ ɔ́, mi ná hlɔ̌nhlɔ́n yě ǎ. Mi kpé nukún dó éé ɖo azɔn jɛ wɛ lɛ́ɛ wú ǎ, mi blá akpa nú éé gblé wǔ lɛ́ɛ ǎ. Mi lɛ́ kɔ nú éé sɔ́ ali ɖěvo, bó xweyǐgbe lɛ́ɛ ǎ. Mi ka lɛ́ ba éé bú lɛ́ɛ ǎ. Lo ɔ́, acɛ e mi nɔ kpa nú yě ɔ́ syɛ́n dín, mi nɔ se gbɔ ǎ. Énɛ́ ɔ́, lɛ̌ngbɔ́ ce lɛ́ɛ gbadó, ɖó lɛ̌ngbɔ́nyitɔ́ jɔ lɛ̌ngbɔ́nyitɔ́ ɖé ɖo yě nu ǎ, bɔ yě húzú nǔɖuɖu nú gběkanlin lɛ́ɛ bó gbadó. Nǔgbó wɛ, gbɔ̌ e ɖo kpó ce mɛ lɛ́ɛ ɖo flúflú wɛ gbɔn só ɖaxó ɖaxó jí, bó ɖo flúflú wɛ gbɔn só kpɛví kpɛví jí; yě gbadó gbɔn ayǐkúngban ɔ́ bǐ jí, bɔ mɛɖé ká ɖo yě flín wɛ ǎ; mɛɖé yi yě ba gbé ǎ. Énɛ́ ɔ́ wú ɔ́, mi lɛ̌ngbɔ́nyitɔ́ Izlayɛ́li tɔn lɛ́ɛ mi, mi ɖótó mì. Nyɛ Aklúnɔ Mavɔmavɔ ɔ́, un xwlé nyiɖée nú mi: lɛ̌ngbɔ́ ce lɛ́ɛ ɖo ajotɔ́ lɛ́ɛ lɔ mɛ, lɛ̌ngbɔ́ ce lɛ́ɛ nyí nǔɖuɖu nú gběkanlin lɛ́ɛ, ɖó yě ɖǒ lɛ̌ngbɔ́nyitɔ́ ǎ. Lɛ̌ngbɔ́nyitɔ́ ce lɛ́ɛ nɔ́ kpé nukún dó lɛ̌ngbɔ́ ce lɛ́ɛ wú ǎ; yěɖée wú wɛ yě nɔ́ kpé nukún dó. Énɛ́ ɔ́ wú ɔ́, mi lɛ̌ngbɔ́nyitɔ́ Izlayɛ́li tɔn lɛ́ɛ mi, mi ɖótó mì. Nyɛ Aklúnɔ Mavɔmavɔ ɔ́, un ná wa nǔ xá mi; un ná byɔ́ lɛ̌ngbɔ́ ce lɛ́ɛ mi; un sɔ́ ná jó yě dó ɖě nú mi ɖɔ mi ní nɔ yě nu bónú mi ná jó yě dó bó jɛ nukún kpé dó miɖée wú jí ǎ. Un ná yí lɛ̌ngbɔ́ ce lɛ́ɛ sín gbla mitɔn mɛ, bɔ yě sɔ́ ná nyí nǔɖuɖu ɖě nú mi ǎ. “Xó e nyɛ Aklúnɔ Mavɔmavɔ ɖɔ ɔ́ ɖíe: Bɛ́ sín din ɔ́, nyɛ Aklúnɔ Mavɔmavɔ ɔ́, nyi ɖésú wɛ ná yi ba lɛ̌ngbɔ́ ce lɛ́ɛ mɔ, bó kpé nukún dó yě wú. Lɛ̌ngbɔ́nyitɔ́ ɖo lɛ̌ngbɔ́ tɔn lɛ́ɛ nu, bónú lɛ̌ngbɔ́ lɛ́ɛ gbadó ɔ́, é nɔ́ dɔn yě kplé; mɔ̌ ɖokpó ɔ́, nyi lɔ ná dɔn lɛ̌ngbɔ́ ce lɛ́ɛ kplé. Jɔhɔn nyanya ɖé wɛ nyi, bó gba lɛ̌ngbɔ́ ce lɛ́ɛ dó gbɔn tánmɛ tánmɛ, un ka ná gbɔn fí énɛ́ lɛ́ɛ bǐ, bó ná dɔn yě kplé. Un ná yi kplá yě sín togun e mɛ yě ɖe lɛ́ɛ, un ná kplé yě sín to tɛnmɛ tɛnmɛ e mɛ yě ɖe lɛ́ɛ mɛ, bó kplá yě wá to yětɔn mɛ. Un ná kplá yě wá, bɔ yě ná nɔ ɖu ama gbɔn Izlayɛ́li só lɛ́ɛ jí, yě ná nɔ́ ɖu ama gbɔn tɔkpá tɔkpá, yě ná nɔ́ ɖu gbɔn fí e gbɛtɔ́ nɔ́ nɔ ɖo to ɔ́ mɛ lɛ́ɛ bǐ. Un ná kplá yě yi fí e ama zɔ́n ɖe ganjí é. Amagbo yětɔn ná gbɔn Izlayɛ́li só lɛ́ɛ jí. Nǔgbó wɛ, yě ná mɔ amagbo ɖagbe, bó ná nɔ́ gbɔjɛ́ ɖo fínɛ́, yě ná mɔ amagbo ɖagbe bó ná mɔ ama e zɔ́n ganjí lɛ́ɛ ɖu gbɔn só lɛ́ɛ jí. Nyi ɖésúnɔ ná nyí lɛ̌ngbɔ́nyitɔ́ nú lɛ̌ngbɔ́ ce lɛ́ɛ, bó ná ná gbɔjɛ́ yě. Xó e nyɛ Aklúnɔ Mavɔmavɔ ɖɔ ɔ́ nɛ́. Lɛ̌ngbɔ́ ɖé bú ɔ́, un ná yi ba; un ná kplá éé zɛ ali é wá; un ná blá akpa nú lɛ̌ngbɔ́ e gblé wǔ é, bó ná ná hlɔ̌nhlɔ́n éé ɖo azɔn jɛ wɛ é. Amɔ̌, lɛ̌ngbɔ́ e kló dín, abǐ éé dó jǒ dín lɛ́ɛ ɔ́, un ná hu yě. Un ná kpé nukún dó lɛ̌ngbɔ́ ce lɛ́ɛ wú lě e sɛ́n zɔ́n gbɔn é.” “Mi lɛ̌ngbɔ́ ce lɛ́ɛ ɔ́, xó e ɖɔ nú mi wɛ nyɛ Aklúnɔ Mavɔmavɔ ɖe é ɖíe: Un ná nɔ́ gbo hwɛ nú gbɔ̌ ce lɛ́ɛ, un ná nɔ́ gbo nú agbo kpó gbǎgbá kpó. Ée mi mɔ ama ɖagbe ɖo amagbo mɛ bó ɖo ɖuɖu wɛ ɔ́, é kpé ǎ cé? Bɔ étɛ́wú mi ká nɔ gbídí ama e kpo ɔ́ ɖó afɔ wú? Ée mi mɔ sin ɖiɖi bó ɖo nunu wɛ ɔ́, é kpé ǎ cé? Bɔ étɛ́wú mi ka nɔ dó afɔ sin e kpo ɔ́ mɛ, bó nɔ́ hɛn blú? Énɛ́ ɔ́, lɛ̌ngbɔ́ ce ɖě lɛ́ɛ ɔ́, é má nyí gběhan e mi gbídí ɖó afɔ wú é wɛ yě ná ɖu, bó nu sin e mi hɛn blú ɖó afɔ wú é a? Énɛ́ wú wɛ nyɛ Aklúnɔ Mavɔmavɔ ɖo ɖiɖɔ nú mi wɛ ɖɔ nyɛ ɖésúnɔ ná wá gbo hwɛ nú lɛ̌ngbɔ́ gǒxúxú kpó lɛ̌ngbɔ́ kloklo kpó. Lɛ̌ngbɔ́ e má ɖó gǎn ɖé ǎ lɛ́ɛ ɔ́, mi ɖó abɔ̌go nú yě bó ɖó aja nú yě; mi sɔ́ zo dó xo yě káká bó nya yě bǐ sín lɛ̌ngbɔ́ ce lɛ́ɛ mɛ. Din ɔ́, un ná wá gɔ́ alɔ nú lɛ̌ngbɔ́ ce lɛ́ɛ, bɔ yě ná gosín ajotɔ́ lɛ́ɛ lɔ mɛ; énɛ́ ɔ́, un ná nɔ́ gbo hwɛ nú gbɔ̌ ce lɛ́ɛ. Un ná sɔ́ lɛ̌ngbɔ́nyitɔ́ ɖokpó ɖó lɛ̌ngbɔ́ ce lɛ́ɛ nu, bɔ é ɖokpó géé ná nɔ́ nyi yě. É wɛ nyí mɛsɛntɔ́ ce Davídi. Éyɛ́ ná nɔ́ kpé nukún dó gbɔ̌ ce lɛ́ɛ wú, bó ná nyí lɛ̌ngbɔ́nyitɔ́ yětɔn. Nyɛ Mawu Mavɔmavɔ ɔ́, un ná nyí Mawu yětɔn, bɔ mɛsɛntɔ́ ce Davídi ka ná nyí axɔ́sú nú yě. Xó e nyɛ Mawu Mavɔmavɔ ɖɔ ɔ́ nɛ́. “Un ná jɛ akɔ e ná ná fífá lɛ̌ngbɔ́ ce lɛ́ɛ ɔ́ xá lɛ̌ngbɔ́ ce lɛ́ɛ: un ná nya gběkanlin lɛ́ɛ bǐ sín to ɔ́ mɛ; énɛ́ ɔ́, kanlin ce lɛ́ɛ ná nɔ vivo mɛ, ɖo amagbo mɛ, bó ná dɔ́ amlɔ ɖo zunkan mɛ. Un ná xo ɖɛ dó to ɔ́ jí, bó xo dó fí e lɛ́ lɛ̌ dó só e è sɔ́ ɖó vo nú mì é jí; jǐ hwenu su ɔ́, un ná nɔ́ sɛ́ jǐ dó, un ná nɔ́ sɛ́ jǐ e ná nɔ́ wa ɖagbe nú yě ɔ́ dó. Atín lɛ́ɛ ná sɛ́n, ayǐkúngban ná ná nǔɖuɖu. Yě ná vo ɖo to ɔ́ mɛ. Un ná hɛn wlɔ e è dǒ yě, bɔ yě nyí kannumɔ é bǐ wɛ́n. Un ná hwlɛ́n yě ɖo mɛ e hɛn yě ɖó kannumɔ lɔ jí lɛ́ɛ sí. Énɛ́ ɔ́, yě ná tunwun ɖɔ nyi wɛ nyí Mawu Mavɔmavɔ. Ajotɔ́ e nɔ gosín to ɖěvo mɛ, bó nɔ́ wá fɔ yě lɛ́ɛ ɖě sɔ́ ná wá fɔ yě ǎ. Gběkanlin lɛ́ɛ ɖě sɔ́ ná vún yě ɖu ǎ. Yě ná nɔ vivo mɛ, mɛɖé sɔ́ ná dó tagba nú yě ǎ. Un ná ná atíngbo ɖé yě bɔ to ná nɔ́ ké. Adɔ sɔ́ ná hu mɛɖé ɖo to ɔ́ mɛ ǎ. To ɖě sɔ́ ná ko yě ǎ. Énɛ́ ɔ́, mɛ bǐ ná tunwun ɖɔ nyɛ Mawu Mavɔmavɔ, Mawu yětɔn ɔ́, un ɖo kpɔ́ xá yě, bɔ Izlayɛ́li togun ɔ́ nyí togun ce. Xó e nyɛ Aklúnɔ Mavɔmavɔ ɖɔ ɔ́ nɛ́. “Nǔgbó wɛ, mi lɛ̌ngbɔ́ ce lɛ́ɛ ɔ́, mi gbɔ̌hwan e ɖo amagbo ce mɛ lɛ́ɛ ɔ́, gbɛtɔ́ wɛ mi nyí bɔ nyɛ ka nyí Mawu mitɔn. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, kpan nukɔn Seyíi sókan lɛ́ɛ, bó ɖɔ nǔ e un ɖɔ nú we dó Seyíi toví lɛ́ɛ wú é nú yě. Ɖɔ nú yě ɖɔ xó e Aklúnɔ Mavɔmavɔ ɖɔ ɔ́ ɖíe: Un ná wa nǔ xá we. Un ná ɖe hlɔ̌nhlɔ́n ce xlɛ́ we Seyíi to, to e ɖo sókan mɛ é; un ná gba we bǐ hánnyá, bó ná sɔ́ we dó húzú gbětótló. Un ná sɔ́ toxo towe lɛ́ɛ bǐ dó húzú aglingbigba; nǔɖé sɔ́ ná kpo ɖo toxo towe lɛ́ɛ mɛ ǎ; énɛ́ ɔ́, a nǎ tunwun ɖɔ nyɛ wɛ nyí Mawu Mavɔmavɔ. A fɔ́n tɛgbɛ ɔ́, wǎn gbɛ́ nú Izlayɛ́li ví lɛ́ɛ wɛ jɛ́n a nɔ ɖe. Hwenu e adǎn ɖo yě gbo wɛ, bɔ è ɖo tó dɔn nú yě wɛ ɖó nǔ nyanya e yě dó sin lɛ́ɛ wú ɔ́, a tɔ́n ahwan yě. Énɛ́ ɔ́ wú wɛ nyɛ Aklúnɔ Mavɔmavɔ ɔ́, un xwlé nyiɖée nú we; un ná tɔ́n ahwan we, bó ná kɔn kanjɔ towe kɔn nyi ayǐ. Ɖó kanjɔ e a kɔn nyi ayǐ ɔ́ ɖo hlɔn ba wɛ. Ée a ja kanjɔ kɔn nyi ayǐ gbé, bó ma sí tamɛ ǎ é ɔ́, è nǎ kɔn kanjɔ hwi lɔ tɔn kɔn nyi ayǐ. Seyíi to, un ná gba we bǐ, bó ná sɔ́ we dó húzú gbětótló; un ná hu mɛ e nɔ ɖo yiyi wɛ bó nɔ́ ɖo wǐwá wɛ lɛ́ɛ bǐ. Un ná hu gbɛtɔ́ tɛ́ gbɔn só towe lɛ́ɛ jí. Mɛ e ahwan ná hu lɛ́ɛ sín cyɔ ná kpé só kpɛví kpɛví lɛ́ɛ jí, bó ná kpé tɔdo lɛ́ɛ mɛ, bó ná kpé do lɛ́ɛ mɛ. Un ná sɔ́ we dó húzú gbětótló, bɔ é ná nɔ mɔ̌ káká sɔ́yi. È sɔ́ ná mɔ mɛɖé ɖo toxo towe lɛ́ɛ ɖě mɛ gbeɖé ǎ. Énɛ́ ɔ́, a nǎ tunwun ɖɔ nyi wɛ nyí Mawu Mavɔmavɔ. “A nɔ́ ɖɔ: ‘Un ná yí axɔ́súɖuto Izlayɛ́li tɔn, bó ná yí axɔ́súɖuto Judáa tɔn. Axɔ́súɖuto we énɛ́ lɛ́ɛ mɛ wɛ nyɛ Mawu Mavɔmavɔ ka nɔ.’ Énɛ́ ɔ́ wú ɔ́, nyɛ Aklúnɔ Mavɔmavɔ ɔ́, un xwlé nyiɖée nú we ɖɔ lě e a wa nǔ xá Izlayɛ́li kpó xomɛsin kpó wǔhwan kpó gbɔn ɔ́, mɔ̌ wɛ nyi lɔ ná wa nǔ xá we gbɔn. Hwenu e un ná ɖó hwɛ nú we ɔ́, un ná ɖe mɛ e un nyí ɔ́ xlɛ́ Izlayɛ́li ví lɛ́ɛ. Énɛ́ ɔ́, a nǎ tunwun ɖɔ nyɛ Mawu Mavɔmavɔ ɔ́, un se lě e a zun Izlayɛ́li só lɛ́ɛ gbɔn é; ɖó a ɖɔ: ‘È ko gba Izlayɛ́li só lɛ́ɛ bǐ; din ɔ́, è jǒ yě nú mǐ bɔ mǐ nǎ yí yě bǐ.’ A hu tɛ́ nú mì; a yǐ go wǔtu ce; un se bǐ. “Xó e nyɛ Aklúnɔ Mavɔmavɔ ɖɔ ɔ́ ɖíe: un ná gba we hánnyá, bónú to lɛ́ɛ bǐ ná j'awǎ. Izlayɛ́li to gba bɔ é víví nú we; togun Izlayɛ́li tɔn ɔ́, ce ka wɛ. Énɛ́ ɔ́ wú ɔ́, nǔ ɖokpó ɔ́ wɛ un ná bló xá hwi ɖésú. Hwi Seyíi to ɔ́ kpó só towe lɛ́ɛ bǐ kpó wɛ è nǎ gba. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.” “Hwɛ gbɛtɔ́ e, din ɔ́, yi ɖɔ xó e un ɖɔ nú we dó Izlayɛ́li só lɛ́ɛ wú é. Ɖɔ nú yě ɖɔ: ‘Izlayɛ́li só lɛ́ɛ mi, mi ɖótó xó e Mawu Mavɔmavɔ ɖɔ é.’ Xó e Aklúnɔ Mavɔmavɔ ɖɔ ɔ́ ɖíe: Kɛntɔ́ mitɔn lɛ́ɛ ko nǔ hahaha bó ɖɔ: ‘Izlayɛ́li só jɔwámɔ lɛ́ɛ ɔ́, mǐtɔn wɛ yě húzú din.’ É nyɔ́! Din ɔ́, bo ɖɔ xó e un ɖɔ dó yě wǔ ɔ́ nú yě; ɖɔ nú yě ɖɔ xó e Aklúnɔ Mavɔmavɔ ɖɔ ɔ́ ɖíe: Un mɔ ɖɔ kɛntɔ́ ján go dó só mitɔn lɛ́ɛ gbɔn fí bǐ; só énɛ́ lɛ́ɛ su yě nukún mɛ, bɔ yě to ɖěvo mɛ nu lɛ́ɛ yí, bɔ é húzú zungbe bó húzú acagbe. Énɛ́ ɔ́ wú ɔ́, Izlayɛ́li só lɛ́ɛ mi, mi ɖótó xó e nyɛ Aklúnɔ Mavɔmavɔ ɖɔ é. Mi ɖótó xó e un ɖɔ dó só kpɛví kpɛví lɛ́ɛ wú é, xó e un ɖɔ dó tɔsisa lɛ́ɛ kpó tɔdo lɛ́ɛ kpó wú é, xó e un ɖɔ dó toxo e è gba bǐ, bɔ mɛɖé ma sɔ́ ɖ'é mɛ ǎ lɛ́ɛ wú é. Togun e lɛ́ lɛ̌ dó toxo énɛ́ lɛ́ɛ é bɛ́ nǔ e ɖo toxo énɛ́ lɛ́ɛ mɛ lɛ́ɛ bǐ, bɔ toxo énɛ́ lɛ́ɛ húzú nǔkiko nú yě. Nyɛ Aklúnɔ Mavɔmavɔ wɛ ɖɔ un ná wa nǔ xá togun e lɛ́ lɛ̌ dó Izlayɛ́li to lɛ́ɛ, ɖo tají ɔ́, Edɔ́mu togun ɔ́. Yě hu tɛ́ nú mì kpó awǎjijɛ kpó bó yí to ce, bó bɛ́ kanlin e ɖo Izlayɛ́li to ɔ́ mɛ lɛ́ɛ bǐ. Énɛ́ ɔ́ wú ɔ́, hwɛ gbɛtɔ́ e, a nǎ ɖɔ xó e un ɖɔ nú we dó Izlayɛ́li to ɔ́ wú é n'i. A nǎ ɖɔ nú só lɛ́ɛ, só kpɛví kpɛví lɛ́ɛ, tɔsisa lɛ́ɛ kpó tɔdo lɛ́ɛ kpó ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Akɔta akɔta lɛ́ɛ dó hɛ̌n mi; énɛ́ wú wɛ un ɖo wǔ hwǎn wɛ, énɛ́ wú wɛ un ɖo adǎn jí, bó ɖɔ: Un zin alɔ dó akɔ́n ɖɔ to e lɛ́ lɛ̌ dó Izlayɛ́li lɛ́ɛ lɔ ná ɖu hɛ̌n. Hwe énɛ́ nu ɔ́, atín e ɖo Izlayɛ́li só jí lɛ́ɛ ná zɔ́n ama, bó ná sɛ́n nú mi Izlayɛ́li ví togun ce ɔ́. Ɖó zaanɖé din ɔ́, mi ná lɛ́ kɔ yi to mitɔn mɛ. Un ná sɔ́ nukún ɖagbe dó kpɔ́n mi Izlayɛ́li só lɛ́ɛ; è nǎ nɔ lɛ gle gbɔn mi Izlayɛ́li só lɛ́ɛ jí, bó ná nɔ́ dó nǔ. Un ná bló bɔ gbɛtɔ́ ná lɛ́ ji kpɔ́ gěgé gbɔn mi Izlayɛ́li só lɛ́ɛ jí: Izlayɛ́li to ɔ́ ná ji gba; toxo e è ko gba hánnyá bǐ lɛ́ɛ ɔ́, è nǎ lɛ́ vɔ́ yě ɖó ayǐ ɖó fí e è ko gba lɛ́ɛ jí. Gbɛtɔ́ kpó kanlin kpó ná ji gba gbɔn mi Izlayɛ́li só lɛ́ɛ jí. Yě ná ji káká bɔ gbɛtɔ́ kpó kanlin kpó ná lɛ́ sukpɔ́ gbɔn mi Izlayɛ́li só lɛ́ɛ jí lě e é kó ɖe gbɔn ɖ'ayǐ é; un ná wa ɖagbe nú mi hú ɖagbe e un ko wa nú mi ɖ'ayǐ é. Énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ. Un ná kplá gbɛtɔ́ bɔ yě ná ɖi zɔnlin gbɔn mi Izlayɛ́li só lɛ́ɛ jí, togun ce Izlayɛ́li ná ɖi zɔnlin gbɔn mi jí. Mi ná nyí yětɔn; mi sɔ́ ná yí vǐ yětɔn sín yě sí ɖě ǎ. Xó e nyɛ Aklúnɔ Mavɔmavɔ ɖɔ ɔ́ ɖíe: Mɛ ɖé lɛ́ɛ nɔ́ ɖɔ hwi Izlayɛ́li to ɔ́, a nɔ vún gbɛtɔ́ ɖu, a nɔ yí vǐ sín togun towe sí. Din ɔ́, a sɔ́ ná vún gbɛtɔ́ ɖu ɖě ǎ, a sɔ́ ná yí vǐ ɖě sín togun towe sí ǎ. Xó e nyɛ Aklúnɔ Mavɔmavɔ ɖɔ ɔ́ nɛ́. Un sɔ́ ná jó we dó bɔ togun ɖě lɛ́ɛ ná zun we abǐ yě ná cá we ko bɔ a nǎ se ǎ. A sɔ́ ná hu toví towe lɛ́ɛ ɖě ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, hwenu e Izlayɛ́li ví lɛ́ɛ ɖo to yětɔn mɛ ɔ́, yě zé walɔ yětɔn kpó nǔ dó sin yětɔn kpó dó hɛn to ɔ́ blí. Nǔ e yě wa nyi do lɛ́ɛ kwíji nukún ce mɛ glegbe e nyɔ̌nu nɔ́ jɛ é ɖɔhun. Énɛ́ ɔ́, un ɖe xomɛsin ce xlɛ́ yě ɖó mɛ e yě hu ɖo to ɔ́ mɛ lɛ́ɛ kpó vodún e yě lí, bó dó hɛn to ɔ́ blí é kpó wú. Un gba yě dó kpé gbɔn akɔta ɖěvo lɛ́ɛ mɛ. Un dɔn tó nú yě lě e nǔ e yě dó sin lɛ́ɛ byɔ́ gbɔn é. To e mɛ yě gbɔn lɛ́ɛ bǐ ɔ́, hwɛ e yě nɔ́ hu lɛ́ɛ hɛn nyɛ mɛ e nyí Mawu mímɛ́ ɔ́ sín nyǐkɔ blí. Ɖó è nɔ ɖɔ dó yě wú ɖɔ: ‘Mawu Mavɔmavɔ sín togun wɛ yě nyí; è ka ɖe yě sín Mawu Mavɔmavɔ sín to ɔ́ mɛ gǎnnugǎnnu.’ Nyǐkɔ ce e hɛn blí wɛ akɔta ɖěvo lɛ́ɛ ɖe ɖó Izlayɛ́li ví lɛ́ɛ e yi to yětɔn mɛ lɛ́ɛ wú ɔ́ vɛ́ nú mì. Énɛ́ ɔ́ wú ɔ́, ɖɔ nú Izlayɛ́li togun ɔ́ ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Izlayɛ́li ví lɛ́ɛ mi, nǔ e bló gbé un ja ɔ́, mi wútu wɛ un ɖo nǎ bló wɛ ǎ; lo ɔ́, è nǎ sí nyǐkɔ ce e mi hɛn blí gbɔn to ɖěɖě mɛ mi gbɔn lɛ́ɛ wǔtu wɛ. Mi wú wɛ akɔta ɖě lɛ́ɛ hu tɛ́ nú nyǐkɔ ce. Din ɔ́, un ná ɖe xlɛ́ yě ɖɔ nyɛ wɛ nyí Mawu aditi, Mawu mímɛ́ ɔ́. Mi wɛ un ka ná sɔ́ dó ɖe nǔ énɛ́ xlɛ́ yě. Énɛ́ ɔ́, akɔta lɛ́ɛ ná tunwun ɖɔ nyɛ wɛ nyí Mawu Mavɔmavɔ. Xó e nyɛ Aklúnɔ Mavɔmavɔ ɖɔ ɔ́ nɛ́. “Un ná ɖe mi sín akɔta ɖě lɛ́ɛ mɛ, un ná ɖe mi sín to ɖěvo ɖěvo e mɛ mi gba kpé gbɔn lɛ́ɛ mɛ, bó ná kplá mi wá to mitɔn mɛ. Un ná kɔn sin mímɛ́ dó mi jí, bɔ mi ná húzú mɛ mímɛ́. Un ná lɛ mi sín nǔ blíblí e mi wa lɛ́ɛ kpó vodún e mi sɛn lɛ́ɛ kpó mɛ. Un ná ná ayixa yɔ̌yɔ́ mi, un ná ná linlin yɔ̌yɔ́ mi. Un ná ɖe ayixa mitɔn e syɛ́n awǐnnya ɖɔhun ɔ́ síin, bó ná zé ayixa e nɔ se tónú ɔ́ ɖó tɛn tɔn mɛ. Un sɔ́ yɛ ce dó mi mɛ; un ná sɔ́ mi dó ɖó mɛ e nɔ xwedó sɛ́n dó wa nǔ lɛ́ɛ; un ná sɔ́ mi dó ɖó mɛ e nɔ se tónú nú nǔ e un zɔn lɛ́ɛ, bó nɔ́ bló ɖ'é jí lɛ́ɛ. Mi ná nɔ to e un ná tɔ́gbó mitɔn lɛ́ɛ é mɛ; mi ná nyí togun ce, bɔ un ná nyí Mawu mitɔn. Un ná hwlɛ́n mi gán sín nǔ blíblí e mi wa lɛ́ɛ mɛ. Un sɔ́ ná sɛ́ adɔ ɖě dó mi ǎ; un ná ná gbe jinukún bɔ ji ná jɛ. Atín mitɔn lɛ́ɛ ná sɛ́n káká, ji ná jɛ nú mi ɖo gle mitɔn lɛ́ɛ mɛ, bɔ mi sɔ́ ná sa adɔ lele ɖě ɖo akɔta ɖěvo lɛ́ɛ nukɔn bɔ é ná nyí winnyá nú mi ǎ. Énɛ́ ɔ́, mi ná flín jijɔ nyanya e mi zán lɛ́ɛ, bó ná flín winnyánú e mi dó sin lɛ́ɛ. Mi ɖésúnɔ sín nǔ ná vɛ́ miɖée wú káká bɔ mi ná sixú kpɔ́n miɖée nukún mɛ ǎ, ɖó nǔ e mi wa nyi do lɛ́ɛ, kpó hɛ̌nnú e mi wa lɛ́ɛ kpó wú. Mi ka ná tunwun ganjí ɖɔ é kún nyí midɛɛ lɛ́ɛ wú wɛ un ɖo nǔ wa gbɔn mɔ̌ wɛ ó. Xó e nyɛ Aklúnɔ Mavɔmavɔ ɖɔ ɔ́ nɛ́. Winnyá wɛ ló hu mi Izlayɛ́li ví lɛ́ɛ bónú mi dó kɔ do ɖó nǔ e mi wa lɛ́ɛ wú. “Xó e nyɛ Aklúnɔ Mavɔmavɔ ɖɔ é ɖíe: Hwenu e un ná slá wǔ nú mi sín hwɛ e mi hu lɛ́ɛ mɛ ɔ́, un ná bló bɔ gbɛtɔ́ ná lɛ́ vɔ́ ji gbɔn toxo lɛ́ɛ mɛ toxo lɛ́ɛ mɛ, bɔ nǔ e è ko hɛn gblé lɛ́ɛ ɔ́, è nǎ bló yě ɖó. Gle e è ma sɔ́ lɛ kpɔ́n gbeɖé ǎ lɛ́ɛ ɔ́, è nǎ vɔ́ bǐ lɛ bɔ aliwáyitɔ́ sɔ́ ná mɔ ayǐkúngban malɛ́málɛ́ ɖě ǎ. È nǎ nɔ́ ɖɔ: ‘To élɔ́ e è ko gba bǐ é lɛ́ wá cí jikpá Edɛ́ni tɔn ɖɔhun, bɔ toxo e ko gba bǐ, bɔ è ko mɔ ɖɔ mɛɖé kún sɔ́ ná nɔ fínɛ́ gbeɖé ó lɛ́ɛ ɔ́, è lɛ̌ wá vɔ́ bǐ gbá, bɔ gbɛtɔ́ ɖo fínɛ́ din.’ Énɛ́ ɔ́, to e lɛ́ lɛ̌ dó mi bo kpo ɖo te lɛ́ɛ ná mɔ ɖɔ nyɛ Mawu Mavɔmavɔ wɛ vɔ́ to e ko gba é bló ɖó, bó lɛ gle e è ko jó dó lɛ́ɛ. Nyɛ Mawu Mavɔmavɔ wɛ ɖɔ bó ká ná bló. “Xó e nyɛ Aklúnɔ Mavɔmavɔ ɖɔ ɔ́ ɖíe: un ná lɛ́ yí gbe bɔ Izlayɛ́li ví lɛ́ɛ ná nɔ́ ylɔ́ mì bónú má wa ɖagbe nú yě; un ná ná vǐ yě bɔ yě ná ji wɔɖɔɖɔ kanlin ɖɔhun. Toxo e mɛ mɛɖé má sɔ́ ɖe égbé din ǎ ɔ́, gbɛtɔ́ ná lɛ́ gɔ́, lě e è ja xwe ɖaxó ɖaxó lɛ́ɛ ɖu gbé ɖo Jeluzalɛ́mu ɔ́, kanlin e ná dó sá vɔ̌ ná wɛ è ɖe lɛ́ɛ nɔ́ gɔ́ Jeluzalɛ́mu toxo ɔ́ gbɔn é. Mɔ̌ wɛ gbɛtɔ́ lɛ́ɛ ná ji gba gbɔn, ɖo toxo mitɔn lɛ́ɛ mɛ; énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ.” Hlɔ̌nhlɔ́n Mawu Mavɔmavɔ tɔn wá jǐ ce, bɔ yɛ Mawu Mavɔmavɔ tɔn sɔ́ mì yi ɖó tɔdo ɖaxó ɖé mɛ, bɔ gbɛtɔ́ xú gɔ́ tɔdo ɔ́. Mawu kplá mì bɔ un ɖi zɔnlin lɛ́ lɛ̌ dó xú lɛ́ɛ. Xú lɛ́ɛ sukpɔ́ káká; bǐ wɛ kó dóxó bó kó wé. Énɛ́ ɔ́, Mawu kanbyɔ́ mì ɖɔ: “Hwɛ gbɛtɔ́ e, xúgloxú élɔ́ lɛ́ɛ sɔ́ sixú fɔ́n wá gbɛ a?” Bɔ un yí gbe ɖɔ: “Aklúnɔ Mavɔmavɔ, hwi ɖokpónɔ géé wɛ tunwun.” Mawu lɛ́ ɖɔ nú mì ɖɔ: “Ɖɔ xó e un ná ɖɔ nú we ɔ́ nú xúgloxú énɛ́ lɛ́ɛ; ɖɔ nú yě ɖɔ: Xúgloxú lɛ́ɛ mi, mi ɖótó. Xó e Aklúnɔ Mavɔmavɔ ɖo ɖiɖɔ nú mi wɛ ɔ́ ɖíe: xúgloxú lɛ́ɛ mi, un ná lɛ́ ná funfún mi, bɔ mi ná lɛ́ fɔ́n wá gbɛ. Un na lɛ́ bló kan dó mi wú, lanti ná nyɛ ɖo mi wú, bɔ un ná sɔ́ anyǔ bú dó; énɛ́ ɔ́ gúdo ɔ́, un ná ná funfún mi, bɔ mi ná fɔ́n; énɛ́ ɔ́, mi ná tunwun ɖɔ nyi wɛ nyí Mawu Mavɔmavɔ.” Bɔ un ɖɔ xó nú xúgloxú lɛ́ɛ lě e Mawu zɔ́n mì gbɔn é. Hwenu e un ɖo xó ɖɔ wɛ ɔ́, un jɛ zǐngídi ɖé se jí, xú lɛ́ɛ jɛ sisɛbɔ dó yěɖée wú jí. Mɛ ɖokpó ɖokpó sín xú jɛ sisɛkplé ɖó kpɔ́ jí Ée un ɖo kpínkpɔ́n wɛ ɔ́, un mɔ bɔ kan jɛ xú lɛ́ɛ wú wá jí, bɔ lanti kpó anyǔ kpó wá xú lɛ́ɛ wú. Lo ɔ́, funfún kó byɔ́ yě mɛ ǎ. Mawu ɖɔ nú mì ɖɔ: “Hwɛ gbɛtɔ́ e, ɖɔ xó nú funfún e nɔ ná gbɛ mɛ ɔ́ nú mì; ɖɔ n'i ɖɔ: ‘Funfún e nɔ́ ná gbɛ mɛ ɔ́ e, Aklúnɔ Mavɔmavɔ ɖe gbe nú we ɖɔ hwi ní gosín wɛ̌kɛ́zo ɛnɛ lɛ́ɛ bǐ jí wá nyi dó mɛkúkú élɔ́ lɛ́ɛ jí nú yě ní fɔ́n wá gbɛ.’ ” Xó e Mawu ɖɔ nú mì ɖɔ má ɖɔ lɛ́ɛ ɔ́, un ɖɔ, bɔ funfún byɔ́ mɛkúkú lɛ́ɛ mɛ, bɔ yě fɔ́n, bó xwe afɔ te. Ahwanfuntɔ́ maxamaxa wɛ. Mawu lɛ́ ɖɔ nú mì ɖɔ: “Hwɛ gbɛtɔ́ e, a mɔ a? Xúgloxú énɛ́ lɛ́ɛ ɔ́, togun ce Izlayɛ́li sín akpajlɛ́ wɛ. Ɖó Izlayɛ́li togun ce ɔ́ nɔ́ ɖɔ: ‘Xúgloxú wɛ mǐ nyǐ; nǔɖé sɔ́ kpo nú mǐ nǎ ɖó nukún ǎ. Xó mǐdɛɛ lɛ́ɛ tɔn kó fó.’ Énɛ́ ɔ́ wú ɔ́, yi ɖɔ xó e nyɛ Aklúnɔ Mavɔmavɔ ɖɔ nú we ɔ́ nú yě; ɖɔ nú yě ɖɔ: un ná hun yɔdo mitɔn lɛ́ɛ, un ná ɖe mi tɔ́n sín mɛ, mi togun ce lɛ́ɛ, un ná kplá mi wá Izlayɛ́li, to mitɔn mɛ. Hwenu e un ná hun yɔdo mitɔn lɛ́ɛ, bó ná ɖe mi tɔ́n sín mɛ ɔ́, mi ná tunwun ɖɔ nyɛ wɛ nyí Mawu Mavɔmavɔ. Hwenu e un ná sɔ́ yɛ ce dó ná gbɛ mi, bó ná lɛ́ kplá mi wá to mitɔn mɛ ɔ́, mi ná tunwun ɖɔ nyi wɛ nyí Mawu Mavɔmavɔ. Nǔgbó wɛ, mi ná tunwun ɖɔ nyɛ Mawu Mavɔmavɔ ɔ́, un ɖɔ bó bló ɖ'é jí. Xó e nyɛ Aklúnɔ Mavɔmavɔ ɖɔ ɔ́ nɛ́.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, sɔ́ kpo ɖokpó, bó wlán nǔ d'é jí; nǔ e a nǎ wlán d'é jí ɔ́ ɖíe: ‘Axɔ́súɖuto Judáa tɔn kpó mɛ e ɖ'é mɛ lɛ́ɛ kpó; yě bǐ wɛ nyí Izlayɛ́li ví.’ Lɛ̌ sɔ́ kpo ɖěvo bó wlán d'é jí ɖɔ: ‘Axɔ́súɖuto Izlayɛ́li tɔn, tínmɛ tɔn wɛ nyí Jozɛ́fu ví lɛ́ɛ kpó mɛ ɖě lɛ́ɛ e ɖo axɔ́súɖuto ɔ́ mɛ lɛ́ɛ kpó; yě bǐ wɛ nyí Izlayɛ́li ví.’ A nǎ fɔ kpo we lɛ́ɛ, bó ná sɔ́ ɖě kpé ɖě nu, bɔ yě ná húzú ɖokpó ɖo alɔ towe mɛ. Énɛ́ ɔ́, Izlayɛ́li ví lɛ́ɛ ná ɖɔ hwi ní tín nǔ e bló wɛ hwi ɖe ɔ́ mɛ nú émí. Yě ɖɔ mɔ̌ ɔ́, a nǎ ɖɔ nú yě ɖɔ: Xó e Aklúnɔ Mavɔmavɔ ɖɔ ɔ́ ɖíe: Un ná zé kpo e sɔ́ Jozɛ́fu kpó Izlayɛ́li ví e ɖo axɔ́súɖuto énɛ́ ɔ́ mɛ lɛ́ɛ kpó sín afɔ ɖó te ɔ́, bó ná zé kpo e sɔ́ axɔ́súɖuto Judáa tɔn sín afɔ ɖó te ɔ́ cá d'é nu; kpo we énɛ́ lɛ́ɛ kplé ɖo alɔ ce mɛ ɔ́, yě ná húzú kpo ɖokpó géé. “Kpo we e wú a wlǎn nǔ dó lɛ́ɛ ná ɖo alɔ towe mɛ ɖo nukún yětɔn mɛ, bɔ a nǎ ɖɔ nú yě ɖɔ: xó e Aklúnɔ Mavɔmavɔ ɖɔ ɔ́ ɖíe: Izlayɛ́li ví lɛ́ɛ mi, un ná kplá mi sín to e mɛ mi gba kpé gbɔn lɛ́ɛ mɛ; un ná kplé mi, bó ná kplá mi wá to mitɔn mɛ. Énɛ́ ɔ́, un ná dɔn mi kplé, bɔ mi ná húzú akɔta ɖokpó géé ɖo Izlayɛ́li só lɛ́ɛ jí; axɔ́sú ɖokpó géé wɛ na ɖu gǎn ɖo mi bǐ sésé nu. Togun ɔ́ sɔ́ ná nyí we ǎ; axɔ́súɖuto ɔ́ sɔ́ ná má ɖó we ǎ. Mi sɔ́ ná sɛn vodún ɖě dó ɖu su ǎ; mi sɔ́ ná ɖo nǔ baɖabaɖa ɖě dó sin wɛ, bó ɖo mɛ hu wɛ dó ɖu su ǎ. Un ná hwlɛ́n mi ɖo nǔ e mi nɔ wa nyi dó nú mì lɛ́ɛ bǐ mɛ. Un ná slá wǔ nú mi, bɔ mi ná húzú togun ce, bɔ un ná nyí Mawu mitɔn. Mɛsɛntɔ́ ce Davídi ná nyí axɔ́sú mitɔn. É ɖokpónɔ wɛ ná nyí lɛ̌ngbɔ́nyitɔ́ mitɔn. Mi ná nɔ́ nyi sɛ́n ce lɛ́ɛ, bó ná se tónú nú nǔ e un ɖɔ lɛ́ɛ, bó ná nɔ́ bló ɖ'é jí. Mi ná nɔ to e un ná mɛsɛntɔ́ ce Jakɔ́bu, bɔ tɔ́gbó mitɔn lɛ́ɛ nɔ mɛ é mɛ. Mi ná nɔ fínɛ́ káká sɔ́yi, mi kpó vǐ mitɔn lɛ́ɛ kpó, kpódó vǐvú vivu mitɔn lɛ́ɛ kpó. Mɛsɛntɔ́ ce Davídi ná nɔ mi nu káká sɔ́yi. Un ná jɛ akɔ e ná ná fífá é ɖokpó xá mi; un ná jɛ akɔ mavɔ mavɔ ɖé xá mi. Un ná sɔ́ mi ɖó to ɔ́ mɛ, un ná bló bɔ mi ná ji gba. Un ná sɔ́ nɔtɛn ce ɖó mi tɛ́ntin; nɔtɛn ce ná nɔ mi tɛ́ntin káká sɔ́yi. Un ná nɔ mi mɛ. Un ná nyí Mawu mitɔn, bɔ mi ná nyí togun ce. Ée un ná sɔ́ nɔtɛn ce ɖó mi tɛ́ntin, bɔ é ná nɔ fínɛ́ káká sɔ́yi ɔ́, to ɖě lɛ́ɛ ná tunwun ɖɔ nyi wɛ nyí Mawu Mavɔmavɔ; yě ná tunwun ɖɔ un sɔ́ Izlayɛ́li ɖó vo.” Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, kpan nukɔn Gɔgu, togun Tubalu kpó Mɛcɛ́ki tɔn kpó sín gǎn ɖaxó ɔ́ ɖo Magɔ́gi tomɛ, bó ɖɔ nǔ e un ɖɔ dó wǔ tɔn ɔ́ n'i. A nǎ ɖɔ n'i ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Un ná tɔ́n ahwan we Gɔgu, hwi mɛ e ɖu gǎn bɔ gǎn vɔ ɖo togun Mɛcɛ́ki tɔn kpó Tubalu tɔn kpó nu é. Un ná dó gan aglan nú we, bó dɔn we tɔ́n kpó hlɔ̌nhlɔ́n kpó, bó dɔn we yi ahwangbénu. Un ná dɔn we tɔ́n sín to towe mɛ, hwi kpó ahwangɔnu towe bǐ kpó, kpó sɔ́ towe lɛ́ɛ kpó, kpó sɔ́xátɔ́ towe e nɔ dó awu ɖagbe ɖagbe lɛ́ɛ kpó, kpódó ahwanfuntɔ́ towe wɔ̌buwɔ́bú e nɔ́ hɛn gǎglónú kpɛví kpó ɖaxó kpó lɛ́ɛ kpó; yě bǐ wɛ nyɔ́ hwǐ zán mɔ̌hunkɔtɔn. Sɔ́ja Pɛ́si tɔn lɛ́ɛ, Etiopíi tɔn lɛ́ɛ, kpó Pútinu tɔn lɛ́ɛ kpó ná xwe gangbákún bó hɛn gǎglónú bó ná gɔ́ nú we. Gomɛ́ɛ togun ɔ́ kpó ahwangɔnu tɔn bǐ kpó, Bɛti-Togáama togun e ɖo totaligbé aga dɔ̌n bǐ é kpó ahwangɔnu tɔn lɛ́ɛ bǐ kpó ná gɔ́ nú ahwangɔnu towe lɛ́ɛ; mɔ̌ ɖokpó ɔ́, to ɖěvo mɛ nu wɔ̌buwɔ́bú ɖé lɛ́ɛ ná gɔ́ nú we. Din ɔ́, sɔ́ nǔ bó ɖo acéjí, hwi kpó mɛ tobutóbú e ɖo acɛ towe mɛ lɛ́ɛ kpó. É wá yá ɔ́, un ná zɔ́n nǔ we. Xwe wá ɖo xwe jí jɛ wɛ ɔ́, un ná sɛ́ we dó, bɔ a nǎ yi tɔ́n ahwan Izlayɛ́li to ɔ́. Izlayɛ́li ví e xo ahwan zlɛ́ lɛ́ɛ ɔ́, yě ná gosín to e mɛ yě gbadó gbɔn lɛ́ɛ mɛ, bó ná wá kplé kpɔ́ gěgé ɖo Izlayɛ́li, só e è ko jó dó bɔ é kó lín bɔ mɛ ɖě ma sɔ́ ɖ'é jí ǎ lɛ́ɛ jí. Yě mɛ énɛ́ lɛ́ɛ e è nǎ kplá sín akɔta ɖě lɛ́ɛ mɛ lɛ́ɛ ɔ́, yě ná wá vo bǐ ɖo to yě ɖésúnɔ tɔn ɔ́ mɛ. Hwɛ ka ná sí te jɔhɔn ɖɔhun, bó ná byɔ́ yě mɛ; a nǎ cyɔ́n yě akpɔ́kpɔ́ ɖɔhun, hwi kpó ahwangɔnu towe bǐ kpó, kpódó togun wɔ̌buwɔ́bú e xwedó we lɛ́ɛ kpó. “Hwe énɛ́ ɔ́ nu su ɔ́, ayixa gěgé ná wá xomɛ nú we, bɔ a nǎ lɛ̌n nǔ nyanya gěgé bó ná wa. Xó e nyɛ Aklúnɔ Mavɔmavɔ ɖɔ ɔ́ nɛ́. A nǎ sɔ́ nǔ bó ná ɖɔ émí ná yi tɔ́n ahwan to e ɖo vivo mɛ é, to e è ma mɛ ahohó lɛ́ lɛ̌ dó toxo tɔn lɛ́ɛ bó dó hɔn nu, bó nɔ́ dó gan mɛ ǎ lɛ́ɛ. A nǎ ɖɔ émí ná yi gba to ɔ́ bǐ, bó bɛ́ nǔ e ɖo to ɔ́ mɛ lɛ́ɛ bǐ gǎnnugǎnnu. A nǎ yi tɔ́n ahwan mɛ e lɛ́ kɔ wá toxo e ko gba bǐ, bɔ mɛɖé má sɔ́ ɖ'é mɛ ǎ lɛ́ɛ; mɛ énɛ́ lɛ́ɛ e è kplá sín akɔta akɔta lɛ́ɛ mɛ lɛ́ɛ; mɛ énɛ́ lɛ́ɛ e ɖó kanlin kpó dɔkun kpó kpɔ́ lɛ́ɛ. Ayǐkúngban ɔ́ sín tɛ́ntin wɛ toxo yětɔn ɖe. Sabanu lɛ́ɛ, Dedáninu lɛ́ɛ, ajɔ̌tɔ́ Taasísi tɔn lɛ́ɛ kpó gǎn yětɔn lɛ́ɛ kpó ná kanbyɔ́ we ɖɔ: ‘Nǔ ná gba bó bɛ́ nǔ gǎnnugǎnnu wú wɛ a kplé ahwan towe lɛ́ɛ a? Kpatágan kpó siká kpó, kanlin kpó dɔkun kpó gbé wɛ a tɔ́n a?’ “Hwɛ gbɛtɔ́ e, ɖɔ xó e nyɛ Aklúnɔ Mavɔmavɔ ɖɔ nú we dó Gɔgu wú é. Xó e un ɖɔ ɔ́ ɖíe: hwenu e togun ce Izlayɛ́li ɔ́ ná ɖo vivo mɛ é ɔ́, hwɛ ná sɔ́ ahwan nú. A nǎ sɔ́ nǔ, bó gosín to towe mɛ ɖo totaligbé aga dɔ̌n, bó ná zɔn sɔ́jahwangbɛ́ wɔ̌buwɔ́bú ɖé nu. To lɛ́ɛ gěgé mɛ wɛ sɔ́ja énɛ́ lɛ́ɛ ná gosín, bó ná xá sɔ́. A nǎ tɔ́n ahwan togun ce Izlayɛ́li ɔ́, bó ná cyɔ́n to ɔ́ ahǔn ɖɔhun. É ká ná lín káká có nǔ énɛ́ lɛ́ɛ ná jɛ. Un ná sɛ́ we dó bɔ a nǎ wǎ tɔ́n ahwan to ce, énɛ́ ɔ́, to ɖě lɛ́ɛ ná tunwun ɖɔ nyɛ wɛ nyí Mawu mímɛ́ ɔ́. Hwi Gɔgu ɔ́ wɛ un ka ná zán dó bló nǔ énɛ́ ɔ́. “Xó e nyɛ Aklúnɔ Mavɔmavɔ ɖɔ ɔ́ ɖíe: Hwi xó wɛ un ɖɔ ɖ'ayǐ xóxó gbɔn mɛsɛntɔ́ ce gbeyíɖɔ Izlayɛ́li tɔn lɛ́ɛ jí. Hwe énɛ́ nu ɔ́, mɛsɛntɔ́ gbeyíɖɔ lɛ́ɛ ɖɔ xó e un ɖɔ nú yě ɔ́ nú xwe mɔ̌kpán ɖɔ un ná kplá mɛɖé bɔ é ná tɔ́n ahwan togun ce. Amɔ̌, Gɔgu, gbe e gbe a ka ná yi tɔ́n ahwan Izlayɛ́li to ɔ́ nǔgbó é ɔ́, xomɛsin ce ná jɛ te dó jǐ towe. Xó e nyɛ Aklúnɔ Mavɔmavɔ ɖɔ ɔ́ nɛ́. Hwenu e un ná ɖo wǔ hwan wɛ, bó ná ɖo xomɛsin ɖaxó ɖé jí ɔ́, un xwlé nyiɖée nú we ɖɔ gbe énɛ́ gbe ɔ́, ayǐkúngban ná dán wǔ ɖaxó ɖé ɖo Izlayɛ́li. Hweví e ɖo xu mɛ lɛ́ɛ, xɛ e nɔ zɔn gbɔn jɔ mɛ lɛ́ɛ, gběkanlin lɛ́ɛ, dan e nɔ ɖíɖí gbɔn kɔ́ mɛ lɛ́ɛ kpó gbɛtɔ́ lɛ́ɛ bǐ kpó ná sísɔ́ ɖo nukɔn ce. Só lɛ́ɛ ná mu, awǐnnya e ɖo xutó lɛ́ɛ ná jɛ ayǐ, dǒ lɛ́ɛ bǐ ná mu kɔn nyi ayǐ. Gɔgu, un ná sɛ́ ahwan dó mɛ towe lɛ́ɛ tɛ́ntin gbɔn só lɛ́ɛ bǐ jí; sɔ́ja towe lɛ́ɛ ná tɔ́n ahwan yěɖée, bó hu yěɖée. Xó e nyɛ Aklúnɔ Mavɔmavɔ ɖɔ ɔ́ nɛ́. Un ná sɛ́ jǐ ɖaxó ɖé dó, un ná sɔ́ jɛmɛjí kpó kú kpó dó ɖó hwɛ nú we. Un ná sɛ́ myɔ kpó kɛ́njí kpó hwemí kpó dó, bɔ yě ná ja jǐ ɖɔhun kɔn dó hwi kpó ahwangɔnu towe kpó, kpódó mɛ tobutóbú e ɖo jǐ towe lɛ́ɛ kpó jí. Énɛ́ ɔ́, un ná ɖe xlɛ́ akɔta lɛ́ɛ bǐ ɖɔ nyɛ wɛ nyí Mawu e kló bó nyí Mawu mímɛ́ é, bɔ yě ná tunwun ɖɔ nyi wɛ nyí Mawu Mavɔmavɔ.” Mawu ɖɔ nú mì ɖɔ: “Hwɛ gbɛtɔ́ e, ɖɔ nǔ e un ɖɔ nú we ɖɔ é ná jɛ dó Gɔgu jí ɔ́ n'i. A nǎ ɖɔ n'i ɖɔ xó e nyɛ Aklúnɔ Mavɔmavɔ ɖɔ ɔ́ ɖíe: Un ná tɔ́n ahwan we Gɔgu, hwi mɛ e ɖu gǎn bɔ gǎn vɔ ɖo togun Mɛcɛ́ki tɔn kpó Tubalu tɔn kpó nu é. Un ná ɖe we tɔ́n sín to towe mɛ, totaligbé aga dɔ̌n; un ná ɖe we tɔ́n gǎnnugǎnnu, bɔ a nǎ yi fun ahwan ɖo Izlayɛ́li só lɛ́ɛ jí. A ka yi jɛ dɔ̌n ɔ́, un ná hɛn da towe wɛ́n bɔ é ná jɛ ayǐ sín alɔ towe amyɔ ɔ́ mɛ; un ná yí gǎ e ɖo alɔ towe aɖisí ɔ́ mɛ lɛ́ɛ kɔn nyi ayǐ. A nǎ kú ɖo Izlayɛ́li só lɛ́ɛ jí, hwi kpó ahwangɔnu towe bǐ kpó, kpó togun tobutóbú e ɖo jǐ towe lɛ́ɛ kpó. Un ná ná lan towe xɛ alɔkpa alɔkpa e nɔ ɖu lan lɛ́ɛ, un ná ná lan towe nǔ e kó wú awa lɛ́ɛ kpó gběkanlin lɛ́ɛ kpó bɔ yě ná ɖu. A nǎ kú jɛ kɔ́ mɛ yǎyánɔ. Xó e nyɛ Aklúnɔ Mavɔmavɔ ɖɔ é nɛ́. Un ná sɛ́ myɔ dó Magɔ́gi to ɔ́ mɛ, bó ná sɛ́ myɔ dó mɛ e ɖo vivo mɛ ɖo tɔtɛ́ntinto lɛ́ɛ mɛ lɛ́ɛ. Énɛ́ ɔ́, mɛ bǐ ná tunwun ɖɔ nyi wɛ nyí Mawu Mavɔmavɔ. Un ná ɖe xlɛ́ togun ce Izlayɛ́li ɖɔ Mawu mímɛ́ wɛ un nyí; un sɔ́ ná jó e dó bɔ é ná sɔ́ nyǐkɔ ce mímɛ́ ɔ́ xo kɔ́ ɖě ǎ; énɛ́ ɔ́, akɔta ɖě lɛ́ɛ ná tunwun ɖɔ nyi wɛ nyí Mawu Mavɔmavɔ, Mawu mímɛ́ Izlayɛ́li tɔn. Nǔgbó wɛ, nǔ énɛ́ lɛ́ɛ ná jɛ; yě kó ɖo jijɛ wɛ; azǎn e xó un ɖɔ ɔ́ wɛ. Xó e nyɛ Aklúnɔ Mavɔmavɔ ɖɔ ɔ́ nɛ́. Énɛ́ ɔ́, Izlayɛ́li ví lɛ́ɛ ná tɔ́n sín toxo yětɔn lɛ́ɛ mɛ; yě ná bɛ́ kɛntɔ́ yětɔn lɛ́ɛ sín ahwanfunnú bó ná ɖo zo dó wɛ káká nú xwe tɛ́nwe; yě ná dó gǎglónú kpɛví kpó ɖaxó kpó zo; yě ná dó da kpó gǎ kpó zo; yě ná dó hwǎn kpó kpo nuxwíɖíxwíɖí kpó zo. É sɔ́ ná byɔ́ ɖɔ è nǎ yi gle mɛ, bó yi ba nakí abǐ è nǎ hu atín cóbó mɔ nakí ǎ, ahwanfunnú énɛ́ lɛ́ɛ wɛ yě ná nɔ́ dó flɔ́ myɔ ɔ́ ná. Din ɔ́, yě wɛ ná fɔ mɛ e nɔ fɔ nǔ yětɔn ɖ'ayǐ lɛ́ɛ sín nǔ; yě wɛ ná vɔ mɛ e nɔ vɔ to yětɔn ɖ'ayǐ lɛ́ɛ. Xó e nyɛ Aklúnɔ Mavɔmavɔ ɖɔ ɔ́ nɛ́. “Hwenu e nǔ énɛ́ lɛ́ɛ bǐ ná jɛ ɔ́, un ná ná fí e è nǎ kun yɔdo nú Gɔgu kpó ahwangɔnu tɔn kpó ɖó ɖo Izlayɛ́li é; yɔdo ɔ́ ná nɔ Aliwáyitɔ́ lɛ́ɛ tɔdo mɛ, ɖo zǎnzǎnhwe jí nú xu Kúkú ɔ́; fí ɔ́ ná sú ali dó aliwáyitɔ́ lɛ́ɛ. È nǎ ɖi Gɔgu kpó ahwan tɔn lɛ́ɛ kpó d'é mɛ, bó ná nɔ́ ylɔ́ fí ɔ́ ɖɔ: ‘Ahwangɔnu Gɔgu tɔn tɔdo’. Sun tɛ́nwe wɛ Izlayɛ́li ví lɛ́ɛ ná sɔ́ ɖó te, bó dó ɖi cyɔ énɛ́ lɛ́ɛ bǐ, bó ná kplɔ́ to ɔ́. Mɛ e ɖo to ɔ́ mɛ lɛ́ɛ bǐ wɛ ná wa azɔ̌ énɛ́ ɔ́, bó ná xɔ susu ɖ'é mɛ gbe e gbe un ná ɖe susu ce xlɛ́ é; xó e nyɛ Aklúnɔ Mavɔmavɔ ɖɔ ɔ́ nɛ́. Sun tɛ́nwe énɛ́ lɛ́ɛ wá yi ɔ́, è nǎ ɖe mɛ ɖé lɛ́ɛ, bɔ yě ná gbɔn to ɔ́ bǐ mɛ, bó ná slá wǔ nú to ɔ́ bǐ; aliwáyitɔ́ lɛ́ɛ ná dó alɔ yě, bɔ yě ná ɖi cyɔ e kpo ɖo kɔ́ mɛ lɛ́ɛ. Mɛ e è nǎ ɖe lɛ́ɛ ná gbɔn to ɔ́ bǐ mɛ; ényí mɛ ɖé ɖo yiyi wɛ, bó mɔ gbɛtɔ́ xú ɖo fí ɖé ɔ́, é ná kplé awǐnnya ɖó kpɔ́ ɖó fínɛ́ dó ɖó wuntun, bɔ yɔkuntɔ́ lɛ́ɛ ná wá sɔ́ yi ɖi ɖó tɔdo Ahwangɔnu Gɔgu tɔn ɔ́ tɔn mɛ. Toxo ɖokpó ná tlɛ tíin lɔ, bɔ è nǎ nɔ́ ylɔ́ ɖɔ Hamɔ́na; tínmɛ tɔn wɛ nyí Ahwan wɔ̌buwɔ́bú. È blǒ énɛ́ lɛ́ɛ gúdo ɔ́, to ɔ́ bǐ ná nyí to mímɛ́.” Aklúnɔ Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ e, ylɔ̌ xɛ tɛnmɛ tɛnmɛ lɛ́ɛ, bó ylɔ́ gběkanlin lɛ́ɛ, bó dó wɛn élɔ́ yě nú mì; ɖɔ nú yě ɖɔ: Mi kplé miɖée sín fí bǐ. Mi kplé miɖée bó wá vɔ̌ e ná sá wɛ un ɖe ɔ́ sín tɛn mɛ. Vɔ̌ ɖaxó ɖé wɛ é ná nyí, bɔ un ná sá gbɔn Izlayɛ́li só lɛ́ɛ jí. Mi na ɖu lan ɖo fínɛ́ bó ná nu hun. Mi ná ɖu ahwanfuntɔ́ syɛ́nsyɛ́n lɛ́ɛ sín lan, bó ná nu gǎn gbɛmɛ fí tɔn lɛ́ɛ sín hun; yě wɛ ná nyí agbo kpó lɛ̌ngbɔ́ví kpó, gbǎgbá kpó nyibúví kloklo kpó bɔ un ná dó sá vɔ̌ ɔ́. Mi wá vɔ̌sísá ɔ́ tɛnmɛ ɔ́, mi ná ɖu lan e dó jǒ é káká bɔ é ná kpé mi kpo; mi ná nu hun káká bɔ hun ná mú mi. Ényí mi wá agɔ̌ e un ylɔ́ ɔ́ tɛnmɛ ɔ́, mi ná ɖu sɔ́ kpó sɔ́xátɔ́ kpó sín lan, bó ná ɖu ahwanfuntɔ́ tɛnmɛ tɛnmɛ sín lan. Xó e nyɛ Aklúnɔ Mavɔmavɔ ɖɔ ɔ́ nɛ́. “Un ná ɖe susu ce xlɛ́ gbɔn akɔta akɔta lɛ́ɛ mɛ; akɔta lɛ́ɛ bǐ ná mɔ lě e un nɔ ɖó hwɛ nú mɛ gbɔn é; yě ná mɔ hlɔ̌nhlɔ́n e un ná sɔ́ dó wa nǔ xá yě ɔ́. Bɛ́ sín gbe énɛ́ ɔ́ gbe ɔ́, Izlayɛ́li ví lɛ́ɛ ná tunwun ɖɔ nyi wɛ nyí Mawu Mavɔmavɔ, Mawu yětɔn káká sɔ́yi.” Mawu ɖɔ: “Akɔta ɖě lɛ́ɛ ná tunwun ɖɔ hwɛ e togun ce Izlayɛ́li ɔ́ hu dó mì lɛ́ɛ wú wɛ ahwan wlí yě yi to ɖěvo mɛ. Nǔgbó ɔ́, un ɖe kɔ sín yě wú, bó jó yě nú kɛntɔ́ yětɔn lɛ́ɛ, bónú è nǐ hu yě ɖo ahwangbénu. Ée un jó yě dó mɔ̌ ɔ́, un dɔn tó nú yě bɔ é sɔgbe xá nǔ baɖabaɖa e yě dó sin lɛ́ɛ kpó nǔ blíblí e yě wa lɛ́ɛ kpó. “Amɔ̌, nǔ e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Bɛ́ sín din ɔ́, un ná nɔ́ kú nǔbláwǔ nú Izlayɛ́li ví lɛ́ɛ. Un ná húzú ninɔmɛ yě Jakɔ́bu ví lɛ́ɛ tɔn, bó ná ɖɔ bó dó sɛ́n d'é jí, bɔ sísí e è ɖǒ ná ɖó nú nyǐkɔ mímɛ́ ce ɔ́, mɛ bǐ ná ɖó. Énɛ́ ɔ́, yě ná wɔn winnyá e mɛ hwɛ e yě hu dó mì ɔ́ dɔn yě dó é; yě ná lɛ́ wá nɔ to yětɔn mɛ, bó ná vo, yě sɔ́ ná ɖi xɛsi nú mɛɖé ǎ. Un ná kplá yě sín to e mɛ yě gbadó gbɔn lɛ́ɛ mɛ, bó ná kplá yě wá to yětɔn mɛ, bɔ yě ná gosín kɛntɔ́ to mɛ. Un ná sɔ́ yě dó ɖe xlɛ́ to wɔ̌buwɔ́bú ɖɔ nyi wɛ nyí Mawu mímɛ́ ɔ́. Un ná kplá Izlayɛ́li ví lɛ́ɛ wá ayǐkúngban yě ɖésúnɔ tɔn jí; un ná jó yě ɖokpó dó nyi mɛ ɖěvo tomɛ fí e un nya yě sɛ́ dó lɛ́ɛ ǎ. Énɛ́ ɔ́, yě ɖésú ná tunwun ɖɔ nyɛ wɛ nyí Mawu Mavɔmavɔ, Mawu yětɔn. Un ná gba yɛ ce kɔn nyi Izlayɛ́li ví lɛ́ɛ jí; énɛ́ ɔ́, un sɔ́ ná jó yě dó gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.” Ahwan wlí mǐ yi Babilɔ́nu ɔ́, xwe tɔn koatɔ́ngɔ́ (25) ɔ́ sín bǐbɛ́mɛ ɔ́, ɖo azǎn wǒgɔ́ ɔ́ e ɖo sun nukɔntɔn e ɖo xwe ɔ́ mɛ é gbe ɔ́, hlɔ̌nhlɔ́n Mawu Mavɔmavɔ tɔn wá jǐ ce, bó kplá mì yi Jeluzalɛ́mu; è gba Jeluzalɛ́mu ɔ́, é ɖo xwe wɛ̌nɛ bló wɛ pɛ́pɛ́pɛ́ gbe énɛ́ gbe. Mawu zé mì yi Izlayɛ́li ɖo nǔmimɔ mɛ; é sɔ́ mì yi ɖó só ɖé jí; só ɔ́ yi jǐ ɖésú; nǔ xɔ ɖɔhun ɖé lɛ́ɛ ɖo só ɔ́ sín ajaja e ɖo afɔligbé ɔ́ mɛ, toxo ɖé wɛ ɖo fínɛ́ ɖɔhun. Mawu kplá mì yi fínɛ́, bɔ un mɔ nya ɖé; nya ɔ́ cí ganvɔ ɖɔhun. É hɛn lɛ̌ɛnkan kpó kpo ɖé kpó alɔ mɛ bó ná dó jlɛ́ nǔ. Nya ɔ́ ɖo te ɖo toxo ɔ́ sín hɔnnúwa kpá. Nya ɔ́ ɖɔ nú mì ɖɔ: “Hwɛ gbɛtɔ́ e, hun nukún towe ganjí, bó ɖótó te ganjí, bó ɖó ayi te ganjí, lobo kpɔ́n nǔ e ná xlɛ́ we wɛ un ɖe é. Ɖó a nǎ mɔ ganjí wú wɛ un kplá we wá fí; énɛ́ gúdo ɔ́, a nǎ ɖɔ nǔ e a mɔ é nú Izlayɛ́li ví lɛ́ɛ.” Nǔ e un mɔ é ɖíe: un mɔ dǒ ɖé lɛ́ lɛ̌ dó Mawu xwé ɔ́; kpo e nya ɔ́ hɛn alɔ mɛ ɔ́, ga tɔn nyí nǔjlɛ́kpo yětɔn ayizɛ́n; nǔjlɛ́kpo énɛ́ ɔ́ ga tɔn nyí mɛ̌tlu vlɔ́ bɔ kpɛví ɖé ɖ'é jí; é jlɛ́ dǒ ɔ́ gblǒ tɔn, bó jlɛ́ jǐ yiyi tɔn, bɔ dǒ ɔ́, gblǒ tɔn nyí kpo e ɖo alɔ tɔn mɛ ɔ́ ɖokpó, bɔ jǐ yiyi tɔn lɔ nyí kpo e ɖo alɔ tɔn mɛ ɔ́ ɖokpó. Nya ɔ́ yi hɔnnúwa e ɖo zǎnzǎnhwe jí é kɔn, bó xá kpekán ɔ́ jí, bó jlɛ́ kpekán ɔ́ sín gblǒ kpɔ́n, bɔ gblǒ tɔn nyí kpo e ɖo alɔ tɔn mɛ ɔ́ ɖokpó. Mɛcɔ́tɔ́ lɛ́ɛ sín xɔ e ɖo ali e gbɔn hɔnnúwa ɔ́ sá byɔ́ xwé ɔ́ gbe lɛ́ɛ ɖokpó ɖokpó sín ga nyí kpo e ɖo alɔ tɔn mɛ ɔ́ ɖokpó, bɔ gblǒ tɔn lɔ nyí kpo e ɖo alɔ tɔn mɛ ɔ́ ɖokpó. Dǒ e è dǒ gbo mɛcɔ́tɔ́ lɛ́ɛ sín xɔ lɛ́ɛ mɛ ɔ́, gblǒ tɔn nyí nǔjlɛ́kpo yětɔn atɔ́ɔ́n. È gbɔn hɔnnúwa ɔ́ sá xwe xwé ɔ́ gbe ɔ́, è nɔ mɔ kpekán ɖěvo có bó nɔ́ mɔ agba e sá è nɔ gbɔn yi xwé ɔ́ gbe é. Nya ɔ́ jlɛ́ kpekán énɛ́ kpɔ́n, bɔ gblǒ tɔn nyí kpo e ɖo alɔ tɔn mɛ ɔ́ ɖokpó; é jlɛ́ agba ɔ́ sín gblǒ kpɔ́n; bɔ é nyí nǔjlɛ́kpo yětɔn tántɔn; nya ɔ́ jlɛ́ dotín hɔnnúwa ɔ́ tɔn lɛ́ɛ kpɔ́n, bɔ ɖokpó ɖokpó sín gblǒ nyí nǔjlɛ́kpo yětɔn we. Mɛcɔ́tɔ́ lɛ́ɛ sín xɔ e ɖo ɖisí amyɔ nú ali e gbɔn hɔnnúwa e ɖo zǎnzǎnhwe jí ɔ́ nu byɔ́ xwé ɔ́ gbe ɔ́, jlɛ̌ ɖokpó ɔ́ wɛ yě ɖó; è ɖo ali ɔ́ jí ɔ́, atɔn ɖo amyɔxwé, bɔ atɔn ɖo ɖisíxwé. Dǒ e gbo xɔ énɛ́ lɛ́ɛ mɛ lɛ́ɛ bǐ wɛ ɖó gblǒ ɖokpó ɔ́. Nya ɔ́ lɛ́ jlɛ́ hɔntogbó ɔ́ kpɔ́n, ɖo hɔnnúwa ɔ́ sá, bɔ gblǒ tɔn nyí nǔjlɛ́kpo yětɔn wǒ, bɔ ga tɔn nyí nǔjlɛ́kpo yětɔn wǒ atɔn. Dǒ kpɛví kpɛví ɖé lɛ́ɛ ɖo aɖisí amyɔ nú ali ɖaxó e gbɔn hɔnnúwa ɔ́ sá byɔ́ xwé ɔ́ gbe é; dǒ lɛ́ɛ gbɔn mɛcɔ́tɔ́xɔ lɛ́ɛ nukɔn bɔ jǐ yiyi yětɔn nyí nǔjlɛ́kpo yětɔn ɖokpó; mɛcɔ́tɔ́xɔ lɛ́ɛ ɖó gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn ayizɛ́n. Nya ɔ́ jlɛ́ hɔnnúwa ɔ́ sín gblǒ; é bɛ́ sín dǒdɔn gǔdo tɔn e ɖo mɛcɔ́tɔ́ lɛ́ɛ sín xɔ mɛ ɔ́ ɖokpó wú, káká yi dǒdɔn gǔdo tɔn e ɖo mɛcɔ́tɔ́xɔ e kpan nukɔn mɛcɔ́tɔ́xɔ énɛ́ ɔ́ é kɔn, bɔ é nyí nǔjlɛ́kpo yětɔn koatɔ́n (25). É jlɛ́ agba ɔ́ sín ga kpɔ́n, bɔ ga tɔn nyí nǔjlɛ́kpo yětɔn ko; kɔ́xota e ɖo Mawu xwé ɔ́ gbe ɔ́ lɛ́ lɛ̌ d'agba ɔ́. Bɛ́ sín hɔnnúwa ɔ́ sín kpekán nukɔntɔn ɔ́ ta, káká yi agba ɔ́ sín dǒdɔn gúdo tɔn ɔ́ kɔn ɔ́, é bló nǔjlɛ́kpo yětɔn kanɖé wǒ (50). Flɛtɛ́li gbɔn hɔnnúwa wú bǐ, bɔ è dǒ ganja bǐ nu ɖo xomɛ; è ɖe flɛtɛ́li dó mɛcɔ́tɔ́xɔ lɛ́ɛ wú, bó ɖe dó dǒ e gbo mɛcɔ́tɔ́xɔ lɛ́ɛ mɛ lɛ́ɛ wú; è ɖe flɛtɛ́li d'agba ɔ́ wú. È ɖe děma gbɔn hɔnnúwa ɔ́ wú bǐ dó ba acɔ́ ná. Nya ɔ́ kplá mì yi kɔ́xota e è byɔ́ xwé ɔ́ gbe tlóló ɔ́, è nɔ mɔ é. È tɛ́ awǐnnya kpikpa gbɔn kɔ́xota ɔ́ tó lɛ́ lɛ̌ dó; xɔ gban wɛ è mɛ lɛ́ lɛ̌ dó kɔ́xota énɛ́. È tɛ́ awǐnnya kpikpa gbɔn aɖisí amyɔ nú hɔnnúwa e nu è nɔ gbɔn byɔ́ xwé ɔ́ gbe lɛ́ɛ. È byɔ̌ xwé ɔ́ gbe tlóló ɔ́, kɔ́xota e è nɔ mɔ é yi do hú kɔ́xota e ɖo xwé ɔ́ ta é. Nya ɔ́ jlɛ́ tɛnmɛ e gosín xwétadó Mawu xwé ɔ́ tɔn kɔn, wá yi glegbedó Mawu xwé tɔn e ɖo zǎnzǎnhwe jí ɔ́ kɔn é, bɔ é nyí nǔjlɛ́kpo yětɔn kanwe ko (100). Énɛ́ ɔ́ gúdo ɔ́, é yi Mawu xwé ɔ́ sín taligbé, bó jlɛ́ hɔnnúwa e ɖo fínɛ́ é; é jlɛ́ gblǒ tɔn kpó jǐ yiyi tɔn kpó. Mɛcɔ́tɔ́xɔ ayizɛ́n ɖo hɔnnúwa ɔ́ mɛ; atɔn ɖo ɖisíxwé nú ali e gbɔn hɔnnúwa ɔ́ sá ɔ́, bɔ atɔn ɖo amyɔxwé. È jlɛ̌ dǒ lɛ́ɛ kpó agba ɔ́ kpó, bɔ bǐ nyí nǔ ɖokpó ɔ́ xá hɔnnúwa e ɖo zǎnzǎnhwe jí ɔ́ tɔn lɛ́ɛ kpó agba tɔn lɛ́ɛ kpó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25). Hɔnnúwa ɔ́ sín flɛtɛ́li lɛ́ɛ kpó agba tɔn kpó, kpó děma e è ɖe dó yě wú lɛ́ɛ kpó bǐ cí hɔnnúwa e ɖo zǎnzǎnhwe jí ɔ́ tɔn lɛ́ɛ ɖɔhun. Kpekán tɛ́nwe wɛ è nɔ fán bó nɔ́ byɔ́ hɔnnúwa taligbé tɔn ɔ́ mɛ, bó nɔ́ yi gbɔn agba ɔ́ sá ɖo nukɔn dɔ̌n byɔ́ xwé ɔ́ gbe. Hɔnnúwa ɖokpó kpan nukɔn hɔnnúwa e ɖo taligbé é, bɔ ali tɔn tɔ́n dó kɔ́xota e ɖo xwé ɔ́ ta é. Nya ɔ́ jlɛ́ sín hɔnnúwa taligbé tɔn ɔ́ kɔn yi hɔnnúwa e kpan nukɔn ɛ ɔ́ kɔn, bó mɔ nǔjlɛ́kpo yětɔn kanwe ko (100), lě e é ɖe gbɔn ɖo zǎnzǎnhwe jí é. É lɛ́ kplá mì yi afɔligbé, bɔ un mɔ hɔnnúwa ɖokpó ɖo fínɛ́; é jlɛ̌ mɛcɔ́tɔ́xɔ lɛ́ɛ kpɔ́n, bó jlɛ́ dǒ lɛ́ɛ kpɔ́n, bó jlɛ́ agba ɔ́ kpɔ́n, bɔ bǐ nyí nǔ ɖokpó ɔ́ xá ée é jlɛ́ wá yi din é. Fí énɛ́ ɔ́ ɖésú ɔ́, flɛtɛ́li gbɔn hɔnnúwa ɔ́ kpó agba ɔ́ kpó wú bǐ lɛ́ lɛ̌ dó; lě e é ɖe gbɔn ɖo zǎnzǎnhwe jí é kpó lě e é ɖe gbɔn ɖo taligbé é kpó; hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn. Kpekán tɛ́nwe wɛ è nɔ fán, bó nɔ́ byɔ́ hɔnnúwa ɔ́ mɛ, bó nɔ́ yi gbɔn agba ɔ́ sá ɖo nukɔn dɔ̌n byɔ́ xwé ɔ́ gbe. Hɔnnúwa ɖokpó lɛ́ kpan nukɔn hɔnnúwa énɛ́ ɔ́, bɔ è gbɔn fínɛ́ ɔ́, è nɔ yi kɔ́xota e ɖo xwé ɔ́ ta é. Nya ɔ́ jlɛ́ sín hɔnnúwa e byɔ́ xwé ɔ́ gbe ɔ́ nu yi hɔnnúwa e yi xwé ɔ́ ta é kɔn, bó mɔ nǔjlɛ́kpo yětɔn kanwe ko (100). Nya ɔ́ kplá mì gbɔn hɔnnúwa e ɖo afɔligbé é nu yi kɔ́xota e ɖo xwé ɔ́ ta é. É jlɛ́ hɔnnúwa ɔ́ kpɔ́n, bɔ é nyí nǔ ɖokpó ɔ́ xá hɔnnúwa e nu è nɔ gbɔn byɔ́ xwé ɔ́ gbe lɛ́ɛ: É jlɛ́ mɛcɔ́tɔ́xɔ e ɖ'é mɛ lɛ́ɛ, bó jlɛ́ dǒ e è dǒ gbo mɛcɔ́tɔ́xɔ lɛ́ɛ mɛ lɛ́ɛ, kpó agba tɔn kpó, bɔ yě nyí nǔ ɖokpó ɔ́ xá hɔnnúwa ɖě lɛ́ɛ tɔn. Flɛtɛ́li gbɔn hɔnnúwa ɔ́ kpó agba tɔn kpó wú bǐ lɛ́ dó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25). Agba lɛ́ lɛ̌ dó kɔ́xota e ɖo xwé ɔ́ ta é; ga yětɔn nyí nǔjlɛ́kpo yětɔn koatɔ́n (25), bɔ gblǒ yětɔn nyí nǔjlɛ́kpo yětɔn atɔ́ɔ́n. È gosín Mawu xwé ɔ́ ta, bó ja xwé ɔ́ sín kɔ́xota ɔ́, è nɔ gbɔn hɔnnúwa ɔ́ sá, bó nɔ́ wá agba tɔn sá bó nɔ́ jɛ te kɔ́xo ɔ́ ta. È ɖe děma gbɔn mɛcɔ́tɔ́xɔ lɛ́ɛ sín dǒ lɛ́ɛ wú ɖo ɖisí amyɔ nú ali e gbɔn hɔnnúwa ɔ́ sá é dó ba acɔ́ ná; kpekán tántɔn wɛ è nɔ fán bó nɔ́ yi hɔnnúwa ɔ́ sá. Nya ɔ́ wá kplá mì gbɔn hɔnnúwa e ɖo zǎnzǎnhwe jí é li nu byɔ́ kɔ́xota e ɖo xwé ɔ́ ta é. É jlɛ́ hɔnnúwa ɔ́ kpɔ́n, bɔ é nyí nǔ ɖokpó ɔ́ xá hɔnnúwa ɖě lɛ́ɛ. É jlɛ́ mɛcɔ́tɔ́xɔ e ɖ'é mɛ lɛ́ɛ, bó jlɛ́ dǒ e è dó gbo mɛcɔ́tɔ́xɔ lɛ́ɛ, kpó agba tɔn kpó, bɔ yě nyí nǔ ɖokpó ɔ́ xá hɔnnúwa ɖě lɛ́ɛ tɔn lɛ́ɛ. Flɛtɛ́li gbɔn hɔnnúwa ɔ́ kpó agba ɔ́ kpó wú bǐ lɛ́ dó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25). È gosín Mawu xwé ɔ́ ta, bó ja xwé ɔ́ sín kɔ́xota ɔ́, è nɔ gbɔn hɔnnúwa ɔ́ sá, bó nɔ́ wá agba tɔn sá bó nɔ́ jɛ te kɔ́xo ɔ́ ta. È ɖe děma gbɔn mɛcɔ́tɔ́xɔ lɛ́ɛ sín dǒ lɛ́ɛ wú ɖo aɖisí amyɔ nú ali e gbɔn hɔnnúwa ɔ́ sá é dó ba acɔ́ ná. Kpekán tántɔn wɛ è nɔ fán, bó nɔ́ yi hɔnnúwa ɔ́ sá. Nya ɔ́ wá kplá mì yi hɔnnúwa taligbé tɔn ɔ́ kɔn, bó jlɛ́ kpɔ́n, bɔ é ɖó jlɛ̌ ɖokpó ɔ́ xá ɖě lɛ́ɛ. É jlɛ́ mɛcɔ́tɔ́xɔ lɛ́ɛ, bó jlɛ́ dǒ e è dó gbo mɛcɔ́tɔ́xɔ lɛ́ɛ mɛ lɛ́ɛ, kpó agba tɔn kpó ɖo fí énɛ́ lɔ; flɛtɛ́li wɛ gbɔn bǐ wú lɛ́ dó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25). È gosín Mawu xwé ɔ́ ta, bó ja xwé ɔ́ sín kɔ́xota ɔ́, è nɔ gbɔn hɔnnúwa ɔ́ sá, bó nɔ́ wá agba tɔn sá bó nɔ́ jɛ te kɔ́xo ɔ́ ta. È ɖe děma gbɔn mɛcɔ́tɔ́xɔ lɛ́ɛ sín dǒ lɛ́ɛ wú ɖo aɖisí amyɔ nú ali e gbɔn hɔnnúwa ɔ́ sá é dó ba acɔ́ ná. Kpekán tántɔn wɛ è nɔ fán, bó nɔ́ yi hɔnnúwa ɔ́ sá. Xɔ ɖé hun d'agba xwéta hɔnnúwa taligbé tɔn ɔ́ tɔn mɛ: fínɛ́ wɛ è nɔ klɔ́ kanlin e è hu, bó ná dó sá vɔ̌ e è nɔ dó zo lɛ́ɛ ná lɛ́ɛ ɖe. Távo ɛnɛ ɖo agba ɔ́ sá; we ɖo akpá ɖokpó xwé bɔ we ɖo akpá ɖě ɔ́ xwé. Távo énɛ́ lɛ́ɛ jí wɛ è nɔ hu kanlin e è nǎ dǒ sá vɔ̌ lɛ́ɛ ɖe: vɔ̌ e è nɔ dó zo lɛ́ɛ kpó vɔ̌ tɛnmɛ tɛnmɛ e è nɔ sá dó hwɛ mɛtɔn lɛ́ɛ tamɛ lɛ́ɛ kpó. Távo ɛnɛ lɛ́ ɖo hɔnnúwa ɔ́ sín agba ɔ́ kɔn ɖo kɔ́xo. Nú è ɖidó xwéta hɔnnúwa taligbé tɔn ɔ́ kɔn ɔ́, távo énɛ́ lɛ́ɛ ɔ́, we ɖo aɖisíxwé bɔ we ɖo amyɔxwé. Hǔn távo tántɔn wɛ è nɔ zán, bó nɔ́ hu kanlin e ná dó sá vɔ̌ nú Mawu wɛ è ɖe lɛ́ɛ ɖo yě jǐ: ɛnɛ ɖo aɖisíxwé nú hɔnnúwa ɔ́, bɔ ɛnɛ ɖo amyɔxwé. Távo ɛnɛ e è sɔ́ ɖó te nú vɔ̌ e è nɔ dó zo lɛ́ɛ ɔ́, awǐnnya kpikpa wɛ è dǒ bló yě. Távo énɛ́ lɛ́ɛ ɔ́, nukún mɛ yětɔn nyí gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn ɖokpó adaɖé, bɔ jǐ yiyi yětɔn nyí nǔjlɛ́kpo yětɔn ɖokpó. È nɔ fɔ alǐnnyánú e è nɔ dó wa lanzɔ́ lɛ́ɛ ɖó távo énɛ́ lɛ́ɛ jí. Do ɖé gbɔn távo lɛ́ɛ tó bǐ lɛ́ lɛ̌ dó; do ɔ́ gbló sɔ alɔkpákpá mɛ; è nɔ bɛ́ kanlin e hu lɛ́ɛ sín lan ɖó távo énɛ́ lɛ́ɛ jí. Nya ɔ́ lɛ́ kplá mì yi kɔ́xota e ɖo xwe ɔ́ ta é; è gosín hɔnnúwa e mɛ è nɔ gbɔn yi xwé ɔ́ ta ɔ́ mɛ ɔ́, è nɔ mɔ hanjitɔ́ lɛ́ɛ sín xɔ lɛ́ɛ ɖo fínɛ́; ɖokpó ɖo hɔnnúwa taligbé tɔn ɔ́ kpá, bó kpan nukɔn afɔligbé; wegɔ́ ɔ́ ɖo hɔnnúwa afɔligbé tɔn ɔ́ kpá, bó kpan nukɔn taligbé. Nya ɔ́ ɖɔ nú mì ɖɔ: “Xɔ e kpan nukɔn afɔligbé ɔ́, vɔ̌sánú-xwlémawutɔ́ e jí azɔ̌ jɛ ɖo Mawuxɔ mɛ lɛ́ɛ tɔn wɛ. Xɔ e kpan nukɔn taligbé é ká nyí vɔ̌sánú-xwlémawutɔ́ e nɔ́ wa azɔ̌ ɖo vɔ̌sákpe ɔ́ jí lɛ́ɛ tɔn. Levíi ví lɛ́ɛ mɛ ɔ́, mɛ e nyí Sadɔ́ku ví lɛ́ɛ kɛ́ɖɛ́ jɛ́n ná nɔ́ yi tɛn mímɛ́ ɔ́ mɛ, bó ná nɔ́ wa azɔ̌ nú Mawu Mavɔmavɔ.” Nya ɔ́ jlɛ́ kɔ́xota e ɖo xwé ɔ́ ta é kpɔ́n, bó mɔ ɖɔ é ɖó gblǒ zɛ̌ɛ́n ga zɛ̌ɛ́n, bɔ é nyí nǔjlɛ́kpo yětɔn kanɖé wǒ (50). Vɔ̌sákpe ɖé ɖo Mawuxɔ ɔ́ nukɔn. Nya ɔ́ kplá mì yi Mawuxɔ ɔ́ sín agba sá. É jlɛ́ ali e nu è nɔ gbɔn yi agba ɔ́ sá é: agba ɔ́ sín dǒ lɛ́ɛ ɔ́, gblǒ yětɔn nyí nǔjlɛ́kpo yětɔn atɔ́ɔ́n, bɔ ali e nu è nɔ gbɔn yi agba ɔ́ sá ɔ́, gblǒ tɔn nyí nǔjlɛ́kpo yětɔn wǒ-ɛnɛ. Dǒ e ɖo aɖisí amyɔ nú ali ɔ́ sín gblǒ é nyí nǔjlɛ́kpo yětɔn atɔn. Agba ɔ́, ga tɔn nyí nǔjlɛ́kpo yětɔn ko, bɔ gblǒ tɔn nyí nǔjlɛ́kpo yětɔn wěwe. Kpekán wǒ wɛ è nɔ fán, bó nɔ́ yi agba ɔ́ sá. È mɛ dotín we ɖó ali ɔ́ nu: ɖokpó ɖo aɖisíxwé, ɖokpó ɖo amyɔxwé. Énɛ́ ɔ́ gúdo ɔ́, nya ɔ́ kplá mì yi Mawu sín xɔgba ɔ́ sá; é jlɛ́ dǒ e mɛ è ɖe xɔgbasáli ɔ́ dó ɔ́ sín gblǒ, bɔ é nyí nǔjlɛ́kpo yětɔn ayizɛ́n. Xɔli ɔ́ sín gblǒ nyí nǔjlɛ́kpo yětɔn wǒ; é jlɛ́ xɔgbasádó ɔ́ sín gblǒ ɖo aɖisí amyɔ, bɔ é nyí nǔjlɛ́kpo yětɔn atɔ́ɔ́n. Xɔgbasá ɔ́, ga tɔn nyí nǔjlɛ́kpo yětɔn kanɖé, bɔ gblǒ ɔ́ nyí nǔjlɛ́kpo yětɔn ko. Énɛ́ ɔ́ gǔdo ɔ́, é byɔ́ xɔnɔnɔ ɔ́ mɛ, bó jlɛ́ xɔnɔmɛli ɔ́ kpɔ́n: dǒ e mɛ è ɖe xɔnɔmɛli ɔ́ dó ɔ́, gblǒ tɔn nyí nǔjlɛ́kpo yětɔn we, bɔ xɔnɔmɛli ɔ́ sín gblǒ nyí nǔjlɛ́kpo yětɔn ayizɛ́n; é jlɛ́ xɔnɔnɔmɛdó e ɖo aɖisí amyɔ ɔ́ kpɔ́n, bɔ gblǒ yětɔn nyí nǔjlɛ́kpo yětɔn tɛ́nwe. É jlɛ́ xɔnɔnɔ ɔ́ mɛ ɖésú kpɔ́n, bɔ é nyí gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn ko, bɔ é ɖɔ nú mì ɖɔ: “ tɛn mímɛ́ bǐ ɔ́ ɖíe.” Nya ɔ́ jlɛ́ Mawuxɔ ɔ́ sín dǒ ɔ́ sín gblǒ kpɔ́n, bɔ é nyí nǔjlɛ́kpo yětɔn ayizɛ́n; è mɛ xɔ ɖé lɛ́ɛ bɔdó Mawuxɔ ɔ́ wú lɛ́ lɛ̌ dó; é jlɛ̌ xɔ énɛ́ lɛ́ɛ lɔ kpɔ́n; bɔ dǒ yětɔn sín gblǒ nyí nǔjlɛ́kpo yětɔn ɛnɛ. Xɔ énɛ́ lɛ́ɛ ɔ́, síngbó atɔnnɔ wɛ nú yě. Bɔ xɔ gban (30) ɖo síngbó ɔ́ ɖokpó ɖokpó mɛ; xɔ e ɖo síngbó lɛ́ɛ ɖokpó ɖokpó mɛ lɛ́ɛ bǐ ɖo hǎ jí. È mɛ xɔ énɛ́ lɛ́ɛ bɔ yě byɔ́ dǒ e è mɛ bɔdó Mawuxɔ ɔ́ wú lɛ́ lɛ̌ dó lɛ́ɛ mɛ kpɛɖé kpɛɖé; yě byɔ́ Mawuxɔ ɔ́ sín dǒ ɔ́ ɖésú mɛ ǎ. Xɔ e ɖo síngbó e ɖo aga ɔ́ mɛ lɛ́ɛ gbló hú xɔ e ɖo síngbó e ɖo tɛ́ntin ɔ́ mɛ lɛ́ɛ, bɔ xɔ e ɖo síngbó tɛ́ntin tɔn ɔ́ mɛ lɛ́ɛ gbló hú ée ɖo síngbó do tɔn ɔ́ mɛ lɛ́ɛ; ɖó síngbó e ɖo tɛ́ntin ɔ́ byɔ́ dǒ e è mɛ bɔdó Mawuxɔ ɔ́ wú lɛ́ lɛ̌ dó ɔ́ mɛ hú síngbó e ɖo do ɔ́, bɔ síngbó e ɖo aga ɔ́ byɔ́ mɛ hú síngbó e ɖo tɛ́ntin é. È gosín síngbó do tɔn ɔ́ jí ɔ́, è nɔ yi wegɔ́ ɔ́ jí bó gosín wegɔ́ ɔ́ jí ɔ́, è nɔ yi atɔngɔ́ ɔ́ jí. Dodó e jí è mɛ xɔ e bɔdó Mawuxɔ ɔ́ wú lɛ́ lɛ̌ dó ɔ́ yi jǐ bó ɖó nǔjlɛ́kpo yětɔn ayizɛ́n. Xɔ e è mɛ bɔdó Mawuxɔ ɔ́ wú é sín dǒdɔn e tɔ́n jɛ kɔ́xo jí ɔ́, gblǒ tɔn nyí nǔjlɛ́kpo yětɔn atɔ́ɔ́n. È mɛ xɔ ɖěvo ɖěvo kpan nukɔn xɔ énɛ́ lɛ́ɛ lɛ́ dó. Kɔ́xota e ɖo xɔ énɛ́ lɛ́ɛ tɛ́ntin ɔ́, gblǒ tɔn nyí nǔjlɛ́kpo yětɔn ko. Xɔ e bɔdó Mawuxɔ ɔ́ wú ɔ́, ali we wɛ è ɖe d'é mɛ, bɔ yě hun dó kɔ́xota énɛ́ ɔ́. Ali ɔ́ ɖokpó ɖo taligbé, bɔ ɖokpó ɖo afɔligbé. Dǒ e è mɛ lɛ́ dó kɔ́xota énɛ́ ɔ́, gblǒ tɔn nyí nǔjlɛ́kpo yětɔn atɔ́ɔ́n. Xɔ ɖokpó kpan nukɔn tɛnmɛ énɛ́ ɔ́, bó ɖo gbadahwe jí nú Mawuxɔ ɔ́. Ga tɔn nyí nǔjlɛ́kpo yětɔn kanwe wǒ (90), bɔ gblǒ tɔn nyí nǔjlɛ́kpo yětɔn kanɖé gban (70), bɔ dǒ ɔ́ sín gblǒ nyí nǔjlɛ́kpo yětɔn atɔ́ɔ́n. Nya ɔ́ jlɛ́ Mawuxɔ ɔ́, bɔ ga tɔn nyí nǔjlɛ́kpo yětɔn kanwe ko (100), é jlɛ́ kɔ́xota e ɖo xɔ ɔ́ gúdo é, bó jlɛ́ xɔ e ɖo xɔ ɔ́ gúdo é, bó jlɛ́ xɔ ɔ́ sín dǒ lɛ́ɛ, bɔ bǐ kplékplé sín ga nyí nǔjlɛ́kpo yětɔn kanwe ko (100). Mawuxɔ ɔ́ sín gblǒ e ɖo zǎnzǎnhwe jí é kpó tɛnmɛ vɔ̌tɔ́ e ɖo ɖisí amyɔ nú xɔ ɔ́ kpó ɔ́, bǐ kplékplé sín ga nyí nǔjlɛ́kpo yětɔn kanwe ko (100). Nya ɔ́ lɛ́ jlɛ́ xɔ e ɖo Mawuxɔ ɔ́ gúdo é sín ga, kpó tɛnmɛ vɔ̌tɔ́ e ɖo aɖisí amyɔ nú xɔ ɔ́ é kpó, bɔ bǐ kplékplé sín ga nyí nǔjlɛ́kpo yětɔn kanwe ko. Agba e ɖo Mawuxɔ ɔ́ nukɔn é kpó Mawuxɔgba ɔ́ kpó Mawuxɔnɔnɔ ɔ́ kpó, kpó dǒ tɔn lɛ́ɛ kpó ɔ́, xwlɛ wɛ è tɛ́ dó bǐ wǔ. Flɛtɛ́li kpó ali e lɛ́ dó xɔ ɔ́ gbɔn síngbó atɔn lɛ́ɛ bǐ jí é kpó ɔ́, bǐ wú wɛ è tɛ́ xwlɛ dó. Xwlɛ wɛ è tɛ́ dó xɔ ɔ́ wú bǐ, sín kpekánta káká yi flɛtɛ́li lɛ́ɛ nu; flɛtɛ́li lɛ́ɛ ɖésú ɔ́, xwlɛ wɛ è tɛ́ dó bǐ wú. È ba acɔ́ nú Mawuxɔ ɔ́ ɖo kɔ́xo, bó ba acɔ́ ná ɖo xɔ ɔ́ mɛ; è ba acɔ́ nú xɔ ɔ́ sín alihɛ́nnu káká yi xɔnɔnɔ ɔ́ mɛ; è ɖe wɛnsagun susunɔ kpó dětín kpó gbɔn dǒ lɛ́ɛ wú; è ɖe wɛnsagun ɖokpó ɔ́, è nɔ ɖe dětín ɖokpó bɔd'é wú. Wɛnsagun ɖokpó nɔ ɖó nukún mɛ we. Nukún mɛ ɔ́ ɖokpó nyí gbɛtɔ́ nukún mɛ, bó nɔ́ kpan nukɔn dětín e è ɖe dó akpá énɛ́ xwé é. Nukún mɛ wegɔ́ ɔ́ nyí kinnikínní nukún mɛ, bó nɔ́ kpan nukɔn dětín e è ɖe dó akpá ɖě ɔ́ xwé é. È ɖe nǔ we énɛ́ lɛ́ɛ gbɔn dǒ lɛ́ɛ bǐ wú lɛ́ dó. Wɛnsagun lɛ́ɛ kpó dětín lɛ́ɛ kpó ɔ́, è ɖe yě dó ba acɔ́ ná gbɔn dǒ lɛ́ɛ wú sín do káká yi hɔn lɛ́ɛ ta nu; kun wɛ è kun yě dó dǒ lɛ́ɛ mɛ. Hɔn e è dǒ xɔgbasá ɔ́ nu ɔ́, hɔnkpo tɔn lɛ́ɛ ɖó gblǒ zɛ̌ɛ́n ga zɛ̌ɛ́n. Ɖo Tɛn mímɛ́ bǐ ɔ́ nukɔn ɔ́, nǔɖé ɖo fínɛ́, bó cí vɔ̌sákpe ɖɔhun; atín wɛ è sɔ́ dó bló nǔ ɔ́, bɔ jǐ yiyi tɔn nyí nǔjlɛ́kpo yětɔn atɔn, bɔ ga tɔn nyí nǔjlɛ́kpo yětɔn we. Zwe tɔn lɛ́ɛ kpó nǔ e jí é jínjɔ́n ɔ́ kpó, kpódó wǔtu tɔn kpó bǐ wɛ nyí xwlɛ. Nya ɔ́ ɖɔ nú mì ɖɔ: “Távo e ɖo Mawu nukɔn é nɛ́.” Mawuxɔ ɔ́, hɔn we wɛ é ɖó: ɖokpó ɖo xɔgba ɔ́ nu, bɔ ɖokpó ɖo Tɛn mímɛ́ bǐ ɔ́ nu. Hɔn we lɛ́ɛ bǐ wɛ nyí hɔn vǐwenɔ. Hɔn e è dó xɔgba ɔ́ nu lɛ́ɛ ɔ́, è ɖe dětín kpó wɛnsagun kpó dó yě wú, bɔ é nyí nǔ ɖokpó ɔ́ xá ée è ɖe dó xɔ ɔ́ sín dǒ lɛ́ɛ wú lɛ́ɛ. Ɖo fí e è nɔ gbɔn byɔ́ Mawuxɔ ɔ́ mɛ ɔ́, è sɔ́ xwlɛ dó bló jɔhɔnsinglɔ́nnú ɖó hɔn ɔ́ ta nu. È ɖe flɛtɛ́li gbɔn xɔ ɔ́ nukɔn bó dó ganja yě nu, bó ɖe dětín gbɔn flɛtɛ́li lɛ́ɛ wú dó ba acɔ́ ná. Énɛ́ ɔ́ gúdo ɔ́, nya ɔ́ kplá mì tɔ́n jɛ Mawu xwé ɔ́ sín kɔ́xota ɖo taligbé, bó kplá mì yi xɔ ɖěvo mɛ; xɔ énɛ́ ɔ́ ɖo xɔ e ɖo Mawuxɔ ɔ́ gúdo ɔ́ kpá. Ga tɔn nyí nǔjlɛ́kpo yětɔn kanwe ko (100), bɔ gblǒ tɔn nyí nǔjlɛ́kpo yětɔn kanɖé wǒ (50). É kpan nukɔn kɔ́xota e lɛ́ lɛ̌ dó Mawuxɔ ɔ́ é ɖo akpá ɖokpó xwé, bɔ gblǒ tɔn nyí nǔjlɛ́kpo yětɔn ko ɖo akpá énɛ́ ɔ́ xwé. Akpá wegɔ́ ɔ́ xwé kpan nukɔn fí e è tɛ́ awǐnnya kpikpa gbɔn ɖo xwé ɔ́ sín kɔ́xota é. Xɔ ɔ́, síngbó atɔnnɔ wɛ, bɔ è ɖe xɔvlamɛli gbɔn bǐ mɛ. È ɖe xɔvlamɛli ɖokpó dó xɔ ɔ́ mɛ, ɖo fí e xɔ ɔ́ fó dó ɖo taligbé é, bɔ gblǒ tɔn nyi nǔjlɛ́kpo yětɔn wǒ, ga tɔn nyí nǔjlɛ́kpo yětɔn kanwe ko (100). Fínɛ́ wɛ è nɔ gbɔn bo nɔ byɔ́ xɔ ɔ́ mɛ. Xɔnu e ɖo síngbó atɔngɔ́ ɔ́ jí lɛ́ɛ hwe hú xɔnu e ɖo síngbó wegɔ́ ɔ́ jí lɛ́ɛ kpó xɔnu e ɖo síngbó nukɔntɔn ɔ́ jí lɛ́ɛ kpó; ɖó xɔvlamɛli e ɖo síngbó atɔngɔ́ ɔ́ jí lɛ́ɛ gbló hú xɔvlamɛli e ɖo síngbó ɖě lɛ́ɛ jí lɛ́ɛ. È xo kpe gbɔn síngbó atɔn lɛ́ɛ ɖokpó ɖokpó nukɔn; è ka sɔ́ dotín dó hɛn kpe énɛ́ lɛ́ɛ ná lě e è sɔ́ dotín dó hɛn xɔ ɖě lɛ́ɛ e ɖo xwé ɔ́ sín kɔ́xota lɛ́ɛ é ɖɔhun ǎ. Énɛ́ ɔ́ wú wɛ è ɖo jǐ yi wɛ bó gosín síngbó ɖě jí yi ɖěvo jí ɔ́, xɔnu e ɖo síngbó lɛ́ɛ jí lɛ́ɛ nɔ ɖo hwihwe d'é jí wɛ. Dǒdɔn xɔ ɔ́ tɔn e ɖo Mawu xwé ɔ́ sín kɔ́xota, bó ɖo fí e xɔ lɛ́ɛ ɖe é ɔ́, ga tɔn nyí nǔjlɛ́kpo yětɔn kanɖé wǒ (50). Xɔ lɛ́ɛ ɖésú ɖó nǔjlɛ́kpo yětɔn kanɖé wǒ (50). Lo ɔ́, xɔnu e ali yětɔn hun dó Mawuxɔ ɔ́ jí lɛ́ɛ ɔ́, ga yětɔn ɖó nǔjlɛ́kpo yětɔn kanwe ko (100). Ali ɖokpó ɖo do nú kpe e è xo gbɔn síngbó nukɔntɔn ɔ́ nukɔn ɔ́ ɖo zǎnzǎnhwe jí, bɔ mɛ e gosín Mawu xwé ɔ́ sín kɔ́xota lɛ́ɛ nɔ gbɔn fínɛ́ yi xɔ ɔ́ mɛ. Ali énɛ́ ɔ́, fí e dǒdɔn e gbɔn kɔ́xo ɔ́ jí ɔ́ gbɔn é wɛ é ɖe. Xɔ e ɖo taligbé ɔ́ ɖɔhun ɖokpó ɖo afɔligbé, bɔ élɔ́ ɖo xɔ e ɖo Mawu gúdo ɔ́ kpá. Ali ɖokpó gbɔn xɔ énɛ́ ɔ́ nukɔn; xɔnu e ɖo xɔ énɛ́ ɔ́ mɛ lɛ́ɛ ɔ́, nǔ ɖokpó ɔ́ wɛ yě nyí xá xɔnu e ɖo xɔ e ɖo taligbé é mɛ lɛ́ɛ; jlɛ̌ ɖokpó ɔ́ wɛ yě ɖó, alɔkpa ɖokpó ɔ́ wɛ è bló yě gbɔn; mɔ̌ ɖokpó ɔ́, ali e nu è nɔ gbɔn byɔ́ yě mɛ lɛ́ɛ kpó ée nu è nɔ gbɔn tɔ́n lɛ́ɛ kpó nyí nǔ ɖokpó ɔ́; hɔn yětɔn lɛ́ɛ lɔ nyí nǔ ɖokpó ɔ́; fí e ali e gbɔn xɔ ɔ́ nukɔn é bɛ́ sín ɔ́, hɔnli ɖokpó ɖo fínɛ́ bó kpan nukɔn Mawu xwéta dó ɔ́; zǎnzǎnhwe jí wɛ è nɔ gbɔn yi fínɛ́. Nya ɔ́ ɖɔ nú mì ɖɔ: “Xɔ we énɛ́ lɛ́ɛ bǐ wɛ è fɔ ɖó vo nú Mawu Mavɔmavɔ. Vɔ̌sánú-xwlémawutɔ́ e hɛn ɔ́, yě ná nɔ́ yi Mawu nukɔn lɛ́ɛ ɔ́, yě ná nɔ́ ɖu vɔ̌sánú mímɛ́ lɛ́ɛ ɖo xɔ énɛ́ lɛ́ɛ mɛ. Nǔgbó ɔ́, xɔ énɛ́ lɛ́ɛ ɔ́, vo wɛ è fɔ yě ɖó nú Mawu, bó nɔ́ bɛ́ vɔ̌sánú e mɛ́ hú vɔ̌sánú lɛ́ɛ bǐ lɛ́ɛ ɖó fínɛ́; vɔ̌sánú énɛ́ lɛ́ɛ wɛ nyí nǔníná lɛ́ɛ kpó kanlin e è hu dó sá vɔ̌ tɛnmɛ tɛnmɛ, dó byɔ́ hwɛsɔ́kɛ lɛ́ɛ sín lan kpó. Vɔ̌sánú-xwlémawutɔ́ e yi wa azɔ̌ ɖo tɛn mímɛ́ ɔ́ mɛ lɛ́ɛ ɔ́, yě sixú gosín tɛn mímɛ́ ɔ́ mɛ fínɛ́, bó yi kɔ́xo tlɔlɔ ǎ. Vɔ̌sánú-xwlémawutɔ́ sín awu e yě dó dó wa azɔ̌ nú Mawu lɛ́ɛ ɔ́, yě ɖó ná ɖe ɖó xɔ énɛ́ lɛ́ɛ mɛ hwɛ̌, bó sɔ́ awu ɖěvo dó cóbó wá yi fí e togun ɔ́ bǐ nɔ́ kplé ɖe é.” Ée nya ɔ́ jlɛ́ xɔ e ɖo Mawu xwé ɔ́ gbe lɛ́ɛ kpé ɔ́, é kplá mì gbɔn hɔnnúwa e ɖo zǎnzǎnhwe jí é nu, bɔ mǐ tɔ́n sín xwé ɔ́ gbe; énɛ́ ɔ́, é jɛ dǒ e è dǒ xá Mawu xwé ɔ́ jlɛ́ jí. Kpo e ɖo alɔ tɔn mɛ, bɔ é ɖo nǔ dó jlɛ́ wɛ ɔ́, é sɔ́ dó jlɛ́ dǒ e ɖo zǎnzǎnhwe jí é ná, bɔ ga tɔn nyí nǔjlɛ́kpo yětɔn afɔwe kanwe ko (500). É jlɛ́ dǒ e ɖo taligbé ɔ́, bɔ ga tɔn nyí nǔjlɛ́kpo yětɔn afɔwe kanwe ko (500). É jlɛ́ dǒ e ɖo afɔligbé ɔ́, bɔ ga tɔn nyí nǔjlɛ́kpo yětɔn afɔwe kanwe ko (500). É yi dǒ e ɖo gbadahwe jí ɔ́ kɔn, bó jlɛ́ bɔ ga tɔn nyí nǔjlɛ́kpo yětɔn afɔwe kanwe ko (500). Lě e é jlɛ́ dǒ e è mɛ lɛ́ lɛ̌ dó Mawu xwé ɔ́ gbɔn é nɛ́. Xwé ɔ́ nyí gblǒ zɛ̌ɛ́n ga zɛ̌ɛ́n, bɔ akpáxwé ɖokpó ɖokpó nyí nǔjlɛ́kpo yětɔn afɔwe kanwe ko (500). Dǒ e è dó xá Mawu xwé ɔ́ wɛ gbo tɛnmɛ e è sɔ́ ɖó vo nú Mawu é kpó fí e nyí fí yǎyánɔ é kpó. Nya ɔ́ lɛ́ kplá mì yi hɔnnúwa zǎnzǎnhwe jí tɔn ɔ́ kɔn. Kpowun ɔ́, un mɔ susu Mawu Izlayɛ́li tɔn ɔ́ tɔn, bɔ é ja sín zǎnzǎnhwe jí. É jǎwe kpó zǐngídi ɖé kpó, bɔ é cí xu wɛ ɖo adǎn jí ɖɔhun; susu tɔn za wě gbɔn ayǐkúngban ɔ́ bǐ jí. Nǔ e un mɔ é cí ée un mɔ hwenu e Mawu wá gba Jeluzalɛ́mu toxo é ɖɔhun; é cí éé un mɔ hwenu e un ɖo Kebáa tɔ ɔ́ tó é ɖɔhun. Ée un mɔ mɔ̌ ɔ́, un xwe agbɔ̌nnusú do. Susu Mawu Mavɔmavɔ tɔn gbɔn hɔnnúwa zǎnzǎnhwe jí tɔn nu byɔ́ xwé ɔ́ gbe. Yɛ Mawu tɔn sɔ́ mì yi kɔ́xota e ɖo Mawu xwé ɔ́ ta é, bɔ un mɔ susu Mawu Mavɔmavɔ tɔn gɔ́ xɔ ɔ́ bǐ. Un se mɛɖé gbe, bɔ é ɖo xó ɖɔ nú mì wɛ sín Mawuxɔ ɔ́ mɛ. Hwenɛ́nu ɔ́, mɛ ɖokpó ɖo te akpá ce. Mɛ e ɖo xó ɖɔ nú mì wɛ ɔ́ ɖɔ: “Hwɛ gbɛtɔ́ e, kpɔ́n fí élɔ́. Fí wɛ axɔ́súzinkpo ce ɖe, fí wɛ un nɔ sɔ́ afɔ ɖó. Un ná nɔ Izlayɛ́li ví lɛ́ɛ mɛ káká sɔ́yi. Izlayɛ́li to ɔ́ kpó axɔ́sú tɔn lɛ́ɛ kpó ɖě sɔ́ ná dó afɔ gbě ǎ, yě ká sɔ́ ná ɖi axɔ́sú yětɔn lɛ́ɛ sín cyɔ ɖě ɖó fí, dó sɔ́ nyǐkɔ ce xo kɔ́ ǎ. Axɔ́sú lɛ́ɛ sɔ́ gbɛndekpekán yětɔn lɛ́ɛ kpó hɔnnúwa yětɔn lɛ́ɛ kpó bɔdó gbɛndekpekán ce kpó hɔnnúwa ce kpó wú. Dǒ jɛ́n gbo xwé ce kpó xwé yětɔn kpó. Yě dó nǔ baɖabaɖa lɛ́ɛ sin dó sɔ́ nyǐkɔ ce xo kɔ́, nyi mɛ e nyí mɛ mímɛ́ é. Énɛ́ ɔ́ wú wɛ un sin xomɛ bó sú kún yětɔn dó. Bɛ́ sín din ɔ́, Izlayɛ́li ví lɛ́ɛ sɔ́ ná dó afɔ gbě ɖě ǎ; yě ná sɛ axɔ́sú yětɔn lɛ́ɛ sín cyɔ lɛ́ɛ dó zɔ nú mì; énɛ́ ɔ́, un ná nɔ yě mɛ káká sɔ́yi. “Amɔ̌, hwɛ gbɛtɔ́ ɔ́, ɖǒ xwé ɔ́ sín jlɛ̌ nú Izlayɛ́li ví lɛ́ɛ. Hwɛ e yě hu lɛ́ɛ ní hu winnyá nú yě; yě ní kpɔ́n lě e è nǎ bló xɔ ɔ́ gbɔn é céɖécéɖé. Nú hwɛ e yě hu lɛ́ɛ hu winnyá nú yě dóó hǔn, wlǎn lě e xwé ɔ́ ná cí é ɖó nǔ jí bó sɔ́ jó nú yě, bó xlɛ́ fí e xɔ lɛ́ɛ ná nɔ lɛ́ɛ yě; fí e è nǎ nɔ́ gbɔn byɔ́ xɔ lɛ́ɛ mɛ é, fí e è nǎ nɔ́ gbɔn tɔ́n é; xlɛ́ lě e xɔ ɔ́ ná nɔ gbɔn é bǐ yě. Wlǎn sɛ́n lɛ́ɛ kpó nǔ e un zɔ́n lɛ́ɛ kpó bǐ nú yě, nú yě ná xwedó. Sɛ́n dodó e kan xwé ɔ́ é ɖíe: Tɛnmɛ e lɛ́ lɛ̌ dó xwé ɔ́ ɖo só ɔ́ ta ɔ́, è nǎ tunwun ɖɔ tɛn ɖé wɛ bɔ è sɔ́ ɖó vo nú Mawu.” È sɔ́ nǔjlɛ́kpo yětɔn dó jlɛ́ vɔ̌sákpe ɔ́; nǔjlɛ́kpo yětɔn ɔ́, mɛ̌tlu vlɔ́ wɛ bɔ kpɛví ɖé ɖ'é jí; vɔ̌sákpe ɔ́ sín jlɛ̌ lɛ́ɛ ɖíe: è kun do lɛ́ lɛ̌ dó vɔ̌sákpe ɔ́, bɔ do yiyi tɔn nyí nǔjlɛ́kpo yětɔn ɖokpó, gblǒ tɔn nyí nǔjlɛ́kpo yětɔn ɖokpó; nǔ e gbɔn do ɔ́ tó ɔ́, jǐ yiyi tɔn nyí nǔjlɛ́kpo yětɔn sín vlɔ̌. Vɔ̌sákpe ɔ́, jǐ yiyi tɔn bló nǔjlɛ́kpo yětɔn we, sín do ɔ́ mɛ yi agba nukɔntɔn ɔ́ jí. Bɛ́ sín fínɛ́ ɔ́, vɔ̌sákpe ɔ́ sín gblǒ ɖe kpo nǔjlɛ́kpo yětɔn ɖokpó ɖokpó gbɔn akpáxwé ɛnɛ lɛ́ɛ bǐ. Bɛ́ sín agba nukɔntɔn jí káká yi agba wegɔ́ ɔ́ jí ɔ́, jǐ yiyi tɔn bló nǔjlɛ́kpo yětɔn ɛnɛ. Bɛ́ sín agba wegɔ́ lɔ jí ɔ́, vɔ̌sákpe ɔ́ sín gblǒ ɖe kpó nǔjlɛ́kpo ɖokpó ɖokpó gbɔn akpáxwé ɛnɛ lɛ́ɛ bǐ. Vɔ̌sákpe ɔ́, akpáxwé tɔn e ɖo aga, bɔ adogwle ɖo fínɛ́ ɔ́, jǐ yiyi tɔn nyí nǔjlɛ́kpo yětɔn ɛnɛ bɔ zwe tɔn ɛnɛ lɛ́ɛ tɔ́n. Adogwle ɔ́ ɖó gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn wěwe. Agba wegɔ́ ɔ́ ɖésú ɖó gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn wǒ-ɛnɛ. Nǔɖé gbɔn tó tɔn, bɔ jǐ yiyi tɔn nyí nǔjlɛ́kpo yětɔn sín vlɔ̌. Do ɖé gbɔn tó tɔn, bɔ gblǒ tɔn nyí nǔjlɛ́kpo yětɔn ɖokpó. Kpekán e jí è nɔ gbɔn yi vɔ̌sákpe ɔ́ jí ɔ́ ɖo zǎnzǎnhwe jí. Mɛ e ɖo xó ɖɔ nú mì wɛ ɔ́ ɖɔ: “Hwɛ gbɛtɔ́ e, ɖǒtó xó e Aklúnɔ Mavɔmavɔ ɖo ɖiɖɔ nú we wɛ é. Hwenu e è nǎ bló vɔ̌sákpe ɔ́, è nǎ nɔ́ dó dó vɔ̌ zo ɖ'é jí, bó ná nɔ́ kɔn kanlin e è hu dó sá vɔ̌ lɛ́ɛ sín hun d'é jí; tito e è ka ná xwedó lɛ́ɛ ɖíe: A nǎ sɔ́ nyibúsú ɖokpó nú vɔ̌sánú-xwlémawutɔ́ Levíi ví Sadɔ́ku ví lɛ́ɛ, bɔ yě ná sɔ́ dó sá hwɛsɔ́kɛmɛvɔ́; yědɛɛ lɛ́ɛ kɛ́ɖɛ́ wɛ un ná gbe ɖɔ yě ná nɔ́ xwlé vɔ̌sánú mì. Xó e nyɛ Mawu Mavɔmavɔ ɖɔ ɔ́ nɛ́. A nǎ sɔ́ kanlin ɔ́ sín hun bó ná sá dó vɔ̌sákpe ɔ́ sín zwe ɛnɛ lɛ́ɛ, bó ná sá dó dodó ɔ́ sín zwe ɛnɛ lɛ́ɛ, bó ná sá dó nǔ e è ɖǒ gbɔn vɔ̌sákpe ɔ́ tó lɛ́ lɛ̌ dó é bǐ. Lě e a nǎ slá wǔ nú vɔ̌sákpe ɔ́ gbɔn, bó ná sɔ́ ɖó vo nú mì é nɛ́. Énɛ́ ɔ́ gúdo ɔ́, a nǎ ɖɔ bɔ è nǎ ɖe nyibúsú e è dǒ sá vɔ̌ ná ɔ́ síin, bɔ è nǎ sɔ́ bó ná yi dó zo ɖo fí e è nɔ bló nǔ mɔ̌hunkɔ ɖe é. È ká ná dó zo ɖo fí e è sɔ́ ɖó vo nú mì é ǎ. Ayǐhɔ́ngbe tɔn ɔ́, a nǎ sɔ́ gbǎgbá asú e má ɖó blɔ̌ ɖěbǔ ǎ é ɖokpó dó sá hwɛsɔ́kɛmɛvɔ́ ná. A nǎ slá wǔ nú vɔ̌sákpe ɔ́ lě e a slá wǔ ná gbɔn hwenu e a sɔ́ nyibúsú dó sá vɔ̌ ná é. A sá hwɛsɔ́kɛmɛvɔ́ ɔ́ fó ɔ́, a nǎ sɔ́ nyibúsú ɖokpó, agbo ɖokpó; yě ɖě ná ɖó blɔ̌ wǔ ǎ. A nǎ fɔ yě wá nú mì. Vɔ̌sánú-xwlémawutɔ́ lɛ́ɛ ná kɔn jɛ dó yě jí, bó fɔ yě dó sá vɔ̌ e nɔ dó zo ɔ́ nú mì. Ayǐhɔ́ngbe ayǐhɔ́ngbe ɔ́, a ná nɔ́ hu gbǎgbá ɖokpó dó sá hwɛsɔ́kɛmɛvɔ́ ná, bó ná hu nyibúsú ɖokpó kpó agbo ɖokpó kpó dó sá vɔ̌ nú mì. Kanlin lɛ́ɛ ɖě ná ɖó blɔ̌ ɖo wǔ ǎ. A nǎ bló mɔ̌ nú azǎn tɛ́nwe. Hǔn azǎn tɛ́nwe wɛ è nǎ sɔ́ ɖó te dó slá wǔ nú vɔ̌sákpe ɔ́, bó ɖe e ɖó vo nú mì. É nyí azǎn tɛ́nwe énɛ́ lɛ́ɛ wá yi ɔ́, bɛ́ sín azǎn tántɔn gɔ́ ɔ́ gbe ɔ́, vɔ̌sánú-xwlémawutɔ́ ɔ́ ná jɛ vɔ̌ tɛnmɛ tɛnmɛ sá nú mì jí ɖo vɔ̌sákpe ɔ́ jí: è ná nɔ́ sá vɔ̌ e è nɔ dó zo lɛ́ɛ, è nǎ nɔ́ sá kɔnɖókpɔ́ vɔ́ lɛ́ɛ. Énɛ́ ɔ́, nyɛ kpó mi kpó ná jɛ ganjí. Xó e nyɛ Aklúnɔ Mavɔmavɔ ɖɔ ɔ́ nɛ́.” Nya ɔ́ lɛ́ kplá mì wá hɔnnúwa e ɖo zǎnzǎnhwe jí nú xwé ɔ́ é, bɔ hɔn tɔn lɛ́ɛ ɖo súsú. Énɛ́ ɔ́, Mawu Mavɔmavɔ ɖɔ nú mì ɖɔ: “Hɔnnúwa élɔ́ ɔ́, súsú wɛ hɔn tɔn lɛ́ɛ ná nɔ́ nɔ; è nǎ hun gbeɖé ǎ. Mɛ ɖé ná gbɔn fínɛ́ gbeɖé ǎ, ɖó nyɛ Mawu Mavɔmavɔ, Mawu Izlayɛ́li tɔn ɔ́, fínɛ́ wɛ un nɔ gbɔn. Hǔn é ní nɔ súsú. É ká ɖo mɔ̌ có gǎn ɔ́ ná nɔ fínɛ́ ɖó gǎn e é nyí ɔ́ wú; é ná nɔ fínɛ́, bó ɖu vɔ̌sánú mímɛ́ ɔ́ ɖo nukɔn ce. É ná byɔ́ mɛ gbɔn hɔnnúwa ɔ́ sín ali nu, bó ná tɔ́n gbɔn ali ɖokpó énɛ́ ɔ́ nu.” Énɛ́ ɔ́ gúdo ɔ́, nya ɔ́ wá kplá mì gbɔn hɔnnúwa e ɖo taligbé ɔ́ nu yi Mawuxɔ ɔ́ lihɛ́nnu; un mɔ susu Mawu Mavɔmavɔ tɔn gɔ́ xɔ ɔ́. Énɛ́ ɔ́, un xwe agbɔ̌nnusú do. Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ɖǒtó ganjí, hun nukún towe ganjí, bó hun tó towe ganjí; ɖǒtó sɛ́n lɛ́ɛ kpó tito e sɔ́ ɖó ayǐ wɛ un ɖe ɖo xwé ɔ́ gbe lɛ́ɛ kpó. Sɛ́n e ɖɔ xó dó mɛ e ɖó acɛ bó ná byɔ́ Mawu xwé ɔ́ gbe é kpó mɛ e ma ɖó acɛ énɛ́ ǎ é kpó; a nǎ ɖó kɛ́n jí céɖécéɖé. “Xó e ɖɔ wɛ nyɛ Aklúnɔ Mavɔmavɔ ɖe ɔ́, a nǎ ɖɔ nú Izlayɛ́li ví tónúmasetɔ́ énɛ́ lɛ́ɛ; xó e ɖɔ wɛ un ɖe ɔ́ ɖíe: Izlayɛ́li ví lɛ́ɛ mi, nǔ baɖabaɖa e dó sin wɛ mi ɖe lɛ́ɛ kpé mì. Hwenu e mi ɖo nǔ e nyí ce ɖo vɔ̌ e mi sá é mɛ lɛ́ɛ xwlé mì wɛ ɔ́, hwenu e mi ɖo kanlin e mi dó sá vɔ̌ ɔ́ é sín jǒ kpó kanjɔ tɔn kpó xwlé mì wɛ ɔ́, hwe ɖokpó énɛ́ ɔ́ nu ɔ́, mi nɔ kplá akɔta ɖěvo lɛ́ɛ, mɛ énɛ́ lɛ́ɛ e ma gbo ada ǎ, bó má ká nɔ nyi sɛ́n ce ǎ lɛ́ɛ byɔ́ xwé ce gbe. Mi ɖu su nú xwé ce. Nǔ baɖabaɖa e dó sin wɛ mi ɖe lɛ́ɛ zɔ́n, bɔ akɔ e nyi kpó mi kpó jɛ ɔ́, mi hɛn gblé. Mi ɖésúnɔ sɔ́ nɔ́ wá wa azɔ̌ nú mì ɖo xwé ce gbe ǎ; lo ɔ́, akɔta ɖěvo lɛ́ɛ wɛ mǐ sɔ́ azɔ̌ énɛ́ jó ná, bɔ yě nɔ́ bló ɖó tɛn mitɔn mɛ. Nyɛ Aklúnɔ Mavɔmavɔ ɖɔ: mɛ e nyí akɔta ɖěvo, bó má gbo ada ǎ, bó má nɔ́ nyi sɛ́n ce lɛ́ɛ ǎ é ɖě ná wá xwé ce gbe gbeɖé ǎ; mɛ énɛ́ ɔ́ ná bo ɖo mi Izlayɛ́li ví lɛ́ɛ tɛ́ntin ɔ́, é ná byɔ́ xwé ce gbe gbeɖé ǎ.” “Levíi ví e xwedó Izlayɛ́li ví ɖě lɛ́ɛ e jó mì dó, bó ɖo vodún yětɔn lɛ́ɛ sɛn wɛ lɛ́ɛ ɔ́, nǔ e yě wa ɔ́ ji nǔɖé ɔ́, yě ná kpan. Azɔ̌ e un ná sɔ́ dó así nú yě ɔ́ wɛ nyí, yě ná nɔ́ wa azɔ̌ nú mì ɖo xwé ce gbe, yě ná nɔ́ nɔ hɔnnúwa lɛ́ɛ jí, bó ná nɔ wa azɔ̌ tɛnmɛ tɛnmɛ ɖo xwé ce gbe; yě ná nɔ́ hu kanlin e è nǎ dó sá vɔ̌ e è nɔ dó zo lɛ́ɛ, kpó kanlin e è nǎ dó sá vɔ̌ ɖě lɛ́ɛ é kpó; yě ná ɖo alɔ jǐ nú togun ɔ́, bó ná nɔ́ wa azɔ̌ n'i. Lo ɔ́, yědɛɛ lɛ́ɛ wɛ nɔ nukɔn nú togun ɔ́ bɔ é sɛn vodún; yě wɛ dɔn Izlayɛ́li ví lɛ́ɛ dó hwɛ mɛ; énɛ́ wú ɔ́, xó e nyɛ Aklúnɔ Mavɔmavɔ ɖɔ ɔ́ ɖíe: Un ná wa nǔ xá yě; nǔ e yě wa ɔ́ ji nǔɖé ɔ́, yě ná sɔ́ kpan. Yě sɔ́ ná wá gɔ̌n ce bó wá wa vɔ̌sánú-xwlémawutɔ́ zɔ́ ɖě gbeɖé ǎ. Nǔ e è nɔ dó wa azɔ̌ nú mì lɛ́ɛ ɔ́, yě sɔ́ ná sɛkpɔ́ ɖě ǎ; yě sɔ́ ná wá tɛn mímɛ́ bǐ ɔ́ mɛ ɖě ǎ. Winnyánú e yě wa, bó dó nǔ baɖabaɖa lɛ́ɛ sin ɔ́ ji nǔɖé ɔ́, yě ná kpan. Din ɔ́, azɔ̌ kpaa e ɖo xwé ce gbe lɛ́ɛ wɛ un ná sɔ́ dó así nú yě bɔ yě ná nɔ́ wa.” “Vɔ̌sánú-xwlémawutɔ́ Levíi ví e nyí Sadɔ́ku ví lɛ́ɛ ɔ́, hwenu e Izlayɛ́li ví lɛ́ɛ jó nyɛ Mawu Mavɔmavɔ ɔ́ dó bó ɖo ali bú wɛ ɔ́, yědɛɛ lɛ́ɛ xwedó xwé ce sín sɛ́n lɛ́ɛ. Énɛ́ ɔ́ wú ɔ́, yě kɛ́ɖɛ́ wɛ ná nɔ́ wa azɔ̌ nú mì, yě wɛ ná nɔ́ sɔ́ kanlin e è hu dó sá vɔ̌ lɛ́ɛ sín jǒ kpó hun kpó xwlé mì. Xó e nyɛ Aklúnɔ Mavɔmavɔ ɖɔ ɔ́ nɛ́. Yě ɖokpónɔ wɛ ná nɔ́ byɔ́ xwé ce gbe, bó ná nɔ́ sɛkpɔ́ távo ce, bó ná nɔ́ xwedó tito e un ɖó ayǐ bɔ è nǎ nɔ xwedó dó wa azɔ̌ ɖo xwé ce gbe lɛ́ɛ. Cóbónú yě ná dó asá hɔnnúwa e yi kɔ́xota e ɖo xwé ɔ́ ta ɔ́ sín kpekán ɔ́, kanvɔ wěwe wɛ yě ná dó. Hwenu e yě ná ɖo azɔ̌ wa wɛ ɖo kɔ́xota e ɖo xwé ɔ́ ta ɔ́ abǐ xɔ ce mɛ ɔ́, yě ná dó gbɔ̌fúnvɔ ǎ. Avɔ e yě ná dó blá ta ná ɔ́, kpó éé yě ná nɔ sin ali ɔ́ kpó ɔ́, kanvɔ wɛ é ná nyí. Nǔ e yě ná nɔ́ dó ɔ́, ɖě ná nɔ́ ná yǒzo yě ǎ, yě táá wá jɛ dɛ̌n. Cóbónú yě ná wá kɔ́xo fí e togun ɔ́ nɔ́ kplé ɖe ɔ́, yě ná to ɖe nǔ e yě dó dó wa azɔ̌ lɛ́ɛ hwɛ̌; yě ná ɖe nǔ lɛ́ɛ dó xɔ e è sɔ́ ɖó te nú nǔ énɛ́ lɛ́ɛ é mɛ, bó ná bɛ́ nǔ ɖěvo dó. É má nyí mɔ̌ ǎ ɔ́, togun ɔ́ táá wá ɖó alɔ vɔ̌sánú-xwlémawutɔ́ sín awu yětɔn lɛ́ɛ wú. “Vɔ̌sánú-xwlémawutɔ́ lɛ́ɛ ná nɔ́ xwlɛ́ ta ǎ, lo ɔ́ cóbónú ɖa yětɔn ná ɖi ga dín ɔ́, yě ná nɔ́ kpa bɔ é ná fɛ́ wǔ. Yě ɖě ná nɔ́ nu vɛ̌ɛn cóbó ná nɔ́ yi kɔ́xota e ɖo xwé ɔ́ ta é ǎ. Vɔ̌sánú-xwlémawutɔ́ ɖě ná da asúkúsi ǎ, ɖě ká ná da nyɔ̌nu e asú gbɛ́ é ɖě ǎ. Izlayɛ́li ví ɖyɔ̌vǐ wɛ yě ná nɔ́ da, abǐ mɛ e asú tɔn nyí vɔ̌sánú-xwlémawutɔ́ bó kú é. “Vɔ̌sánú-xwlémawutɔ́ lɛ́ɛ ná kplɔ́n vogbingbɔn e ɖo nǔ e è ɖe ɖó vo nú mì é kpó nǔ e nyí nǔ kpaa é kpó togun ce, bó ná lɛ́ xlɛ́ yě vogbingbɔn e ɖo nǔ e nyí nǔ mímɛ́ e kpó nǔ e nyí nǔ blíblí é kpó mɛ é. Ényí tagba ɖé tíin ɔ́, yě wɛ ná nɔ́ gbo hwɛ, yě ná nɔ́ xwedó sɛ́n ce lɛ́ɛ, bó ná gbo hwɛ dó jlɔ̌jlɔ́ jí. Yě ná nɔ́ ɖu sinsɛnxwe lɛ́ɛ lě e sɛ́n ɔ́ zɔ́n gbɔn é, bó ná nɔ́ kpé nukún dó gbɔjɛzánsɛ́n ɔ́ wú, bɔ togun ce ná nɔ́ nyi. “Vɔ̌sánú-xwlémawutɔ́ ɖě ná ɖó alɔ cyɔ wú ǎ; é má nyí mɔ̌ ǎ ɔ́, é ná ɖu su. Amɔ̌, nú tɔ́ tɔn, abǐ nɔ tɔn abǐ vǐ tɔn ɖé, abǐ nɔví tɔn sunnú ɖé, abǐ nɔví tɔn nyɔ̌nu e má kó da asú ǎ ɔ́ ɖě wɛ ɔ́, é hɛn ɔ́, é ná ɖó alɔ cyɔ énɛ́ lɛ́ɛ wú. Ényí nǔ wá cí mɔ̌ ɔ́, é ná slá wǔ, bó ná nɔ te nú azǎn tɛ́nwe cóbó ná lɛ́ jɛ azɔ̌ wa jí. Gbe e gbe é ná yi kɔ́xota e ɖo xwé ɔ́ ta ɔ́, é ná sá hwɛsɔ́kɛmɛvɔ́ tɔn. Xó e nyɛ Aklúnɔ Mavɔmavɔ ɖɔ ɔ́ nɛ́. Vɔ̌sánú-xwlémawutɔ́ lɛ́ɛ ná ɖó ayǐkúngban ɖě ǎ; nyɛ Mawu Mavɔmavɔ wɛ ná nyí nǔ e yě ná ɖó é. Mi ma ná ayǐkúngban ɖěbǔ yě ɖo Izlayɛ́li ó; nyɛ wɛ nyí nǔ e yě ɖó ɔ́. Vɔ̌sánú-xwlémawutɔ́ lɛ́ɛ ná nɔ́ ɖu nǔníná jinukún tɔn e è hɛn wá nú mì lɛ́ɛ kpó kanlin e è dǒ sá hwɛsɔ́kɛmɛvɔ́ ná lɛ́ɛ kpó sín lan. Nǔ e è sɔ́ ɖó vo nú mì ɖo Izlayɛ́li to ɔ́ mɛ ɔ́ bǐ wɛ ná nyí yětɔn. Nǔkún nukɔntɔn e ná nɔ́ nyɔ́ ɖo gle mɛ lɛ́ɛ ná nɔ́ nyí vɔ̌sánú-xwlémawutɔ́ lɛ́ɛ tɔn, bɔ nǔjɔ e è nǎ ná mì ɖo Izlayɛ́li tomɛ lɛ́ɛ bǐ ná nyí yětɔn. Mɛ lɛ́ɛ ná nɔ́ ná yě linfín yětɔn e nyɔ́ hú bǐ é, bɔ nyɛ Mawu Mavɔmavɔ ná nɔ́ xo ɖɛ dó xwé yětɔn jí. Amɔ̌, vɔ̌sánú-xwlémawutɔ́ lɛ́ɛ ɖó ná ɖu xɛ kúkú ǎ, yě ká ná ɖu lan kúkú ǎ; é sixú nyí gběkanlin ɖé wɛ é hu, é ká sixú nyí é nɔ é ɖóɖó bó kú, yě ɖó ná ɖu ǎ.” “Hwenu e akɔta Izlayɛ́li ví lɛ́ɛ tɔn lɛ́ɛ ná má ayǐkúngban lɛ́ɛ yětɔn yětɔn ɔ́, tɛnmɛ ɖé ná tíin, bɔ è nǎ sɔ́ ɖó vo nú nyɛ Mawu Mavɔmavɔ. Ayǐkúngban ɔ́ ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn adɔ̌kpo ɖokpó (20.000). Ayǐkúngban énɛ́ ɔ́ ná nyí ayǐkúngban mímɛ́. È nǎ sɔ́ tɛnmɛ ɖé ɖo ayǐkúngban énɛ́ ɔ́ jí nú xwé ce; tɛnmɛ énɛ́ ná ɖó gblǒ zɛ̌ɛ́n ga zɛ̌ɛ́n, bó ná nyí nǔjlɛ́kpo yětɔn afɔwe kanwe ko (500). Tɛn vɔ́tɔ́ ɖé ná lɛ́ lɛ̌ dó tɛnmɛ énɛ́ ɔ́, bɔ gblǒ tɔn ná nyí nǔjlɛ́kpo yětɔn kanɖé wǒ (50). Ayǐkúngban énɛ́ ɔ́, è nǎ lɛ́ kán tɛnmɛ ɖé ɖ'é jí, bɔ ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn děgba we afɔwó (10.000); fí énɛ́ wɛ è nǎ bló tɛn mímɛ́ ce ɖó, fínɛ́ wɛ ná nyí tɛnmɛ mímɛ́ bǐ ɔ́. È nǎ sɔ́ fí énɛ́ ɖó vo nú mì, bɔ é ná nyí vɔ̌sánú-xwlémawutɔ́ e ɖo azɔ̌ wa nú nyɛ Mawu Mavɔmavɔ wɛ lɛ́ɛ tɔn. Tɛn énɛ́ ɔ́ mɛ wɛ xwé yětɔn lɛ́ɛ ná nɔ, bɔ xwé ce lɔ ná nɔ fínɛ́. Tɛnmɛ e ná kpo ɖo ayǐkúngban e è sɔ́ ɖó vo nú mì ɔ́ jí ɔ́, è nǎ sɔ́ nú Levíi ví e nɔ́ kpé nukún dó xwé ce wú lɛ́ɛ; ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn děgba we afɔwó (10.000), bɔ yě ná bló toxo yětɔn lɛ́ɛ ɖ'é jí, bó nɔ fínɛ́. Ɖo ayǐkúngban énɛ́ e è nǎ sɔ́ ɖó vo nú nyɛ Mawu Mavɔmavɔ ɔ́ kpá ɔ́, è nǎ jó tɛnmɛ ɖé dó bɔ ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn děgba ɖě afatɔ́n (5.000), bɔ è nǎ sɔ́ fí énɛ́ dó bló toxo ná, bɔ Izlayɛ́li ví lɛ́ɛ bǐ ná ɖó acɛ bó nɔ toxo énɛ́ ɔ́ mɛ. Gǎn e ɖo to ɔ́ nu ɔ́, tɛnmɛ e ɖo aɖisí kpó amyɔ kpó nú tɛnmɛ e è sɔ́ ɖ'ayǐ nú nyɛ Mawu Mavɔmavɔ é kpódó tɛnmɛ e è sɔ́ ɖ'ayǐ bó ná dó bló toxo nú Izlayɛ́li ví lɛ́ɛ kpó é wɛ è nǎ ná ɛ. Tɛnmɛ ɔ́ ná hun káká yi Mɛditɛlanɛ́ɛ xutó ɖo gbadahwe jí, bó ná hun káká yi fí e Izlayɛ́li dogbó ɔ́ ɖó te ɖó ɖo zǎnzǎnhwe jí é. Fí énɛ́ ɔ́ ná ɖó ga ɖokpó ɔ́ xá ayǐkúngban akɔta ɖokpó ɖokpó tɔn. Énɛ́ ɔ́, gǎn lɛ́ɛ ná ɖó tɛnmɛ yě ɖésú tɔn ɖo Izlayɛ́li; yě sɔ́ ná dó tagba ɖě nú togun ce ǎ. Yě ná jó ayǐkúngban e kpo é dó nú akɔta tɛnmɛ tɛnmɛ e ɖo Izlayɛ́li lɛ́ɛ.” Xó e Aklúnɔ Mavɔmavɔ ɖɔ ɔ́ ɖíe: “Gǎn Izlayɛ́li tɔn lɛ́ɛ mi, mitɔn wá hú gán! Din ɔ́, mi jó dǎkaxixo dó, bó jó ya dó nú mɛ dó, bó xwedó hwɛjijɔ, bó nɔ́ wa nǔ ɖó sɛ́nxwi jí, bó gɔn nǔ e nyí togun ɔ́ tɔn lɛ́ɛ nu klá jɛ. Xó e nyɛ Aklúnɔ Mavɔmavɔ ɖɔ ɔ́ nɛ́. “Mɛ ɖokpó ɖokpó ní nɔ́ sɔ́ nǔdagan e sɔgbe é dó da nǔ ná, bó nɔ́ sɔ́ nǔjlɛ́ká abǐ nǔjlɛ́nú e sɔgbe é dó jlɛ́ nǔ ná. Nǔ e è nɔ dó jlɛ́ nǔkún ná, bɔ è nɔ ylɔ́ ɖɔ efáa é kpó éé è nɔ dó jlɛ́ nǔ e è nɔ jɛ lɛ́ɛ ná, bɔ è nɔ ylɔ́ ɖɔ bati é kpó ɔ́, ɖě ná nɔ hɛn nǔ hú ɖě ǎ. Nǔ e yě ná nɔ́ hɛn ɔ́ ná nyí nǔ e homɛ́ɛ nɔ hɛn ɔ́ sín mǎɖówǒ. Homɛ́ɛ wú wɛ è nǎ jlɛ́ bati kpó efáa kpó dó bó kpɔ́n ɖɔ yě sɔgbe a jí. È sɔ́ gankwɛ́ e è nɔ ylɔ́ ɖɔ síklu ɔ́ ɖokpó ɔ́, è nǎ mɔ gela ko ɖ'é mɛ, bɔ síklu kanɖé ko (60) wɛ ka nyí mǐnu ɖokpó. “Lě e mi ná nɔ ná nǔjɔ mitɔn lɛ́ɛ gbɔn é ɖíe: Ényí blěe abǐ ɔ́ji wɛ ɔ́, jinukún e mi ya ɔ́, mi ná má ɖó do kanɖé ko (60) bó ná ná do ɖokpó. É ká nyí ami wɛ ɔ́, mi ná má ɖó do kanwe ko (100) bó ná ná do ɖokpó. Ami ɔ́, bati wɛ mi ná nɔ́ dó jlɛ́ ná. Mi ka tunwun ɖɔ bati wǒ wɛ nɔ́ nɔ homɛ́ɛ ɖokpó mɛ; mɔ̌ ɖokpó ɔ́, bati wǒ nɔ́ nɔ kɔ́ɔ ɖokpó mɛ. Ɖo Izlayɛ́li to ɔ́ mɛ ɔ́, nú gbɔ̌nyitɔ́ ɖé ɖó lɛ̌ngbɔ́ afɔɖé (200) abǐ gbɔ̌ afɔɖé (200) ɔ́, é ná ná ɖokpó. Nǔ énɛ́ lɛ́ɛ e mi ná jɔ ɔ́, mi ná nɔ́ dó sá jinukún vɔ́, vɔ̌ e è nɔ dó zo é kpó kɔnɖókpɔ́ vɔ́ kpó, bó ná dó mɔ hwɛsɔ́kɛ yí. Xó e nyɛ Aklúnɔ Mavɔmavɔ ɖɔ ɔ́ nɛ́. “Nǔjɔ énɛ́ ɔ́, mɛ e ɖo Izlayɛ́li to ɔ́ mɛ lɛ́ɛ bǐ wɛ ná nɔ́ ná, bɔ yě ná nɔ́ bɛ́ nú gǎn e ɖo Izlayɛ́li to ɔ́ nu é. Ɖó gǎn ɔ́ wɛ ná nɔ́ ná nǔ e è nǎ nɔ́ dó sá vɔ̌ e è nɔ dó zo lɛ́ɛ, bó ná nɔ́ ná nǔníná jinukún tɔn kpó vɛ̌ɛn e è nǎ nɔ ba xwe hwenu lɛ́ɛ kpó; ɖo tají ɔ́, sunwájǐxwe lɛ́ɛ, gbɔjɛzán gbe lɛ́ɛ, kpó nǔwiwa ɖěvo e ná dɔn Izlayɛ́li ví lɛ́ɛ kplé lɛ́ɛ kpó sín hwenu é. Gǎn ɔ́ wɛ ná nɔ́ sá hwɛsɔ́kɛmɛvɔ́, é wɛ ná nɔ́ xwlé nǔníná jinukún tɔn lɛ́ɛ Mawu, bó ná nɔ́ sá vɔ̌ e è nɔ dó zo lɛ́ɛ kpó kɔnɖókpɔ́ sín vɔ̌ lɛ́ɛ kpó, bónú nyɛ Mawu Mavɔmavɔ ná sɔ́ hwɛ kɛ togun Izlayɛ́li tɔn ɔ́.” Xó e Aklúnɔ Mavɔmavɔ ɖɔ ɔ́ ɖíe: “Azǎn nukɔntɔn e ɖo sun nukɔntɔn ɔ́ mɛ ɔ́ gbe ɔ́, è nǎ nɔ́ hu nyibúsú maɖóblɔ̌ ɖo wǔ ɖokpó dó slá wǔ nú xwé ce. Vɔ̌sánú-xwlémawutɔ́ ɔ́ ná nɔ́ sá kanlin e è dǒ sá vɔ̌ ɔ́ sín hun dó xɔ ce sín hɔnkpo lɛ́ɛ wú, bó ná nɔ́ sá dó dodo ɔ́ sín zwe ɛnɛ lɛ́ɛ, bó ná nɔ́ sá dó hɔntogbó e ɖo xwé ɔ́ ta lɛ́ɛ sín hɔnkpo lɛ́ɛ wú. Mɔ̌ ɖokpó ɔ́ wɛ è nǎ nɔ́ bló azǎn tɛ́nwegɔ́ ɔ́ e ɖo sun ɔ́ mɛ ɔ́ gbe, ɖó mɛ e ma jló ǎ abǐ mɛ e ma tunwun ǎ, bó hu hwɛ lɛ́ɛ ta mɛ. È blǒ mɔ̌ ɔ́, è nǎ slá wǔ nú xwé ce. “Sun nukɔntɔn ɔ́ sín azǎn wǒ-ɛnɛgɔ́ ɔ́ gbe ɔ́, mi ná jɛ Dǐndínwáyixwe ɔ́ ɖu jí. Xwe énɛ́ ɔ́, azǎn tɛ́nwe wɛ mi ná ɖu xɔ, bɔ mɛ ɖé ná ɖu wɔ̌xúxú e mɛ è dǒ tɔ́n é hwe énɛ́ ɔ́ nu ǎ. Xwe ɔ́ sín azǎn nukɔntɔn ɔ́ gbe ɔ́, gǎn e ɖo Izlayɛ́li to ɔ́ nu ɔ́ ná nɔ hu nyibúsú ɖokpó dó sá vɔ̌ ná, bónú nyɛ Mawu Mavɔmavɔ ná sɔ́ hwɛ kɛ é kpódó togun ɔ́ bǐ kpó. Mɔ̌ ɖokpó ɔ́, ayǐhɔ́ngbe ayǐhɔ́ngbe ɔ́, è nǎ nɔ́ hu nyibúsú e máɖóblɔ̌ ɖo wǔ ǎ é tɛ́nwe, agbo e maɖóblɔ̌ ɖo wǔ ǎ é tɛ́nwe dó sá vɔ̌ e è nɔ dó zo é nú mì nú azǎn tɛ́nwe e è nǎ ɖu xwe ɔ́ xɔ é; ayǐhɔ́ngbe tɛgbɛ ɔ́, è ka na nɔ́ lɛ́ hu gbǎgbá ɖokpó dó sá hwɛsɔ́kɛmɛvɔ́ ná. È nǎ wá sɔ́ linfín kilóo gban (30), kpó ami lǐtli ayizɛ́n kpó dó nyibúsú ɔ́ jí, bó ná sɔ́ linfín kilóo gban (30) kpó ami lǐtli ayizɛ́n kpó dó agbo ɔ́ jí. “Xwe e è nǎ bɛ̌ ɖuɖu sín azǎn afɔtɔngɔ́ e ɖo sun tɛ́nwegɔ́ ɔ́ mɛ é gbe ɔ́, nǔ e gǎn ɔ́ bló ɖo Dǐndínwáyixwe ɔ́ hwenu ɔ́ ɖokpó ɔ́ wɛ é ná lɛ́ bló: Xwe ɔ́ sín azǎn lɛ́ɛ ɖokpó ɖokpó gbe ɔ́, hwɛsɔ́kɛmɛvɔ́ ɖokpó ɔ́ wɛ é ná sá, vɔ̌ e è nɔ dó zo ɔ́ ɖokpó ɔ́ wɛ é ná sá, bó ná ná nǔníná jinukún tɔn jlɛ̌ ɖokpó ɔ́, ami jlɛ̌ ɖokpó ɔ́.” Xó e Aklúnɔ Mavɔmavɔ ɖɔ ɔ́ ɖíe: “Aklúnɔzángbla ɖokpó mɛ ɔ́, hɔntogbó zǎnzǎnhwe jí tɔn e ɖo kɔ́xota e ɖo xwé ɔ́ ta ɔ́ ɖó ná nɔ́ nɔ súsú nú azǎn ayizɛ́n é nyí azɔ̌wazán gbe lɛ́ɛ; amɔ̌, gbɔjɛzán gbe ɔ́, é ná nɔ́ nɔ nuvo. È nǎ nɔ́ lɛ́ hun sunwájǐxwe ɔ́ gbe. Gǎn e ɖo Izlayɛ́li to ɔ́ nu ɔ́ ná gosín Mawu xwé ɔ́ kɔ́xota, bó ná gbɔn xwéta sín hɔnnúwa zǎnzǎnhwe jí tɔn ɔ́ sá, bó ná nɔ te ɖo Mawu xwéta sín hɔntogbó ɔ́ nu, ɖo hɔnkpo ɔ́ kpá; hwenɛ́nu ɔ́, vɔ̌sánú-xwlémawutɔ́ lɛ́ɛ ná ɖo vɔ̌ e è dó zo ɔ́ kpó kɔnɖókpɔ́vɔ́ kpó sá dó ta tɔn mɛ wɛ. Énɛ́ ɔ́ gúdo ɔ́, é ná jɛ kpo bo ɖe kɔ́, bó lɛ́ kɔ. È nǎ sú hɔntogbó ɔ́ có nú gbadanu ná su ǎ. Gbɔjɛzán gbe lɛ́ɛ kpó sunwájǐzán gbe lɛ́ɛ kpó ɔ́, togun ɔ́ ná nɔ́ wá jɛ kpo bo ɖe kɔ́ nú nyɛ Mawu Mavɔmavɔ ɖo hɔntogbó énɛ́ ɔ́ kɔn. “Gbɔjɛzán gbe ɔ́, gǎn ɔ́ ná nɔ́ hɛn lɛ̌ngbɔ́ví e máɖóblɔ̌ ɖo wǔ ǎ é ayizɛ́n, kpó agbo e má ɖó blɔ̌ ɖo wǔ ǎ é ɖokpó kpó, bɔ è nǎ dó sá vɔ̌ e è nɔ dó zo ɔ́ nú mì. É ná hɛn blěelinfín kilóo gban (30) dó agbo ɔ́ jí, bó ná kpɔ́n blěelinfín e é ɖésú mɔ ɖɔ é ná kpé é, bó ná hɛn dó lɛ̌ngbɔ́ví lɛ́ɛ jí; linfín kilóo gban (30) ɔ́, é ná sɔ́ ami lǐtli ayizɛ́n d'é jí. Sunwájǐzán gbe lɛ́ɛ ɔ́, é ná nɔ́ hu nyibúsú e máɖóblɔ̌ ɖo wǔ ǎ é ɖokpó, lɛ̌ngbɔ́ví e máɖóblɔ̌ ɖo wǔ ǎ é ayizɛ́n kpó agbo e ma ɖó blɔ̌ ɖo wǔ ǎ é ɖokpó kpó. É ná ná blěelinfín kilóo gban (30) dó nyibúsú ɔ́ jí, bó ná sɔ́ kilóo gban (30) dó agbo ɔ́ jí, bɔ lɛ̌ngbɔ́ví lɛ́ɛ ɔ́, é ná kpɔ́n blěelinfín e é ɖésú mɔ ɖɔ é ná kpé ɔ́, bó ná hɛn d'é jí; é ná hɛn ami lǐtli ayizɛ́n dó linfín kilóo gban (30) lɛ́ɛ jí. Ali e gǎn ɔ́ gbɔn bó byɔ́ xwé ɔ́ gbe é wɛ é ná lɛ́ gbɔn bó tɔ́n; hɔnnúwa ɔ́ sá wɛ é ná gbɔn. Amɔ̌, ényí to ɔ́ bǐ wá bó ná sɛn nyɛ Mawu Mavɔmavɔ ɔ́ ɖo nǔwiwa ɖaxó ɖé hwenu ɔ́, mɛ e ná gbɔn hɔnnúwa taligbé tɔn ɔ́ nu, bó ná byɔ́ xwé ɔ́ gbe lɛ́ɛ ɔ́, hɔnnúwa afɔligbé tɔn ɔ́ nu wɛ yě ná gbɔn bó tɔ́n, bɔ mɛ e ka ná gbɔn afɔligbé tɔn ɔ́ nu bó ná byɔ́ mɛ lɛ́ɛ ɔ́ ná gbɔn taligbé tɔn ɔ́ nu bó tɔ́n. Mɛ ɖě ná gbɔn fí e é gbɔn bó byɔ́ xwé ɔ́ gbe é bó tɔ́n ǎ. Fí e kpan nukɔn fí e mɛ ɔ́ gbɔn bó byɔ́ mɛ é wɛ mɛ ɔ́ ná gbɔn bó tɔ́n. Hwe ɖokpó ɔ́ nu wɛ gǎn ɔ́ kpó togun ɔ́ kpó ná byɔ́ xwé ɔ́ gbe bó ná lɛ́ tɔ́n hwe ɖokpó ɔ́ nu.” “Xwe gbe lɛ́ɛ kpódó azǎn nukúnɖéjí lɛ́ɛ kpó gbe ɔ́, è nǎ nɔ́ ná blěelinfín kilóo gban (30) dó nyibúsú ɖokpó abǐ agbo ɖokpó jí. É ká nyí lɛ̌ngbɔ́ví wɛ è nǎ dǒ sá vɔ̌ ná ɔ́, mɛ ɖokpó ɖokpó ná kpɔ́n linfín e é ná sɔ́ d'é jí bɔ é ná kpé é. È ka sɔ́ blěelinfín kilóo gban (30) ɔ́, ami lǐtli ayizɛ́n wɛ ná jɛ jí. “Ényí ɖɔ gǎn ɔ́ jló ná sá vɔ̌ e mɛ ɖésú nɔ́ jló bó nɔ́ sá nú nyɛ Mawu Mavɔmavɔ ɔ́ ɖě ɔ́, é sixú nyí vɔ̌ e è nɔ dó zo ɔ́, é ká sixú nyí kɔnɖókpɔ́vɔ́; hɔnnúwa zǎnzǎnhwe jí tɔn ɔ́ wɛ è nǎ hun n'i. Lě e é kó nɔ́ bló gbɔn gbɔjɛzán gbe ɔ́, mɔ̌ wɛ é ná sá vɔ̌ tɔn gbɔn. É ká ɖidó tlóló ɔ́, è nǎ sú hɔnnúwa ɔ́. “Ayǐ hɔ́n tɛgbɛ ɔ́, è nǎ sɔ́ lɛ̌ngbɔ́ e kó ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ é ɖokpó dó sá vɔ̌ e è nɔ dó zo ɔ́ nú nyɛ Mawu Mavɔmavɔ. Zǎnzǎn wɛ è nǎ sá vɔ̌ énɛ́ ɔ́. Mɔ̌ ɖokpó ɔ́, zǎnzǎn tɛgbɛ ɔ́, è nǎ nɔ́ sɔ́ linfín kilóo atɔ́ɔ́n, bó ná zé ami lǐtli we dó nya ná dó sá vɔ̌ nú nyɛ Mawu Mavɔmavɔ; vɔ̌ énɛ́ e è ɖɔ è nǎ nɔ́ sá ayǐhɔ́ngbe ayǐhɔ́ngbe ɔ́, è nǎ gbɔ sísá gbeɖé ǎ. Hǔn è ma gbɔ lɛ̌ngbɔ́ví ɔ́ kpó linfín ɔ́ kpódó ami ɔ́ kpó xwlé nyɛ Mawu Mavɔmavɔ zǎnzǎn tɛgbɛ gbeɖé ó.” Xó e Aklúnɔ Mavɔmavɔ ɖɔ ɔ́ ɖíe: “Ényí gǎn ɔ́ kán ayǐkúngban e nyí étɔn é ɖě nú vǐ tɔn lɛ́ɛ ɖě ɔ́, é ná nyí vǐ ɔ́ tɔn bɔ vǐ énɛ́ sín vǐ lɛ́ɛ ná ɖu gǔ tɔn. É ká nyí mɛsɛntɔ́ lɛ́ɛ ɖě wɛ gǎn ɔ́ ká kán ayǐkúngban ɔ́ ná ɔ́, ayǐkúngban ɔ́ ná nyí mɛsɛntɔ́ énɛ́ ɔ́ tɔn káká jɛ xwe e xwe è nɔ ɖu Mɛɖée sí jijɛ xwe ɔ́ é; énɛ́ gúdo ɔ́, ayǐkúngban ɔ́ ná lɛ́ húzú gǎn ɔ́ tɔn, ɖó nǔ e nyí gǎn ɔ́ tɔn lɛ́ɛ ɔ́, vǐ tɔn lɛ́ɛ wɛ ná ɖu gǔ tɔn. Amɔ̌, gǎn ɔ́ ná yí toví ɖé sín nǔ sín así tɔn ǎ. Nǔ e ná nyí vǐ tɔn lɛ́ɛ tɔn ɔ́, nǔ é ɖésú tɔn lɛ́ɛ mɛ wɛ é ná kpɔ́n bó ná ná yě. Énɛ́ ɔ́, è nǎ nya mɛ ɖé sín nǔ e nyí étɔn é kɔn ɖo togun ce mɛ ǎ.” Énɛ́ gúdo ɔ́, nya ɔ́ kplá mì gbɔn ali ɖé nu yi xɔ mímɛ́ e kpan nukɔn taligbé é mɛ, ali ɔ́ ɖo hɔnnúwa ɖé kpá, vɔ̌sánú-xwlémawutɔ́ lɛ́ɛ wɛ è sɔ́ xɔ énɛ́ ɖó te ná; é xlɛ́ fí ɖé mì ɖo tó dɔ̌n, ɖo gbadahwe jí, bó ɖɔ nú mì ɖɔ: “Fí wɛ vɔ̌sánú-xwlémawutɔ́ lɛ́ɛ ná nɔ́ ɖa kanlin e è dǒ sá hwɛsɔ́kɛmɛvɔ́ lɛ́ɛ sín lan ɖe. Fí wɛ yě ná nɔ ɖa nǔníná jinukún tɔn lɛ́ɛ lɔ ɖe. Énɛ́ ɔ́, yě ná sɔ́ nǔ ɖěbǔ wá xwé ɔ́ sín kɔ́xota, bónú togun ɔ́ ná ɖó alɔ nǔ e è sɔ́ ɖó vo nú Mawu ɔ́ wú ǎ.” Énɛ́ ɔ́ gúdo ɔ́, é kplá mì yi xwé ɔ́ sín kɔ́xota, bó kplá mì gbɔn zwe ɛnɛ lɛ́ɛ mɛ; kɔ́xota ɖo zwe ɖokpó ɖokpó jí. Kɔ́xota ɛnɛ énɛ́ lɛ́ɛ hwe bó ɖó jlɛ̌ ɖokpó ɔ́; kɔ́xota ɖokpó ɖokpó sín ga nyí nǔjlɛ́kpo yětɔn kanɖé (40), gblǒ kɔ́xota ɖokpó ɖokpó tɔn nyí nǔjlɛ́kpo yětɔn gban (30). Awǐnnyadó wɛ è mɛ dó xá kɔ́xota ɛnɛ énɛ́ lɛ́ɛ ɖokpó ɖokpó, bɔ myɔkpó gbɔn dǒ lɛ́ɛ wú lɛ́ lɛ̌ dó. Nya ɔ́ ɖɔ nú mì ɖɔ: “Ado e jí mɛ e nɔ wa azɔ̌ ɖo xwé ɔ́ gbe lɛ́ɛ ná nɔ́ ɖa kanlin e togun ɔ́ dó sá vɔ̌ lɛ́ɛ sín lan ɖe lɛ́ɛ wɛ.” Nya ɔ́ lɛ́ kplá mì wá Mawuxɔ ɔ́ lihɛ́nnu; énɛ́ ɔ́, un mɔ sin ɖo tíntɔ́n sín kpekán ɔ́ glɔ́ wɛ, bó ɖo sisa wɛ ɖidó zǎnzǎnhwe jí dɔ̌n. Mawuxɔ ɔ́ zǎnzǎnhwe jí wɛ é kpan nukɔn. Sin ɔ́ ɖo sisa sín Mawuxɔ ɔ́ sín afɔligbé wɛ, bó nɔ́ sa gbɔn vɔ̌sákpe ɔ́ sín afɔligbé. Nya ɔ́ kplá mì tɔ́n sín xwé ɔ́ gbe gbɔn hɔnnúwa taligbé tɔn ɔ́ nu, bó kplá mì lɛ́ lɛ̌ dó xwé ɔ́ káká wá hɔnnúwa zǎnzǎnhwe jí tɔn ɔ́ kɔn, bɔ un mɔ sin ɖo sisa sín hɔnnúwa énɛ́ ɔ́ sín afɔligbé wɛ. Nya ɔ́ kplá mì tunta zǎnzǎnhwe jí, fí e sa yi wɛ sin ɔ́ ɖe é, bó sɔ́ kan e ɖo alɔ tɔn mɛ é bó jlɛ́ nǔjlɛ́kpo yětɔn afatɔ́n (1.000); énɛ́ gúdo ɔ́, é kplá mì gbɔn sin ɔ́ mɛ ɖo fínɛ́; bɔ sin ɔ́ fán mì dó afɔgókɔ. É lɛ́ jlɛ́ nǔjlɛ́kpo yětɔn afatɔ́n (1.000), bó lɛ́ kplá mì gbɔn sin ɔ́ mɛ ɖo fínɛ́, bɔ sin ɔ́ fán mì dó koli. Mǐ yi nukɔn bó lɛ́ bló nǔjlɛ́kpo yětɔn afatɔ́n (1.000), bɔ é lɛ́ kplá mì gbɔn sin ɔ́ mɛ ɖo fínɛ́, din ɔ́, sin ɔ́ fán mì dó alinkan. É lɛ́ vɔ́ jlɛ́ nǔjlɛ́kpo yětɔn afatɔ́n (1.000), amɔ̌, un sɔ́ sixú gbɔn sin ɔ́ mɛ ɖě ǎ. Sin ɔ́ yi do ɖo fínɛ́; tɔ jɛ́n è nǎ lin có bó sixú gbɔn mɛ. Nya ɔ́ ɖɔ nú mì ɖɔ: “Hwɛ gbɛtɔ́ví e, a kpɔ́n ganjí a?” Ée é kan mɔ̌ byɔ́ mì ɔ́, é kplá mì yi zɔ, bɔ é ná nɔ zaanɖé ɔ́, é lɛ́ kplá mì wá tɔ ɔ́ tó. Énɛ́ ɔ́, un wá mɔ ɖɔ atín gbɔn tɔ ɔ́ tó. Nya ɔ́ ɖɔ nú mì ɖɔ: “Tɔ élɔ́ ɔ́, to ɔ́ sín zǎnzǎnhwe jí wɛ é nɔ́ sa yi; é gbɔn Judɛ́ɛn tɔdo ɔ́ mɛ, bo yi jɛ Xu Kúkú ɔ́ mɛ. É sa yi kɔn dó Xu Kúkú ɔ́ mɛ ɔ́, é nɔ́ húzú Xu Kúkú ɔ́ sín sin, bɔ sin ɔ́ nɔ húzú sin ɖagbe. Nǔvíɖogbɛ alɔkpa alɔkpa bǐ ná ji ɖ'é mɛ kɔn nyi kpɔ́, bɔ hweví ná nɔ́ ji kɔn nyi kpɔ́ gbɔn fí e tɔ énɛ́ sín sin ko gbɔn é bǐ. Tɔ énɛ́ sín sin sa yi fí ɖěbǔ ɖo Xu Kúkú ɔ́ mɛ ɔ́, é ná húzú sin ɔ́ ɖo fí énɛ́ bɔ é ná húzú sin ɖagbe bó ná nɔ́ ji nǔvíɖogbɛ. Énɛ́ ɔ́, è nǎ nɔ́ mɔ ɖɔnyitɔ́ bɛ́ sín Eyinu-Gɛdi káká yi Eyinu-Eglayimu, bɔ yě ná nɔ́ xyá ɖɔ yětɔn lɛ́ɛ gbɔn xu ɔ́ tó. È nǎ mɔ hweví alɔkpa alɔkpa ɖo xu ɔ́ mɛ, káká bɔ é ná cí Mɛditɛlanɛ́ɛ xu mɛ ɖɔhun. É ká ɖo mɔ̌ có gba kpó tɔ kpó e ná gbɔn Xu kúkú ɔ́ kpá lɛ́ɛ ná húzú sin ɖagbe ǎ; fí énɛ́ lɛ́ɛ ná nyí jɛgba. Ɖo tɔsisa e gosín Mawu xwé ɔ́ gbe é tó ɔ́, atínsínsɛ́n tɛnmɛ tɛnmɛ ná wú gbɔn aɖisí amyɔ. Yě ná lúnlún ɖa gbeɖé ǎ, yě ná nɔ́ sɛ́n hwebǐnu. Sun ɖokpó ɖokpó mɛ ɔ́, è nǎ nɔ́ gbɛ sínsɛ́n ɖo yě jí, ɖó tɔ e sa sín Mawu xwé ɔ́ gbe é wɛ ná nɔ́ sa gbɔn kɔ yětɔn. Sínsɛ́n yětɔn lɛ́ɛ ná nyí nǔɖuɖu, ama yětɔn ná nyí amasin.” Xó e Aklúnɔ Mavɔmavɔ ɖɔ ɔ́ ɖíe: “Un ná ɖɔ fí e dogbó Izlayɛ́li to ɔ́ tɔn ná gbɔn, bɔ akɔta wěwe e ɖo to ɔ́ mɛ lɛ́ɛ ná má lɛ́ɛ nú mi. Akɔta Jozɛ́fu tɔn ɔ́, ayǐkúngban we wɛ é ná yí. Mi ná má ayǐkúngban e ɖo to ɔ́ mɛ é; mɛɖé má yí hú mɛ ɖé ó. Ɖó nyi wɛ zin alɔ dó akɔ́n bó ɖɔ un na ná Izlayɛ́li to ɔ́ tɔ́gbó mitɔn lɛ́ɛ; hǔn mi wɛ ná ɖu gǔ tɔn. Ɖo totaligbé ɔ́, to ɔ́ sín dogbó ná bɛ́ sín Mɛditɛlanɛ́ɛ xu ɔ́ kɔn, bó ná gbɔn ali e yi Hetlɔ́ni, Lɛbo-Hamáti kpó Sedádi kpó é; é ná gbɔn Belotáyi toxo ɔ́ kpó Sivlayímu toxo ɔ́ kpó mɛ. Toxo énɛ́ lɛ́ɛ ɖo axɔ́súɖuto Damási tɔn, Hamáti tɔn kpó Hasɛ́ɛ-Tikɔ́ni tɔn kpó tɛ́ntin. Hasɛ́ɛ-Tikɔ́ni ɔ́ ɖo malín málín mɛ dó Holáni. Hǔn dogbó énɛ́ ɔ́ ná bɛ́ sín Mɛditɛlanɛ́ɛ xu ɔ́ kɔn káká yi Hasáa-Ɛnáni gletoxo ɔ́ kɔn ɖo zǎnzǎnhwe jí. É fó dó axɔ́súɖuto Damási tɔn ɔ́ kpó Hamáti tɔn ɔ́ kpó kɔn ɖo taligbé; dogbó taligbé tɔn ɔ́ nɛ́. Ɖo zǎnzǎnhwe jí ɔ́, dogbó ɔ́ ná bɛ́ sín fí ɖé ɖo Damási kpó Holáni kpó tɛ́ntin, bó ná gbɔn Judɛ́ɛn tɔdo ɔ́ mɛ, ɖo Galadi kpó Izlayɛ́li to ɔ́ kpo tɛ́ntin, bó ná hun káká yi Tamáa, ɖo Xu Kúkú ɔ́ tó; dogbó zǎnzǎnhwe jí tɔn ɔ́ nɛ́. Ɖo tofɔligbé ɔ́, dogbó ɔ́ ná gosín Tamáa wá Mɛliba tɔ ɔ́ kɔn ɖo Kadɛ́ci, bó ná gbɔn Ejípu tɔ ɔ́ kɔn káká yi Mɛditɛlanɛ́ɛ xu ɔ́ kɔn. Dogbó afɔligbé tɔn ɔ́ nɛ́. Ɖo gbadahwe jí ɔ́, Mɛditɛlanɛ́ɛ xu ɔ́ wɛ ná nyí dogbó bɛ́ sín afɔligbé káká yi Lɛbo-Hamáti ɖo taligbé. Dogbó gbadahwe jí tɔn ɔ́ nɛ́. “Mi ná má to ɔ́ ɖo akɔta mitɔn lɛ́ɛ tɛ́ntin. Akɔ wɛ mi ná nyi dó má ayǐkúngban lɛ́ɛ, bɔ mɛ ɖokpó ɖokpó ná tunwun tɛnmɛ e nyí étɔn é; mi ma ka wɔn jǒnɔ e ɖo tɛ́ntin mitɔn, bó ji vǐ dó to ɔ́ mɛ lɛ́ɛ ó. Mɛ énɛ́ lɛ́ɛ ɔ́, Izlayɛ́li ví ɖɔhun wɛ è nǎ hɛn yě; mi ná hɛn yě togun ɔ́ sín vǐ ɖɔhun, bɔ ayǐkúngban e ná nyí yětɔn ɔ́, mi ná ná yě. Jǒnɔ ɖokpó ɖokpó ná mɔ nǔ e nyí étɔn é yí ɖo akɔta e mɛ é ná ɖe é. Xó e nyɛ Aklúnɔ Mavɔmavɔ ɖɔ ɔ́ nɛ́.” “Nyǐkɔ akɔta e ɖo totaligbé lɛ́ɛ tɔn kpó ayǐkúngban e nyí yětɔn lɛ́ɛ kpó é ɖíe: Dan ɔ́, ayǐkúngban éyɛ́ tɔn ɖo totaligbé dɔ̌n bǐ, ɖo ali e gbɔn Hetlɔ́ni bó gbɔn Lɛbo-Hamáti, bó gbɔn Hasáa-Ɛnáni é kpá. Ayǐkúngban tɔn yá dó axɔ́súɖuto Damási tɔn kpó Hamáti tɔn kpó. É ná gosín to ɔ́ sín dogbó zǎnzǎnhwe jí tɔn ɔ́ jí káká yi Mɛditɛlanɛ́ɛ xu ɔ́ tó ɖo gbadahwe jí. Acɛ́ɛ tɔn bɔdó Dan tɔn wú, sín zǎnzǎnhwe jí káká yi gbadahwe jí. Nɛfutali tɔn bɔdó Acɛ́ɛ tɔn wú, sín zǎnzǎnhwe jí káká yi gbadahwe jí. Manasée tɔn bɔdó Nɛfutali tɔn wú, sín zǎnzǎnhwe jí káká yi gbadahwe jí. Eflayímu tɔn bɔdó Manasée tɔn wú, sín zǎnzǎnhwe jí káká yi gbadahwe jí. Hwlibɛ́ni tɔn bɔdó Eflayímu tɔn wú, sín zǎnzǎnhwe jí káká yi gbadahwe jí, bɔ Judáa tɔn bɔdó Hwlibɛ́ni tɔn wú, sín zǎnzǎnhwe jí káká yi gbadahwe jí.” “È nǎ jó ayǐkúngban e bɔdó ayǐkúngban Judáa tɔn wú sín zǎnzǎnhwe jí káká yi gbadahwe jí ɖo Mɛditɛlanɛ́ɛ xu ɔ́ tó ɔ́ dó. Ayǐkúngban énɛ́ ɔ́ ná ɖó ga ɖokpó ɔ́ xá ayǐkúngban e è nǎ akɔta ɖokpó ɖokpó é, gblǒ tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000); è nǎ sá nyɛ Mawu Mavɔmavɔ sín xwé ɖó ayǐkúngban énɛ́ ɔ́ tɛ́ntin. Ayǐkúngban e ná nyí nyɛ Mawu Mavɔmavɔ tɔn ɔ́, ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn adɔ̌kpo ɖokpó (20.000). Ayǐkúngban e è nǎ sɔ́ nú vɔ̌sánú-xwlémawutɔ́ lɛ́ɛ ɖo ayǐkúngban énɛ́ ɔ́ jí ɔ́ ná ɖó nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000) sín zǎnzǎnhwe jí wá yi gbadahwe jí, bɔ sín totaligbé wá yi tofɔligbé ɔ́, é ná ɖó nǔjlɛ́kpo yětɔn děgba we afɔwó (10.000), bɔ xwé ce ná ɖo ayǐkúngban énɛ́ ɔ́ tɛ́ntin. Akpá énɛ́ ɔ́ xwé ɔ́, vɔ̌sánú-xwlémawutɔ́ Levíi ví Sadɔ́ku ví e è sɔ́ ɖó vo lɛ́ɛ tɔn wɛ é ná nyí. Yě wa azɔ̌ ce ganjí tɔn; yědɛɛ bló Levíi ví lɛ́ɛ ɖɔhun, bó jó nyɛ Mawu dó hwenu e Izlayɛ́li ví lɛ́ɛ jó mì dó é ǎ. Énɛ́ ɔ́ wú wɛ ayǐkúngban e è sɔ́ ɖ'ayǐ nú nyɛ Mawu ɔ́, yě ná yí tɛn mímɛ́ titewungbe ɖé ɖ'é mɛ, ɖo Levíi ví lɛ́ɛ tɔn kpá. Tɛnmɛ Levíi ví lɛ́ɛ tɔn ná cí vɔ̌sánú-xwlémawutɔ́ lɛ́ɛ tɔn ɖɔhun. Ayǐkúngban we lɛ́ɛ ɔ́, ga yětɔn ná nyí nǔjlɛ́kpo yětɔn adɔ̌kpo ɖě děgba ɖě afatɔ́n (25.000), bɔ gblǒ yětɔn ná nyí nǔjlɛ́kpo yětɔn děgba we afɔwó (10.000). Akpá énɛ́ xwé ɔ́, è nǎ sa ayǐkúngban nú mɛɖé ǎ, è nǎ ná mɛɖé ǎ, è ka ná ɖyɔ́ xá mɛɖé ǎ, ɖó ayǐkúngban énɛ́ ɔ́ nǔ tají ɖaxó ɖokpó wɛ é nyí nú mɛ bǐ, ɖó vo wɛ è sɔ́ ɖó nú nyɛ Mawu Mavɔmavɔ.” “Ayǐkúngban e è sɔ́ ɖó vo nú nyɛ Mawu ɔ́, é kpo ayǐkúngban ɖé, bɔ gblǒ tɔn nyí nǔjlɛ́kpo yětɔn děgba ɖě afatɔ́n (5.000), bɔ ga tɔn nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000). Ayǐkúngban énɛ́ ɔ́ ná nyí mɛ bǐ tɔn kpaa, bɔ è nǎ sɔ́ ɖó te nú toxo ɔ́ kpó gle e ná lɛ́ lɛ̌ dó toxo ɔ́ é kpó. Ayǐkúngban énɛ́ ná ɖó gblǒ zɛ̌ɛ́n ga zɛ̌ɛ́n; é ná nyí nǔjlɛ́kpo yětɔn děgba ɖě afɔwe kanwe ko (4.500) ɖo zǎnzǎnhwe jí, děgba ɖě afɔwe kanwe ko (4.500) ɖo gbadahwe jí, děgba ɖě afɔwe kanwe ko (4.500) ɖo afɔligbé ɖo taligbé. Ɖo toxo ɔ́ sín gǔdo nukɔn, aɖisí amyɔ ɔ́, è nǎ jó tɛnmɛ ɖé dó, bɔ gblǒ tɔn ná nyí nǔjlɛ́kpo yětɔn afɔɖé kanɖé wǒ (250). Ɖo ayǐkúngban e è sɔ́ ɖó ayǐ nú nyɛ Mawu ɔ́ kpá ɔ́, è nǎ jó ayǐkúngban we dó, ayǐkúngban ɖokpó ná ɖo zǎnzǎnhwe jí nú toxo ɔ́, ɖokpó ná ɖo gbadahwe jí. Ayǐkúngban we énɛ́ lɛ́ɛ bǐ nǎ ɖǒ jlɛ̌ ɖokpó ɔ́, bɔ ga yětɔn ná nyí nǔjlɛ́kpo yětɔn děgba we afɔwó (10.000). Ayǐkúngban énɛ́ lɛ́ɛ jí wɛ è nǎ nɔ́ mɔ nǔ e mɛ e nɔ wa azɔ̌ ɖo toxo ɔ́ mɛ lɛ́ɛ ná ɖu é ɖe. Mɛ e ɖo azɔ̌ wa wɛ ɖo toxo ɔ́ mɛ lɛ́ɛ ɔ́, yě ná bó nyí akɔta ɖěbǔ ɔ́, yě ná nɔ lɛ gle ɖo ayǐkúngban énɛ́ lɛ́ɛ jí. Ayǐkúngban e è sɔ́ ɖó ayǐ nú nyɛ Mawu Mavɔmavɔ é bǐ ná nyí ayǐkúngban ɖé, bó ná ɖó gblǒ zɛ̌ɛ́n ga zɛ̌ɛ́n, bó ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000); ɛnɛvlɔ́ ná nyí toxo ɔ́ sín ayǐkúngban. Ayǐkúngban e kpo lɛ́ɛ ná nyí gǎn e ɖo to ɔ́ nu ɔ́ tɔn. Ayǐkúngban éyɛ́ tɔn lɛ́ɛ ná ɖo zǎnzǎnhwe jí kpó gbadahwe jí kpó nú ayǐkúngban e è sɔ́ ɖ'ayǐ nú nyɛ Mawu ɔ́ kpó ée è sɔ́ ɖ'ayǐ nú toxo ɔ́ é kpó; gblǒ tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000); éé ɖo zǎnzǎnhwe jí ɔ́ zɔn mɔ̌ káká yi to ɔ́ sín dogbó e ɖo zǎnzǎnhwe jí ɔ́ jí, éé ɖo gbadahwe jí ɔ́ zɔn mɔ̌ káká yi Mɛditɛlanɛ́ɛ xu ɔ́ kɔn. Énɛ́ ɔ́, ayǐkúngban e è sɔ́ ɖó vo nú mì ɔ́ kpó éé è sɔ́ ɖó vo nú xwé ce ɔ́ kpó ná ɖo éé è sɔ́ ɖó vo nú gǎn ɔ́ é tɛ́ntin. Ayǐkúngban Levíi ví lɛ́ɛ tɔn kpó fí e toxo ɔ́ ɖe é kpó ná gbo gǎn ɔ́ sín ayǐkúngban ɔ́ ɖó we, bɔ Judáa sín ayǐkúngban ɔ́ ná ɖo totaligbé, bɔ Bɛnjamɛ́ɛ tɔn ná ɖo afɔligbé.” “Nyǐkɔ akɔta ɖě lɛ́ɛ e kpo lɛ́ɛ tɔn kpó ayǐkúngban e nyí yětɔn lɛ́ɛ kpó ɖíe: Bɛnjamɛ́ɛ ɔ́, ayǐkúngban éyɛ́ tɔn gosín dogbó zǎnzǎnhwe jí tɔn ɔ́ jí káká yi Mɛditɛlanɛ́ɛ xu ɔ́ tó ɖo gbadahwe jí. Sinmɛnyɔ́ɔ tɔn bɔdó Bɛnjamɛ́ɛ tɔn wú, sín zǎnzǎnhwe jí káká yi gbadahwe jí. Isakáa tɔn bɔdó Sinmɛnyɔ́ɔ tɔn wú, sín zǎnzǎnhwe jí káká yi gbadahwe jí. Zabulɔ́ɔn tɔn bɔdó Isakáa tɔn wú, sín zǎnzǎnhwe jí káká yi gbadahwe jí. Gadi tɔn bɔdó Zabulɔ́ɔn tɔn wú, sín zǎnzǎnhwe jí káká yi gbadahwe jí. Fí e Gadi sín ayǐkúngban ná nɔ te ɔ́ wɛ ná nyí to ɔ́ sín dogbó. É ná bɛ́ sín Tamáa ɖo zǎnzǎnhwe jí, bó ná gbɔn Mɛliba tɔ ɔ́ kɔn ɖo Kadɛ́ci, bó ná wá gbɔn Ejípu tɔ ɔ́ tó káká yi Mɛditɛlanɛ́ɛ xu ɔ́ tó. Lě e mi ná ná ayǐkúngban e ná nyí akɔta Izlayɛ́li tɔn lɛ́ɛ ɖokpó ɖokpó tɔn ɛ gbɔn é nɛ́. Xó e nyɛ Aklúnɔ Mavɔmavɔ ɖɔ ɔ́ nɛ́.” Dǒdɔn e ɖo zǎnzǎnhwe jí dɔ̌n ɔ́ lɔ ná ɖó hɔnnúwa atɔn; hɔnnúwa Jozɛ́fu tɔn, Bɛnjamɛ́ɛ tɔn kpó Dan tɔn kpó; dǒ énɛ́ lɔ sín ga nyí nǔjlɛ́kpo yětɔn děgba ɖě afɔwe kanwe ko (4.500). Dǒdɔn afɔligbé tɔn ɔ́ lɔ ɖó ga ɖokpó ɔ́; é lɔ ná ɖó hɔnnúwa atɔn: hɔnnúwa Sinmɛnyɔ́ɔ tɔn, Isakáa tɔn kpó Zabulɔ́ɔn tɔn kpó. Dǒdɔn gbadahwe jí tɔn ɔ́ lɔ ɖó ga ɖokpó ɔ́; é lɔ na ɖó hɔnnúwa atɔn: hɔnnúwa Gadi tɔn, Acɛ́ɛ tɔn kpó Nɛfutali tɔn kpó. Dǒ e lɛ́ lɛ̌ dó toxo ɔ́, ga tɔn bǐ nyí nǔjlɛ́kpo yětɔn děgba ɛnɛ afɔwó (18.000). “Sín gbe énɛ́ gbe ɔ́, è nǎ nɔ ylɔ́ toxo ɔ́ ɖɔ: ‘Mawu Mavɔmavɔ ɖo fí.’ ” Hwenu e Yoyakímu Judáa xɔ́sú ɔ́ ɖo xwe atɔn bló wɛ ɖo zinkpo jí ɔ́, Axɔ́sú Babilɔ́nu tɔn Nabukodonɔzɔ́ɔ wá tɔ́n ahwan Jeluzalɛ́mu toxo ɔ́ bó yí. Aklúnɔ jó Yoyakímu dó, bɔ Nabukodonɔzɔ́ɔ ɖu ɖo jǐ tɔn, bó lɛ́ jó nǔzínzán e è nɔ dó wa azɔ̌ ná ɖo sinsɛnxɔ Mawu tɔn mɛ lɛ́ɛ ɖě dó n'i. Nabukodonɔzɔ́ɔ wlí gbɛtɔ́ gěgé yi kannumɔgbénu ɖo Babilɔ́nu, bó bɛ́ nǔzínzán e é hɛn wá lɛ́ɛ yi dó vodún tɔn lɛ́ɛ xwé, ɖo xɔ e mɛ è nɔ kplé vodún tɔn lɛ́ɛ sín dɔkun lɛ́ɛ dó é mɛ. Nabukodonɔzɔ́ɔ ná gbe azaglɔ́gán tɔn Acipenázi ɖɔ é ní kpɔ́n Izlayɛ́li ví lɛ́ɛ mɛ, bó cyán súnnuví e jɔ ɖo axɔ́sú kún mɛ, abǐ éé jɔ ɖo mɛjɔmɛ hɛ́nnu mɛ lɛ́ɛ é ɖě. Súnnuví énɛ́ lɛ́ɛ ɖó ná ɖó blɔ̌ ɖěbǔ ɖo wǔ ǎ; ninɔmɛ yětɔn ɖó ná nyɔ́ kpɔ́n. Wǔ ɖó ná yá yě, bɔ nǔnywɛ́ ná kpé yě. Yě ɖó ná tunwun nǔ, bó ɖó ná nɔ mɔ nukúnnú jɛ nǔ mɛ. Gbɛtɔ́ mɔ̌hunkɔtɔn wɛ yě ɖó ná nyí cóbó ná sixú wa azɔ̌ ɖo axɔ́sú ɔ́ sín hɔnmɛ. È nǎ kplɔ́n Babilɔ́nunu lɛ́ɛ sín gbe yě, bó ná kplɔ́n wlǎnwlán tɔn yě. Axɔ́sú ɔ́ ná gbe ɖɔ è nǐ nɔ́ ná nǔɖuɖu e émí nɔ́ ɖu ɔ́ kpó vɛ̌ɛn e émí nɔ́ nu ɔ́ kpó yě ayǐhɔ́ngbe ayǐhɔ́ngbe, bó ná hɛn yě káká nú xwe atɔn. Nú yě bló xwe atɔn énɛ́ lɛ́ɛ vɔ ɔ́, yě ná jɛ azɔ̌ wa nú axɔ́sú ɔ́ jí. Judáa sín súnnu wínnyáwínnyá ɛnɛ ka ɖo mɛ e è cyán lɛ́ɛ mɛ. Mɛ ɖokpó nɔ nyí Daniyɛ́li, mɛ ɖěvo nɔ nyí Hananiya, mɛ ɖěvo nɔ nyí Micaɛ́li, bɔ mɛ ɖěvo nɔ nyí Azalya. Mɛ e kpa acɛ nú mɛ e nɔ wa azɔ̌ ɖo hɔnmɛ lɛ́ɛ ɔ́ ná nyǐkɔ ɖěvo yě. É sun nyǐ Daniyɛ́li ɖɔ Bɛluticasáa, bó sun nyǐ Hananiya ɖɔ Cadlaki, bó sun nyǐ Micaɛ́li ɖɔ Mɛcáki, bó sun nyǐ Azalya ɖɔ Abɛ́di-Nɛgó. Daniyɛ́li ka tunwun dó ayi tɔn mɛ ɖɔ émí kún ná kpɔ́n dó nǔɖuɖu e axɔ́sú ɔ́ nɔ́ ɖu ɔ́, kpó vɛ̌ɛn e é nɔ́ nu ɔ́ kpó wú, bó ná hɛn émíɖée blí ó. Ée é mɔ mɔ̌ ɔ́, é cikpɛ nú gǎn ɔ́ ɖɔ é ní má hɛn émí blí ó. Mawu bló bɔ gǎn ɔ́ yí gbe nú nǔ e Daniyɛ́li ɖɔ ɔ́, bó mɔ ɖɔ é nyɔ́. É ká lɛ́ ɖɔ nú Daniyɛ́li ɖɔ: “Xɛsi ɖo ɖiɖi mì wɛ, ɖó Sɛ́mɛɖó ce axɔ́sú ɔ́ wú. É ɖésú wɛ ɖɔ nǔ e mi ná ɖu ɔ́ kpó nǔ e mi ná nu ɔ́ kpó. Nú é wá mɔ ɖɔ mi kún ɖo ganjí ɖo agbaza mɛ, mɛ ɖě lɛ́ɛ ɖɔhun ó ɔ́, un ná sɔ́ ta ce ɖó axɔ́nu ɖo gɔ̌n tɔn, ɖó mi wú.” Lo ɔ́, Daniyɛ́li ɖɔ nú nya e gǎn ɔ́ zé ɖó akɔn nú yě ɔ́ ɖɔ é ní kpé nukún dó Hananiya kpó Micaɛ́li, kpó Azalya kpó émí kpó wú, bó ɖɔ n'i ɖɔ: “Nǔ e byɔ́ we wɛ un ɖe ɔ́ ɖíe: a nǎ nɔ́ ná mǎ kpó sin kpó mǐ káká nú azǎn wǒ, bó ná kpɔ́n lě e mǐ ná cí ɔ́. Nú a blǒ mɔ̌ lo ɔ́, a nǎ jlɛ́ ninɔmɛ mǐtɔn dó mɛ ɖě lɛ́ɛ éé ɖo nǔɖuɖu ɖokpó ɔ́ ɖu xá axɔ́sú ɔ́ wɛ lɛ́ɛ ɔ́ tɔn wú. Lě e a nǎ mɔ mǐ gbɔn ɔ́ ná xlɛ́ we lě e a nǎ nɔ́ hɛn mǐ gbɔn ɔ́.” Nya ɔ́ yí gbe nú nǔ e Daniyɛ́li ɖɔ ɔ́, bó ná mǎ kpó sin kpó Daniyɛ́li kpó hǎgbɛ́ tɔn lɛ́ɛ kpó káká nú azǎn wǒ. Ée azǎn wǒ lɛ́ɛ wá yi ɔ́, è mɔ ɖɔ yě ɖo ganjí ɖo agbaza mɛ, bó lɛ́ mɔ lanmɛ hú mɛ e nɔ ɖu nǔɖuɖu ɖagbe e axɔ́sú ɔ́ ɖɔ yě ní nɔ́ ɖu lɛ́ɛ é. Énɛ́ ɔ́ wú wɛ nya e ɖo yě jí kpɔ́n wɛ ɔ́ lɛ́ jɛ nǔɖuɖu e nyí yětɔn ɔ́ kpó vɛ̌ɛn e nyí yětɔn ɔ́ kpó zé ɖó vo jí, bó nɔ́ ná mǎ kɛ́ɖɛ́ yě. Dɔ̌nkpɛvú ɛnɛ lɛ́ɛ ɔ́, Mawu ná yě nukúnnú-mɔjɛnǔmɛ, bó ná yě nǔtunwuntunwun, bɔ yě se gbe lɛ́ɛ, bó lɛ́ ɖó nǔnywɛ́. Daniyɛ́li ɔ́, éyɛ́ nɔ́ tín nǔmimɔ kpó dlɔ̌ lɛ́ɛ kpó mɛ. Azǎn e axɔ́sú ɔ́ ɖó bɔ è nǎ kplá dɔ̌nkpɛvú e è cyán lɛ́ɛ wá ɔ́ sɔgbe, bɔ nya e kpa acɛ dó mɛ e nɔ wa azɔ̌ ɖo hɔnmɛ lɛ́ɛ nu ɔ́ kplá yě wá axɔ́sú Nabukodonɔzɔ́ɔ nukɔn. Axɔ́sú ɔ́ ɖɔ xó xá yě, bó mɔ ɖɔ mɛ ɖé kún ɖo yě mɛ bó ɖó nǔnywɛ́ sɔ Daniyɛ́li kpó Hananiya, kpó Micaɛ́li kpódó Azalya kpó ó. Bɔ yě mɛ ɛnɛ énɛ́ lɛ́ɛ jɛ azɔ̌ wa jí. Nǔ e ná nyí nǔ bó ná byɔ́ ɖɔ è nǎ ɖó nǔnywɛ́ kpó nukúnnú-mɔjɛnǔmɛ kpó cóbó kɛ nu d'é wú ɔ́, ényí axɔ́sú ɔ́ kan nǔ byɔ́ yě dó ɖěbǔ jí ɔ́, xósin e yě nɔ́ ná ɔ́ nɔ́ mɛ́ hú ée nǔkantɔ́ lɛ́ɛ kpó majíkiblótɔ́ e ɖo axɔ́súɖuto ɔ́ mɛ é kpó nɔ́ ná ɔ́ azɔn wǒ. Daniyɛ́li nɔ axɔ́sú ɔ́ sín acɛ mɛ káká jɛ hwenu e Silúsi wá yi gǎnzinkpo jí é. Hwenu e axɔ́sú Nabukodonɔzɔ́ɔ ɖo xwe we bló wɛ ɖo zinkpo jí ɔ́, é kú dlɔ̌ ɖokpó, bɔ ayi tɔn bǐ gbadó, bɔ adɔ̌ vɛ́ ɛ. Énɛ́ ɔ́, é ɖɔ è nǐ ylɔ́ nǔkantɔ́ lɛ́ɛ, majíkiblótɔ́ lɛ́ɛ, azětɔ́ lɛ́ɛ, kpó azɔnɖatɔ́ lɛ́ɛ kpó wá, bónú yě ná ɖɔ nǔ e émí mɔ ɖo dlɔ̌ mɛ ɔ́ nú émí. Ée yě wá ɔ́, yě nɔ te ɖo nukɔn tɔn, bɔ é ɖɔ nú yě ɖɔ: “Un kú dlɔ̌ ɖé, bɔ é hu ado nú mì taala. Un jló ɖɔ mi ní ɖɔ nǔ e un mɔ ɖo dlɔ̌ mɛ ɔ́ nú mì.” Azɔnɖatɔ́ lɛ́ɛ yí gbe nú axɔ́sú ɔ́ dó alamugbe mɛ ɖɔ: “Sɛ́mɛɖó, jidɔ́ mɛtɔn ní nyí káká. Mɛ ní ɖɔ dlɔ̌ e mɛ kú ɔ́ nú mǐ, nú mǐ ná tínmɛ nú mɛ.” Axɔ́sú ɔ́ yí gbe nú yě ɖɔ: “Un ko ɖɔ bó tɛ afɔ jí ɖɔ nú mi ma ɖɔ nǔ e un mɔ ɖo dlɔ̌ e un kú ɔ́ mɛ ɔ́ nú mì, bó ná tínmɛ tɔn mì ǎ ɔ́, un ná já mi lan ɖɔhun, bó ná gba xwé mitɔn bǐ hánnyá. Ényí mi ka ɖɔ dlɔ̌ e un kú ɔ́ nú mì ɔ́, un ná dó dɔkun nú mi, bó ná wlí yɛ̌yi nú mi ɖaxó. Din ɔ́, mi bó ɖɔ nǔ e un mɔ ɖo dlɔ̌ mɛ ɔ́ nú mì, bó tínmɛ nú mì.” Azɔnɖatɔ́ lɛ́ɛ lɛ́ ɖɔ nú axɔ́sú ɔ́ azɔn wegɔ́ ɔ́ ɖɔ: “Sɛ́mɛɖó, mɛ vɛ́ ɖɔ dlɔ̌ e mɛ kú ɔ́ nú mǐ, bónú mǐ ná sixú tínmɛ nú mɛ.” Axɔ́sú ɔ́ lɛ́ yí xó bó ɖɔ: “Un mɔ din ɖɔ tɛn ba wɛ mi ɖe, bó ná yí agbɔ̌n kpɛɖé, ɖó gbeta e un ɖe tɔ́n ɔ́, un ɖɔ bó tɛ afɔ jí. Ényí mi ma ɖɔ dlɔ̌ ɔ́ nú mì ǎ ɔ́, hwɛ e un ná ɖó nú mi ɔ́, mɛɖé ná hwe ɖ'é mɛ ǎ. Mi ɖo tagbesɔ yi wɛ, bó ná jɛ adingban ɖó nú mì jí, bó ná jɛ awo ɖó nú mì jí, káká bɔ nǔ lɛ́ɛ bǐ ná húzú. Mi bó yá wǔ ɖɔ dlɔ̌ e un kú ɔ́ nú mì, cóbónú má tunwun ɖɔ mi hɛn ɔ́, mi ná ná tínmɛ tɔn mì.” Azɔnɖatɔ́ lɛ́ɛ yí gbe nú axɔ́sú ɔ́ ɖɔ: “Mɛ ɖěbǔ ɖo gbɛ ɔ́ mɛ bó ná sixú ɖɔ nǔ e ba wɛ axɔ́sú ɔ́ ɖe ɔ́ ǎ. Axɔ́sú ɖěbǔ ná bó syɛ́n bó ɖó acɛ gbɔn ɖěbǔ ɔ́, é ná byɔ́ nǔ mɔ̌hunkɔtɔn majíkiblótɔ́, abǐ azětɔ́, abǐ azɔnɖatɔ́ ɖěbǔ kpɔ́n ǎ. Nǔ e ba wɛ axɔ́sú ɔ́ ɖe ɔ́ dín gbě, bɔ mɛ ɖěbǔ sixú ná ɛ tínmɛ tɔn ǎ; vodún jɛ́n é ná nyí; vodún lɛ́ɛ sín nɔtɛn ɖíe ma ka ɖo gbɛtɔ́ lɛ́ɛ mɛ ǎ e.” Ée yě ɖɔ mɔ̌ ɔ́, axɔ́sú ɔ́ sin xomɛ bó bɛ́ adǎn, bó ná gbe ɖɔ è nǐ hu nǔnywɛ́tɔ́ e ɖo Babilɔ́nu lɛ́ɛ bǐ, bɔ è jlǎ gbɔn fí bǐ ɖɔ è nǎ hu nǔnywɛ́tɔ́ lɛ́ɛ. Hǔn Daniyɛ́li kpó hǎgbɛ́ tɔn lɛ́ɛ kpó ɔ́, è nǎ hu yě lɔ. Alyɔki sɔ́ja e nɔ cɔ́ axɔ́sú ɔ́ lɛ́ɛ sín gǎn ɔ́ xwe nǔnywɛ́tɔ́ e ɖo Babilɔ́nu lɛ́ɛ hu gbé, bɔ Daniyɛ́li sɔ́ ayi dó ɖɔ xó n'i kpó sísí kpó. É kanbyɔ́ ɛ ɖɔ étɛ́wú gbeta e axɔ́sú ɔ́ ɖe tɔ́n ɔ́ ka syɛ́n sɔ mɔ̌ a jí, bɔ Alyɔki tín nǔ e wú wɛ ɔ́ mɛ n'i. Ée Daniyɛ́li se xó ɔ́ é ɔ́, é sɔ́ nǔ tlóló, bó yi mɔ axɔ́sú ɔ́, bó sa vo n'i ɖɔ é ní nɔ te kpɔ́n émí kpɛɖé nú émí ná wá tín nǔ e sín dlɔ̌ e é kú ɔ́ mɛ n'i. Énɛ́ ɔ́ gúdo ɔ́, Daniyɛ́li lɛ́ kɔ wá yi xwé gbe, bó wlí xó ɔ́ ɖɔ nú hǎgbɛ́ tɔn Hananiya, Micaɛ́li kpó Azalya kpó, lobo ɖɔ nú yě ɖɔ yě ní byɔ́ nǔbláwǔkúnúmɛ Mawu tɔn sín sɛ́xwé, nú Mawu ní ɖe dlɔ̌ mamɔdoná énɛ́ ɔ́ xlɛ́ émí, bónú è ma wá hu émí kpó nǔnywɛ́tɔ́ Babilɔ́nu tɔn lɛ́ɛ kpó ó. Énɛ́ ɔ́, Mawu ɖe nǔbúdo énɛ́ ɔ́ xlɛ́ Daniyɛ́li ɖo dlɔ̌ mɛ, bɔ Daniyɛ́li jɛ Mawu sɛ́xwé tɔn ɔ́ mlá jí, bó nɔ́ ɖɔ: “Mi nú mǐ ná dó kú nú Mawu káká sɔ́yi É wɛ ɖó nǔnywɛ́, bó ɖó acɛ. É wɛ nɔ́ húzú hwenu lɛ́ɛ. É wɛ nɔ́ húzú nǔ e ɖo jijɛ wɛ lɛ́ɛ. É wɛ nɔ́ ɖe axɔ́sú sín gǎnzinkpo jí. É wɛ nɔ́ zé mɛ axɔ́sú. É wɛ nɔ́ ná nǔnywɛ́ nǔnywɛ́tɔ́ lɛ́ɛ. É wɛ nɔ́ ná nukúnnú-mɔjɛnǔmɛ nukúnnú-mɔjɛnǔmɛtɔ́ lɛ́ɛ. É wɛ nɔ́ ɖe nǔbúdo e ɖo hwlǎhwlá lɛ́ɛ xlɛ́. É tunwun nǔ e ɖo zǐnflú mɛ lɛ́ɛ, wěziza ɔ́, gɔ̌n tɔn wɛ é ɖe. Mawu tɔ́gbó ce lɛ́ɛ tɔn, un ɖo susu kpa nú we wɛ. Un ɖo mlǎmlá we wɛ, ɖó nǔnywɛ́ kpó hlɔ̌nhlɔ́n kpó e a nǎ mì ɔ́ wú, ɖó nǔ e mǐ byɔ́ we ɔ́, a ɖe xlɛ́ mǐ.” Ée Daniyɛ́li kpa susu nú Mawu fó ɔ́, é ɖidó Alyɔki gɔ́n. Alyɔki ɔ́ wɛ axɔ́sú ɔ́ ná gbe ɖɔ é ní hu nǔnywɛ́tɔ́ e ɖo Babilɔ́nu lɛ́ɛ. Ée Daniyɛ́li wá Alyɔki gɔ́n tlóló ɔ́, é ɖɔ n'i ɖɔ: “Ma hu nǔnywɛ́tɔ́ e ɖo Babilɔ́nu lɛ́ɛ ó! Wǎ kplá mì yi axɔ́sú ɔ́ gɔ́n, bónú má tín dlɔ̌ e é kú ɔ́ mɛ n'i.” Ée Alyɔki se mɔ̌ ɔ́, é kplá Daniyɛ́li yi axɔ́sú ɔ́ gɔ́n tlóló bó ɖɔ: “Sɛ́mɛɖó, un mɔ mɛ ɖokpó ɖo mɛ e è wlǐ sín Judáa lɛ́ɛ mɛ, bɔ é ná tín dlɔ̌ e mɛ kú ɔ́ mɛ nú mɛ.” Axɔ́sú ɔ́ yí xó, bó kanbyɔ́ Daniyɛ́li e è sun nyǐ ɖɔ Bɛluticasáa ɔ́ ɖɔ: “A sixú ɖɔ dlɔ̌ e un kú ɔ́, bó tínmɛ nú mì a?” Daniyɛ́li yí gbe nú axɔ́sú ɔ́ ɖɔ: “Sɛ́mɛɖó, nǔ e búdo dó mɛ ɔ́, mɛ ɖěbǔ sixú tínmɛ nú mɛ ǎ. Nǔnywɛ́tɔ́ lɛ́ɛ, majíkiblótɔ́ lɛ́ɛ, nǔkantɔ́ lɛ́ɛ, azɔnɖatɔ́ lɛ́ɛ ɖěbǔ sixú tínmɛ nú mɛ ǎ. Amɔ̌, Mawu ɖokpó ɖo sɛ́xwé, bó nɔ́ ɖe nǔbúdo lɛ́ɛ xlɛ́ mɛ. Axɔ́sú Nabukodonɔzɔ́ɔ, Mawu énɛ́ ɔ́ wɛ ná ɖɔ nǔ e ná jɛ sɔ ɔ́ nú mɛ. Din ɔ́, nǔ e è mɔ ɖo dlɔ̌ mɛtɔn mɛ ɔ́ ɖíe: Sɛ́mɛɖó, hwenu e mɛ ɖo adɔ̌zan mɛtɔn jí ɔ́, mɛ ɖo nǔ lin sɛ́ dó nukɔn mɛ wɛ, bɔ mɛ e nɔ ɖe nǔbúdo lɛ́ɛ xlɛ́ mɛ ɔ́ xlɛ́ mɛ nǔ e ná wá jɛ sɔ gúdo é. É nyí nǔnywɛ́ ce hú gǎn gbɛtɔ́ e ɖo gbɛ lɛ́ɛ bǐ tɔn wú wɛ Mawu ɖe nǔbúdo élɔ́ xlɛ́ mì ǎ; lo ɔ́, mɛɖé ná tín dlɔ̌ ɔ́ mɛ nú mɛ bó ná ɖɔ nǔ e ɖo ayi mɛtɔn mɛ ɔ́ nú mɛ wú wɛ. Sɛ́mɛɖó, mɛ ɖo nǔ kpɔ́n wɛ bó mɔ bǒcyɔ ɖaxó ɖokpó; bǒcyɔ ɔ́ sɔ́ avɔ ɖésú; ɖɛkpɛ tɔn vɛ́ jlɛ́. Bǒcyɔ ɔ́ ɖo te nukɔn mɛtɔn, bɔ ninɔmɛ tɔn jí wǔ. Ta tɔn nyí siká akú; akɔ́nnu tɔn kpó awa tɔn lɛ́ɛ kpó nyí kpatágan; adɔgo tɔn kpó asá tɔn lɛ́ɛ kpó nyí ganvɔ. Zǎkɛ́tɛ́ tɔn lɛ́ɛ nyí gan. Afɔkpákpá tɔn lɛ́ɛ fí ɖě nyí gan bɔ fí ɖě nyí ko. Bǒcyɔ ɔ́ kpɔ́n wɛ mɛ ɖe, bɔ awǐnnya ɖé nɔ yǎyá, bó blí sín dɔ̌n bó wá xo bǒcyɔ ɔ́ dó afɔkpákpá e fí ɖě nyí gan, bɔ fí ɖě nyí ko é, bɔ yě gba hánnyá. Đo nukúnxwixwe ɖokpó mɛ ɔ́, gan e ɖ'é mɛ é, ko e ɖ'é mɛ é, ganvɔ e ɖ'é mɛ é, kpatágan e ɖ'é mɛ é, kpó siká e ɖ'é mɛ é kpó bǐ gúdú, bó húzú afúntúntún, bɔ jɔhɔn d'alɔ mɛ bó dɔn yi lě e è ɖo jinukún fún wɛ ɔ́, jɔhɔn nɔ d'alɔ wɔn tɔn mɛ é ɖɔhun. Bǒcyɔ ɔ́, è sɔ́ mɔ wǔjɔnú tɔn ɖěbǔ ǎ. Awǐnnya e ká wá xo bǒcyɔ ɔ́ húzú só ɖaxó bó cyɔ́n ayǐkúngban ɔ́ bǐ. “Sɛ́mɛɖó, dlɔ̌ e mɛ kú ɔ́ nɛ́. Din ɔ́, tínmɛ tɔn ká ɖíe: Mɛ wɛ kpa acɛ nú axɔ́sú lɛ́ɛ bǐ. Mawu sɛ́xwé tɔn ná axɔ́súɖuɖu mɛ, bó ná acɛ mɛ, bó ná hlɔ̌nhlɔ́n mɛ, bó ná susu mɛ. É sɔ́ gbɛtɔ́ kpó kanlin kpó, kpódó xɛ kpó ɖó acɛ mɛtɔn mɛ. Yě ɖo fí ɖěbǔ ɔ́, mɛ wɛ ɖo gǎn yětɔn nyí wɛ. Hǔn Sɛ́mɛɖó, mɛ wɛ nyí ta e è sɔ́ siká dó bló é. Nú axɔ́súɖuto mɛtɔn wá yi ɔ́, axɔ́súɖuto ɖěvo ná wá; é ká ná ɖó acɛ sɔ mɛtɔn ǎ. Axɔ́súɖuto atɔngɔ́ ɔ́ ná wá, bó ná gba kpé ayǐkúngban ɔ́ bǐ jǐ. Axɔ́súɖuto énɛ́ ɔ́ wɛ ɖo ganvɔ ɔ́ nyí wɛ. Axɔ́súɖuto ɛnɛgɔ́ ɔ́ ná jɛ fínɛ́; éyɛ́ ná syɛ́n ɖi gan. Lě e è nɔ zé gan dó gba nǔ hánnyá, bó nɔ li bɔ é nɔ́ mɛ́ kpɔ́ɖɔ́kpɔ́ɖɔ́ ɔ́ ɖɔhun wɛ axɔ́súɖuto énɛ́ ɔ́ ná gba, bó ná li axɔ́súɖuto e jɛ nukɔn n'i lɛ́ɛ bǐ. Lě e mɛ ko mɔ gbɔn ɔ́, bǒcyɔ ɔ́ sín afɔkpákpá lɛ́ɛ, kpó afɔví tɔn lɛ́ɛ kpó ɔ́, ko ɖě gan ɖě wɛ. É ɖo ɖiɖe xlɛ́ wɛ ɖɔ axɔ́súɖuto ɔ́ sín gbe kún ná nɔ kpɔ́ ó. Axɔ́súɖuto énɛ́ ɔ́ ná ɖó nǔɖé, bɔ nǔ ɔ́ ná syɛ́n gan ɖɔhun, ɖó mɛ ɖésúnɔ mɔ ɖɔ gan kpó ko kpó wɛ ɖo bǔ. Ée afɔví lɛ́ɛ ɖě nyí gan, bɔ ɖě nyí ko, bɔ yě bǐ ká ɖo bǔ ɔ́, énɛ́ ɖo ɖiɖe xlɛ́ wɛ ɖɔ axɔ́súɖuto ɔ́ akpá bǔ ná dó hlɔ̌nhlɔ́n, bó syɛ́n gan ɖɔhun, bɔ akpá bǔ ná vɔ́ da. Xlɛ́ tɔn lɛ́ɛ ka ná syɛ́n ǎ. Lě e gan kpó ko kpó má nɔ́ nɔ bǔ ǎ é ɖɔhun jɛ́n ná cí. Axɔ́sú énɛ́ lɛ́ɛ sín hwenu ɔ́, Mawu sɛ́xwé tɔn ná ɖe axɔ́súɖuto e mɛɖé má sixú gba ǎ é ɖokpó tɔ́n. Acɛkpikpa tɔn ná jɛ akɔta ɖěvo sí gbeɖé ǎ. Axɔ́súɖuto énɛ́ ɔ́ ná gba axɔ́súɖuto e ko ɖo ayǐ lɛ́ɛ bǐ, bó ná hu acɛ nú yě, bɔ yě sɔ́ ná tíin nyǐ ǎ. Lo ɔ́, éyɛ́ ná nɔ te káká sɔ́yi. Nǔ e nyí wɛ awǐnnya e mɛɖé ma sɛ́ dó ǎ, bɔ é nɔ́ yǎyá, bó gosín só jí, bó wá gba gan kpó ganvɔ kpó, ko kpó kpatágan kpó, kpódó siká kpó e è dǒ bló bǒcyɔ ɔ́ ná lɛ́ɛ é nɛ́. Sɛ́mɛɖó ce, Nǔ e ɖo ná jɛ wɛ é wɛ Mawu ɖaxó bǐ ɔ́ ɖe xlɛ́ mɛ. Dlɔ̌ titewungbe wɛ mɛ kú, bɔ tínmɛ e é ɖó tawun ɔ́ jɛ́n un ɖɔ nú mɛ nɛ́.” Bɔ axɔ́sú Nabukodonɔzɔ́ɔ xwe agbɔ̌nnusú do ɖo Daniyɛ́li sá mɛ, bó ɖe kɔ́, bó sɔ́ ɛ su, bó zɔ́n ɖɔ è nǐ sá vɔ̌ n'i, bó ná ɛ nǔsáwǔ. Bó ká ɖɔ nú Daniyɛ́li ɖɔ: “Mawu mitɔn hú gǎn vodún lɛ́ɛ bǐ nǔgbó; é wɛ nyí Aklúnɔ axɔ́sú lɛ́ɛ tɔn. É ɖokpó jɛ́n nɔ ɖe nǔbúdo lɛ́ɛ xlɛ́ mɛ; ɖó é bló din bɔ dlɔ̌ élɔ́ e mɛ un má mɔ nǔ jɛ ǎ ɔ́, a kpé wú bó tínmɛ nú mì.” Énɛ́ ɔ́ gúdo ɔ́, axɔ́sú ɔ́ sɔ́ Daniyɛ́li su, bó ná ɛ nǔ ɖagbe ɖagbe gěgé. É sɔ́ Daniyɛ́li tokpɔngán ɖo tokpɔn Babilɔ́nu tɔn nu. É lɛ́ sɔ́ gǎn Daniyɛ́li bɔ é kpa acɛ dó nǔnywɛ́tɔ́ e ɖo Babilɔ́nu lɛ́ɛ bǐ nu. Daniyɛ́li byɔ́ axɔ́sú ɔ́ ɖɔ é ní zé Cadlaki kpó Mɛcáki kpó, kpódó Abɛ́di-Nɛgó kpó ɖó nǔjíkpɔ́ntɔ́ sín tɛnmɛ ɖo tokpɔn Babilɔ́nu tɔn mɛ. É ká zé Daniyɛ́li bɔ é húzú nǔnywɛ́námɛtɔ́ ɖo axɔ́sú ɔ́ sín agba jí. Axɔ́sú Nabukodonɔzɔ́ɔ zɔ́n sikábócyɔ ɖokpó. Ga tɔn yi nǔjlɛ́kpo gban (30) mɔ̌, gbló tɔn yi nǔjlɛ́kpo atɔn mɔ̌. É sɔ́ bǒcyɔ ɔ́ yi ɖó Dula sín tɔdomɛ, ɖo tokpɔn Babilɔ́nu tɔn mɛ. Axɔ́sú ɔ́ sɛ́ wɛn dó tokpɔnjíkpɔ́ntɔ́ lɛ́ɛ, nǔjíkpɔ́ntɔ́ lɛ́ɛ, tokpɔngán lɛ́ɛ, hwɛɖɔtɔ́ ɖaxó ɖaxó lɛ́ɛ, akwɛ́hɛntɔ́ lɛ́ɛ, nǔkplɔ́nmɛtɔ́ lɛ́ɛ, hwɛɖɔtɔ́ kpɛví kpɛví lɛ́ɛ, kpódó axɔ́súzɔ́watɔ́ ɖaxó ɖaxó e ɖo tokpɔn ɔ́ mɛ lɛ́ɛ kpó. Axɔ́sú ɔ́ ylɔ́ yě bónú yě ná wá nɔ te, bɔ é ná hun bǒcyɔ e é tun te ɔ́ xlɛ́ mɛ bǐ. Azɔ̌watɔ́ ɖaxó ɖaxó énɛ́ lɛ́ɛ wá kplé ɖo bǒcyɔ ɔ́ nukɔn, bó ná nɔ nǔwiwa ɔ́ tɛnmɛ. Gǎn e ɖo nǔwiwa ɔ́ nu ɔ́ zé gbe yi jǐ, bó sú xó bó ɖɔ: “Atóógbe! Mɛ bǐ ní ɖó tó mì! O togun e wá fí é, akɔta e wá fí é, mɛ e nyí mɛ bó nɔ dó gbe alɔkpa ɖěbǔ é bǐ ní ɖó tó mì. Hwenu e mi ná se ahwankpɛn, kpete, kanhún kpó nǔxonú alɔkpa alɔkpa bǐ kpó ɖo gbe jɛ wɛ ɔ́, mɛ bǐ ná jɛ kpo ɖo sikábócyɔ e axɔ́sú Nabukodonɔzɔ́ɔ tun te ɔ́ sá mɛ, bó ɖe kɔ́. Mɛ e ma ná jɛ kpo bó ɖe kɔ́ nú sikábócyɔ ɔ́ ǎ ɔ́, è nǎ zé e nyi dó myɔkpó e mɛ myɔ hɛhɛ ɖo jiji ɖe wɛ é mɛ ɖo fí din tlóló. “Énɛ́ ɔ́ wú wɛ hwenu e togun e ɖo fínɛ́ lɛ́ɛ, akɔta e ɖo fínɛ́ lɛ́ɛ, mɛ e nɔ dó gbe tɛnmɛ tɛnmɛ ɖo fínɛ́ lɛ́ɛ se ahwankpɛn, kpete, kanhún kpó nǔxonú alɔkpa alɔkpa bǐ kpó sín gbe é ɔ́, gǎn kpó ahwan kpó bǐ jɛ kpo bó ɖe kɔ́ nú sikábócyɔ e axɔ́sú ɔ́ tun te é.” Nǔwiwa ɔ́ ɖo fífó wɛ kɛ́ɖɛ́, bɔ Babilɔ́nunu ɖé lɛ́ɛ wá slɛ́ Jwifu lɛ́ɛ nú axɔ́sú ɔ́. Yě yí xó bó ɖɔ nú axɔ́sú Nabukodonɔzɔ́ɔ ɖɔ: “Sɛ́mɛɖó, jidɔ́ mɛtɔn ní nyí káká. Mɛ ɖésú wɛ ɖe gbeta tɔ́n ɖɔ: ‘Mɛ ɖěbǔ se ahwankpɛn, kpete, kanhún, kpó nǔxonú alɔkpa alɔkpa kpó sín gbe ɔ́, é ná jɛ kpo bó ɖe kɔ́ nú bǒcyɔ e è sɔ́ sikánú dó bló é. Nú mɛɖé ma ka jɛ kpo bó ɖe kɔ́ ná ǎ ɔ́, è nǎ zé mɛ ɔ́ nyi dó myɔkpó e mɛ zo hɛhɛ ɖe ɔ́ mɛ.’ Lo ɔ́, Jwifu ɖé lɛ́ɛ tíin, bɔ mɛ zé yě nǔjíkpɔ́ntɔ́ ɖo Babilɔ́nu. Yě wɛ nyí Cadlaki kpó Mɛcáki kpó, kpódó Abɛ́di-Nɛgó kpó. Nya énɛ́ lɛ́ɛ nɔ́ sɛn vodún mɛtɔn lɛ́ɛ ǎ; yě ká nɔ ɖe kɔ́ nú bǒcyɔ e mɛ tun te ɔ́ ǎ.” Ée Nabukodonɔzɔ́ɔ se mɔ̌ ɔ́, xomɛ sin i ɖésú, bɔ é ɖo adǎn jí, lobo sɛ́ mɛ dó ɖɔ è nǐ kplá Cadlaki kpó Mɛcáki kpó, kpódó Abɛ́di-Nɛgó kpó wá nú émí. Ée è yi kplá yě wá ɔ́, axɔ́sú ɔ́ kanbyɔ́ yě ɖɔ: “Cadlaki, Mɛcáki, Abɛ́di-Nɛgó! Nǔgbó wɛ mi gbɛ́ ɖɔ émí kún ná sɛn vodún ce lɛ́ɛ ó a? Émí kún ka ná ɖe kɔ́ nú bǒcyɔ e un tun te é ó a? Din ɔ́, mi nɔ acéjí. Mi ná lɛ́ se ahwankpɛn, kpete, kanhún, kpó nǔxonú alɔkpa alɔkpa kpó sín gbe, lobo ná jɛ kpo bó ɖe kɔ́ nú bǒcyɔ ɔ́. Ényí mi ma ɖe kɔ́ ná ǎ ɔ́, è nǎ bɛ́ mi dó myɔkpó e mɛ myɔ ɖo jiji ɖe wɛ hɛhɛ é mɛ din tlóló, bɔ un ná kpɔ́n vodún e ná yí mi sín fɛn ce mɛ é.” Ée axɔ́sú ɔ́ ɖɔ mɔ̌ ɔ́, Cadlaki kpó Mɛcáki kpó, kpódó Abɛ́di-Nɛgó kpó yí gbe n'i ɖɔ: “Sɛ́mɛɖó, é byɔ́ ɖɔ mǐ ná ba hwɛjijɔ nú mǐɖée ǎ. Nǔ e mɛ ka ná tunwun ɔ́ wɛ nyí ɖɔ Mawu e mǐ nɔ́ sɛn ɔ́ ɖó acɛ bó ná hwlɛ́n mǐ gán. É ná ɖe mǐ sín myɔ mɛ, bó ná lɛ́ ɖe mǐ sín acɛ mɛtɔn mɛ. É ná bó ma ka jló e nú é ná hwlɛ́n mǐ gán ǎ ɔ́, axɔ́sú Sɛ́mɛɖó, tunwun ɖɔ mǐ kún ɖo vodún mɛtɔn lɛ́ɛ ná sɛn wɛ ó, mǐ kún ka ná ɖe kɔ́ nú bǒcyɔ e mɛ tun te ɔ́ ó.” Xó énɛ́ e axɔ́sú ɔ́ se ɔ́ lɛ́ dó xomɛsin n'i ɖésú, bɔ é húzú nukún mɛ dó Cadlaki kpó Mɛcáki kpó Abɛ́di-Nɛgó kpó jí. Énɛ́ ɔ́, é ná gbe ɖɔ è nǐ flɔ́ myɔ dó myɔkpó ɔ́ mɛ bónú é syɛ́n hú lě e é nɔ́ nɔ gbɔn ɖ'ayǐ é azɔn tɛ́nwe. É ka zɔ́n sɔ́ja tɔn e kpan akɔ́n ganjí lɛ́ɛ ɖɔ yě ní blá Cadlaki, Mɛcáki kpódó Abɛ́di-Nɛgó kpó, nú è nǎ bɛ́ yě dó myɔkpó ɔ́ mɛ. Yě mɛ atɔn lɛ́ɛ bǐ ɖo gbagwé kpó cokoto kpó, kpó awu ɖaxó kpó, kpódó gbǎkún kpán mɛ mɔ̌, bɔ è blǎ yě, bó bɛ́ yě nyi dó myɔkpó ɔ́ mɛ. È ka bɔ myɔ ɔ́ bɔ é syɛ́n titewungbe lě e axɔ́sú ɔ́ zɔ́n gbɔn é. Hwenu e sɔ́ja lɛ́ɛ xwe Cadlaki kpó Mɛcáki kpó, kpó Abɛ́di-Nɛgó kpó bɛ́ dó myɔ ɔ́ mɛ gbé ɔ́, myɔ ɔ́ slɔ́ yě bɔ yě kú. Yě mɛ atɔn lɛ́ɛ ka ɖo blǎblá mɔ̌ bɔ è bɛ̌ yě nyi dó myɔkpó ɔ́ mɛ. Xɛsi jɛ axɔ́sú Nabukodonɔzɔ́ɔ jí, bɔ é si te vawun bó kanbyɔ́ azaglɔ́gán tɔn lɛ́ɛ ɖɔ: “É ma nyí mɛ atɔn wɛ mǐ blá bó bɛ́ nyi dó zo ɔ́ mɛ a?” Azaglɔ́gán tɔn lɛ́ɛ yí gbe n'i ɖɔ: “Sɛ́mɛɖó! É jɛ́n nɛ́! Mɛ atɔn wɛ.” Axɔ́sú ɔ́ lɛ́ ɖɔ: “Anhɛɛn nɛ́! Din ɔ́, un ka ɖo mɛ ɛnɛ mɔ ɖo zɔnlin ɖi wɛ ɖo myɔ ɔ́ mɛ. Yě ɖo kanmɛ ǎ, bó ɖo sa ɖi wɛ; myɔkpa ɖěbǔ ka ɖo yě wú ǎ. Mɛ ɛnɛgɔ́ ɔ́ ɖi nǔmɛsɛn sɛ́xwé tɔn lɛ́ɛ ɖě.” Axɔ́sú Nabukodonɔzɔ́ɔ ka sɛkpɔ́ myɔkpó ɔ́, bó sú xó bó ɖɔ: “Cadlaki! Mɛcáki! Abɛ́di-Nɛgó! Mɛsɛntɔ́ Mawu Ajalɔ̌nlɔn tɔn lɛ́ɛ e mi! Mi tɔ́n bó wá!” Tlóló tɛn tɔn mɛ ɔ́, Cadlaki kpó Mɛcáki kpó, kpódó Abɛ́di-Nɛgó kpó tɔ́n sín myɔkpó ɔ́ mɛ. Tokpɔnjíkpɔ́ntɔ́ lɛ́ɛ, nǔjíkpɔ́ntɔ́ lɛ́ɛ, tokpɔngán lɛ́ɛ, kpó azaglɔ́gán lɛ́ɛ kpó wá kplé dó yě, bó mɔ ɖɔ wǔtu yětɔn kún xo myɔkpa ó, ɖa yětɔn kún ka fyɔ́ kpɛví ɖé vɔ́vɔ́ ó. Nǔɖé wa awu yětɔn ǎ, yě hwɛ̌n azizɔ lɔ ǎ. Bɔ axɔ́sú ɔ́ sú xó bó ɖɔ: “Susu nú Mawu Cadlaki kpó Mɛcáki kpó Abɛ́di-Nɛgó kpó tɔn. Mawu yětɔn sɛ́ wɛnsagun tɔn dó, bɔ é wá hwlɛ́n mɛsɛntɔ́ tɔn lɛ́ɛ gán, ɖó é wú wɛ yě gán jɛ, bó má se tónú nú gbeta e un ɖe tɔ́n é ǎ. Yě yí gbe nú wǔvɛ́mimɔ hú yě ní sɛn vodún, bó ɖe kɔ́ ná, lobo ná jó Mawu yětɔn dó. Énɛ́ ɔ́ wú wɛ un ɖo gbeta élɔ́ ɖe tɔ́n wɛ: ‘Ényí mɛ ɖěbǔ tíin, mɛ ɔ́ sixú nyí togun ɖěbǔ mɛ nu, é sixú tɔ́n sín akɔta ɖěbǔ mɛ, é sixú nɔ dó gbe alɔkpa alɔkpa ɖěbǔ, bó ɖɔ xó nyanya ɖé dó Mawu Cadlaki kpó Mɛcáki kpó Abɛ́di-Nɛgó kpó tɔn wú gbeɖé ɔ́, è nǎ já mɛ énɛ́ ɔ́, bó ná gúdú xwé tɔn, bɔ é ná húzú zunkɔ́ta. Ɖó vodún ɖěbǔ ɖe bó ná sixú hwlɛ́n mɛ gán Mawu yětɔn ɖɔhun ǎ.’ ” Ée axɔ́sú ɔ́ ɖɔ mɔ̌ ɔ́, é ba azɔ̌ ɖagbe ɖagbe ɖěvo nú Cadlaki kpó Mɛcáki kpó Abɛ́di-Nɛgó kpó ɖo Babilɔ́nu sín tokpɔn ɔ́ mɛ. Tɛn e mɛ axɔ́sú ɔ́ zé yě ɖó ɔ́ lɛ́ nyɔ́ hú ée mɛ yě ɖe ɖ'ayǐ é. Axɔ́sú Nabukodonɔzɔ́ɔ dó wɛn élɔ́ sɛ́ dó togun lɛ́ɛ bǐ, akɔta lɛ́ɛ bǐ, bɔ è dǒ wɛn ɔ́ dó gbe bǐ mɛ nú mɛ e ɖo ayǐkúngban jí lɛ́ɛ bǐ ní se. É ɖɔ: “Mawu ní ná fífá mi nú nǔ bǐ vɔ ɖ'é wú. “Un mɔ din ɖɔ é nyɔ́ nú ma jlá nǔ e Mawu Ajalɔ̌nlɔn wa nú mì lɛ́ɛ kpódó nǔjíwǔ e é bló nú mì lɛ́ɛ kpó mi. Nǔjíwǔ tɔn lɛ́ɛ d'agba lóóo! Nǔjíjlɛ́ tɔn lɛ́ɛ syɛ́n mɛ nya! Mawu énɛ́ ná ɖu axɔ́sú káká sɔ́yi. Acɛkpikpa tɔn ná ɖó dogbó gbeɖé ǎ.” “Nyɛ axɔ́sú Nabukodonɔzɔ́ɔ ɔ́, xwíí wɛ un ɖe ɖo xwé ce gbe, bó ɖo gbɛ ce ɖu wɛ ɖo hɔn ce mɛ. É wá su zǎn mɛ gbe ɖokpó, bɔ un ɖo ayǐmlɔ́mlɔ́ ɖo adɔ̌zan ce jí, lobo kú dlɔ̌ ɖokpó, bɔ é ɖó adohu nú mì. Nǔ e un mɔ ɖo dlɔ̌ ɔ́ mɛ ɔ́ dó xɛsi nú mì. Énɛ́ ɔ́, un ɖɔ è nǐ kplé nǔnywɛ́tɔ́ e ɖo Babilɔ́nu lɛ́ɛ bǐ, bónú yě ná tín dlɔ̌ ɔ́ mɛ nú mì. Ée nǔkantɔ́ lɛ́ɛ, majíkiblótɔ́ lɛ́ɛ, azětɔ́ lɛ́ɛ kpódó azɔnɖatɔ́ lɛ́ɛ kpó wá kplé ɔ́, un ɖɔ dlɔ̌ e un kú ɔ́ nú yě, yě mɛ ɖě ká kpé tínmɛ tɔn wú bó ná mì ǎ. É nɔ zaan bɔ Daniyɛ́li lɔmɔ̌ wá mɔ mì. Nya ɖé wɛ bɔ è nɔ lɛ́ ylɔ́ ɛ ɖɔ Bɛluticasáa. Nyǐkɔ énɛ́ ɔ́, vodún ce sín nyǐkɔ mɛ wɛ è ɖe sín. Nya énɛ́ ɔ́, nǔmɛsɛn mímɛ́ lɛ́ɛ sín yɛ ɖo jǐ tɔn. Ée é wá ɔ́, un ɖɔ dlɔ̌ e un kú ɔ́ n'i; un ɖɔ n'i ɖɔ: Bɛluticasáa nǔkantɔ́ lɛ́ɛ xɔ́sú, un tunwun ɖɔ nǔmɛsɛn mímɛ́ lɛ́ɛ sín yɛ ɖo jǐ towe, bɔ nǔbúdo ɖěbǔ nɔ́ búdo dó we ǎ. Hǔn bó tín dlɔ̌ e un kú ɔ́ mɛ nú mì. Dlɔ̌ e un kú ɔ́ ɖíe, ɖǒ tó: Hwenu e un ɖo ayǐmlɔ́mlɔ́ ɖo adɔ̌zan ce jí ɔ́, dlɔ̌ e un kú ɔ́ ɖíe: Un mɔ atín ɖaxó gɛnnyigɛnnyi ɖé ɖo ayǐkúngban ɔ́ tɛ́ntin. Atín ɔ́ húzú atín ɖaxó, bó syɛ́n. Ala tɔn lɛ́ɛ ɖi ga káká yi sɔ́ jǐnukúnsin. È ɖo fí ɖěbǔ ɖo gbɛ ɔ́ mɛ ɔ́, è nɔ mɔ atín ɔ́ sɛ́ dó. Ama tɔn lɛ́ɛ nyɔ́ ɖɛkpɛ ɖésú. Atín ɔ́ sɛ́n káká bɔ mɛ bǐ ná mɔ sínsɛ́n tɔn ɖu. Kanlin lɛ́ɛ nɔ́ wá bɛ yɛ ɖo glɔ̌ tɔn. Xɛ lɛ́ɛ nɔ́ xo adɔ̌ nyi ala tɔn lɛ́ɛ mɛ. Nǔ e ɖo gbɛ ɔ́ mɛ lɛ́ɛ bǐ nɔ wá ba nǔɖuɖu ɖo gɔ̌n tɔn. “Un ɖo adɔ̌zan ce jí mɔ̌, bó lɛ́ mɔ wɛnsagun ɖokpó jɛ te sín jǐxwé. Wɛnsagun ɔ́ sú xó bó ɖɔ: ‘Mi gbo atín élɔ́, bó já ala tɔn lɛ́ɛ. Mi vúnvún ama tɔn lɛ́ɛ, bó vúnvún sínsɛ́n tɔn lɛ́ɛ, bónú kanlin lɛ́ɛ ní hɔn sín yɛtɛn tɔn, bónú xɛ lɛ́ɛ ní zɔn sín ala tɔn lɛ́ɛ jí. Mi ma ka hɔn atínta ɔ́ kpó ɖɔ tɔn lɛ́ɛ kpó ó, mi jó dó nyi zunkan ɔ́ mɛ. Mi to gan kpó ganvɔ kpó lɛ́ lɛ̌ dó, ahǔn ní ja dó jǐ tɔn, bónú é ní ɖu gběhan kanlin ɖɔhun. È nǎ yí ayi gbɛtɔ́ tɔn sín así tɔn, bó ná ná ɛ ayi kanlin tɔn, bɔ é ná nɔ mɔ̌ káká nú xwe tɛ́nwe.’ “Wɛnsagun lɛ́ɛ wɛ hɛn gbeta énɛ́ ɔ́ wá, bónú mɛ e ɖo gbɛ lɛ́ɛ bǐ ná tunwun ɖɔ Mawu Ajalɔ̌nlɔn ɔ́ wɛ ɖó acɛ dó gbɛtɔ́ lɛ́ɛ bǐ jí, ɖó é nɔ́ ná acɛ mɛ e jló e é. É jló e ɔ́, é ná zé mɛ e gbɛtɔ́ lɛ́ɛ gbɛ́ wǎn ná ɔ́ su. “Dlɔ̌ e nyɛ axɔ́sú Nabukodonɔzɔ́ɔ kú ɔ́ nɛ́. Din ɔ́, hwɛ Bɛluticasáa, a mɔ tínmɛ tɔn ɖé hǔn, nǎ mì. Nǔnywɛ́tɔ́ mɔ̌hun ko ɖo axɔ́súɖuto ce mɛ, bó ná ná tínmɛ tɔn mì ǎ. Amɔ̌, hwɛ ɔ́, a hɛn ɔ́, a nǎ tínmɛ nú mì, ɖó nǔmɛsɛn mímɛ́ lɛ́ɛ sín yɛ ɖo jǐ towe.” Daniyɛ́li e è nɔ ylɔ́ ɖɔ Bɛluticasáa ɔ́ cí cúɖúɖú nú nukúnxwixwe ywɛywɛ ɖé, ɖó ayi tɔn bǐ gbadó, bɔ axɔ́sú ɔ́ ɖɔ n'i ɖɔ: “Bɛluticasáa, ma nú dlɔ̌ énɛ́ ɔ́ kpó tínmɛ e é ɖó ɔ́ kpó ɖó adohu nú we ó.” Bɛluticasáa yí gbe nú axɔ́sú ɔ́ ɖɔ: “Sɛ́mɛɖó, dlɔ̌ e mɛ kú ɔ́ kpó tínmɛ tɔn kpó ɔ́, kɛntɔ́ mɛtɔn lɛ́ɛ wú ɖɔ xó dó wɛ bǐ ɖe. Mɛ mɔ atín syɛ́nsyɛ́n ɖaxó ɖokpó, bɔ ala tɔn lɛ́ɛ ɖi ga káká yi sɔ́ jǐnukúnsin, bɔ gbɛ ɔ́ bǐ nɔ́ mɔ. Atín ɔ́ sín ama lɛ́ɛ nyɔ́ ɖɛkpɛ ɖésú, bó sɛ́n titewungbe, bɔ mɛ bǐ ná mɔ ɖu. Kanlin lɛ́ɛ nɔ wá bɛ yɛ ɖo glɔ̌ tɔn, bɔ xɛ lɛ́ɛ nɔ́ wá xo adɔ̌ nyi ala tɔn lɛ́ɛ mɛ. Sɛ́mɛɖó, mɛ wɛ ɖo atín énɛ́ ɔ́ nyí wɛ. Đó mɛ ɖésú wá d'agba bó syɛ́n ɖésú, bɔ susu mɛtɔn hun káká yi jǐxwé, bɔ acɛkpikpa mɛtɔn gba kpé gbɛ ɔ́ bǐ mɛ. Mɛ ka mɔ wɛnsagun Mawu tɔn ɖokpó jɛ te sín jǐxwé, bó wá ná gbe ɖɔ: mi gbo atín ɔ́, bó sú kún tɔn dó. Amɔ̌, mi jó atínta ɔ́ kpó ɖɔ lɛ́ɛ kpó dó nyi zunkan ɔ́ mɛ, bó to gan kpó ganvɔ kpó lɛ́ lɛ̌ dó. Ahǔn ní ja dó jǐ tɔn, bónú nǔ e nɔ xá kanlin lɛ́ɛ ɔ́ ní xá é lɔmɔ̌ káká nú xwe tɛ́nwe.” Sɛ́mɛɖó, dlɔ̌ e mɛ kú ɔ́ tínmɛ tɔn ɖíe: lě e gbeta e Mawu Ajalɔ̌nlɔn ɔ́ ɖe tɔ́n dó mɛ wú ɔ́ ɖɔ gbɔn ɔ́, wɛ nyí è nǎ nya mɛ sín gbɛtɔ́ lɛ́ɛ mɛ, bɔ mɛ ná yi nɔ gběkanlin lɛ́ɛ tɛ́ntin, bó ná nɔ́ ɖu gběhan nyibú ɖɔhun, bɔ ahǔn ná ja dó mɛ jí káká nú xwe tɛ́nwe. Xwe énɛ́ lɛ́ɛ wá yi ɔ́, mɛ ná wá tunwun ɖɔ Mawu Ajalɔ̌nlɔn ɔ́ wɛ kpa acɛ dó axɔ́súɖuɖu gbɛtɔ́ lɛ́ɛ tɔn bǐ jí, bó nɔ́ ná susu mɛ e jló e é. Gbeta e ka ɖɔ è nǐ jó atínta ɔ́ kpó ɖɔ tɔn lɛ́ɛ kpó dó ɔ́, tínmɛ tɔn ɖíe: mɛ ná lɛ́ wá ɖu axɔ́sú hwenu e mɛ ná wá tunwun ɖɔ Mawu sɛ́xwé tɔn ɔ́ wɛ kpa acɛ dó nǔ bǐ nu é. Énɛ́ ɔ́ wú ɔ́, Sɛ́mɛɖó, mɛ ná kɛnklɛ́n bó yí gbe nú nǔ e kplɔ́n mɛ gbé un ja é: mɛ ná jó hwɛ e mɛ nɔ hu lɛ́ɛ dó; mɛ ná lɛ́ kɔ sín nǔ e mɛ nɔ wa nyi do lɛ́ɛ gúdo, bó ná nɔ́ wa nǔ jlɔ́jlɔ́. Mɛ ná nɔ́ nyɔ́ xomɛ dó wamamɔnɔ lɛ́ɛ wú. Mɛ ɖo nǔ wa gbɔn mɔ̌ wɛ ɔ́, afɔ nyɔ́ ɔ́, nǔ ná nyɔ́ nú mɛ yi nukɔn. Nǔ e ɖo nǎ jɛ wɛ bɔ è ɖɔ nú axɔ́sú Nabukodonɔzɔ́ɔ lɛ́ɛ bǐ jɛ. È tín dlɔ̌ ɔ́ mɛ nú axɔ́sú ɔ́, é ko yi xwe ɖokpó bɔ é ɖo sa ɖi gbɔn xɔ tɔn ta wɛ, ɖo hɔn tɔn mɛ ɖo Babilɔ́nu, lobo sú xó bó ɖɔ: “Kpɔ́n Babilɔ́nu to ɖaxó e un gbá, bó sɔ́ dó bló hɔnmɛ ná é! É xlɛ́ lě e un syɛ́n gbɔn é, é xlɛ́ lě e acɛkpikpa ce xɔ susu gbɔn é.” Hwenu e Nabukodonɔzɔ́ɔ ɖo xó énɛ́ lɛ́ɛ ɖɔ wɛ ɔ́, é se gbe ɖé sín jǐxwé, bɔ gbe ɔ́ ɖɔ: “Axɔ́sú Nabukodonɔzɔ́ɔ, ɖǒ tó xó élɔ́. È ko yí acɛkpikpa ɔ́ sín así we! È nǎ nya we sín gbɛtɔ́ lɛ́ɛ mɛ. A nǎ yi nɔ gběkanlin lɛ́ɛ tɛ́ntin, bó ná nɔ́ ɖu gběhan nyibú ɖɔhun. A nǎ nɔ mɔ̌ káká nú xwe tɛ́nwe. Énɛ́ ɔ́ gúdo ɔ́, a nǎ wá tunwun ɖɔ Mawu Ajalɔ̌nlɔn ɔ́ ɖó acɛ dó axɔ́súɖuto gbɛtɔ́ lɛ́ɛ tɔn bǐ jí, bó nɔ́ ná acɛ mɛ e jló e é.” Tɛn tɔn mɛ fínɛ́ jɛ́n nǔ e é se ɔ́ jɛ ɖe. Nǔ gbó ɔ́, è nya Nabukodonɔzɔ́ɔ sín gbɛtɔ́ lɛ́ɛ mɛ, bɔ é jɛ ama ɖu jí nyibú ɖɔhun; ahǔn nɔ́ ja dó jǐ tɔn. Đa tɔn ɖi ga káká bó cí gangan sín awafún ɖɔhun. Fɛn tɔn lɛ́ɛ ɖi káká bó cí xɛfɛn ɖɔhun. Axɔ́sú Nabukodonɔzɔ́ɔ ɖɔ: “Ée xwe tɛ́nwe lɛ́ɛ wá yi ɔ́, un kpɔ́n jǐxwé, bɔ gbɛtɔ́ sín ayixa e un ɖó ɖ'ayǐ ɔ́ lɛ́ wá nú mì. Un dó kú nú Mawu Ajalɔ̌nlɔn e ɖo gbɛ káká sɔ́yi é. Un jɛ mlǎmlá ɛ jí, bó jɛ susu kpa n'i jí ɖɔ: Acɛkpikpa tɔn ɖó dogbó ǎ, axɔ́súɖuɖu tɔn ná nɔ ayǐ káká sɔ́yi. Lě do gbɛtɔ́ sukpɔ́ ɖo ayǐkúngban jí sɔ é nɛ́, có yě mɛ ɖěbǔ ká nyí nǔ ɖěbǔ ɖo nukɔn tɔn ǎ. Nǔɖíɖó sɛ́xwé tɔn lɛ́ɛ kpó gbɛtɔ́ lɛ́ɛ kpó ɔ́, nǔ e jló e ɔ́ wɛ é nɔ́ sɔ́ yě dó wa. É ja nǔɖé wa gbé ɔ́, mɛɖé nɔ́ sixú gbɛ́ ǎ, mɛɖé ka nɔ́ sixú kɛ nu dó nǔ e é wa ɔ́ wu n'i ǎ. Hwenɛ́nu wɛ gbɛtɔ́ sín ayixa ɔ́ lɛ́ wá nú mì. Un lɛ́ mɔ susu e axɔ́súɖuto ce ɖó ɔ́. Acɛkpikpa ce kpódó axɔ́súɖuto ce sín ɖɛkpɛ kpó lɛ́ vɔ́ wá. Azaglɔ́gán ce lɛ́ɛ kpó tozɔ́watɔ́ ce lɛ́ɛ kpó ná wun bó jɛ gbě ce mɛ, bó wá kplá mì. Yě lɛ́ sɔ́ mì axɔ́sú, bɔ yɛ̌yi e yě wlí nú mì ɔ́ syɛ́n hú ée yě kó nɔ́ wlí nú mì ɖ'ayǐ é. Énɛ́ wú wɛ nyɛ axɔ́sú Nabukodonɔzɔ́ɔ ɖo Mawu jǐxwé tɔn ɔ́ mlá wɛ din, bó ɖo sísɔ́ ɛ su wɛ, bó ɖo susu kpa n'i wɛ. Nǔ e é bló é bǐ wɛ sɔgbe, nǔ e é wa lɛ́ɛ bǐ wɛ nyɔ́. É lɛ́ ɖó acɛ e ná sɔ́ mɛ e ɖo afɔ tɛ ayǐ wɛ lɛ́ɛ hwe é lɔ.” É wá su gbe ɖokpó, bɔ axɔ́sú Bɛlucasáa ylɔ́ agɔ̌ ɖaxó ɖokpó dó tozɔ́watɔ́ tɔn ɖaxó ɖaxó lɛ́ɛ tamɛ. Yě bǐ kplékplé yi afatɔ́n (1.000), bɔ axɔ́sú ɔ́ nu vɛ̌ɛn xá yě. Hwenu e é ɖo ahan nu wɛ ɔ́, é ná gbe ɖɔ è nǐ yi bɛ́ sikákɔ́fu kpó kpatágankɔ́fu kpó e tɔ́ émítɔn bɛ́ sín sinsɛnxɔ Jeluzalɛ́mu tɔn mɛ lɛ́ɛ é wá, ɖó é jló ɖɔ tozɔ́watɔ́ émítɔn lɛ́ɛ kpó asi émítɔn lɛ́ɛ kpó xɔ́ntɔn émítɔn lɛ́ɛ kpó ní nu ahan ɖo kɔ́fu énɛ́ lɛ́ɛ mɛ. È yi bɛ́ sikákɔ́fu e è bɛ̌ sín sinsɛnxɔ Mawu tɔn mɛ ɖo Jeluzalɛ́mu lɛ́ɛ wá, bɔ axɔ́sú ɔ́ má nú mɛ e é ylɔ́ lɛ́ɛ, bɔ yě bǐ nu ahan ɖ'é mɛ. Ée yě bǐ nu ahan ganjí ɔ́, yě jɛ han e yě nɔ́ dó kpa susu nú vodún yětɔn lɛ́ɛ é ji jí. Vodún yětɔn lɛ́ɛ ɔ́, è zě siká dó bló ɖě, bó zé kpatágan dó bló ɖě, bó zé ganvɔ dó bló ɖě, bó zé gan dó bló ɖě. È zě atín dó bló ɖě, bó zé awǐnnya dó bló ɖě. Hwenu e yě ɖo han ji wɛ ɔ́, è mɔ gbɛtɔ́ sín alɔ ɖokpó ɖo nǔ wlán dó ahohó e è sá nǔ wěwé dó ɔ́ wú wɛ, ɖo zogbɛ́nhɛnnú ɔ́ kpá. Axɔ́sú ɔ́ mɔ alɔ e ɖo nǔ wlán wɛ é. Ée é mɔ mɔ̌ ɔ́, é dɔn nukún mɛ nyɔ, bɔ ayi tɔn bǐ gbadó, bɔ alin tɔn kɛwun, bɔ koligó tɔn lɛ́ɛ ɖě nɔ́ xo dó ɖě wú. Énɛ́ ɔ́, é sú xó ɖɔ è nǐ yi ylɔ́ nǔkantɔ́ lɛ́ɛ, majíkiblótɔ́ lɛ́ɛ, azětɔ́ lɛ́ɛ kpó azɔnɖatɔ́ e ɖo Babilɔ́nu lɛ́ɛ bǐ kpó wá nú émí. Ée è yi ylɔ́ yě wá ɔ́, é ɖɔ nú nǔnywɛ́tɔ́ énɛ́ lɛ́ɛ ɖɔ: “Mɛ e ná xa nǔ e è wlǎn ɖó fínɛ́ ɔ́, bó ná tínmɛ nú mì ɔ́, un ná zé axɔ́súwu dó n'i, bó ná dó sikáwlɔ ɖokpó kɔ n'i, bó ná zé e ɖó tɛn atɔngɔ́ ɔ́ mɛ ɖo axɔ́súɖuto ce mɛ.” Nǔnywɛ́tɔ́ axɔ́sú ɔ́ tɔn lɛ́ɛ bǐ wá, mɛ ɖěbǔ ká ɖo yě mɛ bó sixú xa nǔ e è wlǎn ɔ́, bó ná tínmɛ nú axɔ́sú ɔ́ ǎ. Énɛ́ ɔ́, ado lɛ́ hu axɔ́sú Bɛlucasáa, bɔ é blá wǔ bǐ. Bɔ tozɔ́watɔ́ tɔn lɛ́ɛ lɔ sín ayi bǐ gbadó. Nyɔ̌nu axɔ́si ɔ́ se xó e sú wɛ axɔ́sú ɔ́ kpó tozɔ́watɔ́ tɔn lɛ́ɛ kpó ɖe ɔ́, lobo wá. É byɔ́ xɔ e sá ɖu agɔ̌ ɖe wɛ yě ɖe ɔ́, bó ɖɔ: “Sɛ́mɛɖó, jidɔ́ mɛtɔn ní nyí káká. È ma nú nǔ e lin wɛ mɛ ɖe lɛ́ɛ gba ayi dó nú mɛ ó. É byɔ́ ɖɔ mɛ ná dɔn nukún mɛ nyɔ sɔ mɔ̌ ǎ. Nǔmɛsɛn mímɛ́ lɛ́ɛ sín yɛ ɖo nya ɖokpó jí ɖo axɔ́súɖuto mɛtɔn mɛ. Tɔ́ mɛtɔn hwenu ɔ́, nya ɖé wɛ, bó nɔ́ mɔ nukúnnú jɛ nǔ wú céɖécéɖé. É bí, bó ɖó nǔnywɛ́ nǔmɛsɛn ɖɔhun. Énɛ́ ɔ́ wú wɛ tɔ́ mɛtɔn sɔ́ ɛ gǎn, bɔ é kpa acɛ dó nǔkantɔ́ lɛ́ɛ, majíkiblótɔ́, azětɔ́ lɛ́ɛ, kpódó azɔnɖatɔ́ lɛ́ɛ kpó nu. Aziza e ɖo jǐ tɔn ɔ́ ko ɖo mɛɖé jí ǎ. É nɔ́ tunwun nǔ nyanya kpó nǔ ɖagbe kpó. É ɖó nǔnywɛ́, é nɔ́ tín dlɔ̌ mɛ nú mɛ; è so nǔ dó e ɔ́, é nɔ́ flɔ́n. É nɔ́ mɔ nǔbúdo bǐ bó nɔ́ ɖɔ. É nyɔ́ ɖɔ è nǐ yi ylɔ́ nya Daniyɛ́li énɛ́ e tɔ́ mɛtɔn sun nyǐ ɖɔ Bɛluticasáa ɔ́ wá fí din. É ná xa nǔ e è wlǎn ɖó fínɛ́ ɔ́ bó ná tínmɛ nú mɛ.” Nǔgbó ɔ́, è kplá Daniyɛ́li wá axɔ́sú ɔ́ gɔ́n, bɔ axɔ́sú ɔ́ kanbyɔ́ ɛ ɖɔ: “Hwi wɛ nyí Daniyɛ́li kannumɔ Jwifu e tɔ́ ce axɔ́sú ɔ́ kplá sín Judáa wá é a? Un se ɖɔ nǔmɛsɛn lɛ́ɛ sín yɛ ɖo jǐ we, bɔ a nɔ mɔ nukúnnú jɛ nǔ wú céɖécéɖé bó bí, bɔ nǔnywɛ́ e a ɖǒ ɔ́, gbɛtɔ́ ɖěbǔ ɖó ǎ. È ko kplá nǔnywɛ́tɔ́ lɛ́ɛ kpó majíkiblótɔ́ lɛ́ɛ kpó wá nú mì din, bónú yě ná xa nǔwlánwlán e mɔ wɛ a ɖe ɔ́, bó ná tínmɛ nú mì, yě mɛ ɖěbǔ ká kpé wú ǎ. Lo ɔ́, un se ɖɔ hwɛ ɔ́, a nɔ ɖɔ nǔsodómɛ lɛ́ɛ, bó nɔ́ mɔ nǔ jɛ nǔbúdo lɛ́ɛ wú. Ényí a sixú xa nǔwlánwlán élɔ́, bó tínmɛ nú mì ɔ́, un ná zé axɔ́súwu dó nú we, bó ná dó sikáwlɔ kɔ nú we.” Daniyɛ́li ka ɖɔ nú axɔ́sú ɔ́ ɖɔ: “Sɛ́mɛɖó, mɛ ní hɛn nǔ e ná ná mì wɛ mɛ ɖe lɛ́ɛ wú, é gló hǔn, mɛ ní ná mɛ ɖěvo. Amɔ̌, un ka ná xa nǔ e è wlǎn ɔ́, bó ná tínmɛ nú mɛ. Mawu Ajalɔ̌nlɔn ɔ́ sɔ́ tɔ́ mɛtɔn Nabukodonɔzɔ́ɔ ɔ́ axɔ́sú ɖaxó, bɔ susu kpó yɛ̌yi kpó kpé e. Susu énɛ́ e Mawu ná ɛ ɔ́ zɔ́n bɔ togun lɛ́ɛ bǐ, akɔta lɛ́ɛ bǐ, kpó mɛ e nɔ dó gbe tɛnmɛ tɛnmɛ lɛ́ɛ é kpó bǐ nɔ́ ɖi xɛsi n'i, bó nɔ́ sísɔ́ ɖo nukɔn tɔn. É nɔ́ ɖó kúhwɛ nú mɛ e jló e é, bó nɔ́ jó mɛ e jló e ɔ́ dó nyi gbɛ. Mɛ ɖé jló e ɔ́, é nɔ́ sɔ́ mɛ ɔ́ su, mɛɖé ká jló e ɔ́, é nɔ́ sɔ́ mɛ ɔ́ hwe. Lo ɔ́, ée goyíyí kpó mɛmasí kpó byɔ́ ayi tɔn mɛ ɔ́, è ɖe e sín axɔ́súzinkpo ɔ́ jí, bó yí acɛ bǐ sín así tɔn. È nya ɛ sín gbɛtɔ́ lɛ́ɛ mɛ, bɔ é yi nɔ gběkanlin lɛ́ɛ tɛ́ntin, bó nɔ́ ɖu gběhan nyibú ɖɔhun; ahǔn nɔ́ ɖo jija dó jǐ tɔn wɛ. É nɔ mɔ̌ káká jɛ hwenu e é wá tunwun ɖɔ Mawu Ajalɔ̌nlɔn ɔ́ wɛ kpa acɛ dó axɔ́súɖuɖu gbɛtɔ́ tɔn lɛ́ɛ bǐ jí, bó nɔ́ sɔ́ axɔ́sú mɛ e jló e é. Amɔ̌ hwɛ Bɛlucasáa ɔ́, vǐ tɔn wɛ a nyǐ, bó tunwun nǔ énɛ́ lɛ́ɛ bǐ, cóbó ká zé hwiɖée hwe ǎ. A zě Aklúnɔ sɛ́xwé tɔn ɔ́ hwe, bó yi bɛ́ kɔ́fu e ɖo sinsɛnxɔ tɔn mɛ lɛ́ɛ, bɔ hwi kpó gbɛ̌ towe lɛ́ɛ kpó asi towe lɛ́ɛ kpó, kpó agalɛtɔ́ towe lɛ́ɛ kpó dó nu ahan ná, bɔ a nɔ ji han dó kpa susu nú vodún e è zě kpatágan dó bló ná lɛ́ɛ, ée è zě siká dó bló ná lɛ́ɛ, ée è zě ganvɔ dó bló ná lɛ́ɛ, ée è zě gan dó bló ná lɛ́ɛ, ée è zě atín dó bló ná lɛ́ɛ, kpó ée è zě awǐnnya dó bló ná lɛ́ɛ kpó. Vodún énɛ́ lɛ́ɛ ká nɔ mɔ nǔ ǎ, yě ká nɔ́ se xó ǎ, yě ká lɛ́ tunwun nǔ ɖěbǔ ǎ. A nɔ ɖo vodún énɛ́ lɛ́ɛ sɛn wɛ, bó nɔ́ gɔn susu kpa nú Mawu e sín alɔ mɛ funfún towe kpó nǔ e gbɛ towe ná nyí ɔ́ kpó ɖe é. Nǔ e wú Mawu sɛ́ alɔ ɔ́ dó bɔ é wá wlán nǔ élɔ́ lɛ́ɛ ɔ́ nɛ́. Nǔ e alɔ ɔ́ wlán lɛ́ɛ ɖíe, ɖǒ tó: ‘Mɛnɛ́ɛ, Mɛnɛ́ɛ, Tekɛli, Palusíin.’ Tínmɛ yětɔn lɛ́ɛ ɖíe, ɖǒ tó: ‘Mɛnɛ́ɛ’ ɔ́ sín tínmɛ nyí nǔlínlɛ́n. É ɖo ɖiɖɔ ɖo fínɛ́ wɛ ɖɔ Mawu lɛ̌n lě e a ɖu axɔ́sú gbɔn ɔ́ lobo ɖó axɔ́súɖuɖu towe te. ‘Tekɛli’ ɔ́ sín tínmɛ nyí gandida. É ɖo ɖiɖɔ ɖo fínɛ́ wɛ ɖɔ è sɔ́ we ɖó nǔdagan jí lobo da, bó mɔ ɖɔ a kún da gan ó. ‘Palusíin’ ɔ́ sín tínmɛ nyí nǔmímá. É ɖo ɖiɖɔ ɖo fínɛ́ wɛ ɖɔ è mǎ axɔ́súɖuto ɔ́ nú Mɛdinu lɛ́ɛ kpó Pɛ́sinu lɛ́ɛ kpó.” Bɛlucasáa nɔ tɛn e mɛ é se nǔwlánwlán ɔ́ sín tínmɛ ɖe é, bó ná gbe mɛsɛntɔ́ tɔn lɛ́ɛ ɖɔ è nǐ zé axɔ́súwu dó nú Daniyɛ́li, bó zé sikáwlɔ dó kɔ n'i, lobo jlá ɖɔ Daniyɛ́li wɛ nyí mɛ e ɖo zinkpo atɔngɔ́ ɔ́ jí ɖo axɔ́súɖuto ɔ́ mɛ é. Gbe énɛ́ gbe zǎn mɛ ɔ́, è hu axɔ́sú Babilɔ́nu tɔn Bɛlucasáa. Daliwúsi Mɛdinu ɔ́ ɖo xwe kanɖé ko-nukún-we (62) ɖó wɛ, bó yi gǎn jí. Daliwúsi mɔ ɖɔ é nyɔ́ ɖɔ émí ní má axɔ́súɖuto émítɔn ɖó do kantɔn (120), lobo ná sɔ́ tokpɔngán ɖó ɖokpó ɖokpó nu, bónú yě ná sɔ́ acɛkpikpa émítɔn sín afɔ ɖó te gbɔn tokpɔn lɛ́ɛ mɛ. É lɛ́ cyán gǎn nǔjíkpɔ́ntɔ́ atɔn ɖó tokpɔngán lɛ́ɛ nu. Yě wɛ tokpɔngán lɛ́ɛ ná nɔ ɖó azɔ̌ e yě wa ɔ́ sín gbe ná. É bló mɔ̌ bónú mɛɖé ma wá hɛn axɔ́sú ɔ́ sín nǔ ɖěbǔ gblé ó. Daniyɛ́li lɔ ɖo gǎn atɔn e axɔ́sú ɔ́ cyán lɛ́ɛ mɛ. Daniyɛ́li ka ɖo nukɔn nú mɛ we ɖě lɛ́ɛ ɖo nǔnywɛ́ lixo, ɖó yɛ e ɖo jǐ tɔn ɔ́ syɛ́n ɖésú, bɔ axɔ́sú ɔ́ ɖo linlin wɛ ná sɔ́ ɛ ɖó axɔ́súɖuto ɔ́ bǐ nu. Din ɔ́, gǎn we ɖě lɛ́ɛ kpó tokpɔngán lɛ́ɛ kpó jɛ nǔ e wú yě ná ɖó dó, bó ná dɔn toxó ɖé dó kɔ nú Daniyɛ́li ɔ́ ba jí, yě ká mɔ ali tɔn ǎ, é ká dó nǔɖé sin ǎ, ɖó é ɖo gbejí, bɔ è nɔ mɔ vɛ̌dónúnǔ sín walɔ ɖé ɖo así tɔn ǎ; é ká wa nǔɖé nyi do ǎ. Din ɔ́, yě ɖɔ: “Mǐ mɔ nǔ e wú mǐ ná ɖó dó bó dó hwɛ Daniyɛ́li ɔ́ ɖěbǔ ǎ. Ényí mǐ ná mɔ nǔɖé din ɔ́, Mawu e é nɔ́ sɛn ɔ́ sín sɛ́n lixo jɛ́n mǐ nǎ ba ɖe.” Ée yě ɖɔ mɔ̌ ɔ́, yě ɖidó kpódó zǐngídi kpó, bó yi mɔ axɔ́sú ɔ́, bó ɖɔ n'i ɖɔ: “Axɔ́sú Daliwúsi, jidɔ́ mɛtɔn ní nyí káká. Mǐ mɛ gǎn e ɖo axɔ́súɖuto ɔ́ mɛ lɛ́ɛ bǐ: Nǔjíkpɔ́ntɔ́ lɛ́ɛ, tokpɔnjíkpɔ́ntɔ́ lɛ́ɛ, nǔnywɛ́námɛtɔ́ lɛ́ɛ kpó tokpɔngán lɛ́ɛ kpó bǐ kplé, bó ɖó gbe kpɔ́ ɖɔ mɛ ní ɖe gbeta ɖokpó tɔ́n, bó jlá gbɔn to ɔ́ bǐ mɛ, bó ɖɔ syɛ́nsyɛ́n ɖɔ sín égbé káká yi azǎn gban (30) gbe ɔ́, mɛ ɖěbǔ xomlá nǔmɛsɛn ɖěbǔ, abǐ gbɛtɔ́ ɖěbǔ, bɔ é má nyí mɛ Sɛ́mɛɖó ɔ́ wɛ è xomlá ǎ ɔ́, è nǎ sɔ́ mɛ énɛ́ nyi dó kinnikínnído mɛ. Din ɔ́, Sɛ́mɛɖó, mɛ ní bó yí gbe nú gbeta ɔ́, bó dó alɔ mɛ bónú é ná cí Mɛdinu lɛ́ɛ kpó Pɛ́sinu lɛ́ɛ kpó sɛ́n e mɛɖé má nɔ́ húzú ǎ é ɖɔhun.” Énɛ́ ɔ́, axɔ́sú Daliwúsi ɖe gbeta ɔ́ tɔ́n, bó dó sɛ́n ɔ́. Ée Daniyɛ́li se ɖɔ gbeta mɔ̌hun tɔ́n ɔ́, é yi xwé tɔn gbe, bó yi xɔ e ɖo aga é mɛ, bó hun flɛtɛ́li lɛ́ɛ dó Jeluzalɛ́mu sín awa jí. É jɛ kpo ɖo fínɛ́, bó xo ɖɛ, bó mlá Mawu tɔn. É bló mɔ̌ azɔn atɔn ɖo kéze ɔ́ mɛ, lě e é kó nɔ́ bló gbɔn ɖ'ayǐ é. Đɛ xo wɛ é ɖe, bó ɖo Mawu tɔn xomlá wɛ, bɔ kɛntɔ́ lɛ́ɛ wá byɔ́ xɔ ɔ́ mɛ kpó zǐngídi kpó, bó gbo e dó. Yě yi mɔ axɔ́sú ɔ́, bó ɖɔ n'i ɖɔ: “Sɛ́mɛɖó, mɛ ma dó sɛ́n ɖɔ mɛ ɖěbǔ xomlá nǔmɛsɛn ɖěbǔ, abǐ gbɛtɔ́ ɖěbǔ bɔ é ma nyí mɛ ɖésúnɔ ɔ́ wɛ è xomlá ǎ ɔ́, è ɖǒ ná sɔ́ mɛ ɔ́ nyi dó kinnikínnído mɛ ǎ cé?” Axɔ́sú ɔ́ yí gbe nú yě ɖɔ: “Gbeta e tɔ́n e nɛ́ mi ɖɔ pɛ́pɛ́pɛ́ nɛ́. É ná cí Mɛdinu lɛ́ɛ kpó Pɛ́sinu lɛ́ɛ kpó sɛ́n e mɛɖé ma nɔ́ húzú ǎ é ɖɔhun.” Ée yě se mɔ̌ ɔ́, yě ɖɔ: “Éénɛ́! Sɛ́mɛɖó, mɛ e nyí Daniyɛ́li ɖo mɛ e ahwan wlí sín Judáa tomɛ lɛ́ɛ mɛ ɔ́ ké ya ɖěbǔ nú mɛ ǎ, é ka sí gbeta e mɛ ɖe tɔ́n é ǎ, ɖó azɔn atɔn wɛ é nɔ́ xomlá Mawu tɔn ɖo kéze ɖokpó mɛ.” Ée axɔ́sú ɔ́ se mɔ̌ ɔ́, wǔ kú i ɖésú, bɔ é ɖɔ dó ayi mɛ ɖɔ émí ná hwlɛ́n Daniyɛ́li gán, bó ɖo lě e é ná wa gbɔn ɔ́ lin wɛ káká bɔ hwe yi xɔ. Daniyɛ́li kɛntɔ́ lɛ́ɛ zɔn adǎn jí, bó wá mɔ axɔ́sú ɔ́ bó ɖɔ: “Sɛ́mɛɖó, mɛ tunwun ganjí ɖɔ Mɛdinu lɛ́ɛ kpó Pɛ́sinu lɛ́ɛ kpó sín sɛ́n ɖɔhun wɛ sɛ́n e mɛ dó ɔ́ kpó gbeta e mɛ ɖe tɔ́n ɔ́ kpó cí, bɔ mɛɖé nɔ́ húzú ǎ.” Énɛ́ ɔ́, axɔ́sú ɔ́ ná gbe bɔ è yi kplá Daniyɛ́li, bó sɔ́ ɛ nyi dó kinnikínnído mɛ. Axɔ́sú ɔ́ ɖɔ nú Daniyɛ́li ɖɔ: “Mawu e wú a nɔ ɖó kan dó, bó nɔ́ sɛn ɔ́ ní hwlɛ́n we gán.” È zě awǐnnya ɖokpó wá ɖó do ɔ́ nu, bɔ axɔ́sú ɔ́ ɖó wuntun tɔn jí. Tozɔ́watɔ́ lɛ́ɛ lɔ ɖó wuntun yě lɔ tɔn jí, bónú mɛɖé ma húzú nǔ e ná jɛ dó Daniyɛ́li jí é ó. Énɛ́ ɔ́ gúdo ɔ́, axɔ́sú ɔ́ yi hɔnmɛ bó gbɛ́ nǔ ɖu, bó dɔ́ xovɛ́. Adɔ̌ vɛ́ ɛ, bɔ é lɛ́ gbɛ́ ayiɖeɖayǐ nú mɛ sín nǔ bǐ. Axɔ́sú ɔ́ fɔ́n zǎn fuu, bó ɖidó kinnikínnído ɔ́ kɔn. Hwenu e axɔ́sú ɔ́ ɖo do ɔ́ sɛkpɔ́ wɛ ɔ́, é ylɔ́ Daniyɛ́li wǔbláwúblá, bó ɖɔ: “Daniyɛ́li mɛsɛntɔ́ Mawu gbɛɖe ɔ́ tɔn! Mawu towe e wú a ɖǒ kan dó bó nɔ́ sɛn ɔ́ ká kpé wú bó hwlɛ́n we gán sín kinnikínní lɛ́ɛ sín fɛn mɛ din a?” Daniyɛ́li yí gbe nú axɔ́sú ɔ́ bó ɖɔ: “Sɛ́mɛɖó, jidɔ́ mɛtɔn ní nyí káká. Mawu ce sɛ́ wɛnsagun tɔn dó, bɔ é wá sú kinnikínní lɛ́ɛ sín nu, bɔ yě wa nǔɖé nú mì ǎ, ɖó un jɛ agɔ ɖé dó Mawu ce ǎ, un ka jɛ do dó mɛ lɔmɔ̌ ǎ.” Ée axɔ́sú ɔ́ se mɔ̌ ɔ́, xomɛ hun i ɖésú, bɔ é ɖɔ è nǐ ɖe Daniyɛ́li tɔ́n sín do ɔ́ mɛ. È ɖe Daniyɛ́li tɔ́n; è ka mɔ akpa ɖěbǔ ɖo wǔ tɔn ǎ, ɖó é ɖó nǔɖiɖi nú Mawu tɔn, bó ɖeji dó wǔ tɔn. Axɔ́sú ɔ́ ná gbe ɖɔ è nǐ yi wlí mɛ e wá slɛ́ Daniyɛ́li lɛ́ɛ wá; ée è wlǐ yě ɔ́, è bɛ̌ yě kpó asi yětɔn lɛ́ɛ kpó, kpó vǐ yětɔn lɛ́ɛ kpó nyi dó kinnikínnído ɔ́ mɛ. Yě ná jɛ do ɔ́ mɛ kpó nǎ gbɔ kpó ɔ́, kinnikínní lɛ́ɛ zɔn yě jí, bó gba xú yětɔn lɛ́ɛ bǐ. Ée axɔ́sú Daliwúsi bló mɔ̌ ɔ́, é wlán sɛ́ dó togun lɛ́ɛ bǐ, akɔta lɛ́ɛ bǐ kpó mɛ e nɔ dó gbe alɔkpa alɔkpa ɖo gbɛ ɔ́ mɛ lɛ́ɛ kpó ɖɔ: “Fífá ní nɔ kpɔ́ xá mi bó túnflá! “Un ná gbe ɖɔ mɛ e ɖo axɔ́súɖuto ce sín ayǐkúngban jí lɛ́ɛ bǐ ní ɖó sísí nú Mawu Daniyɛ́li tɔn, bó ɖi xɛsi n'i. É wɛ nyí Mawu gbɛɖe ɔ́. É wɛ ná nɔ ayǐ tɛgbɛ sɔ́yi. Axɔ́súɖuɖu tɔn ná vɔ gbeɖé ǎ. Acɛkpikpa tɔn ná nɔ ayǐ káká sɔ́yi. É wɛ nɔ hwlɛ́n mɛ gán, bó nɔ ɖe mɛ sín mɛ kannu. É wɛ nɔ jlɛ́ nǔ tɛnmɛ tɛnmɛ lɛ́ɛ, bó nɔ́ bló nǔdábaɖa lɛ́ɛ ɖo jǐxwé kpódó dodomɛ kpó. Mawu énɛ́ ɔ́ wɛ yí Daniyɛ́li sín kinnikínní lɛ́ɛ sín fɛn mɛ.” Daniyɛ́li ɖésú wá mɔ tɛnmɛ ɖaxó ɖokpó ɖo axɔ́súɖuɖu Daliwúsi tɔn mɛ, bó lɛ́ mɔ ɖo Silúsi tokpɔngán Pɛ́si tɔn sín axɔ́súɖuɖu mɛ. Xwe e xwe axɔ́sú Babilɔ́nu tɔn Bɛlucasáa yi zinkpo jí ɔ́, Daniyɛ́li mlɔ ayǐ ɖo zan jí, bó kú dlɔ̌, bó mɔ nǔ tɛnmɛ tɛnmɛ ɖo amlɔ mɛ. Ée é yá ɔ́, é wlán dlɔ̌ e é kú ɔ́, bó xa nǔ tají tají e é mɔ ɖo amlɔ mɛ lɛ́ɛ. Nǔ e Daniyɛ́li wlán lɛ́ɛ ɖíe: “Zǎn mɛ ɔ́, un ɖo amlɔ mɛ, bó mɔ jɔhɔn jɛ nyinyi jí sín wɛ̌kɛ́zo ɛnɛ lɛ́ɛ mɛ, bó nɔ́ nyi dó xu ɖaxó ɔ́ jí. Kanlin ɖaxó ɛnɛ tɔ́n sín xu ɔ́ mɛ; kanlin lɛ́ɛ ɖě gbɔn vo nú ɖě. Kanlin nukɔntɔn ɔ́ cí kinnikínní ɖɔhun, bó ka ɖó gangan sín awa. Hwenu e un ɖo kpínkpɔ́n ɛ wɛ ɔ́, è sun awa tɔn lɛ́ɛ síin bó sɔ́ ɛ sí te ɖo afɔ tɔn gǔdo tɔn we lɛ́ɛ jí, bɔ é ɖo te gbɛtɔ́ ɖɔhun, bó ɖó gbɛtɔ́ sín ayi. Kanlin wegɔ́ ɔ́ cí lɔnmɔ ɖɔhun. É ɖo tɔ́tɔ́, bɔ ajajaxú atɔn ɖo nu tɔn mɛ, bɔ é tɛ aɖǔ jí. È ná ɛ gbe ɖɔ é ní jlɔ́ bǐ bó yi ɖu lan gěgé. Ée un lɛ́ ɖo kpínkpɔ́n wɛ ɔ́, un mɔ kanlin ɖěvo bɔ é cí kpɔ ɖɔhun. É ɖó xɛ sín awa ɛnɛ ɖo nɛgbé, bó lɛ́ ɖó ta ɛnɛ. È ná ɛ acɛ bɔ é ná ɖu ɖo nǔ bǐ jí. Un lɛ́ ɖo nǔ e mɔ wɛ un ɖe ɖo zǎn mɛ ɔ́ kpɔ́n wɛ. Kanlin ɛnɛgɔ́ e un mɔ ɔ́ dó xɛsi bó hu ado. Hlɔ̌nhlɔ́n e ɖo wǔtu tɔn ɔ́ vɛ́ jlɛ́. Ganɖú ɖaxó ɖaxó wɛ ɖo nu tɔn mɛ bɔ é nɔ dó ɖu nǔ ná, bó nɔ́ zé dó vúnvún nǔ e é nɔ́ wlí lɛ́ɛ ná. É nɔ́ gbídí nǔ e é ma nɔ ɖu ǎ lɛ́ɛ ɖó afɔ wú. Kanlin énɛ́ ɔ́ gbɔn vo nú atɔn ɖě lɛ́ɛ sésé, bó lɛ́ ɖó zo wǒ. Hwenu e un ɖo zo tɔn lɛ́ɛ kpɔ́n wɛ ɔ́, zo yɔ̌yɔ́ kpɛví ɖěvo lɛ́ jɛ wǔwú jí ɖó ɖě lɛ́ɛ tɛ́ntin, lobo zin zo xóxó lɛ́ɛ atɔn dɛ́. Zo yɔ̌yɔ́ ɔ́ ɖó gbɛtɔ́ nukún. É ɖó nu ɖokpó bɔ goyíyíxó nɔ́ ɖo tíntɔ́n sín mɛ wɛ.” Un kpó ɖo nǔ e mɔ wɛ un ɖe ɔ́ kpɔ́n wɛ, bó mɔ axɔ́súzinkpo ɖé lɛ́ɛ ɖo te, bɔ degénɔ kpikpoe ɖokpó wá jínjɔ́n ayǐ. Awu e é dó lɛ́ɛ wé lawé ɖɔhun. Đa e ɖo ta tɔn lɛ́ɛ cí fɛ́ɖɛ́fɛ́ɖɛ́ avɔkanfún ɖɔhun. Axɔ́súzinkpo tɔn nɔ́ kán zo bɔ afɔ tɔn lɛ́ɛ nɔ́ kɔ́n zo hɛhɛ ɖɔhun. Myɔtɔ nɔ tɔ́n bó nɔ ɖo sisa wɛ ɖo nukɔn tɔn. Gbɛtɔ́ wɔ̌blíba ɖo te nukɔn tɔn bó ná sɛn ɛ. Hwɛɖɔtɔ́ lɛ́ɛ wá jínjɔ́n ayǐ, bɔ è hun wěma ɖé lɛ́ɛ nyi wɛn. Goyíyíxó baɖabaɖa e ɖɔ wɛ zo ɔ́ ɖe ɔ́ wú wɛ un ɖo nǔ e mɔ wɛ un ɖe ɔ́ kpɔ́n wɛ. Hwenu e un ka ɖo kpínkpɔ́n ɛ wɛ ɔ́, è hu kanlin ɛnɛgɔ́ ɔ́, bó zé e nyi dó myɔ ɖaxó ɖé mɛ bó fyɔ́ ɛ. Kanlin ɖě lɛ́ɛ e kpo ɔ́ sɔ́ ɖó acɛ ɖěbǔ ǎ. Amɔ̌, è to jó yě dó nyi gbɛ káká jɛ hwe ɖé nu. Un ɖo nǔ e mɔ wɛ un ɖe zǎn ɔ́ mɛ ɖo amlɔ mɛ ɔ́ kpɔ́n wɛ, bó mɔ nǔ gbɛtɔ́ ɖɔhun ɖé ɖo akpɔ́kpɔ́ mɛ jǎwe. É ɖidó degénɔ e nukɔn è kplá ɛ xwe ɔ́ gɔ́n. È ná ɛ acɛkpikpa kpó susu kpó, kpódó axɔ́súɖuɖu kpó, bónú togun lɛ́ɛ, akɔta lɛ́ɛ kpódó gbɛtɔ́ e nɔ dó gbe alɔkpa alɔkpa lɛ́ɛ kpó bǐ ná sɛn ɛ. Acɛkpikpa tɔn nyí acɛkpikpa ɖé, bó ná nɔ ayǐ káká sɔ́yi; é ná ɖó vivɔnu ǎ, mɛɖé ká ná sixú gba axɔ́súɖuto tɔn gbeɖé ǎ. “Nyɛ Daniyɛ́li ɔ́, ayi ce bǐ gbadó, bɔ nǔ e mɔ wɛ un ɖe lɛ́ɛ dó xɛsi nú mì. Un sɛkpɔ́ mɛ e ɖo fínɛ́ lɛ́ɛ ɖokpó, lobo kan nǔ e ɖɔ wɛ nǔ e mɔ wɛ un ɖe lɛ́ɛ ɖe tawun ɔ́ byɔ́ ɛ. É ɖɔ nú mì bó lɛ́ tínmɛ nú mì. É ɖɔ nú mì ɖɔ: ‘Kanlin ɖaxó ɛnɛ lɛ́ɛ ɔ́, axɔ́sú ayǐkúngban jí tɔn ɛnɛ sín xlɛ́ wɛ. Axɔ́sú ɛnɛ énɛ́ lɛ́ɛ wá yi ɔ́, togun mímɛ́ Mawu Ajalɔ̌nlɔn ɔ́ tɔn ná wá ɖu axɔ́sú, bó ná nɔ axɔ́súɖuto ɔ́ nu káká yi mavɔ mavɔ.’ Énɛ́ ɔ́ gúdo ɔ́, un kan nǔ byɔ́ dó kanlin ɛnɛgɔ́ ɔ́ wú, bó ná mɔ nukúnnú jɛ wǔ tɔn tawun, ɖó éyɛ́ gbɔn vo nú atɔn ɖě lɛ́ɛ. É dó xɛsi bɔ é vɛ́ jlɛ́. Aɖǔ tɔn lɛ́ɛ nyí gan, fɛn tɔn lɛ́ɛ nyí ganvɔ. Kanlin e é nɔ́ wlí lɛ́ɛ ɔ́, é nɔ ɖu ɖě, bó nɔ́ vúnvún ɖě, bó nɔ́ gbídí ée kpo lɛ́ɛ ɖó afɔ wú. Un lɛ́ kan nǔ byɔ́ dó zo wǒ e ɖo ta tɔn lɛ́ɛ wú, bó lɛ́ ba do nú zo e jɛ wǔwú jí, bó zin zo ɖěvo atɔn dɛ́ é. Zo énɛ́ ɔ́ e wú ɔ́ ɖó nukún, bó ɖó nu, bɔ goyíyíxó kɛ́ɖɛ́ jɛ́n nɔ́ tɔ́n sín mɛ. Zo énɛ́ kló hú zo ɖě lɛ́ɛ. Ée un ɖo kpínkpɔ́n ɛ wɛ ɔ́, un mɔ ɛ bɔ é ɖo ahwan fun xá togun mímɛ́ Mawu Ajalɔ̌nlɔn ɔ́ tɔn wɛ, bó ɖo ɖuɖu ɖ'é jí wɛ. Lo ɔ́, degénɔ kpikpoe ɔ́ wá, bó mɔ hwɛjijɔ nú togun mímɛ́ Mawu Ajalɔ̌nlɔn ɔ́ tɔn. Ée hwe ɔ́ nu wá su ɔ́, togun mímɛ́ ɔ́ wá yí axɔ́súɖuto ɔ́. “Tínmɛ e é ná mì dó kanlin ɛnɛgɔ́ ɔ́ wú ɔ́ ɖíe: ‘Kanlin ɛnɛgɔ́ ɔ́ wɛ nyí axɔ́súɖuto ayǐkúngban jí tɔn ɛnɛgɔ́ ɔ́. Axɔ́súɖuto énɛ́ ɔ́ gbɔn vo nú ɖě lɛ́ɛ bǐ. É ná vúnvún nǔ e ɖo ayǐkúngban ɔ́ jí lɛ́ɛ bǐ. É ná gbídí yě, bó ná gba yě hánnyá. Zo tɔn wǒ lɛ́ɛ nyí axɔ́sú wǒ e ná kpa acɛ ɖo axɔ́súɖuto énɛ́ ɔ́ mɛ lɛ́ɛ sín xlɛ̌. Axɔ́sú wǒ-ɖokpógɔ́ ɔ́ ná wá, bó ka ná gbɔn vo nú ɖě lɛ́ɛ. Éyɛ́ ná zin axɔ́sú atɔn dɛ́, bó ná kpa acɛ. É ná nylá nu dó Mawu Ajalɔ̌nlɔn ɔ́ wú, bó ná nɔ dó ya nú togun mímɛ́ ɔ́. É ná lin ná húzú togun mímɛ́ ɔ́ sín tito lɛ́ɛ, kpódó sɛ́n tɔn lɛ́ɛ kpó; togun mímɛ́ ɔ́ ná nɔ acɛ tɔn mɛ nú xwe atɔn adaɖé. Énɛ́ ɔ́ gúdo ɔ́, hwɛɖiɖɔ sɛ́xwé tɔn ɔ́ ná wá, bó ná yí acɛkpikpa tɔn, bó ná sú kún tɔn dó, bɔ é sɔ́ ná tíin nyǐ gbeɖé ǎ. Axɔ́súɖuto e ɖo ayǐkúngban ɔ́ jí lɛ́ɛ bǐ sín axɔ́súɖuɖu kpó acɛkpikpa kpó, kpódó susu yětɔn kpó ná húzú togun mímɛ́ Mawu Ajalɔ̌nlɔn tɔn ɔ́ tɔn. Togun mímɛ́ ɔ́ ná ɖu axɔ́sú káká yi mavɔ mavɔ, bɔ hlɔ̌nhlɔ́n e ɖo gbɛ ɔ́ mɛ lɛ́ɛ bǐ ná nɔ acɛ tɔn mɛ, bó ná nɔ́ se tónú n'i, bó ná nɔ́ sɛn ɛ.’ “Dlɔ̌ ɔ́ fó dó fí. Amɔ̌, nyɛ Daniyɛ́li ɔ́, ayi ce nɔ ɖo hun xo xá mì wɛ, bɔ un blá wǔ bǐ, bó nɔ́ ɖo nǔ lin dó xó énɛ́ lɛ́ɛ wú wɛ ɖo gbɛmɛ.” Hwenu e axɔ́sú Bɛlucasáa ɖo xwe atɔn bló wɛ ɖo zinkpo jí ɔ́, nyɛ Daniyɛ́li lɛ́ mɔ nǔ ɖěvo dó ée un ko mɔ ɖ'ayǐ ɔ́ gúdo. Nǔ e un mɔ ɖo dlɔ̌ mɛ din ɔ́ ɖíe: Un mɔ nyiɖée ɖo to ɖaxó e è nɔ ylɔ́ ɖɔ Súzi ɔ́ mɛ, ɖo Elámu tokpɔn mɛ, bɔ un ɖo tɔ e è nɔ ylɔ́ ɖɔ Wuláyi ɔ́ tó. Đo dlɔ̌ ɔ́ mɛ ɔ́, un ɖo nǔ e mɔ wɛ un ɖe ɔ́ kpɔ́n wɛ, bó mɔ agbo bɔ é kpan nukɔn tɔ ɔ́. Agbo ɔ́ ɖó zo jangan jangan we; amɔ̌, zo wegɔ́ ɔ́ e wú gbɔn gǔdo ɔ́ kló hú nukɔn tɔn ɔ́. Un mɔ agbo ɔ́ ɖo zo nyi dó gbadahwe jí wɛ, bó ɖo nyinyi dó totaligbé wɛ, bó ɖo nyinyi dó tofɔligbé wɛ. Kanlin mɔ̌hun tíin bó ná nɔ te nukɔn tɔn ǎ, è ka sixú yí mɛɖé sín fɛn tɔn mɛ ǎ. Nǔ e jló e ɔ́ wɛ é nɔ́ wa, bɔ hlɔ̌nhlɔ́n tɔn fɔ́n ɔ́, é nɔ́ ɖo jijɛ jí wɛ. Hwenu e un ɖo tamɛ lin dó nǔ e un mɔ ɔ́ wú wɛ ɔ́, gbǎgbá ɖokpó tɔ́n sín gbadahwe jí bó jǎwe. É ɖo wezun jí gbɔn ayǐkúngban ɔ́ jí, afɔ tɔn ka ɖo kɔ́ mɛ jɛ wɛ ǎ. Zo ɖaxó ɖokpó ɖo gbǎgbá ɔ́ sín nukún lɛ́ɛ tɛ́ntin. É sɛ yá agbozowenɔ e un mɔ ɖo tɔ ɔ́ nukɔn ɔ́, lobo kplɔ́ dó e kpó hlɔ̌nhlɔ́n tɔn bǐ kpó. É zɔn agbo ɔ́ jí, bó xo e káká bó lɔ́ zo tɔn we lɛ́ɛ. Gǎn ɖé sɔ́ kpo ɖo agbo ɔ́ wu ǎ, bɔ é zin i dɛ, bó sɔ́ afɔ dó xwe e ná. Mɛ ɖé sixú yí agbo ɔ́ sín así tɔn ǎ. Gbǎgbá ɔ́, hlɔ̌nhlɔ́n tɔn ɖo jijɛ jí wɛ. Ée hlɔ̌nhlɔ́n tɔn wá syɛ́n bǐ ɔ́, zo tɔn ɖaxó ɔ́ nɔ mɔ̌ bó wɛ́n, bɔ zo ɖagbe ɖagbe ɛnɛ wú ɖó tɛn tɔn mɛ, lobo kpan nukɔn wɛ̌kɛ́zo ɛnɛ lɛ́ɛ. Zo yɔ̌yɔ́ ɖokpó wú ɖo zo kpɛví e ɖo zo ɛnɛ lɛ́ɛ mɛ ɔ́ wú. Zo ɔ́ ɖo ga ɖi wɛ tunta tofɔligbé zǎnzǎnhwe jí, kpó to e nyɔ́ ɖɛkpɛ hú to lɛ́ɛ bǐ ɔ́ kpó. Zo ɔ́ ɖi ga káká bó yi sɔ́ nǔ e ɖo gbɛ ɖo sɛ́xwé lɛ́ɛ bǐ, bɔ nǔ e ɖo dɔ̌n lɛ́ɛ akpá ɖě, kpó sunví lɛ́ɛ kpó wá jɛ kɔ́ mɛ, lobɔ é sɔ́ afɔ dó gbídí ná. Zo ɔ́ zɔn mɔ̌ káká yi sɔ́ gǎn e kpa acɛ dó nǔɖogbɛ e ɖo sɛ́xwé lɛ́ɛ nu é, lobo ɖó vɔ̌ e è nɔ sá n'i ayǐhɔ́ngbe ayǐhɔ́ngbe lɛ́ɛ é te, lobo lɛ́ ɖu su nú fí e goxɔ tɔn ɖe é. È jǒ nǔ e ɖo gbɛ ɖo sɛ́xwé lɛ́ɛ n'i, bó lɛ́ jó vɔ̌ e è nɔ sá ayǐhɔ́ngbe ayǐhɔ́ngbe ɔ́ dó n'i ɖó hwɛ e é hu ɔ́ wú. Zo ɔ́ zé sinsɛn ɖagbe ɔ́ xo kɔ́. É sɔ́ nǔ ɖěbǔ ɔ́, é nɔ́ kpé wú bó nɔ́ wa. “Un se wɛnsagun ɖokpó sín gbe. Wɛnsagun ɖěvo ka kanbyɔ́ wɛnsagun e sín gbe un se ɔ́ ɖɔ: ‘Hwetɛ́nu nǔ e ɖo jijɛ wɛ lɛ́ɛ ná fó bɔ è ɖɔ ɖo nǔmimɔ ɔ́ mɛ? Káká jɛ hwetɛ́nu wɛ vɔ̌sísá ayǐhɔ́ngbe ayǐhɔ́ngbe tɔn ɔ́ ná nɔ te yi ɖó? Nǔmasɔgbe e ɖo nǔ bǐ gba wɛ ɔ́, káká jɛ hwetɛ́nu é ná gba nǔ yi ɖó te ɖó? Goxɔ ɔ́ kpó nǔɖogbɛ e ɖo sɛ́xwé lɛ́ɛ kpó ɔ́, káká jɛ hwetɛ́nu wɛ yě ná nyí afɔsúnsúnnú yi ɖó?’ Wɛnsagun nukɔntɔn ɔ́ yí gbe n'i ɖɔ: ‘Kéze afatɔ́n kantɔn gban (1.150) kpó zǎn afatɔ́n kantɔn gban (1.150) kpó ná to wá yi hwɛ̌. Énɛ́ ɔ́ gúdo ɔ́, è nǎ lɛ́ slá wǔ nú goxɔ ɔ́.’ ” “Hwenu e nyɛ Daniyɛ́li ɖo nǔ e mɔ wɛ un ɖe ɔ́ kpɔ́n wɛ, bó ɖo nǔ e ɖɔ wɛ é ɖe ɔ́ ba ná tunwun wɛ ɔ́, un mɔ nǔ gbɛtɔ́ ɖɔhun ɖé wá nɔ te ɖo nukɔn ce, bɔ mɛ ɖokpó sú xó ɖo Wuláyi tɔ ɔ́ tɛ́ntin, bó ɖɔ n'i ɖɔ: ‘Gabliyɛ́li, tín nǔ e mɔ wɛ nya énɛ́ ɔ́ ɖe ɔ́ mɛ n'i.’ Gabliyɛ́li jǎwe fí e un ɖe ɔ́, bɔ xɛsi jɛ jǐ ce, bɔ un xwe agbɔ̌nnusú do. Lo ɔ́, é ɖɔ nú mì ɖɔ: ‘Daniyɛ́li, ɖǒ tó; hwɛ ɔ́ gbɛtɔ́ wɛ a nyǐ, nǔ e mɔ wɛ a ka ɖe ɔ́, gbɛvivɔ wú ɖɔ xó dó wɛ é ɖe.’ Hwenu e é ɖo xó énɛ́ ɖɔ wɛ ɔ́, un kpo ɖo agbɔ̌nnusú xwe do, bó sɔ́ tunwun gbɛ e mɛ un ɖe ɔ́ ǎ. Énɛ́ ɔ́, é hɛn mì bó fɔ́n mì sí te, bó ɖɔ nú mì ɖɔ: ‘Un ná ɖɔ nǔ e ná jɛ hwenu e è ɖǒ, bɔ xomɛsin Mawu tɔn ná fó ɔ́ nú we. Agbo e ɖó zo we bɔ a mɔ ɔ́, ɖo axɔ́súɖuto Mɛdi tɔn kpó Pɛ́si tɔn kpó sín xlɛ́ nyí wɛ. Gbǎgbá ɔ́ nyí axɔ́súɖuto Glɛ̌si tɔn sín xlɛ́. Zo ɖaxó e ɖo nukún tɔn lɛ́ɛ tɛ́ntin ɔ́ nyí axɔ́súɖuto nukɔntɔn ɔ́ sín xlɛ́. Hwenu e zo ɖaxó énɛ́ ɔ́ lɔ́ ɔ́, zo ɖěvo ɛnɛ wú ɖó tɛn tɔn mɛ. Énɛ́ xlɛ́ ɖɔ axɔ́súɖuto ɛnɛ ná jɛ axɔ́súɖuto e wá yi ɔ́ sín tɛnmɛ. Amɔ̌, axɔ́súɖuto énɛ́ lɛ́ɛ ná ɖó hlɔ̌nhlɔ́n sɔ ée yě wá ɖyɔ́ é ǎ. Ée yě ná kpa acɛ yětɔn fó, bɔ mɛ lɛ́ɛ ná hu hwɛ káká bɔ é ná tlɛ́n asá ɔ́, axɔ́sú goyítɔ́ mɛblɛ́ɖutɔ́ heelú ɖokpó ná wá yí to ɔ́. Acɛkpikpa tɔn ná nɔ́ ɖo syɛ́nsyɛ́n d'é jí wɛ, có é ka nyí é ɖésú wɛ ɖo hlɔ̌nhlɔ́n ɖé dó wɛ ǎ. É ná dɔn nǔ gěgé gúdú. É sí te dó nǔɖé wú ɔ́, é ná nɔ́ kpé wú. É ná sú mɛ e ɖó acɛ lɛ́ɛ sín kún dó. É ná sú togun mímɛ́ ɔ́ lɔ sín kún dó. É ná zé bǐbí tɔn dó táfú mɛ ɖé lɛ́ɛ, bó ná zé goyíyí tɔn dó sú mɛ e vɛdó ɖɔ émí ko mɔ agbɔ̌n lɛ́ɛ sín kún dó, bó ná lɛ́ sí te dó axɔ́sú axɔ́sú lɛ́ɛ tɔn ɔ́ jí. Hwenɛ́nu ɔ́, mɛ ɖěbǔ ná ɖó alɔ wǔ tɔn ǎ, bɔ é ná nɔ mɔ̌ bó gba hánnyá. Tínmɛ e jɛ xá vɔ̌sísá zǎnzǎn gbada tɔn e a mɔ lɛ́ɛ é nɛ́. Amɔ̌, ma ɖɔ nǔ énɛ́ e a mɔ ɔ́ nú mɛɖé ó, ɖó hwenu e é ná jɛ dó ɔ́ kpo ɖaxó.’ Énɛ́ ɔ́ gúdo ɔ́, nyɛ Daniyɛ́li ɔ́, un ba hlɔ̌nhlɔ́n kpo, lobo jɛ azɔn nú azǎn. Ée azɔn gbɔ nú mì ɔ́, un jɛ azɔ̌ e un nɔ wa nú axɔ́sú ɔ́ lɛ́ɛ wa jí. Nǔ e un mɔ ɔ́ kpó ɖo kpíkpácá mì wɛ, ɖó un ko mɔ nukúnnú jɛ mɛ ǎ.” “Hwenu e Daliwúsi Asuelúsi ví ɔ́ ɖo xwe ɖokpó bló wɛ ɖo zinkpo jí, ɖo akɔta Mɛdi tɔn nu, ɖo axɔ́súɖuto Babilɔ́nu tɔn ɔ́ mɛ ɔ́, nyɛ Daniyɛ́li xa wěma mímɛ́ lɛ́ɛ, bɔ xwe kanɖé gban (70) e è nǎ sɔ́ ɖó te dó hánnyá Jeluzalɛ́mu toxo ɔ́ ná, bɔ Mawu Mavɔmavɔ ɖɔ xó tɔn nú gbeyíɖɔ Jelemíi ɔ́, un mɔ nǔ jɛ mɛ. Un blá nu, bó zé ati kplá, bó lɛ afín, bó dó ɖe xlɛ́ ɖɔ un húzú jijɔ, bó kpan nukɔn Aklúnɔ Mawu bó xo ɖɛ, bó sa vo n'i. Un xo ɖɛ bó ɖɔ hwɛ ce lɛ́ɛ nú Mawu Mavɔmavɔ, Mawu ce ɖɔ: “Aklúnɔ, Mawu ɖaxó e mɛɖé ma nɔ mɔ do ná ǎ é, hwi mɛ e nɔ nɔ gbejí nú akɔ e a jɛ xá mɛ e nɔ nyi sɛ́n towe lɛ́ɛ é. A nɔ nɔ gbejí nú mɛ e yí wǎn nú we lɛ́ɛ. Mǐ gba sɛ́n, mǐ hu hwɛ, mǐ jɛ agɔ, mǐ fɔ́n gǔ dó jǐ towe. Mǐ lɛ́ kɔ sín sɛ́n towe lɛ́ɛ kpódó tito towe lɛ́ɛ kpó gúdo. Mǐ ɖó tó xó e mɛsɛntɔ́ towe gbeyíɖɔ lɛ́ɛ ɖɔ nú axɔ́sú mǐtɔn lɛ́ɛ, gǎn mǐtɔn lɛ́ɛ, tɔ́gbó mǐtɔn lɛ́ɛ kpó togun ɔ́ bǐ kpó é ǎ. Hwi Aklúnɔ ɔ́, a hu hwɛ ɖě ǎ. Amɔ̌, mǐdɛɛ lɛ́ɛ ɔ́, mǐɖée jɛ́n mǐ ná zé hwe lě e mǐ ɖ'é wú gbɔn égbé din é, mǐ kpó Jeluzalɛ́munu lɛ́ɛ kpódó Judáa ví lɛ́ɛ kpó, kpódó Izlayɛ́li ví ɖě lɛ́ɛ e gbejí ma nɔ nú we yětɔn zɔ́n, bɔ a nya yě, bɔ yě gba kpé to lɛ́ɛ mɛ to lɛ́ɛ mɛ lɛ́ɛ kpó. Mɛ ɖě ɖo dokɔ fí, bɔ mɛɖé lɛ́ɛ yi cí to línlín mɛ. Nǔgbó wɛ Mawu Mavɔmavɔ, mǐ kpó axɔ́sú mǐtɔn lɛ́ɛ kpó, gǎn mǐtɔn lɛ́ɛ kpó, tɔ́gbó mǐtɔn lɛ́ɛ kpó ɖu winnyá, ɖó mǐ hu hwɛ dó we. Amɔ̌, hwɛ Aklúnɔ, Mawu mǐtɔn ɔ́, ɖo xomɛnyínyɔ́ towe mɛ ɔ́, mǐ nɔ ɖo gǔ fɔ́n dó jǐ towe wɛ, có a nɔ zé hwɛ mǐtɔn lɛ́ɛ kɛ mǐ. Hwenu e a nɔ ɖo xó ɖɔ nú mǐ wɛ, gbɔn mɛsɛntɔ́ towe gbeyíɖɔ lɛ́ɛ jí ɖɔ mǐ ní nyi sɛ́n émítɔn lɛ́ɛ ɔ́, mǐ dó tókúse mɛ. Izlayɛ́li togun ɔ́ bǐ wɛ gba sɛ́n towe, bó ɖó kɔ zɔ, ɖó yě ba ná se nǔ e a nɔ kplɔ́n mɛ lɛ́ɛ ǎ; énɛ́ ɔ́, nyladó e xó è ɖɔ ɖo mɛsɛntɔ́ towe Mɔyízi sín sɛ́nwéma ɔ́ mɛ ɔ́ wá jɛ dó mǐ jí, ɖó tónúmase mǐtɔn lɛ́ɛ wú. A ɖe gbe bɔ nǔ e a ɖɔ dó mǐ ɖésúnɔ kpó gǎn e ɖo acɛ kpa nú mǐ wɛ lɛ́ɛ kpó wú ɔ́ jɛ; a ɖe gbe bɔ nyladó e ma jɛ ɖo fí ɖé kpɔ́n gbeɖé ǎ ɔ́ jɛ dó mǐ jí ɖo Jeluzalɛ́mu. Mawu Mavɔmavɔ, Mawu mǐtɔn, nyladó énɛ́ lɛ́ɛ bǐ jɛ dó mǐ jí lě e è wlǎn dó Mɔyízisɛ́n ɔ́ mɛ gbɔn é, bɔ mǐ ka sa vo nú we, bó fá xomɛ nú we ǎ, mǐ ka lɛ́ kɔ sín hwɛ mǐtɔn lɛ́ɛ gúdo ǎ, mǐ ké ya nú gbeta e a ɖe tɔ́n é ǎ. Énɛ́ ɔ́ wɛ zɔ́n bɔ a sɛ́ nyladó énɛ́ lɛ́ɛ dó mǐ. Nǔgbó wɛ Mawu Mavɔmavɔ, Mawu mǐtɔn, nǔ e a nɔ wa lɛ́ɛ bǐ wɛ nɔ sɔgbe; lo ɔ́, mǐ nɔ́ ɖó tó nǔ e a nɔ kplɔ́n mɛ lɛ́ɛ ǎ. “Aklúnɔ, Mawu mǐtɔn, hwenu e a zě hlɔ̌nhlɔ́n towe e nukɔn mɛɖé ma sixú nɔ te ɖe ǎ é dó ɖe togun towe tɔ́n sín Ejípu ɔ́, nyǐkɔ towe yi jǐ, bó kpo ɖo mɔ̌ káká wá jɛ égbé. Lo ɔ́, mǐdɛɛ lɛ́ɛ ɔ́, mǐ hu hwɛ, mǐ jɛ agɔ dó we. Aklúnɔ, lɛ̌ jɛ ɖagbe towe lɛ́ɛ wa nú mǐ jí. Ma sɔ́ xomɛsin ɖaxó énɛ́ dó kpɔ́n Jeluzalɛ́mu, toxo towe, só mímɛ́ towe ná ó. Agɔ e mǐ jɛ lɛ́ɛ kpó hwɛ e tɔgbó mǐtɔn lɛ́ɛ hu lɛ́ɛ kpó zɔ́n bɔ akɔta e lɛ́ dó mǐ lɛ́ɛ ɖo zun ɖe ɖo Jeluzalɛ́mu kpó togun towe kpó wú wɛ. Mawu mǐtɔn, bo ɖó tó ɖɛ e xo wɛ un ɖe ɔ́ kpó vo e sa sɛ́ dó we wɛ un ɖe ɔ́ kpó. Zě nukún ɖagbe dó kpɔ́n goxɔ towe e gba hánnyá é ná ɖó wǎn yíyí towe wú. Mawu ce, ɖǒtó ganjí, bó zé nukún towe dó kpɔ́n ná tlítlí. Kpɔ́n lě e to mǐtɔn élɔ́ e ɖo acɛ towe mɛ ɔ́ hánnyá bó cí é! Ée mǐ ka ɖo vo sa nú we wɛ ɔ́, é nyí nyɔ̌wa mǐtɔn wú wɛ mǐ gán jɛ ǎ; lo ɔ́, wǎn yíyí towe ma ɖó dogbó ɔ́ wú wɛ mǐ gán jɛ. Aklúnɔ, ɖǒ tó mǐ! Aklúnɔ, zě hwɛ mǐtɔn lɛ́ɛ kɛ mǐ! Aklúnɔ, ayi towe ní nɔ mǐ wú! Mawu ce, kpɔ́n dó wǎn yíyí towe wú, bó wá jɛ hun dó to élɔ́ kpó togun élɔ́ kpó jí, ɖó nyǐkɔ towe wɛ è ylɔ́ dó yě jí.” “Un kpo ɖo ɖɛ xo wɛ, bó kpo ɖo hwɛ ce lɛ́ɛ kpódó ée togun ce Izlayɛ́li hu ɔ́ kpó ɖɔ nú Mawu Mavɔmavɔ, Mawu ce wɛ. Un sa vo n'i dó só mímɛ́ tɔn tamɛ. Hwenu e un ɖo xó lɛ́ɛ ɖɔ nú Mawu wɛ ɔ́, wɛnsagun Gabliyɛ́li é un mɔ ɖo dlɔ̌ mɛ ɖ'ayǐ ɔ́ zɔn hawun bó wá gɔ̌n ce, hwenu e è ɖo vɔ̌sánú gbadanu tɔn ɔ́ xwlé Mawu wɛ é. É ɖɔ nú mì ɖɔ: ‘Daniyɛ́li, un wá din bó ná hun nǔ sín ayi towe nu. Ée a jɛ vo sa nú Mawu jí tlóló ɔ́, Mawu dó wɛn ɖokpó sɛ́ dó we bɔ un wá dó we, ɖó Mawu yí wǎn nú we ɖésú. Dǒ gǎn, bó mɔ nǔ jɛ wɛn énɛ́ ɔ́ mɛ, bó ná tunwun nǔ e ɖɔ wɛ dlɔ̌ towe ɖe é. Mawu zé xwe tɛ́nwe tɛ́nwe donu kanɖé gban (70) ɖó te nú togun towe, kpó to mímɛ́ e mɛ a ɖe ɔ́ kpó. Hwenu tají ɖé wɛ bɔ tónúmase bǐ ná fó, bɔ nǔwanyido bǐ ná nɔ te, bɔ è nǎ zé hwɛ bǐ kɛ mɛ, lobɔ hwɛjijɔ mavɔ mavɔ ɔ́ ná bɛ́ azɔ̌, bɔ nǔmimɔ lɛ́ɛ kpó xóɖɔɖ'ayǐ lɛ́ɛ kpó ná jɛ, bɔ è nǎ lɛ́ ylɔ́ Mawu nyíkɔ dó goxɔ mímɛ́ bǐ ɔ́ jí. Nǔ e a ka ɖó ná tunwun bó ná mɔ nǔ jɛ wú ɔ́ ɖíe: Sín hwenu e è ɖǒ wɛn e ɖɔ xó dó kɔ lɛ́ sín gbějí wá ɔ́ wú, bó ɖɔ dó Jeluzalɛ́mu toxo ɔ́ ná vɔ́ gbá ɔ́ wú káká wá jɛ gǎn e jí è ylɔ̌ Mawu nyíkɔ dó ɔ́ sín wǐwá hwenu ɔ́ wú ɔ́, é kó bló xwe tɛ́nwe tɛ́nwe donu tɛ́nwe. Énɛ́ ɔ́ gúdo ɔ́, ɖo xwe tɛ́nwe tɛ́nwe donu kanɖé ko-nukún-we (62) mɛ ɔ́, è nǎ lɛ́ vɔ́ toxo ɔ́ kpódó ahohó tɔn lɛ́ɛ bǐ kpó bló ɖó. Amɔ̌, hwe énɛ́ lɛ́ɛ nu ná nyí hwenu vɛ́ wǔ ɖésú. Ée xwe tɛ́nwe tɛ́nwe donu kanɖé ko-nukún-we (62) lɛ́ɛ ná fó ɔ́, è nǎ hu mɛ e jí è ylɔ̌ Mawu nyíkɔ dó é, bɔ mɛ ɖěbǔ ná jɛ hun jǐ tɔn ǎ. Énɛ́ ɔ́ gúdo ɔ́, gǎn ɖokpó ná wá kpó ahwangɔnu tɔn kpó, bó ná gba toxo ɔ́ kpó goxɔ tɔn kpó hánnyá. Amɔ̌, xomɛsin Mawu tɔn sín bǎ ná vɔ gǎn énɛ́ ɔ́ sín gbɛ. Gǎn énɛ́ ɔ́ ná ɖo ahwan fun wɛ, bó ná ɖo nǔ hɛn gblé wɛ káká jɛ kú tɔn hwenu lě e è ko ɖɔ gbɔn ɖ'ayǐ é. Xwe tɛ́nwe gúdo tɔn lɛ́ɛ mɛ ɔ́, Mawu ná ɖó azɔ̌ syɛ́nsyɛ́n kɔ jí nú mɛ gěgé, bɔ yě ɖó ná wa dandan. Yě bló xwe atɔn adaɖé ɖo xwe tɛ́nwe énɛ́ lɛ́ɛ mɛ ɔ́, è nǎ ɖó vɔ̌sísá kpó nǔníná kpó lɔ bǐ te. Nǔhɛngblétɔ́ énɛ́ ɔ́ ná yá wǔ bló nǔ baɖabaɖa lɛ́ɛ lě e é jló e gbɔn é káká jɛ hwenu e è ɖǒ, bɔ éyɛ́ tɔn ná fó dó é.’ ” Hwenu e axɔ́sú Pɛ́si tɔn Silúsi ɖo xwe atɔn bló wɛ ɖo zinkpo jí ɔ́, Mawu dó wɛn ɖé Daniyɛ́li e è nɔ ylɔ́ ɖɔ Bɛluticasáa é. Xó énɛ́ ɔ́, xójɔxó wɛ, bó ɖɔ wǔvɛ́ ɖaxó ɖaxó e jǎwe lɛ́ɛ. Daniyɛ́li ɖo tamɛ lin dó xó énɛ́ wú wɛ, bɔ Mawu wá ná ɛ tínmɛ tɔn ɖo dlɔ̌ mɛ. “Hwenɛ́nu ɔ́, nyɛ Daniyɛ́li nɔ aluwɛ mɛ nú aklúnɔzángbla atɔn kpíkpé. Un nɔ ɖu nǔɖuɖu jɔ nǔɖuɖu ɖěbǔ ǎ. Un nɔ ɖu lan ǎ, un nɔ nu vɛ̌ɛn ǎ, un lɛ́ gɔn ɖa vún káká bɔ aklúnɔzángbla atɔn lɛ́ɛ wá yi. Azǎn ko-nukún-ɛnɛgɔ́ ɔ́ e ɖo sun énɛ́ ɔ́ mɛ ɔ́, un yi cí tɔsisa ɖaxó ɖé tó; è nɔ ylɔ́ tɔ ɔ́ ɖɔ Tígli. Ée un ɖo fínɛ́, bó ɖo nǔ kpɔ́n wɛ ɔ́, un mɔ mɛɖé dó lɛ̌ɛnkanvɔ ɖé, lobo sin siká akú sín gǒjíblánú ɖokpó. Wǔtu tɔn cí awǐnnya xɔ akwɛ́ e è nɔ ylɔ́ ɖɔ klizolíti é ɖɔhun, nukún mɛ tɔn nɔ́ kɛn jǐkɛwun ɖɔhun, nukún tɔn cí zohwín ɖɔhun. Awa tɔn kpó asá tɔn kpó nɔ́ kɔ́n ganvɔ e è ɖǐɖí wǔ ná é ɖɔhun. É ɖo xó ɖɔ wɛ ɔ́, é nɔ cí gbɛtɔ́ gěgé wɛ ɖo xó ɖɔ wɛ ɖɔhun. Nyi ɖokpó wɛ mɔ nǔ énɛ́ ɔ́. Mɛ e lɛ́ lɛ̌ dó mì lɛ́ɛ mɔ nǔ ɖěbǔ ǎ, có xɛsi ka jɛ yě bǐ jí, bɔ yě hɔn yi bɛ. Nyɛ ɖokpó géé wɛ kpo ɖo nǔdábaɖa énɛ́ ɔ́ mɔ wɛ. Un ba hlɔ̌nhlɔ́n kpo. Nukún ce mɛ húzú bó tá myɔ, bɔ kanmɛ ce bǐ túntún. Nya ɔ́ ɖɔ xó bɔ gbe tɔn sín zǐngídi zɔ́n bɔ un ba nyɛɖée kpó, lobo j'ayǐ, bo xwe agbɔ̌nnusú do. Lo ɔ́, mɛɖé ɖ'alɔ wǔ ce, bó fɔ́n mì sí te, bɔ koli ce kpó alɔ ce kpó bǐ nɔ́ sísɔ́. Nya e mɔ wɛ un ɖe ɔ́ ɖɔ nú mì ɖɔ: ‘Daniyɛ́li, hwi mɛ e Mawu yí wǎn ná ɔ́, tɛ́nkpɔ́n bó mɔ nǔ jɛ xó e ɖɔ nú we gbé un ja é mɛ. Nɔ te ɖo fí e a ɖe ɔ́, ɖó hwi gɔ́n wɛ è sɛ́ mì dó din.’ Ée un se mɔ̌ ɔ́, un ɖo te bó ɖo sísɔ́sísɔ́ wɛ. É ɖɔ nú mì ɖɔ: ‘Daniyɛ́li, ma ɖi xɛsi ó. Sín gbe e gbe ayi towe jɛ nǔ mɔ jí, bɔ a zě hwiɖée hwe ɖo Mawu nukɔn ɔ́, Mawu ɖo ɖɛ towe lɛ́ɛ se wɛ, bɔ un hɛn sin tɔn ja nú we. Lo ɔ́, Pɛ́sigán ɔ́ fɔ́n gǔ dó jǐ ce káká nú azǎn ko-nukún-ɖokpó hwɛ̌ có Micɛ́li wɛnsagun Mawu tɔn ɖaxó lɛ́ɛ ɖokpó wá, bó wá dó alɔ mì, bɔ un nɔ axɔ́sú Pɛ́si tɔn lɛ́ɛ gɔ́n. Din ɔ́, un wá bó ná ɖɔ nǔ e ná wá jɛ dó togun towe jí sɔ gúdo ɔ́ nú we. Nǔ ɔ́ wɛ Mawu ɖe xlɛ́ we bɔ a mɔ.’ “Hwenu e é ɖo xó ɖɔ nú mì wɛ ɔ́, un ɖo kɔ́ mɛ kpɔ́n wɛ, bó sixú ɖɔ xó ɖěbǔ ǎ. Mɛ ɖěvo wá ɖó alɔ nu ce wú, bɔ nu ce hun, bɔ un lɛ́ jɛ xó ɖɔ jí. Un ɖɔ nú mɛ ɖěvo énɛ́ e ɖo nukɔn ce ɔ́ ɖɔ: ‘Sɛ́mɛɖó ce, nǔ e un mɔ ɔ́ dó adohu nú mì, bo tlú kanmɛ nú mì. Nyɛ mɛ e ma nyí nǔɖéwanú ǎ, bɔ funfún ma ɖo wǔ ce ǎ, bɔ un ma ɖó gǎn ǎ ɔ́, nɛ̌ un ná sixú ɖɔ xó xá Aklúnɔ ce gbɔn?’ Mɛ ɖěvo énɛ́ e ɖo nukɔn ce ɔ́ lɛ́ ɖó alɔ wu ce, bɔ un lɛ́ mɔ hlɔ̌nhlɔ́n, bɔ é ɖɔ nú mì ɖɔ: ‘Wǎnyínámɔ Mawu tɔn, ma ɖi xɛsi ó. Nǔ wɛ nyɔ́ nú we! Lɛ̌ kpan akɔ́n! Dǒ gǎn!’ Hwenu e é ɖo xó ɖɔ nú mì wɛ ɔ́, hlɔ̌nhlɔ́n ɖo wǔ ce wá wɛ, bɔ un ɖɔ n'i lo ɖɔ: ‘Sɛ́mɛɖó ce, a hɛn ɔ́, a nǎ ɖɔ xó nú mì din, ɖó a nǎ hlɔ̌nhlɔ́n mì.’ É lɛ́ ɖɔ nú mì ɖɔ: ‘A tunwun nǔ e wú un wá gɔ̌n towe ɔ́ a? Din ɔ́, un ná yi fun ahwan xá Pɛ́sigán ɔ́; un ka yi ɔ́, Glɛ̌sigán ɔ́ ná wá. Lo ɔ́, un jló ná xlɛ́ nǔ e è wlǎn dó nǔgbówéma ɔ́ mɛ é we. Mɛ ɖé ka ná dó alɔ mì ɖo ahwan e fun gbé un ja ɔ́ mɛ zɛ gǎn mitɔn Micɛ́li wú ǎ.’ ” Nya ɔ́ ɖɔ nú mì ɖɔ: “Hwenu e Daliwúsi Mɛdinu ɔ́ ɖo xwe ɖokpó bló wɛ ɖo zinkpo jí ɔ́, un dó alɔ ɛ, bó jɛ ahwan jǐ tɔn. Amɔ̌, din ɔ́, wɛn jɔ wɛn e ná dó we wɛ un ɖe ɔ́ ɖíe: “Axɔ́sú atɔn ná ɖu axɔ́sú ɖo Pɛ́si. Axɔ́sú ɛnɛgɔ́ e ná bɔ dó yě wu ɔ́ ná jɛ dɔkun hú axɔ́sú ɖě lɛ́ɛ. Hwenu e dɔkun tɔn lɛ́ɛ ná ná ɛ hlɔ̌nhlɔ́n, bɔ é ná kpa acɛ ganjí ɔ́, é ná wa nǔ bǐ bó ná tɔ́n ahwan axɔ́súɖuto Glɛ̌si tɔn. Lo ɔ́, axɔ́sú akowunká ɖokpó ná yí to ɖo Glɛ̌si, bɔ acɛkpikpa tɔn ná syɛ́n ɖésú, bɔ é ná nɔ wa nǔ e jló e é. Hwenu e è nǎ ɖe e síin ɔ́, axɔ́súɖuto tɔn ná gba hánnyá, bó ná fúnfún gbɔn wɛ̌kɛ́zo ɛnɛ lɛ́ɛ bǐ mɛ. Vǐ tɔn ɖě ná jɛ tɛn tɔn mɛ ǎ. Mɛ ɖěvo ɖěvo lɛ́ɛ wɛ ná kpa acɛ dó axɔ́súɖuto ɔ́ nu, amɔ̌, acɛkpikpa yětɔn ná sɔ éyɛ́ tɔn ǎ. “Mɛ e ná kpa acɛ dó axɔ́súɖuto Tofɔligbé tɔn nu ɔ́ ná syɛ́n ɖésú, amɔ̌, azaglɔ́gán tɔn lɛ́ɛ ɖokpó ná syɛ́n hú i, bɔ fí e é ná kpa acɛ gbɔn ɔ́ ná syɛ́n hú éyɛ́ tɔn. Ée xwe ɖé ná wá yi é ɔ́, yě ná jɛ akɔ. Axɔ́sú Tofɔligbé tɔn ɔ́ sín vǐ nyɔ̌nu ná da axɔ́sú Totaligbé tɔn ɔ́, bó ná dó hwɛ gbo nú yě. Amɔ̌, asi tɔn ná hɛn acɛkpikpa ɔ́ ɖó te n'i ǎ. Axɔ́sú ɔ́ ɖésú ná nɔ gbɛ ǎ, vǐ yětɔn lɔmɔ̌ ná nɔ gbɛ ǎ, asi ɔ́ lɔ ná nɔ gbɛ ǎ, mɛ e kpó yě kpó ɖo kpɔ́ lɛ́ɛ ɖěbǔ ná nɔ gbɛ ǎ, nyɔ̌nu ɔ́ sín asú kpó tɔ́ tɔn kpó ɖě ná nɔ gbɛ ǎ. Hɛ̌nnumɔ tɔn lɛ́ɛ ɖokpó ná wá jɛ tɔ́ tɔn tɛnmɛ, bó ná yi axɔ́sú Totaligbé tɔn ɔ́ sín hɔnmɛ, bó ná dó ya nú ahwangɔnu tɔn. É ná tɔ́n ahwan ahwangɔnu énɛ́ ɔ́, bó ná ɖu ɖo jǐ tɔn. É ɖu ɖo jǐ tɔn fó ɔ́, é ná bɛ́ vodún yětɔn lɛ́ɛ sín bǒcyɔ, bó ná bɛ́ nǔ e yě zě kpatágan kpó siká kpó dó bló ná, bó ylɔ́ Mawu nyǐkɔ d'é jí, bó nɔ zán lɛ́ɛ. É ná bɛ́ nǔ énɛ́ lɛ́ɛ bǐ yi Ejípu. Yě ná gɔn ahwan fun nú xwe we jɛjí. Énɛ́ ɔ́ gúdo ɔ́, axɔ́sú Totaligbé tɔn ɔ́ ná yi tɔ́n ahwan axɔ́súɖuto Tofɔligbé tɔn ɔ́, bó ná lɛ́ lɛ́ kɔ wá yi to tɔn mɛ. “Axɔ́sú Totaligbé tɔn sín vǐ lɛ́ɛ ná kplé ahwan tɔn lɛ́ɛ kɔn nyi kpɔ́ gégé, bó ná sɔ́ ahwannú. Mɛ ɖokpó ka ná ɖo yě mɛ, bó ná yi ahwangbénu, bɔ é kpó sɔ́ja tɔn lɛ́ɛ kpó ná gba wu, bó dó asá to ɔ́ sín dogbó tɔ ɖi sin ɖɔhun. Ée é ná lɛ́ kɔ jǎwe to tɔn mɛ ɔ́, é ná tɔ́n ahwan toxo e è mɛ ahohó lɛ́ lɛ̌ dó é. Xomɛ ná sin axɔ́sú Tofɔligbé tɔn ɔ́, bɔ é ná tɔ́n ahwan axɔ́sú Totaligbé tɔn ɔ́, bɔ axɔ́sú Totaligbé tɔn ɔ́ ná kplé ahwan tɔn lɛ́ɛ kɔn nyi kpɔ́, bɔ yě ná yi ahwangbénu. Lo ɔ́, ahwangɔnu tɔn lɛ́ɛ bǐ ná cí ahwan. Axɔ́sú Tofɔligbé tɔn ɔ́ ná yí go ɖó é ná hu mɛ gěgé ɖo ahwan énɛ́ ɔ́ mɛ. Lo ɔ́, é ná bó hu sɔ́ja tobutóbú énɛ́ lɛ́ɛ ɔ́, é ná ɖu ɖ'é jí ǎ. Axɔ́sú Totaligbé tɔn lɛ́ɛ ná kplé ahwangɔnu yɔ̌yɔ́ ɖěvo lɛ́ɛ. Ahwangɔnu énɛ́ lɛ́ɛ ná sukpɔ́ hú nukɔn tɔn lɛ́ɛ. Xwe nabí ɖé wá yi ɔ́, axɔ́sú ɔ́ kpódó ahwangɔnu gěgé kpó ná lɛ́ vɔ́ wá, bó ná hɛn ahwanfunnú gěgé. Hwenɛ́nu ɔ́, mɛ gěgé ná dó kɛn axɔ́sú Tofɔligbé tɔn. Daniyɛ́li, mɛ e ɖo togun towe mɛ lɛ́ɛ lɔmɔ̌ ɖ'é mɛ; yě kpódó mɛ e yí wǎn nú dǎkaxixo lɛ́ɛ kpó ná fɔ́n gǔ dó jǐ tɔn, bɔ nǔ e Mawu ɖe xlɛ́ we ɖo dlɔ̌ mɛ ɔ́ ná jɛ. Amɔ̌, yě mɛ ɖěbǔ ná ɖu ɖ'é jí ǎ. Axɔ́sú Totaligbé tɔn ɔ́ ná wá, bó ná mɛ kpe ɖokpó, bó ná klá jɛ toxo e è mɛ ahohó lɛ́ lɛ̌ dó é nú. Axɔ́sú Tofɔligbé tɔn ɔ́, lě do e ahwangɔnu tɔn lɛ́ɛ syɛ́n sɔ ɔ́ nɛ́, có é ka sixú nɔ te ɖo axɔ́sú Totaligbé tɔn ɔ́ nukɔn ǎ, ɖó yě ɖó gǎn mɔ̌hun ǎ. Mɛ e gba to ɔ́ é ɔ́, lě e é jló e gbɔn ɔ́ wɛ é ná wa nǔ gbɔn, ɖó mɛ ɖěbǔ sixú nɔ te nukɔn tɔn ǎ. Nú é ɖo nǔ hɛn gblé wɛ bó ɖo yiyi wɛ ɔ́, to e nyɔ́ ɖɛkpɛ hú to lɛ́ɛ bǐ é mɛ wɛ é ná wa xwé ɖó. Énɛ́ ɔ́ gúdo ɔ́, é ná ɖó jlǒ, bó ná wá kpó axɔ́súɖuto tɔn sín hlɔ̌nhlɔ́n bǐ kpó. É ná wa nǔ mɛ ɖo nǔ jlɔ́jlɔ́ wa wɛ ɖɔhun. É ná zé vǐ tɔn da nú axɔ́sú Tofɔligbé tɔn. Linlin e dó wa mɔ̌ ná wɛ é ɖe ɔ́ wɛ nyí ɖɔ é ná dɔn kɛntɔ́ tɔn sín to dó kɔ́blúmánya mɛ, amɔ̌, é ná kpé nǔ énɛ́ ɔ́ wú bó wa ǎ. Énɛ́ ɔ́ gúdo ɔ́, é ná húzú kpan nukɔn toxo e ɖo tɔ ɔ́ tó lɛ́ɛ, bó ná yí toxo gěgé. Amɔ̌, gǎn to ɖěvo mɛ tɔn ná ɖó glagla e ɖú wɛ é ɖe ɔ́ te, bó ná bló bɔ nǔ e é wa lɛ́ɛ ji nǔɖé ɔ́, é ná sɔ́ kpan. Din ɔ́, é ná húzú kpan nukɔn toxo e è mɛ ahohó lɛ́ lɛ̌ dó ɖo to é ɖésú tɔn mɛ lɛ́ɛ; amɔ̌, ɖagbe ɖé ná sixú tɔ́n sín mɛ n'i ǎ. É nyɔ́ wa ɔ́, é ná kú ma ɖó donu. Mɛ e ná wá jɛ axɔ́sú énɛ́ ɔ́ tɛnmɛ ɔ́, ná sɛ́ mɛ ɖokpó dó, bɔ mɛ ɔ́ ná yi xɔ e nyɔ́ ɖɛkpɛ hú xɔ lɛ́ɛ bǐ ɖo axɔ́súɖuto ɔ́ mɛ é mɛ, bó ná bɛ́ nǔ e ɖ'é mɛ lɛ́ɛ bǐ. Azǎn ɖé ná jɛ ǎ, bɔ è nǎ gbídí axɔ́sú énɛ́, é ka ná nyí agbawungba abǐ ahwangbénu ǎ. “Mɛ e ná wá mɛ énɛ́ ɔ́ sín tɛnmɛ ɔ́ ná nyí mɛɖé, bɔ mɛ bǐ ná gbɛ́ wǎn n'i; è nǎ sɔ́ ɛ su axɔ́sú ɖɔhun ǎ. To ɔ́ bǐ ná ɖo vivo mɛ, bɔ nya énɛ́ ɔ́ ná dó ahizi, bó ná klá jɛ axɔ́súɖuto ɔ́ nu, bó ná ɖu gǎn. Ahwangɔnu ɖěbǔ sixú kpé wǔ tɔn ǎ; é ná gbídí yě bǐ. É ná hu togun e yě jɛ akɔ xá ɔ́ sín gǎn ɖokpó. É ná ɖó dó xó e yě ɖɔ nyi alɔ ɖokpó jí xá ɛ lɛ́ɛ wú, bó ná jɛ ayi we zán jí. Mɛ e ɖo jǐ tɔn lɛ́ɛ hwe có acɛ tɔn fɔ́n ɔ́, é nɔ́ ɖo jijɛ jí wɛ. To ɔ́ bǐ ná ɖo vivo mɛ, bɔ é ná yi byɔ́ toxo e hun nukún ganjí ɖo tokpɔn ɔ́ mɛ lɛ́ɛ é mɛ, lobo ná wa nǔ e tɔ́gbó tɔn lɛ́ɛ ma glá bó wa gbeɖé ǎ é. É ná vɔ to ɔ́, bó ná má nǔ e é bɛ́ sín ahwangbénu lɛ́ɛ kpó dɔkun lɛ́ɛ kpó nú mɛ e ɖo jǐ tɔn lɛ́ɛ. É ná to lě e é ná tɔ́n ahwan ahwankpá lɛ́ɛ gbɔn ɔ́. Amɔ̌, nǔ nɛ́ lɛ́ɛ bǐ ná nɔ mɔ̌ káká sɔ́yi ǎ. “É ná ɖeji dó hlɔ̌nhlɔ́n tɔn kpó akɔ́nkpinkpan tɔn kpó wú, bó ná kplá ahwangɔnu ɖaxó ɔ́. Amɔ̌, axɔ́sú énɛ́ ɔ́ ná ko sɔ́ ahwannú ɖ'ayǐ, bó ná fun ahwan xá ahwangɔnu ɖaxó e ná syɛ́n ɖésú é. É ná sɔ́ nǔ bǐ mɔ̌ cóbó ka ná sixú nɔ te nukɔn tɔn ǎ, ɖó ahizi sín wlɛnwín e é ɖe dó wǔ tɔn ɔ́ wú. Nǔ ɖo mɔ̌ có mɛ e ɖo kpɔ́ xá ɛ lɛ́ɛ ɖésú wɛ ná flú i. Kɛntɔ́ tɔn ná ɖu ɖo ahwangɔnu tɔn jí, bɔ sɔ́ja tɔn lɛ́ɛ gěgé ná kú. Axɔ́sú Totaligbé tɔn ɔ́ kpó axɔ́sú tofɔligbé tɔn ɔ́ kpó ná kplé ɖo nǔɖuká ɖokpó ɔ́ kɔn. Amɔ̌, ée dǎkaxixo kpo ɖo ayi mɛ nú yě ɔ́, nǔvú jɛ́n yě ná ɖó nú yěɖée ɖo fínɛ́. Kplé yětɔn énɛ́ ɔ́ ná ɖó bɛ̌nu ɖé ǎ, ɖó hwenu e nǔ bǐ ná fó dó ɔ́ kó su ǎ. Axɔ́sú Totaligbé tɔn ɔ́ ná lɛ́ kɔ yi to tɔn mɛ kpó dɔkun gěgé kpó. Ée é ná lɛ́ kɔ wá xwe xwé ɔ́, é ná tɔ́n ahwan togun e è jɛ akɔ mímɛ́ xá lɛ́ɛ ɖokpó, lě e é ko to gbɔn ɖ'ayǐ é, bó ná ɖidó to tɔn mɛ. “Ée hwe ɔ́ nu wá su ɔ́, axɔ́sú Totaligbé tɔn ɔ́ lɛ́ vɔ́ wá axɔ́súɖuto Totaligbé tɔn ɔ́ tɔn mɛ, amɔ̌, lě e nǔ lɛ́ɛ ná yi gbɔn hwenɛ́nu ɔ́ ná gbɔn vo nú ɖ'ayǐ tɔn ɔ́. Mɛ e ɖo gbadahwe jí lɛ́ɛ ná dó tɔjíhún e gosín Cíplu é, bó ná wá gbo ali nú axɔ́sú Totaligbé tɔn ɔ́. Awakanmɛ ná kú i, bɔ é ná lɛ́ kɔ. É ná ɖó gbe kpɔ́ xá mɛ e ma nɔ gbejí nú akɔjijɛ ɔ́ ǎ lɛ́ɛ, bó ná jɛ ma dó togun e ɖo akɔjijɛ mímɛ́ ɔ́ lɛ́ɛ glɔ́ é jí. Sɔ́ja e é sɛ́ dó lɛ́ɛ ná sí ahwan te, ɖo ahohó mímɛ́ ɔ́ nukɔn, bó ná ɖu su ná. Vɔ̌ e sá nú Mawu wɛ è nɔ ɖe ayǐhɔ́ngbe ayǐhɔ́ngbe ɔ́, yě ná ɖó te; yě ná zé suɖunú baɖabaɖa ɖokpó ɖó vɔ̌sákpe ɔ́ jí. Cɛ́ncɛ́n e xo dó mɛ wɛ axɔ́sú ɔ́ ɖésú nɔ ɖe lɛ́ɛ ɔ́ ná dɔn mɛ gěgé, bɔ yě ná dó vɛ̌ nú akɔjijɛ ɔ́. Amɔ̌, mɛ e nɔ gbejí nú Mawu lɛ́ɛ ná ɖó kan dó nǔ e wa wɛ yě ɖe ɔ́ wú syɛ́nsyɛ́n. Mɛ e bí ganjí ɖo yě mɛ lɛ́ɛ ná ná kplɔ́n mɛ gěgé. È nǎ hu mɛɖé lɛ́ɛ ɖó hwǐ wú, è nǎ dó mɛ lɛ́ɛ zo, è nǎ bɛ́ mɛɖé lɛ́ɛ sín dɔkun, lobo ná zé yě yi sú dó gankpá mɛ. Nǔ énɛ́ lɛ́ɛ ná jɛ káká yi jɛ hwe ɖé nu. Hwenu e yě ná ɖo ya énɛ́ lɛ́ɛ ji wɛ ɔ́, yě ná mɔ alɔdó kpɛɖé. Yɛmɛnúwatɔ́ gěgé ná ɖo mɛ e ná wá jɛ yě jí lɛ́ɛ é mɛ. Mɛ gěgé ná kú ɖo nǔnywɛ́tɔ́ lɛ́ɛ mɛ, bɔ kú yětɔn ná slá wǔ nú togun ɔ́, bɔ é ná mɛ́ bó ná nɔ wǐwé jí nú gbe e gbe gbɛ ná vɔ é; lo ɔ́, hwe ɔ́ nu ko nɛ́ ǎ. “Axɔ́sú ɔ́ ná nɔ́ wa nǔ lě e é jló e gbɔn é. É ná nɔ́ tɛ afɔ ayǐ, bó ná nɔ́ mɔ ɖɔ émí hú gǎn vodún lɛ́ɛ bǐ. É ja xó ɖɔ nú Mawu mawu lɛ́ɛ tɔn gbé ɔ́, é ná nɔ́ lin tamɛ kpɔ́n ǎ. Nǔ nǎ ɖo nyǐnyɔ́ n'i wɛ káká jɛ hwenu e xomɛsin Mawu tɔn ná wá é. Lo ɔ́, nǔ e Mawu ɖɔ ɔ́ jɛ́n ná jɛ. Axɔ́sú ɔ́ ná ɖó sísí ɖěbǔ nú vodún e tɔ́gbó tɔn lɛ́ɛ ko sɛn lɛ́ɛ é ǎ; é ka ná ɖó sísí nú vodún e nyɔ̌nu lɛ́ɛ nɔ́ wlíbo ná é ǎ. É ná mɔ éɖée dó mɔ mɛ e hú gǎn nǔmɛsɛn lɛ́ɛ bǐ é, bó ná nɔ́ sí ɖě ǎ. Lo ɔ́, é ná sɛn vodún ahohó lɛ́ɛ tɔn, nǔmɛsɛn énɛ́ e tɔ́gbó tɔn lɛ́ɛ ma tunwun kpɔ́n ǎ é. É ná xwlé siká, kpatágan, awǐnnya ɖagbe ɖagbe lɛ́ɛ, kpódó nǔ xɔ akwɛ́ ɖěvo ɖěvo lɛ́ɛ kpó vodún énɛ́ Vodún to ɖěvo mɛ tɔn énɛ́ ɔ́ ná dó alɔ ɛ, bɔ é ná tɔ́n ahwan toxo lɛ́ɛ. É ná wlí yɛ̌yi nú mɛ e ná yí gbe nú vodún énɛ́ ɔ́ lɛ́ɛ é bǐ. É ná sɔ́ yě gǎn ɖó mɛ gěgé nu, bó ná má ayǐkúngban nú yě, bɔ é ná nyí ajɔ nú yě. “Hwenu e nǔ lɛ́ɛ bǐ ná ɖo nǎ fó wɛ ɔ́, axɔ́sú Tofɔligbé tɔn ɔ́ ná lɛ́ jɛ kɛnfɔ ɖe xá axɔ́sú Totaligbé tɔn ɔ́ jí. Amɔ̌, axɔ́sú totaligbé tɔn ɔ́ ná sí te dó jǐ tɔn kpó zǐngídi kpó, bó ná fɔ ahwanhún kpó sɔ́ kpó tɔjíhún gěgé kpó, lobo ná tɔ́n ahwan ɛ. Lě e tɔsisa nɔ́ gɔ́, bó nɔ́ gba wǔ ɔ́ ɖɔhun wɛ é kpódó ahwangɔnu tɔn kpó ná xo to ɔ́ sín dogbó lɛ́ɛ zlɛ́, bó ná byɔ́ to ɔ́ mɛ gbɔn ɖisí amyɔ. É ná byɔ́ to e nyɔ́ ɖɛkpɛ hú to lɛ́ɛ bǐ é mɛ, bó ná hu mɛ gěgé. Amɔ̌, Edɔ́munu lɛ́ɛ, Mɔwabunu lɛ́ɛ, kpó gǎn ɖaxó Amumɔ́ɔ ví lɛ́ɛ tɔn lɛ́ɛ kpó ná gló e. É ná kpa acɛ gbɔn to ɖěvo lɛ́ɛ mɛ; Ejípu ɖésú lɔ ná hán ɖ'é mɛ ǎ. É ná klá jɛ Ejípu dɔkun lɛ́ɛ nu; siká kpó kpatágan kpó nǔ xɔ akwɛ́ e ɖo to ɔ́ mɛ lɛ́ɛ kpó bǐ ná húzú étɔn. Libíinu lɛ́ɛ kpó Etiopíinu lɛ́ɛ kpó ná hwíhwɛ́ yěɖée ɖó glɔ̌ tɔn. Amɔ̌, xó e è se sín zǎnzǎnhwe jí kpó totaligbé kpó lɛ́ɛ gba ayi dó n'i, bɔ é sin xomɛ bó dó ahwan gbě, bó ná sú mɛ gěgé sín kún dó. Xu ɔ́ kpó só mímɛ́ e ɖo to e nyɔ́ ɖɛkpɛ hú to lɛ́ɛ bǐ é kpó sín tɛ́ntin wɛ é ná bló axɔ́sú sín goxɔ tɔn lɛ́ɛ nyi. Fínɛ́ wɛ kú ná wá fyán ɛ ɖe, bɔ mɛ ɖěbǔ ná wá dó alɔ ɛ ǎ.” Wɛnsagun ɔ́ lɛ́ vɔ́ ɖɔ nú mì ɖɔ: “Hwenɛ́nu ɔ́, Micɛ́li gǎn wɛnsagun lɛ́ɛ tɔn e nɔ́ nya xɛ ɖo togun towe jí é ná wá. Akpɔmimɔ sín hwenu ɖé wɛ é ná nyí, bɔ nǔ e ná jɛ akɔta énɛ́ ɔ́ hwenu ɔ́, ɖě ná ko jɛ kpɔ́n sín hwenu e akɔta ɖě lɛ́ɛ ko jɔ é ǎ. Énɛ́ ɔ́ gúdo ɔ́, è nǎ hwlɛ́n to towe mɛ nu e sín nyǐkɔ è wlǎn dó gbɛwéma ɔ́ mɛ lɛ́ɛ gán. Mɛ e ɖo amlɔ dɔ́ wɛ ɖo yɔdo mɛ lɛ́ɛ gěgé ná fɔ́n; mɛ ɖě ná fɔ́n nú gbɛ mavɔ mavɔ, mɛ ɖě ká ná fɔ́n dó winnyá nu, mɛ ɖě ká ná fɔ́n dó ya mavɔ mavɔ nu. Mɛ e ná ɖó nǔnywɛ́ lɛ́ɛ ná kɔ́n nǔ e ɖo jǐnukúnsin lɛ́ɛ sín ɖɛkpɛ ɖɔhun. Mɛ e ka ná kplɔ́n nǔ mɛ ɖě bɔ yě ná nɔ gbejí lɛ́ɛ ná kɔ́n sunví e ɖo jǐnukúnsin lɛ́ɛ ɖɔhun. “Daniyɛ́li! Hɛn xó élɔ́ ayi mɛ. Ma ɖɔ nǔ e ɖo wěma élɔ́ mɛ ɔ́ nú mɛɖé cóbónú nǔ lɛ́ɛ bǐ sín fífó hwenu ná su ó. Énɛ́ ɔ́ mɛ gěgé ná wá xa nǔ e ɖ'é mɛ lɛ́ɛ, bɔ nǔnywɛ́ yětɔn ná jɛ jí.” Hwenu e nyɛ Daniyɛ́li ɖo nǔ e mɔ wɛ un ɖe ɔ́ kpɔ́n wɛ ɔ́, mɛ we ɖěvo xwetɔ́n, bó ɖo te ɖo ɖisí amyɔ nú tɔsisa ɔ́. Mɛ ɖokpó kpan nukɔn nya e dó lɛ̌ɛnkanvɔ, bó ɖo tɔ ɔ́ jí ɔ́, bó kanbyɔ́ ɛ ɖɔ: “Hwetɛ́nu nǔ baɖabaɖa énɛ́ lɛ́ɛ ká ná fó dó?” Nya e dó lɛ̌ɛnkanvɔ ɔ́ dlɛ́n alɔ tɔn we lɛ́ɛ dó jǐxwé, bɔ un se bɔ é ɖɔ: “Un xwlé Mawu e ɖo gbɛ káká sɔ́yi ɔ́ sín nyǐkɔ ɖɔ nǔ énɛ́ lɛ́ɛ ná jɛ káká nú xwe atɔn adaɖé. Nǔ énɛ́ lɛ́ɛ ná fó hwenu e togun Mawu tɔn ɔ́ sín acɛkpikpa ná gba hánnyá bǐ é.” Nyɛ Daniyɛ́li lɛ́ se xó énɛ́ lɛ́ɛ, un ka mɔ nukúnnú jɛ mɛ ǎ. Énɛ́ wú wɛ un kanbyɔ́ ɖɔ: “Sɛ́mɛɖó ce! Nɛ̌ nǔ énɛ́ lɛ́ɛ bǐ ka ná fó gbɔn?” É yí gbe nú mì ɖɔ: “Daniyɛ́li, ado ma hu we ó. Xó énɛ́ ɖó ná nɔ hwlǎhwlá ganjí káká jɛ nǔ lɛ́ɛ sín vivɔ hwenu. Mɛ gěgé ná tíin bɔ è ná slá wǔ nú yě, bɔ yě ná wé, bó ná mɛ́. Mɛdídá e ma sixú mɔ nukúnnú jɛ nǔ mɛ ǎ lɛ́ɛ ná kpo ɖo nǔ nyanya yětɔn lɛ́ɛ dó sin wɛ. Amɔ̌, mɛ e ɖó nǔnywɛ́ lɛ́ɛ ná mɔ nukúnnú jɛ nǔ e ɖo jijɛ wɛ é wú. Nǔ énɛ́ lɛ́ɛ ná bɛ́ jijɛ sín gbe e gbe è ma sɔ́ ná sixú sá vɔ̌ nú Mawu ayǐhɔ́ngbe ayǐhɔ́ngbe ǎ é, bɔ è nǎ zé suɖunú baɖabaɖa ɖokpó ɖó vɔ̌sákpe ɔ́ jí. Nǔ lɛ́ɛ ná ɖo jijɛ wɛ káká nú azǎn afayizɛ́n kanwe wǒ (1.290). Nǔ nyɔ́ nú mɛ e ná syɛ́nlǐn, bó ná ɖo nukún ɖó nǔ wɛ káká nú azǎn afayizɛ́n kantɔn afɔtɔn (1.335) é. Amɔ̌, hwɛ Daniyɛ́li ɔ́, nɔ gbejí káká yi fó. Énɛ́ ɔ́, a nǎ ɖó vivo, bó ná fɔ́n sí te, bó ná wá yí ajɔ towe ɖo vivɔnu.” Wěma élɔ́ ɔ́, xó e Mawu Mavɔmavɔ ɖɔ nú Ozée Beeli ví ɔ́ lɛ́ɛ wɛ ɖ'é mɛ. Jelobowámu, Yexoázi ví ɔ́ wɛ nyí Izlayɛ́li xɔ́sú hwenɛ́nu. Hwenɛ́nu ɖokpó ɔ́ wɛ Oziyási kpó Yotámu kpó, kpó Akázi kpó, kpódó Ezekiyási kpó ɖu axɔ́sú ɖo Judáa. Azɔn nukɔn nukɔntɔn e Mawu Mavɔmavɔ ɖɔ xó nú Ozée ɔ́, é ɖɔ n'i ɖɔ: “Yi da agalɛtɔ́ ɖokpó. Vǐ e é ná ji nú we lɛ́ɛ ná nyí agaví, ɖó mɛ e ɖo to ɔ́ mɛ lɛ́ɛ bǐ ɖo aga lɛ wɛ, yě jó nyɛ Mawu Mavɔmavɔ ɔ́ dó!” Ozée yi nǔgbó bó da Gomɛ́ɛ Divlayímu vǐ ɔ́. Nyɔ̌nu ɔ́ mɔ xo, bó ji vǐ súnnu ɖokpó n'i. Bɔ Mawu Mavɔmavɔ ɖɔ nú Ozée ɖɔ: “Sun nyǐ vǐ ɔ́ ɖɔ Izleyɛ́li, ɖó é nɔ zaanɖé din ɔ́, un ná dɔn tó nú Jehu sín kúnkan lɛ́ɛ, ɖó mɛ e yě hu ɖo Izleyɛ́li lɛ́ɛ é wú; un ná ɖó xwédo Izlayɛ́li tɔn ɔ́ sín axɔ́súɖuɖu te. Gbe énɛ́ ɔ́ gbe ɔ́, un ná hu acɛ nú ahwangɔnu Izlayɛ́li tɔn ɔ́ sín hlɔ̌nhlɔ́n ɖo tɔdo Izleyɛ́li tɔn ɔ́ mɛ.” Nyɔ̌nu ɔ́ lɛ́ mɔ xo bó ji vǐ nyɔ̌nu ɖokpó. Bɔ Mawu Mavɔmavɔ ɖɔ nú Ozée ɖɔ: “Sun nyǐ vǐ ɔ́ ɖɔ Lo-Hluxáma, tínmɛ tɔn wɛ nyí mɛ e è ma yí wǎn ná ǎ é, ɖó un sɔ́ ná yí wǎn nú Izlayɛ́linu lɛ́ɛ ǎ. Un ná ɖó wǎn e un yí nú yě ɔ́ te. Lo ɔ́, un ná yí wǎn nú Judáanu lɛ́ɛ; nyɛ Mawu Mavɔmavɔ, Mawu yětɔn ná hwlɛ́n yě gán. Un ka ba gǎ abǐ hwǐ ǎ; un ba ná fun ahwan ǎ, un ba ahwan-yisɔ́sú ǎ, un ka ba sɔ́xátɔ́ cóbó ná hwlɛ́n yě gán ǎ.” Ée Gomɛ́ɛ ɖe anɔ̌ nú Lo-Hluxáma ɔ́, tínmɛ tɔn wɛ nyí mɛ e è ma yí wǎn ná ǎ é, é lɛ́ mɔ xo bó ji vǐ súnnu ɖokpó. Bɔ Mawu Mavɔmavɔ ɖɔ nú Ozée ɖɔ: “Sun nyǐ vǐ ɔ́ ɖɔ Lo-Ami, tínmɛ tɔn wɛ nyí mɛ e ma nyí togun ce ǎ é, ɖó mi sɔ́ nyí togun ce ǎ, nyɛ ka sɔ́ nyí Mawu mitɔn ǎ.” É ɖo mɔ̌ có Izlayɛ́li ví lɛ́ɛ ná sukpɔ́ káká bó ná cí xuta nyɛ́kɛ́n ɖɔhun; è nɔ sixú jlɛ́ xuta nyɛ́kɛ́n ǎ, è ka nɔ sixú xa ǎ. Énɛ́ ɔ́, Mawu sɔ́ ná ɖɔ nú yě ɖɔ yě kún sɔ́ nyí togun émítɔn ó ǎ, é nyɔ́ wa ɔ́, é ná ɖɔ nú yě ɖɔ yě nyǐ Mawu gbɛɖe ɔ́ sín vǐ. Judáanu lɛ́ɛ kpódó Izlayɛ́linu lɛ́ɛ kpó ná kplé bó ná sɔ́ gǎn ɖokpó, bó ná kpa acɛ nú to ɔ́. Đó azǎn ɖaxó ɖé wɛ Izleyɛ́li sín azǎn ɔ́ ná nyí. Mi ɖɔ nú nɔví mitɔn súnnu lɛ́ɛ ɖɔ Ami, togun ce, bó ɖɔ nú nɔví mitɔn nyɔ̌nu lɛ́ɛ ɖɔ Hluxáma, wǎnyínámɔ! Mawu Mavɔmavɔ ɖɔ: “Mi dó hwɛ Izlayɛ́li nɔ mitɔn ɔ́, mi dó hwɛ ɛ, ɖó é sɔ́ nyí asi ce ǎ, nyɛ lɔ ka sɔ́ nyí asú tɔn ǎ. É ní ɖe aga wuntun e ɖo nukún tɔn mɛ ɔ́ síin, bó ɖe aga wuntun e ɖo anɔ̌ tɔn jí ɔ́ síin. É má nyí mɔ̌ ǎ ɔ́, un ná ɖe e nyi mɛ̌, un ná ɖe e nyi mɛ̌ jɔgbe. Un ná sɔ́ ɛ dó húzú gbětótló, un ná sɔ́ ɛ dó húzú axéko, un ná ɖó sinnugblá n'i káká, bɔ é ná wɛ́n vɛ̌. Un ná kú nǔbláwǔ nú vǐ tɔn lɛ́ɛ ǎ, ɖó agaví wɛ yě nyǐ. Nɔ yětɔn lɛ aga, mɛ e hɛn xo yětɔn ɔ́ kɔ́n wi éɖée tɔn, ɖó é ɖɔ: ‘Un ná yi ba xɔnnɔ ce lɛ́ɛ mɔ. Đó yě wɛ nɔ́ ná mì nǔɖuɖu kpó sin kpó, gbɔ̌fúnvɔ kpó akwɛ́núvɔ kpó, ami kpó ahan kpó.’ ” Énɛ́ ɔ́ wú wɛ nyɛ Mawu Mavɔmavɔ ɔ́, un ná bɛ́ wunkan dó gbo ali n'i, un ná mɛ dǒ lɛ́ lɛ̌ dó e, bɔ é sɔ́ ná mɔ ali bó tɔ́n ǎ. É ná kán wezun jɛ xɔnnɔ tɔn lɛ́ɛ gúdo, é ká ná xwedó yě wú ǎ. É ná ba yě, é ká ná mɔ yě ǎ. Énɛ́ ɔ́ gúdo ɔ́, é ná ɖɔ: “Un ná lɛ́ kɔ yi asú ce xóxó ɔ́ gɔ́n, ɖó hwenu e un ɖo gɔ̌n tɔn ɔ́, nǔ nyɔ́ nú mì hú lě e un ɖe gbɔn égbé din é.” É tunwun ɖɔ nyɛ wɛ nɔ ná émí jinukún, kpó vɛ̌ɛn yɔ̌yɔ́ kpó, kpódó ami kpó ɖ'ayǐ ǎ. Bɔ kpatágan kpó siká kpó e un nɔ ná ɛ ɔ́, é nɔ́ fɔ ná vodún Baalu. Énɛ́ ɔ́ wú wɛ un ná yí jinukún ce sín así tɔn ɖo nǔkún-yiya hwenu, bó ná yí vɛ̌ɛn ce sín así tɔn vǐwun gbigbɛ hwenu. Un ná ɖe gbɔ̌fúnvɔ ce kpó akwɛ́núvɔ ce kpó sín wǔ tɔn; gbɔ̌fúnvɔ kpó akwɛ́núvɔ kpó e é dó hwlá mɛ̌ é. Din ɔ́, un ná ɖe nǔ e hwlá wɛ é ɖe ɔ́ xlɛ́ to, ɖo xɔnnɔ tɔn lɛ́ɛ nukún mɛ, bɔ mɛ ɖěbǔ ná yí i sín alɔ ce mɛ ǎ. Un ná ɖó awǎ e jɛ wɛ é ɖe ɔ́ bǐ te. Xwe e ɖu wɛ é ɖe lɛ́ɛ, sunwájǐxwe e ɖu wɛ é ɖe lɛ́ɛ, gbɔjɛzán e ɖu wɛ é ɖe lɛ́ɛ, kpódó agɔ̌ e ɖu wɛ é ɖe lɛ́ɛ bǐ kpó ɔ́, un ná ɖó bǐ te. Un ná sú vǐwungbo tɔn lɛ́ɛ kpó fígitín tɔn lɛ́ɛ kpó kún dó; énɛ́ lɛ́ɛ wɛ nyí nǔ e xɔnnɔ tɔn lɛ́ɛ ná ɛ é, bɔ é nɔ́ ɖɔ: “Nǔ e xɔnnɔ ce lɛ́ɛ ná mì lɛ́ɛ nɛ́. Un ná sɔ́ nǔ énɛ́ lɛ́ɛ dó húzú zunkan, bɔ gběkanlin lɛ́ɛ ná nɔ́ wá ɖu nǔ ɖo fínɛ́. Un ná dɔn tó n'i nú azǎn nabí e é dó zǎlínkpɔ́n zo nú vodún Baalu lɛ́ɛ xɔ é; un ná dɔn tó n'i nú azǎn nabí e é dó alɔkɛ́ kpó kɔjɛ́ kpó dó ba acɔ́ ná xɔ é, azǎn nabí e é ba acɔ́ ná bó yi ba xɔnnɔ tɔn lɛ́ɛ mɔ, bó wɔn mì xɔ é. Énɛ́ ɔ́ wú wɛ un ná dó yɛ ɛ, bó ná kplá ɛ yi gbětótló mɛ, bó ná sɔ́ gbe fífá dó ɖɔ xó n'i. Un ná sɔ́ vǐwungbo tɔn lɛ́ɛ kpó adǎngbomɛ tɔdo ɔ́ kpó jó n'i ɖo fínɛ́, bɔ é ná nyí nukúnɖíɖó sín hɔn ɖé bó hun n'i. É ná jɛ han ji jí sín fínɛ́, lě e é kó nɔ́ ji gbɔn ɖo ɖyɔ̌vǐ mɛ é, lě e é kó nɔ́ ji gbɔn hwenu e é gosín Ejípu é.” Mawu Mavɔmavɔ ɖɔ: “Gbe énɛ́ ɔ́ gbe ɔ́, a nǎ ylɔ́ mì ɖɔ: ‘Asú ce!’ A sɔ́ ná nɔ ylɔ́ mì ɖɔ: ‘Gǎn ce’ ǎ. Un ná yí vodún Baalu kpó vodún ɖě lɛ́ɛ kpó nyǐkɔ sín nu towe, bɔ è sɔ́ ná nɔ́ ylɔ́ nyǐkɔ yětɔn ɖě ǎ. Gbe énɛ́ ɔ́ gbe ɔ́, un ná bló bɔ yě ná jɛ akɔ xá gběkanlin lɛ́ɛ, kpó xɛ lɛ́ɛ kpó, kpódó kanlin e nɔ sá gbɔn kɔ́ mɛ lɛ́ɛ kpó. Un ná bɛ́ gǎ kpó hwǐ kpó, kpódó ahwanfunnú bǐ kpó sín to ɔ́ mɛ, bó ná bló bɔ togun ce ná dɔ́ amlɔ bo vo. Un ná da we bɔ a nǎ nyí asi ce káká sɔ́yi. Agban e un ná ná nú we ɔ́ ɖíe: un ná wa nǔ ɖó sɛ́nxwi jí nú we, un ná wa nǔ ɖó hwɛjijɔ jí nú we, un ná yí wǎn nú we, un ná ɖó xomɛfífá dó wǔtu towe. Un ná da we lě e un dó akpá tɔn nú we gbɔn é. Énɛ́ ɔ́, a nǎ tunwun ɖɔ nyɛ wɛ nyí Mawu Mavɔmavɔ. Gbe énɛ́ ɔ́ gbe ɔ́, mi ná mɔ ɖɔ nyɛ Mawu Mavɔmavɔ nɔ́ yí ɖɛ. Un ná ná nǔ e ba wɛ jǐxwé ɖe lɛ́ɛ jǐxwé, bɔ jǐxwé ná ná nǔ e ba wɛ ayǐkúngban ɖe lɛ́ɛ ayǐkúngban. Ayǐkúngban ná ná jinukún, bó ná ná vɛ̌ɛn yɔ̌yɔ́, bó ná ná ami, bɔ Izleyɛ́li ná mɔ nǔ e ba wɛ é ɖe lɛ́ɛ. Un ná ɖó tɛnmɛ nú Izleyɛ́li ɖo to ɔ́ mɛ, bó ná yí wǎn nú WǍNGBƐ́. Un ná ɖɔ nú MI SƆ́ NYÍ CE Ǎ ɖɔ: ‘Togun ce wɛ a nyǐ’, bɔ é ná ɖɔ nú mì ɖɔ: ‘Mawu ce wɛ a nyǐ.’ ” Mawu Mavɔmavɔ ɖɔ nú mì ɖɔ: “Lɛ̌ vɔ́ yí wǎn nú nyɔ̌nu énɛ́ ɔ́ e ɖó asú cóbó ká lɛ́ ɖo aga lɛ wɛ é. Yǐ wǎn n'i lě e nyɛ Mawu Mavɔmavɔ ɔ́ yǐ wǎn nú Izlayɛ́li ví lɛ́ɛ gbɔn é. Yě jó mì dó, bó ɖo vodún lɛ́ɛ sɛn wɛ, bó yí wǎn nú hlɛ̌n vǐwunsínsɛ́ntá tɔn e yě nɔ́ ná vodún lɛ́ɛ, có un yí wǎn nú yě.” Ée Mawu Mavɔmavɔ ɖɔ mɔ̌ ɔ́, un zé kpatágankwɛ́ afɔtɔn kpódó jinukún e è nɔ ylɔ́ ɖɔ ɔ́ji ɔ́ kilóo afɔwe kanɖé wǒ (450) kpó dó yí nyɔ̌nu ɔ́ ná. Énɛ́ ɔ́, un ɖɔ n'i ɖɔ: “Nyǐ nyɛ ɖokpónɔ tɔn xɔ azǎn gěgé. Ma sɔ́ lɛ aga ɖě ó; ma jó hwiɖée nú súnnu ɖěbǔ ó, énɛ́ ɔ́, nyɛ lɔmɔ̌ ná nɔ mɔ̌ nú we.” Đó Izlayɛ́li ví lɛ́ɛ ná nɔ axɔ́sú kpó gǎn kpó má ɖó xɔ xwe gěgé; yě ná gɔn vɔ̌ sá xɔ xwe gěgé, bó ná gɔn awǐnnya e yě sɔ́ dó ɖó vodún ná ɔ́ sɛn xɔ xwe gěgé. Yě ná gɔn nǔ e è nɔ dó kan nǔ byɔ́ Mawu lɛ́ɛ ɖó xɔ xwe gěgé. Énɛ́ ɔ́ gúdo ɔ́, Izlayɛ́li ví lɛ́ɛ ná lɛ́ kɔ wá. Yě ná ba Mawu Mavɔmavɔ, Mawu yětɔn kpódó Davídi axɔ́sú yětɔn ɔ́ kpó mɔ. Nú é wá yá ɔ́, kpó sísí kpó wɛ yě ná ba Mawu Mavɔmavɔ ɔ́ kpó ɖagbe e é nɔ́ wa nú mɛ lɛ́ɛ kpó. Mawu Mavɔmavɔ ɖo hwɛ dó mɛ e ɖo to ɔ́ mɛ lɛ́ɛ wɛ. Izlayɛ́li ví lɛ́ɛ mi, mi bo ɖótó xó e Mawu Mavɔmavɔ ɖɔ é; é ɖɔ: “Gbejínɔtɔ́ ɖě sɔ́ ɖo to ɔ́ mɛ ǎ, xomɛnyɔ́tɔ́ ɖě sɔ́ ɖo to ɔ́ mɛ ǎ, mɛɖé ká sɔ́ tunwun nyɛ Mawu ɖo to ɔ́ mɛ ǎ. Nu jɛ́n yě nɔ́ dó nɔzo yětɔn, yě nɔ́ ɖó adingban, yě nɔ́ hu mɛ, yě nɔ́ ja ajo, yě nɔ́ lɛ aga. Asú wɛ yě nɔ́ fán mɛ; yě fɔ́n ɔ́, mɛ hu wɛ jɛ́n yě nɔ́ ɖe. Énɛ́ ɔ́ wú wɛ mɛ e ɖo to ɔ́ mɛ lɛ́ɛ ná jɛ aluwɛ mɛ; mɛ e nɔ nɔ to ɔ́ mɛ lɛ́ɛ bǐ ná blá wǔ; yě kpó gběkanlin lɛ́ɛ kpó, kpódó xɛ lɛ́ɛ kpó bǐ wɛ ná blá wǔ, hweví lɛ́ɛ lɔ ná sú kún dó.” Mawu Mavɔmavɔ ɖɔ: Éeǒ! Ényí mɛɖé kpowun wɛ è ɖǒ ná dó hwɛ ǎ; mɛɖé kpowun wɛ è nǎ xa hwɛ̌ dó kɔ ná ǎ. Lo ɔ́, hwi vɔ̌sánú-xwlémawutɔ́ ɖaxó ɔ́ ɖɔ hwɛ xá wɛ un ɖe. Đó togun towe cí mɛ e nɔ ɖɔ jlɛ xá vɔ̌sánú-xwlémawutɔ́ lɛ́ɛ ɖɔhun. A nǎ klɛ́n afɔ bo jɛ ayǐ kéze ɖéɖé, bɔ hǎgbɛ́ towe gbeyíɖɔ ɔ́ lɔmɔ̌ ná klɛ́n afɔ bo jɛ ayǐ zǎn mɛ. Un ná sú nɔ towe sín kún dó. Togun ce gba, ɖó é tunwun mɛ alɔkpa e un nyí ɔ́ ǎ wú. Amɔ̌, hwi lɔmɔ̌ ɔ́, a ko ba ná tunwun nǔ ɖěbǔ dó wǔ ce ǎ. Énɛ́ ɔ́ wú wɛ un ma sɔ́ ba we ǎ. A sɔ́ ná nɔ xwlé vɔ̌sánú ɖě mì ǎ. Nǔkplɔ́nmɛ ce lɛ́ɛ e a wɔn ɔ́ wú wɛ nyi lɔmɔ̌ ná wɔn vǐ towe lɛ́ɛ. Yě fɔ́n bó ɖo jiji wɛ ɔ́, hwɛhuhu yětɔn nɔ́ ɖo jijɛ jí wɛ. Un ná zé susu e yě ɖó ɔ́ dó húzú hɛ̌n. Vɔ̌ e togun ce nɔ wá sá nú mì ɖó hwɛ e yě hu ɔ́ tamɛ ɔ́ wɛ nyí nǔɖuɖu yětɔn. Hǔn, nǔ ɖokpó e nɔ́ myá nukún nú yě ɔ́ wɛ nyí ɖɔ togun ce ní fɔ́n bó ɖo hwɛ hu wɛ. Amɔ̌, nǔ e gbo togun ɔ́ wɛ ná gbo mɛ e nɔ xwlé vɔ̌sánú mì lɛ́ɛ. Lě e yě zán gbɛ gbɔn ɔ́ sín tó wɛ un ná dɔn nú yě. Yě ná nɔ ɖu nǔ káká, bó ká ná nɔ́ gɔ́ xo ǎ. Yě ná nɔ lɛ aga káká, yě ká ná ji vǐ ǎ. Đó yě jó mì dó, yě jó nyɛ Mawu Mavɔmavɔ ɔ́ dó bó jɛ aga lɛ jí. Aga kpó vɛ̌ɛn xóxó kpó vɛ̌ɛn yɔ̌yɔ́ kpó gba tamɛ nú togun ce. Togun ce yi kan nǔ ɖo atín vodún tɔn ɔ́ gɔ́n; é ɖɔ vodún ɔ́ ní ɖɔ xó nú émí. Aga jɔhɔn dɔn yě bú. Yě klán sín nyɛ Mawu yětɔn ɔ́ wú, yě dó afɔ gbě. Yě nɔ́ sá vɔ̌ ɖo só lɛ́ɛ ta; yě nɔ́ dó zǎlínkpɔ́n zo ɖo só kpɛví kpɛví lɛ́ɛ jí, ɖo cɛ́nitín lɛ́ɛ kpó pepliyéetín lɛ́ɛ kpó, kpódó telebɛ́ntitín lɛ́ɛ kpó sá. Atín énɛ́ lɛ́ɛ sín yɛtɛn nyɔ́ ganjí. Énɛ́ ɔ́ wú wɛ vǐ yětɔn nyɔ̌nu lɛ́ɛ nɔ́ lɛ aga, bɔ vǐ yětɔn sín asi lɛ́ɛ nɔ dó afɔ gbě. Lo ɔ́, un ná dɔn tó nú vǐ mitɔn nyɔ̌nu lɛ́ɛ ɖó aga e yě nɔ́ lɛ ɔ́ wú ǎ. Un ná dɔn tó nú vǐ mitɔn sín asi lɛ́ɛ ɖó afɔ e yě nɔ́ dó gbě ɔ́ wú ǎ. Mi vɔ̌sánú-xwlémawutɔ́ lɛ́ɛ wɛ un ná dɔn tó ná, ɖó mi nɔ kplá agalɛtɔ́ lɛ́ɛ yi jɛ vo; mi kpó agalɛtɔ́ lɛ́ɛ kpó nɔ́ yi sá vɔ̌. È nɔ dó lǒ ɖé ɖɔ: Togun e ma tunwun nǔ ɖagbe ɖo nǔ nyanya mɛ ǎ ɔ́, éɖée wɛ é zé nyi gbě. Óo! Izlayɛ́linu lɛ́ɛ mi! Mi fɔ́n bó ɖo aga lɛ wɛ. Amɔ̌, Judáanu lɛ́ɛ mi, mi ma hu hwɛ e yě hu ɔ́ ó. Mi ma yi Gilugalu ó, mi ma yi Bɛti-Awɛni ó, mi ma ka xwlé nǔ bó ɖɔ: “Mawu Mavɔmavɔ ɖo gbɛ” ó. Izlayɛ́linu lɛ́ɛ fɔ́n gǔ nyibúsixwɛ e è ma sixú dé ǎ é ɖɔhun. Amɔ̌, din ɔ́, nyɛ Mawu Mavɔmavɔ ná kplá ɛ yi ama ɖu gbé lɛ̌ngbɔ́ví ɖé ɖɔhun ɖo ayǐkúngban wɛnjɛ ɖé jí. Eflayímunu lɛ́ɛ ɖó kan dó vodún sinsɛn wú. Mi tin dó yě. Yě nu ahan gɔ́ xo lě tlóló ɔ́, aga lɛ jí jɛ́n yě nɔ́ jɛ. Winnyánúwiwa jɛ́n nɔ́ myá nukún nú gǎn yětɔn lɛ́ɛ. Axásáxásá jɔhɔn ná dɔn yě yi. Vɔ̌ e yě sá lɛ́ɛ ná hu winnyá nú yě. “Vɔ̌sánú-xwlémawutɔ́ lɛ́ɛ mi, mi ɖótó xó élɔ́! Izlayɛ́li sín gǎn lɛ́ɛ mi, mi lɔmɔ̌ ní ɖótó. Mi mɛ e ɖo axɔ́sú ɔ́ sín hɔnmɛ lɛ́ɛ mi, mi lɔmɔ̌ ní ɖótó. Midɛɛ lɛ́ɛ wɛ ɖó ná ɖɔ hwɛ jlɔ́jlɔ́. Lo ɔ́, fɛ́ca wɛ mi nyí nú togun ce ɖo Misipa, bó nyí ɖɔ bɔ è ɖǒ n'i ɖo Tabɔ́ɔ só jí, bó nyí do gɔngɔn ɖo Citímu. Amɔ̌, nyɛ ɔ́, un ná kplɔ́n mi mɛ bǐ. Un tunwun Eflayímunu lɛ́ɛ, un dán Izlayɛ́linu lɛ́ɛ ǎ, ɖó din ɔ́, Eflayímu dó afɔ gbě, Izlayɛ́li ɖu su. Nǔ e wa wɛ yě ɖe lɛ́ɛ lɔn nǔ nú yě bónú yě ná lɛ́ kɔ wá Mawu yětɔn gɔ́n ǎ, ɖó agayixa ɖo tɛ́ntin yětɔn. Đó yě tunwun Mawu Mavɔmavɔ ǎ. Go e yí wɛ togun Izlayɛ́li tɔn ɔ́ ɖe ɔ́ kó ɖe nǔ e é nyí ɔ́ xlɛ́. Togun Izlayɛ́li tɔn kpó akɔta Eflayímu tɔn ɔ́ kpó ná klɛ́n afɔ ɖó hwɛ e yě hu lɛ́ɛ wú. Akɔta Judáa tɔn ɔ́ lɔmɔ̌ ná klɛ́n afɔ kpó yě kpó. Yě ná hɛn lɛ̌ngbɔ́ kpó nyibú kpó dó yi sá vɔ̌ nú Mawu Mavɔmavɔ, yě ká ná mɔ ɛ ǎ, ɖó é kó ɖo zɔ nú yě. Yě nɔ gbejí nú Mawu Mavɔmavɔ ǎ, ɖó yě ji agaví. Din ɔ́, sun ɖokpó kó kpé bɔ è nǎ vɔ yě kpó nǔ e yě ɖó lɛ́ɛ bǐ kpó.” “Mi kún lanzo ɖo Giveya, mi kún kpɛn ɖo Hlama! Mi sú xó ɖo Bɛti-Awɛni. Akɔta Bɛnjamɛ́ɛ tɔn, kpɔ́n gǔdo towe. È nǎ vɔ akɔta Eflayímu tɔn ɔ́ ɖo tódɔnnúmɛ zǎn ɔ́ gbe. Nǔ e ɖɔ nú akɔta Izlayɛ́li tɔn lɛ́ɛ wɛ un ɖe ɔ́ ná jɛ nǔgbó. Judáa sín gǎn lɛ́ɛ nɔ wa nǔ mɛ e nɔ sɛ tɛn nú ayǐkúngban yětɔn sín dogbó lɛ́ɛ ɖɔhun. Un ka ná gba xomɛsin ce kɔn nyi yě jí tɔsisa ɖɔhun. È dǒ ya nú akɔta Eflayímu tɔn ɔ́, bɔ hwɛ e è ɖǒ n'i ɔ́ zɔ́n bɔ é gba bǐ, ɖó é wa nǔ e jló e lɛ́ɛ. Un ná cí lakpálakpá ɖɔhun nú akɔta Eflayímu tɔn ɔ́. Un ná cí akpa e vó ɔ́ ɖɔhun nú Judáanu lɛ́ɛ. Akɔta Eflayímu tɔn ɔ́ mɔ azɔn e jɛ wɛ é ɖe ɔ́. Akɔta Judáa tɔn ɔ́ mɔ akpa e ɖo wǔ tɔn ɔ́. Énɛ́ ɔ́, Eflayímu yi Asilíi bó ɖɔ xó nú Axɔ́sú Đaxó ɔ́; lo ɔ́, axɔ́sú énɛ́ ɔ́ sixú gbɔ azɔn nú mi ǎ, é ká sixú mɔ nǔɖé dó hu akpa mitɔn lɛ́ɛ ná ǎ. Kinnikínní ɖɔhun wɛ un ná cí nú akɔta Eflayímu tɔn ɔ́, bó ná cí kinnikínníví ɖɔhun nú Judáanu lɛ́ɛ. Nyɛ Mawu Mavɔmavɔ ɔ́, nyɛ ɖésúnɔ wɛ ná vúnvún yě bó ná yi. Un ná bɛ́ yě yi, bɔ mɛ ɖěbǔ ná sixú yí yě sín así ce ǎ.” Mawu Mavɔmavɔ ɖɔ: “Un ná yi, un ná yi nɔ xwé ce gbe, káká jɛ hwenu e yě ná tunwun ɖɔ émí wa nǔ nyi do bó ná lɛ́ kɔ wá gɔ̌n ce dó é. Nú adǎn kó jɛ yě gbo jí ɔ́, yě ná ba mì mɔ.” Mawu Mavɔmavɔ ɖɔ: “Énɛ́ ɔ́, mi ná ɖɔ: Mi wá nú mǐ ná lɛ́ kɔ yi Mawu Mavɔmavɔ gɔ́n, ɖó é wɛ gblé wǔ mǐ, é ká ná gbɔ azɔn nú mǐ. É wɛ vúnvún mǐ, é jɛ́n ká ná kpé nukún dó mǐ wú. É ná sɔ́ azǎn we ɖó te, bó ná dó vɔ́ gbɛ ná mǐ, bɔ azǎn atɔngɔ́ ɔ́ gbe ɔ́, é ná zé mǐ sí te, bɔ mǐ ná nɔ gbɛ ɖo gɔ̌n tɔn. Mǐ ní tunwun Mawu Mavɔmavɔ, mǐ ní dó gǎn bó ná tunwun i. Wǐwá tɔn ɖó gblǎ ǎ, lě e ayǐtéhɔ̌nnu má nɔ gɔn susu ǎ é ɖɔhun. É ná wá gɔ̌n mǐtɔn jǐ ɖɔhun, é ná wá lě e xwejí nɔ ja, bó nɔ́ hú sin nú ayǐkúngban é ɖɔhun.” Eflayímu e, nɛ̌ un ná wa nǔ towe gbɔn? Judáa e, nɛ̌ un ná wa nǔ towe gbɔn? Sísí e mi ɖó nú mì ɔ́ cí akpɔ́kpɔ́ zǎnzǎn tɔn ɖɔhun. É cí amǔ e sú, bɔ zaanɖé din ɔ́, é ná kɛn ɔ́ ɖɔhun. Énɛ́ ɔ́ wú wɛ un zé xó e un ɖɔ gbɔn gbeyíɖɔ ce lɛ́ɛ jí ɔ́ dó dɔn tó nú yě. Un zé xó e nɔ́ tɔ́n sín nu ce mɛ lɛ́ɛ dó hu yě. Hwɛ e un ɖó nú yě lɛ́ɛ gba kpé wěziza ɖɔhun. Nǔ e un yí wǎn ná ɔ́ wɛ nyí ɖɔ è nǐ nɔ gbejí nú mì, bó yí wǎn nú mì nǔgbó. É nyí vɔ̌sísá lɛ́ɛ wɛ un yí wǎn ná ǎ. Nú è tunwun ɖɔ nyɛ wɛ nyí Mawu ɔ́, un yí wǎn nú énɛ́ ɔ́ hú è nǐ dǒ vɔ̌ zo nú mì ɖo vɔ̌sákpe jí. “Yě gba akɔ e un jɛ xá yě ɔ́, gbɛtɔ́ lɛ́ɛ ɖɔhun. Nǔ e yě wa bó dó jɛ do nú mì é nɛ́. Nǔ nyanyawatɔ́ lɛ́ɛ sín toxo wɛ nyí Galadi toxo ɔ́. Yě gbɔn fí ɖěbǔ dín ɖo toxo ɔ́ mɛ ɔ́, hun jɛ́n nɔ kɔn nyi ayǐ. Vɔ̌sánú-xwlémawutɔ́ lɛ́ɛ tɔwu ɖo Sikɛ́mu sín ali jí ajotɔ́ axánsúnxó ɖɔhun, bó ɖo mɛ hu wɛ. Heelúnú e dó sin wɛ yě ɖe lɛ́ɛ nɛ́. Un mɔ nǔɖé lɛ́ɛ ɖo akɔta Izlayɛ́li tɔn ɔ́ mɛ, nǔ lɛ́ɛ dó xɛsi: Eflayímu ɖo aga lɛ wɛ ɖo fínɛ́, Izlayɛ́li ɖo su ɖu wɛ. Judáa e, un ɖo nǔ sɔ́ wɛ, bó ná ya hwi lɔmɔ̌ nǔkún ɖɔhun, hwenu e un ná kplá mɛ e nyí kannumɔ ɖo togun ce mɛ lɛ́ɛ wá é.” Mawu Mavɔmavɔ ɖɔ: “Hwenu e un jló ná gbɔ azɔn nú togun Izlayɛ́li tɔn ɔ́, hwɛ e akɔta Eflayímu tɔn ɔ́ hu lɛ́ɛ kpódó dǎka e Samalíinu lɛ́ɛ xo ɔ́ kpó wɛ un mɔ. Ajotɔ́ lɛ́ɛ byɔ́ xwé lɛ́ɛ gbe, ajotɔ́ axánsúnxó lɛ́ɛ ɖo ajo gbo mɛ wɛ gbɔn alixo alixo. Yě lɛ̌n gbeɖé ɖɔ un ɖo dǎka e émí xo lɛ́ɛ bǐ flín wɛ ǎ. Din ɔ́, nǔ nyanya e yě wa lɛ́ɛ lɛ́ lɛ̌ dó yě. Un mɔ bǐ. Yě nɔ́ ɖɔ xó víví dó dó xomɛhunhun nú axɔ́sú yětɔn. Yě nɔ́ ɖó adingban dó dó xomɛhunhun nú gǎn yětɔn lɛ́ɛ. Yě bǐ wɛ dó afɔ gbě. Yě cí myɔkpó e wɔ̌xúxúɖatɔ́ xo zo dó, bɔ é sɛ́ káká bó má sɔ́ byɔ́ ɖɔ é ní xo zo dó sín hwenu e é nya linfín ɔ́ dó káká bɔ é wá fɔ́n ǎ é ɖɔhun. Axɔ́sú yětɔn ɖo xwe ɖu wɛ ɔ́, ahan nɔ mú yě, bɔ yě nɔ́ dó nu xó mɛ. Yě mɛ e nɔ fɔ́n bó nɔ ɖo mɛ gbé blá wɛ lɛ́ɛ ɔ́, yě sɛ́ myɔkpó ɖɔhun. Adǎn yětɔn bǐ nɔ yi xɔ zǎn mɛ. É ká jɛ zǎnzǎn ɔ́, adǎn yětɔn nɔ xɔ hiwun, xwé wlí zo ɖɔhun. Yě bǐ wɛ hun zo myɔkpó ɖɔhun. Yě nɔ́ vívá gǎn yětɔn lɛ́ɛ sín kún. Axɔ́sú yětɔn lɛ́ɛ bǐ jɛ ayǐ, yě mɛ ɖěbǔ ylɔ̌ mì ǎ. Akɔta Eflayímu tɔn ɔ́ cáká dó togun lɛ́ɛ mɛ. Akɔta Eflayímu tɔn ɔ́ cí atá e è ma húzú ǎ é ɖɔhun. Jǒnɔ lɛ́ɛ ɖo da vɔ́ n'i wɛ, é ká tunwun ǎ. É ɖo kpikpo wɛ, bó ká tunwun ǎ. Go e yí wɛ togun Izlayɛ́li tɔn ɔ́ ɖe ɔ́ kó ɖe nǔ e é nyí ɔ́ xlɛ́. Yě lɛ́ kɔ wá Mawu Mavɔmavɔ, Mawu yětɔn ɔ́ gɔ́n ǎ. Nǔ énɛ́ lɛ́ɛ bǐ jɛ có, yě ɖo biba ɛ wɛ ǎ. Eflayímunu lɛ́ɛ cí ahwannɛ́ xlonɔ ɖé ɖɔhun, ayixa ɖěbǔ ɖo xo yětɔn mɛ ǎ. Ejípu wɛ yě ylɔ́, Asilíi wɛ yě yi. Nú yě ɖidó ɔ́, un nɔ nyi ɖɔ ce cyɔ́n yě. Un nɔ ɖe gbe bɔ yě nɔ́ kɔn nyi kɔ́ mɛ xɛ ɖɔhun. Un nɔ dɔn tó nú yě bɔ é nɔ́ sɔgbe xá nǔ nyanya e yě wa bɔ è ɖo ɖiɖɔ wɛ é. Yě ɖo hinhɔn nú mì wɛ, heelú yě! Kún yětɔn ná sú dó ɖó yě fɔ́n gǔ dó jǐ ce. Un ko jló ná hwlɛ́n yě gán, lo ɔ́, adingban wɛ yě nɔ́ ɖó dó nu ce. Yě nɔ́ sú xó ylɔ́ mì kpó ayi yětɔn kpó ǎ, bó ká nɔ́ ɖo vo sa wɛ ɖo adɔ̌zan yětɔn lɛ́ɛ jí. Yě nɔ́ já wǔtu bó ná dó mɔ jinukún kpó vɛ̌ɛn yɔ̌yɔ́ kpó. Gǔ fɔ́n dó jǐ ce wɛ yě ká ɖe mɔ̌. Nyɛ wɛ kplɔ́n yě; nyɛ wɛ ná hlɔ̌nhlɔ́n yě. Lo ɔ́, nǔ nyanya kɛ́ɖɛ́ wɛ yě nɔ́ lin dó wǔtu ce. Nyɛ Mawu Ajalɔ̌nlɔn ɔ́ gɔ́n wɛ yě lɛ́ kɔ wá ǎ. Yě cí da e má ɖo ganjí ǎ ɖɔhun. Gǎn yětɔn lɛ́ɛ ná cí ahwan, ɖó mɛ ma sí xó e nɔ́ tɔ́n sín nu yětɔn mɛ lɛ́ɛ wú. Nǔ e ná zɔ́n bɔ yě ná nyí nǔkiko ɖo Ejípu é nɛ́.” Mawu Mavɔmavɔ ɖɔ: “Mi kún lanzo! Kɛntɔ́ kplɔ́ dó Mawu Mavɔmavɔ xwé ɔ́ gangan ɖɔhun, ɖó Izlayɛ́linu lɛ́ɛ gba akɔ e un jɛ xá yě ɔ́, yě gba sɛ́n e un dó nú yě lɛ́ɛ. Yě ná sú xó bó ɖɔ sɛ́ dó mì ɖɔ: ‘Mawu ce, mǐ mɛ Izlayɛ́linu lɛ́ɛ ɔ́, mǐ tunwun we!’ Izlayɛ́linu lɛ́ɛ gbɛ́ wǎn nú nǔ ɖagbe; énɛ́ ɔ́ wú ɔ́, kɛntɔ́ ɔ́ ná jɛ gǔdo yětɔn. Yě nɔ́ sɔ́ axɔ́sú nyɛ mɛ vo. Yě nɔ́ sɔ́ gǎn ma kan nǔɖé byɔ́ mì. Yě zé kpatágan yětɔn kpó siká yětɔn kpó dó bló vodún ná. Énɛ́ ɔ́ wú wɛ kún yětɔn ná sú dó. Nyɛ Mawu Mavɔmavɔ gbɛ́ nyibúví Samalíinu lɛ́ɛ tɔn. Un sin xomɛ dó yě ɖésú. Ayǐ ɖé ká ná hɔ́n, bɔ yě ná gɔn hwɛ hu cé? Izlayɛ́li wɛ nyibúví ɔ́ ká gosín hǔn, alɔnuzɔ́watɔ́ ɖé wɛ tun. Nyibúví ɔ́ nyí Mawu ǎ. Nǔ énɛ́ ɔ́ wú wɛ è nǎ gba nyibúví ɔ́ hánnyá. Nǔ e è dǒ ɔ́ wɛ è nɔ ya. Yě ná ɖó jinukún kwín ɖokpó ǎ. Jinukún e ná wú lɛ́ɛ ɖě ná nyɔ́ nú è nǎ mɔ linfín ǎ. É ná bó tíin ɔ́, jǒnɔ lɛ́ɛ wɛ ná ɖu bǐ. È sú Izlayɛ́linu lɛ́ɛ sín kún dó. Zɛ̌n e má nyí nǔɖé wa nú ǎ é ɖɔhun wɛ yě ɖe din ɖo akɔta lɛ́ɛ tɛ́ntin. Đó yě yi Asilíi, tócí gbě tɔn e má nɔ́ nɔ mɛɖé mɛ ǎ é ɖɔhun. Eflayímunu lɛ́ɛ nɔ́ ná nǔ mɛ dó zun xɔ́ntɔn. Yě ná nǔ akɔta lɛ́ɛ bó ná dó nyɔ́ ɖo yě sí có, un ná kplé yě lo, bɔ zaanɖé din ɔ́, yě ná ji ya ɖo agban kpinkpɛn e axɔ́sú Asilíi tɔn ɔ́ ná ɖíɖá yě ɔ́ glɔ́. Eflayímunu lɛ́ɛ mɛ vɔ̌sákpe kɔn nyi kpɔ́, bó ná dó súnsún hwɛ yětɔn lɛ́ɛ; lo ɔ́, vɔ̌sákpe énɛ́ lɛ́ɛ wɛ dɔn yě dó hwɛ mɛ. Un na bo wlán nǔ e sɛ́n ce zɔ́n lɛ́ɛ bǐ nú yě ɔ́, yě nɔ́ ké ya ɖěbǔ ná ǎ. Yě nɔ́ hu kanlin dó sá vɔ̌ ɖó lan ná ɖu wú, bɔ é nyí nyɛ sá vɔ̌ ná wɛ yě ɖe. Nǔ énɛ́ lɛ́ɛ wɛ nɔ́ hun xomɛ nú nyɛ Mawu Mavɔmavɔ ɔ́ ǎ. Nyɛ Mawu Mavɔmavɔ ɔ́, un flín hwɛ e yě hu lɛ́ɛ din, bó ná dɔn tó tɔn nú yě: yě ná lɛ́ kɔ yi Ejípu. Izlayɛ́linu lɛ́ɛ wɔn nyɛ mɛ e ɖó yě ɔ́, bó gbá xwé nú axɔ́sú yětɔn lɛ́ɛ, bɔ Judáanu lɛ́ɛ ɖó toxo e è mɛ ahohó lɛ́ lɛ̌ dó lɛ́ɛ kɔn nyi kpɔ́; lo ɔ́, un ná dó toxo yětɔn ɖaxó ɖaxó lɛ́ɛ zo, bɔ xwé yětɔn ɖagbe ɖagbe lɛ́ɛ ná ji zo.” Izlayɛ́linu lɛ́ɛ mi, mi ma xaji ɖu xwe bo j'awǎ togun ɖě lɛ́ɛ ɖɔhun ó, ɖó mi lɛ aga bó ɖo zɔ nú nyɛ Mawu mitɔn ɔ́. Đó mi ɖo akwɛ́ kwíji kwíji gbé mɛ, bó nɔ́ ɖo aga lɛ wɛ gbɔn kɔ́xota kɔ́xota fí e è nɔ só jinukún ɖe lɛ́ɛ bǐ. Lo ɔ́, jinukún e só wɛ è ɖe ɖo kɔ́xota é kpódó ami e fyɔ́n wɛ è ɖe ɖo amito mɛ é kpó ná kpé mì ǎ. Mi ɖo vɛ̌ɛn yɔ̌yɔ́ e nɔ te kpɔ́n wɛ mi ɖe ɔ́ ná mɔ nu wɛ ǎ. Eflayímunu lɛ́ɛ ná sixú nɔ Mawu Mavɔmavɔ sín to ɔ́ mɛ ǎ, yě ɖǒ ná lɛ́ kɔ yi Ejípu, abǐ Asilíi, bó ná yi ɖu nǔ e vɛ́ yě lɛ́ɛ. Énɛ́ ɔ́, yě sɔ́ ná ba ahan ɖě nú Mawu Mavɔmavɔ ǎ; yě ká sɔ́ ná nɔ́ xwlé vɔ̌sánú ɖěe, bó ná dó nyɔ́ ɖo así tɔn ǎ. É ná cí nǔwamɛ nǔɖuɖu ɖé ɖɔhun nú yě: mɛ e ná ɖu lɛ́ɛ bǐ ná ɖu su. Đó nǔɖuɖu yětɔn ɔ́, yě ɖokpónɔ wɛ ná ɖu. È ná zé byɔ́ Mawu Mavɔmavɔ xwé gbe ǎ. Ani wɛ mi ná bló ɖo kplézán ɖaxó ɔ́ gbe? Xwezán Mawu Mavɔmavɔ tɔn ɔ́ gbe ɔ́, ani wɛ mi ná bló? Hwenu e yě ná gosín to yětɔn e è gba ɔ́ mɛ ɔ́, Ejípunu lɛ́ɛ ná yí yě. Lo ɔ́, Mɛfísi toxo ɔ́ wɛ ná nyí yɔdo yětɔn. Akwɛ́nú e yě ɖó lɛ́ɛ, kpatágan yětɔn ɔ́, kpɔvɛwun wɛ ná vun blá. Wunkan wɛ ná wú ɖo goxɔ yětɔn lɛ́ɛ mɛ. Hwenu e Mawu Mavɔmavɔ ná dɔn tó nú mɛ ɔ́ kó su, hwenu e Mawu Mavɔmavɔ ná kan nǔ e mɛ ɖokpó ɖokpó wa ɔ́ byɔ́ ɛ ɔ́ kó su. Izlayɛ́linu lɛ́ɛ ní tunwun ɖɔ é kó yá. Mi nɔ ɖɔ: “ Gbeyíɖɔ Mawu tɔn ɔ́ hun taɖu. Mɛ e Mawu nɔ́ ɖɔ xó dó ayi mɛ ná ɔ́ ɖo gblǒ ɖɔ wɛ.” Hwɛ e mi hu lɛ́ɛ wɛ sukpɔ́ dín, gǔ e mi fɔ́n dó jǐ ce ɔ́ syɛ́n dín. Gbeyíɖɔ Mawu tɔn e ɖo Eflayímu wú kpé nukún dó wɛ ɔ́, Mawu ɖo gǔdo tɔn; é ɖo mɔ̌ có, è nɔ ɖó mɔ n'i gbɔn ali tɔn lɛ́ɛ bǐ jí. È nɔ́ hun káká yi tɔ́n ahwan ɛ ɖo Mawu tɔn sín xwé gbe. Yě kpo nú nǔ kwíji kwíji wiwa kɛ́ɖɛ́ lě e yě bló gbɔn ɖo Giveya ɖ'ayǐ xóxó ɔ́ ɖɔhun. Mawu Mavɔmavɔ ná flín nǔ e yě wa nyi do ɔ́. É ná dɔn hwɛ e yě hu ɔ́ sín tó nú yě. Mawu Mavɔmavɔ ɖɔ: “Đ'ayǐ xóxó ɔ́, un mɔ Izlayɛ́linu lɛ́ɛ, yě cí vǐwun e ɖo gbětótló mɛ é ɖɔhun. Un mɔ tɔ́gbó mitɔn lɛ́ɛ, yě cí fígi sín sínsɛ́n nukɔntɔn lɛ́ɛ ɖɔhun. Lo ɔ́, ée yě jɛ Baalu-Peɔ́ɔ tlóló ɔ́, yě jɛ vodún Baalu sɛn jí, bó jó yěɖée dó nú vodún hɛ̌n, bɔ yě kpó asú yětɔn vodún ɔ́ kpó bǐ húzú nǔ gbɛ́hɛn. Susu e Eflayímunu lɛ́ɛ ɖó ɔ́ ná zɔn yi xɛ ɖɔhun. Mɛ ɖé sɔ́ ná ji vǐ ǎ, mɛɖé sɔ́ ná mɔ xo ǎ, sun sɔ́ ná nɔ te nú mɛɖé ǎ. Yě ná bó tɛ́nkpɔ́n bó tɔ́jú vǐ yětɔn lɛ́ɛ ɔ́, yě ná su có nú un ná yí yě sín akɔn yětɔn ǎ. Un wá jó yě dó hweɖénu hǔn, heelú yě. Lě e mɔ Eflayímunu lɛ́ɛ gbɔn wɛ un ɖe ɔ́, nǔ e gbo Tíi ɔ́ wɛ ɖo nǎ gbo e wɛ. Ayǐ nyɔ́ nú Eflayímu ganjí, lo ɔ́, é ná ɖe vǐ tɔn lɛ́ɛ tɔ́n bɔ è nǎ hu yě Tíi ɖɔhun.” Mawu Mavɔmavɔ e, nú è nǎ zé bǎ ɖé dó xo yě ɔ́, bǎ ɖě tɛ́ wɛ è ɖǒ ná zé? Đe gbe bónú asi yětɔn lɛ́ɛ ní nɔ́ gblé xo, sin ní má nɔ anɔ̌ yětɔn mɛ ó. Mawu Mavɔmavɔ ɖɔ: “Adǎnú e yě wa ɔ́ bǐ jɛ wěxo ɖo Gilugalu. Sín fínɛ́ wɛ un jɛ wǎn gbɛ́ nú yě ɖe jí. Hǔn, un ná nya yě sín xwé ce gbe, ɖó nǔ nyanya e yě wa lɛ́ɛ wú. Un sɔ́ ná yí wǎn nú yě ɖě ǎ. Gǎn yětɔn lɛ́ɛ bǐ wɛ nyí gǔfɔ́ntɔ́. Alɔ jɛ Eflayímunu lɛ́ɛ wú titewungbe. Eflayímu to ɔ́, ɖɔ tɔn xú, é sɔ́ ná sɛ́n ɖě ǎ. Eflayímunu lɛ́ɛ ɔ́, yě ná bó ɖó vǐ vívɛ́ná ɔ́, un ná hu bǐ.” Mawu ce ná gbɛ́ yě, ɖó yě ɖótó e ǎ. Yě ná nɔ́ ɖo flúflú wɛ gbɔn akɔta lɛ́ɛ mɛ akɔta lɛ́ɛ mɛ. Izlayɛ́li to ɔ́, vǐwungbo ɖé wɛ bɔ ayǐ nyɔ́ n'i ɖ'ayǐ; é nɔ́ sɛ́n kpɔ́ gégé ɖ'ayǐ. Lo ɔ́, lě e sínsɛ́n tɔn lɛ́ɛ ɖo kpɔ́ su gbɔn wɛ ɔ́, mɔ̌ jɛ́n é nɔ́ ɖo vɔ̌sákpe lɛ́ɛ mɛ gbɔn wɛ. Lě e nǔ bǐ ɖo nyǐnyɔ́ nú to ɔ́ gbɔn wɛ ɔ́, mɔ̌ jɛ́n é nɔ́ ba acɔ́ nú awǐnnya e yě sɔ́ dó ɖó vodún bó nɔ sɛn lɛ́ɛ gbɔn. Ayixa yětɔn nɔ́ nɔ fí ɖokpó ǎ: hwɛ e yě hu lɛ́ɛ ji nǔɖé ɔ́, yě ná kpan. Mawu Mavɔmavɔ ná flí vɔ̌sákpe yětɔn lɛ́ɛ xwe, é ná gba awǐnnya e yě sɔ́ dó ɖó vodún ná, bó nɔ sɛn lɛ́ɛ. Bɔ din ɔ́, yě ná ɖɔ: “Mǐ sɔ́ ɖó axɔ́sú ɖě ǎ, ɖó mǐ ɖó sísí nú Mawu Mavɔmavɔ ǎ; lě e nǔ wá ɖe gbɔn nú mǐ din ɔ́, étɛ́ wɛ axɔ́sú ɖé ká sixú wa nú mǐ?” Yě ɖo akɔ jɛ wɛ ɔ́, xó gbló wɛ yě nɔ́ ɖɔ, adingban wɛ yě nɔ́ ɖó bó nɔ́ xwlé nǔ d'é jí. Mɔ̌ ɖokpó ɔ́, nǔjlɔ́jlɔ́wiwa ɔ́, gběhan aɖǐvɛ́nɔ e wú ɖo hwɛnxlo mɛ ɔ́ ɖɔhun wɛ é cí nú yě. Wǔ ná kú Samalíinu lɛ́ɛ ɖó siká nyibúví Bɛti-Awɛni tɔn lɛ́ɛ wú. Togun tɔn ná nɔ aluwɛ mɛ nú vodún ɔ́, bɔ xɛsi ná jɛ vodúnnɔ tɔn lɛ́ɛ jí, ɖó susu tɔn e ná gosín tɛ́ntin yětɔn ɔ́ wú. È nǎ zé vodún ɔ́ yi Asilíi, bó ná ná Axɔ́sú Đaxó. Eflayímu ná flú, winnyá ná hu Izlayɛ́li ɖó ali énɛ́ ɔ́ e é sɔ́ ɔ́ wú. Acɔnkwín! È blǒ xá Samalíi nɛ́, è blǒ xá axɔ́sú tɔn nɛ́, é ɖo sisa yi wɛ afúntúnkplɔ̌ ɖo sin nukún mɛ ɖɔhun. È nǎ gba vodún xwé e ɖo Bɛti-Awɛni lɛ́ɛ hánnyá. Fí énɛ́ lɛ́ɛ wɛ Izlayɛ́linu lɛ́ɛ hu hwɛ ɖe. Kpɔvɛwun kpó wunkan kpó ná wú ɖó vɔ̌sákpe yětɔn lɛ́ɛ jí. Yě ná ɖɔ nú só ɖaxó lɛ́ɛ ɖɔ: “Mi cyɔ́n mǐ!” Bó ná ɖɔ nú só kpɛví lɛ́ɛ ɖɔ: “Mi mu kɔn nyi mǐ jí!” Mawu Mavɔmavɔ ɖɔ: “Sín nǔ e jɛ ɖo Giveya ɔ́ hwenu ɔ́, Izlayɛ́linu lɛ́ɛ wa nǔ e yě ɖó ná wa lɛ́ɛ ǎ. Yě húzú ǎ. É nyí ganjí wɛ ɔ́, ahwan wɛ mɛhutɔ́ énɛ́ lɛ́ɛ ná kó cí ɖo Giveya. Hwenu e è nǎ dǒ wlɔ yě ɖó hwɛ e yě nɔ́ fɔ́n bó nɔ ɖo huhu wɛ ɔ́ wú ɔ́, un ná dɔn tó nú yě lě e é jló mì gbɔn é; togun gěgé ná ɖó gbe kpɔ́ bó húzú kpan nukɔn yě. Eflayímu ɔ́, nyibúsixwɛ e è dě ganjí, bɔ é yí wǎn nú jinukún cicɔ é ɖɔhun wɛ é cí ɖ'ayǐ. Bɔ nyɛ ɔ́, ée un mɔ ɖɔ kɔ tɔn tlí ganjí ɔ́, un sin mɔ e è nɔ dó lɛ gle ná ɔ́ dó kɔ n'i. Énɛ́ ɔ́, Judáa ná nɔ́ lɛ gle ɔ́, bɔ Izlayɛ́li ná nɔ́ dɔn nǔ e è nɔ dó gba kɔ́gó ná é. Mi dó wǎn yíyí ɔ́, mi ná ya gbejíninɔ. Mi xo gle yɔ̌yɔ́ ɖé nú miɖée: hwenu su bɔ mi ná ba nyɛ Mawu Mavɔmavɔ ɔ́ káká jɛ hwenu e un ná wá kɔn hwlɛngán ɔ́ nyi mi jí dó é. Lo ɔ́, nǔ nyanya sín gle wɛ mi lɛ, hǔn hwɛhuhu wɛ mi ná ya, ayi ɖó nú mɛ ka nyí sínsɛ́n e mi ɖu é. Đó Izlayɛ́linu lɛ́ɛ mi, mi ɖeji dó tito mi ɖésúnɔ tɔn lɛ́ɛ kpó ahwanfuntɔ́ gěgé e mi ɖó lɛ́ɛ kpó wú. Énɛ́ ɔ́ wú wɛ ahwan zǐngídi ɖé ná wɔ́ ɖo togun mitɔn tɛ́ntin, bɔ è nǎ gba toxo ɖaxó mitɔn e mi mɛ ahohó lɛ́ lɛ̌ dó lɛ́ɛ bǐ hánnyá. Lě e axɔ́sú Calumani gba Bɛti-Aavɛ́li hánnyá gbɔn, bó hu vǐ kpó nɔ kpó gbɔn ɔ́, mɔ̌ wɛ un nǎ gba toxo ɖaxó mitɔn lɛ́ɛ gbɔn. Adǎnú ɖaxó ɖaxó e mi yi wa ɖo Betɛ́li ɔ́, nǔ e mi mɔ ɖ'é mɛ ɔ́ nɛ́. Ayǐtéhɔ̌nnu su lě tlóló ɔ́, axɔ́sú Izlayɛ́li tɔn ɔ́ sín xó ná fó.” Mawu Mavɔmavɔ ɖɔ: “Hwenu e Izlayɛ́li ɖo vǔ ɔ́, un yí wǎn n'i. Un ylɔ́ vǐ súnnu ce sín Ejípu.” Lo ɔ́, yě nɔ́ hɔn yi zɔ nú mɛ e ɖo yě ylɔ́ wɛ lɛ́ɛ. Yě sá vɔ̌ nú vodún Baalu, bó dó zǎlínkpɔ́n zo nú bǒcyɔ lɛ́ɛ. Nyɛ wɛ ka hɛn Eflayímunu lɛ́ɛ sín alɔ, bó kplɔ́n yě zɔnlin ɖiɖi. Lo ɔ́, yě tunwun ɖɔ nyɛ wɛ ɖo nukún kpé dó émí wú wɛ ǎ. Un kplá yě kpó yɛ̌yi kpó; wǎn yíyí dɔn nyɛ kpó yě kpó ɖó kpɔ́ gɛdɛ ɖɔhun. Vǐtɔ́ e nɔ dɔn vǐ tɔn dó wǔ é ɖɔhun wɛ un cí nú yě. Un ná nǔɖuɖu yě. Togun Izlayɛ́li tɔn ɔ́ ná lɛ́ kɔ yi Ejípu ǎ; lo ɔ́, Asilíi wɛ ná kpa acɛ n'i. Đó é gbɛ́ ɖɔ émí kún ná lɛ́ kɔ wá gɔ̌n ce ó. Énɛ́ ɔ́ wú wɛ ahwanfunfun ná syɛ́n ɖo toxo yětɔn ɖaxó ɖaxó lɛ́ɛ mɛ, bó ná sú kún dó nú nǔ e wú yě gǎn jɛ lɛ́ɛ, bó ná vɔ nǔ lɛ́ɛ bǐ, ɖó tito yětɔn lɛ́ɛ wú. Togun ce jɛ kú ɖɔ émí ná nɔ zɔ nú mì. È ylɔ̌ ɛ ɖɔ ní lɛ́ kɔ wá nyɛ Ajalɔ̌nlɔn ɔ́ gɔ́n, yě mɛ ɖěbǔ ká se ǎ. “Eflayímu e, nɛ̌ un ná wa nǔ towe gbɔn? Izlayɛ́li e, un ná jó we dó wɛ a? Nǔ e un wa xá Adima toxo ɔ́ wɛ un ná wa xá we a? Lě e un ɖó Sevoyímu toxo ɔ́ nyi ɔ́ wɛ un ná ɖó we nyi a? Ayi ce ɖo hun xo xá mì wɛ. Nǔ towe ɖo wǔ blá nú mì wɛ. Un ná zé xomɛ ɖaxó e un sin ɔ́ dó wa nǔ xá we ǎ. Eflayímu, un sɔ́ ná sú kún towe dó ǎ. Đó Mawu wɛ un nyí, un nyí gbɛtɔ́ ǎ. Mawu mímɛ́ wɛ un nyí ɖo tɛ́ntin towe. Un ná wá kpó xomɛsin kpó ǎ. Vǐ ce lɛ́ɛ ná xwedó nyɛ Mawu Mavɔmavɔ ɔ́; un ná dó gbe kinnikínní ɖɔhun dó ylɔ́ yě bɔ yě ná kán wezun sín xu mɛ wá. Yě ná kán wezun sín Ejípu wá xɛ ɖɔhun. Yě ná kán wezun sín Asilíi wá ahwannɛ́ ɖɔhun. Un ná kplá yě ɖó xwé yětɔn lɛ́ɛ gbe.” Mawu Mavɔmavɔ wɛ ɖɔ mɔ̌. Mawu Mavɔmavɔ ɖɔ: “Togun Eflayímu tɔn nɔ ɖó adingban lɛ́ lɛ̌ dó mì. Akɔta Izlayɛ́li tɔn ɔ́ nɔ́ blɛ́ mɛ lɛ́ lɛ̌ dó mì. Akɔta Judáa tɔn ɔ́ ká kpo ɖo xwixwedó nyɛ Mawu wɛ, bó ɖo gbejí nú nyɛ mɛ e nyí Mǐmɛ́ bǐ ɔ́ é. Eflayímunu lɛ́ɛ nɔ sa ami nú Ejípunu lɛ́ɛ. Xɔ́ntɔn zun wɛ yě ɖe gbɔn mɔ̌ nɛ́. Xɔ́ntɔn énɛ́ lɛ́ɛ e zun wɛ yě ká ɖe ɔ́, nǔ wa dó jɔhɔn mɛ wɛ yě ɖe. Asilíinu lɛ́ɛ e nu alɛ xá wɛ yě nɔ́ ɖe ɔ́, jɔhɔn e nɔ xú nǔ bǐ ɔ́ wɛ yě nyǐ, bɔ yě ɖo gǔdo yětɔn ayǐhɔ́ngbe ayǐhɔ́ngbe. Yě nɔ́ fɔ́n, bó nɔ ɖo adingban ɖó wɛ, bó nɔ́ ɖo dǎka xo wɛ.” Mawu Mavɔmavɔ ɖo hwɛ ɖɔ xá akɔta Judáa tɔn ɔ́ wɛ. É ná dɔn tó nú togun Jakɔ́bu tɔn ɔ́, ɖó gbɛ nyanya e é zán ɔ́ wú. Nǔ nyanya e é wa ɔ́ sín ya wɛ Mawu Mavɔmavɔ ná dó n'i. Jakɔ́bu ɔ́, é kó tɔ́n sín nɔ tɔn xomɛ cóbó kó ɖo za li xá nɔví tɔn wɛ ǎ. Ée é wá su ɔ́, é fun ahwan xá Mawu. Jakɔ́bu fun ahwan xá wɛnsagun Mawu tɔn ɖokpó, bó ɖu ɖ'é jí. É ya avǐ, bó dó kɛnklɛ́n. É mɔ Mawu ɖo Betɛ́li, bɔ Mawu ɖɔ xó n'i. Mawu Mavɔmavɔ wɛ nyí Mawu Nǔbǐwúkpétɔ́. Nyǐkɔ tɔn nyí Mawu Mavɔmavɔ. É ɖɔ nú Jakɔ́bu ɖɔ: “A ɖǒ ná lɛ́ kɔ wá nyɛ Mawu Mavɔmavɔ, Mawu towe gɔ́n. Nɔ nyɔ́ xomɛ bó nɔ́ wa nǔ jlɔ́jlɔ́. Nɔ ɖeji dó nyɛ Mawu towe ɔ́ wú hwebǐnu.” Togun Eflayímu tɔn ɔ́ cí ajɔ̌tɔ́ e hɛn nǔdagan e má sɔgbe ǎ alɔ mɛ é ɖɔhun. É yí wǎn nú mɛblɛ́ɖu. Bɔ Eflayímu ɖɔ: “Un jɛ dɔkun nǔgbó, un ɖó nǔ gěgé nǔgbó. Amɔ̌, nǔ énɛ́ lɛ́ɛ bǐ ɔ́, azɔ̌ e un wa ɔ́ sín le wɛ; è nǎ mɔ hwɛ ɖé bó dó mì ǎ, un wa nǔ nyanya ɖě dó jɛ dɔkun ǎ.” Nyɛ ɔ́, Mawu Mavɔmavɔ, Mawu towe wɛ un nyí sín hwenu e a ɖo Ejípu é. Un ná bló bɔ a nǎ lɛ́ nɔ azava sá, xóxó hwenu ɖɔhun. Un ɖɔ xó nú gbeyíɖɔ ce lɛ́ɛ, un ɖe nǔ alɔkpa alɔkpa lɛ́ɛ xlɛ́ yě. Gbeyíɖɔ ce lɛ́ɛ jí wɛ un nɔ gbɔn bó nɔ́ dó lǒ. Galadinu lɛ́ɛ ɔ́, nǔnyanyawatɔ́ wɛ yě nyí titewungbe. Yě nyǐ nǔɖé wa nú ǎ. Yě nɔ́ zé nyibúsú lɛ́ɛ dó sá vɔ̌ ɖě jɛ ɖě jí lɛ́ɛ ná ɖo goxɔ Gilugalu tɔn ɔ́ mɛ. Lo ɔ́, vɔ̌sákpe yětɔn lɛ́ɛ ná cí awǐnnya e è lǐ ɖó sonu sonu ɖo hwɛnxlo mɛ, ɖo gle mɛ lɛ́ɛ ɖɔhun. Jakɔ́bu hɔn yi Mɛzopotamíi, Izlayɛ́li nɔ wa azɔ̌ nú mɛ ɖěvo ɖó nyɔ̌nu wú. Nyɔ̌nu wú wɛ é húzú lɛ̌ngbɔ́nyitɔ́. Mawu Mavɔmavɔ gbɔn gbeyíɖɔ tɔn lɛ́ɛ ɖokpó jí, bó ɖe Izlayɛ́li ví lɛ́ɛ tɔ́n sín Ejípu. Gbeyíɖɔ tɔn lɛ́ɛ ɖokpó wɛ é zɔ́n ɖɔ é ní kpé nukún dó togun émítɔn ɔ́ wú. Eflayímunu lɛ́ɛ dó xomɛsin nú Mawu Mavɔmavɔ ɖésú. Énɛ́ ɔ́ wú ɔ́, Mawu Mavɔmavɔ yětɔn ná ɖíɖá mɛ e yě hu lɛ́ɛ sín agban yě. Winnyá e jɛ xá yě ɔ́ wɛ é ná dó yě. Eflayímunu lɛ́ɛ ɖo xó ɖɔ wɛ ɖ'ayǐ ɔ́, ado wɛ nɔ hu mɛ bǐ. Aɖǔsó wɛ yě nyí ɖo Izlayɛ́li. Lo ɔ́, é wá sɛn vodún Baalu bó kú. Din ɔ́, Eflayímunu lɛ́ɛ fɔ́n bó ɖo hwɛ hu wɛ. Yě nɔ́ zé kpatágan yětɔn dó tun bǒcyɔ ná, yě nɔ́ tun vodún e yě ɖésúnɔ nɔ́ dó wá lɛ́ɛ. Nǔ énɛ́ lɛ́ɛ bǐ ɔ́, alɔnuzɔ́watɔ́ lɛ́ɛ sín nǔwiwa wɛ. È nɔ ɖɔ dó yě wú ɖɔ: “Yě nɔ́ hu gbɛtɔ́ dó sá vɔ̌, bó ká nɔ́ yi dó nu do nú nyibúví!” Énɛ́ ɔ́ wú wɛ yě ná cí akpɔ́kpɔ́ zǎnzǎn tɔn ɖɔhun, yě ná cí amǔ e nɔ́ sú bɔ zaanɖé ɔ́, é nɔ́ kɛn ɔ́ ɖɔhun; yě ná cí nǔywɛ́ e jɔhɔn dó alɔ mɛ, bó fún sín kɔ́xota fí e è nɔ só jinukún ɖe ɔ́ ɖɔhun. Yě ná cí azizɔ e nɔ ɖo tíntɔ́n sín azɔgonu wɛ é ɖɔhun. Mawu Mavɔmavɔ ɖɔ: “Izlayɛ́linu lɛ́ɛ mi, nyɛ ɔ́, Mawu Mavɔmavɔ, Mawu mitɔn wɛ un nyí sín hwenu e mi tɔ́n sín Ejípu é; mi tunwun Mawu ɖěvo zɛ nyɛ wú ǎ, Mɛhwlɛ́ngántɔ́ ɖěvo tíin zɛ nyɛ wú ǎ. Hwenu e mi ɖo gbětótló mɛ, ɖo ayǐkúngban xúxú ɖé jí ɔ́, nyɛ wɛ nɔ nukɔn nú mi. Mi yi ama ɖu gbé lě tlóló ɔ́, mi nɔ gɔ́ xo. Adɔgo mitɔn gɔ́ lě kpowun ɔ́, mi nɔ jɛ go yí jí. Nǔ e wútu mi wɔn mì ɔ́ nɛ́. Énɛ́ ɔ́, un ná cí kinnikínní ɖɔhun nú mi, un ná cí kpɔ ɖɔhun nú mi. Un ná tɔwu nú mi, ɖo ali jí. Un ná zɔn mi jí lɔnmɔ e è zě vǐ tɔn é ɖɔhun, bó ná tlɛ́n akɔ́nnu mitɔn. Un ná vún mi lě e kinnikínní asi nɔ vún lan ɔ́ ɖɔhun. Gběkanlin lɛ́ɛ ná já mi. Izlayɛ́linu lɛ́ɛ mi, nǔ e dɔn kú wá nú mi ɔ́ wɛ nyí gǔ e mi fɔ́n dó jǐ ce ɔ́. Nyɛ mɛ e sixú wá dó alɔ mi ɔ́, mi fɔ́n gǔ dó jǐ ce. Fítɛ́ axɔ́sú mitɔn ɔ́ ká ɖe? É ní bó hwlɛ́n mi gán gbɔn toxo ɖaxó mitɔn lɛ́ɛ bǐ mɛ bó! Tonukún mitɔn lɛ́ɛ e mi nɔ ɖɔ ná ɖɔ yě ní sɔ́ axɔ́sú ɖokpó nǔ émí, bó lɛ́ sɔ́ gǎn nú émí lɛ́ɛ ɔ́, fítɛ́ yě ɖe? Un sin xomɛ bó ná axɔ́sú ɖokpó mi; un ka ná yí i sín mi sí kpó adǎn kpó. Nǔ e togun Eflayímu tɔn ɔ́ wa nyi do lɛ́ɛ ɔ́, un ɖó kɛ́n yě jí; hwɛ e é hu ɔ́, un kplé ɖ'ayǐ n'i. Yě ná mɔ wǔvɛ́ nyɔ̌nu ɖo ajidonu ɖɔhun. Vǐ xlonɔ wɛ nú yě: hwenu e é ná jɛ te dó ɔ́ su ɔ́, é nɔ gbɛ́ ɖɔ émí kún ná tɔ́n sín nɔ émítɔn xomɛ ó. Bɔ nyɛ Mawu Mavɔmavɔ ɔ́, un ɖó ná yí mɛ énɛ́ lɛ́ɛ sín kú fɛn mɛ wɛ a? Un ná ɖe yě sín kútomɛ wɛ a? Kú e, fítɛ́ ahwanfunnú towe lɛ́ɛ ɖe? Kú e, ɖe acɛ towe e a nɔ dó hu mɛ ná ɔ́ xlɛ́. Un ɖo nǔbláwǔ ná kú nú mɛɖé wɛ ǎ. Nǔ na bó ɖo nyǐnyɔ́ nú Eflayímunu lɛ́ɛ wɛ ɖo nɔví yětɔn lɛ́ɛ tɛ́ntin ɔ́, jɔhɔn e nɔ xú nǔ bǐ ɔ́ ná wá, jɔhɔn nyɛ Mawu Mavɔmavɔ tɔn ɔ́ ná fɔ́n sín gbětótló mɛ wá, bó ná xú tɔjɔtɛn yětɔn lɛ́ɛ, dotɔ yětɔn lɛ́ɛ. È nǎ bɛ̌ dɔkun lɛ́ɛ yi, è nǎ hɛn akwɛ́nú lɛ́ɛ bǐ gblé.” È nǎ dɔn tó nú Samalíinu lɛ́ɛ ɖó yě fɔ́n gǔ dó Mawu yětɔn jí. Ahwan ná gba yě; è nǎ hu vǐ yětɔn lɛ́ɛ bó ná zɛ nyɔ̌nu yětɔn e ɖo xo lɛ́ɛ. Izlayɛ́linu lɛ́ɛ mi, mi lɛ́ kɔ wá Mawu Mavɔmavɔ, Mawu mitɔn gɔ́n, ɖó hwɛ e mi hu lɛ́ɛ zɔ́n bɔ mi jɛ ayǐ. Mi lɛ́ kɔ wá Mawu Mavɔmavɔ gɔ́n, bó ɖɔ n'i ɖɔ: “Sɔ́ hwɛ mǐtɔn lɛ́ɛ bǐ kɛ mǐ, bó yí mǐ ganjí. É sɔ́ ná nyí nyibúsú wɛ mǐ ná nɔ́ dó sá vɔ̌ nú we ǎ, nu mǐtɔn wɛ mǐ ná nɔ́ dó kpa susu nú we. Asilíinu lɛ́ɛ wɛ ná sixú hwlɛ́n mǐ gán ǎ. Mǐ sɔ́ ná nɔ́ xá ahwansɔ́ jí ɖě ǎ. Mǐ sɔ́ ná nɔ́ ylɔ́ nǔ e mǐ sɔ́ alɔ mǐ ɖésúnɔ tɔn dó bló lɛ́ɛ ɖě ɖɔ Mawu mǐtɔn ǎ, ɖó hwi wɛ nɔ kú nǔbláwǔ nú tɔ́cyɔvǐ lɛ́ɛ.” Mawu Mavɔmavɔ ɖɔ: “Un ná sɔ́ afɔ e Izlayɛ́linu lɛ́ɛ dó gbě ɔ́ kɛ yě. Un ná yí wǎn nú yě titewungbe. Đó un sɔ́ ná sin xomɛ dó yě ǎ. Un ná cí ahǔn ɖɔhun nú Izlayɛ́linu lɛ́ɛ, yě ná gba sɛ́ folówa e è nɔ ylɔ́ ɖɔ lǐi ɔ́ ɖɔhun. Yě ná dó ɖɔ do Libáan sín atín lɛ́ɛ ɖɔhun. Ala yětɔn lɛ́ɛ ná vun. Yě ná nyɔ́ ɖɛkpɛ olívutín ɖɔhun, bó ná ɖe wǎn ɖagbe atín e ɖo Libáan lɛ́ɛ ɖɔhun. Mɛ ce lɛ́ɛ ná lɛ́ kɔ wá nɔ awa ce glɔ́. Yě ná lɛ jinukún gle, yě ná gba kún vǐwuntín ɖɔhun. Vɛ̌ɛn yětɔn ná nyɔ́ Libáan sín vɛ̌ɛn ɖɔhun. Ani wɛ Eflayímunu lɛ́ɛ kpó vodún lɛ́ɛ kpó kpé dó? Nyɛ wɛ nɔ yí gbe nú ɖɛ e xo wɛ yě ɖe ɔ́, bó ná cyɔ́n alɔ yě jí. Nyɛ ɔ́, siplɛ́tín ɖɔhun wɛ un cí, bó nɔ ɖo mǔ hwebǐnu. Nyɛ wɛ nɔ zɔ́n bɔ yě nɔ́ mɔ jinukún.” Mɛ e ɖó nǔnywɛ́ ɔ́ ní ɖó ayi xó énɛ́ lɛ́ɛ jí. Mɛ e nɔ yá wǔ mɔ nukúnnú jɛ nǔ mɛ ɔ́ ní mɔ nukúnnú jɛ wú, ɖó Mawu Mavɔmavɔ sín ali lɛ́ɛ jlɔ́. Mɛ e nɔ wa nǔ jlɔ́jlɔ́ lɛ́ɛ ná nɔ́ gbɔn jí, mɛ e nɔ fɔ́n gǔ lɛ́ɛ ká ná jɛ ayǐ. Mawu Mavɔmavɔ ɖɔ xó nú Jowɛ́li Petuwɛli vǐ ɔ́. É ɖɔ: Tomɛxó lɛ́ɛ mi, mi ɖótó xó élɔ́! Judáanu lɛ́ɛ e mi, mi bǐ ní hun tó mitɔn lɛ́ɛ bó se! Nǔ e ɖo jijɛ wɛ din ɔ́, mɔ̌hunkɔtɔn ɖě jɛ ɖo hwe mitɔn nu, abǐ tɔ́gbó mitɔn lɛ́ɛ sín hwenu kpɔ́n a? Mi kpi tan tɔn nú vǐ mitɔn lɛ́ɛ, bónú vǐ mitɔn lɛ́ɛ ná kpi nú vǐ yětɔn lɛ́ɛ. Vǐ yětɔn lɛ́ɛ ká ná kpi nú vǐ e è nǎ wá ji dó gǔdo yětɔn lɛ́ɛ. Nǔ ɖu gle lɛ́ɛ bǐ. Nǔ e wǎnvú lɛ́ɛ ɖu kpo ɔ́, wɛn lɛ́ɛ ɖu. Nǔ e wɛn lɛ́ɛ ɖu kpo ɔ́, vɛɛn lɛ́ɛ ɖu, nǔ e vɛɛn lɛ́ɛ ɖu kpo ɔ́, kle lɛ́ɛ ɖu. Ahannumúnɔ lɛ́ɛ mi, mi fɔ́n bó ya avǐ. Vɛ̌ɛnnutɔ́ lɛ́ɛ mi, mi bǐ ní wɛn azɔn, ɖó vɛ̌ɛn yɔ̌yɔ́ e mi ma ná mɔ nu ǎ ɔ́ wú. Đó nǔvínúví vun blá to mitɔn. Nǔvínúví maxamaxa wɛ, yě ɖó hlɔ̌nhlɔ́n ɖésú. Aɖǔ yětɔn lɛ́ɛ cí kinnikínní asú sín aɖǔ ɖɔhun; aglan yětɔn lɛ́ɛ cí kinnikínní asi sín aglan ɖɔhun. Yě vɔ vǐwungbo mitɔn, yě já fígitín mitɔn wínníwínní, bó ɖu fló tɔn bǐ, lobo zin dó ayǐ. Vǐwun sín ala lɛ́ɛ wé tété. Mi ji gbɛvíhan ɖyɔ̌vǐ e asúxɔ́ntɔn tɔn kú bɔ é sɔ́ nǔwamɛvɔ dó bó ví i ɔ́ ɖɔhun. È sɔ́ nɔ hɛn jinukún kpó vɛ̌ɛn kpó wá Mawu Mavɔmavɔ xwé gbe ǎ. Énɛ́ ɔ́ wú wɛ azɔ̌watɔ́ Mawu Mavɔmavɔ tɔn vɔ̌sánú-xwlémawutɔ́ lɛ́ɛ ɖo aluwɛ mɛ. Nǔ ɖu gle lɛ́ɛ bǐ. Ayǐkúngban ɔ́ ɖo aluwɛ mɛ, ɖó è hɛn jinukún lɛ́ɛ gblé. Vɛ̌ɛn ɖě sɔ́ ɖe ǎ, ami ɖě sɔ́ ɖe ǎ. Wǔ kú glesi lɛ́ɛ bɔ vǐwunglejíkpɔ́ntɔ́ lɛ́ɛ ɖo vo sa wɛ, ɖó blěe kpódó ɔ́ji kpó sɔ́ tíin ǎ, jinukún e è nǎ ya lɛ́ɛ bǐ wɛ gú mɛ. Vǐwungbo bǐ xú, fígitín bǐ mlú ɖa. Glenádi kpó dětín kpó, kpó aslɔ́tín kpó bǐ mlú ɖa. Atín e ɖo gle mɛ lɛ́ɛ bǐ mlú ɖa. Awǎjijɛ ɖěbǔ sɔ́ ɖo gbɛtɔ́ lɛ́ɛ tɛ́ntin ǎ. Vɔ̌sánú-xwlémawutɔ́ lɛ́ɛ mi, mi sɔ́ nǔwamɛvɔ dó bó ya avǐ. Mi ji gbɛvíhan. Mi azɔ̌watɔ́ Mawu mǐtɔn tɔn lɛ́ɛ mi, mi wá, nǔwamɛvɔ ní ɖo kɔ mitɔn, ɖó è sɔ́ nɔ hɛn jinukún kpó vɛ̌ɛn kpó wá Mawu mitɔn sín xwé gbe ǎ. Mi jlá ɖɔ è nǐ blá nu. Mi ylɔ́ mɛ bǐ kplé. Mi kplé tomɛxó lɛ́ɛ kpó toví tosi lɛ́ɛ kpó ɖó Mawu Mavɔmavɔ, Mawu mitɔn sín xwé gbe, bó sa vo nú Mawu Mavɔmavɔ. Caxóxowǒóo! Azǎn baɖabaɖa ɖé ja. Xomɛsinzán Mawu Mavɔmavɔ tɔn kó sɛkpɔ́. Azǎn ɔ́ ná wá bɔ nǔ bǐ ná sú kún dó lě e Nǔbǐwúkpétɔ́ ɔ́ ko lɛ́n gbɔn é. Nukún mǐtɔn mɛ wɛ è zě nǔɖuɖu mǐtɔn ɖe ǎ cé? Awǎjijɛ kpó xomɛhunhun kpó má kó gosín Mawu mǐtɔn sín xwé gbe ǎ cé? Nǔkún e è dǒ lɛ́ɛ bǐ nyɔ dó kɔ́ glɔ́. Agɔ̌ lɛ́ɛ jɛ vɔ̌. Xɔ e mɛ è nɔ bɛ́ jinukún dó lɛ́ɛ gblé, jinukún ɖě sɔ́ tíin ǎ. Kanlin lɛ́ɛ ɖo azɔn wɛn wɛ lóóo! Wǔ kú nyibú lɛ́ɛ ɖó yě sɔ́ mɔ nǔ ɖu ǎ. Lɛ̌ngbɔ́ lɛ́ɛ lɔmɔ̌ ɖo wǔvɛ́ mɔ wɛ. Óo! Mawu Mavɔmavɔ, hwi sú xó ylɔ́ wɛ un ɖe. Đó myɔ ɖu gběhan e ɖo gbětótló mɛ lɛ́ɛ é, bɔ atín e ɖo gle mɛ lɛ́ɛ bǐ fyɔ́. Gběkanlin lɛ́ɛ lɔmɔ̌ ɖo xó sú ylɔ́ we wɛ, ɖó tɔ lɛ́ɛ xú, gběhan e ɖo gbětótló mɛ lɛ́ɛ bǐ fyɔ́. Mi kún kpɛn ɖo Sinyɔ́ɔ. Mi kún kpɛn lélé ɖo só mímɛ́ ce jí. Mi mɛ e ɖo to ɔ́ mɛ lɛ́ɛ bǐ ní sísɔ́, ɖó Mawu Mavɔmavɔ zán ɔ́ ja; é kó sɛkpɔ́. Zǐnflú gɔngɔn sín azǎn ɖé wɛ. Akpɔ́kpɔ́ dó, ahǔn sú. Nǔvínúvíhwan ɖé ɖíe, bó sukpɔ́, lobo dó xɛsi ɖésú. Yě dó ahwan gbě bó ja, bɔ a nǎ ɖɔ zǎn wɛ kú sín só jí ja. È ko mɔ mɔ̌hunkɔtɔn kpɔ́n gbeɖé ǎ; è ka sɔ́ ɖo nǎ mɔ wɛ ɖo sɔ e ja é ǎ. Yě ɖo yiyi wɛ, bó ɖo nǔ bǐ hɛn gblé wɛ myɔ ɖɔhun. Yě gbɔn fí ɖěbǔ dín ɔ́, è sɔ́ nɔ mɔ nǔɖé ɖo fínɛ́ ǎ. Jikpá Edɛ́ni tɔn ɔ́ ɖɔhun wɛ to ɔ́ kó ɖe ɖ'ayǐ, bɔ sín hwenu e yě gbɔn fínɛ́ dín ɔ́, é húzú gbětótló, é dó xɛsi. Nǔ ɖěbǔ gán ɖo yě sí ǎ. A mɔ yě lě ɔ́, a nǎ ɖɔ sɔ́ wɛ dó ahwan gbě bó ja, sɔ́xátɔ́ lɛ́ɛ ɖo wezun jí xwe ahwangbénu ɖɔhun. Yě nɔ́ lɔ́n sín só ɖě jí yi jɛ ɖě jí, bɔ a se zǐngídi yětɔn ɔ́, a nǎ ɖɔ ahwankɛkɛ́ wɛ, a nǎ ɖɔ gběhan wɛ ɖo zo ji wɛ, bó ɖo wǔwú wɛ. Yě jǎwe ahwangɔnu syɛ́nsyɛ́n ɖé wɛ sɔ́ ahwannú bó ja ɖɔhun. Togun lɛ́ɛ nɔ sísɔ́ ɖo nukɔn yětɔn. Togun lɛ́ɛ bǐ nɔ blá wǔ ɖo nukún mɛ. Wɛn lɛ́ɛ nɔ jɛ mɛ gúdo ahwanfuntɔ́ lɛ́ɛ ɖɔhun. Yě nɔ́ fán dǒ ahwanfuntɔ́ lɛ́ɛ ɖɔhun. Yě ɖokpó ɖokpó nɔ sɔ́ ali yětɔn yětɔn télélé ma zɛ sín jí. Wɛn lɛ́ɛ ɖě nɔ́ nya glo ɖě ǎ. Yě ɖokpó ɖokpó ɖo tɛn yětɔn mɛ. Yě nɔ́ lɔ́n dó asá nǔ bǐ; nǔ ɖěbǔ nɔ́ hɛn yě ɖó te ǎ. Yě gba kpé toxo ɖaxó ɔ́ mɛ. Yě nɔ́ kán wezun gbɔn ahohó lɛ́ɛ jí. Yě nɔ́ xá xɔ lɛ́ɛ ta. Yě nɔ́ gbɔn flɛtɛ́li nu yi jɛ xɔ mɛ ajotɔ́ ɖɔhun. Ayǐkúngban nɔ́ sísɔ́ ɖo nukɔn yětɔn. Jǐnukúnsin nɔ húnhún. Hwe kpó sun kpó nɔ́ dó ablu, bɔ sunví lɛ́ɛ sɔ́ nɔ́ ná wěziza ǎ. Mawu Mavɔmavɔ ɖe gbe ɖo ahwangɔnu énɛ́ nukɔn, ɖó ahwanfuntɔ́ tɔn énɛ́ lɛ́ɛ nɔ́ se tónú n'i; yě dó xɛsi ɖésú. Đó Mawu Mavɔmavɔ zán ɔ́ kló, é dó abaɖa. Mɛ̌ wɛ sixú gán ɖo azǎn énɛ́ gbe? Mawu Mavɔmavɔ ɖɔ: “Hwenu su nú mi din, bɔ mi ná lɛ́ kɔ wá gɔ̌n ce. Mi lɛ́ kɔ wá gɔ̌n ce kpó ayixa mitɔn bǐ kpó: mi blá nu, mi ya avǐ, mi sa vo nú mì. Ényí awu mitɔn lɛ́ɛ wɛ mi ná tlɛ́n, bó dó ɖe xlɛ́ ɖɔ nǔ e émí wa ɔ́ vɛ́ nú émí ǎ, ayixa mitɔn lɛ́ɛ wɛ mi ná húzú.” Ɛɛn, mi lɛ́ kɔ wá Mawu Mavɔmavɔ, Mawu mitɔn gɔ́n, ɖó é nyɔ́ xomɛ bó nɔ́ kú nǔbláwǔ nú mɛ. É nɔ́ yá wǔ sin xomɛ ǎ; é fá xomɛ ɖésú, é ɖo gbesisɔ mɛ hwebǐnu, bó ná jó nǔ e é ná wa xá mǐ ɔ́ dó. Afɔ nyɔ́ ɔ́, é sixú jó nǔ e é kó lin bó ná wa ɖ'ayǐ ɔ́ dó, bó ná nyɔ̌ná mi túnflá. Énɛ́ ɔ́, mi hɛn ɔ́, mi ná hɛn jinukún kpó vɛ̌ɛn kpó wá n'i. Mi kún kpɛn ɖo Sinyɔ́ɔ. Mi jlá ɖɔ è nǐ blá nu. Mi ylɔ́ mɛ bǐ kplé. Mi ylɔ́ togun ɔ́ bǐ kplé, ní nyí kplé ɖaxó. Mi kplé degénɔ lɛ́ɛ, mi kplé yɔ̌kpɔ́vú lɛ́ɛ, bó kplé vǐ ɖo anɔ̌nu lɛ́ɛ lɔmɔ̌. Mɛ e da asi yɔ̌yɔ́ ɔ́ ní tɔ́n sín xwé tɔn gbe; nyɔ̌nu e yi asúxwé yɔ̌yɔ́ ɔ́ ní tɔ́n sín xɔ tɔn mɛ. Vɔ̌sánú-xwlémawutɔ́ azɔ̌watɔ́ Mawu Mavɔmavɔ tɔn lɛ́ɛ ní ya avǐ ɖo Mawu Mavɔmavɔ sín xwé gbe, ɖo agba ɔ́ kpó vɔ̌sákpe ɔ́ kpó tɛ́ntin. Yě ní ɖɔ: “Mawu Mavɔmavɔ, kú nǔbláwǔ nú mǐ mɛ towe lɛ́ɛ. Ma jó mǐ mɛ towe lɛ́ɛ dó nú mǐ ɖu winnyá ó. Ma lɔn nú akɔta ɖěvo lɛ́ɛ ɖɔ slǎmɛ mǐ wú ɖɔ fítɛ́ Mawu yětɔn ka ɖe a jí ó.” Mawu Mavɔmavɔ yí wǎn nú to tɔn. Togun tɔn sín nǔ blá wǔ n'i. É yí gbe nú ɖɛ e togun tɔn xo ɔ́, bó ɖɔ: “Mi ɖótó, un ná lɛ́ sɛ́ jinukún, kpó vɛ̌ɛn yɔ̌yɔ́ kpó, kpó ami kpó dó mi. Un ná sɛ́ dó mi bɔ é ná kpé mi kpo. Un sɔ́ ná jó mi dó bɔ mi ná nyí nǔkiko ɖo akɔta lɛ́ɛ tɛ́ntin gbeɖé ǎ. Un ná nya kɛntɔ́ mitɔn e gosín totaligbé lɛ́ɛ dó zɔ nú mi. Un ná nya yě sɛ́ dó ayǐkúngban e ko sá bɔ mɛ ɖé má sɔ́ ɖ'é jí ǎ é jí. Un ná nya mɛ e ɖo nukɔn nú kɛntɔ́ mitɔn lɛ́ɛ dó Xu Kúkú ɔ́ mɛ, bó ná nya mɛ e ɖo gǔdo nú yě lɛ́ɛ dó Mɛditɛlanɛ́ɛ xu ɔ́ mɛ. Cyɔ yětɔn lɛ́ɛ ná dó cyɔ, bɔ wǎn ná vun blá fí bǐ; lě e mɛ e dó nǔ sin xá mi sɔ mɔ̌ lɛ́ɛ ná vɔ gbɔn é nɛ́. Ayǐkúngban e, ma ɖi xɛsi ó. Xomɛ ní hun we, nú a nǐ j'awǎ, ɖó Mawu Mavɔmavɔ nɔ́ wa nǔ ɖaxó ɖaxó lɛ́ɛ. Gběkanlin lɛ́ɛ mi, mi ma ɖi xɛsi ó, ɖó gběhan ná lɛ́ wú ɖo ayǐkúngban wɛnjɛ e ɖo gbětótló mɛ lɛ́ɛ jí; atín lɛ́ɛ ná lɛ́ sɛ́n. Fígitín lɛ́ɛ kpó vǐwun lɛ́ɛ kpó ná lɛ́ sɛ́n kɔn nyi kpɔ́. Sinyɔ́ɔnu lɛ́ɛ mi, mi hun xomɛ bo j'awǎ ɖo Mawu Mavɔmavɔ, Mawu mitɔn mɛ, ɖó é su jǐ hwenu ɔ́, é ná sɛ́ jǐ dó mi. É ná sɛ́ xwejí dó mi, bó ná sɛ́ zǒjí dó mi, lě e é ko nɔ bló gbɔn ɖ'ayǐ xóxó é. Jinukún ná gɔ́ xɔ. Vɛ̌ɛn yɔ̌yɔ́ kpó ami kpó ná gɔ́ gbǎ. Jinukún mitɔn e un sɛ́ wɛn lɛ́ɛ, vɛɛn lɛ́ɛ, kle lɛ́ɛ, kpódó wǎnvú lɛ́ɛ kpó nǔvínúvíhwan énɛ́ lɛ́ɛ kpó dó, bɔ yě wǎ hɛn bǐ gblé ɔ́, un ná sú axɔ́ tɔn mi. Mi ná ɖu nǔ bó gɔ́ xo. Mi ná kpa susu nú nyɛ Mawu Mavɔmavɔ, Mawu mitɔn e wa azɔ̌jíwǔ lɛ́ɛ nú mi é. Bɔ mi mɛ e nyí togun ce ɔ́, mi sɔ́ ná ɖu winnyá gbeɖé ǎ. Énɛ́ ɔ́, Izlayɛ́li ví lɛ́ɛ mi, mi ná tunwun ɖɔ un ɖo tɛ́ntin mitɔn. Mi ná tunwun ɖɔ nyɛ wɛ nyí Mawu Mavɔmavɔ, Mawu mitɔn, ɖɔ Mawu ɖěvo kún sɔ́ tíin zɛ nyɛ wú ó. Bɔ mi mɛ e nyí togun ce ɔ́, mi sɔ́ ná ɖu winnyá gbeɖé ǎ.” Mawu Mavɔmavɔ ɖɔ: “Énɛ́ ɔ́ gúdo ɔ́, un ná gba Yɛ ce kɔn nyi mɛ bǐ jǐ; vǐ mitɔn lɛ́ɛ, súnnu kpó nyɔ̌nu kpó ná nyí gbeyíɖɔ; Mawu ná nɔ́ xo dlɔ̌ degénɔ mitɔn lɛ́ɛ, bɔ dɔ̌nkpɛvú mitɔn lɛ́ɛ ná nɔ́ mɔ nǔ. Đo azǎn énɛ́ lɛ́ɛ mɛ ɔ́, un ná gba Yɛ ce kɔn nyi mɛsɛntɔ́ súnnu kpó nyɔ̌nu kpó ɖésú jí. Un ná ɖe nǔdábaɖa xlɛ́ ɖo jǐnukúnsin kpó ayǐkúngban kpó jí; hun kpó zo kpó ná tɔ́n, azizɔ ná ɖo mlímlí wɛ. Hwesivɔ́ ná húzú zǐnflú, bɔ sun ná myá hun ɖɔhun cóbɔ Mawu Mavɔmavɔ zán ɔ́, azǎn ɖaxó énɛ́ ɔ́ e dó xɛsi ɔ́ ná wá.” Énɛ́ ɔ́, mɛ ɖěbǔ ylɔ́ nyɛ Mawu Mavɔmavɔ sín nyǐkɔ ɔ́, mɛ ɔ́ ná gán. Mɛ e ɖo Jeluzalɛ́mu Sinyɔ́ɔ só ɔ́ jí lɛ́ɛ ɖě ná gán ɖo awě énɛ́ ɔ́ mɛ lě e Mawu Mavɔmavɔ ɖɔ gbɔn é. Mɛ énɛ́ lɛ́ɛ wɛ Mawu Mavɔmavɔ ylɔ́ bɔ yě ná nɔ gbɛ. Xó e Amɔ́si ɖɔ lɛ́ɛ wɛ ɖo wěma élɔ́ mɛ; Amɔ́si ɔ́, lɛ̌ngbɔ́nyitɔ́ e ɖo Tekowa toxo ɔ́ mɛ lɛ́ɛ ɖě wɛ. Mawu ɖe nǔ xlɛ́ ɛ dó togun Izlayɛ́li tɔn ɔ́ wú ɖo axɔ́sú Judáa tɔn Oziyási kpó axɔ́sú Izlayɛ́li tɔn Jelobowámu, Yexoázi ví ɔ́ kpó hwenu. Mawu ɖe nǔ énɛ́ ɔ́ xlɛ́ ɛ ɔ́, é bló xwe we cóbɔ ayǐkúngban dán wǔ. Amɔ́si ɖɔ: “Mawu Mavɔmavɔ ɖo adǎn jǐ ɖo Jeluzalɛ́mu, è ɖo gbe tɔn se wɛ sín Sinyɔ́ɔ. Gběhan e kanlin lɛ́ɛ nɔ ɖu ɔ́ bǐ wɛ fyɔ́; akú ɖó ɖo Kaamɛ́li só ta.” Mawu Mavɔmavɔ ɖɔ: “Damásinu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě zé gankpo dó li Galadinu lɛ́ɛ ná. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ ɔ́ nɛ́. Un ná zé myɔ dó fyɔ́ axɔ́sú Hazayɛ́li sín xwé ná, bɔ myɔ ná vɔ nǔ e ɖo axɔ́sú Bɛni-Hadadi sín hɔnmɛ lɛ́ɛ bǐ. Un ná fó Damási sín hɔntogbó lɛ́ɛ. Un ná sú mɛ e ɖo nǔ nyanya wiwa sín tɔdo énɛ́ ɔ́ mɛ lɛ́ɛ, kpó axɔ́sú gbɛɖuto énɛ́ ɔ́ tɔn ɔ́ kpó sín kún dó. Ahwan ná wlí togun Silíi tɔn ɔ́ sín kannumɔ yi Kíi.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Gazanu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě wlí kannumɔ wɔ̌buwɔ́bú ɖé lɛ́ɛ yi jó nú Edɔ́munu lɛ́ɛ. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ɔ́ ǎ ɔ́ nɛ́. Un ná dó Gaza toxo ɔ́ zo, bɔ zo ná ji hɔnmɛ e ɖo toxo ɔ́ mɛ lɛ́ɛ. Un ná sú Acidɔ́dinu lɛ́ɛ kpó axɔ́sú e ɖo zinkpo jí ɖo Acikelɔ́ni ɔ́ kpó sín kún dó. Un ná húzú alɔ dó Eklɔ́ninu lɛ́ɛ wú. Filisitɛ́ɛn lɛ́ɛ ɖě ná nɔ gbɛ ǎ.” Xó e Aklúnɔ Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Tíinu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ; amɔ̌, élɔ́ e yě wa ɔ́ vɛ́ nú mì tawun. Yě wlí kannumɔ wɔ̌buwɔ́bú ɖé lɛ́ɛ jó nú Edɔ́munu lɛ́ɛ; yě sɔ́ flín nɔví nɔví nyínyí sín akɔ e yě jɛ ɔ́ ǎ. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ɔ́ ǎ é nɛ́. Un ná dó Tíi toxo ɔ́ zo, bɔ zo ná ji hɔnmɛ e ɖo toxo ɔ́ mɛ lɛ́ɛ.” Mawu Mavɔmavɔ ɖɔ: “Edɔ́munu lɛ́ɛ ɔ́, nǔ e yě wa nyi do bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě nɔ́ nya nɔví yětɔn lɛ́ɛ kpó hwǐ kpó; yě sɔ́ ɖó nǔbláwǔkúnúmɛ ǎ, ɖó xomɛsin yětɔn nɔ ɖo nǔ hɛn gblé wɛ hwebǐnu; adǎn jí jɛ́n yě nɔ́ ɖe hwebǐnu. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́. Un na dó Temani toxo ɔ́ zo, bɔ zo ná ji hɔnmɛ e ɖo Bosla lɛ́ɛ é.” Mawu Mavɔmavɔ ɖɔ: “Amumɔ́ɔ ví lɛ́ɛ ɔ́, nǔ e yě wa nyi do bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Đó yě jló ná gbló ada nú to yětɔn, bɔ é sín énɛ́ wú, bɔ yě zɛ nyɔ̌nu Galadinu e ɖo xo lɛ́ɛ sín adɔgo. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́. Un ná dó Hlaba toxo ɔ́ zo, bɔ zo ná ji hɔnmɛ e ɖo toxo ɔ́ mɛ lɛ́ɛ, ɖo azǎn e gbe è na ɖo ahwan fun wɛ, bó ná ɖo xó sú wɛ, bɔ jɔhɔn ɖaxó ɖé ná ɖo nyinyi wɛ, bɔ jǐ ɖaxó ná ɖo jija wɛ é. È nǎ wlí axɔ́sú yětɔn kpó azaglɔ́gán toxo ɔ́ tɔn lɛ́ɛ kpó yi kannumɔgbénu.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Mɔwabunu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě dǒ axɔ́sú Edɔ́mu tɔn ɔ́ sín xú lɛ́ɛ zo, bɔ xú lɛ́ɛ fyɔ́ bǐ gúnmígúnmí. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́. Un na dó Mɔwabu toxo ɔ́ zo, bɔ zo ná ji hɔnmɛ e ɖo Keliyɔ́ti toxo ɔ́ mɛ lɛ́ɛ bǐ. Mɔwabunu lɛ́ɛ ná dɔn ɖo zǐngídi tɛ́ntin, bɔ yě ná ɖo ahwan fun wɛ, bó ná ɖo kpɛn kún wɛ. Un ná hu axɔ́sú e ɖo toxo ɔ́ nu é, bó ná vívá kún nú azaglɔ́gán tɔn lɛ́ɛ kpó éyɛ́ kpó.” Xó e Mawu Mavɔmavɔ ɖɔ ɔ́ nɛ́. Mawu Mavɔmavɔ ɖɔ: “Judáanu lɛ́ɛ ɔ́, nǔ e yě wa nyi do, bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě gbɛ́ wǎn nú sɛ́n ce lɛ́ɛ; yě blǒ nǔ e un zɔ́n yě ɖɔ yě ní bló lɛ́ɛ ǎ; adingbanxó e tɔ́ yětɔn lɛ́ɛ xwedó lɛ́ɛ wɛ yě lɔ jó yěɖée dó ná, bó yi bú ali. Nǔ e wú un ma na lɛ́ kɔ sín gbeta e un ɖe tɔ́n ɔ́ gúdo ǎ é nɛ́. Un na dó Judáa to ɔ́ zo, bɔ zo ná ji hɔnmɛ e ɖo Jeluzalɛ́mu lɛ́ɛ.” Mawu Mavɔmavɔ ɖɔ: “Izlayɛ́li ví lɛ́ɛ ɔ́, nǔ e yě wa nyi do, bɔ un jló na kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun; yě nɔ́ zé xomɛvɔ́nɔ sa kannumɔ ɖɔhun, bó ná dó mɔ akwɛ́ yětɔn yí; yě nɔ́ sɔ́ wamamɔnɔ sa ɖó afɔkpa yětɔn nu. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́. Yě nɔ́ gbídí mɛ e ma ɖó gǎn ǎ lɛ́ɛ sín ta ɖó afɔ wú. Yě yi hwɛɖɔxɔsá bónú wamamɔnɔ ɖo nǔɖé byɔ́ wɛ ɔ́, yě nɔ́ hɔn xó e ɖɔ wɛ é ɖe ɔ́ nyi gbě. Tɔ́ kpó vǐ kpó nɔ ɖó xó xá nyɔ̌nuví ɖokpó ɔ́; nǔ énɛ́ ɔ́ nyí zungbe nú mì bó kɔ́n wi ce. Yě nɔ́ mlɔ́ avɔ e yě yí ɖó gbanu ɖo wamamɔnɔ lɛ́ɛ sí lɛ́ɛ jí, ɖo vɔ̌sákpe ɖokpó ɖokpó kpá. Yě nɔ́ nu vɛ̌ɛn e yě wlí ɖo mɛ lɛ́ɛ sí ɔ́ ɖo nǔmɛsɛn yětɔn lɛ́ɛ sín xɔsá. Có un vívá kún nú Amɔliti lɛ́ɛ ɖó ta mitɔn mɛ. Yě mɛ énɛ́ lɛ́ɛ e yi jǐ sɔ hǔntín, bó syɛ́n sɔ kákɛ́ lɛ́ɛ é; un vívá kún nú yě sín ɖɔ káká yi ɖaví lɛ́ɛ nu. Có nyɛ wɛ ka kplá mi sín Ejípu, bó kplá mi gbɔn gbětótló mɛ xɔ xwe kanɖé (40), bó ná dó ná Amɔliti lɛ́ɛ sín to mi. Un bló bɔ gbeyíɖɔ ce lɛ́ɛ lɛ́ tɔ́n ɖo vǐ súnnu mitɔn lɛ́ɛ mɛ, bɔ un lɛ́ ylɔ́ dɔ̌nkpɛvú ɖé lɛ́ɛ ɖo dɔ̌nkpɛvú mitɔn lɛ́ɛ mɛ, bɔ yě dó akpá dó sɔ́ yěɖée kɛ mì. Nǔ e nyɛ Mawu Mavɔmavɔ kanbyɔ́ ɔ́ nɛ́. Izlayɛ́linu lɛ́ɛ mi! Nǔ nyí mɔ̌ ǎ cé? Lo ɔ́, yě mɛ énɛ́ lɛ́ɛ e dó akpá, dó sɔ́ yěɖée kɛ mì, bó má ɖó ná nu vɛ̌ɛn ǎ lɛ́ɛ ɔ́, mi ná vɛ̌ɛn yě bɔ yě nu; mi gbɛ́ nú gbeyíɖɔ lɛ́ɛ ɖɔ yě nǐ ma sɔ́ yí wɛn ce ɖě bó yi dó ó. Éɖíe! Un na li mi dó kɔ mɛ, lě e kɛkɛ́ e jinukúngban gɔ́ ɔ́ nɔ li kɔ́gúdu é ɖɔhun. Mɛ ɖé ná bó bí ɔ́, é ná sixú hɔn ǎ; mɛɖé ná bó dó hlɔ̌nhlɔ́n ɔ́, é ná sixú sɔ́ hlɔ̌nhlɔ́n tɔn dó wa nǔɖé ná ǎ, mɛɖé ná bó nyí súnnu akowunká ɔ́, é sixú hwlɛ́n gbɛ éɖée tɔn ǎ. Mɛ ɖé ná bó nɔ́ ɖo gǎ da wɛ ɔ́, é ná sixú nɔ nu ǎ; mɛɖé sín afɔ na bo yá ɔ́, é ná sixú gló ǎ; sɔ́xátɔ́ ná sixú gán ɖ'é mɛ ǎ. Azǎn énɛ́ ɔ́ gbe ɔ́, mɛɖé ná bó kpan akɔ́n hú mɛ bǐ ɖo ahwanfuntɔ́ lɛ́ɛ mɛ ɔ́, mɛ ɔ́ ná bɛ́ ahwanfunnú tɔn bǐ kɔn nyi gbě, bó hɔn mɛ̌ jɔgbe.” Xó e Mawu Mavɔmavɔ ɖɔ ɔ́ nɛ́. Izlayɛ́li ví lɛ́ɛ mi, mi mɛ e nyí hɛ̌nnu e Mawu Mavɔmavɔ ɖe tɔ́n sín Ejípu lɛ́ɛ bǐ, mi ɖótó xó élɔ́ e Mawu Mavɔmavɔ ɖɔ dó mi wú é! É ɖɔ: Midɛɛ lɛ́ɛ kɛ́ɖɛ́ wɛ un sɔ́ ɖo hɛ̌nnu e ɖo ayǐkúngban jí lɛ́ɛ bǐ mɛ; énɛ́ ɔ́ wú ɔ́, nǔ nyanya e mi wa lɛ́ɛ bǐ sín tó wɛ un ná dɔn nú mi. Mɛ we nɔ zɔn yi fí ɖé ma ko ɖɔ ɖ'ayǐ a? Ényí kinnikínní ma mɔ nǔ e é na ɖu ɔ́ ǎ ɔ́, é sixú dó gbe ɖo zunkan mɛ a? Nú é ma mɔ nǔɖé wlí ǎ ɔ́, é sixú sú xó ɖo fí e é xo do ɖe ɔ́ a? Ényí è ɖǒ mɔ bó má sɔ́ nǔɖuɖu ɖ'é jí ǎ ɔ́, xɛ sixú wá jɛ mɛ a? Ényí mɔ ɖé ma wlí nǔ ǎ ɔ́, é sixú fɛ́ a? Ahwankpɛn nɔ jɛ gbe ɖo toxo ɖé mɛ, bɔ ado nɔ gɔn mɛ e ɖo toxo ɔ́ mɛ lɛ́ɛ hu a? Awě nɔ́ xo toxo ɖé Mawu Mavɔmavɔ mɛ vo a? Đó Aklúnɔ Mavɔmavɔ nɔ wa nǔɖé ma ɖe nǔbúdo tɔn xlɛ́ mɛsɛntɔ́ tɔn gbeyíɖɔ lɛ́ɛ ǎ. Ényí kinnikínní ɖo gbe dó wɛ ɔ́, mɛ̌ xɛsi ma ka ná ɖi ǎ? Aklúnɔ Mavɔmavɔ ɖo xó ɖɔ wɛ ɔ́, mɛ̌ ma ka ná yi dó wɛn tɔn gbɛtɔ́ lɛ́ɛ ǎ? Mi zé gbe yi jǐ bó ɖɔ ɖo Acidɔ́di kpó Ejípu kpó sín hɔn lɛ́ɛ mɛ ɖɔ: “Mi sɛ miɖée kplé ɖo Samalíi sín só ɔ́ ta, bó ná kpɔ́n nǔ hannyahannya wiwa e ɖo fínɛ́ lɛ́ɛ kpó dǎnúwiwa e ɖo fínɛ́ lɛ́ɛ kpó.” Mawu Mavɔmavɔ ɖɔ: “Samalíinu lɛ́ɛ tunwun nǔ e nyí nǔjlɔ́jlɔ́wiwa ɔ́ ɖě ǎ. Nǔ e yě fán asú mɛ bó yí lɛ́ɛ kpó nǔ e yě fin lɛ́ɛ kpó wɛ yě bɛ́ kplé ɖó hɔn yětɔn lɛ́ɛ mɛ.” Énɛ́ ɔ́ wú wɛ Aklúnɔ Mavɔmavɔ ɖɔ: “Kɛntɔ́ na wá xá to ɔ́; é ná mu dǒ e è mɛ lɛ́dó to ɔ́ bǐ, bó na bɛ́ nǔ e ɖo hɔn towe lɛ́ɛ mɛ lɛ́ɛ.” Mawu Mavɔmavɔ ɖɔ: “Ényí kinnikínní wlí lɛ̌ngbɔ́ ɖokpó ɔ́, lɛ̌ngbɔ́nyitɔ́ ɔ́ nɔ́ yí afɔ tɔn we, abǐ tó tɔn kánkpo ɖé sín nu tɔn mɛ; lě e é ná nyí gbɔn nú Izlayɛ́li ví e ɖo ayǐjínjɔ́n ɖo akánma tó, abǐ kɔɖónú jí ɖo Samalíi lɛ́ɛ ɔ́ nɛ́; xóyɛ́xóyɛ́ ɖé jɛ́n è na hwlɛ́n gán.” Aklúnɔ Mavɔmavɔ, Mawu Nǔbǐwúkpétɔ́ ɔ́ ɖɔ: “Mi ɖótó xó élɔ́, bó ná yi ɖɔ nú Jakɔ́bu sín kúnkan lɛ́ɛ; mi ná ɖɔ: Gbe e gbe un ná dɔn nǔ nyanya e Izlayɛ́li ví lɛ́ɛ wa lɛ́ɛ sín tó nú yě ɔ́, un ná gba vɔ̌sákpe e ɖo Betɛ́li lɛ́ɛ hánnyá; un ná gba lanzo e è mɛ ɖó vɔ̌sákpe ɔ́ sín zwe jí zwe jí lɛ́ɛ, bɔ yě ná hɔ́ jɛ ayǐ. Un ná mu xɔ e mɛ yě nɔ́ nɔ avivɔ hwenu lɛ́ɛ, kpó xɔ e mɛ yě nɔ́ nɔ yǒzo hwenu lɛ́ɛ kpó; un ná mu hɔnmɛ e yě sɔ́ ajinakúɖú dó ɖó acɔ́ na lɛ́ɛ; un ná gba gbɛtɔ́ nukúnɖéjí lɛ́ɛ sín xɔ ɖagbe ɖagbe lɛ́ɛ.” Xó e Mawu Mavɔmavɔ ɖɔ ɔ́ nɛ́. Nyɔ̌nu Samalíi tɔn lɛ́ɛ mi! Mi mɛ e jɔ asú nyibú asi Basáni tɔn lɛ́ɛ ɖɔhun lɛ́ɛ e mi! Mi ɖótó xó e ɖɔ gbé un ja é: mi nɔ táfú mɛ e ma ɖó gǎn ǎ lɛ́ɛ, mi nɔ dó ya nú wamamɔnɔ lɛ́ɛ, bó nɔ́ ɖɔ nú asú mitɔn lɛ́ɛ ɖɔ: “Mi zé ahan wá nú mǐ nǎ nu.” Aklúnɔ Mavɔmavɔ xwlé nyǐkɔ tɔn mímɛ́ ɔ́ bó ɖɔ: “Mi ɖótó! Azǎn ɖé lɛ́ɛ gbe na su, bɔ è na zé klɔcée dó dɔn mi na, lobo ná zé mlɛ dó dɔn vǐ mitɔn lɛ́ɛ na. Mi ná gbɔn dǒlinu bó tɔ́n sín toxo ɔ́ mɛ, bɔ mɛ ɖokpó ɖokpó ná ɖidó fí e é xwe ɔ́ télélé. È na zé mi nyi dó ahohó ɔ́ mɛ.” Xó e Mawu Mavɔmavɔ ɖɔ ɔ́ nɛ́. “Mi yi Betɛ́li bó yi hu hwɛ bó! Mi yi Gilugalu bó hu hwɛ d'é jí! Mi nɔ sa vɔ̌ nú Mawu zǎnzǎn tɛgbɛ bó! Mi nɔ ná mǎɖówǒ nǔ e mi ɖó lɛ́ɛ tɔn, azǎn atɔn gbe azǎn atɔn gbe! Mi nɔ́ zé wɔ̌xúxú e mɛ è dǒ tɔ́n ɔ́ dó sá vɔ̌ nú Mawu dó nɔ́ dó kú n'i bó. Mi sú xó bó jlá nǔníná e mi zé jlǒ mi ɖésúnɔ tɔn dó ná lɛ́ɛ bó! Đó nǔ e mi mɛ Izlayɛ́linu lɛ́ɛ nɔ yí wǎn na é nɛ́.” Xó e Aklúnɔ Mavɔmavɔ ɖɔ ɔ́ nɛ́. “Nyɛ ɔ́, un sɛ́ adɔ dó mi gbɔn toxo ɖaxó mitɔn lɛ́ɛ bǐ mɛ. Nǔɖuɖu hán mi ɖo xwé mitɔn lɛ́ɛ gbe. Nǔ nyí mɔ̌ có, mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́. “Hwenu e é kpo sun atɔn bɔ jinukún mitɔn lɛ́ɛ na nyɔ́ ɔ́, un tɛ jǐ mi. Un bló bɔ jǐ ja ɖo toxo ɖě mɛ, bó gɔn ɖě mɛ; jǐ ja dó gle ɖě gbe bó gɔn ɖě gbe, bɔ nǔkún e ɖ'é jí lɛ́ɛ fyɔ́. Mɛ lɛ́ɛ nɔ gosín toxo we abǐ atɔn mɛ, bó nɔ́ yi sin nu gbé ɖo toxo ɖěvo mɛ; yě ká nɔ́ mɔ nu bónú é nɔ́ ɖi kɔ nú yě ǎ. Nǔ nyí mɔ̌ có, mi lɛ́ kɔ wá gɔn ce ǎ.” Xó e Mawu Mavɔmavɔ ɖɔ ɔ́ nɛ́. “Un dó azɔn jinukún mitɔn lɛ́ɛ, bɔ yě nɔ́ xú dó te abǐ yě nɔ́ nyɔ dó te. Un vívá jikpá mitɔn lɛ́ɛ kpó vǐwungle mitɔn lɛ́ɛ kpó sín kún; wɛn lɛ́ɛ ɖu fígitín mitɔn lɛ́ɛ kpó olívutín mitɔn lɛ́ɛ kpó sú dó. Nǔ nyí mɔ̌ có, mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́. “Un sɛ́ jɛmɛjí dó mi lě e un sɛ́ dó Ejípu gbɔn ɖ'ayǐ é. Un zé hwǐ dó hu mɛ wínnyáwínnyá mitɔn lɛ́ɛ, bó jó mɛ lɛ́ɛ dó bɔ yě bɛ̌ sɔ́ mitɔn lɛ́ɛ yi. Mi se mɛkúkú lɛ́ɛ sín wǎn ɖo fí e mi ɖe é. Nu nyí mɔ̌ có mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́. “Un gba nǔ bǐ hánnyá ɖo mi gɔ́n, lě e un gba Sodɔ́mu kpó Gomɔ́ɔ kpó gbɔn é. Midɛɛ lɛ́ɛ ka gán sín mɛ lě e è nɔ lun myɔtín sín myɔ mɛ é ɖɔhun. Nǔ ɖo mɔ̌ có mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́. “Vǐ ce Izlayɛ́linu lɛ́ɛ mi, mi na mɔ nǔ e un na wa xá mi é. Ée nǔ mɔ̌hunkɔtɔn ɖo te kpɔ́n mi ɔ́, mi bo sɔ́ nǔ, bó wá nyɛ Mawu mitɔn ɔ́ gɔ́n.” “Đó nyɛ wɛ bló só lɛ́ɛ; nyɛ wɛ bló jɔhɔn; nyɛ wɛ nɔ ɖe linlin ce lɛ́ɛ xlɛ́ gbɛtɔ́; nyɛ wɛ nɔ sɔ́ ayǐtéhɔ̌nnu dó húzú zǎn; nyɛ wɛ nɔ zun zɔnlin gbɔn fí e yi jǐ hú fí bǐ é. Mawu Mavɔmavɔ, Mawu Nǔbǐwúkpétɔ́ wɛ un nyí.” Izlayɛ́linu lɛ́ɛ mi, mi ɖótó xó e ɖɔ gbé un ja é: gbɛvíhan ɖé wɛ un dó ɖó ta mitɔn mɛ. Izlayɛ́li jɛ ayǐ; é sɔ́ ná sí te ǎ; é mlɔ́ ayǐ bɔ mɛ ɖěbǔ fɔ́n ɛ sí te ǎ. Đó Aklúnɔ Mavɔmavɔ ɖɔ dó Izlayɛ́li togun ɔ́ wú ɖɔ: “Súnnu afatɔ́n (1.000) gosín toxo ɖaxó ɖé mɛ yi ahwan fun gbé ɔ́, mɛ kanwe ko (100) jɛ́n ná lɛ́ kɔ wá.” Đó Mawu Mavɔmavɔ ɖɔ nú Izlayɛ́li togun ɔ́ ɖɔ: “Mi lɛ́ kɔ wá gɔ̌n ce, bó ná gán! Lo ɔ́, mi ma wá gɔ̌n ce ɖo Betɛ́li ó; mi ma ka yi Gilugalu ó; mi ma gbɔn Bɛ̌-Ceva ó. Đó è na wlí Gilugalunu lɛ́ɛ yi kannumɔgbénu, bó ná vívá Betɛ́linu lɛ́ɛ sín kún.” Mi lɛ́ kɔ wá Mawu Mavɔmavɔ gɔ́n, bó ná gán! É ma nyí mɔ̌ ǎ ɔ́, Mawu Mavɔmavɔ ná wá dó Jozɛ́fu kúnkan lɛ́ɛ bǐ zo, bɔ mɛ e ná cí zo énɛ́ ɔ́ ná tíin ǎ. Heelú mi mɛ e nɔ zé nǔjlɔ́jlɔ́wiwa dó mɔ nǔ nyanya wiwa ná, bó nɔ́ zé hwɛjijɔ dó xo kɔ́ ná lɛ́ɛ. Mawu Mavɔmavɔ bló sunvísɛkplé totaligbé tɔn lɛ́ɛ kpó sunvísɛkplé tofɔligbé tɔn lɛ́ɛ kpó. É nɔ sɔ́ zǐnflú dó húzú wěziza zǎnzǎn tɔn; é nɔ sɔ́ kéze dó húzú zǎn. É dɔn sin e ɖo xu mɛ lɛ́ɛ wá gba kɔn nyi ayǐkúngban jí. Mawu Mavɔmavɔ wɛ é nyí. É nɔ́ zin hlɔ̌nhlɔ́nnɔ lɛ́ɛ dó ayǐ, bó nɔ́ hɔ́ ahohó lɛ́ɛ. Mi jɛ hwɛɖɔxɔsá ɔ́, mi nɔ gbɛ́ wǎn nú mɛ e nɔ ɖɔ è nǐ wa nǔ jlɔ́jlɔ́ é, bɔ mɛ e ɖo nǔgbó ɖɔ wɛ ɔ́ nɔ́ vɛ́ mɔ nú mi. “Mi nɔ xo mɛ e ma ɖó gǎn ǎ lɛ́ɛ ɖu, bó nɔ yí nǔjɔ ɖo jinukún yětɔn lɛ́ɛ jí; énɛ́ ɔ́ wútu ɔ́, xɔ ɖagbe ɖagbe e mi gbá lɛ́ɛ ɔ́, mi ná ɖu gbɛ yětɔn ǎ; vǐwuntín ɖagbe ɖagbe e mi tun lɛ́ɛ ɔ́, mi ná dó vɛ̌ɛn yětɔn nu ǎ. Mawu ká ɖɔ: nyɛ Mawu ɔ́, nǔ nyanya tobutóbú e mi wa lɛ́ɛ ɔ́, un dán ɖěbǔ ǎ; un tunwun lě e nǔ e mi wa nyi do lɛ́ɛ syɛ́n sɔ é: xomɛvɔ́nɔ lɛ́ɛ sín kɛntɔ́ wɛ mi nyí. Mi nɔ yí gbe bɔ è nɔ dó ajɔ mi. Mi jɛ hwɛɖɔxɔsá ɔ́, mi nɔ lɔn nú è na ɖe xlɛ́ ɖɔ wamamɔnɔ lɛ́ɛ sín hwɛ jɔ ǎ.” Nyladó hwenu ɖé wɛ nyí hwenu élɔ́; nǔ e wútu mɛ e nyɔ́ nǔ i ɔ́ nɔ́ nɔ abwɛ̌ ɔ́ nɛ́. Hǔn, mi bó nɔ́ wa nǔ ɖagbe, bó jó nǔ nyanya wiwa dó; énɛ́ ɔ́, mi ná gán bɔ Mawu Mavɔmavɔ, Mawu Nǔbǐwúkpétɔ́ ɔ́ ná nɔ kpɔ́ xá mi lě e mi ba gbɔn é. Mi gbɛ́ wǎn nú nǔ nyanya wiwa, mi yí wǎn nú nǔ ɖagbe wiwa. Mi jɛ hwɛɖɔxɔsá hǔn, mi nɔ ɖɔ xó e sɔgbe é. Énɛ́ ɔ́, afɔ nyɔ́ ɔ́, Mawu Mavɔmavɔ, Mawu Nǔbǐwúkpétɔ́ ɔ́ sixú kú nǔbláwǔ nú Jozɛ́fu sín vǐ e kpo lɛ́ɛ. Mawu Mavɔmavɔ, Mawu Nǔbǐwúkpétɔ́, Aklúnɔ ɖɔ: “Énɛ́ ɔ́ wú wɛ è nǎ nɔ́ ya gbɛvíhan ɖo tokplétɛn lɛ́ɛ bǐ; è nǎ nɔ sú xó ɖo toligbó lɛ́ɛ xo ɖɔ: ‘Heelúnú tɛ́ ɖíe! Heelúnú tɛ́ ɖíe!’ È nǎ ylɔ́ glesi lɛ́ɛ, bó ná dɔn yě dó aluwɛ mɛ, bó ná ylɔ́ mɛ e nɔ dó gbɛvíhan lɛ́ɛ, bɔ yě ná wá ji gbɛvíhan. È nǎ ya gbɛvíhan gbɔn vǐwungle lɛ́ɛ bǐ mɛ, hwenu e un ná gbɔn tɛ́ntin mitɔn é.” Xó e Mawu Mavɔmavɔ ɖɔ ɔ́ nɛ́. Heelú mɛ e ɖo Mawu Mavɔmavɔ sín azǎn ɔ́ nɔ te kpɔ́n wɛ lɛ́ɛ. Étɛ́ ɖó nukún wɛ mi ka ɖe ɖo Mawu Mavɔmavɔ sín azǎn ɔ́ gbe? Zǐnflú sín azǎn wɛ é ná nyí; é na nyí wěziza sín azǎn ǎ. Mɛ e ɖo hinhɔn nú kinnikínní wɛ, bó yi kpé dó lɔnmɔ nu ɔ́ ɖɔhun wɛ mi ná cí; é hɔn byɔ́ xwé gbe, bó kplá así ta bɔ dan xú aɖǔ i. Mawu Mavɔmavɔ sín azǎn ɔ́, wěziza sín azǎn wɛ é ná nyí a? Éeǒ! Zǐnflú sín azǎn wɛ é ná nyí; ablu sín azǎn wɛ; é ná za wě ɖěbǔ ǎ. “Un gbɛ́ wǎn nú xwe e mi nɔ ɖu lɛ́ɛ; yě nɔ́ nyɔ́ nukún ce mɛ ǎ. Mi kplé ɔ́, nǔ e wa wɛ mi nɔ ɖe lɛ́ɛ nɔ́ nyɔ́ mɔ nú mì ǎ. Nú mi xwlé vɔ̌sánú e mi nɔ dó zo lɛ́ɛ kpó nǔníná mitɔn lɛ́ɛ kpó mì ɔ́, yě nɔ́ nyɔ́ nukún ce mɛ ǎ. Nyibúví e mi sɔ́ ɖó vo bɔ nǔɖuɖu kpé lɛ́ɛ ɔ́, mi fɔ yě dó sá vɔ̌ ná nú mì, bó dó dó kú nú mì ɔ́, un tlɛ nɔ kpɔ́n jɛ yětɔn jí lɔ ǎ. Mi ma sɔ́ ji han ɖě dó tó mɛ nú mì ó. Un sɔ́ jló ná se agǐdigbo e xo wɛ mi ɖe lɛ́ɛ ɖě sín gbe ǎ. Lo ɔ́, nǔjlɔ́jlɔ́wiwa ní cí tɔ e ɖo sisa wɛ ɔ́ ɖɔhun; hwɛjijɔ ní cí tɔsisa e ma nɔ xú gbeɖé ǎ é ɖɔhun. “Izlayɛ́linu lɛ́ɛ mi, hwenu e mi nɔ gbětótló mɛ káká nú xwe kanɖé (40) ɔ́, mi sa vɔ̌ ɖé nú mì a? Mi ka ná nǔɖé mì a? Égbé din ɔ́, mi bɛ́ axɔ́sú Sikútu kpó sunví Kinyu e mi nɔ sɛn ɔ́ kpó sín bǒcyɔ lɛ́ɛ hɛn; mi ɖésúnɔ wɛ ká sɔ́ alɔ mitɔn dó bló nǔ énɛ́ lɛ́ɛ ná; mɔ̌ jɛ́n mi ka nɔ bɛ́ nǔ énɛ́ lɛ́ɛ hɛn ɖ'ayǐ a? Mi tunwun ganjí ɖɔ émí kún nɔ bló mɔ̌ ó sín. Énɛ́ ɔ́ wú ɔ́, un ná wlí kannumɔ mitɔn yi Damási gúdo dɔ̌n.” Xó e Mawu Mavɔmavɔ, Mawu Nǔbǐwúkpétɔ́ ɔ́ ɖɔ ɔ́ nɛ́. Mi mɛ e vo fɛɛ ɖo Sinyɔ́ɔ ɖo Samalíi só ta, bó vɛdó ɖɔ nǔɖé kún ná wa émí ó lɛ́ɛ ɔ́, heelú mi. Mi wɛ nyí akɔta e jɛ nukɔn ɖo akɔta ɖě lɛ́ɛ mɛ ɔ́ bɔ è ɖɔ; è ɖɔ mi gɔ́n wɛ Izlayɛ́linu lɛ́ɛ nɔ wá. Mi ló kó yi Kalunɛ́ɛ bó yi kpɔ́n nǔ e jɛ ɔ́; énɛ́ ɔ́ gúdo ɔ́, mi ná gosín fínɛ́ bó hun káká yi Hamáti toxo ɖaxó ɔ́ mɛ, bó yi kpɔ́n nǔ e jɛ ɔ́. Énɛ́ ɔ́ gúdo ɔ́, mi ná wá Gati, ɖo Filisitɛ́ɛn lɛ́ɛ gɔ́n. Mi yi to énɛ́ lɛ́ɛ mɛ ɔ́, mi ná mɔ ɖɔ mi kún nyɔ́ hú yě ó. Ayǐkúngban yětɔn ná bó hwe hú mitɔn ɔ́, mi nyɔ́ hú yě ǎ. Nyladó sín azǎn ɔ́ sɛ dó nukɔn wɛ mi ɖe bó ɖɔ, lo ɔ́, dǎkaxixo sín azǎn ɔ́ dɔn sɛkpɔ́ miɖée wɛ mi ɖe. Mi nɔ mlɔ́ akánma e è sɔ́ ajinakúɖú dó ba acɔ́ na ɔ́ jí; mi nɔ dlɛ́n ɖo zinkpo gaga mitɔn lɛ́ɛ jí; mi ɖo lɛ̌ngbɔ́ví kpó nyibúví e è sɔ́ ɖó vo bɔ nǔɖuɖu kpé ganjí ɔ́ kpó ɖu wɛ. Mi nɔ ji han dó agǐdigbo mɛ kpó xósúsú kpó. Mi nɔ bló hanjinú yɔ̌yɔ́ ɖěvo lɛ́ɛ Davídi ɖɔhun. Mi nɔ nu vɛ̌ɛn ɖo kɔ́fu ɖaxó ɖaxó lɛ́ɛ mɛ, bó nɔ́ sá célu axivɛ́nu lɛ́ɛ. Lo ɔ́, nǔ baɖabaɖa e ɖo jijɛ dó Jozɛ́fu sín akɔta lɛ́ɛ jí wɛ lɛ́ɛ nɔ kú wǔ nú mi ǎ. Énɛ́ ɔ́ wú ɔ́, mi wɛ ná nyí kannumɔ nukɔn tɔn e è nǎ wlí lɛ́ɛ. Agɔ̌ e ɖu wɛ fɔnlínnɔ lɛ́ɛ ɖe ɔ́ kpé lo! Aklúnɔ Mavɔmavɔ xwlé éɖée. Mawu Mavɔmavɔ, Mawu Nǔbǐwúkpétɔ́ ɔ́ ɖɔ: “Go e yí wɛ Izlayɛ́li sín togun ɔ́ ɖe ɔ́ vɛ́ mɔ nú mi ɖésú. Un gbɛ́ wǎn nú xɔ tɔn ɖagbe ɖagbe lɛ́ɛ. Nǔ e ɖo Samalíi lɛ́ɛ bǐ wɛ un ná jó nú kɛntɔ́ tɔn lɛ́ɛ.” Ényí súnnu wǒ wɛ kpo ɖo xwédo ɖokpó mɛ ɔ́, yě bǐ ná kú. Hwenu e hɛ̌nnumɔ ɖé na zé mɛkúkú ɖokpó bó ná dó zo, bó ná bɛ́ xúgloxú tɔn lɛ́ɛ sín xwé ɔ́ gbe ɔ́, é ná kanbyɔ́ mɛ e ɖo xwé ɔ́ tɛ́ntin dɔ̌n ɔ́ ɖɔ: “Mɛ ɖé lɛ́ kpo ɖo gɔ̌n towe dɔ̌n a?” Bɔ mɛ ɔ́ ná yí gbe ɖɔ: “Éeǒ! É sɔ́ kpo mɛɖé ǎ.” É ná lɛ́ ɖɔ gɔ́ ná ɖɔ: “Xwɛ! Hwenu e è nǎ ylɔ́ Mawu Mavɔmavɔ sín nyǐkɔ dó ɔ́ ɖíe ǎ.” Đó Mawu Mavɔmavɔ ɖíe ɖe gbeta tɔ́n e; é ná ɖɔ bɔ xɔ ɖaxó ɔ́ ná mu, bɔ xɔ kpɛví ɔ́ ná gba hánnyá. Sɔ́ nɔ kán wezun gbɔn só jí wɛ a? È nɔ zé nyibú dó lɛ gle ɖo xu jí wɛ a? Bɔ étɛ́wútu mi ka zé nǔjlɔ́jlɔ́wiwa dó húzú nǔvɛ́nu, bó zé hwɛjijɔ dó húzú aɖǐvɛ́? Nǔmaɖinǔ lɛ́ɛ tamɛ wɛ mi nɔ j'awǎ dó. Mi nɔ ɖɔ: “É ma nyí hlɔ̌nhlɔ́n mǐtɔn wɛ zɔ́n bɔ mǐ kpé nǔ bǐ wǔ ǎ cé? Énɛ́ ɔ́ wú ɔ́, Izlayɛ́linu lɛ́ɛ mi, mi ɖótó! Un ná bló bɔ akɔta ɖé ná sí te dó mi jí, bó ná kpa acɛ gannaganna nú mi sín Hamáti hɔntogbó ɔ́ kɔn káká yi tɔsisa e ɖo gbětótló mɛ é kɔn.” Xó e Mawu Mavɔmavɔ, Mawu Nǔbǐwúkpétɔ́ ɖɔ ɔ́ nɛ́. Nǔ e Aklúnɔ Mavɔmavɔ ɖe xlɛ́ mì ɖo nǔmimɔ ɖé mɛ ɔ́ ɖíe: É ɖe wɛn tɔ́n kpɔ́ gégé hwenu e gběhan jɛ zǐnzɔ́n jí é. Gběhan nukɔntɔn e è xo bɔ é nyí axɔ́sú ɔ́ tɔn é. Ée wɛn ɖu gběhan e ɖo to ɔ́ mɛ lɛ́ɛ bǐ ɔ́, un ɖɔ: “Aklúnɔ Mavɔmavɔ, kɛnklɛ́n sɔ́ hwɛ e togun towe hu ɔ́ kɛ ɛ. É má nyí mɔ̌ ǎ ɔ́, éé mɛ e hwe sɔ mɔ̌ ɔ́, nɛ̌ wɛ é ka ná sixú lɛ́ nɔ gbɛ gbɔn?” Ée un ɖɔ mɔ̌ ɔ́, Mawu Mavɔmavɔ lɛ́ kɔ sín nǔ e é jló ná wa ɔ́ gúdo bó ɖɔ: “Nǔ énɛ́ ɔ́ sɔ́ ná jɛ ǎ.” Aklúnɔ Mavɔmavɔ ɖe nǔ ɖěvo xlɛ́ mì. É nɔ zé myɔ dó ɖó hwɛ nú togun ɔ́. Myɔ nɔ hɛn sin e ɖo ayǐkúngban glɔ́ lɛ́ɛ xú, bó nɔ́ fyɔ́ Izlayɛ́li to ɔ́. Énɛ́ ɔ́, un ɖɔ: “Aklúnɔ Mavɔmavɔ, kɛnklɛ́n gbɔ. É má nyí mɔ̌ ǎ ɔ́, togun towe e hwe sɔ mɔ̌ ɔ́, nɛ̌ wɛ é ná lɛ́ sixú nɔ gbɛ gbɔn?” Ée un ɖɔ mɔ̌ ɔ́, Mawu Mavɔmavɔ lɛ́ kɔ sín nǔ e é jló ná wa ɔ́ gúdo bó ɖɔ: “Nǔ énɛ́ ɔ́ lɔ sɔ́ ná jɛ ǎ.” Aklúnɔ lɛ́ ɖe nǔ élɔ́ xlɛ́ mì. É ɖésúnɔ ɖo te ɖo dǒ ɖé jí, bó hɛn kan e è nɔ dó kpɔ́n dǒ sín jlɔ̌jlɔ́ ná sín jǐ wá do ɔ́ alɔ mɛ. É kanbyɔ́ mì ɖɔ: “Amɔ́si, étɛ́ mɔ wɛ a ɖe?” Un yí gbe ɖɔ: “Nǔjlɛ́kan.” Aklúnɔ lɛ́ yí xó bó ɖɔ: “É nyɔ́! Nǔjlɛ́kan ɔ́, un sɔ́ dó ɖo kpínkpɔ́n wɛ ɖɔ togun ce jlɔ́ dǒ ɖɔhun a jí; ɖó un sɔ́ ná sɔ́ nǔwanyido tɔn ɖěbǔ kɛ ɛ ǎ. Un ná gba Izáki ví lɛ́ɛ sín vodún lɛ́ɛ. Un ná gba tɛn mímɛ́ Izlayɛ́li tɔn lɛ́ɛ hánnyá, bó ná tɔ́n ahwan mɛ e ná wá yí axɔ́sú Jelobowámu sín zinkpo jí lɛ́ɛ bǐ.” Amaciya vɔ̌sánú-xwlémawutɔ́ Betɛ́li tɔn ɔ́ dó wɛn sɛ́ dó Jelobowámu, axɔ́sú Izlayɛ́li tɔn ɔ́ bó ɖɔ: “Amɔ́si ɖo biba wɛ bó ná yí gǎn sín así towe ɖo axɔ́súɖuto Izlayɛ́li tɔn mɛ. Xó e ɖɔ wɛ é ɖe lɛ́ɛ kpé agbɔ̌n nú togun ɔ́. Xó e ɖɔ wɛ Amɔ́si ɖe lɛ́ɛ ɖíe: ‘Jelobowámu na kú hwǐ kú, bɔ è ná bɛ́ Izlayɛ́li ví lɛ́ɛ yi kannumɔgbénu, bɔ yě ná lín dó to yětɔn.’ ” Énɛ́ ɔ́, Amaciya ɖɔ nú Amɔ́si ɖɔ: “Nǔmɔtɔ́, tún xwé sín fí bó yi Judáa. A jɛ dɔ̌n ɔ́, a nǎ wa gbeyíɖɔ Mawu tɔn sín azɔ̌, bó dó ɖu nǔ. Lo ɔ́, ma sɔ́ wa gbeyíɖɔ Mawu tɔn sín azɔ̌ ɔ́ ɖě ɖo Betɛ́li fí ó; ɖó fí ɔ́, tɛn mímɛ́ axɔ́sú ɔ́ tɔn wɛ; axɔ́sú xwé wɛ.” Amɔ́si ka yí gbe nú Amaciya ɖɔ: “Un nyí gbeyíɖɔ Mawu tɔn ǎ; un ka nyí gbeyíɖɔ Mawu tɔn sín vǐ ǎ; lo ɔ́, lɛ̌ngbɔ́nyitɔ́ wɛ un nyí, bó nɔ́ tun sikomɔ́ɔtín. Mawu Mavɔmavɔ wɛ ɖe mì sín lɛ̌ngbɔ́ ce lɛ́ɛ kɔn, bó ɖɔ nú mì ɖɔ ma yi dó wɛn émítɔn togun Izlayɛ́li tɔn nú émí. Bɔ hwɛ ka wá ɖo sɛ́n dó nú mì wɛ ɖɔ nyɛ ní ma yi dó wɛn e Mawu ɖɔ nyɛ ní dó Izlayɛ́li ɔ́ ó; nyɛ ní ma ka sɔ́ ɖɔ xó ɖě dó Izáki ví lɛ́ɛ wú ó. É nyɔ́! Bo ɖótó xó e Mawu Mavɔmavɔ ɖɔ dó wǔtu towe é. É ɖɔ: ‘Asi towe ná kpo nú agalilɛ, ɖo toxo ɖaxó ɔ́ mɛ. È nǎ zé hwǐ dó hu vǐ towe súnnu kpó nyɔ̌nu kpó. È nǎ má ayǐkúngban towe nú mɛ ɖěvo lɛ́ɛ. Hwɛ ɔ́, a nǎ yi kú jɛ mɛ e má nyí akɔta towe ǎ lɛ́ɛ sín to mɛ. È nǎ bɛ́ Izlayɛ́li ví lɛ́ɛ yi kannumɔgbénu, bɔ yě ná lín dó toxo yětɔn.’ ” Aklúnɔ Mavɔmavɔ ɖe atínsínsɛ́n myámyá xasun ɖokpó xlɛ́ mì, bó kanbyɔ́ mì ɖɔ: “Étɛ́ mɔ wɛ a ɖe Amɔ́si?” Un yí gbe n'i ɖɔ: “Un mɔ atínsínsɛ́n myámyá xasun ɖokpó.” Énɛ́ ɔ́, Mawu Mavɔmavɔ ɖɔ nú mì ɖɔ: “Hwenu e togun ce Izlayɛ́li ná vɔ́ dó ɔ́ su. Un sɔ́ ná sɔ́ nǔ e é nɔ wa nyi do lɛ́ɛ ɖěbǔ kɛ ɛ ǎ. Gbe énɛ́ ɔ́ gbe ɔ́, hansinɔ e ɖo sinsɛnxɔ mɛ lɛ́ɛ ɔ́, gbɛvíhan wɛ yě ná dó. Cyɔ ná ɖo kpɔ́ gégé, bɔ è ná bɛ́ yě kɔn nyi gbě gbɔn fí bǐ; ahwi ná xo to ɔ́ bǐ.” Mi mɛ e nɔ gbídí gbɛ̌dónánɔ lɛ́ɛ dó do lɛ́ɛ ɔ́, mi mɛ e nɔ sú kún dó nú wamamɔnɔ e ɖo to ɔ́ mɛ lɛ́ɛ ɔ́, mi ɖótó xó élɔ́: Mi nɔ ɖɔ: “Hwetɛ́nu wɛ mǐ ná ɖu sunwájǐxwe ɔ́ fó dó, bó ná sa jinukún? Hwetɛ́nu wɛ gbɔjɛzán ɔ́ ná fó dó, bɔ mǐ nǎ hun agɔ̌ mǐtɔn lɛ́ɛ?” Mǐ ná ɖe nǔjlɛ́ká ɔ́ kpo; mǐ ná ɖe kilóo lɛ́ɛ kpo; nǔdagan mǐtɔn lɛ́ɛ ná sɔgbe ǎ. Mǐ ná sa jinukún nú ajɔ̌tɔ́ mǐtɔn lɛ́ɛ káká yi jɛ wɔn lɛ́ɛ jí. Mɛ e ma ɖó gǎn ǎ lɛ́ɛ kpó wamamɔnɔ lɛ́ɛ kpó ɔ́, mǐ ná kplá yě dó xwé gbe kannumɔ ɖɔhun ɖó yě kpé wú bó sú afɔkpa yětɔn lɛ́ɛ sín axɔ́ ǎ wú. Mawu Mavɔmavɔ xwlé nǔ bó ɖɔ: “Un xwlé to e wú Izlayɛ́li ví lɛ́ɛ ɖo afɔ tɛ ayǐ wɛ sɔ mɔ̌ ɔ́, ɖɔ un kún ná wɔn lě e mi nɔ wa nǔ gbɔn lɛ́ɛ gbeɖé ó.” Énɛ́ ɔ́ wú ɔ́, ayǐkúngban ná dán wǔ. Mɛ e ɖo ayǐkúngban ɔ́ jí lɛ́ɛ bǐ ná jɛ aluwɛ mɛ. Ayǐkúngban ɔ́ ná fɔ́n yi jǐ bǐ dégbédégbé, bó ká ná lɛ́ hwíhwɛ́ tɔsisa ɖaxó Nilu e ɖo Ejípu ɔ́ ɖi sin ɖɔhun. Aklúnɔ Mavɔmavɔ ɖɔ: “Gbe énɛ́ ɔ́ gbe ɔ́, un ná ɖɔ bɔ hwe ná yi xɔ hwemɛ cíɖíɖí; ayǐkúngban ɔ́ ná dó ablu kéze ɖéɖé. Un ná zé awǎ e jɛ wɛ mi ɖe ɔ́ dó húzú aluwɛ ná, bɔ han e ji wɛ mi ɖe lɛ́ɛ bǐ ná húzú gbɛvíhan. Mɛ bǐ ná sin nǔwamɛvɔ dó alin. È nǎ xwlɛ́ ta nú mɛ bǐ, lě e vǐ ɖokpónɔ kú nú mɛ ɔ́, è nɔ bló gbɔn é. Bɔ nǔ énɛ́ lɛ́ɛ bǐ ná fó wǔvɛ́mimɔ sín azǎn ɖé ɖɔhun. Azǎn ɖé ná wá bɔ un ná sɛ́ adɔ dó to ɔ́ mɛ. Xovɛ́ ná nɔ sin mɛ lɛ́ɛ, é ká ná nyí nǔɖuɖu sín xovɛ́ ǎ. Kɔ ná xú yě, é ká ná nyí sin sín kɔ wɛ na xú yě ǎ; lo ɔ́, xó e ɖɔ wɛ un ɖe ɔ́ sín xovɛ́ wɛ ná sin yě, bɔ kɔ tɔn ná xú yě. Yě ná nɔ ɖo flúflú kpé wɛ gbɔn xu jí xu jí. Yě ná nɔ́ gosín totaligbé wá yi zǎnzǎnhwe jí, bó ná nɔ́ ɖo Mawu Mavɔmavɔ xó ɔ́ ba na se wɛ, lo ɔ́, yě ná se ǎ. Gbe énɛ́ ɔ́ gbe ɔ́, kɔ ná xú ɖyɔ̌vǐ ɖagbe ɖagbe lɛ́ɛ kpó dɔ̌nkpɛvú lɛ́ɛ kpó káká bɔ yě ná xú gǒ. Yě nɔ́ xwlé vodún Samalíinu lɛ́ɛ tɔn lɛ́ɛ; yě nɔ́ xwlé nǔ bó nɔ́ ɖɔ: ‘Susu nú vodún towe Dan’, abǐ ‘Susu nú vodúnnú e è nɔ wa ɖo Bɛ̌-Ceva é.’ Yě mɛ énɛ́ lɛ́ɛ ná jɛ ayǐ, bó sɔ́ ná fɔ́n gbeɖé ǎ.” Un mɔ Aklúnɔ ɖo te ɖo vɔ̌sákpe ɔ́ jí, bɔ é ɖo ɖiɖɔ wɛ ɖɔ: “Hɔ̌ azakpo lɛ́ɛ bónú dotín lɛ́ɛ ní mu. Zě azakpo lɛ́ɛ dó vó ta nú yě bǐ. Zě hwǐ dó hu mɛ e kpo lɛ́ɛ ná. Yě mɛ ɖěbǔ sixú hɔn bó gán ǎ. Yě mɛ ɖěbǔ ná hɔn yi ǎ. Nú yě tlɛ kun do káká yi kútomɛ bó byɔ́ mɛ ɔ́, un ná yi dɔn yě tɔ́n. Nú yě tlɛ xá nǔ jí káká yi jǐnukúnsin ɔ́, un na ɖe yě jɛ te. Nú yě tlɛ yi hwlá cí Kaamɛ́li só ta ɔ́, un ná ba yě mɔ, lobo wlí yě. Nú yě ná bó ɖɔ un kún na mɔ émí ó, bó yi hwlá cí xuzan jí ɔ́, un ná ɖe gbe nú xumɛdan, bɔ é na xú aɖǔ yě. Nú yě ná bó sɔ́ yěɖée yi jó nú kɛntɔ́ yětɔn lɛ́ɛ, bó húzú kannumɔ nú yě ɔ́, un ná ɖe gbe, bɔ è nǎ hu yě bǐ. Nukún ce ná ɖo yě jí, é ká nyí nǔ ɖagbe ná wa nú yě wɛ un ɖe wú wɛ nukún ce ná ɖo yě jí ǎ, lo ɔ́, nǔ nyanya ná wa nú yě wú wɛ.” Aklúnɔ Mavɔmavɔ, Mawu Nǔbǐwúkpétɔ́ ɔ́ ɖó alɔ ayǐkúngban ɔ́ wú, bɔ é jɛ wǔ dán jí, bɔ mɛ e ɖ'é jí lɛ́ɛ bǐ jɛ aluwɛ mɛ. Ayǐkúngban ɔ́ ná fɔ́n dó jǐ bǐ, lobo ká ná lɛ́ hwíhwɛ́ tɔsisa ɖaxó Nilu e ɖo Ejípu ɔ́ ɖi sin ɖɔhun. Mawu blǒ nɔtɛn tɔn lɛ́ɛ ɖó sɛ́xwé, bó bló jǐnukúnsin bɔ é cyɔ́n ayǐkúngban ɔ́. É dɔn sin e ɖo xu mɛ lɛ́ɛ wá gba kɔn nyi ayǐkúngban ɔ́ jí. Mawu Mavɔmavɔ wɛ é nɔ nyí. Mawu Mavɔmavɔ ɖɔ: “Izlayɛ́linu lɛ́ɛ mi, mi xɔ akwɛ́ hú Etiopíinu lɛ́ɛ ɖo gɔ̌n ce wɛ a? Un ɖe mi tɔ́n sín Ejípu; un ka lɛ́ ɖe Filisitɛ́ɛn lɛ́ɛ sín Kafutɔ́ɔ, bó ɖe Silíinu lɛ́ɛ tɔ́n sín Kíi. Mi tunwun ǎ cé?” Aklúnɔ Mavɔmavɔ sín nukún ɖo nǔ e axɔ́sú Izlayɛ́li tɔn lɛ́ɛ wa nyi do lɛ́ɛ jí. Bɔ é ɖɔ: “Un ná sú kún yětɔn dó sín ayǐkúngban ɔ́ jí. Amɔ̌, un ná sú Jakɔ́bu ví lɛ́ɛ bǐ sésé sín kún dó ǎ. Đó din ɔ́, un ná ɖe gbe bɔ è nǎ ɖe ɖɛ akɔta Izlayɛ́li tɔn ɔ́ sín akɔta ɖě lɛ́ɛ mɛ, lě e è nɔ ɖe ɖɛ jinukún bɔ kɛ́n ɖěbǔ má nɔ́ ján d'é mɛ ǎ é ɖɔhun. Yě mɛ e wa nǔ nyi do ɖo togun ce mɛ lɛ́ɛ bǐ ná cí ahwan; yě mɛ e nɔ ɖɔ nú gbeyíɖɔ lɛ́ɛ ɖɔ yě kún ná dɔn nyladó e sín adǎn gblɔ́n nú émí wɛ yě ɖe lɛ́ɛ dó émí jí ó lɛ́ɛ bǐ ná cí ahwan.” Mawu Mavɔmavɔ ɖɔ: “É wá yá ɔ́, un ná fɔ́n Davídi sín xwé e mu ɔ́ ɖó te. Un ná bló dǒ e zɛ lɛ́ɛ ɖó. Un ná bló nǔ e gba hánnyá lɛ́ɛ ɖó. Un ná vɔ́ xwé ɔ́ bló ɖó lě e é kó ɖe gbɔn ɖ'ayǐ é. Énɛ́ ɔ́, Izlayɛ́li ví lɛ́ɛ ná lɛ́ vɔ́ ayǐkúngban e ko nyí Edɔ́mu tɔn ɖ'ayǐ xóxó lɛ́ɛ kpó togun ce ɖě lɛ́ɛ kpó yí. Nyɛ Mawu Mavɔmavɔ ɔ́ wɛ ɖɔ mɔ̌, bó ká ná bló.” Mawu Mavɔmavɔ lɛ́ ɖɔ: “Đǒtó! Azǎn ɖé lɛ́ɛ ná wá. Azǎn énɛ́ lɛ́ɛ gbe ɔ́, nú è ya nǔkún nú é nɔ zaan ɔ́, è nǎ nɔ li vǐwun. Énɛ́ ɔ́, vɛ̌ɛn yɔ̌yɔ́ ná nɔ sa tɔ sín kpó lɛ́ɛ jí, bó ná gba kpé só kpɛví kpɛví lɛ́ɛ jí. Un ná kplá togun ce Izlayɛ́li sín kannumɔgbénu wá. Yě ná vɔ́ toxo ɖaxó ɖaxó e è gba hánnyá lɛ́ɛ gbá, lobo ná nɔ toxo énɛ́ lɛ́ɛ mɛ. Yě ná tun vǐwuntín lɛ́ɛ, lobo ná nɔ́ mɔ vɛ̌ɛn nu. Yě ná bló jikpá lɛ́ɛ, bó ná nɔ ɖu nǔ e ná nɔ tɔ́n sín mɛ lɛ́ɛ é. Un ná bló bɔ togun ce ná dó ɖɔ do nyi ayǐkúngban e nyí étɔn ɔ́ jí, bɔ è sɔ́ ná ɖe e sín to e un ná ɛ ɔ́ mɛ ǎ. Xó e nyɛ Mawu Mavɔmavɔ, Mawu mitɔn ɖɔ ɔ́ nɛ́.” Aklúnɔ Mawu ɖe nǔ xlɛ́ Abudiyási. É ɖɔ xó n'i dó togun Edɔ́mu tɔn ɔ́ wú. Xó e é ɖɔ ɔ́ ɖíe: Mǐ se wɛn Mawu Mavɔmavɔ tɔn ɖokpó. É sɛ́ wɛnsagun ɖokpó dó akɔta lɛ́ɛ tɛ́ntin bɔ é wá ɖɔ nú yě ɖɔ: “Mi sí te, mi nú mǐ ná yi fun ahwan xá Edɔ́munu lɛ́ɛ.” Mawu Mavɔmavɔ ɖɔ: “Edɔ́mu, un ná ɖe hlɔ̌nhlɔ́n towe kpo ɖo akɔta lɛ́ɛ bǐ mɛ. Mɛ ɖé sɔ́ ná mɔ we dó mɔ nǔɖé ǎ. Goyíyí towe dɔn we bú ali. A yi cí sókan mɛ, bó yi jínjɔ́n só ta aga ɖéé, bó nɔ́ ɖɔ: ‘Mɛ̌ ká sixú kpíkpé mì sín fí nyi dodomɛ?’ A na bo sɔ́ adɔ̌tɛn towe yi ɖó aga ɖéé gangan ɖɔhun ɔ́, a na bo sɔ́ yi ɖó sunví lɛ́ɛ tɛ́ntin ɔ́, nyɛ ná kpíkpé we sín dɔ̌n wá dodomɛ; nyɛ Mawu Mavɔmavɔ wɛ ɖɔ mɔ̌. Ényí ajotɔ́ mɛvɔtɔ́ lɛ́ɛ wá xwé ɖé gbe zǎn mɛ ɔ́, nǔ e myá nukún nú yě lɛ́ɛ wɛ yě nɔ́ bɛ́. Ényí vǐwungbɛtɔ́ lɛ́ɛ yi vǐwungbo ɖé mɛ ɔ́, yě nɔ́ sixú gbɛ bǐ gbeɖé ǎ. Amɔ̌, hwɛ ɔ́, è vɔ we bǐ. Yéége Esawu ví lɛ́ɛ mi, mi kpɔ́n lě e è bɛ̌ nǔ mitɔn lɛ́ɛ bǐ gbɔn é! Dɔkun mitɔn e ɖo nǔglɔ́ lɛ́ɛ bǐ wɛ è lɛ̌ mɔ bó bɛ́. Mɛ e ɖo jǐ mitɔn lɛ́ɛ bǐ nya mi sín to mitɔn mɛ. Xɔ́ntɔn mitɔn lɛ́ɛ flú mi bo ɖu ɖo mi jí. Mɛ e nɔ ɖu nǔ xá mi lɛ́ɛ ɖésú ɖó mɔ nú mi, bɔ è nɔ ɖɔ dó mi wú ɖɔ: ‘Ayi yětɔn mɔ nǔ ɖěbǔ ǎ.’ Gbe e gbe un ná sin xomɛ ɔ́, un ná sú nǔnywɛ́tɔ́ Edɔ́mu tɔn lɛ́ɛ sín kún dó, un ná jó nukúnnú-mɔjɛnǔmɛtɔ́ ɖěbǔ dó nyi Edɔ́mu só lɛ́ɛ jí ǎ. Nyɛ Mawu Mavɔmavɔ wɛ ɖɔ mɔ̌. Temani toxo e, ahwanfuntɔ́ towe lɛ́ɛ sín ayi bǐ ná gba dó, bɔ è nǎ hu sɔ́ja e ɖo Esawu só jí lɛ́ɛ bǐ tɛ́.” “Edɔ́mu, a nǎ ɖu winnyá bɔ é ná vɛ́ jlɛ́. È nǎ vívá kún towe bǐ sésé, ɖó adǎka e a xo nɔví towe Jakɔ́bu ví lɛ́ɛ wú é wútu. Gbe e gbe toɖévomɛnu lɛ́ɛ bɛ́ nǔ e wú yě gán jɛ lɛ́ɛ xweyǐgbe ɔ́, a ɖo fínɛ́. Hwenu e yě gba toxo Jeluzalɛ́mu tɔn sín hɔn, bó byɔ́ toxo ɔ́ mɛ, lobo ɖo akɔ nyi dó dɔkun yětɔn lɛ́ɛ wɛ ɔ́, a ɖo fínɛ́, bɔ hwi lɔ wa nǔ toɖévomɛnu lɛ́ɛ ɖɔhun. Hwenu e awě ɖo nɔví towe Judáanu lɛ́ɛ xo wɛ ɔ́, é ná kó gɔn nukún towe mɛ nyɔ́. Hwenu e è ɖo nǔ yětɔn hɛn gblé wɛ ɔ́, xomɛ ná ko gɔn hunhun we, hwenu e yě ɖo wǔvɛ́ mɔ wɛ ɔ́, a nǎ kó gɔn yě zun. Hwenu e è ɖo togun ce sín nǔ lɛ́ɛ hɛn gblé wɛ ɔ́, é ná kó gɔn nukún towe mɛ nyɔ́; a nǎ kó gɔn nǔ tɔn lɛ́ɛ bɛ́. Hwenu e mɛ yětɔn lɛ́ɛ ɖo hinhɔn wɛ ɔ́, a nǎ kó gɔn ali gbo nú yě bó hu yě. A nǎ kó gɔn mɛ yětɔn e gán lɛ́ɛ jó nú kɛntɔ́ adǎngbomɛ zán énɛ́ ɔ́ gbe. Đó Mawu Mavɔmavɔ zán ɔ́ kó sɛkpɔ́. Azǎn énɛ́ ɔ́ gbe ɔ́, Mawu Mavɔmavɔ ná ɖɔ hwɛ xá akɔta lɛ́ɛ bǐ. Lě e a wa mɛ ɖě lɛ́ɛ nú gbɔn ɔ́ wɛ è nǎ wa nǔ towe gbɔn. Nǔ nyanya e a wa ɔ́ ná húzú kpan nukɔn we.” Izlayɛ́li ví lɛ́ɛ mi, mi ko nu xomɛsin ce ahan ɖɔhun ɖo só mímɛ́ ce jí, mɔ̌ ɖokpó ɔ́ jɛ́n akɔta lɛ́ɛ bǐ ná nu magbokɔ. Yě ná nu, bó ná mú, bɔ kún yětɔn ná sú dó bǐ gbídígbídí. Amɔ̌, mɛ e gán lɛ́ɛ ná mɔ bibɛtɛn ɖo Sinyɔ́ɔ só ɔ́ jí, bɔ é ná nyí nǔ mímɛ́, bɔ Jakɔ́bu xwédo ɔ́ ná lɛ́ yí to tɔn ɖo mɛ e wá klá jɛ nu lɛ́ɛ sí. Esawu xwédo ɔ́ ná nyí sɛníyɔ, bɔ Jakɔ́bu kpó Jozɛ́fu kpó sín xwédo ɔ́ ná nyí myɔ, bó ná dó Esawu xwédo ɔ́ zo, bɔ é ná ji kɔn afín. Nǔ ɖěbǔ sɔ́ ná kpo ɖo xwédo ɔ́ mɛ ǎ. Nyɛ Mawu Mavɔmavɔ wɛ ɖɔ mɔ̌. Mɛ e ɖo tofɔligbé lɛ́ɛ ná yí Esawu só ɔ́. Mɛ e ɖo ayǐkúngban wɛnjɛ jí lɛ́ɛ ná yí Filisitɛ́ɛn lɛ́ɛ sín to. Izlayɛ́linu lɛ́ɛ ná yí Eflayímu kpó Samalíi kpó sín ayǐkúngban, bɔ Bɛnjamɛ́ɛ ná yí Galadi. Izlayɛ́li ví e ahwan wlí yi kannumɔgbénu lɛ́ɛ ná lɛ́ kɔ wá yí to e mɛ Kanáanu lɛ́ɛ ɖe ɔ́ káká yi Salɛfaɖo Salɛ́pu, bɔ Jeluzalɛ́munu e ahwan wlí hɛn yi kannumɔgbénu ɖo Sefaladi lɛ́ɛ ná lɛ́ kɔ wá yí toxo ɖaxó ɖaxó e ɖo tofɔligbé lɛ́ɛ. Yě ná ɖu ɖ'é jí, bó ná byɔ́ Jeluzalɛ́mu toxo ɔ́ mɛ, bó ná kpa acɛ nú Edɔ́munu lɛ́ɛ. Axɔ́súɖuɖu ɔ́ ná nyí Mawu Mavɔmavɔ tɔn. Mawu Mavɔmavɔ ɖɔ nú Jonási Amitayi ví ɔ́ gbe ɖokpó ɖɔ: “Jonási, yi toxo ɖaxó e è nɔ ylɔ́ ɖɔ Ninívu ɔ́ mɛ din tlóló, bó ɖó hwɛ n'i, ɖó agbɔ̌n kpé mì dó dǎka e xo wɛ to ɔ́ mɛ nu lɛ́ɛ ɖe ɔ́ wú.” Jonási ka ɖɔ émí ná yi Taasísi, bó ná nɔ zɔ nú Mawu Mavɔmavɔ. Énɛ́ ɔ́, é yi Jafa, bó mɔ tɔjíhún ɖé ɖo fínɛ́, bɔ é xwe Taasísi. É sú axɔ́, bó dó tɔjíhún ɔ́, é kpó mɛɖé lɛ́ɛ kpó, bó tunwun ɖɔ émí ná yi Taasísi, bó nɔ zɔ nú Mawu Mavɔmavɔ. Lo ɔ́, Mawu Mavɔmavɔ sɛ́ jɔhɔn ɖaxó ɖé dó xu ɔ́ jí; jɔhɔn ɖo adǎn wa wɛ káká, bɔ tɔjíhún ɔ́ ja gbigba gbé. Xɛsi jɛ tɔjíhúnkuntɔ́ lɛ́ɛ jí, bɔ yě mɛ ɖokpó ɖokpó jɛ nǔmɛsɛn yětɔn lɛ́ɛ ylɔ́ jí; yě bɛ̌ agban e ɖo tɔjíhún ɔ́ mɛ lɛ́ɛ kɔn nyi xu mɛ, bónú hǔn ɔ́ ná dó fúɖá. Jonási ka mlɔ́ hǔn ɔ́ mɛ ɖo do, bó dɔ́ amlɔ bǐ gbídígbídí. Tɔjíhúnkuntɔ́ lɛ́ɛ sín gǎn ká sɛkpɔ́ Jonási, bó kanbyɔ́ ɛ ɖɔ: “Étɛ́wú a ka ɖo amlɔ dɔ́ wɛ? Sí te bó ylɔ́ nǔ e a nɔ sɛn é; afɔ nyɔ́ ɔ́, é ná flín mǐ, bó ná jó mǐ dó bɔ mǐ ná dɔn ǎ.” Mɛ e ɖo hǔn ɔ́ mɛ lɛ́ɛ jɛ ɖiɖɔ nú yěɖée jí ɖɔ: “Mi wá mǐ ní ba do ná, bó ná tunwun mɛ e wú awě élɔ́ ɖo mǐ xo wɛ é.” Ée yě ɖɔ mɔ̌ ɔ́, yě nyi akɔ, bɔ akɔ jɛ Jonási jí. Énɛ́ ɔ́, yě ɖɔ n'i ɖɔ: “Hwi wɛ zɔ́n bɔ awě élɔ́ ɖo mǐ xo wɛ. Azɔ̌ tɛ́ a nɔ wa? Fítɛ́ a gosín? To tɛ́ mɛ nu wɛ a nyǐ? Akɔta tɛ́ mɛ wɛ a tɔ́n sín?” Jonási ka yí gbe nú yě ɖɔ: “ Eblée wɛ nú mì. Un nɔ sɛn Mawu Mavɔmavɔ, Mawu sɛ́xwé tɔn e bló xu kpó ayǐkúngban kpó é.” Énɛ́ ɔ́ gúdo ɔ́, é tín nǔ lɛ́ɛ bǐ mɛ nú yě. Ée tɔjíhúnkuntɔ́ lɛ́ɛ se ɖɔ Mawu Mavɔmavɔ hɔn ná wɛ Jonási ɖe ɔ́, xɛsi ɖaxó ɖé jɛ yě jí, bɔ yě kanbyɔ́ ɛ ɖɔ: “Étɛ́ a ka dó sin nɛ́? Nɛ̌ mǐ ká ná wa nǔ towe gbɔn din, bɔ tɔ ɔ́ ná hwíhwɛ́ bɔ mǐ ná mɔ agbɔ̌n? Đó adǎn e wa wɛ xu ɔ́ ɖe ɔ́ lɛ́ ɖo syɛ́nsyɛ́n d'é jí wɛ.” Jonási ka yí gbe nú yě ɖɔ: “Mi sɔ́ mì nyi dó xu ɔ́ mɛ, énɛ́ ɔ́, xu ɔ́ ná hwíhwɛ́, ɖó nyi wɛ zɔ́n bɔ jɔhɔn ɖaxó élɔ́ ɖo tagba dó nú mi wɛ.” Tɔjíhúnkuntɔ́ lɛ́ɛ tɛ́nkpɔ́n bó ná kun hǔn ɔ́ wá agě jí; lo ɔ́, yě kpé wú ǎ, ɖó adǎn e wa wɛ xu ɔ́ ɖe ɔ́ syɛ́n dín. Yě gbɔ bó jɛ Mawu Mavɔmavɔ ylɔ́ jí ɖɔ: “Mawu Mavɔmavɔ! Ma lɔn nú mǐ dɔn ɖó nya élɔ́ wú ó; é ní má ká nyí ɖɔ mǐ wɛ hu xomɛvɔ́nɔ ó, ɖó hwi Mawu Mavɔmavɔ ɔ́, nǔ e jló we ɔ́ wɛ a nɔ wa.” Énɛ́ ɔ́ gúdo ɔ́, yě sɔ́ Jonási nyi dó xu ɔ́ mɛ, bɔ xu ɔ́ hwíhwɛ́. Ée nǔ nyí mɔ̌ ɔ́, yě jɛ xɛsi ɖi nú Mawu Mavɔmavɔ jí; yě sá vɔ̌ ɖokpó n'i, bó lɛ́ dó akpá n'i. Mawu Mavɔmavɔ sɛ́ hweví ɖaxó ɖé dó, bɔ é wá mi Jonási. Jonási nɔ hweví xomɛ nú zǎn atɔn kéze atɔn. Ée Jonási ɖo hweví ɔ́ xomɛ ɔ́, é xo ɖɛ bó sú xó ylɔ́ Mawu Mavɔmavɔ, Mawu tɔn. É ɖɔ: Hwenu e adǎn gbo mì ɔ́, un sú xó ylɔ́ we Mawu Mavɔmavɔ, bɔ a yǐ gbe nú mì. Hwenu e un ɖo kúdonu ɔ́, un sú xó ylɔ́ we ɖɔ hwi ní wá gɔ́ alɔ nú mì bɔ a se xósúsú ce. A sɔ́ mì nyi dó xu mɛ, bɔ un yi do bǐ gbídígbídí. Sin ɔ́ bú mì bǐ gbídígbídí, bɔ a nɔ mlí aslɔkɛ́ wá gba mì ɖě jɛ ɖě gúdo. Nyɛ ka ko ɖo ɖiɖɔ wɛ ɖɔ: “Mawu Mavɔmavɔ, a nya mì bɔ un ɖo zɔ nú we bǐ. Nǔ ɖo mɔ̌ có un ka lɛ́ jló ná mɔ sinsɛnxɔ towe.” Sin bú mì káká wá kɔ. Sin ɔ́ bú mì bǐ, bɔ gběhan xu mɛ tɔn lɛ́ɛ blá ta nú mì. Só lɛ́ɛ sín dodónu wɛ un ko yi, bɔ kú sín hɔntogbó lɛ́ɛ ko sú dó mì bó ná nɔ mɔ̌ káká sɔ́yi. Lo ɔ́, hwɛ Mawu Mavɔmavɔ, Mawu ce ɔ́, a ɖe mì tɔ́n gbɛɖe sín do gɔngɔn énɛ́ ɔ́ mɛ. Hwenu e kan mɛ gbɔ́jɔ́ mì bɔ agbɔ̌n kpé mì bǐ ɔ́, un wá flín we, bó xo ɖɛ sɛ́ dó we Mawu Mavɔmavɔ, bɔ ɖɛ ce wá gɔ̌n towe, ɖo sinsɛnxɔ mímɛ́ towe mɛ. Mɛ e nɔ sɛn nǔmɛsɛn lɛ́ɛ ɔ́, hwlɛngánli ɔ́ bǐ wɛ sú dó yě. Amɔ̌, nyɛ ɔ́, nǔ e a wa nú mì ɔ́, un ná ji han dó dó kú tɔn nú we; un ná xwlé vɔ̌sánú we, bɔ akpá e un dó nú we lɛ́ɛ ɔ́, un ná ɖe yě. Nǔgbó wɛ Mawu Mavɔmavɔ, hwi wɛ nɔ hwlɛ́n mì gán. Mawu Mavɔmavɔ ká wá ɖe gbe, bɔ hweví ɔ́ wá vi Jonási sɔ́ nyi agě. Mawu Mavɔmavɔ ɖɔ nú Jonási azɔn wegɔ́ ɔ́ ɖɔ: “Yi toxo ɖaxó Ninívu ɔ́ mɛ din tlóló, bó ɖɔ xó e un ɖɔ nú we ɔ́ nú yě.” Élɔ́ tɔn din ɔ́, Jonási se gbe nú Mawu Mavɔmavɔ, bó ɖidó Ninívu. Ninívu ɔ́, toxo ɖaxó ɖé wɛ bó dó agba ɖésú, bɔ azǎn atɔn wɛ è nɔ ɖi zɔnlin xɔ, cóbó nɔ xo toxo ɔ́ zlɛ́. Ée Jonási yi jɛ toxo ɔ́ mɛ ɔ́, é sɔ́ kéze ɖokpó ɖó te, bó jlá gbɔn toxo ɔ́ mɛ bǐ ɖɔ: “Káká nú azǎn kanɖé (40) din ɔ́, Ninívu to ɔ́ bǐ ná vɔ.” Ninívunu lɛ́ɛ ká ɖi nǔ nú Mawu, bó ɖɔ gbɔn toxo ɔ́ bǐ mɛ ɖɔ mɛ bǐ ná blá nu, bo kplá ati, bó dó ɖe xlɛ́ ɖɔ émí húzú jijɔ; bɛ́ sín mɛ e nyí gbɛtɔ́ nukúnɖéjí lɛ́ɛ jí, káká yi kɔn nyi gbɛtɔ́ kpaa lɛ́ɛ jí. Xó énɛ́ ɔ́ yi jɛ axɔ́sú to ɔ́ mɛ tɔn sín tó mɛ, bɔ é sí te sín axɔ́súzinkpo tɔn jí, bó ɖe axɔ́súwu sín kɔ, bó sɔ́ ati cyɔ́n, bó yi jínjɔ́n afín mɛ. É zɔ́n bɔ è sú xó, bó jlá gbɔn Ninívu to ɔ́ bǐ mɛ ɖɔ: “Axɔ́sú ɔ́ kpó tomɛxó lɛ́ɛ kpó ɖe gbeta tɔ́n ɖɔ gbɛtɔ́ kpó kanlin kpó ɖě má ɖu nǔ ó; ɖě má ká nu sin ó; kanlin ɖaxó kpó kpɛví kpó ɖě má yi ɖu ama ó; ɖě ní má yi nu sin ó. Gbɛtɔ́ kpó kanlin kpó bǐ ní dó ati bó sú xó ylɔ́ Mawu kpó hlɔ̌nhlɔ́n kpó. Nú mɛ ɖokpó ɖokpó ní jó jijɔ nyanya dó, bó jó dǎka e é nɔ xo ɔ́ dó. Afɔ nyɔ́ ɔ́, Mawu ná húzú gbe, bó ná jó xomɛsin dó bɔ mǐ sɔ́ ná dɔn ǎ.” Mawu mɔ lě e wa nǔ gbɔn wɛ yě ɖe ɔ́, bó mɔ ɖɔ yě jó jijɔ nyanya yětɔn lɛ́ɛ dó. Énɛ́ ɔ́ wútu ɔ́, é lɛ́ lɛ́ kɔ wá gbeta e é kó ɖe tɔ́n ɔ́ jí, bɔ nǔ nyanya e dán é gblɔ́n nú yě ɔ́, é sɔ́ bló ǎ. Ée Mawu Mavɔmavɔ má sɔ́ dɔn tó nú Ninívunu lɛ́ɛ ǎ ɔ́, é vɛ́ Jonási wú káká, bɔ é sin xomɛ. É xo ɖɛ sɛ́ dó Mawu Mavɔmavɔ bó ɖɔ: “Mawu Mavɔmavɔ, é má nyí nǔ e ɖɔ wɛ un ɖe hwenu e un kpo ɖo to ce mɛ ɔ́ nɛ́ a? Nǔ e gbɛ́ wɛ un ɖe bó hɔn ɖidó Taasísi ɔ́ nɛ́! Đó un tunwun ɖɔ Mawu xomɛnyɔ́tɔ́ wɛ a nyǐ, bó nɔ́ kú nǔbláwǔ nú mɛ; a nɔ yá wǔ sin xomɛ ǎ; ɖagbewiwa towe ɖó dogbó ǎ. A gblɔ̌n adǎn nú mɛ ɔ́, tlóló jɛ́n a nɔ lɛ́ lɛ́ kɔ sín gúdo. Din ɔ́, Mawu Mavɔmavɔ, gbɔ bo hu mì; ɖó un kú din ɔ́, é nyɔ́ nú mì hú un nɔ gbɛ.” Mawu Mavɔmavɔ ká kanbyɔ́ Jonási ɖɔ: “Hǔn nǔ ɖagbe wa wɛ jɛ́n a ɖe din bo ɖo xomɛ sin wɛ a?” Jonási ka tɔ́n sín toxo ɔ́ mɛ, bó yi cí zǎnzǎnhwe jí nú toxo ɔ́, bó bló azava ɖokpó nyi fínɛ́, bó jínjɔ́n sá, bó ɖo te kpɔ́n nǔ e ná jɛ dó toxo ɔ́ jí é. Mawu Mavɔmavɔ ká bló bɔ atín ɖokpó wú ɖo fínɛ́, bɔ ala tɔn lɛ́ɛ vun dó Jonási sín ta nu, bó ná ná ɛ yɛtɛn, bónú hwesivɔ́ e hun dó jǐ tɔn ɔ́ ní ɖe kpo. Atín énɛ́ e wú ɔ́ víví nú Jonási ɖésú. Lo ɔ́, ayǐhɔ́ngbe tɔn ayǐtéhɔ̌nnu ɔ́, Mawu sɛ́ wǎnvú ɖé dó, bɔ é wá ɖu atín ɔ́, bɔ atín ɔ́ kú zogbe. Ée hwe wá tɔ́n ɔ́, Mawu sɛ́ jɔhɔn ɖé dó sín zǎnzǎnhwe jí, bɔ jɔhɔn ɔ́ nɔ́ mɛ mɛ. Hwesivɔ́ ɔ́ hun dó Jonási ta káká bɔ é ɖibla xɛ́ nǔ, bó gbɔ bó byɔ́ kú. É ɖɔ: “Un gbɔ bo kú din ɔ́, é nyɔ́ nú mì hú un nɔ gbɛ.” Mawu ká lɛ́ kanbyɔ́ ɛ ɖɔ: “Nǔ ɖagbe wa wɛ jɛ́n a ɖe din bó ɖo xomɛ sin wɛ ɖó atín yǎyá wú a?” Jonási yí gbe nú Mawu ɖɔ: “Xomɛ e un sin káká din bó byɔ́ kú ɔ́, nǔ ɖagbe wɛ un wa.” Ée é ɖɔ mɔ̌ ɔ́, Mawu Mavɔmavɔ lɛ́ yí xó bó ɖɔ: “Hwɛ ɔ́, atín énɛ́ ɔ́, a jɛ tagba ɖěbǔ dó wǔ tɔn ǎ; hwi wɛ ká bló bɔ é su ǎ. Zǎn ɖokpó mɛ wɛ é wú, bó ká lɛ́ kú zǎn ɖokpó mɛ, cóbɔ nǔ tɔn ká ɖo wǔ blá nú we wɛ, bɔ a ka jló ɖɔ nyɛ ní kú nǔbláwǔ nú Ninívu to ɔ́ ǎ; toxo ɖaxó énɛ́ ɔ́ e mɛ gbɛtɔ́ adɔ̌kpo ayizɛ́n (120.000) ɖe, bɔ kanlin wɔ̌buwɔ́bú ɖe ɔ́, a jlǒ ɖɔ má kú nǔbláwǔ ná ǎ. Mɛ e ɖo to ɔ́ mɛ lɛ́ɛ ká tunwun nǔ e nyɔ́ ɔ́ kpó nǔ e nylá ɔ́ kpó ǎ.” Hwenu e Jotámu kpó Akázi kpó, kpódó Ezekiyási kpó ɖo axɔ́sú ɖu wɛ ɖo Judáa ɖě jɛ ɖě gúdo ɔ́, Mawu Mavɔmavɔ sɔ́ xó élɔ́ dó ayi mɛ nú Micée Mɔlɛcɛ́tinu ɔ́. É ɖe nǔ e ná wá jɛ dó Samalíi toxo ɔ́ kpó Jeluzalɛ́mu toxo ɔ́ kpó jí ɔ́ xlɛ́ ɛ. Togun lɛ́ɛ bǐ ní ɖótó; gbɛtɔ́ e ɖo ayǐkúngban jí lɛ́ɛ bǐ ní tɛ́ tó bó se. Aklúnɔ Mavɔmavɔ ná gosín tɛn tɔn mímɛ́ ɔ́ mɛ, bó ná wá dó hwɛ mi. Nǔgbó wɛ, Mawu Mavɔmavɔ ná tɔ́n sín fí e é nɔ́ nɔ é; é ná jɛ te bó ɖi zɔnlin gbɔn só lɛ́ɛ jí. Só lɛ́ɛ ná sínsín ɖo afɔ tɔn lɛ́ɛ glɔ́, lě e vɛ̌la nɔ sínsín ɖo myɔ nu é ɖɔhun. Só lɛ́ɛ ná sínsín, bó sa yi dodomɛ, lě e sin nɔ sa sín só jí ɔ́ ɖɔhun. Nǔ énɛ́ lɛ́ɛ bǐ ná jɛ ɖó Izlayɛ́li ví lɛ́ɛ hu hwɛ, bó fɔ́n gǔ dó Mawu jí. Mɛ̌ ká zɔ́n bɔ Izlayɛ́li ví lɛ́ɛ fɔ́n gǔ dó Mawu jí? Samalíinu lɛ́ɛ wɛ. Mɛ̌ ká dɔn Judáanu lɛ́ɛ dó vodúnsinsɛn mɛ? Jeluzalɛ́munu lɛ́ɛ ɖésú wɛ. Mawu ɖɔ: “Énɛ́ ɔ́ wú ɔ́, un ná gba Samalíi toxo ɔ́ bǐ hánnyá, bó ná zé dó húzú ayǐkúngban e jí è na nɔ dó vǐwun ɖe é. Un ná zɔ́n bɔ è ná flí awǐnnyaglo tɔn lɛ́ɛ kɔn nyi dodomɛ, bɔ to ɔ́ sín dodó lɛ́ɛ bǐ ná jɛ wěxo. Un ná gba Samalíi sín vodún lɛ́ɛ bǐ, bó ná dó nǔ e è ná ɛ lɛ́ɛ zo. Un ná gba bǒcyɔ lɛ́ɛ, ɖó hun sinsɛn sín aga e é lɛ ɔ́ sín akwɛ́ wɛ é zé dó xɔ nǔ énɛ́ lɛ́ɛ ná. Énɛ́ ɔ́ wú wɛ è nǎ bɛ́ nǔ énɛ́ lɛ́ɛ dó ba acɔ́ nú vodúnxɔ ɖěvo lɛ́ɛ.” Micée ɖɔ: “Un ná ya gbɛvíhan, bó ná ná alě; un ná nɔ mɛ̌, bó ná zɔn afɔvɔ́. Un ná hó avǔn gbě tɔn ɖɔhun, bó ná ɖo alě ná wɛ gowungo ɖɔhun. Samalíi toxo ɔ́ ná gán ɖo awě e ná xo e ɔ́ mɛ ǎ. Adǎn ɖokpó ɔ́ wɛ ka ɖo te kpɔ́n Judáa. Tódɔnnúmɛ ɔ́ kó ɖo Jeluzalɛ́mu fí e togun ce nɔ kplé ɖe, ɖo toxo ɔ́ sín hɔntogbó lɛ́ɛ nukɔn é. Mi ma dó wɛn énɛ́ ɔ́ Gatinu lɛ́ɛ ó; mi kpan akɔ́n bó má ya avǐ ó. Mi mɛ e ɖo Bɛti-Leafla lɛ́ɛ e mi, mi blí gbo gbɔn kɔ́gúdu mɛ, bó dó ɖe xlɛ́ ɖɔ mi ɖo aluwɛ mɛ. Cafíinu lɛ́ɛ e mi, kɛntɔ́ mitɔn lɛ́ɛ ná kplá mi yi kannumɔgbénu mɛ̌ jɔgbe, bɔ winnyá ná hu mi. Đó adǎn e gbo Bɛti-Esɛ́linu lɛ́ɛ, bɔ yě ɖo alě ná wɛ ɔ́ wútu wɛ, Saanáni lɛ́ɛ sɔ́ glá tɔ́n sín toxo yětɔn mɛ ǎ, ɖó yě mɔ ɖɔ Bɛti-Esɛ́li toxo ɔ́ kún sɔ́ nyí bibɛtɛn ɖé ó. Mawu Mavɔmavɔ sɛ́ awě dó, bɔ é xo Jeluzalɛ́mu toxo ɔ́, bɔ Malɔ́tinu lɛ́ɛ ɖo sísɔ́sísɔ́ wɛ, ɖó ayi yětɔn sɔ́ jɛ ayǐ ǎ. Mi Lakícinu e mi, mi sin sɔ́ mitɔn lɛ́ɛ dó ahwankɛkɛ́ mitɔn lɛ́ɛ wú. Mi gbɛ́ gbe nú Mawu Izlayɛ́li ví lɛ́ɛ ɖɔhun; mi wútu wɛ yě hu hwɛ. Énɛ́ ɔ́ wú ɔ́, mi Judáanu lɛ́ɛ ɔ́, mi ɖó ná nɔ zɔ nú Mɔlɛcɛ́ti-Gatinu lɛ́ɛ; Akizívunu lɛ́ɛ ká ná flú axɔ́sú Izlayɛ́li tɔn lɛ́ɛ. Malecanu e mi, Mawu ná jó mi nú gǎn ɖěvo, bɔ é ná yí to mitɔn, bɔ gǎn nukúnɖéjí Izlayɛ́li tɔn lɛ́ɛ ná hɔn yi hwlá cí Adulámu sín sóxo lɛ́ɛ mɛ. Judáanu e mi, mi sun ɖa mitɔn lɛ́ɛ; mi xwlɛ́ ta mitɔn, ta mitɔn ní cí mlɛ́mlɛ́ aklasúta ɖɔhun; mi ya avǐ dó vǐ mitɔn vívɛ́ná lɛ́ɛ tamɛ, ɖó è na kplá yě yi kannumɔgbénu, bɔ yě ná lín dó mi.” Heelú mɛ e nɔ mlɔ́ ayǐ zǎn mɛ bó nɔ gɔn amlɔ dɔ́, bó nɔ ɖo nǔ nyanya e yě ná wa dó nɔzo yětɔn wú wɛ lɛ́ɛ lin wɛ lɛ́ɛ! Yě mɛ e ayǐ hɔ́n lě tlóló ɔ́, yě nɔ́ wa nǔ e yě lin ɔ́, ɖó yě ɖǒ acɛ tɔn. Mɛ ɖé sín gle jló yě ɔ́, yě nɔ́ yí; mɛɖé sín xwé jló yě ɔ́, yě nɔ́ yí; yě nɔ́ fán asú mɛ lɛ́ɛ, bó nɔ́ klá jɛ xwé yětɔn nu, lobo nɔ yí gǔ e yě ɖu lɛ́ɛ bǐ. Énɛ́ ɔ́ wú wɛ Mawu Mavɔmavɔ ɖɔ: “Un ɖo nǔ nyanya ɖé sín nǔ sɔ́ ɖ'ayǐ nú gbɛtɔ́ mi ɖɔhun lɛ́ɛ wɛ; mi ná gló ǎ. Mi ɖo zɔnlin zun wɛ ɔ́, mi sɔ́ ná nɔ glá awa ǎ, ɖó wǔvɛ́ hwenu wɛ jǎwe.” Hwenu e nǔ énɛ́ ɔ́ ná jɛ ɔ́, è na ji gbɛvíhan élɔ́ nú mi: “Mǐ ɖíe wá jɛ ya mɛ bǐ din e; è yǐ ayǐkúngban mǐtɔn lɛ́ɛ sín mǐ sí. Mɛ e ɖo mǐ nya sín gle mǐtɔn lɛ́ɛ mɛ wɛ lɛ́ɛ nɔ́ má gle lɛ́ɛ ɖo yěɖée tɛ́ntin. Étɛ́wú è ka ɖo ajo ja dó mǐ wɛ? Énɛ́ ɔ́ wú wɛ hwenu e togun Mawu Mavɔmavɔ tɔn ná lɛ́ má ayǐkúngban lɛ́ɛ ɔ́, mi mɛ ɖěbǔ ná mɔ ɖě yí ǎ.” Mɛ ɖé lɛ́ɛ nɔ ɖɔ nú mì ɖɔ: “Gbɔ xógbló énɛ́ ɔ́ ɖɔ! Mawu Mavɔmavɔ dó nu togun tɔn wɛ a? É nɔ yá wǔ sin xomɛ wɛ a? É nɔ kó wa nǔ gbɔn mɔ̌ ɖ'ayǐ wɛ a? Amɔ̌, nyɛ ɔ́, mɛ e ɖo nǔ jlɔ́jlɔ́ wa wɛ lɛ́ɛ kɛ́ɖɛ́ wɛ un ná ɖɔ xó ɖagbe ná.” Mawu yí gbe bó ɖɔ: “Mi húzú kɛntɔ́ togun ce tɔn. Mɛ ce lɛ́ɛ yi fun ahwan bó lɛ́ kɔ wá kpó jiɖiɖe kpó ɔ́, mi nɔ yí awu ɖaxó yětɔn dó axɔ́ e yě ɖu dó mi ɔ́ nu. Nyɔ̌nu e ɖo togun ce mɛ lɛ́ɛ ɔ́, mi nɔ nya yě sín xwé yětɔn e yě yí wǎn ná lɛ́ɛ gbe, bó nɔ ɖe wi e un ɖó ta nú vǐ yětɔn lɛ́ɛ ɔ́ síin, bɔ é ná nɔ mɔ̌ káká sɔ́yi. Mi sí te bo yi, ɖó vivo sɔ́ tíin nú mi ɖo fí ǎ. Gbejímánɔ mitɔn lɛ́ɛ zɔ́n, bɔ wǔvɛ́ ɖaxó ɖo te kpɔ́n mi.” Ényí mɛɖé wá xwetɔ́n, bó ɖo xó ɖɔ dó jɔhɔn mɛ wɛ, bó ɖó adingban nú mi ɖɔ vɛ̌ɛn kpó ahan syɛ́nsyɛ́n kpó ná sa ɖo to élɔ́ mɛ ɔ́, xówlíɖɔtɔ́ mɔ̌hunkɔtɔn wɛ jɛ xá togun élɔ́. Lo ɔ́, Mawu ɖɔ: “Un ná kplé mi Izlayɛ́li ví e kpo ɖo gbɛ lɛ́ɛ bǐ; un ná kplé mi ɖó kpɔ́, lě e è nɔ kplé gbɔ̌ dó wutó mɛ é ɖɔhun; lě e gbɔ̌hwan nɔ ɖo amagbo mɛ ɔ́ ɖɔhun. Gbɛtɔ́ ná lɛ́ gɔ́ to mitɔn mɛ, bɔ è na nɔ se hlǔnhlún mitɔn. Mɛ e nɔ hun ali nú mɛ ɔ́ wɛ ɖo nukɔn mitɔn; mi jɛ miɖée sí. Mi ná gba to e mɛ mi ɖe ɔ́ sín hɔntogbó bó tɔ́n; Mawu Mavɔmavɔ axɔ́sú mitɔn ɔ́ wɛ ɖo nukɔn nú mi.” Izlayɛ́li mɛxó hwɛɖɔtɔ́ lɛ́ɛ e mi, mi ɖɔ xó ná wɛ un ɖe; azɔ̌ mitɔn wɛ nyí ɖɔ mi ní tunwun nǔ e nyí nǔ jlɔ́jlɔ́ ɔ́ ǎ cé? Mi ka gbɛ́ wǎn nú ɖagbewiwa, bó yí wǎn nú nǔ nyanya wiwa. Mi nɔ kɔ́n anyǔ sín mɛ ce lɛ́ɛ wú, bó nɔ ɖe lan e ɖo xú yětɔn wú lɛ́ɛ síin. Yě nɔ́ ɖu togun ce sín lan; yě nɔ́ kɔ́n anyǔ yětɔn bó nɔ gba xú yětɔn lɛ́ɛ. Yě nɔ́ já lan yětɔn ɖi nǎ ɖa wɛ è ɖe ɖɔhun. Énɛ́ ɔ́ wú wɛ hwenu e mi ná sú xó ylɔ́ Mawu Mavɔmavɔ ɖɔ ní wá gɔ́ alɔ nú émí ɔ́, Mawu Mavɔmavɔ ná kɛ nu d'é mɛ nú mi ǎ; lo ɔ́, é ná ɖe kɔ sín mi wú, ɖó nǔ nyanya e mi wa ɔ́ wú. Gbeyíɖɔ Mawu tɔn e nɔ flú togun Mawu tɔn lɛ́ɛ ɔ́, nǔ e ɖɔ nú yě wɛ Mawu Mavɔmavɔ ɖe ɔ́ ɖíe: Ényí mɛɖé ná yě akwɛ́ ganjí ɔ́, yě nɔ́ ɖɔ nú mɛ ɔ́ ɖɔ nǔ tɔn bǐ nyɔ̌; lo ɔ́, yě nɔ́ tɔ́n ahwan mɛ e ma nɔ dó nǔɖé nu nú yě ǎ lɛ́ɛ. Din ɔ́, gbeyíɖɔ Mawu tɔn lɛ́ɛ e mi: “Zǎn ná kú dó mi; mi sɔ́ ná nɔ mɔ nǔɖé ǎ; mi ká sɔ́ ná nɔ mɔ nǔ e ɖo na jɛ wɛ ɔ́ ɖě bo ɖɔ ǎ. Zǐnflú ná vun blá mi lě e hwe nɔ yi xɔ, bɔ zǎn nɔ kú é ɖɔhun; mi sɔ́ ná nɔ mɔ nukúnnú ɖěbǔ ǎ.” Mɛ e nɔ ɖɔ nǔ e ná wá jɛ lɛ́ɛ bǐ ná ɖu winnyá, bó cyɔ́n alɔ nukún mɛ, ɖó Mawu sɔ́ ná nɔ yí gbe nú yě ǎ. Amɔ̌, nyɛ ɔ́, Mawu Mavɔmavɔ ná hlɔ̌nhlɔ́n tɔn mì; é ná Yɛ tɔn mì; é ná mì nǔjlɔ́jlɔ́wiwa, bó ná mì, bɔ un ná dó sixú ɖe gbejímánɔ kpódó gǔfínfɔ́n Izlayɛ́li ví lɛ́ɛ tɔn kpó gba. Izlayɛ́li mɛxó hwɛɖɔtɔ́ lɛ́ɛ e mi, mi ɖɔ xó ná wɛ un ɖe. Mi gbɛ́ wǎn nú nǔ ɖagbe wiwa, bó nɔ gba sɛ́n. Mi zé mɛhuhukwɛ́, kpódó mɛtáfúkwɛ́ e mi nɔ mɔ lɛ́ɛ kpó dó ɖo Jeluzalɛ́mu Mawu sín toxo ɔ́ gba wɛ. Hwɛɖɔtɔ́ lɛ́ɛ ɔ́, mɛ e dó nǔ nu nú yě ɔ́ sín hwɛ wɛ nɔ jɔ. Vɔ̌sánú-xwlémawutɔ́ lɛ́ɛ nɔ yí akwɛ́ ɖo mɛ sí, cóbó nɔ kplɔ́n Mawusɛ́n lɛ́ɛ mɛ. Gbeyíɖɔ Mawu tɔn lɛ́ɛ nɔ yí akwɛ́ ɖo mɛ sí cóbó nɔ dó Mawu sín wɛn mɛ. Nǔ ɖo mɔ̌ bɔ yě bǐ ká nɔ glá bó nɔ ɖɔ Mawu Mavɔmavɔ tɔn wɛ émí nyí, ɖɔ Mawu Mavɔmavɔ ɖo kpɔ́ xá émí, ɖɔ nǔ nyanya ɖěbǔ kún ná wa émí ó. Đó midɛɛ lɛ́ɛ wú ɔ́, Sinyɔ́ɔ ná húzú gle e jí è na nɔ dó nǔ ɖe é, Jeluzalɛ́mu ná húzú zunkɔ́ta; lo ɔ́, fí e Sinsɛnxɔ Mawu tɔn e ɖo só jí ɔ́ ɖe ɔ́ bǐ ná húzú zungbó ɖó mi wú. Ayǐ ɖé ná wá hɔ́n, bɔ só e jí sinsɛnxɔ ɔ́ ɖe ɔ́ ná yi jǐ hú só lɛ́ɛ bǐ, é ná hú ga só kpɛví kpɛví lɛ́ɛ bǐ, bɔ togun lɛ́ɛ ná nyi ahwan wá asá tɔn mɛ. Akɔta lɛ́ɛ ná nyi ahwan yi dɔ̌n, bó ná nɔ ɖɔ: “Mi wá nú mǐ ní yi xá Mawu Mavɔmavɔ só ɔ́ jí. Mi wá mǐ yi Mawu Jakɔ́bu tɔn sín xwé gbe, bónú é ná kplɔ́n nǔ e é jló ɖɔ mǐ ní wa lɛ́ɛ mǐ, bɔ mǐ na gbɔn ali tɔn lɛ́ɛ jí.” Đó Sinyɔ́ɔ wɛ Mawu Mavɔmavɔ sín nǔkplɔ́nmɛ nɔ gosín; Jeluzalɛ́mu wɛ xó tɔn nɔ gosín wá nú mǐ. Mawu Mavɔmavɔ ná nyí hwɛɖɔtɔ́ nú togun gěgé. É ná ɖɔ hwɛ gbo nú akɔta syɛ́nsyɛ́n lɛ́ɛ, káká yi jɛ akɔta e ɖo zɔga lɛ́ɛ jí. Akɔta ɖě sɔ́ ná tɔ́n ahwan ɖě ǎ; yě ká tlɛ sɔ́ ɖo ahwanfunfun ná kplɔ́n wɛ ǎ. Yě ná sɔ́ hwǐ yětɔn dó tun alǐn ná, bó ná sɔ́ hwǎn yětɔn dó tun gyankpa ná. Mɛ ɖokpó ɖokpó ná vo ɖo vǐwuntín tɔn kpó fígitín tɔn kpó sá, bɔ mɛ ɖěbǔ sɔ́ ná ɖe bó ná gba ayi dó nú yě ǎ. Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́. Togun ɖě lɛ́ɛ ɖokpó ɖokpó nɔ wa nǔ, bó ná nyɔ́ ɖo vodún yětɔn lɛ́ɛ gɔ́n. Amɔ̌, mǐdɛɛ lɛ́ɛ ɔ́, mǐ jló ná wa nǔ bó ná nyɔ́ ɖo Mawu Mavɔmavɔ, Mawu mǐtɔn gɔ́n káká sɔ́yi. Mawu Mavɔmavɔ ɖɔ: “Azǎn ɖé ná wá, bɔ un ná yí afɔkponɔ lɛ́ɛ. Un ná kplé mɛ e è nya ɖ'ayǐ lɛ́ɛ; mɛ e un dó ya ná ɖ'ayǐ lɛ́ɛ. Un ná kplé afɔkponɔ lɛ́ɛ, bónú togun ɔ́ ná lɛ́ fɔ́n. Un ná zé yě mɛ e ɖo gbejí lɛ́ɛ dó bló togun syɛ́nsyɛ́n ɖé, bɔ nyɛ Mawu Mavɔmavɔ ɔ́ ná ɖu axɔ́sú ɖo yě nu, ɖo Sinyɔ́ɔ só ɔ́ jí, sín hwenɛ́nu káká sɔ́yi. Bɔ hwi Jeluzalɛ́mu ɔ́, hwi só e ɖo toxo ɔ́ cɔ́ wɛ mɛ ɖo tocɔ́kpe jí ɖɔhun ɔ́, a nǎ lɛ́ wá mɔ acɛkpikpa towe xóxó ɔ́ yí zaanɖé din; a nǎ lɛ́ húzú axɔ́súɖuto Mawu tɔn sín tota.” Jeluzalɛ́munu lɛ́ɛ mi, étɛ́ sín xó sú wɛ mi ka ɖe din? Axɔ́sú ɖé sɔ́ ɖo mi nu ǎ wɛ a? Mi sɔ́ ɖó ɖɔxátɔ́ ɖé ǎ wú wɛ mi ɖo wǔvɛ́ mɔ wɛ nyɔ̌nu ɖo ajidonu ɖɔhun a? Mi mɔ wǔvɛ́, bó wɛn azɔn nyɔ̌nu ɖo ajidonu ɖɔhun; ɖó din ɔ́, mi ná gosín toxo ɔ́ mɛ, bó yi cí gle lɛ́ɛ mɛ, bó ná lɛ́ yi káká Babilɔ́nu. Mawu Mavɔmavɔ ná hwlɛ́n mi gán, bó ná ɖe mi sín kɛntɔ́ mitɔn lɛ́ɛ sín acɛ mɛ ɖo Babilɔ́nu fínɛ́. Din ɔ́, akɔta gěgé ko sɛ ta kplé dó mi wú, bó nɔ ɖɔ è nǐ kɔ́n wi nú to mitɔn, bónú émí ná mɔ lě e Jeluzalɛ́mu toxo ɔ́ ná gba gbɔn é. Mɛ énɛ́ lɛ́ɛ tunwun linlin Mawu Mavɔmavɔ tɔn ǎ. Yě mɔ nukúnnú jɛ tito tɔn lɛ́ɛ wú ǎ; yě tunwun ɖɔ kplé wɛ é kplé yě ɖó fí ɖokpó ɔ́, bó ná só yě lě e è nɔ kplé jinukún dó kɔ́xota, bó nɔ só ɔ́ ɖɔhun ǎ. Jeluzalɛ́munu lɛ́ɛ e mi, mi sí te bó ná só kɛntɔ́ mitɔn lɛ́ɛ. Un ná ná hlɔ̌nhlɔ́n mi, nyibúsú e ɖó ganzo, bɔ afɔkpa tɔn lɛ́ɛ nyí ganvɔ é ɖɔhun. Mi ná gba togun gěgé hánnyá, bɔ nǔ e mi ná yí sín yě sí lɛ́ɛ kpó dɔkun yětɔn kpó ɔ́, mi ná sɔ́ wá xwlé nyɛ Aklúnɔ e kpa acɛ nú gbɛ ɔ́ bǐ é. Amɔ̌, din ɔ́, mi sɛ miɖée kplé; kɛntɔ́ mǐtɔn lɛ́ɛ ján go dó mǐ, bó zé kpo dó ɖo nukún mɛ gba nú Izlayɛ́li togán ɔ́ wɛ. Mawu Mavɔmavɔ ɖɔ: “Hwɛ Bɛteleyɛ́mu e ɖo Efláta tokpɔnla mɛ ɔ́, toxo kpɛví ɖokpó wɛ a nyǐ ɖo Judáa yíkúngban jí. Amɔ̌, hwi mɛ wɛ mɛ e ná ɖu axɔ́sú ɖo Izlayɛ́li nu nú mì ɔ́ ná tɔ́n sín. Kún e mɛ é jɔ ɖe ɔ́ ko ɖo te sín xóxó hwenu, bó ɖo te káká sɔ́yi.” Énɛ́ ɔ́ wú wɛ Mawu Mavɔmavɔ ná jó togun tɔn dó nú kɛntɔ́ lɛ́ɛ káká jɛ hwenu e nyɔ̌nu e ɖo ajidonu ɔ́ ná ji vǐ dó é. Yě mɛ e ná kpo ɖo gbɛ ɖo kannumɔgbénu lɛ́ɛ ná lɛ́ kɔ wá gɔ́ nú Izlayɛ́li ví e kpo ɖo xwé lɛ́ɛ. Bɔ éyɛ́ axɔ́sú e sín akpá è dǒ é ná wá, bó ná kpa acɛ dó togun ɔ́ nu kpó hlɔ̌nhlɔ́n Mawu Mavɔmavɔ tɔn kpó, kpódó susu Mawu Mavɔmavɔ tɔn kpó, bɔ togun tɔn sín ayi ná jɛ ayǐ; ɖó mɛ e ɖo gbɛ ɔ́ mɛ lɛ́ɛ bǐ ná mɔ lě e é dó agba sɔ é. É wɛ ná hɛn fífá wá. Ényí Asilíinu lɛ́ɛ wá tɔ́n ahwan mǐ, bó byɔ́ axɔ́sú mǐtɔn lɛ́ɛ sín xwé gbe ɔ́, mǐ ná sɛ́ ahwan gěgé dó yě. Ahwanfunfun yětɔn ná zɔ́n bɔ yě ná kpa acɛ nú Asilíi, Nɛmulɔ́di sín to ɔ́. Yě ná hwlɛ́n mǐ gán sín Asilíinu lɛ́ɛ lɔ mɛ, hwenu e yě ná dó asá dogbó mǐtɔn, bó byɔ́ to mǐtɔn mɛ é. Izlayɛ́li ví e kpo ɖo gbɛ ɖo kannumɔgbénu lɛ́ɛ ná ɖo to gěgé tɛ́ntin, bó ná cí ahǔn e Mawu Mavɔmavɔ nɔ sɛ́ dó bɔ é nɔ wa ɖagbe nú gbɛtɔ́ lɛ́ɛ ɔ́ ɖɔhun. É nɔ ɖó nukún gbɛtɔ́ ǎ, é ká ná ɖo gbɛtɔ́ sín acɛ mɛ ǎ. Izlayɛ́li ví e kpo ɖo gbɛ ɖo akɔta gěgé tɛ́ntin lɛ́ɛ ná dó hlɔ̌nhlɔ́n kinnikínní ɖɔhun, ɖo kanlin e ɖo zungbó mɛ lɛ́ɛ tɛ́ntin, abǐ ée ɖo lɛ̌ngbɔ́hwan tɛ́ntin é ɖɔhun. É gbɔn fí ɖěbǔ ɔ́, é nɔ́ wlí nǔ, bó nɔ ɖo vǔnvún ɖu wɛ; mɛ ɖěbǔ ká sixú yí nǔ e é wlí ɔ́ sín así tɔn ǎ. Izlayɛ́li, tɔ́n ahwan kɛntɔ́ towe lɛ́ɛ, bó vúnvún yě bǐ. Mawu Mavɔmavɔ ɖɔ: “Ayǐ ɖé ná wá hɔ́n bɔ un ná vívá sɔ́ mitɔn lɛ́ɛ bǐ sín kún, bó ná sú ahwankɛkɛ́ mitɔn lɛ́ɛ bǐ sín kún dó. Un ná gba toxo e ɖo ayǐkúngban mitɔn jí lɛ́ɛ bǐ, bó hɔ́ ahohó mitɔn lɛ́ɛ nyi ayǐ. Un ná sú bǒ mitɔn lɛ́ɛ dó, nǔkantɔ́ ɖě sɔ́ ná nɔ mi mɛ ǎ. Un ná gba vodún mitɔn lɛ́ɛ kpódó bǒcyɔ e mi kpa lɛ́ɛ kpó, bɔ mi sɔ́ ná nɔ sɛn nǔ e mi ɖésúnɔ sɔ́ alɔ mitɔn dó bló ná lɛ́ɛ ɖě ǎ. Un ná hɔn atín e mi nɔ sɛn lɛ́ɛ nyi gbě, bó ná gba toxo ɖaxó mitɔn lɛ́ɛ. Un ná sin xomɛ dó akɔta e ma nɔ se tónú nú mì ǎ lɛ́ɛ, bó ná dɔn tó nú yě.” Mi ɖótó nǔ e ɖɔ wɛ Mawu Mavɔmavɔ ɖe é: é ɖɔ nú mì ɖɔ má jɛ ahwan émí jí, bó sú xó, bo ɖɔ nǔ e togun ɔ́ wa nyi do n'i lɛ́ɛ, ɖo só kpɛví kpó só ɖaxó kpó nukɔn. Só lɛ́ɛ e mi, mi ɖótó mì; dodó syɛ́nsyɛ́n e jí ayǐkúngban ɔ́ jínjɔ́n ɔ́ lɛ́ɛ e mi, mi ɖótó mì. Mawu Mavɔmavɔ ɖo hwɛ dó togun tɔn wɛ. É ɖo byɔ̌byɔ́ yě wɛ ɖɔ yě ní ɖɔ nǔ e émí wa nyi do nú yě ɔ́ nú émí. Mawu Mavɔmavɔ ɖɔ: “Togun ce, nǔ nyanya tɛ́ wɛ un ka wa dó mi? Étɛ́ mɛ wɛ un nyí agban bó kpɛn mi ɖe? Mi yí gbe nú mì! Un ɖe mi tɔ́n sín Ejípu, bó hwlɛ́n mi sín kannumɔgbénu. Un sɛ́ Mɔyízi, Aalɔ́ɔn kpó Miliamu kpó dó mi, bónú yě ná nɔ nukɔn mitɔn bo xlɛ́ ali mi. Abǐ énɛ́ lɛ́ɛ sín hwɛ dó mì wɛ mi ɖe a? Togun ce, hwenu e Balaki axɔ́sú Mɔwabu tɔn ɔ́ ɖo linlin wɛ ná wa nǔ dó mi ɔ́, xósin e Baláamu Beɔ́ɔ ví ɔ́ ná ɛ ɔ́, mi flín a? Énɛ́ ɔ́ gúdo ɔ́, un kplá mi sín Citímu káká wá Gilugalu, bónú mi ná mɔ ɖagbe e nyɛ Mawu Mavɔmavɔ mitɔn wa nú mi lɛ́ɛ é.” Ényí un wá Mawu Mavɔmavɔ sɛn gbé ɔ́, vɔ̌sánú tɛ́ mɔ̌ un ka ɖó na xwlé Mawu Ajalɔ̌nlɔn ɔ́? Nyibúví e ɖó xwe ɖokpó ɔ́ wɛ un ná nɔ dó sá vɔ̌ kpíkpé n'i a? Mawu Mavɔmavɔ ɔ́, agbo gěgé kpó ami gěgé kpó ba wɛ é ɖe a? Nukɔngbéví mǐtɔn lɛ́ɛ wɛ mǐ ɖó ná zé jó n'i cóbɔ é ná sɔ́ gǔfínfɔ́n mǐtɔn lɛ́ɛ kpódó gbejímánɔ mǐtɔn lɛ́ɛ kpó kɛ mǐ a? Hwi gbɛtɔ́, Mawu xlɛ́ we nǔ e nyɔ́ bɔ a ɖo ná wa é. Étɛ́ wɛ Mawu Mavɔmavɔ jló ɖɔ a nǐ wa? Nǔ e é jló ɖɔ a nǐ wa kpowun ɔ́ wɛ nyí ɖɔ a nǐ nɔ wa nǔ jlɔ́jlɔ́. A nǎ nɔ́ yí wǎn nú nǔwiwa kpó xomɛnyínyɔ́ kpó, bó ná nɔ zán gbɛ ɖo mɛɖée sɔ́ hwe mɛ ɖo Mawu towe nukɔn. Mawu Mavɔmavɔ ɖo xó ɖɔ nú Jeluzalɛ́munu lɛ́ɛ wɛ, bó ná hwlɛ́n mɛ e nɔ sí i lɛ́ɛ. Akɔta e ɖo Judáa tomɛ lɛ́ɛ e mi, mi mɛ e kplé ɖo toxo ɔ́ mɛ lɛ́ɛ e mi, mi ɖótó. Un ná sixú yí gbe bɔ mɛdídá ná kplé nǔ e é xo yí lɛ́ɛ dó xwé gbe wɛ a? Un sixú yí gbe bɔ è na nɔ zé jlɛ̌nú e ma sɔgbe ǎ dó sa nǔ nú mɛ ǎ. Mɛ e nɔ zán nǔdagan e má sɔgbe ǎ lɛ́ɛ, bó nɔ́ zé kilóo e ma sɔgbe ǎ lɛ́ɛ dó glo mɛ lɛ́ɛ ɔ́, un ná gɔn hwɛ ɖó nú yě a? Akwɛ́nɔ e ɖo to ɔ́ mɛ lɛ́ɛ bǐ wɛ nɔ táfú mɛ, bɔ mɛ e ɖo to ɔ́ mɛ lɛ́ɛ bǐ nɔ́ ɖó nǔvú, bó nɔ́ flú mɛ. A hu hwɛ; énɛ́ ɔ́ wú wɛ un ko jɛ tó dɔn nú we jí, bɔ tó e dɔn nú mi wɛ un ɖe ɔ́ ná zɔ́n, bɔ ajɔ̌ mitɔn ná jɛ ayǐ. A nǎ ɖu nǔ, a ka ná gɔ́ xo ǎ, adɔ ná wa nǔ xá we káká ɖó lě do. Nǔ e a sɔ́ ɖó vo ɔ́ ná sixú nɔ ayǐ ǎ. A ká sɔ́ nǔɖé ɖó ayǐ jɛ́n wɛ ɔ́, un ná sɛ́ kɛntɔ́ towe lɛ́ɛ dó, bɔ yě ná tɔ́n ahwan mi, bó hɛn bǐ gblé. A nǎ nɔ dó nǔ, a ka ná nɔ mɔ ya ǎ; a nǎ nɔ li olívu, a ka ná mɔ ami tɔn bó sa ǎ. A nǎ nɔ li vǐwun, a ka ná nɔ mɔ vɛ̌ɛn tɔn nu ǎ. Jujɔ nyanya e axɔ́sú Ɔmúli zán bɔ vǐ tɔn Akábu kpó hɛ̌nnu tɔn kpó zán ɔ́ xwedó wɛ a ɖe. A nɔ se gbe nú yě. Énɛ́ ɔ́ wú wɛ un ná ɖɔ bɔ è nǎ gba to towe, un ná ɖɔ bɔ gbɛtɔ́ lɛ́ɛ ná nɔ ko mi mɛ e ɖ'é mɛ lɛ́ɛ. Mi na ɖu winnyá e togun ce ɖó ná ɖu é. É blá wǔ mɛ nya! Un cí mɛ e xwe atínsínsɛ́n gbɛ gbé, bɔ è ka ko gbɛ bǐ sín atín ɔ́ jí é ɖɔhun. É sɔ́ mɔ vǐwun ɖé ná ɖu ǎ; é ká sɔ́ mɔ fígi vǐví víví e é jló lɛ́ɛ ɖě ná ɖu ǎ. Gbɛtɔ́ e ɖo gbejí nú Mawu ɔ́ ɖě sɔ́ ɖo to ɔ́ mɛ ǎ; ayijlɔ́jlɔ́nɔ ɖě sɔ́ ɖo to ɔ́ mɛ ǎ. Lě e yě ná wa gbɔn bó ná hu mɛ ɔ́ jɛ́n nɔ ɖo ayi mɛ nú yě bǐ, bɔ yě nɔ́ ɖo yěɖée cɔ́ wɛ. Nǔ nyanya wiwa sín gǎn wɛ yě nyǐ. Gǎn lɛ́ɛ kpó hwɛɖɔtɔ́ lɛ́ɛ kpó nɔ byɔ́ ɖɔ émí ná ɖu nǔ ɖo nǔ mɛ dandan. Gbɛtɔ́ nukúnɖéjí lɛ́ɛ ɖo nǔɖé ba wɛ ɔ́, yě nɔ́ ɖɔ gannaganna, bó nɔ́ ba wlɛnwín tɔn ɖó kpɔ́, bó nɔ́ bló. Mɛ e kpɔ́n te ɖo yě mɛ ɔ́ lɛ́ nylá hú gběhan nyanya. Mɛ e ba ná nyí ayijlɔ́jlɔ́nɔ ɖo yě bǐ mɛ ɔ́ báɖá hú kpɔvɛwunkan sín kpá. Tódɔnnúmɛ e sín xó gbeyíɖɔ Mawu tɔn lɛ́ɛ ɖɔ nú mi ɔ́ sín azǎn ɖíe kó sɛ yá e, bɔ mi ko ɖo adohu adohu jí. Nǔ e mɛ e ɖo xwé mitɔn kpá lɛ́ɛ ná ɖɔ ɔ́, mi ma ɖi nǔ ná ó; mi ma ɖeji dó xɔ́ntɔn mitɔn wú ó; mi nyɔ́ xó ɖɔ ɖo asi mitɔn ɖésú gɔ́n. Azǎn énɛ́ lɛ́ɛ gbe ɔ́, súnnuví ná zun tɔ́ tɔ́n; nyɔ̌nuví ná fɔ́n gǔ dó nɔ tɔn jí; vǐsi ná fɔ́n gǔ dó asú tɔn nɔ jí; hɛ̌nnumɔ mɛtɔn lɛ́ɛ ɖésú ná nyí kɛntɔ́ mɛtɔn. Amɔ̌, nyɛ ɔ́, un ná nɔ te kpɔ́n Mawu Mavɔmavɔ ce; un ɖeji dó Mawu wǔ, ɖó é nɔ hwlɛ́n mì gán. Mawu ce ná se ɖɛ ce. Kɛntɔ́ ce lɛ́ɛ mi, mi ma ko mì ó, ɖó un na bo jɛ ayǐ ɔ́, un ná lɛ́ fɔ́n; un na bo ɖo zǐnflú mɛ din ɔ́, Mawu Mavɔmavɔ ná ná wěziza mì, ɖó é wɛ nyí wěziza ce. Đó un hu hwɛ dó Mawu Mavɔmavɔ wútu ɔ́, un ná ɖo didɛ wɛ ɖo xomɛsin tɔn nu káká, bɔ é ná mɔ hwɛjijɔ nú mì. É ná lɛ́ kplá mì wá wěziza nu, bó ná kɔn nyɔ̌ná tɔn lɛ́ɛ dó jǐ ce. Kɛntɔ́ ce lɛ́ɛ ná mɔ nǔ e jɛ nɛ́ ɔ́, bɔ winnyá ná hu yě. Yě mɛ e nɔ kanbyɔ́ mì ɖ'ayǐ ɖɔ: “Fítɛ́ Mawu Mavɔmavɔ, Mawu towe ká ɖe” a jí lɛ́ɛ ɔ́, è nǎ gbídí yě ɖó afɔ wú lě e è nɔ ɖo zɔnlin ɖi wɛ bó nɔ́ gbídí babá ɖó afɔ wú é ɖɔhun, bɔ un ná mɔ kpó nukún ce lɛ́ɛ kpó, bó ná j'awǎ. Jeluzalɛ́munu lɛ́ɛ mi, azǎn ɖé gbe ná su, bɔ un ná vɔ́ to mitɔn sín dǒ lɛ́ɛ mɛ. Gbe énɛ́ ɔ́ gbe ɔ́, Mawu ná bló bɔ ayǐkúngban e jí mi ɖe din ɔ́ ná lɛ́ dó agba d'é jí. Énɛ́ ɔ́, mɛ mitɔn e ɖo gbějí lɛ́ɛ ná lɛ́ kɔ wá xwé. Yě ná gosín Asilíi, bó gosín Ejípu. Yě ná gosín to e ɖo Nilu kpó Efláti tɔ kpá lɛ́ɛ kpó mɛ. Yě ná gosín to e ɖo xutó lɛ́ɛ mɛ, bó gosín to e ɖo sókan mɛ lɛ́ɛ mɛ, bó ná wá xwé. Fí e kpo ɖo ayǐkúngban jí lɛ́ɛ ná húzú gbětótló, ɖó dǎka e mɛ e ɖo to ɔ́ mɛ lɛ́ɛ nɔ xo ɔ́ wú. Mawu Mavɔmavɔ, zě lɛ̌ngbɔ́nyitɔ́ kpogɛ towe dó kplá togun towe ná, ɖó é ɖo zɔ ɖo ayǐkúngban e jí nǔɖé má nɔ nyɔ́ ɖe ǎ é, có ayǐkúngban ɖagbe kɛ́ɖɛ́ wɛ ka lɛ́ lɛ̌ dó e, kplá ɛ yi ayǐkúngban ɖagbe ɖagbe Basáni tɔn kpó Galadi tɔn kpó jí, lě e a ko nɔ wa gbɔn ɖ'ayǐ é. Wa nǔjíwǔ ɖo tɛ́ntin mǐtɔn hwenu e a ɖe mǐ tɔ́n sín Ejípu ɔ́ ɖɔhun. Akɔta ɖěvo lɛ́ɛ ná mɔ nǔ énɛ́ lɛ́ɛ, bɔ winnyá ná hu yě, yě syɛ́n káká có winnyá ná hu yě. Nǔ énɛ́ ná kpácá yě káká bɔ yě ná sixú kɛ nu ǎ, bó ká sɔ́ ná jló ná lɛ́ se xó ɖě ǎ. Yě ná ɖíɖɔ́ kɔ́gúdu ɖi dan kpódó kanlin e nɔ sá gbɔn kɔ́ mɛ lɛ́ɛ kpó ɖɔhun, yě ná ɖo sísɔ́sísɔ́ wɛ, bó ná tɔ́n sín tɛn yětɔn mɛ, bó ná wá hwɛ Mawu Mavɔmavɔ, Mawu mǐtɔn gɔ́n. Yě ná ɖi xɛsi nú we. Mawu Mavɔmavɔ, è sixú jlɛ́ vodún ɖěbǔ dó wǔ towe ǎ. A sɔ́ hwɛ kɛ mɛ e kpo ɖo gbɛ ɖo togun towe mɛ lɛ́ɛ, bó wɔn hwɛ yětɔn lɛ́ɛ. A nɔ sin xomɛ dó mɛ káká sɔ́yi ǎ, ɖó nǔ e nyɔ́ nukún towe mɛ ɔ́ wɛ nyí ɖɔ a nǎ ɖe xomɛnyínyɔ́ towe xlɛ́ mǐ mɛ e nyí togun towe é. A nǎ lɛ́ kú nǔbláwǔ nú mǐ azɔn ɖokpó gɔ́ ná. A nǎ sɔ́ hwɛ mǐtɔn lɛ́ɛ kɛ mǐ, bó ná sɔ́ hwɛ mǐtɔn lɛ́ɛ nyi dó fí e gɔ́ngɔ́n hú fí bǐ ɖo xu mɛ é. A nǎ ɖe wǎn yíyí towe e ma nɔ húzú ǎ é xlɛ́ Ablaxámu ví lɛ́ɛ, bó ná ɖe xlɛ́ Jakɔ́bu ví lɛ́ɛ, lě e a ko dó akpá tɔn nú tɔ́gbó mǐtɔn lɛ́ɛ gbɔn é. Xó e Mawu ɖɔ dó Ninívu toxo ɔ́ wú, bó ɖe xlɛ́ Naxúmu Elikɔcinu ɔ́ bɔ é wlán ɔ́ ɖíe: Mawu Mavɔmavɔ ɔ́, Mawu wɛ é nyí; é nɔ́ ba gbeɖé ɖɔ è nǐ sɛn nǔ ɖěvo zɛ émí ɖokpónɔ wú ǎ. É nɔ ba hlɔn. Mawu Mavɔmavɔ nɔ ba hlɔn; xomɛsin tɔn syɛ́n. Mawu Mavɔmavɔ nɔ ba hlɔn kɛntɔ́ tɔn lɛ́ɛ wú, é nɔ́ wɔn nǔ nyanya e yě nɔ́ wa lɛ́ɛ é ǎ. Mawu Mavɔmavɔ nɔ yá wǔ sin xomɛ ǎ. Hlɔ̌nhlɔ́n tɔn dó agba. É nɔ́ gɔn tó dɔn nú nǔnyanyawatɔ́ lɛ́ɛ ǎ. Mawu Mavɔmavɔ ɖo yiyi wɛ ɔ́, jɔhɔn ɖaxó ɖé mɛ wɛ é nɔ zɔn. É nɔ́ zɔn axásáxásá jɔhɔn mɛ. É ɖo yiyi wɛ ɔ́, afúntúntún e afɔ tɔn nɔ vun é wɛ nyí akpɔ́kpɔ́. É nɔ́ wa adǎn dó xu bɔ é nɔ́ mɛ. É nɔ́ ɖe gbe bɔ tɔ lɛ́ɛ nɔ xú, bɔ gběhan e ɖo Basáni é kpó éé ɖo Kaamɛ́li só ɔ́ jí é kpó bǐ nɔ fyɔ́, bɔ folówa Libáan tɔn lɛ́ɛ nɔ mlú. Só ɖaxó ɖaxó lɛ́ɛ nɔ húnhún ɖo nukɔn tɔn, bɔ só kpɛví kpɛví lɛ́ɛ nɔ sínsín. Ayǐkúngban nɔ dán wǔ ɖo nukɔn tɔn. Gbɛ ɔ́ kpó mɛ e ɖo gbɛ ɔ́ mɛ lɛ́ɛ kpó nɔ́ sísɔ́. Mɛ̌ ká sixú nɔ te ɖo adǎn e jí Mawu Mavɔmavɔ ɖe ɔ́ nukɔn? Mɛ̌ ká sixú gán ɖo xomɛsin tɔn nukɔn? Xomɛsin tɔn nɔ gba kpé myɔ ɖɔhun, bɔ só lɛ́ɛ nɔ gba hánnyá ɖo nukɔn tɔn. Mawu Mavɔmavɔ nyɔ́, bibɛtɛn wɛ é nyí ɖo adǎngbomɛ hwenu. É tunwun mɛ e nɔ sɔ́ yěɖée dó así n'i lɛ́ɛ. Amɔ̌, é ná sɛ́ nǔgbomɛ dó kɛntɔ́ tɔn lɛ́ɛ, bɔ é ná wá gba yě tɔ ɖɔhun, bó ná vívá toxo ɔ́ sín kún, bó ná nya yě káká yi dó zǐnflú mɛ. Étɛ́ gbé blá dó Mawu Mavɔmavɔ wú wɛ mi ɖe? É ná sú kún mitɔn dó; mɛ ɖé nɔ́ fɔ́n gǔ dó jǐ tɔn azɔn we ǎ. Yě hízí wunkan ɖɔhun, yě cí mɛ e nɔ nu ahan mú é ɖɔhun. Yě ná ji kɛn sɛníyɔ ɖɔhun. Ninívu to, hwi gɔ́n wɛ mɛ e nɔ lin nyanya Mawu Mavɔmavɔ tɔn, bó nɔ blá gbě tɔn ɔ́ gosín. Mawu Mavɔmavɔ ɖɔ nú Judáanu lɛ́ɛ ɖɔ: “Lě e kɛntɔ́ mitɔn lɛ́ɛ sukpɔ́ bó syɛ́n sɔ ɔ́ nɛ́, có yě bǐ ká ná kɛn xwe, bɔ é sɔ́ ná kpo mɛɖé ǎ. Un sɔ́ mi hwe káká jɛ din, amɔ̌, un sɔ́ ná sɔ́ mi hwe ɖě ǎ. Din ɔ́, agban e kɛntɔ́ ɖíɖá mi ɔ́, un ná zlɔ́n mi, lobo ná wɛ́n gɛdɛ e è dǒ mi é.” Gbeta e Mawu Mavɔmavɔ ɖe tɔ́n dó mi Ninívunu lɛ́ɛ wú ɔ́ ɖíe: “Mi sɔ́ ná ɖó vǐ ɖě bɔ é ná hɛn nyǐkɔ mitɔn ɖó te ǎ. Un ná ɖe bǒcyɔ e è kpa lɛ́ɛ, kpó ée è kɔn lɛ́ɛ kpó sín vodún mitɔn lɛ́ɛ xwé. Un ná kun yɔdo mitɔn ɖ'ayǐ, ɖó mi nyí nǔɖé ɖo nukɔn ce ǎ.” Judáanu lɛ́ɛ mi, mɛ e ɖo fífá wɛn ɔ́ jlá wɛ ɔ́ ɖíe gosín só jí jǎwe e. Mi ɖu xwe mitɔn e mi nɔ ɖu lɛ́ɛ, mi ɖe akpá e mi dó nú Mawu lɛ́ɛ, ɖó mɛ nyanya ɔ́ sɔ́ ná wá mi gɔ́n ǎ; è ko vívá kún tɔn bǐ gbídígbídí. Ninívunu e mi, nǔhɛngblétɔ́ ɔ́ ɖo gbě mitɔn mɛ. Mi cɔ́ ahohó mitɔn. Mi cɔ́ ali ɔ́. Mi xo ahwanfuntɔ́ mitɔn lɛ́ɛ kplé, bó sɔ́ ahwan nú. Ɖó Mawu Mavɔmavɔ lɛ́ ɖo susu e nyí Jakɔ́bu ví lɛ́ɛ tɔn ɔ́ sɔ́ jó nú yě wɛ, bó lɛ́ ɖo ée nyí Izlayɛ́li ví lɛ́ɛ tɔn ɔ́ sɔ́ jó nú yě wɛ. Mɛvɔtɔ́ lɛ́ɛ ko vɔ yě ɖ'ayǐ, bó ko hɛn vǐwungbo yětɔn bǐ gblé. Ahwanfuntɔ́ syɛ́nsyɛ́n e ɖo kɛntɔ́ ɔ́ sín ahwankpá ɔ́ mɛ lɛ́ɛ hɛn gǎglónú vɔvɔ, sɔ́ja lɛ́ɛ ɖésú ká dó awu vɔvɔ cɛ́cɛ́. Hwenu e yě ɖo gbesisɔ mɛ bo ná fun ahwan ɔ́, ahwankɛkɛ́ lɛ́ɛ nɔ kán zo myɔ ɖɔhun, hwǎn lɛ́ɛ bǐ kó ɖo jǐ. Ahwankɛkɛ́ lɛ́ɛ ɖidó ahwangbénu, bó ɖo hwlɛndó jí bó kpé fí bǐ. A mɔ yě lě ɔ́, a nǎ vɛdó zohwín wɛ sín, bɔ yě ɖo wezun jí jǐkɛwun ɖɔhun. Axɔ́sú Ninívu tɔn ylɔ́ ahwangán tɔn lɛ́ɛ. Yě ká ɖo sa fún wɛ ɖo yiyi wɛ. Mɛ e ka wá tɔ́n ahwan yě lɛ́ɛ ká yá wǔ yí yɛ dó ahohó ɔ́ wú, bó kó ɖo acéjí. È nǎ mɔ nǔɖé kpowun ɔ́, hɔntogbó e nu è nɔ gbɔn yi tɔsisa lɛ́ɛ kɔn ɔ́ jɛ́n hun, bɔ ahohó hɔnmɛ tɔn ɔ́ jɛ mumu jí. Acɔnkwín! È blǒ nú axɔ́si ɔ́ nɛ́! È ɖe e nyi mɛ̌, bó sɔ́ ɛ hɛn yi. Mɛsɛntɔ́ tɔn nyɔ̌nu lɛ́ɛ ɖo jiji sɔ́ wɛ ahwannɛ́ ɖɔhun, bó ɖo akɔ́nta xo wɛ. Ninívu toxo ɔ́, gbɛtɔ́ wɛ gɔ́ ɖ'ayǐ sin gɔ́ gannú ɖɔhun. Yě ɖíe ka ɖo hinhɔn yi wɛ sin ɖo lǔlǔlúlú sín gannú mɛ wɛ ɖɔhun e. È sú xó bó ɖɔ: “Mi nɔ te! Mi nɔ te!” Mɛ ɖěbǔ ká lɛ́ kɔ ǎ. Mi bɛ́ kpatágan! Mi bɛ́ siká! Dɔkun e ɖo to ɔ́ mɛ ɔ́ sixú vɔ gbeɖé ǎ; dɔkun nukúnɖéjí alɔkpa alɔkpa lɛ́ɛ bǐ wɛ ɖo fínɛ́. È vɔ xwé ɔ́; è hɛn nǔ bǐ gblé; è vɔ toxo ɔ́; wǔ kú mɛ bǐ. Mɛ ɖé sɔ́ syɛ́n dɔn ɖo toxo ɔ́ mɛ ǎ, mɛ bǐ nɔ sísɔ́, mɛ bǐ blá wǔ ɖo nukún mɛ. Nɛ̌ wɛ kinnikínní sín nɔtɛn énɛ́ ɔ́ tɔn ká wá nyí gbɔn, bɔ kinnikínní sín nɔtɛn lɛ́ɛ ɖo Ninívu toxo ɔ́ nyí wɛ. Nǔɖutɛn kinnikínníví lɛ́ɛ tɔn énɛ́ ɔ́, fí énɛ́ e kinnikínní asú, kinnikínní asi kpó kinnikínníví kpó nɔ yi cí, bɔ mɛ ɖěbǔ ma nɔ sixú dó tagba nú yě ǎ ɔ́, nɛ̌ wɛ xó tɔn ká wá nyí gbɔn nɛ́? Kinnikínní asú ɔ́ nɔ wlí lan bó nɔ́ vún nú vǐ tɔn lɛ́ɛ; é nɔ́ gbo gbe lan bó nɔ́ ná kinnikínní asi lɛ́ɛ. É nɔ́ wlí lan bo nɔ vún gɔ́ nɔtɛn tɔn. Mawu Mavɔmavɔ Nǔbǐwúkpétɔ́ ɔ́ ɖɔ: “Éɖíe, un ɖo biba we wɛ. Un ná dó ahwankɛkɛ́ towe lɛ́ɛ zo, bɔ bǐ ná ji kɔn afín. Dɔ̌nkpɛvú towe lɛ́ɛ ná cí ahwan. Un ná ɖó ajo e ja wɛ a ɖe ɔ́ te, bɔ è sɔ́ ná se wɛnsagun towe lɛ́ɛ sín gbe gbeɖé ǎ.” Heelú mɛhutɔ́ sín toxo ɔ́; ahizi kpó asúfánmɛ kpó jí wɛ axɔ́súɖuto tɔn jínjɔ́n. È nɔ gɔn ajo ja dó jɛ dɔkun ná ǎ. A ɖo bǎ gbe se wɛ ǎ cé? A ɖo ahwankɛkɛ́fɔ lɛ́ɛ sín zǐngídi se wɛ ǎ cé? A ɖo sɔ́ lɛ́ɛ sín afɔgbe se wɛ ǎ cé? A ɖo ahwankɛkɛ́ lɛ́ɛ sín zǐngídi se wɛ ǎ cé? Sɔ́xátɔ́ lɛ́ɛ tɔ́n ahwan Ninívu toxo ɔ́. Hwǐ lɛ́ɛ ɖo myɔ kán wɛ, bɔ hwǎn lɛ́ɛ ɖo kínkɔ́n wɛ. Gbɛtɔ́ wɔ̌buwɔ́bú ɖé gblé wǔ. Cyɔ ɖo kpɔ́. Mɛ e kú lɛ́ɛ nyí maxamaxa; a jɛ ayǐ ɔ́, mɛkúkú jí jɛ́n a nǎ jɛ. Ninívu toxo agalɛtɔ́ towunɖó ɔ́, nɔ́ sɔ́ ɖɛkpɛ tɔn kpó walɔ tɔn e é nɔ́ dó lú mɛ é kpó dó dɔn mɛ ná. É nɔ́ sɔ́ aga tɔn kpó azě tɔn kpó dó sa togun lɛ́ɛ kpó akɔta lɛ́ɛ kpó. Mawu Mavɔmavɔ Nǔbǐwúkpétɔ́ ɔ́ ɖɔ: “Éɖíe, un ɖo biba we wɛ. Un ná kplɔ́ awu gaga e a dǒ é sín do káká yi nukún mɛ. Un ná xlɛ́ mɛ̌ towe akɔta ɖě lɛ́ɛ, bó ná zé winnyá e a ɖu ɔ́ xlɛ́ axɔ́súɖuto lɛ́ɛ. Un ná dɔn we gbɔn babá mɛ; un ná kɔ́n wi towe, bó ná sɔ́ we dó húzú nǔkpínkpɔ́n. Mɛ e ná mɔ we lɛ́ɛ bǐ wɛ ná nɔ hɔn yi zɔ nú we, bɔ è nǎ ɖɔ: ‘Ninívu toxo ɔ́ gba. Mɛ̌ wɛ nǔ tɔn ká ná blá wǔ ná? Fítɛ́ wɛ un ka ná yi ba gbɔdónúmɛtɔ́ lɛ́ɛ sín wá n'i?’ ” Tɛbu ɔ́ Asilíi xɔ́sú Asúubanipalu yí toxo ɔ́, bó bɛ́ nǔ e ɖo toxo ɔ́ mɛ lɛ́ɛ bǐ, ɖo é kpo xwe nǔwɔntɔn kanɖé ko-nukún-atɔn (663) bɔ è nǎ ji Jezu Klísu. Tɔsisa tɛ́ntin wɛ é ɖe. Sin wɛ lɛ́ lɛ̌ dó, xu wɛ nyí ahohó tɔn, xu wɛ nyí dǒ tɔn. Hwɛ Ninívu ɔ́, a nyɔ̌ hú Tɛbu ɔ́ wɛ a? Etiopíi kpódó Ejípu kpó wɛ nɔ́ dó dɔkun ɖu mavɔ n'i. Putinu lɛ́ɛ kpódó Libíinu lɛ́ɛ kpó wɛ nɔ́ dó alɔ ɛ ahwan hwenu. É ɖo mɔ̌ có, è wlǐ kannumɔ tɔn hɛn yi. È hu vǐ tɔn lɛ́ɛ tɛ́ gbɔn ali jí ali jí. Mɛ e ɖu ɖ'é jí lɛ́ɛ nyi akɔ dó mɛ nukúnɖéjí tɔn lɛ́ɛ bǐ bó má, bó dó wɔlɔ kpinkpɛn togán tɔn lɛ́ɛ. Hwɛ Ninívu toxo ɔ́, wǔvɛ́ ná mú we ahan ɖɔhun, bɔ a nǎ hɔn hwlá. Hwɛ ɖésú ɔ́, a nǎ ba fí e a nǎ hɔn bɛ dó bɔ kɛntɔ́ towe lɛ́ɛ ma ná mɔ we ǎ é. Ahohó towe lɛ́ɛ bǐ cí fígitín e sínsɛ́n tɔn lɛ́ɛ ko myá é ɖɔhun. Ényí è hǔnhún atín ɔ́ lě ɔ́, sínsɛ́n lɛ́ɛ nɔ jɛ mɛ e jló ná ɖu é sín nu mɛ. Lě e ahohó towe lɛ́ɛ ɖe gbɔn ɔ́ nɛ́. Togun towe ɔ́, nyɔ̌nu kɛ́ɖɛ́ wɛ. To towe sín hɔn lɛ́ɛ nɔ́ nɔ yě ɖóɖó bó nɔ́ hun ɖo kɛntɔ́ nukɔn. Hɔnglá towe lɛ́ɛ bǐ ji zo. Mi bló blǐkisúnto mitɔn lɛ́ɛ ɖó. Mi dun sin. Mi byɔ́ kɔ́do mɛ. Mi nya kɔ́. Mi sún blǐki bó bló ahohó mitɔn lɛ́ɛ ɖó, ɖó ahwan e ná tɔ́n mi wɛ è ɖe ɔ́ wú. Mi na bo bló gbɔn ɖěbǔ ɔ́, myɔ ná fyɔ́ mi. Ahwan ná gba mi; é ná ɖu mi lě e wɛn nɔ ɖu gběhan ɔ́ ɖɔhun. Togun mitɔn sukpɔ́ ɖ'ayǐ bó ɖo winnini wɛn ɖɔhun. Ɖ'ayǐ ɔ́, ajɔ̌watɔ́ mitɔn lɛ́ɛ sukpɔ́ hú sunví e ɖo jǐxwé lɛ́ɛ. Yě cí wɛn nyi ahwan wá xweyǐgbe ɖɔhun. Mɛ nukúnɖéjí mitɔn lɛ́ɛ sukpɔ́ wɛn ɖɔhun. Azɔ̌watɔ́ mitɔn lɛ́ɛ cí wɛn wá kɔn nyi kpá jí avivɔ hwenu ɖɔhun. Ényí hwe tɔ́n ɔ́, yě nɔ́ zɔn, bɔ è sɔ́ nɔ tunwun fí e yě zɔn sín é ǎ. Hwi Asilíi xɔ́sú ɔ́, tokpɔngán towe lɛ́ɛ kú. Ahwangán towe lɛ́ɛ dɔ́ amlɔ dɔ̌mányí. Togun towe gba kpé sókan lɛ́ɛ mɛ, bɔ mɛ ɖé ká xo yě kplé ǎ. Amasin ɖé ɖe nú è nǎ dó hu akpa e a xo é ǎ. Wǔ vantankánnyá wɛ a gblě. Mɛ e ná se xó towe lɛ́ɛ bǐ ná kpa wǒóo dó ta nú we. Ɖó nǔ nyanya e a nɔ ɖo sin dó wɛ ɔ́, mɛ̌ wɛ bǎ tɔn ma ká xo ǎ? Xó e Mawu ɖɔ nú gbeyíɖɔ tɔn Xabakúku bo ɖe xlɛ́ ɛ ɔ́ ɖíe. Mawu Mavɔmavɔ, un ɖo ylɔ̌ylɔ́ we wɛ ɖɔ hwi ní wá dó alɔ mì, bɔ a tin dó mì. Káká jɛ hwetɛ́nu a ka ná tin dó mì yi jɛ? Un ná ɖɔ dǎka e xo wɛ yě ɖe ɔ́ nú we, bɔ a nǎ gɔn hwlɛ̌nhwlɛ́n mǐ gán ɖ'é mɛ wɛ a? Étɛ́wú a ka gbɔ bɔ nukún ce ɖo nǔ nyanya mɔ wɛ sɔ mɔ̌? Nɛ̌ awě ná ɖo mɛ xo wɛ mɔ̌, bɔ é ká ná nɔ nyɔ́ kpɔ́n nú we gbɔn? Nɛ̌ ká gbɔn bɔ è nɔ ɖo mɛ táfú wɛ, bó nɔ ɖo dǎka xo lɛ́ lɛ̌ dó mì wɛ mɔ̌? Jlɛ nɔ jɛ ayǐ, bɔ kɛn nɔ wá. Mɛ ɖé sɔ́ nɔ xwedó sɛ́n ǎ, mɛɖé ká sɔ́ nɔ xwedó hwɛjijɔ ǎ. Đó mɛdídá ɖu ɖo hwɛjijɔnɔ jí, bɔ è nɔ ɖo hwɛ agɔ dó wɛ. Mi sɔ́ nukún ɖó te bó ná kpɔ́n nǔ e ná jɛ dó akɔta lɛ́ɛ jí é. Nú mi mɔ ɔ́, é ná kpácá mi bɔ ahwi ná xo mi. Đó un ná dó nǔɖé sin ɖo hwe mitɔn nu, bɔ nú ɖɔ wɛ è wǎ ɖɔ nú mi ɔ́, mi ná ɖi ǎ. Éɖíe: un ná sɛ́ Babilɔ́nunu lɛ́ɛ dó; togun dídá énɛ́ e ɖo adǎn jí ɔ́, un ná sɛ́ ɛ dó bɔ é ná gbɔn gbɛ ɔ́ bǐ mɛ, bó ná klá jɛ ayǐkúngban e ma nyí étɔn ǎ lɛ́ɛ nu. Togun énɛ́ ɔ́ syɛ́n bó dó xɛsi. Đó gǎn e é hú nǔ é wú ɔ́, é ɖésúnɔ wɛ nɔ ɖɔ lě e nǔ ná nɔ bó ná nyɔ́ n'i é. Sɔ́ tɔn lɛ́ɛ yá afɔ hú kpɔ. Yě bí hú hla e ɖo gbadagbé nya wɛ é. Sɔ́xátɔ́ tɔn lɛ́ɛ jǎwe kpódó goyíyí kpó, yě jǎwe sín zɔ. Yě kpɔ́ ja gangan ɖo nǔ ná sá wɛ ɖɔhun. Togun énɛ́ ɔ́ bǐ jǎwe, bó ná vɔ mɛ. Nukún yětɔn nɔ ɖo nǔ e yě mɔ é bǐ wú. Yě wlí ahwankannumɔ lɛ́ɛ kplé kpɔ́ gégé kɔ́gúdu ɖɔhun. Yě nɔ́ ɖɔ slǎmɛ axɔ́sú lɛ́ɛ wú, bɔ gǎn lɛ́ɛ nɔ nyí nǔkiko nú yě. Ahohó lɛ́ɛ ɖɔ nǔɖé nú yě ǎ. Yě nɔ́ kplé kɔ́ bó nɔ xá jí, bó nɔ sixú fán ahohó lɛ́ɛ. Yě nɔ́ dín jɔhɔn ɖaxó ɖé ɖɔhun, bó nɔ́ lɛ́ yi tɔ́n ɖo fí ɖěvo. Hlɔ̌nhlɔ́n yětɔn wɛ nyí mawu e yě nɔ́ sɛn é. Sín xóxó hwenu ɖokpóó ɔ́, hwi wɛ nyí Mawu Mavɔmavɔ, hwi wɛ nyí Mawu ce, Mawu mímɛ́ ce, Mawu Mavɔmavɔ ce. Áo! Mawu Mavɔmavɔ, a ɖǒ togun élɔ́ e nyí kɛntɔ́ mǐtɔn ɔ́ ayǐ, bɔ é ná nɔ ɖɔ hwɛ lě e a ba gbɔn é. Áo! Só ce, a sɔ́ ɛ bɔ é ná nɔ dɔn tó nú mɛ lě e a ba gbɔn é. Nukún towe mɛ́ dín, bɔ nǔ nyanya nɔ nyɔ́ mɔ nú we ǎ, nǔwanyido nɔ nyɔ́ kpɔ́n nú we ǎ. Ée nǔ nyí mɔ̌ ɔ́, aniwú wɛ a ka ná ɖo mɛsaɖutɔ́ lɛ́ɛ kpɔ́n wɛ, bó ná tin? Hwenu e mɛdídá ɔ́ ɖo mɛ e nyí hwɛjijɔnɔ hú i ɔ́ wlí cán wɛ ɔ́, nɛ̌ ká gbɔn bɔ a tin? A nǎ wa nǔ xá gbɛtɔ́ lɛ́ɛ xumɛhweví, abǐ kanlin e nɔ sá gbɔn kɔ́ mɛ, bó má ɖó mɛɖé bɔ é ná xlɛ́ ali yě ǎ lɛ́ɛ ɖɔhun wɛ a? Babilɔ́nunu lɛ́ɛ nɔ wlí mɛ lɛ́ɛ lě e è nɔ zé mlɛ dó wlí hweví é ɖɔhun; yě nɔ́ dɔn yě dó ɖɔ yětɔn mɛ, bó nɔ kplé yě dó aja yětɔn lɛ́ɛ mɛ, bɔ xomɛ nɔ hun yě, bɔ yě nɔ́ j'awǎ. Énɛ́ ɔ́, yě nɔ́ sá vɔ̌ nú ɖɔ yětɔn lɛ́ɛ, bó nɔ dó zǎlínkpɔ́n zo nú aja yětɔn lɛ́ɛ. Đó nǔ énɛ́ lɛ́ɛ wɛ nyí mɔ̌ bɔ yě nɔ́ sixú mɔ nǔ ɖu ganjí, bɔ nǔɖuɖu yětɔn nyí nǔɖuɖu ɖagbe. Énɛ́ ɔ́ wú wɛ yě ná húzú nǔ e ɖo ɖɔ yětɔn mɛ lɛ́ɛ kɔn nyi ayǐ, bó ná nɔ́ ɖo gbe gbo akɔta lɛ́ɛ wɛ ma gbɔjɛ́, ma kú nǔbláwǔ nú yě a? Nyɛ Xabakúku ɔ́, un ná ɖo te ɖo azɔ̌ ce jí, bó ná ɖo wunzɛn zǎncɔ́tɔ́ e ɖo mɛcɔ́tɔ́xɔ mɛ é ɖɔhun, bó ná se nǔ e Mawu Mavɔmavɔ ná ɖɔ nú mì é; nǔ e é ná ɖɔ dó hwɛ e un jɛ n'i ɔ́ wú é. Mawu Mavɔmavɔ yí gbe nú nyɛ Xabakúku ɖɔ: “Wlǎn nǔ e ɖe xlɛ́ we wɛ un ɖe ɔ́, wlǎn dó awǐnnyatɛ jí ní kló, bónú è nǎ sixú mɔ xa ganjí. Đó nǔɖexlɛ́mɛ wɛ é nyí, bɔ è ko ɖó hwenu e é ná jɛ dó é. Hwe ɔ́ nu kó ɖo susu wɛ, bɔ é ká ná gblá ǎ. Nú hwe ɔ́ nu ná bo ɖo lǐnlín wɛ hǔn, nɔ te kpɔ́n, ɖó nǔ e un ɖɔ ɔ́ ná jɛ jɛ́n wɛ. Wlǎn ɖɔ: gbɛtɔ́ ayixanyanyanɔ ɔ́, gbɛ tɔn ɔ́, gblě wɛ é nɔ gblé; lo ɔ́, hwɛjijɔnɔ ɔ́, é nɔ́ nɔ gbɛ gbɔn nǔɖiɖi tɔn gbla mɛ. Dɔkun ɔ́, nǔ nyanya wɛ. Goyítɔ́ nɔ́ vo gbeɖé ǎ. É nɔ kɛ nu gblogblo ɖó te kútomɛ ɖɔhun. Abaɖaxwéjɛsú wɛ n'i; nǔɖé nɔ kpé e ǎ. É nɔ yí to lɛ́ɛ ɖě jɛ ɖě gúdo, bó nɔ́ fɔ bǐ dó acɛ tɔn mɛ. Mɛ lɛ́ɛ bǐ wɛ ná nɔ gbɔ́ aca ta tɔn. É ná nyí slǎmɛ ɖɔ nú, bɔ è nǎ nɔ ɖɔ bɔnyijí xá ɛ.” “Nǔ e mɛ bǐ ná nɔ ɖɔ é ɖíe: yě ná ɖɔ: Heelú mi mɛ e nɔ xo nǔ e má nyí mitɔn ǎ lɛ́ɛ kplé dó jɛ dɔkun lɛ́ɛ é. Heelú mi mɛ e nɔ ɖo axɔ́gban dó dó axɔ́gban jí wɛ lɛ́ɛ é! Káká jɛ hwetɛ́nu wɛ mi nǎ nɔ wa nǔ gbɔn mɔ̌ yi jɛ?” Mɛ e nya akwɛ́ nú mi lɛ́ɛ ná wá ɖo ajijimɛ. Yě ná sí te dó mi jí, bó ná dó xɛsi nú mi. Yě lɔmɔ̌ ná jɛ ajo dó mi. Mi vɔ akɔta gěgé; énɛ́ wútu ɔ́, togun e kpo lɛ́ɛ bǐ ná vɔ mi, ɖó mi kɔn hun kɔn nyi ayǐ; mi xo dǎka gbɔn to ɔ́ mɛ, mi xo dǎka to ɔ́ kpódó mɛ e ɖo to ɔ́ mɛ lɛ́ɛ bǐ kpó wú. Mi mɛ e nɔ xo ahizi dó dó dɔkun nú mɛ mitɔn lɛ́ɛ, bó nɔ mɔ ɖɔ émí kó hú gǎn nǔ bǐ, bɔ nǔ ɖěbǔ kún sɔ́ sixú kpé émí wú ó lɛ́ɛ ɔ́, heelú mi. Togun wɔ̌buwɔ́bú énɛ́ e mi gblé gbɛ dó ná ɔ́, mi ɖésúnɔ wú wɛ mi wa nǔ dǒ. Winnyá sín wun wɛ mi kplá ɖ'ayǐ nú mɛ mitɔn lɛ́ɛ. Đó awǐnnya e è dǒ mɛ dǒ ná lɛ́ɛ ɖésú ná sú xó bó dó hwɛ mi, bɔ atín e è dǒ kɛ́ sɔ́ ná lɛ́ɛ ná yí gbe yětɔn hɛn yi zɔ. Mi mɛ e kɔn kanjɔ kɔn nyi ayǐ dó lí toxo lɛ́ɛ ɔ́, heelú mi. Heelú mi mɛ e lí toxo nyi nǔ nyanya wiwa jí lɛ́ɛ é! Énɛ́ ɔ́ wɛ zɔ́n bɔ akɔta lɛ́ɛ ɖo tagba vɔ́ jɛ wɛ, bɔ azɔ̌ e wa wɛ yě ɖe ɔ́ nyí nǔ yǎyá. Mawu Mavɔmavɔ Nǔbǐwúkpétɔ́ ɔ́, lě e é jló gbɔn ɔ́ nɛ́ ǎ cé? Mɛ e ná tunwun susu Mawu Mavɔmavɔ tɔn ɖo ayǐkúngban jí lɛ́ɛ ná sukpɔ́ sin e ɖo xu mɛ é ɖɔhun. “Mi mɛ e nɔ ná ahan nɔzo mitɔn bɔ é ná nu mú, ɖó mi ná mɔ mɛ̌ tɔn wú lɛ́ɛ ɔ́, heelú mi. Winnyá wɛ mi nǎ ɖu, susu wɛ mi ná xɔ ǎ. Mi lɔmɔ̌ ɔ́, mi nu ahan bó jɛ mɛ̌. Mawu Mavɔmavɔ ná kpé winnyá kɔ́fu e ɖo aɖisí tɔn mɛ é nú mi gǎnnugǎnnu, bɔ winnyá e mi ná ɖu ɔ́ ná hɛn susu e mi xɔ ɔ́ xo kɔ́. Đó dǎka e mi xo Libáan to ɔ́ wú ɔ́ ná húzú kpan nukɔn mi; mi hu kanlin kɔn nyi kpɔ́. Kanlin ná dó xɛsi mi, ɖó mi kɔn hun kɔn nyi ayǐ, mi xo dǎka gbɔn to ɔ́ mɛ, mi xo dǎka to ɔ́ kpó mɛ e ɖo to ɔ́ mɛ lɛ́ɛ bǐ kpó wú. Étɛ́ wa nú wɛ bǒcyɔ ká nyí tawun bɔ è nɔ bló? Gan kpowun wɛ, mɛblɛ́nú wɛ. Étɛ́wú gbɛtɔ́ ká nɔ ɖeji dó nǔmɛsɛn énɛ́ lɛ́ɛ e má nɔ ɖɔ xó ǎ é wú tawun? É ɖésú wɛ ká zé alɔ tɔn dó bló nɛ́. Mi mɛ e nɔ ɖɔ nú kpo énɛ́ ɖɔ é ní sí te lɛ́ɛ, heelú mi! Mi mɛ e nɔ ɖɔ nú awǐnnya ɖɔ é ní fɔ́n sí te lɛ́ɛ heelú mi! Awǐnnya ká nɔ kɛ nu bo nɔ sixú ɖe nǔɖé xlɛ́ mɛ wɛ a? Énɛ́ è bɛ̌ siká kpódó kpatágan kpó dó va nɛ́! Yɛ e nɔ ná gbɛ mɛ ɔ́ ká ɖ'é mɛ ǎ. Lo ɔ́, Mawu Mavɔmavɔ ɔ́, éyɛ́ ɖo sinsɛnxɔ tɔn mímɛ́ ɔ́ mɛ, nǔ e ɖo ayǐkúngban jí lɛ́ɛ bǐ ní nɔ abwɛ̌ ɖo nukɔn tɔn.” Gbeyíɖɔ Mawu tɔn Xabakúku xo ɖɛ. Gbɛvíhan sín hangbe mɛ è nǎ ji dó. É ɖɔ: Mawu Mavɔmavɔ, è ɖɔ nǔ ɖaxó ɖaxó e a wa lɛ́ɛ bɔ un se, bɔ xɛsi jɛ jǐ ce. Mawu Mavɔmavɔ, lɛ̌ wa azɔ̌ towe ɖo xwe e ná wá lɛ́ɛ mɛ. Wa azɔ̌ towe! A na bo ɖo xomɛ sin wɛ hǔn, ɖe nǔbláwǔ kú nú mɛ towe xlɛ́. Mawu gosín Temani ja. Mɛ mímɛ́ ɔ́ gosín Paláni só ɔ́ jí ja. Agbɔ̌n Nǔbǐwúkpíkpé tɔn kpé sɛ́xwé, bɔ susu tɔn gɔ́ ayǐkúngban ɔ́ jí. É nɔ hɔ́n jǐkɛwun ɖɔhun, jǐ nɔ́ kɛwun sín alɔ tɔn mɛ. Alɔ tɔn mɛ wɛ hlɔ̌nhlɔ́n tɔn ɖe. Jɛmɛjí ɖo gǔdo nukɔn nú Mawu Mavɔmavɔ. É gbɔn fí ɖěbǔ dín ɔ́, azɔn wɛ è nɔ bɛ́ ɖo fínɛ́. É nɔ te lě ɔ́, nukún tɔn nɔ kpé ayǐkúngban ɔ́ bǐ jí. É kpɔ́n akɔta lɛ́ɛ lě ɔ́, xɛsi nɔ jɛ yě jí, bɔ yě nɔ́ sísɔ́. Só ɖaxó ɖaxó e ma nɔ gba gbeɖé ǎ lɛ́ɛ nɔ dán wǔ, só kpɛví kpɛví hwexónu tɔn lɛ́ɛ nɔ yi do, bɔ ali swɛ́ɛ́n hwexónu tɔn lɛ́ɛ nɔ hun ɖo nukɔn tɔn. Un mɔ bɔ Kucáni togun ɔ́ ɖo aluwɛ mɛ, bɔ Madiáani ví lɛ́ɛ ɖo adohu adohu jí. Mawu Mavɔmavɔ! Tɔsisa lɛ́ɛ wɛ zɔ́n bɔ a sin xomɛ a? Tɔsisa lɛ́ɛ wɛ dó xomɛsin nú we a? Xu wɛ a sin xomɛ dó a? A byɔ́ akpɔ́kpɔ́ mɛ ahwankɛkɛ́ mɛ wɛ a byɔ́ ɖɔhun, ahwankɛkɛ́ e sɔ́ lɛ́ɛ nɔ dɔn bɔ a nɔ yi ɖu ɖ'é jí é. A ɖo nǔ sɔ́ wɛ bó ná zán da towe. A ɖo nǔ sɔ́ wɛ bó ná da gǎ towe. A blǒ bɔ jǐkɛwun bó zɛ ayǐkúngban ɔ́, bɔ tɔ jɛ sisa jí. Só ɖaxó ɖaxó lɛ́ɛ mɔ ninɔmɛ towe lě ɔ́, yě nɔ́ húnhún, jǐ ɖaxó nɔ ja bɔ ayǐsun nɔ sa hoho. Xu nɔ dó gbe, bɔ aslɔkɛ́ tɔn lɛ́ɛ nɔ xo káká yi jǐxwé. Hwe kpó sun kpó mɔ gǎ towe lɛ́ɛ sín wěziza ɖo jɔhɔn mɛ ɔ́, yě nɔ́ nɔ te. Yě mɔ hwǎn towe ɖo kinkɛn wɛ, bó ɖo nukún gba mɛ wɛ ɔ́, yě nɔ́ nɔ te ɖo fí e yě ɖe é. A nɔ gbɔn ayǐkúngban ɔ́ jí kpódó adǎn kpó. A ɖo xomɛsin jí ɔ́, a nɔ nyínyɛ́ akɔta lɛ́ɛ. A nɔ tɔ́n bó nɔ́ hwlɛ́n togun towe gán, togun towe e a sɔ́ ɔ́ gán. A nɔ hu mɛ e kpa acɛ dó mɛ nyanya lɛ́ɛ nu é. A nɔ sú mɛ e nyí étɔn lɛ́ɛ kún dó bǐ gbídígbídí. Kɛntɔ́ mǐtɔn lɛ́ɛ sín gǎn lɛ́ɛ zɔn jǐ mǐtɔn jɔhɔn ɖaxó ɖé ɖɔhun, bó ná gba mǐ dó. Yě nɔ́ ɖo awǎjijɛ sín xó sú wɛ, ɖi nǔ yě kó ɖo nyɛ gbɛ̌dónánɔ ɔ́ vún ɖu wɛ ɖo nǔglɔ́ ɖɔhun. Gǎn énɛ́ lɛ́ɛ ɔ́, a zě gǎ yě ɖésúnɔ tɔn dó tɔ́n ta nú yě. Hwi kpódó sɔ́ towe lɛ́ɛ kpó gbɔn xu mɛ dín kpó zǐngídi kpó. Un se zǐngídi ɔ́, bɔ wǔ kú mì; ée un se zǐngídi énɛ́ ɔ́, nu ce nɔ sísɔ́, kanmɛ ce gbɔ́jɔ́, bɔ afɔ ce lɛ́ɛ xo dɔjɔ. Un nɔ xwíí, bó ɖo nǔwamɛ sín azǎn ɔ́ nɔ te kpɔ́n wɛ, bó ná yi tɔ́n ahwan togun e wá tɔ́n ahwan mǐ é. “ Fígitín na bo ma sɛ́n ǎ ɔ́, vǐwuntín na bo ma sɛ́n ǎ ɔ́, olívu na bo ma tíin ǎ ɔ́, gle lɛ́ɛ na bo ma ná jinukún ǎ ɔ́, lɛ̌ngbɔ́ lɛ́ɛ ná bo bú sín amagbo mɛ ɔ́, nyibú bǐ na bo vɔ ɖo kpó mɛ ɔ́, nyɛ ná j'awǎ ɖo Mawu Mavɔmavɔ mɛ, un ná j'awǎ ɖo Mawu e nɔ hwlɛ́n mì gán ɔ́ mɛ. Aklúnɔ Mavɔmavɔ wɛ nyí hlɔ̌nhlɔ́n ce. É bló bɔ un nɔ yá afɔ zungbɔ́ ɖɔhun. É nɔ́ bló bɔ un nɔ fán kpó lɛ́ɛ.” Hanjigbɛ́gán ɔ́ sín han wɛ nyí han élɔ́, kanhún wɛ è nǎ nɔ́ xo d'é mɛ. Xó e Mawu Mavɔmavɔ ɖɔ nú Sofoníi hwenu e Amɔ́ni ví Joziyási ɖo axɔ́sú ɖu wɛ ɖo Judáa ɔ́ ɖíe: Sofoníi ɔ́, Kúcí ví wɛ, bɔ Kúcí nyí Gedaliyá ví, bó nyí Amaliya vívú, bó nyí vívú vivu nú Ezekiyási. Mawu Mavɔmavɔ ɖɔ: “Un ná sú nǔ e ɖo gbɛ ɖo ayǐkúngban jí lɛ́ɛ bǐ sín kún dó. Un ná hu gbɛtɔ́ kpó kanlin kpó; un ná hu xɛ lɛ́ɛ bǐ, un ná hu hweví lɛ́ɛ bǐ. Un ná hu adǎkaxotɔ́ lɛ́ɛ bǐ, bó ná sú nǔ baɖabaɖa e yě zě alɔ yětɔn dó bló ná lɛ́ɛ bǐ sín kún dó. Un ná jó mɛ ɖěbǔ dó nyi gbɛ ɖo ayǐkúngban ɔ́ jí ǎ.” Mawu ɖɔ: “Un ná wa nǔ xá Jeluzalɛ́munu lɛ́ɛ kpódó Judáa to ɔ́ bǐ kpó. Un ná ɖe nǔ e kó nyí vodún Baalu sín wǔjɔnú e kpo ɖo fí é bǐ síin. Mɛ ɖěbǔ sɔ́ ná flín mɛ e nɔ sɛn ɛ lɛ́ɛ kpó hunnɔ lɛ́ɛ kpó vɔ́vɔ́ ǎ. Un ná sú mɛ e nɔ xá xɔ ta, bo nɔ sɛn sun kpó hwe kpó lɛ́ɛ sín kún dó. Mɛ e nɔ ɖɔ émí ná nɔ gbejí nú nyɛ Mawu Mavɔmavɔ, bɔ é ká lɛ́ yá ɔ́, yě nɔ́ ɖɔ émí ná nɔ gbejí nú vodún Mɔlɛ́ki lɛ́ɛ ɔ́, un ná sú mɛ énɛ́ lɛ́ɛ bǐ sín kún dó. Un ná sú mɛ e dó gǔdo mì, bó má nɔ ba alɔdó ce ǎ, bó má nɔ ba ná ɖó xó te nú mì ǎ lɛ́ɛ sín kún dó.” Mi nɔ xwíí ɖo Aklúnɔ Mavɔmavɔ nukɔn, ɖó xomɛsinzán Mawu Mavɔmavɔ tɔn kó sɛkpɔ́. Mawu Mavɔmavɔ kó zé nǔ e ná sá vɔ̌ ná wɛ é ɖe ɔ́ ɖó alɔ jí. É kó cyán mɛ e ná ɖu agɔ̌ lɛ́ɛ. Mawu Mavɔmavɔ ɖɔ: “Vɔ̌sísázán gbe su ɔ́, un ná dɔn tó nú gǎn lɛ́ɛ kpó axɔ́sú ví lɛ́ɛ kpó, kpódó mɛ e nɔ xwedó walɔ to ɖěvo tɔn lɛ́ɛ é kpó. Gbe énɛ́ gbe ɔ́, un ná dɔn tó nú mɛ e nɔ lɔ́n gbɔn sinsɛnxɔ yětɔn lɛ́ɛ sín kpekánta ahe lɛ́ɛ ɖɔhun, bó nɔ́ ja ajo bó nɔ́ xo dǎka, dó bɛ́ dɔkun gɔ́ gǎn yětɔn xwé lɛ́ɛ. Gbe énɛ́ gbe ɖo Jeluzalɛ́mu ɔ́, è nǎ se xósúsú ɖaxó ɖé sín Hweví Hɔntogbó ɔ́ kɔn. Gbɛvíhan ná ɖo Slǎ Yɔ̌yɔ́ ɔ́ mɛ, bɔ nǔ baɖabaɖa ɖé ná jɛ gbɔn só lɛ́ɛ jí. Mi mɛ e ɖo Makitɛ́ci slǎ mɛ, ɖo Jeluzalɛ́mu lɛ́ɛ e mi, mi bǐ ní wɛn azɔn, ɖó ajɔ̌tɔ́ lɛ́ɛ bǐ ná kú; è nǎ vívá akwɛ́ɖyɔ́tɔ́ lɛ́ɛ bǐ sín kún. É jɛ hwenɛ́nu ɔ́, un ná zé zogbɛ́n dó kíjé Jeluzalɛ́mu toxo ɔ́ bǐ xéɖéxéɖé. Un ná dó gbɛya nú mɛ ɖěɖě e ɖo cúɖúɖú ahan ɖo go mɛ ɖɔhun, lobo nɔ ɖɔ dó ayi mɛ ɖɔ: ‘Mawu Mavɔmavɔ ma sixú ɖo nǔɖé ná wa wɛ; é sixú wa nǔ ɖagbe ɖé ǎ, é ká sixú wa nǔ nyanya ɖé ǎ’ lɛ́ɛ. Un ná dó gbɛya nú yě mɛ énɛ́ lɛ́ɛ. È nǎ hɛn dɔkun yětɔn bǐ gblé, bó ná gba xwé yětɔn lɛ́ɛ. Yě ná gbá xɔ bó ka ná nɔ mɛ ǎ. Yě ná tun vǐwun, yě ká ná ɖu ǎ.” Xomɛsinzán Mawu Mavɔmavɔ tɔn sɛkpɔ́! Azǎn ɖaxó Mawu Mavɔmavɔ tɔn ɔ́ kó sɛkpɔ́ bǐ kɛ́nnɛ́kɛ́nnɛ́. É ɖo hwlɛndó jí jǎwe. È ko ɖo azǎn ɔ́ sín xɔxɔ se wɛ. Mɛ ɖěɖě e kpan akɔ́n titewungbe lɛ́ɛ lɔ kó ɖo xó sú wɛ ɖɔ: “Mɛ̌ ká ná hwlɛ́n mǐ gán! Mɛ̌ ná hwlɛ́n mǐ gán!” Xomɛsinzán wɛ azǎn énɛ́ ɔ́ ná nyí. Xɛsi kpó wǔkúmɛ kpó sín azǎn wɛ. Mɛ vivɔ kpó nǔhɛngblé kpó sín azǎn wɛ. Zǐnflú kpó ablu gɔngɔn kpó sín azǎn wɛ. Akpɔ́kpɔ́ kpó amǔ kpó sín azǎn wɛ. Gbe énɛ́ gbe ɔ́, sɔ́ja lɛ́ɛ ná kún lanzo, bó ná ɖo acéjí bó ná tɔ́n ahwan toxo e è mɛ ahohó lɛ́ lɛ̌ dó lɛ́ɛ, bó ná tɔ́n ahwan mɛcɔ́tɔ́xɔ lɛ́ɛ. Mawu Mavɔmavɔ ɖɔ: “Un ná dɔn gbɛtɔ́ lɛ́ɛ dó nǔ nyanya mɛ; yě ná dlá avi nukúntíntɔ́nnɔ ɖɔhun, ɖó yě hu hwɛ dó mì. Kanjɔ yětɔn ná kpé fí bǐ kɔ́gúdu ɖɔhun, bɔ cyɔ yětɔn ná nyɔ zunkɔ́ ɖɔhun.” Azǎn e gbe Mawu Mavɔmavɔ ná ɖo xomɛsin jí é ɔ́, kpatágan yětɔn sixú hwlɛ́n yě gán ǎ, siká yětɔn ká sixú hwlɛ́n yě gán ǎ. Wǔhwan Mawu Mavɔmavɔ tɔn ná sɛ́ myɔ ɖɔhun, bó ná dó to ɔ́ bǐ zo, bó ná vívá gbɛtɔ́ e ɖo to ɔ́ mɛ lɛ́ɛ bǐ sín kún; é ná vívá bɔ é ná vɛ́ jlɛ́. Akɔta e ma ɖó winnyá lɛ́ɛ mi, mi nɔ tɛ́nkpɔ́n bó nɔ́ lin tamɛ kpɛɖé vɔ́vɔ́, mi byɔ́ miɖée mɛ. É má nyí mɔ̌ ǎ ɔ́, xomɛsin ɖaxó Mawu Mavɔmavɔ tɔn sín azǎn ɔ́ ná wá su mi dó. Mi byɔ́ miɖée mɛ, é má nyí mɔ̌ ǎ ɔ́, mi ná wá cí nǔywɛ́ ɖɔhun, bɔ jɔhɔn ná fúnfún kpé gbe énɛ́ gbe. Mi yá wǔ, é má nyí mɔ̌ ǎ ɔ́, xomɛsin Mawu Mavɔmavɔ tɔn ná jɛ te. Mi lɛ́ kɔ wá Mawu Mavɔmavɔ gɔ́n, mi mɛ e zé miɖée hwe ɖo to ɔ́ mɛ lɛ́ɛ; mi mɛ e nɔ se tónú nú sɛ́n tɔn lɛ́ɛ mi, mi ba Mawu Mavɔmavɔ mɔ. Mi wa nǔ jlɔ́jlɔ́, mi zé miɖée hwe ɖo Mawu nukɔn. Afɔ nyɔ́ ɔ́, mi sixú gán gbe e gbe xomɛsin Mawu Mavɔmavɔ tɔn ná wá é. Gaza toxo ɔ́ ná jɛ vɔ̌, Acikelɔ́ni toxo ɔ́ ná gba. È nǎ nya mɛ e ɖo Acidɔ́di toxo ɔ́ mɛ lɛ́ɛ kéze ɖéɖé. È nǎ nya mɛ e ɖo Eklɔ́ni toxo ɔ́ mɛ lɛ́ɛ tɔ́n sín to yě ɖésúnɔ tɔn mɛ. Heelú mi mɛ e gosín Kafutɔ́ɔ bó wá cí xutó lɛ́ɛ. Mawu Mavɔmavɔ ɖó hwɛ nú mi bo ɖɔ: “Kanáa, to Filisitɛ́ɛn lɛ́ɛ tɔn, un ná vívá kún nú we; a sɔ́ ná ɖó toví ɖěbǔ ǎ. Ayǐkúngban towe e ɖo xutó lɛ́ɛ ná húzú amagbo nú kanlin lɛ́ɛ. Fínɛ́ wɛ lɛ̌ngbɔ́nyitɔ́ lɛ́ɛ ná nɔ́ kplá kanlin yětɔn lɛ́ɛ yi amagbo mɛ ɖe, bó ná bló kpó nú kanlin yětɔn lɛ́ɛ ɖó fínɛ́.” Ayǐkúngban énɛ́ ɔ́ ná húzú Judáa ví e kpo ɖo gbɛ lɛ́ɛ tɔn, bɔ kanlin yětɔn lɛ́ɛ ná nɔ́ wá ɖu ama ɖo fínɛ́, bɔ gbadanu su ɔ́, yě ná nɔ́ yi dɔ́ xwé gbe, ɖo Acikelɔ́ni. Đó Mawu Mavɔmavɔ, Mawu yětɔn ná jɛ hun dó yě jí, bó ná zé nǔ e ɖo yě gbo wɛ é dó húzú ɖagbe nú yě. Mawu Mavɔmavɔ ɖɔ: “Un se Mɔwabu ví lɛ́ɛ kpó Amumɔ́ɔ ví lɛ́ɛ kpó ɖo togun ce ko wɛ, bó ɖo slǎmɛ ɖɔ wǔ tɔn wɛ. Yě zun togun ce, yě kán ayǐkúngban tɔn dó yětɔn jí.” Énɛ́ ɔ́ wútu wɛ Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn ɔ́ zin alɔ dó akɔ́n bó ɖɔ: “Un ɖɔ bo tɛ afɔ jí ɖɔ Mɔwabu to ɔ́ kpó Amumɔ́ɔ to ɔ́ kpó ná gba Sodɔ́mu kpó Gomɔ́ɔ kpó ɖɔhun. To yětɔn ná húzú gbětótló káká sɔ́yi. Wunkan kpó jɛ kpó kɛ́ɖɛ́ jɛ́n è nǎ nɔ mɔ ɖo fínɛ́. Mɛ e ná kpo ɖo gbɛ ɖo togun ce mɛ lɛ́ɛ ná wá fɔ nǔ yětɔn lɛ́ɛ, bó ná yí to yětɔn.” Lě e Mawu Mavɔmavɔ ná dɔn tó nú yě ɖó jimakplɔ́n gbe yětɔn wú gbɔn ɔ́ nɛ́: yě zun Mawu Mavɔmavɔ Nǔbǐwúkpétɔ́ ɔ́ sín togun bo lɛ́ yí ayǐkúngban tɔn dó yětɔn jí. Mawu Mavɔmavɔ ná ɖó adohu nú yě, ɖó é ná sɔ́ vodún e ɖo ayǐkúngban jí lɛ́ɛ bǐ dó húzú nǔ yǎyá. Énɛ́ ɔ́, akɔta e ɖo fí má yá fí lɛ́ɛ bǐ ná nɔ sɛn ɛ. Akɔta lɛ́ɛ ɖokpó ɖokpó ná nɔ sɛn ɛ ɖo ayǐkúngban yětɔn yětɔn jí. Mawu ɖɔ: “Etiopíinu lɛ́ɛ mi, mi lɔmɔ̌ ɔ́, un ná hu mi ɖo ahwangbénu.” Mawu Mavɔmavɔ ná wa nǔ xá to e ɖo totaligbé lɛ́ɛ lɔmɔ̌; é ná vívá Asilíi to ɔ́ sín kún; é ná bló bɔ tota Ninívu tɔn ɔ́ ná gba bó ná húzú axéko, ayǐkúngban e jí nǔ ɖěbǔ má nɔ wú ɖe ǎ é. Kanlin lɛ́ɛ ná wá sá xwé gbɔn Ninívu toxo ɔ́ bǐ mɛ. Kanlin tɛnmɛ tɛnmɛ lɛ́ɛ bǐ wɛ ná kplé ɖo fínɛ́. Kwlele kpódó ajijá kpó ná ɖo azakpo lɛ́ɛ jí. Xɛ ná nɔ́ ɖo finfan wɛ ɖo flɛtɛ́li lɛ́ɛ nu. È nǎ kó mɔ lě e xwé ɔ́ gba gbɔn ɔ́ sín gbɛnde mɛ. Sɛ́dlu sín xwlɛ e è dǒ ɖó acɔ́ nú xɔ lɛ́ɛ ná é bǐ nǎ sún wá yi. Nǔ e ná wá gbo toxo élɔ́ e nɔ ɖo afɔ tɛ ayǐ wɛ, bó nɔ́ mɔ ɖɔ nǔɖé kún ná jɛ ó, émí kún nyí mɛ ɖé gbɛ́ ó é nɛ́. Yéége! É gba bǐ. É húzú adɔ̌tɛn nú kanlin lɛ́ɛ. Mɛ e ná gbɔn toxo élɔ́ kpá dín lɛ́ɛ bǐ ná sɔ́ alɔ ɖó nu bo sú xó. Heelú Jeluzalɛ́mu toxo, toxo gǔfɔ́ntɔ́, ahizinɔ, acɛ gannaganna kpa nú mɛ tɔ́, heelú Jeluzalɛ́mu. É ɖótó Mawu Mavɔmavɔ sín xó lɛ́ɛ ǎ, é ké ya nú kplɔ́n e é ná ɛ lɛ́ɛ é ǎ. É ɖeji dó Mawu Mavɔmavɔ wú ǎ. É nɔ́ hɔn yi su Mawu tɔn ǎ. Gǎn e ɖo toxo ɔ́ mɛ lɛ́ɛ cí kinnikínní e ɖo adǎn jí é ɖɔhun. Hwɛɖɔtɔ́ e ɖo toxo ɔ́ mɛ lɛ́ɛ cí hla e xovɛ́ sin, bɔ é yi zǎngbé, bɔ adɔ ma lɔn nǔ n'i nú é ɖu nǔɖé kpo nú zǎnzǎn ǎ é ɖɔhun. Gbeyíɖɔ Mawu tɔn e ɖo toxo ɔ́ mɛ lɛ́ɛ nɔ tɛ afɔ ayǐ. Adingbannɔ wɛ yě nyí. Vɔ̌sánú-xwlémawutɔ́ tɔn lɛ́ɛ nɔ ɖó sísí nú nǔ e è zě xwlé Mawu é ǎ; yě nɔ́ gba Mawu sɛ́n. Nǔ ɖo mɔ̌ có, Mawu Mavɔmavɔ ɖo toxo ɔ́ mɛ; é nɔ́ wa nǔ jlɔ́jlɔ́; é nɔ́ wa nǔ nyanya ǎ. Mawu nɔ́ ɖɔ hwɛ xá mɛ ayǐhɔ́ngbe ayǐhɔ́ngbe dó jlɔ̌jlɔ́ jí. É gblá gbeɖé ǎ. É ɖo mɔ̌ bló wɛ có winnyá hú dǎnúwatɔ́ lɛ́ɛ ǎ, yě kpo ɖo dǎka yětɔn xo wɛ. Mawu Mavɔmavɔ ɖɔ: “Un sú akɔta gěgé sín kún, un gba mɛcɔ́tɔ́xɔ lɛ́ɛ. Ali e gbɔn toxo yětɔn lɛ́ɛ mɛ lɛ́ɛ bǐ jɛ vɔ̌. Un gba toxo yětɔn lɛ́ɛ bǐ; gbɛtɔ́ ɖěbǔ sɔ́ nɔ gbɔn toxo lɛ́ɛ mɛ dín ǎ; mɛ ɖěbǔ sɔ́ ɖo toxo lɛ́ɛ mɛ ǎ. Un ɖɔ dó ayi mɛ ɖɔ: ‘Jeluzalɛ́mu, é nyí a ɖǒ sísí nú mì ɔ́, é nyí a sɔ́ kplɔ́n e un ná we lɛ́ɛ ylɔ́ nǔ ɔ́, un ná gba nɔtɛn towe hánnyá ǎ. Un ná kplɔ́n we gbɔn alɔ bǐ mɛ có, nǔ baɖabaɖa wiwa jɛ́n a nɔ hwlɛ́n dó.’ ” Mawu Mavɔmavɔ ɖɔ nú yě ɖɔ: “Din ɔ́, mi bo nɔ te ba kpɔ́n lě e un ná wa nǔ mitɔn gbɔn gbe e gbe un ná wá dó hwɛ mi é. Un ko ɖɔ un ná kplé akɔta lɛ́ɛ kpó axɔ́súɖuto lɛ́ɛ kpó, bó ná ɖe xomɛsin ce xlɛ́ yě. Xomɛsin ɖaxó e jí un ná ɖe ɔ́ ná cí myɔ ɖɔhun, bó ná fyɔ́ to ɔ́ bǐ.” “Énɛ́ ɔ́ gúdo ɔ́, un ná húzú togun lɛ́ɛ; un ná lɛ nu yětɔn wé: Yě ná xo mlá nyɛ Mawu Mavɔmavɔ ɔ́ sín nyǐkɔ; yě ná ɖó gbe kpɔ́ bó ná sɛn mì. Mɛ e nɔ sɛn mì lɛ́ɛ, yě mɛ e un gba dó lɛ́ɛ ɔ́, yě ná hɛn nǔ wá ná mì. Yě sixú gosín tɔsisa Etiopíi tɔn lɛ́ɛ gúdo.” Mawu Mavɔmavɔ ɖɔ: “Togun ce, gbe énɛ́ gbe ɔ́, nǔ nyanya e a wa lɛ́ɛ, hwɛ e a hu dó mì lɛ́ɛ sɔ́ ná nyí winnyá nú we ǎ. Un ná ɖe mɛ e ɖo go yí wɛ lɛ́ɛ sín tɛ́ntin towe, bɔ a sɔ́ ná nɔ́ tɛ afɔ ayǐ ɖě ɖo só mímɛ́ ce jí ǎ. Mɛ e ɖo togun towe mɛ, bó má ɖó nǔɖé ǎ, bó nɔ́ zé yěɖée hwe, bó nɔ́ byɔ́ mì ɖɔ nyi ní nya xɛ ɖo émí jí lɛ́ɛ ɔ́, un ná jó yě dó nyi togun ɔ́ mɛ. Mɛ e ná kpo ɖo gbɛ ɖo Izlayɛ́li lɛ́ɛ sɔ́ ná wa nǔ agɔ ɖě ǎ; yě sɔ́ ná ɖó adingban ɖě ǎ; yě sɔ́ ná zé ɖɛ̌ yětɔn dó blɛ́ mɛ ná ǎ. Yě ná ɖu nǔ, bó ná dɔ́ amlɔ, bɔ mɛ ɖěbǔ ná dó xɛsi nú yě ǎ.” Sinyɔ́ɔnu lɛ́ɛ mi! Mi j'awǎ. Izlayɛ́li ví lɛ́ɛ mi! Mi sú xó bó kɛ awe. Jeluzalɛ́munu lɛ́ɛ mi! Mi hun xomɛ bo j'awǎ. Mawu Mavɔmavɔ ɖe hwɛ e è ɖǒ nú mi é síin. É nya kɛntɔ́ mitɔn lɛ́ɛ dó gbě. Mawu Mavɔmavɔ Izlayɛ́li xɔ́sú ɔ́ ɖo kpɔ́ xá mi, nǔ nyanya sɔ́ ná ɖó adohu nú mi ǎ. Gbe énɛ́ gbe ɔ́, è nǎ ɖɔ nú Jeluzalɛ́mu ɖɔ: “ Sinyɔ́ɔ, ma ɖi xɛsi ó, awakanmɛ ma kú we ó. Mawu Mavɔmavɔ, Mawu towe ɖo kpɔ́ xá we. É dó hlɔ̌nhlɔ́n, bó ná jiɖiɖe we, ɖɔ a nǎ ɖu ɖ'é jí. É ɖo awǎ jɛ wɛ ɖó hwi wútu. Wǎn yíyí tɔn ná gbɛ yɔ̌yɔ́ we. É ɖo xomɛhunhun mɛ ɖó hwi wútu. È nǎ ɖɔ xwe ɖu wɛ é ɖe.” Mawu Mavɔmavɔ ɖɔ: “Un sɔ́ ná sɛ́ nǔ nyanya dó mi ǎ. Un ná ɖe wunkpɛn nú mi. Hwenu e un ná dɔn tó nú mɛ e táfú mi lɛ́ɛ dó ɔ́ ɖíe su e. Un ná klɔ́ akpa nú mɛ mitɔn e gblé wǔ lɛ́ɛ. Un ná kplá mɛ e ɖo kannumɔgbénu lɛ́ɛ wá xwé. Un ná bló bɔ mi ná xɔ susu, bɔ nyǐkɔ mitɔn ná yi jǐ gbɔn fí e mi ɖu winnyá gbɔn ɖo ayǐkúngban jí lɛ́ɛ bǐ. Hwenɛ́nu ɔ́, un ná kplá mi wá xwé, bó ná kplé mi ɖó kpɔ́. Mi ná mɔ lě e un ná húzú gbɛ mitɔn gbɔn é. Un ná ná susu mi, bɔ è nǎ nɔ mlá mi ɖo togun e ɖo ayǐkúngban jí fí lɛ́ɛ bǐ mɛ.” Mawu Mavɔmavɔ wɛ ɖɔ mɔ̌. Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, sun tɔn ayizɛ́ngɔ́ ɔ́ sín azǎn nukɔntɔn ɔ́ gbe ɔ́, Mawu Mavɔmavɔ gbɔn gbeyíɖɔ tɔn Ajée jí, bó ɖɔ xó nú Zolobabɛ́li tokpɔngán Judáa tɔn ɔ́ kpódó vɔ̌sánú-xwlémawutɔ́ Jozuwée kpó. Zolobabɛ́li ɔ́, Calutiyɛ́li ví wɛ, bɔ Jozuwée ká nyí Yexosadaki ví. Bɔ din ɔ́, é nyɔ́ ɖɔ mi ní jó xwé ce dó nyi gbigba mɔ̌, bó yi cí xwé mitɔn e mi va, bo ɖó acɔ́ ná sɔ mɔ̌ lɛ́ɛ gbe a? Nyɛ Mawu Mavɔmavɔ Nǔbǐwúkpétɔ́ ɔ́, má kan nǔ ɖokpó byɔ́ mi. Mi ka nɔ lin tamɛ dó nǔ e ɖo mi gbo wɛ lɛ́ɛ wú a? Mi nɔ dó jinukún gěgé, nǔkún kpɛɖé jɛ́n mi ka nɔ mɔ ya. Mi nɔ ɖu nǔ, mi ka nɔ gɔ́ xo ǎ. Mi nɔ nu sin, kɔ ka nɔ lɛ́ kpo ɖo mi xú wɛ. Mi nɔ cyɔ́n avɔ, é ka nɔ glɔ́n jɔhɔn nú mi ǎ. Azɔ̌watɔ́ nɔ́ yí azɔ̌kwɛ́ tɔn, lobo ka nɔ bɛ́ kɔn dó adɔ̌kpo gbo ɖo yonu mɛ. Nyɛ Mawu Mavɔmavɔ Nǔbǐwúkpétɔ́ ɔ́, un lɛ́ vɔ́ ɖo ɖiɖɔ nú mi wɛ ɖɔ mi ní lin tamɛ dó nǔ e ɖo mi gbo wɛ lɛ́ɛ wú. Mi yi sókan mɛ, bó yi ba atín dó wá gbá xwé ce ná. É ná dó xomɛhunhun nú mì, bɔ è na sɔ́ mì su. Xó e nyɛ Mawu Mavɔmavɔ ɖɔ é nɛ́. Jinukún gěgé ɖó nukún wɛ mi ɖe, mi bo ka kpɔ́n kpɛ e mi ya é! Kpɛ énɛ́ e mi bɛ́ yi xwé gbe ɔ́, un fún funfún dó, bɔ bǐ gba dó. Nyɛ Mawu Mavɔmavɔ Nǔbǐwúkpétɔ́ ɔ́, má lɛ́ kan nǔ ɖokpó byɔ́ mi: Étɛ́wú nǔ ká ɖo mɔ̌ cí wɛ? Nǔ e wú wɛ ɔ́ wɛ nyí ɖɔ xwé ce ɖo gbigba, bɔ mi mɔ bó jó dó, bɔ ɖokpó ɖokpó mitɔn ka ɖo nukún kpé dó étɔn wú wɛ. Énɛ́ ɔ́ wú wɛ jǐ gɔn jija, bɔ nǔ ɖěbǔ wú ǎ. Un ɖɔ bɔ akú ɖó gbɔn to ɔ́ bǐ mɛ: sókan mɛ wɛ a, jinukúngbo mɛ wɛ a, vǐwungbo mɛ wɛ a, olívugbo mɛ wɛ a, gle mɔ̌hun tíin bɔ akú gɔn ɖǐɖó ɖ'é mɛ ǎ. Akú ɖó gbɔn fí bǐ. Gbɛtɔ́ kpó kanlin kpó bǐ wɛ mɔ wǔvɛ́; azɔ̌ e è wa ɔ́ nǔɖé tɔ́n ɖ'é mɛ ǎ.’ ” Zolobabɛ́li, Calutiyɛ́li ví ɔ́ kpó Jozuwée vɔ̌sánú-xwlémawutɔ́ ɖaxó e nyí Yexosadaki ví ɔ́ kpó, kpódó yě mɛ e lɛ́ kɔ sín kannumɔgbénu wá xwé lɛ́ɛ bǐ kpó ylɔ́ xó e Mawu Mavɔmavɔ, Mawu yětɔn ɖɔ nú yě gbɔn Ajée jí ɔ́ ɖɔ nǔjɔnǔ. Lě e Ajée wa azɔ̌ e Mawu Mavɔmavɔ zɔ́n ɛ é gbɔn ɔ́ nɛ́; énɛ́ ɔ́, toví lɛ́ɛ bǐ mɔ nǔ jɛ acɛkpikpa Mawu Mavɔmavɔ tɔn wú. Énɛ́ ɔ́ gúdo ɔ́, mɛsɛ́dó Mawu Mavɔmavɔ tɔn Ajée dó Mawu Mavɔmavɔ sín wɛn élɔ́ yě. É ɖɔ: “Un ná nɔ xá mi, nyɛ Mawu Mavɔmavɔ ɔ́ wɛ dó akpá tɔn nú mi.” Mawu Mavɔmavɔ hun ayi nú Zolobabɛ́li tokpɔngán Judáa tɔn ɔ́, kpó vɔ̌sánú-xwlémawutɔ́ ɖaxó Jozuwée kpó, kpódó mɛ e lɛ́ kɔ sín kannumɔgbénu wá xwé lɛ́ɛ bǐ kpó, bɔ yě jɛ azɔ̌ wú, bó ná gbá Mawu yětɔn, Mawu Mavɔmavɔ Nǔbǐwúkpétɔ́ ɔ́ sín xwé. Yě jɛ azɔ̌ jí xwe énɛ́ ɔ́ xwe, ɖo sun ayizɛ́ngɔ́ ɔ́ sín azǎn ko-nukún-ɛnɛgɔ́ ɔ́ gbe. Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, azǎn ko-nukún-ɖokpógɔ́ ɔ́ e ɖo sun tɛ́nwegɔ́ ɔ́ mɛ ɔ́ gbe ɔ́, Aklúnɔ lɛ́ dó wɛn ɖokpó gbeyíɖɔ tɔn Ajée. É ɖɔ é ní yi ɖɔ nú Zolobabɛ́li tokpɔngán Judáa tɔn Calutiyɛ́li ví ɔ́, kpódó vɔ̌sánú-xwlémawutɔ́ ɖaxó Jozuwée Yexosadaki ví ɔ́ kpó, kpódó mɛ e lɛ́ kɔ sín kannumɔgbénu wá xwé lɛ́ɛ kpó ɖɔ: “Mɛ̌ ká kpo ɖo mi mɛ bo ɖo lě e Mawu Mavɔmavɔ xwé ɔ́ nyɔ́ ɖɛkpɛ gbɔn ɖ'ayǐ ɔ́ flín wɛ? Nɛ̌ mɔ élɔ́ gbɔn wɛ mi ɖe din? Mi mɔ din ɖɔ é kún hwɛ́n nǔɖé ó ǎ cé? Énɛ́ ɔ́ wú wɛ nyɛ Mawu Mavɔmavɔ ɔ́, un ɖo ɖiɖɔ nú mi wɛ ɖɔ: Zolobabɛ́li, kpan akɔ́n. Vɔ̌sánú-xwlémawutɔ́ ɖaxó Jozuwée, hwi lɔ ní kpan akɔ́n. Mi mɛ e lɛ́ kɔ sín kannumɔgbénu wá xwé lɛ́ɛ, mi lɔmɔ̌ mi kpan akɔ́n. Mi jɛ azɔ̌ wú; un ná nɔ kpɔ́ xá mi. Nyɛ Mawu Mavɔmavɔ Nǔbǐwúkpétɔ́ ɔ́ wɛ dó akpá tɔn nú mi. Un ko zin alɔ énɛ́ ɔ́ dó akɔ́n hwenu e mi tɔ́n sín Ejípu é. Un ka na nɔ tɛ́ntin mitɔn. Mi ma ɖi xɛsi ó. Nyɛ Mawu Mavɔmavɔ Nǔbǐwúkpétɔ́ ɔ́, un ɖo ɖiɖɔ wɛ. Zaanɖé din ɔ́, un ná húnhún jǐnukúnsin kpó ayǐkúngban kpó; un ná húnhún agě kpó tɔ kpó. Un ná dán togun ɖě lɛ́ɛ bǐ, bɔ yě ná bɛ́ dɔkun yětɔn lɛ́ɛ wá fí, bɔ un ná bɛ́ bó dó vɔ́ acɔ́ ɖó nú xwé ce, bɔ é ná nyɔ́ ɖɛkpɛ ɖésú; nyɛ wɛ ɖɔ mɔ̌ nú mi. Đó akwɛ́ kpó siká kpó e ɖo gbɛ ɔ́ mɛ ɔ́ bǐ ɔ́, ce wɛ. Énɛ́ ɔ́, xwé yɔ̌yɔ́ ɔ́ ná nyɔ́ ɖɛkpɛ hú xwé nukɔntɔn ɔ́. Tɛn énɛ́ ɔ́ mɛ wɛ un ná ná fífá mi ɖe. Nyɛ Mawu Mavɔmavɔ Nǔbǐwúkpétɔ́ ɔ́ wɛ dó akpá tɔn.” Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, sun tɔn tɛ́nnɛgɔ́ ɔ́ sín azǎn ko-nukún-ɛnɛgɔ́ ɔ́ gbe ɔ́, Mawu Mavɔmavɔ Nǔbǐwúkpétɔ́ ɔ́ lɛ́ ɖɔ xó nú gbeyíɖɔ tɔn Ajée. É ɖɔ n'i ɖɔ: “Yi ɖɔ nú vɔ̌sánú-xwlémawutɔ́ lɛ́ɛ ɖɔ yě ní gbo xó élɔ́. Ényí mɛɖé hɛn lan e è sá vɔ̌ ná ɔ́ gǒ mɛ, bɔ avɔ e ɖo mɛ ɔ́ wú ɔ́ jɛ wɔ̌xúxú, abǐ mǎ, abǐ vɛ̌ɛn, abǐ ami, abǐ nǔɖuɖu alɔkpa ɖěbǔ wú ɔ́, è nǎ sɔ́ nǔɖuɖu énɛ́ ɔ́ ɖó vo nú Mawu wɛ a?” Vɔ̌sánú-xwlémawutɔ́ lɛ́ɛ ɖɔ: “Éeǒ.” Ajée lɛ́ kanbyɔ́ yě ɖɔ: “Din ɔ́, ɖǒ alɔ nǔ kúkú wú, lobo húzú mɛ blíblí, nú mɛ énɛ́ ɔ́ yi ɖó alɔ nǔɖuɖu ɖé wú ɔ́, nǔɖuɖu énɛ́ ɔ́ lɔ ná húzú nǔ blíblí wɛ a?” Vɔ̌sánú-xwlémawutɔ́ lɛ́ɛ yí gbe n'i ɖɔ: “Ɛɛn” Énɛ́ ɔ́ gúdo ɔ́, Ajée ɖɔ nú yě lo ɖɔ: “Éénɛ́! Mi bo ɖótó nǔ e Mawu Mavɔmavɔ ɖɔ é. É ɖɔ: Mɔ̌ wɛ to élɔ́ mɛ nu lɛ́ɛ kpó nǔ e yě sɔ́ alɔ yětɔn dó bló ná lɛ́ɛ cí. Nǔ e yě nɔ́ xwlé mì ɖo vɔ̌sákpe jí lɛ́ɛ bǐ wɛ nyí nǔ blíblí ɖo nukún ce mɛ.” Mawu Mavɔmavɔ lɛ́ ɖɔ nú yě ɖɔ: “Mi zé ayi mitɔn ɖó te ganjí bó ná kpɔ́n nǔ e ná jɛ jijɛ jí sín din lɛ́ɛ. Cóbónú mi na jɛ xwé ɔ́ sín dǒ mɛ jí kpó awǐnnya kpó ɔ́, étɛ́ wɛ nɔ jɛ dó mi jí? Hwenɛ́nu ɔ́, ényí mɛɖé ɖó jinukún gannú ko ɖo kɔ́zún mɛ, bó xwe jlɛ̌jlɛ́ gbé ɔ́, é má nyí wǒ jɛ́n é nɔ́ yi mɔ ǎ cé? Ényí mɛɖé ɖó vɛ̌ɛn lǐtli kanɖé wǒ (50) ɖo balíi mɛ, bó xwe jlɛ̌jlɛ́ gbé ɔ́, é má nyí lǐtli ko jɛ́n é nɔ́ yi mɔ ǎ cé? Un hɛn azɔ̌ e mi wa é bǐ gblé. Un ɖɔ bɔ jinukún lɛ́ɛ bǐ fyɔ́, abǐ nyɔ dó te. Un ɖɔ bɔ kɛ́njí ja. Un wa nǔ énɛ́ lɛ́ɛ bǐ có mi lɛ́ kɔ wá nyɛ Mawu Mavɔmavɔ ɔ́ gɔ́n ǎ. Mi zé ayi mitɔn ɖó te ganjí, bó ná kpɔ́n nǔ e ná jɛ jijɛ jí sín égbé é. Azǎn ko-nukún-ɛnɛgɔ́ ɔ́ e ɖo sun tɛ́nwegɔ́ ɔ́ mɛ é gbe ɖíe mi ɖo xwé ɔ́ sín awǐnnya dó do wɛ e. Mi bo ɖó kɛ́n jí ganjí. Jinukún ɖěbǔ sɔ́ kpo ɖo kɔ́zún mɛ nú mi din a? Vǐwuntín lɛ́ɛ, fígitín lɛ́ɛ, glenáditín lɛ́ɛ, kpódó olívutín lɛ́ɛ kpó ɖěbǔ sɔ́ sɛ́n ǎ. Amɔ̌, bɛ́ sín égbé ɔ́, un ná kɔn nyɔ̌ná ce lɛ́ɛ dó mi jí.” Azǎn ko-nukún-ɛnɛgɔ́ ɔ́ e ɖo sun énɛ́ ɔ́ mɛ ɔ́ gbe ɔ́, Mawu Mavɔmavɔ ɖɔ xó nú Ajée azɔn wegɔ́ ɔ́, bó ɖɔ: “Yi ɖɔ nú Zolobabɛ́li tokpɔngán Judáa tɔn ɔ́ ɖɔ nyɛ Mawu Mavɔmavɔ Nǔbǐwúkpétɔ́ ɔ́ ná húnhún jǐxwé kpó dodomɛ kpó. Un ná flí zinkpo sín axɔ́sú lɛ́ɛ glɔ́, bó ná hu acɛ nú axɔ́súɖuto e ɖo ayǐkúngban jí lɛ́ɛ bǐ. Un ná flí ahwanhún lɛ́ɛ kpó mɛ e ɖo kunkun wɛ lɛ́ɛ kpó nyi kɔ́ mɛ. Sɔ́ lɛ́ɛ ná kú bɔ sɔ́xátɔ́ lɛ́ɛ ná hu yěɖée. Zolobabɛ́li, mɛsɛntɔ́ ce wɛ a nyǐ, amɔ̌, gbe énɛ́ gbe ɔ́, un ná zɔ́n azɔ̌ ɖokpó we. A nǎ nyí mɛvívɛ́ná ɖokpó nú mì, alɔkɛ́ e un nɔ dó ɖó wuntun nǔ ná é ɖɔhun, ɖó hwi wɛ un sɔ́. Nǔ e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.” Hwenu e Daliwúsi ɖo axɔ́sú ɖu wɛ ɖo Pɛ́si ɔ́, xwe tɔn wegɔ́ ɔ́ sín sun tántɔngɔ́ ɔ́ mɛ ɔ́, Mawu Mavɔmavɔ ɖɔ xó nú gbeyíɖɔ tɔn Zakalíi Bɛlɛkya ví, Idóo vívú ɔ́; é ɖɔ n'i ɖɔ: A nǎ ɖɔ nú yě ɖɔ: “Mawu Mavɔmavɔ sin xomɛ dó tɔ́gbó mitɔn lɛ́ɛ bɔ é syɛ́n ɖésú.” “Mawu Mavɔmavɔ Nǔbǐwúkpétɔ́ ɔ́ ɖɔ: ‘Mi lɛ́ kɔ wá gɔ̌n ce, bónú má lɛ́ kɔ wá mi gɔ́n. Mi ma wa nǔ tɔ́gbó mitɔn lɛ́ɛ ɖɔhun ó. Đ'ayǐ xóxó ɔ́, gbeyíɖɔ lɛ́ɛ kó kplɔ́n nǔ yě ɖo nyǐkɔ ce mɛ ɖɔ yě ní lɛ́ kɔ sín gbɛ nyanya e zán wɛ yě ɖe ɔ́ gúdo, bó jó nǔ ma sɔgbe e wa wɛ yě ɖe lɛ́ɛ dó; yě ká jló ná se ǎ; yě se tónú nú mì ǎ. Din ɔ́, tɔ́gbó mitɔn lɛ́ɛ sɔ́ ɖe ǎ; gbeyíɖɔ lɛ́ɛ ká nɔ gbɛ sɔ́ yi ǎ, mi tunwun ganjí. É ká ɖo mɔ̌ có xó ɖěɖě un ɖɔ gbɔn mɛsɛntɔ́ ce gbeyíɖɔ lɛ́ɛ jí é, kpódó nǔ e un zɔ́n yě lɛ́ɛ kpó ɔ́, tɔ́gbó mitɔn lɛ́ɛ wá mɔ nǔ jɛ mɛ, bó húzú ninɔmɛ. Yě wá tunwun ɖɔ lě e un ɖɔ gbɔn ɔ́ wɛ nyi wa nǔ xá émí gbɔn; lě e gbɛ e zán wɛ émí ɖe ɔ́ kpódó nǔ e émí wa lɛ́ɛ kpó byɔ́ gbɔn ɔ́ wɛ nyɛ Mawu Mavɔmavɔ ɔ́ wa nǔ xá émí gbɔn.’ ” Mawu Mavɔmavɔ wɛ ɖɔ mɔ̌. Hwenu e axɔ́sú Daliwúsi ɖo xwe we bló wɛ ɖo zinkpo jí ɔ́, sun tɔn wǒ-ɖokpógɔ́ ɔ́ e è nɔ ylɔ́ ɖɔ “ Cevati ” ɔ́ sín azǎn ko-nukún-ɛnɛgɔ́ (24) ɔ́ gbe ɔ́, Mawu Mavɔmavɔ ɖɔ xó nú gbeyíɖɔ Zakalíi Bɛlɛkya ví, Idóo vívú ɔ́. É ɖɔ n'i ɖɔ: “Zǎn élɔ́ mɛ ɔ́, un mɔ nǔɖé. Un mɔ sɔ́xátɔ́ ɖé, bɔ é ɖo sɔ́ vɔvɔ ɖé jí, bó ɖo atín kpɛví kpɛví ɖé lɛ́ɛ tɛ́ntin, ɖo tɔdo ɖé mɛ. Atín lɛ́ɛ dó ama ɖésú. Sɔ́ ɖěvo lɛ́ɛ ɖo gǔdo tɔn: sɔ́ vɔvɔ, sɔ́ ajavɛ, sɔ́ wěwé. Un kanbyɔ́ mɛ e ɖo sɔ́ ɔ́ jí ɔ́ ɖɔ: ‘Sɛ́mɛɖó ce, étɛ́ nyí wɛ sɔ́ énɛ́ lɛ́ɛ ká ɖe?’ Bɔ wɛnsagun Mawu Mavɔmavɔ tɔn e ɖo xó ɖɔ nú mì wɛ ɔ́ yí gbe ɖɔ: ‘Un ná tínmɛ nú we.’ Wɛnsagun ɔ́ nɔ fí e é ɖe ɖo atín lɛ́ɛ tɛ́ntin ɔ́, bó lɛ́ ɖɔ: ‘Sɔ́ énɛ́ lɛ́ɛ ɔ́, Mawu Mavɔmavɔ wɛ sɛ́ yě dó ɖɔ yě ní gbɔn ayǐkúngban ɔ́ bǐ jí.’ Sɔ́xátɔ́ lɛ́ɛ ɖó gbe nú wɛnsagun Mawu Mavɔmavɔ tɔn ɔ́ ɖɔ: ‘Mǐ gbɔn ayǐkúngban ɔ́ bǐ jí, mǐ mɔ hunnyahunnya ɖo fí ɖěbǔ ǎ, fí bǐ wɛ ɖo tóó.’ Ée yě ɖɔ mɔ̌ ɔ́, wɛnsagun ɔ́ sú xó ɖɔ: ‘Mawu Mavɔmavɔ Nǔbǐwúkpétɔ́! Xwe kanɖé gban (70) ɖíe wɛ a ko ɖo xomɛ sin dó Judáa sín toxo lɛ́ɛ wɛ e; a sin xomɛ dó Jeluzalɛ́mu, bó sin dó toxo ɖě lɛ́ɛ lɔ. Hwetɛ́nu wɛ a ka ná gɔn nǔbláwǔ kú nú yě yi jɛ?’ ” Hwe énɛ́ ɔ́ nu ɔ́, Mawu Mavɔmavɔ wá ɖɔ xó ɖagbe, xó e nɔ dó wǔsyɛ́n lanmɛ nú mɛ ɔ́ nú wɛnsagun ɔ́. Wɛnsagun e ɖo xó ɖɔ xá mì wɛ ɔ́ ná gbe mì ɖɔ nyɛ ní jlá xó élɔ́ ɖo Mawu Mavɔmavɔ Nǔbǐwúkpétɔ́ ɔ́ sín nyǐkɔ mɛ: “Wǎn yíyí ɖaxó ɖé wɛ un ɖó nú Jeluzalɛ́mu Sinyɔ́ɔ só ɔ́. Lo ɔ́, un sin xomɛ ɖaxó ɖé dó akɔta e nɔ gán jɛ yě ɖésúnɔ wú lɛ́ɛ. Nǔgbó ɔ́, un sin xomɛ dó Izlayɛ́li, é ká kó nyí xomɛsin jɔ xomɛsin ɖé ǎ. Akɔta énɛ́ lɛ́ɛ wɛ zɔ́n bɔ é gba. Énɛ́ ɔ́ wú wɛ nyɛ Mawu Mavɔmavɔ, Nǔbǐwúkpétɔ́ ɔ́, ɖo ɖiɖɔ wɛ ɖɔ un ná lɛ́ kɔ wá Jeluzalɛ́mu bó ná ɖe xomɛnyínyɔ́ ce xlɛ́. È nǎ vɔ́ sinsɛnxɔ ce gbá, bó ná vɔ́ toxo ɔ́ ɖó ayǐ.” Énɛ́ ɔ́ gúdo ɔ́, wɛnsagun ɔ́ ɖɔ nú mì ɖɔ nyɛ ní lɛ́ ɖɔ Mawu Mavɔmavɔ, Nǔbǐwúkpétɔ́ ɔ́ ɖɔ: “Toxo ce lɛ́ɛ ná lɛ́ jɛ ganjí; un ná lɛ́ vɔ́ Jeluzalɛ́mu sɔ́, un ná wá gɔ́ alɔ nú Sinyɔ́ɔ.” Un lɛ́ mɔ nǔ ɖěvo: un mɔ lanzo ɛnɛ. Un kanbyɔ́ wɛnsagun e ɖo xó ɖɔ xá mì wɛ ɔ́ ɖɔ: “Étɛ́ nyí wɛ lanzo ɛnɛ lɛ́ɛ ɖe?” Bɔ é yí gbe nú mì ɖɔ: “Lanzo énɛ́ lɛ́ɛ ɔ́, akɔta hlɔ̌nhlɔ́nnɔ e gba Judáanu lɛ́ɛ, Izlayɛ́linu lɛ́ɛ, kpódó Jeluzalɛ́munu lɛ́ɛ kpó dó lɛ́ɛ wɛ.” Énɛ́ ɔ́ gúdo ɔ́, Mawu Mavɔmavɔ xlɛ́ fletuntɔ́ ɛnɛ mì. Bɔ un kanbyɔ́ ɖɔ: “Étɛ́ wa gbé yě wá?” Bɔ é yí gbe nú mì ɖɔ: “Yě wá bó ná dó xɛsi akɔta hlɔ̌nhlɔ́nnɔ e sí te dó Judáanu lɛ́ɛ jí, bó ná gba é. Yě gba Judáanu lɛ́ɛ dó káká bɔ mɛ ɖěbǔ sixú nɔ te nukɔn yětɔn ǎ.” Nǔ ɖěvo e un mɔ ɔ́ ɖíe: Un mɔ nya ɖé, bɔ é hɛn nǔjlɛ́kan alɔnu. Un kanbyɔ́ ɛ ɖɔ: “Fítɛ́ wɛ a xwe?” Bɔ é yí gbe nú mì ɖɔ: “Un xwe Jeluzalɛ́mu, bó ná jlɛ́ ga tɔn kpó gblǒ tɔn kpó.” Đěe é ɖɔ mɔ̌ ɔ́, wɛnsagun e ɖo xó ɖɔ xá mì wɛ ɔ́ ɖidó, bɔ wɛnsagun ɖěvo wá kpé e. Bó ɖɔ n'i ɖɔ: “Kán wezun yi ɖɔ nú dɔ̌nkpɛvú e hɛn kan ɔ́ ɖɔ: È nǎ mɛ dǒ lɛ́ lɛ̌ dó Jeluzalɛ́mu ǎ, ɖó gbɛtɔ́ kpó kanlin kpó e ná nɔ mɛ lɛ́ɛ ná sukpɔ́ ɖésú. Mawu Mavɔmavɔ ɖɔ: ‘Nyɛ ɖésúnɔ ná nyí myɔ bó ná lɛ́ lɛ̌ dó toxo ɔ́ ahohó ɖɔhun, bó ná ɖe susu ce xlɛ́.’ ” Mawu Mavɔmavɔ ɖɔ: “Mi hɔn, mi hɔn sín to e ɖo taligbé ɔ́ mɛ, ɖó un gba mi dó, bɔ mi kpé wɛ̌kɛ́zo ɛnɛ lɛ́ɛ bǐ mɛ. Jeluzalɛ́munu e ɖo kannumɔgbénu ɖo Babilɔ́nu lɛ́ɛ é mi, mi yá wǔ hɔn.” Đó Mawu Mavɔmavɔ Nǔbǐwúkpétɔ́ ɔ́ zɔ́n azɔ̌ ɖokpó mì, bó ɖɔ dó akɔta e vɔ mi lɛ́ɛ wú ɖɔ: “Nú mɛɖé ɖó alɔ mi wú hǔn, nukúnzin ce wú wɛ é ɖó alɔ. Alɔ ce ná jɛ akɔta énɛ́ lɛ́ɛ wú, bɔ yě ná jɛ mɛ e kó nyí kannumɔ yětɔn ɖ'ayǐ lɛ́ɛ sín alɔ mɛ.” Hwe énɛ́ ɔ́ nu ɔ́, mi ná tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó nǔgbó. Mawu Mavɔmavɔ lɛ́ ɖɔ: “Jeluzalɛ́munu e mi, xomɛ ní hun mi, mi sú xó bó j'awǎ, ɖó un ja bó ná nɔ tɛ́ntin mitɔn. Bɛ́ sín hwe énɛ́ ɔ́ nu ɔ́, akɔta wɔ̌buwɔ́bú ɖé ná xwedó nyɛ Mawu Mavɔmavɔ ɔ́, bɔ yě ná húzú togun ce. É ká ɖo mɔ̌ có midɛɛ lɛ́ɛ tɛ́ntin wɛ un ná nɔ.” É nyí nǔ cí mɔ̌ ɔ́, a nǎ tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó nǔgbó. Judáa ná lɛ́ húzú Mawu Mavɔmavɔ tɔn ɖo ayǐkúngban mímɛ́ ɔ́ jí, bɔ Mawu Mavɔmavɔ ná lɛ́ sɔ́ Jeluzalɛ́mu. Hǔn mɛ bǐ ní nɔ abwɛ̌ ɖo Mawu Mavɔmavɔ nukɔn! Đó é ná tɔ́n sín nɔtɛn tɔn. Mawu Mavɔmavɔ ɖe vɔ̌sánú-xwlémawutɔ́ ɖaxó Jozuwée xlɛ́ mì, bɔ é ɖo te ɖo wɛnsagun Mawu Mavɔmavɔ tɔn sín nukɔn; Satáan ka ɖo te ɖo ɖisí tɔn xwé bó ná dó hwɛ ɛ. Wɛnsagun Mawu Mavɔmavɔ tɔn ɔ́ ɖɔ nú Satáan hwɛdómɛtɔ́ ɔ́ ɖɔ: “Mawu Mavɔmavɔ ní sú nu towe dó Satáan! Ɛɛn, éyɛ́ mɛ e sɔ́ Jeluzalɛ́mu ɔ́ ní sú nu towe dó! Jozuwée ɔ́, myɔtín e è ɖe sín myɔ mɛ ɔ́ ɖɔhun wɛ é cí nǔgbó ǎ cé?” Jozuwée ɔ́, awu kwíji kwíji ɖé mɛ wɛ é ɖe, bó ɖo te ɖo wɛnsagun ɔ́ nukɔn. Wɛnsagun ɔ́ ná gbe mɛ e kpódó é kpó zɔn lɛ́ɛ ɖɔ yě ní ɖe awu lɛ́ɛ n'i, bó ká ɖɔ nú Jozuwée ɖɔ: “Un ɖe hwɛ e a hu lɛ́ɛ sín kɔ nú we, bó ná fɔ acɔ́wu dó nú we.” É lɛ́ ná gbe ɖɔ è nǐ zé tablá mímɛ́ xwe n'i. Đěe é ɖɔ mɔ̌ ɔ́, è zě tablá mímɛ́ ɖokpó xwe nú Jozuwée, bó zé awu dó n'i ɖo wɛnsagun ɔ́ nukún mɛ. Énɛ́ ɔ́ gúdo ɔ́, wɛnsagun ɔ́ ɖɔ nú Jozuwée ɖɔ: Akpá e Mawu Mavɔmavɔ Nǔbǐwúkpétɔ́ ɔ́ dó ɔ́ ɖíe: “Nú a nyi sɛ́n ce lɛ́ɛ ɔ́, nú a wa nǔ ɖó tito ce lɛ́ɛ jí ɔ́, a nǎ kpa acɛ dó sinsɛnxɔ ce nu, bó ná kpa acɛ gbɔn kɔ́xo tɔn lɛ́ɛ ta, bɔ un ná zé we dó mɛ e ɖo fí, bó ɖo azɔ̌ wa nú mì wɛ lɛ́ɛ mɛ.” Wɛnsagun ɔ́ ɖɔ: “Hǔn Jozuwée, hwi vɔ̌sánú-xwlémawutɔ́ ɖaxó ɔ́, ɖǒtó: mi hǎgbɛ́ tɔn lɛ́ɛ, mi vɔ̌sánú-xwlémawutɔ́ e nyí hwlɛngán e jǎwe ɔ́ sín xlɛ́ lɛ́ɛ ɔ́, mi lɔmɔ̌ ní ɖótó. Un ná ɖe mɛsɛntɔ́ ce e è nɔ ylɔ́ ɖɔ ‘Kun’ ɔ́ xlɛ́. Un dó awǐnnya ɖé do nyi Jozuwée nukɔn; awǐnnya ɖokpó géé wɛ, bó ká ɖó nukún tɛ́nwe, bɔ yě nɔ́ kɔ́n. Nyɛ ɖésúnɔ ná wlán nǔɖé d'é wú, bó ná ɖe hwɛ e ɖo to élɔ́ hɛn kwíji wɛ lɛ́ɛ síin kéze ɖokpó mɛ. Ɛɛn, un ɖɔ mɔ̌! Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Gbe énɛ́ ɔ́ gbe ɔ́, mi ná ylɔ́ miɖée kplé dó vǐwungbo mitɔn lɛ́ɛ, kpódó fígigbo mitɔn lɛ́ɛ kpó mɛ, bó ná vo bó j'awǎ.” Wɛnsagun e ɖo xó ɖɔ xá mì wɛ ɔ́ lɛ́ wá, bó hun nukún nú ayixa ce mɛ e ɖo amlɔ dɔ́ wɛ bɔ è fɔ́n ɛ ɔ́ ɖɔhun. Bó kanbyɔ́ mì ɖɔ: “Étɛ́ mɔ wɛ a ɖe?” Bɔ un yí gbe n'i ɖɔ: “Un mɔ zogbɛ́nhɛnnú ɖokpó, bɔ é nyí siká kɛ́ɖɛ́. É ɖó nǔ e mɛ è nǎ kɔn ami dó ɔ́ ɖokpó ɖo aga, bó hɛn zogbɛ́n tɛ́nwe, nǔ e mɛ ami nɔ gbɔn byɔ́ zogbɛ́n lɛ́ɛ mɛ ɔ́ tɛ́nwe. Olívutín we ɖo nǔ e mɛ è nɔ kɔn ami dó ɔ́ kpá, ɖokpó ɖo ɖisíxwé, bɔ ɖokpó ɖo amyɔxwé.” Un kanbyɔ́ wɛnsagun e ɖo xó ɖɔ xá mì wɛ ɔ́ ɖɔ: “Étɛ́ nyí wɛ nǔ énɛ́ lɛ́ɛ bǐ ká ɖe Sɛ́mɛɖó ce?” Bɔ é kanbyɔ́ mì ɖɔ: “A tunwun ǎ cé?” Bɔ un ɖɔ: “Éeǒ!” Énɛ́ ɔ́, é lɛ́ yí xó bó tínmɛ nú mì ɖɔ: Wɛnsagun Mawu Mavɔmavɔ tɔn ɔ́ ɖɔ nú mì ɖɔ nyi ní ɖɔ nú Zolobabɛ́li ɖɔ: Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “É nyí zǐngídi wɛ a nǎ nɔ́ dó wa nǔ ǎ, é ká nyí hlɔ̌nhlɔ́n towe ɖésú wɛ a nǎ nɔ́ dó wa nǔ ǎ, lo ɔ́, Yɛ ce sín hlɔ̌nhlɔ́n wɛ a nǎ nɔ dó wa nǔ.” Mawu Mavɔmavɔ lɛ́ ɖɔ: “Só ɖaxó e, étɛ́ wɛ a nyǐ ɖo Zolobabɛ́li nukɔn? É ná gbígbá we bǐ yi do. Hwi mɛ wɛ é ná ɖe awǐnnya tají e ná nɔ sinsɛnxɔ ɔ́ ta ɔ́ sín. È nǎ kpa awǒbóbó, bó ná ɖɔ: ‘É nyɔ́ ɖɛkpɛ mɛ nya! É nyɔ́ ɖɛkpɛ mɛ nya!’ ” Mawu Mavɔmavɔ lɛ́ ɖɔ nú mì ɖɔ: “Zolobabɛ́li wɛ dó sinsɛnxɔ ɔ́ do, bó ká ná gbá yi fó.” Ényí nǔ cí mɔ̌ ɔ́, a nǎ tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó mi gɔ́n nǔgbó. “Zogbɛ́n tɛ́nwe lɛ́ɛ ɔ́, Mawu Mavɔmavɔ sín nukún e ɖo ayǐkúngban ɔ́ bǐ cɔ́ wɛ lɛ́ɛ wɛ.” Đó mɛ e ná ɖɔ slǎmɛ xɔzɔ́ ɔ́ wú, hwenu e è nǎ jɛ azɔ̌ tɔn wú kpɛɖé kpɛɖé ɔ́ ná wá j'awǎ hwenu e Zolobabɛ́li ná gbá xɔ ɔ́ fó é. Un yí xó bó kanbyɔ́ ɛ ɖɔ: “Étɛ́ nyí wɛ olívutín we e ɖo ɖisíxwé kpó amyɔxwé kpó nú zogbɛ́nhɛnnú lɛ́ɛ ká ɖe?” Un lɛ́ kanbyɔ́ ɛ ɖɔ: “Olívutín sín ala we e ɖo sikánú e mɛ ami nɔ gbɔn ɔ́ kpá lɛ́ɛ ɔ́, étɛ́ nyí wɛ yě ká ɖe?” Bɔ é yí gbe nú mì ɖɔ: “A tunwun ǎ cé?” Bɔ un ɖɔ: “Éeǒ! Sɛ́mɛɖó ce.” Bɔ é tínmɛ nú mì ɖɔ: “Mɛ we e Mawu Mavɔmavɔ e kpa acɛ dó ayǐkúngban ɔ́ bǐ nu ɔ́ dó ami ta ná, dó ɖe yě ɖó vo, bɔ yě ná wa azɔ̌ n'i lɛ́ɛ wɛ.” Un lɛ́ mɔ nǔ ɖěvo: un mɔ anyǔwéma mlámlá ɖé, bɔ é ɖo jɔhɔn mɛ, bo ɖo yiyi wɛ. Wɛnsagun Mawu Mavɔmavɔ tɔn ɔ́ kanbyɔ́ mì ɖɔ: “Étɛ́ mɔ wɛ a ɖe?” Bɔ un yí gbe n'i ɖɔ: “Un mɔ anyǔwéma mlámlá ɖé, bɔ é ɖo jɔhɔn mɛ, bó ɖo yiyi wɛ. Ga tɔn nyí mɛ̌tlu wǒ, gblǒ tɔn nyí mɛ̌tlu atɔ́ɔ́n.” Bɔ é ɖɔ nú mì ɖɔ: “Nu e è dǒ to ɔ́ bǐ é sín wěma wɛ. É wlán dó wěma ɔ́ sín akpá ɖé xwé ɖɔ è ná nya ajotɔ́ lɛ́ɛ bǐ sín to ɔ́ mɛ, bó wlán dó akpá ɖě ɔ́ xwé ɖɔ è nǎ nya mɛ e nɔ ɖó adingban bo nɔ xwlé nǔ d'é jí lɛ́ɛ lɔ bǐ sín to ɔ́ mɛ.” Mawu Mavɔmavɔ Nǔbǐwúkpétɔ́ ɔ́ ɖɔ émí ɖésú wɛ ná sɛ́ nudómɛ énɛ́ ɔ́ dó. Nudómɛ énɛ́ ɔ́ ná gba nǔ ɖo ajotɔ́ lɛ́ɛ ɖokpó ɖokpó xwé, bó ná gba ɖo mɛ e nɔ ɖó adingban bo nɔ xwlé nyǐkɔ ce d'é jí lɛ́ɛ ɖokpó ɖokpó xwé. Nudómɛ énɛ́ ɔ́ ná nɔ to ɔ́ mɛ, bó ná hɛn nǔ bǐ gblé. Xɔtín kpódó awǐnnya e è dǒ gbá xɔ lɛ́ɛ ná lɛ́ɛ kpó bǐ wɛ ná hánnyá. Wɛnsagun e ɖo xó ɖɔ nú mì wɛ ɖ'ayǐ ɔ́ wá bó ɖɔ nú mì ɖɔ: “Zě ta bo kpɔ́n! Étɛ́ wɛ tɔ́n sín dɔ̌n ja?” Bɔ un kanbyɔ́ ɛ ɖɔ: “Étɛ́ ká nɛ́?” Bɔ é yí gbe nú mì ɖɔ: “Xasun e mɛ hwɛ e to ɔ́ bǐ hu ɔ́ ɖe ɔ́ wɛ.” Hwe énɛ́ ɔ́ nu ɔ́, nusú e ɖo xasun ɔ́ nu ɔ́ jɛ hunhun jí, bɔ un mɔ nyɔ̌nu ɖé ɖo ayǐjínjɔ́n ɖo xasun ɔ́ mɛ. Nusú ɔ́, sunmí wɛ è dǒ bló ná. Bɔ wɛnsagun ɔ́ ɖɔ nú mì ɖɔ: “Nyɔ̌nu énɛ́ ɔ́, dǎkaxixo sín xlɛ́ nyí wɛ é ɖe.” Ée é ɖɔ mɔ̌ ɔ́, é lɛ́ kpíkpé nyɔ̌nu ɔ́ dó xasun ɔ́ mɛ, bó sú. Un zé ta bo ná mɔ nǔɖé kpowun ɔ́, nyɔ̌nu we ɖé lɛ́ɛ jɛ́n tɔ́n ɖo jɔhɔn mɛ jǎwe, jɔhɔn ɖo yě zé wɛ, bɔ yě ɖo zinzɔn wɛ. Nǔgbó ɔ́, yě ɖǒ awa, bɔ é cí aɖɔwé sín awa ɖɔhun. Yě wá zé xasun ɔ́ hɛn yi jɔhɔn mɛ. Un kanbyɔ́ wɛnsagun ɔ́ ɖɔ fítɛ́ wɛ yě ká zé xasun ɔ́ xwe a jí? Bɔ é yí gbe nú mì ɖɔ: “Yě zé xwe Mɛzopotamíi, bó ná gbá sinsɛnxɔ ɖokpó n'i, bó ná xo kpe ɖokpó bó sɔ́ ɖ'é jí.” Un lɛ́ mɔ nǔ ɖokpó. Un mɔ ahwankɛkɛ́ví ɛnɛ, bɔ yě ɖo tíntɔ́n sín ganvɔsó we tɛ́ntin wɛ. È sin ahwankɛkɛ́ví nukɔntɔn ɔ́ dó sɔ́ vɔvɔ ɖé lɛ́ɛ wú, bó sin wegɔ́ ɔ́ dó sɔ́ wiwi ɖé lɛ́ɛ wú. È sin ahwankɛkɛ́ví atɔngɔ́ ɔ́ dó ahwansɔ́ wěwé ɖé lɛ́ɛ wú, bó sin ɛnɛgɔ́ ɔ́ dó sɔ́ wlanwlan ɖé lɛ́ɛ wú. Bɔ un kanbyɔ́ wɛnsagun e nɔ ɖɔ xó nú mì ɔ́ ɖɔ: “Sɛ́mɛɖó ce, étɛ́ nyí wɛ sɔ́ énɛ́ lɛ́ɛ kpódó ahwankɛkɛ́ví énɛ́ lɛ́ɛ kpó ká ɖe?” Bɔ é yí gbe nú mì ɖɔ: “Wɛ̌kɛ́zo ɛnɛ lɛ́ɛ wɛ. Aklúnɔ e kpa acɛ dó ayǐkúngban ɔ́ bǐ nu ɔ́ gɔ́n wɛ yě nɔ́ nɔ. Gɔ̌n tɔn wɛ yě gosín din.” Ahwankɛkɛ́ví e dɔn wɛ sɔ́ wiwi lɛ́ɛ ɖe ɔ́, totaligbé wɛ yě dɔn ɖidó. Sɔ́ wěwé lɛ́ɛ jɛ gǔdo yětɔn, bɔ wlanwlan lɛ́ɛ ɖidó tofɔligbé. Sɔ́ vɔvɔ lɛ́ɛ dɔn yětɔn bó ɖidó, bó byɔ́ ɖɔ émí ní gbɔn ayǐkúngban ɔ́ bǐ jí, bɔ é ɖɔ nú yě ɖɔ: “Mi bo yi.” Bɔ yě yi gbɔn ayǐkúngban ɔ́ bǐ jí. Énɛ́ ɔ́, é ylɔ́ mì, bó ɖɔ nú mì ɖɔ: “Kpɔ́n! Mɛ e ɖidó totaligbé lɛ́ɛ ɔ́, yě ná dɔn xomɛsin ce dó gbě énɛ́ ɔ́ jí.” Mawu Mavɔmavɔ ɖe gbe nú mì ɖɔ: “Yǐ nǔníná e mɛ e è kplá yi kannumɔgbénu lɛ́ɛ ná, gbɔn Heludayi kpódó Toviya kpó, kpódó Yedaya kpó jí lɛ́ɛ. A nǎ yi Yociya, Sefaníya ví ɔ́ xwé égbé. Xwé énɛ́ ɔ́ gbe wɛ yě jɛ hwenu e yě lɛ́ kɔ sín Babilɔ́nu wá é. A nǎ zé kpatágan kpódó siká kpó, bó ná dó bló ɖuɖéjígbákún ɖokpó ná, bó ná xwe nú vɔ̌sánú-xwlémawutɔ́ ɖaxó Jozuwée Yexosadaki ví ɔ́. A nǎ ɖɔ n'i ɖɔ: Mawu Mavɔmavɔ Nǔbǐwúkpétɔ́ ɔ́ ɖɔ: ‘Gbɛtɔ́ ɖokpó ɖo fí, bɔ è nɔ ylɔ́ ɖɔ Kun.’ Afɔ tɔn lɛ́ɛ glɔ́ wɛ gbɛ ná tɔ́n kun sín; é wɛ ná vɔ́ sinsɛnxɔ ce gbá. Nǔgbó wɛ, é wɛ ná vɔ́ gbá. Axɔ́súwuntun lɛ́ɛ ná nɔ wǔ tɔn, bɔ é ná ɖo axɔ́súzinkpo tɔn jí, bó ná kpa acɛ nú togun ɔ́. Vɔ̌sánú-xwlémawutɔ́ ɖokpó ná ɖo akpá tɔn; yě mɛ we lɛ́ɛ ɖó gbe kpɔ́, bɔ nǔ ná vɔ ɖ'é wú. “Đuɖéjígbákún ɔ́ ná nɔ sinsɛnxɔ ɔ́ mɛ, bɔ è nǎ nɔ́ dó flín Heludayi kpódó Toviya kpó, kpódó Yedaya kpó, kpódó xomɛnyínyɔ́ Sefaníya ví ɔ́ tɔn kpó.” Mɛ ɖé lɛ́ɛ ná gosín zɔ wá, bó ná dó alɔ mɛ e ɖo sinsɛnxɔ Mawu Mavɔmavɔ tɔn vɔ́ gbá wɛ lɛ́ɛ. Hwe énɛ́ ɔ́ nu ɔ́, mi ná tunwun ɖɔ Mawu Mavɔmavɔ Nǔbǐwúkpétɔ́ ɔ́ wɛ sɛ́ mì dó mi gɔ́n nǔgbó. Nú mi se tónú nú Mawu Mavɔmavɔ, Mawu mitɔn ɔ́, nǔ ná nyí mɔ̌. Hwenu e axɔ́sú Daliwúsi ɖo xwe ɛnɛ bló wɛ ɖo zinkpo jí ɔ́, sun tɔn tɛ́nnɛgɔ́ ɔ́ e è nɔ ylɔ́ ɖɔ “ Kisiléwu ” ɔ́ sín azǎn ɛnɛgɔ́ ɔ́ gbe ɔ́, Mawu Mavɔmavɔ ɖɔ xó ɖé nú mì. Betɛ́linu lɛ́ɛ kó sɛ́ Salɛsɛ́ɛ kpódó Hlɛgɛ́mu-Mɛlɛ́ki kpó dó sinsɛnxɔ Mawu Mavɔmavɔ Nǔbǐwúkpétɔ́ ɔ́ tɔn mɛ, bó ɖe mɛ dó yě jí, bónú yě ná yi sa vo nú Mawu Mavɔmavɔ, bó ná kanbyɔ́ vɔ̌sánú-xwlémawutɔ́ lɛ́ɛ kpódó gbeyíɖɔ Mawu tɔn lɛ́ɛ kpó ɖɔ: “É lɛ́ byɔ́ ɖɔ mǐ ní nɔ́ ya avǐ ɖo sun atɔ́ɔ́ngɔ́ ɔ́ mɛ, bó nɔ́ blá nu lě e mǐ kó nɔ́ bló gbɔn sín do ɔ́ a?” Énɛ́ ɔ́, Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ má ɖɔ nú vɔ̌sánú-xwlémawutɔ́ lɛ́ɛ kpódó to ɔ́ mɛ nu lɛ́ɛ bǐ kpó ɖɔ: “Sín xwe kanɖé gban (70) ɖíe ɖokpóó wɛ, mi nɔ ɖo nu blá wɛ, bó nɔ ɖo vo sa wɛ ɖo sun atɔ́ɔ́ngɔ́ ɔ́ kpódó tɛ́nwegɔ́ ɔ́ kpó mɛ. É ka nyí ɖɔ mi ná nyɔ́ ɖo así ce wútu wɛ mi nɔ ɖo nu énɛ́ lɛ́ɛ blá wɛ ǎ. Mi ɖo nǔ ɖu wɛ, bó ɖo ahan nu wɛ ɔ́, gbɛ mitɔn ɖu wɛ mi ɖe kpowun.” Đ'ayǐ ɔ́, Mawu Mavɔmavɔ kó nɔ ɖɔ xó mɔ̌hunkɔtɔn lɛ́ɛ nú mi gbɔn gbeyíɖɔ tɔn nukɔntɔn lɛ́ɛ jí. Hwenɛ́nu ɔ́, gbɛtɔ́ gɔ́ Jeluzalɛ́mu toxo ɔ́, kpódó toxo e lɛ́ lɛ̌ dó e lɛ́ɛ kpó, bɔ yě bǐ ɖo vivo mɛ. Hwe énɛ́ ɔ́ nu ɖokpó ɔ́, gbɛtɔ́ ɖo to ɔ́ sín afɔligbé, bó lɛ́ ɖo ayǐkúngban wɛnjɛ ɔ́ jí. Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Mi ɖɔ hwɛ jlɔ́jlɔ́, mi yí wǎn nú miɖée, bó nyɔ́ xomɛ dó miɖée wú. Mi ma táfú asúkúsi lɛ́ɛ ó, mi ma táfú tɔ́cyɔvǐ lɛ́ɛ ó, mi ma táfú jǒnɔ lɛ́ɛ ó, mi ma táfú wamamɔnɔ lɛ́ɛ ó, mi ma ka lin nǔ nyanya ɖěbǔ dó miɖée wú ó.” Mɛ lɛ́ɛ ká gbɛ́ ɖɔ émí kún ná se ó, yě nyɛ́ abɔ̌ d'é mɛ, bó sú tó, ɖó yě táá wá se. Yě hɛn ayixa yěɖée tɔn syɛ́n awǐnnya ɖɔhun, bónú yě ní má se kplɔ́n e Mawu Mavɔmavɔ Nǔbǐwúkpétɔ́ ɔ́ sín Yɛ ɖo nǐná yě wɛ gbɔn gbeyíɖɔ Mawu tɔn nukɔntɔn lɛ́ɛ jí é ó. Énɛ́ ɔ́, Mawu Mavɔmavɔ sin xomɛ dó yě, bɔ é syɛ́n ɖésú. Mawu Mavɔmavɔ ɖɔ: “Ée un ylɔ́ yě bɔ yě dǒ tókúse mɛ ɔ́, yě lɔ wá ylɔ́ mì ɔ́, nyi lɔ ná dó tókúse mɛ. Un gba yě kpé akɔta tɛnmɛ tɛnmɛ lɛ́ɛ mɛ, yě tunwun akɔta énɛ́ lɛ́ɛ kpɔ́n gbeɖé ǎ. Yě jǒ to yětɔn dó nyi vɔ̌. Mɛ ɖé sɔ́ nɔ yi to ɔ́ mɛ ǎ, mɛ ɖé ká sɔ́ nɔ́ tɔ́n sín mɛ ǎ. To e mɛ yě nɔ́ ɖu gbɛ ɖe ɖ'ayǐ ɔ́, yě zé dó húzú gbětótló.” Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Nyɛ Mawu Mavɔmavɔ ɔ́, wǎn yíyí ɖaxó wɛ un ɖó nú Jeluzalɛ́mu. Un yí wǎn n'i titewungbe. Énɛ́ ɔ́ wú wɛ un ɖo ɖiɖɔ wɛ ɖɔ un lɛ́ kɔ wá Jeluzalɛ́mu. Un lɛ́ wá jɛ Sinyɔ́ɔ. È nǎ nɔ ylɔ́ Jeluzalɛ́mu ɖɔ ‘Toxo e ɖo gbejí ɔ́’, bó ná nɔ́ ylɔ́ Sinyɔ́ɔ, só ce ɖɔ ‘Só mímɛ́’. Nǔgbó wɛ! Un ɖɔ bo tɛ ɖɛ̌ jí ɖɔ: Degénɔ kpódó nyɔ̌ɖaxóví kpó e nɔ hɛn kpogɛ, ɖó xwe yětɔn kó sɛ yi wútu lɛ́ɛ ɔ́, yě ná lɛ́ kɔ wá jínjɔ́n Jeluzalɛ́mu sín tokplétɛn lɛ́ɛ. Súnnuví lɛ́ɛ kpódó nyɔ̌nuví lɛ́ɛ kpó, ná lɛ́ wá kpɔ́ gégé, bó ná da ayihún ɖo toxo ɔ́ sín tokplétɛn lɛ́ɛ. Nǔ énɛ́ e ná wá jɛ ɔ́ ná cí nǔ ma sixú jɛ ɖɔhun nú mɛ e ná kpo ɖo gbɛ ɖo togun Izlayɛ́li tɔn ɔ́ mɛ lɛ́ɛ. Amɔ̌, nyɛ Mawu Mavɔmavɔ Nǔbǐwúkpétɔ́ ɔ́, un hɛn ɔ́, un ná bló nǔjíwǔ énɛ́ ɔ́. Akpá wɛ nyí bɔ un dó nú mi. Un ná hwlɛ́n togun ce e ɖo kannumɔgbénu, ɖo zǎnzǎnhwe jí kpódó gbadahwe jí kpó lɛ́ɛ gán. Un ná kplá yě sín dɔ̌n wá, bɔ yě ná nɔ Jeluzalɛ́mu; yě ná nyí togun ce, bɔ nyɛ ná nyí Mawu yětɔn. Un ná xwedó nǔgbó kpódó hwɛjijɔ kpó dó ɖu axɔ́sú ɖo yě nu.” Nǔ e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Mi kpan akɔ́n! Akpá e un ko dó nú mi ɖ'ayǐ gbɔn gbeyíɖɔ lɛ́ɛ jí, hwenu e è dǒ sinsɛnxɔ ce do, bó ná vɔ́ gbá lɛ́ɛ se wɛ mi ɖe din. Đ'ayǐ xóxó ɔ́, mɛ ɖěbǔ nɔ́ sú azɔ̌ e gbɛtɔ́ lɛ́ɛ wa ɔ́ sín axɔ́ ǎ; è ka nɔ lɛ́ sú ée kanlin lɛ́ɛ wa ɔ́ sín axɔ́ ǎ. Mɛ ɖé sɔ́ nɔ́ glá tɔ́n ǎ, ɖó kɛntɔ́ lɛ́ɛ wútu. Đó un jó gbɛtɔ́ lɛ́ɛ bǐ dó, bɔ yě nɔ́ ɖo dǎka xo yěɖée wú wɛ. Amɔ̌, din ɔ́, un sɔ́ ná hɛn mɛ e kpo ɖo gbɛ ɖo togun élɔ́ mɛ lɛ́ɛ ɖ'ayǐ tɔn ɖɔhun ǎ. Un ná kɔn fífá nyi ayǐkúngban ɔ́ jí. Vǐwuntín lɛ́ɛ ná nɔ́ sɛ́n, ayǐkúngban ná ná jinukún. Jǐ ná ja ɖésú. Un ná ná nyɔ̌ná énɛ́ lɛ́ɛ bǐ mɛ e kpo ɖo gbɛ ɖo togun ce mɛ lɛ́ɛ. Axɔ́súɖuto Judáa tɔn kpódó Izlayɛ́li tɔn kpó e mi! Togun e è dǒ nu ɔ́ sín xlɛ́ wɛ mi ko nyí ɖ'ayǐ ɖo akɔta lɛ́ɛ tɛ́ntin. Amɔ̌, din ɔ́, un hwlɛ́n mi gán. Mi ná nyí togun nyɔ̌nánɔ ɖé sín xlɛ́. Mi ma sɔ́ ɖi xɛsi ó, mi kpan akɔ́n.” Nǔ e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Nǔ nyanya e un ɖɔ un ná wa xá mi ɖ'ayǐ hwenu e tɔ́gbó tɔgbo mitɔn lɛ́ɛ dó xomɛsin nú mì ɔ́ un wɔn ǎ. Amɔ̌, din ɔ́, un jó xó dó, bó ɖɔ un ná wa ɖagbe nú Jeluzalɛ́munu lɛ́ɛ; un ná wa ɖagbe nú Judáa togun ɔ́. Mi bo ma sɔ́ ɖi xɛsi ó. Lě e mi ɖó ná wa nǔ gbɔn ɔ́ ɖíe: Mɛ ɖokpó ɖokpó ní nɔ́ ɖɔ nǔgbó nú nɔzo tɔn. Hwɛɖɔxɔsá mitɔn lɛ́ɛ ní nɔ́ ɖɔ hwɛ jlɔ́jlɔ́, bó vɔ́ fífá ɖó ayǐ. Mi ma lin nǔ nyanya ɖěbǔ dó miɖée wú ó. Mi ma ɖe kúnnu agɔ bo xwlé nǔ d'é jí ó, ɖó nyɛ Mawu Mavɔmavɔ ɔ́, un gbɛ́ wǎn nú nǔ mɔ̌hunkɔtɔn lɛ́ɛ wiwa.” Mawu Mavɔmavɔ Nǔbǐwúkpétɔ́ ɔ́ ɖɔ nú mì ɖɔ: “Un ɖo ɖiɖɔ nú mi wɛ ɖɔ nu e mi nɔ blá ɖo sun ɛnɛgɔ́ ɔ́, sun atɔ́ɔ́ngɔ́ ɔ́, sun tɛ́nwegɔ́ ɔ́ kpódó wǒgɔ́ ɔ́ kpó mɛ xwewú xwewú ɔ́, bɛ́ sín din ɔ́, yě ná húzú xwe ɖaxó ɖaxó nú Judáa togun ɔ́, bɔ yě ná nɔ́ hun xomɛ, bó ná nɔ j'awǎ tawun. “Amɔ̌, mi ní nɔ́ ba nǔgbó ɖiɖɔ kpódó fífá kpó.” Nǔ e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe: “Akɔta ɖěvo lɛ́ɛ, to wɔ̌buwɔ́bú ɖé mɛ nu lɛ́ɛ ná lɛ́ wá Jeluzalɛ́mu. To ɖě mɛ nu lɛ́ɛ ná yi ɖɔ nú ɖěvo mɛ nú lɛ́ɛ ɖɔ: Mi wá nú mǐ ná yi sa vo nú Mawu Mavɔmavɔ Nǔbǐwúkpétɔ́ ɔ́, bó ná ba ɛ mɔ, bɔ yě ná yí gbe nú yě ɖɔ: ‘Mǐ ná xwedó mi yi.’ Nǔgbó wɛ, togun wɔ̌buwɔ́bú lɛ́ɛ kpódó akɔta hlɔ̌nhlɔ́nnɔ lɛ́ɛ kpó ná wá Jeluzalɛ́mu, bó ná wá ba nyɛ Mawu Mavɔmavɔ ɔ́ mɔ, bó ná sa vo nú mì gbɔn ɖɛ e yě ná xo lɛ́ɛ mɛ. Hwenɛ́nu ɔ́, jǒnɔ wǒ ná tíin, bɔ yě mɛ ɖokpó ɖokpó ná dó gbe vovo: yě ná hɛn Jwifu ɖokpó sín awu ɖaxó sín tó majómájó bó dó hɛn ɛ ɖó te bó ná ɖɔ n'i ɖɔ: ‘Mǐ jló ná xwedó mi, ɖó mǐ se ɖɔ Mawu ɖo kpɔ́ xá mi.’ ” Mawu Mavɔmavɔ ɖɔ xó. Xó tɔn yi tokpɔn Hadlaki tɔn ɔ́ mɛ, bó yi nɔ te ɖo toxo Damási tɔn mɛ. Đó Mawu Mavɔmavɔ sín nukún ɔ́, akɔta Izlayɛ́li tɔn lɛ́ɛ kɛ́ɖɛ́ jí wɛ é ɖe ǎ, é lɛ́ ɖo gbɛtɔ́ ɖě lɛ́ɛ lɔmɔ̌ bǐ jǐ. Mawu Mavɔmavɔ sín xó ɔ́ lɛ́ yi Hamáti toxo ɔ́ mɛ, ɖo Damási kpá, bó lɛ́ yi Tíi kpó Sidɔ́ɔn kpó. To nukúnɖéjí wɛ toxo énɛ́ lɛ́ɛ nyí. Tíinu lɛ́ɛ mɛ ahohó lɛ́ lɛ̌ dó toxo yětɔn. Yě kplé kpatágan bɔ é sukpɔ́ kɔ́gúdu ɖɔhun. Yě tɛ́ siká kpé fí bǐ babá ɖɔhun. Lo ɔ́, Aklúnɔ ná yí bǐ sín yě sí. É ná hɔ́ ahohó yětɔn lɛ́ɛ kɔn nyi xu mɛ. Toxo ɔ́ ná ji zo. Ényí Acikelɔ́ni toxo ɔ́ mɔ mɔ̌ ɔ́, xɛsi ná jɛ jǐ tɔn. Xɛsi ná ɖi Gaza toxo ɔ́, bɔ é ná sísɔ́; Eklɔ́ni toxo ɔ́ lɔmɔ̌ ná ɖi xɛsi bó ná sísɔ́, ɖó é ná ba Tíi toxo e wú é gán jɛ ɔ́ kpo. Axɔ́sú ɖě sɔ́ ná ɖo Gaza ǎ; Acikelɔ́ni ná jɛ vɔ̌. Acidɔ́di ná húzú toxo e mɛ jǒnɔ lɛ́ɛ ján dó Jwifu lɛ́ɛ mɛ ɖe ɔ́ sín toxo. Un ná yí nǔ e wú Filisitɛ́ɛn lɛ́ɛ ɖo go yí wɛ ɔ́ sín yě sí. Kanlin e è hu bɔ hun tɔn ma kɔn nyi ayǐ ǎ, abǐ ée è dǒ sá vɔ̌ nú vodún ɔ́ sín lan ɔ́, un ná yí sín nu yětɔn. Mɛ yětɔn e ná kpo ɖo gbɛ lɛ́ɛ ná sɔ́ mì dó ɖó Mawu yětɔn, lě e xwédo Judáa tɔn ɔ́ bló gbɔn ɔ́ é. Eklɔ́ninu lɛ́ɛ ná byɔ́ togun ce mɛ, lě e Jebuzinu lɛ́ɛ bló gbɔn é. Un ná cɔ́ to ce lɛ́ lɛ̌ dó, bó ná cyɔ́n alɔ jǐ tɔn ɖo ahwangɔnu e ná wá lɛ́ɛ nukɔn. Mɛ ɖěbǔ sɔ́ ná wá dó ya nú togun ce ǎ. Đó din ɔ́, nukún ce ɖo jǐ tɔn. Sinyɔ́ɔnu lɛ́ɛ mi, mi j'awǎ! Jeluzalɛ́munu lɛ́ɛ mi, mi j'awǎ kpó awǒbóbó kpó. Axɔ́sú mitɔn ɖíe ja gɔ̌n mitɔn e. Nǔjlɔ́jlɔ́watɔ́ ɖé wɛ, é ɖu ɖ'é jí. É sɔ́ éɖée hwe, é jínjɔ́n tócí ɖé jí, tócí ví ɖé jí. É ná hɛn ahwankɛkɛ́ví e ɖo Eflayímu lɛ́ɛ gblé. É ná sú ahwansɔ́ e ɖo Jeluzalɛ́mu lɛ́ɛ sín kún dó. É ná wɛ́n da e yě nɔ́ dó fun ahwan ná lɛ́ɛ. É ná ná fífá akɔta lɛ́ɛ, bó ná kpa acɛ sín xu ɖě kɔn yi ɖěvo kɔn, é ná kpa acɛ sín Efláti tɔ ɔ́ kɔn, káká yi ayǐkúngban ɔ́ sín vivɔnu. Mawu Mavɔmavɔ ɖɔ: “Đó akɔ e un jɛ xá mi bó sɔ́ hun ce slé jí ɔ́ wú ɔ́, un ná ɖe mɛ mitɔn e nyí gantɔ́, ɖo do gɔngɔn e mɛ sin ma ɖe ǎ mɛ lɛ́ɛ nyi te. Gantɔ́ e ɖo nukúnɖíɖó mɛ lɛ́ɛ é mi, mi lɛ́ kɔ yi toxo mitɔn ɖaxó e è ko vɔ́ ahohó tɔn lɛ́ɛ mɛ ɔ́ mɛ. Un ɖo ɖiɖɔ nú mi wɛ égbé ɖɔ ya e mi ji ɔ́, un ná wa ɖagbe nú mi ɖ'é nu, bɔ é ná túnflá. Đó un ná zán Judáanu lɛ́ɛ da e è nɔ dó fun ahwan ná é ɖɔhun, bɔ Eflayímunu lɛ́ɛ ná nyí gǎ. Sinyɔ́ɔnu lɛ́ɛ mi, un ná sɛ́ súnnu e ɖo mi mɛ lɛ́ɛ dó, bɔ yě ná yi tɔ́n ahwan Glɛ̌sinu lɛ́ɛ. Un ná zán yě lě e ahwanfuntɔ́ nɔ́ zán hwǐ tɔn gbɔn é.” Mawu Mavɔmavɔ ná tɔ́n ɖo togun tɔn sín ta nu. Gǎ e é ná da ɔ́ ná yi jǐkɛwun ɖɔhun. Aklúnɔ Mavɔmavɔ ná kún kpɛn. É ná zɔn jǐ ɖaxó ɖé mɛ wá; jǐ ɔ́ ná ɖo jija wɛ kpó jɔhɔn kpó. Mawu Mavɔmavɔ Nǔbǐwúkpétɔ́ ɔ́ ná cyɔ́n alɔ jǐ yětɔn. É ná sɛ́ kɛ́njí dó bɔ é ná hu mɛ lɛ́ɛ, bó ná sú kún yětɔn dó. Yě ná ɖu ɖo mɛ e ná fɔ́n gǔ dó yě jí lɛ́ɛ jí. Yě ná kɔn kɛntɔ́ lɛ́ɛ sín hun nyi ayǐ, bɔ é ná sa tɔ vɛ̌ɛn ɖɔhun, abǐ kanlin e è dǒ sá vɔ̌ ná lɛ́ɛ sín hun e gɔ́ basya bó kɔn nyi vɔ̌sákpe ɔ́ sín zwe lɛ́ɛ mɛ é ɖɔhun. Hwenɛ́nu ɔ́, Mawu Mavɔmavɔ ná hwlɛ́n togun tɔn gán, lě e lɛ̌ngbɔ́nyitɔ́ nɔ́ hwlɛ́n kanlin tɔn lɛ́ɛ gán gbɔn é. Yě ná nɔ́ kɔ́n ɖo to ɔ́ mɛ awǐnnya xɔ akwɛ́ e ɖo axɔ́súgbákún wú lɛ́ɛ ɖɔhun. To ɔ́ ná nyí to e mɛ nyɔ̌ná kpó ɖɛkpɛnyínyɔ́ kpó ná tíin ɖe é. Jinukún kpó vɛ̌ɛn yɔ̌yɔ́ kpó ná ná hlɔ̌nhlɔ́n dɔ̌nkpɛvú lɛ́ɛ kpódó ɖyɔ̌vǐ lɛ́ɛ kpó. Mi byɔ́ jǐ Mawu Mavɔmavɔ, mi byɔ́ xwejí. É wɛ nɔ́ bló bɔ jɔhɔn nɔ́ nyi. É ná ná jǐ mi, bɔ é ná ja ɖésú kpó zǐngídi kpó. É ná bló bɔ jinukún ná wú ganjí bɔ ji ná jɛ ɖo mɛ ɖokpó ɖokpó sín gle mɛ. Vodún e kan nǔ byɔ́ wɛ mi nɔ ɖe lɛ́ɛ ɔ́, adingban ɖó nú mi wɛ yě nɔ́ ɖe. Bokɔ́nɔ lɛ́ɛ ɔ́, nǔ e kan wɛ yě nɔ́ ɖe bó nɔ́ ɖo ɖiɖɔ nú mi wɛ lɛ́ɛ ɔ́, nǔvú ɖó wɛ yě nɔ́ ɖe. Dlɔ̌ e tínmɛ nú mi wɛ yě nɔ́ ɖe lɛ́ɛ nyí nǔɖé wa nú ǎ. Hwihwɛ́ e xo mi wɛ yě nɔ́ ɖe ɔ́, blɛ̌blɛ́ mi wɛ yě nɔ́ ɖe. Énɛ́ ɔ́ wú wɛ togun ɔ́ ɖo flúflú wɛ wǔbláwúblá, kanlin e ma ɖó nyinyitɔ́ ǎ é ɖɔhun. Mawu Mavɔmavɔ ɖɔ: “Un sin xomɛ dó lɛ̌ngbɔ́nyitɔ́ lɛ́ɛ. Un ná dɔn tó nú gbɔ̌sú lɛ́ɛ. Đó nyɛ Mawu Mavɔmavɔ Nǔbǐwúkpétɔ́ ɔ́, un ná kpé nukún dó kanlinkpó ce, Judáa togun ɔ́ wú. Un ná kplá ɛ yi ahwan fun gbé sɔ́ e xɔ susu é ɖɔhun. Judáa togun ɔ́ mɛ wɛ gǎn alɔkpa alɔkpa lɛ́ɛ ná tɔ́n sín, bó ná syɛ́n awǐnnya e ɖo xɔzwe jí é ɖɔhun. Yě ná syɛ́n goxɔ sín dotín ɖɔhun. Yě ná ɖó hlɔ̌nhlɔ́n da e è nɔ dó fun ahwan ná é ɖɔhun. Yě ná nyí ahwanfuntɔ́ syɛ́nsyɛ́n, bó ná nɔ́ gbídí mɛ e ɖo ahwan fun xá yě wɛ lɛ́ɛ ɖó afɔ wú babá e ɖo ali jí é ɖɔhun. Yě ná fun ahwan gbɔn mɔ̌ ɖó nyɛ Mawu Mavɔmavɔ ɔ́, un ɖo kpɔ́ xá yě. Énɛ́ ɔ́, winnyá ná hu kɛntɔ́ sɔ́xátɔ́ lɛ́ɛ. Un ná dó wǔsyɛ́n lanmɛ nú togun Judáa tɔn ɔ́; un ná hwlɛ́n togun Izlayɛ́li tɔn ɔ́ gán. Un ná lɛ́ kɔ nú yě wá to yětɔn mɛ, bó ná ɖe wǎn yíyí e un ɖó nú yě ɔ́ xlɛ́ yě, un gbɛ́ yě kpɔ́n gbeɖé ǎ ɖɔhun. Mawu Mavɔmavɔ, Mawu yětɔn wɛ un nyí bó ná yí ɖɛ yětɔn. Eflayímunu lɛ́ɛ ná cí ahwanfuntɔ́ syɛ́nsyɛ́n ɖé ɖɔhun. Yě ná j'awǎ mɛ e nu vɛ̌ɛn é ɖɔhun. Vǐ yětɔn lɛ́ɛ mɔ mɔ̌ ɔ́, xomɛ ná hun yě, awǎjijɛ ná gɔ́ ayi mɛ nú yě ɖó nyɛ Mawu Mavɔmavɔ ɔ́ wú. Un ná ylɔ́ togun ce kplé, ɖó un ko ɖɔ un ná hwlɛ́n yě gán, bɔ yě ná gba kún lě e yě kó gba kún gbɔn ɖ'ayǐ é. Un gba yě kpé togun lɛ́ɛ mɛ. Yě ná bó ɖo zɔ ɔ́, yě ná nɔ flín mì sɛ́ dó. Yě ná nɔ dɔ̌n kpó vǐ yětɔn lɛ́ɛ kpó, bó ná lɛ́ kɔ wá. Un ná ɖe yě tɔ́n sín Ejípu kpó Asilíi kpó, bó ná lɛ́ kɔ nú yě wá to yětɔn lɛ́ɛ mɛ. Un ná lɛ́ kplá yě yi Galadi kpó Libáan kpó. Tɛn ka na lɛ́ kpé yě ɖo fí énɛ́ lɛ́ɛ ǎ. Yě ná dó asá adǎngbomɛ xu ɔ́. Nyɛ Mawu Mavɔmavɔ ɔ́, un ná hwíhwɛ́ aslɔkɛ́ lɛ́ɛ, tɔsisa ɖaxó Nilu ɔ́ ná xú bǐ. Go e yí wɛ Asilíi ɖe ɔ́ ná yi xɔ. Ejípu sɔ́ ná ɖó acɛ ɖěbǔ ǎ. Un ná dó wǔsyɛ́n lanmɛ nú togun ce, bɔ yě ná nɔ wa nǔ e nɔ nyɔ́ nukún ce mɛ lɛ́ɛ tɛgbɛ.” Mawu Mavɔmavɔ wɛ ɖɔ mɔ̌. Libáan e, hun hɔn towe lɛ́ɛ kɛ́, bónú myɔ ní fyɔ́ sɛ́dlutín towe lɛ́ɛ. Siplɛtín lɛ́ɛ mi, mi wɛn azɔn, è sɛ́n sɛ́dlutín lɛ́ɛ; atín ɖagbe ɖagbe énɛ́ lɛ́ɛ ɔ́, è sú kún yětɔn dó. Basáni sín atín ɖaxó ɖaxó lɛ́ɛ mi, mi wɛn azɔn, ɖó è xo zungbó mitɔn e mɛ mɛ ɖé ma nɔ́ sixú byɔ́ ǎ é. Lɛ̌ngbɔ́nyitɔ́ togun lɛ́ɛ tɔn ɖo azɔn wɛn wɛ, ɖó hwenu e yě ná xɔ susu dó ɔ́ kó dín. Kinnikínní lɛ́ɛ ɖo avǐ ya wɛ, ɖó è xo zun e mɛ yě nɔ́ nɔ, ɖo Judɛ́ɛn tɔ ɔ́ tó lɛ́ɛ. Mawu Mavɔmavɔ, Mawu ce ɖɔ nú mì gbe ɖokpó ɖɔ: “Kpé nukún dó lɛ̌ngbɔ́ e ɖo te bɔ è nǎ wá kplá yi lanhutɛn lɛ́ɛ wú. Mɛ e xɔ yě lɛ́ɛ nɔ́ gbo gbe yě, bó ká tunwun ɖɔ émí ɖo nǔ wa nyi do wɛ ǎ. Mɛ e ka sa yě lɛ́ɛ nɔ́ ɖɔ: ‘Mi wá mǐ ní dó kú nú Mawu Mavɔmavɔ, mǐ ɖíe jɛ dɔkun e!’ Lɛ̌ngbɔ́nyitɔ́ yě ɖésúnɔ tɔn lɛ́ɛ ɖésú kú nǔbláwǔ nú yě ǎ. Nyɛ Mawu Mavɔmavɔ ɔ́ lɔmɔ̌ ɖo ɖiɖɔ wɛ ɖɔ un kún ná kú nǔbláwǔ nú mɛ e ɖo ayǐkúngban jí lɛ́ɛ ó. Un ná jó gbɛtɔ́ ɖokpó ɖokpó dó nyi mɛ e ɖo akpá tɔn ɔ́ kpódó axɔ́sú kpó sín acɛ mɛ. Axɔ́sú lɛ́ɛ ná sú nǔ e ɖo ayǐkúngban jí lɛ́ɛ sín kún dó. Un ka ɖo mɛ ɖěbǔ ná hwlɛ́n gán sín alɔ yětɔn mɛ wɛ ǎ.” Ée Mawu Mavɔmavɔ ɖɔ mɔ̌ nú mì ɔ́, un jɛ nukún kpé dó lɛ̌ngbɔ́ e lɛ̌ngbɔ́satɔ́ lɛ́ɛ sɔ́ ɖo te bɔ è nǎ wá kplá yi lanhutɛn lɛ́ɛ wú jí. Lɛ̌ngbɔ́ énɛ́ lɛ́ɛ sín gbɛ blá wǔ hú ɖě lɛ́ɛ bǐ tɔn. Un zé lɛ̌ngbɔ́nyitɔ́kpogɛ we: un sun nyǐ kpogɛ ɔ́ ɖokpó ɖɔ “Fɛ́nú”, bó sun nyǐ wegɔ́ ɔ́ ɖɔ “Bǔninɔ”, bó jɛ nukún kpé dó lɛ̌ngbɔ́ lɛ́ɛ wú jí. Un zé sun ɖokpó ɖó te bo ɖe ɖɛ lɛ̌ngbɔ́nyitɔ́ yětɔn atɔn lɛ́ɛ. Un sɔ́ ɖó suúlu ɖěbǔ dó yě wú ǎ. Yě lɔmɔ̌ ká sɔ́ ba xó ce ɖě ǎ. Énɛ́ ɔ́, un ɖɔ nú yě ɖɔ: “Un sɔ́ ná kpé nukún dó mi wú ɖě ǎ. Mɛ e ná kú lɛ́ɛ ní kú, mɛ e è ná hu lɛ́ɛ ɔ́, è nǐ hu yě; yě mɛ e ná kpo lɛ́ɛ ní wlí yěɖée ɖu.” Un zé lɛ̌ngbɔ́nyitɔ́ kpogɛ Fɛ́nú ɔ́ bó wɛ́n bó dó gba akɔ e un jɛ xá togun lɛ́ɛ bǐ é ná. Gbe énɛ́ ɔ́ gbe wɛ un gba akɔ e un jɛ xá yě ɔ́, bɔ lɛ̌ngbɔ́satɔ́ e ɖo kpínkpɔ́n mì wɛ lɛ́ɛ mɔ ɖɔ Mawu Mavɔmavɔ wɛ ɖo xó ɖɔ wɛ gbɔn nǔ e wa wɛ un ɖe lɛ́ɛ mɛ. Énɛ́ ɔ́, un ɖɔ nú yě ɖɔ: “Ényí é jló mi, nú mi ná sú azɔ̌ e un wa ɔ́ sín axɔ́ mì hǔn, mi sú mì. Mi ma ka ná sú mì ǎ hǔn, mi gbɔ.” Ée un ɖɔ mɔ̌ ɔ́, yě xa kpatágankwɛ́ gban (30), bó dó sú azɔ̌ e un wa ɔ́ sín axɔ́ mì. Mawu Mavɔmavɔ ɖɔ nú mì ɖɔ: “É má nyí akwɛ́ e un xɔ yě nukún mɛ ɔ́ nɛ́ a? Zě kpatágankwɛ́ lɛ́ɛ yi jó nú fletuntɔ́.” Ée é ɖɔ mɔ̌ ɔ́, un bɛ́ kpatágankwɛ́ gban (30) lɛ́ɛ yi jó nú fletuntɔ́ ɖo sinsɛnxɔ Mawu Mavɔmavɔ tɔn mɛ. Énɛ́ ɔ́ gúdo ɔ́, un hɛn lɛ̌ngbɔ́nyitɔ́ kpogɛ ce “Bǔninɔ” ɔ́ wɛ́n, bó dó gba nɔví nɔví nyínyí e ɖo Judáanu lɛ́ɛ kpó Izlayɛ́li ví lɛ́ɛ kpó tɛ́ntin ɔ́ dó. Mawu Mavɔmavɔ lɛ́ ɖɔ nú mì ɖɔ: “Din ɔ́, bo wa azɔ̌ lɛ̌ngbɔ́nyitɔ́ xlonɔ ɖɔhun. Đó un ná sɛ́ lɛ̌ngbɔ́nyitɔ́ ɖěvo dó to ɔ́ mɛ: é ná nɔ́ kpé nukún dó lɛ̌ngbɔ́ e è sɔ́ ɖó te bo ná wá hu lɛ́ɛ wú ǎ; é ná ba éé bú lɛ́ɛ ǎ, é ná blá akpa nú éé gblé wǔ lɛ́ɛ ǎ; é ká ná ná nǔɖuɖu éé kpo ɖo ganjí lɛ́ɛ é ǎ. Nǔ e é ná wa ɔ́ wɛ nyí ɖɔ é ná ɖu lɛ̌ngbɔ́ e dó jǒ hú ɖě lɛ́ɛ bǐ é. É ná ɖu káká bó ɖu afɔkpa tɔn lɛ́ɛ d'é jí. Heelú lɛ̌ngbɔ́nyitɔ́ nǔvɔ́nɔ e nɔ́ jó lɛ̌ngbɔ́ tɔn lɛ́ɛ dó é. Hwǐ ní vún awa tɔn, bó tɔ́n nukún tɔn ɖisíxwé tɔn ɔ́. Alɔ tɔn ní kú. Nukún tɔn ɖisíxwé tɔn ɔ́ ní ba nǔ kpo!” Mawu Mavɔmavɔ ɖɔ xó dó Izlayɛ́li wú. Mawu Mavɔmavɔ e bló jǐxwé, bó ɖó ayǐkúngban ɔ́ ayǐ, bó ná gbɛ gbɛtɔ́ ɔ́, xó e é ɖɔ ɔ́ ɖíe; é ɖɔ: “Un ná sɔ́ Jeluzalɛ́mu dó ɖó kɔ́fu, bɔ xomɛsin ce ná nyí vɛ̌ɛn bo gɔ́ kɔ́fu ɔ́: vɛ̌ɛn énɛ́ ɔ́ ná zɔ́n bɔ togun e lɛ́ lɛ̌ dó e lɛ́ɛ bǐ sín nukún mɛ ná nɔ gbá zǐn. Togun Judáa tɔn ɔ́ bǐ sín nukún mɛ ná nɔ́ lɛ́ lɛ̌ hwenu e kɛntɔ́ lɛ́ɛ ná xá Jeluzalɛ́mu é. Hwenɛ́nu ɔ́, un ná sɔ́ Jeluzalɛ́mu dó ɖó awǐnnya kpinkpɛn ɖé nú togun lɛ́ɛ bǐ. Mɛ e ná zé dó jǐ lɛ́ɛ bǐ ná gblé wǔ. Énɛ́ ɔ́, akɔta e ɖo ayǐkúngban jí lɛ́ɛ bǐ ná kplé bó húzú kpan nukɔn ɛ.” Mawu Mavɔmavɔ ɖɔ: “Gbe énɛ́ ɔ́ gbe ɔ́, un ná ɖɔ bɔ xɛsi ná mú sɔ́ yětɔn lɛ́ɛ bǐ ahan ɖɔhun, bɔ mɛ e xá sɔ́ lɛ́ɛ ná lú dó te. Lo ɔ́, hwenu e un ná ɖɔ bɔ togun lɛ́ɛ sín sɔ́ lɛ́ɛ ná tɔ́n nukún ɔ́, nukún ce ná ɖo togun Judáa tɔn ɔ́ jí. Judáa sín gǎn lɛ́ɛ ná ɖɔ dó ayi mɛ ɖɔ: ‘Jeluzalɛ́munu lɛ́ɛ ɔ́, Mawu Mavɔmavɔ Nǔbǐwúkpétɔ́ ɔ́ mɛ wɛ yě nɔ́ mɔ hlɔ̌nhlɔ́n yětɔn ɖe.’ Hwenɛ́nu ɔ́, un ná ɖɔ bɔ Judáa sín gǎn lɛ́ɛ ná cí myɔ hɛhɛ ɖé ɖɔhun, ɖo zungbó mɛ, abǐ zohwín e ɖo jiji wɛ ɖo jinukún e è kplé lɛ́ɛ tɛ́ntin ɔ́ ɖɔhun. Yě ná vɔ togun e lɛ́dó yě lɛ́ɛ bǐ gbɔn ɖisí amyɔ. Jeluzalɛ́munu lɛ́ɛ ká ná nɔ toxo yětɔn mɛ tɛgbɛ.” Mawu Mavɔmavɔ ná wá dó alɔ Judáa sín hɛ̌nnu lɛ́ɛ hwɛ̌, bónú Davídi sín vǐ lɛ́ɛ kpódó Jeluzalɛ́munu lɛ́ɛ kpó má vɛdó ɖɔ émí hú gǎn togun Judáa tɔn e kpo lɛ́ɛ wɛ sín ó. Hwenɛ́nu ɔ́, Mawu Mavɔmavɔ ná cyɔ́n alɔ Jeluzalɛ́munu lɛ́ɛ jí: mɛ e vɔ́ hú mɛ bǐ ɖo yě mɛ lɛ́ɛ ná dó hlɔ̌nhlɔ́n Davídi ɖɔhun, bɔ Davídi sín vǐ lɛ́ɛ ná cí Mawu ɖɔhun nú Jeluzalɛ́munu lɛ́ɛ; yě ná cí wɛnsagun Mawu Mavɔmavɔ tɔn ɖɔhun ɖo Jeluzalɛ́munu lɛ́ɛ nukɔn. Mawu Mavɔmavɔ ɖɔ: “Hwenɛ́nu ɔ́, un ná wá, bó ná vívá akɔta e ná wá tɔ́n ahwan Jeluzalɛ́mu lɛ́ɛ bǐ. Énɛ́ ɔ́, un ná gba wǔjɔmɛ kpó vosisa kpó sín yɛ kɔn nyi Davídi xwé ɔ́ kpó Jeluzalɛ́munu lɛ́ɛ kpó jí, bɔ yě ná sɔ́ nukún yětɔn ɖó nyɛ mɛ e yě sɔ́ hwǎn é wú. Yě ná ví mì, lě e è nɔ ví vǐɖokpónɔ e kú nú mɛ é ɖɔhun. Yě ná ví mì, bó só hehe, lě e è nɔ ví nukɔngbéví e kú nú mɛ é ɖɔhun. Hwenɛ́nu ɔ́, Jeluzalɛ́munu lɛ́ɛ ná nɔ aluwɛ ɖaxó ɖé mɛ, é ná cí aluwɛ e mɛ è nɔ dó Hadádi-Hlimumɔ́ni ta mɛ, ɖo tɔdo Mɛgidó tɔn mɛ é ɖɔhun. To ɔ́ ná nɔ aluwɛ mɛ. Hɛ̌nnu ɖokpó ɖokpó ná nɔ vovo. Davídi hɛ́nnu ɔ́ ná nɔ vo. Nyɔ̌nu lɛ́ɛ ná nɔ vo. Natáni hɛ́nnu ɔ́ ná nɔ vo, nyɔ̌nu lɛ́ɛ ná nɔ vo. Levíi hɛ́nnu ɔ́ ná nɔ vo, nyɔ̌nu lɛ́ɛ ná nɔ vo. Cimɛ́yi hɛ́nnu ɔ́ ná nɔ vo, nyɔ̌nu lɛ́ɛ ná nɔ vo. Hɛ̌nnu ɖě lɛ́ɛ bǐ ná nɔ vo: hɛ̌nnu ɖokpó ɖokpó ná nɔ vovo, nyɔ̌nu lɛ́ɛ ná nɔ vo.” Mawu Mavɔmavɔ Nǔbǐwúkpétɔ́ ɔ́ lɛ́ ɖɔ: “Hwenɛ́nu ɔ́, sin ná sa sín tɔjɔtɛn ɖé mɛ, bó ná lɛ hwɛ e Davídi ví lɛ́ɛ kpó Jeluzalɛ́munu lɛ́ɛ kpó hu ɔ́ sín kɔ nú yě, bó ná lɛ nǔ blíblí e yě wa lɛ́ɛ sín kɔ nú yě.” Hwenɛ́nu ɔ́, Mawu Mavɔmavɔ Nǔbǐwúkpétɔ́ ɔ́ ɖɔ: “Un ná sú vodún lɛ́ɛ sín kún dó ɖo to ɔ́ mɛ, bɔ mɛ ɖěbǔ sɔ́ ná nɔ́ flín yě ǎ. Mɔ̌ ɖokpó ɔ́, un ná sú mɛ e nɔ ylɔ́ yěɖée ɖɔ gbeyíɖɔ ce lɛ́ɛ sín kún dó, bó ná ɖe nǔ e nɔ́ zɔ́n bɔ mi nɔ yí wǎn nú vodún sinsɛn ɔ́ sín ayi mitɔn mɛ. Ényí mɛɖé sɔ́ ɖo adingban ɖó wɛ, bó ɖɔ nyǐkɔ ce mɛ ɖɔ xó dó wɛ émí ɖe ɔ́, tɔ́ e ji i ɔ́, kpó nɔ e ji i ɔ́ kpó ná ɖɔ n'i ɖɔ: ‘A nǎ kú, ɖó xó ɖɔ dó Mawu Mavɔmavɔ nyǐkɔ mɛ wɛ a ɖe bo ɖɔ, adingban kɛ́ɖɛ́ ɖó wɛ a ka ɖe.’ Bɔ hwenu e é ná ɖo xó ɔ́ ɖɔ wɛ ɔ́, mɛ e ji i lɛ́ɛ ɖésú ná xo e hu. Hwenɛ́nu ɔ́, winnyá ná hu gbeyíɖɔnyíjɛtɔ́ lɛ́ɛ dó nǔmimɔ yětɔn lɛ́ɛ wú, hwenu e yě ná ɖo xó ɖɔ dó nyǐkɔ ce mɛ wɛ é. Yě sɔ́ ná nɔ glá dó awu gaga fúnnɔ e gbeyíɖɔ ce lɛ́ɛ nɔ́ dó ɔ́ ɖě, bó dó blɛ́ mɛ ǎ. Yě mɛ ɖokpó ɖokpó ná ɖɔ: ‘Nyɛ ɔ́, un nyí gbeyíɖɔ Mawu tɔn ǎ; glesi wɛ un nyí. Sín vǔ ɖokpóó wɛ un kó ɖó ayǐkúngban.’ Ényí mɛɖé kanbyɔ́ ɛ ɖɔ: ‘Fítɛ́ wɛ a ba akpa e ɖo akɔ́nnu towe lɛ́ɛ sín’ ɔ́, é ná nɔ́ yí gbe ɖɔ: ‘Xɔ́ntɔn ce lɛ́ɛ sín xwé gbe wɛ è gblě wǔ mì ɖe.’ ” Mawu Mavɔmavɔ Nǔbǐwúkpétɔ́ ɔ́ ɖɔ: “Hwǐ, sí te, tɔ́n ahwan lɛ̌ngbɔ́nyitɔ́ ɔ́, lɛ̌ngbɔ́nyitɔ́ e un sɔ́ bɔ é ná wa azɔ̌ xá mì é. Hu i, énɛ́ ɔ́ lɛ̌ngbɔ́ lɛ́ɛ ná gba dó, bɔ un ná tɔ́n ahwan lɛ̌ngbɔ́ e má ɖó hlɔ̌nhlɔ́n ǎ lɛ́ɛ.” Mawu Mavɔmavɔ lɛ́ ɖɔ: “Mɛ e ɖo to ɔ́ mɛ lɛ́ɛ ɔ́, è mǎ yě ɖó donu atɔn ɔ́, donu we ná kú, ɖokpó e kpo ɔ́ jɛ́n ná gán. Un ná zé atɔnvlɔ́ɖó énɛ́ ɔ́ dó myɔ mɛ, bó ná ɖe nǔ kwíji e ɖo yě wú ɔ́ síin, lě e è nɔ zé kpatágan dó myɔ mɛ bó nɔ ɖe nǔ blíblí e ɖ'é mɛ lɛ́ɛ síin é ɖɔhun. Un ná tɛ́n yě kpɔ́n lě e è nɔ tɛ́n siká kpɔ́n gbɔn ɖo myɔ mɛ é. Énɛ́ ɔ́, yě ná sú xó ylɔ́ mì, bɔ un ná yí gbe nú yě. Un ná ɖɔ: ‘Togun ce wɛ mi nyí’, bɔ yě ná nɔ yí gbe ɖɔ: ‘Nǔgbó wɛ Mawu Mavɔmavɔ, hwi wɛ nyí Mawu mǐtɔn!’ ” Gbe e gbe Mawu Mavɔmavɔ ná sin xomɛ ɔ́ ɖo sisɛkpɔ́ wɛ. Jeluzalɛ́munu lɛ́ɛ mi, è nǎ mǎ dɔkun mitɔn lɛ́ɛ ɖo nukún mitɔn mɛ. Mawu Mavɔmavɔ ná kplé akɔta lɛ́ɛ bǐ, bɔ yě ná tɔ́n ahwan Jeluzalɛ́mu. Yě ná yí toxo ɔ́, yě ná bɛ́ nǔ e ɖo xwé lɛ́ɛ gbe lɛ́ɛ, bó ná hwlɛ́n kan xá nyɔ̌nu lɛ́ɛ, bó ɖó xó xá yě. È nǎ wlí mɛ e ɖo toxo ɔ́ mɛ lɛ́ɛ vlɔ̌ɖówe yi kannumɔgbénu. Amɔ̌, è nǎ vívá mɛ e ná kpo ɖo toxo ɔ́ mɛ lɛ́ɛ sín kún ǎ. Mawu Mavɔmavɔ ná wá, bó ná fun ahwan xá akɔta énɛ́ lɛ́ɛ. É ná fun ahwan lě e é kó nɔ́ fun gbɔn ahwan hwenu é. Mawu Mavɔmavɔ ná nɔ te ɖo olívutín só e ɖo Jeluzalɛ́mu ɔ́ nukɔn, ɖo zǎnzǎnhwe jí ɔ́ jí. Olívutín só ɔ́ ná zɛ ɖó we sín zǎnzǎnhwe jí yi gbadahwe jí, bɔ tɔdo ɖaxó ɖokpó ná tɔ́n: só ɔ́ akpá ɖokpó ná yi totaligbé, bɔ akpá wegɔ́ ɔ́ ná yi tofɔligbé. Énɛ́ ɔ́, mi ná hɔn yi tɔdo e ɖo só ce lɛ́ɛ tɛ́ntin é mɛ, ɖó tɔdo ɔ́ ná gbló ada káká yi Asálu. Mi ná hɔn lě e tɔ́gbó mitɔn lɛ́ɛ hɔn gbɔn hwenu e ayǐkúngban dán wǔ axɔ́sú Judáa tɔn Oziyási hwenu é. Mawu Mavɔmavɔ, Mawu ce ná wá, é kpódó wɛnsagun tɔn lɛ́ɛ bǐ kpó. Wěziza ná ɖe hwenɛ́nu ǎ. Jɔhɔn ná gbɛ́ ǎ, kɛ́njí ná ja ǎ. Hwenu ɖé wɛ hwenu énɛ́ ɔ́ ná nyí, bɔ Mawu Mavɔmavɔ ɖokpónɔ wɛ tunwun. Kéze ná ɖo te hwebǐnu, bɔ è sɔ́ ná tunwun kéze ɖó vo nú zǎn ǎ; gbadanu na bo su ɔ́, gbɛmɛ ná za wě. Hwenɛ́nu ɔ́, tɔjɔtɛn ɖé ná tɔ́n ɖo Jeluzalɛ́mu. Sin e ná nɔ́ tɔ́n sín tɔjɔtɛn énɛ́ ɔ́ mɛ ɔ́ akpá ɖokpó ná nɔ́ sa yi Xu Kúkú mɛ, bɔ akpá ɖokpó ná nɔ sa yi Mɛditɛlanɛ́ɛ xu mɛ. Sin ɔ́ ná nɔ sa mɔ̌ alǔun mɛ kpó jǐ hwenu kpó. Hwenɛ́nu ɔ́, Mawu Mavɔmavɔ ná nyí ayǐkúngban ɔ́ bǐ sín axɔ́sú. Mawu Mavɔmavɔ ɖokpónɔ géé wɛ è nǎ nɔ́ sɛn, nyǐkɔ tɔn ɖokpónɔ géé wɛ gbɛtɔ́ lɛ́ɛ bǐ ná nɔ́ ylɔ́. To ɔ́ bǐ ná húzú, bó ná cí ayǐkúngban wɛnjɛ ɖɔhun sín Gɛva, ɖo totaligbé yi Hlimumɔ́ni, ɖo tofɔligbé. Jeluzalɛ́mu ná yi jǐ hú to e lɛ́ lɛ̌ dó e lɛ́ɛ, bó ná gbló sín Bɛnjamɛ́ɛ hɔn ɔ́ kɔn, káká yi fí e hɔn nukɔntɔn ɔ́ ɖe ɔ́, káká yi hɔn e ɖo zwe lɛ́ɛ mɛ ɔ́ kɔn, bó ná gosín Hananɛ́li sín síngbó ɔ́ kɔn, káká yi vɛ̌ɛnto axɔ́sú ɔ́ tɔn lɛ́ɛ kɔn. È nǎ jɛ toxo ɔ́ mɛ, mɛ ɖé sɔ́ ná ɖo adǎn jí ɖɔ émí ná gba toxo ɔ́ ǎ. Ayi ná jɛ ayǐ ɖo Jeluzalɛ́mu. Togun e yi ahwan fun xá Jeluzalɛ́mu gbé lɛ́ɛ ɔ́, tó e Mawu Mavɔmavɔ ná dɔn nú yě ɔ́ ɖíe: yě ná ɖo gbɛ céɖécéɖé, bɔ lan yětɔn ná nyɔ, nukún yětɔn lɛ́ɛ ná nyɔ ɖo akpa mɛ, bɔ ɖɛ̌ yětɔn lɛ́ɛ lɔmɔ̌ ná nyɔ ɖo nu mɛ. Hwenɛ́nu ɔ́, Mawu Mavɔmavɔ ná dó hunnyahunnya ɖaxó ɖé yě mɛ. Yě ná húzú kpan nukɔn yěɖée, bɔ mɛ ɖokpó ɖokpó ná tɔ́n ahwan nɔzo tɔn. Súnnu Judáa tɔn lɛ́ɛ ná fun ahwan bó ná jɛ ahwan Jeluzalɛ́mu jí. Yě ná bɛ́ akɔta e lɛ́ lɛ̌ dó e lɛ́ɛ sín dɔkun lɛ́ɛ bǐ. Yě ná bɛ́ siká, kpatágan, kpódó avɔ kpó, bɔ é ná sukpɔ́ ɖésú. Nǔ e gbo mɛ e tɔ́n ahwan Jeluzalɛ́munu lɛ́ɛ wɛ ná gbo kanlin yětɔn lɛ́ɛ bǐ: sɔ́ lɛ́ɛ, sɔ́tócí lɛ́ɛ, lǎkúnmí lɛ́ɛ, kpó tócí lɛ́ɛ kpó. Hwenɛ́nu ɔ́, mɛ e ná gán ɖo akɔta e wá tɔ́n ahwan Jeluzalɛ́mu lɛ́ɛ mɛ lɛ́ɛ bǐ ná nɔ́ yi Jeluzalɛ́mu xwewú xwewú, bó ná nɔ́ yi sɛn Mawu Mavɔmavɔ axɔ́sú Nǔbǐwúkpétɔ́ ɔ́, bó ná nɔ́ ɖu azavaxwe ɔ́. Ényí togun e ɖo ayǐkúngban jí lɛ́ɛ ɖokpó gɔn Mawu Mavɔmavɔ Nǔbǐwúkpétɔ́ yi sɛn ɖo Jeluzalɛ́mu ɔ́, jǐ ná ja ɖo to tɔn mɛ ǎ. Ényí Ejípunu lɛ́ɛ gbɛ́ ɖɔ émí kún ná yi Jeluzalɛ́mu bo yi ɖu azavaxwe ɔ́ ó ɔ́, awě e xo akɔta ɖě lɛ́ɛ e gbɛ́ ɖɔ émí kún ná yi ɖu xwe ɔ́ ó lɛ́ɛ, ɖokpó ɔ́ wɛ ná xo yě lɔmɔ̌. Ényí Ejípu kpó akɔta ɖé kpó ma yi ɖu azavaxwe ɔ́ ǎ ɔ́, tó e Mawu Mavɔmavɔ ná dɔn nú yě ɔ́ nɛ́. Hwenɛ́nu ɔ́, è nǎ wlán dó gan e è dǒ kɔ nú sɔ́ lɛ́ɛ é wú é ɖɔ: “È sɔ́ ɖó vo nú Mawu Mavɔmavɔ”. Bɔ ganzɛ́n e ɖo Mawu Mavɔmavɔ xwé gbe lɛ́ɛ ɔ́, è nǎ sɔ́ yě lɔ ɖó vo nú Mawu Mavɔmavɔ kɔ́fu e ɖo vɔ̌sákpe ɔ́ nukɔn lɛ́ɛ ɖɔhun. Ganzɛ́n e ɖo Jeluzalɛ́mu é kpó éé ɖo Judáa é kpó bǐ wɛ è nǎ sɔ́ ɖó vo nú Mavɔmavɔ Nǔbǐwúkpétɔ́ ɔ́. Mɛ e ná xwlé vɔ̌sánú Mawu Mavɔmavɔ lɛ́ɛ bǐ ɔ́, ganzɛ́n énɛ́ lɛ́ɛ wɛ yě ná nɔ́ zán dó ɖa kanlin e yě hu lɛ́ɛ ná. Nǔsatɔ́ ɖě sɔ́ ná ɖo Mawu Mavɔmavɔ Nǔbǐwúkpétɔ́ ɔ́ sín xwé gbe hwenɛ́nu ǎ. Wɛn e Mawu Mavɔmavɔ dó sɛ́ dó Izlayɛ́li ví lɛ́ɛ gbɔn Malacíi jí é. Mawu Mavɔmavɔ ɖɔ nú Izlayɛ́li ví lɛ́ɛ ɖɔ: “Un yí wǎn nú mi.” Yě kanbyɔ́ ɛ ɖɔ: “Fítɛ́ nǔ e ɖe xlɛ́ ɖɔ a yǐ wǎn nú mǐ ɔ́ ɖe?” Mawu Mavɔmavɔ yí gbe bo ɖɔ: “Esawu ɔ́, Jakɔ́bu sín nɔví wɛ é nyí ǎ cé? Có un yí wǎn nú Jakɔ́bu, bó ká gbɛ́ wǎn nú Esawu. Un vɔ ayǐkúngban e jí só lɛ́ɛ ɖe bɔ Esawu ví lɛ́ɛ, yě mɛ e è nɔ ylɔ́ ɖɔ Edɔ́munu lɛ́ɛ ɖe é; un jó to yětɔn dó nú avǔn gbě tɔn e nɔ́ nɔ gbětótló mɛ lɛ́ɛ. Mɛ énɛ́ lɛ́ɛ hɛn ɔ́, yě sixú ɖɔ: ‘È hɛn nǔ mǐtɔn bǐ gblé. Amɔ̌, mǐ na lɛ́ vɔ́ toxo mǐtɔn bló ɖó.’ Nǔ e ɖɔ wɛ nyɛ Mawu Mavɔmavɔ Nǔbǐwúkpétɔ́ ɔ́ ká ɖe é ɖíe: yě ní lɛ́ vɔ́ toxo yětɔn lɛ́ɛ bló ɖó; nyɛ ná lɛ́ hɛn nǔ e yě wa lɛ́ɛ bǐ gblé. Mɛ lɛ́ɛ ná sun nyǐ yě ɖɔ: ‘To e mɛ nǔ nyanya ɖo axɔ́sú ɖu ɖe wɛ é’, bó ná sun nyǐ yě ɖɔ: ‘Togun e Mawu Mavɔmavɔ ma nɔ gɔn xomɛsin dó ǎ é.’ Mi Izlayɛ́li ví lɛ́ɛ na mɔ nǔ énɛ́ lɛ́ɛ bǐ, bó ná ɖɔ: ‘Mawu Mavɔmavɔ nɔ ɖe hlɔ̌nhlɔ́n tɔn xlɛ́ ɖo to e ma tlɛ ɖo Izlayɛ́li yíkúngban jí ǎ lɛ́ɛ lɔ mɛ.’ ” Mawu Mavɔmavɔ Nǔbǐwúkpétɔ́ ɔ́ ɖɔ nú vɔ̌sánú-xwlémawutɔ́ lɛ́ɛ ɖɔ: “Vǐ súnnu nɔ gbo gbě nú tɔ́ tɔn, bɔ mɛsɛntɔ́ nɔ gbo gbě nú gǎn tɔn. Nyɛ ɔ́, é ma ka nyí tɔ́ wɛ un nyí nú mi bo lɛ́ nyí gǎn nú mi ǎ cé? Bɔ étɛ́wú mi ma ka nɔ gbo gbě nú mì ǎ? Étɛ́wú wɛ mi ma ka nɔ sí mì ǎ? Mi nɔ ké ya nú mì ǎ, bó ká nɔ́ kanbyɔ́ mì ɖɔ: ‘Étɛ́ mɛ wɛ mǐ dó vɛ̌ nú we ɖe?’ Nǔɖuɖu e ma jɛ xá mì ǎ lɛ́ɛ wɛ mi nɔ sɔ́ wá vɔ̌sákpe ce jí. Mi nɔ ɖu su nú mì, bó ká nɔ ɖɔ: ‘Étɛ́ mɛ wɛ mǐ ká ɖu su nú we ɖe?’ Nǔ e mi wa dó ɖu su nú mì ɔ́ ɖíe: mi nɔ sɔ́ vɔ̌sákpe ce dó xo kɔ́ ná. Ée mi nɔ hɛn kanlin nukúntíntɔ́nnɔ, kanlin gǒ lílɔ́ ɖé, abǐ kanlin azinzɔnnɔ wá xwlé mì ɔ́, nǔ sɔgbe wa wɛ mi ɖe bó vɛdó a? Ényí mi yi ná kanlin mɔ̌hunkɔtɔn tokpɔngán ɔ́, é ná víví n'i bɔ é na ɖo gbesisɔ mɛ bo ná ná nǔ e ba wɛ mi ɖe ɔ́ mi wɛ mi vɛdó a? Nǔ wɛ nyí bɔ nyɛ Mawu Mavɔmavɔ Nǔbǐwúkpétɔ́ ɔ́ ɖo kinkanbyɔ́ mi wɛ. Din ɔ́, mi wá cikpɛ nú nyɛ Mawu mitɔn, bónú má kú nǔbláwǔ nú togun ce. Din e mi ko dó nǔ énɛ́ ɔ́ sin ɔ́, mi vɛdó ɖɔ un ná ɖótó mi bo yí ɖɛ mitɔn wɛ sín a? Gbeɖé kpɔ́n! Ényí mi ɖokpó gbɔ bó yi sú sinsɛnxɔ ɔ́ sín hɔn lɛ́ɛ ɔ́, é ná nyɔ́ hú. Énɛ́ ɔ́, mi sɔ́ ná nɔ́ yi flɔ́ myɔ dó wǔvɔ́, ɖo vɔ̌sákpe ce jí ǎ. Nú un ná ɖɔ xó nǔgbó nú mi ɔ́, mi nɔ nyɔ́ mɔ nú mì ǎ, vɔ̌sánú e mi nɔ xwlé mì lɛ́ɛ nɔ́ nyɔ́ nukún ce mɛ ǎ. Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Sín zǎnzǎnhwe jí káká wá yi gbadahwe jí ɔ́, gbɛtɔ́ e ɖo ayǐkúngban ɔ́ jí lɛ́ɛ bǐ wɛ tunwun susu ce. Fí bǐ wɛ è nɔ dó zǎlínkpɔ́n zo ɖe dó ta ce mɛ, bó nɔ́ hɛn vɔ̌sánú e jɛ xá mì lɛ́ɛ wá nú mì ɖe. Nǔgbó wɛ, akɔta lɛ́ɛ tunwun susu ce. Midɛɛ lɛ́ɛ ɔ́, mi ka nɔ zé susu ce dó xo kɔ́, bó nɔ́ mɔ ɖɔ é kún jɛ xá ɖɔ è nǐ ɖó sísí nú vɔ̌sákpe nyɛ Aklúnɔ tɔn ɔ́ ó, ɖɔ è hɛn ɔ́, è nǎ hɛn nǔɖuɖu e má nyɔ́ ǎ é wá vɔ̌sákpe ce jí. Mi nɔ ɖɔ: ‘Azɔ̌bamɛ ɖésú wɛ.’ Awɔntín nyɛ́ dó ta nú nyɛ Mawu Mavɔmavɔ Nǔbǐwúkpétɔ́ ɔ́ wɛ mi ɖe. Mi nɔ ná kanlin e mi fin lɛ́ɛ mì. Kanlin e lɔ́ gǒ, abǐ éé ɖo azɔn jɛ wɛ lɛ́ɛ wɛ mi nɔ ná mì. Nɛ̌ un ka sixú yí gbe nú vɔ̌sánú mɔ̌hunkɔtɔn lɛ́ɛ gbɔn? Nǔ wɛ nyí bɔ un kanbyɔ́ mi. Heelú nǔhízítɔ́ e ɖó kanlinsú ɖagbe ɖo kanlin tɔn lɛ́ɛ mɛ, bó ká nɔ́ zé kanlin e ma ɖo ganjí ǎ ɖó vo, bó ná zé dó sá vɔ̌ nú mì é. Heelú i, ɖó axɔ́sú ɖaxó ɖokpó wɛ un nyí, bɔ akɔta lɛ́ɛ bǐ nɔ ɖi xɛsi nú hlɔ̌nhlɔ́n ce.” Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Mawu Mavɔmavɔ ɖɔ: “Din ɔ́, mi vɔ̌sánú-xwlémawutɔ́ lɛ́ɛ mi, mi ɖɔ xó élɔ́ ná wɛ nyɛ Mawu Mavɔmavɔ Nǔbǐwúkpétɔ́ ɔ́ ɖe. Ényí mi ma ɖótó mì ǎ ɔ́, ényí mi ma sɔ́ dó ayi mɛ ɖɔ mi ná sɔ́ nyǐkɔ ce su ǎ ɔ́, un ná sɛ́ nyladó dó mi, bó ná hɛn nyɔ̌ná mitɔn lɛ́ɛ gblé. Nǔgbó wɛ, un dó nu mi, ɖó mi sɔ́ dó ayi mɛ ǎ. Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Éɖíe, un ná wa nǔ xá vǐ mitɔn lɛ́ɛ; un ná kɔn kanlinmí dó nukún mɛ nú mi; un ná kɔn kanlin e mi nɔ dó sá vɔ̌ lɛ́ɛ sín mǐ dó nukún mɛ nú mi, bɔ è nǎ bɛ́ mi kpó kanlinmí ɔ́ kpó kɔn nyi gbě. Énɛ́ ɔ́, mi ná tunwun ɖɔ un ɖe gbeta énɛ́ tɔ́n nú mi, bónú akɔ e un jɛ xá Levíi ɔ́ ná nɔ te káká sɔ́yi. Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Akɔ e un jɛ xá ɛ ɔ́, gbɛ kpó fífá kpó sín akɔ wɛ. Un jɛ akɔ énɛ́ xá ɛ, bónú é na ɖó sísí nú mì. É ká ɖó sísí nú mì nǔgbó. É nɔ́ sísɔ́ ɖo nukɔn ce. Nǔgbó ɖo nu tɔn. Xó nyanya ɖé nɔ́ tɔ́n sín nu tɔn mɛ ǎ. É ɖó gbe kpɔ́ xá mì bó nɔ́ wa nǔ jlɔ́jlɔ́. É ɖe mɛ gěgé sín nǔ nyanya wiwa li jí. Nǔgbó wɛ, vɔ̌sánú-xwlémawutɔ́ ɔ́, azɔ̌ tɔn wɛ nyí é ní kplɔ́n nǔ mɛ lɛ́ɛ, nú yě ná tunwun nyɛ Mawu. É wɛ mɛ lɛ́ɛ nɔ wá kan nǔ byɔ́ dó sɛ́n e yě ná nyi lɛ́ɛ wú, ɖó é wɛ nyí ɖɛ̌mɛnu nyɛ Mawu Mavɔmavɔ Nǔbǐwúkpétɔ́ ɔ́ tɔn. Lo ɔ́, mi vɔ̌sánú-xwlémawutɔ́ lɛ́ɛ ɔ́, mi wa azɔ̌ mitɔn énɛ́ ɔ́ ǎ; nǔ e mi nɔ kplɔ́n mɛ lɛ́ɛ zɔ́n bɔ mɛ gěgé bú ali. Mi hɛn akɔ e un jɛ xá mi ɔ́ gblé.” Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. É lɛ́ ɖɔ: “Nyɛ ɔ́, un ná fɔ́n Izlayɛ́li togun ɔ́ bǐ dó mi jí, bɔ é ná gbɛ́ wǎn nú mi, bó dó winnyá mi, ɖó jlǒ ce e mi ma nɔ́ wa ǎ, kpó gbɛtɔ́ jí e mi nɔ́ nɔ bó má nɔ́ nɔ xó jí ǎ é kpó wú.” Mǐ bǐ wɛ ɖó tɔ́ ɖokpó ɔ́ ǎ cé? Mawu ɖokpó ɔ́ wɛ ɖó mǐ bǐ ǎ cé? Étɛ́wú wɛ mǐ ma ka nɔ nɔ gbejí nú mǐɖée ǎ, bó nɔ́ hɛn akɔ e Mawu jɛ xá tɔ́gbó mǐtɔn lɛ́ɛ ɔ́ gblé? Judáa mɛ lɛ́ɛ ɖe akpá e yě dó ɔ́ ǎ. Yě wa nǔdábaɖa lɛ́ɛ ɖo Jeluzalɛ́mu kpódó Izlayɛ́li to ɔ́ bǐ kpó mɛ. Nǔgbó ɔ́, yě ké ya nú tɛn mímɛ́ e xɔ akwɛ́ ɖo Mawu Mavɔmavɔ nukún mɛ ɔ́ ǎ, bó da nyɔ̌nu e nɔ sɛn vodún lɛ́ɛ. Mawu Mavɔmavɔ ná ɖe mɛ e nɔ wa nǔ gbɔn mɔ̌ ɔ́ sín Jakɔ́bu ví lɛ́ɛ mɛ, bɔ é sɔ́ ná nɔ́ sá vɔ̌ ɖě nú Mawu Mavɔmavɔ Nǔbǐwúkpétɔ́ ɔ́ ǎ. Nǔ e mi nɔ lɛ́ bló ɔ́ ɖíe: mi nɔ ya avǐ, bɔ ɖasin mitɔn nɔ sa gbɔn vɔ̌sákpe Mawu Mavɔmavɔ tɔn jí. Mi nɔ ya avǐ bó nɔ wɛn azɔn, ɖó Mawu Mavɔmavɔ sɔ́ nɔ́ ké ya nú vɔ̌sánú mitɔn lɛ́ɛ ǎ, é ka sɔ́ nɔ yí nǔ e mi nɔ hɛn wá n'i lɛ́ɛ ɖě ǎ. Énɛ́ ɔ́, mi nɔ kanbyɔ́ ɖɔ étɛ́wú ká wɛ? Nǔ e wú wɛ ɔ́ ɖíe: mi dó akpá ɖo Mawu Mavɔmavɔ nukɔn ɖɔ émí ná nɔ gbejí nú asi e mi da ɖo wǐnnyáwínnyá mɛ é. Asi mitɔn wɛ é nyí, mi wɛ da cóbó ka lɛ́ jó e dó. É ma ka nyí mɛ ɖokpó wɛ Mawu Mavɔmavɔ sɔ́ mi kpódó é kpó dó bló ɖo agbaza kpódó yɛ kpó mɛ ǎ cé? Étɛ́ wɛ mɛ ɖokpó énɛ́ ɔ́ ká jló? É má nyí ɖɔ é na ji vǐ e Mawu na ɛ lɛ́ɛ wɛ ǎ cé? Mi bo cɔ́ miɖée. Mi ma gbɛ́ nyɔ̌nu e mi da ɖo wǐnnyáwínnyá mɛ ɔ́ ó. Mawu Mavɔmavɔ, Mawu Izlayɛ́li tɔn, Mawu Mavɔmavɔ Nǔbǐwúkpétɔ́ ɔ́ ɖɔ: “Un gbɛ́ wǎn nú asigbígbɛ́ abǐ asúgbígbɛ́, bó lɛ́ gbɛ́ wǎn nú mɛ e nɔ xo dǎka lɛ́ɛ. Mi bo cɔ́ miɖée, mi ma gɔn akpá e mi dó lɛ́ɛ ɖe ó.” Xó mitɔn lɛ́ɛ nɔ́ kpé agbɔ̌n nú Mawu Mavɔmavɔ; mi ka nɔ kanbyɔ́ ɖɔ: “Xó tɛ́ e tɛ́ é mǐ ká nɔ́ ɖɔ bɔ é nɔ́ kpé agbɔ̌n n'i?” Éɖíe, má ɖɔ nú mi. Xó élɔ́ lɛ́ɛ e mi nɔ ɖɔ ɔ́ wɛ nɔ́ kpé agbɔ̌n nú mì. Mi nɔ ɖɔ: “Mawu Mavɔmavɔ nɔ́ sɔ́ nukún ɖagbe dó kpɔ́n mɛ e nɔ wa nǔ nyanya lɛ́ɛ. Mɛ mɔ̌hunkɔ lɛ́ɛ sín nǔ wɛ nɔ́ nyɔ́ nukún tɔn mɛ.” Mi nɔ lɛ́ ɖɔ: “Fítɛ́ Mawu hwɛjijɔnɔ ɔ́ ka ɖe?” Xósin e Mawu Mavɔmavɔ Nǔbǐwúkpétɔ́ ɔ́ ná mi ɔ́ ɖíe: “Un sɛ́ wɛnsagun ce dó, bɔ é ná bló ali ce ɖó. Mawu Mavɔmavɔ e ba wɛ mi ɖe ɔ́ ná wá sinsɛnxɔ tɔn mɛ ɖo ajijimɛ. Wɛnsagun e nɔ te kpɔ́n wɛ mi ɖe ɔ́ ná jlá akɔ ce e un ná jɛ xá mi ɔ́ sín xó. Éɖíe, é jǎwe. Mɛ ɖé na sixú gán hwenu e é na wá dó é ǎ. Hwenu e é ná ɖe éɖée xlɛ́ ɔ́, mɛɖé ná sixú nɔ te nukɔn tɔn ǎ. É na cí fletuntɔ́ sín myɔ ɖɔhun. É ná cí avɔnyatɔ́ sín aɖǐ ɖɔhun. É ná jɛ fínɛ́, bó ná za zunkɔ́ lɛ́ɛ, bó ná ɖe nǔ kwíji lɛ́ɛ síin. É ná slá wǔ nú Levíi ví vɔ̌sánú-xwlémawutɔ́ lɛ́ɛ bǐ dégbédégbé, lě e è nɔ́ xo zo dó siká kpódó kpatágan kpó, bó nɔ́ ɖe nǔ kwíji sín mɛ gbɔn é, bɔ vɔ̌sánú-xwlémawutɔ́ énɛ́ lɛ́ɛ ná xwlé vɔ̌sánú yětɔn lɛ́ɛ Mawu Mavɔmavɔ, lě e è nɔ́ bló gbɔn ɖ'ayǐ é. Mawu Mavɔmavɔ ná yí vɔ̌sánú Judáanu lɛ́ɛ tɔn kpódó Jeluzalɛ́munu lɛ́ɛ tɔn kpó, kpódó xomɛhunhun kpó, lě e é kó nɔ́ wa gbɔn ɖ'ayǐ, ɖo xwe e ko wá yi lɛ́ɛ mɛ é. Mawu Mavɔmavɔ Nǔbǐwúkpétɔ́ ɔ́ ɖɔ: ‘Un ná wá tɛ́ntin mitɔn, bó ná ɖɔ hwɛ xá mi. Un ná hwlɛndó, bó ná dó hwɛ mɛ e nɔ wa bǒ lɛ́ɛ, mɛ e nɔ lɛ aga lɛ́ɛ, mɛ e nɔ dó akpá bó má nɔ́ ɖe ǎ lɛ́ɛ, mɛ e ma nɔ sú axɔ́ azɔ̌watɔ́ ǎ lɛ́ɛ, mɛ e nɔ táfú asúkúsi kpó tɔ́cyɔvǐ kpó, abǐ mɛ e nɔ́ jɛ agɔ dó jǒnɔ lɛ́ɛ, kpódó mɛ e ma nɔ ké ya ɖěbǔ nú mì ǎ lɛ́ɛ bǐ kpó.’ ” “Nyɛ Mawu Mavɔmavɔ ɔ́, un nɔ húzú ǎ, midɛɛ lɛ́ɛ ɔ́, mi ka gɔn Jakɔ́bu ví titewungbe lɛ́ɛ nyí ǎ. Mi hɔn nú nǔkplɔ́nmɛ ce lɛ́ɛ tɔ́gbó mitɔn lɛ́ɛ ɖɔhun, mi se tónú nú nǔkplɔ́nmɛ ce lɛ́ɛ ǎ. Mi bo lɛ́ kɔ wá gɔ̌n ce, énɛ́ ɔ́, un ná lɛ́ kɔ wá mi gɔ́n. Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Mi ka ɖɔ: ‘Nɛ̌ mǐ ká sixú lɛ́ kɔ wá gɔ̌n towe gbɔn?’ Gbe e un ná yí nú mi ɔ́ ɖíe: Nǔ ɖagbe wɛ é nyí ɖɔ è nǐ jɛ ajo dó Mawu a? Mi ka nɔ jɛ ajo dó mì, bó nɔ́ kanbyɔ́ mì ɖɔ: ‘Étɛ́ wɛ mǐ fin dó we?’ Mǎɖówǒ kpó vɔ̌sánú lɛ́ɛ kpó wɛ mi fin dó mì. Cekúnnu heelú wɛ nyí bó ɖo kɔ mitɔn, ɖó mi nɔ jɛ ajo dó mì, mi togun ɔ́ bǐ. Mawu Mavɔmavɔ Nǔbǐwúkpétɔ́ ɔ́ ɖɔ: ‘Mi hɛn mǎɖówǒ lɛ́ɛ gbesisɔ tɔn wá sinsɛnxɔ ce mɛ, bónú nǔɖuɖu ná tíin ɖo xwé ce gbe. Mi bló gbɔn mɔ̌ bó dó tɛ́n mì kpɔ́n, bó ná kpɔ́n ɖɔ un ma ná hun sɛ́xwé hɔn lɛ́ɛ ɖó nuvo nú mi a jí; un ma ná kɔn nyɔ̌ná dó mi jí bɔ é ná túnflá a jí. Un ná sú ali dó nǔvínúví lɛ́ɛ bɔ yě ná ɖu nǔ e mi dó lɛ́ɛ ǎ; bɔ vǐwuntín mitɔn lɛ́ɛ ná gɔn sínsɛ́n ǎ. Akpá tɔn wɛ un dó nú mi. Akɔta lɛ́ɛ bǐ ná nɔ́ ylɔ́ mi ɖɔ nyɔ̌nánɔ, ɖó to mitɔn ná nyí awǎjijɛ sín to.’ ” Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌. Mawu Mavɔmavɔ ɖɔ: “Mi nɔ dó mɛmasígbe nú mì, bó ká nɔ́ ɖɔ: xó towe nyanya tɛ́ mǐ ká nɔ́ ɖɔ ɖo mǐɖée tɛ́ntin? Nǔ e mi nɔ ɖɔ ɔ́ ɖíe: ‘Mawu sinsɛn ɔ́, nǔ yǎyá wɛ é nyí. Mǐ se tónú nú nǔ e é zɔ́n lɛ́ɛ, bó ká ɖo aluwɛ mɛ, mɛ e cyɔ kú lɛ́ɛ ɖɔhun ɖó Mawu Mavɔmavɔ Nǔbǐwúkpétɔ́ ɔ́ wútu; le tɛ́ wɛ ɖ'é mɛ nú mǐ.’ ” Mi nɔ lɛ́ ɖɔ: “Mǐ mɔ din lo ɖɔ jimakplɔ́n lɛ́ɛ wɛ nǔ nyɔ́ ná, bɔ gbɛ ɔ́ nɔ́ hun ali nú nǔnyanyawatɔ́ lɛ́ɛ. Yě ná bó ɖo xó ba Mawu wɛ ɔ́, yě nɔ́ gán ɖ'é mɛ jɛ́n wɛ.” Énɛ́ ɔ́, mɛ e nɔ hwíhwɛ́ yěɖée dó Mawu Mavɔmavɔ glɔ́ lɛ́ɛ ɖɔ xó nú yěɖée. Mawu Mavɔmavɔ ɖótó yě, é se nǔ e yě ɖɔ ɔ́. È wlǎn mɛ e tunwun Mawu Mavɔmavɔ, bó nɔ́ sí i lɛ́ɛ sín nyǐkɔ dó wěma mɛ ɖo nukɔn tɔn. Bɔ Mawu Mavɔmavɔ Nǔbǐwúkpétɔ́ ɔ́ ɖɔ: “Gbe e gbe un ná ɖe hlɔ̌nhlɔ́n ce xlɛ́ ɔ́, un ná zé mɛ énɛ́ lɛ́ɛ dó ɖó mɛ ce ná. Yě ná nyí togun ce, un ná nyɔ́ xomɛ dó yě wú lě e tɔ́ nɔ́ nyɔ́ xomɛ dó vǐ e nɔ́ sɛn ɛ ɔ́ wú gbɔn é. Mi ná lɛ́ vɔ́ mɔ vogbingbɔn e ɖo hwɛjijɔnɔ lɛ́ɛ kpódó mɛdídá lɛ́ɛ kpó tɛ́ntin é, vogbingbɔn e ɖo mɛ e nɔ sɛn mì kpó mɛ e ma nɔ sɛn mì ǎ lɛ́ɛ kpó tɛ́ntin é.” Mawu Mavɔmavɔ Nǔbǐwúkpétɔ́ ɔ́ ɖɔ: “Xomɛsinzán ce jǎwe, bó cí myɔkpó e mɛ zo hɛhɛ ɖe ɔ́ ɖɔhun. Azǎn énɛ́ gbe ɔ́, è nǎ dó jimakplɔ́n lɛ́ɛ kpó nǔnyanyawatɔ́ lɛ́ɛ kpó zo, bɔ yě ná ji sɛ ɖɔhun. Đɔ kpó ala kpó ɖě sɔ́ ná kpo ǎ. Amɔ̌, hwɛjijɔ ná hɔ́n dó mi mɛ e nɔ sí mì lɛ́ɛ jí hwesivɔ́ ɖɔhun, bɔ azɔn mitɔn ná gbɔ. Mi ná tɔ́n bó ná lɔ́n yi jǐ nyibúví e ɖo wutó mɛ tɔ́n sín wɛ ɔ́ ɖɔhun. Gbe e gbe un ná ɖe hlɔ̌nhlɔ́n ce xlɛ́ ɔ́, mi na li mɛdídá lɛ́ɛ, yě ná cí afúntúntún ɖɔhun ɖo afɔ mitɔn lɛ́ɛ glɔ́. Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.” Mi flín nǔ e mɛsɛntɔ́ ce Mɔyízi kplɔ́n mi é. Mi se tónú nú tito kpódó sɛ́n e un sɔ́ dó así n'i ɖo Holɛ́bu só ɔ́ jí nú togun Izlayɛ́li tɔn ɔ́ bǐ é kpó. “Éɖíe, cóbónú azǎn Mawu Mavɔmavɔ tɔn, azǎn ɖaxó e è ɖǒ ná ɖi xɛsi ná ɔ́ ná wá ɔ́, un ná sɛ́ gbeyíɖɔ ce Elíi dó. È nǎ dó hwɛ gbɔ nú tɔ́ lɛ́ɛ kpó vǐ yětɔn lɛ́ɛ kpó, bó ná dó hwɛ gbɔ nú vǐ lɛ́ɛ kpó tɔ́ yětɔn lɛ́ɛ kpó. Énɛ́ ɔ́, un sɔ́ ná wá gba to mitɔn ǎ.” Wěma e ɖɔ xó dó Jezu Klísu, Davídi ví, Ablaxámu ví ɔ́ sín tɔ́gbó tɔgbo lɛ́ɛ wú ɔ́ ɖíe: Ablaxámu ji Izáki, Izáki ka ji Jakɔ́bu, bɔ Jakɔ́bu ji Juda kpódó nɔví tɔn lɛ́ɛ kpó. Juda ji Pɛlɛ́si kpódó Zeláxi kpó ɖo Tamáa xomɛ; Pɛlɛ́si ji Hɛklɔ́ni, bɔ Hɛklɔ́ni ji Alamu; Hlamu ji Aminadabu, Aminadabu ji Naxicɔ́ni, bɔ Naxicɔ́ni ji Saluma. Saluma ji Bowozi ɖo Hlaxábu xomɛ; Bowozi ji Ovɛ́di ɖo Hwliti xomɛ, bɔ Ovɛ́di ji Jɛsée; Jɛsée ka ji Davídi axɔ́sú ɔ́. Davídi ji Salomɔ́ɔ ɖo Ulíi e kú ɔ́ sín asi xomɛ; Salomɔ́ɔ ji Hlobowámu; Hlobowámu ji Abiya, bɔ Abiya ji Asa. Asa ka ji Jozafáti; Jozafáti ji Jolámu, bɔ Jolámu ji Oziasi. Oziasi ji Yotámu, Yotámu ji Akázi, bɔ Akázi ji Ezekiyási; Ezekiyási ka ji Manasée; Manasée ji Amɔ́ni, bɔ Amɔ́ni ji Joziyási; Joziyási ka ji Jekoniyási kpódó nɔví tɔn lɛ́ɛ kpó hwenu e ahwan wlí mɛ lɛ́ɛ hɛn yi Babilɔ́nu é. Ée è bɛ̌ mɛ lɛ́ɛ yi Babilɔ́nu gúdo ɔ́, Jekoniyási ji Calutiyɛ́li, bɔ Calutiyɛ́li ji Zolobabɛ́li; Zolobabɛ́li ka ji Abiwúdi; Abiwúdi ji Eliakímu, bɔ Eliakímu ji Azɔ́ɔ; Azɔ́ɔ ka ji Sadɔ́ki; Sadɔ́ki ji Akímu, bɔ Akímu ji Eliwúdi; Eliwúdi ji Eleazáa; Eleazáa ji Matáan, bɔ Matáan ji Jakɔ́bu; Jakɔ́bu ji Jozɛ́fu e da Mali é; Mali ka nyí Jezu e è nɔ ylɔ́ ɖɔ Klísu ɔ́ sín nɔ. Jijimɛ lɛ́ɛ bǐ sín kplékplé ɖíe: bɛ́ sín Ablaxámu jí wá jɛ Davídi jí ɔ́, é bló jijimɛ wɛ̌nɛ; sín Davídi jí wá jɛ hwenu e è bɛ̌ mɛ lɛ́ɛ yi Babilɔ́nu gúdo ɔ́, é bló jijimɛ wɛ̌nɛ; sín hwenu e è bɛ̌ kannumɔ yětɔn yi Babilɔ́nu káká wá jɛ Klísu sín hwenu ɔ́, é bló jijimɛ wɛ̌nɛ. Lě e è ji Jezu Klísu gbɔn ɔ́ ɖíe: Mali, Jezu sín nɔ ɔ́, asixɔ́ntɔn Jozɛ́fu tɔn wɛ é nyí; yě ká kó jɛ kpɔ́ cóbɔ é mɔ Jezu sín xo gbɔn Yɛsinsɛn sín nǔwiwa gbla mɛ ǎ. Jozɛ́fu Mali xɔ́ntɔn ɔ́, gbɛtɔ́ ɖé wɛ, bó nɔ́ nyi Mɔyízisɛ́n ɔ́ ganjí. É jló ná dó winnyá asi tɔn ǎ, bó ɖo linlin dó ayi mɛ wɛ ɖɔ émí ná jó e dó ɖo nǔglɔ́. Nǔ énɛ́ lin kpɔ́n wɛ é ɖe, bɔ wɛnsagun Aklúnɔ tɔn wá xo dlɔ̌ ɛ bó ɖɔ n'i ɖɔ: “Jozɛ́fu Davídi ví, xɛsi ma ɖi we, nú a gɔn Mali da ó; ɖó xo e é mɔ ɔ́, Yɛsinsɛn sín nǔwiwa wɛ. É ná ji vǐ súnnu ɖokpó, bɔ a nǎ sun nyǐ vǐ ɔ́ ɖɔ Jezu, ɖó é ná hwlɛ́n togun tɔn gán sín hwɛ tɔn lɛ́ɛ mɛ.” Nǔ e jɛ nɛ́ lɛ́ɛ bǐ sɔgbe xá xó e Aklúnɔ kó ɖɔ ɖ'ayǐ gbɔn gbeyíɖɔ tɔn jí é: “É ɖíe, nyɔ̌nu ɖo alɔjí ná mɔ xo, bó ná ji vǐ súnnu ɖokpó, bɔ è nǎ sun nyǐ i ɖɔ Emanuwɛ́li.” (Nyǐkɔ énɛ́ ɔ́ sín tínmɛ wɛ nyí: “Mawu ɖo kpɔ́ xá mǐ.”) Ée Jozɛ́fu fɔ́n sín amlɔ mɛ ɔ́, é bló nǔ e wɛnsagun Aklúnɔ tɔn ɖɔ n'i ɔ́ ɖ'é jí, bó yí asi tɔn dó xwé gbe. Lo ɔ́, é ɖó xó xá ɛ, káká cóbɔ é ji vǐ ɔ́ ǎ. Jozɛ́fu sun nyǐ vǐ ɔ́ ɖɔ Jezu. È ji Jezu ɖo Bɛteleyɛ́mu ɖo Juda yíkúngban jí, axɔ́sú Elódu hwenu; nǔnywɛ́tɔ́ e nɔ́ mɔ nǔ jɛ sun sín wuntun wú lɛ́ɛ ɖěe gosín zǎnzǎnhwe jí wá Jeluzalɛ́mu. Ée yě wá ɔ́, yě ɖɔ: “Fítɛ́ Jwifu lɛ́ɛ xɔ́sú e è ji ɔ́ ɖe? Ɖó mǐ mɔ sunví e ɖe jiji tɔn xlɛ́ ɔ́ ɖo zǎnzǎnhwe jí fí e mǐ gosín ɔ́, bó wá xwé kanbyɔ́ gbé.” Ée axɔ́sú Elódu se xó énɛ́ ɔ́, ayi tɔn bǐ gbadó é kpódó Jeluzalɛ́mu togun ɔ́ bǐ kpó, bɔ é ylɔ́ vɔ̌sánú-xwlémawutɔ́gán lɛ́ɛ bǐ kplé kpódó sɛ́nkplɔ́nmɛtɔ́ tɔn lɛ́ɛ kpó, lobo kan fí e è ɖǒ ná ji Klísu ɖe ɔ́ byɔ́ yě. Yě ká yí gbe n'i ɖɔ: “Bɛteleyɛ́mu, Judée yíkúngban jí wɛ, ɖó Mawu kó ɖɔ gbɔn gbeyíɖɔ tɔn lɛ́ɛ jí ɖɔ: ‘Hwɛ, Bɛteleyɛ́mu, toxo e ɖo Juda yíkúngban jí é! A ɖo tó ɖěbǔ ɖo Juda toxo ɖaxó lɛ́ɛ mɛ ǎ, ɖó agblo towe mɛ wɛ axɔ́sú ɖé ná tɔ́n ɖe, bó ná kpé nukún dó togun ce Izlayɛ́li wú.’ ” Elódu ka zɔ́n, bɔ è yi ylɔ́ nǔnywɛ́tɔ́ lɛ́ɛ wá n'i. Ée yě wá ɔ́, é kplá yě yi kpá, bo kan hwenu e sunví ɔ́ tɔ́n dó ɔ́ byɔ́ yě tlítlí. Énɛ́ gúdo ɔ́, é nyi nǔnywɛ́tɔ́ énɛ́ lɛ́ɛ sɛ́ dó Bɛteleyɛ́mu bó ɖɔ nú yě ɖɔ: “Mi yi ba do nú vǐ ɔ́ céɖécéɖé, mi ka mɔ ɛ hǔn, mi wá ɖɔ nú mì, nú nyɛ lɔmɔ̌ ná yi kan xwé byɔ́.” Énɛ́ ɔ́, yě byɔ́ xwé ɔ́ gbe, bó mɔ vǐ ɔ́ kpódó nɔ tɔn kpó, bó jɛ kpo, bó ɖe kɔ́ n'i; yě hun gbǎví yětɔn lɛ́ɛ, bó kan agban n'i; yě ná ɛ siká, bó ná ɛ zǎlínkpɔ́n kpódó célu xɔ akwɛ́ ɖé kpán, bɔ è nɔ ylɔ́ célu ɔ́ ɖɔ Mǐla. Mawu ka wá xo dlɔ̌ yě ɖɔ yě ní ma sɔ́ lɛ́ kɔ gbɔn Elódu gɔ́n ó; bɔ yě wlí ali ɖěvo bo yi to yětɔn mɛ. Ée nǔnywɛ́tɔ́ énɛ́ lɛ́ɛ yi gúdo ɔ́, wɛnsagun Aklúnɔ tɔn wá xo dlɔ̌ Jozɛ́fu bó ɖɔ n'i ɖɔ: “Sí te, zě vǐ ɔ́, kplá nɔ tɔn, bó hɔn yi Ejípu; nɔ dɔ̌n káká yi jɛ hwenu e un ná lɛ́ wá ɖɔ xó nú we dó é. Ɖó Elódu ɖo vǐ ɔ́ ba ná hu wɛ.” Jozɛ́fu ka sí te zǎn ɔ́ mɛ nǔgbó, bó zé vǐ ɔ́, bó kplá vǐ ɔ́ sín nɔ, bɔ yě hɔn yi Ejípu, lobo nɔ fínɛ́ káká jɛ hwenu e Elódu kú é. Nǔ nyí mɔ̌, nú xó e Aklúnɔ ko ɖɔ ɖ'ayǐ gbɔn gbeyíɖɔ tɔn jí ɔ́ ná dó jɛ; é wɛ nyí ɖɔ: “Un ylɔ́ vǐ ce sín Ejípu.” Ée Elódu mɔ ɖɔ nǔnywɛ́tɔ́ lɛ́ɛ flú émí ɔ́, xomɛ sin i tlala. É kpɔ́n hwenu e è ji vǐ ɔ́ dó bɔ nǔnywɛ́tɔ́ lɛ́ɛ ɖɔ céɖécéɖé tɔn n'i ɔ́, bó sɛ́ mɛ dó ɖɔ yě nǐ yi hu vǐ súnnu e ma ko ɖó xwe we ǎ lɛ́ɛ káká yi jɛ ée kó ɖó xwe we lɛ́ɛ jí gbɔn Bɛteleyɛ́mu kpódó gletoxo e lɛ́ lɛ̌ dó e lɛ́ɛ kpó mɛ. Énɛ́ ɔ́, nǔ e gbeyíɖɔ Jelemíi kó ɖɔ ɖ'ayǐ ɔ́ jɛ; é wɛ nyí ɖɔ: “È se mɛɖé ɖo xó sú wɛ ɖo Lama, bɔ é ɖo avǐ ya wɛ, bó ɖo alě ná wɛ tlala; Hlacɛ́li wɛ ɖo vǐ tɔn lɛ́ɛ ví wɛ, bó jló ná se gbɔ ǎ, ɖó vǐ tɔn lɛ́ɛ sɔ́ ɖe ǎ.” Ée Elódu kú ɔ́, wɛnsagun Aklúnɔ tɔn ɖokpó wá xo dlɔ̌ Jozɛ́fu ɖo Ejípu, bó ɖɔ n'i ɖɔ: “Sí te; zě vǐ ɔ́, kplá nɔ tɔn, bó lɛ́ kɔ yi Izlayɛ́li; ɖó mɛ e ɖo vǐ ɔ́ ba ná hu wɛ lɛ́ɛ kó kú.” Nǔgbó ɔ́, Jozɛ́fu sí te, bó zé vǐ ɔ́, bó kplá vǐ ɔ́ sín nɔ, bó lɛ́ kɔ yi Izlayɛ́li. Lo ɔ́, ée é se ɖɔ Akelawúsi wɛ ɖo tɔ́ tɔn Elódu zinkpo jí, bó ɖo axɔ́sú ɖu wɛ ɖo Judée ɔ́, fínɛ́ yiyi dó xɛsi n'i; Mawu ka lɛ́ xo dlɔ̌ ɛ, bɔ é gbɔ bó yi Galilée yíkúngban jí, lobo yi cí to e è nɔ ylɔ́ ɖɔ Nazalɛ́ti ɔ́ mɛ, bónú nǔ e gbeyíɖɔ Mawu tɔn lɛ́ɛ kó wlán ɔ́ ná dó jɛ, é wɛ nyí ɖɔ: “È nǎ ylɔ́ Mɛhwlɛ́ngántɔ́ ɔ́ ɖɔ Nazalɛ́tinu.” Hwenɛ́nu ɔ́, Jǎan Yɛhwesinlɛnúmɛtɔ́ ɔ́ wá, bó ɖo Mawuxó jlá wɛ ɖo gbětótló mɛ ɖo Judée, bó nɔ́ ɖɔ: “Mi lɛ́ kɔ sín hwɛ mitɔn lɛ́ɛ gúdo, ɖó axɔ́súɖuɖu sɛ́xwé tɔn kó sɛ yá.” Jǎan wɛ nyí mɛ e wú gbeyíɖɔ Mawu tɔn Ezayíi ɖɔ xógbe élɔ́ dó é: “È se mɛɖé ɖo xó sú wɛ ɖo gbětótló mɛ, bó ɖo ɖiɖɔ wɛ ɖɔ: ‘Mi bló ali ɖó nú Aklúnɔ, mi jlɔ́ ali tɔn lɛ́ɛ ɖó.’ ” Awu kacakaca ɖé wɛ Jǎan nɔ dó, bɔ è sɔ́ lǎkúnmí sín fún dó lɔn ná, bɔ é nɔ́ sin gǒjíblánú e è sɔ́ anyǔ dó bló ná é. É nɔ ɖu wɛn kpódó wǐin akú kpó. Jeluzalɛ́munu lɛ́ɛ, Judéenu lɛ́ɛ kpódó mɛ e ɖo to e ɖo Judɛ́ɛn tɔ kpá é mɛ lɛ́ɛ kpó nɔ́ yi gɔ̌n tɔn. Yě nɔ́ ɖɔ hwɛ yětɔn lɛ́ɛ, bɔ Jǎan nɔ lɛ yɛhwesin nú yě ɖo Judɛ́ɛn tɔ ɔ́ mɛ. Ée é mɔ Falizyɛn lɛ́ɛ kpódó Saduseɛn lɛ́ɛ gěgé kpó wá yɛhwesin lɛ gbé ɔ́, é ɖɔ nú yě ɖɔ: “Jakpata kúnkan e mi! Mɛ̌ ka kplɔ́n mi ɖɔ mi ní hɔn nú xomɛsin Mawu tɔn e jǎwe ɔ́?” Nǔwiwa mitɔn lɛ́ɛ ní bó ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo nǔgbó. Mi ma vɛdó ɖɔ ée émí ko nyí Ablaxámu ví kpowun ɔ́, é ko kpé wɛ sín ó. Ɖó, ma ɖɔ nú mi, awǐnnya e mɔ wɛ mi ɖe nɛ́ lɛ́ɛ ɔ́, Mawu hɛn ɔ́, é ná sɔ́ yě dó húzú vǐ nú Ablaxámu. Asyɔ́ví ɖíe ko ɖo atín lɛ́ɛ sín ɖɔ wú e: atín e ma nɔ ná sínsɛ́n ɖagbe ǎ ɔ́, è nǎ gbo e, bó bɛ́ kɔn nyi myɔ mɛ. Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ, bó ná dó ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo; amɔ̌, mɛ e ɖo gǔdo ce jǎwe ɔ́, mɛ énɛ́ ɔ́ hú gǎn mì, bɔ un nyí mɛɖé bó ná sixú hɛn afɔkpa tɔn lɛ́ɛ n'i vɔ́vɔ́ ǎ; éyɛ́ ɔ́, Yɛsinsɛn kpódó zo kpó wɛ é ná sɔ́ dó lɛ yɛhwesin nú mi. É hɛn atɛ tɔn alɔ mɛ, bó ná fún jinukún tɔn, bó ná bɛ́ dó kɔ́zún mɛ; wɔn lɛ́ɛ ɔ́, é ná bɛ́ kɔn nyi zo e ma nɔ cí gbeɖé ǎ é mɛ. Hwe énɛ́ ɔ́ nu wɛ Jezu gosín Galilée yíkúngban jí, bó wá Jǎan gɔ́n ɖo Judɛ́ɛn tɔ ɔ́ nu, bónú Jǎan ná lɛ yɛhwesin n'i. Jǎan ka gbɛ́, bó ɖɔ: “Nyi wɛ ɖó ná wá gɔ̌n towe, bɔ a nǎ lɛ yɛhwesin nú mì, bɔ hwɛ ka wá gɔ̌n ce a?” Jezu ka yí gbe n'i ɖɔ: “Vɛ̌ gbɔ, ní to nyí mɔ̌ hwɛ̌; ɖó lě e mǐ sixú wa nǔ jlɔ́jlɔ́ gbɔn é nɛ́.” Énɛ́ ɔ́, Jǎan yí gbe. Ée é lɛ yɛhwesin n'i fó ɔ́, Jezu tɔ́n sín tɔ ɔ́ mɛ; tlóló ɔ́, jǐnukúnsin kɛ wun, bɔ Yɛ Mawu tɔn cí ahwannɛ́ ɖɔhun, bó wá jɛ te dó jǐ tɔn. Tlóló ɔ́, è se gbe ɖé sín jǐxwé bɔ é ɖɔ: “Vǐ ce vívɛ́ná wɛ mɛ élɔ́ nyí; xomɛ nɔ hun mì dó wǔtu tɔn tlala.” Énɛ́ ɔ́ gúdo ɔ́, Yɛ ɔ́ kplá Jezu yi gbětótló mɛ bónú awǒvi ná tɛ́n ɛ kpɔ́n. Jezu blá nu xɔ kéze kanɖé (40), zǎn kanɖé (40), énɛ́ ɔ́ gúdo ɔ́, xovɛ́ wá sín i, bɔ mɛtɛ́nkpɔ́ntɔ́ ɔ́ sɛ yá ɛ, bó ɖɔ n'i ɖɔ: “Nú Mawu ví jɛ́n wɛ a nyǐ nǔgbó hǔn, ɖe gbe nú awǐnnya élɔ́ lɛ́ɛ, nú yě ní húzú nǔɖuɖu.” Jezu ka yí gbe n'i ɖɔ: “È ko wlán dó Mawuxówéma ɔ́ mɛ ɖɔ jí: ‘Nǔɖuɖu kɛ́ɖɛ́ wɛ gbɛtɔ́ nɔ́ ɖu bó nɔ́ nɔ gbɛ ǎ; lo ɔ́, xó e ko tɔ́n sín Mawu nu mɛ ɔ́ bǐ wɛ nɔ́ hɛn mɛ ɖó gbɛ.’ ” Énɛ́ ɔ́ gúdo ɔ́, awǒvi kplá Jezu yi Jeluzalɛ́mu, to mímɛ́ ɔ́ mɛ, bó sɔ́ ɛ ɖó sinsɛnxɔ ɔ́ ta aga ɖéé, bó ɖɔ n'i ɖɔ: “Mawu ví jɛ́n a nyǐ nǔgbó hǔn, lɔ̌n yi jɛ dodomɛ; ɖó è ko wlán dó Mawuxówéma ɔ́ mɛ ɖɔ jí: ‘Mawu ná zɔ́n wɛnsagun tɔn lɛ́ɛ, bɔ yě ná hɛn we dó alɔ mɛ, bónú a ma yi klɛ́n afɔ dó awǐnnya ɖé wú ó.’ ” Jezu ka yí gbe n'i ɖɔ: “Mɔ̌ jɛ́n wɛ è lɛ́ wlán ɖɔ jí: ‘Ma tɛ́n Aklúnɔ Mawu towe kpɔ́n ó.’ ” Awǒvi lɛ́ kplá ɛ yi só ɖé jí; só ɔ́ yi jǐ ɖésú; é xlɛ́ ɛ axɔ́súɖuto gbɛmɛ fí tɔn lɛ́ɛ, kpódó dɔkun yětɔn lɛ́ɛ kpan, lobo ɖɔ n'i ɖɔ: “Ényí a jɛ kpo, bó ɖe kɔ́ nú mì ɔ́, un ná ná nǔ énɛ́ lɛ́ɛ bǐ we.” Jezu ka ɖɔ n'i ɖɔ: “ Satáan, bǔ dó mì! Ɖó è ko wlán dó Mawuxówéma ɔ́ mɛ ɖɔ jí: ‘Aklúnɔ Mawu towe wɛ a nǎ ɖe kɔ́ ná, lobo sɛn é ɖokpónɔ géé.’ ” Awǒvi ka jó e dó bo yi; bɔ wɛnsagun Mawu tɔn lɛ́ɛ wá Jezu gɔ́n, bo wá gɔ́ alɔ n'i. Ée Jezu se ɖɔ è wlǐ Jǎan dó gankpá mɛ ɔ́, é gosín fínɛ́, bo yi Galilée gbé jí. Ée é gosín Nazalɛ́ti ɔ́, é yi cí Kafaanawúmu, to e ɖo Galilée xutó ɔ́ mɛ, ɖo Zabulɔ́ɔn kpódó Nɛfutali to kpan gbé jí. Nǔ nyí mɔ̌, bónú xó e gbeyíɖɔ Mawu tɔn Ezayíi ɖɔ ɔ́ na dó jɛ. È wɛ nyí ɖɔ: “Togun e ɖo Zabulɔ́ɔn kpódó Nɛfutali kpó yíkúngban jí, bó ɖo xutó, ɖo Judɛ́ɛn tɔ ɔ́ sín akpá ɖě ɔ́ xwé, ɖo Galilée gbé jí, fí e mɛ e ma nyí Jwifu ǎ lɛ́ɛ ɖe é; togun énɛ́ e ɖo zǐnflú mɛ ɔ́ mɔ wěziza ɖaxó ɖé, bɔ yě mɛ e ɖo kúyɛmɛ lɛ́ɛ ɔ́, wěziza hɔ́n dó yě jí.” Bɛ́ sín hwenɛ́nu ɔ́, Jezu jɛ Wɛn Ɖagbe ɔ́ jlá jí, bo nɔ ɖɔ: “Mi lɛ́ kɔ sín hwɛ mitɔn lɛ́ɛ gúdo, ɖó axɔ́súɖuɖu sɛ́xwé tɔn ko sɛ yá.” Ée Jezu ɖo Galilée xutó gbɔn wɛ xweyǐgbe ɔ́, é mɔ nɔví nɔví we ɖé lɛ́ɛ, Sinmɔ́ɔ e è nɔ ylɔ́ ɖɔ Piyɛ́ɛ ɔ́, kpódó nɔví tɔn Andlé kpán, bɔ yě ɖo ɖɔ nyi wɛ ɖo xu jí, ɖó ɖɔnyitɔ́ wɛ nú yě. Jezu ɖɔ nú yě ɖɔ: “Mi xwedó mì; un ná ná kplɔ́n mi, bɔ mi ná nɔ dɔn gbɛtɔ́ lɛ́ɛ, lě e mi nɔ nyi ɖɔ dó wlí hweví gbɔn é.” Yě ká jó ɖɔ yětɔn lɛ́ɛ dó tlóló bó xwedó e. Jezu ná lɛ́ sɛ yi nukɔn kpɛɖé ɔ́, é mɔ Zebeɖée ví we, Jaki kpódó Jǎan kpó, bɔ yě kpódó tɔ́ yětɔn kpó ɖo akló mɛ, bo ɖo ɖɔ yětɔn lɛ́ɛ blóɖó wɛ. É ylɔ́ yě. Azɔn ɖokpó ɔ́, yě jó akló ɔ́ kpódó tɔ́ yětɔn kpó dó, bó xwedó e. Jezu ka nɔ gbɔn Galilée gbé ɔ́ bǐ jí, bó nɔ́ ɖo nǔ kplɔ́n mɛ lɛ́ɛ wɛ, gbɔn kplɔ́ngbasá Jwifu lɛ́ɛ tɔn, bó nɔ́ ɖo axɔ́súɖuɖu Mawu tɔn sín Wɛn Ɖagbe jlá wɛ, lobo nɔ gbɔ azɔn alɔkpa alɔkpa lɛ́ɛ bǐ, kpódó wɔngblézɔn lɛ́ɛ bǐ kpó nú mɛ lɛ́ɛ ɖo togun ɔ́ mɛ. Nyǐkɔ tɔn gba kpé Silíito ɔ́ bǐ mɛ, bɔ mɛ lɛ́ɛ nɔ kplá azinzɔnnɔ e ɖo azɔn alɔkpa alɔkpa jɛ wɛ lɛ́ɛ wá n'i; mɛ e jí yɛ nyanya ɖe lɛ́ɛ, adǐngbekútɔ́ lɛ́ɛ, ayǐsónɔ lɛ́ɛ, bɔ é nɔ gbɔ azɔn nú yě. Ahwan wɔ̌buwɔ́bú ɖé lɛ́ɛ xwedó e; yě gosín Jeluzalɛ́mu, bó gosín Galilée gbé jí, bó gosín Judée gbé jí, lobo gosín tota wǒ lɛ́ɛ gbé jí kpódó to e ɖo Judɛ́ɛn tɔ ɔ́ gúdo lɛ́ɛ kpan mɛ. Ée Jezu mɔ ahwan gěgé énɛ́ lɛ́ɛ ɔ́, é xá só jí, bo jínjɔ́n ayǐ; ahwanvú tɔn lɛ́ɛ sɛ yá ɛ, bɔ é jɛ nǔ kplɔ́n yě jí ɖɔ: Nǔ nyɔ́ nú mɛ e nyí wamamɔnɔ ɖo ayi mɛ lɛ́ɛ, ɖó yětɔn wɛ nyí axɔ́súɖuto sɛ́xwé tɔn. Nǔ nyɔ́ nú mɛ e ɖo aluwɛ mɛ lɛ́ɛ, ɖó è nǎ dó gbɔ nú yě. Nǔ nyɔ́ nú mɛfífá lɛ́ɛ, ɖó ayǐkúngban ɔ́ na nyí yětɔn! Nǔ nyɔ́ nú mɛ e nǔjlɔ́jlɔ́wiwa sín xovɛ́ nɔ sín, bɔ kɔ tɔn nɔ xú yě lɛ́ɛ é; ɖó yě ná gɔ́ xo. Nǔ nyɔ́ nú mɛ e nɔ kú nǔbláwǔ nú nɔzo yětɔn lɛ́ɛ é, ɖó è nǎ kú nǔbláwǔ nú yě lɔmɔ̌. Nǔ nyɔ́ nú ayimímɛ́nɔ lɛ́ɛ, ɖó yě ná mɔ Mawu. Nǔ nyɔ́ nú mɛ e nɔ jɛ tagba, nú fífá ná dó tíin lɛ́ɛ, ɖó è nǎ ylɔ́ yě ɖɔ Mawu ví. Nǔ nyɔ́ nú mɛ e dó ya na wɛ è ɖe, ɖó yě ɖo nǔ jlɔ́jlɔ́ wa wɛ wú lɛ́ɛ, ɖó yětɔn wɛ nyí axɔ́súɖuto sɛ́xwé tɔn. “Nǔ nyɔ́ nú mi, hwenu e è wǎ ɖo mi zun wɛ, bó ɖo mi ɖe dó wɛ, bó ɖo nǔvú bǐ ɖó dó mi nu wɛ, ɖó nyɛ wútu é. Mi j'awǎ, bó hun xomɛ, ɖó ajɔ ɖaxó ɖo te kpɔ́n mi ɖo sɛ́xwé. Ɖó, mɔ̌ wɛ è ko dó ya nú gbeyíɖɔ Mawu tɔn e jɛ nukɔn nú mi lɛ́ɛ gbɔn ɔ́ nɛ́. “Jɛ wɛ mi nyí nú gbɛ ɔ́. Lo ɔ́, ényí jɛ ma ka sɔ́ ɖó tɔ́n ǎ ɔ́, étɛ́ wɛ è nǎ dó lɛ́ na ɛ tɔ́n na? É sɔ́ nyɔ́ nú nǔɖé zɛ è nǎ sɔ́ kɔn nyi gbě, bó ná gbídí kpó afɔ kpó wú ǎ. “Mi wɛ nyí wěziza nú gbɛ ɔ́; to e ɖo só jí ɔ́ sixú nɔ hwlǎhwlá ǎ. È ka nɔ ta zogbɛ́n bó nɔ́ sɔ́ dó zɛ̌n glɔ́ ǎ; lo ɔ́, nǔ ta aga wɛ è nɔ sɔ́ ɖó, bɔ é nɔ́ ɖi ɖɛ̌ nú mɛ e ɖo xwé gbe lɛ́ɛ bǐ ná mɔ nukúnnú. Wěziza mitɔn ní bo hɔ́n ɖo gbɛtɔ́ lɛ́ɛ nukɔn, bónú yě ní mɔ nǔ ɖagbe wiwa mǐtɔn lɛ́ɛ, bo na dó kpa susu nú Tɔ́ mitɔn e ɖo sɛ́xwé é. “Mi ma vɛdó ɖɔ un wá, bó ná sú Mɔyízisɛ́n lɛ́ɛ, abǐ nǔkplɔ́nmɛ gbeyíɖɔ Mawu tɔn lɛ́ɛ tɔn dó wɛ sín ó. Lo ɔ́, un wá, bó ná bló, bɔ sɛ́n ɔ́ ná sɔgbe. Ɖó ma ɖɔ nǔgbó nú mi: ényí jǐnukúnsin kpódó ayǐkúngban kpó ma ko vɔ ǎ ɔ́, wěkwín kpɛví títí ɖokpó géé ɖo sɛ́n lɛ́ɛ mɛ ná hwe sín wɛ káká cóbónú nǔ lɛ́ɛ bǐ ná sɔgbe ǎ. Hǔn, mɛ e na gba sɛ́n kpɛví títí ɖokpó ɖo sɛ́n nɛ́ lɛ́ɛ mɛ, lobo ná lɛ́ kplɔ́n mɛɖěvo lɛ́ɛ ɖɔ yě lɔ ní bló gbɔn mɔ̌ ɔ́, mɛ énɛ́ ɔ́ ná sɔ atɛ́n ɖo axɔ́súɖuto sɛ́xwé tɔn mɛ ǎ. Lo ɔ́, mɛ e ná nyi sɛ́n énɛ́ lɛ́ɛ, lobo ná kplɔ́n mɛɖěvo lɛ́ɛ ɖɔ yě lɔ ní bló gbɔn mɔ̌ ɔ́, mɛ énɛ́ ɔ́ na xɔ susu ɖo axɔ́súɖuto sɛ́xwé tɔn mɛ. Ɖó, ma ɖɔ nú mi: ényí nǔjlɔ́jlɔ́wiwa mitɔn ma hú gǎn sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó tɔn ǎ ɔ́, mi ɖo axɔ́súɖuto sɛ́xwé tɔn mɛ na byɔ́ wɛ ǎ. “Mi se bɔ è ko ɖɔ nú tɔ́gbó mitɔn lɛ́ɛ ɖɔ: ‘Ma hu mɛ ó; ényí mɛɖé hu mɛ ɔ́, è nǎ ɖó hwɛ n'i.’ Lo ɔ́, nyɛ ka ɖo ɖiɖɔ nú mi wɛ ɖɔ: mɛ ɖěbǔ sin xomɛ dó nɔzo tɔn ɔ́, é jɛ xá ɖɔ è nǐ ɖɔ hwɛ xá mɛ énɛ́; mɛ e ka na zun nɔzo tɔn ɖɔ: ‘Nǔvɔ́nɔ’ ɔ́, é jɛ xá ɖɔ toxóɖɔgbɛ́ ɔ́ ní dɔn tó n'i. Mɛ e ka na zun nɔzo tɔn ɖɔ: ‘Nǔwanǔmɔnɔ’ ɔ́, zojimací wɛ jɛ xá ɛ. Hǔn, ényí a wǎ vɔ̌sákpe nukɔn, bó ja nǔɖé xwlé Mawu gbé, bó flín ɖɔ hwɛgbe ɖé ɖo nɔzo émítɔn kpódó émí kpó tɛ́ntin hǔn, jó vɔ̌sánú e xwlé Mawu gbé wɛ a ja ɔ́ dó nyi vɔ̌sákpe ɔ́ nukɔn, bó yi dó hwɛ gbɔ xá nɔzo towe hwɛ̌; énɛ́ ɔ́ gúdo ɔ́, lɛ́ kɔ bo wá zé vɔ̌sánú towe xwlé Mawu. “Ényí a wa nǔ nyi do nú nɔzo towe ɖé, bónú é kplá we xwe hwɛ nukɔn hǔn, yǎ wǔ dó hwɛ gbɔ xá ɛ hwenu e hwi kpódó é kpó ɖo ali jí ɔ́, é ma nyí mɔ̌ ǎ ɔ́, é ná kplá we dó así nú hwɛɖɔtɔ́, bɔ hwɛɖɔtɔ́ ná jó we nú gantɔ́cɔ́tɔ́, bɔ éyɛ́ ná sɔ́ we dó gankpá mɛ. Ma ɖɔ nǔgbó nú we: hwɛ e è ɖǒ nú we ɔ́ bǐ sín axɔ́ wɛ a nǎ sú vɔ cóbó ná tɔ́n sín gankpá ɔ́ mɛ. “Mi ka se ɖɔ: ‘Ma lɛ aga ó.’ Lo ɔ́, nyɛ ɖo ɖiɖɔ nú mi wɛ ɖɔ: mɛɖé kpɔ́n nyɔ̌nu ɖé bó ɖo linlin wɛ ná ɖó xó xá ɛ ɔ́, é ko lɛ aga xá nyɔ̌nu énɛ́ ɖo ayi mɛ xóxó. Ényí nukún towe ɖisíxwé tɔn ɔ́ na dɔn we dó nǔ nyanya mɛ hǔn, ɖe síin, bo sɔ́ nyi gbě; ɖó ényí a gbɔ bónú nǔɖé hwe ɖo wútu towe ɔ́, é nyɔ́ nú we hú nǔ lɛ́ɛ bǐ ní sɔgbe ɖo wǔtu towe bɔ è nǎ sɔ́ hwi ɖésúnɔ ɔ́ bǐ nyi dó zojimací mɛ. Ényí alɔ towe ɖisí ɔ́ na dɔn we dó nǔ nyanya mɛ hǔn, sɛ́n síin, bo sɔ́ nyi gbě; ɖó ényí ɖɔ a gbɔ bónú nǔɖé hwe ɖo wútu towe ɔ́, é nyɔ́ nú we hú nǔ lɛ́ɛ bǐ ní sɔgbe ɖo wútu towe, bɔ è nǎ sɔ́ hwi ɖésúnɔ ɔ́ bǐ kpéte nyi dó zojimací mɛ. “È ka lɛ́ ɖɔ: ‘Mɛ ɖé gbɛ́ asi tɔn hǔn, ní wlán wěma dó así n'i ɖɔ émí gbɛ́ ɛ.’ Lo ɔ́, nyɛ ɖo ɖiɖɔ nú mi wɛ ɖɔ: mɛɖé nya asi tɔn, bɔ é ma nyí ɖɔ afɔ wɛ é dó gbě ǎ ɔ́, aga wɛ é ɖɔ é ní yi lɛ. Mɛ e ka da nyɔ̌nu e asú tɔn gbɛ́ ɛ ɔ́, é lɔmɔ̌ nyí agalɛtɔ́. “Mi ka lɛ́ se bɔ è ɖɔ nú tɔ́gbó mitɔn lɛ́ɛ ɖɔ: ‘Ma dó akpá bo xwlé Mawu d'é jí bo gɔn ɖiɖe ó; lo ɔ́, ɖe akpá e a dǒ nú Aklúnɔ é.’ Lo ɔ́, nyɛ ɖo ɖiɖɔ nú mi wɛ ɖɔ: mi ma xwlé nǔ ɖěbǔ ó, mi ma xwlé jǐnukúnsin ó, ɖó é wɛ nyí axɔ́súzinkpo Mawu tɔn. Mi ma ka xwlé ayǐkúngban ó, ɖó é wɛ nyí afɔɖótɛn Mawu tɔn; mi ma xwlé Jeluzalɛ́mu ó, ɖó é wɛ nyí axɔ́sú ɖaxó ɔ́ sín to. Mɔ̌ ɖokpó ɔ́, ma xwlé ta towe ó, ɖó a sixú bló bɔ ɖa e ɖo ta towe ɔ́ kwín ɖokpó géé ná húzú wěwé abǐ wiwi ǎ. Ényí xó mitɔn nyí ‘ɛɛn’ hǔn, ní nyí ‘ɛɛn’, é ka nyí ‘éeǒ’ hǔn, ní nyí ‘éeǒ’. Nǔ e mi nɔ xwlé d'é jí ɔ́ bǐ ɔ́, awǒvi gɔ́n wɛ é gosín. “Mi se bɔ è ɖɔ: ‘Mɛ ɖé tɔ́n nukún we hǔn, tɔ́n nukún é lɔmɔ̌; nú mɛɖé sún aɖǔ we hǔn, sún aɖǔ é lɔmɔ̌.’ Lo ɔ́, nyɛ ɖo ɖiɖɔ nú mi wɛ ɖɔ: mɛɖé wa nǔ nyanya nú we hǔn, ma ba hlɔn tɔn ó; ényí mɛɖé xo tomɛ nú we dó ɖisíxwé hǔn, lǐlɛ́ amyɔxwé ɔ́ n'i. Ényí mɛɖé jló ná ylɔ́ hwɛ we, bo na yí awu towe do tɔn ɔ́ hǔn, lɛ̌ jó awu towe ɖaxó ɔ́ dó n'i d'é jí. Ényí mɛɖé zín jǐ towe, bó ɖɔ hwi ní zɔn ali xá émí yi jɛ kilomɛ́tlu ɖokpó hǔn, zɔn ali xá ɛ yi jɛ kilomɛ́tlu we. Ényí mɛɖé byɔ́ nǔ we hǔn, nǎ ɛ; mɛɖé ja nǔ hwé gbé ɖo así towe hǔn, ma ɖe kɔ dó e ó. “Mi se ɖɔ: ‘Yǐ wǎn nú nɔzo towe, bó gbɛ́ wǎn nú kɛntɔ́ towe.’ Lo ɔ́, nyɛ ɖo ɖiɖɔ nú mi wɛ ɖɔ: mi yí wǎn nú kɛntɔ́ mitɔn lɛ́ɛ. Mi xo ɖɛ dó mɛ e nɔ dó nu mi lɛ́ɛ jí. Mi wa ɖagbe nú mɛ e nɔ gbɛ́ wǎn nú mi lɛ́ɛ, bó xo ɖɛ ɖagbe nú mɛ e nɔ ɖe dó mi bó nɔ́ dó ya nú mi lɛ́ɛ. Énɛ́ ɔ́, mi na nyí Tɔ́ mitɔn e ɖo sɛ́xwé ɔ́ sín vǐ; ɖó éyɛ́ nɔ́ zɔ́n, bɔ hwesivɔ́ tɔn nɔ́ hun dó mɛ nyanya lɛ́ɛ kpódó mɛ ɖagbe lɛ́ɛ kpan jí; é nɔ́ bló bɔ jǐ nɔ́ ja nú mɛ e nɔ wa nǔ jlɔ́jlɔ́ lɛ́ɛ kpódó mɛ e nɔ wa nǔ agɔ lɛ́ɛ kpán. Ɖó ényí mɛ e yí wǎn nú mi lɛ́ɛ kɛ́ɖɛ́ jɛ́n mi nɔ yí wǎn ná ɔ́, le tɛ́ wɛ ɖ'é mɛ nú mi? Tokwɛ́yítɔ́ lɛ́ɛ lɔ nɔ bló gbɔn mɔ̌ ǎ cé? É ka nyí nɔví mitɔn lɛ́ɛ kɛ́ɖɛ́ jɛ́n mi nɔ dó gbe ɔ́, nǔ gbɔn vo tɛ́ wa wɛ mi ka ɖe? Mɛ e ma nɔ sɛn Mawu ǎ lɛ́ɛ lɔ nɔ wa nǔ gbɔn mɔ̌ ǎ cé? Ényí mɔ̌ hǔn, mi bo yí wǎn nú mɛ bǐ, lě e Tɔ́ mitɔn e ɖo sɛ́xwé ɔ́ yí wǎn nú mɛ bǐ gbɔn é.” “Mi ma nɔ wa Mawuzɔ́ mitɔn lɛ́ɛ ɖo agbawungba bo na dó xɔ susu ɖo gbɛtɔ́ lɛ́ɛ nukɔn ó. Ɖó, ényí ɖɔ mɔ̌ wɛ mi nɔ wa Mawuzɔ́ mitɔn lɛ́ɛ gbɔn ɔ́, mi sɔ́ ná mɔ ajɔ tɔn yí ɖo Tɔ́ mitɔn e ɖo sɛ́xwé ɔ́ gɔ́n ǎ. A ɖo nǔ ná mɛ wɛ hǔn, ma bló ɖi yɛmɛnúwatɔ́ lɛ́ɛ ɖɔhun ó; yědɛɛ lɛ́ɛ ɖo nǔ ná mɛ wɛ ɔ́, gan wɛ yě nɔ ɖó gbɔn kplɔ́ngbasá lɛ́ɛ, bó nɔ́ ɖó gbɔn alixo alixo, bó ná dó xɔ susu ɖo gbɛtɔ́ lɛ́ɛ nukɔn. Má ɖɔ nǔgbó nú mi: yě ko mɔ ajɔ yětɔn lɛ́ɛ yí. Amɔ̌, hwɛ ɔ́, a ɖo nǔ ná mɛ wɛ hǔn, alɔ towe amyɔ ɔ́ ní má tunwun nǔ e wa wɛ ɖisí ɔ́ ɖe ɔ́ ó, bónú nǔ e ná wɛ a ɖe ɔ́ ná dó nɔ wi mɛ; énɛ́ ɔ́, Tɔ́ towe e nɔ mɔ nǔ jɛ wi mɛ ɔ́ ná ná ajɔ tɔn we.” “Mi ɖo ɖɛ xo wɛ hǔn, mi ma cí yɛmɛnúwatɔ́ lɛ́ɛ ɖɔhun ó; yědɛɛ lɛ́ɛ nɔ yí wǎn nú te ninɔ ɖo kplɔ́ngbasá lɛ́ɛ kpódó alitó alitó lɛ́ɛ kpó, bo nɔ ɖo ɖɛ xo wɛ, nú gbɛtɔ́ lɛ́ɛ na dó mɔ yě. Má ɖɔ nǔgbó nú mi: yě ko mɔ ajɔ yětɔn lɛ́ɛ yí. Amɔ̌, hwɛ ɔ́, a ja ɖɛ xo gbé hǔn, byɔ̌ xɔ towe mɛ, bó sú hɔn towe dó ta, bó ɖɔ xó nú Tɔ́ towe e ɖo fínɛ́ bɔ mɛɖé ma nɔ mɔ ǎ é; énɛ́ ɔ́, éyɛ́ mɛ e nɔ mɔ nǔ jɛ wi mɛ ɔ́ ná ná ajɔ tɔn we. “Mi ɖo ɖɛ xo wɛ hǔn, mi ma nɔ wlí xómaɖixó lɛ́ɛ ɖɔ mɛ e ma nɔ sɛn Mawu ǎ lɛ́ɛ ɖɔhun ó; yědɛɛ lɛ́ɛ wɛ nɔ vɛdó ɖɔ xó gěgé wlí ɖɔ wɛ ná zɔ́n bɔ Mawu ná yí ɖɛ émítɔn sín. Mi ma bló yě ɖɔhun ó; ɖó Tɔ́ mitɔn ko tunwun nǔ e hu dó mi ɔ́, cóbɔ mi wá ja byɔ̌byɔ́ ɛ gbé. Lě e mi ɖó ná nɔ xo ɖɛ gbɔn ɔ́ ɖíe: ‘Tɔ́ mǐtɔn e ɖo sɛ́xwé ɔ́, nyǐkɔ towe ní nyí nǔsísí. Axɔ́súɖuɖu towe ní wá; jlǒ towe ní nyí wiwa ɖo ayǐkúngban jí fí, lě e é nɔ nyí wiwa ɖo sɛ́xwé ɔ́ ɖɔhun. Nǎ nǔɖuɖu égbé tɔn mǐ. Sɔ́ hwɛ mǐtɔn lɛ́ɛ kɛ mǐ, lě e mǐ nɔ sɔ́ kɛ mɛ e nɔ wa nǔ nyi do nú mǐ lɛ́ɛ gbɔn é. Ma lɔn nú mǐ ní jɛ tɛ́nkpɔ́n mɛ ó, lo ɔ́, hwlɛ̌n mǐ gán ɖo awǒvi sí.’ [Ɖó towe wɛ nyí axɔ́súɖuɖu, hlɔ̌nhlɔ́n, kpódó susu kpó, káká sɔ́yi mavɔ mavɔ! Amǐ.] “Ényí mi nɔ sɔ́ nǔ ɖěe gbɛtɔ́ lɛ́ɛ wa nyi do nú mi lɛ́ɛ kɛ yě ɔ́, Tɔ́ mitɔn e ɖo sɛ́xwé ɔ́ ná sɔ́ mi lɔmɔ̌ tɔn lɛ́ɛ kɛ mi. Lo ɔ́, ényí mi ma nɔ sɔ́ nǔ ɖěe gbɛtɔ́ lɛ́ɛ wa nyi do nú mi lɛ́ɛ kɛ yě ǎ ɔ́, Tɔ́ mitɔn ná sɔ́ mi lɔmɔ̌ tɔn lɛ́ɛ kɛ mi ǎ.” “Mi ɖo nu blá wɛ hǔn, mi ma nɔ nɔ aluwɛ mɛ yɛmɛnúwatɔ́ lɛ́ɛ ɖɔhun ó; yě nɔ dɔn nukún mɛ nyɔ, bo nɔ dó ɖe xlɛ́ gbɛtɔ́ lɛ́ɛ ɖɔ émí ɖo nu blá wɛ. Má ɖɔ nǔgbó nú mi, yě ko mɔ ajɔ yětɔn yí. Amɔ̌, hwɛ ɔ́, a ɖo nu blá wɛ hǔn, blǒ hwiɖée ɖó; fún nukún mɛ, bo vún ɖa towe, bónú mɛ ɖěbǔ ma tunwun ɖo wútu towe ɖɔ a ɖo nu blá wɛ zɛ Tɔ́ towe e ɖo wi mɛ ɖo fínɛ́ ɔ́ wú ó; énɛ́ ɔ́, éyɛ́ mɛ e nɔ mɔ nǔ jɛ wi mɛ ɔ́ ná ná ajɔ tɔn we.” “Mi ma kplé dɔkun ɖó ayǐkúngban jí fí e nǔvínúví nɔ ɖu nǔ ɖe, bɔ nǔ nɔ jɛ ko ɖe, bɔ ajotɔ́ nɔ tɔ́n dǒ, bó nɔ́ fin nǔ ɖe ɔ́ ó. Lo ɔ́, mi kplé dɔkun mitɔn lɛ́ɛ ɖó sɛ́xwé; ɖó nǔvínúví nɔ́ ɖu nǔ ɖo fínɛ́ ǎ; nǔ nɔ́ jɛ ko ɖo fínɛ́ ǎ; ajotɔ́ ka nɔ́ tɔ́n dǒ, bó nɔ́ fin nǔ ɖo fínɛ́ ǎ. Ɖó fí ɖěe dɔkun towe ɖe ɔ́, fínɛ́ wɛ ayi towe lɔmɔ̌ ná nɔ.” “Nukún towe lɛ́ɛ wɛ nyí zogbɛ́n nú agbaza towe; ényí nukún towe lɛ́ɛ ɖo ganjí ɔ́, agbaza towe bǐ ná nɔ wěziza mɛ. Lo ɔ́, ényí nukún towe lɛ́ɛ ma ɖo ganjí ǎ ɔ́, agbaza towe bǐ ná nɔ zǐnflú mɛ; ɖó nú wěziza e ɖo wútu towe ɔ́ húzú zǐnflú ɔ́, zǐnflú gɔngɔn tɛ́ mɛ wɛ a ka na ɖe nɛ́?” “Mɛ ɖé sixú sɛn gǎn we ǎ; ɖó é ná gbɛ́ wǎn nú mɛ ɖě, bo na yí wǎn nú mɛ ɖě; abǐ é ná se tónú nú mɛ ɖě, bo na vɛ́ tóli nú mɛ ɖě. Mi sixú sɛn Mawu bo lɛ́ sɛn dɔkun ǎ.” “Énɛ́ wú ɔ́, má ɖɔ nú mi: ado ní ma hu mi dó nǔ e mi na ɖu, bo na nɔ gbɛ é, kpódó nǔ e mi na dó é kpó wú ó; gbɛ ma xɔ akwɛ́ hú nǔɖuɖu, bɔ agbaza lɔ ma xɔ akwɛ́ hú nǔzínzán ǎ cé? Mi kpɔ́n xɛ lɛ́ɛ; yě nɔ dó nǔkún ǎ, yě ká nɔ ya nǔkún bó nɔ́ bɛ́ dó agɔ̌ mɛ ǎ; có Tɔ́ mitɔn e ɖo sɛ́xwé ɔ́ ka nɔ́ ná nǔɖuɖu yě. Midɛɛ lɛ́ɛ ɔ́, mi ma ka xɔ akwɛ́ hú xɛ énɛ́ lɛ́ɛ ǎ cé? Mɛ̌ ka ɖo mi mɛ, bɔ nǔlinkpɔ́n tɔn ná zɔ́n, bɔ é ná sixú dó azǎn kpɛɖé gbɛzán é ɖésú tɔn jí? “Étɛ́wútu mi ka nɔ ɖo tagba jɛ dó nǔ e mi ná dó ɔ́ wú wɛ? Mi kpɔ́n lě e folówa lɛ́ɛ nɔ su gbɔn ɖo gběhan lɛ́ɛ mɛ é; yě nɔ wa azɔ̌ ɖě ǎ, yě ká nɔ lɔn avɔ ǎ. Axɔ́sú Salomɔ́ɔ ɖésú ɔ́, lě e é ɖó dɔkun sɔ ɔ́ nɛ́, có é ma ka ɖó avɔ sɔ ɖokpó yětɔn nɛ́! Ényí Mawu ka ba acɔ́ nú gběhan e ɖo te égbé, bɔ sɔ ɔ́, è nǎ bɛ̌ dó myɔ mɛ ɔ́ sɔ mɔ̌ ɔ́, nɛ̌ wɛ é ma ka ná ná mi nǔ e mi ná dó lɛ́ɛ ǎ gbɔn, nǔɖiɖi kpɛvínɔ e mi? Hǔn, mi bo ma jɛ tagba, bó nɔ́ ɖɔ: ‘Ani mǐ ka ná ɖu’; ‘ani mǐ ka ná nu’; ‘étɛ́ mǐ ka ná dó’ ó. Ɖó mɛ e ma ɖi nǔ nú Mawu ǎ lɛ́ɛ wɛ nɔ́ ɖo wezun dó wɛ, ɖo nǔ énɛ́ lɛ́ɛ gúdo. Tɔ́ mǐtɔn e ɖo sɛ́xwé ɔ́ tunwun ɖɔ nǔ énɛ́ lɛ́ɛ hu dó mi. Axɔ́súɖuɖu Mawu tɔn kpódó jlǒ tɔn wiwa kpó ní nɔ́ myá nukún nú mi jɛ nukɔn; énɛ́ ɔ́, é ná ná nǔ énɛ́ lɛ́ɛ bǐ mi. Mi ma lin sɔ e ja ɔ́ kpɔ́n ó, ɖó sɔ e ja ɔ́ ná wá kpódó tagba é ɖésúnɔ tɔn lɛ́ɛ kpó. Tagba e ayǐhínhɔ́n ɖokpó ɖokpó ná hɛn wá ɔ́ ko kpé nú ayǐhínhɔ́n énɛ́ ɔ́.” “Mi ma ɖó hwɛ nú mɛɖé ó, énɛ́ ɔ́, Mawu na ɖó hwɛ nú mi lɔmɔ̌ ǎ. Ɖó lě e mi nɔ ɖɔ hwɛ xá mɛ gbɔn ɔ́, mɔ̌ wɛ Mawu na ɖɔ hwɛ xá mi lɔmɔ̌ gbɔn. Nǔ e mi sɔ́ dó jlɛ́ nǔ nú mɛ ɖě lɛ́ɛ ɔ́ wɛ Mawu ná sɔ́ dó jlɛ́ nǔ nú mi lɔmɔ̌. Étɛ́wú a ka ɖo nǔywɛ́ e ɖo nukún jí nú nɔví towe ɔ́ kpɔ́n wɛ, bó má ka mɔ atínkpo e ɖo nukún towe jí ɔ́ ǎ? Abǐ hwi mɛ e atínkpo ɖo nukún jí ná ɔ́, nɛ̌ wɛ a sixú ɖɔ nú nɔzo towe ɖɔ: ‘Gbɔ nú ma ɖe nǔywɛ́ sín nukún jí nú we’ gbɔn? Yɛmɛnúwatɔ́, vɛ̌ yi ɖe atínkpo sín nukún jí nú hwiɖée hwɛ̌; énɛ́ ɔ́, a nǎ mɔ nukúnnú ganjí, bó ná sixú ɖe nǔywɛ́ e ɖo nukún jí nú nɔví towe ɔ́ síin. “Nǔ e nyí nǔ mímɛ́ ɔ́, mi ma sɔ́ jó nú cukú lɛ́ɛ ó; yě táá wá húzú kpan nukɔn mi, bó wɔ mi ɖu. Mi ma ka bɛ́ jɛ̌ ɖagbe ɖagbe mitɔn lɛ́ɛ nyi dó nukɔn nú han lɛ́ɛ ó; yě táá wá sɔ́ afɔ dó gbídí ná. “Mi byɔ́ nǔ Mawu, é ná ná mi; mi ba, mi ná mɔ; mi xúxú hɔn, è nǎ hun nú mi. Ɖó mɛ ɖěbǔ byɔ́ nǔ ɔ́, è nǎ ná ɛ; mɛɖé ba ɔ́, é ná mɔ; mɛɖé xúxú hɔn ɔ́, è nǎ hun n'i. Mɛ̌ ka ɖo mi mɛ, bɔ vǐ tɔn ná byɔ́ ɛ nǔɖuɖu, bɔ é ná ná ɛ awǐnnya? Abǐ, nú vǐ tɔn byɔ́ ɛ hweví ɔ́, é ná ná ɛ dan? Midɛɛ lɛ́ɛ ɔ́, lě e mi dá sɔ ɔ́ nɛ́, có mi ka tunwun nǔ ɖagbe bo nɔ ná vǐ mitɔn lɛ́ɛ. Nɛ̌ wɛ Tɔ́ mitɔn e ɖo sɛ́xwé ɔ́ ma ka ná ná nǔ ɖagbe mɛ e byɔ́ ɛ lɛ́ɛ ǎ gbɔn? “Nǔ e mi jló ɖɔ gbɛtɔ́ lɛ́ɛ ní bló nú émí ɔ́, mi nɔ bló nú yě lɔmɔ̌; ɖó nǔ e ɖɔ wɛ Mɔyízi sɛ́n lɛ́ɛ, kpódó gbeyíɖɔ Mawu tɔn lɛ́ɛ kpó ɖe ɔ́ nɛ́. “Mi gbɔn hɔn kpɛví ɔ́ nu; ɖó fí e è nɔ gbɔn, bó nɔ yi dɔn ɔ́, hɔn tɔn d'agba, bɔ ali tɔn gbló, bo vɛ́ gbɔn ǎ; mɛ gěgé wɛ nɔ gbɔn fínɛ́. Lo ɔ́, hɔn e nu è nɔ gbɔn, bó nɔ́ yi gbɛ mavɔ mavɔ mɛ ɔ́ hwe, bɔ ali e è nɔ gbɔn yi ɔ́ sóbwé, bó vɛ́ gbɔn, bɔ mɛ kpɛɖé jɛ́n nɔ ba mɔ.” “Mi cɔ́ miɖée dó mɛ e nɔ sɔ́ yěɖée dó ɖó gbeyíɖɔ Mawu tɔn lɛ́ɛ wú. Ninɔmɛ lɛ̌ngbɔ́ tɔn wɛ yě nɔ zé, bó nɔ́ wá mi gɔ́n; lo ɔ́, ɖo ayi yětɔn mɛ ɔ́, adǎnkanlin ɖi hla ɖɔhun wɛ nú yě. Nǔwiwa yětɔn lɛ́ɛ wɛ na zɔ́n bɔ mi na tunwun nǔ e yě nyí ɔ́; ɖó è nɔ gbɛ vǐwun ɖo wunkan mɛ ǎ, è ka nɔ gbɛ fígi ɖo aklánti gbo mɛ ǎ. Atín ɖagbe ɔ́, sínsɛ́n ɖagbe wɛ é nɔ́ ná, bɔ atín nyanya nɔ ná sínsɛ́n nyanya. Atín ɖagbe ɖé sixú ná sínsɛ́n nyanya ǎ; mɔ̌ ɖokpó ɔ́ jɛ́n atín nyanya ɖé ma sixú ná sínsɛ́n ɖagbe ǎ é nɛ́. Atín ɖěbǔ ma ná sínsɛ́n ɖagbe ǎ ɔ́, è nɔ gbo e, bo nɔ sɔ́ nyi myɔ mɛ. Hǔn, nǔwiwa yětɔn wɛ ná zɔ́n bɔ mi na dó tunwun nǔ e yě nyí ɔ́. “Mɛ e nɔ ɖo ylɔ̌ylɔ́ mì wɛ ɖɔ: ‘Aklúnɔ, Aklúnɔ’ lɛ́ɛ ɔ́, yě bǐ ɖo axɔ́súɖuto sɛ́xwé tɔn mɛ na byɔ́ wɛ ǎ; lo ɔ́, mɛ e nɔ wa jlǒ Tɔ́ ce e ɖo sɛ́xwé ɔ́ tɔn lɛ́ɛ kɛ́ɖɛ́ wɛ na byɔ́ mɛ. Ɖó gbe e gbe Mawu ná ɖɔ hwɛ xá gbɛtɔ́ lɛ́ɛ bǐ ɔ́, mɛ gěgé ná ɖɔ nú mì ɖɔ: ‘Aklúnɔ, Aklúnɔ, é ma ka nyí nyǐkɔ towe mɛ wɛ mǐ ɖɔ Mawuxó nú gbɛtɔ́ lɛ́ɛ dó a? É ma nyí nyǐkɔ towe mɛ wɛ mǐ nya yɛ nyanya lɛ́ɛ dó a? Nǔ tɛnmɛ tɛnmɛ e mǐ jlɛ́ lɛ́ɛ ɔ́, nyǐkɔ towe mɛ wɛ mǐ jlɛ́ dó ǎ cé?’ Bɔ un ka na ɖɔ nyi wɛn nú yě ɖɔ: ‘Un tunwun mi kpɔ́n gbeɖé ǎ; mi bɛ́ miɖée sín nukún ce mɛ, nǔnyanyawatɔ́ lɛ́ɛ mi.’ ” “Énɛ́ ɔ́ wú ɔ́, mɛ ɖěbǔ e ko sixú se xó ce énɛ́ lɛ́ɛ bo bló d'é jí ɔ́, cí gbɛtɔ́ ayiɖotenánɔ e gbá xɔ tɔn nyi só jí é ɖɔhun. Jǐ ja, tɔ ɖi sin, jɔhɔn nyi dó xɔ ɔ́ jí kpódó hlɔ̌nhlɔ́n kpó có xɔ ɔ́ ka mu ǎ, ɖó só jí wɛ è dǒ xɔ ɔ́ do nyi. Amɔ̌, mɛ e se xó ce énɛ́ lɛ́ɛ, bó ma bló d'é jí ǎ ɔ́, cí mɛ e ayixa hwedó, bɔ é gbá xɔ tɔn nyi kɔ́gúdu mɛ é ɖɔhun. Jǐ ja, tɔ ɖi sin, jɔhɔn nyi kpódó hlɔ̌nhlɔ́n kpó, bɔ xɔ ɔ́ mu, bó gba hánnyá.” Hwenu e Jezu jɛ te sín só ɔ́ jí ɔ́, ahwan wɔ̌buwɔ́bú ɖé xwedó e. Nya ɖé ɖo gudu jɛ wɛ bó sɛkpɔ́ Jezu, bó jɛ kpo ɖo nukɔn tɔn, bo ɖɔ: “Aklúnɔ, nú é jló we ɔ́, a hɛn ɔ́, a nǎ gbɔ azɔn nú mì.” Jezu ka dlɛ́n alɔ, bó ɖó wǔtu tɔn, bó ɖɔ: “Un jló. Azɔn towe ní gbɔ.” Tlóló ɔ́, nya ɔ́ sín azɔn gbɔ. Énɛ́ ɔ́ gúdo ɔ́, Jezu ka ɖɔ n'i ɖɔ: “Ɖǒ tó mì ganjí; ma ɖɔ nú mɛɖé ó; lo ɔ́, sɔ́ lě e a ɖe ɔ́ yi xlɛ́ vɔ̌sánú-xwlémawutɔ́ lɛ́ɛ, bó ná wǔsláslá sín agban e xó Mɔyízi ɖɔ ɔ́, bónú mɛ bǐ ná dó tunwun ɖɔ azɔn towe gbɔ nǔgbó.” Ée Jezu byɔ́ Kafaanawúmu ɔ́, sɔ́ja kanwekogán Hlɔ̌ma tɔn ɖokpó sɛkpɔ́ ɛ, bó jɛ vo sa n'i jí; é ɖɔ: “Aklúnɔ, mɛsɛntɔ́ ce ɖokpó xwe ayǐsó ɖo zan jí ɖo xwé gbe, bó ɖo wǔvɛ́ mɔ wɛ ɖésú.” Ée é ɖɔ mɔ̌ ɔ́, Jezu ɖɔ n'i ɖɔ: “Un ná yi gbɔ azɔn n'i.” Sɔ́ja kanwekogán ɔ́ ka yí xó bó ɖɔ: “Aklúnɔ, un nyí mɛ bónú a nǎ xwedó mì yi xwé cé gbe ǎ. Vɛ̌ ko ɖe gbe kpowun, énɛ́ ɔ́, azɔn ná gbɔ nú mɛsɛntɔ́ ce. Ɖó nyɛ ɖésúnɔ ɔ́, mɛɖomɛglɔ́ wɛ nú mì, bɔ sɔ́ja lɛ́ɛ ka ɖo acɛ ce mɛ. Un ɖɔ nú mɛ ɖě ɖɔ: ‘Yi’ ɔ́, é nɔ yi; un ɖɔ nú mɛ ɖěvo ɖɔ: ‘Wǎ’ ɔ́, é nɔ wá; un ka ɖɔ nú mɛsɛntɔ́ ce ɖɔ: ‘Blǒ lě’ ɔ́, é nɔ bló.” Ée Jezu se xó énɛ́ lɛ́ɛ ɔ́, é kpácá ɛ, bɔ é ɖɔ nú mɛ e ɖo xwixwedó e wɛ lɛ́ɛ ɖɔ: “Má ɖɔ nǔgbó nú mi; un mɔ mɛɖé ɖó nǔɖiɖi lěhunkɔtɔn ɖo Izlayɛ́li ví lɛ́ɛ mɛ ǎ. Lo ɔ́, un ɖo ɖiɖɔ nú mi wɛ ɖɔ mɛ gěgé ná gosín zǎnzǎnhwe jí, bó ná gosín gbadahwe jí wá, bó ná jínjɔ́n ayǐ, bó ɖu nǔ xá Ablaxámu kpódó Izáki kpó, kpódó Jakɔ́bu kpán, ɖo axɔ́súɖuto sɛ́xwé tɔn mɛ. Lo ɔ́, axɔ́súɖuto sɛ́xwé tɔn sín vǐ lɛ́ɛ ɔ́, è nǎ bɛ̌ yě kɔn nyi zǐnflú mɛ ɖo kɔ́xo. Fínɛ́ wɛ yě ná ya avǐ, bó ná ɖu aɖǔkún ɖe.” Jezu ka wá ɖɔ nú sɔ́ja kanwekogán ɔ́ ɖɔ: “Bo yi xwé, nǔ e a ɖi ɔ́ ní nyí mɔ̌ nú we.” Ée Jezu ɖɔ mɔ̌ n'i tlóló ɔ́, azɔn gbɔ nú mɛsɛntɔ́ ɔ́. Énɛ́ gúdo ɔ́, Jezu wá yi mɛsɛntɔ́ tɔn Piyɛ́ɛ sín xwé gbe. Fínɛ́ ɔ́, é mɔ Piyɛ́ɛ sín asinɔ bɔ é ɖo ayǐmlɔ́mlɔ́, bɔ avivɔ ɖo jǐ tɔn. Jezu ɖó alɔ alɔ tɔn wú, bɔ avivɔ ɔ́ kɔ́n sín jǐ tɔn, bɔ é sí te, bó jɛ jǒnɔ tɔn yí jí. Ée gbadanu wá su ɔ́, è kplá mɛ e jí yɛ nyanya ɖe lɛ́ɛ gěgé wá n'i. É ɖe gbe dó yɛ nyanya énɛ́ lɛ́ɛ, bɔ yě gosín mɛ e jí yě ɖe lɛ́ɛ jí, bɔ é lɛ́ gbɔ azɔn nú azinzɔnnɔ lɛ́ɛ bǐ, bónú xó élɔ́ e gbeyíɖɔ Mawu tɔn Ezayíi ɖɔ ɔ́ na dó jɛ; é wɛ nyí ɖɔ: “É yí wɔ̌nzɔn e ɖo mǐ wú lɛ́ɛ, bó bɛ́ azɔngban mǐtɔn lɛ́ɛ hɛn.” Ée Jezu mɔ ɖɔ ahwan e lɛ́ lɛ̌ dó émí ɔ́ sukpɔ́ ɔ́, é ɖɔ nú ahwanvú tɔn lɛ́ɛ ɖɔ: “Mi nú mǐ ná dó asá tɔ ɔ́, bó ná yi agě ɖě ɔ́ jí.” Hwenɛ́nu ɔ́, sɛ́nkplɔ́nmɛtɔ́ ɖokpó sɛ yá ɛ, bó ɖɔ n'i ɖɔ: “ Mɛ̌si, un ná xwedó we yi fí e a nǎ yi lɛ́ɛ bǐ.” Jezu ka yí gbe n'i bó ɖɔ: “Ayǐsájɛ lɛ́ɛ ɖó nɔtɛn yětɔn, bɔ xɛ e nɔ zɔ́n gbɔn jɔmɛ lɛ́ɛ ɖó adɔ̌ yětɔn. Lo ɔ́, nyɛ Gbɛtɔ́ví ɔ́ ɖó fí e un ná mlɔ́, bó ná gbɔjɛ́ ɔ́ ǎ.” Ahwanvú tɔn ɖěvo ɖɔ n'i ɖɔ: “Aklúnɔ, gbɔ nú ma to yi ɖi tɔ́ ce hwɛ̌.” Jezu ka yí gbe n'i ɖɔ: “Xwedó mì, bo jó mɛkúkú lɛ́ɛ dó nú yě ní ɖi mɛkúkú yětɔn lɛ́ɛ.” Jezu byɔ́ tɔjíhún mɛ, bɔ ahwanvú tɔn lɛ́ɛ xwedó e. È nǎ mɔ nǔɖé ɔ́, jɔhɔn ɖaxó ɖé jɛ́n jɛ nyinyi jí ɖo tɔ ɔ́ jí, bɔ tɔ ɔ́ fɔ́n adǎn, bó nɔ́ xo sin wá cyɔ́n tɔjíhún ɔ́. Hwenɛ́nu ɔ́, Jezu ka ɖo amlɔ dɔ́ wɛ. Ahwanvú tɔn lɛ́ɛ sɛ yá ɛ, bo fɔ́n ɛ, bo ɖɔ n'i ɖɔ: “Aklúnɔ, hwlɛ̌n mǐ gán; mǐ ɖo tɔ ná kú wɛ.” Jezu ka ɖɔ nú yě ɖɔ: “Étɛ́ sín xɛsi ɖi wɛ mi ka ɖe? Nǔɖiɖihwedónánɔ e mi!” Énɛ́ ɔ́ gúdo ɔ́, é sí te, bó ɖe gbe dó jɔhɔn ɔ́ kpódó xu ɔ́ kpó, bɔ fí bǐ cí tóó. Nǔ énɛ́ ɔ́ kpácá ahwanvú tɔn lɛ́ɛ káká, bɔ yě nɔ ɖɔ: “Mɛ nǎhún ká nyí mɛ élɔ́, bɔ jɔhɔn kpódó xu kpó lɔmɔ̌ nɔ se gbe n'i?” Ée yě jɛ tɔ ɔ́ gúdo dɔ̌n, ɖo Gadaláanu lɛ́ɛ yíkúngban jí ɔ́, yɛnyanyanɔ we ɖé lɛ́ɛ tɔ́n sín sóxo mɛ, fí e è nɔ ɖi mɛkúkú lɛ́ɛ dó é, bó wá kpé Jezu. Yě nɔ́ ɖo nǔ baɖabaɖa dó sin wɛ káká bɔ mɛ ɖěbǔ nɔ́ sixú glá gbɔn fínɛ́ ǎ. Yɛnyanyanɔ we lɛ́ɛ jɛ xó sú jí, bó ɖɔ: “Mawu ví! Étɛ́ ká ɖo mǐ kpódó hwi kpán tɛ́ntin? A wǎ fí, bó ná dó ya nú mǐ cóbɔ hwenu e mǐ ná ji ya dó ɔ́ ná su wɛ a?” Aglǔzahwan ɖaxó ɖé ka ɖo zɔ zaan nú yě, bo ɖo nǔ ɖu wɛ. Yɛ nyanya lɛ́ɛ jɛ vo sa nú Jezu jí ɖɔ: “Nú a jló ná nya mǐ hǔn, nyi mǐ sɛ́ dó aglǔzahwan énɛ́ mɛ.” Jezu ka ɖɔ nú yě ɖɔ: “Mi bo yi;” tlóló ɔ́, yě gosín nya we nɛ́ lɛ́ɛ jí, bó byɔ́ aglǔza lɛ́ɛ mɛ. Azɔn ɖokpó ɔ́, aglǔza lɛ́ɛ nyi agbo sín só ɔ́ jí kɔn nyi xu mɛ, bó kú tɔ. Ée aglǔzanyitɔ́ lɛ́ɛ mɔ mɔ̌ ɔ́, yě dó afɔ wezun mɛ, bó yi toxo ɔ́ mɛ, lobo yi wlí nǔ e jɛ énɛ́ lɛ́ɛ bǐ ɖɔ nú mɛ lɛ́ɛ. Yě lɛ́ ɖɔ lě e yɛnyanyanɔ we nɛ́ lɛ́ɛ sín xó yi gbɔn é nú yě, bɔ togun ɔ́ bǐ nyi ahwan yi kpé Jezu. Ée yě mɔ ɛ ɔ́, yě jɛ vo sa n'i jí, bó ɖɔ é ní gosín ayǐkúngban émítɔn jí. Jezu byɔ́ tɔjíhún ɖé mɛ, bó lɛ́ kɔ gbɔn fí ɖokpó ɔ́ wá to tɔn mɛ. Ayǐsónɔ ɖé ka ɖo ayǐmlɔ́mlɔ́ ɖo zan jí, bɔ è zě e wá n'i. Ée Jezu mɔ lě e yě ɖi nǔ sɔ ɔ́, é ɖɔ nú azinzɔnnɔ ɔ́ ɖɔ: “Vǐ ce, ɖǒ akɔ́nkpinkpan; è sɔ́ hwɛ towe lɛ́ɛ kɛ we.” Ée sɛ́nkplɔ́nmɛtɔ́ lɛ́ɛ se xó énɛ́ ɔ́, yě jɛ ɖiɖɔ dó xomɛ jí ɖɔ: “Nya élɔ́ ɖo nu nylá dó Mawu wú wɛ.” Jezu mɔ nǔ jɛ nǔ e lin wɛ yě ɖe ɔ́ wú, bó ɖɔ nú yě ɖɔ: “Étɛ́wú mi ka ɖo nǔ nyanya mɔ̌hunkɔtɔn lɛ́ɛ lin wɛ? Ényí è ɖɔ: ‘È sɔ́ hwɛ towe lɛ́ɛ kɛ we,’ abǐ: ‘Sí te bó ɖi zɔnlin’ ɔ́, ɖě tɛ́ wɛ ka bɔkun hú ɖě? Lo ɔ́, un jló ɖɔ mi ní tunwun ɖɔ nyɛ Gbɛtɔ́ví ɔ́ ɖó acɛ e sɔ́ hwɛ kɛ mɛ ɖo ayǐkúngban jí ɔ́.” Ée é ɖɔ mɔ̌ ɔ́, é ɖɔ nú ayǐsónɔ ɔ́ ɖɔ: “Sí te, sɔ́ zan towe, bó yi xwé.” Bɔ nya ɔ́ sí te, bó ɖidó xwé tɔn gbe. Ée mɛ lɛ́ɛ mɔ nǔ e jɛ énɛ́ ɔ́, xɛsi jɛ yě jí, bɔ yě jɛ susu kpa nú Mawu jí, ɖó acɛ mɔ̌hunkɔtɔn e é ná gbɛtɔ́ lɛ́ɛ ɔ́ wú. Ée Jezu gosín fínɛ́ ɔ́, é ɖidó, bó sɛ yi zaan, bó mɔ nya tokwɛ́yítɔ́ ɖé ɖo ayǐjínjɔ́n ɖo denuzɔ́watɔ́ lɛ́ɛ xɔsá. Nya ɔ́ nɔ nyí Matíe. Jezu ɖɔ n'i ɖɔ: “Xwedó mì;” bɔ é sí te, bó xwedó e. Jezu ka wá ɖo nǔ ɖu wɛ, ɖo Matíe xwé, bɔ tokwɛ́yítɔ́ lɛ́ɛ gěgé, kpódó hwɛhutɔ́ ɖěvo lɛ́ɛ kpó wá ɖo nǔ ɖu xá é kpódó ahwanvú tɔn lɛ́ɛ kpán wɛ. Ée Falizyɛn lɛ́ɛ mɔ mɔ̌ ɔ́, yě ɖɔ nú ahwanvú tɔn lɛ́ɛ ɖɔ: “Aniwútu wɛ Mɛ̌si mitɔn nɔ ɖu nǔ xá tokwɛ́yítɔ́ lɛ́ɛ kpódó hwɛhutɔ́ ɖěvo lɛ́ɛ kpó?” Jezu ka se xó e ɖɔ wɛ yě ɖe ɔ́, bó ɖɔ: “Mɛ e ɖo ganjí lɛ́ɛ wɛ azɔngblétɔ́ nú hu dó ǎ; lo ɔ́, mɛ e ɖo azɔn jɛ wɛ lɛ́ɛ wɛ nǔ tɔn hu dó. Mi yi ba do nú nǔ e ɖɔ wɛ Mawuxó élɔ́ ɖe ɔ́: ‘Nǔbláwǔkúnúmɛ ba wɛ un ɖe; vɔ̌sísá ba wɛ un ɖe ǎ.’ Ɖó hwɛjijɔnɔ lɛ́ɛ ylɔ́ gbé wɛ un wá ǎ; lo ɔ́, hwɛhutɔ́ lɛ́ɛ ylɔ́ gbé wɛ un wá.” Énɛ́ gúdo ɔ́, Jǎan Yɛhwesinlɛnúmɛtɔ́ ɔ́ sín ahwanvú lɛ́ɛ sɛ yá Jezu, bó kanbyɔ́ ɛ ɖɔ: “Étɛ́wútu mǐdɛɛ lɛ́ɛ kpódó Falizyɛn lɛ́ɛ kpó nɔ ɖo nu blá wɛ hwɛhwɛ, bɔ ahwanvú towe lɛ́ɛ ma ka nɔ́ blá nu ǎ?” Jezu ka yí gbe nú yě ɖɔ: “Mɛ e è ylɔ́ wá alɔ wlíwlí tɛnmɛ lɛ́ɛ sixú nɔ aluwɛ mɛ hwenu e asisúnɔ ɔ́ ɖo kpɔ́ xá yě ɔ́ ǎ; nǔ sixú nyí mɔ̌ ǎ; amɔ̌, hwenu ná wá su bɔ è nǎ wá zé asisúnɔ ɔ́ gǎnnugǎnnu sín yě gɔ̌n; hwe énɛ́ nu ɔ́, yě ná blá nu. “Mɛ ɖé nɔ́ sɔ́ avɔxwɛ yɔ̌yɔ́ e ma yi sin mɛ kpɔ́n ǎ é dó ɖɛ́ awu xóxó ná ǎ; ɖó avɔxwɛ yɔ̌yɔ́ ɔ́ ná lɛ́ dɔn awu xóxó ɔ́ vún, bɔ tlɛ́ntlɛ́nkpa ɔ́ ná gbló d'é jí. Mɔ̌ ɖokpó ɔ́, mɛɖé nɔ́ sɔ́ vɛ̌ɛn yɔ̌yɔ́ kɔn dó anyǔglo xóxó mɛ ǎ; é ma nyí mɔ̌ ǎ ɔ́, anyǔglo ɔ́ ná wú, bɔ vɛ̌ɛn ɔ́ kpódó anyǔglo ɔ́ kpó bǐ ná lá mɛ. Lo ɔ́, vɛ̌ɛn yɔ̌yɔ́ ɔ́, anyǔglo yɔ̌yɔ́ mɛ wɛ è nɔ kɔn dó, bɔ vɛ̌ɛn ɔ́ kpódó anyǔglo ɔ́ kpó bǐ nɔ́ nɔ ganjí.” Hwenu e Jezu kpo ɖo xó énɛ́ lɛ́ɛ ɖɔ nú yě wɛ ɔ́, Jwifu lɛ́ɛ sín gǎn ɖokpó wá jɛ kpo ɖo nukɔn tɔn, bó ɖɔ: “Vǐ ce nyɔ̌nu kú din tlóló; wǎ yi ɖó alɔ jǐ tɔn, énɛ́ ɔ́, é ná fɔ́n.” Nǔgbó ɔ́, Jezu sí te, bɔ é kpódó ahwanvú tɔn lɛ́ɛ kpó xwedó e. Nǎwe ɖé ká ɖo hun ɖi wɛ sín xwe wěwe ɖíe ɖokpóó; nǎwe ɔ́ sɛkpɔ́ Jezu gbɔn gúdo, bó ɖó alɔ awu tɔn tó, ɖó é ɖo ɖiɖɔ dó ayi mɛ wɛ ɖɔ: “Un vɛ́ ko sixú ɖó alɔ awu tɔn tó kpowun ɔ́, azɔn ce ná gbɔ.” Jezu ka lɛ́ kɔ bó mɔ ɛ, bó ɖɔ n'i ɖɔ: “Vǐ ce, ɖǒ akɔ́nkpinkpan, nǔɖiɖi towe zɔ́n bɔ azɔn towe gbɔ.” Tlóló ɔ́, azɔn gbɔ nú nyɔ̌nu ɔ́. Ée Jezu wá gǎn ɔ́ xwé ɔ́, é mɔ kpetekúntɔ́ e wá cyɔ ɔ́ nu lɛ́ɛ, bó lɛ́ mɔ mɛ gěgé ɖo fínɛ́, bɔ yě ɖo zǐngídi ɖú wɛ. É ɖɔ nú yě ɖɔ: “Mi tɔ́n sín fí, ɖó ɖyɔ̌vǐvú ɔ́ kú ǎ, amlɔ dɔ́ wɛ é ɖe.” Bɔ mɛ lɛ́ɛ ka jɛ kiko e jí. Ée è ɖe mɛ lɛ́ɛ tɔ́n ɔ́, Jezu byɔ́ xɔ ɔ́ mɛ, bó hɛn vǐ ɔ́ sín alɔ, bɔ vǐ ɔ́ fɔ́n sí te. Nǔ énɛ́ e jɛ ɔ́ gba kpé gbě nɛ́ ɔ́ bǐ jí. Ée Jezu gosín fínɛ́, bó xweyǐgbe ɔ́, nukúntíntɔ́nnɔ we ɖé lɛ́ɛ xwedó e; yě ɖo xó sú wɛ bó nɔ́ ɖɔ: “Kú nǔbláwǔ nú mǐ, Davídi ví.” Ée Jezu wá xwé gbe ɔ́, nukúntíntɔ́nnɔ lɛ́ɛ sɛkpɔ́ ɛ, bɔ é kanbyɔ́ yě ɖɔ: “Mi ɖi ɖɔ un hɛn ɔ́, un ná hun nukún nú mi a?” Yě yí gbe n'i ɖɔ: “Ɛɛn Aklúnɔ.” Ée yě ɖɔ mɔ̌ ɔ́, Jezu ɖó alɔ nukún yětɔn lɛ́ɛ wú, bo ɖɔ: “Nǔ e mi ɖi ɔ́ ní nyí gbɔn mɔ̌ nú mi.” Bɔ nukún yětɔn lɛ́ɛ hun. Jezu ka dó sɛ́n nú yě syɛ́nsyɛ́n ɖɔ: “Mi cɔ́ miɖée, nú mɛ ɖěbǔ ní ma se ɖo nu mitɔn ó.” Lo ɔ́, ée yě tɔ́n ɔ́, yě jɛ nǔ e Jezu wa ɔ́ jlá jí gbɔn gbě ɔ́ bǐ jí. Yiyi wɛ mɛ énɛ́ lɛ́ɛ ɖe kɛ́ɖɛ́ bɔ è kplá nya ɖé wá nú Jezu, bɔ é nɔ́ sixú ɖɔ xó ǎ, ɖó yɛ nyanya ɖo jǐ tɔn. Ée Jezu nya yɛ nyanya ɔ́ sín ɖɛ̌kúnánɔ ɔ́ jí ɔ́, é jɛ xó ɖɔ jí. Nǔ énɛ́ ɔ́ kpácá mɛ lɛ́ɛ ɖésú, bɔ yě nɔ́ ɖɔ: “Mǐ mɔ nǔ lěhunkɔtɔn kpɔ́n gbeɖé ɖo Izlayɛ́li ǎ.” Lo ɔ́, Falizyɛn lɛ́ɛ ɖɔ: “Yɛ nyanya lɛ́ɛ xɔ́sú sín hlɔ̌nhlɔ́n wɛ é nɔ dó nya yɛ nyanya lɛ́ɛ ná.” Jezu nɔ ɖo toxo ɖaxó lɛ́ɛ bǐ kpódó gletoxo lɛ́ɛ bǐ kpó mɛ gbɔn wɛ, bó nɔ́ ɖo nǔ kplɔ́n mɛ wɛ gbɔn kplɔ́ngbasá Jwifu lɛ́ɛ tɔn, bó nɔ́ ɖo axɔ́súɖuɖu Mawu tɔn sín Wɛn Ɖagbe jlá wɛ; lobo nɔ ɖo azɔn alɔkpa alɔkpa lɛ́ɛ, kpódó wɔ̌nzɔn lɛ́ɛ kpó gbɔ wɛ. Ée Jezu mɔ mɛ énɛ́ lɛ́ɛ ɔ́, nǔ yětɔn blá wǔ n'i, ɖó é mɔ ɖɔ nǔ gbɛ́ dó yě, bɔ wǔ kú yě, bɔ yě cí lɛ̌ngbɔ́ e ma ɖó nyinyitɔ́ ǎ lɛ́ɛ é ɖɔhun, bɔ é ɖɔ nú ahwanvú tɔn lɛ́ɛ ɖɔ: “Nǔkún ɖo kpɔ́ gégé ɖo gle mɛ; nǔkún-yatɔ́ lɛ́ɛ ka nyí kpɛɖé. Mi bo sa vo nú jinukúnnɔ ɔ́, nú é sɛ́ azɔ̌watɔ́ dó jinukúngbo tɔn mɛ.” Jezu ylɔ́ ahwanvú tɔn wěwe lɛ́ɛ kplé, bó ná acɛ yě, nú yě ná dó nya yɛ nyanya lɛ́ɛ ná, bó ná nɔ́ gbɔ azɔn lɛ́ɛ bǐ, kpódó wɔ̌nzɔn lɛ́ɛ bǐ kpó. Mɛsɛ́dó wěwe lɛ́ɛ sín nyǐkɔ ɖíe: jɛ nukɔn ɔ́, Sinmɔ́ɔ e è nɔ lɛ́ ylɔ́ ɖɔ Piyɛ́ɛ ɔ́, kpódó nɔví tɔn Andlé kpó; Zebeɖée ví we, Jaki kpódó Jǎan kpó. Filípu kpódó Baatelemíi kpó; Tɔmáa kpódó Matíe tokwɛ́yítɔ́ ɔ́ kpó; Jaki Alufée ví ɔ́, kpódó Tadée kpó; Sinmɔ́ɔ hunjɛdótojítɔ́ ɔ́, kpódó Judási Isikaliɔ́ti e wá jó Jezu ɔ́ kpó. Yě mɛ wěwe nɛ́ lɛ́ɛ ɔ́, Jezu sɛ́ yě dó, bó kplɔ́n nǔ yě ɖɔ: “Mi ma yi mɛ e ma nyí Jwifu ǎ lɛ́ɛ gɔ́n ó, mi ma ka byɔ́ Samalíinu lɛ́ɛ sín to ɖé mɛ ó. Izlayɛ́li ví e cí lɛ̌ngbɔ́ búbú ɖɔhun lɛ́ɛ gɔ́n wɛ mi ná yi. Mi jlá dó ali ɖɔ: ‘ Axɔ́súɖuɖu sɛ́xwé tɔn ko sɛ yá.’ Mi gbɔ azɔn nú azinzɔnnɔ lɛ́ɛ; mi fɔ́n mɛkúkú lɛ́ɛ; mi gbɔ azɔn nú gudunɔ lɛ́ɛ, bó bló nú yě ní húzú mɛ mímɛ́; mi nya yɛ nyanya lɛ́ɛ. Lě e un ná acɛ mi vɔ̌nu ɔ́, mi lɔmɔ̌ mi bo wa nǔ lɛ́ɛ bǐ vɔ̌nu. Mi ma hɛn siká ó, mi ma hɛn kpatágan ó, mi ma ka hɛn akwɛ́ dó ganɖɔkɛn mɛ ó; mi ma hɛn glo ó, mi ma hɛn awu we ó; mi ma hɛn afɔkpa ó, mi ma hɛn kpo ó; ɖó azɔ̌watɔ́ ɖó ná yí azɔ̌ e é wa ɔ́ sín akwɛ́. “Mi jɛ toxo ɖaxó ɖé abǐ gletoxo ɖěbǔ mɛ hǔn, mi kan mɛ e jǒnɔ mitɔn yíyí jɛ xá ɔ́ byɔ́, bó yi nɔ gɔ̌n tɔn káká yi jɛ hwenu e mi ná gosín to ɔ́ mɛ dó é. Ényí mi byɔ́ xwé ɖé gbe hǔn, mi ɖɔ: ‘Fífá ní nɔ xwé ɔ́ jí.’ Ényí fífá jɛ xá mɛ e ɖo xwé énɛ́ gbe lɛ́ɛ hǔn, fífá mitɔn ní nɔ yě jí; é ma ka jɛ xá yě ǎ hǔn, fífá mitɔn ní lɛ́ kɔ xwedó mi. Nú è ma yí mi, abǐ è gbɛ̌ xó mitɔn se ɖo xwé ɖé gbe, abǐ toxo ɖé mɛ hǔn, mi tɔ́n sín fínɛ́, bó xúxú afɔkɔ́ mitɔn. Má ɖɔ nǔgbó nú mi: é wá jɛ hwɛɖɔzán gbe ɔ́, é ná bɔkun nú Sodɔ́munu lɛ́ɛ kpódó Gomɔ́ɔnu lɛ́ɛ kpó hú to énɛ́ mɛ nu lɛ́ɛ.” “Éɖíe, un sɛ́ mi dó, bɔ mi ná cí lɛ̌ngbɔ́ ɖo hla lɛ́ɛ tɛ́ntin ɖɔhun e; mi bo ɖó ayi te dan ɖɔhun, bó fá xomɛ ahwannɛ́ ɖɔhun. Mi cɔ́ miɖée dó gbɛtɔ́ lɛ́ɛ wú, ɖó yě ná wá dɔn mi yi hwɛ nukɔn, bo na wá ɖɔ hwɛ xá mi, lobo ná ɖó bǎ nú mi ɖo kplɔ́ngbasá yětɔn lɛ́ɛ. Yě ná wá kplá mi yi tokpɔngán lɛ́ɛ kpódó axɔ́sú lɛ́ɛ kpó nukɔn ɖó nyɛ wútu, bónú mi ná ɖe kúnnu nú mì, ɖo yě kpódó mɛ e ma nyí Jwifu ǎ lɛ́ɛ kpó nukɔn. Lo ɔ́, hwenu e yě ná wá wlí mi yi jó ɔ́, mi ma jɛ tagba bo ɖo nǔ e mi ná ɖɔ ɖo dɔ̌n lɛ́ɛ, abǐ lě e mi ná ɖɔ xó gbɔn ɖo dɔ̌n ɔ́ linkpɔ́n wɛ ó, è nǎ sɔ́ nǔ e mi ná ɖɔ ɖo dɔ̌n hwenɛ́nu lɛ́ɛ dó ayi mɛ nú mi. Ɖó mi ɖésúnɔ wɛ ɖo xó ná ɖɔ wɛ ǎ; Yɛ Tɔ́ mitɔn tɔn wɛ ná ɖo xó ɖɔ wɛ gbɔn mi jí. “Nɔví ná jó nɔví tɔn, bɔ è nǎ hu; tɔ́ ná jó vǐ tɔn, bɔ è nǎ hu; vǐ lɛ́ɛ ná fɔ́n gǔ dó mɛjitɔ́ yětɔn lɛ́ɛ jí, bó ná zɔ́n ɖɔ è ní hu yě. Mɛ bǐ ná gbɛ́ wǎn nú mi ɖó nyɛ wú. Lo ɔ́, mɛ e ná dɛ ɖo ya énɛ́ lɛ́ɛ nu káká yi fó ɔ́, è nǎ hwlɛ́n ɛ gán. Nú è dǒ ya nú mi ɖo toxo ɖé mɛ hǔn, mi hɔn yi toxo ɖěvo mɛ. Má ɖɔ nǔgbó nú mi: mi ná ko gbɔn Izlayɛ́li toxo lɛ́ɛ bǐ mɛ fó, cóbɔ nyɛ Gbɛtɔ́ví ɔ́ ná wá ǎ. “Nǔkplɔ́ntɔ́ ɖé nɔ́ hú gǎn mɛ̌si tɔn ǎ; mɔ̌ ɖokpó ɔ́, mɛsɛntɔ́ ɖé nɔ́ hú gǎn gǎn tɔn ǎ; ényí nǔkplɔ́ntɔ́ sixú tunwun nǔ káká wá mɛ̌si tɔn há jí ɔ́, é ko kpé. Mɔ̌ ɖokpó ɔ́, mɛsɛntɔ́ ɖó ná cí gǎn tɔn ɖɔhun; ɖó, nú è ylɔ́ hɛ̌nnugán ɔ́ ɖɔ Bɛluzebúlu yɛ nyanya xɔ́sú ɔ́, nyǐkɔ e è nǎ ná xwéví lɛ́ɛ ná lɛ́ nylá hú mɔ̌. “Mi bo ma ɖi xɛsi nú gbɛtɔ́ lɛ́ɛ ó; ɖó nǔ e wa wɛ è ɖe ɖo nǔglɔ́ ɔ́, bǐ ná wá jɛ wěxo. Xó e un kplá mi ɖó vo, bó ɖɔ nú mi ɔ́, mi ɖɔ bónú mɛ bǐ ní se. Mi ma ɖi xɛsi nú yě mɛ e nɔ hu agbaza, bó ma ka sixú wa nǔɖé nú lǐndɔ̌n ǎ lɛ́ɛ ó; lo ɔ́, mi ɖi xɛsi nú Mawu e ɖó acɛ e sixú dɔn lǐndɔ̌n kpódó agbaza kpó bǐ dó zojimací mɛ é. Gboli ɖo akwɛ́ ɖé jí ǎ; é ka ɖo mɔ̌ có, ɖokpó yětɔn ka nɔ́ kú Mawu Tɔ́ mitɔn sín jlǒ mɛ vo ǎ. Midɛɛ lɛ́ɛ ɔ́, ɖa e ɖo ta nú mi ɔ́ ɖésú ɔ́, Mawu tunwun nabí e é nyí é. Hǔn, mi bo ma ɖi xɛsi ó, ɖó mi xɔ akwɛ́ hú gboli gěgé. “Mɛ e ná ɖɔ ɖo mɛ bǐ nukɔn ɖɔ émí nyí ahwanvú ce ɔ́, nyɛ lɔmɔ̌ ná ɖe kúnnu n'i ɖo Tɔ́ ce e ɖo sɛ́xwé ɔ́ nukɔn. Lo ɔ́, mɛɖé gbɛ́ ɖo gbɛtɔ́ lɛ́ɛ nukɔn ɖɔ émí kún tunwun mì ó ɔ́, nyɛ lɔmɔ̌ na gbɛ́ ɖo Tɔ́ ce e ɖo sɛ́xwé ɔ́ nukɔn ɖɔ un kún tunwun i ó. “Mi ma vɛdó ɖɔ fífá wɛ un hɛn wá ayǐkúngban jí sín ó; fífá wɛ un hɛn wá ǎ; hwǐ wɛ un hɛn wá. Ɖó un wá bɔ nyɛ wútu ɔ́, vǐ súnnu ná mɔ tɔ́ tɔn gbɔ ǎ; vǐ nyɔ̌nu ná mɔ nɔ tɔn gbɔ ǎ; vǐsi ná mɔ asú tɔn nɔ gbɔ ǎ. Xwé mɛtɔn gbe nu lɛ́ɛ na húzú kɛntɔ́ mɛtɔn. “Mɛ e yí wǎn nú tɔ́ tɔn abǐ nɔ tɔn hú mì ɔ́, mɛ énɛ́ jɛ xá ná nyí ahwanvú ce ǎ; mɛ e ka ná yí wǎn nú vǐ tɔn súnnu abǐ vǐ tɔn nyɔ̌nu hú mì ɔ́, mɛ énɛ́ lɔmɔ̌ jɛ xá na nyí ahwanvú ce ǎ. Mɛ e ma ɖíɖá aklúzu tɔn, bó jɛ gǔdo ce ǎ ɔ́, mɛ énɛ́ jɛ xá ná nyí ahwanvú ce ǎ. Mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú dó ta ce mɛ ɔ́, é ná lɛ́ mɔ gbɛ tɔn. “Mɛ e yí mi ɔ́, nyɛ wɛ é yí; mɛ e ka yí nyɛ ɔ́, mɛ e sɛ́ mì dó ɔ́ wɛ é yí. Mɛ e yí gbeyíɖɔ Mawu tɔn, ɖó é nyí gbeyíɖɔ Mawu tɔn wútu ɔ́, é ná mɔ gbeyíɖɔ Mawu tɔn sín ajɔ yí. Mɛ e ka na yí hwɛjijɔnɔ, ɖó é nyí hwɛjijɔnɔ wútu ɔ́, é ná mɔ hwɛjijɔnɔ sín ajɔ yí. Bɔ mɛ ɖěbǔ ka ná sin fífá kɔ́fu ɖokpó kpowun yɔkpɔ́vú lěhunkɔtɔn, ɖó é nyí ahwanvú ce wútu ɔ́, má ɖɔ nǔgbó nú mi, é ná ba ajɔ tɔn kpo ǎ.” Ée Jezu kplɔ́n nǔ énɛ́ lɛ́ɛ ahwanvú tɔn wěwe lɛ́ɛ fó ɔ́, é gosín fínɛ́, bó ɖidó toxo e ɖo gbě ɔ́ jí fínɛ́ lɛ́ɛ mɛ, lobo ná jlá Mawuxó yě. Ée Jǎan ɖo gankpá mɛ, bó se azɔ̌ e wa wɛ Klísu ɖe lɛ́ɛ ɔ́, é sɛ́ ahwanvú tɔn lɛ́ɛ dó e, nú yě ní yi kanbyɔ́ ɛ ɖɔ: “Hwi wɛ nyí mɛ e ɖó ná wá, bɔ mǐ ɖo te kpɔ́n é a? Abǐ mɛ ɖěvo wɛ mǐ ná nɔ te kpɔ́n?” Jezu ka yí gbe nú yě bó ɖɔ: “Mi yi ɖɔ nǔ e se wɛ mi ɖe lɛ́ɛ kpódó nǔ e mɔ wɛ mi ɖe lɛ́ɛ kpó nú Jǎan. Nukúntíntɔ́nnɔ lɛ́ɛ ɖo nukúnnú mɔ wɛ; sékúnɔ lɛ́ɛ ɖo zɔnlin ɖi wɛ; gudunɔ lɛ́ɛ sín wǔtu ɖo te jɛ wɛ; tókúnɔ lɛ́ɛ ɖo nǔ se wɛ; è ɖo mɛkúkú lɛ́ɛ fɔ́n wá gbɛ wɛ, bó ɖo Wɛn Ɖagbe ɔ́ jlá wamamɔnɔ lɛ́ɛ wɛ. Nǔ nyɔ́ nú mɛ e sín nǔɖiɖi ma ná jɛ ayǐ ɖó nyɛ wú ǎ lɛ́ɛ.” Ée wɛnsagun Jǎan tɔn lɛ́ɛ lɛ́ kɔ ɖidó ɔ́, Jezu jɛ Jǎan xó ɖɔ nú togun ɔ́ jí ɖɔ: “Ani wɛ mi ka yi kpɔ́n ɖo gbětótló mɛ? Fántín ɖé wɛ mi mɔ bɔ jɔhɔn ɖo dǐndán wɛ a? Éeǒ! Ani mi ka yi mɔ? Mɛ ɖé wɛ mi mɔ, bɔ é dó awu xɔ akwɛ́ a? Mɛ e ka nɔ dó akwɛ́nɔwu lɛ́ɛ ɔ́, axɔ́sú lɛ́ɛ sín xwé gbe wɛ yě nɔ́ nɔ. Étɛ́ kpɔ́n gbé wɛ mi ka yi? Gbeyíɖɔ Mawu tɔn ɖé wɛ a? Ɛɛn wɛ un ɖɔ nú mi; é ka lɛ́ hú gbeyíɖɔ Mawu tɔn. Ɖó Jǎan wɛ nyí mɛ e xó ɖɔ wɛ Mawuxówéma ɔ́ ɖe ɔ́ bó ɖɔ: Mawu ɖɔ: ‘Wɛnsagun ce ɖíe un sɛ́ dó e, bɔ é ná jɛ nukɔn nú we, bó ná bló ali ɖó nú we.’ Má ɖɔ nǔgbó nú mi: ɖo mɛ e è ji sín nyɔ̌nu xomɛ lɛ́ɛ bǐ mɛ ɔ́, ɖokpó yětɔn hú gǎn Jǎan Yɛhwesinlɛnúmɛtɔ́ ɔ́ ǎ. É ka ɖo mɔ̌ có, mɛ e hwe hú mɛ bǐ, ɖo axɔ́súɖuto sɛ́xwé tɔn mɛ ɔ́, hú gǎn Jǎan Yɛhwesinlɛnúmɛtɔ́ ɔ́. Sín Jǎan Yɛhwesinlɛnúmɛtɔ́ ɔ́ hwenu káká wá jɛ din ɔ́, axɔ́súɖuto sɛ́xwé tɔn ɔ́, hlɔ̌nhlɔ́n nú wɛ é nyí, bɔ mɛ e dó gǎn ɖésú lɛ́ɛ wɛ nɔ́ ba ná klá jɛ nu. Ɖó gbeyíɖɔ Mawu tɔn lɛ́ɛ bǐ kpódó sɛ́n Mɔyízi tɔn lɛ́ɛ kpó ko ɖɔ xó dó axɔ́súɖuto sɛ́xwé tɔn wú káká wá jɛ Jǎan hwenu. Bónú mi ná dó mɔ nǔ jɛ xó e ɖɔ wɛ un ɖe ɔ́ wú ɔ́, mi bo tunwun ɖɔ Jǎan wɛ nyí Elíi e ɖó ná wá bɔ è ɖɔ é. Mɛ e ɖó tó, bó ná dó se nǔ ná ɔ́ ní ɖótó, bó se. “Mɛ̌ wú wɛ un ka sigǎn jlɛ́ gbɛtɔ́ din tɔn lɛ́ɛ dó? Yě cí yɔkpɔ́vú e nɔ jínjɔ́n tokplétɛn bó nɔ́ ɖo xó sú sɛ́ dó gbɛ̌ yětɔn ɖě lɛ́ɛ wɛ ɔ́ ɖɔhun. Yě nɔ́ ɖo ɖiɖɔ wɛ ɖɔ: ‘Mǐ kún kpete dó ji awǎjijɛ han nú mi, bɔ mi gbɛ́ we ɖú; mǐ ji nǔwamɛ han nú mi bɔ mi gbɛ́ alě ná.’ Ɖó Jǎan wá, bó nɔ́ ɖu nǔ ǎ; é ka nɔ́ nu vɛ̌ɛn ǎ; bɔ è ɖɔ: ‘Yɛ nyanya wɛ ɖo jǐ tɔn.’ Nyɛ Gbɛtɔ́ví ɔ́ ka wá bó nɔ́ ɖu nǔ, bó nɔ́ nu vɛ̌ɛn, bɔ è ɖɔ: ‘Nya élɔ́ ɔ́, adɔtɔ́nɔ wɛ; vɛ̌ɛnnutɔ́ wɛ; tokwɛ́yítɔ́ lɛ́ɛ kpódó hwɛhutɔ́ lɛ́ɛ kpó sín xɔ́ntɔn wɛ.’ Lo ɔ́, nǔnywɛ́ Mawu tɔn ɖe hwɛjijɔ é ɖésúnɔ tɔn xlɛ́ gbɔn nǔwiwa tɔn lɛ́ɛ mɛ.” Ée Jezu ɖɔ xó énɛ́ lɛ́ɛ vɔ ɔ́, é jɛ hwɛ dó mɛ e sín tomɛ é jlɛ́ nǔ gěgé ɖe lɛ́ɛ jí, ɖó yě lɛ́ kɔ sín hwɛ yětɔn lɛ́ɛ gúdo ǎ wútu. É ɖɔ: “Heelú mi, Kolazíinnu e mi! Heelú mi, Bɛtisayidanu e mi! Ɖó ényí nǔ e un jlɛ́ ɖo to mitɔn lɛ́ɛ mɛ ɔ́, Tíi kpódó Sidɔ́ɔn kpó wɛ un ko jlɛ́ yě ɖe ɔ́, to énɛ́ lɛ́ɛ mɛ nu lɛ́ɛ ná ko kplá ati, bó ná ko sá afín, bó ná dó ɖe xlɛ́ ɖɔ émí lɛ́ kɔ sín hwɛ émítɔn lɛ́ɛ gúdo. Énɛ́ ɔ́ wú wɛ un ɖo ɖiɖɔ nú mi wɛ ɖɔ: hwɛɖɔzán gbe ɔ́, tó e è nǎ dɔn nú Tilunu lɛ́ɛ kpódó Sidɔ́ɔnnu lɛ́ɛ kpó ɔ́ ná bɔwǔ hú ée è nǎ dɔn nú mi e. Kafaanawúmu, hwɛ ɔ́ ka lo? È nǎ sɔ́ we yi jǐ káká yi sɔ́ jǐnukúnsin wɛ a vɛdó a? Gbeɖé kpɔ́n! Káká kútomɛ wɛ Mawu ná kpíkpé we nyi; ɖó nǔ e un jlɛ́ ɖo tɛ́ntin towe lɛ́ɛ ɔ́, ényí Sodɔ́mu wɛ un ko jlɛ́ yě ɖe ɔ́, to énɛ́ ɔ́ ná kpo ɖo te káká jɛ égbé. Énɛ́ ɔ́ wú wɛ un ɖo ɖiɖɔ nú we wɛ ɖɔ: hwɛɖɔzán gbe ɔ́, tó e è nǎ dɔn nú Sodɔ́muto ɔ́ ná bɔwǔ hú ée è nǎ dɔn nú we ɔ́.” Hwenɛ́nu ɔ́, Jezu yí xó, bó ɖɔ: “Daá! Aklúnɔ jǐnukúnsin kpódó ayǐkúngban kpó tɔn, un dó kú nú we, ɖó a sɔ́ nǔ énɛ́ lɛ́ɛ hwlá dó nukúnnú-mɔjɛnǔmɛtɔ́ lɛ́ɛ kpódó nǔnywɛ́tɔ́ lɛ́ɛ kpó, lobo ka ɖe yě xlɛ́ vǐ ɖo anɔ̌nu lɛ́ɛ. Mɔ̌ wɛ, Daá! Ɖó lě e a jlǒ gbɔn é nɛ́. “Nǔ bǐ wɛ Tɔ́ ce sɔ́ dó alɔ ce mɛ, bɔ mɛ ɖěbǔ ka mɔ nǔ jɛ Vǐ ɔ́ wú, zɛ Tɔ́ ɔ́ wú ǎ; mɛ ɖěbǔ ka lɛ́ mɔ nǔ jɛ Tɔ́ ɔ́ wú, zɛ Vǐ ɔ́ kpódó mɛ e Vǐ ɔ́ jló ná ɖe e xlɛ́ lɛ́ɛ kpó wú ǎ. “Mi wá gɔ̌n ce; mi mɛ e agban kpinkpɛn hinhɛn cikɔ ná lɛ́ɛ é bǐ, bónú ma ná gbɔjɛ́ mi.” Mi yí nǔkplɔ́nmɛ ce lɛ́ɛ se, bónú lǐndɔ̌n mitɔn lɛ́ɛ ná vo, ɖó mɛ fífá wɛ un nyí, bó nyí xomɛnyɔ́tɔ́. Ɖó nǔkplɔ́nmɛ ce lɛ́ɛ vɛ́ wǔ ǎ, su ce lɛ́ɛ ka vɛ́ nyi ǎ. Ée Jezu ɖɔ xó énɛ́ lɛ́ɛ, bɔ é ná nɔ zaan ɔ́, é kpódó ahwanvú tɔn lɛ́ɛ kpó wá ɖo ali ɖé jí gbɔn dín wɛ, ɖo jinukúngle ɖé mɛ, ɖo gbɔjɛzán Jwifu lɛ́ɛ tɔn gbe. Xovɛ́ ka sin ahwanvú tɔn lɛ́ɛ, bɔ yě jɛ jinukún ɔ́ ba jí, bó jɛ ɖuɖu jí. Ée Falizyɛn lɛ́ɛ mɔ mɔ̌ ɔ́, yě ɖɔ nú Jezu ɖɔ jí: “Kpɔ́n ahwanvú towe lɛ́ɛ ɖo nǔ e Mɔyízisɛ́n ɔ́ gbɛ́ ɖɔ è ma wa gbɔjɛzán gbe ó é wa wɛ.” Jezu ka yí gbe nú yě ɖɔ jí: “Nǔ e Davídi wa hwenu e xovɛ́ sin é kpódó mɛ tɔn lɛ́ɛ kpó ɔ́, mi xá kpɔ́n ǎ cé? É byɔ́ sinsɛnxɔ mɛ, bɔ é kpódó mɛ tɔn lɛ́ɛ kpó ɖu nǔɖuɖu e è sɔ́ xwlé Mawu é; ɖo sɛ́n mǐtɔn mɛ ɔ́, yě ká ɖó ná ɖu ǎ; vɔ̌sánú-xwlémawutɔ́ lɛ́ɛ kɛ́ɖɛ́ jɛ́n wɛ ɖó ná ɖu. Abǐ, mi ma xa ɖo sɛ́nwéma ɔ́ mɛ ɖɔ gbɔjɛzán gbe ɔ́, vɔ̌sánú-xwlémawutɔ́ e jí azɔ̌ ɖe ɖo sinsɛnxɔ mɛ lɛ́ɛ nɔ́ gba gbɔjɛzánsɛ́n ɔ́, cóbɔ é nɔ́ gɔn hwɛ nyí nú yě ǎ cé? Má ɖɔ nú mi, nǔ hú gǎn sinsɛnxɔ wɛ ɖo fí. Nǔ e ɖɔ wɛ è ɖe bo ɖɔ: ‘Nǔbláwǔkúnúmɛ ba wɛ un ɖe; vɔ̌sísá ba wɛ un ɖe ǎ’ ɔ́, ényí ɖɔ mi ko mɔ nukúnnú jɛ xógbe énɛ́ wú wɛ ɔ́, mi sɔ́ ná ɖo hwɛ dó xomɛvɔ́nɔ lɛ́ɛ wɛ ǎ; ɖó nyɛ Gbɛtɔ́ví ɔ́ wɛ kpa acɛ nú gbɔjɛzán ɔ́.” Ée Jezu gosín fínɛ́ ɔ́, é yi kplɔ́ngbasá yětɔn. Nya ɖé ka ɖo fínɛ́, bɔ alɔ tɔn ɖokpó kú. Mɛ e ɖo fínɛ́ lɛ́ɛ kanbyɔ́ Jezu ɖɔ: “Sɛ́n ɔ́ ná gbe ɖɔ è nǐ gbɔ azɔn nú mɛ gbɔjɛzán gbe a?” Yě ɖɔ mɔ̌, ɖó yě ná mɔ nǔɖé wú ɖó dó, bó ná dó ɖó hwɛ n'i wútu. Jezu ka yí gbe nú yě ɖɔ: “Mɛ̌ ka ɖo mi mɛ, bónú gbɔ̌ ɖokpó e ɖo así tɔn ɔ́ jɛ dó mɛ gbɔjɛzán gbe ɔ́, é ma ná yi ɖe tɔ́n ǎ; gbɛtɔ́ ka xɔ akwɛ́ hú gbɔ̌. Ényí mɔ̌ hǔn, ɖo sɛ́n mǐtɔn mɛ ɔ́, è hɛn ɔ́, è nǎ wa ɖagbe gbɔjɛzán gbe.” Ée é ɖɔ mɔ̌ ɔ́, é ɖɔ nú nya ɔ́ ɖɔ: “Dlɛ̌n alɔ towe,” bɔ nya ɔ́ dlɛ́n alɔ, bɔ alɔ jɛ alɔ tɛn mɛ, bó cí wegɔ́ ɔ́ ɖɔhun, bɔ Falizyɛn lɛ́ɛ tɔ́n, bó yi kpá dó lě e yě ná hu Jezu gbɔn ɔ́ wú. Ée Jezu tunwun ɖɔ yě blá gbě émítɔn ɔ́, é gosín fí e é ɖe ɔ́; mɛ lɛ́ɛ ka nyi ahwan xwedó e, bɔ é gbɔ azɔn nú azinzɔnnɔ lɛ́ɛ bǐ. Lo ɔ́, é dó sɛ́n nú yě syɛ́nsyɛ́n ɖɔ yě ní ma yi ɖɔ mɛ e émí nyí ɔ́ nú mɛɖé ó. Nǔ nyí mɔ̌, bónú nǔ e è ko ɖɔ ɖ'ayǐ gbɔn gbeyíɖɔ Mawu tɔn Ezayíi jí ɔ́ ná dó jɛ; é wɛ nyí ɖɔ: “Mɛsɛntɔ́ ce e un sɔ́ ɔ́ ɖíe. Mɛ vívɛ́ná ce wɛ bɔ xomɛ nɔ hun mì dó wǔ tɔn. Un ná sɔ́ Yɛ ce ɖó jǐ tɔn, bɔ é ná jlá hwɛjijɔxó Mawu tɔn nú akɔta lɛ́ɛ bǐ. É ná dɔn nǔ xá mɛɖé ǎ; é ka ja xó sú gbé ǎ; mɛɖé ka ja gbe tɔn se gbé ɖo toligbó xo ǎ. É ná nyínyɛ́ fántín e ko tɔ é ǎ; é ka ná cí myɔ e ko ɖo cící wɛ é ǎ. É ná bló mɔ̌ káká jɛ hwenu e mɛ bǐ ná xwedó Mawusɛ́n ɔ́ dó é. Bɔ akɔta lɛ́ɛ bǐ na ɖó nukún i.” È kplá yɛnyanyanɔ ɖé wá nú Jezu. Nya énɛ́ nɔ́ mɔ nukúnnú ǎ, é ka nɔ́ ɖɔ xó ǎ; Jezu ka gbɔ azɔn n'i, bɔ é jɛ nǔ mɔ jí, bó jɛ xó ɖɔ jí. Nǔ énɛ́ kpácá ahwan ɔ́ tlala, bɔ yě ɖɔ: “Davídi ví ɔ́ nɛ́ ǎ cé?” Ée Falizyɛn lɛ́ɛ se xó énɛ́ ɔ́, yě ɖɔ jí: “Nya élɔ́ ɔ́, Bɛluzebúlu yɛ nyanya lɛ́ɛ xɔ́sú sín hlɔ̌nhlɔ́n wɛ é nɔ dó nya yɛ nyanya lɛ́ɛ ná.” Ée Jezu ka mɔ nǔ jɛ ayi yětɔn mɛ ɔ́, é ɖɔ nú yě ɖɔ: “Axɔ́sú ɖé sín to ma ɖó gbe kpɔ́ ǎ ɔ́, to énɛ́ ɔ́ gba wɛ é nɔ́ gba; bɔ to abǐ xwé ɖé tíin bónú mɛ e ɖ'é mɛ lɛ́ɛ sín gbe ma ɖo kpɔ́ ǎ ɔ́, to énɛ́ ɔ́, abǐ xwé énɛ́ ɔ́ gba wɛ é nɔ́ gba. Ényí Satáan ka ɖo nǔ e nyí é ɖésúnɔ tɔn ɔ́ nya wɛ ɔ́, ahwan tɔ́n éɖée wɛ é ɖe nɛ́; nɛ̌ wɛ axɔ́súɖuto tɔn ka sixú nɔ te gbɔn? Ényí ɖɔ yɛ nyanya lɛ́ɛ xɔ́sú Bɛluzebúlu sín hlɔ̌nhlɔ́n wɛ nyɛ nɔ sɔ́ dó nya yɛ nyanya lɛ́ɛ ná ɔ́, mɛ̌ sín hlɔ̌nhlɔ́n wɛ ahwanvú mitɔn lɛ́ɛ ka nɔ dó nya yě ná lo? Énɛ́ ɔ́ wútu wɛ yě ɖésúnɔ ná wá ɖɔ hwɛ xá mi. Lo ɔ́, é nyí ɖɔ Yɛ Mawu tɔn wɛ un nɔ dó nya yɛ nyanya lɛ́ɛ ná ɔ́, hǔn mi bo tunwun ɖɔ axɔ́súɖuɖu Mawu tɔn ko wá mi mɛ. “Mɛ ɖé sixú byɔ́ súnnu glegbenu ɖé xwé, bó ná fɔ nǔ tɔn lɛ́ɛ ma to blá ɛ hwɛ̌ ǎ. Lo ɔ́, ényí é blá ɛ ɔ́, é ná fɔ nǔ e ɖo xwé tɔn gbe lɛ́ɛ. “Mɛ e ma ɖo ahwan ce mɛ ǎ ɔ́, mɛ énɛ́ mɔ mì gbɔ ǎ; bɔ mɛ e ma ka nɔ dɔn gbɛtɔ́ lɛ́ɛ wá gɔ̌n ce ǎ ɔ́, gbɛtɔ́ lɛ́ɛ nya dó zɔ nú mì wɛ é ɖe. Énɛ́ ɔ́ wú wɛ un ɖo ɖiɖɔ nú mi wɛ ɖɔ: ‘Hwɛ ɖěbǔ e gbɛtɔ́ lɛ́ɛ ná hu ɔ́, kpódó nu ɖěbǔ e yě ná nylá dó Mawu wú ɔ́ kpó ɔ́, bǐ wɛ è hɛn ɔ́, è nǎ sɔ́ kɛ yě; lo ɔ́, mɛ e ná nylá nu dó Yɛsinsɛn wú ɔ́, è nǎ sɔ́ kɛ ɛ ǎ. Mɛɖěbǔ nylá nu dó nyɛ Gbɛtɔ́ví ɔ́ wú ɔ́, Mawu na sɔ́ kɛ ɛ; lo ɔ́, mɛ e ná nylá nu dó Yɛsinsɛn wú ɔ́, è nǎ sɔ́ kɛ ɛ ɖo hwe élɔ́ nu din ǎ; è ka na lɛ́ sɔ́ kɛ ɛ ɖo hwenu e jǎwe ɔ́ ǎ.’ ” “Atín ɖagbe ɔ́, sínsɛ́n ɖagbe wɛ é nɔ́ ná, bɔ atín nyanya nɔ ná sínsɛ́n nyanya; ɖó sínsɛ́n atín tɔn wɛ è nɔ kpɔ́n, bó nɔ́ dó tunwun atín alɔkpa e é nyí é. Jakpata kúnkan e mi! Nɛ̌ wɛ mi mɛ e nylá sɔ mɔ̌ lɛ́ɛ ná sixú ɖɔ nǔ ɖagbe gbɔn? Ɖó nǔ e gɔ́ ayi mɛtɔn mɛ ɔ́ wɛ nu mɛtɔn nɔ ɖɔ. Mɛ ɖagbe ɔ́, nǔ ɖagbe e ɖo ayi tɔn mɛ ɔ́ wɛ é nɔ ɖe tɔ́n, bɔ mɛ nyanya ka nɔ ɖe nǔ nyanya e ɖo ayi tɔn mɛ ɔ́ tɔ́n. Má ɖɔ nú mi: hwɛɖɔzán gbe wá su ɔ́, xó gbló e tɔ́n sín gbɛtɔ́ lɛ́ɛ nu mɛ ɔ́ bǐ sín gbe wɛ yě ná ɖó. Ɖó xó e tɔ́n sín hwi ɖésúnɔ nu mɛ ɔ́ wɛ ná ɖe xlɛ́ ɖɔ a nyǐ hwɛjijɔnɔ; xó e ná tɔ́n sín hwi ɖésúnɔ nu mɛ ɔ́ wɛ è nǎ kpɔ́n, bó ná mɔ ɖɔ a nyǐ xomɛvɔ́nɔ, abǐ a kú hwɛ.” Sɛ́nkplɔ́nmɛtɔ́ ɖé lɛ́ɛ kpódó Falizyɛn ɖé lɛ́ɛ kpó yí xó, bó ɖɔ: “ Mɛ̌si, mǐ jló ɖɔ a nǐ jlɛ́ nǔ ɖokpó nú mǐ ná kpɔ́n.” Jezu ka yí gbe nú yě ɖɔ: “Gbɛtɔ́ din tɔn mɛ nyanya gbejímánɔ-númawutɔ́ élɔ́ lɛ́ɛ ɖo nǔjíjlɛ́ Mawu tɔn ba wɛ. Lo ɔ́, yě sɔ́ ɖo ɖěvo ná mɔ wɛ zɛ gbeyíɖɔ Mawu tɔn Jonási tɔn wú ǎ; ɖó lě e Jonási nɔ hweví ɖaxó ɖé sín xomɛ xɔ kéze atɔn zǎn atɔn gbɔn ɔ́, mɔ̌ ɖokpó ɔ́ wɛ nyɛ Gbɛtɔ́ví ɔ́ ná nɔ ayǐkúngban glɔ́ xɔ kéze atɔn zǎn atɔn gbɔn. Hwɛɖɔzán gbe wá su ɔ́, Ninívunu lɛ́ɛ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó hwenu e gbeyíɖɔ Mawu tɔn Jonási ɖɔ Mawuxó nú yědɛɛ lɛ́ɛ ɖo Ninívu ɔ́, yě se, lobo lɛ́ kɔ sín hwɛ yětɔn lɛ́ɛ gúdo; éɖíe, nǔ e ka ɖo fí din ɔ́ hú gǎn Jonási; ɖo hwɛɖɔzán gbe ɔ́, axɔ́sú nyɔ̌nu tofɔligbé tɔn ɔ́ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó é gosín to línlín mɛ, bó wá ɖótó nǔnywɛ́xó axɔ́sú Salomɔ́ɔ tɔn. Nǔ e ka ɖo fí din ɔ́ hú gǎn Salomɔ́ɔ.” “Ényí yɛ nyanya gosín mɛɖé jí ɔ́, é nɔ́ yi dán gbɔn axéko jí, bó nɔ́ ɖo gbɔjɛtɛn ba wɛ; ényí é ma mɔ ǎ ɔ́, é nɔ́ ɖɔ: ‘Un ná lɛ́ kɔ yi xwé ce e gbe un gosín ɔ́.’ Nú é ka lɛ́ kɔ wá ɔ́, é nɔ́ mɔ ɖɔ nɔtɛn énɛ́ kpo ɖo vɔ̌tɔ́, bɔ è ko blóɖó bǐ. Nú é mɔ mɔ̌ ɔ́, é nɔ́ yi kplá yɛ nyanya ɖěvo e nylá hú é ɖésúnɔ ɔ́ tɛ́nwe dó éɖée jí, bɔ yě nɔ wá sá xwé nyi fínɛ́, bɔ lě e nya énɛ́ sín gbɛ nɔ wá cí ɔ́ nɔ lɛ́ nylá hú lě e é ko ɖe gbɔn ɖ'ayǐ é. Mɔ̌ wɛ é ná nyí gbɔn nú gbɛtɔ́ nyanya din tɔn lɛ́ɛ é nɛ́.” Jezu kpo ɖo xó ɖɔ nú togun ɔ́ wɛ, bɔ nɔ tɔn kpódó nɔví tɔn lɛ́ɛ kpó wá, bó ɖo te ɖo hɔnto, bó jló ná ɖɔ xó n'i; [ bɔ mɛɖé wá ɖɔ n'i ɖɔ: “Éɖíe! Nɔ towe kpódó nɔví towe lɛ́ɛ kpó ɖo biba we wɛ; yě ɖo te ɖo hɔnto, bó jló ná ɖɔ xó nú we.”] Jezu ka yí gbe nú mɛ e wá ɖɔ xó n'i ɔ́ ɖɔ: “Mɛ̌ ka nyí nɔ ce? Mɛ̌ ka nyí nɔví ce lɛ́ɛ?” Ée é ɖɔ mɔ̌ ɔ́, é dlɛ́n alɔ dó ahwanvú tɔn lɛ́ɛ, bó ɖɔ: “Nɔ ce kpódó nɔví ce lɛ́ɛ kpó ɖíe; ɖó mɛ ɖěbǔ bló Tɔ́ ce e ɖo sɛ́xwé ɔ́ sín jlǒ ɔ́, mɛ énɛ́ wɛ nyí nɔví ce súnnu, bó nyí nɔví ce nyɔ̌nu, bó nyí nɔ ce.” Gbe nɛ́ gbe ɖokpó ɔ́, Jezu tɔ́n sín xwé gbe, bó yi jínjɔ́n xutó, bó ná kplɔ́n nǔ mɛ. Ahwan e lɛ́ lɛ̌ dó e ɔ́ sukpɔ́ káká, bɔ é byɔ́ tɔjíhún mɛ, bó jínjɔ́n ayǐ, bó ná kplɔ́n nǔ yě; mɛ lɛ́ɛ bǐ sésé ka ɖo te ɖo xu ɔ́ tó. É dó lǒ dó ɖɔ xó nú yě dó nǔ gěgé jí; é ɖɔ nú yě ɖɔ: “Glesi ɖé tɔ́n gbe ɖokpó, bó yi nǔkún hú gbé. Hwenu e é ɖo nǔkún ɔ́ hú gbɔn gle ɔ́ mɛ wɛ ɔ́, ɖě jɛ ali jí, bɔ xɛ lɛ́ɛ wá cyán ɖu; ɖě yi jɛ awǐnnyakan mɛ fí e kɔ́ gěgé ɖé ma ɖe ǎ é; énɛ́ lɛ́ɛ yá wǔ wú, ɖó kɔ sukpɔ́ ɖo fínɛ́ ǎ; lo ɔ́, ɖěe hwesivɔ́ hun ɔ́, yě fyɔ́ lobo xú, ɖó ɖɔ yětɔn yi do ǎ wútu. Ɖěvo lɛ́ɛ jɛ wundonu, bɔ wun lɛ́ɛ wú, bó vun blá yě. Ɖěvo lɛ́ɛ jɛ ayǐkúngban ɖagbe jí, yědɛɛ lɛ́ɛ wú, bó sɛ́n ganjí; bɔ nǔkún ɖě ná mɔ̌hunkɔtɔn donu kanwe ko (100); ɖěvo ná mɔ̌hunkɔtɔn donu kanɖé ko (60); ɖěvo lɛ́ ná mɔ̌hunkɔtɔn donu gban (30).” Bó ná dó sú ta ná ɔ́, Jezu ɖɔ: “Mɛ e ɖó tó bó ná dó se nǔ ná ɔ́ ní ɖótó bó se.” Ahwanvú Jezu tɔn lɛ́ɛ sɛ yá ɛ, bó kanbyɔ́ ɛ ɖɔ: “Aniwútu wɛ a ka nɔ dó lǒ dó ɖɔ xó nú yě?” Jezu yí gbe nú yě ɖɔ: “ Axɔ́súɖuɖu sɛ́xwé tɔn sín nǔbúdo lɛ́ɛ ɔ́, midɛɛ lɛ́ɛ wɛ è hun xlɛ́; è ka xlɛ́ yědɛɛ lɛ́ɛ ǎ. Ɖó mɛ e ɖó nǔ ɔ́, è nǎ lɛ́ ná ɛ d'é jí, bɔ é ná túnflá; mɛ e ma ka ɖó nǔɖé ǎ ɔ́, è nǎ lɛ́ yí kpɛ e ɖo así tɔn é. Nǔ e wú un nɔ dó lǒ dó ɖɔ xó nú yě ɔ́ nɛ́; ɖó yě ɖo nǔ mɔ wɛ, cóbó nyí mamɔtɔ́; yě ɖo nǔ se wɛ, cóbó nyí masetɔ́; yě ká nɔ lɛ́ mɔ nukúnnú jɛ nǔ ɖěbǔ mɛ ǎ. Nǔ nyí mɔ̌, bónú xó e Mawu ɖɔ gbɔn gbeyíɖɔ tɔn Ezayíi jí ɔ́ ná ɖi yě wú; é wɛ nyí ɖɔ: ‘Mi ná se céɖécéɖé, mi ka ná mɔ nǔ jɛ mɛ ǎ; mi ná mɔ ganjí, có mi ka ná mɔ ǎ. Ɖó togun élɔ́ sín ayixa ko syɛ́n; yě sú tó yětɔn, bó myɔ́ nukún, ɖó nukún yětɔn táá wá mɔ nǔ, bónú tó yětɔn táá wá se nǔ, nú ayixa yětɔn ná wá ja nǔ mɔ jɛ nǔ mɛ gbé, bónú yě ná wá ja kɔ lɛ́ sín hwɛ yětɔn lɛ́ɛ gúdo gbé, nú ma wá gbɔ azɔn nú yě. Xó e Aklúnɔ ɖɔ ɔ́ nɛ́.’ “Amɔ̌, midɛɛ lɛ́ɛ ɔ́, nǔ nyɔ́ nú mi, ɖó nukún mitɔn lɛ́ɛ nɔ́ mɔ nǔ, bɔ tó mitɔn lɛ́ɛ nɔ́ se nǔ. Ma ɖɔ nǔgbó nú mi, gbeyíɖɔ Mawu tɔn gěgé kpódó hwɛjijɔnɔ gěgé kpó ko jló ná mɔ nǔ e mɔ wɛ mi ɖe lɛ́ɛ, yě ká mɔ ǎ; yě jló ná se nǔ e se wɛ mi ɖe din é, yě ká se ǎ.” “Midɛɛ lɛ́ɛ ɔ́, mi bo ɖótó lǒ e un dó nú yě dó nǔkúndótɔ́ wú ɔ́ sín tínmɛ. Ayǐkúngban e jí nǔkún lɛ́ɛ jɛ ɖo alixo ɔ́ wɛ nyí mɛ e se axɔ́súɖuɖu Mawu tɔn sín xó, bó ma mɔ nukúnnú jɛ wú ǎ é; awǒvi nɔ́ wá ɖe ée é se ɔ́ sín ayi tɔn mɛ. Awǐnnyakan mɛ fí e nǔkún ɖě lɛ́ɛ yi jɛ, bó wú tlóló ɔ́ wɛ nyí mɛ e se axɔ́súɖuɖu Mawu tɔn sín xó, bó yí dó ayi mɛ tlóló kpódó awǎjijɛ kpó é; lo ɔ́, é ka dó ɖɔ do ǎ; é syɛ́nlǐn ǎ, bɔ hwenu e è nɔ wá ɖo tagba dó nú mɛ wɛ, abǐ è nɔ ɖo mɛ ɖe dó wɛ ɖó Mawuxó ɔ́ wútu ɔ́, nǔɖiɖi tɔn nɔ́ jɛ ayǐ. Ayǐkúngban e jí nǔkún lɛ́ɛ jɛ ɖo wundonu ɔ́ wɛ nyí mɛ e nɔ se axɔ́súɖuɖu Mawu tɔn sín xó, bɔ gbɛmɛ fí sín tagba lɛ́ɛ, dɔkun gbɛmɛ fí tɔn sín mɛdindɔn lɛ́ɛ nɔ́ vun blá xó ɔ́, bɔ é má nɔ́ sixú ná sínsɛ́n ǎ é. Ayǐkúngban ɖagbe e jí nǔkún lɛ́ɛ jɛ, bó ná sínsɛ́n gěgé ɔ́ wɛ nyí mɛ e se axɔ́súɖuɖu Mawu tɔn sín xó, bó mɔ nǔ jɛ mɛ é. É nɔ ná sínsɛ́n, bɔ ɖě nɔ́ ná mɔ̌hunkɔtɔn donu kanwe ko (100); ɖě ká nɔ ná mɔ̌hunkɔtɔn donu kanɖé ko (60); ɖěvo nɔ lɛ́ ná mɔ̌hunkɔtɔn donu gban (30).” Jezu lɛ́ dó lǒ ɖěvo nú yě bó ɖɔ: “ Axɔ́súɖuto sɛ́xwé tɔn cí nya e dó jinukún ɖagbe kɛ́ɖɛ́ dó gle tɔn mɛ ɔ́ ɖɔhun; hwenu e mɛ lɛ́ɛ bǐ ɖo amlɔ dɔ́ wɛ zǎn mɛ ɔ́, kɛntɔ́ tɔn wá dó gběhan nyanya kɔn nyi gle tɔn mɛ bó yi. Hwenu e jinukún lɛ́ɛ su, bó jɛ sínsɛ́n jí ɔ́, è wǎ mɔ nukúnnú jɛ gběhan nyanya lɛ́ɛ lɔmɔ̌ wú. Xwétɔ́ ɔ́ sín mɛsɛntɔ́ lɛ́ɛ wá ɖɔ n'i ɖɔ: ‘Aklúnɔ, é ma ka nyí jinukún ɖagbe kɛ́ɖɛ́ wɛ a dǒ nyi gle towe mɛ ǎ cé? Fítɛ́ gběhan nyanya ka gosín, bó wá tɔ́n ɖ'é mɛ?’ É ka yí gbe nú yě ɖɔ: ‘Kɛntɔ́ sín nǔwiwa wɛ.’ Mɛsɛntɔ́ tɔn lɛ́ɛ ka kanbyɔ́ ɛ ɖɔ: ‘A jlǒ ɖɔ mǐ ní hɔn gběhan nyanya lɛ́ɛ síin a?’ Gǎn yětɔn ka gbɛ́ nú yě bó ɖɔ: ‘Éeǒ! Mi táá wá yi xwe gběhan nyanya lɛ́ɛ hɔn gbé, bó ná hɔn jinukún ɖagbe lɛ́ɛ kpódó yě kpó ɖó kpɔ́. Mi jó we lɛ́ɛ dó, bónú yě ní su zɛ̌nzɛ̌n. Nǔkún-yiyahwenu ko wá su ɔ́, un ná ɖɔ nú nǔkún-yatɔ́ lɛ́ɛ ɖɔ: mi to hɔn gběhan nyanya lɛ́ɛ síin hwɛ̌, bó blá yě ɖó sonu sonu, bónú è nǎ dó zo; lo ɔ́, mi bɛ́ jinukún lɛ́ɛ dó agɔ̌ ce mɛ.’ ” Jezu lɛ́ dó lǒ ɖěvo nú yě bó ɖɔ: “ Axɔ́súɖuto sɛ́xwé tɔn cí atínkwín wínníwínní ɖé ɖɔhun, bɔ nya ɖé dó nyi gle tɔn mɛ. Atínkwín énɛ́ ɔ́ wínní hú atínkwín ɖě lɛ́ɛ bǐ; lo ɔ́, hwenu e é wá wú ɔ́, atín tɔn yi jǐ hú atín ɖě lɛ́ɛ bǐ, káká bó húzú atín ɖaxó, bɔ xɛ lɛ́ɛ nɔ́ xo adɔ̌ nyi ala tɔn lɛ́ɛ mɛ.” Jezu lɛ́ dó lǒ ɖěvo nú yě bó ɖɔ: “ Axɔ́súɖuto sɛ́xwé tɔn cí tɔ́n ɖɔhun, bɔ nǎwe ɖé sɔ́ dó linfín nǎ yi gannú atɔn mɔ̌ mɛ, bónú linfín nyinya ɔ́ bǐ ná dó fɔ́n.” Lǒ wɛ Jezu nɔ dó ɖɔ xó énɛ́ lɛ́ɛ bǐ nú ahwan lɛ́ɛ. É nɔ́ ɖɔ xó nú yě ma gɔn lǒ dó ǎ; bónú xó e gbeyíɖɔ Mawu tɔn ko ɖɔ ɔ́ ná dó jɛ; é wɛ nyí ɖɔ: “Un ná nɔ́ dó lǒ dó ɖɔ xó nú yě; un ná jlá nǔ e ɖo wi mɛ sín hwenu e è ko ɖó gbɛ ɔ́ dó ɔ́ yě.” Jezu nyi togun ɔ́, bó yi xwé gbe, bɔ ahwanvú tɔn lɛ́ɛ sɛkpɔ́ ɛ, bó ɖɔ n'i ɖɔ: “Lǒ e a dǒ dó ɖɔ xó dó gběhan nyanya e ɖo gle mɛ ɔ́ wú ɔ́, tínmɛ nú mǐ.” Jezu ka yí gbe nú yě ɖɔ: “Mɛ e dó nǔkún ɖagbe ɔ́, nyɛ Gbɛtɔ́ví ɔ́ wɛ; gle ɔ́ wɛ nyí gbɛ ɔ́; nǔkún ɖagbe ɔ́ wɛ nyí axɔ́súɖuto Mawu tɔn sín vǐ lɛ́ɛ; gběhan nyanya ɔ́ wɛ nyí awǒvi sín vǐ lɛ́ɛ. Kɛntɔ́ e dó gběhan nyanya ɔ́, awǒvi wɛ; nǔkún-yiyahwenu ɔ́, gbɛvivɔzán gbe wɛ; nukún-yatɔ́ lɛ́ɛ wɛ nyí wɛnsagun Mawu tɔn lɛ́ɛ. Lě e è blá gběhan nyanya lɛ́ɛ ɖó kpɔ́, bó dó zo gbɔn ɔ́, mɔ̌ wɛ é ná nyí gbɔn ɖo gbɛvivɔzán gbe. Nyɛ Gbɛtɔ́ví ɔ́ ná sɛ́ wɛnsagun ce lɛ́ɛ dó, bɔ yě ná wá bɛ́ hwɛmɛdɔnmɛdótɔ́ lɛ́ɛ bǐ kpódó nǔnyanyawatɔ́ lɛ́ɛ kpó sín axɔ́súɖuto Mawu tɔn mɛ, bó ná bɛ́ yě nyi dó zo mɛ. Fínɛ́ wɛ yě ná ya avǐ, bó ná ɖu aɖǔkún ɖe. Hwenɛ́nu ɔ́, Mawu ná sɔ́ hwɛjijɔnɔ lɛ́ɛ su, bó ná zé yě dó húzú nǔɖaxó ná ɖo axɔ́súɖuto tɔn mɛ. Mɛ e ɖó tó bó ná dó se nǔ ná ɔ́ ní ɖótó bó se.” “ Axɔ́súɖuto sɛ́xwé tɔn cí dɔkun e è zě hwlá dó gle ɖé mɛ ɔ́ ɖɔhun. Nya ɖé wá yi tɔ́n dó dɔkun énɛ́ ɔ́ jí, bó lɛ́ zé hwlá. É víví n'i káká, bɔ é yi sa nǔ e ɖo así tɔn lɛ́ɛ bǐ, bó zé akwɛ́ ɔ́ dó wá xɔ gle ɔ́ ná.” “Axɔ́súɖuto sɛ́xwé tɔn lɛ́ cí ajɔ̌tɔ́ e ɖo jɛ̌ ɖagbe ɖagbe lɛ́ɛ ba wɛ ɔ́ ɖɔhun. É wá yi mɔ jɛ̌ xɔ akwɛ́ ɖaxó énɛ́ ɖokpó ɖo mɛɖé sí, bó yi sa nǔ e ɖo así tɔn lɛ́ɛ bǐ, bó zé akwɛ́ ɔ́ dó wá xɔ ná.” “ Axɔ́súɖuto sɛ́xwé tɔn lɛ́ cí ɖɔ e è nyi dó tɔ mɛ, bɔ é wlí hweví tɛnmɛ tɛnmɛ é ɖɔhun. Ée hweví gɔ́ ɖɔ ɔ́, ɖɔnyitɔ́ lɛ́ɛ dɔn wá agě jí; yě jínjɔ́n tɔ ɔ́ tó, bó ɖe ɖɛ hweví lɛ́ɛ; yě cyán ɖagbe lɛ́ɛ dó nǔ mɛ, bó bɛ́ ée má nyɔ́ ǎ lɛ́ɛ nyi gbě. Mɔ̌ wɛ é ná nyí gbɔn ɖo gbɛvivɔzán gbe. Wɛnsagun Mawu tɔn lɛ́ɛ ná cyán mɛ nyanya lɛ́ɛ sín mɛ ɖagbe lɛ́ɛ mɛ, bó ná bɛ́ mɛ nyanya lɛ́ɛ kɔn nyi zo hɛhɛ mɛ. Fínɛ́ wɛ yě ná ya avǐ, bó ná ɖu aɖǔkún ɖe.” Ée Jezu ɖɔ xó énɛ́ lɛ́ɛ gúdo ɔ́, é wá kanbyɔ́ ahwanvú tɔn lɛ́ɛ ɖɔ: “Mi mɔ nǔ jɛ xó e un ɖɔ lɛ́ɛ bǐ mɛ a?” Yě ká yí gbe n'i ɖɔ: “Ɛɛn, mǐ mɔ nǔ jɛ mɛ.” Jezu ka ɖɔ nú yě ɖɔ: “Sɛ́nkplɔ́nmɛtɔ́ e wá húzú axɔ́súɖuto sɛ́xwé tɔn sín ahwanvú ɔ́ cí xwétɔ́ e cyán nǔ yɔ̌yɔ́ kpódó nǔ xóxó kpó sín dɔkun tɔn lɛ́ɛ mɛ ɔ́ ɖɔhun.” Ée Jezu dó lǒ énɛ́ lɛ́ɛ fó ɔ́, é gosín fínɛ́, bó yi Nazalɛ́ti fí e é su ɖe ɔ́, bó jɛ nǔ kplɔ́n mɛ lɛ́ɛ jí ɖo kplɔ́ngbasá Jwifu lɛ́ɛ tɔn. Nǔkplɔ́nmɛ tɔn kpácá yě tlala, bɔ yě nɔ́ kanbyɔ́ yěɖée ɖɔ: “Fítɛ́ é ka yi ba nǔnywɛ́ énɛ́ ɔ́ sín? Hlɔ̌nhlɔ́n e é nɔ́ dó ɖo nǔ lɛ́ɛ jlɛ́ ná wɛ ɔ́, fítɛ́ é ka yi ba sín? Atínkpatɔ́ví ɔ́ nɛ́ ǎ cé? Mali wɛ nyí nɔ tɔn ǎ cé? Nɔví tɔn lɛ́ɛ wɛ nyí Jaki kpódó Jozɛ́fu kpó, Sinmɔ́ɔ kpó Judi kpán ǎ cé? Nɔví tɔn nyɔ̌nu lɛ́ɛ bǐ ma ka ɖo mǐ mɛ fí din a? Fítɛ́ é ka yi ba nǔnywɛ́ énɛ́ kpódó hlɔ̌nhlɔ́n énɛ́ kpó sín?” Bɔ nǔ énɛ́ lɛ́ɛ nyí afɔklɛ́nnú nú yě. Jezu ka ɖɔ nú yě ɖɔ: “Mɛ bǐ wɛ nɔ́ sí gbeyíɖɔ Mawu tɔn; to tɔn mɛ nu lɛ́ɛ, kpódó xwé tɔn gbe nu lɛ́ɛ kpán jɛ́n ma nɔ́ sí i ǎ.” Jezu ka jlɛ́ nǔ gěgé ɖé ɖo fínɛ́ ǎ, ɖó nǔmaɖi yětɔn wú. Hwenɛ́nu ɔ́, tokpɔngán Elódu se nǔwiwa Jezu tɔn lɛ́ɛ, bó ɖɔ nú mɛsɛntɔ́ tɔn lɛ́ɛ ɖɔ: “Jǎan Yɛhwesinlɛnúmɛtɔ́ ɔ́ wɛ; é fɔ́n sín mɛkúkú lɛ́ɛ mɛ; énɛ́ wútu wɛ é ɖó hlɔ̌nhlɔ́n, bó ɖo nǔ énɛ́ lɛ́ɛ jlɛ́ wɛ.” bó jló ná hu i; lo ɔ́, é ɖo xɛsi ɖi nú togun ɔ́ wɛ, ɖó togun ɔ́ nɔ́ mɔ Jǎan dó mɔ gbeyíɖɔ Mawu tɔn ná. Gbe ɖokpó ka wá su, bɔ Elódu ɖo jijizán tɔn sín xwe ɖu wɛ; Elodiadi sín vǐ ɖyɔ̌vǐ ɔ́ ka wá ɖú we ɖo jǒnɔ lɛ́ɛ nukɔn. We tɔn nyɔ́ Elódu nukún mɛ, bɔ é dó akpá nú vǐ ɖyɔ̌vǐ ɔ́, bo xwlé nǔ d'é jí ɖɔ é byɔ́ nǔ ɖěbǔ ɔ́, émí ná ná ɛ. Vǐ ɔ́ sín nɔ ka kplɔ́n nǔ i bɔ é ɖɔ: “Nǎ Jǎan Yɛhwesinlɛnúmɛtɔ́ ɔ́ sín ta mì dó gannúgbɛ́jɛ́ mɛ ɖo fí din tlóló.” Ée é ɖɔ mɔ̌ ɔ́, wǔ kú gǎn ɔ́; lo ɔ́, ée é kó dó akpá, bó xwlé nǔ d'é jí ɖo jǒnɔ lɛ́ɛ nukɔn ɔ́, é ná gbe ɖɔ è nǐ yi gbo Jǎan sín ta ɖo gankpá mɛ wá n'i. Bɔ è yi gbo ta tɔn dó gannúgbɛ́jɛ́ mɛ wá nú ɖyɔ̌vǐ ɔ́, bɔ é sɔ́ yi jó nú nɔ tɔn. Jǎan sín ahwanvú lɛ́ɛ wá sɔ́ cyɔ tɔn bó yi ɖi, bó ká yi ɖɔ nǔ e jɛ ɔ́ nú Jezu. Ée Jezu se ɖɔ Jǎan Yɛhwesinlɛnúmɛtɔ́ ɔ́ kú ɔ́, é byɔ́ tɔjíhún ɖé mɛ, bó ɖidó zɔ fí e mɛɖé ma ná mɔ ɛ ɖe ǎ é. Ahwan ɔ́ ka wɔ́ fí e é xwe ɔ́, bó gosín to lɛ́ɛ mɛ to lɛ́ɛ mɛ, bó zɔn afɔ jɛ gǔdo tɔn. Ée Jezu wá tɔ́n sín tɔjíhún ɔ́ mɛ ɔ́, é mɔ gbɛtɔ́ wɔ̌buwɔ́bú ɖé lɛ́ɛ; nǔ yětɔn blá wǔ n'i, bɔ é gbɔ azɔn nú azinzɔnnɔ e ɖo yě mɛ lɛ́ɛ. Ée gbadanu wá su ɔ́, ahwanvú Jezu tɔn lɛ́ɛ sɛ yá ɛ, bó ɖɔ n'i ɖɔ: “Fí e mǐ ɖe ɖo fí ɔ́ yá dó toxo ɖěbǔ ǎ; zǎn ɖíe ká ɖo kúkú wɛ e; gbɔ bo nyi mɛ lɛ́ɛ, bónú yě ná yi ba nǔɖé ɖu ɖo gletoxo lɛ́ɛ mɛ.” Jezu ka yí gbe nú yě ɖɔ: “Yě ɖó ná yi gbɔn mɔ̌ ǎ; mi ɖésúnɔ mi ná nǔɖuɖu yě.” Lo ɔ́, yě ɖɔ n'i ɖɔ: “Wɔ̌xúxú atɔ́ɔ́n kpódó hweví we kpó jɛ́n ɖo mǐ sí.” Jezu ka ɖɔ nú yě ɖɔ: “Mi bɛ́ yě wá nú mì.” Bɔ é ɖe gbe nú mɛ lɛ́ɛ, bɔ yě jínjɔ́n gběhan jí. É fɔ wɔ̌xúxú atɔ́ɔ́n lɛ́ɛ, kpódó hweví we lɛ́ɛ kpán, bó kpɔ́n jǐ, bó dó kú nú Tɔ́ ɔ́. Énɛ́ ɔ́ gúdo ɔ́, é kán wɔ̌xúxú lɛ́ɛ, lobo bɛ́ nú ahwanvú tɔn lɛ́ɛ, bɔ yě má nú mɛ lɛ́ɛ. Yě bǐ ɖu nǔ, bó gɔ́ xo, bɔ è kplé nǔɖuɖu e kpo ɔ́, bɔ é gɔ́ xasun wěwe. Mɛ e ɖu nǔ lɛ́ɛ ka yi gbɛtɔ́ děgba ɖě afatɔ́n (5.000); è ka xa nyɔ̌nu lɛ́ɛ kpódó yɔkpɔ́vú lɛ́ɛ kpó ǎ. Énɛ́ gúdo tlóló ɔ́, Jezu ɖɔ nú ahwanvú tɔn lɛ́ɛ ɖɔ hwenu e émí ná ɖo mɛ lɛ́ɛ nyi sɛ́ dó xwé wɛ ɔ́, yědɛɛ lɛ́ɛ ní byɔ́ tɔjíhún ɔ́ mɛ, bó jɛ nukɔn ɖidó agě ɖě ɔ́ jǐ. Ée Jezu nyi mɛ lɛ́ɛ sɛ́ dó xwé ɔ́, é wá yi xá só ɖé jí, bó ná yi xo ɖɛ. Zǎn kú, bɔ é kpo é ɖokpónɔ géé ɖo fínɛ́. Tɔjíhún ɔ́ ko sɛ yi xuzan mɛ, bɔ xu ɔ́ nɔ xo wá gba kɔn nyi wú, ɖó hǔn ɔ́ ɖo jɔhɔn kpé wɛ. Sín gan atɔn sɔ́ yi gan ayizɛ́n mɛ ayǐtéhɔ̌nnu mɔ̌ ɔ́, Jezu ɖi zɔnlin gbɔn xu ɔ́ jí, bó ɖidó yě gɔ̌n. Ée ahwanvú tɔn lɛ́ɛ mɔ ɛ ɖo zɔnlin ɖi wɛ gbɔn xu jí ɔ́, ayi yětɔn gbadó, bɔ yě ɖɔ: “Nǔ ɖíe kpé wɛ mǐ ɖe e!” Énɛ́ ɔ́, xɛsi jɛ yě jí, bɔ yě sú xó. Jezu ka ɖɔ nú yě tlóló ɖɔ: “Mi kpan akɔ́n, nyɛ wɛ; mi ma ɖi xɛsi ó.” Piyɛ́ɛ ka ɖɔ n'i ɖɔ: “Aklúnɔ, ényí hwi jɛ́n wɛ nǔgbó hǔn, bo ɖe gbe nú ma ɖi zɔnlin gbɔn tɔ ɔ́ jí wá kpé we.” Bɔ Jezu ɖɔ n'i ɖɔ: “Wǎ!” Piyɛ́ɛ ka tɔ́n sín tɔjíhún ɔ́ mɛ, bó jɛ zɔnlin ɖi jí, bó ɖidó Jezu gɔ́n. Lo ɔ́, ée Piyɛ́ɛ mɔ ɖɔ jɔhɔn ɔ́ ɖo syɛ́nsyɛ́n d'é jí wɛ ɔ́, xɛsi jɛ jǐ tɔn, bɔ é jɛ do yi jí, bó sú xó bó ɖɔ: “Aklúnɔ, hwlɛ̌n mì!” Tlóló ɔ́, Jezu dlɛ́n alɔ, bó hɛn ɛ, bó ɖɔ n'i ɖɔ: “Nǔɖiɖihwedónánɔ, étɛ́wú wɛ a xo nǔ kpɔ́n?” Bɔ yě byɔ́ tɔjíhún ɔ́ mɛ, bɔ jɔhɔn ɔ́ xwɛ. Mɛ e ɖo tɔjíhún ɔ́ mɛ lɛ́ɛ wá jɛ kpo ɖo Jezu nukɔn, bó ɖɔ: “Mawu ví wɛ a nyǐ nǔgbó.” Ée yě jɛ agě ɖě ɔ́ jí ɔ́, yě jɛ Jenɛzalɛ́ti sín ayǐkúngban jí. Mɛ e ɖo fínɛ́ lɛ́ɛ ka mɔ ɖɔ Jezu wɛ wá, bó sɛ́ wɛn dó mɛ e ɖo toxo ɔ́ mɛ lɛ́ɛ bǐ, bɔ yě kplá azinzɔnnɔ lɛ́ɛ bǐ wá n'i; énɛ́ ɔ́, è sa vo n'i ɖɔ é ní ná gbe yě nú yě vɛ́ kó ɖó alɔ awu tɔn tó kpowun; bɔ azinzɔnnɔ e ɖó alɔ awu tɔn tó lɛ́ɛ bǐ sín azɔn gbɔ. Hwenɛ́nu ɔ́, Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpó gosín Jeluzalɛ́mu, bó wá Jezu gɔ́n, bó kanbyɔ́ ɛ ɖɔ: “Aniwútu wɛ ahwanvú towe lɛ́ɛ ma ka nɔ́ xwedó mɛxó mitɔn lɛ́ɛ sín hwɛndo ǎ? Ɖó yě nɔ klɔ́ alɔ lě e sɛ́n ɔ́ zɔ́n gbɔn é cóbó nɔ ɖu nǔ ǎ.” Jezu ka ɖɔ nú yě ɖɔ: “Bɔ aniwútu wɛ midɛɛ lɛ́ɛ ka nɔ gba Mawusɛ́n ɔ́, bó nɔ́ xwedó mi ɖésúnɔ sín hwɛndo lɛ́ɛ? Ɖó Mawu ɖɔ: ‘Sí tɔ́ towe kpódó nɔ towe kpó; mɛ e ka na ɖɔ nǔ nyanya dó tɔ́ tɔn abǐ nɔ tɔn wú ɔ́, è ní hu i.’ Midɛɛ lɛ́ɛ ka nɔ́ ɖɔ mɛ e ná ɖɔ nú tɔ́ tɔn abǐ nɔ tɔn ɖɔ: ‘Nǔ e un ɖó bo na dó gɔ́ alɔ nú we ɔ́, un ko sɔ́ ɖó ayǐ nú Mawu’ ɔ́, mɛ énɛ́ ɔ́ sɔ́ ɖó nǔɖé bó ná wa nú tɔ́ tɔn abǐ nɔ tɔn dandan ǎ. Mɔ̌ wɛ mi nɔ gba Mawusɛ́n ɔ́, bó nɔ́ xwedó hwɛndo tɔ́gbó mitɔn lɛ́ɛ tɔn gbɔn. Yɛmɛnúwatɔ́ e mi! Xó e Ezayíi ɖɔ dó mi wú ɔ́ ɖi mi wú dódó. É wɛ nyí ɖɔ: ‘Togun élɔ́ nɔ sɔ́ mì su ɖo nu; ayi tɔn ka ɖo wǔ ce ǎ. Yě ɖo sinsɛn mì wɛ bo ɖɔ; lo ɔ́, nǔ yǎyá wa wɛ yě ɖe; yě ɖo Mawuxó kplɔ́n mɛ wɛ bo ɖɔ; lo ɔ́, gbɛtɔ́ lɛ́ɛ sín sɛ́n kplɔ́n mɛ wɛ yě ɖe.’ ” Jezu ylɔ́ togun ɔ́, bo ɖɔ n'i ɖɔ: “Mi ɖótó ganjí, bo se; nǔ e nɔ byɔ́ gbɛtɔ́ nu mɛ ɔ́ wɛ nɔ hɛn gbɛtɔ́ blí ǎ; lo ɔ́, nǔ e nɔ tɔ́n sín gbɛtɔ́ nu mɛ ɔ́ wɛ nɔ hɛn gbɛtɔ́ blí.” Énɛ́ gúdo ɔ́, ahwanvú tɔn lɛ́ɛ sɛkpɔ́ ɛ, bo ɖɔ n'i ɖɔ: “A ka nywɛ́ ɖɔ xó e a ɖɔ nɛ́ lɛ́ɛ vɛ́ Falizyɛn lɛ́ɛ wú a?” Jezu ka yí gbe nú yě ɖɔ: “Atín ɖěbǔ e tɔ́ ce e ɖo sɛ́xwé ɔ́ ma tun ǎ ɔ́, è nǎ hɔn. Mi jó yě dó; nukúntíntɔ́nnɔ lɛ́ɛ wɛ ɖo yěɖée kplá wɛ; ényí nukúntíntɔ́nnɔ ɖě ɖo ali xlɛ́ ɖě wɛ ɔ́, yě mɛ we lɛ́ɛ bǐ wɛ nɔ yi jɛ do mɛ.” Piyɛ́ɛ ka yí xó, bó ɖɔ nú Jezu ɖɔ: “Tín lǒ énɛ́ mɛ nú mǐ.” Bɔ Jezu yí gbe n'i bo ɖɔ: “Midɛɛ lɛ́ɛ lɔmɔ̌ ɔ́, nǔnywɛ́ lɛ́ hwedó mi sɔ mɔ̌ wɛ a? Hǔn, mi tunwun ɖɔ nǔ ɖěbǔ byɔ́ gbɛtɔ́ sín nu mɛ ɔ́, adɔgo mɛ wɛ é nɔ dín yi, bó nɔ́ wá yi tɔ́n hwenu e è yi afɔjí ɔ́ ǎ cé? Lo ɔ́, nǔ e tɔ́n sín gbɛtɔ́ nu mɛ ɔ́, ayi tɔn mɛ wɛ é gosín; nǔ énɛ́ wɛ nɔ́ hɛn gbɛtɔ́ blí; ɖó ayi mɛ wɛ nǔ nyanya tɛnmɛ tɛnmɛ lɛ́ɛ nɔ́ gosín: mɛhuhu, agalilɛ, nǔblíblí wiwa, ajojija, kúnnu agɔ ɖiɖe, hɛ̌ndómɛ. Nǔ énɛ́ lɛ́ɛ wɛ nɔ́ hɛn gbɛtɔ́ blí. Alɔ ma klɔ́, cóbó ɖu nǔ e ɖo sɛ́n ɔ́ mɛ ɔ́ wɛ nɔ́ hɛn gbɛtɔ́ blí ǎ.” Jezu gosín fínɛ́, bo wá yi Tíi kpódó Sidɔ́ɔn to kpó gbé jí. Nyɔ̌nu Kanáanu ɖokpó ka gosín gbě nɛ́ ɔ́ jí, bó wá Jezu gɔ́n. É jɛ xó sú jí, bó ɖɔ: “Aklúnɔ! Davídi ví, kú nǔbláwǔ nú mì. Yɛ nyanya ɖo vǐ ce nyɔ̌nu jí, bɔ é ɖo wǔvɛ́ mɔ wɛ baɖabaɖa.” Jezu ka kɛ nu ǎ. Ahwanvú tɔn lɛ́ɛ ka sɛ yá ɛ, bó ɖɔ n'i ɖɔ: “Nya nyɔ̌nu ɔ́, ɖó é ɖo xó sú ɖo gǔdo mǐtɔn wɛ dín.” Jezu ka yí gbe bo ɖɔ: “Izlayɛ́li ví e ci lɛ̌ngbɔ́ búbú ɖɔhun lɛ́ɛ kɛ́ɖɛ́ gbé mɛ wɛ Mawu sɛ́ mì dó.” Lo ɔ́, nyɔ̌nu ɔ́ wá jɛ kpo ɖo Jezu nukɔn, bó ɖɔ: “Aklúnɔ, hwlɛ̌n mì!” Jezu ka yí gbe n'i bó ɖɔ: “É jɛ xá bónú è nǎ zé nǔɖuɖu yɔkpɔ́vú lɛ́ɛ tɔn jó nú cukú lɛ́ɛ ǎ.” Nyɔ̌nu ɔ́ ka yí gbe nú Jezu bó ɖɔ: “Nǔgbó wɛ Aklúnɔ; é ka ɖo mɔ̌ có cukú lɛ́ɛ nɔ́ cyán mɛ e ɖó yě lɛ́ɛ sín nǔɖuɖu e nɔ́ hlɛ́n kɔn nyi ayǐ hwenu e è ɖo nǔ ɖu wɛ ɔ́ ɖu.” Ée nyɔ̌nu ɔ́ ɖɔ mɔ̌ ɔ́, Jezu yí gbe n'i ɖɔ: “Nyɔ̌nu, nǔɖiɖi towe d'agba; lě e a jlǒ gbɔn ɔ́, ní bó nyí mɔ̌ nú we.” Hwenɛ́nu tlóló ɔ́, azɔn gbɔ nú vǐ tɔn. Jezu gosín fínɛ́, bó yi Galilée xutó. É xá só jí, bó jínjɔ́n ayǐ. Mɛ lɛ́ɛ ka nyi ahwan kpɔ́ gégé wá gɔ̌n tɔn. Yě kplá nukúntíntɔ́nnɔ lɛ́ɛ, sékúnɔ lɛ́ɛ, wɔ̌ngblénánɔ lɛ́ɛ, ɖɛ̌kúnánɔ lɛ́ɛ, kpódó azinzɔnnɔ ɖěvo ɖěvo lɛ́ɛ kpó wá nukɔn tɔn, bɔ é gbɔ azɔn nú yě bǐ. Ée mɛ lɛ́ɛ mɔ ɖɔ ɖɛ̌kúnánɔ lɛ́ɛ ɖo xó ɖɔ wɛ céɖécéɖé, bɔ wǔ syɛ́n wɔ̌ngblénánɔ lɛ́ɛ, bɔ sékúnɔ lɛ́ɛ ɖo zɔnlin ɖi wɛ, bɔ nukúntíntɔ́nnɔ lɛ́ɛ ɖo nǔ mɔ wɛ ɔ́, é kpácá yě ɖésú, bɔ yě jɛ susu kpa nú Mawu e Izlayɛ́li ví lɛ́ɛ nɔ́ sɛn é jí. Jezu ylɔ́ ahwanvú tɔn lɛ́ɛ, bó ɖɔ nú yě ɖɔ: “Mɛ élɔ́ lɛ́ɛ sín nǔ blá wǔ nú mì, ɖó, sín azǎn atɔn ɖíe ɖokpóó wɛ yě ko ɖo kpɔ́ xá mì; yě ká sɔ́ ɖó nǔɖé bó ná ɖu ǎ. Un ka jló ná ɖó yě xovɛ́ bó nyi yě ǎ; yě táá wá yi ba yěɖée kpo ɖo alixo, bó ná jɛ ayǐ.” Ahwanvú tɔn lɛ́ɛ ka ɖɔ n'i ɖɔ: “Fítɛ́ wɛ mǐ ka ná ba nǔɖuɖu sín ɖo gblǒlǒ mɛ fí din, bɔ é ná kpé ahwan wɔ̌buwɔ́bú élɔ́?” Jezu ka kanbyɔ́ yě ɖɔ: “Wɔ̌xúxú nabí wɛ ɖo mi sí?” Bɔ yě yí gbe n'i ɖɔ: “Wɔ̌xúxú tɛ́nwe wɛ, bɔ hweví kpɛví kpɛví ɖé lɛ́ɛ ka gɔ́ ná.” Jezu ɖe gbe nú mɛ lɛ́ɛ, bɔ yě jínjɔ́n ayǐ. É sɔ́ wɔ̌xúxú tɛ́nwe lɛ́ɛ kpódó hweví lɛ́ɛ kpó, bó dó kú nú Mawu. Énɛ́ gúdo ɔ́, é kán, bó bɛ́ jó nú ahwanvú tɔn lɛ́ɛ, bɔ yě má nú mɛ lɛ́ɛ. Mɛ lɛ́ɛ bǐ ɖu nǔ bó gɔ́ xo ganjí, bɔ ahwanvú tɔn lɛ́ɛ wá bɛ́ nǔɖuɖu e kpo lɛ́ɛ kplé, bɔ é gɔ́ xasun tɛ́nwe. Gbɛtɔ́ děgba ɖokpó (4.000) wɛ ɖu nǔ ɖo fínɛ́; è ka xa nyɔ̌nu lɛ́ɛ kpódó yɔkpɔ́vú lɛ́ɛ kpó ǎ. Énɛ́ gúdo ɔ́, Jezu nyi mɛ lɛ́ɛ, bɔ é ɖésú byɔ́ tɔjíhún mɛ, bó yi Magadán gbé jí. Falizyɛn lɛ́ɛ kpódó Saduseɛn lɛ́ɛ kpó wá Jezu gɔ́n gbe ɖokpó. Yě jló ná tɛ́n ɛ kpɔ́n ɔ́, bó ɖɔ n'i ɖɔ ní jlɛ́ nǔ ɖokpó bó dó ɖe xlɛ́ émí ɖɔ Mawu gɔ́n wɛ hlɔ̌nhlɔ́n émítɔn gosín. Jezu ka yí gbe nú yě ɖɔ: “É jɛ gbadanu bónú hwe gba amizɛ́n ɔ́, mi nɔ ɖɔ: ‘Ayǐ e ná hɔ́n sɔ ɔ́, gbɛmɛ ná hɔ́n.’ É ka su zǎnzǎn bónú gbɛmɛ myá, bó dó ablu d'é mɛ ɔ́, mi nɔ ɖɔ jǐ ná ja égbé. Ényí gbɛmɛ ná cí alɔkpa ɖé ɔ́, mi nɔ mɔ énɛ́ ɔ́, bó nɔ́ tunwun. Ényí mi ka mɔ hwenu e mi ɖe ɔ́ sín wuntun lɛ́ɛ ɔ́, mi nɔ sixú tunwun ǎ. Gbɛtɔ́ din tɔn mɛ nyanya gbejímánɔ-númawutɔ́ élɔ́ lɛ́ɛ ɖo nǔjíjlɛ́ Mawu tɔn ba wɛ, yě ká sɔ́ ɖo ɖě ná mɔ wɛ, zɛ gbeyíɖɔ Mawu tɔn Jonási tɔn wú ǎ.” Ée Jezu ɖɔ mɔ̌ ɔ́, é jó yě dó, bó yi. Jezu kpódó ahwanvú tɔn lɛ́ɛ kpó yi tɔ ɔ́ gúdo dɔ̌n; lo ɔ́, ahwanvú tɔn lɛ́ɛ flín bó hɛn wɔ̌xúxú ǎ. Jezu ka ɖɔ nú yě ɖɔ: “Mi cɔ́ miɖée dó Falizyɛn lɛ́ɛ kpódó Saduseɛn lɛ́ɛ kpó sín tɔ́n wú.” Ée Jezu ɖɔ mɔ̌ nú yě ɔ́, yě jɛ ɖiɖɔ jí ɖo yěɖée tɛ́ntin ɖɔ: “Wɔ̌xúxú e mǐ ma flín bó hɛn ǎ wútu wɛ é ɖo mɔ̌ ɖɔ nú mǐ wɛ.” Jezu ka tunwun nǔ e ɖɔ wɛ yě ɖe ɖo yěɖée tɛ́ntin ɔ́, bó ɖɔ nú yě ɖɔ: “Nǔɖiɖihwedónánɔ e mi, étɛ́wútu wɛ mi ka ɖo ɖiɖɔ ɖo miɖée tɛ́ntin wɛ ɖɔ wɔ̌xúxú e mi ma hɛn ǎ é wútu wɛ nyi ɖɔ mɔ̌? Mi ko mɔ nukúnnú jɛ nǔ mɛ ǎ wɛ a? Mi sɔ́ flín wɔ̌xúxú atɔ́ɔ́n e gbɛtɔ́ děgba ɖě afatɔ́n (5.000) ɖu ɔ́ kpódó xasun nabí e mɛ mi bɛ́ ée kpo lɛ́ɛ dó ɔ́ kpó ǎ cé? Mi ka sɔ́ lɛ́ flín wɔ̌xúxú tɛ́nwe e gbɛtɔ́ děgba ɖokpó (4.000) ɖu ɔ́, kpódó xasun nabí e mɛ mi bɛ́ ée kpo lɛ́ɛ dó ɔ́ kpó ǎ cé? Nɛ̌ wɛ mi ma ka sixú mɔ nukúnnú jɛ mɛ ɖɔ é kún nyí wɔ̌xúxú xó ɖɔ nú mi wɛ nyɛ ɖe ó gbɔn? Un ɖɔ jí mi ní cɔ́ miɖée dó Falizyɛn lɛ́ɛ kpódó Saduseɛn lɛ́ɛ kpó sín tɔ́n wú.” Hwenɛ́nu wɛ yě wá mɔ nǔ jɛ wú ɖɔ é kún nyí ɖɔ émí ní cɔ́ émíɖée dó tɔ́n wú xó ɖɔ nú émí wɛ é ɖe ó; lo ɔ́, nǔkplɔ́nmɛ Falizyɛn lɛ́ɛ tɔn kpódó Saduseɛn lɛ́ɛ tɔn kpó xó ɖɔ nú émí wɛ é ɖe. Ée Jezu wá Sezalée Filípu tɔn mɛ ɔ́, é kanbyɔ́ ahwanvú tɔn lɛ́ɛ ɖɔ: “Mɛ̌ wɛ nyɛ Gbɛtɔ́ví ɔ́ ka nyí, bɔ mɛ lɛ́ɛ nɔ́ ɖɔ?” Yě yí gbe n'i ɖɔ: “Mɛ ɖé lɛ́ɛ nɔ́ ɖɔ hwi wɛ nyí Jǎan Yɛhwesinlɛnúmɛtɔ́; mɛɖé lɛ́ɛ ka nɔ́ ɖɔ hwi wɛ nyí Elíi; mɛ ɖěvo lɛ́ɛ ka nɔ́ lɛ́ ɖɔ hwi wɛ nyí Jelemíi, abǐ gbeyíɖɔ Mawu tɔn lɛ́ɛ ɖě.” Jezu ka kanbyɔ́ yě ɖɔ: “Bɔ midɛɛ lɛ́ɛ ka lo, mɛ̌ wɛ un nyí bɔ mi nɔ ɖɔ?” Sinmɔ́ɔ Piyɛ́ɛ ka yí gbe n'i ɖɔ: “Hwi wɛ nyí Klísu Mawu gbɛɖe ɔ́ sín Vǐ.” Bɔ Jezu yí xó bó ɖɔ n'i ɖɔ: “Nyɔ̌nánɔ wɛ nú we Sinmɔ́ɔ, Jonási ví, ɖó gbɛtɔ́ gɔ́n wɛ nǔnywɛ́ e a dǒ tunwun xó énɛ́ ná ɔ́ gosín ǎ; lo ɔ́, Tɔ́ ce e ɖo sɛ́xwé ɔ́ wɛ sɔ́ dó ayi mɛ nú we. Din ɔ́, má ɖɔ nú we: Piyɛ́ɛ wɛ nyǐkɔ towe nɔ́ nyí, tínmɛ tɔn wɛ nyí awǐnnya, bɔ awǐnnya élɔ́ ɔ́ jí wɛ un ná sɔ́ agun ce jínjɔ́n, bɔ kú sín hlɔ̌nhlɔ́n ná sixú wa nǔ ɖěbǔ n'i ǎ. Un ná bɛ́ axɔ́súɖuɖu sɛ́xwé tɔn sín cávi lɛ́ɛ dó alɔ mɛ nú we; a gbɛ̌ nǔ ɖěbǔ ɖo ayǐkúngban jí ɔ́, è nǎ gbɛ́ ɖo sɛ́xwé; a ka yí gbe nú nǔ ɖěbǔ ɖo ayǐkúngban jí ɔ́, è nǎ yí gbe ná ɖo sɛ́xwé.” Énɛ́ ɔ́ gúdo ɔ́, Jezu gbɛ́ nú ahwanvú tɔn lɛ́ɛ ɖɔ yě ní ma ɖɔ nú mɛ ɖěbǔ ɖɔ émí wɛ nyí Klísu ɔ́ ó. Sín hwenɛ́nu ɔ́, Jezu jɛ ɖiɖe xlɛ́ ahwanvú tɔn lɛ́ɛ jí ɖɔ émí ɖó ná yi Jeluzalɛ́mu, bɔ tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpó ná dó ya nú émí ɖésú; è nǎ hu émí, amɔ̌, azǎn tɔn atɔngɔ́ ɔ́ gbe ɔ́, Mawu ná fɔ́n émí sín kú. Bɔ Piyɛ́ɛ ka ylɔ́ ɛ jɛ vo, bó jɛ nǔ gbɛ́ n'i jí ɖɔ: “Mawu ma lɔn ó Aklúnɔ; nǔ mɔ̌hunkɔtɔn ná jɛ dó jǐ we gbeɖé ǎ.” Jezu ka húzú kpan nukɔn Piyɛ́ɛ, bó ɖɔ n'i ɖɔ: “Bǔ dó mì Satáan! Mɛdɔndó-nǔnyanyamɛtɔ́ wɛ nú we; ɖó linlin towe sɔgbe xá jlǒ Mawu tɔn ǎ; gbɛtɔ́ sín linlin wɛ a ɖǒ.” Jezu ka ɖɔ nú ahwanvú tɔn lɛ́ɛ ɖɔ jí: “Ényí mɛɖé jló ná xwedó mì hǔn, ní jó tito é ɖésúnɔ tɔn lɛ́ɛ dó, bó ɖíɖá aklúzu tɔn, bó xwedó mì. Ɖó mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú ɖó nyɛ wútu ɔ́, ná hwlɛ́n gbɛ tɔn gán. Ɖó mɛ e gbɛ ɔ́ bǐ ná nyí étɔn, bɔ gbɛ é ɖésúnɔ tɔn ná bú dó e ɔ́, le tɛ́ wɛ ka ɖ'é mɛ n'i? Ani wɛ gbɛtɔ́ ka sixú sɔ́ dó xɔ gbɛ éɖée tɔn ná? Ɖó nyɛ Gbɛtɔ́ví ɔ́ ná wá ɖo susu Mawu Tɔ́ ce tɔn mɛ, nyɛ kpódó wɛnsagun tɔn lɛ́ɛ kpó, bó ná ná nǔ e mɛ ɖokpó ɖokpó wa ɔ́ sín ajɔ ɛ. Ma ɖɔ nǔgbó nú mi: mɛɖé lɛ́ɛ ɖo mi mɛ fí din, bó ná ko kú cóbó ná mɔ nyɛ Gbɛtɔ́ví ɔ́ wá ɖu axɔ́sú ɖo gbɛtɔ́ lɛ́ɛ nu ǎ.” Azǎn tɔn ayizɛ́n gúdo ɔ́, Jezu kplá Piyɛ́ɛ, bó kplá Jaki kpódó Jaki nɔví Jǎan kpó, bɔ yě yi xá só ɖaxó ɖé jí; mɛ ɖěbǔ sɛkpɔ́ yě ǎ. Jezu húzú agbaza ɖo nukɔn yětɔn, bɔ nukún tɔn mɛ nɔ́ kɔ́n ɖi hwesivɔ́ ɖɔhun; bɔ awu tɔn lɛ́ɛ wé pépé. Ahwanvú tɔn atɔn lɛ́ɛ mɔ Mɔyízi kpó Elíi kpó ɖo xó ɖɔ xá ɛ wɛ. Ée Piyɛ́ɛ mɔ mɔ̌ ɔ́, é ɖɔ nú Jezu ɖɔ: “Aklúnɔ, fí e mǐ wǎ din ɔ́ nyɔ́ mɛ! Nú a jlǒ ɔ́, un ná gbá goxɔ atɔn ɖó fí, bɔ ɖokpó ná nyí towe, ɖokpó ná nyí Mɔyízi tɔn, bɔ ɖokpó ná nyí Elíi tɔn.” Xó énɛ́ ɖɔ wɛ Piyɛ́ɛ ɖe kɛ́ɖɛ́ bɔ akpɔ́kpɔ́ wěwé tété ɖé wá cyɔ́n yě, bɔ gbe ɖé nɔ́ ɖi ɖo akpɔ́kpɔ́ ɔ́ mɛ, bó nɔ́ ɖɔ: “Vǐ ce vívɛ́ná wɛ mɛ élɔ́ nyí; xomɛ nɔ hun mì dó wǔtu tɔn; mi ɖótó e.” Ée ahwanvú tɔn lɛ́ɛ se gbe énɛ́ ɔ́, xɛsi ɖaxó ɖé jɛ yě jí, bɔ yě bǐ xwe agbɔ̌nnusú do. Jezu ka sɛ yá yě, bó ɖó alɔ yě jí, bó ɖɔ nú yě ɖɔ: “Mi sí te, mi ma ɖi xɛsi ó.” Ée yě zé ta yi jǐ, bó kpɔ́n fí bǐ ɔ́, yě sɔ́ mɔ mɛɖé ɖo fínɛ́ zɛ Jezu ɖokpónɔ wú ǎ. Hwenu yě wá ɖo te jɛ sín só ɔ́ jí wɛ ɔ́, Jezu gbɛ́ nú yě ɖɔ: “Mi ma ɖɔ nǔ e mi mɔ ɔ́ nú mɛɖé cóbónú Mawu ná fɔ́n nyɛ Gbɛtɔ́ví ɔ́ sín kú ó.” Ahwanvú tɔn lɛ́ɛ ka kanbyɔ́ ɛ ɖɔ: “Nɛ̌ ka gbɔn bɔ sɛ́nkplɔ́nmɛtɔ́ lɛ́ɛ nɔ́ ɖɔ Elíi wɛ ná jɛ nukɔn wá hwɛ̌?” Jezu ka yí gbe nú yě ɖɔ: “Nǔgbó wɛ, Elíi ɖó ná wá jɛ nukɔn, bó ná to nǔ lɛ́ɛ bǐ ɖó alɔ jí. Lo ɔ́, nyɛ ɖo ɖiɖɔ nú mi wɛ ɖɔ: Elíi ɔ́ ko wá, bɔ yě mɔ ɛ, cóbó tunwun i ǎ, lobo wa nǔ e jló yě lɛ́ɛ bǐ xá ɛ. Mɔ̌ ɖokpó ɔ́ jɛ́n wɛ yě ná wá dó ya nú nyɛ Gbɛtɔ́ví ɔ́ gbɔn.” Hwenɛ́nu wɛ ahwanvú tɔn lɛ́ɛ wá mɔ nǔ jɛ wú ɖɔ Jǎan Yɛhwesinlɛnúmɛtɔ́ ɔ́ xó ɖɔ wɛ é ɖe. Ée yě jɛ te sín só ɔ́ jí, bó wá mɛ e ɖo só ɔ́ kpá lɛ́ɛ gɔ́n ɔ́, nya ɖokpó sɛkpɔ́ Jezu, bó jɛ kpo ɖo nukɔn tɔn, bó ɖɔ n'i ɖɔ: “Aklúnɔ! Kú nǔbláwǔ nú vǐ ce, ɖó adǐngbekútɔ́ wɛ, bɔ é ɖo wǔvɛ́ mɔ wɛ ɖésú; hwɛhwɛ wɛ é nɔ́ ɖo myɔ mɛ jɛ wɛ, bó nɔ́ lɛ́ ɖo sin mɛ jɛ wɛ. Un kplá ɛ wá nú ahwanvú towe lɛ́ɛ, yě ká kpé azɔn ɔ́ wú, bó gbɔ n'i ǎ.” Énɛ́ ɔ́, Jezu ɖɔ: “Gbɛtɔ́ nyanya nǔmaɖitɔ́ e mi, káká jɛ hwetɛ́nu wɛ un ná nɔ mi gɔ́n yi jɛ? Káká jɛ hwetɛ́nu wɛ mi ka ná nɔ kɔ jí nú mì yi jɛ? Mi bo kplá azinzɔnnɔ ɔ́ wá nú mì.” Bɔ yě kplá ɛ wá, bɔ Jezu wa adǎn dó yɛ nyanya e ɖo nyaví ɔ́ jí ɔ́ jí, bɔ é gosín jǐ tɔn, bɔ azɔn gbɔ nú nyaví ɔ́ tlóló tɛn tɔn mɛ. Énɛ́ ɔ́ gúdo ɔ́, ahwanvú lɛ́ɛ wá yi mɔ Jezu ɖó vo, bó kanbyɔ́ ɛ ɖɔ jí: “Étɛ́wútu wɛ mǐdɛɛ lɛ́ɛ ma ka kpé yɛ nyanya énɛ́ ɔ́ wú, bó nya ǎ?” Jezu ka yí gbe nú yě ɖɔ: “Nǔɖiɖi kpɛví e mi ɖó ɔ́ wútu wɛ; ɖó ma ɖɔ nǔgbó nú mi, ényí nǔɖiɖi mitɔn na bo sɔ atínkwín e wínní hú atínkwín lɛ́ɛ bǐ é, bónú mi ɖɔ nú só élɔ́ ɖɔ ní sɛ tɛn sín fí, bó yi jɛ dɔ̌n ɔ́, é ná sí te; bɔ nǔ ɖěbǔ wiwa sɔ ná nɔ́ gló mi ǎ. [ Lo ɔ́, yɛ nyanya mɔ̌hunkɔtɔn lɛ́ɛ ɔ́, ɖɛ kpódó nubláblá kpó mɛ jɛ́n wɛ è nɔ sixú kpé yě wú ɖe.”] Jezu kpódó ahwanvú tɔn lɛ́ɛ kpó kplé ɖo Galilée, bɔ é ɖɔ nú yě ɖɔ: “È nǎ wá jó nyɛ Gbɛtɔ́ví ɔ́ nú mɛ lɛ́ɛ; bɔ yě ná hu mì; lo ɔ́, azǎn tɔn atɔngɔ́ ɔ́ gbe ɔ́, Mawu ná fɔ́n mì sín kú.” Xó énɛ́ kú wǔ nú ahwanvú tɔn lɛ́ɛ tlala. Ée Jezu kpódó ahwanvú tɔn lɛ́ɛ kpó byɔ́ Kafaanawúmu ɔ́, mɛ e nɔ yí takwɛ́ sinsɛnxɔ mɛ tɔn lɛ́ɛ sɛ yá Piyɛ́ɛ bó kanbyɔ́ ɛ ɖɔ: “ Mɛ̌si midɛɛ lɛ́ɛ tɔn ka nɔ́ ná takwɛ́ sinsɛnxɔ mɛ tɔn ɔ́ ɖě ǎ wɛ a?” Piyɛ́ɛ yí gbe n'i ɖɔ: “Ɛɛn,” bó ɖidó xwé gbe. Hwenu e é wá xwé gbe ɔ́, Jezu jɛ nukɔn, bó kanbyɔ́ ɛ ɖɔ: “Axɔ́sú e ɖo gbɛmɛ fí lɛ́ɛ ɔ́, mɛ̌ lɛ́ɛ sí wɛ yě ká nɔ́ yí nǔjɔ kpódó tokwɛ́ kpó ɖe? Toví lɛ́ɛ sí wɛ a, abǐ jǒnɔ lɛ́ɛ sí? Étɛ́ wɛ hwɛ ka mɔ dó xó énɛ́ wú?” Piyɛ́ɛ yí gbe n'i ɖɔ: “Jǒnɔ lɛ́ɛ sí wɛ.” Bɔ Jezu ka yí xó, bó ɖɔ n'i ɖɔ: “Ényí mɔ̌ wɛ hǔn, toví lɛ́ɛ ɖ'é mɛ ǎ nɛ́. Lo ɔ́, nú mǐ ma wá nyí afɔklɛ́nnú nú yě ó wútu ɔ́, yi xu jí, bó yi ɖó mlɛ; hweví e a nǎ wlí dó nukɔn ɔ́, kɛ nu tɔn, a ná mɔ akwɛ́ e ná kpé takwɛ́ nyɛ kpó hwɛ kpó tɔn ɔ́ ɖokpó ɖ'é mɛ; sɔ́, bó dó yi sú takwɛ́ nyɛ kpó hwɛ kpó tɔn ná.” Hwenɛ́nu ɔ́, ahwanvú Jezu tɔn lɛ́ɛ sɛ yá ɛ, bó kanbyɔ́ ɛ ɖɔ: “Mɛ̌ wɛ ná ɖu gǎn ɖo mǐ nu ɖo axɔ́súɖuto sɛ́xwé tɔn mɛ?” Jezu ka ylɔ́ yɔkpɔ́vú ɖokpó, bó sɔ́ ɛ ɖó te ɖo tɛ́ntin yětɔn, bó ɖɔ nú yě ɖɔ: “Má ɖɔ nǔgbó nú mi; ényí mi ma húzú jijɔ, bó cí yɔkpɔ́vú lɛ́ɛ ɖɔhun ǎ ɔ́, mi ná byɔ́ axɔ́súɖuto sɛ́xwé tɔn mɛ ǎ. Énɛ́ wútu wɛ, mɛ e ná sɔ́ éɖée hwe, ɖi yɔkpɔ́vú élɔ́ ɖɔhun ɔ́, mɛ énɛ́ ɔ́ wɛ ná nɔ nukɔn ɖo axɔ́súɖuto sɛ́xwé tɔn mɛ. Mɛ e yí yɔkpɔ́vú lěhunkɔtɔn ɖokpó ɖó nyǐkɔ ce mɛ ɔ́, nyɛ ɖésúnɔ wɛ mɛ énɛ́ ɔ́ yí. “Lo ɔ́, mɛ e ná dɔn yɔkpɔ́vú e ɖi nǔ nú mì lɛ́ɛ ɖokpó dó hwɛ mɛ ɔ́, è gbɔ bó sin sé ɖaxó dó kɔ nú mɛ énɛ́ ɔ́, bó kpíkpé e nyi xuzan mɛ ɔ́, é nyɔ́ n'i hú. Adǎn tɛ́ ɖíe wá gbo gbɛtɔ́ lɛ́ɛ e! Ɖó nǔnyanyamɛ-dɔnmɛdó sín nǔwiwa lɛ́ɛ ɖo gbɛ ɔ́ mɛ, bɔ nǔ mɔ̌hunkɔtɔn lɛ́ɛ ɖó ná nɔ́ jɛ, amɔ̌, heelú mɛ e ka ná dɔn mɛ dó nǔ nyanya mɛ lɛ́ɛ é. “Ényí alɔ towe, abǐ afɔ towe ná dɔn we dó nǔ nyanya mɛ hǔn, sɛ́n síin, bó sɔ́ nyi gbě; ɖó nú a nyǐ afɔkponɔ, abǐ alɔmaɖoasínánɔ, bó mɔ gbɛ mavɔ mavɔ yí ɖo Mawu gɔ́n ɔ́, é nyɔ́ nú we hú ɖɔ nǔ lɛ́ɛ bǐ na sɔgbe ɖo wútu towe, bɔ Mawu ka ná kpíkpé hwi ɖésúnɔ kpéte ɔ́ bǐ nyi dó zo e ma nɔ cí gbeɖé ǎ é mɛ. É ka nyí nukún towe wɛ ná dɔn we dó nǔ nyanya mɛ hǔn, ɖe síin, bó sɔ́ nyi gbě. Nú a nyǐ nukún ɖokpónɔ, bó mɔ gbɛ mavɔ mavɔ yí ɖo Mawu gɔ̌n ɔ́, é nyɔ́ hú ɖɔ nukún towe we lɛ́ɛ bǐ ná sɔgbe ɖo ta towe wú, bɔ Mawu ka ná kpíkpé hwi ɖésúnɔ kpéte ɔ́ nyi dó myɔ zojimací tɔn ɔ́ mɛ.” “Mi ma lɔn bo gbɛ́ wǎn nú yɔkpɔ́vú élɔ́ lɛ́ɛ ɖokpó géé ó. Ɖó má ɖɔ nǔgbó nú mi: wɛnsagun yětɔn lɛ́ɛ ɖo sɛ́xwé bó ɖo Tɔ́ ce e ɖo sɛ́xwé ɔ́ nukɔn hwebǐnu. [ Ɖó nyɛ Gbɛtɔ́ví ɔ́ wá, bó ná hwlɛ́n mɛ e bú lɛ́ɛ gán.] “Ani mi ka lin dó xó élɔ́ wú? Ényí mɛɖé ɖó lɛ̌ngbɔ́ kanwe ko (100), bónú ɖokpó ka bú sín mɛ ɔ́, é ma ná jó kanwe afɔtɔn-nukún-ɛnɛ (99) ɖě lɛ́ɛ dó nyi fí ɖokpó ɖo sókan mɛ, lobo ɖidó ɖokpó e bú ɔ́ ba gbé ǎ cé? Ma ɖɔ nǔgbó nú mi: nú é yi mɔ ɔ́, ɖokpó énɛ́ ɔ́ nɔ́ ná ɛ xomɛhunhun hú kanwe afɔtɔn-nukún-ɛnɛ (99) ɖěe ma bú ǎ lɛ́ɛ. Mɔ̌ ɖokpó ɔ́ jɛ́n wɛ Tɔ́ mitɔn e ɖo sɛ́xwé ɔ́ ma jló ɖɔ mɛ ɖokpó géé ní bú ɖo yɔkpɔ́vú élɔ́ lɛ́ɛ mɛ ǎ é nɛ́.” “Ényí mɛ e nyí nɔví towe ɖo nǔɖiɖi mɛ ɔ́ ɖě wa nǔ nyi do nú we hǔn, yi mɔ ɛ, bó ɖɔ nǔ e é wa nyi do ɔ́ n'i, bónú hwi kpó é kpó we lɛ́ɛ ní ɖɔ gbo, ɖo miɖée tɛ́ntin. Nú é se xó towe hǔn, a ɖe e ɖó ali jí nɛ́. Nú é ma ka jló ná se xó towe ǎ hǔn, kplá mɛ ɖokpó abǐ mɛ we dó hwiɖée jí, bónú mi ɖɔ xó ɔ́ gbo, ɖo kúnnuɖetɔ́ we abǐ atɔn nukɔn, lě e sɛ́n ɔ́ zɔ́n gbɔn é. Nú é ma lɛ́ se xó yětɔn hwenɛ́nu ǎ ɔ́, ɖɔ nú agun ɔ́, bónú yě ní ɖɔ nǔ e é wa nyi do ɔ́ n'i; nú é ma lɛ́ se yě lɔmɔ̌ tɔn ǎ jɛ́n wɛ hǔn, bó sɔ́ ɛ dó mɔ mɛ e ma nyí Jwifu ǎ é ná, bó lɛ́ sɔ́ ɛ dó mɔ tokwɛ́yítɔ́ ná. “Má ɖɔ nǔgbó nú mi; nǔ ɖěbǔ e mi ná gbɛ́ ɖo ayǐkúngban jí ɔ́, è nǎ gbɛ́ ɖo sɛ́xwé; nǔ ɖěbǔ e mi ka ná yí gbe ná ɖo ayǐkúngban jí ɔ́, è nǎ yí gbe ná ɖo sɛ́xwé. “Mɔ̌ ɖokpó ɔ́, un lɛ́ ɖo ɖiɖɔ nú mi wɛ: ényí mɛ we ɖó gbe kpɔ́ ɖo ayǐkúngban jí, bó byɔ́ nǔ ɖěbǔ Tɔ́ ce e ɖo sɛ́xwé ɔ́, é ná ná nǔ e yě byɔ́ lɛ́ɛ yě. Ɖó fí e mɛ we, abǐ mɛ atɔn kplé ɖe, ɖo nyǐkɔ ce mɛ ɔ́, un ɖo tɛ́ntin yětɔn.” Hwenɛ́nu ɔ́, Piyɛ́ɛ sɛ yá Jezu, bó kanbyɔ́ ɛ ɖɔ: “Aklúnɔ! Ényí ɖɔ nǔ wa nyi do nú mì wɛ jɛ́n nɔzo ce ka nɔ ɖe ɔ́, azɔn nabí mɔ̌ wɛ un ka sixú sɔ́ nǔ e wa nyi do nú mì wɛ é ɖe lɛ́ɛ sɔ́ kɛ ɛ? É má nyí azɔn tɛ́nwe wɛ un ná sɔ́ hwɛ kɛ ɛ ǎ cé?” Jezu ka yí gbe n'i bó ɖɔ: “káká yi azɔn tɛ́nwe kɛ́ɖɛ́ kpowun wɛ é ná nyí ǎ; lo ɔ́, azɔn kanɖé gban (70) kanɖé gban (70) donu tɛ́nwe. Énɛ́ ɔ́ wú ɔ́, axɔ́súɖuto sɛ́xwé tɔn ɔ́, nǔ e wú è sixú jlɛ́ dó ɔ́ ɖíe: gbe ɖokpó tíin, bɔ axɔ́sú ɖé jló ná xa nǔ tɔn e nu é sɔ́ mɛsɛntɔ́ tɔn lɛ́ɛ ɖó ɔ́ kpɔ́n, ɖɔ yě sɔgbe a jí. Hwenu e yě jɛ nǔ lɛ́ɛ xa jí ɔ́, è kplá mɛ ɖokpó wá n'i, ɖo yě mɛ, bɔ éyɛ́ ɖu sikágankwɛ́ ɖaxó děgba we afɔwó (10.000) dó e. Ée é ma ka ɖó nǔɖé, bó ná dó sú axɔ́ ɔ́ ná ǎ é ɔ́, axɔ́sú ɔ́ zɔ́n ɖɔ è nǐ sa ka tɔn go tɔn, vǐ tɔn, asi tɔn káká yi jɛ é ɖésú jí, bó ná sɔ́ akwɛ́ ɔ́ dó sú axɔ́ è é ɖu ɔ́ ná. Mɛsɛntɔ́ énɛ́ ɔ́ ka húzú jɛ kpo ɖo axɔ́sú ɔ́ nukɔn, bó ɖe kɔ́, bó ɖɔ: ‘Aklúnɔ! Kɛnklɛ́n bó nɔ te kpɛɖé kpɔ́n mì; nǎ sú axɔ́ towe bǐ we.’ Ée é ɖɔ mɔ̌ ɔ́, nǔ tɔn blá wǔ nú axɔ́sú ɔ́, bɔ é jó e dó, lobo sɔ́ axɔ́ e é ɖu ɔ́ bǐ kɛ ɛ. “Ée mɛsɛntɔ́ énɛ́ ka tɔ́n sín axɔ́sú ɔ́ xwé, bó ɖo yiyi wɛ ɔ́, é yi kpé azɔ̌gbɛ́ tɔn e ɖu gankwɛ́ kanwe ko (100) dó e ɔ́ ɖo alixo. Ée é mɔ azɔ̌gbɛ́ tɔn énɛ́ ɔ́ lě kpowun ɔ́, é hɛn vɛ̌ n'i, bó nɔ fyɔ́n, káká bó ná sú gbekan tɔn, bó ɖɔ n'i ɖɔ: ‘Sú axɔ́ ce mì.’ Azɔ̌gbɛ́ tɔn ɔ́ ka húzú jɛ kpo ɖo nukɔn tɔn, bó jɛ kɛnklɛ́n dó n'i jí, bó ɖɔ: ‘Nɔ te kpɛɖé kpɔ́n mì; nǎ sú axɔ́ towe we;’ é ka jló ǎ, bó kplá azɔ̌gbɛ́ tɔn nɛ́ ɔ́ yi dó gankpá mɛ, bɔ é ná nɔ fínɛ́ káká yi jɛ hwenu e é ná sú axɔ́ ɖěe é ɖu dó e ɔ́ bǐ vɔ é. Azɔ̌gbɛ́ tɔn ɖě lɛ́ɛ ka mɔ nǔ e jɛ nɛ́ ɔ́ bǐ, bɔ é kú wǔ nú yě tlala, bɔ yě yi wlí bǐ ɖɔ nú axɔ́sú ɔ́. Ée axɔ́sú ɔ́ se mɔ̌ ɔ́, é zɔ́n ɖɔ yě ní yi ylɔ́ ɛ wá nú émí; ɖěe yě ylɔ́ ɛ wá ɔ́, é ɖɔ n'i ɖɔ: ‘Hwi mɛsɛntɔ́ nyanya élɔ́, axɔ́ wɔ̌buwɔ́bú ɖěe a ɖu dó mì ɔ́, a sa vo nú mì, bɔ un sɔ́ bǐ kɛ we; aniwútu wɛ hwi lɔmɔ̌ ma sixú kú nǔbláwǔ nú hǎgbɛ́ towe, lě e nyɛ kú nǔbláwǔ nú we gbɔn é ǎ?’ Axɔ́sú ɔ́ ka sin xomɛ tlala, bó kplá ɛ yi dó gankpá mɛ, bɔ yě ná dó ya n'i káká yi jɛ hwenu e é ná sú axɔ́ ɔ́ bǐ dó é.” Bó ná dó sú ta nú xó ɔ́, Jezu ɖɔ: “Mi lɔmɔ̌ ɔ́, ényí ɖokpó ɖokpó mitɔn lɛ́ɛ ma nɔ sɔ́ hwɛ kɛ miɖée kpódó ayi mitɔn bǐ kpán ǎ ɔ́, lě e Tɔ́ ce e ɖo sɛ́xwé ɔ́ ná bló gbɔn xá mi ɔ́ nɛ́.” Ée Jezu ɖɔ xó énɛ́ lɛ́ɛ vɔ ɔ́, é gosín Galilée, bó yi Judée gbé jí, ɖo Judɛ́ɛn tɔ ɔ́ gúdo dɔ̌n. Ahwan wɔ̌buwɔ́bú ɖé lɛ́ɛ xwedó e, bɔ é gbɔ azɔn nú azinzɔnnɔ lɛ́ɛ ɖo fínɛ́. Falizyɛn lɛ́ɛ sɛ yá ɛ, bó jló ná ɖó mɔ n'i ɖo xógbe mɛ; yě kanbyɔ́ ɛ ɖɔ: “Sɛ́n mǐtɔn ná gbe ɖɔ è ní ɖó dó nǔɖé wú, bó gbɛ́ asi mɛtɔn a?” Jezu ka yí gbe nú yě ɖɔ: “Mi mɔ Mawuxó élɔ́ xa ǎ cé? ‘Ɖo bǐbɛ́mɛ ɔ́, Mawu Gbɛɖótɔ́ ɔ́ bló súnnu kpó nyɔ̌nu kpó, bó ɖɔ jí, énɛ́ wútu wɛ súnnu ná jó tɔ́ tɔn kpódó nɔ tɔn kpó dó, bó ná jɛ kpɔ́ xá asi tɔn, bɔ yě mɛ we lɛ́ɛ ná húzú ɖokpó géé.’ Énɛ́ ɔ́, yě sɔ́ ɖo mɛ we nyí wɛ ǎ, lo ɔ́, yě húzú mɛ ɖokpó géé. Ényí mɔ̌ hǔn, gbɛtɔ́ ní bó ma klán nǔ e Mawu dɔn cá ɔ́ ó.” Falizyɛn lɛ́ɛ yí xó, bó kanbyɔ́ Jezu ɖɔ: “Étɛ́wútu wɛ Mɔyízi ka ná gbe ɖɔ è hɛn ɔ́, è nǎ wlán wěma dó así nú asi mɛtɔn, ɖɔ émí gbɛ́ ɛ, lobo nya ɛ tɔ́n?” Jezu ka yí gbe nú yě ɖɔ: “Tó tlítlí mitɔn wɛ zɔ́n bɔ Mɔyízi ná gbe énɛ́ ɔ́ mi. Lo ɔ́, é ɖo mɔ̌ ɖ'ayǐ hwenu e Mawu ɖó gbɛ ɔ́ é ǎ. Amɔ̌, má ɖɔ nú mi: ‘Ényí nyɔ̌nu ɖé ma dó afɔ gbě ǎ, bónú asú tɔn nya ɛ, bó da nyɔ̌nu ɖěvo ɔ́, aga wɛ súnnu énɛ́ ɔ́ lɛ.’ ” Ahwanvú Jezu tɔn lɛ́ɛ ka ɖɔ n'i ɖɔ: “Ényí mɔ̌ jɛ́n wɛ asidida xó ɔ́ ná nyí gbɔn nú súnnu hǔn, è gbɔ bo gɔn asi da ɔ́, é nyɔ́ hú.” Jezu ka yí gbe nú yě bó ɖɔ: “Mɛ bǐ wɛ nɔ yí gbe nú xó énɛ́ ǎ; lo ɔ́, mɛ e Mawu ná acɛ tɔn lɛ́ɛ kɛ́ɖɛ́ wɛ nɔ yí gbe ná. Ɖó nǔ gěgé tíin, bó nɔ́ zɔ́n, bɔ súnnu lɛ́ɛ nɔ́ gɔn asi da: súnnu ɖé lɛ́ɛ tíin, bó ko nyí mɛ e ma sixú da asi ǎ é sín nɔ yětɔn xomɛ; súnnu ɖé lɛ́ɛ ka tíin, bɔ gbɛtɔ́ lɛ́ɛ wɛ nɔ́ ɖó yě nyi mɔ̌; súnnu ɖěvo lɛ́ɛ ka lɛ́ tíin, bó nɔ́ ɖó yěɖée mɔ̌, ɖó axɔ́súɖuto sɛ́xwé tɔn wú. Mɛ e ná sixú mɔ nǔ jɛ nǔkplɔ́nmɛ élɔ́ mɛ ɔ́ ní bó mɔ nǔ jɛ mɛ.” Hwenu e Jezu ɖɔ xó énɛ́ lɛ́ɛ vɔ ɔ́, è kplá yɔkpɔ́vú lɛ́ɛ wá n'i, bónú é ná ɖó alɔ ta nú yě, bó ná xo ɖɛ nú yě. Lo ɔ́, ahwanvú tɔn lɛ́ɛ bɛ́ adǎn dó mɛ lɛ́ɛ jí. Jezu ka ɖɔ nú yě ɖɔ: “Mi jó yɔkpɔ́vú lɛ́ɛ dó nú yě ní wǎ gɔ̌n ce; mi ma sú ali dó yě ó; ɖó axɔ́súɖuto sɛ́xwé tɔn ɔ́, mɛ e cí yě ɖɔhun lɛ́ɛ tɔn wɛ.” Ée Jezu ɖɔ mɔ̌ ɔ́, é dlɛ́n alɔ dó yɔkpɔ́vú lɛ́ɛ jí, bó xo ɖɛ dó yě jí, bó gosín fínɛ́. Dɔ̌nkpɛvú ɖé sɛ yá Jezu gbe ɖokpó, bó kanbyɔ́ ɛ ɖɔ: “ Mɛ̌si nǔ ɖagbe tɛ́ un ka ɖó ná wa, bɔ Mawu ná ná mì gbɛ mavɔ mavɔ?” Jezu yí gbe n'i ɖɔ: “Étɛ́wú a ka kan nǔ byɔ́ mì dó nǔ e nyí ɖagbe ɔ́ wú? Mawu ɖokpónɔ géé wɛ nyí mɛ ɖagbe. Nú a jlǒ ɖɔ Mawu ná ná émí gbɛ mavɔ mavɔ hǔn, bo nyi Mawusɛ́n lɛ́ɛ.” Dɔ̌nkpɛvú ɔ́ ka kanbyɔ́ Jezu ɖɔ: “Mawusɛ́n tɛ́ lɛ́ɛ ka wɛ?” Bɔ Jezu yí gbe n'i ɖɔ: “Ma hu mɛ ó, ma lɛ aga ó, ma ja ajo ó, ma ɖe kúnnu agɔ ó, sí tɔ́ towe kpódó nɔ towe kpó, bó yí wǎn nú nɔzo towe hwi ɖésú ɖɔhun.” Dɔ̌nkpɛvú ɔ́ ka ɖɔ nú Jezu ɖɔ: “Un nɔ nyi sɛ́n énɛ́ lɛ́ɛ bǐ; étɛ́ wɛ ka lɛ́ kpo nú mì din bɔ nǎ bló?” Jezu ka ɖɔ n'i ɖɔ: “Nú a jlǒ ná nyí mɛ ɖagbe yi fó hǔn, bo yi bɛ́ nǔ e ɖo así towe lɛ́ɛ bǐ sa, bó sɔ́ akwɛ́ tɔn má nú wamamɔnɔ lɛ́ɛ; énɛ́ ɔ́, a nǎ ɖó dɔkun ɖo Mawu gɔ́n. Énɛ́ ɔ́ gúdo ɔ́, wǎ xwedó mì.” Ée dɔ̌nkpɛvú ɔ́ se xó énɛ́ lɛ́ɛ ɔ́, é ɖidó wǔbláwúblá, ɖó dɔkunnɔ ɖaxó wɛ é nyí. Jezu ka ɖɔ nú ahwanvú tɔn lɛ́ɛ ɖɔ: “Má ɖɔ nǔgbó nú mi; axɔ́súɖuto sɛ́xwé tɔn mɛ byɔ́byɔ́ ná vɛ́ wǔ nú dɔkunnɔ lɛ́ɛ tlala. Má lɛ́ ɖɔ nǔgbó nú mi: nyɛ̌vílinu dín gbɔn ná bɔwǔ nú lǎkúnmí hú dɔkunnɔ ná byɔ́ axɔ́súɖuto Mawu tɔn mɛ.” Ée ahwanvú Jezu tɔn lɛ́ɛ se xó énɛ́ lɛ́ɛ ɔ́, é kpácá yě tlala, bɔ yě ɖɔ: “Ényí nǔ ɖo mɔ̌ ɔ́, mɛ̌ wɛ ka sixú ɖo hwlɛngán ɔ́ ná mɔ wɛ lo?” Jezu ka kpɔ́n yě bó ɖɔ: “Gbɛtɔ́ lɛ́ɛ wɛ nǔ énɛ́ ɔ́ gló; lo ɔ́, Mawu kpé nǔ bǐ wú.” Piyɛ́ɛ ka yí xó, bó ɖɔ nú Jezu ɖɔ: “Mǐdɛɛ lɛ́ɛ ɖíe ka jó nǔ bǐ dó, bó xwedó we e; nɛ̌ wɛ é ka ná wá cí gbɔn nú mǐ?” Bɔ Jezu yí gbe n'i ɖɔ: “Má ɖɔ nǔgbó nú mi: hwenu e nyɛ Gbɛtɔ́ví ɔ́ ná wá jínjɔ́n axɔ́súzinkpo ce jí, ɖo susu ce mɛ, ɖo gbɛ yɔ̌yɔ́ ɔ́ mɛ ɔ́, mi mɛ wěwe e xwedó mì lɛ́ɛ lɔmɔ̌ ná jínjɔ́n axɔ́súzinkpo wěwe jí, bó ná ɖɔ hwɛ xá Izlayɛ́li sín akɔta wěwe lɛ́ɛ, bɔ mɛ ɖěbǔ e ná jó xwé tɔn dó, bó ná jó nɔví tɔn súnnu lɛ́ɛ, abǐ nyɔ̌nu lɛ́ɛ dó, bó ná jó tɔ́ tɔn kpódó nɔ tɔn kpó dó, abǐ vǐ tɔn lɛ́ɛ dó, bó ná jó ayǐkúngban tɔn lɛ́ɛ dó, ɖó nyɛ wútu ɔ́, Mawu ná ná ɛ nǔ e hú mɔ̌ ɔ́ donu kanwe ko (100), bó ná lɛ́ ná ɛ gbɛ mavɔ mavɔ. Mɛ e ɖo nukɔn din lɛ́ɛ gěgé ná wá jɛ gǔdo, bɔ mɛ e ɖo gǔdo din lɛ́ɛ gěgé ná wá jɛ nukɔn.” “ Axɔ́súɖuto sɛ́xwé tɔn ɔ́, nǔ e wú è hɛn ɔ́, è nǎ jlɛ́ dó ɔ́ ɖíe: glenɔ ɖé fɔ́n zǎn tɔ́n gbe ɖokpó, bó ná yi ba azɔ̌watɔ́ dó vǐwungle tɔn mɛ. Azɔ̌watɔ́ e é mɔ jɛ nukɔn, ɖo zǎnzǎn gan ayizɛ́n mɛ mɔ̌ lɛ́ɛ ɔ́, gankwɛ́ ɖokpó, gbe ɖokpó jí wɛ yě ɖɔ gbo dó; bɔ é nyi yě sɛ́ dó gle ɔ́ mɛ. Glenɔ ɔ́ lɛ́ tɔ́n ɖo zǎnzǎnhwe mɛ xwe gan tɛ́nnɛ mɛ mɔ̌, bó lɛ́ mɔ mɛ ɖěvo lɛ́ɛ, bɔ yě kplé ɖo tokplétɛn nǔɖé ma wa, bó ɖɔ nú yě ɖɔ: ‘Mi lɔmɔ̌ ɔ́, mi yi vǐwungle ce mɛ, bó yi wa azɔ̌, bónú ma sú akwɛ́ e jɛ xá ɔ́ mi,’ bɔ yě yi jɛ azɔ̌ wa jí ɖo gle ɔ́ mɛ nǔgbó. Glenɔ ɔ́ ka lɛ́ tɔ́n gan wěwe mɛ mɔ̌, bó lɛ́ tɔ́n gan atɔn mɛ hwelɛ́kɔ mɔ̌, bó bló nǔ ɖokpó ɔ́. Ée é jɛ gan atɔ́ɔ́n mɛ mɔ̌ ɔ́, glenɔ ɔ́ lɛ́ tɔ́n, bó yi mɔ mɛ ɖěvo lɛ́ɛ ɖo tokplétɛn, bó kanbyɔ́ yě ɖɔ: ‘Étɛ́wú wɛ mi ka cí fí sín zǎnzǎn ɖokpóó káká jɛ lěhwenu nǔɖé ma wa?’ Yě yí gbe n'i ɖɔ: ‘Mɛ ɖěbǔ ma yí mǐ dó azɔ̌mɛ nɛ́!’ Glenɔ ɔ́ ka ɖɔ nú yě ɖɔ: ‘Mi lɔmɔ̌, mi bo wá yi vǐwungle ce mɛ bó yi wa azɔ̌.’ “Ée gbadanu wá su ɔ́, glenɔ ɔ́ ɖɔ nú nǔjíkpɔ́ntɔ́ tɔn ɖɔ: ‘Yi ylɔ́ azɔ̌watɔ́ lɛ́ɛ wá, bó sú gbeɖokpókwɛ́ mɛ ɖokpó ɖokpó, bɛ́ sín mɛ e wá gbɔn gǔdo bǐ lɛ́ɛ jí káká yi jɛ mɛ e wá jɛ nukɔn lɛ́ɛ jí.’ Yě mɛ e wá jɛ azɔ̌ wa jí ɖo gan atɔ́ɔ́n mɛ hwelɛ́kɔ lɛ́ɛ wá, bɔ é sú gankwɛ́ ɖokpó ɖokpó yě. Yě mɛ e jɛ azɔ̌ wa jí jɛ nukɔn lɛ́ɛ wá, lobo vɛdó ɖɔ émí lɛ́ɛ ná yí akwɛ́ hú mɔ̌ wɛ sín; lo ɔ́, gankwɛ́ ɖokpó ɖokpó jɛ́n è sú yě lɔmɔ̌. Hwenu e yě ɖo akwɛ́ ɔ́ yí wɛ ɔ́, yě jɛ nǔ hlún ɖɔ dó glenɔ ɔ́ wú jí, bó nɔ́ ɖɔ: ‘Yě mɛ e wá gbɔn gǔdo lɛ́ɛ ɔ́, gan xixo ɖokpó jɛ́n wɛ yě dó wa azɔ̌ ná. A ka sú axɔ́ ɖokpó ɔ́ yě kpódó mǐ kpó; mǐdɛɛ lɛ́ɛ ka ko wá jɛ nukɔn, bó xú hwesivɔ́ káká wá jɛ din, bɔ nǔ cikɔ nú mǐ.’ Glenɔ ɔ́ ka yí gbe nú mɛ ɖokpó ɖo yě mɛ, bó ɖɔ: ‘Xɔ́ntɔn ce; un ma ka wa nǔɖé nyi do nú we nɛ́; é má nyí gankwɛ́ ɖokpó jí wɛ mǐ ɖɔ gbo dó, cóbɔ mi jɛ azɔ̌ wa jí ǎ cé? Yǐ akwɛ́ e nyí towe ɔ́, bó yi xwé; gankwɛ́ ɖokpó ɔ́ wɛ jló mì, bɔ un sú mɛ élɔ́ e wá gbɔn gǔdo ɔ́ kpódó hwi kpó. Un sixú sɔ́ akwɛ́ ce dó wa nǔ e jló mì ɔ́ ná ǎ cé? Wǔhwan wɛ a ɖe a? Un sɔ́ akwɛ́ ce dó wa ɖagbe ná ɔ́, hwɛ wɛ nyí bɔ un hu a?’ ” Énɛ́ ɔ́ gúdo ɔ́, Jezu lɛ́ ɖɔ nú yě ɖɔ: “È nǎ sɔ́ mɛ e ɖo gǔdo lɛ́ɛ wá nukɔn; bó ná sɔ́ mɛ e ɖo nukɔn lɛ́ɛ wá gǔdo.” Hwenu e Jezu ɖo kpó fán wɛ xwe Jeluzalɛ́mu ɔ́, é ylɔ́ ahwanvú tɔn wěwe lɛ́ɛ ɖó vo, bó ɖɔ nú yě ɖɔ: “Mǐ ɖíe xwe Jeluzalɛ́mu e; è nǎ jó nyɛ Gbɛtɔ́ví ɔ́ nú vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó, bɔ yě ná ɖó kúhwɛ nú mì, bó ná jó mì nú mɛ e ma nyí Jwifu ǎ lɛ́ɛ, bɔ yě ná ɖɔ slǎmɛ wǔtu ce; yě ná sɔ́ lanbá dó xo mì, lobo ná ká mì nyi aklúzu jí, bó ná hu mì. Azǎn tɔn atɔngɔ́ ɔ́ gbe ɔ́, Mawu ka ná fɔ́n mì sín kú.” Énɛ́ ɔ́ gúdo ɔ́, Zebeɖée ví lɛ́ɛ sín nɔ sɛ yá Jezu é kpódó vǐ tɔn lɛ́ɛ kpó; é jɛ kpo ɖo Jezu nukɔn, bó ɖe kɔ́ n'i, bó jló ná byɔ́ nǔɖé e. Ée Jezu mɔ ɛ mɔ̌ ɔ́, é kanbyɔ́ ɛ ɖɔ: “Étɛ́ wɛ a jlǒ?” Nyɔ̌nu ɔ́ ka yí gbe n'i ɖɔ: “Un jló ɖɔ a nǐ ná mì gǎnjɛwú ɖɔ vǐ ce we élɔ́ lɛ́ɛ ná jínjɔ́n akpá towe hwenu e a nǎ wá ɖu axɔ́sú é. Mɛɖě ná jínjɔ́n ɖisíxwé, bɔ mɛ ɖě ná jínjɔ́n amyɔxwé.” Jezu ka yí gbe nú vǐ lɛ́ɛ ɖɔ: “Mi tunwun nǔ e byɔ́ wɛ mi ɖe ɔ́ ǎ. Wǔvɛ́ kɔ́fu e nu gbé wɛ un ja ɔ́, mi sixú kpé wú bó nu a?” Yě ká yí gbe ɖɔ: “Ɛɛn mǐ ná kpé wú.” Jezu ka ɖɔ nú yě ɖɔ: “Mi ná wá nu wǔvɛ́ kɔ́fu ce énɛ́ ɔ́ nǔgbó; amɔ̌, ɖisíxwé ce kpódó amyɔxwé ce kpó ná jínjɔ́n ɔ́, nyɛ wɛ ná ná ǎ; mɛ e Mawu ko bló tɛnmɛ énɛ́ lɛ́ɛ ɖ'ayǐ ná lɛ́ɛ tɔn wɛ.” Ée Jezu sín ahwanvú wǒ ɖě lɛ́ɛ se xó énɛ́ ɔ́, yě sin xomɛ dó nɔví nɔví we énɛ́ lɛ́ɛ. Jezu ka ylɔ́ yě, bó ɖɔ nú yě ɖɔ: “Mi tunwun ɖɔ togán e ma nyí Jwifu ǎ lɛ́ɛ ɔ́, acɛ gannaganna wɛ yě nɔ́ kpa nú toví yětɔn lɛ́ɛ lobɔ gǎnhúnǔtɔ́ lɛ́ɛ lɔ nɔ kpa acɛ nú yě. Nǔ ka ɖó ná nyí mɔ̌ ɖo midɛɛ lɛ́ɛ tɛ́ntin ǎ; lo ɔ́, mɛ ɖěbǔ e jló ná nyí gǎn ɖo mi mɛ ɔ́, ní nyí mɛsɛntɔ́ mitɔn. Mɛ ɖěbǔ ka jló ná nyí nukɔntɔ́ ɖo mi mɛ ɔ́, ní nyí kannumɔ mitɔn. Mɔ̌ wɛ ɖe gbɔn nú nyɛ Gbɛtɔ́ví ɔ́; è nǎ sɛn mì wú wɛ un wá ǎ; lo ɔ́, mɛ sɛn gbé wɛ un tɔ́n bó wá, bó ná sɔ́ gbɛ ce jó dó xɔ gbɛ nú mɛ gěgé.” Hwenu e Jezu kpódó ahwanvú tɔn lɛ́ɛ kpó tɔ́n sín Jeliko, bó ɖo yiyi wɛ ɔ́, ahwan wɔ̌buwɔ́bú ɖé xwedó e. Nukúntíntɔ́nnɔ we ɖé lɛ́ɛ ka ɖo ayǐjínjɔ́n ɖo ali ɔ́ kpá. Ée yě se ɖɔ Jezu wá xweyǐgbe ɔ́, yě jɛ xó sú jí, bó nɔ́ ɖɔ: “Aklúnɔ! Davídi ví, kú nǔbláwǔ nú mǐ.” Ahwan e xwedó Jezu lɛ́ɛ ka bɛ́ adǎn dó yě jí, bó ɖɔ yě ní xwɛ. Lo ɔ́, yě lɛ́ sú xó syɛ́nsyɛ́n, bó ɖɔ: “Aklúnɔ! Davídi ví, kú nǔbláwǔ nú mǐ.” Énɛ́ ɔ́, Jezu nɔ te, bó ylɔ́ yě, bó kanbyɔ́ yě ɖɔ: “Étɛ́ mi jló ɖɔ má wa nú mi?” Bɔ yě yí gbe n'i ɖɔ: “Aklúnɔ, a ní hun nukún nú mǐ.” Bɔ Jezu kú nǔbláwǔ nú yě, bó ɖó alɔ nukún yětɔn lɛ́ɛ jí, bɔ yě mɛ we lɛ́ɛ bǐ sín nukún hun tlóló, bɔ yě jɛ nǔ mɔ jí, bó xwedó Jezu. Ée Jezu kpódó ahwanvú tɔn lɛ́ɛ kpó sɛkpɔ́ Jeluzalɛ́mu, bó ko ɖo malín málín mɛ dó Bɛtifajée toxo ɔ́, ɖo olívutín só ɔ́ kɔn dɔ̌n ɔ́, Jezu sɛ́ ahwanvú tɔn we dó; bó ɖɔ nú yě ɖɔ: “Mi yi gletoxo e ɖo nukɔn mitɔn nɛ́ ɔ́ mɛ; mi jɛ toxo ɔ́ mɛ tlóló ɔ́, mi ná mɔ tócí ɖé ɖo kan mɛ, bɔ vǐ tɔn ɖo akpá tɔn, mi tún yě, bó kplá yě wá nú mì. Ényí mɛɖé kan nǔ byɔ́ mi d'é wú hǔn, mi yí gbe n'i ɖɔ: ‘Nǔ tɔn wɛ hu dó Aklúnɔ.’ Azɔn ɖokpó ɔ́, é ná jó yě dó nú mi.” Nǔ cí mɔ̌, bónú xó e Mawu ko ɖɔ ɖ'ayǐ gbɔn gbeyíɖɔ tɔn jí ɔ́ ná dó jɛ; é wɛ nyí ɖɔ: “Mi ɖɔ nú Sinyɔ́ɔnu lɛ́ɛ ɖɔ: axɔ́sú mitɔn ɖíe ja gɔ̌n mitɔn e; xomɛfífánɔ ɖé wɛ; bo jínjɔ́n tócí ɖé kpó tócíví ɖé kpó jí.” Ahwanvú tɔn we lɛ́ɛ ka yi toxo ɔ́ mɛ, bo bló lě e Jezu ɖɔ gbɔn nú yě é. Yě kplá tócí ɔ́ kpódó vǐ tɔn kpó wá, bó tɛ́ awu yětɔn nyi yě jǐ, bɔ Jezu jínjɔ́n jí. Mɛ gěgé tɛ́ avɔ yětɔn nyi ali ɔ́ jí, mɛɖé lɛ́ɛ ka yi fɛ́n atínla lɛ́ɛ, bó tɛ́ kɔn nyi ali ɔ́ jí. Mɛ e ɖo nukɔn nú Jezu lɛ́ɛ kpódó mɛ e ɖo gǔdo n'i lɛ́ɛ kpán nɔ́ ɖo xó sú wɛ, bó nɔ́ ɖɔ: “Ozána nú Davídi ví! Susu nú mɛ e jǎwe ɖo Aklúnɔ nyǐkɔ mɛ é! Ozána! Susu nú Mawu Ajalɔ̌nlɔn ɖo jǐxwé!” Ée Jezu byɔ́ Jeluzalɛ́mu ɔ́, to ɔ́ mɛ nu lɛ́ɛ bǐ xozǐn, bó nɔ́ ɖɔ: “Mɛ̌ wɛ ka nyí nya énɛ́ ɔ́?” Bɔ mɛ lɛ́ɛ yí gbe ɖɔ: “Gbeyíɖɔ Mawu tɔn Jezu e gosín Nazalɛ́ti, ɖo Galilée gbé jí ɔ́ wɛ.” Ée Jezu yi Jeluzalɛ́mu ɔ́, é byɔ́ sinsɛnxɔ mɛ, bó nya mɛ e ɖo nǔ sa wɛ ɖo xɔ ɔ́ mɛ lɛ́ɛ kpódó mɛ e ɖo nǔ xɔ wɛ lɛ́ɛ kpó bǐ tɔ́n; é flí akwɛ́ɖyɔ́tɔ́ e ɖo xɔ ɔ́ mɛ lɛ́ɛ sín távo xwe, bó flí ahwannɛ́satɔ́ lɛ́ɛ sín azinkpo nyi ayǐ. É ɖɔ nú yě ɖɔ: “È ko wlán dó Mawuxówéma ɔ́ mɛ ɖɔ: ‘Xwé ce ɔ́, ɖɛxwé wɛ è nǎ nɔ́ ylɔ́ ɖɔ.’ Lo ɔ́, midɛɛ lɛ́ɛ sɔ́ dó húzú ajotɔ́ lɛ́ɛ sín avatɛn.” Nukúntíntɔ́nnɔ lɛ́ɛ kpódó mɛ e gblé wɔ̌n lɛ́ɛ kpó ka sɛ wá Jezu gɔ́n, ɖo sinsɛnxɔ ɔ́ mɛ, bɔ é gbɔ azɔn nú yě. Lo ɔ́, ée vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó mɔ nǔjíwǔ e jlɛ́ wɛ Jezu ɖe ɖo sinsɛnxɔ ɔ́ mɛ, lobo ka lɛ́ se xó e sú dó kpa susu nú Davídi ví ɔ́ wɛ yɔkpɔ́vú lɛ́ɛ ɖe ɖo sinsɛnxɔ ɔ́ mɛ, bó nɔ́ ɖɔ: “Ozána nú Davídi ví” ɔ́, é vɛ́ yě wú tlala; bɔ yě ɖɔ nú Jezu ɖɔ: “A se nǔ e ɖɔ wɛ vǐ énɛ́ lɛ́ɛ ɖe ɔ́ ǎ cé?” Jezu ka yí gbe nú yě ɖɔ: “Un se ganjí hǔn. Mi lɔmɔ̌ mi ka ko xa Mawuxó élɔ́ ǎ cé? É wɛ nyí ɖɔ: ‘A blǒ bɔ yɔkpɔ́vú lɛ́ɛ kpódó vǐ ɖo anɔ̌nu lɛ́ɛ kpó lɔ kpa susu nú we.’ ” Ée Jezu ɖɔ xó énɛ́ ɔ́ vɔ ɔ́, é jó yě dó nyi fínɛ́, bó tɔ́n sín toxo ɔ́ mɛ, bó yi dɔ́ gletoxo e è nɔ ylɔ́ ɖɔ Betaníi é mɛ. Ayǐhɔ́ngbe tɔn zǎnzǎn, hwenu e Jezu lɛ́ kɔ sín Betaníi, bó ja Jeluzalɛ́mu ɔ́, xovɛ́ sin i. É mɔ fígitín ɖokpó ɖo ali ɔ́ xo, bó yi sá, é ka mɔ nǔɖé ɖ'é jí zɛ ama tɔn lɛ́ɛ wú ǎ; é dó nu fígitín ɔ́, bó ɖɔ: “A sɔ́ ná sɛ́n ɖě gbeɖé ǎ,” bɔ atín ɔ́ mlú ɖa tlóló. Ée ahwanvú tɔn lɛ́ɛ mɔ mɔ̌ ɔ́, é kpácá yě tlala, bɔ yě kanbyɔ́ ɛ ɖɔ: “Nɛ̌ atín ɔ́ ka mlú ɖa gbɔn tlóló nɛ́?” Jezu ka yí gbe nú yě ɖɔ: “Má ɖɔ nǔgbó nú mi: ényí mi ɖó nǔɖiɖi, bó má nɔ́ xo nǔ kpɔ́n ǎ ɔ́, nǔ e un jlɛ́ dó atín énɛ́ wú din, bɔ mi mɔ ɔ́ kɛ́ɖɛ́ wɛ mi ná jlɛ́ ǎ; lo ɔ́, nú mi na bo ɖɔ nú só élɔ́ ɖɔ: ‘Hɔn hwiɖée sín fí, bó yi jɛ xu mɛ’ ɔ́, nǔ ná nyí mɔ̌. Nǔ ɖěbǔ e mi na xo ɖɛ kpódó nǔɖiɖi kpó, bó byɔ́ Mawu ɔ́, é ná ná bǐ mi.” Hwenu e Jezu byɔ́ sinsɛnxɔ mɛ, bó ɖo nǔ kplɔ́n mɛ lɛ́ɛ wɛ ɔ́, vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó sɛ yá ɛ, bó kanbyɔ́ ɛ ɖɔ: “Acɛ tɛ́ a ka ɖó, bó nɔ́ ɖo nǔ énɛ́ lɛ́ɛ wa wɛ? Mɛ̌ wɛ ka ná acɛ énɛ́ ɔ́ we?” Jezu ka yí xó, bó ɖɔ nú yě ɖɔ: “Nyɛ lɔ ná kan nǔ ɖokpó byɔ́ mi. Ényí mi ná sin tɔn mì ɔ́, nyɛ lɔ ná ɖɔ acɛ e un ɖó, bó nɔ́ wa nǔ gbɔn mɔ̌ ɔ́ nú mi. Jǎan Yɛhwesinlɛnúmɛtɔ́ ɔ́, mɛ̌ ka ná ɛ acɛ, bɔ é nɔ́ lɛ yɛhwesin nú mɛ? Mawu wɛ a, abǐ gbɛtɔ́ lɛ́ɛ?” Lo ɔ́, yě jɛ ɖiɖɔ jí ɖo yěɖée tɛ́ntin ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Bɔ étɛ́wú mi ma ka ɖi nǔ nú Jǎan ǎ?’ Ényí mǐ ka yí gbe n'i ɖɔ gbɛtɔ́ lɛ́ɛ wɛ ɔ́, mǐ ɖó ná ɖi xɛsi nú togun ɔ́; ɖó yě bǐ wɛ sɔ́ Jǎan dó ɖó gbeyíɖɔ Mawu tɔn ná.” Énɛ́ ɔ́, yě gbɔ bó yí gbe nú Jezu ɖɔ: “Mǐ tunwun ǎ.” Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì, bɔ un nɔ dó wa nǔ énɛ́ lɛ́ɛ ná ɔ́ ná ɖɔ nú mi wɛ ǎ.” “Mi ɖótó xó élɔ́, bó ɖɔ nǔ e mi lin d'é wú ɔ́ nú mì: nya ɖé ɖó vǐ súnnu we, bó ɖɔ nú mɛ nukɔntɔn ɔ́ gbe ɖokpó ɖɔ jí: ‘Vǐ ce, égbé ɔ́, a na yi wa azɔ̌ ɖo vǐwungle ce mɛ.’ Vǐ ɔ́ ka gbɛ́; zaanɖé ɔ́, é húzú ayixa bó yi wa azɔ̌ ɖo gle ɔ́ mɛ. Tɔ́ yětɔn ka lɛ́ yi ɖɔ xó ɖokpó ɔ́ nú vǐ wegɔ́ ɔ́. Éyɛ́ yí gbe nú tɔ́ ɔ́ ɖɔ: ‘Daá, un ná yi;’ é ka yi ǎ. Ɖo vǐ we énɛ́ lɛ́ɛ mɛ ɔ́, mɛ̌ ka wa tɔ́ tɔn sín jlǒ?” Bɔ yě yí gbe n'i ɖɔ: “Vǐ nukɔntɔn ɔ́ wɛ.” Jezu ka ɖɔ nú yě ɖɔ: “Má ɖɔ nǔgbó nú mi: tokwɛ́yítɔ́ lɛ́ɛ kpódó agalɛtɔ́ lɛ́ɛ kpó ná jɛ nukɔn nú mi ɖo axɔ́súɖuto Mawu tɔn mɛ. Ɖó Jǎan wá mi gɔ́n, bó kplɔ́n nǔ mi dó lě e mi ná wa nǔ jlɔ́jlɔ́ gbɔn ɔ́ wú, bɔ midɛɛ lɛ́ɛ ɔ́, mi ka yí xó tɔn se ǎ. Lo ɔ́, tokwɛ́yítɔ́ lɛ́ɛ kpódó agalɛtɔ́ lɛ́ɛ kpó yí xó tɔn se, bó lɛ́ kɔ sín hwɛ yětɔn lɛ́ɛ gúdo. Mi mɔ nǔ énɛ́ lɛ́ɛ, có é ka ɖɔ nǔ ɖěbǔ nú mi ɖo ayi mɛ, bónú mi lɔmɔ̌ ná yí xó tɔn se, bó lɛ́ kɔ sín hwɛ mitɔn lɛ́ɛ gúdo ǎ.” “Mi bo lɛ́ ɖótó lǒ ɖěvo: Nya xwétɔ́ ɖé ɖó ayǐkúngban, bó dó vǐwun kɔn nyi jí, lobo dó kpá lɛ́ lɛ̌ dó bǐ; é lɛ́ kun vǐwunto ɖokpó dó vǐwungbo ɔ́ mɛ. É lɛ́ bló nǔ e jí glecɔ́tɔ́ lɛ́ɛ nɔ́ xá ɔ́ ɖokpó d'é mɛ, lobo sɔ́ vǐwungle énɛ́ dó alɔ mɛ nú vǐwunzɔ́watɔ́ ɖé lɛ́ɛ, bó yi tomɛ. Ée vǐwun gbigbɛ hwenu wá su ɔ́, nya ɔ́ sɛ́ mɛsɛntɔ́ tɔn lɛ́ɛ dó vǐwunzɔ́watɔ́ lɛ́ɛ gɔ́n, bónú yě ná yí vǐwun e nyí étɔn ɔ́ wá n'i. Hwenu e mɛsɛntɔ́ tɔn lɛ́ɛ yi vǐwunzɔ́watɔ́ lɛ́ɛ gɔ́n ɔ́, vǐwunzɔ́watɔ́ lɛ́ɛ wlí yě, bó xo mɛ ɖokpó ɖo yě mɛ, bó hu mɛ wegɔ́ ɔ́, lobo ɖó awǐnnyaglo nú mɛ atɔngɔ́ ɔ́. Nya ɔ́ lɛ́ sɛ́ mɛsɛntɔ́ ɖěvo lɛ́ɛ dó, bɔ yě sukpɔ́ hú mɛ nukɔntɔn lɛ́ɛ. Vǐwunzɔ́watɔ́ lɛ́ɛ ka lɛ́ wa nǔ yětɔn lě e yě wa mɛ nukɔntɔn lɛ́ɛ sín nǔ gbɔn é. Gbɔn gǔdo bǐ ɔ́, nya ɔ́ wá sɛ́ vǐ é ɖésúnɔ tɔn dó yě, ɖó é ɖo ɖiɖɔ dó ayi mɛ wɛ ɖɔ: ‘Yě mɔ vǐ ce ɖésú ɔ́, yě ná sí i.’ Lo ɔ́, ɖěe vǐwunzɔ́watɔ́ lɛ́ɛ mɔ vǐ tɔn lě ɔ́, yě ɖɔ ɖo yěɖée tɛ́ntin ɖɔ: ‘Vǐ e ɖo xu ɔ́ ná ɖu wɛ é ɖíe; mi wá bónú mǐ ná hu i, bónú vǐwungbo ɔ́ ná húzú mǐtɔn.’ Énɛ́ ɔ́, yě zɔn vǐ ɔ́ jí, bó dɔn ɛ yi vǐwungbo ɔ́ gúdo, bó hu i.” Jezu kanbyɔ́ yě ɖɔ: “Ényí vǐwunglenɔ ɔ́ ka wá ɔ́, nɛ̌ wɛ é ka ná wa vǐwunzɔ́watɔ́ énɛ́ lɛ́ɛ sín nǔ gbɔn?” Yě yí gbe n'i ɖɔ: “É ná hu nya dídá énɛ́ lɛ́ɛ ma kpɔ́n gǔdo, bó ná sɔ́ vǐwungbo ɔ́ dó alɔ mɛ nú vǐwunzɔ́watɔ́ ɖěvo e ná nɔ ná ɛ kanta tɔn dó hwetɔnnu lɛ́ɛ é.” Énɛ́ ɔ́ gúdo ɔ́, Jezu ɖɔ nú yě ɖɔ: “Mi mɔ xó élɔ́ xa ɖo Mawuxówéma ɔ́ mɛ ǎ cé? É wɛ nyí ɖɔ: ‘Awǐnnya e xɔmɛtɔ́ lɛ́ɛ ma sɔ́ dó mɔ nǔɖéwanú ǎ, bó xo nyi kɛ́n ɔ́ wá húzú awǐnnya e ɖo tají é, awǐnnya zwe jí tɔn; Aklúnɔ sín nǔwiwa nɛ́, nǔjíwǔ wɛ é nyí ɖo nukún mǐtɔn mɛ.’ Énɛ́ ɔ́ wútu wɛ un ɖo ɖiɖɔ nú mi wɛ ɖɔ: ‘Mawu ná ɖe mi sín axɔ́súɖuto tɔn mɛ, bó ná sɔ́ akɔta e nǔwiwa yětɔn lɛ́ɛ jɛ xá axɔ́súɖuto tɔn lɛ́ɛ d'é mɛ, [ bɔ mɛ e ná jɛ awǐnnya énɛ́ ɔ́ jí ɔ́ ná gba hánnyá; mɛ e jí awǐnnya ɔ́ ka ná jɛ ɔ́, é ná li i kpɔ́ɖɔ́kpɔ́ɖɔ́.]’ ” Ée vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó se lǒ e Jezu dó nɛ́ lɛ́ɛ ɔ́, yě mɔ nǔ jɛ wú ganjí ɖɔ émí xó ɖɔ wɛ é ɖe, bɔ yě ɖo biba ná wlí i wɛ; lo ɔ́, yě ɖi xɛsi nú togun ɔ́, ɖó togun ɔ́ sɔ́ Jezu dó ɖó gbeyíɖɔ Mawu tɔn ná. Jezu lɛ́ dó lǒ dó ɖɔ xó nú yě ɖɔ: “ Axɔ́súɖuto sɛ́xwé tɔn ɔ́, nǔ e wú è hɛn ɔ́, è nǎ jlɛ́ dó ɔ́ ɖíe: axɔ́sú ɖé ylɔ́ agɔ̌ gbe ɖokpó, ɖó vǐ tɔn ɖo asi ná kplá wɛ. Axɔ́sú énɛ́ sɛ́ deví tɔn lɛ́ɛ dó, bónú yě yi ylɔ́ mɛ e é da, bɔ yě ná wá ɖu agɔ̌ xá ɛ lɛ́ɛ wá; lo ɔ́, mɛ lɛ́ɛ jló ná wá ǎ. É lɛ́ sɛ́ deví tɔn ɖěvo lɛ́ɛ dó, bó ɖɔ nú yě ɖɔ: ‘Mi yi ɖɔ nú mɛ e un da lɛ́ɛ ɖɔ nǔɖuɖu lɛ́ɛ ko sɔgbe; un hu nyibú ce asú lɛ́ɛ, bó hu kanlin ce e dó jǒ lɛ́ɛ; nǔ bǐ ko sɔgbe; mi wá ɖu agɔ̌.’ Lo ɔ́, mɛ e è da lɛ́ɛ dó vɛ̌ nú nǔ énɛ́ lɛ́ɛ bǐ, bó ɖidó nǔ yětɔn yětɔn wa gbé; mɛ ɖě ɖidó gleta, mɛ ɖě ɖidó ajɔ̌ tɔn wa gbé. Mɛ ɖě ká zɔn mɛsɛntɔ́ énɛ́ lɛ́ɛ jí, bó dó ya nú yě káká bó hu yě. Axɔ́sú ɔ́ sin xomɛ tlala, bó sɛ́ ahwan tɔn lɛ́ɛ dó, bɔ yě yi hu mɛhutɔ́ énɛ́ lɛ́ɛ, bó dó toxo yětɔn zo. Énɛ́ gúdo ɔ́, é ɖɔ nú deví tɔn lɛ́ɛ ɖɔ: ‘Nǔ lɛ́ɛ bǐ ɖíe ko sɔgbe e; lo ɔ́, mɛ e un da ɖɔ yě ní wá ɖu agɔ̌ xá mì lɛ́ɛ nyí mɛ e è nǎ wlí yɛ̌yi ná ɖé ǎ. Mi gbɔ bó yi alikpléhɔ̌ntɛn lɛ́ɛ, bó ylɔ́ mɛ e mi ná mɔ lɛ́ɛ bǐ, bónú yě ní wá ɖu agɔ̌.’ Mɛsɛntɔ́ énɛ́ lɛ́ɛ ka yi gbɔn ali xo ali xo, bó kplá mɛ e yě mɔ lɛ́ɛ bǐ wá; mɛ ɖagbe kpódó mɛ nyanya kpó bǐ, bɔ gbɛtɔ́ gɔ́ agɔ̌ɖutɛn ɔ́. “Axɔ́sú ɔ́ ka wá byɔ́ xɔ ɔ́ sá, bó ja jǒnɔ lɛ́ɛ kpɔ́n gbé, bó mɔ nya ɖé ɖo yě mɛ, bɔ é dó awu e è nɔ dó yi asi kplá gbé ɔ́ ǎ. Axɔ́sú ɔ́ ɖɔ nú nya énɛ́ ɖɔ: ‘Xɔ́ntɔn ce! Nɛ̌ a ka wa gbɔn bo byɔ́ xɔsá fí, bɔ awu e è nɔ dó yi asi kplá gbé ɔ́ ma ka ɖo kɔ nú we ǎ?’ Nya ɔ́ ka kɛ nu ǎ. Bɔ axɔ́sú ɔ́ ɖɔ nú nǔɖuɖumátɔ́ lɛ́ɛ ɖɔ: ‘Mi blá afɔ tɔn lɛ́ɛ kpódó alɔ tɔn lɛ́ɛ kpó, bó sɔ́ ɛ nyi dó zǐnflú mɛ ɖo kɔ́xo. Fínɛ́ wɛ é ná ya avǐ, bó ná ɖu aɖǔkún ɖe.’ ” Bɔ Jezu wá sú ta nú xó ɔ́, bó ɖɔ: “Mɛ gěgé wɛ Mawu ylɔ́, mɛ kpɛɖé wɛ è ka cyán.” Hwenɛ́nu ɔ́, Falizyɛn lɛ́ɛ yi kpá dó Jezu wú, bó ɖe wě dó lě e yě ná sixú wa gbɔn, bó kan nǔ byɔ́ ɛ, dó ɖó mɔ n'i, bó ná dó wlí i ɖo xó ɖiɖɔ tɔn lɛ́ɛ mɛ ɔ́ wú, bɔ yě sɛ́ ahwanvú yětɔn lɛ́ɛ kpódó toxóɖɔgbɛ́ Elódu tɔn ɖé lɛ́ɛ kpó dó gɔ̌n tɔn, bɔ yě yi ɖɔ n'i ɖɔ: “ Mɛ̌si, mǐ tunwun ɖɔ nǔgbóɖɔtɔ́ wɛ a nyǐ, bɔ a nɔ xlɛ́ Mawu sín ali ɔ́ mɛ titewungbe; a nɔ ɖi xɛsi nú nǔ e lin wɛ gbɛtɔ́ lɛ́ɛ ɖe ɔ́ ǎ, ɖó a nɔ kpɔ́n mɛɖé sín nukúnta dó ɖɔ xó ǎ. Ɖo sɛ́n mǐtɔn mɛ ɔ́, è hɛn ɔ́, è nǎ sú takwɛ́ Dadá Hlɔ̌ma tɔn tɔn a, abǐ è nǐ gbɔ súsú? Ɖɔ nǔ e a lin d'é wú ɔ́ nú mǐ.” Jezu ka mɔ nǔ jɛ ayi hízíhízí yětɔn wú, bó ɖɔ nú yě ɖɔ: “Yɛmɛnúwatɔ́ e mi! Étɛ́ sín mɔ ɖó nú mì wɛ mi ka ɖe? Mi xlɛ́ gankwɛ́ e è nɔ dó sú takwɛ́ ɔ́ ná ɔ́ ɖokpó mì;” bɔ yě sɔ́ gankwɛ́ ɖokpó xlɛ́ ɛ; bɔ Jezu kanbyɔ́ yě ɖɔ: “Mɛ̌ ɖíe è ɖe ɖ'é jí e? Mɛ̌ sín nyǐkɔ ɖíe ɖ'é jí e?” Yě yí gbe n'i ɖɔ: “Dadá Hlɔ̌ma tɔn tɔn wɛ.” Jezu ka ɖɔ nú yě ɖɔ: “Mi bo sɔ́ nǔ e nyí Dadá Hlɔ̌ma tɔn tɔn ɔ́ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ́ jó nú Mawu.” Xó e Jezu ɖɔ nɛ́ ɔ́ kpácá yě tlala, bɔ yě jó e dó, bó yi. Gbe énɛ́ gbe ɖokpó ɔ́, sinsɛngbɛ́ e è nɔ ylɔ́ ɖɔ Saduseɛn lɛ́ɛ wá Jezu gɔ́n. (Yě wɛ nɔ ɖɔ mɛkúkú lɛ́ɛ kún ná fɔ́n ó.) Yě kanbyɔ́ Jezu ɖɔ: “ Mɛ̌si, Mɔyízi ɖɔ: ‘Ényí súnnu ɖé da asi, bó ma ka ji vǐ ǎ, bó kú ɔ́, nɔví tɔn ná sɔ́ asúkúsi ɔ́ da, bó ná ji vǐ ɖo xo tɔn mɛ, bó ná sixú ɖó donu nú nɔví tɔn e kú é.’ Nɔví nɔví tɛ́nwe ɖé lɛ́ɛ ka ko nɔ mǐ mɛ, bɔ mɛ nukɔntɔn ɔ́ da asi, é ka ji vǐ ɖěbǔ cóbó kú ǎ; bɔ nɔví tɔn sɔ́ asúkúsi ɔ́ da. Nǔ ɖokpó ɔ́ wɛ xá mɛ wegɔ́ ɔ́; bó xá mɛ atɔngɔ́ ɔ́ káká yi jɛ mɛ tɛ́nwegɔ́ ɔ́ jí. Ée yě bǐ kú gúdo ɔ́, nyɔ̌nu ɔ́ lɔmɔ̌ wá kú. Hwenu e mɛkúkú lɛ́ɛ na wá fɔ́n ɔ́, mɛ̌ sín asi wɛ nyɔ̌nu ɔ́ ka na nyí ɖo yě mɛ tɛ́nwe nɛ́ lɛ́ɛ mɛ? Ɖó é ɖíe ko nyí yě bǐ sín asi kpɔ́n e.” Jezu ka yí gbe nú yě ɖɔ: “Ali bú wɛ mi ɖe, ɖó mi mɔ nǔ jɛ Mawuxó ɔ́ wú ǎ; mi ka lɛ́ mɔ nǔ jɛ hlɔ̌nhlɔ́n Mawu tɔn wú ǎ. Ɖó hwenu e mɛkúkú lɛ́ɛ bǐ ná fɔ́n ɔ́, súnnu na da asi ǎ; nyɔ̌nu ɖě ká sɔ́ ná da asú ǎ, yě ná cí wɛnsagun Mawu tɔn lɛ́ɛ ɖɔhun ɖo sɛ́xwé. Nǔ e ka kan fínfɔ́n sín kú mɛkúkú lɛ́ɛ tɔn ɔ́, mi mɔ nǔ e Mawu ɖɔ d'é wú ɔ́ xa ǎ cé? É wɛ nyí ɖɔ: ‘Nyɛ wɛ nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’ Mawu nyí Mawu mɛkúkú lɛ́ɛ tɔn ǎ; lo ɔ́, mɛ e ɖo gbɛ lɛ́ɛ sín Mawu wɛ é nyí.” Nǔ énɛ́ e Jezu kplɔ́n yě ɔ́ kpácá mɛ e se lɛ́ɛ bǐ. Ée Falizyɛn lɛ́ɛ se ɖɔ Jezu xwe Saduseɛn lɛ́ɛ sín nu dó xɔ ɔ́, yě sɛ́ ta kplé, bɔ sɛ́nkplɔ́nmɛtɔ́ ɖokpó ɖo yě mɛ, bó jló ná ɖó mɔ nú Jezu, bó kanbyɔ́ ɛ ɖɔ: “ Mɛ̌si, sɛ́n tɛ́ wɛ ka ɖo tají ɖo sɛ́n lɛ́ɛ bǐ mɛ?” Jezu yí gbe n'i ɖɔ: “ ‘A nǎ yí wǎn nú Aklúnɔ Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó linlin towe bǐ kpó.’ Sɛ́n ɖaxó e jɛ nukɔn nú sɛ́n lɛ́ɛ bǐ ɔ́ nɛ́. Sɛ́n wegɔ́ ɔ́ e bɔ d'é wú, bó ɖi nukɔntɔn ɔ́ ɖíe: ‘A nǎ yí wǎn nú nɔzo towe hwi ɖésú ɖɔhun.’ Sɛ́n we énɛ́ lɛ́ɛ jí wɛ Mɔyízisɛ́n lɛ́ɛ bǐ, kpódó nǔkplɔ́nmɛ gbeyíɖɔ Mawu tɔn lɛ́ɛ tɔn bǐ kpó jínjɔ́n.” Ée Falizyɛn lɛ́ɛ kplé ɔ́, Jezu kan xó byɔ́ yě ɖɔ: “Ani mi ka lin dó Klísu ɔ́ wú? Mɛ̌ ví wɛ é nyí?” Yě yí gbe n'i ɖɔ: “Davídi ví wɛ é nyí.” Jezu ka ɖɔ nú yě ɖɔ: “Nú Davídi ví wɛ é nyí ɔ́, nɛ̌ ka gbɔn bɔ Yɛ ɔ́ sɔ́ xó élɔ́ dó ayi mɛ nú Davídi, bɔ é ylɔ́ Klísu ɔ́ ɖɔ: ‘Aklúnɔ,’ bó ɖɔ jí: ‘Aklúnɔ ɖɔ nú Aklúnɔ ce ɖɔ: Jínjɔ́n ɖisí ce xwé, káká nú má sɔ́ kɛntɔ́ towe lɛ́ɛ dó bló afɔɖótɛn towe.’ “Hǔn ényí Davídi ɖésú ka ylɔ́ Klísu ɖɔ: ‘Aklúnɔ’ ɔ́, nɛ̌ wɛ é ka sixú lɛ́ nyí vǐ tɔn gbɔn?” Mɛ ɖé ka sɔ́ kpé xósin ɖé wú bó ná ɛ ǎ; bɔ, sín gbe énɛ́ gbe ɔ́, mɛ ɖěbǔ sɔ́ nɔ́ glá kan nǔ byɔ́ Jezu ǎ. Jezu ɖɔ xó nú mɛ e xwedó e lɛ́ɛ kpódó ahwanvú tɔn lɛ́ɛ kpó ɖɔ: “ Sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó wɛ sɔ́ yěɖée ɖó Mɔyízi sín tɛnmɛ, bo nɔ tín Mɔyízi sɛ́n lɛ́ɛ mɛ nú mɛ. Hǔn, mi bo nɔ se tónú nú yě, bó nɔ́ bló nǔ e yě ɖɔ nú mi lɛ́ɛ bǐ; mi ma ka nɔ wa nǔ yě ɖɔhun ó; ɖó nǔ e kplɔ́n mi wɛ yě ɖe lɛ́ɛ ɔ́, yě ɖésú nɔ bló gbɔn jí ǎ. Sɛ́n gěgé tíin, bɔ yě nɔ zé dó kɔ jí nú mɛ lɛ́ɛ ɖɔ yě ɖó ná nɔ nyi; lo ɔ́, yě nɔ bló nǔ ɖěbǔ, bónú sɛ́n énɛ́ lɛ́ɛ sín nyinyi na bɔkun nú mɛ lɛ́ɛ ǎ. A mɔ mì a sín nǔ wɛ yě nɔ bló; yě nɔ blá tíla gbajagbaja dó wǔ; yě nɔ xo kɛyɛ dó awu yětɔn lɛ́ɛ tó gblɛlɛ. Yě nɔ ba ná jínjɔ́n tɛn nukɔn nukɔntɔn lɛ́ɛ mɛ ɖo jǒnɔgbé, bó nɔ lɛ́ jló ná jínjɔ́n zinkpo nukúnɖéjí lɛ́ɛ mɛ ɖo kplɔ́ngbasá Jwifu lɛ́ɛ tɔn. È nǐ dó gbe yě ɖo tokplétɛn lɛ́ɛ wɛ yě nɔ yí wǎn ná. Yě nɔ́ jló ɖɔ gbɛtɔ́ lɛ́ɛ ní ylɔ́ émí ɖɔ: ‘ Mɛ̌si.’ Midɛɛ lɛ́ɛ ɔ́, mi ma lɔn nú mɛɖé ylɔ́ mi ɖɔ: ‘Mɛ̌si’ ó, ɖó nɔví nɔví wɛ mi bǐ nyí ɖo nǔɖiɖi mɛ, bó ɖó Mɛ̌si ɖokpó géé. Mi ma ylɔ́ mɛ ɖěbǔ ɖo ayǐkúngban jí fí ɖɔ: ‘Tɔ́’ ó, ɖó Mawu e ɖo jǐxwé ɔ́ ɖokpónɔ géé wɛ nyí Tɔ́ mitɔn. Mi ma ka lɔn nú mɛɖé ní ylɔ́ mi ɖɔ: ‘Gǎn’ ó, ɖó Klísu ɖokpónɔ géé wɛ nyí Gǎn mitɔn. Mɛ e nyí gǎn mitɔn ɔ́ ɖó ná nyí mɛsɛntɔ́ mitɔn. Mɛ e nɔ sɔ́ éɖée su ɔ́, Mawu ná sɔ́ ɛ hwe; mɛ e ka nɔ sɔ́ éɖée hwe ɔ́, Mawu ná sɔ́ ɛ su.” Jezu ka lɛ́ ɖɔ: “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó, yɛmɛnúwatɔ́ e mi! Ɖó mi nɔ sú axɔ́súɖuto sɛ́xwé tɔn sín ali dó mɛ lɛ́ɛ, mi ɖésú ka nɔ byɔ́ ɛ mɛ ǎ; mi ka nɔ ná tɛn mɛ e jló ná byɔ́ ɛ mɛ lɛ́ɛ ǎ. [ “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó, yɛmɛnúwatɔ́ e mi! Ɖó mi nɔ klá jɛ nǔ e nyí asúkúsi lɛ́ɛ tɔn ɔ́ bǐ nu, bó ka nɔ ɖo ɖɛ gaga xo wɛ, bó ná dó ɖe xlɛ́ gbɛtɔ́ lɛ́ɛ ɖɔ mɛ ɖagbe wɛ émí nyí. Énɛ́ ɔ́ wútu wɛ Mawu ná dɔn tó nú mi bɔ é ná syɛ́n ɖésú.] “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpán, yɛmɛnúwatɔ́ e mi! Mi nɔ kán wezun gbɔn agě kpó tɔ kpó, bónú mɛ ɖokpó géé ná sixú byɔ́ sinsɛn mitɔn mɛ. Ényí mi ka yi mɔ mɛɖé, bónú é yí gbe, bó xwedó mi ɔ́, mi nɔ bló, bɔ é nɔ húzú zojimací sín vǐ azɔn we hú midɛɛ lɛ́ɛ. “Heelú mi alixlɛ́mɛtɔ́ nukúntíntɔ́nnɔ lɛ́ɛ! Mi nɔ ɖɔ: ‘Mɛ e xwlé sinsɛnxɔ Mawu tɔn dó dó akpá ná ɔ́, nǔ énɛ́ ɔ́ kún nyí nǔɖé ó; amɔ̌, mɛ e ka xwlé siká e ɖo xɔ ɔ́ mɛ lɛ́ɛ dó dó akpá ná ɔ́, mɛ énɛ́ ɔ́ ɖó ná ɖe akpá ɔ́ dandan.’ Taɖunɔ nukúntíntɔ́nnɔ e mi! Ɖě tɛ́ wɛ ɖo tají ɖo we lɛ́ɛ mɛ? Siká e ɖo xɔ ɔ́ mɛ lɛ́ɛ wɛ a, abǐ sinsɛnxɔ e zɔ́n bɔ sikánú ɔ́ húzú nǔ mímɛ́ é? Mi nɔ lɛ́ ɖɔ: mɛ e xwlé vɔ̌sákpe Mawu tɔn dó dó akpá ná ɔ́ kún ɖó ná ɖe akpá ɔ́ dandan ó; amɔ̌, mɛ e xwlé vɔ̌sánú e ɖo vɔ̌sákpe ɔ́ jí ɔ́ ɖó ná ɖe akpá e é dó ɔ́. Nukúntíntɔ́nnɔ lɛ́ɛ e mi, ɖě tɛ́ wɛ ɖo tají ɖo we lɛ́ɛ mɛ? Vɔ̌sánú ɔ́ wɛ a? Abǐ vɔ̌sákpe e zɔ́n bɔ vɔ̌sánú ɔ́ húzú nǔ mímɛ́ é? Mɛ e xwlé vɔ̌sákpe ɔ́ ko xwlé vɔ̌sákpe ɔ́ kpódó nǔ e ɖ'é jí lɛ́ɛ bǐ kpó. Mɛ e xwlé sinsɛnxɔ Mawu tɔn ɔ́, ko xwlé sinsɛnxɔ ɔ́ kpódó Mawu e nɔ nɔ mɛ ɔ́ kpó. Mɛ e xwlé jǐnukúnsin ɔ́ ko xwlé axɔ́súzinkpo Mawu tɔn, kpódó Mawu e jínjɔ́n jí ɔ́ kpó. “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó, yɛmɛnúwatɔ́ e mi! Mi nɔ ná mǎɖówǒ nǔhwɛ́nkún mitɔn lɛ́ɛ tɔn Mawu, bó ka nɔ jó nǔ e ɖo tají ɖo Mawusɛ́n mɛ lɛ́ɛ dó. Yě wɛ nyí: Hwɛjijɔ, nǔbláwǔkúnúmɛ, gbejíninɔ; nǔ énɛ́ lɛ́ɛ wɛ ɖo tají bɔ mi ɖó ná bló; amɔ̌, mi ɖó ná dó vɛ̌ nú nǔɖé lɛ́ɛ lɔmɔ̌ ǎ. Alixlɛ́mɛtɔ́ nukúntíntɔ́nnɔ e mi! Ɖó mi nɔ xwí nǔvínúví, bó ka nɔ mi lǎkúnmí. “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó! Yɛmɛnúwatɔ́ e mi! Mi nɔ klɔ́ ká kpódó agbǎn kpó gúdo; lo ɔ́, nǔ e mi fin lɛ́ɛ kpódó nǔ e mi hízí lɛ́ɛ kpó wɛ gɔ́ yě mɛ. Falizyɛn nukúntíntɔ́nnɔ! To klɔ́ ká ɔ́ xomɛ hwɛ̌, bónú gúdo tɔn lɔ na mɛ́. “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó! Yɛmɛnúwatɔ́ e mi! Ɖó mi cí yɔta ɖěe è sá nǔ wěwé dó, bɔ é nyɔ́ ɖɛkpɛ ɖo wěxo ɔ́ ɖɔhun. Lo ɔ́, xo tɔn mɛ gɔ́ nú xúgloxú kpódó nǔ nyinyɔ kpán. Mi ɖésú ɔ́, mɔ̌ wɛ mi cí. Ɖó mi nɔ cí mɛ ɖagbe ɖɔhun ɖo gbɛtɔ́ lɛ́ɛ nukún mɛ, lo ɔ́, ayi mitɔn gɔ́ nú yɛmɛnúwiwa kpódó nǔ nyanya wiwa kpó.” “Heelú mi sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpán; yɛmɛnúwatɔ́ e mi! Mi nɔ xo kpe ɖagbe lɛ́ɛ nyi gbeyíɖɔ Mawu tɔn lɛ́ɛ sín yɔta, bó nɔ́ ba acɔ́ nú hwɛjijɔnɔ lɛ́ɛ sín yɔta; lobo nɔ ɖɔ: ‘Ényí mǐ ko jɔ ɖo tɔ́gbó mǐtɔn lɛ́ɛ sín hwenu wɛ ɔ́, mǐ ná lɔn bo hu gbeyíɖɔ Mawu tɔn lɛ́ɛ xá yě ǎ.’ Mi ɖésú wɛ ɖo kúnnu ɖe nú miɖée wɛ, ɖɔ émí nyí mɛ e hu gbeyíɖɔ Mawu tɔn lɛ́ɛ sín vǐvú. Mi bo gbɛ kan dó kan e tɔ́gbó mitɔn lɛ́ɛ gbɛ kpo ɖ'ayǐ nú mi ɔ́ nu yi fó. Dan jɔmɔ e mi! Jakpata kúnkan e mi! Nɛ̌ mi ka sixú lin ɖɔ émí ná gló hwɛɖónúmɛ e nɔ dɔn mɛ yi zojimací mɛ ɔ́ gbɔn? Énɛ́ ɔ́ wútu ɔ́, mi ɖótó bó se: ‘Un ná sɛ́ gbeyíɖɔ lɛ́ɛ dó mi, bó ná sɛ́ nǔnywɛ́tɔ́ lɛ́ɛ kpódó sɛ́nkplɔ́nmɛtɔ́ lɛ́ɛ kpó dó mi. Mi ná hu mɛ ɖě, bó ná ká mɛ ɖě nyi aklúzu jí, bó ná zé lanbá dó xo mɛɖé lɛ́ɛ ná ɖo kplɔ́ngbasá mitɔn lɛ́ɛ. Mi ná dó ya nú yě gbɔn toxo ɖaxó ɖaxó lɛ́ɛ mɛ.’ Mi ná wa mɛ énɛ́ lɛ́ɛ nú gbɔn mɔ̌, bónú xomɛvɔ́nɔ e è hu ɖo ayǐkúngban jí lɛ́ɛ bǐ sín hwɛ ná jɛ kɔ nú mi, bɛ́ sín Abɛ́li hwɛjijɔnɔ ɔ́ jí, káká yi jɛ Zakalíi, Bɛlɛ́kya ví e mi hu ɖo sinsɛnxɔ mɛ, ɖo tɛn mímɛ́ ɔ́ kpódó vɔ̌sákpe ɔ́ kpán tɛ́ntin é jí. Má ɖɔ nǔgbó nú mi: tódɔnnúmɛ e jɛ xá mɛhuhu énɛ́ lɛ́ɛ bǐ é ɔ́, gbɛtɔ́ din tɔn lɛ́ɛ jí wɛ é ná kɔn nyi. “Jeluzalɛ́munu e mi, Jeluzalɛ́munu e mi, mi mɛ e nɔ hu gbeyíɖɔ Mawu tɔn lɛ́ɛ, bo nɔ nyi awǐnnyaglo dó hu mɛ e Mawu nɔ sɛ́ dó mi lɛ́ɛ é! Azɔn mɔ̌kpán wɛ un ko jló ná kplé mi dó awa ce lɛ́ɛ glɔ́, lě e kokló nɔ kplé vǐ tɔn lɛ́ɛ dó awa tɔn lɛ́ɛ glɔ́ ɔ́ ɖɔhun. Lo ɔ́, mi jló ǎ. Din ɔ́, è nǎ ɖe alɔ sín sinsɛnxɔ mitɔn wú nú mi, bɔ é ná jɛ vɔ̌. Ɖó má ɖɔ nǔgbó nú mi: bɛ́ sín din ɔ́, mi sɔ́ ná mɔ mì ɖě káká yi jɛ gbe e gbe mi na ɖɔ susu nú mɛ e jǎwe ɖo Aklúnɔ nyǐkɔ mɛ é ǎ.” Ée Jezu tɔ́n sín sinsɛnxɔ ɔ́ mɛ bó ɖidó ɔ́, ahwanvú tɔn lɛ́ɛ sɛ yá ɛ, bó ɖɔ é ní kpɔ́n lě e è gbǎ sinsɛnxɔ ɔ́ sín xɔ lɛ́ɛ gbɔn é. Jezu ka ɖɔ nú yě ɖɔ: “Mi ma mɔ nǔ énɛ́ lɛ́ɛ bǐ a? Má ɖɔ nǔgbó nú mi: awǐnnya e è dǒ mɛ yě ná lɛ́ɛ ɔ́, ɖě sɔ́ ná wá nɔ ɖě jí ǎ; bǐ wɛ è nǎ mu.” Jezu ka wá jínjɔ́n ayǐ ɖo olívutín só ɔ́ jí, bɔ ahwanvú tɔn lɛ́ɛ ɖokpónɔ yi mɔ ɛ, bó kanbyɔ́ ɛ ɖɔ: “Hwetɛ́nu wɛ nǔ e a ɖɔ nɛ́ ɔ́ ná wá jɛ dó? Ani wɛ ka ná ɖe hwenu e a nǎ lɛ́ kɔ wá ayǐkúngban jí fí ɔ́, kpódó hwenu e gbɛ élɔ́ ná vɔ dó ɔ́ kpán xlɛ́ mǐ? Ɖɔ nú mǐ ná se.” Jezu ka yí gbe nú yě ɖɔ: “Mi hɛn ayi mitɔn, bónú mɛɖé má wá blɛ́ mi ó, ɖó mɛ gěgé ná sɔ́ nyǐkɔ ce, bó ná wá xwetɔ́n, bó ɖɔ: ‘Nyɛ wɛ nyí Klísu ɔ́;’ lobo ná flú mɛ gěgé. Mi ná wá se ahwanfunfun sín zǐngídi ɖo fí e sɛkpɔ́ mi lɛ́ɛ, bó ná nɔ́ se ahwanfunfun sín xó ɖo fí e lín dó mi lɛ́ɛ. Ado ma hu mi ó; ɖó nǔ wɛ nyí bó ɖó ná jɛ; amɔ̌, gbɛvivɔ sín hwenu ɔ́ ko nɛ́ ǎ. Akɔta ɖě ná sí te dó ɖě jí, bɔ axɔ́súɖuto ɖě ná sí te dó ɖě jí; adɔ ná tɔ́n, bɔ ayǐkúngban ná dǎn wǔ gbɔn fí tɛnmɛ tɛnmɛ. Có, nǔ énɛ́ lɛ́ɛ ka ko nyí nǔɖé ǎ; bǐbɛ́ wǔvɛ́mimɔ lɛ́ɛ tɔn kpowun wɛ. “È nǎ wlí mi jó, bɔ è nǎ dó tagba nú mi, káká bó hu mi. Mɛ bǐ ná gbɛ́ wǎn nú mi, ɖó nyɛ wú. Hwenɛ́nu ɔ́, mɛ e ɖi nǔ nú mì lɛ́ɛ gěgé ná jó nǔɖiɖi yětɔn dó. Yě ná nɔ́ slɛ́ yěɖée, bó ná gbɛ́ wǎn nú yěɖée, bɔ mɛ e nɔ sɔ́ yěɖée dó ɖó gbeyíɖɔ Mawu tɔn lɛ́ɛ gěgé ná wá xwetɔ́n, bó ná flú mɛ gěgé. Adǎnúwiwa ná kpé fí bǐ bɔ nǔɖitɔ́ gěgé sín wǎn yí nú nɔzo ná ɖe kpo. Lo ɔ́, mɛ e ná dɛ ɖo ya énɛ́ lɛ́ɛ nu káká yi fó ɔ́, è nǎ hwlɛ́n ɛ gán. È nǎ jlá axɔ́súɖuɖu Mawu tɔn sín Wɛn Ɖagbe gbɔn gbɛ ɔ́ bǐ mɛ, bónú é ná nyí kúnnuɖiɖe nú gbɛtɔ́ lɛ́ɛ bǐ. Énɛ́ ɔ́ gúdo ɔ́, gbɛ ɔ́ ná vɔ. “Énɛ́ ɔ́ wútu ɔ́, mi ná mɔ suɖunú baɖabaɖa e xó gbeyíɖɔ Mawu tɔn Daniyɛ́li ko ɖɔ ɖ'ayǐ ɔ́ ɖo tɛn mímɛ́ ɔ́ mɛ. Mɛ ɖé xa nǔ énɛ́ lɛ́ɛ hǔn, ní bó mɔ nǔ jɛ wú. Hǔn, mɛ e ɖo Judée lɛ́ɛ bǐ ní hɔn yi sókan mɛ. Mɛ ɖé ka ɖo xɔ tɔn ta hǔn, ní ma sɔ́ jɛ te bo wá sɔ́ nǔɖé ɖo xɔ tɔn mɛ cóbó hɔn ó. Mɛ e ka ná ɖo gle mɛ ɔ́ ní ma ɖɔ émí ná lɛ́ kɔ wá zé awu émítɔn ɖaxó ɔ́ ɖo xwé gbe ó. Azǎn nyanya wɛ azǎn énɛ́ lɛ́ɛ ná nyí nú nyɔ̌nu e ná ɖo xo, kpódó éé ná ɖó vǐ ɖo anɔ̌nu hwenɛ́nu lɛ́ɛ kpó. Mi sa vo nú Mawu, bónú hwenu e mi ná hɔn dó é ma nyí avivɔ ɖaxó ɔ́ hwenu ó; é ní ma ka nyí gbɔjɛzán Jwifu lɛ́ɛ tɔn gbe ó; ɖó adǎn e na wá gbo gbɛtɔ́ lɛ́ɛ hwenɛ́nu ɔ́ na syɛ́n dín, bɔ mɔ̌hunkɔtɔn ko jɛ kpɔ́n gbeɖé sín hwenu e Mawu ko ɖó gbɛ ɔ́ káká wá jɛ din é ǎ; nǔ mɔ̌hunkɔ ɖě ká sɔ́ ná jɛ gbeɖé kpɔ́n ǎ. Nú Mawu ma ko ɖe wǔvɛ́ mimɔ énɛ́ lɛ́ɛ sín azǎn kpo wɛ ǎ ɔ́, mɛ ɖěbǔ na gán ɖ'é mɛ ǎ. Lo ɔ́, Mawu ko ɖe azǎn ɔ́ kpo ɖó mɛ tɔn e é cyán lɛ́ɛ wú. “Ényí mɛɖé wá ɖɔ nú mi hwenɛ́nu ɖɔ: ‘Mi kpɔ́n! Klísu ɔ́ ɖo fí;’ abǐ ‘É ɖo dɔ̌n hǔn, mi ma ɖi ó’; ɖó mɛ e nɔ sɔ́ yěɖée dó ɖó Klísu ná lɛ́ɛ kpódó mɛ e nɔ sɔ́ yěɖée dó ɖó gbeyíɖɔ Mawu tɔn ná lɛ́ɛ kpó ná wá xwetɔ́n. Yě ná nɔ́ jlɛ́ nǔ tɛnmɛ tɛnmɛ lɛ́ɛ, bó ná nɔ́ dó nǔdábaɖa ɖaxó ɖaxó lɛ́ɛ sin, bɔ nú yě sixú kpé wú wɛ ɔ́, yě ná flú mɛ e Mawu cyán lɛ́ɛ lɔmɔ̌. Énɛ́ un ko ɖɔ ɖ'ayǐ nú mi nɛ́. “Ényí mɛɖé ka ɖɔ nú mi ɖɔ: ‘Klísu ɔ́ ko wá, bo ɖo gbětótló mɛ’ hǔn, mi ma yi ó. Nú mɛɖé ka lɛ́ ɖɔ nú mi ɖɔ: ‘Éɖíe ɖo xɔ mɛ e’ hǔn, mi ma ɖi ó. Ɖó nyɛ Gbɛtɔ́ví ɔ́ ná lɛ́ kɔ wá lě e jǐ nɔ kɛwun, bó nɔ́ zlɛ́ jǐnukúnsin sín zǎnzǎnhwe jí káká wá yi gbadahwe jí é ɖɔhun. Fí e nǔkúkú ɖe ɔ́, fínɛ́ wɛ aklasú lɛ́ɛ nɔ kplé ɖe. “Nǔ énɛ́ lɛ́ɛ jɛ wá yi gúdo tlóló ɔ́, hwe ná dó zǐnflú, sun sɔ́ ná ná wěziza tɔn ǎ; sunví lɛ́ɛ ná jɛ ayǐ sín jǐxwé, bɔ hlɔ̌nhlɔ́n e ɖo jǐnukúnsin lɛ́ɛ ná húnhún. Énɛ́ ɔ́ gúdo ɔ́, wuntun e ná xlɛ́ ɖɔ nyɛ Gbɛtɔ́ví ɔ́ ko ja ɔ́ ná tɔ́n ɖo jǐnukúnsin, bɔ akɔta e ɖo gbɛ ɔ́ mɛ lɛ́ɛ bǐ ná jɛ alě ná jí, bɔ yě ná mɔ nyɛ Gbɛtɔ́ví ɔ́ ɖo akpɔ́kpɔ́ jí jǎwe kpódó hlɔ̌nhlɔ́n kpó, kpódó susu ɖaxó kpó; bɔ un ná sɛ́ wɛnsagun ce lɛ́ɛ dó, bónú ahwankpɛn ɖaxó ɔ́ ɖɔ nǔ ɔ́, yě ná kplé mɛ e Mawu cyán lɛ́ɛ sín wɛ̌kɛ́zo ɛnɛ lɛ́ɛ bǐ mɛ, sín fí e jǐnukúnsin ɔ́ ko bɛ́ sín ɔ́, káká yi jɛ fí e é kponu dó ɔ́. “Mi kpɔ́n nǔ dó fígitín wú: ényí ala tɔn lɛ́ɛ jɛ mǔ dó jí, bó jɛ ama zɔ́n jí ɔ́, mi nɔ tunwun ɖɔ xwejí ɔ́ wɛ ko ɖo nǎ wɔ̌ wɛ nɛ́. Mɔ̌ ɖokpó ɔ́, nú mi wá mɔ nǔ énɛ́ lɛ́ɛ bǐ ɖo jijɛ wɛ hǔn, mi nywɛ́ ɖɔ nyɛ Gbɛtɔ́ví ɔ́ ko sɛ yá bǐ, bó ɖo hɔn jí. Má ɖɔ nǔgbó nú mi: mi mɛ e ɖo gbɛ din lɛ́ɛ bǐ ná ko kú cóbónú nǔ énɛ́ lɛ́ɛ bǐ ná jɛ ǎ. Jǐnukúnsin kpódó ayǐkúngban kpó ná vɔ, amɔ̌, xó ce lɛ́ɛ ná vɔ gbeɖé ǎ. “Mɛ ɖé tunwun azǎn ɔ́ ǎ; mɛɖé ka tunwun gan ɔ́ mɛ ǎ; wɛnsagun Mawu tɔn lɛ́ɛ tunwun ǎ; nyɛ Mawu ví ɔ́ ɖésú tunwun ǎ; Tɔ́ ɔ́ ɖokpónɔ géé wɛ tunwun. Nǔ e jɛ ɖo Nɔwée hwenu ɔ́ ɖokpó ɔ́ wɛ ná lɛ́ jɛ hwenu e nyɛ Gbɛtɔ́ví ɔ́ ná lɛ́ kɔ wá dó é. Cóbónú sin ná vɔ gbɛ ɔ́, gbɛtɔ́ lɛ́ɛ ɖo nǔ ɖu wɛ, bó ɖo ahan nu wɛ. Yě ɖo asi da wɛ, bó ɖo vǐ ná asú wɛ, káká yi jɛ gbe e gbe Nɔwée byɔ́ tɔjíhún ɖaxó mɛ dó é, bɔ yě mɔ nǔ jɛ nǔ e ɖo jijɛ wɛ lɛ́ɛ wú ǎ, káká yi jɛ hwenu e sin wá bɛ́ yě bǐ dó é. Hwenu nyɛ Gbɛtɔ́ví ɔ́ ná lɛ́ kɔ wá dó ɔ́, lě e é ná cí gbɔn é nɛ́. Hwenɛ́nu ɔ́, súnnu we ná ɖo gle mɛ, bɔ è nǎ sɔ́ mɛ ɖokpó, bó ná jó mɛ ɖokpó dó. Nyɔ̌nu we ná ɖo nǔ li wɛ ɖo sé kɔn, bɔ è nǎ sɔ́ mɛ ɖokpó, bó ná jó mɛ ɖokpó dó. Hǔn mi bo nɔ acéjí, ɖó mi tunwun azǎn e gbe Aklúnɔ mitɔn ná lɛ́ kɔ wá dó é ǎ. Mi ní mɔ nǔ jɛ wú ganjí ɖɔ: ényí xwétɔ́ ɖé tunwun hwenu e ajotɔ́ ná wá xwé tɔn gbe dó ɔ́, wunzɛn wɛ é ná nɔ, bó ná lɔn bónú ajotɔ́ ná tɔ́n dǒ, bó byɔ́ xwé tɔn gbe ǎ. Hǔn mi lɔmɔ̌, mi bo nɔ acéjí, ɖó nyɛ Gbɛtɔ́ví ɔ́ ná wá xwetɔ́n hwenu e mi ma ná ɖó nukún mì dó ǎ é. “Má ɖɔ mɛ e mɛsɛntɔ́ gbejínɔtɔ́, ayiɖotenánɔ ɖi ɔ́ nú mi: é ɖi mɛ e gǎn tɔn ɖo hwɛ ná zɛ wɛ, bó sɔ́ ɛ ɖó mɛ e ɖo xwé tɔn gbe lɛ́ɛ nu, bɔ é ná nɔ ná nǔɖuɖu yě dó hwe tɔn nu é. Nǔ nyɔ́ nú mɛsɛntɔ́ énɛ́ e gǎn tɔn ná lɛ́ kɔ wá mɔ ɛ ɖo nukún kpé dó azɔ̌ tɔn wú wɛ é. Má ɖɔ nǔgbó nú mi: gǎn ɔ́ ná sɔ́ ɛ ɖó dɔkun tɔn lɛ́ɛ bǐ nu. Amɔ̌, é ka nyí ɖɔ mɛsɛntɔ́ nyanya wɛ é nyí, bó nɔ́ ɖɔ dó ayi mɛ ɖɔ: ‘Gǎn ce sín wǐwá ɖíe ɖo lǐnlín wɛ e,’ bó jɛ ɖiɖe dó mɛsɛntɔ́ hǎ tɔn ɖě lɛ́ɛ jí, bó jɛ nǔ ɖu jí, bó jɛ ahan nu xá ahannumúnɔ lɛ́ɛ jí ɔ́, gǎn tɔn ná wá fyán ɛ gbe e gbe é má ná ɖó nukún tɔn ǎ é, ɖo gan e mɛ é má ná tunwun ǎ é. Hwenɛ́nu ɔ́, gǎn tɔn ná dɔn tó n'i, bɔ é ná syɛ́n ɖésú, lobo ná xwe e dó yɛmɛnúwatɔ́ lɛ́ɛ sín ahwan mɛ; fínɛ́ wɛ é ná ya avǐ, bó ná ɖu aɖǔkún ɖe. “Énɛ́ ɔ́, axɔ́súɖuto sɛ́xwé tɔn ɔ́, è nǎ sɔ́ jlɛ́ dó hwenuxó ɖyɔ̌vǐ wǒ ɖé lɛ́ɛ tɔn wú. Ɖyɔ̌vǐ wǒ lɛ́ɛ fɔ zogbɛ́n yětɔn bó ɖidó asisúnɔ ɔ́ kpé gbé. Ɖyɔ̌vǐ wǒ énɛ́ lɛ́ɛ ɔ́, mɛ atɔ́ɔ́n ɖo yě mɛ, bó jɔ xlo, bɔ mɛ atɔ́ɔ́n ɖě lɛ́ɛ ka nyí ayiɖotenánɔ. Yě mɛ xlonɔ lɛ́ɛ ɔ́, yě fɔ zogbɛ́n yětɔn lɛ́ɛ, yě ká sɔ́ hɛn ami dó akpá ǎ. Lo ɔ́, ayiɖotenánɔ lɛ́ɛ hɛn zogbɛ́n yětɔn lɛ́ɛ, bó lɛ́ hɛn ami dó goví mɛ. Ée asisúnɔ ɔ́ ɖo lǐnlín wɛ ɔ́, yě jɛ kɔmlɔgɔ́ sa jí, káká bó dɔ́ amlɔ. “Ɖěe zǎn wá xwete ɔ́, mɛɖé jɛ xó sú jí, bó nɔ́ ɖɔ: ‘Asisúnɔ ɔ́ ɖíe jǎwe e, mi tɔ́n bó yi kpé e!’ Hwenɛ́nu ɔ́, ɖyɔ̌vǐ lɛ́ɛ bǐ fɔ́n, bó bló zogbɛ́n yětɔn lɛ́ɛ ɖó. Xlonɔ atɔ́ɔ́n lɛ́ɛ ka mɔ ɖɔ ami vɔ sín zogbɛ́n émítɔn mɛ, bó ɖɔ nú ayiɖotenánɔ lɛ́ɛ ɖɔ: ‘Mi ná ami mitɔn kpɛɖé mǐ, ɖó zogbɛ́n mǐtɔn lɛ́ɛ ɖo cící wɛ.’ Ayiɖotenánɔ lɛ́ɛ ka yí gbe nú yě ɖɔ: ‘Ami e mǐ hɛn ɔ́ ná sixú kpé mǐ, bó ná kpé mi lɔmɔ̌ ǎ. Mi gbɔ bo yi amisatɔ́ lɛ́ɛ gɔ́n, bó yi jɛ nǔ mitɔn.’ Ami ɔ́ jɛ gbé wɛ yě yi, bɔ asisúnɔ ɔ́ wá, bɔ ayiɖotenánɔ atɔ́ɔ́n e kó ɖo gbesisɔ mɛ lɛ́ɛ xwedó e byɔ́ agɔ̌ɖuɖu sín xɔ ɔ́ mɛ, bɔ yě sú hɔn ɔ́, bó dó gan mɛ. Énɛ́ ɔ́ gúdo wɛ ɖyɔ̌vǐ xlonɔ atɔ́ɔ́n lɛ́ɛ lɛ́ kɔ wá, bó nɔ́ ɖɔ: ‘Aklúnɔ, aklúnɔ, hun hɔn nú mǐ!’ Lo ɔ́, asisúnɔ ɔ́ gbɛ́, bó ɖɔ: ‘Má ɖɔ nǔgbó nú mi, un tunwun mi ǎ.’ ” Bó ná dó sú ta ná ɔ́, Jezu ka lɛ́ ɖɔ nú yě ɖɔ: “Hǔn mi bo nɔ acéjí, ɖó mi tunwun azǎn ɔ́ ǎ, mi ka tunwun gan ɔ́ mɛ ǎ.” “ Axɔ́súɖuto sɛ́xwé tɔn ɔ́, nǔ e wú è sixú lɛ́ jlɛ́ dó ɔ́ ɖíe: nya ɖé ɖo tomɛ ná yi wɛ, bó ylɔ́ mɛsɛntɔ́ tɔn lɛ́ɛ, bó sɔ́ dɔkun tɔn lɛ́ɛ dó alɔ mɛ nú yě. É kpɔ́n lě e ɖokpó ɖokpó yětɔn nɔ́ bí dó azɔ̌ wú gbɔn ɔ́, bó sɔ́ dɔkun tɔn dó así nú yě. É sɔ́ sikágankwɛ́ ɖaxó atɔ́ɔ́n dó así nú mɛ nukɔntɔn ɔ́, bó sɔ́ we dó así nú mɛ wegɔ́ ɔ́, lobo sɔ́ ɖokpó dó así nú mɛ atɔngɔ́ ɔ́, lobo yi to mɛ. Ée nya ɔ́ ɖidó tlóló ɔ́, mɛ nukɔntɔn e yí sikágankwɛ́ ɖaxó atɔ́ɔ́n ɔ́ sɔ́ akwɛ́ ɔ́ dó jɛ ajɔ wa ná jí. Ée é wa ajɔ ɔ́ káká ɔ́, é mɔ sikágankwɛ́ ɖaxó atɔ́ɔ́n ɖěvo d'é jí. Mɔ̌ ɖokpó ɔ́, mɛ e yí sikágankwɛ́ ɖaxó we ɔ́ lɔmɔ̌ ɖu we ɖěvo sín le d'é jí. Mɛ atɔngɔ́ ɔ́ e yí sikágankwɛ́ ɖaxó ɖokpó ɔ́ yi kun do, bó sɔ́ gǎn tɔn sín akwɛ́ ɔ́ hwlá d'é mɛ. “Ɖěe mɛsɛntɔ́ énɛ́ lɛ́ɛ sín gǎn yi nɔ to ɔ́ mɛ xɔ azǎn gěgé, bó lɛ́ kɔ wá ɔ́, é ylɔ́ yě, bɔ yě jɛ lě e yě wa akwɛ́ lɛ́ɛ nǔ gbɔn ɔ́ sín gbe ɖó n'i jí. Mɛ nukɔntɔn e yí sikágankwɛ́ ɖaxó atɔ́ɔ́n ɔ́ sɛ yá ɛ, bó bɛ́ sikágankwɛ́ ɖaxó atɔ́ɔ́n ɖěvo dó atɔ́ɔ́n ɖěe é yí ɖ'ayǐ ɔ́ jí, bó ɖɔ: ‘Gǎn ce, sikágankwɛ́ ɖaxó atɔ́ɔ́n wɛ a sɔ́ nú mì; atɔ́ɔ́n ɖěvo ɖíe un ka mɔ d'é jí e.’ Bɔ gǎn ɔ́ ɖɔ n'i ɖɔ: ‘A wa nǔ ɖó ganjí; mɛsɛntɔ́ ɖagbe gbejínɔtɔ́ wɛ nú we. Un sɔ́ we ɖó nǔ kpɛɖé nu, bɔ a blǒ ɖó ganjí; din ɔ́, un ná sɔ́ we ɖó nǔ gěgé nu. Énɛ́ ɔ́ wú ɔ́, bo wá j'awǎ xá mì.’ Mɛ wegɔ́ ɔ́ e yí sikágankwɛ́ ɖaxó we ɔ́ sɛ yi gǎn tɔn gɔ́n, bó bɛ́ sikágankwɛ́ ɖaxó we ɖěvo dó we ɖěe é yí ɖ'ayǐ ɔ́ jí n'i, bó ɖɔ: ‘Gǎn ce, sikágankwɛ́ we wɛ a sɔ́ nú mì; we ɖěvo ɖíe un ka mɔ d'é jí e.’ Bɔ gǎn ɔ́ ɖɔ n'i ɖɔ: ‘A wa nǔ ɖó ganjí; mɛsɛntɔ́ ɖagbe gbejínɔtɔ́ wɛ nú we. Un sɔ́ we ɖó nǔ kpɛɖé nu, bɔ a blǒ ɖó ganjí; din ɔ́, un ná sɔ́ we ɖó nǔ gěgé nu. Énɛ́ ɔ́ wú ɔ́, bó wá j'awǎ xá mì.’ Mɛ e yí sikágankwɛ́ ɖaxó ɖokpó ɔ́ wá gǎn tɔn gɔ́n, bó ɖɔ n'i ɖɔ: ‘Gǎn ce, un tunwun ɖɔ mɛ syɛ́nsyɛ́n wɛ a nyǐ, bɔ fí e a ma dó nǔkún ɖe ǎ ɔ́ wɛ a nɔ ya nǔkún ɖe; bɔ nǔ e a ma fún ǎ ɔ́ wɛ a nɔ yi bɛ́. Énɛ́ ɔ́ wú wɛ xɛsi ɖi mì, bɔ un yi kun do, bó sɔ́ akwɛ́ ɖěe a sɔ́ nú mì ɔ́ hwlá d'é mɛ. Akwɛ́ towe ɖíe, bo yí.’ Bɔ gǎn ɔ́ yí gbe n'i ɖɔ: ‘Mɛsɛntɔ́ dídá fɔnlínnɔ wɛ nú we. A tunwun ganjí ɖɔ fí e un ma dó nǔ ɖe ǎ ɔ́ wɛ un nɔ ya nǔkún ɖe; bɔ nǔ e un ma fún ǎ ɔ́ wɛ un nɔ bɛ́. A nǎ kó sɔ́ akwɛ́ ce dó akwɛ́xwé, bónú un lɛ́ kɔ wá ɔ́, un ná yí kpódó akwɛ́ví tɔn kpó.’ Gǎn ɔ́ ka wá ɖɔ nú mɛsɛntɔ́ tɔn ɖěvo lɛ́ɛ ɖɔ: ‘Mi yí akwɛ́ ɔ́ sín así tɔn, bó sɔ́ jó nú mɛ e ɖó sikágankwɛ́ ɖaxó wǒ é. Ɖó mɛ e ɖó nǔ ɔ́, è nǎ lɛ́ ná ɛ, bɔ é ná túnflá; lo ɔ́, mɛ e ma ɖó nǔɖé ǎ ɔ́, è nǎ lɛ́ yí kpɛ e ɖo así tɔn ɔ́. Mi sɔ́ mɛsɛntɔ́ nǔvɔ́nɔ énɛ́ nyi dó zǐnflú mɛ ɖo kɔ́xo; fínɛ́ wɛ é ná ya avǐ, bó ná ɖu aɖǔkún ɖe.’ ” “Hwenu nyɛ Gbɛtɔ́ví ɔ́ ná lɛ́ kɔ wá, kpódó susu kpó, ɖo wɛnsagun lɛ́ɛ bǐ tɛ́ntin ɔ́, un ná wá jínjɔ́n axɔ́súzinkpo ce jí, bɔ è nǎ kplé akɔta lɛ́ɛ bǐ ɖó nukɔn ce, bɔ un ná má yě ɖó donu we, lě e lɛ̌ngbɔ́nyitɔ́ nɔ́ cyán lɛ̌ngbɔ́ lɛ́ɛ ɖó vo, bó nɔ́ cyán gbɔ̌ lɛ́ɛ ɖó vo gbɔn é. Un ná sɔ́ mɛ ɖagbe lɛ́ɛ ɖó ɖisí ce xwé, bó ná sɔ́ mɛ nyanya lɛ́ɛ ɖó amyɔ ce xwé, bɔ nyɛ axɔ́sú ɔ́ ná ɖɔ nú mɛ e ɖo ɖisí ce xwé lɛ́ɛ ɖɔ: ‘Mi wá, mi mɛ e jí Tɔ́ ce ko xo ɖɛ ɖagbe dó lɛ́ɛ. Mi wá yí axɔ́súɖuɖu Mawu tɔn sín nǔ ɖagbe e è ko sɔ́ ɖ'ayǐ nú mi sín hwenu e Mawu ko ɖó gbɛ ɔ́ ɖokpóó é. Ɖó xovɛ́ sin mì, bɔ mi ná nǔɖuɖu mì. Kɔ xú mì, bɔ mi ná sin mì. Un nyí jǒnɔ, bɔ mi yí mì dó xwé mitɔn gbe. Un ɖo mɛ̌, bɔ mi ná avɔ mì. Un ɖo azɔn jɛ wɛ, bɔ mi kpé nukún wǔ ce. Un ɖo ganxó, bɔ mi wá ba mì kpɔ́n.’ Mɛ ɖagbe énɛ́ lɛ́ɛ ká ná yí gbe nú mì ɖɔ: ‘Aklúnɔ, hwetɛ́nu wɛ mǐ ká mɔ we ɖo xovɛ́, bó ná nǔɖuɖu we dó? Hwetɛ́nu kɔ ka ɖo xúxú we wɛ, bɔ mǐ ná sin we dó? Hwetɛ́nu wɛ a nyǐ jǒnɔ, bɔ mǐ yí we dó xwé mǐtɔn gbe dó? Hwetɛ́nu wɛ a ɖo mɛ̌, bɔ mǐ ná avɔ we dó? Hwetɛ́nu wɛ a ka ɖo azɔn jɛ wɛ, abǐ a ɖo ganxó, bɔ mǐ wá ba we kpɔ́n dó?’ Nyɛ axɔ́sú ɔ́ ná yí gbe nú yě ɖɔ: ‘Má ɖɔ nǔgbó nú mi: hweɖěbǔnu e mi bló nǔ énɛ́ lɛ́ɛ nú nɔví ce élɔ́ lɛ́ɛ ɔ́, é ná bo nyí mɛ e ma nyí mɛ ɖé ɖo gbɛtɔ́ lɛ́ɛ nukún mɛ ǎ wɛ ɔ́, nyɛ wɛ mi bló ná.’ “Énɛ́ ɔ́ gúdo ɔ́, un ná ɖɔ nú mɛ e ɖo amyɔ ce xwé lɛ́ɛ ɖɔ: ‘Mi sɛ yi zɔ nú mì, mi mɛ e Mawu ko ɖó hwɛ ná lɛ́ɛ é, mi yi jɛ zo e ma nɔ cí gbeɖé ǎ, bɔ Mawu kó bɔ ɖ'ayǐ nú awǒvi kpódó ahwan tɔn lɛ́ɛ kpó é mɛ. Ɖó xovɛ́ sin mì, bɔ mi tɛ nǔɖuɖu mì; kɔ xú mì, bɔ mi tɛ sin mì. Un nyí jǒnɔ, bɔ mi yí mì dó xwé mitɔn gbe ǎ. Un ɖo mɛ̌, bɔ mi ná avɔ mì ǎ. Un jɛ azɔn, bo lɛ́ nɔ ganxó, bɔ mi ka wá ba mì kpɔ́n ǎ.’ Yě lɔmɔ̌ ka ná kanbyɔ́ mì ɖɔ: ‘Aklúnɔ, hwetɛ́nu wɛ mǐ mɔ we ɖo xovɛ́, abǐ kɔ xú we? Hwetɛ́nu wɛ a nyǐ jǒnɔ ɖo to mǐtɔn mɛ? Hwetɛ́nu wɛ mǐ mɔ we ɖo mɛ̌? Hwetɛ́nu wɛ mǐ mɔ we ɖo azɔn jɛ wɛ, abǐ hwetɛ́nu wɛ mǐ mɔ we ɖo ganxó, bɔ mǐ ma ka gɔ́ alɔ nú we ǎ?’ Un ka ná yí gbe nú yě ɖɔ: ‘Má ɖɔ nǔgbó nú mi, hweɖěbǔnu e mi gbɛ́ nǔ énɛ́ lɛ́ɛ bló nú mɛɖé ɖo mɛ élɔ́ lɛ́ɛ mɛ ɔ́, é ná bó nyí mɛ e ma nyí mɛɖé ɖo gbɛtɔ́ lɛ́ɛ sín nukún mɛ ǎ ɔ́ wɛ ɔ́, nyɛ wɛ mi gbɛ́ blǒbló ná.’ Mɛ nyanya énɛ́ lɛ́ɛ ɔ́, è nǎ ɖo tó dɔn nú yě wɛ ma gbokɔ, bɔ mɛ e bló jlǒ Mawu tɔn lɛ́ɛ ná yi gbɛ mavɔ mavɔ mɛ.” Ée Jezu ɖɔ xó énɛ́ lɛ́ɛ bǐ gúdo ɔ́, é ɖɔ nú ahwanvú tɔn lɛ́ɛ ɖɔ: “Mi tunwun ɖɔ Dǐndínwáyi sín xwe ɔ́ kpo azǎn atɔn, bɔ è nǎ jó nyɛ Gbɛtɔ́ví ɔ́ nú gbɛtɔ́ lɛ́ɛ, bónú è nǎ ká mì nyi aklúzu jí.” Hwenɛ́nu ɔ́, vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó kplé ɖo vɔ̌sánú-xwlémawutɔ́ ɖaxó Kayífu xwé, bó ɖe gbeta tɔ́n dó lě e yě ná wa gbɔn bó ná sixú wlí Jezu, bó ná hu i, bɔ mɛɖé ma ná mɔ nukúnnú jɛ wú ǎ é wú. Lo ɔ́, yě ɖo ɖiɖɔ wɛ ɖo yěɖée tɛ́ntin ɖɔ: “Mǐ sixú wlí i xwe ɔ́ hwenu ǎ; é ma nyí mɔ̌ ǎ ɔ́, togun ɔ́ ná fɔ́n gǔ.” Jezu ka wá ɖo Betaníi, ɖo Sinmɔ́ɔ e ko jɛ gudu kpɔ́n ɔ́ sín xwé gbe. Nyɔ̌nu ɖé sɛkpɔ́ ɛ, bó hɛn célu xɔ akwɛ́ dó go ɖé mɛ; go énɛ́ ɔ́, awǐnnya e è nɔ ylɔ́ ɖɔ alubatlu ɔ́ wɛ è sɔ́ dó bló ná. É kɔn célu ɔ́ dó ta nú Jezu hwenu e é ɖo nǔ ɖu wɛ é. Ée ahwanvú Jezu tɔn lɛ́ɛ mɔ mɔ̌ ɔ́, é vɛ́ yě wú tlala, bɔ yě jɛ ɖiɖɔ jí ɖɔ: “Nǔ hɛn gú tɛ́ ka nɛ́? È nǎ kó sa célu ɔ́ yí akwɛ́ gěgé, bó má nú wamamɔnɔ lɛ́ɛ.” Ée Jezu tunwun nǔ e ɖɔ wɛ ahwanvú tɔn lɛ́ɛ ɖe ɔ́, é ɖɔ nú yě ɖɔ: “Étɛ́ sín tagba dó nú nyɔ̌nu élɔ́ wɛ mi ka ɖe? Nǔ ɖagbe wɛ é wa nú mì hǔn. Mi kpódó wamamɔnɔ lɛ́ɛ kpó ɖo kpɔ́ tɛgbɛ, bɔ mi hɛn ɔ́, mi ná wa ɖagbe nú yě hweɖěbǔnu. Lo ɔ́, nyɛ ɖe xá mi tɛgbɛ ǎ. Célu énɛ́ e é kɔn dó wǔtu ce ɔ́, agbaza ce blóɖó ɖó ayǐ wɛ é ɖe, nú gbe e gbe è nǎ ɖi mì é. Má ɖɔ nǔgbó nú mi: fí ɖěbǔ e è nǎ jlá Wɛn Ɖagbe élɔ́ gbɔn ɖo gbɛ ɔ́ bǐ mɛ ɔ́, è nǎ nɔ́ ɖɔ nǔ e nyɔ̌nu élɔ́ wa din ɔ́ sín xó, bó ná nɔ́ dó flín i ná.” Énɛ́ ɔ́ gúdo ɔ́, mɛ e nyí Judási Isikaliɔ́ti ɖo ahwanvú Jezu tɔn wěwe lɛ́ɛ mɛ ɔ́ yi mɔ vɔ̌sánú-xwlémawutɔ́gán lɛ́ɛ, bó ɖɔ nú yě ɖɔ: “Étɛ́ mi ka ná ná mì, bónú má jó Jezu nú mi?” Bɔ yě sú i kpatágankwɛ́ gban (30). Sín gbe énɛ́ gbe ɔ́, Judási jɛ hwenu e ná nyɔ́ n'i, bɔ é ná jó Jezu nú yě ɔ́ ba jí. Hwenu è nɔ ɖu wɔ̌xúxú e mɛ è ma dó tɔ́n ǎ ɔ́ sín xwezán nukɔntɔn ɔ́ gbe ɔ́, ahwanvú Jezu tɔn lɛ́ɛ sɛ yá ɛ, bó kanbyɔ́ ɛ ɖɔ: “Fítɛ́ wɛ a jlǒ ɖɔ mǐ ní yi ɖa Dǐndínwáyixwe ɔ́ sín nǔɖuɖu nú we ɖe?” Jezu ka yí gbe nú yě ɖɔ yě ní yi toxo mɛ, ɖo mɛ lě xwé, bó ɖɔ n'i ɖɔ: “ Mɛ̌si ɖɔ: ‘Gan ce kó ɖo nǎ xo wɛ; xwé towe gbe wɛ nyɛ kpódó ahwanvú ce lɛ́ɛ kpó ká ná ɖu Dǐndínwáyi sín xwe ɔ́ ɖe.’ ” Ahwanvú lɛ́ɛ ká yi bló nǔ e Jezu ɖɔ nú yě ɔ́, bó ɖa Dǐndínwáyixwe ɔ́ sín nǔɖuɖu ɖo fínɛ́. Ée gbadanu wá su ɔ́, Jezu kpódó ahwanvú tɔn wěwe lɛ́ɛ kpó jínjɔ́n ayǐ, bó jɛ nǔ ɖu jí. Hwenu e yě ɖo nǔ ɖu wɛ ɔ́, Jezu ɖɔ nú yě ɖɔ: “Má ɖɔ nǔgbó nú mi, mɛ ɖokpó ɖo mi mɛ, bo ná sa mì.” Ée ahwanvú tɔn lɛ́ɛ se mɔ̌ ɔ́, wǔ kú yě tlala. Bɔ yě ɖokpó ɖokpó jɛ nǔ kanbyɔ́ ɛ jí ɖɔ: “Aklúnɔ nyɛ wɛ ǎ mɛ! Abǐ?” Jezu ka yí gbe nú yě ɖɔ jí: “Mɛ e kplé alɔ xá mì ɖo nǔsúnnúká mɛ ɔ́ wɛ. Nyɛ Gbɛtɔ́ví ɔ́ ɖó ná kú, lě e è ko wlán gbɔn ɖó wǔtu ce é; amɔ̌, heelú mɛ e ka ná sa mì é; mɛ énɛ́ gbɔ bó gɔn gbɛ wá ɔ́, é nyɔ́ n'i hú.” Judási e ɖo na sá ɛ wɛ ɔ́ ka yí xó, bo ɖɔ: “Mɛ̌si! Nyɛ wɛ ǎ mɛ! Abǐ?” Jezu ka yí gbe n'i ɖɔ: “Hwi wɛ ɖɔ.” Hwenu e yě ɖo nǔ ɖu wɛ ɔ́, Jezu zé wɔ̌xúxú bó dó kú nú Mawu, bó kán, lobo ná ahwanvú tɔn lɛ́ɛ bó ɖɔ: “Mi yí, bó ɖu, élɔ́ ɔ́, agbaza ce wɛ.” É lɛ́ sɔ́ kɔ́fu ɖokpó bɔ vɛ̌ɛn ɖ'é mɛ, bɔ é dó kú nú Mawu, bó sɔ́ nú ahwanvú tɔn lɛ́ɛ, bo ɖɔ: “Mi yí, bónú mi bǐ ní nu. Ɖó élɔ́ ɔ́, hun ce wɛ; hun e Mawu dó sɔ́ akɔjijɛ sín afɔ ɖó te ná ɔ́ wɛ. É wɛ kɔn nyi ayǐ, dó gbɛtɔ́ gěgé tamɛ, nú hwɛ sɔ́ kɛ mɛ. Má ɖɔ nǔgbó nú mi: sín égbé ɔ́, un sɔ́ ɖo vɛ̌ɛn élɔ́ ɖě ná nu wɛ káká yi jɛ gbe e gbe nyɛ kpódó mi kpó ná lɛ́ wá nu yɔ̌yɔ́ ɔ́ ɖo axɔ́súɖuto Tɔ́ ce tɔn mɛ é ǎ.” Énɛ́ ɔ́ gúdo ɔ́, yě ji xwe ɔ́ sín han lɛ́ɛ, bó ɖidó olívutín só ɔ́ jí. Énɛ́ ɔ́, Jezu ɖɔ nú ahwanvú tɔn lɛ́ɛ ɖɔ: “Mi bǐ sésé wɛ ná hɔn jó mì dó ɖo zǎn élɔ́ mɛ. Ɖó è ko wlán dó Mawuxówéma ɔ́ mɛ ɖɔ: ‘Un ná hu lɛ̌ngbɔ́nyitɔ́ ɔ́, bɔ lɛ̌ngbɔ́ lɛ́ɛ bǐ ná gbadó.’ Lo ɔ́, hwenu e Mawu ná fɔ́n mì sín kú gúdo ɔ́, un ná jɛ nukɔn nú mi yi Galilée.” Piyɛ́ɛ ka yí xó, bó ɖɔ nú Jezu ɖɔ: “Ényí mɛ ɖě lɛ́ɛ bǐ ná bó hɔn jó we dó ɔ́, nyɛ ná jó we dó gbeɖé ǎ.” Jezu ka ɖɔ n'i ɖɔ: “Má ɖɔ nǔgbó nú we; ɖo zǎn élɔ́ mɛ din ɔ́, cóbónú kokló ná kɔ́ así ɔ́, a nǎ kó gbɛ́ azɔn atɔn ɖɔ émí kún tunwun mì ó.” Piyɛ́ɛ ka lɛ́ yí xó, bó ɖɔ: “É ná bó byɔ́ ɖɔ ma yi kú xá we ɔ́, un ná gbɛ́ gbeɖé ɖɔ un kún tunwun we ó ǎ.” Bɔ ahwanvú ɖě lɛ́ɛ lɔ ɖɔ xó ɖokpó ɔ́. (Maki 14.32-42; Luki 22.39-46) Énɛ́ ɔ́ gúdo ɔ́, Jezu kpódó ahwanvú tɔn lɛ́ɛ kpó wá yi tɛn e mɛ è nɔ ylɔ́ ɖɔ Jɛtisemaníi é, bɔ é ɖɔ nú ahwanvú tɔn lɛ́ɛ ɖɔ: “Mi jínjɔ́n fí, bónú ma yi dɔ̌n bó yi xo ɖɛ bo wá.” É ka kplá Piyɛ́ɛ kpódó Zebeɖée ví we lɛ́ɛ kpó, bɔ wǔ jɛ kúkú i jí, bɔ ado jɛ huhu i jí; bɔ é ɖɔ nú yě ɖɔ jí: “Aluwɛ e nɔ dɔn mɛ yi kú é mɛ wɛ un ɖe; mi nɔ fí, bó nɔ wunzɛn xá mì.” Ée Jezu ɖɔ mɔ̌ nú yě ɔ́, é sɛ yi nukɔn kpɛɖé, bo xwe agbɔ̌nnusú do, bó jɛ ɖɛ xo jí ɖɔ: “Tɔ́ ce, ényí nǔ sixú nyí mɔ̌ hǔn, blǒ bónú ma gɔn wǔvɛ́ kɔ́fu élɔ́ nu. Amɔ̌, ní ma nyí jlǒ ce ó, lo ɔ́, ní nyí jlǒ towe.” Énɛ́ ɔ́ gúdo ɔ́, Jezu lɛ́ kɔ wá ahwanvú tɔn atɔn lɛ́ɛ gɔ́n, bo mɔ yě ɖo amlɔ mɛ, bo ɖɔ nú Piyɛ́ɛ ɖɔ jí: “Mi sixú nɔ wunzɛn xá mì nú ganxixo ɖokpó vɔ́vɔ́ ǎ? Mi nɔ wunzɛn bó xo ɖɛ, bó ma wá jɛ tɛ́nkpɔ́n mɛ ó; ɖó gbɛtɔ́ ɖó jlǒ ɖagbe, agbaza tɔn ka ɖó gǎn ɖé ǎ.” Jezu lɛ́ jó yě dó azɔn wegɔ́ ɔ́, bó yi xo ɖɛ ɖɔ: “Tɔ́ ce, wǔvɛ́ kɔ́fu élɔ́ ma sixú dín wǔtu ce, bónú un gɔn nunu ǎ jɛ́n wɛ hǔn, jlǒ towe ní bó nyí wiwa.” Énɛ́ ɔ́ gúdo ɔ́, Jezu lɛ́ lɛ́ kɔ wá ahwanvú tɔn lɛ́ɛ gɔ́n, bó lɛ́ mɔ yě ɖo amlɔ mɛ, ɖó nukún yětɔn bǐ wɛ kpɛn. Jezu ka jó yě dó, bó sɛ yi zɔ bó xo ɖɛ azɔn atɔngɔ́ ɔ́, bó lɛ́ vɔ́ nǔ ɖokpó lɛ́ɛ ɖɔ. Énɛ́ ɔ́ gúdo ɔ́, é lɛ́ lɛ́ kɔ wá ahwanvú tɔn lɛ́ɛ gɔn, bó ɖɔ nú yě ɖɔ: “Mi lɛ́ kpo ɖo amlɔ dɔ́ wɛ, bó ɖo gbigbɔ jɛ wɛ a? Gan e mɛ è nǎ jó nyɛ Gbɛtɔ́ví ɔ́ nyi hwɛhutɔ́ lɛ́ɛ sín alɔ mɛ ɔ́ ɖíe kó xo e. Mi bo sí te nú mǐ ná yi. Mi kpɔ́n! Mɛ e ɖo sísɔ́ mì jó wɛ ɔ́ ɖíe kó sɛ yá e.” Mɔ̌ ɖɔ wɛ Jezu ɖe kɛ́ɖɛ́ bɔ mɛ e nyí Judási ɖo ahwanvú tɔn wěwe lɛ́ɛ mɛ ɔ́ wá xwetɔ́n; mɛ gěgé ɖé lɛ́ɛ xwedó e, bó hɛn hwǐ kpódó kpo kpán. Vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó wɛ sɛ́ yě dó. Judási e ɖo sisa ɛ ɖu wɛ ɔ́ ka ko ná xlɛ̌ élɔ́ yě ɖɔ: “Mɛ e un ná kí si ná ɔ́ wɛ, mi wlí i.” Ée yě wá ɔ́, Judási sɛ yá Jezu tlóló, bó ɖɔ: “Un dó gbe we Mɛ̌si! ” Lobo kí si n'i. Jezu ka ɖɔ n'i ɖɔ: “Xɔ́ntɔn, wa nǔ e gbé a tɔ́n ɔ́;” bɔ mɛ lɛ́ɛ ka zɔn Jezu jí, bó wlí i. Mɛ e ɖo kpɔ́ xá Jezu lɛ́ɛ ɖokpó ka ɖe alɔ, bó sún hwǐ, bó xú vɔ̌sánú-xwlémawutɔ́ ɖaxó ɔ́ sín mɛsɛntɔ́, bó kpa tó e. Jezu ka ɖɔ n'i ɖɔ jí: “Sɔ́ hwǐ towe ɖó tɛn tɔn mɛ. Ɖó mɛ e nɔ sɔ́ hwǐ dó fun ahwan ná ɔ́, hwǐ kú wɛ é ná kú. Hǔn, a ɖi ɖɔ un hɛn ɔ́, un ná ɖɔ nú Tɔ́ ce, bɔ é ná sɛ́ wɛnsagun sín ahwangbɛ́ wɔ̌buwɔ́bú donu wěwe jɛjí dó mì tlóló din ǎ cé? Ényí mɔ̌ wɛ un ka ko bló gbɔn ɔ́, nɛ̌ wɛ xó e è ka ko ɖɔ, bó wlán dó Mawuxówéma ɔ́ mɛ ɖ'ayǐ ɔ́ ná jɛ gbɔn?” Énɛ́ ɔ́ gúdo ɔ́, Jezu ɖɔ nú ahwan ɔ́ ɖɔ jí: “Ajotɔ́ axánsúnxó wɛ un ka nyí, bɔ mi hɛn hwǐ kpódó kpo kpó, bó wá ja wlǐwlí mì gbé a? Ayǐhɔ́ngbe ayǐhɔ́ngbe wɛ un nɔ ɖo mi tɛ́ntin, bó nɔ ɖo nǔ kplɔ́n mɛ wɛ ɖo sinsɛnxɔ mɛ, có mi ka wlí mì ǎ. Lo ɔ́, nǔ énɛ́ lɛ́ɛ bǐ jɛ, bónú xó e Mawu ko ɖɔ gbɔn gbeyíɖɔ tɔn lɛ́ɛ jí, bɔ è wlǎn dó Mawuxówéma mɛ ɔ́ ná dó jɛ.” Ahwanvú Jezu tɔn lɛ́ɛ bǐ ka jó e dó, bó hɔn. Mɛ e wlí Jezu lɛ́ɛ kplá ɛ hɛn yi vɔ̌sánú-xwlémawutɔ́ ɖaxó Kayífu xwé, ɖo fí e sɛ́nkplɔ́nmɛtɔ́ lɛ́ɛ kpódó tomɛxó lɛ́ɛ kpó ko kplé ɖe é. Piyɛ́ɛ ka jɛ Jezu gúdo, é ka lɔn bó sɛkpɔ́ ɛ ǎ; é nɔ zɔ n'i káká yi vɔ̌sánú-xwlémawutɔ́ ɖaxó ɔ́ sín xwé gbe, bó yi jínjɔ́n mɛsɛntɔ́ lɛ́ɛ kpá, bó ná dó mɔ do nú lě e nǔ lɛ́ɛ ná jɛ gbɔn é. Vɔ̌sánú-xwlémawutɔ́gán lɛ́ɛ kpódó yě mɛ e ko ɖo toxóɖɔgbɛ́ ɔ́ mɛ lɛ́ɛ bǐ kpán ka ɖo mɛ e ná ɖe kúnnu agɔ nú Jezu, bɔ yě ná mɔ tɛn bó ɖó kúhwɛ n'i ɔ́ ba wɛ. Mɛ gěgé wá ɖe kúnnu agɔ n'i; lo ɔ́, xó e yě ɖɔ lɛ́ɛ kpé, bónú è nǎ sixú ɖó kúhwɛ n'i ǎ. Gbɔn gǔdo bǐ ɔ́, mɛ we ɖé lɛ́ɛ wá xwetɔ́n, bó ɖɔ: “Nya élɔ́ ɖɔ jí: ‘Un hɛn ɔ́, un ná gba sinsɛnxɔ Mawu tɔn ɔ́, bó ná sɔ́ azǎn atɔn ɖó te, bó ná vɔ́ ɖěvo gbá.’ ” Vɔ̌sánú-xwlémawutɔ́ ɖaxó ɔ́ ka sí te, bó kanbyɔ́ Jezu ɖɔ: “Nǔ e kúnnuɖetɔ́ énɛ́ lɛ́ɛ ɖɔ dó wǔ towe ɔ́ nɛ́, a ɖǒ nu ɖé ná kɛ d'é wú a?” Jezu ka tin d'é mɛ n'i. Vɔ̌sánú-xwlémawutɔ́ ɖaxó ɔ́ ka ɖɔ n'i ɖɔ: “Ɖo Mawu gbɛɖe ɔ́ sín nyǐkɔ mɛ ɔ́, ényí hwi wɛ nyí Klísu, Mawu ví ɔ́ nǔgbó hǔn, ɖɔ nú mǐ.” Jezu ka yí gbe n'i ɖɔ: “Hwi wɛ ɖɔ, lo ɔ́, un lɛ́ ɖo ɖiɖɔ nú mi wɛ ɖɔ: bɛ́ sín din ɔ́, mi ná mɔ nyɛ Gbɛtɔ́ví ɔ́ ɖo ayǐjínjɔ́n, ɖo Mawu Nǔbǐwúkpétɔ́ ɔ́ sín ɖisíxwé; mi ná lɛ́ mɔ mì, bɔ un ná gosín jǐxwé jǎwe, ɖo akpɔ́kpɔ́ jí.” Ée vɔ̌sánú-xwlémawutɔ́ ɖaxó ɔ́ se xó énɛ́ ɔ́, é vún awu dó kɔ nú éɖée, bó ɖɔ jí: “É nylá nu dó Mawu wú! Kúnnuɖetɔ́ tɛ́ ba wɛ mǐ ka lɛ́ kpo ɖe? Mi ɖésúnɔ kó se lě e é nylá nu dó Mawu wú gbɔn din é. Ani wɛ mi lin d'é wú?” Bɔ yě yí gbe n'i ɖɔ: “Nǔ wɛ é wa nyi do bɔ è ɖǒ ná hu i!” Ée yě ɖɔ mɔ̌ ɔ́, yě jɛ atán tún dó nukún mɛ n'i jí, bó jɛ nǔ dó e jí. Mɛ ɖě nɔ xo tomɛ n'i, bó nɔ ɖɔ n'i ɖɔ: “Klísu, bo ɖɔ mɛ e xo we din ɔ́ nú mǐ nǎ kpɔ́n.” Hwenɛ́nu ɔ́, Piyɛ́ɛ ɖo ayǐjínjɔ́n ɖo kɔ́xota, ɖo xwé ɔ́ gbe. Nyɔ̌nu mɛsɛntɔ́ vɔ̌sánú-xwlémawutɔ́ ɖaxó ɔ́ tɔn ɖokpó sɛ yá ɛ, bó ɖɔ n'i ɖɔ: “Hwi lɔmɔ̌ ko nyí ahwanvú Jezu Galiléenu ɔ́ tɔn kpɔ́n.” Lo ɔ́, Piyɛ́ɛ gbɛ́, ɖo mɛ e ɖo fínɛ́ lɛ́ɛ bǐ nukún mɛ, bo ɖɔ jí: “Un mɔ nǔ jɛ nǔ e ɖɔ wɛ a ɖe ɔ́ mɛ lɔ ǎ.” Ée Piyɛ́ɛ ɖidó hɔntogbó ɔ́ kɔn ɔ́, mɛsɛntɔ́ nyɔ̌nu ɖěvo mɔ ɛ, bó ɖɔ nú mɛ e ɖo fínɛ́ lɛ́ɛ ɖɔ: “Mɛ élɔ́ ko nyí ahwanvú Jezu Nazalɛ́tinu ɔ́ tɔn kpɔ́n.” Piyɛ́ɛ ka lɛ́ gbɛ́ káká, bó xwlé nǔ d'é jí, bo ɖɔ: “Un tunwun nya énɛ́ ǎ.” Ée é ka nɔ zaan kpɛɖé ɔ́, mɛ e ɖo fínɛ́ lɛ́ɛ sɛkpɔ́ Piyɛ́ɛ, bo ɖɔ n'i ɖɔ: “Hwi lɔ ɖo yě mɛ dandan, ɖó gbe e ɖo kɔ towe nu ɔ́ ko ɖe xlɛ́.” Piyɛ́ɛ ka jɛ nu dó éɖée jí, bo jɛ nǔ bǐ xwlé jí, bo ɖɔ: “Un tunwun nya énɛ́ ǎ.” Tlóló ɔ́, kokló kɔ así, bɔ Piyɛ́ɛ flín xó e Jezu ko ɖɔ n'i ɖ'ayǐ ɔ́, é wɛ nyí ɖɔ: “Cóbónú kokló ná kɔ́ así ɔ́, a nǎ ko gbɛ́ azɔn atɔn ɖɔ émí kún tunwun mì ó.” Ée Piyɛ́ɛ tɔ́n ɔ́, é ya avǐ, kpódó vǐvɛ́ kpó. Ée ayǐ hɔ́n tlóló ɔ́, vɔ̌sánú-xwlémawutɔ́gán lɛ́ɛ bǐ kpódó tomɛxó lɛ́ɛ kpó kplé, bó ɖe gbeta tɔ́n, ɖɔ émí ná hu Jezu. Yě blá Jezu, bó kplá ɛ yi jó nú tokpɔngán Pilátu. Ée Judási e jó Jezu ɔ́ mɔ ɖɔ è ɖǒ kúhwɛ n'i ɔ́, nǔ e é wa ɔ́ vɛ́ n'i, bɔ é sɔ́ gankwɛ́ gban (30) ɔ́ yi jó nú vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó, bó ɖɔ: “Un hu hwɛ; nya e un jó nú mi ɔ́, xomɛvɔ́nɔ wɛ.” Yě ká yí gbe n'i ɖɔ: “Étɛ́ wɛ kan mǐ ɖ'é mɛ? Hwi wɛ énɛ́ kan.” Judási ka bɛ́ gankwɛ́ gban (30) lɛ́ɛ nyi dó sinsɛnxɔ mɛ, bó ɖidó. Énɛ́ ɔ́ gúdo ɔ́, é yi dó kan kɔ bo kú. Vɔ̌sánú-xwlémawutɔ́gán lɛ́ɛ ka yi cyán akwɛ́ lɛ́ɛ, bó ɖɔ: “Ɖo sɛ́n mǐtɔn mɛ ɔ́, è ɖǒ ná sɔ́ akwɛ́ élɔ́ yi dó sinsɛnxɔmɛkwɛ́ ɔ́ jí ǎ, ɖó akwɛ́ e è nǎ bó ná dó hu mɛ ná ɔ́ wɛ.” Ée yě gbéjé kpɔ́n káká ɔ́, yě wá ɖó gbe kpɔ́, bó sɔ́ akwɛ́ ɔ́ dó yi xɔ zɛ̌nmɛtɔ́ ɖé sín gle ná, bó dó ɖó kúxwé nú mɛ e ma nyí Jwifu ǎ lɛ́ɛ. Nǔ e wú è nɔ ylɔ́ ayǐkúngban énɛ́ ɔ́ ɖɔ kanjɔgle káká jɛ égbé ɔ́ nɛ́. Nǔ nyí mɔ̌, bónú xó e Mawu kó ɖɔ ɖ'ayǐ gbɔn gbeyíɖɔ tɔn Jelemíi jí ɔ́ ná dó jɛ; é wɛ nyí ɖɔ: “Yě bɛ́ kpatágankwɛ́ gban (30) lɛ́ɛ; akwɛ́ énɛ́ jí wɛ Izlayɛ́li ví ɖé lɛ́ɛ ɖɔ gbo dó, bó dó xɔ Jezu ná. Yě sɔ́ akwɛ́ ɔ́ dó xɔ zɛ̌nmɛtɔ́ ɖé sín gle ná, lě e Aklúnɔ ko ɖɔ gbɔn nú mì ɖ'ayǐ é.” Ée Jezu wá tokpɔngán Pilátu nukɔn ɔ́, tokpɔngán ɔ́ kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Hwi wɛ ɖɔ.” Lo ɔ́, hwenu e vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó ɖo hwɛ dó Jezu wɛ ɖo Pilátu nukɔn ɔ́, Jezu kɛ nu ǎ, bɔ Pilátu ɖɔ n'i ɖɔ: “A se hwɛ tobutóbú e dó we wɛ yě ɖe ɔ́ ǎ cé? Étɛ́ a mɔ d'é wú?” Jezu ka kɛ nu dó xó e yě ɖɔ dó wǔtu tɔn lɛ́ɛ ɖěbǔ wú ǎ, bɔ é kpácá tokpɔngán ɔ́ tlala. Dǐndínwáyi sín xwe hwenu tɛgbɛ ɔ́, tokpɔngán Hlɔ̌ma tɔn ɔ́ nɔ́ ɖe gantɔ́ e ahwan ɔ́ ko sixú byɔ́ ɛ ɔ́ ɖokpó nyi te. Hwenɛ́nu ɔ́, gantɔ́ ɖokpó ka ɖo gankpá ɔ́ mɛ, bɔ è nɔ ylɔ́ ɛ ɖɔ Jezu Balabási. Gantɔ́ énɛ́ ɔ́, to ɔ́ bǐ wɛ tunwun i. Ée togun ɔ́ wá kplé ɔ́, Pilátu kanbyɔ́ yě ɖɔ: “Mɛ̌ wɛ mi jló nú ma ɖe nyi te nú mi ɖo gantɔ́ lɛ́ɛ mɛ? Jezu Balabási ɔ́ wɛ a, abǐ Jezu e è nɔ ylɔ́ ɖɔ Klísu ɔ́?” Ɖó é tunwun ganjí ɖɔ mɛnúvɛ́mɛwú wɛ zɔ́n bɔ yě wlí Jezu Klísu ɔ́ wá nú émí. Hwɛ ɔ́ ɖɔ wɛ Pilátu ɖe, bɔ asi tɔn sɛ́ wɛn dó e ɖɔ jí: “Nǔɖé ní má kan we ɖo nya énɛ́ ɔ́ sín xó mɛ ó, xomɛvɔ́nɔ wɛ. Ɖó zǎn élɔ́ mɛ ɔ́, un kú dlɔ̌ baɖabaɖa ɖé dó wǔ tɔn, bó mɔ wǔvɛ́ ɖésú ɖo amlɔ mɛ.” Vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó ka bló káká bɔ ahwan ɔ́ yí dó xó yětɔn jí, bó byɔ́ ɖɔ è jǒ Balabási, bó hu Jezu. Tokpɔngán ɔ́ lɛ́ wá yí xó, bó kanbyɔ́ yě ɖɔ: “Ɖo mɛ we élɔ́ lɛ́ɛ mɛ ɔ́, mɛ̌ wɛ mi jló bónú má ɖe nyi te nú mi?” Yě ká yí gbe n'i ɖɔ: “Balabási.” Pilátu ka kanbyɔ́ yě ɖɔ: “Jezu e è nɔ ylɔ́ ɖɔ Klísu ɔ́, nɛ̌ wɛ un ka ná wa éyɛ́ sín nǔ gbɔn?” Bɔ yě bǐ yí gbe bó ɖɔ: “Ká ɛ nyi aklúzu jí.” Pilátu ka lɛ́ kanbyɔ́ yě ɖɔ: “Nǔ nyanya tɛ́ wɛ é ká wa?” Yě ká sú xó syɛ́nsyɛ́n bó ɖɔ: “Ká ɛ nyi aklúzu jí.” Ée Pilátu mɔ ɖɔ xó ɔ́ kún ɖo émí kpa wɛ ó, bɔ zǐngídi ahwan ɔ́ tɔn ká ɖo jijɛ jí wɛ jɛ́n wɛ ɔ́, é sɔ́ sin, bó klɔ́ alɔ ɖo yě bǐ nukún mɛ, bó ɖɔ: “Un nyɔ́ nǔɖé do ɖo nya élɔ́ sín kú mɛ ǎ; mi wɛ é kan.” Bɔ ahwan ɔ́ bǐ yí gbe ɖɔ jí: “Nya élɔ́ sín kú ní nɔ kɔ nú mǐ kpódó vǐ mǐtɔn lɛ́ɛ kpó.” Hwenɛ́nu ɔ́, Pilátu ɖe Balabási nyi te nú yě, bo ka zɔ́n bɔ è xo Jezu ɖó bǎ wu. Énɛ́ ɔ́ gúdo ɔ́, é jó e nú sɔ́ja lɛ́ɛ ɖɔ è ní yi ká ɛ nyi aklúzu jí. Tokpɔngán ɔ́ sín sɔ́ja lɛ́ɛ ka kplá Jezu yi hɔnmɛ, bo kplé ahwankpá ɔ́ bǐ dó wǔ tɔn. Yě ɖe awu e é dó lɛ́ɛ bǐ sín kɔ n'i, bó ka sɔ́ awu vɔvɔ ɖaxó ɖé dó n'i. Yě sɔ́ wun dó lɔn axɔ́súgbákún ɖokpó ná, bó sɔ́ xwe n'i, bó ba fántín ɖokpó dó alɔ tɔn ɖisí ɔ́ mɛ, bó nɔ́ jɛ kpo ɖo nukɔn tɔn, bó nɔ́ ɖo cícá ɛ ko wɛ ɖɔ: “Mǐ kan xwé byɔ́, Jwifu lɛ́ɛ xɔ́sú!” Yě nɔ tún atán kɔn nyi wǔtu tɔn, lobo nɔ yí fántín ɔ́ sín así tɔn, bo nɔ dó ta n'i. Ée yě cá ɛ ko mɔ̌ fó ɔ́, yě wá ɖe awu vɔvɔ ɖaxó ɔ́ sín kɔ n'i, bó lɛ́ sɔ́ awu é ɖésúnɔ tɔn lɛ́ɛ dó n'i. Yě kplá ɛ, bó ná yi ká ɛ nyi aklúzu jí. Ée yě tɔ́n sín toxo ɔ́ mɛ ɔ́, yě kpé Silenɛ́ɛnu ɖokpó, bɔ è nɔ ylɔ́ ɛ ɖɔ Sinmɔ́ɔ. Sɔ́ja lɛ́ɛ hú gǎn ɛ, bó ɖíɖá ɛ aklúzu Jezu tɔn. Ée yě jɛ tɛn e mɛ è nɔ ylɔ́ ɖɔ Gɔlugɔta dó Ebléegbe mɛ ɔ́, Gɔlugɔta ɔ́ sín tínmɛ wɛ nyí “takágo tɛnmɛ”. Yě wún vɛ̌ɛn bó kɔn nǔvívɛ́ ɖé d'é mɛ, bó ná Jezu ɖɔ ní nu. Ée é dó nu ɔ́, é gbɛ́ nunu. Sɔ́ja lɛ́ɛ ká Jezu nyi aklúzu jí; yě nyi akɔ dó awu tɔn lɛ́ɛ, bó má. Énɛ́ ɔ́ gúdo ɔ́, sɔ́ja lɛ́ɛ jínjɔ́n ayǐ, bó jɛ cícɔ́ ɛ jí. Bó ná dó ɖe nǔ e sín kúhwɛ è ɖǒ n'i ɔ́ xlɛ́ ɔ́, è wlǎn nǔ élɔ́, bó ká dó aklúzu ɔ́ wú ɖo ta tɔn nu ɖɔ: “Jezu, Jwifu lɛ́ɛ xɔ́sú ɔ́ ɖíe.” Yě ká ajotɔ́ axánsúnxó we nyi aklúzu jí gɔ́ n'i: mɛ ɖokpó ɖo ɖisí tɔn xwé, bɔ mɛ ɖokpó ɖo amyɔ tɔn xwé. Mɛ e ɖo dǐndín wɛ lɛ́ɛ nɔ́ húnhún ta, bó nɔ ɖo zunzun i wɛ, bó nɔ́ ɖɔ: “Hwi mɛ e ɖɔ émí ná gba sinsɛnxɔ Mawu tɔn, bó ná sɔ́ azǎn atɔn ɖó te, bó ná vɔ́ ɖěvo gbá ɔ́ ɖíe a? Hwlɛ̌n hwiɖée gán bó! Ényí Mawu ví ɔ́ jɛ́n a nyǐ hǔn, jɛ te sín aklúzu ɔ́ jí.” Mɔ̌ jɛ́n wɛ vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó lɔ ɖo slǎmɛ ɖɔ wǔ tɔn wɛ, bó nɔ́ ɖɔ: “É hwlɛ́n mɛ ɖě lɛ́ɛ gán, bó ka sixú hwlɛ́n éɖée gán ǎ. Izlayɛ́li xɔ́sú wɛ é nyí bó ɖɔ ǎ cé? Ní bó jɛ te sín aklúzu ɔ́ jí bó! Énɛ́ ɔ́, mǐ ná ɖi nǔ n'i. É ɖeji dó Mawu wú; nú Mawu ɔ́ yí wǎn n'i nǔgbó hǔn, ní bó hwlɛ́n ɛ gán nú mǐ ná kpɔ́n; ɖó é ɖɔ: ‘Un nyí Mawu ví.’ ” Mɔ̌ ɖokpó ɔ́ wɛ ajotɔ́ e è ká ɖó akpá tɔn lɛ́ɛ lɔmɔ̌ ɖo zunzun i gbɔn wɛ. Sín gan wěwe mɛ káká yi jɛ gan atɔn mɛ ɔ́, ablu cyɔ́n to ɔ́ bǐ. Ée é wá su hwelɛ́kɔ ɔ́, Jezu sú xó gǎngán ɖé, bó ɖɔ: “ Eli, Eli, lama sabakitani. ” (Tínmɛ tɔn wɛ nyí: “Mawu ce, Mawu ce, nɛ̌ ka gbɔn bɔ a jǒ mì dó.”) Mɛ e ɖo fínɛ́ lɛ́ɛ ɖě se xó e Jezu ɖɔ nɛ́ ɔ́, bó ɖɔ: “É ɖo Elíi ylɔ́ wɛ.” Tlóló ɔ́, mɛ ɖokpó kán wezun, bó sɔ́ xumɛtekan nylɔ́ dó vɛ̌ɛn sinvɛ́sinvɛ́ mɛ, bó zé slɔ́ fántín gaga ɖé nu, bó dlɛ́n dó Jezu ɖɔ ní nu. Mɛ ɖé lɛ́ɛ ka ɖɔ nú mɛ e ɖo vɛ̌ɛn ná ɛ wɛ ɔ́ ɖɔ: “Gbɔ nú mǐ ná kpɔ́n ɖɔ Elíi ná wá hwlɛ́n ɛ gán a jí.” Jezu lɛ́ sú xó ɖaxó ɖé, bó bɔnu. Azɔn ɖokpó ɔ́, avɔ ɖaxó e ɖo sinsɛnxɔ mɛ ɔ́ dá ɖó we, sín jǐ wá do; ayǐkúngban dán wǔ, bɔ awǐnnya lɛ́ɛ zɛ. Yɔdo lɛ́ɛ hun, bɔ mɛɖeɖóvo Mawu tɔn e kó kú lɛ́ɛ gěgé fɔ́n. Yě tɔ́n sín yɔdo lɛ́ɛ mɛ, bɔ ée Jezu fɔ́n gúdo ɔ́, yě byɔ́ Jeluzalɛ́mu to mímɛ́ ɔ́ mɛ, bɔ mɛ gěgé mɔ yě. Ée sɔ́ja kanwekogán ɔ́ kpódó sɔ́ja e ɖo Jezu cɔ́ xá ɛ wɛ lɛ́ɛ kpó mɔ lě e ayǐkúngban dán wǔ gbɔn, bó mɔ lě e nǔ lɛ́ɛ jɛ gbɔn ɔ́, xɛsi ɖaxó ɖé jɛ yě jí, bɔ yě ɖɔ jí: “Nya élɔ́ ɔ́, Mawu ví wɛ é nyí nǔgbó.” Nyɔ̌nu e nɔ xwedó Jezu bó nɔ dó alɔ ɛ lɛ́ɛ gěgé xwedó e sín Galilée wá fínɛ́. Yě ɖo te, bó ɖo nǔ e ɖo jijɛ wɛ lɛ́ɛ kpɔ́n sɛ́ dó wɛ. Mali Magidalanu ɔ́, Mali e nyí Jaki kpódó Jozɛ́fu kpó sín nɔ ɔ́, kpódó Zebeɖée ví lɛ́ɛ sín nɔ kpó ɖo yě mɛ. Cóbónú hwe ná yi xɔ ɔ́, nya akwɛ́nɔ ɖé wá; nya énɛ́ ɔ́, Alimatéenu wɛ, bɔ è nɔ ylɔ́ ɛ ɖɔ Jozɛ́fu; ahwanvú Jezu tɔn wɛ nú é lɔmɔ̌. É wá yi mɔ tokpɔngán Pilátu, bó byɔ́ ɛ Jezu sín cyɔ. Pilátu ka ɖe gbe nú sɔ́ja lɛ́ɛ, nú è ní jó cyɔ ɔ́ n'i. Jozɛ́fu ka ɖe cyɔ ɔ́ sín aklúzu jí, bó lɛ́ akwɛ́núvɔ yɔ̌yɔ́ ɖé dó, bó sɔ́ yi ɖi dó yɔdo yɔ̌yɔ́ e é kún dó sóxo mɛ ɖ'ayǐ nú é ɖésúnɔ ɔ́ mɛ, bó blí awǐnnya ɖaxó ɖé dó yɔdo ɔ́ nu, bó yi. Mali Magidalanu ɔ́ kpódó Mali ɖě ɔ́ kpó jínjɔ́n ayǐ ɖo fínɛ́, bó kpan nukɔn yɔdo ɔ́. Ayǐhɔ́ngbe tɔn e jɛ dó gbɔjɛzán gbe Jwifu lɛ́ɛ tɔn gúdo ɔ́, vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó zɔn kpɔ́ bo yi tokpɔngán Pilátu gɔ́n. Bó ɖɔ n'i ɖɔ: “Aklúnɔ, mǐ flín ɖɔ hwenu e nya mɛblɛ́ɖutɔ́ énɛ́ kpo ɖo gbɛ ɔ́, é ɖɔ azǎn atɔngɔ́ ɔ́ gbe ɔ́, émí ná fɔ́n sín kú wá gbɛ. Énɛ́ wútu ɔ́, nǎ gbe, bónú sɔ́ja lɛ́ɛ ná yi cɔ́ yɔdo ɔ́ ganjí káká jɛ azǎn atɔngɔ́ ɔ́ gbe. É má nyí mɔ̌ ǎ ɔ́, ahwanvú tɔn lɛ́ɛ táá wá yi fin cyɔ tɔn sɔ́ yi, bó ná ɖɔ nú to lɛ́ɛ ɖɔ: ‘É kó fɔ́n sín kú; nǔvú énɛ́ e yě ná ɖó ɔ́ ná nylá hú nukɔntɔn ɔ́.’ ” Pilátu ka ɖɔ nú yě ɖɔ: “Sɔ́ja lɛ́ɛ ɖíe, mi bo kplá yě bónú yě ní yi cɔ́ yɔdo ɔ́ lě e mi jló gbɔn é.” Yě ká sú yɔdo ɔ́ ganjí, bó ɖó wuntun, lobo ɖó sɔ́ja lɛ́ɛ fínɛ́. Aklúnɔzán gbe ayǐtéhɔ̌nnu ɖo gbɔjɛzán Jwifu lɛ́ɛ tɔn gúdo ɔ́, Mali Magidalanu ɔ́ kpódó Mali ɖě ɔ́ kpán yi Jezu sín yɔdo kpɔ́n gbé. Tlóló ɔ́, ayǐkúngban dán wǔ kpódó hlɔ̌nhlɔ́n kpó; bɔ wɛnsagun Aklúnɔ tɔn ɖokpó jɛ te sín jǐxwé, bó wá blí awǐnnya e è dǒ sú yɔdo ɔ́ ná ɔ́ síin, bó jínjɔ́n jí. Wɛnsagun ɔ́ nɔ́ kɔ́n jǐkɛwun ɖɔhun; bɔ awu tɔn wé tété. Xɛsi jɛ sɔ́ja lɛ́ɛ jí, bɔ yě jɛ sísɔ́sísɔ́ jí, bó jɛ ayǐ, lobo cí mɛ e kú é ɖɔhun. Wɛnsagun ɔ́ ká ɖɔ nú nyɔ̌nu lɛ́ɛ ɖɔ: “Midɛɛ lɛ́ɛ ɔ́, mi ma ɖi xɛsi ó, ɖó un tunwun ɖɔ Jezu e è ká nyi aklúzu jí ɔ́ ba wɛ mi ɖe. É ɖo fí ǎ. É ko fɔ́n sín kú wá gbɛ, lě e é ko ɖɔ gbɔn ɖ'ayǐ é. Mi wá kpɔ́n; fí e è sɔ́ ɛ ɖó ɖ'ayǐ ɔ́ ɖíe. ‘Mi yá wǔ yi ɖɔ nú ahwanvú tɔn lɛ́ɛ ɖɔ é kó fɔ́n sín kú, bó jɛ nukɔn nú mi xwe Galilée; fínɛ́ wɛ mi ná mɔ ɛ ɖe.’ É jɛ́n nɛ́ un kó ɖɔ nú mi nɛ́.” Nyɔ̌nu lɛ́ɛ yá wǔ gosín yɔdo ɔ́ kɔn; yě ɖo xɛsi jí; xomɛ ka lɛ́ ɖo yě hun wɛ ɖésú. Yě kán wezun ɖidó wɛn dó ahwanvú Jezu tɔn lɛ́ɛ gbé. Yě ná mɔ nǔɖé ɔ́, Jezu jɛ́n wɛ wá kpé yě ɖo alixo, bó ɖɔ: “Un dó gbe mi;” bɔ yě jɛ kpo, bó ɖó alɔ afɔ tɔn lɛ́ɛ wú bó ɖe kɔ́ n'i. Hwenɛ́nu ɔ́, Jezu ɖɔ nú yě ɖɔ: “Mi ma ɖi xɛsi ó. Mi yi, bó ɖɔ nú nɔví ce lɛ́ɛ ɖɔ yě ní yi Galilée; fínɛ́ wɛ yě ná mɔ mì ɖe.” Hwenu nyɔ̌nu lɛ́ɛ ɖo ali jí xweyǐgbe ɔ́, sɔ́ja e ɖo Jezu sín yɔdo cɔ́ wɛ lɛ́ɛ ɖě wá Jeluzalɛ́mu toxo ɔ́ mɛ, bó wlí nǔ e jɛ ɔ́ bǐ ɖɔ nú vɔ̌sánú-xwlémawutɔ́gán lɛ́ɛ. Vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpó ka wá kpléta bó ɖe wě dó xó e sɔ́ja lɛ́ɛ wá ɖɔ nú yě ɔ́ wú; yě ná akwɛ́ gěgé sɔ́ja énɛ́ lɛ́ɛ, bó blá ɖɔ xá yě ɖɔ: “Mi ɖɔ nú mɛ lɛ́ɛ ɖɔ hwenu e émí ɖo amlɔ dɔ́ wɛ ɖo yɔdo ɔ́ kɔn ɔ́, ahwanvú Jezu tɔn lɛ́ɛ zɔn zǎn bó wá fin cyɔ tɔn sɔ́ yi. Ényí tokpɔngán ɔ́ na bo se ɔ́, mǐ ná cikpɛ n'i bó ná hwlɛ́n mi gán sín tagba mɛ.” Sɔ́ja lɛ́ɛ yí akwɛ́ ɔ́, bó bló lě e è zɔ̌n yě gbɔn é, bɔ xó énɛ́ gba kpé Jwifu lɛ́ɛ mɛ káká jɛ égbé. Ahwanvú Jezu tɔn wǒ-ɖokpó lɛ́ɛ yi Galilée, ɖo só e Jezu kó jlɛ́ nú yě ɖ'ayǐ ɔ́ jí. Ée yě mɔ Jezu ɖo fínɛ́ ɔ́, yě ɖe kɔ́ n'i; lo ɔ́, mɛɖé lɛ́ɛ ɖo yě mɛ, bó ɖo xixo kpɔ́n wɛ. Jezu ka sɛ yá yě, bó ɖɔ nú yě ɖɔ: “Mawu ná acɛ e ɖo jǐnukúnsin, kpódó ée ɖo ayǐkúngban jí ɔ́ kpó bǐ mì. Hǔn, mi yi bó kplɔ́n nǔ akɔta lɛ́ɛ bǐ, bónú yě ní húzú ahwanvú ce. Mi ylɔ́ Tɔ́ ɔ́, Vǐ ɔ́, kpódó Yɛsinsɛn ɔ́ kpó sín nyǐkɔ dó lɛ yɛhwesin nú yě. Mi kplɔ́n nǔ yě, bónú yě ní se tónú nú nǔ e un kplɔ́n mi lɛ́ɛ bǐ. Mi ka tunwun ɖɔ un ɖo kpɔ́ xá mi tɛgbɛ bɛ́ sín din káká yi jɛ gbe e gbe gbɛ ɔ́ ná vɔ dó é.” Fí e Wɛn Ɖagbe e ɖɔ xó dó Jezu Klísu Mawu ví ɔ́ wú ɔ́ bɛ́ sín ɔ́ ɖíe. Gbeyíɖɔ Mawu tɔn Ezayíi ko wlán ɖ'ayǐ ɖɔ: “Mawu ɖɔ: ‘Wɛnsagun ce ɖíe un sɛ́ dó e, bɔ é ná jɛ nukɔn nú we, bó ná bló ali ɖó nú we.’ É ná nɔ́ ɖo xó sú wɛ ɖo gbětótló mɛ, bó ná nɔ́ ɖɔ: ‘Mi bló ali ɖó nú Aklúnɔ, mi jlɔ́ ali tɔn lɛ́ɛ ɖó.’ ” Jǎan Yɛhwesinlɛnúmɛtɔ́ wá, bó nɔ́ ɖo xó sú wɛ ɖo gbětótló mɛ ɖɔ: “Mi lɛ́ kɔ sín hwɛ mitɔn lɛ́ɛ gúdo, bó wá lɛ yɛhwesin, bónú Mawu ná sɔ́ hwɛ mitɔn lɛ́ɛ kɛ mi.” Mɛ e ɖo Judée gbé jí lɛ́ɛ bǐ, kpódó mɛ e ɖo Jeluzalɛ́mu lɛ́ɛ kpán nɔ́ wá gɔ̌n tɔn, bó nɔ́ ɖɔ hwɛ yětɔn lɛ́ɛ bǐ, bɔ Jǎan nɔ lɛ yɛhwesin nú yě ɖo Judɛ́ɛn tɔ ɔ́ mɛ. Awu kacakaca ɖé wɛ Jǎan nɔ dó, bɔ è sɔ́ lǎkúnmí sín fún dó lɔn ná, bɔ é nɔ́ sin anyǔgójíblánú. É nɔ́ ɖu wɛn kpódó wǐin akú kpó. É nɔ́ ɖo Mawuxó ɔ́ jlá togun lɛ́ɛ wɛ ɖɔ: “Mɛ ɖé ɖo gǔdo ce jǎwe; mɛ énɛ́ ɔ́ hú gǎn mì, bɔ un nyí mɛɖé bó sixú fɛ, bó tún afɔkpakan tɔn lɛ́ɛ vɔ́vɔ́ ǎ. Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; éyɛ́ ká ná sɔ́ Yɛsinsɛn dó lɛ yɛhwesin nú mi.” Hwenɛ́nu wɛ Jezu gosín gletoxo e è nɔ ylɔ́ ɖɔ Nazalɛ́ti é mɛ, ɖo Galilée yíkúngban jí wá, bɔ Jǎan lɛ yɛhwesin n'i ɖo Judɛ́ɛn tɔ ɔ́ mɛ. Hwenu e Jezu ɖo tɔ ɔ́ mɛ tɔ́n sín wɛ ɔ́ jǐnukúnsin hun, bɔ Yɛsinsɛn cí ahwannɛ́ ɖɔhun bó wá jɛ te dó jǐ tɔn. Bɔ è se gbe ɖé sín jǐxwé, bɔ é ɖɔ: “Vǐ vívɛ́ná wɛ a nyǐ nú mì, bɔ xomɛ nɔ hun mì dó wǔtu towe tlala.” Énɛ́ gúdo ɔ́, Yɛ ɔ́ nyi Jezu sɛ́ dó gbětótló mɛ. É nɔ fínɛ́ xɔ azǎn kanɖé (40), bɔ Satáan tɛ́n ɛ kpɔ́n. Gběkanlin lɛ́ɛ tɛ́ntin wɛ é nɔ́ nɔ, bɔ Mawu sín wɛnsagun lɛ́ɛ nɔ́ wá gɔ́ alɔ n'i. Ée è wlǐ Jǎan gúdo ɔ́, Jezu yi Galilée, bó jɛ Wɛn Ɖagbe Mawu tɔn jlá mɛ lɛ́ɛ jí, bó nɔ́ ɖɔ: “Hwe ɔ́ nu ɖíe su e. Axɔ́súɖuɖu Mawu tɔn kó sɛ yá. Mi lɛ́ kɔ sín hwɛ mitɔn lɛ́ɛ gúdo, bó ɖi nǔ nú Wɛn Ɖagbe Mawu tɔn.” Jezu ka ɖo Galilée tɔ ɔ́ tó gbɔn wɛ, bó mɔ Sinmɔ́ɔ kpódó nɔví tɔn Andlé kpán ɖo ɖɔ nyi wɛ ɖo tɔ ɔ́ jí; ɖó ɖɔnyitɔ́ wɛ nú yě. Jezu ɖɔ nú yě ɖɔ: “Mi xwedó mì. Un ná ná kplɔ́n mi, bɔ mi ná nɔ́ dɔn gbɛtɔ́ lɛ́ɛ, lě e mi nɔ nyi ɖɔ dó wlí hweví gbɔn é.” Énɛ́ ɔ́, yě jó ɖɔ yětɔn lɛ́ɛ dó tlóló, bó xwedó e. Ée Jezu ná lɛ́ sɛ yi nukɔn kpɛɖé ɔ́, é mɔ Zebeɖée ví we: Jaki kpódó Jǎan kpán, bɔ yě ɖo tɔjíhún mɛ, bó ɖo ɖɔ yětɔn lɛ́ɛ blóɖó wɛ, bɔ Jezu ylɔ́ yě tlóló, bɔ yě jó tɔ́ yětɔn Zebeɖée ɔ́ dó nyi tɔjíhún ɔ́ mɛ kpódó azɔ̌watɔ́ lɛ́ɛ kpán, lobo xwedó e. Jezu kpódó ahwanvú tɔn lɛ́ɛ kpó yi Kafaanawúmu; gbɔjɛzán Jwifu lɛ́ɛ tɔn gbe ɔ́, é byɔ́ kplɔ́ngbasá, bó jɛ nǔ kplɔ́n mɛ jí. Nǔkplɔ́nmɛ tɔn nɔ kpácá yě mɛ e ɖo tó ɖó e wɛ lɛ́ɛ, ɖó é nɔ kplɔ́n nǔ mɛ kpódó acɛkpikpa kpán; é cí sɛ́nkplɔ́nmɛtɔ́ lɛ́ɛ ɖɔhun ǎ. Hwenɛ́nu ɔ́, dǎwe ɖé ɖo kplɔ́ngbasá ɔ́, bɔ yɛ nyanya ɖo jǐ tɔn; é sú xó, bó ɖɔ: “Étɛ́ wɛ mǐ kpó hwi kpó kpédó, Jezu Nazalɛ́tinu? Kún mǐtɔn sú dó gbé wɛ a ja bo wá a? Un tunwun mɛ e a nyǐ é; mɛ mímɛ́ Mawu tɔn wɛ a nyǐ.” Jezu ka bɛ́ adǎn dó jǐ tɔn ɖɔ: “Nɔ abwɛ̌, bó gosín dǎwe élɔ́ jí.” Bɔ yɛ nyanya ɔ́ húnhún dǎwe ɔ́ syɛ́nsyɛ́n, bó gosín jǐ tɔn, lobo sú xó ɖaxó ɖé. É kpácá yě bǐ bɔ yě nɔ́ kanbyɔ́ yěɖée ɖɔ: “Ani ka ɖíe? Nǔkplɔ́nmɛ alɔkpa vo ɖíe mɛ! É nɔ́ ɖe gbe dó yɛ nyanya lɛ́ɛ, kpódó acɛkpikpa kpán, bɔ yě nɔ́ se gbe n'i.” Azɔn ɖokpó ɔ́, nyǐkɔ tɔn gba kpé Galilée gbé ɔ́ bǐ jí. Ée Jezu tɔ́n sín kplɔ́ngbasá Jwifu lɛ́ɛ tɔn ɔ́, é kpódó Jaki kpó, kpódó Jǎan kpán wá yi Sinmɔ́ɔ kpódó Andlé kpán sín xwé gbe. Avivɔ ka ɖo Sinmɔ́ɔ sín asinɔ jí, bɔ é ɖo ayǐmlɔ́mlɔ́; ée Jezu wá lě tlóló ɔ́, yě ɖɔ xó tɔn nú Jezu. Jezu sɛ yá azinzɔnnɔ ɔ́, bó hɛn alɔ tɔn, bó sɔ́ ɛ sí te; tlóló ɔ́, avivɔ ɔ́ kɔ́n n'i, bɔ é jɛ jǒnɔ yětɔn yí jí. Gbadanu hwenu e hwe ɖo xɔ yi wɛ ɔ́, è kplá azinzɔnnɔ lɛ́ɛ bǐ, kpódó mɛ e jí yɛ nyanya ɖe lɛ́ɛ kpó wá nú Jezu, bɔ to ɔ́ bǐ sésé wá kplé ɖo xwé e gbe Jezu ɖe ɔ́ sín hɔntogbó jí. Jezu gbɔ azɔn tɛnmɛ tɛnmɛ nú azinzɔnnɔ gěgé, bó nya yɛ nyanya gěgé. É ka lɔn nú yɛ nyanya lɛ́ɛ ní ɖɔ xó ǎ, ɖó yě tunwun mɛ e é nyí ɔ́. Jezu fɔ́n zǎn ayǐtéhɔ̌nnu, bó tɔ́n yi fí e mɛɖé ma ná dó tagba n'i ɖe ǎ é, bó xo ɖɛ ɖo fínɛ́. Sinmɔ́ɔ kpódó gbɛ̌ tɔn lɛ́ɛ kpó ká jɛ gbě tɔn mɛ. Hwenu e yě wá yi mɔ ɛ ɔ́, yě ɖɔ n'i ɖɔ: “Mɛ lɛ́ɛ bǐ wɛ ɖo biba we wɛ.” É ka ɖɔ nú yě ɖɔ: “Mi nú mǐ ná gosín fí bó ná yi to e sɛkpɔ́ fí lɛ́ɛ mɛ, nú má yi jlá Mawuxó ɖo fí énɛ́ lɛ́ɛ lɔmɔ̌, ɖó nǔ e wú un tɔ́n é nɛ́.” Bɔ é gbɔn Galilée to ɔ́ bǐ mɛ, bó nɔ́ jlá Mawuxó ɖo kplɔ́ngbasá lɛ́ɛ, bó nɔ́ nya yɛ nyanya sín mɛ lɛ́ɛ jí. Nya gudunɔ ɖé wá Jezu gɔ́n, bó jɛ kpo ɖo nukɔn tɔn, bó ɖɔ: “Nú é jló we ɔ́, a hɛn ɔ́, a nǎ gbɔ azɔn nú mì.” Nǔ tɔn ka blá wǔ nú Jezu, bɔ é dlɛ́n alɔ, bó ɖó wǔ tɔn bó ɖɔ: “Un jló, azɔn towe ní gbɔ.” Tlóló ɔ́, azɔn tɔn gbɔ, bɔ wútu tɔn jɛ te. Lo ɔ́, ée nya énɛ́ ɔ́ ɖidó ɔ́, é jɛ nǔ e Jezu wa n'i ɔ́ jlá jí gbɔn fí bǐ; énɛ́ ɔ́ wú wɛ Jezu ma sɔ́ sixú yi toxo ɖé mɛ ǎ. É gbɔ bó yi cí fí e mɛɖé ma ɖe ǎ é, bɔ mɛ lɛ́ɛ nɔ gosín fí tɛnmɛ tɛnmɛ wá mɔ ɛ. Azǎn ɖé jɛ ǎ, bɔ Jezu wá yi Kafaanawúmu, bɔ yě se ɖɔ é ɖo xwé gbe, bó nyi ahwan yi kplé ɖo fínɛ́, bɔ tɛn ján káká yi hɔnto. Jezu nɔ ɖo Mawuxó ɖɔ nú yě wɛ. Mɛ ɖé lɛ́ɛ wá gɔ̌n tɔn, bɔ mɛ ɛnɛ ɖo yě mɛ, bó hɛn ayǐsónɔ ɖokpó wá gɔ̌n tɔn. Ée ahwan ɔ́ sukpɔ́ káká, bɔ yě ma sixú sɛkpɔ́ ɛ ǎ é ɔ́, yě gbɔ bó xá xɔ e mɛ Jezu ɖe ɔ́ ta, bó kɔ́n xɔ ɔ́ ɖo akpá e xwé Jezu ɖe ɔ́, bó zé ayǐsónɔ ɔ́, kpódó zan e jí é ɖe ɔ́ kpó gbɔn fínɛ́ yi jɛ Jezu sín asá mɛ. Ée Jezu mɔ lě e yě ɖi nǔ sɔ ɔ́, é ɖɔ nú ayǐsónɔ ɔ́ ɖɔ: “Vǐ ce, è sɔ́ hwɛ towe lɛ́ɛ kɛ we.” Sɛ́nkplɔ́nmɛtɔ́ ɖé lɛ́ɛ ká ɖo ayǐjínjɔ́n ɖo mɛ lɛ́ɛ mɛ, bó jɛ ɖiɖɔ dó xomɛ jí ɖɔ: “Nɛ̌ nya élɔ́ sixú ɖɔ nǔ mɔ̌hunkɔtɔn gbɔn? Nu nylá dó Mawu wú wɛ é ɖe. Mɛ̌ wɛ ká sixú sɔ́ hwɛ kɛ mɛ zɛ Mawu ɖokpónɔ wú?” Ée Jezu wɔ́ tlóló ɖɔ yě ɖo xó mɔ̌hunkɔtɔn ɖɔ dó xomɛ wɛ ɔ́, é kanbyɔ́ yě ɖɔ: “Aniwú wɛ mi ka ɖo nǔ mɔ̌hunkɔtɔn lɛ́ɛ lin wɛ? Ényí è ɖɔ nú ayǐsónɔ ɖɔ: ‘È sɔ́ hwɛ towe lɛ́ɛ kɛ we,’ abǐ, ‘Sí te, sɔ́ zan towe bo ɖi zɔnlin’ ɔ́, ɖě tɛ́ wɛ ká bɔkun hú ɖě? Lo ɔ́, un jló ɖɔ mi ní tunwun ɖɔ nyɛ Gbɛtɔ́ví ɔ́ ɖó acɛ e sɔ́ hwɛ kɛ mɛ ɖo ayǐkúngban jí é”. Ée é ɖɔ mɔ̌ ɔ́, é ɖɔ nú ayǐsónɔ ɔ́ ɖɔ: “Un ɖe gbe nú we, sí te, sɔ́ zan towe, bó yi xwé.” Azɔn ɖokpó ɔ́, nya ɔ́ sí te, bó sɔ́ zan tɔn, bó ɖi zɔnlin, bó tɔ́n ɖo yě bǐ nukún mɛ, bɔ ahwi xo yě bǐ; bɔ yě jɛ Mawu xomlá jí, bó nɔ́ ɖɔ: “Mǐ kó mɔ nǔ lěhunkɔtɔn kpɔ́n gbeɖé ǎ.” Jezu lɛ́ yi Galilée tɔ ɔ́ tó, bɔ mɛ lɛ́ɛ bǐ nɔ́ wá gɔ̌n tɔn, bɔ é nɔ ɖo nǔ kplɔ́n yě wɛ. Ée Jezu ɖidó ɔ́, é mɔ Levíi Alufée ví ɔ́ ɖo ayǐjínjɔ́n ɖo denuzɔ́watɔ́ lɛ́ɛ xɔsá, bó ɖɔ n'i ɖɔ: “Xwedó mì.” Bɔ é sí te, bó xwedó e. Jezu ka wá ɖo nǔ ɖu wɛ ɖo Levíi xwé, bɔ tokwɛ́yítɔ́ lɛ́ɛ kpódó hwɛhutɔ́ gěgé kpán ɖo nǔ ɖu xá é kpódó ahwanvú tɔn lɛ́ɛ kpó wɛ, ɖó yě sukpɔ́ bó xwedó e. Ée sɛ́nkplɔ́nmɛtɔ́ e ɖo Falizyɛn lɛ́ɛ sín ahwan mɛ lɛ́ɛ mɔ mɔ̌ ɔ́, yě kanbyɔ́ ahwanvú tɔn lɛ́ɛ ɖɔ: “Aniwú é ká nɔ́ ɖu nǔ xá hwɛhutɔ́ lɛ́ɛ kpódó tokwɛ́yítɔ́ lɛ́ɛ kpó?” Ée Jezu se mɔ̌ ɔ́, é ɖɔ nú yě ɖɔ: “Mɛ e ɖo ganjí lɛ́ɛ wɛ azɔngblétɔ́ nú hudó ǎ; lo ɔ́, mɛ e ɖo azɔn jɛ wɛ lɛ́ɛ wɛ nǔ tɔn hudó. Hwɛjijɔnɔ lɛ́ɛ ylɔ́ gbé wɛ un wá ǎ; hwɛhutɔ́ lɛ́ɛ ylɔ́ gbé wɛ un wá.” Jǎan sín ahwanvú lɛ́ɛ kpódó mawusɛntɔ́gbɛ́ e è nɔ ylɔ́ ɖɔ Falizyɛn lɛ́ɛ kpán nɔ́ ɖo nu blá wɛ, bɔ mɛɖé lɛ́ɛ wá kanbyɔ́ Jezu ɖɔ: “Aniwú wɛ Jǎan sín ahwanvú lɛ́ɛ kpódó ahwanvú Falizyɛn lɛ́ɛ tɔn kpó ká nɔ́ ɖo nu blá wɛ, bɔ ahwanvú towe lɛ́ɛ ma ka nɔ́ blá ɖě ǎ?” Jezu ka yí gbe nú yě ɖɔ: “Asisúnɔ ɔ́ sín xɔ́ntɔn lɛ́ɛ sixú blá nu hwenu e asisúnɔ ɔ́ kpo ɖo kpɔ́ xá yě ɔ́ a? Nǔ sixú nyí mɔ̌ ǎ; yě sixú blá nu hwenu e é kpo ɖo kpɔ́ xá yě ɔ́ ǎ. Amɔ̌, é ná wá su hweɖénu, bɔ è nǎ wá sɔ́ ɛ sín yě gɔ́n; hwe énɛ́ ɔ́ nu wɛ yě ná blá nu. “Mɛ ɖé nɔ́ sɔ́ avɔxwɛ yɔ̌yɔ́ e ma yi sin mɛ kpɔ́n ǎ é dó ɖɛ́ awu xóxó ná ǎ, ɖó ényí è blǒ mɔ̌ ɔ́, avɔxwɛ yɔ̌yɔ́ ɔ́ ná dɔn awu xóxó ɔ́ vún, bɔ ali ɔ́ ná lɛ́ gbló d'é jí. Mɛ ɖé ka nɔ́ sɔ́ vɛ̌ɛn yɔ̌yɔ́ kɔn dó anyǔglo xóxó mɛ ǎ, ɖó ényí è blǒ mɔ̌ ɔ́, vɛ̌ɛn ɔ́ ná hɛn anyǔglo ɔ́ wú, bɔ vɛ̌ɛn ɔ́ kpódó anyǔglo ɔ́ kpó bǐ ná lá mɛ; lo ɔ́, vɛ̌ɛn yɔ̌yɔ́ ɔ́, anyǔglo yɔ̌yɔ́ mɛ wɛ è nɔ kɔn dó.” É wá su gbɔjɛzán Jwifu lɛ́ɛ tɔn gbe gbe ɖokpó, bɔ Jezu ɖo jinukúngle ɖé mɛ gbɔn dín wɛ, é kpódó ahwanvú tɔn lɛ́ɛ kpó. Ée yě ɖo yiyi wɛ ɔ́, ahwanvú tɔn lɛ́ɛ jɛ nǔkún lɛ́ɛ ba ɖu jí. Bɔ Falizyɛn lɛ́ɛ ɖɔ n'i ɖɔ: “Kpɔ́n! Étɛ́wú wɛ ahwanvú towe lɛ́ɛ nɔ́ wa nǔ e sɛ́n mǐtɔn gbɛ́ ɖɔ è ma wa gbɔjɛzán gbe ó é?” É ka yí gbe nú yě ɖɔ: “Nǔ e Davídi wa hwenu e é ɖo nǔɖuɖu ba ná ɖu wɛ, ɖó xovɛ́ sin é kpódó mɛ e kpó é kpó zɔn lɛ́ɛ kpó ɔ́, mi xa kpɔ́n ǎ cé? É byɔ́ sinsɛnxɔ mɛ, ɖo vɔ̌sánú-xwlémawutɔ́ ɖaxó Abiyatáa hwenu, lobɔ nǔɖuɖu e è sɔ́ xwlé Mawu bɔ ɖo sɛ́n mǐtɔn mɛ ɔ́, vɔ̌sánú-xwlémawutɔ́ lɛ́ɛ kɛ́ɖɛ́ jɛ́n ɖó ná ɖu ɔ́, é sɔ́ bo ɖu, bó lɛ́ ná mɛ e kpó é kpó zɔ́n lɛ́ɛ.” É lɛ́ ɖɔ nú yě ɖɔ: “Gbɛtɔ́ wútu wɛ è ɖǒ gbɔjɛzán ɔ́; é nyí gbɔjɛzán ɔ́ wú wɛ è ɖǒ gbɛtɔ́ ǎ. Énɛ́ ɔ́ wú wɛ nyɛ Gbɛtɔ́ví ɔ́ kpa acɛ dó gbɔjɛzán ɔ́ lɔmɔ̌ nu.” Jezu lɛ́ wá yi kplɔ́ngbasá ɔ́, bɔ nya ɖé ɖo fínɛ́, bɔ alɔ tɔn kú. Mɛ e ɖo fínɛ́ lɛ́ɛ ká jɛ Jezu cɔ́ jí, bó ná kpɔ́n ɖɔ é ná gbɔ azɔn nú nya énɛ́ gbɔjɛzán gbe wɛ a jí, bó ná dó sixú ɖó hwɛ nú nya énɛ́. Jezu ka ɖɔ nú nya e sín alɔ kú ɔ́ ɖɔ: “Sí te bó wá jɛ tɛ́ntin fí.” Énɛ́ ɔ́ gúdo ɔ́, é kanbyɔ́ mɛ lɛ́ɛ ɖɔ: “Sɛ́n mǐtɔn ná gbe ɖɔ è nǐ wa ɖagbe abǐ nyanya gbɔjɛzán gbe a? Mɛ wɛ sɛ́n ɔ́ ɖɔ è nǐ hwlɛ́n a, abǐ mɛ wɛ é ɖɔ è nǐ hu?” Lo ɔ́, yě kɛ nu ǎ. Énɛ́ ɔ́, akpɔ ɖó e dó tótlítlí yětɔn wú, bɔ é kpɔ́n yě xaan lɛ́ dó kpódó xomɛsin kpó, bó ɖɔ nú nya ɔ́ ɖɔ: “Dlɛ̌n alɔ towe”, bɔ é dlɛ́n alɔ, bɔ alɔ tɔn jɛ tɛn tɔn mɛ. Falizyɛn lɛ́ɛ tɔ́n sín kplɔ́ngbasá ɔ́, bɔ tlóló ɔ́, yě yi mɔ toxóɖɔgbɛ́ axɔ́sú Elódu tɔn, bɔ yě kplé, bó ɖe wě dó lě e yě nǎ bló gbɔn, bó hu Jezu ɔ́ wú. É ká zɔ́n ahwanvú tɔn lɛ́ɛ ɖɔ yě ní sɔ́ tɔjíhún ɖokpó ɖó te nú émí, bónú mɛ lɛ́ɛ ma wá nyɛ́sú émí ó. Đó, azɔn e gbɔ nú mɛ lɛ́ɛ wɛ é ɖe ɔ́ zɔ́n, bɔ azinzɔnnɔ lɛ́ɛ nɔ ba ná ɖó alɔ wǔtu tɔn, bónú azɔn yětɔn ná gbɔ. Yɛ nyanya lɛ́ɛ mɔ ɛ hweɖěbǔnu ɔ́, yě nɔ́ ɖe kɔ́ n'i, bó nɔ́ sú xó ɖɔ: “Mawu ví wɛ a nyǐ!” Lo ɔ́, Jezu nɔ gbɛ́ nú yě kpódó adǎn kpó ɖɔ yě ma ɖɔ mɛ e émí nyí ɔ́ nú mɛɖé se ó. Jezu ka xá só jí, bó ylɔ́ mɛ e jló e lɛ́ɛ, bɔ yě yi gɔ̌n tɔn; bɔ é cyán mɛ wěwe ɖo yě mɛ bónú yě ná nɔ kpɔ́ xá ɛ, nú é ná nɔ sɛ́ yě dó Mawuxó jlá gbé, bó ná ná acɛ yě, nú yě ná dó nya yɛ nyanya lɛ́ɛ ná. Mɛ wěwe e Jezu cyán lɛ́ɛ ɖíe: Sinmɔ́ɔ e é sun nyǐ ɖɔ Piyɛ́ɛ é, Jaki kpódó nɔví tɔn Jǎan kpó, Zebeɖée ví wɛ yě nyǐ, bɔ (Jezu sun nyǐ yě ɖɔ Boanɛɛgɛ́si, tínmɛ tɔn wɛ nyí “xɛbyosoví.”) Andlé, Filípu, Baatelemíi, Matíe, Tɔmáa, Jaki Alufée ví ɔ́, Tadée, Sinmɔ́ɔ hunjɛdótojítɔ́ ɔ́, kpódó Judási Isikaliɔ́ti e wá jó Jezu ɔ́ kpó. Jezu ka wá xwé gbe, bɔ mɛ gěgé lɛ́ wá kplé ɖo fínɛ́, káká bɔ é kpódó ahwanvú tɔn lɛ́ɛ kpán sɔ́ mɔ tɛn ná ɖu nǔ ǎ. Ée mɛ tɔn lɛ́ɛ se mɔ̌ ɔ́, yě wá bó ná kplá ɛ, ɖó yě ɖo ɖiɖɔ wɛ ɖɔ ta tɔn mɛ kún sɔ́ sɔgbe ó. Sɛ́nkplɔ́nmɛtɔ́ e gosín Jeluzalɛ́mu wá lɛ́ɛ nɔ́ ɖo ɖiɖɔ wɛ ɖɔ: “ Bɛluzebúlu (yɛ nyanya lɛ́ɛ xɔ́sú) wɛ ɖo jǐ tɔn; yɛ nyanya lɛ́ɛ xɔ́sú énɛ́ ɔ́ sín hlɔ̌nhlɔ́n wɛ é nɔ́ dó nya yɛ nyanya lɛ́ɛ ná.” Jezu ka ylɔ́ yě wá, bó dó lǒ dó ɖɔ xó nú yě ɖɔ: “Nɛ̌ Satáan ka sixú nya é ɖésúnɔ gbɔn? Axɔ́súɖuto ɖé ma ɖó gbe kpɔ́ ǎ ɔ́, to énɛ́ ɔ́ sixú jínjɔ́n ayǐ ǎ. Ényí xwé ɖé tíin, bónú mɛ e ɖ'é mɛ lɛ́ɛ sín gbe ma ɖo kpɔ́ ǎ ɔ́, xwé énɛ́ ɔ́, gba wɛ é nɔ gba. Ényí Satáan gbɛ́ wǎn nú éɖée ɔ́, axɔ́súɖuto tɔn ná klán, bó ná sixú nɔ te ǎ, bɔ acɛkpikpa tɔn vɔ nɛ́. “Mɛ ɖé sixú yi súnnu glegbenu ɖé xwé, bó fɔ nǔ tɔn lɛ́ɛ ma tó blá ɛ hwɛ̌ ǎ; lo ɔ́, ényí é blá ɛ ɔ́, é ná fɔ nǔ e ɖo xwé tɔn gbe lɛ́ɛ é bǐ. “Ma ɖɔ nǔgbó nú mi: hwɛ e gbɛtɔ́ lɛ́ɛ kó sixú hu ɔ́ kpódó nu e yě kó sixú nylá dó Mawu wú ɔ́ kpó bǐ wɛ Mawu ná sɔ́ kɛ yě. Mɛ ɖěbǔ ka nylá nu dó Yɛsinsɛn wú ɔ́, è ɖo hwɛ ɖé ná sɔ́ kɛ ɛ wɛ ǎ; ɖó hwɛ e è ma ná sɔ́ kɛ mɛ gbeɖé ǎ ɔ́ wɛ é hu.” Jezu ɖɔ mɔ̌ ɖó yě ɖɔ n'i ɖɔ yɛ nyanya wɛ ɖo jǐ tɔn. Jezu sín nɔví lɛ́ɛ kpódó nɔ yětɔn kpán cí hɔnto, lobo sɛ́ mɛ dó ɖɔ yě ní yi ylɔ́ Jezu wá nú émí. Mɛ gěgé ka ɖo ayǐjínjɔ́n lɛ́ lɛ̌ dó e, bɔ è wá ɖɔ n'i ɖɔ: “Kpɔ́n! Nɔ towe kpódó nɔví towe lɛ́ɛ kpó ɖo hɔnto, bó ɖo biba we wɛ.” É ka yí gbe nú yě ɖɔ: “Mɛ̌ ká nyí nɔ ce? Mɛ̌ ká nyí nɔví ce lɛ́ɛ?” Bɔ é nyi nukún kpɔ́n mɛ e ɖo ayǐjínjɔ́n lɛ́ lɛ̌ dó e lɛ́ɛ, bó ɖɔ: “Nɔ ce kpódó nɔví ce lɛ́ɛ kpán ɖíe. Mɛ ɖěbǔ e ko sixú bló jlǒ Mawu tɔn ɔ́, mɛ énɛ́ ɔ́ wɛ nyí nɔví ce súnnu, bó nyí nɔví ce nyɔ̌nu, bó nyí nɔ ce.” Jezu lɛ́ wá jɛ nǔ kplɔ́n mɛ lɛ́ɛ jí ɖo Galilée sín tɔ ɔ́ tó. Mɛ e kplé dó e lɛ́ɛ sukpɔ́ káká, bɔ é gbɔ bó byɔ́ tɔjíhún ɖé mɛ, ɖo tɔ ɔ́ jí, bó jínjɔ́n ayǐ; mɛ lɛ́ɛ bǐ sésé ká ɖo agě jǐ. É dó lǒ dó kplɔ́n nǔ gěgé yě. Hwenu e é ka ɖo nǔ kplɔ́n yě wɛ ɔ́, é ɖɔ nú yě ɖɔ: “Mi ɖótó! Glesi ɖé tɔ́n gbe ɖokpó, bó yi nǔkún hú gbé. Hwenu e é ɖo nǔkún ɔ́ hú gbɔn gle ɔ́ mɛ wɛ ɔ́, nǔkún lɛ́ɛ ɖě jɛ ali jí, bɔ xɛ lɛ́ɛ wá cyán ɖu. Đě wá jɛ awǐnnyakan mɛ fí e kɔ́ gěgé ɖé ma ɖe ǎ é; énɛ́ lɛ́ɛ yá wǔ wú, ɖó kɔ́ sukpɔ́ ɖo fínɛ́ ǎ. Lo ɔ́, ée hwesivɔ́ wá hun ɔ́, yě fyɔ́, lobo xú; ɖó ɖɔ yětɔn yi do ǎ. Đěvo lɛ́ jɛ wundonu, bɔ wun lɛ́ɛ wú, bó vun blá yě, bɔ yě sɔ́ sɛ́n ǎ. Đěvo lɛ́ jɛ ayǐkúngban ɖagbe jí bó wú, bó hwán, bɔ nǔkún ɖokpó ná mɔ̌hunkɔtɔn donu gban (30), ɖě ná mɔ̌hunkɔtɔn donu kanɖé ko (60), ɖě ná mɔ̌hunkɔtɔn donu kanwe ko (100).” Jezu lɛ́ ɖɔ nú yě ɖɔ: “Mɛ e ɖó tó bó ná dó se nǔ ɔ́ ní ɖótó bó se.” Hwenu e Jezu wá ɖo vo ɔ́, mɛ e lɛ́ lɛ̌ dó e lɛ́ɛ kpódó ahwanvú tɔn lɛ́ɛ kpó ɖɔ é ní tín lǒ lɛ́ɛ mɛ nú émí. É ka ɖɔ nú yě ɖɔ: “ Axɔ́súɖuɖu Mawu tɔn sín nǔbúdo lɛ́ɛ ɔ́, midɛɛ lɛ́ɛ wɛ Mawu hun xlɛ́, amɔ̌, mɛ ɖě lɛ́ɛ ɔ́, lǒ mɛ wɛ è nǎ ɖɔ bǐ dó nú yě. Énɛ́ ɔ́, ‘Yě ná mɔ, cóbó ka ná dán ɛ; yě ná se, yě ka ná mɔ nǔ jɛ mɛ ǎ. Đó yě táá wá lɛ́ kɔ sín hwɛ yětɔn lɛ́ɛ gúdo, nú Mawu ná wá sɔ́ hwɛ yětɔn lɛ́ɛ kɛ yě.’ ” Jezu ɖɔ nú yě ɖɔ: “Ényí mi ma mɔ nukúnnú jɛ lǒ élɔ́ mɛ din ǎ ɔ́, nɛ̌ wɛ mi ka sixú mɔ nukúnnú jɛ lǒ lɛ́ɛ bǐ mɛ gbɔn? Nǔkún e hú wɛ glesi ɔ́ ɖe ɔ́ wɛ nyí Mawuxó ɔ́. Ali e jí nǔkún lɛ́ɛ jɛ ɔ́ wɛ nyí mɛ e nɔ se Mawuxó ɔ́, bɔ tlóló ɔ́, Satáan nɔ wá ɖe sín ayi yětɔn mɛ lɛ́ɛ. Mɔ̌ ɖokpó ɔ́, awǐnnyakan e mɛ nǔkún lɛ́ɛ jɛ ɔ́ wɛ nyí mɛ e nɔ se xó ɔ́, bó nɔ yá wǔ yí kpódó awǎjijɛ kpó lɛ́ɛ, lo ɔ́, Mawuxó ɔ́ nɔ́ dó ɖɔ do ɖo ayi yětɔn mɛ ǎ, bɔ hwenu e è nɔ wá ɖo tagba dó nú mɛ wɛ, bó nɔ́ ɖo mɛ ɖe dó wɛ, ɖó Mawuxó ɔ́ wútu ɔ́, nǔɖiɖi yětɔn nɔ́ jɛ ayǐ. Wundonu fí e nǔkún lɛ́ɛ jɛ ɔ́, wɛ nyí yě mɛ e nɔ se Mawuxó ɔ́, bɔ gbɛmɛ fí sín tagba lɛ́ɛ, dɔkun gbɛmɛ fí tɔn lɛ́ɛ sín mɛdindɔn kpódó nukúnkɛn alɔkpa alɔkpa lɛ́ɛ kpó nɔ́ wá vun blá, bó nɔ́ hu xó ɔ́ ɖo ayi yětɔn mɛ, bɔ é nɔ gɔn sínsɛ́n é. Ayǐkúngban ɖagbe e jí nǔkún lɛ́ɛ jɛ ɔ́ wɛ nyí mɛ e nɔ se Mawuxó ɔ́, bó nɔ́ hɛn dó ayi mɛ, bɔ é nɔ wa azɔ̌ ɖo gbɛzán yětɔn mɛ, bɔ nǔɖiɖi yětɔn nɔ́ gba kún lɛ́ɛ; ényí nǔkún ɖé wɛ yě nyǐ ɔ́, ɖě ná ná sínsɛ́n mɔ̌hunkɔtɔn donu gban (30), ɖě ná ná mɔ̌hunkɔtɔn donu kanɖé ko (60), bɔ ɖěvo ná ná mɔ̌hunkɔtɔn donu kanwe ko (100) mɔ̌.” Jezu lɛ́ wá ɖɔ nú yě ɖɔ: “È tá zogbɛ́n ɔ́, zɛ̌n glɔ́ abǐ akánma glɔ́ wɛ è nɔ sɔ́ dó a? É má nyí nǔ ta aga wɛ è nɔ sɔ́ ɖó ǎ cé? Đó nǔ ɖěbǔ ɖo nǔglɔ́, bó ná gɔn agbawungba jɛ ǎ. Nǔ ɖěbǔ ka nɔ wi mɛ káká ɔ́, é ná wá jɛ wěxo. Mɛ e ɖó tó bó ná dó se nǔ ɔ́ ní ɖótó bó se.” Jezu lɛ́ ɖɔ nú yě ɖɔ: “Mi hɛn ayi dó nǔ e se wɛ mi ɖe lɛ́ɛ wú, ɖó nǔjlɛ́nú e mi nɔ dó jlɛ́ nǔ ná ɔ́ wɛ è nǎ dó jlɛ́ nǔ nú mi, bó ná lɛ́ xú nú mi. Đó, mɛ e ɖó nǔ ɔ́, Mawu ná lɛ́ ná ɛ, bɔ é ná sukpɔ́ d'é jí; mɛ e ma ka ɖó nǔɖé ǎ ɔ́, Mawu ná lɛ́ yí kpɛ e é ɖó ɔ́ sín así tɔn.” Jezu ka lɛ́ yí xó, bó ɖɔ: “ Axɔ́súɖuto Mawu tɔn cí nya e dó nǔkún ɖo gle mɛ ɔ́ ɖɔhun. Zǎn kú ɔ́, nya énɛ́ ɔ́ nɔ́ dɔ́ amlɔ; ayǐ hɔ́n ɔ́, é nɔ́ fɔ́n; lě e é ka nyí gbɔn káká bɔ nǔkún ɔ́ wú bó ɖo susu wɛ ɔ́, é mɔ do ná ǎ. Ayǐkúngban ɔ́ ɖésú wɛ nɔ́ ná jinukún; ama ɔ́ wɛ nɔ́ zɔ́n jɛ nukɔn; énɛ́ gúdo ɔ́, é nɔ́ gba sɛ́, bó nɔ́ fɔ vǐ hwɛ̌ cóbó nɔ́ wá ɖó kwín. Jinukún ka wá su yiya ɔ́, glenɔ ɔ́ nɔ́ bɔ nǔkún-yanú nyi mɛ, ɖó nǔkún-yahwenu su.” Jezu ka lɛ́ ɖɔ: “Étɛ́wú mǐ ná jlɛ́ axɔ́súɖuto Mawu tɔn dó? Abǐ lǒ tɛ́ wɛ mǐ ná dó bó ná dó ɖɔ xó d'é wú? Axɔ́súɖuto Mawu tɔn ɔ́ cí atínkwín e wínní hú ɖě lɛ́ɛ bǐ ɔ́ ɖɔhun. Ényí è ka dó, bónú é wá wú ɔ́, atín tɔn nɔ́ wá yi jǐ hú atín ɖě lɛ́ɛ bǐ. É nɔ́ zɛ ala ɖaxó ɖaxó lɛ́ɛ, káká bɔ xɛ lɛ́ɛ nɔ́ wa adɔ̌ nyi ama tɔn lɛ́ɛ mɛ.” Lǒ mɔ̌hunkɔtɔn tɛnmɛ tɛnmɛ wɛ Jezu nɔ dó bó nɔ́ dó jlá Mawuxó ɔ́ yě, lě e yě sixú mɔ nukúnnú jɛ mɛ gbɔn é. É ɖɔ xó ɖěbǔ nú yě ma gɔn lǒ dó ǎ; lo ɔ́, nú é kpódó ahwanvú tɔn lɛ́ɛ kpó wá ɖo vo ɔ́, é nɔ́ tín lǒ lɛ́ɛ bǐ mɛ nú yě. Gbe nɛ́ gbe ɖokpó ɔ́, ée gbadanu wá su ɔ́, Jezu ɖɔ nú ahwanvú tɔn lɛ́ɛ ɖɔ: “Mi nú mǐ ná yi agě ɖě ɔ́ jǐ.” Bɔ ahwanvú tɔn lɛ́ɛ byɔ́ tɔjíhún e mɛ é ɖésúnɔ ko ɖe ɖ'ayǐ é mɛ, bɔ yě jó ahwan ɔ́ dó, bó kun i ɖidó. Tɔjíhún ɖěvo lɛ́ɛ kpó e kpó ka ɖidó. Tlóló kpowun ɔ́, jɔhɔn ɖaxó ɖé jɛ́n jɛ nyinyi jí, bó nɔ́ xo sin dó tɔjíhún ɔ́ mɛ, káká bɔ tɔjíhún ɔ́ jɛ gǐgɔ́ jí. Jezu ka zé ta ɖó kɔɖónú ɖé jí ɖo gǔdo, bó ɖo amlɔ dɔ́ wɛ. Ahwanvú tɔn lɛ́ɛ ká yi fɔ́n ɛ, bó ɖɔ n'i ɖɔ: “ Mɛ̌si, mǐ ɖo tɔ ná kú wɛ, é ɖɔ nǔɖé nú we ǎ cé?” Jezu ka fɔ́n, bó ɖe gbe dó jɔhɔn ɔ́, bó ɖɔ nú xu ɔ́ ɖɔ ní hwíhwɛ́, bɔ jɔhɔn ɔ́ xwɛ, bɔ fí bǐ cí tóó. Bɔ é wá kanbyɔ́ ahwanvú tɔn lɛ́ɛ ɖɔ: “Aniwú mi ka ɖo xɛsi ɖi wɛ sɔ mɔ̌? Mi ɖó nǔɖiɖi ǎ cé?” Xɛsi ɖaxó ɖé jɛ ahwanvú tɔn lɛ́ɛ jí, bɔ yě jɛ kinkanbyɔ́ yěɖée jí ɖɔ: “Mɛ nǎhún wɛ ká nyí nya élɔ́, bɔ jɔhɔn kpódó xu kpó nɔ́ se gbe n'i?” Jezu kpódó ahwanvú tɔn lɛ́ɛ kpó dó asá Galilée tɔ ɔ́, bó yi Jelazáanu lɛ́ɛ sín ayǐkúngban jí. Ée Jezu jɛ te sín tɔjíhún ɔ́ mɛ tlóló ɔ́, dǎwe ɖé wá kpé e; dǎwe énɛ́ ɔ́, yɛ nyanya ɖo jǐ tɔn, bɔ é tɔ́n sín sóxo mɛ. Sóxo mɛ fínɛ́ wɛ nya énɛ́ ɔ́ nɔ́ nɔ, bɔ mɛɖé sɔ́ nɔ sixú blá ɛ ǎ; è nǎ bó zé wlɔ ɔ́, è nɔ sixú kpé wú ǎ. Đó azɔn mɔ̌kpán wɛ è ko dó gan afɔ n'i, bó ko dó gɛdɛ ɛ, có é hɛn nǔ énɛ́ lɛ́ɛ bǐ wɛ̌n, bɔ mɛ ɖěbǔ nɔ́ sixú kpé jǐ tɔn ǎ. É nɔ ɖo yɔdo lɛ́ɛ tɛ́ntin zǎn kéze, bó nɔ́ ɖo sóklɛ́nmɛ sóklɛ́nmɛ gbɔn wɛ, bó nɔ́ ɖo xó sú wɛ, bó nɔ́ ɖo awǐnnya sɔ́ tlɛ́n wǔ nú éɖée wɛ. Hwenu e é mɔ Jezu sɛ́ dó ɔ́, é kán wezun yi gɔ̌n tɔn, bó jɛ kpo ɖo nukɔn tɔn, bó ɖe kɔ́ n'i, bó sú xó, bó ɖɔ: “Étɛ́ wɛ nyɛ kpódó hwi kpán kpédó, Jezu Mawu Ajalɔ̌nlɔn ví? Un sɔ́ Mawu ɖó afɔ nú we, ma dó ya nú mì ó.” (É ɖɔ mɔ̌ ɖó Jezu ɖe gbe dó e ɖɔ: “Hwi yɛ nyanya élɔ́, gosín nya élɔ́ jí!”) Jezu ka kanbyɔ́ ɛ ɖɔ: “Nɛ̌ wɛ nyǐkɔ towe nɔ́ nyí?” Bɔ é yí gbe n'i ɖɔ: “ ‘Ahwan’, ɖó mǐ mɛ gěgé wɛ.” Bɔ é jɛ vo sa nú Jezu jí ma gbokɔ ɖɔ ní ma nya émí sín gbějí fí ó. Aglǔzahwan ɖaxó ɖé ka ɖo só ɔ́ jí fínɛ́, bó ɖo nǔ ba ɖu wɛ. Bɔ yɛ nyanya énɛ́ lɛ́ɛ dó kɛnklɛ́n nú Jezu ɖɔ: “Nǎ gbe mǐ, bónú mǐ ní yi byɔ́ aglǔza énɛ́ lɛ́ɛ mɛ.” Bɔ Jezu ná gbe yě, bɔ yě gosín dǎwe ɔ́ jí, bó yi byɔ́ aglǔza lɛ́ɛ mɛ, bɔ aglǔza lɛ́ɛ nyi agbo kɔn nyi xu mɛ. Yě bǐ kplékplé ná yi afɔwó (2.000) mɔ̌ bɔ yě bǐ kútɔ. Ée aglǔzanyitɔ́ lɛ́ɛ mɔ mɔ̌ ɔ́, yě hɔn bó yi ɖɔ nǔ e jɛ lɛ́ɛ nú mɛ lɛ́ɛ ɖo toxo ɔ́ kpódó gletoxo lɛ́ɛ kpó mɛ, bɔ mɛ lɛ́ɛ wá kpɔ́n nǔ e jɛ ɔ́. Yě wá Jezu gɔ́n, bó mɔ nya e jí yɛ nyanya wɔ̌buwɔ́bú kó nɔ ɔ́, ɖo ayǐjínjɔ́n, bó dó awu, bɔ ayi tɔn wá gbɛ bɔ xɛsi jɛ yě jí. Yě mɛ e mɔ lě e nǔ lɛ́ɛ jɛ dó yɛnyanyanɔ ɔ́ kpódó aglǔza lɛ́ɛ kpán jí gbɔn ɔ́, wlǐ bǐ ɖɔ nú yě, bɔ xɛsi jɛ yě jí. Bɔ yě jɛ vo sa nú Jezu jí ɖɔ é ní gosín ayǐkúngban émítɔn jí. Hwenu e Jezu ɖo tɔjíhún mɛ byɔ́ wɛ ɔ́, dǎwe e jí é nya yɛ nyanya lɛ́ɛ sín ɔ́ sa vo n'i ɖɔ émí ná xwedó e. Jezu ka gbɛ́, bó ɖɔ n'i ɖɔ: “Yi xwé mɛ towe lɛ́ɛ gɔ́n, bó ɖɔ nǔ e Aklúnɔ wa nú we ɔ́ bǐ nú yě, bó lɛ́ ɖɔ lě e é kú nǔbláwǔ nú we gbɔn ɔ́ bǐ nú yě.” Bɔ nya ɔ́ ɖidó, bó jɛ nǔ e Jezu wá n'i ɔ́ jlá jí, gbɔn tota wǒ lɛ́ɛ gbé jí, bɔ é kpácá mɛ lɛ́ɛ bǐ. Ée Jezu zɔn tɔjíhún mɛ sín fínɛ́, bó yi jɛ agě ɖě ɔ́ jí ɔ́, é ɖo tɔ ɔ́ tó, bɔ mɛ gěgé ɖé lɛ́ɛ nyi ahwan wá lɛ́ lɛ̌ dó e. Jayilɔ́si e nyí gǎn ɖokpó ɖo kplɔ́ngbasá Jwifu lɛ́ɛ tɔn ɔ́ ká wá xwetɔ́n, bó jɛ kpo ɖo Jezu nukɔn, bó jɛ kɛnklɛ́n dó n'i jí ɖɔ: “Vǐ ce ɖyɔ̌vǐvú ɔ́ ɖo kúdonu; wǎ yi ɖó alɔ jǐ tɔn, bónú azɔn tɔn ná gbɔ, nú é ná gán.” Énɛ́ ɔ́, Jezu xwedó e, bɔ mɛ gěgé nyi ahwan jɛ gǔdo tɔn; mɛ lɛ́ɛ sukpɔ́ káká bó ɖo fyɔ́nfyɔ́n ɛ wɛ gbɔn fí bǐ. Nǎwe ɖé ka ɖo fínɛ́; nǎwe énɛ́ ɔ́ kó ɖo hun ɖi wɛ sín xwe wěwe ɖíe ɖokpóó. É kó ji ya gbɔn azɔngblétɔ́ mɔ̌kpán xwé, lobo zán akwɛ́ tɔn bǐ dó wǔvɔ́, azɔn tɔn ka fɔ́n tɛgbɛ ɔ́, jijɛ jí wɛ jɛ́n nɔ́ ɖe. Ée é se Jezu sín xó ɔ́, é xo agun ɔ́ zlɛ́ gbɔn gǔdo, bó ɖó alɔ Jezu sín awu wú; ɖó é ɖo ɖiɖɔ dó ayi mɛ wɛ ɖɔ: “Un vɛ́ ko sixú ɖó alɔ awu tɔn wú kpowun ɔ́, azɔn ce ná gbɔ.” Nǔgbó ɔ́, hun e ɖi wɛ é ɖe ɔ́ gbo ɖo tɛndo ɖokpó ɔ́ mɛ; bɔ é mɔ ɖo agbaza mɛ ɖɔ azɔn émítɔn gbɔ. Azɔn ɖokpó ɔ́, Jezu mɔ ɖɔ hlɔ̌nhlɔ́n ɖé gosín émí wú, bó lílɛ́ kpan nukɔn mɛ lɛ́ɛ, bó ɖɔ: “Mɛ̌ ka ɖó alɔ awu ce wú?” Bɔ ahwanvú tɔn lɛ́ɛ yí gbe n'i ɖɔ: “A mɔ mɛ lɛ́ɛ ɖo fyɔ́nfyɔ́n we wɛ gbɔn fí bǐ, bó ká nɔ́ kanbyɔ́ ɖɔ: ‘Mɛ̌ ka ɖó alɔ wǔ ce?’ ” Jezu ka ɖo mɛ e wa mɔ̌ ɔ́ ba wɛ ɖo mɛ e lɛ́ lɛ̌ dó e lɛ́ɛ mɛ. Énɛ́ ɔ́, xɛsi jɛ nǎwe ɔ́ jí, bɔ é jɛ sísɔ́sísɔ́ jí; ɖó é tunwun nǔ e jɛ ɖo agbaza tɔn mɛ ɔ́, bó gbɔ bó wá jɛ kpo ɖo Jezu nukɔn, bó ɖɔ xó nǔgbó n'i. Jezu ka ɖɔ n'i ɖɔ: “Vǐ ce, nǔɖiɖi towe zɔ́n, bɔ azɔn towe gbɔ. Yi dó fífá mɛ; azɔn towe ní gbɔ nú we bǐ.” Xó énɛ́ lɛ́ɛ ɖɔ wɛ Jezu ɖe kɛ́ɖɛ́, bɔ mɛɖé lɛ́ɛ gosín kplɔ́ngbaságán ɔ́ xwé, bó wá ɖɔ nú kplɔ́ngbaságán ɔ́ ɖɔ: “Vǐ towe kó kú, étɛ́ sín tagba wɛ a nǎ lɛ́ dó nú mɛ̌si ɔ́?” Jezu ka wlí tó xó e ɖɔ wɛ yě ɖe nɛ́ lɛ́ɛ ɖěbǔ wú ǎ, bó ká ɖɔ nú kplɔ́ngbaságán Jayilɔ́si ɖɔ: “Ma ɖi xɛsi ó, vɛ̌ kó ɖi nǔ kpowun.” Jezu ka lɔn bónú mɛɖé xwedó e zɛ Piyɛ́ɛ kpódó Jaki kpó, kpódó Jaki nɔví Jǎan kpán wú ǎ. Jezu kpódó mɛ e é cyán nɛ́ lɛ́ɛ kpó sɛkpɔ́ kplɔ́ngbaságán Jayilɔ́si xwé, bɔ yě se mɛ lɛ́ɛ ɖo hlǔnhlún wɛ, bó ɖo avǐ ya wɛ, lobo ɖo xó sú wɛ. Jezu ka byɔ́ xwé ɔ́ gbe, bó kanbyɔ́ yě ɖɔ: “Étɛ́ sín hlǔnhlún wɛ mi ka ɖe, bó ɖo avǐ ya wɛ sɔ lě? Vǐ ɔ́ ma ká kú nɛ́! Amlɔ dɔ́ wɛ é ɖe.” Mɛ lɛ́ɛ ka jɛ kiko e jí; lo ɔ́, é nya yě bǐ tɔ́n, bó kplá vǐtɔ́ ɔ́, vǐnɔ ɔ́, kpódó ahwanvú tɔn e xwedó e lɛ́ɛ kpán, bɔ yě byɔ́ xɔ e mɛ vǐ ɔ́ ɖe ɔ́; é ká hɛn vǐ ɔ́ sín alɔ, bó ɖɔ: “Talita, kúmi.” (Tínmɛ tɔn wɛ nyí ɖɔ: “Đyɔ̌vǐ un ɖe gbe nú we; sí te.”) Azɔn ɖokpó ɔ́, ɖyɔ̌vǐ ɔ́ sí te, bó jɛ zɔnlin ɖi jí, (ɖó é ko ɖó xwe wěwe.) Nǔ énɛ́ nyí nǔɖé, bó kpácá yě tlala. Jezu ka dó sɛ́n nú yě syɛ́nsyɛ́n ɖɔ: “Mɛ ɖé ma se ɖo nu mitɔn ó, mi ka ná nǔɖuɖu i.” Jezu gosín fínɛ́, bó wá yi Nazalɛ́ti, to e mɛ é su ɖe é, bɔ ahwanvú tɔn lɛ́ɛ xwedó e. Gbɔjɛzán Jwifu lɛ́ɛ tɔn gbe wá su, bɔ Jezu jɛ nǔ kplɔ́n mɛ lɛ́ɛ jí ɖo kplɔ́ngbasá; xó e ɖɔ wɛ é ɖe ɔ́ kpácá mɛ e ɖo tó ɖó e wɛ lɛ́ɛ bǐ, bɔ yě nɔ́ ɖɔ: “Fítɛ́ é ká ba nǔ ɖagbe ɖagbe énɛ́ lɛ́ɛ sín? Nǔnywɛ́ tɛ́ ká nyí énɛ́ e è nǎ ɛ ɔ́? Nɛ̌ wɛ é ká nɔ́ bló gbɔn, bó nɔ́ jlɛ́ nǔdábaɖa énɛ́ lɛ́ɛ? Atínkpatɔ́ ɔ́ nɛ́ ǎ cé? Mali ví ɔ́ jɛ́n ká nɛ́ sín! Jaki kpódó Jozɛ́si kpó Judi kpó, kpódó Sinmɔ́ɔ kpán sín nɔví ɔ́ nɛ́ ǎ cé? Nɔví tɔn nyɔ̌nu lɛ́ɛ lɔ ma ka ɖo mǐ mɛ fí din a?” Bɔ nǔ énɛ́ lɛ́ɛ nyí afɔklɛ́nnú nú yě. Jezu ka ɖɔ nú yě ɖɔ: “Mɛ bǐ wɛ nɔ́ sí gbeyíɖɔ Mawu tɔn; to tɔn mɛ nu lɛ́ɛ, hɛ̌nnumɔ tɔn lɛ́ɛ, kpódó xwé tɔn gbe nu lɛ́ɛ kpán jɛ́n ma nɔ́ sí i ǎ.” Jezu ka sɔ́ jlɛ́ nǔ ɖaxó ɖé ɖo fínɛ́ zɛ azinzɔnnɔ kwín we e jí é ɖó alɔ, bó gbɔ azɔn ná lɛ́ɛ wú ǎ. Nǔ e yě ma ɖi n'i ǎ ɔ́ kpácá ɛ, bɔ é gosín fínɛ́, bó yi jɛ nǔ kplɔ́n mɛ lɛ́ɛ jí gbɔn gletoxo e sɛ yá fínɛ́ lɛ́ɛ mɛ. Jezu ylɔ́ ahwanvú tɔn wěwe lɛ́ɛ kplé, bó jɛ yě sɛ́ dó jí webɔ webɔ. É ná yě acɛ bónú yě ná dó kpé yɛ nyanya lɛ́ɛ wú. É ka ɖɔ nú yě ɖɔ: “Mi jɛ ali hǔn, mi ma hɛn nǔ ɖěbǔ zɛ kpogɛ ɖokpó ɖokpó wú ó, mi ma hɛn nǔɖuɖu ó, mi ma hɛn nǔbyɔ́ɖutɔ́glo ó, mi ma hɛn akwɛ́ ó. Mi blá afɔkpakan mitɔn lɛ́ɛ, mi ma hɛn awu ɖěvo gɔ́ nú ée ɖo kɔ nú mi é ó. “Mi byɔ́ to ɖé mɛ hǔn, mi nɔ xwé e gbe è nǎ yí jǒnɔ mitɔn ɖe é, káká jɛ hwenu e mi ná gosín to énɛ́ mɛ dó é. Ényí yě ma ka yí mi ɖo to ɖé mɛ ǎ, abǐ yě ma ɖótó xó mitɔn ǎ hǔn, mi xúxú afɔkɔ́ mitɔn, bó tɔ́n sín to ɔ́ mɛ; nǔ énɛ́ ná ɖe xlɛ́ yě ɖɔ hwɛ yětɔn kún nyɔ́ ó.” Yě sɔ́ nǔ bó yi, bó jɛ Mawuxó jlá mɛ lɛ́ɛ jí, ɖɔ yě ní lɛ́ kɔ sín hwɛ yětɔn lɛ́ɛ gúdo. Yě nɔ́ nya yɛ nyanya sín mɛ gěgé jí, bó nɔ́ sá ami nú azinzɔnnɔ gěgé, bɔ azɔn yětɔn nɔ́ gbɔ. Axɔ́sú Elódu ka se nǔ e jlɛ́ wɛ Jezu ɖe lɛ́ɛ, ɖó nyǐkɔ tɔn gba kpé fí bǐ. Énɛ́ ɔ́, é ɖɔ: “Jǎan Yɛhwesinlɛnúmɛtɔ́ ɔ́ wɛ fɔ́n sín kú, nǔ e wútu wɛ é ɖó hlɔ̌nhlɔ́n, bó ɖo nǔ énɛ́ lɛ́ɛ jlɛ́ wɛ ɔ́ nɛ́.” Lo ɔ́, mɛɖé lɛ́ɛ nɔ́ ɖɔ: “ Elíi wɛ.” Mɛ ɖěvo lɛ́ɛ ká nɔ́ ɖɔ: “ Gbeyíɖɔ Mawu tɔn lɛ́ɛ ɖě wɛ ɖɔhun.” Ée Elódu se nǔ e jlɛ́ wɛ Jezu ɖe nɛ́ lɛ́ɛ ɔ́, é ɖɔ: “Jǎan ɖěe un gbo ta ná ɔ́ wɛ fɔ́n sín kú.” Elódu énɛ́ ɔ́ wɛ zɔ́n bɔ è wlǐ Jǎan dó gankpá mɛ, ɖó Elodiadi, nɔví tɔn Filípu sín asi e é yí ɔ́ wútu. Đó Jǎan ɖɔ nú Elódu ɖɔ: “Sɛ́n ɔ́ ná gbe we ɖɔ a nǐ yí nɔví towe sín asi ǎ.” Elodiadi ka hɛn Jǎan xomɛ, bó jló ná hu i; lo ɔ́, é mɔ ali tɔn ǎ. Elódu nɔ ɖo xɛsi ɖi nú Jǎan wɛ, ɖó é tunwun ɖɔ gbɛtɔ́ hwɛjijɔnɔ wɛ é nyí, bó lɛ́ nyí mɛ mímɛ́. Elódu nɔ jɛ ahwan jǐ tɔn; é se xó tɔn ɔ́, é nɔ́ tunwun nǔ e é ná lin d'é wú é ǎ, có é ɖo tó ɖó e wɛ ɔ́, é nɔ́ víví n'i. Ayǐ ɖagbe ɖé ká wá hɔ́n nú Elodiadi, bɔ gbe nɛ́ gbe ɔ́, Elódu ɖo jijizán tɔn sín xwe ɖu wɛ, lobo ylɔ́ gǎn hɔn-yitɔ́ tɔn lɛ́ɛ, ahwangán tɔn lɛ́ɛ, kpódó mɛ nukúnɖéjí Galilée to ɔ́ tɔn lɛ́ɛ kpó ɖɔ yě ní wá ɖu xwe xá émí. Elodiadi sín vǐ nyɔ̌nuví ɔ́ ka wá ɖú we, bɔ weɖúɖú tɔn nyɔ́ Elódu kpódó mɛ e ɖo xwe ɖu xá ɛ wɛ lɛ́ɛ kpó sín nukún mɛ, bɔ axɔ́sú Elódu ɖɔ nú vǐ ɔ́ ɖɔ: “Nǔɖé jló we hǔn, byɔ̌ nú má ná we.” Bó dó akpá n'i ɖɔ: “Nǔ ɖěbǔ e a ko sixú byɔ́ ɔ́, é ná bo nyí axɔ́súɖuto ce sín vlɔ̌ɖówe ɔ́, un ná ná we.” Vǐ ɔ́ ká tɔ́n, bó yi kanbyɔ́ nɔ tɔn ɖɔ: “Étɛ́ un ka sixú byɔ́ din?” Bɔ nɔ tɔn yí gbe n'i ɖɔ: “Byɔ̌ Jǎan Yɛhwesinlɛnúmɛtɔ́ ɔ́ sín ta.” Vǐ ɔ́ ká fyá, bó yi axɔ́sú ɔ́ gɔ́n, bó ɖɔ n'i ɖɔ: “Un jló ɖɔ a nǐ ná Jǎan Yɛhwesinlɛnúmɛtɔ́ sín ta mì dó gannúgbɛ́jɛ́ mɛ ɖo fí din tlóló.” Ée axɔ́sú ɔ́ se mɔ̌ ɔ́, wǔ kú i tlala, amɔ̌, é sixú gbɛ́ ǎ, ɖó akpá e é kó dó n'i ɖo jǒnɔ lɛ́ɛ nukɔn é wú. Azɔn ɖokpó ɔ́, axɔ́sú ɔ́ sɛ́ sɔ́ja tɔn lɛ́ɛ ɖokpó dó, bó ná ɛ gbe ɖɔ é ní yi gbo Jǎan sín ta wá. Sɔ́ja ɔ́ ká yi gankpá ɔ́ mɛ, bó gbo Jǎan sín ta dó gannúgbɛ́jɛ́ mɛ wá jó nú vǐ ɔ́, bɔ é sɔ́ yi jó nú nɔ tɔn. Ée Jǎan sín ahwanvú lɛ́ɛ se mɔ̌ ɔ́, yě wá yi sɔ́ cyɔ tɔn bó yi ɖi. Mɛsɛ́dó wěwe lɛ́ɛ lɛ́ kɔ wá Jezu gɔ́n, bó ɖó nǔ e yě wa lɛ́ɛ bǐ kpódó nǔ e yě kplɔ́n mɛ lɛ́ɛ bǐ kpó sín gbe n'i. É ka ɖɔ nú yě ɖɔ: “Mi wá mǐ ní jɛ vo fí e mɛɖé ma ɖe ǎ é, bónú mi ná gbɔjɛ́ kpɛɖé.” Đó mɛ e wá ɖo yě ba kpɔ́n wɛ lɛ́ɛ sukpɔ́, bɔ mɛ ɖě ɖo wǐwá wɛ ɔ́, mɛ ɖě nɔ́ ɖo yiyi wɛ káká bɔ Jezu kpódó ahwanvú tɔn lɛ́ɛ kpó sɔ́ mɔ tɛn ná ɖu nǔ vɔ́vɔ́ ǎ. Bɔ yě byɔ́ tɔjíhún mɛ, bó ɖidó zɔ fí e mɛɖé ma ɖe ǎ é. Ée mɛ lɛ́ɛ mɔ yě xweyǐgbe ɔ́, mɛ gěgé wɔ́ fí e yě xwe ɔ́, bó nyi ahwan sín to lɛ́ɛ mɛ to lɛ́ɛ mɛ, bó zɔn afɔ, lobo kán wezun jɛ nukɔn nú yě yi fí ɔ́. Ée Jezu wá jɛ te sín tɔjíhún ɔ́ mɛ wá agě jí ɔ́, é mɔ gbɛtɔ́ wɔ̌buwɔ́bú ɖé lɛ́ɛ, bɔ nǔ yětɔn blá wǔ n'i; ɖó yě cí lɛ̌ngbɔ́ e má ɖó lɛ̌ngbɔ́nyitɔ́ ǎ é ɖɔhun. Énɛ́ ɔ́, é jɛ nǔ gěgé kplɔ́n yě jí. Ée hwenu ko sɛ yi ɔ́, ahwanvú tɔn lɛ́ɛ sɛ yá ɛ, bó ɖɔ n'i ɖɔ: “Gblǒlǒ mɛ wɛ mǐ ɖe ɖo fí, hwenu ka ko sɛ yi tlala; nyi mɛ lɛ́ɛ, nú yě yi gle lɛ́ɛ ta kpódó gletoxo e yá fí lɛ́ɛ kpó mɛ, lobo ba nǔɖé xɔ ɖu.” É ká yí gbe nú yě ɖɔ: “Mi ɖésú mi ná nǔɖuɖu yě.” Lo ɔ́ yě yí gbe n'i ɖɔ: “Cóbónú è nǎ xɔ wɔ̌xúxú nú mɛ élɔ́ lɛ́ɛ bǐ ɔ́, è nǎ mɔ akwɛ́ ɖé bɔ é ná yi gankwɛ́ afɔɖé (200).” Jezu ka kanbyɔ́ yě ɖɔ: “Wɔ̌xúxú nabí ka ɖo mi sí? Mi yi kpɔ́n.” Ée yě kpɔ́n bó tunwun nabí e wɛ é ɔ́, yě wá ɖɔ n'i ɖɔ: “Wɔ̌xúxú atɔ́ɔ́n kpódó hweví we kpó wɛ ɖo mǐ sí.” Énɛ́ ɔ́ gúdo ɔ́, Jezu ɖɔ nú ahwanvú tɔn lɛ́ɛ ɖɔ yě ní ɖɔ nú mɛ lɛ́ɛ nú yě jínjɔ́n ayǐ sonu sonu ɖo gběhan mú jí. Bɔ ahwanvú tɔn lɛ́ɛ má mɛ lɛ́ɛ kanwe ko (100) kanwe ko (100), kanɖé wǒ (50) kanɖé wǒ (50), bɔ yě jínjɔ́n ayǐ. É yí wɔ̌xúxú atɔ́ɔ́n lɛ́ɛ kpódó hweví we lɛ́ɛ kpó; é kpɔ́n jǐnukúnsin, bó dó kú nú Tɔ́ ɔ́. Énɛ́ ɔ́ gúdo ɔ́, é kán wɔ̌xúxú lɛ́ɛ, bó sɔ́ nú ahwanvú tɔn lɛ́ɛ, nú yě ní má nú mɛ lɛ́ɛ. Jezu lɛ́ má hweví we lɛ́ɛ nú yě bǐ. Yě bǐ ɖu nǔ, bó gɔ́ xo ganjí. È kplé wɔ̌xúxú kpódó hweví e yě ɖu kpo ɔ́ kpó, bɔ é gɔ́ xasun wěwe. Súnnu děgba ɖě afatɔ́n (5.000) wɛ ɖu nǔ ɖo fínɛ́. Énɛ́ gúdo tlóló ɔ́, Jezu ɖɔ nú ahwanvú tɔn lɛ́ɛ ɖɔ yě ní byɔ́ tɔjíhún ɔ́ mɛ jɛ nukɔn nú émí ɖidó Bɛtisayida ɖo agě ɖe ɔ́ jí dɔ̌n, bónú émí ɖésú ná nyi mɛ lɛ́ɛ sɛ́ dó xwé. Ée é nyi mɛ lɛ́ɛ gúdo ɔ́, é xá só jí, bó xo ɖɛ. Ée zǎn wá ɖo bibɔ wɛ ɔ́, tɔjíhún ɔ́ ko ɖo xuzan mɛ, bɔ Jezu ɖokpónɔ géé ka kpo ɖo agě ɔ́ jí. Jezu mɔ ahwanvú tɔn lɛ́ɛ sɛ́ dó, bɔ yě ɖo kan ván wɛ ɖésú, dó ɖo hǔn ɔ́ kun wɛ, ɖó jɔhɔn kpé wɛ yě ɖe; bɔ, sín gan atɔn mɛ zǎn mɛ, sɔ́ yi ayǐtéhɔ̌nnu mɔ̌ ɔ́, é zun zɔnlin gbɔn xu ɔ́ jí yi yě gɔ̌n, bó jló ná zɛ yě wú. Ée ahwanvú tɔn lɛ́ɛ mɔ ɛ ɖo zɔnlin zun gbɔn xu ɔ́ jí wɛ ɔ́, yě vɛdó ɖɔ nǔ kpé wɛ émí ɖe sín, bó jɛ xó sú jí; ɖó yě bǐ wɛ mɔ ɛ, bɔ ado hu yě. Lo ɔ́, é ɖɔ: “Mi kpan akɔ́n, nyɛ wɛ; mi ma ɖi xɛsi ó.” É ka byɔ́ tɔjíhún e mɛ yě ɖe ɔ́ mɛ, bɔ jɔhɔn ɔ́ xwɛ, bɔ é kpácá yě ɖésú; ɖó yě mɔ nǔ jɛ nǔjlɛ́jlɛ́ wɔ̌xúxú tɔn ɔ́ wú ǎ; ɖó yě tlí tó. Jezu kpódó ahwanvú tɔn lɛ́ɛ kpán xo xu ɔ́ zlɛ́, bó wá glín hǔn dó Jenɛzalɛ́ti. Ée yě jɛ te sín tɔjíhún ɔ́ mɛ ɔ́, mɛ lɛ́ɛ mɔ Jezu bó tunwun i tlóló. Énɛ́ ɔ́, yě kán wezun bo yi jlá gbɔn gbě ɔ́ bǐ jí ɖɔ Jezu wá, bɔ azinzɔnnɔ yětɔn lɛ́ɛ nɔ ɖo zan jí, bɔ yě nɔ zé wá nú Jezu. Bɔ fí e Jezu ko sixú jɛ é ɖěbǔ ɔ́, gletoxo mɛ oo, toxo ɖaxó mɛ oo, gleta oo, mɛ lɛ́ɛ nɔ zé azinzɔnnɔ lɛ́ɛ wá agblo lɛ́ɛ jí, bɔ yě nɔ́ ɖɔ nú Jezu ɖɔ é ní kɛnklɛ́n nú azinzɔnnɔ lɛ́ɛ ɖó alɔ awu tɔn tó vɔ́vɔ́, bɔ mɛ e nɔ ɖó alɔ awu tɔn tó lɛ́ɛ bǐ sín azɔn nɔ gbɔ. Falizyɛn lɛ́ɛ kpódó sɛ́nkplɔ́nmɛtɔ́ ɖé lɛ́ɛ kpó gosín Jeluzalɛ́mu bó wá kplé ɖo Jezu gɔ́n. Yě mɔ ahwanvú tɔn ɖé lɛ́ɛ bɔ yě klɔ́ alɔ lě e Falizyɛn lɛ́ɛ sín sɛ́n ɔ́ zɔ́n gbɔn ɔ́ ǎ, bó ka ɖo nǔ ɖu wɛ. Falizyɛn lɛ́ɛ kpódó Jwifu lɛ́ɛ kpó ɔ́, nú yědɛɛ lɛ́ɛ ja nǔ ɖu gbé ɔ́, alɔ wɛ yě nɔ́ tó klɔ́ hwɛ̌, lě e tɔ́gbó yětɔn lɛ́ɛ sín hwɛndo zɔ́n gbɔn é. Yě ka gosín kplétɛn fí ɖé bó wá xwé gbe ɔ́, yě ɖó ná slá wǔ hwɛ̌, cóbó ná jɛ nǔ ɖu jí. Yě lɛ́ ɖó su ɖěvo lɛ́ɛ bó nɔ́ nyi, bɔ é nyí hwɛndo nú yě, ɖi kɔ́fu, tɔyizɛ́n kpódó ganvɔzɛ́n kpó e yě ɖó ná klɔ́ ɖó alɔkpa ɖé jí, cóbó zán ɔ́ ɖɔhun. Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpó ká kanbyɔ́ Jezu ɖɔ: “Aniwútu wɛ ahwanvú towe lɛ́ɛ ma nɔ xwedó tɔ́gbó mǐtɔn lɛ́ɛ sín hwɛndo ǎ, bó nɔ́ nɔ alɔ ma klɔ́, bó nɔ́ ɖu nǔ?” Jezu ka yí gbe nú yě ɖɔ: “Yɛmɛnúwatɔ́ e mi! Xó e Ezayíi ɖɔ dó mi wú ɔ́ ɖi mi wú dódó; é wɛ nyí ɖɔ: ‘Togun élɔ́ nɔ sɔ́ mi su ɖo nu, lo ɔ́, ayi tɔn ɖo wǔ ce ǎ. Yě ɖo sinsɛn mì wɛ bo ɖɔ, lo ɔ́, nǔ yǎyá wa wɛ yě ɖe; yě ɖo Mawuxó kplɔ́n mɛ wɛ bo ɖɔ, lo ɔ́, gbɛtɔ́ lɛ́ɛ sín sɛ́n kplɔ́n mɛ wɛ yě ɖe.’ Mi nɔ xo Mawusɛ́n lɛ́ɛ nyi kɛ́n, bó ká nɔ́ jɛ hun dó gbɛtɔ́ lɛ́ɛ tɔn e nyí hwɛndo é jí.” Jezu lɛ́ ɖɔ nú yě ɖɔ: “Mi nɔ jó Mawusɛ́n lɛ́ɛ dó, bó nɔ́ xwedó hwɛndo mitɔn lɛ́ɛ, bɔ é nyí nǔ ɖagbe wa wɛ mi ɖe nɛ́. Đó Mɔyízi ɖɔ: ‘Sí tɔ́ towe kpódó nɔ towe kpó; mɛ e ka ná dó nu tɔ́ tɔn abǐ nɔ tɔn ɔ́, è nǐ hu i.’ Midɛɛ lɛ́ɛ ka nɔ́ kplɔ́n mɛ ɖɔ nú mɛɖé ɖɔ nú tɔ́ tɔn abǐ nɔ tɔn ɖɔ: ‘Nǔ e un ɖó bó ná dó dó alɔ we ná ɔ́, Kɔbaan wɛ’ ɔ́, mɛ énɛ́ kún wa nǔ nyi do ó. (Kɔbaan ɔ́, tínmɛ tɔn wɛ nyí: nǔ e è sɔ́ ɖ'ayǐ nú Mawu é.) Mi sɔ́ nɔ́ lɔn bónú mɛ énɛ́ ná wa nǔ ɖěbǔ nú tɔ́ tɔn abǐ nɔ tɔn ǎ. Énɛ́ ɔ́, mi nɔ sɔ́ hwɛndo e mɛxó mitɔn lɛ́ɛ jó nyi ayǐ nú mi ɔ́ dó gba xó e Mawu ɖɔ ɔ́ ná; nǔ mɔ̌hunkɔ gěgé ɖěvo tíin, bɔ mi nɔ lɛ́ dó sin.” Jezu lɛ́ ylɔ́ mɛ lɛ́ɛ wá, bó ɖɔ nú yě ɖɔ: “Mi bǐ, mi ɖótó te ganjí, bó ná mɔ nukúnnú jɛ xó e ɖɔ gbé un ja ɔ́ mɛ. Nǔ e è nɔ ɖu dó xomɛ ɔ́ wɛ nɔ́ hɛn gbɛtɔ́ blí ǎ; lo ɔ́, nǔ e tɔ́n sín gbɛtɔ́ sín ayi mɛ ɔ́ wɛ nɔ́ hɛn ɛ blí. [ Mɛ e ɖó tó bó ná dó se nǔ ɔ́ ní ɖótó bó se.”] Hwenu e Jezu ka wá jó mɛ lɛ́ɛ dó, bó wá xwé gbe ɔ́, ahwanvú tɔn lɛ́ɛ kan nǔ byɔ́ ɛ dó lǒ e é dó ɔ́ wú. Jezu yí gbe nú yě ɖɔ: “Midɛɛ lɛ́ɛ lɔmɔ̌ ɔ́, nǔnywɛ́ hwedó mi sɔ mɔ̌ wɛ a? Hǔn mi tunwun ɖɔ nǔ e nɔ́ byɔ́ gbɛtɔ́ xomɛ ɔ́ kún sixú hɛn ɛ blí ó ǎ cé? Đó nǔ énɛ́ ɔ́, ayi mɛ wɛ é nɔ́ byɔ́ ǎ, adɔgo mɛ wɛ é nɔ́ byɔ́, bó nɔ́ wá yi tɔ́n hwenu è nɔ wá yi afɔ jí é.” (Gbɔn xó énɛ́ gbla mɛ ɔ́, Jezu lɛ́ ɖo ɖiɖe xlɛ́ wɛ ɖɔ nǔɖuɖu bǐ wɛ nyɔ́ bɔ è nǎ ɖu.) Jezu ɖɔ nú yě ɖɔ: “Nǔ e tɔ́n sín gbɛtɔ́ sín ayi mɛ ɔ́ wɛ nɔ́ hɛn ɛ blí; ɖó gbɛtɔ́ sín ayi mɛ wɛ linlin nyanya lɛ́ɛ nɔ́ tɔ́n sín; nǔblíblíwiwa, ajojija, mɛhuhu, agalilɛ, nǔjlómɛzɛjlɛ̌wú, adǎnúwiwa, ayiɖónukɔnnúmɛ, nǔmajɛganwiwa, mɛnújlójló, mɛnúɖiɖɔ, goyíyí, yɛyinɔnúwiwa nǔ baɖabaɖa énɛ́ lɛ́ɛ bǐ ɔ́, ayi mɛ wɛ yě nɔ́ gosín, bó nɔ́ hɛn mɛ blí.” Jezu wá gosín fínɛ́, bó yi Tíi gbé jí. É byɔ́ xwé ɖé gbe, é ká jló ɖɔ mɛɖé ní tunwun ɖɔ émí ɖo fínɛ́ ǎ, có mɛ lɛ́ɛ ka mɔ ɛ. Đó nǎwe ɖé ɖó ɖyɔ̌vǐvú ɖokpó, bɔ yɛ nyanya ɖo jǐ tɔn; ée nǎwe énɛ́ ɔ́ se Jezu sín xó ɔ́, é sɔ́nǔ tlóló, bó wá jɛ kpo ɖo akɔ́n tɔn mɛ, bó dó kɛnklɛ́n n'i ɖɔ ní nya yɛ nyanya sín vǐ émítɔn jí. Nǎwe énɛ́ ká nyí Jwifu ǎ; Silíi-Fenisíi wɛ é gosín, bó nɔ́ dó Glɛ̌sigbe. Jezu ka yí gbe n'i ɖɔ: “Gbɔ bónú yɔkpɔ́vú lɛ́ɛ ní tó ɖu nǔ gɔ́ xo hwɛ̌; ɖó é jɛ xá ɖɔ è nǐ zé yɔkpɔ́vú lɛ́ɛ sín nǔɖuɖu nyi dó cukúví lɛ́ɛ ǎ.” Nyɔ̌nu ɔ́ ká yí gbe nú Jezu ɖɔ: “Nǔgbó wɛ Aklúnɔ; nǔ ɖo mɔ̌ có cukúví lɛ́ɛ nɔ́ cyán yɔkpɔ́vú lɛ́ɛ sín nǔɖuɖu e hlɛ́n kɔn nyi ayǐ lɛ́ɛ ɖu vɔ́vɔ́.” Jezu ka yí gbe n'i ɖɔ: “Đó xó énɛ́ e a ɖɔ din ɔ́ wútu ɔ́, lɛ́ kɔ yi xwé, yɛ nyanya ko gosín vǐ towe jí.” Nǎwe ɔ́ ká lɛ́ kɔ yi xwé, bó mɔ vǐ ɔ́ ɖo ayǐmlɔ́mlɔ́ ɖo zan jí, bɔ yɛ nyanya ɔ́ ko gosín jǐ tɔn nǔgbó. Jezu gosín Tíi gbé jí; é gbɔn Sidɔ́ɔn, bó xo tota wǒ lɛ́ɛ zlɛ́, bó wá Galilée tɔ ɔ́ tó. Yě kplá nya ɖé wá n'i, bɔ é kú tó, bó nɔ́ lɛ́ sixú ɖɔ xó ganjí ǎ. Yě dó kɛnklɛ́n nú Jezu ɖɔ ní ɖó alɔ jǐ tɔn, bó gbɔ azɔn n'i. Jezu ka kplá nya ɔ́ jɛ zɔ, bó sɔ́ alɔví dó tógwle tɔn lɛ́ɛ mɛ, bó ɖó atán ɖó ɖɛ̌ ta n'i. Énɛ́ ɔ́ gúdo ɔ́, é kpɔ́n jǐ, bó yi agbɔ̌n jí, bó ɖɔ: “Efata” (tínmɛ tɔn wɛ nyí: “Hun.”) Tlóló ɔ́, tó tɔn lɛ́ɛ hun, bɔ ɖɛ̌ tɔn tún kan, bɔ é jɛ xó ɖɔ jí céɖécéɖé. Jezu ka dó sɛ́n nú yě ɖɔ yě ní ma ɖɔ nú mɛɖé ó; Jezu ɖo gbǐgbɛ́ nú yě wɛ có, jlǎjlá wɛ jɛ́n yě nɔ ɖe. É kpácá mɛ lɛ́ɛ tlala, bɔ yě nɔ ɖɔ: “É nɔ́ bló nǔ bǐ ɖó. É nɔ́ hun tó nú tókúnɔ lɛ́ɛ, bɔ yě nɔ́ se nǔ; é nɔ́ gbɔ azɔn nú ɖɛ̌kúnánɔ lɛ́ɛ, bɔ yě nɔ́ ɖɔ xó.” Hwenɛ́nu ɖokpó ɔ́, mɛ gěgé ɖé lɛ́ɛ jɛ Jezu gúdo. Yě ka sɔ́ ɖó nǔɖuɖu ɖé bó ná ɖu ǎ. Bɔ Jezu ylɔ́ ahwanvú tɔn lɛ́ɛ, bó ɖɔ nú yě ɖɔ: “Mɛ élɔ́ lɛ́ɛ sín nǔ blá wǔ nú mì, ɖó sín azǎn atɔn ɖíe ɖokpóó wɛ yě kó ɖo kpɔ́ xá mì; yě ka sɔ́ ɖó nǔɖé bó ná ɖu ǎ. Nú yě ma ka ɖu nǔ ǎ, bónú un nyi yě sɛ́ dó to yětɔn lɛ́ɛ mɛ ɔ́, hlɔ̌nhlɔ́n ná hwedó yě ɖo alixo, bɔ yě ná jɛ ayǐ, ɖó mɛɖé lɛ́ɛ ɖo yě mɛ, bó gosín fí línlín.” Ahwanvú tɔn lɛ́ɛ ka yí gbe n'i ɖɔ: “Fítɛ́ è ka sixú mɔ nǔɖuɖu ɖe nú mɛ tobutóbú élɔ́ lɛ́ɛ, ɖo gbětótló mɛ fí, bɔ é ná kpé yě?” Jezu ka kanbyɔ́ yě ɖɔ: “Wɔ̌xúxú nabí wɛ ɖo mi sí?” Bɔ yě yǐ gbe n'i ɖɔ: “Tɛ́nwe.” Jezu ka ná gbe mɛ lɛ́ɛ bɔ yě jínjɔ́n ayǐ; é ka fɔ wɔ̌xúxú tɛ́nwe lɛ́ɛ, bó dó kú nú Mawu, bó kán yě, bó sɔ́ jó nú ahwanvú tɔn lɛ́ɛ nú yě ní má nú mɛ lɛ́ɛ, bɔ yě má nú yě. Hweví kpɛví kpɛví ɖé lɛ́ɛ ka ɖo yě sí, bɔ Jezu dó kú nú Mawu, bó ɖɔ è nǐ má nú mɛ lɛ́ɛ. Yě bǐ ɖu nǔ bó gɔ́ xo ganjí, bɔ yě bɛ́ nǔ e yě ɖu kpo ɔ́ kplé, bɔ é gɔ́ xasun tɛ́nwe. Yě mɛ e ɖo fínɛ́ lɛ́ɛ yi děgba (4.000) mɔ̌. Énɛ́ ɔ́ gúdo ɔ́, Jezu nyi yě. Azɔn ɖokpó ɔ́, Jezu kpódó ahwanvú tɔn lɛ́ɛ kpó byɔ́ tɔjíhún mɛ, bó yi Dalumanúta gbé jí. Falizyɛn lɛ́ɛ wá Jezu gɔ́n, bó jló ná ɖó mɔ n'i. Yě jɛ nǔ dɔn xá ɛ jí, bó ɖɔ é ní jlɛ́ nǔ ɖokpó, bó ɖe xlɛ́ ɖɔ Mawu gɔ́n wɛ hlɔ̌nhlɔ́n émítɔn gosín. Jezu yi agbɔ̌n jǐ, bó ɖɔ nú yě ɖɔ: “Nɛ̌ ka gbɔn bɔ gbɛtɔ́ din tɔn lɛ́ɛ ká nɔ́ ɖo nǔjlɛ́jlɛ́ ba wɛ? Má ɖɔ nǔgbó nú mi: yě ɖo nǔjlɛ́jlɛ́ kwín ɖokpó ná mɔ wɛ ǎ.” Ée é ɖɔ mɔ̌ ɔ́, é jó yě dó nyi fínɛ́, bó byɔ́ tɔjíhún mɛ ɖidó agě ɖě ɔ́ jǐ. Jezu sín ahwanvú lɛ́ɛ sɔ́ flín bó hɛn wɔ̌xúxú ǎ; wɔ̌xúxú ɖokpó jɛ́n ɖo yě sí ɖo tɔjíhún ɔ́ mɛ. Jezu ka dó sɛ́n élɔ́ nú yě: “Mi cɔ́ miɖée dó Falizyɛn lɛ́ɛ kpódó axɔ́sú Elódu kpan sín tɔ́n wú.” Ahwanvú tɔn lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Wɔ̌xúxú ɖěe mǐ má hɛn ǎ wútu wɛ é ɖo mɔ̌ ɖɔ wɛ.” Jezu ka wɔ́ xó e ɖɔ wɛ yě ɖe ɔ́, bó kanbyɔ́ yě ɖɔ: “Étɛ́wútu wɛ mi ka ɖo ɖiɖɔ wɛ ɖɔ wɔ̌xúxú ɖěe émí ma hɛn ǎ wútu wɛ un ɖɔ xó énɛ́? Mi nɔ mɔ nukúnnú jɛ nǔ mɛ ǎ cé? Nǔnywɛ́ lɛ́ hwedó mi sɔ mɔ̌ wɛ a? Aniwú mi ka tlí tó sɔ mɔ̌? Nukún mitɔn nɔ mɔ nǔ ǎ wɛ a? Tó mitɔn nɔ se nǔ ǎ wɛ a? Mi nɔ flín nǔ ǎ wɛ a? Hwenu e un sɔ́ wɔ̌xúxú atɔ́ɔ́n dó ná nǔɖuɖu gbɛtɔ́ děgba ɖě afatɔ́n (5.000) ɔ́, xasun nabí mɛ mi ka bɛ́ nǔ e yě ɖu kpo lɛ́ɛ dó, bɔ é gɔ́, bɔ mi bɛ́ yi?” Yě yǐ gbe n'i ɖɔ: “Wěwe.” “Hwenu e un ka zé wɔ̌xúxú tɛ́nwe dó ná nǔɖuɖu gbɛtɔ́ děgba (4.000) ɔ́, xasun nabí mɛ mi ka bɛ́ nǔ e yě ɖu kpo ɔ́ dó, bɔ é gɔ́, bɔ mi bɛ́ yi?” Yě yí gbe n'i ɖɔ: “Tɛ́nwe.” Bɔ Jezu ɖɔ nú yě ɖɔ: “Mi nɔ mɔ nukúnnú jɛ nǔ mɛ ǎ cé?” Jezu kpódó ahwanvú tɔn lɛ́ɛ kpó wá yi gletoxo e è nɔ ylɔ́ ɖɔ Bɛtisayida ɔ́ mɛ, bɔ to ɔ́ mɛ nu lɛ́ɛ kplá nya nukúntíntɔ́nnɔ ɖé wá n'i, bó sa vo n'i ɖɔ é ní ɖó alɔ wǔ tɔn, bó hun nukún n'i. É ka hɛn nukúntíntɔ́nnɔ ɔ́ sín alɔ, bó kplá ɛ yi gletoxo ɔ́ gúdo; é ɖó atán dó nukún tɔn lɛ́ɛ jí, bó ɖó alɔ jǐ tɔn, lobo kanbyɔ́ ɛ ɖɔ: “A mɔ nǔɖé a?” Bɔ nya ɔ́ hun nukún, bó ɖɔ: “Un mɔ gbɛtɔ́ lɛ́ɛ, bɔ yě cí atín ɖɔhun, bó ɖo zɔnlin ɖi wɛ.” Bɔ Jezu lɛ́ ɖó alɔ nukún tɔn lɛ́ɛ jí azɔn wegɔ́ ɔ́, bɔ azɔn tɔn gbɔ, bɔ é kpɔ́n zɔ sɛ́ dó, bó mɔ nǔ céɖécéɖé. Jezu ka ɖɔ n'i ɖɔ: “Yi xwé towe gbe; ma sɔ́ lɛ́ kɔ yi gletoxo ɔ́ mɛ ó.” Jezu kpódó ahwanvú tɔn lɛ́ɛ kpó ɖidó gletoxo e lɛ́ lɛ̌ dó Sezalée Filípu tɔn ɔ́ mɛ. Ée yě jɛ ali xweyǐgbe ɔ́, Jezu kanbyɔ́ yě ɖɔ: “Mɛ nǎhún wɛ un nyí bɔ mɛ lɛ́ɛ nɔ́ ɖɔ?” Bɔ yě yǐ gbe ɖɔ: “Mɛ ɖé lɛ́ɛ nɔ́ ɖɔ hwi wɛ nyí Jǎan Yɛhwesinlɛnúmɛtɔ́ ɔ́; mɛ ɖě nɔ ɖɔ hwi wɛ nyí Elíi; mɛɖěvo lɛ́ɛ nɔ́ ɖɔ gbeyíɖɔ Mawu tɔn lɛ́ɛ ɖě wɛ a nyǐ.” Jezu ka kanbyɔ́ yě ɖɔ: “Midɛɛ lɛ́ɛ ka lo, mɛ̌ wɛ un nyí bɔ mi nɔ ɖɔ?” Bɔ Piyɛ́ɛ yí xó bó ɖɔ: “Hwi wɛ nyí Klísu ɔ́.” Jezu ka dó sɛ́n nú yě syɛ́nsyɛ́n bó ɖɔ yě ní ma ɖɔ nú mɛ ɖěbǔ ɖɔ émí wɛ nyí Klísu ɔ́ ó. Énɛ́ ɔ́ gúdo ɔ́, Jezu lɛ́ jɛ nǔ kplɔ́n ahwanvú tɔn lɛ́ɛ jí ɖɔ: “Nyɛ Gbɛtɔ́ví ɔ́ ná ji ya ɖésú bɔ tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán ná gbɛ́ mì, lobo ná hu mì; azǎn tɔn atɔngɔ́ ɔ́ gbe ɔ́, Mawu ka ná fɔ́n mì sín kú.” Jezu ɖɔ xó énɛ́ lɛ́ɛ kɔn nyi wɛn nú yě. Piyɛ́ɛ ka kplá ɛ yi kpá, bó jɛ nǔ gbɛ́ n'i jí ɖɔ: “Ma sɔ́ ɖɔ mɔ̌ ɖě ó.” Jezu ka lɛ́ kɔ kpɔ́n ahwanvú tɔn lɛ́ɛ, bó bɛ́ adǎn dó Piyɛ́ɛ jí, bó ɖɔ: “Bǔ dó mì Satáan! Đó linlin towe lɛ́ɛ nyí Mawu tɔn ǎ; gbɛtɔ́ lɛ́ɛ sín linlin wɛ ɖo así we.” Jezu ka ylɔ́ ahwan ɔ́ kpódó ahwanvú tɔn lɛ́ɛ kpó, bó ɖɔ nú yě ɖɔ: “Ényí mɛɖé jló ná xwedó mì hǔn, ní jó tito é ɖésúnɔ tɔn lɛ́ɛ dó, bó ɖíɖá aklúzu tɔn, bó xwedó mì. Đó mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú ɖó nyɛ kpó Wɛn Ɖagbe ɔ́ kpó wútu ɔ́, ná hwlɛ́n gbɛ tɔn gán. Mɛ e gbɛ ɔ́ bǐ ná nyí étɔn, lobɔ gbɛ é ɖésúnɔ tɔn ná bú dó e ɔ́, le tɛ́ wɛ ka ɖ'é mɛ n'i? Ani wɛ gbɛtɔ́ ka sixú sɔ́ dó xɔ gbɛ éɖée tɔn ná? Mɛ e nyɛ kpódó xó ce lɛ́ɛ kpó ná nyí winnyánú ná ɖo gbɛtɔ́ din tɔn gbejímánɔ-númawutɔ́ lɛ́ɛ nukɔn ɔ́, mɛ ɔ́ lɔmɔ̌ ná nyí winnyánú nú nyɛ Gbɛtɔ́ví ɔ́ hwenu e nyɛ kpódó wɛnsagun ce lɛ́ɛ kpó ná lɛ́ kɔ wá ɖo Tɔ́ ce sín susu mɛ é.” Jezu ka lɛ́ ɖɔ nú yě ɖɔ: “Má ɖɔ nǔgbó nú mi, mɛɖé lɛ́ɛ ɖo mi mɛ fí din, bó ná kó kú cóbó ná mɔ axɔ́súɖuɖu Mawu tɔn ná wá kpódó hlɔ̌nhlɔ́n kpó ǎ.” Jezu ɖɔ xó énɛ́ nú yě, bɔ azǎn tɔn ayizɛ́n gúdo ɔ́, é kplá Piyɛ́ɛ, Jaki kpódó Jǎan kpán jɛ vo ɖo só ɖaxó ɖé jí, bɔ ninɔmɛ tɔn húzú ɖo nukɔn yětɔn. Bɔ awu e ɖo wǔtu tɔn ɔ́ jɛ kínkɔ́n jí, bó wé tété, bɔ mɛ ɖěbǔ ɖo ayǐkúngban jí fí bó ná bló bɔ é ná wé sɔ mɔ̌ ǎ. Elíi kpódó Mɔyízi kpó wá tɔ́n dó yě jǐ, bó jɛ xó ɖɔ xá Jezu jí. Bɔ Piyɛ́ɛ yí xó, bó ɖɔ nú Jezu ɖɔ: “ Mɛ̌si, fí e mǐ wá din ɔ́ nyɔ́ mɛ! Mǐ ná gbá goxɔ atɔn, towe ɖokpó, Mɔyízi tɔn ɖokpó, Elíi tɔn ɖokpó.” É ɖɔ mɔ̌, ɖó é sɔ́ tunwun xó e é ná ɖɔ ɔ́ ǎ, ɖó xɛsi ɖaxó ɖé jɛ yě jí. Akpɔ́kpɔ́ ɖé wá cyɔ́n yě, bɔ yě se gbe ɖé sín akpɔ́kpɔ́ ɔ́ mɛ, bɔ é nɔ́ ɖɔ: “Vǐ ce vívɛ́ná wɛ nyí mɛ élɔ́; mi ɖótó e.” Azɔn ɖokpó ɔ́, yě kpɔ́n fí bǐ, yě ká sɔ́ mɔ mɛɖé ɖo fínɛ́ zɛ Jezu wú ǎ. Ée yě wá ɖo te jɛ sín só ɔ́ jí wɛ ɔ́, Jezu dó sɛ́n nú yě ɖɔ: “Mi ma ɖɔ nǔ e mi mɔ ɔ́ nú mɛɖé cóbónú Mawu ná fɔ́n nyɛ Gbɛtɔ́ví ɔ́ sín kú ó.” Yě hɛn sɛ́n énɛ́ dó ayi mɛ, bó ka nɔ́ kanbyɔ́ yěɖée ɖɔ: “Étɛ́ ká ɖo ‘fínfɔ́n sín kú’ ɔ́ nyí wɛ?” Bɔ yě kanbyɔ́ Jezu ɖɔ: “Étɛ́wú sɛ́nkplɔ́nmɛtɔ́ lɛ́ɛ ka nɔ́ ɖɔ Elíi wɛ ɖó ná tó wá hwɛ̌?” É ka yí gbe nú yě ɖɔ: “Nǔgbó wɛ, Elíi ɖó ná wá hwɛ̌, bó ná sɔ́ nǔ lɛ́ɛ ɖó tɛn yětɔn yětɔn mɛ. Lo ɔ́, nɛ̌ ka gbɔn bɔ è wlǎn ɖ'ayǐ ɖɔ Gbɛtɔ́ví ɔ́ ɖó ná ji ya ɖésú, bɔ yě ná sɔ́ ɛ dó ylɔ́ nǔɖé ná ǎ? Éɖíe, má ɖɔ nǔgbó nú mi: Elíi ko wá, bɔ yě sɔ́ ɛ dó wa nǔ e jló yě ɔ́ ná lě e è ko wlán gbɔn ɖ'ayǐ dó wǔ tɔn é.” Ée yě sɛkpɔ́ ahwanvú ɖě lɛ́ɛ ɔ́, yě mɔ ahwan gěgé lɛ́ lɛ̌ dó yě, bɔ sɛ́nkplɔ́nmɛtɔ́ lɛ́ɛ ɖo nǔ dɔn xá yě wɛ. Ée mɛ lɛ́ɛ mɔ Jezu ɔ́, é kpácá yě tlala, bɔ yě xozǐn yi kpé e, bó dó gbe e. Jezu ka kanbyɔ́ ahwanvú tɔn lɛ́ɛ ɖɔ: “Étɛ́ dɔn xá yě wɛ mi ka ɖe?” Mɛ ɖokpó ká ɖo ahwan ɔ́ mɛ, bó ɖɔ nú Jezu ɖɔ: “ Mɛ̌si, un kplá vǐ ce wá nú we, nú a nǎ gbɔ azɔn n'i; ɖó yɛ e ɖo jǐ tɔn ɔ́ zɔ́n bɔ é nɔ́ sixú ɖɔ xó ǎ. Nǔ ɔ́ wá n'i lě ɔ́, yɛ ɔ́ nɔ́ sɔ́ ɛ hu dó ayǐ, bɔ é nɔ́ jɛ afúntúnkplɔ̌ tún jí, bó nɔ́ jɛ aɖǔkún ɖu jí, lobo nɔ syɛ́n bǐ. Un sa vo nú ahwanvú towe lɛ́ɛ ɖɔ yě ní nya yɛ ɔ́ sín jǐ tɔn, yě ká kpé wú ǎ.” Jezu ka ɖɔ nú yě ɖɔ: “Mi nǔmaɖitɔ́ élɔ́ lɛ́ɛ mi, hwetɛ́nu wɛ mi ka ná wá se nǔ e ɖɔ nú mi wɛ un ɖe é dó? Xwe nabí wɛ un ka na kplɔ́n nǔ mi xɔ? Mi bo yi kplá vǐ ɔ́ wá nú mì.” Bɔ yě kplá ɛ wá n'i. Ée yɛ ɔ́ mɔ Jezu tlóló lě ɔ́, é húnhún vǐ ɔ́ syɛ́nsyɛ́n, bó sɔ́ ɛ hudɛ́, bɔ é jɛ gbo blí jí, bó jɛ afúntúnkplɔ̌ tún jí. Jezu ka kanbyɔ́ vǐtɔ́ ɔ́ ɖɔ: “Sín hwetɛ́nu wɛ nǔ ɔ́ ká jɛ wiwa ɛ jí?” Bɔ é yí gbe ɖɔ: “Sín vǔ wɛ é ko bɛ́ n'i sín; bɔ azɔn mɔ̌kpán wɛ yɛ ɔ́ kó kpíkpé e dó myɔ mɛ, bó kpíkpé e dó tɔ mɛ, bó ɖo nǎ hu i wɛ. Lo ɔ́, ényí a kpé nǔɖé wú bó ná wa ɖo azɔn énɛ́ ɔ́ wú hǔn, kɛnklɛ́n kú nǔbláwǔ mǐtɔn bó dó alɔ mǐ.” Jezu yí gbe n'i ɖɔ: “Ani ka nyí a kpé nǔɖé wú tɔn bɔ a ɖɔ? Mɛ e ɖi nǔ ɔ́ kpé nǔ bǐ wú.” Tlóló ɔ́, vǐtɔ́ ɔ́ sú xó, bó ɖɔ: “Un ɖi nǔ, ka bló bónú má lɛ́ ɖi nǔ hú mɔ̌.” Jezu mɔ mɛ lɛ́ɛ nyi ahwan jǎwe, bó jɛ adǎn wa dó yɛ nyanya ɔ́ jí ɖɔ: “Yɛ nyanya tóhunúmɛtɔ́, ɖɛ̌hunúmɛtɔ́, un ɖe gbe dó we, gosín vǐ élɔ́ jí, bó má sɔ́ wá jǐ tɔn ɖě gbeɖé ó.” Bɔ yɛ nyanya ɔ́ sú xó, bó húnhún vǐ ɔ́ kpódó zǐngídi kpó, bó gosín jǐ tɔn; bɔ vǐ ɔ́ jɛ ayǐ, bó cí mɛkúkú ɖɔhun, lobɔ mɛ gěgé vɛdó ɖɔ kú wɛ é kú sín. Lo ɔ́, Jezu hɛn alɔ tɔn, bó zé e sí te, bɔ é nɔ te. Ée Jezu kpódó ahwanvú tɔn lɛ́ɛ kpó wá yi xwé gbe ɔ́, yě kanbyɔ́ ɛ ɖɔ: “Étɛ́wú mǐdɛɛ lɛ́ɛ má ká kpé yɛ nyanya énɛ́ wú bó nya ǎ?” Jezu yí gbe nú yě ɖɔ: “Yɛ nyanya mɔ̌hunkɔtɔn lɛ́ɛ ɔ́, ɖɛxixo mɛ jɛ́n wɛ è nɔ sixú kpé yě wú ɖe.” Jezu kpódó ahwanvú tɔn lɛ́ɛ kpó gosín fínɛ́, bó dín gbɔn Galilée gbé jí. Jezu ka jló nú mɛɖé ní tunwun fí e é ɖe ɔ́ ǎ, ɖó hwenɛ́nu ɔ́, é ɖo nǔ kplɔ́n ahwanvú tɔn lɛ́ɛ wɛ ɖɔ: “È nǎ jó nyɛ Gbɛtɔ́ví ɔ́ nú mɛ lɛ́ɛ, bɔ yě ná hu mì, lo ɔ́, azǎn tɔn atɔngɔ́ ɔ́ gbe ɔ́, Mawu ná fɔ́n mì sín kú.” Ahwanvú tɔn lɛ́ɛ ka mɔ nǔ jɛ xó énɛ́ mɛ ǎ; yě ka kan nǔɖé byɔ́ ɛ ǎ, ɖó yě ɖo xɛsi ɖi wɛ. Jezu kpódó ahwanvú tɔn lɛ́ɛ kpán wá jɛ Kafaanawúmu. Ée yě yi xwé gbe ɔ́, Jezu kanbyɔ́ ahwanvú tɔn lɛ́ɛ ɖɔ: “Ani dɔn wɛ mi ka ɖe hwenu e mǐ ɖo ali jí é?” Yě kɛ nu ǎ, ɖó mɛ e ná ɖu gǎn ɖo yě nu ɔ́ sín nǔ dɔn wɛ yě ɖe ɖo ali jí. Jezu ka jínjɔ́n ayǐ, bó ylɔ́ mɛsɛ́dó tɔn wěwe lɛ́ɛ kplé, bó ɖɔ nú yě ɖɔ: “Mɛ ɖé jló ná ɖu gǎn ɖo mi mɛ hǔn, ní sɔ́ éɖée hwe, bó nyí mɛsɛntɔ́ mɛ bǐ tɔn.” Jezu ka yi kplá yɔkpɔ́vú ɖokpó wá tɛ́ntin yětɔn, lobo dɔn ɛ dó wǔ, bó ɖɔ nú yě ɖɔ: “Mɛ e yí yɔkpɔ́vú lěhunkɔtɔn ɖokpó ɖó nyǐkɔ ce mɛ ɔ́, nyɛ ɖésúnɔ wɛ mɛ énɛ́ ɔ́ yí; mɛ e ka yí mì ɔ́, mɛ e sɛ́ mì dó ɔ́ wɛ é yí.” Jǎan ɖɔ nú Jezu ɖɔ: “ Mɛ̌si, mǐ mɔ mɛɖé bɔ é nɔ́ sɔ́ nyǐkɔ towe dó nya yɛ nyanya lɛ́ɛ ná, bɔ mǐ gbɛ́ n'i, ɖó é ɖo ahwan mǐtɔn mɛ ǎ.” Jezu ka yí gbe n'i ɖɔ: “Mi ma gbɛ́ n'i ó, ɖó mɛ ɖěbǔ sixú ylɔ́ nyǐkɔ ce dó jlɛ́ nǔ ná, lobo sí te tlóló, bó ɖɔ nǔ ce nyanya ǎ. Đó mɛ e ma gbɛ́ wǎn nú mǐ ǎ ɔ́, mɛ mǐtɔn wɛ é nyí. Má ɖɔ nǔgbó nú mi: mɛ e ná ná sin kɔ́fu ɖokpó mi, ɖó Klísu tɔn e mi nyí ɔ́ wútu ɔ́, é ná ba ajɔ tɔn kpo ǎ. “Mɛ e ná dɔn yɔkpɔ́vú e ɖi nǔ nú mì lɛ́ɛ ɖokpó dó hwɛ mɛ ɔ́, è gbɔ bo sin sé ɖaxó ɖokpó dó kɔ n'i, bó kpíkpé e dó xu mɛ ɔ́, é nyɔ́ n'i hú. Ényí alɔ towe lɛ́ɛ ɖě ná dɔn we dó nǔ nyanya mɛ hǔn, sɛ́n síin, ɖó a hɛn alɔ ɖokpó yi gbɛ mavɔ mavɔ mɛ ɔ́, é nyɔ́ nú we hú alɔ towe we lɛ́ɛ bǐ sɔgbe ɖo wǔ we, bɔ a ka yi tɔ́n ɖo zojimací mɛ, [ fí e ‘wě lɛ́ɛ má nɔ́ kú ɖe ǎ, bɔ zo ma ka nɔ cí ɖe gbeɖé ǎ é.’] Nú afɔ towe ná dɔn we dó nǔ nyanya mɛ hǔn, sɛ́n síin; a zɔn afɔ ɖokpó jí, bó byɔ́ gbɛ mavɔ mavɔ mɛ ɔ́, é nyɔ́ nú we hú a zɔn afɔ towe we lɛ́ɛ jí, bɔ è sɔ́ we nyi dó zojimací mɛ, [ fí e ‘wě lɛ́ɛ ma nɔ́ kú ɖe ǎ, bɔ zo ma ka nɔ cí ɖe gbeɖé ǎ é.’] Nú nukún towe ka ná dɔn we dó nǔ nyanya mɛ hǔn, ɖe síin; a nyǐ nukún ɖokpónɔ, bó byɔ́ axɔ́súɖuto Mawu tɔn mɛ ɔ́, é nyɔ́ nú we hú nukún towe we lɛ́ɛ bǐ ní ɖo gbɛ, bɔ è ka ná sɔ́ we nyi dó zojimací mɛ, fí e ‘wě lɛ́ɛ ma nɔ́ kú ɖe ǎ, bɔ zo ma ka nɔ cí ɖe gbeɖé ǎ é.’ Đó zo wɛ nyí jɛ e è nǎ dó mɛ bǐ é. “Jɛ ɔ́, nǔ ɖagbe wɛ; é ma ka sɔ́ wá ɖó tɔ́n ǎ ɔ́, étɛ́ wɛ è nǎ sɔ́ dó ná ɛ tɔ́n ná? Jɛ ní nɔ lanmɛ nú mi, bónú mi ní mɔ miɖée gbɔ.” Jezu wá gosín fínɛ́, bó ɖidó Judée gbé jí ɖo Judɛ́ɛn tɔ ɔ́ gúdo. Mɛ lɛ́ɛ ka lɛ́ nyi ahwan xwedó e, bɔ é jɛ nǔ kplɔ́n yě jǐ, lě e é ko nɔ́ bló gbɔn é. Falizyɛn ɖé lɛ́ɛ ka wá xwetɔ́n, bó jló ná tɛ́n ɛ kpɔ́n; yě sɛ yá ɛ, bó jɛ nǔ kanbyɔ́ ɛ jí ɖɔ: “Sɛ́n mǐtɔn ná gbe ɖɔ súnnu ní gbɛ́ asi tɔn a?” Bɔ Jezu yí xó, bó kanbyɔ́ yě ɖɔ: “Étɛ́ wɛ Mɔyízi ka ɖɔ mi ní bló?” Yě yí gbe n'i ɖɔ: “Mɔyízi ná gbe ɖɔ è hɛn ɔ́, è nǎ wlán wěma ɖɔ émí gbɛ́ ɛ, lobo nya ɛ.” Jezu ka yí gbe nú yě ɖɔ: “Tótlítlí mitɔn wɛ zɔ́n bɔ Mɔyízi gbɔ bo ná sɛ́n énɛ́ mi. Sín bǐbɛ́mɛ ɔ́, hwenu e Mawu bló nǔ lɛ́ɛ bǐ fó ɔ́, ‘é wá bló gbɛtɔ́ súnnu kpódó nyɔ̌nu kpó. Énɛ́ wú wɛ súnnu ná jó tɔ́ tɔn kpódó nɔ tɔn kpó dó, bó ná jɛ kpɔ́ xá asi tɔn, bɔ yě mɛ we lɛ́ɛ ná húzú ɖokpó géé;’ énɛ́ ɔ́, yě sɔ́ ɖo mɛ we nyí wɛ ǎ, lo ɔ́, yě húzú ɖokpó géé. Ényí mɔ̌ hǔn, gbɛtɔ́ ní bo ma klán nǔ e Mawu dɔn cá é ó.” Ée yě wá xwé gbe ɔ́, ahwanvú tɔn lɛ́ɛ lɛ́ vɔ́ nǔ ɖokpó ɔ́ kanbyɔ́ ɛ dó xó énɛ́ wú, bɔ é ɖɔ nú yě ɖɔ: “Mɛ e nya asi tɔn bo da nyɔ̌nu ɖěvo ɔ́, acɛ wɛ é gba nyɔ̌nu nukɔntɔn ɔ́ wú. Mɔ̌ ɖokpó ɔ́, ényí nyɔ̌nu ɖé gbɛ́ asú tɔn, bó yi da ɖěvo ɔ́, aga wɛ é lɛ.” Mɛ ɖé lɛ́ɛ kplá yɔkpɔ́vú ɖé lɛ́ɛ wá nú Jezu bónú é ná xo ɖɛ dó yě jí; ahwanvú tɔn lɛ́ɛ ka lɔn ǎ, bó bɛ́ adǎn dó mɛ lɛ́ɛ jí. Ée Jezu mɔ mɔ̌ ɔ́, xomɛ sin i dó ahwanvú tɔn lɛ́ɛ wú, bɔ é ɖɔ nú yě ɖɔ: “Mi jó yɔkpɔ́vú lɛ́ɛ dó nú yě ní wá gɔ̌n ce; mi ma sú ali dó yě ó; ɖó axɔ́súɖuto Mawu tɔn ɔ́, mɛ e cí yě ɖɔhun lɛ́ɛ tɔn wɛ. Má ɖɔ nǔgbó nú mi: mɛ e ma ná yí axɔ́súɖuɖu Mawu tɔn ɔ́ yɔkpɔ́vú ɖɔhun ǎ ɔ́, é ná sixú byɔ́ mɛ ǎ.” Ée é ɖɔ mɔ̌ ɔ́, é dɔn vǐ lɛ́ɛ dó wǔ, bó lílí alɔ ta nú yě, bó xo ɖɛ dó yě jǐ. Ali wɛ Jezu wlí kɛ́ɖɛ́, bó xweyǐgbe, bɔ nyaví dɔ̌nkpɛvú ɖé kán wezun wá mɔ ɛ, bó jɛ kpo ɖo nukɔn tɔn, lobo kanbyɔ́ ɛ ɖɔ: “ Mɛ̌si ɖagbe, étɛ́ un ka ɖó ná wa, bɔ Mawu ná ná mì gbɛ mavɔ mavɔ?” Jezu ka yí gbe n'i ɖɔ: “Aniwú a ka ylɔ́ mì ɖɔ mɛ ɖagbe? Mɛ ɖěbǔ nyí mɛ ɖagbe zɛ Mawu wú ǎ. A tunwun sɛ́n lɛ́ɛ: ‘Ma hu mɛ ó, ma lɛ aga ó, ma ja ajo ó, ma ɖe kúnnu agɔ ó, ma hízí mɛɖé nú ó, sí tɔ́ towe kpódó nɔ towe kpó.’ ” Nyaví ɔ́ ka yí gbe n'i ɖɔ: “Mɛ̌si, sín yɔkpɔ́vú mɛ ce ɖokpóó wɛ un ko ɖo sɛ́n énɛ́ nyi wɛ.” Jezu ka kpɔ́n ɛ, bɔ nǔ tɔn nyɔ́ nukún tɔn mɛ, bɔ é ɖɔ n'i ɖɔ: “Nǔ ɖokpó géé wɛ kpo nú we: yi, bo sa nǔ e a ɖǒ lɛ́ɛ bǐ, bó má akwɛ́ tɔn nú wamamɔnɔ lɛ́ɛ; énɛ́ ɔ́, a nǎ ɖǒ dɔkun ɖo Mawu gɔ́n; énɛ́ ɔ́ gúdo ɔ́, wǎ, bó xwedó mì.” Lo ɔ́, ée é se mɔ̌ ɔ́, wǔ kú i, bɔ é ɖidó wǔɖéwúɖé, ɖó dɔkunnɔ ɖaxó wɛ é nyí. Jezu ka kpɔ́n ahwanvú tɔn e lɛ́ lɛ̌ dó e lɛ́ɛ bó ɖɔ: “ Axɔ́súɖuto Mawu tɔn mɛ byɔ́byɔ́ ná vɛ́ wǔ nú dɔkunnɔ lɛ́ɛ kpɔ́n!” Xó énɛ́ kpácá ahwanvú lɛ́ɛ; Jezu ka lɛ́ yí xó, bó ɖɔ nú yě ɖɔ: “Vǐ ce lɛ́ɛ mi, axɔ́súɖuto Mawu tɔn mɛ ná yi vɛ́ wǔ ɖésú. Nyɛ̌ví li nu dín gbɔn ná bɔwǔ nú lǎkúnmí hú dɔkunnɔ ná byɔ́ axɔ́súɖuto Mawu tɔn mɛ.” Ée ahwanvú lɛ́ɛ se mɔ̌ ɔ́, é lɛ́ kpácá yě, bɔ yě kanbyɔ́ Jezu ɖɔ: “Mɛ̌ ka sixú ɖo hwlɛngán ɔ́ ná mɔ wɛ lo?” Jezu kpɔ́n yě dáán, bó ɖɔ: “Gbɛtɔ́ lɛ́ɛ wɛ nǔ énɛ́ ɔ́ gló, é ka ɖo mɔ̌ nú Mawu ǎ; ɖó Mawu kpé nǔ bǐ wǔ.” Piyɛ́ɛ ka yí xó, bó ɖɔ n'i ɖɔ: “Mǐdɛɛ lɛ́ɛ ɖíe jó nǔ bǐ dó, bó xwedó we e.” Mɛ e ɖo nukɔn din lɛ́ɛ gěgé ná wá jɛ gúdo, bɔ mɛ e ɖo gúdo din lɛ́ɛ gěgé ná wá jɛ nukɔn.” Yě ɖo ali jí, bó ɖo kpó fán wɛ xwe Jeluzalɛ́mu, bɔ Jezu ɖo nukɔn nú yě. Ado ɖo mɛsɛ́dó lɛ́ɛ hu wɛ, bɔ mɛ e xwedó yě lɛ́ɛ ɖo xɛsi jí. Jezu ka ylɔ́ mɛsɛ́dó tɔn wěwe lɛ́ɛ sín mɛ lɛ́ɛ mɛ yi jɛ zɔ, bó jɛ nǔ e ná jɛ dó jǐ tɔn ɖo malín málín mɛ ɔ́ tínmɛ nú yě jí ɖɔ: “Mǐ ɖíe xwe Jeluzalɛ́mu e; è nǎ jó nyɛ Gbɛtɔ́ví ɔ́ nú vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, bɔ yě ná ɖó kúhwɛ nú mì, bó ná jó mì nú mɛ e ma nyí Jwifu ǎ lɛ́ɛ. Yě ná cá mì ko; yě ná tún atán kɔn nyi wǔ ce; yě ná zé lanbá dó xo mì, bó ná hu mì. Azǎn atɔngɔ́ ɔ́ gbe ɔ́, un ka ná fɔ́n sín kú.” Énɛ́ gúdo ɔ́, Zebeɖée sín vǐ Jaki kpó Jǎan kpán wá Jezu gɔ́n, bó ɖe kpá ɛ ɖɔ: “ Mɛ̌si, mǐ jló ɖɔ a nǐ bló nǔ e byɔ́ we gbé mǐ ja ɔ́ nú mǐ.” Jezu ka kanbyɔ́ yě ɖɔ: “Étɛ́ mi jló ma bló nú mi?” Bɔ yě yí gbe n'i ɖɔ: “Hwenu a nǎ wá ɖo susu towe mɛ ɔ́, nǎ gbe, bónú mǐ mɛ we lɛ́ɛ ná wá jínjɔ́n akpá towe; mɛ ɖokpó ná jínjɔ́n ɖisí towe xwé, mɛ wegɔ́ ɔ́ ná jínjɔ́n amyɔ towe xwé.” Jezu ka yí gbe nú yě ɖɔ: “Mi tunwun nǔ e byɔ́ wɛ mi ɖe ɔ́ ǎ. Wǔvɛ́ kɔ́fu e nu gbé wɛ un ja ɔ́, mi sixú nu xá mì a? Yɛhwesin wǔvɛ́ tɔn e ná lɛ wɛ un ɖe ɔ́, mi ná sixú lɛ a?” Yě ka yí gbe n'i ɖɔ: “Mǐ ná kpé wú.” Bɔ Jezu ɖɔ nú yě ɖɔ: “Mi ná wá nu wǔvɛ́ kɔ́fu e nu gbé un ja ɔ́, bó ná lɛ yɛhwesin wǔvɛ́ tɔn e lɛ gbé un ja ɔ́ nǔgbó. Amɔ̌, ɖisí ce xwé abǐ amyɔ ce xwé ninɔ ɔ́, nyɛ wɛ ná ná ǎ. Mɛ e Mawu kó bló tɛnmɛ énɛ́ lɛ́ɛ ɖ'ayǐ ná lɛ́ɛ tɔn wɛ.” Ée mɛsɛ́dó wǒ ɖě lɛ́ɛ se nǔ e Jaki kpódó Jǎan kpó byɔ́ ɔ́, nǔ yětɔn vɛ́ yě wú. Jezu ka ylɔ́ yě bǐ kplé, bó ɖɔ nú yě ɖɔ: “Mi tunwun ɖɔ mɛ e è nɔ ylɔ́ ɖɔ togán ɖo ayǐkúngban jí fí lɛ́ɛ ɔ́, acɛ e jló yě lɛ́ɛ wɛ yě nɔ́ kpa nú toví yětɔn lɛ́ɛ, lobɔ gǎnhúnǔtɔ́ lɛ́ɛ lɔ nɔ kpa acɛ nú yě. Nǔ ka ɖó ná nyí mɔ̌ ɖo midɛɛ lɛ́ɛ tɛ́ntin ǎ; lo ɔ́, mɛ ɖěbǔ jló ná nyí gǎn ɖo mi mɛ hǔn, ní nyí mɛsɛntɔ́ mitɔn. Mɛ ɖé ka jló ná nyí nukɔntɔ́ ɖo mi mɛ hǔn, ní nyí kannumɔ nú mɛ bǐ. Đó nyɛ Gbɛtɔ́ví ɔ́, è nǎ sɛn mì wú wɛ un wá ǎ; lo ɔ́, mɛ sɛn gbé wɛ un tɔ́n bó wá, bó ná sɔ́ gbɛ ce jó dó xɔ gbɛ nú mɛ gěgé.” Yě wá yi jɛ toxo e è nɔ ylɔ́ ɖɔ Jeliko ɔ́ mɛ, bɔ Jezu kpódó ahwanvú tɔn lɛ́ɛ kpó wá ɖo toxo ɔ́ mɛ tɔ́n sín wɛ, bɔ mɛ gěgé ɖé lɛ́ɛ ka nyi ahwan xwedó yě. Nya nukúntíntɔ́nnɔ nǔbyɔ́ɖutɔ́ ɖé ɖo to énɛ́ mɛ, bɔ è nɔ ylɔ́ ɛ ɖɔ Baatimɛ́ɛ, tínmɛ tɔn wɛ nyí Timɛ́ɛ sín vǐ súnnu. É ɖo ayǐjínjɔ́n ɖo ali kpá. Ée é se ɖɔ Jezu Nazalɛ́ti tɔn wɛ ɔ́, é jɛ xó sú jí ɖɔ: “Jezu Davídi ví, kú nǔbláwǔ nú mì!” Mɛ gěgé wɔ́ ɛ, bó ɖɔ n'i ɖɔ ní xwɛ; lo ɔ́, é nɔ lɛ́ sú xó d'é jí ɖɔ: “Davídi ví, kú nǔbláwǔ nú mì!” Jezu ka nɔ te, bó ɖɔ: “Mi yi ylɔ́ ɛ wá!” Bɔ yě yi ylɔ́ ɛ, bó ɖɔ n'i ɖɔ: “Kpan akɔ́n, sí te, é ɖo ylɔ̌ylɔ́ we wɛ.” Bɔ nukúntíntɔ́nnɔ ɔ́ ɖe awu tɔn ɖaxó ɔ́ nyi gbě, lobo kán wezun yi Jezu gɔ́n. Jezu ka kanbyɔ́ ɛ ɖɔ: “Ani wɛ a jlǒ nú ma wa nú we?” Nya ɔ́ ka yí gbe n'i ɖɔ: “ Mɛ̌si, bló bónú ma lɛ́ vɔ́ mɔ nukúnnú.” Jezu ka ɖɔ n'i ɖɔ: “Yi, nǔ e a ɖi ɔ́ zɔ́n bɔ Mawu gbɔ azɔn nú we.” Azɔn ɖokpó ɔ́, nukún tɔn lɛ́ɛ hun, bɔ é wlí ali jɛ Jezu gúdo. Jezu kpódó ahwanvú tɔn lɛ́ɛ kpó ko sɛkpɔ́ Jeluzalɛ́mu, bó ko ɖo malín málín mɛ dó Betaníi kpódó Bɛtifajée kpó, ɖo olívutín só ɔ́ kpá; bɔ Jezu sɛ́ ahwanvú tɔn we dó, bó ɖɔ nú yě ɖɔ: “Mi yi gletoxo e ɖo nukɔn mitɔn nɛ́ ɔ́ mɛ. Mi byɔ́ mɛ tlóló ɔ́, mi ná mɔ tócíví e jí mɛɖé ma ko xá gbeɖé ǎ ɔ́ ɖokpó ɖo sinsin; mi tún kan n'i, bó kplá ɛ wá nú mì. Mɛ ɖé ka kan nǔ e wú mi ɖo mɔ̌ wa wɛ ɔ́ byɔ́ mi hǔn, mi yí gbe n'i ɖɔ: ‘Nǔ tɔn wɛ hú dó Aklúnɔ;’ énɛ́ ɔ́, mɛ ɔ́ ná jó e nú mi tlóló, bɔ mi ná kplá ɛ wá fí.” Yě ka yi toxo ɔ́ mɛ, bó mɔ tócíví ɖokpó ɖo sinsin ɖo hɔn ɖé to, ɖo ali kpá, bó tún i. Mɛ e ɖo te fínɛ́ lɛ́ɛ ɖě kanbyɔ́ yě ɖɔ: “Ani wa wɛ mi ka ɖe nɛ́? Nɛ̌ ka gbɔn bɔ mi ɖo kan tún nú tócíví ɔ́ wɛ?” Yě ka yí gbe nú yě lě e Jezu ɖɔ gbɔn é, bɔ yě jó yě dó. Yě kplá tócíví ɔ́ wá nú Jezu, bó tɛ́ awu yětɔn lɛ́ɛ nyi tócíví ɔ́ jí, bɔ Jezu jínjɔ́n jí. Mɛ gěgé tɛ́ avɔ yětɔn lɛ́ɛ nyi ali ɔ́ jí, mɛ ɖě gbo ama kɔn nyi ali ɔ́ jí. Bɔ mɛ e ɖo nukɔn nú Jezu lɛ́ɛ kpódó mɛ e ɖo gǔdo tɔn lɛ́ɛ kpó nɔ́ sú xó, bó nɔ́ ɖɔ: “Ozána! Susu nú mɛ e jǎwe ɖo Aklúnɔ nyǐkɔ mɛ é. Susu nú axɔ́súɖuɖu e jǎwe é; axɔ́súɖuɖu tɔ́ mǐtɔn Davídi tɔn. Ozána! Susu nú Mawu Ajalɔ̌nlɔn ɖo jǐxwé.” Jezu yi Jeluzalɛ́mu, bó byɔ́ sinsɛnxɔ mɛ, lobo kpɔ́n lě e nǔ lɛ́ɛ ɖo yiyi gbɔn wɛ é. Ée é ka mɔ ɖɔ hwenu ko ɖo sisɛyi wɛ ɔ́, é kpódó mɛsɛ́dó tɔn wěwe lɛ́ɛ kpó lɛ́ kɔ yi Betaníi. Ayǐhɔ́ngbe tɔn hwenu e Jezu kpódó mɛsɛ́dó tɔn lɛ́ɛ kpó wá ɖo Betaníi gosín wɛ ɔ́, xovɛ́ sin i. É ka mɔ fígitín ɖé sɛ́ dó, bɔ é dó ama ganjí, bɔ é ɖidó atín ɔ́ sá, bó ná kpɔ́n ɖɔ émí ná mɔ sínsɛ́n ɖé ɖ'é jí a jí; lo ɔ́, ée é yi atín ɔ́ sá ɔ́, é mɔ nǔtí ɖo jǐ tɔn zɛ ama tɔn lɛ́ɛ wú ǎ, ɖó hwenu e é nɔ́ sɛ́n ɔ́ ko su ǎ. Jezu ka ɖɔ nú atín ɔ́ ɖɔ: “Mɛ ɖé ní ma sɔ́ ɖu sínsɛ́n towe gbeɖé ó,” bɔ ahwanvú tɔn lɛ́ɛ se xó e é ɖɔ nɛ́ ɔ́. Jezu kpódó mɛsɛ́dó tɔn lɛ́ɛ kpó lɛ́ lɛ́ kɔ wá Jeluzalɛ́mu, bɔ Jezu byɔ́ sinsɛnxɔ mɛ, bó jɛ nǔsatɔ́ lɛ́ɛ kpódó nǔxɔtɔ́ e ɖo xɔ ɔ́ mɛ lɛ́ɛ bǐ kpó nya jí; é flí akwɛ́ɖyɔ́tɔ́ lɛ́ɛ sín távo xwe, bó flí ahwannɛ́satɔ́ lɛ́ɛ sín zinkpo lɛ́ɛ nyi ayǐ, bó dó sɛ́n nú yě ɖɔ mɛɖé ní ma sɔ́ hɛn ajɔ̌nú ɖěbǔ dín gbɔn sinsɛnxɔ ɔ́ mɛ ó. É ka jɛ nǔ kplɔ́n yě jí ɖɔ: “È ko wlán dó Mawuxówéma ɔ́ mɛ ɖɔ: ‘Xwé ce ɔ́, ɖɛxwé wɛ è nǎ nɔ́ ylɔ́ ɖɔ, bɔ akɔta lɛ́ɛ bǐ ná nɔ́ wá ɖɔ xó xá Mawu ɖ'é mɛ.’ Midɛɛ lɛ́ɛ ka sɔ́ dó ɖó ajotɔ́ lɛ́ɛ sín avatɛn ná.” Vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó se nǔ e Jezu wa nɛ́ ɔ́, bó jɛ lě e yě ná wa gbɔn bó hu i ɔ́ sín wě ɖe jí, yě ka ɖo xɛsi ɖi wɛ, ɖó mɛ lɛ́ɛ bǐ wɛ nǔkplɔ́nmɛ Jezu tɔn nɔ byɔ́ ayi mɛ ná. Ée gbadanu wá su ɔ́, Jezu kpódó mɛsɛ́dó tɔn lɛ́ɛ kpó tɔ́n sín toxo ɔ́ mɛ. Ayǐhɔ́ngbe tɔn zǎnzǎn tɛɛn ɔ́, Jezu kpódó ahwanvú tɔn lɛ́ɛ kpó wá sɔ́ ali, bó ɖo yiyi wɛ, bó mɔ atín e Jezu dó nu ɔ́, bɔ é ko xú bǐ káká yí dó ɖɔ. Piyɛ́ɛ ka flín nǔ e jɛ wá yi ɔ́, bó ɖɔ nú Jezu ɖɔ: “ Mɛ̌si, kpɔ́n atín e a dó nu ɔ́ nɛ́ xú nɛ́!” Énɛ́ ɔ́ wú wɛ un ɖo ɖiɖɔ nú mi wɛ ɖɔ: Nǔ ɖěbǔ e mi ná byɔ́ Mawu ɖo ɖɛ mɛ ɔ́, mi ɖeji ɖɔ émí ko mɔ yí; mi ka ná mɔ ɖ'é jí nǔgbó. Ényí mi ka ɖo te, bó ɖo ɖɛ xo wɛ bó flín ɖɔ nɔzo émítɔn wa nǔ nyi do nú émí hǔn, mi sɔ́ kɛ ɛ; énɛ́ ɔ́, Tɔ́ mitɔn e ɖo sɛ́xwé ɔ́ ná sɔ́ hwɛ kɛ mi lɔmɔ̌. [ Amɔ̌, ényí mi ma nɔ sɔ́ hwɛ kɛ mɛ ǎ ɔ́, Tɔ́ mitɔn e ɖo sɛ́xwé ɔ́ ná sɔ́ hwɛ kɛ mi lɔmɔ̌ ǎ.”] Jezu kpódó ahwanvú tɔn lɛ́ɛ kpó lɛ́ kɔ yi Jeluzalɛ́mu, bó byɔ́ sinsɛnxɔ mɛ, bɔ hwenu e Jezu ɖo sa ɖi gbɔn xɔ ɔ́ mɛ wɛ ɔ́, vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó mɛxó lɛ́ɛ kpó sɛkpɔ́ ɛ, bó kanbyɔ́ ɛ ɖɔ: “Acɛ tɛ́ wɛ a ka ɖó, bó nɔ́ ɖo nǔ énɛ́ lɛ́ɛ wa wɛ? Mɛ̌ ká ná acɛ énɛ́ ɔ́ we?” Jezu ka yí gbe nú yě ɖɔ: “Un ná kan xó ɖokpó byɔ́ mi, nú mi ná sin tɔn mì ɔ́, nyɛ lɔ ná ɖɔ acɛ e un nɔ dó wa nǔ énɛ́ lɛ́ɛ ná ɔ́ nú mi. Mɛ̌ ká sɛ́ Jǎan dó bɔ é wá lɛ yɛhwesin nú mɛ? Mawu wɛ a, abǐ gbɛtɔ́ lɛ́ɛ? Mi ɖɔ nú má se.” Yě ka jɛ ɖiɖɔ jí ɖo yěɖée tɛ́ntin ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Bɔ étɛ́wú mi ma ka ɖi nǔ nú Jǎan ǎ?’ ” Yě ka ɖo xɛsi ɖi nú togun ɔ́ wɛ, bó nɔ́ ɖɔ: “Mǐ sixú glá din bó ɖɔ gbɛtɔ́ lɛ́ɛ wɛ sɛ́ ɛ dó ǎ, ɖó togun ɔ́ bǐ wɛ sɔ́ Jǎan dó mɔ gbeyíɖɔ Mawu tɔn ná.” Bɔ yě gbɔ bo yí gbe nú Jezu ɖɔ: “Mǐ tunwun ǎ.” Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì, bɔ un nɔ dó wa nǔ énɛ́ lɛ́ɛ ná ɔ́ ná ɖɔ nú mi wɛ ǎ.” Jezu dó lǒ dó ɖɔ xó nú yě ɖɔ: “Nya ɖé ɖó ayǐkúngban, bó tun vǐwun kɔn nyi jí, bó tun atín dó dó kpá lɛ́ lɛ̌ dó vǐwungbo ɔ́ bǐ; é ka lɛ́ kun do e mɛ è nɔ li vǐwun sínsɛ́n ɖe ɔ́ ɖokpó dó vǐwungbo ɔ́ mɛ. É lɛ́ bló nǔ e jí glecɔ́tɔ́ lɛ́ɛ nɔ́ xá ɔ́ ɖokpó d'é mɛ, lobo sɔ́ vǐwungbo énɛ́ dó alɔ mɛ nú vǐwunzɔ́watɔ́ ɖé lɛ́ɛ, bó yi tomɛ. Ée vǐwun gbigbɛ sín hwenu wá su ɔ́, é sɛ́ mɛsɛntɔ́ tɔn ɖokpó dó vǐwunzɔ́watɔ́ lɛ́ɛ gɔ́n, bónú é ná yi yí vǐwun e nyí étɔn é wá n'i. Vǐwunzɔ́watɔ́ lɛ́ɛ ka wlí mɛsɛntɔ́ ɔ́, bó xo e, lobo nya ɛ asígbá alɔgbá. Nya ɔ́ ka lɛ́ sɛ́ mɛsɛntɔ́ tɔn ɖěvo dó yě, bɔ yě xo e, bó zɛ ta n'i, bó kɔ́n wi tɔn. É ka lɛ́ sɛ́ mɛsɛntɔ́ tɔn ɖěvo dó, bɔ yě hu éyɛ́. É wá sɛ́ mɛsɛntɔ́ tɔn gěgé ɖěvo lɛ́ɛ dó, bɔ yě xo mɛ ɖě, bó hu mɛ ɖě. É wá kpo vǐ tɔn vívɛ́ná ɔ́ kɛ́ɖɛ́, bɔ é wá sɛ́ ɛ dó yě gbɔn tó, bó ɖo linlin ɖo ayi mɛ wɛ ɖɔ: ‘Yě mɔ vǐ ce ɖésú ɔ́, yě ná sí i.’ Lo ɔ́, vǐwunzɔ́watɔ́ énɛ́ lɛ́ɛ ɖɔ ɖo yěɖée tɛ́ntin ɖɔ: ‘Vǐ e ɖo xu ɔ́ ná ɖu wɛ ɔ́ ɖíe, mi wá nú mǐ ná hu i, bónú vǐwungbo ɔ́ ná húzú mǐtɔn.’ Ée yě ɖɔ mɔ̌ ɔ́, yě zɔn vǐ ɔ́ jí bó hu i, bó dɔn cyɔ tɔn sín vǐwungbo ɔ́ mɛ, lobo sɔ́ nyi gbě.” Jezu ka kanbyɔ́ yě ɖɔ: “Nɛ̌ wɛ nya ɔ́ ka ná wa nǔ gbɔn? É ná wá, bó ná hu vǐwunzɔ́watɔ́ énɛ́ lɛ́ɛ, lobo ná sɔ́ vǐwungbo ɔ́ dó alɔ mɛ nú mɛ ɖěvo lɛ́ɛ. Mi mɔ xó élɔ́ xa kpɔ́n gbeɖé ɖo Mawuxówéma ɔ́ mɛ ǎ cé? É wɛ nyí ɖɔ: ‘Awǐnnya e xɔmɛtɔ́ lɛ́ɛ má sɔ́ dó mɔ nǔɖéwanú ǎ bó xo nyi kɛ́n ɔ́, wá húzú awǐnnya e ɖo tají é. Aklúnɔ sín nǔwiwa nɛ́, nǔjíwǔ wɛ é nyí ɖo nukún mǐtɔn mɛ.’ ” Jwifu lɛ́ɛ sín gǎn lɛ́ɛ ka ɖo biba ná wlí Jezu wɛ; ɖó yě mɔ gannaganna ɖɔ émí nyi mǎ wɛ é ɖe gbɔn lǒ e é dó ɔ́ mɛ; lo ɔ́, yě ɖo xɛsi ɖi nú togun ɔ́ wɛ bó gbɔ bó jó e dó bó yi. È sɛ́ Falizyɛn ɖé lɛ́ɛ kpódó Elódu sín ahwanvú ɖé lɛ́ɛ kpó dó Jezu gɔ́n, nú yě ná kan nǔ byɔ́ ɛ dó ɖó mɔ n'i, bó ná sixú wlí i ɖo xóɖiɖɔ tɔn lɛ́ɛ mɛ. Yě yi, bó ɖɔ n'i ɖɔ: “ Mɛ̌si, mǐ tunwun ɖɔ nǔgbóɖɔtɔ́ wɛ a nyǐ; a nɔ ɖi xɛsi nú mɛɖé ǎ, a ka nɔ kpɔ́n mɛɖé sín nukúnta dó ɖɔ xó ǎ; a nɔ xlɛ́ Mawu sín ali mɛ titewungbe. Đo sɛ́n mǐtɔn mɛ ɔ́, è hɛn ɔ́, è nǎ sú takwɛ́ Dadá Hlɔ̌ma tɔn tɔn a, abǐ è nǐ gbɔ súsú?” Jezu ka tunwun ɖɔ ayi we zán xá émí wɛ yě ɖe, bó yí gbe nú yě ɖɔ: “Étɛ́ sín mɔ ɖó nú mì wɛ mi ka ɖe? Mi sɔ́ gankwɛ́ Hlɔ̌manu lɛ́ɛ tɔn ɖokpó wá nú ma kpɔ́n.” Bɔ yě sɔ́ gankwɛ́ ɖokpó wá n'i, bɔ é kpɔ́n jí, bó kanbyɔ́ yě ɖɔ: “Mɛ̌ ɖíe è ɖe ɖ'é jí e? Mɛ̌ sín nyǐkɔ ɖíe ɖ'é jí e?” Yě yí gbe n'i ɖɔ: “Dadá Hlɔ̌ma tɔn tɔn wɛ.” Bɔ Jezu ɖɔ nú yě ɖɔ: “Mi bo sɔ́ nǔ e nyí Dadá Hlɔ̌ma tɔn tɔn ɔ́ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ́ jó nú Mawu.” Xósin énɛ́ e Jezu ná yě ɔ́ kpácá yě tlala. Sinsɛngbɛ́ e è nɔ ylɔ́ ɖɔ Saduseɛn lɛ́ɛ wá Jezu gɔ́n; (yě wɛ nɔ ɖɔ mɛkúkú lɛ́ɛ kún ná fɔ́n ó.) Yě kanbyɔ́ ɛ ɖɔ: “ Mɛ̌si, nǔ e Mɔyízi wlán ɖ'ayǐ nú mǐ ɔ́ ɖíe: ‘Ényí mɛɖé ɖó nɔví súnnu, bó ka da asi, bó má ji vǐ ǎ, lobo kú jó asi tɔn dó ɔ́, nɔví tɔn ná sɔ́ asi ɔ́ da, bó ji vǐ ɖo xo tɔn mɛ, bó ná sixú ɖó donu nú nɔví tɔn e kú é.’ Nɔví nɔví súnnu tɛ́nwe ɖé lɛ́ɛ ka tíin. Mɛ nukɔntɔn ɔ́ da asi, é ka ji vǐ ɖě ǎ, lobo kú jó asi ɔ́ dó. Mɛ wegɔ́ ɔ́ sɔ́ asúkúsi ɔ́ da; é ka ji vǐ ǎ, bo kú. Mɔ̌ jɛ́n wɛ mɛ atɔngɔ́ ɔ́ lɔmɔ̌ tɔn nyí gbɔn é nɛ́. Bɔ nɔví nɔví tɛ́nwe énɛ́ lɛ́ɛ bǐ kú ma ɖó vǐ donu. Énɛ́ ɔ́ gúdo ɔ́, nyɔ̌nu ɔ́ lɔmɔ̌ wá kú. Hwenu e mɛkúkú lɛ́ɛ ka na fɔ́n ɔ́, mɛ̌ sín asi wɛ nyɔ̌nu énɛ́ ɔ́ ka na wá nyí ɖo yě mɛ? Éɖíe ko nyí yě mɛ tɛ́nwe lɛ́ɛ bǐ sín asi kpɔ́n e.” Jezu ka yí gbe nú yě ɖɔ: “Hǔn mi mɔ ɖɔ ali bú wɛ émí ɖe din ǎ cé? Đó mi mɔ nukúnnú jɛ Mawuxó ɔ́ wú ǎ, mi ka lɛ́ mɔ nukúnnú jɛ hlɔ̌nhlɔ́n Mawu tɔn wú ǎ. Hwenu e mɛkúkú lɛ́ɛ bǐ ná wá fɔ́n sín kú ɔ́, mɛɖé ná da asi ǎ, mɛɖé ka ná da asú ǎ. Mɛ bǐ ná cí wɛnsagun Mawu tɔn e ɖo sɛ́xwé lɛ́ɛ ɖɔhun. Mɛkúkú lɛ́ɛ ná fɔ́n sín xó ɔ́, mi ma mɔ xa ɖo wěma Mɔyízi tɔn e ɖɔ xó dó zungodwe ɔ́ wú ɔ́ mɛ a? É wɛ nyí ɖɔ: ‘Nyɛ wɛ nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’ Mawu nyí Mawu mɛkúkú lɛ́ɛ tɔn ǎ; lo ɔ́, mɛ e ɖo gbɛ lɛ́ɛ sín Mawu wɛ é nyí. Ali bú wɛ mi ɖe ɖaxó.” Sɛ́nkplɔ́nmɛtɔ́ ɖé ká ɖo fínɛ́, bó se nǔ e dɔn wɛ yě ɖe ɔ́. Ée é mɔ ɖɔ Jezu yí gbe nú yě ɖó ganjí ɔ́, é sɛkpɔ́ ɛ, bó kanbyɔ́ ɛ ɖɔ: “Sɛ́n tɛ́ wɛ ɖo nukɔn ɖo sɛ́n lɛ́ɛ bǐ mɛ?” Jezu ka yí gbe ɖɔ: “Sɛ́n nukɔntɔn ɔ́ ɖíe: ‘ Izlayɛ́li, ɖǒtó! Aklúnɔ Mawu mǐtɔn ɖokpónɔ géé wɛ nyí Aklúnɔ, bɔ a nǎ yí wǎn nú Aklúnɔ Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó linlin towe bǐ kpó, kpódó hlɔ̌nhlɔ́n towe bǐ kpán.’ Sɛ́n wegɔ́ ɔ́ ká ɖíe: ‘A nǎ yí wǎn nú nɔzo towe hwi ɖésúnɔ ɖɔhun.’ Sɛ́n ɖé sɔ́ hú gǎn énɛ́ lɛ́ɛ ǎ.” Sɛ́nkplɔ́nmɛtɔ́ ɔ́ ká ɖɔ nú Jezu ɖɔ: “ Mɛ̌si, é nyɔ́ ganjí, xó nǔgbó wɛ a ɖɔ; Aklúnɔ ɔ́ wɛ nyí Mawu ɖokpó géé e tíin é, bɔ Mawu ɖě sɔ́ ɖe zɛ éyɛ́ wú ǎ. Hǔn, gbɛtɔ́ ɖó ná yí wǎn nú Mawu kpódó ayixa tɔn bǐ kpó, kpódó linlin tɔn bǐ kpó, kpódó hlɔ̌nhlɔ́n tɔn bǐ kpó, bó ná yí wǎn nú nɔzo tɔn é ɖésúnɔ ɖɔhun; énɛ́ ɔ́ nyɔ́ hú vɔ̌ e è dó zo é, kpódó vɔ̌sísá ɖě lɛ́ɛ bǐ kpán.” Jezu mɔ ɖɔ nǔnywɛ́tɔ́ sín gbe wɛ nya énɛ́ ɔ́ yí, bó ɖɔ n'i ɖɔ: “A sɔ́ lín dó axɔ́súɖuto Mawu tɔn ǎ.” Mɛ ɖěbǔ ka sɔ́ glá bó kan nǔɖé byɔ́ ɛ ǎ. Jezu kpo ɖo nǔ kplɔ́n mɛ wɛ ɖo sinsɛnxɔ ɔ́ mɛ, bó kanbyɔ́ ɖɔ: “Nɛ̌ wɛ sɛ́nkplɔ́nmɛtɔ́ lɛ́ɛ ka sixú ɖɔ Klísu ɔ́ Davídi ví wɛ é nyí gbɔn? Đó Yɛsinsɛn sɔ́ dó ayi mɛ nú Davídi, bɔ é ɖésúnɔ ɖɔ: ‘Aklúnɔ ɖɔ nú Aklúnɔ ce ɖɔ: Jǐnjɔ́n ɖisí ce xwé, káká nú má sɔ́ kɛntɔ́ towe lɛ́ɛ dó bló afɔɖótɛn towe.’ Davídi ɖésú nɛ́ ylɔ́ ɛ ɖɔ ‘Aklúnɔ’ nɛ́. Nɛ̌ wɛ é ká sixú lɛ́ nyí vǐ tɔn gbɔn?” Xó énɛ́ e ɖɔ wɛ Jezu ɖe ɔ́ nyɔ́ se nú mɛ e ɖo fínɛ́ lɛ́ɛ bǐ. Jezu ɖɔ nú mɛ e kplɔ́n nǔ wɛ é ɖe lɛ́ɛ ɖɔ: “Mi cɔ́ miɖée dó sɛ́nkplɔ́nmɛtɔ́ lɛ́ɛ wú, ɖó nǔ e nɔ víví nú yě lɛ́ɛ wɛ nyí ɖɔ yě ní nɔ́ ɖo awu gaga mɛ, bó nɔ́ ɖo sa ɖi wɛ; è nǐ nɔ́ dó gbe yě ɖo tokplétɛn lɛ́ɛ. Yě nɔ́ ba ná jínjɔ́n zinkpo nukúnɖéjí lɛ́ɛ mɛ ɖo kplɔ́ngbasá lɛ́ɛ, bó nɔ́ ba ná jínjɔ́n tɛn nukɔn nukɔntɔn lɛ́ɛ mɛ ɖo jǒnɔgbé. Yě nɔ́ klá jɛ nǔ e nyí asúkúsi lɛ́ɛ tɔn é bǐ nu, bó ka nɔ́ ɖo ɖɛ gaga xo wɛ, bó ná dó ɖe xlɛ́ gbɛtɔ́ lɛ́ɛ ɖɔ mɛ ɖagbe wɛ émí nyí. Mawu ná dɔn tó nú yě, bɔ é ná syɛ́n ɖésú.” Jezu jínjɔ́n ayǐ, bó kpan nukɔn gbǎ e mɛ è nɔ sɔ́ akwɛ́ dó ɔ́, bó ɖo lě e mɛ lɛ́ɛ ɖo akwɛ́ sɔ́ dó gbǎ ɔ́ mɛ gbɔn wɛ ɔ́ kpɔ́n wɛ. Dɔkunnɔ gěgé ɖo akwɛ́ ɖaxó ɖaxó bɛ́ d'é mɛ wɛ. Asúkúsi wamamɔnɔ ɖé ka wá, bó bɛ́ akwɛ́ kpɛví kpɛví we dó gbǎ ɔ́ mɛ; akwɛ́ we énɛ́ lɛ́ɛ bǐ yi fánlan ɖokpó mɔ̌. Jezu ka ylɔ́ ahwanvú tɔn lɛ́ɛ kplé, bó ɖɔ: “Má ɖɔ nǔgbó nú mi, akwɛ́ e asúkúsi wamamɔnɔ énɛ́ ɔ́ ná din ɔ́ hú gǎn mɛ ɖě lɛ́ɛ bǐ tɔn. Đó mɛ ɖě lɛ́ɛ bǐ sésé ɔ́, nǔ e kpé yě kpo ɔ́ wɛ yě wá ná dó akwɛ́gbá ɔ́ mɛ. Éyɛ́ ɔ́, akwɛ́ e é ɖó bó ná dó xɔ nǔ ɖu, bó ná nɔ gbɛ ɔ́, bǐ sésé wɛ é sɔ́ wá dó gbǎ ɔ́ mɛ.” Hwenu e Jezu ɖo sinsɛnxɔ ɔ́ mɛ tɔ́n sín wɛ ɔ́, ahwanvú tɔn lɛ́ɛ ɖokpó ɖɔ n'i ɖɔ: “ Mɛ̌si, kpɔ́n awǐnnya ɖagbe ɖagbe élɔ́ lɛ́ɛ, bó kpɔ́n lě e xɔ ɔ́ sá vɔ gbɔn é.” Jezu ka yí gbe n'i ɖɔ: “A ma mɔ xɔ ɖaxó élɔ́ lɛ́ɛ a? Awǐnnya e è dó mɛ yě ná ɔ́, ɖě sɔ́ ná kpo ɖo ɖě jí ǎ; yě bǐ wɛ è nǎ flí gba.” Jezu ka wá yi jínjɔ́n olívutín só ɔ́ jí, ɖo sinsɛnxɔ ɔ́ nukɔn. Piyɛ́ɛ kpódó Jaki kpó, kpódó Jǎan kpó, kpódó Andlé kpán ká wá yi mɔ ɛ, ɖo vo, bó kanbyɔ́ ɛ ɖɔ: “Đɔ hwenu e nǔ énɛ́ lɛ́ɛ bǐ ná jɛ dó ɔ́ nú mǐ; ani wɛ ka ná ɖe hwenu e nǔ énɛ́ lɛ́ɛ bǐ ná jɛ dó ɔ́ xlɛ́ mǐ?” Jezu ka jɛ ɖiɖɔ nú yě jí ɖɔ: “Mi hɛn ayi mitɔn bónú mɛɖé ma wá flú mi ó. Đó mɛ gěgé ná sɔ́ nyǐkɔ ce bó ná wá xwetɔ́n bó ɖɔ: ‘Nyɛ wɛ nyí Klísu ɔ́,’ lobo ná flú mɛ gěgé. Hwenu e mi ná se ɖɔ è ɖo ahwan fun wɛ, bó ɖo ahwan xó ɖɔ wɛ ɔ́, ado ní má hu mi ó; nǔ wɛ nyí bó ɖó ná jɛ; lo ɔ́, é ka ko nyí ɖɔ gbɛ ɔ́ wɛ ko ɖo nǎ vɔ wɛ nɛ́ ǎ. Akɔta ɖě ná sí te dó ɖě jǐ, axɔ́súɖuto ɖě ná sí te dó ɖě jí, ayǐkúngban ná dán wǔ gbɔn fí tɛnmɛ tɛnmɛ, adɔ ná tɔ́n. Nǔ énɛ́ lɛ́ɛ wɛ ná nyí bǐbɛ́ wǔvɛ́mimɔ lɛ́ɛ tɔn. “Amɔ̌, midɛɛ lɛ́ɛ ɔ́, mi hɛn ayi mitɔn, bó nɔ acéjí, ɖó yě ná wá dó tagba nú mi, bó ná nɔ́ kplá mi yi hwɛ nukɔn; yě ná nɔ́ xo mi ɖo kplɔ́ngbasá lɛ́ɛ, yě ná nɔ́ kplá mi yi axɔ́sú lɛ́ɛ kpódó tokpɔngán lɛ́ɛ kpó nukɔn, ɖó nyɛ wú, bónú mi ná nɔ́ ɖe kúnnu nú mì ɖo nukɔn yětɔn. Đó è ɖǒ ná jlá Wɛn Ɖagbe Mawu tɔn ɔ́ akɔta lɛ́ɛ bǐ hwɛ̌. Ényí è ka wá wlí mi xwe hwɛ nukɔn hǔn, mi ma ɖo tamɛ gba wɛ, bó ɖo nǔ e mi ná yi ɖɔ ɖo dɔ̌n, bó ná dó hwlɛ́n miɖée ɔ́ linkpɔ́n wɛ ó; nǔ e Mawu ná sɔ́ dó ayi mɛ nú mi hwenɛ́nu ɔ́ wɛ mi ná ɖɔ, ɖó mi wɛ ɖo xó ná ɖɔ wɛ ǎ, Yɛsinsɛn wɛ. Nɔví ná jó nɔví tɔn, bɔ è nǎ hu; tɔ́ ná jó vǐ tɔn bɔ è nǎ hu; vǐ lɛ́ɛ ná fɔ́n gǔ dó mɛjitɔ́ yětɔn lɛ́ɛ jí, bó ná zɔ́n ɖɔ è nǐ hu yě. Mɛ bǐ ná gbɛ́ wǎn nú mi ɖó nyɛ wú; lo ɔ́, mɛ e ná dɛ ɖo ya énɛ́ lɛ́ɛ nu káká yi fó ɔ́, è nǎ hwlɛ́n ɛ gán. “Hwenu e mi ná wá mɔ suɖunú baɖabaɖa ɔ́ ɖo tɛn e mɛ é ma ɖó ná nɔ ǎ ɔ́, (mɛ e xa nǔ énɛ́ ɔ́ ní mɔ nǔ jɛ wú); mɛ e ɖo Judée yíkúngban jí lɛ́ɛ ní hɔn yi sókan lɛ́ɛ mɛ. Mɛ e ɖo xɔ ta ɔ́ ní ma jɛ te wá sɔ́ nǔɖé ɖo xɔ mɛ ó. Mɛ e ka ná ɖo gle mɛ ɔ́ ní má ɖɔ émí ná lɛ́ kɔ wá zé awu émítɔn ɖaxó ɔ́ ɖo xwé gbe ó. Azǎn nyanya wɛ azǎn énɛ́ lɛ́ɛ ná nyí nú nyɔ̌nu e ná ɖo xo, kpódó ée ná ɖó vǐ ɖo anɔ̌nu hwenɛ́nu lɛ́ɛ kpó. Mi sa vo nú Mawu, bónú nǔ énɛ́ lɛ́ɛ ní má jɛ ɖo avivɔ mɛ, ɖo jǐ hwenu ó. Đó azǎn énɛ́ lɛ́ɛ mɛ ɔ́, adǎn e ná gbo gbɛtɔ́ lɛ́ɛ ɔ́ ná syɛ́n káká, bɔ è ko mɔ mɔ̌hunkɔtɔn kpɔ́n gbeɖé sín hwenu e Mawu ko ɖó gbɛ ɔ́ dó ɔ́ káká jɛ din é ǎ; è ka sɔ́ lɛ́ ɖo mɔ̌hunkɔtɔn ɖě ná mɔ wɛ gbeɖé ǎ. Ényí Aklúnɔ ma ko ɖe azǎn énɛ́ lɛ́ɛ kpo wɛ ǎ ɔ́, mɛ ɖěbǔ ná gán ǎ; lo ɔ́, é ɖe azǎn énɛ́ lɛ́ɛ kpo, ɖó mɛ e é cyán ɖó vo lɛ́ɛ wú. “Nú mɛɖé wá ɖɔ nú mi ɖɔ: ‘Kpɔ́n, Klísu ɖíe ɖo fí e,’ abǐ: ‘Kpɔ́n, énɛ́ ɖo dɔ̌n nɛ́’ hǔn, mi ma ɖi nǔ n'i ó. Đó mɛ e nɔ sɔ́ yěɖée dó ɖó Klísu ná lɛ́ɛ kpódó mɛ e nɔ sɔ́ yěɖée dó ɖó gbeyíɖɔ Mawu tɔn ná lɛ́ɛ kpó ná wá xwetɔ́n. Yě ná nɔ́ jlɛ́ nǔ, bó ná nɔ́ ɖe nǔdábaɖa lɛ́ɛ xlɛ́, bónú yě sixú kpé wú wɛ ɔ́, yě ná flú mɛ e Mawu cyán lɛ́ɛ. Midɛɛ lɛ́ɛ ɔ́, mi bo ɖó ayi te, nǔ lɛ́ɛ bǐ nɛ́ un ko ɖɔ nú mi nɛ́. “Lo ɔ́, azǎn énɛ́ lɛ́ɛ gbe, ɖo yajiji énɛ́ gúdo ɔ́, hwesivɔ́ ná dó zǐnflú; bɔ sun sɔ́ ná ná wěziza tɔn ǎ, bɔ sunví lɛ́ɛ ná jɛ ayǐ sín jǐnukúnsin, bɔ è nǎ húnhún acɛkpikpa e ɖo jǐnukúnsin lɛ́ɛ. Énɛ́ ɔ́, è nǎ mɔ Gbɛtɔ́ví ɔ́ ɖo akpɔ́kpɔ́ jí jǎwe, kpódó hlɔ̌nhlɔ́n ɖaxó kpó, kpódó susu kpó. É ná sɛ́ wɛnsagun tɔn lɛ́ɛ dó, bɔ yě ná kplé mɛ e é cyán lɛ́ɛ gbɔn wɛ̌kɛ́zo ɛnɛ lɛ́ɛ mɛ, sín fí e ayǐkúngban ɔ́ kponu ɖó é, káká yi jɛ fí e jǐnukúnsin kponu ɖó é. “Mi kpɔ́n nǔ dó fígitín wu: ényí ala tɔn lɛ́ɛ jɛ mǔ dó jí, bo jɛ ama zɔ́n jí ɔ́, mi nɔ tunwun ɖɔ xwejí ɔ́ wɛ ko ɖo nǎ wɔ̌ wɛ nɛ́. Mɔ̌ ɖokpó ɔ́, nú mi wá mɔ nǔ énɛ́ lɛ́ɛ ɖo jijɛ wɛ hǔn, mi nywɛ́ ɖɔ nyɛ Gbɛtɔ́ví ɔ́ kó sɛ yá bǐ, bó ɖo hɔn jí. Má ɖɔ nǔgbó nú mi: mi mɛ e ɖo gbɛ din lɛ́ɛ bǐ ná kó kú cóbónú nǔ énɛ́ lɛ́ɛ bǐ ná jɛ ǎ. Jǐnukúnsin kpódó ayǐkúngban kpó ná vɔ, amɔ̌, xó ce lɛ́ɛ ná vɔ gbeɖé ǎ. “Mɛ ɖé tunwun azǎn ɔ́ ǎ; mɛɖé ka tunwun gan ɔ́ mɛ ǎ; wɛnsagun Mawu tɔn lɛ́ɛ tunwun ǎ; nyɛ Mawu ví ɔ́ ɖésú tunwun ǎ; Tɔ́ ɔ́ ɖokpónɔ géé wɛ tunwun. Mi cɔ́ miɖée, bó ɖo acéjí, ɖó mi tunwun hwe ɔ́ nu ǎ. È hɛn ɔ́, è nǎ jlɛ́ dó dǎwe e xwe tomɛ, bó sɔ́ xwé tɔn dó alɔ mɛ nú mɛsɛntɔ́ tɔn lɛ́ɛ ɔ́ wú; é má azɔ̌ yětɔn yětɔn nú yě, bo ka zɔ́n hɔnjínɔtɔ́ ɔ́ ɖɔ é ní nɔ wunzɛn. Hǔn, mi bo nɔ acéjí, ɖó mi tunwun hwenu e xwétɔ́ ɔ́ na lɛ́ kɔ wá dó ɔ́ ǎ; é sixú nyí gbadanu, é sixú nyí zǎnxwete, é sixú nyí kokló kɔ́ así, abǐ zǎnzǎn tɛɛn. Mi ma lɔn nú é wá fyán mi, bó mɔ mi ɖo amlɔ mɛ ó. Nǔ e ɖɔ nú mi wɛ un ɖe ɔ́, mɛ bǐ ɖɔ ná wɛ un ɖe; mi bo nɔ acéjí.” Dǐndínwáyi sín xwe kpódó wɔ̌xúxú e mɛ è ma dó tɔ́n ǎ ɔ́ kpó sín xwe kpo sɔ. Vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó ká ɖo lě e yě ná ɖó yɛ gbɔn, bó wlí Jezu, bó hu i ɔ́ sín wě ɖe wɛ. Amɔ̌, yě ɖo ɖiɖɔ ɖo yěɖée tɛ́ntin wɛ ɖɔ: “Mǐ sixú wlí i xwe ɔ́ hwenu ǎ; é má nyí mɔ̌ ǎ ɔ́, togun ɔ́ ná fɔ́n gǔ.” Jezu ka wá ɖo to e è nɔ ylɔ́ ɖɔ Betaníi ɔ́ mɛ, bó ɖo nǔ ɖu wɛ, ɖo Sinmɔ́ɔ e ko jɛ gudu kpɔ́n ɔ́ xwé, bɔ nyɔ̌nu ɖé wá xwetɔ́n, bó hɛn célu wǎnɖagbenɔ e xɔ akwɛ́ é dó go ɖagbe ɖagbe ɖé mɛ; go énɛ́ ɔ́, awǐnnya e è nɔ ylɔ́ ɖɔ alubatlu ɔ́ wɛ è sɔ́ dó bló ná. Nyɔ̌nu ɔ́ flɛ́ kɔ nú go ɔ́, bó kɔn célu ɔ́ dó ta nú Jezu; ama e è nɔ ylɔ́ ɖɔ nǎa ɔ́ kɛ́ɖɛ́ wɛ è dó bló célu ɔ́ ná. Nǔ énɛ́ vɛ́ mɛɖé lɛ́ɛ wú ɖo yě mɛ, bɔ yě jɛ ɖiɖɔ ɖo yěɖée tɛ́ntin jí ɖɔ: “Aniwú wɛ é ka ɖo célu ɔ́ hɛn gú wɛ mɔ̌? È hɛn ɔ́, è nǎ sa célu énɛ́ hú gankwɛ́ afɔɖé kanwe ko (300), bó má nú wamamɔnɔ lɛ́ɛ,” bɔ yě jɛ nu kɛ d'é wú nú nyɔ̌nu ɔ́ jí. Jezu ka ɖɔ: “Mi jó e dó; étɛ́ sín tagba dó n'i wɛ mi ka ɖe? Nǔ ɖagbe wɛ é wa nú mì. Đó wamamɔnɔ lɛ́ɛ ɖo mi mɛ tɛgbɛ, bɔ é jló mi hweɖěbǔnu ɔ́, mi hɛn ɔ́, mi ná wa ɖagbe nú yě. Nyɛ ka ná nɔ mi mɛ tɛgbɛ ǎ. Lě e é kpé wú gbɔn ɔ́ nɛ́ é bló gbɔn nɛ́; lě e è nɔ sá ami nú cyɔ bó nɔ ɖi ɔ́ wɛ é ko sá nú agbaza ce ɖ'ayǐ din nú gbe e gbe è nǎ ɖi mì é. Má ɖɔ nǔgbó nú mi: è jlǎ Wɛn Ɖagbe Mawu tɔn gbɔn fí ɖěbǔ ɖo gbɛ ɔ́ bǐ mɛ ɔ́, è nǎ nɔ́ ɖɔ nǔ e nyɔ̌nu élɔ́ wa din ɔ́ sín xó, bó ná nɔ́ dó flín i ná.” Đo ahwanvú Jezu tɔn wěwe lɛ́ɛ mɛ ɔ́, mɛ e nyí Judási Isikaliɔ́ti ɔ́ yi mɔ vɔ̌sánú-xwlémawutɔ́gán lɛ́ɛ, bó ná jó Jezu nú yě. Ée yě ɖótó e gúdo ɔ́, xomɛ hun yě, bɔ yě dó akpá n'i ɖɔ émí ná ná ɛ akwɛ́; énɛ́ ɔ́, é jɛ lě e é ná wa gbɔn, bó ná jó Jezu nú yě ɔ́ ba jí. Hwenu e è nɔ ɖu wɔ̌xúxú e mɛ è ma dó tɔ́n ǎ é sín azǎn nukɔntɔn ɔ́ gbe ɔ́, gbe énɛ́ gbe ɖěe è nɔ hu lɛ̌ngbɔ́ví dó ɖu Dǐndínwáyi sín xwe ɔ́ ná ɔ́, ahwanvú Jezu tɔn lɛ́ɛ kanbyɔ́ ɛ ɖɔ: “Fítɛ́ wɛ a jlǒ ɖɔ mǐ ní yi bló tɛnmɛ ɖó nú we ɖe nú Dǐndínwáyi sín xwe ɔ́?” Jezu ka sɛ́ ahwanvú tɔn we dó, bó ɖɔ nú yě ɖɔ: “Mi yi toxo ɔ́ mɛ; mi ná mɔ nya ɖé, bɔ é ná hɛn tɔyizɛ́n. Mi ná xwedó e. Xwé e gbe é ná byɔ́ ɔ́, mi ɖɔ nú xwétɔ́ ɔ́ ɖɔ: ‘ Mɛ̌si ɖɔ: Fítɛ́ jǒnɔyítɛn e mɛ nyi kpódó ahwanvú ce lɛ́ɛ kpó ná ɖu Dǐndínwáyi sín xwe ɔ́ ɖe ɔ́ ɖe?’ Mi ɖɔ mɔ̌ ɔ́, é ná xlɛ́ xɔ ɖaxó ɖé mi ɖo síngbó jí, bɔ nǔ bǐ sɔgbe ɖ'é mɛ; fínɛ́ wɛ mi ná sɔ́ xwe ɔ́ sín nǔ ɖ'ayǐ nú mǐ ɖe.” Ahwanvú tɔn lɛ́ɛ ka yi toxo ɔ́ mɛ, lobo mɔ nǔ lɛ́ɛ bǐ lě e Jezu ɖɔ gbɔn nú yě é, bɔ yě ɖa Dǐndínwáyi sín xwe ɔ́ sín nǔɖuɖu ɖo fínɛ́. Ée gbadanu wá su ɔ́, Jezu kpódó ahwanvú tɔn wěwe lɛ́ɛ kpó wá. Hwenu e yě wá ɖo nǔ ɖu wɛ ɔ́, Jezu ɖɔ: “Má ɖɔ nǔgbó nú mi, mɛ ɖokpó ɖo nǎ sa mì wɛ ɖo mi mɛ e ɖo nǔ ɖu xá mì wɛ lɛ́ɛ mɛ.” Ée yě se mɔ̌ ɔ́, wǔ kú yě, bɔ yě jɛ kinkanbyɔ́ ɛ jí ɖě jɛ ɖě gúdo ɖɔ: “Nyɛ wɛ ǎ mɛ, abǐ?” Jezu ka yí gbe nú yě ɖɔ: “Mɛ ɖokpó wɛ, bó ɖo mi mɛ wěwe e ɖo alɔ dó nǔsúnnúká ɖokpó ɔ́ mɛ xá mì wɛ lɛ́ɛ mɛ. Nǔgbó wɛ, nyɛ Gbɛtɔ́ví ɔ́ ɖó ná kú lě e è ko wlán gbɔn dó wǔtu ce é; amɔ̌ heelú mɛ e ka ná sa mì é; mɛ énɛ́ gbɔ bó gɔn gbɛ wá ɔ́, é nyɔ́ n'i hú.” Hwenu e yě ɖo nǔ ɖu wɛ ɔ́, Jezu sɔ́ wɔ̌xúxú bó dó kú nú Mawu, bó kán, bó ná ahwanvú tɔn lɛ́ɛ bó ɖɔ: “Mi yí, élɔ́ ɔ́ agbaza ce wɛ.” É lɛ́ sɔ́ kɔ́fu ɖokpó, bɔ vɛ̌ɛn ɖ'é mɛ, bɔ é dó kú nú Mawu, bó sɔ́ nú yě, bɔ yě bǐ nu. Bɔ é ɖɔ nú yě ɖɔ: “Élɔ́ ɔ́ hun ce wɛ; hun e Mawu dó sɔ́ akɔjijɛ sín afɔ ɖó te ná ɔ́ wɛ; é wɛ kɔn nyi ayǐ dó mɛ gěgé tamɛ. Má ɖɔ xó nǔgbó nú mi: un sɔ́ ɖo vɛ̌ɛn ɖě ná nu wɛ káká yi jɛ gbe e gbe un ná nu vɛ̌ɛn yɔ̌yɔ́ ɔ́ ɖo axɔ́súɖuto Mawu tɔn mɛ é ǎ.” Bɔ yě ji xwe ɔ́ sín han lɛ́ɛ, bó ɖidó olívutín só ɔ́ jí. Jezu ɖɔ nú ahwanvú tɔn lɛ́ɛ ɖɔ: “Mi bǐ wɛ nǔ e ɖo nǎ jɛ dó jǐ ce wɛ ɔ́ ná hɛn hǔn ná, bɔ mi bǐ ná gbadó; ɖó è wlǎn dó Mawuxówéma ɔ́ mɛ ɖɔ jí: ‘Un ná hu lɛ̌ngbɔ́nyitɔ́ ɔ́, bɔ lɛ̌ngbɔ́ lɛ́ɛ bǐ ná gbadó.’ Lo ɔ́, hwenu e Mawu ná fɔ́n mì sín kú é gúdo ɔ́, un ná jɛ nukɔn nú mi yi Galilée.” Piyɛ́ɛ ka ɖɔ n'i ɖɔ: “Mɛ ɖě lɛ́ɛ bǐ na bó jó we dó ɔ́, nyɛ ɖo nǎ jó we dó wɛ ǎ.” Bɔ Jezu ɖɔ n'i ɖɔ: “Má ɖɔ nǔgbó nú we: hwɛ ɔ́, ɖo zǎn élɔ́ mɛ din ɔ́, cóbónú kokló ná kɔ́ así azɔn we ɔ́, a nǎ kó gbɛ́ azɔn atɔn ɖɔ émí kún tunwun mì ó.” Piyɛ́ɛ ka lɛ́ tɛ ɖɛ̌ jí syɛ́nsyɛ́n, bó ɖɔ: “É ná bó byɔ́ ɖɔ un ná yi kú xá we ɔ́, un ná gbɛ́ ɖɔ un kún tunwun we ó gbeɖé ǎ.” Bɔ ahwanvú ɖě lɛ́ɛ lɔmɔ̌ ɖɔ nǔ ɖokpó ɔ́. Jezu kpódó ahwanvú tɔn lɛ́ɛ kpó wá yi tɛn e mɛ è nɔ ylɔ́ ɖɔ Jɛtisemaníi é. É ɖɔ nú ahwanvú tɔn lɛ́ɛ ɖɔ: “Mi jínjɔ́n fí, bónú má yi xo ɖɛ bó wá.” É ka kplá Piyɛ́ɛ kpódó Jaki kpó, kpódó Jǎan kpán. Xɛsi ɖaxó ɖé jɛ jǐ tɔn, bɔ ado jɛ huhu i jí. Đó é ɖɔ nú yě ɖɔ: “Aluwɛ e nɔ dɔn mɛ yi kú é mɛ wɛ un ɖe; mi nɔ fí, bó nɔ wunzɛn.” Ée é ɖɔ mɔ̌ ɔ́, é sɛ yi nukɔn kpɛví ɖé, bó xwe agbɔ̌nnusú do, bó jɛ ɖɛ xo jí ɖɔ nǔ sixú nyí mɔ̌ hǔn, wǔvɛ́ sín hwenu élɔ́ ɔ́ ní dín wá yi dó émí. Bó nɔ́ ɖɔ: “Tɔ́ ce vívɛ́ná, nǔ ɖěbǔ gló we ǎ; sɛ wǔvɛ́ kɔ́fu élɔ́ dó zɔ nú mì; amɔ̌ ní má nyí jlǒ ce ó, lo ɔ́, ní nyí jlǒ towe.” Énɛ́ gúdo ɔ́, é lɛ́ kɔ wá ahwanvú tɔn lɛ́ɛ gɔ́n, bó mɔ yě ɖo amlɔ dɔ́ wɛ, bó ɖɔ nú Piyɛ́ɛ ɖɔ jí: “Sinmɔ́ɔ, amlɔ dɔ́ wɛ a ɖe a? A sixú nɔ wunzɛn nú ganxixo ɖokpó vɔ́vɔ́ ǎ? Mi nɔ wunzɛn bó xo ɖɛ, bó má wá jɛ tɛ́nkpɔ́n mɛ ó, ɖó gbɛtɔ́ ɖó jlǒ ɖagbe, lo ɔ́, agbaza tɔn ɖó gǎn ɖé ǎ.” É lɛ́ sɛ yi zɔ, bó vɔ́ ɖɛ ɖokpó ɔ́ xo. É lɛ́ lɛ́ kɔ wá, bó lɛ́ mɔ yě ɖo amlɔ dɔ́ wɛ, ɖó nukún yětɔn bǐ wɛ kpɛn, bɔ yě sɔ́ tunwun nǔ e yě ná ɖɔ n'i ɔ́ ǎ. Ée é lɛ́ kɔ wá azɔn atɔngɔ́ ɔ́, é ɖɔ nú yě ɖɔ: “Mi lɛ́ kpo ɖo amlɔ dɔ́ wɛ, bó ɖo gbigbɔ́jɛ́ wɛ a? É kpé lo; gan ɔ́ kó xo. Gbɛtɔ́ví ɔ́ ɖíe è jǒ nyi hwɛhutɔ́ lɛ́ɛ lɔ mɛ e. Mi bo sí te nú mǐ ná yi. Mi kpɔ́n! Mɛ e ɖo sísɔ́ mì jó wɛ ɔ́ ɖíe kó sɛ yá e.” Jezu kpo ɖo xó ɖɔ wɛ, bɔ mɛ e nyí Judási ɖo ahwanvú tɔn wěwe lɛ́ɛ mɛ ɔ́ wá tlóló, bɔ mɛ gěgé ɖé lɛ́ɛ xwedó e, bó hɛn hwǐ kpódó kpo kpán. Vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó mɛxó lɛ́ɛ kpó wɛ sɛ́ yě dó. Judási e ɖo sisa ɛ wɛ ɔ́ ka kó ná xlɛ́ élɔ́ yě ɖɔ: “Mɛ e un ná kí si ná ɔ́ wɛ, mi wlí i, bó kplá ɛ yi, mi ka hɛn ɛ syɛ́nsyɛ́n.” Ée Judási wá tlóló ɔ́, é sɛkpɔ́ Jezu, bó ɖɔ: “ Mɛ̌si ”, lobo kí si n'i. Bɔ yě wlí i. Mɛ e ɖo kpɔ́ xá Jezu lɛ́ɛ ɖokpó sún hwǐ, bó xú vɔ̌sánú-xwlémawutɔ́ ɖaxó ɔ́ sín mɛsɛntɔ́, bó kpa tó e. Jezu ka yí xó, bó ɖɔ nú yě ɖɔ: “Ajotɔ́ axánsúnxó wɛ un ka nyí bɔ mi hɛn hwǐ kpódó kpo kpó bó ja wlǐwlí mì gbé a? Ayǐhɔ́ngbe ayǐhɔ́ngbe wɛ un nɔ ɖo mi tɛ́ntin, bó nɔ́ ɖo nǔ kplɔ́n mɛ wɛ ɖo sinsɛnxɔ mɛ, có mi ka wlí mì ǎ. Lo ɔ́, nǔ e è ko wlán dó Mawuxówéma mɛ ɔ́ ná dó jɛ wú wɛ.” Ahwanvú tɔn lɛ́ɛ bǐ jó e dó, bó hɔn. Nyaví dɔ̌nkpɛvú ɖé ká xwedó Jezu, lobo ɖo avɔ ɖokpó géé mɛ, bɔ yě wlí i. Lo ɔ́, é jó avɔ tɔn dó, bó hɔn mɛ̌ jɔgbe. È kplá Jezu yi vɔ̌sánú-xwlémawutɔ́ ɖaxó Kayífu xwé, bɔ vɔ̌sánú-xwlémawutɔ́gán lɛ́ɛ, mɛxó lɛ́ɛ, kpódó sɛ́nkplɔ́nmɛtɔ́ lɛ́ɛ kpó sín afɔ sɔgbe ɖo fínɛ́. Piyɛ́ɛ jɛ Jezu gúdo; é ká lɔn bó sɛkpɔ́ ɛ ǎ; é nɔ zɔ n'i káká yi vɔ̌sánú-xwlémawutɔ́ ɖaxó ɔ́ sín xwé gbe. É yi jínjɔ́n mɛsɛntɔ́ lɛ́ɛ kpá, bó ɖo myɔ xú wɛ. Vɔ̌sánú-xwlémawutɔ́gán lɛ́ɛ kpódó toxóɖɔgbɛ́ Jwifu lɛ́ɛ tɔn kpó ɖo hwɛ e yě ná dó Jezu, bó ná hu i é ba wɛ. Mɛ gěgé wá ɖe kúnnu agɔ n'i; lo ɔ́, kúnnu e yě ɖe lɛ́ɛ ɔ́, ɖě sɔgbe xá ɖě ǎ. Mɛ ɖé lɛ́ɛ ká sí te, bó ɖe kúnnu agɔ élɔ́ n'i, bó ɖɔ: “Mǐ se, bɔ é ɖɔ: ‘Un ná gba sinsɛnxɔ élɔ́ e gbɛtɔ́ sɔ́ alɔ dó gbá é, bó ná sɔ́ azǎn atɔn ɖó te, bó ná gbá ɖěvo e gbɛtɔ́ sín alɔ ma gbá ǎ é.’ ” Lo ɔ́, akpá énɛ́ xwé ɖésú ɔ́, kúnnu e yě ɖe lɛ́ɛ lɔmɔ̌ nyí ɖokpó ɔ́ ǎ. Vɔ̌sánú-xwlémawutɔ́ ɖaxó ɔ́ ká sí te ɖo agun ɔ́ tɛ́ntin, bó kanbyɔ́ Jezu ɖɔ: “Nǔ e kúnnuɖetɔ́ énɛ́ lɛ́ɛ ɖɔ dó wǔ towe ɔ́ nɛ́, a ɖǒ nu ɖé ná kɛ d'é wú a?” Jezu ka tin, bó gɔn gbe yí, bɔ vɔ̌sánú-xwlémawutɔ́ ɖaxó ɔ́ lɛ́ vɔ́ kanbyɔ́ ɛ ɖɔ: “Hwi wɛ nyí Klísu, vǐ Mawu e mɛ bǐ nɔ́ xomlá ɔ́ tɔn a?” Bɔ Jezu yí gbe n'i ɖɔ: “Nyɛ wɛ, bɔ mi ná wá mɔ nyɛ Gbɛtɔ́ví ɔ́ ɖo ayǐjínjɔ́n ɖo Mawu Nǔbǐwúkpétɔ́ ɔ́ sín ɖisíxwé; mi ná lɛ́ mɔ mì, bɔ un ná gosín jǐnukúnsin jǎwe ɖo akpɔ́kpɔ́ mɛ.” Ée vɔ̌sánú-xwlémawutɔ́ ɖaxó ɔ́ se xó énɛ́ e Jezu ɖɔ ɔ́, é vún awu dó kɔ nú éɖée, bó ɖɔ: “Kúnnuɖiɖe tɛ́ ba wɛ mi ka sɔ́ kpo ɖe? Mi ma se nu e é nylá dó Mawu wú ɔ́ a? Étɛ́ mi lin d'é wú?” Bɔ yě bǐ gblé hwɛ dó ta nú Jezu, bó ɖɔ kú wɛ jɛ xá ɛ. Mɛ ɖé lɛ́ɛ ɖo yě mɛ, bó jɛ atán tún kɔn nyi wú tɔn jí; yě blǎ nukún mɛ n'i, bo jɛ nǔ dó e jí, bo nɔ ɖɔ n'i ɖɔ: “Đɔ mɛ e dó nǔ we ɔ́.” Bɔ sɔ́ja lɛ́ɛ dɔn ɛ, bo jɛ tó mɛ xo n'i jí. Piyɛ́ɛ kpo ɖo fí e é ɖo myɔ xú ɖe wɛ é, bɔ vɔ̌sánú-xwlémawutɔ́ ɖaxó ɔ́ sín mɛsɛntɔ́ nyɔ̌nu ɖokpó wá mɔ ɛ. Ée é mɔ ɛ ɖo myɔ xú wɛ ɔ́, é kpɔ́n ɛ tlítlí, bó ɖɔ n'i ɖɔ: “Hwi lɔmɔ̌ a nɔ xwedó Jezu Nazalɛ́ti tɔn ɔ́.” Piyɛ́ɛ ka gbɛ́, bo ɖɔ: “Un tunwun i ǎ, un ka mɔ nukúnnú jɛ nǔ e ɖɔ wɛ a ɖe nɛ́ ɔ́ mɛ lɔ ǎ;” ée é ɖɔ mɔ̌ ɔ́, é ɖidó hɔntogbó jí, bɔ kokló kɔ́ así. Nyɔ̌nu mɛsɛntɔ́ ɔ́ ka lɛ́ wá mɔ ɛ ɖo hɔntogbó ɔ́ jí, bo lɛ́ jɛ ɖiɖɔ nú mɛ e ɖo fínɛ́ lɛ́ɛ jí ɖɔ: “Mɛ tɔn lɛ́ɛ ɖokpó nɛ́.” Piyɛ́ɛ ka lɛ́ gbɛ́. É nɔ zaan, bɔ mɛ e ɖo fínɛ́ lɛ́ɛ lɔmɔ̌ ɖɔ nú Piyɛ́ɛ ɖɔ: “A ɖo mɛ tɔn lɛ́ɛ mɛ dandan; ɖó Galiléenu wɛ a nyǐ.” Piyɛ́ɛ ka jɛ ɖiɖɔ jí ɖɔ: “Ényí nǔvú ɖó wɛ un ɖe hǔn, Mawu ní dɔn tó nú mì. Un xwlé Mawu ɖɔ un kún tunwun nya e xó ɖɔ wɛ mi ɖe nɛ́ ɔ́ ó.” Tɛn tɔn mɛ tlóló ɔ́, kokló kɔ́ así azɔn wegɔ́ ɔ́, bɔ Piyɛ́ɛ flín xó e Jezu ko ɖɔ n'i ɖ'ayǐ é: “Cóbónú kokló ná kɔ́ así azɔn wegɔ́ ɔ́, a nǎ kó gbɛ́ azɔn atɔn ɖɔ émí kún tunwun mì ó,” lobo lin tamɛ dó xó nɛ́ ɔ́ wú, bó wlí avǐ. É wá su zǎnzǎn tɛɛn, bɔ vɔ̌sánú-xwlémawutɔ́gán lɛ́ɛ, mɛxó lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó toxóɖɔgbɛ́ ɔ́ kpó kplé, bó yi kpá dó Jezu wú. Yě blǎ ɛ, bo kplá ɛ yi jó nú tokpɔngán Pilátu. Pilátu ka kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Hwi wɛ ɖɔ.” Vɔ̌sánú-xwlémawutɔ́gán lɛ́ɛ ka ɖo hwɛ tɛnmɛ tɛnmɛ dó e wɛ. Pilátu ka lɛ́ kanbyɔ́ ɛ ɖɔ: “A sɔ́ ɖó nu ɖé ná kɛ ǎ cé? Kpɔ́n nǔ tobutóbú e sín hwɛ dó we wɛ yě ɖe é.” Lo ɔ́, Jezu sɔ́ kɛ nu ǎ, bɔ é kpácá Pilátu. È ko ja Dǐndínwáyi sín xwe ɖu gbé tɛgbɛ ɔ́, Pilátu nɔ ɖe gantɔ́ ɖěe yě kó sixú byɔ́ ɛ ɔ́ ɖokpó nyi te nú yě. Nya ɖé ka tíin, bɔ è nɔ ylɔ́ ɛ ɖɔ Balabási. È wlǐ nya énɛ́ dó gankpá mɛ, é kpódó todántɔ́ ɖé lɛ́ɛ kpó, ɖó yě dɔn hunnyahunnya dó to mɛ, bó hu mɛ ɖokpó. Agun ɔ́ sɛ yi Pilátu gɔ́n, bo byɔ́ ɛ ɖɔ ní ɖe gantɔ́ ɖokpó nyi te nú émí lě e è ko nɔ bló gbɔn xwewú xwewú tɛgbɛ é. Bɔ Pilátu yí gbe nú yě ɖɔ: “Mi jló nú má ɖe Jwifu lɛ́ɛ xɔ́sú ɔ́ nyi te nú mi a?” Đó é mɔ nǔ jɛ wú ɖɔ mɛnúvɛ́mɛwú wɛ zɔ́n bɔ vɔ̌sánú-xwlémawutɔ́gán lɛ́ɛ wlí Jezu wá jó nú émí. Vɔ̌sánú-xwlémawutɔ́gán lɛ́ɛ ka fɔ́n hun dó jǐ nú mɛ lɛ́ɛ nú yě ní byɔ́ ɖɔ é ní gbɔ bó ɖe Balabási nyi te nú émí. Pilátu ka yí xó, bó kanbyɔ́ yě ɖɔ: “Nɛ̌ wɛ un ka ná wa mɛ e mi nɔ ylɔ́ ɖɔ Jwifu lɛ́ɛ xɔ́sú ɔ́ sín nǔ gbɔn?” Bɔ yě bǐ sú xó, bo ɖɔ: “Ká ɛ nyi aklúzu jí.” Pilátu lɛ́ vɔ́ kanbyɔ́ yě ɖɔ: “Nǔ nyanya tɛ́ é ka wa?” Bɔ agun ɔ́ lɛ́ sú xó syɛ́nsyɛ́n, bó ɖɔ: “Ká ɛ nyi aklúzu jí.” Pilátu ka jló ná nyɔ́ ɖo yě sí, bo ɖe Balabási nyi te nú yě; é ka zɔ́n bɔ è xo Jezu, bɔ é jó e nú yě, nú yě na ká ɛ nyi aklúzu jí. Sɔ́ja lɛ́ɛ kplá Jezu yi hɔnmɛ, lobo ylɔ́ ahwankpá ɔ́ bǐ kplé. Yě sɔ́ awu gaga vɔ́vɔ́ ɖé dó n'i, lobo sɔ́ wun dó lɔn axɔ́súgbákún ɖokpó, bó zé xwe n'i. Bó jɛ gbe dó e jí ɖɔ: “Mǐ kan xwé byɔ́, Jwifu lɛ́ɛ xɔ́sú!” Yě nɔ dó fántín ta n'i, bó nɔ́ tún atán kɔn nyi wútu tɔn, bó nɔ́ jɛ kpo nukɔn tɔn, bó nɔ́ ɖe kɔ́ n'i. Ée yě cá ɛ ko mɔ̌ káká ɔ́, yě wǎ ɖe awu vɔ́vɔ́ ɔ́ sín kɔ n'i, lobo fɔ awu é ɖésúnɔ tɔn lɛ́ɛ dó n'i, bó kplá ɛ tɔ́n sín xwé ɔ́ gbe, bó ná yi ká ɛ nyi aklúzu jí. Sinmɔ́ɔ Silenɛ́ɛnu ɔ́ gosín gleta wá xweyǐgbe. Alɛsándlu kpódó Hlufúsi kpó sín tɔ́ wɛ. Sɔ́ja lɛ́ɛ zɔ́n ɛ gǎnnugǎnnu, ɖɔ é ní ɖíɖá aklúzu Jezu tɔn. Yě kplá Jezu yi tɛn e mɛ è nɔ ylɔ́ ɖɔ Gɔlugɔta dó Ebléegbe mɛ é. Gɔlugɔta ɔ́ sín tínmɛ wɛ nyí “takágo tɛnmɛ”. Yě ná ɛ vɛ̌ɛn e è cáká kpódó mǐla kpó é; é ka nu ǎ. Bɔ yě ká ɛ nyi aklúzu jí, bó nyi akɔ dó awu tɔn lɛ́ɛ, bó má yětɔn yětɔn. Zǎnzǎn gan tɛ́nnɛ mɛ mɔ̌ wɛ yě ká ɛ nyi aklúzu jí. Yě wlán nǔ e wú yě ɖó kúhwɛ n'i ɔ́ ɖó ta tɔn nu ɖo aklúzu ɔ́ jí ɖɔ: “Axɔ́sú Jwifu lɛ́ɛ tɔn.” Yě ká ajotɔ́ axánsúnxó we nyi aklúzu jí gɔ́ n'i: mɛ ɖokpó ɖo ɖisí tɔn xwé, mɛ ɖokpó ɖo amyɔ tɔn xwé. [ Lě e nǔ e è ko wlán dó Mawuxówéma mɛ ɖ'ayǐ ɔ́ jɛ gbɔn ɔ́ nɛ́; é wɛ nyí ɖɔ: “È lɛ̌n ɛ dó dǎkaxotɔ́ lɛ́ɛ sín ahwan mɛ.”] Aligbɔntɔ́ lɛ́ɛ nɔ́ ɖo zunzun i wɛ, bó nɔ́ húnhún ta, bó nɔ́ ɖɔ: “Wǒóo nú we! Hwi mɛ e ɖo sinsɛnxɔ ná mu wɛ, bó ná sɔ́ azǎn atɔn ɖó te, bó vɔ́ ɖěvo gbá ɔ́ ɖíe a? Hwlɛ̌n hwiɖée gán, bó jɛ te sín aklúzu ɔ́ jí.” Mɔ̌ ɖokpó ɔ́, vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó nɔ́ ɖo cícá ɛ ko wɛ ɖo yěɖée tɛ́ntin, bó nɔ́ ɖɔ: “É hwlɛ́n mɛ ɖě lɛ́ɛ gán; é ka sixú hwlɛ́n éɖée gán ǎ! Klísu Izlayɛ́li ví lɛ́ɛ xɔ́sú ɔ́ ní bó jɛ te nú mǐ nǎ kpɔ́n; énɛ́ ɔ́, mǐ ná ɖi nǔ n'i.” Mɛ e è ká nyi aklúzu jí ɖo akpá tɔn lɛ́ɛ lɔmɔ̌ ɖo zunzun i wɛ. Ée gan wěwe xo ɔ́, ablu dó ɖo ayǐkúngban jí káká yi jɛ gan atɔn mɛ. Ée gan atɔn xo ɔ́, Jezu sú xó tlílí, bó ɖɔ: “Elíi Elíi, lama sabakitani?” (Tínmɛ tɔn wɛ nyí: “Mawu ce, Mawu ce, nɛ̌ ká gbɔn bɔ a jǒ mì dó?”) Mɛ e ɖo fínɛ́ lɛ́ɛ ɖě se xó e Jezu ɖɔ nɛ́ ɔ́, bó ɖɔ: “Mi kpɔ́n! É ɖo Elíi ylɔ́ wɛ.” Mɛ ɖokpó ka kán wezun, bó yi sɔ́ xumɛtekan nylɔ́ dó vɛ̌ɛn sinvɛ́sinvɛ́ mɛ, bó zé slɔ́ kpo nu, bó dlɛ́n dó e ɖɔ ní nu, lobo nɔ́ ɖɔ: “Mi gbɔ nú mǐ ná kpɔ́n ɖɔ Elíi ɔ́ ná wá ɖe e jɛ te a jí.” Jezu ka sú xó ɖaxó ɖé, bó bɔnu. Avɔ ɖaxó e è dó gbo sinsɛnxɔ ɔ́ mɛ ná ɔ́ dá ɖó we sín jǐ káká wá do. Ée sɔ́ja kanwekogán Hlɔ̌manu e ɖo te ɖo Jezu nukɔn ɔ́ mɔ lě e é kú gbɔn ɔ́, é ɖɔ: “Nya élɔ́ ɔ́, Mawu ví wɛ é nyí nǔgbó.” Nyɔ̌nu ɖé lɛ́ɛ lɔmɔ̌ ɖo te ɖo zɔga, bó ɖo nǔ e ɖo jijɛ wɛ ɔ́ kpɔ́n sɛ́ dó wɛ. Mali Magidalanu ɔ́ kpódó Mali e nyí Jaki kpɛví ɔ́ kpódó Jozée kpó sín nɔ ɔ́ kpó, kpódó Salomɛ́ɛ kpó ɖo nyɔ̌nu énɛ́ lɛ́ɛ mɛ. Nyɔ̌nu énɛ́ lɛ́ɛ wɛ nɔ́ xwedó Jezu, bó nɔ́ gɔ́ alɔ n'i ɖo nǔ e hudó e lɛ́ɛ mɛ hwenu e é ɖo Galilée ɔ́. Nyɔ̌nu gěgé ɖěvo lɛ́ɛ xwedó e wá Jeluzalɛ́mu, bó ɖo fínɛ́. Ée zǎn jɛ bibɔ jí, bɔ gbe énɛ́ gbe ká lɛ́ nyí gbɔjɛzán Jwifu lɛ́ɛ tɔn kpo sɔ ɔ́, Jozɛ́fu Alimatéenu e nyí mɛ nukúnɖéjí ɖokpó ɖo toxóɖɔgbɛ́ Jwifu lɛ́ɛ tɔn mɛ ɔ́ wá; é lɔmɔ̌ ɖo te kpɔ́n axɔ́súɖuɖu Mawu tɔn. É ɖó akɔ́nkpinkpan, bó yi mɔ Pilátu, bó byɔ́ ɛ Jezu sín cyɔ. Lě e Jezu yá wǔ kú gbɔn ɔ́ kpácá Pilátu, bɔ é ylɔ́ sɔ́ja kanwekogán ɔ́, bó kanbyɔ́ ɛ ɖɔ: “É kú ɔ́, é kó lín wɛ a?” Bɔ sɔ́ja kanwekogán ɔ́ yí gbe n'i ɖɔ é kó kú xóxó, bɔ é ná gbe Jozɛ́fu ɖɔ ní bó yi zé cyɔ ɔ́. Jozɛ́fu xɔ akwɛ́núvɔ ɖé, bó ɖe cyɔ ɔ́ sín aklúzu jí, bó lɛ́ avɔ ɔ́ dó e, lobo sɔ́ ɛ yi ɖi dó yɔdo ɖé mɛ, lobo blí awǐnnya ɖokpó bó dó sú yɔdo ɔ́ ná. Yɔdo énɛ́ ɔ́, sóxo mɛ wɛ è kun dó. Mali Magidalanu ɔ́ kpódó Mali Jozée sín nɔ kpó kpɔ́n fí e è ɖi i dó é. Ée gbɔjɛzán Jwifu lɛ́ɛ tɔn wá yi ɔ́, Mali Magidalanu ɔ́ kpódó Mali Jaki sín nɔ ɔ́ kpó, kpódó Salomɛ́ɛ kpó, xɔ nǔsáwǔ wǎnɖagbenɔ, bó ná yi sá nú Jezu sín cyɔ. Aklúnɔzán gbe zǎnzǎn tɛɛn hwenu e hwe ɖo tíntɔ́n wɛ ɔ́, yě yi Jezu sín yɔdo kɔn. Yě nɔ́ kanbyɔ́ yěɖée ɖɔ: “Mɛ̌ ká ná blí awǐnnya e ɖo yɔdo ɔ́ nu ɔ́ síin nú mǐ?” Ée yě kpɔ́n dɔ̌n sɛ́ dó ɔ́, yě mɔ ɖɔ è ko blí awǐnnya ɖaxó énɛ́ ɔ́ sín yɔdo ɔ́ nu. Yě byɔ́ yɔdo ɔ́ mɛ, bó mɔ dɔ̌nkpɛvú ɖé ɖo ayǐjínjɔ́n ɖo ɖisíxwé, bɔ é dó awu wěwé, bɔ xɛsi ɖaxó ɖé jɛ yě jǐ. Dɔ̌nkpɛvú ɔ́ ka ɖɔ nú yě ɖɔ: “Mi ma ɖi xɛsi ó; Jezu Nazalɛ́ti tɔn e è ká nyi aklúzu jí ɔ́ ba wɛ mi ɖe. È ko fɔ́n ɛ sín kú, é sɔ́ ɖo fí ǎ; fí e è ɖi i dó ɔ́ ɖíe. Lo ɔ́, mi yi ɖɔ nú Piyɛ́ɛ, kpódó ahwanvú ɖě lɛ́ɛ kpó ɖɔ: é ko jɛ nukɔn nú mi xwe Galilée. Fínɛ́ wɛ mi ná yi mɔ ɛ ɖe, lě e é ko ɖɔ gbɔn nú mi é.” Ayi yětɔn bǐ gbadó, bɔ yě ɖo sísɔ́sísɔ́ wɛ, bó tɔ́n sín yɔdo ɔ́ mɛ, bó hɔn. Yě ká glá ɖɔ xó ɖé nú mɛɖé ǎ, ɖó yě ɖo xɛsi ɖi wɛ. [ Ée è fɔ́n Jezu sín kú Aklúnɔzán gbe zǎnzǎn ɔ́, é tó sɔ́ éɖée xlɛ́ Mali Magidalanu e jí é nya yɛ nyanya tɛ́nwe sín é hwɛ̌. Éyɛ́ ka yi ɖɔ nú mɛ e kpódó Jezu kpó kó nɔ kpɔ́, bɔ yě wá ɖo aluwɛ mɛ, bó ɖo avǐ ya wɛ lɛ́ɛ é. Ée yě se ɖɔ Jezu ɖo gbɛ, bɔ Mali mɔ ɛ ɔ́, yě ɖi ǎ. Énɛ́ ɔ́ gúdo ɔ́, Jezu sín ahwanvú we ɖo ali jí xwe gleta. Jezu ka sɔ́ ninɔmɛ ɖěvo, bo tɔ́n dó yě jǐ. Ahwanvú lɛ́ɛ lɛ́ kɔ wá yi ɖɔ nú ahwanvú ɖě lɛ́ɛ. Yě ka ɖi nǔ nú yě lɔmɔ̌ ǎ. Gǔdo gúdo ɔ́, Jezu wá zé éɖée xlɛ́ ahwanvú tɔn wǒ-ɖokpó lɛ́ɛ hwenu e yě ɖo nǔ ɖu wɛ é. É kɛ nu dó nǔmaɖi yětɔn kpódó tótlítlí yětɔn kpó wú nú yě; ɖó yě ɖi nǔ nú mɛ e mɔ ɛ, bó wá ɖɔ nú yě lɛ́ɛ é ǎ. É ka ɖɔ nú yě ɖɔ: “Mi gbɔn gbɛ ɔ́ bǐ mɛ, bo jlá Wɛn Ɖagbe Mawu tɔn ɔ́ gbɛtɔ́ lɛ́ɛ bǐ. Mɛ e ná ɖi nǔ, bɔ è nǎ lɛ yɛhwesin n'i ɔ́ ná gán. Mɛ e ma ka na ɖi nǔ ǎ ɔ́, è nǎ ɖǒ hwɛ n'i. Nǔ e mɛ e ɖi nǔ nú mì lɛ́ɛ ná nɔ jlɛ́ ɔ́ ɖíe: ɖo nyǐkɔ ce mɛ ɔ́, yě ná nɔ́ nya yɛ nyanya lɛ́ɛ sín gbɛtɔ́ lɛ́ɛ jí, bó ná nɔ́ ɖɔ xó dó gbe yɔ̌yɔ́ mɛ. Yě na bo zé dan ɔ́, é ná wa nǔɖé nú yě ǎ; yě na bo nu nǔvɛ́nu ɔ́, é ná wa nǔɖé nú yě ǎ. Yě ná nɔ́ ɖó alɔ azinzɔnnɔ lɛ́ɛ jí, bó ná nɔ́ gbɔ azɔn nú yě.” Ée Aklúnɔ ɖɔ xó énɛ́ lɛ́ɛ nú yě gúdo ɔ́, è sɔ́ ɛ yi jǐnukúnsin, bɔ é jínjɔ́n ɖisíxwé nú Mawu. Ahwanvú tɔn lɛ́ɛ ka sɔ́nǔ, bó jɛ Mawuxó jlá jí gbɔn fí bǐ. Aklúnɔ nɔ́ dó alɔ yě ɖo azɔ̌ énɛ́ kɔn, bó nɔ́ ɖe xlɛ́ ɖɔ xó e ɖɔ wɛ yě ɖe ɔ́ nyí nǔgbó, gbɔn nǔdábaɖa e yě nɔ́ jlɛ́ lɛ́ɛ gbla mɛ.] Teofílu! Mɛ gěgé tɛ́nkpɔ́n bó kpi nǔ e jɛ ɖo tɛ́ntin mǐtɔn lɛ́ɛ é sín tan dó wěma mɛ. Yě ɖɔ nǔ lɛ́ɛ lě e mawuxójlátɔ́ e mɔ nǔ e jɛ lɛ́ɛ sín bǐbɛ́mɛ ɔ́ ɖɔ nú mǐ gbɔn é. Énɛ́ wú wɛ un yi ba do nú nǔ énɛ́ lɛ́ɛ bǐ céɖécéɖé sín bǐbɛ́mɛ yětɔn, bó nywɛ́ ɖɔ má wlán nǔ e jɛ nɛ́ lɛ́ɛ ɖě jɛ ɖě gúdo sɛ́ dó we, bónú a nǎ dó tunwun nǔgbó e ɖo nǔ e è kplɔ́n we lɛ́ɛ mɛ é. Hwenu e Elódu ɖo axɔ́sú ɖu wɛ ɖo Jwifu lɛ́ɛ sín tomɛ ɔ́, vɔ̌sánú-xwlémawutɔ́ ɖokpó ɖo fínɛ́, bɔ è nɔ ylɔ́ ɛ ɖɔ Zakalíi, bɔ é ɖo vɔ̌sánú-xwlémawutɔ́ Abiya sín gbɛ̌ta mɛ. Asi tɔn nɔ nyí Elizabɛ́ti, bó jɔ ɖo vɔ̌sánú-xwlémawutɔ́ ɖaxó Aalɔ́ɔn sín kúnkan mɛ. Yě mɛ we lɛ́ɛ bǐ wɛ nɔ wa jlǒ Mawu tɔn, bó nɔ́ nyi Aklúnɔ sɛ́n lɛ́ɛ, bɔ nǔ bǐ vɔ ɖ'é wú. Yě ká ji vǐ ǎ, ɖó wɛnsinɔ wɛ nú Elizabɛ́ti, bɔ yě mɛ we lɛ́ɛ bǐ sín xwe ka ko sɛ yi. É wá su gbe ɖokpó, bɔ Zakalíi ɖo vɔ̌sánú-xwlémawutɔ́ sín azɔ̌ tɔn lɛ́ɛ wa wɛ ɖo Mawu nukɔn, ɖó gbɛ̌ta e mɛ é ɖe ɔ́ jí wɛ sinsɛnxɔmɛzɔ́ jɛ hwe énɛ́ nu. È ka wá nyi akɔ, bó zé Zakalíi lě e walɔ vɔ̌sánú-xwlémawutɔ́ lɛ́ɛ tɔn zɔ́n gbɔn é, nú é ná byɔ́ tɛn mímɛ́ Aklúnɔ tɔn mɛ, bó ná dó zǎlínkpɔ́n zo, bó xwlé Mawu. Togun ɔ́ bǐ kplé ɖo hɛnkɛ́n, bó ɖo ɖɛ xo wɛ hwenu e Zakalíi ɖo zǎlínkpɔ́n dó zo wɛ é. Wɛnsagun Mawu tɔn ɖokpó ká tɔ́n dó Zakalíi jí, bó ɖo te ɖo ɖisíxwé nú vɔ̌sákpe e jí è nɔ dó zǎlínkpɔ́n zo ɖe é. Ée Zakalíi mɔ ɛ lě ɔ́, ayi tɔn bǐ gbadó, bɔ xɛsi jɛ jǐ tɔn. Wɛnsagun ɔ́ ka ɖɔ n'i ɖɔ: “Zakalíi, ma ɖi xɛsi ó; ɖó Mawu yí gbe nú nǔ e a byɔ́ ɛ é. Asi towe Elizabɛ́ti ná ji vǐ súnnu ɖokpó nú we, bɔ a nǎ sun nyǐ i ɖɔ Jǎan. É ná víví nú we, bɔ a nǎ j'awǎ tɔn, bɔ xomɛ ná hun mɛ gěgé ɖó jiji tɔn wú. Đó é ná nyí gbɛtɔ́ nukúnɖéjí ɖokpó ɖo Aklúnɔ nukún mɛ. Vɛ̌ɛn kpódó ahan syɛ́nsyɛ́n kpó ɖěbǔ ná jɛ nu tɔn ǎ. Yɛsinsɛn ná kó gɔ́ ayi mɛ n'i sín nɔ tɔn xomɛ. É ná bló bɔ Izlayɛ́li ví gěgé ná lɛ́ kɔ wá Aklúnɔ Mawu yětɔn gɔ́n. Mawu ná ná ɛ Yɛ e é ná Elíi é, bó ná lɛ́ ná ɛ hlɔ̌nhlɔ́n e é ná Elíi é, bɔ é ná wá jɛ nukɔn nú Aklúnɔ bó ná dó hwɛ gbɔ nú tɔ́ kpódó vǐ kpó. É ná bló bɔ mɛ e ma nɔ se tónú nú Mawu ǎ lɛ́ɛ ná jɛ jlǒ Mawu tɔn wa jí, bó ná dó sixú bló togun Mawu tɔn ɖó ɖ'ayǐ nú Aklúnɔ.” Zakalíi ka kanbyɔ́ wɛnsagun ɔ́ ɖɔ: “Ani wɛ ná xlɛ́ mì ɖɔ nǔ mɔ̌hunkɔ ná jɛ? Nyɛ ɖíe kó kpo e, bɔ asi ce lɔ sín xwe ka ko sɛ yi.” Wɛnsagun ɔ́ yí gbe n'i ɖɔ: “Nyɛ wɛ nyí Gabliyɛ́li, bó nɔ́ nɔ te ɖo Mawu nukɔn. É wɛ sɛ́ mì dó, nú má ɖɔ xó nú we, lobo dó Wɛn Ɖagbe énɛ́ we. Xó e un ɖɔ nú we ɔ́ ná jɛ ɖo hwe tɔn nu. Lo ɔ́, ɖěe a ma ɖi nǔ nú mì ǎ ɔ́, ɖɛ̌ towe ná kú, bɔ xó ɖiɖɔ ná gló we, káká jɛ hwenu e nǔ lɛ́ɛ bǐ ná jɛ dó é.” Hwenu e nǔ énɛ́ lɛ́ɛ ɖo jijɛ wɛ ɔ́, togun ɔ́ ka ɖo te kpɔ́n Zakalíi, bɔ lě e é lin sɔ ɖo sinsɛnxɔ ɔ́ mɛ ɔ́ nyí nǔ, bó hu ado nú yě. Ée é wá tɔ́n ɔ́, é sɔ́ sixú ɖɔ xó nú yě ǎ, bɔ yě mɔ nukúnnú jɛ wú ɖɔ nǔ wɛ é mɔ ɖo sinsɛnxɔ ɔ́ mɛ, bɔ é gbɔ bó nɔ́ sɔ́ alɔ dó ɖɔ xó nú yě, lobɔ ɖɛ̌ tɔn nɔ kúkú mɔ̌. Ée azǎn nabí e Zakalíi ɖó ná wa azɔ̌ ɔ́ ná ɖo sinsɛnxɔ ɔ́ mɛ ɔ́ fó ɔ́, é yi xwé. Azǎn ɖé jɛ ǎ, bɔ asi tɔn Elizabɛ́ti mɔ xo; é sɔ́ nɔ́ tɔ́n sín xwé tɔn gbe ǎ káká xɔ sun atɔ́ɔ́n, bó nɔ́ ɖɔ jí: “Aklúnɔ sín nǔwiwa ɖíe; é lɛ́ kɔ kpɔ́n mì, lobo ɖe winnyá nú mì ɖo gbɛtɔ́ lɛ́ɛ nukɔn.” Wɛnsagun ɔ́ yi Mali gɔ́n, ɖo xwé tɔn gbe, bó dó gbe e ɖɔ: “Mali, fífá ní nɔ kpɔ́ xá we. Mawu jɔwǔ we; Aklúnɔ ɖo kpɔ́ xá we.” Ée Mali se mɔ̌ ɔ́, ayi tɔn gbadó, bɔ é ɖo kinkanbyɔ́ éɖée wɛ ɖɔ: “Gbedómɛ alɔkpa tɛ́ ká ɖíe?” Wɛnsagun ɔ́ ká ɖɔ n'i ɖɔ: “Mali, ma ɖi xɛsi ó; ɖó Mawu jɔwǔ we; bo tunwun ɖɔ a nǎ mɔ xo, bó ná ji vǐ súnnu ɖokpó, bó ná sun nyǐ i ɖɔ Jezu. É ná nyí mɛ nukúnɖéjí ɖé, bɔ è nǎ nɔ́ ylɔ́ ɛ ɖɔ Mawu Ajalɔ̌nlɔn ví. Aklúnɔ Mawu ná sɔ́ ɛ ɖó tɔ́ tɔn Davídi sín axɔ́súzinkpo jí. É ná ɖu axɔ́sú ɖo Izlayɛ́li ví lɛ́ɛ nu káká sɔ́yi, bɔ axɔ́súɖuɖu tɔn ná vɔ gbeɖé ǎ.” Mali ká kanbyɔ́ wɛnsagun ɔ́ ɖɔ: “Nɛ̌ wɛ nǔ ká sixú nyí mɔ̌ gbɔn? Nyi ɖíe ma tunwun súnnu kpɔ́n ǎ e.” Wɛnsagun ɔ́ ká yí gbe n'i ɖɔ: “Yɛsinsɛn ná wá jǐ towe, bó ná ɖe hlɔ̌nhlɔ́n Mawu tɔn xlɛ́; énɛ́ ɔ́ wú wɛ vǐ e a nǎ ji ɔ́, è nǎ nɔ́ ylɔ́ ɛ ɖɔ mɛɖeɖóvo Mawu tɔn, bó ná nɔ́ ylɔ́ ɛ ɖɔ Mawu ví. Éɖíe! Elizabɛ́ti hɛ̌nnumɔ towe e nyí wɛnsinɔ ɔ́ lɔmɔ̌ mɔ xo ɖo kpikpo tɔn mɛ, bɔ adɔgo tɔn ko ɖó sun ayizɛ́n. Đó nǔ ɖěbǔ gló Mawu ǎ.” Mali yí gbe ɖɔ: “Aklúnɔ sín mɛsɛntɔ́ wɛ un nyí; lě e a ɖɔ gbɔn ɔ́, ní bó nyí mɔ̌ nú mì.” Wɛnsagun ɔ́ ká gosín gɔ̌n tɔn. Azǎn ɖé jɛ ǎ, bɔ Mali jɛ ali, bó hwlɛ́ndó, bó yi Judáa sín toxo ɖé mɛ, ɖo sókan mɛ. É byɔ́ Zakalíi xwé gbe, bó dó gbe Elizabɛ́ti. Ée Elizabɛ́ti se gbedómɛ Mali tɔn lě ɔ́, vǐ e ɖo xo tɔn mɛ é dán wǔ, bɔ Yɛsinsɛn gɔ́ ayi mɛ nú Elizabɛ́ti, bɔ é zé gbe yi jǐ, bó ɖɔ: “Mawu xo ɖɛ dó jǐ we hú nyɔ̌nu lɛ́ɛ bǐ, bó xo ɖɛ dó vǐ e ɖo xo towe mɛ é lɔmɔ̌ jí. Étɛ́ un ka nyí, bɔ Aklúnɔ ce sín nɔ wá ba jǒnɔ mì! Ée un se gbedómɛ towe lě ɔ́, é víví nú vǐ e ɖo xo ce mɛ é, bɔ é dán wǔ. Nǔ nyɔ́ nú we, ɖó a ɖi nǔ ɖɔ akpá e Aklúnɔ dó nú émí ɔ́ ná jɛ.” Mali ɖɔ: “Un ɖo susu kpa nú Aklúnɔ ce wɛ, bɔ xomɛ hun mì tlala dó Mawu Mɛhwlɛ́ngántɔ́ ce wu; ɖó é nyi kɔ kpɔ́n nyɛ mɛsɛntɔ́ tɔn masɔatɛ́n ɔ́. Bɛ́ sín din ɔ́, gbɛtɔ́ lɛ́ɛ bǐ ná nɔ́ ylɔ́ mì ɖɔ nǔnyɔ́nánɔ, ɖó Nǔbǐwúkpétɔ́ ɔ́ wa nǔ ɖaxó ɖaxó nú mì. Nyǐkɔ tɔn ɔ́, nǔ mímɛ́ wɛ é nyí. É ná kú nǔbláwǔ nú mɛ e nɔ sí i lɛ́ɛ bǐ hwebǐnu. É jlɛ́ nǔ ɖaxó ɖaxó lɛ́ɛ; é gba goyítɔ́ lɛ́ɛ dó. É ɖe axɔ́sú lɛ́ɛ sín zinkpo yětɔn lɛ́ɛ jí, bó sɔ́ mɛ e nɔ sɔ́ yěɖée hwe lɛ́ɛ su. É ná nǔ bǐ mɛ e xovɛ́ sin lɛ́ɛ, bó nya dɔkunnɔ lɛ́ɛ asígbá alɔgbá. Mali xɔ sun atɔn mɔ̌ ɖo Elizabɛ́ti gɔ́n, lobo wá yi xwé. Hwenu e Elizabɛ́ti ɖó ná ji vǐ dó é wá su, bɔ é ji vǐ súnnu ɖokpó. Mɛ e ɖo xwé tɔn kpá lɛ́ɛ kpódó hɛ̌nnumɔ tɔn lɛ́ɛ kpán se ɖɔ Aklúnɔ ɖe nǔbláwǔkúnúmɛ tɔn xlɛ́ ɛ, bɔ yě j'awǎ xá ɛ. Azǎn tɔn tántɔn gbe ɔ́, yě wá ja ada gbo nú vǐ ɔ́ gbé, bó jló ná sun nyǐ i ɖɔ Zakalíi tɔ́ ɔ́ ɖɔhun. Nɔ ɔ́ ká kɛ nu, bó ɖɔ: “Éeǒ! Jǎan wɛ é ɖó ná nyí.” Yě ká ɖɔ n'i ɖɔ: “Mɛ ɖé má ká nyí mɔ̌ ɖo hɛ̌n ɔ́ nu nɛ́!” Yě sɔ́ alɔ dó ɖɔ xó nú tɔ́ tɔn, bó kanbyɔ́ ɛ ɖɔ nɛ̌ é ká jló ɖɔ vǐ ɔ́ ní nyí a jí, bɔ é byɔ́ nǔ e jí è nɔ wlán nǔ dó é ɖokpó, bó wlán ɖɔ: “Jǎan wɛ nyǐkɔ tɔn nyí.” Bɔ é kpácá yě bǐ. Azɔn ɖokpó ɔ́, ɖɛ̌ tɔn tún kan, bɔ é hun nu, bó jɛ xó ɖɔ jí, bó jɛ susu kpa nú Mawu jí. Xɛsi jɛ mɛ e ɖo xwé yětɔn kpá lɛ́ɛ bǐ jí. Mɛ bǐ nɔ́ ɖo nǔ e jɛ nɛ́ lɛ́ɛ sín xó ɖɔ wɛ ɖo Judée toxo e ɖo sókan ɔ́ mɛ lɛ́ɛ bǐ mɛ. Mɛ e se lɛ́ɛ ká nɔ́ hɛn dó ayi mɛ, bó nɔ́ ɖo ɖiɖɔ wɛ ɖɔ: “Ani nyí gbé wɛ vǐ élɔ́ ká ja?” Nǔgbó nǔgbó ɔ́, Aklúnɔ sín hlɔ̌nhlɔ́n ɖo kpɔ́ xá ɛ. Yɛsinsɛn gɔ́ ayi mɛ nú tɔ́ tɔn Zakalíi, bɔ é jɛ Mawuxó ɖɔ jí ɖɔ: “È nǐ kpa susu nú Aklúnɔ, Mawu Izlayɛ́li tɔn, ɖó é wá ba togun tɔn kpɔ́n, lobo hwlɛ́n ɛ gán. É sɛ́ Mɛhwlɛ́ngántɔ́ hlɔ̌nhlɔ́nnɔ ɖé dó mǐ. Mɛhwlɛ́ngántɔ́ énɛ́ jɔ ɖo mɛsɛntɔ́ tɔn axɔ́sú Davídi hɛ́nnu mɛ. Nǔ e é ko ɖɔ ɖ'ayǐ xóxó, gbɔn gbeyíɖɔ mímɛ́ tɔn lɛ́ɛ jí é nɛ́. É dó akpá, ɖɔ émí ná hwlɛ́n mǐ gán ɖo kɛntɔ́ mǐtɔn lɛ́ɛ sí, bó ná ɖe mǐ sín mɛ e gbɛ́ wǎn nú mǐ lɛ́ɛ sín acɛ mɛ. É ná ɖe nǔbláwǔkúnúmɛ tɔn xlɛ́ tɔ́gbó mǐtɔn lɛ́ɛ, bó ná flín akɔjijɛ tɔn ma ɖó blɔ̌ ɖo wǔ ɔ́. Đó Mawu dó akpá nú tɔ́gbó mǐtɔn Ablaxámu, ɖɔ émí ná bló, bɔ mǐ ná gló kɛntɔ́ mǐtɔn lɛ́ɛ, bó ná gbó adɔ, bó wa azɔ̌ nú émí; bɔ mǐ ná ɖó ayi mímɛ́ kpódó ayijlɔ́jlɔ́ kpán, ɖo nukɔn émítɔn, káká yi jɛ kúzán gbe mǐtɔn. Vǐ ce, hwɛ ɔ́, è nǎ ylɔ́ we ɖɔ gbeyíɖɔ Mawu Ajalɔ̌nlɔn tɔn, ɖó a nǎ jɛ nukɔn nú Aklúnɔ, bó ná bló ali tɔn lɛ́ɛ ɖó n'i. É ná sɔ́ togun tɔn sín hwɛ lɛ́ɛ kɛ ɛ, bó ná ɖe xlɛ́ ɛ ɖɔ émí hwlɛ́n ɛ gán. Đó Mawu mǐtɔn ɔ́, nǔbláwǔkúnúmɛtɔ́ wɛ, bó ká lɛ́ fá xomɛ; é ná bló bɔ hwlɛngán sín wěziza ɔ́ ná hɔ́n dó mǐ jí sín jǐxwé hwesivɔ́ ɖɔhun; wěziza énɛ́ ɔ́ ná hɔ́n dó mɛ e jínjɔ́n zǐnflú mɛ, bó ɖo kúyɛmɛ lɛ́ɛ jí, bó ná kplá mǐ gbɔn fífá li jí.” Vǐ ɔ́ ɖo susu wɛ, bɔ nǔ e é nyí ɔ́ ɖo wěxo jɛ wɛ. É yi cí gbětótló mɛ káká jɛ gbe e gbe é wá ɖe éɖée xlɛ́ Izlayɛ́li togun ɔ́ é. Hwenɛ́nu ɔ́, Dadá Hlɔ̌ma tɔn Ogwísi ɖe gbeta tɔ́n, ɖɔ è nǐ xa mɛ e ɖo gbɛ ɔ́ mɛ é bǐ. Nukɔn nukɔntɔn e è xa mɛ hwenu e è Kiliniwúsi ɖo tokpɔngán nyí wɛ ɖo Silíi ɔ́ nɛ́. Mɛ ɖokpó ɖokpó nɔ́ yi ná nyǐkɔ ɖo to é ɖésúnɔ tɔn mɛ. Jozɛ́fu lɔ gosín Nazalɛ́ti, ɖo Galilée yíkúngban jí, bó ɖidó Bɛteleyɛ́mu ɖo Judée yíkúngban jí, fí e è ji axɔ́sú Davídi ɖe é, bó ná yi ná nyǐkɔ; ɖó Davídi hɛ́nnu mɛ wɛ é jɔ ɖe. É kplá asi tɔn Mali e ɖo xo hwenɛ́nu é, bó ná yi ná nyǐkɔ. Fínɛ́ wɛ yě ɖe, bɔ vǐjizán Mali tɔn sɔgbe, bɔ é ji nukɔngbéví tɔn, bɔ é nyí súnnu, bɔ é bú avɔ dó e, bó sɔ́ ɛ mlɔ́ nǔ e mɛ kanlin lɛ́ɛ sín nǔɖuɖu nɔ́ nɔ é; ɖó yě mɔ tɛnmɛ ɖo fí e alitanu lɛ́ɛ nɔ yi jɛ é ǎ. Lɛ̌ngbɔ́nyitɔ́ ɖé lɛ́ɛ ɖo gbě énɛ́ ɔ́ jí, bó ɖo zǎn cɔ́ wɛ ɖo lɛ̌ngbɔ́ yětɔn lɛ́ɛ kɔn, ɖo gběhan mɛ. Wɛnsagun Mawu tɔn ɖokpó ká tɔ́n dó yě jí, bɔ susu Mawu tɔn sín wěziza hɔ́n dó yě jí, bɔ xɛsi ɖaxó ɖé jɛ yě bǐ jí. Wɛnsagun ɔ́ ka ɖɔ nú yě ɖɔ: “Mi ma ɖi xɛsi ó, Wɛn Ɖagbe ɖé dó mi gbé wɛ un ja, bɔ é ná nyí awǎjijɛnú ɖaxó nú togun ɔ́ bǐ. È ji Mɛhwlɛ́ngántɔ́ ɖokpó nú mi égbé ɖo axɔ́sú Davídi tomɛ; é wɛ nyí Klísu Aklúnɔ. Nǔ e mi na dó tunwun i ná ɔ́ ɖíe: mi ná mɔ yɛ̌yɛ́ví ɖé, bɔ è bǔ avɔ dó e, bo sɔ́ ɛ mlɔ́ nǔ e mɛ kanlin lɛ́ɛ sín nǔɖuɖu nɔ́ nɔ é.” Azɔn ɖokpó ɔ́, Mawu wɛnsagun wɔ̌buwɔ́bú ɖé lɛ́ɛ wá gɔ́ nú ɖěe wá dó wɛn é, bɔ yě jɛ Mawu mlá jí ɖɔ: “Susu nú Mawu ɖo jǐxwé, fífá ní tíin ɖo ayǐkúngban jí nú gbɛtɔ́ e sín nǔ nyɔ́ Mawu nukún mɛ lɛ́ɛ!” Ée wɛnsagun lɛ́ɛ jó lɛ̌ngbɔ́nyitɔ́ lɛ́ɛ dó, bo lɛ́ kɔ ɖidó jǐxwé ɔ́, lɛ̌ngbɔ́nyitɔ́ lɛ́ɛ ɖɔ nú yěɖée ɖɔ: “Mi nú mi na hun káká yi Bɛteleyɛ́mu, bó ná yi kpɔ́n nǔ e jɛ bɔ Aklúnɔ dó wɛn tɔn sɛ́ dó mǐ é.” Yě fyá bó yi. Yě mɔ Mali kpódó Jozɛ́fu kpó, bó mɔ yɛ̌yɛ́ví ɔ́ ɖo ayǐmlɔ́mlɔ́ ɖo nǔ e mɛ kanlin lɛ́ɛ sín nǔɖuɖu nɔ́ nɔ é mɛ. Ée yě mɔ ɛ ɔ́, yě jɛ xó e wɛnsagun ɔ́ ɖɔ dó yɛ̌yɛ́ví ɔ́ wú ɔ́ ɖɔ jí. Bɔ nǔ e lɛ̌ngbɔ́nyitɔ́ lɛ́ɛ ɖɔ ɔ́ kpácá mɛ e se lɛ́ɛ bǐ. Mali ka yí xó énɛ́ lɛ́ɛ bǐ hɛn dó ayi mɛ, bó nɔ́ ɖo tamɛ lin d'é wú wɛ. Lɛ̌ngbɔ́nyitɔ́ lɛ́ɛ lɛ́ kɔ, bó ɖo susu kpa nú Mawu wɛ, bó ɖo mlǎmlá ɛ wɛ, ɖó nǔ e yě se, bó mɔ lɛ́ɛ bǐ sɔgbe xá lě e wɛnsagun ɔ́ ɖɔ gbɔn nú yě é. Gbe e gbe vǐ ɔ́ ɖó azǎn tántɔn, bɔ è gbo ada n'i ɔ́, è sun nyǐ i ɖɔ “Jezu”; nyǐkɔ énɛ́ ɔ́ wɛ wɛnsagun ɔ́ ko ɖɔ nú Mali ɖ'ayǐ, cóbɔ é wá mɔ xo tɔn. Hwenu e è ɖǒ ná slá wǔ nú Jozɛ́fu kpódó Mali kpó lě e Mɔyízi sɛ́n ɔ́ zɔ́n gbɔn ɔ́ wá su, bɔ é kplá vǐ ɔ́ yi Jeluzalɛ́mu, bó ná sɔ́ ɛ xwlé Mawu. Đó è wlǎn dó Aklúnɔ sɛ́n ɔ́ mɛ ɖɔ jí: “Súnnu nukɔngbéví bǐ wɛ è nǎ sɔ́ ɖó vo nú Aklúnɔ.” Yě ká ɖó ná hɛn xwelé we, abǐ ahwannɛ́ví we, bó ná sɔ́ sá vɔ̌ ná ɖo fínɛ́, lě e Aklúnɔ sɛ́n zɔ́n gbɔn é. Nya ɖé ka ɖo Jeluzalɛ́mu hwenɛ́nu, bɔ è nɔ ylɔ́ ɛ ɖɔ Simɛ́nyɔ́ɔ. Nya énɛ́ ɔ́ nɔ́ xwedó Mawusɛ́n lɛ́ɛ, bó nɔ́ jɛ hun dó Mawu sín azɔ̌ lɛ́ɛ jí. É ká ɖo te kpɔ́n mɛ e ná wá hwlɛ́n Izlayɛ́li togun ɔ́ gán é, bɔ Yɛsinsɛn ɖo kpɔ́ xá ɛ. Yɛsinsɛn ka ko ɖe xlɛ́ ɛ ɖɔ é kún ná kú ma mɔ Klísu Aklúnɔ tɔn ɖó nukún wú ó. Yɛsinsɛn ka wá ɖɔ xó dó ayi mɛ n'i, bɔ é wá sinsɛnxɔ mɛ hwenu e Jezu sín mɛ lɛ́ɛ kplá Jezu wá, bó ja yɛsu e Mɔyízisɛ́n zɔ́n ɔ́ fɔ n'i gbé é. Simɛ́nyɔ́ɔ ka yí vǐ ɔ́ dó awa mɛ, bó dó kú nú Mawu ɖɔ: “Din ɔ́, Aklúnɔ, jǒ nyɛ mɛsɛntɔ́ towe dó, lě e a ko ɖɔ gbɔn é, nú ma yi ɖo fífá mɛ; ɖó nukún ce mɔ hwlɛngán towe e sín nǔ a sɔ́ ɖ'ayǐ nú gbɛtɔ́ lɛ́ɛ bǐ é: é wɛ nyí wěziza e ná ɖe we xlɛ́ akɔta lɛ́ɛ bǐ, bó ká ná nyí susu nú togun towe Izlayɛ́li é.” Nǔ e ɖɔ dó vǐ ɔ́ wú wɛ Simɛ́nyɔ́ɔ ɖe ɔ́ ká nɔ́ kpácá vǐtɔ́ ɔ́ kpódó vǐnɔ ɔ́ kpó. Simɛ́nyɔ́ɔ xo ɖɛ dó yě jí, bó ká ɖɔ nú Mali vǐ ɔ́ sín nɔ ɖɔ: “Nywɛ̌ ɖɔ Mawu sɔ́ vǐ élɔ́, bɔ é ná nyí afɔklɛ́nnú nú Izlayɛ́li ví gěgé, bó ká ná lɛ́ sɔ́ yě mɛ gěgé sí te. É ná nyí wuntun Mawu tɔn e gbɛtɔ́ lɛ́ɛ ná gbɛ́ wǎn ná é, bɔ nǔ e lin wɛ mɛ gěgé ɖe ɔ́ ná jɛ wěxo. Hwi ɖésúnɔ ɔ́, a ka ná mɔ wǔvɛ́, bɔ é ná xo ayi towe zlɛ́ hwǐ ɖɔhun.” Nyɔ̌nu gbeyíɖɔ Mawu tɔn ɖé ka ɖo fínɛ́, bɔ è nɔ ylɔ́ ɛ ɖɔ Ana; Fanuwɛli ví wɛ, bɔ é jɔ ɖo akɔta Acɛ́ɛ tɔn mɛ; xwe tɔn ko sɛ yi tlala. Đyɔ̌vǐ mɛ wɛ é ɖe, bó yi asúxwé. Xwe tɔn tɛ́nwe gúdo wɛ asú tɔn kú jó e dó. É ka sɔ́ da asú ɖě ǎ, káká bó ɖó xwe kanwe-nukún-ɛnɛ (84); é nɔ́ cí sinsɛnxɔ mɛ, bɔ zǎn kpódó kéze kpó ɔ́, é nɔ́ ɖo Mawu sɛn wɛ, ɖo nubláblá kpó ɖɛxixo kpó mɛ. Hwenɛ́nu ɔ́, é wá yě gɔ̌n, bó jɛ Mawu kpa jí, bó jɛ vǐ ɔ́ xó ɖɔ nú mɛ e ɖo te kpɔ́n hwlɛngán Jeluzalɛ́mu tɔn lɛ́ɛ é bǐ jǐ. Ée Mali kpódó Jozɛ́fu kpó bló nǔ e Aklúnɔ sɛ́n zɔ́n lɛ́ɛ bǐ fó ɔ́, yě kpó vǐ ɔ́ kpó lɛ́ kɔ wá yi to yětɔn Nazalɛ́ti ɔ́ mɛ, ɖo Galilée yíkúngban jí. Vǐ ɔ́ ka ɖo susu wɛ, bɔ hlɔ̌nhlɔ́n ɖo wǔ tɔn wá wɛ; nǔnywɛ́ kpé e; bɔ nyɔ̌ná Mawu tɔn ɖo kpɔ́ xá ɛ. Xwewú xwewú ɔ́, Jezu sín tɔ́ kpódó nɔ tɔn kpó nɔ́ yi ɖu Dǐndínwáyixwe ɖo Jeluzalɛ́mu. Hwenu e Jezu ka wá ɖó xwe wěwe ɔ́, yě yi xwe ɔ́ ɖu gbé ɖo Jeluzalɛ́mu lě e yě kó nɔ́ bló gbɔn é. Ée yě ɖu xwe ɔ́ fó ɔ́, yě wlí xwé sín ali; lo ɔ́, Jezu cí Jeluzalɛ́mu, bɔ mɛ tɔn lɛ́ɛ ká tunwun ǎ. Yě vɛdó ɖɔ é kpó émí kpó ɖo yiyi wɛ sín, bó ɖi zɔnlin kéze ɖokpó, cóbó wá jɛ biba ɛ jí gbɔn mɛ yětɔn lɛ́ɛ kpódó mɛtunwunmɛ yětɔn lɛ́ɛ kpán mɛ. Ée yě má mɔ ɛ ǎ ɔ́, yě lɛ́ kɔ wá Jeluzalɛ́mu, bó kpo ɖo biba ɛ wɛ. Azǎn tɔn atɔn gbe wɛ yě wá yi mɔ ɛ ɖo sinsɛnxɔ mɛ, bɔ é ɖo ayǐjínjɔ́n, ɖo sɛ́nkplɔ́nmɛtɔ́ lɛ́ɛ tɛ́ntin, bó ɖo tó ɖó yě wɛ, bó ɖo nǔ kanbyɔ́ yě wɛ, bɔ nǔnywɛ́ tɔn kpódó xósin e ná wɛ é ɖe lɛ́ɛ kpán nɔ́ kpácá mɛ e ɖo tó ɖó e wɛ lɛ́ɛ bǐ. Ée yě wá mɔ ɛ ɔ́, é kpácá yě bǐ, bɔ nɔ tɔn kanbyɔ́ ɛ ɖɔ: “Vǐ ce, nɛ̌ ká gbɔn bɔ a blǒ mɔ̌ xá mǐ, bɔ nyɛ kpódó tɔ́ towe kpo ɖo biba we wɛ adohu adohu?” É yí gbe nú yě ɖɔ: “Étɛ́wú mi ɖo biba mì wɛ? Mi tunwun ɖɔ un ɖó ná ɖo tɔ́ ce sín xɔ mɛ ǎ cé?” Yědɛɛ lɛ́ɛ ka mɔ nǔ jɛ nǔ e ɖɔ nú yě wɛ é ɖe ɔ́ mɛ ǎ. É ka sí te, bó xwedó yě, bɔ yě wá yi Nazalɛ́ti; é nɔ́ se tónú nú yě. Nɔ tɔn ka hɛn nǔ e jɛ nɛ́ lɛ́ɛ bǐ ayi mɛ. Jezu ɖo susu wɛ, bɔ nǔnywɛ́ tɔn ɖo jijɛ jí wɛ. Mawu yí wǎn n'i, bɔ gbɛtɔ́ lɛ́ɛ lɔ yí wǎn n'i. Jǎan gbɔn Judɛ́ɛn tɔ gbé jí, bó nɔ́ ɖɔ nú mɛ lɛ́ɛ ɖɔ: “Mi lɛ́ kɔ sín hwɛ mitɔn lɛ́ɛ gúdo, bó wá lɛ yɛhwesin, nú Mawu ná sɔ́ hwɛ kɛ mi.” Énɛ́ ɔ́, nǔ e è wlǎn dó gbeyíɖɔ Mawu tɔn Ezayíi sín wěma mɛ ɔ́ jɛ; é wɛ nyí ɖɔ: “Mɛ ɖé ɖo xó sú wɛ ɖo gbětótló mɛ bó nɔ́ ɖɔ: ‘Mi bló ali ɖó nú Aklúnɔ, mi jlɔ́ ali tɔn lɛ́ɛ! È ɖǒ ná sú do lɛ́ɛ bǐ, bó ná gbígbá só ɖaxó ɖaxó lɛ́ɛ kpódó kpɛví kpɛví lɛ́ɛ bǐ kpó. È ɖǒ ná jlɔ́ ali gɔ́ndɔ́ngɔ́ndɔ́n lɛ́ɛ, bó bló fí e nyí kpóɖědoɖě lɛ́ɛ ɖó. Énɛ́ ɔ́, mɛ bǐ ná mɔ Mɛhwlɛ́ngántɔ́ e Mawu sɛ́ dó é.’ ” Jǎan nɔ ɖɔ nú mɛ e nɔ nyi ahwan wá yɛhwesin lɛ gbé ɖo gɔ̌n tɔn lɛ́ɛ ɖɔ: “Jakpata kúnkan e mi! Mɛ̌ ká kplɔ́n mi ɖɔ mi ní hɔn nú xomɛsin Mawu tɔn e jǎwe é? Mi nú walɔ mitɔn lɛ́ɛ ní ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo nǔgbó; bónú mi ka gɔn ɖiɖɔ dó ayi mɛ ɖɔ: ‘Ablaxámu ɖésú wɛ dó kún mitɔn.’ Đó má ɖɔ nú mi, awǐnnya e mɔ wɛ mi ɖe nɛ́ lɛ́ɛ ɔ́, Mawu hɛn ɔ́, é ná sɔ́ yě dó ɖó vǐ nú Ablaxámu. Asyɔ́ví ɖíe ko ɖo atín lɛ́ɛ sín ɖɔ wú e; atín e má nɔ́ ná sínsɛ́n ɖagbe ǎ lɛ́ɛ ɔ́, è nǎ gbo yě, bó bɛ́ kɔn nyi myɔ mɛ.” Mɛ lɛ́ɛ ka nɔ kanbyɔ́ Jǎan ɖɔ: “Ani wɛ mǐ ká ɖó ná wa?” Bɔ é yí gbe nú yě ɖɔ: “Ényí mɛɖé ɖo mi mɛ, bó ɖó awu we hǔn, ní ná ɖokpó mɛ e ma ɖó ɖě ǎ é. Mɛ ɖé ká ɖo mi mɛ, bó ɖó nǔ e é ná ɖu é hǔn, ní má xá mɛ e ma ɖó ɖě ǎ é.” Tokwɛ́yítɔ́ lɛ́ɛ lɔmɔ̌ wá yɛhwesin lɛ gbé, bó kanbyɔ́ Jǎan ɖɔ: “ Mɛ̌si, étɛ́ mǐ ɖó ná wa?” Bɔ é yí gbe nú yě ɖɔ: “Mi ma yí akwɛ́ ɖo mɛ ɖěbǔ sí hú gǎn ée è ɖɔ mi ní yí é ó.” Sɔ́ja ɖé lɛ́ɛ lɔmɔ̌ ka kanbyɔ́ ɛ ɖɔ: “Mǐdɛɛ lɛ́ɛ ká lo? Étɛ́ mǐ ka ɖó ná wa?” É yí gbe nú yě ɖɔ: “Mi ma fán asú mɛɖé bó yí akwɛ́ tɔn ó; mi ma ɖó adingban dó mɛɖé nu ó; azɔ̌kwɛ́ e mi nɔ yí ɔ́ ní kpé mi.” Mɛ e ɖo fínɛ́ lɛ́ɛ bǐ wɛ ká ko ɖo nukúnɖíɖó mɛ, bó nɔ́ ɖo linlin wɛ ɖɔ: “Jǎan wɛ ná kó nyí Klísu ɔ́ ǎ cé?” Jǎan ka yí xó, bó ɖɔ nú yě ɖɔ: “Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; amɔ̌, mɛɖé ɖo gǔdo ce jǎwe; mɛ énɛ́ ɔ́ hú gǎn mì, bɔ un nyí mɛɖé, bó ná sixú tún afɔkpakan tɔn lɛ́ɛ vɔ́vɔ́ ǎ; éyɛ́ ɔ́, Yɛsinsɛn kpódó zo kpán wɛ é ná sɔ́ dó lɛ yɛhwesin nú mi. É hɛn atɛ tɔn alɔ mɛ, bó ná fún jinukún tɔn. É ná bɛ́ jinukún ɔ́ dó kɔ́zún mɛ; wɔn lɛ́ɛ ɔ́, é ná bɛ́ yě kɔn nyi zo e ma nɔ cí gbeɖé ǎ é mɛ.” Mɔ̌ wɛ Jǎan ɖɔ xó gěgé, bó dó dó wǔsyɛ́n lanmɛ nú togun ɔ́, bó dó jlá Wɛn Ɖagbe Mawu tɔn nú yě gbɔn é nɛ́. Jǎan ka wá dó hwɛ Elódu ɖó Elodiadi nɔví tɔn sín asi ɔ́ kpódó nǔ nyanya e é dó sin lɛ́ɛ kpán wútu. Ée Jǎan kɛ nu d'é wú n'i gúdo ɔ́, Elódu ka lɛ́ wá dó nǔ e hú gǎn mɔ̌ é sin: é wlí Jǎan dó gan. Hwenu e Jǎan lɛ yɛhwesin nú mɛ e wá fínɛ́ lɛ́ɛ bǐ gúdo ɔ́, é wá lɛ nú Jezu lɔmɔ̌. Ée Jezu lɛ yɛhwesin gúdo ɔ́, é jɛ ɖɛ xo jí, bɔ jǐnukúnsin hun, bɔ Yɛsinsɛn sɔ́ ahwannɛ́ sín agbaza, bó jɛ te dó jǐ tɔn. Gbe ɖé ká ɖi sín jǐxwé, bó ɖɔ: “Vǐ vívɛ́ná wɛ a nyǐ nú mì, bɔ xomɛ nɔ hun mì dó wútu towe tlala.” Xwe gban (30) mɔ̌ wɛ Jezu ɖó, hwenu e é jɛ azɔ̌ tɔn jí é. Mɛ lɛ́ɛ nɔ lin ɖɔ Jozɛ́fu ví wɛ é nyí, Jozɛ́fu ka nyí Heli ví, bɔ Heli nyí Matati ví, bɔ Matati nyí Levíi ví, bɔ Levíi nyí Mɛluci ví, bɔ Mɛluci nyí Ianáyi ví, bɔ Ianáyi nyí Jozɛ́fu ví, bɔ Jozɛ́fu nyí Matatiyási ví, Matatiyási ka nyí Amɔ́si ví, bɔ Amɔ́si nyí Nawúmu ví, bɔ Nawúmu nyí Hɛslí ví, bɔ Hɛslí nyí Nagayi ví, Nagayi ka nyí Maatu ví, bɔ Maatu nyí Matatiyási ví, bɔ Matatiyási nyí Semɛ́ɛ ví, bɔ Semɛ́ɛ nyí Iwɔsɛ́ki ví, bɔ Iwɔsɛ́ki nyí Iwɔda ví, bɔ Iwɔda nyí Iwɔanáni ví, Iwɔanáni ka nyí Hlesa ví, bɔ Hlesa nyí Zolobabɛ́li ví, Zolobabɛ́li ka nyí Calutiyɛ́li ví, bɔ Calutiyɛ́li nyí Nɛli ví, Nɛli ka nyí Mɛluci ví, bɔ Mɛluci nyí Adi ví, bɔ Adi nyí Kɔsamu ví, Kɔsamu nyí Ɛlumadámu ví, bɔ Ɛlumadámu nyí Ɛ́ɛ ví, Bɔ Ɛ́ɛ nyí Jezu ví, bɔ Jezu nyí Eliɛsɛ́ɛ ví, bɔ Eliɛsɛ́ɛ ka nyí Iwɔlímu ví, bɔ Iwɔlímu nyí Matati ví, bɔ Matati nyí Levíi ví, Levíi ka nyí Simɛnyɔ́ni ví, bɔ Simɛnyɔ́ni nyí Judáa ví, bɔ Judáa nyí Jozɛ́fu ví, bɔ Jozɛ́fu nyí Iwɔnámu ví, bɔ Iwɔnámu nyí Eliakímu ví, bɔ Eliakímu nyí Mɛlea ví, Mɛlea ka nyí Mɛnína ví, bɔ Mɛnína nyí Matatáa ví, bɔ Matatáa nyí Natáni ví, bɔ Natáni nyí Davídi ví. Davídi ka nyí Jɛsée ví, bɔ Jɛsée nyí Ovɛ́di ví, bɔ Ovɛ́di nyí Bowozi ví, bɔ Bowozi nyí Saluma ví, bɔ Saluma nyí Naxicɔ́ni ví, Naxicɔ́ni ka nyí Aminadabu ví, bɔ Aminadabu nyí Adiminu ví, bɔ Adiminu nyí Aani ví, bɔ Aani nyí Ɛslɔ́ni ví, bɔ Ɛslɔ́ni nyí Pɛlɛ́si ví, bɔ Pɛlɛ́si nyí Judáa ví, Judáa ka nyí Jakɔ́bu ví, bɔ Jakɔ́bu nyí Izáki ví, bɔ Izáki nyí Ablaxámu ví, bɔ Ablaxámu nyí Tɛláxi ví, bɔ Tɛláxi nyí Naxɔ́ɔ ví, Naxɔ́ɔ ka nyí Selúgi ví, bɔ Selúgi nyí Hlewu ví, Hlewu ka nyí Pɛlɛ́gi ví, bɔ Pɛlɛ́gi nyí Ebɛ́ɛ ví, Ebɛ́ɛ ka nyí Cɛláxi ví, bɔ Cɛláxi nyí Kayinamu ví, bɔ Kayinamu nyí Aapakisadu ví, Aapakisadu ka nyí Sɛ́mu ví, bɔ Sɛ́mu nyí Nɔwée ví, bɔ Nɔwée nyí Lamɛki ví, Lamɛki ka nyí Matusala ví, bɔ Matusala nyí Henɔci ví, bɔ Henɔci nyí Yɛlɛ́di ví, Yɛlɛ́di ka nyí Maxalalɛ́li ví; Maxalalɛ́li ka nyí Kenáni ví, bɔ Kenáni nyí Enɔci ví, Enɔci ka nyí Sɛ́ti ví, bɔ Sɛ́ti nyí Adámu ví, bɔ Adámu nyí Mawu ví. Jezu lɛ́ kɔ sín Judɛ́ɛn tɔ ɔ́ tó, bɔ Yɛsinsɛn gɔ́ ayi mɛ n'i, bó kplá ɛ yi gbětótló mɛ. Fínɛ́ ɔ́, awǒvi tɛ́n ɛ kpɔ́n xɔ azǎn kanɖé (40). Azǎn énɛ́ lɛ́ɛ mɛ ɔ́, é ɖu nǔ ɖěbǔ ǎ, bɔ ée azǎn kanɖé (40) énɛ́ lɛ́ɛ fó ɔ́, xovɛ́ sin i. Awǒvi ka ɖɔ n'i ɖɔ: “Ényí Mawu ví jɛ́n a nyǐ nǔgbó hǔn, ɖe gbe dó awǐnnya élɔ́ ní húzú nǔɖuɖu.” Jezu ka yí gbe n'i ɖɔ: “É ko wlán dó Mawuxówéma ɔ́ mɛ ɖɔ jí: ‘Nǔɖuɖu kɛ́ɖɛ́ wɛ gbɛtɔ́ nɔ ɖu, bó nɔ́ nɔ gbɛ ǎ.’ ” Awǒvi ka wá kplá ɛ yi aga fí ɖé, bɔ nukúnxwixwe ɖokpó mɛ ɔ́, é xlɛ́ ɛ axɔ́súɖuto gbɛmɛ fí tɔn lɛ́ɛ bǐ, lobo ɖɔ n'i ɖɔ: “Un ná ná we to énɛ́ lɛ́ɛ, kpódó dɔkun yětɔn lɛ́ɛ bǐ kpó, ɖó alɔ ce mɛ wɛ è sɔ́ nǔ lɛ́ɛ bǐ dó, bɔ un nɔ ná mɛ e jló mì é. Nú a ɖe kɔ́ nú mì ɔ́, nǔ énɛ́ lɛ́ɛ bǐ ná nyí towe.” Jezu ka yí gbe n'i ɖɔ: “È ko wlán dó Mawuxówéma ɔ́ mɛ ɖɔ jí: ‘Aklúnɔ Mawu towe wɛ a nǎ ɖe kɔ́ ná, lobo ná sɛn é ɖokpónɔ géé.’ ” Awǒvi ka lɛ́ kplá Jezu yi Jeluzalɛ́mu, bó sɔ́ ɛ ɖó sinsɛnxɔ ɔ́ ta aga ɖéé, bó ɖɔ n'i ɖɔ: “Mawu ví jɛ́n a nyǐ nǔgbó hǔn, lɔ̌n sín fí yi jɛ dodomɛ; ɖó è ko wlán dó Mawuxówéma ɔ́ mɛ ɖɔ jí: ‘Mawu ná zɔ́n wɛnsagun tɔn lɛ́ɛ ɖɔ yě ní kpé nukún wǔ we.’ È ka lɛ́ wlán ɖɔ jí: ‘Yě ná hɛn we dó alɔ mɛ, bónú a ma yi klɛ́n afɔ dó awǐnnya ɖé wú ó.’ ” Jezu yí gbe n'i ɖɔ: “È lɛ̌ wlán ɖɔ jí: ‘Ma tɛ́n Aklúnɔ Mawu towe kpɔ́n ó.’ ” Ée awǒvi tɛ́n ɛ kpɔ́n gbɔn ali bǐ nu fó ɔ́, é tó jó e dó hwɛ̌. Jezu lɛ́ kɔ wá yi Galilée, bɔ Yɛsinsɛn sín hlɔ̌nhlɔ́n ɖo kpɔ́ xá ɛ, bɔ nyǐkɔ tɔn gba kpé gbě ɔ́ bǐ jǐ. É nɔ́ ɖo nǔ kplɔ́n mɛ wɛ ɖo kplɔ́ngbasá lɛ́ɛ, bɔ mɛ bǐ nɔ ɖo kpikpa ɛ wɛ. Jezu ka wá Nazalɛ́ti fí e é su ɖe é. É yi kplɔ́ngbasá gbɔjɛzán Jwifu lɛ́ɛ tɔn gbe, lě e é ko nɔ bló gbɔn é. É sí te bó ja Mawuxó xa gbé, bɔ è sɔ́ gbeyíɖɔ Mawu tɔn Ezayíi sín wěma n'i. Ée é vlɔ́n wěma ɔ́ é ɔ́, é mɔ xógbe élɔ́ lɛ́ɛ: “Yɛ Aklúnɔ tɔn ɖo kpɔ́ xá mì, bɔ Mawu sɔ́ mì nú má yi jlá Wɛn Ɖagbe tɔn wamamɔnɔ lɛ́ɛ; é sɛ́ mì dó, nú má yi ɖɔ nú kannumɔ lɛ́ɛ ɖɔ è jǒ yě; nú má yi ɖɔ nú nukúntíntɔ́nnɔ lɛ́ɛ ɖɔ nukún yětɔn hun, nú má yi hwlɛ́n mɛ e táfú wɛ è ɖe lɛ́ɛ gán. Nú má jlá mɛ bǐ ɖɔ xwe e mɛ Aklúnɔ ná jɔwǔ mɛ dó é wá.” É ka mlá wěma ɔ́, bó sɔ́ nú mɛ e nɔ kpé nukún dó kplɔ́ngbasá ɔ́ sín nǔ lɛ́ɛ wú é, lobo jínjɔ́n ayǐ, bó ná kplɔ́n nǔ mɛ. Mɛ e ɖo fínɛ́ lɛ́ɛ bǐ sín nukún ka ɖo jǐ tɔn. Énɛ́ ɔ́, é jɛ ɖiɖɔ nú yě jí ɖɔ: “Xó e un xa nú mi din ɖo Mawuxówéma ɔ́ mɛ ɔ́ jɛ égbé, hwenu e mi ɖo sise dó wɛ é.” Yě bǐ nɔ ɖe kúnnu ɖagbe n'i, bɔ wǔjɔmɛ xó e nɔ tɔ́n sín nu tɔn mɛ é nɔ́ kpácá yě, bɔ yě nɔ ɖɔ: “Jozɛ́fu ví ɔ́ jɛ́n ka nɛ́ hǔn.” Jezu ka ɖɔ nú yě ɖɔ jí: “Un nywɛ́ dandan ɖɔ mi ná dó lǒ élɔ́ nú mì ɖɔ: ‘Azɔngbɔnúmɛtɔ́, gbɔ azɔn nú hwiɖée. Nǔ tobutóbú e a jlɛ̌ ɖo Kafaanawúmu bɔ mǐ se ɔ́, jlɛ̌ ɖě ɖo to towe mɛ fí.’ ” Énɛ́ ɔ́, Jezu lɛ́ ɖɔ nú yě ɖɔ: “Má ɖɔ nǔgbó nú mi: è nɔ yí gbeyíɖɔ Mawu tɔn ɖé ganjí ɖo to tɔn mɛ ǎ. Má ɖɔ nǔgbó nú mi: ɖo gbeyíɖɔ Mawu tɔn Elíi hwenu ɔ́, akú ɖó xɔ xwe atɔn adaɖé ɖo Izlayɛ́li, bɔ adɔ ɖaxó ɖé tɔ́n gbɔn to ɔ́ bǐ mɛ. Asúkúsi gěgé ka ɖo Izlayɛ́li hwe énɛ́ ɔ́ nu, có Mawu ka sɛ́ Elíi dó ɖokpó yětɔn gɔ́n ǎ; é nyɔ́ wa ɔ́, asúkúsi e ɖo Salɛpúta, ɖo Sidɔ́ɔn yíkúngban jí ɔ́ gɔ́n wɛ Mawu sɛ́ ɛ dó. Mɔ̌ ɖokpó ɔ́, ɖo gbeyíɖɔ Mawu tɔn Elizée hwenu ɔ́, mɛ gěgé ɖo guduzɔn jɛ wɛ ɖo Izlayɛ́li, có azɔn gbɔ nú ɖokpó yětɔn ǎ; Naamáni Silíinu ɔ́ kɛ́ɖɛ́ sín azɔn wɛ gbɔ.” Đěe yě se mɔ̌ ɔ́, xomɛ sin yě bǐ ɖo kplɔ́ngbasá ɔ́, bɔ yě sí te, bó dɔn ɛ yi to ɔ́ gúdo, bó kplá ɛ yi só e jí to yětɔn ɖe é ta aga ɖéé, bó ná kpíkpé e nyi dodomɛ. Jezu ka gbɔn tɛ́ntin yětɔn, bó ɖidó. Jezu yi Kafaanawúmu ɖo Galilée yíkúngban jí, bó ɖo nǔ kplɔ́n mɛ lɛ́ɛ wɛ gbɔjɛzán Jwifu lɛ́ɛ tɔn gbe. Nǔkplɔ́nmɛ tɔn kpácá mɛ e ɖo tó ɖó e wɛ lɛ́ɛ bǐ, ɖó é nɔ́ ɖɔ xó kpódó acɛkpikpa kpó. Dǎwe ɖé ka ɖo kplɔ́ngbasá ɔ́ hwenɛ́nu, bɔ yɛ nyanya ɖo jǐ tɔn. Dǎwe ɔ́ sú xó tlílí bó ɖɔ: “Yěege! Étɛ́ mǐ kpó hwi kpó ká kpédó, Jezu Nazalɛ́tinu? Kún mǐtɔn sú dó gbé wɛ a ja bó wá a? Un tunwun mɛ e a nyǐ é; mɛ mímɛ́ Mawu tɔ́n wɛ a nyǐ.” Jezu ka ɖe gbe dó e ɖɔ: “Nɔ abwɛ̌, bó gosín dǎwe élɔ́ jí.” Yɛ nyanya ɔ́ ka zin dǎwe ɔ́ dɛ́ ɖo mɛ bǐ nukún mɛ, bó gosín jǐ tɔn, nǔ ɖěbǔ ka wa dǎwe ɔ́ ǎ. É kpácá yě bǐ, bɔ yě nɔ́ kanbyɔ́ yěɖée ɖɔ jí: “Xó tɛ́ ká ɖíe? É nɔ́ ɖe gbe dó yɛ nyanya lɛ́ɛ, kpódó acɛkpikpa kpó, kpódó hlɔ̌nhlɔ́n kpó, bɔ yě nɔ́ se gbe n'i.” Bɔ Jezu sín nyǐkɔ gba kpé gbě énɛ́ ɔ́ bǐ jǐ. Jezu tɔ́n sín kplɔ́ngbasá ɔ́, bó yi Sinmɔ́ɔ sín xwé gbe. Avivɔ ɖaxó ɖé ká ɖo Sinmɔ́ɔ sín asinɔ jí hwenɛ́nu, bɔ yě ɖɔ xó tɔn nú Jezu. Jezu ka sɛkpɔ́ azinzɔnnɔ ɔ́, bó ɖe gbe dó avivɔ ɔ́, bɔ avivɔ ɔ́ kɔ́n n'i, bɔ é sí te azɔn ɖokpó, bó jɛ jǒnɔ yětɔn yí jí. Ée hwe yi xɔ ɔ́, mɛ e sín mɛ ɖo azɔn tɛnmɛ tɛnmɛ jɛ wɛ lɛ́ɛ kplá azinzɔnnɔ yětɔn lɛ́ɛ wá nú Jezu, bɔ é ɖó alɔ yě wú ɖokpó ɖokpó, bó gbɔ azɔn nú yě. Yɛ nyanya lɛ́ɛ lɔmɔ̌ gosín mɛ gěgé jí, bó nɔ́ sú xó ɖɔ: “Mawu ví wɛ a nyǐ.” Lo ɔ́, Jezu nɔ wa adǎn dó yě, bó nɔ́ lɔn nú yě ní ɖɔ xó ǎ, ɖó yě tunwun ɖɔ é wɛ nyí Klísu ɔ́. Ée ayǐ hɔ́n tlóló ɔ́, Jezu tɔ́n yi fí e mɛɖé má ná dó tagba n'i ɖe ǎ é. Mɛ lɛ́ɛ ka jɛ biba ɛ jí. Ée yě wá mɔ ɛ ɔ́, yě hɛn ɛ ɖó te nú é má gosín yě gɔ̌n ó. É ka ɖɔ nú yě ɖɔ: “ Axɔ́súɖuɖu Mawu tɔn ɔ́, un ɖó ná yi jlá Wɛn Ɖagbe tɔn to ɖě lɛ́ɛ lɔmɔ̌, ɖó nǔ è wú wɛ è sɛ́ mì dó ɔ́ nɛ́.” É ka nɔ ɖo Mawuxó jlá wɛ gbɔn kplɔ́ngbasá lɛ́ɛ, ɖo Judée yíkúngban jí. Jezu ɖo te ɖo Jenɛzalɛ́ti tɔ tó gbe ɖokpó, bɔ mɛ gěgé nyɛ́sú i, bó ná se Mawuxó. É ka mɔ tɔjíhún we ɖo tɔ ɔ́ tó, bɔ ɖɔnyitɔ́ lɛ́ɛ ko jɛ te sín mɛ, bó ɖo ɖɔ yětɔn lɛ́ɛ hú wɛ. Jezu byɔ́ tɔjíhún e nyí Sinmɔ́ɔ tɔn é mɛ, bó byɔ́ ɛ ɖɔ ní sɛ sín tɔ ɔ́ tó kpɛɖé; é ɖésú ka jínjɔ́n ayǐ ɖo tɔjíhún ɔ́ mɛ, bó jɛ nǔ kplɔ́n mɛ lɛ́ɛ jí sɛ́ dó. Ée é kplɔ́n nǔ yě vɔ ɔ́, é ɖɔ nú Sinmɔ́ɔ ɖɔ: “Sɛ yi tɔzan mɛ, bónú hwi kpódó hǎgbɛ́ towe lɛ́ɛ kpó ní dó ɖɔ mitɔn lɛ́ɛ tɔ, bó ná wlí hweví.” Sinmɔ́ɔ ka yí gbe n'i ɖɔ: “ Mɛ̌si, mǐ jɛ tagba zǎn ɔ́ mɛ káká, mǐ ká mɔ nǔɖé wlí ǎ. Lo ɔ́, ée a ka ɖɔ mɔ̌ ɔ́, un ná dó ɖɔ lɛ́ɛ tɔ.” Yě ká jɛ tɔzan ɔ́ mɛ, bó dó ɖɔ lɛ́ɛ tɔ nǔgbó, bɔ hweví e yě wlí lɛ́ɛ sukpɔ́ káká, bɔ ɖɔ lɛ́ɛ jɛ kan wɛ́n jí. Yě gbɔ bó zé alɔ dó ylɔ́ gbɛ̌ yětɔn e ɖo tɔjíhún wegɔ́ ɔ́ mɛ lɛ́ɛ, ɖɔ yě ní wá dó alɔ émí. Yě ká wá, bó bɛ́ hweví dó tɔjíhún we lɛ́ɛ mɛ, bɔ hun lɛ́ɛ gɔ́ káká bó ɖibla syɔ́. Ée Sinmɔ́ɔ Piyɛ́ɛ mɔ mɔ̌ ɔ́, é húzú jɛ kpo ɖo Jezu sá mɛ, bó ɖɔ n'i ɖɔ: “Nɔ zɔ nú mì Aklúnɔ, ɖó hwɛhutɔ́ wɛ nú mì.” Lě e hweví e yě wlí ɔ́ sukpɔ́ gbɔn ɔ́ nyí nǔ bó kpácá Piyɛ́ɛ kpódó mɛ e ɖo fínɛ́ xá ɛ lɛ́ɛ bǐ kpán. Mɔ̌ jɛ́n wɛ é lɛ́ kpácá hǎgbɛ́ tɔn Zebeɖée ví, Jaki kpódó Jǎan kpó ɔ́ nɛ́. Lo ɔ́, Jezu ɖɔ nú Sinmɔ́ɔ ɖɔ: “Ado ma hu we ó; bɛ́ sín din ɔ́, gbɛtɔ́ lɛ́ɛ wɛ a nǎ nɔ́ dɔn wá gɔ̌n ce.” Yě ká kun tɔjíhún yětɔn lɛ́ɛ wá jɛ agě jǐ, bó jó nǔ bǐ dó, lobo xwedó Jezu. Jezu ka wá ɖo toxo ɖaxó ɖé mɛ, bɔ nya ɖé wá xwetɔ́n, bɔ gudu kpé wú tɔn bǐ. Ée é mɔ Jezu ɔ́, é xwe agbɔ̌nnusú do, bó jɛ vo sa n'i jí ɖɔ: “Aklúnɔ, nú é jlǒ we ɔ́, a hɛn ɔ́, a nǎ gbɔ azɔn nú mì.” Jezu ka dlɛ́n alɔ, bó ɖó wǔ tɔn, bó ɖɔ: “Un jló, azɔn towe ní gbɔ.” Tlóló ɔ́, nya ɔ́ sín azɔn gbɔ. Jezu ka dó sɛ́n n'i ɖɔ: “Ma ɖɔ nú mɛɖé cáwún ó, lo ɔ́, sɔ́ lě e a ɖe ɔ́ yi xlɛ́ vɔ̌sánú-xwlémawutɔ́ lɛ́ɛ, bó ná wǔsláslá sín agban e xó Mɔyízi ɖɔ é, bó ná dó ɖe xlɛ́ mɛ bǐ ɖɔ azɔn towe gbɔ nǔgbó.” É ká ɖɔ mɔ̌ có nyǐkɔ Jezu tɔn lɛ́ ɖo gbigba kpé d'é jí wɛ, bɔ mɛ lɛ́ɛ nɔ́ nyi ahwan wá se xó tɔn, bónú é ná gbɔ azɔn nú yě. Jezu ka nɔ yi cí fí e mɛɖé má ɖe ǎ é, bó nɔ́ ɖo ɖɛ xo wɛ. Jezu ɖo nǔ kplɔ́n mɛ wɛ gbe ɖokpó, bɔ Falizyɛn ɖé lɛ́ɛ kpódó sɛ́nkplɔ́nmɛtɔ́ ɖé lɛ́ɛ kpó wá jínjɔ́n akpá tɔn. Gletoxo Galilée tɔn kpódó Judée tɔn kpó, kpódó Jeluzalɛ́mu tɔn kpó mɛ wɛ yě gosín. Hlɔ̌nhlɔ́n Mawu tɔn ɖo Jezu jí, bɔ é nɔ́ dó gbɔ azɔn. Mɛ ɖé lɛ́ɛ ká sɔ́ nya ayǐsónɔ ɖé ɖó zan jí, bó wá xwetɔ́n, bó ɖo lě e yě ná wa gbɔn, bó ná sɔ́ ɛ byɔ́ xɔ e mɛ Jezu ɖe é mɛ, bó ná sɔ́ ɛ ɖó nukɔn tɔn ɔ́ ba wɛ. Ée ahwan e kplé dó Jezu ɔ́ sukpɔ́ káká bɔ yě ma tunwun fí e yě ná zé e gbɔn yi Jezu gɔ́n é ǎ ɔ́, yě gbɔ bó xá xɔ e mɛ Jezu ɖe ɔ́ ta, bó kɔ́n xɔ ɔ́ ɖo akpá ɖokpó, bɔ azinzɔnnɔ ɔ́ ɖo zan jí, bɔ yě zé e gbɔn fínɛ́ yi jɛ Jezu sá mɛ, ɖo mɛ lɛ́ɛ tɛ́ntin. Ée Jezu mɔ lě e yě ɖi nǔ sɔ́ é ɔ́, é ɖɔ nú azinzɔnnɔ ɔ́ ɖɔ: “Xɔ́ntɔn ce, è sɔ́ hwɛ towe lɛ́ɛ kɛ we.” Sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpán ka jɛ linlin jí ɖɔ: “Mɛ̌ ka nyí nya élɔ́, bó nɔ́ nylá nu dó Mawu wú mɔ̌? Mɛ̌ ká sixú sɔ́ hwɛ kɛ mɛ zɛ Mawu ɖokpónɔ wú?” Jezu ka mɔ nǔ jɛ linlin yětɔn lɛ́ɛ wú, bó yí xó, lobo kanbyɔ́ yě ɖɔ: “Aniwútu mi ka ɖo nǔ mɔ̌hunkɔtɔn lɛ́ɛ lin dó ayi mɛ wɛ? Ényí è ɖɔ: ‘È sɔ́ hwɛ towe lɛ́ɛ kɛ we,’ abǐ: ‘Sí te bó ɖi zɔnlin’ ɔ́, ɖě tɛ́ ka bɔ kun hú ɖě? Lo ɔ́, un jló ɖɔ mi ní tunwun ɖɔ nyɛ Gbɛtɔ́ví ɔ́, ɖó acɛ e sɔ́ hwɛ kɛ mɛ ɖo ayǐkúngban jí é.” Ée é ɖɔ mɔ̌ ɔ́, é wá ɖɔ nú ayǐsónɔ ɔ́ ɖɔ: “Un ɖe gbe nú we, sí te, sɔ́ zan towe, bó yi xwé.” Azɔn ɖokpó ɔ́, ayǐsónɔ ɔ́ sí te ɖo yě bǐ nukún mɛ, bó sɔ́ zan e jí è sɔ́ ɛ mlɔ́ ɔ́, bó ɖidó xwé, lobo jɛ susu kpa nú Mawu jí. Ahwi xo yě bǐ, bɔ yě jɛ susu kpa nú Mawu jí. Xɛsi ɖo yě jí, bɔ yě nɔ ɖɔ: “Nǔ e mǐ ma mɔ kpɔ́n gbeɖé ǎ wɛ mǐ mɔ égbé!” Énɛ́ ɔ́ gúdo ɔ́, Jezu tɔ́n, bó mɔ tokwɛ́yítɔ́ ɖé ɖo ayǐjínjɔ́n ɖo denuzɔ́watɔ́ lɛ́ɛ xɔsá, bɔ è nɔ ylɔ́ ɛ ɖɔ Levíi. Jezu ka ɖɔ n'i ɖɔ: “Xwedó mì.” Bɔ Levíi sí te, bó jó nǔ bǐ dó, lobo xwedó e. Levíi wá ylɔ́ agɔ̌ ɖaxó ɖokpó nú Jezu ɖo xwé tɔn gbe. Tokwɛ́yítɔ́ gěgé kpódó mɛ gěgé ɖěvo lɛ́ɛ kpán wá ɖo nǔ ɖu xá yě wɛ. Bɔ Falizyɛn lɛ́ɛ kpódó sɛ́nkplɔ́nmɛtɔ́ yětɔn lɛ́ɛ kpó ka jɛ nǔ hlún ɖɔ jí, bó nɔ́ kanbyɔ́ ahwanvú Jezu tɔn lɛ́ɛ ɖɔ: “Aniwú mi nɔ ɖu nǔ, bó nɔ́ nu ahan xá tokwɛ́yítɔ́ lɛ́ɛ kpódó gbɛnyanyazántɔ́ lɛ́ɛ kpán?” Jezu ka yí gbe nú yě ɖɔ: “Mɛ e ɖo ganjí lɛ́ɛ wɛ azɔngblétɔ́ nú hu dó ǎ, lo ɔ́, mɛ e ɖo azɔn jɛ wɛ lɛ́ɛ wɛ nǔ tɔn hu dó. Hwɛjijɔnɔ lɛ́ɛ ylɔ́ gbé wɛ un wá ǎ, lo ɔ́ hwɛhutɔ́ lɛ́ɛ ylɔ́ gbé wɛ un wá, nú yě ná lɛ́ kɔ sín hwɛ yětɔn lɛ́ɛ gúdo.” Mɛ ɖé lɛ́ɛ ɖɔ nú Jezu ɖɔ: “Jǎan sín ahwanvú lɛ́ɛ kpódó Falizyɛn lɛ́ɛ tɔn lɔmɔ̌ kpán nɔ́ blá nu hwɛhwɛ, lobo nɔ xo ɖɛ; lo ɔ́, ahwanvú towe lɛ́ɛ ka nɔ ɖo nǔ ɖu wɛ, bó nɔ́ ɖo ahan nu wɛ.” Jezu ka yí gbe nú yě ɖɔ: “Mi sixú ɖó mɛ e è ylɔ́ wá alɔ wlíwlí gbé lɛ́ɛ xovɛ́, hwenu e asisúnɔ ɔ́ kpó ɖo kpɔ́ xá yě ɔ́ a? Nǔ sixú nyí mɔ̌ ǎ; amɔ̌ hwenu ná wá su, bɔ è nǎ wá zé asisúnɔ ɔ́ gǎnnugǎnnu sín yě gɔ̌n, hwe énɛ́ ɔ́ nu ɔ́, yě ná blá nu.” É ka lɛ́ dó lǒ élɔ́ nú yě ɖɔ: “Mɛ ɖé nɔ́ tlɛ́n awu yɔ̌yɔ́, bó nɔ́ sɔ́ xwɛ tɔn dó ɖɛ́ awu xóxó ná ǎ; ényí è bló mɔ̌ ɔ́, è nǎ hɛn awu yɔ̌yɔ́ ɔ́ vún; bɔ avɔxwɛ yɔ̌yɔ́ ɔ́ ká ná lɛ́ sɔgbe xá awu xóxó ɔ́ ǎ. Mɛ ɖé ka nɔ́ sɔ́ vɛ̌ɛn yɔ̌yɔ́ kɔn dó anyǔglo xóxó mɛ ǎ; ɖó nú è blǒ mɔ̌ ɔ́, vɛ̌ɛn yɔ̌yɔ́ ɔ́ ná hɛn anyǔglo xóxó ɔ́ wú, bɔ vɛ̌ɛn ɔ́ ná kɔn nyi gbě, bɔ anyǔglo lɛ́ɛ ná lá mɛ. Lo ɔ́, vɛ̌ɛn yɔ̌yɔ́ ɔ́, anyǔglo yɔ̌yɔ́ mɛ wɛ è nɔ kɔn dó. Mɛ ɖé nɔ́ nu vɛ̌ɛn xóxó, bó sɔ́ nɔ́ ba ná nu vɛ̌ɛn yɔ̌yɔ́ ǎ, ɖó é nɔ́ ɖɔ: ‘Vɛ̌ɛn xóxó ɔ́ nyɔ́.’ ” É wá su gbɔjɛzán Jwifu lɛ́ɛ tɔn gbe gbe ɖokpó, bɔ Jezu ɖo jinukúngle ɖé mɛ gbɔn dín wɛ é kpódó ahwanvú tɔn lɛ́ɛ kpán. Ée yě ɖo yiyi wɛ ɔ́, ahwanvú tɔn lɛ́ɛ jɛ jinukún lɛ́ɛ ba jí, bó nɔ́ nyínyɛ́, lobo nɔ ɖu. Falizyɛn ɖé lɛ́ɛ ka mɔ yě, bó kanbyɔ́ yě ɖɔ: “Étɛ́wú mi ka ɖo nǔ e sɛ́n ɔ́ gbɛ́ ɖɔ è ma wa gbɔjɛzán gbe ó ɔ́ wa wɛ?” Jezu ka lɛ́ ɖɔ nú yě ɖɔ: “Nyɛ Gbɛtɔ́ví ɔ́ wɛ kpa acɛ dó gbɔjɛzán ɔ́ nu.” É wá su gbɔjɛzán gbe ɖěvo, bɔ Jezu yi kplɔ́ngbasá, bó ɖo nǔ kplɔ́n mɛ wɛ. Nya ɖé ká ɖo fínɛ́, bɔ alɔ tɔn ɖisí ɔ́ kú. Sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó ká jɛ Jezu cɔ́ jí ɖɔ é ná gbɔ azɔn nú mɛ gbɔjɛzán gbe wɛ a jí, bó ná mɔ nǔ e wú yě ná ɖó dó, bó ná sixú ɖó hwɛ n'i é. Lo ɔ́, Jezu ka tunwun nǔ e lin wɛ yě ɖe ɔ́, bó ɖɔ nú nya alɔkúnánɔ ɔ́ ɖɔ: “Sí te, bó wá jɛ tɛ́ntin fí.” Bɔ nya ɔ́ sí te, bó wá nɔ te ɖo tɛ́ntin yětɔn. Bɔ Jezu ɖɔ nú mɛ lɛ́ɛ ɖɔ: “Sɛ́n mǐtɔn ná gbe ɖɔ è nǐ wa ɖagbe abǐ nyanya gbɔjɛzán gbe a? Mɛ wɛ sɛ́n ɔ́ ɖɔ è nǐ hwlɛ́n gán a, abǐ è nǐ hu mɛ?” É kpɔ́n yě bǐ xaan lɛ́ dó, bó ɖɔ nú nya ɔ́ ɖɔ: “Dlɛ̌n alɔ towe.” Bɔ nya ɔ́ dlɛ́n alɔ, bɔ alɔ ɔ́ jɛ tɛn tɔn mɛ. Xomɛ ka sin yě tlala, bɔ yě jɛ wě ɖe dó nǔ e yě ná wa xá Jezu ɔ́ wú jí. Jezu yi ɖɛ xo gbé gbe ɖokpó ɖo só ɖé jí, bó xo ɖɛ zǎn mɛ káká bɔ ayǐ hɔ́n. Ée ayǐ wá hɔ́n ɔ́, é ylɔ́ ahwanvú tɔn lɛ́ɛ, bó cyán mɛ wěwe ɖo yě mɛ, bó sun nyǐ yě ɖɔ mɛsɛ́dó: Yě mɛ e é cyán lɛ́ɛ ɖíe: Sinmɔ́ɔ e è sun nyǐ ɖɔ Piyɛ́ɛ é, Andlé Piyɛ́ɛ nɔví ɔ́, Jaki, Jǎan, Filípu, Baatelemíi, Matíe, Tɔmáa, Jaki Alufée ví ɔ́, Sinmɔ́ɔ hunjɛdótojítɔ́ ɔ́, Judáa Jaki ví ɔ́, kpódó Judási Isikaliɔ́ti e wá sa Jezu é kpán. Jezu kpódó mɛ e é cyán lɛ́ɛ kpó jɛ te sín só ɔ́ jí wá ayǐkúngban wɛnjɛ jí. Ahwanvú tɔn wɔ̌buwɔ́bú ɖé lɛ́ɛ ɖo fínɛ́, bɔ mɛ gěgé gosín Judée, bó gosín Jeluzalɛ́mu, lobo gosín xutó, ɖo Tíi kpódó Sidɔ́ɔn kpán gbé jí, bó wá ja tó ɖó e gbé, bónú é ná gbɔ azɔn yětɔn lɛ́ɛ nú yě, bɔ mɛ e yɛ nyanya lɛ́ɛ ɖo tagba dó ná wɛ lɛ́ɛ ɔ́, é gbɔ azɔn nú yě. Mɛ lɛ́ɛ bǐ nɔ́ ba ná ɖó alɔ wǔ tɔn, ɖó hlɔ̌nhlɔ́n ɖé nɔ tɔ́n sín lan tɔn mɛ, bó nɔ́ gbɔ azɔn nú yě mɛ bǐ. Jezu ka nyi kɔ kpɔ́n ahwanvú tɔn lɛ́ɛ, bó ɖɔ nú yě ɖɔ: “Nǔ nyɔ́ nú mi mɛ e nyí wamamɔnɔ lɛ́ɛ, ɖó midɛɛ lɛ́ɛ jí wɛ Mawu ná ɖu axɔ́sú ɖe. Nǔ nyɔ́ nú mi mɛ e xovɛ́ ɖo sinsin wɛ din lɛ́ɛ é, ɖó mi ná gɔ́ xo. Nǔ nyɔ́ nú mi mɛ e ɖo avǐ ya wɛ din lɛ́ɛ é, ɖó mi ná ko nǔ. “Nǔ ná nyɔ́ nú mi hwenu e gbɛtɔ́ lɛ́ɛ ná gbɛ́ wǎn nú mi, bó ná gbɛ́ mi, bó ná nɔ́ ɖo mi zun wɛ, bó ná nɔ́ mɔ mi dó mɔ mɛ nyanya ná ɖó nyɛ Gbɛtɔ́ví ɔ́ wútu é. Mi j'awǎ gbe nɛ́ gbe, bó lɔ́n yi jǐ kpódó xomɛhunhun kpó, ɖó ajɔ mitɔn d'agba ɖo Mawu gɔ́n. Mɔ̌ wɛ tɔ́gbó yětɔn lɛ́ɛ kó wa gbɔn xá gbeyíɖɔ Mawu tɔn lɛ́ɛ é nɛ́. Amɔ̌, heelú mi dɔkunnɔ lɛ́ɛ, ɖó mi ko mɔ nyɔ̌ná mitɔn! Heelú mi mɛ e ɖu nǔ gɔ́ xo din lɛ́ɛ é, ɖó xovɛ́ ná wá sin mi! Heelú mi mɛ e ɖo nǔ ko wɛ din lɛ́ɛ é, ɖó mi ná wá nɔ aluwɛ mɛ, bó ná ya avǐ! Heelú mi hwenu e gbɛtɔ́ lɛ́ɛ bǐ ɖo nǔ mitɔn ɖagbe ɖɔ wɛ é, ɖó mɔ̌ wɛ tɔ́gbó yětɔn lɛ́ɛ ko bló gbɔn nú mɛ e nɔ ylɔ́ yěɖée ɖɔ gbeyíɖɔ Mawu tɔn lɛ́ɛ é nɛ́!” “Má ka ɖɔ nú mi mɛ e ɖo tó ɖó mì wɛ lɛ́ɛ é: Mi yí wǎn nú kɛntɔ́ mitɔn lɛ́ɛ; mi wa ɖagbe nú mɛ e gbɛ́ wǎn nú mi lɛ́ɛ. Mi xo ɖɛ ɖagbe nú mɛ e nɔ dó nu mi lɛ́ɛ, bó xo ɖɛ ɖagbe nú mɛ e nɔ dó ya nú mi lɛ́ɛ. Nú mɛɖé xo tómɛ nú we dó alɔ ɖé xwé hǔn, lǐlɛ́ ɖě ɔ́ n'i; mɛɖé ka hú gǎn we bó yí awu towe ɖaxó ɔ́ hǔn, ma ɖɔ émí ná hwlɛ́n do tɔn ɔ́ xá ɛ ó. Mɛ ɖé byɔ́ nǔ we hǔn, nǎ ɛ; mɛɖé klá jɛ dɔkun towe nu hǔn, ma sɔ́ kanbyɔ́ ó. Nǔ e mi jló ɖɔ gbɛtɔ́ lɛ́ɛ ní wa nú mi é wɛ mi ná wa nú yě lɔmɔ̌. “Ényí mɛ e yí wǎn nú mi lɛ́ɛ jɛ́n mi nɔ yí wǎn ná ɔ́, nǔgɛ́n tɛ́ mi ka wa, bɔ è nǎ tunwun nú mi? Đó mɛ e ma nɔ nyi Mawusɛ́n ǎ lɛ́ɛ lɔ nɔ yí wǎn nú mɛ e nɔ yí wǎn nú yě lɛ́ɛ. Ényí mɛ e nɔ wa ɖagbe nú mi lɛ́ɛ jɛ́n mi nɔ wa ɖagbe ná ɔ́, nǔgɛ́n tɛ́ wa wɛ mi ka ɖe, bɔ è nǎ tunwun nú mi? Mɛ e ma nɔ xwedó Mawusɛ́n ǎ lɛ́ɛ lɔ nɔ wa mɔ̌. Ényí mɛ e sí mi ná lɛ́ wá mɔ nǔ mitɔn yí ɖe ɔ́ jɛ́n mi nɔ hwé nǔ ná ɔ́, nǔgɛ́n tɛ́ mi ka wa, bɔ è nǎ tunwun nú mi? Mɛ e ma nɔ nyi Mawusɛ́n ǎ lɛ́ɛ lɔ nɔ hwé nǔ nú gbɛ̌ yětɔn lɛ́ɛ, bó ná wá mɔ mɔ̌hunkɔtɔn yí ɖo yě sí. Lo ɔ́, mi yí wǎn nú kɛntɔ́ mitɔn lɛ́ɛ, bó nɔ́ wa ɖagbe nú yě, bó nɔ́ hwé nǔ nú mɛ, mi ma ka ɖó nukún tɔn ɖɔ émí ná lɛ́ wá mɔ yí ó, énɛ́ ɔ́, ajɔ mitɔn ná tlí, bɔ mi ná nyí Mawu Ajalɔ̌nlɔn ví; ɖó Mawu nɔ́ nyɔ́ xomɛ dó alɔgúdokpɛ́dónúmɛtɔ́ lɛ́ɛ kpódó mɛdídá lɛ́ɛ kpán wú. Mi nɔ kú nǔbláwǔ nú mɛ, lě e Mawu Tɔ́ mitɔn nɔ kú nǔbláwǔ nú mɛ gbɔn é.” “Mi ma ɖɔ hwɛ xá mɛɖé ó, énɛ́ ɔ́, Mawu ná ɖɔ hwɛ xá mi lɔmɔ̌ ǎ; mi ma ɖó hwɛ nú mɛɖé ó, énɛ́ ɔ́, Mawu ná ɖó hwɛ nú mi lɔmɔ̌ ǎ. Mi sɔ́ hwɛ kɛ mɛ, énɛ́ ɔ́, Mawu ná sɔ́ hwɛ kɛ mi lɔmɔ̌. Mi ná nǔ mɛ, énɛ́ ɔ́, Mawu ná ná nǔ mi lɔmɔ̌. É ka wá ja mitɔn ɔ́ ná mi gbé ɔ́, é ná jlɛ́ ganjí, bó ná húnhún, bó ná zín, bɔ é ná túnflá, bɔ é ná sɔ́ dó así nú mi; ɖó nǔ e mi dó jlɛ́ nǔ nú mɛ ɔ́ wɛ Mawu ná dó jlɛ́ nú mi lɔmɔ̌.” Jezu ka lɛ́ wá dó lǒ nú yě ɖɔ jí: “Nukúntíntɔ́nnɔ ɖě nɔ sixú xlɛ́ ali ɖě ɔ́ a? Yě mɛ we lɛ́ɛ ná yi jɛ do mɛ ǎ cé? Nǔkplɔ́ntɔ́ nɔ́ hú gǎn mɛ̌si tɔn ǎ; nǔkplɔ́ntɔ́ ɖé ká kplɔ́n nǔ ganjí ɔ́, mɛ̌si tɔn ɖɔhun wɛ é ná cí.” “Nɛ̌ ká gbɔn bɔ a nɔ mɔ nǔywɛ́ e ɖo nɔví towe sín nukún jí ɔ́, bó ma ka nɔ mɔ atínkpo e ɖo towe jí é ǎ? Hwi mɛ e ma ɖo atínkpo e ɖo nukún towe jí é mɔ wɛ ǎ ɔ́, nɛ̌ wɛ a ka sixú ɖɔ nú nɔví towe ɖɔ: ‘Nɔví ce, gbɔ nú ma ɖe nǔywɛ́ e ɖo nukún towe jí ɔ́ sín i nú we’ gbɔn? Yɛmɛnúwatɔ́, vɛ̌ to ɖe atínkpo sín nukún jí nú hwiɖée hwɛ̌; énɛ́ ɔ́, a nǎ mɔ nukúnnú, bó sixú ɖe nǔywɛ́ e ɖo nukún jí nú nɔví towe ɔ́ sín i.” “Atín ɖagbe ɖé nɔ ná sínsɛ́n nyanya ǎ, mɔ̌ jɛ́n atín nyanya ɖé má ka nɔ́ ná sínsɛ́n ɖagbe ǎ é nɛ́. Đó nǔ e atín ɖokpó ɖokpó nyí ɔ́, sínsɛ́n tɔn wɛ nɔ ɖe xlɛ́. È nɔ gbɛ yovózɛn ɖo kpɔvɛwun jí ǎ; è ka nɔ gbɛ vǐwun ɖo xɛ́tín jí ǎ. Gbɛtɔ́ ɖagbe ɔ́, nǔ ɖagbe wɛ é nɔ ɖe tɔ́n sín nǔ ɖagbe e ɖo ayi tɔn mɛ é mɛ. Gbɛtɔ́ nyanya ka nɔ ɖe nǔ nyanya tɔ́n sín nǔ nyanya e ɖo ayi tɔn mɛ é mɛ; ɖó nǔ e gɔ́ ayi mɛtɔn mɛ ɔ́ wɛ nu nɔ ɖɔ.” “Aniwú mi nɔ ylɔ́ mì ɖɔ ‘Aklúnɔ, Aklúnɔ’, bó má ká nɔ́ wa nǔ e un ɖɔ lɛ́ɛ ǎ? Mɛɖěbǔ wá gɔ̌n ce, bó ɖótó xó ce, bó bló ɖ'é jí ɔ́, un ná xlɛ́ mɛ e wú è nǎ jlɛ́ ɛ dó ɔ́ mi. È nǎ jlɛ́ ɛ dó nya ɖé wú, bɔ é ja xɔ mɛ gbé, bó kun do káká bó yi mɔ awǐnnya, bó dó xɔ ɔ́ do dó awǐnnya ɔ́ jí. Tɔ wá ɖi sin, bó sa yi gba dó xɔ ɔ́ wú, xɔ ɔ́ ka dán wǔ ǎ, ɖó é mɛ ganjí. Amɔ̌, mɛ e ɖótó xó ce, bó ma bló ɖ'é jí ǎ ɔ́ cí nya e mɛ xɔ nyi ayǐkúngban jí ma kun do, cóbó dó xɔ ɔ́ do ǎ ɔ́ ɖɔhun; ayǐsun wá sa yi gba dó xɔ ɔ́ wú, bɔ tlóló jɛ́n xɔ ɔ́ mu, bó hánnyá bǐ.” Ée Jezu ɖɔ xó énɛ́ lɛ́ɛ bǐ nú mɛ e ɖo tó ɖó e wɛ lɛ́ɛ vɔ ɔ́, é yi Kafaanawúmu. Đo fínɛ́ ɔ́, sɔ́ja kanwekogán Hlɔ̌ma tomɛ tɔn ɖé ka ɖó mɛsɛntɔ́ vívɛ́ná ɖokpó, bɔ mɛsɛntɔ́ ɔ́ ɖo azɔn jɛ wɛ, bó ɖo kúdonu. Ée è ɖɔ Jezu sín xó bɔ é se ɔ́, é sɛ́ tomɛxó Judée tɔn ɖé lɛ́ɛ dó gɔ̌n tɔn, nú yě ní sa vo n'i ɖɔ ní kɛnklɛ́n bó wá hwlɛ́n mɛsɛntɔ́ émítɔn. Ée yě wá Jezu gɔ́n ɔ́, yě sa vo n'i ɖaxó ɖɔ jí: “É jɛ xá ɖɔ a nǐ ná ɛ nǔ e byɔ́ wɛ é ɖe ɔ́, ɖó é yí wǎn nú akɔta mǐtɔn; é wɛ gbá kplɔ́ngbasá mǐtɔn nú mǐ.” Jezu ka xwedó yě, bó kó sɛ yá xwé ɔ́, bɔ sɔ́ja kanwekogán ɔ́ sɛ́ xɔ́ntɔn tɔn ɖé lɛ́ɛ dó, nú yě yi ɖɔ n'i ɖɔ: “Aklúnɔ, ma xaji jɛ tagba ó, ɖó un nyí mɛɖé nú a nǎ wá xwé ce gbe ǎ. Énɛ́ ɔ́ wú wɛ un mɔ ɖɔ un kún nyí mɛɖé, bó sixú wá gɔ̌n towe ó. Bo kɛ nu ɖokpó kpowun, bónú azɔn ná gbɔ nú mɛsɛntɔ́ ce. Đó nyɛ ɖésúnɔ ɔ́, mɛɖomɛglɔ́ wɛ nú mì, bɔ sɔ́ja ka ɖo acɛ ce mɛ; un ɖɔ nú mɛ ɖě ɖɔ: ‘Yi’ ɔ́, é nɔ́ yi; un ɖɔ nú mɛ ɖěvo ɖɔ: ‘Wǎ’ ɔ́, é nɔ wá; un ka ɖɔ nú mɛsɛntɔ́ ce ɖɔ: ‘Blǒ lě’ ɔ́, é nɔ́ bló.” Ée Jezu se xó énɛ́ lɛ́ɛ ɔ́, sɔ́ja kanwekogán ɔ́ sín nǔ nyɔ́ nukún tɔn mɛ káká, bɔ é lílɛ́ kpan nukɔn ahwan e xwedó e ɔ́, bó ɖɔ nú yě ɖɔ: “Ma ɖɔ nú mi, ɖo Izlayɛ́li ɖésú ɔ́, un mɔ mɛɖé, bɔ é ɖó nǔɖiɖi lěhunkɔtɔn ǎ.” Ée mɛ e sɔ́ja kanwekogán ɔ́ sɛ́ dó lɛ́ɛ lɛ́ kɔ wá yi xwé ɔ́, yě mɔ mɛsɛntɔ́ ɔ́, bɔ azɔn ko gbɔ n'i bǐ sésé. Énɛ́ gúdo ɔ́, Jezu wá xwe to e è nɔ ylɔ́ ɖɔ Nayinu é mɛ. Ahwanvú tɔn lɛ́ɛ kpódó mɛ gěgé ɖěvo lɛ́ɛ kpó ka zɔn xá ɛ. Hwenu e é wá ja to ɔ́ hɔn nukɔn jɛ gbé ɔ́, é mɔ è xwe cyɔ ɖé ɖi gbé, bɔ é nyí vǐɖokpónɔ asúkúsi ɖé tɔn, bɔ to ɔ́ mɛ nu lɛ́ɛ gěgé nyi ahwan xwedó asúkúsi ɔ́. Ée Aklúnɔ mɔ asúkúsi ɔ́ é ɔ́, nǔ tɔn blá wǔ n'i, bɔ é ɖɔ n'i ɖɔ: “Ma sɔ́ ya avǐ ɖě ó.” Jezu ka sɛ yá nǔ e jí è sɔ́ cyɔ ɔ́ mlɔ́ é, bó ɖó alɔ wú, bɔ mɛ e hɛn cyɔ ɔ́ lɛ́ɛ nɔ te. Jezu ka ɖɔ: “Dɔ̌nkpɛvú, sí te, un ɖe gbe tɔn nú we.” Dɔ̌nkpɛvú e kú ɔ́ ka fɔ́n jínjɔ́n ayǐ, bó jɛ xó ɖɔ jí, bɔ Jezu ɖɔ nú nɔ tɔn ɖɔ: “Vǐ towe ɖíe.” Xɛsi jɛ mɛ lɛ́ɛ bǐ jí, bɔ yě nɔ kpa susu nú Mawu, bó nɔ́ ɖɔ: “ Gbeyíɖɔ Mawu tɔn ɖaxó ɖokpó ɖíe tɔ́n ɖo mǐ mɛ e; Mawu wá ba togun tɔn kpɔ́n.” Nǔ énɛ́ e Jezu wa ɔ́ sín xó gba kpé Judée gbé ɔ́ bǐ jǐ, bó lɛ́ gba kpé to e lɛ́ lɛ̌ dó e lɛ́ɛ bǐ mɛ. Jǎan sín ahwanvú lɛ́ɛ wlí nǔ énɛ́ lɛ́ɛ bǐ sésé ɖɔ n'i; é ka ylɔ́ mɛ we ɖo yě mɛ, bó sɛ́ yě dó Aklúnɔ gɔ́n, nú yě yi kanbyɔ́ ɛ ɖɔ: “Hwi wɛ nyí mɛ e ɖó ná wá, bɔ mǐ ɖo te kpɔ́n é a, abǐ mɛ ɖěvo wɛ mǐ ná nɔ te kpɔ́n?” Ée yě yi gɔ̌n tɔn ɔ́, yě ɖɔ n'i ɖɔ: “Jǎan Yɛhwesinlɛnúmɛtɔ́ wɛ sɛ́ mǐ dó, bónú mǐ ná wá kanbyɔ́ we ɖɔ: ‘Hwi wɛ nyí mɛ e mǐ ɖo te kpɔ́n bɔ é ná wá é a, abǐ mɛ ɖěvo wɛ mǐ ná nɔ te kpɔ́n?’ ” Hwenɛ́nu ɔ́, Jezu ka gbɔ azɔn nú mɛ gěgé; é gbɔ azɔn nú mɛ e ɖo wǔvɛ́ mɔ wɛ lɛ́ɛ, bó nya yɛ nyanya sín mɛ gěgé jí, lobo hun nukún nú nukúntíntɔ́nnɔ gěgé. É yí gbe nú mɛ e Jǎan sɛ́ dó lɛ́ɛ ɖɔ: “Mi yi ɖɔ nǔ e mi se lɛ́ɛ kpódó nǔ e mi mɔ lɛ́ɛ kpó nú Jǎan: nukúntíntɔ́nnɔ lɛ́ɛ ɖo nukúnnú mɔ wɛ, sékúnɔ lɛ́ɛ ɖo zɔnlin ɖi wɛ, gudunɔ lɛ́ɛ sín wǔtu ɖo te jɛ wɛ, tókúnɔ lɛ́ɛ ɖo nǔ se wɛ, è ɖo mɛkúkú lɛ́ɛ fɔ́n wá gbɛ wɛ, bó ɖo Wɛn Ɖagbe Mawu tɔn jlá wamamɔnɔ lɛ́ɛ wɛ. Nǔ nyɔ́ nú mɛ e sín nǔɖiɖi ma ná jɛ ayǐ ɖó nyɛ wútu ǎ lɛ́ɛ.” Ée wɛnsagun Jǎan tɔn lɛ́ɛ ka lɛ́ kɔ ɖidó ɔ́, Jezu jɛ Jǎan xó ɖɔ nú togun ɔ́ jí ɖɔ: “Ani mi ka yi kpɔ́n ɖo gbětótló mɛ? Fántín ɖé wɛ mi mɔ bɔ jɔhɔn ɖo dǐndán wɛ a? Éeǒ. Étɛ́ mi ka tɔ́n bó yi kpɔ́n? Mɛ ɖé wɛ bó dó awu xɔ akwɛ́ a? Éɖíe mɛ e nɔ dó awu xɔ akwɛ́, bó nɔ́ ɖo gbɛ ɖu wɛ lɛ́ɛ ɔ́, hɔnmɛ wɛ yě nɔ́ nɔ e. Ani wɛ mi ka yi kpɔ́n? Gbeyíɖɔ Mawu tɔn ɖé wɛ a? Ɛɛn! Ma ɖɔ nú mi, mɛ e hú gbeyíɖɔ Mawu tɔn ɔ́ wɛ. Jǎan wɛ nyí mɛ e xó ɖɔ wɛ Mawuxówéma ɖe ɔ́, bó ɖɔ: ‘Wɛnsagun ce ɖíe un sɛ́ dó e, é ná jɛ nukɔn nú we, bó ná bló ali ɖó nú we.’ ” Má ɖɔ nǔgbó nú mi: “Mɛ e tɔ́n sín nyɔ̌nu xo mɛ lɛ́ɛ ɔ́, ɖěbǔ hú gǎn Jǎan Yɛhwesinlɛnúmɛtɔ́ ǎ; é ka ɖo mɔ̌ có mɛ e hwe hú mɛ bǐ ɖo axɔ́súɖuɖu Mawu tɔn mɛ ɔ́ hú gǎn Jǎan. Togun ɔ́ bǐ kpódó tokwɛ́yítɔ́ e Jǎan lɛ yɛhwesin ná lɛ́ɛ kpó se xó ɔ́, bó mɔ ɖɔ hwɛjijɔnɔ wɛ nyí Mawu. Lo ɔ́, Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpán ka gbɛ́ nǔ e Mawu jló nú yě é, lobo lɔn nú Jǎan lɛ yɛhwesin nú yě ǎ.” Jezu lɛ́ ɖɔ: “Mɛ̌ wú wɛ un ka ná jlɛ́ gbɛtɔ́ din tɔn lɛ́ɛ dó? Mɛ̌ wɛ yě ɖi? Yě ɖi yɔkpɔ́vú e nɔ jínjɔ́n tokplétɛn bó nɔ́ ɖo ɖiɖɔ sɛ́ dó gbɛ̌ yětɔn ɖě lɛ́ɛ wɛ ɖɔ: ‘Mǐ kún kpete dó ji awǎjijɛ han, bɔ mi gbɛ́ we ɖú; mǐ ji nǔwamɛ han, bɔ mi gbɛ́ avǐ ya.’ Đó Jǎan Yɛhwesinlɛnúmɛtɔ́ wá, é nɔ ɖu nǔ ǎ, é ka nɔ nu vɛ̌ɛn ǎ, bɔ mi nɔ ɖɔ: ‘Yɛ nyanya wɛ ɖo jǐ tɔn.’ Nyɛ Gbɛtɔ́ví ɔ́ ká wá, bó nɔ́ ɖu nǔ, bó nɔ́ nu vɛ̌ɛn, bɔ mi ɖɔ: ‘Nya élɔ́ ɔ́, adɔtɔ́nɔ wɛ, vɛ̌ɛnnutɔ́ wɛ, tokwɛ́yítɔ́ lɛ́ɛ kpódó gbɛnyanyazántɔ́ lɛ́ɛ kpó sín xɔ́ntɔn wɛ.’ Lo ɔ́, mɛ e nyí nǔnywɛ́ ví lɛ́ɛ nɔ́ gbo gbě nú nǔnywɛ́.” Falizyɛn ɖé ka wá ylɔ́ Jezu ɖɔ é ní wá ɖu nǔ ɖo émí gɔ́n. Jezu ka yi Falizyɛn ɔ́ xwé, bó sɔ́ tɛnmɛ, bó ná ɖu nǔ. Nyɔ̌nu gbɛnyanyazántɔ́ ɖé ka ɖo to ɔ́ mɛ; ée é se ɖɔ Jezu ɖo nǔ ɖu wɛ ɖo Falizyɛn ɔ́ xwé ɔ́, é hɛn célu wǎnɖagbenɔ go ɖokpó wá. Awǐnnya e è nɔ ylɔ́ ɖɔ alubatlu ɔ́ wɛ è dǒ bló go ɔ́ ná. É wá cí Jezu gúdo, ɖo afɔ tɔn lɛ́ɛ kpá, bó ɖo avǐ ya wɛ. Đasin é ɖésúnɔ tɔn nɔ ja kɔn nyi Jezu sin afɔ lɛ́ɛ jí, bɔ é nɔ́ dɔn ɖa tɔn dó súnsún afɔ tɔn lɛ́ɛ ná, bó nɔ́ kí si ná, bó nɔ́ kɔn célu ɔ́ dó afɔ tɔn lɛ́ɛ wú. Ée Falizyɛn e ylɔ́ Jezu ɔ́ mɔ mɔ̌ ɔ́, é ɖɔ dó xomɛ ɖɔ: “Ényí nya élɔ́ ko nyí gbeyíɖɔ Mawu tɔn wɛ ɔ́, nyɔ̌nu e ɖo alɔ ɖó wǔ tɔn wɛ nɛ́ ɔ́, é ná kó tunwun mɛ alɔkpa e é nyí é; é ná kó tunwun ɖɔ nyɔ̌nu gbɛnyanyazántɔ́ wɛ.” Jezu ka yí xó, bó ɖɔ n'i ɖɔ: “Sinmɔ́ɔ, un ɖó xó ɖé bó ná ɖɔ nú we.” Sinmɔ́ɔ ka yí gbe n'i ɖɔ: “ Mɛ̌si, bo ɖɔ xó ɔ́.” Jezu ɖɔ: “Nya ɖé tíin, bɔ mɛ we ɖu axɔ́ dó e. Mɛ nukɔntɔn ɔ́ ɖu gankwɛ́ afɔwe kanwe ko (500) dó e; mɛ wegɔ́ ɔ́, ɖu gankwɛ́ kanɖé wǒ (50) dó e. Yě ká ɖó nǔ e yě ná dó sú axɔ́ énɛ́ ɔ́ ná é ǎ, bɔ nya ɔ́ sɔ́ akwɛ́ ɔ́ kɛ yě mɛ we lɛ́ɛ. Đo mɛ we énɛ́ lɛ́ɛ mɛ ɔ́, mɛ̌ ka ná yí wǎn nú nya ɔ́ hú mɛ ɖě?” Sinmɔ́ɔ ka yí gbe ɖɔ: “Nyɛ mɔ ɖɔ mɛ e é zě axɔ́ gěgé kɛ é wɛ.” Jezu ka ɖɔ n'i ɖɔ: “A yǐ gbe ɖó ganjí.” Jezu ka lílɛ́ kpan nukɔn nyɔ̌nu ɔ́, bó ɖɔ nú Sinmɔ́ɔ ɖɔ: “A ma mɔ nyɔ̌nu élɔ́ a? Ée un byɔ́ xwé towe gbe ɔ́, a nǎ sin mì nú má dó klɔ́ afɔ ná ǎ, lo ɔ́, éyɛ́ kɔn ɖasin tɔn dó afɔ ce lɛ́ɛ jí, lobo dɔn ɖa tɔn dó súnsún ná. A kí si nú mì ǎ, lo ɔ́, éyɛ́ ɔ́, sín hwenu e un ko byɔ́ fí ɔ́, é gɔn si kí nú afɔ ce lɛ́ɛ ǎ. A kɔn ami dó ta nú mì ǎ, éyɛ́ ka kɔn célu wǎnɖagbenɔ dó afɔ ce lɛ́ɛ wú. Énɛ́ ɔ́ wú ɔ́, ma ɖɔ nú we: è sɔ́ hwɛ tobutóbú e é hu lɛ́ɛ kɛ ɛ, ɖó wǎn yíyí ɖaxó e é ɖó ɔ́ wútu. Lo ɔ́, ényí Mawu sɔ́ hwɛ kpɛɖé kɛ mɛɖé ɔ́, wǎn yíyí kpɛɖé wɛ mɛ énɛ́ ɔ́ nɔ́ ɖó.” Jezu ka ɖɔ nú nyɔ̌nu ɔ́ ɖɔ: “È sɔ́ hwɛ towe lɛ́ɛ kɛ we.” Mɛ e ɖo nǔ ɖu xá Jezu wɛ lɛ́ɛ ka jɛ ɖiɖɔ dó xomɛ jí ɖɔ: “Mɛ̌ ka nyí mɛ élɔ́, bó nɔ́ sɔ́ hwɛ kɛ mɛ?” Jezu ka ɖɔ nú nyɔ̌nu ɔ́ ɖɔ: “Nǔ e a ɖi ɔ́ hwlɛ́n we gán. Yi, bónú fífá Mawu tɔn ní nɔ kpɔ́ xá we.” Énɛ́ ɔ́ gúdo ɔ́, Jezu nɔ ɖo toxo ɖaxó lɛ́ɛ kpódó gletoxo lɛ́ɛ kpán mɛ gbɔn wɛ, bó nɔ́ ɖo axɔ́súɖuɖu Mawu tɔn ɔ́ sín Wɛn Ɖagbe jlá wɛ; ahwanvú tɔn wěwe lɛ́ɛ ka nɔ́ xwedó e. Mɔ̌ ɖokpó ɔ́, nyɔ̌nu e jí é nya yɛ nyanya sín lɛ́ɛ, kpódó ée é gbɔ azɔn ná lɛ́ɛ kpó ɖě xwedó e: Mali Magidalanu e jí é nya yɛ nyanya tɛ́nwe sín é, Jani e nyí Cúza nǔjíkpɔ́ntɔ́ Elódu tɔn sín asi é, Suzánu, kpódó nyɔ̌nu gěgé ɖěvo ɖé lɛ́ɛ kpán, bɔ yě nɔ́ sɔ́ nǔ e yě ɖó lɛ́ɛ dó dó alɔ Jezu kpódó ahwanvú tɔn wěwe lɛ́ɛ kpán. Mɛ gěgé gosín to lɛ́ɛ mɛ, to lɛ́ɛ mɛ, bó nyi ahwan wá Jezu gɔ́n. Ée mɛ lɛ́ɛ wá sukpɔ́ ɔ́, é dó lǒ élɔ́ dó ɖɔ xó nú yě, bó ɖɔ: “Nya ɖé tɔ́n gbe ɖokpó, bó yi nǔkún tɔn hú gbé. Hwenu e é ɖo nǔkún ɔ́ hú gbɔn gle ɔ́ mɛ wɛ ɔ́, ɖě yi jɛ ali jí, bɔ è gbɔn jí, lobɔ xɛ lɛ́ɛ cyán ɖu. Đě wá jɛ awǐnnyakan mɛ, fí e kɔ́ gěgé ɖé ma ɖe ǎ é; ée yě wú ɔ́, yě fyɔ́ tlóló, ɖó yě mɔ fífá ǎ. Đě lɛ́ jɛ wundonu, bɔ ée yě jɛ wǔwú jí ɔ́, wun lɛ́ɛ lɔmɔ̌ wú, bó vun blá yě. Đě wá jɛ ayǐkúngban ɖagbe jí; énɛ́ lɛ́ɛ wú, bó sɛ́n, bɔ nǔkún ɖokpó ná nǔkún mɔ̌hunkɔtɔn donu kanwe ko (100).” Ée Jezu ɖɔ mɔ̌ ɔ́, é zé gbe yi jǐ, bó sú ta nú lǒ ɔ́, bó ɖɔ: “Mɛ e ɖó tó bó ná dó se nǔ ná ɔ́ ní ɖótó bó se.” Ahwanvú Jezu tɔn lɛ́ɛ ka wá kan nǔ byɔ́ Jezu dó nǔ e ɖɔ wɛ lǒ énɛ́ ɔ́ ɖe ɔ́ wú. É ka yí gbe nú yě ɖɔ: “ Axɔ́súɖuɖu Mawu tɔn sín nǔbúdo lɛ́ɛ ɔ́, midɛɛ lɛ́ɛ wɛ è hun xlɛ́; lo ɔ́, mɛ ɖě lɛ́ɛ ɔ́, lǒ mɛ wɛ è nɔ ɖɔ xó tɔn nú yě dó. Énɛ́ ɔ́, yě ná ɖo nǔ mɔ wɛ, cóbó ná nyí mamɔtɔ́; yě ná ɖo sise wɛ, cóbó ká ná mɔ nukúnnú jɛ mɛ ǎ.” “Lǒ e un dó ɔ́, tínmɛ tɔn ɖíe: nǔkún ɔ́, Mawuxó ɔ́ wɛ. Nǔkún e jɛ ali jí lɛ́ɛ ɔ́, mɛ e nɔ se Mawuxó ɔ́, bɔ awǒvi nɔ́ wá ɖe sín ayi yětɔn mɛ lɛ́ɛ é wɛ; ɖó, yě tá wá ɖi nǔ, bónú Mawu ná hwlɛ́n yě gán. Nǔkún e jɛ awǐnnyakan mɛ lɛ́ɛ é ɔ́, mɛ e nɔ se Mawuxó ɔ́, lobo nɔ yí kpódó xomɛhunhun kpán lɛ́ɛ wɛ; lo ɔ́, xó ɔ́ nɔ lí dǒ ɖo ayi yětɔn mɛ ǎ, yě nɔ́ ɖi nǔ nú azǎn ɖé; bɔ nǔxámɛ hwenu wá su ɔ́, yě nɔ́ jó agɔ. Nǔkún e jɛ wundonu lɛ́ɛ ɔ́, mɛ e nɔ se Mawuxó ɔ́, bó nɔ́ ɖidó lɛ́ɛ é wɛ; yě nɔ́ jó yěɖée dó, bɔ nǔlinkpɔ́n, dɔkun, kpódó vǐví gbɛmɛ fí tɔn kpó nɔ vun blá xó ɔ́ ɖo ayi yětɔn mɛ, bɔ sínsɛ́n yětɔn nɔ zin ǎ. Nǔkún e jɛ ayǐkúngban ɖagbe jí lɛ́ɛ ɔ́, mɛ e nɔ se Mawuxó ɔ́, bó nɔ́ yí kpódó ayi ɖagbe kpán, kpódó ayijlɔ́jlɔ́ kpán lɛ́ɛ wɛ; lǐnsyɛ́nsyɛ́n yětɔn nɔ́ zɔ́n, bɔ yě nɔ́ ná sínsɛ́n.” “Mɛ ɖé nɔ́ tá zogbɛ́n bó nɔ́ xwe zɛ̌n dó, abǐ bó nɔ́ sɔ́ dó akánma glɔ́ ǎ; lo ɔ́, nǔta aga wɛ è nɔ sɔ́ ɖó, bónú mɛ e ná byɔ́ xwé gbe lɛ́ɛ ná mɔ wěziza. Đó nǔ ɖěbǔ ɖo nǔglɔ́ ɔ́, é ná wá jɛ wěxo agbawungba; nǔ ɖěbǔ ka nɔ wi mɛ ɔ́, é ná wá wěziza nu. “Mi nɔ hɛn ayi dó lě e mi nɔ ɖótó nǔ gbɔn ɔ́ wú; ɖó mɛ e ɖó nǔ ɔ́, Mawu ná lɛ́ ná ɛ d'é jí, lo ɔ́, mɛ e ma ɖó nǔɖé ǎ ɔ́, Mawu ná yí kpɛ e é lin ɖɔ émí ɖó ɔ́ sín así tɔn.” Jezu sín nɔ kpódó Jezu sín nɔví lɛ́ɛ kpó ka wá gɔ̌n tɔn; lo ɔ́, yě sixú yi fí e é ɖe ɔ́ ǎ, ɖó gbɛtɔ́ sukpɔ́. Mɛ ɖé ka wá ɖɔ nú Jezu ɖɔ: “Nɔ towe kpódó nɔví towe lɛ́ɛ kpó ɖo hɔnto, bó ɖo biba we wɛ.” Jezu ka ɖɔ nú mɛ e ɖo fínɛ́ lɛ́ɛ ɖɔ: “Mɛ e nɔ se Mawuxó ɔ́, bó nɔ́ bló ɖ'é jí lɛ́ɛ wɛ nyí nɔ ce kpódó nɔví ce lɛ́ɛ kpó.” É ka wá su gbe ɖokpó, bɔ Jezu kpódó ahwanvú tɔn lɛ́ɛ kpó byɔ́ tɔjíhún ɖé mɛ, bɔ é ɖɔ nú yě ɖɔ: “Mi nú mǐ nǎ yi agě ɖě ɔ́ jí,” bɔ yě ɖidó. Hwenu e yě ɖo yiyi wɛ ɖo tɔ ɔ́ jí ɔ́, Jezu wlí amlɔ. Jɔhɔn ɖaxó ɖé ka jɛ nyinyi jí, bó nɔ́ xo sin dó tɔjíhún ɔ́ mɛ, bɔ hǔn ɔ́ jɛ gǐgɔ́ jí, bɔ nǔ nyanya ɖo nǎ jɛ wɛ. Yě sɛ yá Jezu, bó fɔ́n ɛ, lobo ɖɔ: “ Mɛ̌si! Mɛ̌si! Mǐ ɖo nǎ dɔn wɛ.” Jezu ka fɔ́n, bó wa adǎn dó jɔhɔn ɔ́, kpódó xu e ɖo zǐngídi jí é kpó, bɔ yě bǐ xwɛ, bɔ fí bǐ cí tóó. É ka wá kanbyɔ́ yě ɖɔ: “Lě e mi ɖi nǔ gbɔn ɔ́ ɖíe a?” Nǔ énɛ́ ɔ́ kpácá yě, bɔ xɛsi jɛ yě jí, bɔ yě jɛ ɖiɖɔ nú yěɖée jí ɖɔ: “Mɛ nǎhún ka nyí nya élɔ́, bó nɔ́ ɖe gbe dó jɔhɔn kpódó tɔ kpó, bɔ yě nɔ́ se gbe n'i?” Yě ká wá jɛ Jelazáanu lɛ́ɛ sín to e kpan nukɔn Galilée é mɛ. Ée Jezu jɛ te sín tɔjíhún ɔ́ mɛ wá agě jí ɔ́, nya to ɔ́ mɛ nu ɖé wá kpé e. Nya énɛ́ ɔ́, yɛ nyanya gěgé ɖo jǐ tɔn; é ma sɔ́ dó awu ǎ ɔ́, é ko lín; é sɔ́ nɔ́ nɔ xwé ɖé gbe ǎ; lo ɔ́, sóxo mɛ fí e è nɔ ɖi mɛkúkú lɛ́ɛ dó ɖo to yětɔn mɛ ɔ́ wɛ é nɔ́ nɔ. Hwenu e é mɔ Jezu ɔ́, é jɛ xó sú jí, bó jɛ kpo ɖo nukɔn tɔn, bó zé gbe yi jǐ, bó ɖɔ: “Étɛ́ wɛ nyɛ kpódó hwi kpó kpédó, Jezu Mawu Ajalɔ̌nlɔn ví? Kɛnklɛ́n, ma dó ya nú mì ó.” Nya ɔ́ ɖɔ mɔ̌, ɖó Jezu ɖe gbe dó yɛ nyanya ɔ́ ɖɔ ní gosín jǐ tɔn. Đó azɔn mɔ̌kpán wɛ yɛ ɔ́ kó zɔn jǐ tɔn, bɔ è nɔ dó gan afɔ n'i, bó nɔ sɔ́ wɔlɔ dó dó gɛdɛ ɛ, nú é ma tɔ́n ó; có é nɔ hɛn gan ɔ́ kpódó wɔlɔ ɔ́ kpó bǐ wɛ̌n, bó nɔ́ jɛ te, bɔ yɛ nyanya ɔ́ nɔ dɔn ɛ yi gbětótló mɛ. Jezu ka kanbyɔ́ ɛ ɖɔ: “Nɛ̌ wɛ nyǐkɔ towe nɔ nyí?” Bɔ é yí gbe n'i ɖɔ: “Ahwan wɛ un nyí,” ɖó yɛ nyanya gěgé wɛ ɖo nya ɔ́ jí. Bɔ yɛ nyanya énɛ́ lɛ́ɛ jɛ vo sa nú Jezu jí ɖɔ é ní má nya émí yi dó do gɔngɔn mɛ ó. Aglǔzahwan ɖaxó ɖé ka ɖo sókan mɛ fínɛ́, bó ɖo nǔ ba ɖu wɛ. Bɔ yɛ nyanya lɛ́ɛ dó kɛnklɛ́n nú Jezu ɖɔ é ní ná gbe émí, bónú émí ná yi byɔ́ aglǔza énɛ́ lɛ́ɛ mɛ, bɔ Jezu ka ná gbe tɔn yě. Azɔn ɖokpó ɔ́, yɛ nyanya lɛ́ɛ gosín dǎwe ɔ́ jí, bó byɔ́ aglǔza lɛ́ɛ mɛ, bɔ aglǔza lɛ́ɛ bɛ́ wezun sín só ɔ́ jí, bó kɔn nyi xu mɛ, bó kú tɔ. Ée aglǔzanyitɔ́ lɛ́ɛ mɔ nǔ énɛ́ e jɛ ɔ́, yě hɔn, bó yi ɖɔ nǔ e jɛ nɛ́ lɛ́ɛ nú mɛ lɛ́ɛ ɖo toxo ɔ́ mɛ kpódó gletoxo lɛ́ɛ mɛ kpó. Bɔ mɛ lɛ́ɛ tɔ́n, bó wá kpɔ́n nǔ e jɛ é. Ée yě wá Jezu gɔ́n é ɔ́, yě mɔ nya e jí Jezu nya yɛ nyanya lɛ́ɛ sín é ɖo ayǐjínjɔ́n ɖo Jezu kpá, bɔ ayi tɔn wá gbɛ, bɔ é dó awu. Ée yě mɔ ɛ ɔ́, xɛsi jɛ yě jí. Mɛ e ɖo tɛn tɔn mɛ bó mɔ lě e Jezu gbɔ azɔn nú yɛnyanyanɔ ɔ́ gbɔn lɛ́ɛ wlí bǐ ɖɔ nú mɛ e wá lɛ́ɛ. Lo ɔ́, mɛ e ɖo gbě énɛ́ ɔ́ jí lɛ́ɛ bǐ dó kɛnklɛ́n nú Jezu ɖɔ é ní gosín ayǐkúngban émítɔn jí, ɖó xɛsi ɖaxó ɖé jɛ yě jí. Jezu ka byɔ́ tɔjíhún mɛ, bó gosín yě gɔ̌n. Nya e jí yɛ nyanya gosín ɔ́ ka sa vo nú Jezu ɖɔ émí ná xwedó e. Jezu ka lɛ́ kɔ n'i bó ɖɔ: “Lɛ̌ kɔ yi xwé towe gbe, bó ɖɔ nǔ e Mawu wa nú we lɛ́ɛ bǐ.” Nya ɔ́ ka ɖidó, bó jɛ nǔ e Jezu wa n'i é bǐ jlá jí gbɔn to ɔ́ bǐ mɛ. Hwenu e Jezu lɛ́ kɔ wá ɔ́, mɛ lɛ́ɛ nyi ahwan wá kpé e, ɖó yě bǐ wɛ ko ɖo te kpɔ́n ɛ. Dǎwe ɖé ka wá xwetɔ́n, bɔ è nɔ ylɔ́ ɛ ɖɔ Jayilɔ́si, bɔ é nyí kplɔ́ngbasá Jwifu lɛ́ɛ tɔn sín gǎn. É jɛ kpo ɖo Jezu nukɔn, bó sa vo n'i ɖɔ ní wá xwé émítɔn gbe, ɖó ɖyɔ̌vǐvú ɖokpó géé é ɖó, bɔ é ko ɖó xwe wěwe mɔ̌ ɔ́ ɖo kúdonu. Hwenu e Jezu xweyǐgbe ɔ́, mɛ e tɛ́ntin é ɖe lɛ́ɛ sukpɔ́ káká, bó ɖo fyɔ́nfyɔ́n ɛ wɛ gbɔn fí bǐ. Nǎwe ɖé ka ɖo fínɛ́. Nǎwe énɛ́ kó ɖo hun ɖi wɛ sín xwe wěwe ɖíe ɖokpóó. É ná nǔ e é ɖó ɔ́ bǐ azɔngblétɔ́ lɛ́ɛ, có yě ɖě ká kpé azɔn ɔ́ wú bó gbɔ n'i ǎ. Nǎwe ɔ́ gbɔn Jezu gúdo, bó wá ɖó alɔ awu tɔn tó, bɔ hun e ɖi wɛ é ɖe ɔ́ gbo ɖo tɛndo ɖokpó ɔ́ mɛ. Jezu ka kanbyɔ́ ɖɔ: “Mɛ̌ ká ɖó alɔ wǔ ce?” Yě bǐ ka jɛ gbigbɛ jí, bɔ Piyɛ́ɛ ɖɔ: “ Mɛ̌si, a mɔ mɛ lɛ́ɛ lɛ́ lɛ̌ dó we, bó ɖo fyɔ́nfyɔ́n we wɛ gbɔn fí bǐ, bɔ a ka nɔ lɛ́ kanbyɔ́ ɖɔ mɛ̌ wɛ ɖó alɔ émí wú a jí.” Lo ɔ́, Jezu ɖɔ: “Mɛ ɖé ɖó alɔ wú ce dandan; ɖó un tunwun ɖɔ hlɔ̌nhlɔ́n ɖé tɔ́n sín wú ce.” Ée nyɔ̌nu ɔ́ mɔ ɖɔ nǔ e émí wa ɔ́ gba ɔ́, é jɛ sísɔ́sísɔ́ jí, bó wá jɛ kpo ɖo Jezu nukɔn, bɔ nǔ e wú é ɖó alɔ wǔ tɔn ɔ́, kpódó lě e azɔn gbɔ n'i tlóló gbɔn é kpó ɔ́, é wlí bǐ bó ɖɔ ɖo mɛ bǐ nukún mɛ. Jezu ka ɖɔ n'i ɖɔ: “Vǐ ce, nǔɖiɖi towe zɔ́n bɔ azɔn towe gbɔ. Yi dó fífá mɛ!” Xó énɛ́ lɛ́ɛ ɖɔ wɛ Jezu ɖe kɛ́ɖɛ́ bɔ mɛɖé gosín Jayilɔ́si xwé, bó ɖɔ n'i ɖɔ: “Vǐ towe kó kú, ma sɔ́ dó tagba nú mɛ̌si ɔ́ ó.” Lo ɔ́, ée Jezu se mɔ̌ ɔ́, é ɖɔ nú Jayilɔ́si ɖɔ: “Ma ɖi xɛsi ó, vɛ̌ ko ɖi nǔ kpowun, énɛ́ ɔ́, azɔn na gbɔ nú vǐ towe.” Ée Jezu wá Jayilɔ́si xwé ɔ́, é lɔn nú mɛɖé byɔ́ xɔ ɔ́ mɛ xá ɛ zɛ Piyɛ́ɛ kpó Jǎan kpó Jaki kpó, vǐtɔ́ ɔ́ kpódó vǐnɔ kpó wú ǎ. Mɛ bǐ ɖo avǐ ya wɛ, bó ɖo alě ná wɛ ɖó vǐ ɔ́ wútu. Jezu ka ɖɔ: “Mi ma ya avǐ ó, vǐ ɔ́ kú ǎ; lo ɔ́, amlɔ dɔ́ wɛ é ɖe.” Yě ká jɛ cícá ɛ ko jí, ɖó yě tunwun ɖɔ vǐ ɔ́ kó kú. Éyɛ́ ká hɛn vǐ ɔ́ sín alɔ, bó ɖɔ: “Sí te!” Bɔ vǐ ɔ́ fɔ́n, bó sí te tlóló; bɔ Jezu ná gbe ɖɔ è nǐ ná ɛ nǔɖuɖu. É kpácá vǐtɔ́ ɔ́ kpó vǐnɔ ɔ́ kpó tlala, Jezu ka dó sɛ́n nú yě ɖɔ nǔ énɛ́ e jɛ ɔ́ yě ní má ɖɔ nú mɛɖé ó. Jezu kplé ahwanvú tɔn wěwe lɛ́ɛ gbe ɖokpó, bó ná yě hlɔ̌nhlɔ́n kpódó acɛ kpó, bónú yě ná nɔ nya yɛ nyanya lɛ́ɛ sín mɛ lɛ́ɛ jí, bó ná nɔ́ gbɔ azɔn nú azinzɔnnɔ lɛ́ɛ. É sɛ́ yě dó, nú yě ná yi jlá axɔ́súɖuɖu Mawu tɔn sín xó, bó gbɔ azɔn nú azinzɔnnɔ lɛ́ɛ. É ɖɔ nú yě ɖɔ: “Mi jɛ ali hǔn, mi ma hɛn nǔ ɖěbǔ ó: mi ma hɛn kpogɛ ó, mi ma hɛn nǔbyɔ́ɖutɔ́ glo ó, mi ma hɛn nǔɖuɖu ó, mi ma hɛn akwɛ́ ó, mi ɖě ma ka hɛn awu we ó. Mi jɛ xwé ɖé gbe hǔn, mi nɔ fínɛ́ káká yi jɛ hwenu e mi na tɔ́n sín to ɔ́ mɛ dó é. Ényí mɛ lɛ́ɛ ma ka yí mi ǎ, bónú mi ja to ɔ́ mɛ tɔ́n sín gbe hǔn, mi xúxú afɔkɔ́ mitɔn, bó dó ɖe xlɛ́ yě ɖɔ yě wa nǔ nyi do.” Mɛsɛ́dó lɛ́ɛ ka yi, bó nɔ gbɔn fí bǐ ɖo gletoxo lɛ́ɛ mɛ, bó nɔ jlá Wɛn Ɖagbe Mawu tɔn ɔ́, bó nɔ gbɔ azɔn nú mɛ lɛ́ɛ gbɔn fí bǐ. Tokpɔngán Elódu se nǔ énɛ́ lɛ́ɛ e ɖo jijɛ wɛ lɛ́ɛ, bó sɔ́ tunwun lě e é ná bló gbɔn ɔ́ ǎ, ɖó mɛ ɖé lɛ́ɛ nɔ ɖɔ: “Jǎan Yɛhwesinlɛnúmɛtɔ́ ɔ́ wɛ fɔ́n sín kú.” Mɛ ɖé lɛ́ɛ ka nɔ ɖɔ: “ Elíi wɛ lɛ́ kɔ wá.” Mɛ ɖěvo lɛ́ɛ nɔ ɖɔ: “ Gbeyíɖɔ Mawu tɔn xóxó lɛ́ɛ ɖě wɛ fɔ́n wá gbɛ.” Elódu ka ɖɔ: “Jǎan ɔ́, un ka ko gbo ta ɛ nɛ́! Mɛ nǎhún wɛ ka nyí mɛ e wú un ɖo nǔ énɛ́ lɛ́ɛ se dó wɛ é?” Bɔ é ɖo biba ná mɔ mɛ ɔ́ wɛ. Ée mɛsɛ́dó lɛ́ɛ lɛ́ kɔ wá ɔ́, yě ɖɔ nǔ e yě wa lɛ́ɛ bǐ nú Jezu. É ka kplá yě jɛ zɔ ɖo to e è nɔ ylɔ́ ɖɔ Bɛtisayida é sín awa jí. Ée mɛ lɛ́ɛ mɔ mɔ̌ ɔ́, yě jɛ gúdo tɔn. Jezu ka yí yě ganjí, bó ɖɔ xó nú yě dó axɔ́súɖuɖu Mawu tɔn ɔ́ wú, lobo lɛ́ gbɔ azɔn nú azinzɔnnɔ lɛ́ɛ. Hwe ɖo xɔ na yi wɛ, bɔ mɛsɛ́dó wěwe lɛ́ɛ sɛ yá ɛ, bó ɖɔ n'i ɖɔ: “Nyi mɛ lɛ́ɛ, nú yě ní yi gletoxo lɛ́ɛ mɛ, abǐ gle e yá fí lɛ́ɛ é ta, bó na yi ba fí ɖé nɔ, bó na yi ba nǔɖé xɔ ɖu, ɖó gblǒlǒ mɛ wɛ mì ɖe ɖo fí.” Jezu ka ɖɔ nú yě ɖɔ: “Mi ɖésúnɔ ní ná nǔɖuɖu yě.” Yě ká ɖɔ n'i ɖɔ: “Wɔ̌xúxú atɔ́ɔ́n kpódó hweví we kpán jɛ́n ɖo mǐ sí. Mǐ ná yi xɔ nǔɖuɖu nú mɛ tobutóbú élɔ́ lɛ́ɛ ɖɔ wɛ a ɖe a?” Đó mɛxó súnnu děgba ɖě afatɔ́n (5.000) mɔ̌ wɛ ɖo mɛ lɛ́ɛ mɛ. Jezu ka ɖɔ nú ahwanvú tɔn lɛ́ɛ ɖɔ: “Mi ɖɔ nú mɛ lɛ́ɛ nú yě jínjɔ́n ayǐ sonu sonu, kanɖé wǒ (50) kanɖé wǒ (50).” Yě ɖɔ nú mɛ lɛ́ɛ bɔ yě bǐ sésé jínjɔ́n ayǐ. Jezu ka yí wɔ̌xúxú atɔ́ɔ́n lɛ́ɛ kpódó hweví we lɛ́ɛ kpán, bó kpɔ́n jǐ, bó dó kú nú Mawu, bó kán, lobo sɔ́ nú ahwanvú tɔn lɛ́ɛ, nú yě ní má nú mɛ lɛ́ɛ. Yě bǐ ɖu nǔ, bó gɔ́ xo, bɔ nǔ e yě ɖu kpo ɔ́, è kplé bɔ é gɔ́ xasun wěwe. É wá su gbe ɖokpó, bɔ Jezu ɖo ɖɛ xo wɛ é ɖokpónɔ, bɔ ahwanvú tɔn lɛ́ɛ wá gɔ̌n tɔn, bɔ é kanbyɔ́ yě ɖɔ: “Mɛ̌ un ka nyí bɔ mɛ lɛ́ɛ nɔ ɖɔ?” Bɔ yě yí gbe n'i ɖɔ: “Mɛ ɖě nɔ ɖɔ hwi wɛ nyí Jǎan Yɛhwesinlɛnúmɛtɔ́, mɛ ɖěvo lɛ́ɛ ka nɔ ɖɔ hwi wɛ nyí Elíi, mɛ ɖě ká nɔ ɖɔ gbeyíɖɔ Mawu tɔn xóxó lɛ́ɛ ɖě wɛ fɔ́n sín kú.” É ka lɛ́ kanbyɔ́ yě ɖɔ: “Midɛɛ lɛ́ɛ lo, mɛ̌ un ka nyí bɔ mi nɔ ɖɔ?” Bɔ Piyɛ́ɛ yí xó bó ɖɔ: “Hwi wɛ nyí Klísu Mawu tɔn.” Jezu ka dó sɛ́n nú yě syɛ́nsyɛ́n ɖɔ yě ní ma ɖɔ mɛ e émí nyí ɔ́ nú mɛɖé cáwún ó. Jezu ka lɛ́ ɖɔ nú yě ɖɔ: “Nyɛ Gbɛtɔ́ví ɔ́ ná ji ya ɖésú; tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán ná gbɛ́ mì, lobo ná hu mì. Azǎn tɔn atɔngɔ́ ɔ́ gbe ɔ́, Mawu ka ná fɔ́n mì sín kú.” Jezu lɛ́ ɖɔ nú yě bǐ ɖɔ: “Ényí mɛɖé jló ná xwedó mì hǔn, ní jó tito é ɖésúnɔ tɔn lɛ́ɛ dó, bó ɖíɖá aklúzu tɔn ayǐhɔ́ngbe ayǐhɔ́ngbe, bó xwedó mì. Đó mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú ɖó nyɛ wútu ɔ́ ná hwlɛ́n gbɛ tɔn gán. Ényí mɛɖé ka ɖó nǔ e ɖo gbɛ élɔ́ mɛ ɔ́ bǐ, lobo ka dɔn, abǐ gbɛ é ɖésúnɔ tɔn ka bú dó e ɔ́, le tɛ́ wɛ ɖ'é mɛ n'i? Mɛ e nyɛ kpódó xó ce lɛ́ɛ kpó ná nyí winnyánú ná ɔ́, mɛ ɔ́ lɔmɔ̌ ná nyí winnyánú nú nyɛ Gbɛtɔ́ví ɔ́ hwenu e un ná lɛ́ kɔ wá ɖo susu ce mɛ, ɖo susu Tɔ́ ɔ́ tɔn mɛ, kpódó susu wɛnsagun Mawu tɔn lɛ́ɛ kpó tɔn mɛ é. Má ɖɔ nǔgbó nú mi: mɛ ɖé lɛ́ɛ ɖo mi mɛ fí din, bó ná kó kú cóbó ná mɔ axɔ́súɖuɖu Mawu tɔn ɔ́ ǎ.” Ée Jezu ɖɔ xó énɛ́ lɛ́ɛ gúdo ɔ́, azǎn ná yi tántɔn mɔ̌, bɔ é kplá Piyɛ́ɛ kpódó Jǎan kpó, kpódó Jaki kpán, bó xá só ɖé jí, bó ná yi xo ɖɛ. Hwenu e é ɖo ɖɛ xo wɛ ɔ́, nukún tɔn mɛ sín ninɔmɛ húzú, bɔ awu e é dó ɔ́ húzú wěwé tété, bó nɔ kɔ́n, bɔ mɛ we ɖé lɛ́ɛ ɖo xó ɖɔ xá ɛ wɛ: Mɔyízi kpódó Elíi kpán wɛ. Yě wá tɔ́n ɖo susu Mawu tɔn mɛ, bó ɖo xó ɖɔ xá Jezu wɛ, dó lě e é ná gosín gbɛmɛ fí gbɔn ɖo Jeluzalɛ́mu ɔ́ wú. Piyɛ́ɛ kpódó hǎgbɛ́ tɔn lɛ́ɛ kpán ɖo sɛnmlɔ mɛ; ée yě wá fɔ́n ɔ́, yě mɔ Jezu ɖo susu tɔn mɛ, kpódó mɛ we e ɖo akpá tɔn lɛ́ɛ kpán. Hwenu e mɛ we énɛ́ lɛ́ɛ ɖo nǎ yi wɛ ɔ́, Piyɛ́ɛ ɖɔ nú Jezu ɖɔ: “ Mɛ̌si, fí e mǐ wá din ɔ́ nyɔ́ mɛ! Mǐ ná gbá goxɔ atɔn: towe ɖokpó, Mɔyízi tɔn ɖokpó, Elíi tɔn ɖokpó.” Piyɛ́ɛ ka tunwun nǔ e ɖɔ wɛ é ɖe ɔ́, cóbó ɖo ɖiɖɔ wɛ ǎ. Mɔ̌ ɖɔ wɛ Piyɛ́ɛ ɖe kɛ́ɖɛ́ bɔ akpɔ́kpɔ́ ɖé wá cyɔ́n yě bǐ; ée ahwanvú lɛ́ɛ mɔ mɔ̌ ɔ́, xɛsi jɛ yě jí. È se gbe ɖé sín akpɔ́kpɔ́ ɔ́ mɛ ɖɔ: “Mɛ élɔ́ ɔ́, vǐ ce e un sɔ́ é wɛ; mi ɖótó e.” Ée è se gbe énɛ́ gúdo ɔ́, é wá kpo Jezu ɖokpónɔ. Nǔ énɛ́ e ahwanvú lɛ́ɛ ka mɔ ɔ́, yě hɛn dó ayi mɛ, bó ɖɔ xó ɖěbǔ nú mɛ ɖé sín hwenɛ́nu ǎ. Ayǐhɔ́ngbe tɔn hwenu e yě ɖo te jɛ sín só ɔ́ jí wɛ ɔ́, mɛ gěgé ɖé lɛ́ɛ nyi ahwan wá kpé Jezu. Dǎwe ɖé ká ɖo mɛ lɛ́ɛ mɛ, bó sú xó bó ɖɔ: “ Mɛ̌si, kɛnklɛ́n, nyi kɔ kpɔ́n vǐ súnnu ce, ɖó vǐ ɖokpó géé e un ɖó ɔ́ nɛ́. Yɛ nyanya ɖé nɔ wá zɔn jǐ tɔn; é zɔn jǐ tɔn lě tlóló ɔ́, é nɔ́ jɛ xó sú jí; yɛ nyanya ɔ́ nɔ húnhún i kpódó hlɔ̌nhlɔ́n kpó, bɔ é nɔ́ jɛ afúntúnkplɔ̌ tún jí. É nɔ́ fá cóbɔ yɛ nyanya ɔ́ nɔ́ wá jó e dó ǎ, bɔ vǐ ɔ́ sín lanmɛ bǐ nɔ túlú. Un sa vo nú ahwanvú towe lɛ́ɛ ɖɔ yě ní nya yɛ nyanya ɔ́ sín jǐ tɔn; yě ká kpé wú ǎ.” Jezu ka ɖɔ nú ahwanvú tɔn lɛ́ɛ ɖɔ: “Mi gbɛtɔ́ nyanya, nǔmaɖitɔ́ e mi, káká jɛ hwetɛ́nu wɛ mi ka ná nɔ kɔ jí nú mì yi jɛ?” Bo ka ɖɔ nú vǐtɔ́ ɔ́ ɖɔ: “Kplá vǐ towe wá fí.” Ée vǐ ɔ́ ɖo sisɛyá Jezu wɛ ɔ́, yɛ nyanya ɔ́ sɔ́ ɛ hudɛ́, bó hunhun i kpódó hlɔ̌nhlɔ́n kpó. Jezu ka wa adǎn dó yɛ nyanya ɔ́, bɔ é gosín vǐ ɔ́ jí, bɔ vǐ ɔ́ sín azɔn gbɔ, lobɔ Jezu kplá ɛ jó nú tɔ́ tɔn. Lě e hlɔ̌nhlɔ́n Mawu tɔn d'agba sɔ ɔ́ nyí nǔɖé, bó kpácá yě tawun. Nǔ énɛ́ e Jezu jlɛ́ lɛ́ɛ bǐ ɖo mɛ ɖokpó ɖokpó kpácá wɛ, bɔ é ɖɔ nú ahwanvú tɔn lɛ́ɛ ɖɔ: “Midɛɛ lɛ́ɛ ɔ́, mi ɖótó xó élɔ́ ganjí: è nǎ wá jó nyɛ Gbɛtɔ́ví ɔ́ nú mɛ lɛ́ɛ.” Ahwanvú tɔn lɛ́ɛ ka mɔ nǔ jɛ xó énɛ́ mɛ ǎ; Mawu sɔ́ hwlá dó yě, bónú yě ma mɔ nǔ jɛ mɛ ó, bɔ yě ká glá kan nǔɖé byɔ́ Jezu dó xó énɛ́ ɔ́ wú ǎ. Ahwanvú Jezu tɔn lɛ́ɛ ɖo nǔ dɔn wɛ dó mɛ e nyí nǔ ɖaxó ɖo yě mɛ ɔ́ jí. Jezu ka mɔ nǔ jɛ nǔ e lin wɛ yě ɖe ɔ́ wú, bó dɔn yɔkpɔ́vú ɖokpó dó akpá, bó ɖɔ nú yě ɖɔ: “Mɛ ɖěbǔ yí yɔkpɔ́vú élɔ́ ɖo nyǐ ce tamɛ ɔ́, nyɛ ɖésúnɔ wɛ é yí. Mɛ e ka yí mì ɔ́, mɛ e sɛ́ mì dó ɔ́ wɛ é yí; ɖó mɛ e nɔ sɔ́ éɖée hwe hú mɛ bǐ ɖo mi mɛ ɔ́, mɛ énɛ́ wɛ ná nyí nǔɖaxó.” Jǎan ɖɔ nú Jezu ɖɔ: “ Mɛ̌si, mǐ mɔ mɛɖé, bɔ é nɔ́ ylɔ́ nyǐkɔ towe dó nya yɛ nyanya lɛ́ɛ ná, bɔ mǐ gbɛ́ n'i, ɖó é ɖo ahwan mǐtɔn mɛ ǎ.” Jezu ka ɖɔ n'i ɖɔ: “Mi ma gbɛ́ n'i ó, ɖó mɛ e ma gbɛ́ wǎn nú mi ǎ ɔ́, mɛ mitɔn wɛ.” Hwenu e Mawu na sɔ́ Jezu sín gbɛmɛ fí ɔ́ ɖo susu wɛ, bɔ Jezu ɖidó Jeluzalɛ́mu, kpódó akɔ́nkpinkpan kpó. É sɛ́ wɛnsagun lɛ́ɛ dó bɔ yě jɛ nukɔn n'i, bó yi gletoxo ɖé mɛ, ɖo Samalíi gbé jí, bó na bló tɛnmɛ ɖó n'i. Lo ɔ́, mɛ lɛ́ɛ yí i ǎ, ɖó Jeluzalɛ́mu e é xwe ɔ́ wútu. Ée ahwanvú tɔn Jaki kpódó Jǎan kpó mɔ mɔ̌ ɔ́, yě ɖɔ n'i ɖɔ: “A jlǒ nú mǐ ní ná gbe nú zo jɛ te sín jǐxwé, bó fyɔ́ yě a?” Jezu ka lílɛ́ kpan nukɔn yě, bó wa adǎn dó ta nú yě, bɔ yě ɖidó gletoxo ɖěvo mɛ. Ée yě ɖo ali jí xweyǐgbe ɔ́, mɛɖé ɖɔ nú Jezu ɖɔ: “Un ná xwedó we yi fí e a na yi lɛ́ɛ bǐ.” Jezu ka yí gbe n'i ɖɔ: “Ayǐsájɛ lɛ́ɛ ɖó nɔtɛn yětɔn, bɔ xɛ e nɔ zɔn gbɔn jɔ mɛ lɛ́ɛ ɖó adɔ̌ yětɔn; lo ɔ́, nyɛ Gbɛtɔ́ví ɔ́ ka ɖó fí e un ná mlɔ́, bó ná gbɔjɛ́ ɔ́ ǎ.” É ka ɖɔ nú mɛ ɖěvo ɖɔ: “Xwedó mì.” Mɛ ɔ́ ka yí gbe n'i ɖɔ: “Aklúnɔ, gbɔ nú ma tó yi ɖi tɔ́ ce hwɛ̌.” Jezu ka yí gbe n'i ɖɔ: “Jǒ mɛkúkú lɛ́ɛ dó nú yě ní ɖi cyɔ yětɔn lɛ́ɛ. Amɔ̌, hwɛ yi jlá Wɛn Ɖagbe e ɖɔ xó dó axɔ́súɖuɖu Mawu tɔn wú é.” Mɛ ɖěvo ka lɛ́ ɖɔ n'i ɖɔ: “Un ná xwedó we Aklúnɔ; lo ɔ́, gbɔ nú ma yi dó yibowá nú mɛ ce lɛ́ɛ hwɛ̌.” Jezu ka yí gbe n'i ɖɔ: “Mɛ e sɔ́ glelɛmɔ e nyibú nɔ dɔn ɔ́ dó ɖo gle lɛ ná wɛ, bó ɖo gǔdo kpɔ́n wɛ ɔ́ jɛ xá axɔ́súɖuɖu Mawu tɔn ǎ.” Énɛ́ gúdo ɔ́, Aklúnɔ lɛ́ ɖe ahwanvú kanɖé gban-nukún-we (72), bó sɛ́ yě dó webɔ webɔ, bɔ yě jɛ nukɔn n'i yi to e mɛ é ɖésú ɖó ná yi lɛ́ɛ, kpódó fí e é ɖó ná gbɔn lɛ́ɛ bǐ kpán. É ɖɔ nú yě ɖɔ: “Nǔkún ɖo kpɔ́ gégé ɖo gle mɛ, nǔkún-yatɔ́ lɛ́ɛ ká nyí kpɛɖé; mi bó sa vo nú jinukúnnɔ ɔ́, nú é sɛ́ azɔ̌watɔ́ dó jinukúngbo tɔn mɛ. Mi yi! Éɖíe un sɛ́ mi dó, bɔ mi ná cí lɛ̌ngbɔ́ ɖɔhun ɖo hla lɛ́ɛ tɛ́ntin e. Mi ma hɛn akwɛ́hɛnnú ó, mi ma hɛn nǔbyɔ́ɖutɔ́glo ó, mi ma ka hɛn afɔkpa ó, mi ma nɔ te ɖo ali jí, bó dó gbe mɛ ó. Mi byɔ́ xwé ɖé gbe hǔn, mi ɖɔ hwɛ̌ ɖɔ: ‘Fífá ní nɔ xwé élɔ́ jí.’ Mi byɔ́ toxo ɖěbǔ mɛ bónú è yí mi, bó na nǔ ɖěbǔ mi hǔn, mi ɖu. Mi gbɔ azɔn nú azinzɔnnɔ e ɖo fínɛ́ lɛ́ɛ é, bó ɖɔ nú mɛ lɛ́ɛ ɖɔ: ‘ Axɔ́súɖuɖu Mawu tɔn ko sɛ yá mi.’ Amɔ̌, nú mi byɔ́ to ɖé mɛ, bónú è ma yí mi ǎ hǔn, mi tɔ́n jɛ toligbó lɛ́ɛ xo, bó ɖɔ: ‘To mitɔn sín afúntúntún e vun dó afɔ mǐtɔn lɛ́ɛ wú ɖésú ɔ́, mǐ xúxú kɔn nyi ayǐ nú mi, bó ná dó ɖe xlɛ́ mi ɖɔ nǔ e mi wa ɔ́ kún nyɔ́ ó. Mi ní ka tunwun ɖɔ axɔ́súɖuɖu Mawu tɔn ko sɛ yá.’ Ma ɖɔ nú mi: hwenu e Mawu ná ɖɔ hwɛ xá gbɛtɔ́ lɛ́ɛ ɔ́, tó e è nǎ dɔn nú Sodɔ́munu lɛ́ɛ ɔ́ ná bɔwǔ hú ée è nǎ dɔn nú to énɛ́ mɛ nu lɛ́ɛ é.” “Heelú mi Kolazíinnu lɛ́ɛ! Heelú mi Bɛtisayidanu lɛ́ɛ! Đó nǔ e Mawu jlɛ ɖo to mitɔn lɛ́ɛ mɛ ɔ́, ényí Tíi abǐ Sidɔ́ɔn wɛ è ko jlɛ́ nǔ énɛ́ lɛ́ɛ ɖe ɔ́, to énɛ́ lɛ́ɛ mɛ nu lɛ́ɛ ɔ́, yě ná ko bɛ́ ati kplá, bó kó lɛ afín, bó ná dó ɖe xlɛ́ ɖɔ émí lɛ́ kɔ sín hwɛ émítɔn lɛ́ɛ gúdo. Énɛ́ ɔ́ wú wɛ hwenu e Mawu ná ɖɔ hwɛ xá gbɛtɔ́ lɛ́ɛ ɔ́, hwɛ e Mawu ná ɖɔ xá Tíinu lɛ́ɛ kpódó Sidɔ́ɔnnu lɛ́ɛ kpán ɔ́ ná syɛ́n sɔ́ ée é ná ɖɔ xá midɛɛ lɛ́ɛ ɔ́ ǎ. Hwɛ ɔ́ ka lo Kafaanawúmu! A nǎ sɔ́ hwiɖée yi jǐ káká yi sɔ́ jǐnukúnsin wɛ a ka vɛdó a? Gbeɖé kpɔ́n; káká kútomɛ wɛ è nǎ kpíkpé we nyi dó.” É lɛ́ ɖɔ nú ahwanvú tɔn lɛ́ɛ ɖɔ: “Mɛ e ɖótó mi ɔ́, nyɛ wɛ é ɖótó; mɛ e ka gbɛ́ mi ɔ́, nyɛ wɛ é gbɛ́. Mɛ e ka gbɛ́ mì ɔ́, é gbɛ́ mɛ e sɛ́ mì dó ɔ́.” Ahwanvú lɛ́ɛ lɛ́ kɔ wá kpódó xomɛhunhun kpán, bó ɖɔ nú Jezu ɖɔ: “Aklúnɔ, mǐ ylɔ́ nyǐkɔ towe lě ɔ́, yɛ nyanya lɛ́ɛ ɖésú nɔ jó ta nú mǐ.” É ka ɖɔ nú yě ɖɔ: “Un mɔ Satáan, bɔ é jɛ ayǐ sín jǐxwé, jǐkɛwun ɖɔhun. Un ná acɛ mi, bɔ mi ná ɖi zɔnlin gbɔn dan jí, bó ná ɖi zɔnlin gbɔn hɔnkéklě jí, bó ná ɖu ɖo awǒvi sín hlɔ̌nhlɔ́n lɛ́ɛ bǐ jí, lobɔ nǔ ɖěbǔ ná kpé mi wú ǎ. É ɖo mɔ̌ có, yɛ nyanya lɛ́ɛ e jó ta nú mi é wú wɛ xomɛ ná hun mi ǎ; lo ɔ́, xomɛ ní hun mi ɖó nyǐkɔ mitɔn e è wlǎn ɖó sɛ́xwé é wú.” Hwenɛ́nu tlóló ɔ́, Yɛsinsɛn dó xomɛ hunhun ɖaxó ɖé nú Jezu, bɔ é ɖɔ: “Daá! Aklúnɔ jǐnukúnsin kpódó ayǐkúngban kpó tɔn, un dó kú nú we, ɖó a sɔ́ nǔ énɛ́ lɛ́ɛ hwlá dó nukúnnú-mɔjɛ́nǔmɛtɔ́ lɛ́ɛ, kpódó nǔnywɛ́tɔ́ lɛ́ɛ kpó, lobo ka ɖe yě xlɛ́ vǐ ɖo anɔ̌nu lɛ́ɛ. Mɔ̌ wɛ Daá! Đó lě e a jlǒ gbɔn é nɛ́. “Nǔ bǐ wɛ Tɔ́ ce sɔ́ dó alɔ ce mɛ, bɔ mɛ ɖěbǔ tunwun mɛ e Vǐ ɔ́ nyí ɔ́ zɛ Tɔ́ ɔ́ wú ǎ; mɛ ɖěbǔ ká tunwun mɛ e Tɔ́ ɔ́ nyí ɔ́ zɛ Vǐ ɔ́ kpódó mɛ e Vǐ ɔ́ jló ná ɖe e xlɛ́ lɛ́ɛ kpó wú ǎ.” Jezu lílɛ́ kpan nukɔn ahwanvú tɔn lɛ́ɛ, bó ɖɔ nú yě ɖokpónɔ ɖɔ: “Nǔ nyɔ́ nú mi mɛ e ɖo nǔ élɔ́ lɛ́ɛ mɔ wɛ din é! Đó má ɖɔ nú mi: gbeyíɖɔ Mawu tɔn gěgé kpódó axɔ́sú gěgé kpán jló ná mɔ nǔ e mɔ wɛ mi ɖe é; yě ká mɔ ǎ; yě jló ná se nǔ e se wɛ mi ɖe é, yě ká se ǎ.” Sɛ́nkplɔ́nmɛtɔ́ ɖé ka sí te, bó jló ná ɖó mɔ nú Jezu, bó ɖɔ n'i ɖɔ: “ Mɛ̌si, étɛ́ un ɖó ná wa, bɔ Mawu ná ná mì gbɛ mavɔ mavɔ?” Jezu ka yí gbe n'i ɖɔ: “Étɛ́ è ka wlán dó sɛ́nwéma ɔ́ mɛ? Nǔ e a xa ɔ́, nɛ̌ wɛ a mɔ nukúnnú jɛ mɛ gbɔn?” Nya ɔ́ yí gbe ɖɔ: “A nǎ yí wǎn nú Aklúnɔ Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó hlɔ̌nhlɔ́n towe bǐ kpó, kpódó linlin towe bǐ kpó, lobo yí wǎn nú nɔzo towe hwi ɖésúnɔ ɖɔhun.” Jezu ka ɖɔ n'i ɖɔ: “A yǐ gbe ɖó ganjí. Blǒ gbɔn mɔ̌, énɛ́ ɔ́, a nǎ nɔ gbɛ.” Lo ɔ́, ée nya ɔ́ jló ná ɖe xlɛ́ ɖɔ émí kan nǔ byɔ́ ɖó ganjí ɔ́, é ɖɔ nú Jezu ɖɔ: “Mɛ̌ ká nyí nɔzo ce?” Jezu yí xó, bó ɖɔ: “Nya ɖé gosín Jeluzalɛ́mu wá xwe Jeliko, bó jɛ ajotɔ́ lɛ́ɛ sín alɔ mɛ, bɔ yě zɔn jǐ tɔn, bó ɖe nǔ e é dó lɛ́ɛ bǐ, bó fin nǔ tɔn lɛ́ɛ bǐ, lobo xo e, bó jó e dó nyi beɖebeɖe bó yi. Vɔ̌sánú-xwlémawutɔ́ ɖé ka wá ɖo dǐndín gbɔn fínɛ́ wɛ vlafo, bó mɔ ɛ, lobo gbɔn akpá ɖěvo xwé n'i bó yi. Mɔ̌ ɖokpó ɔ́, Levíi ví ɖé wá jɛ fí e é ɖe é, bó mɔ ɛ, lobo gbɔn zɔ n'i bó yi. Samalíinu ɖé ka wá xwe to mɛ, bó jɛ fí e é ɖe é, bó mɔ ɛ, bɔ nǔ tɔn blá wǔ n'i. É sɛ yá ɛ, bó ɖó ami kpódó vɛ̌ɛn kpó akpa lɛ́ɛ mɛ n'i, lobo blá; énɛ́ ɔ́ gúdo ɔ́, é sɔ́ ɛ ɖó sɔ́ é ɖésúnɔ tɔn jí, lobo kplá ɛ yi xwé e gbe alitanu lɛ́ɛ nɔ́ yi nɔ é, bó kpé nukún wǔ tɔn. Ayǐhɔ́ngbe tɔn ɔ́, é ɖe gankwɛ́ we tɔ́n, bó sɔ́ nú xwénɔ ɔ́, bó ɖɔ: ‘Kpé nukún nya élɔ́ wú; ényí a zǎn akwɛ́ ɖé dó wǔ tɔn hú mɔ̌ ɔ́, un lɛ́ kɔ ɔ́, un ná sú we.’ ” “Đo mɛ atɔn énɛ́ lɛ́ɛ mɛ ɔ́, mɛ̌ ká ɖe xlɛ́ ɖɔ émí nyí nya e jɛ ajotɔ́ lɛ́ɛ sín alɔ mɛ é sín nɔzo, bɔ ayi towe mɔ?” Sɛ́nkplɔ́nmɛtɔ́ ɔ́ ka yí gbe n'i ɖɔ: “Mɛ e kú nǔbláwǔ n'i é wɛ.” Jezu ka ɖɔ n'i ɖɔ: “Hwi lɔ ɔ́, yi bló gbɔn mɔ̌.” Jezu ɖo yiyi wɛ gbe ɖokpó, é kpódó ahwanvú tɔn lɛ́ɛ kpó. É byɔ́ gletoxo ɖé mɛ; nyɔ̌nu ɖé ɖo fínɛ́, bó yí i dó xwé gbe. È nɔ ylɔ́ nyɔ̌nu ɔ́ ɖɔ Maati. Maati ka ɖó nɔví nyɔ̌nu ɖokpó, bɔ é nɔ nyí Mali. Mali ɔ́ wá jínjɔ́n Aklúnɔ kpá, ɖo afɔ tɔn lɛ́ɛ kɔn, bó ɖo tó ɖó nǔkplɔ́nmɛ tɔn lɛ́ɛ wɛ. Maati ka ɖo azɔ̌ wa wɛ nukún myámyá, bó ná yí Jezu sín jǒnɔ. É wá mɔ Jezu bó ɖɔ n'i ɖɔ: “Aklúnɔ, lě e nɔví ce jó azɔ̌ bǐ dó nyi kɔ jí nú nyɛ ɖokpónɔ ɔ́ ɖɔ nǔɖé nú we ǎ cé? Đɔ n'i nú é ní wá dó alɔ mì.” Aklúnɔ ka yí gbe n'i ɖɔ: “Maati, Maati, ado nɔ hu we dín, bɔ a nɔ fɔ nǔ gěgé dó dó tagba nú hwiɖée. Nǔ ɖokpó géé jɛ́n ká ɖo tají. Mali wɛ ka sɔ́ akpá ɖagbe ɔ́, bɔ mɛɖé ná yí sín así tɔn ǎ.” Jezu ɖo ɖɛ xo wɛ gbe ɖokpó ɖo fí ɖé. Ée é xo ɖɛ ɔ́ fó ɔ́, ahwanvú tɔn ɖokpó ɖɔ n'i ɖɔ: “Aklúnɔ, kplɔ́n mǐ lě e mǐ ná nɔ́ xo ɖɛ gbɔn é, lě e Jǎan kplɔ́n ahwanvú tɔn lɛ́ɛ gbɔn é.” Bɔ Jezu ɖɔ nú yě ɖɔ: “Mi ɖo ɖɛ xo wɛ hǔn, mi nɔ ɖɔ: ‘Daá! Nyǐkɔ towe ní nyí nǔsísí; axɔ́súɖuɖu towe ní wá; nɔ ná nǔɖuɖu e mǐ ná ɖu é mǐ ayǐhɔ́ngbe ayǐhɔ́ngbe; sɔ́ hwɛ mǐtɔn lɛ́ɛ kɛ mǐ, ɖó mǐ lɔ nɔ sɔ́ hwɛ kɛ mɛ e nɔ jɛ agɔ dó mǐ lɛ́ɛ bǐ; ma lɔn nú mǐ ní jɛ tɛ́nkpɔ́n mɛ ó.’ ” É ka lɛ́ ɖɔ nú yě ɖɔ: “Ényí mɛɖé ɖo mi mɛ, bó ɖó xɔ́ntɔn ɖokpó, bó yi mɔ ɛ zǎnxwete, bó ɖɔ n'i ɖɔ: ‘Xɔ́ntɔn, nya wɔ̌xúxú atɔn nú mì, ɖó xɔ́ntɔn ce ɖokpó xwe tomɛ, bó wá gbɔn gɔ̌n ce; un ka ɖó nǔɖé ná ná ɛ ǎ,’ bónú mɛ ɖě ɔ́ nɔ xɔ mɛ, bó yí gbe n'i ɖɔ: ‘Ma dó tagba nú mì ó. Un ko dó gan hɔn ce mɛ, bɔ nyɛ kpódó vǐ ce lɛ́ɛ kpó kó yi xɔ; un sɔ́ sixú sí te bó sɔ́ nǔɖé nú we ǎ.’ Ma ɖɔ nú mi: ényí é má kpɔ́n dó xɔ́ntɔn e yě nyí ɔ́ wú ǎ ɔ́, é ná kpɔ́n dó tagba e dó n'i wɛ é ɖe é wú, bó ná sí te wá ná ɛ nǔ e hu dó e lɛ́ɛ é bǐ. Ma ka ɖɔ nú mi: mi byɔ́ nǔ Mawu, é ná ná mi; mi ba, mi ná mɔ; mi xúxú hɔn, è nǎ hun nú mi. Đó, mɛ ɖěbǔ ɖo nǔ byɔ́ wɛ ɔ́, è nǎ na ɛ; mɛɖé ba ɔ́, é ná mɔ; mɛɖé xúxú hɔn ɔ́, è nǎ hun n'i. Vǐtɔ́ tɛ́ ká ɖo mi mɛ, bónú vǐ tɔn byɔ́ ɛ hweví ɔ́, é ná zé dan dó alɔ mɛ n'i? Abǐ, é ná byɔ́ ɛ azin, bɔ é ná sɔ́ hɔnkéklě dó alɔ mɛ n'i? Midɛɛ lɛ́ɛ ɔ́, lě e mi nyí mɛ nyanya sɔ é nɛ́, có mi nyɔ́ nǔ ɖagbe ná vǐ mitɔn lɛ́ɛ. Bɔ nɛ̌ Mawu Tɔ́ e ɖo sɛ́xwé ɔ́ má ka ná ná Yɛsinsɛn tɔn mɛ e byɔ́ ɛ lɛ́ɛ ǎ gbɔn?” Nya ɖé tíin bɔ yɛ nyanya e nɔ hu ɖɛ̌ nú mɛ ɔ́ ɖo jǐ tɔn, bɔ é nɔ sixú ɖɔ xó ǎ; Jezu ka nya yɛ nyanya ɔ́ sín jǐ tɔn, bɔ é kpácá togun ɔ́ bǐ. Lo ɔ́, mɛ ɖé lɛ́ɛ ɖo mɛ lɛ́ɛ mɛ bó ɖɔ: “ Bɛluzebúlu yɛ nyanya lɛ́ɛ xɔ́sú sín hlɔ̌nhlɔ́n wɛ é nɔ́ dó nya yɛ nyanya lɛ́ɛ ná.” Mɛ ɖěvo lɛ́ɛ ká jló ná ɖó mɔ nú Jezu, bó byɔ́ ɛ ɖɔ ní ɖe wuntun ɖé xlɛ́ émí, bónú è nǎ mɔ ɖɔ Mawu gɔ̌n wɛ hlɔ̌nhlɔ́n tɔn gosín. Ée Jezu ka tunwun linlin yětɔn lɛ́ɛ ɔ́, é ɖɔ nú yě ɖɔ: “Nú axɔ́súɖuto ɖé tíin, bɔ to ɔ́ mɛ nu lɛ́ɛ ma ɖó gbe kpɔ́ ǎ ɔ́, axɔ́súɖuto énɛ́ ɔ́, gba wɛ é nɔ gba; xwé ɖé ka tíin, bónú xwé ɔ́ gbe nu lɛ́ɛ ma ɖó gbe kpɔ́ ǎ ɔ́, xwé énɛ́ ɔ́ gba wɛ é nɔ gba. Ényí Satáan tɔ́n ahwan éɖée ɔ́, nɛ̌ wɛ axɔ́súɖuto tɔn ka sixú nɔ te gbɔn? Mi ɖíe ɖɔ yɛ nyanya lɛ́ɛ xɔ́sú Bɛluzebúlu sín hlɔ̌nhlɔ́n wɛ nyɛ nɔ dó nya yɛ nyanya lɛ́ɛ ná e. Ényí ɖɔ yɛ nyanya lɛ́ɛ xɔ́sú Bɛluzebúlu sín hlɔ̌nhlɔ́n wɛ nyɛ nɔ sɔ́ dó nya yɛ nyanya lɛ́ɛ ná ɔ́, mɛ̌ sín hlɔ̌nhlɔ́n wɛ ahwanvú mitɔn lɛ́ɛ ká nɔ dó nya yě ná lo? Énɛ́ ɔ́ wútu wɛ yě ɖésúnɔ ná wá ɖɔ hwɛ xá mi. Lo ɔ́, é nyí ɖɔ Mawu sín hlɔ̌nhlɔ́n wɛ un nɔ dó nya yɛ nyanya lɛ́ɛ ná ɔ́, hǔn mi bó tunwun ɖɔ axɔ́súɖuɖu Mawu tɔn kó wá mi mɛ. “Ényí nya hlɔ̌nhlɔ́nɖowǔnánɔ ɖé sɔ́ ahwannú ganjí, bó ɖo xwé tɔn cɔ́ wɛ ɔ́, nǔɖé nɔ́ wa nǔ e é ɖó lɛ́ɛ ǎ. Amɔ̌, ényí mɛ e dó hlɔ̌nhlɔ́n hú i é ɖě ká wá zɔn jǐ tɔn, bó ɖu ɖo jǐ tɔn ɔ́, mɛ énɛ́ ɔ́ ná yí alǐnnyánú e wú é ɖeji dó lɛ́ɛ bǐ sín así tɔn, bó ná bɛ́ nǔ e é ɖó lɛ́ɛ bǐ, bó fɔ má. “Mɛ e ma ɖo ahwan ce mɛ ǎ ɔ́, mɛ énɛ́ mɔ mì gbɔ ǎ; mɛ e ma ka nɔ dɔn gbɛtɔ́ lɛ́ɛ wá gɔ̌n ce ǎ ɔ́, yě nya dó zɔ nú mì wɛ é ɖe.” “Ényí yɛ nyanya gosín mɛɖé jí ɔ́, é nɔ́ yi dán gbɔn axéko jí, bó nɔ́ ɖo gbɔjɛtɛn ba wɛ. Ényí é má mɔ ǎ ɔ́, é nɔ́ ɖɔ jí: ‘Un ná lɛ́ kɔ yi xwé ce e gbe un gosín é.’ Nú é wá ɔ́, é nɔ mɔ bɔ è ko za xwé ɔ́ gbe, bó ko blóɖó bǐ. Nú é mɔ mɔ̌ ɔ́, é nɔ yi, bó nɔ́ kplá yɛ nyanya e nylá hú é ɖésúnɔ ɔ́ tɛ́nwe dó éɖée jí, bɔ yě nɔ wá byɔ́ xwé ɔ́ gbe, bó nɔ́ nɔ fínɛ́, bɔ nya énɛ́ ɔ́ sín ninɔmɛ nɔ wá nylá hú hwenu e yɛ nyanya ɖokpó ɖo jǐ tɔn é.” Énɛ́ ɔ́ ɖɔ wɛ Jezu ɖe bɔ nyɔ̌nu ɖé zé gbe yi jǐ ɖo mɛ lɛ́ɛ mɛ, bó ɖɔ: “Nǔ nyɔ́ nú adɔgo e mɛ a nɔ é! Nǔ nyɔ́ nú anɔ̌ e a nɔ̌ é.” Jezu ka yí gbe ɖɔ: “Éeǒ! É nyɔ́ wa ɔ́, mɛ e se Mawuxó ɔ́, bó bló ɖ'é jí lɛ́ɛ wɛ nǔ nyɔ́ ná.” Ée mɛ gěgé nyi ahwan wá kplé ɖo Jezu gɔ́n ɔ́, é yí xó bó ɖɔ: “Gbɛtɔ́ din tɔn lɛ́ɛ ɔ́, mɛ nyanya wɛ nú yě; yě ɖo nǔjíjlɛ́ e ná ɖe hlɔ̌nhlɔ́n Mawu tɔn xlɛ́ ɔ́ ɖokpó ba wɛ; yě ká sɔ́ ɖo nǔjíjlɛ́ ɔ́ ɖěvo ná mɔ wɛ zɛ gbeyíɖɔ Mawu tɔn Jonási tɔn ɔ́ wú ǎ. Đó lě e Jonási nyí wuntun ɖokpó nú Ninívunu lɛ́ɛ ɔ́, mɔ̌ wɛ nyɛ Gbɛtɔ́ví ɔ́ ná nyí wuntun nú gbɛtɔ́ din tɔn lɛ́ɛ é nɛ́. Đo hwɛɖɔzán gbe ɔ́, axɔ́sú-nyɔ̌nu tofɔligbé tɔn ɔ́ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó é gosín to línlín mɛ, bó wá ɖótó nǔnywɛ́xó axɔ́sú Salomɔ́ɔ tɔn. Nǔ e ka ɖo fí din ɔ́ hú gǎn Salomɔ́ɔ. Hwɛɖɔzán gbe wá su ɔ́, Ninívunu lɛ́ɛ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó hwenu e gbeyíɖɔ Mawu tɔn Jonási ɖɔ Mawuxó nú yědɛɛ lɛ́ɛ ɖo Ninívu ɔ́, yě se, lobo lɛ́ kɔ sín hwɛ yětɔn lɛ́ɛ gúdo; éɖíe: nǔ e ka ɖo fí din ɔ́ hú gǎn Jonási.” “Mɛ ɖé nɔ́ tá zogbɛ́n bó nɔ́ sɔ́ hwlá ǎ; è ka nɔ xwe nǔ dó ǎ. Lo ɔ́, nǔ ta aga wɛ è nɔ sɔ́ ɖó, nú mɛ e ná byɔ́ xwé gbe lɛ́ɛ ná dó mɔ wěziza. Nukún towe lɛ́ɛ wɛ nyí zogbɛ́n nú agbaza towe; ényí nukún towe lɛ́ɛ ɖo ganjí ɔ́, agbaza towe bǐ ɖo wěziza mɛ. Ényí nukún towe lɛ́ɛ ma ka ɖo ganjí ǎ ɔ́, agbaza towe ɔ́ bǐ ɖo zǐnflú mɛ. Bo cɔ́ hwiɖée, bónú wěziza e ɖo wǔtu towe ɔ́ má nyí zǐnflú ó. Ényí agbaza towe bǐ ɖo wěziza mɛ, bónú akpá ɖěbǔ xwé ma ɖo ablu mɛ ǎ ɔ́, é ná za wě bǐ sésé lě e zogbɛ́n sín wěziza nɔ́ hɔ́n dó jǐ towe gbɔn é.” Ée Jezu ɖɔ xó fó ɔ́, Falizyɛn ɖokpó wá ylɔ́ ɛ ɖɔ ní wá ɖu nǔ ɖo émí gɔ́n. Jezu ka yi Falizyɛn ɔ́ xwé, bó jínjɔ́n ayǐ, bó ná ɖu nǔ. Ée Falizyɛn ɔ́ mɔ ɖɔ Jezu kún klɔ́ alɔ lě e sɛ́n ɔ́ zɔ́n gbɔn ɔ́ cóbó jɛ nǔ ɖu jí ó ɔ́, é kpácá ɛ. Lo ɔ́, Aklúnɔ ɔ́ ɖɔ n'i ɖɔ: “Mi Falizyɛn lɛ́ɛ ɖíe nǔgbó; mi nɔ klɔ́ kɔ́fu kpódó agbǎn kpó gúdo; lo ɔ́, dǎka kpódó ajo kpó wɛ gɔ́ xo mitɔn mɛ. Yɛyinɔ e mi! Mɛ e bló agbǎn gúdo ɔ́ jɛ́n ká bló agbǎn xomɛ lɔmɔ̌ ǎ cé? Mi gbɔ bó ná nǔɖuɖu e ɖo kɔ́fu kpódó agbǎn kpó xomɛ ɔ́ wamamɔnɔ lɛ́ɛ; énɛ́ ɔ́, nǔ bǐ ná nyí nǔ mímɛ́ ɖo nukún mitɔn mɛ. “Heelú mi Falizyɛn lɛ́ɛ! Đó mi nɔ ná mǎɖówǒ nǔhwɛ́nkún e è nɔ ylɔ́ ɖɔ mati é kpódó ée è nɔ ylɔ́ ɖɔ hlúu é kpó, kpódó mǎ tɛnmɛ tɛnmɛ lɛ́ɛ kpó tɔn lobo ka nɔ dó vɛ̌ nú nǔjlɔ́jlɔ́wiwa kpódó wǎn yí nú Mawu kpó. Nǔ énɛ́ lɛ́ɛ wɛ mi ɖó ná wa, ma wɔn ɖě lɛ́ɛ. “Heelú mi Falizyɛn lɛ́ɛ! Mi nɔ yí wǎn nú tɛn nukɔntɔn lɛ́ɛ mɛ ninɔ, ɖo kplɔ́ngbasá Jwifu lɛ́ɛ tɔn, lobo nɔ jló ɖɔ è nǐ dó gbe émí kpódó sísí kpó ɖo tokplétɛn lɛ́ɛ. Heelú mi, ɖó mi cí yɔta e è ma ɖó wuntun ǎ, bɔ è ma nɔ tunwun ǎ bó nɔ́ gbɔn jí lɛ́ɛ é ɖɔhun.” Sɛ́nkplɔ́nmɛtɔ́ ɖokpó ka yí xó, bó ɖɔ n'i ɖɔ: “ Mɛ̌si, a ɖo xó ɖɔ gbɔn mɔ̌ wɛ hǔn, mǐ lɔ zun wɛ a ɖe.” Jezu ka ɖɔ: “Heelú mi sɛ́nkplɔ́nmɛtɔ́ lɛ́ɛ lɔmɔ̌, ɖó mi nɔ dó agban kpinkpɛn nú mɛ lɛ́ɛ, bó ka sɔ́ nɔ wa nǔ ɖěbǔ dó dó alɔ yě ǎ! Heelú mi, ɖó mi nɔ xo kpe ɖagbe lɛ́ɛ nyi gbeyíɖɔ Mawu tɔn e tɔ́gbó mitɔn lɛ́ɛ hu lɛ́ɛ é sín yɔ lɛ́ɛ ta! Nǔ e tɔ́gbó mitɔn lɛ́ɛ wa ɔ́, mi ɖo kúnnu ɖe ná wɛ, bó yí dó yětɔn jí; ɖó yědɛɛ lɛ́ɛ hu gbeyíɖɔ Mawu tɔn lɛ́ɛ; midɛɛ lɛ́ɛ ɔ́, mi ka xo kpe ɖagbe nyi yɔ yětɔn lɛ́ɛ ta! Nǔ énɛ́ wú wɛ Mawu ko ɖɔ dó mi wú ɖ'ayǐ ɖo nǔnywɛ́ tɔn mɛ ɖɔ: ‘Un ná sɛ́ gbeyíɖɔ lɛ́ɛ kpódó mɛsɛ́dó lɛ́ɛ kpán dó yě; yě ná hu mɛ ɖě, bó ná dó ya nú mɛ ɖě,’ bónú Mawu ná kan gbeyíɖɔ tɔn lɛ́ɛ sín hun byɔ́ gbɛtɔ́ din tɔn lɛ́ɛ; gbeyíɖɔ Mawu tɔn e sín hun tɔ́gbó yětɔn lɛ́ɛ sɔ́ kɔn nyi ayǐ sín hwenu e Mawu ko ɖó gbɛ ɔ́ dó é; ɛɛn, má ɖɔ nú mi; Mawu ná kan hun yětɔn byɔ́ gbɛtɔ́ din tɔn lɛ́ɛ, bɛ́ sín Abɛ́li sín hun jí, káká yi jɛ Zekaliya tɔn jí; Zekaliya e è hu ɖo sinsɛnxɔ mɛ, ɖo vɔ̌sákpe ɔ́ kpódó tɛn mímɛ́ ɔ́ kpó tɛ́ntin é. “Heelú mi sɛ́nkplɔ́nmɛtɔ́ lɛ́ɛ, ɖó mi sɔ́ nǔnywɛ́xwé sín cávi ɔ́; mi ɖésúnɔ ɔ́, mi byɔ́ mɛ ǎ; mɛ e ka jló ná byɔ́ mɛ lɛ́ɛ ɔ́, mi nɔ lɛ́ sú ali tɔn dó yě!” Ée Jezu tɔ́n sín Falizyɛn ɔ́ xwé ɔ́, sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó jɛ gǒmɛ n'i, bó jɛ nǔ kanbyɔ́ ɛ jí magbokɔ, bó ná dó ɖó mɔ n'i, lobo ná mɔ tɛn bó ná wlí i ɖo xógbe tɔn lɛ́ɛ mɛ. Hwenu e Jezu ɖo xó énɛ́ lɛ́ɛ ɖɔ wɛ ɔ́, gbɛtɔ́ afatɔ́n (1.000) afatɔ́n (1.000) donu mɔ̌kpán wá kplé ɖo fí e é ɖe ɔ́; mɛ lɛ́ɛ sukpɔ́ káká, bó ɖo afɔ tɛ yěɖée jí wɛ. Jezu ka to ɖɔ nú ahwanvú tɔn lɛ́ɛ hwɛ̌ ɖɔ: “Mi cɔ́ miɖée dó tɔ́n Falizyɛn lɛ́ɛ tɔn e nyí yɛmɛnúwiwa é wú. Nǔɖé ɖo nǔglɔ́, bó ná gɔn wěxo ma jɛ ǎ; nǔɖé ka ɖo wi mɛ bɔ è nǎ gɔn nukúnnú ma mɔ jɛ wú ǎ. Énɛ́ ɔ́ wú wɛ nǔ e mi ná ɖɔ ɖo zǐnflú mɛ é bǐ wɛ è nǎ wá se ɖo kéze ɖéɖé. Nǔ e sín kpá mi ka ná ɖe ɖo xɔnɔnɔ mɛ ɔ́, bǐ wɛ è nǎ wá jlá gbɔn fí bǐ, bɔ mɛ bǐ ná se.” “Xɔ́ntɔn ce lɛ́ɛ, má ɖɔ nú mi; mi ma ɖi xɛsi ɖěbǔ nú mɛ e nɔ hu agbaza, bɔ énɛ́ ɔ́ gúdo ɔ́, yě ma sɔ́ sixú wa nǔɖé hú mɔ̌ ǎ lɛ́ɛ ó. Lo ɔ́, ma ɖɔ mɛ e mi ná ɖi xɛsi ná é nú mi: mi ɖi xɛsi nú Mawu e ɖó acɛ, bó hɛn ɔ́, é ná zé mi nyi dó zo mɛ ɖo kú mitɔn gúdo é. Ɛɛn! Má ɖɔ nú mi: é wɛ mi ɖó ná nɔ ɖi xɛsi ná. “Gboli atɔ́ɔ́n ɖo akwɛ́ ɖé jí ǎ; é ɖo mɔ̌ có, Mawu ka nɔ kpé nukún dó ɖokpó ɖokpó yětɔn wu. Midɛɛ lɛ́ɛ ɔ́, ɖa nabí e ɖo ta nú mi ɔ́ ɖésú ɔ́, Mawu tunwun bǐ; mi bó ma ɖi xɛsi ó. Đó nú è na bo kplé gboli mɔ̌kpán ɖó kpɔ́ ɔ́, mi xɔ akwɛ́ hú yě.” “Mɛ e ná ɖe kúnnu nú mì ɖo gbɛtɔ́ lɛ́ɛ nukɔn ɖɔ émí nyí ahwanvú ce ɔ́, nyɛ Gbɛtɔ́ví ɔ́ lɔ ná ɖe kúnnu n'i ɖo wɛnsagun Mawu tɔn lɛ́ɛ nukɔn ɖɔ ahwanvú ce wɛ é nyí nǔgbó. Mɛ e ka na gbɛ́ ɖo gbɛtɔ́ lɛ́ɛ nukɔn ɖɔ émí kún nyí ahwanvú ce ó ɔ́, nyɛ Gbɛtɔ́ví ɔ́ lɔ na gbɛ́ ɛ ɖo wɛnsagun Mawu tɔn lɛ́ɛ nukɔn. “Mɛɖěbǔ nylá nu dó nyɛ Gbɛtɔ́ví ɔ́ wú ɔ́, Mawu ná sɔ́ kɛ ɛ. Mɛ e ka ná nylá nu dó Yɛsinsɛn wú ɔ́, Mawu ná sɔ́ kɛ ɛ ǎ. “Hwenu e è nǎ dɔn mi yi kplɔ́ngbasá Jwifu lɛ́ɛ tɔn, bó ná dɔn mi yi hwɛɖɔtɔ́ lɛ́ɛ kpódó axɔ́sú lɛ́ɛ kpán nukɔn, bó ná yi ɖɔ hwɛ xá mi ɔ́, mi ma jɛ tagba, bó ɖo xósin e mi ná yi ná bó dó hwlɛ́n miɖée gán ɔ́, abǐ nǔ e mi ná yi ɖɔ ɖo dɔ̌n ɔ́ linkpɔ́n wɛ ó, ɖó Yɛsinsɛn ná kplɔ́n mi nǔ e mi ná ɖɔ ɔ́, ɖo gan ɔ́ mɛ.” Mɛ ɖokpó ɖo mɛ lɛ́ɛ mɛ, bó ɖɔ nú Jezu ɖɔ: “ Mɛ̌si, ɖe gbe nú nɔví ce, bónú é má gǔ mǐtɔn, nú má yí ce.” Jezu ka yí gbe n'i ɖɔ: “Dǎwe! Mɛ̌ ká sɔ́ mì dó ɖó hwɛɖɔtɔ́, abǐ gǔmátɔ́ mitɔn?” É ka ɖɔ nú yě ɖɔ: “Mi cɔ́ miɖée dó nukúnkɛndídó wú; ɖó nú gbɛtɔ́ na bo ɖó nǔ gbɔn ɖěbǔ ɔ́, gbɛ jɔ gbɛ ɔ́ ɖo dɔkun tɔn lɛ́ɛ mɛ ǎ.” É ka dó lǒ nú yě ɖɔ: “Nya dɔkunnɔ ɖé sín ayǐkúngban ná jinukún gěgé, bɔ é ɖo linlin wɛ ɖɔ: ‘Nɛ̌ un ka ná bló gbɔn? Nyɛ ɖíe ma ɖó fí e un ná bɛ́ nǔkún e un ya lɛ́ɛ bǐ dó ɔ́ ǎ e!’ É wá ɖɔ nú éɖée ɖɔ: ‘Nǔ e un ná wa é ɖíe: un ná kíjá agɔ̌ ce lɛ́ɛ, bó ná vɔ́ ɖaxó tɔn ɖěvo lɛ́ɛ bló, lobo ná kplé jinukún ce lɛ́ɛ kpódó dɔkun ce lɛ́ɛ kpó d'é mɛ; lobo ná ɖɔ nú nyɛɖée ɖɔ: nǔ e ná hɛn mì káká nú xwe mɔ̌kpán ɔ́ ɖo así ce; din ɔ́, un ná gbɔjɛ́, bó ná ɖu nǔ, bó nu ahan, bó ná ɖu gbɛ.’ Mawu ka ɖɔ n'i ɖɔ: ‘Xlonɔ; zǎn élɔ́ mɛ ɔ́, è nǎ yǐ gbɛ towe sín así towe. Nǔ e a ka kplé lɛ́ɛ ɔ́, mɛ̌ tɔn wɛ é ka ná nyí lo?’ ” Jezu sú ta nú xó ɔ́, bó ɖɔ: “Mɛ e kplé dɔkun gbɛmɛ fí tɔn lɛ́ɛ nú éɖée, bó ma ka ɖó dɔkun ɖé ɖo Mawu gɔ̌n ǎ ɔ́, lě e é nɔ́ nyí gbɔn n'i é nɛ́.” Énɛ́ ɔ́ gúdo ɔ́, Jezu ɖɔ nú ahwanvú tɔn lɛ́ɛ ɖɔ: “Ado ní ma hu mi dó nǔ e mi ná ɖu bó ná nɔ gbɛ é kpódó nǔ e mi ná dó é kpó wú ó; ɖó gbɛ mitɔn xɔ akwɛ́ hú nǔɖuɖu, bɔ agbaza mitɔn xɔ akwɛ́ hú avɔ. Mi kpɔ́n nǔ dó avǔnsákɔwó lɛ́ɛ wú: yě nɔ́ dó nǔkún ǎ, yě ká nɔ́ ya nǔkún ǎ; yě ɖó kɔ́zún ǎ, yě ká ɖó agɔ̌ ǎ, có Mawu nɔ́ ná nǔɖuɖu yě; mi ka xɔ akwɛ́ hú xɛ lɛ́ɛ. Mɛ̌ ka ɖo mi mɛ, bɔ nǔlinkpɔ́n tɔn ná zɔ́n, bɔ é ná sixú dó azǎn kpɛɖé gbɛzán éɖée tɔn jí? Hǔn, nú hlɔ̌nhlɔ́n mitɔn ma kpé nǔ masɔatɛ́n lɛ́ɛ wú ǎ ɔ́, aniwú nǔɖé lɛ́ɛ ka nɔ́ ɖo hǔn mɛ nú mi? Mi kpɔ́n nǔ dó folówa lɛ́ɛ wú; yě nɔ́ wa azɔ̌ ǎ; yě ká nɔ́ lɔn avɔ ǎ, é ɖo mɔ̌ có, má ɖɔ nú mi: axɔ́sú Salomɔ́ɔ ɖésú ɔ́, lě e é ɖó dɔkun sɔ é nɛ́ có, é ká ba acɔ́ sɔ yě ɖokpó ǎ. Gběhan e ɖo te ɖo gle mɛ égbé bɔ sɔ ɔ́, è nǎ wá bɛ́ kɔn nyi myɔ mɛ ɔ́, ényí Mawu nɔ ɖó acɔ́ n'i sɔ mɔ̌ ɔ́, nɛ̌ é ma ka ná ná mi nǔ e mi ná dó lɛ́ɛ ǎ gbɔn? Nǔɖiɖikpɛvínɔ e mi. Midɛɛ lɛ́ɛ ɔ́, mi ma nú nǔ e mi ná ɖu ɔ́ kpódó nǔ e mi ná nu ɔ́ kpó ní hɛn hǔn nú mi, bónú mi ná ɖo wezun tɔn jí magbokɔ ó. Đó mɛ e ɖo gbɛmɛ fí, bó má nɔ sɛn Mawu ǎ lɛ́ɛ wɛ nɔ ɖo wezun nu ɖo nǔ énɛ́ lɛ́ɛ gúdo. Midɛɛ lɛ́ɛ ɔ́, Tɔ́ mitɔn tunwun ɖɔ nǔ énɛ́ lɛ́ɛ hu dó mi. Mi nú axɔ́súɖuɖu Mawu tɔn ní myá nukún nú mi; énɛ́ ɔ́, Mawu ná ná nǔ énɛ́ lɛ́ɛ bǐ mi d'é jí.” “Lɛ̌ngbɔ́hwan kpɛví, ma ɖi xɛsi ó, ɖó Tɔ́ mitɔn jló ɖɔ mi ní ɖu axɔ́sú xá émí. Mi sa nǔ e mi ɖó lɛ́ɛ, bó má akwɛ́ tɔn nú wamamɔnɔ lɛ́ɛ. Mi hɛn akwɛ́kpo e ma ná gbi ǎ lɛ́ɛ; mi kplé dɔkun ɖó Mawu gɔ́n fí e nǔɖé ma ná wa ɛ ɖe ǎ é; ɖó ajotɔ́ nɔ yi fínɛ́ ǎ; nǔvínúví nɔ ɖu nǔ ɖo fínɛ́ ǎ. Đó fí e dɔkun mitɔn ɖe ɔ́, fí e ayi mitɔn lɔ ná nɔ é nɛ́.” “Mi sin gǒjíblánú, bónú zogbɛ́n mitɔn ní ɖo títá. Mi ní cí mɛsɛntɔ́ e ɖo te kpɔ́n gǎn yětɔn e yi asikpíkplá do mɛ, bó lɛ́ kɔ wá hweɖěbǔnu, bó xúxú hɔn ɔ́, yě ná hun n'i tlóló é ɖɔhun. Nǔ nyɔ́ nú mɛsɛntɔ́ énɛ́ lɛ́ɛ e gǎn yětɔn ná wá mɔ ɖo wunzɛn lɛ́ɛ é. Má ɖɔ nǔgbó nú mi: gǎn yětɔn ná sɔ́ gǒjíblánú sin, bó ná sɔ́ yě jínjɔ́n ayǐ nú yě ná ɖu nǔ, bɔ é ɖésú ná gbɔn yě ɖokpó ɖokpó jí, lobo ná sɛn ká nú yě. Ényí gǎn ɔ́ lɛ́ kɔ wá zǎnxwete, abǐ ayǐtéhɔ̌nnu, bó mɔ mɛsɛntɔ́ énɛ́ lɛ́ɛ ɖo wunzɛn hǔn, nǔ nyɔ́ nú yě. “Mi nywɛ́ ganjí ɖɔ ényí xwétɔ́ ɖé tunwun gan e mɛ ajotɔ́ ná wá dó ɔ́, é ná lɔn bɔ ajotɔ́ ná tɔ́n dǒ tɔn ǎ. Mi lɔmɔ̌ mi bó nɔ acéjí, ɖó gan e mɛ mi ma ná ɖó ayi tɔn dó ǎ ɔ́ wɛ nyɛ Gbɛtɔ́ví ɔ́ ná wá.” Piyɛ́ɛ ɖɔ jí: “Aklúnɔ, mǐdɛɛ lɛ́ɛ dó lǒ énɛ́ ná wɛ a ɖe a, abǐ mɛ bǐ dó ná wɛ a ɖe?” Aklúnɔ ka yí gbe ɖɔ: “Mɛ̌ ká nyí mɛsɛntɔ́ gbejínɔtɔ́ nǔnywɛ́tɔ́? Mɛsɛntɔ́ gbejínɔtɔ́ nǔnywɛ́tɔ́ ɔ́ wɛ nyí mɛ e gǎn tɔn ɖo hwɛ ná zɛ wɛ, bó sɔ́ ɛ ɖó xwé tɔn nu, bɔ é ná nɔ́ ná nǔɖuɖu mɛsɛntɔ́ hǎtɔ́ tɔn ɖě lɛ́ɛ dó hwenu é wɛ. Nǔ nyɔ́ nú mɛsɛntɔ́ énɛ́ e gǎn tɔn ná wá mɔ ɖo nukún kpé dó azɔ̌ tɔn wú wɛ é. Má ɖɔ nǔgbó nú mi: gǎn ɔ́ ná sɔ́ ɛ ɖó dɔkun tɔn lɛ́ɛ bǐ nu. Lo ɔ́, ényí mɛsɛntɔ́ énɛ́ ɔ́ ka ɖɔ dó ayi tɔn mɛ ɖɔ: ‘Gǎn ce sín wǐwá ɖo lǐnlín wɛ’, bó jɛ mɛsɛntɔ́ súnnu kpódó nyɔ̌nu kpó xo jí, bó jɛ nǔ ba ɖu jí, bó jɛ ahan nu jí, bó húzú ahannumúnɔ ɔ́, gǎn tɔn ná lɛ́ kɔ wá gbe e gbe é ma ná ɖó ayi tɔn ǎ é, ɖo gan e mɛ é ma ná tunwun ǎ é, bó ná dɔn tó n'i, bɔ é ná vɛ́ ɖésú, lobo ná xwe e dó gbejímánɔtɔ́ lɛ́ɛ sín ahwan mɛ. “Mɛsɛntɔ́ e ka tunwun nǔ e gǎn tɔn nɔ jló ɔ́, bó ma ka sɔ́nǔ, bó bló nǔ e gǎn tɔn nɔ jló ɔ́ ǎ é ɔ́, é ná ɖu bǎ ɖésú.” Lo ɔ́, mɛ e ma tunwun gǎn tɔn sín jlǒ ǎ, bó wa nǔ e jɛ xá tó dɔn nú mɛ ɔ́, bǎ kpɛɖé jɛ́n é ná ɖu; ɖó mɛ e è nǎ nǔ gěgé ɔ́, gěgé tɔn wɛ è nǎ byɔ́ ɛ; bɔ mɛ e è zɔ̌n nǔ gěgé hɛn ɔ́, è nǎ byɔ́ ɛ hú mɔ̌. “Myɔ wɛ un sɔ́ nyí ayǐkúngban ɔ́ jí; é ní wlí ɖɔ wɛ jɛ́n un ɖe. Un ɖó ná lɛ yɛhwesin wǔvɛ́ tɔn ɖé, bɔ hǔn ce bǐ ɖo aga káká yi jɛ hwenu e nǔ ná nyí mɔ̌ dó é. Fífá wɛ un hɛn wá ayǐkúngban ɔ́ jí wɛ mi vɛdó a? Éeǒ! Ma ɖɔ nú mi: gbemanɔkpɔ́ wɛ un hɛn wá. Đó sín din ɔ́, gbemanɔkpɔ́ ná tíin, bɔ nú mɛ atɔ́ɔ́n ɖo xwé ɖé gbe ɔ́, gbe yětɔn sɔ́ ɖo kpɔ́ ná nɔ wɛ ǎ; mɛ atɔn ná sí te dó mɛ we jí, bɔ mɛ we ná sí te dó mɛ atɔn jí. Tɔ́ ná sí te dó vǐ tɔn súnnu jí, bɔ vǐ súnnu ná sí te dó tɔ́ tɔn jí; nɔ ná sí te dó vǐ tɔn nyɔ̌nu jí, bɔ vǐ nyɔ̌nu ná sí te dó nɔ tɔn jí; asúnɔ ná sí te dó vǐ tɔn sín asi jí; bɔ vǐsi ná sí te dó asú tɔn nɔ jí.” Jezu ka lɛ́ ɖɔ nú mɛ lɛ́ɛ ɖɔ: “Nú mi mɔ akpɔ́kpɔ́ ɖé fɔ́n sín gbadahwe jí jǎwe ɔ́, mi nɔ ɖɔ tlóló ɖɔ: ‘Jǐ ná ja’, bɔ é ká nɔ nyí mɔ̌ nǔgbó. Nú jɔhɔn ka jɛ nyinyi jí sín tofɔligbé ɔ́, mi nɔ ɖɔ: ‘Yǒzo ɖo nǎ gbɛ́ wɛ’, bɔ é ka nɔ nyí mɔ̌ nǔgbó. Yɛmɛnúwatɔ́ e mi, mi nɔ mɔ nukúnnú jɛ wuntun ayǐkúngban tɔn kpódó jǐnukúnsin tɔn kpán wú, bó nɔ́ tínmɛ. Nɛ̌ ká gbɔn bɔ nú mi mɔ nǔ e ɖo jijɛ wɛ ɖo hwe mitɔn nu din lɛ́ɛ ɔ́, mi ma ka nɔ mɔ nukúnnú jɛ yě wú ǎ?” “Étɛ́wú wɛ ɖokpó ɖokpó mitɔn ma nɔ kan nǔ byɔ́ éɖée dó nǔ e sɔgbe bɔ é ɖo ná wa ɔ́ wú ǎ? Ényí mɛɖé dó hwɛ we, bó kplá we xwe hwɛ nukɔn hǔn, tɛ́nkpɔ́n, bó dó hwɛ gbɔ xá ɛ hwenu e mi kpo ɖo alixo é; é má nyí mɔ̌ ǎ ɔ́, é ná kplá we yi jó nú hwɛɖɔtɔ́, bɔ hwɛɖɔtɔ́ ná jó we nú sɔ́jagán ɔ́, bɔ sɔ́jagán ɔ́ ná sɔ́ we dó gan. Má ɖɔ nǔgbó nú we: ényí ɖɔ nǔ nyǐ mɔ̌ ɔ́, hwɛ e è ɖǒ nú we ɔ́, bǐ sín axɔ́ wɛ a nǎ sú; é ná kpo ɖěbǔ ɖo kɔ towe cóbɔ a nǎ tɔ́n sín gankpá ɔ́ mɛ ǎ.” Hwenɛ́nu ɖokpó ɔ́, mɛɖé lɛ́ɛ ɖo fínɛ́, bó ɖo Galiléenu e ɖo vɔ̌ sá nú Mawu wɛ, bɔ Pilátu zɔ́n bɔ è hu yě lɛ́ɛ sín xó ɖɔ nú Jezu wɛ. Jezu ka ɖɔ nú yě ɖɔ: “Mi vɛdó ɖɔ Galiléenu énɛ́ lɛ́ɛ ɔ́, yě hu hwɛ hú Galiléenu ɖě lɛ́ɛ wútu wɛ è hu yě gbɔn mɔ̌ sín a? Éeǒ, yě hu hwɛ hú yě ǎ; lo ɔ́, ényí mi lɔ ma lɛ́ kɔ sín hwɛ mitɔn lɛ́ɛ gúdo ǎ ɔ́, mi bǐ wɛ ná kú yě ɖɔhun. Abǐ, mɛ afɔtɔn nukún-atɔn e jí ahohó Silowée tɔn mu jɛ, bɔ yě kú lɛ́ɛ ɔ́, yě hu hwɛ hú Jeluzalɛ́munu ɖě lɛ́ɛ bǐ wɛ mi vɛdó a? Éeǒ, yě hu hwɛ hú yě ǎ; lo ɔ́, ényí mi lɔ ma lɛ́ kɔ sín hwɛ mitɔn lɛ́ɛ gúdo ǎ ɔ́, mi bǐ wɛ ná kú yě ɖɔhun.” Jezu ka lɛ́ dó lǒ élɔ́ nú yě ɖɔ: “Nya ɖé tun fígitín ɖokpó nyi vǐwungbo tɔn mɛ, bó ja sínsɛ́n gbɛ ɖ'é jí gbé, é ka mɔ ɖě ǎ. Énɛ́ ɔ́, é ɖɔ nú vǐwunzɔ́watɔ́ ɔ́ ɖɔ: ‘Kpɔ́n, sín xwe atɔn ɖíe ɖokpóó wɛ un nɔ tɔ́n fígi gbɛ gbé ɖo atín élɔ́ jí, bó nɔ́ wá ba kpo. Gbo sín i! Aniwú é ka ná ɖo tɛn hán mɛ wɛ yǎyá kpowun ɖo fí?’ Vǐwunzɔ́watɔ́ ɔ́ ka yí gbe n'i ɖɔ: ‘Gǎn ce! Lɛ̌ jó e dó xwe élɔ́ mɛ hwɛ̌ nú mǐ ná kpɔ́n. Un ná kun do lɛ́ lɛ̌ dó, bó ná bɛ́ zunkɔ́ d'é mɛ; nú é sixú sɛ́n xwe ɖě ɔ́ mɛ ɔ́, é ná nyɔ́; é má nyí mɔ̌ ǎ ɔ́, a nǎ gbo sín i.’ ” Jezu wá ɖo nǔ kplɔ́n mɛ wɛ ɖo kplɔ́ngbasá ɖé ɖo gbɔjɛzán gbe. Nyɔ̌nu ɖé ka ɖo fínɛ́, bɔ yɛ nyanya ɖo jǐ tɔn. Yɛ nyanya ɔ́ zɔ́n bɔ nyɔ̌nu ɔ́ gblé wɔ̌n, sín xwe afɔtɔn nukún-atɔn ɖíe; é nɔ́ zɔn tɔ́tɔ́, bó sɔ́ nɔ́ sixú jlɔ́ ɖěbǔ ǎ. Ée Jezu mɔ nyɔ̌nu ɔ́ é ɔ́, é ylɔ́ ɛ, bó ɖɔ n'i ɖɔ: “Nyɔ̌nu, azɔn towe gbɔ nú we, bɔ a jɛ te.” Ée Jezu ɖɔ mɔ̌ n'i ɔ́, é ɖó alɔ jǐ tɔn, bɔ nyɔ̌nu ɔ́ jlɔ́ tlóló tɛn tɔn mɛ, bó jɛ susu kpa nú Mawu jí. Lo ɔ́, ée é nyí gbɔjɛzán gbe wɛ Jezu gbɔ azɔn nú mɛ ɔ́, é vɛ́ mɛ e nyí gǎn ɖo kplɔ́ngbasá ɔ́ é wú, bɔ é ɖɔ nú mɛ lɛ́ɛ ɖɔ: “Azǎn ayizɛ́n wɛ nyí azɔ̌wazán ɖo aklúnɔzángbla ɖokpó mɛ. Ényí mi jló nú è nǎ gbɔ azɔn nú mi hǔn, mi bo nɔ wá azǎn énɛ́ lɛ́ɛ gbe; mi ma nɔ wá gbɔjɛzán gbe ó.” Aklúnɔ yí gbe n'i ɖɔ: “Yɛmɛnúwatɔ́ e mi! Hǔn gbɔjɛzán gbe ɔ́, mi mɛ ɖokpó ɖokpó nɔ́ tún kan nú nyibú mitɔn, abǐ tócí mitɔn, bó nɔ́ ɖe tɔ́n sín kpó mɛ, bó nɔ́ kplá yi sin nu gbé ǎ cé? Bɔ nyɔ̌nu élɔ́ e nyí Ablaxámu ví, bɔ Satáan blá sín xwe afɔtɔn-nukún-atɔn ɖíe ɖokpóó ɔ́, è ɖo na tún kan n'i gbɔjɛzán gbe ǎ cé?” Hwenu e Jezu ɖo mɔ̌ ɖɔ wɛ ɔ́, winnyá hu kɛntɔ́ tɔn lɛ́ɛ bǐ. Nǔ ɖaxó ɖaxó e jlɛ́ wɛ é ɖe lɛ́ɛ ká hun xomɛ nú mɛ lɛ́ɛ. Jezu wá ɖɔ: “Étɛ́ ɖɔhun wɛ axɔ́súɖuɖu Mawu tɔn cí? Aniwú un ka sixú jlɛ́ dó? É cí atínkwín wínníwínní ɖé ɖɔhun, bɔ nya ɖé dó nyi jikpá tɔn mɛ; ée atínkwín ɔ́ wá wú bó su ɔ́, é húzú atín, bɔ xɛ lɛ́ɛ nɔ wá xo adɔ̌ nyi ala tɔn lɛ́ɛ mɛ.” Jezu lɛ́ ɖɔ: “Aniwú un ka sixú lɛ́ jlɛ́ axɔ́súɖuɖu Mawu tɔn dó? É cí tɔ́n ɖɔhun, bɔ nyɔ̌nu ɖé sɔ́ dó linfín gannú atɔn mɛ, bónú linfín nyinya ɔ́ bǐ ná dó fɔ́n.” Jezu wlí ali kpan ta Jeluzalɛ́mu, bó nɔ ɖo nǔ kplɔ́n mɛ lɛ́ɛ wɛ gbɔn toxo ɖaxó lɛ́ɛ, kpódó gletoxo lɛ́ɛ kpó mɛ. Mɛ ɖé ka kanbyɔ́ ɛ ɖɔ: “Aklúnɔ, mɛ kpɛɖé jɛ́n Mawu ná hwlɛ́n gán nǔgbó a?” Jezu ka ɖɔ nú yě ɖɔ: “Mi dó gǎn, bó gbɔn hɔn kpɛví ɔ́ nu; ɖó má ɖɔ nú mi, mɛ gěgé na ba ɖɔ émí ná gbɔn hɔnli énɛ́ nu, bó ka ná kpé wú ǎ. “Hwenu e xwétɔ́ ɔ́ ná sí te, bó ná dó gan hɔn tɔn mɛ, bɔ mi ná kpo ɖo hɛnkɛ́n ɔ́, mi ná jɛ hɔn xúxú jí, bó ná ɖɔ: ‘Daá, hun hɔn nú mǐ!’ Bɔ é ná yí gbe nú mi ɖɔ: ‘Un tunwun mi ǎ.’ Énɛ́ ɔ́, mi ná jɛ ɖiɖɔ jí ɖɔ: ‘Mǐ kpódó hwi kpó wɛ ɖu nǔ, bó nu ahan, bɔ a kplɔ́n nǔ mɛ gbɔn ali lɛ́ɛ xo, ali lɛ́ɛ xo ɖo to mitɔn mɛ.’ Lo ɔ́, é ná yí gbe nú mi ɖɔ: ‘Má ɖɔ nú mi: Un tunwun fí e nu mi nyí é ǎ; mi bǐ ní sɛ yi zɔ nú mì, nǔnyanyawatɔ́ e mi.’ Fínɛ́ ɔ́, mi ná ya avǐ, bó ná ɖu aɖǔkún, hwenu e mi ná mɔ Ablaxámu kpódó Izáki kpó, kpódó Jakɔ́bu kpó, kpódó gbeyíɖɔ Mawu tɔn lɛ́ɛ bǐ kpán, ɖo axɔ́súɖuto Mawu tɔn mɛ, bɔ midɛɛ lɛ́ɛ ka ná ɖo hɛnkɛ́n é. Mɛ lɛ́ɛ ná gosín zǎnzǎnhwe jí, kpódó gbadahwe jí kpán, bó ná gosín totaligbé kpódó tofɔligbé kpán, bó ná wá ɖu agɔ̌ ɖo axɔ́súɖuɖu Mawu tɔn mɛ. Mi ní ka tunwun ɖɔ mɛ e ɖo gǔdo din lɛ́ɛ ɖě ná wá nukɔn, bɔ mɛ e ɖo nukɔn din lɛ́ɛ ɖě ná wá gǔdo.” Gbe énɛ́ ɔ́ gbe ɖokpó ɔ́, Falizyɛn ɖé lɛ́ɛ wá ɖɔ nú Jezu ɖɔ: “ Elódu jló ná hu we; énɛ́ wútu ɔ́, gosín to mǐtɔn mɛ, bó yi fí ɖěvo.” Jezu ka yí gbe nú yě ɖɔ: “Mi yi ɖɔ nú nya nǔhɛngblétɔ́ ayǐsájɛ ɖɔhun énɛ́ ɔ́ ɖɔ égbé kpódó sɔ́ kpán ɔ́, un ná ɖo yɛ nyanya lɛ́ɛ nya sín mɛ lɛ́ɛ jí wɛ, bó ná ɖo azɔn gbɔ nú mɛ lɛ́ɛ wɛ, bɔ azǎn atɔngɔ́ ɔ́ gbe ɔ́, un ná wa azɔ̌ ce fó. Amɔ̌, égbé kpódó sɔ́ kpó, kpódó azǎn e ná bɔ d'é wú ɔ́ kpó ɔ́, un ɖó ná wlí ali ce, bó ɖidó Jeluzalɛ́mu; ɖó gbeyíɖɔ Mawu tɔn ɖě nɔ́ kú ɖo to ɖé mɛ zɛ Jeluzalɛ́mu wú ǎ. “Jeluzalɛ́munu e mi, Jeluzalɛ́munu e mi, mi mɛ e nɔ hu gbeyíɖɔ Mawu tɔn lɛ́ɛ, bó nɔ́ nyi awǐnnyaglo dó hu mɛ e Mawu nɔ́ sɛ́ dó mi lɛ́ɛ é! Azɔn mɔ̌kpán wɛ un ko jló ná kplé mi dó awa ce lɛ́ɛ glɔ́, lě e kokló nɔ́ kplé vǐ tɔn lɛ́ɛ dó awa tɔn lɛ́ɛ glɔ́ gbɔn é, lo ɔ́, mi jló ǎ. Hǔn, Mawu ná ɖe alɔ sín xwé mitɔn wú nú mi. Ma ka ɖɔ nú mi: mi sɔ́ ɖo nǎ mɔ mì wɛ ɖě, káká yi jɛ gbe e gbe mi ná ɖɔ susu nú mɛ e jǎwe ɖo Aklúnɔ nyíkɔ mɛ é ǎ.” Gbɔjɛzán gbe ɖé wá su, bɔ Jezu yi nǔ ɖu gbé ɖo Falizyɛn lɛ́ɛ sín gǎn ɖé xwé; mɛ e ɖo fínɛ́ lɛ́ɛ ka ɖo cicɔ ɛ wɛ. Nya ɖé ɖo nukɔn tɔn fínɛ́, bó ɖo jǐjízɔn jɛ wɛ. Jezu ka yí xó, bó kanbyɔ́ sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó ɖɔ: “Đo sɛ́n mǐtɔn mɛ ɔ́, è hɛn ɔ́, è nǎ gbɔ azɔn nú mɛ gbɔjɛzán gbe a, abǐ è nǎ gɔn azɔn gbɔ nú mɛ?” Bɔ yě kɛ nu ǎ. Jezu ka ɖó alɔ azinzɔnnɔ ɔ́ wú, bó gbɔ azɔn n'i, lobo nyi i sɛ́ dó xwé. Énɛ́ ɔ́ gúdo ɔ́, Jezu kanbyɔ́ yě ɖɔ: “Mɛ̌ wɛ ɖo mi mɛ bɔ vǐ tɔn abǐ nyibú tɔn ná jɛ dotɔ mɛ gbɔjɛzán gbe, bɔ é ma ná yi ɖe e tɔ́n tlóló ǎ?” Yě ɖě ká mɔ nǔɖé ɖɔ dó xó énɛ́ ɔ́ wú ǎ. Jezu mɔ ɖɔ mɛ e è ylɔ̌ yi jǒnɔgbé lɛ́ɛ ɖo tɛn ɖaxó mɛ ba ná jínjɔ́n wɛ, bó dó lǒ élɔ́ nú yě bǐ ɖɔ: “Ényí mɛɖé ylɔ́ we yi agɔ̌ ɖu gbé ɖo asikplákplá tɛnmɛ hǔn, ma yi jínjɔ́n tɛn ɖaxó mɛ ó, ɖó mɛɖé kó sixú nyí mɛjɔmɛ hú we, bɔ è nǎ ylɔ́ é lɔmɔ̌. Mɛ e ylɔ́ we, bó ylɔ́ é lɔmɔ̌ ɔ́ táá wá ɖɔ nú we ɖɔ: ‘Sí te, bó ná tɛn nya élɔ́’, hwenɛ́nu ɔ́, tɛnmɛ ba gbé wɛ a xwe ɖo gǔdo bǐ nɛ́, bɔ é ná nyí winnyá nú we. Nǔ ɖo ganjí ɔ́, a yi jǒnɔ gbé ɔ́, tɛn e ɖo gǔdo bǐ é mɛ wɛ a nǎ jínjɔ́n; énɛ́ ɔ́, mɛ e ylɔ́ we ɔ́ wá mɔ we ɖo fínɛ́ ɔ́, é ná ɖɔ nú we ɖɔ: ‘Xɔ́ntɔn ce, sɛ wá nukɔn’, bɔ é ná nyí susu nú we ɖo mɛ e kpódó hwi kpó ɖo agɔ̌ ɖu ɖo fínɛ́ wɛ lɛ́ɛ bǐ nukún mɛ. Đó mɛ ɖěbǔ sɔ́ éɖée su ɔ́, è nǎ sɔ́ ɛ hwe; mɛ e ka sɔ́ éɖée hwe ɔ́, è nǎ sɔ́ ɛ su.” Jezu ka wá ɖɔ nú mɛ e ylɔ́ ɛ é ɖɔ: “Ényí a jlǒ ná da mɛ nú è nǎ wá ɖu hwemɛ nǔɖuɖu, abǐ gbada nǔɖuɖu ɖo gɔ̌n towe hǔn, ma ylɔ́ xɔ́ntɔn towe lɛ́ɛ, nɔví towe lɛ́ɛ, hɛ̌nnumɔ towe lɛ́ɛ, kpódó dɔkunnɔ e ɖo xwé towe kpá lɛ́ɛ kpó ó; ɖó yě lɔ hɛn ɔ́, yě ná ylɔ́ we, bó ná sú nǔ e yě ɖu ɔ́ sín axɔ́ we. Lo ɔ́, ényí a ylɔ́ agɔ̌ hǔn, ylɔ̌ wamamɔnɔ lɛ́ɛ kpódó sékúnɔ lɛ́ɛ kpó, afɔkponɔ lɛ́ɛ kpódó nukúntíntɔ́nnɔ lɛ́ɛ kpó. Énɛ́ ɔ́, nǔ ná nyɔ́ nú we, ɖó mɛ énɛ́ lɛ́ɛ sixú wá ja axɔ́ tɔn sú we gbé ǎ; amɔ̌, Mawu ná ná ajɔ tɔn we gbe e gbe é ná fɔ́n hwɛjijɔnɔ lɛ́ɛ sín kú é.” Mɛ ɖokpó ɖo mɛ e ɖo nǔ ɖu xá Jezu wɛ lɛ́ɛ mɛ, bɔ ée é se xó énɛ́ lɛ́ɛ ɔ́, é ɖɔ nú Jezu ɖɔ: “Nǔ nyɔ́ nú mɛ e na ɖu nǔ ɖo agɔ̌ e Mawu na ylɔ́ hwenu e é ná ɖu axɔ́sú ɖo gbɛtɔ́ lɛ́ɛ nu ɔ́ tɛnmɛ é.” Jezu ka ɖɔ n'i ɖɔ: “Nya ɖé ylɔ́ agɔ̌ ɖaxó ɖokpó, bó ylɔ́ mɛ gěgé. Ée nǔɖuɖu hwenu su ɔ́, é sɛ́ mɛsɛntɔ́ tɔn dó, nú é ná yi ɖɔ nú mɛ e è ylɔ́ lɛ́ɛ ɖɔ: ‘Mi wá, nǔ bǐ ko sɔgbe.’ Lo ɔ́, yě bǐ dó gbe ɖokpó ɔ́, bó ɖɔ sɛ́ dó e ɖɔ émí kún sixú wá ó. Mɛ nukɔntɔn ɔ́ ɖɔ sɛ́ dó e ɖɔ: ‘Un xɔ ayǐkúngban ɖokpó, bó jló ná yi kpɔ́n; kɛnklɛ́n ma sin xomɛ ó.’ Mɛ ɖěvo ɖɔ: ‘Un xɔ nyibú wǒ, bó jló ná yi kpɔ́n ɖɔ yě ná sixú wa azɔ̌ ganjí a jí; kɛnklɛ́n ma sin xomɛ ó.’ Mɛ ɖěvo lɛ́ ɖɔ: ‘Un kplá asi din zaanɖé; énɛ́ ɔ́ wú ɔ́, un sixú wá ǎ.’ Mɛsɛntɔ́ ɔ́ lɛ́ kɔ wá, bó ɖó gbe nú gǎn tɔn. Gǎn ɔ́ ka sin xomɛ tlala, bó ɖɔ nú mɛsɛntɔ́ tɔn ɔ́ ɖɔ: ‘Ya wǔ yi tokplétɛn lɛ́ɛ, bó gbɔn ali ɖaxó lɛ́ɛ kpódó ali kpɛví lɛ́ɛ kpó xo, bó kplá wamamɔnɔ lɛ́ɛ kpódó sékúnɔ lɛ́ɛ kpó, nukúntíntɔ́nnɔ lɛ́ɛ kpódó afɔkponɔ lɛ́ɛ kpó wá fí.’ Ée mɛsɛntɔ́ ɔ́ yi bó wá ɔ́, é wá ɖɔ n'i ɖɔ: ‘Gǎn ce, nǔ e a zɔ̌n ɔ́, è ko bló, có tɛn lɛ́ kpo.’ Gǎn ɔ́ ka ɖɔ nú mɛsɛntɔ́ tɔn ɔ́ ɖɔ: ‘Lɛ̌ yi gbɔn gletoxo lɛ́ɛ mɛ, bó gbɔn aliswɛ́ɛ́n lɛ́ɛ jí, bó dɔn mɛ e a nǎ mɔ lɛ́ɛ wá dandan nú xwé ce ná gɔ́.’ Đó ma ɖɔ nú mi: nya énɛ́ lɛ́ɛ e un ko ylɔ́ ɖ'ayǐ ɔ́, yě mɛ ɖě ná ɖu nǔɖuɖu ce ǎ.” Mɛ gěgé nyi ahwan xwedó Jezu, bɔ é lílɛ́ kpan nukɔn yě, bó ɖɔ: “Ényí mɛɖé jló ná xwedó mì, bó má ka yí wǎn nú mì hú tɔ́ tɔn, nɔ tɔn, asi tɔn, vǐ tɔn lɛ́ɛ, nɔví tɔn súnnu lɛ́ɛ kpódó nɔví tɔn nyɔ̌nu lɛ́ɛ kpó, káká jɛ gbɛ é ɖésúnɔ tɔn jí ǎ ɔ́, mɛ énɛ́ sixú nyí ahwanvú ce ǎ. Mɛ e ma ɖíɖá aklúzu tɔn, bó xwedó mì ǎ ɔ́, mɛ énɛ́ sixú nyí ahwanvú ce ǎ. Ényí mɛɖé ɖo mi mɛ, bó ɖo síngbó ná gbá wɛ ɔ́, ayǐ wɛ é ná to jínjɔ́n, bó ná lɛ́n akwɛ́ nabí e é ná zán d'é wú ɔ́ kpɔ́n hwɛ̌, bó ná kpɔ́n ɖɔ émí ɖó akwɛ́ e ná sixú wa azɔ̌ ɔ́ yi fó ɔ́ a jí. É má nyí mɔ̌ ǎ ɔ́, nú é wá dó xɔ ɔ́ do, bó ma ka sɔ́ wá kpé wú, bó gbá yi fó ǎ ɔ́, mɛ e na wá mɔ lɛ́ɛ bǐ na jɛ cícá ɛ ko jí, bó ná nɔ́ ɖɔ: ‘Mi kpɔ́n, nya ɖě ɖíe dó xɔ do, bó ma ka kpé wú bó gbá yi fó ǎ e.’ Mɔ̌ ɖokpó ɔ́, axɔ́sú e ɖó ahwanfuntɔ́ děgba we afɔwó (10.000), bó ja ahwan fun xá axɔ́sú ɖěvo e ɖó ahwanfuntɔ́ adɔ̌kpo ɖokpó (20.000) gbé ɔ́, é ná to jínjɔ́n ayǐ hwɛ̌, bó ná lin tamɛ kpɔ́n ɖɔ émí ná sixú kpé ahwan xá ɛ a jí. Nú é mɔ ɖɔ émí kún sixú kpé wú ó ɔ́, hwenu e mɛ ɖě ɔ́ kpo ɖo zɔga ɔ́, é ná sɛ́ wɛn dó e ɖɔ nɛ̌ wɛ émí ná bló gbɔn bɔ fífá ná tíin a jí. Mɔ̌ ɖokpó ɔ́, mɛ e ná ɖo mi mɛ, bó ma ná jó dɔkun tɔn lɛ́ɛ bǐ dó ǎ ɔ́, mɛ énɛ́ sixú nyí ahwanvú ce ǎ.” “Jɛ ɔ́, nǔ ɖagbe wɛ é nyí; ényí é ka gblé ɔ́, nɛ̌ wɛ è nǎ lɛ́ wa gbɔn n'i bɔ é ná lɛ́ nyɔ́? É sɔ́ nyɔ́ nú ayǐkúngban ǎ, é ka sɔ́ lɛ́ nyɔ́ nú gle lɔ ǎ; hǔn gbě wɛ è nǎ sɔ́ kɔn nyi. Mɛ e ɖó tó bó ná dó se nǔ ná ɔ́ ní bó ɖótó bó se.” Tokwɛ́yítɔ́ lɛ́ɛ bǐ kpódó gbɛnyanyazántɔ́ ɖěvo lɛ́ɛ kpó sɛ yá Jezu, bó ja tó ɖó e gbé, bɔ Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpó jɛ nǔ hlún ɖɔ jí ɖɔ: “Nya élɔ́ nɔ́ yí gbɛnyanyazántɔ́ lɛ́ɛ ganjí, bó nɔ ɖu nǔ xá yě.” Jezu ka dó lǒ nú yě ɖɔ: “Mɛ̌ ká ɖo mi mɛ, bónú é ɖó lɛ̌ngbɔ́ kanwe ko (100), bɔ ɖokpó bú ɖ'é mɛ ɔ́, é ma ná jó lɛ̌ngbɔ́ kanwe afɔtɔn-nukún-ɛnɛ (99) ɖě lɛ́ɛ dó nyi amagbo mɛ fí e ɖu nǔ ɖe wɛ yě ɖe é, bó ná jɛ ɖokpó e bú é gbé mɛ, káká bó ná yi mɔ ɛ ǎ? Ée é mɔ ɛ ɔ́, xomɛ hun i, bɔ é sɔ́ ɛ nyi kɔlivla mɛ wá xwé gbe, bó kplé xɔ́ntɔn tɔn lɛ́ɛ, kpódó mɛ e ɖo xwé tɔn kpá lɛ́ɛ kpó, bó ɖɔ nú yě ɖɔ: ‘Mi j'awǎ xá mì, ɖó un mɔ lɛ̌ngbɔ́ ce e bú é.’ Mɔ̌ ɖokpó ɔ́, má ɖɔ nú mi, ényí hwɛhutɔ́ ɖokpó géé lɛ́ kɔ sín hwɛ tɔn lɛ́ɛ gúdo ɔ́, awǎ e è nɔ jɛ dó ta tɔn mɛ ɖo sɛ́xwé ɔ́ nɔ hú ée è nɔ jɛ dó hwɛjijɔnɔ kanwe afɔtɔn-nukún-ɛnɛ (99) e kɔ lɛ́ sín hwɛ yětɔn lɛ́ɛ gúdo nú ma hu dó ǎ lɛ́ɛ tamɛ é.” “Abǐ nyɔ̌nu tɛ́ ká ná ɖó gankwɛ́ wǒ, bó hɛn ɖokpó bú ɖ'é mɛ ɔ́, é má ná tá zogbɛ́n, bó za xwé gbe, lobo xwetɛ́, bó ba káká bó mɔ ǎ? Ée é mɔ ɔ́, é kplé xɔ́ntɔn tɔn lɛ́ɛ, kpódó mɛ e ɖo xwé tɔn kpá lɛ́ɛ kpó, bó ɖɔ nú yě ɖɔ: ‘Mi j'awǎ xá mì, ɖó un mɔ akwɛ́ ce e un hɛn bú é.’ Mɔ̌ ɖokpó ɔ́, má ɖɔ nú mi: ényí hwɛhutɔ́ ɖokpó géé lɛ́ kɔ sín hwɛ tɔn lɛ́ɛ gúdo ɔ́, lě e wɛnsagun Mawu tɔn lɛ́ɛ nɔ j'awǎ gbɔn ɔ́ nɛ́.” Jezu ka lɛ́ ɖɔ: “Nya ɖé ɖó vǐ súnnu we. Yɔkpɔ́vú ɔ́ ka ɖɔ nú tɔ́ tɔn gbe ɖokpó ɖɔ: ‘Daá, nǎ gǔ e ná nyí ce ɔ́ mì;’ bɔ tɔ́ ɔ́ ka má dɔkun tɔn nú yě. Azǎn ɖé jɛ ǎ, bɔ yɔkpɔ́vú ɔ́ xo nǔ tɔn lɛ́ɛ bǐ kplé, bó yi to línlín ɖé mɛ, bó zán nǔ tɔn lɛ́ɛ dó akpa mɛ. Hwenu e é zán nǔ tɔn lɛ́ɛ bǐ vɔ ɔ́, adɔ ɖaxó ɖé tɔ́n ɖo to ɔ́ mɛ, bɔ é jɛ ya ji jí. É gbɔ bó yi jɛ kɔ nú to ɔ́ mɛ nu ɖokpó, bɔ nya ɔ́ sɛ́ ɛ dó gle tɔn ta, nú é ná nɔ́ ná nǔɖuɖu aglǔza lɛ́ɛ. Nǔɖuɖu e aglǔza lɛ́ɛ nɔ ɖu ɔ́, ɖuɖu tɔn nɔ jló e, mɛɖé ka nɔ ná ɛ ǎ. É wá dó ayi do, bó ɖɔ dó xomɛ ɖɔ: ‘Azɔ̌watɔ́ gěgé wɛ ɖo daá ce xwé, bɔ nǔɖuɖu kpé yě kpo, bɔ nyɛ ka wá ɖo adɔ ná kú wɛ ɖo fí. Un ná sɔ́ nǔ, bó lɛ́ kɔ yi daá ce gɔ́n, bó na ɖɔ n'i ɖɔ: Daá! Un hu hwɛ dó Mawu, bó hu hwɛ dó we; un sɔ́ nyí mɛ bónú a na ylɔ́ mì ɖɔ vǐ ǎ; yǐ mì dó azɔ̌watɔ́ towe lɛ́ɛ mɛ.’ É ka sɔ́ nǔ nǔgbó, bó lɛ́ kɔ ɖidó tɔ́ tɔn gɔ́n. “Hwenu e é ɖo zɔ jǎwe ɔ́, tɔ́ tɔn mɔ ɛ sɛ́ dó, bɔ nǔ tɔn blá wǔ n'i, bɔ é bɛ́ wezun, bó yi zunfán ɛ, bó kí si n'i. Vǐ ɔ́ ka ɖɔ n'i ɖɔ: ‘Daá, un hu hwɛ dó Mawu, bó hu hwɛ dó we; un sɔ́ nyí mɛ nú a nǎ ylɔ́ mì ɖɔ vǐ ǎ.’ Lo ɔ́, tɔ́ ɔ́ ɖɔ nú mɛsɛntɔ́ tɔn lɛ́ɛ ɖɔ: ‘Mi yá wǔ yi sɔ́ awu gaga e nyɔ́ ɖɛkpɛ hú ɖě lɛ́ɛ bǐ ɔ́ wá dó n'i; mi sɔ́ alɔkɛ́ dó n'i, bó dó afɔkpa n'i. Mi yi sɔ́ nyibú wínnyáwínnyá e è sɔ́ ɖó vo, bɔ nǔɖuɖu kpé e ganjí ɔ́ wá, bó hu, nú mǐ ná ɖu agɔ̌, bó ná j'awǎ; ɖó vǐ ce élɔ́ ɔ́, kú wɛ é ko kú; é ka lɛ́ wá gbɛ. É ko bú bɔ è ka lɛ́ wá mɔ ɛ;’ bɔ yě jɛ xwe ɖu jí. “Vǐ tɔn mɛxó ɔ́ ka ɖo gleta hwenɛ́nu. Ée é lɛ́ kɔ bó sɛ yá xwé gbe ɔ́, é se bɔ è ɖo hǔn xo wɛ, bó ɖo we ɖú wɛ. Énɛ́ ɔ́, é ylɔ́ mɛsɛntɔ́ lɛ́ɛ ɖokpó, bó kan nǔ e ɖo jijɛ wɛ é byɔ́. Mɛsɛntɔ́ ɔ́ ka yí gbe n'i ɖɔ: ‘Nɔví towe wɛ lɛ́ kɔ wá xwé, bɔ tɔ́ towe hu nyibú wínnyáwínnyá e è sɔ́ ɖó vo, bɔ nǔɖuɖu kpé ganjí é, ɖó é mɔ ɛ ɖo ganjí.’ Vǐmɛxó ɔ́ ka wlí xomɛsin, bó gbɛ́ xwé gbe byɔ́, bɔ tɔ́ ɔ́ tɔ́n, bó wá sa vo n'i ɖɔ ní byɔ́ xwé gbe. Lo ɔ́, é yí gbe nú tɔ́ ɔ́ ɖɔ: ‘Sín xwe mɔ̌kpán ɖíe wɛ un ɖo sinsɛn we wɛ; un dó asá gbe towe gbeɖé ǎ; a ka ná gbɔ̌ ɖokpó mì gbeɖé nú ma dó ɖu agɔ̌ xá xɔ́ntɔn ce lɛ́ɛ ǎ. Vǐ towe énɛ́ ka yi sɔ́ dɔkun towe dó ɖu gbɛ xá agalɛtɔ́ lɛ́ɛ, bó lɛ́ kɔ wá, bɔ a hu nyibú wínnyáwínnyá e è sɔ́ ɖó vo, bɔ nǔɖuɖu kpé ganjí é n'i.’ Tɔ́ ɔ́ ka ɖɔ n'i ɖɔ: ‘Vǐ ce, hwɛ ɔ́, tɛgbɛ wɛ a ɖo kpɔ́ xá mì, bɔ nǔ e un ɖó lɛ́ɛ bǐ nyí towe, lo ɔ́, xwe wɛ mǐ ló kó ɖu, bó j'awǎ, bɔ é nyɔ́; ɖó nɔví towe élɔ́ ɔ́, kú wɛ é ko kú; é ka lɛ́ wá gbɛ; é ko bú, un ka lɛ́ wá mɔ ɛ.’ ” Jezu ka lɛ́ ɖɔ nú ahwanvú tɔn lɛ́ɛ ɖɔ: “Nya dɔkunnɔ ɖé tíin, bó ɖó nǔjíkpɔ́ntɔ́ ɖokpó; è ka wá slɛ́ ɛ n'i ɖɔ é nɔ zán nǔ tɔn lɛ́ɛ nyi do. Nya ɔ́ ka ylɔ́ ɛ, bó ɖɔ n'i ɖɔ: ‘Étɛ́ se dó wú towe wɛ un ɖe nɛ́? Wǎ xa nǔ ce lɛ́ɛ nú mì, ɖó a sɔ́ sixú nɔ nǔ ce lɛ́ɛ nu ǎ.’ Nǔjíkpɔ́ntɔ́ ɔ́ ka ɖɔ dó xomɛ ɖɔ: ‘Nɛ̌ un ka na wa gbɔn din? Gǎn ce ɖíe gbɛ́ ɖɔ un kún sɔ́ na nɔ nǔ émítɔn lɛ́ɛ nu ó e. Gle wɛ un ná yi lɛ a? Hlɔ̌nhlɔ́n tɔn ɖo wú ce ǎ. Nǔ wɛ un ka na yi byɔ́ ɖu a? É na hu winnyá nú mì. Un ko tunwun nǔ e un ná wa, bɔ mɛɖé ná yí mì dó xwé tɔn gbe, hwenu e gǎn ce na nya mì sín nǔ tɔn lɛ́ɛ nu é.’ Bɔ é wá ylɔ́ mɛ e ɖu axɔ́ dó gǎn tɔn lɛ́ɛ é ɖokpó ɖokpó wá, bó kanbyɔ́ mɛ nukɔn tɔn ɔ́ ɖɔ: ‘Axɔ́ nabí a ka ɖu dó gǎn ce?’ Nya ɔ́ yí gbe n'i ɖɔ: ‘Un ɖu ami gbǎ kanwe ko (100) xɔ.’ Nǔjíkpɔ́ntɔ́ ɔ́ ka ɖɔ n'i ɖɔ: ‘Wěma towe ɖíe; jǐnjɔ́n ayǐ, bó yá wǔ wlán kanɖé wǒ (50).’ É ɖɔ nú mɛ ɖěvo ɖɔ: ‘Hwɛ ɔ́ nabí a ɖu?’ Bɔ é yí gbe ɖɔ: ‘Jinukún ati kanwe ko (100),’ bɔ nǔjíkpɔ́ntɔ́ ɔ́ ɖɔ ní ɖɔ: ‘Wěma towe ɖíe, wlǎn kanwe (80).’ Gǎn ɔ́ kpa bǐbí nú nǔjíkpɔ́ntɔ́ ayihízíhízínɔ énɛ́; ɖó gbɛmɛ fí ví lɛ́ɛ nɔ tunwun ayi e yě ná zán xá yětɔn ɖɔhun lɛ́ɛ hú mɛ e ɖo wěziza mɛ lɛ́ɛ.” Jezu ɖɔ: “Nyɛ ɔ́, má ka ɖɔ nú mi: dɔkun nɔ wa jlǒ Mawu tɔn ǎ; mi ka zán dó zun xɔ́ntɔn ná, lobo nú gbe e gbe é ná wá vɔ dó mi ɔ́, è nǎ yí mi dó xwé e ná ɖo te tɛgbɛ é gbe. Mɛ e nɔ gbejí ɖo nǔ kpɛví kɔn é ɔ́, é ná nɔ gbejí ɖo nǔ ɖaxó kɔn; mɛ e ka hízí nǔ ɖo nǔ kpɛví kɔn é ɔ́, é ná hízí nǔ, ɖo nǔ ɖaxó lɔmɔ̌ kɔn. Ényí mi ma nɔ gbejí ɖo dɔkun gbɛmɛ fí tɔn lɛ́ɛ kɔn ǎ ɔ́, mɛ̌ ka ná sɔ́ dɔkun jɔ dɔkun dó alɔ mɛ nú mi? Ényí mi ma nɔ gbejí ɖo mɛɖěvo nú kɔn ǎ ɔ́, mɛ̌ ka ná ná ée nyí mitɔn ɔ́ mi? “Mɛsɛntɔ́ ɖé sixú sɛn gǎn we ǎ: ɖó é ná gbɛ́ wǎn nú mɛ ɖě, bó na yí wǎn nú mɛ ɖě; abǐ é ná se tónú nú mɛ ɖě, bó ná vɛ́ tóli nú mɛ ɖě. Mi sixú sɛn Mawu, bó lɛ́ sɛn dɔkun ǎ.” Ée Falizyɛn lɛ́ɛ se xó énɛ́ ɔ́, yě jɛ slǎmɛ ɖɔ Jezu wú jí, ɖó yědɛɛ lɛ́ɛ yí wǎn nú akwɛ́. Jezu ka ɖɔ nú yě ɖɔ: “Midɛɛ lɛ́ɛ wɛ nɔ ɖe xlɛ́ ɖo gbɛtɔ́ lɛ́ɛ nukún mɛ ɖɔ émí nyí hwɛjijɔnɔ; lo ɔ́, Mawu tunwun ayi mitɔn. Đó nǔ e gbɛtɔ́ lɛ́ɛ nɔ mɔ dó mɔ nǔgɛ́n ɔ́, nǔ wɛ é nyí bɔ Mawu gbɛ́ wǎn na ɖésú.” Nǔ e Mɔyízi sɛ́n ɔ́ zɔ́n lɛ́ɛ kpódó nǔ e gbeyíɖɔ Mawu tɔn lɛ́ɛ ɖɔ lɛ́ɛ kpán wɛ ɖo te káká bɔ Jǎan Yɛhwesinlɛnúmɛtɔ́ ɔ́ wá; bɛ́ sín hwenu e é wá ɔ́, mɛ lɛ́ɛ jɛ Wɛn Ɖagbe e ɖɔ xó dó axɔ́súɖuɖu Mawu tɔn wú ɔ́ jlá mɛ lɛ́ɛ jí; bɔ mɛ ɖokpó ɖokpó nɔ ɖo gǎn dó wɛ, bó na byɔ́ axɔ́súɖuɖu Mawu tɔn mɛ. Jǐnukúnsin kpódó ayǐkúngban kpán ná vɔ ɔ́, é ná bɔkun hú wěkwín kpɛví ɖokpó géé ní hwe sín sɛ́n ɔ́ mɛ. Mɛ ɖěbǔ gbɛ́ asi tɔn, bó da ɖěvo hǔn, aga wɛ é lɛ; mɛ e ka da nyɔ̌nu e asú tɔn nya ɔ́, aga wɛ élɔ́ lɛ. Nya dɔkunnɔ ɖé tíin, bó nɔ dó akwɛ́núvɔ vɔvɔ ɖagbe ɖagbe lɛ́ɛ, bó nɔ ɖo acɔ́ mɛ hwebǐnu, lobo nɔ ɖo agɔ̌ ɖu wɛ ayǐhɔ́ngbe ayǐhɔ́ngbe. Wamamɔnɔ ɖé mɔ̌ ka tíin, bɔ è nɔ ylɔ́ ɛ ɖɔ Lazáa, bɔ akpa kpé wǔtu tɔn bǐ, bɔ é nɔ ɖo ayǐmlɔ́mlɔ́ ɖo dɔkunnɔ ɔ́ sín hɔntogbó kpá. É nɔ ba ɖɔ émí lo ko mɔ nǔ e nɔ hlɛ́n kɔn nyi ayǐ hwenu e dɔkunnɔ ɔ́ ɖo nǔ ɖu wɛ é; avǔn lɛ́ɛ nɔ wá ɖíɖɔ́ akpa tɔn lɛ́ɛ mɛ. Wamamɔnɔ ɔ́ wá kú, bɔ wɛnsagun Mawu tɔn lɛ́ɛ zé e yi Ablaxámu kpá; dɔkunnɔ ɔ́ lɔ wá kú, bɔ è ɖi i. Hwenu e dɔkunnɔ ɔ́ ɖo kútomɛ, bó ɖo wǔvɛ́ mɔ wɛ ɖésú ɔ́, é zé ta yi jǐ, bó mɔ Ablaxámu sɛ́ dó, bɔ Lazáa ɖo akɔ́n tɔn mɛ; bɔ é sú xó, bó ɖɔ: “Daá Ablaxámu, kú nǔbláwǔ ce, bó sɛ́ Lazáa dó, ní sɔ́ alɔvínu tɔn dó sin mɛ, bó wá fá ɖɛ̌ ta nú mì, ɖó un ɖo wǔvɛ́ mɔ wɛ ɖésú ɖo zo élɔ́ mɛ.” Ablaxámu ka yí gbe n'i ɖɔ: “Vǐ ce, flín ɖɔ ɖagbe e nyí towe ɔ́, a ko mɔ yí ɖo gbɛ towe hwenu. Lazáa ɔ́, ya wɛ éyɛ́ ka ji, bɔ din ɔ́, é vo ɖo fí, bɔ hwɛ ka ɖo ya ji wɛ. Énɛ́ ɔ́ kɛ́ɖɛ́ wú wɛ ǎ; do gɔngɔn ɖé ɖo mǐ kpódó mi kpán tɛ́ntin, bɔ mɛɖé jló ná gosín fí yi dɔ̌n ɔ́, é ná kpé wú ǎ; mɛɖé ka sigǎn gosín dɔ̌n wá mǐ gɔ̌n ǎ.” Dɔkunnɔ ɔ́ ka yí gbe ɖɔ: “Daá, bo kɛnklɛ́n bó sɛ́ Lazáa dó tɔ́ ce xwé. Đó un ɖó nɔví súnnu atɔ́ɔ́n ɖo fínɛ́; ní yi kplɔ́n nǔ yě, bónú yě ma wa nǔ nyɛ ɖɔhun, bó wá tɔ́n ɖo yagbénu fí ó.” Ablaxámu ka yí gbe n'i ɖɔ: “Nǔ e Mɔyízi kpódó gbeyíɖɔ Mawu tɔn lɛ́ɛ kpán wlán lɛ́ɛ ɖo dɔ̌n nú yě; yě ní nɔ xwedó.” Dɔkunnɔ ɔ́ ka ɖɔ: “Éeǒ daá Ablaxámu. Ényí mɛɖé gosín kútomɛ, bó yi mɔ yě ɔ́, yě ná húzú ayi.” Ablaxámu ka ɖɔ n'i ɖɔ: “Ényí yě má xwedó nǔ e Mɔyízi kpódó gbeyíɖɔ Mawu tɔn lɛ́ɛ kpán wlán lɛ́ɛ ǎ ɔ́, mɛ ɖěbǔ na bó fɔ́n sín kútomɛ fí, bó yi ɖɔ xó nú yě ɔ́, yě ɖo nǎ se wɛ ǎ.” Jezu ɖɔ nú ahwanvú tɔn lɛ́ɛ ɖɔ: “Mɛ dɔn dó nǔ nyanya mɛ sixú hán ǎ; amɔ̌, heelú mɛ e ná dɔn mɛ dó nǔ nyanya mɛ é; è gbɔ bó sin sé ɖaxó ɖokpó dó kɔ nú mɛ énɛ́ ɔ́, bó kpíkpé e nyi xu mɛ ɔ́, é nyɔ́ n'i hú nyladó e ɖo te kpɔ́n mɛ e na dɔn yɔkpɔ́vú ɖo nǔɖiɖi mɛ élɔ́ lɛ́ɛ ɖokpó géé dó nǔ nyanya mɛ é. Mi bo cɔ́ miɖée! “Ényí nɔví towe hu hwɛ hǔn, gbɛ̌ nǔ n'i; ényí é ka lɛ́ kɔ sín hwɛ tɔn lɛ́ɛ gúdo hǔn, sɔ́ kɛ ɛ. É na bó hu hwɛ dó we azɔn tɛ́nwe ɖo kéze ɖokpó ɔ́ mɛ, lobo wá gɔ̌n towe azɔn tɛ́nwe mɔ̌, bó ɖɔ nú we ɖɔ: ‘Nǔ e un wa nyi do nú we ɔ́ vɛ́ nú mì’ hǔn, sɔ́ kɛ ɛ.” Mɛsɛ́dó lɛ́ɛ ɖɔ nú Aklúnɔ ɖɔ: “Dǒ nǔɖiɖi nǔɖiɖi jí nú mǐ.” Jezu ka ɖɔ nú yě ɖɔ: “Ényí nǔɖiɖi mitɔn na bo sɔ atínkwín kpɛví ɖé, bónú mi ɖɔ nú atín élɔ́ ɖɔ: ‘Hɔn hwiɖée bó yi tun te ɖo xu mɛ’ ɔ́, é ná se gbe nú mi.” “Mɛ̌ ká ɖo mi mɛ, bó ná ɖó mɛsɛntɔ́ ɖokpó, bɔ é nɔ́ lɛ gle n'i, abǐ é nɔ́ nyi kanlin n'i, bó ná gosín gle mɛ wá xwé, bɔ mɛ ɔ́ ná ɖɔ n'i ɖɔ: ‘Yǎ wǔ wá jínjɔ́n ayǐ bó ɖu nǔ?’ Éeǒ; é nyɔ́ wa ɔ́, ɖɔ wɛ é ná ɖɔ n'i ɖɔ: ‘Blǒ nǔɖuɖu nú mì, bó húzú kan bó sɛn mì káká nú ma ɖu nǔ, bó nu ahan; énɛ́ ɔ́ gúdo ɔ́, hwi lɔ ná wá ɖu nǔ, bó nu ahan.’ Mɛsɛntɔ́ ɔ́ ka bló nǔ e é zɔ́n ɛ lɛ́ɛ bǐ ɔ́, gǎn ɔ́ ná dó kú tɔn n'i wɛ a? Mɔ̌ ɖokpó ɔ́, ényí mi lɔmɔ̌ mi wa nǔ e Mawu zɔ́n mi lɛ́ɛ bǐ hǔn, mi ɖɔ: ‘Mɛsɛntɔ́ kpowun wɛ mǐ nyí; nǔ e mǐ ɖó ná wa é jɛ́n mǐ wa.’ ” Jezu wá ɖo ali jí xwe Jeluzalɛ́mu, bó gbɔn Samalíi kpódó Galilée kpó tɛ́ntin. Ée é ɖo gletoxo ɖé mɛ byɔ́ wɛ ɔ́, azinzɔnnɔ wǒ ɖé lɛ́ɛ wá kpé e; guduzɔn ɖé jɛ wɛ yě ɖe. Yě nɔ te ɖo zɔ, bó zé gbe yi jǐ, bó jɛ Jezu ylɔ́ jí, bó ɖɔ: “Jezu, Mɛ̌si, kɛnklɛ́n kú nǔbláwǔ mǐtɔn.” Ée Jezu mɔ yě ɔ́, é ɖɔ nú yě ɖɔ: “Mi yi sɔ́ miɖée xlɛ́ vɔ̌sánú-xwlémawutɔ́ lɛ́ɛ;” bɔ hwenu e yě sɔ́ ali bó xweyǐgbe ɔ́, azɔn gbɔ nú yě. Mɛ ɖokpó ka ɖo yě mɛ, bɔ ée éyɛ́ mɔ ɖɔ azɔn gbɔ nú émí ɔ́, é lɛ́ kɔ, bó jɛ susu kpa nú Mawu jí, kpódó xósúsú kpó. É wá jɛ kpo ɖo Jezu nukɔn, bó ɖe kɔ́, lobo dó kú n'i. Nya énɛ́ ɔ́, Samalíinu ka wɛ. Jezu yí xó, bó ɖɔ: “Mɛ wǒ lɛ́ɛ bǐ wɛ azɔn gbɔ ná ǎ cé? Mɛ tɛ́nnɛ ɖě lɛ́ɛ lo? Fítɛ́ yě ká ɖe? Hǔn mɛɖé sɔ́ ɖo yě mɛ, bó ná lɛ́ kɔ wá kpa susu nú Mawu zɛ toɖévomɛnu élɔ́ wú ǎ cé?” É ka ɖɔ nú nya e wá dó kú n'i ɔ́ ɖɔ: “Sí te, bó yi; nǔ e a ɖi ɔ́ zɔ́n bɔ Mawu gbɔ azɔn nú we.” Falizyɛn lɛ́ɛ ka wá kan nǔ byɔ́ Jezu dó hwenu e axɔ́súɖuɖu Mawu tɔn na wa dó é wu, bɔ é yí gbe nú yě ɖɔ: “ Axɔ́súɖuɖu Mawu tɔn nyí nǔ e è nǎ sixú mɔ dó nukún wú ɔ́ ǎ. È sixú ɖɔ: ‘Éɖíe ɖo fí e; abǐ énɛ́ ɖo dɔ̌n nɛ́’ ǎ. Đó mi ní nywɛ́ ɖɔ axɔ́súɖuɖu Mawu tɔn ko ɖo mi mɛ.” É lɛ́ ɖɔ nú ahwanvú tɔn lɛ́ɛ ɖɔ: “Hwe ɖé nu ná wá su, bɔ mi na ba ná mɔ nyɛ Gbɛtɔ́ví ɔ́ sín azǎn lɛ́ɛ ɖě, bó ka na ba kpo. È nǎ ɖɔ nú mi ɖɔ: ‘Éɖíe ɖo fí e, abǐ énɛ́ ɖo dɔ̌n nɛ́!’ Mi ma ka xwedó yě ó. Đó, lě e jǐ nɔ́ kɛwun, bɔ jǐnukúnsin nɔ za wě sín akpá ɖě xwé, káká yi akpá ɖěvo xwé gbɔn ɔ́, mɔ̌ ɖokpó ɔ́ wɛ é ná nyí gbɔn nú nyɛ Gbɛtɔ́ví ɔ́ ɖo azǎn ce gbe. Amɔ̌, ya wɛ un ná tó jí káká, bɔ gbɛtɔ́ din tɔn lɛ́ɛ na tó gbɛ́ mì hwɛ̌. Nǔ e jɛ ɖo Nɔwée hwenu ɔ́ ɖokpó ɔ́ jɛ́n na lɛ́ jɛ ɖo nyɛ Gbɛtɔ́ví ɔ́ sín azǎn lɛ́ɛ gbe. Nɔwée hwenu ɔ́, gbɛtɔ́ lɛ́ɛ ɖo nǔ ɖu wɛ, bó ɖo ahan nu wɛ; súnnu lɛ́ɛ ɖo asi kplá wɛ, bɔ nyɔ̌nu lɛ́ɛ ɖo asúxwé yi wɛ káká yi jɛ gbe e gbe Nɔwée byɔ́ tɔjíhún ɖaxó ɔ́ mɛ é; jǐ ɖaxó ɖé ja káká, bɔ sin vɔ yě bǐ. Mɔ̌ ɖokpó ɔ́, nǔ e jɛ ɖo Lɔ̌ti hwenu ɔ́ wɛ na lɛ́ jɛ: gbɛtɔ́ lɛ́ɛ ɖo nǔ ɖu wɛ, bó ɖo ahan nu wɛ; yě ɖo nǔ xɔ wɛ, bó ɖo nǔ sa wɛ; yě ɖo nukún dó wɛ, bó ɖo xɔ gbá wɛ, bɔ gbe e gbe Lɔ̌ti wá tɔ́n sín Sodɔ́mu ɔ́, Mawu zɔ́n, bɔ zo kpódó hwemí kpó ja sín jǐxwé jǐ ɖɔhun, bó vɔ yě bǐ. Hwenu e nyɛ Gbɛtɔ́ví ɔ́ ná ɖe susu ce xlɛ́ ɔ́, lě e é ná nyí gbɔn ɔ́ nɛ́. “Azǎn énɛ́ gbe ɔ́, mɛ e ná ɖo xɔ ta bɔ nǔ tɔn lɛ́ɛ ka ná ɖo xɔ mɛ ɔ́, ní ma jɛ te bó yi fɔ ó. Mɔ̌ ɖokpó ɔ́, mɛ e ná ɖo gle mɛ ɔ́ má lɛ́ kɔ wá xwé gbe ó. Mi flín Lɔ̌ti sín asi ɔ́. Mɛ e ná ba ná hwlɛ́n gbɛ éɖée tɔn gán ɔ́, gbɛ tɔn ná bú dó e. Mɛ e ka ná hɛn gbɛ tɔn bú ɔ́ ná lɛ́ vɔ́ mɔ gbɛ tɔn sɔ́ ɖó tɛn tɔn mɛ. Má ka ɖɔ nú mi: zǎn énɛ́ mɛ ɔ́, mɛ we ná ɖo zan ɖokpó ɔ́ jí, bɔ è nǎ sɔ́ mɛ ɖokpó, bó ná jó mɛ ɖokpó dó. Nyɔ̌nu we ná ɖo nǔ li wɛ, bɔ è nǎ sɔ́ mɛ ɖokpó, bó ná jó mɛ ɖokpó dó. [ Súnnu we ná ɖo gleta, bɔ è nǎ sɔ́ mɛ ɖokpó, bó ná jó mɛ ɖokpó dó.”] Ahwanvú tɔn lɛ́ɛ ka yí xó, bó kanbyɔ́ ɛ ɖɔ: “Aklúnɔ! Fítɛ́ nǔ énɛ́ lɛ́ɛ ka ná jɛ ɖe?” Jezu ka yí gbe nú yě ɖɔ: “Fí e nǔ kúkú ɖe ɔ́, fí e aklasú lɛ́ɛ nɔ kplé ɖe é nɛ́.” Énɛ́ ɔ́ gúdo ɔ́, Jezu lɛ́ dó lǒ ɖokpó nú ahwanvú tɔn lɛ́ɛ, bó dó ɖe xlɛ́ yě ɖɔ yě ɖó ná ɖó kan dó ɖɛxixo wú tɛgbɛ; awakanmɛ ní má kú yě gbeɖé ó; é ɖɔ: “Hwɛɖɔtɔ́ ɖé tíin ɖo to ɖé mɛ, bó nɔ sí Mawu ɖěbǔ ǎ, é ka nɔ ké ya nú gbɛtɔ́ ɖěbǔ ǎ. Asúkúsi ɖé ká ɖo to ɔ́ mɛ, bó nɔ́ wá mɔ hwɛɖɔtɔ́ ɔ́, bó nɔ́ ɖɔ n'i ɖɔ: ‘Hwlɛ̌n mì ɖo mɛ e sí te dó jǐ ce ɔ́ sí.’ Hwɛɖɔtɔ́ ɔ́ tó gbɛ́ káká hwɛ̌; lo ɔ́, é wá ɖɔ dó xomɛ ɖɔ: ‘Un na bó ma sí Mawu ǎ, bó ma ké ya nú gbɛtɔ́ ǎ ɔ́, lě e asúkúsi élɔ́ ɖo kɔ jí nú mì sɔ é ɔ́, un ná gbɔ bó gbo dó étɔn jí; é má nyí mɔ̌ ǎ ɔ́, é ná wá ɖo tagba dó nú mì wɛ káká bɔ agbɔ̌n na kpé mì.’ ” Bɔ Aklúnɔ lɛ́ ɖɔ: “Mi ma se nǔ e hwɛagɔdotɔ́ énɛ́ ɖɔ é a? Ényí nǔ ɖo mɔ̌ ɔ́, nɛ̌ wɛ Mawu má ká ná yá wǔ gbo hwɛ nú yě mɛ e nyí étɔn, bó nɔ́ ɖo xó sú ylɔ́ ɛ wɛ zǎn kéze lɛ́ɛ ǎ gbɔn? É ná lín cóbó ná dó alɔ yě wɛ a? Má ɖɔ nú mi: tlóló wɛ é ná mɔ hwɛjijɔ nú yě. Lo ɔ́, hwenu e nyɛ Gbɛtɔ́ví ɔ́ ná wá ɔ́, un ka ná mɔ nǔɖitɔ́ ɖo ayǐkúngban jí a?” Jezu lɛ́ dó lǒ élɔ́, bó dó nyi mǎ mɛ e nɔ mɔ yěɖée dó mɔ mɛ ɖagbe, lobo ma ka nɔ ké ya nú mɛ ɖě lɛ́ɛ ǎ é, bó ɖɔ: “Nya we ɖé lɛ́ɛ yi ɖɛ xo gbé ɖo sinsɛnxɔ mɛ; mɛ ɖokpó nyí Falizyɛn, bɔ mɛ ɖokpó ka nyí tokwɛ́yítɔ́. Falizyɛn ɔ́ ɖo te, bó ɖo ɖɛ xo dó ayi mɛ wɛ ɖɔ: ‘Mawu ce! Un dó kú nú we, ɖó un cí gbɛtɔ́ ɖě lɛ́ɛ e nyí ajotɔ́, mɛ nyanya, agalɛtɔ́ lɛ́ɛ ɖɔhun ǎ. Un ka lɛ́ dó kú nú we, ɖó un cí tokwɛ́yítɔ́ élɔ́ ɖɔhun ǎ. Nyɛ ɔ́, un nɔ blá nu azɔn we ɖo aklúnɔzángbla ɖokpó mɛ, bɔ nǔ e un ɖó lɛ́ɛ bǐ ɔ́, un nɔ ná mǎɖówǒ tɔn.’ Tokwɛ́yítɔ́ ɔ́ ka ɖo te ɖo zɔ; é glá bó zé ta yi jǐ vɔ́vɔ́ ǎ; bó ná dó ɖe xlɛ́ ɖɔ émí yí hwɛ émítɔn lɛ́ɛ gbe ɔ́, é nɔ́ zin alɔ dó akɔ́n, bó nɔ́ ɖɔ: ‘Mawu ce, kú nǔbláwǔ ce, ɖó hwɛhutɔ́ wɛ nú mì.’ ” Jezu ka ɖɔ: “Má ɖɔ nú mi: Tokwɛ́yítɔ́ ɔ́ lɛ́ kɔ yi xwé tɔn gbe kɔ vɔ́; Falizyɛn ɔ́, hwɛ e éyɛ́ hu lɛ́ɛ ka nɔ kɔ n'i. Đó mɛ e sɔ́ éɖée su ɔ́, Mawu ná sɔ́ ɛ hwe; mɛ e ka sɔ́ éɖée hwe ɔ́, Mawu ná sɔ́ ɛ su.” Mɛ lɛ́ɛ kplá vǐ ɖo anɔ̌nu lɛ́ɛ lɔmɔ̌ wá Jezu gɔ́n, nú é ná ɖó alɔ yě jǐ, bó xo ɖɛ dó yě jí; lo ɔ́, ée ahwanvú tɔn lɛ́ɛ mɔ mɔ̌ ɔ́, yě bɛ́ adǎn dó mɛ lɛ́ɛ jí, Jezu ka ylɔ́ yě, bó ɖɔ: “Mi jó yɔkpɔ́vú lɛ́ɛ dó nú yě ní wǎ gɔ̌n ce; mi ma sú ali dó yě ó; ɖó axɔ́súɖuto Mawu tɔn ɔ́, mɛ e cí yě ɖɔhun lɛ́ɛ tɔn wɛ. Má ɖɔ nǔgbó nú mi: mɛ e ma ná yí axɔ́súɖuɖu Mawu tɔn ɔ́ yɔkpɔ́vú ɖɔhun ǎ ɔ́, é ɖo nǎ byɔ́ mɛ wɛ ǎ.” Jwifu lɛ́ɛ sín gǎn ɖokpó kanbyɔ́ Jezu ɖɔ: “ Mɛ̌si; mɛ ɖagbe! Étɛ́ un ɖó ná wa bɔ Mawu na ná mì gbɛ mavɔ mavɔ?” Jezu ka yí gbe n'i ɖɔ: “Étɛ́wú wɛ a ylɔ́ mì ɖɔ mɛ ɖagbe? Mɛ ɖěbǔ nyí mɛ ɖagbe zɛ Mawu ɖokpónɔ géé wú ǎ. A tunwun sɛ́n lɛ́ɛ: ‘Ma lɛ aga ó, ma hu mɛ ó, ma ja ajo ó, ma ɖe kúnnu agɔ ó, sí tɔ́ towe kpódó nɔ towe kpó.’ ” Nya ɔ́ ka yí gbe n'i ɖɔ: “Sín dɔ̌nkpɛvú mɛ ce ɖokpóó wɛ un ko ɖo sɛ́n énɛ́ lɛ́ɛ bǐ nyi wɛ.” Ée Jezu se mɔ̌ ɔ́, é ɖɔ n'i ɖɔ: “Nǔ ɖokpó géé wɛ kpo nú we: sa nǔ e a ɖǒ ɔ́ bǐ, bó má akwɛ́ tɔn nú wamamɔnɔ lɛ́ɛ; énɛ́ ɔ́, a nǎ ɖó dɔkun ɖo Mawu gɔ̌n; énɛ́ ɔ́ gúdo ɔ́, wǎ, bó xwedó mì.” Lo ɔ́, ée nya énɛ́ se mɔ̌ ɔ́, wǔ kú i bǐ, ɖó dɔkunnɔ ɖaxó ɖé wɛ é nyí. Ée Jezu mɔ ɖɔ wǔ kú nya ɔ́ bǐ ɔ́, é ɖɔ: “É ná vɛ́ wǔ nú dɔkunnɔ lɛ́ɛ ɖésú, bɔ yě ná byɔ́ axɔ́súɖuɖu Mawu tɔn mɛ. Đó, nyɛ̌vílinu dín gbɔn ná bɔwǔ nú lǎkúnmí hú dɔkunnɔ ná byɔ́ axɔ́súɖuto Mawu tɔn mɛ.” Mɛ e ɖo tó ɖó e wɛ lɛ́ɛ ɖɔ: “Ényí nǔ ɖo mɔ̌ ɔ́, mɛ̌ ka ɖo hwlɛngán ná mɔ wɛ lo?” Jezu ka yí gbe nú yě ɖɔ: “Nǔ e gló gbɛtɔ́ ɔ́ gló Mawu ǎ.” Piyɛ́ɛ ka ɖɔ nú Jezu ɖɔ: “Mǐdɛɛ lɛ́ɛ ɖíe ka jó nǔ e mǐ ɖó lɛ́ɛ bǐ dó, bó xwedó we e.” Bɔ Jezu ɖɔ nú yě ɖɔ: “Má ɖɔ nǔgbó nú mi; mɛ e ná jó xwé tɔn dó, abǐ asi tɔn dó, abǐ nɔví tɔn lɛ́ɛ dó, abǐ mɛ tɔn lɛ́ɛ dó, abǐ vǐ tɔn lɛ́ɛ dó, ɖó axɔ́súɖuɖu Mawu tɔn sín nukɔn yiyi wú ɔ́, mɛ énɛ́ ɔ́, Mawu ná ná ɛ mɔ̌hunkɔtɔn donu nabí ɖé ɖo gbɛ élɔ́ mɛ, bó ka ná lɛ́ wá na ɛ gbɛ mavɔ mavɔ ɖo gbɛ e jǎwe é mɛ.” Jezu kplá ahwanvú tɔn wěwe lɛ́ɛ jɛ vo, bó ɖɔ nú yě ɖɔ: “Jeluzalɛ́mu ɖíe mǐ xwe e, bɔ nǔ e gbeyíɖɔ Mawu tɔn lɛ́ɛ kó wlán dó Gbɛtɔ́ví ɔ́ wú ɔ́ bǐ ná jɛ. Đó è nǎ jó e nú mɛ e ma nɔ sɛn Mawu ǎ lɛ́ɛ, bɔ yě ná ko e; yě ná ɖɔ nǔyá n'i; yě ná tún atán kɔn nyi wú tɔn, Yě ná sɔ́ lanbá dó xo e ná. Énɛ́ ɔ́ gúdo ɔ́, yě ná hu i, bɔ azǎn tɔn atɔngɔ́ ɔ́ gbe ɔ́, é ka ná fɔ́n.” Lo ɔ́, ahwanvú tɔn lɛ́ɛ mɔ nǔ jɛ xó énɛ́ lɛ́ɛ e é ɖɔ nú yě lɛ́ɛ ɖěbǔ mɛ ǎ, é búdo dó yě, bɔ yě tunwun nǔ e ɖɔ wɛ Jezu ɖe ɔ́ ǎ. Jezu sɛkpɔ́ toxo e è nɔ ylɔ́ ɖɔ Jeliko ɔ́, nukúntíntɔ́nnɔ ɖé ka ɖo ayǐjínjɔ́n ɖo ali kpá, bó ɖo nǔ byɔ́ ɖu wɛ. Ée é se mɛ gěgé wá xweyǐgbe ɔ́, é kan nǔ e ɖo jijɛ wɛ é byɔ́, bɔ è ɖɔ n'i ɖɔ Jezu Nazalɛ́tinu ɔ́ wɛ wá xweyǐgbe. Bɔ é sú xó, bó ɖɔ: “Jezu Davídi ví, kú nǔbláwǔ nú mì!” Mɛ e ɖo nukɔn nú Jezu lɛ́ɛ gbɛ́ nǔ nú nya ɔ́ ɖɔ ní nɔ abwɛ̌; lo ɔ́, éyɛ́ lɛ́ vɔ́ xó sú syɛ́nsyɛ́n, bó ɖɔ: “Davídi ví, kú nǔbláwǔ nú mì!” Jezu ka nɔ te, bó zɔ́n ɖɔ è nǐ kplá ɛ wá nú émí. Ée é wá ɔ́, Jezu kanbyɔ́ ɛ ɖɔ: “Ani wɛ a jlǒ nú ma wa nú we?” Bɔ é yí gbe ɖɔ: “Aklúnɔ, blǒ bónú ma lɛ́ mɔ nukúnnú.” Jezu ka ɖɔ n'i ɖɔ: “Bo mɔ nukúnnú! Nǔ e a ɖi ɔ́ zɔ́n bɔ Mawu gbɔ azɔn nú we.” Azɔn ɖokpó ɔ́, nya ɔ́ mɔ nukúnnú, bó xwedó Jezu, bó ɖo susu kpa nú Mawu wɛ. Ée ahwan e xwedó Jezu ɔ́ mɔ nǔjlɛ́jlɛ́ énɛ́ ɔ́, yě bǐ jɛ Mawu mlá jí. Jezu wá jɛ Jeliko, bó ɖo toxo ɔ́ xo zlɛ́ wɛ. Nya ɖé ka ɖo fínɛ́, bɔ è nɔ ylɔ́ ɛ ɖɔ Zacée: tokwɛ́yítɔ́ lɛ́ɛ sín gǎn wɛ n'i, bɔ é jɛ dɔkun. É ɖo mɛ e nyí Jezu é ba ná mɔ wɛ; lo ɔ́, é kpé wú ǎ, ɖó mɛ e kplé ɖo fínɛ́ lɛ́ɛ sukpɔ́, é ka lɛ́ nyí mɛ gli. Énɛ́ ɔ́, é gbɔ bó kán wezun jɛ nukɔn, bó yi xá atín ɖé jí, bó na dó sixú mɔ Jezu, ɖó atín ɔ́ sá wɛ Jezu ná dín gbɔn. Ée Jezu jɛ fínɛ́ ɔ́, é kpɔ́n jǐ, bó ɖɔ n'i ɖɔ: “Zacée, yǎ wǔ jɛ te; ɖó éhɔ́nmɛ ɔ́, xwé towe gbe wɛ un ɖó ná jɛ.” Ée Jezu ɖɔ mɔ̌ ɔ́, Zacée jɛ te bléwún, bó kplá Jezu yi xwé gbe, bó yí jǒnɔ tɔn kpódó xomɛhunhun kpó. Ée mɛ lɛ́ɛ mɔ mɔ̌ ɔ́, yě bǐ jɛ nǔ hlún ɖɔ dó Jezu wú jí; yě nɔ́ ɖɔ: “É yi jɛ hwɛhutɔ́ xwé!” Zacée ka sí te ɖo Aklúnɔ nukɔn, bó ɖɔ n'i ɖɔ: “Aklúnɔ! Un ná ná dɔkun ce sín vlɔ̌ɖówe wamamɔnɔ lɛ́ɛ, bónú un ka hízí mɛɖé ɔ́, un ná sú mɔ̌hunkɔtɔn donu ɛnɛ mɛ ɔ́.” Jezu ka ɖɔ n'i ɖɔ: “Égbé ɔ́, Mawu hwlɛ́n mɛ e ɖo xwé élɔ́ gbe lɛ́ɛ gán, ɖó nya élɔ́ lɔmɔ̌ ɔ́, Ablaxámu ví wɛ.” Đó Mawu sɛ́ nyɛ Gbɛtɔ́ví ɔ́ dó, bónú má wá ba mɛ e bú lɛ́ɛ, bó hwlɛ́n yě gán. Ée mɛ lɛ́ɛ ɖo xó énɛ́ lɛ́ɛ ɖótó wɛ ɔ́, Jezu lɛ́ dó lǒ ɖěvo nú yě, ɖó é ko sɛ yá Jeluzalɛ́mu, bɔ mɛ lɛ́ɛ ka vɛdó ɖɔ tlóló din wɛ axɔ́súɖuɖu Mawu tɔn ná bɛ́ sín. Bɔ é ɖɔ: “Nya nukúnɖéjí ɖé wɛ sɔ́nǔ xwe to línlín ɖé mɛ, nú è nǎ yi sɔ́ ɛ axɔ́sú, bɔ é ná lɛ́ kɔ wá xwé. Cóbónú é ná yi ɔ́, é ylɔ́ mɛ wǒ ɖo mɛsɛntɔ́ tɔn lɛ́ɛ mɛ, bó sɔ́ sikágankwɛ́ wǒ dó así nú yě, bó ɖɔ yě ní dó ɖo ajɔ̌ wa ná wɛ, káká nú émí na lɛ́ kɔ wá. To tɔn mɛ nu lɛ́ɛ ka gbɛ́ wǎn n'i, bɔ yě ɖe mɛ, bɔ wɛn jɛ gǔdo tɔn nú yě ní yi ɖɔ nú mɛ e jló ná sɔ́ ɛ axɔ́sú ɔ́ ɖɔ: ‘Mǐ ba nú mɛ énɛ́ ní ɖu axɔ́sú ɖo mǐ nu ǎ!’ “Ée è sɔ́ ɛ axɔ́sú, bɔ é lɛ́ kɔ wá xwé ɔ́, é ylɔ́ mɛsɛntɔ́ e é má akwɛ́ ná lɛ́ɛ, bó ná tunwun lě e mɛ ɖokpó ɖokpó mɔ é. Mɛ nukɔntɔn ɔ́ wá, bó ɖɔ: ‘Gǎn ce, sikágankwɛ́ towe ɔ́ ji sikágankwɛ́ wǒ.’ Gǎn ɔ́ ka yí gbe n'i ɖɔ jí: ‘A wa nǔ ɖó ganjí; mɛsɛntɔ́ ɖagbe wɛ nú we; ɖó lě e a nɔ gbejí gbɔn, ɖo nǔ kpɛví mɛ é wú ɔ́, un ná sɔ́ we ɖó toxo wǒ nu.’ Mɛ wegɔ́ ɔ́ lɔ wá, bó ɖɔ: ‘Gǎn ce, sikágankwɛ́ towe ɔ́ ji atɔ́ɔ́n ɖěvo.’ Gǎn ɔ́ ka yí gbe nú élɔ́ ɖɔ: ‘Hwi lɔ ɔ́, nɔ toxo atɔ́ɔ́n nu.’ Mɛ ɖěvo ɖɔ: ‘Gǎn ce, sikágankwɛ́ towe ɖíe; avɔtó wɛ un sin dó, bó sɔ́ sɛxwe; ɖó xɛsi wɛ un ɖi nú we, ɖó a nylá hun tlala; nǔ e a ma sɔ́ ɖó ayǐ ǎ ɔ́ wɛ a nɔ yi zé; nǔ e a ma dó ǎ ɔ́ wɛ a nɔ ya.’ Gǎn ɔ́ ka yí gbe n'i ɖɔ: ‘Hwi mɛsɛntɔ́ nyanya élɔ́ ɔ́, xó e tɔ́n sín hwi ɖésú nu mɛ ɔ́ wɛ un ná sɔ́ dó ɖɔ hwɛ xá we. Ée a tunwun ɖɔ un nylá hun, bɔ nǔ e un ma sɔ́ ɖ'ayǐ ǎ ɔ́ wɛ un nɔ yi zé, bó ka nɔ ya nǔ e un ma dó ǎ ɔ́, nɛ́ ka gbɔn bɔ a ma ka sɔ́ akwɛ́ ce yi ɖó akwɛ́xwé, bónú un lɛ́ kɔ wá ɔ́, ma yí kpódó akwɛ́ví tɔn kpo ǎ?’ É ka ɖɔ nú mɛ e ɖo fínɛ́ lɛ́ɛ ɖɔ: ‘Mi yí sikágankwɛ́ ɔ́ sín así tɔn, bó zé nú mɛ e ɖó wǒ é!’ Yě ká yí gbe n'i ɖɔ: ‘Gǎn! Éyɛ́ ko ɖó sikágankwɛ́ wǒ hǔn!’ É ka yí gbe nú yě ɖɔ: ‘Má ɖɔ nú mi, mɛ e ɖó nǔ ɔ́, è nǎ lɛ́ ná nǔ i d'é jí. Mɛ e ma ka ɖó nǔɖé ǎ ɔ́, è nǎ lɛ́ yí kpɛ e é ɖó ɔ́ sín así tɔn. Kɛntɔ́ ce e ka ɖɔ nyɛ kún ná ɖu axɔ́sú ɖo émí nu ó lɛ́ɛ ɔ́, mi dɔn yě bǐ wá fí, bó hu yě ɖo nukún ce mɛ.’ ” Ée Jezu ɖɔ xó énɛ́ lɛ́ɛ vɔ ɔ́, é jɛ mɛ lɛ́ɛ sín nukɔn, bó ɖidó Jeluzalɛ́mu. Ée é sɛ yá Bɛtifajée kpódó Betaníi kpan, ɖo só e è nɔ ylɔ́ ɖɔ olívutín só ɔ́ kpá ɔ́, é ɖe ahwanvú tɔn we sɛ́ dó, bó ɖɔ nú yě ɖɔ: “Mi yi gletoxo e ɖo nukɔn nɛ́ é mɛ; mi byɔ́ toxo ɔ́ mɛ tlóló ɔ́, mi ná mɔ tócíví ɖé ɖo kan mɛ, bɔ mɛɖé ko xá jí kpɔ́n gbeɖé ǎ. Mi tún i, bó kplá ɛ wá. Ényí mɛɖé ka kanbyɔ́ mi ɖɔ: ‘Étɛ́wú mi ka ɖo túntún i wɛ’ hǔn, mi yí gbe n'i ɖɔ: ‘Nǔ tɔn wɛ hu dó Aklúnɔ.’ ” Ée yě ká yi ɔ́, yě mɔ nǔ lɛ́ɛ lě Jezu ɖɔ gbɔn nú yě ɔ́. Hwenu e yě ɖo tócíví ɔ́ tún wɛ ɔ́, nǔnɔ lɛ́ɛ kanbyɔ́ yě ɖɔ: “Aniwú mi ka ɖo tócíví ɔ́ tún wɛ?” Yě ká yí gbe ɖɔ: “Nǔ tɔn wɛ hu dó Aklúnɔ!” Bɔ yě kplá tócíví ɔ́ wá nú Jezu, bó tɛ́ avɔ yětɔn lɛ́ɛ nyi jǐ tɔn, bó sɔ́ Jezu jínjɔ́n jí. Ée Jezu ɖo yiyi wɛ ɔ́, mɛ lɛ́ɛ nɔ sɔ́ avɔ yětɔn tɛ́ ɖó ali ɔ́ jí. Hwenu e é sɛkpɔ́ Jeluzalɛ́mu, bó ɖo te jɛ sín olívutín só ɔ́ jí byɔ́ dodomɛ wɛ xweyǐgbe ɔ́, xomɛ ɖaxó ɖé hun ahwanvú wɔ̌buwɔ́bú e xwedó e lɛ́ɛ, bɔ yě jɛ susu kpa nú Mawu jí kpódó xósúsú kpó, ɖó nǔ e Mawu jlɛ́, bɔ yě mɔ lɛ́ɛ bǐ wú. Yě nɔ́ ɖɔ: “Mawu ní xo ɖɛ dó axɔ́sú e jǎwe ɖo Aklúnɔ nyíkɔ mɛ é jí. Fífá ní tíin ɖo sɛ́xwé, susu nú Mawu.” Falizyɛn e ɖo agun ɔ́ mɛ lɛ́ɛ ɖě ɖɔ n'i ɖɔ: “ Mɛ̌si, ɖɔ nú ahwanvú towe lɛ́ɛ nú yě ní xwɛ!” Jezu ka yí gbe nú yě ɖɔ: “Má ɖɔ nú mi: yědɛɛ lɛ́ɛ na bó xwɛ ɔ́, awǐnnya lɛ́ɛ ná sú xó.” Ée Jezu sɛ yá Jeluzalɛ́mu, bó mɔ to ɔ́ sɛ́ dó ɔ́, é ya avǐ ɖó ta tɔn mɛ, bó ɖɔ: “Ké, Jeluzalɛ́munu lɛ́ɛ mi! Égbé din ɔ́, ényí ɖɔ nǔ e ná hɛn fífá wá nú mi ɔ́ wú wɛ mi ko mɔ nukúnnú jɛ vɔ́vɔ́ ɔ́, nyɔ̌ wɛ é lo ko nyɔ́. Lo ɔ́, éɖíe é búdo dó mi e. Ayǐ ɖé lɛ́ɛ ka ná wá hɔ́n nú mi, bɔ kɛntɔ́ mitɔn lɛ́ɛ ná tɔ́n ahwan mi; yě ná xá toxo ɔ́, lobo ná ján mi gbɔn fí bǐ. Yě ná vɔ mi bǐ, bó ná gba toxo ɔ́, bɔ awǐnnya e è dǒ mɛ xɔ lɛ́ɛ ná ɔ́, ɖě sɔ́ ná kpo ɖo ɖě jí ǎ; ɖó hwenu e Mawu wá ba jǒnɔ mi ɔ́, mi tunwun ǎ.” Jezu byɔ́ sinsɛnxɔ mɛ, bó jɛ nǔsatɔ́ lɛ́ɛ nya jí; é ɖɔ nú yě ɖɔ: “Mawuxó ɔ́ ɖɔ jí: ‘Xwé ce ɔ́, ɖɛxwé wɛ é ná nyí; lo ɔ́, midɛɛ lɛ́ɛ mi ka sɔ́ dó ɖó ajotɔ́ lɛ́ɛ sín avatɛn.’ ” Ayǐhɔ́ngbe ayǐhɔ́ngbe ɔ́, Jezu nɔ kplɔ́n nǔ mɛ lɛ́ɛ ɖo sinsɛnxɔ mɛ; vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó ɖo biba ná hu i wɛ. Lo ɔ́, yě tunwun lě e yě ná kpé wǔ tɔn gbɔn é ǎ, ɖó togun ɔ́ bǐ wɛ bɔ nukún nyi wǔ tɔn, bó nɔ ɖo tó ɖó e wɛ kpó ayi yětɔn bǐ kpó. Gbe ɖokpó wá su, bɔ Jezu ɖo nǔ kplɔ́n mɛ lɛ́ɛ wɛ ɖo sinsɛnxɔ mɛ, bó ɖo Wɛn Ɖagbe Mawu tɔn jlá wɛ, bɔ vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó wá xwetɔ́n, bó ɖɔ n'i ɖɔ: “Đɔ acɛ e a ɖǒ, bó nɔ ɖo nǔ énɛ́ lɛ́ɛ wa wɛ ɔ́ nú mǐ; abǐ, ɖɔ mɛ e ná acɛ énɛ́ we ɔ́ nú mǐ.” Jezu ka yí gbe nú yě ɖɔ: “Nyɛ lɔmɔ̌ ma kan nǔ ɖokpó byɔ́ mi: mɛ̌ ká ná acɛ Jǎan, bɔ é wá lɛ yɛhwesin nú mɛ? Mawu wɛ a? Abǐ gbɛtɔ́ lɛ́ɛ wɛ? Mi ɖɔ nú má se.” Yě ká jɛ wě ɖe ɖo yěɖée tɛ́ntin jí ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Étɛ́wú mi ma ka ɖi nǔ nú Jǎan ǎ?’ Ényí mǐ ka yí gbe ɖɔ gbɛtɔ́ lɛ́ɛ wɛ ɔ́, to ɔ́ bǐ ná nyi awǐnnyaglo dó hu mǐ ná, ɖó mɛ bǐ wɛ nɔ mɔ Jǎan dó mɔ gbeyíɖɔ Mawu tɔn.” Énɛ́ ɔ́, yě gbɔ bó yí gbe ɖɔ émí kún tunwun mɛ e ná ɛ acɛ ɔ́ ó. Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì bɔ un nɔ dó wa nǔ énɛ́ lɛ́ɛ na ɔ́ na ɖɔ nú mi wɛ ǎ.” Énɛ́ ɔ́ gúdo ɔ́, Jezu dó lǒ élɔ́ nú mɛ lɛ́ɛ ɖɔ: “Nya ɖé ɖó ayǐkúngban, bó dó vǐwun kɔn nyi jí, bó xáya nú vǐwunzɔ́watɔ́ ɖé lɛ́ɛ, lobo yi tomɛ xɔ azǎn. Ée vǐwun gbigbɛ hwenu wá su ɔ́, nya ɔ́ sɛ́ mɛsɛntɔ́ tɔn ɖokpó dó vǐwunzɔ́watɔ́ lɛ́ɛ gɔ́n, bónú é ná yi yí vǐwun étɔn wá n'i. Lo ɔ́, vǐwunzɔ́watɔ́ lɛ́ɛ xo e, bó nya ɛ asígbá alɔgbá. Nya ɔ́ lɛ́ wá sɛ́ mɛsɛntɔ́ ɖěvo dó, bɔ yě xo é lɔmɔ̌, bó ɖɔ nǔyá n'i, lobo nya ɛ asígbá alɔgbá. É lɛ́ wá sɛ́ mɛ atɔngɔ́ ɔ́ dó, bɔ yě gblé wǔ i, bó nya ɛ tɔ́n sín vǐwungbo ɔ́ mɛ. Nya ɔ́ wá ɖɔ dó xomɛ ɖɔ: ‘Nɛ̌ un ka ná wa gbɔn? Un ná sɛ́ vǐ ce vívɛ́ná ɔ́ dó kpɔ́n; afɔ nyɔ́ ɔ́, yě sixú ɖó sísí nú éyɛ́.’ Lo ɔ́, ée vǐwunzɔ́watɔ́ lɛ́ɛ mɔ ɛ ɔ́, yě ɖɔ ɖo yěɖée tɛ́ntin ɖɔ: ‘Vǐ e ɖo xu ɔ́ ná ɖu wɛ ɔ́ ɖíe. Mi nú mǐ ná hu i, bónú vǐwungbo ɔ́ ná húzú mǐtɔn.’ Bɔ yě dɔn ɛ tɔ́n sín vǐwungbo ɔ́ mɛ, bó hu i.” Jezu wá kanbyɔ́ ɖɔ: “Nɛ̌ nya énɛ́ ɔ́ ka ná wa vǐwunzɔ́watɔ́ énɛ́ lɛ́ɛ sín nǔ gbɔn?” “É ná wá, bó ná hu vǐwunzɔ́watɔ́ énɛ́ lɛ́ɛ, lobo ná sɔ́ vǐwungbo ɔ́ dó alɔ mɛ nú mɛ ɖěvo lɛ́ɛ.” Ée mɛ lɛ́ɛ se mɔ̌ ɔ́, yě ɖɔ: “Mawu ní ma lɔn ó.” Lo ɔ́, Jezu kpɔ́n yě bó ɖɔ: “Xó élɔ́ e è wlǎn dó Mawuxówéma ɔ́ mɛ ɔ́, ani ɖɔ wɛ é ka ɖe: ‘Awǐnnya e xɔmɛtɔ́ lɛ́ɛ ma sɔ́ dó mɔ nǔɖéwanú ǎ, bó xo nyi kɛ́n ɔ́, wá húzú awǐnnya e ɖo tají é.’ Mɛɖěbǔ jɛ awǐnnya énɛ́ jí ɔ́, mɛ ɔ́ ná gba hánnyá; mɛ e jí awǐnnya ɔ́ ka ná jɛ ɔ́, é ná li i kpɔ́ɖɔ́kpɔ́ɖɔ́.” Gan énɛ́ mɛ ɖokpó ɔ́, vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpán ɖo lě e yě ná wa gbɔn, bɔ alɔ ná jɛ Jezu wú ɔ́ ba wɛ, ɖó yě tunwun ɖɔ émí nyi mǎ wɛ é ɖe; lo ɔ́, yě ɖo xɛsi ɖi nú togun ɔ́ wɛ. Yě ká wá jɛ Jezu cɔ́ jí, bó ɖó mɛɖé lɛ́ɛ n'i, nú yě ná yi ba gbe ɖo nu tɔn. Yě ná wa yɛ n'i ɖɔ émí ɖo gbejí nú Mawu, bó ná kan nǔ byɔ́ ɛ dó ɖó mɔ n'i, bó ná sixú wlí i ɖo xó ɖiɖɔ tɔn lɛ́ɛ mɛ, lobo ná jó e nú gǎn hwɛɖɔtɔ́ tokpɔn ɔ́ mɛ tɔn lɛ́ɛ. Mɛ énɛ́ lɛ́ɛ wá kanbyɔ́ Jezu ɖɔ: “ Mɛ̌si, mǐ tunwun ɖɔ xó e a nɔ ɖɔ ɔ́ kpódó nǔ e a nɔ kplɔ́n mɛ ɔ́ kpan bǐ wɛ sɔgbe. A nɔ kpɔ́n mɛɖé sín nukúnta dó ɖɔ xó ǎ, bó ka nɔ xlɛ́ Mawu sín ali ɔ́ mɛ titewungbe. Đo sɛ́n mǐtɔn mɛ ɔ́, è hɛn ɔ́, è nǎ sú takwɛ́ Dadá Hlɔ̌ma tɔn tɔn a, abǐ è nǎ gbɔ súsú?” Jezu ka mɔ nǔ jɛ ayi e ɖó wɛ yě ɖe ɔ́ wú, bó ɖɔ nú yě ɖɔ: “Mi xlɛ́ gankwɛ́ Hlɔ̌manu lɛ́ɛ tɔn ɖokpó mì ma kpɔ́n;” bɔ yě xlɛ́ ɛ, bɔ é kanbyɔ́ yě ɖɔ: “Mɛ̌ ɖíe è ɖe ɖ'é jí e? Mɛ̌ sín nyǐkɔ ɖíe ɖ'é jí e?” Bɔ yě yí gbe n'i ɖɔ: “Dadá Hlɔ̌ma tɔn tɔn wɛ.” Bɔ Jezu ɖɔ nú yě ɖɔ: “Mi bó sɔ́ nǔ e nyí Dadá Hlɔ̌ma tɔn tɔn ɔ́ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ́ jó nú Mawu.” Yě ká kpé wú, bó wlí i ɖo xógbe tɔn lɛ́ɛ ɖě mɛ ɖo mɛ lɛ́ɛ nukɔn ǎ. Xósin e é ná yě ɔ́ kpácá yě, bɔ yě gbɔ bó xwɛ. Sinsɛngbɛ́ e è nɔ ylɔ́ ɖɔ Saduseɛn lɛ́ɛ ɖě wǎ Jezu gɔ́n. (Yě wɛ nɔ́ ɖɔ mɛkúkú lɛ́ɛ kún ná fɔ́n ó). Yě kanbyɔ́ Jezu ɖɔ: “ Mɛ̌si, sɛ́n e Mɔyízi wlán ɖ'ayǐ nú mǐ ɔ́ ɖíe: ‘Ényí mɛɖé ɖó nɔví súnnu, bó da asi, lobo ma ka ji vǐ ǎ, bó kú jó asi ɔ́ dó ɔ́, nɔví tɔn ɔ́ ná sɔ́ asi ɔ́ da, bó ji vǐ ɖo xo tɔn mɛ, bó ná sixú ɖó donu nú nɔví tɔn e kú é.’ Nɔví nɔví tɛ́nwe ɖé lɛ́ɛ ka tíin. Mɛ nukɔntɔn ɔ́ da asi; é ka ji vǐ ǎ, bó kú jó asi ɔ́ dó, bɔ mɛ wegɔ́ ɔ́ sɔ́ asúkúsi ɔ́ da; élɔ́ ka ji vǐ ǎ, bó kú jó nyɔ̌nu ɔ́ dó; Hwenu e mɛkúkú lɛ́ɛ ná wá fɔ́n ɔ́, mɛ̌ sín asi wɛ nyɔ̌nu ɔ́ ka ná nyí ɖo yě mɛ tɛ́nwe lɛ́ɛ mɛ? Đó éɖíe ko nyí yě bǐ sín asi kpɔ́n e. Jezu yí gbe nú yě ɖɔ: “Súnnu kpódó nyɔ̌nu kpó e ɖo ayǐkúngban jí din lɛ́ɛ wɛ nɔ da asi, bó nɔ da asú. Lo ɔ́, mɛ e Mawu mɔ ɖɔ fínfɔ́n sín kú jɛ xá, bɔ yě ná nɔ gbɛ e jǎwe ɔ́ mɛ lɛ́ɛ sɔ́ na da asi ǎ, yě ká sɔ́ na da asú ǎ. Mɔ̌ jɛ́n yě ma sɔ́ sixú kú ǎ é nɛ́; ɖó yě ná cí wɛnsagun Mawu tɔn lɛ́ɛ ɖɔhun, bó ná nyí Mawu ví, ɖó yě fɔ́n sín mɛkúkú lɛ́ɛ mɛ. Mɛkúkú lɛ́ɛ ná fɔ́n sín kú xó ɔ́ ɖɔ wɛ Mɔyízi ɖe ɖo sɛ́nwéma e ɖɔ xó dó zungodwe e ɖo zo ji wɛ ɔ́ wú ɔ́ mɛ; hwenu e é ylɔ́ Aklúnɔ ɖɔ Mawu Ablaxámu tɔn, Mawu Izáki tɔn, Mawu Jakɔ́bu tɔn ɔ́, mɛkúkú lɛ́ɛ ná fɔ́n xó ɔ́ ɖɔ wɛ é ɖe. Hǔn, Mawu ɔ́, é nyí Mawu mɛkúkú lɛ́ɛ tɔn ǎ; Mawu mɛ e ɖo gbɛ lɛ́ɛ tɔn wɛ é nyí; ɖó, ɖo Mawu nukɔn ɔ́, yě bǐ wɛ ɖo gbɛ.” Sɛ́nkplɔ́nmɛtɔ́ ɖé lɛ́ɛ ka yí xó, bó ɖɔ nú Jezu ɖɔ: “Mɛ̌si, a ɖɔ xó ganjí.” Bɔ yě sɔ́ glá, bó kan nǔ ɖěbǔ byɔ́ Jezu ǎ. Jezu ɖɔ nú yě ɖɔ: “Nɛ̌ è ka sixú ɖɔ Klísu ɔ́, Davídi ví wɛ é nyí gbɔn? Đó Davídi ɖésú wɛ ɖɔ ɖo Ɖɛhanwéma tɔn mɛ ɖɔ: ‘Aklúnɔ ɖɔ nú Aklúnɔ ce ɖɔ: Jǐnjɔ́n ɖisí ce xwé, káká nú má sɔ́ kɛntɔ́ towe lɛ́ɛ dó bló afɔɖótɛn towe.’ Davídi nɛ́ ylɔ́ ɛ ɖɔ Aklúnɔ nɛ́; nɛ̌ é ka sixú lɛ́ nyí vǐ tɔn gbɔn?” Togun ɔ́ bǐ ɖo tó ɖó Jezu wɛ, bɔ é ɖɔ nú ahwanvú tɔn lɛ́ɛ ɖɔ: “Mi cɔ́ miɖée dó sɛ́nkplɔ́nmɛtɔ́ lɛ́ɛ wú, ɖó nǔ e nɔ víví nú yě lɛ́ɛ wɛ nyí ɖɔ: yě ní ɖo awu gaga mɛ, bó ɖo sa ɖi wɛ; è nǐ nɔ́ dó gbe yě ɖo tokplétɛn lɛ́ɛ; yě nɔ́ ba ná jínjɔ́n zinkpo nukúnɖéjí lɛ́ɛ mɛ ɖo kplɔ́ngbasá lɛ́ɛ, bó nɔ́ ba ná jínjɔ́n tɛn nukɔn nukɔntɔn lɛ́ɛ mɛ ɖo jǒnɔgbé.” Yě nɔ klá jɛ nǔ e nyí asúkúsi lɛ́ɛ tɔn é bǐ nu, bó ka nɔ́ ɖo ɖɛ gaga xo wɛ, bó ná dó ɖe xlɛ́ gbɛtɔ́ lɛ́ɛ ɖɔ mɛ ɖagbe wɛ émí nyí. Mawu ná dɔn tó nú yě, bɔ é ná syɛ́n ɖésú. Jezu kpɔ́n mɛ lɛ́ɛ tlítlí, bó mɔ dɔkunnɔ lɛ́ɛ ɖo akwɛ́ sɔ́ dó akwɛ́gbá sinsɛnxɔ mɛ tɔn ɔ́ mɛ wɛ. É ka lɛ́ mɔ asúkúsi wamamɔnɔ ɖé, bɔ é sɔ́ gankwɛ́ kpɛví kpɛví we dó gbǎ ɔ́ mɛ. Ée Jezu mɔ mɔ̌ ɔ́, é ɖɔ nú yě ɖɔ: “Má ɖɔ nǔgbó nú mi; akwɛ́ e asúkúsi wamamɔnɔ élɔ́ ná ɔ́, é hú mɛ ɖě lɛ́ɛ bǐ tɔn. Đó mɛ ɖě lɛ́ɛ bǐ sésé ɔ́, nǔ e kpé yě kpo ɔ́ mɛ wɛ yě kpɔ́n bó wá ná nǔ dó gbǎ ɔ́ mɛ; éyɛ́ ɔ́, nǔ e hu dó e ɔ́, nǔ e ɖo así tɔn, bɔ é ná ɖu, bó nɔ gbɛ ɔ́ bǐ wɛ é sɔ́ wá d'é mɛ.” Ée mɛɖé lɛ́ɛ ɖo awǐnnya ɖagbe ɖagbe lɛ́ɛ xó ɖɔ wɛ, bó ɖo nǔ e mɛ lɛ́ɛ ná Mawu, bɔ è dó ɖó acɔ́ nú sinsɛnxɔ ɔ́ xó ɖɔ wɛ ɔ́, Jezu ɖɔ: “Nǔ énɛ́ lɛ́ɛ e mɔ wɛ mi ɖe din ɔ́, hwe ɖé nu ná wá su, bɔ awǐnnya lɛ́ɛ ɖě sɔ́ ná kpo ɖo ɖě jí ǎ; bǐ wɛ è nǎ mu.” Yě kanbyɔ́ Jezu ɖɔ: “ Mɛ̌si, hwetɛ́nu wɛ nǔ énɛ́ lɛ́ɛ ká ná wá jɛ? Wuntun tɛ́ ká ná ɖe xlɛ́ mǐ ɖɔ nǔ énɛ́ lɛ́ɛ ko ɖo nǎ jɛ wɛ?” Jezu ka yí gbe nú yě ɖɔ: “Mi hɛn ayi nú mɛɖé má wá flú mi ó. Đó mɛ gěgé ná sɔ́ nyǐkɔ ce, bó ná wá xwetɔ́n, bó ɖɔ: ‘Nyɛ wɛ nyí Klísu ɔ́;’ hwenu e gbɛ ná vɔ dó ɔ́ ko sɛ yá kɛ́nnɛ́kɛ́nnɛ́; mi ma xwedó yě ó. Hwenu e mi ná wá se bɔ è nǎ ɖo ahwanfunfun kpódó gǔfínfɔ́n kpó xó ɖɔ wɛ ɔ́, ado ní ma hu mi ó, ɖó nǔ wɛ nyí, bó ɖó ná tó jɛ hwɛ̌; lo ɔ́, vivɔ gbé wɛ gbɛ ɔ́ kó ja nɛ́ ǎ.” Jezu ka lɛ́ ɖɔ nú yě ɖɔ: “Togun ɖě ná sí te dó ɖě jǐ; axɔ́súɖuto ɖě ná sí te dó ɖě jǐ. Ayǐkúngban ná dán wǔ ɖésú, bɔ adɔ kpódó jɛmɛjí kpó ná wá gbɔn fí tɛnmɛ tɛnmɛ. Nǔ baɖabaɖa gěgé ná jɛ, bɔ wuntun ɖaxó ɖaxó lɛ́ɛ ná tɔ́n ɖo jǐxwé. “Amɔ̌, cóbónú nǔ énɛ́ lɛ́ɛ ná jɛ ɔ́, alɔ ná jɛ mi wú, bɔ è nǎ dó ya nú mi, bó ná dɔn mi yi kplɔ́ngbasá Jwifu lɛ́ɛ tɔn, bó ná sɔ́ mi dó gankpá mɛ; è nǎ ylɔ́ hwɛ mi ɖo axɔ́sú lɛ́ɛ kpódó tokpɔngán lɛ́ɛ kpó nukɔn, ɖó nyɛ wú. Nǔ énɛ́ lɛ́ɛ ná jɛ dó mi jí, bɔ mi ná ɖó d'é wú, bó ná ɖe kúnnu nú mì. Mi ka tunwun ɖɔ xó e mi ná yi ɖɔ dó hwlɛ́n miɖée ɔ́, mi kún ná ba ɖ'ayǐ ó. Đó un ná sɔ́ xó e mi ná ɖɔ é kpódó nǔnywɛ́ e mi ná zán é kpán bǐ dó ayi mɛ nú mi, bɔ kɛntɔ́ mitɔn lɛ́ɛ ɖěbǔ ná sixú mɔ xó ɖé, bó dó gba mitɔn ɔ́ ná ǎ. Mɛjitɔ́ mitɔn lɛ́ɛ lɔ kpódó nɔví mitɔn lɛ́ɛ kpó, mɛ mitɔn lɛ́ɛ kpódó xɔ́ntɔn mitɔn lɛ́ɛ kpán ná jó mi, bɔ è nǎ hu mɛ gěgé ɖo mi mɛ; mɛ bǐ ná gbɛ́ wǎn nú mi ɖó nyɛ wú. Lo ɔ́, ɖa mitɔn lɛ́ɛ ɖokpó ná hwe ǎ. Ényí mi ka dɛ ɖo ya énɛ́ lɛ́ɛ nu ɔ́, Mawu ná hwlɛ́n mi gán.” “Hwenu e mi ka ná wá mɔ kɛntɔ́ lɛ́ɛ nyi ahwan, bó ján Jeluzalɛ́mu toxo ɔ́, mi nywɛ́ ɖɔ hwenu e è nǎ gba dó ɔ́ kó sɛ yá. Énɛ́ ɔ́, mɛ e ná ɖo Judée gbé jí lɛ́ɛ ní hɔn yi só lɛ́ɛ jí; mɛ e ná ɖo toxo ɔ́ mɛ lɛ́ɛ ní hɔn tɔ́n, bónú mɛ e ná ɖo gleta lɛ́ɛ ní má sɔ́ lɛ́ kɔ wá toxo ɔ́ mɛ ó. Đó hlɔnbiba sín azǎn wɛ azǎn énɛ́ lɛ́ɛ ná nyí, bɔ nǔ e è ko wlán ɖ'ayǐ é bǐ ná jɛ. Azǎn nyanya wɛ azǎn énɛ́ lɛ́ɛ ná nyí nú nyɔ̌nu e ná ɖo xo, kpódó ée ná ɖó vǐ anɔ̌nu hwenɛ́nu lɛ́ɛ kpán; ɖó to ɔ́ bǐ ná jɛ lele mɛ, bɔ Mawu ná ɖe xomɛsin tɔn xlɛ́ togun ɔ́. Yě ná kú hwǐ kú; ahwan ná wlí kannumɔ yětɔn yi to lɛ́ɛ mɛ to lɛ́ɛ mɛ, bɔ mɛ e ma nɔ sɛn Mawu ǎ lɛ́ɛ ná gbídí Jeluzalɛ́mu dó afɔ wú, káká yi jɛ hwenu e gan mɛ yětɔn ná vɔ dó é.” “È nǎ mɔ wuntun ɖo hwesivɔ́ mɛ, bó ná mɔ ɖo sun kpódó sunví lɛ́ɛ kpó mɛ. Đo ayǐkúngban jí ɔ́, akɔta lɛ́ɛ ná ɖo adohu adohu jí, bɔ zǐngídi e ɖú wɛ xu ɖe é, kpódó lě e xo gbɔn wɛ é ɖe é kpán ná gba hǔn dó nú yě. Gbɛtɔ́ lɛ́ɛ ɖo nǔ e ná jɛ dó gbɛ ɔ́ wú ɔ́ kpɔ́n sɛ́ dó wɛ ɔ́, xɛsi ná ɖi yě, bɔ yě ná kú dó te. Hlɔ̌nhlɔ́n jǐxwé tɔn lɛ́ɛ ná dán wǔ. Énɛ́ ɔ́, è nǎ mɔ Gbɛtɔ́ví ɔ́ ɖo akpɔ́kpɔ́ mɛ jǎwe, kpódó hlɔ̌nhlɔ́n kpán, ɖo susu ɖaxó ɖé mɛ. Nǔ énɛ́ lɛ́ɛ jɛ jijɛ jí hǔn, mi jlɔ́, bó kpɔ́n jǐ, ɖó hwenu e Mawu ná hwlɛ́n mi é kó sɛ yá.” Jezu ka dó lǒ nú yě, bó ɖɔ: “Mi kpɔ́n fígitín, kpódó atín ɖě lɛ́ɛ bǐ kpán: Ényí yě jɛ ama zɔ́n jí, bónú mi mɔ ɔ́, mi ɖésúnɔ nɔ tunwun ɖɔ xwejí nɛ́ ɖo nǎ wɔ́ wɛ nɛ́. Mɔ̌ ɖokpó ɔ́, ényí mi wá mɔ nǔ énɛ́ lɛ́ɛ ɖo jijɛ wɛ hǔn, mi nywɛ́ ɖɔ axɔ́súɖuɖu Mawu tɔn kó sɛ yá. Má ɖɔ nǔgbó nú mi: mi mɛ e ɖo gbɛ din lɛ́ɛ bǐ ná kó kú cóbónú nǔ énɛ́ lɛ́ɛ ná jɛ ǎ. Jǐnukúnsin kpódó ayǐkúngban kpán ná vɔ, amɔ̌ xó ce lɛ́ɛ ná vɔ gbeɖé ǎ.” “Mi bo cɔ́ miɖée, bónú nǔ ɖu díngan, ahan nu díngan, kpódó gbɛmɛ tagba lɛ́ɛ kpán má wá cyɔ́n ayi mitɔn jí, lobo nú azǎn énɛ́ ɔ́ wá fyán mi ó; ɖó azǎn énɛ́ ɔ́ ná wá fyán mi, lě e mɔ nɔ fyán kanlin gbɔn é. Mi bo nɔ wunzɛn hwebǐnu, bó nɔ ɖo ɖɛ xo wɛ hwebǐnu, bó ná mɔ hlɔ̌nhlɔ́n dó gló nǔ énɛ́ lɛ́ɛ e ná jɛ lɛ́ɛ bǐ, lobo ná sigǎn nɔ te ɖo Gbɛtɔ́ví ɔ́ nukɔn.” Kéze ɔ́, Jezu nɔ ɖo nǔ kplɔ́n mɛ wɛ ɖo sinsɛnxɔ ɔ́ mɛ; zǎn mɛ ɔ́, é ka nɔ yi cí só e è nɔ ylɔ́ ɖɔ olívutín só ɔ́ jí. Ayǐ ká hɔ́n lě tlóló ɔ́, togun ɔ́ bǐ nɔ́ wá sinsɛnxɔ ɔ́ mɛ, bó nɔ́ se xó tɔn. Xwe e è nɔ ylɔ́ ɖɔ Dǐndínwáyixwe, bɔ è nɔ ɖu wɔ̌xúxú e mɛ è ma dó tɔ́n ǎ é ɔ́ kó ɖo sisɛyá wɛ. Vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpán ɖo lě e yě ná hu Jezu gbɔn ɔ́ sín wě ɖe wɛ; lo ɔ́, yě ɖo xɛsi ɖi nú to lɛ́ɛ wɛ. Satáan ka byɔ́ ayi mɛ nú Judási e è nɔ ylɔ́ ɖɔ Isikaliɔ́ti, bɔ é ɖo ahwanvú Jezu tɔn wěwe lɛ́ɛ mɛ é; bɔ Judási yi mɔ vɔ̌sánú-xwlémawutɔ́gán lɛ́ɛ kpódó sɔ́jagán lɛ́ɛ kpán, bó ɖɔ xó xá yě dó lě e é ná jó Jezu nú yě gbɔn ɔ́ wú. Énɛ́ ɔ́, xomɛ hun yě tlala, bɔ yě ɖɔ gbo xá Judási ɖɔ émí ná ná akwɛ́ ɛ, bɔ Judási yí gbe, bó jɛ hwenu e ná nyɔ́, bɔ é ná jó Jezu nú yě, bɔ mɛ lɛ́ɛ ma ná tunwun ǎ é ba jí. Wɔ̌xúxú e mɛ è ma dó tɔ́n ǎ é sín xwezán e gbe è nɔ hu lɛ̌ngbɔ́ví dó ɖu Dǐndínwáyixwe ɔ́ ná ɔ́ su. Jezu ka sɛ́ Piyɛ́ɛ kpódó Jǎan kpó dó, bó ɖɔ nú yě ɖɔ: “Mi yi bló tɛnmɛ ɖó, bó ɖa nǔɖuɖu e mǐ nǎ dó ɖu Dǐndínwáyixwe ɔ́ ná é.” Yě ká kanbyɔ́ ɛ ɖɔ: “Fítɛ́ a jlǒ ɖɔ mǐ ní yi sɔ́ xwe ɔ́ sín nǔ ɖe?” É ka yí gbe nú yě ɖɔ: “Éɖíe: mi ɖo toxo ɔ́ mɛ ná byɔ́ wɛ ɔ́, mi ná mɔ nya ɖé, bɔ é ná hɛn sin dó tɔyizɛ́n mɛ wá xweyǐgbe; mi xwedó e káká yi xwé e gbe é ná byɔ́ é, bó ɖɔ nú xwétɔ́ ɔ́ ɖɔ: ‘ Mɛ̌si ɖɔ mǐ ní wá kan xɔ e mɛ émí kpódó ahwanvú émítɔn lɛ́ɛ kpó ná ɖu Dǐndínwáyixwe ɔ́ ɖe ɔ́ byɔ́ we.’ Énɛ́ ɔ́, xwétɔ́ ɔ́ ná xlɛ́ xɔ ɖaxó ɖé mi ɖo síngbó jí, bɔ nǔ bǐ ko sɔgbe ɖ'é mɛ; fínɛ́ wɛ mi ná sɔ́ xwe ɔ́ sín nǔ ɖ'ayǐ ɖe.” Ahwanvú tɔn we lɛ́ɛ ka yi, bó mɔ nǔ lɛ́ɛ bǐ lě e Jezu ɖɔ gbɔn nú yě ɔ́, bɔ yě ɖa xwe ɔ́ sín nǔɖuɖu ɖo fínɛ́. Ée hwe ɔ́ nu su é ɔ́, Jezu kpódó mɛsɛ́dó tɔn lɛ́ɛ kpán ja nǔ ɖu gbé, bɔ Jezu ɖɔ nú yě ɖɔ: “Un ko jló tlala ɖɔ ma ɖu Dǐndínwáyixwe sín nǔɖuɖu élɔ́ xá mi, cóbó ná jɛ ya ji jí; ɖó ma ɖɔ nú mi: un sɔ́ ɖo ɖě ná ɖu wɛ gbeɖé, káká yi jɛ hwenu e Mawu ná ɖe nǔ e xwe ɔ́ nyí ɔ́ xlɛ́, ɖo axɔ́súɖuɖu tɔn mɛ dó é ǎ.” É ká wá sɔ́ kɔ́fu ɖokpó, bɔ vɛ̌ɛn ɖ'é mɛ, bɔ é dó kú nú Mawu, bó ɖɔ: “Mi yí, bó má nu, ɖó má ɖɔ nú mi, bɛ́ sín din ɔ́, vɛ̌ɛn ɖě sɔ́ ɖo nu ce ná jɛ wɛ káká yi jɛ hwenu e axɔ́súɖuɖu Mawu tɔn ná wá dó é ǎ.” Ée Jezu ɖɔ mɔ̌ ɔ́, é sɔ́ wɔ̌xúxú, bó dó kú nú Mawu, bó kán, bó ná yě bó ɖɔ: “Élɔ́ ɔ́, agbaza ce wɛ; [agbaza ce e un sɔ́ jó dó mi ta mɛ ɔ́ wɛ; mi nɔ bló lě, dó flín mì ná.” Ée yě ɖu nǔ gúdo ɔ́, é sɔ́ vɛ̌ɛn kɔ́fu ɔ́ lɔmɔ̌ nú yě, bó ɖɔ: “Vɛ̌ɛn élɔ́ ɔ́, hun ce wɛ; hun ce e Mawu dó sɔ́ akɔjijɛ yɔ̌yɔ́ ɔ́ sín afɔ ɖó te ná ɔ́ wɛ; é wɛ kɔn nyi ayǐ dó ta mitɔn mɛ.] “Mɛ e ka ɖo nǎ sɔ́ mì jó wɛ é ɖíe ɖo nǔ ɖu xá mì wɛ e. Gbɛtɔ́ví ɔ́ ɖó ná kú, lě e Mawu kó ɖɔ gbɔn é, amɔ̌ mɛ e ná sɔ́ ɛ jó ɔ́, heelú i.” Yě ká jɛ kinkanbyɔ́ yěɖée jí ɖɔ mɛ̌ ka ɖo nǔ mɔ̌hunkɔtɔn ná dó sin wɛ ɖo émí mɛ a jí. Yě jɛ nǔ dɔn jí kpó adǎn kpó ɖo yěɖée tɛ́ntin, ɖɔ mɛ̌ ká ɖó ná nyí nǔɖaxó ɖo émí mɛ a jí. Jezu ka ɖɔ nú yě ɖɔ: “Togun e ma nyí Jwifu ǎ lɛ́ɛ sín axɔ́sú lɛ́ɛ nɔ́ kpa acɛ gannaganna nú yě, bɔ mɛ e nyí gǎn lɛ́ɛ nɔ́ ba ɖɔ è nǐ ylɔ́ émí ɖɔ ‘Đagbewatɔ́.’ Lo ɔ́, nǔ ná nyí mɔ̌ ɖo midɛɛ lɛ́ɛ mɛ ǎ; é nyɔ́ wa ɔ́, mɛ e nyí nǔɖaxó ɖo mi mɛ é ní cí yɔkpɔ́vú ɖɔhun; mɛ e ka nyí gǎn é ní cí mɛsɛntɔ́ ɖɔhun. Đo mɛ e ɖo nǔ ɖu wɛ é kpódó mɛ e ɖo mɛ sɛn wɛ ɔ́ kpán mɛ ɔ́, mɛ̌ wɛ hú gǎn mɛ ɖě? Mɛ e ɖo nǔ ɖu wɛ é wɛ ǎ cé? É ɖo mɔ̌ có, nyɛ ka ɖo mi mɛ mɛsɛntɔ́ ɖɔhun. “Midɛɛ lɛ́ɛ ɔ́, mi wɛ nɔ gúdo ce hwebǐnu, ɖo adǎngbomɛ ce lɛ́ɛ mɛ. Énɛ́ wú ɔ́, nyɛ ɔ́, un sɔ́ axɔ́súɖuto ɔ́ ɖó te nú mi, lě e Tɔ́ ce sɔ́ ɖó te nú nyɛ gbɔn é, bónú mi na ɖu nǔ, bó nu sin xá mì, ɖo axɔ́súɖuto ce mɛ, lobo na jínjɔ́n axɔ́súzinkpo jí, bó na ɖɔ hwɛ xá Izlayɛ́li sín akɔta wěwe lɛ́ɛ.” “Aklúnɔ ɖɔ: Sinmɔ́ɔ! Sinmɔ́ɔ! Đǒtó; Satáan byɔ́ mi, bó na fún mi lě e è nɔ fún jinukún gbɔn é. Lo ɔ́, un sa vo nú Mawu ɖó ta towe mɛ, bónú nǔɖiɖi má wá hwe dó we ó. Hwenu e a ka ná lɛ́ kɔ wá gɔ̌n ce ɔ́, dǒ wǔsyɛ́n lanmɛ nú nɔví towe lɛ́ɛ.” Piyɛ́ɛ ka ɖɔ n'i ɖɔ: “Aklúnɔ! Un ɖo gbesisɔ mɛ, bó ná xwedó we yi ganxó, bó ná xwedó we yi kú.” Jezu ka yí gbe n'i ɖɔ: “Má ɖɔ nú we Piyɛ́ɛ! Kokló ná kó kɔ́ así égbé cóbɔ a nǎ kó gbɛ́ azɔn atɔn ɖɔ émí kún tunwun mì ó ǎ.” Jezu ka ɖɔ nú yě ɖɔ: “Hwenu e un sɛ́ mi dó, bɔ mi ma hɛn akwɛ́kpo ǎ, bó ma ka hɛn nǔbyɔ́ɖutɔ́glo ǎ, lobo ma ka hɛn afɔkpa ǎ ɔ́, mi jɛ nǔɖé dó wɛ a?” Bɔ yě yí gbe n'i ɖɔ: “Éeǒ, mǐ jɛ nǔ ɖěbǔ do ǎ.” É ka ɖɔ nú yě ɖɔ: “Amɔ̌, din ɔ́, mɛɖé ɖó akwɛ́kpo hǔn, ní sɔ́ hɛn; mɛɖé ɖó nǔbyɔ́ɖutɔ́glo hǔn, ní sɔ́ hɛn; mɛ e ma ka ɖó hwǐ ǎ é ɔ́, ní sa awu tɔn dó xɔ ná. Đó má ɖɔ nú mi: nǔ élɔ́ e è wlǎn ɔ́ ɖó ná jɛ dó jǐ ce. ‘È lɛ̌n ɛ dó dǎkaxotɔ́ lɛ́ɛ sín ahwan mɛ.’ Nǔ e è wlǎn dó wǔ ce lɛ́ɛ ɖó ná jɛ.” Yě ká ɖɔ n'i ɖɔ: “Aklúnɔ, hwǐ we ɖíe ɖo fí e.” É ka yí gbe nú yě ɖɔ: “É ko kpé.” Jezu tɔ́n, bó ɖidó olívutín só ɔ́ ta, lě e é kó nɔ́ bló gbɔn ɖ'ayǐ é, bɔ ahwanvú tɔn lɛ́ɛ xwedó e. Ée é jɛ fínɛ́ ɔ́, é ɖɔ nú yě ɖɔ: “Mi xo ɖɛ, bó ma wá jɛ tɛ́nkpɔ́n ɖaxó mɛ ó.” Ée é ɖɔ mɔ̌ ɔ́, é sɛ yi zɔ nú yě, nǎ yi mɛ̌tlukpo gban mɔ̌, bó jɛ kpo, bó jɛ ɖɛ xo jí ɖɔ: “Daá! Ényí a jlǒ hǔn, sɛ wǔvɛ́ kɔ́fu élɔ́ dó zɔ nú mì; amɔ̌, ní má nyí jlǒ ce ó, lo ɔ́, ní nyí lě e é jló hwɛ gbɔn é.” [ Hwenɛ́nu ɔ́, wɛnsagun Mawu tɔn ɖokpó gosín jǐxwé wá tɔ́n dó jǐ tɔn, bó ná ɛ akɔ́nkpinkpan. Jezu ka ɖo kúsukpɔ xo wɛ, bó lɛ́ ɖo ɖɛ xo wɛ syɛ́nsyɛ́n, bɔ dɛ̌n e jɛ wɛ é ɖe ɔ́ cí hun ɖɔhun, bó nɔ kun kɔn nyi ayǐ.] Ée é xo ɖɛ gúdo ɔ́, é sí te, bó yi ahwanvú tɔn lɛ́ɛ gɔ́n, bó mɔ yě ɖo amlɔ mɛ wǔbláwúblá, bó ɖɔ: “Étɛ́! Amlɔ dɔ́ wɛ mi ɖe a? Mi sí te bó xo ɖɛ, bó má wá jɛ tɛ́nkpɔ́n ɖaxó mɛ ó.” Mɔ̌ ɖɔ wɛ Jezu ɖe kɛ́ɖɛ́, bɔ mɛɖé lɛ́ɛ nyi ahwan wá xwetɔ́n, bɔ mɛ e è nɔ ylɔ́ ɖɔ Judási ɖo ahwanvú tɔn wěwe lɛ́ɛ mɛ ɔ́ zɔn yě nu. Judási sɛ yá Jezu, bó ná kí si n'i, bɔ Jezu ɖɔ n'i ɖɔ: “Judási, é má nyí si wɛ a kí nú Gbɛtɔ́ví ɔ́ bó dó jó e a?” Ée mɛ e ɖo Jezu kpá lɛ́ɛ mɔ nǔ e ɖo nǎ jɛ wɛ é ɔ́, yě kanbyɔ́ ɛ ɖɔ: “Aklúnɔ, mǐ ní jɛ hwǐ xú mɛ jí a?” Mɛ ɖokpó ka ɖo yě mɛ, bó xú hwǐ vɔ̌sánú-xwlémawutɔ́ ɖaxó ɔ́ sín mɛsɛntɔ́, bó kpa tó tɔn ɖisíxwé tɔn ɔ́. Jezu ka ɖɔ: “Mi gbɔ; ní nɔ mɔ̌!” É ka ɖó alɔ tó ɔ́ wú, bɔ tó jɛ tó tɛnmɛ. Jezu ka ɖɔ nú vɔ̌sánú-xwlémawutɔ́gán lɛ́ɛ kpódó sinsɛnxɔcɔ́tɔ́ sín gǎn lɛ́ɛ kpó, kpódó tomɛxó e wá gbě tɔn mɛ lɛ́ɛ kpán ɖɔ: “Ajotɔ́ axánsúnxó wɛ un ka nyí, bɔ mi hɛn hwǐ kpódó kpo kpó jɛ gbě ce mɛ a? Ayǐhɔ́ngbe ayǐhɔ́ngbe wɛ nyɛ kpódó mi kpán nɔ́ ɖo sinsɛnxɔ mɛ, bɔ mi ka wlí mì ǎ; lo ɔ́, mi kpódó ablu mɛ hlɔ̌nhlɔ́n lɛ́ɛ kpó sín gan wɛ xo din.” Ée yě wlí Jezu ɔ́, yě dɔn ɛ yi vɔ̌sánú-xwlémawutɔ́ ɖaxó ɔ́ xwé. Piyɛ́ɛ jɛ gǔdo yětɔn, é ka lɔn bó sɛkpɔ́ yě ǎ. Mɛ ɖé lɛ́ɛ ka bɔ myɔ ɖo kɔ́xo ɔ́ ta, bó jínjɔ́n ayǐ lɛ́ lɛ̌ dó, bɔ Piyɛ́ɛ wá yi jínjɔ́n yě mɛ. Nyɔ̌nu mɛsɛntɔ́ ɖokpó mɔ ɛ ɖo ayǐjínjɔ́n ɖo myɔ ɔ́ kɔn; é kpɔ́n ɛ tlítlí, bó ɖɔ: “Mɛ élɔ́ lɔmɔ̌ nɔ zɔn xá ɛ!” Piyɛ́ɛ ka gbɛ́ bó ɖɔ: “Nyɔ̌nu, un tunwun i ǎ.” É nɔ zaan, bɔ mɛ ɖěvo lɛ́ wá mɔ ɛ, bó ɖɔ: “Hwi lɔmɔ̌ ɖo mɛ tɔn lɛ́ɛ mɛ!” Piyɛ́ɛ ka gbɛ́, bó ɖɔ: “Éeǒ, un ɖo yě mɛ ɖě ǎ!” É ná yi gan xixo ɖokpó mɔ̌, bɔ mɛ ɖěvo lɛ́ wá, bó tɛ ɖɛ̌ jí syɛ́nsyɛ́n ɖɔ: “Nya élɔ́ nɔ́ zɔn xá ɛ dandan, ɖó Galilée nu wɛ!” Piyɛ́ɛ ka ɖɔ: “Nya ce, un mɔ nǔ jɛ nǔ e ɖɔ wɛ a ɖe ɔ́ mɛ ǎ.” Xó énɛ́ ɖɔ wɛ é ɖe kɛ́ɖɛ́ bɔ kokló kɔ́ así. Aklúnɔ ká lílɛ́, bó kpɔ́n Piyɛ́ɛ, bɔ Piyɛ́ɛ flín xó e Aklúnɔ kó ɖɔ n'i ɖ'ayǐ é; é wɛ nyí ɖɔ: “Cóbónú kokló ná kɔ́ así égbé ɔ́, a nǎ kó gbɛ́ azɔn atɔn ɖɔ émí kún tunwun mì ó.” Bɔ é tɔ́n jɛ hɔnto, bó ya avǐ kpódó vǐvɛ́ kpó. Mɛ e è sɔ́ ɖó Jezu kɔn, bɔ yě ɖo cícɔ́ ɛ wɛ lɛ́ɛ ɖo kiko e wɛ, bó ɖo xixo e wɛ. Yě sɔ́ avɔ dó blá nukún mɛ n'i, bó ɖɔ n'i ɖɔ: “Đɔ mɛ e dó nǔ we din ɔ́ nú mǐ.” Yě ɖɔ nǔyá gěgé ɖěvo n'i. Ayǐ ká wá hɔ́n, bɔ tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán wá kplé, bó dɔn Jezu yi hwɛɖɔxɔsá yětɔn ɖaxó ɔ́, bó ɖɔ n'i ɖɔ: “Ényí hwi wɛ nyí Klísu ɔ́ hǔn, ɖɔ nú mǐ.” Jezu ka yí gbe nú yě ɖɔ: “Un ɖɔ nú mi ɔ́, mi ná ɖi ǎ; un ka kan nǔ byɔ́ mi ɔ́, mi ná yí gbe nú mì ǎ. Amɔ̌, sín din ɔ́, nyɛ Gbɛtɔ́ví ɔ́ ná jínjɔ́n Mawu Nǔbǐwúkpétɔ́ ɔ́ sín ɖisíxwé.” Yě bǐ ka ɖɔ: “Hǔn Mawu ví wɛ nú we nɛ́ hǔn?” É ká yí gbe nú yě ɖɔ: “É jɛ́n nɛ́ mi ɖɔ nɛ́.” Ée Jezu ɖɔ mɔ̌ ɔ́, yě yí xó, bó ɖɔ: “ Kúnnuɖetɔ́ tɛ́ ba wɛ mǐ ká sɔ́ kpo ɖe? É ɖésú nɛ́ kó sɔ́ nu tɔn dó ɖɔ ná din bɔ mǐ se nɛ́.” Agun ɔ́ bǐ sí te, bó kplá Jezu hɛn yi Pilátu nukɔn. Đo fínɛ́ ɔ́, yě jɛ hwɛ xa dó kɔ n'i jí, bó nɔ́ ɖɔ: “Mǐ mɔ nya élɔ́ bɔ é nɔ́ ɖo to ɔ́ dɔn bú wɛ. É nɔ́ gbɛ́ ɖɔ è nǐ má sú takwɛ́ Dadá Hlɔ̌ma tɔn tɔn ó, lobo nɔ ɖɔ émí wɛ nyí Klísu axɔ́sú.” Pilátu ka kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Hwi wɛ ɖɔ!” Pilátu ka wá ɖɔ nú vɔ̌sánú-xwlémawutɔ́gán lɛ́ɛ kpódó agun ɔ́ kpán ɖɔ: “Un mɔ hwɛ ɖě ɖo kɔ nú nya élɔ́ ǎ.” Yědɛɛ lɛ́ɛ ka lɛ́ tɛ ɖɛ̌ jí, bó nɔ́ ɖɔ: “Nǔ e kplɔ́n mɛ wɛ é ɖe ɔ́ ɖo Judée to ɔ́ bǐ dán wɛ; Galilée yíkúngban jí wɛ é bɛ́ sín, káká wá jɛ fí.” Ée Pilátu se Galilée xó ɔ́, é kanbyɔ́ ɖɔ Galiléenu wɛ nya ɔ́ nyí a jí. Ée é mɔ nǔ jɛ wú ɖɔ Elódu sín acɛ mɛ wɛ Jezu ɖe ɔ́, é nyi i sɛ́ dó Elódu, ɖó é lɔmɔ̌ ɖo Jeluzalɛ́mu hwenɛ́nu. Ée Elódu mɔ Jezu ɔ́, xomɛ hun i tlala; ɖó é kó ɖo biba ná mɔ ɛ wɛ ɔ́, é kó lín, ɖó nǔ e é nɔ́ se dó wǔ tɔn lɛ́ɛ wú, bó ɖo nukún ɖó wɛ ɖɔ é ná jlɛ́ nǔ bɔ émí ná kpɔ́n. É kan nǔ gěgé byɔ́ ɛ; lo ɔ́, Jezu kɛ nu d'é mɛ n'i ǎ. Vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpán ká ɖo fínɛ́, bó ɖo hwɛ xa dó kɔ n'i wɛ syɛ́nsyɛ́n. Elódu kpódó sɔ́ja tɔn lɛ́ɛ kpán ká wa wǎngbɛ́númɛ sín nǔ xá Jezu; yě ko e, lobo sɔ́ awu ɖagbe ɖagbe ɖé dó n'i, bó nyi i sɛ́ dó Pilátu gɔ́n. Gbe énɛ́ ɔ́ gbe wɛ Elódu kpódó Pilátu kpán gbɔ kɛn e yě ɖe ɖ'ayǐ é, bó húzú xɔ́ntɔn. Pilátu ka ylɔ́ vɔ̌sánú-xwlémawutɔ́gán lɛ́ɛ kpódó togán lɛ́ɛ kpó, kpódó togun ɔ́ kpán kplé, bó ɖɔ nú yě ɖɔ: “Nya élɔ́ e mi kplá wá nú mì, bó ɖɔ é ɖo to ɔ́ dɔn bú wɛ ɔ́ ɖíe un kan nǔ byɔ́ ɖo mi bǐ nukɔn e; un ka mɔ nǔ e é wa nyi do é ǎ. Elódu lɔ ka mɔ nǔɖé ǎ; énɛ́ ɔ́ wútu wɛ é lɛ́ nyi i sɛ́ dó mǐ; mi ma mɔ din ɖɔ nya élɔ́ kún wa nǔɖé nú è nǎ sixú ɖó kúhwɛ n'i ó a? Hǔn, un ná xo e, bó ná jó e dó.” [ Dǐndínwáyixwe hwenu tɛgbɛ ɔ́, Pilátu ɖó ná ɖe gantɔ́ ɖokpó nyi te nú yě.] Yě bǐ ka jɛ xó sú jí ɖɔ: “Hu nya élɔ́, bó ɖe Balabási nyi te nú mǐ.” Balabási énɛ́ ɔ́, gǔ wɛ é fɔ́n dó gǎn lɛ́ɛ jí, lobo hu mɛ, bɔ è wlǐ i dó gan. Pilátu ka jló ná ɖe Jezu nyi te; énɛ́ wú wɛ é lɛ́ kan xó byɔ́ yě. Yě ká sú xó, bó ɖɔ: “Ká ɛ nyi aklúzu jí! Ká ɛ nyi aklúzu jí!” Pilátu ka lɛ́ ɖɔ nú yě azɔn atɔngɔ́ ɔ́ ɖɔ: “Nǔ nyanya tɛ́ é ká wa? Nyɛ mɔ hwɛ ɖě n'i ǎ. Hǔn, un ná xo e, bó ná jó e dó.” Lo ɔ́, yě ɖo xó sú wɛ syɛ́nsyɛ́n, bó ɖo tagba dó nú Pilátu wɛ ɖɔ è ní ká ɛ nyi aklúzu jí; xó e sú wɛ yě ɖe ɔ́ hú gǎn Pilátu, bɔ Pilátu gbo xó ɔ́ dó yětɔn jí. Mɛ e è wlǐ dó gan ɖó hunnyahunnya dɔn dó to mɛ, kpódó mɛ huhu kpán wú ɔ́, è ɖe éyɛ́ nyi te, lě e yě byɔ́ gbɔn é, lobo ka jó Jezu nú yě, nú yě ná sɔ́ ɛ dó wa nǔ e jló yě ɔ́ ná. Hwenu e è kplá Jezu xweyǐgbe ɔ́, nya ɖé tíin, bó lɛ́ kɔ sín gleta; è nɔ ylɔ́ ɛ ɖɔ Sinmɔ́ɔ; Silenɛ́ɛnu wɛ; yě wlí i, bó ɖíɖá ɛ aklúzu ɔ́, bónú é ná hɛn jɛ Jezu gúdo. Mɛ lɛ́ɛ ká nyi ahwan xwedó Jezu, bɔ nyɔ̌nu lɛ́ɛ ɖo avǐ ya wɛ, bó ɖo alě ná wɛ. Jezu ka lílɛ́ kpan nukɔn yě, bó ɖɔ: “Jeluzalɛ́munu nyɔ̌nu e mi, mi ma ya avǐ nú nyɛ ó; lo ɔ́, mi ya avǐ nú miɖée, bó ya avǐ nú vǐ mitɔn lɛ́ɛ. Đó ayǐ ɖé lɛ́ɛ ná wá hɔ́n, bɔ è nǎ ɖɔ: ‘Nǔ nyɔ́ nú wɛnsinɔ lɛ́ɛ, bó nyɔ́ nú mɛ e ma ji vǐ kpɔ́n gbeɖé ǎ lɛ́ɛ, bó nyɔ́ nú mɛ e ma ná anɔ̌ vǐ kpɔ́n gbeɖé ǎ é.’ Hwenɛ́nu ɔ́, è nǎ jɛ ɖiɖɔ nú só ɖaxó ɖaxó lɛ́ɛ jí ɖɔ: ‘Mi mu kɔn nyi mǐ jǐ!’ Bó ná ɖɔ nú só kpɛví kpɛví lɛ́ɛ ɖɔ: ‘Mi cyɔ́n mǐ.’ Đó ényí è ɖo atín mǔ sín nǔ wa gbɔn mɔ̌ wɛ ɔ́, nɛ̌ wɛ atín xúxú tɔn ka ná nyí gbɔn?” Yě kplá dǎnúwatɔ́ we dó jǐ tɔn, bó ná yi hu yě kpó é kpó. Ée yě wá yi jɛ tɛn e mɛ è nɔ ylɔ́ ɖɔ “takágo” ɔ́, yě ká Jezu nyi aklúzu jí, bó ká dǎnúwatɔ́ we lɛ́ɛ: è ká mɛ ɖokpó ɖó ɖisí tɔn xwé, bó ká mɛ ɖokpó ɖó amyɔ tɔn xwé. Jezu ka sa vo nú Mawu, bó ɖɔ: “Daá, yě tunwun nǔ e wa wɛ yě ɖe é ǎ; sɔ́ kɛ yě.” Yě ká nyi akɔ dó avɔ tɔn lɛ́ɛ, bó sɔ́ yětɔn yětɔn. Togun ɔ́ ka cí fínɛ́, bó ɖo nǔ kpɔ́n wɛ. Gǎn lɛ́ɛ ka ɖo kiko e wɛ, bó nɔ́ ɖɔ: “É hwlɛ́n mɛ ɖě lɛ́ɛ gán. Ényí Klísu mɛ e Mawu kpɔ́n bó sɔ́ é jɛ́n é nyí nǔgbó hǔn, ní bó hwlɛ́n éɖée gán.” Sɔ́ja lɛ́ɛ lɔmɔ̌ ɖo kiko e wɛ. Yě sɛ yi gɔ̌n tɔn, bó xwlé e vɛ̌ɛn sinvɛ́sinvɛ́, bó nɔ ɖɔ: “Ényí axɔ́sú Jwifu lɛ́ɛ tɔn jɛ́n a nyǐ nǔgbó hǔn, hwlɛ̌n hwiɖée gán.” È ka wlán xógbe élɔ́ dó ta tɔn nu ɖɔ: “Nya élɔ́ ɔ́, axɔ́sú Jwifu lɛ́ɛ tɔn wɛ.” Dǎnúwatɔ́ e è ka nyi aklúzu jí lɛ́ɛ ɖokpó ɖo zunzun i wɛ, bó nɔ́ ɖɔ: “É má nyí hwi wɛ nyí Klísu ǎ cé? Bo hwlɛ́n hwiɖée gán, bó hwlɛ́n mǐ lɔmɔ̌ gán bó!” Lo ɔ́, mɛ ɖě ɔ́ gbɛ́ nǔ n'i, bó ɖɔ: “Hwɛ nɔ sí Mawu ǎ wɛ a? Hwi mɛ e kpó é kpó è ɖǒ kúhwɛ ɖokpó ɔ́ na é. Mǐdɛɛ lɛ́ɛ ɔ́, nǔ e mǐ wa ɔ́ sín axɔ́ sú wɛ mǐ ɖe, bɔ é sɔgbe; éyɛ́ má ká wa nǔ nyanya ɖěbǔ nɛ́!” É ka lɛ́ ɖɔ: “Jezu, hwenu e a nǎ wá ɖu axɔ́sú ɖo gbɛ élɔ́ nu ɔ́, flín mì mɛ!” Jezu ka yí gbe n'i ɖɔ: “Má ɖɔ nǔgbó nú we: égbé din ɔ́, a nǎ ɖo Mawu gɔ̌n xá mì.” Jezu ka sú xó kpó hlɔ̌nhlɔ́n kpó, bó ɖɔ: “Daá, un sɔ́ lǐndɔ̌n ce dó alɔ mɛ nú we.” Énɛ́ ɔ́ gúdo ɔ́, é bɔnu. Ée sɔ́ja kanwekogán ɔ́ mɔ nǔ énɛ́ lɛ́ɛ e jɛ lɛ́ɛ ɔ́, é jɛ susu kpa nú Mawu jí ɖɔ: “Dandan mɛ ɔ́, nya élɔ́ ɔ́, xomɛvɔ́nɔ wɛ é nyí nǔgbó.” Ée mɛ e nyi ahwan wá kpɔ́n nǔ énɛ́ lɛ́ɛ mɔ mɔ̌ ɔ́, yě bǐ jɛ alɔ zin dó akɔ́n jí, dó ɖe xlɛ́ ɖɔ é kú wǔ nú émí, bó lɛ́ kɔ wá yi xwé. Jezu sín xɔ́ntɔn lɛ́ɛ bǐ, kpódó nyɔ̌nu e xwedó e sín Galilée lɛ́ɛ bǐ kpan ka nɔ te ɖo zɔ, bó ɖo nǔ e ɖo jijɛ wɛ lɛ́ɛ kpɔ́n wɛ. Nya nukúnɖéjí ɖokpó ka tíin, bó ɖo toxóɖɔgbɛ́ yětɔn mɛ, bɔ è nɔ ylɔ́ ɛ ɖɔ Jozɛ́fu, bɔ é nyí gbɛtɔ́ ayijlɔ́jlɔ́nɔ, hwɛjijɔnɔ. É ɖo nǔ e mɛ ɖě lɛ́ɛ ɖɔ ɔ́ kpódó nǔ e yě wa ɔ́ kpó ɖěbǔ jí ǎ. Nya énɛ́ ɔ́ Judée to e è nɔ ylɔ́ ɖɔ Alimatée ɔ́ mɛ nu wɛ. É lɔmɔ̌ ɖo te nɔ kpɔ́n axɔ́súɖuɖu Mawu tɔn wɛ. É yi mɔ Pilátu, bó byɔ́ ɛ Jezu sín cyɔ. É ɖe Jezu sín aklúzu ɔ́ jí, bó lɛ́ akwɛ́núvɔ dó e, lobo sɔ́ ɛ yi ɖi dó yɔdo e è kun dó sóxo mɛ é mɛ; yɔdo énɛ́ ɔ́, è ko ɖi mɛ ɖěbǔ d'é mɛ kpɔ́n ǎ. Gbe énɛ́ gbe ɔ́, axɔ́súzán gbe wɛ bɔ gbɔjɛzán ɔ́ ko ɖo nǎ bɛ́ wɛ. Nyɔ̌nu e kplá Jezu sín Galilée lɛ́ɛ xwedó Jozɛ́fu, bó kpɔ́n yɔdo ɔ́ mɛ, bó mɔ lě e è sɔ́ Jezu sín cyɔ ɖó é. Yě ká lɛ́ kɔ wá yi xwé, bó yi ba nǔsáwǔ wǎnɖagbenɔ kpódó célu kpó ɖó alɔ jí. Yě gbɔjɛ́ gbɔjɛzán gbe ɔ́ lě e sɛ́n ɔ́ zɔ́n gbɔn é. Aklúnɔzán gbe ayǐtéhɔ̌nnu ɔ́, nyɔ̌nu lɛ́ɛ wá yɔdo ɔ́ kɔn, bó hɛn nǔsáwǔ wǎnɖagbenɔ e yě ko ba ɖó alɔ jí é. Yě mɔ ɖɔ awǐnnya e è dó sú yɔdo ɔ́ ná ɔ́, è ko blí sín i. Énɛ́ ɔ́, yě byɔ́ yɔdo ɔ́ mɛ, yě ká mɔ Aklúnɔ Jezu sín cyɔ ǎ. Yě sɔ́ tunwun nǔ e yě ná wa é ǎ, bó ɖo nukún dó gbɛmɛ kpɔ́n dó nǔ énɛ́ wú wɛ, bɔ nya we ɖé lɛ́ɛ wá tɔ́n ɖo akpá yětɔn, bɔ awu yětɔn nɔ́ kɔ́n. Xɛsi jɛ nyɔ̌nu lɛ́ɛ jí, bɔ yě dǒ kɔ do; nya we lɛ́ɛ ká ɖɔ nú yě ɖɔ: “Étɛ́wú mi ka ɖo mɛ e ɖo gbɛ é ba wɛ ɖo mɛkúkú lɛ́ɛ mɛ? É sɔ́ ɖo fí ǎ, è ko fɔ́n ɛ sín kú. Mi flín xó e é ɖɔ nú mi hwenu e é ɖo Galilée é; é ɖɔ: ‘È ɖǒ ná jó Gbɛtɔ́ví ɔ́ nú hwɛhutɔ́ lɛ́ɛ, bɔ yě ná ká ɛ nyi aklúzu jí, bɔ Mawu ná fɔ́n ɛ sín kú azǎn tɔn atɔngɔ́ ɔ́ gbe.’ ” Hwenɛ́nu wɛ yě wá flín xó énɛ́ lɛ́ɛ e Jezu ko ɖɔ nú yě ɖ'ayǐ é. Ée yě lɛ́ kɔ sín yɔdo ɔ́ kɔn ɔ́, yě wlí nǔ énɛ́ lɛ́ɛ bǐ ɖɔ nú mɛsɛ́dó wǒ-ɖokpó lɛ́ɛ, kpódó mɛ ɖě lɛ́ɛ bǐ kpán. Nyɔ̌nu e ɖɔ nǔ énɛ́ lɛ́ɛ nú mɛsɛ́dó lɛ́ɛ ɔ́, yě ɖíe: Mali Magidalanu ɔ́, Jani kpódó Mali Jakinɔ ɔ́ kpán, kpódó nyɔ̌nu e kpó yě kpó zɔn lɛ́ɛ kpán. Mɛsɛ́dó lɛ́ɛ ka mɔ xó énɛ́ lɛ́ɛ dó mɔ lɛ̌lo, bó ɖi nǔ nú nyɔ̌nu lɛ́ɛ sín xó ǎ; có Piyɛ́ɛ ka sí te, bó kán wezun yi yɔdo ɔ́ kɔn. Ée é jɛ dɔ̌n ɔ́, é fɛ, bó kpɔ́n yɔdo ɔ́ mɛ, bó mɔ avɔ e è lɛ́ dó Jezu ɔ́ kɛ́ɖɛ́. Nǔ énɛ́ e jɛ ɔ́ búdo dó e, bɔ é lɛ́ kɔ wá yi xwé. Gbe nɛ́ gbe ɖokpó ɔ́, ahwanvú Jezu tɔn we ɖé lɛ́ɛ ɖo ali jí xwe gletoxo e è nɔ ylɔ́ ɖɔ Emawúsi, bɔ é ɖo kilomɛ́tlu wǒ-ɖokpó mɔ̌ dó Jeluzalɛ́mu ɔ́ mɛ. Yě ɖo xó ɖɔ dó nǔ énɛ́ e jɛ lɛ́ɛ bǐ wú wɛ. Xó énɛ́ lɛ́ɛ ɖɔ wɛ yě ɖe, bó ɖo nǔ dɔn ɖ'é kɔn wɛ, bɔ Jezu ɖésú wá xwedó yě wú, bó jɛ ali zɔn xá yě jí. Nǔɖé cyɔ́n nukún yětɔn jí, nú yě ma tunwun i ó. É kanbyɔ́ yě ɖɔ: “Xó tɛ́ ɖɔ dó ali wɛ mi ka ɖe mɔ̌?” Bɔ yě nɔ te wǔbláwúblá. Mɛ e è nɔ ylɔ́ ɖɔ Kleopasi ɖo yě mɛ ɔ́ yí gbe n'i ɖɔ jí: “Hǔn hwi ɖokpónɔ jɛ́n wɛ nyí jǒnɔ ɖo Jeluzalɛ́mu bó dán nǔ e jɛ ɖo fínɛ́ azǎnví élɔ́ lɛ́ɛ mɛ é a?” É ka yí gbe nú yě ɖɔ: “Étɛ́ ka jɛ?” Yě yí gbe n'i ɖɔ: “Nǔ e kpé Jezu Nazalɛ́ti tɔn é wɛ. Gbɔn nǔwiwa tɔn lɛ́ɛ kpódó xó tɔn lɛ́ɛ kpó gbla mɛ ɔ́, é ko ɖe xlɛ́ ɖo Mawu kpódó togun ɔ́ bǐ kpán nukɔn ɖɔ émí nyí gbeyíɖɔ Mawu tɔn, nǔwúkpétɔ́. Vɔ̌sánú-xwlémawutɔ́gán lɛ́ɛ kpódó togán mǐtɔn lɛ́ɛ kpán ka sɔ́ ɛ jó ɖɔ è nǐ ɖó kúhwɛ n'i, bó ká ɛ nyi aklúzu jí. Mǐdɛɛ lɛ́ɛ kó ɖo nukún ɖó wɛ ɖɔ é wɛ ná hwlɛ́n Izlayɛ́li togun ɔ́ gán. Lo ɔ́, nǔ cí mɔ̌ din ɔ́, azǎn tɔn atɔngɔ́ ɔ́ ɖíe. Nyɔ̌nu e ɖo ahwan mǐtɔn mɛ lɛ́ɛ ɖěe wá dó adohu nú mǐ; yě fɔ́n zǎn yi yɔ ɔ́ kɔn, yě ká mɔ cyɔ tɔn ǎ, lobo wá ɖɔ nú mǐ; énɛ́ ɔ́ víví hwe, bɔ yě lɛ́ ɖɔ nú mǐ ɖɔ wɛnsagun ɖé lɛ́ɛ tɔ́n dó émí jí, lobo ɖɔ nú émí ɖɔ Jezu ɖo gbɛ. Mɛ mǐtɔn ɖé lɛ́ɛ yi yɔ ɔ́ kɔn, bó mɔ nǔ énɛ́ lɛ́ɛ, lě e nyɔ̌nu lɛ́ɛ ɖɔ gbɔn é; lo ɔ́, yě mɔ Jezu ɔ́ ǎ.” Jezu ka ɖɔ nú yě ɖɔ: “Gbɛtɔ́ nǔnywɛ́hwedónánɔ lɛ́ɛ mi! Hwetɛ́nu wɛ mi ná wá ɖi nǔ nú nǔ e gbeyíɖɔ Mawu tɔn lɛ́ɛ kó ɖɔ ɔ́ bǐ dó? Klísu ɔ́ má kó ɖó ná ji ya énɛ́ lɛ́ɛ hwɛ̌, cóbó ná dó sixú byɔ́ susu tɔn mɛ ǎ cé?” É ka bɛ́ xó sín Mɔyízi jí, bó gbɔn gbeyíɖɔ Mawu tɔn lɛ́ɛ bǐ jí, bɔ nǔ e è wlǎn dó wǔtu tɔn ɖo Mawuxówéma mɛ ɔ́, é tín bǐ mɛ nú yě. Ée yě ká sɛ yá gletoxo e mɛ yě xwe ɔ́, Jezu bló nǔ mɛ e ná dín yi nukɔn ɖɔhun; lo ɔ́, yě ɖó e te, bó ɖɔ n'i ɖɔ: “Nɔ mǐ gɔ̌n, zǎn kó ɖo nǎ kú wɛ, ɖó hwe kó jɛ do.” É ka byɔ́ xwé gbe, bó nɔ yě gɔ̌n. Hwenu e é ka wá jɛ nǔ ɖu xá yě jí ɔ́, é sɔ́ wɔ̌xúxú, bó dó kú nú Mawu, bó kán, bó ná yě. Azɔn ɖokpó ɔ́, nukún yětɔn hun, bɔ yě mɔ nǔ jɛ wǔ tɔn, lobo tunwun ɖɔ Jezu wɛ; éyɛ́ ka bú sín yě tɛ́ntin, bɔ yě nɔ ɖɔ nú yěɖée ɖɔ jí: “Hwenu e é ɖo xó ɖɔ nú mǐ wɛ ɖo alixo, bó ɖo Mawuxó tínmɛ nú mǐ wɛ ɔ́, akpakpa ɖé ma sɔ́ mǐ sín xomɛ a?” Énɛ́ ɔ́, yě sí te tlóló, bó lɛ́ kɔ yi Jeluzalɛ́mu, bó mɔ mɛsɛ́dó wǒ-ɖokpó lɛ́ɛ kplé, kpódó gbɛ̌ yětɔn lɛ́ɛ kpó. Mɛ wǒ-ɖokpó lɛ́ɛ kpódó gbɛ̌ yětɔn lɛ́ɛ kpán ɖɔ nú yě ɖɔ: “Aklúnɔ fɔ́n sín kú nǔgbó, bó sɔ́ éɖée xlɛ́ Sinmɔ́ɔ.” Yě lɔ yí xó, bó ɖɔ nǔ e jɛ ɖo alixo ɔ́, lě e yě ká wá tunwun i gbɔn hwenu e é kán wɔ̌xúxú é. Xó énɛ́ lɛ́ɛ ɖɔ wɛ yě ɖe, bɔ Jezu wá tɔ́n ɖo tɛ́ntin yětɔn, bó ɖɔ nú yě ɖɔ: “Fífá ní nɔ kpɔ́ xá mi.” Xɛsi jɛ yě jí, bɔ ayi yětɔn gbadó, bɔ yě vɛdó ɖɔ nǔ mɔ wɛ émí ɖe sín. Lo ɔ́, Jezu ɖɔ: “Ani ka ɖo ayi gbadó nú mi wɛ mɔ̌? Étɛ́ sín nǔ xo kpɔ́n wɛ mi ka ɖe? Mi kpɔ́n alɔ ce lɛ́ɛ, bó kpɔ́n afɔ ce lɛ́ɛ; nyi ɖésúnɔ wɛ. Mi ɖó alɔ wú ce bó kpɔ́n; yɛ ɖé nɔ ɖó agbaza ǎ, é ka nɔ ɖó xú lě e nyɛ ɖó gbɔn bɔ mi mɔ é ǎ.” Hwenu e é ɖo mɔ̌ ɖɔ wɛ ɔ́, é zé alɔ tɔn lɛ́ɛ kpódó afɔ tɔn lɛ́ɛ kpó xlɛ́ yě. Nǔ énɛ́ ɔ́ hun xomɛ nú yě, cóbó ka lɛ́ kpo ɖo yě kpácá wɛ, bɔ ɖěe yě ma yá wǔ ɖi nǔ ǎ ɔ́, Jezu kanbyɔ́ yě ɖɔ: “Mi ɖó nǔɖuɖu ɖé ɖo fí a?” Yě ká sɔ́ hweví hihi sínsɛ́n ɖokpó n'i, bɔ é yí, bó ɖu ɖo nukún yětɔn mɛ, bó ka ɖɔ nú yě ɖɔ: “Hwenu e un ɖo kpɔ́ xá mi ɔ́, un ko ɖɔ xó élɔ́ lɛ́ɛ nú mi ɖɔ jí: nǔ e è ko wlán dó wú ce ɖo Mɔyízi sín sɛ́n ɔ́ mɛ, bó wlán dó wú ce ɖo gbeyíɖɔ Mawu tɔn lɛ́ɛ sín wěma mɛ, bó lɛ́ wlán dó wú ce ɖo Ɖɛhanwéma lɛ́ɛ mɛ ɔ́ bǐ ɖó ná jɛ.” Hwenɛ́nu wɛ é hun ayi yětɔn, bónú yě ná mɔ nǔ jɛ Mawuxówéma ɔ́ mɛ. É ɖɔ nú yě ɖɔ: “È ko wlán ɖ'ayǐ ɖɔ: Klísu ɔ́ ɖó ná ji ya, káká bó kú, bɔ Mawu ka na lɛ́ fɔ́n ɛ sín kú azǎn tɔn atɔngɔ́ ɔ́ gbe, bɔ, ɖo nyǐkɔ tɔn mɛ ɔ́, è nǎ jlá Wɛn Ɖagbe ɔ́ akɔta lɛ́ɛ bǐ, bɛ́ sín Jeluzalɛ́mu, bó ná ɖɔ nú gbɛtɔ́ lɛ́ɛ bǐ ɖɔ yě ní lɛ́ kɔ sín hwɛ yětɔn lɛ́ɛ gúdo, bónú Mawu ná sɔ́ hwɛ yětɔn lɛ́ɛ kɛ yě. Mi nyí kúnnuɖetɔ́ nǔ énɛ́ lɛ́ɛ tɔn. Nyɛ ɖésúnɔ ka ná sɛ́ nǔ e sín akpá tɔ́ ce dó ɔ́ dó mi. Mi bó nɔ to ɔ́ mɛ káká yi jɛ hwenu e hlɔ̌nhlɔ́n Mawu tɔn ná jɛ te dó mi jí é.” Jezu wá kplá yě yi káká Betaníi, bó sɔ́ alɔ tɔn lɛ́ɛ yi jǐ, bó xo ɖɛ dó yě jí. Hwenu e é ɖo ɖɛ xo dó yě jí wɛ ɔ́, é jó yě dó, bɔ Mawu sɔ́ ɛ yi jǐxwé. Yědɛɛ lɛ́ɛ ka ɖe kɔ́ n'i, bó lɛ́ kɔ wá yi Jeluzalɛ́mu kpódó awǎjijɛ ɖaxó kpán. Yě nɔ ɖo sinsɛnxɔ mɛ hwebǐnu, bó nɔ ɖo susu kpa nú Mawu wɛ. Cóbónú Mawu ná ɖó gbɛ ɔ́, xó ɔ́ kó tíin; é kó ɖe kpódó Mawu kpó, bó nyí Mawu. Xó énɛ́ kó ɖe tɛgbɛ xá Mawu ɖo bǐbɛ́mɛ. É jí wɛ è gbɔn bó bló nǔ e ɖo gbɛ ɔ́ mɛ lɛ́ɛ bǐ; è blǒ nǔ ɖěbǔ é mɛ vo ǎ. É mɛ wɛ gbɛ ɖe, bɔ gbɛ ɔ́ ka nɔ ná wěziza gbɛtɔ́. Wěziza ɔ́ ɖo hǐnhɔ́n wɛ ɖo zǐnflú mɛ, bɔ zǐnflú ɔ́ ka sixú wa nǔɖé n'i ǎ. Mawu sɛ́ mɛɖé dó, bɔ nyǐkɔ tɔn nyí Jǎan. É wá ɖe kúnnu nú wěziza ɔ́, bónú mɛ bǐ ná dó ɖi nǔ nú wěziza ɔ́, gbɔn kúnnuɖiɖe tɔn gbla mɛ. É ɖésú wɛ nyí wěziza ɔ́ ǎ; lo ɔ́, é wá, bó ná ɖe kúnnu nú wěziza ɔ́. Wěziza énɛ́ ɔ́ wɛ nyí wěziza nǔgbó e wá gbɛ ɔ́ mɛ, bó hɔ́n dó gbɛtɔ́ lɛ́ɛ bǐ jí é. Xó ɔ́ kó ɖo gbɛ ɔ́ mɛ; é jí wɛ è blǒ gbɛ ɔ́ gbɔn cóbɔ gbɛtɔ́ lɛ́ɛ ka tunwun i ǎ. É wá mɛ tɔn lɛ́ɛ gɔ́n, bɔ mɛ tɔn lɛ́ɛ ka yí i ǎ. Nǔ ɖo mɔ̌ có mɛɖé lɛ́ɛ ka yí i, bó ɖi nǔ n'i. É ná acɛ mɛ énɛ́ lɛ́ɛ, nú yě ná húzú Mawu ví. Yě nyí vǐ gbɔn hun gbla mɛ ǎ; yě ká nyí vǐ gbɔn jlǒ agbaza tɔn gbla mɛ ǎ; yě ká nyí vǐ gbɔn gbɛtɔ́ sín jlǒ gbla mɛ ǎ; lo ɔ́, Mawu wɛ nyí Tɔ́ nú yě. Xó ɔ́ húzú gbɛtɔ́, bó wá nɔ mǐ mɛ; é ɖe fɛ́nú kpódó nǔgbó kpó xlɛ́ mǐ, bɔ mǐ mɔ susu tɔn, susu e Tɔ́ nɔ ná Vǐɖokpónɔ tɔn é. Jǎan ɖe kúnnu n'i, bó sú xó ɖɔ: “Mɛ e xó un ɖɔ nú mi bó ɖɔ: ‘Mɛ ɖokpó ɖo gǔdo ce jǎwe; mɛ énɛ́ hú gǎn mì, ɖó é kó ɖe cóbɔ è wǎ ji mì’ ɔ́ ɖíe.” Nyɔ̌ná tɔn mɛ wɛ mǐ bǐ mɔ dɔkun e nyí mǐtɔn ɔ́ yí ɖe, bó mɔ fɛ́nú yí dó fɛ́nú jí. Đó Mɔyízi jí wɛ Mawu gbɔn, bó ná sɛ́n lɛ́ɛ mǐ, bó gbɔn Jezu Klísu jí, bó ná fɛ́nú kpódó nǔgbó kpán mǐ. Mɛ ɖěbǔ mɔ Mawu kpɔ́n gbeɖé ǎ; lo ɔ́, Vǐɖokpónɔ e nyí Mawu bó ɖo akɔ́n tɔn mɛ ɔ́ wɛ wá ɖe e xlɛ́. Jwifugán e ɖo Jeluzalɛ́mu lɛ́ɛ sɛ́ vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó dó, bónú yě ní yi kanbyɔ́ Jǎan ɖɔ mɛ nǎhún wɛ é ka nyí a jí. Ée yě kan nǔ byɔ́ ɛ ɔ́, Jǎan gbɛ́ ǎ; é ɖɔ tawun ɖo mɛ bǐ nukɔn ɖɔ: “Nyɛ wɛ nyí Klísu ɔ́ ǎ.” Bɔ yě kanbyɔ́ ɛ ɖɔ: “Mɛ̌ wɛ a ka nyí lo? Hwi wɛ nyí Elíi ɔ́ a?” Bɔ é gbɛ́ nú yě ɖɔ: “Éeǒ, nyɛ wɛ ǎ.” Yě lɛ́ kanbyɔ́ ɛ ɖɔ: “ Gbeyíɖɔ Mawu tɔn ɔ́ wɛ a nyí a?” Bɔ é gbɛ́ nú yě ɖɔ: “Éeǒ.” Yě ká wá kanbyɔ́ ɛ ɖɔ: “Bɔ mɛ nǎhún a ka nyí tawun? Mǐ ɖó ná yi ɖó gbe nú mɛ e sɛ́ mǐ dó lɛ́ɛ; étɛ́ hwi ɖésú ká nyí bó tunwun?” Jǎan yí gbe nú yě ɖɔ: “Nyɛ wɛ nyí mɛ e ɖo xó sú wɛ ɖo gbětótló mɛ é: ‘Mi bló Aklúnɔ sín ali ɖó.’ ” (Nǔ e gbeyíɖɔ Mawu tɔn Ezayíi ɖɔ é nɛ́.) Falizyɛn lɛ́ɛ lɔmɔ̌ ɖo mɛ e è sɛ́ dó Jǎan gɔ́n lɛ́ɛ mɛ. Bɔ yě kan xó élɔ́ byɔ́ ɛ: “Nú a ma nyí Klísu ɔ́ ǎ, bó ma nyí Elíi ǎ, bó ma ka nyí gbeyíɖɔ Mawu tɔn ɔ́ ǎ ɔ́, étɛ́wútu a ka nɔ lɛ yɛhwesin nú mɛ lɛ́ɛ lo?” Jǎan yí gbe nú yě ɖɔ: “Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; lo ɔ́, mɛ ɖokpó ɖo mi tɛ́ntin, bɔ mi tunwun mɛ e é nyí ɔ́ ǎ. Mɛ énɛ́ wɛ nyí mɛ e ɖo gǔdo ce jǎwe ɔ́, bɔ un nyí mɛɖé bó sixú tún afɔkpakan tɔn lɛ́ɛ vɔ́vɔ́ ǎ.” Nǔ énɛ́ lɛ́ɛ jɛ ɖo Betaníi, ɖo Judɛ́ɛn tɔ ɔ́ gúdo, fí e Jǎan ɖo yɛhwesin lɛ nú mɛ ɖe wɛ é. Ayǐhɔ́ngbe tɔn ɔ́, Jǎan mɔ Jezu jǎwe bó ɖɔ: “Mi kpɔ́n! Lɛ̌ngbɔ́ví Mawu tɔn e nɔ sɔ́ hwɛ kɛ gbɛtɔ́ lɛ́ɛ ɔ́ ɖíe. Mɛ e xó un ɖɔ nú mi bo ɖɔ: ‘Mɛ ɖé ɖo gǔdo ce jǎwe; mɛ énɛ́ hú gǎn mì, ɖó é ko ɖe cóbɔ è wá ji mì ɔ́ nɛ́.’ Mɛ e é ná nyí ɔ́, nyɛ ɖésúnɔ ko tunwun ɖ'ayǐ ǎ; lo ɔ́, bónú Izlayɛ́li togun ɔ́ ná dó tunwun i wú wɛ un wá sɔ́ sin dó ɖo yɛhwesin lɛ nú mɛ wɛ.” Jǎan ɖe kúnnu ɖɔ: “Un mɔ Yɛ Mawu tɔn gosín jǐxwé wá jɛ te dó jǐ tɔn ahwannɛ́ ɖɔhun, bó cí jǐ tɔn. Mɛ e é ná nyí ɔ́, nyɛ ɖésúnɔ ko tunwun ɖ'ayǐ ǎ. Lo ɔ́, mɛ e sɛ́ mì dó, bónú má wá sɔ́ sin dó lɛ yɛhwesin nú mɛ ɔ́, ko ɖɔ nú mì ɖ'ayǐ ɖɔ: ‘Mɛ e jí a nǎ mɔ Yɛ Mawu tɔn ná jɛ te dó, bó ná cí jǐ tɔn ɔ́, mɛ énɛ́ wɛ ná sɔ́ Yɛsinsɛn dó lɛ yɛhwesin nú mɛ.’ Nyi ɖésú wɛ mɔ nǔ e jɛ ɔ́, bó ɖe kúnnu ná ɖɔ é wɛ nyí Mawu ví.” Ayǐhɔ́ngbe tɔn ɔ́, Jǎan ko lɛ́ ɖo fí ɖokpó ɔ́, kpódó ahwanvú tɔn we kpó. Ée é mɔ Jezu wá xweyǐgbe ɔ́, é ɖɔ: “Mi kpɔ́n! Lɛ̌ngbɔ́ví Mawu tɔn ɔ́ ɖíe.” Ée ahwanvú Jǎan tɔn we lɛ́ɛ se xó énɛ́ ɔ́, yě jɛ Jezu gúdo. Jezu lílɛ́ kpan nukɔn yě, bó mɔ ɖɔ yě xwedó émí, lobo kanbyɔ́ yě ɖɔ: “Ani ba wɛ mi ɖe?” Bɔ yě kanbyɔ́ ɛ ɖɔ: “Fítɛ́ wɛ a nɔ́ nɔ, Hlabi?” Hlabi sín tínmɛ wɛ nyǐ Mɛ̌si. Jezu ka yí gbe nú yě ɖɔ: “Mi wá kpɔ́n fí e un nɔ nɔ ɔ́.” Yě ká xwedó e, bo yi mɔ fí e é nɔ́ nɔ ɔ́, bó nɔ gɔ̌n tɔn gbe énɛ́ gbe. (Hwelɛ́kɔ gan ɛnɛ mɛ mɔ̌ wɛ nǔ énɛ́ ɔ́ ɖo jijɛ wɛ.) Andlé e nyí Sinmɔ́ɔ Piyɛ́ɛ sín nɔví ɔ́ lɔ ɖo mɛ we e se Jǎan sín xó, bo xwedó Jezu lɛ́ɛ mɛ. Nǔ nukɔntɔn e Andlé bló ɔ́, é wɛ nyí ɖɔ é yi mɔ nɔví tɔn Sinmɔ́ɔ, bo ɖɔ n'i ɖɔ: “Mǐ mɔ Mɛsíya ɔ́.” Bɔ Andlé kplá nɔví tɔn Sinmɔ́ɔ yi Jezu gɔ́n. Jezu kpɔ́n Sinmɔ́ɔ, bó ɖɔ: “Hwi wɛ nyí Sinmɔ́ɔ, Jǎan sín vǐ ɔ́; amɔ̌, è nǎ nɔ ylɔ́ we ɖɔ Sefási (nyǐkɔ énɛ́ ɔ́ sín tínmɛ wɛ nyí awǐnnya.)” Ayǐhɔ́ngbe tɔn ɔ́, Jezu sɔ́ nǔ, bó xwe Galilée. É kpé Filípu, bó ɖɔ n'i ɖɔ: “Xwedó mì!” (Filípu ɔ́, Bɛtisayidanu wɛ, Andlé kpódó Piyɛ́ɛ kpó ɖɔhun.) Filípu yi mɔ Natanayɛ́li, bó ɖɔ n'i ɖɔ: “Mɛ e wú Mɔyízi sín sɛ́n lɛ́ɛ kpódó gbeyíɖɔ Mawu tɔn lɛ́ɛ kpó ɖɔ xó dó ɔ́, mǐ mɔ ɛ. Jezu Nazalɛ́ti tɔn Jozɛ́fu ví ɔ́ wɛ.” Natanayɛ́li ka kanbyɔ́ ɛ ɖɔ: “Nǔ ɖagbe ɖě ká sixú tɔ́n sín Nazalɛ́ti a?” Filípu ka ɖɔ n'i ɖɔ: “Wǎ, bó wá kpɔ́n.” Đěe Jezu mɔ Natanayɛ́li jǎwe ɔ́, é ɖɔ dó wútu tɔn ɖɔ: “Mi kpɔ́n! Izlayɛ́li ví titewungbe ɖokpó ɖíe; é nɔ hízí nǔ ǎ.” Đěe Natanayɛ́li se xó e Jezu ɖɔ dó wútu tɔn nɛ́ ɔ́, é kanbyɔ́ ɛ ɖɔ: “Nɛ̌ a ka wa gbɔn bó tunwun mì?” Bɔ Jezu yí gbe n'i ɖɔ: “Hwenu e a kpo ɖo fígitínsá dɔ̌n ɔ́, un ko mɔ we, cóbɔ Filípu wá ylɔ́ we.” Natanayɛ́li yí gbe n'i ɖɔ: “ Mɛ̌si, hwi wɛ nyí Mawu ví ɔ́ nǔgbó; hwi wɛ nyí Izlayɛ́li xɔ́sú.” Jezu ka yí gbe n'i ɖɔ: “Ée un ɖɔ nú we ɖɔ un mɔ we ɖo fígitínsá ɔ́ wútu wɛ a ɖi nǔ; a ka ko mɔ nǔɖé ǎ; a nǎ lɛ́ wá mɔ nǔ e hú gǎn mɔ̌ lɛ́ɛ.” Jezu lɛ́ ɖɔ n'i ɖɔ: “Ma ɖɔ nǔgbó nú mi: mi ná mɔ jǐnukúnsin ná hun, bɔ wɛnsagun Mawu tɔn lɛ́ɛ ná nɔ ɖo jǐ yi wɛ, bó ná nɔ ɖo te jɛ wɛ dó nyɛ Gbɛtɔ́ví ɔ́ jí.” Azǎn tɔn atɔngɔ́ ɔ́ gbe ɔ́, nya ɖé ɖo asi kplá wɛ ɖo Kana Galilée yíkúngban jí. Jezu sín nɔ ɖo alɔwlíwlí ɔ́ tɛn mɛ. È ylɔ́ Jezu kpódó ahwanvú tɔn lɛ́ɛ kpó, bɔ yě lɔmɔ̌ yi tɛn ɔ́ mɛ. Ée vɛ̌ɛn wá vɔ ɔ́, Jezu sín nɔ wá ɖɔ n'i ɖɔ: “Yě sɔ́ ɖó vɛ̌ɛn ɖě ǎ.” Jezu ka yí gbe n'i ɖɔ: “Nyɔ̌nu, é ma ka nyí hwi wɛ ná ɖɔ nǔ e un ná wa ɔ́ nú mì nɛ́; hwenu e un ná wa nǔ dó ɔ́ ko su ǎ.” Nɔ tɔn ka ɖɔ nú nǔɖuɖumátɔ́ lɛ́ɛ ɖɔ: “Mi bló nǔ e é ná zɔ́n mi lɛ́ɛ bǐ.” Dozɛ́n e è sɔ́ awǐnnya dó bló ná ɔ́ ayizɛ́n ká ɖo fínɛ́, bɔ Jwifu lɛ́ɛ nɔ dun sin dó yě mɛ, bó nɔ dó slá wǔ ná. Dozɛ́n énɛ́ lɛ́ɛ ɖokpó ɖokpó nɔ́ hɛn sin lǐtli kanwe (80) abǐ kantɔn (120) mɔ̌. Jezu ɖɔ nú nǔɖuɖumátɔ́ lɛ́ɛ ɖɔ: “Mi dun sin gɔ́ dozɛ́n élɔ́ lɛ́ɛ!” Bɔ yě dun sin gɔ́ yě flélé. Énɛ́ ɔ́ gúdo ɔ́, Jezu ɖɔ nú yě ɖɔ: “Mi bo wún yi jó nú nǔɖuɖumátɔ́ lɛ́ɛ sín gǎn,” bɔ yě wún yi jó n'i. Nǔɖuɖumátɔ́ lɛ́ɛ sín gǎn ɔ́ ɖɔ́ sin e ko húzú vɛ̌ɛn ɔ́ kpɔ́n; é ka tunwun fí e vɛ̌ɛn énɛ́ gosín ɔ́ ǎ; (mɛsɛntɔ́ e yi dun sin ɔ́ lɛ́ɛ wɛ tunwun.) Gǎn ɔ́ ylɔ́ asisúnɔ ɔ́, bó ɖɔ n'i ɖɔ: “Vɛ̌ɛn ɖagbe ɔ́ wɛ mɛ lɛ́ɛ bǐ nɔ ná mɛ jɛ nukɔn, bɔ hwenu e ahan wá ɖo mɛ jí yi wɛ ɔ́, è nɔ wá zán vɛ̌ɛn e ma nyɔ́ sɔ mɔ̌ ǎ é; bɔ hwɛ ka zé vɛ̌ɛn ɖagbe ɔ́ ɖ'ayǐ káká jɛ din.” Nǔ nukɔn nukɔntɔn e Jezu jlɛ́ é nɛ́; Kana Galilée yíkúngban jí wɛ é jlɛ́ ɖe. Mɔ̌ wɛ Jezu ɖe susu tɔn xlɛ́ gbɔn, bɔ ahwanvú tɔn lɛ́ɛ ɖi nǔ n'i. Énɛ́ gúdo ɔ́, Jezu kpódó nɔ tɔn kpó, kpódó nɔví tɔn lɛ́ɛ kpó, kpódó ahwanvú tɔn lɛ́ɛ kpó wá yi Kafaanawúmu, bó nɔ fínɛ́ xɔ azǎn kpɛɖé. Ée Dǐndínwáyi sín xwe e Jwifu lɛ́ɛ nɔ ɖu ɔ́ sín azǎn ɖo sisɛyá wɛ ɔ́, Jezu yi Jeluzalɛ́mu. É mɔ mɛɖé lɛ́ɛ ɖo sinsɛnxɔ ɔ́ mɛ, bɔ yě ɖo nyibú sa wɛ, bó ɖo gbɔ̌ sa wɛ, bó ɖo ahwannɛ́ sa wɛ. Akwɛ́ɖyɔ́tɔ́ lɛ́ɛ lɔ ɖo sinsɛnxɔ ɔ́ mɛ, bó ɖo ayǐjínjɔ́n ɖo távo yětɔn lɛ́ɛ kɔn. Ée Jezu mɔ mɔ̌ ɔ́, é sɔ́ kan dó bló bǎ ná, bó nya yě bǐ sín sinsɛnxɔ ɔ́ mɛ, yě kpódó gbɔ̌ yětɔn lɛ́ɛ kpó, kpódó nyibú yětɔn lɛ́ɛ kpó. É fúnfún akwɛ́ɖyɔ́tɔ́ lɛ́ɛ sín akwɛ́, bó flí távo yětɔn lɛ́ɛ xwe. É ɖɔ nú ahwannɛ́satɔ́ lɛ́ɛ ɖɔ: “Mi bɛ́ nǔ mitɔn lɛ́ɛ, bó tɔ́n sín xɔ ɔ́ mɛ. Mi ma zé tɔ́ ce sín xwé dó húzú ajɔ̌xwé ná ó.” Ée ahwanvú tɔn lɛ́ɛ mɔ mɔ̌ ɔ́, yě flín xó élɔ́ e è wlǎn dó Mawuxówéma ɔ́ mɛ ɔ́: “Wǎn yíyí e un ɖó nú xwé towe ɔ́, wǎn yíyí ma ɖó jlɛ̌ ɖé wɛ, bó nɔ́ sɔ́ akpakpa mì.” Lo ɔ́, Jwifu lɛ́ɛ yí xó, bó kanbyɔ́ Jezu ɖɔ: “Étɛ́ a ka ná jlɛ́ nú mǐ, bó ná dó ɖe xlɛ́ mǐ ɖɔ Mawu ná acɛ we ɖɔ a ní wa nǔ gbɔn mɔ̌?” Jezu ka yí gbe nú yě ɖɔ: “Mi gba sinsɛnxɔ élɔ́; un ná sɔ́ azǎn atɔn ɖó te bó ná lɛ́ vɔ́ gbá.” Jwifu lɛ́ɛ ka ɖɔ n'i ɖɔ: “Xwe kanɖé ayizɛ́n (46) wɛ è sɔ́ ɖó te, bó dó gbá sinsɛnxɔ élɔ́ ná; bɔ hwɛ ka ɖɔ din ɖɔ émí ná zé azǎn atɔn ɖó te, bó dó vɔ́ gbá ná a?” Lo ɔ́, sinsɛnxɔ e xó ɖɔ nú yě wɛ Jezu ɖe hwenɛ́nu ɔ́, agbaza é ɖésúnɔ tɔn wɛ. Énɛ́ ɔ́ wú wɛ hwenu e Mawu wá fɔ́n Jezu sín kú ɔ́, ahwanvú tɔn lɛ́ɛ flín ɖɔ é ko ɖɔ mɔ̌ ɖ'ayǐ; bɔ yě ɖi nǔ nú Mawuxówéma ɔ́, bó lɛ́ ɖi nǔ nú xó e Jezu ɖɔ nú yě lɛ́ɛ. Hwenu e Jezu ɖo Jeluzalɛ́mu, Dǐndínwáyixwe hwenu ɔ́, mɛ gěgé ɖi nǔ n'i, ɖó yě mɔ nǔdábaɖa e é jlɛ́ lɛ́ɛ. Jezu ka gán jɛ yě wú ǎ, ɖó é tunwun yě bǐ ganjí; é sɔ́ byɔ́ ɖɔ è nǐ ɖɔ xó n'i dó mɛɖé wú ǎ, ɖó é ɖésúnɔ ko mɔ nǔ jɛ nǔ e ɖo gbɛtɔ́ xomɛ ɔ́ bǐ wú. Nya ɖokpó tíin ɖo Falizyɛn lɛ́ɛ mɛ, bɔ è nɔ ylɔ́ ɛ ɖɔ Nikodɛ́mu. Gbɛtɔ́ nukúnɖéjí ɖokpó wɛ é nyí ɖo Jwifu lɛ́ɛ mɛ. Nya énɛ́ zɔn zǎn wá Jezu gɔ́n gbe ɖokpó bó ɖɔ n'i ɖɔ: “ Mɛ̌si, mǐ tunwun ɖɔ Mawu wɛ sɛ́ we dó, bónú a nǎ kplɔ́n nǔ mǐ. Đó, ényí Mawu ma ɖo kpɔ́ xá mɛɖé ǎ ɔ́, nǔdábaɖa e a nɔ jlɛ́ lɛ́ɛ ɔ́, mɛ ɔ́ sixú jlɛ́ ǎ.” Jezu ka yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ ǎ ɔ́, é sixú mɔ axɔ́súɖuɖu Mawu tɔn ɔ́ ǎ.” Nikodɛ́mu ka kanbyɔ́ Jezu ɖɔ: “Nɛ̌ mɛ e ko nyí mɛxó ɔ́ ná sixú lɛ́ vɔ́ jɔ gbɔn? É ná byɔ́ nɔ tɔn sín xomɛ, bɔ è ná lɛ́ vɔ́ ɛ ji wɛ a?” Jezu yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ gbɔn sin kpódó Yɛsinsɛn kpó mɛ ǎ ɔ́, é sixú byɔ́ axɔ́súɖuɖu Mawu tɔn mɛ ǎ. Vǐ e gbɛtɔ́ ji ɔ́, gbɛtɔ́ sin vǐ wɛ é nyí; mɛ e è ji gbɔn Yɛsinsɛn mɛ ɔ́, Yɛsinsɛn sin vǐ wɛ é nyí. Ma lɔn bónú lɛ̌vɔ́jɔ xó énɛ́ e un ɖɔ nú we ɔ́ ní kpácá we ó. Jɔhɔn nɔ nyi ɖo fí e jló e ɔ́, bɔ a nɔ se zǐngídi tɔn; a ka nɔ tunwun fí e é tɔ́n sín ɔ́, abǐ fí e é xwe ɔ́ ǎ. Lě e é nɔ nyí gbɔn nú mɛ e vɔ́ jɔ gbɔn Yɛsinsɛn mɛ ɔ́ nɛ́.” Nikodɛ́mu ka kanbyɔ́ Jezu ɖɔ: “Nɛ̌ nǔ ka sixú nyí mɔ̌ gbɔn?” Jezu yí gbe n'i ɖɔ: “Nɛ̌ hwi mɛ e nyí mɛ̌si ɖaxó ɖokpó nú Izlayɛ́li togun ɔ́, ma ka tunwun nǔ énɛ́ lɛ́ɛ ǎ gbɔn? Ma ɖɔ nǔgbó nú we: Nǔ e mǐ tunwun ɔ́ sín xó ɖɔ wɛ mǐ ɖe, bó ka ɖo nǔ e mǐ mɔ ɔ́ sín kúnnu ɖe wɛ; mi ka ɖi kúnnuɖiɖe mǐtɔn ǎ. Ényí mi ma ɖi nǔ nú mì hwenu e un ɖo gbɛmɛ fí sín xó lɛ́ɛ ɖɔ nú mi wɛ é ǎ ɔ́, nɛ̌ mi ka na wá sixú ɖi nǔ nú mì hwenu e un ná wá ɖo nǔ e ɖo sɛ́xwé lɛ́ɛ sín xó ɖɔ nú mi wɛ é gbɔn? Mɛ ɖěbǔ yi Mawu gɔ̌n kpɔ́n gbeɖé zɛ Gbɛtɔ́ví e jɛ te sín sɛ́xwé ɔ́ wú ǎ. Lě e Mɔyízi sɔ́ dan ɖó jǐ gbɔn ɖo gbětótló mɛ ɔ́, mɔ̌ ɖokpó ɔ́ wɛ è nǎ sɔ́ Gbɛtɔ́ví ɔ́ ɖó jǐ, bónú mɛ e ná ɖi nǔ n'i ɔ́ ma dɔn ó; lo ɔ́, é ní mɔ gbɛ mavɔ mavɔ. Đó Mawu yí wǎn nú gbɛtɔ́ sɔ mɔ̌, bó sɔ́ Vǐɖokpónɔ tɔn jó, bónú mɛ e ná ɖi nǔ n'i lɛ́ɛ ɖěbǔ ma dɔn ó; lo ɔ́, yě bǐ ní mɔ gbɛ mavɔ mavɔ. Mawu sɛ́ Vǐ tɔn dó gbɛ ɔ́ mɛ, bónú é ná wá ɖó hwɛ nú gbɛtɔ́ lɛ́ɛ ǎ; lo ɔ́, é ná wá hwlɛ́n yě gán wútu wɛ. Mɛ e ɖi nǔ nú vǐ ɔ́, Mawu ná ɖó hwɛ n'i ǎ; mɛ e ma ka ɖi nǔ n'i ǎ ɔ́, Mawu ko ɖó hwɛ nú mɛ énɛ́ xóxó, ɖó é ɖi nǔ nú Vǐɖokpónɔ Mawu tɔn ǎ wútu. Nǔ e ka dɔn hwɛɖónúmɛ énɛ́ wá ɔ́ wɛ nyí ɖɔ: wěziza wá gbɛ ɔ́ mɛ, gbɛtɔ́ lɛ́ɛ ka yí wǎn nú zǐnflú hú gǎn wěziza ɔ́, ɖó nǔ nyanya wiwa yětɔn lɛ́ɛ wútu. Nǔnyanyawatɔ́ nɔ gbɛ́ wǎn nú wěziza, bó nɔ lɔn ná sɛkpɔ́ ǎ; ɖó nǔ nyanya e é nɔ wa lɛ́ɛ táá wá jɛ wěxo. Lo ɔ́, mɛ e nɔ xwedó nǔgbó ɖo nǔwiwa tɔn lɛ́ɛ mɛ ɔ́ nɔ́ wá wěziza nu, bónú è nǎ mɔ nǔ jɛ ɖagbewiwa tɔn lɛ́ɛ wú; ɖó nǔwiwa tɔn lɛ́ɛ sɔgbe xá Mawu sín jlǒ.” Énɛ́ gúdo ɔ́, Jezu kpódó ahwanvú tɔn lɛ́ɛ kpó yi Judée yíkúngban jí. Jezu nɔ fínɛ́ xá yě, bó ɖo yɛhwesin lɛ nú mɛ lɛ́ɛ wɛ. Jǎan lɔ ɖo yɛhwesin lɛ nú mɛ wɛ ɖo Ayinɔ́ni, ɖo malín málín mɛ dó Salímu; ɖó sin sukpɔ́ ɖo fínɛ́. Mɛ lɛ́ɛ nɔ yi gɔ̌n tɔn, bɔ é nɔ lɛ yɛhwesin nú yě. È ko wlí Jǎan dó gankpá mɛ hwenɛ́nu ǎ. Énɛ́ ɔ́, Jǎan sín ahwanvú ɖé lɛ́ɛ wá ɖo nǔ dɔn xá Jwifu ɖokpó wɛ, dó wǔsláslá wú. Yě wǎ yi Jǎan gɔ́n, bó ɖɔ n'i ɖɔ: “Mɛ̌si, nya e kpódó hwi kpó nɔ Judɛ́ɛn tɔ ɔ́ gúdo dɔ̌n, bɔ a ɖe kúnnu n'i ɔ́ lɔmɔ̌ ɖo yɛhwesin lɛ nú mɛ wɛ, bɔ mɛ lɛ́ɛ bǐ ɖo gɔ̌n tɔn yi wɛ.” Jǎan ka yí gbe nú yě ɖɔ: “Mawu má ná nǔɖé mɛɖé ǎ ɔ́, é sixú mɔ ǎ. Mi ɖésúnɔ ná ɖe kúnnu nú mì ɖɔ un ɖɔ: ‘Un nyí Klísu ɔ́ ǎ; lo ɔ́, Mawu sɛ́ mì dó, bɔ un jɛ nukɔn n'i.’ Asisúnɔ tɔn wɛ nyí asi ɔ́; lo ɔ́, asisúnɔ sín xɔ́ntɔn e ɖo asisúnɔ ɔ́ kpá, bó ɖo gbe tɔn se wɛ ɔ́, xomɛ nɔ hun i. Mɔ̌ wɛ xomɛ hun nyɛ lɔmɔ̌ din ɔ́ nɛ́; bɔ xomɛhunhun ce ɔ́, nǔ bǐ vɔ ɖ'é wú. É jɛ xá ɖɔ éyɛ́ ní ɖo susu xɔ wɛ, bónú susu nyɛtɔn ná ɖo ɖiɖe kpo wɛ.” “Mɛ e gosín sɛ́xwé ɔ́ hú gǎn mɛ bǐ. Mɛ e ka ɖo ayǐkúngban jí ɔ́, ayǐkúngban jí tɔn wɛ é nyí, bó nɔ́ ɖɔ ayǐkúngban jí sín xó. Hǔn, mɛ e gosín sɛ́xwé wá ɔ́ hú gǎn mɛ bǐ nǔgbó. Éyɛ́ ɔ́, nǔ e é mɔ ɔ́, kpódó nǔ e é se ɔ́ kpó sín kúnnu wɛ é nɔ ɖe; bɔ mɛ ɖěbǔ ka ɖi nǔ nú kúnnuɖiɖe tɔn ǎ. Mɛ ɖěbǔ yí kúnnuɖiɖe tɔn ɔ́, mɛ ɔ́ nɔ ɖe xlɛ́ ɖɔ nǔ e Mawu ɖɔ ɔ́, nǔgbó wɛ. Mɛ e Mawu sɛ́ dó ɔ́, Mawuxó wɛ é nɔ ɖɔ; ɖó Mawu nɔ ɖó jlɛ̌ nú Yɛ tɔn e é nɔ ná mɛ e é sɛ́ dó ɔ́ ǎ. Tɔ́ ɔ́ yí wǎn nú Vǐ ɔ́, bó sɔ́ nǔ lɛ́ɛ bǐ dó alɔ tɔn mɛ. Mɛ e ɖi nǔ nú Vǐ ɔ́, mɔ gbɛ mavɔ mavɔ; mɛ e ma ka se tónú nú vǐ ɔ́ ǎ ɔ́, é ná mɔ gbɛ mavɔ mavɔ ǎ; lo ɔ́, xomɛsin Mawu tɔn ɖo jǐ tɔn.” Falizyɛn lɛ́ɛ se ɖɔ Jezu ɖo ahwan mɔ hú Jǎan wɛ, bó lɛ́ ɖo yɛhwesin lɛ nú mɛ hú Jǎan wɛ. Nǔgbó ɔ́, Jezu ɖésú lɛ yɛhwesin nú mɛɖé ǎ, ahwanvú tɔn lɛ́ɛ wɛ ɖo yɛhwesin lɛ nú mɛ wɛ. Ée Jezu tunwun ɖɔ Falizyɛn lɛ́ɛ se mɔ̌ ɔ́, é gosín Judée bo lɛ́ kɔ yi Galilée. Ée é ka nyí Samalíi wɛ é ɖó ná gbɔn dín yi Galilée ɔ́, é wá yi jɛ Samalíi toxo ɖé mɛ, bɔ è nɔ ylɔ́ toxo ɔ́ ɖɔ Sicáa; Sicáa lín dó gle e Jakɔ́bu ná vǐ tɔn Jozɛ́fu é ǎ. Fínɛ́ wɛ sɛ́tɔ Jakɔ́bu tɔn ɖe. Jezu ɖo fínɛ́ jɛ wɛ gan wěwe mɛ mɔ̌. Nǔ cikɔ n'i, bɔ é gbɔ bo jínjɔ́n tɔ ɔ́ tó. Nyɔ̌nu ɔ́ ka yí gbe nú Jezu ɖɔ: “Nɛ̌ hwi mɛ e nyí Jwifu ɔ́ ka wá ɖo sin byɔ́ nyɛ mɛ e nyí Samalíinu é wɛ gbɔn?” (Đó Jwifu lɛ́ɛ nɔ jɛ kpɔ́ xá Samalíinu lɛ́ɛ ǎ.) Jezu ka yí gbe n'i ɖɔ: “Ényí a ko tunwun nǔ e Mawu nɔ ná mɛ ɔ́, bó tunwun nyɛ mɛ e ɖɔ nú we ɖɔ: nǎ sin mì ma nu ɔ́ wɛ ɔ́, hwi ɖésú wɛ ná ko byɔ́ sin mì bɔ un ná ko ná sin e nɔ ná gbɛ mɛ ɔ́ we.” Nyɔ̌nu ɔ́ ka ɖɔ nú Jezu ɖɔ: “Mɛɖaxó! A ma ka ɖó nǔɖé, bó ná dó dun sin ɔ́ ná nɛ́, tɔ ɔ́ ka lɛ́ gɔ́ngɔ́n. Fítɛ́ a ka ná ba sin e nɔ ná gbɛ mɛ é sín? Tɔ́gbó mǐtɔn Jakɔ́bu wɛ kun tɔ élɔ́ nú mǐ. É ɖésúnɔ nu sin tɔn; vǐ tɔn lɛ́ɛ kpódó kanlin tɔn lɛ́ɛ kpó nu sin tɔn. Hwɛ lin ɖɔ émí hú gǎn ɛ wɛ a?” Jezu ka yí gbe n'i ɖɔ: “Mɛɖěbǔ nu sin élɔ́ ɔ́, kɔ ná lɛ́ xú i. Mɛ e ka ná nu sin e nyɛ ná ná ɛ ɔ́, kɔ sɔ́ ná xú i gbeɖé ǎ. Sin e nyɛ ná ná ɛ ɔ́, ná húzú tɔjɔtɛn e mɛ sin e nɔ ná gbɛ mavɔ mavɔ mɛ é ná nɔ sa sín é.” Énɛ́ ɔ́, nyɔ̌nu ɔ́ ɖɔ nú Jezu ɖɔ: “Mɛɖaxó, kɛnklɛ́n bó ná sin énɛ́ mì, nú kɔ ma sɔ́ xú mì, bónú ma lɛ́ tɔ́n sin dun gbé wá fí ó.” Jezu ka ɖɔ n'i ɖɔ: “Yi ylɔ́ asú towe wá fí.” Bɔ nyɔ̌nu ɔ́ yí gbe n'i ɖɔ: “Un ma ɖó asú nɛ́;” bɔ Jezu ɖɔ n'i ɖɔ: “Un ɖó asú ǎ e a ɖɔ ɔ́, xó nǔgbó wɛ nyí bɔ a ɖɔ. Đó a ko da asú atɔ́ɔ́n wá yi, bɔ mɛ e kpódó hwi kpó ɖo yiyi wɛ din ɔ́ lɔ nyí asú towe ǎ. Xó énɛ́ e a ɖɔ ɔ́, nǔgbó wɛ.” Nyɔ̌nu ɔ́ ɖɔ nú Jezu ɖɔ: “Mɛɖaxó, un mɔ din ɖɔ gbeyíɖɔ Mawu tɔn wɛ a nyǐ. Tɔ́gbó mǐtɔn lɛ́ɛ sɛn Mawu ɖo só élɔ́ jí, bɔ mi mɛ Jwifu lɛ́ɛ ka nɔ ɖɔ fí e è ɖǒ na sɛn Mawu ɖe ɔ́ wɛ nyí Jeluzalɛ́mu.” Jezu ka ɖɔ n'i ɖɔ: “Nyɔ̌nu; ɖi nǔ nú mì; hwenu ɖo nǎ su wɛ, bɔ é sɔ́ ná nyí só élɔ́ jí wɛ mi ná nɔ sɛn Mawu Tɔ́ ɔ́ ɖe ǎ, é ka sɔ́ ná lɛ́ nyí Jeluzalɛ́mu wɛ mi ná nɔ sɛn ɛ ɖe ǎ. Mi mɛ Samalíinu lɛ́ɛ tunwun nǔ e sɛn wɛ mi ɖe ɔ́ ǎ; lo ɔ́, mǐ mɛ Jwifu lɛ́ɛ tunwun ɖɔ hwlɛngán ɔ́ Jwifu lɛ́ɛ gɔ́n wɛ é gosín. Hwe ɔ́ nu ɖo nǎ su wɛ, éɖíe ka ko su e, bɔ Mawusɛntɔ́ titewungbe lɛ́ɛ ná sɛn Tɔ́ ɔ́ gbɔn hlɔ̌nhlɔ́n Yɛ ɔ́ tɔn mɛ, bó ná sɛn ɛ ɖo nǔgbó mɛ. Đó Mawusɛntɔ́ mɔ̌hunkɔ lɛ́ɛ ba wɛ Tɔ́ ɔ́ ɖe. Mawu ɔ́, Yɛ wɛ é nyí; bɔ mɛ e ná sɛn ɛ lɛ́ɛ ɖó ná sɛn ɛ gbɔn hlɔ̌nhlɔ́n Yɛ ɔ́ tɔn mɛ, bó ná sɛn ɛ ɖo nǔgbó mɛ.” Nyɔ̌nu ɔ́ ka ɖɔ n'i ɖɔ: “Un nywɛ́ ɖɔ Mɛsíya ɔ́ ɖó ná wá: (Mɛsíya ɔ́ sín tínmɛ wɛ nyí Klísu.) Bɔ hwenu e éyɛ́ ná wá ɔ́, é ná tín nǔ bǐ mɛ nú mǐ.” Bɔ Jezu ɖɔ n'i ɖɔ: “Nyɛ mɛ e nyí mɔ̌ ɔ́ ɖíe ɖo xó ɖɔ nú we wɛ e.” Xó énɛ́ ɖɔ wɛ Jezu ɖe kɛ́ɖɛ́ bɔ ahwanvú tɔn lɛ́ɛ lɛ́ kɔ sín toxo mɛ wá. Ée yě mɔ ɖɔ é ɖo xó ɖɔ xá nyɔ̌nu wɛ ɔ́, é kpácá yě tlala; lo ɔ́, yě ɖě ká kanbyɔ́ ɛ ɖɔ: “Étɛ́ kanbyɔ́ nyɔ̌nu ɔ́ wɛ a ɖe.” Abǐ “Étɛ́ sín xó ɖɔ xá ɛ wɛ a ɖe a jí ǎ.” Nyɔ̌nu ɔ́ jó tɔyizɛ́n tɔn dó, bo yi toxo ɔ́ mɛ, bó ɖɔ nú mɛ lɛ́ɛ ɖɔ: “Mi vɛ́ wá kpɔ́n! Nya ɖě ɖíe! É ɖɔ nǔ e un wa ɔ́ bǐ nú mì. Klísu ɔ́ ná ko wɛ ǎ cé?” Ée mɛ lɛ́ɛ se mɔ̌ ɔ́, yě tɔ́n sín toxo ɔ́ mɛ nǔgbó bó ɖidó Jezu gɔ́n. Hwenɛ́nu wɛ ahwanvú Jezu tɔn lɛ́ɛ jɛ vo sa n'i jí ɖɔ: “ Mɛ̌si, bo ka ɖu nǔ bó!” Jezu ka yí gbe nú yě ɖɔ: “Nǔɖuɖu e mi ma tunwun ǎ ɔ́ wɛ ɖo así ce.” Ée ahwanvú tɔn lɛ́ɛ se mɔ̌ ɔ́, yě jɛ ɖiɖɔ ɖo yěɖée tɛ́ntin jí ɖɔ: “Mɛ ɖé wɛ ka ko hɛn nǔɖuɖu wá n'i a?” Jezu ka ɖɔ nú yě ɖɔ: “Nǔɖuɖu ce wɛ nyí ɖɔ ma bló jlǒ mɛ e sɛ́ mì dó ɔ́ tɔn, bó ka wa azɔ̌ e é zɔ́n mì ɔ́ yi kpé. Mi nɔ ɖɔ: ‘káká nú sun ná yi ɛnɛ mɔ̌ din ɔ́, è nǎ ya jinukún.’ Nyɛ ka ɖo ɖiɖɔ nú mi wɛ ɖɔ mi ní kpɔ́n gle lɛ́ɛ ganjí; jinukún lɛ́ɛ ko myá go, bó kó su yiya. Nukún-yatɔ́ nɔ yí azɔ̌kwɛ́ tɔn, bó nɔ́ kplé nǔkún lɛ́ɛ nú gbɛ mavɔ mavɔ, bónú nǔdótɔ́ ɔ́ kpódó nukún-yatɔ́ ɔ́ kpó bǐ ná kplé, bó ná j'awǎ. Hǔn nǔgbó ɖɔ wɛ è ɖe, bo ɖɔ: ‘Mɛ ɖěvo nɔ dó nǔ, bɔ mɛ ɖěvo nɔ ya’. Un sɛ́ mi dó nukún ya gbé ɖo gle e mɛ mi ma wa azɔ̌ ɖe ǎ é. Mɛ ɖěvo lɛ́ɛ wɛ ko wa azɔ̌ ɖo gle ɔ́ mɛ, bɔ mi wá ɖo le tɔn ɖu wɛ.” Samalíinu e ɖo toxo énɛ́ mɛ lɛ́ɛ gěgé ɖi nǔ nú Jezu; ɖó kúnnu e nyɔ̌nu ɔ́ ɖe nú Jezu ɔ́ wútu. É wɛ nyí ɖɔ: “É ɖɔ nǔ e un wa lɛ́ɛ bǐ nú mì.” Énɛ́ ɔ́ wɛ zɔ́n, bɔ ée Samalíinu lɛ́ɛ wá yi mɔ Jezu ɔ́, yě sa vo n'i ɖɔ é ní nɔ émí gɔ́n kpɛɖé bɔ Jezu nɔ yě gɔ̌n xɔ azǎn we; mɛ gěgé lɛ́ ɖi nǔ nú Jezu ɖó xó e é ɖésúnɔ ɖɔ nú yě ɔ́ wútu. Yě ɖɔ nú nyɔ̌nu ɔ́ ɖɔ: “É sɔ́ nyí xó e a ɖɔ nú mǐ ɔ́ wú wɛ mǐ ɖi nǔ ǎ, lo ɔ́, é ɖɔ xó bɔ mǐ ɖésúnɔ se, bó tunwun ɖɔ é wɛ nyí Mɛhwlɛ́ngántɔ́ gbɛ ɔ́ tɔn nǔgbó.” Ée Jezu nɔ Samalíinu lɛ́ɛ gɔ́n xɔ azǎn we ɔ́, é gosín fínɛ́, bó ɖidó Galilée azǎn tɔn atɔngɔ́ ɔ́ gbe. É ɖésú ka ko ɖɔ ɖ'ayǐ ɖɔ mɛɖé kún nɔ sí gbeyíɖɔ Mawu tɔn ɖé ɖo to é ɖésúnɔ tɔn mɛ ó. Galiléenu lɛ́ɛ gěgé yi ɖu Dǐndínwáyixwe ɖo Jeluzalɛ́mu, bó mɔ nǔ e Jezu wa ɖo xwe ɔ́ hwenu lɛ́ɛ bǐ; énɛ́ ɔ́ wú wɛ ée é wá Galilée ɔ́, to ɔ́ mɛ nu lɛ́ɛ yí jǒnɔ tɔn ganjí. Jezu ka ɖɔ n'i ɖɔ: “Ényí mi ma ko mɔ nǔjíjlɛ́ lɛ́ɛ kpódó nǔdábaɖa lɛ́ɛ kpó ǎ ɔ́, mi ná ɖi nǔ ǎ.” Nya ɔ́ ká yí gbe n'i ɖɔ: “Mɛɖaxó, kɛnklɛ́n, yá wǔ bó wá kpɔ́n vǐ ce nú mì, bónú é ma kú ó.” Jezu ka yí gbe n'i ɖɔ: “Yi xwé, vǐ towe ɖo gbɛ.” Nya ɔ́ ka ɖi xó e Jezu ɖɔ n'i ɔ́, bó ɖidó xwé. Xwé li jí ɔ́ wɛ é ɖe, bɔ mɛsɛntɔ́ tɔn lɛ́ɛ wá kpé e, bó ɖɔ n'i ɖɔ: “Vǐ towe ɖo gbɛ!” Bɔ nya ɔ́ kanbyɔ́ yě ɖɔ: “Hwetɛ́nu mɔ̌ wɛ azɔn ɔ́ ka jɛ te kpɔ́n n'i jí?” Bɔ yě yí gbe n'i ɖɔ: “Sɔ hwemɛ, gan ɖokpó mɛ mɔ̌ wɛ avivɔ ɔ́ kɔ́n n'i.” Vǐtɔ́ ɔ́ mɔ ɖɔ hwenɛ́nu pɛ́pɛ́pɛ́ wɛ Jezu ɖɔ: “Vǐ towe ɖo gbɛ.” Bɔ é kpódó xwédo tɔn bǐ kpó ɖi nǔ nú Jezu. Nǔ wegɔ́ e Jezu jlɛ́ hwenu e é lɛ́ kɔ wá Judée, Galilée yíkúngban jí é nɛ́. Énɛ́ ɔ́ gúdo ɔ́, Jwifu lɛ́ɛ ja sinsɛn sín xwe yětɔn ɖokpó ɖu gbé, bɔ Jezu yi Jeluzalɛ́mu. Jeluzalɛ́mu fínɛ́, ɖo lɛ̌ngbɔ́ lɛ́ɛ sín hɔntogbó kpá ɔ́, è kun tɔ e mɛ è nɔ lɛ wǔ ɖe ɔ́ ɖokpó ɖó fínɛ́, bɔ è nɔ ylɔ́ dó Ebléegbe mɛ ɖɔ Bɛtizata; è mɛ xɔ gaga axixwɛ ɖɔhun atɔ́ɔ́n ɖé lɛ́ɛ gbɔn tɔ ɔ́ tó. Azinzɔnnɔ gěgé nɔ ɖo ayǐmlɔ́mlɔ́ ɖo xɔ énɛ́ lɛ́ɛ sá: Nukúntíntɔ́nnɔ lɛ́ɛ, sékúnɔ lɛ́ɛ, kpódó mɛ e xwe ayǐsó lɛ́ɛ kpó; [bɔ yě bǐ nɔ ɖo te kpɔ́n hwenu e sin ɔ́ ná xo dó ɔ́. Đó wɛnsagun Mawu tɔn ɖokpó nɔ jɛ te hwe ɖé lɛ́ɛ nu, bó nɔ wá xo tɔ ɔ́. Énɛ́ ɔ́, nú sin ɔ́ dán wǔ lě tlóló ɔ́, azinzɔnnɔ e jɛ nukɔn, bó jɛ tɔ ɔ́ mɛ ɔ́, é ná bó ɖo azɔn ɖěbǔ jɛ wɛ ɔ́, azɔn tɔn nɔ gbɔ.] Azinzɔnnɔ ɖé ka ɖo fínɛ́, bó ko ɖo azɔn jɛ wɛ sín xwe gbantɔ́n-nukún-atɔn (38) ɖíe. Ée Jezu mɔ azinzɔnnɔ énɛ́ ɔ́ ɖo ayǐmlɔ́mlɔ́ ɖo fínɛ́, bó ka tunwun ɖɔ é kó ɖo tɔ ɔ́ tó din ɔ́, é ko lín ɔ́, é kanbyɔ́ ɛ ɖɔ: “A jlǒ bónú azɔn towe ní gbɔ a?” Azinzɔnnɔ ɔ́ ka yí gbe n'i ɖɔ: “Aklúnɔ, un ɖó mɛɖé ɖo fí bɔ é ná sɔ́ mì dó sin ɔ́ mɛ hwenu e é nɔ xo dó ɔ́ ǎ; hwenu e un nɔ ɖo gǎn dó wɛ ɖɔ ma yi jɛ mɛ ɔ́, mɛ ɖěvo nɔ ko jɛ tɔ ɔ́ mɛ jɛ nukɔn nú mì.” Bɔ Jezu ɖɔ n'i ɖɔ: “Sí te, sɔ́ zan towe bo zun zɔnlin.” Azɔn ɖokpó ɔ́, azɔn tɔn gbɔ, bɔ é zé zan tɔn bó jɛ zɔnlin zun jí; gbe énɛ́ gbe ká nyí Jwifu lɛ́ɛ sín gbɔjɛzán gbe. Énɛ́ ɔ́ wútu ɔ́, Jwifugán lɛ́ɛ ɖɔ nú nya e azɔn gbɔ ná ɔ́ ɖɔ: “Égbé ɔ́, gbɔjɛzán gbe wɛ; a ɖǒ ná zé zan gbɔjɛzán gbe ǎ, sɛ́n mǐtɔn gbɛ́.” Nya ɔ́ ká yí gbe nú yě ɖɔ: “Mɛ e gbɔ azɔn nú mì ɔ́ wɛ ɖɔ nú mì ɖɔ: ‘Zě zan towe bo zun zɔnlin.’ ” Yě ká kanbyɔ́ ɛ ɖɔ: “Mɛ̌ ká nyí mɛ e ɖɔ nú we ɖɔ: ‘Zě zan towe bo ɖi zɔnlin’ ɔ́?” Lo ɔ́, nya ɔ́ mɔ nǔ jɛ mɛ e gbɔ azɔn n'i ɔ́ wú ǎ, ɖó Jezu gosín fínɛ́ ɖó agun e kplé ɖo fínɛ́ ɔ́ wútu. Énɛ́ ɔ́ gúdo ɔ́, Jezu wá mɔ mɛ e é gbɔ azɔn ná ɔ́ ɖo sinsɛnxɔ mɛ, bo ɖɔ n'i ɖɔ: “Đǒtó mì! Ée azɔn towe gbɔ din ɔ́, ma sɔ́ hu hwɛ ɖě ó, é ma nyí mɔ ǎ ɔ́, nǔ e nylá hú mɔ ɔ́ ná lɛ́ wá gbo we.” Bɔ nya ɔ́ gosín sinsɛnxɔ ɔ́ mɛ, bó ɖɔ nú Jwifugán lɛ́ɛ ɖɔ Jezu wɛ gbɔ azɔn nú émí. Nǔ e wú wɛ Jwifugán lɛ́ɛ jɛ Jezu gbé nya jí ɔ́ nɛ́, ɖó gbɔjɛzán gbe wɛ é wa nǔ énɛ́. Jezu ka ɖɔ nú yě ɖɔ: “Tɔ́ ce ɖo azɔ̌ wa wɛ tɛgbɛ, bɔ nyɛ lɔ ɖo azɔ̌ wa wɛ.” Xó énɛ́ wútu wɛ Jwifugán lɛ́ɛ ma sɔ́ jló ná mɔ Jezu gbɔ ǎ, bó ɖo biba ná hu i wɛ; é ka nyí gbɔjɛzán e é ɖu su na ɔ́ kɛ́ɖɛ́ wú wɛ ǎ; lo ɔ́, é nɔ́ ɖɔ Mawu nyí Tɔ́ émítɔn, bó nɔ́ sɔ́ éɖée ɖó Mawu há jí. Jezu yí xó, bó ɖɔ nú yě ɖɔ: “Ma ɖɔ nǔgbó nú mi; Vǐ ɔ́ nɔ wa nǔɖé é ɖésúnɔ ǎ; nǔ e é mɔ bɔ Tɔ́ ɔ́ ɖo wiwa wɛ ɔ́ jɛ́n é lɔmɔ̌ nɔ wa; bɔ nǔ e Tɔ́ ɔ́ bló ɔ́, Vǐ ɔ́ lɔmɔ̌ nɔ bló. Đó Tɔ́ ɔ́ yí wǎn nú Vǐ ɔ́, bo nɔ ɖe nǔwiwa tɔn lɛ́ɛ bǐ xlɛ́ ɛ; é ka na lɛ́ wá ɖe nǔwiwa e hú gǎn élɔ́ lɛ́ɛ é xlɛ́ ɛ, bɔ é ná kpácá mi. Đó lě e Tɔ́ ɔ́ nɔ fɔ́n mɛkúkú lɛ́ɛ, bó nɔ ná yě gbɛ gbɔn ɔ́, mɔ̌ ɖokpó ɔ́ wɛ Vǐ ɔ́ lɔmɔ̌ nɔ ná gbɛ mɛ e jló e lɛ́ɛ gbɔn. Tɔ́ ɔ́ nɔ ɖɔ hwɛ xá mɛɖé ǎ. É sɔ́ hwɛɖiɖɔ ɔ́ bǐ dó así nú Vǐ ɔ́; bónú gbɛtɔ́ lɛ́ɛ bǐ ná sɔ́ Vǐ ɔ́ su, lě e yě nɔ sɔ́ Tɔ́ ɔ́ su gbɔn é ɖɔhun. Mɛ e ma sɔ́ Vǐ ɔ́ su ǎ ɔ́, é sɔ́ Tɔ́ e sɛ́ ɛ dó ɔ́ lɔ su ǎ. “Má ɖɔ nǔgbó nú mi: mɛ e ɖótó xó ce, bó ɖi nǔ nú mɛ e sɛ́ mì dó ɔ́ kó mɔ gbɛ mavɔ mavɔ, bɔ è sɔ́ ná ɖó hwɛ n'i ǎ, ɖó é kó xo kú zlɛ́ wá gbɛ. Má ɖɔ nǔgbó nú mi: hwe ɔ́ nu ɖo na su wɛ; éɖíe ka ko su e, bɔ mɛkúkú lɛ́ɛ ná se Mawu ví ɔ́ sín gbe; énɛ́ ɔ́, mɛ e ná se gbe tɔn lɛ́ɛ ná mɔ gbɛ. Đó lě e Tɔ́ ɔ́ ɖó acɛ, bó nɔ ná gbɛ mɛ gbɔn ɔ́, mɔ̌ ɖokpó ɔ́ wɛ é ná ɛ acɛ, bɔ élɔ́ ná ná gbɛ mɛ. Mawu ná acɛ ɛ, bɔ é ná ɖɔ hwɛ xá gbɛtɔ́ lɛ́ɛ, ɖó Gbɛtɔ́ví wɛ é nyí. Hwenu e mɛkúkú lɛ́ɛ ná se gbe tɔn, bó ná fɔ́n ɔ́ ko sɛ yá; mi ma nú é kpácá mi ó. Yě ná tɔ́n sín yɔdo yětɔn lɛ́ɛ mɛ; mɛ e wa nǔ ɖagbe lɛ́ɛ ɔ́, Mawu ná fɔ́n yě sín kú, bó ná ná yě gbɛ mavɔ mavɔ. Lo ɔ́, mɛ e wa nǔ nyanya lɛ́ɛ ná fɔ́n sín kú, bónú Mawu ná ɖó hwɛ nú yě.” “Un sixú wa nǔɖé ɖo nyɛ ɖésúnɔ sín acɛ mɛ ǎ. Nǔ e Mawu ɖɔ nú mì ɔ́ wɛ un nɔ xwedó dó ɖɔ hwɛ xá mɛ, bɔ un nɔ dó hwɛjijɔ, ɖó jlǒ nyɛ ɖésúnɔ tɔn wɛ un nɔ wa ǎ; lo ɔ́, mɛ e sɛ́ mì dó ɔ́ sín jlǒ wɛ un nɔ wa. “Ényí nyɛ ɖésú wɛ na ɖe kúnnu nú nyɛɖée ɔ́, xó e ɖɔ wɛ un ɖe ɔ́ sixú ɖe xlɛ́ ɖɔ nǔgbó ɖɔ wɛ un ɖe ǎ. Mɛ ɖěvo wɛ ka ɖo kúnnu ɖe nú mì wɛ, bɔ un tunwun ɖɔ xó e é ɖɔ dó wútu ce lɛ́ɛ nyí nǔgbó. Mi sɛ́ mɛ dó Jǎan, bɔ é ɖe kúnnu nú nǔgbó ɔ́. É ka nyí kúnnuɖiɖe gbɛtɔ́ tɔn sín nǔ wɛ hu dó mì ǎ; lo ɔ́, un ɖɔ xó énɛ́ ɔ́, bónú Mawu ná hwlɛ́n mi gán. Jǎan cí zogbɛ́n e ɖo títá é ɖɔhun nú mi, bɔ mi yí gbe bó j'awǎ kpɛɖé ɖo wěziza tɔn nu. Nǔ ɖěvo ka ɖo kúnnu ɖe nú mì wɛ, bó hú gǎn kúnnu e Jǎan ɖe nú mì é. Azɔ̌ e Tɔ́ ce sɔ́ dó así nú mì, bɔ un ɖo wiwa wɛ lɛ́ɛ ɖe kúnnu nú mì bo ɖe xlɛ́ ɖɔ é wɛ sɛ́ mì dó nǔgbó. Tɔ́ e sɛ́ mì dó ɔ́ ɖésú ɖe kúnnu nú mì. Mi ka se gbe tɔn kpɔ́n ǎ; mi ka mɔ ɛ kpɔ́n ǎ; mi ka hɛn xó tɔn ayi mɛ ǎ; ɖó mi ɖi nǔ nú mɛ e é sɛ́ dó ɔ́ ǎ. Mi nɔ ɖo Mawuxówéma ɔ́ kplɔ́n wɛ, ɖó mi nɔ lin ɖɔ é mɛ wɛ émí ná mɔ gbɛ mavɔ mavɔ ɖe; lo ɔ́, Mawuxó e è wlán lɛ́ɛ ɔ́, nyɛ wɛ yě ɖe kúnnu ná. Có mi ka jló ná wá gɔ̌n ce, bó ná mɔ gbɛ jɔ gbɛ ɔ́ ǎ. “Gbɛtɔ́ lɛ́ɛ ní kpa susu nú mì ba wɛ un ɖe ǎ. Đó un tunwun mi, bó mɔ ɖɔ mi kún yí wǎn nú Mawu ó. Tɔ́ ce sín nyǐkɔ mɛ wɛ un wá dó, bɔ mi ka yí mì ǎ; é ka nyí mɛ ɖěvo wɛ ka wá ɖo nyǐkɔ é ɖésúnɔ tɔn mɛ ɔ́, mi ná yí i. Mi mɛ e nɔ ɖo susu kpa nú miɖée wɛ, bó ma nɔ ba nú Mawu ná sɔ́ mi su ǎ lɛ́ɛ ɔ́, nɛ̌ mi ka sixú ɖi nǔ gbɔn? Mi ma lin ɖɔ nyɛ wɛ ná dó hwɛ mi ɖo Tɔ́ ce nukɔn ó; Mɔyízi e wú wɛ mi ɖeji dó ɔ́ wɛ ná dó hwɛ mi ɖo Tɔ́ ce nukɔn. Ényí mi ko ɖi nǔ nú Mɔyízi wɛ ɔ́, mi ná ko ɖi nǔ nú nyɛ lɔmɔ̌; ɖó nǔ e Mɔyízi wlán ɔ́, nyɛ wú wɛ é ɖɔ xó dó. Ée mi ma ka ɖi nǔ e Mɔyízi wlán lɛ́ɛ ǎ ɔ́, nɛ̌ mi ka sixú ɖi xó ce lɛ́ɛ gbɔn?” Énɛ́ ɔ́ gúdo ɔ́, Jezu dó asá Galilée tɔ e è nɔ lɛ́ ylɔ́ ɖɔ Tibɛliadi ɔ́, bó jɛ agě ɖě ɔ́ jí dɔ̌n. Ahwan wɔ̌buwɔ́bú ɖé xwedó Jezu, ɖó mɛ lɛ́ɛ mɔ nǔ e jlɛ́ wɛ é ɖe, bó ɖo azɔn gbɔ nú mɛ lɛ́ɛ wɛ é. Jezu xá só ɖé jí, lobo jínjɔ́n ayǐ ɖo fínɛ́ é kpódó ahwanvú tɔn lɛ́ɛ kpó. Jwifu lɛ́ɛ sín xwe e è nɔ ylɔ́ ɖɔ Dǐndínwáyi ɔ́ ko sɛ yá. Jezu zé ta bó mɔ ahwan wɔ̌buwɔ́bú ɖé ja gɔ̌n tɔn, lobo ɖɔ nú Filípu ɖɔ: “Fítɛ́ mǐ ná mɔ nǔɖuɖu xɔ ɖe, bɔ é ná kpé mɛ énɛ́ lɛ́ɛ bǐ?” Jezu ɖɔ mɔ̌, bó ná dó kpɔ́n nǔ e Filípu ná ɖɔ ɔ́, ɖó é ɖésúnɔ kó tunwun nǔ e wa gbé é ja é. Filípu ka yí gbe n'i ɖɔ: “È na bo sɔ́ gankwɛ́ afɔɖé (200) ɖó te, bó dó xɔ nǔɖuɖu ná ɔ́, é ná kpé nú yě ɖokpó ɖokpó ná mɔ kpɛɖé kpɛɖé ǎ.” Ahwanvú Jezu tɔn ɖěvo e è nɔ ylɔ́ ɖɔ Andlé, bɔ é nyí Sinmɔ́ɔ Piyɛ́ɛ sín nɔví ɔ́ ɖɔ n'i ɖɔ: “Nyaví ɖé ɖo fí, bó hɛn wɔ̌xúxú atɔ́ɔ́n kpódó hweví we kpó; fítɛ́ nǔ énɛ́ ka sixú jɛ nú mɛ tobutóbú élɔ́ lɛ́ɛ?” Jezu ka ɖɔ nú ahwanvú tɔn lɛ́ɛ ɖɔ: “Mi ɖɔ nú mɛ lɛ́ɛ bǐ nú yě ní jínjɔ́n ayǐ.” Gběhan wɛ́lɛ́wɛ́lɛ́ ka sukpɔ́ ɖo tɛn énɛ́ ɔ́ mɛ, bɔ yě bǐ jínjɔ́n jí. Súnnu mɛxó e ɖo yě mɛ lɛ́ɛ ná yi děgba ɖě afatɔ́n (5.000) mɔ̌. Jezu ka fɔ wɔ̌xúxú lɛ́ɛ, bó dó kú nú Mawu, bó má nú mɛ e jínjɔ́n ayǐ ɖo fínɛ́ lɛ́ɛ; mɔ̌ ɖokpó ɔ́, é má hweví lɛ́ɛ nú yě, bɔ mɛ ɖokpó ɖokpó yí lě e é jló e gbɔn é. Đěe yě bǐ ɖu nǔ bó gɔ́ xo ɔ́, Jezu ɖɔ nú ahwanvú tɔn lɛ́ɛ ɖɔ: “Mi bɛ́ nǔ e yě ɖu kpo lɛ́ɛ bǐ, bónú ɖě ma yi gbě ó.” Ahwanvú tɔn lɛ́ɛ ka bɛ́ nǔ e yě ɖu kpo, ɖo wɔ̌xúxú atɔ́ɔ́n lɛ́ɛ mɛ é bǐ, bɔ é gɔ́ xasun wěwe. Ée mɛ lɛ́ɛ mɔ nǔ énɛ́ e Jezu jlɛ́ ɔ́, yě ɖɔ: “ Gbeyíɖɔ Mawu tɔn e ɖó ná wá gbɛ ɔ́ mɛ ɔ́ wɛ é nyí nǔgbó.” Ée Jezu mɔ ɖɔ yě ná wá sɔ́ émí kpó hlɔ̌nhlɔ́n kpó, bó ná sɔ́ émí axɔ́sú ɔ́, é gosín fínɛ́, bó tunta sókan ɔ́ mɛ é ɖokpónɔ. Ée gbadanu wá su ɔ́, ahwanvú Jezu tɔn lɛ́ɛ jɛ te wá Galilée tɔ ɔ́ tó, bó byɔ́ tɔjíhún mɛ, bó tunta Kafaanawúmu; zǎn ko kú, bɔ Jezu ka ko xwedó yě wú ǎ. Tɔ ɔ́ ɖo adǎn jí hwenɛ́nu, ɖó jɔhɔn ɖaxó ɖé ɖo nyinyi wɛ. Hwenu e ahwanvú Jezu tɔn lɛ́ɛ ɖo hǔn ɔ́ kun wɛ, bó ko bló kilomɛ́tlu atɔ́ɔ́n abǐ ayizɛ́n mɔ̌ ɔ́, yě mɔ Jezu, bɔ é ɖo zɔnlin ɖi wɛ gbɔn tɔ ɔ́ jí ja yě gɔ̌n, bɔ xɛsi jɛ yě jí. É ka ɖɔ nú yě ɖɔ: “Nyɛ wɛ, mi ma ɖi xɛsi ó.” Bɔ ée yě jló ná sɔ́ ɛ dó hǔn ɔ́ mɛ ɔ́, tlóló ɔ́, hǔn ɔ́ yi glín dó tɔ ɔ́ tó, fí e yě xwe é. Gbe e gbe Jezu na nǔɖuɖu mɛ ɔ́ sín ayǐhɔ́ngbe ɔ́, mɛ lɛ́ɛ flín ɖɔ tɔjíhún ɖokpó géé jɛ́n wɛ ɖo tɔ ɔ́ jí, bɔ ahwanvú Jezu tɔn lɛ́ɛ sɔ́ bó ɖidó; Jezu ka xwedó yě ǎ, yě ɖokpónɔ wɛ byɔ́ hǔn ɔ́ mɛ. Lo ɔ́, Tibɛliadi sín tɔjíhún ɖé lɛ́ɛ glín ɖo fí e Aklúnɔ zé wɔ̌xúxú bó dó kú nú Mawu bɔ yě ɖu ɖe é. Bɔ ée mɛ lɛ́ɛ ma sɔ́ mɔ Jezu ǎ, bó ma ka sɔ́ lɛ́ mɔ ahwanvú tɔn lɛ́ɛ lɔ ǎ ɔ́, yě byɔ́ tɔjíhún énɛ́ lɛ́ɛ mɛ, bó ɖidó Jezu ba gbé ɖo Kafaanawúmu. Ée yě wǎ yi mɔ Jezu ɖo tɔ ɔ́ gúdo dɔ̌n ɔ́, yě kanbyɔ́ ɛ ɖɔ: “ Mɛ̌si, hwetɛ́nu a ka wá yí dě dó?” Jezu ka yí gbe nú yě ɖɔ: “Má ɖɔ nǔgbó nú mi: nǔ e un jlɛ́ bɔ mi mɔ lɛ́ɛ wútu wɛ mi ɖo biba mì wɛ ǎ. Lo ɔ́, wɔ̌xúxú e mi ɖu gɔ́ xo ɔ́ wútu wɛ mi ɖo biba mì wɛ. Mi ma nɔ jɛ tagba dó nǔɖuɖu e nɔ gblé ɔ́ tamɛ ó; lo ɔ́, mi ní nɔ jɛ tagba dó nǔɖuɖu e nɔ́ nɔ ayǐ sɔ́yi gbɛ mavɔ mavɔ é tamɛ. Nǔɖuɖu énɛ́ ɔ́, Gbɛtɔ́ví ɔ́ wɛ ná ná mi, ɖó Mawu Tɔ́ ɔ́ ná acɛ tɔn ɛ.” Yě ká kanbyɔ́ ɛ ɖɔ: “Nɛ̌ mǐ ká ná bló gbɔn, bó wa mawuzɔ̌ lɛ́ɛ?” Jezu ka yí gbe nú yě ɖɔ: “Nǔ e Mawu jló ɖɔ mi ní wa ɔ́ wɛ nyí ɖɔ mi ní ɖi nǔ nú mɛ e é sɛ́ dó é.” Yě ká lɛ́ kanbyɔ́ ɛ ɖɔ jí: “Étɛ́ wɛ a nǎ sixú jlɛ́, bɔ mǐ ná mɔ, bó ná dó ɖi nǔ nú we? Azɔ̌ tɛ́ wɛ a nǎ wa? Tɔ́gbó mǐtɔn lɛ́ɛ kó ɖu nǔɖuɖu e è nɔ ylɔ́ ɖɔ mǎna ɔ́ ɖo gbětótló mɛ lě e è ko wlán gbɔn ɖo Mawuxówéma ɔ́ mɛ é. É wɛ nyí ɖɔ: ‘É ná nǔɖuɖu e gosín jǐxwé ɔ́ yě, bɔ yě ɖu.’ ” Jezu ka yí gbe nú yě ɖɔ: “Ma ɖɔ nǔgbó nú mi: Mɔyízi wɛ ná nǔɖuɖu e gosín jǐxwé ɔ́ mi ǎ; lo ɔ́, Tɔ́ ce wɛ ɖo nǔɖuɖu titewungbe e gosín jǐxwé ɔ́ ná mi wɛ. Đó nǔɖuɖu e Mawu ná ɔ́ wɛ nyí mɛ e jɛ te sín jǐxwé, bó ná gbɛ jɔ gbɛ ɔ́ é.” Yě ká ɖɔ n'i ɖɔ: “Aklúnɔ! Bo nɔ ná nǔɖuɖu énɛ́ mǐ tɛgbɛ.” Jezu ka lɛ́ yí gbe nú yě ɖɔ: “Nyɛ wɛ nyí nǔɖuɖu e nɔ ná gbɛ jɔ gbɛ mɛ é. Mɛ e wá gɔ̌n ce ɔ́, xovɛ́ sɔ́ ná sin i gbeɖé ǎ. Mɛ e ka ɖi nǔ nú mì ɔ́, kɔ sɔ́ ná xú i gbeɖé ǎ. Lo ɔ́, un ko ɖɔ nú mi; mi ko mɔ mì, cóbɔ mi ka ɖi nǔ nú mì ǎ. Mɛ e Tɔ́ ɔ́ ná mì lɛ́ɛ bǐ ná wá gɔ̌n ce; mɛ e ka wá gɔ̌n ce ɔ́, un ná ɖe e tɔ́n ǎ. Đó un jɛ te sín jǐxwé, bó ná bló jlǒ ce ǎ; lo ɔ́, nǔ e jló mɛ e sɛ́ mì dó ɔ́ bló gbé un ja bo wá. Mɛ e sɛ́ mì dó ɔ́ sín jlǒ wɛ ka nyí ɖɔ un ma hɛn mɛ ɖokpó bú ɖo mɛ e é sɔ́ dó así nú mì lɛ́ɛ mɛ ó; lo ɔ́, nú ma fɔ́n yě bǐ sín kú ɖo azǎn gǔdo gúdo tɔn ɔ́ gbe. Nǔ e Tɔ́ ce jló ɔ́ wɛ nyí ɖɔ mɛ e mɔ Vǐ ɔ́, bó ɖi nǔ n'i lɛ́ɛ ní mɔ gbɛ mavɔ mavɔ, bónú má fɔ́n yě sín kú azǎn gǔdo gúdo tɔn ɔ́ gbe.” Ée Jwifu e gbɛ́ wǎn nú Jezu lɛ́ɛ se xó énɛ́ ɔ́, yě jɛ nǔ hlún ɖɔ dó Jezu wú jí, ɖó é ɖɔ “Nyɛ wɛ nyí nǔɖuɖu e jɛ te sín jǐxwé é.” Énɛ́ ɔ́, yě nɔ́ ɖɔ: “Jezu, Jozɛ́fu ví ɔ́ jɛ́n ka nɛ́ hǔn, bɔ mǐ ka tunwun tɔ́ tɔn kpódó nɔ tɔn kpó nɛ́. Nɛ̌ é ka ná ɖɔ nú mǐ din ɖɔ émí jɛ te sín jǐxwé gbɔn?” Jezu yí xó, bó ɖɔ nú yě ɖɔ: “Mi gbɔ nǔ hlún ɖɔ ɖo miɖée tɛ́ntin. Ényí Tɔ́ e sɛ́ mì dó ɔ́ ma dɔn mɛɖé wá nú mì ǎ ɔ́, é sixú wá gɔ̌n ce ǎ; mɛ e ka ná wá gɔ̌n ce ɔ́, un ná fɔ́n ɛ sín kú azǎn gǔdo gúdo tɔn ɔ́ gbe. Gbeyíɖɔ Mawu tɔn lɛ́ɛ ko wlán ɖ'ayǐ ɖɔ: ‘Mawu ɖésú wɛ ná kplɔ́n nǔ yě bǐ.’ Mɛ e ɖótó Tɔ́ ɔ́, bó se nǔkplɔ́nmɛ tɔn ɔ́, mɛ énɛ́ ná wá gɔ̌n ce. É ka nyí ɖɔ mɛɖé mɔ Tɔ́ ɔ́ kpɔ́n ɖɔ wɛ un ɖe ǎ; mɛ e gosín Mawu gɔ́n ɔ́ kɛ́ɖɛ́ jɛ́n mɔ ɛ.” “Ma ɖɔ nǔgbó nú mi: mɛ e ɖi nǔ nú mì ɔ́ mɔ gbɛ mavɔ mavɔ. Nyɛ wɛ nyí nǔɖuɖu e nɔ́ ná gbɛ jɔ gbɛ mɛ é. Tɔ́gbó mǐtɔn lɛ́ɛ ɖu mǎna ɖo gbětótló mɛ, có yě ká kú. Amɔ̌, nǔɖuɖu élɔ́ e jɛ te sín jǐxwé ɔ́, nǔɖuɖu ɖé wɛ bɔ mɛɖé ɖu ɔ́, é ná kú ǎ. Nyɛ wɛ nyí nǔɖuɖu gbɛɖe e jɛ te sín jǐxwé é. Mɛ e ná ɖu ɖo nǔɖuɖu élɔ́ mɛ ɔ́ ná nɔ gbɛ káká sɔ́yi. Nǔɖuɖu e un ka ná ná mi ɔ́, agbaza ce e un ná sɔ́ jó dó gbɛtɔ́ lɛ́ɛ tamɛ ɔ́ wɛ.” Jwifu e gbɛ́ wǎn nú Jezu lɛ́ɛ ka jɛ nǔ dɔn jí syɛ́nsyɛ́n ɖo yěɖée tɛ́ntin bo nɔ ɖɔ: “Nɛ̌ nya élɔ́ ká sixú ná agbaza tɔn mǐ, bɔ mǐ na ɖu gbɔn?” Jezu yí gbe nú yě ɖɔ: “Má ɖɔ nǔgbó nú mi: ényí mi ma ɖu nyɛ Gbɛtɔ́ví ɔ́ sín agbaza, bó nu hun ce ǎ ɔ́, gbɛ jɔ gbɛ ɔ́ ná nɔ mi mɛ ǎ. Mɛ e ɖu agbaza ce, bó nu hun ce ɔ́, mɛ énɛ́ mɔ gbɛ mavɔ mavɔ, bɔ un ná fɔ́n ɛ sín kú azǎn gǔdo gúdo tɔn gbe. Đó agbaza ce ɔ́, nǔɖuɖu titewungbe ɔ́ wɛ é nyí, bɔ hun ce ka nyí nǔ nunu titewungbe ɔ́. Mɛ e ɖu agbaza ce, bo nu hun ce ɔ́ ɖo gbɛ ɖo nyɛ mɛ, bɔ nyɛ lɔ ɖo gbɛ ɖo éyɛ́ mɛ. Tɔ́ ɔ́ e sɛ́ mì dó ɔ́ ɖo gbɛ, bɔ nyɛ ka ɖo gbɛ ɖo acɛ tɔn mɛ. Mɔ̌ ɖokpó ɔ́, mɛɖé ɖu agbaza ce ɔ́, é ná nɔ gbɛ gbɔn acɛ ce mɛ. Nǔɖuɖu e jɛ te sín jǐxwé ɔ́ ɖíe; é cí ɖěe tɔ́gbó mitɔn lɛ́ɛ ɖu cóbó ka kú ɔ́ ɖɔhun ǎ; mɛ e ɖu nǔɖuɖu élɔ́ ɔ́, é ná nɔ gbɛ tɛgbɛ sɔ́yi.” Nǔ e Jezu ɖɔ hwenu e é ɖo nǔ kplɔ́n mɛ lɛ́ɛ wɛ ɖo Kafaanawúmu ɖo kplɔ́ngbasá Jwifu lɛ́ɛ tɔn ɔ́ nɛ́. Ée Jezu sín ahwanvú wɔ̌buwɔ́bú e xwedó e lɛ́ɛ se xó énɛ́ lɛ́ɛ ɔ́, yě mɛ gěgé jɛ ɖiɖɔ jí ɖɔ: “Xó élɔ́ syɛ́n dódó; mɛ ka sixú yí gbe nú xó énɛ́ ɔ́?” Jezu mɔ ɖɔ ahwanvú émítɔn lɛ́ɛ ɖo nǔ hlún ɖɔ dó xó énɛ́ ɔ́ wú wɛ, bó kanbyɔ́ yě ɖɔ: “Xó énɛ́ e un ɖɔ ɔ́ ná nyí afɔklɛ́nnú nú mi wɛ a? Ényí mi ka wá mɔ Gbɛtɔ́ví ɔ́ xwe jǐxwé fí e é ko ɖe ɖ'ayǐ ɔ́, nɛ̌ ka ná cí gbɔn nú mi lo? Yɛsinsɛn wɛ nɔ ná gbɛ mɛ; hlɔ̌nhlɔ́n gbɛtɔ́ tɔn kpé nǔɖé wú ǎ. Xó e un ɖɔ nú mi lɛ́ɛ wɛ nɔ ná Yɛ Mawu tɔn e nɔ ná gbɛ mɛ é. Lo ɔ́, mɛɖé lɛ́ɛ ɖo mi mɛ bó ɖi nǔ ǎ.” Đó sín do wɛ Jezu ko tunwun mɛ e ma ɖi nǔ ǎ lɛ́ɛ, kpódó mɛ e ɖo ná sa ɛ ɖu wɛ ɔ́ kpó. Jezu lɛ́ ɖɔ nú yě ɖɔ jí: “Nǔ e wú un ɖɔ ényí Mawu ma ná gbe tɔn mɛɖé ǎ ɔ́, mɛ ɔ́ kún sixú wá gɔ̌n ce ó é nɛ́.” Sín hwenɛ́nu ɔ́, ahwanvú Jezu tɔn gěgé lɛ́ kɔ, bó sɔ́ nɔ xwedó e ǎ. Jezu ka kanbyɔ́ mɛ wěwe lɛ́ɛ ɖɔ: “Mi lɔmɔ̌ mi jló ná yi a?” Sinmɔ́ɔ Piyɛ́ɛ ka yí gbe n'i ɖɔ: “Aklúnɔ! Mɛ̌ gɔ́n mǐ ka ná lɛ́ yi? É má nyí nu towe wɛ è nɔ se xó e nɔ ná gbɛ mavɔ mavɔ mɛ ɔ́ ɖe ǎ cé? Mǐdɛɛ lɛ́ɛ ɔ́, mǐ ɖi nǔ, bó tunwun ɖɔ hwi wɛ nyí Klísu, mɛ mímɛ́ Mawu tɔn.” Jezu ka lɛ́ ɖɔ nú yě ɖɔ jí: “Nyɛ ɖésú wɛ cyán mi mɛ wěwe lɛ́ɛ, cóbɔ mɛ ɖokpó ka ɖo mi mɛ bó nyí awǒvigbɛtɔ́.” Judási Sinmɔ́ɔ Isikaliɔ́ti ví ɔ́ xó ɖɔ wɛ Jezu ɖe; ɖó é lɔmɔ̌ ɖo ahwanvú wěwe lɛ́ɛ mɛ, cóbó ka ɖo Jezu ná sa wɛ. Énɛ́ ɔ́ gúdo ɔ́, Jezu ɖo to e ɖo Galilée gbé jí lɛ́ɛ mɛ gbɔn wɛ; é ka jló ná yi gbɔn Judée ǎ, ɖó Jwifugán lɛ́ɛ ɖo biba ná hu i wɛ. Xwe e Jwifu lɛ́ɛ ja ɖuɖu gbé ɔ́, yě nɔ dó azava bó nɔ́ nɔ sá ɔ́ ko sɛ yá. Bɔ Jezu sín nɔví lɛ́ɛ ɖɔ n'i ɖɔ: “Yi Judée, bónú ahwanvú towe lɛ́ɛ lɔ ná mɔ azɔ̌ e a nɔ wa lɛ́ɛ. Đó mɛ ɖěbǔ jló ɖɔ è nǐ tunwun émí ɔ́, mɛ ɔ́ nɔ́ wa nǔ dó nǔglɔ́ ǎ; ée a ko nɔ jlɛ́ nǔ ɔ́, blǒ bónú mɛ bǐ ní tunwun we.” Đó nɔví tɔn lɛ́ɛ ɖésú ɖi nǔ n'i ǎ. Jezu ka ɖɔ nú yě ɖɔ: “Gan ce ko xo ǎ; lo ɔ́, midɛɛ lɛ́ɛ ɔ́, hwe lɛ́ɛ bǐ nu wɛ nyɔ́ nú mi. Gbɛtɔ́ lɛ́ɛ sixú gbɛ́ wǎn nú midɛɛ lɛ́ɛ ǎ; lo ɔ́, yě gbɛ́ wǎn nú nyɛ, ɖó un nɔ ɖe kúnnu ɖɔ nǔwiwa yětɔn lɛ́ɛ kún nyɔ́ ó. Midɛɛ lɛ́ɛ mi yi ɖu xwe ɔ́; nyɛ xwe xwe ɔ́ ɖu gbé ǎ; ɖó gan e mɛ un ɖó ná yi dó ɔ́ ko xo ǎ.” Ée Jezu ɖɔ mɔ̌ nú yě ɔ́, é cí Galilée. Ée Jezu sín nɔví lɛ́ɛ yi xwe ɔ́ ɖu gbé gúdo ɔ́, é lɔmɔ̌ wá bɛ yɛ, bó yi xwe ɔ́ tɛn mɛ. Jwifugán lɛ́ɛ ba ɛ xwe ɔ́ hwenu káká, yě ká mɔ ɛ ǎ, bó nɔ́ ɖɔ: “Fítɛ́ é ka ɖe ɖo mɛ lɛ́ɛ mɛ tawun?” Mɛ gěgé ɖo mɛ lɛ́ɛ mɛ, bo zé gbe dó do, bo nɔ ɖo xó ɖɔ dó wútu tɔn wɛ, bó nɔ́ ɖɔ: “Gbɛtɔ́ ɖagbe wɛ nyí nya ɔ́ mɛ!” Mɛɖě ká nɔ ɖɔ: “Éeǒ; mɛblɛ́ɖutɔ́ ɖé kpowun wɛ.” Lo ɔ́, mɛ e ɖo xó tɔn ɖɔ wɛ lɛ́ɛ ɖě nɔ glá zé gbe dó jǐ ǎ, ɖó yě ɖo xɛsi ɖi nú Jwifugán lɛ́ɛ wɛ. Yě ɖo xwe ɔ́ ɖu wɛ, bó ko vlɔ́ azǎn nabí e yě ná dó ɖu ná ɔ́ ɖó we, bɔ Jezu yi sinsɛnxɔ mɛ, bó jɛ nǔ kplɔ́n mɛ jí. Lě e kplɔ́n nǔ mɛ gbɔn wɛ é ɖe ɔ́ kpácá Jwifugán lɛ́ɛ káká bɔ yě nɔ ɖɔ: “Nya élɔ́ má ka yi wěmaxɔmɛ kpɔ́n nɛ́! Nɛ̌ é ká wa gbɔn bó tunwun Mawuxówéma ɔ́ sɔ mɔ̌?” Jezu ka yí gbe nú yě ɖɔ: “Nyɛ wɛ ɖó nǔ e kplɔ́n mi wɛ un ɖe ɔ́ ǎ; Mawu e sɛ́ mì dó ɔ́ gɔ́n wɛ é gosín. Mɛ e ɖó jlǒ, bó ná wa jlǒ Mawu tɔn ɔ́, ényí nǔkplɔ́nmɛ ce ɔ́, Mawu gɔ́n wɛ é gosín abǐ acɛ nyɛ ɖésúnɔ tɔn wɛ ɔ́, é ná mɔ do ná. Mɛ e ka ɖo é ɖésúnɔ sín susu ba wɛ ɔ́, acɛ é ɖésúnɔ tɔn mɛ wɛ é nɔ ɖɔ xó dó. Lo ɔ́, mɛ e ɖo mɛ e sɛ́ ɛ dó ɔ́ sín susu ba wɛ ɔ́, nǔgbó wɛ é nɔ ɖɔ, bɔ xó tɔn ɖě nɔ́ nyí nǔvú ǎ. Mɔyízi ko ná sɛ́n lɛ́ɛ mi; lo ɔ́, mi mɛ ɖokpó nɔ́ nyi sɛ́n lɛ́ɛ ǎ; bɔ étɛ́ wú mi ka ɖo nǎ hu mì wɛ?” Ahwan ɔ́ yí gbe n'i ɖɔ: “Yɛ nyanya wɛ ɖo jǐ towe; mɛ̌ ká ɖo nǎ hu we wɛ?” Jezu yí gbe nú yě ɖɔ: “Nǔ ɖokpó wɛ un wa, bɔ é kpácá mi sɔ mɔ̌. Mɔyízi hɛn adagbigbo sɛ́n ɔ́ wá nú mi; (é wɛ ka jɛ sɛ́n énɛ́ nyi jí jɛ nukɔn ǎ, tɔ́gbó mǐtɔn lɛ́ɛ wɛ jɛ jí dó nukɔn), có gbɔjɛzán gbe lɛ́ɛ lɔmɔ̌ ɔ́, mi nɔ gbo ada nú mɛ. É ma nyí Mɔyízisɛ́n ɔ́ nyi wɛ mi ɖe bó nɔ́ gbo ada nú mɛ gbɔjɛzán gbe a? Étɛ́wú mi ka ɖo xomɛ sin dó nyɛ mɛ e gbɔ azɔn nú gbɛtɔ́ blěbǔ ɖokpó gbɔjɛzán gbe ɔ́ wɛ. Mi ma nɔ nɔ gbɛtɔ́ jí ó, mi nɔ nɔ xó jí.” Jeluzalɛ́munu ɖé lɛ́ɛ nɔ ɖɔ: “É ma nyí nya e wú lɛ́ lɛ̌ dó wɛ yě ɖe bo na hu ɔ́ nɛ́ a? É nɛ́ ka ɖo xó ɖɔ wɛ ɖo agbawungba nɛ́; bɔ yě ká sɔ́ ɖo nǔɖé ɖɔ n'i wɛ ǎ; abǐ gǎn mǐtɔn lɛ́ɛ ka wá mɔ do na ɖɔ é wɛ nyí Klísu ɔ́ wútu wɛ è jó e dó a? É ka nyí Klísu ɔ́ wɛ ɔ́, mɛɖé ma ka na tunwun fí e é gosín ɔ́ nɛ́? Mǐ ká tunwun fí e nya élɔ́ gosín ɔ́ nɛ́!” Hwenu e Jezu ɖo nǔ kplɔ́n mɛ wɛ ɖo sinsɛnxɔ mɛ ɔ́, é sú xó, bó ɖɔ: “Mi tunwun mì, bó tunwun fí e un gosín é. Nyɛ ɖésúnɔ sín acɛ mɛ wɛ un wá dó ǎ, lo ɔ́, mɛ e sɛ́ mì dó ɔ́, nǔgbóɖɔtɔ́ wɛ, bɔ mi ka tunwun i ǎ. Nyɛ tunwun i, ɖó gɔ̌n tɔn wɛ un gosín; é wɛ sɛ́ mì dó.” Hwenɛ́nu ɔ́, yě jló ná wlí i, mɛ ɖěbǔ sín alɔ ka jɛ wú tɔn ǎ, ɖó gan tɔn ko xo ǎ. Mɛ gěgé ɖo agun ɔ́ mɛ bó ɖi nǔ n'i, bó nɔ́ ɖɔ: “Nú Klísu ɔ́ na bo wá ɔ́, é sɔ́ ná lɛ́ jlɛ́ nǔ hú nya élɔ́ wɛ a?” Falizyɛn lɛ́ɛ se nǔ e mɛ lɛ́ɛ zé gbe dó do, bó ɖo ɖiɖɔ dó Jezu wú wɛ ɖo agun ɔ́ mɛ é, bɔ yě ɖó gbe kpɔ́ xá vɔ̌sánú-xwlémawutɔ́gán lɛ́ɛ, bó sɛ́ sɔ́ja dó, bó ná wlí Jezu. Jezu ɖɔ nú yě ɖɔ: “Hwenu kpɛɖé jɛ́n kpo, bɔ un ná dó nɔ mi mɛ; énɛ́ ɔ́ gúdo ɔ́, un na lɛ́ kɔ yi mɛ e sɛ́ mì dó ɔ́ gɔ́n. Mi ná ba mì, mi ka ná mɔ mì ǎ; ɖó mi ná sixú wá fí e un ɖe ɔ́ ǎ.” Bɔ vɔ̌sánú-xwlémawutɔ́gán lɛ́ɛ jɛ ɖiɖɔ jí ɖo yěɖée tɛ́ntin ɖɔ: “Fítɛ́ nya élɔ́ ka jló ná yi, bɔ mǐ ma sɔ́ ná mɔ ɛ ǎ? É jló ná yi gɔ́ nú Jwifu e gba kpé Glɛ̌sinu lɛ́ɛ mɛ lɛ́ɛ, bó ná kplɔ́n nǔ Glɛ̌sinu lɛ́ɛ wɛ a? Bɔ étɛ́ ná ɖɔ wɛ é ka ɖe bó ɖɔ: ‘Mi ná ba mì, mi ka ná mɔ mì ǎ, ɖó mi ná sixú wá fí e un ɖe ɔ́ ǎ.’ ” Gbe e gbe yě ná ɖu xwe ɔ́ fó ɔ́ wɛ nyí azǎn tají. Gbe énɛ́ gbe ɔ́, Jezu nɔ te ahwan ɔ́ nukɔn, bó zé gbe yi jǐ bó ɖɔ: “Sinnugblá sin mɛɖé hǔn, ní wá gɔ̌n ce bó wá nu sin. Lě e Mawuxówéma ɔ́ ko ɖɔ gbɔn ɔ́, mɛ e ɖi nǔ nú mì ɔ́, ná húzú tɔjɔtɛn e mɛ sin e nɔ ná gbɛ mɛ ɔ́ nɔ sa sín é.” Yɛsinsɛn e mɛ e ɖi nǔ n'i lɛ́ɛ ná mɔ yí ɔ́ xó ɖɔ wɛ Jezu ɖe. Hwenɛ́nu ɔ́, Mawu ko na Yɛsinsɛn mɛɖé ǎ; ɖó Jezu ko byɔ́ susu tɔn mɛ ǎ. Mɛ gěgé ɖo agun ɔ́ mɛ, bɔ ée yě se xó énɛ́ ɔ́, yě ɖɔ: “Dandan mɛ ɔ́, nya élɔ́ wɛ nyí gbeyíɖɔ Mawu tɔn.” Mɛ ɖé lɛ́ɛ ɖɔ: “ Klísu wɛ;” lo ɔ́, mɛ ɖěvo lɛ́ɛ nɔ ɖɔ: “Klísu ɔ́ sixú gosín Galilée ǎ. Mawuxówéma ɔ́ ko ɖɔ Davídi ví lɛ́ɛ mɛ wɛ Klísu ɔ́ ɖó ná tɔ́n sín, ɖo Bɛteleyɛ́mu, Davídi tomɛ.” Énɛ́ ɔ́, agun ɔ́ klán gbe ɖó Jezu wútu. Mɛ ɖé lɛ́ɛ ɖo yě mɛ, bo jló ná wlí i; yě mɛ ɖěbǔ sín alɔ ka jɛ wǔ tɔn ǎ. Hwenu sɔ́ja e è sɛ́ dó Jezu wlí gbé lɛ́ɛ lɛ́ kɔ wá ɔ́, vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó kanbyɔ́ yě ɖɔ: “Étɛ́wú mi ma ka kplá ɛ wá ǎ?” Bɔ sɔ́ja e è sɛ́ dó lɛ́ɛ yí gbe nú yě ɖɔ: “È se bɔ mɛɖé ɖɔ xó nya énɛ́ ɖɔhun gbeɖé kpɔ́n ǎ.” Falizyɛn lɛ́ɛ ka kanbyɔ́ yě ɖɔ: “Mi lɔmɔ̌ mi jó miɖée dó n'i bɔ é flú mi wɛ a? Mi mɔ gǎn mǐtɔn lɛ́ɛ ɖě abǐ Falizyɛn lɛ́ɛ ɖě ɖi nǔ n'i a? Mɛ tobutóbú élɔ́ lɛ́ɛ e ma ka tunwun Mɔyízi sɛ́n ɔ́ ǎ, bo ɖo xwixwedó e wɛ lɛ́ɛ ɔ́, nu wɛ è ko dó yě.” Falizyɛn e ɖo fínɛ́ lɛ́ɛ ɖokpó nɔ nyí Nikodɛ́mu; é wɛ wá mɔ Jezu ɖ'ayǐ; é kanbyɔ́ yě ɖɔ: “Đo sɛ́n mǐtɔn mɛ ɔ́, e nɔ ɖó hwɛ nú mɛɖé má se xó ɖé ɖo nu tɔn, ma ka tunwun nǔ e é wa nyi do ɔ́ a?” Bɔ yě yí gbe n'i ɖɔ: “Galiléenu wɛ hwi lɔmɔ̌ nyí a? Kpɔ́n Mawuxówéma ɔ́ mɛ ganjí bo! A ná mɔ ɖɔ gbeyíɖɔ Mawu tɔn ɖě kún gosín Galilée ó.” [ Énɛ́ ɔ́ gúdo ɔ́, mɛ ɖokpó ɖokpó lɛ́ kɔ yi xwé tɔn gbe. Lo ɔ́, Jezu yi só e è nɔ ylɔ́ ɖɔ olívutín só ɔ́ jí. Ayǐhɔ́ngbe zǎnzǎn tɛɛn ɔ́, é lɛ́ kɔ yi sinsɛnxɔ mɛ, bɔ mɛ lɛ́ɛ bǐ nyi ahwan wá gɔ̌n tɔn, bɔ é jínjɔ́n ayǐ, bó jɛ nǔ kplɔ́n yě jí. Hwenɛ́nu wɛ sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó kplá nyɔ̌nu ɖé wá, bó sɔ́ ɛ ɖó agun ɔ́ nukɔn; nyɔ̌nu énɛ́ ɔ́, afɔ dó gbě wɛ é ɖe bɔ yě gbo e dó. Yě ɖɔ nú Jezu ɖɔ: “ Mɛ̌si, nyɔ̌nu élɔ́ ɔ́, afɔ dó gbě wɛ é ɖe bɔ mǐ yi gbo e dó. Mɔyízi sɛ́n ɔ́ ka ɖɔ jí mɛ mɔ̌hunkɔtɔn ɔ́, awǐnnyaglo wɛ è nǎ nyi dó hu i ná. Ani hwɛ ka lin d'é wú?” Xó énɛ́ e yě kanbyɔ́ Jezu ɔ́, mɔ wɛ nyí bɔ yě ɖó n'i, bo na dó ɖó hwɛ n'i. Jezu ka fɛ, bo jɛ nǔ wlán dó kɔ́ mɛ jí kpódó alɔví kpó. Ée yě ɖo nǔ kanbyɔ́ ɛ wɛ magbokɔ ɔ́, é jlɔ́ kɔ bó ɖɔ nú yě ɖɔ: “Mɛ e ɖo mi mɛ bó ma hu hwɛ kpɔ́n gbeɖé ǎ ɔ́ ní nyi awǐnnyaglo dó e jɛ nukɔn.” Ée é ɖɔ mɔ̌ ɔ́, é lɛ́ vɔ́ fɛ, bó jɛ nǔ wlán dó kɔ́ mɛ jí. Ée yě mɛ e kplá nyɔ̌nu ɔ́ wá nú Jezu lɛ́ɛ se mɔ̌ ɔ́, yě jɛ yiyi jí ɖokpó ɖokpó, bɛ́ sín mɛxó lɛ́ɛ jí, bɔ é wá kpo Jezu ɖokpónɔ géé kpódó nyɔ̌nu ɔ́ kpó. Jezu lɛ́ jlɔ́, bó kanbyɔ́ nyɔ̌nu ɔ́ ɖɔ: “Nyɔ̌nu! Fítɛ́ mɛ lɛ́ɛ ɖe? Mɛ ɖěbǔ sɔ́ ɖó hwɛ nú we ǎ cé?” Nyɔ̌nu ɔ́ yí gbe n'i ɖɔ: “Yě ɖěbǔ ɖó hwɛ nú mì ǎ, Aklúnɔ.” Jezu ka ɖɔ n'i ɖɔ: “Nyɛ lɔmɔ̌ un ɖó hwɛ nú we ǎ; bo yi; bɛ́ sín din ɔ́, ma ka sɔ́ hu hwɛ ɖě ó.”] Jezu lɛ́ jɛ nǔ kplɔ́n mɛ lɛ́ɛ jí ɖo sinsɛnxɔ mɛ, bo ɖɔ nú yě ɖɔ: “Nyɛ wɛ nyí wěziza gbɛ ɔ́ tɔn; mɛ e xwedó mì ɔ́ na gbɔn zǐnflú mɛ gbeɖé ǎ, lo ɔ́ é ná mɔ wěziza e nɔ ná gbɛ jɔ gbɛ mɛ é.” Falizyɛn lɛ́ɛ ka ɖɔ n'i ɖɔ: “A ɖo kúnnu ɖe nú hwiɖée wɛ; énɛ́ ɔ́ wú ɔ́, xó towe nyí nǔgbó ǎ.” Jezu ka yí gbe nú yě ɖɔ: “É ná bó nyí kúnnu ɖe nú nyɛɖée wɛ un ɖe ɔ́, xó e ɖɔ wɛ un ɖe ɔ́, nǔgbó wɛ é nyí; ɖó un tunwun fí e un gosín ɔ́, bo ka lɛ́ tunwun fí e un xwe ɔ́. Midɛɛ lɛ́ɛ ka tunwun fí e un gosín ɔ́ ǎ; mi ka lɛ́ tunwun fí e un xwe ɔ́ ǎ. Lě e gbɛtɔ́ lɛ́ɛ nɔ ɖɔ hwɛ gbɔn ɔ́ wɛ mi nɔ ɖɔ hwɛ gbɔn; nyɛ ɔ́, un nɔ ɖɔ hwɛ xá mɛɖé ǎ. Ényí un ka ɖɔ hwɛ ɔ́, hwɛjijɔ wɛ un nɔ ɖɔ; ɖó un ɖo nyɛ ɖóɖó ǎ; Tɔ́ e sɛ́ mì dó ɔ́ kpódó nyɛ kpó wɛ ɖo kpɔ́. È ka ko wlán dó Mawuxówéma mitɔn mɛ ɖɔ: ‘Nǔ e mɛ we ɖe kúnnu ɖokpó ɔ́ ná ɔ́, nǔgbó wɛ é nyí.’ Un ɖo kúnnu ɖe nú nyɛɖée wɛ, bɔ Tɔ́ e sɛ́ mì dó ɔ́ lɔ ka ɖo kúnnu ɖe nú mì wɛ.” Yě kanbyɔ́ ɛ ɖɔ: “Fítɛ́ Tɔ́ towe ɔ́ ká ɖe?” Jezu yí gbe nú yě ɖɔ: “Mi tunwun mì ǎ; mi ka lɛ́ tunwun Tɔ́ ce ǎ. Ényí mi ko tunwun mì wɛ ɔ́, mi ná ko tunwun Tɔ́ ce lɔmɔ̌.” Hwenu e Jezu ɖo xó énɛ́ lɛ́ɛ ɖɔ wɛ ɔ́, nǔ kplɔ́n mɛ wɛ é ɖe ɖo sinsɛnxɔ ɔ́ mɛ, ɖo gbǎ e mɛ è nɔ sɔ́ akwɛ́ dó ɔ́ kpá; mɛ ɖěbǔ ka wlí i ǎ, ɖó gan tɔn ko xo ǎ. Jezu ka lɛ́ ɖɔ nú yě ɖɔ: “Un xweyǐgbe; mi na ba mì, lo ɔ́, mi ná kú dó hwɛ mitɔn lɛ́ɛ mɛ, ɖó mi sixú yi fí e un xwe ɔ́ ǎ.” Jwifugán lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Éɖée hu gbé wɛ é ka ja a? Đó é ɖɔ: ‘Mi sixú yi fí e un xwe ɔ́ ǎ.’ ” Jezu yí gbe nú yě ɖɔ: “Midɛɛ lɛ́ɛ ɔ́, ayǐkúngban jí fí tɔn wɛ mi nyí, amɔ̌, nyɛ ɔ́, jǐxwé tɔn wɛ un nyí: gbɛ élɔ́ tɔn wɛ mi nyí, amɔ̌, nyɛ ɔ́, un nyí gbɛ élɔ́ tɔn ǎ. Énɛ́ wútu wɛ un ko ɖɔ nú mi ɖɔ hwɛ mitɔn mɛ wɛ mi ná kú dó. Ényí mi ma ɖi nǔ ɖɔ un nyí mɛ e un nyí é ǎ ɔ́, mi ná kú dó hwɛ mitɔn lɛ́ɛ mɛ.” Yě ká lɛ́ kanbyɔ́ ɛ ɖɔ: “Mɛ̌ a ka nyí?” Jezu yí gbe nú yě ɖɔ: “Mɛ e un ko ɖɔ nú mi sín do ɖɔ un nyí ɔ́ wɛ un nyí. Un ɖó nǔ gěgé bó ná ɖɔ dó mi wú, bó ná ɖɔ hwɛ dó nǔ gěgé wú nú mi; lo ɔ́, mɛ e sɛ́ mì dó ɔ́, nǔgbóɖɔtɔ́ wɛ, bɔ nǔ e un se ɖo nu tɔn ɔ́ kɛ́ɖɛ́ ɖɔ nú gbɛ ɔ́ wɛ un ɖe.” Yě ká mɔ nǔ jɛ wú ɖɔ Tɔ́ ɔ́ sín xó ɖɔ nú émí wɛ é ɖe ǎ. Bɔ Jezu ɖɔ nú yě ɖɔ: “Hwenu e mi ná wá sɔ́ Gbɛtɔ́ví ɔ́ dó jǐ ɔ́, mi ná tunwun ɖɔ un nyí mɛ e un nyí ɔ́, bó kún nɔ́ ɖɔ nǔ ɖěbǔ ɖo nyɛ ɖésúnɔ sín acɛ mɛ ó; nǔ e Tɔ́ ɔ́ kplɔ́n mì ɔ́ kɛ́ɖɛ́ wɛ un nɔ ɖɔ. Mɛ e sɛ́ mì dó ɔ́ ka ɖo kpɔ́ xá mì; é jó mì dó ǎ, ɖó nǔ e nyɔ́ nukún tɔn mɛ ɔ́ wɛ un nɔ bló tɛgbɛ.” Ée Jezu ɖo xó ɖɔ wɛ gbɔn mɔ̌ ɔ́, mɛ gěgé ɖi nǔ n'i. Jezu ɖɔ nú Jwifu e ɖi nǔ n'i lɛ́ɛ ɖɔ: “Ényí mi se gbe nú mì ɔ́, mi nyí ahwanvú ce lɛ́ɛ nǔgbó. Mi ná tunwun nǔgbó ɔ́, bɔ nǔgbó ɔ́ ná ɖe mi sín kannumɔgbénu.” Yě ká yí gbe n'i ɖɔ: “Ablaxámu ví wɛ mǐ nyí, mǐ nɔ mɛɖé kannu kpɔ́n gbeɖé ǎ; étɛ́wútu a ka ɖɔ è nǎ ɖe mǐ sín kannumɔgbénu?” Jezu ka ɖɔ nú yě ɖɔ: “Má ɖɔ nǔgbó nú mi: mɛ e nɔ hu hwɛ é ɖěbǔ ɔ́, hwɛ sín kannumɔ wɛ é nyí; lo ɔ́, mɛ e nyí kannumɔ ɔ́ nɔ́ nɔ xwé gbe sɔ́yi ǎ; xwéví wɛ nɔ́ nɔ xwé gbe sɔ́yi. Ényí Vǐ ɔ́ ɖe mi sín kannumɔgbénu ɔ́, mi ná gosín kannumɔgbénu nǔgbó. Un tunwun ɖɔ Ablaxámu ví wɛ mi nyí nǔgbó; lo ɔ́, mi ɖo biba ná hu mì wɛ, ɖó mi ɖi nǔ nú xó ce lɛ́ɛ ǎ wútu. Nǔ e un mɔ ɖo Tɔ́ ce gɔ́n ɔ́ ɖɔ wɛ un ɖe; mi lɔmɔ̌ ka ɖo nǔ e mi se ɖo tɔ́ mitɔn nu ɔ́ bló wɛ.” Yě yǐ gbe n'i ɖɔ: “Ablaxámu wɛ nyí tɔ́ mǐtɔn.” Jezu ka ɖɔ nú yě ɖɔ: “Ényí Ablaxámu ví wɛ mi ko nyí nǔgbó ɔ́, mi ná ko nɔ wa nǔ Ablaxámu ɖɔhun. Amɔ̌, din ɔ́, nyɛ ka ɖɔ nǔgbó e un se ɖo Mawu nu ɔ́ nú mi; có mi ka lɛ́ ɖo biba na hu mì wɛ; Ablaxámu ka wa nǔ mɔ̌hunkɔtɔn ɖě ǎ. Nǔ e tɔ́ mitɔn wa ɔ́ wa wɛ jɛ́n mi ɖe.” Ée é ɖɔ mɔ̌ ɔ́, yě yǐ gbe n'i ɖɔ: “Mǐ nyí agaví ǎ; Mawu wɛ nyí Tɔ́ ɖokpó géé e mǐ ɖó é.” Jezu ka yí gbe nú yě ɖɔ: “Nú Mawu jɛ́n nyí Tɔ́ mitɔn nǔgbó ɔ́, mi na ko yí wǎn nú mì, ɖó Mawu gɔ́n wɛ un gosín bó wá. Jlǒ nyɛ ɖésúnɔ tɔn mɛ wɛ un wá dó ǎ; lo ɔ́, é wɛ sɛ́ mì dó. Étɛ́wú mi ma ka mɔ nǔ jɛ xó ce lɛ́ɛ wú ǎ? Đó xó ce nɔ vɛ́ se nú mi. Awǒvi wɛ nyí tɔ́ mitɔn, bɔ nǔ e nɔ jló e lɛ́ɛ wiwa wɛ nɔ myá nukún nú mi. Mɛhutɔ́ wɛ é ko nyí sín do, é yí wǎn nú nǔgbó ǎ, ɖó nǔgbó ɖě ɖo nu tɔn ǎ; é ná ɖó nǔvú ɔ́, nǔ ɖo gaan wɛ, ɖó é ɖésúnɔ bǐ wɛ ko nyí adingbannɔ, bo nyí adingbannɔ lɛ́ɛ sín tɔ́. Amɔ̌, nyɛ ɔ́, nǔgbó wɛ un nɔ ɖɔ; énɛ́ ɔ́ wú wɛ mi ma nɔ ɖi nǔ nú mì ǎ. Mɛ̌ ká ɖo mi mɛ, bó ná sixú ɖe xlɛ́ ɖɔ un hu hwɛ kpɔ́n? Ényí un ka ɖo nǔgbó ɖɔ wɛ ɔ́, aniwú wɛ mi ma nɔ ɖi nǔ nú mì ǎ? Mɛ e nyí Mawu tɔn ɔ́, Mawuxó wɛ é nɔ ɖótó; midɛɛ lɛ́ɛ ɔ́, mi ka nɔ ɖótó Mawuxó ɔ́ ǎ, ɖó mi nyí étɔn ǎ wú.” Jwifu e gbɛ́ wǎn nú Jezu lɛ́ɛ ka yí gbe n'i ɖɔ: “Ée mǐ ɖɔ Samalíinu wɛ a nyǐ, bɔ yɛ nyanya ɖo jǐ towe é ɔ́, a ma mɔ ɖɔ hwɛ mǐtɔn jɔ a?” Jezu ka yí gbe nú yě ɖɔ: “Yɛ nyanya ɖě ɖo jǐ ce ǎ; Tɔ́ ce sɔ́ su wɛ un ɖe, bɔ midɛɛ lɛ́ɛ ka ɖo hɛ̌n dó mì wɛ. Nyɛ ɖésú wɛ nɔ sɔ́ nyɛɖée su ǎ; Mawu wɛ nɔ sɔ́ mì su, bo nɔ ɖɔ hwɛ. Má ɖɔ nǔgbó nú mi: ényí mɛɖé se xó ce, bó bló ɖ'é jí ɔ́, mɛ ɔ́ ná kú gbeɖé ǎ.” Jwifu e gbɛ́ wǎn nú Jezu lɛ́ɛ yí gbe n'i ɖɔ: “Mǐ mɔ din ɖɔ yɛ nyanya wɛ ɖo jǐ towe nǔgbó; Ablaxámu ko kú wá yi, bɔ gbeyíɖɔ Mawu tɔn lɛ́ɛ bǐ ko kú, hwɛ ka wá ɖɔ din ɖɔ: ‘Ényí mɛɖé se xó ce bó bló ɖ'é jí ɔ́, mɛ ɔ́ ná kú gbeɖé ǎ.’ Hwɛ hú gǎn tɔ́gbó mǐtɔn Ablaxámu wɛ a? Éyɛ́ ko kú, bɔ gbeyíɖɔ Mawu tɔn lɛ́ɛ lɔmɔ̌ ko kú. Mɛ̌ a ka nɔ sɔ́ hwiɖée dó mɔ?” Jezu ka yí gbe nú yě ɖɔ: “Ényí nyɛ ɖésú wɛ nɔ sɔ́ nyɛɖée su ɔ́, susu ce na xɔ akwɛ́ ǎ. Tɔ́ ce wɛ ka nɔ sɔ́ mì su. Mi ɖíe ka ɖɔ é wɛ nyí Mawu nú émí e, có mi ka tunwun i ǎ; nyɛ ɔ́, un tunwun i. Ényí un ɖɔ un kún tunwun i ó ɔ́, un ná nyí nǔvúɖótɔ́ mi ɖɔhun. Lo ɔ́, nyɛ tunwun i, bó nɔ́ bló xó tɔn lɛ́ɛ ɖ'é jí. Awǎjijɛ ɖaxó wɛ nyí nú tɔ́gbó mitɔn Ablaxámu, ɖó é ɖo nukún ɖó wiwa ce wɛ; é ka mɔ nǔgbó, bɔ xomɛ hun i.” Jwifu e gbɛ́ wǎn nú Jezu lɛ́ɛ ka kanbyɔ́ ɛ ɖɔ: “A ko ɖó xwe kanɖé wǒ (50) vɔ́vɔ́ ǎ, bó ka mɔ Ablaxámu a?” Jezu ka ɖɔ nú yě ɖɔ: “Ma ɖɔ nǔgbó nú mi: cóbónú Ablaxámu ná jɔ ɔ́, nyɛ ko tíin.” Bɔ yě fɔ awǐnnyaglo, bó ná nyi dó e; Jezu ka bɛ, bó tɔ́n sín sinsɛnxɔ ɔ́ mɛ. Jezu wá xweyǐgbe, bó mɔ nya ɖé, bɔ è ji nukúntíntɔ́nnɔ tɔn. Jezu sín ahwanvú lɛ́ɛ kanbyɔ́ Jezu ɖɔ: “ Mɛ̌si, mɛ̌ wɛ hu hwɛ bɔ è ka ji nya élɔ́ nukúntíntɔ́nnɔ tɔn mɔ̌? É ɖésú wɛ hu hwɛ a, abǐ mɛ e ji i lɛ́ɛ ɖě wɛ hu hwɛ?” Jezu ka yí gbe nú yě ɖɔ: “É ɖésúnɔ ɔ́ hu hwɛ wú wɛ ǎ, mɛ e ji i lɛ́ɛ ɖě ká hu hwɛ wú wɛ ǎ; é tɔ́n nukún, bónú Mawu ná dó ɖe hlɔ̌nhlɔ́n tɔn xlɛ́ dó wǔtu tɔn. Din e kéze kpo ɖo te ɔ́, mǐ ɖó ná wa mɛ e sɛ́ mì dó ɔ́ sín azɔ̌, ɖó zǎn ko ɖo nǎ kú wɛ, bɔ mɛɖé sɔ́ ná sixú kpé nǔɖé wú bó wa ǎ. Hwenu e un sigǎn kpo ɖo gbɛ ɔ́ mɛ ɔ́, nyɛ wɛ nyí wěziza nú gbɛ ɔ́.” Ée Jezu ɖɔ mɔ̌ ɔ́, é tún atán kɔn nyi kɔ́ mɛ, bó dó fan babá ná, bó sá dó nukún nú nya ɔ́, bo ɖɔ n'i ɖɔ: “Yi klɔ́ ɖo Silowée tɔnu.” (Silowée ɔ́ sín tínmɛ wɛ nyí mɛsɛ́dó.) Nya nukúntíntɔ́nnɔ ɔ́ ka yi klɔ́ ɖo tɔ ɔ́ nu nǔgbó; ée é lɛ́ kɔ ɔ́, é mɔ nǔ céɖécéɖé. Mɛ e ɖo xwé tɔn kpá lɛ́ɛ kpódó mɛ e ko nɔ mɔ ɛ ɖo nǔ byɔ́ ɖu wɛ ɖ'ayǐ lɛ́ɛ kpó nɔ ɖɔ: “É ma ka nyí nya e nɔ jínjɔ́n ayǐ, bo nɔ ɖo nǔ byɔ́ ɖu wɛ ɔ́ nɛ́ a?” Mɛɖě nɔ ɖɔ: “É wɛ”, mɛ ɖěvo lɛ́ɛ ka nɔ ɖɔ: “Gbeɖé, mɛɖimɛ wɛ.” É ɖésúnɔ ka ɖɔ nú yě ɖɔ: “Nyɛ jɛ́n wɛ.” Yě ká kanbyɔ́ ɛ ɖɔ: “Nɛ̌ nukún towe lɛ́ɛ ka hun gbɔn?” Bɔ é yí gbe nú yě ɖɔ: “Mɛ e è nɔ ylɔ́ ɖɔ Jezu ɔ́ wɛ fan babá, bó sá dó nukún nú mì, bó ɖɔ nú mì ɖɔ: ‘Yi tɔ e è nɔ ylɔ́ ɖɔ Silowée ɔ́ nu, bó yi klɔ́.’ Ɖěe un ka yi tɔ ɔ́ nu bó yi klɔ́ ɔ́, un mɔ nukúnnú.” Yě ká kanbyɔ́ ɛ ɖɔ: “Fítɛ́ mɛ ɔ́ ka ɖe?” Bɔ é yí gbe nú yě ɖɔ: “Un tunwun ǎ.” Yě kplá nya e ko nyí nukúntíntɔ́nnɔ ɖ'ayǐ ɔ́ yi jó nú Falizyɛn lɛ́ɛ. Gbe e gbe Jezu ka fan babá, bó dó hun nukún n'i ɔ́, gbɔjɛzán Jwifu lɛ́ɛ tɔn gbe wɛ. Énɛ́ ɔ́ wú wɛ Falizyɛn lɛ́ɛ lɔ kan nǔ byɔ́ ɛ dó lě e nukún tɔn hun gbɔn ɔ́ wú. É ka ɖɔ nú yě ɖɔ: “É fan babá bó sá dó nukún nú mì, bɔ un yi klɔ́, bó ka jɛ nǔ mɔ jí.” Falizyɛn lɛ́ɛ ɖě ɖɔ: “Mɛ e bló nǔ mɔ̌hunkɔ ɔ́ sixú gosín Mawu gɔ́n ǎ; ɖó é gba sɛ́n e ɖɔ xó dó gbɔjɛzán ɔ́ wú é.” Mɛ ɖěvo lɛ́ɛ ɖɔ: “Nɛ̌ hwɛhutɔ́ ɖé ka sixú jlɛ́ nǔ mɔ̌hunkɔtɔn lɛ́ɛ gbɔn?” Bɔ gbe yětɔn sɔ́ ɖo kpɔ́ ǎ. Yě ká lɛ́ kanbyɔ́ nya e ko nyí nukúntíntɔ́nnɔ ɖ'ayǐ ɔ́ ɖɔ: “Hwɛ ɔ́, mɛ e hun nukún nú we ɔ́, étɛ́ a ka lin dó wǔ tɔn?” É ka yí gbe nú yě ɖɔ: “ Gbeyíɖɔ Mawu tɔn ɖé wɛ.” Nǔ ɖo mɔ̌ có Jwifugán lɛ́ɛ jló ná ɖi ɖɔ nya ɔ́ ko nyí nukúntíntɔ́nnɔ ɖ'ayǐ, cóbó wá ɖo nukúnnú mɔ wɛ ǎ, lobo ylɔ́ mɛ e ji i lɛ́ɛ, bó kanbyɔ́ yě ɖɔ: “Vǐ mitɔn ɔ́ jɛ́n ɖíe a? Nukúntíntɔ́nnɔ tɔn wɛ mi ji nǔgbó a? Nɛ̌ nǔ ka nyí gbɔn bɔ é ɖo nǔ mɔ wɛ din?” Mɛ e ji i lɛ́ɛ ka yí gbe nú yě ɖɔ: “Vǐ mǐtɔn wɛ, bɔ mǐ ji nukúntíntɔ́nnɔ tɔn. Amɔ̌, lě e nǔ nyí gbɔn, bɔ é wá ɖo nǔ mɔ wɛ din ɔ́, mǐ mɔ do ná ǎ; mɛ̌ to hun nukún n'i hǔn, mǐ tunwun ǎ. Mi kan xó byɔ́ ɛ, é ko ɖó xwe e ná ɖɔ xó dó éɖée nu ɔ́; é ɖésúnɔ ná tínmɛ nú mi.” Mɛ e ji i lɛ́ɛ ɖɔ mɔ̌, ɖó yě ɖo xɛsi ɖi nú Jwifugán lɛ́ɛ wɛ, ɖó yě ko kplé, bó ɖɔ ɖó alɔ ɖokpó ɔ́ jí ɖɔ mɛɖé mɔ Jezu dó mɔ Klísu ná ɔ́, émí ná nya mɛ ɔ́ sín kplɔ́ngbasá émítɔn. Nǔ e wú mɛ e ji i lɛ́ɛ ɖɔ é ko ɖó xwe e ná ɖɔ xó dó éɖée nu ɔ́ nɛ́, bó ɖɔ è nǐ kan nǔ byɔ́ é ɖésúnɔ. Jwifugán lɛ́ɛ lɛ́ vɔ́ ylɔ́ nya e ko nyí nukúntíntɔ́nnɔ ɖ'ayǐ ɔ́ azɔn wegɔ́ ɔ́, bó ɖɔ n'i ɖɔ: “Kpa susu nú Mawu; mǐdɛɛ lɛ́ɛ ɔ́, mǐ tunwun ɖɔ dǎwe énɛ́ ɔ́, hwɛhutɔ́ wɛ.” Éyɛ́ ka ɖɔ nú yě ɖɔ: “E to nyí hwɛhutɔ́ oo, é to ma nyí hwɛhutɔ́ oo, un tunwun ǎ; nǔ ɖokpó géé e un tunwun ɔ́ wɛ nyí ɖɔ: nukúntíntɔ́nnɔ wɛ un nyí ɖ'ayǐ; amɔ̌ din ɔ́, un ɖo nǔ mɔ wɛ.” Yě lɛ́ kanbyɔ́ ɛ ɖɔ: “Nɛ̌ é ká bló gbɔn nú we? Nɛ̌ é ká hun nukún nú we gbɔn?” Bɔ é yí gbe nú yě ɖɔ: “Un ko ɖɔ lě e nǔ lɛ́ɛ nyí gbɔn ɔ́ nú mi, bɔ mi dó tókúse mɛ; nɛ̌ ka gbɔn din bɔ mi jló nú ma lɛ́ vɔ́ wlí ɖɔ nú mì? Mi lɔmɔ̌ jló ná húzú ahwanvú tɔn lɛ́ɛ wɛ a?” Ée nya ɔ́ ɖɔ mɔ̌ nú yě ɔ́, yě bɔ zun ɖó n'i, bó ɖɔ: “Hwi wɛ nyí ahwanvú dǎwe énɛ́ tɔn, mǐdɛɛ lɛ́ɛ ɔ́, ahwanvú Mɔyízi tɔn wɛ mǐ nyí. Mǐdɛɛ lɛ́ɛ tunwun ɖɔ Mɔyízi wɛ Mawu ɖɔ xó ná; amɔ̌, mɛ énɛ́ ɔ́, mi tunwun fí e éyɛ́ gosín ɔ́ ǎ.” Nya ɔ́ ka yí gbe nú yě ɖɔ: “É kpácá mì bɔ mi tunwun fí e é gosín ɔ́ ǎ, có é ka hun nukún nú nyɛ. Đó mǐ tunwun ganjí ɖɔ Mawu kún nɔ ɖótó hwɛhutɔ́ lɛ́ɛ ó; mɛ e ka nɔ sí Mawu bo nɔ blǒ nǔ e Mawu jlǒ lɛ́ɛ ɔ́, mɛ énɛ́ ɔ́ wɛ Mawu nɔ ɖótó. È se gbeɖé kpɔ́n ɖɔ mɛɖé hun nukún nú mɛ e ko tɔ́n nukún sín nɔ tɔn xo mɛ ɔ́ ǎ. Ényí nya énɛ́ ma ka gosín Mawu gɔ́n ǎ ɔ́, é ná sixú wa nǔɖé ǎ.” Yě ká yí gbe n'i ɖɔ: “Hwi ɖésúnɔ bǐ ɔ́, hwɛ mɛ wɛ è ji we dó, bɔ a ka wá ja nǔ kplɔ́n mǐdɛɛ lɛ́ɛ gbé.” Bɔ yě ɖe e sín agun yětɔn mɛ. Ée Jezu se ɖɔ yě ɖe dǎwe e é hun nukún ná ɔ́ sín agun yětɔn mɛ ɔ́, é wá yi kpé e ɖo alixo, bó kanbyɔ́ ɛ ɖɔ: “A ɖi nǔ nú Gbɛtɔ́ví ɔ́ a?” Dǎwe ɔ́ ka yí gbe n'i ɖɔ: “Mɛɖaxó, mɛ̌ ka nyí mɛ ɔ́, ɖɔ nú mì bónú má ɖi nǔ n'i.” Jezu ka ɖɔ n'i ɖɔ: “Mɛ ɔ́ ɖíe mɔ wɛ a ko ɖe e; é wɛ nyí nyɛ mɛ e ɖo xó ɖɔ nú we wɛ din é.” Bɔ nya ɔ́ ɖɔ n'i ɖɔ: “Un ɖi nǔ nú we, Aklúnɔ,” bó jɛ kpo, bó ɖe kɔ́ n'i. Jezu ka ɖɔ: “Un wá gbɛ ɔ́ mɛ bó ná ɖe nǔwanyido gbɛtɔ́ lɛ́ɛ tɔn nyi wěxo, bónú mɛ e ma mɔ nǔ ǎ lɛ́ɛ ná mɔ nǔ, bónú mɛ e ka ɖo nǔ mɔ wɛ lɛ́ɛ ná húzú nukúntíntɔ́nnɔ.” Falizyɛn ɖé lɛ́ɛ ka ɖo fínɛ́ xá Jezu, bó se xó énɛ́ ɔ́, bó kanbyɔ́ ɛ ɖɔ: “Mǐ lɔmɔ̌ nyí nukúntíntɔ́nnɔ wɛ a?” Jezu ka yí gbe nú yě ɖɔ: “Ényí nukúntíntɔ́nnɔ wɛ mi ko nyí ɔ́, hwɛ mitɔn sɔ́ ná kpo ɖo kɔ nú mi ǎ. Lo ɔ́, ée mi nɔ ɖɔ émí nɔ mɔ nukúnnú ɔ́, hwɛ mitɔn lɛ́ɛ kpo ɖo kɔ nú mi.” “Má ɖɔ nǔgbó nú mi: mɛ e ma gbɔn hɔnlinu byɔ́ lɛ̌ngbɔ́kpó ɔ́ mɛ ǎ, bó fán nǔ gbɔn fí ɖěvo byɔ́ mɛ ɔ́, mɛ énɛ́ ɔ́, ajotɔ́ axánsúnxó wɛ é nyí. Lo ɔ́, mɛ e gbɔn hɔnlinu byɔ́ mɛ ɔ́, é wɛ nyí lɛ̌ngbɔ́nyitɔ́ ɔ́. Éyɛ́ wɛ hɔnjínɔtɔ́ nɔ hun hɔn ná, bɔ lɛ̌ngbɔ́ lɛ́ɛ nɔ ɖótó gbe tɔn; é nɔ́ ylɔ́ lɛ̌ngbɔ́ tɔn lɛ́ɛ ɖokpó ɖokpó sín nyǐkɔ, bó nɔ́ ɖe yě tɔ́n. Ényí é ɖe lɛ̌ngbɔ́ e nyí étɔn lɛ́ɛ bǐ tɔ́n ɔ́, é nɔ́ jɛ nukɔn yětɔn, bɔ lɛ̌ngbɔ́ lɛ́ɛ nɔ xwedó e; ɖó yě se gbe tɔn ɔ́, yě nɔ́ tunwun. Amɔ̌, yě nɔ xwedó jǒnɔ ǎ; é nyɔ́ wa ɔ́, hɔn wɛ yě nɔ hɔn n'i; ɖó yě tunwun gbe tɔn ǎ.” Lǒ wɛ nyí bɔ Jezu dó bó dó ɖɔ xó nú yě, yě ká mɔ nukúnnú jɛ nǔ e é jlǒ ná ɖɔ nú yě ɔ́ mɛ ǎ. Jezu lɛ́ ɖɔ nú yě ɖɔ: “Má ɖɔ nǔgbó nú mi: nyɛ wɛ nyí hɔn nú lɛ̌ngbɔ́ lɛ́ɛ. Mɛ e ko jɛ nukɔn nú mì lɛ́ɛ bǐ wɛ nyí ajotɔ́ axánsúnxó, lɛ̌ngbɔ́ lɛ́ɛ ka ɖótó yě ǎ. Nyɛ wɛ nyí hɔn ɔ́. Mɛ e ná gbɔn jǐ ce ɔ́, è nǎ hwlɛ́n ɛ gán; é ná nɔ́ yi, bó ná nɔ́ wá, bó ná nɔ́ mɔ nǔ ɖu. Ajotɔ́ ɔ́, ajogbé wɛ é nɔ́ tɔ́n, bó nɔ́ tɔ́n mɛ hu gbé, bó nɔ́ tɔ́n nǔ hɛn gblé gbé. Nyɛ ɔ́, un wá bónú lɛ̌ngbɔ́ lɛ́ɛ ná mɔ gbɛ, bó mɔ gbɛ dó gbɛ jí. “Nyɛ wɛ nyí lɛ̌ngbɔ́nyitɔ́ ɖagbe ɔ́, lɛ̌ngbɔ́nyitɔ́ ɖagbe ɔ́ nɔ́ sɔ́ gbɛ tɔn dó sá vɔ̌ dó lɛ̌ngbɔ́ tɔn lɛ́ɛ tamɛ. Azɔ̌watɔ́ e ka ɖo lɛ̌ngbɔ́ lɛ́ɛ nyi wɛ ɖó akwɛ́ kɛ́ɖɛ́ wútu, bɔ lɛ̌ngbɔ́ lɛ́ɛ ma nyí étɔn ǎ ɔ́, ényí é mɔ hla jǎwe ɔ́, hɔn wɛ é nɔ hɔn jó lɛ̌ngbɔ́ lɛ́ɛ dó, bɔ hla nɔ byɔ́ yě mɛ, bó nɔ́ wlí ɖě, bó nɔ́ gba ɖě lɛ́ɛ dó. Mɛ énɛ́ ɔ́ nɔ hɔn, ɖó akwɛ́ kɛ́ɖɛ́ ba wɛ é ɖe. Lɛ̌ngbɔ́ lɛ́ɛ sín gbɛ nɔ vɛ́ n'i ǎ. Un lɛ́ ɖó lɛ̌ngbɔ́ ɖěvo lɛ́ɛ bɔ yě ɖo wutó élɔ́ mɛ ǎ; un ɖó ná kplá yě lɔmɔ̌ wá fí, bɔ yě ná se gbe ce, bɔ lɛ̌ngbɔ́hwan ɔ́ ná nyí ɖokpó, bɔ lɛ̌ngbɔ́nyitɔ́ lɔmɔ̌ ná nyí ɖokpó. “Tɔ́ ɔ́ yí wǎn nú mì, ɖó un sɔ́ gbɛ ce dó sá vɔ̌ ná, bó ná sixú lɛ́ vɔ́ yí. Mɛɖěbǔ ná yí gbɛ ce sín así ce ǎ; lo ɔ́, nyɛ ɖésú wɛ jló bó sɔ́ jó; ɖó un ɖó acɛ e sɔ́ gbɛ ce jó é, bó ka lɛ́ ɖó acɛ e lɛ́ vɔ́ yí é. Tɔ́ ce wɛ ná acɛ énɛ́ ɔ́ mì. Lě e Tɔ́ ce zɔ́n mì gbɔn ɔ́ nɛ́.” Gbemanɔkpɔ́ lɛ́ byɔ́ Jwifu e gbɛ́ wǎn nú Jezu lɛ́ɛ mɛ, ɖó xó énɛ́ lɛ́ɛ wútu. Bɔ mɛ gěgé ɖo yě mɛ, bó ɖɔ: “Yɛ nyanya wɛ ɖo jǐ tɔn; taɖunɔ wɛ; étɛ́wú mi ka ɖo tó ɖó e wɛ?” Mɛ ɖěvo lɛ́ɛ ɖɔ: “Mɛ e jí yɛ nyanya ɖe ɔ́ sín xó ɖiɖɔ nɛ́ ǎ; yɛ nyanya ɖě sixú hun nukún nú nukúntíntɔ́nnɔ lɛ́ɛ a?” Hwenɛ́nu ɔ́, Jwifu lɛ́ɛ kplé ɖo Jeluzalɛ́mu, bó ɖo hwenu e yě sɔ́ sinsɛnxɔ yětɔn dó alɔ mɛ nú Mawu ɔ́ sín xwe ɖu wɛ. Avivɔ ɖaxó hwenu wɛ, bɔ Jezu ɖo sa ɖi wɛ gbɔn Salomɔ́ɔ sín agba jí, ɖo sinsɛnxɔ ɔ́ mɛ. Jwifu e gbɛ́ wǎn nú Jezu lɛ́ɛ lɛ́ lɛ̌ dó e, bó kanbyɔ́ ɛ ɖɔ: “Káká jɛ hwetɛ́nu a nǎ ɖɔ xó jɔ xó nú mǐ, bɔ mǐ ná gɔn nǔ xokpɔ́n dó? Ényí hwi wɛ nyí Klísu ɔ́ hǔn, ɖɔ nú mǐ tawun.” Jezu ka yí gbe nú yě ɖɔ: “Un ko ɖɔ nú mi, mi ka ɖi ǎ. Nǔ e wa wɛ un ɖe ɖo Tɔ́ ce nyǐkɔ mɛ lɛ́ɛ nɔ ɖe kúnnu nú mì. Lo ɔ́ mi ka ɖi ǎ, ɖó mi ɖo lɛ̌ngbɔ́ ce lɛ́ɛ mɛ ǎ. Lɛ̌ngbɔ́ ce lɛ́ɛ nɔ ɖótó gbe ce, un tunwun yě bɔ yě nɔ xwedó mì. Un nɔ ná gbɛ mavɔ mavɔ yě; yě ná kú gbeɖé ǎ; mɛ ɖěbǔ ka ná yí yě sín alɔ ce mɛ ǎ. Tɔ́ ce e sɔ́ yě dó así nú mì ɔ́, hú gǎn nǔ bǐ, mɛ ɖěbǔ sixú xo nǔɖé yí sín alɔ tɔn mɛ ǎ. Nyɛ kpódó Tɔ́ ɔ́ kpó ɔ́, ɖokpó wɛ mǐ nyǐ.” Jwifu e gbɛ́ wǎn nú Jezu lɛ́ɛ fɔ awǐnnyaglo bó ná nyi dó hu i ná, bɔ Jezu ɖɔ nú yě ɖɔ: “Nǔ ɖagbe e gosín Tɔ́ ce gɔ́n lɛ́ɛ ɔ́, un ɖe gěgé xlɛ́ mi; ɖě tɛ́ wútu wɛ mi jló ná nyi awǐnnyaglo dó hu mì?” Yě yí gbe n'i ɖɔ: “Nǔ ɖagbe e a ɖe xlɛ́ mǐ lɛ́ɛ ɖě wútu wɛ mǐ jló ná nyi awǐnnyaglo dó hu we ǎ, nu e a nylǎ dó Mawu wú ɔ́ wútu wɛ. Đó hwi mɛ e nyí gbɛtɔ́ yǎyá ɔ́, a nɔ sɔ́ hwiɖée dó ɖó Mawu ná.” Jezu ka yí gbe nú yě ɖɔ: “È ma wlán dó Mawuxówéma mitɔn mɛ ɖɔ: ‘Un ɖɔ jí: mawu wɛ mi nyí’ ǎ cé? Mawuxówéma ɔ́ nɛ́ è ma ka sixú gbídí nǔ ɖěbǔ ɖ'é mɛ ǎ nɛ́. Ényí è ka ylɔ́ mɛ e ɖɔ Mawuxó ná wɛ è ɖe lɛ́ɛ ɖɔ mawu ɔ́, étɛ́wú nyɛ mɛ e Mawu ka ɖe ɖó vo, bó sɛ́ mì dó gbɛ ɔ́ mɛ ɔ́, un ɖɔ nú mi ɖɔ Mawu ví wɛ un nyí, bɔ mi ka ɖɔ un nylá nu dó Mawu wú? Nú un ma ɖo azɔ̌ e nyí Tɔ́ ce tɔn lɛ́ɛ wa wɛ ǎ hǔn, mi ma ɖi nǔ nú mì ó. Ényí un ka ɖo azɔ̌ e nyí étɔn lɛ́ɛ wa wɛ hǔn, mi na bo ma ɖi nǔ nú mì ǎ hǔn, mi bo ɖi nǔ ɖó azɔ̌ énɛ́ lɛ́ɛ wútu. Bónú mi tunwun, bó mɔ nǔ jɛ wú ɖɔ Tɔ́ ɔ́ ɖo nyɛ mɛ, bɔ un ɖo Tɔ́ ɔ́ mɛ.” Ée Jezu ɖɔ mɔ̌ ɔ́, yě lɛ́ jló ná wlí i, bɔ é ka hɔn sín yě mɛ. É lɛ́ yi Judɛ́ɛn tɔ gúdo, fí e Jǎan lɛ yɛhwesin nú mɛ lɛ́ɛ ɖe ɔ́, bó cí fínɛ́. Gbɛtɔ́ gěgé wá gɔ̌n tɔn bó nɔ́ ɖɔ: “Jǎan Yɛhwesinlɛnúmɛtɔ́ jlɛ́ nǔ ɖěbǔ ǎ; lo ɔ́, nǔ e é ka ɖɔ dó nya élɔ́ wú ɔ́ bǐ wɛ nyí nǔgbó.” Bɔ fínɛ́ ɔ́, mɛ gěgé ɖi nǔ nú Jezu. Nya ɖé tíin, bó ɖo azɔn jɛ wɛ, bɔ è nɔ ylɔ́ ɛ ɖɔ Lazáa Betaníi tɔn; Betaníi ɔ́, Mali kpódó nɔví tɔn Maati kpó sín gletoxo wɛ. Mali énɛ́ wɛ nyí nyɔ̌nu e sá célu nú Jezu, bó zé ɖa tɔn dó súnsún afɔ tɔn lɛ́ɛ ná é; nɔví tɔn wɛ ka nyí Lazáa e ɖo azɔn jɛ wɛ é. Lazáa sín nɔví nyɔ̌nu we lɛ́ɛ ka sɛ́ wɛn dó Jezu bó ɖɔ: “Aklúnɔ, xɔ́ntɔn towe vívɛ́ná ɔ́ ɖo azɔn jɛ wɛ.” Ée Jezu se mɔ̌ ɔ́, é ɖɔ jí: “Kú wɛ ná ɖu ɖo azɔn élɔ́ jí ǎ; é ná ɖe susu Mawu tɔn xlɛ́, bɔ Mawu ví ɔ́ ná xɔ susu gbɔn gbla tɔn mɛ.” Jezu ka yí wǎn nú Maati kpódó nɔví tɔn nyɔ̌nu ɔ́ kpó, kpódó Lazáa kpán. Lo ɔ́, hwenu e Jezu se ɖɔ Lazáa ɖo azɔn jɛ wɛ ɔ́, é lɛ́ nɔ to e mɛ é ɖe ɔ́ nú azǎn we d'é jí. Énɛ́ ɔ́ gúdo ɔ́, é wá ɖɔ nú ahwanvú tɔn lɛ́ɛ ɖɔ: “Mi nú mǐ ná lɛ́ kɔ yi Judée.” Ahwanvú tɔn lɛ́ɛ ka ɖɔ n'i ɖɔ: “ Mɛ̌si, ayisɔnmɔ tófí jɛ́n wɛ Judéenu lɛ́ɛ ja huhu we gbé kpódó awǐnnyaglo kpó ɖo dɔ̌n, bɔ a nǎ lɛ́ lɛ́ kɔ yi dɔ̌n a?” Jezu ka ɖɔ nú yě ɖɔ: “Ganxixo wěwe wɛ ɖo kéze ɖokpó mɛ; ényí mɛɖé ɖo yiyi wɛ kéze ɔ́, é nɔ klɛ́n afɔ ǎ, ɖó gbɛ mɛ nɔ za wě. É ka nyí zǎn mɛ wɛ é ɖo yiyi wɛ ɔ́, é nɔ klɛ́n afɔ, ɖó wěziza ɖo é ɖésúnɔ mɛ ǎ.” Énɛ́ ɔ́ gúdo ɔ́, é lɛ́ ɖɔ nú yě ɖɔ: “Xɔ́ntɔn mǐtɔn Lazáa ɖo amlɔ dɔ́ wɛ; un ná yi fɔ́n ɛ.” Énɛ́ ɔ́, ahwanvú tɔn lɛ́ɛ kɛ nu bo ɖɔ: “Aklúnɔ, ényí ɖɔ amlɔ dɔ́ wɛ jɛ́n é ɖe ɔ́, azɔn tɔn ná gbɔ.” Lazáa ko kú ɖɔ nú yě wɛ Jezu ɖe, cóbɔ yědɛɛ lɛ́ɛ ka vɛdó ɖɔ amlɔ dɔ́ wɛ é ɖe, bó ɖo gbigbɔ jɛ wɛ sín. Bɔ Jezu gbɔ bo ɖɔ nyi wɛn nú yě ɖɔ: “Lazáa kú; fínɛ́ e un ma ka ɖe cóbɔ é kú ǎ ɔ́ víví nú mì ɖó mi wútu; énɛ́ ɔ́ ná zɔ́n bɔ mi ná sixú ɖi nǔ. Mi bo nú mǐ ná yi gɔ̌n tɔn.” Hwenɛ́nu ɔ́, Tɔmáa e è nɔ lɛ́ ylɔ́ ɖɔ hǒxo ɔ́ ɖɔ nú ahwanvú ɖě lɛ́ɛ ɖɔ: “Mi nú mǐ lɔmɔ̌ ná xwedó e hɛn yi, bó ná yi kú xá ɛ.” Ée Jezu wá Betaníi ɔ́, é mɔ ɖɔ è ko ɖi Lazáa, bɔ azǎn tɔn ko yi ɛnɛ. Betaníi yá dó Jeluzalɛ́mu bó ɖo kilomɛ́tlu atɔn mɔ̌ dó e. Bɔ Judéenu lɛ́ɛ gěgé ko wá nǔwamɛgbe dó Maati kpódó Mali kpó gbé ɖó nɔví yětɔn e kú ɔ́ wú. Ée Maati se ɖɔ Jezu jǎwe ɔ́, é yi kpé e ɖo alixo; lo ɔ́, Mali cí xwé gbe. Ée Maati yi mɔ Jezu ɔ́, é ɖɔ: “Aklúnɔ, ényí fí wɛ a ko ɖe ɔ́, nɔví ce ná kú ǎ. Có din ɖésú ɔ́, un tunwun ɖɔ a byɔ́ nǔ ɖěbǔ Mawu ɔ́, é ná ná bǐ we.” Jezu ka ɖɔ n'i ɖɔ: “Nɔví towe ná fɔ́n.” Bɔ Maati yí gbe n'i ɖɔ: “Un tunwun ɖɔ é ná fɔ́n ɖo fínfɔ́n sín kú mɛkúkú lɛ́ɛ tɔn hwenu, ɖo azǎn gǔdo gúdo tɔn ɔ́ gbe.” Jezu ka ɖɔ n'i ɖɔ: “Nyɛ wɛ nyí fínfɔ́n sín kú, bo lɛ́ nyí gbɛ; mɛ ɖěbǔ ɖi nǔ nú mì ɔ́, é ná bo kú ɔ́, é ná nɔ gbɛ. Mɛ e ka ɖo gbɛ bo ɖi nǔ nú mì ɔ́ ná kú gbeɖé ǎ. A ɖi nǔ ɖɔ nǔ ná nyí mɔ̌ a?” Maati ka yí gbe n'i ɖɔ: “Ɛɛn Aklúnɔ, un ɖi nǔ ɖɔ hwi wɛ nyí Klísu Mawu ví e ɖó ná wá gbɛ ɔ́ mɛ é.” Ée Maati ná xósin énɛ́ ɔ́ Jezu ɔ́, é yi ylɔ́ nɔví tɔn Mali bó ɖe kpá ɛ ɖɔ: “ Mɛ̌si wá bo ɖo ylɔ̌ylɔ́ we wɛ.” Ée Mali se mɔ̌ ɔ́, é sí te vawun, bo ɖidó Jezu kpé gbé. Jezu ko byɔ́ gletoxo ɔ́ mɛ hwenɛ́nu ǎ, é kpo ɖo fí e Maati yi kpé e ɖe é. Ée Judéenu e wá bo ɖo xwé ɔ́ gbé xá Mali, bo ɖo gbɔ dó n'i wɛ lɛ́ɛ mɔ bɔ é sí te vawun mɔ̌ bo tɔ́n ɔ́, yě xwedó e, ɖó yě vɛdó ɖɔ yɔ ɔ́ jí ya avǐ ɖe gbé wɛ é xwe sín. Ée Mali yi mɔ Jezu ɖo fí e é ɖe ɔ́, é jɛ kpo ɖo nukɔn tɔn, bó ɖɔ n'i ɖɔ: “Aklúnɔ, ényí a ko ɖo fí wɛ ɔ́, nɔví ce ná kú ǎ.” Ée Jezu mɔ ɖɔ é ɖo avǐ ya wɛ, bɔ Judéenu e xwedó e lɛ́ɛ lɔ ɖo avǐ ya wɛ ɔ́, lanmɛ tɔn slɔ́ fún, bɔ ayi tɔn bǐ gbadó; bɔ é kanbyɔ́ ɛ ɖɔ: “Fítɛ́ mi ka sɔ́ ɛ ɖó?” Yě ká yí gbe n'i ɖɔ: “Aklúnɔ, wǎ kpɔ́n fí e mǐ sɔ́ ɛ ɖó ɔ́.” Bɔ Jezu ya avǐ. Ée Judéenu lɛ́ɛ mɔ mɔ̌ ɔ́, yě ɖɔ: “Mi kpɔ́n lě e é yí wǎn n'i sɔ é.” Mɛ ɖé lɛ́ɛ ka ɖo yě mɛ bó ɖɔ: “Éyɛ́ mɛ e hun nukún nú nukúntíntɔ́nnɔ ɔ́, é sixú bló bónú nya énɛ́ gɔn kúkú ǎ cé?” Wǔ lɛ́ kú Jezu, bɔ é ɖidó yɔdo ɔ́ kɔn; yɔdo ɖé wɛ bó ɖo sóxo mɛ bɔ è blǐ awǐnnya nyi nu. Ée Jezu jɛ fínɛ́ ɔ́, é ɖɔ nú mɛ lɛ́ɛ ɖɔ: “Mi blí awǐnnya ɔ́ síin.” Bɔ mɛ e kú ɔ́ sín nɔví nyɔ̌nu Maati ɖɔ nú Jezu ɖɔ: “Aklúnɔ, cyɔ ɔ́ ná ko dó cyɔ mɛ! Đó azǎn ɛnɛ ɖíe ɖokpóó wɛ é ko ɖo fínɛ́.” Jezu ka ɖɔ n'i ɖɔ: “Un ko ɖɔ nú we ɖɔ nú a ɖi nǔ ɔ́, a ná mɔ susu Mawu tɔn ǎ cé?” Bɔ yě blí awǐnnya ɔ́ síin. Jezu ka zé ta yi jǐ, bó ɖɔ: “Tɔ́ ce, un dó kú nú we, ɖó a ɖǒtó mì. Un tunwun ɖɔ a nɔ ɖótó mì tɛgbɛ; amɔ̌, mɛ e lɛ́ lɛ̌ dó mì lɛ́ɛ wútu wɛ un ka ɖo xó ɖɔ wɛ bónú yě ná dó ɖi nǔ ɖɔ hwi wɛ sɛ́ mì dó.” Ée Jezu ɖɔ xó énɛ́ vɔ ɔ́, é sú xó syɛ́nsyɛ́n bo ɖɔ: “Lazáa tɔ́n, bó wá.” Bɔ mɛkúkú ɔ́ tɔ́n sín yɔdo ɔ́ mɛ nǔgbó, bɔ avɔ e è lɛ̌ dó afɔ tɔn lɛ́ɛ kpódó alɔ tɔn lɛ́ɛ kpán é bǐ ɖo mɔ̌, bɔ avɔ e è dǒ blǎ gba n'i ɔ́ ɖo nukún mɛ n'i. Jezu ɖɔ nú yě ɖɔ: “Mi tún gba n'i, bo jó e dó nú é yi.” Ée Judéenu e wá Mali gɔ́n lɛ́ɛ mɔ nǔ énɛ́ e Jezu jlɛ́ ɔ́, yě mɛ gěgé ɖi nǔ n'i. Nǔ ɖo mɔ̌ có mɛɖé lɛ́ɛ ɖo yě mɛ, bó yi mɔ Falizyɛn lɛ́ɛ, bó wlí nǔ e Jezu wa é bǐ ɖɔ nú yě. Bɔ vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó ylɔ́ kplé toxóɖɔtɔ́ lɛ́ɛ tɔn, bó ɖɔ: “Nɛ̌ mǐ ká ná bló gbɔn nú nya élɔ́? Éɖíe ɖo nǔ gěgé jlɛ́ wɛ e. Ényí mǐ jó e dó, bɔ é ɖo nǔ wa gbɔn mɔ̌ wɛ ɔ́, mɛ bǐ ná ɖi nǔ n'i, bɔ Hlɔ̌manu lɛ́ɛ ná wá gba sinsɛnxɔ mǐtɔn, bó ná gba to ɔ́ dó ta nú mǐ.” Mɛ ɖokpó ka ɖo yě mɛ, bó nɔ́ nyí Kayífu; é wɛ ɖo vɔ̌sánú-xwlémawutɔ́ ɖaxó sín azɔ̌ wa wɛ xwe énɛ́ xwe, bó ɖɔ nú yě ɖɔ: “Mi tunwun nǔɖé ǎ. Hǔn mi mɔ ɖɔ mɛ ɖokpó géé kú dó mɛ bǐ tamɛ ɔ́, é nyɔ́ hú to ɔ́ bǐ sésé ní vɔ ǎ cé?” É ɖésú wɛ ka ɖo xó énɛ́ ɖɔ wɛ ǎ; lo ɔ́, xwe énɛ́ xwe ɔ́, é wɛ nyí vɔ̌sánú-xwlémawutɔ́ ɖaxó ɔ́, bɔ Mawu ɖɔ xó gbɔn jǐ tɔn ɖɔ Jezu ná kú dó togun ɔ́ bǐ tamɛ. É ka nyí ɖɔ togun énɛ́ ɔ́ kɛ́ɖɛ́ tamɛ wɛ é ná kú dó ǎ; é ná lɛ́ kplé Mawu ví e gbadó lɛ́ɛ bǐ ɖó bǔ. Sín gbe énɛ́ gbe ɖokpóó wɛ yě ko ɖe gbeta tɔ́n ɖɔ émí ná hu i. Énɛ́ ɔ́ wútu wɛ Jezu sɔ́ nɔ zé éɖée xlɛ́ Judéenu lɛ́ɛ agbawungba ǎ, bɔ é kpódó ahwanvú tɔn lɛ́ɛ kpó yi cí to e è nɔ ylɔ́ ɖɔ Eflayímu é mɛ, ɖo malín málín mɛ dó gbětótló mɛ. Dǐndínwáyixwe Jwifu lɛ́ɛ tɔn ko sɛ yá; bɔ to ɔ́ mɛ nu lɛ́ɛ gěgé ko yi Jeluzalɛ́mu bó ná yi slá wǔ, cóbɔ xwe ɔ́ ná wá. Yě ɖo Jezu ba wɛ, bó jɛ kinkanbyɔ́ yěɖée jí ɖo sinsɛnxɔ ɔ́ mɛ ɖɔ: “É ná wá xwe ɔ́ tɛnmɛ ǎ wɛ a? Étɛ́ mi ka mɔ dó nǔ énɛ́ wú?” Vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó ɖé gbeta tɔn, bó ɖɔ: “Ényí mɛ ɖěbǔ tunwun fí e é ɖe ɔ́ hǔn, ní wá ɖɔ, bónú è nǎ yi wlí i.” Dǐndínwáyixwe kpo azǎn ayizɛ́n, bɔ Jezu yi Betaníi fí e Lazáa e é fɔ́n sín kú ɔ́ nɔ́ nɔ é. Ée é yi fínɛ́ ɔ́, yě ná nǔɖuɖu i, bɔ é kpódó Lazáa kpó ɖo ɖuɖu wɛ, bɔ Maati ɖo ká sɛn wɛ. Mali ka sɔ́ célu axivɛ́nu lǐtli vlɔ́, bɔ è sɔ́ nǎ akú dó bló ná, lobo kɔn dó afɔ tɔn lɛ́ɛ jí, bó dɔn ɖa tɔn dó súnsún ná, bɔ célu ɔ́ sín wǎn gba kpé xwé ɔ́ gbe bǐ. Jezu sín ahwanvú Judási Isikaliɔ́ti e ɖo nǎ sa ɛ wɛ ɔ́ ɖɔ: “Étɛ́wú è ma ka sixú sɔ́ célu énɛ́ e è nǎ mɔ gankwɛ́ afɔɖé kanwe ko (250) cóbó xɔ ɔ́ sɔ́ sa, bó má akwɛ́ tɔn nú wamamɔnɔ lɛ́ɛ ǎ?” É ka nyí ɖɔ wamamɔnɔ lɛ́ɛ sín kan vɛ́ wɛ é ɖe, bo ɖɔ mɔ̌ ǎ; lo ɔ́, ajotɔ́ wɛ n'i, ɖó é wɛ nɔ hɛn akwɛ́ yětɔn, bó nɔ ɖo finfin ɖ'é mɛ wɛ. Jezu ka ɖɔ: “Mi jó nyɔ̌nu ɔ́ dó ní hɛn nǔ e é ɖó ɔ́ nú gbe e gbe è nǎ ɖi mì é. Midɛɛ lɛ́ɛ ɔ́, wamamɔnɔ lɛ́ɛ ɖo mi mɛ tɛgbɛ; nyɛ ka ɖo mi mɛ tɛgbɛ ǎ.” Hwenɛ́nu ɔ́, Judéenu lɛ́ɛ gěgé se ɖɔ Jezu ɖo Betaníi, bó nyi ahwan ɖidó dɔ̌n; é ka nyí Jezu kɛ́ɖɛ́ gbé wɛ yě tɔ́n ǎ, lo ɔ́, yě jló ná yi kpɔ́n Lazáa e é fɔ́n sín kú ɔ́ lɔ. Vɔ̌sánú-xwlémawutɔ́gán lɛ́ɛ ka ɖe gbeta tɔ́n, bó ná hu Lazáa lɔmɔ̌, ɖó éyɛ́ wútu wɛ Judéenu lɛ́ɛ gěgé jó vɔ̌sánú-xwlémawutɔ́gán yětɔn lɛ́ɛ dó, bó ɖi nǔ nú Jezu. Ayǐhɔ́ngbe tɔn ɔ́, yě mɛ wɔ̌buwɔ́bú e wá xwe ɖu gbé ɖo Jeluzalɛ́mu lɛ́ɛ se ɖɔ Jezu ja fínɛ́; bɔ yě ba děma hɛn alɔ mɛ, bo ɖo xó sú wɛ káká bo yi kpé e; bo nɔ ɖɔ: “ Ozána! Susu nú Mawu! Susu nú mɛ e jǎwe ɖo Aklúnɔ nyǐkɔ mɛ é: susu nú axɔ́sú Izlayɛ́li tɔn.” Jezu mɔ tócíví ɖokpó bó jínjɔ́n jí, lě e è ko wlán dó Mawuxówéma ɔ́ mɛ gbɔn ɔ́ ɖɔ: “Mi ma ɖi xɛsi ó Sinyɔ́ɔnu lɛ́ɛ mi, axɔ́sú mitɔn ɖíe jǎwe bó jínjɔ́n tócíví jí e!” Ahwanvú Jezu tɔn lɛ́ɛ ka yá wǔ mɔ nǔ jɛ nǔ énɛ́ lɛ́ɛ e ɖo jijɛ wɛ lɛ́ɛ mɛ ǎ; lo ɔ́, hwenu e è sɔ́ Jezu su ɔ́, yě flín ɖɔ nǔ énɛ́ lɛ́ɛ e jɛ ɔ́ bǐ wɛ è ko wlán dó wú tɔn ɖ'ayǐ nǔgbó. Mɛ e ɖo te hwenu e Jezu ylɔ́ Lazáa sín yɔdo mɛ, bo fɔ́n ɛ sín kú ɔ́ ɖɔ nǔ e yě mɔ ɔ́. Nǔ énɛ́ wútu wɛ mɛ lɛ́ɛ nyi ahwan wá kpé e, ɖó yě se ɖɔ é jlɛ́ nǔ mɔ̌hun. Falizyɛn lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Mi ma mɔ din ɖɔ mǐ kún sixú ɖo nǔ ɖěbǔ wú na kpé wɛ ó a? Énɛ́ mɛ lɛ́ɛ bǐ ɖo xwixwedó e wɛ nɛ́!” Glɛ̌sinu ɖé lɛ́ɛ ɖo mɛ e wá Mawu sɛn gbé ɖo Jeluzalɛ́mu xwe ɔ́ hwenu lɛ́ɛ mɛ. Yě yi mɔ Filípu e gosín Bɛtisayida ɖo Galilée yíkúngban jí ɔ́, bo ɖɔ n'i ɖɔ: “Mɛɖaxó, mǐ jló ná mɔ Jezu.” Filípu ka yi ɖó xó énɛ́ te nú Andlé, bɔ yě mɛ we lɛ́ɛ zɔn kpɔ́, bo yi ɖɔ nú Jezu. Jezu ka yí gbe nú yě ɖɔ: “Hwenu e è nǎ sɔ́ Gbɛtɔ́ví ɔ́ su ɔ́ sín gan ɖíe xo lo e. Ma ɖɔ nǔgbó nú mi, ényí jinukún má yi do bó kú ǎ ɔ́, é nɔ ná nǔkún ǎ; kú wɛ é nɔ́ kú, cóbó nɔ gba kún. Mɛ e yí wǎn nú gbɛ éɖée tɔn ɔ́, gbɛ tɔn ná bú dó e; mɛ e ka gbɛ́ wǎn nú gbɛ éɖée tɔn ɖo gbɛ mɛ fí ɔ́ ná hɛn gbɛ tɔn ɖ'ayǐ nú gbɛ mavɔ mavɔ. Mɛ ɖé jló ná nyí mɛsɛntɔ́ ce hǔn, mɛ ɔ́ ní xwedó mì, bɔ fí e un ná nɔ ɔ́ wɛ é lɔmɔ̌ ná nɔ. Ényí mɛɖé nyí mɛsɛntɔ́ ce ɔ́, Tɔ́ ce ná sɔ́ mɛ ɔ́ su.” Jezu ɖɔ: “Din ɔ́, ayi ce bǐ wɛ gbadó. Nɛ̌ un ka sixú ɖɔ gbɔn? Daá, xɔ mì ɖo wǔvɛ́ e jǎwe nú mì é sí wɛ un ka na ɖɔ a? Éeǒ, un ná ɖɔ mɔ̌ ǎ; énɛ́ wútu wɛ un wá. Hǔn Daá, bo sɔ́ nyǐkɔ towe su.” Hwenɛ́nu ɔ́, gbe ɖé ka ɖi sín jǐxwé, bó ɖɔ: “Un ko sɔ́ nyǐkɔ ce sɔ́ su; un ka ná lɛ́ sɔ́ ɛ su.” Ée ahwan e ɖo fínɛ́ lɛ́ɛ se gbe ɔ́, yě ɖɔ: “Jǐ wɛ ɖo gbe dó wɛ.” Mɛ ɖěvo lɛ́ɛ ka ɖɔ: “ Wɛnsagun Mawu tɔn ɖé wɛ ɖɔ xó n'i.” Jezu ka yí xó bo ɖɔ: “Nyɛ wú wɛ gbe énɛ́ ɖi ǎ; midɛɛ lɛ́ɛ wútu wɛ. Hwenu e Mawu ná ɖɔ hwɛ xá gbɛ élɔ́ dó ɔ́ ɖíe su e; din wɛ Mawu ná nya axɔ́sú gbɛmɛ fí tɔn ɔ́ tɔ́n. Hwenu e è nǎ sɔ́ mì sín ayǐkúngban jí dó jǐ ɔ́, un ná dɔn gbɛtɔ́ lɛ́ɛ bǐ dó wǔ.” Kú alɔkpa e kú gbé Jezu ja ɔ́ xó ɖɔ wɛ é ɖe. Mɛ lɛ́ɛ ka yí gbe n'i ɖɔ: “Mǐ xa ɖo Mawuxówéma ɔ́ mɛ ɖɔ Klísu ɔ́ kún ná kú gbeɖé ó, bɔ hwɛ ka ɖo ɖiɖɔ nú mǐ wɛ din ɖɔ è nǎ sɔ́ Gbɛtɔ́ví ɔ́ dó jǐ. Mɛ̌ ká nyí Gbɛtɔ́ví énɛ́?” Jezu ka ɖɔ nú yě ɖɔ: “Wěziza kpo ɖo mi tɛ́ntin nú hwenu kpɛɖé; mi ɖi zɔnlin hwenu e wěziza kpo ɖo mi tɛ́ntin é, bónú zǐnflú má wá fyán mi ó; ɖó mɛ e ɖo zɔnlin ɖi wɛ ɖo zǐnflú mɛ ɔ́ tunwun fí e é xwe ɔ́ ǎ. Hǔn, din e wěziza ɔ́ kpo ɖo te nú mi ɔ́, mi bo ɖi nǔ n'i, bó ná húzú wěziza gbɛtɔ́.” Ée Jezu ɖɔ xó énɛ́ lɛ́ɛ gúdo ɔ́, é gosín fínɛ́, bó sɔ́ éɖée hwlá dó yě. Jezu jlɛ́ nǔ tobutóbú énɛ́ lɛ́ɛ ɖo nukún yětɔn mɛ, có yě ká ɖi nǔ n'i ǎ; bónú xó e Mawu ko ɖɔ ɖ'ayǐ gbɔn gbeyíɖɔ tɔn Ezayíi jí ɔ́ ná dó jɛ; é wɛ nyí ɖɔ: “Aklúnɔ, mɛ̌ ka ɖi nǔ nú xó e mǐ ɖɔ lɛ́ɛ? Mɛ̌ Aklúnɔ ka ɖe hlɔ̌nhlɔ́n tɔn xlɛ́?” Yě sixú ɖi nǔ nǔgbó ǎ, ɖó Ezayíi lɛ́ ɖɔ: “Mawu va nukún yě, nú yě má mɔ nukúnnú ó; é cyɔ́n nǔ ayi yětɔn jí, nú yě ma mɔ nukúnnú jɛ nǔ mɛ ó. Mawu ɖɔ: ‘Un bló mɔ̌, bónú yě ma lɛ́ kɔ wá gɔ̌n ce nú má gbɔ azɔn nú yě ó.’ ” Ezayíi ɖɔ xó énɛ́ lɛ́ɛ, ɖó é mɔ susu e Jezu ɖó é, bó ɖɔ xó dó wǔ tɔn. Nǔ ɖo mɔ̌ có Jwifugán lɛ́ɛ gěgé ɖi nǔ nú Jezu; yě ká ɖe nǔɖiɖi yětɔn xlɛ́ ǎ, Falizyɛn lɛ́ɛ táá wá nya yě tɔ́n sín kplɔ́ngbasá lɛ́ɛ. Đó susu xɔ ɖo gbɛtɔ́ lɛ́ɛ gɔ́n myá nukún nú yě hú susu xɔ ɖo Mawu gɔ́n. Jezu zé gbe yi jǐ, bo ɖɔ: “Mɛ e ɖi nǔ nú mì ɔ́, nyɛ kɛ́ɖɛ́ wɛ é ɖi nǔ ná ǎ; é lɛ́ ɖi nǔ nú mɛ e sɛ́ mì dó é. Mɛ e mɔ mì ɔ́, mɔ mɛ e sɛ́ mì dó ɔ́ lɔmɔ̌. Nyɛ ɔ́, un wá gbɛ ɔ́ mɛ wěziza ɖɔhun, bónú mɛ e ɖi nǔ nú mì ɔ́ ma nɔ zǐnflú mɛ ó. Ényí mɛɖé se xó ce, bó ma bló ɖ'é jí ǎ ɔ́, nyɛ wɛ ná ɖó hwɛ n'i ǎ, ɖó un tɔ́n hwɛ ɖó nú mɛ gbé bó wá gbɛ ɔ́ mɛ ǎ; gbɛ ɔ́ hwlɛngán gbé wɛ un ja bó wá. Mɛ e gbɛ́ mì, bó ma yí xó ce lɛ́ɛ ǎ ɔ́, é ko ɖó nǔ e na ɖɔ hwɛ xá ɛ lɛ́ɛ; xó e un ɖɔ lɛ́ɛ wɛ ja hwɛ ɖɔ xá ɛ gbé ɖo azǎn gǔdo gúdo tɔn ɔ́ gbe. Đó nyɛ ɖésúnɔ sín acɛ mɛ ɖɔ xó dó wɛ un ɖe ǎ; lo ɔ́, nǔ e Tɔ́ e sɛ́ mì dó ɔ́ zɔ́n ɖiɖɔ mì ɔ́ ɖɔ wɛ un ɖe. Un ka tunwun ɖɔ nǔ e Tɔ́ e sɛ́ mì dó ɔ́ zɔ́n ɔ́ nɔ ná gbɛ mavɔ mavɔ. Hǔn, xó e ɖɔ nú mi wɛ un ɖe lɛ́ɛ bǐ ɔ́, lě e Tɔ́ ce zɔ́n mì gbɔn ɔ́ ɖɔ gbɔn wɛ un ɖe.” Dǐndínwáyixwe kpo sɔ, bɔ Jezu tunwun ɖɔ gan e mɛ émí ná gosín gbɛ mɛ fí, bó ná yi Mawu gɔ́n dó ɔ́ xo. É yí wǎn nú mɛ e nyí étɔn ɖo gbɛ ɔ́ mɛ lɛ́ɛ bó ɖó wǎn yíyí nú yě káká yi kú. Jezu kpódó ahwanvú tɔn lɛ́ɛ kpó ɖo gbada nǔɖuɖu ɖu wɛ. Awǒvi ka ko sɔ́ linlin nyanya dó ayi mɛ nú Judási Sinmɔ́ɔ Isikaliɔ́ti ví ɔ́, ɖɔ ní sa Jezu. Ée Jezu ka tunwun ɖɔ Mawu ko sɔ́ nǔ bǐ dó alɔ mɛ nú émí, bɔ gɔ̌n tɔn wɛ e mi gosín, bó ka lɛ́ lɛ́ kɔ xwe gɔ̌n tɔn ɔ́, é sí te sín nǔɖuɖu ɔ́ kɔn, bó ɖe awu tɔn lɛ́ɛ, bó sɔ́ avɔ ɖé sin dó alin. Énɛ́ gúdo ɔ́, é wún sin dó gannú mɛ, bó jɛ afɔ klɔ́ nú ahwanvú tɔn lɛ́ɛ jí ɖokpó ɖokpó, bó nɔ́ dɔn avɔ e é sin dó alin ɔ́ dó súnsún afɔ nú yě. É wá jɛ Sinmɔ́ɔ Piyɛ́ɛ jí, bɔ éyɛ́ ɖɔ: “Aklúnɔ, hwi wɛ ná klɔ́ afɔ nú mì a?” Jezu ka yí gbe n'i ɖɔ: “Nǔ e wa wɛ un ɖe ɔ́, a ko tunwun din ǎ; amɔ̌, a nɔ káká ɔ́, a nǎ wá tunwun.” Piyɛ́ɛ lɛ́ ɖɔ nú Jezu ɖɔ: “A nǎ klɔ́ afɔ nú mì gbeɖé ǎ!” Bɔ Jezu ɖɔ n'i ɖɔ: “Ényí un ma klɔ́ afɔ nú we ǎ ɔ́, hǔn a sɔ́ nyí ahwanvú ce ǎ.” Énɛ́ ɔ́, Sinmɔ́ɔ Piyɛ́ɛ ɖɔ n'i ɖɔ: “Nú ényí mɔ wɛ hǔn Aklúnɔ, é ní ma nyí ɖɔ afɔ ce lɛ́ɛ kɛ́ɖɛ́ wɛ a nǎ klɔ́ ó; klɔ́ alɔ ce lɛ́ɛ, bó klɔ́ ta ce lɔmɔ̌ d'é jí.” Jezu ka yí gbe n'i ɖɔ: “Mɛ e ko lɛ wǔ ɔ́, afɔ kɛ́ɖɛ́ jɛ́n kpo n'i bɔ é ná klɔ́, bó ná mɛ́; ɖó mǐmɛ́ jí wɛ mi ko ɖe; amɔ̌ mi bǐ ka wɛ ǎ.” Jezu ɖɔ mɔ̌, ɖó é ko tunwun mɛ e ɖo nǎ sa ɛ ɖu wɛ ɖo yě mɛ é; nǔ e wú é ɖɔ é kún nyí yě bǐ wɛ nyí mɛ mímɛ́ ó ɔ́ nɛ́. Ée é klɔ́ afɔ nú yě bǐ yi fó ɔ́, é lɛ́ sɔ́ awu tɔn lɛ́ɛ dó, bó yi jínjɔ́n tɛn tɔn mɛ ɖo nǔɖuɖu ɔ́ kɔn, bó kanbyɔ́ yě ɖɔ: “Mi ka mɔ nǔ jɛ nǔ e un bló nú mi din ɔ́ mɛ a? Mi nɔ ylɔ́ mì ɖɔ ‘ Mɛ̌si ’, bó nɔ́ ylɔ́ mì ɖɔ ‘Aklúnɔ’; hwɛ mitɔn jɔ, ɖó nǔ e un nyí ɔ́ nɛ́. Hǔn, ényí nyɛ mɛ e nyí Aklúnɔ mitɔn, bó nyí Mɛ̌si mitɔn ɔ́ ka klɔ́ afɔ nú mi ɔ́, é jɛ xá ɖɔ mi ná nɔ́ klɔ́ afɔ nú miɖée. Đó kpɔ́ndéwú ɖé wɛ é nyí, bɔ un ná mi, bónú mi lɔmɔ̌ ná nɔ́ bló lě e un bló gbɔn nú mi é. Má ɖɔ nǔgbó nú mi: mɛsɛntɔ́ nɔ hú gǎn gǎn tɔn ǎ; mɔ̌ ɖokpó ɔ́, wɛnsagun nɔ hú gǎn mɛ e sɛ́ ɛ dó ɔ́ ǎ. Nǔ lɛ́ɛ bǐ mɛ nɛ́ mi mɔ nukúnnú jɛ nɛ́; ényí mi bló ɖ'é jí ɔ́, é ná nyɔ́ nú mi. Mi bǐ xó ɖɔ wɛ un ka ɖe ǎ, ɖó un tunwun mɛ e un cyán lɛ́ɛ; nǔ e Mawuxówéma ɔ́ ka ko ɖɔ ɔ́ ɖó ná jɛ. É wɛ nyí ɖɔ: ‘Mɛ e nɔ ɖu nǔɖuɖu ce ɔ́ húzú kpan nukɔn mì.’ Un ɖo ɖiɖɔ nú mi wɛ din, cóbónú é ná wá jɛ; bónú é wá jɛ ɔ́, mi na ɖi nǔ ɖɔ nyɛ wɛ nyí mɛ e un nyí é. Má ɖɔ nǔgbó nú mi: mɛ e yí mɛ e un sɛ́ dó ɔ́ ɖěbǔ sín jǒnɔ ɔ́, nyɛ ɖésúnɔ wɛ é yí, bɔ mɛ e ka yí mì ɔ́, mɛ e sɛ́ mì dó ɔ́ wɛ é yí.” Ée Jezu ɖɔ xó énɛ́ lɛ́ɛ gúdo ɔ́, ayi tɔn bǐ gbadó, bɔ é ɖɔ: “Má ɖɔ nǔgbó nú mi: mɛ ɖokpó ɖo mi mɛ, bó ná sa mì.” Ahwanvú tɔn lɛ́ɛ ka tunwun mɛ e xó ɖɔ wɛ é ɖe ɖo yě mɛ ɔ́ ǎ, bɔ yě jɛ yěɖée kpɔ́n jí. Ahwanvú Jezu tɔn e é ɖó wǎn yíyí ná tlala ɔ́ ka ɖo akpá tɔn ɖo nǔɖuká ɔ́ kɔn. Sinmɔ́ɔ Piyɛ́ɛ sɔ́ ta dó ɖɔ xó n'i ɖɔ ní kanbyɔ́ Jezu ɖɔ mɛ xó ɖɔ wɛ é ɖe ají. Éyɛ́ ka nya dó Jezu sín akɔ́nnu, bó kanbyɔ́ ɛ ɖɔ: “Aklúnɔ, mɛ̌ ka nyí mɛ ɔ́?” Bɔ Jezu yí gbe n'i ɖɔ: “Mɛ e un ná sɔ́ wɔ̌xúxú gǒ ɖokpó, bó sún nǔsúnnú, bó sɔ́ ná ɔ́, mɛ ɔ́ wɛ.” Nǔgbó ɔ́, Jezu sɔ́ wɔ̌xúxú gǒ ɖokpó, bó sún nǔsúnnú, bó sɔ́ nú Judási Sinmɔ́ɔ Isikaliɔ́ti ví ɔ́. Ée Judási yí wɔ̌xúxú ɔ́, Satáan wá ayi tɔn mɛ, bɔ Jezu ɖɔ n'i ɖɔ: “Nǔ e ná bló wɛ a ɖe ɔ́, yǎ wǔ bló.” Yě mɛ e ɖo nǔ ɖu xá Jezu wɛ lɛ́ɛ ɖěbǔ mɔ nǔ jɛ nǔ e wú Jezu ɖɔ xó énɛ́ nú Judási ɔ́ mɛ ǎ. Ée é ka nyí Judási wɛ nɔ hɛn akwɛ́ yětɔn ɔ́, mɛɖé lɛ́ɛ vɛdó ɖɔ é ní yi xɔ nǔ e è nǎ dó ɖu xwe ɔ́ ná ɔ́, abǐ é ní ná nǔɖé wamamɔnɔ lɛ́ɛ ɖɔ n'i wɛ é ɖe sín. Ée Judási yí wɔ̌xúxú ɔ́, é tɔ́n tlóló. Zǎn ko kú hwenɛ́nu. Ée Judási tɔ́n ɔ́, Jezu yí xó bó ɖɔ: “Din ɔ́, Gbɛtɔ́ví ɔ́ ko xɔ susu, bɔ Mawu ko xɔ susu gbɔn jǐ tɔn. Ée Mawu xɔ susu gbɔn vǐ tɔn gbla mɛ ɔ́, Mawu lɔ ná sɔ́ vǐ tɔn su ɖo é ɖésúnɔ gɔ́n; é ka ná sɔ́ ɛ su ɖo malín málín mɛ. Yɔkpɔ́ ce lɛ́ɛ mi, un sɔ́ ɖo mi gɔ́n ná nɔ wɛ gěgé ɖé ǎ. Mi ná ba mì. Xó ɖokpó e un ko ɖɔ nú Jwifugán lɛ́ɛ ɔ́ ɖɔ nú mi lɔmɔ̌ wɛ un ɖe. É wɛ nyí ɖɔ: ‘Fí e un xwe ɔ́, mi ɖě sixú yi ǎ.’ Un ɖo sɛ́n yɔ̌yɔ́ ɖokpó ná mi wɛ: mi yí wǎn nú miɖée. Mi ɖó ná yí wǎn nú miɖée lě e un yí wǎn nú mi gbɔn é. Wǎn yíyí e mi ná ɖó nú miɖée ɔ́, wɛ ná ɖe xlɛ́ mɛ lɛ́ɛ bǐ ɖɔ mi nyí ahwanvú ce nǔgbó.” Sinmɔ́ɔ Piyɛ́ɛ kanbyɔ́ Jezu ɖɔ: “Aklúnɔ, fítɛ́ a ka xwe?” Jezu ka yí gbe n'i ɖɔ: “Fí e un xwe ɔ́, a sixú xwedó mì yi din ǎ; lo ɔ́, é ko wá yá ɔ́, a nǎ xwedó mì yi.” Piyɛ́ɛ lɛ́ kanbyɔ́ Jezu ɖɔ: “Aklúnɔ, étɛ́wútu un ma ka sixú xwedó we yi din ǎ? Un ɖo gbesisɔ mɛ, bó ná kú ɖó ta towe mɛ.” Jezu ka yí gbe n'i ɖɔ: “A ɖo gbesisɔ mɛ bó ná kú ɖó ta ce mɛ nǔgbó a? Má ɖɔ nǔgbó nú we: cóbónú kokló ná kɔ́ así ɔ́, a nǎ ko gbɛ́ azɔn atɔn ɖɔ émí kún tunwun mì ó.” Jezu ɖɔ nú ahwanvú tɔn lɛ́ɛ ɖɔ: “Mi ma nú ayi mitɔn gbadó ó. Mi ɖi nǔ nú Mawu, bó ɖi nǔ nú nyɛ lɔmɔ̌. Nɔtɛn gěgé wɛ ɖo Tɔ́ ce xwé bɔ un ná yi bló tɛnmɛ ɖó ɖ'ayǐ nú mi; ényí nǔ ma nyí mɔ̌ ǎ ɔ́, un ná ɖɔ nú mi ǎ. Nú un ko yi bló nɔtɛn ɖó ɖ'ayǐ nú mi vɔ ɔ́, un ná lɛ́ kɔ wá kplá mi, bɔ fí e un ɖe ɔ́, mi lɔmɔ̌ ná nɔ fínɛ́. Mi ko tunwun ali e kplá mɛ yi fí e un xwe é.” Tɔmáa ka ɖɔ: “Aklúnɔ, mǐ tunwun fí e a xwe ɔ́ ǎ, nɛ̌ mǐ ka sixú tunwun ali ɔ́ gbɔn?” Jezu ka yí gbe n'i ɖɔ: “Nyɛ wɛ nyí ali ɔ́, bó nyí nǔgbó ɔ́, bó ka lɛ́ nyí gbɛ ɔ́. Mɛɖěbǔ sixú yi Tɔ́ ɔ́ gɔ́n nyɛ mɛ vo ǎ. Ényí mi tunwun mì ɔ́, mi ná tunwun Tɔ́ ce lɔmɔ̌; sín din ɔ́, mi tunwun i, bó mɔ ɛ.” Filípu ka ɖɔ n'i ɖɔ: “Aklúnɔ, xlɛ́ Tɔ́ ɔ́ mǐ; nǔ e ba wɛ mǐ ɖe ɔ́ bǐ nɛ́.” Jezu ka yí gbe n'i ɖɔ: “Filípu, sín tɛgbɛ wɛ un ko ɖo kpɔ́ xá mi, bɔ a ka ko tunwun mì káká jɛ din ǎ. Mɛ e mɔ mì ɔ́ ko mɔ Tɔ́ ɔ́; aniwútu a ka ɖɔ: ‘Xlɛ́ Tɔ́ ɔ́ mǐ?’ A ɖi ɖɔ un ɖo Tɔ́ ɔ́ mɛ, bɔ Tɔ́ ɔ́ ɖo nyɛ ɖésúnɔ mɛ ǎ cé? Xó e ɖɔ nú mi wɛ un ɖe lɛ́ɛ ɔ́, xo ce mɛ wɛ un nɔ kpɔ́n kpowun, bó nɔ́ ɖɔ ǎ; lo ɔ́, Tɔ́ e ɖo nyɛ mɛ ɔ́ sín nǔwiwa wɛ. Mi ɖi xó e ɖɔ nú mi wɛ un ɖe, bó ɖɔ: un ɖo Tɔ́ ɔ́ mɛ, bɔ Tɔ́ ɔ́ ka ɖo nyɛ ɖésú mɛ é. Nú mi na bo ma ka jló ná ɖi xó ce ǎ hǔn, mi bo kpɔ́n dó nǔ e wa wɛ un ɖe lɛ́ɛ wú vɔ́vɔ́, bó ɖi nǔ nú mì. Ma ɖɔ nǔgbó nú mi: mɛ e ɖi nǔ nú mì ɔ́ ná jlɛ́ nǔ e jlɛ́ wɛ un ɖe lɛ́ɛ, bó ná lɛ́ jlɛ́ hú mɔ̌; ɖó un ko xwe Tɔ́ ɔ́ gɔ́n. Bɔ nǔ e mi na byɔ́ gbɔn nyǐkɔ ce mɛ ɔ́, un ná ná bǐ mi, bónú Tɔ́ ɔ́ ná sixú xɔ susu gbɔn Vǐ ɔ́ jí. Ényí mi ylɔ́ nyǐkɔ ce, bó byɔ́ nǔ ɖěbǔ ɔ́, un ná bló nú mi.” “Nú mi yí wǎn nú mì ɔ́, mi ná nyi sɛ́n ce lɛ́ɛ. Nyɛ ka ná sa vo nú Tɔ́ ɔ́, bɔ é ná sɛ́ gbɔdónúmɛtɔ́ ɖěvo dó mi, bɔ é ná nɔ kpɔ́ xá mi tɛgbɛ. Éyɛ́ wɛ nyí Yɛ nǔgbónɔ, bɔ mɛ e nyí gbɛ ɔ́ tɔn lɛ́ɛ sixú yí i ǎ; ɖó yě sixú mɔ ɛ ǎ; yě ká lɛ́ sixú tunwun i ǎ. Midɛɛ lɛ́ɛ ɔ́, mi ka ko tunwun i, ɖó é ɖo kpɔ́ xá mi, bó ɖo mi mɛ. “Un ná jǒ mi dó nyi tɔ́cyɔvǐ nɔcyɔvǐ gbɛ mɛ ǎ; un ná lɛ́ wá mi gɔ́n. Zaanɖé din ɔ́, mɛ e nyí gbɛ ɔ́ tɔn lɛ́ɛ sɔ́ ná mɔ mì ǎ; amɔ̌, midɛɛ lɛ́ɛ ɔ́, mi ná mɔ mì; ɖó un ɖo gbɛ, bɔ mi lɔmɔ̌ mi ná nɔ gbɛ. Azǎn énɛ́ gbe ka wá su ɔ́, mi na tunwun ɖɔ un ɖo Tɔ́ ce mɛ, bɔ mi ɖo nyɛ mɛ, bɔ nyɛ ɖo mi mɛ. “Mɛ e hɛn sɛ́n ce lɛ́ɛ ayi mɛ, bó nɔ́ nyi yě lɛ́ɛ ɔ́, mɛ énɛ́ wɛ yí wǎn nú mì. Tɔ́ ce ná yí wǎn nú mɛ e yí wǎn nú mì ɔ́, bɔ nyɛ lɔ ná yí wǎn n'i, bó ná ɖe nyɛɖée xlɛ́ ɛ.” Judi ka kanbyɔ́ Jezu ɖɔ: “Aklúnɔ, nɛ̌ ka gbɔn bɔ mǐdɛɛ lɛ́ɛ kɛ́ɖɛ́ jɛ́n a nǎ ɖe hwiɖée xlɛ́, bó ma ka ná ɖe hwiɖée xlɛ́ gbɛtɔ́ lɛ́ɛ bǐ ǎ?” (É ka nyí Judási Isikaliɔ́ti wɛ ǎ). Bɔ Jezu ka yí gbe n'i ɖɔ: “Ényí mɛɖé yí wǎn nú mì ɔ́, é ná bló ɖó xó ce lɛ́ɛ jí, bɔ Tɔ́ ce na yí wǎn n'i, bɔ mǐ ná wá gɔ̌n tɔn, bó ná nɔ kpɔ́ xá ɛ. Mɛ e ma ka yí wǎn nú mì ǎ ɔ́, é nɔ bló ɖó xó ce lɛ́ɛ jí ǎ. Nyɛ ɖésúnɔ gɔ́n wɛ xó e ɖɔ nú mi wɛ un ɖe lɛ́ɛ ka nɔ gosín ǎ, Tɔ́ ce e sɛ́ mì dó ɔ́ gɔ́n wɛ xó énɛ́ lɛ́ɛ nɔ gosín. “Un ɖɔ xó énɛ́ lɛ́ɛ nú mi, hwenu e un kpo ɖo kpɔ́ xá mi é. Lo ɔ́, mɛ e ná d'alɔ mi ɔ́, Yɛsinsɛn e Tɔ́ ɔ́ ná sɛ́ dó mi ɖo nyǐkɔ ce mɛ é wɛ; é ná kplɔ́n nǔ bǐ mi, bó ná flín nǔ e un ɖɔ nú mi lɛ́ɛ bǐ mi. “Fífá wɛ un jó dó nú mi; fífá ce wɛ un ná mi. Un ná mi lě e gbɛ ɔ́ nɔ ná mɛ gbɔn ɔ́ ǎ; ado ma hu mi ó; xɛsi ma ɖi mi ó. Mi se bɔ un ɖɔ nú mi ɖɔ: ‘Un xweyǐgbe; un ka ná lɛ́ kɔ wá mi gɔ́n.’ Ényí ɖɔ mi yí wǎn nú mì wɛ ɔ́, xomɛ wɛ ná ko hun mi, ɖó Tɔ́ ɔ́ gɔ́n e un xwe ɔ́ wútu, ɖó Tɔ́ ɔ́ hú gǎn mì. Un ko ɖɔ nǔ énɛ́ lɛ́ɛ nú mi din, cóbɔ yě ná wá jɛ, lobo nú yě wá jɛ ɔ́, mi ná ɖi nǔ. Un sɔ́ ɖo xó gěgé ɖé ná ɖɔ xá mi wɛ ǎ, ɖó axɔ́sú gbɛ élɔ́ tɔn ko jǎwe; é ɖó acɛ ɖěbǔ ɖo jǐ ce ǎ. Amɔ̌, nú gbɛtɔ́ lɛ́ɛ ná dó tunwun ɖɔ un yí wǎn nú Tɔ́ ɔ́, un ná wa nǔ lě e Tɔ́ ɔ́ zɔ́n mì gbɔn é; mi sí te nú mǐ ná gosín fí.” “Nyɛ wɛ nyí vǐwuntín titewungbe ɔ́, bɔ Tɔ́ ce ka nyí vǐwunglejíkpɔ́ntɔ́ ɔ́. Ala ɖěbǔ ɖo wú ce, bó ma nɔ ná sínsɛ́n ǎ ɔ́, tɔ́ ce nɔ sɛ́n síin; ée ka nɔ́ ná sínsɛ́n ɔ́, é nɔ́ jlá ala tɔn lɛ́ɛ bónú é ná sixú lɛ́ sɛ́n d'é jí. Midɛɛ lɛ́ɛ ɔ́, xó e un ɖɔ nú mi ɔ́ zɔ́n, bɔ mi ko húzú mɛ mímɛ́. Mi nɔ nyɛ mɛ, lě e nyɛ ɖo mi mɛ ɔ́ ɖɔhun, ɖó vǐwuntín sín ala sixú sɛ́n é ɖóɖó, ma nɔ vǐwuntín dodó ɔ́ wú ǎ; mɔ̌ ɖokpó ɔ́, mi lɔmɔ̌ mi ma nɔ nyɛ mɛ ǎ ɔ́, mi sixú ná sínsɛ́n ɖěbǔ ǎ. “Nyɛ wɛ nyí vǐwuntín dodó ɔ́, bɔ midɛɛ lɛ́ɛ ka nyí ala lɛ́ɛ. Mɛ e ɖo nyɛ mɛ, bɔ nyɛ lɔ ka ɖo éyɛ́ mɛ ɔ́, é ná sɛ́n gěgé. Đó nyɛ mɛ vo ɔ́, mi sixú kpé nǔ ɖěbǔ wú bo wa ǎ. Mɛ e ma ɖo nyɛ mɛ ǎ ɔ́, Mawu nɔ sɔ́ ɛ nyi gbě lě e è nɔ sɛ́n atínla, bɔ yě nɔ xú, bɔ è nɔ bɛ́ kɔn nyi myɔ mɛ, bɔ yě nɔ ji zo é ɖɔhun. Ényí mi nɔ nyɛ mɛ, bónú xó ce lɛ́ɛ jínjɔ́n ayi mɛ nú mi ɔ́, mi byɔ́ nǔ e jló mi ɔ́, mi ná mɔ yí. Ényí mi ná sínsɛ́n gěgé ɔ́, susu wɛ é ná nyí nú Tɔ́ ce, bɔ mi ná nyí ahwanvú ce. Lě e Tɔ́ ɔ́ yí wǎn nú mì gbɔn ɔ́, nyɛ lɔ un yí wǎn nú mi; mi bo nɔ wǎn yíyí ce mɛ. Ényí mi nyi sɛ́n ce lɛ́ɛ ɔ́, mi ná nɔ wǎn yíyí ce mɛ, lě e nyɛ nyi Tɔ́ ce sín sɛ́n lɛ́ɛ, bó ɖo wǎn yíyí tɔn mɛ ɔ́ ɖɔhun. “Un ɖɔ mɔ̌ nú mi, bónú xomɛ ní hun mi, lě e xomɛ nɔ hun nyɛ gbɔn é, bónú awǎjijɛ mitɔn ɔ́, nǔ bǐ ní vɔ ɖ'é wú. Sɛ́n ce ka ɖíe: mi yí wǎn nú miɖée, lě e un yí wǎn nú mi gbɔn é. Wǎn yíyí nú mɛ ɖě sɔ́ hú è sɔ́ gbɛ mɛɖée tɔn dó sá vɔ̌ dó xɔ́ntɔn mɛtɔn lɛ́ɛ tamɛ ǎ. Ényí mi nɔ bló nǔ e un zɔ́n mi lɛ́ɛ ɔ́, xɔ́ntɔn ce wɛ mi nyí. Un sɔ́ nɔ ylɔ́ mi ɖɔ mɛsɛntɔ́ ǎ, ɖó mɛsɛntɔ́ nɔ mɔ do nú nǔ e wa wɛ gǎn tɔn ɖe ɔ́ ǎ. Un nɔ ylɔ́ mi ɖɔ xɔ́ntɔn, ɖó nǔ e un se ɖo Tɔ́ ce nu lɛ́ɛ bǐ wɛ un ɖe xlɛ́ mi. Mi wɛ sɔ́ mì ǎ; lo ɔ́, nyɛ wɛ cyán mi, bó sɛ́ mi dó gbɛ ɔ́ mɛ, bónú mi ná sɛ́n, bó gba kún káká sɔ́yi; énɛ́ ɔ́, mi byɔ́ nǔ ɖěbǔ Tɔ́ ɔ́ ɖo nyǐkɔ ce mɛ ɔ́, é ná ná bǐ mi. Nǔ e zɔ́n mi wɛ un ɖe ɔ́ wɛ nyí ɖɔ mi ní ɖó wǎn yíyí nú miɖée.” “Ényí mɛ e nyí gbɛ ɔ́ tɔn lɛ́ɛ gbɛ́ wǎn nú mi hǔn, mi tunwun ɖɔ yě ko gbɛ́ wǎn nú nyɛ jɛ nukɔn nú mi. Ényí gbɛ ɔ́ tɔn wɛ mi nyí ɔ́, mɛ e nyí gbɛ ɔ́ tɔn lɛ́ɛ na ko yí wǎn nú mi. Lo ɔ́, nyɛ cyán mi, bó ɖe mi sín gbɛ ɔ́ mɛ, bɔ mi sɔ́ nyí gbɛ ɔ́ tɔn ǎ; énɛ́ ɔ́ wútu wɛ mɛ e nyí gbɛ ɔ́ tɔn lɛ́ɛ gbɛ́ wǎn nú mi. Mi vɛ́ nɔ flín xó e un ko ɖɔ nú mi é: ‘Mɛsɛntɔ́ nɔ hú gǎn gǎn tɔn ǎ.’ Ényí yě dó ya nú mì ɔ́, yě ná dó ya nú mi lɔmɔ̌; yě ká xwedó xó ce lɛ́ɛ ɔ́, yě ná xwedó xó mi lɔmɔ̌ tɔn lɛ́ɛ. Nyɛ wútu wɛ è nǎ wa nǔ énɛ́ lɛ́ɛ bǐ xá mi, ɖó yě tunwun mɛ e sɛ́ mì dó ɔ́ ǎ. Ényí un ma ko wá, bó ɖɔ xó nú yě ǎ ɔ́, yě ná nyí hwɛhutɔ́ ǎ; din e un ka wá, bó ɖɔ xó nú yě ɔ́, yě sɔ́ sixú mɔ nǔ ɖěbǔ ɖɔ, bó dó hwlɛ́n yěɖée gán sín hwɛ yětɔn lɛ́ɛ mɛ ǎ. Mɛ e gbɛ́ wǎn nú mì ɔ́, é gbɛ́ wǎn nú Tɔ́ ce lɔmɔ̌. Ényí un ma ko jlɛ́ nǔ e mɛ ɖěbǔ ma jlɛ́ kpɔ́n gbeɖé ɔ́ ɖo nukún yětɔn mɛ ǎ ɔ́, yě ná nyí hwɛhutɔ́ ǎ. Amɔ̌, din ɔ́, yě mɔ nǔjlɛ́jlɛ́ énɛ́ lɛ́ɛ có bó ka gbɛ́ wǎn nú nyɛ, bó lɛ́ gbɛ́ wǎn nú Tɔ́ ce. Lo ɔ́, nǔ e è wlán dó sɛ́nwéma yětɔn mɛ ɔ́ ná dó jɛ wútu wɛ; é wɛ nyí ɖɔ: ‘Yě gbɛ́ wǎn nú mì nǔɖé ma sín nǔɖé wú.’ “Gbɔdónúmɛtɔ́ ɔ́ ná wá. Yɛ e nyí nǔgbó, bó gosín Tɔ́ ɔ́ gɔ́n ɔ́ wɛ. Un ná sɛ́ ɛ dó mi sín Tɔ́ ɔ́ gɔ́n. Hwenu e é ná wá ɔ́, é ná ɖe kúnnu nú mì; bɔ mi lɔmɔ̌ ná ɖe kúnnu nú mì, ɖó mi ko ɖo kpɔ́ xá mì sín bǐbɛ́mɛ. “Un ɖɔ xó énɛ́ lɛ́ɛ bǐ nú mi din, bónú nǔɖiɖi mitɔn ní ma jɛ ayǐ ó. È nǎ wá ɖe mi sín kplɔ́ngbasá lɛ́ɛ. Gan ɔ́ ko ɖo nǎ xo wɛ lɔ, bɔ mɛ ɖěbǔ hu mi ɔ́, mɛ ɔ́ ná vɛdó ɖɔ Mawu sín azɔ̌ wa wɛ émí ɖe nɛ́ sín. Yě ná wa nǔ gbɔn mɔ̌, ɖó yě tunwun Tɔ́ ce ǎ; yě ká tunwun nyɛ lɔmɔ̌ ǎ. Hǔn, un ɖo xó élɔ́ lɛ́ɛ ɖɔ nú mi wɛ, bónú gan tɔn wá xo ɔ́, mi ná flín ɖɔ un ko ɖɔ xó énɛ́ lɛ́ɛ nú émí ɖ'ayǐ.” “Un ɖɔ xó élɔ́ lɛ́ɛ nú mi sín do ǎ, ɖó un ɖo kpɔ́ xá mi. Amɔ̌, din ɔ́, un xwe mɛ e sɛ́ mì dó ɔ́ gɔ́n, bɔ mɛ ɖěbǔ ka ɖo mi mɛ, bó kanbyɔ́ mì ɖɔ fítɛ́ a xwe ají ǎ. Ée un ɖɔ mɔ̌ nú mi ɔ́, wǔ jɛ́n kú mi, có nǔgbó ɖɔ nú mi wɛ un ɖe: yiyi ce ná ɖó le nú mi hú; ɖó ényí un ma yi ǎ ɔ́, gbɔdónúmɛtɔ́ ɔ́ ná wá mi gɔ́n ǎ. Un ka yi ɔ́, un ná sɛ́ ɛ dó mi. Nú é ko wá ɔ́, é ná ɖe xlɛ́ gbɛtɔ́ lɛ́ɛ ɖɔ linlin e yě ɖó dó hwɛhuhu wú, bó ɖó dó jlǒ Mawu tɔn kpódó hwɛɖiɖɔ kpán wú ɔ́ kún sɔgbe ó. Linlin e yě ɖǒ dó hwɛhuhu wú ɔ́ kún sɔgbe ó; ɖó yě ɖi nǔ nú mì ǎ. Linlin e yě ɖǒ dó jlǒ Mawu tɔn wú ɔ́ sɔgbe ǎ, ɖó un xwe Tɔ́ ce gɔ́n, bɔ mi sɔ́ ná mɔ mì ɖě ǎ. Linlin e yě ɖǒ dó hwɛɖiɖɔ Mawu tɔn wú ɔ́ sɔgbe ǎ, ɖó Mawu ko ɖó hwɛ nú axɔ́sú gbɛmɛ fí tɔn ɔ́. “É kpo nǔ gěgé, bɔ un ɖó ná ɖɔ nú mi; lo ɔ́, mi sixú mɔ nukúnnú jɛ yě mɛ ǎ. Hwenu e Yɛ e nɔ ɖe nǔgbó Mawu tɔn xlɛ́ ɔ́ ná wá ɔ́, é ná bló, bɔ mi ná tunwun nǔgbó ɔ́ bǐ; ɖó acɛ é ɖésúnɔ tɔn mɛ wɛ é ná ɖɔ xó dó ǎ; lo ɔ́, nǔ e é se ɔ́ wɛ é ná ɖɔ, bó ná ɖɔ nǔ e ɖo na jɛ wɛ lɛ́ɛ nú mi. É ná sɔ́ mì su, ɖó nǔ e un ɖɔ n'i ɔ́ wɛ é ná ɖɔ nú mi. Nǔ e nyí Tɔ́ ɔ́ tɔn ɔ́ bǐ wɛ nyí ce. Énɛ́ wútu wɛ un ɖɔ nú mi ɖɔ: nǔ e un ɖɔ n'i ɔ́ wɛ é ná ɖɔ nú mi.” “Zaanɖé din ɔ́, mi na ba mì kpo; é ka nɔ zaanɖé ɔ́, mi ná mɔ mì, ɖó un xwe Tɔ́ ce gɔ́n.” Ée Jezu ɖɔ mɔ̌ ɔ́, ahwanvú tɔn lɛ́ɛ ɖěe jɛ nǔ kanbyɔ́ yěɖée jí, bo nɔ ɖɔ: “Étɛ́ ɖɔ nú mǐ wɛ é ka ɖe, bo ɖɔ: ‘Zaanɖé din ɔ́, mi na ba mì kpo; zaanɖé din ɔ́, mi ná mɔ mì; bo ka lɛ́ ɖɔ: ɖó un xwe Tɔ́ ɔ́ gɔ́n!’ Ani ka nyí: ‘Zaanɖé din’ ɔ́? Mǐ ma mɔ nǔ jɛ xó e ɖɔ nú mǐ wɛ é ɖe ɔ́ mɛ nɛ́!” Jezu ka tunwun ɖɔ yě jló ná kan nǔ byɔ́ émí, bó ɖɔ nú yě ɖɔ: “Ée un ɖɔ nú mi ɖɔ zaanɖé din ɔ́, mi ná ba mì kpo, é ka lɛ́ nɔ zaanɖé ɔ́ mi ná mɔ mì ɔ́, wú kan nǔ byɔ́ miɖée dó wɛ mi ɖe a?” Má ɖɔ nǔgbó nú mi: mi ná nɔ́ ɖo avǐ ya wɛ, bó ná nɔ́ ɖo alě ná wɛ, bɔ mɛ e nyí gbɛmɛ fí tɔn lɛ́ɛ ka ná nɔ́ ɖo awǎ jɛ wɛ. Mi ná nɔ aluwɛ mɛ, lo ɔ́, aluwɛ mitɔn ná wá húzú awǎjijɛ nú mi. Nyɔ̌nu ja vǐ ji gbé ɔ́, wǔ nɔ́ kú i, ɖó wǔvɛ́ mimɔ tɔn sín gan wɛ xo; é ka ji vǐ ɔ́ gúdo ɔ́, é sɔ́ nɔ́ flín wǔvɛ́ e é mɔ lɛ́ɛ ǎ, xomɛ nɔ hun i ɖó vǐ e wá gbɛ ɔ́ wú. Mɔ̌ ɖokpó ɔ́, mi lɔmɔ̌ ɖo aluwɛ mɛ din; lo ɔ́, un ná lɛ́ wá mɔ mi, bɔ mi ná mɔ awǎjijɛ, bɔ mɛ ɖěbǔ sɔ́ ná sixú ɖe awǎjijɛ énɛ́ sín ayi mitɔn mɛ ǎ. “Azǎn énɛ́ gbe ɔ́, mi sɔ́ ná kan nǔ ɖěbǔ byɔ́ mì ǎ. Má ɖɔ nǔgbó nú mi: nǔ e mi ná byɔ́ Tɔ́ ɔ́, é ná ná bǐ mi ɖó nyǐkɔ ce mɛ. Amɔ̌, káká wá jɛ din ɔ́, mi ko byɔ́ nǔ ɖěbǔ ɖo nyǐkɔ ce mɛ ǎ; mi byɔ́, bó ná mɔ yí, bónú awǎjijɛ mitɔn ɔ́, nǔ bǐ na vɔ ɖ'é wú.” “Lǒ wɛ un dó, bo dó ɖɔ xó énɛ́ lɛ́ɛ bǐ nú mi; lo ɔ́, é ná wá jɛ hweɖénu, bɔ un sɔ́ ná dó lǒ ɖě dó ɖɔ xó nú mi ǎ. Hwenɛ́nu ɔ́, un ná ɖɔ Tɔ́ ɔ́ sín xó nú mi sɔ́ nyi wɛn. Azǎn énɛ́ gbe ɔ́, mi ná nɔ́ ylɔ́ nyǐkɔ ce dó byɔ́ nǔ Tɔ́ ɔ́. Ényí un ná sa vo nú Tɔ́ ɔ́ dó ta mitɔn mɛ ɖɔ wɛ un ɖe ǎ. Đó é ɖésúnɔ yí wǎn nú mi, ɖó mi yí wǎn nú mì, bó ka ɖi nǔ ɖɔ Mawu wɛ sɛ́ mì dó. Un gosín Tɔ́ ɔ́ gɔ́n, bó wá gbɛ mɛ fí; din ɔ́, un ɖo gbɛ ɔ́ mɛ gosín wɛ, bó xwe Tɔ́ ɔ́ gɔ́n.” Ahwanvú tɔn lɛ́ɛ ka ɖɔ n'i ɖɔ: “Din ɔ́, a nɔ ɖɔ xó sɔ́ nyi wɛn, bo sɔ́ nɔ dó lǒ ǎ. Mǐ mɔ din ɖɔ a tunwun nǔ bǐ; é sɔ́ byɔ́ ɖɔ mɛ ɖěbǔ ní kan nǔɖé byɔ́ we ǎ. Énɛ́ ɔ́ wɛ zɔ́n bɔ mǐ ɖi nǔ ɖɔ a gosín Mawu gɔ́n nǔgbó.” Jezu ka ɖɔ nú yě ɖɔ: “Mi ɖi nǔ lo a? Hwenu ɖo nǎ su wɛ; hwe ɔ́ nu jɛ́n ka ko ɖíe, bɔ è nǎ gba mi dó, bɔ mɛ ɖokpó ɖokpó ná yi xwé tɔn gbe, bó ná jó nyɛ ɖokpónɔ dó; amɔ̌, un ɖo nyɛ ɖokpónɔ ǎ, ɖó Tɔ́ ɔ́ ɖo kpɔ́ xá mì. Un ɖɔ nǔ énɛ́ lɛ́ɛ nú mi, bónú mi ná ɖó vivo ɖo nyɛ mɛ. Mi ná mɔ wǔvɛ́ ɖo gbɛ ɔ́ mɛ; lo ɔ́, mi kpan akɔ́n, ɖó un ko ɖu ɖo gbɛ ɔ́ jí.” Ée Jezu ɖɔ xó énɛ́ lɛ́ɛ ɔ́, é kpɔ́n jǐ, bó ɖɔ: “Daá, hwe ɔ́ nu ɖíe su e; sɔ́ Vǐ towe su, bónú Vǐ towe lɔ ná sɔ́ we su. Đó a nǎ ɛ acɛ ɖo gbɛtɔ́ lɛ́ɛ bǐ jí, bónú é ná ná gbɛ mavɔ mavɔ mɛ e a sɔ́ dó así n'i lɛ́ɛ bǐ sésé. Gbɛ mavɔ mavɔ ɔ́ wɛ nyí ɖɔ yě ní tunwun we, bó tunwun ɖɔ hwi wɛ nyí Mawu nǔgbó ɖokpó e tíin é, bó lɛ́ tunwun Jezu Klísu e a sɛ́ dó gbɛ ɔ́ mɛ é. Un wa azɔ̌ e a zɔ̌n mì ɔ́, un bló yi fó, bó dó sɔ́ we su ɖo ayǐkúngban jí. Daá! Din ɔ́, bo ná mì susu ce e un ko ɖó ɖo gɔ̌n towe, cóbɔ a ɖǒ gbɛ ɔ́ é. “Un ɖe we xlɛ́ mɛ e a sɔ́ dó así nú mì ɖo gbɛ ɔ́ mɛ lɛ́ɛ. Towe wɛ yě ko nyí, bɔ a ka sɔ́ yě dó así nú mì, bɔ yě se tónú nú we. Din ɔ́, yě tunwun ɖɔ nǔ e a nǎ mì ɔ́ bǐ wɛ gosín gɔ̌n towe, ɖó xó e a sɔ́ dó así nú mì lɛ́ɛ ɔ́, un ɖɔ bǐ nú yě, bɔ yě yí bǐ; yě ɖi nǔ ɖɔ hwi gɔ́n wɛ un gosín nǔgbó. “Yě tamɛ sa vo nú we dó wɛ un ɖe. Mɛ e nyí gbɛ ɔ́ tɔn lɛ́ɛ tamɛ sa vo dó wɛ un ɖe ǎ; lo ɔ́, mɛ élɔ́ lɛ́ɛ e a sɔ́ dó así nú mi lɛ́ɛ tamɛ sa vo nú we dó wɛ un ɖe, ɖó towe wɛ yě nyí. Nǔ e nyí ce ɔ́ bǐ wɛ nyí towe; nǔ e ka nyí towe ɔ́ bǐ wɛ nyí ce, bɔ è nɔ kpa susu nú mì ɖo yě mɛ. Un sɔ́ ɖo gbɛ ɔ́ mɛ ǎ, yědɛɛ lɛ́ɛ ka kpo ɖo gbɛ ɔ́ mɛ, bɔ nyɛ ja gɔ̌n towe. Tɔ́ mímɛ́! Kpɔ́n mɛ e a sɔ́ dó así nú mì lɛ́ɛ jí ɖo nyǐkɔ towe mɛ, bónú yě nyí ɖokpó, lě e hwi kpódó nyɛ kpó nyí ɖokpó gbɔn é. Hwenu e un ɖo kpɔ́ xá yě ɔ́, un hɛn yě ɖo acɛ e a nǎ mì é mɛ; un kpɔ́n yě jí, bɔ mɛ ɖokpó bú ɖo yě mɛ zɛ mɛ e ɖó ná bú é wú ǎ, bónú xó e Mawuxówéma ɔ́ ɖɔ ɔ́ ná dó jɛ. Un ko ja gɔ̌n towe; amɔ̌ din e un kpo ɖo gbɛ ɔ́ mɛ ɔ́, un ɖɔ xó énɛ́ lɛ́ɛ nú yě, bónú xomɛhunhun ce ma ɖó blɔ̌ ɔ́ ní nɔ yě mɛ. Un sɔ́ xó towe dó así nú yě, bɔ mɛ e nyí gbɛ ɔ́ tɔn lɛ́ɛ gbɛ́ wǎn nú yě, ɖó yě nyí gbɛ ɔ́ tɔn ǎ, lě e nyɛ lɔmɔ̌ ma nyí gbɛ ɔ́ tɔn ǎ é ɖɔhun. Un byɔ́ we ɖɔ hwi ní ɖe yě sín gbɛ ɔ́ mɛ ǎ; lo ɔ́, hwlɛ̌n yě ɖo awǒvi sí. Yě nyí gbɛ ɔ́ tɔn ǎ, lě e nyɛ lɔ ma nyí gbɛ ɔ́ tɔn ǎ é ɖɔhun. Blǒ bónú yě ní nyí towe gbɔn xó towe e nyí nǔgbó ɔ́ gbla mɛ. Un sɛ́ yě dó gbɛ ɔ́ mɛ, lě e a sɛ́ mì dó gbɛ ɔ́ mɛ é ɖɔhun. Un sɔ́ nyɛ ɖésú bǐ jǒ nú we ɖó yě wú, nú yě lɔmɔ̌ ná sixú nyí towe nǔgbó. “Yě kɛ́ɖɛ́ sín tamɛ sa vo dó wɛ un ɖe ǎ; lo ɔ́, mɛ e ná se xó ce lɛ́ɛ ɖo nu yětɔn, bó ná ɖi nǔ nú mì lɛ́ɛ bǐ sín tamɛ sa vo nú we dó wɛ un ɖe; bónú yě bǐ ní nyí ɖokpó, lě e nyɛ kpódó hwi kpó nyí ɖokpó gbɔn é. Daá, a ɖo nyɛ mɛ, bɔ nyí lɔ ɖo hwi lɔ mɛ; yě ní nɔ bǔ ɖo mǐ mɛ, bónú gbɛtɔ́ lɛ́ɛ ná dó tunwun ɖɔ hwi wɛ sɛ́ mì dó nǔgbó. Susu e a ná mì ɔ́, un ná yě lɔmɔ̌, bónú yě ní nyí ɖokpó, lě e hwi kpódó nyɛ kpó nyí ɖokpó gbɔn é. Nyɛ ɖo yě mɛ, bɔ hwɛ ɖo nyɛ mɛ, nú yě ní nɔ bǔ nǔgbó, bónú gbɛtɔ́ lɛ́ɛ ná dó tunwun ɖɔ a sɛ́ mì dó, bó yí wǎn nú yě, lě e a yí wǎn nú mì gbɔn é. “Daá! Un jló ɖɔ fí e un ɖe ɔ́, mɛ e a nǎ mì lɛ́ɛ lɔ ní nɔ fínɛ́ xá mì, bónú yě ní mɔ susu e a nǎ mì ɔ́, ɖó a ko yí wǎn nú mì cóbó wá ɖó gbɛ ɔ́. Daá hwɛjijɔnɔ! Gbɛ ɔ́ ma tunwun we nɛ́! Nyɛ ka tunwun we, bɔ mɛ élɔ́ lɛ́ɛ tunwun ɖɔ hwi wɛ sɛ́ mì dó. Un ɖe we xlɛ́ yě, bó ka ná lɛ́ ɖe we xlɛ́ hú mɔ̌, bónú wǎn yíyí e a ɖǒ nú mì ɔ́ ní nɔ yě mɛ, bónú nyɛ ɖésú ná nɔ yě mɛ.” Ée Jezu sa vo énɛ́ ɔ́ nú tɔ́ tɔn gúdo ɔ́, éyɛ́ kpódó ahwanvú tɔn lɛ́ɛ kpó dó asá Sedlɔ́n tɔ ɔ́ jɛ agě ɖě ɔ́ jí. Jikpá ɖé ɖo fínɛ́, bɔ yě byɔ́ mɛ. Judási e ɖo Jezu ná sa wɛ ɔ́ lɔ tunwun fínɛ́, ɖó Jezu kpódó ahwanvú tɔn lɛ́ɛ kpó nɔ ko kplé ɖo fínɛ́ hwɛhwɛ. Énɛ́ ɔ́, Judási kplá sɔ́jahwan lɛ́ɛ kpódó sinsɛnxɔcɔ́tɔ́ e vɔ̌sánú-xwlémawutɔ́gán lɛ́ɛ, kpódó Falizyɛn lɛ́ɛ kpó ná ɛ lɛ́ɛ kpó, bɔ yě yi jikpá ɔ́ mɛ. Yě hɛn zogbɛ́n, bó hɛn zohwín kpódó alǐnnyánú kpó alɔ nu. Jezu ka ko tunwun nǔ e ɖo nǎ gbo e wɛ é bǐ, bó sɛ yi nukɔn yětɔn, bó ɖɔ: “Mɛ̌ ba wɛ mi ka ɖe?” Yě yí gbe n'i ɖɔ: “Jezu Nazalɛ́tinu ɔ́ ba wɛ mǐ ɖe.” É ka ɖɔ nú yě ɖɔ: “Nyɛ ɖíe.” Judási e ɖo sisa ɛ ɖu wɛ ɔ́ lɔ ɖo yě mɛ. Ée Jezu yí gbe nú yě ɖɔ nyɛ wɛ ɔ́, yě bǐ j'agɔ yi gúdo, bó yi jɛ ayǐ. Jezu lɛ́ kanbyɔ́ yě azɔn wegɔ́ ɔ́ ɖɔ: “Mɛ̌ ba wɛ mi ka ɖe?” Bɔ yě lɛ́ yí gbe n'i ɖɔ: “Jezu Nazalɛ́tinu ɔ́ ba wɛ mǐ ɖe.” Jezu ka ɖɔ nú yě ɖɔ: “Un ko ɖɔ nú mi ɖɔ nyɛ wɛ; ényí nyɛ ba wɛ jɛ́n mi ɖe hǔn, mi jǒ mɛ élɔ́ lɛ́ɛ dó, bónú yě ní yi.” É ɖɔ mɔ̌, bónú xó e é ɖésú ko ɖɔ ɖ'ayǐ ɔ́ na dó jɛ; é wɛ nyí ɖɔ: “Mɛ e a nǎ mì lɛ́ɛ ɖěbǔ bú ǎ.” Sinmɔ́ɔ Piyɛ́ɛ ka kplá hwǐ bó sún hwǐ tɔn sín akún mɛ, bó xú vɔ̌sánú-xwlémawutɔ́ ɖaxó ɔ́ sín mɛsɛntɔ́ ɖokpó, bó kpa tó tɔn ɖisíxwé tɔn ɔ́. È nɔ ylɔ́ mɛsɛntɔ́ énɛ́ ɖɔ Malukúsi. Jezu ka ɖɔ nú Piyɛ́ɛ ɖɔ: “Sɔ́ hwǐ towe dó akún. Wǔvɛ́ kɔ́fu e Tɔ́ ɔ́ ɖɔ nyɛ ní nu ɔ́, un ná nu ǎ wɛ a?” Énɛ́ gúdo ɔ́, sɔ́jahwan lɛ́ɛ kpódó mɛ e ɖo yě nu ɔ́ kpó, kpódó sinsɛnxɔcɔ́tɔ́ Jwifu lɛ́ɛ tɔn kpó wlí Jezu, bó blá ɛ. Yě tó kplá ɛ hɛn yi Hanna gɔ́n hwɛ̌. Hanna énɛ́ wɛ nyí asitɔ́ nú Kayífu e ɖo vɔ̌sánú-xwlémawutɔ́ ɖaxó nyí wɛ xwe énɛ́ xwe é. Kayífu énɛ́ wɛ ko kplɔ́n nǔ Jwifugán lɛ́ɛ ɖ'ayǐ ɖɔ jí: “Mɛ ɖokpó kú dó to ɔ́ bǐ tamɛ ɔ́, é nyɔ́ hú to ɔ́ bǐ ní kú.” Sinmɔ́ɔ Piyɛ́ɛ kpódó ahwanvú ɖěvo kpó xwedó Jezu. Ahwanvú énɛ́ ɔ́, vɔ̌sánú-xwlémawutɔ́ ɖaxó ɔ́ tunwun i; énɛ́ wútu wɛ éyɛ́ xwedó Jezu byɔ́ xwé ɔ́ gbe. Piyɛ́ɛ ka cí hɔntogbó jí; énɛ́ ɔ́, ahwanvú e vɔ̌sánú-xwlémawutɔ́ ɖaxó ɔ́ tunwun ɔ́ lɛ́ kɔ bó wá ɖɔ xó nú nyɔ̌nu hɔnjínɔtɔ́ ɔ́, bó kplá Piyɛ́ɛ byɔ́ xwé gbe. Nyɔ̌nu hɔnjínɔtɔ́ ɔ́ ka kanbyɔ́ Piyɛ́ɛ ɖɔ: “Hwi lɔmɔ̌ ma ɖo nya énɛ́ sín ahwanvú lɛ́ɛ mɛ ǎ cé?” Bɔ Piyɛ́ɛ gbɛ́ n'i, bó ɖɔ: “Éeǒ, nyɛ ɖo yě mɛ ǎ.” Mɛsɛntɔ́ lɛ́ɛ kpódó sinsɛnxɔcɔ́tɔ́ lɛ́ɛ kpó flɔ́ akán, bó ɖo te lɛ́ lɛ̌ dó, bó ɖo xúxú wɛ, ɖó avivɔ gbɛ́. Piyɛ́ɛ lɔ ɖo te ɖo yě mɛ, bó ɖo myɔ xú wɛ. Vɔ̌sánú-xwlémawutɔ́ ɖaxó ɔ́ kan nǔ byɔ́ Jezu dó ahwanvú tɔn lɛ́ɛ wú, bó lɛ́ kan nǔ byɔ́ ɛ dó nǔ e é nɔ kplɔ́n mɛ ɔ́ wú. Bɔ Jezu ka yí gbe n'i ɖɔ: “Agbawungba wɛ un ɖɔ xó nú mɛ lɛ́ɛ bǐ ɖe. Tɛgbɛ wɛ un ka nɔ ɖo nǔ kplɔ́n mɛ lɛ́ɛ wɛ ɖo kplɔ́ngbasá lɛ́ɛ, kpódó sinsɛnxɔ mɛ kpó, fí e Jwifu lɛ́ɛ bǐ nɔ kplé ɖe é. Un ɖɔ nǔ ɖěbǔ ɖo nǔglɔ́ ǎ. Aniwú wɛ a ka ɖo nǔ kanbyɔ́ mì wɛ? Kan nǔ e un ɖɔ ɔ́ byɔ́ mɛ e un ɖɔ xó ná lɛ́ɛ, ɖó yědɛɛ lɛ́ɛ tunwun nǔ e un kplɔ́n yě lɛ́ɛ.” Ée Jezu ɖɔ mɔ̌ ɔ́, sinsɛnxɔcɔ́tɔ́ ɖokpó ɖo fínɛ́, bó xo tó mɛ n'i, bó ɖɔ: “Mɔ̌ wɛ a nǎ yí gbe nú vɔ̌sánú-xwlémawutɔ́ ɖaxó ɔ́ gbɔn a?” Jezu ka yí gbe n'i ɖɔ: “Ényí nǔ wɛ un ɖɔ nyi do hǔn, ɖe nǔ e un ɖɔ nyi do ɔ́ xlɛ́; é ka nyí xó ganjí wɛ un ɖɔ ɔ́, étɛ́wú a ka xo tó mɛ nú mì?” Jezu ɖo blǎblá mɔ̌, bɔ Hanna nyi i sɛ́ dó Kayífu vɔ̌sánú-xwlémawutɔ́ ɖaxó ɔ́ gɔ́n. Sinmɔ́ɔ Piyɛ́ɛ ɖo te, bó ɖo myɔ xú wɛ ɖo fínɛ́, bɔ yě kanbyɔ́ ɛ ɖɔ: “Hwi lɔmɔ̌ má ɖo ahwanvú nya énɛ́ tɔn mɛ ǎ cé?” É ka gbɛ́, bó ɖɔ: “Éeǒ, nyɛ ɖo yě mɛ ɖě ǎ!” Vɔ̌sánú-xwlémawutɔ́ ɖaxó ɔ́ sín mɛsɛntɔ́ e Piyɛ́ɛ kpa tó ná ɔ́ sín mɛ ɖokpó kanbyɔ́ Piyɛ́ɛ ɖɔ jí: “Un ma mɔ hwi kpó nya énɛ́ kpó ɖo jikpá ɔ́ mɛ a?” Piyɛ́ɛ ka lɛ́ gbɛ́, bɔ tlóló ɔ́, kokló kɔ́ así. Yě kplá Jezu sín Kayífu xwé, bó kplá ɛ hɛn yi tokpɔngán Hlɔ̌manu lɛ́ɛ tɔn sín hɔnmɛ zǎnzǎn tɛɛn. Lo ɔ́, Jwifu lɛ́ɛ byɔ́ hɔn ɔ́ mɛ ǎ, ɖó yě táá wá ɖu su, bónú xwe ɖuɖu ná gló yě. Énɛ́ wú wɛ Pilátu gbɔ bo tɔ́n, bó wá mɔ yě, bó kanbyɔ́ yě ɖɔ: “Hwɛ tɛ́ dó nya élɔ́ wɛ mi ka ɖe?” Yě yí gbe n'i ɖɔ: “É ma ko nyí nǔnyanyawatɔ́ ǎ ɔ́, mǐ ná kplá ɛ wá nú we ǎ.” Énɛ́ ɔ́, Pilátu ɖɔ nú yě ɖɔ: “Mi ɖésúnɔ mi bo kplá ɛ, bó ɖɔ hwɛ xá ɛ lě e sɛ́n mitɔn jló gbɔn é.” Jwifugán lɛ́ɛ ka yí gbe n'i ɖɔ jí: “Mǐ ɖó acɛ e hu mɛ é ǎ.” Nǔ cí mɔ̌, bónú xó e Jezu ɖésú ko ɖɔ ɖ'ayǐ dó kú alɔkpa e é ná kú é wú ɔ́ ná dó jɛ. Pilátu ka lɛ́ kɔ yi hɔn ɔ́ mɛ, bó ylɔ́ Jezu, bó kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Xó énɛ́ e a kanbyɔ́ mì ɔ́, hwi ɖésúnɔ sín xomɛ wɛ é tɔ́n sín a, abǐ mɛ ɖěvo wɛ ɖɔ xó ce nú we?” Pilátu ka yí gbe n'i ɖɔ: “Nyɛ ɔ́, Jwifu wɛ un nyí a? To towe mɛ nu lɛ́ɛ kpódó vɔ̌sánú-xwlémawutɔ́gán lɛ́ɛ kpó wɛ kplá we wá nú mì. Étɛ́ a ka wa?” Jezu ka yí gbe n'i ɖɔ: “Axɔ́súɖuɖu ce nyí gbɛ mɛ fí tɔn ǎ; ényí gbɛ mɛ fí tɔn wɛ é ko nyí ɔ́, ahwanvú ce lɛ́ɛ ná ko fun ahwan, nú è ma jó mì nú Jwifugán lɛ́ɛ ó; axɔ́súɖuɖu ce ka nyí gbɛ mɛ fí tɔn ǎ.” Pilátu lɛ́ kanbyɔ́ ɛ ɖɔ: “Hǔn axɔ́sú wɛ a nyí nɛ́ hǔn?” Bɔ Jezu yí gbe n'i ɖɔ: “Hwi wɛ ɖɔ un nyí axɔ́sú. È ji mì, bɔ un wá gbɛ ɔ́ mɛ, bó ná ɖe kúnnu nú nǔgbó ɔ́. Mɛ e nɔ xwedó nǔgbó ɔ́ bǐ wɛ nɔ ɖótó xó ce.” Pilátu kanbyɔ́ ɛ ɖɔ: “Ani ka nyí nǔgbó ɔ́?” Ée Pilátu kan mɔ̌ byɔ́ Jezu ɔ́, é lɛ́ tɔ́n, bó yi ɖɔ nú Jwifu e gbɛ́ wǎn nú Jezu lɛ́ɛ ɖɔ: “Un mɔ nǔ e wú un ná ɖó hwɛ nú nya élɔ́ é ɖě ǎ. Lo ɔ́, walɔ mitɔn wɛ é ko nyí, bɔ un nɔ jó gantɔ́ ɖokpó nú mi Dǐndínwáyixwe ɔ́ hwenu. Mi jló nú má jó Jwifu lɛ́ɛ xɔ́sú ɔ́ nú mi a?” Yě bǐ ka sú xó, bó ɖɔ jí: “Gbeɖé, é wɛ a nǎ jǒ nú mǐ ǎ, Balabási wɛ a nǎ jó nú mǐ!” Ajotɔ́ axánsúnxó ɖokpó wɛ ka nyí Balabási ɔ́. Hwenɛ́nu ɔ́, Pilátu ná gbe ɖɔ è ní kplá Jezu bó zé lanbá dó xo e ná; bɔ sɔ́ja lɛ́ɛ sɔ́ wun dó lɔn axɔ́súgbákún ɖokpó, bó sɔ́ xwe n'i, bó lɛ́ sɔ́ awu ɖaxó vɔvɔ cɛ́cɛ́ ɖé dó n'i. Yě nɔ sɛ yi nukɔn tɔn, bó nɔ ɖɔ: “Mǐ kan xwé byɔ́, Jwifu lɛ́ɛ xɔ́sú.” Bó nɔ́ xo tó mɛ n'i. Pilátu lɛ́ tɔ́n wá kɔ́xo, bó ɖɔ nú yě ɖɔ: “Mi ɖótó; un ná yi kplá nya mitɔn wá nú mi, bónú mi ná dó tunwun ɖɔ un kún mɔ nǔ e wú un ná ɖó hwɛ n'i é ɖě ó.” Énɛ́ ɔ́, Jezu tɔ́n, bó ɖo awu vɔvɔ ɖaxó ɔ́ mɛ, bɔ axɔ́súgbákún ɔ́ ɖo ta n'i. Pilátu ɖɔ nú yě ɖɔ: “Nya ɔ́ ɖíe.” Ée vɔ̌sánú-xwlémawutɔ́gán lɛ́ɛ kpódó sinsɛnxɔcɔ́tɔ́ lɛ́ɛ kpó mɔ ɛ lě ɔ́, yě sú xó, bó ɖɔ: “Ká ɛ nyi aklúzu jí! Ká ɛ nyi aklúzu jí!” Pilátu ka ɖɔ nú yě ɖɔ: “Mi kplá ɛ, bó yi ká ɛ nyi aklúzu jí mi ɖésúnɔ, ɖó nyɛ mɔ nǔ e wú un ná ɖó hwɛ n'i ɔ́ ɖě ǎ.” Jwifu lɛ́ɛ ka yí gbe n'i ɖɔ: “Mǐ ɖó sɛ́n, bɔ sɛ́n énɛ́ byɔ́ ɖɔ è ní hu i; ɖó é ɖɔ émí nyí Mawu ví.” Ée Pilátu se mɔ̌ ɔ́, xɛsi lɛ́ ɖi i d'é jí, bɔ é lɛ́ kplá Jezu byɔ́ hɔn ɔ́ mɛ, bó kanbyɔ́ ɛ ɖɔ: “Fítɛ́ a ka gosín?” Jezu ka kɛ nu ǎ, bɔ Pilátu ɖɔ n'i ɖɔ: “Nyɛ wɛ a tin dó a? A tunwun ɖɔ un ɖó acɛ bó ná ɖe we nyi te, bó lɛ́ ɖó acɛ bó ná ká we nyi aklúzu jí ǎ cé?” Jezu ka yí gbe n'i ɖɔ: “Ényí Mawu ma ná gbe tɔn we ǎ ɔ́, a sixú ɖó acɛ ɖěbǔ ɖo jǐ ce ǎ; énɛ́ ɔ́ wú wɛ mɛ e jó mì ɔ́ hu hwɛ hú we.” Bɛ́ sín hwenɛ́nu ɔ́, Pilátu jɛ lě e é ná wa gbɔn, bó ná ɖe Jezu nyi te ɔ́ ba jí. Jwifu lɛ́ɛ ka jɛ xó sú jí, bó ɖɔ: “Ényí a ɖe nya énɛ́ nyi te hǔn, a nyǐ Dadá Hlɔ̌ma tɔn sín xɔ́ntɔn ǎ; ɖó mɛ e sɔ́ éɖée axɔ́sú ɔ́, gǔ wɛ é fɔ́n dó Dadá Hlɔ̌ma tɔn jí.” Ée Pilátu se mɔ̌ ɔ́, é ɖe Jezu tɔ́n, lobo wá jínjɔ́n hwɛɖɔzinkpo ɔ́ jí, ɖo tɛn e mɛ è tɛ́ awǐnnya ɖagbe ɖagbe lɛ́ɛ kɔn nyi, bɔ è nɔ ylɔ́ ɖɔ “Gabata” ɖo Ebléegbe mɛ é. Dǐndínwáyixwe kpo sɔ, bɔ yě ko ɖo xwe ɔ́ nú sɔ́ ɖ'ayǐ wɛ, xwe gan wěwe mɛ ɔ́, Pilátu ɖɔ nú Jwifu lɛ́ɛ ɖɔ: “Axɔ́sú mitɔn ɖíe.” Jwifu lɛ́ɛ ka sú xó, bó ɖɔ: “È hu i! È hu i! È ká ɛ nyi aklúzu jí.” Pilátu ka kanbyɔ́ yě ɖɔ: “Má ká axɔ́sú mitɔn nyi aklúzu jí wɛ a?” Vɔ̌sánú-xwlémawutɔ́gán lɛ́ɛ yí gbe n'i ɖɔ: “Mǐ sɔ́ ɖó axɔ́sú ɖěvo zɛ Dadá Hlɔ̌ma tɔn wú ǎ.” Bɔ Pilátu jó Jezu nú yě, bónú yě ná yi ká ɛ nyi aklúzu jí. Yě kplá Jezu ɖidó. Jezu ɖíɖá aklúzu tɔn, bó tɔ́n sín toxo ɔ́ mɛ; é ɖidó fí ɖé, bɔ è nɔ ylɔ́ fí ɔ́ ɖɔ “takágo”, bɔ Eblée lɛ́ɛ nɔ́ ylɔ́ fí énɛ́ ɖɔ Gɔlugɔta. Fínɛ́ wɛ yě ká Jezu nyi aklúzu jí ɖe; è lɛ̌ ká mɛ we ɖěvo ɖó aklúzu jí; mɛ ɖokpó ɖo ɖisí tɔn xwé, mɛ wegɔ́ ɔ́ ɖo amyɔ tɔn xwé, bɔ Jezu ɖo tɛ́ntin mɛ. Pilátu wlán xógbe élɔ́, bó sɔ́ ɖó aklúzu ɔ́ jí aga ɖɔ: “Jezu Nazalɛ́ti tɔn, Jwifu lɛ́ɛ xɔ́sú.” Jwifu gěgé mɔ nǔ e è wlǎn énɛ́ ɔ́ xa, ɖó tɛn e mɛ è ká Jezu nyi ɔ́ lín dó toxo ɔ́ ǎ. Xógbe énɛ́ ɔ́, è wlǎn dó Ebléegbe mɛ, bó wlán dó Latɛ́ɛngbe mɛ, bó lɛ́ wlán dó Glɛ̌sigbe mɛ. Jwifu lɛ́ɛ sín vɔ̌sánú-xwlémawutɔ́gán lɛ́ɛ wá yi ɖɔ nú Pilátu ɖɔ: “Jwifu lɛ́ɛ xɔ́sú wɛ a ɖǒ ná wlán ǎ; nǔ e a ɖǒ ná wlán ɔ́ ɖíe: ‘Nya élɔ́ ɖɔ émí wɛ nyí Jwifu lɛ́ɛ xɔ́sú.’ ” Pilátu ka yí gbe nú yě ɖɔ: “Nǔ e un ko wlán ɔ́, un wlán wɛ.” Ée sɔ́ja lɛ́ɛ ká Jezu nyi aklúzu jí vɔ ɔ́, yě bɛ́ awu tɔn lɛ́ɛ, bó má ɖó donu ɛnɛ, bɔ mɛ ɖokpó ɖokpó sɔ́ étɔn. Yě lɛ́ sɔ́ awu tɔn ɖaxó e má ɖó titɔkpa ɖěbǔ ǎ, bó nyí avɔ ɖokpó sín jǐ káká wá do é. Sɔ́ja lɛ́ɛ ɖɔ ɖo yěɖée tɛ́ntin ɖɔ: “Mǐ ná vún awu élɔ́ ǎ. Mi nú mǐ ná nyi akɔ dó, bó ná tunwun mɛ e tɔn é ná nyí é.” Nǔ nyí mɔ̌, bónú nǔ e Mawuxówéma ɔ́ ɖɔ ɔ́ ná dó jɛ. É wɛ nyí ɖɔ: “Yě má awu ce lɛ́ɛ, bó nyi akɔ dó awu ce ɖaxó ɔ́.” Nǔ e sɔ́ja lɛ́ɛ wa ɔ́ nɛ́. Jezu sín nɔ, kpódó nɔ tɔn nɔví nyɔ̌nu Mali e nyí Klopási sín asi ɔ́ kpó, kpódó Mali Magidalanu ɔ́ kpó ɖo te, ɖo aklúzu Jezu tɔn ɔ́ kpá. Ée Jezu mɔ nɔ tɔn, bó ka mɔ ahwanvú tɔn e é yí wǎn ná ɔ́ ɖo te ɖo akpá tɔn ɔ́, é ɖɔ nú nɔ tɔn ɖɔ: “Nǎna, vǐ towe nɛ́!” Bó ka lɛ́ ɖɔ nú ahwanvú ɔ́ ɖɔ: “Nɔ towe nɛ́!” Sín gbe énɛ́ gbe ɔ́, ahwanvú ɔ́ kplá Jezu sín nɔ dó xwé tɔn gbe. Énɛ́ gúdo ɔ́, ée Jezu tunwun ɖɔ nǔ lɛ́ɛ bǐ fó lo ɔ́, é ɖɔ: “Kɔ xú mì!” Bónú nǔ e è wlǎn dó Mawuxówéma ɔ́ mɛ ɔ́ ná dó jɛ. Zɛ̌n ɖé ka ɖo fínɛ́, bɔ vɛ̌ɛn sinvɛ́sinvɛ́ gɔ́, sɔ́ja lɛ́ɛ ka nylɔ́ xumɛtekan d'é mɛ, bó sɔ́ slɔ́ izɔ́pukpo nu, bó dlɛ́n ɖó nu n'i. Ée Jezu nu vɛ̌ɛn sinvɛ́sinvɛ́ ɔ́, é ɖɔ: “Nǔ bǐ fó!” Bó dó kɔ do, bó bɔnu. Gbe énɛ́ gbe ɔ́, gbɔjɛzán Jwifu lɛ́ɛ tɔn kpo sɔ, bó jɛ dó Dǐndínwáyixwe gbe. Jwifugán lɛ́ɛ ka jló nú mɛ e è ká lɛ́ɛ ní nɔ aklúzu jí azǎn énɛ́ gbe ǎ, ɖó azǎn ɖaxó ɖé wɛ nyí azǎn énɛ́ ɔ́. Yě yi byɔ́ gbe Pilátu ɖɔ é ní gba afɔxú nú mɛ e è ká lɛ́ɛ, bó ɖe yě síin. Pilátu ná gbe yě, bɔ sɔ́ja lɛ́ɛ yi gba afɔxú nú mɛ we e è ká nyi aklúzu jí xá Jezu lɛ́ɛ; yě gba afɔxú nú mɛ nukɔn tɔn ɔ́, bó gba nú mɛ wegɔ́ ɔ́. Ée yě wá jɛ Jezu jí ɔ́, yě mɔ ɖɔ é ko kú, bɔ yě sɔ́ xaji bó gba afɔxú n'i ǎ. Lo ɔ́, sɔ́ja ɖokpó sɔ́ hwǎn adaja mɛ n'i, bɔ tlóló ɔ́, hun kpódó sin kpó lúlú kɔn nyi ayǐ. Mɛ e nɔ tɛn tɔn mɛ, bó mɔ é wɛ ɖe kúnnu ná, bɔ kúnnuɖiɖe tɔn ka nyí nǔgbó. Éyɛ́ tunwun ɖɔ nǔgbó wɛ émí ɖɔ, bónú mi lɔmɔ̌ ná ɖi nǔ. Nǔ énɛ́ lɛ́ɛ bǐ jɛ, bónú nǔ e è ko wlán ɖ'ayǐ ɖo Mawuxówéma ɔ́ mɛ ɔ́ ná dó jɛ; é wɛ nyí ɖɔ: “È nǎ gba xú tɔn ɖokpó géé lě ǎ.” È ka lɛ́ wlán dó akpá ɖěvo xwé ɖo Mawuxówéma ɔ́ mɛ ɖɔ: “Yě ná mɔ mɛ e yě sɔ́ hwǎn é.” Énɛ́ ɔ́ gúdo ɔ́, nya ɖé tíin, bɔ è nɔ ylɔ́ ɛ ɖɔ Jozɛ́fu; Alimatéenu wɛ; é lɔmɔ̌ ɖo Jezu sín ahwanvú lɛ́ɛ mɛ. É ka nɔ jló ná ɖe xlɛ́ ɖɔ émí ɖo Jezu sín ahwanvú lɛ́ɛ mɛ ǎ; ɖó é nɔ ɖo xɛsi ɖi nú Jwifugán lɛ́ɛ wɛ. Nya énɛ́ yi mɔ Pilátu, bó byɔ́ ɛ Jezu sín cyɔ, bɔ Pilátu ná ɛ gbe, bɔ é yi zé cyɔ ɔ́. Nikodɛ́mu e zɔn zǎn gbe ɖokpó, bó yi mɔ Jezu ɔ́ lɔmɔ̌ wá Jezu sín cyɔ kɔn. Nikodɛ́mu xo mǐla kpódó alowɛ́si kpó kplé, bó hɛn, bɔ é ná yi kilóo gban mɔ̌. Yě ɖíɖá Jezu sín cyɔ, bo lɛ́ akwɛ́núvɔ ɖé dó e, bo sá mǐla kpódó alowɛ́si kpó e è xokplé ɔ́ n'i, lě e Jwifu lɛ́ɛ nɔ bló gbɔn nú cyɔ cóbó nɔ ɖi é. Jikpá ɖé ka ɖo fí e è ká Jezu nyi aklúzu jí ɖe é, bɔ yɔdo yɔ̌yɔ́ ɖokpó ɖ'é mɛ, bɔ è ko ɖi mɛ ɖěbǔ d'é mɛ kpɔ́n gbeɖé ǎ. Fínɛ́ wɛ yě ɖi Jezu dó, ɖó yɔdo ɔ́ lín dó fínɛ́ ǎ, bɔ Jwifu lɛ́ɛ ka ko ɖo gbɔjɛzán ɔ́ nú sɔ́ wɛ. Aklúnɔzán gbe zǎnzǎn hwenu e zǐnflú kpo ɖo te ɔ́, Mali Magidalanu ɔ́ yi Jezu sín yɔdo kɔn, bó mɔ ɖɔ è ɖe awǐnnya e ɖo Jezu sín yɔdo nu ɔ́ síin. Énɛ́ ɔ́, é kán wezun yi mɔ Piyɛ́ɛ, kpódó ahwanvú ɖě ɔ́ e Jezu yí wǎn ná é kpó, bó ɖɔ nú yě ɖɔ: “Yě ɖe Aklúnɔ sín yɔdo tɔn mɛ, bɔ mǐ tunwun fí e è sɔ́ ɛ yi ɔ́ ǎ.” Bɔ Piyɛ́ɛ kpódó ahwanvú ɖě ɔ́ kpó tɔ́n, bó ɖidó yɔdo ɔ́ kɔn. Yě mɛ we lɛ́ɛ bǐ wɛ bɛ́ wezun; ahwanvú ɖě ɔ́ ka zɛ Piyɛ́ɛ wú, bó yi yɔdo ɔ́ kɔn jɛ nukɔn. É fɛ, bó kpɔ́n yɔdo ɔ́ mɛ, bó mɔ avɔ e è lɛ̌ dó e lɛ́ɛ ɖo fínɛ́; é ka byɔ́ mɛ ǎ. Sinmɔ́ɔ Piyɛ́ɛ wá wá gbɔn gǔdo, bó byɔ́ yɔdo ɔ́ mɛ, bó mɔ avɔ e è lɛ̌ dó e lɛ́ɛ ɖo fínɛ́; é lɛ́ mɔ avɔ e è bǔ dó ta nú Jezu ɔ́; é ka ɖo ɖě lɛ́ɛ mɛ ǎ; é ɖo mlǎmlá ɖo vo. Énɛ́ ɔ́ gúdo ɔ́, ahwanvú ɖě ɔ́ e jɛ nukɔn nú Piyɛ́ɛ wá yɔdo ɔ́ kɔn ɔ́ lɔmɔ̌ byɔ́ mɛ; é mɔ bó ɖi nǔ. Nǔ e ɖɔ wɛ Mawuxówéma ɔ́ ɖe bó ɖɔ Jezu ná fɔ́n sín kú ɔ́, yě ko mɔ nǔ jɛ mɛ ǎ; bɔ ahwanvú we énɛ́ lɛ́ɛ lɛ́ kɔ yi xwé yětɔn lɛ́ɛ gbe. Mali ɖo te ɖo yɔdo ɔ́ kɔn, bó ɖo avǐ ya wɛ, bɔ hwenu e é ɖo avǐ ya wɛ ɔ́, é fɛ, bó kpɔ́n yɔdo ɔ́ mɛ sɛ́ dó. É mɔ wɛnsagun Mawu tɔn we ɖo fí e è sɔ́ Jezu sín cyɔ ɖó ɔ́, bɔ yě dǒ nǔ wěwé; mɛ ɖokpó jínjɔ́n afɔligbé, bɔ mɛ ɖokpó jínjɔ́n taligbé; bɔ yě kanbyɔ́ ɛ ɖɔ: “Nyɔ̌nu! Étɛ́ sín avǐ ya wɛ a ka ɖe?” É ka yí gbe nú yě ɖɔ: “Yě ɖe Aklúnɔ ce síin, bɔ un tunwun fí e è sɔ́ ɛ ɖó ɔ́ ǎ.” Ée é ɖɔ mɔ̌ ɔ́, é lílɛ́, bó mɔ Jezu ɖo te; é ka tunwun ɖɔ é wɛ ǎ. Jezu ka ɖɔ n'i ɖɔ: “Nyɔ̌nu! Étɛ́ sín avǐ ya wɛ a ka ɖe? Mɛ̌ ba wɛ a ɖe?” Mali ka vɛdó ɖɔ jikpájíkpɔ́ntɔ́ ɔ́ wɛ sín, bó ɖɔ n'i ɖɔ: “Mɛɖaxó! Ényí hwi wɛ sɔ́ ɛ sín fí hǔn, ɖɔ fí e a sɔ́ ɛ ɖó ɔ́ nú mì, nú má yi sɔ́ ɛ.” Bɔ Jezu ylɔ́ ɛ bó ɖɔ: “Mali!” Bɔ é lílɛ́, bó ylɔ́ ɛ dó Ebléegbe mɛ ɖɔ: “Hlabúni”; (tínmɛ tɔn wɛ nyí Mɛ̌si.) Jezu ɖɔ n'i ɖɔ: “Ma hɛn mì ɖó te ó, ɖó un ko yi Tɔ́ ɔ́ gɔ́n ɖo sɛ́xwé ǎ; lo ɔ́, yi ɖɔ nú nɔví ce lɛ́ɛ ɖɔ un xwe Tɔ́ ce e nyí Tɔ́ mi lɔ tɔn é gɔ́n; un xwe Mawu ce e nyí Mawu mi lɔ tɔn é gɔ́n.” Bɔ Mali Magidalanu ɔ́ yi ɖɔ nú ahwanvú Jezu tɔn lɛ́ɛ ɖɔ: “Un mɔ Aklúnɔ!” Bó dó wɛn e Jezu dó e ɔ́ yě. Gbe énɛ́ gbe aklúnɔzán gbe gbadanu ɔ́, Jezu sín ahwanvú lɛ́ɛ yi sú hɔn dó ta; ɖó yě ɖo xɛsi ɖi nú Jwifugán lɛ́ɛ wɛ, bɔ Jezu wá nɔ te, ɖo tɛ́ntin yětɔn, bó ɖɔ nú yě ɖɔ: “Fífá ní nɔ kpɔ́ xá mi!” Ée é ɖɔ mɔ̌ nú yě gúdo ɔ́, é xlɛ́ alɔ tɔn lɛ́ɛ kpódó adaja tɔn kpó yě. Ée yě mɔ Aklúnɔ yětɔn ɔ́, xomɛ hun yě tlala. Jezu lɛ́ vɔ́ ɖɔ nú yě ɖɔ: “Fífá ní nɔ kpɔ́ xá mi. Lě e Tɔ́ ɔ́ sɛ́ mì dó ɔ́, nyi lɔ sɛ́ mi dó.” Ée é ɖɔ mɔ̌ ɔ́, é fún funfún dó yě jí, bó ɖɔ nú yě ɖɔ: “Mi yí Yɛsinsɛn. Mi sɔ́ hwɛ kɛ mɛɖé ɔ́, é ná gosín kɔ n'i; mi ma ka sɔ́ hwɛ kɛ mɛɖé ǎ ɔ́, é ná nɔ kɔ n'i.” Mɛ e nyí Tɔmáa ɖo ahwanvú Jezu tɔn wěwe lɛ́ɛ mɛ bɔ è nɔ lɛ́ ylɔ́ ɛ ɖɔ hǒxo ɔ́ ɖo kpɔ́ xá yě hwenu e Jezu wá ɔ́ ǎ. Ahwanvú ɖě lɛ́ɛ wá ɖɔ n'i ɖɔ: “Mǐ mɔ Aklúnɔ!” Tɔmáa ka yí gbe nú yě ɖɔ: “Ényí un ma mɔ hǔnjɛ́nkpa e ɖo alɔ tɔn mɛ lɛ́ɛ, bó sɔ́ alɔví ce d'é mɛ, bó mɔ hwǎnkpa e ɖo adaja tɔn mɛ ɔ́, bó zé alɔ ce dó adaja tɔn mɛ ǎ ɔ́, un ná ɖi ǎ.” Azǎn tɔn tántɔngɔ́ ɔ́ gbe ɔ́, ahwanvú Jezu tɔn lɛ́ɛ ko lɛ́ sú hɔn dó ta, ɖo fí ɖokpó ɔ́, bɔ Tɔmáa ɖo yě mɛ gbe énɛ́ gbe. Hɔn ɔ́ ɖo súsú có Jezu wá nɔ te ɖo tɛ́ntin yětɔn, bó ɖɔ: “Fífá ní nɔ kpɔ́ xá mi.” É ka ɖɔ nú Tɔmáa ɖɔ: “Dlɛ̌n alɔví towe ɖó fí, bó kpɔ́n alɔ ce lɛ́ɛ. Dlɛ̌n alɔ towe, bó sɔ́ dó adaja ce mɛ; gɔn nǔ xokpɔ́n, bó ɖi nǔ.” Tɔmáa yí gbe n'i ɖɔ: “Aklúnɔ ce, Mawu ce!” Jezu ka ɖɔ n'i ɖɔ: “É ma nyí ée a mɔ mì ɔ́ wútu wɛ a ɖi nǔ nú mì a? Nǔ nyɔ́ nú mɛ e ma mɔ ǎ, bó ka ɖi nǔ lɛ́ɛ.” Jezu jlɛ́ nǔ gěgé ɖěvo lɛ́ɛ ɖo ahwanvú tɔn lɛ́ɛ nukɔn; è ka wlán yě dó wěma élɔ́ mɛ ǎ. Amɔ̌, è wlǎn élɔ́ lɛ́ɛ, bónú mi ná ɖi nǔ ɖɔ Jezu wɛ nyí Klísu Mawu ví ɔ́, bónú mi ɖi nǔ ɔ́, mi ná mɔ gbɛ gbɔn jǐ tɔn. Énɛ́ ɔ́ gúdo ɔ́, Jezu lɛ́ sɔ́ éɖée xlɛ́ ahwanvú tɔn lɛ́ɛ ɖo Tibɛliadi tɔ tó. Lě e é ka sɔ́ éɖée xlɛ́ yě gbɔn é ɖíe: Sinmɔ́ɔ Piyɛ́ɛ, Tɔmáa e è nɔ ylɔ́ ɖɔ hǒxo ɔ́, Natanayɛ́li e gosín Kana Galilée yíkúngban jí é, Zebeɖée ví súnnu we lɛ́ɛ, kpódó ahwanvú Jezu tɔn we ɖěvo lɛ́ɛ kpó ɖo kpɔ́. Sinmɔ́ɔ Piyɛ́ɛ ɖɔ nú yě ɖɔ: “Un ná yi tɔ jǐ, bó ná yi nyi ɖɔ;” bɔ mɛ ɖě lɛ́ɛ ɖɔ n'i ɖɔ: “Mǐ lɔmɔ̌ ná xwedó we yi.” Bɔ yě yi byɔ́ tɔjíhún mɛ, bó sɛ yi tɔ ɔ́ jí; yě ká wlí nǔ ɖěbǔ zǎn énɛ́ mɛ ǎ. Ée ayǐ ɖo kinkɛn wɛ ɔ́, Jezu wá nɔ te ɖo tɔ ɔ́ tó, ahwanvú tɔn lɛ́ɛ ka tunwun ɖɔ é wɛ ǎ. Jezu ɖɔ nú yě ɖɔ: “Vǐ ce lɛ́ɛ mi; mi mɔ nǔɖé wlí a?” Yě ká yí gbe n'i ɖɔ: “Éeǒ! Mǐ mɔ nǔ ɖěbǔ wlí ǎ.” É ka ɖɔ nú yě ɖɔ: “Mi bo nyi ɖɔ ɔ́ dó ɖisíxwé nú tɔjíhún ɔ́, énɛ́ ɔ́ mi ná mɔ hweví wlí.” Yě ká nyi ɖɔ ɔ́ dó ɖisíxwé nǔgbó, bɔ ɖɔ ɔ́ wlí hweví gěgé, káká bɔ yě sɔ́ sixú dɔn tɔ́n ǎ. Énɛ́ ɔ́, ahwanvú e Jezu yí wǎn ná ɔ́ ɖɔ nú Piyɛ́ɛ ɖɔ: “Aklúnɔ wɛ!” Ée Sinmɔ́ɔ Piyɛ́ɛ se ɖɔ Aklúnɔ wɛ ɔ́, é sɔ́ awu tɔn sin dó alin, bó lɔ́n jɛ tɔ ɔ́ mɛ, ɖó é ko ɖe awu ɖ'ayǐ. Ahwanvú ɖě lɛ́ɛ ka zɔn tɔjíhún ɔ́ mɛ wá, bó dɔn ɖɔ ɔ́, bɔ hweví gɔ́. Fí e yě ɖe dó agě ɔ́ jí ɔ́ sɔ́ lín ǎ; é ná yi mɛ̌tlu kanwe ko (100) mɔ̌. Ée yě jɛ te ɔ́, yě mɔ myɔkán, bɔ è ɖo hweví hi ɖ'é jí wɛ; yě lɛ́ mɔ wɔ̌xúxú ɖo fínɛ́. Jezu ɖɔ nú yě ɖɔ: “Mi fɔ hweví e mi wlí din lɛ́ɛ ɖě wǎ.” Ée Jezu ɖɔ mɔ̌ ɔ́, Sinmɔ́ɔ Piyɛ́ɛ yi byɔ́ tɔjíhún ɔ́ mɛ, bó dɔn ɖɔ ɔ́ tɔ́n, bɔ hweví kloklo kantɔn gban-nukún-atɔn (153) ɖo ɖɔ ɔ́ mɛ, có ɖɔ ɔ́ vún ǎ. Jezu ɖɔ nú yě ɖɔ: “Mi wá ɖu nǔ.” Ahwanvú lɛ́ɛ ɖokpó ka glá, bó kan mɛ e é nyí ɔ́ byɔ́ ɛ ǎ ɖó yě bǐ mɔ nǔ jɛ wú ɖɔ Aklúnɔ wɛ. Jezu ka sɛ yá yě, bó sɔ́ wɔ̌xúxú ɔ́ nú yě, bó lɛ́ sɔ́ hweví ɔ́ lɔ nú yě. Sín hwenu e Jezu fɔ́n sín kú ɔ́, azɔn atɔngɔ́ ɔ́ nɛ́ é ɖo éɖée sɔ́ xlɛ́ ahwanvú tɔn lɛ́ɛ wɛ nɛ́. Ée yě ɖu nǔ ɔ́, Jezu ɖɔ nú Sinmɔ́ɔ Piyɛ́ɛ ɖɔ: “Sinmɔ́ɔ Jǎan ví! A yǐ wǎn nú mì hú lě e mɛ élɔ́ lɛ́ɛ yí wǎn nú mì gbɔn é a?” Bɔ Piyɛ́ɛ yí gbe n'i ɖɔ: “Ɛɛn Aklúnɔ; a tunwun ɖɔ un yí wǎn nú we.” Bɔ Jezu ɖɔ n'i ɖɔ: “Nǎ nǔɖuɖu lɛ̌ngbɔ́ví ce lɛ́ɛ!” Jezu lɛ́ kanbyɔ́ ɛ azɔn wegɔ́ ɔ́ ɖɔ: “Sinmɔ́ɔ Jǎan ví, a yǐ wǎn nú mì ganjí a?” Bɔ Piyɛ́ɛ lɛ́ yí gbe n'i ɖɔ: “Ɛɛn Aklúnɔ, a tunwun ɖɔ un yí wǎn nú we.” Bɔ Jezu lɛ́ ɖɔ n'i ɖɔ: “Kpé nukún dó lɛ̌ngbɔ́ ce lɛ́ɛ wú.” Jezu lɛ́ kanbyɔ́ ɛ azɔn atɔngɔ́ ɔ́ ɖɔ: “Sinmɔ́ɔ Jǎan ví, a yǐ wǎn nú mì a?” Ée Piyɛ́ɛ mɔ ɖɔ Jezu kanbyɔ́ émí azɔn atɔngɔ́ ɔ́ ɖɔ é yí wǎn nú émí a jí ɔ́, wǔ kú i, bɔ é gbɔ bó yí gbe n'i ɖɔ: “Aklúnɔ, a tunwun nǔ bǐ; a tunwun ɖɔ un yí wǎn nú we.” Jezu ka ɖɔ n'i ɖɔ: “Nǎ nǔɖuɖu lɛ̌ngbɔ́ ce lɛ́ɛ. Má ɖɔ nǔgbó nú we, hwenu e a ɖo dɔ̌nkpɛ mɛ ɔ́, hwi ɖésú wɛ nɔ sin gǒjíblánú towe, bó nɔ́ yi fí e jló we ɔ́ bǐ; amɔ̌, hwenu e a nǎ wá kpo nyɔ̌ɖaxó ɔ́, a nǎ dlɛ́n alɔ towe lɛ́ɛ, bɔ mɛ ɖěvo ná sin gǒjíblánú nú we, bó ná dɔn we gbɔn fí e a ma jló ǎ é.” Kú alɔkpa e Piyɛ́ɛ ná kú, bó ná dó ná susu Mawu ɔ́ xlɛ́ ɛ wɛ Jezu ɖe, bó dó ɖɔ mɔ̌ n'i; énɛ́ ɔ́ gúdo ɔ́, é ɖɔ n'i ɖɔ: “Xwedó mì.” Piyɛ́ɛ ka lɛ́ kɔ kpɔ́n gúdo, bó mɔ ahwanvú e Jezu yí wǎn ná ɔ́ jǎwe ɖo gǔdo yětɔn; ahwanvú énɛ́ wɛ sɛkpɔ́ Jezu hwenu e yě ɖo nǔ ɖu wɛ é, bó kanbyɔ́ ɛ ɖɔ: “Aklúnɔ, mɛ̌ ka ɖo nǎ sa we ɖu wɛ.” Ée Piyɛ́ɛ mɔ ahwanvú énɛ́ ɔ́, é kanbyɔ́ Jezu ɖɔ: “Aklúnɔ, mɛ élɔ́ ka lo? Étɛ́ ka ná jɛ dó éyɛ́ jí?” Jezu ka yí gbe n'i ɖɔ: “Ényí un jló ɖɔ éyɛ́ ní nɔ ayǐ káká bónú ma lɛ́ kɔ wá ɔ́, ani wɛ kan we ɖ'é mɛ? Hwɛ ɔ́, xwedó mì.” Xó énɛ́ gba kpé mɛ e ɖi nǔ nú Jezu lɛ́ɛ mɛ, bɔ yě ɖɔ ahwanvú énɛ́ kun ɖo nǎ kú wɛ ó; Jezu ka ɖɔ é kún ná kú ó ǎ; lo ɔ́, é ɖɔ n'i ɖɔ: “Ényí un jló ɖɔ é ní nɔ ayǐ káká bónú ma lɛ́ kɔ wá ɔ́, ani wɛ kan we ɖ'é mɛ?” Ahwanvú énɛ́ wɛ ɖo kúnnu ɖe nú nǔ élɔ́ lɛ́ɛ bǐ wɛ; é wɛ wlán nǔ élɔ́ lɛ́ɛ, bɔ mǐ tunwun ɖɔ xó nǔgbó wɛ é ɖɔ. Jezu lɛ́ wa nǔ gěgé ɖěvo lɛ́ɛ, bɔ ényí è gbɛ̌ d'é wú bó ná wlán ɖě bɔdó ɖě wú ɔ́, un ɖiɖɔ wěma tɔn ná sukpɔ́ káká bɔ gbɛ ɔ́ bǐ ná sixú hɛn ǎ. Mɛvívɛ́ná ce Teofílu! Nǔ e Jezu wa ɔ́ kpódó nǔ e é kplɔ́n mɛ lɛ́ɛ kpán ɔ́, un kpi bǐ sín tan dó wěma ce nukɔn tɔn ɔ́ mɛ sín bǐbɛ́mɛ, káká yi jɛ gbe e gbe Mawu sɔ́ ɛ yi jǐxwé é. Cóbónú é ná yi jǐxwé ɔ́, é kplɔ́n nǔ mɛsɛ́dó e é cyán lɛ́ɛ gbɔn Yɛsinsɛn jí. Mɛsɛ́dó énɛ́ lɛ́ɛ wɛ Jezu sɔ́ éɖée xlɛ́ ɖo kú tɔn gúdo, bó ɖe xlɛ́ yě gbɔn ali gěgé nu, ɖɔ émí ɖo gbɛ. Azǎn kanɖé (40) wɛ é tɔ́n dó yě jí xɔ, bó nɔ́ ɖo xó ɖɔ nú yě wɛ dó axɔ́súɖuɖu Mawu tɔn wú. Jezu ka wá ɖo nǔ ɖu xá yě wɛ gbe ɖokpó, bó ɖɔ nú yě ɖɔ: “Mi ma sɛ tɛn sín Jeluzalɛ́mu ó, lo ɔ́, mi nɔ te kpɔ́n nǔ e sín akpá Mawu Tɔ́ ɔ́ dó, bɔ un ko ɖɔ xó tɔn nú mi é. Đó Jǎan ɔ́, sin wɛ é sɔ́ dó lɛ yɛhwesin nú mɛ; lo ɔ́, midɛɛ lɛ́ɛ ɔ́, ɖo malín málín mɛ din ɔ́, Yɛsinsɛn wɛ è nǎ sɔ́ dó lɛ yɛhwesin nú mi.” Kplékplé mɛ yětɔn kanbyɔ́ Jezu ɖɔ: “Aklúnɔ, hwenɛ́nu wɛ a nǎ lɛ́ vɔ́ axɔ́súɖuɖu Izlayɛ́li tɔn ɔ́ sɔ́ dó alɔ mɛ nú Izlayɛ́li a?” É ka yí gbe nú yě ɖɔ: “Hwenu e é ná nyí ɔ́, gan e mɛ ka wɛ ɔ́, Mawu Tɔ́ ɔ́ ko to kpódó acɛ tɔn kpán; é nyí xó mitɔn ɖé ǎ. Lo ɔ́, mi ná mɔ acɛ yí hwenu e Yɛsinsɛn ná jɛ te wá mi jí é, bɔ mi na nyí kúnnuɖetɔ́ ce, ɖo Jeluzalɛ́mu, gbɔn Judée gbé ɔ́ bǐ jí, kpódó Samalíi kpán, káká yi jɛ fí e gbɛ ɔ́ kponu ɖó é.” Ée Jezu ɖɔ xó énɛ́ lɛ́ɛ gúdo ɔ́, yě ɖo kpínkpɔ́n ɛ wɛ, bɔ è sɔ́ ɛ ɖidó jǐ bɔ akpɔ́kpɔ́ ɖé wá bú i. Fínɛ́ wɛ yě ɖe, bó ɖo jǐnukúnsin kpɔ́n sɛ́ dó wɛ hwenu e é ɖo yiyi wɛ ɔ́, bɔ nya we ɖé lɛ́ɛ dó awu wěwé, bó tɔ́n ɖo akpá yětɔn, bo ɖɔ nú yě ɖɔ: “Galiléenu e mi! Étɛ́ sín te wɛ mi ka kpo ɖe ɖo fí, bó ɖo jǐnukúnsin kpɔ́n sɛ́ dó wɛ mɔ̌? Jezu énɛ́ e è sɔ́ sín tɛ́ntin mitɔn yi jǐxwé ɔ́ ná lɛ́ wá lě e mi mɔ ɛ, bɔ é yi jǐxwé gbɔn é.” Énɛ́ ɔ́ gúdo ɔ́, mɛsɛ́dó lɛ́ɛ jɛ te sín olívutín só ɔ́ jí, bó lɛ́ kɔ wá yi Jeluzalɛ́mu; só énɛ́ lín dó toxo ɔ́ ǎ; é ná ɖó kilomɛ́tlu ɖokpó mɔ̌ dó toxo ɔ́. Ée yě wá toxo ɔ́ mɛ ɔ́, yě byɔ́ xɔ e mɛ yě ko nɔ́ nɔ ɖ'ayǐ é mɛ, ɖo síngbó ɖé jí. Yě mɛ e wɛ lɛ́ɛ ɖíe: Piyɛ́ɛ, Jǎan, Jaki, Andlé, Filípu, Tɔmáa, Baatelemíi, Matíe, Jaki Alufée ví ɔ́, Sinmɔ́ɔ hunjɛdótojítɔ́ ɔ́, kpódó Judi Jaki ví ɔ́ kpó. Yě bǐ sín ayi ɖo bǔ, bɔ yě nɔ́ ɖó kan dó ɖɛxixo wú, yě kpódó nyɔ̌nu lɛ́ɛ kpán, kpódó Mali Jezu sín nɔ kpó, kpódó Jezu sín nɔví lɛ́ɛ kpó. Gbe ɖokpó wá su, bɔ yě nǔɖitɔ́ kantɔn mɔ̌ (120) kplé, bɔ Piyɛ́ɛ sí te ɖo tɛ́ntin yětɔn, bó ɖɔ: “Nɔví ce lɛ́ɛ mi! Judási e nɔ nukɔn nú mɛ e wá wlí Jezu lɛ́ɛ ɔ́, nǔ e Yɛsinsɛn ɖɔ dó wǔtu tɔn gbɔn Davídi nu mɛ, ɖo Mawuxówéma ɔ́ mɛ ɔ́ ɖó ná jɛ. Hǎgbɛ́ mǐtɔn wɛ é kó nyí ɖ'ayǐ, bɔ é lɔmɔ̌ ɖó azɔ̌ tɔn.” Mɛ e xó ɖɔ wɛ Piyɛ́ɛ ɖe ɔ́ ɖíe ka sɔ́ nǔ nyanya e é dó sin ɔ́ sín akwɛ́ dó xɔ ayǐkúngban ɖokpó, lobo sɔ́ kɔ do, bó wú ɖo tɛ́ntin, bɔ adɔ tɔn lɛ́ɛ bǐ tlú e. Nǔ énɛ́ ɔ́, Jeluzalɛ́munu lɛ́ɛ bǐ wɛ se, káká bó nɔ́ ylɔ́ ayǐkúngban ɔ́ dó gbe yětɔn mɛ ɖɔ “Hakeludama” tínmɛ tɔn wɛ nyí “kanjɔyíkúngban.” “È ka wlán dó Ɖɛhanwéma mɛ ɖɔ jí: ‘Xwé tɔn ní wú gbě, bónú mɛɖé ní ma sɔ́ nɔ gbe ó.’ È lɛ́ wlán ɖɔ: ‘Mɛ ɖěvo ní jɛ tɛn tɔn mɛ.’ Énɛ́ ɔ́, yě sɔ́ mɛ we ɖó te: Jozɛ́fu kpó Matyasi kpó; Jozɛ́fu ɔ́ nɔ́ lɛ́ nyí Baasabási, bɔ è nɔ lɛ́ ylɔ́ ɛ ɖɔ Jusitúsi. Énɛ́ ɔ́ gúdo ɔ́, yě xo ɖɛ, bó ɖɔ: “Aklúnɔ, hwi mɛ e nɔ mɔ nǔ jɛ mɛ ɖokpó ɖokpó sín ayi mɛ é, xlɛ́ mɛ e a sɔ́ ɖo mɛ we élɔ́ lɛ́ɛ mɛ é mǐ, nú é ná nɔ Judási sín tɛn mɛ, bó wa mɛsɛ́dó sín azɔ̌ e Judási jó dó, bó yi tɛn e nyí étɔn ɔ́ mɛ é.” Ée yě ɖɔ mɔ̌ ɔ́, yě nyi akɔ, bó sɔ́ Matyasi, bɔ é gɔ́ nú mɛsɛ́dó wǒ-ɖokpó lɛ́ɛ. Pantekótu sín xwezán gbe ka wá su, bɔ nǔɖitɔ́ lɛ́ɛ bǐ kplé ɖo fí ɖokpó ɔ́. Tlóló ɔ́, zǐngídi ɖé gosín jǐxwé jɔhɔn ɖaxó ɖé wɛ ɖo nyinyi wɛ ɖɔhun, bó kpé xwé e gbe yě ɖe ɔ́ bǐ, bɔ yě mɔ nǔ zoɖɛ́ ɖɔhun ɖé lɛ́ɛ má yěɖée ɖó mɛ ɖokpó ɖokpó jí. Yɛsinsɛn gɔ́ ayi mɛ nú yě, bɔ yě jɛ gbe alɔkpa alɔkpa dó jí, lě e Yɛsinsɛn ɔ́ ná ɖɔ yě ní ɖɔ gbɔn é. Hwenɛ́nu ɔ́, Jwifu e nɔ xwedó Mawusɛ́n ɔ́ lɛ́ɛ gěgé ká gosín to e ɖo ayǐkúngban jí é bǐ mɛ, bó wá ɖo Jeluzalɛ́mu. Ée yě se zǐngídi énɛ́ ɔ́, yě nyi ahwan wá kplé, bɔ xó e ɖɔ wɛ mɛsɛ́dó lɛ́ɛ ɖe ɔ́ fyán yě tlala, ɖó mɛ ɖokpó ɖokpó nɔ́ se xó énɛ́ lɛ́ɛ dó é ɖésúnɔ sín gbe mɛ; bɔ é nyí nǔɖé bó kpácá yě, bó fyán yě, bɔ yě nɔ́ ɖɔ: “Yě mɛ énɛ́ lɛ́ɛ e ɖo xó ɖɔ wɛ lɛ́ɛ ɔ́, Galiléenu wɛ yě bǐ ka nyí ǎ cé? Nɛ̌ ka gbɔn bɔ ɖokpó ɖokpó mǐtɔn nɔ́ se xó e ɖɔ wɛ yě ɖe ɔ́ dó gbe mǐtɔn mǐtɔn mɛ? Gbɛtɔ́ ɖo mǐ mɛ bó gosín Paati, Mɛdinu kpó Elámu kpán; mɛ ɖě gosín Mɛzopotamíi, Judée, Kapadɔ́si, Pɔ́ɔn, gbɛtɔ́ gosín tokpɔn Azíi tɔn mɛ. Mɛ ɖé lɛ́ɛ gosín Flijíi, Panfilíi, Ejípu kpódó Libíi sín akpáxwé e ɖo Silenɛ́ɛ kpá é kpán; Hlɔ̌manu lɛ́ɛ ɖo mǐ mɛ. Jwifu lɛ́ɛ, kpódó mɛ e wá byɔ́ sinsɛn yětɔn mɛ lɛ́ɛ kpán; Klɛ́tinu lɛ́ɛ ɖo fí, kpódó Alabíinu lɛ́ɛ kpó, có mǐ bǐ mǐ ɖo sise wɛ, bɔ yě nɔ́ ɖo azɔ̌ ɖagbe ɖagbe e Mawu wa lɛ́ɛ sín xó ɖɔ wɛ dó gbe mǐtɔn mǐtɔn mɛ.” É kpácá yě bǐ tawun, bɔ yě sɔ́ tunwun nǔ e yě ná ɖɔ ɔ́ ǎ, bó gbɔ bó nɔ kanbyɔ́ yěɖée ɖɔ: “Étɛ́ lɔkpa ka ɖíe?” Lo ɔ́, mɛ ɖé lɛ́ɛ ɖo yě mɛ, bó nɔ́ ɖo slǎmɛ ɖɔ mɛsɛ́dó lɛ́ɛ wú wɛ ɖɔ jí: “Vɛ̌ɛn víví wɛ yě nu gɔ́ xo.” Piyɛ́ɛ ka sí te, é kpódó hǎgbɛ́ tɔn wǒ-ɖokpó lɛ́ɛ kpán, bó zé gbe yi jǐ, bó ɖɔ nú mɛ lɛ́ɛ ɖɔ: “Mi Judéenu lɛ́ɛ kpódó mi mɛ e ɖo Jeluzalɛ́mu lɛ́ɛ bǐ sésé kpó, mi ní mɔ nukúnnú jɛ nǔ élɔ́ wú, bó lɛ́ ɖótó xó e ɖɔ gbé un ja é. Mɛ élɔ́ lɛ́ɛ nu ahan mú lě e mi vɛdó é ǎ, ɖó gan tɛ́nnɛ zǎnzǎn tɔn jɛ́n ɖíe ɖo xixo wɛ e. Lo ɔ́, nǔ e gbeyíɖɔ Mawu tɔn Jowɛ́li ko ɖɔ ɔ́ wɛ ɖo jijɛ wɛ; é wɛ nyí ɖɔ: ‘Mawu ɖɔ: ɖo azǎn gǔdo gúdo tɔn lɛ́ɛ mɛ ɔ́, un ná gba Yɛ ce kɔn nyi mɛ bǐ jǐ; vǐ mitɔn lɛ́ɛ, súnnu kpó nyɔ̌nu kpán ná nɔ́ ɖɔ Mawuxó; dɔ̌nkpɛvú mitɔn lɛ́ɛ ná nɔ́ mɔ nǔ, bɔ Mawu ná nɔ́ xo dlɔ̌ nyɔ̌xónɔ mitɔn lɛ́ɛ. Dódó, ɖo azǎn énɛ́ lɛ́ɛ mɛ ɔ́, un ná gba Yɛ ce kɔn nyi mɛsɛntɔ́ ce súnnu kpódó nyɔ̌nu kpán jí, bɔ yě ná ɖɔ Mawuxó. Un ná ɖe nǔdábaɖa xlɛ́ ɖo jǐnukúnsin aga, bó ná ɖe nǔjlɛ́jlɛ́ xlɛ́ ɖo do, ɖo ayǐkúngban jí fí: hun kpódó zo kpó, kpódó azizɔ ɖaxó kpó ná tíin. Hwesivɔ́ ná húzú zǐnflú, bɔ sun ná myá hun ɖɔhun, cóbɔ Aklúnɔ sín azǎn ɔ́, azǎn ɖaxó susunɔ énɛ́ ná wá. Énɛ́ ɔ́, mɛ ɖěbǔ ylɔ́ Aklúnɔ sín nyǐkɔ ɔ́, mɛ ɔ́ ná gán.’ ” “Izlayɛ́li ví e mi! Mi ɖótó te bó se xó élɔ́ lɛ́ɛ: Jezu Nazalɛ́tinu ɔ́, nya ɖé wɛ é nyí, bɔ Mawu ɖe hlɔ̌nhlɔ́n tɔn xlɛ́ mi, gbɔn nǔjíwǔ kpó nǔ ɖaxó ɖaxó kpó, kpódó wuntun e Mawu jlɛ́ gbɔn jǐ tɔn ɖo mǐ tɛ́ntin, bɔ mi ɖésú tunwun lɛ́ɛ kpó gbla mɛ. Nya énɛ́ ɔ́, è jó e nú mi, lě e Mawu ɖésú kó jló, bó to gbɔn é, bɔ mi ká ɛ nyi aklúzu jí, bó hu i, gbɔn mɛdídá lɛ́ɛ lɔ mɛ; lo ɔ́, Mawu fɔ́n ɛ sín kú; é hwlɛ́n ɛ sín kúgan mɛ; ɖó kú sín hlɔ̌nhlɔ́n sixú hɛn ɛ ɖó te ǎ. Davídi ka ko ɖɔ xó dó wǔ tɔn ɖɔ jí: ‘Un nɔ mɔ Aklúnɔ hwebǐnu ɖo nukɔn ce; é ɖo ɖisí ce xwé bónú nǔɖé ní ma gba ayi dó nú mì ó. Énɛ́ ɔ́ wú wɛ nyɔ̌ná gɔ́ ayi ce mɛ, bɔ un nɔ ɖɔ xó kpódó awǎjijɛ kpó. Agbaza ce na bo ɖo yɔdo mɛ ɔ́, é ná vo ɖo nukúnɖíɖó mɛ; ɖó a nǎ jó lǐndɔ̌n ce dó nyi kútomɛ ǎ; a ka ná lɔn nú mɛ mímɛ́ towe ná nyɔ ǎ. A xlɛ́ gbɛli lɛ́ɛ mì, lobɔ kpɔ́nɔxámɛ towe nɔ dó xomɛhunhun nú mì.’ ” “Nɔví ce lɛ́ɛ mi, mi gbɔ nú ma ɖɔ xomɛ nú mi: tɔ́gbó mǐtɔn Davídi kú, bɔ è ɖi i, bɔ é kpo ɖo yɔdo tɔn mɛ, ɖo tomɛ fí káká jɛ égbé din. Lo ɔ́, gbeyíɖɔ Mawu tɔn wɛ é nyí, bó ka tunwun ɖɔ Mawu dó akpá, bó xwlé nǔ d'é jí nú émí ɖɔ émí ná wá sɔ́ vǐvú émítɔn ɖokpó ɖó axɔ́súzinkpo émítɔn jí. Fínfɔ́n sín kú Klísu tɔn ɔ́ wɛ Davídi ko mɔ, bó kó ɖɔ ɖ'ayǐ ɖɔ jí: ‘È nǎ jó e dó nyi kútomɛ ǎ, agbaza tɔn ka ná nyɔ ɖo yɔdo mɛ ǎ.’ ” Jezu énɛ́ wɛ Mawu fɔ́n sín kú; mǐ bǐ wɛ mɔ; bɔ din e Mawu sɔ́ ɛ su, bó sɔ́ ɛ jínjɔ́n akpá, ɖo ɖisí tɔn xwé ɔ́, Mawu tɔ́ tɔn sɔ́ Yɛsinsɛn e sín akpá é dó nú mǐ ɔ́ jó n'i, bɔ é gba kɔn nyi mǐ jí; nǔ e mɔ wɛ mi ɖe, bó ɖo sise wɛ din ɔ́ nɛ́. Đó Davídi yi jǐxwé ɖě ǎ; é ɖésú ka ɖɔ: “Aklúnɔ ɖɔ nú Aklúnɔ ce ɖɔ: Jǐnjɔ́n ɖisí ce xwé, káká nú ma sɔ́ kɛntɔ́ towe lɛ́ɛ dó bló afɔɖótɛn towe.” “Izlayɛ́li ví lɛ́ɛ bǐ ní bó tunwun ganjí ɖɔ Jezu énɛ́ e mi ká nyi aklúzu jí ɔ́ wɛ Mawu sɔ́ Aklúnɔ, bó lɛ́ sɔ́ Klísu.” Ée yě se xó énɛ́ ɔ́, é hɛn hǔn nú yě ɖésú, bɔ yě kanbyɔ́ Piyɛ́ɛ kpódó mɛsɛ́dó lɛ́ɛ kpán ɖɔ: “Nɔví ce lɛ́ɛ mi! Étɛ́ mǐ ká ɖó ná wa?” Piyɛ́ɛ ka yí gbe nú yě ɖɔ: “Mi lɛ́ kɔ sín hwɛ mitɔn lɛ́ɛ gúdo; ɖokpó ɖokpó mitɔn ní lɛ yɛhwesin ɖo Jezu Klísu nyǐkɔ mɛ, bónú Mawu ná sɔ́ hwɛ mitɔn lɛ́ɛ kɛ mi, bɔ mi ná mɔ Yɛsinsɛn e nyí nǔníná Mawu tɔn ɔ́ yí. Đó mi kpódó vǐ mitɔn lɛ́ɛ kpán wɛ Mawu dó akpá tɔn ná, káká yi jɛ mɛ e ɖo zɔga lɛ́ɛ bǐ sésé jí, mɛ e Aklúnɔ Mawu mǐtɔn ná ylɔ́ wá é ɖésú gɔ́n lɛ́ɛ.” Piyɛ́ɛ ka lɛ́ ɖɔ xó gěgé ɖěvo nú yě, bó ná dó dɔn yě wá Mawu li jí, bó lɛ́ dó ná akɔ́nkpinkpan yě. É ɖɔ nú yě ɖɔ: “Mi hɔn sín gbɛtɔ́ dídá din tɔn élɔ́ lɛ́ɛ mɛ.” Mɛ e yí Piyɛ́ɛ xó se lɛ́ɛ ka lɛ yɛhwesin. Yě bǐ kplékplé yi afɔwó afatɔ́n (3.000) mɔ̌, bó jɛ yě jí gbe énɛ́ gbe. Yě nɔ́ ɖó kan dó mɛsɛ́dó lɛ́ɛ sín nǔkplɔ́nmɛ kpódó kpɔ́ninɔ ɖo nɔví mɛ kpó wú, bó nɔ́ ɖó kan dó kɔnɖókpɔ́núɖuɖu ɔ́ kpódó ɖɛxixo kpó wú. Đokpó ɖokpó yětɔn ɖo xɛsi ɖi wɛ; ɖó Mawu ɖo nǔjlɛ́jlɛ́ kpódó nǔdábaɖa gěgé kpó jlɛ́ wɛ gbɔn mɛsɛ́dó lɛ́ɛ jí. Yě mɛ e ɖi nǔ lɛ́ɛ bǐ sésé nɔ́ nɔ kpɔ́, bó nɔ́ kplé nǔ yětɔn lɛ́ɛ bǐ ɖó kpɔ́. Yě nɔ́ sa nǔ yětɔn lɛ́ɛ, bó nɔ́ má akwɛ́ tɔn ɖo yěɖée tɛ́ntin lě e nǔ tɔn hu dó mɛ ɖokpó ɖokpó gbɔn é. Ayǐhɔ́ngbe ayǐhɔ́ngbe ɔ́, yě nɔ́ yi kplé ɖo sinsɛnxɔ mɛ; yě nɔ́ ɖu nǔ ɖó kpɔ́ gbɔn xwé yětɔn lɛ́ɛ gbe xwé yětɔn lɛ́ɛ gbe, bó nɔ́ lɛ́ ɖu nǔ kpó xomɛhunhun kpó, kpó ayixa ɖokpó kpó. Yě nɔ́ kpa susu nú Mawu, bɔ mɛ bǐ yí wǎn nú yě. Ayǐhɔ́ngbe ayǐhɔ́ngbe ɔ́, Aklúnɔ ka nɔ́ dɔn mɛ e é hwlɛ́n gán lɛ́ɛ wá gɔ́ nú yě. Piyɛ́ɛ kpódó Jǎan kpó xwe sinsɛnxɔ mɛ, gan atɔn mɛ hwelɛ́kɔ sín ɖɛxixo hwenu. Nya ɖé ka tíin, bó kú sé sín hwenu e è ko ji i é. Ayǐhɔ́ngbe ayǐhɔ́ngbe ɔ́, è nɔ zé nya énɛ́ wá ɖó xɔ ɔ́ sín hɔn e è nɔ ylɔ́ ɖɔ “hɔn ɖɛkpɛ ɖɛkpɛ” ɔ́ nukɔn, bónú é ná nɔ́ byɔ́ nǔ mɛ e nɔ gbɔn fínɛ́ byɔ́ sinsɛnxɔ mɛ lɛ́ɛ. Ée nya énɛ́ mɔ Piyɛ́ɛ kpódó Jǎan kpán ɖo sinsɛnxɔ mɛ ná byɔ́ wɛ ɔ́, é byɔ́ nǔ yě. Yě ka bɔ nukún nyi wǔ tɔn, bɔ Piyɛ́ɛ ɖɔ n'i ɖɔ jí: “Kpɔ́n mǐ.” Sékúnɔ ɔ́ ka jɛ yě kpɔ́n jí ma ɖe nukún, bó vɛdó ɖɔ nǔɖé ná ná émí wɛ yě ɖe sín. Piyɛ́ɛ ka ɖɔ n'i ɖɔ jí: “Un ɖó akwɛ́ ǎ, un ka ɖó siká ǎ, lo ɔ́, nǔ e un ɖó ɔ́, un ná ná we; ɖo Jezu Klísu Nazalɛ́tinu ɔ́ sín nyǐkɔ mɛ ɔ́: ɖi zɔnlin.” Piyɛ́ɛ ɖɔ mɔ̌ bó hɛn alɔ tɔn ɖisí ɔ́, bó sɔ́ ɛ sí te, bɔ azɔn ɖokpó ɔ́, sékúnɔ ɔ́ sín afɔ lɛ́ɛ kpódó afɔgómɛ tɔn lɛ́ɛ kpó syɛ́n, bɔ é lɔ́n xwete, bó jɛ zɔnlin ɖi jí, bó xwedó yě byɔ́ sinsɛnxɔ ɔ́ mɛ, bó ɖo zɔnlin ɖi wɛ, bó ɖo jǐ lɔ́n yi wɛ, bó ɖo susu kpa nú Mawu wɛ. Togun ɔ́ bǐ sésé mɔ ɛ ɖo zɔnlin ɖi wɛ, bó ɖo susu kpa nú Mawu wɛ. Ée mɛ bǐ wá tunwun ɖɔ nya e nɔ ɖo ayǐjínjɔ́n, bó nɔ́ ɖo nǔ byɔ́ wɛ ɖo “Hɔn ɖɛkpɛ ɖɛkpɛ” ɔ́ nukɔn ɔ́ wɛ ɔ́, nǔ énɛ́ e jɛ dó wǔ tɔn ɔ́ kpácá yě, bó fyán yě. Nya ɔ́ ka sɔ́ lɛ́ kɔ sín Piyɛ́ɛ kpódó Jǎan kpán gúdo ǎ, bɔ nǔ énɛ́ lɛ́ɛ kpácá togun ɔ́ bǐ, bɔ yě nyi ahwan wá mɔ yě, ɖo fí e è nɔ ylɔ́ ɖɔ Salomɔ́ɔ gba jí é. Ée Piyɛ́ɛ mɔ mɔ̌ é ɔ́, é yí xó, bó ɖɔ nú togun ɔ́ ɖɔ: “Izlayɛ́li ví e mi! Étɛ́wú azɔn e gbɔ nú nya élɔ́ ɔ́ nɔ́ kpácá mi? Étɛ́wú mi nɔ kpɔ́n mǐ mɔ̌, ɖi hlɔ̌nhlɔ́n mǐ ɖésúnɔ tɔn, abǐ Mawu sísí mǐtɔn wɛ wa nǔ, bɔ nya élɔ́ ɖo zɔnlin ɖi wɛ ɖɔhun?” Mawu Ablaxámu tɔn, Izáki tɔn, Jakɔ́bu tɔn, Mawu tɔ́gbó mǐtɔn lɛ́ɛ tɔn wɛ sɔ́ mɛsɛntɔ́ tɔn Jezu sɔ́ su. Jezu e mi jó nú gǎn lɛ́ɛ, lobo gbɛ́ ɛ ɖo Pilátu nukɔn hwenu e éyɛ́ jló ná ɖe e nyi te é. Midɛɛ lɛ́ɛ ɔ́, mi gbɛ́ mɛ e nyí mɛ mímɛ́, bó nyí hwɛjijɔnɔ ɔ́, bó ka byɔ́ ɖɔ è nǐ ɖe mɛ e nyí mɛhutɔ́ ɔ́ nyi te. Mi zɔ́n bɔ è hu mɛ e nyí gbɛnámɛtɔ́ ɔ́. Mawu ka fɔ́n ɛ sín kú, bɔ mǐ ɖo kúnnu ɖe ná wɛ. Nǔɖiɖi ɖó nú hlɔ̌nhlɔ́n e Jezu sín nyǐkɔ ɖó ɔ́ zɔ́n, bɔ nyǐkɔ énɛ́ ná hlɔ̌nhlɔ́n nya e mi ko tunwun, bó ka ɖo mimɔ wɛ din é; nǔɖiɖi ɖó n'i wɛ zɔ́n, bɔ nya élɔ́ sín azɔn gbɔ bǐ sésé lě e mi ɖésúnɔ ɖo mimɔ gbɔn wɛ din é. Din ɔ́, nɔví ce lɛ́ɛ mi; un tunwun ɖɔ nǔ énɛ́ e mi kpódó gǎn mitɔn lɛ́ɛ kpó dó sin xá Jezu ɔ́, mi kún tunwun cóbó bló ó. Lo ɔ́, nǔ e Mawu ko ɖɔ ɖ'ayǐ ɖɔ Klísu émítɔn ɖó ná ji ya ɔ́ wɛ é bló. Hǔn mi bo lɛ́ kɔ sín hwɛ mitɔn lɛ́ɛ gúdo, bó wá Mawu gɔ́n, bónú é ná súnsún hwɛ mitɔn lɛ́ɛ. Aklúnɔ Mawu ná sɛ́ fífá sín hwenu lɛ́ɛ dó mi, bó ná sɛ́ mɛ e é ko sɔ́ ɖ'ayǐ nú mi ɔ́ dó mi; mɛ ɔ́ wɛ nyí Jezu Klísu. Amɔ̌, din ɔ́, Jezu ná to ɖo Mawu gɔ́n hwɛ̌, káká jɛ hwenu e Mawu ná lɛ́ vɔ́ nǔ bǐ húzú dó, lě e é ko ɖɔ gbɔn ɖ'ayǐ xóxó gbɔn gbeyíɖɔ mímɛ́ tɔn lɛ́ɛ jí é. Mɔyízi ko ɖɔ jí: “Aklúnɔ Mawu mitɔn ná bló bɔ gbeyíɖɔ nyɛ ɖɔhun ɖokpó ná tɔ́n ɖo togun mitɔn mɛ. Mi ná ɖótó nǔ e é ná ɖɔ nú mi lɛ́ɛ bǐ sésé. Mɛ ɖěbǔ ma ká ɖótó gbeyíɖɔ énɛ́ ɔ́ ǎ ɔ́, è nǎ ɖe e sín togun ɔ́ mɛ, bó hu i.” Mɔ̌ ɖokpó ɔ́, gbeyíɖɔ Mawu tɔn e jí Mawu ɖɔ xó gbɔn, bɛ́ sín Samuwɛ́li jí lɛ́ɛ bǐ ɖɔ xó dó azǎn élɔ́ lɛ́ɛ wú ɖě jɛ ɖě gúdo. Mi lɔmɔ̌ ɔ́, Jwifu wɛ mi nyí, bɔ akɔ e Mawu jɛ xá tɔ́gbó mitɔn lɛ́ɛ gbɔn gbeyíɖɔ tɔn lɛ́ɛ jí ɔ́ nyí mitɔn, ɖó Mawu ko dó akpá tɔn nú tɔ́gbó mitɔn Ablaxámu ɖɔ jí: “Vǐ towe lɛ́ɛ jí wɛ un ná gbɔn, bó ná xo ɖɛ ɖagbe dó hɛ̌nnu e ɖo wɛ̌kɛ́ ɔ́ mɛ lɛ́ɛ bǐ jí.” Hǔn, midɛɛ lɛ́ɛ wɛ nyí mɛ nukɔn tɔn e Mawu sɛ́ Jezu dó é. É sɛ́ ɛ dó bónú é ná lɛ́ kɔ nú ɖokpó ɖokpó mitɔn sín nǔ nyanya e mi nɔ wa lɛ́ɛ gúdo, bó ná xo ɖɛ dó mi jí. Piyɛ́ɛ kpódó Jǎan kpán kpo ɖo xó ɖɔ nú togun ɔ́ wɛ, bɔ vɔ̌sánú-xwlémawutɔ́ lɛ́ɛ kpódó sinsɛnxɔcɔ́tɔ́ lɛ́ɛ sín gǎn kpó, sinsɛngbɛ́ e è nɔ ylɔ́ ɖɔ Saduseɛn lɛ́ɛ kpó wá xwetɔ́n. Nǔ e kplɔ́n togun ɔ́ wɛ mɛsɛ́dó we énɛ́ lɛ́ɛ ɖe, bó ɖɔ Jezu fɔ́n sín kú, lobo dó ɖo ɖiɖe xlɛ́ gbɔn fínɛ́ wɛ ɖɔ mɛkúkú lɛ́ɛ ná fɔ́n sín kú ɔ́, é vɛ́ yě wú, bɔ yě wlí mɛsɛ́dó énɛ́ lɛ́ɛ yi dó gankpá mɛ, bɔ yě nɔ́ fínɛ́ káká bɔ ayǐ hɔ́n; ɖó hwe ko ɖo xɔ yi wɛ. Nǔ ka ɖo mɔ̌ có, mɛ e se xó e mɛsɛ́dó lɛ́ɛ ɖɔ ɔ́ gěgé ɖi nǔ. Mɛ e ɖi nǔ lɛ́ɛ ná yi děgba ɖě afatɔ́n (5.000) mɔ̌. Ayǐhɔ́ngbe tɔn ɔ́, Jwifugán lɛ́ɛ, tomɛxó lɛ́ɛ, kpódó sɛ́nkplɔ́nmɛtɔ́ lɛ́ɛ kpán wá kplé ɖo Jeluzalɛ́mu. Vɔ̌sánú-xwlémawutɔ́ ɖaxó Hanna ɖo tɛn énɛ́ mɛ, kpódó Kayífu kpó, kpó Jǎan kpó, kpódó Alɛsándlu kpó, kpódó vɔ̌sánú-xwlémawutɔ́ ɖaxó ɔ́ sín hɛ̌nnumɔ lɛ́ɛ bǐ sésé kpán. Yě zɔ̌n bɔ è kplá Piyɛ́ɛ kpódó Jǎan kpán wá nukɔn yětɔn, bɔ yě kanbyɔ́ yě ɖɔ jí: “Mɛ̌ sín acɛ mɛ abǐ mɛ̌ sín nyǐkɔ mɛ mi ka bló nǔ énɛ́ dó?” Hwenɛ́nu ɔ́, Yɛsinsɛn gɔ́ ayi mɛ nú Piyɛ́ɛ bɔ é ɖɔ nú yě ɖɔ jí: “Gǎn lɛ́ɛ mi; tomɛxó lɛ́ɛ mi; mi ɖo hwɛ ɖɔ xá mǐ wɛ égbé, ɖó mǐ wa ɖagbe nú sékúnɔ ɖé, bɔ mi jló ná tunwun lě e mǐ wa gbɔn, bó gbɔ azɔn n'i ɔ́; é má nyí mɔ̌ wɛ ǎ cé? Mi bǐ kpódó Izlayɛ́li togun ɔ́ lɔmɔ̌ kpó ní tunwun ɖɔ Jezu Klísu Nazalɛ́tinu e mi ká nyi aklúzu jí, bɔ Mawu ka fɔ́n ɛ sín kú ɔ́ sín nyǐkɔ mɛ wɛ nya énɛ́ ɖo ganjí ɖe, bó ɖo te nukɔn mitɔn din. Jezu énɛ́ sín xó wɛ è ko ɖɔ ɖo Mawuxówéma ɔ́ mɛ ɖɔ jí: ‘Awǐnnya e mi xɔmɛtɔ́ lɛ́ɛ má sɔ́ dó mɔ nǔɖéwanú ǎ, bó xo nyi kɛ́n ɔ́, wá húzú awǐnnya tají ɔ́, awǐnnya zwe jí tɔn ɔ́.’ É ɖokpónɔ géé jɛ́n sixú hwlɛ́n mɛ gán; ɖó, gbɔn gbɛ ɔ́ bǐ mɛ ɔ́, Mawu sɔ́ ná mɛ ɖěvo gbɛtɔ́ lɛ́ɛ ɖo fí ɖěbǔ, bɔ mi ná mɔ hwlɛngán gbɔn jǐ tɔn ǎ.” Mɛ e ɖo toxóɖɔgbɛ́ ɔ́ mɛ lɛ́ɛ mɔ ɖɔ Piyɛ́ɛ kpódó Jǎan kpán ɔ́, gbɛtɔ́ yǎyá ɖé kpowun wɛ yě nyí; yě kún se wěma ɖé ó; lě e yě ka gbó adɔ, bó ɖo xó ɖɔ gbɔn wɛ ɔ́ nyí nǔɖé, bó kpácá yě tlala. Yě ka mɔ nǔ jɛ yě wú ganjí ɖɔ yě mɛ e ko zɔn xá Jezu lɛ́ɛ ɖěe wɛ. Lo ɔ́, ée yě mɔ mɛ e yě gbɔ azɔn ná ɔ́ ɖo te ɖo yě kpá ɔ́, yě sɔ́ tunwun nǔ e yě ná ɖɔ d'é wú ɔ́ ǎ. Yě ka ɖɔ nú yě ɖɔ yě ní tɔ́n sín toxóɖɔgbɛ́ ɔ́ xɔsá, bó jɛ xó ɔ́ gbéjé kpɔ́n jí ɖo yěɖée tɛ́ntin. Yě nɔ́ ɖɔ jí: “Nɛ̌ mǐ ká ná wa nya énɛ́ lɛ́ɛ sín nǔ gbɔn? Đó nǔ e Mawu jlɛ́ gbɔn yě jí din ɔ́ ɖo gannaganna; Jeluzalɛ́mu toxo ɔ́ bǐ wɛ mɔ nukúnnú jɛ wú céɖécéɖé ɖɔ yě wɛ bló, bɔ mǐ sixú gbɛ́ ǎ. Lo ɔ́, mǐ ná tɛ́nkpɔ́n nú xó ɔ́ má sɔ́ gba kpé d'é jí ɖo togun ɔ́ mɛ ó; mǐ ná ván nukún dó yě, bó dó sɛ́n nú yě ɖɔ yě ma sɔ́ ɖɔ xó nú mɛ ɖěbǔ ɖo Jezu nyǐkɔ mɛ ó.” Ée yě ɖɔ mɔ̌ ɔ́, yě ylɔ́ Piyɛ́ɛ kpódó Jǎan kpán, bó dó sɛ́n nú yě syɛ́nsyɛ́n ɖɔ yě ma sɔ́ ɖɔ xó dó Jezu nyíkɔ mɛ ɖě ó, yě ma ka sɔ́ kplɔ́n nǔ mɛ dó nyǐkɔ tɔn mɛ ɖě ó. Piyɛ́ɛ kpódó Jǎan kpán ka yí xó, bó ɖɔ nú yě ɖɔ: “Mi ɖésú mi kpɔ́n ɖɔ é sɔgbe ɖo Mawu nukɔn ɖɔ è nǐ se tónú nú mi hú è nǐ se tónú nú Mawu ají. Mǐdɛɛ lɛ́ɛ ɔ́, nǔ e mǐ mɔ, lobo se ɔ́, mǐ sixú gɔn ɖiɖɔ gbeɖé ǎ.” Ée yě ɖɔ mɔ̌ ɔ́, mɛ e ɖo toxóɖɔgbɛ́ ɔ́ mɛ lɛ́ɛ lɛ́ ván nukún dó yě, lobo jó yě. Yě tunwun lě e yě ná dɔn tó nú yě gbɔn é ǎ, ɖó togun ɔ́ wú. Đó togun ɔ́ bǐ wɛ ɖo susu kpa nú Mawu wɛ, ɖó nǔ énɛ́ e jɛ ɔ́ wú. Nya e sín azɔn gbɔ gbɔn nǔ e Jezu jlɛ́ gbɔn yě jí nɛ́ ɔ́ gbla mɛ ɔ́ ko ɖó xwe kanɖé (40) zɛ wú. Ée è jǒ Piyɛ́ɛ kpódó Jǎan kpán gúdo ɔ́, yě lɛ́ kɔ yi gbɛ̌ yětɔn lɛ́ɛ gɔ́n, bɔ nǔ e vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpán ɖɔ ɔ́, yě wlí bǐ ɖɔ nú yě. Ée gbɛ̌ yětɔn lɛ́ɛ se xó énɛ́ lɛ́ɛ ɔ́, yě bǐ ɖó gbe kpɔ́, bó ɖɔ nú Mawu ɖɔ: “Aklúnɔ! Hwi wɛ bló jǐxwé kpódó ayǐkúngban kpán, bó lɛ́ bló xu kpódó nǔ e ɖ'é mɛ lɛ́ɛ bǐ sésé kpán. Hwi wɛ gbɔn Yɛsinsɛn jí, bó sɔ́ xó élɔ́ lɛ́ɛ dó nu mɛ nú mɛsɛntɔ́ towe tɔ́gbó mǐtɔn Davídi, bɔ é ɖɔ: ‘Étɛ́wú mɛ e ma nyí Jwifu ǎ lɛ́ɛ ka ɖo adǎn jí? Étɛ́wú togun ɔ́ bǐ ka ɖo gbě blá wɛ dó wǔvɔ́? Axɔ́sú e ɖo wɛ̌kɛ́ ɔ́ mɛ lɛ́ɛ sɔ́ ahwan nú, bɔ gǎn lɛ́ɛ ɖó gbe kpɔ́, bó tɔ́n ahwan Aklúnɔ Mawu kpó Klísu tɔn kpó.’ Nǔgbó ɔ́, gbe wɛ Elódu kpódó Pɔ́nsu Pilátu kpó ɖó kpɔ́ ɖo tomɛ fí xá mɛ e ma nyí Jwifu ǎ lɛ́ɛ, kpódó Izlayɛ́li ví lɛ́ɛ kpán, bó fɔ́n gǔ dó mɛsɛntɔ́ towe mímɛ́ Jezu, e a sɔ́ Klísu ɔ́ jí. Yě ɖó gbe kpɔ́, bó bló nǔ e hwi ɖésúnɔ kó jló, bó kó ɖe wě tɔn ɖ'ayǐ ɖo hlɔ̌nhlɔ́n towe mɛ ɔ́ bǐ. Din ɔ́, Aklúnɔ, kpɔ́n adǎn e gblɔ́n nú mǐ wɛ yě ɖe é, bó bló bónú mǐ mɛ mɛsɛntɔ́ towe lɛ́ɛ ná ɖó akɔ́nkpinkpan, bó jlá xó towe kpódó jiɖiɖe bǐ kpán. Dlɛ̌n alɔ towe, bónú nǔjlɛ́jlɛ́ lɛ́ɛ kpódó nǔdábaɖa lɛ́ɛ kpó ná tíin, ɖo mɛsɛntɔ́ towe mímɛ́ Jezu sín nyǐkɔ mɛ.” Ée yě xo ɖɛ fó ɔ́, fí e yě kplé ɖe ɔ́ dán wǔ. Yɛsinsɛn gɔ́ ayi mɛ nú yě, bɔ yě jɛ Mawuxó jlá jí, kpódó jiɖiɖe kpán. Nǔɖitɔ́ lɛ́ɛ bǐ sésé ɖó jlǒ ɖokpó ɔ́, bó ɖó linlin ɖokpó ɔ́, bɔ mɛ ɖěbǔ sɔ́ nɔ sɔ́ nǔ e nyí étɔn ɔ́ sɔ́ ylɔ́ étɔn ǎ; lo ɔ́, nǔ e ɖo mɛ ɖokpó ɖokpó sí ɔ́ húzú mɛ bǐ tɔn. Mɛsɛ́dó lɛ́ɛ ka nɔ́ ɖe kúnnu nú fínfɔ́n sín kú Aklúnɔ Jezu tɔn, kpódó jiɖiɖe kpó, bɔ Mawu tún acɛ dó yě mɛ bǐ jǐ. Mɛ ɖé nɔ́ jɛ nǔɖé do ɖo yě mɛ ǎ ɖó mɛ e ɖó ayǐkúngban abǐ xwé lɛ́ɛ nɔ sɔ́ sa, bó nɔ́ zé akwɛ́ tɔn wá nú mɛsɛ́dó lɛ́ɛ, bɔ yě nɔ́ má nú mɛ ɖokpó ɖokpó lě e nǔ tɔn hudó e gbɔn é. Mɔ̌ wɛ nya ɖé tíin, bɔ è nɔ ylɔ́ ɛ ɖɔ Jozɛ́fu; mɛsɛ́dó lɛ́ɛ ká sun nyǐ i ɖɔ Baanabási, (tínmɛ tɔn wɛ nyí gbɔdónúmɛtɔ́,) Levíi ví wɛ bɔ è ji i ɖo Cíplu. É lɔmɔ̌ sa ayǐkúngban ɖokpó, bó sɔ́ akwɛ́ tɔn wá nú mɛsɛ́dó lɛ́ɛ. Nya ɖé tíin, bó nɔ́ nyí Ananíyasi, bɔ asi tɔn nɔ nyí Safíla. Yě lɔmɔ̌ ɖó gbe kpɔ́, bó sa ayǐkúngban yětɔn. É ɖɔ xá asi tɔn, bɔ yě ɖe akwɛ́ e yě sa ayǐkúngban ɔ́ yí ɔ́ kpo, bɔ é sɔ́ ée kpo ɔ́ yi jó nú mɛsɛ́dó lɛ́ɛ. Piyɛ́ɛ ka kanbyɔ́ ɛ ɖɔ: “Ananíyasi! Aniwú Satáan gɔ́ ayi mɛ nú we mɔ̌, bó zɔ́n bɔ a ɖe akwɛ́ e a dǒ sa ayǐkúngban ɔ́ ná ɔ́ kpo, bó wá ɖo nǔvú ɖó nú Yɛsinsɛn wɛ? Hwenu e a ma ko sa ayǐkúngban ɔ́ ǎ ɔ́, towe wɛ é nyí ǎ cé? Ée a ka wá sa ɔ́, akwɛ́ tɔn ɔ́, é má nyí towe wɛ é nyí a? Fítɛ́ a ka ba ayi hízíhízí mɔ̌hun sín? Gbɛtɔ́ lɛ́ɛ wɛ a ɖǒ nǔvú ná ǎ, Mawu wɛ a ɖǒ nǔvú ná.” Ée Ananíyasi se xó énɛ́ ɔ́, é jɛ ayǐ, bó kú cúɖúɖú, bɔ xɛsi ɖaxó ɖé jɛ mɛ e se nǔ énɛ́ e jɛ lɛ́ɛ bǐ jí. Dɔ̌nkpɛvú e ɖo fínɛ́ lɛ́ɛ sí te, bó bú avɔ dó cyɔ tɔn, lobo sɔ́ ɛ yi ɖi. É bló ganxixo atɔn mɔ̌, bɔ asi tɔn lɔmɔ̌ wá xwetɔ́n; é ka ko se nǔ e jɛ ɔ́ ǎ. Piyɛ́ɛ ka ylɔ́ ɛ, bó kanbyɔ́ ɛ ɖɔ: “Akwɛ́ élɔ́ wɛ mi sa ayǐkúngban mitɔn yí a? Đɔ nú mǐ.” É ka yí gbe ɖɔ: “Ɛɛn, mɔ̌ jɛ́n mǐ sa yí hǔn.” Ée é ɖɔ mɔ̌ ɔ́, Piyɛ́ɛ ɖɔ n'i ɖɔ: “Nɛ̌ ka gbɔn bɔ hwi kpódó asú towe kpó blá ɖɔ, bó jló ná ba do nú Yɛ Aklúnɔ tɔn kpɔ́n mɔ̌? Đǒtó; mɛ e ɖi asú towe lɛ́ɛ nɛ́ ɖo xwé gbe byɔ́ wɛ nɛ́; yě ná sɔ́ hwi lɔmɔ̌ yi ɖi.” Tɛn tɔn mɛ tlóló ɔ́, nyɔ̌nu ɔ́ jɛ ayǐ ɖo Piyɛ́ɛ sá mɛ, bó kú. Ée dɔ̌nkpɛvú lɛ́ɛ byɔ́ xwé gbe ɔ́, yě mɔ cyɔ tɔn, bó ka sɔ́ é lɔmɔ̌ yi ɖi ɖó asú tɔn kpá. Bɔ xɛsi ɖaxó ɖé jɛ agun nǔɖitɔ́ lɛ́ɛ tɔn ɔ́ bǐ jí, bó jɛ mɛ e se nǔ énɛ́ e jɛ lɛ́ɛ bǐ jí. Mawu jlɛ́ nǔ gěgé, bó ɖe nǔdábaɖa gěgé xlɛ́ gbɔn mɛsɛ́dó lɛ́ɛ jí, ɖo togun ɔ́ mɛ. Nǔɖitɔ́ lɛ́ɛ bǐ nɔ́ nɔ kpɔ́ ɖo Salomɔ́ɔ gba jí. Mɛɖěvo sɔ́ nɔ́ glá gɔ́ nú yě ǎ; lo ɔ́, togun ɔ́ yí wǎn nú yě ɖésú. Mɛ e ɖo nǔ ɖi nú Aklúnɔ wɛ lɛ́ɛ ɖo kpɔ́ su d'é jí wɛ, ɖo súnnu mɛ, ɖo nyɔ̌nu mɛ. Bɔ mɛ lɛ́ɛ nɔ́ zé azinzɔnnɔ yětɔn lɛ́ɛ wá ɖó ali lɛ́ɛ xo; yě nɔ́ tɛ́ yě dó akánma jí, bó nɔ́ lɛ́ tɛ́ yě dó zan jí bónú Piyɛ́ɛ wá xweyǐgbe ɔ́, yɛ tɔn ná gbɛ́ gbɔn mɛ ɖěe jí ɖo yě mɛ vɔ́vɔ́. Mɛ gěgé nyi ahwan sín to e yá Jeluzalɛ́mu lɛ́ɛ lɔ mɛ, bó nɔ́ kplá azinzɔnnɔ lɛ́ɛ, kpódó mɛ e yɛ nyanya ɖo tagba dó ná wɛ lɛ́ɛ kpán wá, bɔ azɔn nɔ gbɔ nú yě bǐ. Vɔ̌sánú-xwlémawutɔ́ ɖaxó ɔ́ kpódó mɛ e ɖo kpɔ́ xá ɛ lɛ́ɛ bǐ kpó jɛ wǔ hwan jí, bó sí te dó mɛsɛ́dó lɛ́ɛ jí. Mɛ e ɖo kpɔ́ xá ɛ lɛ́ɛ wɛ nyí Saduseɛn lɛ́ɛ. Yě wlí yě dó gankpá mɛ, fí e è nɔ wlí mɛ kpaa lɛ́ɛ sú dó é. Lo ɔ́, ée zǎn kú ɔ́, wɛnsagun Aklúnɔ tɔn ɖokpó hun gankpá ɔ́ sín hɔn lɛ́ɛ, bó kplá yě jɛ hɔnto, bó ɖɔ nú yě ɖɔ: “Mi yi cí sinsɛnxɔ mɛ, bó jlá Wɛn Ɖagbe Mawu tɔn e nɔ ná gbɛ mɛ é bǐ togun ɔ́.” Ée yě se mɔ̌ ɔ́, yě fɔ́n zǎn yi sinsɛnxɔ mɛ, bó jɛ nǔ kplɔ́n mɛ lɛ́ɛ jí. Vɔ̌sánú-xwlémawutɔ́ ɖaxó ɔ́, kpódó mɛ e ɖo kpɔ́ xá ɛ lɛ́ɛ kpó ka ylɔ́ Izlayɛ́li tomɛxó lɛ́ɛ bónú yě ná bló toxóɖɔgbɛ́ ɔ́ sín kplé. Ée yě kplé ɔ́, yě sɛ́ mɛ dó ɖɔ è nǐ yi kplá mɛsɛ́dó lɛ́ɛ wá sín gankpá mɛ. Ée sɔ́ja lɛ́ɛ yi ɔ́, yě sɔ́ mɔ yě ɖo gankpá ɔ́ mɛ ǎ, bó lɛ́ kɔ bó wá ɖó gbe ɖɔ: “Mǐ mɔ hɔn lɛ́ɛ bǐ ɖo súsú ganjí, bó mɔ sɔ́ja ɖo hɔn lɛ́ɛ jí; ée mǐ ka hun hɔn lɛ́ɛ ɔ́, mǐ mɔ mɛ ɖěbǔ ɖo xɔ ɔ́ mɛ ǎ.” Ée sinsɛnxɔcɔ́tɔ́ lɛ́ɛ sín gǎn, kpódó vɔ̌sánú-xwlémawutɔ́gán lɛ́ɛ kpán se mɔ̌ ɔ́, yě bǔ ayǐ ɖo mɛsɛ́dó énɛ́ lɛ́ɛ sín xó kpódó nǔ e ná wá jɛ gúdo lɛ́ɛ kpó mɛ. Bɔ mɛ ɖě wá xwetɔ́n, bó ɖɔ nú yě ɖɔ: “Mɛ e mi wlí sú dó gankpá mɛ lɛ́ɛ nɛ́ ɖo sinsɛnxɔ mɛ, bó ɖo nǔ kplɔ́n togun ɔ́ wɛ nɛ́.” Bɔ sinsɛnxɔcɔ́tɔ́ lɛ́ɛ sín gǎn kpódó mɛ tɔn lɛ́ɛ kpán yí kplá mɛsɛ́dó lɛ́ɛ wá; yě ka kplá yě kpódó zǐngídi kpó ǎ, ɖó yě ɖo xɛsi ɖi wɛ ɖɔ togun ɔ́ táá wá nyi awǐnnyaglo dó hu émí. Ée yě kplá mɛsɛ́dó lɛ́ɛ wá ɔ́, yě kplá yě yi toxóɖɔgbɛ́ ɔ́ nukɔn, bɔ vɔ̌sánú-xwlémawutɔ́ ɖaxó ɔ́ jɛ hwɛ tɛ́ xá yě jí ɖɔ: “Mǐ má kó dó sɛ́n nú mi syɛ́nsyɛ́n ɖɔ mi ma sɔ́ kplɔ́n nǔ mɛ dó nya énɛ́ sín nyǐkɔ mɛ ó a? Énɛ́ nǔ e kplɔ́n mɛ wɛ mi ɖe ɔ́ ka gba kpé Jeluzalɛ́mu to ɔ́ bǐ mɛ nɛ́; bɔ mi jló ná zé nya énɛ́ sín kú kplá kɔ nú mǐ.” Piyɛ́ɛ kpódó mɛsɛ́dó lɛ́ɛ kpó ká yí gbe n'i ɖɔ: “È ɖó ná se tónú nú Mawu; é nyɔ́ hú è se tónú nú gbɛtɔ́. Mawu tɔ́gbó mǐtɔn lɛ́ɛ tɔn kó fɔ́n Jezu énɛ́ e midɛɛ lɛ́ɛ hu, hwenu e mi ká ɛ nyi aklúzu jí é. Mawu sɔ́ ɛ ɖó ɖisí tɔn xwé, bó sɔ́ ɛ su, lobo sɔ́ ɛ axɔ́sú Mɛhwlɛ́ngántɔ́, nú é ná xlɛ́ ali Izlayɛ́li togun ɔ́, bónú Izlayɛ́li togun ɔ́ ná lɛ́ kɔ sín hwɛ tɔn lɛ́ɛ gúdo, bɔ Mawu ná sɔ́ hwɛ e é hu lɛ́ɛ kɛ ɛ. Mǐ nyí kúnnuɖetɔ́ nǔ énɛ́ lɛ́ɛ tɔn; mǐ kpódó Yɛsinsɛn e Mawu nɔ́ ná mɛ e nɔ se tónú n'i lɛ́ɛ é kpán.” Ée toxóɖɔtɔ́ lɛ́ɛ se xó énɛ́ lɛ́ɛ ɔ́, xomɛ sin yě tlala, bɔ yě jló ná hu mɛsɛ́dó lɛ́ɛ. Lo ɔ́, Falizyɛn ɖokpó ɖo yě mɛ hwenɛ́nu; è nɔ ylɔ́ ɛ ɖɔ Gamaliyɛ́li; sɛ́nkplɔ́nmɛtɔ́ ɖaxó ɖokpó wɛ é nyí, bɔ to ɔ́ bǐ nɔ́ sí i. Nya énɛ́ sí te ɖo toxóɖɔgbɛ́ ɔ́ mɛ, bó ɖe gbe ɖɔ è nǐ ɖe mɛsɛ́dó lɛ́ɛ tɔ́n hwɛ̌. Énɛ́ gúdo ɔ́, é ɖɔ nú toxóɖɔtɔ́ lɛ́ɛ ɖɔ: “Izlayɛ́li ví e mi, mi hɛn ayi dó nǔ e wa xá mɛ énɛ́ lɛ́ɛ gbé mi ja ɔ́ wú. É kó lín din ǎ, bɔ Tedasi sí te ɖo fí, bó ɖɔ émí jɛ́n tíin, bɔ súnnu mɛxó ná yi afɔwe (400) mɔ̌ xwedó e. È ka hu i, bɔ mɛ énɛ́ lɛ́ɛ bǐ gbadó, bɔ xó fó. Éyɛ́ gúdo ɔ́, Judási Galiléenu ɔ́ sí te, ɖo mɛxixa hwenu, bó dɔn ahwan dó éɖée jí; é lɔmɔ̌ kú, bɔ mɛ e xwedó e lɛ́ɛ bǐ gbadó. Din ɔ́, ma ɖɔ nú mi, mi ma sɔ́ kpɔ́n mɛ énɛ́ lɛ́ɛ ɖě sín jɛ jí ó; mi jó yě dó nú yě yi. Đó ényí tito yětɔn abǐ nǔwiwa yětɔn ɔ́, gbɛtɔ́ gɔ́n wɛ é gosín ɔ́, é ná sú dó. Lo ɔ́, é ka nyí ɖɔ Mawu sín nǔwiwa wɛ ɔ́, mi sixú kpé wú bó sú dó ǎ; mi cɔ́ miɖée, bó má tɔ́n ahwan Mawu ó.” Ée é ɖɔ mɔ̌ ɔ́, yě bǐ yí gbe nú xó tɔn, bó ka ylɔ́ mɛsɛ́dó lɛ́ɛ, lobo zɔ́n bɔ è xo yě, bó dó sɛ́n nú yě ɖɔ yě má sɔ́ ɖɔ xó dó Jezu nyǐkɔ tamɛ ɖě ó, lobo jó yě dó. Mɛsɛ́dó lɛ́ɛ ka gosín toxóɖɔgbɛ́ ɔ́ nukɔn, bɔ xomɛ hun yě tlala, ɖó yě mɔ ɖɔ Mawu mɔ émí dó mɔ mɛ e jɛ xá ya ji dó Jezu nyǐkɔ mɛ é. Ayǐhɔ́ngbe ayǐhɔ́ngbe ɔ́, yě nɔ́ gɔn nǔ kplɔ́n mɛ lɛ́ɛ ɖo sinsɛnxɔ mɛ mɛ kpó xwé lɛ́ɛ gbe kpó ǎ, yě ka nɔ́ gɔn Wɛn Ɖagbe e ɖɔ xó dó Jezu- Klísu wú ɔ́ jlá yě ǎ. Hwenɛ́nu ɔ́, ahwanvú lɛ́ɛ wá ɖo kpɔ́ sú d'é jí wɛ, bɔ Jwifu e nɔ xwedó walɔ Glɛ̌sinu lɛ́ɛ tɔn lɛ́ɛ wá jɛ nǔ hlún ɖɔ dó Jwifu e nɔ xwedó walɔ Eblée lɛ́ɛ tɔn lɛ́ɛ wú jí. Yě nɔ́ ɖɔ è nɔ dó vɛ̌ nú asúkúsi émítɔn lɛ́ɛ ɖo nǔmímá hwenu ayǐhɔ́ngbe ayǐhɔ́ngbe. Énɛ́ wú wɛ mɛsɛ́dó wěwe lɛ́ɛ wá ylɔ́ ahwanvú lɛ́ɛ bǐ kplé, bó ɖɔ nú yě ɖɔ: “É jɛ xá ɖɔ mǐ ní jó Mawuxó jlájlá dó, bó wá yi ɖo nǔɖuɖu má wɛ ǎ. Énɛ́ ɔ́ wú ɔ́, nɔví ce lɛ́ɛ mi, mi gbɔ bo kpɔ́n miɖée mɛ, bó cyán súnnu tɛ́nwe e ɖó jijɔ ɖagbe, bɔ Yɛsinsɛn kpó nǔnywɛ́ kpó gɔ́ ayi mɛ ná lɛ́ɛ é, bónú mǐ ná sɔ́ yě ɖó azɔ̌ énɛ́ ɔ́ nu. Énɛ́ ɔ́, mǐdɛɛ lɛ́ɛ ɔ́, mǐ ná kpé nukún dó ɖɛxixo kpódó Mawuxó jlájlá kpó wú.” Xó énɛ́ nyɔ́ agun ɔ́ bǐ nukún mɛ, bɔ yě cyán mɛ tɛ́nwe élɔ́ lɛ́ɛ: Etyɛ́ni, nya nǔɖitɔ́ titewungbe ɖé wɛ, bɔ Yɛsinsɛn gɔ́ ayi mɛ n'i; Filípu kpó Plokɔ́ɔ kpó, Nikanɔ́ɔ kpó Timɔ́ɔ kpó, Pamɛnási kpódó Nikoláa Antyɔ́cinu e ko byɔ́ Jwifu lɛ́ɛ sín sinsɛn mɛ ɖ'ayǐ ɔ́ kpán. Yě wá kplá yě mɛ tɛ́nwe lɛ́ɛ yi mɛsɛ́dó lɛ́ɛ gɔ́n, bɔ mɛsɛ́dó lɛ́ɛ xo ɖɛ, bó ɖó alɔ yě jí. Mawuxó ɔ́ ka jɛ gbigba kpé jí, bɔ ahwanvú lɛ́ɛ ɖo kpɔ́ sú d'é jí wɛ ɖo Jeluzalɛ́mu, bɔ vɔ̌sánú-xwlémawutɔ́ wɔ̌buwɔ́bú ɖé lɛ́ɛ jɛ nǔ ɖi nú Jezu jí ɖo Jwifu lɛ́ɛ mɛ. Mawu tún acɛ dó Etyɛ́ni jí, bó ná ɛ hlɔ̌nhlɔ́n, bɔ é nɔ́ ɖo nǔdábaɖa ɖe tɔ́n wɛ, bó nɔ́ ɖo nǔ ɖaxó ɖaxó lɛ́ɛ jlɛ́ wɛ ɖo togun ɔ́ tɛ́ntin. Jwifu ɖé lɛ́ɛ ka gosín kplɔ́ngbasá e è nɔ ylɔ́ ɖɔ “Kannumɔ e jɛ yěɖée sí lɛ́ɛ tɔn é” bó wá, bó jɛ nǔ dɔn xá Etyɛ́ni jí; to vovo mɛ wɛ Jwifu énɛ́ lɛ́ɛ gosín; mɛ ɖě gosín Silenɛ́ɛ, Alɛsándli, Silisíi kpódó Azíi yíkúngban jí kpó. Lo ɔ́, yě nɔ́ sixú nɔ te Etyɛ́ni nukɔn ǎ, ɖó é nɔ́ ɖo xó ɖɔ wɛ kpódó nǔnywɛ́ e Yɛsinsɛn ná ɛ ɔ́ kpó. Bɔ yě gbɔ bó dɔn mɛɖé lɛ́ɛ dó awo mɛ, bó ná akwɛ́ yě, bónú yě ná ɖó adingban dó Etyɛ́ni kɔ ɖɔ: “Mǐ se nya élɔ́ ɖo nu nylá dó Mawu kpódó Mɔyízi kpán wú wɛ.” Xó énɛ́ e yě kpá ɖɔ ɔ́ zɔ́n bɔ togun ɔ́ kpódó tomɛxó lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán bǐ xo zǐn, bó zɔn Etyɛ́ni jí bó wlí, lobo kplá ɛ hɛn yi toxóɖɔgbɛ́ ɔ́ nukɔn. Yě lɛ́ kplá kúnnu-agɔɖetɔ́ ɖěvo lɛ́ɛ wá, bɔ yě ɖɔ: “Nya élɔ́ nɔ́ gɔn nu nylá dó sinsɛnxɔ mímɛ́ mǐtɔn élɔ́ kpódó Mɔyízi sɛ́n ɔ́ kpán wú ǎ. Đó mǐ se bɔ é ɖɔ Jezu Nazalɛ́tinu ɔ́ ná gba sinsɛnxɔ ɔ́, lobo ná húzú hwɛndo e Mɔyízi ɖó ayǐ nú mǐ é.” Mɛ e ɖo ayǐjínjɔ́n ɖo toxóɖɔgbɛ́ ɔ́ mɛ lɛ́ɛ bǐ bɔ nukún nyi Etyɛ́ni wú, bɔ nukún mɛ tɔn cí wɛnsagun Mawu tɔn lɛ́ɛ sín nukún mɛ ɖɔhun ɖo yě nukún mɛ. Vɔ̌sánú-xwlémawutɔ́ ɖaxó ɔ́ kanbyɔ́ Etyɛ́ni ɖɔ: “Nǔ nyí mɔ̌ nǔgbó a?” Bɔ Etyɛ́ni yí xó, bó ɖɔ: “Nɔví ce lɛ́ɛ mi, tɔ́ ce lɛ́ɛ mi, mi ɖótó mì. Mawu susunɔ ɔ́ tɔ́n dó tɔ́gbó mǐtɔn Ablaxámu jí hwenu e é kpo ɖo Mɛzopotamíi, bó ma kó yi sá xwé ɖó Haláani ǎ é, bó ɖɔ n'i ɖɔ: ‘Tɔ́n sín to towe mɛ; tɔ́n sín hɛ̌nnumɔ towe lɛ́ɛ mɛ, bó yi to e un ná xlɛ́ we ɔ́ mɛ.’ Nǔgbó ɔ́, Ablaxámu gosín Kaludéenu lɛ́ɛ tomɛ, bó wá sá xwé dó Haláani; ée tɔ́ tɔn kú gúdo ɔ́, Mawu ɖe e sín fínɛ́, bó sɔ́ ɛ wá to e mɛ mi ɖe din é mɛ. Mawu ná ayǐkúngban ɖěbǔ Ablaxámu ɖo tomɛ fí ǎ; ayǐkúngban alɔbá ɖokpó vɔ́vɔ́ nyí étɔn ǎ. Lo ɔ́, Mawu dó akpá n'i ɖɔ émí ná ná ɛ to ɔ́, bɔ é ná wá nyí vǐvú tɔn lɛ́ɛ lɔ tɔn, có Ablaxámu ka ko ji vǐ ɖěbǔ hwenɛ́nu ǎ. Mawu ka lɛ́ ɖɔ n'i ɖɔ: ‘Vǐvú towe lɛ́ɛ ná yi cí mɛ ɖěvo tomɛ, bɔ è nǎ sɔ́ yě dó ɖó kannumɔ, lobo ná dó ya nú yě xɔ xwe afɔwe (400). Amɔ̌, un ná ɖɔ hwɛ xá akɔta e mɛ yě ná nyí kannumɔ ɖe é. Énɛ́ gúdo ɔ́, yě ná gosín to ɔ́ mɛ, bó ná wá sɛn mì ɖo fí.’ Bɔ Mawu jɛ akɔ xá ɛ, bó sɔ́ adagbigbo dó ɖó akɔjijɛ énɛ́ sín wuntun. Énɛ́ ɔ́ wú wɛ hwenu e Ablaxámu ji Izáki ɔ́, é gbo ada n'i azǎn tɔn tántɔngɔ́ ɔ́ gbe. Ée Izáki lɔmɔ̌ ji Jakɔ́bu ɔ́, é gbo ada n'i, bɔ Jakɔ́bu gbo nú tɔ́gbó mǐtɔn wěwe lɛ́ɛ. “Tɔ́gbó mǐtɔn énɛ́ lɛ́ɛ hwan wǔ dó nɔví yětɔn Jozɛ́fu, lobo sɔ́ ɛ yi sa, bɔ è kplá ɛ yi Ejípu; lo ɔ́, Mawu nɔ gǔdo tɔn, bó hwlɛ́n ɛ ɖo nǔgbomɛ lɛ́ɛ bǐ mɛ, lobo ná ɛ nǔnywɛ́, bó bló bɔ nǔ tɔn nyɔ́ Ejípu xɔ́sú ɔ́ nukún mɛ, bɔ é sɔ́ ɛ gǎn ɖó to ɔ́ kpódó xwé tɔn kpán nu. Adɔ ɖé ka tɔ́n ɖo Ejípu kpódó Kanáa kpó, bɔ mɛ bǐ jɛ ya ɖaxó ɖé mɛ, tɔ́gbó mǐtɔn lɛ́ɛ sɔ́ mɔ nǔɖé ná ɖu ǎ. Jakɔ́bu ka se ɖɔ jinukún ɖo Ejípu, lobo sɛ́ tɔ́gbó mǐtɔn lɛ́ɛ dó azɔn nukɔn tɔn ɔ́. Azɔn wegɔ́ e é sɛ́ yě dó ɔ́, Jozɛ́fu ɖe éɖée xlɛ́ nɔví tɔn lɛ́ɛ, bɔ Ejípu xɔ́sú ɔ́ wá tunwun hɛ̌nnu e mɛ Jozɛ́fu gosín é. Jozɛ́fu sɛ́ yě dó ɖɔ yě ní yi kplá tɔ́ émítɔn Jakɔ́bu ɔ́ kpódó hɛ̌nnumɔ tɔn lɛ́ɛ bǐ kpán wá nú émí; yě mɛ gbɛtɔ́ kanɖé gbantɔ́n (75) wɛ. Jakɔ́bu wá yi Ejípu; fínɛ́ wɛ é kú ɖe, bɔ tɔ́gbó mǐtɔn lɛ́ɛ lɔmɔ̌ kú ɖo fínɛ́. È sɔ́ cyɔ yětɔn lɛ́ɛ yi Sikɛ́mu, bó ɖi yě dó yɔdo e Ablaxámu sɔ́ akwɛ́ dó xɔ ná ɖo Hamɔ́ɔ vǐ lɛ́ɛ sí é mɛ. “Hwenu e Mawu ná ɖe akpá e é dó nú Ablaxámu ɔ́ wá ɖo susu wɛ; bɔ togun Izlayɛ́li tɔn ɔ́ ɖo jiji d'é jí wɛ, bó ɖo kpɔ́ sú d'é jí wɛ ɖo Ejípu; yě ɖo kpɔ́ su d'é jí wɛ mɔ̌ káká yi jɛ axɔ́sú Ejípu tɔn ɖěvo e ma tunwun Jozɛ́fu ǎ é hwenu. Axɔ́sú énɛ́ ɔ́ zán ayi dídá dó akɔta mǐtɔn wú, bó dó ya nú tɔ́gbó mǐtɔn lɛ́ɛ káká, lobo zɔ́n ɖɔ yě ní nɔ́ sɔ́ vǐ yětɔn lɛ́ɛ nyi gbě, nú yě ma nɔ gbɛ ó. Hwenɛ́nu wɛ è ji Mɔyízi, bɔ é nyɔ́ ɖɛkpɛ ɖésú ɖo Mawu nukún mɛ. Mɛ tɔn lɛ́ɛ kpé nukún wú tɔn ɖo tɔ́ tɔn sín xwé gbe xɔ sun atɔn. Énɛ́ ɔ́ gúdo ɔ́, yě wá sɔ́ ɛ nyi gbě, bɔ Ejípu xɔ́sú ɔ́ sín vǐ nyɔ̌nu ɔ́ wá sɔ́ ɛ, bó hɛn ɛ vǐ é ɖésúnɔ tɔn ɖɔhun. Fínɛ́ wɛ é yí nǔnywɛ́ Ejípunu lɛ́ɛ tɔn bǐ ɖe, bó lí dǒ ɖo xóɖiɖɔ kpódó nǔwiwa kpó mɛ. “Hwenu e é ɖó xwe kanɖé (40) ɔ́, nɔví tɔn Izlayɛ́li ví lɛ́ɛ sín nǔ byɔ́ ayi mɛ n'i, bɔ é ɖɔ émí ná yi kpɔ́n lě e yě ɖe gbɔn é. Ée é yi ɔ́, é mɔ Ejípunu ɖé ɖo ya dó nú Izlayɛ́li ví ɖokpó wɛ, bó jɛ ahwan jǐ tɔn; é ba hlɔn, bó hu Ejípunu ɔ́. É vɛdó ɖɔ nɔví émítɔn lɛ́ɛ ná mɔ nǔ jɛ mɛ ɖɔ Mawu wɛ sɛ́ émí dó ɖɔ émí ní wá hwlɛ́n yě gán sín; yě ká mɔ nǔ jɛ mɛ ǎ. Ayǐhɔ́ngbe tɔn ɔ́, Mɔyízi mɔ Izlayɛ́li ví we ɖé lɛ́ɛ ɖo hun xo wɛ, lobo jló ná kɔ́ nǔ nú yě, bó ɖɔ: ‘Xɔ́ntɔn ce lɛ́ɛ mi; nɔví wɛ mi nyí hǔn. Nɛ̌ ká gbɔn bɔ mi ɖo ya dó nú miɖée wɛ?’ Mɛ e ɖo mɛ tɔn wegɔ́ ɔ́ dó ya ná wɛ ɔ́ ká sísɛ́ Mɔyízi bó ɖɔ jí: ‘Mɛ̌ ká sɔ́ we gǎn, abǐ hwɛɖɔtɔ́ ɖo mǐ nu? A jlǒ ná hu mì lě e a hu Ejípunu ɔ́ gbɔn sɔ é wɛ a?’ Ée Mɔyízi se mɔ̌ ɔ́, é hɔn bó yi cí to e è nɔ ylɔ́ ɖɔ Madiáani ɔ́ mɛ, bó ji vǐ súnnu we ɖo fínɛ́. “Xwe kanɖé (40) wá yi, bɔ wɛnsagun Mawu tɔn ɖokpó wá tɔ́n dó jǐ tɔn ɖo gbětótló Sinayíi só tɔn mɛ, ɖo zungodwe ɖé mɛ, bɔ zungodwe ɔ́ ɖo zo ji wɛ. Nǔ énɛ́ e Mɔyízi mɔ ɔ́ kpácá ɛ tlala, bɔ é jló ná sɛ yá, bó ná kpɔ́n tlítlí tɔn, lobo ká se Aklúnɔ sín gbe bɔ é ɖɔ jí: ‘Nyɛ wɛ nyí Mawu tɔ́gbó towe lɛ́ɛ tɔn; Mawu Ablaxámu tɔn; Mawu Izáki tɔn; Mawu Jakɔ́bu tɔn.’ Ée Mɔyízi se mɔ̌ ɔ́, é jɛ sísɔ́sísɔ́ jí, bó sɔ́ glá, bó kpɔ́n ǎ. Aklúnɔ ka ɖɔ n'i ɖɔ: ‘ɖe afɔkpa towe lɛ́ɛ, ɖó ayǐkúngban e jí a ɖo te ɖe ɔ́, ayǐkúngban mímɛ́ wɛ. Un mɔ ya e ji wɛ togun ce ɖe ɖo Ejípu ɔ́ ganjí. Un se azɔn e wɛn wɛ é ɖe ɔ́, lobo jɛ te wá hwlɛ̌nhwlɛ́n ɛ gán gbé. Din ɔ́, wǎ. Un ná sɛ́ we dó Ejípu.’ “Mɔyízi énɛ́ e yě kó gbɛ́, bó kanbyɔ́ ɛ ɖɔ: ‘Mɛ̌ ká sɔ́ we gǎn, abǐ hwɛɖɔtɔ́’ a jí é wɛ Mawu wá sɛ́ dó yě, lobo ná ɛ hlɔ̌nhlɔ́n gbɔn wɛnsagun e tɔ́n dó jǐ tɔn ɖo zungodwe mɛ ɔ́ jí, nú é ná ɖu gǎn ɖo yě nu, lobo hwlɛ́n yě gán. Mɔyízi énɛ́ wɛ kplá Izlayɛ́li ví lɛ́ɛ tɔ́n sín Ejípu, gbɔn nǔdábaɖa e é ɖe tɔ́n lɛ́ɛ kpódó nǔ e é jlɛ́ ɖo to énɛ́ ɔ́ mɛ, bó jlɛ́ ɖo Xu Vɔvɔ ɔ́ tó, bó jlɛ́ ɖo gbětótló mɛ, káká xɔ xwe kanɖé (40) ɔ́ kpó gbla mɛ. Mɔyízi ɖokpó énɛ́ wɛ ɖɔ nú Izlayɛ́li ví lɛ́ɛ ɖɔ jí: ‘Mawu ná bló bɔ gbeyíɖɔ nyɛ ɖɔhun ɖokpó ná tɔ́n ɖo togun mitɔn mɛ.’ Hwenu e togun ɔ́ kplé ɖo gbětótló mɛ ɔ́, é wɛ nɔ kpɔ́ xá yě; é nɔ kpɔ́ xá tɔ́gbó mǐtɔn lɛ́ɛ, kpó wɛnsagun e ɖɔ xó n'i ɖo Sinayíi só jí ɔ́ kpó, bó yí Mawuxó e nɔ́ ná gbɛ mɛ ɔ́, bó ɖɔ nú mǐ. “Lo ɔ́, tɔ́gbó mǐtɔn lɛ́ɛ jló ná se tónú n'i ǎ, lobo gbɛ́ xó tɔn, bó jló ná lɛ́ kɔ yi Ejípu, bó ɖɔ nú Aalɔ́ɔn ɖɔ jí: ‘Blǒ vodún e ná sixú nɔ nukɔn nú mǐ lɛ́ɛ nú mǐ; ɖó Mɔyízi énɛ́ e kplá mǐ sín Ejípu ɔ́, mǐ sɔ́ tunwun gbɛ e mɛ é ɖe tawun ɔ́ ǎ.’ Énɛ́ ɔ́, yě bló nyibúví ɖokpó hwenɛ́nu, bó jɛ vɔ̌sánú xwlé e jí, bɔ nǔ e yě ɖésú sɔ́ alɔ dó bló ná ɔ́, nyí awǎjijɛnú nú yě. Mawu ka dó gǔdo yě, bó jó yě dó, bɔ yě jɛ hwe kpó sun, kpódó sunví lɛ́ɛ kpó sɛn jí, lě e è ko wlán ɖo gbeyíɖɔ Mawu tɔn lɛ́ɛ sín wěma mɛ gbɔn é; è wlǎn ɖɔ jí: ‘Izlayɛ́li ví lɛ́ɛ mi! Ée mi nɔ gbětótló mɛ xɔ xwe kanɖé (40) ɔ́, kanlin tɛ́ mi ka hu nú mì? Vɔ̌ tɛ́ mi ka sá nú mì gbeɖé? Goxɔ vodún Mɔlɛ́ki tɔn, kpódó sunví vodún Hlefánu tɔn kpán sín bǒcyɔ wɛ mi kpa, bó zé hɛn, lobo nɔ sɛn ǎ cé? Énɛ́ ɔ́ wú ɔ́, un ná bɛ́ mi sín to mitɔn mɛ yi Babilɔ́nu gúdo.’ “Hwenu e tɔ́gbó mǐtɔn lɛ́ɛ ɖo yiyi wɛ ɖo gbětótló mɛ ɔ́, yě hɛn goxɔ e ɖe xlɛ́ ɖɔ Mawu ɖo kpɔ́ xá yě ɔ́, bɔ awǐnnya we e jí Mawusɛ́n lɛ́ɛ ɖe ɔ́ ɖ'é mɛ. Mɔyízi bló goxɔ énɛ́, bɔ é sɔgbe xá ée é mɔ é. Goxɔ énɛ́ wá jɛ tɔ́gbó mǐtɔn lɛ́ɛ sí; bɔ Jozuwée nɔ yě nu, bɔ yě zé byɔ́ to e mɛ Mawu nya akɔta ɖé lɛ́ɛ sín, bɔ yě yi ɔ́ mɛ. Goxɔ ɔ́ nɔ yě sí ɖo fínɛ́ káká jɛ hwenu e Davídi wá ɖu axɔ́sú é. Davídi sín nǔ nyɔ́ Mawu e Jakɔ́bu nɔ sɛn ɔ́ nukún mɛ, bɔ Davídi byɔ́ ɛ ɖɔ é ní ná gbe émí, nú émí ná gbá xɔ ɖokpó n'i. Amɔ̌, axɔ́sú Salomɔ́ɔ wɛ wá gbá xɔ énɛ́ nú Mawu. “Lo ɔ́, Mawu Ajalɔ̌nlɔn ɔ́ nɔ́ nɔ xɔ e gbɛtɔ́ gbá é mɛ ǎ, lě e gbeyíɖɔ tɔn ko ɖɔ gbɔn é; é ɖɔ: Aklúnɔ ɖɔ: ‘Jǐnukúnsin ɔ́, axɔ́súzinkpo ce wɛ, bɔ ayǐkúngban ka nyí afɔɖótɛn ce. Xwé tɛ́ mi ka sixú gbá nú mì? Abǐ fítɛ́ ka sixú nyí gbɔjɛtɛn ce? Nyɛ wɛ bló nǔ énɛ́ lɛ́ɛ bǐ ǎ cé?’ “Mi tamɛtitɔ́, tótlítɔ́, ayisyɛ́nsyɛ́nnɔ lɛ́ɛ mi; gǔ jɛ́n mi nɔ fɔ́n dó Yɛsinsɛn jí; nǔ e tɔ́gbó mitɔn lɛ́ɛ wa ɔ́, é wa wɛ jɛ́n mi lɔmɔ̌ ɖe. Gbeyíɖɔ tɛ́ tɔ́gbó mitɔn lɛ́ɛ má ka dó ya ná ǎ? Yě hu mɛ e wá ɖɔ ɖ'ayǐ ɖɔ hwɛjijɔnɔ ɔ́ ná wá lɛ́ɛ é. Hwɛjijɔnɔ énɛ́ wɛ midɛɛ lɛ́ɛ mi sa, lobo hu din. Mi mɛ e yí sɛ́n ɔ́ gbɔn wɛnsagun Mawu tɔn lɛ́ɛ jí ɔ́, mi nyi sɛ́n énɛ́ ǎ.” Ée toxóɖɔtɔ́ lɛ́ɛ se xó énɛ́ e Etyɛ́ni ɖɔ ɔ́, xomɛ sin yě dó wǔ tɔn tlala, bɔ yě jɛ aɖǔkún ɖu jí. Yɛsinsɛn gɔ́ ayi mɛ nú Etyɛ́ni, bɔ é kpɔ́n jǐxwé, bó mɔ susu Mawu tɔn, bɔ Jezu ɖo te ɖo ɖisíxwé nú Mawu, bɔ é ɖɔ: “Mi ɖótó! Un mɔ sɛ́xwé ɖo hunhun, bó mɔ Gbɛtɔ́ví ɔ́ ɖo te ɖo ɖisíxwé nú Mawu.” Ée yě se mɔ̌ ɔ́, yě bǐ sú xó tlílí, bó sú tó, bó zɔn jǐ tɔn zɛ̌ɛ́n, bó dɔn ɛ yi to ɔ́ gúdo, lobo nyi awǐnnyaglo dó hu i. Kúnnuɖetɔ́ lɛ́ɛ zɔ́n awu yětɔn hɛn nyaví dɔ̌nkpɛvú ɖé, bɔ è nɔ ylɔ́ ɛ ɖɔ Sólu. Hwenu e yě ɖo awǐnnyaglo nyi dó Etyɛ́ni wɛ ɔ́, Etyɛ́ni xo ɖɛ, bó ɖɔ: “Aklúnɔ Jezu, yǐ lǐndɔ̌n ce.” Énɛ́ ɔ́ gúdo ɔ́, é húzú jɛ kpo, bó sú xó tlílí ɖɔ: “Aklúnɔ, ma lɛ́n hwɛ élɔ́ dó kɔ nú yě ó.” Ée é ɖɔ mɔ̌ ɔ́, é bɔnu. Etyɛ́ni e è hu ɔ́ nyɔ́ Sólu nukún mɛ. Gbe énɛ́ gbe e è hu Etyɛ́ni ɔ́, mɛ lɛ́ɛ jɛ ya dó nú agun Jezu tɔn e ɖo Jeluzalɛ́mu ɔ́ jí, bɔ yě bǐ gba kpé Judée kpódó Samalíi kpán gbejí. Mɛsɛ́dó lɛ́ɛ kɛ́ɖɛ́ jɛ́n ma hɔn yi ɖě ǎ. Mɛ e nɔ xwedó Mawusɛ́n ɔ́ lɛ́ɛ ɖěe ká sɔ́ Etyɛ́ni sín cyɔ yi ɖi, bó ya avǐ ɖésú. Sólu ka nɔ́ ɖo gǎn dó wɛ, bó ná vívá agun Jezu tɔn. É nɔ gbɔn xwé gbe xwé gbe, bó nɔ́ wlí súnnu kpódó nyɔ̌nu kpán e ɖi nǔ nú Jezu lɛ́ɛ dó gankpá mɛ. Yě mɛ e gbadó lɛ́ɛ nɔ́ ɖo Wɛn Ɖagbe ɔ́ jlá wɛ gbɔn fí lɛ́ɛ fí lɛ́ɛ. Mɔ̌ wɛ Filípu wá yi toxo ɖaxó ɖé mɛ ɖo Samalíi yíkúngban jí, bó nɔ́ ɖo Klísu xó ɖɔ wɛ. Ée togun ɔ́ se xó e ɖɔ wɛ Filípu ɖe lɛ́ɛ, bó ká mɔ nǔ e jlɛ́ wɛ é ɖe lɛ́ɛ ɔ́, yě mɛ bǐ sésé yí nǔkplɔ́nmɛ tɔn se. Yɛ nyanya lɛ́ɛ nɔ gosín azinzɔnnɔ gěgé jí kpó xósúsú ɖaxó kpó; mɔ̌ ɖokpó ɔ́, azɔn gbɔ nú wǔkúnánɔ gěgé, kpódó sékúnɔ gěgé kpán. Énɛ́ ɔ́ wú ɔ́, xomɛ ɖaxó ɖé hun mɛ e ɖo to énɛ́ mɛ lɛ́ɛ. Nya ɖé ká ɖo Samalíi to ɔ́ mɛ ɖ'ayǐ, bɔ è nɔ ylɔ́ ɛ ɖɔ Sinmɔ́ɔ; nya énɛ́ nɔ́ ɖo majíki gěgé bló wɛ, bɔ é nɔ́ kpácá mɛ e ɖo Samalíi gbé jí lɛ́ɛ bǐ, bɔ é nɔ́ mɔ ɖɔ émí nyí nǔɖaxó, bɔ mɛ bǐ nɔ́ ɖótó e tlítlí, bɛ́ sín yɔkpɔ́vú bǐ lɛ́ɛ jí, káká yi mɛxó bǐ lɛ́ɛ jí; yě nɔ ɖɔ: “Nya élɔ́ wɛ nyí hlɔ̌nhlɔ́n Mawu tɔn e è nɔ ylɔ́ ɖɔ ‘hlɔ̌nhlɔ́n ɖaxó’ é.” Yě bǐ nɔ́ ɖótó e tlítlí, ɖó nǔ e é nɔ́ jlɛ́ gbɔn majíki mɛ lɛ́ɛ ɖo yě kpácá wɛ din ɔ́, é kó lín. Lo ɔ́, hwenu e yě yǐ Wɛn Ɖagbe e jlá yě wɛ Filípu ɖe dó axɔ́súɖuɖu Mawu tɔn kpódó nyǐkɔ Jezu Klísu tɔn kpó wú ɔ́ se ɔ́, è lɛ yɛhwesin nú yě, súnnu kpódó nyɔ̌nu kpó. Sinmɔ́ɔ lɔ ɖi nǔ, bɔ è lɛ yɛhwesin n'i; énɛ́ ɔ́ gúdo ɔ́, é sɔ́ lɛ́ kɔ sín Filípu gúdo ǎ, bɔ nǔjlɛ́jlɛ́ kpódó nǔdábaɖa kpó e jlɛ́ wɛ Filípu nɔ ɖe lɛ́ɛ nɔ́ kpácá ɛ. Mɛsɛ́dó e ɖo Jeluzalɛ́mu lɛ́ɛ wá se ɖɔ Samalíinu lɛ́ɛ ɖi nǔ nú xó ɔ́, bó sɛ́ Piyɛ́ɛ kpódó Jǎan kpán dó yě. Ée yě jɛ to ɔ́ mɛ ɔ́, yě xo ɖɛ nú nǔɖitɔ́ lɛ́ɛ, nú Mawu ná ná yě Yɛsinsɛn; ɖó Yɛsinsɛn ko jɛ te dó mɛ ɖěbǔ jí ɖo yě mɛ hwenɛ́nu ǎ; yɛhwesin jɛ́n è lɛ nú yě ɖo Aklúnɔ Jezu nyíkɔ mɛ. Ée Piyɛ́ɛ kpódó Jǎan kpán xo ɖɛ gúdo ɔ́, yě ɖó alɔ yě jí, bɔ Mawu ná Yɛsinsɛn yě. Ée Sinmɔ́ɔ ka mɔ ɖɔ mɛsɛ́dó lɛ́ɛ ɖó alɔ nǔɖitɔ́ lɛ́ɛ jí, bɔ Mawu ná Yɛsinsɛn yě ɔ́, é dó akwɛ́ sín akpá nú yě, bó ɖɔ: “Mi ná acɛ nyi lɔmɔ̌, bónú mɛ e jí un ná ɖó alɔ ɔ́, Mawu ná ná Yɛsinsɛn mɛ ɔ́.” Piyɛ́ɛ ka yí gbe n'i ɖɔ: “Hwi kpódó akwɛ́ towe kpó bǐ ní bó dɔn, ɖó a lin ɖɔ è nɔ sɔ́ akwɛ́ dó xɔ nǔníná Mawu tɔn. Nǔɖé kan we ɖo xó élɔ́ mɛ ǎ; nǔɖé ka nyí towe ɖ'é mɛ ǎ; ɖó ayi towe jlɔ́ ɖo Mawu nukɔn ǎ. Hǔn, bo lɛ́ kɔ sín linlin towe nyanya énɛ́ gúdo, bó sa vo nú Aklúnɔ, bónú nǔ sixú nyí mɔ̌ ɔ́, é ná sɔ́ nǔ nyanya énɛ́ e a lin ɔ́ kɛ we; ɖó un mɔ ɖɔ nǔ dídá kɛ́ɖɛ́ wɛ gɔ́ ayi towe mɛ, bɔ hwɛ dó gɛdɛ we.” Sinmɔ́ɔ ka yí gbe ɖɔ jí: “Mi ɖésúnɔ mi bo sa vo nú Aklúnɔ nú mì, bónú nǔ e mi ɖɔ ɔ́ ɖě ma ɖi wǔ ce ó.” Ée Piyɛ́ɛ kpódó Jǎan kpán ɖe kúnnu nú Aklúnɔ, bó jlá xó tɔn vɔ ɔ́, yě lɛ́ kɔ ɖidó Jeluzalɛ́mu, bó jlá Wɛn Ɖagbe ɔ́ dó ali, gbɔn Samalíi sín gletoxo gěgé mɛ. Wɛnsagun Aklúnɔ tɔn ɖɔ nú Filípu ɖɔ jí: “A nǎ sí te, bó ɖidó to ɔ́ sín afɔligbé. Ali e gosín Jeluzalɛ́mu, bó gbɔn gbětótló mɛ yi Gaza ɔ́ wɛ a nǎ wlí.” Yɛsinsɛn ka ɖɔ nú Filípu ɖɔ: “Xwedó kɛkɛ́ví énɛ́ wú.” Filípu ka kán wezun bó xwedó kɛkɛ́ví ɔ́ wú, bó se nya Etiopíinu ɔ́ ɖo nǔ xa wɛ, ɖo gbeyíɖɔ Mawu tɔn Ezayíi sín wěma mɛ lobo kanbyɔ́ ɛ ɖɔ: “A ka mɔ nǔ jɛ nǔ e xa wɛ a ɖe ɔ́ mɛ din a?” Etiopíinu ɔ́ ká yí gbe n'i ɖɔ: “Ényí mɛɖé má tínmɛ nú mì ǎ ɔ́, nɛ̌ un ka sixú mɔ nǔ jɛ mɛ gbɔn?” É ka ɖɔ nú Filípu ɖɔ ní byɔ́ kɛkɛ́ví ɔ́ mɛ, bó jínjɔ́n akpá émítɔn. Nǔ e xa wɛ é ɖe ɖo Mawuxówéma ɔ́ mɛ ɔ́ ɖíe: “È kplá ɛ lě e è nɔ kplá lɛ̌ngbɔ́ yi lanhutɛn ɔ́ ɖɔhun; é cí xwíí, lě e lɛ̌ngbɔ́ nɔ cí xwíí ɖo mɛ e ɖo fún kpa n'i wɛ ɔ́ nukɔn gbɔn é. È dǒ winnyá ɛ, è táfú i, bó ɖɔ hwɛ tɔn ganjí ǎ. Mɛ̌ ka ná sixú kpi vǐ tɔn lɛ́ɛ sín tan? Đó yě hu i sín gbɛ élɔ́ mɛ.” Nya agooɖojǐe ɔ́ ká kanbyɔ́ Filípu ɖɔ: “Mɛ̌ xó ɖɔ wɛ gbeyíɖɔ Mawu tɔn ɔ́ ká ɖe? É ɖésú xó ɖɔ wɛ é ɖe a, abǐ mɛ ɖěvo? Kɛnklɛ́n, ɖɔ má se.” Bɔ Filípu yí xó, bó bɛ́ sín nǔ e xa wɛ nya énɛ́ ɖe ɖo Mawuxówéma ɔ́ mɛ ɔ́ jí, bó ɖɔ Wɛn Ɖagbe Jezu tɔn ɔ́ sín xó n'i. Yě ɖo yiyi wɛ, bó wá yi mɔ sin ɖo fí ɖé, bɔ agooɖojǐe ɔ́ ɖɔ jí: “Kpɔ́n! Sin ɖíe; étɛ́ ka sɔ́ ná gbɛ́ ɖɔ un ma lɛ yɛhwesin ó?” [ Filípu ka ɖɔ jí: “Ényí a ɖi nǔ kpódó ayi towe bǐ kpó ɔ́, è hɛn ɔ́, è nǎ lɛ yɛhwesin nú we.” Etiopíinu ɔ́ ka yí gbe n'i ɖɔ jí: “Un ɖi nǔ ɖɔ Jezu Klísu ɔ́, Mawu ví wɛ é nyí.”] É zɔ́n bɔ è ɖǒ kɛkɛ́ví ɔ́ te, bɔ é kpódó Filípu kpó we lɛ́ɛ jɛ te, bó byɔ́ sin ɔ́ mɛ, bɔ Filípu lɛ yɛhwesin n'i. Ée yě tɔ́n sín sin ɔ́ mɛ ɔ́, Aklúnɔ sín Yɛ sɔ́ Filípu yi, bɔ agooɖojǐe ɔ́ sɔ́ mɔ ɛ ǎ. Lo ɔ́, é wlí ali tɔn, bó ɖidó kpódó xomɛhunhun kpó. Filípu ɔ́ ka wá mɔ éɖée ɖo to e è nɔ ylɔ́ ɖɔ Azɔtɔ́si ɔ́ mɛ, bó wlí ali, bó nɔ́ ɖo Wɛn Ɖagbe ɔ́ jlá wɛ gbɔn to lɛ́ɛ mɛ to lɛ́ɛ mɛ, káká yi jɛ Sezalée. Sólu ka kpo ɖo kúdán gblɔ́n nú Jezu sín ahwanvú lɛ́ɛ wɛ. É yi mɔ vɔ̌sánú-xwlémawutɔ́ ɖaxó ɔ́, bó ɖɔ ní bló wěma nú émí nú émí ná hɛn yi kplɔ́ngbasá e ɖo Damási lɛ́ɛ, bónú émí mɔ mɛ e byɔ́ sinsɛn yɔ̌yɔ́ ɔ́ mɛ lɛ́ɛ ɖě ɔ́, súnnu abǐ nyɔ̌nu ɔ́, émí ná blá yě, bó kplá yě wá Jeluzalɛ́mu. Dɔ̌n ɔ́ yi wɛ é ɖe, bó kó sɛ yá Damási to ɔ́, bɔ tlóló ɔ́, wěziza ɖé gosín jǐxwé wá hɔ́n lɛ́ lɛ̌ dó e, bɔ é jɛ ayǐ. É ka se gbe ɖé, bɔ gbe ɔ́ nɔ́ kanbyɔ́ ɛ ɖɔ: “Sólu, Sólu, étɛ́wú a ka ɖo ya dó nú mì wɛ?” Sólu ka kanbyɔ́ ɛ ɖɔ: “Hwi mɛ̌ ká wɛ Aklúnɔ?” Gbe ɔ́ ká ɖɔ: “Nyɛ Jezu e dó ya ná a ɖe ɔ́ wɛ. Din ɔ́, sí te, bó byɔ́ toxo ɔ́ mɛ; è nǎ ɖɔ nǔ e a ɖǒ ná wa ɔ́ nú we.” Ahwangbɛ́ tɔn e kpó é kpó xwe to ɔ́ mɛ lɛ́ɛ nɔ te, bó sɔ́ sixú kɛ nu ǎ. Yě ɖo xó ɔ́ se wɛ, yě ka mɔ mɛ e ɖo xó ɔ́ ɖɔ wɛ é ǎ. Sólu ka wá sí te sín kɔ́ mɛ, bó hun nukún, é ka sɔ́ sixú mɔ nǔ ɖěbǔ ǎ, bɔ yě hɛn alɔ tɔn, bó kplá ɛ byɔ́ Damási. É nɔ nukúnnú ma mɔ nú azǎn atɔn. É ɖu nǔ ǎ; é nu sin ǎ. Ahwanvú Jezu tɔn ɖokpó ka ɖo Damási fínɛ́, bɔ è nɔ ylɔ́ ɛ ɖɔ Ananíyasi. É mɔ nǔ, bó mɔ Aklúnɔ bɔ é ɖɔ n'i ɖɔ: “Ananíyasi.” Bɔ é yí gbe n'i ɖɔ: “Nyɛ ɖíe Aklúnɔ.” Aklúnɔ ka ɖɔ n'i ɖɔ: “Sí te, bó wlí ali e è nɔ ylɔ́ ɖɔ ali Jlɔ́jlɔ́ ɔ́, bó yi Judási xwé gbe, bó kan nya Táasinu e è nɔ ylɔ́ ɖɔ Sólu ɔ́ byɔ́; é ɖo ɖɛ xo wɛ din; Sólu ɖo ɖɛ xo wɛ, bó mɔ nǔ, bó mɔ nya ɖé, bɔ è nɔ ylɔ́ nya ɔ́ ɖɔ Ananíyasi, bɔ é byɔ́ xwé gbe, bó ɖó alɔ jǐ tɔn, bónú é ná lɛ́ mɔ nǔ.” Ananíyasi ka yí gbe ɖɔ: “Aklúnɔ! Un ko se nya élɔ́ sín xó, ɖo mɛ gěgé nu. Nǔ nyanya e é wa xá mɛ e nyí towe ɖo Jeluzalɛ́mu lɛ́ɛ ɔ́, un se bǐ. Fí e é ka wá din ɔ́, vɔ̌sánú-xwlémawutɔ́gán lɛ́ɛ wɛ é byɔ́ gbe, bó ná wlí mɛ e nɔ xomlá nyǐkɔ towe lɛ́ɛ bǐ.” Aklúnɔ ka ɖɔ n'i ɖɔ: “Vɛ̌ yi, ɖó nya énɛ́ ɔ́, alǐnnyánú ɖé wɛ é nyí, bɔ un sɔ́, bó ná dó wa azɔ̌ ná, nú é ná jlá nyǐkɔ ce mɛ e ma nyí Jwifu ǎ lɛ́ɛ, bó ná jlá axɔ́sú yětɔn lɛ́ɛ, kpódó Izlayɛ́li togun ɔ́ kpó. Un ka ná ɖe ya e é ná ji ɖó nyǐkɔ ce wú lɛ́ɛ bǐ xlɛ́ ɛ.” Ananíyasi ka yi nǔgbó, bó byɔ́ xwé ɔ́ gbe, lobo ɖó alɔ Sólu jí, bó ɖɔ: “Sólu nɔví ce! Aklúnɔ Jezu e tɔ́n dó jǐ towe ɖo ali e a gbɔn bó wá é jí ɔ́ wɛ sɛ́ mì dó, nú a nǎ lɛ́ mɔ nukúnnú, bónú Yɛsinsɛn ní gɔ́ ayi mɛ nú we.” Azɔn ɖokpó ɔ́, nǔ hwevízá ɖɔhun ɖé lɛ́ɛ jɛ ayǐ sín Sólu nukún jí, bɔ é lɛ́ jɛ nǔ mɔ jí bó sí te, bó lɛ yɛhwesin. Énɛ́ ɔ́ gúdo ɔ́, é ɖu nǔ, bɔ hlɔ̌nhlɔ́n wá wǔ tɔn. Sólu nɔ ahwanvú Jezu tɔn e ɖo Damási lɛ́ɛ gɔ́n xɔ azǎn. É ka jɛ kplɔ́ngbasá lɛ́ɛ gbɔn jí azɔn ɖokpó, bó nɔ́ ɖo Jezu xó ɖɔ nú mɛ lɛ́ɛ wɛ, ɖɔ Mawu ví wɛ é nyí. Nǔ énɛ́ kpácá mɛ e nɔ se xó e ɖɔ wɛ é ɖe lɛ́ɛ bǐ, bɔ yě nɔ́ ɖɔ: “Nya e ɖo mɛ e nɔ xomlá Jezu ɖo Jeluzalɛ́mu lɛ́ɛ sín kún sú dó wɛ ɔ́ nɛ́ ǎ cé? Mɛ e nɔ xomlá Jezu lɛ́ɛ ná wlí yi jó nú vɔ̌sánú-xwlémawutɔ́gán lɛ́ɛ gbé wɛ é tɔ́n bó wá fí ǎ cé?” Hlɔ̌nhlɔ́n e Sólu dó ɖo Wɛn Ɖagbe ɔ́ jlá ná wɛ ɔ́ nɔ́ ɖo jijɛ jí wɛ, bɔ Jwifu e ɖo Damási lɛ́ɛ sɔ́ mɔ nu ɖé ná kɛ dó xó tɔn wú ǎ; ɖó é ɖe xlɛ́ titewungbe ɖɔ Jezu wɛ nyí Klísu. Azǎn wá ɖo azǎn jí jɛ wɛ, bɔ Jwifu lɛ́ɛ yi kpá dó Sólu wú, bó ná hu i. Sólu se gbě e è blǎ dó wǔ tɔn ɔ́; zǎn kpó kéze kpó ɔ́, yě nɔ́ ɖo to ɔ́ sín hɔntogbó lɛ́ɛ jí, bó nɔ́ ɖo fí e é ná tɔ́n gbɔn ɔ́ cɔ́ wɛ, bó ná mɔ tɛn bo hu i. Énɛ́ wú ɔ́, ahwanvú lɛ́ɛ wá sɔ́ ɛ dó xasun mɛ zǎn mɛ, bó sɔ́ ɛ gbɔn ahohó ɔ́ ta, bó ɖe e nyi te dǒ ɔ́ gúdo dɔ̌n. Ée Sólu wá jɛ Jeluzalɛ́mu ɔ́, é jló ná xwe éɖée dó ahwanvú lɛ́ɛ mɛ; lo ɔ́, yě bǐ nɔ́ ɖi xɛsi dó wǔ tɔn, ɖó yě ɖeji ɖɔ élɔ́ ko húzú ahwanvú Klísu tɔn ǎ. Baanabási ka kplá Sólu hɛn yi mɛsɛ́dó lɛ́ɛ gɔ́n, bó wlí lě e é mɔ Aklúnɔ gbɔn ɖo ali jí é, lě e Aklúnɔ ɖɔ xó n'i gbɔn é ɖɔ nú yě; é ɖɔ lě e Sólu ɖésú gbó adɔ bó jlá Mawuxó ɔ́ ɖo Jezu sín nyǐkɔ mɛ gbɔn, ɖo togun mɛ agbawungba ɖo Damási é bǐ nú yě. Bɛ́ sín hwenɛ́nu ɔ́, yě yí Sólu, bɔ é nɔ ɖo yiyi wɛ, bó nɔ́ ɖo wǐwá wɛ, bó nɔ́ gbó adɔ dó ɖɔ Mawuxó, ɖo Aklúnɔ nyǐkɔ mɛ, ɖo Jeluzalɛ́mu. É nɔ́ ɖɔ xó nú Jwifu e nɔ xwedó walɔ Glɛ̌sinu lɛ́ɛ tɔn ɔ́ lɔmɔ̌, bó nɔ́ ɖo nǔ dɔn xá yě wɛ; amɔ̌, yě ɖo biba ná hu i wɛ. Ée nɔví lɛ́ɛ se mɔ̌ ɔ́, yě kplá ɛ yi Sezalée, bó nyi i sɛ́ dó Táasi. Yě mɛ e ɖi nǔ nú Jezu lɛ́ɛ sín agun e ɖo Judée ɔ́ kpó ée ɖo Galilée ɔ́ kpó, kpódó ée ɖo Samalíi ɔ́ kpán bǐ sín ayi wɛ jɛ ayǐ, bɔ yě ɖo dǒ lí wɛ, bó nɔ́ ɖo sísí ɖó nú Aklúnɔ wɛ ɖo nǔwiwa yětɔn lɛ́ɛ mɛ; Yɛsinsɛn gɔ́ alɔ nú yě, bɔ yě ɖo kpɔ́ sú d'é jí wɛ. Piyɛ́ɛ ɖo to ɔ́ bǐ mɛ gbɔn wɛ, lobo yi nǔɖitɔ́ e ɖo Lida lɛ́ɛ gɔ́n gbe ɖokpó. É mɔ nya ɖé ɖo fínɛ́, bɔ è nɔ ylɔ́ ɛ ɖɔ Enɛ́ɛ; nya énɛ́ xwe ayǐsó ɖo zan jí din ɔ́, xwe tɔn ko yi tántɔn; bɔ é ɖo ayǐmlɔ́mlɔ́. Piyɛ́ɛ ka ɖɔ n'i ɖɔ: “Enɛ́ɛ, Jezu Klísu gbɔ azɔn nú we; sí te bó mlá zan towe.” Bɔ é sí te tlóló tɛn tɔn mɛ. Lidanu lɛ́ɛ bǐ kpódó Calɔ́ni gbé jí nu lɛ́ɛ kpó ka mɔ nya énɛ́, bó húzú jɛ Aklúnɔ sín ali jí. Nyɔ̌nu ɖé ka ɖo ahwanvú Jezu tɔn lɛ́ɛ mɛ ɖo Jopée, bɔ è nɔ ylɔ́ ɛ ɖɔ Tabita; (nyǐkɔ énɛ́ sín tínmɛ wɛ nyí “Dɔ̌kási” ɖo Glɛ̌sigbe mɛ, bó nyí “Tɛ́” ɖo Fɔngbe mɛ.) Nyɔ̌nu ɖagbewatɔ́ ɖé wɛ, bó nɔ́ dó alɔ wamamɔnɔ lɛ́ɛ ɖésú. Hwenɛ́nu ɔ́, é bɛ́ azɔn, lobo kú, bɔ yě lɛ wǔ nú cyɔ tɔn, bó sɔ́ yi tɛ́ ɖó xɔ ɖé mɛ, ɖo síngbó jí. Ée ahwanvú Jezu tɔn e ɖo Jopée lɛ́ɛ se ɖɔ Piyɛ́ɛ ɖo Lida, bɔ Lida ma ka lín dó Jopée ǎ ɔ́, yě ɖe mɛ we sɛ́ dó e nú yě ní yi ɖɔ n'i ɖɔ ní kɛnklɛ́n bó wá kpɔ́n nǔ élɔ́ nú émí din tlóló. Ée Piyɛ́ɛ se wɛn énɛ́ tlóló ɔ́, é sí te bó xwedó yě azɔn ɖokpó. Ée yě wá Jopée ɔ́, yě kplá ɛ yi xɔ ɔ́ mɛ, ɖo síngbó jí. Ée Piyɛ́ɛ byɔ́ xɔ ɔ́ mɛ ɔ́, asúkúsi lɛ́ɛ bǐ sɛkpɔ́ ɛ ɖasin ɖo nukún mɛ, bó xlɛ́ ɛ awu kpó avɔ kpán e Dɔ̌kási nɔ bló hwenu e é ɖo gbɛ é. Piyɛ́ɛ ka ɖe mɛ bǐ tɔ́n sín xɔ ɔ́ mɛ, bó húzú jɛ kpo, lobo xo ɖɛ, bó wá lílɛ́ kpan nukɔn cyɔ ɔ́, bó ɖɔ: “Tabita! Sí te!” Tabita ka hun nukún; ée é mɔ Piyɛ́ɛ ɔ́, é fɔ́n jínjɔ́n ayǐ. Piyɛ́ɛ ka hɛn alɔ tɔn, bó sɔ́ ɛ sí te, bó ylɔ́ nǔɖitɔ́ lɛ́ɛ, kpódó asúkúsi lɛ́ɛ kpán, bó sɔ́ ɛ xlɛ́ yě gbɛɖe. Jopéenu lɛ́ɛ bǐ se nǔ énɛ́ ɔ́, bɔ yě mɛ gěgé ɖi nǔ nú Aklúnɔ. Piyɛ́ɛ ka nɔ Jopée fínɛ́, ɖo anyǔzɔ́watɔ́ e è nɔ ylɔ́ ɖɔ Sinmɔ́ɔ é xwé xɔ azǎn. Nya ɖé ɖo Sezalée, bɔ è nɔ ylɔ́ ɛ ɖɔ Kɔnɛ́yi; sɔ́ja kanwekogán wɛ é nyí, ɖo ahwangbɛ́ e è nɔ ylɔ́ ɖɔ Italíi tɔn ɔ́ mɛ. Nya énɛ́ ɔ́ nɔ́ xwedó Mawusɛ́n, bɔ é kpódó mɛ e ɖo hɛ̌n tɔn nu lɛ́ɛ bǐ kpán nɔ́ ɖó sísí nú Mawu. É nɔ́ ná nǔ gěgé Jwifu wamamɔnɔ lɛ́ɛ, bó nɔ́ xo ɖɛ hwebǐnu. Gbe ɖokpó wá su, ɖo hwelɛ́kɔ xwe gan atɔn mɛ mɔ̌, bɔ é mɔ nǔ, bó mɔ wɛnsagun Mawu tɔn ɖokpó céɖécéɖé, bɔ wɛnsagun ɔ́ byɔ́ xwé tɔn gbe, bó ɖɔ n'i ɖɔ: “Kɔnɛ́yi.” Ée Kɔnɛ́yi mɔ wɛnsagun ɔ́, xɛsi jɛ jǐ tɔn; é ká kpɔ́n ɛ tlítlí, bó kanbyɔ́ ɛ ɖɔ: “Nɛ̌ ká gbɔn Aklúnɔ?” Bɔ wɛnsagun ɔ́ yí gbe n'i ɖɔ: “Đɛ e a nɔ xo lɛ́ɛ, kpódó nǔ e a nɔ ná wamamɔnɔ lɛ́ɛ kpán ɔ́, bǐ wɛ Mawu yí, bó flín we. Din ɔ́, sɛ́ mɛ dó Jopée, nú è yi ylɔ́ Sinmɔ́ɔ e è nɔ ylɔ́ ɖɔ Piyɛ́ɛ ɔ́ wá. É ɖo nya anyǔzɔ́watɔ́ ɖé xwé; è nɔ ylɔ́ nya ɔ́ ɖɔ Sinmɔ́ɔ, bɔ xwé tɔn ɖo xutó.” Ée wɛnsagun e ɖɔ xó n'i ɔ́ yi tlóló ɔ́, Kɔnɛ́yi ylɔ́ mɛsɛntɔ́ tɔn we, kpó sɔ́ja e nɔ wa azɔ̌ n'i lɛ́ɛ ɖokpó kpó; sɔ́ja énɛ́ nɔ́ xwedó Mawusɛ́n ɔ́; Kɔnɛ́yi tín nǔ e jɛ ɔ́ bǐ mɛ nú yě, lobo sɛ́ yě dó Jopée. Ayǐhɔ́ngbe tɔn ɔ́, yě ɖo ali jí xweyǐgbe, bó kó sɛ yá Jopée. Đo Jopée dɔ̌n ɔ́, Piyɛ́ɛ xá xɔ ta hwenɛ́nu ɖo gan wěwe mɛ ɖɔhun mɔ̌, bó ná xo ɖɛ. Xovɛ́ sin i, bɔ é jló ná ɖu nǔ. Hwenu e è ɖo nǔɖuɖu ɔ́ bló wɛ ɔ́, é ba éɖée kpo, bó mɔ jǐnukúnsin kɛ, bɔ nǔ avɔ ɖaxó ɖɔhun ɖé gosín jǐ ja dodomɛ, bɔ tó tɔn ɛnɛ lɛ́ɛ ɖo sinsin; bɔ kanlin alɔkpa alɔkpa ɖ'é mɛ: ée nɔ́ zɔn afɔ ɛnɛ jí lɛ́ɛ, ée nɔ́ sá gbɔn kɔ́ mɛ lɛ́ɛ, kpódó xɛ alɔkpa alɔkpa lɛ́ɛ kpán ɖ'é mɛ. É ká se gbe ɖé, bɔ gbe ɔ́ ɖɔ n'i ɖɔ: “Piyɛ́ɛ! Sí te, hu, bó ɖu.” Piyɛ́ɛ ka yí gbe ɖɔ jí: “Éeǒ Aklúnɔ; ɖó nǔ e nyí nǔvɛ́mɛ é kpódó nǔ e nɔ hɛn mɛ blí é kpó ɔ́, un ɖu ɖě kpɔ́n gbeɖé ǎ.” Gbe ɔ́ ká lɛ́ ɖɔ n'i azɔn wegɔ́ ɔ́ ɖɔ: “Nǔ e Mawu ɖɔ è hɛn ɔ́, è nǎ ɖu ɔ́, hwɛ ma ɖɔ é vɛ́ mɛ ó.” Azɔn atɔn wɛ nǔ énɛ́ jɛ. Énɛ́ gúdo tlóló ɔ́, nǔ avɔ ɖaxó ɖɔhun ɔ́ kpódó nǔ e ɖ'é mɛ lɛ́ɛ bǐ kpán lɛ́ kɔ yi jǐxwé. Piyɛ́ɛ ɖo nǔ énɛ́ lɛ́ɛ e é mɔ lɛ́ɛ sín tínmɛ kanbyɔ́ éɖée wɛ. Énɛ́ linkpɔ́n wɛ é ɖe kɛ́ɖɛ́, bɔ mɛ e Kɔnɛ́yi sɛ́ dó e lɛ́ɛ kan Sinmɔ́ɔ xwé byɔ́, bó wá jɛ hɔntogbó jí. Yě zé gbe yi jǐ, bó kanbyɔ́ ɖɔ fínɛ́ wɛ Sinmɔ́ɔ e è nɔ ylɔ́ ɖɔ Piyɛ́ɛ ɔ́ jɛ ají. Piyɛ́ɛ ka kpo ɖo tamɛ lin dó nǔ e é mɔ ɔ́ wú wɛ, bɔ Yɛsinsɛn ɖɔ n'i ɖɔ: “Đǒtó; mɛ atɔn ɖé lɛ́ɛ nɛ́ ɖo biba we wɛ nɛ́. Sí te, jɛ te, bó xwedó yě; ma xokpɔ́n ó, ɖó nyi wɛ sɛ́ yě dó.” Piyɛ́ɛ ka jɛ te wá mɔ mɛ lɛ́ɛ, bó ɖɔ nú yě ɖɔ: “Nyɛ mɛ e ba wɛ mi ɖe ɔ́ ɖíe; étɛ́ ka hɛn mi wá?” Yě ka yí gbe n'i ɖɔ: “Sɔ́ja kanwekogán Kɔnɛ́yi wɛ sɛ́ mǐ dó; nya énɛ́ ɔ́, gbɛtɔ́ ɖagbe ɖé wɛ; é nɔ́ sí Mawu, bɔ Jwifu lɛ́ɛ bǐ nɔ́ ɖe kúnnu ɖagbe n'i. Wɛnsagun Mawu tɔn ɖé tɔ́n dó jǐ tɔn, bó ɖɔ n'i ɖɔ ní ylɔ́ we wá xwé tɔn gbe, bó ɖótó xó e a nǎ ɖɔ n'i é.” Piyɛ́ɛ ka kplá yě byɔ́ xwé gbe, lobo ɖó tɛnmɛ nú yě. Ayǐhɔ́ngbe tɔn ɔ́, é kpódó yě kpán wá jɛ ali; nɔví e ɖo Jopée lɛ́ɛ ɖě ka xwedó e. Yě wá Sezalée ayǐhɔ́ngbe tɔn. Kɔnɛ́yi ka ɖo te kpɔ́n wǐwá yětɔn, bó ylɔ́ hɛ̌nnumɔ tɔn lɛ́ɛ, kpódó xɔ́ntɔn tɔn vívɛ́ná lɛ́ɛ kpán. Hwenu e Piyɛ́ɛ ɖo xwé ɔ́ gbe byɔ́ wɛ ɔ́, Kɔnɛ́yi wá kpé e, bó húzú jɛ kpo ɖo nukɔn tɔn, bó ɖe kɔ́. Lo ɔ́, Piyɛ́ɛ sɔ́ ɛ sí te, bó ɖɔ: “Sí te, gbɛtɔ́ wɛ nyɛ lɔmɔ̌ nyí.” Bɔ é kpódó Piyɛ́ɛ kpó jɛ xó ɖɔ jí, bó byɔ́ xwé ɔ́ gbe, bɔ Piyɛ́ɛ mɔ ɖɔ mɛ gěgé kó kplé ɖo fínɛ́, bó ɖɔ nú yě ɖɔ: “Mi tunwun ganjí ɖɔ, ɖo mǐ mɛ Jwifu lɛ́ɛ sín sɛ́n mɛ ɔ́, Jwifu ɖé kún ɖó ná dó gbɛ̌ xá mɛ e ma nyí Jwifu ǎ é gbeɖé ó; é kún ka ɖó ná byɔ́ ɖě xwé ó. Lo ɔ́, Mawu ɖe xlɛ́ mǐ din ɖɔ un kún ɖó ná ylɔ́ mɛ ɖěbǔ ɖɔ mɛ blíblí abǐ mɛ e un ma sixú dó gbɛ̌ xá ǎ é ó. Nǔ e wú wɛ hwenu e a ylɔ̌ mì ɔ́, un ma xokpɔ́n cóbó wá ǎ é nɛ́. Din ɔ́, nǔ e wú a ylɔ̌ mì ɔ́, bó ɖɔ nú mì.” Kɔnɛ́yi ka yí xó, bó ɖɔ: “Azǎn ɛnɛ ɖíe wɛ un ɖo xwé ce gbe, ɖo gan atɔn mɛ hwelɛ́kɔ lěhwenu, bó ɖo ɖɛ xo wɛ; tlóló kpowun ɔ́, nya ɖé jɛ́n wá tɔ́n ɖo nukɔn ce, bó dó awu ɖé, bɔ awu ɔ́ nɔ́ kɔ́n. Nya ɔ́ ɖɔ nú mì ɖɔ: ‘Kɔnɛ́yi, Mawu yí ɖɛ towe, bó flín nǔ e a nɔ ná wamamɔnɔ lɛ́ɛ é. Sɛ́ mɛ dó Jopée, nú è yi ylɔ́ Sinmɔ́ɔ e è nɔ lɛ́ ylɔ́ ɖɔ Piyɛ́ɛ é wá. Anyǔzɔ́watɔ́ Sinmɔ́ɔ e xwé tɔn ɖo xutó ɔ́ sín xwé gbe wɛ é jɛ.’ Un ka sɛ́ mɛ dó azɔn ɖokpó, ɖɔ è nǐ yi ylɔ́ we wá, bɔ a ka yí gbe bo wá nǔgbó. Din ɔ́, mǐ bǐ ɖíe ɖo Mawu nukɔn e, bó ná se nǔ e Mawu zɔ́n we ɖɔ a nǐ ɖɔ nú mǐ é.” Piyɛ́ɛ yí xó, bó ɖɔ: “Un mɔ din nǔgbó ɖɔ Mawu kún nɔ́ ɖe mɛɖé ɖó vo ɖo mɛɖé mɛ ó. Lo ɔ́, ɖo akɔta ɖěbǔ mɛ ɔ́, mɛ e nɔ ɖó sísí n'i, bó nɔ́ xwedó hwɛjijɔ ɔ́, mɛ énɛ́ sín nǔ nɔ́ nyɔ́ nukún tɔn mɛ. Mi tunwun xó e Mawu ɖɔ sɛ́ dó Izlayɛ́li ví lɛ́ɛ, bó dó Wɛn Ɖagbe e nɔ ná fífá mɛ ɔ́ yě gbɔn Jezu Klísu e nyí mɛ bǐ sín Aklúnɔ ɔ́ jí é. Hwenu e Jǎan jlá Mawuxó ɔ́, bó lɛ yɛhwesin nú mɛ lɛ́ɛ gúdo ɔ́, mi tunwun nǔ e jɛ ɖo Galilée hwɛ̌ cóbó lɛ́ wá jɛ gbɔn Judée gbé ɔ́ bǐ jí é. Mi tunwun lě e Mawu gba Yɛsinsɛn sín hlɔ̌nhlɔ́n dó Jezu Nazalɛ́tinu ɔ́ jí gbɔn é; mi lɛ́ tunwun lě e Jezu gbɔn to ɔ́ mɛ, bó wa ɖagbe nú mɛ lɛ́ɛ, bó gbɔ azɔn nú mɛ e ɖo awǒvi sín acɛ mɛ lɛ́ɛ bǐ gbɔn é, ɖó Mawu ɖo kpɔ́ xá ɛ. Nǔ e é wa ɖo Jwifu lɛ́ɛ yíkúngban jí, kpódó Jeluzalɛ́mu kpó ɔ́ bǐ wɛ mǐ mɔ; yě ká ɛ nyi aklúzu jí, bó hu i. Mawu ka fɔ́n ɛ sín kú azǎn tɔn atɔngɔ́ ɔ́ gbe, bó ɖe e xlɛ́. Togun ɔ́ bǐ wɛ é ka ɖe e xlɛ́ ǎ; lo ɔ́, mǐ mɛ e Mawu kó cyán ɖ'ayǐ, bɔ mǐ ná nyí kúnnuɖetɔ́ tɔn lɛ́ɛ wɛ é ɖe e xlɛ́; mǐ ɖu nǔ, bó nu ahan xá ɛ hwenu e Mawu fɔ́n ɛ sín kú wá gbɛ é gúdo. É ka zɔ́n ɖɔ mǐ ní jlá togun ɔ́ bǐ, bó ɖe kúnnu ná ɖɔ émí wɛ nyí mɛ e Mawu sɔ́ bɔ é ná ɖɔ hwɛ xá mɛ e ɖo gbɛ kpó mɛ e ko kú lɛ́ɛ kpó é. É wɛ gbeyíɖɔ Mawu tɔn lɛ́ɛ bǐ ɖe kúnnu ná ɖɔ jí: ‘Mɛ e ná ɖi nǔ n'i lɛ́ɛ ɔ́, Mawu ná sɔ́ hwɛ yětɔn lɛ́ɛ kɛ yě, gbɔn hlɔ̌nhlɔ́n e Jezu sín nyǐkɔ ɖó ɔ́ gbla mɛ.’ ” Piyɛ́ɛ kpo ɖo xó énɛ́ lɛ́ɛ ɖɔ wɛ, bɔ Yɛsinsɛn jɛ te wá mɛ e ɖo tó ɖó e wɛ lɛ́ɛ bǐ jí. Ée Jwifu e ɖi nǔ nú Jezu, bó xwedó Piyɛ́ɛ wá lɛ́ɛ mɔ ɖɔ Yɛsinsɛn e Mawu nɔ́ ná mɛ ɔ́ gba kɔn nyi mɛ e ma nyí Jwifu ǎ lɛ́ɛ lɔmɔ̌ jí ɔ́, é kpácá yě tlala. Đó yě se bɔ yě ɖo xó ɖɔ wɛ dó gbe e yě ma se ǎ lɛ́ɛ mɛ, bó ɖo susu kpa nú Mawu wɛ. Piyɛ́ɛ ka yí xó, bó ɖɔ: “Mɛ élɔ́ lɛ́ɛ e Mawu ná Yɛsinsɛn lě e é ná mǐ lɔmɔ̌ gbɔn ɔ́, è sixú gbɛ́ ɖɔ è ma lɛ yɛhwesin nú yě kpó sin kpó ó a?” Ée é ɖɔ mɔ̌ ɔ́, é ná gbe ɖɔ è lɛ yɛhwesin nú yě, ɖo Jezu Klísu nyǐkɔ mɛ. Énɛ́ ɔ́ gúdo ɔ́, yě dó kɛnklɛ́n n'i ɖɔ é ní nɔ émí gɔ́n xɔ azǎn yɔywɛ ɖé. Mɛsɛ́dó lɛ́ɛ kpódó nɔví ɖo Klísu mɛ e ɖo Judée lɛ́ɛ kpán se ɖɔ mɛ e ma nyí Jwifu ǎ lɛ́ɛ lɔmɔ̌ yí Mawuxó se. Énɛ́ wú wɛ hwenu e Piyɛ́ɛ lɛ́ kɔ yi Jeluzalɛ́mu ɔ́, Jwifu klísusɛntɔ́ lɛ́ɛ dó hwɛ ɛ, bó kanbyɔ́ ɛ ɖɔ: “Étɛ́wú a ka yi mɛ e ma nyí Jwifu ǎ lɛ́ɛ gɔ́n, bó ɖu nǔ xá yě?” Piyɛ́ɛ ka yí xó, bó tín lě e nǔ lɛ́ɛ yi gbɔn ɔ́ mɛ nú yě ɖokpó ɖokpó; é ɖɔ nú yě ɖɔ: “Jopée wɛ un ɖe, bó ɖo ɖɛ xo wɛ, bó byɔ́ nǔ dlɔ̌ ɖɔhun ɖé mɛ, bó mɔ nǔ avɔ ɖaxó ɖɔhun ɖé gosín jǐnukúnsin wá káká gɔ̌n ce, ɖo dodomɛ, bɔ tó tɔn ɛnɛ lɛ́ɛ ɖo sinsin; bɔ un jɛ kpínkpɔ́n jí tlítlí, bó mɔ kanlin e nɔ zɔn afɔ ɛnɛ jí lɛ́ɛ, gběkanlin lɛ́ɛ, kanlin e nɔ sá gbɔn kɔ́ mɛ lɛ́ɛ, kpódó xɛ alɔkpa alɔkpa lɛ́ɛ kpó ɖ'é mɛ. Un ka se gbe ɖé, bɔ é ɖɔ nú mì ɖɔ: ‘Piyɛ́ɛ, sí te, hu bo ɖu.’ Un ka yí gbe ɖɔ jí: ‘Éeǒ Aklúnɔ! Đó nǔ e nyí su é kpódó nǔ e nɔ hɛn mɛ blí é kpó ɔ́, un ɖu ɖě kpɔ́n gbeɖé ǎ.’ Gbe ɔ́ ka lɛ́ ɖɔ nú mì sín jǐxwé azɔn wegɔ́ ɔ́ ɖɔ: ‘Nǔ e Mawu ɖɔ è hɛn ɔ́, è nǎ ɖu ɔ́, hwɛ ma ɖɔ é vɛ́ mɛ ó.’ Azɔn atɔn wɛ nǔ énɛ́ jɛ; énɛ́ ɔ́ gúdo ɔ́, nǔ avɔ ɖaxó ɖɔhun ɔ́ kpódó nǔ e ɖ'é mɛ lɛ́ɛ bǐ kpó yi jǐxwé. Hwenɛ́nu tlóló ɔ́, mɛ atɔn ɖé lɛ́ɛ wá xwé e gbe un ɖe ɔ́ sín hɔn jí; Sezalée wɛ è sɛ́ yě dó sín. Yɛsinsɛn ka ɖɔ ma xwedó yě; nyɛ ní má xo kpɔ́n ó. Nɔví mǐtɔn ayizɛ́n élɔ́ lɛ́ɛ e mɔ wɛ mi ɖe din lɛ́ɛ ká kplá mì yi Sezalée, bɔ mǐ bǐ byɔ́ Kɔnɛ́yi xwé, bɔ nya ɔ́ wlí lě e é mɔ wɛnsagun Mawu tɔn ɖé wá xwé tɔn gbe, bó ɖɔ xó n'i gbɔn ɔ́ ɖɔ nú mǐ; wɛnsagun ɔ́ ɖɔ n'i ɖɔ: ‘Sɛ́ mɛ dó Jopée nú è yi ylɔ́ Sinmɔ́ɔ e nɔ lɛ́ nyí Piyɛ́ɛ é wá. É ná ɖɔ xó e ná hwlɛ́n hwi kpódó hɛ̌nnu towe bǐ kpó gán ɔ́ nú we.’ Xó ɖɔ nú yě jí wɛ un jɛ, bɔ Yɛsinsɛn jɛ te wá yě jǐ, lě e é jɛ te wá mǐ jǐ ɖo bǐbɛ́mɛ gbɔn é, bɔ un flín xó e Aklúnɔ kó ɖɔ ɔ́; é wɛ nyí ɖɔ: ‘Jǎan sɔ́ sin dó lɛ yɛhwesin nú mɛ; amɔ̌ Yɛsinsɛn wɛ è nǎ sɔ́ dó lɛ yɛhwesin nú midɛɛ lɛ́ɛ.’ Ényí Mawu ná nǔníná ɖokpó ɔ́ yě, lě e é ná mǐ lɔ gbɔn hwenu e mǐ ɖi nǔ nú Aklúnɔ Jezu Klísu ɔ́, mɛ̌ nyɛ ka nyí, bó ná yi gbɛ́ gbe nú Mawu.” Ée yě se mɔ̌ ɔ́, xomɛ yětɔn fá, bɔ yě jɛ susu kpa nú Mawu jí, bó nɔ́ ɖɔ: “Mawu bló, bɔ mɛ e ma nyí Jwifu ǎ lɛ́ɛ lɔmɔ̌ sixú lɛ́ kɔ sín hwɛ yětɔn lɛ́ɛ gúdo, bó ná sixú mɔ gbɛ mavɔ mavɔ.” Yadónúmɛ e tíin hwenu e è hu Etyɛ́ni ɔ́ zɔ́n bɔ mɛ e ɖi nǔ nú Jezu lɛ́ɛ gbadó. Mɛ ɖé lɛ́ɛ ɖo yě mɛ, bó hun káká yi Fenisíi; mɛɖé lɛ́ɛ yi to e ɖo tɔ tɛ́ntin bɔ è nɔ ylɔ́ ɖɔ Cíplu ɔ́ mɛ; mɛ ɖě ka yi to e è nɔ ylɔ́ ɖɔ Antyɔ́ci ɔ́ mɛ; lo ɔ́, Jwifu lɛ́ɛ kɛ́ɖɛ́ wɛ yě nɔ́ jlá Mawuxó ɔ́ ná. Amɔ̌, Cíplunu kpódó Silenɛ́ɛnu ɖé lɛ́ɛ kpán ka ɖo yě mɛ, bɔ hwenu e yě yi Antyɔ́ci ɔ́, yě jɛ Wɛn Ɖagbe Aklúnɔ Jezu tɔn sín xó jlá Glɛ̌sinu lɛ́ɛ lɔmɔ̌ jí. Aklúnɔ sín hlɔ̌nhlɔ́n ɖo kpɔ́ xá yě, bɔ mɛ gěgé ɖi nǔ, bó húzú jɛ Aklúnɔ li jí. Nǔ énɛ́ wá yi jɛ tó mɛ nú agun Jezu tɔn e ɖo Jeluzalɛ́mu ɔ́, bɔ yě sɛ́ Baanabási dó Antyɔ́ci. Ée é wá, bó mɔ lě e Mawu wa ɖagbe nú togun ɔ́ gbɔn ɔ́, é hun xomɛ n'i, bɔ é ná akɔ́nkpinkpan yě bǐ, ɖɔ yě ní nɔ gbejí nú Aklúnɔ kpó ayixa ɖokpó kpó. Đó Banabási ɔ́, ɖagbewatɔ́ wɛ, bɔ Yɛsinsɛn kpódó nǔɖiɖi kpán gɔ́ ayi tɔn mɛ, bɔ mɛ gěgé lɛ́ jɛ Aklúnɔ sín ali jí. Énɛ́ gúdo ɔ́, Baanabási yi to e è nɔ ylɔ́ ɖɔ Táasi ɔ́ mɛ, bó ná yi kplá Sólu. Ée é mɔ ɛ ɔ́, é kplá ɛ wá Antyɔ́ci, bɔ yě mɛ we lɛ́ɛ bló xwe ɖokpó kpíkpé ɖo agun mɛ e ɖi nǔ nú Jezu lɛ́ɛ tɔn e ɖo fínɛ́ ɔ́ mɛ, bó kplɔ́n nǔ mɛ gěgé. Antyɔ́ci fínɛ́ wɛ mɛ lɛ́ɛ ylɔ́ ahwanvú Jezu tɔn lɛ́ɛ ɖɔ klísusɛntɔ́ ɖe dó nukɔn. Hwe énɛ́ nu ɔ́, gbeyíɖɔ Mawu tɔn ɖé lɛ́ɛ gosín Jeluzalɛ́mu, bó yi Antyɔ́ci. Mɛ e è nɔ ylɔ́ ɖɔ Agabusi ɖo yě mɛ ɔ́ sí te, bɔ Yɛsinsɛn sɔ́ dó ayi mɛ n'i bɔ é ɖɔ adɔ ɖaxó ɖé ná wá tɔ́n ɖo ayǐkúngban ɔ́ bǐ jí. (Adɔ énɛ́ ka tɔ́n nǔgbó hwenu e Klódu ɖo axɔ́sú ɖu wɛ é.) Énɛ́ ɔ́, ahwanvú lɛ́ɛ ɖe gbeta tɔ́n, ɖɔ émí ɖokpó ɖokpó ná ná nǔ e wú émí kpé ɔ́, bɔ è nǎ sɛ́ dó nɔví émítɔn ɖo Klísu mɛ e ɖo Judée lɛ́ɛ, bó dó dó alɔ yě ná. Yě sɛ́ nǔ e yě jɔ lɛ́ɛ dó agunnukɔntɔ́ lɛ́ɛ ɖo Judée, gbɔn Baanabási kpódó Sólu kpó jí. Hwenɛ́nu ɔ́, axɔ́sú Elódu jɛ ya dó nú mɛɖé lɛ́ɛ jí, ɖo agunví lɛ́ɛ mɛ. É zɔ́n bɔ è zě hwǐ dó hu Jaki e nyí Jǎan sín nɔví é ná. Ée é mɔ ɖɔ nǔ énɛ́ nyɔ́ Jwifu lɛ́ɛ nukún mɛ ɔ́, é zɔ́n, bɔ è wlǐ Piyɛ́ɛ lɔmɔ̌. (Wɔ̌xúxú e mɛ è ma dó tɔ́n ǎ é sín xwezán hwenu wɛ.) Ée Elódu wlí Piyɛ́ɛ ɔ́, é sú i dó gankpá mɛ, bó sɔ́ ɛ dó alɔ mɛ nú sɔ́ja ɛnɛ ɛnɛ gbɛ́ donu ɛnɛ, nú yě ná cɔ́ ɛ, bó ɖo linlin wɛ ɖɔ Dǐndínwáyixwe ɔ́ gúdo ɔ́, émí ná dɔn ɛ wá togun ɔ́ nukɔn, bó ná ɖɔ hwɛ xá ɛ. Lo ɔ́, hwenu e Piyɛ́ɛ ɖo ganxó ɔ́, agun ɔ́ nɔ́ ɖo ɖɛ xo wɛ syɛ́nsyɛ́n dó ta tɔn mɛ. Ée é kpo sɔ bɔ Elódu ná kplá Piyɛ́ɛ wá togun ɔ́ nukɔn, bó ná ɖɔ hwɛ xá ɛ ɔ́, Piyɛ́ɛ ɖo amlɔ dɔ́ wɛ zǎn mɛ, ɖo sɔ́ja we tɛ́ntin; wlɔ we wɛ è dó e, bɔ sɔ́ja ɖěvo lɛ́ɛ ka ɖo te ɖo hɔn ɔ́ jí, bó ɖo gankpá ɔ́ cɔ́ wɛ. Azɔn ɖokpó ɔ́, wɛnsagun Aklúnɔ tɔn ɖokpó wá xwetɔ́n, bɔ wěziza hɔ́n ɖo xɔ ɔ́ mɛ. Wɛnsagun ɔ́ ka ɖó alɔ Piyɛ́ɛ wú, bó fɔ́n ɛ, lobo ɖɔ: “Sí te hawun!” Bɔ wlɔ lɛ́ɛ bǐ jɛ ayǐ sín alɔ tɔn. Wɛnsagun ɔ́ ka ɖɔ n'i ɖɔ: “Sɔ́ gǒjíblánú towe sin, bó sɔ́ afɔkpa towe lɛ́ɛ dó.” Bɔ é ka bló gbɔn mɔ̌. Wɛnsagun ɔ́ ka lɛ́ ɖɔ n'i ɖɔ: “Sɔ́ awu towe ɖaxó ɔ́ dó, bó xwedó mì.” Bɔ Piyɛ́ɛ tɔ́n, bó xwedó wɛnsagun ɔ́; lo ɔ́, nǔ e wa wɛ wɛnsagun ɔ́ ɖe ɔ́, Piyɛ́ɛ ɖi ɖɔ nǔgbó wɛ é nyí ǎ; é vɛdó ɖɔ nǔ mɔ wɛ émí ɖe sín. Yě zɛ sɔ́ja nukɔn tɔn lɛ́ɛ wú, bó zɛ wegɔ́ lɛ́ɛ wú, bó yi jɛ ganhɔn e tɔ́n jɛ toxo mɛ ɔ́ jí, bɔ hɔn ɔ́ nɔ é ɖóɖó, bó hun ɖo nukɔn yětɔn, bɔ yě tɔ́n, bó mlɛ́ ali ɖé ɖidó; azɔn ɖokpó ɔ́, wɛnsagun ɔ́ ka jó e dó. Piyɛ́ɛ ka mɔ éɖée mɛ, bó ɖɔ: “Un mɔ ganjí din ɖɔ Aklúnɔ wɛ sɛ́ wɛnsagun tɔn dó, bó wá xɔ mì ɖo Elódu kpódó nǔ e nɔ te kpɔ́n wɛ Jwifu lɛ́ɛ ɖe ɔ́ bǐ kpó sí.” Ée é mɔ mɔ̌ ɔ́, é ɖidó Mali e nyí Jǎan e è nɔ lɛ́ ylɔ́ ɖɔ Maki ɔ́ sín nɔ xwé. Mɛ gěgé ko kplé ɖo fínɛ́, bó ɖo ɖɛ xo wɛ. É xúxú hɔntogbó, bɔ nyɔ̌nu mɛsɛntɔ́ e è nɔ ylɔ́ ɖɔ Hlodu ɔ́ wá kpɔ́n mɛ e ɖo hɔn xúxú wɛ é. Ée é se mɛ ɔ́ sín gbe ɔ́, é tunwun ɖɔ Piyɛ́ɛ wɛ, bɔ xomɛ hun i káká, bɔ é sɔ́ hun hɔn ɔ́ ǎ, bó kán wezun yi ɖɔ Piyɛ́ɛ wɛ ɖo te ɖo hɔn ɔ́ jí. Yě ka ɖɔ n'i ɖɔ: “A ɖo lugbe ǎ.” Lo ɔ́, Hlodu lɛ́ vɔ́ tɛ ɖɛ̌ jí bó ɖɔ nú yě ɖɔ nǔgbó ɖɔ nú yě wɛ émí ɖe; yě ka ɖɔ: “Sɛ́ tɔn wɛ.” Piyɛ́ɛ ka kpo ɖo hɔn xúxú wɛ jɛ́n wɛ; ée yě wá yi hun hɔn ɔ́, yě mɔ ɛ, bɔ ado hu yě. Piyɛ́ɛ ka bló alɔ nú yě ɖɔ yě ní xwɛ, bó wlí lě e Aklúnɔ ɖe e sín gankpá mɛ gbɔn ɔ́ ɖɔ nú yě. É ka lɛ́ ɖɔ nú yě ɖɔ: “Mi yi ɖɔ nú Jaki, kpódó nɔví mǐtɔn ɖo nǔɖiɖi mɛ lɛ́ɛ kpó.” Énɛ́ ɔ́ gúdo ɔ́, é tɔ́n bó ɖidó fí ɖěvo. Ée ayǐ wá hɔ́n ɔ́, sɔ́ja lɛ́ɛ jɛ jojo dán jí, bó nɔ́ kanbyɔ́ yěɖée ɖɔ: “Étɛ́ ka jɛ dó Piyɛ́ɛ jí?” Elódu yi Piyɛ́ɛ kplá gbé ɖo gankpá mɛ, bó ba ɛ kpo, bó ylɔ́ sɔ́ja lɛ́ɛ, bó kan nǔ byɔ́ yě, lobo ná gbe ɖɔ è nǐ hu yě. Énɛ́ ɔ́ gúdo ɔ́, Elódu gosín Judée, bó yi nɔ Sezalée. Elódu sin xomɛ dó Tíinu lɛ́ɛ kpódó Sidɔ́ɔnnu lɛ́ɛ kpán tlala. Yědɛɛ lɛ́ɛ ka ɖó gbe kpɔ́, bó zun xɔ́ntɔn xá gǒmɛgán tɔn Blasitúsi, bó yi mɔ ɛ, bó jló ná dó hwɛ gbɔ xá ɛ, ɖó ayǐkúngban tɔn jí wɛ dɔkun e nɔ hɛn to yětɔn ɔ́ nɔ́ tɔ́n sín. Ée kplézán ɔ́ sɔgbe ɔ́, Elódu dó axɔ́súwu tɔn lɛ́ɛ, bó jínjɔ́n axɔ́súzinkpo tɔn jí, bó ɖɔ xó nú yě agbawungba, bɔ to ɔ́ bǐ nɔ́ sú xó ɖɔ: “Gbɛtɔ́ wɛ ɖo xó ɖɔ wɛ ǎ; nǔmɛsɛn ɖé wɛ.” Lo ɔ́, tlóló tɛn tɔn mɛ ɔ́, wɛnsagun Aklúnɔ tɔn sín alɔ jɛ wǔ tɔn, ɖó é sɔ́ Mawu su ǎ wútu; bɔ wě ɖu i káká bɔ é kú. Mawuxó ɔ́ ká ɖo gbigba kpé d'é jí wɛ. Baanabási kpódó Sólu kpán ka wa nǔ e gbé è sɛ́ yě dó é ɖó alɔ te, bó lɛ́ kɔ sín Jeluzalɛ́mu, bó kplá Jǎan e è nɔ ylɔ́ ɖɔ Maki é. Đo mɛ e ɖi nǔ nú Jezu lɛ́ɛ sín agun e ɖo Antyɔ́ci ɔ́ mɛ ɔ́, è nɔ mɔ gbeyíɖɔ Mawu tɔn lɛ́ɛ, kpódó nǔkplɔ́nmɛtɔ́ lɛ́ɛ kpó: Baanabási, Simɛ́nyɔ́ɔ e è nɔ ylɔ́ ɖɔ Mɛwi é, Lusiwúsi Silenɛ́ɛnu ɔ́, Manayɛnu e Elódu tokpɔngán ɔ́ sín mɛ lɛ́ɛ hɛn, bɔ é kpó é kpó nɔ kpɔ́ bó su é, kpódó Sólu kpán. Gbe ɖokpó ka wá su bɔ yě ɖo Aklúnɔ sɛn wɛ, bó ɖo nu blá wɛ, bɔ Yɛsinsɛn ɖɔ nú yě ɖɔ: “Mi ɖe Baanabási kpódó Sólu kpán ɖó vo nú mì, nú yě ná yi wa azɔ̌ e wú un ylɔ́ yě é.” Ée yě blá nu bó xo ɖɛ gúdo ɔ́, yě ɖǒ alɔ Baanabási kpódó Sólu kpán jí, bó nyi yě. Ée Yɛsinsɛn sɛ́ Baanabási kpódó Sólu kpán dó mɔ̌ ɔ́, yě wá yi Selesíi, bó dó tɔjíhún ɖo fínɛ́ ɖidó to e è nɔ ylɔ́ ɖɔ Cíplu ɔ́ mɛ. Đěe yě jɛ to e è nɔ ylɔ́ ɖɔ Salamínu ɔ́ mɛ ɔ́, yě yi kplɔ́ngbasá Jwifu lɛ́ɛ tɔn, bó jɛ Mawuxó jlá jí, bɔ Jǎan-Maki ɖo yě gɔ́n, bó ná dó alɔ yě. Énɛ́ ɔ́ gúdo ɔ́, yě xo tɔtɛ́ntinto ɔ́ bǐ zlɛ́ káká yi jɛ to e è nɔ ylɔ́ ɖɔ Pafɔ́si ɔ́ mɛ; yě mɔ Jwifu majíkiblótɔ́ ɖé ɖo fínɛ́, bɔ è nɔ ylɔ́ ɛ ɖɔ Báa-Jezu, bɔ é sɔ́ éɖée dó ɖó gbeyíɖɔ Mawu tɔn. Báa-Jezu énɛ́ ka ɖo tokpɔngán e kpa acɛ nú tɔtɛ́ntinto ɔ́ gɔ́n; è nɔ ylɔ́ tokpɔngán ɔ́ ɖɔ Sɛjiwusi Polúsi, bɔ é nyí gbɛtɔ́ nǔnywɛ́tɔ́. Tokpɔngán ɔ́ ka jló ná se Mawuxó, bó zɔ́n ɖɔ è nǐ ylɔ́ Baanabási kpódó Sólu kpó wá nú émí; lo ɔ́, Elimasi e è nɔ ylɔ́ ɖɔ majíkiblótɔ́ ɔ́, (mɔ̌ wɛ è nɔ ylɔ́ ɛ ɖɔ dó Glɛ̌sigbe mɛ) ka ná tɛn tɔn yě ǎ, é ɖo biba ná ɖe ayi tokpɔngán ɔ́ tɔn sín nǔɖiɖi ɖó nú Jezu Klísu xó e ɖɔ n'i wɛ è ɖe ɔ́ wú wɛ. Énɛ́ ɔ́, Sólu e è nɔ lɛ́ ylɔ́ ɖɔ Pɔ́lu ɔ́, Yɛsinsɛn gɔ́ ayi mɛ n'i, bɔ é kpɔ́n Elimasi tlítlí, bó ɖɔ: “Ayi hízíhízí, ayidídánɔ wɛ nú we; awǒvi sín vǐ wɛ a nyǐ, bó nyí nǔ ɖagbe lɛ́ɛ sín kɛntɔ́; káká yi jɛ hwetɛ́nu a ka ná gɔn avaja dó tito Aklúnɔ tɔn lɛ́ɛ mɛ dó? Din ɔ́, ɖǒtó! Aklúnɔ ná dɔn tó nú we; a nǎ va nukún, bó ná gɔn hwesivɔ́ mɔ káká yi jɛ hwe ɖé nu.” Tlóló tɛn tɔn mɛ ɔ́, Elimasi va nukún, bó jɛ avi dlá jí, lobo ɖo mɛ e ná kplá ɛ ɔ́ ba wɛ. Ée tokpɔngán ɔ́ mɔ nǔ énɛ́ e jɛ ɔ́, é ɖi nǔ nú Jezu, ɖó nǔ e è kplɔ́n ɛ dó Aklúnɔ wú ɔ́ xo ayi tɔn zlɛ́. Pɔ́lu kpódó hǎgbɛ́ tɔn lɛ́ɛ kpán ka wá dó tɔjíhún sín Pafɔ́si, bó yi jɛ Pɛɛjée ɖo Panfilíi gbé jí. Jǎan-Maki ka jó yě dó ɖo fínɛ́, bó lɛ́ kɔ yi Jeluzalɛ́mu. Yědɛɛ lɛ́ɛ ka zɛ Pɛɛjée wú, bó yi Antyɔ́ci ɖo Pisidíi gbé jí; yě byɔ́ kplɔ́ngbasá gbɔjɛzán gbe, bó jínjɔ́n ayǐ. Hwenu e yě xa sɛ́n ɔ́, bó xa gbeyíɖɔ Mawu tɔn lɛ́ɛ sín wěma gúdo ɔ́, kplɔ́ngbaságán lɛ́ɛ ɖɔ sɛ́ dó yě ɖɔ: “Nɔví mǐtɔn lɛ́ɛ mi, ényí mi ɖó xó ɖé, bó ná ɖɔ nú togun ɔ́, bó dó ná ɛ akɔ́nkpinkpan hǔn, mi ɖɔ.” Ée é ɖɔ mɔ̌ ɔ́, Pɔ́lu sí te, bó bló alɔ nú yě, bó ɖɔ: “Mi Izlayɛ́li ví lɛ́ɛ kpódó mi mɛ e nɔ sí Mawu lɛ́ɛ kpó e mi, mi ɖótó bó se. Mawu Izlayɛ́li togun ɔ́ tɔn ɔ́ cyán tɔ́gbó mǐtɔn lɛ́ɛ ɖó vo, bó bló bɔ togun ɔ́ ɖeji hwenu e yě ɖo Ejípu é; é ka wá ɖe yě tɔ́n sín to ɔ́ mɛ, gbɔn hlɔ̌nhlɔ́n tɔn gbla mɛ, lobo dɛ bó hɛn yě xɔ xwe kanɖé (40) mɔ̌, ɖo gbětótló mɛ. É ka wá vívá kún nú akɔta tɛ́nwe, ɖo Kanáa yíkúngban jí, bó sɔ́ to yětɔn nú Izlayɛ́li ví lɛ́ɛ, bɔ ayǐkúngban énɛ́ húzú yětɔn. “Énɛ́ ɔ́ gúdo ɔ́, é sɔ́ gǎn lɛ́ɛ ɖó yě nu, nú xwe afɔwe kanɖé wǒ (450) mɔ̌ káká yi jɛ gbeyíɖɔ Mawu tɔn Samuwɛ́li hwenu. Yě ɖésúnɔ ka wá byɔ́ axɔ́sú ɖokpó, bɔ Mawu sɔ́ Sawúlu Kícu sín vǐ ɔ́, ɖo Bɛnjamɛ́ɛ ví lɛ́ɛ mɛ, bɔ é ɖu axɔ́sú ɖo yě nu xɔ xwe kanɖé (40). Énɛ́ gúdo ɔ́, Mawu wá ɖe Sawúlu sín axɔ́súzinkpo jí, bó sɔ́ Davídi ɖó tɛn tɔn mɛ. Davídi énɛ́ ɔ́ wɛ Mawu ɖe kúnnu ná ɖɔ: ‘Un mɔ ɖɔ Davídi Jɛsée ví ɔ́, mɛɖé wɛ é nyí, bɔ jijɔ tɔn nyɔ́ nukún ce mɛ, bɔ é ná bló jlǒ ce lɛ́ɛ bǐ.’ Vǐ tɔn lɛ́ɛ mɛ wɛ Jezu e Mawu sɔ́ Mɛhwlɛ́ngántɔ́ nú togun Izlayɛ́li tɔn ɔ́ tɔ́n sín, lě e é dó akpá tɔn nú yě gbɔn é. Cóbónú Jezu ná wá ɔ́, Jǎan ko ɖɔ nú Izlayɛ́li togun ɔ́ bǐ ɖɔ yě ní lɛ́ kɔ sín hwɛ yětɔn lɛ́ɛ gúdo, bó lɛ yɛhwesin. Hwenu e Jǎan ka wá ɖo azɔ̌ tɔn ná wa fó wɛ ɔ́, é nɔ ɖɔ jí: ‘Mɛ̌ un ka nyí bɔ mi vɛdó? Nyɛ wɛ nyí mɛ e nɔ te kpɔ́n wɛ mi ɖe ɔ́ ǎ; lo ɔ́, mɛ énɛ́ kpo ɖo gǔdo jǎwe, bɔ un nyí mɛɖé bó sixú ɖe afɔkpa sín afɔ n'i vɔ́vɔ́ ǎ.’ “Nɔví ce lɛ́ɛ mi, mi mɛ e jɔ ɖo Ablaxámu kúnkan mɛ lɛ́ɛ, kpódó mi mɛ e nɔ sí Mawu lɛ́ɛ kpán e mi; mi wɛ Mawu dó Wɛn Ɖagbe élɔ́ e nɔ hwlɛ́n mɛ gán ɔ́ sɛ́ dó. Đó Jeluzalɛ́munu lɛ́ɛ kpódó gǎn yětɔn lɛ́ɛ kpó tunwun mɛ e Jezu nyí ɔ́ ǎ; yě ka mɔ nukúnnú jɛ gbeyíɖɔ Mawu tɔn lɛ́ɛ sín nǔ e è nɔ xa nú yě gbɔjɛzán gbe tɛgbɛ ɔ́ wú ǎ; lo ɔ́, kúhwɛ e yě ɖǒ nú Jezu ɔ́, nǔ e è nɔ xa nú yě ɔ́ wɛ jɛ. Yě mɔ nǔɖé wú ná ɖó dó, bó dó ɖó kúhwɛ n'i ǎ, có yě ka byɔ́ Pilátu ɖɔ ní ná gbe nú è hu i. Ée yě wa nǔ e Mawuxó ɔ́ ɖɔ dó wútu tɔn lɛ́ɛ bǐ xá ɛ vɔ ɔ́, yě wá ɖe cyɔ tɔn sín aklúzu jí, bó sɔ́ ɛ yi ɖi. Lo ɔ́, Mawu ka fɔ́n ɛ sín kú, bɔ é wá ɖe éɖée xlɛ́ mɛ e xwedó e sín Galilée wá Jeluzalɛ́mu lɛ́ɛ xɔ azǎn mɔ̌kpán. Mɛ énɛ́ lɛ́ɛ wɛ wá ɖo kúnnu ɖe n'i wɛ din ɖo Izlayɛ́li togun ɔ́ mɛ, bɔ mǐdɛɛ lɛ́ɛ ɔ́, mǐ wá ɖo Wɛn Ɖagbe ɔ́ dó mi wɛ ɖɔ jí: akpá e Mawu ko dó nú tɔ́gbó mǐtɔn lɛ́ɛ ɔ́, é ɖe akpá énɛ́ ɔ́ nú mǐ vǐ yětɔn lɛ́ɛ hwenu e é fɔ́n Jezu sín kú lě e è ko wlán gbɔn ɖo Ɖɛhanwéma ɔ́ mɛ, ɖo ta tɔn wegɔ́ ɔ́ mɛ gbɔn ɔ́ ɖɔ jí: ‘Hwi wɛ nyí Vǐ ce; bɛ́ sín égbé ɔ́, un nyí Tɔ́ towe.’ Mawu ko ɖɔ ɖ'ayǐ ɖɔ émí ná fɔ́n ɛ sín kú, bónú é ma nyɔ ó. Nǔ énɛ́ ɔ́ ɖɔ gbɔn xó élɔ́ mɛ wɛ é ɖe, bó ɖɔ: ‘Un ná ná mi nyɔ̌ná mímɛ́; nyɔ̌ná gǎnjɛwú e sín akpá un dó nú Davídi é.’ Énɛ́ wú wɛ é lɛ́ ɖɔ ɖo akpá ɖěvo xwé ɖɔ jí: ‘A nǎ lɔn nú mɛ mímɛ́ towe ná nyɔ ǎ.’ Đó hwenu e Davídi nɔ gbɛ, bó bló jlǒ Mawu tɔn gúdo ɔ́, é wá kú, bɔ è ɖi i dó tɔ́gbó tɔn lɛ́ɛ kpá, bɔ cyɔ tɔn nyɔ ɖo yɔdo mɛ. Lo ɔ́, mɛ e Mawu fɔ́n sín kú ɔ́, cyɔ éyɛ́ tɔn nyɔ ɖě ǎ. Nɔví ce lɛ́ɛ mi, hǔn mi ɖó ná tunwun ɖɔ Jezu jí wɛ è jlǎ Wɛn Ɖagbe hwɛsɔ́kɛmɛ tɔn ɔ́ mi gbɔn. Đó mɛ ɖěbǔ ɖi nǔ ɔ́, mɛ ɔ́ nɔ́ gosín hwɛ lɛ́ɛ bǐ sín acɛ mɛ gbɔn jǐ tɔn; hwɛ sín acɛ mɛ e Mɔyízi sɛ́n ɔ́ ma sixú ɖe mi sín ǎ é; nú nǔ e gbeyíɖɔ Mawu tɔn lɛ́ɛ ko ɖɔ ɔ́ má wá jɛ dó mi jí ó; é wɛ nyí ɖɔ: ‘Mi kpɔ́n, mi wǎngbɛ́númɛtɔ́ lɛ́ɛ; ado ní hu mi, mi ní dɔn; ɖó hwe mitɔn nu ɔ́, un ná dó nǔɖé sin, bónú ɖɔ wɛ è wá ɖɔ nú mi ɔ́, mi ná ɖi ǎ.’ ” Ée Pɔ́lu kpódó Baanabási kpán tɔ́n sín kplɔ́ngbasá ɔ́, mɛ lɛ́ɛ sa vo nú yě ɖɔ gbɔjɛzán gbe ée ná bɔ d'é wú ɔ́, yě ní wá ɖɔ xó dó nǔ ɖokpó ɔ́ wú. Ée yě bló kplé ɔ́ fó ɔ́, Jwifu gěgé, kpódó yě mɛ e byɔ́ Jwifu lɛ́ɛ sín sinsɛn mɛ lɛ́ɛ gěgé kpán xwedó Pɔ́lu kpódó Baanabási kpó. Pɔ́lu kpódó Baanabási kpó ɖɔ xó nǔ yě, bó ná akɔ́nkpinkpan yě ɖɔ yě ní lí dǒ ɖo nyɔ̌ná Mawu tɔn mɛ. Gbɔjɛzán gbe e jɛ fínɛ́ ɔ́, toxo ɔ́ mɛ nu lɛ́ɛ bǐ ɖibla kplé bó ná se Mawuxó. Ée Jwifu lɛ́ɛ mɔ lě e mɛ lɛ́ɛ sukpɔ́ sɔ ɔ́, wǔhwinhwan gɔ́ ayi yětɔn mɛ, bɔ yě nɔ́ mɔ xó vo ɖɔ dó Pɔ́lu sín xó wú, bó nɔ zun i. Pɔ́lu kpódó Baanabási kpó ka ɖɔ xó kpódó jiɖiɖe kpó ɖɔ: “Midɛɛ lɛ́ɛ wɛ è ɖǒ ná ɖɔ Mawuxó ná hwɛ̌; ée mi ka gbɛ́, bó mɔ ɖɔ émí kún jɛ xá gbɛ mavɔ mavɔ ɔ́ ó ɔ́, din ɔ́, mǐ ná gbɔ bó yi mɛ e má nyí Jwifu ǎ lɛ́ɛ gɔ́n. Đó lě e Aklúnɔ zɔ́n mǐ gbɔn é ɖíe: ‘Un sɔ́ we nú a nǎ nyí wěziza nú akɔta ɖě lɛ́ɛ, nú a nǎ jlá Wɛn Ɖagbe hwlɛngán tɔn ɔ́ káká yi fí e gbɛ ɔ́ kponu ɖó é.’ ” Ée mɛ e ma nyí Jwifu ǎ lɛ́ɛ se mɔ̌ ɔ́, xomɛ hun yě, bɔ yě jɛ susu kpa nú Aklúnɔxó ɔ́ jí; mɛ e è ko sɔ́ ɖ'ayǐ nú gbɛ mavɔ mavɔ lɛ́ɛ bǐ ɖi nǔ nú Jezu. Aklúnɔxó ɔ́ nɔ ɖo gbigba kpé wɛ gbɔn gbě ɔ́ bǐ jǐ. Lo ɔ́, Jwifu lɛ́ɛ kplɔ́n nǔ nyɔ̌nu nukúnɖéjí e nɔ ɖó sísí nú Mawu lɛ́ɛ kpódó mɛjɔmɛ to ɔ́ tɔn lɛ́ɛ kpó, bɔ yě fɔ́n gǔ dó Pɔ́lu kpódó Baanabási kpó jí, bó nya yě sín to yětɔn mɛ. Pɔ́lu kpódó Baanabási kpó ka xúxú afɔkɔ́ yětɔn kɔn nyi ayǐ nú yě, bó yi to e è nɔ ylɔ́ ɖɔ Ikoniyɔ́mu é mɛ. Awǎjijɛ kpódó Yɛsinsɛn kpó ká gɔ́ ayi mɛ nú ahwanvú Jezu tɔn lɛ́ɛ ɖo Antyɔ́ci. Ée Pɔ́lu kpódó Baanabási kpó jɛ to e è nɔ ylɔ́ ɖɔ Ikoniyɔ́mu ɔ́ mɛ ɔ́, yě yi kplɔ́ngbasá Jwifu lɛ́ɛ tɔn, bó ɖɔ xó nú yě, káká bɔ Jwifu lɛ́ɛ gěgé kpódó Glɛ̌sinu gěgé kpán ɖi nǔ nú Jezu. Lo ɔ́, Jwifu e gbɛ́ nǔ ɖi lɛ́ɛ fɔ́n hun dó jǐ nú mɛ e ma nyí Jwifu ǎ lɛ́ɛ, bó zɔ́n bɔ yě jɛ nǔ nyanya lin dó nɔví ɖo Klísu mɛ lɛ́ɛ wú jí. Pɔ́lu kpódó Baanabási kpán nɔ fínɛ́ ɖésú. Yě nɔ ɖɔ xó kpódó jiɖiɖe kpó. Aklúnɔ ká ná acɛ yě, bɔ yě nɔ́ ɖo nǔ tɛnmɛ tɛnmɛ jlɛ́ wɛ, bó nɔ́ ɖo nǔdábaɖa lɛ́ɛ jlɛ́ wɛ, bó ná dó ɖe xlɛ́ ɖɔ nǔ e ɖɔ wɛ yě ɖe dó nyɔ̌ná Mawu tɔn wú ɔ́ nǔgbó wɛ é nyí. Énɛ́ ɔ́, to ɔ́ mɛ nu lɛ́ɛ sɔ́ ɖó gbe kpɔ́ ǎ; mɛ hǎbǔ ɖo Jwifu lɛ́ɛ jí, bɔ hǎbǔ ká ɖo mɛsɛ́dó lɛ́ɛ jí. Mɛ e ma nyí Jwifu ǎ lɛ́ɛ kpódó Jwifu lɛ́ɛ kpán sɔgbe dó gǎn yětɔn lɛ́ɛ wú, bó ɖo nǔ sɔ́ wɛ, bó ná dó ya nú mɛsɛ́dó lɛ́ɛ, lobo ná hu yě ɖó awǐnnyaglo wú. Ée Pɔ́lu kpódó Baanabási kpó se mɔ̌ ɔ́, yě hɔn yi Lisitli kpó Dɛɛbe kpó, ɖo Likawoníi gbé jí kpódó to e yá fínɛ́ lɛ́ɛ kpán mɛ, bó jɛ Wɛn Ɖagbe ɔ́ jlá jí gbɔn fí énɛ́ lɛ́ɛ lɔmɔ̌. Nya ɖé ɖo to e è nɔ ylɔ́ ɖɔ Lisitli ɔ́ mɛ, bó nɔ́ ɖo ayǐjínjɔ́n, ɖó afɔ tɔn lɛ́ɛ kú; sín hwenu e è ji nya énɛ́ ɔ́ ɖokpóó wɛ afɔ tɔn lɛ́ɛ ko kú, bɔ é ɖi zɔnlin kpɔ́n gbeɖé ǎ. É ɖo xó e ɖɔ wɛ Pɔ́lu ɖe ɔ́ ɖótó wɛ. Pɔ́lu sín nukún wá yi jɛ jǐ tɔn, bɔ é kpɔ́n ɛ tlítlí, bó mɔ ɖɔ nya énɛ́ ɖó nǔɖiɖi e ná zɔ́n bɔ azɔn tɔn ná gbɔ é. Énɛ́ ɔ́, Pɔ́lu zé gbe yi jǐ, bó ɖɔ n'i ɖɔ: “Sí te bó jlɔ́ ɖo afɔ towe lɛ́ɛ jí.” Bɔ nya ɔ́ lɔ́n sí te, bó jɛ zɔnlin ɖi jí. Ée mɛ e ɖo fínɛ́ lɛ́ɛ mɔ nǔ énɛ́ e Pɔ́lu jlɛ́ ɔ́, yě sú xó, bó ɖɔ dó Likawoníi gbe mɛ ɖɔ: “Nǔmɛsɛn lɛ́ɛ ɖíe húzú gbɛtɔ́ bó jɛ te wá mǐ mɛ e.” Yě ylɔ́ Baanabási ɖɔ Zewúsi, bó ylɔ́ Pɔ́lu ɖɔ Ɛɛmɛsi; ɖó Pɔ́lu wɛ nyí ɖɛ̌mɛnu ɔ́. Vodún Zewúsi e xɔ tɔn ɖo toxo ɔ́ nukɔn ɔ́ sín vodúnnɔ ka sɔ́ folówa bó dó ba acɔ́ nú nyibúsú ɖé lɛ́ɛ, bó dɔn yě wá hɔn lɛ́ɛ nu. É kpódó togun ɔ́ bǐ kpán ɖo nǔ sɔ́ wɛ, bó jló ná xwíyɔ Baanabási kpódó Pɔ́lu kpán. Ée mɛsɛ́dó Baanabási kpódó Pɔ́lu kpán se mɔ̌ ɔ́, yě tlɛ́n awu dó kɔ nú yěɖée, bó dó wezun byɔ́ ahwan ɔ́ mɛ, bó ɖɔ: “Mɛ ce lɛ́ɛ mi, étɛ́wú mi ka ɖo mɔ̌ wa wɛ? Gbɛtɔ́ mi ɖɔhun jɛ́n mǐ lɔmɔ̌ nyí, bó hɛn Wɛn Ɖagbe ɔ́ wá nú mi, bó dó ɖo ɖiɖɔ nú mi wɛ ɖɔ mi ní lɛ́ kɔ sín nǔ ma ɖi nǔ lɛ́ɛ gúdo, bó jɛ Mawu gbɛɖe ɔ́ gúdo; é wɛ bló jǐnukúnsin kpódó ayǐkúngban kpán, bó bló xu, kpódó nǔ e ɖo yě mɛ lɛ́ɛ bǐ kpán. Xóxó hwenu ɔ́, Mawu jó akɔta lɛ́ɛ bǐ dó, bɔ mɛ ɖokpó ɖokpó nɔ sɔ́ ali e jló e é. Lo ɔ́, é gɔn kúnnu ɖe nú éɖée gbɔn ɖagbe e é nɔ wa lɛ́ɛ gbla mɛ ǎ. É nɔ sɛ́ jǐ dó mi, bó nɔ́ ná jinukún mi dó hwe tɔn nu. É nɔ ná nǔɖuɖu mi túnflá; é nɔ ná xomɛhunhun mi.” Baanabási kpódó Pɔ́lu kpó ɖɔ mɔ̌ có, é fá cóbónú mɛ lɛ́ɛ wá yí gbe nú xó e yě ɖɔ ɔ́, bó jó vɔ̌ e sá nú yě gbé wɛ yě ja ɔ́ dó ǎ. Jwifu ɖé lɛ́ɛ ka gosín Antyɔ́ci e ɖo Pisidíi yíkúngban jí é kpódó Ikoniyɔ́mu kpán wá xwetɔ́n, bó kplɔ́n nǔ mɛ lɛ́ɛ, bɔ yě nyi awǐnnyaglo dó Pɔ́lu káká bɔ é jɛ ayǐ, bɔ yě vɛdó ɖɔ é kú wɛ sín, bó dɔn ɛ yi to ɔ́ gúdo. Lo ɔ́, ée ahwanvú lɛ́ɛ lɛ́ lɛ̌ dó e ɔ́, é sí te bo lɛ́ byɔ́ toxo ɔ́ mɛ. Ayǐhɔ́ngbe tɔn ɔ́, é kpódó Baanabási kpán ɖidó to e è nɔ ylɔ́ ɖɔ Dɛɛbe ɔ́ mɛ. Baanabási kpódó Pɔ́lu kpó jlá Wɛn Ɖagbe ɔ́ ɖo Dɛɛbe, bɔ mɛ gěgé ɖi nǔ nú Jezu. Énɛ́ ɔ́ gúdo ɔ́, yě lɛ́ kɔ yi Lisitli, Ikoniyɔ́mu kpódó Antyɔ́ci Pisidíi tɔn kpán. Yě nɔ dó wǔsyɛ́n lanmɛ nú ahwanvú Jezu tɔn lɛ́ɛ, bó nɔ́ ná akɔ́nkpinkpan yě, nú yě ná lí dǒ ɖo nǔɖiɖi mɛ, bó nɔ́ ɖɔ nú yě ɖɔ: “Ya gěgé wɛ mǐ ɖó nǎ ji, bó ná dó byɔ́ axɔ́súɖuɖu Mawu tɔn mɛ.” Pɔ́lu kpó Baanabási kpó sɔ́ agunnukɔntɔ́ ɖó yě nu, gbɔn agun ɖokpó ɖokpó mɛ. Yě blá nu, bó xo ɖɛ lobo sɔ́ yě dó alɔ mɛ nú Aklúnɔ e yě ɖi nǔ na é. Mɛsɛ́dó énɛ́ lɛ́ɛ ka gbɔn Pisidíi wá Panfilíi. Yě wá ɖɔ Mawuxó ɖo Pɛɛjée; énɛ́ ɔ́ gúdo ɔ́, yě wǎ Atalya. Yě dó tɔjíhún ɖo fínɛ́, bó yi Antyɔ́ci; fínɛ́ wɛ è ko sɔ́ yě dó alɔ mɛ nú wǔjɔmɛ Mawu tɔn ɖe, nú azɔ̌ e yě wa din é. Ée yě wá Antyɔ́ci ɔ́, yě kplé agun Klísu tɔn e ɖo fínɛ́ lɛ́ɛ, bó ɖɔ nǔ e Mawu wa gbɔn yě jí ɔ́ bǐ nú yě, bó ka lɛ́ ɖɔ lě e Mawu hun ali nú mɛ e ma nyí Jwifu ǎ lɛ́ɛ gbɔn, bónú yě lɔ na sixú ɖi nǔ nú Jezu é nú yě. Yě nɔ fínɛ́ xá mɛ e ɖi nǔ nú Jezu lɛ́ɛ xɔ azǎn gěgé. Mɛ ɖé lɛ́ɛ gosín Judée gbé jí, bó wá Antyɔ́ci, bó nɔ ɖo nǔ kplɔ́n nɔví ɖo Klísu mɛ lɛ́ɛ wɛ ɖɔ: “Ényí è ma gbo ada nú mi lě e Mɔyízi sɛ́n ɔ́ zɔ́n gbɔn é ǎ ɔ́, Mawu ná hwlɛ́n mi gán ǎ.” Pɔ́lu kpódó Baanabási kpó ka gbɛ́ xó yětɔn, bó dɔn nǔ xá yě ɖ'é kɔn tlala. Énɛ́ ɔ́, nɔví ɖo Klísu mɛ lɛ́ɛ wá ɖe gbeta tɔ́n, ɖɔ Pɔ́lu kpódó Baanabási kpó, kpódó nɔví ɖo Klísu mɛ ɖě lɛ́ɛ kpó ná yi Jeluzalɛ́mu bó ná ɖɔ xó énɛ́ gbo xá mɛsɛ́dó lɛ́ɛ kpódó agunnukɔntɔ́ lɛ́ɛ kpán. Nǔɖitɔ́ lɛ́ɛ nyi yě, bɔ yě wlǐ ali, bó gbɔn Fenisíi kpódó Samalíi kpán gbé jí bó nɔ́ ɖo lě e mɛ e ma nyí Jwifu ǎ lɛ́ɛ jɛ Mawu li jí gbɔn é jlá wɛ, bɔ é nɔ nyí xomɛhunhun ɖaxó nú nɔví ɖo Klísu mɛ lɛ́ɛ. Hwenu e yě wá Jeluzalɛ́mu ɔ́, agun nǔɖitɔ́ lɛ́ɛ tɔn, kpódó mɛsɛ́dó e ɖo fínɛ́ lɛ́ɛ kpó, kpódó agunnukɔntɔ́ lɛ́ɛ kpó yí yě, bɔ yě wá gbɔn yě jí, bó wlí nǔ e Mawu wa é bǐ ɖɔ nú yě; lo ɔ́, mɛɖé lɛ́ɛ sí te ɖo Falizyɛn e ɖi nǔ nú Jezu lɛ́ɛ mɛ, bó ɖɔ è ɖǒ ná gbo ada nú yě mɛ e ma nyí Jwifu ǎ, bó ka ɖi nǔ nú Jezu lɛ́ɛ, bó ná ɖɔ nú yě ɖɔ yě ɖǒ ná nyi Mɔyízisɛ́n ɔ́ dandan. Mɛsɛ́dó lɛ́ɛ kpódó agunnukɔntɔ́ lɛ́ɛ kpán kplé, bó ná gbéjé xó énɛ́ kpɔ́n. Ée yě dɔn nǔ ɖ'é kɔn káká ɔ́, Piyɛ́ɛ sí te bó ɖɔ: “Nɔví ce lɛ́ɛ mi, mi nywɛ́ ɖɔ é kó lín din, bɔ Mawu ɖe mì ɖó vo ɖo mi mɛ, nú ma jlá Wɛn Ɖagbe ɔ́ mɛ e ma nyí Jwifu ǎ lɛ́ɛ, nú yě ná se, lobo ɖi nǔ. Mawu e nɔ mɔ nǔ jɛ mɛ xomɛ ɔ́ ná yě Yɛsinsɛn lě e é ná mǐ gbɔn é, bó dó ɖe xlɛ́ ɖɔ émí yí yě. Mawu ɖe mɛɖé ɖó vo ɖo yě kpó mǐ mɛ e nyí Jwifu lɛ́ɛ kpó mɛ ǎ; é lɛ ayixa yětɔn wé ɖó yě ɖi nǔ. Hǔn din ɔ́, aniwú mi ka nɔ ɖíɖá agban e tɔ́gbó mitɔn lɛ́ɛ kpódó mi ɖésúnɔ kpó ma kpé wú bó hɛn ǎ ɔ́ ahwanvú lɛ́ɛ, bó dó ɖo do ba nú Mawu wɛ? Lo ɔ́, mǐ ɖi nǔ ɖɔ Mawu hwlɛ́n mǐ gán gbɔn xomɛ e Aklúnɔ Jezu nyɔ́ dó mǐ wú é gbla mɛ, lě e é hwlɛ́n yě lɔmɔ̌ gán gbɔn é.” Énɛ́ ɔ́, agun ɔ́ bǐ nɔ abwɛ̌ tóó, bó ɖótó Baanabási kpódó Pɔ́lu kpán, bɔ yě wlǐ nǔ e Mawu jlɛ́ ɔ́, kpódó nǔdábaɖa e é ɖe xlɛ́ gbɔn yě jí, ɖo mɛ e ma nyí Jwifu ǎ lɛ́ɛ tɛ́ntin é bǐ ɖɔ. Ée Pɔ́lu kpódó Baanabási kpó ɖɔ xó vɔ ɔ́, Jaki yí xó, bó ɖɔ: “Nɔví ce lɛ́ɛ e mi, mi ɖótó mì. Sinmɔ́ɔ ɖɔ lě e Mawu kpé nukún dó mɛ e ma nyí Jwifu ǎ lɛ́ɛ wú gbɔn, bó sɔ́ togun ɖokpó ɖo yě mɛ, bɔ é nyí étɔn sín do é; nǔ énɛ́ sɔgbe xá xó élɔ́ e gbeyíɖɔ Mawu tɔn lɛ́ɛ kó wlán é; é wɛ nyí ɖɔ: Aklúnɔ ɖɔ: ‘Énɛ́ ɔ́ gúdo ɔ́, un ná lɛ́ kɔ wá, bó ná vɔ́ xwédo Davídi tɔn e ko mu ɔ́ fɔ́n sí te; un ná vɔ́ dǒglin tɔn lɛ́ɛ mɛ, bó ná lɛ́ fɔ́n xwé ɔ́ sí te, nú mɛ e kpo lɛ́ɛ bǐ ná ba Aklúnɔ; mɔ̌ ɖokpó ɔ́, mɛ e ma nyí Jwifu ǎ, bɔ un ylɔ́ nú yě ná nyí ce lɛ́ɛ bǐ ná ba Aklúnɔ.’ Nǔ e Aklúnɔ e ko sɔ́ nǔ énɛ́ lɛ́ɛ xlɛ́ sín xóxó hwenu ɔ́ ɖɔ é nɛ́.” Jaki lɛ́ ɖɔ: “Nǔ é wútu nyɛ mɔ ɖɔ é kún nyɔ́ nú è nǎ dó tagba nú yě mɛ e ma nyí Jwifu ǎ, bó ka wá Mawu gɔ́n lɛ́ɛ ó é nɛ́. Amɔ̌, nǔ e mǐ ná wlán sɛ́ dó yě kpowun ɔ́ wɛ nyí ɖɔ: yě ní má ɖu kanlin e è xwlé vodún lɛ́ɛ ɖě sín lan ó; yě ní ma ɖó xó xá nɔ yětɔn ó, yě ní má ɖó xó xá tɔ́ yětɔn sín asi ó; yě ní má ɖó xó xá vǐ yětɔn abǐ nɔví yětɔn ó; yě má ɖu kanlin e è glɔ̌n agbɔ̌n ná bó hu lɛ́ɛ ɖě sín lan ó, yě ma ka ɖu hun ó. Đó, xóxó hwenu ɖokpóó wɛ mɛ lɛ́ɛ nɔ ɖo Mɔyízisɛ́n ɔ́ jlá wɛ gbɔn to ɖokpó ɖokpó mɛ, bɔ è nɔ xa ɖo kplɔ́ngbasá Jwifu lɛ́ɛ tɔn, ɖo gbɔjɛzán gbe lɛ́ɛ bǐ.” Énɛ́ gúdo ɔ́, mɛsɛ́dó lɛ́ɛ kpódó agunnukɔntɔ́ lɛ́ɛ kpán, kpódó agun nǔɖitɔ́ lɛ́ɛ tɔn ɔ́ bǐ sésé kpán ɖó gbe kpɔ́, bó ɖe mɛɖé lɛ́ɛ ɖo yěɖée mɛ, bó sɛ́ yě dó Antyɔ́ci, yě kpó Pɔ́lu kpó, kpó Baanabási kpó; mɛ énɛ́ lɛ́ɛ wɛ nyí Judási e è sun nyǐ ɖɔ Baasabási é kpódó Silási kpán; gbɛtɔ́ nukúnɖéjí wɛ yě nyǐ, ɖo nɔví ɖo Klísu mɛ lɛ́ɛ mɛ. Yě bló wěma ɖokpó dó así nú yě, bó ɖɔ dó wéma ɔ́ mɛ ɖɔ: “Mǐ nɔví mitɔn mɛsɛ́dó lɛ́ɛ, kpódó agunnukɔntɔ́ lɛ́ɛ kpán dó gbe sɛ́ dó mi mɛ e má nyí Jwifu ǎ, bó ka nyí nɔví mǐtɔn ɖo Klísu mɛ, bó ɖo Antyɔ́ci, bó ɖo tokpɔn Silíi tɔn kpódó Silisíi tɔn kpó mɛ lɛ́ɛ. Mǐ se ɖɔ mɛɖé lɛ́ɛ gosín mǐ gɔ̌n, bó wá dɔn hunnyahunnya byɔ́ mi mɛ, gbɔn xó e yě ɖɔ nú mi lɛ́ɛ gbla mɛ, lobo gba ayi dó nú mi; mǐ ká zɔ́n nǔɖé yě ǎ. Énɛ́ ɔ́ wú wɛ mǐ bǐ ɖó gbe kpɔ́, bó ɖe mɛɖé lɛ́ɛ ɖo mǐ mɛ, bó sɛ́ yě dó mi; yě xwedó nɔví mǐtɔn vívɛ́ná Baanabási kpódó Pɔ́lu kpán. Adǎn gěgé kó gbo Baanabási kpódó Pɔ́lu kpó, bɔ yě ko ɖibla kú dó Aklúnɔ mǐtɔn Jezu Klísu sín nyǐkɔ tamɛ. Mǐ sɛ́ Judási kpódó Silási kpán dó, nú yě ɖésúnɔ ná wá ɖɔ nǔ e mǐ wlán sɛ́ dó mi din ɔ́ nú mi. Yɛsinsɛn kpódó mǐ kpó mɔ ɖɔ mǐ kún sɔ́ ná zɔ́n azɔ̌ ɖěvo mi zɛ ée ɖo tají bɔ mi ɖó ná wa é wú ó; é wɛ nyí ɖɔ: mi ma ɖu nǔ e è xwlé vodún é ɖě ó; mi ma ɖu hun ó; mi ma ɖu kanlin e è glɔ̌n agbɔ̌n ná bó hu lɛ́ɛ ɖě sín lan ó; mi ma ka lɛ aga ó; ényí mi bló gbɔn mɔ̌ ɔ́, é ná nyɔ́. É su gbeɖé.” È jǒ yě dó, bɔ yě ɖidó Antyɔ́ci. Ée yě jɛ dɔ̌n ɔ́, yě kplé nɔví ɖo Klísu mɛ e ɖo fínɛ́ lɛ́ɛ bǐ, bó sɔ́ wěma ɔ́ jó nú yě. Ée yě xa wěma ɔ́, xomɛ hun yě, ɖó xó e ɖo wěma ɔ́ mɛ lɛ́ɛ ná akɔ́nkpinkpan yě. Judási kpódó Silási kpán ɔ́, gbeyíɖɔ Mawu tɔn wɛ yě lɔmɔ̌ nyǐ; yě ɖɔ xó gěgé nú nɔví ɖo Klísu mɛ lɛ́ɛ, bó dó ná akɔ́nkpinkpan kpódó lanmɛsyɛ́nsyɛ́n kpán yě. Yě nɔ fínɛ́ nú azǎn yɔywɛ ɖé, bɔ nɔví ɖo Klísu mɛ lɛ́ɛ nyi yě sɛ́ dó mɛ e sɛ́ yě dó lɛ́ɛ gɔ́n, bó ɖɔ yě na yi ɖagbe. [ Lo ɔ́, Silási ɖɔ émí ná cí fínɛ́.] Pɔ́lu kpódó Baanabási kpó ka cí Antyɔ́ci, bɔ yě kpódó mɛ gěgé ɖěvo lɛ́ɛ kpán nɔ ɖo nǔ kplɔ́n mɛ lɛ́ɛ wɛ, bó nɔ́ ɖo Wɛn Ɖagbe Aklúnɔ tɔn jlá wɛ. Ée azǎn ɖé jɛ ɔ́, Pɔ́lu wá ɖɔ nú Baanabási ɖɔ: “Mǐ ná lɛ́ kɔ yi kpɔ́n nɔví mǐtɔn lɛ́ɛ ɖo to e mɛ mǐ jlá Aklúnɔxó ɔ́ gbɔn lɛ́ɛ bǐ, bó ná kpɔ́n lě e yě ɖe gbɔn é.” Baanabási ka jló ná kplá Jǎan e è sun nyǐ ɖɔ Maki ɔ́; Pɔ́lu ka mɔ ɖɔ è kún ná kplá ɛ ó, ɖó é ko jó yě dó ɖo Panfilíi ɖokpóó, bó sɔ́ nɔ́ xwedó yě yi azɔ̌ wa gbé ǎ. Nǔ dindɔn ɔ́ syɛ́n káká, bɔ Pɔ́lu kpódó Baanabási kpó klán. Baanabási ka kplá Maki, bɔ yě dó tɔjíhún, bó ɖidó tɔtɛ́ntinto e è nɔ ylɔ́ ɖɔ Cíplu ɔ́ gbé jí. Pɔ́lu kplá Silási bo ɖidó, bɔ nɔví ɖo Klísu mɛ lɛ́ɛ sɔ́ Pɔ́lu dó alɔ mɛ nú wǔjɔmɛ Aklúnɔ tɔn. É gbɔn Silíi gbé jí, bó gbɔn Silisíi gbé jí, bó dó wǔsyɛ́n lanmɛ nú agun Klísu tɔn lɛ́ɛ. Pɔ́lu ka wá Dɛɛbe, bó gosín fínɛ́ wá Lisitli. Ahwanvú Jezu tɔn ɖé ka ɖo fínɛ́, bɔ è nɔ ylɔ́ ɛ ɖɔ Timɔtée; nyɔ̌nu Jwifu e ɖi nǔ nú Jezu é ɖě sín vǐ wɛ, bɔ tɔ́ tɔn ka nyí Glɛ̌sinu. Nɔví ɖo Klísu mɛ e ɖo Lisitli kpódó Ikoniyɔ́mu kpán lɛ́ɛ ka nɔ ɖe kúnnu ɖagbe nú Timɔtée; bɔ Pɔ́lu jló ɖɔ é ní xwedó émí, lobo kplá ɛ; é gbo ada n'i, ɖó Jwifu e ɖo gbě énɛ́ lɛ́ɛ jí lɛ́ɛ wú; ɖó mɛ bǐ tunwun ɖɔ Timɔtée sín tɔ́ ɔ́, Glɛ̌sinu wɛ. Đo to e Pɔ́lu kpódó Timɔtée kpán nɔ gbɔn lɛ́ɛ mɛ ɔ́, yě nɔ́ ɖɔ gbeta e mɛsɛ́dó lɛ́ɛ kpódó agunnukɔntɔ́ Jeluzalɛ́mu tɔn lɛ́ɛ kpán ɖe tɔ́n ɔ́ nú mɛ lɛ́ɛ, bó nɔ́ byɔ́ yě ɖɔ yě ní se tónú nú gbeta énɛ́ lɛ́ɛ. Bɔ agun nǔɖitɔ́ lɛ́ɛ tɔn lɛ́ɛ nɔ ɖo dǒ lí wɛ ɖo nǔɖiɖi mɛ, bó nɔ́ ɖo jijɛ jí wɛ ayǐhɔ́ngbe ayǐhɔ́ngbe. Yɛsinsɛn ka lɔn nú Pɔ́lu kpódó Silási kpó ní jlá Mawuxó ɖo Azíi gbé jí ǎ, énɛ́ ɔ́, yě dín gbɔn Flijíi gbé jí, bó dín gbɔn Galati gbé jí. Yě sɛ yá Mizíi gbé jí, bó tɛ́nkpɔ́n ná yi tokpɔn e è nɔ ylɔ́ ɖɔ Bitiníi é mɛ; lo ɔ́, Yɛ Jezu tɔn lɔn nú yě ǎ, bɔ yě dín gbɔn Mizíi, bó yi to e è nɔ ylɔ́ ɖɔ Tlowasi é mɛ. Zǎn mɛ ɔ́, Mawu ɖe nǔɖé xlɛ́ Pɔ́lu: é mɔ Masedwaninu ɖokpó ɖo te, bó ɖo vo sa n'i wɛ ɖɔ: “Kɛnklɛ́n wǎ Masedwani, bó wá dó alɔ mǐ.” Ée Pɔ́lu mɔ nǔ énɛ́ ɔ́ gúdo ɔ́, mǐ sɔ́ nǔ, azɔn ɖokpó, bó ná yi Masedwani, ɖó mǐ mɔ gaan ɖɔ Mawu wɛ ylɔ́ mǐ, nú mǐ ná yi jlá Wɛn Ɖagbe ɔ́ to énɛ́ ɔ́ mɛ nu lɛ́ɛ. Mǐ dǒ tɔjíhún ɖo Tlowasi, bó zɔn mɔ̌ tlɔlɔ yi tɔtɛ́ntinto e è nɔ ylɔ́ ɖɔ Samɔtlási ɔ́ mɛ, bɔ ayǐhɔ́ngbe tɔn ɔ́, mǐ yi Nɛyapolísi. Mǐ gosín fínɛ́, bó yi toxo ɖaxó e è nɔ ylɔ́ ɖɔ Filípu ɔ́ mɛ; toxo énɛ́ ɖo tokpɔnla nukɔntɔn Masedwani tɔn mɛ, ɖo Hlɔ̌manu lɛ́ɛ sín acɛ mɛ. Mǐ nɔ to énɛ́ mɛ xɔ azǎn nabí ɖé. Gbɔjɛzán gbe Jwifu lɛ́ɛ tɔn ɔ́, mǐ tɔ́n sín toxo ɔ́ mɛ, bó yi tɔ tó, bó vɛdó ɖɔ mǐ ná mɔ Jwifu lɛ́ɛ sín ɖɛxotɛn ɖé ɖo fínɛ́ wɛ sín. Mǐ jínjɔ́n ayǐ, bó ɖɔ xó xá nyɔ̌nu e kplé ɖo fínɛ́ lɛ́ɛ. Nyɔ̌nu énɛ́ lɛ́ɛ ɖě nɔ nyí Lidíi, bó gosín Tiatíi, bó nɔ́ sa akwɛ́núvɔ vɔvɔ ɖé lɛ́ɛ; é nɔ sí Mawu; é ɖo tó ɖó mǐ wɛ, bɔ Aklúnɔ hun ayi tɔn, bɔ é wlí tó xó e ɖɔ wɛ Pɔ́lu ɖe ɔ́ wú. É kpódó mɛ tɔn lɛ́ɛ kpó lɛ yɛhwesin; énɛ́ ɔ́ gúdo ɔ́, é sa vo nú mǐ ɖɔ: “Ényí mi mɔ ɖɔ un ɖi nǔ nú Aklúnɔ nǔgbó hǔn, mi wá nɔ xwé ce gbe.” É zín mǐ jǐ bɔ mǐ gbɔ bó yí gbe, bó yi nɔ xwé tɔn gbe. Mǐ wá xwe ɖɛxotɛnmɛ gbe ɖokpó, bó kpé nyɔ̌nu mɛsɛntɔ́ ɖé, bɔ yɛ nyanya ɖé ɖo jǐ tɔn, bɔ é nɔ kan amɔɛ nú mɛ lɛ́ɛ. Nǔ énɛ́ e é nɔ wa ɔ́ nɔ zɔ́n, bɔ é nɔ dɔn akwɛ́ gěgé wá nú gǎn tɔn lɛ́ɛ. Nyɔ̌nu énɛ́ ɔ́ jɛ Pɔ́lu kpó mǐ kpó gúdo, bó nɔ sú xó ɖɔ: “Mɛ élɔ́ lɛ́ɛ ɔ́, Mawu Ajalɔ̌nlɔn sín mɛsɛntɔ́ wɛ nú yě; hwlɛngán sín ali ɔ́ sín xó ɖɔ nú mi wɛ yě ɖe.” Mɔ̌ wɛ é ɖo mǐ gúdo xɔ azǎn mɔ̌kpán, bɔ é wá vɛ́ Pɔ́lu wú gbe ɖokpó, bɔ é lɛ́ kɔ bó ɖɔ nú yɛ e ɖo nyɔ̌nu ɔ́ jí ɔ́ ɖɔ: “Đo Jezu Klísu nyǐkɔ mɛ ɔ́, un ɖe gbe dó we: gosín nyɔ̌nu élɔ́ jí;” bɔ yɛ ɔ́ gosín nyɔ̌nu ɔ́ jí tlóló tɛn tɔn mɛ. Ée nyɔ̌nu ɔ́ sín gǎn lɛ́ɛ mɔ ɖɔ é kún sɔ́ ɖo akwɛ́ ɖé ná dɔn wá nú émí wɛ ó ɔ́, yě wlǐ Pɔ́lu kpódó Silási kpán, bó dɔn yě yi tokplétɛn ɖo gǎn lɛ́ɛ nukɔn; yě kplá yě yi hwɛɖɔtɔ́ Hlɔ̌manu lɛ́ɛ tɔn nukɔn, bó ɖɔ: “Nya élɔ́ lɛ́ɛ ɖo to mǐtɔn hɛn wúlú wɛ; Jwifu wɛ nú yě, yě nɔ ɖo walɔ e sɛ́n mǐtɔn gbɛ́ nú mǐ lɛ́ɛ kplɔ́n mɛ wɛ; mǐ Hlɔ̌manu lɛ́ɛ ɔ́, mǐ sixú yí gbe ná ǎ; mǐ ka sixú xwedó ǎ.” Ahwan ɔ́ lɔ sí te dó Pɔ́lu kpódó Silási kpó jí, bɔ hwɛɖɔtɔ́ lɛ́ɛ zɔ́n bɔ è ɖe awu nú yě mɛ we lɛ́ɛ, bó xo yě ɖó lanbá wú. Ée yě xo yě, bɔ bǎkpa kpé yě wú ɔ́, yě kplá yě dó gankpá mɛ, bó ɖɔ nú gǎn e kpa acɛ dó gankpá ɔ́ nu ɔ́ ɖɔ ní cɔ́ yě ganjí. Ée gǎn ɔ́ se mɔ̌ ɔ́, é kplá yě yi sú dó xɔ ɖé mɛ, ɖo gankpá ɔ́ tɛ́ntin, bó ján afɔ yětɔn lɛ́ɛ dó sókpo mɛ, lobo sú hɔn dó yě. Zǎnvlɔ́ɖówe mɔ̌ ɔ́, Pɔ́lu kpódó Silási kpó ɖo ɖɛ xo wɛ, bó ɖo han ji mlá Mawu wɛ, bɔ gantɔ́ lɛ́ɛ ɖo tó ɖó yě wɛ. Azɔn ɖokpó ɔ́, ayǐkúngban dán wǔ kpódó hlɔ̌nhlɔ́n kpó, bó húnhún gankpá ɔ́ sín dodó lɛ́ɛ bǐ; è nǎ mɔ nǔɖé kpowun ɔ́, hɔn lɛ́ɛ bǐ jɛ́n hun, bɔ gɛdɛ e è dǒ gantɔ́ lɛ́ɛ é bǐ wɛ́n kɔn nyi ayǐ. Gǎn e kpa acɛ dó gankpá ɔ́ nu ɔ́ fɔ́n; ée é mɔ hɔn lɛ́ɛ bǐ ɖo nuvo ɔ́, é vɛdó ɖɔ gantɔ́ lɛ́ɛ hɔn yi wɛ sín, bó sún hwǐ, bó jló ná hu éɖée. Pɔ́lu ka sú xó syɛ́nsyɛ́n ɖé, bó ɖɔ: “Ma wa nǔ dó hwiɖée wú ó, ɖó mǐ bǐ wɛ sɔgbe ɖo fí.” Hwenɛ́nu ɔ́, é byɔ́ zogbɛ́n, bó lɔ́n byɔ́ xɔ ɔ́ mɛ, bó jɛ sísɔ́sísɔ́ jí, lobo jɛ kpo ɖo Pɔ́lu kpódó Silási kpó nukɔn. É ka wá ɖe yě tɔ́n, bó ɖɔ: “Mɛɖaxó ce lɛ́ɛ! Étɛ́ un ɖó ná wa bɔ Mawu ná hwlɛ́n mì gán?” Pɔ́lu kpódó Silási kpó ka yí gbe n'i ɖɔ: “Đi nǔ nú Aklúnɔ Jezu, énɛ́ ɔ́, Mawu ná hwlɛ́n we gán, hwi kpódó mɛ e ɖo xwé towe gbe lɛ́ɛ kpó.” Bɔ yě ɖɔ Aklúnɔxó nú é kpódó mɛ e ɖo xwé tɔn gbe lɛ́ɛ bǐ kpán. É ka kplá yě azɔn ɖokpó ɖo zǎn xóxó énɛ́ mɛ, bó klɔ́ bǎkpa yětɔn lɛ́ɛ nú yě, bɔ tlóló tɛn tɔn mɛ ɔ́, é kpódó mɛ tɔn lɛ́ɛ bǐ kpán lɛ yɛhwesin. Gǎn e kpa acɛ dó gankpá ɔ́ nu ɔ́ ka kplá yě yi xɔ tɔn mɛ, ɖo síngbó jí, bó ná nǔɖuɖu yě, bɔ é kpó mɛ tɔn lɛ́ɛ bǐ kpán jɛ awǎ ɖó Mawu e yě ɖi nǔ ná é wútu. Ayǐ ka wá hɔ́n, bɔ hwɛɖɔtɔ́ lɛ́ɛ sɛ́ sɔ́ja lɛ́ɛ dó, nú yě ní yi ɖɔ nú gǎn e kpa acɛ dó gankpá ɔ́ nu ɔ́ ɖɔ: “Jǒ Pɔ́lu kpódó Silási kpó dó;” énɛ́ ɔ́, gǎn e kpa acɛ dó gankpá ɔ́ nu ɔ́ wá yi ɖɔ nú Pɔ́lu ɖɔ: “Hwɛɖɔtɔ́ lɛ́ɛ sɛ́ sɔ́ja lɛ́ɛ dó ɖɔ è ní jó mi; mi tɔ́n bo yi ɖo fífá mɛ.” Lo ɔ́, Pɔ́lu ɖɔ nú mɛ e è sɛ́ dó lɛ́ɛ ɖɔ: “Hlɔ̌manu wɛ mǐ nyí; yě ka xo mǐ ɖo agbawungba ma ɖɔ hwɛ xá mǐ, lobo bɛ́ mǐ wá kɔn nyi gankpá mɛ; bɔ din ɔ́, yě jló ná ɖe mǐ tɔ́n mɛɖé ma se; gbeɖé kpɔ́n, yě ɖésúnɔ ní wá ɖe mǐ tɔ́n.” Sɔ́ja lɛ́ɛ ka sɔ́ xó énɛ́ lɛ́ɛ yi ɖɔ nú hwɛɖɔtɔ́ lɛ́ɛ; ée hwɛɖɔtɔ́ lɛ́ɛ se ɖɔ Hlɔ̌manu wɛ yě nyí ɔ́, xɛsi jɛ yě jí, bɔ yě wǎ mɔ Pɔ́lu kpódó Silási kpán, bó sa vo nú yě, lobo ɖe yě tɔ́n, bó ɖɔ yě nǐ kɛnklɛ́n bó gosín to ɔ́ mɛ. Đěe Pɔ́lu kpódó Silási kpán tɔ́n sín gankpá ɔ́ mɛ ɔ́, yě wǎ yi Lidíi xwé, bó mɔ nɔví ɖo Klísu mɛ lɛ́ɛ ɖo fínɛ́, bó dó wǔsyɛ́n lanmɛ nú yě, lobo ɖidó. Pɔ́lu kpódó Silási kpó gbɔn Anfipolísi kpódó Apoloni kpó mɛ dín, bó wá Tɛsaloniki; kplɔ́ngbasá ɖokpó ka ɖo fínɛ́. Pɔ́lu yi kplɔ́ngbasá ɔ́ lě e é ko nɔ bló gbɔn é. Gbɔjɛzán gbe atɔn ɖě jɛ ɖě gúdo ɔ́, é dɔn nǔ xá mɛ e ɖo kplɔ́ngbasá ɔ́ lɛ́ɛ dó nǔ e è wlǎn dó Mawuxówéma ɔ́ mɛ lɛ́ɛ wú. É tín nǔ e è wlán dó wěma ɔ́ mɛ lɛ́ɛ mɛ nú yě, bó ɖe xlɛ́ yě ɖɔ Klísu ɖó ná ji ya káká bó kú, bɔ Mawu ka ná fɔ́n ɛ sín kú lě e è wlǎn dó Mawuxówéma ɔ́ mɛ gbɔn é; é ɖɔ nú yě ɖɔ: “Klísu énɛ́ wɛ nyí Jezu e xó ɖɔ nú mi wɛ un ɖe é.” Mɛ ɖé lɛ́ɛ ɖo mɛ e ɖo tó ɖó yě wɛ lɛ́ɛ mɛ, bɔ xó énɛ́ lɛ́ɛ byɔ́ ayi mɛ nú yě, bɔ yě gɔ́ nú Pɔ́lu kpódó Silási kpán; mɔ̌ ɖokpó ɔ́, Glɛ̌sinu e nɔ ɖó sísí nú Mawu lɛ́ɛ gěgé kpódó nyɔ̌nu nukúnɖéjí gěgé kpán gɔ́ nú yě. Lo ɔ́, Jwifu lɛ́ɛ jɛ wǔ hwan jí, bó cyán toví dídá nǔvɔ́nɔ e nɔ́ ɖo dǐndán gbɔn alixo alixo wɛ lɛ́ɛ kplé; yě dɔn hunnyahunnya dó ahwan ɔ́ mɛ, bó dɔn to ɔ́ bǐ wlú. Yě yi Jazɔ́ɔn xwé gbe, bó ɖo Pɔ́lu kpó Silási kpó ba wɛ, bó ná kplá yě yi togun ɔ́ nukɔn. Ée yě ma mɔ yě ǎ ɔ́, yě zɔn Jazɔ́ɔn kpódó nɔví ɖo Klísu mɛ ɖé lɛ́ɛ kpán jí, bó dɔn yě yi gǎn e ɖo to ɔ́ mɛ lɛ́ɛ nukɔn, bó sú xó ɖɔ: “Mɛ e dɔn to fúnlɛ̌n gbɔn gbɛ ɔ́ mɛ lɛ́ɛ wá ayǐkúngban mǐtɔn jí, bɔ Jazɔ́ɔn ka yí yě dó xwé tɔn gbe; yě mɛ bǐ wɛ nɔ gba sɛ́n e Dadá Hlɔ̌ma tɔn dó lɛ́ɛ, bó nɔ ɖɔ axɔ́sú ɖěvo tíin bó nɔ́ nyí Jezu.” Xó énɛ́ lɛ́ɛ fɔ́n hun dó jǐ nú togun ɔ́ kpódó gǎn e ɖo to ɔ́ mɛ lɛ́ɛ bǐ kpó, bɔ Jazɔ́ɔn kpódó mɛ e è wlǐ gɔ́ n'i lɛ́ɛ kpán tó sɔ́ akwɛ́ ɖé ɖó gbanu hwɛ̌, cóbɔ è jó yě dó bɔ yě tɔ́n. Ée nǔ énɛ́ lɛ́ɛ jɛ tlóló ɔ́, nɔví ɖo Klísu mɛ lɛ́ɛ nyi Pɔ́lu kpódó Silási kpán sɛ́ dó Belée gbe nɛ́ gbe zǎn mɛ. Ée yě jɛ dɔ̌n ɔ́, yě yi kplɔ́ngbasá Jwifu lɛ́ɛ tɔn. Jwifu e ɖo fínɛ́ lɛ́ɛ nyɔ́ xomɛ hú éé ɖo Tɛsaloniki lɛ́ɛ; yě yí Mawuxó se kpódó jlǒ ɖagbe kpán. Ayǐhɔ́ngbe ayǐhɔ́ngbe ɔ́, yě nɔ́ kíjé Mawuxówéma ɔ́, bó nɔ kpɔ́n ɖɔ xó e ɖɔ nú yě wɛ mɛsɛ́dó lɛ́ɛ ɖe ɔ́ ka sɔgbe ají. Bɔ mɛ gěgé ɖo yě mɛ, bó ɖi nǔ nú Jezu; mɔ̌ ɖokpó ɔ́, nyɔ̌nu Glɛ̌sinu nukúnɖéjí gěgé kpódó súnnu gěgé kpán ɖi nǔ nú Jezu. Lo ɔ́, éé Jwifu e ɖo Tɛsaloniki lɛ́ɛ se ɖɔ Pɔ́lu ɖo Mawuxó jlá wɛ ɖo Belée lɔmɔ̌ ɔ́, yě wá kplɔ́n nǔ mɛ lɛ́ɛ, bɔ yě fɔ́n gǔ, bó jɛ hunnyahunnya dó to ɔ́ mɛ jí, bɔ nɔví ɖo Klísu mɛ lɛ́ɛ yá wǔ nyi Pɔ́lu sɛ́ dó xuwa jí; Silási kpódó Timɔtée kpó ká cí to ɔ́ mɛ fínɛ́. Yě mɛ e ɖo Pɔ́lu nyi wɛ lɛ́ɛ kplá ɛ káká yi jɛ to e è nɔ ylɔ́ ɖɔ Atɛ́ni é mɛ bó lɛ́ kɔ. Pɔ́lu ka dó wɛn yě ɖɔ yě ní ɖɔ nú Silási kpódó Timɔtée kpán ɖɔ yě ní yá wǔ xwedó émí wú. Hwenu e Pɔ́lu ɖo te kpɔ́n Silási kpódó Timɔtée kpó ɖo Atɛ́ni ɔ́, é mɔ lě e vodún sukpɔ́ gbɔn ɖo to ɔ́ mɛ ɔ́, bɔ é sin xomɛ n'i tlala. É nɔ yi kplɔ́ngbasá, bó nɔ́ ɖo nǔ dɔn xá Jwifu lɛ́ɛ kpódó mɛ e ma nyí Jwifu ǎ, bó ka nɔ́ sɛn Mawu lɛ́ɛ kpán wɛ. Ayǐhɔ́ngbe ayǐhɔ́ngbe ɔ́, é nɔ́ yi tokplétɛn, bó nɔ́ yi dɔn nǔ xá mɛ e é nɔ mɔ ɖo fínɛ́ lɛ́ɛ. Glɛ̌sinu nǔnywɛ́tɔ́ e è nɔ ylɔ́ Epikiliɛn lɛ́ɛ kpódó ée è nɔ ylɔ́ ɖɔ Sitoyisiɛn lɛ́ɛ kpán lɔ jɛ xó ɖɔ xá ɛ jí. Mɛ ɖě nɔ́ kanbyɔ́ ɖɔ: “Étɛ́ ɖɔ wɛ nǔxweɖɔtɔ́ énɛ́ ka ɖe?” Mɛ ɖěvo lɛ́ɛ ká se xó e ɖɔ dó Jezu kpódó fínfɔ́n sín kú kpó wú wɛ é ɖe ɔ́, bó nɔ́ ɖɔ: “É cí to ɖěvo mɛ vodún lɛ́ɛ xó ɖɔ nú mǐ wɛ é ɖe ɖɔhun.” Bɔ yě kplá Pɔ́lu yi mɛ e nɔ́ kplé ɖo fí e è nɔ ylɔ́ ɖɔ Aleopaji lɛ́ɛ nukɔn, bó kanbyɔ́ ɛ ɖɔ: “Nǔkplɔ́nmɛ yɔ̌yɔ́ e a hɛn wá ɔ́, a sixú tínmɛ nú mǐ a? Đó nǔ e ɖɔ wɛ a ɖe ɔ́ nɔ́ búdo dó mǐ, bɔ mǐ jló ná mɔ nǔ jɛ mɛ.” (Lo ɔ́, Atɛ́ninu lɛ́ɛ bǐ kpódó jǒnɔ e ɖo yě mɛ lɛ́ɛ kpán ɔ́, yě sɔ́ nɔ́ sɔ́ hwenu yětɔn dó wa nǔɖé ná zɛ yě ná ɖɔ xó yɔ̌yɔ́ e tíin lɛ́ɛ, abǐ yě ná ɖótó xó yɔ̌yɔ́ e tíin lɛ́ɛ wú ǎ.) Pɔ́lu ka sí te ɖo mɛ énɛ́ lɛ́ɛ e nɔ kplé ɖo Aleopaji lɛ́ɛ tɛ́ntin, bó ɖɔ: “Atɛ́ninu lɛ́ɛ mi; un mɔ ɖɔ mi nyí sinsɛnnɔ tawun. Đó hwenu e un ɖo to mitɔn mɛ gbɔn wɛ ɔ́, un mɔ vodúnxɔ gěgé sín vɔ̌sákpe; un tlɛ wá yi mɔ vɔ̌sákpe ɖé, bɔ è wlǎn d'é jí ɖɔ: ‘Vodún e è ma tunwun ǎ é tɔn ɖíe.’ Nǔ e mi ma tunwun ǎ bó ka nɔ́ sɛn ɔ́ sín xó ɖɔ nú mi gbé wɛ un ja. Mawu e bló gbɛ ɔ́ kpódó nǔ e ɖ'é mɛ lɛ́ɛ bǐ kpán ɔ́, é wɛ nyí Aklúnɔ jǐxwé kpódó ayǐkúngban kpán tɔn. Mawu énɛ́ ka nɔ́ nɔ sinsɛnxɔ e gbɛtɔ́ bló ɔ́ mɛ ǎ. É ka ba nú gbɛtɔ́ ní bló nǔ alɔkpa ɖěbǔ dó sɛn ɛ ná nǔɖé wɛ hudó e ɖɔhun ǎ; é wɛ nɔ́ ná gbɛ, bó nɔ́ ná funfún kpódó nǔ bǐ kpó gbɛtɔ́ lɛ́ɛ. Gbɛtɔ́ ɖokpó géé jí wɛ é ɖó togun lɛ́ɛ bǐ gbɔn, bó ma yě kpé ayǐkúngban ɔ́ bǐ sésé jí; é ɖó hwenu lɛ́ɛ, bó ka ɖó dogbó nú nɔtɛn togun lɛ́ɛ tɔn ɖokpó ɖokpó. Mawu to nǔ lɛ́ɛ bǐ gbɔn mɔ̌, bónú gbɛtɔ́ lɛ́ɛ ná dó ba ɛ, bónú yě ɖo biba ɛ wɛ káká ɔ́, afɔ nyɔ́ ɔ́, yě sixú wá yi mɔ ɛ; có Mawu ka sɔ́ lín dó ɖokpó ɖokpó mǐtɔn ǎ. “Đó, é wɛ zɔ́n bɔ mǐ ɖo gbɛ; é wɛ zɔ́n bɔ mǐ ɖo wǔ dǎn wɛ; é wɛ zɔ́n bɔ mǐ tíin. Nǔnywɛ́tɔ́ mitɔn lɛ́ɛ ɖésú ko ɖɔ mɔ̌ ɖɔ jí: “Vǐ tɔn wɛ mǐ nyí.” “Ée é ka nyí ɖɔ Mawu sín vǐ wɛ mǐ nyí é ɔ́, mǐ sɔ́ ɖó ná lin ɖɔ Mawu cí siká abǐ kpatágan abǐ awǐnnya ɖagbe ɖagbe e gbɛtɔ́ sɔ́ linlin tɔn kpódó aɖawun tɔn kpó dó kɔn ná é ɖɔhun ǎ. Nǔ ma nywɛ́ sín gbɛ e gbɛtɔ́ lɛ́ɛ kó zán ɖo hwenu e yě ɖo manywɛ́ mɛ ɔ́, Mawu lɛ́n hwɛ tɔn dó kɔ nú yě ǎ; amɔ̌ din ɔ́, é wá ɖo byɔ̌byɔ́ gbɛtɔ́ lɛ́ɛ bǐ wɛ, ɖo fí ɖěbǔ e yě kó ɖe ɔ́, ɖɔ yě ní lɛ́ kɔ sín hwɛ yětɔn lɛ́ɛ gúdo. Đó é sɔ́ azǎn ɖokpó ɖó te, bɔ azǎn énɛ́ gbe ɔ́, é ná xwedó hwɛjijɔ, bó ɖɔ hwɛ xá gbɛtɔ́ lɛ́ɛ bǐ, gbɔn mɛ e é ɖésúnɔ ko ɖe ɖó vo ɔ́ jí. É fɔ́n ɛ sín kú, bó dó ɖe nǔ énɛ́ ɔ́ xlɛ́ mɛ bǐ.” Ée mɛ lɛ́ɛ se fínfɔ́n sín kú xó ɔ́, mɛ ɖě ko e; mɛ ɖě ka ɖɔ: “Mǐ ná se xó towe dó nǔ énɛ́ wú azǎn ɖěvo gbe.” Pɔ́lu ka gosín yě mɛ. É ɖo mɔ̌ có, mɛɖé lɛ́ɛ xwedó e, bó ɖi nǔ: mɛ e è nɔ ylɔ́ ɖɔ Denisi ɖo mɛ e nɔ kplé ɖo Aleopaji lɛ́ɛ mɛ é, kpó nyɔ̌nu e è nɔ ylɔ́ ɖɔ Damalísi ɔ́ kpó, kpódó mɛ ɖěvo lɛ́ɛ kpán ɖo yě mɛ. Énɛ́ ɔ́ gúdo ɔ́, Pɔ́lu gosín Atɛ́ni, bó yi Kɔlɛ́nti. É mɔ nya Jwifu ɖokpó ɖo fínɛ́; è nɔ ylɔ́ nya ɔ́ ɖɔ Akilási, bɔ é nyí tokpɔn Pɔ́ɔn mɛ nu; nya énɛ́ kpódó asi tɔn Plisílu kpó gosín Italíi wá ɔ́, é ko lín ǎ, ɖó axɔ́sú Klódu ɖe gbeta tɔ́n ɖɔ mɛ e nyí Jwifu lɛ́ɛ bǐ ní tɔ́n sín Hlɔ̌ma; Pɔ́lu yi mɔ yě. Ée Pɔ́lu kpódó yě kpó ɔ́, azɔ̌ ɖokpó ɔ́ wɛ yě nɔ́ wa ɔ́, Pɔ́lu nɔ xwé yětɔn gbe, bɔ yě nɔ́ wa azɔ̌ ɖó kpɔ́ yě nɔ́ gbá goxɔ. Gbɔjɛzán gbe Jwifu lɛ́ɛ tɔn tɛgbɛ ɔ́, Pɔ́lu nɔ yi ɖɔ xó ɖo kplɔ́ngbasá, bó nɔ́ tɛ́nkpɔ́n bɔ Jwifu lɛ́ɛ kpódó Glɛ̌sinu lɛ́ɛ kpán nɔ mɔ nǔgbó nú xó tɔn. Ée Silási kpódó Timɔtée kpó gosín Masedwani wá ɔ́, Pɔ́lu jó éɖée nú Mawuxó ɖiɖɔ kɛ́ɖɛ́, bó nɔ́ ɖe kúnnu nú Jezu ɖo Jwifu lɛ́ɛ nukɔn ɖɔ Jezu wɛ nyí Klísu; lo ɔ́, Jwifu lɛ́ɛ jló ná se xó tɔn ǎ, bó nɔ́ ɖo zunzun i wɛ; é ka xúxú awu tɔn lɛ́ɛ, bó ɖɔ nú yě ɖɔ: “Ényí nǔɖé ɔ́, ní nyí nú mi; nyɛ ko ɖe nyɛtɔn sín mɛ. Bɛ́ sín din ɔ́, un ná nɔ́ yi mɛ e ma nyí Jwifu ǎ lɛ́ɛ gɔ́n.” Pɔ́lu ka gosín fínɛ́ bó yi nya ɖé gɔ́n; nya ɔ́ nɔ nyí Titiwusi-Jusitúsi. Nya énɛ́ ɖó sísí nú Mawu, bɔ xwé tɔn ɖo kplɔ́ngbasá Jwifu lɛ́ɛ tɔn kpá. Klisipúsi e nyí kplɔ́ngbasá Jwifu lɛ́ɛ tɔn sín gǎn ɔ́ kpódó xwédo tɔn bǐ kpán ɖi nǔ nú Aklúnɔ. Kɔlɛ́ntinu e ɖótó Pɔ́lu lɛ́ɛ gěgé ɖi nǔ nú Jezu, bó lɛ yɛhwesin. Pɔ́lu ka mɔ nǔ zǎn mɛ gbe ɖokpó; é mɔ Aklúnɔ, bɔ é ɖɔ n'i ɖɔ: “Ma ɖi xɛsi ó; lo ɔ́, ɖo xó ɖɔ wɛ; ma nɔ abwɛ̌ ó; ɖó un ɖo kpɔ́ xá we, bɔ mɛ ɖěbǔ ná ɖó alɔ wú we, bó wa nǔ nyanya xá we ǎ; ɖɔ xó, ɖó mɛ gěgé ɖo to élɔ́ mɛ, bó nyí ce.” Pɔ́lu nɔ Kɔlɛ́nti fínɛ́ xɔ xwe ɖokpó adaɖé, bó nɔ́ ɖo Mawuxó kplɔ́n mɛ lɛ́ɛ wɛ. Hwenu e Galiɔ́ɔn nyí tokpɔngán ɖo Akáyi gbé jí ɔ́, Jwifu lɛ́ɛ ɖó gbe kpɔ́, bó sí te dó Pɔ́lu jí; yě wlǐ i, bó kplá ɛ yi hwɛ nukɔn, bó ɖɔ: “Nya élɔ́ nɔ́ ɖɔ xó nú mɛ lɛ́ɛ, bó ná dó dɔn yě nú yě ná sɛn Mawu lě e sɛ́n ɔ́ ma zɔ́n gbɔn ǎ é.” Hwenu e Pɔ́lu jló ná kɛ nu dó xó énɛ́ ɔ́ wú ɔ́, Galiɔ́ɔn ɖɔ nú Jwifu lɛ́ɛ ɖɔ: “Jwifu lɛ́ɛ mi; ényí nǔ nyanya ɖé wɛ é dó sin abǐ agɔ ɖé wɛ é jɛ din ɔ́, un ná kú hǔn, bó se xó mitɔn. Lo ɔ́, ée ényí nǔ dɔn wɛ mi ɖe dó xógbe ɖé lɛ́ɛ wú, nyǐkɔ ɖé lɛ́ɛ wú, kpódó sɛ́n mi ɖésúnɔ tɔn kpán wú ɔ́, mi ɖésúnɔ wɛ ná kpɔ́n bó ɖɔ. Nyɛ wɛ ná ɖɔ hwɛ gbo nú mi ɖo nǔ énɛ́ lɛ́ɛ kɔn ǎ; un gbɛ́.” Ée é ɖɔ mɔ̌ ɔ́, é nya yě sín hwɛɖɔxɔ ɔ́ sá. Yě bǐ ka zɔn Sositɛ́nu e ɖo kplɔ́ngbasá Jwifu lɛ́ɛ tɔn sín gǎn nyí wɛ hwenɛ́nu ɔ́ jí, bó jɛ xixo e jí ɖo hwɛɖɔxɔ ɔ́ nukɔn. Galiɔ́ɔn ka mɔ nǔ énɛ́ lɛ́ɛ ɖě dó mɔ nǔɖé ǎ. Pɔ́lu lɛ́ nɔ Kɔlɛ́nti xɔ azǎn gěgé; énɛ́ ɔ́ gúdo ɔ́, é jó nɔví ɖo Klísu mɛ lɛ́ɛ dó, bó dó tɔjíhún ɖidó Silíi, bɔ Plisílu kpódó Akilási kpó xwedó e; cóbónú é ka ná ɖidó ɔ́, é xwlɛ́ ɖa ɖo to e è nɔ ylɔ́ ɖɔ Sanklé ɔ́ mɛ, ɖó akpá e é kó dó nú Mawu é wú. Ée yě wá yi jɛ Efɛ́zi ɔ́, Pɔ́lu jó Plisílu kpódó Akilási kpán dó; é yi kplɔ́ngbasá, bó dɔn nǔ xá Jwifu lɛ́ɛ. Jwifu lɛ́ɛ dó kɛnklɛ́n n'i ɖɔ ní nɔ émí gɔ́n kpɛɖé d'é jí, bɔ é gbɛ́. Hwenu e é ja yě gɔ̌n gosín gbé ɔ́, é ɖɔ nú yě ɖɔ: “Ényí Mawu jló ɔ́, un ná lɛ́ wá mi gɔ́n hwe ɖěvo nu.” Ée é ɖɔ mɔ̌ ɔ́, é yi byɔ́ tɔjíhún mɛ ɖo Efɛ́zi, bó ɖidó. Ée é wá yi jɛ te ɖo Sezalée ɔ́, é yi dó gbe agun nǔɖitɔ́ lɛ́ɛ tɔn ɖo Jeluzalɛ́mu, bó yi Antyɔ́ci. É xɔ azǎn yɔywɛ ɖé ɖo fínɛ́, bó ɖidó. É gbɔn Galati gbé jí, bó gbɔn Flijíi gbé jí ɖě jɛ ɖě gúdo, lobo dó wǔsyɛ́n lanmɛ nú ahwanvú Jezu tɔn e ɖo gbě énɛ́ lɛ́ɛ jí lɛ́ɛ bǐ. Nya Jwifu ɖé tíin, bɔ è ji i ɖo Alɛsándli; è nɔ ylɔ́ ɛ ɖɔ Apolosu; nya énɛ́ wá Efɛ́zi; é nyɔ́ xó ɖɔ, lobo tunwun Mawuxó ɔ́ ganjí. È kplɔ́n ɛ nǔ e kan Aklúnɔ sín ali ɔ́, bɔ akpakpa tɔn nɔ sɔ́ ɛ, bɔ é nɔ́ ɖo Wɛn Ɖagbe Jezu tɔn ɔ́ jlá wɛ, bó nɔ́ ɖo kplɔ́nkplɔ́n mɛ lɛ́ɛ wɛ, bɔ nǔ e ɖɔ wɛ é ɖe lɛ́ɛ bǐ nɔ́ sɔgbe, có yɛhwesin Jǎan tɔn kɛ́ɖɛ́ wú jɛ́n é mɔ nǔ jɛ. É nɔ ɖo xó ɖɔ wɛ kpódó jiɖiɖe kpán ɖo kplɔ́ngbasá. Đěe Plisílu kpódó Akilási kpán se xó e ɖɔ wɛ é ɖe lɛ́ɛ ɔ́, yě dɔn ɛ dó wǔ, bó tín Mawu sín ali ɔ́ mɛ n'i. Ée Apolosu jló ná yi Akáyi ɔ́, nɔví ɖo Klísu mɛ lɛ́ɛ na ɛ akɔ́nkpinkpan, bó wlán wěma sɛ́ dó ahwanvú Jezu tɔn e ɖo dɔ̌n lɛ́ɛ, nú yě ní yí i ganjí. Ée é wá jɛ fínɛ́ ɔ́, é dó alɔ mɛ e ɖi nǔ nú Jezu gbɔn fɛ́nú Mawu tɔn mɛ lɛ́ɛ ɖésú. Đó, é nɔ ɖɔ xó kpódó hlɔ̌nhlɔ́n kpó, bó nɔ dó ɖe xlɛ́ Jwifu lɛ́ɛ agbawungba ɖɔ ali bú wɛ yě ɖe. É nɔ ɖe xlɛ́ yě ɖo Mawuxówéma ɔ́ mɛ ɖɔ Jezu wɛ nyí Klísu ɔ́. Hwenu e Apolosu ɖo Kɔlɛ́nti ɔ́, Pɔ́lu gbɔn tokpɔn e ɖo só jí lɛ́ɛ mɛ, bó wá Efɛ́zi. É mɔ ahwanvú ɖé lɛ́ɛ ɖo fínɛ́, bó kanbyɔ́ yě ɖɔ: “Hwenu e mi ɖi nǔ nú Jezu ɔ́, Mawu ná Yɛsinsɛn mi a?” Bɔ yě yǐ gbe n'i ɖɔ: “Yɛsinsɛn ɖé tó tíin hǔn, mǐ se kpɔ́n gbeɖé ǎ.” Pɔ́lu ka kanbyɔ́ yě ɖɔ: “Yɛhwesin tɛ́ mi ka lɛ lo?” Bɔ yě yí gbe n'i ɖɔ: “Yɛhwesin Jǎan tɔn wɛ mǐ lɛ.” Pɔ́lu ka ɖɔ nú yě ɖɔ: “Yɛhwesin kɔ lɛ́ sín hwɛ mɛtɔn lɛ́ɛ gúdo tɔn wɛ Jǎan lɛ nú mɛ, bó ɖɔ nú togun ɔ́ ɖɔ mɛ e ɖo gúdo émítɔn jǎwe ɔ́ wɛ yě ná ɖi nǔ ná; mɛ énɛ́ wɛ nyí Jezu.” Ée yě se mɔ̌ ɔ́, yě lɛ yɛhwesin ɖo Aklúnɔ Jezu nyǐkɔ mɛ. Pɔ́lu ka ɖó alɔ yě jí, bɔ Yɛsinsɛn wá yě jǐ, bɔ yě jɛ gbe ɖěvo dó jí, bó jɛ xó e Mawu ɖɔ nú yě ɔ́ ɖɔ jí. Yě bǐ ná yi gbɛtɔ́ wěwe mɔ̌. Pɔ́lu nɔ yi kplɔ́ngbasá, bó nɔ ɖo xó ɖɔ wɛ kpódó jiɖiɖe kpó káká nú sun atɔn; é nɔ ɖɔ nǔ e kan axɔ́súɖuɖu Mawu tɔn ɔ́ sín xó, bó nɔ́ tɛ́nkpɔ́n nú mɛ lɛ́ɛ ná mɔ nǔgbó nú xó e ɖɔ wɛ é ɖe é. Lo ɔ́, mɛɖé lɛ́ɛ ti tamɛ ɖo yě mɛ; yě gbɛ̌, lobo nɔ ɖɔ xó nyanya dó Aklúnɔ sín ali ɔ́ wú, ɖo togun ɔ́ nukɔn; énɛ́ ɔ́ wú ɔ́, Pɔ́lu gosín yě mɛ, bó kplá ahwanvú lɛ́ɛ, bó nɔ́ ɖɔ xó dó xó ɔ́ wú ayǐhɔ́ngbe ayǐhɔ́ngbe ɖo Tilánɔsi sín wěmaxɔmɛ. Nǔ nyí mɔ̌ xɔ xwe we, káká bɔ mɛ e ɖo Azíi gbé jí lɛ́ɛ bǐ: Jwifu lɛ́ɛ kpódó mɛ e ma nyí Jwifu ǎ lɛ́ɛ kpán se Aklúnɔxó ɔ́. Mawu nɔ́ jlɛ́ nǔ ɖaxó ɖaxó lɛ́ɛ gbɔn Pɔ́lu jí, káká bɔ nú yě sɔ́ avɔ abǐ lɛ̌nsuví e jɛ Pɔ́lu wú ɔ́, ɖě dó azinzɔnnɔ ɖé wú ɔ́, azɔn tɔn nɔ gbɔ, bɔ yɛ nyanya ɖo mɛɖé jí ɔ́, é nɔ́ gosín mɛ ɔ́ jí. Jwifu ɖé lɛ́ɛ ká tíin, bó nɔ́ ɖo dǐndán kpé wɛ, bó nɔ́ ɖo yɛ nyanya nya sín mɛ lɛ́ɛ jí wɛ; yě lɔmɔ̌ wá jɛ Aklúnɔ Jezu nyǐkɔ ylɔ́ jí, bó ná dó nya yɛ nyanya sín mɛ lɛ́ɛ jí; yě nɔ́ ɖɔ nú yɛ nyanya lɛ́ɛ ɖɔ: “Un ɖe gbe dó mi; mi tɔ́n ɖo Jezu e xó Pɔ́lu nɔ ɖɔ ɔ́ sín nyǐkɔ mɛ.” (Vɔ̌sánú-xwlémawutɔ́ ɖaxó Jwifu lɛ́ɛ tɔn e è nɔ ylɔ́ ɖɔ Ceva ɔ́ sín vǐ súnnu tɛ́nwe lɛ́ɛ wɛ nɔ ɖo mɔ̌ bló wɛ.) Lo ɔ́, yɛ nyanya ɔ́ gblɔ́n nú yě ɖɔ: “Jezu ɔ́, un tunwun i, bó tunwun mɛ e Pɔ́lu nyí é; bɔ midɛɛ lɛ́ɛ ɔ́, mɛ nǎhún mi ka nyí?” Bɔ nya e jí yɛ nyanya ɔ́ ɖe ɔ́ zɔn yě jí, bɔ hlɔ̌nhlɔ́n tɔn hú gǎn yě bǐ tɔn; é xo yě káká, bó gblé wǔ yě, bó ɖe yě nyi mɛ̌, bɔ yě hɔn tɔ́n sín xwé ɔ́ gbe. Jwifu kpódó Glɛ̌sinu e ɖo Efɛ́zi lɛ́ɛ bǐ kpán wɛ se nǔ énɛ́ e jɛ ɔ́; énɛ́ ɔ́, xɛsi jɛ yě bǐ jǐ, bɔ yě sɔ́ Aklúnɔ Jezu sín nyǐkɔ su. Yě mɛ e ɖi nǔ nú Jezu lɛ́ɛ gěgé nɔ́ wá ɖɔ hwɛ yětɔn lɛ́ɛ, lobo nɔ ɖɔ nǔ e yě ko nɔ wa nyi do ɖ'ayǐ lɛ́ɛ ɖo agbawungba. Majíkiblótɔ́ gěgé nɔ bɛ́ majíkiwéma yětɔn lɛ́ɛ wá, bó nɔ́ dó zo, ɖo mɛ bǐ nukún mɛ; yě lɛ̌n wěma énɛ́ lɛ́ɛ bǐ sín akwɛ́ kpɔ́n, bó mɔ ɖɔ é ná yi gankwɛ́ adɔ̌kpo we děgba we afɔwó (50.000) mɔ̌. Lě e Aklúnɔxó ɔ́ nɔ́ ɖo gbigba kpé wɛ kpódó acɛ kpó, bó nɔ́ ɖo hlɔ̌nhlɔ́n tɔn ɖe xlɛ́ gbɔn wɛ ɔ́ nɛ́. Ée nǔ énɛ́ lɛ́ɛ jɛ gúdo ɔ́, Pɔ́lu ɖɔ émí ná gbɔn Masedwani kpódó Akáyi kpán gbé jí, bó ná yi Jeluzalɛ́mu. É ka lɛ́ ɖɔ: “Un yi dɔ̌n ɔ́, un ɖó ná wá yi Hlɔ̌ma lɔmɔ̌.” Énɛ́ ɔ́, é sɛ́ mɛ e nɔ dó alɔ ɛ lɛ́ɛ we dó Masedwani; yě mɛ we énɛ́ lɛ́ɛ wɛ nyí: Timɔtée kpódó Elasíti kpán; é ɖésúnɔ ka cí Azíi fínɛ́ kpɛɖé. Hwenɛ́nu wɛ hunnyahunnya ɖaxó ɖé tíin ɖó Aklúnɔ sín ali ɔ́ wútu. Nya nǔtuntɔ́ ɖé tíin, bɔ è nɔ ylɔ́ ɛ ɖɔ Demɛtliwúsi; é nɔ sɔ́ kpatágan dó tun vodún e è nɔ ylɔ́ ɖɔ Aatemísi é sín xɔ kpɛví kpɛví ɖé lɛ́ɛ ná bó nɔ́ sa; énɛ́ ɔ́ nɔ́ zɔ́n bɔ é nɔ dɔn akwɛ́ gěgé wá nú azɔ̌watɔ́ lɛ́ɛ. Nya énɛ́ wá kplé mɛ e nɔ wa azɔ̌ xá ɛ lɛ́ɛ, kpódó azɔ̌ ɖokpó ɔ́ watɔ́ e ɖo to ɔ́ mɛ lɛ́ɛ kpó, bó ɖɔ nú yě ɖɔ: “Xɔ́ntɔn ce lɛ́ɛ mi, mi tunwun ɖɔ azɔ̌ élɔ́ wɛ nɔ dɔn akwɛ́ wá nú mǐ. Mi ka ɖo nǔ e dó sin wɛ nya Pɔ́lu énɛ́ ɖe ɔ́ mɔ wɛ, bó ɖo sise wɛ: é sɔ́ xó tɔn dó gblé tamɛ nú mɛ gěgé; ényí Efɛ́zi fí kɛ́ɖɛ́ wɛ ǎ, ɖibla gbɔn Azíi gbé ɔ́ bǐ jǐ wɛ, ɖó é nɔ́ ɖo ɖiɖɔ nú mɛ lɛ́ɛ wɛ ɖɔ nǔmɛsɛn e mǐ nɔ́ sɔ́ alɔ dó bló ná lɛ́ɛ kún nyí nǔ è nǎ sɛn ɖé ó. Nú mǐ ma nyɔ́ wa ǎ ɔ́, ényí azɔ̌ mǐtɔn kɛ́ɖɛ́ wɛ é ná hɛn gblé ǎ; lo ɔ́, mɛɖé sɔ́ ná ké ya nú vodún ɖaxó Aatemísi sín xɔ ɔ́ lɔmɔ̌ ǎ, bɔ vodún énɛ́ ɔ́ ɖésú e mɛ e ko ɖo Azíi gbé ɔ́ bǐ jí, kpódó mɛ e ko ɖo gbɛ ɔ́ bǐ mɛ lɛ́ɛ kpán nɔ́ sɛn ɔ́ sɔ́ ná ɖó wi ɖé ta ǎ.” Ée yě se mɔ̌ ɔ́, xomɛ sin yě, bɔ yě jɛ xó sú jí bó nɔ́ ɖɔ: “Aatemísi Efɛ́zinu lɛ́ɛ tɔn ɔ́ wɛ nyí nǔ ɖaxó.” Bɔ to ɔ́ bǐ xozǐn, bó nyi ahwan ɖidó tokplégbasá; yě wlí Gayiwúsi kpódó Alisitáki kpán, bó dɔn yě hɛn yi fínɛ́. Yě mɛ énɛ́ lɛ́ɛ ɔ́, Masedwaninu wɛ yě nyí, bɔ yě kpó Pɔ́lu kpó zɔn. Pɔ́lu ka jló ná yi fí e togun ɔ́ kplé ɖe ɔ́; lo ɔ́, yě mɛ e ɖi nǔ nú Jezu lɛ́ɛ gbɛ́ n'i. Xɔ́ntɔn tɔn axɔ́súzɔ́watɔ́ Azíinu ɖé lɛ́ɛ lɔmɔ̌ sɛ́ wɛn dó e ɖɔ é ní kɛnklɛ́n bó ma yi tokplégbasá ɔ́ gbeɖé ó. Hwenɛ́nu ɔ́, mɛ ɖě sú xó, bó ɖɔ ɖě ɔ́, mɛ ɖě nɔ́ sú xó bó nɔ́ ɖɔ ɖěvo, bɔ agun ɔ́ bǐ fan. Mɛ gěgé ɖo yě mɛ, bó tlɛ tunwun nǔ e wú è kplé lɔ é ǎ. Mɛ ɖé lɛ́ɛ ɖo agun ɔ́ mɛ, bó tín xó ɔ́ mɛ nú Alɛsándlu e Jwifu lɛ́ɛ sísɛ́ dó nukɔn é; énɛ́ ɔ́, Alɛsándlu bló alɔ nú yě, bó jló ná ɖɔ xó dó hwlɛ́n yě gán ɖo togun ɔ́ nukɔn. Lo ɔ́, ée yě mɔ ɖɔ Jwifu wɛ é nyí ɔ́, yě bǐ sú xó zɛ̌ɛ́n, bó ɖo xó ɖokpó ɔ́ ɖɔ wɛ káká nú ganxixo we mɔ̌; yě nɔ́ ɖɔ: “Aatemísi Efɛ́zinu lɛ́ɛ tɔn ɔ́ wɛ nyí nǔ ɖaxó!” Wěgbójínɔtɔ́ to ɔ́ tɔn ka hwíhwɛ́ mɛ lɛ́ɛ bó ɖɔ: “Efɛ́zinu lɛ́ɛ mi, mɛ bǐ tunwun ɖɔ Efɛ́zi to ɔ́ wɛ nɔ cɔ́ vodún ɖaxó Aatemísi sín xɔ ɔ́, kpódó akpajlɛ́ tɔn e jɛ ayǐ sín jǐxwé ɔ́ kpán. Mɛ ɖé sixú gbɛ́ énɛ́ ǎ; énɛ́ wú ɔ́, mǐ ɖó ná hwíhwɛ́ mǐɖée, bó gɔn nǔ wa ma lin tamɛ kpɔ́n. Mɛ élɔ́ lɛ́ɛ e mi kplá hɛn wá fí ɔ́, yě ɖu su ɖé nú vodún mǐtɔn ǎ, yě ka nylá nu ɖé dó vodún mǐtɔn wú ǎ. Ényí Demɛtliwúsi kpódó nǔtuntɔ́ e nɔ́ wa azɔ̌ xá ɛ lɛ́ɛ kpán ɖó nǔɖé dó mɛɖé wú ɔ́, hwɛɖɔxɔ lɛ́ɛ ɖo nuvo; hwɛɖɔtɔ́ lɛ́ɛ lɔ ka ɖe; yě ní yi ylɔ́ hwɛ ɖo fínɛ́. Ényí mi ka lɛ́ ɖo nǔ ɖěvo ba wɛ ɔ́, to ɔ́ ko kplé ɔ́, è nǎ ɖɔ gbo. Mǐ ma nyɔ́ bló ǎ ɔ́, è nǎ ɖɔ to hɛn dán wɛ mǐ ɖe, ɖó nǔ e jɛ égbé ɔ́ wú; nǔ e wú è blǒ kplé élɔ́ din ɔ́, é tíin nyǐ ǎ; mǐ ka sixú mɔ xó jɔ xó ɖé, dó tín nǔ e wú mǐ kplé ɖo fí din ɔ́ mɛ ǎ.” Ée é ɖɔ mɔ̌ ɔ́, é nya mɛ lɛ́ɛ. Ée zǐngídi ɔ́ wá xwɛ ɔ́, Pɔ́lu ylɔ́ yě mɛ e ɖi nǔ nú Jezu lɛ́ɛ kplé, bó dó wǔsyɛ́n lanmɛ nú yě, bó ɖɔ nú yě ɖɔ émí ná yi bó wá, lobo ɖidó Masedwani. É gbɔn fí énɛ́ lɛ́ɛ, bó ɖɔ xó gěgé ɖo fínɛ́, bó dó dó wǔsyɛ́n lanmɛ nú mɛ e ɖi nǔ nú Jezu lɛ́ɛ, bó wá yi Glɛ̌si yíkúngban jí. É xɔ sun atɔn ɖo fínɛ́; é ka wá ɖo nǔ sɔ́ wɛ bó ná dó tɔjíhún yi Silíi gbé jí, bó se ɖɔ Jwifu lɛ́ɛ blá gbě émítɔn; énɛ́ ɔ́ wú ɔ́, é ɖɔ émí ná lɛ́ kɔ gbɔn Masedwani. Mɛ e nyi i lɛ́ɛ ɖíe: Sopatlɔ́si Beléenu e nyí Pilusi ví é; Alisitáki kpódó Sekúndúsi kpó, Tɛsalonikinu wɛ nú yě; Gayiwúsi Dɛɛbenu ɔ́, kpódó Timɔtée kpó; Ticíku kpódó Tlofímu kpó, Azíinu wɛ nú yě. Mɛ énɛ́ lɛ́ɛ jɛ nukɔn, bó yi nɔ te kpɔ́n mǐ ɖo Tlowasi. Ée wɔ̌xúxú e mɛ è ma dó tɔ́n ǎ é sín xwe wá yi ɔ́, mǐ ɖésúnɔ ɔ́, mǐ dó tɔjíhún ɖo Filípu, bó xɔ azǎn atɔ́ɔ́n ɖo tɔ jí, bó wá mɔ yě ɖo Tlowasi, bó nɔ fínɛ́ xɔ azǎn tɛ́nwe. Azǎn nukɔntɔn e ɖo aklúnɔzángbla mɛ ɔ́, gbadanu tɔn ɔ́, mǐ kó kplé bó ná ɖu kɔnɖókpɔ́ nǔɖuɖu ɔ́; Pɔ́lu ka ɖó ná yi ayǐhɔ́ngbe tɔn zǎnzǎn; é ka ɖo xó ɖɔ xá yě mɛ e ɖi nǔ nú Jezu lɛ́ɛ wɛ káká bɔ zǎn vlɔ́ ɖó we. Zogbɛ́n gěgé ɖo títá ɖo xɔ e mɛ mǐ kplé ɖe ɖo síngbó jí é. Nyaví dɔ̌nkpɛvú ɖé ɖo ayǐjínjɔ́n ɖo flɛtɛ́li nu; è nɔ ylɔ́ ɛ ɖɔ Etíki. Nyaví énɛ́ wá jɛ amlɔgɔ́ sa jí, hwenu e xó e ɖɔ wɛ Pɔ́lu ɖe ɔ́ ɖo ga ɖi wɛ é. Amlɔ wá nyí i bǐ, bɔ é jɛ ayǐ sín síngbó atɔngɔ́ ɔ́ jí, bɔ kúkú tɔn jɛ́n yě wá zé. Pɔ́lu ka jɛ te, bó fɛ, bó zé e dó awa mɛ bó ɖɔ: “Ayi mitɔn ní ma gbadó ó, ɖó é kpo ɖo gbɛ.” Énɛ́ gúdo ɔ́, Pɔ́lu lɛ́ yi síngbó ɔ́ jí, bó kán wɔ̌xúxú bó ɖu. É ka lɛ́ ɖɔ xó nú yě káká bɔ ayǐ hɔ́n, lobo ɖidó. Mɛ lɛ́ɛ ka kplá nyaví dɔ̌nkpɛvú ɔ́, bɔ é ɖo gbɛ; nǔ énɛ́ dó wǔsyɛ́n lanmɛ nú yě bǐ. Mǐdɛɛ lɛ́ɛ ɔ́, mǐ jɛ nukɔn nú Pɔ́lu, bó dó tɔjíhún, bó ɖidó Asɔ́si; fínɛ́ wɛ é ɖésúnɔ kó ɖɔ émí ná zɔn afɔ wá, bɔ mǐ ná zé émí ɖe. Hwenu e mǐ wá kplé ɖo Asɔ́si ɔ́, mǐ sɔ́ ɛ dó tɔjíhún mɛ yi Mitilɛ́nu. Mǐ gosín fínɛ́, bɔ ayǐhɔ́ngbe tɔn ɔ́, mǐ yi Cio nukɔn. Azǎn atɔngɔ́ ɔ́ gbe ɔ́, mǐ yi Samɔ́si, bó wá Milɛ ayǐhɔ́ngbe tɔn. Đó Pɔ́lu ɖɔ émí ná gbɔn Efɛ́zi nukɔn dín, bó ma wá gú hwenu ɖo Azíi ó; ɖó é ɖo hwlɛndó jí, bónú é kpé wú ɔ́, é ná ɖo Jeluzalɛ́mu ɖo Jwifu lɛ́ɛ sín xwe e è nɔ ylɔ́ ɖɔ Pantekótu ɔ́ gbe. Pɔ́lu sɛ́ mɛ dó sín Milɛ, nú yě ní yi Efɛ́zi, bó yi ylɔ́ agunnukɔntɔ́ lɛ́ɛ wá. Ée yě wǎ gɔ̌n tɔn ɔ́, é ɖɔ nú yě ɖɔ: “Lě e un nɔ mi mɛ gbɔn sín gbe e gbe un wá Azíi ɔ́, mi ɖě sɔ́ dán ɛ ǎ. Un nɔ sɛn Aklúnɔ ɖo mɛɖée sɔ́ hwe mɛ; un nɔ sɛn ɛ kpó avǐ kpó, bó nɔ́ sɛn ɛ ɖo wǔvɛ́ e mɔɖónúmɛ Jwifu lɛ́ɛ tɔn nɔ dɔn wá nú mì lɛ́ɛ é tɛ́ntin. Nǔ e ná nyí le nú mi ɔ́, un hwlá ɖěbǔ dó mi ǎ: un ɖɔ bǐ nú mi, bó kplɔ́n bǐ mi ɖo agbawungba kpódó xwé mitɔn lɛ́ɛ gbe kpó. Un ɖɔ nú Jwifu lɛ́ɛ, bó ɖɔ nú mɛ e ma nyí Jwifu ǎ lɛ́ɛ ɖɔ yě ɖó ná lɛ́ kɔ sín hwɛ yětɔn lɛ́ɛ gúdo, bó húzú jɛ Mawu li jí, bó ɖi nǔ nú Aklúnɔ mǐtɔn Jezu. Éɖíe! Din ɔ́, un xwe Jeluzalɛ́mu; ɖó Yɛsinsɛn ɖɔ nú mì ɖɔ nyi ɖó ná yi dandan; un ko tunwun nǔ e ɖo ná gbo mì wɛ ɖo dɔ̌n é ǎ. Nǔ e un tunwun kpowun ɔ́ wɛ nyí ɖɔ: ɖo to ɖokpó ɖokpó mɛ ɔ́, Yɛsinsɛn nɔ ɖo ɖiɖɔ nú mì wɛ ɖɔ gankpá mɛ yiyi kpódó yajiji gěgé kpán ɖo te kpɔ́n mì. Amɔ̌, gbɛ nyɛtɔn ɔ́ wɛ nyí nǔɖé nú mì ǎ; éé ɖo tají ɔ́ wɛ nyí ɖɔ má kó sixú dó wezun e ɖo afɔ ce nu ɔ́ yi fó, bó wa azɔ̌ e Aklúnɔ Jezu sɔ́ dó así nú mì ɔ́ yi fó; é wɛ nyí ɖɔ má jlá Wɛn Ɖagbe e ɖɔ xó dó fɛ́nú Mawu tɔn wú é. “Un gbɔn mi bǐ tɛ́ntin, bó ɖɔ axɔ́súɖuɖu Mawu tɔn sín xó nú mi; amɔ̌ din ɔ́, mi ɖě sɔ́ ná mɔ mì ǎ. Énɛ́ wú wɛ un ɖo ɖiɖɔ nú mi wɛ égbé ɖɔ ényí mɛɖé dɔn ɖo mi mɛ ɔ́, é kún sɔ́ kan mì ó! Đó un jlá tito Mawu tɔn ɔ́ bǐ mi; un hwlá ɖěbǔ dó mi ǎ. Mi hɛn ayi dó miɖée wú, bó hɛn ayi dó agun Mawu tɔn e nu Yɛsinsɛn sɔ́ mi ɖó é wú, bónú mi ná xlɛ́ ali agunví lɛ́ɛ; agunví énɛ́ lɛ́ɛ e Mawu xɔ gbɔn Vǐ é ɖésúnɔ tɔn sín kú gbla mɛ é. Un tunwun ɖɔ nyɛ wá yi gúdo ɔ́, gbɛtɔ́ dídá ajanuhla ɖɔhun ɖé lɛ́ɛ na wá byɔ́ mi mɛ, lobo na kú nǔbláwǔ ɖěbǔ nú agunví lɛ́ɛ ǎ. Đo mi ɖésúnɔ mɛ ɔ́, mɛɖé lɛ́ɛ na wá sí te, bó jɛ nǔ e ma sɔgbe xá Wɛn Ɖagbe ɔ́ ǎ lɛ́ɛ kplɔ́n mɛ jí, bɔ mɛ gěgé ná xwedó yě ɖo mɛ e ɖi nǔ nú Jezu lɛ́ɛ mɛ. Hǔn, mi bo nɔ acéjí, bó ka flín ɖɔ zǎn kpódó kéze kpo ɔ́, un kún gɔn nǔ kplɔ́n ɖokpó ɖokpó mitɔn lɛ́ɛ kpódó avǐ kpán káká nú xwe atɔn ó. “Din ɔ́, un zé mi dó alɔ mɛ nú Mawu, bó jó mi nú fɛ́nú tɔn sín xó. Mawu ɖó acɛ, bó ná na hlɔ̌nhlɔ́n mi, bó ná lɛ́ na mi nǔ ɖagbe e é ko sɔ́ ɖ'ayǐ nú mɛ e nyí étɔn lɛ́ɛ bǐ é. Nukún ce ɖo mɛɖé sín akwɛ́ wú ǎ; é ka ɖo mɛɖé sín siká wú ǎ; é ka lɛ́ ɖo mɛɖé sín avɔ wú ǎ. Mi ɖésú mi tunwun ɖɔ azɔ̌ e nyɛ ɖésúnɔ wa ɔ́ wɛ hɛn nyɛ kpódó hǎgbɛ́ ce lɛ́ɛ kpán. Un xlɛ́ mi gbɔn alɔkpa bǐ mɛ ɖɔ mɔ̌ wɛ è ɖǒ ná nɔ́ wa azɔ̌ gbɔn, bó ná sixú dó alɔ wamamɔnɔ lɛ́ɛ, bó ná dó flín xó e Aklúnɔ Jezu ɖésú ɖɔ lɛ́ɛ ná; é ɖɔ: ‘Nǔnámɛ nɔ dó xomɛhunhun nú mɛ hú nǔyíɖomɛsí.’ ” Ée Pɔ́lu ɖɔ xó énɛ́ lɛ́ɛ vɔ ɔ́, é jɛ kpo kpódó yě bǐ kpó, bó xo ɖɛ; bɔ yě bǐ bɛ́ avǐ, bó kplá así kɔ nú Pɔ́lu, bó kí si n'i. Wǔ kú yě tlala, ɖó é kó ɖɔ nú yě ɖɔ yě kún sɔ́ ná mɔ émí ó, bɔ yě nyi i káká yi ɖó tɔjíhún ɔ́ kɔn. Ée mǐ wá jó yě dó ɔ́, mǐ byɔ́ tɔjíhún mɛ bo ɖidó tɔtɛ́ntinto e è nɔ ylɔ́ ɖɔ Kɔ́si ɔ́ mɛ tlɔlɔ. Ayǐhɔ́ngbe tɔn ɔ́, mǐ wǎ Hlodɛ́si, bó gosín fínɛ́ bo yi Patala. Mǐ ka mɔ tɔjíhún ɖé, bɔ é xwe Fenisíi, bɔ mǐ byɔ́ mɛ ɖidó. Mǐ mɔ tɔtɛ́ntinto e è nɔ ylɔ́ ɖɔ Cíplu é sɛ́ dó, bó jó to énɛ́ ɔ́ dó nyi amyɔxwé, lobo yi Silíi; bó wá glín hǔn ɖó Tíi, ɖó fínɛ́ wɛ tɔjíhún ɔ́ ɖó ná ɖe agban ɖe. Mǐ mɔ mɛ e ɖi nǔ nú Jezu lɛ́ɛ ɖo fínɛ́, bó nɔ yě gɔ̌n xɔ azǎn tɛ́nwe. Yɛsinsɛn sín hlɔ̌nhlɔ́n ɖe nǔ e ɖo te kpɔ́n Pɔ́lu ɔ́ xlɛ́ yě, bɔ yě ɖɔ nú Pɔ́lu ɖɔ ní ma yi Jeluzalɛ́mu ó. Lo ɔ́, ée mǐ nɔ fínɛ́ xɔ azǎn tɛ́nwe ɔ́, mǐ lɛ́ wlí ali ɖidó; yě kpódó asi yětɔn lɛ́ɛ kpó, kpódó vǐ yětɔn lɛ́ɛ kpó bǐ wá nyi mǐ káká jɛ toxo ɔ́ gúdo. Ée mǐ jɛ xutó ɔ́, mǐ jɛ kpo bó xo ɖɛ. Énɛ́ ɔ́ gúdo ɔ́, mǐ dó yibowá nú mǐɖée, bɔ mǐ byɔ́ tɔjíhún mɛ, bɔ yědɛɛ lɛ́ɛ lɛ́ kɔ ɖidó xwé yětɔn lɛ́ɛ gbe. Ée mǐ gosín Tíi ɔ́, Putolemayísi wɛ mǐ wá glín hǔn dó, bɔ tɔjígbingbɔn yi tomɛ mǐtɔn nɔ te ɖo fínɛ́. Mǐ dó gbe nɔví mǐtɔn ɖo nǔɖiɖi mɛ lɛ́ɛ, bó nɔ kpɔ́ xá yě gbe énɛ́ gbe. Ayǐhɔ́ngbe tɔn ɔ́, mǐ yi Sezalée, bó jɛ Filípu Wɛn Ɖagbejlátɔ́ ɔ́ xwé, bó nɔ fínɛ́. Filípu énɛ́ ɖo mɛ tɛ́nwe e è cyán ɖo Jeluzalɛ́mu lɛ́ɛ mɛ. Filípu ɖó ɖyɔ̌vǐ ɛnɛ; yě ɖě tunwun súnnu ǎ; yě nɔ́ ɖo Mawuxó ɖɔ wɛ. Mǐ ko nɔ fínɛ́ xɔ azǎn gěgé, bɔ gbeyíɖɔ Mawu tɔn e è nɔ ylɔ́ ɖɔ Agabusi ɔ́ gosín Judée wá. É wá mɔ mǐ, bó zé gǒjíblánú Pɔ́lu tɔn dó blá afɔ kpódó alɔ kpán nú éɖée, bó ɖɔ: “Nǔ e Yɛsinsɛn ɖɔ ɔ́ ɖíe: mɛ e tɔn nyí gǒjíblánú élɔ́ ɔ́, lě e Jwifu lɛ́ɛ na blá ɛ gbɔn ɖo Jeluzalɛ́mu, bó ná jó e nú mɛ e ma nyí Jwifu ǎ lɛ́ɛ é ɖíe.” Ée mǐ se mɔ̌ ɔ́, mǐ kpó to ɔ́ mɛ nu lɛ́ɛ kpó sa vo nú Pɔ́lu ɖɔ ní ma yi Jeluzalɛ́mu ó. É ka yí gbe nú mǐ ɖɔ: “Nɛ̌ ka gbɔn bɔ mi ɖo avǐ ya wɛ bó ɖo ayi gba dó nú mì wɛ mɔ̌? Ényí è nǎ blá mì kɛ́ɖɛ́ wɛ un ɖo gbesisɔ mɛ ná ǎ; lo ɔ́, un lɛ́ ɖo gbesisɔ mɛ bo ná kú ɖo Jeluzalɛ́mu, ɖó Aklúnɔ Jezu wútu.” Ée mǐ má sixú ɖɔ xó ɖé, bó dó hɛn ɛ ɖó te ǎ jɛ́n wɛ ɔ́, mǐ gbɔ bo jó e dó, bó ɖɔ: “Lě e Aklúnɔ jló gbɔn ɔ́, ní bo nyí mɔ̌.” Mǐ nɔ fínɛ́ xɔ azǎn yɔywɛ ɖé, bó sɔ́nǔ, bó ɖidó Jeluzalɛ́mu. Ahwanvú Jezu tɔn e ɖo Sezalée lɛ́ɛ ɖě zɔn xá mǐ, bó kplá mǐ yi ahwanvú Jezu tɔn xóxó lɛ́ɛ ɖokpó xwé; tɔtɛ́ntinto e è nɔ ylɔ́ ɖɔ Cíplu ɔ́ mɛ nu wɛ é nyí, bɔ è nɔ ylɔ́ ɛ ɖɔ Munasɔ́ɔn; xwé tɔn gbe wɛ mǐ ɖó ná nɔ. Đěe mǐ wá Jeluzalɛ́mu ɔ́, nɔví mǐtɔn ɖo nǔɖiɖi mɛ lɛ́ɛ yí mǐ kpódó xomɛhunhun kpán. Ayǐhɔ́ngbe tɔn ɔ́, Pɔ́lu kpó mǐ kpó yi Jaki xwé, bɔ agunmɛxó lɛ́ɛ bǐ kplé ɖo fínɛ́. Pɔ́lu dó gbe yě, bɔ nǔ e Mawu jlɛ́ ɖo mɛ e ma nyí Jwifu ǎ lɛ́ɛ tɛ́ntin gbɔn gbla tɔn mɛ ɔ́, é wlí ɖokpó ɖokpó ɖɔ nú yě. Ée yě se xó nɛ́ lɛ́ɛ ɔ́, yě bǐ kpa susu nú Mawu, bó ka ɖɔ nú Pɔ́lu ɖɔ: “A mɔ a nɔví? Jwifu lɛ́ɛ afatɔ́n afatɔ́n donu nabí ɖé wɛ ɖi nǔ; yě bǐ ka lɛ́ ɖó kan dó Mɔyízi sɛ́n ɔ́ wú. È ka wá ɖɔ nú yě ɖɔ hwi nɔ kplɔ́n nǔ Jwifu e ɖo to ɖěvo mɛ lɛ́ɛ ɖɔ yě ma sɔ́ nyi Mɔyízisɛ́n ɔ́ ɖě ó; yě má sɔ́ gbo ada nú vǐ yětɔn lɛ́ɛ ɖě ó, yě ma ka sɔ́ xwedó hwɛndo tɔ́gbó mǐtɔn lɛ́ɛ tɔn ɖě ó. Nɛ̌ mǐ ná wa gbɔn din? Đó dandan mɛ ɔ́, yě ná se ɖɔ a lɛ́ kɔ wá. Hǔn, bó bló nǔ e mǐ ná ɖɔ nú we ɔ́. Nya ɛnɛ ɖé lɛ́ɛ ɖo mǐ mɛ, bó ko dó akpá nú Mawu. Kplá yě, bónú hwi kpódó yě kpán mi ná yi slá wǔ; a nǎ sú akwɛ́ e mi ná zán ɖo fínɛ́ ɔ́ bǐ, bónú yě ná sixú xwlɛ́ ɖa; énɛ́ ɔ́, mɛ bǐ ná tunwun ɖɔ nǔ e è ɖɔ dó wú we ɔ́ ɖě kún nyí nǔgbó ó, bó ná mɔ ɖɔ hwi lɔ nɔ nyi Mɔyízisɛ́n lɛ́ɛ. Mɛ e ma nyí Jwifu ǎ, bó ka ɖi nǔ nú Jezu lɛ́ɛ ɔ́, mǐ kó wlán nǔ e mǐ kplé bó ɖɔ ɔ́ sɛ́ dó yě ɖɔ yě ní má ɖu nǔ e è xwlé vodún ɔ́ ɖě ó; yě ní má ɖu hun ó; yě ní má ɖu kanlin e è glɔ̌n agbɔ̌n ná bo hu lɛ́ɛ ɖě sín lan ó, yě ní má ka lɛ aga ó.” Énɛ́ ɔ́, Pɔ́lu kplá nya ɛnɛ énɛ́ lɛ́ɛ, bɔ ayǐhɔ́ngbe tɔn ɔ́, é slá wǔ xá yě, bó byɔ́ sinsɛnxɔ mɛ. É ɖɔ gbe e gbe wǔsláslá ɔ́ ná fó dó, bɔ è nǎ xwlé vɔ̌sánú Mawu dó ɖokpó ɖokpó yětɔn tamɛ é nú yě ɖo fínɛ́. Azǎn tɛ́nwe lɛ́ɛ wɛ ɖo ná vɔ wɛ kɛ́ɖɛ́, bɔ Jwifu Azíi gbé jí tɔn lɛ́ɛ wá mɔ Pɔ́lu ɖo sinsɛnxɔ ɔ́ mɛ, bó fɔ́n togun ɔ́ bǐ dó jǐ tɔn, lobo wlí i. Yě nɔ́ sú xó ɖɔ: “Izlayɛ́li ví lɛ́ɛ mi, mi wá lóóo! Nya e nɔ ɖɔ xó dó Izlayɛ́li togun ɔ́ wú, bó nɔ́ ɖɔ xó dó Mɔyízi sɛ́n ɔ́, kpódó sinsɛnxɔ élɔ́ kpó wú nú mɛ lɛ́ɛ bǐ gbɔn fí bǐ ɔ́ ɖíe! É tlɛ lɛ́ vɔ́ dɔn mɛ e ma nyí Jwifu ǎ lɛ́ɛ byɔ́ sinsɛnxɔ mɛ, bó ɖu su nú tɛn mímɛ́ élɔ́.” (Yě ɖɔ mɔ̌, ɖó yě ko mɔ Tlofímu Efɛ́zinu ɔ́ kpódó Pɔ́lu kpán ɖo toxo ɔ́ mɛ ɖ'ayǐ, bɔ yě vɛdó ɖɔ Pɔ́lu kplá ɛ byɔ́ sinsɛnxɔ ɔ́ mɛ wɛ sín.) Hunnyahunnya ɔ́ gba kpé to ɔ́ bǐ mɛ, bɔ mɛ lɛ́ɛ kán wezun sín awa lɛ́ɛ bǐ jǐ; yě wlǐ Pɔ́lu, bó dɔn ɛ tɔ́n sín sinsɛnxɔ ɔ́ mɛ, lobo dɔn hɔn lɛ́ɛ bǐ sú tlóló. Yě ɖo biba ná hu i wɛ, bɔ è wá ɖɔ nú ahwangán ɖaxó e kpa acɛ nú ahwankánɖó Hlɔ̌ma tɔn ɔ́ ɖɔ: “Jeluzalɛ́mu to ɔ́ bǐ xo zǐn.” Azɔn ɖokpó ɔ́, ahwangán ɖaxó ɔ́ kplá sɔ́ja lɛ́ɛ kpódó sɔ́ja kanwekogán lɛ́ɛ kpán, bó kplɔ́ dó mɛ lɛ́ɛ. Ée mɛ e ɖo Pɔ́lu xo wɛ lɛ́ɛ mɔ ahwangán ɔ́ kpódó sɔ́ja lɛ́ɛ kpán ɔ́, yě ɖó alɔ te. Ahwangán ɖaxó ɔ́ sɛ yá Pɔ́lu, bó ɖe gbe ɖɔ è ní wlǐ i, bó sɔ́ wlɔ we bó dó e; é kan mɛ e Pɔ́lu nyí ɔ́ kpódó nǔ e é wa ɔ́ kpó byɔ́. Lo ɔ́, mɛ lɛ́ɛ ɖě nɔ́ sú xó, bó nɔ́ ɖɔ ɖě, mɛ ɖěvo lɛ́ɛ nɔ́ ɖɔ vo. Ée ahwangán ɔ́ má sixú mɔ ta nú xó ɖé ɖo hunnyahunnya énɛ́ ɔ́ mɛ ǎ ɔ́, é ɖe gbe ɖɔ è nǐ kplá Pɔ́lu yi ahwankpá ɔ́ mɛ. Hwenu e Pɔ́lu wá kpekán lɛ́ɛ jí ɔ́, sɔ́ja lɛ́ɛ gbɔ bó sɔ́ ɛ dó kɔlivla mɛ, ɖó adǎn e jí mɛ lɛ́ɛ ɖe ɔ́ wútu, ɖó yě bǐ nyi ahwan jɛ gǔdo tɔn, bó nɔ́ ɖo xó sú wɛ ɖɔ: “È hu i, è hu i!” Ée yě ɖo Pɔ́lu ná kplá byɔ́ ahwankpá ɔ́ mɛ wɛ ɔ́, é kanbyɔ́ ahwangán ɖaxó ɔ́ ɖɔ: “Un hɛn ɔ́, un ná ɖɔ xó nú we a?” Ahwangán ɔ́ ka kanbyɔ́ ɛ ɖɔ: “A se Glɛ̌sigbe wɛ a? Hǔn hwi wɛ tlɛ nyí Ejípunu e nɔ nukɔn nú gǔfɔ́ndótojítɔ́ lɛ́ɛ, bó kplá mɛhutɔ́ děgba (4.000) yi gbětótló mɛ azǎn nabí ɖé ɖíe ɔ́ lɔ ǎ mɛ?” Pɔ́lu ka yí gbe n'i ɖɔ: “Jwifu wɛ nú mì; è ji mì ɖo Táasi ɖo Silisíi yíkúngban jí: to nukúnɖéjí ɖé sín vǐ wɛ un nyí; kɛnklɛ́n ná gbe mì, nú má ɖɔ xó nú togun ɔ́.” Ahwangán ɔ́ ka ná gbe tɔn ɛ, bɔ Pɔ́lu nɔ te ɖo kpekán lɛ́ɛ jí, bó bló alɔ nú togun ɔ́, bɔ mɛ bǐ xwɛ. Pɔ́lu ka wlí xó dó alamugbe mɛ, bó ɖɔ: “Nɔví ce lɛ́ɛ mi; tɔ́ ce lɛ́ɛ mi, mi ɖótó xó e un ɖó, bó ná ɖɔ nú mi din dó nǔ e sín hwɛ dó mì wɛ mi ɖe lɛ́ɛ wú é.” Ée yě mɔ ɖɔ alamugbe mɛ ɖɔ xó nú émí dó wɛ é ɖe ɔ́, yě bǐ lɛ́ cí tóó d'é jí, bɔ Pɔ́lu ɖɔ: “Jwifu wɛ nú mì; Táasi wɛ è ji mì ɖe, ɖo Silisíi gbé jí, Jeluzalɛ́mu fí wɛ un nɔ bo su; Gamaliyɛ́li wɛ nyí mɛ̌si ce; é kplɔ́n lě e è ɖǒ ná nyi tɔ́gbó mǐtɔn lɛ́ɛ sín sɛ́n gbɔn é mì céɖécéɖé. Un nɔ jɛ hun dó Mawu jǐ, lě e mi lɔ ɖo hun jɛ dó jǐ tɔn gbɔn wɛ éhɔ́nmɛ din é. Un ko dó ya nú yě mɛ e xwedó Aklúnɔ sín ali lɛ́ɛ, káká bɔ mɛ kú ɖo yě mɛ kpɔ́n; un ko wlí súnnu kpódó nyɔ̌nu kpán yi dó gankpá mɛ. Vɔ̌sánú-xwlémawutɔ́ ɖaxó ɔ́ kpódó kplékplé agunnukɔntɔ́ lɛ́ɛ tɔn kpán hɛn ɔ́, yě nǎ ɖe kúnnu nú mì ɖɔ nǔgbó wɛ un ɖɔ; un tlɛ yí wěma ɖo yě sí nú nɔví ce Jwifu e ɖo Damási lɛ́ɛ; fínɛ́ wɛ un xwe, bó ná wlí nǔɖitɔ́ e ɖo dɔ̌n lɛ́ɛ, lobo ná kplá yě wá Jeluzalɛ́mu, bónú è nǎ dɔn tó nú yě.” Un kanbyɔ́ ɛ ɖɔ: ‘Hwi mɛ̌ ká wɛ Aklúnɔ?’ Bɔ é ɖɔ nú mì ɖɔ: ‘Nyɛ Jezu Nazalɛ́ti tɔn e ɖe dó wɛ a ɖe ɔ́ wɛ.’ Mɛ e kpódó nyi kpó zɔ́n lɛ́ɛ mɔ wěziza ɔ́, yě ka se mɛ e ɖo xó ɖɔ nú mì wɛ ɔ́ sín gbe ǎ. Un ka lɛ́ kanbyɔ́ mɛ e ɖo xó ɖɔ nú mì wɛ ɔ́ ɖɔ: ‘Ani un ɖó ná wa Aklúnɔ?’ Aklúnɔ ɔ́ ká ɖɔ nú mì ɖɔ: ‘Sí te, yi Damási; a ko yi dɔ̌n ɔ́, è nǎ ɖɔ nǔ e Mawu ɖɔ hwi ná wa ɔ́ bǐ nú we.’ Lo ɔ́, wěziza ɔ́ sín hlɔ̌nhlɔ́n zɔ́n, bɔ un sɔ́ nɔ sixú mɔ nukúnnú ǎ, bɔ gbɛ̌ ce e kpódó nyi kpó zɔn lɛ́ɛ wɛ gbɔ bo hɛn alɔ ce káká bo kplá mì yi Damási. “Nya ɖé ka ɖo Damási fínɛ́, bɔ è nɔ ylɔ́ ɛ ɖɔ Ananíyasi; nya ɖé wɛ é nyí, lobo nɔ xwedó Mawusɛ́n, bó ɖó sísí nú Mawu, bɔ Jwifu e ɖo to ɔ́ mɛ lɛ́ɛ bǐ nɔ ɖɔ xó tɔn ɖagbe. Nya énɛ́ wá gɔ̌n ce, bó nɔ te ɖo akpá ce, bó ɖɔ nú mì ɖɔ: ‘Sólu, nɔví ce, nukún towe lɛ́ɛ ní hun, bónú a ní lɛ́ mɔ nukúnnú.’ Azɔn ɖokpó ɔ́, nukún ce lɛ́ɛ hun, bɔ un mɔ Ananíyasi. É ka ɖɔ: ‘Mawu tɔ́gbó mǐtɔn lɛ́ɛ tɔn ɔ́ ko sɔ́ we, bónú a na tunwun jló tɔn, bó ná mɔ mɛsɛntɔ́ Mawu tɔn hwɛjijɔnɔ ɖokpó géé ɔ́, bó ná se xó e na tɔ́n sín nu tɔn mɛ é. Đó a ɖǒ na nyí kúnnuɖetɔ́ tɔn, bó ná ɖɔ nǔ e a mɔ, bó se ɔ́, ɖo gbɛtɔ́ lɛ́ɛ bǐ nukɔn. Din ɔ́, étɛ́ nɔ te kpɔ́n wɛ a ka lɛ́ ɖe? Sí te, bónú è nǐ ylɔ́ nyǐkɔ tɔn dó lɛ yɛhwesin nú we, bó ná ɖe we sín hwɛ towe mɛ.’ ” “Ée un lɛ́ kɔ wá Jeluzalɛ́mu ɔ́, un wá ɖo ɖɛ xo wɛ gbe ɖokpó, ɖo sinsɛnxɔ mɛ, bó jɛ nǔ mɔ jí. Un mɔ Aklúnɔ, bɔ é ɖɔ nú mì ɖɔ jí: ‘Hwlɛ̌ndó, bó yá wǔ tɔ́n sín tomɛ fí, ɖó kúnnu e a nǎ ɖe nú mì ɖo fí ɔ́, to élɔ́ mɛ nu lɛ́ɛ ɖo nǔ ná ɖi ná wɛ ǎ.’ Un ka yí gbe ɖɔ jí: ‘Aklúnɔ, yě ka tunwun ganjí ɖ'ayǐ ɖɔ un ko nɔ gbɔn kplɔ́ngbasá lɛ́ɛ, bó nɔ́ zɔ́n bɔ è nɔ wlí mɛ e nɔ ɖi nǔ nú we lɛ́ɛ dó gankpá mɛ, bó nɔ́ xo yě. Hwenu e è ɖo kúnnuɖetɔ́ towe Etyɛ́ni hu wɛ ɔ́, nyɛ lɔ ɖo fínɛ́, bó yí gbe ná; nyɛ wɛ tlɛ yí mɛ e hu i lɛ́ɛ sín awu hɛn.’ Aklúnɔ ka ɖɔ nú mì ɖɔ: ‘Yi, ɖó fí línlín ná sɛ́ we dó wɛ un ɖe, ɖo mɛ e ma nyí Jwifu ǎ lɛ́ɛ gɔ́n.’ ” Mɛ lɛ́ɛ ɖótó Pɔ́lu káká jɛ fínɛ́, lo ɔ́, yě jɛ xó sú jí ɖɔ: “Mi bú nya énɛ́; mi hu i; é nyí mɛ bó ná nɔ gbɛ ǎ!” Yě ɖo xó sú wɛ, bó ɖo avɔ yětɔn lɛ́ɛ nyi dó jǐ wɛ, lobo ɖo kɔ́gúdu nyi dó jǐ wɛ; bɔ ahwangán ɖaxó ɔ́ ɖɔ è ní kplá Pɔ́lu byɔ́ ahwankpá ɔ́ mɛ, bó xo e, bó kan nǔ byɔ́ ɛ, nú é ná ɖɔ nǔ e wútu mɛ lɛ́ɛ ɖo xó sú dó jǐ tɔn wɛ sɔ mɔ̌ é. Ée yě blá Pɔ́lu, bó ɖo nǎ xó e wɛ ɔ́, é kanbyɔ́ sɔ́ja kanwekogán ɔ́ ɖɔ: “Sɛ́n ɔ́ ná gbe ɖɔ è ní xo Hlɔ̌ma toví ɖó lanbá wú ma to ɖó hwɛ n'i a?” Ée sɔ́ja kanwekogán énɛ́ se mɔ̌ ɔ́, é yi mɔ ahwangán ɖaxó Hlɔ̌manu ɔ́, bó ɖɔ n'i ɖɔ: “Étɛ́ ná dó sin wɛ a ka ɖe nɛ́? Nya ɔ́ Hlɔ̌manu wɛ hǔn.” Bɔ ahwangán ɖaxó Hlɔ̌manu ɔ́ wá Pɔ́lu gɔ́n, bó kanbyɔ́ ɛ ɖɔ: “Hlɔ̌manu wɛ a nyǐ nǔgbó a?” Pɔ́lu ka yí gbe ɖɔ: “Ɛɛn Hlɔ̌manu wɛ un nyí.” Bɔ ahwangán ɖaxó Hlɔ̌manu ɔ́ ɖɔ: “Nyɛ ɔ́, akwɛ́ mɔ̌kpán wɛ un zán, cóbɔ è wǎ xa mì dó Hlɔ̌manu lɛ́ɛ mɛ.” Pɔ́lu ka ɖɔ: “Nyɛ ɔ́, Hlɔ̌ma ví jiji wɛ un nyí.” Tlóló ɔ́, mɛ e ko ɖo nǎ xo e wɛ lɛ́ɛ bǐ yá wǔ jó agɔ yi gǔdo bléwún. Xɛsi jɛ ahwangán ɖaxó Hlɔ̌manu ɔ́ ɖésú jí, ɖó é wá mɔ ɖɔ Hlɔ̌ma toví wɛ émí zɔ́n bɔ è blǎ. Ayǐhɔ́ngbe tɔn ɔ́, ahwangán ɖaxó Hlɔ̌manu ɔ́ jló ná tunwun nǔ e sín hwɛ dó Pɔ́lu wɛ Jwifu lɛ́ɛ ɖe tawun ɔ́; é zɔ́n bɔ è tun i, lobo zɔ́n, bɔ è kplé vɔ̌sánú-xwlémawutɔ́gán lɛ́ɛ kpódó toxóɖɔtɔ́ lɛ́ɛ kpó, bɔ é kplá Pɔ́lu, bó sɔ́ ɛ ɖó nukɔn yětɔn. Pɔ́lu bɔ nukún nyi toxóɖɔtɔ́ lɛ́ɛ wú, bó ɖɔ: “Nɔví ce lɛ́ɛ mi, ayi ce xo hun xá mì ɖo nǔ ɖěbǔ mɛ ɖo Mawu nukɔn káká jɛ égbé ǎ.” Vɔ̌sánú-xwlémawutɔ́ ɖaxó Ananíyasi ka ɖɔ nú mɛ e ɖo Pɔ́lu kpá lɛ́ɛ ɖɔ yě ní gba nu n'i, bɔ Pɔ́lu ɖɔ n'i ɖɔ: “Hwi mɛ e kwíji ɖo ayi mɛ, bó ka ɖo mɛ mímɛ́ bló wɛ ɖo wěxo ɔ́, dǒglin e è sá nǔ wěwé dó ɔ́ ɖɔhun wɛ a cí; Mawu wɛ ná xo we; a jínjɔ́n ayǐ, bó jló ná ɖɔ hwɛ xá mì lě e sɛ́n ɔ́ zɔ́n gbɔn é; sɛ́n ɔ́ ka zɔ́n ɖɔ è xo mì ǎ, bɔ hwɛ ka zɔ́n ɖɔ è ní xo mì.” Mɛ e ɖo Pɔ́lu kpá lɛ́ɛ ka ɖɔ: “A zun vɔ̌sánú-xwlémawutɔ́ ɖaxó ɔ́!” Pɔ́lu ka yí gbe ɖɔ: “Nɔví ce lɛ́ɛ mi, un tunwun ɖɔ vɔ̌sánú-xwlémawutɔ́ ɖaxó wɛ ǎ; ɖó è ko wlán ɖɔ: ‘Ma ɖɔ xó nyanya dó togán towe wú ó.’ ” Ée Pɔ́lu ka mɔ ɖɔ, ɖo toxóɖɔgbɛ́ ɔ́ mɛ ɔ́, mɛ ɖě nyí Saduseɛn, mɛ ɖě ka nyí Falizyɛn ɔ́, é sú xó ɖo toxóɖɔgbɛ́ ɔ́ tɛ́ntin, bó ɖɔ: “Nɔví ce lɛ́ɛ mi, nyɛ ɔ́, Falizyɛn gbɛ́ta ɔ́ mɛ wɛ un ɖe, bó ka lɛ́ nyí Falizyɛn ví jiji. Fínfɔ́n mɛkúkú lɛ́ɛ tɔn e ɖó nukún wɛ un ɖe ɔ́ wútu wɛ è ɖo hwɛ ɖɔ xá mì wɛ.” Ée é ɖɔ mɔ̌ ɔ́, nǔdindɔn byɔ́ Falizyɛn lɛ́ɛ kpódó Saduseɛn lɛ́ɛ kpó tɛ́ntin, bɔ agun ɔ́ klán. (Đó Saduseɛn lɛ́ɛ nɔ ɖɔ mɛkúkú lɛ́ɛ kún ɖo ná fɔ́n wɛ ɖě ó; wɛnsagun ɖě kún tíin ó; yɛ ɖě kún ka tíin ó; Falizyɛn lɛ́ɛ ka nɔ ɖi nǔ nú nǔ énɛ́ lɛ́ɛ bǐ.) Énɛ́ ɔ́, xósúsú ɔ́ lɛ́ syɛ́n d'é jí; Falizyɛn sɛ́nkplɔ́nmɛtɔ́ ɖé lɛ́ɛ sí te, bó gbɛ́ gbídígbídí ɖɔ jí: “Mǐ mɔ nǔ e nya élɔ́ wa nyi do ɔ́ ǎ; é sixú nyí ɖɔ yɛ ɖé abǐ wɛnsagun ɖé wɛ ná ko ɖɔ xó n'i.” Zǐngídi ɔ́ ka wá ɖo syɛ́nsyɛ́n d'é jí wɛ, bɔ ahwangán ɖaxó ɔ́ jɛ xɛsi ɖi jí ɖɔ yě ma wá vúnvún Pɔ́lu ó, énɛ́ ɔ́ wú wɛ é ylɔ́ sɔ́ja lɛ́ɛ, bó zɔ́n ɖɔ yě ní wá ɖe Pɔ́lu sín mɛ lɛ́ɛ mɛ, bó kplá ɛ yi ɖó ahwankpá ɔ́ mɛ. Gbe énɛ́ gbe zǎn mɛ ɔ́, Aklúnɔ tɔ́n dó Pɔ́lu jí, bó ɖɔ n'i ɖɔ: “Kpan akɔ́n; a ɖe kúnnu nú mì ɖo Jeluzalɛ́mu fí; mɔ̌ ɖokpó ɔ́, a nǎ lɛ́ ɖe nú mì ɖo Hlɔ̌ma.” Ée ayǐ ka wá hɔ́n ɔ́, Jwifu lɛ́ɛ blá gbě; yě ɖɔ, bó xwlé nǔ d'é jí ɖɔ, émí ma hu Pɔ́lu ǎ ɔ́, émí kún ná ɖu nǔ ɖěbǔ ó, émí kún ka ná nu sin ó. Yě mɛ e blá gbě énɛ́ ɔ́ hú gbɛtɔ́ kanɖé (40). Yě yi mɔ vɔ̌sánú-xwlémawutɔ́gán lɛ́ɛ kpódó agunnukɔntɔ́ lɛ́ɛ kpán, bó ɖɔ nú yě ɖɔ: “Mǐ ɖó gbe kpɔ́, bó xwlé nǔ d'é jí ɖɔ mǐ ma hu Pɔ́lu ǎ ɔ́, mǐ kún ná ɖu nǔ ó. Hǔn din ɔ́, midɛɛ lɛ́ɛ kpódó toxóɖɔgbɛ́ lɛ́ɛ kpó ní byɔ́ ahwangán ɖaxó ɔ́ ɖɔ ní kplá Pɔ́lu wá nú émí; mi ná ɖɔ n'i ɖɔ émí jló ná gbéjé xó tɔn kpɔ́n céɖécéɖé. Cóbónú é ná wá mi gɔ́n ɔ́, mǐdɛɛ lɛ́ɛ ɔ́, mǐ nǎ ko ɖo gbesisɔ mɛ bó ná hu i ɖo alixo.” Pɔ́lu sín nɔví nyɔ̌nu sín vǐ súnnu ɖokpó ka se gbě e blá dó nylɔ́ tɔn wú wɛ yě ɖe ɔ́, bó yi gɔ̌n tɔn ɖo ahwankpá ɔ́ mɛ, lobo wlí ɖɔ n'i. Pɔ́lu ka ylɔ́ sɔ́ja lɛ́ɛ sín gǎn ɖokpó, bó ɖɔ n'i ɖɔ: “Kplá nyaví élɔ́ yi ahwangán ɖaxó ɔ́ gɔ́n; é ɖó xó ɖé ná ɖɔ n'i.” Sɔ́jagán ɔ́ ka kplá nyaví ɔ́ yi ahwangán ɖaxó ɔ́ gɔ́n, bó ɖɔ n'i ɖɔ: “Gantɔ́ Pɔ́lu wɛ ylɔ́ mì, bó sɔ́ nyaví élɔ́ dó alɔ mɛ nú mì ɖɔ ma kplá ɛ wá nú we, ɖó é jló ná ɖɔ xó ɖé nú we.” Ahwangán ɖaxó ɔ́ ka hɛn nyaví ɔ́ sín alɔ, bó kplá ɛ jɛ vo, bó kanbyɔ́ ɛ ɖɔ: “Étɛ́ a jlǒ ná ɖɔ nú mì?” Nyaví ɔ́ ka yí gbe ɖɔ: “Jwifu lɛ́ɛ ɖó gbe kpɔ́, bó ná byɔ́ we ɖɔ hwi ní kplá Pɔ́lu wá toxóɖɔgbɛ́ ɔ́ nukɔn sɔ, ɖi nǔ yě jló ná vɔ́ xó tɔn gbéjé kpɔ́n ganjí ɖɔhun. Ma ka ɖótó xó yětɔn ó; ɖó mɛ yětɔn kanɖé (40) jɛjí ná tɔwu n'i. Mɛ énɛ́ lɛ́ɛ ko ɖɔ, bó xwlé nǔ d'é jí ɖɔ émí ma hu Pɔ́lu ǎ ɔ́, émí kún ná ɖu nǔ ó, émí kún ka ná nu sin ó; yě bǐ wɛ kó ɖo gbesisɔ mɛ din; gbeníná towe kɛ́ɖɛ́ jɛ́n kpo.” Ahwangán ɖaxó ɔ́ ka nyi nyaví ɔ́ sɛ́ dó xwé, bó dó sɛ́n n'i ɖɔ mɛɖé ní ma se nǔ e é wá ɖɔ nú émí din ɔ́ ɖo nu tɔn ó. Ahwangán ɖaxó ɔ́ ka wá ylɔ́ sɔ́ja kanwekogán we, bó ɖɔ nú yě ɖɔ: “Mi kplé sɔ́ja afɔɖé (200), sɔ́ja sɔ́xátɔ́ kanɖé gban (70), kpódó sɔ́ja e nɔ hɛn hwǎn lɛ́ɛ afɔɖé (200) kpán ɖó te. Mi ná gosín fí gan tɛ́nnɛ mɛ zǎn mɛ, bó ná hun káká yi Sezalée. Mi blá akpa nú sɔ́ ɖé lɛ́ɛ ɖ'ayǐ nú Pɔ́lu lɔmɔ̌, bó kplá ɛ yi tokpɔngán Felísi gɔ́n wǔyɛ́yɛ́ afɔyɛ́yɛ́.” É ka wlán wěma ɖokpó sɛ́ dó tokpɔngán ɔ́, bó ɖɔ d'é mɛ ɖɔ: “Nyɛ Klódiwusi Lisiyási ɔ́, un ɖo gbe dó sɛ́ dó mɛsísí ce tokpɔngán Felísi wɛ. Nya élɔ́ e un sɛ́ dó we ɔ́, Jwifu lɛ́ɛ wɛ wlí i, bó ɖo nǎ hu i wɛ, bɔ nyɛ kpódó ahwan ce lɛ́ɛ kpó yi tɛn tɔn mɛ, bó yí i sín alɔ yětɔn mɛ, ɖó un se ɖɔ Hlɔ̌manu wɛ. Un jló ná ba do nú xó ɔ́, bó ná tunwun nǔ e sín hwɛ dó e wɛ yě ɖe tawun ɔ́, bó kplá ɛ yi toxóɖɔgbɛ́ yětɔn nukɔn. Un wá mɔ ɖɔ nǔɖé lɛ́ɛ wú dó hwɛ ɛ dó wɛ yě ɖe, ɖo sɛ́n yětɔn mɛ. Lo ɔ́, nǔ e na zɔ́n bɔ è nǎ ɖó kúhwɛ n'i, abǐ è nǎ wlí i dó gankpá mɛ ɔ́, un mɔ ɖě ɖo wǔ tɔn ǎ. Ée è lɛ́ wá ɖɔ nú mì ɖɔ Jwifu lɛ́ɛ blá gbě tɔn ɔ́, un yǎ wǔ bo sɛ́ ɛ dó we, bó ka ɖɔ nú mɛ e ɖo hwɛ dó e wɛ lɛ́ɛ azɔn ɖokpó ɖɔ yě ní wá ylɔ́ hwɛ ɛ ɖo gɔ̌n towe.” Sɔ́ja lɛ́ɛ ka bló nǔ e è zɔ́n yě lɛ́ɛ, bó kplá Pɔ́lu yi Antipatlisi zǎn énɛ́ mɛ. Ayǐhɔ́ngbe tɔn ɔ́, sɔ́ja e zɔn afɔ bo ɖo yě nyi wɛ lɛ́ɛ lɛ́ kɔ wá yi ahwankpá ɔ́ mɛ, bɔ yě mɛ e xá sɔ́ lɛ́ɛ kplá Pɔ́lu hɛn yi to ɔ́ mɛ. Ée sɔ́xátɔ́ lɛ́ɛ yi Sezalée ɔ́, yě sɔ́ wěma ɔ́ nú tokpɔngán ɔ́, lobo kplá Pɔ́lu jó n'i. Tokpɔngán ɔ́ ka xa wěma ɔ́, bó kan tokpɔn e mɛ nu Pɔ́lu nyí ɔ́ byɔ́. Ée é se ɖɔ Silisíinu wɛ é nyí ɔ́, é ɖɔ n'i ɖɔ: “Mɛ e ɖo hwɛ dó we wɛ lɛ́ɛ ko wá ɔ́, un ná kan nǔ byɔ́ we.” Énɛ́ gúdo ɔ́, é ná gbe ɖɔ è ní sɔ́ ɛ dó axɔ́sú Elódu sín hɔnmɛ, bó cɔ́ ɛ. Azǎn atɔ́ɔ́ngɔ́ ɔ́ gbe ɔ́, vɔ̌sánú-xwlémawutɔ́ ɖaxó Ananíyasi kpódó tomɛxó ɖé lɛ́ɛ kpó, kpódó ɖɛ̌mɛɖenúxótɔ́ e è nɔ ylɔ́ ɖɔ Tɛtulúsi é kpán wá Sezalée, bó wá jɛ Pɔ́lu sín hwɛ nú tokpɔngán ɔ́. Tokpɔngán ɔ́ ka ylɔ́ Pɔ́lu wá, bɔ Tɛtulúsi wlí xó, bó jɛ hwɛ dó Pɔ́lu jí ɖɔ: “Mɛsísí ce Felísi, hwi wɛ nyí mɔ̌, bɔ mǐ mɔ vivo; nǔnywɛ́ e a dǒ ɖo to élɔ́ sín azɔ̌ wa ná wɛ ɔ́ wɛ zɔ́n bɔ nǔ gěgé húzú nú nukɔn yiyi to ɔ́ tɔn. Mǐ tunwun nǔ énɛ́ lɛ́ɛ bǐ nú we hwebǐnu, ɖo fí bǐ, bó ɖo kú tɔn dó nú we wɛ tlala. Lo ɔ́, un jló ná yí hwenu towe gěgé ǎ, énɛ́ ɔ́ wútu wɛ un ɖo kɛnklɛ́n dó nú we wɛ, ɖɔ a ní nyɔ̌ xomɛ, bó ɖótó xó e ɖɔ nú we gbé un ja ɔ́ ɖo kléwún mɛ. Nya élɔ́ ɔ́, mǐ mɔ ɖɔ azɔn nyanya ɖé wɛ é nyí; é nɔ́ dó avaja Jwifu e ɖo gbɛ ɔ́ mɛ lɛ́ɛ bǐ mɛ; sinsɛngbɛ́ Nazalɛ́tinu lɛ́ɛ tɔn sín gǎn wɛ. É tlɛ lɛ́ jló ná ɖu su nú sinsɛnxɔ ɔ́, bɔ mǐ wlí i, [bó jló ná ɖɔ hwɛ xá ɛ lě e sɛ́n mǐtɔn zɔ́n gbɔn é. Lo ɔ́, ahwangán ɖaxó Lizyási yí i sín mǐ sí kpó hlɔ̌nhlɔ́n kpó, bó ɖɔ mɛ e ɖo hwɛ dó e wɛ lɛ́ɛ ní wá jɛ hwɛ nú we.] Hwi ɖésúnɔ kó kan nǔ byɔ́ ɛ ɔ́, a nǎ mɔ ɖɔ nǔ e mǐ ɖɔ dó wǔ tɔn ɔ́ bǐ wɛ nyí nǔgbó.” Jwifu lɛ́ɛ ka nɔ xó e Tɛtulúsi ɖɔ ɔ́ jí, bó ɖɔ nǔ nyí mɔ̌ nǔgbó. Tokpɔngán ɔ́ ka jó xó nú Pɔ́lu, bɔ é wlí xó bo ɖɔ: “Un tunwun ɖɔ a ɖo gǎn ɖu wɛ ɖo to élɔ́ nu din ɔ́, xwe tɔn ko sɛ yi; énɛ́ ɔ́ wú wɛ un ɖeji, bó ná gblɔ́n xó nú mɛ e ɖo hwɛ dó mì wɛ lɛ́ɛ. Un yi Aklúnɔ sɛn gbé ɖo Jeluzalɛ́mu din ɔ́, é sɔ́ hú azǎn wěwe ǎ; hwi ɖésúnɔ hɛn ɔ́, a nǎ ba do ná. È mɔ mì bɔ un ɖo nǔ dɔn xá mɛ ɖěbǔ wɛ ɖo sinsɛnxɔ mɛ ǎ, è ka mɔ mì bɔ un fɔ́n hun dó jǐ nú togun ɔ́ ɖo kplɔ́ngbasá lɛ́ɛ, abǐ fí ɖěvo ɖo toxo ɔ́ mɛ ǎ. Nǔ e sín hwɛ dó mì wɛ yě ka ɖe din ɔ́, yě sixú ɖɔ xó ɖé, bó ná ɖe xlɛ́ we ɖɔ nǔgbó wɛ ǎ. Amɔ̌, un yí gbe nú yě ɖɔ jí Mawu e tɔ́gbó mǐtɔn lɛ́ɛ nɔ sɛn ɔ́ sɛn wɛ un ɖe gbɔn ali yɔ̌yɔ́ e yě ɖɔ é kún sɔgbe ó é jí; lo ɔ́, nǔ e è wlán dó sɛ́nwéma ɔ́ mɛ lɛ́ɛ kpódó nǔ e gbeyíɖɔ Mawu tɔn lɛ́ɛ ɖɔ lɛ́ɛ kpán ɔ́, un ɖi nǔ nú bǐ sésé. Un ka ɖo nukún ɖó Mawu wɛ, lě e yě lɔmɔ̌ ɖo nukún ɖó e wɛ gbɔn é. Mawu ná wá fɔ́n mɛ ɖagbe lɛ́ɛ, kpódó mɛ nyanya lɛ́ɛ kpó sín kú. Énɛ́ ɔ́ wú wɛ un nɔ dó gǎn, bónú ayi ce ma xo hun xá mì ɖo nǔ ɖěbǔ mɛ, ɖo Mawu kpódó gbɛtɔ́ lɛ́ɛ kpán nukɔn ó. “Hwenu e un yi xɔ xwe mɔ̌kpán ɖo gbějí, bó lɛ́ kɔ wá Jeluzalɛ́mu ɔ́, un hɛn akwɛ́ bó ná dó dó alɔ mɛ ce lɛ́ɛ, bó ná lɛ́ xwlé vɔ̌sánú Mawu. Nǔ énɛ́ ɔ́ kɔn wɛ un ɖe ɖo sinsɛnxɔ mɛ, bɔ Jwifu lɛ́ɛ wá mɔ mì; un ko slá wǔ nɛ́; ahwan ɖé ɖo fínɛ́ ǎ; zǐngídi ɖé ka tíin ǎ, lo ɔ́, ényí Jwifu Azíi tɔn lɛ́ɛ ko mɔ nǔɖé ná ɖɔ dó wú ce wɛ ɔ́, yě wɛ ná kó wá gɔ̌n towe, bó jɛ hwɛ ce nú we. Abǐ, mɛ e ɖo fí din lɛ́ɛ ɔ́, yědɛɛ lɛ́ɛ ní bo ɖɔ nǔ nyanya e un dó sin bɔ yě mɔ bo ɖɔ hwenu e un ɖo toxóɖɔgbɛ́ ɔ́ nukɔn é. Xó ɖokpó e un nɔ te ɖo nukɔn yětɔn, bó ɖɔ bɔ yě hɛn ɔ́, yě ná ɖɔ ɔ́ ɖíe: ‘Un ɖi nǔ ɖɔ mɛkúkú lɛ́ɛ ná fɔ́n wú wɛ è ɖo hwɛ dó mì wɛ ɖo nukɔn mitɔn égbé.’ ” Felísi ɔ́ ka mɔ nǔ jɛ Aklúnɔ sín ali ɔ́ wú ganjí. É sɛ hwɛɖɔzán ɔ́ dó nukɔn, bó ɖɔ nú yě ɖɔ: “Ényí ahwangán ɖaxó Lisiyási ko wá ɔ́, un ná gbéjé xó mitɔn kpɔ́n.” É ka ɖɔ nú sɔ́jagán ɔ́ ɖɔ é ní cɔ́ Pɔ́lu bó ka ná ɛ vivo, bó ná gbe xɔ́ntɔn tɔn lɛ́ɛ, nú yě ní nɔ wá gɔ́ alɔ n'i. Azǎn ɖé jɛ ǎ, bɔ Felísi wá, é kpódó asi tɔn Dlusíla e nyí Jwifu ɔ́ kpán. É zɔ́n, bɔ è ylɔ́ Pɔ́lu wá, bɔ é ɖótó xó e Pɔ́lu ɖɔ dó nǔɖiɖi ɖó nú Jezu Klísu wú é. Lo ɔ́, ée Pɔ́lu ɖo xó ɖɔ dó lě e è nǎ zán gbɛ ɖagbe gbɔn é wú wɛ, bó ɖo xó ɖɔ dó lě e è nǎ ɖu ɖo mɛ ɖésúnɔ jí gbɔn é wú wɛ, bó lɛ́ ɖo xó ɖɔ dó lě e Mawu na wá ɖɔ hwɛ xá gbɛtɔ́ lɛ́ɛ gbɔn ɔ́ wú wɛ ɔ́, xɛsi jɛ Felísi jí, bɔ é ɖɔ nú Pɔ́lu ɖɔ: “To yi hwɛ̌; un ko wá mɔ vivo ɔ́, un ná lɛ́ ylɔ́ we.” É ɖo akwɛ́ lɔmɔ̌ ɖó nukún wɛ ɖo Pɔ́lu sí; énɛ́ wútu wɛ é nɔ zɔ́n, bɔ è nɔ ylɔ́ ɛ wá n'i hwɛhwɛ, bɔ yě nɔ ɖɔ xó. Xwe we gúdo ɔ́, Pɔsiwusi Fɛsitúsi wá ɖyɔ́ Felísi. Felísi ka jló ná wa nǔ, bó ná dó xomɛhunhun nú Jwifu lɛ́ɛ, bó jó Pɔ́lu dó nyi gankpá mɛ. Ée Fɛsitúsi wá Sezalée ɔ́, azǎn tɔn atɔngbe ɔ́, é gosín fínɛ́ bó yi Jeluzalɛ́mu. Vɔ̌sánú-xwlémawutɔ́gán ɔ́, kpódó Jwifugán lɛ́ɛ kpán ka kplé bo yi jɛ Pɔ́lu sín hwɛ̌ nú Fɛsitúsi, bó byɔ́ ɛ ɖɔ é ní nyɔ́ xomɛ dó émí wú, bó sɛ́ Pɔ́lu dó Jeluzalɛ́mu. Yě ɖɔ mɔ̌ ɖó yě ko blá gbě tɔn, bó jló ná hu i ɖo alixo. Lo ɔ́, Fɛsitúsi yí gbe nú yě ɖɔ Pɔ́lu ɖo gankpá mɛ ɖo Sezalée, émí ɖésúnɔ ka ná yi dɔ̌n ɖo malín málín mɛ. É ka lɛ́ ɖɔ: “Ényí nya énɛ́ wa nǔɖé nyi do hǔn, gǎn mitɔn lɛ́ɛ ní bó xwedó mì yi Sezalée, bó ná yi dó hwɛ ɛ.” Azǎn tántɔn, abǐ azǎn wǒ jɛ́n Fɛsitúsi nɔ yě gɔ̌n xɔ, bó lɛ́ kɔ yi Sezalée. Ayǐhɔ́ngbe tɔn ɔ́, é wá jínjɔ́n hwɛɖɔxɔsá, bó ɖɔ è nǐ kplá Pɔ́lu wá. Ée Pɔ́lu ka wá ɔ́, Jwifu e gosín Jeluzalɛ́mu bó wá lɛ́ɛ lɛ́ lɛ̌ dó e, bó jɛ hwɛ ɖaxó ɖaxó gěgé lɛ́n dó kɔ n'i jí; lo ɔ́, yě sixú ɖe xlɛ́ ɖɔ nǔgbó wɛ ǎ. Pɔ́lu ka jɛ xó ɖɔ dó ba hwɛjijɔ nú éɖée jí ɖɔ: “Un jɛ agɔ ɖé dó Jwifu lɛ́ɛ sín sɛ́n wú ǎ; un ka jɛ dó sinsɛnxɔ ɔ́ wú ǎ; mɔ̌ jɛ́n un ma lɛ́ jɛ dó Dadá Hlɔ̌ma tɔn wú ǎ é nɛ́.” Ée Fɛsitúsi ká jló ná wa nǔ bó ná dó xomɛhunhun nú Jwifu lɛ́ɛ ɔ́, é kanbyɔ́ Pɔ́lu ɖɔ: “A jló ná yi Jeluzalɛ́mu, nú è nǎ yi ɖɔ hwɛ xá we ɖo nukún ce mɛ a?” Pɔ́lu ka yí gbe ɖɔ: “Hwɛɖɔxɔsá ɖaxó wɛ un ná yi ɖo Dadá Hlɔ̌ma tɔn nukɔn; fínɛ́ wɛ è ɖǒ ná ɖɔ hwɛ xá mì ɖe; un wa nǔɖé dó Jwifu lɛ́ɛ ǎ; hwi ɖésúnɔ mɔ nǔ jɛ wú ganjí. Ényí un wa nǔɖé nyi do nǔgbó, bɔ nǔ énɛ́ ɔ́ byɔ́ ɖɔ è nǐ hu mì ɔ́, un gbɛ́ kú ǎ. Amɔ̌, ényí hwɛ e dó mì wɛ mɛ nɛ́ lɛ́ɛ ɖe ɔ́ ɖě ma ka nyí nǔgbó ǎ ɔ́, mɛ ɖěbǔ ɖó acɛ e jó mì nú yě ɔ́ ǎ. Hǔn un ylɔ́ hwɛ ɖaxó ɖo Dadá Hlɔ̌ma tɔn gɔ́n.” Fɛsitúsi kpódó toxóɖɔtɔ́ tɔn lɛ́ɛ kpán ka wá yi kpá, bɔ é wá ɖɔ nú Pɔ́lu ɖɔ: “A ylɔ́ hwɛ ɖaxó ɖo Dadá Hlɔ̌ma tɔn gɔ́n. Hǔn a nǎ yi Dadá Hlɔ̌ma tɔn ɔ́ gɔ́n.” Ée azǎn ɖé jɛ wa yi ɔ́, axɔ́sú Aglipa kpódó asi tɔn Belenísi kpán wá Sezalée, bó ná ɖɔ nǔ dó Fɛsitúsi. Ée yě ɖo to ɔ́ mɛ fínɛ́ xɔ azǎn gěgé ɔ́, Fɛsitúsi wá ɖó Pɔ́lu sín xó ɔ́ te nú axɔ́sú ɔ́; é ɖɔ n'i ɖɔ: “Nya ɖé ɖo fí, bɔ tokpɔngán Felísi jó e nyi gankpá mɛ. Hwenu e un yi Jeluzalɛ́mu ɔ́, vɔ̌sánú-xwlémawutɔ́gán lɛ́ɛ kpódó Jwifu tomɛxó lɛ́ɛ kpán wá jɛ hwɛ tɔn nú mì, bó byɔ́ ɖɔ ma ɖó hwɛ n'i. Un ka yí gbe nú yě ɖɔ cóbónú Hlɔ̌manu lɛ́ɛ ná jó mɛɖé ɔ́, mɛ e ɖo hwɛ dó e wɛ lɛ́ɛ ɖó ná jɛ hwɛ tɔn ɖo mɛ ɔ́ ɖésúnɔ nukɔn, bónú é ná mɔ tɛn, bó ɖɔ xó dó ba hwɛjijɔ nú éɖée hwɛ̌. Énɛ́ ɔ́, yě xwedó mì wá fí; un sɔ́ nɔ te ǎ; ayǐhɔ́ngbe tɔn jɛ́n un yi jínjɔ́n hwɛɖɔzinkpo ce jí, bó ɖɔ è ní kplá nya ɔ́ hɛn wá. Yě mɛ e ɖo hwɛ dó e wɛ lɛ́ɛ sí te, bó dó hwɛ ɛ; lo ɔ́, nǔ nyanya e un vɛdó ɖɔ yě na ɖɔ é dó sin lɛ́ɛ ɔ́, yě ɖɔ ɖěbǔ ǎ. Nǔɖé dɔn xá ɛ wɛ jɛ́n yě ɖe kpowun; yě ɖo nǔ dɔn xá ɛ wɛ dó sinsɛn yě ɖésúnɔ tɔn wú, bó ɖo nǔ dɔn xá ɛ wɛ dó nya e è nɔ ylɔ́ ɖɔ Jezu ɔ́ wú. Nya énɛ́ ko kú; Pɔ́lu ka ɖɔ é ɖo gbɛ. Ée un ma tunwun lě e un ná ɖɔ xó énɛ́ lɛ́ɛ gbɔn ǎ é ɔ́, un kanbyɔ́ Pɔ́lu ɖɔ é jló ná yi Jeluzalɛ́mu, bɔ è nǎ yi ɖɔ hwɛ tɔn ɖo dɔ̌n a jí; lo ɔ́, Pɔ́lu ylɔ́ hwɛ ɖaxó: é byɔ́ ɖɔ è ní bo ɖo émí cɔ́ wɛ káká jɛ hwenu e Dadá ɔ́ ná ɖe gbeta ɖé tɔ́n dó xó émítɔn wú é; énɛ́ ɔ́ wú ɔ́, un ná gbe ɖɔ è ní cɔ́ ɛ káká yi jɛ hwenu e un ná sɛ́ ɛ dó Dadá ɔ́ gɔ́n é.” Énɛ́ ɔ́, Aglipa ɖɔ nú Fɛsitúsi ɖɔ: “Nyɛ ɖésúnɔ ɔ́, un jló ná se xó ɖé ɖo nya énɛ́ nu.” Fɛsitúsi ka yí gbe n'i ɖɔ: “Sɔ ko su ɔ́, a na se xó tɔn.” Ayǐhɔ́ngbe tɔn ɔ́, Aglipa kpódó asi tɔn Belenísi kpán wá, bɔ ahwangán lɛ́ɛ kpódó tonukún lɛ́ɛ kpán kplá yě wa yi, bɔ yě byɔ́ hwɛɖɔxɔ ɔ́ sá kpódó yɛ̌yi kpán. Fɛsitúsi ná gbe bɔ è kplá Pɔ́lu wá. Fɛsitúsi ɖɔ: “Axɔ́sú Aglipa kpódó mi mɛ e ɖo fí lɛ́ɛ é bǐ kpán; nya e sín hwɛ wɛ Jwifu lɛ́ɛ bǐ jɛ nú mì ɖo Jeluzalɛ́mu, bó ka lɛ́ wá jɛ nú mì ɖo fí, bó sú xó syɛ́nsyɛ́n ɖɔ è ma ɖó e gbɛ ó ɔ́, nya ɔ́ ɖíe. Nyɛ ka mɔ ɖɔ é kún wa nǔɖé nyi do bónú è nǎ hu i ó. Lo ɔ́, ée é ɖésúnɔ ko ylɔ́ hwɛ ɖaxó ɖo Dadá Hlɔ̌ma tɔn gɔ́n ɔ́, énɛ́ ɔ́ wú wɛ un ɖe gbeta tɔ́n ɖɔ un ná sɛ́ ɛ dó gɔ̌n tɔn. Un ɖó nǔɖé tawun bó ná wlán dó wǔ tɔn sɛ́ dó Dadá ɔ́ ǎ. Énɛ́ ɔ́ wú wɛ un ylɔ́ ɛ wá nukɔn mitɔn, ɖo tají ɔ́, hwi axɔ́sú Aglipa nukɔn, bónú è ko kan nǔ byɔ́ ɛ ɔ́, ma mɔ nǔɖé wlán sɛ́ dó. Đó nyɛ mɔ ɖɔ è sɛ́ gantɔ́ ɖé dó mɛ, bó ma ka ɖɔ nǔ e é wa ɔ́ dó jǐ tɔn ǎ ɔ́, é kún sɔgbe ó.” Aglipa ka ɖɔ nú Pɔ́lu ɖɔ: “A ɖó xó ɖé ná ɖɔ, bó ná dó ba hwɛjijɔ nú hwiɖée hǔn, bó ɖɔ; un ná gbe tɔn we.” Pɔ́lu ka dlɛ́n alɔ, bó wlí xó, bó ɖɔ: “Axɔ́sú Aglipa, é víví nú mì tlala, bɔ nǔ e sín hwɛ dó mì wɛ Jwifu lɛ́ɛ ɖe ɔ́, má sixú ɖɔ xó dó ba hwɛjijɔ nú nyɛɖée ɖo nukɔn towe égbé; ɖó a mɔ nǔ jɛ Jwifu lɛ́ɛ sín hwɛndo wú ganjí, bó tunwun nǔ e yě nɔ dɔn xá yěɖée lɛ́ɛ. Énɛ́ wú ɔ́, kɛnklɛ́n ɖǒ suúlu, bó ɖótó mì. “Lě e un zán gbɛ ce gbɔn sín wǐnnyáwínnyá mɛ ce, lě e un nɔ togun ce tɛ́ntin gbɔn sín hwenu e è ji mì ɔ́, lě e un nɔ Jeluzalɛ́mu gbɔn é ɖésú ɔ́, Jwifu lɛ́ɛ bǐ wɛ tunwun. Yě tunwun mì din ɔ́, é ko lín, bɔ ényí yě jló wɛ ɔ́, yě ná ɖe kúnnu nú mì ɖɔ un nyí gbɛ̌ví sinsɛngbɛ́ e syɛ́n hú ɖě lɛ́ɛ bǐ ɔ́ tɔn. Sinsɛngbɛ́ énɛ́ ɔ́ wɛ nyí Falizyɛn lɛ́ɛ tɔn. Akpá e Mawu dó nú tɔ́gbó mǐtɔn lɛ́ɛ, bɔ un ɖo nukún ɖó wɛ ɔ́, é wútu wɛ è ɖo hwɛ ɖɔ xá mì wɛ din. Akɔta mǐtɔn wěwe lɛ́ɛ lɔ ɖo nukún ɖó akpá énɛ́ sín ɖiɖe wɛ, bó nɔ́ ván kan bó nɔ́ sɛn Mawu kpódó lǐnsyɛ́nsyɛ́n kpán zǎn kéze. Axɔ́sú e! Nukúnɖíɖó énɛ́ wɛ zɔ́n bɔ Jwifu lɛ́ɛ ɖo hwɛ dó mì wɛ. Étɛ́wú mi ka nɔ lin ɖɔ è kún sixú ɖi ɖɔ Mawu ná fɔ́n mɛkúkú lɛ́ɛ ó? “Nyɛ ɖésúnɔ ɔ́, un ko lin ɖɔ un ná bló nǔ e ɖo gbɛ ɔ́ bǐ, dó tɔ́n ahwan Jezu Nazalɛ́tinu ɔ́ sín nyǐkɔ. Nǔ e un wa ɖo Jeluzalɛ́mu ɔ́ nɛ́. Un yí acɛ ɖo vɔ̌sánú-xwlémawutɔ́gán lɛ́ɛ sí, bó nɔ wlí mɛ e ɖi nǔ nú Jezu lɛ́ɛ gěgé dó gan, bɔ hwenu e è nɔ ɖo yě hu wɛ ɔ́, un nɔ yí gbe ná. Hwɛhwɛ wɛ un nɔ dɔn tó nú yě gbɔn kplɔ́ngbasá Jwifu lɛ́ɛ tɔn bǐ; un nɔ zín yě jí ɖɔ yě ní nylá nu dó Mawu wú; xomɛ yětɔn nɔ sin mì ɖaxó, bɔ un nɔ hun káká yi to ɖěvo lɛ́ɛ mɛ, bó nɔ yi dó ya nú yě. “Azɔ̌ énɛ́ wa gbé wɛ un xwe ɖo Damási, bɔ vɔ̌sánú-xwlémawutɔ́gán lɛ́ɛ ná gbe mì, bó ná acɛ mì bɔ un ɖidó. Axɔ́sú e! Ali jí wɛ un ɖe xweyǐgbe, bɔ gan wěwe mɛ mɔ̌ ɔ́, wěziza ɖé gosín jǐxwé, bó kɔ́n hú hwesivɔ́, bó wá hɔ́n lɛ́ lɛ̌ dó nyɛ kpódó gbɛ̌ ce e kpódó nyɛ kpó xweyǐgbe lɛ́ɛ kpán, bɔ mǐ jɛ ayǐ. Un ka se gbe ɖé, bɔ gbe ɔ́ ɖo ɖiɖɔ nú mì dó Ebléegbe mɛ wɛ ɖɔ: ‘Sólu, Sólu, étɛ́wú a ka ɖo ya dó nú mì wɛ? Tamɛ e ti wɛ a ɖe ɔ́, nǔ wa dó hwiɖée wú wɛ a ɖe, lě e nyibú e sɛ́ hwɛ̌ kpo nuxwíɖíxwíɖí sín nuvínu ɔ́ nɔ́ wa nǔ dó éɖée wú é.’ Un ka kanbyɔ́ ɛ ɖɔ: ‘Hwi mɛ ka wɛ?’ Aklúnɔ ɔ́ ka yí gbe nú mì ɖɔ: ‘Nyɛ Jezu e dó ya ná wɛ a ɖe é wɛ. Lo ɔ́, sí te, bó nɔ te; nǔ e wú un ka tɔ́n dó jǐ towe ɔ́ ɖíe: un ná sɔ́ we dó bló mɛsɛntɔ́ ce ná; a nǎ nyí kúnnuɖetɔ́ ce, bɔ nǔ e a mɔ din lɛ́ɛ kpódó ɖěe un ná lɛ́ wá sɔ́ xlɛ́ we lɛ́ɛ kpán ɔ́, a nǎ ɖɔ nú mɛ ɖě lɛ́ɛ. Un ná hwlɛ́n we gán ɖo togun Jwifu lɛ́ɛ tɔn e mɛ un ná sɛ́ we dó ɔ́ sí, bó ná lɛ́ hwlɛ́n we gán ɖo mɛ e ma nyí Jwifu ǎ, bɔ un ná sɛ́ we dó yě mɛ lɛ́ɛ sí. Un sɛ́ we dó, bónú a nǎ hun nukún nú yě; bónú a nǎ kplá yě sín zǐnflú mɛ wá wěziza nu; bó ná ɖe yě sín Satáan sín acɛ mɛ wá Mawu gɔ́n, lobo nú yě ɖi nǔ nú mì ɔ́, Mawu ná sɔ́ hwɛ yětɔn lɛ́ɛ kɛ yě, bɔ yě ná mɔ tɛnmɛ ɖo mɛ e nyí étɔn lɛ́ɛ tɛ́ntin.’ “Axɔ́sú Aglipa e! Ée nǔ nyí mɔ̌ ɔ́, un vɛ́ tóli nú nǔ e Mawu sɔ́ xlɛ́ mì lɛ́ɛ ǎ. Lo ɔ́, un to yi ɖɔ Mawuxó ɔ́ nú Damásinu lɛ́ɛ kpódó Jeluzalɛ́munu lɛ́ɛ kpó hwɛ̌, bó lɛ́ wá yi ɖɔ nú mɛ e ɖo Judée gbé jí lɛ́ɛ bǐ, kpódó mɛ e ma nyí Jwifu ǎ lɛ́ɛ kpán, bó ɖɔ nú yě ɖɔ yě ní lɛ́ kɔ sín hwɛ yětɔn lɛ́ɛ gúdo; yě ní wá Mawu gɔ́n; yě ní nɔ wa nǔ e ná ɖe xlɛ́ ɖɔ yě lɛ́ kɔ sín hwɛ yětɔn lɛ́ɛ gúdo nǔgbó é. Énɛ́ ɔ́ wú wɛ Jwifu lɛ́ɛ wlí mì ɖo sinsɛnxɔ mɛ, bó jló ná hu mì. Mawu ka wa nǔ, bɔ un kpo ɖo afɔte káká jɛ égbé; un nɔ ɖo Wɛn Ɖagbe ɔ́ sín kúnnu ɖe wɛ ɖo gbɛtɔ́ kpaa lɛ́ɛ kpódó gbɛtɔ́ nukúnɖéjí lɛ́ɛ kpán nukɔn; un ka nɔ ɖɔ nǔɖé zɛ nǔ e gbeyíɖɔ Mawu tɔn lɛ́ɛ kpódó Mɔyízi kpán ko ɖɔ é ná jɛ é wú ǎ; é wɛ nyí ɖɔ: Klísu ná kú; é wɛ ka nyí mɛ nukɔn nukɔntɔn e ná fɔ́n sín kú ɔ́, bó ná jlá wěziza hwlɛngán tɔn ɔ́ mǐ mɛ Jwifu lɛ́ɛ kpódó mɛ e ma nyí Jwifu ǎ lɛ́ɛ kpán.” Ée Pɔ́lu ɖo xó ɖɔ dó ba hwɛjijɔ nú éɖée wɛ mɔ̌ ɔ́, Fɛsitúsi sú xó, bó ɖɔ: “Pɔ́lu! A hun taɖu wɛ a? A kplɔ́n wěma káká bɔ é dó taɖu we!” Pɔ́lu ka yí gbe n'i ɖɔ: “Mɛsísí ce Fɛsitúsi, un hun taɖu ǎ; xó e ɖɔ wɛ un ɖe ɔ́ sɔgbe, bó xwe ali ganjí. Axɔ́sú Aglipa mɔ do nú nǔ énɛ́ lɛ́ɛ bǐ; hǔn un hɛn ɔ́, un ná ɖɔ xó kpódó jiɖiɖe kpó ɖo nukɔn tɔn; ɖó un ɖó gǎnjɛwú ɖɔ é tunwun nǔ énɛ́ lɛ́ɛ ɖokpó ɖokpó, ɖó nǔ énɛ́ lɛ́ɛ ɖě jɛ ɖo nǔglɔ́ fí ɖé ǎ. Axɔ́sú Aglipa! A ɖi nǔ nú xó e gbeyíɖɔ Mawu tɔn lɛ́ɛ ɖɔ lɛ́ɛ a? Un tunwun ɖɔ a ɖi nǔ ná.” Axɔ́sú Aglipa ka ɖɔ nú Pɔ́lu ɖɔ: “A vɛdó ɖɔ émí ná ɖɔ xó nú mì káká bɔ un ná húzú klísusɛntɔ́ tlóló din wɛ sín a?” Pɔ́lu ka ɖɔ: “É ná bó nyí din oo, é ná bo lín oo, Mawu ní bló nú é ní ma nyí hwi ɖokpónɔ kɛ́ɖɛ́ ó; lo ɔ́, mɛ e ɖo tó ɖó mì wɛ égbé lɛ́ɛ ɔ́, bǐ sésé ní cí nyɛ ɖɔhun; Mawu ma ka lɔn bónú è wá dó wlɔ mi nyɛ ɖɔhun ó.” Aglipa kpódó Fɛsitúsi kpó, kpódó Belenísi kpó, kpódó mɛ e ɖo ayǐjínjɔ́n xá yě lɛ́ɛ bǐ kpán ka sí te. Ée yě gosín fínɛ́ ɔ́, yě ɖo ɖiɖɔ ɖo yěɖée tɛ́ntin wɛ ɖɔ: “Nya élɔ́ wa nǔɖé, bɔ é byɔ́ ɖɔ è nǎ ɖó kúhwɛ n'i, abǐ è nǎ wlí i dó gan ǎ.” Aglipa ka ɖɔ nú Fɛsitúsi ɖɔ: “Nya élɔ́ ma ko ylɔ́ hwɛ ɖaxó ɖo Dadá Hlɔ̌ma tɔn gɔ́n ǎ ɔ́, è nǎ jó e.” Hwenu e è wǎ ɖe gbe bɔ mǐ ná dó tɔjíhún bo yi Italíi ɔ́, è ɖǒ Pɔ́lu kpódó gantɔ́ ɖěvo lɛ́ɛ kpán nú sɔ́ja kanwekogán ɖé, bɔ è nɔ ylɔ́ ɛ ɖɔ Juliwusi, bɔ é ɖo ahwangbɛ́ e è sun nyǐ ɖɔ ahwangbɛ́ Ogwísi ɔ́ tɔn mɛ. Mǐ dǒ Adlamitiwɔmu sín tɔjíhún ɖé, bɔ é ko ɖo nǎ sún wɛ, lobo ná gbɔn tɔjíhúnglíntɛn Azíi tɔn dín. Alisitáki e gosín Tɛsaloniki ɖo Masedwani kanmɛ ɔ́ dó tɔjíhún ɔ́ xá mǐ. Ayǐhɔ́ngbe tɔn ɔ́, mǐ jɛ Sidɔ́ɔn; Juliwusi ka nyɔ́ xomɛ dó Pɔ́lu wú, bó ná ɛ gbe ɖɔ ní yi kpɔ́n xɔ́ntɔn tɔn lɛ́ɛ, bónú yě gɔ̌ alɔ n'i ɖo nǔ e hudó e lɛ́ɛ mɛ. Ée mǐ gosín fínɛ́ ɔ́, hǔn ɔ́ jɛ jɔhɔn kpé jí, bɔ mǐ gbɔn kɛ́nkɛ́n nú tɔtɛ́ntinto Cíplu tɔn ɔ́ bó ɖidó. Ée mǐ ka xo xu e ɖo Silisíi kpódó Panfilíi kpán kpá ɔ́ zlɛ́ ɔ́, mǐ wá yi jɛ to e è nɔ ylɔ́ ɖɔ Míilu ɔ́ mɛ, ɖo Lisíi yíkúngban jí. Sɔ́ja kanwekogán ɔ́ mɔ tɔjíhún Alɛsándli tɔn ɖé ɖo fínɛ́, bɔ é xwe Italíi, bɔ sɔ́ja kanwekogán ɔ́ kplá mǐ d'é mɛ. Mǐ zɔn dɛ̌dɛ̌ xɔ azǎn; é bɔwǔ có mǐ wá jɛ Kinidi sín hǎ jí ǎ; jɔhɔn ka lɔn nú mǐ ná glín hǔn ɖó fínɛ́ ǎ, bɔ mǐ gbɔn kɛ́nkɛ́n nú Klɛ́ti, ɖo Salumɔnɛ́ɛ sín alɔxwé. Mǐ jɛ tagba ɖésú dó kun tɔjíhún ɔ́ gbɔn xutó xutó wá jɛ fí ɖé, bɔ è nɔ ylɔ́ fí ɔ́ ɖɔ Tɔjíhúnglintɛn ɖagbe, bɔ é ɖo to e nyí Lazayia ɔ́ kpá. Mǐ gǔ hwenu ɖo xu jí, bɔ tɔ jí gbingbɔn hwenɛ́nu ka bló awǒvinú ɖaxó ɖé, ɖó nubláblá hwenu ko dín wa yi; énɛ́ ɔ́ wú wɛ Pɔ́lu ɖɔ nú yě ɖ'ayǐ ɖɔ: “Xɔ́ntɔn ce lɛ́ɛ mi, nyɛ mɔ ɖɔ mǐ jɛ tɔ jí hwe élɔ́ nu din ɔ́, mǐ ná yi kpé afɔkú ɖaxó, bɔ agban lɛ́ɛ kpódó hǔn ɔ́ kpán kɛ́ɖɛ́ wɛ ná dɔn ǎ, lo ɔ́, mǐ ɖésúnɔ sín gbɛ ɖo axɔ́ nu.” Sɔ́ja kanwekogán ɔ́ ka ɖeji dó xó e ɖɔ wɛ hǔnkuntɔ́ ɔ́ kpódó hǔnnɔ ɔ́ kpán ɖe é wú hú xó e ɖɔ wɛ Pɔ́lu ɖe lɛ́ɛ. Tɔjíhúnglíntɛn énɛ́ nyɔ́ nɔ avivɔ hwenu ǎ; énɛ́ ɔ́ wú wɛ mɛ hǎbǔ gbɔ bó yí gbe ɖɔ émí ná ɖidó, bó ná tɛ́nkpɔ́n bónú yě kpé wú ɔ́, yě ná yi Fenísi e nyí tɔjíhúnglíntɛn Klɛ́ti tɔn ɔ́, bó nɔ fínɛ́ avivɔ hwenu; ɖó to énɛ́ kpan nukɔn tofɔligbé-gbadahwe jí, kpódó totaligbé-gbadahwe jí kpó. Jɔhɔn flɛ́flɛ́ ɖé jɛ nyinyi jí sín tofɔligbé, bɔ yě vɛdó ɖɔ émí ná sixú yi lě e émí lin gbɔn ɔ́ wɛ sín; yě ɖe gandótɔnu lɛ́ɛ síin, bó sún hǔn, bó jɛ xutó xutó gbɔn jí, ɖo tɔtɛ́ntinto Klɛ́ti tɔn kpá. Zaanɖé ɔ́, jɔhɔn ɖaxó ɖé jɛ nyinyi jí, sín tɔtɛ́ntinto ɔ́ sín só lɛ́ɛ jí, bɔ è nɔ ylɔ́ jɔhɔn ɔ́ ɖɔ “Totaligbé-zǎnzǎnhwe jí.” Jɔhɔn ɔ́ d'alɔ hǔn ɔ́ mɛ, bó dɔn ɛ ɖidó, bɔ è sixú kun hǔn ɔ́ kpán nukɔn jɔhɔn ǎ, bɔ mǐ gbɔ bó jó miɖée dó nú jɔhɔn ɔ́. Mǐ wá gbɔn tɔtɛ́ntinto kpɛví ɖé kpá, bɔ è nɔ ylɔ́ to ɔ́ ɖɔ Kodáa. Mǐ jɛ tagba ɖésú, cóbó wá kpé akló ɔ́ wú. Yě zé akló ɔ́ dó tɔjíhún ɔ́ mɛ, bó sin kan lɛ́ lɛ̌ dó tɔjíhún ɔ́; yě ka ɖo xɛsi ɖi wɛ ɖɔ hǔn ɔ́ ní ma yi gba dó nyɛ̌kɛ́n wú ɖo Libíi xuta ó, bó ɖe gandótɔnu e nɔ gbɔn sin nukún mɛ ɔ́, bó jó yěɖée dó mɔ̌, bɔ jɔhɔn ɔ́ dɔn yě ɖidó. Jɔhɔn ɖaxó ɔ́ kpo ɖo mǐ dán wɛ baɖabaɖa, bɔ ayǐhɔ́ngbe tɔn ɔ́, yě jɛ agban lɛ́ɛ bɛ́ kɔn nyi xu mɛ jí. Azǎn atɔngɔ́ ɔ́ gbe ɔ́, yě sɔ́ alɔ yě ɖésúnɔ tɔn lɛ́ɛ dó ɖe nǔ kpinkpɛn e ɖo hǔn ɔ́ wú lɛ́ɛ kɔn nyi xu mɛ. Ée mǐ ma sɔ́ mɔ hwesivɔ́ kpódó sunví lɛ́ɛ kpán sín azǎn mɔ̌kpán ɖíe ǎ, bɔ jɔhɔn ɖaxó ɔ́ ka kpo ɖo nyinyi wɛ syɛ́nsyɛ́n jɛ́n wɛ ɔ́, mǐ sɔ́ ɖó nukún ɖěbǔ ɖɔ mǐ ná gán ǎ. Mǐ ma sɔ́ ɖu nǔ ǎ ɔ́, é kó lín. Pɔ́lu ka sí te ɖo mɛ lɛ́ɛ tɛ́ntin, bó ɖɔ nú yě ɖɔ: “Mɛ ce lɛ́ɛ mi, mi ná ko se xó ce, bó gɔn Klɛ́ti gosín; énɛ́ ɔ́, mǐ ná wá ɖo afɔkú élɔ́ kpé wɛ, bɔ nǔ mǐtɔn lɛ́ɛ ná ɖo dindɔn wɛ ǎ. Amɔ̌, din ɔ́, mi ɖó akɔ́nkpinkpan, mɛ ɖěbǔ ná kú ɖo mǐ mɛ ǎ; hǔn ɔ́ kɛ́ɖɛ́ jɛ́n ná lá mɛ. Đó Mawu e tɔn un nyí, bó nɔ́ sɛn ɔ́ sín wɛnsagun ɖokpó sɛ yá mì égbé zǎn mɛ, bó ɖɔ nú mì ɖɔ: ‘Pɔ́lu, ma ɖi xɛsi ó, ɖó a nǎ yi Dadá Hlɔ̌ma tɔn nukɔn dandan, bɔ hwi wútu ɔ́, Mawu ná ná gbɛ mɛ e ɖo tɔ jí xá we lɛ́ɛ bǐ.’ Énɛ́ wú ɔ́, mɛ ce lɛ́ɛ mi, mi bo kpán akɔ́n, ɖó un ɖeji dó Mawu wú ɖɔ nǔ e é ɖɔ nú mì ɔ́ jɛ́n wɛ ná jɛ. Lo ɔ́, tɔjíhún mǐtɔn ɖó ná yi gba ɖo tɔtɛ́ntinto ɖé jí.” Azǎn wɛ̌nɛgɔ́ ɔ́ gbe zǎn mɛ ɔ́, jɔhɔn ɖaxó ɔ́ kpo ɖo mǐ dɔn wɛ bɔ mǐ yi xu e è nɔ ylɔ́ ɖɔ Adliatíki é wa jí; ée zǎn vlɔ́ ɖó we mɔ̌ ɔ́, tɔnúwatɔ́ lɛ́ɛ vɛdó ɖɔ mǐ ɖo ayǐkúngban ɖé sɛ yá wɛ sín, bó sin nǔ kpinkpɛn ɖé dó kan nu, bó sɔ́ dó tɔ ɔ́ mɛ kpɔ́n, bó mɔ ɖɔ tɔ ɔ́ sín do yiyi ɖo mɛ̌tlu gbantɔ́n-nukún-we (37). Ée mǐ sɛ yi nukɔn kpɛɖé ɔ́, yě lɛ́ sɔ́ kan ɔ́ dó tɔ ɔ́ mɛ kpɔ́n, bó mɔ mɛ̌tlu koatɔ́n-nukún-atɔn (28). Yě ka ɖo xɛsi ɖi wɛ ɖɔ hǔn ɔ́ ma wá yi gba dó só ɖé wú ó; énɛ́ ɔ́ wú wɛ yě dó gandótɔnu ɛnɛ xu ɔ́ mɛ, ɖo hǔn ɔ́ sín gúdo; yě ka ɖo vo sa wɛ ɖɔ ayǐ ní vɛ́ yá wǔ hɔ́n. Tɔnúwatɔ́ lɛ́ɛ kó jló ná hɔn jó hǔn ɔ́ dó, bó ɖe tɔjíhún ɔ́ nyi xu jí; yě bló nǔ ɖi mɛ e xwe gandótɔnu e ɖo hǔn ɔ́ nukɔn lɛ́ɛ sɔ́ gbé ɖɔhun. Pɔ́lu ka ɖɔ nú sɔ́ja kanwekogán ɔ́ kpódó sɔ́ja lɛ́ɛ kpán ɖɔ: “Ényí mɛ énɛ́ lɛ́ɛ ma nɔ hǔn ɔ́ mɛ ǎ ɔ́, mi ná gán ǎ.” Bɔ sɔ́ja lɛ́ɛ sɛ́n kan nú tɔjíhún ɔ́, bó jó dó, bɔ tɔ dɔn ɛ yi. Ée ayǐ ɖibla hɔ́n ɔ́, Pɔ́lu dó kɛnklɛ́n nú yě bǐ ɖɔ yě ní ɖu nǔ; é ɖɔ nú yě ɖɔ: “Sín azǎn wɛ̌nɛ ɖíe ɖokpóó wɛ mi ɖo adohu adohu jí, bó gbɛ́ nǔ ɖu. Énɛ́ wú wɛ un ɖo ɖiɖɔ nú mi wɛ ɖɔ mi ní ɖu nǔ, bó ná nɔ gbɛ, ɖó nǔɖé ná wa ɖa e ɖo ta mitɔn ɔ́ ɖokpó géé ǎ.” Ée Pɔ́lu ɖɔ mɔ̌ ɔ́, é zé wɔ̌xúxú, bó dó kú nú Mawu ɖo mɛ bǐ nukún mɛ, bó kán, lobo jɛ ɖuɖu jí. Nǔ énɛ́ dó wǔsyɛ́n lanmɛ nú yě bǐ, bɔ yě lɔmɔ̌ ɖu nǔ. Mǐ mɛ e ɖo hǔn ɔ́ mɛ lɛ́ɛ bǐ bló gbɛtɔ́ afɔɖé kanɖé gbantɔ́n-nukún-ɖokpó (276). Ée yě ɖu nǔ bó gɔ́ xo ɔ́, yě bɛ́ jinukún e kpo ɖo hǔn ɔ́ mɛ lɛ́ɛ kɔn nyi tɔ mɛ, bónú hǔn ɔ́ ná dó fúɖá. Đěe ayǐ hɔ́n ɔ́, tɔnúwatɔ́ lɛ́ɛ sɔ́ tunwun fí e yě ɖe ɔ́ ǎ; lo ɔ́, yě mɔ xugbado ɖé kpódó xuta ɖé kpó sɛ́ dó, bó ɖɔ émí ná dó gǎn, bó ná kpɔ́n ɖɔ émí ná sixú dɔn hǔn ɔ́ yi dɔ̌n a jí. Yě tún kan nú gandótɔnu lɛ́ɛ, bó jó yě dó nyi xu mɛ; azɔn ɖokpó ɔ́, yě tún kan nú zɛn e yě nɔ dó jlɔ́ ali nú hǔn ɔ́ lɛ́ɛ, bó dó avɔ ɖokpó dó nukɔn nú hǔn ɔ́, bɔ jɔhɔn dó alɔ mɛ, bó dɔn yě ɖidó agě. Hǔn ɔ́ ka wá yi dó ta nyɛ̌kɛ́n mɛ, bó sɔ́ sixú sɛ tɛn ǎ; aslɔkɛ́ lɛ́ɛ sín zǐngídi ká hɛn hǔn ɔ́ gba ɖo gúdo. Bɔ sɔ́ja lɛ́ɛ ɖó gbe kpɔ́, bó ná hu gantɔ́ e ɖo hǔn ɔ́ mɛ lɛ́ɛ bǐ, nú yě mɛ ɖě ma lin tɔ bó hɔn yi ó. Lo ɔ́, sɔ́ja kanwekogán ɔ́ lɔn nú yě ǎ, ɖó é jló ná hwlɛ́n Pɔ́lu gán. É ná gbe ɖɔ mɛ e nyɔ́ tɔ lin lɛ́ɛ ní jɛ tɔ dó nukɔn, bó lin tɔ yi agě jí. Mɛ e kpo lɛ́ɛ ɔ́, yědɛɛ lɛ́ɛ na zunfán xwlɛ, abǐ hǔn ɔ́ sín fínfɛ́n lɛ́ɛ, bó ná jɛ yě gúdo jɛ agě jí. Mɔ̌ wɛ yě bǐ wá yi jɛ agě jí gbɔn wǔyɛ́yɛ́ afɔyɛ́yɛ́. Ée mǐ wá gán lo ɔ́, mǐ se ɖɔ tɔtɛ́ntinto énɛ́ ɔ́, Maluti wɛ è nɔ ylɔ́ ɖɔ. To ɔ́ mɛ nu lɛ́ɛ nyɔ́ xomɛ dó mǐ wú tlala. Ée jǐ wlí, bɔ avivɔ gbɛ́ ɔ́, yě bɔ myɔ ɖaxó ɖé, bó yí jǒnɔ mǐtɔn ɖ'é kɔn. Pɔ́lu bɛ́ nǔywɛ́, bó ná kɔn nyi myɔ ɔ́ mɛ, bɔ amanɔnú jakpata ɖokpó tɔ́n sín nǔywɛ́ ɔ́ mɛ, bó tɛ́ dó alɔ tɔn wú, ɖó myɔ ɔ́ sín yǒzo hɛn ɛ. Ée to ɔ́ mɛ nu lɛ́ɛ mɔ dan ɔ́ ɖo gblɛlɛ ɖo alɔ tɔn wú ɔ́, yě nɔ ɖɔ nú yěɖée ɖɔ: “Dandan mɛ ɔ́, mɛhutɔ́ wɛ nya élɔ́ nyí; ɖó é gán ɖo xu sí, có vodún hwɛjijɔ kpo ɖo gǔdo tɔn.” Pɔ́lu ka mi dan ɔ́ dó myɔ ɔ́ mɛ; nǔ ɖěbǔ ka wa é ɖésúnɔ ǎ. Mɛ lɛ́ɛ ko ɖo te kpɔ́n ɖɔ é ná jɛ flɔ́flɔ́ jí, abǐ é ná jɛ ayǐ bó kú cúɖúɖú; lo ɔ́, ée yě nɔ te káká bɔ nǔɖé ma sɔ́ wa ɛ ǎ ɔ́, yě húzú gbe bó ɖɔ vodún wɛ é nyí. To ɔ́ mɛ sín gǎn e è nɔ ylɔ́ ɖɔ Publiwúsi ɔ́ ɖó ayǐkúngban ɖokpó ɖo akpá fínɛ́. É yí jǒnɔ mǐtɔn, bɔ é fɛ́ wǔ ɖésú, bɔ mǐ nɔ xwé tɔn gbe xɔ azǎn atɔn. Publiwúsi sín tɔ́ ɖo ayǐmlɔ́mlɔ́, bɔ avivɔ ɖo jǐ tɔn, bɔ é ɖo zɛntín nyɛ wɛ. Pɔ́lu ka yi kpɔ́n ɛ, bó xo ɖɛ, bó ɖó alɔ jǐ tɔn, bó gbɔ azɔn n'i. Énɛ́ gúdo ɔ́, azinzɔnnɔ e kpo ɖo to ɔ́ mɛ lɛ́ɛ wá mɔ Pɔ́lu, bɔ é gbɔ azɔn nú yě lɔmɔ̌. Énɛ́ ɔ́ wú wɛ yě wlí yɛ̌yi bǐ nú mǐ, bɔ ée mǐ ɖo hǔn mɛ byɔ́ wɛ ɔ́, yě ná nǔ e ná hudó mǐ lɛ́ɛ bǐ mǐ. Sun atɔn wɛ mǐ bló ɖo to énɛ́ ɔ́ mɛ, cóbó wá dó hǔn ɖé, bɔ é ko wá nɔ fínɛ́ avivɔ hwenu; Alɛsándli wɛ é gosín, bɔ è ɖǒ nyǐkɔ n'i ɖɔ “Vodún hǒxo lɛ́ɛ.” Mǐ wá jɛ Silakúsi, bó nɔ fínɛ́ xɔ azǎn atɔn. Ée mǐ wá gosín fínɛ́ ɔ́, hǔn ɔ́ gbɔn xutó xutó káká yi jɛ Hlejio. Ayǐhɔ́ngbe tɔn ɔ́, jɔhɔn tofɔligbé tɔn ɔ́ jɛ nyinyi jí, bɔ azǎn atɔngɔ́ ɔ́ gbe ɔ́, mǐ jɛ Puzɔ́lu. Mǐ mɔ nɔví mǐtɔn ɖo Klísu mɛ e ɖo fínɛ́ lɛ́ɛ, bɔ yě sa vo nú mǐ ɖɔ mǐ ní nɔ émí gɔ́n nú azǎn tɛ́nwe, bɔ mǐ nɔ yě gɔ̌n. Fínɛ́ wɛ mǐ gosín bó yi Hlɔ̌ma. Nɔví mǐtɔn ɖo Klísu mɛ e ɖo Hlɔ̌ma lɛ́ɛ kó se ɖɔ mǐ jǎwe, bó wá kpé mǐ ɖo alixo; mɛɖé lɛ́ɛ wá nɔ te kpɔ́n mǐ ɖo Jǒnɔyítɛn Atɔn lɛ́ɛ nukɔn; mɛɖé lɛ́ɛ hun káká wá kpé mǐ ɖo Apiwúsixi mɛ. Ée Pɔ́lu mɔ yě ɔ́, é dó kú nú Mawu, bɔ wǔ yá ɛ. Ée mǐ jɛ Hlɔ̌ma ɔ́, è nǎ gbe Pɔ́lu ɖɔ ní yi nɔ vo; è ka ɖó sɔ́ja ɖokpó n'i, bɔ é ná nɔ cɔ́ ɛ. Azǎn atɔngɔ́ ɔ́ gbe ɔ́, Pɔ́lu ylɔ́ Jwifu nukúnɖéjí lɛ́ɛ wá xwé tɔn gbe. Ée yě wá kplé ɔ́, é ɖɔ nú yě ɖɔ: “Nɔví ce lɛ́ɛ mi, un jɛ agɔ ɖé dó togun mǐtɔn ǎ; un ka jɛ agɔ dó tɔ́gbó mǐtɔn lɛ́ɛ sín hwɛndo ǎ, có è wlǐ mì dó gankpá mɛ ɖo Jeluzalɛ́mu, bó jó mì nú Hlɔ̌manu lɛ́ɛ. Ée Hlɔ̌manu lɛ́ɛ kan nǔ byɔ́ mì káká ɔ́, yě mɔ nǔɖé wú ná ɖó dó, bó dó ɖó kúhwɛ nú mì ǎ, bó kó jló ná jó mì. Lo ɔ́, Jwifu lɛ́ɛ ka gbɛ́; énɛ́ ɔ́ wú ɔ́, un mɔ ɖɔ é ɖo dandan mɛ nú ma ylɔ́ hwɛ ɖaxó ɖo Dadá Hlɔ̌ma tɔn gɔ́n; é ka nyí to ce sín hwɛ ná jɛ wɛ un ɖe bo wá fí ǎ. Nǔ e wú un byɔ́ ɖɔ ma mɔ mi, bó ná ɖɔ xó nú mi ɔ́ nɛ́; ɖó mɛ e ɖó nukún wɛ Izlayɛ́li togun ɔ́ ɖe ɔ́ wú wɛ è dǒ wlɔ mì lě.” Yě ka yí gbe n'i ɖɔ: “Mǐdɛɛ lɛ́ɛ ɔ́, wěma ɖěbǔ wá nú mǐ sín Judée, bó ɖɔ xó nú mǐ dó wǔ towe ǎ; nɔví mǐtɔn ɖě ka gosín dɔ̌n, bó wá jɛ hwɛ towe, abǐ bó wá ɖɔ xó towe nyanya ɖé nú mǐ ǎ. Lo ɔ́, mǐ jló ɖɔ hwi ɖésú ní ɖɔ nǔ e a lin ɔ́ nú mǐ; ɖó mǐ tunwun ɖɔ fí bǐ jɛ́n è nɔ ɖɔ xó nyanya dó sinsɛngbɛ́ énɛ́ wú ɖe.” É kpódó yě kpó ɖó azǎn, bɔ yě sukpɔ́ d'é jí, bó wá yi mɔ ɛ, ɖo xɔ e mɛ é ɖe ɔ́. Sín zǎnzǎn káká wá jɛ gbadanu ɔ́, é tín nǔ mɛ nú yě. É ɖɔ axɔ́súɖuɖu Mawu tɔn sín xó nú yě; é sɔ́ Mɔyízi sɛ́n lɛ́ɛ kpódó nǔkplɔ́nmɛ gbeyíɖɔ Mawu tɔn lɛ́ɛ tɔn kpán dó ɖɔ xó nú yě, bó ba ná dɔn yě, nú yě na ɖi nǔ ɖɔ nǔ e ɖɔ dó Jezu wú wɛ é ɖe ɔ́ nǔgbó wɛ. Mɛ ɖé lɛ́ɛ ɖo yě mɛ, bó mɔ nǔgbó nú xó e ɖɔ wɛ Pɔ́lu ɖe ɔ́, lobo ɖi nǔ ná; mɛɖé lɛ́ɛ ka ɖi nǔ ǎ. Bɔ yě nɔ gbe ma ɖó kpɔ́ mɔ̌, bó ɖidó, bɔ Pɔ́lu ɖɔ nú yě kpowun ɖɔ: “Xó e Yɛsinsɛn ɖɔ nú tɔ́gbó mǐtɔn lɛ́ɛ gbɔn gbeyíɖɔ Mawu tɔn Ezayíi jí ɔ́, nǔgbó jɛ́n é nyí. É wɛ nyí ɖɔ: ‘Yi togun énɛ́ ɔ́ gɔ́n, bó ɖɔ n'i ɖɔ: mi ná se céɖécéɖé, mi ka ná mɔ nǔ jɛ mɛ ǎ; mi ná mɔ ganjí có mi ka ná mɔ ǎ. Đó togun élɔ́ sín ayixa ko syɛ́n; yě sú tó yětɔn, bó myɔ nukún, ɖó nukún yětɔn táá wá mɔ nǔ, bónú tó yětɔn táá wá se nǔ, nú ayixa yětɔn ná wá ja nǔ mɔ jɛ nǔ mɛ gbé, bónú yě ná wá ja kɔ lɛ́ sín hwɛ yětɔn lɛ́ɛ gúdo gbé, nú ma wá gbɔ azɔn nú yě. Xó e Aklúnɔ ɖɔ ɔ́ nɛ́.’ ” Pɔ́lu ka lɛ́ ɖɔ nú yě ɖɔ: “Mi bo nywɛ́ ganjí ɖɔ Mawu sɛ́ hwlɛngán tɔn dó mɛ e ma nyí Jwifu ǎ lɛ́ɛ; yědɛɛ lɛ́ɛ ná ɖótó e.” [ Ée Pɔ́lu ɖɔ xó énɛ́ lɛ́ɛ fó ɔ́, Jwifu lɛ́ɛ ɖidó, bó ɖo nǔ dɔn ɖo yěɖée tɛ́ntin wɛ ɖésú.] Pɔ́lu nɔ xɔ e é xáya ɔ́ mɛ xɔ xwe we kpíkpé, bó nɔ́ yí mɛ e nɔ wá gɔ̌n tɔn lɛ́ɛ bǐ sín jǒnɔ ɖo fínɛ́. É nɔ ɖɔ axɔ́súɖuɖu Mawu tɔn sín xó, bó nɔ́ kplɔ́n nǔ mɛ dó Aklúnɔ Jezu Klísu wú, kpódó jiɖiɖe kpán, bɔ mɛ ɖěbǔ sɔ́ nɔ́ dó tagba n'i ǎ. Nyɛ Pɔ́lu mɛsɛntɔ́ Klísu Jezu tɔn e Mawu ylɔ́ bónú ma nyí mɛsɛ́dó ɔ́ wɛ ɖo wěma élɔ́ sɛ́ dó mi wɛ, bó ɖo gbe dó mi wɛ; Mawu wɛ ɖe mì ɖó vo bónú ma jlá Wɛn Ɖagbe tɔn. Wɛn Ɖagbe énɛ́ ɔ́, Mawu ko dó akpá tɔn gbɔn gbeyíɖɔ tɔn lɛ́ɛ jí din ɔ́, é ko lín, bɔ yě wlán dó Mawuxówéma ɔ́ mɛ. Wɛn Ɖagbe énɛ́ ɖɔ xó dó Vǐ tɔn Aklúnɔ mǐtɔn Jezu Klísu ɔ́ wú. Đo gbɛtɔ́ nyínyí tɔn mɛ ɔ́, Davídi kúnkan mɛ wɛ é jɔ ɖe; amɔ̌, ɖo yɛ mímɛ́ nyínyí tɔn mɛ ɔ́, è ɖe e xlɛ́ kpódó hlɔ̌nhlɔ́n kpó ɖɔ Mawu ví wɛ é nyí gbɔn kú e é kú bó fɔ́n ɔ́ gbla mɛ. Mawu jɔwǔ mì gbɔn Klísu jí, bó sɔ́ mì mɛsɛ́dó, bónú ma sɔ́ Klísu nyǐkɔ su, bó ná sixú dɔn gbɛtɔ́ ɖo to lɛ́ɛ bǐ mɛ, bónú yě ná ɖi nǔ n'i, bó se tónú n'i. Mi lɔ, mi ɖo mɛ énɛ́ lɛ́ɛ mɛ, mi mɛ e Mawu ylɔ́ bɔ mi nyí Jezu Klísu tɔn lɛ́ɛ é. Un ɖo wěma élɔ́ wlán sɛ́ dó mi mɛ e ɖo Hlɔ̌ma lɛ́ɛ wɛ; mi mɛ e Mawu yí wǎn ná, bó ylɔ́ mi, bó ɖe mi ɖó vo, bɔ mi ná nyí togun tɔn é bǐ. Mawu Tɔ́ mǐtɔn kpódó Aklúnɔ mǐtɔn Jezu Klísu kpó ní ná fɛ́nú kpódó fífá kpó mi. Cóbónú un ná ɖɔ xó e ná ɖɔ nú mi wɛ un ɖe é ɔ́, un ná tó dó kú nú Mawu ce gbɔn Jezu Klísu jí, dó mi bǐ sín tamɛ hwɛ̌, ɖó è ɖo nǔ e mi ɖi nú Klísu ɔ́ sín xó ɖɔ wɛ gbɔn gbɛ ɔ́ bǐ mɛ. Mawu e sɛn wɛ un ɖe kpódó ayixa ce bǐ kpó, gbɔn Wɛn Ɖagbe e ɖɔ xó dó Vǐ tɔn wú ɔ́ jlájlá gbla mɛ ɔ́, tunwun ɖɔ nǔgbó ɖɔ wɛ un ɖe; é tunwun ɖɔ un ɖo ɖɛ xo wɛ hweɖěbǔnu ɔ́, nǔ mitɔn nɔ ɖo ayi mɛ nú mì. Un nɔ byɔ́ ɛ ɖɔ ɖo jlǒ tɔn mɛ ɔ́, ní bló bónú ma sixú mɔ ali, lobo wá mi gɔ́n lo. Đó é jló mì ɖésú ɖɔ ma wá mɔ mi, bó hɛn nǔníná Yɛsinsɛn tɔn ɖé wá nú mi, bónú mi ná lí dǒ ɖo nǔ e mi ɖi nú Klísu ɔ́ mɛ. Nǔ e ɖɔ wɛ un ɖe ɔ́ wɛ nyí ɖɔ é jló mì ɖɔ nyɛ kpó mi kpó ná nɔ kpɔ́, bó ná dó ná akɔ́nkpinkpan mǐɖée. Nyɛ ná ná akɔ́nkpinkpan mi gbɔn nǔɖiɖi ce gbla mɛ, bɔ mi lɔ ná ná akɔ́nkpinkpan mì gbɔn nǔɖiɖi mitɔn gbla mɛ. Nɔví lɛ́ɛ mi, un jló ɖɔ mi ní tunwun ɖɔ un ko lin azɔn mɔ̌kpán ná wá gɔn mitɔn, amɔ̌ káká jɛ din ɔ́, nǔ ɖo jijɛ mɛ nú mì wɛ. Un ka ko nɔ ba ɖɔ azɔ̌ e wa wɛ un ɖe ɔ́ ní ɖó le ɖo tɛ́ntin mitɔn, lě e é ɖó le gbɔn ɖo togun ɖě lɛ́ɛ mɛ é. É ɖo dandan mɛ nú mì ɖɔ ma yi mɛ lɛ́ɛ bǐ gɔ̌n; mɛ e hun nukún lɛ́ɛ kpó mɛ e ma hun nukún ǎ lɛ́ɛ kpó; mɛ e se wěma lɛ́ɛ kpódó mɛ e ma se wěma ǎ lɛ́ɛ kpó. Énɛ́ ɔ́ wútu wɛ é jló mì ɖésú ɖɔ ma wá jlá Wɛn Ɖagbe ɔ́ mi mɛ e ɖo Hlɔ̌ma lɛ́ɛ lɔmɔ̌. Un ɖo Wɛn Ɖagbe ɔ́ jlá wɛ ɔ́, winnyá nɔ hu mì ǎ, ɖó hlɔ̌nhlɔ́n e Mawu nɔ zán dó hwlɛ́n mɛ e ɖi nǔ é bǐ gán é wɛ; Jwifu lɛ́ɛ jɛ nukɔn, bɔ mɛ e ma nyí Jwifu ǎ lɛ́ɛ bɔ d'é wú. Nǔgbó ɔ́, Wɛn Ɖagbe ɔ́ ɖe lě e Mawu nɔ zé gbɛtɔ́ lɛ́ɛ dó húzú hwɛjijɔnɔ ná ɖo nukɔn tɔn gbɔn ɔ́ xlɛ́; sín bǐbɛ́mɛ káká yi vivɔnu ɔ́, nǔɖiɖi kɛ́ɖɛ́ jí wɛ é nɔ zé yě dó húzú hwɛjijɔnɔ ná gbɔn lě e Mawuxówéma ɔ́ ɖɔ gbɔn é; é wɛ nyí ɖɔ: “Mɛ e Mawu mɔ dó mɔ hwɛjijɔnɔ ɖó nǔɖiɖi tɔn wú ɔ́ ná nɔ gbɛ.” Nǔgbó mɛ e ma nɔ se tónú nú Mawu ǎ, bó nɔ́ ɖo nǔ nyanya wa wɛ lɛ́ɛ ɔ́, Mawu nɔ́ ɖe xomɛsin tɔn xlɛ́ yě bǐ sín jǐxwé, nǔ énɛ́ lɛ́ɛ wɛ nɔ zɔ́n bɔ gbɛtɔ́ lɛ́ɛ ma nɔ sixú tunwun nǔgbó ɔ́ ǎ. Mawu nɔ dɔn tó nú yě, ɖó nǔ e è hɛn ɔ́, è nǎ tunwun dó Mawu wú ɔ́ ɖo wɛn nú yě: Mawu ɖésúnɔ ɖe nǔ énɛ́ xlɛ́ yě céɖécéɖé. Nǔgbó ɔ́, sín hwenu e Mawu ko ɖó gbɛ ɔ́, nǔ e é nyí bɔ è ma nɔ mɔ ǎ ɔ́, é wɛ nyí ɖɔ: hlɔ̌nhlɔ́n tɔn mavɔ mavɔ ɔ́ kpódó nǔ e é nyí nǔgbó ɔ́ kpó ɔ́, è nɔ tunwun gbɔn nǔ e é wa lɛ́ɛ gbla mɛ; énɛ́ ɔ́ wútu ɔ́, kɛnklɛ́n sɔ́ ɖ'é mɛ nú yě ǎ. Yě tunwun Mawu; lo ɔ́, yě nɔ ná susu e jɛ xá ɛ é ǎ; yě ka nɔ lɛ́ dó kú n'i lě e é jɛ xá gbɔn é ǎ; é nyɔ́ wa ɔ́, nǔ e yě nɔ lin ɔ́ nɔ ɖó ta ɖé ǎ; nǔɖé ɖo ayixa yětɔn mɛ ǎ; ayixa yětɔn nɔ mɔ nǔ ǎ. Yě nɔ ɖɔ nǔnywɛ́tɔ́ wɛ émí nyí; xlonɔ wɛ yě ka nyí. Yě nɔ́ gɔn susu kpa nú Mawu e ma nɔ kú ǎ é, bó nɔ kpa susu nú bǒcyɔ gbɛtɔ́ e nɔ kú é tɔn, bó nɔ́ kpa nú bǒcyɔ xɛ lɛ́ɛ tɔn, kanlin e ɖó afɔ ɛnɛ lɛ́ɛ tɔn kpódó kanlin e nɔ sá lɛ́ɛ tɔn kpán. Énɛ́ ɔ́ wútu wɛ Mawu jǒ yě dó bɔ yě nɔ́ wa nǔblíblí lě e é jló yě gbɔn é, bó nɔ ɖo agbaza yětɔn zé dó wa winnyánú ná wɛ ɖo yěɖée tɛ́ntin. Yě gbɛ́ nǔgbó e ɖɔ xó dó Mawu wú ɔ́ yí, bó ka yí gbe nú adingban. Yě nɔ́ sɛn nǔɖíɖó Mawu tɔn lɛ́ɛ, bó nɔ́ se tónú nú yě, bó nɔ́ jó é ɖésúnɔ Gbɛɖótɔ́ ɔ́ dó; é wɛ è ka ɖó ná kpa susu ná káká sɔ́yi. Amǐ. Énɛ́ ɔ́ wú wɛ Mawu jó yě dó bɔ yě nɔ wa agbaza sín jlǒ e nyí winnyánú lɛ́ɛ. Nyɔ̌nu yětɔn lɛ́ɛ ɖésú nɔ́ ɖó xó xá nyɔ̌nu yě ɖɔhun lɛ́ɛ; é ka nyɔ́ mɔ̌ ǎ. Mɔ̌ ɖokpó ɔ́, súnnu lɛ́ɛ nɔ́ jó nyɔ̌nu lɛ́ɛ dó, bɔ jlǒ ɖaxó ɖé nɔ dɔn yě mɛ súnnu énɛ́ lɛ́ɛ, bɔ yě nɔ ɖo winnyánú wa wɛ, kpó súnnu yě ɖɔhun lɛ́ɛ kpó. Énɛ́ ɔ́ wú wɛ Mawu dɔn tó nú yě, bɔ é sɔgbe xá nǔ nyanya e yě wa lɛ́ɛ. Ée yě gbɛ̌ ɖɔ émí kún ná tunwun Mawu ó é ɔ́, Mawu jǒ yě dó bɔ yě nɔ wa nǔ e linlin masɔgbe yětɔn jló lɛ́ɛ é, bó nɔ́ ɖo nǔ e yě má ɖó ná wa ǎ é wa wɛ. Nǔmasɔgbe tɛnmɛ tɛnmɛ wiwa bǐ kpó nǔ nyanya wiwa tɛnmɛ tɛnmɛ bǐ kpó wɛ gɔ́ ayi yětɔn mɛ; mɛnújlójló tɛnmɛ tɛnmɛ bǐ kpó adǎnúwiwa tɛnmɛ tɛnmɛ bǐ kpó wɛ gɔ́ ayi yětɔn mɛ. Wǔhwinhwan kpó mɛhuhu kpó, kpódó jlɛɖiɖɔ kpán wɛ gɔ́ ayi yětɔn mɛ; sísɛ́ kpódó bǐbí kpó wɛ gɔ́ ayi yětɔn mɛ; yě nɔ́ ɖo xó ɖɔ kpé wɛ, bó nɔ́ ɖo xó nyanya ɖɔ dó yěɖée wú wɛ; Mawu sín kɛntɔ́ wɛ yě nyǐ. Yě nɔ sí mɛ ǎ; yě nɔ ɖo go yí wɛ, bó nɔ́ ɖo ajɔ̌ jlá nú yěɖée wɛ. Yě nɔ ɖo nǔ nyanya wiwa sín wlɛnwín yɔ̌yɔ́ lɛ́ɛ ɖe wɛ; yě nɔ́ vɛ́ tóli nú mɛjitɔ́ yětɔn lɛ́ɛ. Ayixa yětɔn nɔ mɔ nǔ ǎ; yě dó akpá ɔ́, yě nɔ ɖe ǎ; yě yǐ wǎn nú mɛ ǎ; mɛ nú nɔ blá wǔ nú yě ǎ. Yě tunwun ganjí ɖɔ sɛ́n Mawu tɔn ɖɔ mɛ e nɔ zán gbɛ gbɔn mɔ̌ lɛ́ɛ ɔ́, kú wɛ jɛ xá yě, cóbó ka nɔ kpo ɖo nǔ mɔ̌hun lɛ́ɛ wa wɛ, lobo nɔ lɛ́ yí hwɛ dó mɛ e nɔ wa nǔ mɔ̌hun lɛ́ɛ jí. Hwi mɛ e ɖo hwɛ dó mɛ ɖě lɛ́ɛ wɛ ɔ́, a na bo nyí nǔ ɖěbǔnɔ ɔ́, kɛnklɛ́n sɔ́ ɖ'é mɛ nú we ǎ; ɖó hwenu e a ɖo hwɛ dó mɛ ɖě lɛ́ɛ wɛ, bó ka nɔ ɖo nǔ ɖokpó ɔ́ wa wɛ yě ɖɔhun ɔ́, hwɛ ɖó nú hwiɖée wɛ a ɖe. Mǐ tunwun ɖɔ Mawu nɔ ɖɔ hwɛ xá mɛ e nɔ wa nǔ mɔ̌hun lɛ́ɛ lě e é sɔgbe xá nǔgbó ɔ́ gbɔn é. Nya ce, hwi mɛ e nɔ ɖo hwɛ dó yě mɛ e nɔ ɖo nǔ énɛ́ lɛ́ɛ wa wɛ, bó ka ɖo nǔ ɖokpó ɔ́ wa wɛ yě ɖɔhun ɔ́, a vɛdó ɖɔ émí ná gán ɖo hwɛɖɔxámɛ Mawu tɔn mɛ wɛ sín a? Abǐ a vɛdó ɖɔ émí ná hu tɛ́ nú xomɛnyínyɔ́ ɖaxó Mawu tɔn ɔ́ kpó sɔxwixwe tɔn kpó, kpódó xomɛfífá tɔn ɖaxó ɔ́ kpó wɛ sín a? Abǐ a tunwun ɖɔ xomɛnyínyɔ́ Mawu tɔn ɖo dindɔn we wɛ nú a na lɛ́ kɔ sín hwɛ towe lɛ́ɛ gúdo ǎ cé? A ka tlí tó; a ɖo gbesisɔ mɛ bó ná lɛ́ kɔ sín hwɛ towe lɛ́ɛ gúdo ǎ; énɛ́ wútu wɛ a ɖo tó dɔn nú mɛ ɖaxó ɖé sín nǔ sɔ́ ɖ'ayǐ nú hwiɖée wɛ nú gbe e gbe Mawu ná ɖe xomɛsin tɔn kpó hwɛjlɔ́jlɔ́ ɖiɖɔ tɔn kpó xlɛ́ é. Gbe énɛ́ gbe ɔ́, Mawu ná sú nǔ e mɛ ɖokpó ɖokpó wa ɔ́ sín axɔ́ ɛ. É ná ná gbɛ mavɔ mavɔ mɛ e nɔ ɖó kan dó nǔ ɖagbe wiwa wú, bó nɔ́ ɖo susu kpó yɛ̌yi kpó, kpódó jɔmakú kpó ba ɖo gɔ̌n tɔn gbɔn mɔ̌ wɛ lɛ́ɛ. Lo ɔ́, Mawu ná sin xomɛ ɖésú dó mɛ e nɔ fɔ́n gǔ dó jǐ tɔn, bó ma nɔ́ se tónú nú nǔgbó ɔ́ ǎ, bó nɔ́ kpo nú nǔ nyanya wiwa kɛ́ɖɛ́ lɛ́ɛ é. Mɛ e ka nɔ wa nǔ nyanya lɛ́ɛ bǐ wɛ ná mɔ wǔvɛ́, bó ná mɔ akpɔ: Jwifu lɛ́ɛ jɛ nukɔn, bɔ mɛ e ma nyí Jwifu ǎ lɛ́ɛ ná bɔ d'é wú. É ka ɖo mɔ̌ có Mawu ná ná susu, yɛ̌yi, kpódó fífá kpó mɛ e nɔ wa nǔ ɖagbe lɛ́ɛ bǐ. É ná ná Jwifu lɛ́ɛ jɛ nukɔn, bó ná ná mɛ e ma nyí Jwifu ǎ lɛ́ɛ bɔ d'é wú. Đó Mawu nɔ ɖe mɛɖé ɖó vo ɖo mɛ ɖé mɛ ǎ. Mɛ e ma tunwun sɛ́n e Mawu ná Jwifu lɛ́ɛ ǎ, bó hu hwɛ lɛ́ɛ bǐ ɔ́, yě ná dɔn sɛ́n lɛ́ɛ mɛvo; mɛ e ka tunwun sɛ́n lɛ́ɛ, bó hu hwɛ lɛ́ɛ ɔ́, è nǎ sɔ́ sɛ́n lɛ́ɛ dó ɖɔ hwɛ xá yě bǐ. Đó ényí mɛ e nɔ ɖótó sɛ́n lɛ́ɛ kpowun lɛ́ɛ wɛ nɔ nyí hwɛjijɔnɔ ɖo Mawu nukɔn ǎ; lo ɔ́, mɛ e nɔ bló nǔ e sɛ́n lɛ́ɛ zɔ́n lɛ́ɛ wɛ nɔ nyí hwɛjijɔnɔ ɖo nukɔn tɔn. Ényí mɛ e ma nyí Jwifu ǎ, bó ma ɖó sɛ́n lɛ́ɛ ǎ lɛ́ɛ nɔ yě ɖóɖó, bó jɛ nǔ e sɛ́n lɛ́ɛ zɔ́n lɛ́ɛ wa jí ɔ́, yě na bo ma ɖó sɛ́n lɛ́ɛ ǎ ɔ́, yě ɖe xlɛ́ ɖɔ émí tunwun nǔ e è ɖǒ ná wa é, abǐ nǔ e è ma ɖó ná wa ǎ é. Lě e yě nɔ wa nǔ gbɔn ɔ́ nɔ ɖe xlɛ́ ɖɔ è wlǎn lě e sɛ́n ɔ́ zɔ́n ɖɔ è nǐ wa nǔ gbɔn ɔ́ dó ayi mɛ nú émí. Ayixa yětɔn lɔ nɔ ɖe kúnnu ná ɖɔ nǔgbó wɛ; mɔ̌ ɖokpó ɔ́, linlin yětɔn lɛ́ɛ e nɔ dó hwɛ yě hwe ɖé lɛ́ɛ nu, bó nɔ jɛ ahwan yě jí hwe ɖ'é lɛ́ɛ nu lɛ́ɛ lɔ nɔ ɖe xlɛ́. Nǔ e ná jɛ gbe e gbe Mawu ná gbɔn Jezu Klísu jí, bó ɖɔ hwɛ dó nǔ e gbɛtɔ́ lɛ́ɛ nɔ wa ɖo nǔglɔ́ lɛ́ɛ é nɛ́, lě e Wɛn Ɖagbe e jlá wɛ un ɖe ɔ́ ɖɔ gbɔn é. Amɔ̌, hwɛ ɔ́, a ɖɔ émí nyí Jwifu; a gǎn jɛ sɛ́n lɛ́ɛ wú, bó nɔ xɔ susu ɖó Mawu towe wú. A tunwun nǔ e Mawu jló é, bɔ sɛ́n lɛ́ɛ kó kplɔ́n we ɖɔ hwi ní sɔ́ nǔ ɖagbe, bó jó nǔ nyanya dó. A mɔ hwiɖée dó mɔ mɛ e nɔ xlɛ́ ali nukúntíntɔ́nnɔ lɛ́ɛ é, bó nɔ́ mɔ ɖɔ émí nyí wěziza nú mɛ e ɖo ablu mɛ lɛ́ɛ é. A mɔ ɖɔ émí nɔ́ kplɔ́n nǔ xlonɔ lɛ́ɛ, kpó mɛ e ma tunwun nǔɖé ǎ lɛ́ɛ kpó, ɖó a ɖeji ɖɔ émí nɔ́ mɔ nǔnywɛ́ titewungbe kpó nǔgbó titewungbe kpó ɖo sɛ́n ɔ́ mɛ. Hwi mɛ e nɔ kplɔ́n nǔ mɛ ɖě lɛ́ɛ ɔ́, étɛ́ wú a ma ka nɔ kplɔ́n nǔ hwiɖée ǎ? A nɔ ɖɔ nú mɛ lɛ́ɛ ɖɔ è ma jɛ ajo ó; étɛ́wú hwi ɖésúnɔ ka nɔ jɛ ajo? Hwi mɛ e nɔ ɖɔ è kún ɖó ná lɛ aga ó ɔ́, étɛ́ wú hwi ɖésúnɔ ka nɔ lɛ aga? Hwi mɛ e gbɛ́ wǎn nú vodún lɛ́ɛ bo ɖɔ ɔ́, étɛ́ wú a ka nɔ fin nǔ e ɖo xɔ yětɔn mɛ lɛ́ɛ bɛ́? Hwi mɛ e nɔ xɔ susu ɖó a ɖǒ Mawusɛ́n ɔ́ wútu ɔ́, a nɔ gba sɛ́n ɔ́, bó nɔ dó hɛn Mawu sín nyǐkɔ blí. Đó Mawuxówéma ɔ́ ɖɔ: “Mi mɛ Jwifu lɛ́ɛ wútu wɛ akɔta ɖě lɛ́ɛ nɔ́ ɖɔ xó nyanya dó Mawu wú.” Ényí a nɔ nyi sɛ́n ɔ́, ada e a gbo ɔ́ ɖó le nú we. Amɔ̌, ényí a ma ka nɔ nyi sɛ́n ɔ́ ǎ ɔ́, é cí a ma gbo ada ɖɔhun. Ényí mɛ e ma gbo ada ǎ é ka nɔ wa nǔ e sɛ́n ɔ́ zɔ́n ɔ́, Mawu ná sɔ́ ɛ dó mɔ mɛ e gbo ada é ná ǎ wɛ a? Mɛ e ma gbo ada ǎ, bó ka nɔ nyi sɛ́n lɛ́ɛ na ɖɔ hwɛ xá hwi mɛ e nyí Jwifu bo gbo ada, bó ɖó sɛ́nwéma ɔ́, bó ma ka nɔ wa nǔ e è wlán d'é mɛ lɛ́ɛ ǎ é. Nǔgbó ɔ́, mɛ e nyí Jwifu nǔgbó nǔgbó ɔ́ wɛ nyí mɛ e nyí ɖo nukún ta lɛ́ɛ ǎ; é ka nyí mɛ e è gbo ada ná kpowun ɖo wěxo é ǎ. Lo ɔ́, mɛ e nyí Jwifu nǔgbó nǔgbó ɔ́ wɛ nyí mɛ e nyí Jwifu ɖo ayi mɛ é, mɛ e gbo ada ɖo ayi mɛ é. Ada énɛ́ ɔ́, Yɛ Mawu tɔn wɛ nɔ gbo nú mɛ; ényí nǔ e è wlán dó sɛ́nwéma mɛ lɛ́ɛ wɛ nɔ́ gbo nú mɛ ǎ. Jwifu nǔgbó nǔgbó énɛ́ ɔ́, gbɛtɔ́ wɛ nɔ kpa susu n'i ǎ, lo ɔ́, Mawu wɛ nɔ́ kpa susu n'i. È nyǐ Jwifu ɔ́, le tɛ́ wɛ ɖ'é mɛ? È gbo ada ɔ́, ɖagbe tɛ́ wɛ ɖ'é mɛ? Le ɔ́ d'agba ɖo ali bǐ nu; ɖó le nukɔntɔn e Jwifu lɛ́ɛ ɖó ɔ́ wɛ nyí ɖɔ Mawu sɔ́ xó tɔn lɛ́ɛ dó así nú yě. Ényí mɛɖé lɛ́ɛ ɖo yě mɛ, bó ma nɔ gbejí ǎ ɔ́, nɛ̌ è ka ná ɖɔ gbɔn? Mawu ná gbɛ́ ɖɔ émí kún ná nɔ gbejí ó, ɖó yědɛɛ lɛ́ɛ ma nɔ gbejí wútu wɛ a? Gbeɖé kpɔ́n! Mi ɖó ná tunwun ɖɔ ényí gbɛtɔ́ lɛ́ɛ bǐ ná bo ɖo adingban ɖó wɛ ɔ́, Mawu ɔ́, nǔgbó wɛ é nyí, lě e Mawuxówéma ɔ́ ɖɔ gbɔn é; Mawuxówéma ɔ́ ɖɔ: “Xó ɖiɖɔ towe lɛ́ɛ mɛ ɔ́, è ɖǒ ná nɔ́ mɔ ɖɔ xó towe sɔgbe, bɔ è ɖɔ hwɛ xá we ɔ́, a ɖǒ ná nɔ́ ɖu ɖ'é jí.” Ényí nǔ nyanya e mǐ nɔ́ wa ɔ́ nɔ́ ɖe hwɛjijɔ Mawu tɔn xlɛ́ ɔ́, nɛ̌ mǐ ka ná ɖɔ gbɔn? Mǐ ná ɖɔ Mawu nɔ́ dó hwɛ agɔ, ɖó é nɔ́ dɔn tó nú mǐ wútu wɛ a? Lě e gbɛtɔ́ lɛ́ɛ nɔ́ ɖɔ xó gbɔn ɔ́ ɖɔ gbɔn wɛ un ɖe ɖo fí. Gbeɖé kpɔ́n! Xógbe énɛ́ sɔgbe ǎ; ɖó ényí Mawu nɔ́ dó hwɛ agɔ ɔ́, nɛ̌ wɛ é ka ná sixú ɖɔ hwɛ xá gbɛ ɔ́ gbɔn? Lo ɔ́, ényí adingban ce nɔ lɛ́ ɖe nǔgbó Mawu tɔn xlɛ́ d'é jí, bó nɔ́ sɔ́ ɛ su ɔ́, étɛ́ wú Mawu ka ná ɖó hwɛ nú mì hwɛhutɔ́ wɛ un nyí ɖɔhun? Ényí mɔ̌ wɛ é nyí ɔ́, étɛ́wú mǐ ma ka ná ɖɔ mi wá nú mǐ ná wa nǔ nyanya bónú nǔ ɖagbe ná tɔ́n sín mɛ ǎ? Mɛ e jló ná ɖɔ xó ce nyanya lɛ́ɛ nɔ́ ɖɔ mɔ̌ wɛ nyi nɔ ɖɔ. Mɛ énɛ́ lɛ́ɛ ɔ́, è nǎ ɖó hwɛ nú yě; nǔ e yě wa é ka byɔ́ mɔ̌. Lo ɔ́, étɛ́ ka wɛ? Mǐ mɛ Jwifu lɛ́ɛ ɔ́, mǐ nyɔ́ hú gbɛtɔ́ ɖě lɛ́ɛ wɛ a? Gbeɖé kpɔ́n! Đó un ko ɖe xlɛ́ ɖɔ Jwifu lɛ́ɛ kpódó gbɛtɔ́ ɖě lɛ́ɛ bǐ kpó wɛ kplé bó ɖo hwɛ sín acɛ mɛ. Mawuxówéma ɔ́ ɖɔ mɔ̌; Mawuxówéma ɔ́ ɖɔ: “Gbɛtɔ́ ɖěbǔ tíin, bó nyí hwɛjijɔnɔ ɖo Mawu nukún mɛ ǎ. Mɛ ɖokpó géé lě tíin ǎ. Mɛɖěbǔ tíin, bó mɔ nukúnnú jɛ nǔ e sɔgbe ɔ́ mɛ ǎ; mɛ ɖěbǔ ɖo Mawu ba wɛ ǎ. Gbɛtɔ́ lɛ́ɛ bǐ wɛ gosín ali ɖagbe ɔ́ jí; yě bǐ gosín ali ɖagbe ɔ́ jí ɖó kpɔ́, bó sɔ́ nyí nǔɖéwanú nú Mawu ǎ. Mɛɖěbǔ tíin bó nɔ́ wa ɖagbe ǎ; mɛ ɖokpó géé lě tíin ǎ. Nu yětɔn cí yɔdo e ɖo nuvo é ɖɔhun; yě nɔ sɔ́ ɖɛ̌ yětɔn dó blɛ́ mɛ ná. É cí dan sín aɖǐvɛ́ wɛ nɔ tɔ́n sín nu yětɔn mɛ ɖɔhun. Yě kɛ nu ɔ́, nu jɛ́n yě nɔ dó mɛ, bó nɔ́ ɖɔ dǎnǔ nú mɛ. Mɛhuhu wɛ yě nɔ́ hwlɛ́n dó. Yě gbɔn fí ɖěbǔ ɔ́, yě nɔ́ hɛn nǔ gblé; yě nɔ́ dɔn mɛ dó nyladó mɛ. Yě tunwun ali e è nɔ gbɔn bó nɔ́ mɔ fífá é ǎ. Yě nɔ́ sí Mawu ɖěbǔ ɖo gbɛzán yětɔn mɛ ǎ.” Mǐ ka tunwun ɖɔ nǔ e ɖɔ wɛ sɛ́n lɛ́ɛ ɖe ɔ́ bǐ ɔ́, mɛ e ɖo sɛ́n lɛ́ɛ glɔ́ lɛ́ɛ ɖɔ ná wɛ yě ɖe, bónú è nǎ xwe nu yětɔn dó xɔ, bónú Mawu ná ɖɔ hwɛ xá gbɛtɔ́ e ɖo gbɛ ɔ́ mɛ lɛ́ɛ bǐ. Đó mɛ ɖěbǔ ná nyí hwɛjijɔnɔ ɖo Mawu nukún mɛ, ɖó é wa nǔ e sɛ́n lɛ́ɛ zɔ́n lɛ́ɛ wútu ǎ; ɖó nǔ e sɛ́n ɔ́ wa kpowun ɔ́ wɛ nyí ɖɔ é nɔ́ bló bɔ gbɛtɔ́ lɛ́ɛ nɔ tunwun ɖɔ émí hu hwɛ. Amɔ̌, din ɔ́, Mawu xlɛ́ mǐ lě e é nɔ́ sɔ́ mǐ dó húzú hwɛjijɔnɔ ná gbɔn é. Mɛ sɔ́ dó húzú hwɛjijɔnɔ ná énɛ́ ka ɖó xó ɖé xá sɛ́n lɛ́ɛ nyinyi ǎ. Gbeyíɖɔ Mawu tɔn lɛ́ɛ kpódó sɛ́n e Mawu nǎ Jwifu lɛ́ɛ kpó ɖɔ xó d'é wú; yě ɖɔ: Mawu nɔ́ sɔ́ gbɛtɔ́ lɛ́ɛ dó húzú hwɛjijɔnɔ ná ɖo nukún tɔn mɛ, gbɔn nǔ e yě ɖi nú Jezu Klísu é jí. É nɔ wa mɔ̌ nú mɛ e nɔ ɖi nǔ nú Klísu lɛ́ɛ bǐ, ɖó ɖo Mawu gɔ́n ɔ́, vogbingbɔn ɖěbǔ ɖo yě mɛ ǎ. Đó gbɛtɔ́ lɛ́ɛ bǐ wɛ hu hwɛ bɔ susu e Mawu nɔ́ ná mɛ ɔ́, yě ɖó ɖě ɖ'é mɛ ǎ. Amɔ̌, Mawu ɔ́, ɖo xomɛnyínyɔ́ tɔn mɛ ɔ́, é sɔ́ yě mɛ e ɖi nǔ nú Klísu Jezu lɛ́ɛ bǐ dó húzú hwɛjijɔnɔ ná vɔ̌nu ɖo nukún tɔn mɛ gbɔn Klísu Jezu e nɔ ɖe yě sín hwɛ mɛ ɔ́ jí. Mawu sɔ́ Klísu ɖó te nú vɔ̌sísá, bónú gbɔn hun tɔn gbla mɛ ɔ́, Klísu ná mɔ hwɛ sɔ́ kɛ mɛ yí nú mɛ e ɖi nǔ n'i lɛ́ɛ é. Lě e Mawu nyí hwɛjijɔnɔ gbɔn é wɛ é jló ná ɖe xlɛ́ gbɔn mɔ̌. Đ'ayǐ ɔ́, Mawu ɖó suúlu, bó nɔ́ ɖo nǔ wa wɛ gbɛtɔ́ lɛ́ɛ kún hu hwɛ ó ɖɔhun. Amɔ̌, din ɔ́, é ɖe lě e é nɔ́ sɔ́ gbɛtɔ́ lɛ́ɛ dó húzú hwɛjijɔnɔ ɖo nukún tɔn mɛ gbɔn ɔ́ xlɛ́, ɖó é nyí hwɛjijɔnɔ, bó ná lɛ́ sɔ́ mɛ e ɖi nǔ nú Jezu lɛ́ɛ lɔmɔ̌ dó húzú hwɛjijɔnɔ. Hǔn, nǔ e wú gbɛtɔ́ lɛ́ɛ ná ɖó dó, bó dó yí go ɔ́ ɖě sɔ́ tíin a? Éeǒ! Đokpó géé lě tíin ǎ. Étɛ́wú nǔ ká nyí mɔ̌? Đó yě nɔ bló nǔ e sɛ́n ɔ́ zɔ́n ɔ́ wútu wɛ a? Éeǒ! Lo ɔ́, nǔ e yě ɖi nú Klísu ɔ́ wútu wɛ. Đó mǐ mɔ ɖɔ nǔ e gbɛtɔ́ ɖi nú Klísu ɔ́ wɛ nɔ zɔ́n bɔ Mawu nɔ́ sɔ́ ɛ dó húzú hwɛjijɔnɔ ná ɖo nukún tɔn mɛ; é nyí é nɔ bló nǔ e sɛ́n lɛ́ɛ zɔ́n ɔ́ wútu wɛ ǎ. Abǐ, Mawu ɔ́, Jwifu lɛ́ɛ sín Mawu kɛ́ɖɛ́ wɛ é nyí a? É nyí togun ɖě lɛ́ɛ lɔmɔ̌ tɔn ǎ cé? Ɛɛn, é nyí Mawu togun ɖě lɛ́ɛ lɔ tɔn ganjí. Đó Mawu ɖokpó géé wɛ tíin, bó ná kpɔ́n dó nǔɖiɖi e Jwifu lɛ́ɛ ɖó ɔ́ wú, bó ná sɔ́ yě dó húzú hwɛjijɔnɔ ná; mɔ̌ ɖokpó ɔ́, é ná lɛ́ kpɔ́n dó nǔɖiɖi e mɛ e ma nyí Jwifu ǎ lɛ́ɛ lɔmɔ̌ ɖó ɔ́ wú, bó ná sɔ́ yě dó húzú hwɛjijɔnɔ. Ée mǐ ɖɔ Mawu nɔ sɔ́ mɛ e ɖi nǔ nú Klísu lɛ́ɛ dó húzú hwɛjijɔnɔ na ɔ́ wɛ zɔ́n bɔ è nǎ ɖɔ sɛ́n lɛ́ɛ nyí nǔ yǎyá a? Gbeɖé kpɔ́n! É nyɔ́ wa ɔ́, nǔ e sɛ́n lɛ́ɛ nyí tawun ɔ́ ɖe xlɛ́ wɛ mǐ ɖe. Hǔn étɛ́ mǐ ná ɖɔ dó tɔ́gbó mǐtɔn Ablaxámu wú? Étɛ́ é ka mɔ yí? Ényí nǔ e Ablaxámu wa é wú wɛ Mawu mɔ ɛ dó mɔ hwɛjijɔnɔ ná ɔ́, Ablaxámu hɛn ɔ́, é ná yí go; é ka sixú yí go ɖo Mawu nukɔn ǎ. Đó Mawuxówéma ɔ́ ɖɔ: “Ablaxámu ɖi nǔ nú Mawu, bɔ Mawu kpɔ́n dó nǔ e é ɖi n'i ɔ́ wú, bó mɔ ɛ dó mɔ hwɛjijɔnɔ.” Mǐ tunwun ɖɔ mɛ e wa azɔ̌ ɔ́, è nɔ sú axɔ́ ɛ; axɔ́ énɛ́ e è sú i ɔ́, nǎ wɛ è nǎ ɛ vɔ̌nu ǎ; axɔ́ wɛ é nyí bɔ è ɖu dó e. Lo ɔ́, ényí mɛɖé nɔ azɔ̌ ma wa, bó ka ɖi nǔ nú Mawu e nɔ́ mɔ mɛ e ma nɔ sí i ɖ'ayǐ ǎ lɛ́ɛ dó mɔ hwɛjijɔnɔ ɔ́, é ná kpɔ́n dó nǔ e é ɖi n'i ɔ́ wú, bó ná mɔ ɛ dó mɔ hwɛjijɔnɔ. Mɛ e Mawu ma kpɔ́n dó azɔ̌ tɔn lɛ́ɛ wú ǎ, bó mɔ ɛ dó mɔ hwɛjijɔnɔ ɔ́, lě e Davídi ɖɔ nǔ nyɔ́ n'i gbɔn é ɖíe; Davídi ɖɔ: “Nǔ nyɔ́ nú mɛ e Aklúnɔ ɖe agɔ e yě jɛ lɛ́ɛ sín kɔ ná lɛ́ɛ é; yě mɛ e Aklúnɔ sɔ́ nǔ e yě wa nyi do lɛ́ɛ kɛ é. Nǔ nyɔ́ nú mɛ e Aklúnɔ ma xa hwɛ dó kɔ ná ǎ é.” Nyɔ̌ná énɛ́ ɔ́, mɛ e gbo ada lɛ́ɛ kɛ́ɖɛ́ tɔn wɛ é nyí a? Éeǒ! É nyí mɛ e gbo ada lɛ́ɛ kɛ́ɖɛ́ tɔn ǎ. É lɛ́ nyí mɛ e ma gbo ada ǎ lɛ́ɛ lɔ tɔn. Mǐ ko ɖɔ din ɖɔ: “Ablaxámu ɖi nǔ nú Mawu, bɔ Mawu kpɔ́n dó nǔɖiɖi tɔn wú, bó mɔ ɛ dó mɔ hwɛjijɔnɔ.” Nɛ̌ Ablaxámu ka ɖe gbɔn hwenɛ́nu? É kó gbo ada cóbɔ Mawu mɔ ɛ dó mɔ hwɛjijɔnɔ wɛ a, abǐ é kó gbo ada ǎ? Éeǒ! É kó gbo ada cóbɔ Mawu mɔ ɛ dó mɔ hwɛjijɔnɔ ǎ. Énɛ́ ɔ́ gúdo wɛ Ablaxámu wá gbó ada, bɔ é nyí wuntun ɖé n'i. Wuntun énɛ́ wɛ ɖe xlɛ́ ɖɔ Mawu mɔ ɛ dó mɔ hwɛjijɔnɔ, ɖó nǔ e é ɖi n'i cóbó wá gbo ada é wú. Mɔ̌ wɛ Ablaxámu nyí tɔ́ nú mɛ e ma gbo ada ǎ, bó ka ɖi nǔ nú Mawu, bɔ Mawu mɔ yě dó mɔ hwɛjijɔnɔ lɛ́ɛ bǐ gbɔn é nɛ́. É lɛ́ nyí mɛ e gbo ada lɛ́ɛ sín tɔ́; é nyí mɛ e gbo ada kpowun lɛ́ɛ wɛ ǎ; lo ɔ́, mɛ e gbo ada, bó nɔ lɛ́ tɛ afɔ afɔdo tɔ́gbó mǐtɔn Ablaxámu tɔn mɛ, ɖo nǔɖiɖi sín alixo lɛ́ɛ wɛ: Ablaxámu ɔ́ kó ɖi nǔ cóbó wá gbo ada. Mawu dó akpá nú Ablaxámu kpódó vǐ tɔn lɛ́ɛ kpó ɖɔ gbɛ ɔ́ ná nyí yětɔn. Sɛ́n e é nɔ nyi ɔ́ wútu wɛ Mawu dó akpá énɛ́ ɔ́ ǎ; lo ɔ́ hwɛjijɔnɔ e é nyí ɖo Mawu nukún mɛ ɖó nǔ e é ɖi n'i ɔ́ wú wɛ Mawu dó akpá énɛ́ n'i. Đó é nyí mɛ e nɔ wa nǔ e sɛ́n ɔ́ zɔ́n lɛ́ɛ wɛ ná mɔ nǔ e sín akpá Mawu dó ɔ́ yí ɔ́, hǔn nǔɖiɖi ɔ́ nyí nǔ yǎyá, bɔ akpá e Mawu dó ɔ́ sɔ́ na nyí nǔɖé wa nú ǎ. Đó sɛ́n ɔ́ nɔ dɔn xomɛsin Mawu tɔn kpó hwɛɖɔxámɛ tɔn kpó wá; amɔ̌ fí e sɛ́n ɖé ma ka ɖe ǎ ɔ́, è sixú gba sɛ́n ɖo fínɛ́ ǎ. Énɛ́ ɔ́, Mawu dó akpá ɖó nǔɖiɖi wútu, bónú é ná nyí nǔníná vɔ̌nu Mawu tɔn, bónú akpá énɛ́ e é dó ɔ́ na nyí Ablaxámu sín vǐ lɛ́ɛ bǐ tɔn. É nyí mɛ e ɖó sɛ́n lɛ́ɛ kɛ́ɖɛ́ wɛ é ná xɔ akwɛ́ ná ǎ; lo ɔ́, é ná xɔ akwɛ́ nú mɛ e ɖi nǔ nú Mawu Ablaxámu ɖɔhun lɛ́ɛ lɔ bǐ. Ablaxámu wɛ nyí tɔ́ mǐtɔn; é wɛ nyí tɔ́ nú mɛ bǐ. Mawuxówéma ɔ́ ɖɔ: “Un sɔ́ we dó ɖó tɔ́ nú akɔta wɔ̌buwɔ́bú.” É wɛ nyí tɔ́ mǐtɔn ɖo Mawu e é ɖi nǔ na ɔ́ nukún mɛ; Mawu e nɔ ná gbɛ mɛkúkú lɛ́ɛ, bó nɔ ɖɔ xó kpowun bɔ nǔ e ma ko tíin ǎ lɛ́ɛ nɔ tíin é. Ablaxámu ɖi nǔ, bó ɖó nukún nǔ; nǔ ɖěbǔ ka ɖe bɔ è sixú ɖó nukún ǎ; nǔ ɖo mɔ̌ có Ablaxámu ɖi nǔ, bó ɖó nukún nǔ. Mɔ̌ wɛ é húzú tɔ́gbó nú togun wɔ̌buwɔ́bú gbɔn, lě e Mawu ko ɖɔ n'i gbɔn é; Mawu ɖɔ n'i ɖɔ: “Lě e vǐ towe lɛ́ɛ ná sukpɔ́ gbɔn é nɛ́.” Ablaxámu ko ɖó xwe kanwe ko (100) mɔ̌, bó kó mɔ ɖɔ nǔ gbɛ́ dó agbaza émítɔn, bɔ asi émítɔn Sala lɔ sín xwe ko sɛ yi, bɔ é kún sɔ́ sixú ji vǐ ó; lo ɔ́, nǔɖiɖi tɔn vɔ́ da ǎ. É jó nǔɖiɖi dó ǎ; é ka xo nǔ kpɔ́n dó akpá e Mawu dó n'i ɔ́ wú ǎ; é nyɔ́ wa ɔ́, nǔɖiɖi tɔn ná ɛ hlɔ̌nhlɔ́n, bɔ é nɔ kpa susu nú Mawu. Đó é ɖeji bǐ dégbédégbé ɖɔ Mawu ɖó hlɔ̌nhlɔ́n, bó ná ɖe akpá e é dó nú émí é. Énɛ́ wútu wɛ Mawu mɔ Ablaxámu dó mɔ hwɛjijɔnɔ ɖó nǔ e é ɖi n'i ɔ́ wútu. Lo ɔ́, xógbe élɔ́ lɛ́ɛ e è wlán bó ɖɔ: “É mɔ ɛ dó mɔ hwɛjijɔnɔ” ɔ́, é nyí Ablaxámu kɛ́ɖɛ́ wútu wɛ è wlán ǎ. È lɛ́ wlán yě nú mǐ mɛ e è ná mɔ dó mɔ hwɛjijɔnɔ lɛ́ɛ lɔmɔ̌; mǐ mɛ e ɖi nǔ nú Mawu e fɔ́n Jezu Aklúnɔ mǐtɔn sín kú é. Mawu jǒ Jezu nú kú ɖó hwɛ mǐtɔn lɛ́ɛ tamɛ, bɔ é ka fɔ́n wá gbɛ, bó ná sɔ́ mǐ dó húzú hwɛjijɔnɔ ɖo nukún tɔn mɛ. Hǔn, ée Mawu sɔ́ mǐ dó húzú hwɛjijɔnɔ gbɔn nǔɖiɖi gbla mɛ ɔ́, fífá ɖo mǐ kpo Mawu kpo tɛ́ntin, gbɔn Aklúnɔ mǐtɔn Jezu Klísu sín nǔwiwa lɛ́ɛ gbla mɛ. Nǔɖiɖi mǐtɔn zɔ́n bɔ mǐ kpé wú, bó mɔ fɛ́nú e Mawu ná mǐ ɔ́ yí gbɔn Jezu jí; fɛ́nú énɛ́ wɛ zɔ́n bɔ mǐ lí dǒ din. Nǔ e nɔ dó xomɛhunhun nú mǐ ɔ́ wɛ nyí nukún e ɖó wɛ mǐ ɖe ɖɔ mǐ ná ɖó mǐmá ɖo susu Mawu tɔn mɛ é. Ée lɛ́ hú mɔ̌ ɔ́ wɛ nyí ɖɔ mǐ na bo ɖo wǔvɛ́ mɔ wɛ ɔ́, xomɛ nɔ hun mǐ, ɖó mǐ tunwun ɖɔ wǔvɛ́mimɔ nɔ ná bɔ è nɔ ɖó suúlu; bɔ suúluɖíɖó nɔ́ ná bɔ è nɔ dɛ ɖo tɛ́nkpɔ́n nu, bɔ didɛ ɔ́ nɔ́ ná bɔ è nɔ ɖó nukúnɖíɖó. Nukúnɖíɖó énɛ́ ka nɔ flú mɛ ǎ, ɖó Mawu kɔn wǎn yíyí tɔn dó ayi mǐtɔn mɛ gbɔn Yɛsinsɛn e é ná mǐ ɔ́ jí. Đó hwenu e mǐ ma kó ɖó gǎn ɖé ǎ ɔ́, Klísu kú dó mǐ mɛ e ma nɔ sí Mawu ǎ lɛ́ɛ tamɛ, ɖo hwenu e Mawu ɖó dó é. É ná vɛ́ wǔ ɖésú, bɔ è nǎ yí gbe bo kú dó hwɛjijɔnɔ ɖé tamɛ. Afɔ wɛ ná nyɔ́ bɔ mɛɖé ná ɖó akɔ́nkpinkpan bó kú dó ɖagbewatɔ́ ɖé tamɛ. Amɔ̌, Mawu ɖe lě e é yí wǎn nú mǐ sɔ́ ɔ́ xlɛ́ mǐ, ɖó hwenu e mǐ kpo ɖo hwɛhutɔ́ nyí wɛ ɔ́ wɛ Klísu kú dó ta mǐtɔn mɛ. Din ɔ́, Mawu sɔ́ mǐ dó húzú hwɛjijɔnɔ gbɔn hun Jezu tɔn e kɔn nyi ayǐ ɔ́ gbla mɛ. Hǔn é ɖo gannaganna ɖɔ Mawu ná lɛ́ hwlɛ́n mǐ gán ɖo xomɛsin tɔn kpó hwɛɖɔxámɛ tɔn kpó sí. Kɛntɔ́ Mawu tɔn wɛ mǐ kó nyí ɖ'ayǐ; lo ɔ́, Mawu dó hwɛ gbɔ xá mǐ gbɔn kú e Vǐ tɔn kú ɔ́ gbla mɛ. Din e Mawu dó hwɛ gbɔ xá mǐ ɔ́, é ɖo gannaganna ɖɔ é ná hwlɛ́n mǐ gán gbɔn vǐ tɔn sín gbɛ gbla mɛ. Énɛ́ ɔ́ kɛ́ɖɛ́ ka wɛ ǎ; lo ɔ́, mǐ tlɛ lɛ́ ɖo awǎ jɛ wɛ ɖo Mawu mɛ gbɔn Aklúnɔ mǐtɔn Jezu Klísu e Mawu zé dó dó hwɛ gbɔ xá mǐ é jí. Hwɛhuhu ɔ́, gbɛtɔ́ ɖokpó géé jí wɛ é gbɔn bó wá gbɛ ɔ́ mɛ; mɛ énɛ́ wɛ nyí Adámu; hwɛhuhu ɔ́ ka dɔn kú wá. Énɛ́ ɔ́, gbɛtɔ́ lɛ́ɛ bǐ nɔ kú, ɖó mɛ bǐ wɛ hu hwɛ. Cóbónú Mawu ná ná sɛ́n ɔ́ Mɔyízi ɔ́, hwɛhuhu ko tíin ɖo gbɛ ɔ́ mɛ; lo ɔ́, ée sɛ́n ɔ́ ma kó ɖe ǎ ɔ́, Mawu nɔ lɛ́n hwɛ dó kɔ nú mɛɖé ɖ'ayǐ ǎ. É ɖo mɔ̌ có, bɛ́ sín Adámu hwenu ɖokpóó káká wá jɛ Mɔyízi hwenu ɔ́, kú ɔ́ ɖu axɔ́sú; é ɖu axɔ́sú ɖo mɛ e sín hwɛ ma tlɛ cí hwɛ e Adámu hu é ɖɔhun ǎ lɛ́ɛ lɔ jí; Adámu e vɛ́ tóli nú Mawu é. Adámu ɔ́, mɛ e ɖó ná wá ɔ́ sín akpajlɛ́ wɛ é nyí. È sixú jlɛ́ nǔníná Mawu tɔn vɔ̌nu ɔ́ dó nǔ e Adámu wa nyi do ɔ́ wú ǎ; ɖó é sín nǔ e gbɛtɔ́ ɖokpó géé énɛ́ wa nyi do ɔ́ wú, bɔ mɛ gěgé kú; lo ɔ́ fɛ́nú Mawu tɔn ɔ́ hú gǎn nǔwanyido Adámu tɔn ɔ́ ɖaxó, bɔ nǔníná e é ná mɛ gěgé vɔ̌nu gbɔn gbɛtɔ́ ɖokpó géé jí ɔ́ (Jezu Klísu) lɛ́ ɖo tají hú mɔ̌. Nǔ e nǔníná Mawu tɔn nɔ wa ɔ́ gbɔn vo nú nǔ e hwɛ e gbɛtɔ́ ɖokpó géé (Adámu) énɛ́ hu ɔ́ dɔn wá é. Đó hwɛ e è ɖɔ dó nǔwanyido gbɛtɔ́ ɖokpó géé énɛ́ tɔn ɔ́ dɔn hwɛɖónúmɛ wá gbɛ ɔ́ mɛ. Nǔníná vɔ̌nu e Mawu ná mǐ dó nǔwanyido gěgé gúdo ɔ́ ɖe mǐ sín hwɛ mɛ. Ée é sín nǔ e gbɛtɔ́ ɖokpó géé wa nyi do ɔ́ wú, bɔ kú ɖu axɔ́sú gbɔn gbɛtɔ́ ɖokpó géé énɛ́ jí ɔ́, é ɖo gannaganna ɖɔ mɛ e Mawu ná fɛ́nú kpódó nǔníná hwɛjijɔ tɔn kpó, bɔ é túnflá lɛ́ɛ ná nɔ gbɛ bó ná ɖu axɔ́sú ɖo hwɛhuhu jí, ɖó nǔ e Jezu- Klísu wa é wútu. Hǔn nǔ e gbɛtɔ́ ɖokpó géé wa nyi do ɔ́ dɔn hwɛɖónúmɛ wá nú gbɛtɔ́ bǐ, mɔ̌ ɖokpó ɔ́ jɛ́n azɔ̌ jlɔ́jlɔ́ e gbɛtɔ́ ɖokpó géé (Jezu Klísu) wa ɔ́ ɖe gbɛtɔ́ lɛ́ɛ bǐ sín hwɛɖónúmɛ mɛ, bó ná gbɛ yě. Đó lě e tónúmase gbɛtɔ́ ɖokpó géé tɔn zɔ́n bɔ gbɛtɔ́ gěgé húzú hwɛhutɔ́ ɔ́, mɔ̌ jɛ́n tónúsise gbɛtɔ́ ɖokpó géé tɔn zɔ́n bɔ gbɛtɔ́ gěgé húzú hwɛjijɔnɔ ɖo Mawu nukún mɛ. Sɛ́n ɔ́ wá, bónú hwɛhuhu ná sukpɔ́; fí e hwɛhuhu ka sukpɔ́ ɖe ɔ́, fɛ́nú Mawu tɔn nɔ túnflá ɖo fínɛ́. Hǔn énɛ́ ɔ́ wú wɛ lě e hwɛhuhu ko ɖu axɔ́sú gbɔn kú jí ɔ́, mɔ̌ ɖokpó ɔ́ jɛ́n fɛ́nú Mawu tɔn ɖo axɔ́sú ɖu wɛ gbɔn hwɛjijɔ jí, bó ná kplá mǐ yi gbɛ mavɔ mavɔ mɛ gbɔn Jezu Klísu Aklúnɔ mǐtɔn jí. Étɛ́ mǐ ka ná ɖɔ din? Mǐ nǎ ɖo gbɛ ɖo hwɛ mɛ tɛgbɛ bónú fɛ́nú Mawu tɔn ní túnflá wɛ a? Gbeɖé kpɔ́n! Đo hwɛhuhu sín alixo ɔ́, mǐ kó kú; bɔ nɛ̌ mǐ ka ná lɛ́ kpo ɖo hwɛ hu wɛ gbɔn? Abǐ mi tunwun ɖɔ mǐ mɛ e ko lɛ yɛhwesin, bó ɖo bǔ xá Klísu Jezu lɛ́ɛ ɔ́, mǐ bǐ kú kú e Klísu kú ɔ́ ǎ cé? Hwenu e è lɛ yɛhwesin nú mǐ ɔ́, mǐ kú xá Klísu, bɔ è ɖi mǐ kpó e kpó, bónú lě e Mawu Tɔ́ ɔ́ sɔ́ hlɔ̌nhlɔ́n tɔn susunɔ ɔ́ dó fɔ́n Klísu ná ɔ́, mɔ̌ ɖokpó ɔ́, mǐ lɔ ná zán gbɛ yɔ̌yɔ́. Đó ée mǐ ko ɖo bǔ xá ɛ, bó ko kú xá ɛ ɔ́, mɔ̌ ɖokpó ɔ́ jɛ́n mǐ ɖo bǔ xá ɛ bó ko fɔ́n sín kú xá ɛ. Mǐ tunwun ganjí ɖɔ gbɛtɔ́ e mǐ ko nyí ɖ'ayǐ ɔ́, ká wɛ è ko ká gbɛtɔ́ énɛ́ kpódó Klísu kpó nyi aklúzu jí, bó ná sú kún dó nú hwɛhuhu sín ninɔmɛ e mǐ ɖó ɖ'ayǐ é, bónú mǐ ma sɔ́ nyí kannumɔ nú hwɛhuhu ɖě ó. Đó mɛ e kú ɔ́ gosín hwɛhuhu sín hlɔ̌nhlɔ́n kan nu. Ée mǐ kú xá Klísu ɔ́, mǐ ɖi nǔ ɖɔ mǐ lɔmɔ̌ mǐ ná nɔ gbɛ xá ɛ. Đó mǐ tunwun ɖɔ ée Mawu fɔ́n Klísu sín kú ɔ́, Klísu kún sɔ́ ná kú ó; ɖó kú sɔ́ ɖó acɛ ɖo jǐ tɔn ǎ. Đó Klísu kú; hwɛhuhu sɔ́ ná ɖó hlɔ̌nhlɔ́n ɖé ǎ wútu wɛ é kú azɔn ɖokpó géé, bɔ xó fó. Lo ɔ́, Klísu fɔ́n wá gbɛ; é ná nɔ gbɛ nú Mawu wútu wɛ é fɔ́n wá gbɛ. Mɔ̌ ɖokpó ɔ́, ɖo bǔ e mǐ ɖe xá Klísu Jezu ɔ́ mɛ ɔ́, mi lɔmɔ̌ mi ní nɔ mɔ miɖée dó mɔ mɛ e ko kú ɖo hwɛhuhu sín alixo ɔ́ na bo nɔ mɔ miɖée dó mɔ mɛ e ɖo gbɛ nú Mawu ɔ́ ná. Hǔn, hwɛhuhu ní ma ɖu axɔ́sú ɖo agbaza mitɔn e ná kú ɔ́ nu ó; mi ma se tónú nú jló agbaza tɔn lɛ́ɛ ó. Mi ma sɔ́ miɖée dó wa azɔ̌ nú hwɛhuhu azɔ̌wanú e nɔ wa nǔ agɔ lɛ́ɛ é ɖɔhun ó; é nyɔ́ wa ɔ́, mi sɔ́ miɖée jó nú Mawu, ɖó mɛ e fɔ́n sín kú é wɛ mi nyí; mi sɔ́ miɖée bǐ jó nú azɔ̌ tɔn, azɔ̌wanú e nɔ wa nǔ jlɔ́jlɔ́ lɛ́ɛ é ɖɔhun. Đó hwɛhuhu ná ɖó acɛ ɖo mi jí ǎ; ɖó mi sɔ́ ɖo sɛ́n ɔ́ sín acɛ mɛ ǎ; lo ɔ́, fɛ́nú Mawu tɔn mɛ wɛ mi ɖe. Étɛ́ o! Ée mǐ ma ɖo sɛ́n ɔ́ sín acɛ mɛ ǎ, bó ɖo fɛ́nú Mawu tɔn mɛ ɔ́ wú wɛ mǐ ná hu hwɛ a? Gbeɖé kpɔ́n! Mi tunwun ganjí ɖɔ ényí mi jó miɖée dó kannumɔ ɖɔhun nú mɛɖé, bó ná se tónú n'i ɔ́, kannumɔ mɛ e se tónú ná wɛ mi ɖe ɔ́ tɔn wɛ mi nyí. É sixú nyí hwɛhuhu e nɔ kplá mɛ yi kú é; é ka sixú nyí tónúse nú Mawu e nɔ sɔ́ mɛ dó húzú hwɛjijɔnɔ ɖo Mawu nukún mɛ é. Lo ɔ́, è ní kpa susu nú Mawu! Mi mɛ e ko nyí kannumɔ nú hwɛhuhu ɖ'ayǐ ɔ́, din ɔ́, mi se tónú kpódó ayixa mitɔn bǐ sésé kpo nú kpɔ́ndéwú e ɖo kplɔ́n e mi yí ɔ́ mɛ é. È hwlɛ̌n mi gán sín hwɛ sín acɛ mɛ, bɔ mi húzú kannumɔ nú hwɛjijɔ. Un ɖo xó ɖɔ nú mi wɛ lě e gbɛtɔ́ nɔ ɖɔ xó gbɔn é, ɖó nukúnnú e mi ma nɔ yá wǔ mɔ jɛ nǔ e kan Mawu lɛ́ɛ mɛ ǎ wútu. Ɖ'ayǐ xóxó ɔ́, mi jó miɖée bǐ dó kannumɔ ɖɔhun nú nǔblíblí wiwa kpódó gbɛ nyanya zínzán kpán; nǔ énɛ́ lɛ́ɛ wiwa nɔ zɔ́n bɔ mi nɔ vɛ́ tóli nú Mawu. Mɔ̌ ɖokpó ɔ́, din ɔ́, mi jó miɖée dó bǐ kannumɔ ɖɔhun nú nǔjlɔ́jlɔ́wiwa; énɛ́ ná zɔ́n bɔ mi ná nɔ sixú zán gbɛ mímɛ́. Hwenu e mi nyí hwɛ sín kannumɔ ɖ'ayǐ ɔ́, é ɖo dandan nú mi ɖɔ mi ní nɔ wa nǔ jlɔ́jlɔ́ ǎ. Nǔ énɛ́ lɛ́ɛ e mi wa ɖ'ayǐ, bɔ é ɖo winnyá nyí nú mi wɛ din ɔ́, étɛ́ mi ka mɔ ɖ'é mɛ? Nǔ énɛ́ lɛ́ɛ ɔ́, kú wɛ yě nɔ dɔn mɛ yi. Amɔ̌, din ɔ́, è ɖe mi sín hwɛhuhu sín acɛ mɛ, bɔ mi ɖo azɔ̌ wa nú Mawu wɛ. Nǔ e mi ná mɔ ɖ'é mɛ ɔ́ wɛ nyí ɖɔ mi na zán gbɛ mímɛ́, bɔ vivɔnu ɔ́, mi ná mɔ gbɛ mavɔ mavɔ. Đó axɔ́ e hwɛhuhu nɔ sú mɛ ɔ́ wɛ nyí kú; amɔ̌ nǔ e Mawu nɔ ná mɛ vɔ̌nu ɔ́ wɛ nyí gbɛ mavɔ mavɔ e mǐ ɖó ɖo bǔ e mǐ ɖe xá Klísu Jezu Aklúnɔ mǐtɔn mɛ é. Nɔví lɛ́ɛ mi, nǔ e ná ɖɔ nú mi wɛ un ɖe ɔ́, mi ko tunwun, ɖó mi tunwun sɛ́n ɔ́. Hwenu e gbɛtɔ́ ɖo gbɛ ɔ́ jɛ́n sɛ́n ɔ́ nɔ kpa acɛ n'i. Nǔ e wú è nǎ kpɔ́n dó ɔ́ ɖíe: nyɔ̌nu e ɖo asúxwé ɔ́, sɛ́n ɔ́ cá ɛ dó asú tɔn wú, káká yi jɛ hwenu e asú tɔn ná nɔ gbɛ xɔ é bǐ; lo ɔ́, ényí asú ɔ́ kú ɔ́, nyɔ̌nu ɔ́ gosín sɛ́n e cá ɛ dó asú tɔn wú ɔ́ sín acɛ mɛ. Hǔn ényí nyɔ̌nu énɛ́ jó éɖée dó nú súnnu ɖěvo hwenu e asú tɔn kpo ɖo gbɛ ɔ́, è nǎ ylɔ́ ɛ ɖɔ agalɛtɔ́; lo ɔ́, ényí asú tɔn kú ɔ́, ɖo sɛ́n ɔ́ sín alixo ɔ́, é jɛ éɖée sí, bó hɛn ɔ́, é ná húzú súnnu ɖěvo sín asi; hwe énɛ́ ɔ́ nu ɔ́, è sɔ́ na ylɔ́ ɛ ɖɔ agalɛtɔ́ ǎ. Mɔ̌ ɖokpó ɔ́ nɔví ce lɛ́ɛ mi, ɖo sɛ́n ɔ́ sín alixo ɔ́, mi lɔmɔ̌ ɔ́, mi ko kú. Ée mi cá miɖée xá Klísu ɔ́, kú wɛ mi ko kú ɖo sɛ́n ɔ́ sín alixo. Din ɔ́, mɛ ɖěvo tɔn wɛ mi nyí; mɛ e fɔ́n sín kú é tɔn wɛ mi nyí, bónú mǐ ná nɔ́ wa nǔ e nyɔ́ Mawu nukún mɛ é. Nǔgbó ɔ́, hwenu e mǐ ɖó hwɛhuhu sín ninɔmɛ ɖ'ayǐ ɔ́, jló nyanya e sɛ́n ɔ́ nɔ dɔn wá lɛ́ɛ nɔ wa azɔ̌ ɖo agbaza mǐtɔn bǐ mɛ, bó nɔ kplá mǐ yi kú. Amɔ̌, din ɔ́, è ko ɖe mǐ sín sɛ́n ɔ́ sín acɛ mɛ; mǐ ko kú ɖo sɛ́n énɛ́ e hɛn mǐ dó hɛn gantɔ́ é sín alixo; hǔn din ɔ́, mǐ hɛn ɔ́, mǐ ná zé walɔ yɔ̌yɔ́ ɔ́ dó wa azɔ̌ nú Mawu, ɖo Yɛsinsɛn ɔ́ sín acɛ mɛ; é sɔ́ ná nyí walɔ xóxó e mǐ nɔ dó wa azɔ̌ n'i ɖo sɛ́n e è wlǎn ɔ́ sín acɛ mɛ é ǎ. Étɛ́ mǐ ka ná ɖɔ lo? Sɛ́n ɔ́ hwɛhuhu wɛ é nyí a? Gbeɖé kpɔ́n! Sɛ́n ɔ́ wɛ zɔ́n bɔ un tunwun nǔ e nyí hwɛhuhu é; ɖó sɛ́n ɔ́ ma ɖɔ: “Nukún towe ní má nɔ nɔzo towe sín nǔɖé wú ó” ǎ ɔ́, un ná tunwun nǔ e nyí mɛɖévonú jlójló é ǎ. Ali e sɛ́n ɔ́ ɖe ɔ́ jí wɛ hwɛhuhu gbɔn, bó sɔ́ mɛnújlójló alɔkpa lɛ́ɛ bǐ dó ayi mɛ nú mǐ; ɖó sɛ́n ɔ́ ma tíin ǎ ɔ́, hwɛhuhu ɖó acɛ ɖé ǎ. Đ'ayǐ ɔ́, hwenu e sɛ́n ɔ́ ma ɖe ǎ ɔ́, un ɖo gbɛ; amɔ̌, ée sɛ́n ɔ́ wá jɛ nǔ e è ma ɖó ná wa ǎ lɛ́ɛ ɖe tɔ́n jí ɔ́, hwɛhuhu ɔ́ bɛ́ azɔ̌wiwa, bɔ nyɛ kú: sɛ́n e ɖó ná ná gbɛ mɛ ɔ́, kú wɛ é dɔn mì yi. Đó hwɛhuhu ɔ́ xwedó ali e é mɔ ɔ́, bó flú mì gbɔn sɛ́n ɔ́ jí; é lɛ́ gbɔn sɛ́n ɖokpó énɛ́ jí, bó hu mì. Hǔn sɛ́n ɔ́, nǔ mímɛ́ wɛ é nyí bɔ nǔ e é nɔ zɔ́n mɛ ɔ́ lɔ nyí nǔ mímɛ́, lobo nyí nǔ jlɔ́jlɔ́, nǔ ɖagbe. Nǔ e nyí nǔ ɖagbe ɔ́, nǔ e nɔ́ hu mɛ ɔ́ wɛ é húzú nú nyɛ a? Gbeɖé kpɔ́n! Hwɛhuhu wɛ zɔ́n bɔ un kú; hwɛhuhu ɔ́, ninɔmɛ titewungbe e é ɖó ɔ́ wɛ é ɖe xlɛ́ gbɔn mɔ̌. É sɔ́ nǔ e nyí nǔ ɖagbe ɔ́ ɖó nukɔn, bó dó hu nyɛ ná. Lě e hwɛhuhu ɔ́ gbɔn nǔ e sɛ́n zɔ́n ɔ́ jí, bó húzú hwɛ e nylá ɖésú ɔ́ gbɔn é nɛ́. Nǔgbó ɔ́, mǐ tunwun ɖɔ sɛ́n ɔ́, Mawu gɔ́n wɛ é gosín; nyɛ ɔ́, un ka ɖó hwɛhuhu sín ninɔmɛ, bɔ è sa mì nú hwɛhuhu. Đó un nɔ tunwun nǔ e wa wɛ un ɖe ɔ́ ǎ; un nɔ wa nǔ e un jló ná wa ɔ́ ǎ; nǔ e un nɔ gbɛ́ wǎn ná ɔ́ wɛ un nɔ wa. Ée é nyí ɖɔ nǔ e un ma jló ná wa ǎ ɔ́ wɛ un nɔ wa ɔ́, un mɔ ɖɔ sɛ́n ɔ́, nǔ ɖagbe wɛ é nyí, gbɔn nǔ e un nɔ wa gbɔn mɔ̌ ɔ́ gbla mɛ. Ényí nǔ cí mɔ̌ ɔ́, hǔn nǔ e wa wɛ un ɖe ɔ́, nyɛ ɖésú wɛ ɖo blǒbló wɛ ǎ; lo ɔ́, hwɛhuhu e ɖo nyɛ mɛ ɔ́ wɛ ɖo nǔ wa gbɔn mɔ̌ wɛ. Đó un tunwun ɖɔ nǔ ɖagbe wiwa kún ɖo ayixa ce mɛ ó; é wɛ nyí ɖɔ nǔ ɖagbe wiwa ɖo hwɛhuhu sín ninɔmɛ e un ɖó ɔ́ mɛ ǎ; ɖó un jló bó ná wa nǔ ɖagbe; amɔ̌, un ɖó hlɔ̌nhlɔ́n e ná wa é ǎ. Nǔ ɖagbe e un nɔ jló ná wa ɔ́, un nɔ wa ǎ; lo ɔ́, nǔ nyanya e un ma jló ǎ ɔ́ wɛ un nɔ wa. Ényí un ka nɔ bló nǔ e un ma jló ná wa ǎ ɔ́, hǔn é sɔ́ nyí nyɛ ɖésúnɔ wɛ ɖo nǔ wa gbɔn mɔ̌ wɛ ǎ, lo ɔ́ hwɛhuhu e ɖo ayi ce mɛ ɔ́ wɛ ɖo nǔ wa gbɔn mɔ̌ wɛ. Hǔn, nǔ e un wá mɔ ɖo nyɛɖée mɛ ɔ́ ɖíe: un jló na wa ɖagbe hweɖěbǔnu ɔ́, nǔ nyanya kɛ́ɖɛ́ wú jɛ́n un nɔ kpé, bó nɔ wa. Đo linlin ce mɛ ɔ́, Mawusɛ́n ɔ́ wɛ nɔ dó xomɛhunhun nú mì. Amɔ̌, sɛ́n ɖěvo tíin ɖo agbaza ce mɛ, bó ɖo hun xo xá sɛ́n e ɖo linlin ce mɛ é wɛ, bó sɔ́ mì dó ɖó gantɔ́ nú hwɛhuhu sɛ́n e ɖo agbaza ce mɛ é. Gbɛ ce blá wǔ; mɛ ka na xɔ mì ɖo agbaza élɔ́ e dɔn mì xwe kú ɔ́ sí? Mi ní kpa susu nú Mawu gbɔn Jezu Klísu Aklúnɔ mǐtɔn jí. Kléwún mɛ ɔ́, nyɛ ɖésúnɔ mɔ ɖɔ un nyí kannumɔ nú Mawusɛ́n ɔ́; lo ɔ́, ɖo hwɛhuhu sín ninɔmɛ e un ɖó ɔ́ mɛ ɔ́, un nyí kannumɔ nú hwɛhuhu sɛ́n ɔ́. Hǔn din ɔ́, hwɛɖónúmɛ sɔ́ ɖe nú mɛ e ɖo bǔ xá Klísu Jezu lɛ́ɛ ǎ. Đó Yɛsinsɛn e nɔ na gbɛ mɛ, ɖo bǔ e è ɖe xá Klísu Jezu ɔ́ mɛ ɔ́ sín sɛ́n hwlɛ́n mì ɖo sɛ́n e nɔ ɖe hwɛhuhu kpódó kú kpó xlɛ́ mì ɔ́ sí. Nǔ e Mɔyízisɛ́n ɔ́ ma kpé wú bó bló ǎ ɖó hwɛhuhu sín ninɔmɛ e gbɛtɔ́ ɖó ɔ́ zɔ́n bɔ é vɔ́da wútu ɔ́, Mawu bló: é sɛ́ Vǐ é ɖésúnɔ tɔn dó, ɖó hwɛhuhu ɔ́ wútu, bɔ é zɔn agbaza mɛ wá; agbaza e mɛ é zɔn wá ɔ́ cí hwɛhuhu sín agbaza e gbɛtɔ́ ɖó é ɖɔhun. Mawu bló mɔ̌, bó dó ɖó hwɛ nú hwɛhuhu ɖo gbɛtɔ́ sín agbaza mɛ. Mawu bló nǔ énɛ́ ɔ́, bónú nǔ e sɛ́n ɔ́ ɖɔ è ɖǒ na wa ɔ́, ní nyí wiwa ɖo mǐ mɛ; mǐ mɛ e ma sɔ́ nɔ zán gbɛ mǐtɔn lě e hwɛhuhu sín ninɔmɛ e mǐ ɖó ɔ́ jló gbɔn ɔ́ ǎ, bó nɔ zán lě e Yɛsinsɛn jló gbɔn é. Nǔgbó ɔ́, mɛ e nɔ zán gbɛ lě e hwɛhuhu sín ninɔmɛ e mǐ ɖó ɔ́ jló gbɔn lɛ́ɛ ɔ́, ninɔmɛ hwɛhuhu tɔn sín nǔ lɛ́ɛ jí wɛ ayixa yětɔn nɔ́ nɔ; lo ɔ́, mɛ e nɔ zán gbɛ lě e Yɛsinsɛn jló gbɔn lɛ́ɛ ɔ́, Yɛsinsɛn sín nǔ lɛ́ɛ jí wɛ ayixa yětɔn nɔ́ nɔ. Ényí ayixa mɛtɔn ɖo hwɛhuhu sín nǔ lɛ́ɛ jí ɔ́, kú wɛ é nɔ kplá mɛ yi; ayixa mɛtɔn ka ɖo Yɛsinsɛn sín nǔ lɛ́ɛ jí ɔ́, é nɔ kplá mɛ bɔ è nɔ mɔ gbɛ, bó nɔ mɔ fífá. Mɛ e jí ninɔmɛ hwɛhuhu tɔn sín nǔ lɛ́ɛ nɔ ɖu gǎn ɖe lɛ́ɛ ɔ́, kɛntɔ́ Mawu tɔn wɛ yě nyǐ; ɖó yě nɔ yí gbe bó nɔ́ nɔ Mawusɛ́n ɔ́ sín acɛ mɛ ǎ; yě ka sixú kpé wú lɔ ǎ. Yě mɛ e ɖo hwɛhuhu sín ninɔmɛ e yě ɖǒ ɔ́ sín acɛ mɛ lɛ́ɛ sixú wa nǔ bɔ é ná hun xomɛ nú Mawu ǎ. Amɔ̌, midɛɛ lɛ́ɛ ɔ́, mi sɔ́ nɔ zán gbɛ mitɔn lě e hwɛhuhu sín ninɔmɛ e mi ɖó ɔ́ zɔ́n gbɔn é ǎ; lě e Yɛsinsɛn jló gbɔn ɔ́ wɛ mi nɔ zán gbɛ mitɔn gbɔn; ényí Yɛ Mawu tɔn ɖo mi mɛ nǔgbó ɔ́ nɛ́. Mɛ ɖé ma ɖó Yɛ Klísu tɔn ǎ ɔ́, mɛ ɔ́ nyí Klísu tɔn ǎ. Ényí Klísu ɖo mi mɛ ɔ́, agbaza mitɔn ɖo te nú kú, ɖó hwɛhuhu wútu; có Yɛ ɔ́ nyí gbɛ ɖo mi mɛ ɖó Mawu zé mi dó húzú hwɛjijɔnɔ ná. Ényí Mawu e fɔ́n Jezu sín kú ɔ́ sín Yɛ ɖo mi mɛ ɔ́, mɛ e fɔ́n Klísu Jezu sín kú ɔ́ ná ná gbɛ agbaza mitɔn e ɖo te nú kú ɔ́ lɔmɔ̌ gbɔn Yɛ tɔn e ɖo mi mɛ é jí. Nɔví lɛ́ɛ mi! Ényí mɔ̌ hǔn, azɔ̌ ɖo te nú mi; é ka nyí hwɛhuhu sín ninɔmɛ e mǐ ɖó ɔ́ na wa azɔ̌ ná wɛ mǐ ɖe, bó ná zán gbɛ mǐtɔn lě e é jló mǐ gbɔn é ǎ. Đó ényí mi nɔ zán gbɛ mitɔn lě e hwɛhuhu sín ninɔmɛ e mi ɖo ɔ́ nɔ jló gbɔn ɔ́, mi ná kú. Lo ɔ́, ényí mi gbɔn Yɛsinsɛn jí bó hu walɔ agbaza tɔn lɛ́ɛ ɔ́, mi ná nɔ gbɛ. Mɛ e Yɛ Mawu tɔn nɔ́ xlɛ́ ali lɛ́ɛ bǐ wɛ nyí Mawu ví. Đó Yɛ e Mawu na mi ɔ́ nyí, yɛ e na sɔ́ mi dó ɖó kannumɔ, bó ná bló bɔ mi na húzú xɛsinɔ é ǎ. Lo ɔ́, Yɛsinsɛn e sɔ́ mi dó húzú Mawu ví, bó lɛ́ ná acɛ mǐ, bɔ mi nɔ sú xó ylɔ́ Mawu ɖɔ: “Daá ce! Tɔ́ ce vívɛ́ná” ɔ́ wɛ. Yɛ Mawu tɔn ɖésú ko yí gbe dó nǔ e yɛ mǐtɔn ɖɔ ɔ́ jí ɖɔ mǐ nyǐ Mawu ví. Ée é nyí ɖɔ vǐ tɔn wɛ mǐ nyí é ɔ́, mǐ ná ɖó mǐmá ɖo ɖagbe e é sɔ́ ɖ'ayǐ nú togun tɔn ɔ́ mɛ, bó ná lɛ́ ɖó ɖagbe énɛ́ xá Klísu. Đó ényí mǐ ji ya xá Klísu ɔ́, mǐ ná lɛ́ ɖó mǐmá ɖo susu tɔn mɛ. Un mɔ ɖɔ nǔ e ɖo mǐ gbo wɛ ɖo hwenu e mǐ ɖe din ɔ́, è kún sixú jlɛ́ dó susu e Mawu ná wá ɖe xlɛ́ mǐ ɔ́ wú ó. Nǔ e è blǒ lɛ́ɛ bǐ wɛ ɖo te, bó ɖó jló ɖaxó, bó ná mɔ hwenu e Mawu ná ɖe vǐ tɔn lɛ́ɛ xlɛ́ dó é. Nǔ e è blǒ lɛ́ɛ jɛ nǔ e ma nɔ kplá mɛ yi fí ɖé ǎ ɔ́ sín acɛ mɛ; é ka nyí yě ɖésúnɔ wɛ jló, bó jɛ acɛ tɔn mɛ ǎ; Mawu wɛ sɔ́ yě ɖó acɛ tɔn mɛ; é ɖo mɔ̌ có nukúnɖíɖó ɖé ka tíin. Đó è nǎ ɖe yě sín acɛ nǔhɛngblétɔ́ e hɛn yě dó hɛn gantɔ́ ná ɔ́ tɔn mɛ gbe ɖokpó, bɔ yě ná ɖó mǐmá ɖo mɛɖée sí jijɛ susunɔ e Mawu ví lɛ́ɛ ɖó ɔ́ mɛ. Nǔgbó ɔ́, mǐ tunwun ɖɔ káká jɛ din ɔ́, nǔ e è blǒ lɛ́ɛ bǐ wɛ ɖo azɔn wɛn wɛ, bó ɖo wǔvɛ́ mɔ wɛ nyɔ̌nu ɖo ajidonu ɖɔhun. Lo ɔ́, é nyí nǔ e è blǒ lɛ́ɛ kɛ́ɖɛ́ wɛ ɖo azɔn wɛn wɛ ǎ, mǐ mɛ e ko ɖó Yɛsinsɛn, bɔ é nyí nǔ nukɔntɔn e Mawu ná mǐ, ɖo nǔníná tɔn lɛ́ɛ mɛ ɔ́, mǐ lɔ ɖo azɔn wɛn wɛ ɖo ayi mɛ, lobo ɖo te kpɔ́n ɖɔ Mawu ní ɖe mǐ sín agbaza mǐtɔn mɛ, bó ná ɖɔ mǐ nyí vǐ émítɔn, lobo hwlɛ́n mǐ gan bǐ dégbédégbé. Đó è ko hwlɛ́n mǐ gán; lo ɔ́, mǐ ɖo nukún ɖó wɛ ɖɔ è ní hwlɛ́n mǐ gán bǐ dégbédégbé. Ényí è ɖo nǔ e ɖó nukún wɛ è ɖe ɔ́ mɔ wɛ ɔ́, hǔn é sɔ́ nyí nukúnɖíɖó ǎ; mɛ̌ ka ná lɛ́ kpo ɖo nukún ɖó nǔ e mɔ wɛ é ɖe ɔ́ wɛ? Ényí mǐ ɖo nukún ɖó nǔ e mɔ wɛ mǐ ma ɖe ǎ ɔ́ wɛ ɔ́, mǐ ɖo te kpɔ́n kpódó sɔxwixwe kpó. Mɔ̌ ɖokpó ɔ́, Yɛsinsɛn lɔ nɔ gɔ́ alɔ nú mǐ ɖo gǎnmaɖó mǐtɔn mɛ, ɖó mǐ nyɔ́ ɖɛ xo lě e é jɛ xá gbɔn é ǎ; lo ɔ́, Yɛ ɔ́ ɖésú nɔ xo ɖɛ dó ta mǐtɔn mɛ kpódó azɔnwinwɛn e è ma sixú ɖɔ ǎ é kpó. Bɔ Mawu e nɔ mɔ nukúnnú jɛ ayi mɛ ɔ́ mɔ nukúnnú jɛ nǔ e Yɛsinsɛn jló ná byɔ́ ɔ́ wú, ɖó Yɛ nɔ xo ɖɛ lě e Mawu jló gbɔn ɔ́ nú mɛ e nyí Mawu tɔn lɛ́ɛ é. Mǐ tunwun ɖɔ mɛ e yí wǎn nú Mawu lɛ́ɛ ɔ́, mɛ e é ylɔ́ ɖo tito tɔn mɛ lɛ́ɛ ɔ́, nǔ e nɔ jɛ dó yě jǐ lɛ́ɛ bǐ ɔ́, ɖagbe wɛ é nɔ dó wá nú yě. Đó mɛ e Mawu ko tunwun sín do lɛ́ɛ ɔ́, é lɛ́ ɖɔ ɖ'ayǐ ɖɔ émí na bló bɔ yě ná cí Vǐ émítɔn ɖɔhun, bónú vǐ tɔn ná nyí nukɔn ví ɖo nɔví gěgé tɛ́ntin. Mɛ e Mawu ɖe gbeta énɛ́ tɔ́n ɖ'ayǐ ná lɛ́ɛ ɔ́, é lɛ́ ylɔ́ yě; mɛ e é ylɔ́ lɛ́ɛ ɔ́, é sɔ́ yě dó húzú hwɛjijɔnɔ; mɛ e é sɔ́ dó húzú hwɛjijɔnɔ lɛ́ɛ ɔ́, é lɛ́ bló bɔ yě ɖó mǐmá ɖo susu tɔn mɛ. Đo nǔ énɛ́ lɛ́ɛ bǐ mɛ ɔ́, étɛ́ mǐ ka na lɛ́ ɖɔ? Ényí Mawu ɖo mǐ jí ɔ́, mɛ ɖěbǔ sixú wa nǔ ɖěbǔ nú mǐ ǎ. Éyɛ́ mɛ e ma hwlɛ́n Vǐ é ɖésúnɔ tɔn ǎ, bó sɔ́ ɛ jó dó mǐ bǐ tamɛ ɔ́, nɛ̌ é ma ka ná ná nǔ bǐ mǐ kpó Vǐ tɔn kpó ǎ gbɔn? Mɛ̌ ka ná dó hwɛ mɛ e Mawu cyán lɛ́ɛ? Mɛ ɖé ɖe ǎ, ɖó Mawu wɛ ɖɔ yě nyǐ hwɛjijɔnɔ. Mɛ̌ ka ná ɖó hwɛ nú yě lo? Mɛ ɖé ɖe ǎ, ɖó Klísu Jezu wɛ nyí mɛ e kú é; nǔ e hú gǎn mɔ̌ ɔ́ wɛ nyí é fɔ́n sín kú, bó ɖo tɛn ɖaxó mɛ ɖo ɖisíxwé nú Mawu, bó ɖo vo sa nú Mawu wɛ dó ta mǐtɔn mɛ. Étɛ́ ka sixú ɖe mǐ ɖó vo nú wǎn yíyí e Klísu ɖó nú mǐ é? Wǔvɛ́mimɔ wɛ a, nukúnmyámɛ wɛ a, yadónúmɛ wɛ a, xovɛ́ wɛ a, avɔvúnmɛ wɛ a, afɔkú wɛ a, kúdán wɛ a? Lě e Mawuxówéma ɔ́ ɖɔ gbɔn ɔ́: “Hwi wú wɛ è nɔ ɖo mǐ hu wɛ ayǐhɔ́ngbe ayǐhɔ́ngbe; è kplá mǐ lɛ̌ngbɔ́ e è kplá xwe lanhutɛn é ɖɔhun.” Lo ɔ́, nǔ énɛ́ lɛ́ɛ bǐ ɖo jijɛ wɛ, có Klísu e yí wǎn nú mǐ ɔ́ dó alɔ mǐ, bɔ mǐ ɖó ɖuɖéjí bǐ gbídígbídí. Đó un ɖeji ɖɔ nǔ ɖěbǔ kún sixú ɖe mǐ ɖó vo nú wǎn yíyí tɔn ó: mǐ ɖo gbɛ oo, mǐ ɖo kú oo, nǔ ɖěbǔ sixú ɖe mǐ ɖó vo nú wǎn yíyí tɔn ǎ; wɛnsagun lɛ́ɛ, acɛkpikpa lɛ́ɛ, kpódó hlɔ̌nhlɔ́n e ɖo jǐxwé lɛ́ɛ ɖěbǔ kpó sixú ɖe mǐ ɖó vo nú wǎn yíyí tɔn ǎ; mɔ̌ jɛ́n nǔ e ɖo jijɛ wɛ égbé lɛ́ɛ, kpódó éé ná wá jɛ sɔ lɛ́ɛ é kpán ma sixú ɖe mǐ ɖó vo nú wǎn yíyí tɔn ǎ é nɛ́. Nǔ e ɖo hwe glɔ́ lɛ́ɛ kpó nǔ e ɖo ayǐkúngban glɔ́ lɛ́ɛ é kpó, kpódó nǔ ɖěvo e è blǒ é ɖěbǔ kpán sixú ɖe mǐ ɖó vo nú wǎn yíyí e Mawu ɖe xlɛ́ mǐ gbɔn Aklúnɔ mǐtɔn Klísu Jezu jí é ǎ. Nǔgbó ɖɔ wɛ un ɖe, ɖo bǔ e un ɖe xá Klísu ɔ́ mɛ; un nɔ ɖó adingban ǎ. Ayixa ce ɖe kúnnu nú mì gbɔn Yɛsinsɛn jí ɖɔ nǔgbó ɖɔ wɛ un ɖe. Un ɖo aluwɛ ɖaxó mɛ; un ɖo wǔvɛ́ mɔ wɛ hwebǐnu ɖo ayi mɛ. Nyɛ ɖésúnɔ ɔ́, un jló ɖɔ Mawu ní dó nu mì, bó ɖe mì ɖó zɔ nú Klísu, nú ɖagbe nɔví ce lɛ́ɛ tɔn; yě mɛ e nyí akɔta ce lɛ́ɛ é. Yě wɛ nyí Izlayɛ́li ví lɛ́ɛ. Mawu sɔ́ yě dó ɖó vǐ; é ná kpɔ́nɔxámɛ tɔn susunɔ ɔ́ yě; é jɛ akɔ xá yě; é ná sɛ́n yě, é ɖɔ lě e è nǎ sɛn ɛ gbɔn ɔ́ nú yě; é dó akpá tɔn lɛ́ɛ nú yě. Tɔ́gbó mitɔn lɛ́ɛ sín vǐ wɛ yě nyí, bɔ Klísu ɔ́, ɖo gbɛtɔ́ nyínyí tɔn sín alixo ɔ́, akɔta yětɔn mɛ wɛ é jɔ ɖe. Susu nú Mawu e ɖo axɔ́sú ɖu ɖo mǐ bǐ nu wɛ káká sɔ́yi é. Amǐ! Ényí akpá e Mawu dó ɔ́ gɔn azɔ̌ wa ɖɔ wɛ un ɖe ǎ. Đó é nyí mɛ e Izlayɛ́li ji lɛ́ɛ bǐ wɛ nyí togun Izlayɛ́li tɔn nǔgbó ɔ́ ǎ. Mɔ̌ ɖokpó ɔ́, vǐ e Ablaxámu ji lɛ́ɛ bǐ wɛ nyí vǐ titewungbe n'i ǎ; ɖó Mawu ɖɔ nú Ablaxámu ɖɔ: “Izáki jí wɛ a nǎ ɖó vǐ e sín akpá un dó nú we lɛ́ɛ gbɔn.” É ɖo nyǐnyí wɛ ɖɔ é kún nyí vǐ e Ablaxámu ji lɛ́ɛ bǐ wɛ nyí Mawu ví ó; lo ɔ́, vǐ e sín akpá Mawu dó bɔ è ji lɛ́ɛ wɛ Mawu nɔ mɔ dó mɔ vǐ nǔgbó nǔgbó. Đó Mawu dó akpá, bó ɖɔ: “Ényí hwenu e un ɖó ɔ́ su ɔ́, un ná lɛ́ wá, bɔ Sala ná ɖó vǐ súnnu ɖokpó.” Bǐ ká kó nɛ́ ǎ. Hlebeka ví we lɛ́ɛ ɔ́, tɔ́ ɖokpó ɔ́ wɛ ji yě; é wɛ nyí tɔ́gbó mǐtɔn Izáki. Lě e Mawuxówéma ɔ́ ɖɔ gbɔn ɔ́: “Un yí wǎn nú Jakɔ́bu; lo ɔ́, un gbɛ́ wǎn nú Esawu.” Étɛ́ mǐ ka ná ɖɔ lo? Mawu ɔ́, hwɛ agɔdótɔ́ wɛ é nyí a? Gbeɖé kpɔ́n. Đó é ɖɔ nú Mɔyízi ɖɔ: “Un ná kú nǔbláwǔ nú mɛ e un jló ná kú nǔbláwǔ na é, bó ná nyɔ́ xomɛ dó mɛ e wú un jló na nyɔ́ xomɛ dó é.” Hǔn, é nyí jló gbɛtɔ́ tɔn wɛ na zɔ́n bɔ Mawu ná kú nǔbláwǔ nú mɛ abǐ é ná nyɔ́ xomɛ dó mɛ wú ǎ; é ka nyí gǎndídó gbɛtɔ́ tɔn lɛ́ɛ wú wɛ ǎ. Lo ɔ́, Mawu e nɔ kú nǔbláwǔ nú mɛ ɔ́ wɛ. Mawu ɖɔ nú axɔ́sú Ejípu tɔn ɖo Mawuxówéma ɔ́ mɛ ɖɔ: “Nǔ e wú un sɔ́ we axɔ́sú tawun lɛ́ɛ wɛ nyí ɖɔ un ná ɖe hlɔ̌nhlɔ́n ce xlɛ́ gbɔn jǐ towe; un sɔ́ we axɔ́sú, bónú nyǐkɔ ce ná gba kpé ayǐkúngban ɔ́ bǐ jǐ.” Énɛ́ ɔ́, Mawu nɔ kú nǔbláwǔ nú mɛ e jló e ɔ́, bó nɔ bló bɔ mɛ e é jló ɖɔ é ní tlí tó ɔ́ nɔ húzú tótlítɔ́. Afɔ nyɔ́ ɔ́, è nǎ kanbyɔ́ mǐ ɖɔ: “Ényí nǔ ɖo mɔ̌ ɔ́, ani sín hwɛ dó gbɛtɔ́ lɛ́ɛ wɛ Mawu ka lɛ́ ɖe? Đó mɛ ɖěbǔ sixú nɔ te ɖo jlǒ tɔn nukɔn ǎ.” Hwi gbɛtɔ́ ɔ́, ani a ka nyí, bó ná dɔn nǔ xá Mawu? Kozɛ́n sixú kanbyɔ́ mɛ e bló é ɔ́ ɖɔ nɛ̌ ká gbɔn bɔ é bló émí gbɔn lě ají a? Zɛ̌nmɛtɔ́ sixú zé ko dó wa nǔ e jló é ná: ko ɖokpó e é nya ɔ́, é sixú zé dó mɛ zɛ̌n e è nɔ zán nú nǔjɔnǔ é; é ka sixú lɛ́ zé dó mɛ zɛ̌n e è nɔ zán nú nǔ yǎyá é. Étɛ́ è ka ná ɖɔ dó Mawu wǔ? É jló ná ɖe xomɛsin tɔn xlɛ́, bó ná bló bɔ è nǎ tunwun hlɔ̌nhlɔ́n tɔn. Énɛ́ ɔ́, gbɛtɔ́ e cí zɛ̌n e è nɔ zán nú nǔ yǎyá lɛ́ɛ ɖɔhun bɔ Mawu ɖó ná sin xomɛ dó, bó ɖo gbesisɔ mɛ, bó ná sú kún yětɔn dó lɛ́ɛ ɔ́, é ɖó sɔxwixwe ɖaxó, bó yí gbe bɔ yě nɔ kɔ jí n'i. É jló ná ɖe lě e susu tɔn ma ɖó dogbó ǎ gbɔn ɔ́ xlɛ́ mǐ mɛ e cí zɛ̌n e è nɔ zán nú nǔjɔnǔ lɛ́ɛ ɖɔhun bɔ é kú nǔbláwǔ ná lɛ́ɛ é; mǐ mɛ e é kó blóɖó ɖ'ayǐ, bɔ mǐ ná mɔ susu tɔn yí lɛ́ɛ. Đó mǐdɛɛ lɛ́ɛ wɛ nyí mɛ e é ylɔ́ lɛ́ɛ; é ka nyí mɛ e é ylɔ́ sín Jwifu lɛ́ɛ mɛ lɛ́ɛ kɛ́ɖɛ́ wɛ ǎ, lo ɔ́, mɛ e é ylɔ́ sín togun ɖě lɛ́ɛ mɛ lɛ́ɛ lɔ ɖ'é mɛ. Nǔ énɛ́ wɛ Mawu ɖɔ ɖo Ozée sín wěma mɛ; Mawu ɖɔ: “Un ná ylɔ́ togun e ma nyí togun ce ɖ'ayǐ ǎ lɛ́ɛ ɖɔ togun ce; un ná ylɔ́ akɔta e un ma yí wǎn ná ɖ'ayǐ ǎ ɖɔ wǎnyínámɔ ce vívɛ́ná. Fí e è ko ɖɔ nú yě ɖɔ: ‘Mi nyí togun ce ǎ’ ɖe ɔ́, fí énɛ́ ɖokpó ɔ́ wɛ è nǎ lɛ́ ylɔ́ yě ɖɔ Mawu gbɛɖe ɔ́ sín vǐ ɖe.” Ezayíi ɔ́, éyɛ́ sú xó, bó ɖɔ dó Izlayɛ́li togun ɔ́ wú ɖɔ: “Ényí Izlayɛ́li ví na bo sukpɔ́ sɔ nyɛ̌kɛ́n e ɖo xutó ɔ́, mɛ kpɛɖé jɛ́n ná kpo ɖo yě mɛ bó ná mɔ hwlɛngán. Hwɛ e Aklúnɔ ná ɖɔ xá mɛ e ɖo ayǐkúngban jí lɛ́ɛ ɔ́, hwɛɖónúmɛ e ɖ'é mɛ ɔ́, é ná dɔn tó tɔn nú yě hawun, kpó hlɔ̌nhlɔ́n kpó.” Bɔ lě e Ezayíi ɖokpó énɛ́ ɔ́ kó ɖɔ gbɔn ɖ'ayǐ ɖɔ: “Ényí Aklúnɔ Nǔbǐwúkpétɔ́ ɔ́ ma ko jó vǐ mǐtɔn ɖě lɛ́ɛ dó nú mǐ ǎ ɔ́, mǐ ná kó cí Sodɔ́mu ɖɔhun, bó ná kó cí Gomɔ́ɔ ɖɔhun.” Étɛ́ mǐ ná ɖɔ lo? Mǐ ná ɖɔ mɛ e ma nyí Jwifu ǎ, bó ma ka ba na nyí hwɛjijɔnɔ ɖo Mawu nukɔn ǎ lɛ́ɛ ɔ́, Mawu sɔ́ yě dó húzú hwɛjijɔnɔ gbɔn nǔɖiɖi gbla mɛ. Lo ɔ́, togun Izlayɛ́li tɔn e ka ɖo sɛ́n lɛ́ɛ bǐ ba ná nyi wɛ pɛ́pɛ́pɛ́, bó ná nyí hwɛjijɔnɔ ɖo Mawu nukɔn lɛ́ɛ ɔ́, nǔ e wú sɛ́n ɔ́ tíin ɔ́, yě kpé wú bó wa ǎ. Aniwú yě ma ka kpé wú ǎ? Yě kpé wú ǎ, ɖó yě ba ná sɔ́ jiɖiɖe yětɔn dó Mawu wú ǎ; yě vɛdó ɖɔ émí ná nyí hwɛjijɔnɔ ɖo Mawu nukɔn gbɔn nǔwiwa émítɔn lɛ́ɛ gbla mɛ wɛ sín. Yě klɛ́n afɔ dó awǐnnya e wú è nɔ klɛ́n afɔ dó é wú. Awǐnnya énɛ́ xó wɛ Mawuxówéma ɔ́ ɖɔ bó ɖɔ: “Éɖíe! Un dó awǐnnya e wú è nɔ klɛ́n afɔ dó, bó nɔ fún sa é ɖokpó do nyi Sinyɔ́ɔ; awǐnnya ɖé wɛ bó nɔ́ zin mɛ dɛ́; amɔ̌ mɛ e ɖi nǔ n'i ɔ́ ná ɖu winnyá ǎ.” Nɔví lɛ́ɛ mi, nǔ e ba wɛ un ɖe kpó ayi ce bǐ kpó, bó ɖo byɔ̌byɔ́ ɖo Mawu sí wɛ nú Jwifu lɛ́ɛ ɔ́, wɛ nyí ɖɔ yě ní mɔ hwlɛngán. Đó un hɛn ɔ́, un ná ɖe kúnnu nú yě ɖɔ nǔ wa bó nyɔ́ ɖo Mawu sí sín akpakpa ɖaxó ɖé ɖo yě jí; lo ɔ́, yě ɖǒ nukúnnú-mɔjɛnǔmɛ titewungbe ɔ́ ǎ. Nǔgbó ɔ́, yě mɔ nukúnnú jɛ lě e Mawu nɔ sɔ́ gbɛtɔ́ dó húzú hwɛjijɔnɔ gbɔn ɔ́ wú ǎ, bó ba ali yě ɖésúnɔ tɔn, bó ná dó húzú hwɛjijɔnɔ ɖo Mawu nukɔn; énɛ́ ɔ́, yě sɔ́ gbɔn ali e Mawu ɖe bɔ gbɛtɔ́ lɛ́ɛ ná gbɔn, bɔ Mawu ná sɔ́ yě dó húzú hwɛjijɔnɔ ná é ǎ. Đó Klísu wɛ nyí mɛ e gɔ́n Mɔyízisɛ́n ɔ́ kplá mǐ xwe é, bónú Mawu ná sɔ́ mɛ e ɖi nǔ lɛ́ɛ bǐ dó húzú hwɛjijɔnɔ. Mɔyízi wlán ɖɔ: “Mɛ e nɔ wa nǔ jlɔ́jlɔ́ lě e sɛ́n ɔ́ zɔ́n gbɔn ɔ́ ná mɔ gbɛ gbɔn sɛ́n ɔ́ jí.” Lo ɔ́, xó e è ɖɔ dó lě e Mawu nɔ sɔ́ gbɛtɔ́ dó húzú hwɛjijɔnɔ ná gbɔn ɖo é ɖésúnɔ nukɔn, gbɔn nǔɖiɖi gbla mɛ gbɔn ɔ́ ɖíe: “Ma ɖɔ dó ayi mɛ ɖɔ: ‘Mɛ̌ ka ná yi jǐxwé?’ (Bó ná ɖe Klísu jɛ te ó.) Ma ka lɛ́ ɖɔ dó ayi mɛ ɖɔ: ‘Mɛ̌ ka ná yi kútomɛ?’ (Bó ná fɔ́n Klísu sín kú) ó.” Bɔ nɛ̌ è ka ɖɔ lo? Nǔ e è ɖɔ ɔ́ ɖíe: “Xó ɔ́ ɖo akpá towe; é ɖo nu towe mɛ, bó ɖo ayi towe mɛ.” Xó énɛ́ wɛ nyí nǔɖiɖi sín wɛn e jlá wɛ mǐ ɖe é. Đó ényí a sɔ́ nu towe dó ɖɔ ná ɖo mɛ bǐ nukɔn ɖɔ Jezu wɛ nyí Aklúnɔ lobo ɖi nǔ ɖo ayi towe mɛ ɖɔ Mawu fɔ́n ɛ sín kú ɔ́, Mawu ná hwlɛ́n we gán. Đó, nú mɛɖé ɖi nǔ ɖo ayi tɔn mɛ ɔ́, é nɔ sín énɛ́ wú bɔ mɛ énɛ́ nɔ húzú hwɛjijɔnɔ ɖo Mawu nukɔn. Nú mɛɖé ɖɔ kpó nu tɔn kpó ɖo mɛ bǐ nukɔn ɖɔ Jezu wɛ nyí Aklúnɔ ɔ́, é ná sín énɛ́ wú bɔ Mawu ná hwlɛ́n mɛ énɛ́ gán. Nǔgbó ɔ́, Mawuxówéma ɔ́ ɖɔ: “Mɛɖěbǔ ɖi nǔ n'i ɔ́, é ná ɖu winnyá ǎ.” Đó vogbingbɔn ɖé ɖo mɛ e nyí Jwifu é kpódó mɛ e ma nyí Jwifu ǎ é kpo tɛ́ntin ǎ; yě bǐ wɛ ɖó Aklúnɔ ɖokpó ɔ́; Aklúnɔ e nɔ dó nú mɛ e nɔ xomlá ɛ lɛ́ɛ bǐ, bɔ é nɔ túnflá é. Đó lě e Mawuxówéma ɔ́ ɖɔ gbɔn ɔ́: “Mɛɖěbǔ ylɔ́ Aklúnɔ sín nyǐkɔ ɔ́, mɛ ɔ́ ná gán.” Lo ɔ́, ényí mɛ lɛ́ɛ ma ɖi nǔ n'i ǎ ɔ́, nɛ̌ yě ka ná xomlá ɛ gbɔn? Ényí è ma ɖɔ xó tɔn bɔ yě se ǎ ɔ́, nɛ̌ yě ka ná ɖi nǔ n'i gbɔn? Ényí mɛɖé ma jlá xó tɔn ǎ ɔ́, nɛ̌ yě ka ná se xó tɔn gbɔn? Ényí è ma sɛ́ mɛ dó xó tɔn jlá gbé ǎ ɔ́, nɛ̌ è ka ná mɔ Wɛn Ɖagbejlátɔ́ gbɔn? Lě e Mawuxówéma ɔ́ ɖɔ gbɔn ɔ́ ɖíe: “È mɔ Wɛn Ɖagbejlátɔ́ lɛ́ɛ jǎwe ɔ́, é nɔ nyɔ́ kpɔ́n mɛ.” Amɔ̌, mɛ bǐ yí gbe nú Wɛn Ɖagbe ɔ́ ǎ. Nǔgbó ɔ́, Ezayíi ɖɔ: “Aklúnɔ, mɛ̌ ka ɖi nǔ nú Mawuxó e mǐ ɖɔ é?” Énɛ́ ɔ́, nǔ e se wɛ è ɖe ɔ́ mɛ wɛ nǔɖiɖi nɔ tɔ́n sín, bɔ nǔ e se wɛ è ɖe ɔ́ ka nyí Klísu sín xó e jlá wɛ è ɖe é. Lo ɔ́, un nɔ kanbyɔ́ ɖɔ: “Yě ka se Mawuxó ɔ́ ǎ wɛ a?” Ɛɛn, yě se ganjí. Đó Mawuxówéma ɔ́ ɖɔ: “Yě ɖɔ xó bɔ è se gbɔn ayǐkúngban ɔ́ bǐ jǐ, bɔ xó e yě ɖɔ ɔ́ yi káká fí e gbɛ ɔ́ kponu ɖó é.” Un nɔ lɛ́ kanbyɔ́ ɖɔ: “Togun Izlayɛ́li tɔn ɔ́ ka mɔ nukúnnú jɛ wú ǎ wɛ a?” Bó ná dó ná xó énɛ́ ɔ́ sín sin ɔ́, nǔ e Mɔyízi ɖɔ ɔ́ ɖíe: “Un ná bló bɔ mi ná hwan wǔ dó akɔta e ma nyí akɔta nǔgbó nǔgbó ǎ é. Un ná bló bɔ akɔta e ma ɖó nǔnywɛ́ ǎ é ná dó xomɛsin xomɛ nú mi.” Ée Ezayíi ɖɔ ɔ́ hú mɔ̌; é ɖɔ: “Mɛ e ma ɖo biba mì wɛ ɖ'ayǐ ǎ lɛ́ɛ ɔ́, yě mɔ mì. Un sɔ́ nyɛɖée xlɛ́ mɛ e ma ko nɔ kan mì byɔ́ ɖ'ayǐ ǎ lɛ́ɛ.” Lo ɔ́, nǔ e é ɖɔ dó Izlayɛ́li wú ɔ́ ɖíe: “Tɛgbɛ tɛgbɛ wɛ un nɔ dlɛ́n alɔ nú togun e nɔ vɛ́ tóli, togun e nɔ fɔ́n gǔ é.” Hǔn, un nɔ kanbyɔ́ ɖɔ: Mawu gbɛ̌ togun tɔn wɛ a? Gbeɖé kpɔ́n! Đó nyɛ ɖésúnɔ ɔ́, Izlayɛ́li ví wɛ un nyí; Ablaxámu kún mɛ wɛ un jɔ ɖe, ɖo akɔta Bɛnjamɛ́ɛ tɔn mɛ. Mawu gbɛ̌ togun tɔn e é ko tunwun sín do é ǎ; nǔ e Mawuxówéma ɔ́ ɖɔ ɖo akpá e xwé Elíi jɛ Izlayɛ́li ví lɛ́ɛ sín hwɛ ɖo Mawu nukɔn ɖe ɔ́, mi ma tunwun a? Elíi ɖɔ: “Aklúnɔ, yě hu gbeyíɖɔ towe lɛ́ɛ; yě gba vɔ̌sákpe towe lɛ́ɛ; nyɛ ɖokpónɔ géé wɛ kpo, bɔ yě ka lɛ́ ɖo biba na hu mì wɛ.” Xó tɛ́ Mawu ka ɖɔ d'é wú n'i? Mawu ɖɔ: “Un sɔ́ gbɛtɔ́ děgba ɖě afɔwó-afatɔ́n (7.000) ɖ'ayǐ nú nyɛɖée; yě mɛ énɛ́ lɛ́ɛ ɖě jɛ kpo vodún Baalu nukɔn ǎ.” Mɔ̌ ɖokpó ɔ́, hwenu e mǐ ɖe din ɔ́, é lɛ́ kpo mɛ e Mawu cyán ɖo xomɛnyínyɔ́ tɔn mɛ ɔ́ kpɛɖé. Xomɛnyínyɔ́ tɔn wú wɛ é cyán yě; é nyí nǔ e yě wa lɛ́ɛ wú wɛ ǎ; é ma nyí mɔ̌ ǎ ɔ́, xomɛnyínyɔ́ Mawu tɔn sɔ́ na nyí xomɛnyínyɔ́ nǔgbó nǔgbó ǎ. Hǔn, é ɖo wɛn: togun Izlayɛ́li tɔn mɔ nǔ e ba wɛ é ɖe ɔ́ yí ǎ. Mɛ e Mawu cyán ɖo togun ɔ́ mɛ lɛ́ɛ kɛ́ɖɛ́ wɛ mɔ yí; mɛ e kpo lɛ́ɛ ɔ́, é bló bɔ yě húzú tótlítɔ́. Lě e Mawuxówéma ɔ́ ɖɔ gbɔn ɔ́: “Mawu bló bɔ káká jɛ égbé ɔ́, ayixa yětɔn sɔ́ nɔ mɔ nǔ ǎ; nukún yětɔn sɔ́ nɔ mɔ nǔ ǎ, tó yětɔn lɛ́ɛ sɔ́ nɔ se nǔ ǎ.” Davídi lɔ ɖɔ: “Nǔɖuɖu ɖagbe ɖagbe e yě ɖa ɔ́ ní nyí mɔ nú yě; é ní nyí ɖɔ, bónú yě ná jɛ mɛ, bónú è nǎ dɔn tó nú yě. Nukún yětɔn ní dó zǐnflú, bónú yě ní ba nukúnnú kpo; blǒ bónú yě ní mɔ wǔvɛ́ káká nú kpó yětɔn ní xá.” Hǔn, un nɔ kanbyɔ́ ɖɔ: “Hwenu e Jwifu lɛ́ɛ klɛ́n afɔ ɔ́, yě jɛ ayǐ bó nɔ mɔ̌ káká sɔ́yi wɛ a?” Gbeɖé kpɔ́n! Lo ɔ́, ɖó hwɛ e yě hu ɔ́ wútu ɔ́, togun ɖě lɛ́ɛ mɔ hwlɛngán, bónú Jwifu lɛ́ɛ ná sixú hwan wǔ dó yě. Ényí hwɛ e Jwifu lɛ́ɛ hu ɔ́ dó dɔkun Yɛsinsɛn tɔn nú gbɛ ɔ́, ényí sɔ́ e è sɔ́ yě hwe ɔ́ dó dɔkun Yɛsinsɛn tɔn nú togun ɖě lɛ́ɛ ɔ́, nɛ̌ kɔ e yě bǐ sésé ná lɛ́ wá, bó mɔ hwlɛngán ɔ́ ma na wa azɔ̌ hú mɔ̌ ǎ gbɔn? Din ɔ́, mi mɛ e ma nyí Jwifu ǎ lɛ́ɛ ɖɔ xó ná wɛ un ɖe: un nyí mɛsɛ́dó nú mɛ e ma nyí Jwifu ǎ lɛ́ɛ; ée nǔ ka nyí mɔ̌ ɔ́, un nɔ gó ɖó azɔ̌ e nyí ce ɔ́ wú. Afɔ nyɔ́ ɔ́, un sixú fɔ́n wǔhwinhwan dó jǐ nú mɛ e ɖo akɔta ce mɛ lɛ́ɛ; ényí un wa nǔ gbɔn mɔ̌ ɔ́, un sixú hwlɛ́n yě mɛ ɖěe gán. Nǔgbó ɔ́, ée Mawu gbɛ́ mɛ e ɖo akɔta ce mɛ lɛ́ɛ ɔ́, é dó hwɛ gbɔ xá akɔta ɖě lɛ́ɛ e kpo ɖo gbɛ ɔ́ mɛ é. Hwenu e Mawu ka ná wá yí yě ɔ́, nɛ̌ é ná nyí gbɔn lo? Gbɛ wɛ é ná nyí nú mɛ e ko kú lɛ́ɛ. Ényí è sɔ́ wɔ̌xúxú ɖé bó kán ɖ'é wu, bó sɔ́ xwlé Mawu ɔ́, wɔ̌xúxú e kpo ɔ́ bǐ wɛ nyí étɔn. Ényí è sɔ́ atín sín ɖɔ ɖó vo nú Mawu ɔ́, atínla lɛ́ɛ lɔ bǐ wɛ nyí Mawu tɔn. Togun Izlayɛ́li tɔn ɔ́ cí olívutín e è tun bó kpé nukún d'é wú, bɔ è jlǎ ala tɔn ɖé lɛ́ɛ ɔ́ ɖɔhun. Hwi mɛ e ma nyí Jwifu ǎ ɔ́, a cí olívutín gbě tɔn sín ala e è sɔ́ cá dó ala e è jlǎ lɛ́ɛ nu é ɖɔhun. Din ɔ́, hwi lɔ ɖo nǔɖuɖu ɖagbe e nɔ tɔ́n sín olívutín e è tun ɔ́ sín ɖɔ mɛ ɔ́ ɖu xá ɛ wɛ. Énɛ́ wútu ɔ́, a ɖǒ na gbɛ́ wǎn nú ala ɖě lɛ́ɛ ǎ. Nɛ̌ a ka sixú jlá ajɔ̌ nú hwiɖée gbɔn? Hwi wɛ hɛn ɖɔ lɛ́ɛ ǎ, lo ɔ́, ɖɔ lɛ́ɛ wɛ hɛn hwɛ. A nǎ ɖɔ nú mì ɖɔ: “Ala énɛ́ lɛ́ɛ ɔ́, gbo wɛ è gbo yě síin, bó ná sɔ́ mì cá dó nu yětɔn.” Nǔgbó wɛ é nyí. È gbo yě síin ɖó nǔmaɖi yětɔn wútu, bɔ a ɖo tɛn énɛ́ mɛ, ɖó nǔ e a ɖi ɔ́ wú. Hǔn ma yí go ó, lo ɔ́, ɖi xɛsi. Đó ényí Mawu ma jó Jwifu e nyí ala e jɔ kpó atín ɔ́ kpó lɛ́ɛ nyi tɛn yětɔn mɛ ǎ ɔ́, é ná jó hwi lɔ dó ǎ. Kpɔ́n lě e Mawu ɖe xomɛnyínyɔ́ tɔn kpó hunnylánylá tɔn kpó xlɛ́ gbɔn é: é nɔ́ nylá hun dó mɛ e hu hwɛ lɛ́ɛ, bó ka nyɔ́ xomɛ dó wú we; lo ɔ́, a ɖǒ ná nɔ xomɛnyínyɔ́ tɔn mɛ; é ma nyí mɔ̌ ǎ ɔ́, é ná gbo hwi lɔ síin atínla ɖɔhun. Ényí Jwifu lɛ́ɛ lɛ́ kɔ sín nǔmaɖi yětɔn gúdo ɔ́, Mawu ná cá yě dó fí e yě ko ɖe ɖ'ayǐ é; ɖó é ɖó acɛ bó ná lɛ́ vɔ́ yě cá. Hwi mɛ e ma nyí Jwifu ǎ ɔ́, ala e jɔ kpó olívutín gbě tɔn kpó ɔ́ wɛ a nyǐ: è gbo ala ɔ́ síin, bó sɔ́ ɛ cá dó olívutín e è tun bo kpé nukún d'é wú ɔ́ wú, có mɔ̌ wɛ nǔ ka nɔ́ nyí gbɔn ɖo gbɛ ɔ́ mɛ ǎ. Jwifu lɛ́ɛ ɔ́, yědɛɛ lɛ́ɛ wɛ nyí ala e jɔ kpó olívutín énɛ́ e è tun bó kpé nukún d'é wú ɔ́ kpó é. Hǔn, ényí è nǎ lɛ́ vɔ́ yě cá dó atín e sín ala yě ko nyí ɖ'ayǐ ɔ́ wú ɔ́, é ná bɔwǔ ɖésú. Nɔví ce lɛ́ɛ mi, nǔbúdo ɖokpó ɖíe, bɔ un jló ná ɖe xlɛ́ mi, bónú mi ma sɔ́ miɖée dó mɔ nǔnywɛ́tɔ́ ná ó: togun Izlayɛ́li tɔn akpá bǔ húzú tótlítɔ́. Lo ɔ́, yě ná nɔ mɔ̌ sɔ́yi ǎ; hwenu e togun ɖě lɛ́ɛ bǐ ná mɔ hwlɛngán dó ɔ́ jɛ́n yě ná nɔ mɔ̌ jɛ. Mɔ̌ wɛ Mawu ná hwlɛ́n Izlayɛ́li ví lɛ́ɛ bǐ gán gbɔn; lě e Mawuxówéma ɔ́ ɖɔ gbɔn ɔ́; Mawuxówéma ɔ́ ɖɔ: “Mɛhwlɛ́ngántɔ́ ɔ́ ná gosín Sinyɔ́ɔ wá; é ná ɖe sísí ma ɖó nú Mawu Jakɔ́bu ví lɛ́ɛ tɔn síin. Akɔ e un ná jɛ xá yě hwenu e un ná ɖe hwɛ yětɔn lɛ́ɛ sín kɔ nú yě ɔ́ nɛ́.” Ényí è kpɔ́n lě e Jwifu lɛ́ɛ gbɛ́ Wɛn Ɖagbe ɔ́ gbɔn ɔ́, kɛntɔ́ Mawu tɔn wɛ yě nyí bɔ é húzú ɖagbe nú mi; lo ɔ́, nú è kpɔ́n lě e Mawu sɔ́ yě gbɔn ɔ́, yě wɛ Mawu yí wǎn ná ɖó akpá e é dó nú tɔ́gbó yětɔn lɛ́ɛ wútu. Đó Mawu nɔ lɛ́ vɔ́ nǔ e é ná mɛ é yí ǎ; é ka nɔ húzú nǔ e é lin dó mɛ e è ylɔ́ lɛ́ɛ ɔ́ wú é ǎ. Đ'ayǐ ɔ́, mi vɛ́ tóli nú Mawu; amɔ̌ din ɔ́, mi tunwun nǔbláwǔkúnúmɛ Mawu tɔn, ɖó Jwifu lɛ́ɛ vɛ́ tóli nú Mawu wútu. Mɔ̌ ɖokpó ɔ́, yě vɛ́ tóli nú Mawu din, bónú Mawu ná kú nǔbláwǔ nú mi, bónú yě lɔ ná sixú mɔ nǔbláwǔkúnúmɛ ɖokpó énɛ́ yí din. Đó Mawu glɔ́n gbɛtɔ́ lɛ́ɛ bǐ dó tónúmase yě ɖésúnɔ tɔn mɛ, bó ná dó ɖe nǔbláwǔkúnúmɛ tɔn xlɛ́ mɛ bǐ. Fɛ́nú Mawu tɔn d'agba lóóo! Nǔnywɛ́ tɔn kpó nǔtunwuntunwun tɔn kpó gɔ́ngɔ́n lóóo! Mɛ̌ ka sixú tín gbeta e é nɔ ɖe tɔ́n lɛ́ɛ é mɛ? Mɛ̌ ka sixú mɔ nukúnnú jɛ tito tɔn lɛ́ɛ wú? Lě e Mawuxówéma ɔ́ ɖɔ gbɔn ɔ́ ɖíe: “Mɛ ɖěbǔ sixú tunwun linlin Aklúnɔ tɔn ǎ. Mɛ ɖěbǔ ka sixú kplɔ́n nǔ i ǎ.” Mɛ̌ ka ná nǔ i jɛ nukɔn bɔ é ná sú axɔ́ tɔn ɛ? Đó gɔ̌n tɔn wɛ nǔ bǐ gosín; é wɛ bló nǔ bǐ, bɔ nǔ bǐ nyí étɔn. Susu nú Mawu káká sɔ́yi. Amǐ! Nɔví ce lɛ́ɛ mi, ée Mawu ɖe xomɛnyínyɔ́ tɔn xlɛ́ mi mɔ̌ é ɔ́, un ɖo vo sa nú mi wɛ ɖɔ mi ní sɔ́ mi ɖésúnɔ bǐ jǒ, vɔ̌sánú gbɛɖe e è sɔ́ ɖ'ayǐ nú Mawu, bɔ é nyɔ́ nukún tɔn mɛ é ɖɔhun. Lě e mi ná sɛn ɛ gbɔn, bɔ é ná nyí sinsɛn titewungbe ɔ́ é nɛ́. Mi ma nɔ wa nǔ lě e gbɛ ɔ́ nɔ wa nǔ gbɔn é ó; lo ɔ́, mi jó Mawu dó, nú é húzú mi gbɔn ayi mitɔn sín hǔzúhúzú gbla mɛ. Énɛ́ ɔ́, mi ná sixú tunwun jlǒ Mawu tɔn: é wɛ nyí nǔ ɖagbe; nǔ e nɔ nyɔ́ nukún tɔn mɛ é; nǔ e sɔgbe bɔ nǔ bǐ vɔ ɖ'é wú é. Đó nǔníná e Mawu ná mǐ ɖo xomɛnyínyɔ́ tɔn mɛ é wú ɔ́, un ɖo ɖiɖɔ nú mi mɛ ɖokpó ɖokpó wɛ ɖɔ mɛɖé ní ma nɔ mɔ éɖée zɛ nǔ e é nyí ɔ́ wú ɖo linlin é ɖésúnɔ tɔn mɛ ó; lo ɔ́, linlin e é nɔ ɖó dó é ɖésúnɔ wú ɔ́ ní nɔ́ nɔ jlɛ̌mɛ, lě e Mawu ná nǔɖiɖi mɛ ɖokpó ɖokpó gbɔn é. Wǔjɔnú gěgé wɛ ɖo agbaza mǐ mɛ ɖokpó ɖokpó tɔn wú, bɔ yě bǐ ɖó azɔ̌ vovo bó nɔ wa. Mɔ̌ ɖokpó ɔ́, lě do e mǐ sukpɔ́ sɔ́ ɔ́, agbaza ɖokpó géé wɛ mǐ nyí ɖo bǔ e mǐ ɖe xá Klísu é mɛ, bɔ mǐ bǐ cá dó miɖée wú wǔjɔnú e ɖo agbaza ɖokpó wú lɛ́ɛ ɖɔhun. Nǔníná vovo wɛ mǐ ɖó bó ná zán lě e Mawu ná vɔ̌nu tɔn mǐ mɛ ɖokpó ɖokpó gbɔn é. Ényí mɛɖé ɖó nǔníná e nɔ yí wɛn ɖo Mawu sí, bó nɔ dó ɔ́, é ɖó ná bló lě e mǐ ɖi nǔ nú Klísu gbɔn é. Ényí mɛɖé ɖó nǔníná e ná wa Mawuzɔ́ ɔ́ hǔn, é ní wa. Mɛ e ɖó nǔníná e ná kplɔ́n nǔ mɛ ɔ́, ní kplɔ́n nǔ mɛ. Mɛ e ɖó nǔníná e nɔ́ ná akɔ́nkpinkpan mɛ ɔ́ ɖó ná ná akɔ́nkpinkpan mɛ. Mɛ e nɔ ná nǔ mɛ ɔ́ ní nɔ hun alɔ bo nɔ ná mɛ. Mɛ e nyí nukɔntɔ́ ɔ́ ní bí dó azɔ̌ wú. Mɛ e nɔ d'alɔ gbɛ̌dónánɔ lɛ́ɛ ní nɔ́ bló kpódó xomɛhunhun kpó. Wǎn yíyí e mi ɖó ɔ́ ní yi xomɛ ganjí. Mi gbɛ́ wǎn nú nǔ nyanya wiwa. Mi nɔ ɖó kan dó nǔ ɖagbe wiwa wú. Mi nɔ ɖó wǎn yíyí titewungbe nú miɖée lě e nɔví nɔví lɛ́ɛ nɔ́ yí wǎn nú yěɖée gbɔn é. Mi nɔ ɖó sísí titewungbe nú miɖée. Mi nɔ bí dó azɔ̌ wú; mi ma nɔ ɖi fɔnlín ó. Akpakpa ní nɔ́ sɔ́ mi dó aklúnɔzɔ́ wiwa wú. Nǔ e ɖó nukún wɛ mi ɖe ɔ́ ní dó xomɛhunhun nú mi. Mi nɔ ɖó sɔxwixwe ɖo wǔvɛ́ e mɔ wɛ mi ɖe lɛ́ɛ mɛ. Mi nɔ ɖó kan dó ɖɛxixo wú. Mi nɔ dó alɔ nɔví mitɔn ɖo Klísu mɛ lɛ́ɛ ɖo nǔ e hudó yě lɛ́ɛ mɛ. Mi nɔ yí mɛ e nɔ wá gɔ̌n mitɔn lɛ́ɛ ganjí. Mi nɔ byɔ́ Mawu ɖɔ é ní xo ɖɛ dó mɛ e nɔ dó ya nú mi lɛ́ɛ jí. Mi nɔ byɔ́ ɛ ɖɔ é ní xo ɖɛ dó yě jǐ; é ní ma nɔ́ dó nu yě ó. Mi nɔ jɛ awǎ xá mɛ e ɖo awǎ jɛ wɛ lɛ́ɛ, bó nɔ́ ya avǐ xá mɛ e ɖo avǐ ya wɛ lɛ́ɛ. Mi nɔ ɖó linlin ɖokpó ɔ́ dó miɖée wú. Mi ma nɔ yí go ó; mi ma ɖó nukún kloklo ó; lo ɔ́, mi nɔ ba nǔ e ɖo jlɛ̌ mɛ lɛ́ɛ. Mi ma nɔ́ mɔ miɖée dó mɔ nǔnywɛ́tɔ́ ó. Mi ma nɔ zé nǔ nyanya dó sú nǔ nyanya xɔ́ mɛ ɖěbǔ ó; mi nɔ ba ná wa nǔ ɖagbe ɖo gbɛtɔ́ lɛ́ɛ bǐ nukɔn. Ényí mi kpé wú hǔn, mi tɛ́nkpɔ́n gbɔn alɔkpa bǐ mɛ lě e mi kpé wú gbɔn é, bó nɔ fífá mɛ xá gbɛtɔ́ lɛ́ɛ bǐ. Mɛvívɛ́ná ce lɛ́ɛ mi, mi ɖésúnɔ ma nɔ ba hlɔn ó; lo ɔ́, mi nɔ jó xomɛsin Mawu tɔn dó ní nɔ́ wa azɔ̌, ɖó è wlǎn dó Mawuxówéma ɔ́ mɛ ɖɔ: “Nyɛ wɛ nɔ ba hlɔn; nyɛ wɛ nɔ sú nǔ e è wa ɔ́ sín axɔ́ mɛ; Aklúnɔ wɛ ɖɔ mɔ̌.” È lɛ̌ wlán dó Mawuxówéma ɔ́ mɛ ɖɔ: “Ényí xovɛ́ sin kɛntɔ́ towe hǔn, nǎ nǔɖuɖu i; ényí kɔ xú i hǔn, nǎ sin i. Ényí a ɖo mɔ̌ wa wɛ ɔ́, winnyá ná hu i káká bɔ é ná mɔ wǔvɛ́ myɔkán wɛ è kplé ɖó ta n'i ɖɔhun.” Ma jó hwiɖée dó nú nǔ nyanya wiwa ɖu ɖo jǐ towe ó; é nyɔ́ wa ɔ́, nɔ wa nǔ ɖagbe dó ɖu ɖo nǔ nyanya jí. Gbɛtɔ́ lɛ́ɛ bǐ ɖó ná se tónú nú acɛkpikpa e ɖo to ɔ́ nu lɛ́ɛ, ɖó acɛkpikpa ɖé tíin, bɔ Mawu ma ná gbe tɔn ǎ; acɛkpikpa e tíin lɛ́ɛ ɔ́, Mawu wɛ ɖó yě ayǐ. Énɛ́ ɔ́, mɛ e nɔ sí te dó acɛkpikpa ɔ́ jí ɔ́, nǔ e Mawu ɖɔ è nǐ wa ɔ́ jí sí te dó wɛ é ɖe. Mɛ e ka nɔ sí te dó nǔ e Mawu ɖɔ è nǐ wa lɛ́ɛ jí ɔ́ ná dɔn hwɛɖónúmɛ Mawu tɔn dó éɖée jí. Nǔgbó ɔ́, mɛ e nɔ wa nǔ ɖagbe lɛ́ɛ wɛ ná ɖi xɛsi nú gǎn lɛ́ɛ ǎ; lo ɔ́, mɛ e nɔ wa nǔ nyanya lɛ́ɛ wɛ na ɖi xɛsi nú yě. Nú a ma jló ná ɖi xɛsi nú acɛkpikpa ɔ́ ǎ hǔn, nɔ wa nǔ ɖagbe; énɛ́ ɔ́, acɛkpikpa ɔ́ ná kpá we; ɖó azɔ̌ wa nú Mawu wɛ é ɖe nú ɖagbe hwi ɖésúnɔ tɔn. Ényí a ka nɔ wa nǔ nyanya hǔn, ɖi xɛsi n'i; ɖó yǎyá wɛ é ɖó acɛ bó ná dɔn tó nú mɛ ǎ: É ɖo azɔ̌ wa nú Mawu wɛ, bó ná ɖe xomɛsin Mawu tɔn xlɛ́ mɛ e nɔ wa nǔ nyanya é. Énɛ́ wú wɛ é ɖo dandan mɛ ɖɔ è nǐ se tónú nú acɛkpikpa lɛ́ɛ; ényí è nǎ hɔn nú xomɛsin Mawu tɔn kɛ́ɖɛ́ wú wɛ ǎ; lo ɔ́, ayixa mɛtɔn ko ɖɔ nǔ e è nǎ wa ɔ́ nú mɛ wútu wɛ. Nǔ ɖokpó énɛ́ wú wɛ mi nɔ sú takwɛ́; ɖó mɛ e sí acɛkpikpa ɖe, bɔ yě ɖo azɔ̌ énɛ́ wa wɛ lɛ́ɛ ɔ́, azɔ̌ wa nú Mawu wɛ yě ɖe, bó ka ɖó ná wa azɔ̌ énɛ́ ganjí. Nǔ e sín axɔ́ mi ɖu lɛ́ɛ ɔ́, mi sú mɛ e mi ɖu dó lɛ́ɛ bǐ. Mi sú kuzú mɛ e mi ɖu kuzú sín axɔ́ dó lɛ́ɛ; mi sú tokwɛ́ mɛ e mi ɖu tokwɛ́ sín axɔ́ dó lɛ́ɛ. Mi sí mɛ e mi ɖó ná sí é; mi wlí yɛ̌yi nú mɛ mi ɖó ná wlí yɛ̌yi ná é. Mi ma ɖu axɔ́ dó mɛ ɖěbǔ ó; nǔ ɖokpó géé sín axɔ́ wɛ mi ɖu dó miɖée; é wɛ nyí mi ní yí wǎn nú miɖée; ɖó mɛ e yí wǎn nú mɛ ɖě lɛ́ɛ ɔ́ se tónú nú nǔ e sɛ́n ɔ́ nɔ zɔ́n ɔ́ bǐ dégbédégbé. Nǔgbó ɔ́, mi tunwun nǔ e sɛ́n ɔ́ ɖɔ lɛ́ɛ: “Ma lɛ aga ó, ma hu mɛ ó, ma jɛ ajo ó, nukún towe ní má nɔ nɔzo towe sín nǔɖé wú ó”; sɛ́n énɛ́ lɛ́ɛ kpódó ɖě lɛ́ɛ bǐ kpó wɛ è sɛ sin xwe ná dó sɛ́n élɔ́ mɛ: “Yǐ wǎn nú nɔzo towe hwi ɖésúnɔ ɖɔhun.” Mɛ e yí wǎn nú mɛ ɔ́ nɔ wa nǔ nyanya ɖěbǔ dó nɔzo tɔn wú ǎ. Nú è yí wǎn nú mɛ hǔn, sɛ́n ɔ́ bǐ sésé se tónú ná wɛ è ɖe. Mi wa nǔ gbɔn mɔ̌, ɖó mǐ tunwun hwenu e mǐ ɖe ɔ́. Hwenu e mi ná fɔ́n sín amlɔ mɛ ɔ́ su lo; ɖó hwlɛngán hwenu ɔ́ sɛkpɔ́ mǐ din hú hwenu e mǐ ɖi nǔ tlóló é. Zǎn kó sɛ yi; ayǐ kó ɖo nǎ hɔ́n wɛ. Hǔn, mi nú mǐ ná jó nǔ e è nɔ wa ɖo ablu mɛ lɛ́ɛ dó, lobo fɔ ahwanfunnú e nɔ́ zɔ́n bɔ è nɔ fun ahwan ɖo wěziza nu lɛ́ɛ kplá. Mi nú mǐ ná zán gbɛ mǐtɔn ɖo jlɔ̌jlɔ́ jí, lě e é jɛ xá ɖɔ è nǐ bló gbɔn ɖo kéze ɖéɖé é. Mǐ ní ma wa nǔ zɛ jlɛ̌ wú ó; mǐ ní ma nu ahan mú ó; mǐ ní ma lɛ aga ó; mǐ ní ma wa nǔblíblí ó; mǐ ní ma ɖɔ jlɛ ó; mǐ ní ma hwan wǔ ó. Lo ɔ́, mi ní sɔ́ Aklúnɔ Jezu Klísu dó awu ɖɔhun, bó ma sɔ́ jó miɖée dó nú ninɔmɛ gbɛtɔ́ tɔn e mi ɖó é, bó wa nǔ e jló e lɛ́ɛ ó. Mi yí mɛ e ma ɖó gǎn ɖo nǔɖiɖi mɛ ǎ é ganjí, mi ma ɖɔ xó nyanya dó linlin tɔn lɛ́ɛ wú ó. Nǔ e wú mi na kpɔ́n dó ɔ́, mɛ ɖě ɖi nǔ ɖɔ émí hɛn ɔ́, émí ná ɖu nǔ bǐ; mɛ ɖe ɔ́ e ma ka ɖó gǎn ɖo nǔɖiɖi mɛ ǎ ɔ́, mǎ kɛ́ɖɛ́ jɛ́n éyɛ́ nɔ ɖu. Mɛ e nɔ ɖu nǔ bǐ ɔ́ ɖó ná gbɛ́ wǎn nú mɛ e nǔɖé lɛ́ɛ tíin, bɔ é ma nɔ ɖu ǎ é ǎ; mɛ e nǔɖé lɛ́ɛ tíin bɔ éyɛ́ ma nɔ ɖu ǎ é lɔ ɖó ná dó hwɛ mɛ e nɔ ɖu nǔ bǐ é ǎ; ɖó Mawu yí é lɔmɔ̌. Mɛ nǎhún wɛ a nyǐ, bó ná dó hwɛ mɛsɛntɔ́ mɛɖěvo tɔn? É wa azɔ̌ tɔn ganjí kpó é ma wa ganjí kpó ɔ́, gǎn tɔn wɛ é kan. É ka ná wa azɔ̌ tɔn ganjí, ɖó Aklúnɔ ɖó acɛ e ná ɛ hlɔ̌nhlɔ́n bɔ é ná wa azɔ̌ tɔn ganjí é. Mɛ ɖě nɔ lin ɖɔ azǎn ɖé lɛ́ɛ tíin, bó ɖo tají hú ɖě lɛ́ɛ; mɛ ɖěvo lɛ́ɛ ka nɔ lin ɖɔ azǎn lɛ́ɛ bǐ wɛ nyí nǔ ɖokpó ɔ́. Mɛ ɖokpó ɖokpó ɖó ná gán jɛ nǔ e ɖɔ wɛ é ɖe ɔ́ wú ɖo ayi tɔn mɛ. Mɛ e nɔ sɔ́ azǎn ɖé lɛ́ɛ dó mɔ azǎn tají ná lɛ́ɛ nɔ́ bló mɔ̌, bó nɔ dó sɔ́ Aklúnɔ su; mɛ e nɔ ɖu nǔ bǐ ɔ́, nɔ bló mɔ̌, bó nɔ dó sɔ́ Aklúnɔ su; ɖó é nɔ dó kú nú Aklúnɔ dó nǔɖuɖu énɛ́ tamɛ. Mɛ e ma nɔ ɖu nǔ bǐ ǎ lɔ nɔ bló mɔ̌, bó nɔ dó sɔ́ Aklúnɔ su, bó nɔ dó kú nú Mawu. Nǔgbó ɔ́, mɛɖé ɖo mǐ mɛ, bó ɖó ná nɔ gbɛ nú éɖée ǎ; mɛɖé ka ɖo mǐ mɛ, bó ɖó ná kú nú éɖée ǎ. Ényí mǐ ɖo gbɛ ɔ́, mǐ ɖo gbɛ nú Aklúnɔ. Ényí mǐ kú ɔ́, mǐ kú nú Aklúnɔ. Énɛ́ ɔ́, nú mǐ ɖo gbɛ oo, mǐ kú oo, Aklúnɔ tɔn wɛ mǐ nyǐ. Đó Klísu kú, bó ka lɛ́ wá gbɛ, bó ná nyí Aklúnɔ nú mɛ e kú lɛ́ɛ kpó mɛ e ɖo gbɛ lɛ́ɛ é kpó. Amɔ̌, hwɛ ɔ́, étɛ́wú a ɖo hwɛ dó nɔví towe wɛ? Hwɛ lo, étɛ́wú a gbɛ̌ wǎn nú nɔví towe? Đó Mawuxówéma ɔ́ ɖɔ: “Nyɛ Aklúnɔ gbɛɖe ɔ́, un tɛ ɖɛ̌ jí ɖɔ: gbɛtɔ́ lɛ́ɛ bǐ ná jɛ kpo ɖo nukɔn ce, bɔ mɛ ɖokpó ɖokpó ná zé gbe yi jǐ, bó ɖɔ nyɛ Aklúnɔ ɔ́ wɛ nyí Mawu.” Énɛ́ ɔ́, mɛ ɖokpó ɖokpó ná ɖó nǔ e é ɖésúnɔ wa ɔ́ sín gbe nú Mawu. Hǔn, mǐ ní bó gɔn hwɛ dó mǐɖée. Gbeta e mǐ ná ɖe tɔ́n kpowun ɔ́ ɖíe: Mǐ ní ma wa nǔ e ná zɔ́n bɔ nɔví mǐtɔn ná klɛ́n afɔ, abǐ é ná jɛ hwɛ mɛ é ɖěbǔ ó. Đo bǔ e un ɖe xá Aklúnɔ Jezu ɔ́ mɛ ɔ́, un tunwun, bó gán jɛ wú ɖɔ nǔɖuɖu ɖěbǔ kún nyí nǔblíblí ó; lo ɔ́, ényí mɛɖé lin ɖɔ nǔɖé nyí nǔblíblí ɔ́, nǔ ɔ́ húzú nǔblíblí nú mɛ ɔ́. Ényí a nɔ bló bɔ nɔví towe nɔ mɔ wǔvɛ́ ɖó nǔɖuɖu e ɖu wɛ a ɖe ɔ́ wútu ɔ́, a sɔ́ ɖo nǔ wa wɛ lě e wǎn yíyí ɔ́ byɔ́ gbɔn é ǎ. É ná sɔ́n nǔ e ɖu wɛ hwɛ ɖe ɔ́ wú kpowun bɔ a nǎ dɔn mɛ e tamɛ Klísu kú dó ɔ́ yí bú a? Nǔ e nyɔ́ nú mi ɔ́ ɖó ná nyí nǔ e wú mɛ ɖě lɛ́ɛ ná ɖɔ xó nyanya dó é ǎ. Đó axɔ́súɖuɖu Mawu tɔn nyí nǔɖuɖu kpó ahan kpó sín xó ɖé ǎ; hwɛjijɔ kpódó fífá kpó, kpódó awǎjijɛ e Yɛsinsɛn nɔ ná mɛ ɔ́ kpó sín xó wɛ. Mɛ e nɔ wa azɔ̌ nú Klísu gbɔn mɔ̌ ɔ́, nǔ tɔn nɔ nyɔ́ Mawu nukún mɛ; gbɛtɔ́ lɛ́ɛ nɔ kpa ɛ. Hǔn, mǐ ní bó ba nǔ e nɔ dɔn fífá wá, bó ná zɔ́n bɔ mǐ ná dó wǔsyɛ́n lanmɛ nú miɖée ɖo nǔɖiɖi mɛ é. Ma hɛn Mawuzɔ́ ɔ́ gblé ɖó nǔɖuɖu wútu ó. Nǔgbó ɔ́, è sixú ɖu nǔ bǐ. Nú è nǎ ɖu nǔɖé, bónú nɔví mɛtɔn ná jɛ hwɛ mɛ ɔ́, é nyɔ́ nú è nǐ gɔn ɖuɖu. Nǔ e nyɔ́ ɔ́ wɛ nyí ɖɔ, è nǐ jó nǔ e ná zɔ́n bɔ nɔví mɛtɔn ná jɛ hwɛ mɛ ɔ́ bǐ dó; ényí lan wɛ hǔn, ma ɖu ó; ényí vɛ̌ɛn wɛ hǔn, ma nu ó; ényí nǔ ɖěbǔ wɛ hǔn, ma bló ó. Hɛn nǔɖiɖi e hwi ɖésúnɔ ɖó dó nǔ énɛ́ wú ɔ́ nú hwiɖée ɖo Mawu nukɔn. Nǔ nyɔ́ nú mɛ e wa nǔ e é mɔ ɖɔ é nyɔ́ bɔ ayi tɔn ma xo hun xá ɛ ǎ é. Lo ɔ́, mɛ e xo nǔ kpɔ́n dó nǔɖuɖu ɖé wú, cóbó ka ɖu ɔ́, Mawu ɖó hwɛ nú mɛ énɛ́; ɖó é wa nǔ lě e nǔɖiɖi ɔ́ zɔ́n gbɔn é ǎ. Nǔ ɖěbǔ e è ma wa kpó nǔɖiɖi kpó ǎ ɔ́, hwɛ wɛ é nyí. Mǐ mɛ e ɖó gǎn ɖo nǔɖiɖi mɛ lɛ́ɛ ɔ́, mǐ ɖó ná dɛ ɖo mɛ e ma ɖó gǎn ɖo nǔɖiɖi mɛ ǎ lɛ́ɛ sín gǎnmaɖó nu; mǐ ɖó ná wa nǔ bó ná nyɔ́ ɖo mǐɖée sí ǎ. Đokpó ɖokpó mǐtɔn ɖó ná ba ná nyɔ́ ɖo nɔzo tɔn sí, nú ɖagbe nɔzo ɔ́ tɔn, bónú é ná yi nukɔn ɖo nǔɖiɖi mɛ. Đó Klísu ɔ́ wa nǔ bó ná nyɔ́ ɖo éɖée sí ǎ; é nyɔ́ wa ɔ́, lě e Mawuxówéma ɔ́ ɖɔ gbɔn ɔ́: “Zun e nyí zun towe ɔ́, nyɛ wɛ yí bǐ.” Nǔ e è ko wlán dó Mawuxówéma ɔ́ mɛ ɖ'ayǐ xóxó lɛ́ɛ bǐ ɔ́, è wlán yě, bó ná dó kplɔ́n nǔ mǐ, bónú mǐ ná ɖó nukún nǔ gbɔn sɔxwixwe kpó akɔ́nkpinkpan e Mawuxówéma ɔ́ nɔ ná mǐ ɔ́ kpó gbla mɛ. Mawu e gɔ́n sɔxwixwe kpó kanmɛsyɛ́nsyɛ́n kpó nɔ gosín ɔ́, ní bló bónú mi ná sixú zán gbenɔkpɔ́ sín gbɛ ɖo miɖée tɛ́ntin Klísu Jezu ɖɔhun. Bónú mi bǐ ná ɖó gbe kpɔ́ dó kpa susu nú Mawu, Aklúnɔ mǐtɔn Jezu Klísu sín Tɔ́ ɖó kpɔ́. Hǔn, mi bo nɔ yí miɖée ganjí lě e Klísu yí mi gbɔn é, nú è nǎ kpa susu nú Mawu. Nǔgbó ɔ́, un ɖo ɖiɖɔ nú mi wɛ ɖɔ Klísu húzú Jwifu lɛ́ɛ sín mɛsɛntɔ́, bó ná dó ɖe akpá e Mawu dó nú tɔ́gbó yětɔn lɛ́ɛ é, bó ná ɖe xlɛ́ gbɔn mɔ̌ ɖɔ Mawu kún nɔ́ dó akpá bó nɔ́ gɔn ɖiɖe ó. É wá bónú mɛ e ma nyí Jwifu ǎ lɛ́ɛ lɔmɔ̌ ná kpa susu nú Mawu ɖó nǔbláwǔkúnúmɛ tɔn wútu; lě e Mawuxówéma ɔ́ ɖɔ gbɔn é; é wɛ nyí ɖɔ: “Énɛ́ ɔ́ wú wɛ un ná kpa susu nú we ɖo akɔta e ma nyí Jwifu ǎ lɛ́ɛ tɛ́ntin, bó ná ji han dó mlá we ná.” Mawuxówéma ɔ́ lɛ́ ɖɔ: “Akɔta lɛ́ɛ mi, mi jɛ awǎ xá togun Aklúnɔ tɔn!” É lɛ́ ɖɔ: “Akɔta akɔta lɛ́ɛ mi, mi bǐ ní sɔ́ Aklúnɔ su, togun lɛ́ɛ bǐ ní kpa susu n'i!” Ezayíi lɔ ɖɔ: “Mɛ ɖé ná tɔ́n sín Jɛsée kún mɛ, bó ná wá; é ná sí te, bó ná ɖu axɔ́sú ɖo akɔta e ma nyí Jwifu ǎ lɛ́ɛ bǐ nu; é wɛ ná nyí nukúnɖíɖó akɔta e ma nyí Jwifu ǎ lɛ́ɛ bǐ tɔn.” Mawu e gɔ́n nukúnɖíɖó nɔ gosín ɔ́, ní bló bónú awǎjijɛ e nǔ bǐ vɔ ɖ'é wú ɔ́ kpódó fífá e nǔ bǐ vɔ ɖ'é wú ɔ́ kpó ní gɔ́ ayi mɛ nú mi gbɔn nǔɖiɖi e mi ɖó n'i ɔ́ jí, bónú nukúnɖíɖó mitɔn ná túnflá gbɔn Yɛsinsɛn sín hlɔ̌nhlɔ́n jí. Nɔví ce lɛ́ɛ mi, nyɛ ɖésúnɔ ɔ́, un ɖó gǎnjɛwú ɖɔ mi nyɔ́ xomɛ titewungbe. Mi mɔ nukúnnú jɛ nǔ e è ɖǒ ná tunwun ɔ́ wú bǐ dégbédégbé, bɔ mi nyí mɛ bó hɛn ɔ́, mi ná kplɔ́n nǔ miɖée. É ɖo mɔ̌ có, un syɛ́n ta, bó ɖɔ xó ɖé lɛ́ɛ sɛ́ dó mi, ɖo akpá gěgé xwé ɖo wěma élɔ́ mɛ, bó ná dó flín nǔ e mi ko tunwun ɖ'ayǐ lɛ́ɛ mi. Un wlán wěma ɔ́ gbɔn mɔ̌, ɖó fɛ́nú e Mawu ná mì, bɔ un nyí mɛsɛntɔ́ Klísu Jezu tɔn ɖo togun e ma nyí Jwifu ǎ lɛ́ɛ tɛ́ntin ɔ́ wútu. Wɛn Ɖagbe Mawu tɔn e jlá wɛ un ɖe ɔ́, vɔ̌sánú-xwlémawutɔ́zɔ́ dó wa ná wɛ un ɖe, bó ɖo wiwa wɛ, bónú togun e ma nyí Jwifu ǎ lɛ́ɛ ná húzú vɔ̌sánú e nɔ́ nyɔ́ Mawu nukún mɛ, bɔ Yɛsinsɛn sɔ́ ɖó vo nú Mawu é. Hǔn, ɖo bǔ e un ɖe xá Klísu Jezu ɔ́ mɛ ɔ́, un hɛn ɔ́, un ná gó, ɖó azɔ̌ e wa nú Mawu wɛ un ɖe ɔ́ wú. Đó ényí un glá bó ɖɔ nǔɖé xó ɔ́, azɔ̌ e Klísu wa gbɔn jǐ ce, bó ná dɔn mɛ e ma nyí Jwifu ǎ lɛ́ɛ, bónú yě ná se tónú nú Mawu ɔ́ sín xó kɛ́ɖɛ́ jɛ́n é ná nyí; é wa azɔ̌ énɛ́ gbɔn xóɖiɖɔ kpó nǔwiwa kpó mɛ, gbɔn nǔjíjlɛ́ lɛ́ɛ kpódó nǔdábaɖa lɛ́ɛ kpó sín hlɔ̌nhlɔ́n mɛ; gbɔn Yɛsinsɛn sín hlɔ̌nhlɔ́n mɛ. Lě e un gbɔn fí bǐ bɛ́ sín Jeluzalɛ́mu káká yi Ililíi gbé jí, bó jlá Wɛn Ɖagbe e ɖɔ xó dó Klísu wú ɔ́ kpíkpé tɔn gbɔn é nɛ́. Lo ɔ́, un tunwun ɖɔ fí e è ma ko se Klísuxó ɖe ǎ lɛ́ɛ kɛ́ɖɛ́ jɛ́n un ná jlá Wɛn Ɖagbe ɔ́ gbɔn dandan, bónú é ní ma cí dǒ e mɛɖěvo dó do ɔ́ jí wɛ un mɛ xɔ nyi ɖɔhun ó. Lě e Mawuxówéma ɔ́ ɖɔ gbɔn ɔ́: “Mɛ e è ma ko ɖɔ xó tɔn ná kpɔ́n ǎ lɛ́ɛ ná mɔ ɛ, bɔ mɛ e ma ko se xó tɔn kpɔn ǎ lɛ́ɛ ná mɔ nukúnnú jɛ wú.” Azɔn nabí ɖé wɛ é sín Wɛn Ɖagbe jlájlá gbɔn fí e è ma ko se Klísuxó ɔ́ ɖe ǎ lɛ́ɛ é wú, bɔ un gɔn gɔ̌n mitɔn. Amɔ̌, din ɔ́, un ko fó azɔ̌ ce ɖo gbě énɛ́ lɛ́ɛ jí. Gɔ̌n mitɔn wiwa ɖo jlǒjló mì wɛ din ɔ́, xwe tɔn ko sukpɔ́. Un ka jló ɖɔ nú un xwe Ɛsipányi ɔ́, un ná wá gbɔn mi gɔ́n, bónú jló e un ɖó, bó ná nɔ mi gɔ́n ɔ́ jɛmɛ nú mì kpɛɖé ɔ́, mi ná d'alɔ mì bɔ un ná yi to énɛ́ mɛ. Amɔ̌, din ɔ́, un xwe Jeluzalɛ́mu, bó ná yi gɔ́ alɔ nú mɛɖeɖóvo Mawu tɔn e ɖo dɔ̌n lɛ́ɛ. Nǔgbó ɔ́, klísusɛntɔ́ e ɖo Masedwani kpó Akáyi kpó lɛ́ɛ ɖɔ émí ná jɔ akwɛ́ nú wamamɔnɔ e ɖo mɛɖeɖóvo Mawu tɔn mɛ, ɖo Jeluzalɛ́mu lɛ́ɛ. Yě ɖésúnɔ wɛ bló kpó xomɛhunhun kpó; lo ɔ́, è nǎ ɖɔ nǔgbó ɔ́, axɔ́ wɛ é nyí bɔ yě ɖu dó wamamɔnɔ énɛ́ lɛ́ɛ. Đó Jwifu e nyí klísusɛntɔ́ lɛ́ɛ má nyɔ̌ná Yɛsinsɛn tɔn e nyí yě ɖésúnɔ tɔn lɛ́ɛ xá mɛ e ma nyí Jwifu ǎ lɛ́ɛ. Hǔn mɛ e ma nyí Jwifu ǎ lɛ́ɛ lɔmɔ̌ ɖó ná sɔ́ nyɔ̌ná gbɛmɛ fí tɔn lɛ́ɛ dó dó alɔ yě ná. Ényí un ko ɖɔ xó énɛ́ gbo, bó ko sɔ́ nǔ e è jɔ lɛ́ɛ jó nú yě ɔ́, un ná ɖidó Ɛsipányi; un ka xweyǐgbe ɔ́, un ná gbɔn mi gɔ́n. Un ka tunwun ɖɔ un jǎwe mi gɔn ɔ́, un ná hɛn nyɔ̌ná kpíkpé Klísu tɔn wá nú mi. Nɔví ce lɛ́ɛ mi, nǔ e wú un ɖo vo sa nú mi wɛ gbɔn Aklúnɔ mǐtɔn Jezu Klísu kpó wǎn yíyí e Yɛsinsɛn nɔ ná mɛ ɔ́ kpán jí ɔ́ ɖíe: mi fun ahwan e fun wɛ un ɖe ɔ́ xá mì, bó sa vo nú Mawu dó ta ce mɛ. Mi xo ɖɛ bónú ma gló nǔmaɖitɔ́ e ɖo Judée lɛ́ɛ, bónú alɔgɔ́númɛ sín azɔ̌ e wú un xwe Jeluzalɛ́mu ɔ́, mɛɖeɖóvo Mawu tɔn e ɖo dɔ̌n lɛ́ɛ ní kɛ alɔ bó yí. Énɛ́ ɔ́, nú é jló Mawu ɔ́, un ná wá mi gɔ́n kpó awǎjijɛ ɖaxó kpó, bó ná gbɔjɛ́ ɖo tɛ́ntin mitɔn. Mawu e nɔ ná fífá mɛ ɔ́ ní nɔ kpɔ́ xá mi bǐ! Amǐ! Un ɖe gbě nú nɔví mǐtɔn nyɔ̌nu Fwebée e ɖo azɔ̌ wa nú agun Klísu tɔn e ɖo Sanklé é, bónú mi na yí i ganjí ɖo Aklúnɔ sín nyǐkɔ mɛ, lě e mɛ e ɖo mɛɖeɖóvo Mawu tɔn mɛ lɛ́ɛ ná bló gbɔn ɖo yěɖée tɛ́ntin é; mi d'alɔ ɛ ɖo nǔ e kɔn nǔ mitɔn ná hudó e ɖe lɛ́ɛ é bǐ mɛ. É lɔmɔ̌ d'alɔ mɛ gěgé, ɖo tají ɔ́, é d'alɔ nyɛ lɔmɔ̌. Mi dó gbe Plisílu kpódó Akilási kpó nú mì; nyɛ kpó yě kpó wɛ wa azɔ̌ nú Klísu Jezu. Yě ko ɖibla sɔ́ gbɛ yě ɖésúnɔ tɔn nyi gbě dó ta ce mɛ; nyɛ ɖokpónɔ wɛ tunwun ɖagbe énɛ́ nú yě ǎ; agun klísusɛntɔ́ e ma nyí Jwifu ǎ lɛ́ɛ tɔn lɛ́ɛ lɔmɔ̌ ɔ́ bǐ tunwun ɖagbe énɛ́ nú yě. Mi dó gbe agun e nɔ kplé ɖo xwé yětɔn gbe ɔ́ lɔmɔ̌ nú mì. Mi dó gbe wǎnyínámɔ ce Epenɛ́ti e nyí mɛ nukɔn tɔn e ɖi nǔ nú Klísu ɖo tokpɔn Azíi tɔn mɛ é nú mì. Mi dó gbe Mali e jɛ tagba ɖésú dó ta mitɔn mɛ ɔ́ nú mì. Mi dó gbe Andlonikúsi kpó Juniyasi kpó nú mì; hɛ̌nnumɔ ce wɛ yě nyí, bɔ nyɛ kpó yě kpó kó nɔ gankpá mɛ kpɔ́n. Mɛ nukúnɖéjí wɛ yě nyí ɖo mɛsɛ́dó lɛ́ɛ mɛ, yě ko húzú klísusɛntɔ́ dó nukɔn nú mì. Mi dó gbe Anpliatúsi e nyí mɛvívɛ́ná ce ɖo bǔ e mǐ ɖe xá Aklúnɔ mɛ ɔ́ nú mì. Mi dó gbe Wibɛ́ɛn e kpó mǐ kpó ɖo azɔ̌ wa nú Klísu wɛ é nú mì; bó dó gbe mɛvívɛ́ná ce Sitaxísi nú mì. Mi dó gbe Apɛlu e ɖe nǔ e é ɖi nú Klísu ɔ́ xlɛ́ é nú mì. Mi dó gbe mɛ e ɖo Alisitobúlu xwé lɛ́ɛ nú mì. Mi dó gbe hɛ̌nnumɔ ce Elódiɔ́n nú mì. Mi dó gbe mɛ e ɖo Naasísi xwé, bó ɖi nǔ nú Aklúnɔ lɛ́ɛ nú mì. Mi dó gbe Tlifɛ́nu kpó Tlifɔ́su kpó e ɖo azɔ̌ wa nú Aklúnɔ wɛ lɛ́ɛ nú mì. Mi dó gbe mɛvívɛ́ná ce Pɛsízi e wa azɔ̌ ɖésú nú Aklúnɔ ɔ́ nú mì. Mi dó gbe Hlufúsi e nyí mɛ bɔ Aklúnɔ sɔ́ é nú mì, bó dó gbe nɔ tɔn e nyí nɔ nú nyɛ lɔmɔ̌ ɔ́ nú mì. Mi dó gbe Asɛnklíti kpó Flegɔ́ɔn kpó Ɛɛmɛsi kpó, kpódó Patlɔbási kpó, kpódó Ɛɛmasi kpó, bó dó gbe nɔví ɖě lɛ́ɛ e ɖo kpɔ́ xá yě ɔ́ nú mì. Mi dó gbe Filolɔ́gu kpó Juli kpó, bó dó gbe Nɛlée kpó nɔví tɔn nyɔ̌nu ɔ́ kpó nú mì, bó dó gbe Olɛ́npási kpódó mɛɖeɖóvo Mawu tɔn e ɖo kpɔ́ xá yě lɛ́ɛ bǐ kpán nú mì. Mi ki nɔví nɔví sín si dó dó gbe miɖée ná; agun Klísu tɔn lɛ́ɛ bǐ dó gbe sɛ́ dó mi. Nɔví lɛ́ɛ mi, un ɖo vo sa nú mi wɛ ɖɔ mi cɔ́ miɖée dó mɛ e nɔ dɔn kínklán byɔ́ mɛ mɛ lɛ́ɛ wú. Nǔ e yě nɔ ɖɔ lɛ́ɛ nɔ gbɔn vo nú nǔ e è kplɔ́n mi lɛ́ɛ, bó nyí afɔklɛ́nnú nú mi; mi lɛ́ kɔ sín yě gúdo. Đó gbɛtɔ́ mɔ̌hunkɔtɔn lɛ́ɛ ɖo azɔ̌ wa nú Klísu Aklúnɔ mǐtɔn ɔ́ wɛ ǎ; lo ɔ́, adɔgo yě ɖésúnɔ tɔn wa azɔ̌ ná wɛ yě ɖe. Yě nɔ ɖɔ xó víví, bó nɔ ɖɔ mɛblɛ́ɖuxó dó flú xomɛvɔ́nɔ lɛ́ɛ sín ayixa. Mɛ bǐ wɛ tunwun ɖɔ mi nɔ se tónú nú Aklúnɔ; hǔn xomɛ nɔ hun mì dó mi wú; lo ɔ́, un jló ɖɔ nǔnywɛ́ ní kpé mi, bónú mi ná nɔ wa nǔ ɖagbe; un jló ɖɔ mi ní nɔ mǐmɛ́ jí, bó hɔn nú nǔ nyanya. Zaanɖé din ɔ́, Mawu e nɔ ná fífá mɛ ɔ́ ná nyínyɛ́ Satáan dó afɔ mitɔn lɛ́ɛ glɔ́. Fɛ́nú Aklúnɔ mǐtɔn Jezu tɔn ní nɔ kpɔ́ xá mi. Azɔ̌gbɛ́ ce Timɔtée dó gbe sɛ́ dó mi; mɔ̌ ɖokpó ɔ́, hɛ̌nnumɔ ce Lusiwúsi kpó Jazɔ́ɔn kpó, kpódó Sosipatlɔ́si kpán dó gbe sɛ́ dó mi. Nyɛ Tɛtiwúsi e ɖo wěma élɔ́ wlán nú Pɔ́lu wɛ ɔ́ dó gbe sɛ́ dó mi ɖo bǔ e mǐ ɖe xá Aklúnɔ ɔ́ mɛ. Gayiwúsi e yí nyɛ Pɔ́lu dó xwé tɔn gbe ɔ́, é mɛ e sín xwé gbe agun ɔ́ bǐ nɔ́ kplé ɖe ɔ́ dó gbe sɛ́ dó mi. Elasíti e nɔ hɛn akwɛ́gbá to ɔ́ tɔn ɔ́ kpódó nɔví mǐtɔn Kaatúsi kpán dó gbe sɛ́ dó mi. [ Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ. Amǐ!] Mi nú mǐ ná kpa Mawu! É ɖó acɛ bó ná bló bɔ mǐ ná ɖó hlɔ̌nhlɔ́n ɖo nǔɖiɖi mɛ, lě e Wɛn Ɖagbe e jlá wɛ un ɖe ɔ́ ɖɔ gbɔn é, ɖi lě e wɛn e kunkplá Jezu Klísu bɔ un ɖo dǐdó wɛ ɔ́, kpo nǔtunwuntunwun e mǐ mɔ yí ɖo nǔbúdo Mawu tɔn mɛ ɔ́ kpán ɖɔ gbɔn é. Nǔbúdo énɛ́ ko ɖo hwlǎhwlá sín xóxó hwenu ɖokpóó. Amɔ̌, din ɔ́, wěma e gbeyíɖɔ Mawu tɔn lɛ́ɛ wlán lɛ́ɛ ɖe nǔbúdo énɛ́ nyi wěxo. Đi lě e Mawu Mavɔmavɔ ɔ́ ná gbe tɔn gbɔn ɔ́, è ɖe nǔbúdo énɛ́ ɔ́ xlɛ́ akɔta lɛ́ɛ bǐ, bónú yě ná ɖi nǔ, bó ná se tónú. Mawu nǔnywɛ́tɔ́ ɖokpó géé e tíin ɔ́, susu n'i káká sɔ́yi gbɔn Jezu Klísu jí. Amǐ! Nyɛ Pɔ́lu e Mawu ylɔ́ ɖo jlǒ tɔn mɛ, bónú ma nyí mɛsɛ́dó Klísu Jezu tɔn ɔ́ kpódó nɔví mǐtɔn ɖo Klísu mɛ Sositɛ́nu kpán wɛ ɖo wěma élɔ́ wlán sɛ́ dó agun Mawu tɔn e ɖo Kɔlɛ́nti é wɛ, bó ɖo wlǎnwlán sɛ́ dó yě mɛ e Mawu ylɔ́, bɔ yě ná nɔ gbɛ n'i, ɖo bǔ e yě ɖe xá Klísu Jezu ɔ́ mɛ lɛ́ɛ wɛ, bó ɖo wlǎnwlán sɛ́ dó mɛ e nyí étɔn lɛ́ɛ kpó mɛ e nɔ ɖo Aklúnɔ mǐtɔn Jezu Klísu sín nyǐkɔ ylɔ́ wɛ ɖo fí ɖěbǔ e yě ɖe lɛ́ɛ é bǐ kpó wɛ. Aklúnɔ Jezu Klísu ɔ́ wɛ nyí Aklúnɔ yětɔn, bó nyí mǐ lɔmɔ̌ tɔn. Mawu Tɔ́ mǐtɔn ɔ́ kpódó Aklúnɔ Jezu Klísu kpán ní ná fɛ́nú kpódó fífá kpó mi. Un nɔ dó kú nú Mawu ce hwebǐnu dó ta mitɔn mɛ, ɖó fɛ́nú e é ná mi ɖo bǔ e mi ɖe ɖo Klísu Jezu mɛ é wútu. Nǔgbó ɔ́, Mawu zě nǔníná lɛ́ɛ bǐ dó dó dɔkun nú mi, ɖo bǔ e mi ɖe xá Klísu Jezu ɔ́ mɛ; ɖo tají ɔ́, é zé nǔníná e kunkplá xó ɔ́ lɛ́ɛ, kpódó éé kunkplá nukúnnú-mɔjɛnǔmɛ lɛ́ɛ kpán é bǐ dó dó dɔkun nú mi. Kúnnu e è ɖe nú Klísu ɔ́ lí dǒ ɖo tɛ́ntin mitɔn titewungbe, bɔ nǔníná Mawu tɔn ɖěbǔ hwedó mi mɛ e ɖo te kpɔ́n hwenu e Mawu ná ɖe Aklúnɔ mǐtɔn Jezu Klísu xlɛ́ dó é lɛ́ɛ ǎ. Aklúnɔ mǐtɔn Jezu Klísu ɔ́ wɛ ná hɛn mi, bɔ mi na syɛ́nlǐn káká yi vivɔnu, bónú mɛɖé ní ma mɔ nǔɖé ɖɔ dó mi wú ɖo azǎn tɔn gbe ó. Mawu ɖo gbejí. É wɛ ylɔ́ mi, bónú mi ná nɔ bǔ xá Vǐ tɔn Aklúnɔ mǐtɔn Jezu Klísu. Nɔví lɛ́ɛ mi, ɖo Aklúnɔ mǐtɔn Jezu Klísu sín nyǐkɔ mɛ ɔ́, un ɖo byɔ̌byɔ́ mi wɛ ɖɔ mi bǐ ní ɖó gbe kpɔ́, bónú kínklán ma nɔ tɛ́ntin mitɔn ó; mi ní nɔ bǔ ganjí, bó ɖó linlin ɖokpó ɔ́; ayixa mitɔn ní nɔ ɖɔ nǔ ɖokpó ɔ́. Nɔví ce lɛ́ɛ mi, nǔgbó ɔ́, Klowée sín hɛ̌nnumɔ ɖé lɛ́ɛ ɖɔ nú mǐ ɖɔ mi ɖo jlɛ ɖɔ wɛ. Nǔ e ɖɔ wɛ un ɖe bó ɖɔ mɔ̌ ɔ́ ɖíe: mi ɖokpó ɖokpó nɔ́ ɖo xó vovo ɖɔ wɛ; mɛ ɖě nɔ ɖɔ: “Nyɛ ɔ́, Pɔ́lu tɔn wɛ un nyí”; mɛɖěvo nɔ ɖɔ: “Nyɛ ɔ́, Apolosu tɔn wɛ un nyí”; mɛɖěvo nɔ lɛ́ ɖɔ: “Nyɛ ɔ́, Sefási tɔn wɛ un nyí”; bɔ mɛ ɖě nɔ lɛ́ ɖɔ: “Nyɛ ɔ́, Klísu tɔn wɛ un nyí.” Nǔ e un ka ná kanbyɔ́ mi ɔ́, mi vɛdó ɖɔ Klísu ɔ́ má éɖée ɖó donu vovo wɛ sín a? Pɔ́lu ɔ́ wɛ è ká ɖó aklúzu jí dó ta mitɔn mɛ a? Pɔ́lu sín nyǐkɔ mɛ wɛ è lɛ yɛhwesin nú mi dó a? Un dó kú nú Mawu ɖɔ un kún lɛ yɛhwesin nú mɛɖé ɖo mi mɛ zɛ Klisipúsi kpó Gayiwúsi kpó wú ó. Énɛ́ ɔ́, mɛ ɖěbǔ ɖo mi mɛ bó ná sixú ɖɔ nyǐkɔ ce mɛ wɛ è lɛ yɛhwesin nú émí dó ǎ. (Áááá! Un lɛ́ lɛ yɛhwesin nú Sitefanási sín hɛ̌nnu ɔ́ lɔ; lo ɔ́, un to lɛ́ lɛ yɛhwesin nú mɛɖé hǔn, un sɔ́ flín ǎ.) Klísu sɛ́ mì dó nú má wá lɛ yɛhwesin nú mɛ ǎ; Wɛn Ɖagbe ɔ́ wɛ é sɛ́ mì dó ɖɔ má wá jlá; nyɛ ní má ka zé nǔnywɛ́ gbɛtɔ́ tɔn sín xó dó jlá ná ó; é má nyí mɔ̌ ǎ ɔ́, hlɔ̌nhlɔ́n e kú e Klísu kú ɖo aklúzu jí ɔ́ ɖó ɔ́ táá nyí nǔ yǎyá. Nǔgbó ɔ́, kú e Klísu kú ɖo aklúzu jí é sín xó ɔ́, xlonɔxó wɛ yě mɛ e ɖo bǔbú wɛ lɛ́ɛ nɔ dó mɔ ná; lo ɔ́, hlɔ̌nhlɔ́n Mawu tɔn wɛ é nyí nú mǐ mɛ e ɖo hwlɛngán sín ali jí lɛ́ɛ. Nǔ e Mawuxówéma ɔ́ ɖɔ ɔ́ ɖíe: “Un ná sú nǔnywɛ́tɔ́ lɛ́ɛ sín nǔnywɛ́ sín kún dó; un ná gbɛ́ nǔ e nukúnnú-mɔjɛnǔmɛtɔ́ lɛ́ɛ tunwun é.” Ényí nǔ nyí mɔ̌ ɔ́, ani wɛ nǔnywɛ́tɔ́, abǐ wěmasetɔ́, abǐ xóɖɔdóxówútɔ́ gbɛmɛ fí tɔn lɛ́ɛ sɔ́ sixú lɛ́ ɖɔ? Mawu ɖe xlɛ́ ɖɔ nǔnywɛ́ gbɛmɛ fí tɔn ɔ́, xlojijɔ wɛ é nyí. Nǔgbó ɔ́, gbɔn nǔnywɛ́ e gbɛtɔ́ lɛ́ɛ ɖó ɔ́ gbla mɛ ɔ́, yě kpé wú bó tunwun Mawu ɖo fí e nǔnywɛ́ tɔn ɖo azɔ̌ wa ɖe wɛ ɔ́ ǎ. Énɛ́ ɔ́ wú wɛ é nyɔ́ Mawu nukún mɛ ɖɔ émí ná hwlɛ́n mɛ e ɖi nǔ lɛ́ɛ gán, gbɔn wɛn élɔ́ e dó wɛ mǐ ɖe, bɔ gbɛtɔ́ lɛ́ɛ nɔ mɔ dó mɔ xlonɔxó ná é gbla mɛ. Jwifu lɛ́ɛ nɔ byɔ́ ɖɔ è nǐ jlɛ́ nǔ, bó dó ná xlɛ́ émí, bɔ Glɛ̌sinu lɛ́ɛ ka nɔ ba nǔnywɛ́. Mǐdɛɛ lɛ́ɛ ɔ́, Klísu e è ká nyi aklúzu jí ɔ́ jlá wɛ mǐ ɖe: afɔklɛ́nnúxó wɛ xó énɛ́ nyí nú Jwifu lɛ́ɛ, bɔ mɛ e ma nyí Jwifu ǎ lɛ́ɛ nɔ́ mɔ dó mɔ xlonɔxó. Lo ɔ́, Klísu ɔ́, hlɔ̌nhlɔ́n Mawu tɔn kpódó nǔnywɛ́ Mawu tɔn kpó wɛ é nyí nú mɛ e Mawu ylɔ́ lɛ́ɛ; Jwifu kpódó Glɛ̌sinu kpó. Đó nǔ e è nɔ mɔ dó mɔ xlojijɔ Mawu tɔn ná ɔ́, nǔnywɛ́ e ɖ'é mɛ ɔ́ hú gǎn nǔnywɛ́ e gbɛtɔ́ lɛ́ɛ ɖó é; nǔ e è nɔ mɔ dó mɔ vǐvɔ́ Mawu tɔn ná ɔ́, hlɔ̌nhlɔ́n e é ɖó ɔ́ hú gǎn ée gbɛtɔ́ lɛ́ɛ ɖó é. Nɔví lɛ́ɛ mi, mi ní mɔ ɖɔ, ɖo gbɛtɔ́ sín ali jí ɔ́, nǔnywɛ́tɔ́ nabíɖé kún ɖo mi mɛ e Mawu ylɔ́ lɛ́ɛ mɛ ó; mɛ e ɖó hlɔ̌nhlɔ́n ɔ́ nabíɖé kún ɖo mi mɛ ó; mɛ nabíɖé kún ka ɖo mi mɛ bó gosín hɛ̌nnu nukúnɖéjí lɛ́ɛ mɛ ó. Lo ɔ́, Mawu sɔ́ nǔ e gbɛtɔ́ lɛ́ɛ nɔ mɔ dó mɔ xlo ná ɔ́ dó dó winnyá nǔnywɛ́tɔ́ lɛ́ɛ ná; é sɔ́ nǔ e yě nɔ mɔ dó mɔ vǐvɔ́ ná ɔ́ dó dó winnyá mɛ e ɖó hlɔ̌nhlɔ́n lɛ́ɛ. Nǔ e gbɛtɔ́ lɛ́ɛ mɔ dó mɔ nǔ masɔatɛ́n, nǔ gbɛ́hɛn, nǔ yǎyá ɔ́, Mawu sɔ́ dó gba nǔ e yě sɔ́ dó mɔ nǔgɛ́n é. Énɛ́ ɔ́, gbɛtɔ́ ɖěbǔ sixú yí go ɖo Mawu nukɔn ǎ. Lo ɔ́, Mawu dɔn mi kpó Klísu Jezu kpán ɖó bǔ, bó sɔ́ ɛ dó ɖó nǔnywɛ́ mǐtɔn. Gbɔn Klísu Jezu jí ɔ́, mǐ húzú hwɛjijɔnɔ ɖo Mawu nukɔn; Mawu ɖe mǐ ɖó vo gbɔn jǐ tɔn; é hwlɛ́n mǐ sín hwɛ mǐtɔn lɛ́ɛ mɛ gbɔn jǐ tɔn. Énɛ́ ɔ́ wú ɔ́, lě e Mawuxówéma ɔ́ ɖɔ gbɔn ɔ́: “Nú mɛɖé jló ná jlá ajɔ̌ nú éɖée ɔ́, ní jlá ɖó Aklúnɔ ɔ́ wú.” Nɔví lɛ́ɛ mi, hwenu e un wá mi gɔ́n bó ná ɖɔ nǔbúdo Mawu tɔn ɔ́ sín xó nú mi ɔ́, un zán xógbe gɛ́dɛ́gɛ́dɛ́, abǐ nǔnywɛ́ xwítíxwítí ɖé dó ɖɔ xó nú mi ǎ. Đó un ko ɖɔ ɖɔ hwenu e un ná nɔ mi gɔ́n xɔ ɔ́ bǐ sésé ɔ́, un kún sɔ́ ná tunwun nǔ ɖěbǔ zɛ Jezu Klísu wú ó; ɖo tají ɔ́, Jezu Klísu e è ká nyi aklúzu jí é. Énɛ́ ɔ́ wú wɛ un wá mi gɔ́n, gǎn ɖé ma ɖó, kpó xɛsi kpó, kpódó sísɔ́sísɔ́ kpán. É nyí nǔnywɛ́ gbɛtɔ́ tɔn sín xó víví lɛ́ɛ wɛ un sɔ́ dó kplɔ́n nǔ mɛ ǎ, é ka nyí é wɛ un dó ɖɔ Mawuxó ɔ́ ná ǎ; lo ɔ́, Yɛ Mawu tɔn sín hlɔ̌nhlɔ́n sín nǔwiwa wɛ. Énɛ́ ɔ́, nǔɖiɖi mitɔn jínjɔ́n nǔnywɛ́ gbɛtɔ́ lɛ́ɛ tɔn jí ǎ; lo ɔ́ hlɔ̌nhlɔ́n Mawu tɔn jí wɛ é jínjɔ́n. É ɖo mɔ̌ có, un ɖo nǔnywɛ́ ɖé kplɔ́n klísusɛntɔ́ e ko zin ɖo nǔɖiɖi mɛ lɛ́ɛ wɛ; amɔ̌ nǔnywɛ́ énɛ́ nyí nǔnywɛ́ gbɛmɛ fí tɔn ǎ; é ka nyí hlɔ̌nhlɔ́n e ɖo acɛ kpa wɛ ɖo gbɛ élɔ́ mɛ, bɔ è ka ná wá hu acɛ ná lɛ́ɛ ǎ. Éeǒ! Nǔnywɛ́ énɛ́ jlá wɛ un ɖe ǎ. Nǔnywɛ́ Mawu tɔn e nyí nǔbúdo bɔ Mawu zé hwlá dó gbɛtɔ́ lɛ́ɛ é jlá wɛ un ɖe; nǔnywɛ́ énɛ́ wɛ Mawu ko sɔ́ ɖ'ayǐ xóxó nú susu mǐtɔn, cóbɔ gbɛ ɔ́ wá tíin. Hlɔ̌nhlɔ́n gbɛ élɔ́ mɛ tɔn lɛ́ɛ ɖěbǔ kó tunwun nǔnywɛ́ énɛ́ ɖ'ayǐ ǎ; ényí ɖɔ yě kó tunwun wɛ ɔ́, yě ná zɔ́n ɖɔ è nǐ ká Aklúnɔ susunɔ ɔ́ nyi aklúzu jí ǎ. Lo ɔ́, lě e Mawuxówéma ɔ́ kó ɖɔ gbɔn ɔ́: “Nǔ e mɛ ɖěbǔ ma mɔ kpɔ́n gbeɖé, bó ma ka se kpɔ́n gbeɖé ǎ ɔ́, nǔ e mɛ ɖěbǔ ma lin kpɔ́n gbeɖé ǎ ɔ́, Mawu bló nǔ énɛ́ ɖ'ayǐ nú mɛ e yí wǎn n'i lɛ́ɛ.” Mǐdɛɛ lɛ́ɛ wɛ ka nyí mɛ e Mawu ɖe nǔbúdo énɛ́ xlɛ́ gbɔn Yɛsinsɛn jí é. Nǔgbó ɔ́, Yɛsinsɛn ɔ́ nɔ ba do nú nǔ bǐ káká jɛ tito Mawu tɔn e ɖo hwlǎhwlá ɖo gɔngɔn mɛ lɛ́ɛ é lɔ jí. Đo gbɛtɔ́ nyínyí sín alixo ɔ́, yɛ e ɖo gbɛtɔ́ mɛ ɔ́ jɛ́n tunwun nǔ e kunkplá gbɛtɔ́ é; mɔ̌ ɖokpó ɔ́, Yɛ Mawu tɔn kɛ́ɖɛ́ jɛ́n tunwun nǔ e kunkplá Mawu é. Mǐdɛɛ lɛ́ɛ ɔ́, ényí yɛ e ɖo gbɛ élɔ́ mɛ ɔ́ wɛ è nǎ mǐ ǎ; lo ɔ́, Mawu ná mǐ Yɛ e gosín gɔ̌n tɔn é, bónú mǐ ná tunwun nǔ e Mawu ná mǐ vɔ̌nu lɛ́ɛ bǐ, bó nɔ́ ɖo xó tɔn ɖɔ wɛ. É nyí xógbe e nǔnywɛ́ gbɛtɔ́ tɔn nɔ kplɔ́n mɛ lɛ́ɛ wɛ mǐ dó ɖo xó tɔn ɖɔ ná wɛ ǎ; lo ɔ́, ée Yɛ Mawu tɔn nɔ kplɔ́n mɛ lɛ́ɛ wɛ mǐ dó ɖo ɖiɖɔ ná wɛ. Mɛ e jí Yɛ énɛ́ ɖe lɛ́ɛ ɔ́, lě e mǐ nɔ tín nǔgbó Mawu tɔn ɔ́ mɛ nú yě gbɔn ɔ́ nɛ́. Mɛ e ma ɖó Yɛ Mawu tɔn ǎ ɔ́ sixú yí nǔníná Mawu tɔn e Yɛ énɛ́ ɔ́ nɔ ná mɛ lɛ́ɛ é ǎ; xlonɔxó wɛ é nɔ́ mɔ xó énɛ́ lɛ́ɛ dó mɔ ná; é sixú mɔ nukúnnú jɛ yě mɛ ǎ, ɖó Yɛ Mawu tɔn ɔ́ jɛ́n è sixú dó ba do nú nǔgbó Mawu tɔn lɛ́ɛ ná. Mɛ e ɖó Yɛ Mawu tɔn ɔ́ jɛ́n sixú ɖɔ hwɛ dó nǔ bǐ; lo ɔ́, mɛ ɖěbǔ sixú ɖɔ hwɛ dó éyɛ́ ǎ. Ɖó Mawuxówéma ko ɖɔ: “Mɛ̌ ka tunwun Aklúnɔ sín linlin lɛ́ɛ? Mɛ̌ ka sixú kplɔ́n nǔ i?” Amɔ̌, mǐdɛɛ lɛ́ɛ ɔ́, linlin Klísu tɔn wɛ mǐ ɖó. Nɔví lɛ́ɛ mi, nǔgbó ɔ́, un kpé wú bó ɖɔ xó nú mi lě e è nǎ ɖɔ xó nú mɛ e ɖó Yɛ Mawu tɔn gbɔn é ǎ: lě e è nǎ ɖɔ xó nú mɛ e nyí gbɛ élɔ́ tɔn lɛ́ɛ gbɔn ɔ́ wɛ un ɖɔ xó nú mi gbɔn. Lě e è nǎ ɖɔ xó nú mɛ e nyí vǐ yɛ̌yɛ́ ɖo bǔ e yě ɖe xá Klísu ɔ́ mɛ lɛ́ɛ gbɔn ɔ́ wɛ un ɖɔ xó nú mi gbɔn. Anɔ̌sin wɛ un ná mi; é nyí nǔɖuɖu syɛ́nsyɛ́n wɛ ǎ, ɖó mi sixú kpé wú ǎ; bɔ káká jɛ égbé din ɔ́, mi tlɛ ko sixú kpé wú ǎ. Đó mi lɛ́ kpo ɖo gbɛ zán wɛ gbɛtɔ́ gbɛ élɔ́ tɔn lɛ́ɛ ɖɔhun. Hwenu e mi lɛ́ kpo ɖo wǔhwan wɛ, bó ɖo jlɛ ɖɔ wɛ ɖo miɖée tɛ́ntin ɔ́, ɖiɖe xlɛ́ wɛ mi ɖe ɖɔ gbɛ élɔ́ tɔn wɛ émí nyí nɛ́ ǎ cé? Mi ɖo nǔ wa wɛ gbɛtɔ́ kpaa lɛ́ɛ ɖɔhun. Ée mɛ mitɔn ɖě nɔ ɖɔ: “Un nyí Pɔ́lu tɔn”, bɔ mɛɖěvo nɔ ɖɔ: “Un nyí Apolosu tɔn” ɔ́, nǔ wa wɛ mi ɖe gbɛtɔ́ kpaa lɛ́ɛ ɖɔhun nɛ́ ǎ cé? Nǔ e un ná kanbyɔ́ mi ɔ́, mɛ̌ ka nyí Apolosu? Mɛ̌ ka nyí Pɔ́lu? Azɔ̌watɔ́ Mawu tɔn e jí Mawu ylɔ́ mi gbɔn, bɔ mi ɖi nǔ ɔ́ wɛ mǐ nyí kpowun. Azɔ̌ e Aklúnɔ zɔ́n ɖokpó ɖokpó mǐtɔn ɔ́ wa wɛ mǐ ɖe. Nyɛ wɛ tun atín ɔ́, bɔ Apolosu hú sin ná; Mawu wɛ ka ná bɔ é su. Hǔn, mɛ e tun atín ɔ́, kpódó mɛ e hú sin ná ɔ́ kpán ɔ́, yě nyí nǔtí ǎ. Mawu wɛ nyí nǔ bǐ; ɖó é wɛ bló bɔ atín ɔ́ su. Mɛ e tun atín é kpódó mɛ e hú sin ná é kpó ɔ́, zɛ̌nzɛ̌n wɛ yě ɖe; mɛ ɖokpó ɖokpó ná mɔ lě e é wa nǔ gbɔn ɔ́ sín ajɔ yí ɖo Mawu sí. Đó azɔ̌ wa ɖó kpɔ́ wɛ mǐ ɖe nú Mawu, bɔ midɛɛ lɛ́ɛ ka nyí gle Mawu tɔn, bó lɛ́ nyí xɔ Mawu tɔn. Un wa azɔ̌ ɖi xɔmɛtɔ́gán e nǔnywɛ́ kpé é ɖɔhun, bó dó xɔ ɔ́ do ganjí, lě e Mawu ná nǔníná tɔn mì gbɔn é. Din ɔ́, mɛɖěvo ɖo dǒ mɛ ɖ'é jí wɛ. Amɔ̌, mɛ ɖokpó ɖokpó ka ɖó ná hɛn ayixa dó lě e é ɖo dǒ mɛ ɖ'é jí gbɔn wɛ é wú. Đó è ko dó dǒ ɔ́ do; Jezu Klísu wɛ nyí dǒ dodó énɛ́ ɔ́, bɔ mɛ ɖěbǔ sɔ́ sixú dó dǒ ɖěvo do ǎ. Mɛ ɖé lɛ́ɛ ná sɔ́ siká abǐ kpatágan, abǐ awǐnnya xɔ akwɛ́ dó mɛ dǒ ɖó dǒ dodó ɔ́ jí; mɛɖěvo lɛ́ɛ ka ná zán atín, abǐ sɛ, abǐ gběhan. Amɔ̌, Aklúnɔ sín azǎn ɔ́ wɛ ná ɖe lě e azɔ̌ mɛ ɖokpó ɖokpó tɔn ɖe gbɔn é xlɛ́, bɔ é ná jɛ wěxo. Nǔgbó ɔ́, azǎn énɛ́ ɔ́ ná wá kpó myɔ kpó, bɔ myɔ ná gbéjé azɔ̌ e mɛ ɖokpó ɖokpó wa ɔ́ kpɔ́n, bó ná ɖe azɔ̌ alɔkpa e é nyí ɔ́ xlɛ́. Ényí azɔ̌ e mɛɖé wa ɖó dǒ dodó ɔ́ jí ɔ́ kpo ɖo te ɔ́, é ná mɔ ajɔ yí ɖo Mawu sí. Ényí azɔ̌ mɛɖé tɔn ka fyɔ́ ɖo myɔ ɔ́ mɛ ɔ́, mɛ énɛ́ ná mɔ ajɔ ɖěbǔ yí ɖo Mawu sí ǎ; é ɖo mɔ̌ có mɛ énɛ́ ɖésú ná mɔ hwlɛngán mɛ e xo myɔ ɔ́ zlɛ́, bó gán é ɖɔhun. Mi tunwun ɖɔ sinsɛnxɔ Mawu tɔn wɛ émí nyí, bɔ Yɛ Mawu tɔn ɖo émí mɛ. Nǔgbó ɔ́, ényí mɛɖé mu sinsɛnxɔ Mawu tɔn ɔ́, Mawu ná gblé gbɛ dó nú mɛ énɛ́; ɖó sinsɛnxɔ Mawu tɔn ɔ́, nǔ mímɛ́ wɛ é nyí; mi wɛ ka nyí sinsɛnxɔ tɔn. Mɛɖé bó ma blɛ́ éɖée ó. Ényí mɛɖé ɖo mi mɛ, bónú nǔ e gbɛtɔ́ lɛ́ɛ nɔ ylɔ́ ɖɔ nǔnywɛ́ ɔ́ wɛ é ɖó, lobo ɖɔ émí ɖó nǔnywɛ́ ɔ́, mɛ énɛ́ ní bó húzú xlonɔ bó ná sixú ɖó nǔnywɛ́ titewungbe ɔ́. Đó nǔnywɛ́ gbɛ élɔ́ tɔn ɔ́, xlonɔxó wɛ é nyí ɖo Mawu nukɔn. Nǔgbó ɔ́, Mawuxówéma ɔ́ ɖɔ: “Nǔnywɛ́tɔ́ lɛ́ɛ ɔ́, sísɛ́ yětɔn ɖésú wɛ Mawu nɔ dó wlí yě ná.” Mawuxówéma ɔ́ lɛ́ ɖɔ: “Aklúnɔ tunwun ɖɔ linlin nǔnywɛ́tɔ́ lɛ́ɛ tɔn kún nyí nǔtí ó.” Hǔn mɛ ɖěbǔ ɖó ná tɛ afɔ ayǐ ɖó gbɛtɔ́ wú ǎ; ɖó nǔ bǐ wɛ nyí mitɔn: Pɔ́lu oo, Apolosu abǐ Sefási oo, wɛ̌kɛ́ oo, gbɛ oo, kú oo, din abǐ sɔ e jǎwe ɔ́ oo, nǔ bǐ wɛ nyí mitɔn. Amɔ̌ midɛɛ lɛ́ɛ ɔ́, Klísu tɔn wɛ mi nyí, bɔ Klísu nyí Mawu tɔn. Hǔn, mi ɖó ná nɔ mɔ mǐ dó mɔ azɔ̌watɔ́ Klísu tɔn ná, bó ɖó ná mɔ mǐ dó mɔ mɛ e Mawu sɔ́ nǔbúdo tɔn lɛ́ɛ sín azɔ̌ dó así ná lɛ́ɛ é. Mɛ e è zě azɔ̌ ɖé dó así ná ɔ́, nǔ e byɔ́ ɛ wɛ è ɖe kpowun ɔ́ wɛ nyí ɖɔ é ní nɔ gbejí. Nyɛ ɔ́, ényí mi ɖɔ hwɛ xá mì, abǐ è ɖɔ hwɛ xá mì, ɖo hwɛɖɔxɔsá gbɛtɔ́ lɛ́ɛ tɔn ɔ́, énɛ́ ɔ́ vɛ́ nú mì ɖěbǔ ǎ; un ka ɖo hwɛ ɖɔ xá nyɛ ɖésúnɔ wɛ ǎ. Nǔgbó ɔ́, ayixa ce xo hun xá mì ɖo nǔ ɖěbǔ mɛ ǎ; lo ɔ́, énɛ́ ɔ́ ko ɖe xlɛ́ ɖɔ un nyí xomɛvɔ́nɔ ǎ. Aklúnɔ wɛ nyí mɛ e nɔ ɖɔ hwɛ dó mì é. Énɛ́ ɔ́ wú ɔ́, mi ma ɖɔ hwɛ dó mɛ ɖěbǔ cóbónú hwenu e Mawu ɖó ɔ́ ná su ó; mi nɔ te nú Aklúnɔ ní wá: é ná ɖe nǔ e ɖo hwlǎhwlá ɖo zǐnflú mɛ ɔ́ nyi wěxo, bɔ linlin e ɖo ayixa mɛ nú gbɛtɔ́, bɔ è ma mɔ nukúnnú jɛ wú ǎ lɛ́ɛ ɔ́, é ná ɖe xlɛ́; énɛ́ ɔ́, Mawu ná kpa mɛ ɖokpó ɖokpó lě e é jɛ xá gbɔn é. Nɔví lɛ́ɛ mi, nǔ énɛ́ lɛ́ɛ e un ɖɔ nú mi din ɔ́, Apolosu kpó nyɛ ɖésúnɔ kpó wú wɛ un ɖɔ xó dó, bó dó kplɔ́n nǔ mi, bónú mi ná kpɔ́n nǔ dó mǐ wú, bó ná tunwun nǔ e ɖɔ wɛ lǒ élɔ́ ɖe é: “Mi ma wa nǔ zɛ nǔ e è wlán ɔ́ wú ó.” Mɛ ɖé ma ɖo mi mɛ, bó sɔ́ mɛɖé dó xɔ susu ná, bó gbɛ́ wǎn nú mɛɖé ó. Đó mɛ̌ wɛ bló bɔ a hú gǎn mɛ ɖě lɛ́ɛ? Mawu wɛ ná nǔ e a ɖǒ lɛ́ɛ bǐ we ǎ cé? Ée nǔ ka nyí mɔ̌ ɔ́, nɛ̌ ka gbɔn bɔ a nɔ sɔ́ nǔ e ɖo así we ɔ́ dó yí go ná, nǎ wɛ è nǎ we ǎ ɖɔhun? Mi ɖíe ko ɖó nǔ e ba wɛ mi ɖe lɛ́ɛ bǐ e. Mi ɖíe ko jɛ dɔkun e. Mi ko húzú axɔ́sú, có mǐdɛɛ lɛ́ɛ ka nyí axɔ́sú ǎ. Un jló ganjí ɖɔ mi ní ɖu axɔ́sú nǔgbó, bónú mǐ lɔmɔ̌ ná ɖu axɔ́sú xá mi. Đó mǐ mɛ mɛsɛ́dó lɛ́ɛ ɔ́, ɖo nukún ce mɛ ɔ́, é cí tɛn gǔdo tɔn ɔ́ mɛ wɛ Mawu sɔ́ mǐ ɖó ɖɔhun; mǐ cí mɛ e ɖó ná kú ɖo agbawungba ɔ́ ɖɔhun; mǐ húzú nǔkpínkpɔ́n nú gbɛ ɔ́ bǐ, bó húzú nǔkpínkpɔ́n nú wɛnsagun lɛ́ɛ kpó gbɛtɔ́ lɛ́ɛ kpó. Mǐ nyí xlonɔ ɖó Klísu wútu; midɛɛ lɛ́ɛ ka nyí nǔnywɛ́tɔ́ ɖo bǔ e mi ɖe xá Klísu ɔ́ mɛ; mǐdɛɛ lɛ́ɛ vɔ́, midɛɛ lɛ́ɛ ka ɖó hlɔ̌nhlɔ́n; è dó vɛ̌ nú mǐ, bó ka wlí yɛ̌yi nú midɛɛ lɛ́ɛ. Káká jɛ gan élɔ́ mɛ ɔ́, mǐ mɔ nǔ ná ɖu ǎ, mǐ ka mɔ sin ná nu ǎ; avɔ vún mǐ; è xo mǐ; mǐ flú yi dě ɔ́, mǐ nɔ́ flú yi dě. Mǐ nɔ́ jɛ tagba bó nɔ́ wa azɔ̌, bó ná dó sixú nyí mi ɖésúnɔ; è ɖo mǐ zun wɛ ɔ́, mǐ nɔ́ ɖo fífá byɔ́ nú mɛ wɛ; è ɖo ya dó nú mǐ wɛ ɔ́, mǐ nɔ́ dɛ ɖ'é nu. Mǐ nɔ́ nyɔ́ xomɛ dó mɛ e ɖo xó mǐtɔn nyanya ɖɔ wɛ lɛ́ɛ wú. Káká wá jɛ din ɔ́, è nɔ lɛ́ mɔ mǐ dó mɔ zunkɔ́ gbɛ ɔ́ tɔn ná, bó nɔ́ mɔ mǐ dó mɔ nǔ kwíji gbɛtɔ́ lɛ́ɛ tɔn ná. Ényí un ná dó winnyá mi wú wɛ un wlán nǔ énɛ́ lɛ́ɛ sɛ́ dó mi ǎ; lo ɔ́, nú má dó kplɔ́n nǔ mi vǐ ce vívɛ́ná lɛ́ɛ ɖɔhun wú wɛ. Đó, nú mi na bo ɖó vǐhɛntɔ́ děgba we afɔwó (10.000) ɖo Klísu mɛ ɔ́, mi ɖó tɔ́ gěgé ɖo Klísu mɛ ǎ: nǔgbó ɔ́, nǔ e kunkplá gbɛzán mitɔn ɖo Klísu Jezu mɛ ɔ́, nyɛ wɛ húzú tɔ́ nú mi, gbɔn Wɛn Ɖagbe e un jlá mi ɔ́ jí. Hǔn un ɖo byɔ̌byɔ́ mi wɛ ɖɔ mi ní wa nǔ ɖi nyɛ ɖɔhun. Énɛ́ ɔ́ wú ɔ́, un sɛ́ vǐ vívɛ́ ce Timɔtée dó mi; é ɖo gbejí nú Aklúnɔ. É ná flín lě e un nɔ zán gbɛ ce gbɔn ɖo Klísu mɛ ɔ́ mi; lě e un nɔ zán gbɛ gbɔn ɔ́ wɛ un nɔ kplɔ́n mɛ gbɔn fí bǐ, ɖo agun Klísu tɔn lɛ́ɛ bǐ mɛ. Mɛ ɖé lɛ́ɛ ɖo mi mɛ, bó ɖo go yí wɛ, ɖi un kún ná wá mi gɔ́n ó ɖɔhun. Amɔ̌ ényí é jló Aklúnɔ ɔ́, un ná wá mi gɔ́n ɖo malín málín mɛ din; énɛ́ ɔ́, un ná tunwun nǔ e wú goyítɔ́ énɛ́ lɛ́ɛ kpé é; ényí xó yětɔn lɛ́ɛ kɛ́ɖɛ́ wɛ un ná se kpowun ǎ. Đó axɔ́súɖuɖu Mawu tɔn ɔ́, é nyí xó nyɔ́ ɖɔ nú ɖé ǎ; hlɔ̌nhlɔ́n nú wɛ. Nɛ̌ mi ka jló gbɔn? Un ja gɔ̌n mitɔn hǔn, ma hɛn kpo a? Abǐ ma wá kpó wǎn yíyí kpó, kpódó xomɛfífá kpán a? È nɔ se bɔ mɛ lɛ́ɛ nɔ ɖo ɖiɖɔ wɛ gbɔn fí bǐ ɖɔ mi ɖo aga lɛ wɛ; agalilɛ énɛ́ ɔ́ syɛ́n ɖésú, bɔ mɛ e ma nyí klísusɛntɔ́ ǎ lɛ́ɛ ɖésú tlɛ nɔ wa nǔ gbɔn mɔ̌ ǎ: nǔgbó ɔ́, è ɖɔ mɛɖé ɖo mi mɛ, bó yí tɔ́ tɔn sín asi. Nǔ ɖo mɔ̌, bɔ wú gbɛ́ kúkú mi, bɔ mi nɔ lɛ́ ɖo go yí wɛ a? Mɛ e dó nǔ mɔ̌hunkɔtɔn sin ɔ́, ɖe wɛ mi ɖó ná ɖe e sín tɛ́ntin mitɔn. Énɛ́ ɔ́, mi ɖó ná jó nya énɛ́ ɔ́ nú Satáan, bónú agbaza tɔn ná gblé, bɔ Mawu ná hwlɛ́n lǐndɔ̌n tɔn gán ɖo Aklúnɔ sín azǎn gbe. Go e yí wɛ mi ɖe ɔ́ nyí nǔ ɖagbe ɖé ǎ. Mi tunwun lǒ élɔ́: “Tɔ́n kpɛví ɖé wɛ nɔ fɔ́n linfín e è nya ɔ́ bǐ.” Mi ɖe hwɛhuhu sín tɔ́n xóxó énɛ́ ɔ́ síin, bónú mi ná húzú linfín nyinya yɔ̌yɔ́; ɖó linfín nyinya yɔ̌yɔ́ e mɛ è ma dó tɔ́n ǎ é wɛ mi nyí; ɖó Klísu e nyí Dǐndínwáyixwe mǐtɔn sín lɛ̌ngbɔ́ví ɔ́, è ko sɔ́ ɛ dó sá vɔ̌ ná. Hǔn, mi bo nú mǐ ná ɖu xwe mǐtɔn; mǐ ní ma ka zé wɔ̌xúxú e mɛ è dǒ tɔ́n xóxó e nyí hwɛhuhu sín tɔ́n kpódó agalilɛ sín tɔ́n kpán ɔ́ dó ɖu ná ó; lo ɔ́, mǐ ní zé wɔ̌xúxú e mɛ tɔ́n má ɖe ǎ é dó ɖu ná; wɔ̌xúxú énɛ́ ɔ́, mǐmɛ́ kpódó nǔgbó kpó sín wɔ̌xúxú wɛ é nyí. Un byɔ́ mi ɖo wěma e un sɛ́ dó mi ɔ́ mɛ ɖɔ mi ní ma kpé nǔ ɖěbǔ xá agalɛtɔ́ lɛ́ɛ ó. Ényí agalɛtɔ́ nǔjlómɔnɔ, ajotɔ́ abǐ vodúnsɛntɔ́ gbɛ élɔ́ tɔn lɛ́ɛ bǐ kpaa xó ɖɔ wɛ un ɖe ǎ. Ényí mi gbɛ́ ná hɔn nú mɛ énɛ́ lɛ́ɛ bǐ ɔ́, gbɛ ɔ́ mɛ jɛ́n mi ná tɔ́n sín. Nǔ e ɖɔ nú mi wɛ un ɖe ɔ́ wɛ nyí ɖɔ mi ní ma kpé nǔ ɖěbǔ xá mɛ e ɖɔ émí nyí klísusɛntɔ́, bó ka nɔ ɖo aga lɛ wɛ, abǐ mɛ nú jló wɛ, abǐ vodún sɛn wɛ, abǐ nǔyá ɖɔ nú mɛ wɛ, ahan nu mú wɛ, abǐ ajo ja wɛ é ó. Mi ɖó ná ɖu nǔ xá mɛ mɔ̌hunkɔtɔn lɔ vɔ́vɔ́ ǎ. Ényí mɛɖé ɖo mi mɛ, bónú nɔví ɖé wa nǔ nyi do n'i ɔ́, nɛ̌ ka gbɔn bɔ é ma sixú wá jɛ hwɛ tɔn nú mɛɖeɖóvo Mawu tɔn lɛ́ɛ ǎ, bó nɔ́ glá káká yi ylɔ́ hwɛ ɛ ɖo hwɛɖɔtɔ́ e ma nyí klísusɛntɔ́ ǎ lɛ́ɛ gɔ́n? Mi tunwun ɖɔ mɛɖeɖóvo Mawu tɔn lɛ́ɛ wɛ ná ɖɔ hwɛ xá wɛ̌kɛ́ ɔ́ bǐ ǎ cé? Ée é ka nyí ɖɔ mi wɛ ɖó ná ɖɔ hwɛ xá gbɛ ɔ́, nǔ énɛ́ lɛ́ɛ e ma nyí nǔjɔnǔ ɖé ǎ lɛ́ɛ ɔ́, mi sixú kpé wú bó ɖɔ gbo mi ɖésúnɔ ǎ cé? Mi tunwun ɖɔ mǐdɛɛ wɛ ná ɖɔ hwɛ xá wɛnsagun lɛ́ɛ ǎ cé? Ani ka lɛ́ nyí gbɛ élɔ́ mɛ sín nǔ lɛ́ɛ tɔn? Ényí tagba ɖé wá tɔ́n ɖo tɛ́ntin mitɔn, ɖó nǔ hǔnmɛ énɛ́ lɛ́ɛ wú ɔ́, nɛ̌ gbɔn bɔ mi nɔ yi ylɔ́ hwɛ ɖo mɛ e ma ɖo togun Mawu tɔn ɔ́ mɛ ǎ lɛ́ɛ gɔ́n? Winnyá ní hu mi. Dandan mɛ ɔ́, gbɛtɔ́ nǔnywɛ́tɔ́ e ná sixú dó hwɛ gbɔ nú nɔví nɔví ɔ́ ɖokpó ná ɖo mi mɛ vɔ́vɔ́! Lo ɔ́, hwɛ jɛ́n nɔví ɖě ká ɖó ná ylɔ́ ɖě ɔ́ dandan a? Bɔ é ka ná lɛ́ nyí hwɛɖɔtɔ́ e ma nyí klísusɛntɔ́ ǎ lɛ́ɛ nukɔn a? Nǔgbó ɔ́, hwɛgbe e nɔ ɖo tɛ́ntin mitɔn ɔ́ kɛ́ɖɛ́ ko ɖe xlɛ́ ɖɔ mi jɛ ayǐ bǐ gbídígbídí. Nɛ̌ ka gbɔn bɔ mi ma gbɔ bónú è wa nǔ agɔ dó mi ǎ? Nɛ̌ ka gbɔn bɔ mi ma gbɔ bónú è jɛ ajo dó mi ǎ? É nyɔ́ wa ɔ́, midɛɛ lɛ́ɛ wɛ nɔ ɖo nǔ agɔ wa wɛ, bó nɔ́ ɖo ajo ja wɛ, bɔ nɔví ɖo Klísu mɛ lɛ́ɛ wú wa nǔ énɛ́ lɛ́ɛ dó wɛ mi ka nɔ lɛ́ ɖe! Dandan mɛ ɔ́, mi tunwun ɖɔ mɛ e ɖo nǔ nyanya wa wɛ lɛ́ɛ kún ná mɔ tɛn ɖo axɔ́súɖuɖu Mawu tɔn mɛ ó; mi ma blɛ́ miɖée ó: agalɛtɔ́ lɛ́ɛ, vodúnsɛntɔ́ lɛ́ɛ, mɛsibatɔ́ lɛ́ɛ, nyɔ̌nu e nɔ dó afɔ gbě lɛ́ɛ, súnnu e nɔ ɖó xó xá súnnu yětɔn ɖɔhun lɛ́ɛ, ajotɔ́ lɛ́ɛ, mɛnújlótɔ́ lɛ́ɛ, ahannumúnɔ lɛ́ɛ, mɛnúɖɔtɔ́ abǐ ajotɔ́ axánsúnxó lɛ́ɛ ɔ́, yě ɖě ná mɔ tɛn ɖo axɔ́súɖuɖu Mawu tɔn mɛ ǎ. Nǔ e mɛɖé lɛ́ɛ ɖo mi mɛ, bó ko nyí ɖ'ayǐ ɔ́ nɛ́. Amɔ̌, è ko lɛ mi wé sín hwɛ mɛ; è ko ɖe mi ɖó vo, bɔ mi na nyí Mawu tɔn; è ko sɔ́ mi dó húzú hwɛjijɔnɔ, ɖo Aklúnɔ Jezu Klísu sín nyǐkɔ mɛ, gbɔn Yɛ Mawu mǐtɔn tɔn jí. Mɛ ɖé lɛ́ɛ ɖo mi mɛ, bó nɔ ɖɔ: “Nǔ bǐ sín gbe wɛ è nǎ mì.” Nǔgbó wɛ! É ɖo mɔ̌ có nǔ lɛ́ɛ bǐ ka nyɔ́ nú mi ǎ. Un sixú ɖɔ: “È nǎ nǔ bǐ sín gbe mì”; amɔ̌, un ka ná jó nyɛɖée dó, bó na húzú kannumɔ nǔ ɖěbǔ tɔn ǎ. Mi nɔ lɛ́ ɖɔ: “Nǔɖuɖu nyí adɔgo tɔn, bɔ adɔgo nyí nǔɖuɖu tɔn.” Nǔgbó wɛ! É ka ɖo mɔ̌ có Mawu ná gblé gbɛ dó nú yě mɛ we lɛ́ɛ bǐ. Amɔ̌ agbaza gbɛtɔ́ tɔn ɔ́, éyɛ́ ɖe nú agalilɛ ǎ: Aklúnɔ tɔn wɛ é nyí, bɔ Aklúnɔ nyí étɔn. Mawu fɔ́n Aklúnɔ wá gbɛ: é ná fɔ́n mǐ lɔmɔ̌ wá gbɛ gbɔn hlɔ̌nhlɔ́n tɔn gbla mɛ. Mi tunwun ɖɔ agbaza mitɔn lɛ́ɛ ɔ́, agbaza Klísu tɔn sín wǔjɔnú wɛ yě nyí ǎ cé? Hǔn un ná zé agbaza Klísu tɔn sín wǔjɔnú dó bló agbaza agalɛtɔ́ tɔn sín wǔjɔnú ná wɛ a? Gbeɖé kpɔ́n! Abǐ mi tunwun ɖɔ súnnu e ɖó kɔnɖókpɔ́ xá nyɔ̌nu agalɛtɔ́ ɔ́, é kpó nyɔ̌nu ɔ́ kpó húzú ɖokpó ɔ́ ǎ cé? Đó Mawuxówéma ɔ́ ɖɔ: “Yě mɛ we lɛ́ɛ ná húzú agbaza ɖokpó géé.” Lo ɔ́, mɛ e ɖó kɔnɖókpɔ́ xá Aklúnɔ ɔ́, é kpó Aklúnɔ kpó húzú mɛ ɖokpó ɖo Yɛsinsɛn mɛ. Mi hɔn nú agalilɛ. Hwɛ ɖěvo ɖěbǔ e gbɛtɔ́ ná hu ɔ́, hwɛ énɛ́ ɔ́ ɖo zɔ nú agbaza tɔn; amɔ̌, mɛ e lɛ aga ɔ́ hu hwɛ dó agbaza é ɖésúnɔ tɔn. Mi tunwun ɖɔ agbaza mitɔn ɔ́, Yɛsinsɛn e Mawu ná mi, bɔ é ɖo mi mɛ ɔ́ sín sinsɛnxɔ wɛ é nyí ǎ cé? Mi nyí mi ɖésúnɔ tɔn ǎ: axivɛ́nu wɛ Mawu xɔ mi, lobo sú axɔ́. Hǔn, mi bo zán agbaza mitɔn dó kpa susu nú Mawu. Din ɔ́, nǔ e mi kanbyɔ́ mì ɖo wěma e mi wlán sɛ́ dó mì é mɛ ɔ́, mǐ ná kɛ nu d'é wú: é nyɔ́ bónú súnnu ná ɖó xó xá nyɔ̌nu ǎ. É ka ɖo mɔ̌ có, bónú è ma wá lɛ aga ó wútu ɔ́, nú súnnu ɖokpó ɖokpó ɖó asi é ɖésúnɔ tɔn, bónú nyɔ̌nu ɖokpó ɖokpó ɖó asú é ɖésúnɔ tɔn ɔ́, é nyɔ́ hú. Súnnu ɔ́ ɖó ná wa asúzɔ́ tɔn nú asi tɔn; mɔ̌ ɖokpó ɔ́, nyɔ̌nu ɔ́ ɖó ná wa asizɔ́ tɔn nú asú tɔn. Nyɔ̌nu ɔ́ ɖó acɛ dó agbaza é ɖésúnɔ tɔn jí ǎ; agbaza tɔn ɔ́, asú tɔn tɔn wɛ é nyí; mɔ̌ ɖokpó ɔ́, súnnu ɔ́ ɖó acɛ dó agbaza é ɖésúnɔ tɔn jí ǎ; agbaza tɔn ɔ́, asi tɔn tɔn wɛ é nyí. Mi ma gbɛ́ xɔ nú miɖée ó, afi nú mi ɖó gbe kpɔ́, bó ná nɔ mɔ̌ nú hwenu ɖé, bó ná sixú kpé nukún dó ɖɛxixo wú. Amɔ̌, ényí hwe ɔ́ nu wá yi ɔ́, mi ná lɛ́ bɛ́ asú kpó asi kpó sín gbɛ lě e é jɛ xá gbɔn é; é má nyí mɔ̌ ǎ ɔ́, miɖée jí ɖu ɖe táá gló mi, bɔ Satáan ná tɛ́n mi kpɔ́n. Nǔ énɛ́ e un ɖɔ nú mi ɔ́, sɛ́n wɛ é nyí bɔ un dó nú mi ǎ, amɔ̌ lě e é ɖe gbɔn nú nyɛ ɔ́ wɛ un ɖɔ nú mi. Nǔgbó ɔ́, un jló ɖɔ mɛ bǐ ní nɔ nyɛ ɖɔhun; lo ɔ́, nǔníná mɛtɔn mɛtɔn wɛ Mawu ka ná mɛ; é ná ɖě mɛ ɖě, bó ná ɖěvo mɛ ɖě ɔ́. Nǔ e ɖɔ nú mɛ e ma da asi ǎ lɛ́ɛ, abǐ mɛ e ma da asú ǎ lɛ́ɛ, kpódó asúkúsi lɛ́ɛ kpán wɛ un ɖe ɔ́ ɖíe: é nyɔ́ nú mi ní kpo ɖo mi ɖokpónɔ nɔ wɛ nyɛ ɖɔhun. Amɔ̌, ényí mi ma sixú ɖu ɖo miɖée jí ǎ hǔn, mi da asi, abǐ mi da asú: ényí mi da asi abǐ mi da asú ɔ́, é nyɔ́ hú mi ní nɔ mɔ̌, bónú nyɔ̌nu biba abǐ súnnu biba sín jlǒ na ɖo jiji wɛ ɖo lan mitɔn mɛ myɔ ɖɔhun. Mɛɖě lɛ́ɛ ɔ́, nǔ e ɖɔ nú yě wɛ un ɖe ɔ́ ɖíe (nyɛ ɖésúnɔ wɛ ka ɖo ɖiɖɔ wɛ; é nyí Aklúnɔ wɛ ǎ). Nú súnnu e ɖi nǔ nú Klísu ɔ́ ɖě ɖó asi e ma ɖi nǔ nú Klísu ǎ é, bɔ nyɔ̌nu ɔ́ ka yí gbe bó ná nɔ kpɔ́ xá ɛ ɔ́, súnnu ɔ́ ɖó ná nya ɛ ǎ. Mɔ̌ ɖokpó ɔ́, nú nyɔ̌nu e ɖi nǔ nú Klísu ɔ́ ɖě ɖó asú e ma ɖi nǔ nú Klísu ǎ é, bɔ súnnu ɔ́ ka yí gbe bó ná nɔ kpɔ́ xá ɛ ɔ́, nyɔ̌nu ɔ́ ɖó ná nya ɛ ǎ. Nǔgbó ɔ́, súnnu e ma ɖi nǔ nú Klísu ǎ ɔ́ nyí mɛɖeɖóvo Mawu tɔn, ɖó bǔ e é kpó asi tɔn kpó ɖe ɔ́ wútu. Mɔ̌ ɖokpó ɔ́, nyɔ̌nu ɖo asúxwé e ma ɖi nǔ nú Klísu ǎ ɔ́ nyí mɛɖeɖóvo Mawu tɔn, ɖó bǔ e é kpó asú tɔn kpó ɖe ɔ́ wútu. Ényí nǔ ma nyí mɔ̌ ǎ ɔ́, è nǎ nɔ́ mɔ vǐ yětɔn lɛ́ɛ dó mɔ mɛ blíblí, có mɛ mímɛ́ wɛ yě ká nyí. É ka ɖo mɔ̌ có, nú mɛ e ma ɖi nǔ nú Klísu ǎ ɔ́ jló ná klán xá asú tɔn abǐ asi tɔn e ɖi nǔ nú Klísu ɔ́ hǔn, é ní jó e dó ní yi; é nyí nǔ cí mɔ̌ ɔ́, hǔn asisúnɔ abǐ nyɔ̌nu ɖo asúxwé e ɖi nǔ nú Klísu ɔ́ jɛ éɖée sí; ɖó mǐ ná mɔ fífá wútu wɛ Mawu ylɔ́ mǐ. Hwi nyɔ̌nu e ɖi nǔ nú Klísu ɔ́, a tunwun nú a nǎ hwlɛ́n asú towe gán a? Abǐ hwi súnnu e ɖi nǔ nú Klísu ɔ́, a tunwun nú a nǎ hwlɛ́n asi towe gán a? Nǔ e wɛ kpowun ɔ́, mɛ ɖokpó ɖokpó ɖó ná zán gbɛ tɔn, bɔ é ná sɔgbe xá nǔníná e Aklúnɔ ná ɛ é, bó ná sɔgbe xá lě e é ko ɖe gbɔn cóbɔ Mawu ylɔ́ ɛ é; sɛ́n e un ɖó ayǐ ɖo agun lɛ́ɛ bǐ mɛ ɔ́ nɛ́. Ényí mɛɖé ko gbo ada cóbɔ Mawu ylɔ́ ɛ ɔ́, ní ma sɔ́ ba ná sɔ́ éɖée dó húzú mɛ e ma gbo ada ǎ é ó; ényí mɛɖé ma ka gbo ada cóbɔ Mawu ylɔ́ ɛ ǎ ɔ́, é ɖó ná yi gbo ada ǎ. È gbo ada abǐ è ma gbo ada ǎ ɔ́ wɛ ɖo tají ǎ; nǔ e ɖo tají ɔ́ wɛ nyí è nǐ se tónú nú Mawusɛ́n lɛ́ɛ. Mɛ ɖokpó ɖokpó ɖó ná nɔ lě e é ɖe gbɔn hwenu e Mawu ylɔ́ ɛ é. Nú kannumɔ wɛ a nyǐ hwenu e Mawu ylɔ́ we ɔ́ hǔn, ado ma hu we ó; lo ɔ́, ényí ali ɖé wá hun nú we, bɔ a nǎ jɛ hwiɖée sí hǔn, hwlɛ̌ndó. Đó mɛ e nyí kannumɔ bɔ Aklúnɔ ylɔ́ ɛ ɔ́ nyí mɛ e jɛ éɖée sí, bó ɖo Aklúnɔ sín acɛ mɛ é; mɔ̌ ɖokpó ɔ́, mɛ e ɖo éɖée sí, bɔ Klísu ylɔ́ ɛ ɔ́ nyí Klísu sín kannumɔ. Axivɛ́nu wɛ Mawu xɔ mi, bó sú axɔ́; hǔn mi bo ma húzú gbɛtɔ́ lɛ́ɛ sín kannumɔ ó. Nǔgbó wɛ! Nɔví lɛ́ɛ mi, mɛ ɖokpó ɖokpó ɖó ná nɔ ninɔmɛ e mɛ é ko ɖe hwenu e Mawu ylɔ́ ɛ ɔ́, ɖo Mawu nukɔn. Nǔ e kan mɛ e ma da asi ǎ abǐ asú ǎ lɛ́ɛ ɔ́, Aklúnɔ ɖɔ xó ɖé nú mì d'é wú ǎ; lo ɔ́, nyɛ mɛ e Aklúnɔ bló bɔ un nyí mɛ e wú è hɛn ɔ́, è nǎ ɖeji dó gbɔn xomɛnyínyɔ́ tɔn gbla mɛ ɔ́, ma ɖɔ nǔ e un lin d'é wú ɔ́ nú mi. Đó wǔvɛ́ mimɔ e ɖe din ɔ́ wútu ɔ́, nǔ e un lin d'é wú ɔ́ ɖíe: é nyɔ́ bónú gbɛtɔ́ ná nɔ lě e é ɖe gbɔn é. Asi wɛ a ɖǒ hǔn, ma ba ná klán xá ɛ ó; a ma ɖó asi ǎ hǔn, ma ba ná da ó. É ɖo mɔ̌ có, nú a da asi ɔ́, a hu hwɛ ǎ; nú ɖyɔ̌vǐ ɖé ka da asú ɔ́, é hu hwɛ ǎ. Amɔ̌, mɛ e da asi abǐ mɛ e da asú lɛ́ɛ ɔ́, yě nɔ mɔ wǔvɛ́ ɖo gbɛ e yě nɔ zán ayǐhɔ́ngbe ayǐhɔ́ngbe ɔ́ mɛ; un ka jló ɖɔ mi ní mɔ wǔvɛ́ ǎ. Nɔví lɛ́ɛ mi, nǔ e ɖɔ wɛ un ɖe, bó ɖɔ mɔ̌ ɔ́ ɖíe: hwenu kpɛɖé wɛ kpo; bɛ́ sín din ɔ́, mɛ e da asi lɛ́ɛ ní zán gbɛ yě ma da asi ɖɔhun. Mɛ e ɖo avǐ ya wɛ lɛ́ɛ ní cí yě ma ɖo avǐ ya wɛ ɖɔhun; mɛ e ɖo awǎ jɛ wɛ lɛ́ɛ ní cí yě ma ɖo awǎ jɛ wɛ ɖɔhun; mɛ e ɖo nǔ xɔ wɛ lɛ́ɛ ní cí nǔ e yě xɔ ɔ́ ma ɖo así yětɔn ɖɔhun. Mɛ e ɖo dɔkun gbɛmɛ fí tɔn lɛ́ɛ zán wɛ lɛ́ɛ ní cí yě ma ɖo nǔɖé zán wɛ ɖɔhun. Đó tito gbɛ élɔ́ mɛ tɔn lɛ́ɛ ɖo hǔzúhúzú wɛ. É jló mì ɖɔ nǔlinlin ɖěbǔ ní ma nɔ ayixa mɛ nú mi ó. Mɛ e ma da asi ǎ ɔ́, Aklúnɔ sín nǔ lɛ́ɛ wú wɛ é nɔ kpé nukún dó; é nɔ ba ná nyɔ́ ɖo Aklúnɔ sí. Lo ɔ́, mɛ e da asi ɔ́ nɔ kpé nukún dó gbɛmɛ fí sín nǔ lɛ́ɛ wú; é nɔ ba ná nyɔ́ ɖo asi tɔn sí. Énɛ́ ɔ́, nǔ we wú kpé nukún dó wɛ é ɖe nɛ́. Mɔ̌ ɖokpó ɔ́, nyɔ̌nu e ma da asú ǎ, abǐ ɖyɔ̌vǐ ɔ́, Aklúnɔ sín nǔ lɛ́ɛ wú wɛ é nɔ kpé nukún dó; ɖó é nɔ jló ná nyí Aklúnɔ tɔn ɖo agbaza kpó yɛ kpó mɛ; lo ɔ́, nyɔ̌nu e ka ɖó asú ɔ́, gbɛmɛ fí sín nǔ lɛ́ɛ wú wɛ é nɔ kpé nukún dó; é nɔ ba ná nyɔ́ ɖo asú tɔn sí. Đagbe mitɔn wú wɛ un ɖɔ mɔ̌; mɔ̌ wɛ mi ná bló gbɔn dandan wú wɛ un ɖɔ mɔ̌ ǎ; un jló ɖɔ mi ní zán gbɛ mitɔn lě e é jɛ xá gbɔn é, bó ka ɖó kan dó Aklúnɔ sín azɔ̌ ɔ́ wú bǐ gbídígbídí. Un ná ɖɔ xó dó súnnu e ɖó asixɔ́ntɔn, abǐ nyɔ̌nu e ɖó asúxɔ́ntɔn ɔ́ wú. Nú dɔ̌nkpɛvú ɔ́ mɔ ɖɔ ninɔmɛ e émí nɔ ɖó dó ɖyɔ̌vǐ ɔ́ wú ɔ́ kún sɔgbe ó, bó mɔ ɖɔ jlǒ agbaza tɔn ɖu ɖo émí jí, bó mɔ ɖɔ émí ɖó ná da émíɖée ɔ́, yě ní bó da yěɖée lě e yě jlǒ gbɔn é! É nyí hwɛ ǎ. Lo ɔ́, ényí dɔ̌nkpɛvú énɛ́ kpɔ́n ayi éɖée tɔn mɛ, bó ɖɔ émí kún ná da asi ó, bɔ é lí dǒ ɖo ayi tɔn mɛ, bɔ é ma ka nyí mɛɖé wɛ ɖɔ dandan mɔ̌ jɛ́n é ná bló ǎ, bɔ é mɔ ɖɔ émí hɛn ɔ́, émí ná ɖu ɖo jlǒ agbaza tɔn jí, bó kún ná ɖó alɔ asixɔ́ntɔn émítɔn wú ó ɔ́, nǔ ɖagbe wɛ é wa. Énɛ́ ɔ́, mɛ e da asixɔ́ntɔn tɔn ɔ́, nǔ ɖagbe wɛ é wa; mɛ e ma ka da ɛ ǎ ɔ́, é wa nǔ ɖagbe hú mɛ ɖě ɔ́. Nyɔ̌nu e da asú ɔ́, ko ɖo bǔ xá asú tɔn káká yi jɛ hwenu e asú tɔn ɔ́ na nɔ gbɛ dó é. Lo ɔ́, nú asú tɔn kú ɔ́, é hɛn ɔ́, é ná da mɛ e jló e é; yě ní vɛ ko sixú da yěɖée ɖo bǔ e yě ɖe xá Aklúnɔ ɔ́ mɛ. É ɖo mɔ̌ có, nú é nɔ asú ma da ɔ́, é ná mɔ awǎjijɛ hú; lě e nyɛ mɔ gbɔn ɔ́ nɛ́; un ka tunwun ɖɔ nyi lɔ ɖó Yɛ Mawu tɔn. Din ɔ́, un ná ɖɔ xó dó nǔɖuɖu e è dǒ sá vɔ̌ nú vodún lɛ́ɛ wú. Mǐ tunwun ɖɔ mǐ mɛ bǐ wɛ tunwun nǔ. Lo ɔ́, nǔ e mǐ tunwun ɔ́ zɔ́n bɔ goyíyí gɔ́ gbɛtɔ́ sín ayixa mɛ; wǎn yíyí ka nɔ zɔ́n bɔ mǐ nɔ yi nukɔn. Mɛ e lin ɖɔ émí tunwun nǔɖé ɔ́, é ko tunwun nǔ ɔ́ lě e é ɖó ná tunwun gbɔn é ǎ. Amɔ̌ mɛ e yí wǎn nú Mawu ɔ́, Mawu tunwun i. Hǔn nǔ e kan nǔɖuɖu e è dǒ sá vɔ̌ nú vodún lɛ́ɛ ɖuɖu ɔ́, mǐ tunwun ganjí ɖɔ vodún ɖě kún ɖo gbɛ ɔ́ mɛ ó; mǐ tunwun ganjí ɖɔ Mawu ɖokpó géé wɛ tíin. Nú é tlɛ nyí ɖɔ nǔ gěgé tíin ɖo jǐnukúnsin kpódó ayǐkúngban jí kpán, bɔ mɛ lɛ́ɛ nɔ ylɔ́ ɖɔ mawu ɔ́, hǔn, “mawu” gěgé wɛ tíin, bɔ “aklúnɔ” gěgé tíin nɛ́. Lo ɔ́, Mawu ɖokpó géé wɛ tíin nú mǐdɛɛ lɛ́ɛ: é wɛ nyí Tɔ́ e ɖó nǔ bǐ é; é wɛ mǐ ɖo gbɛ ná; mɔ̌ ɖokpó ɔ́, Aklúnɔ ɖokpó géé wɛ tíin; é wɛ nyí Jezu Klísu e jí nǔ lɛ́ɛ bǐ tíin gbɔn é; é jí wɛ mǐ ɖo gbɛ gbɔn. Amɔ̌, mɛ bǐ mɔ nǔ jɛ nǔgbó énɛ́ wú ǎ. Mɛ ɖé lɛ́ɛ tíin, bɔ ée yě ko sɛn vodún ɖ'ayǐ káká bɔ é byɔ́ walɔ mɛ nú yě ɔ́, káká jɛ din ɔ́, yě lɛ́ kpo ɖo nǔɖuɖu énɛ́ lɛ́ɛ ɖu wɛ, vodún tɔn wɛ nǔɖuɖu ɔ́ nyí ɖɔhun, bɔ ayixa yětɔn e má ɖó gǎn ǎ ɔ́ nɔ́ ɖɔ nú yě ɖɔ yě blí. Có é ma ka nyí nǔɖuɖu wɛ nɔ zɔ́n bɔ mǐ nɔ́ sɛkpɔ́ Mawu nɛ́; ényí mǐ ma ɖu ǎ ɔ́, nǔɖé gú mǐ ǎ; ényí mǐ ka ɖu ɔ́, le ɖé ɖ'é mɛ nú mǐ ǎ. É ɖo mɔ̌ có, mi cɔ́ miɖée, bónú miɖée sí e mi jɛ, bó dó ɖo nǔ wa ná wɛ ɔ́ ní ma dɔn mɛ e ma ɖó gǎn ɖo ayixa mɛ ǎ lɛ́ɛ dó hwɛ mɛ ó. Nǔgbó ɔ́, ényí mɛ e ma ɖó gǎn ɖo ayixa mɛ ǎ ɔ́ mɔ hwi mɛ e ɖɔ émí “tunwun nǔ” ɔ́ ɖo nǔ ɖu wɛ ɖo vodúnxɔ mɛ ɔ́, é ná ná ɛ akɔ́nkpinkpan, bɔ é ná ɖu nǔɖuɖu e è dǒ sá vɔ̌ ná nú vodún é ǎ cé? É nyí mɔ̌ ɔ́, mɛ énɛ́ e ma ɖó gǎn ɖé ɖo ayixa mɛ ǎ ɔ́, nɔví ɖo Klísu mɛ énɛ́ e tamɛ Klísu kú dó ɔ́ ná dɔn, ɖó “nǔtunwuntunwun towe énɛ́” wútu! Ényí mi nɔ hu hwɛ dó nɔví mitɔn lɛ́ɛ gbɔn mɔ̌, bó nɔ dó akpa ayixa yětɔn e má ɖó gǎn lɛ́ɛ wú ɔ́, Klísu ɔ́ ɖésú wɛ mi hu hwɛ dó. Énɛ́ wútu ɔ́, nú nǔɖuɖu wɛ ná zɔ́n bɔ nɔví ce ná jɛ hwɛ mɛ hǔn, un sɔ́ ná ɖu lan gbeɖé ǎ, bónú é ma sín nyɛ wútu nú nɔví ce jɛ hwɛ mɛ ó. Nyɛ ɖésúnɔ sí wɛ un ɖe ǎ cé? Mɛsɛ́dó wɛ un nyí ǎ cé? Un mɔ Aklúnɔ mǐtɔn Jezu ǎ cé? Azɔ̌ e un wa ɖo bǔ e un ɖe xá Aklúnɔ mɛ ɔ́ sín xlɛ́ wɛ mi nyí ǎ cé? Ényí ɖɔ mɛɖěvo tlɛ gbɛ́ ɖɔ un kún nyí mɛsɛ́dó ó ɔ́, midɛɛ lɛ́ɛ ɔ́, mi ɖó ná tunwun dandan ɖɔ mɛsɛ́dó wɛ un nyí. Nǔgbó ɔ́, mi ɖésúnɔ ɔ́, ɖó bǔ e mi ɖe xá Aklúnɔ ɔ́ wútu ɔ́, mi nyí xlɛ́ ɖɔ un nyí mɛsɛ́dó. Mɛ e nɔ ɖo biba ná mɔ do nú mì wɛ lɛ́ɛ ɔ́, xó e un nɔ dó hwlɛ́n nyɛɖée gán ɖo yě sí ɔ́ ɖíe: un ɖó acɛ bó ná yí nǔɖuɖu kpódó ahan kpó, ɖó azɔ̌ e wa wɛ un ɖe ɔ́ wú ǎ cé? Un ɖó acɛ bó ná da nɔví ɖo Klísu mɛ ɖokpó, bó ná kplá hɛn lě e Sefási kpó mɛsɛ́dó ɖě lɛ́ɛ kpó, kpódó Aklúnɔ sín nɔví lɛ́ɛ kpó bló gbɔn ɔ́ a cé? Abǐ nyɛ kpódó Baanabási kpó kɛ́ɖɛ́ jɛ́n ɖó ná wa azɔ̌, cóbó sixú mɔ nǔ e hu dó mǐ lɛ́ɛ a? Abǐ mi se kpɔ́n gbeɖé ɖɔ ahwan-yitɔ́ ɖé nɔ zé é ɖésúnɔ sín akwɛ́ dó wa ahwanzɔ́ ná wɛ a? Abǐ mi se kpɔ́n gbeɖé ɖɔ mɛ e dó vǐwuntín ɔ́ kún nɔ ɖu sínsɛ́n tɔn ó wɛ a? Abǐ kanlinnyitɔ́ ɖé kún nɔ nu kanlin e nyi wɛ é ɖe lɛ́ɛ sín anɔ̌sin ó wɛ a? Mi ma vɛdó ɖɔ gbɛtɔ́ sín linlin kpowun wɛ un dó ɖo xó ɖɔ ná wɛ sín ó, ɖó Mɔyízisɛ́n ɔ́ lɔmɔ̌ ɖɔ nǔ ɖokpó ɔ́. Nǔgbó ɔ́, è wlán dó sɛ́n énɛ́ mɛ ɖɔ: “Mi ma dó aja nu nú nyibú e ɖo nǔkún só ɖó afɔ wú wɛ é ó.” Mawu nɔ jɛ tagba dó nyibú lɛ́ɛ tamɛ wɛ a? Nú è nǎ ɖɔ nǔgbó ɔ́, mǐdɛɛ lɛ́ɛ wú wɛ Mawu ɖɔ xó gbɔn mɔ̌ ǎ cé? Mǐdɛɛ lɛ́ɛ wú wɛ è wlǎn xó énɛ́ dandan. Mɛ e ɖo gle lɛ wɛ ɔ́ kpó mɛ e ɖo jinukún cɔ wɛ ɔ́ kpó ɖó ná wa azɔ̌ yětɔn, ɖo nukúnɖíɖó mɛ ɖɔ émí ná yí jinukún e ná nyí émítɔn ɔ́ ɖ'é mɛ. Jinukún Yɛsinsɛn tɔn wɛ mǐ dó nyi ayi mitɔn mɛ: ényí jinukún ɔ́ ɖě wɛ mǐ ya ɖ'é mɛ ɖo dɔkun mitɔn lɛ́ɛ mɛ ɔ́, nǔ wɛ mǐ wa zɛ jlɛ̌ wú a? Ényí mɛɖěvo lɛ́ɛ ɖó acɛ énɛ́ ɖo mi jí ɔ́, mǐdɛɛ lɛ́ɛ ɖó acɛ énɛ́ ɖo mi jí hú yědɛɛ lɛ́ɛ ǎ cé? É ɖo mɔ̌ có, mǐ zé acɛ énɛ́ ɔ́ dó wa azɔ̌ ná ǎ; é nyɔ́ wa ɔ́, mǐ dɛ ɖo nǔ bǐ nu, bó ma glɔ́n ali nú Wɛn Ɖagbe e ɖɔ xó dó Klísu wú ɔ́ sín nukɔn yiyi ó. Dandan mɛ ɔ́, mi tunwun ɖɔ mɛ e nɔ wa azɔ̌ ɖo sinsɛnxɔ mɛ lɛ́ɛ ɔ́, sinsɛnxɔ mɛ sín nǔɖuɖu wɛ yě nɔ́ ɖu; bɔ mɛ e nɔ xwlé vɔ̌sánú Mawu ɖo vɔ̌sákpe jí lɛ́ɛ nɔ mɔ yětɔn yí ɖo vɔ̌sánú énɛ́ lɛ́ɛ mɛ. Mɔ̌ ɖokpó ɔ́, Aklúnɔ ná gbe ɖɔ mɛ e ɖo Wɛn Ɖagbe ɔ́ jlá wɛ lɛ́ɛ ɔ́, azɔ̌ énɛ́ ní ná nǔɖuɖu yě. Lo ɔ́, un zé acɛ énɛ́ lɛ́ɛ ɖokpó dó wa azɔ̌ ná ǎ; é ka nyí ɖɔ biba wɛ un ɖe wú wɛ un ɖo xó élɔ́ wlán wɛ ǎ. Ényí un kú ɔ́, é nyɔ́ nú mì hú è nǎ yí nǔ énɛ́ e zɔ́n bɔ un nɔ jlá ajɔ̌ nú nyɛɖée ɔ́ sín así ce. Un ná jlá ajɔ̌ nú nyɛɖée ɖó Wɛn Ɖagbe e jlá wɛ un ɖe ɔ́ wú ǎ; nǔgbó ɔ́, azɔ̌ ɖé wɛ é nyí bɔ è zɔ̌n mì ɖɔ ma wa dandan; ényí un ma jlá Wɛn Ɖagbe ɔ́ ǎ hǔn, heelú mì. Ényí nyɛ ɖésú wɛ zé azɔ̌ énɛ́ ɔ́, bó ɖo wiwa wɛ ɔ́, un sixú ɖó nukún ɖɔ un ná mɔ le tɔn. Lo ɔ́, ɖěe é nyí ɖɔ azɔ̌ wɛ é nyí, bɔ è ɖɔ un ɖó ná wa ɔ́, azɔ̌ e è zɔ́n mì ɔ́ wa wɛ un ɖe kpowun. Le tɛ́ wɛ ka ɖ'é mɛ nú mì lo? Nú un jlá Wɛn Ɖagbe ɔ́ mɛ lɛ́ɛ vɔ̌nu, bó ma ka zán Wɛn Ɖagbejlátɔ́ sín acɛ e un ɖó lɛ́ɛ ǎ ɔ́, vǐví e un nɔ mɔ ɖ'é mɛ ɔ́ wɛ nyí le ce. Nyɛɖée sí wɛ un ɖe; un nyí mɛ ɖěbǔ sín kannumɔ ǎ; é ka ɖo mɔ̌ có, un sɔ́ nyɛɖée dó ɖó kannumɔ nú mɛ bǐ, bó ná dó dɔn mɛ gěgé wá Aklúnɔ li jí lě e un kpé wú gbɔn é. Hwenu e un ɖo azɔ̌ wa wɛ ɖo Jwifu lɛ́ɛ tɛ́ntin ɔ́, un nɔ zán gbɛ Jwifu ɖɔhun, bó ná dó sixú dɔn yě; un ɖo Mɔyízisɛ́n ɔ́ glɔ́ ǎ, có hwenu e un ɖo azɔ̌ wa wɛ ɖo mɛ e ɖo sɛ́n tɔn glɔ́ lɛ́ɛ tɛ́ntin ɔ́, un nɔ zán gbɛ sɛ́n tɔn glɔ́ wɛ un ɖe ɖɔhun, bó ná dó sixú dɔn yě. Mɔ̌ ɖokpó ɔ́, hwenu e un ɖo mɛ e ma tunwun Mɔyízisɛ́n ɔ́ ǎ lɛ́ɛ tɛ́ntin ɔ́, un nɔ zé Mɔyízisɛ́n ɔ́ dó wa azɔ̌ ná ǎ; un nɔ zán gbɛ yě ɖɔhun, bó ná dó sixú dɔn yě; énɛ́ ɔ́ wɛ nyí ɖɔ un nɔ vɛ́ tóli nú Mawusɛ́n ɔ́ ǎ; ɖó klisusɛ́n ɔ́ glɔ́ wɛ un ɖe. Đo mɛ e ma ɖó gǎn ɖo nǔɖiɖi mɛ ǎ lɛ́ɛ tɛ́ntin ɔ́, un nɔ zán gbɛ mɛ e ma ɖó gǎn ɖo nǔɖiɖi mɛ ǎ ɖɔhun, bó na dó sixú dɔn yě. Énɛ́ ɔ́, un sɔ́ nyɛɖée dó bló nǔ bǐ nú mɛ bǐ, bó ná dó sixú hwlɛ́n mɛɖé lɛ́ɛ gán gbɔn alɔkpa lɛ́ɛ bǐ mɛ. Wɛn Ɖagbe ɔ́ wú wɛ un ɖo nǔ énɛ́ lɛ́ɛ bǐ wa wɛ, bó ná sixú ɖó mǐmá ɖo ɖagbe e ɖo Wɛn Ɖagbe ɔ́ mɛ é mɛ. Dandan mɛ ɔ́, mi tunwun ɖɔ mɛ e ɖo agbahwlɛ́nhwlɛ́n wezun kán wɛ lɛ́ɛ ɔ́, yě bǐ wɛ ɖo wezun jí; lo ɔ́, mɛ ɖokpó géé jɛ́n nɔ ɖu ɖ'é jí. Hǔn mi bo kán wezun lě e mi ná kán gbɔn bó ná ɖu ɖ'é jí é. Agbazamɛgándótɔ́ lɛ́ɛ bǐ ɔ́, nú yě ɖo agbazamɛgándídó ɔ́ kplɔ́n wɛ ɔ́, yě nɔ dó sɛ́n syɛ́nsyɛ́n ɖé lɛ́ɛ nú yěɖée; yě nɔ bló mɔ̌ bó ná dó mɔ ɖuɖéjígbákún e ma nɔ dɔ́ ji ǎ ɔ́ ɖokpó yí; amɔ̌ mǐdɛɛ lɛ́ɛ ɔ́, mǐ nɔ́ bló mɔ̌, bó ná mɔ ɖuɖéjígbákún e ná nɔ ayǐ káká sɔ́yi ɔ́ ɖokpó yí. Énɛ́ ɔ́ wú wɛ hwenu e un ɖo wezun kán wɛ ɔ́, nukún ce ɖo fí e un xwe ɔ́ wú; énɛ́ ɔ́ wútu wɛ un cí akpotokwínnyitɔ́ e ma ɖo akpotokwín nyi dó jɔhɔn mɛ wɛ ǎ é ɖɔhun. Un nɔ dó ya nú agbaza ce ɖésú, lobo nɔ hɛn ɛ syɛ́nsyɛ́n, bónú hwenu e un ná ɖɔ Mawuxó ɔ́ nú mɛɖěvo lɛ́ɛ gúdo ɔ́, Mawu ma wá gbɛ́ mì ó. Nɔví ce lɛ́ɛ mi, nǔ e jɛ dó tɔ́gbó mǐtɔn e xwedó Mɔyízi lɛ́ɛ jí ɔ́, un jló ɖɔ mi ní flín. Yě bǐ wɛ nɔ akpɔ́kpɔ́ ɔ́ glɔ́; yě bǐ wɛ gbɔn Xu Vɔvɔ ɔ́ tɛ́ntin dín. Yě bǐ wɛ è lɛ yɛhwesin ná, ɖo akpɔ́kpɔ́ kpó xu kpó mɛ, bɔ yɛhwesin lilɛ énɛ́ ɔ́ dɔn yě ɖó bǔ xá Mɔyízi. Yě bǐ wɛ ɖu nǔɖuɖu Yɛsinsɛn tɔn ɖokpó ɔ́, bó nu Yɛsinsɛn sín sin ɖokpó ɔ́: yě nu sin ɖo só Yɛsinsɛn tɔn e ɖo yě kplá wɛ ɔ́ nu; só énɛ́ ɔ́, Klísu wɛ. É ka ɖo mɔ̌ có, mɛ wɔ̌buwɔ́bú ɖo yě mɛ, bɔ nǔwiwa yětɔn nyɔ́ Mawu nukún mɛ ǎ; énɛ́ ɔ́ wú wɛ yě kú ɖo gbětótló mɛ. Kpɔ́ndéwú wɛ nǔ énɛ́ lɛ́ɛ e jɛ lɛ́ɛ nyí nú mǐ, bónú mǐ ní ma wá ɖó jlǒ nyanya yě ɖɔhun ó. Mi ka ɖó ná jɛ vodún sɛn jí lě e mɛɖé lɛ́ɛ bló gbɔn ɖo yě mɛ ɔ́ ɖɔhun ǎ. Lě e Mawuxówéma ɔ́ ɖɔ gbɔn ɔ́: “Mɛ lɛ́ɛ jínjɔ́n ayǐ, bó ɖu nǔ, bó nu ahan; énɛ́ ɔ́ gúdo ɔ́, yě sí te, bó da ayihún.” Mǐ ɖó ná jó miɖée nú agalilɛ lě e mɛɖé lɛ́ɛ bló gbɔn ɖo yě mɛ, bɔ gbɛtɔ́ adɔ̌kpo ɖokpó afɔwó afatɔ́n (23.000) kú ɖo kéze gbe ɖokpó mɛ é ǎ. Mǐ ɖó ná tɛ́n Aklúnɔ kpɔ́n, lě e mɛɖé lɛ́ɛ bló gbɔn ɖo yě mɛ, bɔ dan ɖu yě bɔ yě kú é ǎ. Mi ɖó ná hlún nǔ ɖɔ lě e mɛɖé lɛ́ɛ bló gbɔn ɖo yě mɛ, bɔ wɛnsagun e nɔ hu mɛ ɔ́ wá hu yě ɔ́ ǎ. Nǔ nyanya énɛ́ lɛ́ɛ jɛ dó yě jǐ, bó ná dó nyí kpɔ́ndéwú nú mɛɖěvo lɛ́ɛ; è wlǎn nǔ énɛ́ lɛ́ɛ e jɛ lɛ́ɛ, bó ná dó kplɔ́n nǔ mǐ ná; ɖó hwenu e mǐ ɖe din ɔ́, hwenu lɛ́ɛ sín vivɔ ko sɛ yá. Énɛ́ ɔ́ wú ɔ́, mɛ e lin ɖɔ émí ɖo te ɔ́ ɖó ná cɔ́ éɖée, bó ma wá jɛ ayǐ ó. Mi mɔ tɛ́nkpɔ́n ɖěbǔ zɛ ée gbɛtɔ́ nɔ mɔ é wú ǎ. Mawu nɔ́ gɔn akpá e é dó lɛ́ɛ ɖe ǎ; é ná lɔn bɔ tɛ́nkpɔ́n ɖé ná wá nú mi bó hú gǎn hlɔ̌nhlɔ́n e mi ɖó é ǎ; amɔ̌ hwenu e tɛ́nkpɔ́n ná wá nú mi ɔ́, é ná ná hlɔ̌nhlɔ́n mi bɔ mi ná dɛ ɖ'é nu; énɛ́ ɔ́, é ná ɖe ali nú mi bɔ mi ná tɔ́n sín mɛ. Énɛ́ ɔ́ wú ɔ́, mɛvívɛ́ná ce lɛ́ɛ mi, mi ma sɛn vodún ó. Un ɖɔ xó nú mi, lě e è nǎ ɖɔ xó nú nukúnnú-mɔjɛnǔmɛtɔ́ gbɔn é ɖɔhun; mi ɖésú ní bo kíjé xó e un ɖɔ ɔ́ mɛ kpɔ́n. Mi flín kɔ́fu e tamɛ mǐ nɔ́ dó kú nú Mawu dó ɖo Aklúnɔ sín nǔɖuɖu ɔ́ hwenu é: hwenu e mǐ ɖo ahan e ɖ'é mɛ ɔ́ nu wɛ ɔ́, é nɔ kɔn mǐ ɖó kpɔ́ xá Klísu sín hun ǎ cé? Wɔ̌xúxú e mǐ nɔ́ kán ɔ́ ka lo? Hwenu e mǐ nɔ́ ɖo ɖuɖu wɛ ɔ́, é nɔ́ kɔn mǐ ɖó kpɔ́ xá Klísu sín agbaza a cé? Wɔ̌xúxú ɖokpó géé wɛ ɖe; nú mǐ tlɛ sukpɔ́ gbɔn ɖěbǔ ɔ́, agbaza ɖokpó géé wɛ mǐ nyí, ɖó wɔ̌xúxú ɖokpó ɔ́ wɛ mǐ bǐ má ɖu. Mi kpɔ́n nǔ dó togun Izlayɛ́li tɔn wú: mɛ e nɔ ɖu nǔ e è sɔ́ dó sá vɔ̌ ná lɛ́ɛ ɔ́ ɖó kɔnɖókpɔ́ xá Mawu e è sɔ́ vɔ̌sákpe ɔ́ kɛ é. Étɛ́ ɖɔ wɛ un ka ɖe? Điɖɔ wɛ un ɖe ɖɔ nǔɖuɖu e è nǎ vodún ɔ́ nyí nǔɖé a? Điɖɔ wɛ un ɖe ɖɔ vodún ɔ́ ɖésú nyí nǔɖé a? Gbeɖé kpɔ́n! Lo ɔ́, nǔ e ɖɔ wɛ un ɖe ɔ́ wɛ nyí ɖɔ mɛ e ma nyí klísusɛntɔ́ ǎ lɛ́ɛ ɔ́, vɔ̌ e yě nɔ́ sá ɔ́, yɛ nyanya lɛ́ɛ wɛ yě nɔ́ sá ná; é nyí Mawu wɛ yě nɔ sá ná ǎ. Un ka jló ɖɔ mi ní ɖó kɔnɖókpɔ́ xá yɛ nyanya lɛ́ɛ ǎ. Mi sixú nu ahan ɖo kɔ́fu Aklúnɔ tɔn mɛ, bó lɛ́ nu ahan ɖo kɔ́fu yɛ nyanya lɛ́ɛ tɔn mɛ ǎ; mi sixú ɖu Aklúnɔ sín nǔɖuɖu, bó lɛ́ ɖu yɛ nyanya lɛ́ɛ sín nǔɖuɖu ǎ. Abǐ mǐ jlǒ ná bló bɔ Aklúnɔ ná jɛ wǔ hwan jí wɛ a? Mi vɛdó ɖɔ mǐ dó hlɔ̌nhlɔ́n hú i wɛ sín a? Mɛ ɖé lɛ́ɛ nɔ ɖɔ: “È nǎ nǔ bǐ sín gbe.” Nǔgbó wɛ! É ka ɖo mɔ̌ có, nǔ lɛ́ɛ bǐ wɛ ka nyɔ́ ǎ. “È nǎ nǔ lɛ́ɛ bǐ sín gbe”; é ɖo mɔ̌ có, nǔ lɛ́ɛ bǐ wɛ nɔ wa ɖagbe ǎ. Mɛɖěbǔ ní ma nɔ ba ɖagbe é ɖésúnɔ tɔn ó; lo ɔ́, ní nɔ ba ɖagbe mɛɖěvo lɛ́ɛ tɔn. Mi hɛn ɔ́, mi ná ɖu nǔ e sa wɛ è ɖe ɖo axi mɛ é bǐ; ayixa mitɔn ma xo hun xá mi bónú mi kan nǔɖé byɔ́ ó. Đó lě e Mawuxówéma ɔ́ ɖɔ gbɔn ɔ́: “Aklúnɔ tɔn wɛ nyí ayǐkúngban kpódó nǔ e ɖ'é mɛ lɛ́ɛ bǐ kpó.” Ényí mɛ e ma ɖi nǔ ǎ ɔ́ ɖě ylɔ́ mi dó nǔɖuɖu kɔn, bónú mi yí gbe bo yi hǔn, mi ɖu nǔ e é ná xwlé mi é bǐ; ayixa mitɔn ma xo hun xá mi bónú mi kan nǔɖé byɔ́ ó. Amɔ̌ ényí mɛɖé ɖɔ nú mi ɖɔ: “Lan élɔ́ ɔ́, kanlin e è sɔ́ dó sá vɔ̌ ná nú vodún ɔ́ sín lan wɛ hǔn”, mi ma ɖu ó; ɖó mɛ e ɖɔ xó d'é wú nú mi ɔ́ wútu, nú ayixa ma xo hun xá mɛ ó. Ayixa midɛɛ lɛ́ɛ tɔn xó ɖɔ wɛ un ɖe ɖo fí ǎ; lo ɔ́, mɛ ɖě ɔ́ tɔn xó ɖɔ wɛ un ɖe. È nǎ kanbyɔ́ ɖɔ: “Aniwú ka wɛ? Nǔɖé jlǒ mì bónú un ja wiwa gbé ɔ́, mɛɖěvo sín ayixa wɛ ná ɖɔ fí e un ná wa yi jɛ ɔ́ nú mì a? Nú un dó kú nú Mawu ɖó nǔ e ɖu wɛ un ɖe ɔ́ wú ɔ́, nɛ̌ ka gbɔn bɔ è nǎ ɖɔ xó dó wǔ ce, ɖó nǔɖuɖu énɛ́ e tamɛ un dó kú nú Mawu dó é?” Nǔ ɖu wɛ mi ɖe oo, ahan nu wɛ mi ɖe oo, abǐ nǔ ɖěbǔ wa wɛ mi ɖe hǔn, mi bló bǐ, bó dó sɔ́ Mawu su. Mi ma wa nǔ e ná nyí afɔklɛ́nnú nú Jwifu lɛ́ɛ, abǐ mɛ e ma nyí Jwifu ǎ lɛ́ɛ, abǐ agun Mawu tɔn ɔ́ ɖěbǔ ó. Mi nɔ wa nǔ nyɛ ɖɔhun; un nɔ dó gǎn bó ná nyɔ́ ɖo mɛ bǐ sí, ɖo nǔ bǐ mɛ; un nɔ ba nyɛ ɖésúnɔ sín ɖagbe ǎ; lo ɔ́, ɖagbe mɛ bǐ tɔn wɛ un nɔ ba, bónú Mawu ná hwlɛ́n yě gán. Mi wa nǔ nyɛ ɖɔhun, lě e nyi lɔ nɔ wa nǔ Klísu ɖɔhun gbɔn é. Un nɔ kpa mi, ɖó mi nɔ flín mì ɖo nǔ bǐ mɛ; mi nɔ xwedó nǔ e un kplɔ́n mi lɛ́ɛ. É ka ɖo mɔ̌ có, un jló ɖɔ mi ní mɔ nukúnnú jɛ nǔ élɔ́ wú: Klísu nyí gǎn nú súnnu bǐ; asisúnɔ nyí gǎn nú asi tɔn, bɔ Mawu ka nyí gǎn nú Klísu. Hǔn, ényí súnnu ɖé sɔ́ nǔɖé cyɔ́n ta hwenu e é ɖo ɖɛ xo wɛ, abǐ hwenu e Mawu sɔ́ xó ɖé dó nu n'i, bɔ é ɖo ɖiɖɔ wɛ ɔ́, Klísu ɖe kpo wɛ é ɖe. Amɔ̌, ényí nyɔ̌nu ɖé ɖe nǔ e é cyɔ́n ta ɔ́ síin, hwenu e é ɖo ɖɛ xo wɛ, abǐ hwenu e Mawu sɔ́ xó ɖé dó nu n'i, bɔ é ɖo ɖiɖɔ wɛ ɔ́, asú tɔn ɖe kpo wɛ é ɖe; é cí nyɔ̌nu e xwlɛ́ ta ɔ́ ɖɔhun. Nú nyɔ̌nu ɖé ma ka sɔ́ nǔɖé cyɔ́n ta ǎ ɔ́, é sixú kpa ɖa. Lo ɔ́, ɖěe é ka nyí ɖɔ ɖa kpikpa, abǐ ta xwlɛ́xwlɛ́ ɔ́, winnyánú wɛ é nyí nú nyɔ̌nu ɔ́, hǔn é ɖó ná sɔ́ nǔɖé cyɔ́n ta. É byɔ́ ɖɔ súnnu ní sɔ́ nǔɖé cyɔ́n ta ǎ; ɖó akpajlɛ́ Mawu tɔn kpó susu Mawu tɔn kpó wɛ é nyí; lo ɔ́, nyɔ̌nu ɔ́ susu súnnu tɔn wɛ é nyí. Nǔgbó ɔ́, é nyí nyɔ̌nu wú wɛ Mawu ɖe súnnu sín ǎ; lo ɔ́, súnnu wú wɛ é ɖe nyɔ̌nu sín. Mawu bló súnnu nú nyɔ̌nu ǎ; amɔ̌ nyɔ̌nu wɛ é bló nú súnnu. Énɛ́ ɔ́ wú wɛ nyɔ̌nu e ɖo asúxwé ɔ́, wuntun e ɖe xlɛ́ ɖɔ é ɖo asú tɔn sín acɛ mɛ ɔ́ ɖó ná ɖo ta tɔn ɖó wɛnsagun lɛ́ɛ wú. É ka ɖo mɔ̌ có, ɖo bǔ e mǐ ɖe xá Aklúnɔ ɔ́ mɛ ɔ́, nyɔ̌nu sixú tíin súnnu mɛ vo ǎ; súnnu ka sixú tíin nyɔ̌nu mɛ vo ǎ. Đó ée è ɖe nyɔ̌nu sín súnnu wú ɔ́, mɔ̌ ɖokpó ɔ́, nyɔ̌nu ji súnnu. Mawu wɛ ka bló nǔ bǐ. Mi ɖésúnɔ ɔ́, mi vɛ gbéjé kpɔ́n: é nyɔ́ bónú nyɔ̌nu ná nɔ ta vɔ́ hwenu e é ɖo xó ɖɔ xá Mawu wɛ ɔ́ a? Gbɛ ɔ́ ɖésú ko kplɔ́n mi ɖɔ nú ɖa e ɖo súnnu ta ɔ́ ɖi ga ɔ́, winnyánú wɛ é nyí n'i. Lo ɔ́, nú ɖa e ɖo ta nú nyɔ̌nu ɔ́ ka ɖi ga ɔ́, yɛ̌yinú wɛ é nyí n'i. Nǔgbó ɔ́, Mawu ná ɖa gaga nyɔ̌nu, bɔ ɖa ɔ́ ná cyɔ́n ta tɔn. Amɔ̌, nú mɛɖé ka jló ná lɛ́ dɔn nǔ dó xó énɛ́ ɔ́ wú ɔ́, nǔ ɖokpó e é ná tunwun ɔ́ wɛ nyí ɖɔ: mǐdɛɛ lɛ́ɛ ɖó walɔ ɖěvo ǎ; agun Mawu tɔn lɛ́ɛ lɔ ka ɖó walɔ ɖěvo ǎ. Un sixú kpa mi ɖo xó e wú ná kɛ nu dó nú mi wɛ un ja din lɛ́ɛ mɛ ǎ, ɖó kplé e mi nɔ kplé lɛ́ɛ nɔ wa nyanya nú mi hú ɖagbe. Jɛ nukɔn ɔ́, un se ɖɔ, nú agun ɔ́ kplé ɔ́, gbɛ̌ta ɖé lɛ́ɛ ɖo mi mɛ, bɔ gbe yětɔn ɖo kpɔ́ ǎ. Un ka ɖi nǔ na kpɛɖé. Kínklán ɖó ná nɔ tɛ́ntin mitɔn, bónú è nǎ dǒ tunwun mɛ e Mawu yí gbe nú nǔwiwa yětɔn lɛ́ɛ é. Ényí mi kplé ɔ́, é nyí Aklúnɔ sín nǔɖuɖu ɔ́ wɛ mi nɔ ɖu ǎ. Nǔgbó ɔ́, káká nú mi ná jɛ nǔɖuɖu kɔn lě ɔ́, mɛ ɖokpó ɖokpó nɔ hwlɛ́ndó nǔɖuɖu é ɖésúnɔ tɔn, bó nɔ ɖu, bɔ hwenu e xovɛ́ ɖo mɛ ɖě sin wɛ ɔ́, mɛ ɖě nɔ ɖo ahan nu mú wɛ. Étɛ́! Mi ɖó xwé, bó ná ɖu nǔ, bó ná nu ahan ɖ'é gbe ǎ cé? Abǐ mi gbɛ́ wǎn nú agun Mawu tɔn ɔ́ wɛ a? Mi jló ná dó winnyá mɛ e ma ɖó nǔɖé ǎ lɛ́ɛ wɛ a? Étɛ́ nɔ te kpɔ́n wɛ mi ɖe ɖɔ ma ɖɔ nú mi? Má kpa mi wɛ a? Éeǒ! Un sixú kpa mi nǔgbó ǎ! Đó nǔ e Aklúnɔ kplɔ́n mì bɔ un kplɔ́n mi ɔ́ ɖíe: Aklúnɔ Jezu ɔ́, zǎn e mɛ è sɔ́ ɛ jó ɔ́, é zé wɔ̌xúxú, bó dó kú nú Mawu, bó kán, bó ɖɔ: “Élɔ́ ɔ́, agbaza ce e nyí mitɔn ɔ́ wɛ; mi ná nɔ bló gbɔn lě dó flín mì ná.” Mɔ̌ ɖokpó ɔ́, ée yě ɖu nǔ fó ɔ́, é zé kɔ́fu e mɛ vɛ̌ɛn ɖe ɔ́, bó ɖɔ: “Élɔ́ ɔ́, akɔjijɛ yɔ̌yɔ́ Mawu tɔn e sín afɔ hun ce sɔ́ ɖó te ɔ́ wɛ. Ényí mi ɖo nunu wɛ hweɖěbǔnu hǔn, mi nɔ nu dó flín mì ná.” Nǔgbó ɔ́, káká jɛ hwenu e Aklúnɔ ná wá dó ɔ́, nú mi ɖo wɔ̌xúxú élɔ́ ɖu wɛ, bó ɖo nunu wɛ ɖo kɔ́fu élɔ́ mɛ hweɖěbǔnu ɔ́, kú e Aklúnɔ kú ɔ́ jlá wɛ mi ɖe. Énɛ́ wútu ɔ́, nú mɛɖé ɖu Aklúnɔ sín wɔ̌xúxú, abǐ é nu ɖo kɔ́fu tɔn mɛ dó acɛ jí ɔ́, nǔ wɛ é wa nyi do dó Aklúnɔ sín agbaza kpó hun tɔn kpó wú. Hǔn mɛ ɖokpó ɖokpó ní bó kíjé éɖée mɛ kpɔ́n, cóbó ɖu wɔ̌xúxú élɔ́, abǐ cóbó nu ɖo kɔ́fu élɔ́ mɛ. Đó, wɔ̌xúxú ɔ́ kpódó vɛ̌ɛn ɔ́ kpó ɔ́, nú mɛɖé ma tunwun nǔ e ɖo yě kpó agbaza Aklúnɔ tɔn kpó tɛ́ntin ɔ́ ǎ, bó ɖu wɔ̌xúxú ɔ́, lobo nu ɖo kɔ́fu ɔ́ mɛ ɔ́, mɛ énɛ́ ɔ́ ɖo hwɛɖɔxámɛ Mawu tɔn dɔn dó éɖée jí wɛ, hwenu e é ɖo ɖuɖu wɛ, bó ɖo nunu wɛ é. Énɛ́ ɔ́ wú wɛ mɛ gěgé ɖo mi mɛ, bó ɖo azɔn jɛ wɛ; mɛ gěgé gblé wɔ̌n; mɛ ɖě ká ko kú. Ényí mǐ nɔ kíjé mǐ ɖésúnɔ sín ayixa mɛ kpɔ́n ɔ́, mǐ ná jɛ hwɛɖɔxámɛ Mawu tɔn mɛ ǎ. Amɔ̌, ényí Aklúnɔ ɖo hwɛ ɖɔ xá mǐ wɛ ɔ́, tó dɔn nú mǐ wɛ é ɖe, bónú Mawu ma wá ɖó kúhwɛ nú mǐ kpódó yě mɛ e nyí gbɛ ɔ́ tɔn lɛ́ɛ kpó ó. Énɛ́ ɔ́, nɔví lɛ́ɛ mi, nú mi kplé, bó ja nǔɖuɖu Aklúnɔ tɔn ɖu gbé hǔn, mi bo nɔ nɔ te kpɔ́n miɖée. Ényí xovɛ́ sin mɛɖé hǔn, ní nɔ ɖu nǔ ɖo xwé tɔn gbe, bó ma dɔn hwɛɖɔxámɛ Mawu tɔn dó mi jí ɖo kplé mitɔn lɛ́ɛ mɛ ó. Nǔ e kpo lɛ́ɛ ɔ́, nú un ko wá mi gɔ́n ɔ́, un ná ɖɔ gbo. Din ɔ́ nɔví lɛ́ɛ mi, nǔ e kunkplá nǔníná Yɛsinsɛn tɔn lɛ́ɛ ɔ́, un jló ɖɔ mi ní tunwun yě ganjí. Mi tunwun ɖɔ hwenu e mi ma ko nyí klísusɛntɔ́ ǎ ɔ́, vodún e nyí nǔ bo ma sixú ɖɔ xó ǎ lɛ́ɛ kɔn wɛ nǔ ɔ́ nɔ dɔn mi yi, bɔ mi nɔ sixú gló ǎ. Énɛ́ ɔ́ wú wɛ un jló ɖɔ mi ní tunwun ganjí ɖɔ mɛ e Yɛsinsɛn sɔ́ xó dó ayi mɛ na bɔ é ɖo ɖiɖɔ wɛ ɔ́ sixú ɖɔ: “Jezu heelú we” ǎ; nú Yɛsinsɛn ma ka sɔ́ xó dó ayi mɛ nú mɛɖé ǎ ɔ́, mɛ ɔ́ sixú ɖɔ: “Jezu wɛ nyí Aklúnɔ” ǎ. Nǔníná Yɛsinsɛn tɔn lɛ́ɛ ɔ́, alɔkpa alɔkpa wɛ tíin; lo ɔ́, Yɛsinsɛn ɖokpó ɔ́ jɛ́n nɔ na mɛ. Mawuzɔ̌ wiwa tɛnmɛ tɛnmɛ wɛ tíin; lo ɔ́, Aklúnɔ ɖokpó ɔ́ wa ná wɛ è ka ɖe. Nǔwiwa Mawu tɔn tɛnmɛ tɛnmɛ wɛ tíin, lo ɔ́, Mawu ɖokpó ɔ́ jɛ́n ɖo nǔ énɛ́ lɛ́ɛ bǐ wa wɛ gbɔn mɛ bǐ mɛ. Yɛsinsɛn nɔ zé nǔníná ɖé dó ɖe éɖée xlɛ́ ɖo mɛ ɖokpó ɖokpó sín gbɛzán mɛ, nú ɖagbe mɛ bǐ tɔn. Yɛsinsɛn nɔ ná mɛ ɖě, bɔ é nɔ ɖɔ xó kpó nǔnywɛ́ kpó; é ɖokpó ɔ́ nɔ lɛ́ ná mɛ ɖě, bɔ é nɔ ɖɔ mɛ e tunwun nǔ ɔ́ sín xó. Yɛsinsɛn ɖokpó géé énɛ́ nɔ ná nǔɖiɖi mɛ ɖě, bó nɔ ná acɛ e nɔ gbɔ azɔn nú mɛ ɔ́ mɛ ɖě. Yɛsinsɛn nɔ ná acɛ mɛ ɖě, bɔ é ná sixú jlɛ́ nǔ; é nɔ ná mɛ ɖě, bɔ é nɔ ɖɔ xó e Mawu sɔ́ dó nu n'i ɖɔ é ní ɖɔ lɛ́ɛ; é nɔ lɛ́ ná mɛɖěvo, bɔ é nɔ sixú tunwun yɛ nǔgbó ɔ́ ɖo yɛ nyanya lɛ́ɛ mɛ. É nɔ ná mɛ ɖě, bɔ é nɔ ɖɔ xó dó gbe tɛnmɛ tɛnmɛ lɛ́ɛ mɛ, bó nɔ́ lɛ́ ná mɛ ɖě, bɔ é nɔ tín gbe énɛ́ lɛ́ɛ mɛ. Yɛsinsɛn ɖokpó géé ɔ́ jɛ́n nɔ bló nǔ énɛ́ lɛ́ɛ bǐ; é nɔ ma nǔníná lɛ́ɛ nú mɛ ɖokpó ɖokpó lě e é jló e gbɔn é. Nǔgbó ɔ́, Klísu cí agbaza ɖokpó géé ɖɔhun, bɔ wǔjɔnú gěgé ɖo wǔ tɔn; wǔjɔnú gěgé wɛ ɖo agbaza énɛ́ wú, có agbaza ɖokpó wɛ é nyí, bɔ mǐ bǐ ɔ́, Jwifu kpó mɛ e ma nyí Jwifu ǎ kpó, kannumɔ kpó mɛ e ɖo é ɖésúnɔ sí ɔ́ kpó ɔ́, mǐ bǐ wɛ è zě Yɛsinsɛn ɖokpó ɔ́ dó lɛ yɛhwesin ná, bónú mǐ ná nyí agbaza ɖokpó; Yɛsinsɛn ɖokpó énɛ́ wɛ mǐ bǐ nu. Wǔjɔnú ɖokpó géé wɛ bló agbaza ǎ; lo ɔ́, wǔjɔnú gěgé wɛ. Ényí afɔ ɖɔ: “Ée un ma nyí alɔ ǎ wútu ɔ́, un nyí agbaza tɔn ǎ”; énɛ́ ɔ́ wɛ ná zɔ́n bɔ é ná gɔn wǔjɔnú agbaza tɔn nyí a? Ényí tó ka ɖɔ: “Ée un ma nyí nukún ǎ wútu ɔ́, un nyí agbaza tɔn ǎ”; énɛ́ ɔ́ wɛ na zɔ́n bɔ é ná gɔn wǔjɔnú agbaza tɔn nyí a? Nú agbaza ɔ́ bǐ ɔ́ nukún wɛ é nyí ɔ́, nɛ̌ é ka na se nǔ gbɔn? É ka nyí tó wɛ é nyí ɔ́, nɛ̌ é ná se nǔ wǎn gbɔn? Nǔgbó ɔ́, Mawu sɔ́ wǔjɔnú lɛ́ɛ ɖokpó ɖokpó ɖó agbaza wú, lě e é jló e gbɔn é. Ényí wǔjɔnú lɛ́ɛ bǐ ɔ́, nǔ ɖokpó géé wɛ yě nyí ɔ́, hǔn agbaza na tíin ǎ! Hǔn wǔjɔnú gěgé wɛ tíin, bɔ agbaza ɖokpó géé tíin. Énɛ́ ɔ́ wú ɔ́, nukún sixú ɖɔ nú alɔ ɖɔ nǔ tɔn kún hu dó émí ó ǎ. Ta lɔ ka sixú ɖɔ nú afɔ ɖɔ nǔ tɔn kún hu dó émí ó ǎ. É nyɔ́ wa ɔ́, wǔjɔnú agbaza tɔn e è nɔ mɔ ɖɔ yě kún ɖó gǎn ɖěbǔ ó lɛ́ɛ ɔ́, è sixú ɖe yě kpo ǎ. Ée mǐ ma nɔ́ ké ya ɖé ná ǎ lɛ́ɛ ɔ́, mǐ nɔ́ kpé nukún dó yě wú hú ɖě lɛ́ɛ. Ée ma nyɔ́ ɖɔ è nǐ ylɔ́ nyǐkɔ yětɔn vawun ǎ lɛ́ɛ ɔ́, è nɔ lɛ́ wlí yɛ̌yi nú yě hú ɖě lɛ́ɛ bǐ. Ée ka nyɔ́ kpɔ́n tawun ɖo agbaza mǐtɔn wú lɛ́ɛ ɔ́, mǐ nɔ wlí yɛ̌yi nú yě sɔ mɔ̌ ǎ. Mawu to agbaza ɔ́ gbɔn alɔkpa ɖé bónú é ná wlí yɛ̌yi nú wǔjɔnú e yɛ̌yi hwedó lɛ́ɛ hú ɖě lɛ́ɛ bǐ, bónú kínklán ní ma ɖo agbaza ɔ́ mɛ ó; lo ɔ́, nú wǔjɔnú tɛnmɛ tɛnmɛ lɛ́ɛ bǐ na kpé nukún dó yěɖée wú, gbɔn agbaza ɖokpó ɔ́ mɛ. Nú agbaza ɔ́ sín wǔjɔnú ɖé ɖo wǔvɛ́ mɔ wɛ ɔ́, wǔjɔnú ɖě lɛ́ɛ bǐ wɛ nɔ mɔ wǔvɛ́ xá ɛ; ényí è ka wlí yɛ̌yi nú ɖokpó ɔ́, ɖě lɛ́ɛ bǐ wɛ nɔ j'awǎ xá ɛ. Agbaza Klísu tɔn wɛ mi bǐ nyí, bɔ mi mɛ ɖokpó ɖokpó nyí wǔjɔnú ɖo agbaza énɛ́ ɔ́ wú. Đo agun ɔ́ mɛ ɔ́, Mawu to mɛsɛ́dó lɛ́ɛ jɛ nukɔn; gbeyíɖɔ Mawu tɔn lɛ́ɛ bɔ d'é wú, bɔ nǔkplɔ́nmɛtɔ́ lɛ́ɛ nyí atɔngɔ́ ɔ́; énɛ́ ɔ́ gúdo ɔ́, yě mɛ e nɔ jlɛ́ nǔ lɛ́ɛ jɛ fínɛ́, bɔ yě mɛ e ɖó acɛ e nɔ gbɔ azɔn nú mɛ lɛ́ɛ jɛ yě gúdo; mɛ e nɔ gɔ́ alɔ nú mɛ lɛ́ɛ kpó agunvíjíkpɔ́ntɔ́ lɛ́ɛ kpó, kpó yě mɛ e è nǎ bɔ yě nɔ ɖɔ xó dó gbe tɛnmɛ tɛnmɛ mɛ lɛ́ɛ kpó jɛ gǔdo yětɔn. Mɛ bǐ wɛ nyí mɛsɛ́dó a? Mɛ bǐ wɛ nyí gbeyíɖɔ Mawu tɔn a? Mɛ bǐ wɛ nyí nǔkplɔ́nmɛtɔ́ a? Mɛ bǐ wɛ ɖó acɛ e nɔ jlɛ́ nǔ é a? Mɛ bǐ wɛ ɖó acɛ e nɔ gbɔ azɔn nú mɛ é a? Mɛ bǐ wɛ nɔ ɖɔ xó dó gbe tɛnmɛ tɛnmɛ mɛ a? Mɛ bǐ wɛ nɔ tín gbe énɛ́ lɛ́ɛ mɛ a? Ényí mɔ̌ hǔn, nǔníná e ɖo tají hú ɖě lɛ́ɛ bǐ ɔ́ ní bó myá nukún nú mi. Amɔ̌ din ɔ́, un ná xlɛ́ ali e mi ná gbɔn, bó ná kpé nǔ e nyɔ́ hú nǔ lɛ́ɛ bǐ é wú ɔ́ mi. Ényí un ná bo nɔ ɖɔ xó dó gbɛtɔ́ lɛ́ɛ kpódó wɛnsagun Mawu tɔn lɛ́ɛ kpó sín gbe mɛ, bó ma ka ɖó wǎn yíyí ǎ ɔ́, xó ce lɛ́ɛ ná cí hǔn abǐ gan e xo wɛ è ɖe kpowun, bɔ é ma ɖo xó ɖě ɖɔ wɛ ǎ é ɖɔhun. Ényí un ná bo ɖó nǔníná e nɔ yí wɛn ɖo Mawu sí, bó nɔ dó ɔ́, un ná bó mɔ nukúnnú jɛ nǔbúdo lɛ́ɛ bǐ wú, bó ná bó tunwun nǔ bǐ ɔ́, un ná bó ɖó nǔɖiɖi e sixú sɛ tɛn nú só ɔ́, bó ma ka ɖó wǎn yíyí ǎ ɔ́, un nyí nǔtí ǎ. Nú un ná bó má dɔkun ce lɛ́ɛ bǐ nú mɛ, un na bo sɔ́ agbaza ce dó sá vɔ̌, bɔ è dǒ zo, bɔ un ma ka ɖó wǎn yíyí ǎ ɔ́, nǔɖé ɖ'é mɛ nú mì ǎ. Wǎn yíyí nɔ kú hǔn; é nɔ nyɔ́ xomɛ; é nɔ jló mɛ nú ǎ; é nɔ́ jlá ajɔ̌ nú éɖée ǎ; é nɔ́ yí go ǎ. Wǎn yíyí nɔ́ wa winnyánú ɖěbǔ ǎ; é nɔ́ ba ɖɔ émí ɖokpónɔ géé tɔn jɛ́n ná nyɔ́ ǎ; nǔɖé nɔ́ sin xomɛ n'i ǎ; é ka nɔ lɛ́ hɛn mɛ dó xomɛ ǎ. Nǔ agɔ wiwa wɛ nɔ hun xomɛ nú mɛ e ɖó wǎn yíyí é ǎ; lo ɔ́, nǔgbó wɛ nɔ hun xomɛ n'i. Wǎn yíyí nɔ́ zɔ́n bɔ è nɔ dɛ ɖo nǔ bǐ nu; ényí mǐ ná bó ɖo ninɔmɛ ɖěbǔ mɛ ɔ́, wǎn yíyí ɔ́ nɔ hɛn nǔɖiɖi mǐtɔn, kpó nukúnɖíɖó mǐtɔn kpó, kpódó hǔnkúkú mǐtɔn kpán ɖó te. Wǎn yíyí ná vɔ gbeɖé ǎ; wɛn Mawu tɔn lɛ́ɛ dídó ka ná vɔ; xó ɖɔ dó gbe tɛnmɛ tɛnmɛ mɛ ná nɔ te; nǔ e mǐ tunwun ɔ́ na vɔ. Nǔgbó ɔ́, mǐ tunwun nǔ yi kpé ǎ; mǐ ka ɖɔ Mawuxó ɔ́ yi kpé ǎ. Amɔ̌, hwenu e nǔ e sɔgbe é ná wá ɔ́, nǔ e ma sɔgbe ǎ ɔ́ ná bú. Hwenu e un ɖo yɔkpɔ́vú ɔ́, un nɔ ɖɔ xó yɔkpɔ́vú ɖɔhun, bó nɔ lin nǔ yɔkpɔ́vú ɖɔhun, lobɔ ayixa ce nɔ mɔ nǔ yɔkpɔ́vú ɖɔhun; lo ɔ́, ée un wá húzú mɛxó ɔ́, nǔ e nyí yɔkpɔ́vú tɔn lɛ́ɛ bú. Din ɔ́, nǔ e mɔ wɛ mǐ ɖe ɔ́ cí è ɖo nǔ mɔ wɛ vlivli ɖo nǔkpɛ́n e kú ɔ́ mɛ ɖɔhun. Amɔ̌, nú é wá yá ɔ́, mǐ ná mɔ nǔ lɛ́ɛ bǐ ɖó nukún wú gannaganna; din ɔ́, un ko tunwun nǔ yi kpé ǎ; amɔ̌, nú é wá yá ɔ́, un ná tunwun nǔ yi fó lě e Mawu tunwun mǐ bǐ dégbédégbé gbɔn é. Nǔ atɔn e ná nɔ ayǐ sɔ́yi lɛ́ɛ ɖíe: nǔɖiɖi, nukúnɖíɖó kpó wǎn yíyí kpó; wǎn yíyí wɛ ka hú gǎn yě bǐ. Hǔn wǎn yíyí wɛ mi ná nɔ ba jɛ nukɔn nú nǔ bǐ; mi nɔ ba nǔníná Yɛsinsɛn tɔn lɛ́ɛ lɔmɔ̌; ɖo tají ɔ́, mi nɔ ba ná yí wɛn ɖo Mawu sí bó dó. Mɛ e ɖo xó ɖɔ dó gbe tɛnmɛ tɛnmɛ mɛ wɛ ɔ́, gbɛtɔ́ lɛ́ɛ ɖɔ xó ná wɛ é ɖe ǎ; lo ɔ́, Mawu ɖɔ xó ná wɛ é ɖe; ɖó mɛɖé mɔ nukúnnú jɛ nǔ e ɖɔ wɛ é ɖe ɔ́ mɛ ǎ. Nǔbúdo ɖɔ wɛ é ɖe gbɔn Yɛsinsɛn sín hlɔ̌nhlɔ́n jí. Amɔ̌, mɛ e yí wɛn ɖo Mawu sí bó ɖo dǐdó wɛ ɔ́, gbɛtɔ́ lɛ́ɛ ɖɔ xó ná wɛ é ɖe, bónú yě ná dó yi nukɔn ɖo nǔɖiɖi mɛ, bó ná dó ná akɔ́nkpinkpan yě, bó ná dó dó gbɔ nú yě. Mɛ e ɖo xó ɖɔ dó gbe tɛnmɛ tɛnmɛ mɛ wɛ ɔ́, é ɖésúnɔ ná hlɔ̌nhlɔ́n wɛ é ɖe; lo ɔ́, mɛ e yí wɛn ɖo Mawu sí bó ɖo dǐdó wɛ ɔ́, agun ɔ́ bǐ dɔn yi nukɔn wɛ é ɖe ɖo nǔɖiɖi mɛ. Un jló ganjí ɖɔ mi bǐ ní ɖɔ xó dó gbe tɛnmɛ tɛnmɛ mɛ; lo ɔ́, mi ní yí wɛn ɖo Mawu sí bó dó ɔ́ ka jló mì hú. Nǔgbó ɔ́, mɛ e ɖo wɛn mɔ̌hunkɔtɔn lɛ́ɛ dó wɛ ɔ́ hú gǎn mɛ e ɖo xó ɖɔ dó gbe tɛnmɛ tɛnmɛ mɛ wɛ é; afi nú mɛɖé ɖo fínɛ́, bó ná sixú tín xó e ɖɔ wɛ é ɖe ɔ́ mɛ, bónú agun ɔ́ bǐ ná dó sixú yi nukɔn. Énɛ́ ɔ́, nɔví lɛ́ɛ mi, un ná kan nǔ élɔ́ byɔ́ mi: ényí un wá mi gɔ́n, bó ɖɔ xó nú mi dó gbe tɛnmɛ tɛnmɛ mɛ ɔ́, nǔ ɖagbe tɛ́ un ka wa nú mi? Un ná nyí nǔɖéwanú nú mi ɖo nǔ ɖěbǔ mɛ ǎ; afi nú é nyí ɖɔ nǔɖé wɛ Mawu ɖe xlɛ́ mì bɔ un ɖɔ nú mi; abǐ nǔɖé wɛ un tunwun bo ɖɔ nú mi, abǐ wɛn ɖé wɛ un yí ɖo Mawu sí bó dó mi; abǐ nǔɖé wɛ un kplɔ́n mi. Mi nú mǐ ná kpɔ́n nǔ dó nǔxonú lɛ́ɛ wú; mǐ ní sɔ́ kpete, abǐ agǐdigbo: nú gbe e dó wɛ é ɖe lɛ́ɛ ɔ́, ɖě ma gbɔn vo nú ɖě ǎ ɔ́, nɛ̌ wɛ è nǎ sixú tunwun nǔ e ɖɔ wɛ kpete ɔ́ ɖe ɔ́, abǐ nǔ e ɖɔ wɛ agǐdigbo ɔ́ ɖe ɔ́ gbɔn? Ényí mɛ e ɖo ahwankpɛn kún wɛ ɔ́, ma kún céɖécéɖé tɔn ǎ ɔ́, mɛ̌ ka ná sɔ́ ahwan nú? Mɔ̌ ɖokpó ɔ́, ényí mi ma ɖɔ xó dó gbe e è se ɔ́ mɛ ǎ ɔ́, nɛ̌ wɛ è nǎ sixú mɔ nukúnnú jɛ nǔ e ɖɔ wɛ mi ɖe ɔ́ wú gbɔn? Xó ɖɔ dó jɔhɔn mɛ wɛ é ná nyí. Gbe e ɖo gbɛ ɔ́ mɛ lɛ́ɛ sukpɔ́; amɔ̌ gbe lɛ́ɛ ɖokpó ɖokpó ɖó nǔ e ɖɔ wɛ é ɖe é. É ka ɖo mɔ̌ có, nú un ma se gbe e mɛ ɖɔ xó nú mì dó wɛ è ɖe ɔ́ ǎ ɔ́, mɛ e ɖo xó ɖɔ nú mì dó gbe énɛ́ mɛ wɛ ɔ́, un ná nyí akɔmasegbe n'i; éyɛ́ lɔ ná nyí akɔmasegbe nú mì. Énɛ́ ɔ́, ɖěe é nyí ɖɔ nǔníná Yɛsinsɛn tɔn lɛ́ɛ ba wɛ mi ɖe vɛ́návɛ́ná ɔ́, mi ní ba ée ná zɔ́n bɔ agun ɔ́ ná yi nukɔn tawun lɛ́ɛ é, bónú yě ní sukpɔ́ ɖo mi sí. Énɛ́ ɔ́ wú ɔ́, mɛ e ɖo xó ɖɔ dó gbe tɛnmɛ tɛnmɛ mɛ wɛ ɔ́ ɖó ná byɔ́ Mawu ɖɔ ní ná émí, bónú émí ná nɔ sixú tín gbe énɛ́ lɛ́ɛ mɛ. Đó nú un ɖo ɖɛ xo dó gbe mɔ̌hunkɔtɔn lɛ́ɛ mɛ wɛ ɔ́, ayi ce ɖo ɖɛ mɛ nǔgbó; lo ɔ́, nǔnywɛ́ ce ka ɖo azɔ̌ wa wɛ ǎ. Hǔn nɛ̌ wɛ un ka ná wa gbɔn? Un ná xo ɖɛ kpó ayi ce kpó, bó ka ná xo ɖɛ kpó nǔnywɛ́ ce lɔmɔ̌ kpó, bó ka ná ji han kpó ayi ce kpó, bó ka ná ji kpó nǔnywɛ́ ce lɔmɔ̌ kpó. Nǔgbó ɔ́, ényí a ɖo kú dó nú Mawu wɛ ɖo ayi mɛ kɛ́ɖɛ́ ɔ́, nɛ̌ wɛ mɛ e ɖo fínɛ́, bó ma mɔ nǔ jɛ mɛ ǎ ɔ́ ná sixú yí gbe ɖɔ “ Amǐ ” nú kú dó nú Mawu sín ɖɛ e xo wɛ a ɖe ɔ́ gbɔn? É sixú tunwun nǔ e ɖɔ wɛ a ɖe ɔ́ ǎ. Nú kú dó nú Mawu sín ɖɛ e xo wɛ a ɖe ɔ́ tlɛ nyɔ́ káká ɔ́, é d'alɔ mɛ ɖě ɔ́ bɔ é yi nukɔn ǎ. Un dó kú nú Mawu, ɖó é bló bɔ un nɔ ɖɔ xó dó gbe tɛnmɛ tɛnmɛ mɛ hú mi bǐ. Lo ɔ́, nú un ka ɖo agun mɛ ɔ́, un nɔ ba ná ɖɔ xógbe e è nǎ mɔ nukúnnú jɛ mɛ ɔ́ atɔ́ɔ́n, bó ná dó kplɔ́n nǔ mɛ ɖě lɛ́ɛ hú má ɖɔ xógbe děgba we afɔwó (10.000) dó gbe tɛnmɛ tɛnmɛ mɛ. Nɔví lɛ́ɛ mi, mi ma nyí yɔkpɔ́vú ɖo linlin mitɔn lɛ́ɛ mɛ ó; mi ní nyí yɔkpɔ́vú ɖo nǔ e kunkplá nǔ nyanya é mɛ; amɔ̌, mi ní nyí mɛxó ɖo linlin mitɔn lɛ́ɛ mɛ. Mawuxówéma ɔ́ ɖɔ: “Mɛ e nɔ dó gbe ɖěvo lɛ́ɛ jí wɛ un ná ɖɔ xó nú togun élɔ́ gbɔn; akɔmasegbe lɛ́ɛ sín nu mɛ wɛ un ná ɖɔ xó nú yě gbɔn; nú un na bo bló gbɔn mɔ̌ ɔ́, yě ná ba ná se xó ce ǎ.” Xó e Aklúnɔ ɖɔ ɔ́ nɛ́. Énɛ́ ɔ́, wuntun ɖé wɛ xó ɖɔ dó gbe tɛnmɛ tɛnmɛ mɛ nyí nú mɛ e ma ɖi nǔ ǎ lɛ́ɛ; é ka nyí mɔ̌ nú mɛ e ɖi nǔ lɛ́ɛ ǎ; é nyɔ́ wa ɔ́, wɛn yí ɖo Mawu sí bó dó ɔ́, wuntun ɖé wɛ é nyí nú mɛ e ɖi nǔ lɛ́ɛ, é ka nyí mɔ̌ nú mɛ e ma ɖi nǔ lɛ́ɛ ǎ. Hǔn, mǐ ní ɖɔ agun ɔ́ bǐ kplé bɔ mɛ bǐ jɛ xó ɖɔ dó gbe tɛnmɛ tɛnmɛ mɛ jí: nú gbɛtɔ́ kpaa lɛ́ɛ abǐ mɛ e ma ɖi nǔ ǎ lɛ́ɛ byɔ́ fí e mi ɖe ɔ́, yě ná ɖɔ taɖu wɛ mi hun ǎ cé? Lo ɔ́, nú mɛ bǐ ka yí wɛn ɖo Mawu sí bó ɖo dǐdó wɛ, bɔ mɛ e ma ɖi nǔ ǎ, abǐ gbɛtɔ́ kpaa ɖé byɔ́ fínɛ́ ɔ́, xó e se wɛ é ɖe ɔ́ ná zɔ́n, bɔ ayi tɔn ná mɔ hwɛ e é hu ɔ́; nǔ e se wɛ é ɖe ɔ́ bǐ ná nɔ ɖɔ hwɛ dó e. Bɔ nǔ e ɖo hwlǎhwlá ɖo ayi tɔn mɛ lɛ́ɛ bǐ sésé ná jɛ wě jí. Hwenɛ́nu ɔ́, é ná cyɔ́n nukún mɛ ayǐ, bó ná sɛn Mawu, bó ná ɖɔ: “Mawu ɖo tɛ́ntin mitɔn nǔgbó.” Nɔví lɛ́ɛ mi, étɛ́ wɛ mǐ ná ɖɔ dó sú ta ná? Ényí mi kplé, bónú mɛɖé ɖó han ɖé bó ná ji hǔn, ní ji; mɛɖé ɖó nǔkplɔ́nmɛ ɖé bó ná kplɔ́n mɛ hǔn, ní kplɔ́n mɛ; mɛɖé ɖó nǔɖexlɛ́mɛ ɖé bó ná ɖe xlɛ́ mɛ hǔn, ní ɖe xlɛ́; mɛɖé ɖó xó ɖé bó ná ɖɔ dó gbe tɛnmɛ tɛnmɛ mɛ hǔn, ní ɖɔ; mɛɖé ɖo gbe e dó wɛ mɛ ɖě ɔ́ ɖe ɔ́ ná tínmɛ wɛ hǔn, ní tínmɛ; è ɖǒ ná bló nǔ énɛ́ lɛ́ɛ bǐ, dó dó alɔ agun ɔ́, bɔ é ná yi nukɔn. Ényí è jɛ xó ɖɔ dó gbe tɛnmɛ tɛnmɛ mɛ jí ɔ́, mɛ e ná ɖɔ lɛ́ɛ ní ma sɔ́ hú mɛ we, abǐ mɛ atɔn ó; mɛ ɖě ɔ́ ka ɖó ná ɖɔ étɔn fó hwɛ̌, cóbɔ mɛɖěvo ná yí; mɛɖé ní ka tín nǔ e ɖɔ wɛ yě ɖe ɔ́ mɛ. Nú mɛɖé ma ɖo fínɛ́ bó ná tín nǔ e ɖɔ wɛ è ɖe ɔ́ mɛ ǎ hǔn, yě ní nɔ abwɛ̌ ɖo agun ɔ́ mɛ; è nǐ ɖɔ xó nú mɛɖée, bó ɖɔ xó nú Mawu. Ényí mɛ e Mawu nɔ dó wɛn lɛ́ɛ ɖě ja xó ɖɔ gbé hǔn, yě mɛ we, abǐ yě mɛ atɔn ní yí xó, bónú mɛ ɖě lɛ́ɛ ní gbéjé nǔ e ɖɔ wɛ yě ɖe lɛ́ɛ kpɔ́n. Amɔ̌, nú mɛɖé ɖo fínɛ́ bɔ Mawu ɖe nǔɖé xlɛ́ ɛ ɔ́, mɛ e ɖo xó ɖɔ wɛ ɔ́ ɖó ná nɔ abwɛ̌. Mi bǐ sixú dó wɛn Mawu tɔn ɔ́, mɛ ɖě jɛ mɛ ɖě gúdo, bó ná dó ná kplɔ́n kpódó akɔ́nkpinkpan kpó mɛ bǐ. Yě mɛ e ɖo wɛn mɔ̌hunkɔtɔn dó wɛ lɛ́ɛ ɖó ná ɖu ɖo yěɖée jí, ɖo nǔníná e Mawu ná yě ɔ́ nukɔn. Đó Mawu ylɔ́ mǐ, bónú mǐ ná zán gbɛ hannyahannya ǎ, lo ɔ́, mǐ ná mɔ fífá wútu wɛ é ylɔ́ mǐ. Lě e é kó nɔ nyí gbɔn ɖo mɛɖeɖóvo Mawu tɔn lɛ́ɛ sín agun lɛ́ɛ bǐ mɛ ɔ́, nyɔ̌nu lɛ́ɛ ɖó ná nɔ abwɛ̌ hwenu e agun ɔ́ kplé é: è nǎ gbe yě ɖɔ yě ní ɖɔ xó ǎ; lě e sɛ́n ɔ́ lɔmɔ̌ ɖɔ gbɔn ɔ́, yě ɖó ná hwíhwɛ́ yěɖée. Ényí yě ɖo nǔɖé sín do ba wɛ hǔn, yě ní kan xó byɔ́ asú yětɔn lɛ́ɛ ɖo xwé gbe. É nyɔ́ bónú yě ná ɖɔ xó ɖo agun ɔ́ mɛ ǎ. Abǐ mi gɔ́n wɛ Mawuxó ɔ́ gosín a? Abǐ midɛɛ lɛ́ɛ kɛ́ɖɛ́ gɔ́n wɛ é wá a? Ényí mɛɖé lin ɖɔ émí nyí gbeyíɖɔ Mawu tɔn, abǐ é lin ɖɔ émí ɖó nǔníná Yɛsinsɛn tɔn ɖé ɔ́, mɛ ɔ́ ɖó ná tunwun ɖɔ nǔ e Aklúnɔ zɔ́n ɔ́ wɛ nyí nǔ e wlán sɛ́ dó mi wɛ un ɖe é. Amɔ̌, nú mɛɖé má ké ya nú nǔkplɔ́nmɛ élɔ́ ǎ hǔn, mɛɖé má ké ya nú é lɔmɔ̌ ó. Énɛ́ ɔ́, nɔví ce lɛ́ɛ mi, nǔ e mi ɖó ná nɔ ba ɔ́ wɛ nyí ɖɔ mi ná nɔ dó wɛn e Mawu dó mi é; amɔ̌, mi ma gbɛ́ xó ɖɔ dó gbe tɛnmɛ tɛnmɛ mɛ ó. È nǐ bló nǔ lɛ́ɛ bǐ lě e é jɛ xá gbɔn é; è nǐ bló kpó tito kpó. Nɔví ce lɛ́ɛ mi, din ɔ́, un jló ná flín Wɛn Ɖagbe ɔ́ mi; Wɛn Ɖagbe e un jlá mi, bɔ mi yí, lobɔ nǔɖiɖi mitɔn tɛ́ d'é wú syɛ́nsyɛ́n é. É jí wɛ Mawu hwlɛ́n mi gán gbɔn; ényí mi hɛn dó ayi mɛ lě e un kplɔ́n mi gbɔn ɔ́ nɛ́; é ma nyí mɔ̌ ǎ ɔ́, nǔ e mi ɖi ɔ́ ná nyí nǔ yǎyá. Nǔ e è kplɔ́n mì ɔ́ wɛ un kplɔ́n mi, nǔkplɔ́nmɛ e ɖo tají hú ɖě lɛ́ɛ é; é wɛ nyí ɖɔ: Klísu kú ɖó hwɛ mǐtɔn lɛ́ɛ tamɛ lě e Mawuxówéma ɔ́ ko ɖɔ gbɔn é. È ɖi i, bɔ azǎn tɔn atɔngɔ́ ɔ́ gbe ɔ́, è fɔ́n ɛ sín kú lě e Mawuxówéma ɔ́ kó ɖɔ gbɔn é. Ée é fɔ́n ɔ́, é sɔ́ éɖée xlɛ́ Sefási, bó wá sɔ́ éɖée xlɛ́ mɛsɛ́dó wěwe lɛ́ɛ. Énɛ́ ɔ́ gúdo ɔ́, é sɔ́ éɖée xlɛ́ nɔví ɖo Klísu mɛ afɔwe kanwe ko (500) jɛjí zɛ̌ɛ́n. Yě mɛ gěgé lɛ́ kpo ɖo gbɛ, mɛ ɖě ká kó kú. Énɛ́ ɔ́ gúdo ɔ́, é sɔ́ éɖée xlɛ́ Jaki, bó wá sɔ́ éɖée xlɛ́ mɛsɛ́dó lɛ́ɛ bǐ. Ée é sɔ́ éɖée xlɛ́ yě bǐ ɔ́, é wá sɔ́ éɖée xlɛ́ nyɛ lɔmɔ̌ gbɔn gǔdo; có mɛ e azǎn ma sɔgbe bɔ è ji ɖɔhun wɛ un cí. Nǔgbó ɔ́, nyɛ wɛ nyí mɛ e gbɔn gǔdo bǐ ɖo mɛsɛ́dó lɛ́ɛ mɛ é. Ényí è nǎ ɖɔ nǔgbó ɔ́, é jɛ xá ɖɔ è nǐ ylɔ́ mì ɖɔ mɛsɛ́dó ǎ, ɖó un dó ya nú agun Mawu tɔn. Amɔ̌, gbɔn nyɔ̌ná Mawu tɔn gbla mɛ ɔ́, un húzú mɛ e un nyí din é, bɔ nyɔ̌ná e è kɔn dó jǐ ce ɔ́ nyí nǔ yǎyá ǎ: é nyɔ́ wa ɔ́, un wa azɔ̌ hú mɛsɛ́dó ɖě lɛ́ɛ bǐ. È nǎ ɖɔ nǔgbó ɔ́, é nyí nyɛ wɛ ɖo azɔ̌ wa wɛ ǎ; lo ɔ́, nyɔ̌ná Mawu tɔn e ɖo kpɔ́ xá mì ɔ́ wɛ. Énɛ́ ɔ́, ényí nyɛ wɛ jlá Wɛn Ɖagbe ɔ́ mi oo, abǐ yědɛɛ lɛ́ɛ wɛ jlá mi oo, Wɛn Ɖagbe e jlá wɛ mǐ ɖe ɔ́ nɛ́; nǔ e mi ka ɖi nǔ ná ɔ́ nɛ́. Mǐ ɖo jlǎjlá wɛ ɖɔ Mawu fɔ́n Klísu sín kú; ée é nyí mɔ̌ ɔ́, nɛ̌ mɛɖé lɛ́ɛ ka ná ɖo mi mɛ, bó ná sixú ɖɔ mɛkúkú lɛ́ɛ kún ná fɔ́n ó gbɔn? Ényí mɛkúkú lɛ́ɛ ma nɔ fɔ́n nǔgbó ǎ hǔn, Klísu lɔmɔ̌ fɔ́n sín kú ǎ nɛ́. Ényí Klísu ma ka fɔ́n sín kú ǎ hǔn, Wɛn Ɖagbe e jlá wɛ mǐ ɖe ɔ́, nǔ yǎyá wɛ, bɔ nǔ e mi lɔmɔ̌ ɖi é ka nyí nǔ yǎyá. Ényí mɛkúkú lɛ́ɛ má nɔ́ fɔ́n nǔgbó ǎ ɔ́, è nǎ mɔ mǐ dó mɔ kúnnu-agɔɖenúmawutɔ́; ɖó mǐ ɖe kúnnu n'i ɖɔ é fɔ́n Klísu sín kú; ényí mɛkúkú lɛ́ɛ ma nɔ́ fɔ́n ǎ ɔ́, hǔn nǔ nyí mɔ̌ ǎ nɛ́. Đó nú mɛkúkú lɛ́ɛ ma nɔ fɔ́n sín kú ǎ hǔn, Klísu lɔ fɔ́n sín kú ǎ nɛ́. Ényí Klísu ma ka fɔ́n sín kú ǎ hǔn, nǔɖiɖi mitɔn ɔ́, nǔ yǎyá wɛ é nyí, bɔ mi lɛ́ kpo ɖo hwɛ mitɔn lɛ́ɛ mɛ. Ényí Klísu ma ka fɔ́n sín kú ǎ hǔn, nɔví ɖo Klísu mɛ e kú lɛ́ɛ ɔ́, yě lɔmɔ̌ dɔn. Ényí nukún e ɖó Klísu wɛ mǐ ɖe ɔ́, gbɛ élɔ́ mɛ kɛ́ɖɛ́ jɛ́n é nyɔ́ ná ɔ́, nǔ mǐtɔn ná blá wǔ hú gbɛtɔ́ lɛ́ɛ bǐ tɔn. Nǔgbó ɔ́, Klísu wɛ nyí mɛ nukɔntɔn e fɔ́n sín kú é, bó dó ná gǎnjɛwú mǐ ɖɔ mɛ e kú lɛ́ɛ lɔmɔ̌ ná fɔ́n. Đó lě e kú gbɔn gbɛtɔ́ ɖokpó jí wá ɔ́, mɔ̌ jɛ́n fínfɔ́n sín kú mɛkúkú lɛ́ɛ tɔn gbɔn gbɛtɔ́ ɖokpó jí wá é nɛ́. Lě e gbɛtɔ́ bǐ nɔ kú ɖó bǔ e yě ɖe xá Adámu ɔ́ wútu ɔ́, mɔ̌ ɖokpó ɔ́, mɛ e ɖo bǔ xá Klísu lɛ́ɛ bǐ ɔ́, Mawu ná fɔ́n yě sín kú. Amɔ̌, mɛ ɖokpó ɖokpó ná nɔ tɛn é ɖésúnɔ tɔn mɛ; Klísu wɛ jɛ nukɔn nú mɛ bǐ, bɔ mɛ e nyí étɔn lɛ́ɛ ná bɔ dó wǔ tɔn hwenu e é ná wá dó é. Klísu ná gblé gbɛ dó nú gǎn lɛ́ɛ bǐ, bó ná gbídí acɛkpikpa lɛ́ɛ bǐ kpó hlɔ̌nhlɔ́n e ɖo yɛswímɛ lɛ́ɛ bǐ kpó, bó ná sɔ́ axɔ́súɖuɖu ɔ́ dó alɔ mɛ nú Mawu Tɔ́ ɔ́. Énɛ́ ɔ́ gúdo ɔ́, gbɛ ná vɔ. Đó Klísu ɖó ná ɖo axɔ́sú ɖu wɛ káká bɔ Mawu ná ɖu ɖo kɛntɔ́ lɛ́ɛ bǐ jǐ, bó ná bɛ́ yě dó afɔ tɔn lɛ́ɛ glɔ́. Kɛntɔ́ gúdo tɔn e sín kún è nǎ sú dó ɔ́ wɛ nyí kú. Nǔgbó ɔ́, Mawuxówéma ɔ́ ɖɔ: “Mawu bɛ̌ nǔ bǐ dó afɔ tɔn lɛ́ɛ glɔ́.” Lo ɔ́, è ɖǒ ná mɔ nukúnnú jɛ wú ɖɔ “nǔ bǐ” énɛ́ e è ɖɔ ɔ́, Mawu e sɔ́ nǔ bǐ dó Klísu glɔ́ ɔ́ kún ɖ'é mɛ ó. Hwenu e Mawu ná hwíhwɛ́ nǔ bǐ ɖó Klísu glɔ́ ɔ́, é ɖésú Vǐ ɔ́ ná hwíhwɛ́ éɖée dó Mawu e hwíhwɛ́ nǔ bǐ dó glɔ́ tɔn ɔ́ glɔ́; énɛ́ ɔ́, Mawu ná nyí nǔ bǐ nú mɛ bǐ. Mi lɛ kpɔ́n nǔ dó yě mɛ e nɔ lɛ yɛhwesin dó mɛkúkú lɛ́ɛ tamɛ lɛ́ɛ wú; ényí mɛkúkú lɛ́ɛ ma nɔ fɔ́n nǔgbó ǎ ɔ́, ani ɖó nukún wɛ yě mɛ e nɔ wa mɔ̌ lɛ́ɛ ka ɖe? Aniwú yě ká nɔ lɛ yɛhwesin ɖó ta yětɔn mɛ? Bɔ mǐ lɔmɔ̌, aniwú mǐ ka nɔ jó miɖée dó nú afɔkú hwebǐnu? Nɔví lɛ́ɛ mi, ayǐhɔ́ngbe ayǐhɔ́ngbe ɔ́, un nɔ ɖibla kú: susu e un nɔ mɔ ɖó mi wú ɖo kɔnɖókpɔ́ e mǐ ɖó xa Aklúnɔ mǐtɔn Klísu Jezu ɔ́ mɛ ɔ́ wú wɛ un ɖo mɔ̌ ɖɔ nú mi wɛ. Ényí walɔ gbɛtɔ́ lɛ́ɛ tɔn wú wɛ un fun ahwan xá gběkanlin lɛ́ɛ ɖo Efɛ́zi fí ɔ́, le tɛ́ ká ɖ'é mɛ nú mì? Ényí mɛkúkú ma nɔ fɔ́n ǎ hǔn, mi gbɔ bo wá nú mǐ ní bló nǔ e lǒ élɔ́ ɖɔ é: “Mǐ ní ɖu nǔ, bó nu ahan, ɖó sɔ ɔ́, mǐ ná kú.” Mi ma blɛ́ miɖée ó: “Gbɛ̌ nyanya lɛ́ɛ ɔ́, walɔ ɖagbe e è ɖǒ ɔ́ wɛ yě nɔ hɛn gblé.” Mi byɔ́ miɖée mɛ lě e é jɛ xá gbɔn é, bó gɔn hwɛ hu. Mɛ ɖé lɛ́ɛ ɖo mi mɛ, bó tunwun Mawu ǎ; winnyá ní hu mi. Mɛ ɖé ka kanbyɔ́ ɖɔ: “Nɛ̌ è ka ná fɔ́n mɛkúkú lɛ́ɛ gbɔn? Agbaza alɔkpa tɛ́ wɛ yě ná ɖó?” Xlonɔ wɛ nú we! Nú a sɔ́ jinukún ɖé dó kɔ́ glɔ́ ɔ́, nú jinukún énɛ́ ma kú ǎ ɔ́, é sixú ná gbɛ atín ǎ. Jinukún yǎyá ɖé kpowun wɛ a sɔ́ dó kɔ́ glɔ́; é sixú nyí jinukún e nɔ ná yovólinfín é, abǐ jinukún alɔkpa ɖěvo; é nyí agbaza e jinukún ɔ́ ná ɖe tɔ́n ɔ́ wɛ a sɔ́ dó kɔ́ glɔ́ ǎ. Mawu ná agbaza e jló e ɔ́ jinukún énɛ́; agbaza e nyí jinukún ɖokpó ɖokpó tɔn ɔ́ wɛ Mawu nɔ ná ɛ. Agbaza lɛ́ɛ bǐ nyí nukún mɛ ɖokpó ɔ́ ǎ; gbɛtɔ́ lɛ́ɛ ɖó agbaza alɔkpa vo; kanlin lɛ́ɛ ɖó alɔkpa ɖěvo; xɛ lɛ́ɛ ɖó alɔkpa ɖěvo, bɔ hweví lɛ́ɛ ɖó alɔkpa ɖěvo. Agbaza sɛ́xwé tɔn lɛ́ɛ lɔ tíin, bɔ ayǐkúngban jí tɔn lɛ́ɛ lɔ tíin; agbaza sɛ́xwé tɔn lɛ́ɛ sín ɖɛkpɛ gbɔn vo nú agbaza ayǐkúngban jí tɔn lɛ́ɛ. Hwesivɔ́ ɖó ɖɛkpɛ é ɖésúnɔ tɔn; sun ɖó ɖɛkpɛ é ɖésú tɔn vo; sunví lɛ́ɛ ɖó yětɔn vo; ɖo sunví lɛ́ɛ ɖésú tɛ́ntin ɔ́, sunví ɖě sín ɖɛkpɛ nɔ gbɔn vo nú ɖě tɔn. Hwenu e mɛkúkú lɛ́ɛ ná fɔ́n ɔ́, lě e é ná nyí gbɔn ɔ́ nɛ́. Hwenu e è sɔ́ agbaza ɔ́ dó kɔ́ glɔ́ ɔ́, nǔ nyinyɔ wɛ é kó nyí; hwenu e é ka ná lɛ́ wá gbɛ ɔ́, é sɔ́ ná nyí nǔ nyinyɔ ǎ. Hwenu e è sɔ́ ɛ dó kɔ́ glɔ́ ɔ́, é ná nylá kan; é ná ɖó gǎn ɖé ǎ; hwenu e é ka ná fɔ́n sín kú ɔ́, é ná nyɔ́ ɖɛkpɛ, bó ná ɖó hlɔ̌nhlɔ́n. Hwenu e è sɔ́ ɛ dó kɔ́ glɔ́ ɔ́, agbaza ayǐkúngban jí tɔn wɛ é nyí; hwenu e é ka ná fɔ́n sín kú ɔ́, agbaza sɛ́xwé tɔn wɛ é ná nyí. Ée agbaza ayǐkúngban jí tɔn tíin ɔ́, agbaza sɛ́xwé tɔn lɔ ɖó ná tíin. Nǔgbó ɔ́, Mawuxówéma ɔ́ ɖɔ: “Adámu e nyí gbɛtɔ́ nukɔntɔn ɔ́, húzú mɛ gbɛɖe”; Adámu gúdo tɔn ɔ́, yɛ e nɔ ná gbɛ mɛ é wɛ. Nǔ e nyí Yɛsinsɛn tɔn ɔ́ wɛ wá dó nukɔn ǎ, ayǐkúngban jí tɔn ɔ́ wɛ jɛ nukɔn, bɔ Yɛsinsɛn tɔn ɔ́ nyí wegɔ́ ɔ́. Gbɛtɔ́ nukɔntɔn ɔ́, kɔ́gúdu ayǐkúngban jí tɔn wɛ è dǒ bló e ná; gbɛtɔ́ wegɔ́ ɔ́ ka gosín sɛ́xwé. Mɛ e nyí ayǐkúngban jí tɔn lɛ́ɛ cí mɛ e è sɔ́ kɔ́ dó bló ná é ɖɔhun; mɛ e ka nyí sɛ́xwé tɔn lɛ́ɛ cí mɛ e gosín sɛ́xwé é ɖɔhun. Lě e mǐ cí mɛ e è sɔ́ kɔ́ dó bló ná ɔ́ ɖɔhun ɔ́, mɔ̌ ɖokpó ɔ́ wɛ mǐ ná wá cí mɛ e gosín sɛ́xwé ɔ́ ɖɔhun. Nɔví lɛ́ɛ mi, nǔ e ɖɔ gbé un ja ɔ́ ɖíe: nǔ e è sɔ́ agbaza kpódó hun kpó dó bló ɔ́ sixú ɖó mǐmá ɖo axɔ́súɖuɖu Mawu tɔn mɛ ǎ; nǔ e nɔ kú ɔ́ sixú nyí jɔmakú ǎ. Mi ɖótó! Un ná ɖe nǔbúdo ɖokpó xlɛ́ mi; mǐ bǐ ná kú ǎ, amɔ̌ è nǎ húzú mǐ bǐ, ɖo cɛ́jú mɛ, ɖo nukún xwixwe ɖokpó mɛ, hwenu e kpɛn gǔdo gúdo tɔn ɔ́ ná ɖɔ nǔ é; ɖó hwenu e kpɛn ɔ́ ná ɖɔ nǔ ɔ́, mɛ e kú lɛ́ɛ ná fɔ́n, bó ná nyí mɛ e ma sɔ́ ɖó ná kú ǎ é, bɔ è nǎ húzú mǐ bǐ. Nǔgbó ɔ́, agbaza e nɔ nyɔ ɔ́ ɖó ná sɔ́ ée ma nɔ nyɔ ǎ ɔ́ dó; agbaza e nɔ kú ɔ́ ɖó ná sɔ́ ée ma sixú kú ǎ ɔ́ dó. Hwenu e agbaza e nɔ nyɔ́ ɔ́ ná sɔ́ ée ma nɔ́ nyɔ́ ǎ ɔ́ dó, bɔ agbaza e nɔ kú ɔ́ ná sɔ́ ée ma sixú kú ǎ ɔ́ dó ɔ́, hwe énɛ́ ɔ́ nu ɔ́, xó élɔ́ e Mawuxówéma ɔ́ ɖɔ ɔ́ ná jɛ: “È sú kú sín kún dó; è ɖu ɖo kú jí bǐ kpéte!” Mawuxówéma ɔ́ lɛ́ ɖɔ: “Kú, fítɛ́ ɖuɖéjí towe ɖe? Kú, fítɛ́ acɛ towe e a nɔ dó wa nǔ nyanya ná ɔ́ ɖe?” Kú nɔ yí acɛ tɔn e é nɔ dó wa nǔ nyanya ná ɔ́ ɖo hwɛhuhu sí, bɔ hwɛhuhu ka nɔ yí acɛ tɔn ɖo sɛ́n sí. Lo ɔ́, susu nú Mawu e nɔ ná ɖuɖéjí mǐ gbɔn Aklúnɔ mǐtɔn Jezu Klísu jí é! Énɛ́ ɔ́, nɔví ce vívɛ́ná lɛ́ɛ mi, mi syɛ́nlǐn, bó lí dǒ, lobo nɔ ɖo bǐbí dó Aklúnɔ sín azɔ̌ ɔ́ wú d'é jí wɛ ayǐhɔ́ngbe ayǐhɔ́ngbe; ɖó mi tunwun ɖɔ azɔ̌ e wa wɛ mi ɖe ɖo bǔ e mi ɖe xá Aklúnɔ mɛ ɔ́ kún ná gú mi ó. Un ná lɛ́ ɖɔ xó kpɛɖé nú mi dó akwɛ́ e è nɔ jɔ dó mɛɖeɖóvo Mawu tɔn lɛ́ɛ tamɛ ɔ́ wú: mi wa nǔ bónú é ní sɔgbe xá lě e un ɖɔ nú agun e ɖo Galatinu lɛ́ɛ ɖɔ yě ní bló gbɔn é. Azǎn nukɔntɔn e ɖo aklúnɔzán gbla mɛ é tɛgbɛ ɔ́, mi mɛ ɖokpó ɖokpó ɖó ná ɖe akwɛ́ ɖó vo lě e mi mɔ akwɛ́ gbɔn é, bó ná sɔ́ ɖ'ayǐ ɖo xwé mitɔn lɛ́ɛ gbe, bónú é ma wá nyí hwenu e un ná wá ɔ́ wɛ è nǎ wá jɔ akwɛ́ ó. Hwenu e un ná wá ɔ́, un ná wlán wěma dó así nú mɛ e mi ná ɖe lɛ́ɛ, bó ná sɛ́ yě dó Jeluzalɛ́mu, bɔ yě ná bɛ́ nǔníná mitɔn lɛ́ɛ yi jó. Ényí é byɔ́ ɖɔ nyi lɔmɔ̌ ná yi ɔ́, yě ná xwedó mì yi. Un ná wá mi gɔ́n; un ná gbɔn Masedwani wá; ɖó un ná gbɔn tokpɔn énɛ́ mɛ dín. Bóyá un sixú nɔ mi gɔ́n kpɛɖé; afɔ nyɔ́ ɔ́, un sixú nɔ fínɛ́ avivɔ hwenu ɔ́ bǐ; énɛ́ ɔ́, un ná yi fí ɖěbǔ ɔ́, mi ná dó alɔ mì bɔ un ná yi. Đó un jló ɖɔ ma wá kpɔ́n mi kpowun, bó ná dín ǎ. Ényí é jló Aklúnɔ ɔ́, un ɖo linlin wɛ ɖɔ un ná nɔ mi gɔ́n nú hwenu kpɛɖé. É ka ɖo mɔ̌ có, un tunwun ɖɔ un ná nɔ Efɛ́zi káká yi jɛ Pantekótu gbe. Đó kɛntɔ́ lɛ́ɛ sukpɔ́; Mawu ka hun ali nú mì ɖo fínɛ́, bɔ un ná wa azɔ̌ ɖaxó ɖé, bɔ nǔ ɖagbe ná tɔ́n sín mɛ. Ényí Timɔtée wá hǔn, mi bló gbɔn ɖě bónú xɛsi ní ma ɖi i ɖo tɛ́ntin mitɔn ó; ɖó é ɖo aklúnɔzɔ́ ɔ́ wa wɛ nyɛ ɖɔhun. Mɛ ɖěbǔ má dó vɛ̌ n'i ó; é nyɔ́ wa ɔ́, alɔ wɛ mi ná dó e, bɔ é ná yi tomɛ kpó fífá kpó bó ná sixú lɛ́ kɔ wá gɔ̌n ce, ɖó un ɖo te kpɔ́n é kpódó nɔví lɛ́ɛ kpán. Nɔví mǐtɔn Apolosu ɔ́, azɔn mɔ̌kpán wɛ un ko ná akɔ́nkpinkpan éyɛ́ ɖɔ é kpódó nɔví ɖě lɛ́ɛ kpán ní wá mi gɔ́n; lo ɔ́, é ka jló e ɖěbǔ ɖɔ é ní wá din ǎ; é ka ɖo mɔ̌ có, nú é ko wá mɔ ali tɔn ɔ́, é ná wá. Mi nɔ acéjí; mi syɛ́nlǐn ɖo nǔɖiɖi mɛ; mi ɖó akɔ́nkpinkpan; mi ɖó hlɔ̌nhlɔ́n. Mi wa nǔ bǐ kpó wǎn yíyí kpó. Nɔví lɛ́ɛ mi, mi tunwun Sitefanási kpódó hɛ̌nnu tɔn kpó: mi tunwun ɖɔ, ɖo Akáyi ɔ́, yě wɛ nyí mɛ nukɔntɔn e húzú jɛ Klísu sín ali jí, bó jó yěɖée dó nú mɛɖeɖóvo Mawu tɔn lɛ́ɛ é. Un ɖo byɔ̌byɔ́ mi wɛ ɖɔ, mi hwíhwɛ́ miɖée dó mɛ mɔ̌hunkɔtɔn lɛ́ɛ, kpódó mɛ e kpó yě kpó ɖo azɔ̌ wa wɛ syɛ́nsyɛ́n lɛ́ɛ bǐ kpán glɔ́. Đěe Sitefanási kpó Fɔtunatúsi kpó, kpódó Akayikúsi kpán wá ɔ́, xomɛ hun mì, ɖó do mitɔn e jɛ wɛ un ɖe, ɖó fí ma ɖe mitɔn wútu ɔ́, yě wá sú; yě blǒ bɔ ayi ce j'ayǐ lě e yě blǒ bɔ mi ɖésúnɔ sín ayi j'ayǐ gbɔn é. Mɛ mɔ̌hunkɔtɔn lɛ́ɛ ɔ́, è ɖǒ ná tunwun lě e è ɖǒ ná nɔ́ kpa yě gbɔn é. Agun e ɖo tokpɔn Azíi tɔn mɛ lɛ́ɛ dó gbe sɛ́ dó mi. Akilási kpó Plisílu kpó, kpódó agun e nɔ kplé ɖo xwé yětɔn gbe ɔ́ kpán dó gbe sɛ́ dó mi ɖaxó ɖo Aklúnɔ mɛ. Nɔví e ɖo fí lɛ́ɛ bǐ dó gbe sɛ́ dó mi. Mi kí nɔví nɔví sín si dó dó gbe miɖée ná. Xógbe élɔ́ e ná xa wɛ mi ɖe din ɔ́, nyɛ ɖésúnɔ wɛ sɔ́ alɔ ce dó wlán ná: Nyɛ Pɔ́lu dó gbe sɛ́ dó mi. Ényí mɛɖé ma yí wǎn nú Aklúnɔ ǎ hǔn, heelú i! Aklúnɔ mǐtɔn, wǎ! Fɛ́nú Aklúnɔ Jezu tɔn ní nɔ kpɔ́ xá mi. Wǎn yíyí ce ɖo kpɔ́ xá mi bǐ ɖo bǔ e mǐ ɖe xá Klísu Jezu ɔ́ mɛ. Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn gbla mɛ ɔ́, kpódó nɔví mǐtɔn Timɔtée kpán wɛ ɖo wěma élɔ́ wlán sɛ́ dó agun Mawu tɔn e ɖo Kɔlɛ́nti é, kpódó mɛɖeɖóvo Mawu tɔn e ɖo tokpɔn Akáyi tɔn mɛ lɛ́ɛ bǐ kpán wɛ. Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpódó fífá kpán mi. Mi nú mǐ ná kpa Mawu Aklúnɔ mǐtɔn Jezu Klísu sín Tɔ́; Tɔ́ nǔbláwǔkúnúmɛtɔ́ wɛ é nyí, bó nyí Mawu e nɔ dó gbɔ nú mɛ ɖo ali bǐ nu é. É nɔ dó gbɔ nú mǐ, ɖo wǔvɛ́ e mǐ nɔ́ mɔ lɛ́ɛ bǐ mɛ, bónú mǐ ná sixú sɔ́ gbɔ e é dó nú mǐ ɖésúnɔ ɔ́ dó dó gbɔ nú mɛ e ɖo wǔvɛ́ tɛnmɛ tɛnmɛ mɔ wɛ lɛ́ɛ. Nǔgbó ɔ́, lě e mǐ ji ya gěgé xá Klísu gbɔn ɔ́, mɔ̌ ɖokpó ɔ́ jɛ́n Mawu na dó gbɔ gěgé nú mǐ gbɔn Klísu jí. Ényí mǐ ɖo ya ji wɛ ɔ́, è nǎ dó gbɔ nú mi, bó ná hwlɛ́n mi gán wú wɛ; ényí è dǒ gbɔ nú mǐ ɔ́, è nǎ dó gbɔ nú mi wútu wɛ. Gbɔdónúmɛ énɛ́ wɛ ná zɔ́n, bɔ mi ná dɛ ɖo ya ɖokpó ɔ́ e ji wɛ mǐ ɖe lɛ́ɛ nu kpó suúlu kpó. Énɛ́ ɔ́, nukún e ɖó mi wɛ mǐ ɖe ɔ́ syɛ́n ɖésú. Đó mǐ tunwun ɖɔ ée wǔvɛ́ e mɔ wɛ mǐ ɖe ɔ́ mɔ wɛ mi lɔ ɖe é ɔ́, gbɔ e è dó nú mǐ ɔ́, è nǎ dó nú mi lɔmɔ̌. Nɔví lɛ́ɛ mi, nǔgbó ɔ́, mǐ jlǒ nú mi ní tunwun wǔvɛ́ e mǐ mɔ ɖo tokpɔn Azíi tɔn mɛ é: agban tɔn kpɛn mǐ sɔ mɔ̌, káká bɔ mǐ sɔ́ sixú dɛ ɖ'é nu ǎ; mǐ sɔ́ ɖó nukún lɔ ɖɔ mǐ ná nɔ gbɛ ǎ. Mǐ ko vɛdó ɖɔ kúhwɛ wɛ è ɖǒ nú mǐ sín; nǔ nyí mɔ̌, bó ná kplɔ́n mǐ ɖɔ mǐ ní ma nɔ ɖó jiɖiɖe dó mǐ ɖésúnɔ wú ó; lo ɔ́, mǐ ní nɔ ɖó jiɖiɖe dó Mawu e nɔ fɔ́n mɛkúkú lɛ́ɛ ɔ́ kɛ́ɖɛ́ wú. É wɛ hwlɛ́n mǐ sín afɔkú baɖabaɖa énɛ́ e hɛn ɔ́, é ná dɔn mɛ yi kú ɔ́ mɛ, bó ka ná lɛ́ hwlɛ́n mǐ sín mɛ. Nǔgbó wɛ! Mǐ ɖo nukún ɖó e wɛ ɖɔ é ná lɛ́ hwlɛ́n mǐ sín mɛ; ɖó mi ɖésúnɔ ɔ́, mi ná dó alɔ mǐ ɖo ɖɛ e mi nɔ xo nú mǐ lɛ́ɛ gbla mɛ. Énɛ́ ɔ́, Mawu ná yí ɖɛ e mɛ gěgé nɔ xo dó ta mǐtɔn mɛ lɛ́ɛ é; é ná wa ɖagbe énɛ́ nú mǐ, gbɔn hwlɛ́n e é ná hwlɛ́n mǐ gán ɔ́ gbla mɛ, bɔ mɛ gěgé ná nɔ dó kú n'i ɖó mǐ wú. Nǔ e wú mǐ hɛn ɔ́, mǐ ná gó ɔ́ ɖíe: ayixa mǐtɔn ná gǎnjɛwú mǐ ɖɔ mǐ zǎn gbɛ mǐtɔn ɖo gbɛ ɔ́ mɛ; ɖo tají ɔ́, mǐ zán gbɛ mǐtɔn ɖo tɛ́ntin mitɔn kpó ayi ɖokpó kpó, kpó nǔgbó e nɔ gosín Mawu gɔ̌n ɔ́ kpó. Nǔ énɛ́ e mǐ ka wa ɔ́, fɛ́nú Mawu tɔn wɛ xlɛ́ ali mǐ; é nyí nǔnywɛ́ gbɛtɔ́ tɔn ǎ. Nǔgbó ɔ́, ɖo wěma e mǐ nɔ sɛ́ dó mi lɛ́ɛ mɛ ɔ́, mǐ nɔ wlán nǔ ɖěvo zɛ nǔ e mi nɔ xa ɖ'é mɛ, bó nɔ mɔ nukúnnú jɛ mɛ lɛ́ɛ wú ǎ. Bɔ un ɖo nukún ɖó wɛ ɖɔ mi ná mɔ nukúnnú jɛ nǔ élɔ́ mɛ céɖécéɖé. Nǔ kpɛɖé kpowun wú jɛ́n mi mɔ nukúnnú jɛ din; é wɛ nyí ɖɔ Aklúnɔ mǐtɔn Jezu sín azǎn gbe ɔ́, mi hɛn ɔ́, mi ná xɔ susu ɖó mǐ wú, lě e mǐ lɔ ná xɔ susu ɖó mi wú gbɔn é. Un ko ɖeji dó nǔ énɛ́ wú sɔ mɔ̌, bó ko lin ɖ'ayǐ ɖɔ un ná wá mi gɔ́n, bónú Mawu ná wa ɖagbe nú mi ɖó azɔn we jí. Nǔgbó ɔ́, un ko lin ɖ'ayǐ ɖɔ un ná gbɔn mi gɔ́n, bó ná dín yi Masedwani, bó lɛ́ kɔ ɔ́, un ná lɛ́ wá mɔ mi, bɔ mi ná dó alɔ mì, bɔ un ná dín yi Judée. Ée un ɖo linlin énɛ́ ɖó wɛ ɔ́, nǔɖé kpowun wa wɛ un ɖe a? Hwenu e un ɖo tito ce lɛ́ɛ to wɛ ɔ́, linlin gbɛtɔ́ tɔn kɛ́ɖɛ́ wɛ un dó to yě ná a? Un ná ɖo gbesisɔ mɛ, bó ná ɖo “ɛɛn” kpó “éeǒ” kpó ɖɔ wɛ zɛ̌ɛ́n wɛ a? Lě e xó e Mawu ɖɔ lɛ́ɛ ɖě ma nɔ húzú ǎ gbɔn ɔ́, mɔ̌ jɛ́n nǔ e un ɖɔ nú mi ɔ́ ma nyí “ɛɛn” bo lɛ́ nyí “éeǒ” ǎ é nɛ́. Đó Klísu Jezu, Mawu ví e xó nyɛ kpó Silási kpó, kpódó Timɔtée kpó, ɖɔ nú mi ɔ́ wá, bó ná nyí “ɛɛn”, bó ná lɛ́ nyí “éeǒ” ǎ. É nyɔ́ wa ɔ́, “ɛɛn” Mawu tɔn wɛ é nyí. Nǔgbó ɔ́, é wɛ nyí “ɛɛn” e yí gbe ɖɔ akpá e Mawu dó lɛ́ɛ bǐ nyí nǔgbó é. Hǔn Klísu Jezu jí wɛ mǐ nɔ́ ɖɔ “ amǐ ” mǐtɔn gbɔn, bó ná dó kpa susu nú Mawu. Bɔ Mawu ɖésúnɔ wɛ nɔ ná lǐnsyɛ́nsyɛ́n mǐ kpó mi kpó ɖo gbɛ e mǐ nɔ́ zán ɖo Klísu mɛ é mɛ. Mawu ɖésúnɔ wɛ ɖe mǐ ɖó vo. É wɛ sɔ́ nyǐkɔ tɔn dó ɖó wuntun mǐ, bó kɔn Yɛsinsɛn dó ayi mǐtɔn mɛ; é wɛ ná gǎnjɛwú mǐ ɖɔ mǐ ná mɔ ɖagbe e é sɔ́ ɖ'ayǐ nú mǐ lɛ́ɛ yí. Mawu ná ɖe kúnnu nú mì; ényí nǔvú ɖó wɛ un ɖe hǔn, ma kú. Un jló ná gba ayi dó nú mi ǎ wútu wɛ un ma lɛ́ kɔ wá Kɔlɛ́nti ǎ. Mǐ ba ná ɖɔ nú mi ɖɔ nǔ lě wɛ mi ɖó ná ɖi nǔ ná dandan ǎ, ɖó mi ko lí dǒ ɖo nǔɖiɖi mɛ; lo ɔ́, mǐ jló ná wa azɔ̌ xá mi nú nyɔ̌ná mitɔn. Énɛ́ ɔ́ wú wɛ, un ɖɔ un kún sɔ́ ná wá mi gɔ́n ó, ɖó un táá lɛ́ dɔn mi dó aluwɛ mɛ. Đó ényí un dɔn mi dó aluwɛ mɛ ɔ́, mɛ̌ ka ná lɛ́ dó xomɛhunhun nú mì? Mi mɛ énɛ́ lɛ́ɛ e un ná ko dɔn dó aluwɛ mɛ lɛ́ɛ kɛ́ɖɛ́ jɛ́n ná nyí! Énɛ́ ɔ́ wú wɛ un wlán wěma sɛ́ dó mi lě e un bló gbɔn é: un jló ná wá mi gɔ́n bónú yě mɛ ɖokpó e ɖó ná dó xomɛhunhun nú mì lɛ́ɛ ná dɔn mì dó aluwɛ mɛ ǎ. Nǔgbó ɔ́, un ɖó gǎnjɛwú ɖɔ hwenu e xomɛ nɔ ɖo hunhun mì wɛ ɔ́, mi lɔmɔ̌ ɔ́, mi bǐ wɛ xomɛ nɔ hun. Nǔgbó wɛ, un wlán wěma sɛ́ dó mi kpódó ayixa gbadó kpó, kpó vǐvɛ́ sise kpó, kpódó avǐ ya ma xwɛ kpán; é ka nyí ɖɔ un ná dó dɔn mi dó aluwɛ mɛ wútu wɛ ǎ; lo ɔ́, nú mi ná dó tunwun lě e un yí wǎn nú mi sɔ é. Ényí é sín mɛɖé wú bɔ è jɛ aluwɛ mɛ ɔ́, nyɛ wɛ mɛ énɛ́ dɔn dó aluwɛ mɛ ǎ; lo ɔ́, mi bǐ wɛ; abǐ nú è ma ná dó atɔ́ɔ́n nú jí ǎ ɔ́, mɛ akpá ɖé wɛ è dɔn dó aluwɛ mɛ ɖo mi mɛ. Tó e mɛ gěgé ɖo mi mɛ, bó dɔn nú mɛ énɛ́ ɔ́ ko kpé. Énɛ́ ɔ́ wú ɔ́, mi gbɔ bo sɔ́ hwɛ kɛ ɛ, bó dó gbɔ n'i, bónú é ma yí jɛ aluwɛ ɖaxó ɖé mɛ, bó ná mɔ ɖɔ nǔ bǐ ko vɔ ó. Hǔn, un ɖo byɔ̌byɔ́ mi wɛ ɖɔ mi ní ɖe xlɛ́ ɛ ɖɔ émí yí wǎn n'i. Nǔgbó ɔ́, nǔ e wú un wlán wěma sɛ́ dó mi ɔ́ ɖíe: un jló ná tɛ́n mi kpɔ́n, bó ná kpɔ́n ɖɔ mi ɖo gbesisɔ mɛ hwebǐnu, bó ná bló nǔ e un ɖɔ nú mi lɛ́ɛ ají. Nú mɛɖé wa nǔ nyi do, bónú mi sɔ́ kɛ ɛ ɔ́, nyi lɔ nɔ sɔ́ kɛ ɛ; ɖó ényí un sɔ́ hwɛ kɛ mɛ ɔ́, midɛɛ lɛ́ɛ wú wɛ un sɔ́ kɛ ɛ ɖo Klísu nukɔn, bónú Satáan ní ma kpé mǐ wú ó; nǔgbó ɔ́, mǐ tunwun linlin tɔn lɛ́ɛ ganjí. Hwenu e un wá Tlowasi, bó ná jlá Wɛn Ɖagbe e ɖɔ xó dó Klísu wú é ɔ́, un mɔ ɖɔ Aklúnɔ bló bɔ azɔ̌ ɔ́ sín ali ɖagbe ɖé hun nú mì ɖo fínɛ́. É ka ɖo mɔ̌ có wǔ kú mì ɖaxó tlala, ɖó un ko mɔ nɔví mǐtɔn Títu ǎ. Énɛ́ ɔ́ wú wɛ un ɖɔ nú Tlowasinu lɛ́ɛ ɖɔ é yi hweɖénu, bó ɖidó Masedwani. Lo ɔ́, susu nú Mawu, ɖó é nɔ dɔn mǐ hwebǐnu, bɔ mǐ ɖo gúdo tɔn ɖo ɖuɖéjíhwan e mɛ mǐ ɖo bǔ xá Klísu ɖe ɔ́ mɛ. É nɔ sɔ́ mǐ dó wa azɔ̌ ná, bónú mɛ lɛ́ɛ ná tunwun Klísu gbɔn fí bǐ, célu e wǎn tɔn nɔ gba kpé fí bǐ é ɖɔhun. Nǔgbó ɔ́, mǐ cí zǎlínkpɔ́n wǎnɖagbenɔ ɖé ɖɔhun, bɔ Klísu zé ná Mawu; mǐ nyǐ zǎlínkpɔ́n wǎnɖagbenɔ nú mɛ e ɖo hwlɛngán sín ali jí lɛ́ɛ é, bó lɛ́ nyí nú mɛ e ɖo bǔbú wɛ lɛ́ɛ é. Amɔ̌, wǎn e nɔ hu mɛ ɔ́ wɛ mǐ nyí nú mɛ e ɖo bǔbú wɛ lɛ́ɛ, bó ka nyí wǎn e nɔ ná gbɛ mɛ ɔ́ nú mɛ e ɖo hwlɛngán sín ali jí lɛ́ɛ é. Mɛ̌ ka sixú kpé azɔ̌ mɔ̌hunkɔtɔn wú bó wa? Mǐ cí mɛ tobutóbú e nɔ zé Mawuxó ɔ́ dó wa ajɔ̌ ná lɛ́ɛ ɖɔhun ǎ. É nyɔ́ wa ɔ́, ée é nyí ɖɔ Mawu wɛ sɛ́ mǐ dó ɔ́, mǐ nɔ ɖɔ xó kpódó nǔgbó kpó ɖo nukɔn tɔn azɔ̌watɔ́ Klísu tɔn ɖɔhun. Xó énɛ́ lɛ́ɛ e mǐ ɖɔ ɔ́, mǐɖée sɔ́ su sín xó wɛ é nyí a? Abǐ mǐ ba ná zé wěma e ɖe xlɛ́ ɖɔ mǐ nyí azɔ̌ mɔ̌hunkɔtɔn wa tɔ́ ɔ́ xlɛ́ mi lě e mɛ ɖě lɛ́ɛ ba ná xlɛ́ mi gbɔn é wɛ a? Abǐ mǐ ba ná byɔ́ wěma énɛ́ mi wɛ a? Midɛɛ lɛ́ɛ ɖésúnɔ wɛ nyí wěma mǐtɔn, bɔ è wlán dó ayixa mɛ nú mǐ, bɔ mɛ bǐ hɛn ɔ́, yě nǎ tunwun, bó ná xa. Nǔgbó wɛ! É ɖo wɛn ɖɔ wěma ɖé wɛ mi nyí, bɔ Klísu wlán, bɔ mǐdɛɛ lɛ́ɛ nɔ sɔ́ jó. É nyí kwélesin wɛ è dǒ wlán wěma ɔ́ ná ǎ; lo ɔ́, Yɛ Mawu gbɛɖe ɔ́ tɔn wɛ è dǒ wlán ná; é nyí awǐnnyatɛ jí wɛ è wlǎn ɖó ǎ; lo ɔ́, gbɛtɔ́ lɛ́ɛ sín ayi mɛ wɛ è wlǎn dó. Jiɖiɖe e mǐ ɖó dó Mawu wú gbɔn Klísu jí ɔ́ wɛ zɔ́n bɔ mǐ yí gbe ɖɔ mɔ̌ wɛ é nyí. Nǔgbó ɔ́, gbɔn alɔkpa ɖěbǔ mɛ ɔ́, mǐ sixú ɖɔ ɖɔ mǐ sixú wa azɔ̌ mɔ̌hunkɔtɔn ɖo mǐ ɖésúnɔ sín hlɔ̌nhlɔ́n mɛ ǎ. Hlɔ̌nhlɔ́n e mǐ nɔ dó kpé nǔ wú ɔ́, Mawu gɔ́n wɛ é nɔ gosín. Đó é wɛ húzú mǐ, bɔ mǐ kpé wú, bó nyí akɔjijɛ yɔ̌yɔ́ ɔ́ sín azɔ̌watɔ́. Akɔjijɛ yɔ̌yɔ́ énɛ́ jínjɔ́n sɛ́n e è wlán lɛ́ɛ jí ǎ; lo ɔ́, Yɛsinsɛn sín nǔwiwa wɛ. Sɛ́n e è wlán ɔ́, mɛ wɛ é nɔ hu; lo ɔ́ Yɛsinsɛn ɔ́, gbɛ wɛ é nɔ ná mɛ. Sɛ́n ɔ́, awǐnnya sín atɛ lɛ́ɛ jí wɛ è wlǎn ɖó, wěkwín ɖě jɛ ɖě gúdo, bɔ susu Mawu tɔn tɔ́n hwe énɛ́ nu. Mɔyízi sín nukún mɛ nɔ kɔ́n, bó nɔ ná wěziza ɖaxó ɖé, bɔ Izlayɛ́li ví lɛ́ɛ nɔ sixú kpɔ́n ɛ ǎ, có wěziza énɛ́ ɔ́ ka ɖó ná bú. Nú sɛ́n e azɔ̌ tɔn ɔ́ ko nyí ɖɔ mɛ wɛ é nɔ dɔn yi kú ɔ́, ka wá kpó susu ɖaxó mɔ̌hunkɔtɔn kpó ɔ́, nɛ̌ wɛ susu e lɛ́ lɛ̌ dó Yɛsinsɛn sín azɔ̌ ɔ́ ma ɖó ná d'agba hú mɔ̌ ǎ gbɔn? Azɔ̌ e nɔ dɔn gbɛtɔ́ lɛ́ɛ yi kú ɔ́ ko ɖó susu; nɛ̌ wɛ azɔ̌ e nɔ zé gbɛtɔ́ lɛ́ɛ dó húzú hwɛjijɔnɔ ɖo Mawu nukɔn ɔ́ ma ká ná ɖó susu hú mɔ̌ ǎ gbɔn? Mǐ sixú ɖɔ ɖɔ susu e jɛ kínkɔ́n jí ɖ'ayǐ ɔ́ kún nyí nǔtí ɖo susu din tɔn ɔ́ nukɔn ó; ɖó susu din tɔn ɔ́ hú gǎn ɖ'ayǐ tɔn ɔ́ titewungbe. Nǔgbó ɔ́, ényí nǔ e ná nɔ ayǐ nú hwenu kpɛɖé ɔ́ ka xɔ susu ɔ́, nɛ̌ wɛ ée ná nɔ ayǐ káká sɔ́yi ɔ́ ma ká ná xɔ susu hú mɔ̌ ǎ gbɔn? Nukúnɖíɖó mɔ̌hunkɔtɔn e mǐ ɖó ɔ́ wú wɛ mǐ ɖó jiɖiɖe sɔ mɔ̌. Mǐ cí Mɔyízi ɖɔhun ǎ; éyɛ́ ɔ́, avɔ wɛ é cyɔ́n nukún mɛ, bónú Izlayɛ́li ví lɛ́ɛ ní ma mɔ wěziza e ɖo kínkɔ́n wɛ ɖo nukún tɔn mɛ, bó ka ná bú ɔ́ sín yiyi ó. Lo ɔ́, è cyɔ́n nǔ ayixa yětɔn jí, bɔ ayixa yětɔn sɔ́ sixú nɔ mɔ nǔ ǎ; bɔ káká jɛ din ɔ́, nú yě ɖo nǔ xa wɛ ɖo akɔjijɛ xóxó ɔ́ wéma mɛ ɔ́, avɔ ɖokpó ɔ́ wɛ nɔ cyɔ́n ayixa yětɔn jí. Mɛ e ɖo bǔ xá Klísu ɔ́ sín ayixa jí jɛ́n wɛ è nɔ ɖe avɔ énɛ́ sín. Káká jɛ égbé ɖésú ɔ́, nú yě ɖo Mɔyízi sín wěma lɛ́ɛ xa wɛ hweɖěbǔnu ɔ́, avɔ ɔ́ nɔ cyɔ́n ayixa yětɔn jí. Lo ɔ́, lě e Mawuxówéma ɔ́ ɖɔ gbɔn ɔ́ ɖíe: “Ényí mɛɖé lɛ́ kɔ wá Aklúnɔ gɔ́n ɔ́, è nɔ ɖe avɔ ɔ́ síin.” Lo ɔ́, Aklúnɔ e xó ɖɔ wɛ è ɖe ɖo fí ɔ́, Yɛ ɔ́ wɛ; bɔ fí e Yɛ Aklúnɔ tɔn ka ɖe ɔ́, mɛɖée sí jijɛ ɖo fínɛ́. Mǐ bǐ ɔ́, è ɖe avɔ sín nukún mɛ nú mǐ, bɔ susu Aklúnɔ tɔn ɔ́, è nɔ mɔ ɖo mǐ mɛ wěkpɛ́n mɛ ɖɔhun; énɛ́ ɔ́, è húzú mǐ nú mǐ ná cí Aklúnɔ ɖɔhun, bɔ mǐ gosín susu ɖé mɛ yi byɔ́ susu e lɛ́ hú gǎn mɔ̌ é mɛ. Azɔ̌ e Yɛ Aklúnɔ tɔn wa ɔ́ nɛ́. Mawu ɔ́, ɖo xomɛnyínyɔ́ tɔn mɛ ɔ́, é sɔ́ azɔ̌ énɛ́ dó así nú mǐ; énɛ́ ɔ́ wú wɛ awakanmɛ ma kú mǐ ǎ. Nǔglɔ́nú e mǐ nɔ wa lɛ́ɛ kpó winnyánú e mǐ nɔ́ wa lɛ́ɛ kpó ɔ́, mǐ jó dó; mǐ nɔ sɔ́ sísɛ́ ɖó nukɔn dó wa nǔ ǎ; mǐ nɔ́ kpé ta do nú Mawuxó ɔ́ ǎ; é nyɔ́ wa ɔ́, mǐ nɔ́ ɖɔ nǔgbó ɔ́ nyi wɛn nú mɛ, bɔ è nɔ tunwun; énɛ́ ɔ́, gbɛtɔ́ bǐ nɔ mɔ ɖo ayi mɛ ɖo Mawu nukɔn ɖɔ azɔ̌ mɔ̌hunkɔtɔn wa tɔ́ wɛ mǐ nyí. Nú Wɛn Ɖagbe e jlá wɛ mǐ ɖe ɔ́ dó zǐnflú ɔ́, mɛ e ɖo dindɔn wɛ lɛ́ɛ jɛ́n é dó zǐnflú ná. Yě ɖi nǔ ǎ; ɖó gǎn nyanya gbɛ élɔ́ tɔn ɔ́ va nukún ayixa yětɔn. Mawu gbɛ élɔ́ tɔn énɛ́ nɔ lɔn nú yě ná mɔ wěziza e Wɛn Ɖagbe e ɖɔ xó dó susu Klísu tɔn wú ɔ́ nɔ ná mɛ é ǎ. Klísu ɔ́ wɛ nyí akpajlɛ́ Mawu tɔn titewungbe ɔ́. Nǔgbó ɔ́, mǐ ɖésúnɔ jlá wɛ mǐ ɖe ǎ: Klísu Jezu jlá wɛ mǐ ɖe ɖɔ é nyí Aklúnɔ, bó ɖo mǐɖée jlá wɛ ɖɔ mɛsɛntɔ́ mitɔn wɛ mǐ nyí ɖó Jezu wú. Mawu e ɖɔ: “Wěziza ní kɔ́n sín ablu mɛ” ɔ́, é ɖokpó ɔ́ wɛ lɛ́ nyí mɛ e bló bɔ wěziza tɔn nɔ kɔ́n ɖo ayi mǐtɔn lɛ́ɛ mɛ é, bónú mǐ ná ɖó nǔnywɛ́ wěziza tɔn e nyí susu Mawu tɔn é; susu Mawu tɔn e ɖo kínkɔ́n wɛ ɖo Klísu sín nukún mɛ é. Lo ɔ́, mǐ mɛ e sí dɔkun Yɛsinsɛn tɔn énɛ́ ɖe lɛ́ɛ ɔ́, kozɛ́n ɖɔhun wɛ mǐ cí, bónú è nǎ mɔ ganjí ɖɔ hlɔ̌nhlɔ́n aditi énɛ́ ɔ́, Mawu tɔn wɛ; é kún nyí mǐtɔn ó. Nǔgbomɛ alɔkpa alɔkpa lɛ́ɛ nɔ ɖo go ján dó mǐ wɛ; lo ɔ́, yě nyínyɛ́ mǐ ǎ; mǐ sɔ́ tunwun lě e mǐ ná wa nǔ gbɔn ɔ́ ǎ; lo ɔ́, mǐ mɔ ɖɔ nǔ bǐ ko vɔ ǎ. È ɖo ya dó nú mǐ wɛ; lo ɔ́, Mawu jó mǐ dó ǎ; è nɔ ɖo mǐ zín dó ayǐ wɛ, mǐ ka dɔn ǎ. Kú Jezu tɔn ɔ́ ɖo agbaza mǐtɔn mɛ bɔ mǐ kpó é kpó ɖo yiyi wɛ tɛgbɛ, bónú gbɛ tɔn lɔ ná ɖe éɖée xlɛ́ ɖo agbaza mǐtɔn mɛ. Gbɛ mǐtɔn mɛ ɔ́, è ɖo kúdán gblɔ́n nú mǐ wɛ tɛgbɛ ɖó Jezu wú, nú gbɛ tɔn lɔ ná ɖe éɖée xlɛ́ ɖo agbaza mǐtɔn e ɖo te nú kú ɔ́ mɛ. Énɛ́ ɔ́, kú ɔ́ ɖo azɔ̌ wa wɛ ɖo mǐ mɛ; gbɛ lɔ ka ɖo azɔ̌ wa wɛ ɖo mi mɛ. Mawuxówéma ɔ́ ɖɔ: “Un ɖi nǔ, énɛ́ ɔ́ wú wɛ un ɖɔ xó.” Đo nǔɖiɖi sín ayixa ɖokpó ɔ́ mɛ ɔ́, mǐ lɔ ɖi nǔ; énɛ́ ɔ́ wú wɛ mǐ ɖo xó ɖɔ wɛ. Nǔgbó ɔ́, mǐ tunwun ɖɔ Mawu e fɔ́n Aklúnɔ Jezu sín kú wá gbɛ ɔ́ ná fɔ́n mǐ lɔmɔ̌ wá gbɛ kpó Jezu kpó, bó ná bló bɔ mǐ kpó mi kpó ná wá nukɔn tɔn. Đagbe mitɔn wútu wɛ nǔ énɛ́ lɛ́ɛ bǐ jɛ; énɛ́ ɔ́, mɛ e jí kɔn nyi wɛ fɛ́nú Mawu tɔn ɖe lɛ́ɛ ná nɔ́ ɖo jijɛ jí wɛ, bɔ ɖɛ e mɛ gěgé ná nɔ́ xo dó dó kú nú Mawu ɔ́ ná nɔ́ ɖo jijɛ jí wɛ ayǐhɔ́ngbe ayǐhɔ́ngbe nú susu Mawu tɔn. Nǔ e wútu awakanmɛ ma nɔ kú mǐ ǎ ɔ́ nɛ́. Nú nǔ e mǐ nyǐ ɖo agbaza mɛ ɔ́ ná bo ɖo gblěgblé wɛ ɔ́, nǔ e mǐ nyí ɖo Yɛsinsɛn li jí ɔ́ nɔ ɖo hlɔ̌nhlɔ́n mɔ wɛ ayǐhɔ́ngbe ayǐhɔ́ngbe. Wǔvɛ́ kpɛ e mɔ wɛ mǐ ɖe din nú hwenu ɖé ɔ́ nɔ́ bló susu mavɔ mavɔ ɖ'ayǐ nú mǐ, bɔ é nɔ́ túnflá; susu énɛ́ ɖo tají hú wǔvɛ́ e mɔ wɛ mǐ ɖe din é ɖaxó. Đó nǔ e è nɔ mɔ ɖó nukún wú ɔ́ jí wɛ ayixa mǐtɔn ɖe ǎ; lo ɔ́, nǔ e è ma nɔ mɔ ɖó nukún wú ǎ ɔ́ jí wɛ ayixa mǐtɔn ɖe. Nǔ e è nɔ mɔ ɖó nukún wú ɔ́, hwenu kpɛɖé jɛ́n wɛ é nɔ́ nɔ ayǐ ná; lo ɔ́, nǔ e è ma nɔ mɔ ɖó nukún wú ǎ ɔ́, é nɔ́ nɔ ayǐ káká sɔ́yi. Nǔgbó ɔ́, mǐ tunwun ɖɔ nú è kíjá agbaza mǐtɔn e nyí goxɔ ayǐkúngban jí tɔn ɔ́, mǐ ɖó ɖěvo e nyí xɔ Mawu tɔn e gbɛtɔ́ sín alɔ ma bló ǎ, bɔ é ná nɔ ayǐ káká sɔ́yi ɔ́ ɖo sɛ́xwé. Lě e mǐ ɖe din ɔ́, mǐ ɖo azɔn wɛn wɛ, ɖó mǐ ɖó jlǒ ɖaxó ɖɔ mǐ ní sɔ́ agbaza mǐtɔn sɛ́xwé tɔn ɔ́ dó. Nǔgbó ɔ́, ényí ɖɔ mǐ vɛ ko sixú sɔ́ dó ɔ́, è sɔ́ ná mɔ mǐ ɖo mɛ̌ ǎ. Nǔgbó wɛ! Káká jɛ hwenu e mǐ ná ɖo ayǐkúngban jí sín goxɔ énɛ́ ɔ́ mɛ dó ɔ́, mǐ ná ɖo azɔn wɛn wɛ, agban kpinkpɛn ɖé glɔ́ wɛ mǐ ɖe ɖɔhun. É nyí biba wɛ mǐ ɖe ɖɔ mǐ ní gosín agbaza mǐtɔn ayǐkúngban jí tɔn ɔ́ mɛ ǎ; lo ɔ́, nǔ e ba wɛ mǐ ɖe ɔ́ wɛ nyí ɖɔ mǐ ní sɔ́ agbaza sɛ́xwé tɔn ɔ́ dó, bónú nǔ e ɖo gbɛ ɔ́ ná sɔ́ nǔ e ɖo te nú kú ɔ́ mi. Mawu ɖésú wɛ kó bló mǐ nú mǐ ná tunwun hǔzúhúzú mɔ̌hunkɔtɔn, bó ná Yɛ tɔn mǐ, bɔ é nyí ɖagbe e é sɔ́ ɖ'ayǐ nú mǐ lɛ́ɛ sín gǎnjɛwú nú mǐ. Hǔn akɔ́nkpinkpan gɔ́ ayi mɛ nú mǐ hwebǐnu. Mǐ tunwun ɖɔ hwenu e mǐ ko sixú kpo ɖo agbaza énɛ́ ɔ́ mɛ ɔ́, mǐ ɖo zɔ nú nɔtɛn Aklúnɔ tɔn. Nǔgbó ɔ́, mǐ ɖo gbɛ ɔ́, nǔ e mǐ ɖi ɔ́ wú wɛ; é nyí mǐ kó mɔ ɖó nukún wú wɛ ǎ. Akɔ́nkpinkpan gɔ́ ayi mɛ nú mǐ, bɔ nǔ e jló mǐ tawun ɔ́ wɛ nyí ɖɔ mǐ ní gosín agbaza élɔ́ mɛ, bó ná yi nɔ xwé mǐtɔn gbe, ɖo Aklúnɔ gɔ́n. Lo ɔ́, nú mǐ nɔ agbaza élɔ́ mɛ kpó mǐ gosín mɛ kpó ɔ́, nǔ e jló mǐ jɛ nukɔn ɔ́ wɛ nyí ɖɔ mǐ ní nyɔ́ Aklúnɔ nukún mɛ. Đó mǐ bǐ ɔ́, mǐ ɖó ná wá Klísu nukɔn, bɔ é ná ɖɔ hwɛ dó mǐ, bónú mɛ ɖokpó ɖokpó ná mɔ lě e é wa nǔ gbɔn hwenu e é ɖo agbaza tɔn mɛ ɔ́ sín ajɔ yí; nú nǔ ɖagbe wɛ mɛ ɔ́ wa, abǐ nǔ nyanya wɛ mɛ ɔ́ wa ɔ́, é ná mɔ ajɔ tɔn yí. Mǐ tunwun nǔ e nyí sísí ɖó nú Aklúnɔ é, bó ɖo biba wɛ nú gbɛtɔ́ lɛ́ɛ ná wá mǐtɔn jí. Mawu tunwun mǐ céɖécéɖé, bɔ un ɖi ɖɔ, ɖo ayi mi ɖésúnɔ tɔn mɛ ɔ́, mi tunwun nyɛ lɔmɔ̌. É nyí ɖɔ mǐ jló ná lɛ́ jɛ mǐɖée kpa jí ɖo mi gɔ́n wú wɛ ǎ; lo ɔ́, mǐ jló ná ná ali mi, bɔ mi ná xɔ susu ɖó mǐ wú; énɛ́ ɔ́, mi ná mɔ xósin e mi ná nɔ ná yě mɛ e nɔ sɔ́ nǔ e ɖo nukúnta lɛ́ɛ dó yí go ná, bó ma nɔ́ sɔ́ nǔ e ɖo ayi mɛ lɛ́ɛ dó yí go ná ǎ lɛ́ɛ. Ényí tamɛmasɔgbenánɔ wɛ mǐ nyí nǔgbó ɔ́, Mawu wɛ mǐ nyí ná; lo ɔ́, nú tamɛ mǐtɔn ka sɔgbe ɔ́, mi wɛ é sɔgbe ná. Wǎn yíyí Klísu tɔn ɖu ɖo mǐ jí, ɖó mǐ ɖó gǎnjɛwú ɖɔ mɛ ɖokpó géé wɛ kú dó mɛ bǐ tamɛ; é wɛ nyí ɖɔ mɛ bǐ kú xá ɛ. É kú dó mɛ bǐ tamɛ, bónú mɛ e ɖo gbɛ lɛ́ɛ ɔ́, yě ma sɔ́ nɔ gbɛ nú yě ɖésúnɔ ó; lo ɔ́, yě ní nɔ gbɛ nú mɛ e kú dó yě tamɛ, bɔ è lɛ́ fɔ́n ɛ wá gbɛ dó yě tamɛ é. Énɛ́ ɔ́, bɛ́ sín din ɔ́, mǐ sɔ́ nɔ sɔ́ gbɛtɔ́ sín ayixa dó kpɔ́n mɛ ɖěbǔ ná ǎ; ényí mǐ ko sɔ́ gbɛtɔ́ sín ayixa dó kpɔ́n Klísu ná ɖ'ayǐ ɔ́, mǐ sɔ́ nɔ́ zé ayixa énɛ́ ɔ́ dó kpɔ́n ɛ ná din ǎ. Hǔn ényí mɛɖé jɛ kpɔ́ xá Klísu lě tlóló ɔ́, mɛ ɔ́ nɔ húzú nǔɖíɖó yɔ̌yɔ́: nǔ e nyí xóxó ɔ́ bú, bɔ yɔ̌yɔ́ ɔ́ wá. Mawu e dó hwɛ gbɔ xá mǐ gbɔn Klísu jí ɔ́ sín azɔ̌ wɛ nyí nǔ énɛ́ lɛ́ɛ bǐ; é wɛ zé azɔ̌ dó así nú mǐ, bɔ mǐ ná dɔn mɛɖěvo lɛ́ɛ wá, bɔ é ná dó hwɛ gbɔ xá yě. Đó Mawu kó ɖo azɔ̌ wa wɛ gbɔn Klísu jí, bó ná dó hwɛ gbɔ xá gbɛtɔ́ lɛ́ɛ bǐ; é kpɔ́n dó nǔwanyido yětɔn lɛ́ɛ wú ǎ. Hwɛdógbɔ sín azɔ̌ énɛ́ e wa wɛ é ɖe ɔ́, é sɔ́ dó así nú mǐ ɖɔ mǐ ní jlá. Hǔn, Klísu nu ɖɔ xó dó wɛ mǐ ɖe, è ka ná ɖɔ nǔgbó ɔ́, Mawu ɖésú wɛ ɖo mi ylɔ́ wɛ gbɔn mǐ jí: mǐ ɖo vo sa nú mi wɛ, ɖo Klísu sín nyǐkɔ mɛ ɖɔ mi ní yí gbe bó dó hwɛ gbɔ xá Mawu. Klísu hu hwɛ ɖě kpɔ́n gbeɖé ǎ; amɔ̌ Mawu ɖíɖá ɛ hwɛ mǐtɔn lɛ́ɛ, bónú ɖo bǔ e mǐ ɖe xá Klísu ɔ́ mɛ ɔ́, mǐ ná sixú ɖu azɔ̌ e gbla mɛ Mawu sɔ́ mǐ dó húzú hwɛjijɔnɔ ná ɖo nukɔn tɔn ɔ́ sín le. Énɛ́ ɔ́, mǐ mɛ e ɖo azɔ̌ wa xá Mawu wɛ lɛ́ɛ ɔ́, mǐ ɖo byɔ̌byɔ́ mi wɛ ɖɔ mi ma jó fɛ́nú e mi yí ɖo Mawu sí ɔ́ dó, bónú é bú ó. Đó nǔ e Mawuxówéma ɔ́ ɖɔ é ɖíe: “Ée ɖagbewiwa sín hwenu su ɔ́, un se xó towe; hwlɛngánzán gbe su ɔ́, un wá gɔ́ alɔ nú we.” Xó e Mawu ɖɔ ɔ́ nɛ́. Đagbewiwa sín hwenu ɔ́ ɖíe su din e; hwlɛngán sín azǎn ɔ́ gbe ɖíe su din e. Mǐ jló ɖɔ è ma kpé wú bó mɔ nǔ nyanya ɖé ɖɔ dó azɔ̌ mǐtɔn wú ó; énɛ́ wɛ zɔ́n bɔ mǐ ɖo biba wɛ ɖɔ mǐ ní ma nyí afɔklɛ́nnú nú mɛ ɖěbǔ ɖo nǔ ɖěbǔ mɛ ó. É nyɔ́ wa ɔ́, mǐ nɔ́ ɖe xlɛ́ ɖo nǔ bǐ mɛ ɖɔ mǐ nyí azɔ̌watɔ́ Mawu tɔn: mǐ nɔ́ ɖó suúlu ɖaxó, bó nɔ́ dɛ ɖo wǔvɛ́ lɛ́ɛ nu, bó nɔ́ dɛ ɖo nǔgbomɛ lɛ́ɛ, kpódó nǔ e nɔ́ hu ado lɛ́ɛ kpán nu. È xo mǐ, bó kplá mǐ dó gankpá mɛ; è kplé ahwan dó mǐ bǐ wú; mǐ wa azɔ̌ syɛ́nsyɛ́n lɛ́ɛ; mǐ nɔ sixú dɔ́ amlɔ ǎ; mǐ nɔ́ sixú ɖu nǔ ǎ. É ka ɖo mɔ̌ có, mǐ nɔ́ ɖe xlɛ́ ɖɔ mǐ nyí azɔ̌watɔ́ Mawu tɔn gbɔn ayi mímɛ́ mǐtɔn gbla mɛ, gbɔn nǔtunwuntunwun mǐtɔn gbla mɛ; gbɔn suúlu ɖíɖó kpó xomɛnyínyɔ́ mǐtɔn kpán gbla mɛ; gbɔn Yɛsinsɛn gbla mɛ; gbɔn wǎn yíyí nǔjɔnǔ tɔn e mǐ ɖó ɔ́ gbla mɛ. Gbɔn nǔgbó e jlá wɛ mǐ ɖe ɔ́, kpódó hlɔ̌nhlɔ́n Mawu tɔn kpán gbla mɛ. Nǔ jlɔ́jlɔ́ wiwa wɛ nyí ahwanfunnú e mǐ nɔ́ zán dó fun ahwan ná é; é wɛ mǐ nɔ́ lɛ́ zán dó hwlɛ́n mǐɖée ná ɖo ahwan nukɔn. È nɔ wlí yɛ̌yi nú mǐ; è nɔ lɛ́ dó winnyá mǐ; è nɔ ɖɔ xó nyanya dó mǐ wú; è nɔ lɛ́ ɖɔ xó ɖagbe dó mǐ wú. È nɔ mɔ mǐ dó mɔ adingbannɔ ná; nǔgbó ɖɔ wɛ mǐ ka ɖe. È nɔ mɔ mǐ dó mɔ mɛ e è ma tunwun ǎ é; mɛ bǐ wɛ ka tunwun mǐ; è nɔ mɔ mǐ dó mɔ mɛ e ɖo ná kú wɛ é; mǐ ka ɖo gbɛ ganjí lě e mɔ gbɔn wɛ mi ɖe é; è nɔ dɔn tó nú mǐ, có è ka nɔ hu mǐ ǎ. È nɔ dɔn mǐ dó aluwɛ mɛ, có mǐ nɔ́ ɖo awǎjijɛ mɛ hwebǐnu; mǐ cí wamamɔnɔ ɖɔhun; lo ɔ́, mǐ nɔ́ dó dɔkun nú mɛ gěgé; mǐ cí mɛ e ma ɖó nǔɖé ɖɔhun, è ka ná ɖɔ nǔgbó ɔ́, mǐ ɖó nǔ bǐ. Xɔ́ntɔn mǐtɔn vívɛ́ná Kɔlɛ́ntinu lɛ́ɛ mi, mǐ ɖɔ xomɛ nú mi; mǐ yí wǎn nú mi ɖésú. Mǐ gbɛ́ wǎn nú mi ǎ; lo ɔ́, midɛɛ lɛ́ɛ wɛ gbɛ́ wǎn nú mǐ. Énɛ́ ɔ́, un ɖo xó ɖɔ nú mi wɛ vǐ ce wɛ mi nyí ɖɔhun: linlin e mǐ ɖó dó mi wú ɔ́, mi ní ɖó dó mǐ lɔmɔ̌ wú; mi ní ɖó wǎn yíyí ɖaxó nú mǐ. Mi ma kpé nǔɖé xá mɛ e ma ɖi nǔ nú Klísu ǎ lɛ́ɛ ó: yě nyí mɛ e è nǎ kpé nǔ xá ɖé ǎ. Nǔgbó ɔ́, nɛ̌ mɛ e nɔ wa nǔ e sɔgbe ɔ́ ká sixú kpé nǔ xá mɛ e ma nɔ wa nǔ e sɔgbe ǎ ɔ́ gbɔn? Nɛ̌ wěziza ka sixú nɔ bǔ xá ablu gbɔn? Nɛ̌ Klísu ka sixú ɖó gbe kpɔ́ xá awǒvi gbɔn? Abǐ ani wɛ mɛ e ɖi nǔ nú Klísu ɔ́ sixú kpé xá mɛ e ma ɖi nǔ nú Klísu ǎ é? Étɛ́ sinsɛnxɔ Mawu tɔn sixú kpé xá vodún lɛ́ɛ? Đó sinsɛnxɔ Mawu gbɛɖe ɔ́ tɔn wɛ mǐ nyí, lě e Mawu ko ɖɔ gbɔn é; Mawu ɖɔ: “Un ná nɔ yě mɛ, bó ná ɖi zɔnlin xá yě; un ná nyí Mawu yětɔn, bɔ yě ná nyí togun ce.” Énɛ́ ɔ́ wú wɛ Aklúnɔ ɖɔ: “Mi ɖó ná gosín yě mɛ, bó ná klán xá yě; mi ma ɖó alɔ nǔ e nyí suɖunú ɔ́ ɖě wú ó, énɛ́ ɔ́, nyɛ ná yí mi. Un ná nyí tɔ́ nú mi, bɔ mi ná nyí vǐ súnnu kpó vǐ nyɔ̌nu kpó nú mì; nǔ e Aklúnɔ Nǔbǐwúkpétɔ́ ɔ́ ɖɔ ɔ́ nɛ́.” Mɛvívɛ́ná ce lɛ́ɛ mi, akpá énɛ́ lɛ́ɛ e Mawu dó ɔ́, mǐ wɛ é dó yě ná. Énɛ́ ɔ́ wú ɔ́, mǐ ní slá wǔ nú agbaza kpó lǐndɔ̌n kpó, bó dó gǎn, bó ɖi xɛsi nú Mawu ɖo gbɛzán mǐtɔn mɛ, lobo ná nyí mɛ mímɛ́ yi fó. Mi hun xomɛ dó mǐ wú! Mǐ wa nǔɖé nyi do nú mɛ ɖěbǔ ǎ; mǐ vɔ mɛ ɖěbǔ ǎ; mǐ ka xo mɛ ɖěbǔ ɖu ǎ. Un ná ɖó hwɛ nú mi wú wɛ un ɖo mɔ̌ ɖɔ wɛ ǎ. Nǔgbó ɔ́, lě e un ko ɖɔ gbɔn nú mi ɔ́, mi vɛ́ nú mǐ sɔ mɔ̌, bɔ mǐ ɖo kpɔ́ xá mi hwebǐnu, bó ná nɔ gbɛ xá mi, abǐ bó ná kú xá mi. Un ɖeji dó mi wú ɖaxó; un nɔ sɔ́ mi dó yí go ná tawun. Mǐ ɖo wǔvɛ́ mɔ wɛ có un ɖó akɔ́nkpinkpan titewungbe, bɔ xomɛ nɔ hun mì túnflá. Đésú ɔ́, hwenu e mǐ wá Masedwani ɔ́, mǐ mɔ gbɔjɛ́ ɖěbǔ ǎ; mǐ mɔ wǔvɛ́ gbɔn fí bǐ: mǐ nɔ ɖo zali xá mɛɖěvo lɛ́ɛ wɛ, bó nɔ́ ɖo xɛsi ɖi wɛ ɖo ayi mɛ. Lo ɔ́, Mawu e nɔ dó gbɔ nú mɛ e kanmɛ gbɔ́jɔ́ lɛ́ɛ ɔ́, dó gbɔ nú mǐ gbɔn Títu sín wǐwá gbla mɛ. É nyí wǐwá tɔn kɛ́ɖɛ́ wɛ dó gbɔ nú mǐ ǎ; lo ɔ́, xó e é wá ɖɔ nú mǐ dó lě e mi dó gbɔ nú é ɖésúnɔ gbɔn ɔ́ wú ɔ́ lɛ́ dó gbɔ nú mǐ. Lě e mi ɖó jlǒ sɔ, bó ná mɔ mǐ ɔ́, aluwɛ ɖaxó e mɛ mi ɖe é, kpódó lě e mi ɖo gbesisɔ mɛ, bó ná jɛ ahwan jǐ ce gbɔn ɔ́ kpó ɔ́, é ɖɔ nú mǐ. Énɛ́ ɔ́ wɛ zɔ́n din bɔ xomɛ lɛ́ hun mì d'é jí. Nǔgbó ɔ́, nú wěma e un wlán sɛ́ dó mi ɔ́ na bo zɔ́n bɔ mi ɖo aluwɛ mɛ ɔ́, é vɛ́ nú mì ǎ. Hwenu e un mɔ ɖɔ wěma énɛ́ zɔ́n, bɔ mi nɔ aluwɛ mɛ nú hwenu kpɛɖé ɔ́ wɛ é ná vɛ́ nú mì. Amɔ̌ din ɔ́, un ɖo awǎ jɛ wɛ; é nyí aluwɛ mɛ e un dɔn mi dó ɔ́ wú wɛ ǎ; lo ɔ́, un ɖo awǎ jɛ wɛ ɖó aluwɛ e mɛ mi nɔ ɔ́ zɔ́n bɔ mi húzú jijɔ. Mawu zě aluwɛ mɛ e mi nɔ ɔ́ dó wa azɔ̌ ná; hǔn mǐ sɔ́ wa nǔ ɖěbǔ nyi do nú mi ǎ. Đó aluwɛ e Mawu nɔ dó wa azɔ̌ ná ɔ́ nɔ́ ná mɛ jijɔ húzúhúzú e nɔ kplá mɛ bɔ è nɔ mɔ hwlɛngán é, bɔ é sɔ́ nɔ vɛ́ nú mɛ ǎ. Lo ɔ́, aluwɛ e mɛ gbɛ ɔ́ nɔ dɔn mɛ dó ɔ́, kú wɛ é nɔ kplá mɛ hɛn yi. Aluwɛ e mɛ mi nɔ ɔ́, Mawu zě dó wa azɔ̌ ná; mi bó kpɔ́n nǔ e tɔ́n sín mɛ din lɛ́ɛ é! Aluwɛ énɛ́ e mɛ mi nɔ ɔ́, mi kpɔ́n lě e é zɔ́n bɔ mi sɔ́ nǔ e jɛ ɔ́ dó ylɔ́ nǔjɔnǔ sɔ é, bó kpɔ́n lě e é húzú mi gbɔn, bɔ mi bí dó azɔ̌ wú, bó ná dó jɛ ahwan miɖée jí é. Mi kpɔ́n lě e mi mɔ akpɔ sɔ é, bó kpɔ́n lě e xɛsi ɖi mi dó Mawu wú sɔ é. Mi kpɔ́n lě e mi ɖó jlǒ, bó ná mɔ mǐ sɔ é. Mi kpɔ́n lě e mi bí dó nǔ wú sɔ é, bó kpɔ́n lě e mi ván kan, bó ná dɔn tó nú mɛ e wa nǔ nyanya ɔ́ sɔ é! Mi ɖe xlɛ́ gbɔn alɔkpa lɛ́ɛ bǐ mɛ ɖɔ émí nyí xomɛvɔ́nɔ ɖo nǔ énɛ́ e jɛ ɔ́ mɛ. Hǔn, nú un sɛ́ wěma dó mi ɔ́, é nyí mɛ e wa nǔ nyi do ɔ́ wútu wɛ ǎ; é ka lɛ́ nyí mɛ e è wa nǔ nyi do ná ɔ́ wútu wɛ ǎ. Lo ɔ́, bónú mi ɖésúnɔ ná dó mɔ nukúnnú jɛ kan e mi xo dó mǐ ɔ́ wú céɖécéɖé ɖo Mawu nukɔn wútu wɛ un sɛ́ wěma dó mi. Énɛ́ ɔ́ wú wɛ lě e mi wa nǔ gbɔn ɔ́ dó gbɔ nú mǐ. Gbɔ kɛ́ɖɛ́ wɛ é dó nú mǐ ǎ. Ée mǐ mɔ lě e xomɛ hun Títu sɔ, ɖó alɔkpa e mɛ mi bǐ dó wǔsyɛ́n kanmɛ n'i gbɔn ɔ́ wú ɔ́, mǐ mɔ xomɛhunhun ɖaxó ɖěvo d'é jí. Un jlá ajɔ̌ nú nyɛɖée kpɛɖé ɖo gɔ̌n tɔn, ɖó mi wú, bɔ mi ka dó winnyá mǐ ǎ. Lo ɔ́, lě e nǔ e mǐ nɔ́ ɖɔ nú mi lɛ́ɛ bǐ nɔ nyí nǔgbó ɔ́, mɔ̌ ɖokpó ɔ́, lě e mǐ kpa mi gbɔn ɖo Títu gɔ́n ɔ́, è mɔ ɖó mɔ̌ jǐ. Énɛ́ ɔ́, nú é flín lě e mi bǐ ɖo gbesisɔ mɛ, bó ná se tónú gbɔn ɔ́, bó flín lě e mi yí i kpó xɛsi kpó, kpó sísɔ́sísɔ́ kpó gbɔn ɔ́, wǎn yíyí e é ɖó nú mi ɔ́ nɔ lɛ́ jɛjí. Xomɛhunhun gɔ́ ayi mɛ nú mì, ɖó un hɛn ɔ́, un ná ɖeji dó mi wú ɖo nǔ bǐ mɛ. Nɔví lɛ́ɛ mi, mǐ jló ɖɔ mi ní tunwun lě e fɛ́nú Mawu tɔn wa nǔ gbɔn ɖo agun e ɖo Masedwani lɛ́ɛ mɛ é. Nǔ gbo agunví lɛ́ɛ tawun ɖo fínɛ́, gbɔn wǔvɛ́ e yě mɔ lɛ́ɛ gbla mɛ. Lo ɔ́, xomɛhunhun yětɔn d'agba sɔ mɔ̌, bɔ yě nɔ́ ɖe xlɛ́ ɖɔ émí nɔ hun alɔ dó ná nǔ mɛ titewungbe; có nǔɖé ka ɖo yě sí ǎ. Nǔgbó ɖɔ nú mi wɛ un ɖe; yě ná nǔ lě e yě kpé wú gbɔn é; yě tlɛ lɛ́ ná hú lě e yě kpé wú gbɔn ɔ́ lɔ; yě ɖésúnɔ ɖó jlǒ, bó byɔ́ mǐ, bó dó tagba tɔn nú mǐ ɖésú, ɖɔ mǐ ní kɛnklɛ́n, bónú émí lɔ ná sɛ́ nǔ dó mɛɖeɖóvo Mawu tɔn lɛ́ɛ, bó ná dó dó alɔ yě. Yě bló hú gǎn lě e mǐdɛɛ lɛ́ɛ lin gbɔn é; yě tó sɔ́ yěɖée jó nú Aklúnɔ hwɛ̌, bɔ énɛ́ ɔ́ gúdo ɔ́, gbɔn jlǒ Mawu tɔn gbla mɛ ɔ́, yě sɔ́ yěɖée jó nú mǐ lɔmɔ̌. Énɛ́ ɔ́ wú wɛ mǐ sa vo nú Títu ɖɔ ní wá mi gɔ́n, bó ná dlɛ́n azɔ̌ ɔ́ d'é nu lě e é kó jɛ wú gbɔn ɖ'ayǐ é, bó ná dó dɔn mi nú mi ná wa wǎn-yíyízɔ́ énɛ́ yi fó. Mi jɛ dɔkun ɖo nǔ bǐ mɛ: mi jɛ dɔkun ɖo nǔɖiɖi mɛ, ɖo Mawuxó ɖiɖɔ mɛ, ɖo nǔtunwuntunwun mɛ, ɖo bǐbí ɖó dó nǔ wú maɖódogbó, kpódó wǎn yíyí e mi ɖó nú mǐ é kpán mɛ. Énɛ́ ɔ́ wú ɔ́, mǐ jló ɖɔ mi ní ɖe xlɛ́ ɖɔ émí jɛ dɔkun ɖo wǎn-yíyízɔ́ énɛ́ lɔ mɛ. É nyí acɛ kpa nú mi wɛ un ɖe ǎ; lo ɔ́, un ɖɔ bǐbí ɖó dó azɔ̌ wǔ mɛɖé lɛ́ɛ tɔn nú mi, bó ná dó kpɔ́n ɖɔ wǎn yíyí e mi ɖó nú mǐ ɔ́ nyí wǎn yíyí nǔgbó a jí. Đó mi tunwun wǔ e Aklúnɔ mǐtɔn Jezu Klísu jɔ mi é: éyɛ́ mɛ e nyí dɔkunnɔ ɔ́, é sɔ́ éɖée dó bló wamamɔnɔ dó ta mitɔn mɛ, bó ná dó dó dɔkun nú mi gbɔn wamamɔnɔ nyínyí tɔn gbla mɛ. Énɛ́ ɔ́, un ná ɖɔ nǔ e un lin dó nǔ énɛ́ wú ɔ́ nú mi: é nyɔ́ nú mi ɖɔ nǔ e wa ji mi jɛ ɖo xwe ɖě ɔ́ mɛ ɔ́, mi ní bló yi fó. Mi wɛ jɛ nǔ wa jí jɛ nukɔn; é ka nyí énɛ́ kɛ́ɖɛ́ mɛ wɛ mi jɛ nukɔn ɖe ǎ; lo ɔ́, xwe ɖě ɔ́ mɛ ɔ́, mi lɛ́ ɖó jlǒ ɖagbe, bó ná wa nǔ. Hǔn din ɔ́, mi bo dlɛ́n azɔ̌ énɛ́ d'é nu, bó wa yi fó; jlǒ ɖagbe e mi ɖó, bó ɖɔ émí ná wa azɔ̌ ɔ́, mi zé jlǒ ɖagbe mɔ̌hunkɔtɔn dó bló yi fó; mi bló mɔ̌ kpódó nǔ e ɖo mi sí é kpán. Đó, nú è sɔ́ jlǒ ɖagbe dó ná nǔ mɛ ɔ́, nǔ e ɖo mɛ sí ɔ́ wɛ Mawu nɔ́ kpɔ́n, bó nɔ yí nǔníná énɛ́; é nyí nǔ e ma ɖo mɛ sí ǎ ɔ́ wɛ é nɔ kpɔ́n ǎ. É nyí è nǎ sɔ́ nǔ e ɖo mɛ sí é bǐ ná mɛ dó dó alɔ mɛ, bó wá jɛ do tɔn ɖɔ wɛ è ɖe ǎ; lo ɔ́, mɛ e ná nǔ wɛ è ɖe é kpó mɛ kpó bǐ ná nɔ zɛ̌nzɛ̌n. Din ɔ́, nǔ ɖo mi sí ganjí, bɔ mi hɛn ɔ́, mi ná gɔ́ alɔ nú mɛ e nǔɖé hudó lɛ́ɛ. Énɛ́ ɔ́, nú nǔɖé wá hudó mi lɔmɔ̌ gbeɖé, bónú yě lɔ ɖó ganjí ɔ́, yě ná dó alɔ mi. Lě e mɛ bǐ ná nɔ zɛ̌nzɛ̌n gbɔn ɔ́ nɛ́. Lě e nǔ e è wlán dó Mawuxówéma ɔ́ mɛ ɔ́ ɖɔ gbɔn é nɛ́; é wɛ nyí ɖɔ: “Mɛ e bɛ́ gěgé tɔn kplé ɔ́, é ɖó dín ǎ; mɛ e ka bɛ́ kpɛɖé ɔ́, é hwedó e ǎ.” Susu nú Mawu e sɔ́ dó ayi mɛ nú Títu, bɔ é bí dó mi wú mǐ ɖɔhun é! Títu yí gbe nú nǔ e mǐ byɔ́ ɛ é; nǔ e lɛ́ hú mɔ̌ ɔ́ wɛ nyí ɖɔ bǐbí ɖó dó nǔ wú sín akpakpa sɔ́ ɛ káká bɔ é ɖésúnɔ ɖɔ kpó jlǒ é ɖésúnɔ tɔn kpó ɖɔ émí ná wá mi gɔ́n. Mǐ sɛ́ nɔví e agun lɛ́ɛ bǐ nɔ kpa, ɖó lě e é nɔ wa Wɛn Ɖagbe jlájlázɔ́ ɔ́ gbɔn é wú ɔ́ dó, bɔ é xwedó Títu. Énɛ́ ɔ́ kɛ́ɖɛ́ wɛ ǎ; nɔví mǐtɔn énɛ́ ɔ́ wɛ agun lɛ́ɛ ɖe, bɔ é ná xwedó mǐ gbɔn to lɛ́ɛ mɛ to lɛ́ɛ mɛ, bɔ mǐ ná wa wǎn-yíyízɔ́ énɛ́ ɔ́ nú susu Aklúnɔ tɔn, bó ná ɖe jlǒ e mǐ ɖó, bó ná dó alɔ mɛ ɖě lɛ́ɛ ɔ́ xlɛ́. Mǐ ɖo nǔ bǐ bló wɛ, bónú nǔníná ɖaxó énɛ́ ɔ́, mɛɖé ma wá mɔ nǔɖé ɖɔ dó lě e mǐ zán gbɔn é wú ó. Mǐ ba ná nɔ́ wa nǔ ɖagbe; é ka nyí nǔ e nɔ́ nyɔ́ Aklúnɔ nukún mɛ ɔ́ kɛ́ɖɛ́ wɛ mǐ ná nɔ́ bló ǎ; lo ɔ́, mǐ ná nɔ́ bló nǔ e nɔ́ nyɔ́ gbɛtɔ́ lɛ́ɛ lɔmɔ̌ nukún mɛ é. Mǐ sɛ́ nɔví mǐtɔn ɖěvo kpódó yě kpán dó; mǐ tɛ́n ɛ kpɔ́n gbɔn ali gěgé xo; é ka nɔ ɖe xlɛ́ hwe lɛ́ɛ bǐ nu ɖɔ émí bí dó azɔ̌ wú; amɔ̌ din ɔ́, ɖó jiɖiɖe ɖaxó e é ɖó dó mi wú ɔ́ wútu ɔ́, bǐbí ɖó dó azɔ̌ wú tɔn lɛ́ jɛjí. Títu ɔ́, azɔ̌gbɛ́ ce wɛ éyɛ́ nyí, bó nɔ́ wa azɔ̌ xá mì, bó ná dó dó alɔ mi. Nɔví ɖě lɛ́ɛ e xwedó e lɛ́ɛ ɔ́, mɛsɛ́dó agun lɛ́ɛ tɔn wɛ yě nyí, bó ɖo azɔ̌ wa wɛ nú susu Klísu tɔn. Mi ɖe xlɛ́ yě ɖɔ mi yí wǎn nú yě nǔgbó, bónú agun lɛ́ɛ ná mɔ ɖɔ mi yí wǎn nú yě, bó ná tunwun ɖɔ ée mǐ ɖo gǔgó ɖó mi wú wɛ ɔ́, hwɛ mǐtɔn jɔ. Nǔ e è sɛ́ dó mɛɖeɖóvo Mawu tɔn e ɖo Judée lɛ́ɛ, bó dó dó alɔ yě ɔ́, é byɔ́ dandan ɖɔ ma wlán wěma sɛ́ dó mi d'é wú ǎ. Nǔgbó ɔ́, un tunwun jlǒ ɖagbe e mi ɖó ɔ́, bó nɔ́ zé mi dó jlá ajɔ̌ ná ɖo Masedwaninu lɛ́ɛ gɔ́n, bó nɔ́ ɖɔ: “Nɔví e ɖo Akáyi lɛ́ɛ ko ɖo gbesisɔ mɛ, bó ná ná nǔ mɛ sín xwe ɖě ɔ́ mɛ ɖokpóó.” Bǐbí ɖó dó azɔ̌ wú mitɔn zɔ́n, bɔ akpakpa sɔ́ mɛ gěgé ɖo yě mɛ. É ɖo mɔ̌ có, un ɖo nɔví élɔ́ lɛ́ɛ sɛ́ dó mi wɛ, bónú kpa e mǐ kpa mi ɖó nǔ énɛ́ wú ɔ́ ní ma wá nyí nǔ yǎyá ó: un jló ɖɔ mi ní ɖo gbesisɔ mɛ nǔgbó, lě e un ɖɔ gbɔn é. É ma nyí mɔ̌ ǎ ɔ́, ényí Masedwaninu lɛ́ɛ kpó nyɛ kpó wá, bó má mɔ mi ɖo gbesisɔ mɛ ǎ ɔ́, winnyá ná hu mǐ ɖaxó, ɖó lě e mǐ kó ɖó ji ɖe dó mi wú sɔ́ é wútu; mi lɔ ná mɔ winnyá. Hǔn, un mɔ ɖɔ é ɖo dandan mɛ nú ma sa vo nú nɔví énɛ́ lɛ́ɛ ɖɔ yě ní wá gɔ̌n mitɔn jɛ nukɔn nú mǐ, bónú nǔníná e mi ko dó akpá tɔn, bó ná ná kpódó xomɛnyínyɔ́ kpó ɔ́, yě ná sɔ́ nǔ tɔn ɖ'ayǐ. Énɛ́ ɔ́, hwenu e un ná wá ɔ́, é ná ko ɖo alɔ jí, bɔ é ná nyí xlɛ́ ɖɔ mi nɔ́ ná nǔ mɛ kpódó ayixa ɖagbe kpó; ní ma nyí dandan sín nǔ ó. Mi ka flín xógbe élɔ́: mɛ e dó jinukún kpɛví ɖé ɔ́, kpɛví ɖé wɛ é nɔ ya; mɛ e ka dó gěgé ɔ́, gěgé tɔn wɛ é nɔ́ ya. Hǔn, mɛ ɖokpó ɖokpó ɖó ná ná nǔ mɛ lě e é lin gbɔn ɖo ayi tɔn mɛ é; ní ma ná nǔ mɛ, bónú é lɛ́ vɛ́ n'i, abǐ ní nyí dandan sín nǔ n'i ó. Đó Mawu yí wǎn nú mɛ e nɔ ná nǔ mɛ kpódó xomɛhunhun kpó é. Mawu ɖó acɛ e ná ná nǔ ɖagbe ɖagbe tɛnmɛ tɛnmɛ lɛ́ɛ bǐ mi é, é ná ná mi, bɔ é ná túnflá, bónú mi ná ɖó nǔ e ɖo tají nú mi lɛ́ɛ bǐ hwebǐnu, bó ná zán, bɔ é ná lɛ́ kpo ɖo mi sí ganjí, nú azɔ̌ ɖagbe lɛ́ɛ bǐ. Lě e Mawuxówéma ɔ́ ɖɔ gbɔn é; é wɛ nyí ɖɔ: “É ná nǔ wamamɔnɔ lɛ́ɛ bɔ é sukpɔ́. Hwɛjijɔ tɔn ɖo te tɛgbɛ.” Mawu e nɔ ná jinukún nǔkúndótɔ́, bó nɔ́ ná nǔɖuɖu, bɔ è nɔ ɖu ɔ́ ná ná jinukún e hudó mi ɔ́ bǐ mi, bó ná zɔ́n bɔ é ná su, bɔ hwɛjijɔ e mi ɖó ɔ́ ná ná sínsɛ́n gěgé. É ná dó dɔkun gěgé nú mi hwebǐnu, bónú mi ná sixú nɔ ɖe xlɛ́ hwɛhwɛ ɖɔ émí nɔ́ ná nǔ mɛ kpó xomɛhunhun kpó, bɔ mɛ gěgé ná nɔ́ dó kú nú Mawu ɖó nǔ e mi nɔ ná, bɔ mǐ nɔ́ sɔ́ yi jó nú yě lɛ́ɛ wú. Đó azɔ̌ énɛ́ e wa wɛ mi ɖe ɔ́, é nyí nǔ e hudó mɛɖeɖóvo Mawu tɔn lɛ́ɛ kɛ́ɖɛ́ wɛ é nɔ́ gló nú yě ǎ; lo ɔ́, é nɔ́ lɛ́ zɔ́n, bɔ kú dó nú Mawu sín ɖɛ nɔ sukpɔ́, ɖó nǔ e é wa nǔ yě lɛ́ɛ wú. Azɔ̌ énɛ́ ná ɖe nǔ e mǐ nyí ɔ́ xlɛ́, bɔ mɛ gěgé ná kpa susu nú Mawu ɖó tónú e mi se nú Mawu, bó nɔ ɖe nǔɖiɖi e mi ɖó nú Wɛn Ɖagbe Klísu tɔn ɔ́ xlɛ́ é wú; yě ná lɛ́ kpa susu nú Mawu, ɖó lě e mi nyɔ́ xomɛ, bó nɔ má dɔkun mitɔn lɛ́ɛ xá yě, kpó mɛ ɖě lɛ́ɛ kpó gbɔn é wú. Đó fɛ́nú tobutóbú e Mawu gba kɔn dó mi jí ɔ́ wútu wɛ yě nɔ́ xo ɖɛ nú mi kpó wǎn yíyí ɖaxó kpó. Mi nú mǐ ná dó kú nú Mawu ɖó nǔníná tɔn e d'agba bɔ è ma sixú jlɛ́ ǎ é wú. Nyɛ Pɔ́lu e è nɔ ɖɔ, nú un ɖo kpɔ́ xá mi ɔ́, un nɔ fá, un ka ɖo zɔ ɔ́ un nɔ wa adǎn sɛ́ dó mi ɔ́, nyɛ ɖésú wɛ ɖo nǔ élɔ́ byɔ́ mi wɛ; gbɔn xomɛfífá kpó xomɛnyínyɔ́ Klísu tɔn kpó mɛ ɔ́, un ɖo vo sa nú mi wɛ ɖɔ: mi ma wa nǔ, bónú ma ɖe lě e un kpan akɔ́n gbɔn ɔ́ xlɛ́ mi hwenu e un ná ɖo mi gɔ́n é ó; ɖó un ɖó gǎnjɛwú ɖɔ un ná kpan akɔ́n dó ɖɔ xó nú mɛ e nɔ lin ɖɔ tito gbɛtɔ́ tɔn wɛ mǐ nɔ́ xwedó, dó wa nǔ ná lɛ́ɛ é. Agbaza gbɛtɔ́ tɔn mɛ wɛ mǐ ɖe nǔgbó; mǐ ka zé walɔ gbɛtɔ́ tɔn dó ɖo ahwan fun ná wɛ ǎ. Ahwanfunnú e dó fun ahwan ná wɛ mǐ ɖe lɛ́ɛ nyí gbɛtɔ́ gbɛmɛ fí tɔn lɛ́ɛ tɔn ǎ: ahwanfunnú hlɔ̌nhlɔ́nnɔ Mawu tɔn e è nɔ dó mu ahohó lɛ́ɛ ná ɔ́ wɛ. Mǐ nɔ́ gba linlin e ma sɔgbe ǎ lɛ́ɛ bǐ dó. Nǔ e è sɔ́ goyíyí dó glɔ́n ali ná, bónú è ma tunwun Mawu ó lɛ́ɛ bǐ ɔ́, mǐ nɔ́ flí bǐ xwe; mǐ nɔ́ wlí linlin lɛ́ɛ bǐ dó gan, bó ná dɔn yě nú yě ná se tónú nú Klísu. Mǐ ɖo gbesisɔ mɛ, bónú mi se tónú bɔ nǔ bǐ vɔ ɖ'é wú tlóló ɔ́, mǐ ná dɔn tó nú tónúmase sín nǔwiwa lɛ́ɛ bǐ. Nukúnta wɛ mi nɔ kpɔ́n nǔ lɛ́ɛ ɖe kpowun. Ényí mɛɖé gán jɛ wú ɖɔ émí nyí Klísu tɔn hǔn, mɛ ɔ́ ní tunwun dó ayi mɛ ɖɔ lě e é nyí Klísu tɔn ɔ́, mɔ̌ wɛ mǐ lɔ nyí Klísu tɔn. Đó nú un na bo gó zɛ jlɛ̌ wú kpɛɖé ɖó acɛ e Aklúnɔ ná mì ɔ́ wútu ɔ́, winnyá ná hu mì ǎ; acɛ énɛ́ ɔ́ sín azɔ̌ wɛ nyí ɖɔ mǐ ná bló bɔ gbɛ̌kplékplé mitɔn ná yi nukɔn ɖo nǔɖiɖi mɛ; é nyí mǐ ná bló bɔ mi ná gbadó wɛ ǎ. Un jló ɖɔ é ní ma nyí xɛsi ba ná dó mi wɛ un ɖe, bó ɖo nǔ e ɖo wěma ce mɛ lɛ́ɛ wlán sɛ́ dó mi wɛ ó. Nǔgbó ɔ́, nǔ e è nɔ ɖɔ ɔ́ ɖíe: “Pɔ́lu ɔ́, xó e é nɔ wlán dó wěma tɔn lɛ́ɛ mɛ ɔ́ nɔ ɖó hlɔ̌nhlɔ́n, bó nɔ ɖó zin; nú é ka ɖo tɛ́ntin mǐtɔn ɔ́, é nɔ ɖó gǎn ɖé ǎ, bɔ lě e é nɔ́ ɖɔ xó gbɔn ɔ́ nɔ́ blá wǔ.” Mɛ e nɔ ɖo xó énɛ́ ɖɔ wɛ ɔ́, ní tunwun ganjí ɖɔ: hwenu e mǐ ɖo zɔ ɔ́, nǔ e mǐ nɔ́ wlán sɛ́ dó mi lɛ́ɛ kún gbɔn vo nú nǔ e mǐ ná wa hwenu e mǐ ná ɖo tɛ́ntin mitɔn lɛ́ɛ é ó. Nǔgbó ɔ́, mǐ ná glá bó sɔ́ mǐɖée ɖó mɛɖé há jí, abǐ mǐ ná jlɛ́ mǐɖée dó mɛɖé lɛ́ɛ wú, ɖo yě mɛ e nɔ sɔ́ yěɖée dó mɔ nǔgɛ́n ná lɛ́ɛ mɛ ǎ. Xlonɔ wɛ nú yě, ɖó yě ɖésúnɔ wɛ nɔ́ bló jlɛ̌nú yětɔn, bó nɔ dó jlɛ́ yěɖée ná; yě nɔ jlɛ́ yěɖée dó yěɖée wú. Mǐdɛɛ lɛ́ɛ ɔ́, mǐ ná jlá ajɔ̌ nú mǐɖée zɛ jlɛ̌ e è ɖǒ nú mǐ ɔ́ wú ǎ; azɔ̌ e Mawu sɔ́ dó así nú mǐ ɔ́, fí e é ɖɔ mǐ ní wá yi jɛ, bó ná gbe tɔn mǐ bɔ mǐ wa ɖo mi gɔ́n ɔ́, fínɛ́ wɛ mǐ ná jlá ajɔ̌ nú mǐɖée yi ɖó te ɖó. Azɔ̌ e mǐ wa ɖo mi gɔ́n ɔ́ lɔ ɖ'é mɛ. Mǐ zɛ jlɛ̌ e è ɖǒ nú mǐ ɔ́ wú, bónú é ná nyí ɖɔ mǐ kún hun káká wá gɔ̌n mitɔn ó ǎ; ɖó mǐ hun káká wá mi gɔ́n, bó wá jlá Wɛn Ɖagbe e ɖɔ xó dó Klísu wú ɔ́ mi. Énɛ́ ɔ́, mǐ nɔ́ tɔ́n sín jlɛ̌ e è ɖǒ ɔ́ mɛ ǎ; mǐ nɔ́ zé azɔ̌ e mɛɖěvo lɛ́ɛ wa ɔ́ dó jlá ajɔ̌ nú mǐɖée ǎ; é nyɔ́ wa ɔ́, mǐ ɖo nukún ɖó wɛ ɖɔ nǔɖiɖi mitɔn ná jɛjí, bónú mǐ ná sixú wa azɔ̌ e hú gǎn mɔ̌ é ɖo tɛ́ntin mitɔn, bó ná nɔ jlɛ̌ e Mawu ɖó nú mǐ ɔ́ mɛ tɛgbɛ. Énɛ́ ɔ́ gúdo ɔ́, mǐ hɛn ɔ́, mǐ ná jlá Wɛn Ɖagbe ɔ́ hɛn yi to e zɛ mi wú lɛ́ɛ gbé jí, ɖó mǐ jló ná zé azɔ̌ e mɛɖěvo lɛ́ɛ ko wa ɖo yě ɖésúnɔ sín azɔ̌ jí ɔ́, dó jlá ajɔ̌ nú mǐɖée ǎ. É ka ɖo mɔ̌ có, lě e Mawuxówéma ɔ́ ɖɔ gbɔn ɔ́ ɖíe: “Nú mɛɖé jló ná jlá ajɔ̌ nú éɖée ɔ́, ní jlá ɖó Aklúnɔ ɔ́ wú.” Nǔgbó ɔ́, é nyí mɛ e nɔ ɖɔ xó ɖagbe dó éɖée wú ɔ́ wɛ Aklúnɔ nɔ yí wǎn ná ǎ; lo ɔ́, mɛ e wú Mawu nɔ ɖɔ xó ɖagbe dó ɔ́ wɛ é nɔ yí wǎn ná. Ényí mi sixú gbɔ nú ma ɖɔ tamɛmasɔgbenánɔ xó kpɛɖé nú mi ɔ́, nyɔ́ wɛ lo nyɔ́. Nǔgbó wɛ! Mi gbɔ ma ɖɔ! Un nɔ hwan wǔ dó mi; wǔhwinhwan e gosín Mawu gɔ́n ɔ́ wɛ un ka nɔ hwan dó mi; ɖó ɖyɔ̌vǐ ɖo alɔjí mímɛ́ ɖɔhun wɛ mi cí, bɔ un ko dó akpá nú asú ɖokpó géé ɖɔ un ná sɔ́ mi da n'i; asú énɛ́ ɔ́ wɛ nyí Klísu. Lo ɔ́, un ɖo xɛsi ɖi wɛ ɖɔ lě e mi tɛ́ dó Klísu wú ɖo gbejíninɔ kpódó mǐmɛ́ kpán mɛ gbɔn ɔ́, nǔɖé ní ma flú ayixa mitɔn, bónú mi ná jó Klísu dó, lě e Ɛvu jó éɖée dó, bɔ dan sɔ́ bǐbí ɖó nukɔn, bó ɖó nǔvú dó flú i é ɖɔhun ó. Đó ényí mɛɖé wá ɖɔ Jezu ɖé xó nú mi bɔ é gbɔn vo nú Jezu e xó mǐ ɖɔ nú mi ɔ́, mi nɔ xwɛ bó nɔ́ ɖótó e ganjí, bó nɔ́ lɛ́ ɖo gbesisɔ mɛ, bó ná yí yɛ kpó wɛn kpó e gbɔn vo nú Yɛ Mawu tɔn kpódó Wɛn Ɖagbe e mǐ wa jlá mi bɔ mi yí é kpán. Un mɔ ɖɔ mɛ énɛ́ lɛ́ɛ e mi nɔ mɔ dó mɔ mɛsɛ́dó ɖaxó ɖaxó lɛ́ɛ ɔ́, un kún hwe hú yě ɖo nǔ ɖěbǔ mɛ ó. Đo xóɖiɖɔ sín alixo ɔ́, è sixú ɖɔ un kún nyɔ́ xó ɖɔ ó; amɔ̌ dandan mɛ ɔ́, ɖo nǔtunwuntunwun lixo ɔ́, è sixú ɖɔ un kún tunwun nǔ ó ǎ; mǐ ko ɖe xlɛ́ mi céɖécéɖé gbɔn ali bǐ xo, bó ɖe xlɛ́ mi céɖécéɖé ɖo nǔ bǐ mɛ. Hwenu e un jlá Wɛn Ɖagbe Mawu tɔn ɔ́ mi ɔ́, vɔ̌nu wɛ un jlá mi; un sɔ́ nyɛɖée hwe, bó ná dó sɔ́ mi su. Ée un wa nǔ gbɔn mɔ̌ ɔ́, nǔ wɛ un wa nyi do a? Un yí gbe bɔ agun ɖěvo lɛ́ɛ nɔ sú axɔ́ mì; ényí è nǎ ɖɔ ɔ́, é cí mɛ ɖě lɛ́ɛ sín akwɛ́ wɛ un fin, bó dó wá dó alɔ mi ɖɔhun. Hwenu e un ɖo mi gɔ́n ɔ́, nǔɖé hú dó mì ɔ́, agban tɔn nɔ kpɛn mɛ ɖěbǔ ǎ, ɖó nɔví e gosín Masedwani lɛ́ɛ hɛn nǔ e ɖo tají nú mì lɛ́ɛ bǐ wá nú mì. Un hɛn nyɛɖée bó ma nyí agban ɖo kɔ jí nú mi ɖo nǔ ɖěbǔ mɛ ó; un ka ná lɛ́ kpo ɖo nyɛɖée hɛn wɛ mɔ̌. Un zé Klísu e ɖo nyɛ mɛ ɔ́ sín nǔgbó dó ɖo ɖiɖɔ nú mi wɛ ɖɔ agban e un ma nyí bó ɖo kɔ jí nú mɛɖé ǎ ɔ́ wú wɛ un nɔ ɖo ajɔ̌ jlá nú nyɛɖée wɛ; mɛɖé ka yí sín así ce ɖo fí ɖěbǔ ɖo Akáyi gbé ɔ́ bǐ jí ǎ. Étɛ́wú un ɖɔ mɔ̌? Un yí wǎn nú mi ǎ wútu wɛ a? Mawu tunwun ganjí ɖɔ un yí wǎn nú mi. Un ná ɖo nǔ wa wɛ lě e bló gbɔn wɛ un ɖe din é, bɔ yě mɛ e ɖo ali ba wɛ, bó ná jlá ajɔ̌ nú yěɖée, bó ná ɖɔ émí ɖo azɔ̌ ɖokpó ɔ́ wa wɛ mǐ ɖɔhun lɛ́ɛ ɔ́, nǔ e wú yě ná ɖó dó ɔ́, un ná sú ali tɔn dó yě. Mɛ énɛ́ lɛ́ɛ ɔ́, mɛsɛ́dónyíjɛtɔ́ wɛ yě nyí; mɛwlóɖutɔ́ wɛ yě nyí, bó nɔ́ sɔ́ mɛsɛ́dó Klísu tɔn sín ninɔmɛ. Nǔkpácámɛ ɖé ka ɖo fínɛ́ ǎ, ɖó Satáan ɖésú hɛn ɔ́, é ná sɔ́ wɛnsagun wěziza tɔn sín ninɔmɛ. Hǔn nú azɔ̌watɔ́ tɔn lɛ́ɛ lɔ nɔ sɔ́ azɔ̌watɔ́ nǔ e sɔgbe ɔ́ tɔn sín ninɔmɛ ɔ́, nǔkpácámɛ ɖé sɔ́ ɖo fínɛ́ ǎ; amɔ̌, lě e yě ná vɔ gbɔn ɔ́ ná sɔgbe xá nǔ e yě wa é. Un lɛ́ ɖo vǐvɔ́ ɖɔ wɛ ɖɔ mɛ ɖěbǔ má mɔ mì dó mɔ taɖunɔ ó; ényí mɔ̌ wɛ mi ka lɛ́n gbɔn hǔn, mi bo yí mì dó yí taɖunɔ ná, bónú nyɛ lɔmɔ̌ ma sixú jlá ajɔ̌ nú nyɛɖée kpɛɖé. Dandan mɛ ɔ́, nǔ e ɖɔ wɛ un ɖe din ɔ́, é nyí nǔ e Aklúnɔ jló é ǎ; ɖó ninɔmɛ énɛ́ e mɛ un ɖe, bó ɖo ajɔ̌ jlá nú nyɛɖée wɛ ɔ́, un nɔ ɖɔ xó taɖunɔ wɛ un nyí ɖɔhun. Đó mɛ gěgé ɖěvo lɛ́ɛ nɔ xwedó linlin gbɛtɔ́ tɔn kpowun, bó nɔ ɖo ajɔ̌ jlá nú yěɖée wɛ; énɛ́ wú ɔ́, nyɛ lɔmɔ̌ ná jlá ajɔ̌ nú nyɛɖée. Tɛgbɛ jɛ́n mi nɔ yí gbe, bó nɔ ɖótó tamɛmasɔgbenánɔ lɛ́ɛ; có nǔnywɛ́tɔ́ wɛ mi ka nyí nɛ́! Mi nɔ yí gbe, bɔ è nɔ kpa acɛ nú mi kannumɔ ɖɔhun, abǐ è nɔ wló mi ɖu; mi nɔ yí gbe bɔ è nɔ blɛ́ mi ɖu; mi nɔ yí gbe bɔ è nɔ kpɔ́n ahɔnxlomɛ nú mi; mi nɔ yí gbe bɔ è nɔ gba nukún mɛ nú mi. Xó ɔ́, ɖiɖɔ tɔn hu winnyá: mǐ ɖe gǎnmaɖó mǐtɔn xlɛ́ dín. Có ényí mɛɖé glá, bó zé nǔɖé dó jlá ajɔ̌ nú éɖée ɔ́, nyɛ lɔmɔ̌ ná glá, bó ná zé nǔ énɛ́ dó jlá ajɔ̌ nú nyɛɖée. (Un ɖo xó ɖɔ wɛ taɖunɔ wɛ un nyí ɖɔhun.) É ma nyí Eblée wɛ yě nyí a? Nyɛ lɔmɔ̌ ɔ́, Eblée wɛ un nyí. É ma nyí Izlayɛ́li ví wɛ yě nyí a? Nyɛ lɔmɔ̌ ɔ́, Izlayɛ́li ví wɛ un nyí. É ma nyí Ablaxámu ví wɛ nyí a? Nyɛ lɔmɔ̌ ɔ́, Ablaxámu ví wɛ un nyí. É ma nyí azɔ̌watɔ́ Klísu tɔn wɛ yě nyí a? Din ɔ́, un ná ɖɔ xó ta ce mɛ ma sɔgbe ɖěbǔ ɖɔhun: un nyí Klísu sín azɔ̌watɔ́ hú yě; un wa azɔ̌ hú yě; è nɔ wlí mì dó gankpá mɛ hú yě; è xo mì dín hú yě; kúdán gbo mì hú yě. Jwifu lɛ́ɛ ɔ́, azɔn atɔ́ɔ́n wɛ yě sɛ́n lanbá kanɖé é hwe ɖokpó (39) nú mì. Hlɔ̌manu lɛ́ɛ ɔ́, azɔn atɔn wɛ yě ɖǒ kpo nú mì, bó nyi awǐnnyaglo bó ná dó hu mì ná azɔn ɖokpó; azɔn atɔn wɛ tɔjíhún syɔ́ dó mì; un nɔ tɔ jí nú kéze ɖokpó zǎn ɖokpó. Tomɛ tobutóbú e un yi lɛ́ɛ ɔ́, adǎn gbo mì ɖo tɔ jí, bó gbo mì ɖo to ce mɛ nu Jwifu lɛ́ɛ sín alɔ mɛ, bó gbo mì ɖo mɛ e ma nyí Jwifu ǎ lɛ́ɛ sín alɔ mɛ; adǎn gbo mì ɖo toxo lɛ́ɛ mɛ, bó gbo mì ɖo gbětótló lɛ́ɛ mɛ; adǎn gbo mì ɖo xu jí, bó gbo mì ɖo nɔvínyíjɛtɔ́ lɛ́ɛ sín alɔ mɛ. Un wa azɔ̌ syɛ́nsyɛ́n lɛ́ɛ, bɔ adǎn ɖaxó ɖaxó lɛ́ɛ gbo mì; un nɔ sixú dɔ́ amlɔ hwɛhwɛ ǎ; un nɔ sixú ɖu nǔ ǎ; avivɔ dó ya nú mì; avɔ hán mì. Gɔ́ nú nǔ énɛ́ lɛ́ɛ bǐ ɔ́, ayǐhɔ́ngbe ayǐhɔ́ngbe ɔ́, nǔ e ɖo hǔnmɛ nú mì nú agun lɛ́ɛ bǐ ɔ́ nɔ nyí agban bó nɔ́ kpɛn mì. Ényí mɛɖé ma ɖó gǎn ǎ ɔ́, un nɔ ɖɔ nyɛ lɔ kún ɖó gǎn ó; ényí mɛɖé jɛ hwɛ mɛ ɔ́, é nɔ nyí wǔvɛ́ ɖaxó nú mì. Nú é byɔ́ ɖɔ ma jlá ajɔ̌ nú nyɛɖée ɔ́, nǔ e nɔ ɖe gǎnmaɖó ce xlɛ́ ɔ́ bǐ wɛ un ná dó jlá ajɔ̌ nú nyɛɖée. Mawu Aklúnɔ Jezu sín Tɔ́ tunwun ɖɔ un kún nɔ ɖó adingban ó. Susu nú nyǐkɔ tɔn hwe lɛ́ɛ bǐ nu! Hwenu e un ɖo Damási ɔ́, tokpɔngán e ɖo azɔ̌ wa nú axɔ́sú Aletási wɛ ɔ́ fɔ sɔ́ja ɖó to ɔ́ sín hɔn lɛ́ɛ jí, bónú yě ná wlí mì. Lo ɔ́, è zě mì dó xasun mɛ, bó zé mì gbɔn flɛtɛ́li e è ɖe dó dǒ e è do xá toxo ɔ́ ná lɛ́ɛ ɖokpó nu, bɔ un jɛ te ɖo dǒ ɔ́ gúdo, bó yi; lě e un gló yě gbɔn ɔ́ nɛ́. Hǔn, un ɖó ná jlá ajɔ̌ nú nyɛɖée; có é ka nyɔ́ mɔ̌ ǎ. Amɔ̌ din ɔ́, un ná ɖɔ xó dó nǔmimɔ kpódó nǔɖexlɛ́mɛ kpán e Aklúnɔ ná mì ɔ́ wú. Un tunwun klísusɛntɔ́ ɖokpó, bɔ xwe wɛ̌nɛ ɖíe ɔ́, è sɔ́ ɛ káká yi jǐnukúnsin e yi jǐ hú jǐnukúnsin lɛ́ɛ bǐ é; un tunwun nú agbaza tɔn wɛ è sɔ́ yi abǐ lǐndɔ̌n tɔn wɛ è sɔ́ yi ǎ; Mawu ɖokpónɔ wɛ tunwun. Nǔgbó wɛ! Un tunwun ɖɔ nya énɛ́ ɔ́, káká sɛ́xwé wɛ è sɔ́ ɛ yi; un lɛ́ ɖo vǐvɔ́ ɖɔ wɛ ɖɔ un kún tunwun nú agbaza tɔn wɛ è sɔ́ yi, abǐ lǐndɔ̌n tɔn wɛ è sɔ́ yi ó; Mawu ɖokpónɔ wɛ tunwun. É se xó e è ma sixú vɔ́ ɖɔ ǎ é, xó e è ma ka ná gbe gbɛtɔ́ ɖɔ ní ɖɔ ǎ é ɖo fínɛ́. Un ná jlá ajɔ̌ nú nyɛɖée ɖó nya énɛ́ tamɛ; lo ɔ́, un ná jlá ajɔ̌ nú nyɛɖée ɖó nyɛ ɖésúnɔ tamɛ ǎ, afi nú ma dó ɖɔ nǔ e nɔ ɖe gǎnmaɖó ce lɛ́ɛ bǐ xlɛ́ é. Ényí un jló ná jlá ajɔ̌ nú nyɛɖée ɔ́, un ná nyí taɖunɔ ǎ, ɖó xó nǔgbó wɛ un ná ɖɔ. Lo ɔ́, un nɔ lɔn bo nɔ jlá ajɔ̌ nú nyɛɖée ǎ; ɖó un jló ɖɔ mɛɖé ní ɖó linlin ɖé dó wǔ ce, nú é hú gǎn linlin e é ɖó dó nǔ e é mɔ bɔ un ɖo wiwa wɛ ɔ́, kpó nǔ e é se bɔ un ɖo ɖiɖɔ wɛ ɔ́ kpó wú ǎ. É ka ɖo mɔ̌ có, bónú goyíyí ma gɔ́ gbɛzán ce mɛ, ɖó nǔ ɖaxó ɖaxó énɛ́ lɛ́ɛ e Mawu nɔ ɖe xlɛ́ mì lɛ́ɛ wútu ó ɔ́, è sɛ́ azɔn baɖabaɖa ɖé dó mì, bɔ é cí wɛnsagun Satáan tɔn ɖé ɖɔhun, bó xo mì, bó glɔ́n ali nú mì, bónú goyíyí ma gɔ́ gbɛzán ce mɛ ó. Azɔn atɔn wɛ un sa vo nú Aklúnɔ, ɖɔ ní hwlɛ́n mì sín wǔvɛ́ énɛ́ mɛ. Bɔ Mawu yí gbe nú mì ɖɔ: “Wǔjɔmɛ ce wɛ nyí nǔ e hudó we ɔ́ bǐ, ɖó hwenu e a ma kpé nǔ wú ǎ ɔ́ wɛ hlɔ̌nhlɔ́n ce nɔ́ ɖe nǔwiwa tɔn lɛ́ɛ bǐ xlɛ́ dégbédégbé.” Hǔn, un ɖo gbesisɔ mɛ bó ná sɔ́ gǎnmaɖó ce dó jlá ajɔ̌ nú nyɛɖée kpó ayixa ce bǐ kpó, bónú hlɔ̌nhlɔ́n Klísu tɔn ná cyɔ́n alɔ jǐ ce. Énɛ́ ɔ́ wútu ɔ́, gǎnmaɖó ce nɔ́ dó xomɛhunhun nú mì ɖó Klísu wú. È ɖo zunzun mì wɛ ɖó Klísu wú ɔ́, xomɛ nɔ hun mì; nǔ ɖo gbigbo mì wɛ ɖó Klísu wú ɔ́, xomɛ nɔ hun mì; ya e è nɔ dó mì ɖó Klísu wútu lɛ́ɛ kpódó xɛsi e è nɔ dó nú mì ɖó Klísu wútu lɛ́ɛ kpán nɔ hun xomɛ nú mì, ɖó hwenu e un ma ɖó gǎn ǎ ɔ́, hwenɛ́nu wɛ un nɔ mɔ hlɔ̌nhlɔ́n. Un ɖo xó ɖɔ wɛ taɖunɔ wɛ un húzú ɖɔhun; lo ɔ́, mi wɛ zɔ́n mɔ̌; mi wɛ ná ko jɛ ahwan jǐ ce. Đó nú un ma tlɛ nyí nǔɖé ǎ ɔ́, un hwe hú mɛ e mi nɔ mɔ dó mɔ mɛsɛ́dó ɖaxó lɛ́ɛ é ɖo nǔ ɖěbǔ mɛ ǎ. Un wa azɔ̌ e ɖe xlɛ́ ɖɔ un nyí mɛsɛ́dó lɛ́ɛ ɖo tɛ́ntin mitɔn kpó hǔnkúkú titewungbe kpó: nǔwiwa énɛ́ lɛ́ɛ wɛ nyí wuntun tɛnmɛ tɛnmɛ lɛ́ɛ, nǔjlɛ́jlɛ́ tɛnmɛ tɛnmɛ lɛ́ɛ kpó nǔdábaɖa tɛnmɛ tɛnmɛ e Mawu bló gbɔn jǐ ce lɛ́ɛ kpó. Ani un ka wa nú agun ɖě lɛ́ɛ, bó ma wa nú midɛɛ lɛ́ɛ zɛ agban e un ma nyí bó kpɛn mi ǎ é wú? Agɔ énɛ́ e un jɛ dó mi ɔ́, mi bo sɔ́ kɛ mì. Nyɛ ɖíe ko lɛ́ ɖo gbesisɔ mɛ bó ja gɔ̌n mitɔn azɔn atɔngɔ́ e, un ka ná lɛ́ nyí agban bo kpɛn mi ǎ; mi ba wɛ un ɖe; akwɛ́ mitɔn ba wɛ un ɖe ǎ. Nǔgbó ɔ́, é nyí vǐ lɛ́ɛ wɛ ná sɔ́ nǔ e yě ɖǒ lɛ́ɛ dó tɔ́jú mɛjitɔ́ yětɔn lɛ́ɛ ná ǎ; lo ɔ́, mɛjitɔ́ lɛ́ɛ wɛ ná sɔ́ nǔ e yě ɖó lɛ́ɛ dó tɔ́jú vǐ yětɔn lɛ́ɛ ná. Nyɛ ɔ́, é ná hun xomɛ nú mì ɖɔ ma zán nǔ e un ɖó ɔ́ bǐ, bó zán nyɛ ɖésúnɔ dó dó alɔ mi ná. Lě e nyɛ yí wǎn nú mi sɔ ɔ́, midɛɛ lɛ́ɛ ná yí wǎn nú mì sɔ́ mɔ̌ ǎ wɛ a? Un nyí agban bo kpɛn mi ǎ nǔgbó. Lo ɔ́, mɛɖé lɛ́ɛ ná ɖɔ un sɔ́ sísɛ́ ɖó nukɔn, bó zé adingban dó ɖó mɔ nú mi bɔ mi jɛ mɛ. Un xo mi ɖu gbɔn mɛ e un sɛ́ dó mi lɛ́ɛ ɖě jí wɛ a? Un sa vo nú Títu ɖɔ ní wá gɔ̌n mitɔn; un sɛ́ é kpódó nɔví e mi tunwun ɔ́ kpán dó. Mi ná ɖɔ Títu ɔ́ xo émí ɖu wɛ a? Nyɛ kpó Titu kpó ɔ́, ayixa ɖokpó ɔ́ wɛ mǐ xwedó bó dó wa nǔ, bó zán gbɛ mǐtɔn gbɔn alɔkpa ɖokpó ɔ́ mɛ ǎ cé? Linlin wɛ mi ka ɖe sín hwe ɖé nu ɖɔ mǐ ɖo biba ná jɛ ahwan mǐɖée jí, ɖo nukɔn mitɔn a? Éeǒ, mǐ ɖo biba ná jɛ ahwan mǐɖée jí wɛ ǎ. Lě e Klísu jló gbɔn ɔ́ wɛ mǐ ɖo xó ɖɔ gbɔn wɛ ɖo Mawu nukɔn. Mɛvívɛ́ná mǐtɔn lɛ́ɛ mi, mǐ ɖo énɛ́ lɛ́ɛ bǐ ɖɔ nú mi wɛ, bó ná dó dɔn mi yi nukɔn ɖo nǔɖiɖi mɛ. Un ɖo xɛsi ɖi wɛ ɖɔ hwenu e un ná wá gɔ̌n mitɔn ɔ́, un ná wá mɔ mi ɖo lě e un ma jló gbɔn ǎ é, bɔ mi lɔmɔ̌ ná mɔ mì ɖo lě e mi ma jló gbɔn ǎ é. Un ɖo xɛsi ɖi wɛ ɖɔ un wá ɔ́, jlɛ kpó wǔhwinhwan kpó ná ɖo tɛ́ntin mitɔn; xomɛsin kpó agbahwlɛ́nxámɛ kpó ná ɖo tɛ́ntin mitɔn; mɛzunzun kpó xó ma sɔgbe kpó, goyíyí kpó nǔ hannyahannya wiwa kpó ná ɖo tɛ́ntin mitɔn. Un ɖo xɛsi ɖi wɛ ɖɔ gɔ̌n mitɔn e un ná wá din ɔ́, Mawu ce ná sɔ́ mì hwe ɖo nukɔn mitɔn; bɔ un ná ya avǐ dó mɛ tobutóbú e hu hwɛ ɖ'ayǐ, bó ma lɛ́ kɔ sín nǔ kwíji wiwa, agalilɛ, kpódó nǔ nyanya e yě wa lɛ́ɛ kpán gúdo ǎ lɛ́ɛ tamɛ. Azɔn atɔngɔ́ ɔ́ ɖíe un ja gɔ̌n mitɔn e. Lě e Mawuxówéma ɔ́ ɖɔ gbɔn ɔ́, “È dǒ hwɛ ɖé mɛɖé ɔ́, mɛ we, abǐ mɛ atɔn ɖó ná ɖe kúnnu ná.” Un ɖó xóɖɔɖ'ayǐnúmɛ ɖé, bó ná ɖɔ nú mɛ e ko hu hwɛ wá yi lɛ́ɛ kpó mɛ ɖě lɛ́ɛ bǐ kpó; un ko ɖɔ nú mi hwenu e un wá gɔ̌n mitɔn azɔn wegɔ́ ɔ́ é; amɔ̌ un lɛ́ ɖo vǐvɔ́ ɖɔ wɛ din e un ɖo zɔ é. Din tɔn e un ná wá gɔ̌n mitɔn ɔ́, un ná kpɔ́n bó ɖɔ xá mɛ ɖěbǔ ǎ. Mi ɖo nǔ e ɖe xlɛ́ ɖɔ Klísu nɔ ɖɔ xó gbɔn jǐ ce ɔ́ ba wɛ; un ko wá ɔ́, mi ná mɔ. Klísu wa mɛ ma ɖó gǎn nú ɖé ɖo tɛ́ntin mitɔn ǎ; lo ɔ́, hlɔ̌nhlɔ́n tɔn wɛ é nɔ ɖe xlɛ́ ɖo tɛ́ntin mitɔn. Nǔgbó wɛ; è ká ɛ nyi aklúzu jí ɖó gǎnmaɖó tɔn wú; lo ɔ́, é ɖo gbɛ ɖo hlɔ̌nhlɔ́n Mawu tɔn mɛ. Đo bǔ e mǐ ɖe xá ɛ ɔ́ mɛ ɔ́, mǐ lɔmɔ̌ ɖó gǎn ǎ; amɔ̌, mǐ ná ɖe xlɛ́ mi ɖɔ mǐ kpó e kpó ɖo gbɛ gbɔn hlɔ̌nhlɔ́n Mawu tɔn mɛ. Mi tɛ́n miɖée kpɔ́n, bó kíjé ayi miɖée tɔn mɛ kpɔ́n ɖɔ émí nɔ́ zán gbɛ ɖo nǔɖiɖi mɛ a jí? Mi tunwun ɖɔ Jezu Klísu ɖo tɛ́ntin émí tɔn; mɔ̌ wɛ ǎ cé? Afi nú mi jɛ ayǐ ɖo tɛ́nkpɔ́n mitɔn mɛ. Amɔ̌, un ɖi ɖɔ mi ná tunwun ɖɔ mǐdɛɛ lɛ́ɛ ɔ́, mǐ kún jɛ ayǐ ɖo tɛ́nkpɔ́n mɛ ó. É ka ɖo mɔ̌ có, mǐ ɖo vo sa nú Mawu wɛ ɖɔ mi ní ma wa nǔ nyanya ɖěbǔ ó; é nyí mǐ ná ɖe xlɛ́ gbɔn fí ɖɔ è ko tɛ́n mǐ kpɔ́n wɛ ǎ; lo ɔ́, ényí é ná bo cí mǐ ko jɛ ayǐ ɖo tɛ́nkpɔ́n mɛ ɖɔhun ɔ́, mǐ ní mɔ mi ɖo nǔ ɖagbe wa wɛ. Đó mǐ sixú wa nǔ ɖěbǔ, bɔ é ná gbɔn vo nú nǔgbó Mawu tɔn ǎ; nǔgbó Mawu tɔn ɔ́ jɛ́n mǐ sixú dó wa nǔ. Hwenu e mǐ ma ɖó gǎn ǎ, bɔ midɛɛ lɛ́ɛ ka ɖó ɔ́, mǐ nɔ jɛ awǎ; énɛ́ wú wɛ, mǐ nɔ́ lɛ́ byɔ́ ɖo ɖɛ mǐtɔn lɛ́ɛ mɛ ɖɔ mi ní húzú nǔɖagbewatɔ́ yi fó. Nǔ e wú un ɖo zɔ bó wlán nǔ énɛ́ lɛ́ɛ bǐ sɛ́ dó mi ɔ́ ɖíe: é wɛ nyí ɖɔ, hwenu e un ná wá nɔ gɔ̌n mitɔn ɔ́, un ma kpɔ́n dó acɛ e Aklúnɔ ná mì ɔ́ wú, bó nylá hun dó mi ó; acɛ énɛ́ e Aklúnɔ ná mì ɔ́, azɔ̌ tɔn wɛ nyí ɖɔ ma dó dó alɔ mi, bónú mi ná yi nukɔn ɖo nǔɖiɖi mɛ; é nyí ɖɔ un ná dó dɔn mi dó gǔdo wɛ ǎ. Nɔví lɛ́ɛ mi, din ɔ́, é su gbeɖé! Mi dó gǎn bó ná nyí nǔɖagbewatɔ́ yí fó; mi dó wǔsyɛ́n lanmɛ nú miɖée; mi ɖó gbe kpɔ́; mi fá xomɛ dó miɖée wú; énɛ́ ɔ́, Mawu wǎn yíyí kpó fífá kpó nɔ ɔ́ ná nɔ kpɔ́ xá mi. Mi kí nɔví nɔví sín si nú miɖée, dó dó gbe miɖée ná. Mɛɖeɖóvo Mawu tɔn lɛ́ɛ dó gbe sɛ́ dó mi. Fɛ́nú Aklúnɔ Jezu Klísu tɔn kpó wǎn yíyí Mawu tɔn kpó, kpódó kɔnɖókpɔ́ Yɛsinsɛn tɔn kpán ní nɔ kpɔ́ xá mi bǐ. Nyɛ Pɔ́lu, mɛsɛ́dó Jezu Klísu tɔn, mɛsɛ́dó Mawu Tɔ́ mǐtɔn e fɔ́n ɛ sín kú ɔ́ tɔn wɛ ɖo wěma élɔ́ sɛ́ dó mi wɛ. Un nyí mɛsɛ́dó gbɛtɔ́ lɛ́ɛ tɔn ǎ; gbɛtɔ́ ɖé wɛ sɛ́ mì dó ǎ. Nyɛ kpódó nɔví e ɖo fí lɛ́ɛ bǐ kpó wɛ ɖo wěma élɔ́ sɛ́ dó mi agun e ɖo Galati gbé jí lɛ́ɛ wɛ. Mawu Tɔ́ mǐtɔn kpódó Aklúnɔ mǐtɔn Jezu Klísu kpán ní ná fɛ́nú kpódó fífá kpó mi. Jezu Klísu énɛ́ wɛ sɔ́ gbɛ tɔn jó, dó hwɛ mǐtɔn lɛ́ɛ tamɛ, bó ná dó hwlɛ́n mǐ gán sín gbɛ nyanya e mɛ mǐ ɖe din é mɛ. Lě e Mawu mǐtɔn, Tɔ́ mǐtɔn ɔ́ jló gbɔn é nɛ́. Susu nú Mawu káká sɔ́yi! Amǐ. É kpácá mì tawun bɔ mi yá wǔ jó Mawu e ylɔ́ mi gbɔn fɛ́nú Klísu tɔn gbla mɛ ɔ́ dó, lobo xwedó Wɛn Ɖagbe ɖěvo. É ka nyí ɖɔ Wɛn Ɖagbe ɖěvo tíin wɛ ǎ; lo ɔ́, mɛɖé lɛ́ɛ wɛ ɖo ayi gbadó nú mi wɛ, bó jló ná hɛn Wɛn Ɖagbe Klísu tɔn gblé. Má ɖɔ nú mi: ényí mɛɖé wá jlá Wɛn Ɖagbe ɖé mi, bɔ é gbɔn vo nú ée mǐ kó jlá mi ɔ́ hǔn, Mawu ní dó nu i. É ná bó nyí mǐ ɖésúnɔ wɛ oo, wɛnsagun sɛ́xwé tɔn lɛ́ɛ ɖě wɛ oo, Mawu ní dó nu i. Mǐ ko ɖɔ nú mi ɖ'ayǐ; un ka lɛ́ ɖo ɖiɖɔ nú mi wɛ din ɖɔ ényí mɛɖé wá jlá Wɛn Ɖagbe ɖé mi bɔ é gbɔn vo nú ée mi yí gbe ná ɔ́ hǔn, Mawu ní dó nu i. Din ɔ́, má wa nǔ bónú gbɛtɔ́ lɛ́ɛ ná kpa mì, abǐ Mawu ná kpa mì ba wɛ un ɖe a? Abǐ un jló ná nyɔ́ ɖo gbɛtɔ́ lɛ́ɛ sí? Ényí gbɛtɔ́ lɛ́ɛ sí nyɔ́ ɖe wɛ un kpo ɖe ɔ́, un ná ɖo mɛsɛntɔ́ Klísu tɔn nyí wɛ din ǎ. Nɔví lɛ́ɛ mi! Má ɖɔ nú mi: Wɛn Ɖagbe e jlá wɛ un ɖe ɔ́, gbɛtɔ́ lɛ́ɛ wɛ dó wá ǎ; mɛɖé wɛ ɖɔ nú mì ǎ; mɛɖé ka kplɔ́n mì ǎ; Jezu Klísu ɖésú wɛ ɖe xlɛ́ mì. Hwenu e un ɖo Jwifu lɛ́ɛ sín sinsɛn mɛ ɔ́, mi se lě e un zán gbɛ ce gbɔn é; mi tunwun lě e un nɔ dó ya nú agun Mawu tɔn gbɔn é; un nɔ dó ya n'i titewungbe, bó nɔ dó gǎn ná sú kún tɔn dó. Mi tunwun lě e un nɔ xwedó Jwifu lɛ́ɛ sín sinsɛn hú hǎtɔ́ ce gěgé gbɔn é; mi tunwun lě e un nɔ jɛ hun dó hwɛndo tɔ́ mǐtɔn lɛ́ɛ tɔn jí gbɔn hú gbɛ̌ ce lɛ́ɛ bǐ é. Lo ɔ́, Mawu ɔ́, ɖo nyɔ̌ná tɔn mɛ ɔ́, é ko sɔ́ mì cóbɔ è wá ji mì, bó ylɔ́ mì, bónú má sɛn ɛ. Hwenu e é ka jló Mawu bɔ é ɖe vǐ tɔn xlɛ́ mì, bónú má jlá Wɛn Ɖagbe e ɖɔ xó dó vǐ ɔ́ wú ɔ́ mɛ e ma nyí Jwifu ǎ lɛ́ɛ ɔ́, un kan nǔɖé byɔ́ mɛɖé ǎ; un ka lɛ́ yi mɛ e ko nyí mɛsɛ́dó jɛ nukɔn nú mì lɛ́ɛ gɔ́n ɖo Jeluzalɛ́mu ǎ; lo ɔ́, un dín tlɔlɔ yi Alabíi; énɛ́ ɔ́ gúdo ɔ́, un lɛ́ kɔ wá Damási. Xwe atɔn gúdo wɛ un yi Jeluzalɛ́mu, bó ná yi tunwun Sefási; ée un yi gɔ̌n tɔn ɔ́, un nɔ fínɛ́ xɔ azǎn afɔtɔn. Lo ɔ́, un sɔ́ mɔ mɛsɛ́dó ɖěvo ǎ; Jaki Aklúnɔ sín nɔví ɔ́ jɛ́n un mɔ. Nǔ e wlán sɛ́ dó mi wɛ un ɖe ɔ́ nǔgbó wɛ. Mawu nukɔn ɖíe un ɖe e; un ɖo adingban ɖó wɛ ǎ. Énɛ́ ɔ́ gúdo ɔ́, un yi Silíi, kpódó Silisíi kpán gbé jí. Káká jɛ hwenɛ́nu ɔ́, mɛ e ɖo agun Klísu tɔn mɛ ɖo Judée lɛ́ɛ ɖě kó mɔ mì kpɔ́n ǎ. Yě se kpowun ɖɔ: “Mɛ e nɔ dó ya nú mǐ ɖ'ayǐ ɔ́ ɖo ɖiɖɔ nú mɛ lɛ́ɛ wɛ din ɖɔ yě ní ɖi nǔ nú Jezu. Đ'ayǐ ɔ́, é wɛ ka nɔ dó gǎn, bó ná sú mɛ e ɖi nǔ nú Jezu lɛ́ɛ sín kún dó.” Bɔ yě kpa susu nú Mawu ɖó nyɛ wútu. Xwe wɛ̌nɛ gúdo ɔ́, un lɛ́ kɔ yi Jeluzalɛ́mu, nyɛ kpódó Baanabási kpó; un lɛ́ kplá Títu lɔmɔ̌. Un yi dɔ̌n ɖó Mawu ɖe xlɛ́ mì ɖɔ un ɖó ná yi. Ée un yi ɔ́, nyɛ kpódó agunnukɔntɔ́ lɛ́ɛ kpó kɛ́ɖɛ́ kplé, bɔ Wɛn Ɖagbe e un jlá mɛ e ma nyí Jwifu ǎ lɛ́ɛ ɔ́, un tínmɛ nú yě, ɖó un jló nú azɔ̌ e un wa ɖ'ayǐ ɔ́, kpódó ée wa wɛ un ɖe din ɔ́ kpó ní nyí nǔ yǎyá ǎ. Títu e kpódó nyɛ kpó zɔn ɔ́, Glɛ̌sinu wɛ; è ka ɖɔ ada jɛ́n é ná gbo dandan ǎ. Klísusɛntɔ́-nyíjɛtɔ́ ɖé lɛ́ɛ lun byɔ́ mǐ mɛ, bó jló ná gbo ada n'i, có è ka gbo n'i ǎ. Yě jló ná ba do nú mǐ ɖésúnɔ sí e mǐ ɖe ɖo bǔ e mǐ ɖe xá Klísu Jezu ɔ́ mɛ é, bó jló ná lílɛ́ mǐ, bónú mǐ ná lɛ́ húzú kannumɔ nú Jwifu lɛ́ɛ sín walɔ. Mǐ ka lɔn nǔ nú yě nukún xwixwe ɖokpó vɔ́vɔ́ ǎ. Mǐ ka bló nǔ e ba wɛ yě ɖe ɔ́ ǎ, bónú Wɛn Ɖagbe nǔgbó nǔgbó ɔ́ ní nɔ ayǐ nú mi. Yě mɛ e è nɔ mɔ dó mɔ gbɛtɔ́ nukúnɖéjí énɛ́ lɛ́ɛ ɔ́: “Nǔ e yě nyí ɔ́ kan mì ǎ, ɖó Mawu nɔ ɖe mɛɖé ɖó vo ɖo mɛɖé mɛ ǎ.” Yě mɛ nukúnɖéjí énɛ́ lɛ́ɛ sɔ́ zé kplɔ́n yɔ̌yɔ́ ɖěvo gɔ́ nú ée kplɔ́n mɛ wɛ un ko ɖe ɔ́ ǎ. É nyɔ́ wa ɔ́, yě mɔ ɖɔ Mawu sɔ́ Wɛn Ɖagbe jlájlá mɛ e ma nyí Jwifu ǎ lɛ́ɛ sín azɔ̌ dó así nú mì, lě e é sɔ́ Wɛn Ɖagbe jlájlá mɛ e nyí Jwifu lɛ́ɛ sín azɔ̌ dó así nú Sefási gbɔn é. Đó Mawu e sɔ́ Sefási dó ɖó mɛsɛ́dó nú mɛ e nyí Jwifu lɛ́ɛ ɔ́ wɛ sɔ́ nyɛ lɔmɔ̌ dó ɖó mɛsɛ́dó nú mɛ e ma nyí Jwifu ǎ lɛ́ɛ é. Jaki kpódó Sefási kpó, kpódó Jǎan kpán wɛ è nɔ mɔ ɖɔ yě nyí sósyɛ́n nú agun lɛ́ɛ; ée yě mɔ ɖɔ Mawu sɔ́ azɔ̌ énɛ́ dó así nú mì ɔ́, yě ná alɔ nyɛ kpódó Baanabási kpó, bó dó ɖe xlɛ́ ɖɔ azɔ̌ ɖokpó ɔ́ wa wɛ mǐ ɖe. Énɛ́ ɔ́, mǐ bǐ ɖó gbe kpɔ́, bɔ nyɛ kpódó Baanabási kpó ná yi mɛ e ma nyí Jwifu ǎ lɛ́ɛ gɔ́n, bɔ yědɛɛ lɛ́ɛ ná yi mɛ e nyí Jwifu lɛ́ɛ gɔ́n. Amɔ̌ yě byɔ́ nǔ ɖokpó mǐ. Yě byɔ́ mǐ ɖɔ mǐ ní nɔ́ flín wamamɔnɔ e ɖo agun émítɔn mɛ ɖo Jeluzalɛ́mu lɛ́ɛ. Nǔ e ba ná wa wɛ un ko ɖe ɖ'ayǐ ɔ́ nɛ́. Lo ɔ́, ée Sefási wá Antyɔ́ci ɔ́, é wa nǔ nyi do, bɔ un gbɛ́ nǔ n'i ɖo mɛ bǐ nukún mɛ. Nǔgbó ɔ́, cóbónú mɛ e Jaki sɛ́ dó lɛ́ɛ ná gosín Jeluzalɛ́mu wá ɔ́, Sefási nɔ ɖu nǔ xá mɛ e ma nyí Jwifu ǎ lɛ́ɛ. Ée yě ka wá ɔ́, é jɛ wǔ ɖó zɔ nú mɛ e ma nyí Jwifu ǎ lɛ́ɛ jí, bó sɔ́ nɔ ɖu nǔ xá yě ǎ; ɖó é ɖo xɛsi nú mɛ e nɔ ɖɔ è ɖǒ ná gbo ada nú mɛ e ma nyí Jwifu ǎ lɛ́ɛ wɛ. Jwifu e kpo lɛ́ɛ lɔ ɖi xɛsi, bó jɛ yɛmɛnú wa jí Sefási ɖɔhun, káká bɔ Baanabási lɔ ɖi xɛsi, bó jɛ yɛmɛnú wa jí yě ɖɔhun. Ée un mɔ ɖɔ nǔ e wa wɛ yě ɖe ɔ́ kún sɔgbe xá nǔgbó e ɖo Wɛn Ɖagbe ɔ́ mɛ é ó ɔ́, un ɖɔ nú Sefási ɖo yě bǐ nukún mɛ ɖɔ: “Ényí hwi mɛ e nyí Jwifu ɔ́ ka nɔ zán gbɛ mɛ e ma nyí Jwifu ǎ ɖɔhun, bó má nɔ́ wa nǔ Jwifu ɖɔhun ǎ ɔ́, nɛ̌ a ka sixú ɖɔ nú mɛ e ma nyí Jwifu ǎ lɛ́ɛ ɖɔ yě ní wa nǔ Jwifu ɖɔhun dandan gbɔn?” Mǐdɛɛ lɛ́ɛ ɔ́, Jwifuví jiji wɛ mǐ nyí; mǐ nyí toɖévomɛnu e ma nɔ xwedó Mawusɛ́n ǎ lɛ́ɛ é ǎ, có mǐ ka tunwun ɖɔ é kún nyí Mɔyízisɛ́n lɛ́ɛ nyinyi wɛ nɔ zɔ́n, bɔ Mawu nɔ mɔ mɛ dó mɔ hwɛjijɔnɔ ná ó. Lo ɔ́, nǔ ɖi nú Klísu Jezu wɛ nɔ zɔ́n bɔ Mawu nɔ mɔ mɛ dó mɔ hwɛjijɔnɔ ná. Énɛ́ ɔ́ wú wɛ mǐ lɔmɔ̌ ɖi nǔ nú Klísu Jezu, bó ná sixú húzú hwɛjijɔnɔ ɖó nǔɖiɖi e mǐ ɖó nú Klísu ɔ́ wútu. É nyí ɖɔ mǐ nyi sɛ́n lɛ́ɛ wútu wɛ mǐ húzú hwɛjijɔnɔ ǎ; ɖó Mawu ná mɔ mɛ ɖěbǔ dó mɔ hwɛjijɔnɔ ɖó é nɔ nyi sɛ́n lɛ́ɛ wú ǎ. Lo ɔ́, ényí hwenu e mǐ ɖo biba wɛ ɖɔ mǐ ná nyí hwɛjijɔnɔ ɖo Mawu nukɔn, gbɔn Klísu jí ɔ́, è ka wá mɔ mǐ lɔmɔ̌ dó mɔ hwɛhutɔ́ ná ɔ́, énɛ́ wú wɛ è nǎ ɖɔ Klísu wɛ nɔ dɔn mɛ dó hwɛ mɛ a? Gbeɖé kpɔ́n! Đó è nǎ nyi sɛ́n dó mɔ hwɛjijɔ xó e un gbɛ́ ɔ́, ényí un lɛ́ jɛ gbe yí na jí hǔn, ɖiɖe xlɛ́ wɛ un ɖe ɖɔ un lɛ́ húzú sɛ́ngbatɔ́ nɛ́. Đó ɖo sɛ́n ɔ́ lixo ɔ́, un ko kú. Sɛ́n ɔ́ ɖésú wɛ ka hu mì, bónú má sixú nɔ gbɛ bó sɛn Mawu. È ká mì nyi aklúzu jí xá Klísu. Gbɛ e un ka ɖe din ɔ́, nyɛ ɖésúnɔ wɛ ɖo gbɛ ǎ, Klísu wɛ ɖo gbɛ ɖo nyɛ mɛ, bɔ gbɛ e un ɖe din ɖo agbaza mɛ ɔ́, nǔɖiɖi e un ɖó nú Mawu ví e yí wǎn nú mì, bó kú dó ta ce mɛ ɔ́ wú wɛ un ɖo gbɛ. Un ná hɔn fɛ́nú Mawu tɔn nyi gbě ǎ. Đó nú sɛ́n ɔ́ wɛ nɔ zɔ́n bɔ è nɔ nyí hwɛjijɔnɔ ɖo Mawu nukɔn ɔ́, hǔn Klísu kú dó wǔvɔ́ nɛ́. Galatinu xlonɔ e mi! Mɛ̌ ka flú mi lě e? Có lě e è ká Jezu Klísu nyi aklúzu jí bɔ é kú gbɔn ɔ́, nukún mitɔn mɛ fí jɛ́n è tínmɛ ɖe céɖécéɖé. Nǔ e un jló ɖɔ mi ní tínmɛ nú mì kpowun ɔ́ ɖíe: nǔ e sɛ́n ɔ́ zɔ́n wiwa lɛ́ɛ wɛ zɔ́n bɔ Mawu ná Yɛsinsɛn tɔn mi a, abǐ Wɛn Ɖagbe e mi se bó ɖi nǔ ná ɔ́ wú wɛ? Xlo jɛ́n mi jɔ sɔ mɔ̌ a? Yɛ Mawu tɔn ná hlɔ̌nhlɔ́n mi, bɔ mi jɛ gbɛ yɔ̌yɔ́ ɔ́ zán jí. Din ɔ́, mi jló ná zé hlɔ̌nhlɔ́n mi ɖésúnɔ tɔn dó sú ta ná wɛ a? Nǔ énɛ́ lɛ́ɛ gbo mi dó wǔvɔ́ wɛ a? Nǔ énɛ́ lɛ́ɛ sixú gbo mi dó wǔvɔ́ ǎ. Sɛ́n e mi nɔ nyi ɔ́ wú wɛ Mawu ná Yɛsinsɛn tɔn mi, bó nɔ jlɛ́ nǔ ɖo tɛ́ntin mitɔn a, abǐ Wɛn Ɖagbe e mi se bo ɖi nǔ ná ɔ́ wú wɛ? Mɔ̌ wɛ Mawuxó ɔ́ ɖɔ xó dó Ablaxámu wú gbɔn; Mawuxó ɔ́ ɖɔ: “É ɖi nǔ nú Mawu, bɔ Mawu kpɔ́n dó nǔɖiɖi tɔn wú, bó mɔ ɛ dó mɔ hwɛjijɔnɔ.” Hǔn mi bo tunwun ɖɔ mɛ e ɖó nǔɖiɖi lɛ́ɛ wɛ nyí Ablaxámu ví tawun. Mawuxó ɔ́ ko ɖɔ sín do ɖɔ: mɛ e ma nyí Jwifu ǎ lɛ́ɛ ná ɖi nǔ nú Mawu, bɔ Mawu ná sɔ́ yě dó húzú hwɛjijɔnɔ; énɛ́ ɔ́ wú wɛ Mawu dó akpá ɖagbe élɔ́ nú Ablaxámu ɖo Mawuxówéma ɔ́ mɛ ɖɔ: “Un ná xo ɖɛ dó akɔta e ɖo gbɛ ɔ́ mɛ lɛ́ɛ bǐ jǐ gbɔn jǐ towe.” Ablaxámu ɖi nǔ nú Mawu, bɔ Mawu xo ɖɛ dó jǐ tɔn; mɔ̌ ɖokpó ɔ́, é ná xo ɖɛ dó mɛ e ɖi nǔ n'i lɛ́ɛ bǐ jǐ, Ablaxámu ɖɔhun. Lo ɔ́, mɛ e gán jɛ sɛ́n nyinyi wú, bó ná dó mɔ hwlɛngán lɛ́ɛ bǐ wɛ è dó nu. Đó è ko wlán dó Mawuxówéma ɔ́ mɛ ɖɔ: “Mɛ e ma nɔ xwedó nǔ e è wlǎn dó sɛ́nwéma ɔ́ mɛ lɛ́ɛ bǐ hwebǐnu ǎ ɔ́, nu wɛ è dó e.” È ka mɔ nukúnnú jɛ mɛ ganjí ɖɔ Mawu kún sixú mɔ mɛɖé dó mɔ hwɛjijɔnɔ ɖó sɛ́n e é nɔ nyi ɔ́ wú ó; ɖó Mawuxówéma ɔ́ ɖɔ: “Mɛ e Mawu mɔ dó mɔ hwɛjijɔnɔ ɖó nǔɖiɖi tɔn wú ɔ́ ná nɔ gbɛ.” Sɛ́n ɔ́ ɖo nǔɖiɖi sín acɛ mɛ ǎ; é nyɔ́ wa ɔ́, ɖi lě e Mawuxó ɔ́ ko ɖɔ gbɔn ɔ́: “Mɛ e ná sixú nyi sɛ́n lɛ́ɛ bǐ ɔ́ ná nɔ gbɛ gbɔn sɛ́n ɔ́ gbla mɛ.” Ée Klísu húzú mɛ e è dó nu ɖó tɛn mǐtɔn mɛ ɔ́, é hwlɛ́n mǐ gán sín nyladó e sɛ́n ɔ́ nɔ hɛn wá nú mǐ é mɛ; ɖó Mawuxówéma ɔ́ ɖɔ: “Mɛ e è ká nyi atín wú ɔ́, nu wɛ è dǒ e.” Nǔ cí mɔ̌, bónú mɛ e ma nyí Jwifu ǎ lɛ́ɛ lɔ ná mɔ nyɔ̌ná e sín akpá Mawu dó nú Ablaxámu ɔ́ yí gbɔn Jezu Klísu jí. Nǔ cí mɔ̌, bónú mǐ bǐ ní mɔ Yɛsinsɛn e sín akpá Mawu dó nú mǐ ɔ́ yí ɖó nǔ e mǐ ɖi nú Mawu ɔ́ wútu. Nɔví lɛ́ɛ mi, un ná sɔ́ nǔ e nɔ jɛ tɛgbɛ ɔ́ ɖokpó dó kplɔ́n nǔ mi ná. Ényí mɛɖé ɖɔ lě e è nǎ zán nǔ tɔn lɛ́ɛ gbɔn ɖo kú tɔn gúdo ɔ́ ganjí ɔ́, mɛɖé sɔ́ sixú gbídí ǎ; mɛɖé ka sixú gɔ́ nǔɖé ná ǎ. Mawu dó akpá nú Ablaxámu kpódó vǐ tɔn kpán. Mawuxówéma ɔ́ ɖɔ é kpódó vǐ tɔn lɛ́ɛ kpán, bónú è nǎ vɛdó ɖɔ mɛ gěgé xó ɖɔ wɛ é ɖe sín ǎ. Mawuxó ɔ́ ɖɔ hwi kpódó vǐ towe kpán, bó dó ɖo ɖiɖe xlɛ́ wɛ ɖɔ mɛ ɖokpó xó ɖɔ wɛ é ɖe; mɛ énɛ́ ɔ́ wɛ nyí Klísu. Nǔ e ɖɔ wɛ un ɖe ɔ́ ɖíe: Mawu ko sɔ́ akɔjijɛwéma ɖé ɖ'ayǐ, bó dó akpá ɖɔ émí ná bló ɖ'é jí. Sɛ́n e wá tɔ́n xwe afɔwe gban (430) gúdo ɔ́, sixú gbídí nǔ e ɖo akɔjijɛwéma énɛ́ mɛ lɛ́ɛ, bɔ akpá e Mawu dó ɔ́ ná nyí nǔ yǎyá ǎ. Đó ényí sɛ́n wɛ è nɔ nyi cóbó nɔ́ mɔ nǔ ɖagbe e Mawu sɔ́ ɖ'ayǐ nú mɛ lɛ́ɛ yí ɔ́, hǔn nǔ ɖagbe énɛ́ lɛ́ɛ sɔ́ nyí akpá e Mawu dó ɔ́ sín xó ɖé ǎ. Lo ɔ́, akpá e Mawu dó nú Ablaxámu ɔ́ wútu wɛ é ɖe nyɔ̌ná tɔn xlɛ́ Ablaxámu. Étɛ́wú è dǒ sɛ́n ɔ́ lo? È dǒ sɛ́n ɔ́ bónú é ná ɖe zǐnzán e gbɔn vo nú jlǒ Mawu tɔn ɔ́ xlɛ́; é ná ɖo te káká jɛ hwenu e Ablaxámu ví e è dǒ akpá ɔ́ na ɔ́ na wá dó é. Wɛnsagun Mawu tɔn lɛ́ɛ wɛ hɛn sɛ́n ɔ́ wá gbɔn mɛ ɖokpó jí. Đó akpá e Mawu dó ɔ́, é ɖokpónɔ wɛ é kan; é byɔ́ ɖɔ wɛnsagun Mawu tɔn ɖé, abǐ mɛɖé ní ɖe kúnnu ná ǎ. Sɛ́n ɔ́ gbɛ́ akpá e Mawu dó lɛ́ɛ ɖɔ wɛ è ɖe a? Gbeɖé kpɔ́n. Ényí è dǒ sɛ́n ɖé, bɔ sɛ́n énɛ́ hɛn ɔ́, é ná ná gbɛ jɔ gbɛ gbɛtɔ́ lɛ́ɛ ɔ́, hǔn mɛ bǐ wɛ sixú nyí hwɛjijɔnɔ ɖo Mawu nukɔn, gbɔn sɛ́n ɔ́ gbla mɛ. Lo ɔ́, Mawuxówéma ɔ́ ɖɔ gbɛtɔ́ lɛ́ɛ bǐ wɛ ɖo súsú ɖo hwɛ sín acɛ glɔ́, bónú nǔ e sín akpá Mawu dó ɔ́, é ná ná mɛ e ɖi nǔ lɛ́ɛ, ɖó nǔɖiɖi e yě ɖǒ nú Jezu Klísu ɔ́ wú. Cóbónú nǔɖiɖi sín hwenu ná su ɔ́, sɛ́n ɔ́ tó hɛn mǐ gantɔ́ ɖɔhun hwɛ̌, káká jɛ hwenu e Mawu wá ɖe nǔɖiɖi énɛ́ xlɛ́ mǐ dó é. Énɛ́ ɔ́, sɛ́n ɔ́ ɖo mǐ kplɔ́n wɛ káká jɛ hwenu e Klísu wá dó é, bónú Mawu ná zé mǐ dó húzú hwɛjijɔnɔ gbɔn nǔɖiɖi gbla mɛ. Din e nǔɖiɖi sín hwenu su ɔ́, mǐ sɔ́ ɖo mɛkplɔ́ntɔ́ énɛ́ sín acɛ mɛ ǎ; ɖó mi bǐ nyí Mawu ví, ɖo Klísu Jezu mɛ, gbɔn nǔɖiɖi gbla mɛ. Nǔgbó ɔ́, è lɛ yɛhwesin nú mi bǐ ɖo Klísu mɛ, bɔ mi sɔ́ Klísu sín jijɔ. Hǔn din ɔ́, Jwifu sɔ́ ɖo vo nú mɛ e ma nyí Jwifu ǎ é ǎ; kannumɔ sɔ́ ɖo vo nú mɛ e ma nyí kannumɔ ǎ é ǎ; súnnu sɔ́ ɖo vo nú nyɔ̌nu ǎ; ɖó mi mɛ bǐ wɛ nyí ɖokpó ɔ́ ɖo Klísu Jezu mɛ. Ényí mi nyí Klísu tɔn hǔn, mi nyí Ablaxámu ví, bɔ nǔ ɖagbe e sín akpá Mawu dó nú Ablaxámu ɔ́, mi ná mɔ yí. Xó e ɖɔ wɛ un ɖe, bó ɖɔ mɔ̌ ɔ́ ɖíe: vǐ e ɖó ná ɖu tɔ́ tɔn sín gǔ, bó má ka ko su ǎ é ɔ́, kannumɔ gbɛ mɛ wɛ é ɖe, có étɔn wɛ ka nyí nǔ lɛ́ɛ bǐ. Hwenu e é kpo ɖo yɔkpɔ́vú ɔ́, mɛ wɛ nɔ kpé nukún wǔ tɔn; mɛ wɛ nɔ kpɔ́n nǔ tɔn lɛ́ɛ jí káká jɛ xwe nabí e tɔ́ ɔ́ ɖɔ é ná ɖó, bɔ é ɖésúnɔ ná jɛ nǔ tɔn lɛ́ɛ nu é. Mɔ̌ ɖokpó ɔ́, mǐ lɔmɔ̌ ɔ́, nǔɖoyɛswímɛ gbɛmɛ fí tɔn lɛ́ɛ sín kannumɔ wɛ mǐ ko nyí ɖ'ayǐ, cóbó wá su ɖo Mawu mɛ. Lo ɔ́, ée hwe tɔn nu wá su ɔ́, é sɛ́ vǐ tɔn dó gbɔn nyɔ̌nu ɖé jí, bɔ vǐ énɛ́ lɔ nɔ sɛ́n ɔ́ glɔ́, bó ná sixú hwlɛ́n mɛ e ɖo sɛ́n ɔ́ glɔ́ lɛ́ɛ gán, bónú mǐ ná sixú húzú vǐ nú Mawu. Mawu sɛ́ yɛ vǐ tɔn tɔn dó ayi mǐtɔn mɛ, bó ná dó ɖe xlɛ́ ɖɔ mǐ nyí vǐ émítɔn nǔgbó. Yɛ ɔ́ nɔ sú xó, bó nɔ́ ɖɔ: “Daá ce! Tɔ́ ce vívɛ́ná!” Énɛ́ ɔ́, a sɔ́ nyí kannumɔ ǎ; vǐ wɛ a nyǐ. Ée a ka nyí vǐ ɔ́, Mawu ná ná nǔ ɖagbe e é sɔ́ ɖ'ayǐ nú vǐ tɔn lɛ́ɛ é bǐ we. Đ'ayǐ xóxó ɔ́, mi tunwun Mawu ǎ, bó nyí kannumɔ nú nǔmɛsɛn e ma nyí Mawu jɔ Mawu ǎ lɛ́ɛ. Amɔ̌ din e mi tunwun Mawu ɔ́, un ka ná ɖɔ din e mi tunwun Mawu ɔ́ lɔ ǎ; din e Mawu tunwun mi ɔ́, nɛ̌ mi ka sixú lɛ́ lɛ́ kɔ yi nǔmaɖinǔ énɛ́ lɛ́ɛ e má ɖó gǎn ǎ lɛ́ɛ kɔn gbɔn? Étɛ́wú mi ka jló ná lɛ́ húzú kannumɔ nǔ énɛ́ lɛ́ɛ tɔn? Mi nɔ ɖó kɛ́n azǎn ɖé lɛ́ɛ, sun ɖé lɛ́ɛ, hwenu ɖé lɛ́ɛ kpódó xwe ɖé lɛ́ɛ kpó jí, bó nɔ sɔ́ yě dó ɖó nǔ ɖaxó ná. Ado ɖo huhu mì wɛ ɖó mi wú; ɖó é cí ɖi azɔ̌ e un wa ɖo mi tɛ́ntin ɔ́ nǔ yǎyá wɛ é nyí ɖɔhun. Nɔví lɛ́ɛ mi, un ɖo kɛnklɛ́n dó nú mi wɛ; mi húzú, bó cí nyɛ ɖɔhun, lě e nyɛ lɔ húzú, bó cí mi ɖɔhun gbɔn é. Mi wa nǔɖé nyi do nú mì ǎ. Mi ní flín ɖɔ azɔn jɛ wɛ un ɖe wú wɛ un jlá Wɛn Ɖagbe ɔ́ mi azɔn nukɔn nukɔntɔn ɔ́. Azɔn e jɛ wɛ un ɖe ɔ́ dó azɔ̌ kɔ nú mi có mi ka dó vɛ̌ nú mì ǎ; mi ka nya mì ǎ; é nyɔ́ wa ɔ́, mi yí mì lě e è nɔ yí wɛnsagun Mawu tɔn gbɔn é. Un ná ɖɔ tawun ɔ́, Klísu Jezu ɖɔhun wɛ mi yí mì. Xomɛ e nɔ hun mi hwenɛ́nu ɔ́, fítɛ́ é ka gbɔn? Đó un ná ɖe kúnnu nú mi ɖɔ: ényí nukún ɔ́, nǔ wɛ nyí bɔ è nɔ ɖe sín ta wú ɔ́, mi ná ko ɖe bó ná mì. Din ɔ́, kɛntɔ́ mitɔn wɛ un húzú ɖó nǔgbó e un ɖɔ nú mi ɔ́ wú a? Mɛ énɛ́ lɛ́ɛ ɖo ɖagbe mitɔn ba wɛ bó ɖɔ, lo ɔ́, ayixa yětɔn nyɔ́ ǎ. Nǔ e ba wɛ yě ɖe ɔ́ wɛ nyí ɖɔ nyɛ kpódó mi kpó ní klán, nú mi ná xwedó yě. Nǔgbó ɔ́, é nyɔ́ nú è nǐ ba ɖagbe mɛtɔn; è nǐ vɛ kó sixú ba kpódó ayixa ɖagbe kpó, é ní ka nyí hwebǐnu; é ní má nyí hwenu e un ɖo kpɔ́ xá mi ɔ́ kɛ́ɖɛ́ ó. Vǐ ce lɛ́ɛ mi, un lɛ́ ɖo wǔvɛ́ mɔ dó ta mitɔn mɛ wɛ nyɔ̌nu ɖo ajidonu ɖɔhun. Un ná ɖo wǔvɛ́ énɛ́ ɔ́ mɔ wɛ káká jɛ hwenu e mi ná wa nǔ Klísu ɖɔhun dó é. É jló mì nú má ɖo kpɔ́ xá mi din, bó ná sɔ́ gbe vo dó ɖɔ xó nú mi; ɖó ado ɖo huhu mì wɛ tawun ɖó mi wú. Nǔ e un jló ná kanbyɔ́ mi ɔ́, mi mɛ e jló ná nɔ sɛ́n ɔ́ sín acɛ mɛ lɛ́ɛ ɔ́, mi se nǔ e sɛ́n ɔ́ ɖɔ ɔ́ ǎ cé? È ɖɔ Ablaxámu ɖó vǐ we; é ji ɖokpó ɖo nyɔ̌nu kannumɔ ɔ́ xomɛ, bó ji ɖokpó ɖo mɛ e ma nyí kannumɔ ǎ é xomɛ. Kannumɔ ɔ́ sín vǐ ɔ́, è ji i vǐ bǐ ɖɔhun. Lo ɔ́, nyɔ̌nu e má nyí kannumɔ ǎ ɔ́ sín vǐ ɔ́, akpá tɔn wɛ Mawu dǒ nú Ablaxámu cóbɔ è ji i. Nǔ énɛ́ lɛ́ɛ e è ɖɔ ɔ́, nǔ jlɛ́ dó nǔ wú wɛ. Nyɔ̌nu we énɛ́ lɛ́ɛ ɔ́, akɔjijɛ we wɛ yě nyí. Nyɔ̌nu e ji vǐ kannumɔ lɛ́ɛ ɔ́, Hagáa wɛ, bɔ éyɛ́ sɔ́ akɔ e è jɛ ɖo só Sinayíi tɔn jí ɔ́ sín afɔ ɖó te. Đó Hagáa wɛ nyí só Sinayíi tɔn e ɖo Alabíi é. É wɛ lɛ́ ɖo Jeluzalɛ́mu égbé tɔn ɔ́ nyí wɛ, bɔ é kpódó vǐ tɔn lɛ́ɛ kpó ɖo kannumɔgbénu. Jeluzalɛ́mu sɛ́xwé tɔn ɔ́ ɖo é ɖésúnɔ sí; é wɛ nyí nɔ mǐtɔn. Đó Mawuxó ɔ́ ɖɔ: “Wɛnsinɔ, hwi mɛ e ma ji vǐ kpɔ́n ǎ é, jɛ awǎ; hwi mɛ e ma mɔ wǔvɛ́ ɖo ajidonu kpɔ́n ǎ é, sú xó bó jɛ awǎ; ɖó nyɔ̌nu e asú tɔn gbɛ́ e ná ɖó vǐ hú nyɔ̌nu e ɖo asúxwé é.” Amɔ̌ mi nɔví lɛ́ɛ mi! Vǐ e Mawu dó akpá tɔn bó ji lɛ́ɛ wɛ mi nyí Izáki ɖɔhun. Đ'ayǐ xóxó ɔ́, mɛ e è ji vǐ bǐ ɖɔhun ɔ́ nɔ dó ya nú mɛ e è ji gbɔn Yɛsinsɛn jí ɔ́; mɔ̌ ɖokpó ɔ́ wɛ é lɛ́ ɖe gbɔn din. Lo ɔ́, étɛ́ Mawuxó ɔ́ ɖɔ? É ɖɔ: “Nya nyɔ̌nu mɛsɛntɔ́ ɔ́ kpódó vǐ tɔn kpó; ɖó mɛsɛntɔ́ sín vǐ ná ɖu gǔ xá mɛ e ma nyí mɛsɛntɔ́ ǎ é sín vǐ ǎ.” Hǔn nɔví lɛ́ɛ mi! Mǐ nyí nyɔ̌nu kannumɔ ɔ́ sín vǐ ǎ; nyɔ̌nu e má nyí kannumɔ ǎ é sín vǐ wɛ mǐ nyí. Klísu ɖe mǐ sín sɛ́n ɔ́ kannu, bónú mǐ ná jɛ mǐ ɖésúnɔ sí. Mi bo syɛ́nlǐn, bó má lɛ́ wá húzú kannumɔ ó. Nyɛ Pɔ́lu wɛ tɛ ɖɛ̌ jí, bó ɖo ɖiɖɔ nú mi wɛ ɖɔ ényí mi jó miɖée dó, bónú è gbo ada nú mi hǔn, nǔ e Klísu wa nú mi ɔ́, nǔ yǎyá wɛ. Un lɛ́ ɖo ɖiɖɔ nú mi wɛ ɖɔ: mɛ ɖěbǔ gbo ada lě e Jwifu lɛ́ɛ sín sɛ́n zɔ́n gbɔn ɔ́ hǔn, ní tunwun ɖɔ émí ɖó ná nyi sɛ́n Jwifu lɛ́ɛ tɔn bǐ. Mi mɛ e nɔ ba ná nyi sɛ́n ɔ́, bó ná dó nyí hwɛjijɔnɔ ɖo Mawu nukɔn lɛ́ɛ ɔ́, mi tunwun ɖɔ émí kpó Klísu kpó klán, bɔ émí ba fɛ́nú Mawu tɔn kpo. Mǐdɛɛ lɛ́ɛ ɔ́, mǐ ɖo nukún ɖó wɛ ɖɔ Mawu ná sɔ́ mǐ dó húzú hwɛjijɔnɔ. Nǔ énɛ́ ɖó nukún wɛ mǐ ɖe gbɔn Yɛsinsɛn e ɖo azɔ̌ wa wɛ gbɔn nǔɖiɖi mɛ ɔ́ sín hlɔ̌nhlɔ́n jí; ɖó ényí mǐ ɖo kpɔ́ xá Klísu Jezu ɔ́, adagbigbo nyí nǔɖé ǎ; adamagbo lɔ ka nyí nǔɖé ǎ. Nǔ e ɖo tají ɔ́ wɛ nyí nǔɖiɖi e nɔ wa nǔ kpódó wǎn yíyí kpó é. Mi ka ɖo nukɔn yi wɛ ganjí ɖ'ayǐ nɛ́! Mɛ̌ ka ɖó mi te bó gbɛ́ ɖɔ mi ní má sɔ́ se tónú nú nǔgbó ɔ́ ó? Nǔ énɛ́ e è ɖɔ nú mi káká bɔ mi yí gbe ná ɔ́ gosín Mawu e ɖo mi ylɔ́ wɛ ɔ́ gɔ́n ǎ. Lě e è ko nɔ ɖɔ gbɔn ɔ́: “Tɔ́n kpɛví ɖé wɛ nɔ fɔ́n linfín e è nya ɔ́ bǐ.” É ɖo mɔ̌ có un ɖó jiɖiɖe dó mi wú ɖo Aklúnɔ mɛ ɖɔ mi kún ná lin nǔ ɖěvo zɛ ée un lin é wú ó; amɔ̌ mɛ e ɖo hunnyahunnya dó mi mɛ wɛ ɔ́, é ná bo nyí nǔɖébǔnɔ ɔ́, Mawu na dɔn tó n'i. Nɔví lɛ́ɛ mi, nyɛ ɔ́, ényí un lɛ́ kpo ɖo ɖiɖɔ wɛ ɖɔ ada jɛ́n è nǎ gbo dandan ɔ́, étɛ́ sín ya dó nú mì wɛ è ka lɛ́ kpo ɖe? Ényí ɖɔ mɔ̌ bló gbɔn wɛ un ɖe ɔ́, Wɛn Ɖagbe e jlá wɛ un ɖe bɔ é ɖɔ xó dó Klísu e è ká nyi aklúzu jí ɔ́ wú ɔ́ sɔ́ ná nyí afɔklɛ́nnú nú mɛɖé ǎ. Un jló ɖɔ mɛ e ɖo hunnyahunnya dó mi mɛ wɛ lɛ́ɛ ɔ́, ní má nyí ada kɛ́ɖɛ́ wɛ yě ná gbo ó; lo ɔ́, yě ní sá yěɖée. Nɔví lɛ́ɛ mi, midɛɛ lɛ́ɛ ɔ́, mi ná nɔ mi ɖésúnɔ sí wú wɛ Mawu ylɔ́ mi; amɔ̌ mi ma kpɔ́n ɖɔ émí ko ɖo émí ɖésúnɔ sí, bó wa nǔ e jló mi ɔ́ ó. Lo ɔ́, mi xwedó wǎn yíyí Mawu tɔn, bó húzú mɛsɛntɔ́ nú miɖée. Đó ényí è sɛ sin xwe nú sɛ́n lɛ́ɛ bǐ ɔ́, nǔ e ɖɔ wɛ yě ɖe ɔ́ ɖíe: “Yǐ wǎn nú nɔzo towe hwi ɖésú ɖɔhun.” Mi cɔ́ miɖée, é má nyí mɔ̌ ǎ ɔ́, nú mi zán gbɛ mitɔn gběkanlin lɛ́ɛ ɖɔhun, bó ɖo wǔ gblé miɖée wɛ, bó ɖo ya dó nú miɖée wɛ ɔ́, mi ná sú miɖée kún dó. Un ɖo ɖiɖɔ nú mi wɛ ɖɔ mi ní jó miɖée dó nú Yɛsinsɛn ní xlɛ́ ali mi; mi ma wa nǔ e jló mi lɛ́ɛ ó. Đó jlǒ nyanya gbɛtɔ́ tɔn lɛ́ɛ nɔ sí te dó jlǒ Yɛsinsɛn tɔn lɛ́ɛ jí. Mɔ̌ ɖokpó ɔ́, jlǒ Yɛsinsɛn tɔn lɛ́ɛ lɔ nɔ sí te dó jlǒ nyanya gbɛtɔ́ tɔn lɛ́ɛ jí; yě gbɔn vo sésé nú yěɖée, bónú mi ma wa nǔ e jló mi lɛ́ɛ ó. Ényí Yɛsinsɛn ɖo ali xlɛ́ mi wɛ ɔ́, sɛ́n ɔ́ sɔ́ ɖó acɛ ɖo mi jí ǎ. Nǔ nyanya e gbɛtɔ́ nɔ wa lɛ́ɛ ɖo nǔglɔ́ ǎ; yě wɛ nyí: agalilɛ, nǔ kwíji kwíji wiwa, nǔ nyanya wiwa, vodúnsinsɛn, majíkiblóbló, wǎngbɛ́númɛ, jlɛɖiɖɔ, wǔhwinhwan, majijɛ, zalixámɛ, nǔmɛkínkɛ́n, gbemanɔkpɔ́, mɛnújlójló, ahannumú, nǔɖudíngan kpódó nǔ hǔnmɛ énɛ́ lɛ́ɛ kpán. Un ɖo ɖiɖɔ nú mi wɛ din lě e un ko ɖɔ gbɔn nú mi ɖ'ayǐ ɔ́, ɖɔ mɛ e nɔ wa nǔ mɔ̌hunkɔtɔn lɛ́ɛ kún ɖo axɔ́súɖuɖu Mawu tɔn mɛ ná byɔ́ wɛ ó. Lo ɔ́, nǔ e Yɛsinsɛn nɔ ná mɛ ɔ́ wɛ nyí wǎn yíyí, xomɛhunhun, vivo mimɔ, suúluɖíɖó, xomɛnyínyɔ́, ɖagbewiwa, gbejíninɔ, fífá, mɛɖéejíɖuɖe; nǔgbó ɔ́, sɛ́n ɔ́ gbɛ́ nǔ énɛ́ lɛ́ɛ ǎ. Mɛ e nyí Klísu Jezu tɔn lɛ́ɛ ko ká hwɛhuhu sín ninɔmɛ e yě ɖó ɔ́, kpódó jlǒ tɔn lɛ́ɛ bǐ kpó nyi aklúzu jí. Ée ényí ɖɔ Yɛsinsɛn wɛ ná gbɛ jɔ gbɛ mǐ ɔ́, mǐ ní bó jó mǐɖée dó n'i, bónú é ná xlɛ́ ali mǐ. Mǐ ní má nyí goyítɔ́ ó; mǐ ní má nɔ dó xomɛsin xomɛ nú mǐɖée ó; mǐɖée nú ní má nɔ su mǐɖée nukún mɛ ó. Nɔví lɛ́ɛ mi! Mi mɛ e ko ɖó nukɔn yiyi ɖo nǔɖiɖi mɛ lɛ́ɛ ɔ́, ényí mɛɖé ɖo nǔ ɖěbǔ wa nyi do wɛ, bónú è gbo e dó hǔn, mi ɖe e ɖó ali jí; mi ka bló kpódó xomɛfífá kpó. Un ka lɛ́ ɖo ɖiɖɔ nú mi wɛ ɖɔ mi cɔ́ miɖée, bónú mi ɖésúnɔ má wá jɛ tɛ́nkpɔ́n mɛ ó. Mi hɛn agban mitɔn lɛ́ɛ xá miɖée; ényí mi bló mɔ̌ hǔn, Klísu sín sɛ́n ɔ́ nyi wɛ mi ɖe nɛ́. Mɛ e nɔ mɔ éɖée dó mɔ nǔgɛ́n, bó má ka nyí nǔɖé ǎ ɔ́, éɖée blɛ́ wɛ é ɖe, ɖó é nyí nǔtí ǎ. Mɛ ɖokpó ɖokpó ní byɔ́ éɖée mɛ, bó kpɔ́n nǔ e wa wɛ é ɖe lɛ́ɛ; ényí nǔ e wa wɛ é ɖe lɛ́ɛ sixú nyí xomɛhunhun nú n'i ɔ́, é ní hun xomɛ ɖo éɖée mɛ; é má jlɛ́ éɖée dó mɛ ɖě lɛ́ɛ wú ó. Đó mɛ ɖokpó ɖokpó ɖó ná wa azɔ̌ e nyí étɔn é. Mɛ e kplɔ́n Mawuxó ɔ́ wɛ è ɖe ɔ́ ɖó ná má nǔ ɖagbe e ɖo así tɔn lɛ́ɛ bǐ xá mɛ e ɖo Mawuxó ɔ́ kplɔ́n ɛ wɛ é. Mi ma blɛ́ miɖée ó, mɛɖé nɔ wa yɛ nú Mawu ǎ. Nǔ e è dǒ ɔ́ wɛ è nɔ ya. Mɛ ɖé wa jlǒ nyanya gbɛtɔ́ tɔn ɔ́, jlǒ nyanya gbɛtɔ́ tɔn ná dɔn kú wá n'i; mɛɖé ka wa jlǒ Yɛsinsɛn tɔn ɔ́, Yɛsinsɛn ná ná ɛ gbɛ mavɔ mavɔ. Hǔn awakanmɛ ní má kú mǐ dó nǔ ɖagbe wiwa wú ó. Đó nú awakanmɛ ma kú mǐ ǎ, bónú hwe tɔn nu wá su ɔ́, mǐ ná mɔ ajɔ tɔn yí. Ényí mɔ̌ hǔn nɔví lɛ́ɛ mi, ényí mǐ mɔ ɖagbewiwa sín ali hweɖěbǔnu hǔn, mǐ ní nɔ wa nú mɛ bǐ, ɖo tají ɔ́, nú nɔví ɖo nǔɖiɖi mɛ lɛ́ɛ. Din ɔ́, nyɛ ɖésú wɛ ɖo xó élɔ́ lɛ́ɛ wlán sɛ́ dó mi wɛ kpó alɔ ce kpó. Ényí mi ko mɔ lě e wěkwín lɛ́ɛ kló gbɔn ɔ́, mi ná tunwun ɖɔ nyɛ ɖésúnɔ wɛ wlán. Mɛ e ɖɔ ada jɛ́n mi ná gbo dandan lɛ́ɛ ɔ́, nǔ e ba wɛ yě ɖe ɔ́ wɛ nyí ɖɔ yě ná ɖe yěɖée xlɛ́ ɖo gbɛtɔ́ lɛ́ɛ nukɔn, ɖó yě jlǒ ɖɔ è ní dó ya nú émí ɖó Klísu e kú ɖo aklúzu jí é wú ǎ. Yě mɛ énɛ́ lɛ́ɛ e gbo ada ɔ́ ɖésú nɔ nyi sɛ́n ɔ́ ǎ. Yě jló ɖɔ mi ní yí gbe bó gbo ada, bó ná dó tɛ afɔ ayǐ ɖɔ émí wɛ gbo ada nú mi. Nyɛ ɔ́, nǔ ɖokpó e wú un nɔ tɛ afɔ ayǐ ɔ́ wɛ nyí kú e Aklúnɔ mǐtɔn Jezu Klísu kú ɖo aklúzu jí é. Nǔgbó ɔ́, gbɔn kú Klísu tɔn jí ɔ́, gbɛ ɔ́ kú nú mì, bɔ nyɛ lɔ kú nú gbɛ ɔ́. Adagbigbo nyí nǔɖé ǎ; adamagbo lɔ ka nyí nǔɖé ǎ; nǔ e ɖo tají ɔ́ wɛ nyí ɖɔ è ní nyí mɛ yɔ̌yɔ́. Fífá kpódó xomɛnyínyɔ́ Mawu tɔn kpó ní nɔ kpɔ́ xá mɛ e nɔ xwedó tito énɛ́ lɛ́ɛ ɖo gbɛzán yětɔn mɛ lɛ́ɛ, bó nɔ kpɔ́ xá mɛɖeɖóvo Mawu tɔn lɛ́ɛ bǐ. Bɛ́ sín din ɔ́, mɛ ɖěbǔ má sɔ́ dó tagba ɖě nú mì ó. Đó akpado e ɖo wǔ ce lɛ́ɛ ko xlɛ́ ɖɔ un nyí Jezu tɔn. Nɔví lɛ́ɛ mi! Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ. Amǐ. Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn mɛ é wɛ sɛ́ wěma élɔ́ dó mɛɖeɖóvo Mawu tɔn e ɖo Efɛ́zi, bó ɖo gbejí ɖo bǔ e yě ɖe xá Klísu Jezu ɔ́ mɛ lɛ́ɛ é. Mawu Tɔ́ mǐtɔn kpódó Aklúnɔ mǐtɔn Jezu Klísu kpó ní ná fɛ́nú kpódó fífá kpó mi. Mi nú mǐ ná dó kú nú Mawu Aklúnɔ mǐtɔn Jezu Klísu sín Tɔ́, ɖó é ná nyɔ̌ná Yɛsinsɛn tɔn tɛnmɛ tɛnmɛ lɛ́ɛ bǐ mǐ, bó dó xo ɖɛ dó mǐ jí, ɖo bǔ e mǐ ɖe xá Klísu ɖo yɛswímɛ ɔ́ mɛ. Đó, cóbónú Mawu ná bló gbɛ ɔ́, é ko cyán mǐ, bɔ mǐ ná nyí étɔn ɖo Klísu mɛ, bónú mǐ ná sixú nyí mɛ mímɛ́, mɛ ma ɖó blɔ̌ ɖo wǔ ɖo nukɔn tɔn; ɖo wǎn yíyí tɔn mɛ ɔ́, Mawu ko to ɖ'ayǐ ɖɔ émí ná sɔ́ mǐ dó ɖó vǐ gbɔn Jezu Klísu jí. É jló e mɔ̌ ɖó é nyɔ́ nukún tɔn mɛ. Mǐ ní bó kpa Mawu, ɖó é ná fɛ́nú tɔn susunɔ ɔ́ mǐ kpó xomɛhunhun kpó, ɖo Vǐ tɔn vívɛ́ná ɔ́ mɛ. Đó Mawu ɖe mǐ sín nǔ nyanya mɛ, bó sɔ́ hwɛ mǐtɔn lɛ́ɛ kɛ mǐ gbɔn Jezu Klísu sín hun gbla mɛ. Lě e é ɖe xomɛnyínyɔ́ tɔn maɖójlɛ̌ ɔ́ xlɛ́ mǐ gbɔn é nɛ́. É ná mǐ nyɔ̌ná tɔn énɛ́ bɔ é túnflá gbɔn nǔnywɛ́ kpíkpé kpódó nukúnnú-mɔjɛnǔmɛ kpíkpé e é ná mǐ ɔ́ kpán gbla mɛ. Mawu ɖe nǔbúdo e é ko to, bó ɖɔ kpó jlǒ tɔn kpó ɖɔ émí ná bló gbɔn Klísu jí ɔ́ xlɛ́ mǐ. Tito énɛ́ e Mawu bló fó ɖo hwe tɔn nu ɔ́ wɛ nyí ɖɔ nǔ e ɖo jǐnukúnsin lɛ́ɛ, kpó ée ɖo ayǐkúngban jí lɛ́ɛ bǐ kpó ná kplé ɖo gǎn ɖokpó géé glɔ́; Gǎn énɛ́ wɛ nyí Klísu. Bǔ e mǐ ɖe xá Klísu é mɛ wɛ mǐ mɔ hwlɛngán e nyí mǐtɔn ɔ́ yí ɖe; ɖó Mawu ko sɔ́ mǐ ɖ'ayǐ lě e é ko to gbɔn é; Mawu nɔ́ wa nǔ bɔ é nɔ sɔgbe xá lě e é ɖésúnɔ jló bó ɖɔ gbɔn é. Mǐ mɛ Jwifu lɛ́ɛ wɛ nyí mɛ nukɔntɔn e ɖo nukún ɖó nǔ wɛ ɖo Klísu mɛ lɛ́ɛ é; hǔn mǐ ní bó kpa susu Mawu tɔn. Mi mɛ e ma nyí Jwifu ǎ lɛ́ɛ lɔmɔ̌ ɔ́, hwenu e mi se nǔgbó wɛn, Wɛn Ɖagbe e nɔ ná hwlɛngán mɛ ɔ́ sín xó ɔ́, mi ɖi nǔ nú Klísu, bɔ Mawu ná Yɛsinsɛn e sín akpá e é dó ɔ́ mi, bó dó ɖó wuntun mi. Yɛsinsɛn ɔ́ wɛ nyí nǔ ɖagbe e Mawu sɔ́ ɖó te nú togun tɔn ɔ́ sín gǎnjɛwú nú mǐ. É wɛ nyí gǎnjɛwú mǐtɔn ɖɔ hwenu e mǐ ná nyí Mawu tɔn bǐ kpéte ɔ́, mǐ ná mɔ yě yí. Hǔn mǐ ní bó kpa susu Mawu tɔn. Énɛ́ ɔ́ wútu wɛ ée nyi lɔmɔ̌ un se lě e mi ɖi nǔ nú Aklúnɔ Jezu gbɔn, bó se lě e mi yí wǎn nú mɛɖeɖóvo Mawu tɔn lɛ́ɛ bǐ gbɔn ɔ́, un nɔ gɔn kú dó nú Mawu dó ta mitɔn mɛ ǎ. Un ɖo ɖɛ xo wɛ hweɖěbǔnu ɔ́, un nɔ flín mi. Un nɔ byɔ́ Mawu Aklúnɔ mǐtɔn Jezu Klísu tɔn e nyí Tɔ́ susunɔ ɔ́ ɖɔ ní ná Yɛ tɔn mi, bónú Yɛ ɔ́ ná ná nǔnywɛ́ mi, bó ná ɖe mɛ e Mawu nyí ɔ́ xlɛ́ mi, bónú mi ná tunwun i. Un nɔ byɔ́ ɛ ɖɔ ní bló bónú wěziza ní byɔ́ ayi mitɔn mɛ, bónú mi ná tunwun nǔ e nukúnɖíɖó e wútu é ylɔ́ mi ɔ́ nyí é, bó ná tunwun lě e dɔkun e ɖo nǔ ɖagbe ɖagbe e é sɔ́ ɖ'ayǐ nú mɛ e nyí étɔn lɛ́ɛ mɛ ɔ́ sɔ́ é. Đo fínɛ́ ɔ́, Klísu hú gǎn gǎn lɛ́ɛ bǐ; é hú gǎn hlɔ̌nhlɔ́n lɛ́ɛ bǐ; é hú gǎn acɛkpikpa lɛ́ɛ bǐ; é hú gǎn gǎnhúnǔtɔ́ lɛ́ɛ bǐ, bɔ nǔ e mɛ ɖěbǔ ko sixú nyí ɔ́, é hú gǎn bǐ; é nyí gbɛ élɔ́ mɛ kɛ́ɖɛ́ wɛ é hú gǎn nǔ bǐ ɖe ǎ; lo ɔ́, é lɛ́ hú gǎn nǔ bǐ ɖo gbɛ e jǎwe ɔ́ mɛ. Mawu sɔ́ nǔ lɛ́ɛ bǐ ɖó Klísu sín acɛ mɛ, bó sɔ́ ɛ ɖó agun ɔ́ nú, bɔ é wɛ nyí gǎn ɖaxó bǐ ɔ́. Agun Mawu tɔn ɔ́, agbaza Klísu tɔn wɛ, bɔ Klísu e kpa acɛ nú gbɛ ɔ́ bǐ ɔ́, agun ɔ́ mɛ wɛ é ɖe bǐ kpéte. Đ'ayǐ xóxó ɔ́, mɛkúkú ɖɔhun wɛ mi cí, ɖó tónú e mi ma nɔ se nú Mawu é, kpódó hwɛ e mi nɔ hu lɛ́ɛ kpó wú. Mi nɔ xwedó gbɛ nyanya e mɛ e nyí gbɛ élɔ́ tɔn lɛ́ɛ nɔ zán é. Mi nɔ se tónú nú gǎn e kpa acɛ nú nǔ e ɖo yɛswímɛ ɖo hwe glɔ́ lɛ́ɛ. Gǎn énɛ́ ɔ́ wɛ nyí yɛ e ɖo azɔ̌ wa wɛ din ɖo gbɛtɔ́ e ma nɔ se tónú nú Mawu ǎ lɛ́ɛ mɛ é. Mǐ lɔmɔ̌ ɔ́, mɛ énɛ́ lɛ́ɛ ɖɔhun wɛ mǐ bǐ cí ɖ'ayǐ; mǐ nɔ zán gbɛ mǐtɔn lě e hwɛhuhu sín ninɔmɛ e mǐ ɖó ɔ́ jló gbɔn é, bɔ nǔ e mǐ lin lɛ́ɛ kpódó nǔ e jló mǐ é kpó wɛ mǐ nɔ́ wa. Đěe é nyí ɖɔ mɔ̌ wɛ mǐ kó cí ɔ́, vǐ e Mawu sín xomɛ dó ɔ́ wɛ mǐ kó nyí ɖ'ayǐ, mɛ bǐ ɖɔhun. Lo ɔ́, xomɛnyínyɔ́ Mawu tɔn d'agba, bɔ lě e é ɖó wǎn yíyí nú mǐ sɔ́ é zɔ́n, bɔ hwenu e mǐ kpo ɖo mɛkúkú ɖɔhun cí wɛ ɖo nukɔn tɔn, ɖó hwɛ mǐtɔn lɛ́ɛ wú ɔ́, é bló bɔ mǐ lɛ́ wá gbɛ kpódó Klísu kpó. Fɛ́nú Mawu tɔn mɛ wɛ mi mɔ hwlɛngán ɖe. Đo bǔ e mǐ ɖe xá Klísu Jezu ɔ́ mɛ ɔ́, Mawu fɔ́n mǐ kpó e kpó wá gbɛ, bónú mǐ ná ɖu axɔ́sú xá ɛ ɖo gbɛ e mǐ ma ɖo mimɔ wɛ ǎ é mɛ. É bló mɔ̌, bónú ayǐ e ná wá hɔ́n ɖo sɔ gúdo lɛ́ɛ ɔ́, é ná ɖe dɔkun maɖókpodó e ɖo fɛ́nú tɔn mɛ ɔ́ xlɛ́ mǐ, gbɔn xomɛnyínyɔ́ e é ɖó dó mǐ wú gbɔn Klísu Jezu jí é mɛ. Đó xomɛnyínyɔ́ Mawu tɔn mɛ wɛ mi mɔ hwlɛngán ɖe, gbɔn nǔ e mi ɖi é gbla mɛ. É nyí mi ɖésúnɔ wɛ hwlɛ́n miɖée gán ǎ; nǔnámɛ Mawu tɔn wɛ. É nyí nǔ e mi wa lɛ́ɛ sín ajɔ wɛ ǎ; énɛ́ ɔ́, mɛ ɖěbǔ sixú yí go ná ǎ. Đó nǔwiwa tɔn wɛ mǐ nyí; ɖo bǔ e mǐ ɖe xá Klísu Jezu é mɛ ɔ́, é bló mǐ, bónú mǐ ná zán gbɛ e gɔ́ nú nǔ ɖagbe wiwa é. Nǔ ɖagbe wiwa énɛ́ lɛ́ɛ wɛ é ɖésúnɔ kó sɔ́ ɖ'ayǐ nú mǐ, bónú mǐ ná bló. Mi mɛ e ma nyí Jwifu jiji ǎ lɛ́ɛ ɔ́, Jwifu lɛ́ɛ nɔ́ ylɔ́ mi ɖɔ atɔtɔnɔ; yě Jwifu lɛ́ɛ ɔ́, è ka nɔ ylɔ́ yě ɖɔ adagbotɔ́, ɖó wuntun e gbɛtɔ́ lɛ́ɛ sɔ́ alɔ yětɔn dó ɖó yě wú ɔ́ wútu ɔ́, mi flín nǔ e mi ko nyí ɖ'ayǐ é. Hwenɛ́nu ɔ́, zɔ wɛ mi ɖe nú Klísu; jǒnɔ wɛ mi nyí nú togun Izlayɛ́li tɔn, bó ɖo togun énɛ́ e Mawu sɔ́ é mɛ ǎ. Akpá e Mawu dó nú togun tɔn, bó dó nu alɛ xá ɛ ɔ́, midɛɛ lɛ́ɛ ɖ'é mɛ ǎ. Mi tunwun Mawu ǎ; mi ka ɖo nukún ɖó nǔɖé wɛ ǎ; mi ɖo gbɛ ɔ́ mɛ kpowun. Amɔ̌ din ɔ́, ɖo bǔ e mǐ ɖe xá Klísu Jezu ɔ́ mɛ ɔ́, mi mɛ e ɖo zɔ ɖ'ayǐ lɛ́ɛ ɔ́, mi sɛkpɔ́ Mawu, gbɔn Vǐ tɔn sín hun gbla mɛ. Đó Klísu Jezu ɖésúnɔ wɛ hɛn fífá wá nú mǐ; gbɔn kú tɔn gbla mɛ ɔ́, dǒ e klán mɛ e nyí Jwifu é kpódó mɛ e ma nyí Jwifu ǎ é kpó ɖó vovo, bó zɔ́n bɔ yě nyí kɛntɔ́ ɔ́, é mu. É dɔn yě ɖó bǔ, bɔ yě húzú togun ɖokpó ɔ́, bó mɔ fífá. É bló bɔ é sɔ́ byɔ́ ɖɔ è ní se tónú nú Jwifu lɛ́ɛ sín sɛ́n, kpó nǔ é nɔ zɔ́n lɛ́ɛ kpó, kpódó gbeta tɔn lɛ́ɛ kpán ǎ. É zé akɔta we énɛ́ lɛ́ɛ dó húzú togun yɔ̌yɔ́ ɖokpó ná ɖo bǔ e mǐ ɖe xá Klísu é mɛ. Lě e é ná fífá mǐ gbɔn é nɛ́. Klísu sú kɛn kún dó, gbɔn kú e é kú ɖo aklúzu jí é gbla mɛ; é dɔn akɔta we lɛ́ɛ bǐ kplé, bɔ yě húzú agbaza ɖokpó, bó gbɔ kɛn e yě ɖe xá Mawu é, gbɔn kú e é kú ɖo aklúzu jí é gbla mɛ. Klísu wá jlá Wɛn Ɖagbe fífá tɔn ɔ́ mi mɛ e ma nyí Jwifu ǎ, bó ɖo zɔ nú Mawu ɖ'ayǐ lɛ́ɛ, bó lɛ́ jlá mǐ mɛ e nyí Jwifu, bó kó sɛkpɔ́ ɛ lɛ́ɛ. Đó Klísu jí wɛ mǐ bǐ ná gbɔn, Jwifu kpódó mɛ e ma nyí Jwifu ǎ é kpó, bó ná sixú yi Mawu Tɔ́ ɔ́ gɔ́n, kpódó Yɛsinsɛn ɖokpó énɛ́ sín alɔdó kpó. Énɛ́ ɔ́ wútu ɔ́, mi mɛ e ma nyí Jwifu ǎ lɛ́ɛ ɔ́, mi sɔ́ nyí jǒnɔ abǐ mɛ e gosín fí ɖěvo bó wá é ǎ; lo ɔ́, mi húzú to ɖokpó ɔ́ mɛ nu xá mɛɖeɖóvo Mawu tɔn lɛ́ɛ, bó ɖo hɛ̌nnu Mawu tɔn mɛ. Nú è nǎ jlɛ́ mɛɖeɖóvo Mawu tɔn lɛ́ɛ dó nǔɖé wú ɔ́, xɔ wɛ yě nyí, bɔ midɛɛ lɛ́ɛ ɔ́, mi nyí blǐki e è dǒ mɛ xɔ ɔ́ ná é, bɔ mɛsɛ́dó lɛ́ɛ kpódó gbeyíɖɔ Mawu tɔn lɛ́ɛ kpó nyí awǐnnya dodó ɔ́, bɔ mi jínjɔ́n jí; bɔ Klísu Jezu ɖésú nyí awǐnnya e ɖo tají é. Klísu Jezu wɛ nyí sósyɛ́n nú xɔ ɔ́, bó ná ɛ hlɔ̌nhlɔ́n, nú xɔ ɔ́ ná yi ta, bó ná nyí sinsɛnxɔ mímɛ́ e è sɔ́ ɖó vo nú Aklúnɔ é. Đo bǔ e mi ɖe xá Klísu Jezu ɔ́ mɛ ɔ́, mi lɔmɔ̌ nyí blǐki ɖo blǐki e è dǒ mɛ xɔ ɔ́ ná lɛ́ɛ mɛ; bɔ mi kpódó mɛ ɖě lɛ́ɛ bǐ kpó ná kplé bó ná nyí xɔ e mɛ Yɛ Mawu tɔn nɔ́ nɔ é. Énɛ́ ɔ́ wútu ɔ́, nyɛ Pɔ́lu e ɖo gan sɛn wɛ ɖó Klísu Jezu e sɛn wɛ un ɖe ɔ́ wú, dó mi mɛ e ma nyí Jwifu ǎ lɛ́ɛ sín tamɛ ɔ́, azɔ̌ e Mawu zɔ́n mì ɖo xomɛnyínyɔ́ tɔn mɛ ɖɔ ma wa nú mi ɔ́, un ɖi ɖɔ mi ná kó se. Mawu ɖe nǔɖé xlɛ́ mì, bónú ma mɔ nǔ jɛ nǔbúdo tɔn wú. Un ko ɖɔ xó kpɛɖé dó nǔbúdo énɛ́ ɔ́ wú dó wěma élɔ́ mɛ. Énɛ́ ɔ́, ényí ɖɔ mi ɖo xixa wɛ ɔ́, mi hɛn ɔ́, mi ná tunwun lě e un mɔ nukúnnú jɛ nǔbúdo e kan Klísu ɔ́ wú gbɔn é. Đ'ayǐ xóxó ɔ́, Mawu ɖe nǔbúdo énɛ́ ɔ́ xlɛ́ gbɛtɔ́ lɛ́ɛ ǎ; amɔ̌ din ɔ́, é ɖe xlɛ́ mɛsɛ́dó mímɛ́ lɛ́ɛ kpódó gbeyíɖɔ lɛ́ɛ kpán gbɔn Yɛsinsɛn jí. Nǔbúdo ɔ́ ɖíe: mɛ e ma nyí Jwifu ǎ lɛ́ɛ ná mɔ nǔ ɖagbe e Mawu sɔ́ ɖó ayǐ nú togun tɔn ɔ́ yí xá mɛ e nyí Jwifu lɛ́ɛ, gbɔn Wɛn Ɖagbe ɔ́ jí. Yě bǐ nyí wǔjɔnú agbaza ɖokpó ɔ́ tɔn, bɔ akpá e Mawu dó ɔ́, yě lɔmɔ̌ ná ɖó mǐmá ɖ'é mɛ gbɔn Klísu Jezu jí. Nǔ e Mawu sɔ́ hlɔ̌nhlɔ́n tɔn, bó ná mì ɖo xomɛnyínyɔ́ tɔn mɛ ɔ́ zɔ́n bɔ azɔ̌ ce nyí Wɛn Ɖagbe jlájlá. Un sɔ mɛ e ma sɔ atɛ́n ɖo mɛɖeɖóvo Mawu tɔn lɛ́ɛ mɛ ɔ́ ǎ, có Mawu ka jɔwǔ mì, bó ɖɔ nyɛ ní jlá Wɛn Ɖagbe e nyí dɔkun maɖókpodó Klísu tɔn ɔ́ mɛ e ma nyí Jwifu ǎ lɛ́ɛ é. Má jlá Wɛn Ɖagbe ɔ́ yě, bó ná kplá gbɛtɔ́ lɛ́ɛ bǐ, nú yě ná mɔ nukúnnú jɛ lě e nǔbúdo Mawu tɔn e ɖo wi mɛ ɔ́ ná jɛ gbɔn é wú. Mawu e bló nǔ bǐ ɔ́ sɔ́ tito énɛ́ ɔ́ hwlá sín tɛgbɛ, bónú din ɔ́, gǎn lɛ́ɛ kpódó hlɔ̌nhlɔ́n e ɖo gbɛ e mǐ ma ɖo mimɔ wɛ ǎ mɛ lɛ́ɛ kpó ní mɔ nukúnnú jɛ nǔnywɛ́ Mawu tɔn wú gbɔn alɔ bǐ mɛ gbɔn agun ɔ́ gbla mɛ. Mawu wa nǔ gbɔn mɔ̌, bɔ é sɔgbe xá linlin e é ko ɖó sín tɛgbɛ, bó wá bló ɖ'é jí gbɔn Aklúnɔ mǐtɔn Klísu Jezu jí é. Bǔ e mǐ ɖe xá Klísu é kpó nǔɖiɖi e mǐ ɖó n'i é kpó zɔ́n bɔ mǐ glá bó sɛkpɔ́ ɛ kpó jiɖiɖe ɖaxó ɖé kpó. Énɛ́ ɔ́ wútu ɔ́, un ɖo byɔ̌byɔ́ mi wɛ ɖɔ awakanmɛ ní ma kú mi dó wǔvɛ́ e mɔ wɛ un ɖe dó ta mitɔn mɛ é wú ó; ɖagbe mitɔn wú wɛ un ɖo wǔvɛ́ énɛ́ lɛ́ɛ mɔ wɛ. Énɛ́ ɔ́ wú wɛ un nɔ jɛ kpo ɖo Mawu Tɔ́ ɔ́, ée nyí Tɔ́ nú hɛ̌nnu e ɖo sɛ́xwé é bǐ, kpódó ée ɖo ayǐkúngban jí é bǐ kpó ɔ́ nukɔn. Un nɔ byɔ́ ɛ ɖɔ, lě e susu tɔn d'agba sɔ ɔ́, ní dó wǔsyɛ́n lanmɛ nú mi kpó hlɔ̌nhlɔ́n kpó gbɔn Yɛsinsɛn jí. Un nɔ byɔ́ ɛ ɖɔ Klísu ní nɔ ayi mitɔn mɛ gbɔn nǔ e mi ɖi n'i é gbla mɛ. Un nɔ byɔ́ ɛ ɖɔ mi ní dó ɖɔ do, bó lí dǒ ɖo wǎn yíyí mɛ. Un nɔ byɔ́ ɛ ɖɔ mi kpódó mɛɖeɖóvo Mawu tɔn lɛ́ɛ kpó bǐ ní sixú mɔ nukúnnú jɛ lě e wǎn yíyí Klísu tɔn gbló sɔ é, lě e é ɖi ga sɔ é, lě e é yi jǐ sɔ é, kpódó lě e é gɔ́ngɔ́n sɔ é kpó wú. Nǔgbó wɛ! Mi ní mɔ nukúnnú jɛ wǎn yíyí tɔn wú, énɛ́ ɔ́, nǔ e Mawu nyí ɔ́ ná gɔ́ ayi mitɔn mɛ bǐ dégbédégbé. Có mɛɖé ka nɔ mɔ nukúnnú jɛ wǎn yíyí Mawu tɔn wú yí fó gbeɖé ǎ. Mawu ɖó hlɔ̌nhlɔ́n, bó hɛn ɔ́, é ná wa nǔ nú mǐ hú nǔ e mǐ byɔ́ ɛ ɔ́, abǐ ée lin wɛ mǐ tlɛ ɖe ɔ́ gbɔn hlɔ̌nhlɔ́n e ɖo azɔ̌ wa wɛ ɖo mǐ mɛ ɔ́ jí. Susu nú Mawu ɖo agun ɔ́ mɛ, ɖo Klísu Jezu mɛ, sín din káká sɔ́yi mavɔ mavɔ! Amǐ! Đó nǔ énɛ́ lɛ́ɛ bǐ wú ɔ́, nyɛ mɛ e ɖo ganxó ɖó un ɖo Aklúnɔ sɛn wɛ wútu ɔ́, un ɖo byɔ̌byɔ́ mi wɛ ɖɔ mi ní zán gbɛ mitɔn ní sɔgbe xá lě e Mawu jló gbɔn hwenu e é ylɔ́ mi é. Mi nɔ sɔ́ miɖée hwe hwebǐnu; mi nɔ ɖó xomɛfífá, bó nɔ́ ɖó suúlu. Mi nɔ mɔ miɖée gbɔ ɖo wǎn yíyí mɛ. Mi dó gǎn, bó sɔ́ fífá e dɔn mi cá, bɔ mi nyí ɖokpó ɔ́ dó hɛn bǔteninɔ e Yɛsinsɛn ná mi ɔ́ ɖó te. Agbaza ɖokpó géé wɛ ɖe, bɔ Yɛsinsɛn ɖokpó géé ɖe lě e nukúnɖíɖó e wú Mawu ylɔ́ mǐ é lɔ nyí ɖokpó géé gbɔn é. Aklúnɔ ɖokpó géé wɛ ɖe, bɔ nǔɖiɖi ɖokpó géé ɖe, bɔ yɛhwesinlilɛ ɖokpó géé ɖe. Mawu ɖokpó géé wɛ ɖe, bó nyí Tɔ́ nú mɛ bǐ, bó kpa acɛ nú mɛ bǐ, bó ɖo azɔ̌ wa wɛ ɖo mɛ bǐ mɛ, bó ɖo mɛ bǐ mɛ. Có nǔníná vovo wɛ mǐ mɛ ɖokpó ɖokpó mɔ yí, bɔ é sɔgbe xá ée Klísu ná é. Lě e nǔ e è wlǎn dó Mawuxówéma ɔ́ mɛ ɔ́ ɖɔ gbɔn ɔ́: “Hwenu e é yi jǐ aga ɔ́, é kplá gantɔ́ lɛ́ɛ yi, é ná nǔ gbɛtɔ́ lɛ́ɛ.” Étɛ́ ɖɔ wɛ è ka ɖe bó ɖɔ é yi jǐ aga? Ényí è ɖɔ é yi jǐ aga hǔn, é tó jɛ te wá do ɖo ayǐkúngban jí hwɛ̌ nɛ́! Mɛ e jɛ te wá do ɖo ayǐkúngban jí ɔ́ ɖokpó ɔ́ wɛ yi jǐ aga, bó ná sixú ɖu axɔ́sú ɖo nǔ bǐ nu ɖo fí bǐ. É wɛ ná nǔníná vovo gbɛtɔ́ lɛ́ɛ. É ná, bɔ mɛɖé lɛ́ɛ nyí mɛsɛ́dó, bɔ mɛɖé lɛ́ɛ nyí gbeyíɖɔ Mawu tɔn, mɛɖé lɛ́ɛ nyí Mawuxójlátɔ́, bɔ mɛɖé lɛ́ɛ nyí nukɔntɔ́, bó nyí nǔkplɔ́nmɛtɔ́. É bló mɔ̌, bó ná bló mɛɖeɖóvo Mawu tɔn lɛ́ɛ ɖó, bɔ yě ná sixú wa azɔ̌ e nyí klísusɛntɔ́ tɔn é; é ná bló bɔ agun e nyí agbaza Klísu tɔn ɔ́ ná yi nukɔn ɖo nǔɖiɖi mɛ, káká bɔ mǐ ná nɔ bǔ ɖo nǔɖiɖi mɛ, bó ná nɔ bǔ ɖo nukúnnú mɔ jɛ Mawu ví ɔ́ wú mɛ; mǐ ná nyí mɛxó ɖo nǔɖiɖi mɛ, bó ná mɔ hlɔ̌nhlɔ́n, lobo ná sɔ ga Klísu, bɔ nǔ bǐ ná vɔ ɖ'é wú. Énɛ́ ɔ́, mǐ sɔ́ ná cí yɔkpɔ́vú lɛ́ɛ ɖɔhun, bɔ mɛblɛ́ɖutɔ́ lɛ́ɛ ná sɔ́ nǔkplɔ́nmɛ yětɔn lɛ́ɛ dó gba ayi dó nú mǐ, bɔ mǐ ná nɔ xo yi aɖisí, bó ná nɔ́ xo yi amyɔ, lě e aslɔkɛ́ kpó jɔhɔn kpó nɔ́ dó ya nú tɔjíhún gbɔn ɖo tɔjí é ɖɔhun ǎ. Đó mɛblɛ́ɖutɔ́ lɛ́ɛ ɔ́, nǔ e yě sɔ́ sísɛ́ yětɔn dó wa é wɛ yě nɔ́ zé dó dɔn mɛ dó nǔ nyanya mɛ. Lo ɔ́, mǐ ɖo nǔgbó ɔ́ jlá wɛ kpódó wǎn yíyí kpó ɔ́, mǐ ná ɖo nukɔn yi wɛ ɖo nǔ bǐ mɛ, bó ná ɖo sisɛkpɔ́ Klísu e nyí ta ɔ́ wɛ. É wɛ zɔ́n bɔ wǔjɔnú tɛnmɛ tɛnmɛ agbaza tɔn lɛ́ɛ bǐ ɖo bǔ, bɔ gǒflɛ́mɛ tɛnmɛ tɛnmɛ e ɖo agbaza ɔ́ wú lɛ́ɛ hɛn agbaza ɔ́ ɖó bǔ ganjí. Énɛ́ ɔ́, ényí wǔjɔnú lɛ́ɛ ɖokpó ɖokpó ɖo azɔ̌ tɔn wa wɛ ɔ́, agbaza ɔ́ bǐ nɔ su, bó nɔ ɖo nukɔn yi wɛ gbɔn wǎn yíyí mɛ. Xó e ɖɔ nú mi wɛ un ɖe ɖo Aklúnɔ sín nyǐkɔ mɛ é ɖíe: mi ma sɔ́ nɔ zán gbɛ mitɔn nǔmaɖitɔ́ lɛ́ɛ ɖɔhun ó; yědɛɛ lɛ́ɛ ɔ́, linlin yětɔn ma ɖó ta ɖé lɛ́ɛ wɛ yě nɔ́ xwedó. Ayi yětɔn nɔ́ mɔ nǔ ɖěbǔ ǎ. Gbɛ jɔ gbɛ e Mawu nɔ́ ná mɛ ɔ́, yědɛɛ lɛ́ɛ ɖó mǐmá ɖěbǔ ɖ'é mɛ ǎ; ɖó yě gǔ, bó tlí tó taala. Nǔ ɖěbǔ sɔ́ nɔ́ nyí winnyá nú yě ǎ; yě jó yěɖée dó nú nǔ nyanya wiwa; nǔ ɖěbǔ nɔ́ hɛn yě ɖó te ɖo nǔ nyanya wiwa lixo ǎ. Midɛɛ lɛ́ɛ ɔ́, nǔ e mi kplɔ́n dó Klísu jí ɔ́ nɛ́ ǎ. Dandan mɛ ɔ́, è ɖɔ Jezu sín xó bɔ mi se. Ée mi ka ɖi nǔ nú Jezu ɔ́, è ko kplɔ́n nǔgbó e ɖo Jezu mɛ ɔ́ mi. Hǔn mi ɖó ná ɖe mɛ e mi nyí ɖ'ayǐ xóxó ɔ́ nyi ayǐ. Mɛ e mi nyí ɖ'ayǐ xóxó ɔ́ wɛ nɔ sɔ́ lě e mi nɔ zán gbɛ mitɔn gbɔn ɖ'ayǐ ɔ́ dó ayi mɛ nú mi. É wɛ jlǒ tɔn e nɔ blɛ́ mɛ lɛ́ɛ nɔ hɛn bú. Ayixa mitɔn kpódó linlin mitɔn kpó ɖó ná húzú bǐ kpéte. Mi sɔ́ mɛ yɔ̌yɔ́ e Mawu bló, bɔ é cí é ɖésúnɔ ɖɔhun ɔ́ dó. Mɛ yɔ̌yɔ́ énɛ́ nɔ́ ɖe éɖée xlɛ́ ɖo gbɛ jlɔ́jlɔ́, gbɛ mímɛ́ e nǔgbó ɔ́ nɔ sɔ́ dó ayi mɛ nú mɛ ɔ́ mɛ. Énɛ́ wútu ɔ́, mi jó adingban dó, nú mɛ ɖokpó ɖokpó ní ɖɔ nǔgbó nú nɔzo tɔn, ɖó mǐ bǐ wɛ nyí wǔjɔnú agbaza ɖokpó ɔ́ tɔn. Ényí mi sin xomɛ hǔn, mi cɔ́ miɖée bó ma jɛ hwɛ mɛ ó; hwe ma yi xɔ dó xomɛsin mitɔn ó. Mi ma ná tɛn awǒvi bónú é tɛ́n mi kpɔ́n ó. Mɛ e nɔ jɛ ajo ɖ'ayǐ ɔ́, ní jó ajo dó bó wa azɔ̌, bó nyí é ɖésúnɔ kpódó ayijlɔ́jlɔ́ kpó; énɛ́ ɔ́, é ná ɖó nǔ e é ná dó dó alɔ mɛ e nǔɖé hudó lɛ́ɛ é. Xó nyanya ɖěbǔ má nɔ tɔ́n sín nu mitɔn mɛ ó. Xó ɖagbe e ná dó alɔ mɛ nǔgbomɛ hwenu é, xó e ná wa ɖagbe nú mɛ e ɖo tó ɖó mi wɛ lɛ́ɛ kɛ́ɖɛ́ wɛ ná nɔ́ tɔ́n sín nu mitɔn mɛ. Mi ma wa nǔ bónú wǔ kú Yɛsinsɛn Mawu tɔn ó; Yɛsinsɛn énɛ́ wɛ nyí wuntun Mawu tɔn e ɖo mi wú é. É wɛ nyí gǎnjɛwú mǐtɔn ɖɔ ayǐ ɖé ná wá hɔ́n, bɔ Mawu ná ɖe mǐ sín nǔ nyanya mɛ bǐ sésé. Mi jó akpɔmimɔ dó; mi jó aɖi ɖíɖó dó, bó jó xomɛsin dó; mi jó jlɛɖiɖɔ dó, bó jó mɛnúɖiɖɔ dó. Mi jó adǎkaxixo bǐ dó. Mi nyɔ́ xomɛ dó miɖée wú, bó nɔ́ sɔ́ hwɛ kɛ miɖée, lě e Mawu sɔ́ hwɛ kɛ mi ɖo Klísu mɛ gbɔn é. Vǐ vívɛ́ná wɛ mi nyí nú Mawu; énɛ́ ɔ́ wútu ɔ́, mi ɖó ná dó gǎn, bó wa nǔ é ɖɔhun. Mi wa azɔ̌ kpódó wǎn yíyí kpó Klísu ɖɔhun. Klísu e yí wǎn nú mǐ bó sɔ́ éɖée jó dó ta mitɔn mɛ vɔ̌sánú ɖɔhun, vɔ̌sísá wǎn ɖagbenɔ e nɔ nyɔ́ Mawu nukún mɛ é ɖɔhun. È ma se agalilɛ xó, nǔblíblíwiwa, abǐ nukúnkɛndídó sín xó vɔ́vɔ́ ɖo tɛ́ntin mitɔn ó; ɖó mɛɖeɖóvo Mawu tɔn wɛ mi nyí. É jɛ xá ɖɔ è nǐ se wunhínhɔ́n xó, xó gbló kpódó xó kwíji kwíji ɖé kpán ɖo nu mitɔn ǎ; lo ɔ́, mi ní nɔ dó kú nú Mawu nú nǔ e é wa nú mi lɛ́ɛ. Mi tunwun ganjí ɖɔ agalɛtɔ́, nǔblíblíwatɔ́ abǐ gwěnɔ ɖé kún xwe axɔ́súɖuɖu Klísu tɔn kpódó Mawu tɔn kpó mɛ gbeɖé ó; ɖó gwě ɔ́, vodúnsinsɛn ɖɔhun wɛ é ɖe. Mɛ ɖé ma sɔ́ xó gbló bó dó blɛ́ mi ná ó, ɖó nǔ énɛ́ lɛ́ɛ wútu wɛ Mawu nɔ sin xomɛ dó mɛ e ma nɔ se tónú n'i ǎ lɛ́ɛ. Hǔn mi ma kpé nǔ ɖěbǔ xá mɛ énɛ́ lɛ́ɛ ó. Đ'ayǐ ɔ́, ablu mɛ wɛ mi ɖe; amɔ̌ din e mi ɖo bǔ xa Aklúnɔ ɔ́, mi ɖo wěziza mɛ; énɛ́ ɔ́ wú ɔ́, mi nɔ zán gbɛ mitɔn mɛ e nyí wěziza tɔn é ɖɔhun. Wěziza wɛ nɔ zɔ́n, bɔ è nɔ wa nǔ ɖagbe; è nɔ wa nǔ jlɔ́jlɔ́ bó nɔ́ ɖɔ nǔgbó. Mi nɔ́ tɛ́nkpɔ́n bó nɔ́ tunwun nǔ e nɔ́ nyɔ́ Aklúnɔ nukún mɛ é. Mi ma nɔ wa nǔ nyanya e mɛ e ɖo ablu mɛ lɛ́ɛ nɔ wa é ɖě ó; lo ɔ́, mi ɖe nǔ énɛ́ ɔ́ lɛ́ɛ gba ɖo wěziza nu. Đó nǔ e mɛ énɛ́ lɛ́ɛ nɔ wa ɖo nǔglɔ́ ɔ́, è sixú ɖɔ ǎ; winnyánú wɛ. Ényí è ɖe nǔ énɛ́ lɛ́ɛ bǐ gba ɖo wěziza nu ɔ́, è nɔ mɔ nukúnnú jɛ nǔ e yě nyí ɔ́ wú céɖécéɖé. Đó nǔ e è ɖe gba ɖo wěziza nu lɛ́ɛ bǐ wɛ nɔ́ húzú wěziza; énɛ́ wútu wɛ è ɖɔ: “Hwi mɛ e ɖo amlɔ dɔ́ wɛ ɔ́, fɔ́n sí te sín mɛkúkú lɛ́ɛ mɛ; énɛ́ ɔ́, Klísu sín wěziza ná hɔ́n dó jǐ towe.” Hǔn mi bo cɔ́ miɖée ganjí dó gbɛ e zán wɛ mi ɖe ɔ́ wú. Mi ma zán gbɛ mitɔn xlonɔ ɖɔhun ó; lo ɔ́, mi zán gbɛ mitɔn nǔnywɛ́tɔ́ ɖɔhun. Mi hwlɛndó hwenu lɛ́ɛ, bó wa nǔ; ɖó hwenu e mǐ ɖe ɔ́ nyɔ́ ǎ. Énɛ́ ɔ́ wútu ɔ́, mi ma wa nǔ mɛ e ma ɖó ayi xomɛ ǎ é ɖɔhun ó; lo ɔ́, mi tɛ́nkpɔ́n bó tunwun nǔ e Aklúnɔ jló ɖɔ mi ní wa é. Mi ma nu ahan mú ó; ahan nu díngan wɛ nɔ zɔ́n bɔ gbɛ mɛtɔn nɔ gblé; lo ɔ́, Yɛsinsɛn ní gɔ́ ayi mitɔn mɛ. Mi ji han tɛnmɛ tɛnmɛ dó dó wǔsyɛ́n lanmɛ nú miɖée, bó lɛ́ ji dó kpa Aklúnɔ kpódó ayixa mitɔn bǐ kpó. Mi dó kú nú Mawu Tɔ́ ɔ́ ɖó nǔ bǐ tamɛ hwebǐnu ɖo Aklúnɔ mitɔn Jezu Klísu sín nyǐkɔ mɛ. Mi nɔ hwíhwɛ́ miɖée ɖo miɖée glɔ́, ɖó sísí e mi ɖó nú Klísu ɔ́ wú. Nyɔ̌nu lɛ́ɛ mi, mi nɔ hwíhwɛ́ miɖée ɖó asú mitɔn lɛ́ɛ glɔ́, lě e mi nɔ hwíhwɛ́ miɖée ɖó Aklúnɔ glɔ́ gbɔn é. Đó asú wɛ nɔ kpa acɛ nú asi tɔn, lě e Klísu kpa acɛ nú agun tɔn gbɔn é. Klísu ɖésú wɛ nyí Mɛhwlɛ́ngántɔ́ nú agun e ɖo agbaza tɔn nyí wɛ é. Lě e agun ɔ́ nɔ hwíhwɛ́ éɖée ɖo Klísu glɔ́ gbɔn ɔ́ wɛ nyɔ̌nu lɛ́ɛ lɔ ɖo ná nɔ́ hwíhwɛ́ yěɖée ɖó asú yětɔn lɛ́ɛ glɔ́ gbɔn ɖo nǔ bǐ mɛ. Súnnu lɛ́ɛ mi, mi yí wǎn nú asi mitɔn lɛ́ɛ, lě e Klísu yí wǎn nú agun ɔ́ gbɔn káká bó sɔ́ éɖée jó dó ta tɔn mɛ é. É bló mɔ̌, bó sɔ́ sin kpódó xó tɔn kpó dó lɛ agun ɔ́ wé, bónú é ná sixú nyí agun e jɛ xá bó ná nyí agun Mawu tɔn é. Đó é ɖo biba wɛ ɖɔ agun ɔ́ ní wá é ɖésúnɔ nukɔn kpódó susu kpó; é jló ɖɔ agun ɔ́ ní nyɔ́ ɖɛkpɛ, bónú nǔ bǐ ní vɔ ɖ'é wú, bónú è ma mɔ nǔ kwíji ɖěbǔ ɖo wǔ tɔn ó; é ní ma ɖó blɔ̌ ɖěbǔ wǔ ó. Hǔn, asú lɛ́ɛ ɖó ná yí wǎn nú asi yětɔn lɛ́ɛ, lě e yě yí wǎn nú agbaza yě ɖésúnɔ tɔn gbɔn é. Mɛ e yí wǎn nú asi tɔn ɔ́, é ɖésúnɔ wɛ é yí wǎn ná. Đó mɛ ɖěbǔ gbɛ́ wǎn nú agbaza é ɖésúnɔ tɔn kpɔ́n gbeɖé ǎ; é nyɔ́ wa ɔ́, be wɛ é nɔ́ lé ná, bó nɔ ná ɛ nǔɖuɖu, lě e Klísu nɔ bló gbɔn nú agun tɔn é; agbaza tɔn sín wǔjɔnú wɛ mǐ nyí. Đó Mawuxó ɔ́ ɖɔ: “Énɛ́ ɔ́ wú wɛ súnnu ná jó tɔ́ tɔn kpódó nɔ tɔn kpó dó, bó ná jɛ kpɔ́ xá asi tɔn, bɔ yě mɛ we lɛ́ɛ bǐ ná húzú ɖokpó géé.” Nǔbúdo titewungbe ɖé wɛ è ɖe xlɛ́ ɖo fí élɔ́, bɔ nyɛ mɔ ɖɔ Klísu kpódó agun ɔ́ kpó xó ɖɔ wɛ é ɖe. É ka lɛ́ ɖo xó ɖɔ dó mǐ lɔmɔ̌ wú wɛ: súnnu ɖokpó ɖokpó ɖó ná yí wǎn nú asi tɔn é ɖésúnɔ ɖɔhun; nyɔ̌nu ɖokpó ɖokpó ɖó ná sí asú tɔn. Vǐ lɛ́ɛ mi, azɔ̌ e nyí azɔ̌ mitɔn bó sɔgbe bɔ mi ná wa ɖo Aklúnɔ nukɔn ɔ́ wɛ nyí ɖɔ mi ná se tónú nú mɛ e ji mi lɛ́ɛ. Sɛ́n nukɔntɔn e Mawu dó, bó dó akpá d'é jí ɔ́ wɛ nyí: “Sí tɔ́ towe kpódó nɔ towe kpó, bónú gbɛ ná nyɔ́ nú we, bɔ a nǎ dɔ́ ji ɖo ayǐkúngban jí fí.” Vǐtɔ́ lɛ́ɛ mi, mi ma nɔ wa nǔ, bó ná dó dó xomɛsin nú vǐ mitɔn lɛ́ɛ ó; amɔ̌ mi hɛn yě, bó gbɛ́ nǔ nú yě, bó ná kplɔ́n yě lě e Aklúnɔ jló gbɔn é. Kannumɔ lɛ́ɛ mi, mi se tónú nú gǎn mitɔn e ɖo ayǐkúngban jí fí lɛ́ɛ é, kpó sísí kpó, kpó sísɔ́sísɔ́ kpó, kpódó ayijlɔ́jlɔ́ kpó Klísu sɛn wɛ mi ɖe ɖɔhun. É ní ma nyí nukún yětɔn mɛ kɛ́ɖɛ́ wɛ mi ná bló mɔ̌ ɖe, mɛ e ɖo biba ná nyɔ́ ɖo gbɛtɔ́ lɛ́ɛ nukɔn wɛ é ɖɔhun ó; amɔ̌ mi se tónú klísusɛntɔ́ e nɔ wa jlǒ Mawu tɔn kpódó ayixa tɔn bǐ kpó é ɖɔhun. Mi nɔ wa kannumɔzɔ́ mitɔn kpódó jlǒ ɖagbe kpó, Aklúnɔ ɖésú wa azɔ̌ ná wɛ mi ɖe ɖɔhun, bó ma nɔ lin ɖɔ gbɛtɔ́ lɛ́ɛ kɛ́ɖɛ́ wa azɔ̌ ná wɛ émí ɖe ó. Bó tunwun ɖɔ mɛ ɖokpó ɖokpó ná mɔ nǔ ɖagbe e é wa ɔ́ sín ajɔ yí ɖo Aklúnɔ gɔ́n; mɛ ɔ́ sixú nyí kannumɔ, mɛ ɔ́ sixú ɖo éɖée sí. Gǎn lɛ́ɛ mi, mi lɔmɔ̌, mi ná nɔ zán jijɔ ɖagbe xá kannumɔ mitɔn lɛ́ɛ. Mi ma nylá hun dó yě ó, bó ka tunwun ɖɔ mi kpódó yě kpó wɛ ɖó gǎn ɖokpó ɔ́ ɖo sɛ́xwé; gǎn énɛ́ ka nɔ ɖe mɛɖé ɖó vo ɖo mɛɖé mɛ ǎ. Nǔ e kpo bɔ un ná ɖɔ nú mi é ɖíe: mi ba hlɔ̌nhlɔ́n mitɔn ɖo bǔ e mi ɖe ɖo Aklúnɔ mɛ ɔ́ mɛ, bó ba ɖo hlɔ̌nhlɔ́n tɔn e kpé nǔ bǐ wú é mɛ. Mi fɔ ahwanfunnú e Mawu ná mi lɛ́ɛ bǐ kplá, bó ná sixú nɔ te ɖo mɔ e awǒvi nɔ ɖó nú mɛ lɛ́ɛ nukɔn. Đó gbɛtɔ́ lɛ́ɛ ná fun ahwan xá wɛ mi ɖe ǎ; lo ɔ́, nǔɖoyɛswímɛ nyanya e ɖo jǐnukúnsin kpó ayǐkúngban kpó tɛ́ntin, acɛkpikpa lɛ́ɛ, hlɔ̌nhlɔ́n lɛ́ɛ kpódó gǎn gbɛ élɔ́ mɛ tɔn e mǐ ma nɔ́ mɔ ǎ lɛ́ɛ kpó wɛ mi ɖó ná fun ahwan xá. Énɛ́ ɔ́ wútu ɔ́, mi ní fɔ ahwanfunnú e Mawu ná mi lɛ́ɛ bǐ kplá din; énɛ́ ɔ́, azǎn nyanya ɔ́ gbé wá su ɔ́, mi ná sixú nɔ te ɖo kɛntɔ́ nukɔn, bɔ hwenu e mi ná fun ahwan ɔ́ fó ɔ́, mi ná lɛ́ kpo ɖo acéjí. Hǔn mi bó ɖo acéjí. Nǔgbó ní nyí gǒjíblánú ɖo alin mitɔn; hwɛjijɔ ní nyí ganwu nú mi dó. Kan ɖó dó Wɛn Ɖagbe e nɔ ná fífá mɛ ɔ́ jlájlá wú ní nyí afɔkpa ɖo afɔ mitɔn. Nǔɖiɖi ní nyí gǎglónú nú mi, bónú mi nɔ sɔ́ hɛn tɛgbɛ, bó ná dó xo gǎ myɔnɔ e kɛntɔ́ ná da dó mi ɔ́ cí. Hwlɛngán ní nyí gangbákún ɖo ta nú mi, bónú Mawuxó ɔ́ ní nyí hwǐ e Yɛsinsɛn sɔ́ dó alɔ mɛ nú mi é. Mi ná nɔ xo ɖɛ tɛnmɛ tɛnmɛ, bó ná nɔ sa vo nú Mawu gbɔn Yɛsinsɛn jí hwebǐnu. Mi nɔ́ nɔ acéjí, bó nɔ́ ɖó kan d'é wú titewungbe, lobo nɔ xo ɖɛ nú mɛɖeɖóvo Mawu tɔn lɛ́ɛ bǐ. Mi nɔ xo ɖɛ nú nyɛ lɔmɔ̌, bónú un ja xó ɖɔ gbé hǔn, Mawu ní ná mì xó e sɔgbe é, bónú ma ɖɔ xó kpódó jiɖiɖe kpó, bó ná dó tín nǔbúdo Wɛn Ɖagbe ɔ́ tɔn mɛ. Un ɖo gankpá mɛ din cóbó ka sɔ́ Wɛn Ɖagbe énɛ́ sín afɔ ɖó te. Hǔn mi bo nɔ xo ɖɛ nú mì, bónú ma sixú jlá Wɛn Ɖagbe ɔ́ kpódó jiɖiɖe kpó lě e un ɖó ná bló gbɔn é. Nɔví wǎnyínámɔ mǐtɔn Ticíku e ɖo gbejí ɖo alɔdómɛ tɔn lɛ́ɛ mɛ, ɖo Aklúnɔ sín azɔ̌ lɛ́ɛ mɛ ɔ́ ná ɖɔ xó ce lɛ́ɛ bǐ nú mi, bónú mi ná tunwun lě e un ɖe gbɔn é. Nǔ e wú un sɛ́ ɛ dó tawun ɔ́ wɛ nyí ɖɔ é ná wá ɖɔ lě e mǐ ɖe gbɔn ɔ́ nú mi, bó dó ná akɔ́nkpinkpan mi. Mawu Tɔ́ ɔ́ kpódó Aklúnɔ Jezu Klísu kpó ní ná fífá kpódó wǎn yíyí kpó, kpódó nǔɖiɖi kpó nɔví ɖo Klísu mɛ lɛ́ɛ bǐ. Fɛ́nú Mawu tɔn ní nɔ kpɔ́ xá mɛ e ɖó wǎn yíyí mavɔ mavɔ nú Aklúnɔ mǐtɔn Jezu Klísu lɛ́ɛ. Mǐ mɛsɛntɔ́ Klísu Jezu tɔn Pɔ́lu kpódó Timɔtée kpán wɛ sɛ́ wěma élɔ́ dó mɛɖeɖóvo Mawu tɔn e ɖi nǔ nú Klísu Jezu bó ɖo Filípu lɛ́ɛ; mǐ sɛ́ dó yě kpó agunnukɔntɔ́ lɛ́ɛ kpó, kpódó yě mɛ e nɔ kpé nukún dó agunví lɛ́ɛ wú é kpán. Mawu Tɔ́ mǐtɔn kpódó Aklúnɔ Jezu Klísu kpán ní ná fɛ́nú kpódó fífá kpó mi. Nú un flín mi hweɖěbǔnu ɔ́, un nɔ dó kú nú Mawu ɖó mi bǐ ta mɛ. Un ɖo ɖɛ xo dó ta mitɔn mɛ wɛ hweɖěbǔnu ɔ́, un nɔ xo ɖɛ kpódó xomɛhunhun kpán. Đó lě e mi dó alɔ mì gbɔn sín gbe e gbe mi ɖi nǔ ɔ́, káká wá jɛ din, ɖo Wɛn Ɖagbe ɔ́ jlájlá lixo ɔ́ wútu. Un gán jɛ nǔ élɔ́ wú: Mawu e bɛ́ azɔ̌ ɖagbe énɛ́ ɖo tɛ́ntin mitɔn ɔ́ ná ɖ'é wú, káká bɔ é ná fó ɖo gbe e gbe Jezu Klísu ná lɛ́ kɔ wá dó é. Linlin mɔ̌hunkɔtɔn e un ɖó dó mi bǐ wú ɔ́ sɔgbe ganjí. Nǔgbó ɔ́, mi bǐ ɖo ayi mɛ nú mì, ɖó din e un ɖo gankpá mɛ ɔ́ kpó hwenu e è ma ko wlí mì ǎ, bɔ un jɛ ahwan Wɛn Ɖagbe ɔ́ jí, bó sɔ́ jínjɔ́n ayǐ, bɔ é lí dǒ é kpó ɔ́, ɖagbe e Mawu wa nú mì ɔ́, é wa nú mi lɔmɔ̌. Ée un ɖɔ un yí wǎn nú mi ɔ́, Mawu tunwun ɖɔ nǔgbó ɖɔ wɛ un ɖe. Wǎn e un yí nú mi ɔ́, Klísu Jezu gɔn wɛ é gosín. Đɛ e un nɔ xo nú mi ɔ́ ɖíe: un nɔ byɔ́ Mawu ɖɔ é ní bló bónú wǎn e mi yí nú miɖée ɔ́ ní ɖo jijɛ jí wɛ, bónú mi ní tunwun nǔ ganjí, bó ɖó nukúnnú-mɔjɛnǔmɛ titewungbe. Énɛ́ ɔ́, mi ná sixú tunwun nǔ e nyí nǔ ɖagbe ɔ́ bó sɔ́ bó ná nyí mɛ mímɛ́, bɔ hwenu e Klísu ná lɛ́ kɔ wá ɔ́, è nǎ mɔ nǔɖé ɖɔ dó mi wú ǎ. Jezu Klísu ná ná hlɔ̌nhlɔ́n mi, bɔ mi ná nɔ wa nǔ jlɔ́jlɔ́, bɔ mɛ lɛ́ɛ ná nɔ kpa susu nú Mawu, bó ná nɔ mlá ɛ. Nɔví ce lɛ́ɛ mi, un jló nú mi ní tunwun ɖɔ nǔ e jɛ dó jǐ ce ɔ́ lɛ́ zɔ́n bɔ Wɛn Ɖagbe ɔ́ yi nukɔn. Nǔ énɛ́ wɛ zɔ́n, bɔ sɔ́ja hɔnmɛcɔ́tɔ́ lɛ́ɛ bǐ kpó mɛ ɖě lɛ́ɛ bǐ kpó tunwun ɖɔ Klísu e un nɔ sɛn ɔ́ wútu wɛ un ɖo gankpá mɛ. Ée nɔví lɛ́ɛ mɔ ɖɔ un ɖo gankpá mɛ ɔ́, yě mɛ gěgé ɖó akɔ́nkpinkpan, bó ɖó jiɖiɖe dó Aklúnɔ wú, bó nɔ syɛ́n ta bó nɔ ɖo Mawuxó jlá d'é jí wɛ ma ɖi xɛsi. Nǔgbó ɔ́, mɛɖé lɛ́ɛ ɖo yě mɛ, bó sɔ́ wǔhwan kpó jlɛ kpó sín ayixa dó jlá Klísuxó ɔ́ ná; mɛ ɖěvo lɛ́ɛ ka nɔ jlá Klísuxó ɔ́ kpó ayixa ɖagbe kpó. Yě mɛ e nɔ jlá Klísuxó ɔ́ kpódó ayixa ɖagbe kpó lɛ́ɛ ɔ́, yě nɔ wa nǔ kpódó wǎn yíyí kpán, ɖó yě tunwun ɖɔ Mawu sɔ́ mì, nú ma nɔ jɛ ahwan Wɛn Ɖagbe ɔ́ jí. Mɛɖě lɛ́ɛ ɔ́, xó e ɖɔ wɛ yě ɖe lɛ́ɛ gosín ayixa yětɔn mɛ ǎ; lo ɔ́, zalixámɛ sín ayixa wɛ yě sɔ́ dó ɖo Klísuxó ɔ́ jlá ná wɛ; yě ɖo linlin wɛ ɖɔ émí ná dó wǔvɛ́ wǔvɛ́ jí nú mì din e un ɖo gankpá mɛ é. Nú ayixa e dó jlá Klísuxó ɔ́ ná wɛ yě ɖe ɔ́ sɔgbe kpó é ma sɔgbe kpó ɔ́, énɛ́ ɖɔ nǔɖé ǎ; é ná bó nyí alɔkpa ɖěbǔ mɛ ɔ́, è ko jlá Klísuxó ɔ́, bɔ é nyí xomɛhunhun nú mì, bɔ xomɛ tɔn ná ɖo hunhun mì wɛ tɛgbɛ. Đó un tunwun ɖɔ gbɔn ɖɛ mitɔn lɛ́ɛ kpódó Yɛ Jezu Klísu tɔn sín alɔgɔ́númɛ kpán gbla mɛ ɔ́, nǔ énɛ́ lɛ́ɛ bǐ sésé ná wá nyí ɖagbe nú mì. Nǔgbó ɔ́, un ɖo te, bó ɖo nukún ɖó wɛ syɛ́nsyɛ́n ɖɔ nǔ ɖěbǔ ní ma zɔ́n, bónú winnyá hu mì ó. É nyɔ́ wa ɔ́, din kpódó hwe lɛ́ɛ bǐ nu kpó ɔ́, un ɖó gǎnjɛwú syɛ́nsyɛ́n ɖɔ un ɖo gbɛ oo, un ɖo kú oo, un ná sɔ́ nyɛɖée bǐ dó ɖe susu tɔn xlɛ́. Đó nyɛ ɔ́, gbɛ ce ɔ́, Klísu wɛ, bɔ kú nyí le nú mì. Lo ɔ́, nú un nɔ gbɛ ɔ́, un hɛn ɔ́, un ná wa nǔ ɖagbe; hǔn, gbɛ wɛ un ná nɔ a, kú wɛ un ná kú a, un sɔ́ tunwun ée un ná sɔ́ ɖ'é mɛ é ǎ. Un mɔ ɖɔ nǔ we énɛ́ lɛ́ɛ bǐ ɖo dindɔn mì wɛ: un jló ná gosín gbɛ élɔ́ mɛ, bó ná yi nɔ kpɔ́ xá Klísu, énɛ́ ɔ́ ba wɛ un ɖe tawun. Lo ɔ́, nǔ e ɖo tají ɔ́ wɛ nyí ɖɔ ma nɔ gbɛ ɖó midɛɛ lɛ́ɛ wútu. Un gán jɛ énɛ́ wú, bó tunwun ɖɔ un ná nɔ ayǐ, bó nɔ kpɔ́ xá mi bǐ, bó ná dó alɔ mi bɔ mi ná ɖó nukɔn yiyi, bó ná ɖó xomɛhunhun ɖo nǔɖiɖi e mi ɖó nú Klísu ɔ́ mɛ. Énɛ́ ɔ́, hwenu e un ná lɛ́ wá mi gɔ́n ɔ́, mi na ɖeji, bó gó ɖo Klísu Jezu mɛ ɖó nyɛ wú. Nǔ e mi ná wa kpowun ɔ́ wɛ nyí ɖɔ mi ní zán gbɛ mitɔn lě e Wɛn Ɖagbe Klísu tɔn ɔ́ zɔ́n gbɔn é. Énɛ́ wú ɔ́, nú un wá mi gɔ́n oo, abǐ un gɔn mi gɔ́n oo, má se ɖɔ mi syɛ́nlǐn, bó ɖó linlin ɖokpó ɔ́, lobo zé ayixa ɖokpó ɔ́ dó ɖo ahwan fun ɖó kpɔ́ wɛ, nú nǔɖiɖi e Wɛn Ɖagbe ɔ́ nɔ na mɛ é. Mi ma jó miɖée dó nú kɛntɔ́ mitɔn lɛ́ɛ ní dó xɛsi nú mi ɖo nǔ ɖěbǔ mɛ ó; énɛ́ ɔ́ ná nyí xlɛ́ nú yě ɖɔ bǔbú wɛ yě ɖe, bó ka ná nyí xlɛ̌ nú midɛɛ lɛ́ɛ ɖɔ hwlɛngán li jí wɛ mi ɖe; Mawu sín azɔ̌ wɛ nyí énɛ́ lɛ́ɛ. Đó Mawu wa ɖagbe nú mi, bɔ mi ná sɛn Klísu; é nyí mi ná ɖi nǔ n'i kpowun wɛ ǎ, lo ɔ́, mi ná ji ya lɔmɔ̌ ɖó ta tɔn mɛ. Din ɔ́, nyɛ kpó mi kpó bǐ wɛ ɖo ahwan fun ɖó kpɔ́ wɛ, bɔ ahwan e fun wɛ mi ɖe ɔ́, mi mɔ bɔ un fun ɖ'ayǐ, bó ka lɛ́ kpo ɖo funfun wɛ din, lě e mi se gbɔn é. Nǔɖiɖi e mi ɖó nú Klísu ɔ́ nɔ́ ná hlɔ̌nhlɔ́n mi d'é jí a? Wǎn yíyí e Klísu ɖó nú mi ɔ́ nɔ́ ná akɔ́nkpinkpan mi a? Mi ɖo bǔ ɖo miɖée tɛ́ntin ɖo Yɛsinsɛn sín nǔwiwa mɛ a? Mi yí wǎn nú miɖée a? Mi nɔ nyɔ́ xomɛ dó miɖée wú a? Hǔn un ɖo byɔ̌byɔ́ mi wɛ ɖɔ mi ní ɖó gbe kpɔ́, bó ɖó wǎn yíyí ɖokpó ɔ́, bó ɖó ayixa ɖokpó ɔ́ kpódó linlin ɖokpó ɔ́ kpán, bó ná dó dó xomɛhunhun nú mì yi kpé. Mi ma sɔ́ ce jɛ́n ná nyɔ́ sín ayixa, abǐ mɛɖée sɔ́ su dó wǔvɔ́ sín ayixa dó wa nǔ ɖěbǔ ná ó; lo ɔ́, mi nɔ sɔ́ miɖée hwe ɖo mɛ ɖě lɛ́ɛ nukɔn, bónú mɛ ɖokpó ɖokpó ní nɔ mɔ ɖɔ mɛ ɖě lɛ́ɛ hú gǎn émí. Mɛɖěbǔ ma nɔ ba ɖagbe é ɖésúnɔ tɔn ó; lo ɔ́, mɛ ɖokpó ɖokpó ní nɔ ba ɖagbe mɛ ɖě lɛ́ɛ tɔn. Mi ɖó ninɔmɛ e Klísu Jezu ɖó é. Klísu ko ɖó ninɔmɛ Mawu tɔn sín do; é ka ba ɖɔ émí ná zé émíɖée ɖó Mawu há jí kpó hlɔ̌nhlɔ́n kpó ǎ. É nyɔ́ wa ɔ́, é ɖésúnɔ ɔ́ gbɛ́ nǔ e é ɖó ɔ́ bǐ, bó zé ninɔmɛ mɛsɛntɔ́ tɔn. É húzú gbɛtɔ́, bó wá ɖi gbɛtɔ́ yǎyá kpowun ɖé ɖɔhun. É yí gbe bó sɔ́ éɖée hwe, bó se tónú nú Mawu káká yi kú; aklúzu jí wɛ é kú ɖe lɔ. Énɛ́ ɔ́ wú wɛ Mawu sɔ́ ɛ su, bó sɔ́ ɛ ɖó tɛn e nyí ɖaxó bǐ ɔ́ mɛ, lobo ná ɛ nyǐkɔ e hú gǎn nyǐkɔ ɖě lɛ́ɛ bǐ é, bónú è ylɔ̌ Jezu sín nyǐkɔ hweɖěbǔnu ɔ́, mɛ e ɖo jǐxwé lɛ́ɛ bǐ, kpó mɛ e ɖo ayǐkúngban jí lɛ́ɛ bǐ kpó, kpódó mɛ e ɖo ayǐkúngban glɔ́ lɛ́ɛ bǐ kpán ná jɛ kpo kpó sísí kpó, bónú mɛ bǐ ná jlá ɖɔ Jezu Klísu wɛ nyí Aklúnɔ; énɛ́ ɔ́ wɛ ná sɔ́ Mawu Tɔ́ ɔ́ su. Énɛ́ ɔ́, mɛvívɛ́ná ce lɛ́ɛ mi, hwenu e un ɖo kpɔ́ xá mi ɔ́, mi nɔ se tónú nú mì tɛgbɛ; din e un ma ka sɔ́ ɖo kpɔ́ xá mi ǎ ɔ́, é lɛ́ ɖo tají ɖɔ mi ní lɛ́ se tónú nú mì. Mi wa azɔ̌ kpó xɛsi kpó, kpódó sísɔ́sísɔ́ kpán nú hwlɛngán mitɔn ná nyí hwlɛngán kpíkpé. Đó Mawu ɖo azɔ̌ wa ɖo mi wú wɛ tɛgbɛ, bónú mi ná sixú nɔ ɖó jló, bó ná nɔ wa nǔ e sɔgbe xá tito é ɖésúnɔ tɔn é. Mi wa nǔ bǐ; mi ma húnhún nǔ ɖɔ ɖo nǔ e wa wɛ mi ɖe lɛ́ɛ ɖě kɔn ó, mi ma ka dɔn nǔ ɖo ɖě kɔn ó; énɛ́ ɔ́, mi ná nyí xomɛvɔ́nɔ, bó ná nyí mɛ mímɛ́, lobo ná nyí Mawu ví maɖóblɔ̌ɖowǔ ɖo gbɛtɔ́ nyanya, ayigɛ́dɛ́gɛ́dɛ́nɔ gbɛmɛ fí tɔn lɛ́ɛ tɛ́ntin. Mi ɖó ná nɔ kɔ́n ɖo tɛ́ntin yětɔn sunví ɖɔhun, bó ná nɔ ɖɔ xó e nɔ ná gbɛ mɛ ɔ́ nú yě. Ényí mi wa nǔ gbɔn mɔ̌ ɔ́, xomɛ ná hun mì dó mi wú hwenu e Klísu ná lɛ́ kɔ wá dó é; nǔgbó ɔ́, é ná ɖe xlɛ́ ɖɔ azɔ̌ e un wa lɛ́ɛ, kpódó tagba e un jɛ lɛ́ɛ kpán ɖě kún nyí nǔ yǎyá ó. É ná bó byɔ́ ɖɔ è nǎ hu mì dó sá vɔ̌ ná gɔ́ nú vɔ̌ e sá nú Mawu wɛ mi ɖe gbɔn nǔɖiɖi mitɔn gbla mɛ ɔ́, awǎjijɛ wɛ é nyí nú mì, bɔ mi mɛ bǐ ná jɛ awǎ xá mì. Mɔ̌ ɖokpó ɔ́, mi lɔmɔ̌ mi ɖó ná jɛ awǎ, bɔ un ná jɛ awǎ xá mi. Đo Aklúnɔ Jezu sín nyǐkɔ mɛ ɔ́, un ɖo linlin wɛ ɖɔ zaanɖé din ɔ́, un ná sɛ́ Timɔtée dó mi, bónú é lɛ́ kɔ wá ɔ́, xó mitɔn e é ná wá ɖɔ nú mì lɛ́ɛ ná ná akɔ́nkpinkpan nyɛ ɖésú. Nǔ e ɖo hǔn mɛ nú mì lɛ́ɛ ɔ́, é ɖokpónɔ géé wɛ nɔ ɖɔ xá mì, bɔ lě e nǔ ná nɔ bó ná nyɔ́ nú mi ɔ́ ɖo ayixa mɛ n'i titewungbe. Mɛɖě lɛ́ɛ bǐ ɔ́, nǔ yě ɖésúnɔ tɔn lɛ́ɛ jɛ́n nɔ myá nukún nú yě; nǔ e nyí Jezu Klísu tɔn lɛ́ɛ ɖě nɔ́ myá nukún nú yě ǎ. Mi ɖésúnɔ ɔ́, mi tunwun ninɔmɛ Timɔtée tɔn; lě e nyɛ kpó e kpó wa azɔ̌ vǐ kpó tɔ́ kpó ɖɔhun gbɔn, bó jlá Wɛn Ɖagbe ɔ́, mi tunwun. Un ɖo linlin wɛ ɖɔ nú un ko mɔ nukúnnú jɛ nǔ e ɖo te kpɔ́n mì ɔ́ wú tlóló ɔ́, un ná sɛ́ ɛ dó mi. Un ka ɖeji dó Aklúnɔ wú ɖɔ, ɖo malín málín mɛ din ɔ́, nyɛ ɖésúnɔ ná wá mɔ mi. Nɔví mǐtɔn Epafloditi e jí mi sɛ́ nǔ e hudó mì lɛ́ɛ gbɔn ɔ́, nyɛ kpó é kpó wa azɔ̌ ɖó kpɔ́, bó fun ahwan ɖó kpɔ́; din ɔ́, un mɔ ɖɔ é nyɔ́ nú ma lɛ́ kɔ n'i sɛ́ dó mi. É ɖó jlǒ ɖaxó ɖɔ émí ní mɔ mi bǐ, bɔ é ɖo hǔn mɛ n'i ɖésú, ɖó mi se ɖɔ é jɛ azɔn. É jɛ azɔn nǔgbó, bó ɖibla kú; amɔ̌, Mawu kú nǔbláwǔ n'i, é ka nyí é ɖokpó wɛ Mawu kú nǔbláwǔ ná ǎ; é kú nǔbláwǔ nú nyɛ lɔmɔ̌, bónú aluwɛ mɛ e un ko ɖe ɔ́ ní ma lɛ́ jɛ jí ó. É ɖo ayi mɛ nú mì ɖɔ ma yá wǔ sɛ́ ɛ dó mi, bónú mi mɔ ɛ ɔ́, xomɛ ná lɛ́ hun mi, bɔ nyɛ ɖésúnɔ ɔ́ ka sɔ́ ná nɔ aluwɛ mɛ ǎ. Nú é wá hǔn, mi bo yí i kpódó xomɛhunhun ɖaxó kpán, nɔví ɖo Aklúnɔ mɛ ɖɔhun. Mi ɖó ná ɖó sísí nú gbɛtɔ́ étɔn ɖɔhun lɛ́ɛ. Đó é ɖibla kú ɖó Klísu sín azɔ̌ tamɛ. É ɖibla sɔ́ gbɛ tɔn nyi gbě ɖo azɔ̌ e é wa xá mì, bó ná dó dó alɔ mì ɖó tɛn mitɔn mɛ é mɛ. Nɔví ce lɛ́ɛ mi, din ɔ́, mi jɛ awǎ ɖo Klísu mɛ, nú é byɔ́ ɖɔ má lɛ́ vɔ́ nǔ e un ko wlán sɛ́ dó mi ɖ'ayǐ lɛ́ɛ wlán sɛ́ dó mi ɔ́, agbɔ̌n kpé mì d'é wú ǎ; é ná wa ɖagbe nú mi. Mi cɔ́ miɖée dó nǔnyanyawatɔ́ nɛ́ lɛ́ɛ wú; mi cɔ́ miɖée dó avǔn nɛ́ lɛ́ɛ wú; mi cɔ́ miɖée dó wútujánúmɛtɔ́ nɛ́ lɛ́ɛ wú. Mǐ mɛ e nɔ sɛn Mawu ɖo Yɛ Mawu tɔn mɛ lɛ́ɛ ɔ́, mǐ wɛ gbo ada titewungbe ɔ́; mǐ wɛ nɔ xɔ susu ɖo Klísu Jezu mɛ; mǐ wɛ ma nɔ gán jɛ walɔ gbɛtɔ́ tɔn lɛ́ɛ wú ǎ. Có nyɛ lɔmɔ̌ hɛn ɔ́, un ná gán jɛ walɔ énɛ́ lɛ́ɛ wú. Ényí mɛɖé mɔ ɖɔ gbɛtɔ́ sín walɔ énɛ́ lɛ́ɛ wɛ zɔ́n bɔ émí ɖo ganjí ɔ́, nǔ e wú nyɛ ná ɖó dó, bó ɖɔ un ɖo ganjí ɔ́ hú gǎn éyɛ́ tɔn. Đó Izlayɛ́li ví jiji wɛ nú mì, bɔ un jɔ ɖo Bɛnjamɛ́ɛ sín hɛ̌nnu mɛ. Mɛ e ji mì lɛ́ɛ ɔ́, Eblée wɛ yě nyí. Azǎn tántɔn wɛ un ɖó, bɔ è gbo ada nú mì. Nú è nǎ xwedó sɛ́n Jwifu lɛ́ɛ tɔn ɔ́, Falizyɛn wɛ un nyí. Un nɔ jɛ hun dó Jwifu lɛ́ɛ sín sɛ́n jí káká, bó nɔ dó ya nú agun e ɖi nǔ nú Jezu lɛ́ɛ. Mɛ ɖé nɔ mɔ nǔjɛdo ɖé ɖo wǔ ce ɖo sɛ́n ɔ́ nyinyi sín ali xo ǎ. Đ'ayǐ ɔ́, un nɔ mɔ ɖɔ nǔ énɛ́ lɛ́ɛ nyí le nú mì; amɔ̌ din ɔ́, un nɔ mɔ nǔ énɛ́ lɛ́ɛ bǐ dó mɔ nǔ lá mɛ ná ɖó Klísu wútu. É nyí nǔ énɛ́ lɛ́ɛ kɛ́ɖɛ́ wɛ un mɔ dó mɔ nǔ lá mɛ ná ǎ; lo ɔ́, nǔ lɛ́ɛ bǐ wɛ un mɔ dó mɔ nǔ lá mɛ ná, ɖó vǐví ɖaxó e un mɔ hwenu e un wá tunwun ɖɔ Klísu Jezu ɔ́, Aklúnɔ ce wɛ é nyí ɔ́ wútu; éyɛ́ wútu wɛ un gbɛ́ nǔ bǐ, bó nɔ́ mɔ nǔ bǐ dó mɔ babá, bó ná sixú nyí étɔn, bó ná nɔ bǔ xá ɛ titewungbe; un sɔ́ nɔ́ lin ɖɔ tónú e un nɔ se nú sɛ́n ɔ́ wútu wɛ un nyí hwɛjijɔnɔ ɖo Mawu nukɔn ǎ; nǔɖiɖi e un ɖó nú Klísu ɔ́ wútu wɛ un nyí hwɛjijɔnɔ ɖo Mawu nukɔn. Un nyí hwɛjijɔnɔ ɖó Mawu ná mì hlɔ̌nhlɔ́n e é nɔ ná mɛ e ɖi nǔ nú Klísu lɛ́ɛ, bɔ yě ná sixú nyí hwɛjijɔnɔ é. Nǔ e ba wɛ un ɖe kpowun ɔ́ wɛ nyí ɖɔ ma tunwun mɛ e Klísu nyí é, bó tunwun hlɔ̌nhlɔ́n e fínfɔ́n sín kú tɔn ɖó é; un jló ɖɔ ma ji ya é ɖɔhun, bó kú kú e é kú é, bó ná ɖo nukún ɖó wɛ ɖɔ Mawu ná fɔ́n nyɛ lɔmɔ̌ sín kú. Un ko mɔ nǔ e ba wɛ un ɖe ɔ́, abǐ un ko sɔgbe bɔ nǔ vɔ ɖ'é wú ɖɔ wɛ un ɖe ǎ; lo ɔ́, un kpo ɖo gǎn dó wɛ ɖo nǔ e ba wɛ un ɖe ɔ́ gúdo, bónú é ná jɛ alɔ ce mɛ; ɖó un ko ɖo Klísu Jezu sín alɔ mɛ. Hǔn, nɔví ce lɛ́ɛ mi, un lin ɖɔ un ko mɔ nǔ e ba wɛ un ɖe ɔ́ yí ǎ; lo ɔ́, nǔ ɖokpó e wa wɛ un ɖe ɔ́ wɛ nyí ɖɔ un ɖo nǔ e ɖo gǔdo ce lɛ́ɛ wɔn wɛ, bó ɖo gǎn dó wɛ, lobo ná yi nǔ e ɖo nukɔn ce ɔ́ kɔn. Énɛ́ ɔ́, un ɖo wezun jí xwe nǔ e ba wɛ un ɖe ɔ́ kɔn, bó ná dó mɔ ajɔ e Mawu ylɔ́ mǐ sín sɛ́xwé ɖɔ mǐ ná yí gbɔn Klísu Jezu jí ɔ́ yí. Mǐ mɛ e ko lí dǒ ɖo nǔɖiɖi mɛ lɛ́ɛ bǐ ɔ́, mǐ ní lin nǔ ɖokpó ɔ́. É ka ɖo mɔ̌ có, ényí mɛɖé lɛ́ɛ ɖo mi mɛ, bó ɖó linlin vo ɔ́, Mawu ná ná wěziza mi d'é wú. Nǔ ɖěbǔ ná bó ɖo jijɛ wɛ hǔn, mi nú mǐ nǎ wlí ali e jí mǐ kó ɖe káká jɛ din ɔ́ ɖidó fí e mǐ xwe é. Nɔví ce lɛ́ɛ mi, mi bǐ ní bló nyɛ ɖɔhun. Mǐ ko ná xlɛ́ tɔn: hǔn mi sɔ́ nukún mitɔn ɖó yě mɛ e gbɛzínzán yětɔn nɔ sɔgbe xá xlɛ́ mǐtɔn énɛ́ lɛ́ɛ é jí. Un ko nɔ ɖɔ nú mi hwɛhwɛ, bó ka lɛ́ ɖo vǐvɔ́ ɖɔ nú mi wɛ din kpó avǐ kpó ɖɔ mɛ gěgé tíin, bɔ gbɛzínzán yětɔn nɔ ɖe xlɛ́ ɖɔ yě nyí kɛntɔ́ Klísu e kú ɖo aklúzu jí ɔ́ tɔn. Fí e yě ná yi dɔn ɖe ɔ́ wɛ yě kán wezun xwe; ɖó nǔ ɖokpó e yě nɔ sɛn ɔ́ wɛ nyí adɔgo yětɔn; yě nɔ xɔ susu ɖo nǔ e ɖó ná hu winnyá nú yě ɔ́ mɛ, bɔ gbɛ mɛ fí sín nǔ lɛ́ɛ kɛ́ɖɛ́ jí jɛ́n ayixa yětɔn nɔ ɖe. Mǐdɛɛ lɛ́ɛ ɔ́, sɛ́xwé tɔn wɛ mǐ nyí, bó ɖo te kpɔ́n Mɛhwlɛ́ngántɔ́ mǐtɔn e nyí Aklúnɔ Jezu Klísu ɔ́ vɛ́návɛ́ná. Ényí é ko wá ɔ́, é ná zán hlɔ̌nhlɔ́n tɔn e é nɔ dó sɔ́ nǔ lɛ́ɛ bǐ dó acɛ tɔn mɛ ná ɔ́, dó húzú agbaza mǐtɔn ayǐkúngban jí fí tɔn maɖógǎnɖé ɔ́ ná, bɔ agbaza mǐtɔn ná xɔ susu étɔn ɔ́ ɖɔhun. Énɛ́ ɔ́, nɔví ce vívɛ́ná lɛ́ɛ mi, é jló mì ɖésú ɖɔ ma lɛ́ mɔ mi; mi nɔ wa nǔ, bɔ xomɛ nɔ hun mì, bɔ un nɔ xɔ susu ɖ'é mɛ tawun; mɛvívɛ́ná ce lɛ́ɛ mi, lě e mi ɖó ná syɛ́nlǐn ɖo gbɛzínzán mitɔn mɛ, ɖo Aklúnɔ mɛ gbɔn ɔ́ nɛ́. Evodíi kpódó Sɛntíci kpó e, un ɖo vo sa nú mi wɛ, ɖɔ mi ní kɛnklɛ́n bo ɖó gbe kpɔ́ nɔví ɖo Aklúnɔ mɛ ɖɔhun. Hwi mɛ e nyí azɔ̌gbɛ́ ce gbejínɔtɔ́ ɔ́, un ɖo byɔ̌byɔ́ hwi lɔmɔ̌ wɛ ɖɔ hwi ní dó alɔ nyɔ̌nu énɛ́ lɛ́ɛ; nǔgbó ɔ́, nyɛ kpódó yě kpó fun ahwan ɖó kpɔ́, bónú Wɛn Ɖagbe ɔ́ ná gba kpé: mǐ kpó Klemáa kpó, kpódó azɔ̌gbɛ́ ce lɛ́ɛ bǐ kpán wɛ fun ahwan énɛ́ ɔ́; mɛ énɛ́ lɛ́ɛ bǐ sín nyǐkɔ wɛ Mawu wlán dó gbɛwéma ɔ́ mɛ. Mi jɛ awǎ hwebǐnu, ɖó mi ɖo bǔ ɖo Aklúnɔ mɛ; un ɖo vǐvɔ́ ɖɔ wɛ ɖɔ mi ní jɛ awǎ. Mi fá xomɛ dó mɛ bǐ wú. Aklúnɔ ná wá zaanɖé din. Ado ma hu mi dó nǔ ɖěbǔ wú ó; lo ɔ́, mi ɖo ninɔmɛ ɖěbǔ mɛ hǔn, mi ní nɔ sɔ́ kúdónúmɛ sín ayixa dó xo ɖɛ, bó byɔ́ nǔ e hudó mi lɛ́ɛ Mawu. Énɛ́ ɔ́, fífá Mawu tɔn e hú gǎn nukúnnú-mɔjɛnǔmɛ gbɛtɔ́ tɔn bǐ ɔ́ ná bló ayixa mitɔn kpódó linlin mitɔn lɛ́ɛ kpó ɖó, bɔ mi ná sixú nɔ bǔ ɖo Klísu Jezu mɛ. Nɔví ce lɛ́ɛ mi, bó ná dó fó xó ce ɔ́, un ɖo byɔ̌byɔ́ mi wɛ ɖɔ ayixa mitɔn ní nɔ nǔ e nyɔ́, bɔ susu jɛ xá lɛ́ɛ jí: nǔ e nyí nǔgbó ɔ́ bǐ, nǔ e è nǎ ɖó sísí ná é, nǔ e sɔgbe é, nǔ e mɛ́ é, nǔ e nɔ nyɔ́ mɛ nukún mɛ é kpódó nǔ e wlí yɛ̌yi ɔ́ kpán; ayixa mitɔn ní nɔ nǔ énɛ́ lɛ́ɛ jí. Nǔ e un kplɔ́n mi lɛ́ɛ, nǔ e mi yí ɖo gɔ̌n ce lɛ́ɛ, nǔ e mi se ɖo nu ce lɛ́ɛ, kpódó nǔ e un wa, bɔ mi mɔ lɛ́ɛ kpó ɔ́, mi zé dó wa azɔ̌ ná; énɛ́ ɔ́, Mawu e nɔ ná fífá mǐ ɔ́ ná nɔ kpɔ́ xá mi. Đo bǔ e un ɖe xá Aklúnɔ ɔ́ mɛ ɔ́, un mɔ awǎjijɛ ɖaxó, ɖó mi lɛ́ jɛ ɖiɖe xlɛ́ jí lo, ɖɔ nyɛ ɖo ayi mɛ nú émí. Un tunwun ɖɔ un ɖo ayi mɛ nú mi; lo ɔ́, lě e mi ná ɖe xlɛ́ mì gbɔn ɔ́ sín ali wá sú dó mi. É ka nyí nǔɖé wɛ hudó mì wɛ zɔ́n bɔ un ɖo mɔ̌ ɖɔ wɛ ǎ, ɖó un ko kplɔ́n nyɛɖée, bɔ nǔ e un ɖó ɔ́ nɔ kpé mì. Un nyɔ́ wamamɔnɔgbɛ zán, bó nyɔ́ dɔkunnɔgbɛ zán. Un kplɔ́n nyɛɖée, bɔ ɖo fí ɖěbǔ e un ná ɖe ɔ́, kpódó ninɔmɛ ɖěbǔ e mɛ un ná ɖe ɔ́ kpán nɔ́ nyɔ́ nú mì; un gɔ́ xo ganjí oo, un ɖo xovɛ́ oo, ényí nǔ kpé mì kpo abǐ é hwedó mì oo, é nɔ nyɔ́ nú mì. Mɛ e nɔ ná hlɔ̌nhlɔ́n mì ɔ́ wɛ nɔ zɔ́n, bɔ un nɔ sixú kpé nǔ énɛ́ lɛ́ɛ bǐ wú. É ka ɖo mɔ̌ có, alɔ e mi dó mì ɖo nǔ e ɖo gbigbo mì wɛ lɛ́ɛ mɛ ɔ́, nǔ ɖagbe wɛ mi wa. Filípunu lɛ́ɛ mi, mi ɖésúnɔ ɔ́, mi tunwun ganjí ɖɔ ée un gosín Masedwani, hwenu e è jɛ Wɛn Ɖagbe ɔ́ jlá jí ɔ́, midɛɛ lɛ́ɛ kɛ́ɖɛ́ wɛ nyí agun e dó alɔ mì é; midɛɛ lɛ́ɛ ɖokpónɔ wɛ mɔ do nú akwɛ́ e un nɔ mɔ ɔ́ kpó ée un nɔ zán é kpó. Hwenu e un ɖo Tɛsaloniki ɖ'ayǐ ɔ́, nǔ e nɔ hudó mì lɛ́ɛ ɔ́, azɔn mɔ̌kpán wɛ mi sɛ́ dó mì. É nyí nǔ e mi ná ná mì lɛ́ɛ ba wɛ un ɖe kpowun ǎ; lo ɔ́, un jló ɖɔ nǔ ɖagbe e wa wɛ mi ɖe lɛ́ɛ ní jɛ jí nú ɖagbe mitɔn. Un mɔ nǔ e mi sɛ́ dó mì lɛ́ɛ bǐ, bɔ é kpé mì kpo; din e Epafloditi hɛn nǔ e mi ná mì lɛ́ɛ wá nú mì ɔ́, nǔ e ɖo tají nú mì lɛ́ɛ bǐ ɖo así ce; nǔ e mi ná mì lɛ́ɛ cí vɔ̌sánú wǎnɖagbenɔ ɖɔhun, bó cí vɔ̌sísá e nɔ nyɔ́ Mawu nukún mɛ, bɔ é nɔ yí gbe ná ɔ́ ɖɔhun. Mawu ce ɔ́, dɔkun ɖo así tɔn bó túnflá; é ná ná nǔ e hudó mi lɛ́ɛ bǐ mi ɖo susu tɔn mɛ, gbɔn Klísu Jezu jí. Susu nú Mawu Tɔ́ mǐtɔn káká yi mavɔ mavɔ. Amǐ. Mi dó gbe mɛɖeɖóvo Mawu tɔn e nyí Klísu Jezu tɔn lɛ́ɛ bǐ nú mì. Nɔví e ɖo kpɔ́ xá mì lɛ́ɛ dó gbe sɛ́ dó mi. Mɛɖeɖóvo Mawu tɔn e ɖo fí lɛ́ɛ bǐ, ɖo tají ɔ́, yě mɛ e ɖo Dadá Hlɔ̌ma tɔn sín hɔnmɛ lɛ́ɛ dó gbe sɛ́ dó mi. Fɛ́nú Aklúnɔ Jezu Klísu tɔn ní nɔ kpɔ́ xá mi bǐ. Nyɛ Pɔ́lu e nyí mɛsɛ́dó Klísu Jezu tɔn, gbɔn jlǒ Mawu tɔn gbla mɛ ɔ́, kpódó nɔví mǐtɔn Timɔtée kpán wɛ sɛ́ wěma élɔ́ dó. Mǐ wɛ sɛ́ dó nɔví mǐtɔn gbejínɔtɔ́ ɖo Klísu mɛ e nyí mɛɖeɖóvo Mawu tɔn bó ɖo Kolósi lɛ́ɛ. Mawu Tɔ́ mǐtɔn ní ná fɛ́nú kpó fífá kpó mi. Ényí mǐ ɖo ɖɛ xo dó ta mitɔn mɛ wɛ hweɖěbǔnu ɔ́, mǐ nɔ́ dó kú nú Mawu Aklúnɔ mǐtɔn Jezu Klísu sín Tɔ́. Đó, mǐ se nǔɖiɖi e mi ɖó nú Klísu Jezu ɔ́, kpódó wǎn yíyí e mi ɖó nú mɛɖeɖóvo Mawu tɔn lɛ́ɛ kpán. Hwenu e è hɛn xó nǔgbó e nyí Wɛn Ɖagbe ɔ́ wá mi gɔn azɔn nukɔn nukɔntɔn ɔ́, è ɖe nukúnɖíɖó e é nɔ ná mɛ ɔ́ xlɛ́ mi. Énɛ́ ɔ́, nǔɖiɖi mitɔn kpódó wǎn yíyí mitɔn kpán jínjɔ́n nǔ e ɖó nukún wɛ mi ɖe, bɔ Mawu sɔ́ ɖ'ayǐ nú mi ɖo sɛ́xwé ɔ́ jí. Wɛn Ɖagbe ɔ́ ɖo gbigba kpé wɛ, bó ɖo azɔ̌ wa ɖo klísusɛntɔ́ lɛ́ɛ sín gbɛzán mɛ wɛ gbɔn gbɛ ɔ́ bǐ mɛ, lě e é bló gbɔn ɖo tɛ́ntin mitɔn sín gbe e gbe mi se fɛ́nú Mawu tɔn ɔ́ sín xó azɔn nukɔn tɔn, lobo kplɔ́n nǔ e é nyí tawun ɔ́, bó tunwun é. Azɔ̌gbɛ́ mǐtɔn wǎnyínámɔ mǐtɔn Epaflasi wɛ kplɔ́n nǔ énɛ́ mi; mɛsɛntɔ́ Klísu tɔn gbejínɔtɔ́ wɛ é nyí, bó ɖo azɔ̌ wa ɖó tɛn mǐtɔn mɛ wɛ. Wǎn yíyí e Yɛsinsɛn ná mi ɔ́, é ɖɔ xó tɔn nú mǐ. Énɛ́ ɔ́ wú wɛ sín gbe e gbe mǐ se xó mitɔn ɔ́, mǐ nɔ́ gɔn ɖɛ xó nú mi ǎ. Mǐ nɔ́ byɔ́ Mawu ɖɔ ní ná nǔnywɛ́ kpódó nukúnnú-mɔjɛnǔmɛ e Yɛsinsɛn nɔ ná mɛ ɔ́ kpán bǐ mi, bónú mi ná tunwun jlǒ tɔn titewungbe. Énɛ́ ɔ́, mi ná sixú nɔ zán gbɛ mitɔn lě e Aklúnɔ jló gbɔn é, bó ná nɔ wa nǔ e nɔ́ nyɔ́ nukún tɔn mɛ ɔ́ hwebǐnu. Mi ná nɔ́ wa nǔ ɖagbe tɛnmɛ tɛnmɛ lɛ́ɛ, bó ná nɔ́ ɖo Mawu tunwun d'é jí wɛ. Mǐ nɔ byɔ́ Mawu ɖɔ ní zé hlɔ̌nhlɔ́n tɔn susunɔ ɔ́ dó ná hlɔ̌nhlɔ́n kpíkpé mi, bónú mi ná sixú kú hǔn bó ɖó akɔ́n nǔ lɛ́ɛ bǐ nu kpó xomɛhunhun kpó. Mi dó kú nú Mawu Tɔ́ ɔ́ kpódó awǎjijɛ kpán, ɖó é bló bɔ mi lɔ ɖó mǐmá ɖo ɖagbe e é sɔ́ ɖ'ayǐ ɖo axɔ́súɖuto wězizanɔ ɔ́ mɛ, nú mɛ e nyí étɔn lɛ́ɛ é mɛ. Nǔgbó ɔ́, é yí mǐ sín zǐnflú sín hlɔ̌nhlɔ́n sí, bó sɔ́ mǐ ɖó Vǐ tɔn vívɛ́ná ɔ́ sín axɔ́súɖuto mɛ. Vǐ vívɛ́ná énɛ́ wɛ zɔ́n, bɔ Mawu xɔ mǐ sín kannumɔgbénu, bó sɔ́ hwɛ mǐtɔn lɛ́ɛ kɛ mǐ. Klísu ɔ́, akpajlɛ́ Mawu e è ma nɔ mɔ ǎ ɔ́ tɔn wɛ é nyí. Nukɔngbéví wɛ é nyí, bó hú gǎn nǔ e Mawu bló lɛ́ɛ bǐ. Đó jǐ tɔn wɛ Mawu bló nǔ e ɖo jǐnukúnsin lɛ́ɛ kpódó ée ɖo ayǐkúngban jí lɛ́ɛ bǐ kpán gbɔn: nǔ e mɔ wɛ è ɖe lɛ́ɛ kpódó ée è ma ɖo mimɔ wɛ ǎ lɛ́ɛ kpó, hlɔ̌nhlɔ́n nǔɖoyɛswímɛ tɔn lɛ́ɛ, gǎnhúnǔtɔ́ lɛ́ɛ, gǎn lɛ́ɛ kpódó acɛkpikpa lɛ́ɛ kpán; jǐ tɔn wɛ Mawu bló nǔ lɛ́ɛ bǐ gbɔn, bɔ nǔ lɛ́ɛ bǐ nyí étɔn. É ko tíin cóbɔ nǔ lɛ́ɛ bǐ wá tíin; é wɛ hɛn nǔ lɛ́ɛ bǐ ɖó tɛn yětɔn yětɔn mɛ, ɖo bǔ e yě ɖe xá ɛ ɔ́ mɛ. É wɛ nyí ta nú agbaza ɔ́: agbaza ɔ́ wɛ ɖo agun ɔ́ nyí wɛ; é mɛ wɛ gbɛ yɔ̌yɔ́ ɔ́ bɛ́ ɖe; é wɛ nyí mɛ nukɔn tɔn e Mawu fɔ́n sín kú é, bónú é ná dó nɔ nukɔn ɖo nǔ bǐ mɛ. Đó é nyɔ́ Mawu nukún mɛ ɖɔ émí ní nɔ Vǐ émítɔn mɛ bǐ dégbédégbé. Mɔ̌ ɖokpó ɔ́, é ɖɔ émí ná bló bɔ gbɛ ɔ́ bǐ ná dó hwɛ gbɔ xá émí; é ɖó fífá ayǐ gbɔn kú e Vǐ tɔn kú ɖo aklúzu jí é gbla mɛ, bɔ nǔ e ɖo ayǐkúngban jí lɛ́ɛ, kpódó ée ɖo sɛ́xwé lɛ́ɛ bǐ kpó dó hwɛ gbɔ xá ɛ. Đ'ayǐ ɔ́, mi lɔmɔ̌ mi lín dó Mawu; kɛntɔ́ tɔn wɛ mi nyí ɖ'ayǐ, ɖó nǔ nyanya e mi nɔ lin, bó nɔ wa lɛ́ɛ bǐ wú. Amɔ̌ din ɔ́, Vǐ tɔn húzú gbɛtɔ́ lobo kú, bɔ é bló bɔ mǐ dó hwɛ gbɔ xá ɛ gbɔn Vǐ tɔn sín kú gbla mɛ, bónú mi ná sixú nyí mɛɖeɖóvo, bó nyí mɛ mímɛ́, mɛ ma ɖó blɔ̌ ɖo wǔ ɖo nukɔn tɔn. É ɖo mɔ̌ có, mi ka ɖó ná nɔ nǔɖiɖi mɛ, bó ná syɛ́nlǐn ɖo dodó syɛ́nsyɛ́n jí; mi ma jó miɖée dó bónú mɛɖé ní sɛ tɛn nú mi sín nǔ e ɖó nukún wɛ mi ɖe sín hwenu e mi ko se Wɛn Ɖagbe ɔ́ dó ɔ́ kɔn ó. Wɛn Ɖagbe énɛ́ wɛ è dǒ nǔ e Mawu bló ɖo gbɛ ɔ́ mɛ lɛ́ɛ é; é wɛ nyí ɖěe nyɛ Pɔ́lu, un húzú mɛsɛntɔ́ ná é. Din ɔ́, wǔvɛ́ e mɔ wɛ un ɖe ɖó mi wú ɔ́ nɔ ná xomɛhunhun mì. Đó, gbɔn wǔvɛ́ e mɔ wɛ un ɖe ɖo agbaza mɛ lɛ́ɛ gbla mɛ ɔ́, nǔ e hwe ɖo wǔvɛ́ e Klísu mɔ lɛ́ɛ mɛ ɔ́ bló kpé wɛ un ɖe nú agbaza tɔn e nyí klísusɛntɔ́ lɛ́ɛ sín agun é. Un húzú mɛsɛntɔ́ nú agun Klísu tɔn, bɔ é sɔgbe xá azɔ̌ e Mawu sɔ́ dó así nú mì, ɖɔ ma wa nú mi é: azɔ̌ e é sɔ́ dó así nú mì ɔ́ wɛ nyí ɖɔ ma jlá xó tɔn fó. É wɛ nyí nǔbúdo e é zé hwlá dó gbɛtɔ́ lɛ́ɛ bǐ sín hwe lɛ́ɛ bǐ nu é; amɔ̌ din ɔ́, é ɖe xlɛ́ mɛ e nyí étɔn lɛ́ɛ é. Đó Mawu jló ná ɖe tito tɔn e ɖo wi mɛ ɔ́ xlɛ́ yě; tito énɛ́ e nyí é ɖésúnɔ tɔn, bɔ dɔkun ɖ'é mɛ sɔ mɔ̌, bó nyí tito ɖagbe ɖagbe ɔ́, é sɔ́ ɖ'ayǐ nú nyɔ̌ná togun lɛ́ɛ bǐ tɔn. Nǔbúdo ɔ́ ɖíe: Klísu ɖo mi mɛ, bó nɔ́ ná gǎnjɛwú mi ɖɔ mi ná ɖó mǐmá ɖo susu Mawu tɔn mɛ. Énɛ́ ɔ́, mǐ nɔ jlá Klísuxó ɔ́ mɛ bǐ; mǐ nɔ́ zé nǔnywɛ́ e Mawu ná mǐ ɔ́ bǐ dó ɖó afɔ afɔ jí nú mɛ bǐ, dó kplɔ́n nǔ mɛ bǐ, bónú mɛ bǐ ná sixú zin ɖo nǔɖiɖi mɛ, ɖo bǔ e yě ɖe xá Klísu ɔ́ mɛ, ɖo Mawu nukɔn. Bónú un ná dó sixú wa azɔ̌ énɛ́ ɔ́, hlɔ̌nhlɔ́n ɖaxó e Klísu nɔ ná mɛ ɔ́ wɛ é ná mì, bɔ un dó ɖo azɔ̌ wa ná wɛ, bó dó ɖo gǎn dó wɛ; hlɔ̌nhlɔ́n énɛ́ ɔ́ wɛ ɖo azɔ̌ wa wɛ ɖo gbɛzán ce mɛ. Tagba e jɛ dó ta mitɔn mɛ wɛ un ɖe, bó ɖo jijɛ dó Lawodiséenu lɛ́ɛ kpódó mɛ e ma tunwun mì titewungbe lě ǎ lɛ́ɛ bǐ kpán tamɛ wɛ ɔ́, un jló ɖɔ mi ní tunwun lě e é syɛ́n gbɔn é. Un ɖo ahwan fun wɛ, bónú yě ní ɖó akɔ́nkpinkpan nǔjɔnǔ tɔn, bónú yě ní nyí ɖokpó ɖo wǎn yíyí mɛ, bónú gǎnjɛwú e nǔnywɛ́ titewungbe ɔ́ nɔ ná mɛ ɔ́ ní gɔ́ ayi mɛ nú yě ganjí; énɛ́ ɔ́, yě ná sixú tunwun nǔbúdo Mawu tɔn; Klísu ɖésú wɛ nyí nǔbúdo énɛ́. Éyɛ́ mɛ wɛ è nɔ mɔ dɔkun e ɖo nǔnywɛ́ mɛ lɛ́ɛ kpódó ée ɖo nukúnnú-mɔjɛnǔmɛ lɛ́ɛ bǐ kpán ɖo hwlǎhwlá ɖe. Un ɖɔ xó nú mi gbɔn mɔ̌, bónú mɛɖé ma ɖɔ xó víví dó blɛ́ mi ná ó. Ényí un tlɛ lín dó mi ɖo agbaza mɛ ɔ́, un ɖo kpɔ́ xá mi ɖo ayi mɛ, bɔ lě e un mɔ bɔ mi nɔ wa nǔ dó tito jí ganjí gbɔn, bó lí dǒ ɖo nǔɖiɖi e mi ɖó nú Klísu ɔ́ mɛ gbɔn ɔ́, víví nú mì. Énɛ́ ɔ́, ée mi yí Klísu Jezu dó yí Aklúnɔ mitɔn ná ɔ́, mi bo nɔ bǔ xá ɛ ɖo gbɛzán mitɔn mɛ. Mi dó ɖɔ do ɖo Klísu mɛ; gbɛ mitɔn bǐ ní nɔ alɔ tɔn mɛ; mi ní nɔ syɛ́nlǐn ɖo nǔɖiɖi mɛ hwebǐnu lě e è kplɔ́n mi gbɔn é, bó nɔ tunwun nǔ e Mawu nɔ wa nú mi ɔ́ n'i. Mi cɔ́ miɖée, bónú mɛɖé ma zé mɛblɛ́blɛ́xó, xómaɖixó, nǔnywɛ́ gbɛtɔ́ tɔn dó dó gɛdɛ mi ó; nǔnywɛ́ énɛ́ ɔ́, nǔkplɔ́nmɛ gbɛtɔ́ lɛ́ɛ tɔn jí wɛ é jínjɔ́n, bó jínjɔ́n nǔɖoyɛswímɛ e ɖo gbɛ ɔ́ mɛ lɛ́ɛ sín hlɔ̌nhlɔ́n jí; é jínjɔ́n Klísu jí ǎ. Mi ma ɖótó yě ó; ɖó nǔ e Mawu nyí ɔ́ bǐ ko yí agbaza ɖo Klísu mɛ, bónú Mawu ná nɔ Klísu mɛ bǐ sésé, bɔ mi yí nǔ bǐ sésé ɖo bǔ e mi ɖe xá Klísu ɔ́ mɛ. Éyɛ́ wɛ ɖo ta nú gǎn lɛ́ɛ bǐ, kpódó acɛkpikpa lɛ́ɛ bǐ kpán. È ko gbo ada nú mi ɖo bǔ e mi ɖe xá Klísu é mɛ; é ka nyí ada e gbɛtɔ́ lɛ́ɛ nɔ gbo nú mɛ ɔ́ wɛ ǎ; lo ɔ́, ada e Klísu nɔ gbo nú mɛ ɔ́ wɛ, bɔ é ɖe mi sín agbaza mitɔn hwɛhutɔ́ ɔ́ sín acɛ mɛ. Nǔgbó ɔ́, ée è lɛ yɛhwesin nú mi ɔ́, è ɖi mi kpódó Klísu kpán, bó lɛ́ fɔ́n mi kpó e kpó sín kú, ɖó mi ɖi nǔ nú Mawu e fɔ́n ɛ sín kú é sín hlɔ̌nhlɔ́n. Đ'ayǐ ɔ́, mɛkúkú wɛ mi nyí, ɖó hwɛ mitɔn lɛ́ɛ wútu; ɖó mi nyí Jwifu ǎ; mi tunwun Mawusɛ́n ɔ́ ǎ; amɔ̌ din ɔ́, Mawu bló, bɔ mi lɛ́ wá gbɛ kpódó Klísu kpó, bɔ é sɔ́ hwɛ e mǐ hu lɛ́ɛ bǐ kɛ mǐ. Wěma e jí è wlǎn hwɛ mǐtɔn lɛ́ɛ dó, bɔ è ɖo hwɛ dó mǐ wɛ, bɔ tito tɔn lɛ́ɛ ma sɔgbe xá mǐ ǎ ɔ́, Mawu ká wěma ɔ́ nyi aklúzu jí, bó súnsún hwɛ mǐtɔn e ɖ'é jí lɛ́ɛ bǐ. Klísu yí hlɔ̌nhlɔ́n sín gǎn lɛ́ɛ kpódó acɛkpikpa lɛ́ɛ kpó sí, gbɔn kú e é kú ɖo aklúzu jí ɔ́ gbla mɛ; é ɖu ɖo yě jí, bó bɛ́ yě kɔn nyi togun mɛ agbawungba, bɔ yě húzú nǔkpínkpɔ́n. Ényí mɔ̌ hǔn, mi ma lɔn nú mɛɖé ní ɖɔ nú mi ɖɔ nǔ lě wɛ nyɔ́ bɔ mi ná ɖu, abǐ nǔ lě wɛ nyɔ́ bɔ mi ná nu, abǐ xwezán lě wɛ mi ná nyi, sun wá jǐ sín azǎn lě wɛ mi ná nyi, abǐ gbɔjɛzán Jwifu lɛ́ɛ tɔn lě wɛ mi ná nyi ó. Nǔ énɛ́ lɛ́ɛ bǐ ɔ́, nǔ ɖagbe e jǎwe ɔ́ sín yɛ kpowun wɛ yě nyǐ; lo ɔ́, Klísu wɛ nyí nǔjɔnǔ ɔ́. Mi ma lɔn nú mɛ e nɔ hun xomɛ ɖo mɛɖéesɔ́hwe ɖo wějí sín nǔwiwa lɛ́ɛ kpódó wɛnsagun lɛ́ɛ sinsɛn kpán mɛ ɔ́, ɖě ní ɖó hwɛ nú mi ó; mɛ mɔ̌hun ɔ́, nǔmimɔ e é nɔ mɔ lɛ́ɛ wú wɛ é nɔ gán jɛ, bɔ linlin gbɛtɔ́ tɔn e é nɔ ɖó lɛ́ɛ nɔ zɔ́n bɔ goyíyí dó wǔvɔ́ nɔ gbɛ́ dó e. Mɛ énɛ́ nɔ tɛ́ dó Klísu e nyí ta ɔ́ wú ǎ. Klísu ɔ́ wɛ ka zɔ́n bɔ agbaza ɔ́ bǐ ɖo nǔ ɖu wɛ, bɔ gǒflɛ́mɛ lɛ́ɛ kpódó kan lɛ́ɛ kpán nɔ hɛn ɛ ɖó bǔ ganjí, bɔ é nɔ su lě e Mawu jló gbɔn é. Mi kpó Klísu kpó kó kú, bɔ è ko hwlɛ́n mi sín yɛ e kpa acɛ ɖo gbɛ ɔ́ mɛ lɛ́ɛ sín hlɔ̌nhlɔ́n sí. Ée nǔ nyí mɔ̌ ɔ́, aniwú mi ka lɛ́ ɖo gbɛ zán wɛ gbɛ ɔ́ tɔn wɛ mi lɛ́ nyí ɖɔhun? Aniwútu mi ka yí gbe, bɔ è nɔ lɛ́ ɖo sɛ́n dó nú mi wɛ ɖɔ: “Ma zé nǔ lě ó! Ma dó nǔ lě nu ó! Ma ɖó alɔ nǔ lě wú ó!” Nǔ e è zǎn tlóló ɔ́, é nɔ vɔ ɔ́ wɛ sɛ́n énɛ́ lɛ́ɛ kan; gbɛtɔ́ lɛ́ɛ sín sɛ́n kpódó nǔ e yě nɔ́ kplɔ́n mɛ lɛ́ɛ kpán wɛ nyí nǔ énɛ́ lɛ́ɛ. Nǔgbó ɔ́, è kpɔ́n sɛ́n énɛ́ lɛ́ɛ mɛ ɔ́, è nɔ mɔ ɖɔ nǔnywɛ́ ɖ'é mɛ, ɖó yě nɔ́ ɖɔ sinsɛn mɛ ɖésúnɔ tɔn, mɛɖéesɔ́hwe kpó ya dó nú agbaza mɛ ɖésúnɔ tɔn kpó sín xó. Lo ɔ́, sɛ́n énɛ́ lɛ́ɛ ɖó hlɔ̌nhlɔ́n ɖěbǔ bó ná dó alɔ mɛ, bɔ è nǎ ɖu ɖo agbaza mɛɖée tɔn jí ǎ. Mawu kó fɔ́n mi sín kú kpó Klísu kpó. Hǔn mi bo ba nǔ e ɖo sɛ́xwé lɛ́ɛ; fínɛ́ wɛ Klísu jínjɔ́n ɖisíxwé nú Mawu ɖe. Nǔ e nyí sɛ́xwé tɔn lɛ́ɛ ní nɔ́ myá nukún nú mi; ée nyí ayǐkúngban jí tɔn lɛ́ɛ wɛ ná nɔ myá nukún nú mi ǎ. Đó mi kú, bɔ gbɛ mitɔn kpó Klísu tɔn kpó ɖo hwlǎhwlá ɖo Mawu mɛ. Gbɛ jɔ gbɛ mitɔn ɔ́, Klísu wɛ, bɔ hwenu e é ná wá tɔ́n ɔ́, mi lɔmɔ̌ kpó é kpó ná tɔ́n ɖo susu tɔn mɛ. Hǔn, mi bo sú nǔ e nyí ayǐkúngban jí tɔn ɖo ayi mitɔn mɛ lɛ́ɛ sín kún dó; nǔ énɛ́ lɛ́ɛ wɛ nyí: agalilɛ, nǔblíblíwiwa, jlǒ agbaza tɔn lɛ́ɛ, linlin nyanya lɛ́ɛ kpó nukúnkɛndídó kpó, ɖó nukúnkɛndídó ɔ́ cí bǒcyɔ sinsɛn ɖɔhun. Nǔwanyido mɔ̌hunkɔtɔn lɛ́ɛ wútu wɛ xomɛsin Mawu tɔn ná kɔn nyi mɛ e ma nɔ se tónú n'i ǎ lɛ́ɛ jí. Hwenu e gbɛ mitɔn ɖo hwɛ énɛ́ lɛ́ɛ sín acɛ mɛ ɖ'ayǐ ɔ́, lě e mi nɔ zán gbɛ gbɔn é nɛ́. Amɔ̌ din ɔ́, mi jó nǔ élɔ́ lɛ́ɛ bǐ wiwa dó: mi ma nɔ sin xomɛ ó; mi ma nɔ dó xomɛsin nú mɛ ó; mi ma nɔ nylá hun ó; mi ma nɔ zun mɛ ó, abǐ xó gblégblé ɖé ní ma nɔ tɔ́n sín nu mitɔn mɛ ó. Mi ma nɔ ɖó nǔvú nú miɖée ó, ɖó mi ko ɖe gbɛtɔ́ xóxó e mi nyí ɖ'ayǐ ɔ́ kpódó walɔ tɔn lɛ́ɛ bǐ kpán nyi ayǐ; bɔ mi sɔ́ ninɔmɛ yɔ̌yɔ́ ɔ́ dó; ninɔmɛ gbɛtɔ́ yɔ̌yɔ́ tɔn; gbɛtɔ́ yɔ̌yɔ́ énɛ́ nɔ ɖo hǔzúhúzú wɛ ayǐhɔ́ngbe ayǐhɔ́ngbe, bó ná cí Mawu e ɖó e ɔ́ ɖɔhun, bó ná tunwun i céɖécéɖé. Hǔn, mɛ e ma nyí Jwifu ǎ ɖě sɔ́ ɖo vo ǎ; mɛ e ka nyí Jwifu ɔ́ ɖě sɔ́ ɖo vo ǎ; mɛ e gbo ada é ɖě sɔ́ ɖo vo ǎ; atɔtɔnɔ ɖě ka sɔ́ ɖo vo ǎ; mɛ e ma hun nukún ǎ ɖě sɔ́ ɖo vo ǎ; hwexónu gbɛtɔ́ ɖě sɔ́ ɖo vo ǎ; kannumɔ ɖě sɔ́ ɖo vo ǎ; mɛ e ɖo éɖée sí ɔ́ lɔ ka sɔ́ ɖo vo ǎ; lo ɔ́, Klísu wɛ nyí nǔ bǐ, bó ɖo mɛ énɛ́ lɛ́ɛ bǐ mɛ. Mɛɖeɖóvo Mawu tɔn wɛ mi nyí. Mɛvívɛ́ná Mawu tɔn wɛ mi nyí, bɔ é sɔ́ mi, bónú mi ná nyí étɔn. Énɛ́ ɔ́ wútu wɛ mi ɖó ná sɔ́ nǔbláwǔkúnúmɛ, xomɛnyínyɔ́, mɛɖéesɔ́hwe, xomɛfífá kpó suúlu kpó dó awu ɖɔhun. Mi nɔ mɔ miɖée gbɔ; ényí mɛɖé wa nǔ nyi do nú mɛɖé ɖo mi mɛ hweɖěbǔnu hǔn, mi nɔ sɔ́ kɛ miɖée. Mi ɖó ná nɔ sɔ́ hwɛ kɛ miɖée lě e Aklúnɔ sɔ́ kɛ mi é ɖɔhun. Mi sɔ́ wǎn yíyí gbá dó nǔ énɛ́ lɛ́ɛ bǐ jí; ɖó wǎn yíyí ɔ́ wɛ nɔ dɔn nǔ énɛ́ lɛ́ɛ bǐ cá, bɔ yě nɔ́ nɔ bǔ ganjí. Fífá Klísu tɔn ní ɖu gǎn ɖo ayi mitɔn mɛ; nǔgbó ɔ́, fífá énɛ́ ɔ́ wú wɛ Mawu ylɔ́ mi ɖó kpɔ́, bɔ mi nyí wǔjɔnú agbaza ɖokpó géé tɔn. Énɛ́ ɔ́ wú ɔ́, mi tunwun nǔ e Mawu wa nú mi ɔ́ n'i. Klísu sín xó ɔ́ kpódó dɔkun e ɖ'é mɛ ɔ́ bǐ kpán ní nɔ ayi mitɔn mɛ. Mi nɔ sɔ́ nǔnywɛ́ kpíkpé dó kplɔ́n nǔ miɖée, bó nɔ dó gbɛ́ nǔ nú miɖée. Mi ná nɔ zé kúdónúmɛ sín ayixa dó ji han tɛnmɛ tɛnmɛ lɛ́ɛ nú Mawu. Mi nɔ wa nǔ e wa wɛ mi ɖe lɛ́ɛ bǐ ɖo Aklúnɔ Jezu sín nyǐkɔ mɛ; mi nɔ ɖɔ xó e ɖɔ wɛ mi lɛ́ɛ bǐ ɖo Aklúnɔ Jezu sín nyǐkɔ mɛ, bó nɔ dó kú nú Mawu Tɔ́ ɔ́ gbɔn jǐ tɔn. Nyɔ̌nu lɛ́ɛ mi, mi ní hwíhwɛ́ miɖée ɖo asú mitɔn lɛ́ɛ glɔ́, lě e é jɛ xá ɖɔ è nǐ bló gbɔn ɖo bǔ e mi ɖe xá Aklúnɔ ɔ́ mɛ é. Súnnu lɛ́ɛ mi, mi yí wǎn nú asi mitɔn lɛ́ɛ; mi ma nylá hun dó yě ó. Vǐ lɛ́ɛ mi, mi se tónú nú mɛjitɔ́ mitɔn lɛ́ɛ ɖo nǔ bǐ mɛ, ɖó nǔ e nɔ nyɔ́ Aklúnɔ nukún mɛ é nɛ́. Vǐtɔ́ lɛ́ɛ mi, mi ma nɔ dó xomɛsin nú vǐ mitɔn lɛ́ɛ ó; é ma nyí mɔ̌ ǎ ɔ́, awakanmɛ ná kú yě. Kannumɔ lɛ́ɛ mi, mi se tónú nú gǎn mitɔn e ɖo ayǐkúngban jí fí lɛ́ɛ ɖo nǔ bǐ mɛ; ní ma nyí hwenu e yě ɖo mi cɔ́ wɛ ɔ́ jɛ́n mi ná nɔ wa nǔ gbɔn mɔ̌, bó ná dó nyí mɛ ɖo yě sí ó; lo ɔ́, mi se tónú nú yě, kpó ayixa ɖagbe kpó, ɖó sísí e mi ɖó nú Aklúnɔ ɔ́ wútu. É ná bó nyí azɔ̌ ɖěbǔ wa wɛ mi ɖe hǔn, mi wa kpódó ayixa mitɔn bǐ kpán, Aklúnɔ wa azɔ̌ ná wɛ mi ɖe ɖɔhun; é nyí gbɛtɔ́ lɛ́ɛ wa ná wɛ mi ɖe ǎ. Mi tunwun ɖɔ ɖagbe e Aklúnɔ sɔ́ ɖ'ayǐ nú mɛ e nyí étɔn lɛ́ɛ é ɔ́, émí ná ɖó ɖ'é mɛ, bɔ é ná nyí ajɔ mitɔn; ɖó Klísu wɛ nyí gǎn e wa azɔ̌ ná wɛ mi ɖe tawun é. Amɔ̌, mɛ e nɔ wa nǔ nyanya ɔ́, é ná mɔ le e nyí étɔn ɔ́ yí, bɔ é ná sɔgbe xá nǔ nyanya e é wa é, ɖó Mawu nɔ́ ɖe mɛɖé ɖó vo ɖo mɛɖé mɛ ǎ. Gǎn lɛ́ɛ mi, mi zé ayixa jlɔ́jlɔ́, ayixa sɔgbe dó hɛn kannumɔ mitɔn lɛ́ɛ ná. Mi ná nɔ flín ɖɔ émí lɔmɔ̌ ɖó gǎn ɖokpó ɖo sɛ́xwé. Mi nɔ xo ɖɛ hwɛhwɛ; mi nɔ kpé nukún dó ɖɛ e xo wɛ mi ɖe ɔ́ wú, kpódó kú dó nú Mawu kpó. Nú mi ka ɖo ɖɛ xo wɛ hǔn, mi nɔ xo ɖɛ dó mǐ lɔmɔ̌ tamɛ, bónú Mawu ní hun ali ɖagbe nú mǐ, nú mǐ ná jlá xó tɔn, bó ná ɖɔ nǔbúdo Klísu tɔn sín xó nú mɛ lɛ́ɛ. Nǔgbó ɔ́, nǔbúdo énɛ́ wútu wɛ un ɖo gankpá mɛ din. Hǔn mi bo nɔ xo ɖɛ dó ta ce mɛ, bónú ma nɔ ɖɔ nǔbúdo ɔ́ sín xó céɖécéɖé nú mɛ lɛ́ɛ, lě e un ɖó ná nɔ ɖɔ gbɔn é. Mi zán gbɛ mitɔn kpó nǔnywɛ́ kpó xá mɛ e ma ɖo agun Klísu tɔn mɛ ǎ lɛ́ɛ; ali tɔn hun nú mi hweɖěbǔnu hǔn, mi hwlɛ́ndó. Xó mitɔn lɛ́ɛ ní nɔ nyɔ́ se tɛgbɛ, bó nɔ́ dɔn mɛ; mi ná tunwun lě e mi ná nɔ́ ná xósin mɛ ɖokpó ɖokpó gbɔn é. Nɔví wǎnyínámɔ mǐtɔn Ticíku e nyí azɔ̌watɔ́ gbejínɔtɔ́, bɔ nyɛ kpó é kpó ɖo Aklúnɔ sín azɔ̌ ɔ́ wa wɛ ɔ́, ná wá ɖɔ xó ce lɛ́ɛ bǐ nú mi. Nǔ e wú un sɛ́ ɛ dó tawun ɔ́ wɛ nyí ɖɔ é ná wá ɖɔ lě e mǐ ɖe gbɔn ɔ́ nú mi, bó ná ná akɔ́nkpinkpan mi. Wǎnyínámɔ mǐtɔn gbejínɔtɔ́ Onɛzímu e nyí mɛ mitɔn ɔ́, un sɛ́ é lɔmɔ̌ dó, bɔ é ná xwedó e; yě ná ɖɔ nǔ e ɖo jijɛ wɛ ɖo dě ɔ́ bǐ nú mi. Alisitáki e kpó nyɛ kpó ɖo gankpá mɛ ɔ́ dó gbe sɛ́ dó mi; Baanabási sín nɔví Maki lɔmɔ̌ dó gbe sɛ́ dó mi. Lě e mi ná yí Maki gbɔn ɔ́, è ko ɖɔ nú mi; nú é wá mi gɔ́n hǔn, mi yí i ganjí. Jezu e è nɔ ylɔ́ ɖɔ Jusitúsi ɔ́ lɔmɔ̌ dó gbe sɛ́ dó mi. Yě mɛ atɔn énɛ́ lɛ́ɛ jɛ́n nyí Jwifu e húzú jɛ Klísu sín ali jí lɛ́ɛ é; yě ɖo azɔ̌ wa xá mì wɛ nú axɔ́súɖuɖu Mawu tɔn. Yě dó wǔsyɛ́n lanmɛ nú mì ɖésú. Epaflasi e nyí mɛ mitɔn ɔ́ lɔmɔ̌ dó gbe sɛ́ dó mi; mɛsɛntɔ́ Klísu Jezu tɔn énɛ́ ɔ́ nɔ gɔn ɖɛ xo, kpódó ayixa tɔn bǐ sésé kpán dó ta mitɔn mɛ ǎ, bónú mi ná dó sixú syɛ́nlǐn, bó ná zin ɖo nǔɖiɖi mɛ, bó ná sɔgbe titewungbe, bó ná wa nǔ e Mawu jló ɔ́ bǐ. Un hɛn ɔ́, un ná ɖe kúnnu élɔ́ n'i ɖɔ: é nɔ jɛ tagba ɖésú dó ta mitɔn mɛ, bó nɔ jɛ tagba dó mɛ e ɖo Lawodisée lɛ́ɛ tamɛ, bó nɔ jɛ tagba dó mɛ e ɖo Ielapólisi lɛ́ɛ tamɛ. Wǎnyínámɔ mǐtɔn Luki dotóo ɔ́ kpódó Demási kpán dó gbe sɛ́ dó mi. Mi dó gbe nɔví mǐtɔn e ɖo Lawodisée lɛ́ɛ; mi dó gbe Nɛfáa lɔmɔ̌, kpódó nɔví e nɔ kplé ɖo xwé tɔn gbe lɛ́ɛ kpán. Mi xa wěma élɔ́ ɔ́ hǔn, mi bló bónú è xa nú agun e ɖo Lawodisée ɔ́ lɔmɔ̌. Mi lɔmɔ̌ ɔ́, mi xa wěma e è nǎ sɛ́ dó mi sín Lawodisée é. Mi ɖɔ nú Aacípu ɖɔ é ní kpé nukún dó azɔ̌ e Aklúnɔ zɔ́n ɛ ɔ́ wú bó wa ganjí. Nyɛ Pɔ́lu ɖésú wɛ sɔ́ alɔ ce dó wlán xó élɔ́ lɛ́ɛ ná: Un dó gbe sɛ́ dó mi; mi ma wɔn ɖɔ gankpá mɛ wɛ un ɖe ó. Fɛ́nú Mawu tɔn ní nɔ kpɔ́ xá mi. Nyɛ Pɔ́lu kpó Silási kpó, kpódó Timɔtée kpán wɛ wlán wěma élɔ́ sɛ́ dó mi agunví e ɖo Tɛsaloniki bó ɖo bǔ ɖo Mawu Tɔ́ ɔ́ kpódó Aklúnɔ Jezu Klísu kpán mɛ é. Mawu ní ná fɛ́nú kpódó fífá kpó mi. Mǐ nɔ dó kú nú Mawu tɛgbɛ dó mi bǐ tamɛ, bó nɔ flín mi hwebǐnu ɖo ɖɛ mǐtɔn lɛ́ɛ mɛ. Nǔgbó ɔ́, ɖo Mawu Tɔ́ mǐtɔn nukɔn ɔ́, mǐ nɔ́ flín lě e mi zé nǔɖiɖi mitɔn dó wa azɔ̌ ná sɔ é, mǐ nɔ́ flín lě e mi wa wǎn-yíyízɔ́ sɔ é; bɔ nukún e ɖó Aklúnɔ mǐtɔn Jezu Klísu wɛ mǐ ɖe ɔ́, lě e mi syɛ́nlǐn ɖ'é mɛ sɔ ɔ́, mǐ nɔ́ flín. Nɔví ce lɛ́ɛ mi, mǐ tunwun ɖɔ Mawu yí wǎn nú mi, bó sɔ́ mi nú mi ná nyí étɔn. Đó mǐ jlá Wɛn Ɖagbe ɔ́ mi; mǐ ka jlá mi ɖó nu wú kpowun ǎ; lo ɔ́, mǐ jlá mi kpódó hlɔ̌nhlɔ́n kpó, kpó alɔgɔ́númɛ Yɛsinsɛn tɔn kpó, kpódó gǎnjɛwú titewungbe e ɖo Wɛn Ɖagbe énɛ́ mɛ ɔ́ kpó. Mi tunwun lě e mǐ zán gbɛ mǐtɔn gbɔn ɖo tɛ́ntin mitɔn, ɖó ɖagbe mitɔn wú é. Lě e mǐ wa nǔ gbɔn ɔ́ kpódó lě e Aklúnɔ wa nǔ gbɔn ɔ́ kpán wɛ mi xwedó, dó wa nǔ, ɖó mi mɔ wǔvɛ́ ɖésú, có mi ka yí Mawuxó ɔ́ kpódó xomɛhunhun e Yɛsinsɛn nɔ ná mɛ é kpó. Énɛ́ ɔ́ zɔ́n, bɔ mi húzú kpɔ́ndéwú nú klísusɛntɔ́ e ɖo Masedwani lɛ́ɛ kpódó ée ɖo Akáyi lɛ́ɛ kpán. Đó Aklúnɔxó ɔ́, mi gɔ́n wɛ é gosín, bɔ mɛ gěgé se; é nyí Masedwani kpó Akáyi kpó kɛ́ɖɛ́ wɛ è se xó énɛ́ ɖe ǎ; lo ɔ́, fí bǐ wɛ nǔɖiɖi e mi ɖó nú Mawu ɔ́ sín xó gba kpé; mǐ sɔ́ ná xaji ɖɔ énɛ́ ɔ́ ǎ. Mɛ lɛ́ɛ bǐ wɛ nɔ́ ɖɔ lě e mi yí mǐ gbɔn hwenu e mǐ wá mi gɔ́n é; mɛ lɛ́ɛ bǐ wɛ nɔ́ ɖɔ lě e mi jó nǔmɛsɛn lɛ́ɛ dó gbɔn, bó húzú jɛ Mawu gbɛɖe, Mawu nǔgbó ɔ́ li jí, bó ná wa azɔ̌ n'i, lobo ná nɔ te kpɔ́n ɖɔ vǐ tɔn Jezu ní gosín sɛ́xwé wá é. Vǐ tɔn énɛ́ ɔ́ wɛ é fɔ́n sín kú, bɔ é hwlɛ́n mǐ sín xomɛsin Mawu tɔn e jǎwe ɔ́ mɛ. Nɔví lɛ́ɛ mi, mi ɖésúnɔ tunwun ganjí ɖɔ gɔ̌n mitɔn e mǐ wá ɔ́, mǐ kún wá dó wǔvɔ́ ó. Mi lɛ́ tunwun ɖɔ cóbónú mǐ ná wá mi gɔn ɖo Tɛsaloniki ɔ́, mǐ ji ya; è dǒ winnyá mǐ ɖo Filípu. Yě tɔ́n ahwan mǐ, bɔ é syɛ́n ɖésú, có Mawu ná akɔ́nkpinkpan mǐ, ɖɔ mǐ ní jlá Wɛn Ɖagbe émítɔn ɔ́ mi. Nǔgbó ɔ́, xó e ɖɔ dó ylɔ́ mɛ lɛ́ɛ ná wɛ mǐ ɖe ɔ́ jínjɔ́n nǔwanyido ɖé jí ǎ; é jínjɔ́n linlin kwíji kwíji ɖé jí ǎ; é ka jínjɔ́n nǔ hízíhízí ɖé jí ǎ. É nyɔ́ wa ɔ́, lě e Mawu jló gbɔn ɔ́ wɛ mǐ nɔ ɖɔ xó gbɔn hwebǐnu, ɖó é mɔ ɖɔ mǐ hɛn ɔ́, mǐ ná jlá Wɛn Ɖagbe ɔ́, bó sɔ́ dó así nú mǐ; gbɛtɔ́ lɛ́ɛ sí ba ná nyɔ́ ɖe wɛ mǐ ɖe, bó ɖo Wɛn Ɖagbe ɔ́ jlá wɛ ǎ; lo ɔ́, Mawu e nɔ gbéjé linlin e ɖo ayi mǐtɔn mɛ ɔ́ kpɔ́n ɔ́ sí ba ná nyɔ́ ɖe wɛ mǐ ɖe. Mi tunwun ganjí ɖɔ mǐ kún ɖɔ xó ɖé dó klɔ́ mɛ ná gbeɖé ó; é kún ka nyí nǔɖé ba ɖo mi sí wɛ mǐ ɖe, bó ɖo Wɛn Ɖagbe ɔ́ jlá mi wɛ ó; Mawu ɖésú ná ɖe kúnnu ná. Mǐ wa nǔɖé bó dó ɖɔ mɛɖé ní kpa mǐ ǎ; é ná bo nyí midɛɛ lɛ́ɛ oo, é ná bo nyí mɛɖěvo lɛ́ɛ oo, mǐ ba ǎ. Cóbɔ mǐ ka hɛn ɔ́, mǐ ná ko ɖɔ nú mi ɖɔ nǔ lě wɛ mi ná wa dandan, ɖó mɛsɛ́dó Klísu tɔn e mǐ nyí ɔ́ wútu; mǐ ka bló gbɔn mɔ̌ ǎ; é nyɔ́ wa ɔ́, hwenu e mǐ ɖo mi gɔn ɔ́, mǐ fá xomɛ dó mi wú, vǐnɔ e ɖo nukún kpé dó vǐ tɔn lɛ́ɛ wú wɛ ɔ́ ɖɔhun. Mǐ ɖo gbesisɔ mɛ, bó ná sɔ́ gbɛ mǐtɔn jó dó ta mitɔn mɛ, ɖó wǎn e mǐ nyí nú mi é wú; é nyí Wɛn Ɖagbe Mawu tɔn ɔ́ kɛ́ɖɛ́ wɛ mǐ ná jlá mi ǎ; ɖó mi vɛ́ nú mǐ sɔ mɔ̌. Nɔví lɛ́ɛ mi, lě e mǐ jɛ tagba, bó wa azɔ̌ gbɔn ɖo tɛ́ntin mitɔn ɔ́, mi flín ǎ cé? Mǐ ɖo Wɛn Ɖagbe Mawu tɔn ɔ́ jlá mi wɛ, bó ka nɔ wa azɔ̌ zǎn kpó kéze kpó, ɖó mǐ jló ná nɔ kɔ jí nú mi mɛ ɖěbǔ ǎ. Mi ná ɖe kúnnu ná, bɔ Mawu lɔmɔ̌ ná ɖe kúnnu ná ɖɔ gbɛ mímɛ́, gbɛ jlɔ́jlɔ́, gbɛ e mɛɖé ma ná mɔ nǔjɛdo ɖé ɖɔ d'é wú ǎ ɔ́ wɛ mǐ zán ɖo tɛ́ntin mitɔn. Mi lɛ́ tunwun ɖɔ lě e vǐtɔ́ nɔ hɛn vǐ tɔn gbɔn ɔ́, mɔ̌ wɛ mǐ hɛn ɖokpó ɖokpó mitɔn gbɔn. Mǐ nɔ ɖo nǔ kplɔ́n mi wɛ, bó nɔ ɖo gbɔ dó nú mi wɛ, bó nɔ byɔ́ mi syɛ́nsyɛ́n ɖɔ gbɛzínzán mitɔn ní nyɔ́ Mawu e ylɔ́ mi dó axɔ́súɖuɖu tɔn kpó susu tɔn kpó mɛ ɔ́ sín nukún mɛ. Mǐ nɔ lɛ́ gɔn kú dó nú Mawu ɖó nǔ élɔ́ wú ǎ; é wɛ nyí ɖɔ hwenu e mǐ jlá Mawuxó ɔ́ mi ɔ́, mi se lobo yí dó ayi mɛ; mi ka yí dó yí gbɛtɔ́ xó ǎ; lo ɔ́ mi yí dó yí Mawuxó ná; Mawuxó ɔ́ wɛ é ka nyí nǔgbó; ée mi yí i mɔ̌ ɔ́, é ɖo azɔ̌ wa ɖo mi mɛ e ɖi nǔ lɛ́ɛ mɛ wɛ. Nɔví lɛ́ɛ mi, nǔ e gbo agun e ɖo Judée, bó nyí Mawu tɔn ɖo bǔ e mǐ ɖe xá Klísu Jezu ɔ́ mɛ lɛ́ɛ ɔ́ wɛ gbo mi lɔmɔ̌. Ya e Jwifu lɛ́ɛ dó nú yě ɖo dɔ̌n ɔ́ ɖokpó ɔ́ wɛ to mitɔn mɛ nu lɛ́ɛ dó nú mi lɔmɔ̌. Jwifu lɛ́ɛ wɛ hu Aklúnɔ Jezu, lobo hu gbeyíɖɔ Mawu tɔn lɛ́ɛ, bó nya mǐ. Yě dó xomɛsin nú Mawu, bó nyí kɛntɔ́ gbɛtɔ́ lɛ́ɛ bǐ tɔn. Yě nɔ dó gǎn, bó ná glɔ́n ali nú mǐ, bónú mǐ má kpé wú, bó jlá Wɛn Ɖagbe e ná zɔ́n, bɔ mɛ e ma nyí Jwifu ǎ lɛ́ɛ ná mɔ hwlɛngán é ó. Nǔ énɛ́ e yě wa ɔ́, hwɛ wɛ yě hu dó sú ta nú hwɛ e hu wɛ yě ko ɖe ɖ'ayǐ lɛ́ɛ. Xomɛsin Mawu tɔn ka wá kɔn nyi yě jǐ lo. Nɔví lɛ́ɛ mi, nǔ e kan mǐdɛɛ lɛ́ɛ ɔ́ wɛ nyí ɖɔ: sín hwenu e mǐ ko gosín mi gɔn nú hwenu yɔywɛ ɖé ɔ́, é jló mǐ ɖésú ɖɔ mǐ ní lɛ́ mɔ mi; énɛ́ wú wɛ mǐ lɛ́ vɔ́ gǎn dó d'é jí, bó ná sixú kpé wú; mǐ sɔ́ ɖo kpɔ́ xá mi ɖo agbaza mɛ ǎ; lo ɔ́, ayi mǐtɔn ɖo mi wú. Mǐ ko jló ná lɛ́ wá mi gɔ́n; ɖo tají ɔ́, nyɛ Pɔ́lu ɔ́, azɔn mɔ̌kpán wɛ un tɛ́nkpɔ́n bó ná lɛ́ wá mi gɔ́n; lo ɔ́, Satáan ka sú ali tɔn dó mǐ. Nǔgbó ɔ́, nukún mǐtɔn sɔ́ ɖo mɛɖé jí zɛ midɛɛ lɛ́ɛ kɛ́ɖɛ́ wú ǎ; mi jí wɛ nukún mǐtɔn ɖe; mi wɛ nyí xomɛhunhun mǐtɔn, bó nyí ɖuɖéjí mǐtɔn sín xlɛ́ e wú mǐ ná sixú tɛ afɔ ayǐ ɖo Aklúnɔ mǐtɔn Jezu nukɔn, ɖo hwenu e é ná lɛ́ kɔ wá é. Nǔgbó wɛ! Mi wɛ nyí susu mǐtɔn, bó nyí xomɛhunhun mǐtɔn. Mǐ sɔ́ sixú wá nɔ te sɔ mɔ̌ ǎ, bó gbɔ bó ɖɔ mǐdɛɛ lɛ́ɛ kɛ́ɖɛ́ ná nɔ Atɛ́ni, bó sɛ́ nɔví mǐtɔn Timɔtée e kpó mǐ kpó ɖo Wɛn Ɖagbe e ɖɔ xó dó Klísu wú ɔ́ jlá wɛ, bó dó ɖo azɔ̌ wa nú Mawu wɛ ɔ́ dó mi. Mǐ sɛ́ ɛ dó mi, bónú é ná wá ɖɔ xó dó ná lǐnsyɛ́nsyɛ́n kpó akɔ́nkpinkpan kpó mi, ɖo nǔɖiɖi mitɔn mɛ; bónú mi ma jó miɖée dó nú ya e ji wɛ mǐ ɖe ɔ́ ní dán mɛ ɖokpó ɖo mi mɛ ó; ɖó mi ɖésúnɔ ɔ́, mi ko tunwun ɖɔ ya énɛ́ e ji wɛ mǐ ɖe ɔ́, tito Mawu tɔn mɛ wɛ é ko ɖe nú mǐ. Nǔgbó ɔ́, hwenu e mǐ kpo ɖo mi gɔ́n ɔ́, mǐ ko ɖɔ nú mi ɖ'ayǐ ɖɔ mǐ ná ji ya; nǔ énɛ́ wɛ ɖo jijɛ wɛ din; mi ɖésúnɔ ɔ́, mi tunwun ganjí. Énɛ́ ɔ́ wútu ɔ́, ée un ma sɔ́ sixú nɔ te ǎ ɔ́, un sɛ́ Timɔtée dó mi, bónú é ná wá kpɔ́n lě e nǔɖiɖi mitɔn ɖe gbɔn é, ɖó un ɖo xɛsi ɖi wɛ ɖɔ awǒvi ní ma wá tɛ́n mi kpɔ́n nú mi jɛ mɔɖónúmɛ tɔn lɛ́ɛ mɛ, bónú azɔ̌ e mǐ wa ɖo tɛ́ntin mitɔn ɔ́ nyí nǔ yǎyá ó. Amɔ̌ din ɔ́, Timɔtée ko lɛ́ kɔ sín mi gɔ́n wá, bó ɖɔ xó ɖagbe nú mǐ dó nǔɖiɖi mitɔn kpó wǎn yíyí e mi ɖó nú miɖée ɔ́ kpó wú. É ɖɔ nú mǐ ɖɔ mi ɖo flínflín mǐ wɛ tɛgbɛ kpó wǎn yíyí kpó, bɔ mi jló ná lɛ́ mɔ mǐ lě e mǐ lɔ jló ná lɛ́ vɔ́ mɔ mi é. Nɔví mǐtɔn lɛ́ɛ mi, adǎn ɖo mǐ gbo wɛ, bɔ mǐ ɖo wǔvɛ́ mɔ wɛ mɔ̌ có, xó mitɔn e mǐ se ɔ́ ná akɔ́nkpinkpan mǐ. Nǔɖiɖi e mi ɖó ɔ́ wɛ ná akɔ́nkpinkpan mǐ. Din ɔ́, ényí mi syɛ́nlǐn ɖo kɔnɖókpɔ́ e mi ɖó xá Aklúnɔ ɔ́ mɛ ɔ́, hǔn mǐ ɖo gbɛ nǔgbó. Xomɛ e hun mǐ ɖo Mawu mǐtɔn nukɔn ɖó mi wútu ɔ́, mǐ tunwun lě e mǐ ná dó kú n'i gbɔn dó ta mitɔn mɛ, bɔ é ná jɛ mɛ é ǎ. Zǎn kpó kéze kpó ɔ́, mǐ nɔ́ byɔ́ ɛ syɛ́nsyɛ́n ɖɔ ní bló bónú mǐ ɖésúnɔ ná lɛ́ mɔ mi, bónú nǔ e lɛ́ hwedó mi ɖo nǔɖiɖi mitɔn mɛ ɔ́, mǐ ná gɔ́ ná nú mi. Mawu Tɔ́ mǐtɔn ɔ́ ɖésú kpódó Aklúnɔ mǐtɔn Jezu kpó ní kplá mǐ, bónú mǐ ná sixú wá mɔ mi. Aklúnɔ ní bló bónú wǎn yíyí e mi ɖó nú miɖée, bó ɖó nú gbɛtɔ́ lɛ́ɛ bǐ ɔ́ ní nɔ ɖo jijɛ jí wɛ, bónú é ní cí wǎn yíyí e mǐdɛɛ lɛ́ɛ ɖó nú mi é ɖɔhun. Énɛ́ ɔ́, é ná dó wǔsyɛ́n lanmɛ nú mi, bɔ mi ná nyí mɛ mímɛ́, bó ná nyí mɛ ma ɖó blɔ̌ ɖo wǔ ɖo Mawu Tɔ́ mǐtɔn nukɔn, hwenu e Aklúnɔ mǐtɔn Jezu ná wá kpó mɛ e nyí étɔn lɛ́ɛ bǐ kpó é. Bó ná dó fó ɔ́, nɔví lɛ́ɛ mi, mǐ kó kplɔ́n lě e mi ná zán gbɛ mitɔn gbɔn, bɔ é ná nyɔ́ Mawu nukún mɛ ɔ́ mi, bɔ mi ka ko ɖo blǒbló gbɔn jí wɛ. Nǔ e kpo bɔ mǐ ná ɖɔ nú mi din ɔ́ ɖíe: mǐ ɖo byɔ̌byɔ́ mi wɛ, bó ɖo vo sa nú mi wɛ ɖo Aklúnɔ Jezu nyǐkɔ mɛ ɖɔ mi ní nɔ zán gbɛ mitɔn, bónú é ní lɛ́ nyɔ́ d'é jí hú mɔ̌. Nǔgbó ɔ́, mi tunwun nǔ e Aklúnɔ Jezu ná gbe mǐ, bɔ mǐ kplɔ́n mi é. Nǔ e Mawu jló nú mi ɔ́ wɛ nyí ɖɔ mi ní nyí mɛ mímɛ́, bó ma nɔ lɛ aga ó. Mɛ ɖokpó ɖokpó ní tunwun lě e é ná hɛn agbaza tɔn ɖó mǐmɛ́ kpódó yɛ̌yi kpán jí gbɔn é; ní ma nɔ jó éɖée dó nú jlǒ nyanya agbaza mɛ tɔn lɛ́ɛ lě e nǔmaɖitɔ́ e ma tunwun Mawu ǎ lɛ́ɛ nɔ bló gbɔn é ó. Mɛɖěbǔ ní ma wa nǔ nyi do nú nɔví tɔn, abǐ ní hízí i ɖo xó énɛ́ ɔ́ mɛ ó; ɖó Mawu ná ba hlɔn nǔ mɔ̌hun lɛ́ɛ bǐ tɔn, lě e mǐ kó ɖɔ nú mi syɛ́nsyɛ́n gbɔn é. Đó Mawu ylɔ́ mǐ, bónú mǐ ná wa nǔ blíblí ǎ; lo ɔ́, é ylɔ́ mǐ nú mǐ ná zán gbɛ mímɛ́. Hǔn, mɛ e hɔn nǔkplɔ́nmɛ énɛ́ nyi gbě ɔ́, é nyí gbɛtɔ́ wɛ é hɔn nyi gbě ǎ; lo ɔ́, Mawu e ná Yɛsinsɛn tɔn mi ɔ́ wɛ é hɔn nyi gbě. É sɔ́ byɔ́ ɖɔ è nǎ wlán nǔɖé sɛ́ dó mi dó nɔví ɖo nǔɖiɖi mɛ sín wǎn e mi ɖó ná yí nú miɖée ɔ́ wú ǎ; ɖó lě e mi ná yí wǎn nú miɖée gbɔn ɔ́, Mawu ko kplɔ́n mi. Wǎn yíyí énɛ́ wɛ mi ɖó nú nɔví lɛ́ɛ gbɔn Masedwani to ɔ́ bǐ mɛ. Amɔ̌, nɔví lɛ́ɛ mi, mǐ lɛ́ ɖo byɔ̌byɔ́ mi wɛ ɖɔ wǎn yíyí énɛ́ ní nɔ lɛ́ jɛjí ayǐhɔ́ngbe ayǐhɔ́ngbe. Mi dó gǎn, bónú fífá ní nɔ́ nɔ tɛ́ntin mitɔn; mi dó gǎn bó nɔ́ kpé nukún dó nǔ mi ɖésúnɔ tɔn lɛ́ɛ wú; mi dó gǎn bó nɔ́ wa azɔ̌ kpó alɔ mi ɖésúnɔ tɔn kpó lě e mǐ kó ɖɔ nú mi gbɔn é. Énɛ́ ɔ́, mɛ e ma ɖo agun Klísu tɔn mɛ ǎ lɛ́ɛ ná nɔ ɖó sísí nú mi, bɔ mi ka ná nɔ kɔ jí nú mɛɖé ǎ. Nɔví lɛ́ɛ mi, lě e mɛ e ko kú lɛ́ɛ xó ná wá nyí gbɔn ɔ́, mǐ jló ɖɔ mi ní mɔ nǔ jɛ mɛ céɖécéɖé, bónú mi ma nɔ aluwɛ mɛ mɛ ɖě lɛ́ɛ e ma ɖo nukún ɖó nǔɖé wɛ ǎ lɛ́ɛ ɖɔhun ó. Đó mǐ ɖi nǔ ɖɔ Jezu kú bó lɛ́ fɔ́n; mɔ̌ ɖokpó ɔ́, mǐ lɛ́ ɖi nǔ ɖɔ Mawu ná fɔ́n mɛ e ɖi nǔ nú Jezu cóbó kú lɛ́ɛ kpó é kpó. Nǔgbó ɔ́, lě e Aklúnɔxó ɔ́ ɖɔ gbɔn ɔ́ ɖíe ɖɔ nú mi gbé wɛ mǐ ja e: mǐ mɛ e ná kpo ɖo gbɛ hwenu e Aklúnɔ ná wá dó ɔ́, mǐ ná jɛ nukɔn nú mɛ e ko kú lɛ́ɛ ǎ. Hwe ɔ́ nu su ɔ́, Aklúnɔ ɖésúnɔ ná jɛ te sín jǐxwé, bɔ è nǎ se mɛɖé ná ɖe gbe kpó xósúsú kpó, bó ná se wɛnsagun Mawu tɔn ɖaxó ɖokpó sín gbe; bó ná se ɖuɖéjí sín kpɛn Mawu tɔn sín gbe; bɔ mɛ e ɖi nǔ nú Klísu cóbó kú lɛ́ɛ ná fɔ́n jɛ nukɔn. Énɛ́ ɔ́ gúdo ɔ́, mǐ mɛ e ná kpo ɖo gbɛ hwenɛ́nu lɛ́ɛ ɔ́, Mawu ná zé mǐ kpó yě kpó zɛ̌ɛ́n yi jǐ, ɖo akpɔ́kpɔ́ mɛ, bɔ mǐ ná yi kpé Aklúnɔ ɔ́ ɖo jɔhɔn mɛ; bɔ énɛ́ ɔ́, mǐ ná nɔ kpɔ́ xá Aklúnɔ ɔ́ hwebǐnu. Hǔn mi bo zé xó énɛ́ lɛ́ɛ dó dó wǔsyɛ́n lanmɛ nú miɖée. Nɔví lɛ́ɛ mi, hwenu e nǔ énɛ́ lɛ́ɛ ná jɛ dó ɔ́, é sɔ́ byɔ́ ɖɔ è nǐ wlán nǔɖé d'é wú sɛ́ dó mi ǎ. Đó mi ɖésúnɔ ɔ́, mi tunwun ganjí ɖɔ Aklúnɔzán ɔ́ ná wá fyán mɛ lě e ajotɔ́ nɔ wá fyán mɛ zǎn mɛ é ɖɔhun. Hwenu e gbɛtɔ́ lɛ́ɛ na ɖɔ: “Fífá tíin, bɔ ayi jɛ ayǐ” ɔ́, hwe énɛ́ ɔ́ nu wɛ nǔ e ná vívá kún yětɔn ɔ́ ná zɔn yě jǐ ajijimɛ lě e nyɔ̌nu e ɖo xo ɔ́ nɔ jɛ flú mɛ ajijimɛ é ɖɔhun; yě ná gán ɖ'é mɛ ǎ. Amɔ̌, nɔví lɛ́ɛ mi, midɛɛ lɛ́ɛ ɔ́, mi ɖo ablu mɛ, bónú azǎn énɛ́ ɔ́ ná wá fyán mi ajotɔ́ ɖɔhun ǎ. Nǔgbó ɔ́, wěziza tɔn wɛ mi bǐ nyí, bó nyí kéze tɔn; mi nyí zǎn tɔn ǎ; mi ka nyí ablu tɔn ǎ. Ényí mɔ̌ hǔn, mǐ ɖó ná dɔ́ amlɔ mɛ ɖě lɛ́ɛ ɖɔhun ǎ; lo ɔ́, mǐ ɖó ná nɔ wunzɛn; ayi mǐtɔn ní ɖo te. Đó mɛ e nɔ dɔ́ amlɔ lɛ́ɛ ɔ́, zǎn mɛ wɛ yě nɔ dɔ́ amlɔ, bɔ mɛ e nɔ nu ahan mú lɛ́ɛ nɔ́ nu ahan mú zǎn mɛ. Amɔ̌, mǐdɛɛ lɛ́ɛ ɔ́, kéze tɔn wɛ mǐ nyí, bɔ ayi mǐtɔn ɖó ná nɔ te. Nǔɖiɖi kpó wǎn yíyí kpó ní nyí ganwu, bónú mǐ ní sɔ́ dó; hwlɛngán e ɖó nukún wɛ mǐ ɖe ɔ́ ní nyí gangbákún bónú mǐ ní sɔ́ xwe. Nǔgbó ɔ́, tito Mawu tɔn wɛ nyí ɖɔ é ná zé xomɛsin tɔn dó wa nǔ xá mǐ ǎ; lo ɔ́, tito tɔn wɛ nyí ɖɔ é ná hwlɛ́n mǐ gán, gbɔn Aklúnɔ mǐtɔn Jezu Klísu jí. Đó Jezu Klísu kú dó ta mǐtɔn mɛ, nú mǐ kpo ɖo gbɛ oo, abǐ mǐ kó kú oo, mǐ ná nɔ gbɛ xá ɛ. Hǔn, mi ná akɔ́nkpinkpan miɖée, bó dó wǔsyɛ́n lanmɛ nú miɖée, lě e bló gbɔn wɛ mi ko ɖe é. Nɔví lɛ́ɛ mi, mǐ ɖo byɔ̌byɔ́ mi wɛ ɖɔ mi nɔ ɖó sísí nú mɛ e Aklúnɔ sɔ́, bɔ yě ɖo azɔ̌ wa wɛ ɖo tɛ́ntin mitɔn lɛ́ɛ é; mɛ e Aklúnɔ sɔ́ azɔ̌ dó así ná, bɔ yě ɖo ali xlɛ́ mi wɛ, bó ɖo kplɔ́n ná mi wɛ lɛ́ɛ é. Mi nɔ wlí yɛ̌yi nú yě ganjí; mi ná yí wǎn nú yě titewungbe, ɖó azɔ̌ e wa wɛ yě ɖe ɔ́ wútu. Mi nɔ ɖó xomɛfífá dó miɖée wú. Nɔví lɛ́ɛ mi, mǐ lɛ́ ɖo byɔ̌byɔ́ mi wɛ ɖɔ mi nɔ gbɛ́ nǔ nú fɔnlínnɔ lɛ́ɛ; mi nɔ ná akɔ́nkpinkpan mɛ e ma nɔ gba wǔ dó mɛ mɛ ǎ lɛ́ɛ; mi ní nɔ gɔ́ alɔ nú mɛ e ma ɖó gǎn ǎ lɛ́ɛ; mi nɔ ɖó suúlu dó mɛ bǐ wú. Mi cɔ́ miɖée, bónú è wa nǔ nyanya nú mɛɖé hǔn, ní ma sɔ́ nyanya dó sú axɔ́ ná ó; lo ɔ́, mi dó gǎn bó nɔ wa ɖagbe nú miɖée hwebǐnu, bó nɔ wa nú gbɛtɔ́ lɛ́ɛ bǐ. Mi nɔ jɛ awǎ hwebǐnu. Mi nɔ xo ɖɛ hwebǐnu. Mi nɔ dó kú nú Mawu ɖo nǔ bǐ mɛ; ɖó nǔ e ba ɖo gbɛzínzán mitɔn mɛ wɛ Mawu ɖe, ɖo bǔ e mi ɖe ɖo Klísu Jezu mɛ é nɛ́. Mi ma glɔ́n ali nú Yɛsinsɛn sín azɔ̌ ó. Mi ma gbɛ́ wǎn nú wɛn e Mawu sɔ́ dó ayi mɛ nú mɛɖé ɖɔ ní dó mi ɔ́ ó. Lo ɔ́, mi ba do nú nǔ bǐ céɖécéɖé, bó nɔ hɛn ée nyɔ́ lɛ́ɛ dó ayi mɛ. Mi nɔ́ cɔ́ miɖée dó nǔ nyanya alɔkpa alɔkpa bǐ wú. Mawu e nɔ ná fífá mɛ ɔ́ ní bló bónú mi ní nyí étɔn bǐ dégbédégbé, ní cɔ́ mi ɖésúnɔ ɔ́ bǐ, ní cɔ́ yɛ mitɔn, bó cɔ́ lǐndɔ̌n mitɔn kpódó agbaza mitɔn kpó, bónú blɔ̌ ɖé ma nɔ mi wú ó, nú gbe e gbe Aklúnɔ mǐtɔn Jezu Klísu ná wá é. Đó mɛ e ylɔ́ mi ɔ́ ɖo gbejí; é wɛ ná wa azɔ̌ énɛ́ ɖo gbɛ mitɔn mɛ. Nɔví lɛ́ɛ mi, mi nɔ xo ɖɛ nú mǐ lɔmɔ̌. Mi kí nɔví nɔví sín si nú nɔví lɛ́ɛ bǐ, bó dó dó gbe yě ná. Đo Aklúnɔ sín nyǐkɔ mɛ ɔ́, un ɖo byɔ̌byɔ́ mi wɛ ɖɔ mi ní kɛnklɛ́n bó xa wěma élɔ́ nú nɔví lɛ́ɛ bǐ. Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi. Nyɛ Pɔ́lu kpó Silási kpó, kpódó Timɔtée kpán wɛ wlán wěma élɔ́ sɛ́ dó mi agunví e ɖo Tɛsaloniki, bó ɖo bǔ xá Mawu Tɔ́ mǐtɔn ɔ́ kpó Aklúnɔ Jezu Klísu kpó é. Mawu Tɔ́ ɔ́ kpódó Aklúnɔ Jezu Klísu kpó ní ná fɛ́nú kpó fífá kpó mi. Nɔví lɛ́ɛ mi, mǐ ɖó ná ɖo kú dó nú Mawu wɛ hwebǐnu ɖó ta mitɔn mɛ. É sɔgbe ɖɔ mǐ ní bló gbɔn mɔ̌, ɖó nǔɖiɖi e mi ɖó ɔ́ ɖo nukɔn yi wɛ ɖésú, bɔ wǎn yíyí e ɖokpó ɖokpó mitɔn ɖó nú mɛ ɖě lɛ́ɛ ɔ́ nɔ ɖo jijɛ jí wɛ. Énɛ́ ɔ́ wú wɛ mǐ nɔ gó ɖo agun Mawu tɔn lɛ́ɛ mɛ ɖó mi wu; lě e mi dɛ ɖo ya e dó nú mi wɛ yě ɖe lɛ́ɛ kpó wǔvɛ́ e mɔ wɛ mi ɖe lɛ́ɛ kpó nu, lobo ɖó kan dó nǔ wú, bó kpo ɖo nǔ ɖi wɛ ɔ́ lɔ zɔ́n, bɔ mǐ nɔ́ gó. Énɛ́ ɔ́ ɖe xlɛ́ ɖɔ hwɛɖiɖɔ Mawu tɔn sɔgbe; Mawu ná zé mi dó húzú mɛ e jɛ xá axɔ́súɖuɖu tɔn e wú mi ɖo ya ji wɛ é ná, ɖó mi dɛ ɖo nǔ lɛ́ɛ bǐ nu. Đó Mawu ná wa nǔ e sɔgbe ɔ́; é ná dó ya nú mɛ e ɖo ya dó nú mi wɛ lɛ́ɛ; É na sɔ́ kú mavɔ mavɔ dó dɔn tó nú yě; é ná ɖe yě ɖó zɔ nú fí e Aklúnɔ ɖe é; é ná ɖe yě ɖó zɔ nú Aklúnɔ sín hlɔ̌nhlɔ́n susunɔ ɔ́. É ná wá gbe énɛ́ gbe, bónú mɛ e nyí étɔn lɛ́ɛ ná kpa susu n'i, bɔ nǔ tɔn ná nyɔ́ mɛ e ɖi nǔ n'i lɛ́ɛ bǐ sín nukún mɛ; mi lɔmɔ̌ mi ná nɔ mɛ énɛ́ lɛ́ɛ mɛ, ɖó mi ɖi nǔ nú xó tɔn e mǐ wá ɖɔ nú mi é. Énɛ́ ɔ́ wútu wɛ mǐ nɔ ɖo ɖɛ xo nú mi wɛ hwebǐnu. Mǐ nɔ byɔ́ Mawu mǐtɔn ɖɔ ní bló bónú mi ní nyí mɛ e jɛ xá gbɛ e wútu é ylɔ́ mi é. Mǐ nɔ byɔ́ ɛ ɖɔ, gbɔn hlɔ̌nhlɔ́n tɔn mɛ ɔ́, ní bló bónú mi ní wa nǔ ɖagbe e mi jló ná wa lɛ́ɛ bǐ; ní bló bónú nǔ bǐ ní vɔ́ ɖo nǔɖiɖizɔ́ e wa wɛ mi ɖe ɔ́ wú. Énɛ́ ɔ́, gbɔn Mawu mǐtɔn kpódó Aklúnɔ mǐtɔn Jezu Klísu kpó sín fɛ́nú gbla mɛ ɔ́, è nǎ sɔ́ Aklúnɔ mǐtɔn Jezu sín nyǐkɔ su gbɔn mi jí, bó ná sɔ́ nyǐkɔ mi lɔmɔ̌ tɔn su gbɔn jǐ tɔn. Mi ma lɔn nú mɛɖé blɛ́ mi gbɔn alɔkpa ɖěbǔ mɛ ó, ɖó azǎn énɛ́ ná ko wá cóbɔ gǔfínfɔ́n gǔdo gúdo tɔn ɔ́ na wá yi ǎ; é ná ko wá cóbɔ Mɛdídá e sín kún è nǎ sú dó ɔ́ ná tɔ́n jɛ wěxo ǎ. É ná lɔn bónú gbɛtɔ́ lɛ́ɛ sɔ́ ná sɛn nǔ e yě nɔ sɛn lɛ́ɛ ɖě ǎ; yě ká sɔ́ ná sɛn nǔ e yě nɔ dó ɖó Mawu ná ɔ́ ɖě ǎ. É ná sɔ́ éɖée ɖó aga, nú nǔ énɛ́ lɛ́ɛ bǐ, bó ná hun káká yi byɔ́ sinsɛnxɔ Mawu tɔn mɛ, bó na jínjɔ́n ayǐ, lobo ná jlá ɖɔ émí nyí Mawu. Mi sɔ́ flín ɖɔ hwenu e un kpo ɖo mi gɔ́n ɔ́, un nɔ ko ɖɔ nǔ énɛ́ lɛ́ɛ nú mi ǎ cé? É ɖo mɔ̌ có, nǔɖé ka tíin bó hɛn nǔ énɛ́ lɛ́ɛ ɖó te; mi ka tunwun nǔ e wɛ é. Ée nǔ cí mɔ̌ ɔ́, hwenu e Mɛdídá ɔ́ ná tɔ́n dó ɔ́ jɛ́n ná su cóbɔ é ná tɔ́n. Dǎnúwiwa sín hlɔ̌nhlɔ́n e ɖo wi mɛ ɔ́ ko ɖo azɔ̌ wa wɛ. Cóbónú nǔ énɛ́ lɛ́ɛ ka ná jɛ ɔ́, mɛ e hɛn Mɛdídá ɔ́ ɖó te ɔ́ jɛ́n ná gosín i hwɛ̌. Hwenɛ́nu ɔ́, Mɛdídá ɔ́ ná tɔ́n, bɔ Aklúnɔ Jezu ná zé funfún e nɔ́ tɔ́n sín nu tɔn mɛ ɔ́ dó hu i, lobo ná sɔ́ wǐwá tɔn sín kínkɔ́n dó vívá kún tɔn. Mɛdídá ɔ́ ná wá kpó Satáan sín hlɔ̌nhlɔ́n kpó, bó ná jlɛ́ nǔ tɛnmɛ tɛnmɛ, bó ná ɖe wuntun tɛnmɛ tɛnmɛ lɛ́ɛ xlɛ́, lobo ná bló nǔjíwǔ tɛnmɛ tɛnmɛ lɛ́ɛ; nǔ énɛ́ lɛ́ɛ ɖě ká nyí nǔgbó ǎ. É ná wa nǔ nyanya gbɔn alɔkpa bǐ mɛ, bó ná dó blɛ́ mɛ e ná dɔn lɛ́ɛ ná; yě ná dɔn, ɖó nǔgbó e ná hwlɛ́n yě gán ɔ́, yě yí ǎ; yě ká yí wǎn ná ǎ. Nǔ e wú wɛ Mawu sɛ́ hlɔ̌nhlɔ́n e nɔ dɔn mɛ, bɔ è nɔ wa nǔ nyi do ɔ́ dó yě, bónú yě ná nɔ ɖi nǔ nú adingban ɔ́ nɛ́. Énɛ́ ɔ́, mɛ e ma ɖi nǔ nú nǔgbó ɔ́ ǎ, bó ka nɔ yí wǎn nú nǔ agɔ wiwa lɛ́ɛ ɔ́, è nǎ ɖó hwɛ nú yě bǐ. Nɔví lɛ́ɛ mi, mi mɛ e Aklúnɔ yí wǎn ná lɛ́ɛ ɔ́, mǐ ɖó ná nɔ dó kú nú Mawu hwebǐnu ɖó ta mitɔn mɛ. Đó Mawu sɔ́ mi, bónú mi ná nyí mɛ nukɔn nukɔntɔn e é ná hwlɛngán, gbɔn Yɛsinsɛn e zɔ́n bɔ mi nyí étɔn ɔ́ kpódó nǔɖiɖi e mi ɖó nú nǔgbó ɔ́ kpán jí. Nǔ énɛ́ wú wɛ Mawu ylɔ́ mi gbɔn Wɛn Ɖagbe e mǐ dó mi ɔ́ gbla mɛ; é ylɔ́ mi bónú mi ná ɖó susu Aklúnɔ mǐtɔn Jezu Klísu tɔn. Nɔví lɛ́ɛ mi, ényí mɔ̌ hǔn, mi dó gǎn, bó hɛn nǔ e mǐ kplɔ́n mi lɛ́ɛ bǐ dó ayi mɛ: ée mǐ ɖɔ xó dó kplɔ́n mi lɛ́ɛ, abǐ ée mǐ wlán sɛ́ dó mi lɛ́ɛ é. Nɔví lɛ́ɛ mi, bó ná dó fó ɔ́, mǐ ɖo byɔ̌byɔ́ mi wɛ ɖɔ mi ní nɔ xo ɖɛ nú mǐ, bónú Aklúnɔxó ɔ́ ní yá wǔ gba kpé, bónú mɛ lɛ́ɛ ní nɔ kpa susu ná lě e é ɖe gbɔn ɖo mi gɔ́n é. Mi lɛ́ xo ɖɛ nú mǐ, bónú Mawu ná hwlɛ́n mǐ ɖo mɛdídá lɛ́ɛ kpódó mɛ nyanya lɛ́ɛ kpó sí; ɖó mɛ bǐ wɛ ɖi nǔ nú Wɛn Ɖagbe ɔ́ ǎ. Lo ɔ́, Aklúnɔ ɔ́, gbejínɔtɔ́ wɛ; é ná ná hlɔ̌nhlɔ́n mi, bó ná cyɔ́n alɔ mi jí, bɔ awǒvi ná kpé mi wú ǎ. Aklúnɔ ná jiɖiɖe mǐ dó mi wú; é ná gǎnjɛwú mǐ ɖɔ mi nɔ bló nǔ e ɖɔ nú mi wɛ mǐ ɖe lɛ́ɛ, bó ka lɛ́ kpo ɖo blǒbló wɛ. Aklúnɔ ní wa azɔ̌ ɖo ayixa mitɔn mɛ, bónú mi ná yí wǎn nú Mawu bó ná ɖó hǔnkúkú e Klísu nɔ ná mɛ é. Nɔví lɛ́ɛ mi, mǐ ɖo byɔ̌byɔ́ mi wɛ ɖo Aklúnɔ Jezu Klísu sín nyǐkɔ mɛ ɖɔ mi nɔ nɔ zɔ nú nɔví mǐtɔn e nɔ nɔ fɔnlín gbɛ mɛ, bó ma nɔ jló ná wa nǔɖé ǎ, bó ma nɔ xwedó nǔ e mǐ kplɔ́n yě ɔ́ ǎ lɛ́ɛ bǐ. Mi ɖésúnɔ ɔ́, lě e mi ɖó ná wa nǔ mǐdɛɛ lɛ́ɛ ɖɔhun gbɔn ɔ́, mi tunwun ganjí; ɖó hwenu e mǐ ɖo mi gɔ́n ɔ́, mǐ ɖi fɔnlín ǎ. Mǐ ɖu mɛɖé nǔɖuɖu bó gɔn axɔ́ sú ǎ; é nyɔ́ wa ɔ́, mǐ nɔ́ jɛ tagba, bó nɔ wa azɔ̌, bó nɔ jɛ dɛ̌n zǎn kpó kéze kpó, bó ma nɔ kɔ jí nú mɛ ɖěbǔ ó. É nyí mǐ gɔn acɛ e ná ɖu nǔ mitɔn bó gɔn axɔ́ sú ɔ́ ɖó wútu wɛ mǐ wa nǔ gbɔn mɔ̌ ǎ; lo ɔ́, mǐ wa nǔ gbɔn mɔ̌, bó ná dó ná xlɛ́ e mi ná xwedó ɔ́ mi. Nǔgbó ɔ́, hwenu e mǐ ɖo mi gɔ́n ɔ́, mǐ ko ɖɔ nú mi ɖɔ mɛ e ma jló ná wa azɔ̌ ǎ ɔ́, ní ma ɖu nǔɖuɖu lɔ ó. Mǐ ɖo xó ɖɔ nú mi wɛ gbɔn mɔ̌, ɖó mǐ se ɖɔ mɛɖé lɛ́ɛ ɖo mi mɛ, bó nɔ nɔ fɔnlín gbɛ mɛ, bó nɔ́ ba nǔɖé ná wa zɛ yě ná ɖo nu dó mɛɖěvo xó mɛ wɛ wú ǎ. Mɛ énɛ́ lɛ́ɛ ɔ́, mǐ ɖo byɔ̌byɔ́ yě wɛ, bó lɛ́ ɖo zǐnzɔ́n yě wɛ ɖo Aklúnɔ Jezu Klísu sín nyǐkɔ mɛ wɛ ɖɔ yě ní ma nɔ nya xó gbé ó; yě ní nɔ ɖó kan dó azɔ̌ wú, bó ná dó sixú nyí yě ɖésú. Nɔví lɛ́ɛ mi, midɛɛ lɛ́ɛ ɔ́, ɖagbewiwa ní ma ci kɔ nú mi ó. Nǔ e kplɔ́n mi wɛ mǐ ɖe ɖo wěma élɔ́ mɛ ɔ́, ényí mɛɖé ma bló ɖ'é jí ǎ hǔn, mi ɖó kɛ́n jǐ tɔn, bó ma dó gbɛ̌ tɔn ó, bónú winnyá ná hu i. Amɔ̌ mi ma ka sɔ́ ɛ dó ɖó kɛntɔ́ na ó; lo ɔ́, mi kplɔ́n nǔ i nɔví ɖɔhun. Aklúnɔ e nɔ́ ná fífá mɛ ɔ́, é ɖésúnɔ ní ná fífá mi hwebǐnu, gbɔn alɔkpa bǐ mɛ. Aklúnɔ ní nɔ kpɔ́ xá mi bǐ. Nyɛ Pɔ́lu ɖésú wɛ sɔ́ alɔ ce dó wlán xógbe élɔ́ lɛ́ɛ ná: un dó gbe mi; lě e un nɔ dó alɔ wěma ce lɛ́ɛ bǐ mɛ gbɔn ɔ́ nɛ́; mɔ̌ wɛ un nɔ wlán nǔ gbɔn. Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ. Nyɛ Pɔ́lu e Mawu Mɛhwlɛ́ngántɔ́ mǐtɔn, kpódó Klísu Jezu e nyí nukúnɖíɖó mǐtɔn ɔ́ kpán ɖe gbe, bɔ un nyí mɛsɛ́dó Klísu Jezu tɔn ɔ́ wɛ wlán wěma élɔ́ sɛ́ dó hwi vǐ ce jiji ɖo nǔɖiɖi mɛ Timɔtée. Mawu Tɔ́ ɔ́ kpódó Aklúnɔ mǐtɔn Klísu Jezu kpán ní ná fɛ́nú we, bó kú nǔbláwǔ nú we, lobo ná fífá we. Nɔ Efɛ́zi lě e un ko ɖɔ gbɔn nú we hwenu e un ɖidó Masedwani é; mɛɖé lɛ́ɛ ɖo fínɛ́, bó nɔ ɖo nǔ e ma sɔgbe xá nǔɖiɖi mǐtɔn ǎ lɛ́ɛ kplɔ́n mɛ lɛ́ɛ wɛ; a ɖǒ ná gbɛ́ nǔ nú yě. Đɔ nú yě ɖɔ yě ní jó xɛxó kpódó kanfifɔ magbokɔ kpó dó, ɖó nǔ énɛ́ lɛ́ɛ ɔ́, adɔn wɛ yě nɔ dɔn nyi ayǐ, bó nɔ́ lɔn nú mɛ lɛ́ɛ ná nyí nǔjíkpɔ́ntɔ́ Mawu tɔn ɖagbe ɖo nǔɖiɖi mɛ ǎ. Nǔ e wú un ɖɔ mɔ̌ ɔ́ wɛ nyí ɖɔ nǔkplɔ́nmɛ mǐtɔn lɛ́ɛ ɖó ná d'alɔ mi, bɔ mi ná ɖó wǎn yíyí e nɔ tɔ́n sín ayi mímɛ́ mɛ é; wǎn yíyí e nɔ tɔ́n sín linlin ɖagbe mɛ é, wǎn yíyí e nɔ tɔ́n sín nǔɖiɖi jɔ nǔɖiɖi mɛ é. Mɛ ɖé lɛ́ɛ lɛ́ kɔ sín walɔ énɛ́ lɛ́ɛ gúdo, lobo kpo nú xógbló kɛ́ɖɛ́, káká bó bú ɖ'é mɛ. Yě jló ná nyí sɛ́nkplɔ́nmɛtɔ́, yě nɔ mɔ nukúnnú jɛ nǔ e ɖɔ wɛ yě ɖésúnɔ ɖe ɔ́ mɛ ǎ; yě ka nɔ mɔ nukúnnú jɛ nǔ e jí yě tɛ ɖɛ̌ sɔ mɔ̌, bó ɖo ɖiɖɔ wɛ ɔ́ mɛ ǎ. Nǔgbó ɔ́, mǐ tunwun ɖɔ sɛ́n ɔ́, nǔ ɖagbe wɛ é nyí, nú è zě dó wa azɔ̌ ná lě e é jɛ xá gbɔn ɔ́ nɛ́. Đo tají ɔ́, è ka ná flín ɖɔ é kún nyí nǔjlɔ́jlɔ́watɔ́ lɛ́ɛ wú wɛ è dǒ sɛ́n ɔ́ ó; lo ɔ́, mɛ e wú è dǒ sɛ́n ɔ́ lɛ́ɛ wɛ nyí nǔnyanyawatɔ́ lɛ́ɛ, tónúmasetɔ́ lɛ́ɛ, mɛ e ma nɔ sí Mawu ǎ lɛ́ɛ, hwɛhutɔ́ lɛ́ɛ, mɛ e ma nyí mɛ mímɛ́ ǎ lɛ́ɛ, mɛ e ma ɖi nǔ nú Mawu ǎ lɛ́ɛ, mɛ e nɔ hu tɔ́ yětɔn abǐ nɔ yětɔn lɛ́ɛ é, mɛhutɔ́ lɛ́ɛ. Nǔblíblíwatɔ́ lɛ́ɛ, súnnu e nɔ ɖó xó xá súnnu gbɛ̌ yětɔn lɛ́ɛ é, nyɔ̌nu e nɔ ɖó xó xá nyɔ̌nu gbɛ̌ yětɔn lɛ́ɛ é, kannumɔjɔ́watɔ́ lɛ́ɛ, adingbannɔ lɛ́ɛ, mɛ e nɔ xwlé nǔ dó nǔvú jí lɛ́ɛ, kpódó mɛ e nɔ wa nǔ e ma sɔgbe xá nǔkplɔ́nmɛ titewungbe ɔ́ ǎ lɛ́ɛ bǐ kpó. Wɛn Ɖagbe e è sɔ́ dó así nú mǐ, bɔ é ɖɔ xó dó Mawu nyɔ̌nábǐnɔ ɔ́ sín susu wú ɔ́ mɛ wɛ è nɔ mɔ nǔkplɔ́nmɛ énɛ́ ɖe. Un dó kú nú Aklúnɔ mǐtɔn Klísu Jezu e ná hlɔ̌nhlɔ́n mì, nú ma dó wa azɔ̌ ce ná é. Un dó kú n'i, ɖó é mɔ ɖɔ un nyí mɛ bɔ è nǎ ɖeji dó wǔ ce, un dó kú n'i, ɖó é sɔ́ mì bónú ma wa azɔ̌ n'i. Có ɖ'ayǐ ɔ́, un ko nylá nu dó wǔtu tɔn, bó kó dó ya n'i, bó ɖɔ alǎnnú n'i kpɔ́n. Lo ɔ́, é kú nǔbláwǔ nú mì, ɖó hwenɛ́nu ɔ́, un ɖi nǔ n'i ǎ, un ka tunwun nǔ e wa wɛ un ɖe ɔ́ ǎ. Aklúnɔ mǐtɔn ka kɔn fɛ́nú tɔn dó jǐ ce, bɔ é túnflá; é ná nǔɖiɖi kpódó wǎn yíyí e mǐ ɖǒ ɖo Klísu Jezu mɛ ɔ́ kpó mì. Xó nǔgbó ɖokpó ɖíe, bɔ é jɛ xá ɖɔ mɛ bǐ ní yí; é wɛ nyí ɖɔ Klísu Jezu wá gbɛ ɔ́ mɛ, bó ná hwlɛ́n hwɛhutɔ́ lɛ́ɛ gán; nyɛ wɛ ka nyí hwɛhutɔ́ hú hwɛhutɔ́ lɛ́ɛ bǐ. Amɔ̌ énɛ́ ɔ́ wútu wɛ Mawu kú nǔbláwǔ nú mì; é jló ɖɔ Jezu Klísu ní ɖe sɔxwixwe tɔn bǐ xlɛ́ gbɔn nyɛ mɛ e nyí hwɛhutɔ́ hú hwɛhutɔ́ lɛ́ɛ bǐ é sín gbɛzán mɛ, bónú ma nyí kpɔ́n d'é wú nú mɛ e ná wá ɖi nǔ n'i, bó ná mɔ gbɛ mavɔ mavɔ lɛ́ɛ é bǐ. Axɔ́sú mavɔ mavɔ e ma nɔ kú gbeɖé ǎ ɔ́, axɔ́sú e è ma nɔ mɔ ǎ é, axɔ́sú e nyí Mawu ɖokpó géé ée tíin é; è nǐ wlí yɛ̌yi n'i, bó kpa susu n'i káká sɔ́yi mavɔ mavɔ. Amǐ. Vǐ ce Timɔtée, un ɖo nǔ élɔ́ zɔ́n we wɛ, bɔ é sɔgbe xá nǔ e Mawu ɖɔ é ná jɛ dó jǐ towe lɛ́ɛ, bɔ è ko ɖɔ nú we ɖ'ayǐ é. Xwedó xó énɛ́ lɛ́ɛ, bó ná dó fun ahwan ɖagbe ɔ́, kpódó nǔɖiɖi kpó, kpódó linlin ɖagbe kpó. Mɛ ɖé lɛ́ɛ gbɛ́ ɖɔ émí kún ná ɖótó nǔ e ɖɔ nú émí wɛ linlin émítɔn ɖe ɔ́ ó, bɔ é sín énɛ́ wú, bɔ nǔɖiɖi yětɔn jɛ ayǐ. Imɛnɛ́ɛ kpódó Alɛsándlu kpán ɖo mɛ énɛ́ lɛ́ɛ mɛ. Un jó yě dó nú Satáan, nú yě ná tunwun ɖɔ émí kún sɔ́ ná nylá nu dó Mawu wú ɖě ó. Nǔ nukɔntɔn e zɔ́n mi wɛ un ɖe ɔ́ wɛ nyí ɖɔ mi ní nɔ sa vo nú Mawu; mi nɔ xo ɖɛ; mi nɔ byɔ́ nǔ Mawu; mi nɔ dó kú n'i; mi ná nɔ bló nǔ énɛ́ lɛ́ɛ, ɖó gbɛtɔ́ lɛ́ɛ bǐ tamɛ. Mi xo ɖɛ nú axɔ́sú lɛ́ɛ kpódó mɛ e sín alɔ mɛ acɛkpikpa ɖe lɛ́ɛ bǐ kpán, bónú mǐ ná sixú mɔ vivo kpódó fífá kpó, ɖo sísí titewungbe ɖó nú Mawu kpódó jijɔ ɖagbe zínzán kpó mɛ. Đó nǔ e nyí nǔ ɖagbe, bó nyɔ́ ɖo Mawu Mɛhwlɛ́ngántɔ́ mǐtɔn nukún mɛ ɔ́ nɛ́. É wɛ jló ɖɔ gbɛtɔ́ lɛ́ɛ bǐ ní mɔ hwlɛngán, bó ná tunwun nǔgbó ɔ́ bǐ dégbédégbé. Đó Mawu ɖokpó géé wɛ tíin; ɖɛ̌mɛnu ɖokpó géé wɛ tíin ɖo Mawu kpódó gbɛtɔ́ lɛ́ɛ kpán tɛ́ntin. Đɛ̌mɛnu ɔ́ wɛ nyí Klísu Jezu e nyí gbɛtɔ́ é. Klísu Jezu énɛ́ ɔ́ wɛ sɔ́ éɖée jó, bó dó xɔ gbɛ nú mɛ bǐ. Ée hwenu e Mawu ɖó ɔ́ wá su ɔ́, lě e é ɖe xlɛ́ ɖɔ Mawu jló ɖɔ gbɛtɔ́ lɛ́ɛ bǐ ní mɔ hwlɛngán gbɔn é nɛ́. Un ɖo adingban ɖó wɛ ǎ; nǔgbó ɖɔ wɛ un ɖe bó ɖɔ énɛ́ ɔ́ wútu wɛ Mawu sɔ́ mì wɛnsagun, bó sɔ́ mì mɛsɛ́dó, bó zɔ́n mì ɖɔ ma kplɔ́n nǔ e kan nǔɖiɖi kpódó nǔgbó kpó ɔ́ mɛ e ma nyí Jwifu ǎ lɛ́ɛ. Un jló ɖɔ súnnu lɛ́ɛ ɖo fí ɖěbǔ hǔn, yě ní nɔ xo ɖɛ, yě ní nɔ zé alɔ dó jǐ, bó nɔ xo ɖɛ kpódó ayi mímɛ́ kpó; yě ní ma nɔ sin xomɛ ó, yě ma ka nɔ ɖɔ jlɛ ó. Un lɛ́ jló ɖɔ nyɔ̌nu lɛ́ɛ ní nɔ́ sɔ́nǔ lě e é jɛ xá gbɔn é, ɖo yɛ̌yi mɛ, ɖo jlɛ̌ jí. Nǔ e nyɔ̌nu lɛ́ɛ ná dó ba acɔ́ ná ɔ́ wɛ nyí ɖa gɛ́dɛ́gɛ́dɛ́ blóbló ǎ; sikánúdídó, jɛ̌dídó abǐ avɔ xɔ akwɛ́ gbígbá ǎ; lo ɔ́, nǔ e yě ná nɔ dó ba acɔ́ ná ɔ́ wɛ nyí nǔ ɖagbe wiwa, lě e é jɛ xá ɖɔ nyɔ̌nu e nɔ sí Mawu lɛ́ɛ ní nɔ bló gbɔn é. Nyɔ̌nu lɛ́ɛ ní nɔ nɔ xwíí, bó nɔ́ yí nǔ e kplɔ́n yě wɛ è ɖe ɔ́, bó nɔ́ hwíhwɛ́ yěɖée bǐ. Un ná gbe nyɔ̌nu ɖé ɖɔ é ní kplɔ́n nǔ mɛ ɖo agun mɛ abǐ é ní kpa acɛ nú súnnu ɖé ǎ. Abwɛ̌ wɛ é ɖó ná nɔ. Đó Adámu wɛ Mawu bló jɛ nukɔn, cóbó wá bló Ɛvu. É ka nyí Adámu wɛ Satáan blɛ́ ǎ; nyɔ̌nu ɔ́ wɛ é blɛ́, bɔ é gba sɛ́n e Mawu dó é. É ɖo mɔ̌ có, nú nyɔ̌nu ɖi nǔ nú Mawu, bó ɖó wǎn yíyí nú nɔzo, bó ɖo mímɛ́ jí, bó nɔ wa nǔ dó jlɛ̌ jí ɔ́, Mawu ná hwlɛ́n ɛ gán ɖo vǐjiji tɔn mɛ. Xó nǔgbó ɖokpó ɖíe: ényí mɛɖé jló ná nyí agunjíkpɔ́ntɔ́ ɔ́, azɔ̌ ɖagbe ba wɛ é ɖe. Agunjíkpɔ́ntɔ́ ka ɖó ná nyí mɛɖé, bɔ è nǎ mɔ nǔɖé ɖɔ dó wú tɔn ǎ. Asi ɖokpó wɛ é ɖó ná ɖó; é ná nɔ wa nǔ ɖó jlɛ̌ jí; é ɖó ná nɔ ɖu ɖo éɖée jí; é ɖó ná ɖó walɔ ɖagbe; é ɖó ná nɔ yí mɛ ganjí; é ná nyí mɛɖé bó ná sixú kplɔ́n nǔ mɛ. É ɖó ná nyí ahannumúnɔ ǎ; é ka ná nyí tagbanɔ ǎ, é nyɔ́ wa ɔ́, é ná nyɔ́ xomɛ, bó ná nyí mɛfífá, bɔ akwɛ́ ná nɔ gbo vɛ̌ ɛ ǎ. É ɖó ná kpé nukún dó xwé tɔn wú ganjí, bó ɖó gbe ɖo vǐ tɔn lɛ́ɛ jí, bɔ yě ná nɔ́ se tónú kpó sísí ɖaxó kpó. Đó mɛ e ma sixú kpé nukún dó xwé tɔn wú ǎ ɔ́, nɛ̌ é ka ná sixú kpé nukún dó agun Mawu tɔn wú gbɔn? É ɖó ná nyí mɛ e ɖi nǔ nú Klísu yɔ̌yɔ́ ɔ́ ǎ; é ma nyí mɔ̌ ǎ ɔ́, goyíyí táá wá byɔ́ lanmɛ n'i, bɔ Mawu ná ɖó hwɛ n'i lě e é ɖó hwɛ nú awǒvi gbɔn é. É ɖó ná nyí mɛɖé bɔ mɛ e ma ɖo agun Klísu tɔn mɛ ǎ lɛ́ɛ lɔmɔ̌ ná nɔ ɖe kúnnu ɖagbe n'i, bónú é ma wá ɖu hɛ̌n ó, bónú é ma wá jɛ mɔ e awǒvi nɔ ɖó nú mɛ lɛ́ɛ mɛ ó. Mɛ e nɔ kpé nukún dó agunví lɛ́ɛ wú ɔ́ lɔmɔ̌ ɖó ná nyí gbɛtɔ́ ɖagbe, nǔgbóɖɔtɔ́; yě ɖó ná nɔ nu ahan dín ǎ; yě ka ɖó ná nɔ zé ayi hízíhízí dó ba akwɛ́ ná ǎ. Yě ɖó ná tɛ́ dó nǔgbó e ɖo nǔɖiɖi ɔ́ mɛ é wú syɛ́nsyɛ́n, kpódó ayixa mímɛ́ kpó. È nǐ tó tɛ́n yě kpɔ́n hwɛ̌; ényí è ma mɔ nǔ jɛ dó ɖé ɖo yě wú ǎ ɔ́, yě hɛn ɔ́, yě ná wa agunvíwú-kpénukúndótɔ́ sín azɔ̌. Asi yětɔn lɛ́ɛ lɔ ɖó ná nyí mɛ ɖagbe; yě ɖó ná nɔ ɖɔ mɛ nú ǎ; yě ná nɔ wa nǔ bǐ dó jlɛ̌ jí, bó ná nɔ gbejí ɖo nǔ bǐ mɛ. Agunvíwú-kpénukúndótɔ́ ɔ́, así ɖokpó géé wɛ é ɖó ná ɖó; é ɖó ná hɛn vǐ tɔn lɛ́ɛ kpódó xwé tɔn kpó ganjí. Agunvíwú-kpénukúndótɔ́ e nɔ wa azɔ̌ yětɔn ganjí lɛ́ɛ ɔ́, tɛn ɖagbe wɛ yě nɔ mɔ; yě hɛn ɔ́, yě ná ɖɔ nǔɖiɖi e mǐ ɖó ɖo bǔ e mǐ ɖe xá Klísu Jezu ɔ́ mɛ ɔ́ sín xó kpódó jiɖiɖe kpó. Un ɖo wěma élɔ́ wlán sɛ́ dó we wɛ, bó ka ɖo linlin wɛ ɖɔ un ná wá gɔ̌n towe ɖo malín málín mɛ. È ka nɔ tunwun ǎ; ényí wǐwá ce wá ɖo lǐnlín wɛ ɔ́, wěma élɔ́ ná zɔ́n bɔ a nǎ tunwun lě e a nǎ wa nǔ gbɔn ɖo xwédo Mawu tɔn mɛ é; xwédo e nyí agun Mawu gbɛɖe ɔ́ tɔn, bó nyí dotín kpódó sósyɛ́n kpó nú nǔgbó ɔ́ é. Nǔgbó wɛ, mɛ ɖěbǔ sixú gbɛ́ ǎ; nǔbúdo e ɖo mawusinsɛn mɛ ɔ́ d'agba. “É wá gbɛtɔ́ ɖɔhun; Yɛsinsɛn ɖe e xlɛ́ ɖɔ é nyí hwɛjijɔnɔ; wɛnsagun Mawu tɔn lɛ́ɛ mɔ ɛ. È ɖɔ xó tɔn nú akɔta lɛ́ɛ bǐ; è ɖi nǔ n'i gbɔn gbɛ ɔ́ bǐ mɛ; Mawu sɔ́ ɛ yi jǐxwé ɖo susu mɛ.” Yɛsinsɛn ɖésú ko ɖɔ céɖécéɖé ɖɔ azǎn gǔdo gúdo tɔn lɛ́ɛ mɛ ɔ́, mɛɖé lɛ́ɛ ná jó nǔɖiɖi dó, bó ná ɖótó yɛ e nɔ flú mɛ lɛ́ɛ kpódó yɛ nyanya lɛ́ɛ sín nǔkplɔ́nmɛ kpó. Yě ná ɖótó nǔ énɛ́ lɛ́ɛ ɖo yɛmɛnúwatɔ́ lɛ́ɛ kpó adingbannɔ lɛ́ɛ kpó sín nu, bó ná jó yěɖée dó bɔ yɛmɛnúwatɔ́ énɛ́ lɛ́ɛ e nǔmasɔgbewiwa ɖó wuntun ayixa yětɔn lɛ́ɛ gan zozo wɛ è dǒ ɖó wuntun ɖɔhun lɛ́ɛ ná dɔn yě bǐ bǔ. Mɛ énɛ́ lɛ́ɛ nɔ dó sɛ́n ɖɔ è ma da asú ó, è ma ka da asi ó. Yě nɔ dó nǔɖuɖu ɖé lɛ́ɛ sín sɛ́n nú mɛ; lo ɔ́, Mawu bló nǔɖuɖu énɛ́ lɛ́ɛ, bónú nǔɖitɔ́ e mɔ nukúnnú jɛ nǔgbó ɔ́ wú lɛ́ɛ ná nɔ ɖu kpó kúdídó kpó. Đó nǔ e Mawu bló lɛ́ɛ bǐ wɛ nyɔ́, bɔ è sixú dó ɖě sín sɛ́n nú mɛ ǎ; bǐ wɛ è ɖǒ ná yí kpódó kúdídó kpó. Đó Mawuxó ɔ́ kpódó ɖɛxixo kpán nɔ bló bɔ nǔ bǐ nɔ húzú nǔ mímɛ́. A kplɔ́n nǔ énɛ́ lɛ́ɛ nɔví lɛ́ɛ ɔ́, a nǎ nyí Klísu Jezu sín mɛsɛntɔ́ ɖagbe, bó ná ɖe xlɛ́ ɖɔ nǔɖiɖixó kpódó nǔkplɔ́nmɛ titewungbe e a xwedó lɛ́ɛ kpán wɛ nyí Yɛsinsɛn sín nǔɖuɖu nú we. Hɔn nú xlonɔ sín tan e kpi wɛ nyɔ̌ɖaxóví lɛ́ɛ nɔ ɖe, bɔ é ma sɔgbe xá nǔɖiɖi ɔ́ ǎ lɛ́ɛ é, bó kplɔ́n hwiɖée dó xɛsi ɖi nú Mawu lɔ jí. Agbaza mɛ gándídó ɔ́, nǔ ɖagbe wɛ; amɔ̌ nǔ kpɛɖé jɛ́n wɛ é nyɔ́ ná; ayi mɛ gándídó ɔ́ ka nyɔ́ nú nǔ lɛ́ɛ bǐ, ɖó é dó akpá nú mi ɖɔ mi ná mɔ gbɛ din tɔn, kpódó ée ja ɔ́ kpó. Xó nǔgbó ɖokpó nɛ́, bɔ é jɛ xá ɖɔ mɛ bǐ ní yí bǐ dégbédégbé. Nǔ énɛ́ wú wɛ mǐ ɖo azɔ̌ wa wɛ, bó ɖo gǎn dó wɛ, ɖó mǐ ɖo Mawu gbɛɖe e nyí Mɛhwlɛ́ngántɔ́ gbɛtɔ́ lɛ́ɛ bǐ tɔn ɔ́ ɖó nukún wɛ, ɖo tají ɔ́, Mawu gbɛɖe e nyí Mɛhwlɛ́ngántɔ́ gbɛtɔ́ e ɖi nǔ nú Klísu lɛ́ɛ tɔn ɔ́ ɖó nukún wɛ. Nǔ e a ɖǒ ná ɖɔ nú yě, bó ná kplɔ́n yě lɛ́ɛ nɛ́. Ma lɔn nú mɛɖé mɔ yɔkpɔ́vú towe, bó ɖó hwɛ nú we ó. Lo ɔ́, nyǐ kpɔ́ndéwú nú nǔɖitɔ́ lɛ́ɛ, bó nyí kpɔ́ndéwú ɖo xóɖiɖɔ mɛ, bó nyí kpɔ́ndéwú ɖo zǐnzán kpó wǎn yíyí kpó mɛ, bó nyí kpɔ́ndéwú ɖo nǔɖiɖi kpó gbɛ mímɛ́ e a nɔ zán ɔ́ kpó mɛ. Cóbónú un ná wá hǔn, ɖǒ kan dó Mawuxó xixa ɖo agun mɛ, kpódó Mawuxó ɖiɖɔ kpó wú, bó lɛ́ ɖó kan dó nǔkplɔ́nmɛ wú. Ma dó vɛ̌ nú nǔníná e ɖo así we, bɔ Mawu ná we hwenu e gbeyíɖɔ Mawu tɔn lɛ́ɛ ɖɔ Mawuxó, bɔ agunmɛxó lɛ́ɛ ɖ'alɔ jí we ɔ́ ó. Kpé nukún dó nǔ énɛ́ lɛ́ɛ wú, lobo sɔ́ hwiɖée bǐ jó nú nǔ énɛ́ lɛ́ɛ, bónú mɛ bǐ ná mɔ nǔ jɛ nukɔn yiyi towe wú. Hɛn ayixa dó hwiɖée wú, bó hɛn ayixa dó nǔ e kplɔ́n mɛ wɛ a ɖe ɔ́ wú. Đǒ kan dó nǔ énɛ́ lɛ́ɛ bǐ wú; ɖó nú a ɖo nǔ wa gbɔn mɔ̌ wɛ ɔ́, a nǎ hwlɛ́n hwiɖée gán, bó ná hwlɛ́n mɛ e ɖo tó ɖó we wɛ lɛ́ɛ bǐ gán. Ma sɔ́ gbe syɛ́nsyɛ́n dó gbɛ́ nǔ nú súnnu e ko nyí mɛxó é ó; lo ɔ́, ɖɔ xó n'i lě e a ɖǒ ná ɖɔ xó nú tɔ́ towe gbɔn é. Nɔ xá dɔ̌nkpɛvú lɛ́ɛ lě e a ɖǒ ná nɔ́ xá nɔví towe gbɔn é. Nɔ xá nyɔ̌nu e ko nyí mɛxó lɛ́ɛ lě e a nǎ nɔ xá nɔ towe gbɔn é. Nɔ xá ɖyɔ̌vǐ lɛ́ɛ nɔví towe nyɔ̌nu ɖɔhun kpódó ayixa mímɛ́ kpó. Kpé nukún dó asúkúsi e nyí asúkúsi nǔgbó nǔgbó lɛ́ɛ wú kpódó sísí kpó. Ényí asúkúsi ɖé ka ɖó vǐ abǐ vǐvú ɔ́, vǐ énɛ́ lɛ́ɛ ɖó ná kplɔ́n lě e yě nǎ zé nǔɖiɖi yětɔn dó wa azɔ̌ ná gbɔn ɖo hɛ̌nnu yě ɖésúnɔ tɔn mɛ ɔ́ hwɛ̌, énɛ́ ɔ́, yě ná sú nǔ e sín axɔ́ yě ɖu dó mɛjitɔ́ yětɔn lɛ́ɛ ɔ́ yě, ɖó nǔ e nyɔ́ Mawu nukún mɛ é nɛ́. Asúkúsi nǔgbó nǔgbó e ma ɖó mɛɖé bɔ é ná kpé nukún dó wútu tɔn ǎ ɔ́ nɔ sɔ́ nukúnɖíɖó tɔn bǐ ɖó Mawu jí. É nɔ gɔn ɖɛ xo ǎ, é nɔ gɔn vo sa nú Mawu ǎ. Lo ɔ́, asúkúsi e jó éɖée dó nú gbɛɖuɖu ɔ́ ɖo gbɛ cóbó ká kó kú. A ɖǒ ná nɔ ɖɔ nú yě ɖɔ yě ní nɔ wa nǔ gbɔn mɔ̌, bónú è ma wá mɔ nǔɖé ɖɔ dó yě wú ó. Ényí mɛɖé ma nɔ kpé nukún dó mɛ tɔn lɛ́ɛ wú ǎ ɔ́, ɖo tají ɔ́, mɛ e ɖo hɛ̌n tɔn nu lɛ́ɛ wú ǎ ɔ́, mɛ énɛ́ ɔ́ gbɛ́ nǔɖiɖi, lobo nylá hú nǔmaɖitɔ́. Asúkúsi ɖé ma ɖó xwe kanɖé ko (60) jɛjí ǎ hǔn, ma lɛ́n ɛ dó asúkúsi lɛ́ɛ mɛ ó. É ka ná nyí mɛɖé, bɔ súnnu ɖokpó géé jɛ́n é ná da kpɔ́n. È ka ɖó ná tunwun i ɖó nǔ ɖagbe e é nɔ wa ɔ́ wú; é ná nyí mɛɖé, bó ko kplɔ́n vǐ kpɔ́n, é ná nyí mɛɖé, bó nɔ yí mɛ ganjí; é ná nyí mɛɖé, bó nɔ klɔ́ afɔ nú klísusɛntɔ́ lɛ́ɛ; é ná nyí mɛɖé, bó nɔ gɔ́ alɔ nú gbɛ̌dónánɔ lɛ́ɛ, bó ná nɔ wa ɖagbe hwebǐnu. Ma xa asúkúsi e ma ko nyí mɛxó ǎ lɛ́ɛ dó asúkúsi lɛ́ɛ mɛ ó; ɖó hwenu e asúdida nɔ jɛ yě jló jí ɔ́, yě nɔ lɛ́ kɔ sín Klísu gúdo. Énɛ́ ɔ́, yě sɔ́ nɔ nɔ gbejí nú akpá nukɔn tɔn e yě dó nú Klísu ɔ́ ǎ, bɔ è nɔ ɖó hwɛ nú yě. Énɛ́ ɔ́ kɛ́ɖɛ́ ka wɛ ǎ; yě nɔ́ gú hwenu yětɔn, bó nɔ ɖo xwé xá ɖó afɔ wú wɛ, bɔ é húzú jijɔ nú yě. Ée tlɛ nylá hú bǐ ɔ́ wɛ nyí ɖɔ yě nɔ húzú xóɖɔ́xóɖɔ́, bó nɔ hɛn xó ɖé xomɛ ǎ, bó nɔ ɖo xó e yě ma ɖó ná ɖɔ ǎ lɛ́ɛ ɖɔ wɛ. Énɛ́ ɔ́ wú wɛ un jló ɖɔ asúkúsi e ma ko nyí mɛxó ǎ lɛ́ɛ ní lɛ́ vɔ́ asú da, bó ji vǐ; yě ní kpé nukún dó xwé yětɔn wú, bó ma ná ali ɖěbǔ kɛntɔ́ mǐtɔn lɛ́ɛ, bónú yě mɔ nǔ nyanya ɖé ɖɔ dó mǐ wú ó. Đó asúkúsi ɖé lɛ́ɛ kó gosín ali jlɔ́jlɔ́ ɔ́ jí, bó xwedó Satáan. Amɔ̌ ényí agunví nyɔ̌nu ɖé ɖó asúkúsi ɖo hɛ̌n tɔn nu hǔn, ní kpé nukún dó wú tɔn; ní ma jó é dó nyi kɔ jí nú agun ɔ́ ó; bónú agun ɔ́ na sixú kpé nukún dó asúkúsi nǔgbó nǔgbó lɛ́ɛ wú. Agunmɛxó e nɔ xlɛ́ ali agun ɔ́ ganjí lɛ́ɛ ɔ́, è ɖó ná mɔ yě dó mɔ mɛ e jɛ xá bɔ è nǎ sú axɔ́ we ɖo bǔ é; ɖo tají ɔ́, mɛ e nɔ ɖó kan dó Mawuxó ɖiɖɔ kpódó Mawuxó kplɔ́n mɛ kpó wú lɛ́ɛ. Đó Mawuxówéma ɔ́ ko ɖɔ: “Ma dó aja nu nú nyibúsú e ɖo nǔkún só ɖó afɔ wú wɛ ɔ́ ó.” Mawuxówéma ɔ́ ka lɛ́ ɖɔ: “É jɛ xá ɖɔ azɔ̌watɔ́ ní yí azɔ̌kwɛ́ tɔn.” È wǎ jɛ agunmɛxó ɖé sín hwɛ nú we hǔn, ma yí gbe ná ó, afi nú mɛ we abǐ mɛ atɔn ɖe kúnnu ná. Ényí mɛɖé tíin bó fɔ́n ɔ́, é nɔ ɖo hwɛ hu wɛ hǔn, gbɛ̌ n'i ɖo agbawungba, bónú mɛ e kpo lɛ́ɛ ná ɖi xɛsi. Un ɖo byɔ̌byɔ́ we wɛ syɛ́nsyɛ́n ɖo Mawu nukɔn, ɖo Klísu Jezu nukɔn, ɖo wɛnsagun mímɛ́ Mawu tɔn lɛ́ɛ nukɔn ɖɔ hwi ní se tónú nú sɛ́n énɛ́ lɛ́ɛ. Ma nɔ mɛɖé jí ó; ma ka lɔn nú mɛɖé sín nǔ nyɔ́ nukún towe mɛ hú mɛɖé ɖo nǔwiwa towe lɛ́ɛ mɛ ó. Ma hwlɛ́n dó, bó ɖ'alɔ mɛɖé jí ó; mɛɖé hu hwɛ hǔn, ma ɖó alɔ ɖ'é mɛ ó, bó hɛn hwiɖée dó mímɛ́ jí. Đó xomɛzɔn e a nɔ jɛ hwɛhwɛ ɔ́ wú ɔ́, ma sɔ́ nɔ nu sin kɛ́ɖɛ́ ó; nɔ nu vɛ̌ɛn kpɛɖé kpɛɖé, ɖó xomɛzɔn towe wú, ɖó a nɔ jɛ azɔn hwɛhwɛ. Mɛ ɖé lɛ́ɛ tíin, bɔ nǔ e yě wa nyi do ɔ́, è nɔ ko mɔ gannaganna cóbó nɔ ɖɔ hwɛ xá yě; mɛɖé lɛ́ɛ ka tíin, bɔ gǔdo gúdo bǐ wɛ nǔ e yě wa nyí do lɛ́ɛ nɔ wá jɛ wěxo. Mɔ̌ ɖokpó ɔ́, nǔ ɖagbe e mɛɖé lɛ́ɛ nɔ wa lɛ́ɛ ɔ́, è nɔ mɔ yě gannaganna; ée è ma tlɛ ko ɖo mimɔ wɛ tlóló ǎ lɛ́ɛ ɔ́, nɔ sixú nɔ hwlǎhwlá sɔ́yi ǎ. Mɛ e nyí kannumɔ lɛ́ɛ bǐ ɖó ná mɔ gǎn yětɔn lɛ́ɛ dó mɔ mɛ e è ɖó ná ɖó sísí bǐ ná é, bónú mɛɖé ma ɖɔ xó nyanya dó Mawu sín nyǐkɔ kpódó nǔ e kplɔ́n mɛ wɛ mǐ ɖe ɔ́ kpán wú ó. Kannumɔ e sín gǎn nyí nǔɖitɔ́ lɛ́ɛ ɖó ná gɔn gǎn yětɔn lɛ́ɛ sí, ɖó yě ko nyí nɔví nɔví ɖo nǔɖiɖi mɛ wútu ǎ; é nyɔ́ wa ɔ́, yě ɖó ná lɛ́ sɛn yě bɔ é ná hú lě e sɛn gbɔn wɛ yě ko ɖe ɖ'ayǐ ɔ́, ɖó mɛ e ɖo nǔ e wa wɛ yě ɖe ɔ́ sín le ɖu wɛ lɛ́ɛ ɔ́, nǔɖitɔ́ e yě yí wǎn ná lɛ́ɛ wɛ. Nǔ e a ná kplɔ́n yě ɔ́ kpódó Mawuxó e a ná ɖɔ nú yě ɔ́ kpán ɖíe: Ényí mɛɖé kplɔ́n nǔ ɖěvo mɛ, bó ma yí gbe nú xó nǔgbó Aklúnɔ mǐtɔn Jezu Klísu tɔn lɛ́ɛ kpódó nǔkplɔ́nmɛ e sɔgbe xá sinsɛn mǐtɔn ɔ́ kpó ǎ hǔn, go wɛ é yí; é tunwun nǔɖé ǎ; nǔdindɔn kpódó jlɛɖiɖɔ dó xógbe ɖé lɛ́ɛ wú kpó sín azɔn jɛ wɛ é ɖe; nǔ énɛ́ lɛ́ɛ wɛ nɔ hɛn wǔhwinhwan, adɔndindɔn, mɛzunzun, nǔnyanyavɛdómɛ, kpódó nǔdindɔn magbokɔ byɔ́ gbɛtɔ́ e sín tamɛ ma sɔgbe ǎ bɔ yě ma sɔ́ tunwun nǔgbó ɔ́ ǎ lɛ́ɛ kpó tɛ́ntin; yě nɔ vɛdó ɖɔ mawusinsɛn ɔ́, dɔkun jijɛ nú wɛ é nyí sín. Nǔgbó ɔ́, mawusinsɛn ɔ́, dɔkun ɖaxó ɖokpó wɛ é nyí nú mɛ e nǔ e é ɖó ɔ́ nɔ kpé é. Đó mǐ hɛn nǔɖé wá gbɛmɛ fí ǎ; mǐ ka sixú hɛn nǔɖé yi kú ǎ. Énɛ́ ɔ́ wú ɔ́, ényí mǐ kó sixú mɔ nǔ bó ɖu, bó mɔ avɔ bo dó ɔ́, é ɖó ná kpé mǐ. Amɔ̌, mɛ e nɔ jló ná jɛ dɔkun lɛ́ɛ nɔ jɛ tɛ́nkpɔ́n mɛ, bó nɔ jɛ jlǒ ma ɖó ta ɖé lɛ́ɛ, kpódó jlǒ e nɔ zɔ́n bɔ è nɔ mɔ wǔvɛ́ lɛ́ɛ kpó sín mɔ mɛ; jlǒ énɛ́ lɛ́ɛ wɛ nɔ dɔn gbɛtɔ́ yi bú, bɔ yě nɔ dɔn. Đó wǎn yí nú akwɛ́ mɛ wɛ nǔ nyanya tɛnmɛ tɛnmɛ lɛ́ɛ bǐ nɔ tɔ́n sín; mɛɖé lɛ́ɛ ɖo gbě tɔn mɛ káká bó yi bú, bó ɖo zɔ nú nǔɖiɖi ɔ́, bó dɔn nǔgbomɛ gěgé dó kɔ. Amɔ̌ hwɛ mawuzɔ́watɔ́ ɔ́, ɖǒ wǔ zɔ nú nǔ énɛ́ lɛ́ɛ bǐ, bó xwedó hwɛjijɔ, bó nɔ sí Mawu, bó ɖó nǔɖiɖi, bó ɖó wǎn yíyí, bó ɖó hǔnkúkú kpódó xomɛfífá kpó. Fun nǔɖiɖi hwan ɖagbe ɔ́. Hɛn gbɛ mavɔ mavɔ ɔ́ wú syɛ́nsyɛ́n, gbɛ mavɔ mavɔ e Mawu ylɔ́ we ná é. Gbɛ mavɔ mavɔ énɛ́ wɛ a ɖe kúnnu ɖagbe ná ɖo gbɛtɔ́ gěgé nukɔn. Un ɖo zinzɔn we wɛ ɖo Mawu e ná gbɛ nǔ bǐ ɔ́ nukɔn, bó ɖo zinzɔn we wɛ ɖo Klísu Jezu e ɖe kúnnu ɖagbe ɖo Pɔ́nsu Pilátu sá mɛ ɔ́ nukɔn ɖɔ hwi ní se tónú nú nǔ e un zɔ́n we ɔ́, bó hɛn dó mǐmɛ́ jí nú blɔ̌ ɖé ma nɔ wú ó, káká jɛ gbe e gbe Aklúnɔ mǐtɔn Jezu Klísu ná ɖe éɖée xlɛ́ dó é. Nú hwe ɔ́ nu wá su ɔ́, Mawu nyɔ̌nábǐnɔ ɔ́, Mawu ɖokpó géé e hú gǎn nǔ bǐ é, ée nyí Axɔ́sú axɔ́sú lɛ́ɛ tɔn, bó nyí Aklúnɔ aklúnɔ lɛ́ɛ tɔn ɔ́, ná ɖe hwenu e Jezu Klísu na lɛ́ kɔ wá ɔ́ xlɛ́. É ɖokpónɔ géé wɛ má nɔ kú ǎ, bó ɖo wěziza e mɛɖé ma sixú sɛkpɔ́ ǎ é mɛ; mɛɖé mɔ ɛ kpɔ́n gbeɖé ǎ; mɛɖé ka sixú mɔ ɛ lɔ bo gbɔ ǎ. Susu kpódó hlɔ̌nhlɔ́n mavɔ mavɔ kpó ní nyí étɔn; amǐ! Kplɔ́n nǔ mɛ e jɛ dɔkun ɖo gbɛmɛ fí lɛ́ɛ ɖɔ yě ma nɔ yí go ó; ɖɔ nú yě ɖɔ yě ma sɔ́ nukúnɖíɖó yětɔn ɖó dɔkun énɛ́ lɛ́ɛ jí ó; ɖó è sixú gán jɛ dɔkun énɛ́ lɛ́ɛ wú ǎ. Lo ɔ́, yě ní sɔ́ nukúnɖíɖó yětɔn ɖó Mawu jí; é wɛ nɔ ná nǔ bǐ mǐ, bɔ é nɔ túnflá, bónú mǐ ná ɖu gbɛ yětɔn. Kplɔ́n nǔ yě ɖɔ yě ní nɔ wa ɖagbe, bó kplɔ́n yě ɖɔ yě ní nɔ wa nǔ ɖagbe gěgé. Yě ní nɔ hun alɔ bó ná nǔ mɛ, bó nɔ gbesisɔ mɛ, bó ná má nǔ e yě ɖó ɔ́ xá mɛ ɖě lɛ́ɛ. Ényí yě ɖo mɔ̌ wa wɛ ɔ́, dɔkun ɖagbe, dɔkun e wú è hɛn ɔ́, è nǎ gán jɛ ɔ́ kplé ɖ'ayǐ nú yěɖée wɛ yě ɖe nú sɔ yí e ná wá hɔ́n é, bó ná dó mɔ gbɛ jɔ gbɛ ɔ́ yí. Timɔtée, hɛn nǔ e è sɔ́ dó así nú we ɔ́ syɛ́nsyɛ́n. Nɔ hɔn nú xógbló, xó e ma sɔgbe xá nǔɖiɖi ɔ́ ǎ lɛ́ɛ, bó hɔn nú nǔnywɛ́ ma nyí nǔnywɛ́ e mɛ lɛ́ɛ nɔ ylɔ́ ɖɔ nǔnywɛ́, bó nɔ ɖo nǔ dɔn ɖ'é kɔn wɛ é. Nǔgbó ɔ́, mɛɖé lɛ́ɛ nɔ ɖɔ émí ɖó nǔnywɛ́ énɛ́ ɔ́, bó xo nǔɖiɖi ɔ́ kpo. Fɛ́nú Mawu tɔn ní nɔ kpɔ́ xá mi. Nyɛ Pɔ́lu e nyí mɛsɛ́dó Klísu Jezu tɔn ɖo jlǒ Mawu tɔn mɛ, bó ná jlá gbɛ e sín akpá è dǒ nú mǐ ɖo bǔ e mǐ ɖe xá Klísu Jezu ɔ́ mɛ ɔ́ wɛ ɖo wěma élɔ́ sɛ́ dó we wɛ, vǐ ce vívɛ́ná Timɔtée. Mawu Tɔ́ ɔ́ kpódó Aklúnɔ mǐtɔn Klísu Jezu kpó ní ná fɛ́nú we, bó kú nǔbláwǔ nú we, bó ná fífá we. Un nɔ dó kú nú Mawu e tɔ́gbó ce lɛ́ɛ sɛn, bɔ nyɛ ɖésú ɖo sinsɛn wɛ kpódó ayixa mímɛ́ kpó é. Un dó kú n'i ɖó é bló bɔ zǎn kpó kéze kpó ɔ́, un nɔ flín we hwebǐnu, ɖo ɖɛ ce lɛ́ɛ mɛ. Un nɔ flín avǐ e a ya é, bó nɔ ɖó jlǒ ɖaxó ɖɔ ma lɛ́ wá mɔ we, bónú xomɛ ná hun mì titewungbe. Nǔɖiɖi titewungbe e a ɖǒ ɔ́ ɖo ayi ce mɛ, bɔ un ɖo flínflín wɛ. Nǔɖiɖi énɛ́ ɔ́ wɛ nɔ towe sín nɔ Lɔyisi kpódó nɔ towe Enisi kpó ko ɖó jɛ nukɔn nú we. Un ka ɖeji ɖɔ hwi lɔ ɖó nǔɖiɖi énɛ́. Énɛ́ ɔ́ wú wɛ un ɖo flínflín we wɛ ɖɔ hwi ní hɛn nǔníná e Mawu ná we hwenu e un ɖó alɔ jǐ towe ɔ́ ɖó gbɛ. Ényí xɛsiɖiɖi sín yɛ wɛ Mawu ná mǐ ǎ; lo ɔ́, hlɔ̌nhlɔ́n kpódó wǎn yíyí kpó, kpódó mɛ ɖésúnɔ jí ɖu ɖe kpó sín yɛ wɛ é ná mǐ. Hǔn kúnnu ɖe nú Aklúnɔ mǐtɔn ní má nɔ́ hu winnyá nú we ó. Winnyá ní ma ka lɛ́ hu we dó nyɛ mɛ e nyí gantɔ́ ɖó Klísu tamɛ é wú ó; é nyɔ́ wa ɔ́, ji ya e nyí towe ɔ́ dó Wɛn Ɖagbe ɔ́ tamɛ lě e Mawu ná hlɔ̌nhlɔ́n tɔn we gbɔn é. É wɛ hwlɛ́n mǐ gán, bó ylɔ́ mǐ nú mǐ ná nyí mɛɖeɖóvo tɔn; é ká nyí nǔ e mǐ nɔ wa lɛ́ɛ wútu wɛ é ylɔ́ mǐ ǎ; lo ɔ́, tito é ɖésúnɔ tɔn kpódó fɛ́nú tɔn kpó wú wɛ é ylɔ́ mǐ. É ko ná fɛ́nú énɛ́ mǐ ɖo bǔ e mǐ ɖe ɖo Klísu Jezu mɛ cóbɔ gbɛ ɔ́ wá tíin é mɛ. Amɔ̌ din ɔ́, é wá ɖe xlɛ́ mǐ gbɔn Mɛhwlɛ́ngántɔ́ mǐtɔn Klísu Jezu sín wǐwá jí. É wɛ nyí mɛ e hu acɛ nú kú, bó sɔ́ Wɛn Ɖagbe dó ɖe jɔmakúgbɛ xlɛ́ mǐ é. Wɛn Ɖagbe énɛ́ ɔ́ wútu wɛ Mawu sɔ́ mì mawuxóɖɔtɔ́, bó sɔ́ mì mɛsɛ́dó, bó zɔ́n mì ɖɔ ma kplɔ́n nǔ mɛ. Énɛ́ ɔ́ wú wɛ un ɖo ya élɔ́ lɛ́ɛ ji wɛ; é ka hu winnyá nú mì ǎ; ɖó un tunwun mɛ e un ɖi nǔ ná é, bó ka ɖó jiɖiɖe ɖɔ é ɖó hlɔ̌nhlɔ́n e ná hɛn nǔ e é sɔ́ dó así nú mǐ ɔ́ káká jɛ azǎn énɛ́ ɔ́ gbe. Đó nǔɖiɖi kpódó wǎn yíyí e mǐ ɖó ɖo bǔ e mǐ ɖe xá Klísu Jezu ɔ́ kpán mɛ é wú ɔ́, hɛn xó jɔ xó e a se ɖo nu ce lɛ́ɛ é, bónú yě ní nyí kpɔ́ndéwú nú we. Yɛsinsɛn e ɖo mǐ mɛ ɔ́ ní d'alɔ we, bónú a nǐ hɛn nǔkplɔ́nmɛ titewungbe e è sɔ́ dó así nú we lɛ́ɛ. Lě e a ko tunwun gbɔn ɔ́, mɛ e ɖo Azíi yíkúngban jí lɛ́ɛ bǐ lɛ́ kɔ sín gǔdo ce; yě ɖě nɛ́ nyí Fijɛ́lu kpódó Ɛɛmɔjɛ́ni kpó nɛ́. Aklúnɔ ní ɖe nǔbláwǔkúnúmɛ tɔn xlɛ́ hɛ̌nnu Onɛzifɔ́ɔ tɔn, ɖó é nɔ dó wǔsyɛ́n lanmɛ nú mì hwɛhwɛ; winnyá hu i ɖó nyɛ mɛ e ɖo gankpá mɛ ɔ́ wú ǎ. É nyɔ́ wa ɔ́, hwenu e é wá Hlɔ̌ma ɔ́, é ba mì kpódó vǐvɛ́ dó nú nǔ kpó káká bó mɔ mì. Aklúnɔ ní bló bónú é ní mɔ nǔbláwǔkúnúmɛ Aklúnɔ tɔn yí ɖo azǎn énɛ́ gbe. Alɔ tobutóbú e é gɔ́ nú mì ɖo Efɛ́zi ɔ́, a tunwun ganjí. Hǔn, hwi vǐ ce ɔ́, mɔ hlɔ̌nhlɔ́n ɖo fɛ́nú e mǐ ɖó, ɖo bǔ e mǐ ɖe xá Klísu Jezu ɔ́ mɛ. Nǔ e un ɖɔ, bɔ a se ɖo kúnnuɖetɔ́ gěgé nukɔn ɔ́, sɔ́ dó así nú mɛ e wú è ɖeji dó, bɔ yě lɔ ná sixú kplɔ́n mɛɖěvo lɛ́ɛ é. Ji ya e nyí towe ɔ́ ahwanfuntɔ́ ɖagbe Klísu Jezu tɔn ɖɔhun. Ényí ahwanfuntɔ́ e ɖo ahwangbénu ɔ́ ɖě jló na nyɔ́ ɖo gǎn tɔn sí ɔ́, é nɔ bɛ́ gbɛmɛ kpaa sín nǔ lɛ́ɛ dó hǔn mɛ ǎ. Wezunkántɔ́ e yi agbahwlɛ́nhwlɛ́n tɛnmɛ ɔ́ ma kán wezun lě e sɛ́n ɔ́ zɔ́n gbɔn ɔ́ ǎ ɔ́, é sixú mɔ ɖuɖéjígbákún yí ǎ. Glesi e wa azɔ̌, bó jɛ dɛ̌n ɔ́ wɛ ɖó ná nyí mɛ nukɔntɔn e ná yí nukún e nyí étɔn é. Lin tamɛ dó nǔ e ɖɔ wɛ un ɖe ɔ́ wú, ɖó Aklúnɔ ná nukúnnú-mɔjɛnǔmɛ we, bónú a nǎ sixú mɔ nukúnnú jɛ bǐ wú. Flín Klísu Jezu Davídi ví e Mawu fɔ́n sín kú, lě e Wɛn Ɖagbe e un jlá ɔ́ ɖɔ gbɔn é. Wɛn Ɖagbe énɛ́ wú wɛ un ɖo ya ji wɛ káká bɔ è dǒ wlɔ mì nǔ nyanya ɖé wɛ un wa ɖɔhun; Mawuxó ɔ́ ka ɖo wlɔ mɛ ǎ. Énɛ́ wú wɛ un nɔ dɛ ɖo nǔ bǐ nu, ɖó mɛ e Mawu cyán lɛ́ɛ wú, bónú yě lɔ ná sixú mɔ hwlɛngán e ɖo Klísu Jezu mɛ ɔ́ kpódó susu maɖókpodó kpó yí. Xó nǔgbó ɖokpó ɖíe: “Ényí mǐ kú xá ɛ ɔ́, mǐ ná lɛ́ wá nɔ gbɛ xá ɛ. Ényí mǐ syɛ́nlǐn ɔ́, mǐ ná ɖu axɔ́sú xá ɛ. Ényí mǐ gbɛ́ ɖɔ mǐ kún tunwun i ó ɔ́, élɔ́ ná gbɛ́ ɖɔ émí kún tunwun mǐ ó. Ényí mǐ ma nɔ gbejí ǎ ɔ́, éyɛ́ ɖo gbejí tɛgbɛ; ɖó é sixú gbɛ́ ɖɔ émí kún nyí nǔ e émí nyí ɔ́ ó ǎ.” Flín nǔ énɛ́ ɔ́ bǐ, bó gbɛ́ nú yě ɖo Mawu nukɔn ɖɔ yě ní ma sɔ́ xógbe ɖé ɖó te, bó ɖo jlɛ ɖɔ ɖ'é kɔn wɛ ó. Jlɛ énɛ́ lɛ́ɛ nɔ wa nǔɖé zɛ yě ná dɔn mɛ e ɖo sise wɛ lɛ́ɛ yi bú wú ǎ. Dǒ gǎn bó sɔ́ hwiɖée jó nú Mawu, bó ná nyí mɛ e é jɛ xá ɖɔ Mawu ná sixú ɖe gbě ná é, bó ná nyí azɔ̌watɔ́ e winnyá ma ná hu dó azɔ̌ e é wa lɛ́ɛ wú ǎ é; azɔ̌watɔ́ e nɔ jlá nǔgbó wɛn ɔ́ ganjí é. Jǒ xógbló kpódó xó e ma sɔgbe xá Mawuxó ɔ́ ǎ lɛ́ɛ kpó dó; ɖó mɛ e nɔ ɖɔ xó énɛ́ lɛ́ɛ é fɔ́n tɛgbɛ ɔ́, yě ná nɔ ɖo zɔ sɛ yi nú Mawu wɛ; bɔ nǔ e kplɔ́n mɛ wɛ yě ɖe ɔ́ cí akpa e vó, bó ɖo nyinyɔ wɛ ɔ́ ɖɔhun. Imɛnɛ́ɛ kpódó Filetɔ́si kpó ɖo mɛ énɛ́ lɛ́ɛ mɛ. Yě lɛ́ kɔ sín nǔgbó ɔ́ gúdo, bó nɔ ɖɔ mɛkúkú lɛ́ɛ ko fɔ́n, bɔ xó énɛ́ ɔ́ ko wá yi. Nǔkplɔ́nmɛ yětɔn énɛ́ ɔ́ zɔ́n bɔ mɛɖé lɛ́ɛ sín nǔɖiɖi jɛ ayǐ. Nǔ ɖo mɔ̌ có dodó syɛ́nsyɛ́n Mawu tɔn ɔ́ ɖo te ganjí, bɔ xó élɔ́ lɛ́ɛ nyí wuntun bó ɖ'é wú: “Aklúnɔ tunwun mɛ e nyí étɔn lɛ́ɛ é!” “Mɛ ɖěbǔ ɖɔ émí nyí Aklúnɔ tɔn ɔ́, mɛ ɔ́ ɖó ná lɛ́ kɔ sín nǔ nyanya wiwa gúdo.” Agbǎn e è sɔ́ siká abǐ kpatágan dó bló ná lɛ́ɛ kɛ́ɖɛ́ wɛ è nɔ mɔ ɖo xwé ɖaxó ɖokpó gbe ǎ; è nɔ lɛ́ mɔ agbǎn e è sɔ́ atín dó bló ná ɔ́ kpódó ée è sɔ́ ko dó bló ná ɔ́ kpó. Agbǎn nukɔntɔn lɛ́ɛ ɔ́, hwenu e è ja nǔjɔnǔ ɖé wa gbé ɔ́ wɛ è nɔ ɖe yě tɔ́n; amɔ̌ ɖě lɛ́ɛ ɔ́, è nɔ zán yě nú nǔ yǎyá lɛ́ɛ. Ényí mɛɖé sixú ɖe nǔ nyanya e xó un ɖɔ ɔ́ sín gbɛzán tɔn mɛ ɔ́, nǔjɔnǔ wɛ è nǎ nɔ sɔ́ ɛ dó bló ná ɖó é ɖo gǎn tɔn sín acɛ mɛ bǐ sésé, bó jɛ alɔ n'i, bó ɖo gbesisɔ mɛ, bɔ é ná sɔ́ ɛ dó wa nǔ ɖagbe bǐ ná. Hɔn nú jlǒ nyanya e mɛwínnyáwínnyá lɛ́ɛ nɔ ɖó lɛ́ɛ, bónú hwi kpódó mɛ e nɔ xomlá Aklúnɔ kpódó ayi mímɛ́ kpó lɛ́ɛ ní ba nǔjlɔ́jlɔ́wiwa, nǔɖiɖi, wǎn yíyí kpódó fífá kpó. Nɔ zɔ nú nǔdindɔn e nyí taɖunɔ xó, bó nyí xlonɔ xó lɛ́ɛ; bo tunwun ɖɔ nǔdindɔn énɛ́ lɛ́ɛ ɔ́, jlɛ wɛ yě nɔ dɔn wá. Aklúnɔ sín mɛsɛntɔ́ ka ɖó ná ɖɔ jlɛ ǎ; é nyɔ́ wa ɔ́, mɛ bǐ wɛ é ɖó ná dɔn dó wǔ; é ɖó ná nyí mɛɖé bó ná sixú kplɔ́n nǔ mɛ; é ɖó ná nɔ kú hǔn. É ɖó ná nɔ sɔ́ xomɛ fífá dó kplɔ́n nǔ mɛ e ma ɖo xó ɖokpó ɔ́ ɖɔ xá ɛ wɛ ǎ lɛ́ɛ; afɔ nyɔ́ ɔ́, Mawu ná bló bɔ yě ná lɛ́ kɔ sín hwɛ yětɔn lɛ́ɛ gúdo, bó ná mɔ nukúnnú jɛ nǔgbó ɔ́ wú. Énɛ́ ɔ́, yě ná wá mɔ yěɖée mɛ, bó ná ɖe yěɖée sín awǒvi e wlí yě, bó nɔ zɔ́n bɔ yě nɔ wa jlǒ tɔn ɔ́ sín mɔ mɛ. Ka lɛ́ nywɛ́ ɖɔ hwenu vɛ́ wǔ lɛ́ɛ ná tíin ɖo azǎn gǔdo gúdo tɔn lɛ́ɛ mɛ. Hwe énɛ́ nu ɔ́, gbɛtɔ́ lɛ́ɛ ná nɔ ba ɖɔ émítɔn jɛ́n ná nyɔ́; yě ná nɔ yí wǎn nú akwɛ́; yě ná nɔ mɔ yěɖée; yě ná nɔ́ yí go; yě ná nɔ́ nylá nu dó Mawu wú; yě ná nɔ́ vɛ́ tóli nú mɛjitɔ́ yětɔn lɛ́ɛ; yě ná nɔ dó alɔgúdokpɛ́ nú mɛ; yě ná nɔ ɖó sísí nú nǔ e nyí Mawu tɔn lɛ́ɛ ɖě ǎ. Yě ná ɖó wǎn yíyí ɖěbǔ ǎ; yě ná nɔ kú nǔbláwǔ nú mɛ ǎ; yě ná nɔ́ ɖɔ mɛ nú; yě nɔ sixú ɖu ɖo yěɖée jí ǎ, bó ná nɔ nylá hun; yě ná nɔ́ gbɛ́ wǎn nú ɖagbewiwa. Yě ná nɔ́ sa mɛ ɖu; yě ná nɔ́ lin tamɛ kpɔ́n cóbó ná nɔ́ wa nǔ ǎ; yě ná nɔ́ yí go zɛ xwé wú; yě ná nɔ́ yí wǎn nú gbɛɖuɖu hú yě ná yí wǎn nú Mawu. Yě ná nyí mawusɛntɔ́ ɖo nukúnta, bó ka ná gbɛ́ nǔ e nyí hlɔ̌nhlɔ́n titewungbe nú sinsɛn ɔ́ é; lɛ̌ kɔ sín gbɛtɔ́ mɔ̌hun lɛ́ɛ gúdo. Mɛ ɖé lɛ́ɛ ɖo yě mɛ, bó nɔ lun byɔ́ xwé lɛ́ɛ gbe, lobo nɔ ɖɔ xó dó blɛ́ nyɔ̌nu e ma ɖó gǎn ɖě ǎ, bɔ hwɛgban ɖo kɔ ná lɛ́ɛ, káká bó nɔ́ xwe yě dó acɛ yětɔn mɛ. Nyɔ̌nu énɛ́ lɛ́ɛ nɔ ɖo nǔ kplɔ́n wɛ tɛgbɛ, yě ka nɔ sixú kpé nǔgbó ɔ́ wú bó nɔ tunwun ǎ. Lě e Janɛ́si kpódó Janblɛ́si kpó gbɛ́ Mɔyízi sín xó gbɔn ɔ́, mɔ̌ ɖokpó ɔ́ wɛ gbɛtɔ́ ayiblúblúnɔ e sín nǔɖiɖi ma nyí nǔɖé wa nú ǎ nɛ́ lɛ́ɛ lɔmɔ̌ gbɛ́ nǔgbó ɔ́ gbɔn é nɛ́. Yě ka xwe fí línlín ɖé ǎ; ɖó mɛ bǐ ná mɔ ɖɔ taɖunɔxó ɖɔ wɛ yě ɖe, lě e é nyí gbɔn nú Janɛ́si kpódó Janblɛ́si kpó é ɖɔhun. Amɔ̌ hwɛ ɔ́, a ka tunwun nǔ e un kplɔ́n mɛ ɔ́ bǐ; a tunwun lě e un zán gbɛ ce gbɔn ɔ́ bǐ, bó tunwun linlin ce lɛ́ɛ, bó tunwun nǔɖiɖi e un ɖó ɔ́, bó tunwun suúlu e un ɖó ɔ́ kpódó wǎn yíyí e un ɖó ɔ́ kpán. A tunwun lě e un nɔ syɛ́nlǐn gbɔn é. A tunwun ya e è dǒ nú mì lɛ́ɛ é, bó tunwun wǔvɛ́ e un mɔ lɛ́ɛ. A tunwun nǔ e gbo mì ɖo Antyɔ́ci kpódó Ikoniyɔ́mu kpó, kpódó Lisitli kpán é, bó tunwun wǔvɛ́ e un mɔ lɛ́ɛ. Aklúnɔ ka hwlɛ́n mì gán ɖo nǔ énɛ́ lɛ́ɛ bǐ mɛ. Mɛ e jló ná zán gbɛ yětɔn nú Mawu kpó sísí kpó, ɖo bǔ e yě ɖe xá Klísu Jezu é mɛ ɔ́ bǐ wɛ è nǎ tlɛ dó ya ná lɔ. Amɔ̌ gbɛtɔ́ dídá awoxotɔ́ lɛ́ɛ fɔ́n tɛgbɛ ɔ́, yě na ɖo nǔ nyanya wa d'é jí wɛ; yě ná flú mɛ ɖě lɛ́ɛ, bɔ è nǎ flú yě ɖésú. Hwɛ ɔ́, syɛ́nlǐn ɖo nǔ e a kplɔ́n, bó mɔ ɖɔ nǔgbó wɛ é nyí ɔ́ mɛ; ɖó a tunwun mɛ e kplɔ́n nǔ énɛ́ we lɛ́ɛ. Sín hwenu e a ɖo vǔ ɔ́ wɛ a ko tunwun nǔwlánwlán mímɛ́ lɛ́ɛ; yě hɛn ɔ́, yě nǎ ná nǔnywɛ́ e nɔ kplá mɛ, bɔ è nɔ mɔ hwlɛngán gbɔn nǔ ɖi nú Klísu Jezu gbla mɛ ɔ́ we. Nǔ e è wlán dó Mawuxówéma ɔ́ mɛ ɔ́, Mawu wɛ sɔ́ bǐ dó ayi mɛ nú mɛ lɛ́ɛ; é nyɔ́ nú è nǎ sɔ́ dó kplɔ́n nǔ mɛ, bó ná dó ɖe mɛ dó ali jí, bó ná dó ɖe nǔwanyido lɛ́ɛ xlɛ́, lobo ná dó kplɔ́n lě e è nǎ zǎn gbɛ ɖagbe gbɔn ɔ́ mɛ, bónú mɛ e nyí Mawu tɔn ɔ́ ná ɖo gbesisɔ mɛ titewungbe, bɔ nǔ e é ná dó wa nǔ ɖagbe bǐ na ɔ́ bǐ ná ɖo así tɔn. Un ɖo zǐnzɔ́n we wɛ syɛ́nsyɛ́n ɖo Mawu nukɔn, bó ɖo zǐnzɔ́n we wɛ ɖo Klísu Jezu e ná ɖɔ hwɛ xá mɛ e ɖo gbɛ lɛ́ɛ kpódó mɛ e ɖo kú lɛ́ɛ kpán ɔ́ nukɔn, bó ɖo byɔ̌byɔ́ we wɛ ɖo Jezu Klísu sín wǐwá kpódó axɔ́súɖuɖu tɔn kpán sín nyǐkɔ mɛ ɖɔ: Jlǎ Mawuxó; nɔ tɛ ɖɛ̌ jí, bó nɔ ɖɔ hwebǐnu; hwe ɔ́ nu nyɔ́ kpó é ma nyɔ́ kpó ɔ́, a nǎ nɔ́ jlá; a nǎ nɔ́ sɔ́ xomɛfífá dó kɛ nu dó nǔ wú nú mɛ, dó gbɛ́ nǔ nú mɛ, bó dó ná akɔ́nkpinkpan mɛ ɖo nǔkplɔ́nmɛ towe lɛ́ɛ mɛ. Đó hweɖénu ná wá su, bɔ nǔkplɔ́nmɛ titewungbe ɔ́ sɔ́ ná nyɔ́ se nú gbɛtɔ́ lɛ́ɛ ǎ; lo ɔ́, yě ná xwedó jlǒ yě ɖésúnɔ tɔn, bó ná kplé nǔkplɔ́nmɛtɔ́ wɔ̌buwɔ́bú ɖé lɛ́ɛ nú yěɖée, bɔ yě ná nɔ́ ɖɔ nǔ e nyɔ́ se nú yě lɛ́ɛ nú yě. Yě ná nɔ́ dó tókúse nǔgbó ɔ́ mɛ, bó ná nɔ́ ɖótó xɛxó lɛ́ɛ. Amɔ̌ hwɛ ɔ́, nɔ wa nǔ bǐ dó jlɛ̌ jí; dɛ ɖo yajiji nu; wa Wɛn Ɖagbejlátɔ́ sín azɔ̌, bó wa mɛsɛntɔ́ Mawu tɔn sín azɔ̌ towe ganjí. Nyɛ ɔ́, hwenu e è nǎ sɔ́ mì dó sá vɔ̌ ná ɔ́ su; hwenu e un ná gosín gbɛ élɔ́ mɛ ɔ́ su. Un fun ahwan ɖagbe ɔ́; un dó wezun ɔ́ káká yi vivɔnu; un kpo ɖo nǔ ɖi nú Klísu Jezu wɛ. Bɔ din ɔ́, ajɔ e è nǎ ná mɛ e ɖu ɖ'é jí lɛ́ɛ ɖo te nú mì; é wɛ nyí hwɛjijɔ sín ɖuɖéjígbákún e Aklúnɔ e nɔ́ ɖɔ hwɛjijɔ ɔ́ ná ná mì azǎn énɛ́ gbe é. É ka nyí nyɛ ɖokpónɔ wɛ é ná ná ǎ, lo ɔ́, mɛ e yí wǎn n'i, bó ɖo te kpɔ́n wǐwá tɔn lɛ́ɛ bǐ wɛ é ná ná. Dǒ gǎn bó wá mɔ mì ɖo malín málín mɛ. Đó Demási jó mì dó, bó yi Tɛsaloniki, ɖó é yí wǎn nú gbɛ din tɔn ɔ́ dín. Klɛsáan yi Galati, bɔ Títu ka yi Dalumati. Luki kɛ́ɖɛ́ wɛ kpo ɖo gɔ̌n ce; kplá Maki bónú hwi kpó e kpó ní zɔn wá; ɖó é hɛn ɔ́, é ná d'alɔ mì ɖo azɔ̌ ce lɛ́ɛ mɛ. Un sɛ́ Ticíku dó Efɛ́zi. A ja hǔn, sɔ́ awu ce ɖaxó e un jó dó nyi Kaapɔ́si xwé, ɖo Tlowasi é wá nú mì; bɛ̌ wěma lɛ́ɛ lɔmɔ̌ wá nú mì; ɖo tají ɔ́, anyǔwéma lɛ́ɛ. Alɛsándlu fletuntɔ́ ɔ́ wa nǔ nyanya gěgé dó wútu ce; Aklúnɔ ná sú nǔ e é wa ɔ́ sín axɔ́ ɛ. Hwi lɔ ka cɔ́ hwiɖée dó wǔ tɔn, ɖó xó e mǐ ɖɔ ɔ́ bǐ xwíí wɛ é fɔ́n gǔ bó gbɛ́. Nukɔn nukɔntɔn e un yi hwɛ nukɔn bó ná ɖɔ xó dó hwlɛ́n nyɛɖée ɔ́, un mɔ mɛɖé ɖo gǔdo ǎ; yě bǐ wɛ hɔn jó mì dó; Mawu ní ma lɛ́n hwɛ tɔn dó kɔ nú yě ó. Aklúnɔ ka nɔ gǔdo ce, bó ná hlɔ̌nhlɔ́n mì, bɔ un jlá wɛn Mawu tɔn ɔ́ ganjí, bónú mɛ e ma nyí Jwifu ǎ lɛ́ɛ bǐ ná se. Aklúnɔ hwlɛ́n mì sín kinnikínní nu mɛ. Aklúnɔ ná ɖe mì sín nǔ nyanya bǐ mɛ; é ná hwlɛ́n mì, bó ná kplá mì byɔ́ axɔ́súɖuɖu tɔn mɛ ɖo sɛ́xwé wǔyɛ́yɛ́ afɔyɛ́yɛ́. È ní kpa susu n'i káká sɔ́yi. Amǐ. Dǒ gbe Plisílu kpódó Akilási kpán, kpódó hɛ̌nnu Onɛzifɔ́ɔ tɔn kpán nú mì. Elasíti cí Kɔlɛ́nti. Un ka jó Tlofímu dó nyi Milɛ, ɖó é ɖo azɔn jɛ wɛ. Dǒ gǎn bó wá cóbónú avivɔ hwenu su. Ebúlu kpódó Pudɛ́nsi kpó, kpódó Linu kpó, kpódó Klódiya kpó, kpódó nɔví ɖě lɛ́ɛ bǐ kpán dó gbe sɛ́ dó we. Aklúnɔ ní nɔ kpɔ́ xá we. Fɛ́nú Mawu tɔn ní nɔ kpɔ́ xá mi. Nyɛ Pɔ́lu, mɛsɛntɔ́ Mawu tɔn, mɛsɛ́dó Aklúnɔ Jezu Klísu tɔn wɛ wlán wěma élɔ́. Mawu zɔ́n mì ɖɔ ma ɖɔ xó nú mɛ e émí cyán lɛ́ɛ, bónú yě ní ɖi nǔ nú Aklúnɔ Jezu Klísu, lobo ka ɖe nǔgbó e ɖo sinsɛn mǐtɔn li jí ɔ́ xlɛ́ yě, bónú yě ná ɖo gbɛ mavɔ mavɔ sín nukúnɖíɖó mɛ. Mawu ko dó gbɛ mavɔ mavɔ ɔ́ sín akpá cóbɔ gbɛ ɔ́ wá tíin; é ka nɔ ɖó adingban ǎ. Ée hwe ɔ́ nu wá su ɔ́, é ɖe gbɛ mavɔ mavɔ ɔ́ xlɛ́ gbɔn xó tɔn gbla mɛ, ɖo wɛn e é sɔ́ dó así nú mì, bɔ un ɖo jlǎjlá wɛ, lě e Mawu Mɛhwlɛ́ngántɔ́ mǐtɔn ɔ́ zɔ́n gbɔn é mɛ. Títu, vǐ ce nǔgbó nǔgbó tɔn wɛ a nyǐ ɖo nǔɖiɖi ɖokpó ɔ́ e mǐ ɖó ɔ́ mɛ. Mawu Tɔ́ ɔ́ kpó Mɛhwlɛ́ngántɔ́ mǐtɔn Klísu Jezu kpó ní ná fɛ́nú kpó fífá kpó we. Un jó we dó nyi Klɛ́ti, bónú a nǎ to nǔ e kpo bɔ è nǎ to lɛ́ɛ é; a nǎ xwedó lě e un ko ɖɔ hwi ní bló gbɔn ɔ́, bó ná sɔ́ agunmɛxó lɛ́ɛ ɖo toxo ɖokpó ɖokpó mɛ. Agunmɛxó ɖó ná nyí mɛɖé, bɔ è nǎ mɔ nǔjɛdo ɖě ɖɔ dó wú tɔn ǎ; asi ɖokpó géé wɛ é ɖó ná ɖó; vǐ tɔn lɛ́ɛ ɖó ná ɖi nǔ nú Klísu; yě ɖó ná nyí mɛ, bɔ è nǎ tunwun yě dó tunwun gbɛnyanyazántɔ́ ǎ, yě ká ɖó ná tlí tó ǎ. Nǔgbó ɔ́, azɔ̌ e nyí agunnukɔntɔ́ tɔn ɔ́ wɛ nyí ɖɔ é ná nɔ kpé nukún dó nǔ e nyí Mawu tɔn lɛ́ɛ wú; énɛ́ ɔ́ wú ɔ́, è ɖǒ ná mɔ nǔjɛdo ɖěbǔ ɖɔ dó wǔ tɔn ǎ, é ɖó ná nyí gangannagansú ǎ; é ɖó ná nyí xomɛsinnɔ ǎ, é ɖó ná nyí ahannumúnɔ ǎ, é ɖó ná nɔ́ sí hun te ǎ, é ɖó ná nyí mɛxoɖutɔ́ ǎ. É ɖó ná nɔ yí mɛ e nɔ wá gɔ̌n tɔn lɛ́ɛ ganjí, bó ná yí wǎn nú ɖagbewiwa; é ɖó ná nɔ wa nǔ e sɔgbe é, é ɖó ná nɔ́ wa nǔ jlɔ́jlɔ́; é ɖó ná nyí mɛ mímɛ́; é ɖó ná nɔ wa nǔ ɖó jlɛ̌ jí. É ɖó ná hɛn xó jɔ xó, xó ɖeji d'é wú e sɔgbe xá ɖěe è kplɔ́n ɛ ɔ́ dó ayi mɛ syɛ́nsyɛ́n; énɛ́ ɔ́, é ná nyí mɛ, bó ná sixú zé nǔkplɔ́nmɛ titewungbe ɔ́ dó ná akɔ́nkpinkpan mɛ ɖě lɛ́ɛ, bó ná nɔ́ ɖe mɛ e nɔ kpé ta do nú xó ɔ́ lɛ́ɛ sín nǔwanyido xlɛ́ yě. Đó yě sukpɔ́, ɖo tají ɔ́, gǔfɔ́ntɔ́ e nɔ ɖɔ xó maɖótaɖé dó blɛ́ mɛ lɛ́ɛ ná ɔ́ sukpɔ́ ɖo Jwifu e húzú jɛ Klísu li jí lɛ́ɛ mɛ. È ɖǒ ná xwe nu yětɔn dó xɔ, ɖó yě ɖo hunnyahunnya dó hɛ̌nnu lɛ́ɛ bǐ sésé mɛ wɛ, bɔ nǔ e è ma ɖó ná kplɔ́n mɛ ǎ ɔ́, yě nɔ kplɔ́n mɛ lɛ́ɛ, bó ná dó mɔ akwɛ́. Klɛ́tinu gbeyíɖɔ yě ɖésúnɔ tɔn ɖokpó ɖɔ dó yě wú ɖɔ: “Klɛ́tinu lɛ́ɛ ɔ́, adingbannɔ jɛ́n yě nyǐ tɛgbɛ; kanlin dídá wɛ yě nyí; yě ɖi fɔnlín, bó sɔ́ nɔ lin nǔɖé zɛ nǔɖuɖu wú ǎ.” Nǔ énɛ́ e gbeyíɖɔ ɔ́ ɖɔ dó yě wú ɔ́, nǔgbó ka wɛ; énɛ́ wú ɔ́, gbɛ̌ nǔ nú yě syɛ́nsyɛ́n, bónú yě ní ɖó nǔɖiɖi e sɔgbe é, bónú yě ní ma sɔ́ nɔ gán jɛ Jwifu lɛ́ɛ sín xɛxó kpó mɛ e lɛ́ kɔ sín nǔgbó ɔ́ gúdo lɛ́ɛ kpó sín sɛ́n wú ó. Mɛ mímɛ́ lɛ́ɛ ɔ́, nǔ bǐ wɛ nyí nǔ mímɛ́ nú yě. Lo ɔ́, mɛ e ma nyí mɛ mímɛ́ ǎ, bó ma ɖi nǔ nú Klísu ǎ lɛ́ɛ ɔ́, nǔɖé nyí nǔ mímɛ́ nú yě ǎ; ɖó nǔnywɛ́ yětɔn kpó ayixa yětɔn kpó bǐ wɛ nyí nǔblíblí. Yě tunwun Mawu bó ɖɔ; lo ɔ́, nǔwiwa yětɔn ɖe xlɛ́ ɖɔ yě kún tunwun Mawu ó. Mɛ e è nǎ gbɛ́ wǎn ná wɛ nú yě; yě nyí gǔfɔ́ntɔ́, bó nyí mɛ e ma sixú kpé nǔ ɖagbe ɖěbǔ wú bó wa ǎ lɛ́ɛ é. Amɔ̌ hwɛ ɔ́, nǔ e sɔgbe xá nǔkplɔ́nmɛ ɖagbe ɔ́ wɛ a nǎ kplɔ́n mɛ lɛ́ɛ; ɖɔ nú súnnu e ko kpo lɛ́ɛ ɖɔ yě ní nɔ wa nǔ ɖó jlɛ̌ jí; yě ní nyí mɛsísí; yě ní nɔ wa nǔ e sɔgbe é; yě ní lí dǒ ɖo nǔɖiɖi mɛ, bó lí dǒ ɖo wǎn yíyí kpó suúluɖíɖó kpó mɛ. Mɔ̌ ɖokpó ɔ́, ɖɔ nú nyɔ̌nu e sín xwe ko sɛ yi lɛ́ɛ ɖɔ yě ní zán gbɛ yětɔn mɛ e nɔ zán gbɛ mímɛ́ lɛ́ɛ ɖɔhun. Yě ná nɔ́ ɖɔ mɛ nu ǎ; yě ná nyí ahannumúnɔ ǎ; yě ɖó ná nɔ́ kplɔ́n nǔ ɖagbe mɛ, bó ná dó sixú kplɔ́n nyɔ̌nu e ma ko nyí mɛxó ǎ lɛ́ɛ ɖɔ yě ní yí wǎn nú asú yětɔn kpó vǐ yětɔn lɛ́ɛ kpó. Yě ná nɔ kplɔ́n yě ɖɔ yě ní nɔ wa nǔ e sɔgbe é, lobo nyí mɛ mímɛ́; yě ní nɔ́ kpé nukún dó xwégbezɔ́ yětɔn lɛ́ɛ wú, bó ná nyí nyɔ̌nu ɖagbe e nɔ se tónú nú asú yětɔn lɛ́ɛ é; yě ní wa nǔ gbɔn mɔ̌, bónú mɛɖé ma ɖɔ xó nyanya ɖé dó Mawuxó ɔ́ wú ó. Mɔ̌ ɖokpó ɔ́, a nǎ ɖɔ nú dɔ̌nkpɛvú lɛ́ɛ ɖɔ yě ní nɔ wa nǔ e sɔgbe é. Hwi ɖésúnɔ ɔ́, a ɖǒ ná nɔ́ wa nǔ ɖagbe ɖo nǔ bǐ mɛ, bó ná nyí kpɔ́n d'é wú nú yě; a nǎ sɔ́ nǔ e kplɔ́n mɛ wɛ a ɖe lɛ́ɛ dó ɖó nǔjɔnǔ, lobo kpé nukún d'é wú. A nǎ nɔ zán xógbe e sɔgbe bɔ mɛɖé ma ná sixú mɔ xó ɖé ɖɔ d'é wú ǎ lɛ́ɛ, bónú kɛntɔ́ towe lɛ́ɛ ná ɖu winnyá, ɖó yě ná mɔ xó nyanya ɖé ɖɔ dó mǐ wú ǎ. Kannumɔ lɛ́ɛ ɖó ná se tónú nú gǎn yětɔn lɛ́ɛ, bó ná nyɔ́ nú yě ɖo nǔ bǐ mɛ; yě ɖó ná nɔ vɛ́ tóli nú gǎn yětɔn lɛ́ɛ sín xó ǎ. Yě ɖó ná nɔ́ hízí gǎn yětɔn sín nǔ ɖěbǔ ǎ; é nyɔ́ wa ɔ́, yě ná nɔ́ ɖe xlɛ́ hwebǐnu ɖɔ émí nyí mɛ ɖagbe; émí ɖo gbejí, bónú mɛ lɛ́ɛ ná dó sixú ɖó sísí nú nǔkplɔ́nmɛ e ɖɔ xó dó Mawu Mɛhwlɛ́ngántɔ́ mǐtɔn wú ɔ́ ɖo nǔ bǐ mɛ. Đó Mawu ɖe fɛ́nú tɔn e jí hwlɛngán gbɛtɔ́ lɛ́ɛ bǐ tɔn jínjɔ́n ɔ́ xlɛ́. Fɛ́nú énɛ́ ɔ́ kplɔ́n mǐ ɖɔ mǐ ní jó gbɛ nyanya zínzán kpó jlǒ gbɛmɛ fí tɔn lɛ́ɛ kpó dó, bó ná nɔ́ wa nǔ e sɔgbe é, bó ná nɔ́ zán gbɛ jlɔ́jlɔ́, lobo ná nɔ́ gbejí nú Mawu. Lě e mǐ ɖó ná nɔ te kpɔ́n azǎn ɖagbe e ɖó nukún wɛ mǐ ɖe ɔ́ gbɔn ɔ́ nɛ́; azǎn énɛ́ gbe wɛ Mawu ɖaxó, Mɛhwlɛ́ngántɔ́ Klísu Jezu ná ɖe susu tɔn xlɛ́. É sɔ́ éɖée jó dó ta mǐtɔn mɛ, bó ná xɔ mǐ ɖo nǔ nyanya bǐ mɛ, bó ná sɔ́ mǐ dó bló togun mímɛ́ e nyí é ɖokpónɔ géé tɔn ɔ́ ná, bɔ mǐ ná nɔ́ ɖó kan dó nǔ ɖagbe wiwa wú. Nǔ e a nǎ zé acɛkpikpa towe bǐ dó kplɔ́n mɛ e ɖo tó ɖó we wɛ lɛ́ɛ ná ɔ́ nɛ́, bó ná nɔ́ sɔ́ dó ná akɔ́nkpinkpan yě, abǐ bó ná nɔ́ dó gbɛ́ nǔ nú yě. Ma ka lɔn nú mɛɖé hu tɛ́ nú we ó. A nǎ nɔ́ flín mɛ lɛ́ɛ bǐ ɖɔ yě ɖó ná nɔ́ hwíhwɛ́ yěɖée dó gǎn lɛ́ɛ kpódó acɛkpikpa lɛ́ɛ kpán glɔ́; a nǎ flín yě ɖɔ yě ɖó ná nɔ sí yě, bó ná ɖo gbesisɔ mɛ nú nǔ ɖagbe wiwa bǐ. Yě ní ma nɔ ɖɔ xó nyanya dó mɛɖé wú ó; yě ní nyí mɛfífá, bó nyɔ́ xomɛ, bónú yě ní nɔ ɖe xomɛfífá xlɛ́ mɛ lɛ́ɛ bǐ hwebǐnu. Đó ɖ'ayǐ xóxó ɔ́, mǐ lɔmɔ̌ ɔ́, mǐ ko nyí ayixamasɔgbenánɔ, bó kó nyí tónúmasetɔ́, bó kó bú ali; jlǒ agbaza tɔn tɛnmɛ tɛnmɛ lɛ́ɛ kpó gbɛɖuɖu kpán sín kannumɔ wɛ mǐ kó nyí ɖ'ayǐ. Dǎnúwiwa kpó mɛɖěvonújlójló kpó sín gbɛ mɛ wɛ mǐ kó nɔ ɖ'ayǐ; mǐ nɔ gbɛ́ wǎn nú mɛ ɖě lɛ́ɛ, bɔ yě lɔ nɔ gbɛ́ wǎn nú mǐ lɔmɔ̌. Lo ɔ́, hwenu e Mawu Mɛhwlɛ́ngántɔ́ mǐtɔn ɖe xomɛnyínyɔ́ tɔn kpó wǎn yíyí tɔn kpó xlɛ́ gbɛtɔ́ lɛ́ɛ ɔ́, é hwlɛ́n mǐ gán, é ka nyí ɖɔ mǐ wa nǔ jlɔ́jlɔ́ wútu wɛ é hwlɛ́n mǐ gán ǎ; lo ɔ́, nǔ mǐtɔn wɛ blá wǔ n'i. É hwlɛ́n mǐ gán, bó lɛ mǐ wé; mɛlɛwé énɛ́ ɔ́ mɛ wɛ Yɛsinsɛn nɔ ná lɛ̌vɔ́jɔ kpó gbɛ yɔ̌yɔ́ kpán mǐ ɖe. Mawu gbɔn Mɛhwlɛ́ngántɔ́ mǐtɔn Jezu Klísu jí, bó kɔn Yɛsinsɛn tɔn dó mǐ jí bɔ é túnflá, bónú gbɔn fɛ́nú Yɛsinsɛn ɔ́ tɔn mɛ ɔ́, mǐ ná sixú húzú hwɛjijɔnɔ ɖo Mawu nukɔn, bó ná sixú mɔ gbɛ mavɔ mavɔ e ɖó nukún wɛ mǐ ɖe ɔ́ yí. Xó nǔgbó ɖokpó nɛ́. Un jló ɖɔ a nǐ tɛ ɖɛ̌ nǔ énɛ́ lɛ́ɛ jí ganjí, bónú mɛ e ɖi nǔ nú Mawu lɛ́ɛ ná tɛ́ dó ɖagbewiwa wú. Nǔ e nyí nǔ ɖagbe bó nyɔ́ nú gbɛtɔ́ lɛ́ɛ é nɛ́. Amɔ̌, hɔn nú nǔdindɔn e nɔ hwɛ́n xlonɔ xó lɛ́ɛ, bó hɔn nú kanfifɔ magbokɔ lɛ́ɛ, bó nɔ hɔn nú jlɛɖiɖɔ kpódó adɔndindɔn dó sɛ́n lɛ́ɛ jí kpán. Nǔ énɛ́ lɛ́ɛ ɔ́, yě nyí nǔɖéwanú ǎ; nǔ nyanya wɛ yě nyí. Ényí mɛɖé ɖo kíjá dó mɛ mɛ wɛ hǔn, gbɛ̌ nǔ n'i azɔn nukɔntɔn ɔ́, gbɛ́ n'i azɔn wegɔ́ ɔ́; é kpo ɖ'é wú jɛ́n wɛ hǔn, nɔ zɔ n'i. Đó a tunwun ganjí ɖɔ mɛ mɔ̌hunkɔtɔn ɔ́, é ko lɛ́ kɔ sín ali jlɔ́jlɔ́ ɔ́ jí, bɔ hwɛ e hu wɛ é ɖe lɛ́ɛ ko ɖe xlɛ́ ɖɔ ali bú wɛ é ɖe. Hwenu e un ná sɛ́ Aatemási abǐ Ticíku dó we ɔ́, tɛ́nkpɔ́n bó wá mɔ mǐ ɖo Nikopolísi, ɖó fínɛ́ wɛ un ɖɔ un ná nɔ avivɔ hwenu. A nǎ gɔ́ alɔ nú Zenasi ɖɛ̌mɛnu ɔ́, kpó Apolosu kpó, nú yě ná dó sixú yi to e mɛ yě xwe ɔ́; blǒ bónú nǔɖé ní ma hwedó yě ó. Mɛ mǐtɔn lɛ́ɛ lɔmɔ̌ ní kplɔ́n nǔ ɖagbe wiwa, bó nɔ wa hwebǐnu, bó ná nɔ́ sixú mɔ nǔ e ɖo tají lɛ́ɛ, bó ma zán gbɛ yětɔn dó wǔvɔ́ ó. Mɛ e kpó nyɛ kpó ɖo kpɔ́ lɛ́ɛ bǐ dó gbe sɛ́ dó we. Dǒ gbe nú xɔ́ntɔn mǐtɔn ɖo nǔɖiɖi mɛ lɛ́ɛ. Fɛ́nú Mawu tɔn ní nɔ kpɔ́ xá mi bǐ. Nyɛ Pɔ́lu e ɖo ganxó ɖó Klísu Jezu wútu ɔ́, kpódó nɔví mǐtɔn Timɔtée kpán wɛ ɖo wěma élɔ́ wlán sɛ́ dó we wɛ Filemɔ́ɔ, hwi mɛ e nyí wǎnyínámɔ mǐtɔn, bó lɛ́ nyí azɔ̌gbɛ́ mǐtɔn é. Hwi kpódó agun e nɔ kplé ɖo xwé towe gbe ɔ́ kpó, kpó nɔví mǐtɔn nyɔ̌nu Afya kpán, kpódó ahwanfungbɛ́ mǐtɔn Aacípu kpán wɛ mǐ sɛ́ wěma ɔ́ dó. Mawu Tɔ́ mǐtɔn kpódó Aklúnɔ mǐtɔn Jezu Klísu kpó ní ná fɛ́nú kpódó fífá kpó mi. Un ɖo ɖɛ xo wɛ hweɖěbǔnu ɔ́, un nɔ flín we, bó nɔ dó kú nú Mawu, ɖó un se wǎn yíyí e a ɖǒ nú mɛɖeɖóvo Mawu tɔn lɛ́ɛ kpódó nǔɖiɖi e a ɖǒ nú Aklúnɔ Jezu ɔ́ kpán. Un nɔ byɔ́ Mawu ɖɔ kɔnɖókpɔ́ e a ɖǒ xá mǐ ɖo nǔɖiɖi mɛ ɔ́ ní bló bónú è nǎ tunwun ɖagbe e mǐ nɔ mɔ ɖo Klísu mɛ lɛ́ɛ bǐ céɖécéɖé. Nɔví ce, wǎn yíyí e a ɖǒ ɔ́ hun xomɛ nú mì tlala, bó dó gbɔ nú mì ɖésú, ɖó a blǒ bɔ mɛɖeɖóvo Mawu tɔn lɛ́ɛ sín ayi jɛ ayǐ. Wǎn yíyí e a ɖǒ ɔ́ wú wɛ un ɖo nǔ élɔ́ byɔ́ we wɛ. Un hɛn ɔ́, un ná ɖɔ nǔ e a nǎ bló ɔ́ nú we, ɖó Klísu ná acɛ tɔn mì; un ka jló ná bló gbɔn mɔ̌ ǎ. Nyɛ Pɔ́lu ɔ́, un ko kpo, bó ka lɛ́ ɖo gankpá mɛ din ɖó Klísu Jezu wútu. Un ɖo vo sa nú we wɛ dó Onɛzímu tamɛ. Un ɖɔ Klísu Jezu xó n'i, bɔ é ɖi nǔ, lobo húzú vǐ ce ɖo Klísu mɛ ɖo gankpá mɛ fí. Đ'ayǐ xóxó ɔ́, é nyí le ɖě nú we ǎ; amɔ̌ din ɔ́, é nyí le nú we, bó nyí le nú nyi lɔmɔ̌. Din ɔ́, un lɛ́ kɔ n'i sɛ́ dó we; éyɛ́ mɛ e nyí xo ce mɛ ví é. É jló mì ganjí ɖɔ ní nɔ gɔ̌n ce ɖo gankpá mɛ fí e un ɖe ɖó Wɛn Ɖagbe ɔ́ wútu é, bónú é ná dó alɔ mì ɖó tɛn towe mɛ. Lo ɔ́, un jló ná bló nǔɖé hwi mɛvo ǎ; un jló ná fán asú we nú a nǎ wa ɖagbe nú mì ǎ; lo ɔ́, a nǐ bló kpó jlǒ hwi ɖésúnɔ tɔn kpó. É sixú ko nyí ɖɔ Onɛzímu ɔ́ gosín gɔ̌n towe nú hwenu kpɛɖé, bó ná lɛ́ kɔ wá nɔ gɔ̌n towe káká sɔ́yi wɛ. Din ɔ́, é sɔ́ nyí kannumɔ kpowun nú we ǎ; é hú gǎn kannumɔ. Nɔví mǐtɔn vívɛ́ná wɛ é húzú. Nyɛ ɔ́, mɛvívɛ́ ɖé wɛ é nyí nú mì. É ka ɖó ná lɛ́ nyí mɛvívɛ́ nú hwɛ hú mɔ̌; kannumɔ towe wɛ é nyí, bó ka lɛ́ nyí nɔví towe ɖo Aklúnɔ mɛ. Ényí azɔ̌gbɛ́ towe jɛ́n un nyí nǔgbó hǔn, yí i lě e a nǎ yí nyɛ ɖésúnɔ gbɔn ɔ́. Ényí é wa nǔɖé nyi do nú we, abǐ é ɖu axɔ́ ɖé dó we hǔn, lɛ̌n bǐ dó kɔ nú mì. Nyɛ Pɔ́lu ɖésú wɛ wlán xó élɔ́ dó alɔ ce wú: nyɛ Pɔ́lu ná sú axɔ́ tɔn we; un jló ná flín we ɖɔ a ɖu gbɛ hwi ɖésúnɔ tɔn sín axɔ́ dó mì ǎ. Nɔví ce! Kɛnklɛ́n bó kpɔ́n dó Aklúnɔ wú, bó wa ɖagbe énɛ́ nú mì; blǒ bónú ayi ce ní j'ayǐ, nɔví ɖo Klísu mɛ ɖɔhun. Hwenu e un ɖo wěma élɔ́ wlán sɛ́ dó we wɛ ɔ́, un ɖeji ɖɔ a nǎ bló nǔ e byɔ́ we wɛ un ɖe é, bó ná lɛ́ bló hú mɔ̌. Un ka lɛ́ ɖo byɔ̌byɔ́ we wɛ azɔn ɖokpó ɖɔ hwi ní bló xɔ ɖokpó mɛ ɖó ɖ'ayǐ nú mì; ɖó un ɖo nukún ɖó wɛ ɖɔ Mawu ná yí ɖɛ mitɔn bó ná bló bɔ un ná wá mɔ mi. Epaflasi e kpó nyi kpó ɖo gan sɛn wɛ ɖó Klísu Jezu wútu ɔ́ dó gbe sɛ́ dó we. Mɔ̌ ɖokpó ɔ́, azɔ̌gbɛ́ ce Maki kpódó Alisitáki kpó, kpó Demási kpó, kpódó Luki kpán dó gbe sɛ́ dó we. Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi. Đ'ayǐ xóxó ɔ́, Mawu gbɔn gbeyíɖɔ lɛ́ɛ jí, bó ɖɔ xó nú tɔ́gbó mǐtɔn lɛ́ɛ azɔn mɔ̌kpán gbɔn alɔ gěgé mɛ. Amɔ̌, ɖo azǎn élɔ́ lɛ́ɛ, éé ɖo azǎn gǔdo gúdo tɔn nyí wɛ lɛ́ɛ mɛ ɔ́, é ɖɔ xó nú mǐ gbɔn vǐ tɔn jí; é jí wɛ Mawu ɖó gbɛ ɔ́ gbɔn; é wɛ Mawu sɔ́, bó zé nǔ lɛ́ɛ bǐ dó así ná. É wɛ nyí susu Mawu tɔn sín wěziza sín xlɛ́, bó nyí Mawu sín xlɛ́ titewungbe tɔn. É sɔ́ xó tɔn hlɔ̌nhlɔ́nnɔ ɔ́ dó hɛn gbɛ ɔ́ ɖó te. Ée é lɛ gbɛtɔ́ lɛ́ɛ wé sín hwɛ yětɔn lɛ́ɛ mɛ gúdo ɔ́, é jínjɔ́n Mawu e nyí hlɔ̌nhlɔ́n bǐ nɔ ɔ́ sín ɖisíxwé ɖo sɛ́xwé. Vǐ ɔ́ wá hú gǎn wɛnsagun lɛ́ɛ lě e nyǐkɔ e Mawu ná ɛ ɔ́ ɖo tají hú wɛnsagun Mawu tɔn lɛ́ɛ tɔn gbɔn é. Đó Mawu ɖɔ nú wɛnsagun tɔn lɛ́ɛ ɖě gbeɖé ɖɔ: “Vǐ ce wɛ a nyǐ, bɔ égbé ɔ́, un ji we” ǎ. É ka ɖɔ dó wɛnsagun ɖé wú gbeɖé ɖɔ: “Un ná nyí tɔ́ n'i, bɔ éyɛ́ ná nyí vǐ nú mì” ǎ. Lo ɔ́, hwenu e Mawu ná sɛ́ nukɔngbéví tɔn dó gbɛ ɔ́ mɛ ɔ́, é ɖɔ: “Wɛnsagun Mawu tɔn lɛ́ɛ bǐ ɖó ná ɖe kɔ́ n'i.” Nǔ e Mawu ɖɔ dó wɛnsagun lɛ́ɛ wú ɔ́ ɖíe: “Mawu nɔ sɔ́ wɛnsagun tɔn lɛ́ɛ dó húzú jɔhɔn, bó nɔ́ sɔ́ mɛsɛntɔ́ tɔn lɛ́ɛ dó húzú myɔ.” Lo ɔ́, Mawu ɖɔ dó vǐ ɔ́ wú ɖɔ: “Óo! Mawu, axɔ́súzinkpo towe ɖo te káká sɔ́yi. Hwɛjijɔ jí wɛ axɔ́súɖuɖu towe jínjɔ́n. A yǐ wǎn nú hwɛjijɔ, bó gbɛ́ wǎn nú nǔ nyanya; énɛ́ ɔ́ wú wɛ Mawu, Mawu towe kɔn awǎjijɛ sín ami dó ta nú we, bó dó sɔ́ we bɔ a hú gǎn hǎgbɛ́ towe lɛ́ɛ.” É lɛ́ ɖɔ: “Aklúnɔ, hwi wɛ ɖó ayǐkúngban ɔ́ ayǐ sín do, bɔ jǐxwé ɔ́ nyí alɔ towe núwiwa. Nǔ énɛ́ lɛ́ɛ bǐ ná vɔ; hwɛ ka ná ɖe tɛgbɛ; yě ná dóxó avɔ ɖɔhun. A nǎ mlá yě awu ɖaxó ɖɔhun, bɔ è nǎ ɖyɔ́ yě avɔ ɖɔhun. Amɔ̌ hwɛ ɔ́, nǔ ɖokpó ɔ́ wɛ a nyǐ tɛgbɛ, bɔ gbɛ towe ɖó vivɔ ǎ.” Mawu ɖɔ nú wɛnsagun tɔn lɛ́ɛ ɖě gbeɖé ɖɔ: “Jǐnjɔ́n ɖisí ce xwé fí káká nú ma sɔ́ kɛntɔ́ towe lɛ́ɛ dó húzú afɔɖótɛn nú we” ǎ. Étɛ́ wɛnsagun lɛ́ɛ ka nyí lo? Yɛ wɛ yě bǐ nyí, bó ɖo azɔ̌ wa nú Mawu wɛ, bɔ Mawu sɛ́ yě dó nú yě ná wá dó alɔ mɛ e ɖó ná mɔ hwlɛngán lɛ́ɛ. Énɛ́ ɔ́ wú wɛ mǐ ɖó ná hɛn nǔgbó e mǐ se lɛ́ɛ syɛ́nsyɛ́n hú ɖ'ayǐ tɔn, bónú è ma wá dɔn mǐ ɖó zɔ nú nǔgbó ɔ́ ó. Đó xó e wɛnsagun lɛ́ɛ ɖɔ ɔ́ lí dǒ sɔ mɔ̌, bɔ mɛɖé ma ké ya ná ǎ, abǐ mɛɖé vɛ́ tóli ná ɔ́, è nɔ dɔn tó nú mɛ ɔ́, lě e é jɛ xá gbɔn é. Ényí nǔ nyí mɔ̌ ɔ́, nú mǐdɛɛ lɛ́ɛ dó vɛ̌ nú hwlɛngán ɖaxó énɛ́ ɔ́, nɛ̌ mǐ ka ná sixú gló tódɔnnúmɛ ɔ́ gbɔn? Aklúnɔ ɖésú ɖɔ hwlɛngán énɛ́ ɔ́ sín xó dó nukɔn, bɔ mɛ e se lɛ́ɛ ɖe kúnnu ná ɖɔ nǔgbó wɛ. Azɔn ɖokpó ɔ́, Mawu ɖe wuntun tɛnmɛ tɛnmɛ lɛ́ɛ xlɛ́, bó jlɛ́ nǔ tɛnmɛ tɛnmɛ kpódó nǔdábaɖa tɛnmɛ tɛnmɛ kpó gbɔn yě jí, bó dó ɖe xlɛ́ ɖɔ émí yí gbe nú kúnnuɖiɖe yětɔn. É lɛ́ má Yɛsinsɛn sín nǔníná lɛ́ɛ lě e é jló e gbɔn é. Nǔgbó ɔ́, ényí wɛnsagun lɛ́ɛ wɛ Mawu ná acɛ dó gbɛ́ e jǎwe, bɔ mǐ ɖo xó tɔn ɖɔ wɛ ɔ́ nu ǎ. É nyɔ́ wa ɔ́, mɛɖé ko ɖɔ ɖo Mawuxówéma ɔ́ mɛ ɖo akpá ɖé xwé ɖɔ: “Étɛ́ gbɛtɔ́ ka nyí bɔ a nǎ flín i? Étɛ́ vǐ e gbɛtɔ́ ji ɔ́ ka nyí, bɔ a nǎ kpé nukún wǔ tɔn. A sɔ́ ɛ hwe ɖo wɛnsagun lɛ́ɛ glɔ́ nú hwenu kpɛɖé, bó ka sɔ́ susu kpódó yɛ̌yi kpán sín axɔ́súgbákún xwe n'i. A sɔ́ nǔ bǐ dó afɔ tɔn glɔ́.” Ée è ɖɔ Mawu sɔ́ nǔ bǐ dó acɛ tɔn mɛ ɔ́, é xlɛ́ ɖɔ nǔ ɖěbǔ kún ɖe bɔ é gɔn acɛ tɔn mɛ sɔ́ ɖó ó. É ka ɖo mɔ̌ có, mǐ kó ɖo mimɔ wɛ din ɖɔ é ɖó acɛ ɖo nǔ lɛ́ɛ bǐ nu ǎ. Nǔ e mɔ wɛ mǐ ɖe ɔ́ ɖíe: Mawu sɔ́ Jezu hwe ɖo wɛnsagun lɛ́ɛ glɔ́ nú hwenu kpɛɖé, bónú é ní kú dó gbɛtɔ́ lɛ́ɛ bǐ tamɛ gbɔn fɛ́nú Mawu tɔn gbla mɛ, bɔ mǐ ka ɖo mimɔ ɛ wɛ din bɔ è sɔ́ susu kpódó yɛ̌yi kpán sín axɔ́súgbákún xwe n'i ɖó ya e é ji, bó kú ɔ́ wú. Nǔgbó ɔ́, é jɛ xá hwenɛ́nu ɖɔ Mawu e bló nǔ bǐ, bó hɛn nǔ bǐ ɖó tɛn yětɔn yětɔn mɛ ɔ́, ní bló nú Jezu ní mɛ́ yí fó, gbɔn wǔvɛ́mimɔ gbla mɛ. Mawu blǒ mɔ̌, bó ná dɔn vǐ gěgé wá susu tɔn mɛ gbɔn Jezu jí. Đó Jezu wɛ nyí gǎn e nɔ xlɛ́ hwlɛngánli ɔ́ yě ɔ́. Jezu e nɔ slá wǔ nú mɛ ɔ́ kpódó mɛ e é slá wǔ ná lɛ́ɛ kpó ɔ́, tɔ́ ɖokpó ɔ́ wɛ ɖó yě bǐ. Énɛ́ ɔ́ wú wɛ winnyá ma hu Jezu nú é ná ylɔ́ yě ɖɔ nɔví émítɔn lɛ́ɛ ǎ. Nǔgbó ɔ́, é ɖɔ nú Mawu ɖɔ: “Un ná jlá nǔ e a wa lɛ́ɛ nɔví ce lɛ́ɛ; un ná mlá we ɖo agun ɔ́ tɛ́ntin.” É lɛ́ ɖɔ: “Un ná ɖeji dó Mawu wú.” Bó lɛ́ vɔ ɖɔ: “Nyɛ kpó vǐ e Mawu ná mì lɛ́ɛ kpán ɖíe.” Ée ényí ɖɔ vǐ énɛ́ lɛ́ɛ ɔ́, gbɛtɔ́ wɛ yě nyǐ, bó ɖó agbaza kpó hun kpó ɔ́, Jezu ɖésú húzú gbɛtɔ́, bó ɖó agbaza kpó hun kpó yě ɖɔhun. É húzú gbɛtɔ́, bɔ gbɔn kú tɔn gbla mɛ ɔ́, é hu acɛ nú awǒvi e ɖó acɛ e nɔ hu mɛ é; énɛ́ ɔ́, é hwlɛ́n mɛ e cí kannumɔ ɖɔhun ɖo gbɛzán yětɔn bǐ mɛ, ɖó xɛsi e ɖi nú kú wɛ yě ɖe ɔ́ wútu lɛ́ɛ gán. Đó é ɖo gaan ɖɔ é kún nyí wɛnsagun Mawu tɔn lɛ́ɛ wɛ é d'alɔ ó; lo ɔ́, Ablaxámu ví lɛ́ɛ wɛ é d'alɔ. Énɛ́ ɔ́ wú wɛ é ɖó ná húzú, bó cí nɔví tɔn lɛ́ɛ ɖɔhun ɖo ali lɛ́ɛ bǐ nu, bó ná sixú nyí vɔ̌sánú-xwlémawutɔ́ ɖaxó, gbejínɔtɔ́, kpódó nǔbláwǔkúnúmɛtɔ́ kpó ɖo mawuzɔ́ e wa wɛ é ɖe ɔ́ mɛ, bónú Mawu ná sɔ́ hwɛ e togun ɔ́ hu lɛ́ɛ kɛ ɛ. Bɔ din ɔ́, é hɛn ɔ́, é ná dó alɔ mɛ e è tɛ́nkpɔ́n lɛ́ɛ, ɖó è ko tɛ́n é ɖésúnɔ kpɔ́n, bɔ é ko ji ya. Énɛ́ ɔ́ wú ɔ́, nɔví klísusɛntɔ́ lɛ́ɛ mi, mi mɛ e Mawu ylɔ́ lɛ́ɛ lɔ ɔ́, nukún mitɔn ní nɔ Jezu wú; é wɛ nyí Mɛsɛ́dó Mawu tɔn, bó nyí vɔ̌sánú-xwlémawutɔ́ ɖaxó e hɛn nǔɖiɖi e jlá wɛ mǐ ɖe ɔ́ wá nú mǐ é. Nǔgbó ɔ́, é nɔ gbejí nú Mawu e sɔ́ ɛ nú azɔ̌ énɛ́ ɔ́, Mɔyízi e wú è ɖɔ xó élɔ́ dó ɔ́ ɖɔhun: “É nɔ gbejí ɖo Mawu sín xwédo ɔ́ bǐ mɛ.” Mɛ lɛ́ɛ nɔ kpa susu nú mɛ e gbá xɔ ɔ́ hú xɔ ɔ́ ɖésú. Mɔ̌ ɖokpó ɔ́ wɛ susu e jɛ xá Jezu ɔ́ hú gǎn Mɔyízi tɔn. Nǔgbó ɔ́, è mɔ xɔ ɖé ɖo te hǔn, mɛɖé jɛ́n gbá; Mawu wɛ ka nyí mɛ e bló nǔ bǐ é. Mɔyízi éyɛ́ ɔ́, mɛsɛntɔ́ ɖɔhun ɔ́, é nɔ gbejí ɖo Mawu sín xwédo ɔ́ bǐ mɛ, bó ná nyí kúnnuɖetɔ́ nú nǔ e è ɖǒ ná ɖɔ é. Amɔ̌ Klísu ɔ́, ɖi vǐ ɖɔhun ɔ́, é nɔ gbejí nú Mawu, bɔ Mawu sɔ́ ɛ ɖó xwédo tɔn nu. Mǐdɛɛ lɛ́ɛ ɔ́, ényí mǐ hɛn jiɖiɖe mǐtɔn kpódó akɔ́nkpinkpan mǐtɔn kpó ɖo nǔ e ɖó nukún wɛ mǐ ɖe ɔ́ mɛ ɔ́, xwédo tɔn wɛ mǐ nyí. Énɛ́ ɔ́ wú ɔ́, mi cɔ́ miɖée, lě e Yɛsinsɛn ɖɔ gbɔn é; Yɛsinsɛn ɖɔ: “Ényí mi se Mawu sín gbe égbé din hǔn, mi ma tlí tó hwenu e mi fɔ́n gǔ dó jǐ tɔn é ɖɔhun ó; gbe e gbe mi tɛ́n ɛ kpɔ́n ɖo gbětótló mɛ é ɖɔhun ó. Tɔ́gbó mitɔn lɛ́ɛ tɛ́n mì kpɔ́n ɖo fínɛ́, có yě ká mɔ nǔwiwa ce lɛ́ɛ káká nú xwe kanɖé (40). Énɛ́ ɔ́ wú wɛ xomɛ sin mì dó mɛ énɛ́ lɛ́ɛ wú, bɔ un ɖɔ: ‘Ayi yětɔn nɔ ɖo ali bú wɛ hwebǐnu. Yě mɔ nukúnnú jɛ nǔ e ba nú yě wɛ un ɖe ɔ́ wú ǎ.’ Đo xomɛsin ce mɛ ɔ́, un xwlé nǔ bó ɖɔ: ‘Yě ná byɔ́ to e mɛ un ná ná gbɔjɛ́ yě ɖe ɔ́ mɛ gbeɖé ǎ.’ ” Nɔví lɛ́ɛ mi, mi cɔ́ miɖée, bónú mɛɖé má ɖo mi mɛ, bó ɖó ayi nyanya, ayi e ma nɔ ɖi nǔ ǎ é, bó lɛ́ kɔ sín Mawu gbɛɖe ɔ́ gúdo ó. É nyɔ́ wa ɔ́, mi nɔ ná akɔ́nkpinkpan miɖée ayǐhɔ́ngbe ayǐhɔ́ngbe káká yi jɛ hwenu e “Égbé din” e xó è ɖɔ dó Mawuxówéma ɔ́ mɛ ɔ́ ná ɖo azɔ̌ wa dó mǐ jí wɛ yi jɛ é, bónú ɖokpó mitɔn ma jó éɖée dó nú hwɛhuhu flú i, bónú é wá húzú tótlítɔ́ ó. Nǔgbó ɔ́, ényí mǐ hɛn jiɖiɖe e mǐ ɖó sín bǐbɛ́mɛ ɔ́ syɛ́nsyɛ́n káká yi fó hǔn, mǐ nyí hǎgbɛ́ Klísu tɔn. Nǔ e ɖɔ wɛ Mawuxówéma ɔ́ ɖe ɔ́ ɖíe: “Ényí mi se Mawu sín gbe égbé din hǔn, mi ma tlí tó hwenu e mi fɔ́n gǔ dó jǐ tɔn ɔ́ ɖɔhun ó.” Mɛ̌ e mɛ̌ e ka se Mawu sín gbe bó fɔ́n gǔ dó jǐ tɔn? Yě mɛ e Mɔyízi ɖe tɔ́n sín Ejípu lɛ́ɛ bǐ wɛ. Mɛ̌ e mɛ̌ e Mawu ka sin xomɛ dó káká nú xwe kanɖé? Mɛ e hu hwɛ, bó j'ayǐ bó kú ɖo gbětótló mɛ lɛ́ɛ wɛ. Hwenu e Mawu xwlé nǔ bó ɖɔ: “Yě ná byɔ́ to e mɛ un ná ná gbɔjɛ́ yě ɖe ɔ́ mɛ gbeɖé ǎ” ɔ́, mɛ̌ e mɛ̌ e xó ɖɔ wɛ é ka ɖe? Mɛ e fɔ́n gǔ lɛ́ɛ xó ɖɔ wɛ é ɖe. Nǔgbó ɔ́, mǐ mɔ ɖɔ yě kún kpé wú, bó byɔ́ gbɔjɛ́ énɛ́ ɔ́ mɛ ó, ɖó nǔ e yě ma ɖi ǎ é wútu. Ée akpá e Mawu dó nú mǐ ɖɔ mǐ ná byɔ́ fí e émí ná ná gbɔjɛ́ mǐ ɖe ɔ́ lɛ́ kpo ɖo te ɔ́, hǔn mǐ ní bó cɔ́ mǐɖée, bónú mi mɛ ɖěbǔ ní ma gɔn gbɔjɛ́ énɛ́ ɔ́ mɛ byɔ́ ó. Đó mǐ se Wɛn Ɖagbe ɔ́ lě e mɛ e ɖo gbětótló mɛ ɖ'ayǐ lɛ́ɛ se gbɔn é. Yě se wɛn énɛ́ ɔ́; é ka wa ɖagbe ɖé nú yě ǎ; ɖó hwenu e yě se ɔ́, yě yí kpó nǔɖiɖi kpó ǎ. Mǐ mɛ e ɖi nǔ lɛ́ɛ ɔ́, mǐ ná byɔ́ gbɔjɛ́ énɛ́ ɔ́ mɛ; gbɔjɛ́ énɛ́ e wú Mawu ɖɔ xó dó bó ɖɔ: “Đo xomɛsin ce mɛ ɔ́, un xwlé nǔ bó ɖɔ: ‘Yě ná byɔ́ to e mɛ un ná ná gbɔjɛ́ yě ɖe ɔ́ mɛ gbeɖé ǎ.’ ” Xó e Mawu ɖɔ é nɛ́; é ká kó wa azɔ̌ tɔn fó sín hwenu e é ko ɖó gbɛ ɔ́ dó é ɖokpóó. Đó è ko ɖɔ xó dó azǎn tɛ́nwegɔ́ ɔ́ wú, ɖo akpá ɖé xwé ɖo Mawuxówéma ɔ́ mɛ ɖɔ: “Ée Mawu bló nǔ lɛ́ɛ bǐ fó ɔ́, é gbɔjɛ́ azǎn tɛ́nwegɔ́ ɔ́ gbe.” É lɛ́ ɖɔ ɖo aga ɖɔ: “Yě ná byɔ́ to e mɛ un bló gbɔjɛtɛn ɖ'ayǐ nú yě ɖe ɔ́ mɛ gbeɖé ǎ.” Énɛ́ ɔ́ wú ɔ́, mɛ ɖěvo lɛ́ɛ hɛn ɔ́, yě ná byɔ́ mɛ, ɖó mɛ nukɔntɔn e se Wɛn Ɖagbe ɔ́ lɛ́ɛ byɔ́ gbɔjɛ́ énɛ́ mɛ ǎ, ɖó yě tlí tó. Énɛ́ ɔ́ wú wɛ Mawu lɛ́ ɖó azǎn ɖěvo; è nɔ ylɔ́ azǎn énɛ́ ɖɔ “Égbé din”. É lín káká, bɔ é lɛ́ wá ɖɔ azǎn énɛ́ sín xó gbɔn Davídi jí, ɖo Ɖɛhanwéma tɔn e mǐ ko mɔ wá yi é mɛ ɖɔ: “Ényí mi se Mawu sín gbe égbé din hǔn, mi ma tlí tó ó.” Đó ényí Jozuwée ko kplá togun ɔ́ byɔ́ gbɔjɛtɛn énɛ́ mɛ wɛ ɔ́, Mawu sɔ́ ná lɛ́ wá ɖɔ azǎn ɖěvo xó ǎ. Énɛ́ ɔ́, gbɔjɛ́ ɖé ɖo te nú togun Mawu tɔn, bó cí gbɔjɛ́ e Mawu gbɔjɛ́ azǎn tɛ́nwegɔ́ ɔ́ gbe ɔ́ ɖɔhun. Đó mɛ e byɔ́ fí e Mawu ná ná gbɔjɛ́ ɛ ɖe ɔ́, nɔ gbɔjɛ́ ɖo azɔ̌ é ɖésúnɔ tɔn lɛ́ɛ mɛ lě e Mawu gbɔjɛ́ azǎn tɛ́nwegɔ́ ɔ́ gbe hwenu e é bló nǔ lɛ́ɛ bǐ fó gúdo é ɖɔhun. Hǔn, mi bo nú mǐ ná dó gǎn, bó ná byɔ́ gbɔjɛ́ énɛ́ ɔ́ mɛ; mǐ ní bló gbɔn alɔkpa ɖé bónú mǐ mɛ ɖěbǔ ní ma vɛ́ tóli bó gɔn gbɔjɛ́ énɛ́ ɔ́ mɛ byɔ́ lě e mɛ e nɔ gbětótló mɛ lɛ́ɛ vɛ́ tóli gbɔn é ó. Đó Mawuxó ɔ́ ɖo gbɛ, bó ɖó hlɔ̌nhlɔ́n; é ɖá hú jǐví nuwenɔ bǐ. É nɔ byɔ́ káká fí e lǐndɔ̌n kpó yɛ kpó kplé ɖe ɔ́, bó nɔ má yě ɖó vovo. É nɔ byɔ́ káká fí e gǒflɛ́mɛ lɛ́ɛ kpódó fɔn lɛ́ɛ kpó kplé ɖe ɔ́, bó nɔ má yě ɖó vovo. É nɔ ɖe ɖɛ jlǒ kpódó linlin e ɖo gbɛtɔ́ sín ayi mɛ lɛ́ɛ kpán ɖó vovo. Nǔ ɖěbǔ tíin bɔ è sixú sɔ́ hwlá dó Mawu ǎ. Nǔ e Mawu bló lɛ́ɛ ɖěbǔ ɖo hwlǎhwlá n'i ǎ; nǔ lɛ́ɛ bǐ wɛ é nɔ mɔ ɖo mɛ̌, bó nɔ mɔ yě ɖo wěxo; é wɛ mǐ bǐ ɖó ná ɖó gbe ná. Hǔn, mi bo nú mǐ ná hɛn nǔɖiɖixó e ɖɔ wɛ mǐ ɖe ɔ́ syɛ́nsyɛ́n. Nǔgbó ɔ́, mǐ ɖó vɔ̌sánú-xwlémawutɔ́gán ɖaxó ɖokpó; Jezu Mawu ví ɔ́ wɛ; é hun káká yi Mawu ɖésú nukɔn. Vɔ̌sánú-xwlémawutɔ́ ɖaxó e ma sixú kpé wú bó ji ya xá mǐ ɖo gǎnmaɖó mǐtɔn lɛ́ɛ mɛ ǎ ɔ́ wɛ mǐ ɖó ǎ. É nyɔ́ wa ɔ́, vɔ̌sánú-xwlémawutɔ́ ɖaxó mǐtɔn ɔ́, è tɛ́n ɛ kpɔ́n mǐ ɖɔhun ɖo nǔ bǐ mɛ; amɔ̌, é hu hwɛ ǎ. Hǔn, mi bo nú mǐ ná sɛkpɔ́ axɔ́súzinkpo Mawu tɔn, fí e fɛ́nú ɖe ɔ́, kpódó jiɖiɖe kpán; é ná sɔ́ hwɛ kɛ mǐ ɖo fínɛ́. Mǐ ná mɔ fɛ́nú ɖo fínɛ́, bónú é ná d'alɔ mǐ ɖo nǔ e hudó mǐ lɛ́ɛ mɛ, ɖo hwe tɔn nu. Vɔ̌sánú-xwlémawutɔ́ ɖaxó ɖěbǔ ɔ́, gbɛtɔ́ lɛ́ɛ mɛ wɛ è nɔ sɔ́ ɖe; è ɖe e nú é ná wa azɔ̌ nú Mawu nú ɖagbe yětɔn. É nɔ sɔ́ nǔníná lɛ́ɛ kpó vɔ̌sánú lɛ́ɛ kpó xwlé Mawu ɖó hwɛ e gbɛtɔ́ lɛ́ɛ hu lɛ́ɛ tamɛ. Ée é ɖésúnɔ lɔ nyí mɛ, bó ma ɖó gǎn ǎ gbɔn alɔkpa gěgé mɛ é ɔ́, é sixú kpɔ́n bó ɖɔ xá mɛ e ma tunwun nǔɖé ǎ lɛ́ɛ, kpó mɛ e nɔ wa nǔ nyi do lɛ́ɛ kpán. Ée é ɖésúnɔ ma ka ɖó gǎn mɔ̌ ǎ é ɔ́, é nyí hwɛ e togun ɔ́ hu lɛ́ɛ kɛ́ɖɛ́ tamɛ wɛ é ná sá vɔ̌ dó ǎ; lo ɔ́, é ɖó ná sá vɔ̌ dó hwɛ e é ɖésúnɔ hu lɛ́ɛ lɔ tamɛ. Mɛ ɖěbǔ nɔ na susu e ɖo vɔ̌sánú-xwlémawutɔ́ ɖaxó nyínyí mɛ ɔ́ éɖée ǎ; lo ɔ́, Mawu wɛ nɔ ylɔ́ mɛ lě e é ylɔ́ Aalɔ́ɔn gbɔn é. Mɔ̌ ɖokpó ɔ́, Klísu ná susu e ɖo vɔ̌sánú-xwlémawutɔ́ ɖaxó nyínyí mɛ ɔ́ éɖée ǎ; é nyɔ́ wa ɔ́, Mawu wɛ ɖɔ n'i ɖɔ: “Vǐ ce wɛ a nyǐ, bɔ égbé ɔ́, un ji we.” É lɛ́ ɖɔ ɖó fí ɖěvo ɖɔ: “A nǎ nyí vɔ̌sánú-xwlémawutɔ́ káká sɔ́yi, Mɛlukisedɛ́ki ɖɔhun.” Hwenu e Jezu ɖo gbɛ ɖo ayǐkúngban jí fí ɔ́, é xo ɖɛ bó sa vo kpódó xósúsú kpó, kpódó ɖasin kpó, nú Mawu e kpé wú bó ná hwlɛ́n ɛ ɖo kú sí é. Mawu ka yí ɖɛ tɔn, ɖó é hwíhwɛ́ éɖée dó Mawu glɔ́ wútu. É kplɔ́n tónúsise gbɔn ya e é ji lɛ́ɛ gbla mɛ, có Mawu ví wɛ é ka nyí. Ée Mawu sɔ́ ɛ dó ɖó mɛ mímɛ́ bɔ nǔ bǐ vɔ ɖ'é wú ɔ́, é húzú hwlɛngán mavɔ mavɔ sín jɔtɛn nú mɛ e nɔ se tónú n'i lɛ́ɛ é bǐ, bɔ Mawu sɔ́ ɛ vɔ̌sánú-xwlémawutɔ́ ɖaxó Mɛlukisedɛ́ki ɖɔhun. Mǐ ɖó nǔ gěgé bó ná ɖɔ nú mi dó xó énɛ́ ɔ́ wú; lo ɔ́, é ná vɛ́ wǔ ɖésú bɔ è nǎ tínmɛ nú mi, ɖó mi wá húzú mɛ e ma nɔ yá wǔ mɔ nukúnnú jɛ nǔ mɛ ǎ é. Mi mɛ e ná kó nyí mɛ̌si sín tɛgbɛ ɔ́, é lɛ́ byɔ́ ɖɔ è ní kplɔ́n nǔ nukɔn nukɔntɔn e ɖo Mawuxó ɔ́ mɛ lɛ́ɛ mi. Mi mɛ e ɖó ná ko ɖo nǔɖuɖu syɛ́nsyɛ́n ɖu wɛ ɔ́, é lɛ́ byɔ́ ɖɔ anɔ̌sin wɛ mi ná nu. Mɛ e ka ɖo anɔ̌nu ɔ́, vǐ yɛ̌yɛ́ wɛ é nyí; é ko ɖó nukúnnú-mɔjɛnǔmɛ ɖé bó ná tunwun nǔ e sɔgbe é, kpódó nǔ e ma sɔgbe ǎ é kpó ǎ. Lo ɔ́, nǔɖuɖu syɛ́nsyɛ́n ɔ́, mɛxó lɛ́ɛ tɔn wɛ; mɛxó énɛ́ lɛ́ɛ kó tunwun nǔ ɖagbe ɖo nǔ nyanya mɛ, gbɔn nǔwiwa yětɔn lɛ́ɛ gbla mɛ, bɔ é ko má yě. Hǔn, mi bo nú mǐ ná yi nukɔn, bó dín zɛ nǔkplɔ́nmɛ nukɔn nukɔntɔn e ɖɔ xó dó Klísu wú lɛ́ɛ wú, bó jɛ nǔ e è nɔ kplɔ́n mɛ e ko su ɖo nǔɖiɖi mɛ lɛ́ɛ ɔ́ kplɔ́n jí. Nǔ e jí nǔkplɔ́nmɛ énɛ́ ɔ́ jínjɔ́n lɛ́ɛ ɖěvo wɛ mǐ ná lɛ́ vɔ ɖ'ayǐ ǎ; yě wɛ nyí ɖɔ: é ɖo dandan mɛ ɖɔ è nǐ lɛ́ kɔ sín azɔ̌ e ma nyí nǔɖé wa nú ǎ lɛ́ɛ gúdo, bó ɖi nǔ nú Mawu; è nǐ lɛ́ kɔ sín nǔkplɔ́nmɛ e kunkplá yɛhwesin lilɛ tɛnmɛ tɛnmɛ lɛ́ɛ kpódó alɔ ɖó mɛ jí kpó ɔ́ gúdo, bó lɛ́ kɔ sín mɛkúkú ná fɔ́n sín kú xó kpódó hwɛɖónúmɛ mavɔ mavɔ sín xó jlájlá kpó gúdo. Mi nú mǐ ná yi nukɔn; é jló Mawu ɔ́, nǔ e mǐ ná wa é nɛ́. Ényí ayǐkúngban e nɔ sɔ́ jǐ e ɖo jija dó jǐ tɔn wɛ hwɛhwɛ ɔ́ sín sin nu, bó nɔ́ ná nǔɖuɖu mɛ e wú è lɛ ɛ lɛ́ɛ ɔ́, Mawu nɔ dó acɛ jǐ tɔn. Amɔ̌, nú ayǐkúngban ɔ́ ka nɔ ná wunkan kpódó gběhan kpó ɔ́, hǔn é nyí ayǐkúngban ɖagbe ǎ; Mawu ná dó nu i sɔ́ ɖo fí ɖé ǎ, bɔ é ná yi vɔ ɖo myɔ mɛ. Mɛvívɛ́ná ce lɛ́ɛ mi, nǔ ɖo mɔ̌ có mǐ ná bó ɖo xó ɖɔ gbɔn mɔ̌ wɛ ɔ́, mǐ ɖeji dó mi wú titewungbe; mǐ tunwun ɖɔ mi ɖo ali ɖagbe ɔ́ jí; hwlɛngán sín ali ɔ́ jí wɛ mi ɖe. Mawu nɔ dó hwɛ agɔ ǎ; é ná wɔn azɔ̌ e mi wa é ǎ; wǎn yíyí e mi ɖe xlɛ́ ɛ gbɔn alɔ e mi dó nɔví klísusɛntɔ́ lɛ́ɛ é gbla mɛ, bó ka lɛ́ kpo ɖo dǐdó yě wɛ ɔ́, é ná wɔn ǎ. Amɔ̌ mǐ jló ɖɔ ɖokpó ɖokpó mitɔn ní ɖe bǐbí dó nǔ wú énɛ́ xlɛ́ káká sɔ́yi vivɔnu, bónú nǔ e ɖó nukún wɛ mi ɖe ɔ́ ná jɛ. Mǐ jló ɖɔ mi ní húzú fɔnlínnɔ ǎ, lo ɔ́, mi ní xwedó xlɛ́ mɛ e ɖi nǔ bó ɖó sɔxwixwe, bó nɔ mɔ nǔ e sín akpá Mawu dó ɔ́ yí, ɖó énɛ́ wú lɛ́ɛ é tɔn. Hwenu e Mawu dó akpá nú Ablaxámu ɔ́, é xwlé nǔ n'i d'é jí. Ée mɛɖé ma ka tíin, bó hú gǎn éyɛ́ Mawu ɔ́, bɔ é ná xwlé ǎ ɔ́, é xwlé é ɖésúnɔ n'i. É ɖɔ: “Un d'akpá nú we ɖɔ: un ná xo ɖɛ dó jǐ towe; un ná ná vǐ gěgé we.” Ablaxámu ɖó sɔxwixwe, bó nɔ te kpɔ́n Mawu, bɔ énɛ́ ɔ́, nǔ e sín akpá Mawu dó ɔ́, é mɔ yí. Ényí gbɛtɔ́ lɛ́ɛ ɖo nǔ ná xwlé wɛ ɔ́, mɛ e hú gǎn yě ɔ́ wɛ yě nɔ xwlé, bɔ nǔ e yě xwlé ɔ́ nɔ nyí gǎnjɛwú, bó nɔ sú nǔ dó nǔdindɔn bǐ ɖo tɛ́ntin yětɔn. Mɛ e ɖó ná mɔ nǔ ɖagbe e sín akpá Mawu dó lɛ́ɛ yí ɔ́, Mawu jló ná lɛ́ ɖe xlɛ́ yě céɖécéɖé d'é jí ɖɔ émí kún ná húzú gbeta émítɔn gbeɖé ó. Énɛ́ ɔ́ wútu wɛ hwenu e é dó akpá ɔ́, é xwlé nǔ d'é jí. Hǔn, nǔ we tíin: akpá e é dó ɔ́ kpó nǔ e é xwlé ɔ́ kpó; nǔ we énɛ́ lɛ́ɛ ɔ́, è sixú ɖyɔ́ yě ǎ, bɔ ɖo nǔ we énɛ́ lɛ́ɛ mɛ ɔ́, Mawu sixú ɖó adingban ǎ. Énɛ́ ɔ́ wú wɛ mǐ mɛ e mɔ bibɛtɛn ɖo Mawu glɔ́ lɛ́ɛ ɔ́, mǐ mɔ akɔ́nkpinkpan ɖaxó, bó ná hɛn nukúnɖíɖó e è sɔ́ ɖó te nú mǐ ɔ́ syɛ́nsyɛ́n. Nukúnɖíɖó énɛ́ ɔ́ nɔ hɛn lǐndɔ̌n mǐtɔn syɛ́nsyɛ́n, lě e gandótɔnu nɔ hɛn tɔjíhún syɛ́nsyɛ́n ɖó te gbɔn é. Nukúnɖíɖó énɛ́ ɔ́ wɛ nyí gǎnjɛwú; é lí dǒ; é wɛ nɔ xo avɔ ɖaxó e è dǒ gbo sinsɛnxɔ sɛ́xwé tɔn mɛ ná ɔ́ zlɛ́ bó nɔ dín yi tɛn mímɛ́ bǐ e ɖo sinsɛnxɔ ɔ́ mɛ ɔ́ mɛ. Fínɛ́ wɛ Jezu jɛ nukɔn nú mǐ, bó yi dó ta mǐtɔn mɛ. É húzú vɔ̌sánú-xwlémawutɔ́ ɖaxó káká sɔ́yi, Mɛlukisedɛ́ki ɖɔhun. Mɛlukisedɛ́ki énɛ́ ɔ́, Salɛ́mu xɔ́sú wɛ é nyí, bó lɛ́ nyí vɔ̌sánú-xwlémawutɔ́ Mawu Ajalɔ̌nlɔn ɔ́ tɔn. Hwenu e Ablaxámu fun ahwan lobo ɖu ɖo axɔ́sú lɛ́ɛ jí, bó lɛ́ kɔ wá xwé ɔ́, Mɛlukisedɛ́ki yi kpé e, bó dó acɛ jǐ tɔn. Ablaxámu ná nǔ e é hɛn sín ahwangbénu é bǐ sín mǎɖówǒ Mɛlukisedɛ́ki. Nyǐkɔ Mɛlukisedɛ́ki ɔ́, tínmɛ tɔn nukɔntɔn ɔ́ wɛ nyí “Axɔ́sú hwɛjijɔnɔ”. Gɔ́ nú énɛ́ ɔ́, é nyí axɔ́sú Salɛ́mu tɔn; tínmɛ tɔn wɛ nyí: “Axɔ́sú fífánɔ”. Mɛlukisedɛ́ki ɔ́, è tunwun tɔ́ tɔn ǎ, è tunwun nɔ tɔn ǎ; è tunwun tɔ́gbó tɔn ɖěbǔ ǎ; è ka ɖɔ jiji tɔn abǐ kú tɔn xó ɖo fí ɖěbǔ ǎ; é cí Mawu ví ɔ́ ɖɔhun; é nyí vɔ̌sánú-xwlémawutɔ́ káká sɔ́yi. Mi kpɔ́n lě e Mɛlukisedɛ́ki ɔ́ nyí nǔɖaxó sɔ é! Tɔ́gbó mǐtɔn Ablaxámu ɖésú ná ɛ mǎɖówǒ nǔ e é hɛn wá sín ahwangbénu ɔ́ tɔn. Mɛ e jɔ ɖo Levíi kún mɛ, bó nyí vɔ̌sánú-xwlémawutɔ́ lɛ́ɛ ɔ́, ɖo sɛ́n ɔ́ mɛ ɔ́, yě ɖó ná nɔ yí mǎɖówǒ nǔ bǐ tɔn ɖo togun Izlayɛ́li tɔn sí. Nú è nǎ ɖɔ ɔ́, yě nɔ yí mǎɖówǒ ɖo nɔví yětɔn lɛ́ɛ sí, có Ablaxámu ví jɛ́n mɛ énɛ́ lɛ́ɛ lɔmɔ̌ nyí. Mɛlukisedɛ́ki nyí Levíi ví ǎ, có é ka yí mǎɖówǒ ɖo Ablaxámu sí; é lɛ́ dó acɛ mɛ e Mawu dó akpá lɛ́ɛ ná ɔ́ jí. Mɛ bǐ tunwun din ɖɔ mɛ e dó acɛ mɛ jí ɔ́ hú gǎn mɛ e jí è dǒ acɛ é; é sɔ́ ɖó xokpɔ́n ǎ. Levíi ví e nɔ yí mǎɖówǒ lɛ́ɛ ɔ́, gbɛtɔ́ wɛ yě nyí, bó nɔ kú; lo ɔ́, Mɛlukisedɛ́ki e yí mǎɖówǒ ɔ́, mɛ e Mawuxówéma ɔ́ ɖe kúnnu ná ɖɔ é ɖo gbɛ ɔ́ wɛ. Nú è nǎ ɖɔ kpowun ɔ́, ée Ablaxámu ná mǎɖówǒ Mɛlukisedɛ́ki ɔ́, Levíi lɔ ná mǎɖówǒ Mɛlukisedɛ́ki gbɔn Ablaxámu jí. Nǔgbó ɔ́, è ko ji Levíi ǎ; amɔ̌, é ɖo tɔ́gbó tɔn Ablaxámu mɛ, hwenu e Mɛlukisedɛ́ki yi kpé Ablaxámu é. Vɔ̌sánú-xwlémawutɔ́ sín azɔ̌ e Levíi lɛ́ɛ nɔ wa é jí wɛ sɛ́n e è nǎ togun Izlayɛ́li tɔn ɔ́ jínjɔ́n. Lo ɔ́, vɔ̌sánú-xwlémawutɔ́ lɛ́ɛ ɔ́, ényí azɔ̌ e yě wa ɔ́ ko nyɔ́ bɔ nǔ bǐ vɔ ɖ'é wú wɛ ɔ́, é sɔ́ ná byɔ́ ɖɔ vɔ̌sánú-xwlémawutɔ́ alɔkpa ɖěvo ní wá ǎ; é sɔ́ ná byɔ́ ɖɔ vɔ̌sánú-xwlémawutɔ́ e cí Mɛlukisedɛ́ki ɖɔhun, bó ma cí Aalɔ́ɔn ɖɔhun ǎ ɔ́ ní wá ǎ. Đó ényí è ɖyɔ̌ vɔ̌sánú-xwlémawutɔ́zɔ́ sín kanfifɔ ɔ́, é ɖo dandan mɛ bɔ è nǎ ɖyɔ́ sɛ́n ɔ́ lɔmɔ̌. Aklúnɔ mǐtɔn e wú è ɖɔ xó énɛ́ lɛ́ɛ dó ɔ́, kún ɖěvo mɛ wɛ é jɔ ɖe, bɔ mɛ ɖěbǔ ɖo kún énɛ́ mɛ, bó wa vɔ̌sánú-xwlémawutɔ́ sín azɔ̌ ɖo vɔ̌sákpe jí kpɔ́n gbeɖé ǎ. È tunwun ganjí ɖɔ Judáa kún mɛ wɛ é jɔ ɖe, bɔ Mɔyízi ka ɖɔ xó ɖěbǔ dó kún énɛ́ wú hwenu e é ɖɔ vɔ̌sánú-xwlémawutɔ́ lɛ́ɛ sín xó é ǎ. Nǔ e jɛ bó lɛ́ ɖe nǔ énɛ́ lɛ́ɛ xlɛ́ céɖécéɖé d'é jí ɔ́ ɖíe: vɔ̌sánú-xwlémawutɔ́ Mɛlukisedɛ́ki ɖɔhun ɖěvo wá. Sɛ́n gbɛtɔ́ tɔn lɛ́ɛ ɖě wɛ è xwedó bó sɔ́ ɛ vɔ̌sánú-xwlémawutɔ́ ǎ; hlɔ̌nhlɔ́n gbɛ maɖókpodó tɔn gbla mɛ wɛ é húzú vɔ̌sánú-xwlémawutɔ́ gbɔn. Nǔgbó ɔ́, Mawuxówéma ɔ́ ɖɔ: “A nǎ nyí vɔ̌sánú-xwlémawutɔ́ káká sɔ́yi Mɛlukisedɛ́ki ɖɔhun.” Ée nǔ nyí mɔ̌ ɔ́, é gbídí sɛ́n xóxó ɔ́, ɖó sɛ́n énɛ́ ɖó gǎn ɖé ǎ, é ka nyí nǔɖé wa nú ǎ. Nǔgbó ɔ́, Mɔyízisɛ́n ɔ́ bló bɔ nǔɖé nyɔ́ káká yi fó ǎ; nukúnɖíɖó ɖagbe ɖé ka wá bó nyɔ́ hú mɔ̌; nukúnɖíɖó énɛ́ wɛ bló bɔ mǐ nɔ sɛkpɔ́ Mawu. Ée lɛ́ hú gǎn mɔ̌ ɔ́ wɛ nyí ɖɔ Mawu xwlé nǔ d'é jí. É ka xwlé nǔɖé dó Levíi lɛ́ɛ jí hwenu e yě húzú vɔ̌sánú-xwlémawutɔ́ é ǎ. Lo ɔ́, Mawu sɔ́ Jezu vɔ̌sánú-xwlémawutɔ́, bó xwlé nǔ d'é jí hwenu e é ɖɔ n'i ɖɔ: “Aklúnɔ xwlé nǔ bó ɖɔ: ‘A nǎ nyí vɔ̌sánú-xwlémawutɔ́ káká sɔ́yi.’ ” É ka ná húzú gbe ǎ. Énɛ́ ɔ́ wú ɔ́, Jezu lɔ nyí akɔjijɛ e nyɔ́ hú akɔjijɛ nukɔntɔn ɔ́ sín gǎnjɛwú nú mǐ. Vogbingbɔn ɖěvo lɛ́ tíin: vɔ̌sánú-xwlémawutɔ́ e jɔ ɖo Levíi kún mɛ lɛ́ɛ ɔ́, yě sukpɔ́; amɔ̌ yě nɔ ɖo kúkú wɛ, bɔ azɔ̌ yětɔn sɔ́ nɔ sixú yi nukɔn ǎ. Lo ɔ́, Jezu ɔ́ ɖo gbɛ tɛgbɛ, bɔ vɔ̌sánú-xwlémawutɔ́ sín azɔ̌ tɔn ɔ́, é ná ɖo wiwa wɛ káká sɔ́yi. Énɛ́ wú wɛ é hɛn ɔ́, é ná hwlɛ́n mɛ e gbɔn jǐ tɔn bó sɛkpɔ́ Mawu lɛ́ɛ é bǐ gǎn, bɔ nǔ bǐ ná vɔ ɖ'é wú sín din káká sɔ́yi, ɖó é ɖo gbɛ tɛgbɛ, bó ná nɔ sa vo nú Mawu dó ta yětɔn mɛ. Hǔn, Jezu wɛ nyí vɔ̌sánú-xwlémawutɔ́ ɖaxó e jɛ xá mǐ é, ɖó é nyí mɛ mímɛ́; é wa nǔ nyanya ɖěbǔ ǎ; hwɛ ɖěbǔ ɖo kɔ n'i ǎ. È sɔ́ ɛ ɖó vo nú hwɛhutɔ́ lɛ́ɛ, bó sɔ́ ɛ dó jǐ aga ɖo sɛ́xwé. É cí vɔ̌sánú-xwlémawutɔ́ ɖaxó ɖě lɛ́ɛ ɖɔhun ǎ: yědɛɛ lɛ́ɛ ɔ́, ayǐhɔ́ngbe ayǐhɔ́ngbe ɔ́, yě nɔ to sá vɔ̌ dó hwɛ e yě ɖésúnɔ hu lɛ́ɛ tamɛ hwɛ̌, có bó nɔ́ wá sá vɔ̌ dó hwɛ e togun ɔ́ hu lɛ́ɛ tamɛ; Jezu ka bló gbɔn mɔ̌ ǎ. Azɔn ɖokpó géé wɛ é sá vɔ̌ hwenu e é sɔ́ éɖée jó é, bɔ xó fó. Mɔyízisɛ́n ɔ́, gbɛtɔ́ wɛ é nɔ sɔ́ vɔ̌sánú-xwlémawutɔ́ ɖaxó; gbɛtɔ́ ka ɖó gǎn ɖé ǎ; lo ɔ́, xó e Mawu ɖɔ bó xwlé nǔ d'é jí ɖo sɛ́n ɔ́ gúdo ɔ́, Mawu ví ɔ́ wɛ é sɔ́ vɔ̌sánú-xwlémawutɔ́ ɖaxó; é ɖó blɔ̌ ǎ káká sɔ́yi. Nǔ e ɖo tají hú ɖě lɛ́ɛ bǐ ɖo nǔ e ɖɔ wɛ mǐ ɖe ɔ́ mɛ ɔ́ ɖíe: Vɔ̌sánú-xwlémawutɔ́ ɖaxó mɔ̌hun wɛ mǐ ɖó, bɔ é jínjɔ́n ɖisíxwé nú axɔ́súzinkpo Mawu susu bǐ nɔ ɔ́ tɔn ɖo sɛ́xwé. É ɖo vɔ̌sánú-xwlémawutɔ́ ɖaxó sín azɔ̌ wa wɛ ɖo Tɛn mímɛ́ bǐ ɔ́ mɛ; Tɛn mímɛ́ bǐ e nyí goxɔ titewungbe e gbɛtɔ́ ma gbá ǎ, bɔ Aklúnɔ gbá é. Vɔ̌sánú-xwlémawutɔ́ ɖaxó ɖěbǔ ɔ́, è nɔ sɔ́ ɛ nú é ná xwlé nǔníná kpó vɔ̌sánú kpó Mawu. Hǔn é ɖo dandan mɛ ɖɔ vɔ̌sánú-xwlémawutɔ́ ɖaxó mǐ lɔ tɔn ní ɖó nǔɖé bó ná xwlé Mawu. Nú ayǐkúngban jí wɛ é ko ɖe ɔ́, é tlɛ ná nyí vɔ̌sánú-xwlémawutɔ́ ǎ, ɖó vɔ̌sánú-xwlémawutɔ́ lɛ́ɛ ɖe, bó nɔ xwlé nǔníná lɛ́ɛ Mawu, lě e Jwifu lɛ́ɛ sín sɛ́n zɔ́n gbɔn é. Azɔ̌ e wa wɛ vɔ̌sánú-xwlémawutɔ́ énɛ́ lɛ́ɛ ɖe ɔ́ nyí xlɛ̌, bó nyí yɛ nǔ e ɖo sɛ́xwé ɔ́ tɔn. É sɔgbe xá nǔ e jɔ dó Mɔyízi ji ɔ́. Hwenu e é ɖo goxɔ ɔ́ na gbá wɛ ɔ́, Mawu ɖɔ n'i ɖɔ: “Ayi towe ní nɔ ée un xlɛ́ we ɖo só jí ɔ́ jí, bó bló bǐ nú é sɔgbe xá.” Amɔ̌ din ɔ́, azɔ̌ e è zɔ̌n Jezu ɔ́ hú gǎn yětɔn tawun, ɖó é wɛ nyí ɖɛ̌mɛnu nú akɔ e Mawu jɛ xá togun tɔn bɔ é nyɔ́ hú nukɔntɔn é; ɖó akɔjijɛ énɛ́ ɔ́ jínjɔ́n akpá e Mawu dó bɔ é nyɔ́ hú ɖě lɛ́ɛ bǐ lɛ́ɛ é jí. Ényí akɔjijɛ nukɔntɔn ɔ́ ma ko ɖó blɔ̌ ǎ ɔ́, é sɔ́ ná byɔ́ ɖɔ è nǎ sɔ́ akɔjijɛ wegɔ́ ɔ́ dó ɖyɔ́ ná ǎ. Lo ɔ́, Mawu mɔ nǔjɛdo ɖo togun tɔn wú, bó ná kɛ nu d'é wú hwenu e é ɖɔ ɖo Mawuxówéma ɔ́ mɛ ɖɔ: “Azǎn ɖé lɛ́ɛ ná wá, bɔ un ná jɛ akɔ yɔ̌yɔ́ ɖé xá Izlayɛ́li kpódó Judáa kpó sín togun. É ná cí akɔ e un jɛ xá tɔ́gbó yětɔn lɛ́ɛ, gbe e gbe un hɛn alɔ yětɔn, bó kplá yě tɔ́n sín Ejípu é ɖɔhun ǎ; yě nɔ gbejí nú akɔjijɛ énɛ́ ɔ́ ǎ. Énɛ́ ɔ́ wú ɔ́, un sɔ́ flín yě ǎ. Azǎn énɛ́ lɛ́ɛ gúdo ɔ́, nǔ e sín akɔ un ná jɛ xá Izlayɛ́li ví lɛ́ɛ é ɖíe: Un ná bló bɔ sɛ́n ce lɛ́ɛ ná nɔ ta yětɔn mɛ; un ná wlán yě dó ayi yětɔn mɛ; un ná nyí Mawu yětɔn, bɔ yě ná nyí togun ce. É sɔ́ ná byɔ́ ɖɔ mɛɖé ná ɖo yě mɛ, bó ná kplɔ́n nǔ mɛ e kpó é kpó nyí to ɖokpó ɔ́ mɛ nu é, abǐ mɛ e nyí nɔví tɔn é, bó ná ɖɔ n'i ɖɔ: ‘Tunwun Aklúnɔ’ ǎ. Đó mɛ bǐ ná tunwun mì, bɛ́ sín mɛ e nyí yɔkpɔ́vú bǐ é jí, káká yi jɛ mɛ e nyí mɛxó bǐ ɔ́ jí. Un ná sɔ́ nǔ e yě wa nyi do lɛ́ɛ kɛ yě; un sɔ́ ná flín hwɛ e yě hu lɛ́ɛ ǎ.” Xó e Aklúnɔ ɖɔ ɔ́ nɛ́. Ée Mawu ɖɔ akɔjijɛ yɔ̌yɔ́ ɔ́ xó ɔ́, é bló bɔ akɔ nukɔntɔn ɔ́ húzú nǔ xóxó; nǔ e ka húzú nǔ xóxó, bó lɛ́ fɔ́n bó ɖo xó dó d'é jí wɛ ɔ́ kó ɖo nǎ bú wɛ. Akɔjijɛ nukɔntɔn ɔ́ ko ɖó tito lɛ́ɛ nú Mawu sinsɛn, bó ɖó sinsɛnxɔ e gbɛtɔ́ sɔ́ alɔ dó gbá é ɖokpó. È gbǎ goxɔ ɖokpó bɔ è nɔ ylɔ́ tɛn nukɔntɔn e ɖo goxɔ ɔ́ mɛ ɔ́ ɖɔ Tɛn mímɛ́. Fí énɛ́ ɔ́ wɛ è fɔ zogbɛ́nhɛnnú kpó távo kpó, kpódó wɔ̌xúxú e è xwlé Mawu lɛ́ɛ kpán ɖó. Tɛn wegɔ́ e ɖo xɔmɛgbovɔ wegɔ́ ɔ́ gúdo ɔ́, è nɔ ylɔ́ ɖɔ Tɛn mímɛ́ bǐ. Vɔ̌sákpe e è blǒ kpó siká kpó bɔ è nɔ dó zǎlínkpɔ́n zo ɖ'é jí ɔ́ ɖo fínɛ́, bɔ akɔjijɛgbá e wú è kɔn siká dó gbɔn fí bǐ ɔ́ ɖo fínɛ́. Sikázɛ́n e mɛ nǔɖuɖu e è nɔ ylɔ́ ɖɔ mǎna ɔ́ ɖe ɔ́ ɖo akɔjijɛgbá ɔ́ mɛ. Aalɔ́ɔn sín kpo e tɔ́n ama ɔ́ kpódó awǐnnyatɛ e jí è wlǎn akɔjijɛxó lɛ́ɛ dó ɔ́ kpán ɖ'é mɛ. Wɛnsagun susunɔ e ɖe xlɛ́ ɖɔ Mawu ɖo tɛn énɛ́ ɔ́ mɛ lɛ́ɛ ɖo akɔjijɛgbá ɔ́ ta, bó kɛ awa yětɔn lɛ́ɛ cyɔ́n fí e è nɔ sá vɔ̌ ɖe, bó nɔ́ mɔ hwɛsɔ́kɛ yí ɖe é. Amɔ̌, hwenu e è nǎ tín nǔ énɛ́ lɛ́ɛ ɖokpó ɖokpó mɛ dó ɔ́ ɖíe ǎ. È to nǔ lɛ́ɛ bǐ gbɔn mɔ̌, bɔ vɔ̌sánú-xwlémawutɔ́ lɛ́ɛ nɔ byɔ́ tɛn nukɔntɔn ɔ́ mɛ ayǐhɔ́ngbe ayǐhɔ́ngbe, bó nɔ wa azɔ̌ yětɔn. Amɔ̌, tɛn wegɔ́ ɔ́, vɔ̌sánú-xwlémawutɔ́ ɖaxó ɔ́ kɛ́ɖɛ́ jɛ́n nɔ byɔ́ mɛ; azɔn ɖokpó wɛ é nɔ byɔ́ mɛ ɖo xwe ɖokpó mɛ. É ɖó ná hɛn kanlin sín hun byɔ́ mɛ, bó ná zé xwlé Mawu dó hwɛ e é ɖésúnɔ hu lɛ́ɛ kpódó ée togun ɔ́ ma tunwun ǎ bo hu lɛ́ɛ kpó tamɛ. Yɛsinsɛn ɔ́ ɖo ɖiɖe xlɛ́ wɛ gbɔn fínɛ́ ɖɔ ényí tɛn nukɔntɔn ɔ́ kpo ɖo te jɛ́n wɛ ɔ́, ali e yi Tɛn mímɛ́ bǐ ɔ́ mɛ ɔ́, è kún ko hun ó. Nǔ énɛ́ ɔ́, xlɛ́ ɖé wɛ é nyí, bó ɖo xó ɖɔ dó hwenu e mǐ ɖe din ɔ́ wú wɛ. Nǔ énɛ́ ɔ́ ɖo tíntín mɛ wɛ ɖɔ nǔ e è nɔ ná Mawu lɛ́ɛ kpó vɔ̌ e è nɔ sɔ́ kanlin dó sá n'i ɔ́ kpó kún sixú bló bónú mɛ e ɖo Mawu sɛn gbɔn mɔ̌ wɛ ɔ́ sín ayi ní mɛ́, bónú nǔ vɔ ɖ'é wú ó. Đó Mawu sinsɛn gbɔn mɔ̌ ɔ́, nǔɖuɖu kpó ahan nunu kpó, kpódó wǔsláslá sín nǔwiwa tɛnmɛ tɛnmɛ lɛ́ɛ kpó sín sɛ́n kpowun wɛ; tito gbɛtɔ́ tɔn kpowun wɛ, bó wa azɔ̌ káká jɛ hwenu e Mawu vɔ́ nǔ lɛ́ɛ bǐ to dó é. Lo ɔ́, Klísu ɔ́ wá, bó nyí vɔ̌sánú-xwlémawutɔ́ ɖaxó nú nǔ ɖagbe e wá lɛ́ɛ, bɔ goxɔ e mɛ é nɔ wa azɔ̌ tɔn lɛ́ɛ ɖe ɔ́ ɖo tají bó sɔgbe, bɔ nǔ bǐ vɔ ɖ'é wú hú ée gbɛtɔ́ gbá ɔ́; é nyí gbɛmɛ fí sín nǔ ǎ. Azɔn ɖokpó géé jɛ́n Klísu byɔ́ Tɛn mímɛ́ bǐ ɔ́ mɛ bɔ xó fó; é ka nyí gbǎgbá sín hun kpó nyibúví sín hun kpó wɛ é hɛn byɔ́ mɛ ǎ; é ɖésúnɔ sín hun wɛ é hɛn bó dó mɔ hwlɛngán mavɔ mavɔ yí nú mǐ. Mɛ e ɖu su lɛ́ɛ ɔ́, gbǎgbá sín hun kpó nyibúsú sín hun kpó wɛ è nɔ dó slá wǔ nú agbaza yětɔn; nyibú asi wínnyáwínnyá wɛ è nɔ dó zo, bó nɔ́ fúnfún afín tɔn yě jǐ, bó nɔ́ dó slá wǔ nú agbaza yětɔn. Ée nǔ nyí mɔ̌ ɔ́, nɛ̌ Klísu sín hun ma ná wa azɔ̌ hú mɔ̌ ǎ gbɔn? Ɖó Klísu ɔ́ sɔ́ éɖée dó sá vɔ̌ nú Mawu vɔ̌sánú maɖóblɔ̌ ɖɔhun gbɔn Yɛ mavɔ mavɔ jí; hun tɔn ná slá wǔ nú ayixa mǐtɔn, bó ná ɖe azɔ̌ e nyí azɔ̌ nyanya ɖ'é mɛ lɛ́ɛ sín mɛ, bónú mǐ ná sixú wa azɔ̌ nú Mawu gbɛɖe ɔ́. Énɛ́ ɔ́ wú wɛ Klísu nyí ɖɛ̌mɛnu nú akɔjijɛ yɔ̌yɔ́ ɔ́ bónú mɛ e Mawu ylɔ́ lɛ́ɛ ná sixú mɔ nyɔ̌ná mavɔ mavɔ e sín akpá é dó nú yě lɛ́ɛ yí. Yě ná mɔ nǔ e sín akpá Mawu dǒ nú yě ɔ́ yí, ɖó Klísu kú, bɔ kú tɔn hwlɛ́n gbɛtɔ́ lɛ́ɛ gán sín hwɛ e yě hu hwenu e yě ɖo akɔjijɛ nukɔntɔn ɔ́ glɔ́ lɛ́ɛ mɛ. Ényí wěma e ɖɔ mɛ e ná ɖu mɛɖé sín gǔ ɔ́ tíin ɔ́, é ɖo dandan mɛ bɔ è nǎ ɖe xlɛ́ ɖɔ mɛ e wlán wěma ɔ́ ko kú. Đó ényí mɛ e wlán wěma énɛ́ ɔ́ kpo ɖo gbɛ jɛ́n wɛ ɔ́, hǔn wěma ɔ́ wa azɔ̌ ǎ; hwenu e mɛ ɔ́ kú ɔ́ jɛ́n wěma ɔ́ ná wa azɔ̌. Énɛ́ wútu wɛ hun to kɔn nyi ayǐ hwɛ̌ cóbɔ akɔjijɛ nukɔntɔn ɔ́ ɖésú bɛ́ azɔ̌. Nǔ nukɔntɔn e Mɔyízi bló ɔ́ wɛ nyí ɖɔ: é xa nǔ e sɛ́n ɔ́ zɔ́n ɖɔ è ní wa lɛ́ɛ bǐ ɖo togun ɔ́ bǐ nukɔn lě e è wlǎn gbɔn dó sɛ́nwéma ɔ́ mɛ é. Énɛ́ ɔ́ gúdo ɔ́, é sɔ́ nyibúví kpódó gbǎgbá kpó sín hun, kpó sin kpó; é sɔ́ izɔ́pukpo, kpó avɔ vɔvɔ cɛ́cɛ́ ɖé kpó, bó sɔ́ dó hun kpó sin kpó ɔ́ mɛ, lobo mì dó sɛ́nwéma ɔ́ wú, bó lɛ́ mì dó togun ɔ́ bǐ wú. É ɖɔ: “Akɔjijɛ e Mawu ɖɔ nú mi ɖɔ mi ní nɔ gbejí ná ɔ́, sin hun wɛ nyí élɔ́.” Mɔ̌ ɖokpó ɔ́, Mɔyízi mì hun dó goxɔ ɔ́ wú, bó mì dó nǔ e è nɔ dó wa sinsɛnzɔ́ ná lɛ́ɛ bǐ wú. Nǔgbó ɔ́, ɖo sɛ́n ɔ́ mɛ ɔ́, nǔ lɛ́ɛ bǐ wɛ è nɔ ɖibla slá wǔ ná kpódó hun kpó, bɔ cóbónú Mawu ná sɔ́ hwɛ kɛ mɛɖé ɔ́, hun jɛ́n nɔ́ kɔn nyi ayǐ. Nǔ énɛ́ lɛ́ɛ e nyí xlɛ́ nǔ e ɖo sɛ́xwé lɛ́ɛ tɔn ɔ́, lě e è ɖǒ ná nɔ slá wǔ nú yě gbɔn é nɛ́. Amɔ̌, nǔ e ɖo sɛ́xwé lɛ́ɛ ɖésú ɔ́, vɔ̌ e è nǎ sá dó slá wǔ nú yědɛɛ lɛ́ɛ ɔ́ ná nyɔ́ hú mɔ̌ titewungbe. Đó Tɛn mímɛ́ e mɛ Klísu byɔ́ ɔ́ nyí Tɛn mímɛ́ ɖé kpowun bɔ gbɛtɔ́ lɛ́ɛ bló, bɔ é nyí xlɛ́ Tɛn mímɛ́ titewungbe ɔ́ tɔn ǎ; lo ɔ́, sɛ́xwé ɖésú wɛ é yi. Fínɛ́ wɛ é ɖo Mawu nukɔn ɖe din, dó ta mǐtɔn mɛ. Jwifu lɛ́ɛ sín vɔ̌sánú-xwlémawutɔ́ ɖaxó ɔ́ nɔ hɛn kanlin e è dǒ sá vɔ̌ ná nú Mawu ɔ́ sín hun, bó nɔ byɔ́ Tɛn mímɛ́ bǐ ɔ́ mɛ xwewú xwewú; Klísu ɔ́ ka byɔ́ mɛ, bó ná sɔ́ éɖée dó sá vɔ̌ ná azɔn gěgé ǎ. Ényí mɔ̌ wɛ é nyí ɔ́, é ɖó ná ko ji ya azɔn mɔ̌kpán sín hwenu e Mawu ɖó gbɛ ɔ́ dó é; nǔgbó ɔ́, azɔn ɖokpó géé jɛ́n é wá, bɔ xó fó, hwenu e nǔ lɛ́ɛ bǐ sín fífó ko sɛ yá é, bó sɔ́ éɖée dó sá vɔ̌ ná, bó ná dó ɖe hwɛhuhu síin. Gbɛtɔ́ ɖěbǔ ɔ́, azɔn ɖokpó géé wɛ é ɖó ná kú, bɔ énɛ́ ɔ́ gúdo ɔ́, Mawu ná ɖɔ hwɛ xá ɛ. Mɔ̌ ɖokpó ɔ́, Klísu sɔ́ éɖée dó sá vɔ̌ ná azɔn ɖokpó géé énɛ́ ɔ́ dó hwɛ gbɛtɔ́ gěgé tɔn tamɛ. É ná wá azɔn wegɔ́ ɔ́, é ka sɔ́ ná nyí hwɛhuhu wɛ é ná wá ɖe síin ǎ; lo ɔ́, mɛ e ɖo te kpɔ́n ɛ ɖɔ é ní wá hwlɛ́n émí gán lɛ́ɛ wɛ é ná wá hwlɛ́n gán. Sɛ́n Jwifu lɛ́ɛ tɔn nyí nǔ ɖagbe e jǎwe lɛ́ɛ sín ninɔmɛ pɛ́pɛ́pɛ́ ǎ; yɛ nǔ lɛ́ɛ tɔn kpowun wɛ. Sɛ́n ɔ́ sixú zɔ́n bɔ mɛ e nɔ sɛkpɔ́ Mawu lɛ́ɛ ná nyí mɛ mímɛ́ bɔ nǔ vɔ ɖ'é wú ǎ; é sixú zɔ́n nú yě ná nyí mɛ mímɛ́ gbɔn vɔ̌ ɖokpó e sá wɛ è nɔ ɖe ayǐhɔ́ngbe ayǐhɔ́ngbe ɖo xwewú xwewú tɛgbɛ ɔ́ gbla mɛ gbeɖé ǎ. Mɛ e nɔ sɛn Mawu gbɔn mɔ̌ lɛ́ɛ ɔ́, ényí è ko slá wǔ titewungbe ɔ́ nú yě azɔn ɖokpó bɔ xó fó wɛ ɔ́, yě sɔ́ ná lɛ́ kpo ɖo linlin wɛ ɖɔ hwɛ émítɔn lɛ́ɛ kpo ɖo kɔ nú émí ǎ, bó ná jó vɔ̌sísá tɛnmɛ tɛnmɛ bǐ dó. Nǔgbó ɔ́, hwɛ e mɛ lɛ́ɛ hu ɔ́ wɛ vɔ̌sísá énɛ́ lɛ́ɛ nɔ flín yě xwewú xwewú. Đó nyibúsú sín hun kpó gbǎgbá sín hun kpó sixú súnsún hwɛ mɛtɔn lɛ́ɛ gbeɖé ǎ. Énɛ́ ɔ́ wú wɛ hwenu e Klísu ɖo gbɛ ɔ́ mɛ ná byɔ́ wɛ ɔ́, é ɖɔ nú Mawu ɖɔ: “A ba vɔ̌sísá ǎ, a ka ba nǔníná ǎ; lo ɔ́, a nǎ agbaza ɖokpó mì. Kanlin e dó zo wɛ è nɔ ɖe ɖo vɔ̌sákpe jí lɛ́ɛ nɔ dó xomɛhunhun nú we ǎ; vɔ̌sísá e nɔ súnsún hwɛ mɛtɔn lɛ́ɛ ka nɔ dó xomɛhunhun nú we ǎ. Bɔ un ɖɔ: ‘Mawu e, nyɛ ɖíe, un ja bó ná wa jlǒ towe lě e è ko wlán gbɔn dó wǔ ce, ɖo sɛ́nwéma ɔ́ mɛ é.’ ” É tó ɖɔ: “A ba vɔ̌sísá ǎ; a ka ba nǔníná ǎ; a ba kanlin e è dǒ zo ɖo vɔ̌sákpe jí é abǐ vɔ̌sísá e nɔ súnsún hwɛ mɛtɔn lɛ́ɛ é ɖě ǎ; nǔ énɛ́ lɛ́ɛ ɖě nɔ hun xomɛ nú we ǎ; có lě e sɛ́n ɔ́ zɔ́n gbɔn ɔ́ wɛ è nɔ sá vɔ̌ énɛ́ lɛ́ɛ gbɔn.” Énɛ́ ɔ́ gúdo ɔ́, é lɛ́ ɖɔ: “Mawu e, nyɛ ɖíe, un ja, bó ná wa jlǒ towe.” Énɛ́ ɔ́, é ɖe vɔ̌sísá xóxó lɛ́ɛ bǐ síin, bó ɖó yɔ̌yɔ́ ɔ́ ayǐ. Đó Jezu Klísu bló nǔ e Mawu jló ɖɔ ní bló é wú ɔ́, è slá wǔ nú mǐ gbɔn agbaza é ɖésúnɔ tɔn e é sɔ́ dó sá vɔ̌ ná azɔn ɖokpó bɔ xó fó ɔ́ gbla mɛ. Vɔ̌sánú-xwlémawutɔ́ ɖé fɔ́n ɔ́, é nɔ ɖo azɔ̌ tɔn wa wɛ; é nɔ ɖo vɔ̌ ɖokpó ɔ́ sá wɛ hwɛhwɛ, có vɔ̌sísá énɛ́ lɛ́ɛ nɔ sixú súnsún hwɛ mɛtɔn lɛ́ɛ síin gbeɖé ǎ. Klísu éyɛ́ ɔ́, vɔ̌ ɖokpó géé wɛ é ka sá dó hwɛ lɛ́ɛ tamɛ, bó yi jínjɔ́n ɖisíxwé nú Mawu, bɔ vɔ̌ énɛ́ e é sá ɔ́ ná ɖo azɔ̌ wa wɛ káká sɔ́yi. Fínɛ́ wɛ é ɖe din, bó ɖo te nú Mawu ná sɔ́ kɛntɔ́ tɔn lɛ́ɛ dó bló afɔɖótɛn tɔn. Đó, gbɔn vɔ̌ ɖokpó géé e Klísu sá ɔ́ gblá mɛ ɔ́, é bló bɔ mɛ e è slá wǔ ná lɛ́ɛ húzú mɛɖeɖóvo, bɔ nǔ bǐ vɔ ɖ'é wú káká sɔ́yi. Bɔ Yɛsinsɛn lɔ ɖe kúnnu tɔn nú mǐ. Nǔgbó ɔ́, é to ɖɔ hwɛ̌ ɖɔ: “Aklúnɔ ɖɔ: ‘ Akɔ e ná jɛ xá yě wɛ un ɖe ɖo azǎn énɛ́ lɛ́ɛ gúdo ɔ́ ɖíe: un ná sɔ́ sɛ́n ce lɛ́ɛ dó ayi mɛ nú yě; un ná wlán yě dó ta yětɔn mɛ.’ ” É lɛ́ ɖɔ: “Un sɔ́ ná flín hwɛ e yě hu lɛ́ɛ ǎ; un ka sɔ́ ná flín nǔ e yě wa nyi do lɛ́ɛ ǎ.” Hǔn, nú è sɔ́ hwɛ kɛ mɛ ɔ́, é sɔ́ byɔ́ ɖɔ è nǐ sá vɔ̌, bó dó mɔ hwɛsɔ́kɛ yí ǎ. Énɛ́ hǔn nɔví ce lɛ́ɛ mi, mǐ ɖó jiɖiɖe kpíkpé ɖɔ mǐ ná yi Tɛn mímɛ́ bǐ ɔ́ mɛ gbɔn hun Jezu tɔn gbla mɛ. É hun ali yɔ̌yɔ́ gbɛɖe ɖé nú mǐ gbɔn xɔmɛgbovɔ e è dǒ gbo goxɔ ɔ́ mɛ ná ɔ́ mɛ; é wɛ nyí ɖɔ gbɔn agbaza é ɖésúnɔ tɔn ɔ́ mɛ. Mǐ ɖó vɔ̌sánú-xwlémawutɔ́ ɖaxó ɖokpó bɔ é kpa acɛ dó Mawu xwé ɔ́ nu. Hǔn, mi nú mǐ ná sɛkpɔ́ Mawu kpódó ayijlɔ́jlɔ́ kpó, kpódó gǎnjɛwú kpíkpé e nǔɖiɖi nɔ ná mɛ ɔ́ kpó, kpódó ayi e è slá wǔ ná bɔ nǔ nyanya ɖěbǔ ma ɖ'é mɛ ǎ é kpó, kpódó agbaza e è zě sin mímɛ́ dó lɛ ná é kpó. Mi nú mǐ ná hɛn nukúnɖíɖó e sín xó jlá wɛ mǐ ɖe ɔ́ syɛ́nsyɛ́n, ɖó Mawu e dó akpá nú mǐ ɔ́ ɖo gbejí. Mi nú mǐ ná kpé nukún dó mǐɖée wú, bó ná flɔ́ wǎn yíyí sín zo dó lanmɛ nú mǐɖée, bó ná ɖó wǎn yíyí, bó ná nɔ flɔ́ ɖagbewiwa sín zo dó lanmɛ nú mǐɖée, bó ná wa ɖagbe. Mǐ ma jó agun e mɛ mǐ nɔ yi é dó, mɛ e ko nɔ bló mɔ̌, bɔ é ko má yě lɛ́ɛ ɖɔhun ó. Lo ɔ́, mǐ ní nɔ ná kanmɛsyɛ́n mǐɖée, ɖó Aklúnɔ sín azǎn ɔ́ ko ɖo sisɛkpɔ́ wɛ lě e mɔ gbɔn wɛ mi ɖe din é. Đó ée mǐ mɔ nukúnnú jɛ nǔ e nyí nǔgbó ɔ́ wú ɔ́, nú mǐ lɛ́ jló bó kpo ɖo hwɛ hu wɛ hǔn, vɔ̌sísá ɖěbǔ sɔ́ tíin bó ná ɖe hwɛ sín kɔ nú mǐ ǎ. É sɔ́ kpo nǔɖé nú mǐ hú mǐ ná ɖo adohu adohu jí, bó ná ɖo te kpɔ́n nǔ e ɖo nǎ jɛ wɛ ɔ́ ǎ. Nǔ énɛ́ wɛ nyí hwɛɖiɖɔ Mawu tɔn kpódó myɔ hɛhɛ e ná sú kún dó nú Mawu sín kɛntɔ́ lɛ́ɛ é kpó. Mɛɖěbǔ gba Mɔyízisɛ́n ɔ́ bónú mɛ we abǐ mɛ atɔn ɖe kúnnu ná ɔ́, è nɔ kú nǔbláwǔ n'i ǎ, è nɔ hu i. Énɛ́ ɔ́, nɛ̌ é ka ná nyí gbɔn nú mɛ e gbɛ́ wǎn nú Mawu ví ɔ́ é lo? Mɛ e sɔ́ akɔjijɛ Mawu tɔn sín hun e gbla mɛ è slá wǔ n'i gbɔn ɔ́ dó mɔ nǔ yǎyá, bó zun Yɛ nǔbláwǔkúnúmɛtɔ́ ɔ́, nɛ̌ é ka ná nyí gbɔn n'i? Mi ɖésúnɔ ɔ́, mi ná ko tunwun ɖɔ tó e è nǎ dɔn nú mɛ énɛ́ ɔ́ ná nylá hú mɛ e gba Mɔyízisɛ́n ɔ́ é tɔn. Đó mǐ tunwun mɛ e ɖɔ: “Nyɛ wɛ nɔ ba hlɔn; nyɛ wɛ ná sú nǔ e è wa ɔ́ sín axɔ́ mɛ” é; mɛ ɖokpó énɛ́ ɔ́ wɛ lɛ́ ɖɔ: “Aklúnɔ ná ɖɔ hwɛ xá togun tɔn.” É hu ado ɖésú ɖɔ è nǐ jɛ Mawu gbɛɖe ɔ́ sín alɔ mɛ. Mi ní flín nǔ e ko gbo mi ɖ'ayǐ hwenu e mi mɔ wěziza Mawu tɔn é; mi ji ya hwenɛ́nu ɖésú, có bó ka syɛ́nlǐn ɖo ahwan nukɔn. Hwe ɖé lɛ́ɛ nu ɔ́, è nɔ ɖo mi zun wɛ, bó nɔ ɖo tagba dó nú mi wɛ ɖo agbawungba. Hwe ɖé lɛ́ɛ nu ɔ́, mi nɔ ɖo gbesisɔ mɛ, bó nɔ ji ya xá mɛ e dó ya ná wɛ è ɖe mi ɖɔhun lɛ́ɛ é. Nǔgbó ɔ́, mi kú nǔbláwǔ nú mɛ e è wlǐ dó gankpá mɛ lɛ́ɛ, bɔ hwenu e è wǎ bɛ́ nǔ mitɔn lɛ́ɛ ɔ́, mi yí gbe ná kpódó xomɛhunhun kpó, ɖó mi tunwun ɖɔ dɔkun e nyɔ́ hú dɔkun énɛ́ lɛ́ɛ, bó nɔ́ nɔ ayǐ káká sɔ́yi ɔ́ ɖo émí sí. Hǔn mi bo ma jó jiɖiɖe e mi ɖó dó Mawu wú ɔ́ dó ó; ɖó ajɔ ɖaxó ɖé ɖ'é mɛ. Nǔ e hu dó mi ɔ́ wɛ nyí ɖɔ mi ná dɛ, bó ná wa jlǒ Mawu tɔn, bó ná mɔ akpá e é dó ɔ́ yí. Nǔgbó ɔ́, lě e Mawuxówéma ɖɔ gbɔn ɔ́: “É lɛ́ kpo hwenu kpɛɖé, kpɛví títí ɖé bɔ mɛ e ɖó ná wá ɔ́ ná wá; é ná lín có bo wá ǎ. Nǔ ɖo mɔ̌ có, mɛ e un mɔ dó mɔ hwɛjijɔnɔ ɖó nǔɖiɖi tɔn wú ɔ́ ná nɔ gbɛ. Amɔ̌ mɛ ɔ́ lɛ́ kɔ ɔ́, nǔ tɔn sɔ́ ná nyɔ́ nukún ce mɛ ǎ.” Mǐ ɖo mɛ e nɔ jó agɔ dó gúdo, bó nɔ yi dɔn lɛ́ɛ mɛ ǎ; lo ɔ́, mǐ ɖó nǔɖiɖi, bó ɖo hwlɛngán sín ali ɔ́ jí. Nǔɖiɖi ɖíɖó wɛ nyí è nǐ ɖeji dó nǔ e ɖó nukún wɛ è ɖe ɔ́ wú; è nǐ gán jɛ nǔ e è ma mɔ ǎ é wú ɖɔ é tíin. Nǔ e gbɛtɔ́ xóxó hwenu tɔn lɛ́ɛ ɖi ɔ́ wɛ zɔ́n bɔ Mawu ɖe kúnnu ɖagbe nú yě. Nǔɖiɖi wɛ zɔ́n bɔ mǐ mɔ nukúnnú jɛ wú ɖɔ Mawu ɔ́, xó tɔn wɛ é dó bló wɛ̌kɛ́ ɔ́ ná; nǔ e è ma sixú mɔ ǎ ɔ́ wɛ é dó bló nǔ e mɔ wɛ è ɖe ɔ́ ná. Nǔɖiɖi e Abɛ́li ɖó ɔ́ wɛ zɔ́n bɔ é sá vɔ̌ e nyɔ́ hú Kanyɛ́ɛ tɔn é nú Mawu. Nǔɖiɖi ɔ́ wɛ zɔ́n bɔ Mawu sɔ́ ɛ dó mɔ hwɛjijɔnɔ ná, ɖó Mawu ɖe kúnnu ɖagbe ɖɔ nǔ e é xwlé émí lɛ́ɛ nyɔ́. Abɛ́li ko kú cóbɔ nǔ e é wa ɔ́ ka kpo ɖo xó ɖɔ wɛ gbɔn nǔɖiɖi e é ɖó ɔ́ gbla mɛ. Nǔɖiɖi e Henɔci ɖó ɔ́ wɛ zɔ́n bɔ é ma kú ǎ. È sɔ́ ɛ yi jǐxwé, bɔ mɛɖé sɔ́ mɔ ɛ ǎ; ɖó Mawu wɛ sɔ́ ɛ yi. Mawuxówéma ɔ́ ɖɔ: cóbónú Mawu ná sɔ́ ɛ yi jǐxwé ɔ́, nǔ tɔn ko nyɔ́ nukún tɔn mɛ. Nǔgbó ɔ́, nú mɛɖé ma ɖó nǔɖiɖi ǎ ɔ́, nǔ tɔn sixú nyɔ́ Mawu nukún mɛ ǎ; ɖó mɛ e sɛkpɔ́ Mawu ɔ́ ɖó ná ɖi nǔ ɖɔ Mawu tíin, bó nɔ ná ajɔ mɛ e ɖo biba ɛ wɛ lɛ́ɛ. Nǔɖiɖi e Nɔwée ɖó ɔ́ wɛ zɔ́n bɔ nǔ e ɖo nǎ jɛ wɛ, bɔ Mawu ɖɔ n'i, bɔ mɛɖé ma ka ɖo mimɔ wɛ ǎ lɛ́ɛ ɔ́, é sɔ́ dó ylɔ́ nǔjɔnǔ. É se tónú nú Mawu, bó bló tɔjíhún ɖokpó, bɔ é kpódó xwédo tɔn kpó byɔ́ mɛ bó gán. Énɛ́ ɔ́, é ɖó hwɛ nú gbɛ ɔ́, bɔ Mawu sɔ́ ɛ dó mɔ hwɛjijɔnɔ gbɔn nǔɖiɖi e é ɖó ɔ́ gbla mɛ. Nǔɖiɖi e Ablaxámu ɖó ɔ́ wɛ zɔ́n bɔ hwenu e Mawu ylɔ̌ ɛ ɔ́, é se tónú n'i, bó ɖidó to e ná ná ɛ wɛ Mawu ɖe, bɔ é ná nyí étɔn ɔ́ mɛ. É gosín to é ɖésúnɔ tɔn mɛ, bó ɖidó, ma tunwun fí e é xwe é. Nǔɖiɖi e Ablaxámu ɖó ɔ́ wɛ zɔ́n bɔ é yi nɔ to e sín akpá Mawu dó n'i ɔ́ mɛ jǒnɔ ɖɔhun; goxɔ mɛ wɛ é nɔ; mɔ̌ ɖokpó ɔ́, Izáki kpó Jakɔ́bu kpó e Mawu dó akpá ɖokpó ɔ́ ná lɛ́ɛ nɔ goxɔ mɛ é ɖɔhun. Đó Ablaxámu ɖo te kpɔ́n toxo ɖaxó e ɖó dodó syɛ́nsyɛ́n, bɔ Mawu ɖésú ɖe wě tɔn bó bló é. Nǔɖiɖi e Sala ɖésú ɖó ɔ́ wɛ zɔ́n bɔ è nǎ ɛ hlɔ̌nhlɔ́n bɔ é mɔ xo, có é ka ko kpo bǐ, ɖó é ɖó nǔɖiɖi ɖɔ Mawu e dó akpá ɔ́ ɖo gbejí. Nǔ énɛ́ wú wɛ nya ɖokpó géé gba kún, bɔ kún tɔn lɛ́ɛ sukpɔ́ káká, bó cí sunví e ɖo jǐxwé lɛ́ɛ ɖɔhun; yě sukpɔ́ káká bo cí kɔ́ e ɖo xutó ɔ́ ɖɔhun, bɔ è sixú xa yě ǎ; có nya énɛ́ ɔ́ ko ɖo kú li jí. Yě mɛ énɛ́ lɛ́ɛ bǐ ɔ́, nǔɖiɖi mɛ wɛ yě bǐ kú dó. Yě mɔ nǔ e sín akpá Mawu dó lɛ́ɛ yí ǎ; yě ka mɔ ɖɔ nǔ énɛ́ lɛ́ɛ ná jɛ bɔ xomɛ hun yě tlala. Yě tunwun ɖɔ jǒnɔ wɛ émí nyí ɖo ayǐkúngban jí fí, bó ɖo wiwa yi wɛ. Mɛ e nɔ ɖɔ xó gbɔn mɔ̌ lɛ́ɛ ɖo ɖiɖe xlɛ́ wɛ ɖɔ émí ɖo to émí ɖésúnɔ tɔn ɔ́ ba wɛ. Ényí to e mɛ yě gosín ɔ́ ko vɛ́ nú yě wɛ ɔ́, yě ná ko lɛ́ mɔ ali tɔn bó lɛ́ kɔ yi. To e nyɔ́ hú to e mɛ yě gosín ɔ́ ba wɛ yě ɖe; to ɔ́ wɛ nyí to yě ɖésúnɔ tɔn ɖo sɛ́xwé. Énɛ́ ɔ́ wú wɛ winnyá ma hu Mawu ɖɔ è nǐ ylɔ́ émí ɖɔ Mawu mɛ énɛ́ lɛ́ɛ tɔn ǎ; ɖó é bló toxo ɖaxó ɖokpó ɖó ɖ'ayǐ nú yě ɖo sɛ́xwé. Nǔɖiɖi e Ablaxámu ɖó ɔ́ wɛ zɔ́n bɔ hwenu e Mawu dó e kpɔ́n ɔ́, é sɔ́ vǐ tɔn Izáki bó ná dó sá vɔ̌ nú Mawu. Ablaxámu wɛ nyí mɛ e Mawu dó akpá ɔ́ ná é; có é ka ɖo gbesisɔ mɛ bó ná sɔ́ vǐ ɖokpónɔ tɔn dó sá vɔ̌ nú Mawu. Mawu ɖɔ nú Ablaxámu ɖɔ: “Kún e sín akpá un dó nú we ɔ́, Izáki jí wɛ a nǎ gba kún ɔ́ gbɔn.” Ablaxámu tunwun ɖɔ Mawu ɖó acɛ bó ná fɔ́n Izáki sín kú. Bónú è nǎ ɖɔ ɔ́, Ablaxámu lɛ́ vɔ́ mɔ vǐ tɔn Izáki kú wɛ é ko kú, bɔ è fɔ́n ɛ wá gbɛ ɖɔhun. Nǔɖiɖi e Izáki ɖó ɔ́ wɛ zɔ́n bɔ é tún acɛ dó Jakɔ́bu kpó Esawu kpó jí, bó ɖɔ lě e nǔ ná nɔ gbɔn nú yě sɔ gúdo ɔ́ nú yě. Nǔɖiɖi e Jakɔ́bu ɖó ɔ́ wɛ zɔ́n bɔ hwenu e é kpo kpɛɖé bɔ é ná kú ɔ́, é xo ɖɛ dó Jozɛ́fu ví lɛ́ɛ ɖokpó ɖokpó jí; kpogɛ tɔn jí wɛ é gán jɛ bó sɛn Mawu. Nǔɖiɖi e Jozɛ́fu ɖó ɔ́ wɛ zɔ́n bɔ ée é kpo kpɛɖé bɔ é ná kú ɔ́, é ɖɔ xó dó hwenu e Izlayɛ́li ví lɛ́ɛ ná gosín Ejípu é wú, bó ɖɔ lě e è nǎ wa xú tɔn lɛ́ɛ sín nǔ gbɔn é. Nǔɖiɖi e mɛ e ji Mɔyízi lɛ́ɛ ɖó ɔ́ wɛ zɔ́n bɔ hwenu e è ji i ɔ́, yě sɔ́ ɛ hwlá xɔ sun atɔn. Yě mɔ ɖɔ vǐ ɔ́ nyɔ́ ɖɛkpɛ; énɛ́ ɔ́ wú ɔ́, yě ɖi xɛsi nú sɛ́n e axɔ́sú ɔ́ dó é gbigba ǎ. Nǔɖiɖi e Mɔyízi ɖó ɔ́ wɛ zɔ́n bɔ hwenu e é su ɔ́, é gbɛ́ ɖɔ è nǐ ma ylɔ́ émí ɖɔ Ejípu xɔ́sú ɔ́ sín vǐ nyɔ̌nu sín vǐ ó. É yí gbe ɖɔ è nǐ dó ya nú émí kpó togun Mawu tɔn kpó; énɛ́ ɔ́ nyɔ́ n'i hú é ní mɔ vǐví e ɖo hwɛhuhu mɛ ɔ́ nú hwenu kpɛɖé. É tunwun ɖɔ nú mɛ lɛ́ɛ gbɛ́ wǎn nú émí lě e yě gbɛ́ wǎn nú Klísu gbɔn ɔ́, é kpé akwɛ́ nú émí hú dɔkun Ejípu tɔn lɛ́ɛ; ɖó nukún tɔn ɖo ajɔ e jǎwe sɔ gúdo ɔ́ wú. Nǔɖiɖi e Mɔyízi ɖó ɔ́ wɛ zɔ́n bɔ é gosín Ejípu ma ɖi xɛsi nú xomɛsin axɔ́sú ɔ́ tɔn. É kpán akɔ́n, ɖi é ɖo éyɛ́ Mawu e è ma nɔ mɔ ǎ é mɔ wɛ ɖɔhun. Nǔɖiɖi e Mɔyízi ɖó ɔ́ wɛ zɔ́n bɔ é ɖó Dǐndínwáyi sín xwe ɔ́ ayǐ, bó ná gbe ɖɔ è nǐ mì hun dó hɔn lɛ́ɛ wú, bónú wɛnsagun e nɔ hu mɛ ɔ́ ma hu nukɔngbéví Izlayɛ́li ví lɛ́ɛ tɔn ó. Nǔɖiɖi e Izlayɛ́li ví lɛ́ɛ ɖó ɔ́ wɛ zɔ́n bɔ yě gbɔn Xu Vɔvɔ ɔ́ mɛ dín, ayǐkúngban xúxú jí gbɔn wɛ yě ɖe ɖɔhun. Lo ɔ́, ée Ejípunu lɛ́ɛ tɛ́nkpɔ́n bó ná bló nǔ ɖokpó ɔ́ é ɔ́, yě kú tɔ. Nǔɖiɖi e Izlayɛ́li ví lɛ́ɛ ɖó ɔ́ wɛ zɔ́n bɔ hwenu e yě ɖi zɔnlin, bó lɛ́ lɛ̌ dó ahohó Jeliko tɔn xɔ azǎn tɛ́nwe ɔ́, ahohó ɔ́ mu. Nǔɖiɖi e Hlaxábu nyɔ̌nu agalɛtɔ́ ɔ́ ɖó ɔ́ wɛ zɔ́n bɔ hwenu e mɛ e ma se tónú nú Mawu ǎ lɛ́ɛ kú ɔ́, éyɛ́ kú ɖě ǎ, ɖó é yí dobanúnǔtɔ́ e Izlayɛ́li ví lɛ́ɛ sɛ́ dó ɔ́, kpódó xomɛnyínyɔ́ kpó. Étɛ́ un ka ná lɛ́ ɖɔ? Đó un gbɛ́ ná ɖɔ xó dó Jedenyɔ́ɔ kpó Balaaki kpó, Sanmusɔ́ɔn kpó Jɛfutée kpó, Davídi kpó Samuwɛ́li kpó, kpódó gbeyíɖɔ Mawu tɔn lɛ́ɛ kpó wú ɔ́, ganmɛ ná hwedó mì. Nǔɖiɖi e yě ɖó ɔ́ zɔ́n bɔ yě fun ahwan, bó ɖu ɖo to gěgé jí; yě wa nǔ e sɔgbe ɔ́, bó mɔ nǔ e sín akpá Mawu dó ɔ́ yí. Nǔɖiɖi e yě ɖó ɔ́ zɔ́n bɔ yě sú kinnikínní lɛ́ɛ sín nu dó. Nǔɖiɖi e yě ɖó ɔ́ zɔ́n bɔ yě xo myɔ e ɖo jiji wɛ hɛhɛ ɔ́ cí; yě gló hwǐ; yě ɖó gǎn ɖé ɖ'ayǐ ǎ, yě ka wá mɔ gǎn. Ahwanfuntɔ́ syɛ́nsyɛ́n wɛ yě wá nyí, bó ɖu ɖo ahwangɔnu to ɖěvo mɛ tɔn lɛ́ɛ jí. Gbɔn nǔɖiɖi gbla mɛ ɔ́, nyɔ̌nu ɖé lɛ́ɛ tíin, bɔ è fɔ́n mɛ yětɔn e kú lɛ́ɛ nú yě. Mɛ ɖé lɛ́ɛ tíin, bɔ è dó ya nú yě, bɔ yě kú, ɖó yě gbɛ́ ɖɔ émí kún ná gosín nǔ e ɖɔ wɛ émí ɖe ɔ́ gúdo ó, bó ná sixú wá fɔ́n sín kú, bó ná mɔ gbɛ e ná nyɔ́ hú gbɛ élɔ́ é. Mɛ ɖé lɛ́ɛ tíin, bɔ è ɖɔ slǎmɛ yě wú, bó xo yě ɖó lanbá wú; è dǒ wlɔ mɛɖé lɛ́ɛ, bó sú yě dó gankpá mɛ. È nyi awǐnnyaglo dó mɛɖé lɛ́ɛ káká bɔ yě kú; è sɔ́ sá dó sɛ́n mɛɖé lɛ́ɛ ɖó we; è sɔ́ hwǐ dó hu mɛɖé lɛ́ɛ ná. Yě ɖó nǔɖé ǎ; gbɔ̌nyú wɛ yě nɔ dó, bó nɔ ɖo flúflú kpé wɛ, bɔ è nɔ ɖo ya dó nú yě wɛ, bó nɔ ɖo tagba dó nú yě wɛ. Gbɛ ɔ́ jɛ xá yě ǎ; yě nɔ ɖo gbětótló mɛ flú gbɔn wɛ, bó nɔ ɖo sókan mɛ sókan mɛ gbɔn wɛ, bó nɔ ɖo sóxo mɛ sóxo mɛ, do mɛ do mɛ gbɔn wɛ. È ɖe kúnnu ɖagbe nú yě ɖó nǔɖiɖi yětɔn wú; có yě ka mɔ nǔ e sín akpá Mawu dó nú yě ɔ́ yí ǎ. Nǔgbó ɔ́, ée Mawu ko sɔ́ nǔɖé ɖ'ayǐ nú mǐ bɔ é nyɔ́ hú mɔ̌ ɔ́, é jló ɖɔ mɛ énɛ́ lɛ́ɛ ní húzú mɛ mímɛ́ bɔ nǔ bǐ ná vɔ ɖ'é wú mǐdɛɛ lɛ́ɛ mɛ vo ǎ. Mǐ lɔmɔ̌ ɔ́, mɛ tobutóbú énɛ́ lɛ́ɛ e ɖe nǔɖiɖi yětɔn xlɛ́ lɛ́ɛ lɛ́ lɛ̌ dó mǐ; hǔn, mǐ ní jó nǔ e nɔ dó tagba nú mǐ ɖo Aklúnɔ lixo ɔ́ bǐ dǒ, bó jó hwɛhuhu e é ma vɛ́ wǔ ná ɖɔ é ní tɛ́ dó mǐ wú ǎ é dó. Mǐ ní dɛ ɖo wezun e è sɔ́ ɖó te nú mǐ bɔ mǐ ɖo kínkán wɛ ɔ́ nu. Mǐ ní sɔ́ nukún mǐtɔn ɖó Jezu jí; é wɛ jɛ nǔɖiɖi mǐtɔn jí; é wɛ ná lɛ́ fó. É yí gbe bɔ è hu i ɖó aklúzu jí; é kpɔ́n winnyá e è nɔ mɔ ɖo kú mɔ̌hunkɔtɔn mɛ ɔ́ ǎ, ɖó é ɖo awǎjijɛ e è sɔ́ ɖó te n'i ɔ́ flín wɛ, bɔ égbé din ɔ́, é ɖo ayǐjínjɔ́n ɖo axɔ́súzinkpo Mawu tɔn kpá ɖo ɖisíxwé. Mi flín lě e é dɛ ɖo gǔ mɔ̌hunkɔtɔn e hwɛhutɔ́ lɛ́ɛ fɔ́n dó jǐ tɔn ɔ́ nu gbɔn é, bónú awakanmɛ ma kú mi, nú nǔ ci kɔ nú mi ó; ɖó ahwan e fun xá hwɛhuhu wɛ mi ɖe ɔ́, mi ko fun káká yi kú ǎ. Xó e Mawu ɖɔ nú mi bó dó dó wǔsyɛ́n lanmɛ nú mi vǐ ɖɔhun ɔ́, mi wɔn wɛ a? Mawu ɖɔ: “Vǐ ce, Aklúnɔ ɖo kplɔ́nkplɔ́n we wɛ hǔn, ma dó vɛ̌ ná ó. A wa nǔ nyi do bónú é ɖo gbǐgbɛ́ nú we wɛ hǔn, ma nú awakanmɛ kú we ó; ɖó mɛ e Aklúnɔ yí wǎn ná ɔ́ wɛ é nɔ kplɔ́n; mɛ e é sɔ́ dó ylɔ́ vǐ ɔ́ wɛ é nɔ dɔn tó ná.” Mi dɛ ɖo ya e ji wɛ mi ɖe lɛ́ɛ nu, tɔ́ wɛ ɖo vǐ kplɔ́n wɛ ɖɔhun; nǔgbó ɔ́, ya énɛ́ lɛ́ɛ ɖe xlɛ́ ɖɔ Mawu ɖo mǐ hɛn wɛ vǐ ɖɔhun; ɖó vǐ tɛ́ wɛ tɔ́ tɔn ma nɔ kplɔ́n ǎ? Ényí é ma kplɔ́n mi vǐ tɔn ɖě lɛ́ɛ bǐ ɖɔhun ǎ ɔ́, hǔn mi nyí vǐ jɔ vǐ ǎ, agaví wɛ mi nyí. Mi nú mǐ ná kpɔ́n nǔ dó tɔ́ mǐtɔn e ɖo ayǐkúngban jí fí lɛ́ɛ wú; yě nɔ kplɔ́n mǐ bɔ mǐ nɔ sí yě. Étɛ́ ka sɔ́ nyí Tɔ́ mǐtɔn e ɖo sɛ́xwé ɔ́ tɔn lo? Mǐ ɖó ná hwíhwɛ́ mǐɖée ɖo glɔ́ tɔn, bó ná sixú nɔ gbɛ. Tɔ́ mǐtɔn ayǐkúngban jí tɔn lɛ́ɛ nɔ kplɔ́n mǐ nú hwenu kpɛɖé, lě e yě mɔ ɖɔ é sɔgbe gbɔn é. Lo ɔ́, Mawu nɔ kplɔ́n mǐ ɖó ɖagbe mǐ ɖésúnɔ tɔn wú, bónú mǐ ná sixú ɖó ɖo mǐmá Mawu tɔn mɛ. Hwenu e è nɔ ɖo mǐ kplɔ́n wɛ tlóló ɔ́, aluwɛ sín nǔ wɛ é nɔ nyí nú mǐ; é nɔ nyí awǎjijɛnú nú mǐ ǎ. É ka wá yá ɔ́, mɛ e è kplɔ́n gbɔn mɔ̌ lɛ́ɛ nɔ mɔ le e ɖ'é mɛ é; le ɔ́ wɛ nyí fífá e è nɔ mɔ ɖo gbɛ jlɔ́jlɔ́ zínzán mɛ é. Mi bo sɔ́ alɔ mitɔn e kúyɛ lɛ́ɛ d'aga; mi ná hlɔ̌nhlɔ́n koli mitɔn e ɖo sísɔ́sísɔ́ wɛ lɛ́ɛ é. Mi ɖe ali jlɔ́jlɔ́ bó gbɔn jí, bónú afɔ e ɖó blɔ̌ ɔ́ ní ma lílɛ́ ó; lo ɔ́, afɔ énɛ́ ní jɛ afɔ tɛnmɛ. Mi dó gǎn, bó nɔ fífá mɛ xá mɛ bǐ, bó zán gbɛ mímɛ́; ɖó, nú mɛɖé ma wa nǔ gbɔn mɔ̌ ǎ ɔ́, é ná sixú mɔ Aklúnɔ ǎ. Mi cɔ́ miɖée, bónú mɛɖé ma sú fɛ́nú Mawu tɔn sín ali dó éɖée ó. Mɛɖěbǔ ní ma cí atín aɖǐvɛ́nɔ e nɔ wú, bó nɔ gba kún kpé fí bǐ, lobɔ aɖǐvɛ́ tɔn nɔ dó azɔn gbɛtɔ́ gěgé ɔ́ ɖɔhun ó. Mɛ ɖé ní ma nyí agalɛtɔ́ abǐ suɖunúmawutɔ́ Esawu ɖɔhun ó; Esawu e kpɔ́n dó nǔɖuɖu ká ɖokpó wú, bó sa vǐɖaxó sín acɛ e é ɖó é. Énɛ́ ɔ́ gúdo ɔ́, lě e mi tunwun gbɔn é ɔ́, é jló ɖɔ tɔ́ émítɔn ní xo ɖɛ dó émí jí; lo ɔ́, è gbɛ́ ɛ, ɖó é sɔ́ mɔ ali ɖěbǔ, bó ná dó lɛ́ kɔ sín nǔ nyanya e é wa ɔ́ gúdo ǎ; é ba ná lɛ́ kɔ sín nǔ nyanya e é wa ɔ́ gúdo kpó avǐ kpó; é ka sɔ́ kpé wú ǎ. Mi sɛkpɔ́ só e wú è hɛn ɔ́, è nǎ ɖ'alɔ ɔ́ Izlayɛ́li ví lɛ́ɛ ɖɔhun ǎ: só Sinayíi tɔn kpó myɔ hɛhɛ e ɖo jiji ɖ'é jí wɛ ɔ́ kpó; mi sɛkpɔ́ zǐnflú e dó ɖ'é jí ɔ́ ǎ; mi sɛkpɔ́ ablu e dó ɖ'é jí ɔ́ ǎ; mi sɛkpɔ́ jɔhɔn ɖaxó e ɖo nyinyi ɖ'é jí wɛ é ǎ. Mi sɛkpɔ́ kpɛn e ɖo nǔ ɖɔ ɖ'é jí wɛ ɔ́ ǎ; mi sɛkpɔ́ gbe e se wɛ è ɖe ɖ'é jí ɔ́ ǎ. Ée Izlayɛ́li ví lɛ́ɛ se gbe énɛ́ ɔ́, yě sa vo nú Mawu ɖɔ é ní ma sɔ́ ɖɔ xó ɖěbǔ nú émí d'é jí ó; ɖó sɛ́n e è dǒ nú yě ɔ́ hú gǎn yě; é wɛ nyí ɖɔ: “Nú mɛ ɖěbǔ ɖó alɔ só ɔ́ wú ɔ́, é ná bo nyí kanlin wɛ ɔ́, è nǎ nyi awǐnnya dó e káká bó ná hu i.” Nǔ énɛ́ dó abaɖa káká bɔ Mɔyízi ɖɔ: “Xɛsi ɖi mì káká bɔ un ɖo sísɔ́sísɔ́ wɛ.” Lo ɔ́, midɛɛ lɛ́ɛ ɔ́, mi sɛkpɔ́ Sinyɔ́ɔ só ɔ́; mi sɛkpɔ́ Jeluzalɛ́mu sɛ́xwé tɔn, ée nyí toxo Mawu gbɛɖe ɔ́ tɔn é, bó sɛkpɔ́ wɛnsagun wɔ̌buwɔ́bú lɛ́ɛ. Mi sɛkpɔ́ Mawu ví nukɔn tɔn e kplé bó ɖo xwe ɖu wɛ, bɔ è wlǎn nyǐkɔ yětɔn ɖó sɛ́xwé lɛ́ɛ é. Mi sɛkpɔ́ Mawu e nɔ ɖɔ hwɛ xá mɛ bǐ e, bó sɛkpɔ́ yɛ mɛ e nyí hwɛjijɔnɔ bɔ Mawu zé yě dó húzú mɛ mímɛ́ bɔ nǔ bǐ vɔ ɖ'é wú lɛ́ɛ tɔn. Mi sɛkpɔ́ Jezu e nyí ɖɛ̌mɛnu nú akɔjijɛ yɔ̌yɔ́ ɔ́ é; bó sɛkpɔ́ hun tɔn e kɔn nyi ayǐ é, hun tɔn énɛ́ e ɖó acɛ hú hun Abɛ́li tɔn é. Mi cɔ́ miɖée bó ma gbɛ́ tó ɖó mɛ e ɖo xó ɖɔ nú mi wɛ é ó. Yě mɛ e gbɛ́ tó ɖó mɛ e ɖo Mawuxó ɖɔ nú yě wɛ ɖo ayǐkúngban jí fí ɔ́, yě gló tódɔnnúmɛ Mawu tɔn ǎ. Étɛ́ ka sɔ́ nyí mǐtɔn lo? Ényí mǐ ɖe kɔ dó mɛ e ɖo xó ɖɔ nú mǐ wɛ sín jǐxwé aga ɔ́, mǐ sixú gló tódɔnnúmɛ Mawu tɔn ǎ. Hwenu e Mawu ɖɔ xó ɔ́, gbe tɔn húnhún ayǐkúngban ɔ́. Amɔ̌ din ɔ́, é dó akpá nú mǐ ɖɔ: “Un ná lɛ́ húnhún ayǐkúngban ɔ́ azɔn ɖokpó d'é jí; é ka sɔ́ ná nyí ayǐkúngban ɔ́ kɛ́ɖɛ́ wɛ un ná húnhún ǎ; un ná húnhún jǐnukúnsin lɔmɔ̌.” Xógbe “un ná lɛ́ húnhún” ɔ́ ɖe xlɛ́ ɖɔ nǔ e Mawu bló lɛ́ɛ ná húnhún, bó ná bú, bónú nǔ e ma sixú húnhún ǎ é ná nɔ ayǐ. Hǔn, mi nú mǐ ná tunwun nǔ e Mawu wa nú mǐ ɔ́ n'i; ɖó é ɖo axɔ́súɖuto e ma sixú húnhún ǎ é ná mǐ wɛ. Mi nú mǐ ná sɛn ɛ lě e mǐ ná sɛn ɛ gbɔn, bɔ é ná nyɔ́ nukún tɔn mɛ é kpó sísí kpó, kpódó xɛsi kpó, bó ná dó ɖe xlɛ́ ɛ ɖɔ mǐ tunwun nǔ e é wa nú mǐ ɔ́ n'i. Đó Mawu mǐtɔn ɔ́, myɔ e nɔ hɛn nǔ gblé ɔ́ wɛ é nyí. Wǎn e yí nú miɖée wɛ mi ɖe nɔví nɔví ɖɔhun ɔ́, mi ma jó dó ó. Mi flín ɖɔ mi ɖó ná nɔ yí yě mɛ e nɔ wá ba jǒnɔ mi lɛ́ɛ é ganjí, ɖó mɛɖé lɛ́ɛ tíin bó ɖo nǔ wa gbɔn mɔ̌ wɛ, bó yí wɛnsagun Mawu tɔn lɛ́ɛ dó xwé gbe cóbó dán ɛ. Mi flín mɛ e ɖo ganxó lɛ́ɛ, mi ɖésúnɔ wɛ ɖo ganxó ɖɔhun. Mi flín mɛ e è ɖo ya dó ná wɛ lɛ́ɛ, ɖó mi ɖésú ɖó agbaza. Asi dida abǐ asú dida ní nyí nǔsísí; asú kpó asi kpó ní nɔ gbejí nú yěɖée. Mawu ná ɖó hwɛ nú mɛ e nɔ ɖo nǔblíblí wa wɛ lɛ́ɛ kpódó mɛ e nɔ ɖo aga lɛ wɛ lɛ́ɛ kpó. Mi ma jó miɖée dó nú wǎn yíyí nú akwɛ́ ɖu ɖo mi jí ó; nǔ e ɖo mi sí ɔ́ ní kpé mi, ɖó Mawu ɖɔ: “Un ná jó we dó gbeɖé ǎ; un ná ɖe alɔ sín kan towe mɛ gbeɖé ǎ. Énɛ́ ɔ́ wú wɛ mǐ hɛn ɔ́, mǐ ná ɖɔ kpódó jiɖiɖe kpó ɖɔ Aklúnɔ wɛ nyí mɛ e nɔ d'alɔ mǐ é. Un ná ɖi xɛsi nú nǔɖé ǎ. Étɛ́ mɛɖé ka sixú wa nú mì.” Mi flín agunnukɔntɔ́ mitɔn xóxó e ɖɔ Mawuxó nú mi lɛ́ɛ é. Mi lin tamɛ dó lě e yě zán gbɛ yětɔn gbɔn ɔ́ kpó lě e yě kú gbɔn ɔ́ kpó wú, bó ɖó nǔɖiɖi yě ɖɔhun. Jezu Klísu ɔ́, nǔ e é nyí sɔ ɔ́ jɛ́n é lɛ́ nyí égbé, bó ná lɛ́ nyí káká sɔ́yi. Mi ma jó miɖée dó bónú kplɔ́n baɖabaɖa tɛnmɛ tɛnmɛ lɛ́ɛ dɔn mi bú ó; é nyɔ́ nú fɛ́nú Mawu tɔn ní bló nú ayixa mǐtɔn ní lí dǒ. Ní ma nyí sɛ́n e è dǒ dó nǔɖuɖu tɛnmɛ tɛnmɛ lɛ́ɛ wú ɔ́ wɛ ná zɔ́n bɔ ayixa mǐtɔn ná lí dǒ ó; mɛ e nɔ nyi sɛ́n énɛ́ lɛ́ɛ nɔ mɔ le ɖé ɖ'é mɛ gbeɖé ǎ. Vɔ̌sánú-xwlémawutɔ́ e nɔ wa azɔ̌ ɖo goxɔ e mɛ Jwifu lɛ́ɛ nɔ sɛn Mawu ɖe lɛ́ɛ mɛ ɔ́ ɖó acɛ e ɖu nǔ e è sɔ́ dó sá vɔ̌ nú Mawu ɖo vɔ̌sákpe mǐtɔn jí é ǎ. Vɔ̌sánú-xwlémawutɔ́ ɖaxó ɔ́ nɔ sɔ́ kanlin e è hu lɛ́ɛ sín hun yi Tɛn mímɛ́ bǐ ɔ́ mɛ, bó nɔ sá vɔ̌ nú Mawu dó hwɛ e togun ɔ́ hu lɛ́ɛ tamɛ. Lo ɔ́, kanlin énɛ́ lɛ́ɛ e è hu ɔ́, è nɔ bɛ yě yi goxɔ lɛ́ɛ gúdo, bó nɔ dó zo. Énɛ́ ɔ́ wútu wɛ Jezu lɔ kú ɖo toxo ɔ́ gúdo, bó ná sɔ́ hun é ɖésúnɔ tɔn dó slá wǔ nú togun ɔ́. Hǔn, mi nú mǐ ná yi toxo ɔ́ gúdo, bó ná ɖu winnyá ɖokpó ɔ́ xá ɛ. Đó mǐ ɖó toxo e nɔ nɔ ayǐ káká sɔ́yi ɔ́ ɖo ayǐkúngban jí fí ǎ; amɔ̌ mǐ ɖo toxo Mawu tɔn e jǎwe ɔ́ ba wɛ. Mi nú mǐ ná kpa susu nú Mawu dó sá vɔ̌ n'i hwebǐnu gbɔn Jezu jí; é wɛ nyí ɖɔ mǐ ní nɔ sɔ́ nu mǐtɔn dó kpa susu nú nyǐkɔ tɔn ɖo togun mɛ agbawungba. Mi ma wɔn bó gɔn ɖagbe wa ó; mi ma wɔn bó gɔn nǔ e ɖo mi sí lɛ́ɛ má xá miɖée ó, ɖó vɔ̌sísá mɔ̌hunkɔtɔn lɛ́ɛ wɛ nɔ́ nyɔ́ Mawu nukún mɛ. Mi se tónú nú agunnukɔntɔ́ mitɔn lɛ́ɛ, bó hwíhwɛ́ miɖée ɖo glɔ́ yětɔn; yě nɔ ɖo nukún kpé dó mi wú wɛ hwebǐnu, ɖó yě ɖó ná ɖó azɔ̌ e yě wa ɔ́ sín gbe nú Mawu. Ényí mi se tónú nú yě ɔ́, yě ná wa azɔ̌ yětɔn kpódó xomɛhunhun kpó; ényí mi ma ka se tónú nú yě ǎ ɔ́, yě ná wa azɔ̌ yětɔn wǔɖéwúɖé; énɛ́ ɔ́, mi ka sɔ́ ná mɔ le ɖěbǔ ɖ'é mɛ ǎ. Mi nɔ ɖo ɖɛ xo nú mǐ wɛ; mǐ ɖeji ɖɔ ayixa mǐtɔn mɛ́, ɖó mǐ ɖó jlǒ bó ná nɔ zán gbɛ ɖagbe ɖo nǔ bǐ mɛ. Đo tají ɔ́, un ɖo byɔ̌byɔ́ mi wɛ ɖɔ mi ní xo ɖɛ nú mì, bónú Mawu ní bló bónú ma wá mi gɔn ɖó yǐyá jí. Mawu fífánɔ ɔ́ fɔ́n lɛ̌ngbɔ́nyitɔ́ ɖaxó Aklúnɔ mǐtɔn Jezu sín mɛkúkú lɛ́ɛ mɛ gbɔn hun akɔjijɛ mavɔ mavɔ ɔ́ tɔn gbla mɛ ɔ́, ní bló bónú mi ná kpé nǔ ɖagbe bǐ wú bó wa, bó dó wa jlǒ tɔn; ní bló nǔ e nyɔ́ nukún tɔn mɛ lɛ́ɛ ɖo mǐ mɛ gbɔn Jezu Klísu jí. Susu nú Jezu Klísu káká sɔ́yi mavɔ mavɔ. Amǐ! Nɔví lɛ́ɛ mi, un ɖo byɔ̌byɔ́ mi wɛ ɖɔ mi ní ɖó sɔxwixwe, bó ɖótó akɔ́nkpinkpan sín xó e un ɖɔ sɛ́ dó mi lɛ́ɛ é; ɖó wěma élɔ́ e un wlán sɛ́ dó mi ɔ́ ɖi ga dín ǎ. Un ka jló nú mi ní tunwun ɖɔ è ko jó nɔví mǐtɔn Timɔtée. Ényí é yá wǔ wá ɔ́, nú un ja mi gɔn ɔ́, un ná kplá ɛ wá. Mi dó gbe agunnukɔntɔ́ mitɔn lɛ́ɛ bǐ, bó dó gbe mɛɖeɖóvo Mawu tɔn lɛ́ɛ bǐ. Nɔví e ɖo Italíi lɛ́ɛ dó gbe sɛ́ dó mi. Fɛ́nú Mawu tɔn ní nɔ kpɔ́ xá mi bǐ. Nyɛ Jaki e nyí azɔ̌watɔ́ Mawu tɔn, bó nyí azɔ̌watɔ́ Aklúnɔ Jezu Klísu tɔn ɔ́ wɛ wlán wěma élɔ́ sɛ́ dó Jwifu klísusɛntɔ́ e gba kpé gbɛ ɔ́ bǐ mɛ lɛ́ɛ é, bó ɖo gbe dó sɛ́ dó yě wɛ. Nɔví ce lɛ́ɛ mi, hwenu e è nǎ ɖo mi dó kpɔ́n wɛ gbɔn alɔkpa lɛ́ɛ bǐ mɛ ɔ́, ní nyí awǎjijɛnú nú mi; ɖó mi tunwun ɖɔ ényí nǔɖiɖi mitɔn lí dǒ ɖo mɛ dó kpɔ́n lɛ́ɛ mɛ ɔ́, é nɔ zɔ́n bɔ è nɔ ɖó suúlu. Amɔ̌, mi nɔ acéjí bónú suúlu e mi ɖó ɔ́ ní wa azɔ̌ kpíkpé, bónú mi ná zin, bó ná jɛ ayǐ ɖo nǔ ɖěbǔ mɛ ǎ. É ka ɖo mɔ̌ có, ényí nǔnywɛ́ hwedó mɛɖé ɖo mi mɛ hǔn, ní byɔ́ Mawu nú é ná ná ɛ; ɖó Mawu nɔ hun alɔ dó ná nǔ mɛ bǐ kpó xomɛhunhun kpó. Amɔ̌, mɛ ɔ́ ní byɔ́ kpó nǔɖiɖi kpó ma xo nǔ kpɔ́n; ɖó mɛ e nɔ xo nǔ kpɔ́n ɔ́ cí aslɔkɛ́ e sí te ɖo xu jí, bɔ jɔhɔn nɔ dó alɔ mɛ, bó nɔ xo dó ɖisí, bó nɔ xo dó amyɔ é ɖɔhun. Mɛ mɔ̌hunkɔtɔn ní ma lin ɖɔ émí ná mɔ nǔɖé yí ɖo Aklúnɔ sí ó; ɖó, ɖo nǔwiwa tɔn lɛ́ɛ mɛ ɔ́, ayi tɔn nɔ nɔ fí ɖokpó ǎ; é ka ɖó jiɖiɖe dó nǔ e wa wɛ é ɖe ɔ́ ɖě wú ǎ. Nɔví e nyí wamamɔnɔ ɔ́ ní tɛ afɔ ayǐ, ɖó Mawu ɖo sísɔ́ ɛ su wɛ; nɔví e nyí dɔkunnɔ ɔ́ ní tɛ afɔ ayǐ ɖó Mawu ɖo sísɔ́ ɛ hwe wɛ. Nǔgbó ɔ́, dɔkunnɔ ɔ́ sín gbɛ ná wá yi gběhan sɛ́ ɖɔhun. Hwe nɔ tɔ́n kpó zozo ɖaxó ɖé kpó, bó nɔ fyɔ́ gběhan ɔ́, bɔ sɛ́ ɔ́ nɔ jɛ ayǐ, bɔ ɖɛkpɛ tɔn nɔ bú. Mɔ̌ ɖokpó ɔ́, dɔkunnɔ ɔ́ ná jɛ ayǐ ɖo nǔ e é nɔ wa lɛ́ɛ mɛ. Nǔ nyɔ́ nú mɛ e nɔ syɛ́nlǐn ɖo mɛdókpɔ́n hwenu é; ɖó nú é ɖe lǐnsyɛ́nsyɛ́n tɔn xlɛ́ gúdo ɔ́, é ná mɔ gbɛ jɔ gbɛ yí; gbɛ jɔ gbɛ énɛ́ wɛ nyí ajɔ e sín akpá Mawu dó nú mɛ e yí wǎn n'i lɛ́ɛ é. Hwenu e mɛɖé ná jɛ tɛ́nkpɔ́n mɛ ɔ́, ní ma ɖɔ Mawu wɛ ɖo émí tɛ́nkpɔ́n wɛ ó. Đó nǔ nyanya sixú tɛ́n Mawu kpɔ́n ǎ; Mawu ɖésú ka nɔ tɛ́n mɛ ɖěbǔ kpɔ́n ǎ. Lo ɔ́, è nɔ jɛ tɛ́nkpɔ́n mɛ hwenu e jlǒ nyanya mɛ ɖésúnɔ tɔn dɔn mɛ, bɔ è jɛ mɔ mɛ é. Énɛ́ ɔ́ gúdo ɔ́, jlǒ nyanya ɔ́ nɔ ji hwɛhuhu, bɔ hwɛhuhu ɔ́ wá dó ɖɔ do bǐ ɔ́, é nɔ ji kú. Nɔví ce vívɛ́ná lɛ́ɛ mi, è ma blɛ́ mi ó. Nǔníná ɖagbe ɖagbe bǐ, kpó nǔnámɛ e nǔ vɔ ɖ'é wú ɔ́ bǐ kpó ɔ́, sɛ́xwé wɛ yě nɔ gosín; yě nɔ jɛ te sín Mawu e bló nǔ e ɖo jǐxwé bó nɔ ná wěziza lɛ́ɛ é gɔ́n; Mawu nɔ húzú ǎ; é ɖo ɖěbǔ ɔ́, é nɔ dó zǐnflú ǎ. Đo é ɖésúnɔ sín jlǒ mɛ ɔ́, é ná gbɛ jɔ gbɛ mǐ gbɔn xó tɔn e nyí nǔgbó ɔ́ gbla mɛ, bónú mǐ ná nyí mɛ nukɔn nukɔntɔn lɛ́ɛ ɖo nǔɖíɖó tɔn lɛ́ɛ bǐ mɛ. Nɔví vívɛ́ná lɛ́ɛ mi, mi flín xó élɔ́ ganjí: mɛ ɖokpó ɖokpó ɖó ná nɔ ɖo gbesisɔ mɛ, bó ná nɔ se Mawuxó ɔ́; amɔ̌ ní ma nɔ zɔn xó jí ó; ní ma ka nɔ yá wǔ sin xomɛ ó; ɖó mɛ e sin xomɛ ɔ́ nɔ wa nǔ e sɔgbe ɖo Mawu nukún mɛ é ǎ. Énɛ́ ɔ́ wútu ɔ́, mi ní jó nǔ e ná hɛn mɛ kwíji é bǐ kpódó azɔ̌ nyanya bǐ kpán dó. Mi yí xó e Mawu sɔ́ dó ayi mitɔn mɛ ɔ́ kpó xomɛ fífá kpó; ɖó xó ɔ́ hɛn ɔ́, é ná hwlɛ́n mi gán. Mi ma ɖo miɖée blɛ́ wɛ, bó ɖo Mawuxó ɔ́ ɖótó wɛ kpowun ó; azɔ̌ wɛ mi ná nɔ zé dó wa ná titewungbe. Đó mɛ e nɔ se Mawuxó ɔ́, bó ma nɔ zé dó wa azɔ̌ ná ǎ ɔ́ cí mɛ e ɖo nǔkpɛ́n mɛ kpɔ́n wɛ, bó mɔ lě e é ɖésúnɔ ɖe gbɔn é ɖɔhun. Ée é kpɔ́n éɖée gúdo ɔ́, é ɖidó, bó wɔn lě e é ɖe gbɔn ɔ́ tlóló. Lo ɔ́, mɛ e nɔ gbéjé sɛ́n ma ɖó blɔ̌ e nɔ ɖe mǐ sín mɛ kannu ɔ́ kpɔ́n céɖécéɖé, bó nɔ ɖó kan d'é wú, lobo ma nɔ ɖótó kpowun, bó nɔ wɔn ǎ, bó nɔ bló ɖ'é jí ɔ́, Mawu ná xo ɖɛ dó mɛ énɛ́ ɔ́ jí, ɖo nǔ e é nɔ wa ɔ́ mɛ. Ényí mɛɖé mɔ ɖɔ émí nyí sinsɛnnɔ, bó ma ka nɔ hɛn nu tɔn ǎ ɔ́, éɖée blɛ́ wɛ é ɖe; sinsɛn tɔn nyí nǔɖéwanú ǎ. Sinsɛn e nyí sinsɛn mímɛ́, sinsɛn nǔgbó nǔgbó ɖo Mawu Tɔ́ ɔ́ nukɔn ɔ́ ɖíe: è nǐ kpé nukún dó tɔ́cyɔvǐ nɔcyɔvǐ lɛ́ɛ kpó asúkúsi lɛ́ɛ kpó wú ɖo wǔvɛ́ yětɔn lɛ́ɛ mɛ; è nǐ cɔ́ mɛɖée dó nǔ e wa wɛ mɛ e nyí gbɛ ɔ́ tɔn lɛ́ɛ ɖe lɛ́ɛ wú, bó ma hɛn mɛɖée blí ó. Nɔví ce lɛ́ɛ mi, mi mɛ e nɔ zán gbɛ mitɔn ɖo nǔɖiɖi e mi ɖó nú Aklúnɔ mǐtɔn Jezu Klísu susunɔ ɔ́ mɛ lɛ́ɛ ɔ́, mi ɖó ná ɖe mɛɖé ɖó vo ɖo mɛɖé mɛ ǎ. È nǐ ɖɔ nya dɔkunnɔ ɖé dó sikálɔkɛ́, bó dó awu ɖagbe ɖagbe ɖé, lobo byɔ́ agun mitɔn mɛ; nya wamamɔnɔ ɖé lɔ byɔ́ agun mitɔn mɛ, bó ɖo awu kíjá ɖé mɛ. Ée yě byɔ́ agun ɔ́ mɛ ɔ́, mi ɖó sísí titewungbe ɖé nú nya e dó awu ɖagbe ɖagbe ɔ́, bó ɖɔ n'i ɖɔ: “Wǎ jínjɔ́n fí, ɖo susu sín tɛn élɔ́ mɛ;” bó ka ɖɔ nú wamamɔnɔ ɔ́ ɖɔ: “Hwɛ ɔ́, nɔ te ɖo fínɛ́”, abǐ “Jǐnjɔ́n kɔ́ mɛ, ɖo afɔ ce kpá.” Ényí mi nɔ wa nǔ gbɔn mɔ̌ hǔn, mɛ ɖě ɖe ɖó vo nú mɛ ɖě wɛ mi ɖe nɛ́; linlin nyanya e ayi mitɔn kplɔ́n mi ɔ́ wɛ mi nɔ dó wa nǔ ná. Nɔví ce vívɛ́ná lɛ́ɛ mi, mi ɖótó: Mawu cyán wamamɔnɔ gbɛ élɔ́ mɛ tɔn lɛ́ɛ, bónú yě ná nyí dɔkunnɔ ɖo nǔɖiɖi mɛ, bó ná nyí axɔ́súɖuto e sín akpá e é dó nú mɛ e yí wǎn n'i lɛ́ɛ ɔ́ sín vǐ. Lo ɔ́, midɛɛ lɛ́ɛ ɔ́, mi gbɛ́ wǎn nú wamamɔnɔ! È ma ka nyí dɔkunnɔ lɛ́ɛ wɛ nɔ ɖo mi táfú wɛ, bó nɔ ɖo mi dɔn yi hwɛ nukɔn wɛ ǎ cé? Yě wɛ nɔ nylá nu dó nyǐkɔ ɖagbe ɖagbe énɛ́ e Mawu ná mǐ ɔ́ wú ǎ cé? Nǔgbó ɔ́, nú mi nɔ nyi axɔ́súɖuto Mawu tɔn sín sɛ́n ɔ́ lě e Mawuxówéma ɔ́ ɖɔ gbɔn ɔ́, nǔ ɖagbe wa wɛ mi ɖe; é wɛ nyí ɖɔ: “Yǐ wǎn nú nɔzo towe hwi ɖésúnɔ ɖɔhun”. Amɔ̌, nú mi nɔ ɖe mɛ ɖě ɖó vo nú mɛ ɖě hǔn, hwɛ hu wɛ mi ɖe, bɔ sɛ́n ɔ́ ɖo hwɛ ɖó nú mi wɛ, ɖó tóli vɛ́ nú sɛ́n ɔ́ wɛ mi ɖe. Đó nú mɛɖé vɛ́ tóli nú nǔ e sɛ́n ɔ́ zɔ́n lɛ́ɛ ɖokpó géé ɔ́, nǔ e sɛ́n ɔ́ zɔ́n lɛ́ɛ bǐ wɛ é vɛ́ tóli ná. Nǔgbó ɔ́, mɛ e ɖɔ: “Ma lɛ aga ó” ɔ́, é ɖokpó ɔ́ wɛ lɛ́ ɖɔ: “Ma hu mɛ ó.” Énɛ́ ɔ́ wú ɔ́, ényí a na bo ma lɛ aga ǎ, bó ka hu mɛ ɔ́, sɛ́n wɛ a gba. Mi nɔ ɖɔ xó, bó nɔ wa nǔ mɛ e è ɖǒ ná zé sɛ́n e nɔ ɖe mɛ sín mɛ kannu ɔ́ dó ɖɔ hwɛ xá é ɖɔhun. Đó mɛ e ma kú nǔbláwǔ nú mɛ ɖě lɛ́ɛ ǎ ɔ́, Mawu ná kú nǔbláwǔ n'i hwenu e è nǎ ɖɔ hwɛ xá ɛ ɔ́ ǎ; lo ɔ́, nǔbláwǔkúnúmɛ ná ɖu ɖo hwɛɖiɖɔ jí. Nɔví ce lɛ́ɛ mi, ényí mɛɖé ɖɔ: “Un ɖó nǔɖiɖi” bó ma nɔ ɖe xlɛ́ ɖo nǔwiwa tɔn lɛ́ɛ mɛ ǎ ɔ́, aniwanú wɛ nǔɖiɖi énɛ́ ká nyí? Nǔɖiɖi énɛ́ sixú hwlɛ́n ɛ gán a? È nǐ ɖɔ avɔ abǐ nǔɖuɖu hwedó nɔví súnnu abǐ nɔví nyɔ̌nu ɖé, nú mi ma ná nǔ e ɖo tají bɔ yě ná nɔ gbɛ ɔ́ yě ǎ, lobo ɖɔ nú yě ɖɔ: “Mi ná yi ɖo fífá mɛ; mi dó awu ganjí, bó ɖu nǔ ní kpé mi” ɔ́, ani wɛ é ná wa nú yě? Lě e é ɖe gbɔn nú nǔɖiɖi ɔ́ nɛ́: ényí é ma nɔ ɖe éɖée xlɛ́ gbɔn nǔwiwa lɛ́ɛ mɛ ǎ ɔ́, nǔɖiɖi kúkú wɛ é nyí ɖo éɖée mɛ. Amɔ̌, nú mɛɖé ɖɔ: “A ɖǒ nǔɖiɖi, bɔ nyɛ ɖó nǔwiwa lɛ́ɛ” ɔ́, nyɛ ná ɖɔ n'i ɖɔ: “Xlɛ́ lě e nǔɖiɖi towe sixú tíin nǔwiwa lɛ́ɛ mɛ vo gbɔn é mi; énɛ́ ɔ́, nyɛ ná xlɛ́ nǔɖiɖi ce we gbɔn nǔwiwa ce lɛ́ɛ mɛ.” A ɖi nǔ ɖɔ Mawu ɖokpó géé wɛ ɖe; é nyɔ́ ganjí! Yɛ nyanya lɛ́ɛ lɔ ɖi nǔ ɖɔ Mawu ɖokpó géé wɛ ɖe, bɔ xɛsi nɔ ɖi yě, bɔ yě nɔ sísɔ́. Ayixamasɔgbenánɔ! A jlǒ ɖɔ è nǐ ɖe lě e nǔɖiɖi e ma nɔ wa nǔ ǎ ɔ́ nyí nǔ yǎyá gbɔn ɔ́ xlɛ́ we a? Tɔ́gbó mǐtɔn Ablaxámu ɔ́, nɛ̌ Mawu ka mɔ ɛ dó mɔ hwɛjijɔnɔ ná gbɔn? Mawu mɔ ɛ dó mɔ hwɛjijɔnɔ ná ɖó nǔwiwa tɔn lɛ́ɛ wú; ɖó é sɔ́ vǐ tɔn Izáki xwlé Mawu ɖo vɔ̌sákpe jí. A mɔ a? Nǔɖiɖi tɔn kpó nǔwiwa tɔn lɛ́ɛ kpó wa azɔ̌ ɖó kpɔ́, bɔ nǔɖiɖi tɔn húzú nǔɖiɖi titewungbe, ɖó nǔɖiɖi tɔn kpó nǔwiwa tɔn lɛ́ɛ kpó nɔ wa azɔ̌ ɖó kpɔ́. Énɛ́ ɔ́, nǔ e è wlǎn dó Mawuxówéma ɔ́ mɛ ɔ́ jɛ; é wɛ nyí ɖɔ: “Ablaxámu ɖi nǔ nú Mawu, bɔ Mawu kpɔ́n dó nǔɖiɖi tɔn wú, bó mɔ ɛ dó mɔ hwɛjijɔnɔ ná.” Énɛ́ ɔ́, è nɔ ylɔ́ ɛ ɖɔ Mawu xɔ́ntɔn. Mi mɔ din ɖɔ Mawu nɔ sɔ́ gbɛtɔ́ dó mɔ hwɛjijɔnɔ ná ɖó nǔwiwa tɔn lɛ́ɛ wú; é nyí nǔɖiɖi e é ɖó ɔ́ kɛ́ɖɛ́ wú wɛ ǎ. Mɔ̌ ɖokpó ɔ́ wɛ é nyí nú Hlaxábu agalɛtɔ́ ɔ́. Mawu sɔ́ ɛ dó mɔ hwɛjijɔnɔ ná ɖó nǔwiwa tɔn lɛ́ɛ wú; é wɛ yí dobanúnǔtɔ́ lɛ́ɛ dó xwé gbe, lobo dó alɔ yě, bɔ yě gbɔn ali ɖěvo bo yi. Nǔgbó ɔ́, lě e agbaza e mɛ lǐndɔ̌n ma ɖe ǎ ɔ́ nyí nǔkúkú gbɔn ɔ́, mɔ̌ ɖokpó ɔ́ wɛ nǔɖiɖi e ma nɔ ɖe éɖée xlɛ́ gbɔn nǔwiwa lɛ́ɛ mɛ ǎ ɔ́ nyí nǔkúkú gbɔn. Nɔví ce lɛ́ɛ mi, mi mɛ gěgé ní ma ba ná nyí nǔkplɔ́nmɛtɔ́ ó; ɖó mi tunwun ɖɔ mǐ mɛ nǔkplɔ́nmɛtɔ́ lɛ́ɛ ɔ́, Mawu na ɖɔ hwɛ xá mǐ, bɔ é ná syɛ́n hú mɛ ɖě lɛ́ɛ tɔn ɖésú. Mǐ mɛ bǐ wɛ nɔ wa nǔ nyi do gbɔn alɔkpa gěgé mɛ. Ényí mɛɖé ma wa nǔ nyi do gbeɖé ɖo xó ɖiɖɔ tɔn lɛ́ɛ mɛ ǎ ɔ́, mɛ ma ɖó blɔ̌ ɖo wǔ wɛ nyí mɛ énɛ́; mɛ énɛ́ hɛn ɔ́, é ná lɛ́ ɖu ɖo agbaza éɖée tɔn bǐ jǐ. Mǐ nɔ dó gan nu nú sɔ́ lɛ́ɛ, bónú yě na sixú se tónú nú mǐ; énɛ́ ɔ́, mǐ ná dɔn yě yi fí e jló mǐ é. Abǐ mi kpɔ́n nǔ dó tɔjíhún lɛ́ɛ wú; yě d'agba sɔ mɔ̌, bɔ jɔhɔn ɖaxó nɔ ɖo yě sísɛ́ wɛ có, nǔ e è nɔ dó jlɔ́ ali nú yě ɔ́, nǔ kpɛví títí ɖé wɛ, bɔ tɔjíhúnkuntɔ́ ɔ́ nɔ dó jlɔ́ ali nú yě ɖidó fí e jló e é. Mɔ̌ ɖokpó ɔ́, ɖɛ̌ ɔ́, agbaza sín wǔjɔnú kpɛví ɖé wɛ é nyí; lo ɔ́, é hɛn ɔ́, é ná zé nǔ ɖaxó ɖaxó dó jlá ajɔ̌ nú éɖée. Mi kpɔ́n lě e myɔ kpɛví títí ɖé ko kpé bó ná dó zunkan ɖaxó zo gbɔn é! Đɛ̌ lɔmɔ̌ ɔ́, myɔ wɛ é nyí. É cí gbɛ e nǔ nyanya kpa acɛ ná ɔ́ ɖɔhun, bó ɖó tɛnmɛ tɔn ɖo agbaza mǐtɔn mɛ; é nɔ hɛn mǐ ɖésúnɔ ɔ́ bǐ blí; é nɔ zé jeyɛ́nu sín myɔ e ɖo é ɖésúnɔ ji wɛ ɔ́ dó fyɔ́ gbɛzán mǐtɔn ɔ́ bǐ ná. Gbɛtɔ́ hɛn ɔ́, é ná dé gběkanlin alɔkpa alɔkpa lɛ́ɛ, xɛ alɔkpa alɔkpa lɛ́ɛ, kanlin alɔkpa alɔkpa e è nɔ sá lɛ́ɛ, kpó hweví alɔkpa alɔkpa lɛ́ɛ kpó, lobo ka dé yě nǔgbó. Lo ɔ́, gbɛtɔ́ ɖěbǔ kpé wú, bó dé ɖɛ̌ tɔn gbeɖé ǎ; nǔ nyanya wɛ é nyí bó ɖo azɔ̌ wa wɛ hwebǐnu; aɖǐ e nɔ hu mɛ ɔ́ wɛ gɔ́. É wɛ mǐ nɔ zé dó dó kú nú Aklúnɔ Tɔ́ mǐtɔn; é wɛ mǐ ka nɔ lɛ́ zé dó dó nu gbɛtɔ́ e Mawu bló, bɔ é nyí akpajlɛ́ tɔn ɔ́ ná. Kúdónúmɛ sín xó kpó nudómɛ sín xó kpó nɔ tɔ́n sín nu ɖokpó ɔ́ mɛ. Nɔví ce lɛ́ɛ mi, é ɖó ná nyí mɔ̌ ǎ. Tɔjɔtɛn ɖé nɔ tɔ́n sin e víví é kpó sin e vɛ́ ɔ́ kpó gbɔn ali ɖokpó ɔ́ nu ǎ. Nɔví ce lɛ́ɛ mi, fígitín ɖé sixú sɛ́n olívu ǎ; vǐwuntín ɖé sixú sɛ́n fígi ǎ; mɔ̌ ɖokpó ɔ́, tɔjɔtɛn e sín sin nɔ vɛ́ jɛ ɔ́ sixú ná sin víví ǎ. Mɛ ɖé ɖo mi mɛ, bó tunwun nǔ, bó lɛ́ ɖó nǔnywɛ́ a? Ní bó ɖe xlɛ́ gbɔn gbɛ ɖagbe e é nɔ zán ɔ́ gbla mɛ, bó ɖe xlɛ́ gbɔn nǔ e é nɔ wa ɖo mɛɖée sɔ́ hwe kpó nǔnywɛ́ kpó mɛ lɛ́ɛ gbla mɛ. Lo ɔ́, ényí wǔhwinhwan baɖabaɖa kpó agbahwlɛ́nxámɛ sín ayixa kpó ɖo xomɛ nú mi hǔn, mi ma jlá ajɔ̌ nú miɖée ó; mi ma gbɛ́ nǔgbó ɖɔ, lobo ɖó nǔvú ó. Nǔnywɛ́ mɔ̌hunkɔtɔn gosín Mawu gɔn ǎ; gbɛ élɔ́ kpó gbɛtɔ́ nyínyí kpó tɔn wɛ é nyí; awǒvi gɔ́n wɛ é gosín. Đó fí e wǔhwinhwan ɖe, bɔ agbahwlɛ́nxámɛ sín ayixa ɖe ɔ́, nǔ hannyahannya wiwa kpó nǔ nyanya wiwa tɛnmɛ tɛnmɛ bǐ kpó lɔ ɖo fínɛ́. Lo ɔ́, nǔnywɛ́ e gosín Mawu gɔ́n ɔ́, nǔ mímɛ́ wɛ é to nyí hwɛ̌; énɛ́ ɔ́ gúdo ɔ́, é nɔ ba tagba ǎ; é fá bó nɔ lɛ́ hun xomɛ dó wa nǔ nú mɛ; é nyɔ́ xomɛ ɖésú, bó nɔ wa nǔ ɖagbe lɛ́ɛ; é nɔ nɔ mɛɖé jí ǎ; é ka nɔ wa yɛmɛnú ǎ. Mɛ e nɔ ɖe fífá sín ali lɛ́ lɛ̌ dó yěɖée lɛ́ɛ ɔ́, fífá mɛ wɛ yě nɔ dó nǔ dó, bɔ jinukún e yě nɔ ya ɔ́ nyí gbɛ jlɔ́jlɔ́. Fítɛ́ ahwan e ɖo tɛ́ntin mitɔn lɛ́ɛ kpódó jlɛ e ɖo tɛ́ntin mitɔn lɛ́ɛ kpó ka nɔ gosín? Nǔjlómɛ díngan mitɔn e ɖo ahwan fun wɛ hwebǐnu ɖo agbaza mitɔn mɛ lɛ́ɛ mɛ wɛ yě nɔ gosín. Mi nɔ jló mɛɖévonú; lo ɔ́, mi sixú mɔ ǎ; bɔ énɛ́ ɔ́ wú ɔ́, mi ɖo gbesisɔ mɛ, bó ná hu mɛ; nǔ nɔ jló mi; mi ka sixú mɔ ǎ, bɔ énɛ́ ɔ́ nɔ́ zɔ́n bɔ mi nɔ jɛ jlɛ ɖɔ jí, bó nɔ jɛ ahwan fun jí. Mi nɔ mɔ nǔ e ba wɛ mi ɖe ɔ́ ǎ, ɖó mi nɔ byɔ́ Mawu ǎ. Mi na bo byɔ́ ɔ́, mi nɔ mɔ ǎ, ɖó ayixa nyanya wɛ mi nɔ dó byɔ́: nǔ e byɔ́ wɛ mi ɖe ɔ́, mi jló ná zán nú mi ɖésúnɔ sín gbɛɖuɖu. Nǔ gbejímánɔ-númawutɔ́ élɔ́ lɛ́ɛ! Mi tunwun ɖɔ è zun xɔ́ntɔn xá gbɛ ɔ́, Mawu sín kɛntɔ́ wɛ è nyǐ ǎ cé? Mɛ e jló ná nyí gbɛmɛ fí sín nǔ lɛ́ɛ sín xɔ́ntɔn ɔ́ nɔ sɔ́ éɖée dó húzú Mawu sín kɛntɔ́. Mi ma vɛdó ɖɔ yǎyá wɛ è wlǎn xó élɔ́ dó Mawuxówéma ɔ́ mɛ sín ó: è wlǎn ɖɔ: “Mawu nɔ zé wǔhwinhwan dó byɔ́ yɛ e é sɔ́ dó mǐ mɛ ɔ́ ná.” É ɖo mɔ̌ có, é nɔ lɛ́ ná fɛ́nú e hú gǎn mɔ̌ ɔ́ mǐ; ɖó Mawuxówéma ɔ́ ɖɔ: “Mawu nɔ gbɛ́ goyítɔ́ lɛ́ɛ sín xó; lo ɔ́, é nɔ ná fɛ́nú mɛ e nɔ sɔ́ yěɖée hwe lɛ́ɛ.” Hǔn, mi bo hwíhwɛ́ miɖée ɖó Mawu glɔ́; mi ló dǒ ɖo awǒvi nukɔn; énɛ́ ɔ́, é ná hɔn yi zɔ nú mi. Mi sɛkpɔ́ Mawu; énɛ́ ɔ́ é ná sɛkpɔ́ mi. Mi hwɛhutɔ́ lɛ́ɛ, mi klɔ́ alɔ mitɔn lɛ́ɛ; mi yɛmɛnúwatɔ́ lɛ́ɛ, mi slá wǔ nú ayixa mitɔn lɛ́ɛ! Mi nɔ aluwɛ mɛ; mi ya avǐ, bó ná alě; nǔ wɛ mi ɖó ná ko ǎ; avǐ wɛ mi ɖó ná ya, bó zé awǎjijɛ mitɔn dó húzú aluwɛ ná. Mi sɔ́ miɖée hwe ɖo Aklúnɔ nukɔn, énɛ́ ɔ́ é ná sɔ́ mi su. Nɔví lɛ́ɛ mi, mi ma nɔ ɖɔ miɖée sín nǔ nyanya ó. Mɛ e nɔ ɖɔ nɔví tɔn sín nǔ nyanya, abǐ é nɔ ɖɔ hwɛ dó e ɔ́, sɛ́n ɔ́ sín nǔ nyanya ɖɔ wɛ é ɖe, bó ɖo hwɛ ɖɔ dó sɛ́n ɔ́ wɛ. Nú a ka ɖo hwɛ ɖɔ dó sɛ́n ɔ́ wɛ hǔn, a sɔ́ nyí mɛ e ɖo tónú se n'i wɛ ɔ́ ǎ; lo ɔ́, a nyǐ mɛ e nɔ ɖɔ hwɛ dó sɛ́n ɔ́ é. Mawu ɖokpónɔ géé wɛ nɔ dó sɛ́n; é ɖokpónɔ géé wɛ nyí hwɛɖɔtɔ́; é ɖokpónɔ géé wɛ sixú hwlɛ́n mɛ bo sixú lɛ́ hu mɛ. Hwi mɛ e ɖo hwɛ ɖɔ dó nɔzo towe wɛ ɔ́, mɛ̌ wɛ a sɔ́ hwiɖée dó mɔ ná? Din ɔ́, mi mɛ e nɔ ɖɔ: “Égbé abǐ sɔ ɔ́, mǐ ná yi to lě mɛ; mǐ ná nɔ fínɛ́ xɔ xwe ɖokpó; mǐ ná wa ajɔ̌ bó ná mɔ akwɛ́” lɛ́ɛ ɔ́, mi ɖótó mì. Mi tunwun nǔ e gbɛ mitɔn ná nyí sɔ ɔ́ ǎ! Nǔgbó ɔ́, ahǔn e nɔ sú nú hwenu kpɛɖé, bɔ zaanɖé kpowun ɔ́, é nɔ hɔ́n ɔ́ ɖɔhun wɛ mi cí. Nǔ e mi ɖó ná ɖɔ ɔ́ ɖíe: “Ényí é jló Aklúnɔ ɔ́, mǐ ná nɔ gbɛ, bó ná wa lě, bó ná wa lě.” Amɔ̌ din ɔ́, goyítɔ́ wɛ mi nyí, bó ɖo ajɔ̌ jlá nú miɖée wɛ. Goyíyí ka nyí nǔ ɖagbe ǎ. Énɛ́ ɔ́, mɛ e tunwun nǔ ɖagbe e é ɖó ná wa ɔ́, bó ma ka nɔ wa ǎ ɔ́, hwɛ hu wɛ é ɖe. Din ɔ́, dɔkunnɔ lɛ́ɛ mi, mi ɖótó mì! Mi ya avǐ, bó só hehe, ɖó nǔ nyanya e ná jɛ dó mi jí lɛ́ɛ wú! Dɔkun mitɔn lɛ́ɛ nyɔ, bɔ nǔ ɖu avɔ mitɔn lɛ́ɛ. Siká mitɔn kpó kpatágan mitɔn kpó jɛ ko; ko énɛ́ e yě jɛ ɔ́ wɛ ná ɖe kúnnu nyanya nú mi bó ná ɖu lan mitɔn lɛ́ɛ myɔ ɖɔhun. Mi bɛ́ dɔkun kplé ɖo azǎn élɔ́ lɛ́ɛ e nyí azǎn gǔdo gúdo tɔn lɛ́ɛ é mɛ. Mi sú axɔ́ azɔ̌watɔ́ e ɖo azɔ̌ wa wɛ ɖo gle mitɔn mɛ lɛ́ɛ ǎ. Mi ɖótó vo e sa wɛ yě ɖe ɔ́! Mɛ e ɖo jinukún mitɔn lɛ́ɛ bɛ́ yi xwé gbe nú mi wɛ lɛ́ɛ sín xósúsú hun káká wá jɛ Aklúnɔ Nǔbǐwúkpétɔ́ ɔ́ sín tómɛ. Acɔ́ mɛ wɛ mi nɔ, bó ɖu gbɛ ɖo ayǐkúngban ɔ́ jí; nǔ ɖagbe ɖagbe lɛ́ɛ wɛ mi ɖu, bó dó jǒ ɖ'ayǐ nú gbe e gbe è nǎ kplá mi yi lanhutɛn é. Mi ɖó hwɛ nú xomɛvɔ́nɔ lɛ́ɛ, bó hu yě; yě ka dɔn nǔ xá mi ǎ. Nɔví lɛ́ɛ mi, hǔn mi bo ɖó suúlu káká, nú Aklúnɔ ná wá. Mi kpɔ́n lě e glesi nɔ ɖó suúlu, bó nɔ nɔ te bɔ ayǐkúngban nɔ ná jinukún ɖagbe ɖagbe lɛ́ɛ gbɔn é; é nɔ ɖó suúlu káká bɔ xwejí kpó zǒjí kpó nɔ ja. Mi lɔmɔ̌ ɔ́, mi ɖó suúlu; akɔ́nkpinkpan ní kpé mi, ɖó Aklúnɔ sín wiwa ko sɛkpɔ́. Nɔví lɛ́ɛ mi, mi ma nɔ jɛ miɖée sín hwɛ, bónú Mawu wá ɖɔ hwɛ xá mi ó. Hwɛɖɔtɔ́ ɔ́ ko ɖo hɔnta, bó ɖo xwé gbe ná byɔ́ wɛ. Nɔví lɛ́ɛ mi, mi nɔ flín gbeyíɖɔ Mawu tɔn e ɖɔ xó dó Aklúnɔ nyǐkɔ mɛ lɛ́ɛ é; suúlu e yě ɖǒ ɖo wǔvɛ́ e yě mɔ lɛ́ɛ mɛ ɔ́, ní nyí kpɔ́n d'é wú nú mi. Mǐ nɔ ylɔ́ yě ɖɔ nǔnyɔ́nánɔ, ɖó yě dɛ ɖo ya e yě ji lɛ́ɛ nu. Suúlu e Jɔ̌bu ɖó ɔ́, mi se, bó tunwun nǔ e Aklúnɔ wá ná ɛ gbɔn gúdo ɔ́; ɖó Aklúnɔ nyɔ́ xomɛ ɖésú; mɛ nú nɔ blá wǔ n'i titewungbe. Nɔví ce lɛ́ɛ mi, ɖo tají ɔ́, mi ma xwlé nǔ ó; mi ma xwlé jǐnukúnsin ó, mi ma xwlé ayǐkúngban ó, mi ma ka xwlé nǔ gbɔn alɔkpa ɖěvo ɖěbǔ mɛ ó. Ényí xó mitɔn ɔ́, ɛɛn wɛ é nyí hǔn, mi ɖɔ “ɛɛn” kpowun; é ka nyí éeǒ wɛ é nyí hǔn, mi ɖɔ “éeǒ” kpowun, bónú Mawu ma wá ɖó hwɛ nú mi ó. Mɛ ɖé ɖo wǔvɛ́ mɔ wɛ ɖo mi mɛ a? Ní xo ɖɛ. Mɛ ɖé ɖo awǎjijɛ mɛ ɖo mi mɛ a? Ní ji han dó kpa susu nú Mawu. Mɛ ɖé ɖo mi mɛ bó ɖo azɔn jɛ wɛ a? Ní ylɔ́ agunmɛxó lɛ́ɛ; yě ná xo ɖɛ n'i, bó ná kɔn ami dó ta n'i ɖo Aklúnɔ nyǐkɔ mɛ. Đɛ énɛ́ e è xo kpó nǔɖiɖi kpó ɔ́ ná hwlɛ́n azinzɔnnɔ ɔ́ gán. Aklúnɔ ná bló bɔ é ná jɛ te, bɔ ényí hwɛ ɖé ɖo kɔ tɔn ɔ́, Mawu ná sɔ́ kɛ ɛ. Hǔn, mi bo ɖɔ hwɛ e mi hu lɛ́ɛ nú miɖée, bó xo ɖɛ nú miɖée, bónú azɔn mitɔn ná gbɔ. Đɛ e hwɛjijɔnɔ nɔ xo ɔ́ nɔ ɖó hlɔ̌nhlɔ́n ɖésú. Elíi ɔ́, gbɛtɔ́ wɛ é nyí mǐ ɖɔhun: é xo ɖɛ kpó vǐvɛ́ dó nú nǔ kpó, bó byɔ́ Mawu ɖɔ jǐ ní ma ja ó, bɔ jǐ ka ja dó ayǐkúngban jí ǎ káká nú xwe atɔn adaɖé. Énɛ́ ɔ́ gúdo ɔ́, é lɛ́ xo ɖɛ; énɛ́ ɔ́, jǐnukúnsin ná jǐ, bɔ ayǐkúngban ná jinukún tɔn lɛ́ɛ. Nɔví ce lɛ́ɛ mi, nú mɛɖé zɛ sín nǔgbó sín ali ɔ́ jí ɖo mi mɛ, lobo nú mɛɖé lɛ́ dɔn ɛ wá jí hǔn, mi flín xó élɔ́: mɛ e kplá hwɛhutɔ́ ɖé sín ali nyanya e jí é ɖe ɔ́ jí ɔ́, ná hwlɛ́n lǐndɔ̌n hwɛhutɔ́ énɛ́ ɔ́ tɔn sín kú. É ná bló bɔ Mawu ná bú nǔ dó hwɛhuhu gěgé. Nyɛ mɛsɛ́dó Jezu Klísu tɔn Piyɛ́ɛ wɛ wlán wěma élɔ́ sɛ́ dó mi mɛcyáncyán Mawu tɔn e nyí jǒnɔ ɖo ayǐkúngban jí, bó gba kpé Pɔ́ɔn kpó Galati kpó, Kapadɔ́si kpó Azíi kpó, kpódó Bitiníi kpán sín tokpɔn mɛ lɛ́ɛ é. Mawu Tɔ́ ɔ́ cyán mi, bɔ é sɔgbe xá lě e é ɖésúnɔ ko to gbɔn ɖ'ayǐ é, bɔ mi nyí mɛɖeɖóvo tɔn, gbɔn Yɛ tɔn sín nǔwiwa gbla mɛ, nú mi ná se tónú nú Jezu Klísu, bɔ hun tɔn ná lɛ mi wé. Mawu ní ná fɛ́nú kpó fífá kpó mi ní túnflá. Mi nú mǐ ná kpa susu nú Mawu Aklúnɔ mǐtɔn Jezu Klísu sín Tɔ́. Đo xomɛnyínyɔ́ ɖaxó e é ɖó ɔ́ mɛ ɔ́, é fɔ́n Jezu Klísu sín kú, bó dó ná gbɛ yaɖéyaɖé mǐ. Énɛ́ ɔ́ zɔ́n bɔ nukúnɖíɖó mǐtɔn ɔ́ nyí nukúnɖíɖó gbɛɖe, bɔ ɖagbe e Mawu sɔ́ ɖ'ayǐ nú mɛ e nyí étɔn lɛ́ɛ é ná ná xomɛhunhun mǐ. Đagbe énɛ́ lɛ́ɛ ɔ́, ɖagbe ɖé wɛ yě nyí bó sixú gblé ǎ; yě sixú blí ǎ; yě ka sixú cá ǎ. Mawu sɔ́ ɖagbe énɛ́ lɛ́ɛ ɖ'ayǐ ɖó sɛ́xwé, nú mi mɛ e hlɔ̌nhlɔ́n tɔn ɖo hinhɛn wɛ gbɔn nǔɖiɖi jí káká jɛ hwenu e hwlɛngán e ko sɔgbe, bɔ è nǎ ɖe xlɛ́ ɖo hwenu gǔdo gúdo tɔn lɛ́ɛ mɛ ɔ́ ná wá dó é. Énɛ́ ɔ́ wú ɔ́, nú é ná bó byɔ́ ɖɔ mi ná nɔ aluwɛ mɛ din nú hwenu kpɛɖé, ɖó nǔ tɛnmɛ tɛnmɛ e ɖo mi gbo wɛ lɛ́ɛ wú ɔ́, nyɔ̌ná énɛ́ lɛ́ɛ nɔ dó xomɛhunhun nú mi. Nǔ énɛ́ lɛ́ɛ ɖo mi gbo wɛ nú è nǎ tɛ́n lě e nǔɖiɖi mitɔn jínjɔ́n ayǐ gbɔn ɔ́ kpɔ́n. Siká ɔ́, nǔ wɛ é nyí bó ná vɔ, có è ka nɔ tɛ́n ɛ kpɔ́n gbɔn myɔ nu; mɔ̌ ɖokpó ɔ́, nǔɖiɖi mitɔn e xɔ akwɛ́ ɖaxó hú siká ɔ́, è nɔ tɛ́n ɛ kpɔ́n, bó ná dó kpɔ́n lě e é lí dǒ gbɔn é. Bɔ énɛ́ ɔ́, hwenu e Jezu Klísu ná ɖe éɖée xlɛ́ ɔ́, è nǎ sixú mlá mi; è nǎ sixú kpa susu nú mi, bó ná sixú wlí yɛ̌yi nú mi. Mi mɔ ɛ ǎ, có mi ka yí wǎn n'i; mi ɖo mimɔ ɛ wɛ din ǎ, có mi ka ɖi nǔ n'i; énɛ́ ɔ́ wú wɛ xomɛ ɖaxó ɖé ɖo mi hun wɛ; xomɛ hun mi sɔ mɔ̌, bɔ nu sixú ɖɔ ǎ. Đó mi ɖo nǔ e wú mi ɖi nǔ ɔ́ mɔ yí wɛ: é wɛ nyí hwlɛngán mitɔn. Gbeyíɖɔ Mawu tɔn e ɖɔ xó dó fɛ́nú e Mawu ko sɔ́ ɖ'ayǐ nú mi ɔ́ wú lɛ́ɛ ba do nú hwlɛngán ɔ́, bó gbéjé kpɔ́n. Nǔ e Yɛ Klísu tɔn ɖɔ nú yě lɛ́ɛ ɔ́, yě nɔ dó gǎn ná tunwun hwenu e nǔ lɛ́ɛ ná jɛ dó ɔ́ kpódó nǔ e hwenu yě ná jɛ dó ɔ́ kpán; ɖó Yɛ énɛ́ e ɖo yě mɛ ɔ́ ko ɖɔ ya e Klísu ná ji lɛ́ɛ, kpó susu e é ná mɔ ɖo yajiji énɛ́ lɛ́ɛ gúdo ɔ́ kpán sín xó nú yě ɖ'ayǐ. Mawu ɖe xlɛ́ gbeyíɖɔ lɛ́ɛ ɖɔ wɛn énɛ́ e è ɖɔ yě ní dó ɔ́ kún nyí yě ɖésúnɔ tɔn ó; lo ɔ́, mi tɔn wɛ. Wɛn Ɖagbejlátɔ́ lɛ́ɛ dó wɛn énɛ́ ɔ́ mi din; yě ɖɔ xó tɔn nú mi kpó hlɔ̌nhlɔ́n e Yɛsinsɛn e è sɛ́ dó sín sɛ́xwé ɔ́ ná yě ɔ́ kpó; wɛnsagun lɛ́ɛ ɖésú lɔ ka jló ná mɔ nǔ jɛ wɛn énɛ́ mɛ. Énɛ́ ɔ́ wú ɔ́, ayi mitɔn ní nɔ gbesisɔ mɛ, bó ná wa nǔ. Mi nɔ acéjí, bó zé nukúnɖíɖó mitɔn bǐ ɖó nǔníná e Mawu ná ná mi hwenu e Jezu Klísu ná ɖe éɖée xlɛ́ ɔ́ jí. Mi se tónú nú Mawu, vǐ e se tónú ɔ́ ɖɔhun, bónú nǔwiwa mitɔn lɛ́ɛ ní ma sɔgbe xá jlǒ e mi nɔ ɖó ɖ'ayǐ hwenu e mi lɛ́ kpo ɖo manywɛ́ mɛ ɔ́ lɛ́ɛ ó. Lo ɔ́, mi ní nyí mɛ mímɛ́ ɖo nǔwiwa mitɔn bǐ mɛ, lě e Mawu e ylɔ́ mi ɔ́ nyí mɛ mímɛ́ gbɔn é. Nǔgbó ɔ́, nǔ e è wlán dó Mawuxówéma ɔ́ mɛ ɔ́ ɖɔ: “Mi nyí mɛ mímɛ́, ɖó mɛ mímɛ́ wɛ un nyí.” Mi ɖo ɖɛ xo wɛ ɔ́, Mawu e nɔ ɖɔ hwɛ xá gbɛtɔ́ lɛ́ɛ bǐ gbɔn alɔkpa ɖokpó ɔ́ mɛ, lě e mɛ ɖokpó ɖokpó wa nǔ gbɔn ɔ́, mi nɔ ylɔ́ ɛ ɖɔ Tɔ́, hǔn mi bo ɖe sísí e mi ɖó n'i ɔ́ xlɛ́ gbɔn nǔwiwa mitɔn lɛ́ɛ mɛ, ɖo hwenu e kpo bɔ mi ná nɔ ayǐkúngban jí fí ná ɔ́ mɛ. Nǔgbó ɔ́, mi tunwun nǔ e è dǒ xɔ mi sín gbɛ ma nyí gbɛ e sín gǔ mi ɖu ɖo tɔ́gbó mǐtɔn lɛ́ɛ sí ɔ́ mɛ é; nǔ e nɔ wá cá kpatágan abǐ sikágan ɖɔhun ɔ́ wɛ è dǒ xɔ mi ná a? Éeǒ! Hun xɔ akwɛ́ ɖaxó Klísu tɔn ɔ́ wɛ è dǒ xɔ mi ná; Klísu e cí lɛ̌ngbɔ́ví e ma ɖó blɔ̌ ǎ, bɔ nǔɖé ma ka va dó wútu tɔn ǎ ɔ́ ɖɔhun é wɛ. Mawu ko sɔ́ ɛ cóbó wá ɖó gbɛ ɔ́, bó ɖe e xlɛ́ ɖo azǎn e nyí azǎn gǔdo tɔn élɔ́ lɛ́ɛ é mɛ, ɖó ɖagbe mitɔn wú. É jí wɛ mi gbɔn bó ɖi nǔ nú Mawu e fɔ́n ɛ sín kú, bó sɔ́ ɛ su é; énɛ́ ɔ́, nǔɖiɖi mitɔn kpó nukúnɖíɖó mitɔn kpó ɖo Mawu jǐ. Mi se tónú nú nǔgbó ɔ́, bó dó slá wǔ nú miɖée, bó ná dó yí wǎn titewungbe nú nɔví mitɔn ɖo nǔɖiɖi mɛ lɛ́ɛ. Hǔn, mi bo yí wǎn ɖaxó nú miɖée kpó ayixa mitɔn bǐ kpó. Nǔgbó ɔ́, mi vɔ́ jɔ; é ka nyí nǔkún e nɔ kú ɔ́ jí wɛ mi vɔ́ jɔ gbɔn ǎ; lo ɔ́, nǔkún e ma nɔ kú ǎ ɔ́ jí wɛ mi vɔ́ jɔ gbɔn; xó gbɛɖe, xó mavɔ mavɔ Mawu tɔn ɔ́ wɛ zɔ́n bɔ mi vɔ́ jɔ. Đó lě e Mawuxówéma ɔ́ ɖɔ gbɔn ɔ́: “Gbɛtɔ́ lɛ́ɛ bǐ cí gběhan ɖɔhun, bɔ susu yětɔn bǐ cí folówa ɖɔhun; gběhan ɔ́ nɔ fyɔ́, bɔ folówa ɔ́ nɔ j'ayǐ; lo ɔ́, Aklúnɔxó ɔ́ nɔ́ nɔ ayǐ káká sɔ́yi.” Xó énɛ́ wɛ nyí Wɛn Ɖagbe e è jlǎ mi é. Hǔn, mi bo jó adǎnúwiwa alɔkpa alɔkpa bǐ dó; mi jó nǔvúɖíɖó bǐ dó; mi jó yɛmɛnúwiwa dó; mi jó wǔhwinhwan kpó xó nyanya ɖɔ dó mɛ wú bǐ kpó dó. Mi sɛkpɔ́ Aklúnɔ, awǐnnya gbɛɖe e gbɛtɔ́ lɛ́ɛ xo nyi kɛ́n, bɔ Mawu ka mɔ dó mɔ awǐnnya xɔ akwɛ́ bó sɔ́ é, bónú mi lɔmɔ̌ ɔ́, ɖi awǐnnya gbɛɖe ɖɔhun ɔ́, è nǎ zé mi dó gbá sinsɛnxɔ Yɛsinsɛn tɔn ɔ́ ná. Mi ná nyí vɔ̌sánú-xwlémawutɔ́ mímɛ́ sín gbɛ̌ta, bó ná nɔ xwlé vɔ̌sánú Yɛsinsɛn tɔn ɔ́ Mawu; vɔ̌sánú Yɛsinsɛn tɔn e nɔ nyɔ́ Mawu nukún mɛ, gbɔn Jezu Klísu jí é. Đó nǔ e Mawuxówéma ɔ́ ɖɔ ɔ́ ɖíe: “Un sɔ́ awǐnnya xɔ akwɛ́ ɖokpó, bó ɖo do dó wɛ din ɖo Sinyɔ́ɔ, bɔ é nyí awǐnnya e ɖo zwe jí é, bɔ mɛ e ɖi nǔ n'i ɔ́ ná ɖu winnyá ǎ.” Awǐnnya xɔ akwɛ́ ɖaxó ɖokpó wɛ nyí awǐnnya énɛ́ ɔ́ nú mi mɛ e ɖi nǔ lɛ́ɛ; amɔ̌ nú mɛ e ma ɖi nǔ ǎ lɛ́ɛ ɔ́, é nyí: “Awǐnnya e xɔmɛtɔ́ lɛ́ɛ ma dó mɔ nǔɖéwanú ǎ, bó xo nyi kɛ́n, bɔ é húzú awǐnnya e ɖo tají é”. È lɛ́ ɖɔ ɖo akpá ɖěvo xwé ɖɔ: “Awǐnnya e wú gbɛtɔ́ lɛ́ɛ nɔ klɛ́n afɔ dó, bó nɔ́ fún sa ɔ́, só e nɔ zin yě dɛ́ ɔ́ wɛ.” Yě klɛ́n afɔ d'é wú, ɖó yě gbɛ́ ɖɔ émí kún ná ɖi nǔ nú xó ɔ́ ó; nǔ e è ko zé yě ɖó te ná é nɛ́. Amɔ̌ midɛɛ lɛ́ɛ ɔ́, akɔta e è cyán ɔ́ wɛ mi nyí, bó nyí vɔ̌sánú-xwlémawutɔ́ axɔ́sú ɔ́ tɔn; akɔta ɖe ɖó vo wɛ mi nyí, bó nyí togun Mawu tɔn. Mawu e ylɔ́ mi nú mi ná gosín ablu mɛ, bó wá wěziza tɔn ɖagbe ɖagbe ɔ́ nu ɔ́ cyán mi bónú mi ná jlá azɔ̌ ɖagbe ɖagbe e é nɔ wa lɛ́ɛ. Mi nyí togun Mawu tɔn ɖ'ayǐ ǎ; amɔ̌ din ɔ́, togun tɔn wɛ mi nyí; é kú nǔbláwǔ nú mi ɖ'ayǐ ǎ; amɔ̌ din ɔ́, é kú nǔbláwǔ nú mi. Mɛvívɛ́ná ce lɛ́ɛ mi, mi mɛ e nyí jǒnɔ bó nyí aligbɔntɔ́ ɖo ayǐkúngban jí lɛ́ɛ ɔ́, un ɖo byɔ̌byɔ́ mi wɛ ɖɔ mi ma lɔn nú jlǒ gbɛtɔ́ tɔn e nɔ ɖo ahwan fun xá ayi wɛ lɛ́ɛ ní ɖu ɖo mi jí ó. Mi zán gbɛ ɖagbe ɖo mɛ e ma ɖi nǔ nú Mawu ǎ lɛ́ɛ tɛ́ntin; énɛ́ ɔ́, nú yě na bo ɖo hwɛ dó mi wɛ ɖɔ mi nyí nǔnyanyawatɔ́ ɔ́, yě ná wá mɔ nǔ jɛ azɔ̌ ɖagbe e mi nɔ wa lɛ́ɛ wú dandan, bó ná kpa susu nú Mawu ɖo azǎn e gbe é ná ba yě kpɔ́n é. Mi hwíhwɛ́ miɖée dó acɛkpikpa gbɛtɔ́ lɛ́ɛ tɔn bǐ glɔ́, ɖó Aklúnɔ wú: mi hwíhwɛ́ miɖée dó Dadá e kpa acɛ nú mɛ bǐ ɔ́ glɔ́, bó hwíhwɛ́ miɖée dó tokpɔngán lɛ́ɛ glɔ́; Dadá ɔ́ wɛ sɛ́ yě dó, bónú yě ná dɔn tó nú nǔnyanyawatɔ́ lɛ́ɛ, bó ná kpa mɛ e nɔ wa nǔ ɖagbe lɛ́ɛ é. Nǔgbó ɔ́, nǔ e Mawu jló ɔ́ wɛ nyí ɖɔ mi ní nɔ wa nǔ ɖagbe, bó ná dó xwe yě mɛ e ma tunwun nǔɖé ǎ lɛ́ɛ kpó xlonɔ lɛ́ɛ kpó sín nu dó xɔ. Mi zán gbɛ mitɔn mɛ e ɖo éɖée sí é ɖɔhun; amɔ̌ mi ɖésúnɔ sí e mi ɖe ɔ́ ní ma nyí avɔ bónú mi bú dó nǔ nyanya ó; lo ɔ́, mi wa nǔ mɛsɛntɔ́ Mawu tɔn ɖɔhun. Mi sí gbɛtɔ́ lɛ́ɛ bǐ; mi yí wǎn nú nɔví mitɔn ɖo nǔɖiɖi mɛ lɛ́ɛ; mi ɖi xɛsi nú Mawu; mi sí Dadá ɔ́. Mɛsɛntɔ́ lɛ́ɛ mi, mi hwíhwɛ́ miɖée dó gǎn mitɔn lɛ́ɛ glɔ́, bó ɖó sísí nú yě nú nǔ bǐ ní vɔ ɖ'é wú; é nyí gǎn e nyɔ́, bó fá lɛ́ɛ kɛ́ɖɛ́ wɛ mi ná ɖó sísí ná ǎ; lo ɔ́, mi ná ɖó sísí nú yě mɛ e nylá hun lɛ́ɛ lɔmɔ̌. Nǔgbó ɔ́, ényí è ɖo ya dó nú mi dó acɛ jí wɛ, bónú mi dɛ ɖ'é nu, ɖó mi jló ná se tónú nú Mawu wútu ɔ́, nǔ ɖagbe wɛ é nyí. Đó ényí nǔ wɛ mi wa nyi do, bɔ è ɖo mi xo wɛ, bɔ mi dɛ ɖ'é nu ɔ́, le tɛ́ wɛ ɖ'é mɛ nú mi? Lo ɔ́, nú mi wa nǔ ɖagbe bɔ è dǒ ya nú mi, bɔ mi dɛ ɖ'é nu ɔ́, nǔ ɖagbe wɛ é nyí ɖo Mawu nukún mɛ. Nǔ e Mawu ylɔ́ mi na é nɛ́; ɖó Klísu ɖésúnɔ ji ya dó ta mitɔn mɛ, bó jó xlɛ́ tɔn nyi ayǐ nú mi, bónú mi ná zé afɔ dó afɔdo tɔn lɛ́ɛ mɛ. É hu hwɛ ǎ, è ka se adingbanxó ɖé ɖo nu tɔn mɛ kpɔ́n gbeɖé ǎ. Ée è zun i ɔ́, é zun mɛ ǎ; ée é ji ya ɔ́, é gblɔ́n adǎn nú mɛ ǎ; lo ɔ́, é sɔ́ éɖée dó alɔ mɛ nú Mawu e nɔ ɖɔ hwɛ kpó hwɛjijɔ kpó é. É bɛ́ hwɛ mǐtɔn lɛ́ɛ dó éɖée jí ɖo aklúzu jí, bónú mi ma sɔ́ hu hwɛ ó, bónú mi ná zán gbɛ jlɔ́jlɔ́. Akpado tɔn lɛ́ɛ wɛ zɔ́n bɔ è gbɔ azɔn nú mi. Đó lɛ̌ngbɔ́ e bú lɛ́ɛ ɖɔhun wɛ mi cí ɖ'ayǐ; amɔ̌ din ɔ́, è ko lɛ́ kplá mi wá mɛ e nyí lɛ̌ngbɔ́nyitɔ́ mitɔn, bó nɔ cɔ́ mi ɔ́ gɔ́n. Nyɔ̌nu lɛ́ɛ mi, mɔ̌ ɖokpó ɔ́, mi hwíhwɛ́ miɖée dó asú mitɔn lɛ́ɛ glɔ́, bónú mɛɖé ɖo yě mɛ, bó má ɖi nǔ nú Mawuxó ɔ́ ǎ ɔ́, mi ná dɔn ɛ gbɔn walɔ mitɔn lɛ́ɛ gbla mɛ, bɔ é ná ɖi nǔ. É byɔ́ ɖɔ mi ní ɖɔ xó ɖé ǎ; ɖó yě ná mɔ lě e zǐnzán mitɔn mɛ́, bó ɖó sísí gbɔn é. Mi ma nú acɔ́ɖónú wěxo tɔn lɛ́ɛ ɖi ɖablóbló, sikánú lɛ́ɛ, avɔ ɖagbe ɖagbe lɛ́ɛ wɛ mi ná nɔ́ dó ba acɔ́ ná ó. Lo ɔ́, acɔ́ xomɛ tɔn wɛ mi ná nɔ́ ba; acɔ́ énɛ́ nɔ cá ǎ; é wɛ nyí fífá kpó vivo ɖo ayi mɛ kpó; acɔ́ énɛ́ wɛ xɔ akwɛ́ ɖaxó ɖo Mawu gɔ̌n. Nyɔ̌nu xóxó hwenu tɔn e nɔ sí Mawu, bó nɔ́ ɖo nukún ɖó e wɛ lɛ́ɛ ɔ́, lě e yě nɔ́ bló yěɖée ɖó gbɔn ɔ́ ɖíe: yě nɔ hwíhwɛ́ yěɖée dó asú yětɔn lɛ́ɛ glɔ́. Ninɔmɛ énɛ́ wɛ Sala ɖó; é nɔ se tónú nú asú tɔn Ablaxámu bó nɔ́ ylɔ́ ɛ ɖɔ: “Sɛ́ ce”. Din ɔ́, ényí mi nɔ wa nǔ ɖagbe, bó ma jó miɖée dó nú nǔ ɖěbǔ dó xɛsi nú mi ǎ ɔ́, vǐ tɔn wɛ mi nyí. Asisúnɔ lɛ́ɛ mi, mɔ̌ ɖokpó ɔ́, mi tunwun ɖɔ asi mitɔn lɛ́ɛ kún ɖó gǎn ɖé sɔ mi ó, bónú mi ná nɔ kpɔ́n dó énɛ́ ɔ́ wú, bó ná nɔ zán gbɛ ɖagbe xá yě; mi nɔ wlí yɛ̌yi nú yě, ɖó yě kpó mi kpó wɛ Mawu ná ná gbɛ jɔ gbɛ. Mi nɔ wa nǔ gbɔn mɔ̌, bónú nǔ ɖěbǔ ma ɖó ɖɛ e mi nɔ xo lɛ́ɛ te ó. Bó ná dó fó ɔ́, mi bǐ ní ɖó linlin ɖokpó ɔ́, bó ɖó ayixa ɖokpó ɔ́; mi yí wǎn nú miɖée nɔví nɔví ɖɔhun; mi nɔ nyɔ́ xomɛ dó miɖée wú, bó nɔ sɔ́ miɖée hwe. Mi ma zé nyanya dó sú nyanya xɔ ná ó, abǐ mi ma zé zun dó sú zun xɔ ná ó; é nyɔ́ wa ɔ́, nyɔ̌ná wɛ mi ná nɔ byɔ́ ɖo Mawu gɔ́n dó sú axɔ́ ná; nǔ e Mawu ylɔ́ mi ná é nɛ́. Đó Mawuxówéma ɔ́ ɖɔ: “Mɛ e jló ná mɔ gbɛ sín vǐví, bó jló ɖɔ gbɛ ní nyɔ́ nú émí ɔ́ ɖó ná hɛn nu tɔn, bó ná nɔ́ ɖɔ xó nyanya ǎ, bó ná jó nǔvúɖíɖó dó. É ɖó ná lɛ́ kɔ sín nǔ nyanya wiwa gúdo, bó ná nɔ wa nǔ ɖagbe; é ná nɔ́ jɛ hun dó fífá jí bó nɔ ba; ɖó Aklúnɔ sín nukún ɖo mɛ e nɔ wa nǔ jlɔ́jlɔ́ lɛ́ɛ jí, é ɖo gbesisɔ mɛ, bó ná ɖótó ɖɛ yětɔn. Amɔ̌, é nɔ ɖe kɔ dó nǔnyanyawatɔ́ lɛ́ɛ.” Ényí mi nɔ bí dó nǔ ɖagbe wiwa wú ɔ́, mɛ̌ ka ná wa nǔ nyanya dó mi wú? Ényí é ná bó byɔ́ ɖɔ mi ná ji ya ɖó mi ɖo nǔ jlɔ́jlɔ́ wa wɛ wú hǔn, nǔ nyɔ́ nú mi. Mi ma ɖi xɛsi ɖěbǔ nú gbɛtɔ́ lɛ́ɛ ó; mi ma ka jó miɖée dó nú è gba ayi dó nú mi ó. Lo ɔ́, mi tunwun dó ayi mitɔn mɛ ɖɔ Klísu Aklúnɔ ɖokpónɔ géé jɛ́n nyí Mɛ mímɛ́. Mi ɖo gbesisɔ mɛ hwebǐnu, bónú mɛɖé byɔ́ mi ɖɔ mi ní tín nǔ mɛ nú émí dó nǔ e ɖó nukún wɛ mi ɖe ɔ́ wú ɔ́, mi ná ná sin tɔn mɛ ɔ́. Gbe fífá kpó mɛsísí kpó wɛ mi ka ná dó ná xósin yě. Mi ɖó ayixa mímɛ́, bónú jijɔ ɖagbe e Klísu sɔ́ dó ayi mɛ nú mi, bɔ mi ɖo zǐnzán wɛ ɔ́, hwenu e yě mɛ e nɔ ɖo xó nyanya ɖɔ d'é wú wɛ lɛ́ɛ ná dó hwɛ mi ɔ́, xó e yě nɔ ɖɔ lɛ́ɛ ní hu winnyá nú yě. Đó ényí jlǒ Mawu tɔn wɛ nyí ɖɔ è nǐ ji ya ɔ́, hǔn è ji ya ɖó ɖagbewiwa wú ɔ́, é nyɔ́ hú è nǐ ji ya ɖó nyanya wú. Nǔgbó ɔ́, Klísu ɔ́ ɖésú kú; é kú azɔn ɖokpó géé bɔ xó fó dó hwɛ e gbɛtɔ́ lɛ́ɛ hu lɛ́ɛ tamɛ; éyɛ́ mɛ e nɔ wa nǔ jlɔ́jlɔ́ ɔ́ kú dó mɛ e ma nɔ wa nǔ jlɔ́jlɔ́ ǎ lɛ́ɛ tamɛ, bó ná dó kplá mi wá Mawu gɔ̌n; ɖo agbaza sín alixo ɔ́, è hu i; lo ɔ́, ɖo Yɛ ɔ́ sín alixo ɔ́, è fɔ́n ɛ wá gbɛ. Yɛ énɛ́ mɛ wɛ é zɔn bó yi jlá Mawuxó yɛ e ɖo gan mɛ lɛ́ɛ. Mɛ e ko vɛ́ tóli nú Mawu ɖ'ayǐ xóxó ɖo hwenu e é ɖó suúlu bó nɔ te káká bɔ Nɔwée bló tɔjíhún ɔ́ fó lɛ́ɛ sín yɛ lɛ́ɛ xó ɖɔ wɛ è ɖe. Mɛ kwín we ɖé wɛ byɔ́ tɔjíhún ɔ́ mɛ: yě mɛ tántɔn wɛ nyí mɛ e byɔ́ mɛ bó gán ɖo sin xó ɔ́ mɛ é. Nǔ e sín akpajlɛ́ nyí wɛ sin ɔ́ ɖe ɔ́ wɛ nyí yɛhwesin e ɖo mi lɔ hwlɛngán wɛ din e. Yɛhwesin ɔ́, ɖixó agbaza tɔn lɛ́ɛ wɛ é nɔ ɖe síin ǎ, lo ɔ́ vo sa nú Mawu wɛ é ɖe ɖɔ é ní ná ayixa mímɛ́ mi. Fɔ́n e Jezu Klísu fɔ́n sín kú ɔ́ zɔ́n bɔ yɛhwesin hwlɛ́n mi gán. Jezu Klísu ɔ́ wɛ yi sɛ́xwé bó jínjɔ́n ɖisíxwé nú Mawu; fínɛ́ wɛ é ɖu axɔ́sú nú wɛnsagun lɛ́ɛ bǐ kpó acɛkpikpa lɛ́ɛ bǐ kpó, kpódó hlɔ̌nhlɔ́n lɛ́ɛ bǐ kpán ɖe. Đó Klísu ji ya ɖo agbaza mɛ wútu ɔ́, mi lɔmɔ̌ mi bo dó wǔsyɛ́n lanmɛ nú miɖée, bó ɖó ninɔmɛ ɖokpó ɔ́ ɖo ayixa mɛ; ɖó mɛ e dɛ ɖo yajiji agbaza mɛ tɔn lɛ́ɛ nu ɔ́ sɔ́ ɖó nǔɖé xá hwɛhuhu ǎ. Hǔn, bɛ́ sín din ɔ́, gbɛ e kpo bɔ mi ná zán ɖo ayǐkúngban jí fí ɔ́, lě e Mawu jló gbɔn ɔ́ wɛ mi ɖó ná zán gbɔn; é nyí jlǒ gbɛtɔ́ tɔn wɛ mi ná xwedó ǎ. Đó ɖ'ayǐ xóxó ɔ́, gbɛzínzán e mɛ e ma ɖi nǔ nú Mawu ǎ lɛ́ɛ nɔ yí wǎn na ɔ́ wɛ mi ko zán ɖ'ayǐ káká, amɔ̌ din ɔ́, é kpé. Mi ko zán gbɛ mitɔn ɖo hwɛhuhu mɛ, ɖo jlǒ nyanya lɛ́ɛ mɛ, ɖo ahannumú mɛ, ɖo nǔɖuzɛjlɛ̌wú mɛ, ɖo ahannuzɛjlɛ̌wú kpódó nǔ baɖabaɖa sinsɛn lɛ́ɛ kpán mɛ. Din ɔ́, ée mɛ ma ɖi nǔ nú Mawu ǎ lɛ́ɛ mɔ ɖɔ mi kún sɔ́ nɔ ɖo nǔwazɛjlɛ̌wú sín gbɛ nyanya énɛ́ ɔ́ zán xá émí wɛ ó ɔ́, é kpácá yě, bɔ yě bɔ zun ɖó nú mi. Amɔ̌, yě ná ɖó nǔ e yě wa lɛ́ɛ sín gbe nú Mawu e ɖo gbesisɔ mɛ, bó ná ɖɔ hwɛ xá mɛ e ɖo gbɛ lɛ́ɛ kpódó mɛ e kú lɛ́ɛ kpó é. Énɛ́ ɔ́ wútu wɛ è jlǎ Wɛn Ɖagbe ɔ́ mɛkúkú lɛ́ɛ lɔmɔ̌; bónú ée yě ko gbɔn hwɛɖɔxámɛ e ɖo te kpɔ́n gbɛtɔ́ lɛ́ɛ bǐ ɔ́ mɛ dín ɖo agbaza mɛ ɔ́, yě ná nɔ gbɛ gbɔn Yɛsinsɛn jí lě e Mawu ɖo gbɛ gbɔn é. Hwenu nǔ lɛ́ɛ bǐ ná vɔ dó ɔ́ ko yá; mi zán gbɛ e sɔgbe é; ayixa mitɔn ní nɔ te bónú mi ná nɔ sixú xo ɖɛ. Nǔ e mi ná wa jɛ nukɔn nú nǔ lɛ́ɛ bǐ ɔ́ wɛ nyí ɖɔ mi ní ɖó wǎn yíyí ɖaxó nú miɖée; ɖó wǎn yíyí ɔ́ nɔ súnsún hwɛ wɔ̌buwɔ́bú e è hu ɔ́ sín kɔ nú mɛ. Nú mi ba jǒnɔ miɖée hǔn, mi ma húnhún nǔ ɖɔ cóbó yí miɖée ó. Nǔníná tɛnmɛ tɛnmɛ wɛ Mawu ná mi. Mɛ ɖokpó ɖokpó ɖó ná nyí nǔjíkpɔ́ntɔ́ ɖagbe nǔníná e Mawu ná ɛ tɔn, bó ɖó ná zán nú ɖagbe mɛ bǐ tɔn. Ényí mɛɖé ɖo Wɛn Ɖagbe jlá wɛ hǔn, ní nyí Mawuxó; ényí mɛɖé ɖo Mawuzɔ́ wa wɛ hǔn, ní wa kpó hlɔ̌nhlɔ́n e Mawu ná ɛ ɔ́ kpó, bónú è nǎ kpa susu nú Mawu ɖo nǔ bǐ mɛ, gbɔn Jezu Klísu e nyí susunɔ, bó nyí hlɔ̌nhlɔ́nnɔ káká sɔ́yi ɔ́ jí! Amǐ! Mɛvívɛ́ná ce lɛ́ɛ mi, adǎn ɖaxó e ɖo mi gbo wɛ ɔ́ ní ma kpácá mi, bónú mi mɔ dó mɔ nǔ e ma jɛ kpɔ́n gbeɖé ǎ é ná ó. É nyɔ́ wa ɔ́, mi jɛ awǎ ɖó mǐmá e mi ɖó ɖo ya e Klísu jí lɛ́ɛ mɛ é wútu, bónú awǎjijɛ ná gɔ́ ayi mɛ nú mi hwenu e Mawu ná ɖe Klísu ɔ́ sín susu xlɛ́ é. Nú è ɖo mi zun wɛ ɖó mi nyí ahwanvú Klísu tɔn wútu hǔn, nǔ nyɔ́ nú mi, ɖó Yɛ susunɔ, Yɛ Mawu tɔn ɔ́ ɖo mi jí. É ní ma sín mɛhuhu wú, ajojija wú, abǐ nǔ nyanya wiwa wú, abǐ nudómɛɖévoxómɛ wú bónú è dǒ ya nú mɛɖé ɖo mi mɛ ó. Amɔ̌, nú mɛɖé ɖo ya ji wɛ ɖó klísusɛntɔ́ e é nyí ɔ́ wú hǔn, ní ma hu winnyá n'i ó; é nyɔ́ wa ɔ́, ní dó kú nú Mawu ɖó Klísu sín nyǐkɔ e ɖo wú tɔn é wú. Hwenu e hwɛɖiɖɔ ná bɛ́ dó ɔ́ ko su; xwédo Mawu tɔn ɔ́ wɛ è ka ná ɖɔ hwɛ xá jɛ nukɔn. Ée é ka nyí ɖɔ mǐdɛɛ lɛ́ɛ jí wɛ è nǎ bɛ́ hwɛɖiɖɔ sín ɔ́, hwenu e é ná wá jɛ mɛ e gbɛ́ wǎn nú Wɛn Ɖagbe Mawu tɔn lɛ́ɛ jí ɔ́, nɛ̌ wɛ yětɔn ná fó gbɔn? Lě e Mawuxówéma ɔ́ ɖɔ gbɔn ɔ́: “Ényí mɛ e nɔ wa nǔ jlɔ́jlɔ́ lɛ́ɛ ná hwlɛngán ɔ́ ka vɛ́ wǔ sɔ mɔ̌ ɔ́, nɛ̌ é ka ná nyí gbɔn nú mɛdídá lɛ́ɛ kpódó hwɛhutɔ́ lɛ́ɛ kpán?” Ényí mɔ̌ hǔn, mɛ e ɖo ya ji wɛ lě e Mawu jló gbɔn lɛ́ɛ ɖó ná ɖó kan dó ɖagbewiwa wú, bó ná sɔ́ yěɖée bǐ sésé dó alɔ mɛ nú Gbɛɖótɔ́ e ɖo gbejí é. Din ɔ́, mɛ e nyí agunmɛxó ɖo mi mɛ lɛ́ɛ ɖɔ xó ná wɛ un ɖe. Nyɛ lɔ ɔ́, agunmɛxó wɛ un nyí; un nyí kúnnuɖetɔ́ wǔvɛ́ e Klísu mɔ lɛ́ɛ tɔn, bó ɖó mǐmá ɖo susu e è nǎ wá ɖe xlɛ́ ɔ́ mɛ. Nǔ e ɖɔ nú yě wɛ un ɖe ɔ́ ɖíe: mi kpé nukún dó mɛ e Mawu sɔ́ dó así nú mi lɛ́ɛ wú, lě e lɛ̌ngbɔ́nyitɔ́ lɛ́ɛ nɔ kpé nukún dó lɛ̌ngbɔ́ e è sɔ́ dó así nú yě lɛ́ɛ wú gbɔn é; mi sɔ́ jlǒ ɖagbe dó kpé nukún dó yě wú lě e Mawu jló gbɔn é; ní ma nyí gǎn wɛ é hú mi bɔ mi bló ó. Mi wa azɔ̌ mitɔn kpódó bǐbí ɖó dó nǔ wǔ kpán; ní ma nyí akwɛ́ wɛ mi xwedó ó. Mi ma nɔ ba ná kpa acɛ gannaganna nú mɛ e è sɔ́ dó así nú mi ɖɔ mi ní kpé nukún dó yě wú lɛ́ɛ ó; lo ɔ́, mi ní nyí kpɔ́ndéwú nú lɛ̌ngbɔ́ lɛ́ɛ. Énɛ́ ɔ́, hwenu e lɛ̌ngbɔ́nyitɔ́ lɛ́ɛ sín gǎn ná ɖe éɖée xlɛ́ ɔ́, mi ná yí axɔ́súgbákún susunɔ e ma ná cá gbeɖé ǎ é. Mɔ̌ ɖokpó ɔ́, mi mɛwínnyáwínnyá lɛ́ɛ mi, mi ɖó ná nɔ́ hwíhwɛ́ miɖée dó mɛ e nyí mɛxó nú mi lɛ́ɛ glɔ́; mi bǐ ní nɔ sɔ́ miɖée hwe, bó ná nɔ wa azɔ̌ nú miɖée, ɖó Mawuxówéma ɔ́ ɖɔ: “Mawu nɔ ɖe kɔ dó goyítɔ́ lɛ́ɛ; lo ɔ́, é nɔ nyɔ́ xomɛ dó mɛ e nɔ sɔ́ yěɖée hwe lɛ́ɛ wú.” Hǔn mi bo hwíhwɛ́ miɖée dó Mawu sín alɔ hlɔ̌nhlɔ́nnɔ ɔ́ glɔ́, bónú é ná sɔ́ mi su hwenu e é ɖó dó é. Mi zlɔ́n nǔ e ɖo linkpɔ́n nyí nú mi wɛ lɛ́ɛ bǐ sín agban ɖó jǐ tɔn, ɖó é ɖo nukún kpé dó mi wú wɛ. Ayixa mitɔn ní ɖo te; mi cɔ́ miɖée, ɖó kɛntɔ́ mitɔn awǒvi ɔ́ ɖo lɛ̌ lɛ́ dó mi wɛ kinnikínní e ɖo adǎn jí é ɖɔhun, bó ɖo mɛ e é ná vún ɖu ɔ́ ba wɛ. Mi lí dǒ ɖo nǔɖiɖi mɛ, bó syɛ́nlǐn ɖo awǒvi nukɔn, ɖó mi tunwun ɖɔ nɔví mitɔn e gba kpé gbɛ ɔ́ bǐ mɛ lɛ́ɛ ɔ́, wǔvɛ́ ɖokpó ɔ́ mɔ wɛ yě lɔmɔ̌ ɖe. Lo ɔ́, ényí mi ji ya nú hwenu kpɛɖé gúdo ɔ́, Mawu fɛ́nú bǐ nɔ e ylɔ́ mi nú mi ná ɖó mǐmá ɖo susu tɔn mavɔ mavɔ ɔ́ mɛ, ɖo bǔ e mi ɖe xá Klísu ɔ́ mɛ ɔ́, é ɖésúnɔ ná wa azɔ̌ ɖo mi wú, bɔ mi ná nyɔ́ yí fó; é ná bló bɔ mi ná syɛ́nlǐn; é ná ná hlɔ̌nhlɔ́n mi; é ná dó mi do nyi dodó syɛ́nsyɛ́n lɛ́ɛ jí. Hlɔ̌nhlɔ́n ní nyí étɔn káká sɔ́yi! Amǐ. Silási e un nɔ mɔ dó mɔ nɔví gbejínɔtɔ́ ɔ́ wɛ dó alɔ mì bɔ un wlán wěma kpɛví élɔ́ sɛ́ dó mi, bó dó ná akɔ́nkpinkpan mi, bó ná dó ná gǎnjɛwú mi ɖɔ fɛ́nú Mawu tɔn titewungbe ɔ́ nɛ́. Mi bo syɛ́nlǐn ɖ'é mɛ. Agun e ɖo Babilɔ́nu bɔ Mawu cyán lě e é cyán mi lɔmɔ̌ gbɔn ɔ́ dó gbe sɛ́ dó mi; vǐ ce Maki lɔmɔ̌ dó gbe sɛ́ dó mi. Mi kí wǎn yí nú nɔví sín si nú miɖée, bó dó dó gbe miɖée ná. Fífá ní nɔ kpɔ́ xá mi mɛ e nyí Klísu tɔn lɛ́ɛ é bǐ. Nyɛ Sinmɔ́ɔ Piyɛ́ɛ e nyí mɛsɛntɔ́ Jezu Klísu tɔn, bó nyí mɛsɛ́dó tɔn ɔ́ wɛ wlán wěma élɔ́; mɛ e è nǎ nǔɖiɖi xɔ akwɛ́ mǐtɔn ɖɔhun gbɔn azɔ̌ jlɔ́jlɔ́ e Mawu mǐtɔn Mɛhwlɛ́ngántɔ́ Jezu Klísu wa é gbla mɛ lɛ́ɛ wɛ un wlán sɛ́ dó, bó dó gbe yě. Mawu ní ná fɛ́nú kpó fífá kpó mi, bónú é túnflá ɖó Mawu kpó Aklúnɔ mǐtɔn Jezu kpán e mi tunwun ɔ́ wú. Hlɔ̌nhlɔ́n Mawu tɔn e Aklúnɔ ɖó ɔ́ ná nǔ e ɖo tají bɔ mǐ ná dó ɖó sísí nú Mawu ɖo gbɛzán mǐtɔn mɛ ɔ́ bǐ mǐ; é wɛ nyí ɖɔ: é bló bɔ mǐ tunwun Mawu e ylɔ́ mǐ bónú mǐ ná ɖó mǐmá ɖo susu é ɖésúnɔ tɔn kpó xomɛnyínyɔ́ tɔn kpó mɛ é. Mɔ̌ wɛ é dó akpá ɖaxó ɖaxó e xɔ akwɛ́ lɛ́ɛ nú mǐ gbɔn; énɛ́ ɔ́, nú mi mɔ nǔ e sín akpá e é dó lɛ́ɛ yí ɔ́, mi ná sixú gló jlǒ e nɔ hɛn nǔ gblé bo ɖo axɔ́sú ɖu wɛ ɖo gbɛmɛ fí é, bó ná ɖó mǐmá ɖo ninɔmɛ Mawu tɔn mɛ. Đó mǐmá e mi ná ɖó ɖo ninɔmɛ Mawu tɔn mɛ ɔ́ wú ɔ́, mi zán hlɔ̌nhlɔ́n e ɖo mi wú ɔ́ bǐ, bó ɖó zǐnzán ɖagbe gɔ́ nú nǔɖiɖi mitɔn, bó ɖó nǔtunwuntunwun gɔ́ nú zǐnzán ɖagbe mitɔn. Bó ɖó mɛɖéejíɖuɖe gɔ́ nú nǔtunwuntunwun, bó ɖó suúlu gɔ́ nú mɛɖéejíɖuɖe, lobo zé sísí ɖó nú Mawu gɔ́ nú suúlu. Bó ná dó fó ɔ́, mi ɖó wǎn yí nú nɔví gɔ́ nú sísí ɖó nú Mawu, bó ɖó wǎn yíyí ɖó nú mɛ bǐ gɔ́ nú wǎn yí nú nɔví. Jijɔ énɛ́ lɛ́ɛ wɛ mi ɖó ná ɖó; ényí mi ɖó jijɔ énɛ́ lɛ́ɛ bónú é túnflá ɔ́, yě ná zɔ́n bɔ, ɖo Aklúnɔ mǐtɔn Jezu Klísu sín tunwuntunwun mɛ ɔ́, mi sɔ́ ná ɖi fɔnlín ǎ, mi ka sɔ́ ná gɔn sínsɛ́n ǎ. Lo ɔ́, mɛɖé ma ɖó jijɔ énɛ́ lɛ́ɛ ǎ ɔ́, mɛ ɔ́ nɔ mɔ nǔ jɛ zɔ ǎ; é cí nukúntíntɔ́nnɔ ɖɔhun; é sɔ́ flín ɖɔ è ko slá wǔ nú émí sín hwɛ e émí hu ɖ'ayǐ lɛ́ɛ mɛ ǎ. Énɛ́ ɔ́ wú ɔ́, nɔví lɛ́ɛ mi, mi lɛ́ dó gǎn d'é jí, bó zán gbɛ mitɔn nú é ní sɔgbe xá ylɔ̌ e Mawu ylɔ́ mi ɔ́ kpó cyán e é cyán mi ɔ́ kpó; ɖó nú mi nɔ wa nǔ gbɔn alɔkpa énɛ́ mɛ ɔ́, mi ná jɛ nǔ nyanya mɛ gbeɖé ǎ. Lě e Mawu ná ná acɛ ɖaxó mi, bɔ mi ná dó byɔ́ Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn ɔ́ sín axɔ́súɖuɖu mavɔ mavɔ ɔ́ mɛ gbɔn é nɛ́. Nǔ e wú un ná nɔ vɔ́ nǔ énɛ́ lɛ́ɛ flín mi tɛgbɛ é nɛ́, có mi ka ko tunwun yě, bó ko lí dǒ syɛ́nsyɛ́n ɖo nǔgbó e mi yí é mɛ. Lo ɔ́, nú un kpo ɖo gbɛ jɛ́n wɛ ɔ́, un mɔ ɖɔ é sɔgbe nú ma nɔ flín nǔ énɛ́ lɛ́ɛ mi, bó ná dó hɛn ayixa mitɔn ɖó te. Đó, un tunwun ɖɔ zaanɖé din ɔ́, un ná gosín agbaza élɔ́ e nɔ kú ɔ́ mɛ, lě e Aklúnɔ mǐtɔn Jezu Klísu ɖe xlɛ́ mǐ gbɔn é. Hǔn, un ná bló lě e un kpé wú gbɔn ɔ́ bǐ, bó na xlɛ́ lě e mi ná sixú flín nǔ énɛ́ lɛ́ɛ hwebǐnu gbɔn, ɖo kú ce gúdo ɔ́ mi. Nǔgbó ɔ́, é nyí hwenuxó e è sɔ́ bǐbí dó kpa ná ɔ́ ɖě wú wɛ mǐ gán jɛ, bó dó kplɔ́n nǔ mi ɖɔ Aklúnɔ mǐtɔn Jezu Klísu ná wá kpó hlɔ̌nhlɔ́n kpó ǎ; lo ɔ́, mǐ mɔ susu ɖaxó e é ɖó ɔ́ kpó nukún mǐ ɖésúnɔ tɔn kpó. Hwenu e Mawu Tɔ́ ɔ́ wlí yɛ̌yi n'i, bó sɔ́ ɛ su ɔ́, mǐ ɖo fínɛ́; hwenɛ́nu ɔ́, gbe ɖé ɖi sín Mawu susuɖaxónɔ ɔ́ gɔ́n wá gɔ̌n tɔn, bó ɖɔ n'i ɖɔ: “Vǐ ce vívɛ́ná wɛ mɛ élɔ́ nyí; xomɛ nɔ hun mì dó wǔtu tɔn.” Mǐ ɖésúnɔ ɔ́, hwenu e mǐ kpó é kpó ɖo só mímɛ́ ɔ́ jí ɔ́, mǐ se gbe énɛ́ e ɖi sín jǐxwé é. Énɛ́ ɔ́ zɔ́n bɔ mǐ lɛ́ ɖó jiɖiɖe dó wɛn e gbeyíɖɔ Mawu tɔn lɛ́ɛ dó ɔ́ wú ganjí. Ényí mi wlí tó wú ganjí ɔ́, é ná nyɔ́, ɖó é cí zogbɛ́n e ɖo ɖɛ̌ ɖi wɛ ɖo zǐnflú mɛ káká bɔ ayǐ ná hɔ́n, bɔ sunví zǎnzǎn tɔn ná ná wěziza dó ayi mitɔn mɛ ɔ́ ɖɔhun. Nǔ e mi ka ná tunwun ganjí hwɛ̌ ɔ́ ɖíe: mɛ ɖěbǔ sixú sɔ́ nǔnywɛ́ é ɖésúnɔ tɔn dó tín Mawuxó e è wlǎn ɔ́ mɛ ná ǎ. Đó mɛ ɖěbǔ nɔ sɔ́ jlǒ é ɖésúnɔ tɔn kpowun dó ɖɔ Mawuxó ɔ́ ná kpɔ́n gbeɖé ǎ; lo ɔ́, Yɛsinsɛn wɛ nɔ sɔ́ dó ayi mɛ nú gbɛtɔ́ lɛ́ɛ, bɔ yě nɔ ɖɔ xó e Mawu ɖɔ yě ní ɖɔ é. Đ'ayǐ xóxó ɔ́, gbeyíɖɔmawutɔn-nyíjɛtɔ́ ɖé lɛ́ɛ tɔ́n ɖo togun ɔ́ mɛ; mɔ̌ ɖokpó ɔ́, nǔkplɔ́nmɛtɔ́-nyíjɛtɔ́ ɖé lɛ́ɛ ná tɔ́n ɖo tɛ́ntin mitɔn; yě ná sɔ́ kplɔ́n nyanya, kplɔ́n e nɔ hɛn nǔ gblé ɔ́ byɔ́ mi mɛ, bó ná gbɛ́ gǎn e hwlɛ́n yě gán é; énɛ́ ɔ́, yě ná vɔ yěɖée bléwún. Mɛ gěgé ná xwedó yě ɖo gbɛ kwíji kwíji énɛ́ e yě nɔ zán ɔ́ mɛ, bɔ lě e yě nɔ wa nǔ gbɔn ɔ́ ná zɔ́n bɔ è nǎ ɖɔ xó nyanya dó nǔgbó sín ali ɔ́ wú. Nǔkplɔ́nmɛtɔ́-nyíjɛtɔ́ énɛ́ lɛ́ɛ ná nɔ ɖo akwɛ́ gbé mɛ, bó ná nɔ kpa xó ɖɔ nú mi, bó dó xo mi ɖu. Amɔ̌, mɛ e ná ɖó hwɛ nú yě ɔ́ ko ɖo te kpɔ́n yě sín tɛgbɛ, bó ná ɖó hwɛ nú yě, bɔ vivɔ yětɔn sixú gblá gbeɖé ǎ. Đó Mawu gɔn hwɛ ɖó nú wɛnsagun e hu hwɛ lɛ́ɛ é ǎ; lo ɔ́, é bɛ́ yě kɔn nyi zo mɛ, bɔ è hɛn yě dó wlɔ mɛ ɖo zǐnflú mɛ fínɛ́ nú hwɛɖɔzán gbe. Mawu gɔn hwɛ ɖó nú gbɛ xóxó ɔ́ ǎ; lo ɔ́, é bló bɔ tɔ ɖi sin kpé fí bǐ, bɔ gbɛtɔ́ dídá e ɖo gbɛ énɛ́ ɔ́ mɛ lɛ́ɛ kú tɔ. Nɔwée e ɖo lě e Mawu ba ɖɔ yě ní zán gbɛ gbɔn ɔ́ sín xó ɖɔ nú yě wɛ ɔ́ kɛ́ɖɛ́ wɛ é hwlɛ́n gán kpó mɛ tɛ́nwe ɖěvo kpó. Mawu ɖó hwɛ nú Sodɔ́mu kpó Gomɔ́ɔ kpó, bó zé myɔ dó vɔ yě ná; é bló mɔ̌, bó dó ná nǔ e ɖo ná jɛ dó mɛdídá e ná wá lɛ́ɛ jí wɛ ɔ́ sín xlɛ́ ɖokpó yě. Mawu hwlɛ́n Lɔ̌ti gán; Lɔ̌ti ɔ́, nǔjlɔ́jlɔ́watɔ́ wɛ, bɔ gbɛ kwíji kwíji e gbɛtɔ́ dídá hwetɔnnu tɔn lɛ́ɛ zán ɔ́ vɛ́ n'i. Đó nya nǔjlɔ́jlɔ́watɔ́ énɛ́ e ɖo tɛ́ntin yětɔn ɔ́, ɖo nǔ e wa wɛ yě ɖe ɔ́ mɔ wɛ, bó ɖo sise wɛ, bɔ nǔ énɛ́ zɔ́n bɔ é nɔ mɔ wǔvɛ́ ayǐhɔ́ngbe ayǐhɔ́ngbe ɖo ayi tɔn mímɛ́ ɔ́ mɛ. Énɛ́ ɔ́, Aklúnɔ tunwun lě e é nɔ hwlɛ́n mɛ e nɔ ɖó sísí n'i lɛ́ɛ gán sín adǎngbomɛ lɛ́ɛ mɛ gbɔn é, bó lɛ́ tunwun lě e é nɔ sɔ́ yě mɛ e ɖo nǔ nyanya wa wɛ lɛ́ɛ ɖ'ayǐ gbɔn, bó ná dɔn tó nú yě ɖo hwɛɖɔzán gbe é. Yě mɛ e nɔ xwedó jlǒ kwíji kwíji gbɛtɔ́ e yě nyí ɔ́ tɔn, bó nɔ gbɛ́ wǎn nú acɛkpikpa Mawu tɔn lɛ́ɛ ɔ́ wɛ é ná dɔn tó ná tawun. Nǔkplɔ́nmɛtɔ́-nyíjɛtɔ́ e xó un ɖɔ nú mi lɛ́ɛ ɔ́, ta wɛ yě nɔ syɛ́n, bó nɔ dó gbe kawun kawun dó ɖɔ xó nú mɛ; yě ɖó sísí nú nǔɖíɖó susunɔ e ɖo jǐxwé lɛ́ɛ é ǎ; lo ɔ́, zun wɛ yě nɔ zun yě. Wɛnsagun Mawu tɔn lɛ́ɛ ɖó hlɔ̌nhlɔ́n, bó ɖó acɛ hú nǔkplɔ́nmɛtɔ́-nyíjɛtɔ́ énɛ́ lɛ́ɛ, yě nɔ zé zun dó dó hwɛ nǔɖíɖó susunɔ lɛ́ɛ ná ɖo Aklúnɔ nukɔn ǎ. Amɔ̌, mɛ énɛ́ lɛ́ɛ ɔ́, yě nɔ lin tamɛ kpɔ́n cóbó nɔ wa nǔ ǎ; yě cí gběkanlin e jɔ, bɔ è nǎ wlí bó hu é ɖɔhun; yě nɔ zun nǔ e wú yě ma mɔ nukúnnú jɛ ǎ é; è nǎ hu yě lě e è nɔ hu gběkanlin lɛ́ɛ gbɔn é. Mɔ̌ wɛ è nǎ sú hwɛ e yě hu lɛ́ɛ sín axɔ́ yě gbɔn. Yě ná wa nǔ dó gbɔ jlǒ nyanya yětɔn lɛ́ɛ ɖo kéze ɖéɖé wɛ nɔ hun xomɛ nú yě. Ényí yě ɖo tɛ́ntin mitɔn, bó ɖo mi blɛ́ wɛ, bó ɖo nǔ mitɔn ɖu wɛ ɔ́, winnyánú wɛ é nyí, bó nyí afɔklɛ́nnú. Aga nukún wɛ ɖo ta nú yě, bɔ hwɛhuhu nɔ ci kɔ nú yě gbeɖé ǎ. Yě nɔ ɖó mɔ nú mɛ e vɔ́ lɛ́ɛ, bɔ yě nɔ jɛ mɛ; nukúnkɛn wɛ yě nɔ dó; Mawu ko dó nu yě. Yě gosín ali jlɔ́jlɔ́ ɔ́ jí, bó yi bú; Bosɔ́ɔ sín vǐ Baláamu e yí wǎn nú nǔ nyanya wiwa dó ɖu le ɔ́, ali e é gbɔn ɔ́ wɛ yě wlǐ. Lo ɔ́, è gbɛ̌ nǔ n'i, ɖó tóli e é vɛ́ ɔ́ wú. Nǔgbó ɔ́, tócí sɔ́ gbɛtɔ́ sín gbe dó jɛ xó ɖɔ jí, bó ɖó xlonɔnú e wa wɛ gbeyíɖɔ ɔ́ ɖe ɔ́ te; tócí ka nɔ ɖɔ xó ǎ. Nǔkplɔ́nmɛtɔ́-nyíjɛtɔ́ énɛ́ lɛ́ɛ cí tɔjɔtɛn e xusin é ɖɔhun; yě cí akpɔ́kpɔ́ e jɔhɔn ɖaxó ɖé ɖo zǐzé wɛ ɔ́ ɖɔhun; Mawu sɔ́ tɛnmɛ ɖ'ayǐ nú yě ɖo zǐnflú gɔngɔn bǐ ɔ́ mɛ. Yě nɔ ɖo goyítɔ́ xó ɖɔ wɛ, bó nɔ ɖo xlonɔ xó ɖɔ wɛ; yě nɔ wlí mɛ e ma ko hɔn sín yě mɛ e ɖo ali bú wɛ lɛ́ɛ tɛ́ntin zinzin ǎ lɛ́ɛ dó mɔ mɛ; nǔblíblí wiwa sín jlǒ e yě ɖó ɖo gbɛtɔ́ nyínyí mɛ lɛ́ɛ wɛ yě nɔ́ dó wlí yě dó mɔ mɛ. Yě nɔ dó akpá nú yě ɖɔ yě ná jɛ yěɖée sí; lo ɔ́, jijɔ e nɔ dɔn mɛ yi kú lɛ́ɛ sín kannumɔ wɛ yě ɖésú ka nyí; ɖó kannumɔ wɛ mɛ ɖokpó ɖokpó nyí nú nǔ e nɔ ɖu ɖo jǐ tɔn é. Nǔgbó ɔ́, ényí yě mɛ e tunwun Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn, bó ma ka ko hɔn sín nǔblíblíwiwa gbɛmɛ fí tɔn lɛ́ɛ mɛ zinzin ǎ lɛ́ɛ lɛ́ jó yěɖée dó nú nǔblíblíwiwa énɛ́ lɛ́ɛ, bɔ yě ɖu ɖo yě jí ɔ́, ninɔmɛ e yě nɔ wá ɖó ɖo vivɔnu ɔ́ nɔ lɛ́ nylá hú ée yě ko ɖó ɖo bǐbɛ́mɛ é. Ényí yě gbɔ bó gɔn ali jlɔ́jlɔ́ ɔ́ tunwun ɔ́, é nyɔ́ nú yě hú ɖɔ yě ní tunwun bó ka wá lɛ́ kɔ sín nǔ mímɛ́ e è ɖɔ yě ní wa lɛ́ɛ gúdo. Nǔ e jɛ dó yě jí ɔ́ sɔgbe xá xó e lǒ élɔ́ lɛ́ɛ ɖɔ é: “Cukú bɛ́ nǔ e é vi ɔ́ ɖu”, abǐ “Aglǔza e è lɛ wǔ ná din tlóló ɔ́ lɛ́ lɛ́ kɔ yi lɛ babá.” Mɛvívɛ́ná ce lɛ́ɛ mi, wěma wegɔ́ ɔ́ ɖíe wlán sɛ́ dó mi wɛ un ɖe e. Đo wěma we lɛ́ɛ bǐ mɛ ɔ́, un nɔ ba ná fɔ́n linlin e sɔgbe lɛ́ɛ ɖo ayixa mitɔn mɛ, gbɔn nǔkplɔ́nmɛ e un nɔ flín mi lɛ́ɛ gbla mɛ. Un jló ɖɔ mi ná nɔ flín xó e gbeyíɖɔ mímɛ́ Mawu tɔn lɛ́ɛ ɖɔ ɖ'ayǐ xóxó lɛ́ɛ kpódó nǔ e Aklúnɔ Mɛhwlɛ́ngántɔ́ zɔ́n ɖɔ mi ní wa, bɔ mɛsɛ́dó mitɔn lɛ́ɛ kplɔ́n mi ɔ́ kpán. Nǔ e mi ná tunwun jɛ nukɔn ɔ́ wɛ nyí ɖɔ: ɖo azǎn gǔdo gúdo tɔn lɛ́ɛ mɛ ɔ́, mɛ e nɔ zán gbɛ yětɔn lě e jlǒ yě ɖésúnɔ tɔn ba gbɔn lɛ́ɛ ná ɖe yěɖée xlɛ́. Yě ná ɖɔ slǎmɛ mi wú, bó ná ɖɔ: “É dó akpá ɖɔ émí ná wá; mɔ̌ wɛ ǎ cé? Énɛ́! Fítɛ́ é ka ɖe? Tɔ́gbó mǐtɔn lɛ́ɛ ko kú; lo ɔ́, nǔ bǐ ɖo lě e é ko ɖe gbɔn sín hwenu e gbɛ ɔ́ ko tíin ɔ́ ɖokpóó é.” Yě nɔ jló bó nɔ wɔn ɖɔ é ko lín din bɔ Mawu ɖɔ xó bɔ jǐnukúnsin kpó ayǐkúngban kpó tíin. Ayǐkúngban ɔ́, sin mɛ wɛ è dɔn ɛ sín; sin wɛ é dó bló ná. Mɔ̌ ɖokpó ɔ́, sin wɛ Mawu dó vɔ gbɛ xóxó ɔ́ ná; tɔ ɖi sin kpé fí bǐ; sin énɛ́ wɛ é dó vɔ gbɛ ɔ́ ná. Lo ɔ́, xó ɖokpó ɔ́ wɛ Mawu dó zé jǐnukúnsin kpó ayǐkúngban din tɔn ɔ́ kpó ɖ'ayǐ, bó ná wá zé myɔ dó vɔ yě ná. É hɛn yě ɖó te nú gbe e gbe é ná wá ɖó hwɛ nú mɛ nyanya lɛ́ɛ, bó ná vɔ yě dó é. Lo ɔ́, nɔví ce vívɛ́ná lɛ́ɛ mi, nǔ ɖokpó ka tíin, bɔ mi ɖó ná wɔn ǎ: é wɛ nyí ɖɔ, ɖo Aklúnɔ nukɔn ɔ́, azǎn ɖokpó cí xwe afatɔ́n ɖɔhun, bɔ xwe afatɔ́n cí azǎn ɖokpó ɖɔhun. Aklúnɔ nɔ lín có bó nɔ ɖe akpá e é dó lɛ́ɛ, lě e mɛɖé lɛ́ɛ nɔ vɛdó ɔ́ ǎ. Lo ɔ́, é nɔ ɖó suúlu dó mi wú; ɖó é jló ɖɔ mɛ ɖěbǔ ní dɔn ǎ; é nyɔ́ wa ɔ́, é jló ɖɔ mɛ bǐ ní mɔ ali, bó lɛ́ kɔ sín nǔ nyanya wiwa gúdo. É ka ɖo mɔ̌ có, Aklúnɔ sín azǎn ɔ́ ná wá ajotɔ́ ɖɔhun. Azǎn énɛ́ gbe ɔ́, jǐnukúnsin ná bú kpó zǐngídi ɖaxó ɖé kpó; Mawu ná zé myɔ dó vɔ nǔ e ɖo jǐnukúnsin lɛ́ɛ ná; ayǐkúngban kpó nǔ e ɖ'é mɛ lɛ́ɛ kpó bǐ ná bú. Ée é nyí ɖɔ nǔ énɛ́ lɛ́ɛ bǐ ná vɔ gbɔn mɔ̌ ɔ́, mi mɔ nukúnnú jɛ ninɔmɛ e mi ɖó ná ɖó ɔ́ wú ganjí. Mi ɖó ná nɔ zán gbɛ mímɛ́, bó ná nɔ ɖó sísí nú Mawu, lobo ná ɖo te kpɔ́n azǎn tɔn, bó ná ɖo nǔ e wú mi kpé ɔ́ bǐ wa wɛ, bónú é ná yá wǔ wá. Azǎn énɛ́ gbe wɛ Mawu ná zé myɔ dó fyɔ́ jǐnukúnsin ná, bɔ nǔ e ɖo jǐnukúnsin lɛ́ɛ bǐ ná sínsín ɖo myɔ ɔ́ sín zozo nu. Amɔ̌, Mawu dó jǐnukúnsin yɔ̌yɔ́ kpó ayǐkúngban yɔ̌yɔ́ kpó sín akpá; fínɛ́ wɛ è nǎ nɔ wa nǔ kpódó hwɛjijɔ kpán ɖe; nǔ e mǐ ɖo te kpɔ́n ɔ́ nɛ́. Énɛ́ ɔ́ wú ɔ́, nɔví ce vívɛ́ná lɛ́ɛ mi, ée mi ɖo te kpɔ́n nǔ énɛ́ lɛ́ɛ sín jijɛ ɔ́, mi bo ɖo nǔ e wú mi kpé ɔ́ bǐ wa wɛ, bó ná dó nyí mɛ mímɛ́ ma ɖó blɔ̌ ɖo wǔ ɖo Mawu nukɔn, bó ná dó nɔ fífá mɛ kpó Mawu kpó. Mi ní tunwun ɖɔ suúlu e Aklúnɔ mǐtɔn ɖó ɔ́ wɛ nyí hwlɛngán mitɔn, lě e Mawu ná nǔnywɛ́ nɔví mǐtɔn vívɛ́ná Pɔ́lu, bɔ é lɔmɔ̌ wlán sɛ́ dó mi gbɔn é. Wěma e mɛ é ɖɔ xó dó nǔ énɛ́ lɛ́ɛ wú ɖe lɛ́ɛ bǐ ɔ́, nǔ e é wlán d'é mɛ lɛ́ɛ nɛ́. Xó ɖé lɛ́ɛ ɖo wěma tɔn lɛ́ɛ mɛ, bɔ nukúnnú-mɔjɛmɛ tɔn nɔ vɛ́ wǔ, bɔ mɛ e ma mɔ do nú nǔɖé ǎ, bó ma ka lí dǒ ǎ lɛ́ɛ nɔ kpé ta do ná, lě e yě ko nɔ bló gbɔn nú Mawuxó ɔ́ ɖo akpá ɖěvo lɛ́ɛ xwé é. Nǔ e yě ná wa, bɔ yě ɖésúnɔ ná yi vɔ ɖ'é mɛ ɔ́ wa wɛ yě ɖe. Amɔ̌, nɔví ce vívɛ́ná lɛ́ɛ mi, midɛɛ lɛ́ɛ ɔ́, è ko ɖɔ xó énɛ́ lɛ́ɛ ɖ'ayǐ nú mi din. Hǔn, mi bó cɔ́ miɖée, bó ma jó miɖée dó nú nǔ wa nyi do gbɛtɔ́ nyanya lɛ́ɛ tɔn ní dɔn mi bú ó; mi ma ka lɛ́ gɔn acéjí e mi ɖe ɔ́ nɔ ó. Lo ɔ́, mi ní ɖo Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn ɔ́ tunwun d'é jí wɛ, bó ɖo fɛ́nú tɔn tunwun d'é jí wɛ. Susu n'i sín din káká sɔ́yi mavɔ mavɔ. Amǐ. Nǔ e kan xó e nɔ na gbɛ mɛ ɔ́ ɖɔ sɛ́ dó mi wɛ mǐ ɖe. Xó énɛ́ ko ɖe sín bǐbɛ́mɛ nǔ lɛ́ɛ bǐ tɔn; é ɖɔ xó bɔ mǐ se, bó mɔ ɖó nukún mǐtɔn lɛ́ɛ wú; mǐ kpɔ́n bó ɖ'alɔ wú. Hwenu e gbɛ énɛ́ wá ɔ́, mǐ mɔ ɛ. Énɛ́ ɔ́ wútu wɛ mǐ ɖo xó tɔn ɖɔ nú mi wɛ, bó ɖo gbɛ mavɔ mavɔ e ko ɖo Tɔ́ ɔ́ gɔ́n, bɔ è ɖe xlɛ́ mǐ ɔ́ sín kúnnu ɖe nú mi wɛ, bó ɖo xó tɔn ɖɔ nú mi wɛ. Nǔ e mǐ mɔ lobo se ɔ́, mǐ ɖo ɖiɖɔ nú mi lɔmɔ̌ wɛ, bónú mi ná nɔ bǔ xá mǐ ɖo kɔnɖókpɔ́ e mǐ ɖó xá Tɔ́ ɔ́ kpódó Vǐ tɔn Jezu Klísu ɔ́ kpó ɔ́ gbla mɛ. Mǐ ɖo nǔ énɛ́ lɛ́ɛ wlán sɛ́ dó mi wɛ, bónú awǎjijɛ mǐtɔn ná nyí awǎjijɛ kpíkpé. Wɛn e mǐ se ɖo Jezu Klísu nu, bó ɖo dǐdó mi wɛ ɔ́ wɛ nyí ɖɔ Mawu nyí wěziza, bɔ zǐnflú ɖěbǔ ɖo wǔ tɔn ǎ. Ényí mǐ ɖɔ mǐ ɖo kɔnɖókpɔ́ mɛ xá Mawu, bó ka lɛ́ kpo ɖo gbɛ zán wɛ ɖo zǐnflú mɛ hǔn, adingban ɖó wɛ mǐ ɖe ɖo xó ɖiɖɔ mɛ, kpó nǔwiwa mǐtɔn lɛ́ɛ kpó mɛ. Lo ɔ́, ényí mǐ ɖo gbɛ zán wɛ ɖo wěziza mɛ lě e Mawu ɖésúnɔ ɖo wěziza mɛ gbɔn ɔ́, hǔn mǐ ɖo kɔnɖókpɔ́ mɛ xá mǐɖée, bɔ vǐ tɔn Jezu sín hun nɔ lɛ mǐ wé sín hwɛ mǐtɔn lɛ́ɛ bǐ mɛ. Ényí mǐ ɖɔ hwɛ ɖě kún ɖo kɔ nú mǐ ó hǔn, mǐɖée blɛ́ wɛ mǐ ɖe, bɔ nǔgbó ɔ́ ɖo mǐ mɛ ǎ. Ényí mǐ ka ɖɔ hwɛ mǐtɔn lɛ́ɛ nú Mawu ɔ́, mǐ hɛn ɔ́, mǐ ná ɖeji dó wǔ tɔn, ɖó nǔ jlɔ́jlɔ́ wɛ é nɔ wa; é ná sɔ́ hwɛ mǐtɔn lɛ́ɛ kɛ mǐ, bó ná lɛ mǐ wé sín nǔ nyanya e mǐ wa lɛ́ɛ bǐ mɛ. Ényí mǐ ɖɔ mǐ kún hu hwɛ ó hǔn, Mawu ylɔ́ ɖɔ adingbannɔ wɛ mǐ ɖe nɛ́, bɔ xó tɔn ɖo ayi mǐtɔn mɛ ǎ. Vǐ ce lɛ́ɛ mi, un ɖo nǔ énɛ́ lɛ́ɛ wlán sɛ́ dó mi wɛ, bónú mi ma hu hwɛ ó. Ényí mɛɖé ka hu hwɛ ɔ́, mǐ ɖǒ ɖɛ̌mɛnu ɖokpó ɖo Tɔ́ ɔ́ gɔ́n; é wɛ nyí Jezu Klísu hwɛjijɔnɔ ɔ́. É wɛ sɔ́ éɖée dó sá vɔ̌ ná, bónú Mawu ná sɔ́ hwɛ mǐtɔn lɛ́ɛ kɛ mǐ. É ká nyí hwɛ mǐdɛɛ lɛ́ɛ tɔn kɛ́ɖɛ́ wɛ Mawu ná sɔ́ kɛ mǐ ǎ; é ná lɛ́ sɔ́ gbɛtɔ́ bǐ sín hwɛ kɛ yě. Ényí mǐ nɔ nyi sɛ́n tɔn lɛ́ɛ ɔ́, mǐ hɛn ɔ́, mǐ nǎ ɖeji ɖɔ mǐ tunwun i. Nú mɛɖé ɖɔ: “Un tunwun i”, bó ka gbɛ́ sɛ́n tɔn lɛ́ɛ nyi hǔn, adingbannɔ wɛ nyí mɛ énɛ́, bɔ nǔgbó ɔ́ ɖo mɛ énɛ́ mɛ ǎ. Amɔ̌, mɛ e nɔ se tónú nú xó tɔn ɔ́, mɛ énɛ́ ɖó wǎn yíyí titewungbe bɔ nǔ bǐ vɔ ɖ'é wú. Lě e mǐ hɛn ɔ́, mǐ nǎ tunwun ɖɔ mǐ ɖo bǔ xá Jezu Klísu gbɔn ɔ́ ɖíe: mɛ e ɖɔ émí ɖo bǔ xá ɛ ɔ́ ɖó ná zán gbɛ tɔn lě e é ɖésúnɔ zán gbɛ tɔn gbɔn é. Mɛvívɛ́ná ce lɛ́ɛ mi, sɛ́n yɔ̌yɔ́ ɖěvo wlán sɛ́ dó mi wɛ un ɖe ǎ; sɛ́n xóxó e mi ko ɖó sín hwenu e mi ɖi nǔ nú Klísu é wɛ. Sɛ́n xóxó énɛ́ ɔ́, xó e mi ko se é wɛ. É ka ɖo mɔ̌ có, sɛ́n yɔ̌yɔ́ wɛ é nyí, bɔ un ɖo wlǎnwlán sɛ́ dó mi wɛ, bɔ nǔgbó sɛ́n énɛ́ tɔn ɖe éɖée xlɛ́ gbɔn Klísu mɛ, bó ɖe éɖée xlɛ́ ɖo mǐ lɔmɔ̌ mɛ, ɖó zǐnflú ɔ́ ko ɖo yiyi wɛ, bɔ wěziza titewungbe ɔ́ ko ɖo hǐnhɔ́n wɛ. Mɛ e ɖɔ émí ɖo gbɛ zán wɛ ɖo wěziza mɛ, bó ka gbɛ́ wǎn nú nɔví tɔn ɔ́ kpo ɖo gbɛ zán wɛ ɖo zǐnflú mɛ. Mɛ e yí wǎn nú nɔví tɔn ɔ́ nɔ́ nɔ wěziza mɛ; énɛ́ ɔ́, nǔ ɖěbǔ ɖo wǔ tɔn bó ná dɔn mɛ ɖěvo dó hwɛ mɛ ǎ. Mɛ e ka gbɛ́ wǎn nú nɔví tɔn ɔ́ ɖo zǐnflú mɛ; é ɖo zɔnlin ɖi wɛ ɖo zǐnflú mɛ; é tunwun fí e é xwe ɔ́ ǎ, ɖó zǐnflú ɔ́ zɔ́n bɔ é ɖo nǔ mɔ wɛ ǎ. Vǐ ce lɛ́ɛ mi, un ɖo wěma wlán sɛ́ dó mi wɛ, ɖó Mawu sɔ́ hwɛ mitɔn lɛ́ɛ kɛ mi ɖo Jezu Klísu nyíkɔ mɛ. Vǐtɔ́ lɛ́ɛ mi, un ɖo wěma wlán sɛ́ dó mi wɛ, ɖó mi tunwun mɛ e ko tíin sín bǐbɛ́mɛ é. Mɛwínnyáwínnyá lɛ́ɛ mi, un ɖo wěma wlán sɛ́ dó mi wɛ, ɖó mi ko ɖu ɖo mɛ nyanya ɔ́ jí. Vǐ ce lɛ́ɛ mi, un ɖo wěma wlán sɛ́ dó mi wɛ, ɖó mi tunwun Tɔ́ ɔ́. Vǐtɔ́ lɛ́ɛ mi, un ɖo wěma wlán sɛ́ dó mi wɛ, ɖó mi tunwun mɛ e ko tíin sín bǐbɛ́mɛ é. Mɛwínnyáwínnyá lɛ́ɛ mi, un ɖo wěma wlán sɛ́ dó mi wɛ ɖó mi ɖó hlɔ̌nhlɔ́n; Mawuxó ɔ́ ɖo ayi mɛ nú mi, bɔ mi ɖu ɖo mɛ nyanya ɔ́ jí. Mi ma yí wǎn nú gbɛ ɔ́ ó; mi ma ka yí wǎn nú nǔ e nyí gbɛ ɔ́ tɔn lɛ́ɛ ɖěbǔ ó. Ényí mɛɖé yí wǎn nú gbɛ ɔ́ hǔn, é ɖó wǎn yíyí nú Tɔ́ ɔ́ ǎ. Đó nǔ e nyí gbɛ ɔ́ tɔn ɔ́ ɖě gosín Tɔ́ ɔ́ gɔ́n ǎ; gbɛtɔ́ sín jlǒ nyanya lɛ́ɛ, nukún ɖo mɛ gban mɛ, kpó goyíyí e dɔkun jijɛ nɔ zɔ́n mɛ é kpán ɖě gosín Tɔ́ ɔ́ gɔ́n ǎ; gbɛmɛ fí núwiwa lɛ́ɛ wɛ. Gbɛ élɔ́ ɔ́, wǐwá yi wɛ é ɖe, bɔ mɛ e nɔ bló jlǒ gbɛ élɔ́ tɔn lɛ́ɛ lɔ ɖo wǐwá yi wɛ; mɛ e nɔ bló jlǒ Mawu tɔn ɔ́ ka nɔ́ nɔ gbɛ káká sɔ́yi. Vǐ ce lɛ́ɛ mi, hwenu gǔdo gúdo tɔn mɛ ɖíe mǐ ɖe e; mi ka ko se ɖɔ kɛntɔ́ Klísu tɔn ɔ́ ɖó ná wá; amɔ̌ din ɔ́, Klísu sín kɛntɔ́ gěgé ko wá. Énɛ́ ɔ́ wɛ zɔ́n bɔ mǐ tunwun ɖɔ hwenu gǔdo gúdo tɔn ɔ́ mɛ ɖíe mǐ ɖe e. Mɛ énɛ́ lɛ́ɛ gosín mǐ mɛ, ɖó yě nyí mɛ mǐtɔn ɖě ɖ'ayǐ ǎ; ɖó nú yě ko nyí mɛ mǐtɔn wɛ ɔ́, yě ná ko nɔ mǐ mɛ; yě ka gosín mǐ mɛ, bónú è nǎ mɔ nukúnnú jɛ mɛ céɖécéɖé ɖɔ yě ɖěbǔ kún ko nyí mɛ mǐtɔn ɖ'ayǐ ó. Midɛɛ lɛ́ɛ ɔ́, Klísu kɔn Yɛsinsɛn dó mi jí; énɛ́ ɔ́ wɛ zɔ́n bɔ mi bǐ tunwun nǔgbó ɔ́. Hǔn, ényí mi dán nǔgbó ɔ́ wú wɛ un ɖo nǔ élɔ́ wlán sɛ́ dó mi wɛ ǎ. Mi tunwun nǔ e nyí nǔgbó ɔ́ é, bó ka lɛ́ tunwun ɖɔ nǔvú ɖěbǔ kún nɔ tɔ́n sín nǔgbó ɔ́ mɛ ó. Mɛ̌ ka ɖo nǔvúɖótɔ́ ɔ́ nyí wɛ? Mɛ e ɖɔ Jezu kún nyí Klísu ɔ́ ó é wɛ; mɛ énɛ́ wɛ nyí Klísu sín Kɛntɔ́ ɔ́. É gbɛ́ Tɔ́ ɔ́ kpó Vǐ ɔ́ kpó. Nǔgbó ɔ́, mɛ e gbɛ́ Vǐ ɔ́ é ɔ́ gbɛ́ Tɔ́ ɔ́. Mɛ e ka yí gbe ɖɔ Jezu nyí Mawu ví é ɔ́, mɛ énɛ́ ɖo kɔnɖókpɔ́ mɛ xá Mawu Tɔ́ ɔ́ lɔmɔ̌. Mi hɛn xó e mi se sín hwenu e mi ɖi nǔ nú Klísu ɔ́ dó ayi mitɔn mɛ. Ényí xó e mi se sín hwenu e mi ɖi nǔ nú Klísu é ɖo ayi mitɔn mɛ ɔ́, mi lɔ ná ɖo vǐ ɔ́ kpó Tɔ́ ɔ́ kpó mɛ. Nǔ e sín akpá Klísu ka dó nú mǐ ɔ́ wɛ nyí gbɛ mavɔ mavɔ. Un ɖo nǔ énɛ́ lɛ́ɛ wlán sɛ́ dó mi wɛ, bó dó ɖo xó ɖɔ dó mɛ e nɔ ba ná flú mi lɛ́ɛ wú wɛ. Midɛɛ lɛ́ɛ ɔ́, Yɛsinsɛn e Klísu kɔn dó mi jí ɔ́ ɖo mi jí; hǔn, é sɔ́ byɔ́ ɖɔ mɛɖé ní kplɔ́n nǔ mi ǎ. Lo ɔ́, ée Yɛsinsɛn énɛ́ nɔ kplɔ́n nǔ bǐ mi ɔ́, bɔ nǔ e é nɔ kplɔ́n mi lɛ́ɛ ka nyí nǔgbó, bó ma nyí nǔvú ǎ é ɔ́, mi bǐ ní se tónú nú kplɔ́n e é nɔ ná mi lɛ́ɛ, ɖo bǔ e mi ɖe xá Jezu ɔ́ mɛ. Din ɔ́, vǐ ce lɛ́ɛ mi, mi nɔ bǔ xá Klísu, bónú hwenu e é ná ɖe éɖée xlɛ́ ɔ́, mǐ ná ɖó gǎnjɛwú kpíkpé; hwenu e é ná lɛ́ kɔ wá ɔ́, winnyá ní ma hu mǐ ɖo nukɔn tɔn ó. Ée mi tunwun ɖɔ nǔ jlɔ́jlɔ́ wɛ Klísu nɔ wa ɔ́, mi bo tunwun ɖɔ mɛ ɖěbǔ e nɔ wa nǔ jlɔ́jlɔ́ ɔ́, Klísu tɔn wɛ mɛ énɛ́ nyí. Mi Kpɔ́n lě e Tɔ́ ɔ́ yí wǎn nú mǐ sɔ é. É yí wǎn nú mǐ káká bo ɖɔ è ní ylɔ́ mǐ ɖɔ Mawu ví; vǐ tɔn wɛ mǐ ka nyí nǔgbó. Ée gbɛ ɔ́ ma tunwun Mawu ɔ́ ǎ wútu wɛ é ma tunwun mǐ ǎ. Mɛvívɛ́ná ce lɛ́ɛ mi, din ɔ́, Mawu ví wɛ mǐ nyí; amɔ̌, è ko ɖe nǔ e mi ná wá nyí ɔ́ xlɛ́ céɖécéɖé ǎ. Lo ɔ́, nǔ e mǐ tunwun kpowun ɔ́ wɛ nyí ɖɔ hwenu e Klísu ná lɛ́ kɔ wá ɔ́, mǐ ná cí é ɖɔhun; ɖó mǐ ná mɔ ɛ lě e é ɖe gbɔn é. Mɛ ɖěbǔ ɖó nukún ɖíɖó énɛ́ ɖo Klísu mɛ hǔn, éɖée bló ɖó mǐmɛ́ jí wɛ é ɖe lě e Jezu Klísu ɖésúnɔ nyí mǐmɛ́ gbɔn é. Mɛ e nɔ hu hwɛ é ɖěbǔ ɔ́, Mawusɛ́n gba wɛ é ɖe; ɖó hwɛhuhu ɔ́, Mawusɛ́n gbigba wɛ. Mi ka tunwun ɖɔ Klísu wá, bó ná ɖe hwɛ lɛ́ɛ síin; hwɛ ɖě ka ɖo ayi tɔn mɛ ǎ. Énɛ́ ɔ́, mɛ ɖěbǔ ɖo Jezu Klísu mɛ ɔ́, mɛ ɔ́ sɔ́ nɔ hu hwɛ ǎ; mɛ e nɔ ɖo hwɛ hu wɛ ɔ́ mɔ ɛ ǎ, é ka tunwun i ǎ. Vǐ ce lɛ́ɛ mi, mi ma lɔn nú mɛɖé blɛ́ mi ó; mɛ e nɔ wa nǔ jlɔ́jlɔ́ ɔ́, hwɛjijɔnɔ wɛ é nyí, lě e Klísu nyí hwɛjijɔnɔ é. Mɛ e nɔ ɖo hwɛ hu wɛ ɔ́, awǒvi tɔn wɛ é nyí, ɖó awǒvi ɔ́ ko ɖo hwɛ hu wɛ sín do, bɔ Mawu ví ɔ́ ka wá, bó ná sú awǒvi sín nǔwiwa lɛ́ɛ sín kún dó. Mɛ ɖěbǔ nyí Mawu ví ɔ́, mɛ ɔ́ sɔ́ nɔ hu hwɛ ǎ, ɖó gbɛ Mawu tɔn ɖo mɛ énɛ́ mɛ. Đó ée Mawu nyí Tɔ́ tɔn ɔ́, é sixú kpo ɖo hwɛ hu wɛ ǎ. Mɛ e nyí Mawu ví lɛ́ɛ kpó mɛ e nyí awǒvi ví lɛ́ɛ kpó ɔ́, nǔ e nɔ zɔ́n bɔ è nɔ tunwun ɖě ɖo ɖě mɛ céɖécéɖé ɔ́ ɖíe: mɛ e ma nɔ wa nǔ jlɔ́jlɔ́ ǎ é ɖěbǔ nyí Mawu ví ǎ; mɛ e ma yí wǎn nú nɔví tɔn ǎ é ɖěbǔ nyí Mawu ví ǎ. Nǔgbó ɔ́, xó e mi se sín hwenu e mi ɖi nǔ nú Klísu ɔ́ wɛ nyí mǐ ɖó ná yí wǎn nú mǐɖée. Mǐ ɖó ná cí Kanyɛ́ɛ ɖɔhun ǎ, ɖó mɛ nyanya ɔ́ tɔn wɛ éyɛ́ ko nyí, bó hu nɔví tɔn. Étɛ́wú é ka hu nɔví tɔn? Nǔ e wú é hu i ɔ́ wɛ nyí ɖɔ nǔ e éyɛ́ Kanyɛ́ɛ ɔ́ nɔ wa lɛ́ɛ nɔ sɔgbe ǎ; ée nɔví tɔn ka nɔ wa lɛ́ɛ nɔ sɔgbe. Énɛ́ wú ɔ́ nɔví lɛ́ɛ mi, ényí mɛ e nyí gbɛ élɔ́ tɔn lɛ́ɛ gbɛ́ wǎn nú mi hǔn, ní ma kpácá mi ó. Mǐ tunwun ɖɔ mǐ gosín kú wá gbɛ; mǐ tunwun mɔ̌, ɖó mǐ yí wǎn nú nɔví mǐtɔn lɛ́ɛ. Mɛ e ma ka yí wǎn nú mɛ ǎ é kpo ɖo kú. Mɛ ɖěbǔ gbɛ́ wǎn nú nɔví tɔn hǔn, mɛhutɔ́ wɛ é nyí; mi ka tunwun ɖɔ mɛhutɔ́ ɖěbǔ kún ɖó gbɛ mavɔ mavɔ ó. Lě e mǐ tunwun nǔ e wǎn yíyí nyí ɔ́ gbɔn ɔ́ ɖíe: Klísu sɔ́ gbɛ tɔn jó dó ta mǐtɔn mɛ; hǔn mǐ lɔmɔ̌ ɖó ná sɔ́ gbɛ mǐtɔn jó dó nɔví mǐtɔn lɛ́ɛ tamɛ. Ényí mɛɖé jɛ dɔkun, bó mɔ ɖɔ nǔɖé hudó nɔví émítɔn, bó ka ɖo nukún syɛ́n dó e wɛ ɔ́, nɛ̌ wǎn yíyí Mawu tɔn ka sixú nɔ mɛ énɛ́ sín ayi mɛ gbɔn? Vǐ ce lɛ́ɛ mi, mi ma nú mǐ ní nɔ́ yí wǎn nú mɛ ɖo nu kpó xó víví kpó kpowun ó; lo ɔ́, wǎn yíyí titewungbe e nɔ ɖe éɖée xlɛ́ gbɔn nǔwiwa lɛ́ɛ mɛ ɔ́ wɛ mǐ ɖó ná ɖó. Lě e mǐ ná tunwun ɖɔ mǐ nyí nǔgbó ɔ́ tɔn gbɔn ɔ́ nɛ́; lě e ayi mǐtɔn ná ɖó gǎnjɛwú ɖo Mawu nukɔn gbɔn é nɛ́. Ényí ayi mǐtɔn ná bó ɖo hwɛ ɖó nú mǐ wɛ ɔ́, mǐ ní tunwun ɖɔ Mawu hú gǎn ayi mǐtɔn, lobo tunwun nǔ bǐ. Mɛvívɛ́ná ce lɛ́ɛ mi, ényí ayi mǐtɔn ma sɔ́ ɖo hwɛ ɖó nú mǐ wɛ ǎ hǔn, mǐ ɖó gǎnjɛwú kpíkpé ɖo Mawu nukɔn. Nǔ ɖěbǔ e mǐ byɔ́ ɔ́, mǐ nɔ mɔ yí ɖo así tɔn, ɖó mǐ nɔ nyi sɛ́n tɔn lɛ́ɛ, bó nɔ wa nǔ e nɔ nyɔ́ nukún tɔn mɛ lɛ́ɛ. Nǔ e zɔ́n mǐ wɛ Mawu ɖe ɔ́ wɛ nyí ɖɔ mǐ ní ɖi nǔ nú vǐ tɔn Jezu Klísu ɔ́ sín nyǐkɔ, bó ka yí wǎn nú mǐɖée lě e Klísu zɔ́n mǐ gbɔn é. Mɛ e nɔ nyi Mawusɛ́n lɛ́ɛ ɔ́, mɛ ɔ́ ɖo Mawu mɛ, bɔ Mawu ɖo éyɛ́ mɛ. Mǐ tunwun ɖɔ Mawu ɖo mǐ mɛ gbɔn Yɛsinsɛn e é ná mǐ é jí. Mɛvívɛ́ná ce lɛ́ɛ mi, mi ma nɔ ɖi nǔ nú mɛ e ɖɔ émí ɖó Yɛ Mawu tɔn lɛ́ɛ é bǐ ó, mi nɔ to dó yě kpɔ́n hwɛ̌, bó ná kpɔ́n ɖɔ Yɛ Mawu tɔn ɔ́ jɛ́n ɖo yě mɛ nǔgbó ají; ɖó gbeyíɖɔmawutɔn-nyíjɛtɔ́ gěgé ko gba kpé gbɛ ɔ́ mɛ din. Lě e mi ná tunwun mɛ e ɖó Yɛ Mawu tɔn lɛ́ɛ gbɔn ɔ́ ɖíe: mɛ ɖěbǔ ɖɔ Jezu Klísu zɔn agbaza mɛ bo wá hǔn, mɛ énɛ́ ɖó Yɛ Mawu tɔn. Mɛ ɖěbǔ ma ka yí gbe ɖɔ Jezu Klísu zɔn agbaza mɛ wá ǎ hǔn, mɛ énɛ́ ɖó Yɛ Mawu tɔn ǎ; Kɛntɔ́ Mawu tɔn ɔ́ sín yɛ wɛ é ɖó. Mi ko se ɖɔ yɛ énɛ́ ná wá, bɔ é ka ko ɖo gbɛ ɔ́ mɛ din. Vǐ ce lɛ́ɛ mi, midɛɛ lɛ́ɛ ɔ́, Mawu tɔn wɛ mi nyí, bó ka ko ɖu ɖo gbeyíɖɔmawutɔn-nyíjɛtɔ́ lɛ́ɛ jí, ɖó Yɛ e ɖo midɛɛ lɛ́ɛ mɛ ɔ́ hú gǎn ée ɖo azɔ̌ wa wɛ ɖo mɛ e nyí gbɛ ɔ́ tɔn lɛ́ɛ mɛ é. Gbeyíɖɔmawutɔn-nyíjɛtɔ́ lɛ́ɛ ɔ́, gbɛ ɔ́ tɔn wɛ yě nyí, bó nɔ ɖɔ xó lě e mɛ e nyí gbɛ ɔ́ tɔn lɛ́ɛ nɔ ɖɔ xó gbɔn é, bɔ mɛ e nyí gbɛ ɔ́ tɔn lɛ́ɛ nɔ ɖótó yě. Amɔ̌, mǐdɛɛ lɛ́ɛ ɔ́, Mawu tɔn wɛ mǐ nyí, bɔ mɛ e tunwun Mawu ɔ́ nɔ ɖótó mǐ; mɛ e ma nyí Mawu tɔn ǎ ɔ́ nɔ ɖótó mǐ ǎ. Lě e mǐ nɔ sixú tunwun Yɛ nǔgbónɔ ɔ́, kpó yɛ adingbannɔ ɔ́ kpó gbɔn ɔ́ nɛ́. Mɛvívɛ́ná ce lɛ́ɛ mi, mi nú mǐ ná yí wǎn nú mǐɖée, ɖó wǎn yíyí ɔ́, Mawu gɔ́n wɛ é gosín. Mɛ ɖěbǔ ɖó wǎn yíyí nú mɛ hǔn, Mawu ví wɛ é nyí, bó tunwun Mawu. Mɛ e ma yí wǎn nú mɛ ǎ ɔ́ tunwun Mawu ǎ, ɖó Mawu ɔ́, wǎn yíyí wɛ é nyí. Lě e Mawu ɖe wǎn yíyí e é ɖó nú mǐ ɔ́ xlɛ́ mǐ gbɔn ɔ́ ɖíe: é sɛ́ vǐɖokpónɔ tɔn dó gbɛ ɔ́ mɛ, bónú mǐ ná nɔ gbɛ gbɔn jǐ tɔn. Wǎn yíyí énɛ́ ɔ́, nǔ e ɖ'é mɛ é ɖíe: ényí mǐdɛɛ lɛ́ɛ wɛ yí wǎn nú Mawu jɛ nukɔn ǎ; éyɛ́ wɛ yí wǎn nú mǐ jɛ nukɔn, bó sɛ́ vǐ tɔn dó, bɔ é sɔ́ éɖée dó sá vɔ̌, bónú Mawu ná sɔ́ hwɛ mǐtɔn lɛ́ɛ kɛ mǐ. Mɛvívɛ́ná ce lɛ́ɛ mi, ée Mawu yí wǎn nú mǐ gbɔn mɔ̌ ɔ́, mǐ lɔ ɖó ná yí wǎn nú mǐɖée. Mɛ ɖé mɔ Mawu kpɔ́n gbeɖé ǎ; ényí mǐ yí wǎn nú mǐɖée ɔ́, Mawu ɖo ayi mǐtɔn mɛ, bɔ wǎn yíyí tɔn sɔgbe ɖo mǐ mɛ bɔ nǔ bǐ vɔ ɖ'é wú. Yɛsinsɛn é ɖésúnɔ tɔn e é ná mǐ ɔ́ wú wɛ mǐ tunwun ɖɔ mǐ ɖo éyɛ́ mɛ, bɔ éyɛ́ ɖo mǐ mɛ. Mǐdɛɛ lɛ́ɛ ɔ́, mǐ mɔ bó ɖe kúnnu ná ɖɔ Tɔ́ ɔ́ sɛ́ Vǐ tɔn dó, bɔ é nyí Mɛhwlɛ́ngántɔ́ gbɛ ɔ́ tɔn. Mɛ e ɖɔ Jezu nyí Mawu ví ɔ́, Mawu ɖo mɛ énɛ́ mɛ, bɔ mɛ ɔ́ lɔ ɖo Mawu mɛ. Mǐdɛɛ lɛ́ɛ ɔ́, mǐ tunwun wǎn yíyí e Mawu ɖó nú mǐ ɔ́, bó ɖi nǔ ná. Mawu ɔ́, wǎn yíyí wɛ é nyí; mɛ e ɖo wǎn yíyí mɛ ɔ́, mɛ ɔ́ ɖo Mawu mɛ, bɔ Mawu ɖo élɔ́ mɛ. Ényí wǎn yíyí ɔ́ sɔgbe ɖo ayi mǐtɔn mɛ bɔ nǔ bǐ vɔ ɖ'é wú ɔ́, mǐ ná ɖó gǎnjɛwú kpíkpé ɖo hwɛɖɔzán gbe, ɖó gbɛ e mǐ zán ɖo gbɛ élɔ́ mɛ ɔ́ cí Klísu tɔn ɖɔhun. Xɛsi ɖo wǎn yíyí mɛ ǎ; wǎn yíyí e sɔgbe bɔ nǔ bǐ vɔ ɖ'é wú ɔ́ nɔ nya xɛsi tɔ́n. Tódɔnnúmɛ wɛ nɔ dɔn xɛsi wá; ɖó mɛ e ɖo xɛsi ɖi wɛ ɔ́, mɛ énɛ́ ɔ́ ɖó wǎn yíyí bɔ nǔ bǐ vɔ ɖ'é wú ǎ. Mǐdɛɛ lɛ́ɛ ɔ́, mǐ yí wǎn nú Mawu, ɖó é wɛ yí wǎn nú mǐ jɛ nukɔn. Ényí mɛɖé ka ɖɔ émí yí wǎn nú Mawu, bó ka gbɛ́ wǎn nú nɔví tɔn hǔn, adingbannɔ wɛ é nyí; ɖó mɛ e ma yí wǎn nú nɔví tɔn e mɔ wɛ é ɖe ɔ́ ǎ ɔ́, nɛ̌ é ka na sixú yí wǎn nú Mawu e mɔ wɛ é ma ɖe ǎ é gbɔn? Hǔn sɛ́n e Mawu ná mǐ ɔ́ ɖíe: mɛ e yí wǎn nú Mawu ɔ́ ɖó ná yí wǎn nú nɔví tɔn lɔmɔ̌. Mɛ ɖěbǔ ɖi nǔ ɖɔ Jezu wɛ nyí Klísu ɔ́ hǔn, mɛ ɔ́ nyí Mawu ví. Mɛ ɖěbǔ yí wǎn nú tɔ́ ɖé ɔ́, mɛ ɔ́ nɔ yí wǎn nú vǐ tɔn lɛ́ɛ lɔmɔ̌. Ényí mǐ yí wǎn nú Mawu, bó nɔ nyi sɛ́n tɔn lɛ́ɛ ɔ́, énɛ́ wɛ ná zɔ́n bɔ mǐ ná tunwun ɖɔ mǐ yí wǎn nú vǐ tɔn lɛ́ɛ. Wǎn yí nú Mawu wɛ nyí è nǐ nyi sɛ́n tɔn lɛ́ɛ; sɛ́n tɔn lɛ́ɛ ka vɛ́ nyi ǎ; ɖó Mawu ví ɖěbǔ hɛn ɔ́, é ná ɖu ɖo gbɛ ɔ́ jí. Nǔɖiɖi e mǐ ɖǒ ɔ́ wɛ ka nɔ zɔ́n bɔ mǐ nɔ ɖu ɖo gbɛ ɔ́ jí. Mɛ̌ ka sixú ɖu ɖo gbɛ ɔ́ jí? Mɛ e ɖi nǔ ɖɔ Jezu nyí Mawu ví ɔ́ kɛ́ɖɛ́ wɛ hɛn ɔ́, é ná ɖu ɖo gbɛ ɔ́ jí. Jezu Klísu wɛ nyí mɛ e wá é; é wɛ wá kpó sin kpó hun kpó; é wá kpó sin kɛ́ɖɛ́ kpó ǎ; lo ɔ́, é wá kpó sin kpó hun kpó, bɔ Yɛsinsɛn ka ɖo kúnnu ɖe ná wɛ ɖɔ nǔgbó wɛ, ɖó Yɛsinsɛn ɔ́, nǔgbó wɛ é nyí. Kúnnuɖetɔ́ atɔn wɛ ɖe; Yě wɛ nyí: Yɛsinsɛn, sin kpó hun kpó. Yě mɛ atɔn lɛ́ɛ sín gbe ɖo kpɔ́. Mǐ nɔ yí gbe nú kúnnuɖiɖe gbɛtɔ́ lɛ́ɛ tɔn; Mawu sín kúnnuɖiɖe ka hú gǎn gbɛtɔ́ lɛ́ɛ tɔn ɖaxó. Kúnnuɖiɖe Mawu tɔn ɔ́ wɛ nyí ɖɔ é ɖe kúnnu nú vǐ tɔn. Énɛ́ ɔ́, mɛ e ɖi nǔ nú Mawu ví ɔ́ é ɔ́, mɛ énɛ́ ɖó kúnnuɖiɖe énɛ́ ɔ́ ɖo ayi tɔn mɛ; mɛ e ma ka ɖi nǔ nú Mawu ǎ é sɔ́ Mawu dó ylɔ́ adingbannɔ; ɖó é ɖi nǔ nú kúnnu e Mawu ɖe nú vǐ tɔn é ǎ. Nǔ e ɖɔ wɛ kúnnuɖiɖe énɛ́ ɖe ɔ́ ɖíe: Mawu ná gbɛ mavɔ mavɔ mǐ, bɔ mǐ mɔ gbɛ énɛ́ gbɔn vǐ tɔn jí. Mɛ e ɖó vǐ ɔ́ ɖo ayi mɛ ɔ́ ɖó gbɛ énɛ́; mɛ e ma ka ɖó vǐ ɔ́ ɖo ayi mɛ ǎ ɔ́ ɖó gbɛ énɛ́ ǎ. Un ɖo nǔ énɛ́ wlán sɛ́ dó mi wɛ bónú mi mɛ e ɖi nǔ nú Mawu ví ɔ́ lɛ́ɛ ná tunwun ɖɔ émí ɖó gbɛ mavɔ mavɔ. Mǐ ɖǒ gǎnjɛwú kpíkpé ɖo Mawu nukɔn ɖɔ mǐ byɔ́ nǔ ɖěbǔ nú é sɔgbe xá jlǒ tɔn ɔ́, é nɔ ɖótó mǐ. Ée mǐ tunwun ɖɔ hwenu e mǐ ɖo nǔɖé byɔ́ ɛ wɛ ɔ́, é nɔ ɖótó mǐ ɔ́, mǐ lɛ́ tunwun ɖɔ é nɔ ná nǔ e byɔ́ ɛ wɛ mǐ ɖe ɔ́ mǐ. Ényí mɛɖé mɔ nɔví tɔn ɖo hwɛ hu wɛ hǔn, mɛ ɔ́ ní xo ɖɛ n'i; énɛ́ ɔ́, Mawu ná ná gbɛ nɔví énɛ́. É ka ɖo mɔ̌ có, hwɛ ɖokpó tíin bó nɔ dɔn mɛ yi kú; hwɛ énɛ́ tamɛ wɛ un ɖɔ è nǐ xo ɖɛ dó ǎ. Nǔ nyanya wiwa bǐ wɛ nyí hwɛ; amɔ̌ hwɛ ɖé lɛ́ɛ tíin bó nɔ dɔn mɛ yi kú ǎ. Mǐ tunwun ɖɔ mɛ e nyí Mawu tɔn ɔ́ ɖěbǔ kún sɔ́ nɔ kpo ɖo hwɛ hu wɛ ó, ɖó Mawu ví ɔ́ cyɔ́n alɔ jǐ tɔn, bɔ Mɛnyanya ɔ́ sɔ́ nɔ kpé nǔ ɖěbǔ wú bó nɔ wa n'i ǎ. Mǐ tunwun ɖɔ Mawu tɔn wɛ mǐ nyí, bɔ gbɛ ɔ́ bǐ ka ɖo Mɛnyanya ɔ́ sín acɛ mɛ. Mǐ tunwun ɖɔ Mawu ví ɔ́ wá, bó ná nǔnywɛ́ mǐ, nú mǐ ná dó tunwun Mawu nǔgbó ɔ́, bɔ mǐ ɖo bǔ xá Mawu nǔgbó ɔ́ gbɔn vǐ tɔn Jezu Klísu jí; é wɛ nyí Mawu nǔgbó ɔ́, bó nyí gbɛ mavɔ mavɔ. Vǐ ce lɛ́ɛ mi, mi cɔ́ miɖée dó vodún sinsɛn wú. Nyɛ Agunmɛxó ɔ́ wɛ ɖo wěma élɔ́ wlán sɛ́ dó Nyɔ̌nu e Mawu sɔ́ é wɛ; hwi kpódó vǐ towe lɛ́ɛ kpó wɛ un sɛ́ wěma ɔ́ dó. Wǎn yíyí nǔgbó nǔgbó wɛ un ɖó nú mi. É ka nyí nyɛ ɖokpónɔ wɛ yí wǎn nú mi ǎ; mɛ e tunwun nǔgbó ɔ́ lɛ́ɛ bǐ wɛ yí wǎn nú mi. Đó nǔgbó ɔ́ ɖo ayi mǐtɔn mɛ, bó ná nɔ xá mǐ káká sɔ́yi. Mawu Tɔ́ ɔ́ kpódó Jezu Klísu e nyí vǐ tɔn ɔ́ kpó ní ná fɛ́nú kpódó nǔbláwǔkúnúmɛ kpó, kpó fífá kpó mǐ, bónú mǐ ní ɖó nǔ énɛ́ lɛ́ɛ ɖo wǎn yíyí kpódó nǔgbó kpó mɛ. Ée un mɔ vǐ towe ɖě lɛ́ɛ ɖo gbɛ zán wɛ ɖo nǔgbó mɛ lě e Tɔ́ ɔ́ zɔ́n mǐ gbɔn ɔ́, xomɛ hun mì tlala; din ɔ́, nyɔ̌nu, nǔ e byɔ́ we wɛ un ɖe ɔ́ ɖíe: mi nú mǐ ná yí wǎn nú mǐɖée; é nyí sɛ́n yɔ̌yɔ́ ɖěvo wɛ nyí bɔ un wlán sɛ́ dó we ǎ; lo ɔ́, sɛ́n e mǐ ko yí sín hwenu e mǐ ɖi nǔ nú Klísu ɔ́ wɛ. Wǎn yíyí ɖíɖó wɛ nyí è nǐ zán gbɛ lě e Tɔ́ ɔ́ sín sɛ́n lɛ́ɛ zɔ́n gbɔn é; sɛ́n ɔ́ wɛ nyí ɖɔ: mi ní zán gbɛ mitɔn ɖo wǎn yíyí mɛ, lě e mi se gbɔn sín hwenu e mi ɖi nǔ nú Klísu é. Adingbannɔ gěgé gba kpé gbɛ ɔ́ mɛ, bó nɔ gbɛ́ ɖɔ Jezu Klísu kún zɔn agbaza mɛ wá ó. Mɛ e nɔ wa nǔ gbɔn mɔ̌ ɔ́, adingbannɔ wɛ; Klísu Kɛntɔ́ ɔ́ wɛ. Mi cɔ́ miɖée, bó ma wá ba nǔ e wú mi wa azɔ̌ ɔ́ kpo ó; lo ɔ́, mi ní mɔ ajɔ mitɔn bǐ yí. Mɛɖěbǔ ma nɔ te nǔkplɔ́nmɛ Klísu tɔn lɛ́ɛ kɛ́ɖɛ́ jí ǎ, bó lɛ́ ba ɖěvo d'é jí hǔn, mɛ énɛ́ ɖó Mawu ɔ́ ayi mɛ ǎ. Mɛ e ka nɔ te nǔkplɔ́nmɛ Klísu tɔn lɛ́ɛ jí ɔ́, mɛ ɔ́ ɖó Tɔ́ ɔ́ kpó Vǐ ɔ́ kpó ayi mɛ. Ényí mɛɖé wá gɔ̌n mitɔn, bó ma hɛn kplɔ́n énɛ́ wá nú mi ǎ hǔn, mi ma yí i dó xwé mitɔn gbe ó; mi ma ka dó gbe e lɔ vɔ́vɔ́ ó. Đó mɛ e dó gbe e ɔ́, nǔ nyanya e é nɔ wa lɛ́ɛ wa xá ɛ wɛ é ɖe. Un ɖó xó gěgé bó ná ɖɔ nú mi, un ka jló ná wlán yě dó wěma jí sɛ́ dó mi ǎ; ɖó nú un wá gɔ̌n mitɔn, bó wá ɖɔ xó énɛ́ lɛ́ɛ nú mi kpódó nu ce kpo ɔ́, é nyɔ́ hú; énɛ́ ɔ́, awǎjijɛ mǐtɔn ná nyí awǎjijɛ kpíkpé. Nɔví towe nyɔ̌nu e Mawu sɔ́ é sín vǐ lɛ́ɛ lɔ dó gbe sɛ́ dó we. Nyɛ Agunmɛxó ɔ́ wɛ ɖo wěma élɔ́ wlán sɛ́ dó mɛvívɛ́ná ce Gayiwúsi e un ɖó wǎn yíyí nǔgbó nǔgbó ná é wɛ. Mɛvívɛ́ná ce, un jló ɖɔ nǔ bǐ ní yi nú we ganjí, lanmɛ towe ní nɔ ganjí lě e a ɖo ganjí ɖo nǔɖiɖi mɛ gbɔn é. Ée nɔví ɖé lɛ́ɛ wá bó ɖɔ lě e a ɖo gbejí ɖo nǔgbó ɔ́ mɛ gbɔn, kpódó lě e a kpo ɖo gbɛ towe zán wɛ gbɔn ayǐhɔ́ngbe ayǐhɔ́ngbe ɔ́ nú mì ɔ́, xomɛ hun mì tlala. Un se ɖɔ vǐ ce lɛ́ɛ ɖo gbɛ zán wɛ ɖo nǔgbó mɛ ɔ́, nǔɖé sɔ́ nɔ hun xomɛ nú mì hú mɔ̌ ǎ. Mɛvívɛ́ná ce, a nɔ gbejí ɖo nǔ e a nɔ wa nú nɔví lɛ́ɛ é mɛ káká bó nɔ lɛ́ nɔ gbejí ɖo nǔ e a nɔ bló nú nɔví e nyí jǒnɔ lɛ́ɛ é lɔ mɛ. Yě ɖe kúnnu nú wǎn yíyí e a ɖǒ ɔ́ ɖo agun ɔ́ nukɔn; gɔ̌ alɔ nú yě lě e Mawu jló gbɔn é, nú yě ná yi to e mɛ yě xwe ɔ́. Đó Jezu Klísu wú wɛ yě ma yí nǔɖé ɖo mɛ e ma nyí klísusɛntɔ́ ǎ lɛ́ɛ sí cóbó jɛ ali ǎ. Mǐ mɛ klísusɛntɔ́ lɛ́ɛ ɔ́, mǐ ɖó ná d'alɔ gbɛtɔ́ mɔ̌hun lɛ́ɛ, bó ná sixú wa azɔ̌ xá yě, nú nǔgbó ɔ́ ná yi nukɔn. Un wlán wěma kléwún ɖé sɛ́ dó agun ɔ́; lo ɔ́, Diotlefɛ́si e nɔ yí wǎn nú gǎnɖuɖu ɖo yě nu ɔ́ ka gbɛ́ ɖɔ émí kún ná kpé nǔɖé xá mǐ ó. Énɛ́ ɔ́ wú ɔ́, hwenu e un ná wá mi gɔ́n ɔ́, un ná ɖɔ nǔ nyanya e é nɔ́ dó sin lɛ́ɛ nú mi, bó ná ɖɔ nǔyá e é ɖɔ nú mǐ ɔ́ kpódó adingban e é ɖó dó mǐ nu ɔ́ kpán nú mi; énɛ́ kɛ́ɖɛ́ ká wɛ ǎ; é nɔ́ yí nɔví e nɔ wá lɛ́ɛ ɖě ǎ; mɛ ɖěvo lɛ́ɛ ka jló ná yí yě ɔ́, é nɔ lɛ́ lɔn nú yě ǎ, bó nɔ lɛ́ ba ná ɖe yě sín agun ɔ́ mɛ. Mɛvívɛ́ná ce, ma nɔ wa nǔ mɛ e nɔ wa nǔ nyanya é ɖɔhun ó; lo ɔ́, nɔ wa nǔ mɛ e nɔ wa nǔ ɖagbe é ɖɔhun. Mɛ e nɔ wa nǔ ɖagbe ɔ́, Mawu tɔn wɛ é nyí, bɔ mɛ e ka nɔ wa nǔ nyanya ɔ́ mɔ Mawu ǎ. Mɛ bǐ wɛ nɔ ɖɔ Demɛtliwúsi xó ɖagbe; nǔgbó ɔ́ ɖésúnɔ ɖe kúnnu n'i; mǐ lɔ ɔ́, mǐ nɔ́ ɖe kúnnu ɖagbe n'i; a ka tunwun ɖɔ xó nǔgbó wɛ mǐ nɔ́ ɖɔ. Un ɖó xó gěgé bó ná ɖɔ nú we; un ka jló ná wlán yě dó wěma jí sɛ́ dó we ǎ. Un ɖo linlin wɛ ɖɔ un ná wá mɔ we ɖo malín málín mɛ, bɔ mǐ ná kpé nu bó ɖɔ xó. Fífá ní nɔ kpɔ́ xá we. Xɔ́ntɔn towe lɛ́ɛ dó gbe sɛ́ dó we. Dǒ gbe xɔ́ntɔn mǐtɔn lɛ́ɛ ɖokpó ɖokpó nú mǐ. Nyɛ Judi mɛsɛntɔ́ Jezu Klísu tɔn, Jaki sín nɔví ɔ́ wɛ ɖo wěma élɔ́ wlán wɛ; nyɛ wɛ ɖo wěma élɔ́ wlán sɛ́ dó mɛ e Mawu Tɔ́ ɔ́ ylɔ́ bɔ yě ɖo gbɛ ɖo wǎn yíyí tɔn mɛ, bɔ Jezu Klísu ɖo yě hɛn wɛ lɛ́ɛ wɛ. Nǔbláwǔkúnúmɛ Mawu tɔn kpódó fífá tɔn kpó, kpódó wǎn yíyí tɔn kpán ní nɔ kpɔ́ xá mi bó túnflá. Mɛvívɛ́ná ce lɛ́ɛ mi, un ko ɖo lě e un ná wa gbɔn, bó ná wlán wěma sɛ́ dó mi dó hwlɛngán ɖokpó ɔ́ e mǐ ɖó ɔ́ wú ɔ́ ba wɛ syɛ́nsyɛ́n; énɛ́ ɔ́ lin wɛ un ɖe bó wá mɔ ɖɔ é ɖo dandan mɛ nú mì ɖɔ ma wlán sɛ́ dó mi, bó ná dó ná akɔ́nkpinkpan mi, bónú mi ná fun ahwan nú nǔɖiɖi e Mawu ná mɛɖeɖóvo tɔn lɛ́ɛ bǐ azɔn ɖokpó géé bɔ xó fó é. Nǔgbó ɔ́, mɛdídá ɖé lɛ́ɛ lun byɔ́ mi mɛ, bó nɔ́ kpé ta do nú wɛn e ɖɔ xó dó nyɔ̌ná Mawu mǐtɔn tɔn wú é; yě bló mɔ̌, bó ná dó ɖe xlɛ́ ɖɔ gbɛ kwíji kwíji e zán wɛ émí ɖe ɔ́ sɔgbe, bó nɔ́ gbɛ́ Jezu Klísu e nyí Mɛ̌si mǐtɔn ɖokpó géé, bó nyí Aklúnɔ mǐtɔn é. É ko lín din bɔ Mawuxówéma ɔ́ ko ɖɔ hwɛ e è ɖǒ nú yě ɔ́. Nǔ élɔ́ lɛ́ɛ e ɖɔ nú mi gbé wɛ un ja din ɔ́, mi ko tunwun ganjí có un ka jló ná lɛ́ flín mi ɖɔ ée Aklúnɔ hwlɛ́n togun Izlayɛ́li tɔn ɔ́ gán, bó ɖe e sín Ejípu gúdo ɔ́, é wá hu mɛ e gbɛ́ ɖɔ émí kún ná ɖi nǔ n'i ó lɛ́ɛ bǐ. Mi flín wɛnsagun e wa nǔ zɛ acɛ e Mawu ná yě ɔ́ wú lɛ́ɛ; yě jó nɔtɛn yě ɖésúnɔ tɔn dó, bɔ Mawu dó wlɔ yě káká sɔ́yi mavɔ mavɔ, bó sɔ́ yě dó zǐnflú mɛ, ɖo do gɔngɔn mɛ nú azǎn ɖaxó ɔ́; azǎn énɛ́ gbe wɛ Mawu ná ɖó hwɛ nú yě. Mi flín Sodɔ́mu kpó Gomɔ́ɔ kpó, kpódó to e sɛkpɔ́ yě lɛ́ɛ kpó; to énɛ́ mɛ nu lɛ́ɛ wa nǔ wɛnsagun énɛ́ lɛ́ɛ ɖɔhun; yě lɛ́ jó yěɖée dó nú agalilɛ kpódó hɛ̌nnú wiwa kpó; to énɛ́ mɛ nu lɛ́ɛ ɔ́, è sɔ́ zo mavɔ mavɔ dó ɖo tó dɔn nú yě wɛ; è ɖo tó énɛ́ ɔ́ dɔn nú yě wɛ, bó dó ɖo sɛ́n dó nú mɛ bǐ wɛ. Alɔkpa ɖokpó ɔ́ wɛ mɛdídá énɛ́ lɛ́ɛ nɔ wa nǔ gbɔn: dlɔ̌ e yě nɔ́ kú lɛ́ɛ nɔ́ dɔn yě bɔ yě nɔ dɔn agbaza yětɔn blí; yě sɔ́ acɛkpikpa Mawu tɔn dó mɔ nǔɖé ná ǎ, bó nɔ́ zun nǔɖíɖó susunɔ e ɖo sɛ́xwé lɛ́ɛ. Lo ɔ́, hwenu e wɛnsagun ɖaxó Micɛ́li ɖo nǔ dɔn xá awǒvi wɛ, bó ɖo Mɔyízi cyɔ hwlɛ́n xá ɛ wɛ ɔ́, é glá sɔ́ zun dó ɖó hwɛ n'i ǎ; lo ɔ́, é ɖɔ n'i kpowun ɖɔ: “Aklúnɔ ní dɔn tó nú we.” Lo ɔ́, mɛdídá énɛ́ lɛ́ɛ ɔ́, yě nɔ lin tamɛ kpɔ́n cóbó nɔ wa nǔ ǎ. Yě cí gběkanlin ɖɔhun; nǔ e wú yě ma mɔ nukúnnú jɛ ǎ ɔ́ wɛ yě nɔ zun; nǔtunwuntunwun e kpó yě kpó jɔ lɛ́ɛ ɔ́, kú wɛ é nɔ nyí nú yě. Heelú yě, ɖó ali e Kanyɛ́ɛ gbɔn ɔ́ wɛ yě mlɛ́. Yě jó yěɖée dó nú nǔ wa nyi do, bó ná dó mɔ akwɛ́ Baláamu ɖɔhun. Yě dɔn, ɖó yě fɔ́n gǔ Kolée ɖɔhun. Kpɔ́nɔxámɛ yětɔn ɔ́, afɔklɛ́nnú wɛ é nyí ɖo nɔví nɔví nǔɖuɖu mitɔn kɔn, fí e yě nɔ ɖu agɔ̌ ɖe ma ɖó winnyá é. Yě ɖésúnɔ kɛ́ɖɛ́ wú jɛ́n yě nɔ kpé nukún dó. Yě cí akpɔ́kpɔ́ e jɔhɔn nɔ zé, bɔ é ma nɔ ná jǐ ǎ é ɖɔhun. Yě cí atín e hwenu yě ná ná sínsɛ́n dó é ná bó su ɔ́, yě ma nɔ ná sínsɛ́n ǎ lɛ́ɛ ɖɔhun. Yě cí atín e è hɔn dó ɖɔ, bɔ yě kú bǐ é ɖɔhun. Yě cí xu e ɖo xixo wɛ kpó adǎn kpó ɔ́ ɖɔhun, bɔ winnyánú wiwa yětɔn lɛ́ɛ nɔ cí fún e nyɛ wɛ xu ɔ́ ɖe é ɖɔhun. Yě cí sunví e ɖo flúflú wɛ lɛ́ɛ ɖɔhun, bɔ Mawu sɔ́ tɛnmɛ ɖokpó ɖ'ayǐ nú yě káká sɔ́yi, ɖo ablu gɔngɔn ɔ́ mɛ. Mɛ énɛ́ lɛ́ɛ ɔ́, nǔɖé nɔ jɛ yětɔn jí gbeɖé ǎ; vo sa wɛ jɛ́n yě nɔ ɖe; yě nɔ zán gbɛ yětɔn lě e é jló yě gbɔn é; yě nɔ yí nu go, bó nɔ klɔ́ mɛ, bó ná dó mɔ nǔɖé yí ɖo mɛ sí. Amɔ̌, mi mɛvívɛ́ná ce lɛ́ɛ mi, mi flín nǔ e mɛsɛ́dó Aklúnɔ mǐtɔn Jezu Klísu tɔn lɛ́ɛ ko ɖɔ nú mi ɖ'ayǐ é. Nǔgbó ɔ́, yě ɖɔ nú mi ɖɔ: “Azǎn gǔdo gúdo tɔn lɛ́ɛ mɛ ɔ́, mɛɖé lɛ́ɛ ná tíin, bó ná nɔ ɖɔ slǎmɛ mi wú, bó ná zán gbɛ yětɔn lě e jlǒ nyanya yětɔn lɛ́ɛ zɔ́n yě gbɔn é.” Yě wɛ nɔ dɔn kínklán byɔ́ mɛ mɛ. Gbɛtɔ́ e yě nyí ɔ́ wɛ nɔ ɖu ɖo yě jǐ; é nyí Yɛsinsɛn wɛ nɔ ɖu ɖo yě jí ǎ. Amɔ̌ mi mɛvívɛ́ná ce lɛ́ɛ ɔ́, mi ɖo dǒ lí wɛ ɖo nǔɖiɖi mímɛ́ titewungbe e mi ɖó ɔ́ mɛ; mi nɔ xo ɖɛ kpódó Yɛsinsɛn sín hlɔ̌nhlɔ́n kpó, ée mi ɖo te nú Aklúnɔ mǐtɔn Jezu Klísu ná ná gbɛ mavɔ mavɔ mi ɖo xomɛnyínyɔ́ tɔn mɛ ɔ́, mi hɛn miɖée ɖo wǎn yíyí Mawu tɔn mɛ. Mɛ e nɔ ɖo nǔ xo kpɔ́n wɛ lɛ́ɛ sín nǔ ní nɔ blá wǔ nú mi. Mi dɔn yě sín myɔ mɛ dó hwlɛ́n yě gán. Mi kú nǔbláwǔ nú mɛ ɖě lɛ́ɛ lɔmɔ̌; ayi mitɔn ní ka ɖo te; mi gbɛ́ wǎn nú hwɛhuhu sín ninɔmɛ e yě ɖó ɔ́ káká yi jɛ awu yětɔn e hwɛhuhu sín jlǒ ɖaxó e yě ɖǒ ɖo gbɛtɔ́ nyínyí yětɔn mɛ é nɔ́ hɛn blí é jí. Nǔ e ɖo hwlǎhwlá, bɔ Jezu Klísu ɖe xlɛ́ céɖécéɖé lɛ́ɛ wɛ ɖo wěma élɔ́ mɛ. Mawu ɖe nǔ énɛ́ lɛ́ɛ xlɛ́ ɛ, bónú é ná xlɛ́ nǔ e ná jɛ ɖo malín málín mɛ lɛ́ɛ mɛsɛntɔ́ tɔn lɛ́ɛ. Jezu Klísu sɛ́ wɛnsagun tɔn dó mɛsɛntɔ́ tɔn Jǎan, bó ɖe nǔ lɛ́ɛ xlɛ́ ɛ. Jǎan ɖe kúnnu nú nǔ e é mɔ lɛ́ɛ bǐ. Wɛn e Mawu dó ɔ́, kpó nǔgbó e Jezu Klísu ɖe xlɛ́ ɔ́ kpó sín xó wɛ é ɖɔ ɖo fí. Nǔ nyɔ́ nú mɛ e ɖo wěma élɔ́ xa wɛ ɔ́, bó nyɔ́ nú mɛ e ɖo tó ɖó wɛn élɔ́ lɛ́ɛ e Mawu dó gbɔn gbeyíɖɔ tɔn lɛ́ɛ jí, bó nɔ́ bló ɖ'é jí lɛ́ɛ wɛ. Đó hwenu e Mawu ɖó bɔ nǔ énɛ́ lɛ́ɛ bǐ ná jɛ dó ɔ́ kó sɛ yá. bó zé mǐ dó bló vɔ̌sánú-xwlémawutɔ́ lɛ́ɛ sín axɔ́súɖuto ná, bónú mǐ ná nɔ wa azɔ̌ nú Tɔ́ tɔn Mawu. Susu kpó hlɔ̌nhlɔ́n kpó ní nyí étɔn káká sɔ́yi mavɔ mavɔ! Amǐ. Mi kpɔ́n! É jǎwe ɖo akpɔ́kpɔ́ mɛ! Mɛ bǐ ná mɔ ɛ; mɛ e sɔ́ hwǎn ɛ lɛ́ɛ lɔ ná mɔ ɛ. Akɔta e ɖo ayǐkúngban jí lɛ́ɛ bǐ ná ná alě ɖó éyɛ́ wú. Nǔgbó wɛ, é ná nyí mɔ̌! Amǐ. Aklúnɔ Mawu Nǔbǐwúkpétɔ́ e tíin din, bó ka kó tíin ɖ'ayǐ, bó ná wá ɔ́ ɖɔ: “Un nyí Alufa, bó nyí Omɛga; un nyí bǐbɛ́, bó nyí vivɔ.” Un nɔ nyí Jǎan; nɔví mitɔn wɛ un nyí; ɖo bǔ e mǐ ɖe xá Jezu é mɛ ɔ́, un ɖo ya ji xá mi wɛ, bó ɖo axɔ́súɖuɖu ɔ́ mɛ xá mi; un ɖo te kpódó suúlu kpó xá mi. Un ɖo tɔtɛ́ntin-yíkúngban e è nɔ ylɔ́ ɖɔ Patimɔ́si ɔ́ jí, ɖó un jlá Mawuxó ɔ́ bó ɖe kúnnu nú Jezu wútu. Aklúnɔzán gbe ɔ́, Yɛsinsɛn wá jǐ ce, bɔ un nɔ se gbe syɛ́nsyɛ́n ɖé ɖo gǔdo ce, bɔ gbe ɔ́ nɔ́ ɖɔ nǔ kpɛn ɖaxó ɖé ɖɔhun, bó nɔ́ ɖɔ: “Wlǎn nǔ e mɔ wɛ a ɖe lɛ́ɛ dó wěma mɛ, bó sɛ́ wěma ɔ́ dó agun Klísu tɔn tɛ́nwe élɔ́ lɛ́ɛ: agun Efɛ́zi tɔn, Simíini tɔn, Pɛɛgamu tɔn, Tiatíi tɔn, Saadu tɔn, Filadɛlufíi tɔn kpó Lawodisée tɔn kpó.” Un lílɛ́, bó ná kpɔ́n mɛ e ɖo xó ɖɔ nú mì wɛ é; énɛ́ ɔ́, un mɔ sikázogbɛ́nhɛnnú tɛ́nwe. Nǔ gbɛtɔ́ ɖɔhun ɖé ɖo tɛ́ntin yětɔn; é dó awu gaga ɖé, bɔ awu ɔ́ ɖi ga káká wá afɔ tɔn lɛ́ɛ jí; é zé akɔ́ntablánú e è zé siká dó bló ná ɔ́ sin dó akɔ́ngónu. Ta tɔn kpó ɖa tɔn lɛ́ɛ kpó wé avɔkanfún abǐ lawé ɖɔhun; nukún tɔn lɛ́ɛ nɔ́ kán zo myɔ ɖɔhun. Afɔ tɔn lɛ́ɛ nɔ kɔ́n ganvɔ e è sínsín ɖo zo mɛ, bó ɖíɖí wǔ ná ɔ́ ɖɔhun; gbe tɔn nɔ ɖɔ nǔ sin ɖaxó ɖo ayǐ kɔn nyi wɛ ɖɔhun. É hɛn sunví tɛ́nwe dó alɔ tɔn ɖisí ɔ́ mɛ, bɔ hwǐ ɖíɖá nu we nɔ ɖé nɔ tɔ́n sín nu tɔn mɛ; nukún tɔn mɛ nɔ kɔ́n lě e hwe nɔ kɔ́n gbɔn ɖo hwemɛ cíɖíɖí é ɖɔhun. Ée un mɔ ɛ ɔ́, un jɛ ayǐ ɖo asá tɔn mɛ, bó cí mɛkúkú ɖɔhun. É ɖó alɔ tɔn ɖisí ɔ́ jǐ ce, bó ɖɔ: “Ma ɖi xɛsi ó! Nyɛ wɛ nyí mɛ e jɛ nukɔn ɔ́, bó nyí mɛ e gbɔn gǔdo é. Nyɛ wɛ nyí mɛ gbɛɖe ɔ́. Un ko kú ɖ'ayǐ; amɔ̌ din ɔ́, un ɖo gbɛ hwebǐnu; kú kpódó kútomɛ kpán sín cávi ɖo así ce. Hǔn, bo wlán nǔ e a mɔ lɛ́ɛ: ée ɖo jijɛ wɛ din lɛ́ɛ kpódó ée ná wá jɛ dó énɛ́ lɛ́ɛ gúdo lɛ́ɛ kpán. Sunví tɛ́nwe e mɔ wɛ a ɖe ɖo alɔ ce ɖisí ɔ́ mɛ lɛ́ɛ kpó sikázogbɛ́nhɛnnú tɛ́nwe lɛ́ɛ kpó ɔ́, nǔbúdo e ɖe xlɛ́ wɛ yě ɖe ɔ́ ɖíe: sunví tɛ́nwe lɛ́ɛ ɔ́, agun Klísu tɔn tɛ́nwe lɛ́ɛ sín wɛnsagun lɛ́ɛ wɛ; bɔ zogbɛ́nhɛnnú tɛ́nwe lɛ́ɛ nyí agun Klísu tɔn tɛ́nwe lɛ́ɛ.” Wlǎn wěma sɛ́ dó agun Klísu tɔn e ɖo Efɛ́zi ɔ́ sín wɛnsagun, bó ɖɔ n'i ɖɔ: “Mɛ e hɛn sunví tɛ́nwe lɛ́ɛ dó alɔ tɔn ɖisí ɔ́ mɛ, bó ɖo zɔnlin ɖi wɛ ɖo sikázogbɛ́nhɛnnú tɛ́nwe lɛ́ɛ tɛ́ntin ɔ́, xó e ɖɔ wɛ é ɖe ɔ́ ɖíe: Un tunwun nǔ e a wa ɔ́ bǐ; un tunwun tagba e a jɛ é, bó tunwun ɖɔ a ɖǒ suúlu. Un tunwun ɖɔ a kún nɔ sixú mɔ mɛdídá lɛ́ɛ gbɔ ó; yě mɛ e nɔ ɖɔ émí nyí mɛsɛ́dó, bó ma ka nyí ǎ lɛ́ɛ ɔ́, a ba do nú yě, bó mɔ ɖɔ adingbannɔ wɛ nú yě. A ɖǒ suúlu; a mɔ wǔvɛ́ ɖó nyɛ wútu, bɔ awakanmɛ ka kú we ǎ. Lo ɔ́, nǔ towe e vɛ́ wǔ ce ɔ́ ɖíe: a sɔ́ ɖó wǎn yíyí lě e a ɖǒ gbɔn ɖo bǐbɛ́mɛ é ǎ. Hǔn, bó flín tɛn ɖagbe e mɛ a jɛ ayǐ sín é, bó lɛ́ kɔ sín hwɛ towe lɛ́ɛ gúdo, bó wa nǔ lě e a blǒ gbɔn ɖo bǐbɛ́mɛ é. Ényí a ma lɛ́ kɔ sín hwɛ towe lɛ́ɛ gúdo ǎ ɔ́, un ná wá mɔ we, bó na ɖe zogbɛ́nhɛnnú towe síin. É ka ɖo mɔ̌ có, nǔ élɔ́ e a nɔ bló ɔ́ nyɔ́ nú we: a gbɛ́ wǎn nú nǔ e Nikoláa gbɛ́ta lɛ́ɛ nɔ wa lɛ́ɛ é, lě e un gbɛ́ wǎn ná gbɔn é. “Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́, un ná ná ɛ gbe, bɔ é ná ɖu atín e nɔ ná gbɛ jɔ gbɛ mɛ, bó ɖo Mawu sín jikpá mɛ ɔ́ sín sínsɛ́n.” Wlǎn wěma sɛ́ dó agun Klísu tɔn e ɖo Simíini ɔ́ sín wɛnsagun, bó ɖɔ n'i ɖɔ: “Mɛ e nyí mɛ e jɛ nukɔn, bó nyí mɛ e gbɔn gǔdo ɔ́, mɛ e ko kú, bó lɛ́ fɔ́n ɔ́, xó e é ɖɔ ɔ́ ɖíe: Un tunwun wǔvɛ́ e mɔ wɛ a ɖe lɛ́ɛ; un tunwun ɖɔ a kún ɖó nǔɖé ó; nú è ka ná ɖɔ nǔgbó ɔ́, dɔkunnɔ wɛ a nyǐ! Yě mɛ e ɖɔ émí nyí Jwifu, bó ma ka nyí ǎ lɛ́ɛ ɔ́, un tunwun nǔ nyanya e ɖɔ dó wǔ towe wɛ yě nɔ ɖe lɛ́ɛ: gbɛ̌ kplékplé Satáan tɔn wɛ yě nyí! Wǔvɛ́ e a nǎ mɔ ɔ́ ní ma dó xɛsi nú we ó. Đǒtó: Awǒvi ná bɛ́ mɛ gěgé ɖo mi mɛ dó gankpá mɛ, bó ná dó tɛ́n mi kpɔ́n; mi ná mɔ wǔvɛ́ xɔ azǎn wǒ. Nɔ gbejí káká yi kú; énɛ́ ɔ́, un ná ná we gbɛ bɔ é ná cí axɔ́súgbákún e nɔ́ ná gbɛ mɛ é ɖɔhun. “Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́ ná kú kú wegɔ́ ɔ́ ǎ.” Wlǎn wěma sɛ́ dó agun Klísu tɔn e ɖo Pɛɛgamu ɔ́ sín wɛnsagun, bó ɖɔ n'i ɖɔ: “Mɛ e ɖó hwǐ ɖíɖá nu we nɔ ɔ́, xó e é ɖɔ ɔ́ ɖíe: Un tunwun fí e a nɔ nɔ é: fí e Satáan ɖu axɔ́sú ɖe ɔ́ wɛ a nɔ nɔ. A nɔ gbejí nú mì; a jǒ nǔɖiɖi e a ɖǒ nú mì ɔ́ dó ǎ; hwenu e è hu kúnnuɖetɔ́ ce gbejínɔtɔ́ Antipasi ɖo mi gɔ́n ɖo fí e Satáan nɔ nɔ ɔ́, a jǒ mì dó ǎ. É ka ɖo mɔ̌ có a wa nǔɖé lɛ́ɛ bɔ é vɛ́ wǔ ce: mɛ e tɛ́ dó nǔkplɔ́nmɛ Baláamu tɔn wú lɛ́ɛ ɖo mi mɛ: Baláamu nɔ kplɔ́n nǔ Balaki ɖɔ ní dɔn Izlayɛ́li ví lɛ́ɛ, bónú yě ní ɖu kanlin e è xwlé vodún lɛ́ɛ sín lan, bó lɛ aga, bó ná dó hu hwɛ. Mɔ̌ ɖokpó ɔ́, mɛ e nɔ tɛ́ dó nǔkplɔ́nmɛ Nikoláa gbɛ́ta lɛ́ɛ tɔn wú lɛ́ɛ lɔ ɖo mi mɛ. Hǔn, bo lɛ́ kɔ sín hwɛ towe lɛ́ɛ gúdo; é ma nyí mɔ̌ ǎ ɔ́, un ná wá mɔ we ɖo malín málín mɛ din, bó ná zé hwǐ e nɔ tɔ́n sín nu ce mɛ ɔ́ dó fun ahwan xá mɛ énɛ́ lɛ́ɛ. “Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́, un ná ná ɛ nǔɖuɖu e è nɔ ylɔ́ ɖɔ mǎna bɔ é ɖo hwlǎhwlá ɔ́. Un ná lɛ́ ná ɛ awǐnnya wěwé e jí è wlǎn nyǐkɔ yɔ̌yɔ́ ɖé dó ɔ́; mɛ ɖěbǔ tunwun nyǐkɔ énɛ́ zɛ mɛ e yí awǐnnya énɛ́ é wú ǎ.” Wlǎn wěma sɛ́ dó agun Klísu tɔn e ɖo Tiatíi ɔ́ sín wɛnsagun, bó ɖɔ n'i ɖɔ: “Mawu ví e nukún tɔn lɛ́ɛ nɔ kán zo myɔ ɖɔhun, bɔ afɔ tɔn lɛ́ɛ nɔ kɔ́n ganvɔ e è ɖiɖi wǔ ná ɔ́ ɖɔhun ɔ́, xó e é ɖɔ ɔ́ ɖíe: Un tunwun nǔ e wa wɛ a ɖe ɔ́ bǐ; un tunwun lě e a ɖo gbejí gbɔn é; un tunwun lě e a bǐ dó azɔ̌ wú gbɔn é, bó tunwun suúlu e a ɖǒ é. Un tunwun ɖɔ azɔ̌ e wa wɛ a ɖe din ɔ́ sukpɔ́ hú ée a wa ɖo bǐbɛ́mɛ é. Lo ɔ́, nǔ towe e vɛ́ wǔ ce ɔ́ ɖíe: nyɔ̌nu e nɔ nyí Jezabɛ́li bó nɔ ylɔ́ éɖée ɖɔ gbeyíɖɔ Mawu tɔn ɔ́, a nɔ jó e dó bɔ é nɔ kplɔ́n nǔ mɛsɛntɔ́ ce lɛ́ɛ ɖɔ yě ní nɔ́ lɛ aga; yě ní nɔ́ ɖu kanlin e è xwlé vodún lɛ́ɛ sín lan; é nɔ́ kplɔ́n nǔ énɛ́ lɛ́ɛ yě dó flú yě. Un jó hwenu dó n'i, bónú é ná lɛ́ kɔ sín hwɛ tɔn lɛ́ɛ gúdo; lo ɔ́, é jló ná jó agalilɛ dó ǎ. Énɛ́ ɔ́ wú wɛ un ná zé e nyi zan jí; un ná zɔ́n bɔ mɛ e nɔ lɛ aga xá ɛ lɛ́ɛ lɔ ná mɔ wǔvɛ́ ɖaxó, afi nú yě lɛ́ kɔ sín nǔ nyanya e wa wɛ é kpó yě kpó ɖe lɛ́ɛ gúdo. Un ná hu vǐ tɔn lɛ́ɛ; énɛ́ ɔ́, agun Klísu tɔn lɛ́ɛ bǐ ná tunwun ɖɔ nyɛ wɛ nyí mɛ e nɔ tunwun linlin kpódó jlǒ gbɛtɔ́ tɔn lɛ́ɛ kpán é. Un ná sú lě e mi mɛ ɖokpó ɖokpó wa nǔ gbɔn ɔ́ sín axɔ́ mi. “Amɔ̌ midɛɛ lɛ́ɛ ɔ́, mi mɛ e ɖo agun Tiatíi tɔn ɔ́ mɛ, bó ma xwedó nǔkplɔ́nmɛ nyanya énɛ́ ɔ́ ǎ, bó ma ka mɔ nukúnnú jɛ nǔ e mɛ énɛ́ lɛ́ɛ nɔ ylɔ́ ɖɔ ‘do gɔngɔn Satáan tɔn’ ɔ́ wú ǎ lɛ́ɛ ɔ́, un ɖo ɖiɖɔ nú mi wɛ ɖɔ un kún sɔ́ ná ɖíɖá agban ɖěvo mi ó. Lo ɔ́, mi hɛn nǔ e mi ɖó ɔ́ wú syɛ́nsyɛ́n káká bónú ma wá. Un ná ná ɛ sunví zǎnzǎn tɔn lɔmɔ̌. “Mɛ e ɖó tó, bó ná dó se nǔ ɔ́ ní se nǔ jɛ nǔ e ɖɔ nú agun lɛ́ɛ wɛ Yɛsinsɛn ɖe ɔ́ mɛ ganjí!” Wlǎn wěma sɛ́ dó agun Klísu tɔn e ɖo Saadu ɔ́ sín wɛnsagun, bó ɖɔ n'i ɖɔ: “Mɛ e sí yɛ Mawu tɔn tɛ́nwe lɛ́ɛ kpódó sunví tɛ́nwe lɛ́ɛ kpán ɖe ɔ́, xó e é ɖɔ ɔ́ ɖíe: Un tunwun nǔ e wa wɛ a ɖe ɔ́ bǐ; un tunwun ɖɔ è nɔ mɔ we dó mɔ mɛ gbɛɖe; lo ɔ́, a ko kú. Fɔ́n, bó dó wǔsyɛ́n lanmɛ nú nǔ e lɛ́ kpo ɖo así towe é, bónú é ma kú bǐ gbídígbídí ó, ɖó un mɔ ɖɔ azɔ̌ e a wa lɛ́ɛ kún nyí azɔ̌ e nyɔ́ bɔ nǔ vɔ ɖ'é wú ɖo Mawu ce nukɔn ɔ́ ó. Hǔn, bó flín kplɔ́n e a yǐ ɔ́, bó flín lě e a se gbɔn é; se tónú nú kplɔ́n énɛ́ ɔ́, bó lɛ́ kɔ sín hwɛ towe lɛ́ɛ gúdo. Ényí a ma fɔ́n ǎ ɔ́, un ná wá fyán we ajotɔ́ ɖɔhun, a nǎ tunwun gan e mɛ un ná wá dó é ǎ. É ka ɖo mɔ̌ có, ɖo Saadu ɔ́, mɛ towe lɛ́ɛ ɖě tíin, bó hɛn awu yětɔn lɛ́ɛ blí ǎ. Yě ná dó awu wěwé, bó ná zɔn xá mì, ɖó yě nyí mɛ e jɛ xá é. “Mɔ̌ wɛ mɛ e ná ɖu ɖ'é jí ɔ́ ná dó awu wěwé gbɔn; un ná súnsún nyǐkɔ tɔn sín gbɛwéma ɔ́ mɛ ǎ. Un ná ɖɔ ɖo Tɔ́ ce kpó wɛnsagun tɔn lɛ́ɛ kpó nukɔn ɖɔ ce wɛ é nyí. “Mɛ e ɖó tó bó ná dó se nǔ ɔ́, ní se nǔ jɛ nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ mɛ ganjí!” “Wlǎn wěma sɛ́ dó agun Klísu tɔn e ɖo Filadɛlufíi ɔ́ sín wɛnsagun, bó ɖɔ n'i ɖɔ: “Mɛ e nyí mɛ mímɛ́, bó nyí mɛ titewungbe ɔ́, mɛ e sí axɔ́sú Davídi sín cávi ɔ́ ɖe ɔ́, mɛ e nɔ hun hɔn bɔ mɛ ɖěbǔ ma nɔ sixú sú ǎ é, mɛ e nɔ sú hɔn bɔ mɛ ɖěbǔ ma nɔ sixú hun ǎ é ɔ́, xó e é ɖɔ ɔ́ ɖíe: Un tunwun nǔ e wa wɛ a ɖe ɔ́ bǐ; un tunwun ɖɔ hlɔ̌nhlɔ́n kpɛɖé jɛ́n a ɖǒ; é ka ɖo mɔ̌ có, a blǒ ɖó xó ce jí; a nɔ gbejí nú mì; un hun hɔn ɖé ɖo nukɔn towe bɔ mɛ ɖěbǔ sixú sú ǎ. Mɛ e ɖo Satáan sín kplɔ́ngbasá lɛ́ɛ ɔ́, yě mɛ adingbannɔ énɛ́ lɛ́ɛ e nɔ ɖɔ émí nyí Jwifu, bó ma ka nyí ǎ lɛ́ɛ ɔ́, nǔ e un ná wa xá yě ɔ́ ɖíe: un ná dɔn yě gǎnnugǎnnu, bɔ yě ná wá jɛ kpo ɖo nukɔn towe, bó ná wlí yɛ̌yi nú we. Yě ná tunwun ɖɔ un yí wǎn nú we. Đó xó e un ɖɔ nú we ɖɔ hwi ní ɖó kan dó nǔ wú ɔ́, a hɛn dó ayi mɛ; énɛ́ wútu ɔ́, hwenu e awě e ná wá xo gbɛ ɔ́ bǐ, bó ná tɛ́n mɛ e ɖo ayǐkúngban jí lɛ́ɛ kpɔ́n ɔ́ ná wá ɔ́, nyɛ lɔ ná cyɔ́n alɔ jǐ we. Un ná wá ɖo malín málín mɛ din. Hɛn nǔ e ɖo así towe ɔ́ syɛ́nsyɛ́n, bónú mɛɖé ma yí ɖuɖéjí towe sín ajɔ ɔ́ sín así towe ó. “Mɛ e ná ɖu ɖ'é jí ɔ́, un ná sɔ́ ɛ dó bló dotín ná ɖo sinsɛnxɔ Mawu ce tɔn mɛ, bɔ é sɔ́ ná tɔ́n ǎ. Un ná wlán Mawu ce sín nyǐkɔ kpódó Mawu ce sín toxo sín nyǐkɔ kpán dó wǔ tɔn; Mawu ce sín toxo ɔ́ wɛ nyí Jeluzalɛ́mu yɔ̌yɔ́ e Mawu ce ná sɛ́ dó, bɔ é ná jɛ te sín sɛ́xwé wá é. Un ná wlán nyǐkɔ ce yɔ̌yɔ́ ɔ́ lɔ dó wǔ tɔn. “Mɛ e ɖó tó bó ná dó se nǔ ɔ́ ní mɔ nǔ jɛ nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ mɛ ganjí.” “Wlǎn wěma sɛ́ dó agun Klísu tɔn e ɖo Lawodisée ɔ́ sín wɛnsagun, bó ɖɔ n'i ɖɔ: “Mɛ e nɔ nyí Amǐ, bó nyí Kúnnuɖetɔ́ gbejínɔtɔ́ titewungbe, bó nyí mɛ e jí Mawu blǒ nǔ bǐ sésé gbɔn ɔ́, xó e é ɖɔ ɔ́ ɖíe: Un tunwun nǔ e a wa ɔ́ bǐ; un tunwun ɖɔ a kún fá ó, a kún ka hun zo ó; é jló mì ɖésú ɖɔ a nǐ nyí ɖokpó ɖo we lɛ́ɛ mɛ. Lo ɔ́, ée é ka nyí ɖɔ gblɔ̌ wɛ a gblɔ̌ xɛ́ɛ́ ɔ́, a hun zo ǎ, a ka fá ǎ; un ná vi we sín kɔ! A nɔ ɖɔ: ‘Un jɛ dɔkun, un mɔ akwɛ́, nǔɖé hwe dó mì ǎ.’ Lo ɔ́, a tunwun ɖɔ gbɛ̌dónánɔ wɛ émí nyí, lobo nyí lelenɔ ǎ. Wamamɔnɔ wɛ a nyǐ; nukúntíntɔ́nnɔ wɛ nú we; mɛ̌ wɛ a ɖe. Énɛ́ ɔ́ wú wɛ un ɖo nǔ kplɔ́n we wɛ ɖɔ hwi ní xɔ siká e è ko zé dó myɔ mɛ, bɔ nǔblíblí ɖé ma sɔ́ ɖ'é mɛ ǎ ɔ́ ɖo así ce, bó ná dó nyí dɔkunnɔ. Xɔ awu wěwé lɛ́ɛ lɔ ɖo así ce, bó ná dó, dó mɛ̌ towe e ɖo winnyá hu nú we wɛ ɔ́ jí. Mɔ̌ ɖokpó ɔ́, xɔ nukúntínkɛn ɖo así ce, bó ná dó nukún towe lɛ́ɛ jí, bó ná sixú mɔ nukúnnú. Mɛ e un yí wǎn ná lɛ́ɛ ɔ́, un nɔ gbɛ́ nǔ nú yě bǐ, bó nɔ kplɔ́n nǔ yě bǐ. Hǔn, bo ɖe bǐbí dó nǔ wú towe xlɛ́, bó lɛ́ kɔ sín hwɛ towe lɛ́ɛ gúdo. Đǒtó, un ɖo te ɖo hɔn jí, bó ɖo hɔn xúxú wɛ; ényí mɛɖé se gbe ce, bó hun hɔn ɔ́, un ná byɔ́ xwé tɔn gbe; un ná ɖu nǔ xá ɛ, bɔ é ná ɖu nǔ xá mì. “Mɛ e ná ɖu ɖ'é jí ɔ́, un ná ná ɛ gbe, bɔ é ná jínjɔ́n axɔ́súzinkpo ce jí, lě e un ɖu ɖ'é jí, bó jínjɔ́n Tɔ́ ce kpá ɖo axɔ́súzinkpo tɔn jí é ɖɔhun. “Mɛ e ɖó tó bó ná dó se nǔ ɔ́ ní se nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ ganjí.” Énɛ́ ɔ́ gúdo ɔ́, un ɖo nǔ kpɔ́n wɛ bó mɔ hɔn ɖé ɖo hunhun ɖo sɛ́xwé. Gbe e ɖo nǔ ɖɔ wɛ kpɛn ɖaxó ɖé ɖɔhun, bó ɖo xó ɖɔ nú mì wɛ ɖ'ayǐ ɔ́ ɖɔ nú mì ɖɔ: “Xá jǐ fí, un ná xlɛ́ nǔ e ɖó ná jɛ énɛ́ ɔ́ gúdo ɔ́ we.” Tlóló ɔ́, Yɛ wá jǐ ce, bɔ un mɔ axɔ́súzinkpo ɖokpó ɖo sɛ́xwé, bɔ mɛ ɖokpó ɖo ayǐjínjɔ́n ɖo axɔ́súzinkpo énɛ́ jí. Mɛ e ɖo ayǐjínjɔ́n ɖ'é jí ɔ́ sín ninɔmɛ cí awǐnnya xɔ akwɛ́ e è nɔ ylɔ́ ɖɔ jasipée ɔ́ kpódó ée è nɔ ylɔ́ ɖɔ sadwáni ɔ́ kpán ɖɔhun. Nyǐ ɖi lɛ́ lɛ̌ dó zinkpo ɔ́, bó nɔ kɔ́n awǐnnya e è nɔ ylɔ́ ɖɔ emɛlodu ɔ́ ɖɔhun. Axɔ́súzinkpo ko-nukún-ɛnɛ ɖěvo lɛ́ lɛ̌ dó axɔ́súzinkpo énɛ́, bɔ mɛxó ko-nukún-ɛnɛ ɖo ayǐjínjɔ́n ɖo axɔ́súzinkpo énɛ́ lɛ́ɛ jí. Yě dǒ awu wěwé, bó xwe axɔ́súgbákún e è sɔ́ siká dó bló ná é. Jǐ nɔ kɛ wun, è nɔ se gbe ɖé lɛ́ɛ; jǐ nɔ dó gbe sín axɔ́súzinkpo ɔ́ kɔn. Zohwín tɛ́nwe ɖo jiji wɛ ɖo axɔ́súzinkpo ɔ́ nukɔn; zohwín tɛ́nwe énɛ́ lɛ́ɛ ɔ́, Yɛ Mawu tɔn tɛ́nwe lɛ́ɛ wɛ. Xu wěkpɛ́n ɖɔhun ɖé ɖo faɖaɖa ɖo axɔ́súzinkpo ɔ́ nukɔn, lobo cí awǐnnya e è nɔ ylɔ́ ɖɔ klísutalu ɔ́ ɖɔhun. Nǔɖogbɛ ɛnɛ ɖo tɛ́ntin, lɛ́ lɛ̌ dó axɔ́súzinkpo ɔ́. Nǔɖogbɛ énɛ́ lɛ́ɛ ɔ́, nukún kpé gǔdo kpó nukɔn kpó nú yě. Nǔɖogbɛ nukɔntɔn ɔ́ ɖi kinnikínní; nǔɖogbɛ wegɔ́ ɔ́ ɖi nyibúsú wínnyáwínnyá. Nǔɖogbɛ atɔngɔ́ ɔ́ sín nukún mɛ ɖi gbɛtɔ́ sín nukún mɛ, bɔ nǔɖogbɛ ɛnɛgɔ́ ɔ́ ɖi gangan e ɖo zinzɔn wɛ é. Nǔɖogbɛ lɛ́ɛ ɖokpó ɖokpó ɖó awa ayizɛ́n; nukún kpé fí bǐ nú yě ɖo wěxo kpódó xomɛ kpó. Yě nɔ gɔn han ji zǎn kéze ǎ; yě nɔ ɖɔ: “Mǐmɛ́! Mǐmɛ́! Mǐmɛ́ wɛ Aklúnɔ Mawu ɔ́ nyí; é tíin ɖ'ayǐ, bó tíin din; é ná wá.” Nǔɖogbɛ ɛnɛ lɛ́ɛ nɔ ji han dó kpá susu, dó wlí yɛ̌yi, dó dó kú nú mɛ e ɖo ayǐjínjɔ́n ɖo axɔ́súzinkpo ɔ́ jí, bó ɖo gbɛ káká sɔ́yi é. Nú yě ɖo mɔ̌ bló wɛ hweɖěbǔnu ɔ́, mɛxó ko-nukún-ɛnɛ lɛ́ɛ nɔ jɛ kpo ɖo mɛ e ɖo axɔ́súzinkpo ɔ́ jí, bó ɖo gbɛ káká sɔ́yi ɔ́ nukɔn, bó nɔ sɛn ɛ. Yě nɔ zé axɔ́súgbákún yětɔn lɛ́ɛ nyi axɔ́súzinkpo ɔ́ nukɔn, bó nɔ ɖɔ: “Aklúnɔ mǐtɔn, Mawu mǐtɔn, susu, yɛ̌yi kpó hlɔ̌nhlɔ́n kpó jɛ xá we, ɖó a blǒ nǔ bǐ; hwi wɛ jló bɔ yě tíin; hwi wɛ jló bɔ yě ɖo gbɛ.” Énɛ́ ɔ́ gúdo ɔ́, un mɔ wěma ɖé ɖo mlǎmlá ɖo mɛ e jínjɔ́n axɔ́súzinkpo jí ɔ́ sín alɔ ɖisí ɔ́ mɛ; è wlán nǔ dó wěma énɛ́ sín akpáxwé we lɛ́ɛ bǐ; è tlɛ́ wěma ɔ́ ɖo fí tɛ́nwe, bó ɖó wuntun jí. Un mɔ wɛnsagun hlɔ̌nhlɔ́nnɔ ɖokpó ɖo xó sú wɛ tlílí, bó nɔ ɖɔ: “Mɛ̌ é ka jɛ xá ɖɔ é nǐ gba wuntun lɛ́ɛ, bó hun wěma ɔ́.” Lo ɔ́, mɛ ɖěbǔ ɖe ɖo jǐxwé ǎ; mɛɖé ɖe ɖo ayǐkúngban jí ǎ; mɛɖé ka ɖe ɖo ayǐkúngban glɔ́, bó ná sixú hun wěma ɔ́, abǐ bó ná sixú kpɔ́n xo tɔn mɛ ǎ. Énɛ́ ɔ́, un ya avǐ ɖésú, ɖó è mɔ mɛ e jɛ xá ɖɔ é ní hun wěma ɔ́, abǐ ní kpɔ́n xo tɔn mɛ é ɖěbǔ ǎ. Lo ɔ́, mɛxó lɛ́ɛ ɖokpó ɖɔ nú mì ɖɔ: “Ma ya avǐ ó, kpɔ́n: kinnikínní e ɖo akɔta Judáa tɔn mɛ, bó nyí axɔ́sú Davídi ví ɔ́ ɖu ɖ'é jí, bó ná gba wuntun tɛ́nwe lɛ́ɛ, bó ná hun wěma ɔ́.” Un mɔ Lɛ̌ngbɔ́ví ɖokpó ɖo te ɖo axɔ́súzinkpo ɔ́ tɛ́ntin; nǔɖogbɛ ɛnɛ lɛ́ɛ kpó mɛxó lɛ́ɛ kpó lɛ́ lɛ̌ dó e. Lɛ̌ngbɔ́ví ɔ́ cí hu wɛ è hu i ɖɔhun; é ɖó zo tɛ́nwe, bó ɖó nukún tɛ́nwe; nukún tɛ́nwe lɛ́ɛ wɛ nyí Yɛ Mawu tɔn tɛ́nwe e è sɔ́ sɛ́ dó ayǐkúngban ɔ́ bǐ jí é. Lɛ̌ngbɔ́ví ɔ́ sɛ yi nukɔn, bó yí wěma ɔ́ ɖo mɛ e jínjɔ́n axɔ́súzinkpo ɔ́ jí ɔ́ sín alɔ ɖisí ɔ́ mɛ. Ée é yí wěma ɔ́ é ɔ́, nǔɖogbɛ ɛnɛ lɛ́ɛ kpó mɛxó ko-nukún-ɛnɛ lɛ́ɛ kpán jɛ kpoli ɖo nukɔn tɔn. Yě mɛ ɖokpó ɖokpó hɛn agǐdigbo ɖokpó ɖokpó, bó lɛ́ hɛn sikákɔ́fu, bɔ zǎlínkpɔ́n gɔ́. Zǎlínkpɔ́n ɔ́ wɛ nyí ɖɛ e mɛɖeɖóvo Mawu tɔn lɛ́ɛ nɔ xo lɛ́ɛ. Yě ɖo han yɔ̌yɔ́ ɖé ji wɛ ɖɔ: “A nyǐ mɛ e jɛ xá bó ná yí wěma ɔ́, bó gba wuntun lɛ́ɛ é; ɖó è hu we, bɔ gbɔn hun towe gbla mɛ ɔ́, a xɔ gbɛ nú gbɛtɔ́ lɛ́ɛ nú Mawu, ɖo gbe lɛ́ɛ bǐ mɛ, ɖo togun lɛ́ɛ bǐ mɛ, ɖo to lɛ́ɛ bǐ mɛ. A sɔ́ yě dó bló axɔ́súɖuto, bó sɔ́ yě dó bló vɔ̌sánú-xwlémawutɔ́ lɛ́ɛ sín axɔ́súɖuto ná, bónú yě ná wa azɔ̌ nú Mawu mǐtɔn, bó ná ɖu axɔ́sú ɖo ayǐkúngban jí.” Un lɛ́ kpɔ́n bó se wɛnsagun wɔ̌buwɔ́bú ɖé lɛ́ɛ sín gbe; wɛnsagun wɔ̌bliwɔ̌va wɛ; yě lɛ́ lɛ̌ dó axɔ́súzinkpo ɔ́ kpó nǔɖogbɛ lɛ́ɛ kpó, kpódó mɛxó lɛ́ɛ kpán. Yě zé gbe dó jǐ bó ɖo ɖiɖɔ wɛ ɖɔ: “Lɛ̌ngbɔ́ví e è hu ɔ́ wɛ nyí mɛ e é jɛ xá bɔ é ná yí acɛ, dɔkun, nǔnywɛ́, hlɔ̌nhlɔ́n, yɛ̌yi, susu kpó kpikpa kpó é.” Un lɛ́ se nǔɖíɖó e ɖo jǐxwé lɛ́ɛ bǐ, ée ɖo ayǐkúngban jí lɛ́ɛ bǐ, ée ɖo ayǐkúngban glɔ́ lɛ́ɛ bǐ, ée ɖo xu mɛ lɛ́ɛ bǐ; nǔɖíɖó e gbɔn wɛ̌kɛ́zo ɛnɛ lɛ́ɛ mɛ lɛ́ɛ bǐ ɖo ɖiɖɔ wɛ ɖɔ: “Kpikpa, yɛ̌yi, susu, kpódó hlɔ̌nhlɔ́n kpó ní nyí mɛ e ɖo ayǐjínjɔ́n ɖo axɔ́súzinkpo ɔ́ jí é kpódó Lɛ̌ngbɔ́ví ɔ́ kpó tɔn káká sɔ́yi!” Nǔɖogbɛ ɛnɛ lɛ́ɛ yí gbe ɖɔ: “ Amǐ!” Bɔ mɛxó lɛ́ɛ jɛ kpoli bó ɖe kɔ́. Énɛ́ ɔ́ gúdo ɔ́, wuntun tɛ́nwe lɛ́ɛ ɔ́, un mɔ Lɛ̌ngbɔ́ví ɔ́ gba nukɔntɔn ɔ́, bɔ un se nǔɖogbɛ ɛnɛ lɛ́ɛ ɖokpó dó gbe jǐ dó gbe ɖɔhun, bó ɖɔ: “Wǎ!” Un kpɔ́n lobo mɔ sɔ́ wěwé ɖokpó; mɛ e ɖo sɔ́ ɔ́ jí ɔ́ hɛn gǎ ɖokpó, bɔ è nǎ ɛ axɔ́súgbákún ɖokpó. É ɖidó mɛ ko ɖu ɖ'é jí ɖɔhun, bó ná ɖu ɖ'é jí. Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun wegɔ́ ɔ́, bɔ un se nǔɖogbɛ wegɔ́ ɔ́ ɖo ɖiɖɔ wɛ ɖɔ: “Wǎ!” Bɔ sɔ́ ɖěvo tɔ́n, bó nyí sɔ́ vɔvɔ; è nǎ acɛ mɛ e ɖo sɔ́ ɔ́ jí ɔ́ ɖɔ é ní bló bónú ahwanfunfun ní gba kpé ayǐkúngban ɔ́ jí, bónú gbɛtɔ́ lɛ́ɛ ɖě ná nɔ hu ɖě. È sɔ́ hwǐ ɖaxó ɖokpó dó así n'i. Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun atɔngɔ́ ɔ́, bɔ un se nǔɖogbɛ atɔngɔ́ ɔ́ ɖo ɖiɖɔ wɛ ɖɔ: “Wǎ!” Un kpɔ́n, lobo mɔ sɔ́ wiwi ɖokpó; mɛ e ɖo sɔ́ ɔ́ jí ɔ́ hɛn nǔdagan ɖokpó alɔ mɛ. Un se gbe ɖé gosín nǔɖogbɛ ɛnɛ lɛ́ɛ tɛ́ntin, bó ɖɔ: “Blěe kilóo ɖokpó géé jɛ́n è nɔ zé azɔ̌kwɛ́ gbe ɖokpó tɔn ɔ́ bǐ dó xɔ ná; ɔ́ ji kilóo atɔn wɛ è nɔ zé azɔ̌kwɛ́ gbe ɖokpó tɔn ɔ́ bǐ dó xɔ ná. Amɔ̌, ma ɖ'alɔ ami kpó vɛ̌ɛn kpó wú ó.” Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun ɛnɛgɔ́ ɔ́, bɔ un se nǔɖogbɛ ɛnɛgɔ́ ɔ́ ɖo ɖiɖɔ wɛ ɖɔ: “Wǎ!” Un kpɔ́n bó mɔ sɔ́ amamú ɖokpó; mɛ e ɖo sɔ́ ɔ́ jí ɔ́ nɔ nyí Kú, bɔ kútomɛ xwedó e. È nǎ acɛ yě, bónú yě ná hu gbɛtɔ́ lɛ́ɛ ɖó hwǐ wú; yě ná ɖó adɔ nú yě, bɔ yě ná kú; yě ná ɖó azɔn nú yě, bɔ yě ná kú; yě ná zɔ́n bɔ gběkanlin e ɖo ayǐkúngban jí lɛ́ɛ ná hu gbɛtɔ́ lɛ́ɛ ɖo ayǐkúngban ɔ́ sín ɛnɛvlɔ́ɖó jí. Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun atɔ́ɔ́ngɔ́ ɔ́, bɔ un mɔ mɛ e è hu, ɖó yě jlá Mawuxó ɔ́, bó nɔ gbejí ɖo kúnnuɖiɖe yětɔn mɛ lɛ́ɛ é sín lǐndɔ̌n ɖo vɔ̌sákpe ɔ́ glɔ́. Yě nɔ sú xó tlílí, bó nɔ ɖɔ: Aklúnɔ mímɛ́, Aklúnɔ nǔgbó nǔgbó, káká hwetɛ́nu wɛ a nǎ nɔ te yi jɛ, bó ná ɖɔ hwɛ xá mɛ e ɖo ayǐkúngban jí lɛ́ɛ, bó ná ba hlɔn nú mǐ, ɖó hu e yě hu mǐ ɔ́ wútu? È nǎ awu gaga wěwé yě mɛ ɖokpó ɖokpó, bó ɖɔ nú yě ɖɔ yě ní lɛ́ gbɔjɛ́ nú hwenu kpɛɖé, káká jɛ hwenu e azɔ̌gbɛ́ yětɔn kpó nɔví yětɔn e è ɖǒ ná hu yě ɖɔhun lɛ́ɛ kpó ná sɔgbe dó é. Énɛ́ ɔ́ gúdo ɔ́, un mɔ Lɛ̌ngbɔ́ví ɔ́ gba wuntun ayizɛ́ngɔ́ ɔ́. Énɛ́ ɔ́, ayǐkúngban dán wǔ kpó zǐngídi kpó, hwe húzú nǔ wiwi lutuvɔ ɖɔhun; sun ɔ́ bǐ húzú vɔvɔ hun ɖɔhun. Sunví lɛ́ɛ jɛ ayǐ sín jǐnukúnsin lě e jɔhɔn ɖaxó nɔ nyi, bó nɔ dán fígitín, bɔ sínsɛ́n tɔn mazin mazin lɛ́ɛ nɔ jɛ ayǐ gbɔn é. Jǐnukúnsin mlá lě e è nɔ mlá wěma gbɔn é, bó bú; è ɖe só lɛ́ɛ bǐ kpódó ayǐkúngban e ɖo tɔ tɛ́ntin lɛ́ɛ bǐ kpán sín tɛn yětɔn yětɔn lɛ́ɛ mɛ. Axɔ́sú e ɖo ayǐkúngban jí lɛ́ɛ, nukɔntɔ́ lɛ́ɛ, ahwangán lɛ́ɛ, dɔkunnɔ lɛ́ɛ, hlɔ̌nhlɔ́nnɔ lɛ́ɛ, kpódó gbɛtɔ́ ɖě lɛ́ɛ bǐ kpó; kannumɔ lɛ́ɛ oo, mɛ e ɖo yě ɖésúnɔ sí lɛ́ɛ oo, yě bǐ hɔn hwlá cí sónu lɛ́ɛ mɛ bó hɔn hwlá cí awǐnnya lɛ́ɛ gúdo ɖo sókan mɛ, bó nɔ ɖɔ nú só lɛ́ɛ kpódó awǐnnya lɛ́ɛ kpán ɖɔ: “Mi mu kɔn nyi mǐ jǐ, bó sɔ́ mǐ hwlá, bónú mɛ e jínjɔ́n axɔ́súzinkpo ɔ́ jí ɔ́ má mɔ mǐ ó; énɛ́ ɔ́, mǐ ná nɔ zɔ nú xomɛsin Lɛ̌ngbɔ́ví ɔ́ tɔn. Đó xomɛsin yětɔn sín azǎn ɖaxó ɔ́ wá; mɛ̌ ka sixú nɔ te ɖo azǎn énɛ́ nukɔn?” Énɛ́ ɔ́ gúdo ɔ́, un mɔ wɛnsagun Mawu tɔn ɛnɛ ɖo te ɖo ayǐkúngban ɔ́ sín zo ɛnɛ lɛ́ɛ jí; yě hɛn jɔhɔn ayǐkúngban jí tɔn ɛnɛ lɛ́ɛ ɖó te, bónú jɔhɔn ɖěbǔ ma nyi dó ayǐkúngban ɔ́ ó, é ma nyi dó xu ó; é ma ka nyi dó atín ɖěbǔ ó. Un lɛ́ mɔ wɛnsagun Mawu tɔn ɖěvo tɔ́n sín zǎnzǎnhwe jí, bó hɛn wuntun Mawu gbɛɖe ɔ́ tɔn. É sú xó tlílí, bó ɖɔ sɛ́ dó wɛnsagun Mawu tɔn ɛnɛ e yí acɛ, bó ná wa nǔ nyanya dó ayǐkúngban kpódó xu kpán wú lɛ́ɛ ɖɔ: “Mi ma to wa nǔ nyanya dó ayǐkúngban wú ó; mi ma wa dó xu wú ó; mi ma wa dó atín lɛ́ɛ wú káká jɛ hwenu e mǐ ná ɖó wuntun nukɔn nú mɛsɛntɔ́ Mawu mǐtɔn tɔn lɛ́ɛ dó é ó.” Hwenɛ́nu ɔ́, è ɖɔ mɛ nabí e è ko ɖó wuntun Mawu tɔn nukɔn ná lɛ́ɛ é nú mì: yě mɛ adɔ̌kpo tɛ́nwe děgba (144.000) wɛ è ɖǒ wuntun ɖo togun Izlayɛ́li tɔn sín akɔta lɛ́ɛ bǐ mɛ. È ɖǒ wuntun gbɛtɔ́ děgba atɔn (12.000) ɖo akɔta Judáa tɔn mɛ, děgba atɔn (12.000) ɖo akɔta Hwlibɛ́ni tɔn mɛ, děgba atɔn (12.000) ɖo akɔta Gadi tɔn mɛ; děgba atɔn (12.000) ɖo akɔta Acɛ́ɛ tɔn mɛ, děgba atɔn (12.000) ɖo akɔta Nɛfutali tɔn mɛ, děgba atɔn (12.000) ɖo akɔta Manasée tɔn mɛ, děgba atɔn (12.000) ɖo akɔta Sinmɛnyɔ́ɔ tɔn mɛ, děgba atɔn (12.000) ɖo akɔta Levíi tɔn mɛ, děgba atɔn (12.000) ɖo akɔta Isakáa tɔn mɛ; děgba atɔn (12.000) ɖo akɔta Zabulɔ́ɔn tɔn mɛ, děgba atɔn (12.000) ɖo akɔta Jozɛ́fu tɔn mɛ, děgba atɔn (12.000) ɖo akɔta Bɛnjamɛ́ɛ tɔn mɛ. Énɛ́ ɔ́ gúdo ɔ́, un lɛ́ kpɔ́n bó mɔ mɛ wɔ̌buwɔ́bú ɖé: mɛ ɖěbǔ sixú xa mɛ e ɖo ahwan ɔ́ mɛ lɛ́ɛ bǐ ǎ. Yě gosín to lɛ́ɛ bǐ mɛ, bó gosín akɔta lɛ́ɛ bǐ mɛ, bó gosín togun lɛ́ɛ bǐ mɛ, bó gosín gbe e è nɔ dó lɛ́ɛ bǐ mɛ; yě ɖo te ɖo axɔ́súzinkpo ɔ́ kpó Lɛ̌ngbɔ́ví ɔ́ kpán nukɔn; yě dó awu gaga wěwé, bó hɛn děma alɔ mɛ. Yě sú xó tlílí ɖɔ: “Hwlɛngán mǐtɔn gosín Mawu mǐtɔn e jínjɔ́n axɔ́súzinkpo jí ɔ́ gɔ́n, bó gosín Lɛ̌ngbɔ́ví ɔ́ gɔ́n!” Wɛnsagun Mawu tɔn lɛ́ɛ bǐ ɖo te bó lɛ́ lɛ̌ dó axɔ́súzinkpo ɔ́ kpó mɛxó lɛ́ɛ kpó, kpódó nǔɖogbɛ ɛnɛ lɛ́ɛ kpó. Yě xwe agbɔ̌nnusú do ɖo axɔ́súzinkpo ɔ́ nukɔn, bó ɖe kɔ́ nú Mawu, bó nɔ ɖɔ: “ Amǐ! Kpikpa, susu, nǔnywɛ́, kúdídó, yɛ̌yi, acɛ, kpódó hlɔ̌nhlɔ́n kpán ní nyí Mawu mǐtɔn tɔn káká sɔ́yi! Amǐ!” Mɛxó lɛ́ɛ ɖokpó kanbyɔ́ mì ɖɔ: “Mɛ̌ ka nyí mɛ énɛ́ lɛ́ɛ e dó awu gaga wěwé é? Fítɛ́ yě gosín?” Un yí gbe n'i ɖɔ: “Aklúnɔ ce, un ma tunwun nɛ́, hwi wɛ tunwun.” Bɔ é ɖɔ nú mì ɖɔ: “Mɛ e è dǒ ya ɖaxó ɔ́ ná lɛ́ɛ é wɛ. Yě nya awu gaga yětɔn lɛ́ɛ, bó bɛ́ dó Lɛ̌ngbɔ́ví ɔ́ sín hun mɛ, bɔ awu lɛ́ɛ wé. Énɛ́ ɔ́ wú wɛ yě ɖo te ɖo axɔ́súzinkpo ɔ́ nukɔn, bó ɖo azɔ̌ wa nú Mawu wɛ zǎn kéze ɖo sinsɛnxɔ tɔn mɛ. Mɛ e ɖo ayǐjínjɔ́n ɖo axɔ́súzinkpo ɔ́ jí ɔ́ ná cyɔ́n alɔ yě jǐ. Xovɛ́ sɔ́ ná sin yě gbeɖé ǎ; kɔ sɔ́ ná xú yě gbeɖé ǎ; hwesivɔ́ sɔ́ ná mɛ yě gbeɖé ǎ; yǒzo ɖěbǔ sɔ́ ná hɛn yě gbeɖé ǎ. Đó Lɛ̌ngbɔ́ví e ɖo axɔ́súzinkpo ɔ́ tɛ́ntin ɔ́ ná nyí Lɛ̌ngbɔ́nyitɔ́ yětɔn, bó ná kplá yě yi fí e sin ɖagbe e nɔ ná gbɛ mɛ ɔ́ nɔ tɔ́n sín lɛ́ɛ. Bɔ Mawu ná súnsún ɖasin bǐ sín nukún mɛ nú yě.” Ée Lɛ̌ngbɔ́ví ɔ́ gba wuntun tɛ́nwegɔ́ ɔ́ é ɔ́, jǐxwé cí tóó nú ganxixo ɖokpó sín vlɔ̌ mɔ̌, bɔ un mɔ wɛnsagun Mawu tɔn tɛ́nwe e ɖo te Mawu nukɔn lɛ́ɛ. È fɔ kpɛn ɖaxó tɛ́nwe nú yě. Wɛnsagun ɖěvo wá cí vɔ̌sákpe ɔ́ kpá; é hɛn nǔ e mɛ è nɔ fyɔ́ zǎlínkpɔ́n ɖe ɔ́ ɖokpó; siká wɛ è dó bló ná. È nǎ ɛ zǎlínkpɔ́n gěgé, bɔ é ná zé kpó mɛɖeɖóvo Mawu tɔn lɛ́ɛ bǐ sín ɖɛ kpó xwlé Mawu ɖo vɔ̌sákpe e è sɔ́ siká dó bló ná ɔ́ jí. Zǎlínkpɔ́n ɔ́ sín azizɔ nɔ sí sín wɛnsagun ɔ́ sín alɔ mɛ, bɔ azizɔ ɔ́ kpó mɛɖeɖóvo Mawu tɔn lɛ́ɛ sín ɖɛ kpó nɔ yi jǐ ɖo Mawu nukɔn. Bɔ wɛnsagun Mawu tɔn ɔ́ sɔ́ zǎlínkpɔ́nfyɔ́nú ɔ́, bó kɔn vɔ̌sákpe ɔ́ sín myɔkán ɔ́ d'é mɛ, bɔ é gɔ́, lobɔ é zé nyi dó ayǐkúngban jí, bɔ é se gbe ɖé lɛ́ɛ; so ny'áwǎn, jǐ kɛ wun, bɔ ayǐkúngban dán wǔ. Wɛnsagun Mawu tɔn tɛ́nwe e hɛn kpɛn ɖaxó tɛ́nwe lɛ́ɛ ɖo nǔ sɔ́ wɛ, bó ná jɛ kpɛn ɖaxó lɛ́ɛ kún jí. Wɛnsagun nukɔntɔn ɔ́ kún kpɛn bɔ kɛ́njí kpó myɔ kpán cáká kpó kanjɔ kpó, bó kɔn nyi ayǐkúngban jí. Ayǐkúngban ɔ́ sín atɔnvlɔ́ɖó fyɔ́; atín lɛ́ɛ sín atɔnvlɔ́ɖó fyɔ́; gběhan mú lɛ́ɛ bǐ fyɔ́. Énɛ́ ɔ́ gúdo ɔ́, wɛnsagun wegɔ́ ɔ́ kún kpɛn, bɔ nǔ só ɖaxó ɖɔhun ɖé ɖo myɔ ji wɛ, bɔ è sɔ́ nyi xu mɛ, bɔ xu ɔ́ sín atɔnvlɔ́ɖó húzú kanjɔ. Nǔɖíɖó gbɛɖe e ɖo xu ɔ́ glɔ́ lɛ́ɛ bǐ sín atɔnvlɔ́ɖó kú, bɔ tɔjíhún lɛ́ɛ sín atɔnvlɔ́ɖó gblé. Énɛ́ ɔ́ gúdo ɔ́, wɛnsagun atɔngɔ́ ɔ́ kún kpɛn bɔ sunví ɖaxó ɖé ɖo jiji wɛ zohwín ɖɔhun, bó jɛ ayǐ sín jǐxwé; é jɛ tɔ lɛ́ɛ kpódó tɔjɔtɛn lɛ́ɛ kpó sín atɔnvlɔ́ɖó jí. Sunví énɛ́ sín nyǐkɔ nɔ́ nyí vǐvɛ́, bɔ sin lɛ́ɛ sín atɔnvlɔ́ɖó vɛ́, bɔ mɛ e nu lɛ́ɛ gěgé kú, ɖó sin ɔ́ vɛ́ wútu. Énɛ́ ɔ́ gúdo ɔ́, wɛnsagun ɛnɛgɔ́ ɔ́ kún kpɛn, bɔ è dǒ nǔ hwe ɔ́ sín atɔnvlɔ́ɖó, bó dó nǔ sun sín atɔnvlɔ́ɖó, bó dó nǔ sunví lɛ́ɛ sín atɔnvlɔ́ɖó, bɔ kínkɔ́n yětɔn sín atɔnvlɔ́ɖó dó ablu; kéze sín atɔnvlɔ́ɖó sɔ́ nɔ ná wěziza ǎ; zǎn lɔ sín atɔnvlɔ́ɖó sɔ́ nɔ ná wěziza ǎ. Un lɛ́ kpɔ́n, bó mɔ gangan ɖokpó ɖo zinzɔn wɛ gbɔn jɔhɔn mɛ aga ɖéé; un se bɔ é ɖo xó sú wɛ tlílí ɖɔ: “Awo! Awo! Étɛ́ ɖíe ɖo mɛ e ɖo ayǐkúngban jí lɛ́ɛ ná gbo wɛ hwenu e wɛnsagun atɔn ɖě lɛ́ɛ ná kún kpɛn, bɔ è nǎ se ɔ́ e?” Énɛ́ ɔ́ gúdo ɔ́, wɛnsagun Mawu tɔn atɔ́ɔ́ngɔ́ ɔ́ kún kpɛn. Sunví ɖokpó j'ayǐ sín jǐxwé wá jɛ ayǐkúngban jí bɔ un mɔ; è sɔ́ dotɔ domaɖó-azan ɔ́ tɔn sín cávi jó nú sunví ɔ́. Sunví ɔ́ hun hɔn dotɔ domaɖó-azan ɔ́ tɔn, bɔ azizɔ ɖé tɔ́n sín mɛ, bó cí kpómɛmyɔ ɖaxó sín azizɔ ɖɔhun. Azizɔ e tɔ́n sín dotɔ ɔ́ mɛ ɔ́ hɛn hwesivɔ́ kpódó gbɛ ɔ́ mɛ kpán wi. Kle lɛ́ɛ tɔ́n sín azizɔ ɔ́ mɛ, bó gba kpé ayǐkúngban ɔ́ jí; è nǎ acɛ yě, bɔ é cí acɛ e hɔnkéklě lɛ́ɛ ɖó é ɖɔhun. È ɖɔ nú yě ɖɔ yě ní ma wa nǔ nyanya nú gběhan ó, yě ní ma wa nǔ nyanya nú ama e ɖo mǔ lɛ́ɛ ɖěbǔ ó; yě ní ma ka wa nǔ nyanya nú atín ɖěbǔ ó. Lo ɔ́, gbɛtɔ́ e sín nukɔn wuntun Mawu tɔn ma ɖe ǎ lɛ́ɛ kɛ́ɖɛ́ wɛ yě ná wa nǔ nyanya ná. È nǎ gbe kle lɛ́ɛ ɖɔ yě ní hu gbɛtɔ́ énɛ́ lɛ́ɛ ǎ; lo ɔ́, yě ní dó ya nú yě kpowun nú sun atɔ́ɔ́n. Wǔvɛ́ e è nɔ mɔ ɖo ya e kle lɛ́ɛ nɔ dó nú mɛ é mɛ ɔ́ cí hɔnkéklě mɛ mɛ ɔ́, wǔvɛ́ e è nɔ mɔ é ɖɔhun. Đo sun atɔ́ɔ́n énɛ́ lɛ́ɛ gbla mɛ ɔ́, gbɛtɔ́ lɛ́ɛ ná ba kú, yě ka ná mɔ ǎ; yě ná jló ɖɔ émí ní kú, kú ka ná hɔn yi zɔ nú yě. Kle énɛ́ lɛ́ɛ cí sɔ́ e ɖo gbesisɔ mɛ, bó ná fun ahwan é ɖɔhun; nǔ axɔ́súgbákún e è sɔ́ siká dó bló ná é ɖɔhun ɖé lɛ́ɛ ɖo ta nú yě; nukún mɛ yětɔn lɛ́ɛ cí gbɛtɔ́ nukún mɛ ɖɔhun. Đa yětɔn lɛ́ɛ cí nyɔ̌nu lɛ́ɛ sín ɖa ɖɔhun; aɖǔ yětɔn lɛ́ɛ cí kinnikínní lɛ́ɛ sín aɖǔ ɖɔhun. Nǔ gǎglónú e è sɔ́ gan dó bló ná é ɖɔhun ɖé ɖo akɔ́nta nú yě; awa yětɔn lɛ́ɛ sín zǐngídi cí kɛkɛ́ví gěgé e sɔ́ ɖo dindɔn wɛ, bó ɖo wezun jí xwe ahwangbénu lɛ́ɛ sín zǐngídi ɖɔhun. Sí e yě ɖó lɛ́ɛ cí hɔnkéklě lɛ́ɛ tɔn ɖɔhun, bɔ nu yětɔn xwíɖí. Sí yětɔn lɛ́ɛ mɛ wɛ acɛ e yě ná dó wa nǔ nyanya dó gbɛtɔ́ lɛ́ɛ wú nú sun atɔ́ɔ́n ɔ́ ɖe. Axɔ́sú ɖokpó ɖo yě nu; é wɛ nyí wɛnsagun dotɔ domaɖó-azan ɔ́ tɔn; nyǐkɔ tɔn nɔ nyí “Abadɔ́ɔn” ɖo Ebléegbe mɛ, bó nɔ nyí “Apolyɔ́ni” ɖo Glɛ̌sigbe mɛ. Awě nukɔntɔn ɔ́ nɛ́ wá yi nɛ́; énɛ́ ɔ́ gúdo ɔ́, nyladó we ɖěvo ɖó ná lɛ́ jɛ. Énɛ́ ɔ́ gúdo ɔ́, wɛnsagun ayizɛ́ngɔ́ ɔ́ kún kpɛn, bɔ un se gbe ɖé ɖo nǔ ɖɔ wɛ sín vɔ̌sákpe e è sɔ́ siká dó bló ná, bɔ é ɖo Mawu nukɔn ɔ́ sín zo ɛnɛ lɛ́ɛ kɔn jǎwe. Gbe ɔ́ ɖɔ nú wɛnsagun ayizɛ́ngɔ́ e hɛn kpɛn ɔ́ ɖɔ: “Đe wɛnsagun ɛnɛ e ɖo wlɔ mɛ ɖo Efláti, tɔsisa ɖaxó ɔ́ kpá lɛ́ɛ nyi te.” Đe wɛnsagun ɛnɛ lɛ́ɛ nyi te; è ko sɔ́ nǔ nú yě ɖ'ayǐ nú gan énɛ́ ɔ́ mɛ pɛ́pɛ́pɛ́, ɖo azǎn énɛ́ ɔ́ gbe, nú azǎn énɛ́ ɔ́ ɖo sun énɛ́ ɔ́ mɛ, nú sun énɛ́ ɔ́ ɖo xwe énɛ́ ɔ́ mɛ, bónú yě ná hu gbɛtɔ́ lɛ́ɛ sín atɔnvlɔ́ɖó. È ɖɔ ahwanfuntɔ́ nabí e ɖo sɔ́ jí lɛ́ɛ nú mì: yě mɛ lǐvi afɔɖé (200.000.000) wɛ. Lě e un mɔ sɔ́ lɛ́ɛ kpódó sɔ́xátɔ́ lɛ́ɛ kpán ɖo nǔmimɔ ce mɛ gbɔn ɔ́ ɖíe: sɔ́xátɔ́ lɛ́ɛ hɛn gǎglónú vɔvɔ myɔ ɖɔhun; yě hɛn gǎglónú fɛ́sinnɔ awǐnnya ɖagbe ɖagbe e è nɔ ylɔ́ ɖɔ Safíi ɔ́ ɖɔhun; yě hɛn gǎglónú koklójónɔ hwemí ɖɔhun; sɔ́ lɛ́ɛ sín ta cí kinnikínní lɛ́ɛ sín ta ɖɔhun; myɔ kpó azizɔ kpó, kpódó hwemí kpó nɔ tɔ́n sín nu yětɔn mɛ. Nǔ nyanya atɔn énɛ́ lɛ́ɛ hu gbɛtɔ́ lɛ́ɛ sín atɔnvlɔ́ɖó: nǔ nyanya énɛ́ lɛ́ɛ wɛ nyí myɔ kpódó azizɔ kpó, kpódó hwemí kpán e ɖo tíntɔ́n sín sɔ́ lɛ́ɛ nu mɛ wɛ é. Đó hlɔ̌nhlɔ́n sɔ́ lɛ́ɛ tɔn ɔ́, nu yětɔn mɛ wɛ é ɖe, bó lɛ́ ɖo sí yětɔn lɛ́ɛ mɛ; sí yětɔn cí dan ɖɔhun bó ɖó ta bɔ yě nɔ sɔ́ dó wa nǔ nyanya nú gbɛtɔ́ lɛ́ɛ. Gbɛtɔ́ e kpo bɔ nǔ nyanya énɛ́ lɛ́ɛ ma hu ǎ lɛ́ɛ lɛ́ kɔ sín nǔ e yě sɔ́ alɔ yě ɖésúnɔ tɔn dó bló ná lɛ́ɛ sinsɛn gúdo ǎ. Yě nɔ gɔn yɛ nyanya lɛ́ɛ sɛn ǎ; yě ka nɔ gɔn vodún e è sɔ́ siká dó bló ná lɛ́ɛ, ée è sɔ́ kpatágan dó bló ná lɛ́ɛ, ée è sɔ́ ganvɔ dó bló ná lɛ́ɛ, ée è sɔ́ awǐnnya dó bló ná lɛ́ɛ kpó ée è sɔ́ atín dó bló ná lɛ́ɛ kpán sɛn ǎ; nǔ énɛ́ lɛ́ɛ ka sixú mɔ nukúnnú ǎ; yě ka sixú se tónú ǎ; yě ka sixú ɖi zɔnlin ǎ. Gbɛtɔ́ énɛ́ lɛ́ɛ ka lɛ́ lɛ́ kɔ sín mɛhuhu, majíkiblóbló, agalilɛ kpó ajojija kpó gúdo ǎ. Énɛ́ ɔ́ gúdo ɔ́, un mɔ wɛnsagun Mawu tɔn hlɔ̌nhlɔ́nnɔ ɖěvo, bɔ é ɖo te jɛ sín jǐxwé wɛ; akpɔ́kpɔ́ bú i; nyǐ ɖi lɛ́ lɛ̌ dó ta tɔn; nukún tɔn mɛ nɔ kɔ́n hwe ɖɔhun; zǎkɛ́tɛ́ tɔn lɛ́ɛ cí myɔdotín ɖɔhun. É hɛn wěma kpɛví ɖokpó alɔ mɛ, bɔ é ɖo hunhun. É sɔ́ afɔ tɔn ɖisí ɔ́ ɖó xu jí, bó sɔ́ afɔ tɔn amyɔ ɔ́ ɖó ayǐkúngban jí. É sú xó tlílí kinnikínní dó gbe ɖɔhun. Ée é sú xó fó ɔ́, so tɛ́nwe lɛ́ɛ dó gbe dó yí gbe n'i. Ée so tɛ́nwe lɛ́ɛ dó gbe fó ɔ́, un jló ná jɛ nǔ e yě ɖɔ lɛ́ɛ wlán jí, lo ɔ́, un se gbe ɖé sín jǐxwé, bɔ gbe ɔ́ ɖɔ nú mì ɖɔ: “Hɛn nǔ e so tɛ́nwe lɛ́ɛ ɖɔ é dó ayi mɛ; ma wlán ó.” Wɛnsagun e un mɔ ɖo te ɖo xu kpódó ayǐkúngban kpán jí ɔ́ dlɛ́n alɔ tɔn ɖisí ɔ́ dó jǐxwé, bó xwlé nǔ dó Mawu nyǐkɔ mɛ. Mawu e ɖo gbɛ káká sɔ́yi, bó bló jǐxwé kpó nǔ e ɖ'é mɛ lɛ́ɛ bǐ kpán é nyíkɔ mɛ; Mawu e bló ayǐkúngban kpó nǔ e ɖ'é mɛ lɛ́ɛ bǐ kpán é nyíkɔ mɛ; Mawu e bló xu kpódó nǔ e ɖ'é mɛ lɛ́ɛ bǐ kpán ɔ́ sín nyǐkɔ mɛ; é xwlé nǔ dó Mawu nyíkɔ mɛ ɖɔ: “Hwenu ɖé sɔ́ kpo bɔ è nǎ ɖó ǎ. Amɔ̌ hwenu e wɛnsagun tɛ́nwegɔ́ ɔ́ ná jɛ kpɛn kún jí ɔ́, nǔbúdo Mawu tɔn ná jɛ lě e é ko ɖɔ gbɔn nú mɛsɛntɔ́ tɔn gbeyíɖɔ lɛ́ɛ é.” Énɛ́ ɔ́ gúdo ɔ́, gbe e un se sín jǐxwé ɖ'ayǐ ɔ́ lɛ́ ɖɔ xó élɔ́ lɛ́ɛ nú mì; é ɖɔ: “Yi yí wěma kpɛví e ɖo hunhun ɖo wɛnsagun e ɖo te ɖo xu kpódó ayǐkúngban kpán jí ɔ́ sín alɔ mɛ é.” Nǔgbó ɔ́, un yi wɛnsagun ɔ́ gɔ́n bó ɖɔ n'i ɖɔ é ní sɔ́ wěma kpɛví ɔ́ nú mì. Bɔ wɛnsagun ɔ́ ɖɔ nú mì ɖɔ: “Yǐ bó ɖu: é ná vɛ́ ɖo adɔgo towe mɛ, bó ka ná víví ɖi wǐin ɖo nu towe mɛ.” Un yí wěma kpɛví ɔ́ sín alɔ tɔn mɛ bó ɖu. É víví ɖo nu ce mɛ ɖi wǐin; ée un ka mi ɔ́, é húzú nǔ vívɛ́ ɖo adɔgo ce mɛ. Énɛ́ ɔ́ gúdo ɔ́, è ɖɔ nú mì ɖɔ: “A ɖǒ ná lɛ́ dó wɛn Mawu tɔn e ɖɔ xó dó togun gěgé, to gěgé, gbe gěgé kpódó axɔ́sú gěgé kpán wú é.” Énɛ́ ɔ́ gúdo ɔ́, è sɔ́ fántín bǎ ɖɔhun ɖokpó dó así nú mì bó ɖɔ: “Yi jlɛ́ sinsɛnxɔ Mawu tɔn kpódó vɔ̌sákpe ɔ́ kpó, bó xa mɛ e ɖo Mawu sɛn wɛ ɖo sinsɛnxɔ ɔ́ mɛ lɛ́ɛ. Lo ɔ́, jǒ sinsɛnxɔ ɔ́ sín kɔ́xota dó; ma jlɛ́ ó; ɖó è ko sɔ́ kɔ́xota ɔ́ nú mɛ e ma nɔ sɛn Mawu ǎ lɛ́ɛ, bɔ yě ná gbídí toxo mímɛ́ ɔ́ ɖó afɔ wú káká nú sun kanɖé nukún-we (42). Un ná sɛ́ kúnnuɖetɔ́ ce we lɛ́ɛ dó, bɔ yě ná dó ati; bó ná dó wɛn Mawu tɔn ɔ́ xɔ azǎn afatɔ́n afɔɖé kanɖé ko (1.260).” Olívutín we lɛ́ɛ kpó zogbɛ́nhɛnnú we e ɖo te ɖo Aklúnɔ ayǐkúngban jí tɔn sín nukɔn ɔ́ kpó wɛ nyí kúnnuɖetɔ́ we énɛ́ lɛ́ɛ. Ényí mɛɖé jló ná wa nǔ nyanya dó yě wú ɔ́, myɔ nɔ tɔ́n sín nu yětɔn mɛ bó nɔ fyɔ́ kɛntɔ́ yětɔn lɛ́ɛ. Lě e è ɖǒ ná hu mɛ e ná ba ná wa nǔ nyanya dó yě wú lɛ́ɛ gbɔn é nɛ́. Yě ɖó acɛ, bó ná sú jǐxwé, bónú jǐ ní ma ja hwenu e yě ná ɖo wɛn Mawu tɔn dó wɛ ɔ́ ó. Yě lɛ́ ɖó acɛ bó ná sɔ́ sin dó húzú hun ná; yě lɛ́ ɖó acɛ bó ná sɛ́ nǔ nyanya tɛnmɛ tɛnmɛ bǐ dó ayǐkúngban ɔ́ jí. É jló yě hweɖěbǔnu ɔ́, yě ná nɔ wa nǔ énɛ́ lɛ́ɛ. Hwenu e yě ná dó wɛn e dó wɛ yě ɖe ɔ́ fó ɔ́, kanlin e ná tɔ́n sín domaɖó-azan ɔ́ mɛ ɔ́ ná tɔ́n ahwan yě; é ná ɖu ɖo yě jǐ, bó ná hu yě. Cyɔ yětɔn lɛ́ɛ ná cí toxo ɖaxó ɔ́ sín alixo, fí e è ká Aklúnɔ yětɔn nyi aklúzu jí ɖe é. Nú è ma jló ná ylɔ́ to ɔ́ sín nyǐkɔ ɖésú ǎ ɔ́, è nɔ ylɔ́ ɖɔ Sodɔ́mu abǐ Ejípu. Gbɛtɔ́ e ɖo togun lɛ́ɛ bǐ mɛ é, ée ɖo akɔta lɛ́ɛ bǐ mɛ é, ée ɖo gbe lɛ́ɛ bǐ mɛ é, kpódó gbɛtɔ́ e ɖo to lɛ́ɛ bǐ mɛ é kpó ná kpɔ́n cyɔ yětɔn nú azǎn atɔn adaɖé, bó ná lɔn nú è nǎ ɖi yě ǎ. Kú e mɛ we énɛ́ lɛ́ɛ kú ɔ́ ná hun xomɛ nú mɛ e ɖo ayǐkúngban jí lɛ́ɛ é; yě ná jɛ awǎ ɖó kú e mɛ we énɛ́ lɛ́ɛ kú ɔ́ wú, bó ná ná nǔ yěɖée; yě ná wa nǔ gbɔn mɔ̌, ɖó ya ɖaxó e gbeyíɖɔ we énɛ́ lɛ́ɛ ko dó nú mɛ e ɖo ayǐkúngban jí lɛ́ɛ wú. Amɔ̌, azǎn atɔn adaɖé énɛ́ lɛ́ɛ gúdo ɔ́, funfún e nɔ ná gbɛ mɛ ɔ́, gosín Mawu gɔ̌n, bó byɔ́ yě mɛ, bɔ yě fɔ́n sí te; énɛ́ ɔ́, xɛsi ɖaxó ɖé jɛ mɛ e ɖo yě mɔ wɛ lɛ́ɛ bǐ jǐ. Gbeyíɖɔ we lɛ́ɛ se gbe ɖaxó ɖé ɖi sín jǐxwé, bɔ gbe ɔ́ ɖɔ nú yě ɖɔ: “Mi xá jǐ fí.” Bɔ hwenu e kɛntɔ́ yětɔn lɛ́ɛ ɖo yě kpɔ́n wɛ ɔ́, yě zɔn akpɔ́kpɔ́ ɖé mɛ yi jǐxwé. Hwenɛ́nu ɖokpó ɔ́, ayǐkúngban dán wǔ kpódó zǐngídi kpó, bɔ toxo ɔ́ sín wǒvlɔ́ɖó mu; ayǐkúngban énɛ́ e dán wǔ ɔ́ hu gbɛtɔ́ děgba ɖě afɔwó-afatɔ́n (7.000); énɛ́ ɔ́, xɛsi jɛ mɛ ɖě lɛ́ɛ jí, bɔ yě nɔ kpa susu nú Mawu jǐxwé tɔn. Nyladó wegɔ́ ɔ́ nɛ́ wá yí nɛ́; mi ɖótó. Atɔngɔ́ ɔ́ ná jɛ dín zaanɖé. Énɛ́ ɔ́ gúdo ɔ́, wɛnsagun Mawu tɔn tɛ́nwegɔ́ ɔ́ kún kpɛn, bɔ gbe ɖaxó ɖé lɛ́ɛ ɖi ɖo jǐxwé bó ɖɔ: “Axɔ́súɖuɖu gbɛ ɔ́ tɔn nyí Aklúnɔ mǐtɔn kpó Klísu tɔn kpán tɔn lo! Bɔ é ná ɖu axɔ́sú káká sɔ́yi.” Mɛxó ko-nukún-ɛnɛ e ɖo ayǐjínjɔ́n ɖo axɔ́súzinkpo yětɔn lɛ́ɛ jí ɖo Mawu nukɔn lɛ́ɛ ɔ́, xwe agbɔ̌nnusú do, bó ɖe kɔ́ nú Mawu, bó ɖɔ: “Aklúnɔ Mawu Nǔbǐwúkpétɔ́, hwi mɛ e tíin, bó ko tíin ɖ'ayǐ ɔ́, mǐ dó kú nú we, ɖó hlɔ̌nhlɔ́n towe ɖaxó e a sɔ́ dó wa azɔ̌ ná ɔ́ wú; mǐ dó kú nú we ɖó axɔ́sú e a jɛ ɖuɖu jí ɔ́ wútu. To lɛ́ɛ ko ɖo adǎn jí ɖ'ayǐ, amɔ̌ hwenu e a nǎ ɖe xomɛsin towe xlɛ́ dó ɔ́ su; hwenu e a nǎ ɖɔ hwɛ xá mɛkúkú lɛ́ɛ dó ɔ́ su; hwenu e a nǎ ná ajɔ gbeyíɖɔ mɛsɛntɔ́ towe lɛ́ɛ dó ɔ́ su. Mɛ e nyí towe lɛ́ɛ kpódó mɛ e nɔ sí we lɛ́ɛ bǐ kpó ɔ́, yě tlɛ nyí mɛxó abǐ yɔkpɔ́vú ɔ́, hwenu e a nǎ ná ajɔ yě dó ɔ́ su; hwenu e a nǎ vívá mɛ e nɔ hɛn ayǐkúngban ɔ́ gblé lɛ́ɛ sín kún dó ɔ́ su.” Énɛ́ ɔ́, è hun sinsɛnxɔ Mawu tɔn ɖo jǐxwé, bɔ è mɔ akɔjijɛgbá ɔ́ ɖ'é mɛ. Jǐkɛwun, è se gbe ɖé lɛ́ɛ; jǐ dó gbe; ayǐkúngban dán wǔ; kɛ́njí ɖaxó ja. Xlɛ̌ ɖaxó ɖé tɔ́n ɖo jǐxwé: è mɔ nyɔ̌nu ɖé dó hwesivɔ́; sun ɖo afɔ tɔn lɛ́ɛ glɔ́; axɔ́súgbákún ɖokpó ɖo ta tɔn bɔ sunví wěwe ɖ'é wú. Nyɔ̌nu ɔ́ ɖo vǐ ná ji wɛ; é ɖo vǐjiji sín wǔvɛ́ lɛ́ɛ mɔ wɛ, bó ɖo xó sú wɛ. Xlɛ̌ ɖěvo lɛ́ tɔ́n ɖo jǐxwé: è mɔ kanlin baɖabaɖa ɖaxó vɔvɔ ɖé; è nɔ ylɔ́ kanlin ɔ́ ɖɔ Dlagɔ́ɔn; é ɖó ta tɛ́nwe, bó ɖó zo wǒ, bɔ axɔ́súgbákún ɖokpó ɖokpó ɖo ta tɔn ɖokpó ɖokpó jí. É sɔ́ sí tɔn dó kplɔ́ sunví lɛ́ɛ sín atɔnvlɔ́ɖó sín jǐxwé nyi dó ayǐkúngban jí. É nɔ te ɖo nyɔ̌nu e ɖo vǐ ná ji wɛ ɔ́ nukɔn, bónú é ji vǐ ɔ́ tlóló ɔ́, é ná vún vǐ ɔ́ ɖu. Nyɔ̌nu ɔ́ ji vǐ súnnu ɖokpó. Vǐ ɔ́ ná kpa acɛ dó to lɛ́ɛ bǐ nu, bɔ acɛkpikpa tɔn ná syɛ́n gankpo ɖɔhun. È ka wá zé vǐ ɔ́ yi Mawu kpó axɔ́súzinkpo tɔn kpó kɔn; bɔ nyɔ̌nu ɔ́ hɔn yi gbětótló mɛ, fí e Mawu ko bló tɛnmɛ ɖó ɖ'ayǐ n'i ɖe é, bónú è nǎ ná nǔɖuɖu i xɔ azǎn afatɔ́n afɔɖé kanɖé ko (1.260). Bɔ ahwan tɔ́n ɖo jǐxwé: wɛnsagun ɖaxó Micɛ́li kpódó wɛnsagun e ɖo glɔ́ tɔn lɛ́ɛ kpó fun ahwan xá Dlagɔ́ɔn ɔ́, bɔ Dlagɔ́ɔn ɔ́ kpódó wɛnsagun tɔn lɛ́ɛ kpó fun ahwan xá yě. Lo ɔ́, yě ka ɖu ɖo Dlagɔ́ɔn ɔ́ jí, bɔ è sɔ́ ná gbe é kpódó wɛnsagun tɔn lɛ́ɛ kpó ɖɔ yě ní nɔ jǐxwé ǎ. È zě Dlagɔ́ɔn ɖaxó ɔ́ nyi dó ayǐkúngban jí; é wɛ nyí dan xóxó e è nɔ ylɔ́ ɖɔ awǒvi abǐ Satáan é; é wɛ flú gbɛ ɔ́ bǐ. È zě e nyi dó ayǐkúngban jí, é kpódó wɛnsagun tɔn lɛ́ɛ kpó. Énɛ́ ɔ́ gúdo ɔ́, un se gbe ɖaxó ɖé ɖi sín jǐxwé bó ɖɔ: “Hwlɛngán sín hwenu su lo! Mawu ɖe axɔ́súɖuɖu tɔn kpó hlɔ̌nhlɔ́n tɔn kpó xlɛ́ lo! Klísu tɔn ɖe acɛkpikpa e nyí étɔn ɔ́ xlɛ́ lo! Đó hwɛdómɛtɔ́ e ɖo te ɖo Mawu mǐtɔn nukɔn bó ná dó hwɛ nɔví mǐtɔn lɛ́ɛ zǎn kéze ɔ́, è ko zin i dɛ́. Lɛ̌ngbɔ́ví ɔ́ sín kanjɔ kpó xó e nɔví mǐtɔn lɛ́ɛ ɖe kúnnu ná ɔ́ kpán zɔ́n bɔ yě ɖu ɖo jǐ tɔn. Yě yí gbe bó ná sɔ́ gbɛ yětɔn jó; yě yí gbe bó ná kú. Énɛ́ wú ɔ́, sɛ́xwé kpó mi mɛ e ɖo sɛ́xwé lɛ́ɛ kpó ní jɛ awǎ. Amɔ̌ heelú ayǐkúngban kpó xu kpó. Đó awǒvi jɛ te wá mi gɔ́n kpódó xomɛsin ɖaxó ɖé kpó, ɖó é tunwun ɖɔ hwenu kpɛɖé jɛ́n wɛ kpo nú émí.” Ée Dlagɔ́ɔn ɔ́ mɔ ɖɔ è nyi émí dó ayǐkúngban jí é ɔ́, é jɛ nyɔ̌nu e ji vǐ súnnu ɔ́ gúdo. Lo ɔ́, è nǎ gangan ɖaxó sín awa we nyɔ̌nu ɔ́, bónú é ná zɔn yi tɛn tɔn mɛ ɖo gbětótló mɛ, fí e è nǎ ná ɛ nǔɖuɖu ɖe xɔ xwe atɔn adaɖé é; fí e dan ɔ́ ma ná wlí i ɖe ǎ é. Bɔ dan ɔ́ tún sin sín nu mɛ bɔ é cí tɔsisa ɖɔhun ɖo nyɔ̌nu ɔ́ gúdo, bó ná dó dɔn nyɔ̌nu ɔ́ hɛn yi. Lo ɔ́, ayǐkúngban hwlɛ́n nyɔ̌nu ɔ́ gán: ayǐkúngban ɔ́ hun nu, bó nu sin e Dlagɔ́ɔn ɔ́ tún sín nu mɛ é. Énɛ́ ɔ́, xomɛ sin Dlagɔ́ɔn ɔ́ dó nyɔ̌nu ɔ́ wú tlala, bɔ é ɖidó ahwan fun xá nyɔ̌nu ɔ́ sín vǐ e kpo lɛ́ɛ gbé; mɛ e se tónú nú Mawusɛ́n ɔ́, bó ɖo gbejí nú nǔgbó e Jezu ɖe xlɛ́ lɛ́ɛ ɔ́, é ɖidó ahwan fun xá yě bǐ gbé. Dlagɔ́ɔn ɔ́ yi cí xutó. Énɛ́ ɔ́ gúdo ɔ́, un mɔ kanlin ɖé tɔ́n sín xu mɛ; é ɖó zo wǒ, bó ɖó ta tɛ́nwe; é xwe axɔ́súgbákún ɖokpó ɖokpó ɖó zo tɔn lɛ́ɛ ɖokpó ɖokpó jí; è wlǎn nu nylá dó Mawu wú sín nyǐkɔ dó ta tɔn lɛ́ɛ wú. Kanlin e un mɔ ɔ́ ɖi kpɔ; afɔ tɔn lɛ́ɛ ɖi lɔnmɔ sín afɔ; nu tɔn ɖi kinnikínní sín nu. Dlagɔ́ɔn ɔ́ sɔ́ hlɔ̌nhlɔ́n tɔn jó n'i, bó sɔ́ axɔ́súzinkpo tɔn kpódó acɛ tɔn ɖaxó ɔ́ kpó jó n'i. É cí è gblě wǔ i dó ta tɔn lɛ́ɛ ɖokpó ɖɔ ní kú ɖɔhun; lo ɔ́, wǔ e è gblě e ɖɔ ní kú ɔ́, akpa tɔn ko kú. Nǔ tɔn nyɔ́ gbɛtɔ́ e ɖo ayǐkúngban jí lɛ́ɛ bǐ nukún mɛ, bɔ yě ɖo gǔdo tɔn. Mɛ bǐ jɛ Dlagɔ́ɔn ɔ́ sɛn jí, ɖó é zé acɛ tɔn jó nú kanlin ɔ́; yě nɔ sɛn kanlin ɔ́ lɔmɔ̌, bó nɔ ɖɔ: “Mɛ̌ ká cí kanlin ɔ́ ɖɔhun? Mɛ̌ ká sixú fun ahwan xá ɛ?” È nǎ gbe kanlin ɔ́ ɖɔ ní ɖɔ xó, bó dó yí go Mawu wú, bó ɖɔ xó dó zun Mawu; è ná ɛ acɛ ɖɔ ní wa mɔ̌ xɔ sun kanɖé nukún-we (42). É jɛ xó nyanya ɖɔ dó Mawu wǔ jí; é jɛ xó nyanya ɖɔ dó Mawu kpó nɔtɛn tɔn kpó wú jí, bó jɛ mɛ e nɔ nɔ jǐxwé lɛ́ɛ zun jí. È ná ɛ gbe ɖɔ ní fun ahwan xá mɛɖeɖóvo Mawu tɔn lɛ́ɛ, bó ɖu ɖo yě jǐ; è ná ɛ acɛ dó akɔta lɛ́ɛ bǐ kpó togun lɛ́ɛ bǐ kpó nu; é ná ɛ acɛ dó gbe lɛ́ɛ bǐ kpó to lɛ́ɛ bǐ kpó nu. Mɛ e ɖo ayǐkúngban jí lɛ́ɛ bǐ ná nɔ sɛn ɛ: yě mɛ e sín nyǐkɔ è ma wlán dó Lɛ̌ngbɔ́ví e è hu ɔ́ sín wěma mɛ ǎ lɛ́ɛ ná sɛn ɛ. Wěma énɛ́ ɔ́, mɛ e ɖo gbɛ lɛ́ɛ tɔn wɛ, bɔ è ko wlán nyǐkɔ yětɔn lɛ́ɛ d'é mɛ sín bǐbɛ́mɛ gbɛ ɔ́ tɔn. “Ényí mi ɖó tó bó ná dó se nǔ hǔn, mi bo ɖótó ganjí. Mɛ e ɖo te nú gankpá mɛ ɔ́ ɖó ná yi gankpá mɛ; mɛ e ɖo te nú hwǐ kú ɔ́ ɖó ná kú hwǐ kú; nǔ énɛ́ ɔ́ byɔ́ ɖɔ mɛɖeɖóvo Mawu tɔn lɛ́ɛ ní dɛ, bó ɖó nǔɖiɖi.” Énɛ́ ɔ́ gúdo ɔ́, un mɔ kanlin ɖěvo bɔ é ɖo ayǐkúngban glɔ́ tɔ́n sín wɛ; é ɖó zo we, bɔ zo lɛ́ɛ cí Lɛ̌ngbɔ́ví sín zo ɖɔhun; é ɖo xó ɖɔ wɛ Dlagɔ́ɔn ɖɔhun. É nɔ zán acɛ e kanlin nukɔntɔn ɔ́ ɖó ɔ́ bǐ ɖo nukɔn tɔn. É zɔ́n bɔ ayǐkúngban ɔ́ kpó mɛ e ɖ'é jí lɛ́ɛ kpó nɔ sɛn kanlin nukɔntɔn e wǔ e è gblě e ɖɔ ní kú ɔ́ sín akpa ko kú é. Kanlin wegɔ́ énɛ́ ɔ́, nɔ jlɛ́ nǔ ɖaxó ɖaxó lɛ́ɛ; é nɔ dɔn myɔ sín jǐxwé wá ayǐkúngban jí ɖo gbɛtɔ́ lɛ́ɛ bǐ nukɔn. É nɔ zé nǔ e è nǎ gbe e ɖɔ é ní jlɛ́ ɖo kanlin nukɔntɔn ɔ́ nukɔn ɔ́ dó flú gbɛtɔ́ e ɖo ayǐkúngban jí lɛ́ɛ ná. É ɖo ɖiɖɔ nú gbɛtɔ́ e ɖo ayǐkúngban jí lɛ́ɛ wɛ ɖɔ yě ní kpa susu nú kanlin e è sɔ́ hwǐ dó gblé wǔ ná, cóbɔ é ka lɛ́ kpo ɖo gbɛ ɔ́ sín akpajlɛ́, bó dó sɔ́ ɛ su. È nǎ gbe kanlin wegɔ́ ɔ́ ɖɔ ní ná gbɛ kanlin nukɔntɔn ɔ́ sín akpajlɛ́, bónú akpajlɛ́ énɛ́ ɔ́ ná sixú ɖɔ xó, bónú é ná sixú hu mɛ e ma ná nɔ sɛn ɛ ǎ lɛ́ɛ bǐ. Kanlin ɔ́ zɔ́n bɔ è ɖǒ wuntun alɔ ɖisí ɔ́, abǐ nukɔn nú mɛ bǐ: yɔkpɔ́vú kpó mɛxó kpó; dɔkunnɔ kpó wamamɔnɔ kpó; kannumɔ kpó mɛ e ɖo éɖée sí ɔ́ kpó. Ényí mɛɖé ma ɖó wuntun énɛ́ ɔ́ ǎ ɔ́, é sixú xɔ nǔ ǎ; é ka sixú sa nǔ ǎ. Wuntun ɔ́ wɛ nyí kanlin ɔ́ sín nyǐkɔ, abǐ xixa nabí e nyǐkɔ tɔn nyí é. Nǔ énɛ́ lɛ́ɛ byɔ́ ɖɔ è ɖǒ ná ɖó nǔnywɛ́. Mɛ e ɖó nǔnywɛ́ ɔ́ ní lɛ́n xixa nabí e kanlin ɔ́ nyí é; ɖó gbɛtɔ́ sín nyǐkɔ sín xixa wɛ, bɔ xixa tɔn nyí nǔwɔntɔn kanɖé koatɔ́n-nukún-ɖokpó (666). Énɛ́ ɔ́ gúdo ɔ́, un kpɔ́n bó mɔ Lɛ̌ngbɔ́ví ɔ́ ɖo te ɖo Sinyɔ́ɔ sín só ɔ́ jí. Gbɛtɔ́ adɔ̌kpo tɛ́nwe děgba (144.000) e sín nukɔn è wlǎn nyǐkɔ tɔn kpó tɔ́ tɔn sín nyǐkɔ kpán ɖó lɛ́ɛ ɖo fínɛ́ xá ɛ. Un se gbe ɖé sín jǐxwé bɔ é ɖo nǔ ɖɔ wɛ sin ɖaxó ɖé wɛ ɖo ayǐ kɔn nyi wɛ ɖɔhun; jǐ ɖo gbe dó wɛ kpó hlɔ̌nhlɔ́n kpó ɖɔhun; gbe e un se ɔ́ cí agǐdigboxotɔ́ lɛ́ɛ ɖo agǐdigbo xo wɛ ɖɔhun. Gbɛtɔ́ adɔ̌kpo tɛ́nwe děgba (144.000) nɛ́ lɛ́ɛ ɖo te ɖo axɔ́súzinkpo ɔ́ nukɔn, ɖo nǔɖogbɛ ɛnɛ lɛ́ɛ kpó mɛxó lɛ́ɛ kpó nukɔn, bó ɖo han yɔ̌yɔ́ ɖé jí wɛ. Mɛɖěbǔ sixú kplɔ́n han énɛ́ zɛ gbɛtɔ́ adɔ̌kpo tɛ́nwe děgba (144.000) e è vɔ̌ xɔ sín ayǐkúngban jí lɛ́ɛ wú ǎ. Mɛ énɛ́ lɛ́ɛ hɛn yěɖée blí kpó nyɔ̌nu kpó ǎ; ɖó yě tunwun nyɔ̌nu kpɔ́n ǎ; yě hɛn yěɖée ɖó mǐmɛ́ jí; yě nɔ xwedó Lɛ̌ngbɔ́ví ɔ́ gbɔn fí e é xwe ɔ́ bǐ; é vɔ́ yě xɔ sín gbɛtɔ́ lɛ́ɛ mɛ, bónú yě ná nyí mɛ nukɔntɔn e è nǎ Mawu kpó Lɛ̌ngbɔ́ví ɔ́ kpó é. È se yě ɖó adingban kpɔ́n gbeɖé ǎ; blɔ̌ ɖěbǔ ɖo yě wú ǎ. Énɛ́ ɔ́ gúdo ɔ́, un mɔ wɛnsagun ɖěvo, bɔ é ɖo zinzɔn wɛ gbɔn jɔhɔn mɛ aga; é ɖó Wɛn Ɖagbe mavɔ mavɔ ɖé bó ná dó mɛ e ɖo ayǐkúngban jí lɛ́ɛ; é ná dó wɛn ɔ́ to bǐ, akɔta bǐ, gbe bǐ kpódó togun bǐ kpó. Wɛnsagun ɔ́ zé gbe yi jǐ bó ɖɔ: “Mi ɖó sísí nú Mawu, bó kpa susu n'i! Đó hwenu e é ná ɖɔ hwɛ xá gbɛtɔ́ lɛ́ɛ dó ɔ́ su. Mi sɛn mɛ e bló jǐxwé, bó bló ayǐkúngban, bó bló xu kpó tɔjɔtɛn lɛ́ɛ kpó é!” Wɛnsagun wegɔ́ ɔ́ jɛ nukɔntɔn ɔ́ gúdo, bó ɖɔ: “É jɛ ayǐ lóóo! Toxo ɖaxó e è nɔ ylɔ́ ɖɔ Babilɔ́nu ɔ́ jɛ ayǐ lóóo. É ná vɛ̌ɛn tɔn to lɛ́ɛ bǐ. Aga e é lɛ ɔ́ sín vɛ̌ɛn baɖabaɖa ɔ́, é ná to lɛ́ɛ bǐ bɔ yě nu!” Wɛnsagun atɔngɔ́ ɔ́ jɛ we nukɔntɔn lɛ́ɛ gúdo, bó zé gbe yi jǐ bó ɖɔ: “Mɛ e ɖo kanlin ɔ́ kpó akpajlɛ́ tɔn kpó sɛn wɛ, lobo yí wuntun tɔn dó nukɔn, abǐ dó alɔ ɔ́, mɛ énɛ́ ɖésú ná nu vɛ̌ɛn Mawu tɔn; adǎn tɔn sín vɛ̌ɛn e é kɔn akú tɔn dó xomɛsin tɔn sín kɔ́fu mɛ é! Yě mɛ e ɖo nǔ wa gbɔn mɔ̌ wɛ lɛ́ɛ bǐ ná ji ya ɖaxó, ɖo myɔ kpó hwemí kpó mɛ, ɖo wɛnsagun mímɛ́ lɛ́ɛ kpódó Lɛ̌ngbɔ́ví ɔ́ kpán nukɔn. Myɔ e ná dó ya ɖaxó nú yě ɔ́ sín azizɔ ná ɖo sisi wɛ káká sɔ́yi. Zǎn kpó kéze kpó ɔ́, gbɔjɛ́ ɖe nú yě mɛ e sɛn kanlin ɔ́ kpó akpajlɛ́ tɔn lɛ́ɛ kpó é ǎ; é ka ɖe nú mɛ e wú nyǐkɔ tɔn sín wuntun ɖe ɔ́ ɖěbǔ ǎ.” Nǔ e wú é byɔ́ ɖɔ mɛɖeɖóvo Mawu tɔn e nɔ xwedó Mawusɛ́n lɛ́ɛ, bó ɖó nǔɖiɖi nú Jezu lɛ́ɛ ɖó ná dɛ ɔ́ nɛ́. Un se gbe ɖé bɔ gbe ɔ́ ɖɔ nú mì sín jǐxwé ɖɔ: “Wlǎn nǔ élɔ́: ‘Mɛ e ɖo kúkú wɛ ɖo Aklúnɔ mɛ bɛ́ sín din lɛ́ɛ ɔ́, nǔ nyɔ́ nú yě!’ ” Yɛ ɔ́ ɖɔ: “Ɛɛn nǔgbó wɛ, yě hɛn ɔ́, yě ná gbɔjɛ́ ɖo azɔ̌ syɛ́nsyɛ́n e yě wa lɛ́ɛ mɛ, ɖó ɖagbe e yě wa lɛ́ɛ kpó yě kpo ɖo yiyi wɛ.” Un lɛ́ ɖo kpínkpɔ́n wɛ bó mɔ akpɔ́kpɔ́ wěwé ɖé, bɔ nǔ gbɛtɔ́ ɖɔhun ɖé ɖo ayǐjínjɔ́n ɖ'é jí. Axɔ́súgbákún e è sɔ́ siká dó bló ná ɔ́ ɖokpó ɖo ta tɔn, bɔ é hɛn nǔkún-yanú ɖíɖá ɖokpó alɔ mɛ. Wɛnsagun ɖěvo tɔ́n sín sinsɛnxɔ ɔ́ mɛ, bó sú xó tlílí, bó ɖɔ sɛ́ dó mɛ e ɖo ayǐjínjɔ́n ɖo akpɔ́kpɔ́ ɔ́ jí ɔ́ ɖɔ: “Zě nǔkún-yanú towe dó ya nǔkún, ɖó nǔkún-yahwenu ko su; ɖó nǔkún e ɖo ayǐkúngban jí lɛ́ɛ ko myá.” Bɔ mɛ e ɖo ayǐjínjɔ́n ɖo akpɔ́kpɔ́ ɔ́ jí ɔ́ zé nǔkún-yanú tɔn dó kplɔ́ nǔkún lɛ́ɛ ná ɖo ayǐkúngban ɔ́ jí; bɔ nǔkún e ɖo ayǐkúngban jí lɛ́ɛ bǐ nyí yiya. Wɛnsagun ɖěvo lɛ́ tɔ́n sín sinsɛnxɔ e ɖo jǐxwé ɔ́ mɛ; élɔ́ hɛn nǔkún-yanú ɖíɖá ɖokpó. Bɔ wɛnsagun ɖěvo e ɖó acɛ dó myɔ ɔ́ jí ɔ́ gosín vɔ̌sákpe ɔ́ kɔn wá. É sú xó, bó ɖɔ sɛ́ dó wɛnsagun e hɛn nǔkún-yanú ɖíɖá ɔ́ ɖɔ: “Zě nǔkún-yanú towe dó gbo vǐwun sín hwǐn e ɖo ayǐkúngban jí lɛ́ɛ bǐ; ɖó sínsɛ́n yětɔn lɛ́ɛ ko myá.” Wɛnsagun ɔ́ nyi nǔkún-yanú tɔn dó kplɔ́ vǐwun sín hwǐn lɛ́ɛ ná ɖo ayǐkúngban ɔ́ jí, bɔ vǐwun sín hwǐn e ɖo ayǐkúngban jí lɛ́ɛ nyí gbigbo, bɔ è bɛ̌ nyi dó xomɛsin Mawu tɔn sín vǐwunfyɔ́nnú ɖaxó ɔ́ mɛ. È li vǐwun sínsɛ́n ɔ́ ɖo vǐwunto mɛ, ɖo toxo ɔ́ gúdo, bɔ hun nɔ sa sín vǐwunto ɔ́ mɛ hoho, bó gba kpé kɔ́ mɛ káká yi kilomɛ́tlu afɔɖé kanwe ko (300), bɔ do yiyi tɔn yi mɛ̌tlu ɖokpó adaɖé mɔ̌. Énɛ́ ɔ́ gúdo ɔ́, un mɔ xlɛ́ ɖěvo ɖo jǐxwé; xlɛ́ énɛ́ ɔ́ d'agba bó nyɔ́ kpɔ́n: wɛnsagun tɛ́nwe ɖé lɛ́ɛ wɛ, bɔ yě hɛn nǔ nyanya tɛ́nwe. Nǔ nyanya tɛ́nwe énɛ́ lɛ́ɛ ɔ́, nǔ nyanya gǔdo gúdo tɔn lɛ́ɛ wɛ; ɖó yě jí wɛ xomɛsin Mawu tɔn ná vɔ gbɔn. Un mɔ nǔ xu wěkpɛ́n ɖɔhun ɖé cáká kpó myɔ kpó; un lɛ́ mɔ yě mɛ e ɖu ɖo kanlin ɔ́ jí, bó ɖu ɖo akpajlɛ́ tɔn jí, bó ɖu ɖo xixa nabí e nyǐkɔ tɔn nyí ɔ́ jí lɛ́ɛ. Yě ɖo te ɖo xu wěkpɛ́n ɖɔhun ɔ́ jí, bó hɛn agǐdigbo e Mawu sɔ́ nú yě lɛ́ɛ. Yě ɖo mɛsɛntɔ́ Mawu tɔn Mɔyízi sín han ji wɛ, bó ɖo Lɛ̌ngbɔ́ví ɔ́ sín han ji wɛ ɖɔ: “Aklúnɔ Mawu Nǔbǐwúkpétɔ́, azɔ̌ towe lɛ́ɛ d'agba bó nyɔ́ kpɔ́n. Axɔ́sú to lɛ́ɛ tɔn, tito towe lɛ́ɛ jlɔ́ bó nyí nǔgbó. Aklúnɔ, mɛ̌ ma ká ná ɖó sísí nú we ǎ? Mɛ̌ ka ná gbɛ́ ɖɔ émí kún ná kpa susu nú we ó? Đó hwi ɖokpónɔ géé wɛ nyí mǐmɛ́; to lɛ́ɛ bǐ ná wá sɛn we. Đó nǔ jlɔ́jlɔ́ e a nɔ wa lɛ́ɛ ɖe yěɖée xlɛ́ céɖécéɖé.” Un mɔ sinsɛnxɔ e mɛ akɔjijɛ Mawu tɔn sín goxɔ ɖe ɔ́ hun ɖo jǐxwé. Wɛnsagun tɛ́nwe e hɛn nǔ nyanya tɛ́nwe lɛ́ɛ tɔ́n sín sinsɛnxɔ ɔ́ mɛ; yě dǒ akwɛ́núvɔ wěwé, bɔ é nɔ kɔ́n, bó sin akɔ́ntablánú e è sɔ́ siká dó bló ná ɔ́ dó akɔ́nnu. Nǔɖogbɛ ɛnɛ lɛ́ɛ ɖokpó bɛ́ sinnugannú e è sɔ́ siká dó bló ná ɔ́ tɛ́nwe nú wɛnsagun tɛ́nwe lɛ́ɛ; Mawu e ɖo gbɛ káká sɔ́yi ɔ́ sín xomɛsin gɔ́ sinnugannú énɛ́ lɛ́ɛ mɛ. Azizɔ gɔ́ sinsɛnxɔ ɔ́ mɛ, ɖó susu Mawu tɔn kpó hlɔ̌nhlɔ́n tɔn kpó wú, bɔ mɛ ɖěbǔ sixú byɔ́ sinsɛnxɔ ɔ́ mɛ káká jɛ hwenu e nǔ nyanya tɛ́nwe e wɛnsagun lɛ́ɛ hɛn ɔ́ ná jɛ dó é ǎ. Énɛ́ ɔ́ gúdo ɔ́, un se gbe ɖi lélé sín sinsɛnxɔ ɔ́ mɛ, bó ɖo ɖiɖɔ nú wɛnsagun tɛ́nwe lɛ́ɛ wɛ ɖɔ: “Mi yi húzú xomɛsin Mawu tɔn e ɖo sinnugannú tɛ́nwe mɛ lɛ́ɛ kɔn nyi ayǐkúngban jí!” Wɛnsagun nukɔntɔn ɔ́ yi, bó húzú sinnugannú éyɛ́ tɔn kɔn nyi ayǐkúngban jí. Énɛ́ ɔ́, agadá baɖabaɖa, agadá nyinyɔ ɖé tɔ́n gbɔn mɛ e wú wuntun kanlin ɔ́ tɔn ɖe, bɔ yě nɔ sɛn akpajlɛ́ tɔn lɛ́ɛ sín wútu. Wɛnsagun wegɔ́ ɔ́ húzú sinnugannú éyɛ́ tɔn kɔn nyi xu mɛ. Bɔ xu ɔ́ húzú, bó cí mɛkúkú sín kanjɔ ɖɔhun, bɔ nǔɖogbɛ e ɖo xu ɔ́ mɛ lɛ́ɛ bǐ kú. Wɛnsagun atɔngɔ́ ɔ́ húzú sinnugannú éyɛ́ tɔn kɔn nyi tɔsisa lɛ́ɛ kpó tɔjɔtɛn lɛ́ɛ kpó mɛ, bɔ yě húzú kanjɔ. Énɛ́ ɔ́ gúdo ɔ́, un se wɛnsagun e ɖó acɛ dó sin lɛ́ɛ jí ɔ́ ɖɔ: “Hwi mɛ e nyí mǐmɛ́, hwi mɛ e tíin bo ko tíin ɖ'ayǐ ɔ́, hwɛjijɔnɔ wɛ a nyǐ, bó dó ɖɔ hwɛ gbɔn mɔ̌. Nǔgbó ɔ́, yě kɔn mɛɖeɖóvo Mawu tɔn lɛ́ɛ kpó gbeyíɖɔ lɛ́ɛ kpó sín hun nyi ayǐ, bɔ din ɔ́, a nǎ kanjɔ yě, bɔ yě nu. Nǔ e jɛ xá yě ɔ́ nɛ́!” Énɛ́ ɔ́ gúdo ɔ́, un se gbe ɖé gosín vɔ̌sákpe ɔ́ kɔn, bó ɖo ɖiɖɔ wɛ ɖɔ: “Nǔgbó wɛ Aklúnɔ Mawu Nǔbǐwúkpétɔ́, hwɛɖiɖɔ towe lɛ́ɛ nyí nǔgbó bó sɔgbe!” Wɛnsagun ɛnɛgɔ́ ɔ́ húzú sinnugannú éyɛ́ tɔn kɔn nyi hwe jí, bɔ è nǎ gbe hwe ɔ́ ɖɔ ní zé myɔ tɔn dó fyɔ́ gbɛtɔ́ lɛ́ɛ. Yǒzo ɖaxó ɖé fyɔ́ gbɛtɔ́ lɛ́ɛ, bɔ yě nylá nu dó Mawu e ɖó acɛ dó nǔ nyanya mɔ̌hunkɔtɔn lɛ́ɛ jí ɔ́ sín nyǐkɔ wú; yě lɛ́ kɔ sín hwɛ yětɔn lɛ́ɛ gúdo, bó ná kpa susu nú Mawu ǎ. Wɛnsagun atɔ́ɔ́ngɔ́ ɔ́ húzú sinnugannú éyɛ́ tɔn kɔn nyi kanlin ɔ́ sín axɔ́súzinkpo jí, bɔ ablu ɖaxó ɖé cyɔ́n axɔ́súɖuto tɔn. Gbɛtɔ́ lɛ́ɛ ɖo wǔvɛ́ mɔ wɛ káká bó nɔ́ han aɖǔ ɖɛ̌ yě ɖésúnɔ tɔn. Yě nylá nu dó Mawu sɛ́xwé tɔn wú, ɖó wǔvɛ́ e mɔ wɛ yě ɖe ɔ́ kpó agadá yětɔn lɛ́ɛ kpó wú. Yě lɛ́ kɔ sín nǔ nyanya e wa wɛ yě ɖe lɛ́ɛ gúdo ǎ. Wɛnsagun ayizɛ́ngɔ́ ɔ́ húzú sinnugannú éyɛ́ tɔn kɔn nyi tɔsisa ɖaxó e è nɔ ylɔ́ ɖɔ Efláti ɔ́ mɛ. Tɔ ɔ́ mɛ, bó ná ali axɔ́sú e jǎwe sín zǎnzǎnhwe jí lɛ́ɛ. Énɛ́ ɔ́ gúdo ɔ́, un mɔ yɛ nyanya atɔn bɔ yě cí aglǒběsé ɖɔhun; yě tɔ́n sín Dlagɔ́ɔn ɔ́ kpó kanlin ɔ́ kpó, kpódó gbeyíɖɔnyíjɛtɔ́ ɔ́ kpán sín nu mɛ. Awǒvi e ɖo nǔ jlɛ̌ wɛ lɛ́ɛ sín yɛ lɛ́ɛ wɛ. Yɛ atɔn énɛ́ lɛ́ɛ ɖidó axɔ́sú e ɖo ayǐkúngban ɔ́ bǐ jí lɛ́ɛ gɔ́n, bó ná kplé yě nú ahwan e è ná fun ɖo Mawu Nǔbǐwúkpétɔ́ ɔ́ sín azǎn ɖaxó ɔ́ gbe é. “Đǒtó, un ná wá ajotɔ́ ɖɔhun! Nǔ nyɔ́ nú mɛ e ná ɖo wunzɛn, bó ná ɖo awu tɔn lɛ́ɛ mɛ é, bónú é ma zɔn mɛ̌ yi, nú è nǎ mɔ ɛ ɖo mɛ̌ nú winnyá ná hu i ó.” Yɛ nyanya lɛ́ɛ kplé axɔ́sú lɛ́ɛ ɖó tɛn e mɛ è nɔ ylɔ́ ɖɔ Haamagedɔ́ni ɔ́ dó Ebléegbe mɛ é. Wɛnsagun tɛ́nwegɔ́ ɔ́ húzú sinnugannú éyɛ́ tɔn kɔn nyi jɔhɔn mɛ. È se gbe lélé ɖé sín sinsɛnxɔ ɔ́ mɛ; gbe ɔ́ gosín axɔ́súzinkpo ɔ́ kɔn, bó ɖo ɖiɖɔ wɛ ɖɔ: “É sɔgbe lo!” Jǐkɛwun; è se gbe ɖé lɛ́ɛ; jǐ dó gbe; ayǐkúngban dán wǔ kpó hlɔ̌nhlɔ́n kpó. Ayǐkúngban ɔ́ ko dán wǔ mɔ̌hunkɔtɔn ɖě sín hwenu e è ko bló gbɛtɔ́ é ǎ; é syɛ́n ɖésú! Toxo ɖaxó ɔ́ má ɖó atɔn, bɔ toxo e gbɔn to lɛ́ɛ bǐ mɛ lɛ́ɛ gba hánnyá. Mawu wɔn Babilɔ́nu ɖaxó ɔ́ ǎ; é ná ɛ xomɛsin tɔn ɖaxó ɔ́ sín vɛ̌ɛn e ɖo sinnugannú tɔn mɛ ɔ́, bɔ é nu. Tɔtɛ́ntin yíkúngban lɛ́ɛ bǐ bú, bɔ è sɔ́ mɔ só lɛ́ɛ ɖě ǎ. Kɛ́njí ɖaxó ɖaxó ɖé lɛ́ɛ nɔ ja kɔn nyi gbɛtɔ́ lɛ́ɛ jí; kɛ́n énɛ́ lɛ́ɛ ɖokpó ɖokpó nɔ da káká yi kilóo kanɖé (40). Gbɛtɔ́ lɛ́ɛ nylá nu dó Mawu wú, ɖó nǔ nyanya e kɛ́njí ɔ́ dó sin ɔ́ wú; ɖó nǔ nyanya ɖé wɛ bó syɛ́n ɖésú. Énɛ́ ɔ́ gúdo ɔ́, wɛnsagun tɛ́nwe e hɛn sinnugannú tɛ́nwe lɛ́ɛ ɖokpó wá ɖɔ nú mì ɖɔ: “Wǎ, bónú ma xlɛ́ we lě e è ɖǒ ná dɔn tó nú agalɛtɔ́ ɖaxó e nyí toxo ɖaxó e è gbǎ ɖó tɔsisa gěgé tó ɔ́ gbɔn é. Axɔ́sú e ɖo ayǐkúngban jí lɛ́ɛ lɛ aga xá ɛ, bɔ mɛ e ɖo ayǐkúngban jí lɛ́ɛ nu nǔblíblí tɔn sín vɛ̌ɛn mú.” Yɛ ɔ́ wá jǐ ce, bɔ wɛnsagun ɔ́ zé mì yi gbětótló mɛ. Un mɔ nyɔ̌nu ɖé ɖo fínɛ́, bɔ é ɖo ayǐjínjɔ́n ɖo kanlin vɔvɔ cɛ́cɛ́ ɖé jí; nu nylá dó Mawu wǔ sín nyǐkɔ kpé kanlin ɔ́ wú; kanlin énɛ́ ɖó ta tɛ́nwe, zo wǒ. Nyɔ̌nu ɔ́ dó akwɛ́núvɔ vɔvɔ kwélesinnɔ kpó avɔ vɔvɔ cɛ́cɛ́ kpó; é bɛ́ sikánú lɛ́ɛ kpódó awǐnnya xɔ akwɛ́ lɛ́ɛ kpó, kpódó jɛ̌ lɛ́ɛ kpán dó ba acɔ́ ná; é hɛn kɔ́fu e è sɔ́ siká dó bló ná ɔ́ ɖokpó alɔ mɛ, bɔ suɖunú lɛ́ɛ kpó aga tɔn sín nǔ kwíji kwíji lɛ́ɛ kpó gɔ́ kɔ́fu ɔ́. È wlǎn nyǐkɔ ɖé dó nukɔn tɔn; nyǐkɔ ɔ́ búdo. È wlǎn ɖɔ: “Babilɔ́nu ɖaxó ɔ́, agalɛtɔ́ lɛ́ɛ kpó suɖunú gbɛ ɔ́ tɔn lɛ́ɛ kpó sín nɔ.” Un mɔ ɖɔ mɛɖeɖóvo Mawu tɔn lɛ́ɛ kpódó kúnnuɖetɔ́ Jezu tɔn e è hu lɛ́ɛ kpó sín hun mú nyɔ̌nu ɔ́. Ée un mɔ nyɔ̌nu ɔ́, é kpácá mì ɖésú. Énɛ́ ɔ́, wɛnsagun ɔ́ ɖɔ nú mì ɖɔ: “Nɛ̌ ka gbɔn bɔ é kpácá we? Nǔ e nyɔ̌nu ɔ́ kpó kanlin e jí é jínjɔ́n, bɔ é ɖó ta tɛ́nwe, zo wǒ ɔ́ kpó nyí ɔ́, un ná tín nǔbúdo e ɖ'é mɛ ɔ́ mɛ nú we. Kanlin e a mɔ ɔ́ nɔ gbɛ ɖ'ayǐ; é ka sɔ́ ɖo gbɛ din ǎ; é ɖó ná tɔ́n sín do gɔngɔn ɔ́ mɛ, bó ka ná yi dɔn. Mɛ e ɖo ayǐkúngban jí bɔ è ma wlán nyǐkɔ yětɔn dó gbɛwéma ɔ́ mɛ sín bǐbɛ́mɛ gbɛ ɔ́ tɔn ǎ lɛ́ɛ wá mɔ kanlin ɔ́, é ná kpácá yě: nǔgbó ɔ́, kanlin ɔ́ ɖo gbɛ ɖ'ayǐ; é ka sɔ́ ɖo gbɛ din ǎ, é ná lɛ́ vɔ́ ɖe éɖée xlɛ́. “Nǔ énɛ́ ɔ́ byɔ́ ɖɔ è ɖǒ ná ɖó nukúnnú mɔ jɛ nǔ mɛ kpó nǔnywɛ́ kpó. Ta tɛ́nwe lɛ́ɛ ɔ́, só tɛ́nwe wɛ; yě jí wɛ nyɔ̌nu ɔ́ ɖo ayǐjínjɔ́n ɖe; yě lɛ́ nyí axɔ́sú tɛ́nwe. Mɛ atɔ́ɔ́n jɛ ayǐ ɖo yě mɛ; mɛ ɖokpó ɖo axɔ́sú ɖu wɛ din; mɛ tɛ́nwegɔ́ ɔ́ ka ko wá ǎ; hwenu e é ná wá ɔ́, hwenu kpɛɖé jɛ́n é ná nɔ ayǐ ná. Kanlin e nɔ gbɛ ɖ'ayǐ, bó ma sɔ́ ɖo gbɛ din ǎ ɔ́, axɔ́sú tántɔngɔ́ ɔ́ wɛ é ɖésú nyí, bó lɛ́ ɖo mɛ tɛ́nwe nukɔntɔn lɛ́ɛ mɛ, lobo ná yi dɔn. “Zo wǒ e a mɔ lɛ́ɛ ɔ́, axɔ́sú wǒ wɛ yě nyí; yě ka ko jɛ axɔ́sú ɖu jí ǎ. Amɔ̌ è nǎ sɔ́ acɛkpikpa ɔ́ dó así nú yě, bɔ yě ná ɖu axɔ́sú xá kanlin ɔ́ nú ganxixo ɖokpó. Linlin ɖokpó ɔ́ wɛ yě mɛ wǒ lɛ́ɛ bǐ ɖó; linlin yětɔn wɛ nyí ɖɔ yě ná zé hlɔ̌nhlɔ́n yětɔn kpó acɛkpikpa yětɔn kpó jó nú kanlin ɔ́. Yě ná fun ahwan xá Lɛ̌ngbɔ́ví ɔ́. Lɛ̌ngbɔ́ví ɔ́ ka ná ɖu ɖo yě jǐ; ɖó é wɛ nyí Aklúnɔ aklúnɔ lɛ́ɛ tɔn; Axɔ́sú axɔ́sú lɛ́ɛ tɔn; é ná ɖu ɖo yě jǐ, é kpó mɛ e ɖo kpɔ́ xá ɛ lɛ́ɛ kpó; mɛ e è ylɔ̌ bó cyán bɔ yě nɔ gbejí n'i lɛ́ɛ.” Wɛnsagun ɔ́ lɛ́ ɖɔ nú mì ɖɔ: “Tɔsisa e a mɔ ɖo fí e agalɛtɔ́ ɔ́ ɖe lɛ́ɛ ɔ́, togun lɛ́ɛ wɛ; ahwan lɛ́ɛ wɛ; to lɛ́ɛ kpó gbe lɛ́ɛ kpó wɛ. Zo wǒ e a mɔ lɛ́ɛ kpó kanlin ɔ́ kpó ná gbɛ́ wǎn nú agalɛtɔ́ ɔ́; yě ná fɔ nǔ e é ɖó lɛ́ɛ bǐ; yě ná ɖe e nyi mɛ̌; yě ná ɖu lan tɔn, bó ná zé myɔ dó fyɔ́ ɛ. Đó Mawu sɔ́ jlǒ e nɔ wa linlin tɔn ɔ́ dó ayi mɛ nú yě; yě ná ɖó gbe kpɔ́, bó wa nǔ, bó ná sɔ́ axɔ́súɖuɖu yětɔn dó así nú kanlin ɔ́ káká yi jɛ hwenu e xó e Mawu ɖɔ lɛ́ɛ ná jɛ dó é. “Bó ná dó fó ɔ́, nyɔ̌nu e a mɔ ɔ́, toxo ɖaxó e kpa acɛ dó axɔ́sú ayǐkúngban jí tɔn lɛ́ɛ nu ɔ́ wɛ.” Énɛ́ ɔ́ gúdo ɔ́, un mɔ wɛnsagun ɖěvo ɖo te jɛ sín jǐxwé wɛ. É ɖó acɛ ɖaxó ɖé; susu tɔn hɔ́n dó ayǐkúngban ɔ́ bǐ jǐ. Wɛnsagun ɔ́ sú xó tlílí bó ɖɔ: “É jɛ ayǐ lóóo, Babilɔ́nu toxo ɖaxó ɔ́ jɛ ayǐ lóóo! Awǒvi lɛ́ɛ sín nɔtɛn wɛ é nyí din, bó nyí bibɛtɛn nú yɛ nyanya alɔkpa alɔkpa lɛ́ɛ bǐ; xɛ blíblí, xɛ gbɛ́ hɛn tɛnmɛ tɛnmɛ lɛ́ɛ bǐ nɔ́ nɔ fínɛ́. Đó é ná aga e é lɛ ɔ́ sín vɛ̌ɛn baɖabaɖa ɔ́ to lɛ́ɛ bǐ, bɔ yě nu. Axɔ́sú ayǐkúngban jí tɔn lɛ́ɛ lɛ aga xá ɛ, bɔ ajɔ̌tɔ́ ayǐkúngban jí tɔn lɛ́ɛ jɛ dɔkun gbɔn gbɛɖunú e é ɖó zɛ jlɛ̌ wú lɛ́ɛ gbla mɛ.” Énɛ́ ɔ́ gúdo ɔ́, un se gbe ɖěvo gosín jǐxwé, bó ɖo ɖiɖɔ wɛ ɖɔ: “Togun ce, mi tɔ́n sín tɛ́ntin tɔn, bó ma hu hwɛ e hu wɛ é ɖe lɛ́ɛ xá ɛ ó, mi ma ɖó mǐmá ɖo awě e ná xo e lɛ́ɛ mɛ ó. Đó hwɛ tɔn lɛ́ɛ kplé káká yi jǐnukúnsin; Mawu wɔn nǔ nyanya e é wa lɛ́ɛ ǎ. Mi wa nǔ xá ɛ lě e é wa nǔ xá mi gbɔn é. Kɔ́fu e mɛ é cá ahan dó nú mi ɔ́, mi cáká mɔ̌hunkɔtɔn donu we d'é mɛ n'i. Lě e é nɔ sɔ́ éɖée su, bó nɔ ba acɔ́ sɔ ɔ́, mɔ̌ wɛ mi ná dó ya n'i sɔ, mɔ̌ wɛ mi ná dó e aluwɛ mɛ sɔ; ɖó é nɔ ɖɔ dó ayi mɛ ɖɔ: ‘Un ɖo ayǐjínjɔ́n fí, axɔ́sú nyɔ̌nu ɖɔhun; un nyí asúkúsi ǎ; un ka ná nɔ aluwɛ mɛ gbeɖé ǎ.’ Énɛ́ ɔ́ wú wɛ awě e è sɔ́ ɖó ayǐ n'i lɛ́ɛ ná xo e ɖo kéze ɖokpó géé mɛ; awě énɛ́ lɛ́ɛ wɛ nyí: kúzɔ́n, aluwɛ kpódó adɔ kpó; è nǎ zě myɔ dó fyɔ́ ɛ ná. Đó Aklúnɔ Mawu e ɖo hwɛ ɖɔ xá ɛ wɛ ɔ́ ɖó hlɔ̌nhlɔ́n.” Hwenu e axɔ́sú ayǐkúngban jí tɔn e lɛ aga xá ɛ, bó ɖu gbɛ xá ɛ lɛ́ɛ ná mɔ myɔ e ɖo fyɔ́fyɔ́ ɛ wɛ ɔ́ sín azizɔ ɔ́, yě ná ya avǐ, bó ná ná alě ɖó toxo ɖaxó ɔ́ wú. Yě ná ɖo xɛsi ɖi nú wǔvɛ́ e é ná mɔ lɛ́ɛ wɛ, bó ná nɔ zɔ, bó ná nɔ ɖɔ: “Awo! Awo! Babilɔ́nu toxo ɖaxó, toxo hlɔ̌nhlɔ́nnɔ! È sɔ́ ganxixo ɖokpó géé ɖó te, bó dó ɖó hwɛ nú we!” Ajɔ̌tɔ́ ayǐkúngban jí tɔn lɛ́ɛ lɔmɔ̌ ɖo avǐ ya wɛ, bó ɖo alě ná wɛ ɖó éyɛ́ wú, ɖó mɛ ɖěbǔ sɔ́ nɔ xɔ ajɔ̌nú yětɔn lɛ́ɛ ǎ. Ajɔ̌nú énɛ́ lɛ́ɛ wɛ nyí: siká, kpatágan, awǐnnya xɔ akwɛ́ lɛ́ɛ kpó jɛ̌ lɛ́ɛ kpó; akwɛ́núvɔ vɔvɔ kwélesinnɔ lɛ́ɛ, avɔ vɔvɔ cɛ́cɛ́ lɛ́ɛ, sɛ́da, atín tɛnmɛ tɛnmɛ e è ma nɔ mɔ gbɔn mɔ̌ ǎ lɛ́ɛ, nǔ tɛnmɛ tɛnmɛ e è sɔ́ ajinakú sín aɖǔ dó bló ná lɛ́ɛ, ée è sɔ́ atín xɔ akwɛ́ dó bló ná lɛ́ɛ, ée è sɔ́ ganvɔ dó bló ná lɛ́ɛ, ée è sɔ́ gan kpó awǐnnya ɖagbe ɖagbe e è nɔ ylɔ́ ɖɔ mǎblu ɔ́ kpó dó bló ná lɛ́ɛ. Nǔhwɛ́nkún e è nɔ ylɔ́ ɖɔ kanɛ́lu ɔ́, kpó nǔhwɛ́nkún ɖěvo ɖěvo lɛ́ɛ kpó; nǔsáwǔ, mǐla kpó zǎlínkpɔ́n kpó; vɛ̌ɛn, ami, linfín, kpó blěe kpó; nyibú kpó lɛ̌ngbɔ́ kpó, sɔ́ kpó kɛkɛ́ví kpó, kannumɔ lɛ́ɛ kpó gbɛtɔ́ ɖěvo lɛ́ɛ kpó. Ajɔ̌tɔ́ énɛ́ lɛ́ɛ nɔ ɖɔ nú toxo ɔ́ ɖɔ: “Sínsɛ́n e ba ná mɔ wɛ a ɖe lɛ́ɛ bǐ bú sín gɔ̌n towe; dɔkun towe kpó gbɛɖunú towe lɛ́ɛ bǐ kpó bú, bɔ a sɔ́ ná lɛ́ mɔ yě gbeɖé ǎ.” Ajɔ̌tɔ́ e wa ajɔ̌ ɖo toxo énɛ́ mɛ bó jɛ dɔkun lɛ́ɛ ná ɖo xɛsi ɖi nú wǔvɛ́ e é ná mɔ lɛ́ɛ wɛ bó ná nɔ zɔ. Yě ná ya avǐ bó ná ná alě. Yě ná ɖɔ: “Awo! Awo! Étɛ́ ɖíe gbo toxo ɖaxó ɔ́ e! Akwɛ́núvɔ vɔvɔ kwélesinnɔ ɖé wɛ é dó ɖ'ayǐ, bó dó avɔ vɔvɔ cɛ́cɛ́ ɖagbe ɖagbe; é bɛ́ sikánú lɛ́ɛ, awǐnnya xɔ akwɛ́ lɛ́ɛ kpó jɛ̌ lɛ́ɛ kpó dó ba acɔ́ ná. Dɔkun énɛ́ lɛ́ɛ bǐ ka vɔ ɖo ganxixo ɖokpó géé mɛ!” Gǎn e kpa acɛ nú tɔjíhún lɛ́ɛ bǐ, kpó mɛ e dó tɔjíhún lɛ́ɛ kpó, kpó mɛ e nɔ wa azɔ̌ ɖo tɔjíhún mɛ lɛ́ɛ kpó, kpó mɛ e nɔ wa ajɔ̌ gbɔn xu jí xu jí lɛ́ɛ bǐ kpó nɔ zɔ. Ée yě mɔ myɔ e ɖo fyɔ́fyɔ́ ɛ wɛ ɔ́ sín azizɔ ɔ́, yě jɛ xó sú jí ɖɔ: “Toxo e cí toxo ɖaxó élɔ́ ɖɔhun ɔ́ ɖě tíin kpɔ́n gbeɖé ǎ!” Yě nɔ nyi kɔ́ dó ta; yě nɔ ɖo avǐ ya wɛ, bó nɔ ɖo alě ná wɛ, bó nɔ ɖo xó sú wɛ ɖɔ: “Awo! Awo! Étɛ́ ɖíe gbo toxo ɖaxó ɔ́ e! Dɔkun tɔn wɛ nɔ dó dɔkun nú mɛ e ɖó tɔjíhún ɖo xu jí lɛ́ɛ bǐ. È ka sɔ́ ganxixo ɖokpó géé ɖó te bó dó vívá ɛ ná.” Jǐnukúnsin! Jɛ awǎ ɖó gba e é gba ɔ́ wú! Mɛɖeɖóvo Mawu tɔn lɛ́ɛ, mɛsɛ́dó lɛ́ɛ kpó gbeyíɖɔ lɛ́ɛ kpó e, mi lɔmɔ̌ ní jɛ awǎ! Đó Mawu ko ɖó nǔ nyanya e é wa nú mi ɔ́ sín hwɛ n'i. Hwenɛ́nu ɔ́, wɛnsagun hlɔ̌nhlɔ́nnɔ ɖé zé awǐnnya sé ɖaxó ɖɔhun ɖé nyi dó xu mɛ bó ɖɔ: “Lě e è nǎ zé toxo ɖaxó Babilɔ́nu ɔ́ nyi dó do, kpó hlɔ̌nhlɔ́n kpó gbɔn ɔ́ nɛ́, bɔ è sɔ́ ná mɔ ɛ gbeɖé ǎ. È sɔ́ ná se agǐdigboxotɔ́ lɛ́ɛ kpó hanjitɔ́ lɛ́ɛ kpó sín nǔxixo gbeɖé ɖo agblo towe mɛ ǎ; è ka sɔ́ ná se kpetekúntɔ́ lɛ́ɛ kpó kpɛnkúntɔ́ lɛ́ɛ kpó sín nǔxixo gbeɖé ɖo agblo towe mɛ ǎ; è sɔ́ ná mɔ azɔ̌ ɖěbǔ watɔ́ ɖo agblo towe mɛ ǎ; è sɔ́ ná se sé sín gbe ɖě ɖo agblo towe mɛ ǎ. Zogbɛ́n sín wěziza sɔ́ ná hɔ́n ɖo agblo towe mɛ gbeɖé ǎ; è sɔ́ ná se asú kpó asi kpó e da yěɖée tlóló ɔ́ sín gbe ɖě ɖo agblo towe mɛ ǎ, ɖó ajɔ̌tɔ́ towe lɛ́ɛ ko nyí nǔsúɖaxó gbɛ ɔ́ tɔn ɖ'ayǐ, bɔ a zě majíki sín nǔwiwa towe lɛ́ɛ dó flú to lɛ́ɛ bǐ ná.” È dɔn tó nú Babilɔ́nu, ɖó è mɔ gbeyíɖɔ lɛ́ɛ kpó mɛɖeɖóvo Mawu tɔn lɛ́ɛ kpó, kpódó mɛ e è hu ɖo ayǐkúngban jí lɛ́ɛ bǐ kpán sín hun ɖo agblo tɔn mɛ. Énɛ́ ɔ́ gúdo ɔ́, un se gbe ɖaxó ɖé ɖo jǐnukúnsin, mɛ wɔ̌buwɔ́bú ɖé wɛ ɖo xó ɖɔ wɛ ɖɔhun, bɔ gbe ɔ́ ɖo ɖiɖɔ wɛ ɖɔ: “Alelúya Aklúnɔ! Mawu mǐtɔn tɔn wɛ nyí hwlɛngán, susu, kpó hlɔ̌nhlɔ́n kpó! Hwɛɖiɖɔ tɔn lɛ́ɛ nyí nǔgbó, bó sɔgbe! Đó é ɖó hwɛ nú agalɛtɔ́ ɖaxó e sɔ́ aga tɔn dó ɖo ayǐkúngban ɔ́ hɛn gblé wɛ é. Mawu sɔ́ ɛ dó ba hlɔn, ɖó é hu mɛsɛntɔ́ tɔn lɛ́ɛ.” Yě lɛ́ ɖɔ: “Alelúya! Myɔ e ɖo toxo ɖaxó ɔ́ fyɔ́ wɛ ɔ́ sín azizɔ ɖo sisi wɛ káká sɔ́yi.” Mɛxó ko-nukún-ɛnɛ (24) lɛ́ɛ kpó nǔɖogbɛ ɛnɛ lɛ́ɛ kpó jɛ kpo bó ɖe kɔ́ nú Mawu e ɖo ayǐjínjɔ́n ɖo axɔ́súzinkpo ɔ́ jí é, bó ɖɔ: “ Amǐ! Alelúya!” È se gbe ɖé sín axɔ́súzinkpo ɔ́ kɔn, bɔ é ɖo ɖiɖɔ wɛ ɖɔ: “Mi mɛsɛntɔ́ Mawu tɔn lɛ́ɛ bǐ; mi mɛ e nɔ sí i lɛ́ɛ, mɛxó kpó yɔkpɔ́vú kpó, mi kpa Mawu mǐtɔn.” Énɛ́ ɔ́ gúdo ɔ́, un se gbe ɖé mɛ wɔ̌buwɔ́bú ɖé sín gbe ɖɔhun; gbe ɔ́ cí sin wɛ ɖo ayǐ kɔn nyi wɛ hoho ɖɔhun; é cí jǐ wɛ ɖo gbe dó wɛ kpó hlɔ̌nhlɔ́n kpó ɖɔhun; un se yě ɖo ɖiɖɔ wɛ ɖɔ: “Alelúya! Đó Aklúnɔ Mawu mǐtɔn Nǔbǐwúkpétɔ́ ɔ́ jɛ axɔ́sú ɖu jí! Mi wá mǐ jɛ awǎ, bó hun xomɛ, bó sɔ́ ɛ su! Đó alɔwlíwlí Lɛ̌ngbɔ́ví ɔ́ tɔn sín hwenu su, bɔ yawó tɔn ko sɔ́ nǔ. È nǎ acɛ asi tɔn ɖɔ ní dó akwɛ́núvɔ fɛ́ɖɛ́fɛ́ɖɛ́ ɖagbe ɖagbe e nɔ kɔ́n, bó mɛ́ é.” Đó mɛɖeɖóvo Mawu tɔn lɛ́ɛ sín azɔ̌ jlɔ́jlɔ́ lɛ́ɛ wɛ nyí akwɛ́núvɔ fɛ́ɖɛ́fɛ́ɖɛ́ ɖagbe ɖagbe ɔ́. Wɛnsagun ɔ́ ɖɔ nú mì ɖɔ: “Wlǎn: nǔ nyɔ́ nú mɛ e è ylɔ̌ wá alɔwlíwlínúɖuɖu Lɛ̌ngbɔ́ví ɔ́ tɔn ɖu gbé lɛ́ɛ é.” É lɛ́ ɖɔ nú mì ɖɔ: “Mawu sín xó nǔgbó lɛ́ɛ nɛ́.” Bɔ un jɛ kpo ɖo afɔ tɔn lɛ́ɛ kɔn, bó ná ɖe kɔ́ n'i, bɔ é ka ɖɔ nú mì ɖɔ: “Gbɔ! Ma bló mɔ̌ ó! Mɛsɛntɔ́ wɛ un nyí hwi kpó nɔví towe lɛ́ɛ kpó ɖɔhun; nɔví towe e hɛn kúnnuɖiɖe Jezu tɔn lɛ́ɛ é. Mawu wɛ a nǎ ɖe kɔ́ ná!” Kúnnuɖiɖe Jezu tɔn ɔ́ wɛ nɔ sɔ́ xó e gbeyíɖɔ lɛ́ɛ ná ɖɔ ɔ́ dó ayi mɛ nú yě. Énɛ́ ɔ́ gúdo ɔ́, un mɔ jǐnukúnsin ɖo nuvo, bɔ sɔ́ wěwé ɖé tɔ́n. Mɛ e ɖo sɔ́ ɔ́ jí ɔ́, nyǐkɔ tɔn nɔ nyí Gbejínɔtɔ́, bó nɔ nyí Titewungbe; é nɔ́ ɖɔ hwɛ bó nɔ́ fun ahwan kpó hwɛjijɔ kpó. Nukún tɔn lɛ́ɛ nɔ kán zo myɔ ɖɔhun, bɔ axɔ́súgbákún gěgé ɖo ta tɔn. È wlǎn nyǐkɔ ɖé ɖó wǔ tɔn, bɔ mɛ ɖěbǔ tunwun nyǐkɔ ɔ́ zɛ é ɖésúnɔ wú ǎ. É dó awu gaga ɖé, bɔ awu ɔ́ cí hun mɛ wɛ è nylɔ̌ dó ɖɔhun; nyǐkɔ tɔn nɔ nyí “Mawuxó”. Ahwangɔnu jǐxwé tɔn lɛ́ɛ xwedó e; yě ɖo sɔ́ wěwé jí; yě dǒ akwɛ́núvɔ fɛ́ɖɛ́fɛ́ɖɛ́ wěwé mímɛ́ ɖagbe ɖagbe ɖé. Hwǐ ɖíɖá ɖé nɔ tɔ́n sín nu tɔn mɛ; hwǐ ɔ́ wɛ é ná sɔ́ dó xo to lɛ́ɛ ná. É ná kpa acɛ dó yě nu, bɔ acɛkpikpa tɔn ná syɛ́n gankpo ɖɔhun; é ná li vǐwun sínsɛ́n ɔ́ ɖo xomɛsin ɖaxó Mawu Nǔbǐwúkpétɔ́ ɔ́ tɔn sín vǐwunto ɔ́ mɛ. È wlǎn nyǐkɔ ɖé dó awu tɔn kpó asá tɔn kpó wú; è wlǎn ɖɔ: “Axɔ́sú axɔ́sú lɛ́ɛ tɔn; Aklúnɔ aklúnɔ lɛ́ɛ tɔn.” Énɛ́ ɔ́ gúdo ɔ́, un mɔ wɛnsagun ɖé ɖo te hwesivɔ́ mɛ. É sú xó gbe lélé sɛ́ dó xɛ e ɖo zinzɔn wɛ ɖo aga ɖéé lɛ́ɛ bǐ ɖɔ: “Mi wá; mi kplé miɖée nú nǔɖuɖu ɖaxó Mawu tɔn ɔ́! Mi wá ɖu axɔ́sú lɛ́ɛ sín lan; mi wá ɖu ahwangán lɛ́ɛ kpó asúká lɛ́ɛ kpó sín lan; mi wá ɖu sɔ́ lɛ́ɛ kpó sɔ́xátɔ́ lɛ́ɛ kpó sín lan; mi wá ɖu gbɛtɔ́ lɛ́ɛ bǐ sín lan; kannumɔ lɛ́ɛ kpó mɛ e ɖo yě ɖésúnɔ sí lɛ́ɛ kpó, mɛxó kpó yɔkpɔ́vú kpó sín lan.” Énɛ́ ɔ́ gúdo ɔ́, un mɔ kanlin ɔ́; un mɔ axɔ́sú ayǐkúngban jí tɔn lɛ́ɛ kpó ahwangɔnu yětɔn lɛ́ɛ kpó; yě kplé bó ná fun ahwan xá mɛ e ɖo sɔ́ ɔ́ jí ɔ́ kpó ahwangɔnu tɔn kpó. Ahwan wlí kanlin ɔ́ kpó gbeyíɖɔnyíjɛtɔ́ e jlɛ́ nǔ ɖo nukɔn tɔn ɔ́ kpó. Nǔjlɛ́jlɛ́ énɛ́ lɛ́ɛ wɛ é dó flú mɛ e wú kanlin ɔ́ sín wuntun ɖe, bɔ yě nɔ́ sɛn kanlin ɔ́ sín akpajlɛ́ lɛ́ɛ ná. È sɔ́ kanlin ɔ́ kpó gbeyíɖɔnyíjɛtɔ́ ɔ́ kpó gbɛɖe gbɛɖe nyi dó myɔ togotogo e mɛ hwemí ɖo jiji ɖe wɛ ɔ́ mɛ. È sɔ́ hwǐ e nɔ tɔ́n sín mɛ e ɖo sɔ́ jí ɔ́ sín nu mɛ ɔ́ dó hu mɛ e kpo lɛ́ɛ ná, bɔ xɛ lɛ́ɛ bǐ ɖu lan yětɔn gɔ́ xo. Énɛ́ ɔ́ gúdo ɔ́, un mɔ wɛnsagun ɖé ɖo te jɛ sín jǐxwé wɛ; wɛnsagun ɔ́ hɛn domaɖó-azan ɔ́ sín cávi kpó wlɔ ɖaxó ɖé kpó alɔnu. É wlí Dlagɔ́ɔn ɔ́; dan xóxó e nyí awǒvi abǐ Satáan é; é zé wlɔ ɔ́ dó blá ɛ ná nú xwe afatɔ́n (1.000). Wɛnsagun ɔ́ zé e nyi dó domaɖó-azan ɔ́ mɛ, bó sú, lobo ɖó wuntun, bónú Dlagɔ́ɔn ɔ́ ma sɔ́ dɔn to lɛ́ɛ ɖě yi bú ó, káká bónú xwe afatɔ́n (1.000) lɛ́ɛ ná wá yi. Énɛ́ ɔ́ gúdo ɔ́, è ɖǒ ná ɖe e nyi te nú hwenu kpɛɖé. Un mɔ axɔ́súzinkpo lɛ́ɛ: è nǎ acɛ mɛ e jínjɔ́n jí lɛ́ɛ, bɔ yě ná ɖɔ hwɛ. Mɛ e è gbo ta, ɖó yě jlá Mawuxó ɔ́, bó ɖe kúnnu nú Jezu wútu lɛ́ɛ ɔ́, un lɛ́ mɔ lǐndɔ̌n yětɔn. Yě sɛn kanlin ɔ́ ǎ; yě sɛn akpajlɛ́ tɔn ǎ, kanlin ɔ́ sín wuntun ka ɖo nukɔn nú yě ǎ; é ka lɛ́ ɖo alɔ nú yě ǎ. Mɛ énɛ́ lɛ́ɛ lɛ́ wá gbɛ, bó ɖu axɔ́sú xá Klísu nú xwe afatɔ́n (1.000). Mɛkúkú ɖě lɛ́ɛ fɔ́n wá gbɛ cóbɔ xwe afatɔ́n (1.000) lɛ́ɛ wá yi ǎ. Mɛkúkú lɛ́ɛ sín fínfɔ́n nukɔn nukɔntɔn ɔ́ nɛ́. Mɛ e ɖó mǐmá ɖo fínfɔ́n sín kú nukɔn nukɔntɔn énɛ́ ɔ́ mɛ lɛ́ɛ ɔ́, nǔ nyɔ́ nú yě; mɛɖeɖóvo Mawu tɔn wɛ yě nyí; kú wegɔ́ ɔ́ ɖó acɛ ɖo yě jí ǎ; yě ná nyí vɔ̌sánú-xwlémawutɔ́ nú Mawu kpó Klísu kpó, bó ná ɖu axɔ́sú xá Klísu nú xwe afatɔ́n (1.000). Hwenu e xwe afatɔ́n (1.000) lɛ́ɛ ná wá yi ɔ́, è nǎ ɖe Satáan sín gankpá mɛ, bɔ é ná yi flú to e gba kpé wɛ̌kɛ́zo ɛnɛ lɛ́ɛ mɛ é; to lɛ́ɛ wɛ nyí Gɔgu kpó Magɔ́gi kpó. É ná kplé yě, bɔ yě ná fun ahwan, bó ná sukpɔ́ nyɛ̌kɛ́n e ɖo xutó é ɖɔhun. Yě ɖíe gba kpé ayǐkúngban ɔ́ bǐ jí jǎwe e; yě xá mɛɖeɖóvo Mawu tɔn lɛ́ɛ sín ahwankpá ɔ́ bó xá toxo e Mawu yí wǎn ná é. Lo ɔ́ myɔ jɛ te sín jǐnukúnsin bó fyɔ́ yě. Hwenɛ́nu ɔ́, è zě awǒvi e ɖo yě flú wɛ ɔ́ nyi dó myɔ togotogo e mɛ hwemí ɖo jiji ɖe wɛ ɔ́ mɛ; myɔ énɛ́ mɛ wɛ è ko zé kanlin ɔ́ kpó gbeyíɖɔnyíjɛtɔ́ ɔ́ kpó nyi; yě ná ɖo ya ɖaxó ɖé ji wɛ zǎn kéze káká sɔ́yi. Énɛ́ ɔ́ gúdo ɔ́, un mɔ axɔ́súzinkpo ɖaxó wěwé ɖé kpó mɛ e ɖo ayǐjínjɔ́n ɖ'é jí ɔ́ kpó. Ayǐkúngban kpó jǐnukúnsin kpó hɔn sín nukɔn tɔn, bɔ é sɔ́ mɔ yě ǎ. Un mɔ mɛkúkú lɛ́ɛ, mɛxó kpó yɔkpɔ́vú kpó ɖo te ɖo axɔ́súzinkpo ɔ́ nukɔn, bó lɛ́ hun wěma ɖé lɛ́ɛ. È lɛ̌ hun wěma ɖěvo; wěma e mɛ è wlǎn mɛ e ɖo gbɛ lɛ́ɛ sín nyǐkɔ dó ɔ́ wɛ. Mɛkúkú lɛ́ɛ ɔ́, è ɖɔ hwɛ xá yě bɔ é sɔgbe xá nǔ e yě wa bɔ è wlǎn dó wěma lɛ́ɛ mɛ é. Mɛkúkú e ɖo xu mɛ lɛ́ɛ ɔ́, xu jó yě. Kú kpó kútomɛ kpó lɔmɔ̌ jó mɛkúkú e yě hɛn lɛ́ɛ, bɔ è ɖɔ hwɛ xá mɛkúkú énɛ́ lɛ́ɛ bǐ bɔ é sɔgbe xá nǔ e yě wa é. È bɛ̌ kú kpó kútomɛ kpó nyi myɔ togotogo ɔ́ mɛ; kú wegɔ́ ɔ́ nɛ́. Mɛ ɖěbǔ e sín nyǐkɔ è ma ko wlán dó gbɛwéma ɔ́ mɛ ɖ'ayǐ ǎ ɔ́, è sɔ́ ɛ nyi myɔ togotogo ɔ́ mɛ. Énɛ́ ɔ́ gúdo ɔ́, un mɔ jǐnukúnsin yɔ̌yɔ́ ɔ́ kpó ayǐkúngban yɔ̌yɔ́ ɔ́ kpó. Jǐnukúnsin nukɔntɔn ɔ́ kpó ayǐkúngban nukɔntɔn ɔ́ kpó bú, bɔ xu sɔ́ tíin ǎ. Un mɔ toxo mímɛ́ e nyí Jeluzalɛ́mu yɔ̌yɔ́ ɔ́ é; Mawu sɛ́ ɛ dó, bɔ é ɖo te jɛ wɛ sín jǐnukúnsin. É ɖo gbesisɔ mɛ yawó yɔ̌yɔ́ e ba acɔ́, bó ná yi asúxwé ɔ́ ɖɔhun. Un se gbe ɖaxó ɖé gosín axɔ́súzinkpo ɔ́ kɔn, bó ɖo ɖiɖɔ wɛ ɖɔ: “Din ɔ́, nɔtɛn Mawu tɔn ɖo gbɛtɔ́ lɛ́ɛ tɛ́ntin! É ná nɔ xá yě, bɔ yě ná nyí togun tɔn. Mawu ɖésúnɔ ná nɔ kpɔ́ xá yě, bó ná nyí Mawu yětɔn. È nǎ súnsún ɖasin bǐ sín nukún yětɔn mɛ; kú sɔ́ ná tíin ǎ, aluwɛ sɔ́ ná tíin ǎ, alěníná sɔ́ ná tíin ǎ, wǔvɛ́ mimɔ sɔ́ ná tíin ǎ; nǔ xóxó lɛ́ɛ ko bú.” Hwenɛ́nu ɔ́, mɛ e ɖo ayǐjínjɔ́n ɖo axɔ́súzinkpo ɔ́ jí ɔ́ ɖɔ: “Din ɔ́, un ɖo nǔ lɛ́ɛ bǐ sɔ́ dó húzú nǔ yɔ̌yɔ́ wɛ.” É lɛ́ ɖɔ nú mì ɖɔ: “Wlǎn, ɖó xó nǔgbó wɛ nyí xó énɛ́ lɛ́ɛ, bó nyí xó e wú è nǎ ɖeji dó lɛ́ɛ.” É lɛ́ ɖɔ: “É sɔgbe lo! Un nyí Alufa, bó nyí Omɛga; un nyí bǐbɛ́, bó nyí vivɔ. Un ná ná sin mɛ e sinnugblá sin é, bɔ é ná nu vɔ̌nu ɖo fí e sin e nɔ ná gbɛ mɛ ɔ́ nɔ tɔ́n sín é. Mɛɖěbǔ ɖu ɖ'é jí ɔ́, un ná ná ɛ nǔníná énɛ́; un ná nyí Mawu tɔn, bɔ é ná nyí vǐ ce. Amɔ̌ nǔvɔ́nɔ lɛ́ɛ ɔ́, nǔmaɖitɔ́ lɛ́ɛ ɔ́, suɖutɔ́ lɛ́ɛ ɔ́, mɛhutɔ́ lɛ́ɛ ɔ́, agalɛtɔ́ lɛ́ɛ ɔ́, majíkiblótɔ́ lɛ́ɛ ɔ́, vodúnsɛntɔ́ lɛ́ɛ kpódó adingbannɔ lɛ́ɛ bǐ kpán ɔ́, tɛn yětɔn ná nɔ myɔ togotogo e mɛ hwemí ɖo jiji ɖe wɛ é mɛ; é wɛ nyí kú wegɔ́ ɔ́.” Wɛnsagun tɛ́nwe e hɛn sinnugannú tɛ́nwe e awě tɛ́nwe gǔdo gúdo tɔn lɛ́ɛ gɔ́ ɔ́ ɖokpó wá ɖɔ nú mì ɖɔ: “Wǎ! Un ná xlɛ́ yawó yɔ̌yɔ́ ɔ́ we, Lɛ̌ngbɔ́ví ɔ́ sín asi.” Yɛsinsɛn ɔ́ wá bɔ wɛnsagun ɔ́ zé mì yi só ɖaxó ɖé ta; só ɔ́ yi jǐ ɖésú. É xlɛ́ toxo mímɛ́ Jeluzalɛ́mu e Mawu sɛ́ dó, bɔ é ɖo te jɛ sín jǐnukúnsin wɛ ɔ́ mì. É ɖó susu Mawu tɔn, bó nɔ́ kán zo. Toxo ɔ́ nɔ kɔ́n awǐnnya xɔ akwɛ́ ɖaxó ɖé ɖɔhun; awǐnnya e è nɔ ylɔ́ ɖɔ jasipée é ɖɔhun; é nɔ za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun. È mɛ dǒ ɖaxó ɖé lɛ́ lɛ̌ dó, dǒ ɔ́ yi jǐ ɖésú. Hɔntogbó wěwe wɛ é ɖó, bɔ wɛnsagun wěwe ɖo hɔn lɛ́ɛ cɔ́ wɛ. È wlǎn togun Izlayɛ́li tɔn sín akɔta wěwe lɛ́ɛ sín nyǐkɔ dó hɔn lɛ́ɛ wú. Hɔntogbó atɔn atɔn ɖo akpá ɖokpó ɖokpó xwé: atɔn ɖo zǎnzǎnhwe jí, atɔn ɖo totaligbé, atɔn ɖo tofɔligbé, bɔ atɔn ɖo gbadahwe jí. Dǒ ɖaxó e è mɛ lɛ́ lɛ̌ dó toxo ɔ́, awǐnnya wěwe jí wɛ è dǒ do ɖó, bó wlǎn Lɛ̌ngbɔ́ví ɔ́ sín mɛsɛ́dó wěwe lɛ́ɛ sín nyǐkɔ dó awǐnnya énɛ́ lɛ́ɛ wú. Wɛnsagun e ɖo xó ɖɔ nú mì wɛ ɔ́ hɛn nǔjlɛ́kpo ɖokpó, bó ná dó jlɛ́ toxo ɔ́ kpó hɔn tɔn lɛ́ɛ kpó, kpó dǒ e è mɛ lɛ́ lɛ̌ dó é kpán. Nǔjlɛ́kpo énɛ́ ɔ́, fántín wɛ, bɔ è sɔ́ siká dó bló ná. Toxo ɔ́ sín akpáxwé ɛnɛ lɛ́ɛ ɖó ga ɖokpó ɔ́; zwe ɛnɛ lɛ́ɛ nyí ɖokpó ɔ́. Wɛnsagun ɔ́ sɔ́ fántín tɔn dó jlɛ́ toxo ɔ́ ná: ga tɔn nyí jlɛ̌nú děgba atɔn (12.000). Gblǒ tɔn kpó jǐ yiyi tɔn kpó nyí nǔ ɖokpó ɔ́ xá ga tɔn. Wɛnsagun ɔ́ jlɛ́ dǒ ɔ́ lɔmɔ̌, bɔ jǐ yiyi tɔn nyí alɔbá kantɔn ko-nukún-ɛnɛ (144); jlɛ̌nú énɛ́ e é dó jlɛ́ nǔ ná ɔ́ cí ée gbɛtɔ́ nɔ dó jlɛ́ nǔ ná ɔ́ ɖɔhun, bó nyí ɖokpó ɔ́ xá wɛnsagun ɔ́ tɔn. Awǐnnya e è nɔ ylɔ́ ɖɔ jasipée ɔ́ wɛ è dó mɛ dǒ ɔ́ ná, bɔ toxo ɔ́ ɖésú nyí siká akú, bó za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun. È sɔ́ awǐnnya xɔ akwɛ́ tɛnmɛ tɛnmɛ lɛ́ɛ dó ba acɔ́ nú awǐnnya dodó e jí è mɛ dǒ toxo ɔ́ tɔn ɖó lɛ́ɛ: awǐnnya e è nɔ ylɔ́ ɖɔ jasipée ɔ́ wɛ è dǒ ba acɔ́ nú awǐnnya dodó nukɔn nukɔntɔn ɔ́, bó sɔ́ safíi dó ba acɔ́ nú awǐnnya dodó wegɔ́ ɔ́, bó sɔ́ agáti dó ba acɔ́ nú awǐnnya dodó atɔngɔ́ ɔ́, bó sɔ́ emɛlodu dó ba acɔ́ nú awǐnnya dodó ɛnɛgɔ́ ɔ́. É sɔ́ onísi dó ba acɔ́ nú awǐnnya dodó atɔ́ɔ́ngɔ́ ɔ́, bó sɔ́ sadwáni dó ba acɔ́ nú awǐnnya dodó ayizɛ́ngɔ́ ɔ́, bó sɔ́ klizolíti dó ba acɔ́ nú awǐnnya dodó tɛ́nwegɔ́ ɔ́, bó sɔ́ belilu dó ba acɔ́ nú awǐnnya dodó tántɔngɔ́ ɔ́, bó sɔ́ tokpázi dó ba acɔ́ nú awǐnnya dodó tɛ́nnɛgɔ́ ɔ́, bó sɔ́ klizoplazi dó ba acɔ́ nú awǐnnya dodó wǒgɔ́ ɔ́, bó sɔ́ yasɛnti dó ba acɔ́ nú awǐnnya dodó wǒ-ɖokpógɔ́ ɔ́, bó sɔ́ amɛtisi dó ba acɔ́ nú awǐnnya dodó wěwegɔ́ ɔ́. Hɔn wěwe lɛ́ɛ nyí jɛ̌ wěwe; jɛ̌ ɖokpó wɛ è dǒ bló hɔn ɖokpó ná. Ali toxo ɔ́ tɔn nyí siká akú, bó za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun. Un mɔ sinsɛnxɔ ɖo toxo énɛ́ ɔ́ mɛ ǎ, ɖó Aklúnɔ Mawu Nǔbǐwúkpétɔ́ ɔ́ wɛ nyí sinsɛnxɔ tɔn; mɔ̌ ɖokpó ɔ́, Lɛ̌ngbɔ́ví ɔ́ nyí sinsɛnxɔ tɔn. Toxo ɔ́ byɔ́ ɖɔ hwe ní ná émí wěziza ǎ; é ka byɔ́ ɖɔ sun ní ná émí wěziza ǎ, ɖó susu Mawu tɔn nɔ ná ɛ wěziza, bɔ Lɛ̌ngbɔ́ví ɔ́ nyí zogbɛ́n tɔn. Togun e ɖo gbɛ ɔ́ mɛ lɛ́ɛ ná ɖi zɔnlin gbɔn wěziza tɔn nú, bɔ axɔ́sú ayǐkúngban jí tɔn lɛ́ɛ ná hɛn dɔkun yětɔn lɛ́ɛ wá toxo ɔ́ mɛ. Toxo ɔ́ sín hɔntogbó lɛ́ɛ ná nɔ hunhun ɖo kéze ɔ́ bǐ mɛ; è nǎ sú gbeɖé ǎ, ɖó zǎn ná kú ɖo fínɛ́ ǎ. È nǎ hɛn susu kpó dɔkun to lɛ́ɛ tɔn kpó wá toxo ɔ́ mɛ. Amɔ̌ nǔblíblí ɖěbǔ ná byɔ́ toxo énɛ́ mɛ ǎ; mɛ e nɔ jó éɖée dó nú suɖunú kpó adingban kpó ɔ́, ɖě ná byɔ́ toxo énɛ́ mɛ ǎ. Mɛ e sín nyǐkɔ e è nǎ wlán dó gbɛwéma e nyí Lɛ̌ngbɔ́ví ɔ́ tɔn ɔ́ mɛ lɛ́ɛ kɛ́ɖɛ́ wɛ ná byɔ́ toxo ɔ́ mɛ. Wɛnsagun ɔ́ lɛ́ xlɛ́ mì sin e nɔ ná gbɛ mɛ ɔ́ sín tɔsisa, bɔ é ɖo tíntɔ́n sín Mawu kpó Lɛ̌ngbɔ́ví ɔ́ kpó sín axɔ́súzinkpo mɛ wɛ, lobo za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun. É nɔ ɖo sisa gbɔn toxo ɔ́ sín ali tɛ́ntin wɛ. Atín e nɔ ná gbɛ mɛ ɔ́ ɖo tɔsisa ɔ́ sín akpá ɖokpó ɖokpó xwé; é nɔ sɛ́n azɔn wěwe ɖo xwe ɖokpó mɛ; sun ɖokpó ɖokpó mɛ wɛ é nɔ sɛ́n; è nɔ zé ama tɔn lɛ́ɛ dó gbɔ azɔn nú to lɛ́ɛ. Nǔ ɖěbǔ sɔ́ ɖo toxo ɔ́ mɛ bɔ Mawu donu ǎ. Axɔ́súzinkpo Mawu kpó Lɛ̌ngbɔ́ví ɔ́ kpó tɔn ná nɔ toxo ɔ́ mɛ, bɔ mɛsɛntɔ́ Mawu tɔn lɛ́ɛ ná nɔ sɛn Mawu. Yě ná mɔ nukún tɔn mɛ; è nǎ wlán nyǐkɔ tɔn dó nukɔn yětɔn. Zǎn sɔ́ ná nɔ kú ǎ; yě sɔ́ ná ba wěziza zogbɛ́n tɔn ǎ; yě ka sɔ́ ná ba wěziza hwe tɔn ǎ, ɖó Aklúnɔ Mawu ná gba wěziza tɔn kɔn nyi yě jí, bɔ yě ná ɖu axɔ́sú káká sɔ́yi. Énɛ́ ɔ́ gúdo ɔ́, wɛnsagun ɔ́ ɖɔ nú mì ɖɔ: “Xó nǔgbó wɛ nyí xó élɔ́ lɛ́ɛ, bó nyí xó e wú è ná ɖeji dó lɛ́ɛ. Bɔ Aklúnɔ Mawu e nɔ sɔ́ xó e gbeyíɖɔ lɛ́ɛ ná ɖɔ ɔ́ dó ayi mɛ nú yě ɔ́ sɛ́ wɛnsagun tɔn dó, bɔ é ná xlɛ́ nǔ e ɖó ná jɛ ɖo malín málín mɛ din lɛ́ɛ mɛsɛntɔ́ tɔn lɛ́ɛ.” Jezu ɖɔ: “Đǒtó! Un ná wá ɖo malín málín mɛ din! Nǔ nyɔ́ nú mɛ e nɔ se tónú nú xóɖɔɖ'ayǐ e ɖo wěma élɔ́ mɛ lɛ́ɛ.” Nyɛ Jǎan ɔ́, un se xó lɛ́ɛ, bó mɔ nǔ énɛ́ lɛ́ɛ. Ée un se xó lɛ́ɛ bó mɔ nǔ énɛ́ lɛ́ɛ vɔ ɔ́, un jɛ kpo ɖo wɛnsagun e xlɛ́ nǔ lɛ́ɛ mì ɔ́ sín asá mɛ, bó ná ɖe kɔ́ n'i. É ka ɖɔ nú mì ɖɔ: “Gbɔ, ma bló mɔ̌ ó! Mɛsɛntɔ́ wɛ un nyí hwi kpó nɔví towe gbeyíɖɔ lɛ́ɛ kpán ɖɔhun; bó nyí mɛsɛntɔ́ mɛ e nɔ se tónú nú xó e è wlán dó wěma élɔ́ mɛ lɛ́ɛ é ɖɔhun. Mawu wɛ a ɖǒ ná ɖe kɔ́ ná.” Énɛ́ ɔ́ gúdo ɔ́, é ɖɔ nú mì ɖɔ: “Xó ɖɔ ɖ'ayǐ e è wlán dó wěma élɔ́ mɛ lɛ́ɛ ɔ́, ma hɛn xomɛ ó, ɖó hwenu e è ɖǒ, bɔ nǔ énɛ́ lɛ́ɛ bǐ ná jɛ ɔ́ ko sɛkpɔ́. Mɛ e nyí mɛdídá ɔ́ ní fɔ́n bó ɖo mɛdídá nyí wɛ; mɛ e nyí mɛ blíblí ɔ́ ní fɔ́n bó ɖo mɛ blíblí nyí wɛ; mɛ e nyí mɛ ɖagbe ɔ́ ní fɔ́n bó ɖo mɛ ɖagbe nyí wɛ; mɛ e nyí mɛ mímɛ́ ɔ́ ní fɔ́n bó ɖo mɛ mímɛ́ nyí wɛ.” Jezu ɖɔ: “Đǒtó! Un ná wá ɖo malín málín mɛ din! Un ná hɛn ajɔ ce lɛ́ɛ wá, bó ná ná mɛ ɖokpó ɖokpó, bɔ é ná sɔgbe xá nǔ e é wa é. Un nyí Alufa, bó nyí Omɛga; mɛ nukɔn nukɔntɔn, bó nyí mɛ gǔdo gúdo tɔn; un nyí bǐbɛ́, bó nyí vivɔ.” Nǔ nyɔ́ nú mɛ e nɔ nya awu gaga yětɔn lɛ́ɛ, bó ná dó ba acɛ e ná ɖu atín e nɔ ná gbɛ mɛ ɔ́ sín sínsɛ́n é; bó ná dó ba acɛ e ná gbɔn toxo ɔ́ sín hɔntogbó lɛ́ɛ nu byɔ́ toxo ɔ́ mɛ é. Amɔ̌, avǔn lɛ́ɛ, majíkiblótɔ́ lɛ́ɛ, agalɛtɔ́ lɛ́ɛ, mɛhutɔ́ lɛ́ɛ, vodúnsɛntɔ́ lɛ́ɛ, kpó mɛ e yí wǎn nú adingban, bó nɔ wa adingbanzɔ́ lɛ́ɛ bǐ kpó ná nɔ toxo ɔ́ gúdo! “Nyɛ Jezu ɔ́, un sɛ́ wɛnsagun ce dó mi, nú é ná ɖɔ nǔ énɛ́ lɛ́ɛ bǐ nú mi ɖo agun lɛ́ɛ mɛ. Davídi sín hɛ̌nnu mɛ wɛ un jɔ ɖe; un nyí sunví zǎnzǎn tɔn e nɔ kɔ́n é.” Yɛ ɔ́ kpó yawó yɔ̌yɔ́ ɔ́ kpó ɖo ɖiɖɔ wɛ ɖɔ: “Wǎ!” Mɛ e ɖo mɔ̌ se wɛ ɔ́ lɔ ní ɖɔ: “Wǎ!” Mɛ e sinnugblá sin ɔ́ ní wá; mɛ e ɖo sin e nɔ ná gbɛ mɛ ɔ́ ba wɛ ɔ́ ní yí vɔ̌nu. Mɛ e ɖo xóɖɔɖ'ayǐ e ɖo wěma élɔ́ mɛ lɛ́ɛ se wɛ ɔ́, nyɛ Jǎan un ɖo ɖiɖɔ n'i wɛ ɖɔ: nú mɛɖé gɔ́ nǔɖé ná ɔ́, Mawu ná zé awě e sín xó è ɖɔ dó wěma élɔ́ mɛ lɛ́ɛ gɔ́ nú tó e è nǎ dɔn n'i lɛ́ɛ é. Ényí mɛɖé ka ɖe nǔɖé kpo sín xóɖɔɖ'ayǐ e ɖo wěma élɔ́ mɛ lɛ́ɛ mɛ ɔ́, atín e nɔ ná gbɛ mɛ, bɔ è ɖɔ xó tɔn dó wěma élɔ́ mɛ ɔ́, sínsɛ́n e nyí étɔn ɖo atín énɛ́ sín sínsɛ́n mɛ ɔ́, Mawu ná ɖe síin, bɔ toxo mímɛ́ e xó è ɖɔ dó wěma élɔ́ mɛ ɔ́, mǐmá e nyí étɔn ɖo toxo énɛ́ mɛ ɔ́, Mawu ná ɖe síin. Mɛ e ɖe kúnnu ɖɔ nǔgbó wɛ nǔ énɛ́ lɛ́ɛ nyí ɔ́ ɖɔ: “Nǔgbó wɛ! Un ná wá ɖo malín málín mɛ din!” Amǐ! Aklúnɔ Jezu, wǎ! Fɛ́nú Aklúnɔ Jezu tɔn ní nɔ kpɔ́ xá mɛ bǐ.