طٜعٜ نغٛنِ اِنْطٜ مَامَعٜنْ يٜىٰسُ اَلْمَسِيحُ لٜݧٛلْ دَوْدَ، دَوْدَ لٜݧٛلْ اِبْرَاهِمْ؞ اِبْرَاهِمْ دَݧِ اِشِيَاکُ، ندٜنْ اِشِيَاکُ دَݧِ يَاکُبُ، ندٜنْ يَاکُبُ دَݧِ يَحُودَ اٜ سَکِرَاٻٜ مَاکٛ، يَحُودَ دَݧِ فٜرٜسَ اٜ جٜىٰرَ، مَدُوجٛ جٜىٰرَ وٛنِ تَامَرْ، فٜرٜسَ دَݧِ حٜسٜرُونَ، حٜسٜرُونَ دَݧِ اَرَمْ، اَرَمْ دَݧِ اَمِينَدَبْ، اَمِينَدَبْ دَݧِ نَاشٛنْ، نَاشٛنْ دَݧِ سَلْمٛنْ، سَلْمٛنْ دَݧِ بٛعَاجَ، مَدُوجٛ بٛعَاجَ وٛنِ رَحَبْ، بٛعَاجَ دَݧِ اٛبِدَ، مَدُوجٛ اٛبِدَ وٛنِ رُتْ، اٛبِدَ دَݧِ جٜىٰسِ، جٜىٰسِ دَݧِ دَوْدَ لَامِيطٛ، دَوْدَ لَامِيطٛ دَݧِ سُلٜيْمَانُ، مَدُوجٛ سُلٜيْمَانُ وٛنِ دٜبّٛ اُرِيَ ندٜنّٛ، سُلٜيْمَانُ دَݧِ رٜحٛبٛوَمْ، رٜحٛبٛوَمْ دَݧِ اَبِجَ، اَبِجَ دَݧِ اَاسَ، اَاسَ دَݧِ جٜحٛوشَفَتْ، جٜحٛوشَفَتْ دَݧِ جٛورَمْ، جٛورَمْ دَݧِ اَجَارِيَ، اَجَارِيَ دَݧِ جٛوتَمَ، جٛوتَمَ دَݧِ اَحَسْ، اَحَسْ دَݧِ حٜجٜکَايَ، حٜجٜکَايَ دَݧِ مَنَاسٜ، مَنَاسٜ دَݧِ اَمٛنْ، اَمٛنْ دَݧِ جٛوسَيَ، جٛوسَيَ دَݧِ جٜکٛونِيَ اٜ سَکِرَاٻٜ مَاکٛ وٛرْٻٜ، شَرٜلْ کٛ يَحُودَنْکٛعٜنْ نَنْغَا نجَارَا لٜيْدِ بَابِيلَ؞ غَطَ طُمْ يَارِيٻٜ لٜيْدِ بَابِيلَ، جٜکٛونِيَ دَݧِ شٜيَلْتِيَلْ، شٜيَلْتِيَلْ دَݧِ جَرُوبَبٜلْ، جَرُوبَبٜلْ دَݧِ اَبِيحُدُ، اَبِيحُدُ دَݧِ اٜلِيَاکِمْ، اٜلِيَاکِمْ دَݧِ اَاجٛرٛ، اَاجٛرٛ دَݧِ جَادٛکْ، جَادٛکْ دَݧِ اَاکِمْ، اَاکِمْ دَݧِ اَلِييُدُ، اَلِييُدُ دَݧِ اٜلٜيَاجَرْ، اٜلٜيَاجَرْ دَݧِ مَتَانَ، مَتَانَ دَݧِ يَاکُبُ، يَاکُبُ دَݧِ يُسُفُ غٛرْکٛ مَرْيَامَ، مَرْيَامَ دَݧِ يٜىٰسُ بِعٜتٜىٰطٛ اَلْمَسِيحُ؞ اٜ وٛودِ مَامَعٜنْ سَڤّٛ اٜ نَيٛ دَغَ جَامَنُ اِبْرَاهِمْ يَاکِ جَامَنُ دَوْدَ؞ اٜ وٛودِ مَامَعٜنْ سَڤّٛ اٜ نَيٛ دَغَ جَامَنُ دَوْدَ يَاکِ شَرٜلْ نغٜلْ يَحُودَنْکٛعٜنْ نجَارَا مَشُّنغَاکُ تٛ لٜيْدِ بَابِيلَ؞ اٜ وٛودِ مَامَعٜنْ سَڤّٛ اٜ نَيٛ دَغَ شَرٜلْ نغٜلْ يَحُودَنْکٛعٜنْ نجَارَا مَشُّنغَاکُ تٛ لٜيْدِ بَابِيلَ يَاکِ دَݧْنغٛلْ اَلْمَسِيحُ؞ رَا نٛ يٜىٰسُ اَلْمَسِيحُ دَݧِرَا؞ مَدُوجٛ مَاکٛ مَرْيَامَ وَادِ اَلْکَوَلْ تٜىٰغَلْ اٜ يُسُفُ؞ اَمَّا کٛ ٻٜ نغَطَ تٜىٰغَلْ، سٜيْ اٛ تَوْرَا رٜىٰدُ دَغَ تٛ رُوحُ اَللَّه؞ ندٜ يُسُفُ اٛ نٜطّٛ اَادِلِيجٛ، اٛ يِطَا اٛ سٜمْتِنَمٛ اٜ نجَيْرِ؞ اٛ دَرْوِ اٛ يٛوفَمٛ اٜ سُوطٜ؞ اَمَّا شَرٜلْ نغٜلْ اٛ ݧُمَتَ دٛوْ مَاجُمْ، مَلَاعِکَاجٛ جٛومِرَاوٛ وَنْغَنِمٛ ندٜرْ کٛيْطٛلْ، وِعِمٛ، «يُسُفُ ٻِي دَوْدَ، تَاع حُلُ تٜعُکِ مَرْيَامَ، نغَمْ ٻِنْغٜلْ نغٜلْ اٛ سَاوِ دَغَ تٛ رُوحُ اَللَّه نغٜلْ پِوٛيِ؞ اٛ دَݧَيْ ٻِطّٛ غٛرْکٛ ندٜنْ اَ نٛدَّيْمٛ يٜىٰسُ، نغَمْ اٛ حِسْنَيْ يِمْٻٜ مَاکٛ دَغَ حَکّٜ مَٻّٜ؞» فُو فِي طُعُمْ طُمْ وَطِ نغَمْ طُمْ حٜبِّنَ کٛ جٛومِرَاوٛ وِعِ دَغَ حٛنْدُکٛ اَنَّبِيجٛ، اٛ وِعِ، «رَطُّمْ، سُرْبَاجٛ مٛ اَنْدَا غٛرْکٛ دَݧَيْ ٻِطّٛ غٛرْکٛ، ندٜنْ طُمْ نٛدَّيْ اِنْدٜ مَاکٛ اِمَانُوٜلْ؞» مَعَنَ اِمَانُوٜلْ وٛنِ، «اَللَّه اٜ وٛنْدِ اٜ مٜىٰطٜنْ؞» ندٜ يُسُفُ اُمِّي دَغَ طٜيْنغٛلْ نغٛلْ، سٜيْ وَطِ کٛ مَلَاعِکَاجٛ جٛومِرَاوٛ اٛنْ وِعِمٛ، اٛ تٜعِ مَرْيَامَ؞ اَمَّا اٛ اَنْدَامٛ نَاکِ غَطَ اٛ دَݧِ ٻِطّٛ مَاکٛ؞ ندٜنْ يُسُفُ نٛدِّ ٻِطّٛ اٛنْ يٜىٰسُ؞ غَطَ يٜىٰسُ دَݧَامَ اٜ غَرِيرِ بَيْتَلَامِ ندٜرْ لٜيْدِ يَحُودِيَ، ندٜرْ شَرٜلْ نغٜلْ حِرُدُسْ لَامٛتٛ، وٛٻّٜ اَنْدَنْٻٜ کٛودٜ دَغَ فُونَ ٻٜ نغَرِ اُرُشَلِيمَ، اٜ ٻٜ پَمَ، «تٛيٜ اٛنْ طٛنْ دَݧَاطٛ لَامِيطٛ يَحُودَنْکٛعٜنْ؟ نغَمْ مِنْ نغِعِ حٛودٜرٜ مَاکٛ دَغَ فُونَ، مِنْ نغَرِي مِنْ مَوْنِنَمٛ؞» ندٜ حِرُدُسْ لَامِيطٛ نَنِ نٛنْ، اٛ وَنِّ، کَنْکٛ اٜ يِمْٻٜ اُرُشَلِيمَ طُطْٻٜ؞ سٜيْ اٛ نٛدِّ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ، اٛ پَمِٻٜ، «تٛيٜ اَلْمَسِيحُ دَݧٜتٜىٰ؟» ٻٜ مبِعِمٛ، «ندٜرْ غَرِيرِ بَيْتَلَامِ ندٜرْ لٜيْدِ يَحُودِيَ؞ نغَمْ رَا کٛ اَنَّبِيجٛ وِنْدِ، ‹اَمَّا، اَنْ، غَرِيٜلْ بَيْتَلَامِ غٛنْغٜلْ ندٜرْ لٜيْدِ يَحُودَ، اَنْ اَ غَرِيٜلْ غٛودُنغٜلْ تٜدُّنغَلْ ندٜرْ لٜيْدِ ندِنْ، نغَمْ دَغَ ندٜرْ مَاطَ غٛطّٛ لَامِيطٛ پِوٛيْتَ، کَنْکٛ وَرْتَتَ غَيْنَاکٛ يِمْٻٜ اَمْ اِسْرَاعِيلَنْکٛعٜنْ؞› » سٜيْ حِرُدُسْ نٛدِّ ٻٜنْ طٛنْ اَنْدَنْٻٜ کٛودٜ اٜ سُوطٜ، اٛ پَمِٻٜ شَرٜلْ نغٜلْ ٻٜ نغِعِ حٛودٜرٜ ندٜنْ، ٻٜ مبِعِمٛکَ؞ سٜيْ اٛ لِلِٻٜ بَيْتَلَامِ، اٛ وِعِ، «نجَحٜىٰ طَٻِّتٛنْ ٻِنْغٜلْ نغٜلْ بٛطُّمْ؞ تٛ اٛنْ نغِعِينغٜلْ، نغَرٛنْ مبِعٛنْيَمْکَ، نغَمْ مِنْ مَا مِ يَحَ مِ مَوْنِنَنغٜلْ؞» ندٜ ٻٜ نَتِّ وُرٛ نغٛنْ، ٻٜ تَوِ ٻِنْغٜلْ نغٜلْ اٜ مَرْيَامَ مَدُوجٛ مَاغٜلْ؞ ٻٜ ندِشِّ ٻٜ مَوْنِنِنغٜلْ، ندٜنْ ٻٜ ڤِتِّ دٛݝْلٜ مَٻّٜ ٻٜ کٛکِّنغٜلْ شَاحُ جِينَارِ، اٜ اُرْدٜ وٜلْندٜ بِعٜتٜىٰندٜ فِرَنْکِسٜنْ، اٜ نٜبَّمْ اُرٛوجَمْ بِعٜتٜىٰطَمْ مُرْ؞ ندٜ اَللَّه حَطِيٻٜ ندٜرْ کٛيْطٛلْ تٛع ٻٜ شٛعّٛو تٛ حِرُدُسْ، سٜيْ ٻٜ تٛکِّ لَاوٛلْ فٜىٰرٜ ٻٜ شٛعِّ لٜيْدِ مَٻّٜ؞ غَطَ اَنْدَنْٻٜ کٛودٜ ٻٜنْ ندِلِّ، سٜيْ مَلَاعِکَاجٛ جٛومِرَاوٛ وَنْغَنِ يُسُفُ ندٜرْ کٛيْطٛلْ، وِعِمٛ، «اُمَّ کٛشَّا ٻِنْغٜلْ نغٜلْ اٜ مَدُوجٛ مَاغٜلْ ندٛغَّا نجَحَا لٜيْدِ مَسَرْ؞ نجٛوطٜىٰ تٛنْ نَا مِ وِعِيعٛنْ نغَرْتٛنْ، نغَمْ حِرُدُسْ اٜ يِطِ طَٻِّتَ ٻِنْغٜلْ نغٜلْ نغَمْ اٛ وَرَنغٜلْ؞» يُسُفُ اُمِّي حٛشِّ ٻِنْغٜلْ نغٜلْ اٜ مَدُوجٛ مَاغٜلْ شَکَ جٜمَّ، اٛ دِلِّ لٜيْدِ مَسَرْ؞ تٛنْ ٻٜ نجٛوطِ نَاکِ حِرُدُسْ مَايِ؞ نٛنْ وَطِي نغَمْ طُمْ حٜبِّنَ کٛ جٛومِرَاوٛ وِعِ دَغَ حٛنْدُکٛ اَنَّبِيجٛ مَاکٛ وِيکِ، «دَغَ لٜيْدِ مَسَرْ مِ نٛدِّ ٻِطّٛ اَمْ؞» ندٜ حِرُدُسْ فَامِ اَنْدَنْٻٜ کٛودٜ ٻٜنْ پٛيْرِيمٛ، سٜيْ ٻٜرْندٜ مَاکٛ مٜتِّ نَاع سٜطَّ؞ اٛ وِعِ طُمْ وَرَ ٻِکّٛيْ ڤَمَرٛيْ فُو نغٛرٛيْ نغٛودُکٛيْ دُوٻِ طِطِ يَاکِ لٜيْ نغٛنْکٛيْ ندٜرْ غَرِيٜلْ بَيْتَلَامِ اٜ حَادٜ غَرِيٜلْ نغٜلْ؞ اٛ وَطُ نٛنْ نغَمْ اَنْدَنْٻٜ کٛودٜ ٻٜنْ مبِعِمٛ اَرَنْدٜ حٛودٜرٜ ندٜنْ وَنْغَنِيٻٜ دُوٻِ طِطِ پَٻِّيطِ؞ نٛنْ حٜبِّنِ کٛ اَللَّه وِعِ دَغَ حٛنْدُکٛ اَنَّبِ اِرْمِيَ وِيکِ، «طُمْ نَنِ حٛنٛنْدٜ ندٜرْ غَرِيرِ رَامَ، بٛجِّ نَوْطِ؞ طُمْ رَحِيلَ وٛيَنْتَ ٻِٻّٜ مَاکٛ، اٛ وَݧِ اٛ وَلْتِنَنٜىٰ ٻٜرْندٜ، نغَمْ ٻِٻّٜ مَاکٛ مَايِ؞» غَطَ حِرُدُسْ مَايِ، سٜيْ مَلَاعِکَاجٛ جٛومِرَاوٛ وَنْغَنِ يُسُفُ ندٜرْ کٛيْطٛلْ اٜ مَسَرْ، وِعِ، «اُمَّ کٛشَّا ٻِنْغٜلْ نغٜلْ اٜ مَدُوجٛ مَاغٜلْ شٛعّٛطَا لٜيْدِ اِسْرَاعِيلَ، نغَمْ ٻٜنْ طٛنْ طَٻُّتُٻٜ مبَرَ ٻِنْغٜلْ نغٜلْ ٻٜ مَايِ؞» سٜيْ يُسُفُ اُمِّي، حٛشِّ ٻِنْغٜلْ نغٜلْ اٜ مَدُوجٛ مَاغٜلْ، ٻٜ شٛعِّي لٜيْدِ اِسْرَاعِيلَ؞ اَمَّا ندٜ اٛ نَنِ اَرْکِلَيُسْ رٛنِي جٛوطٛرْغَلْ لَامُ ݧَاکٛ مُوطُمْ حِرُدُسْ اٜ مٛ لَامٛ لٜيْدِ يَحُودِيَ، سٜيْ اٛ حُلِ يَاکِ تٛنْ؞ اَمَّا ندٜ طُمْ وَغِّنِمٛ ندٜرْ کٛيْطٛلْ، سٜيْ اٛ سٛعِّ اٛ يَحِ لٜيْدِ غَلِيلِ؞ اٛ يَحِ اٛ جٛوطِي ندٜرْ وٛنْدِ غَرِيرِ بِعٜتٜىٰندِ نَجَرَتْ، نغَمْ طُمْ حٜبِّنَ کٛ اَللَّه وِعِ دَغَ کٛنْدُطٜ اَنَّبٛعٜنْ وِيکِ، «طُمْ نٛدَّيْمٛ نَجَرَنْکٜىٰجٛ؞» غَطَ دُوٻِ طُطِّ يَحَيَ غَطٛووٛ بَڤْتِسْمَ يَحِ ندٜرْ لَدّٜ يَحُودِيَ، اٜ مٛ وَعَجِنَ، اٜ مٛ وِعَ، «تُوبٜىٰ، نغَمْ لَامُ اَللَّه ٻَدَکٜ!» اٛنْ طٛنْ کَنْکٛ وٛنِ مٛ اَنَّبِ اِشَايَ مٜتِ دٛوْ مَاکٛ، وِعِ، «غٛطّٛ اٜ نٛدَّ ندٜرْ لَدّٜ، اٜ وِعَ، ‹مٛعِّنٜىٰ طَتَلْ جٛومِرَاوٛ، ڤٛرْتٜىٰ لَاوٛلْ نغَمْ غَرٛلْ مَاکٛ!› » يَحَيَ اٜ ٻٛرْنِي کٛلْتٜ طٜ طُمْ وَطِرِ لٜىٰٻٜ نغٜىٰلٛوبَ، اٜ مٛ تَادِي تَادٛرْدٜ لَرَلْ؞ ݧَمْندُ مَاکٛ وٛنِ بَابٜىٰجِ اٜ نجُمْرِ؞ سٜيْ يِمْٻٜ طُطْٻٜ دَغَ غَرِيرِ اُرُشَلِيمَ اٜ لٜيْدِ يَحُودِيَ فُو اٜ غَرِيجٜ طٜ حَادٜ شَانغٛلْ اُرْدُنْ ٻٜ نغَطِ کَ يَاکِ تٛ مَاکٛ؞ اٜ ٻٜ مبِعَ فُو کٛ وٛوطَا طُمْ ٻٜ نغَطِ، اٜ مٛ وَطَنَٻٜ بَڤْتِسْمَ ندٜرْ شَانغٛلْ اُرْدُنْ؞ اَمَّا ندٜ يَحَيَ يِعِ فَارِسَنْکٛعٜنْ اٜ سَادُسَنْکٛعٜنْ طُطْٻٜ نغَرِ نغَمْ اٛ وَطَنَٻٜ بَڤْتِسْمَ، اٛ وِعِٻٜ، «اٛنٛنْ ٻِٻّٜ بٛولٜ! مٛيٜ وِعِعٛنْ ندٛغّٛنْ بٛنٜ غَرَيْطُمْ؟ نغَطٜىٰ کٛ حٛلَّتَ اٛنْ اَلِ حَکّٜىٰجِ مٛوطٛنْ؞ تٛع اٛنْ ݧُمُ اٛنْ مبِعَيْ ندٜرْ ٻٜرْطٜ مٛوطٛنْ، ‹مِنٛنْ، مِنْ ٻِٻّٜ اَنَّبِ اِبْرَاهِمْ؞› نغَمْ اٜ مِ وِعَعٛنْ، اَللَّه وَاوَيْ اُمِّنَنْکِ اَنَّبِ اِبْرَاهِمْ ٻِٻّٜ دَغَ ندٜرْ کَاپٜ طٜعٜ؞ کٛو جٛونِ فٜعِّرْدٜ پٜفْتَامَ نغَمْ فٜعَّ لٜطّٜ دَغَ طَطِ مَاجٜ؞ لٜکِّ فُو کِ رِمَتَا ٻِکّٛيْ مبٛطْکٛيْ، طُمْ فٜعَّيْکِ طُمْ فَطَّکِ ندٜرْ حِيتٜ؞ مِنْ، اٜ مِ وَطِرَنَعٛنْ بَڤْتِسْمَ اٜ ندِيَمْ نغَمْ حٛلُّکِ اٛنْ تُوبِ؞ اَمَّا ٻُرْطٛيَمْ مَنْغُ اٜ وَرَ غَطَ اَمْ؞ مِ فٛتَايِ مِ جٛغٛو ڤَطٜ مَاکٛ؞ اٛ وَطِرَنَيْعٛنْ بَڤْتِسْمَ اٜ رُوحُ اَللَّه اٜ حِيتٜ؞ اٜ مٛ جٛغِي بٜسِرْطُمْ غَوْرِ مَاکٛ نغَمْ سٜنْدُکِ غَوْرِ اٜ ݧَاندٜ؞ اٛ حَوْرِتَيْ غَوْرِ ندِنْ، اٛ وَطَندِ ندٜرْ رٜسِرْدٜ غَوْرِ مَاکٛ، اَمَّا اٛ وُلَ ݧَاندٜ ندٜنْ ندٜرْ حِيتٜ نغٜ وَاتَتَا؞» اٜ شَرٜلْ نغٜلْ يٜىٰسُ وَرٛيِ دَغَ لٜيْدِ غَلِيلِ؞ اٛ يَحِ شَانغٛلْ اُرْدُنْ تٛ يَحَيَ نغَمْ يَحَيَ وَطَنَمٛ بَڤْتِسْمَ؞ اَمَّا يَحَيَ يِطِي وَݧَ وَطَنْکِمٛ بَڤْتِسْمَ، اٜ وِعَ، «اٜ حَانِ نغَطَنَايَمْ بَڤْتِسْمَ، اَمَّا اَ وَرِ تٛ اَمْ؟» اَمَّا يٜىٰسُ نٛوتِي وِعِ، «اَلُ طُمْ وَرْتَ نٛنْ جٛونِ، نغَمْ نٛنْ حَانِ کٜبِّنِرٜنْ کٛ اَللَّه يِطِ نغَطٜنْ؞» ندٜنْ يَحَيَ جَٻِ؞ ندٜ طُمْ وَطَنِ يٜىٰسُ بَڤْتِسْمَ، اٜ مٛ وُرْتٛ ندٜرْ ندِيَمْ طَمْ، سٜيْ طٛنْ اٜ طٛنْ دٛوْ مَٻِّتِي اٛ يِعِ رُوحُ اَللَّه اٜ جِڤّٛيٛ دٛوْ مَاکٛ اٜ ٻَنْدُ بٛ فٛوندُ؞ سٜيْ حٛنٛنْدٜ پِوٛيِ دَغَ دٛوْ وِعِ، «اٛعٛ وٛنِ ٻِطّٛ اَمْ مٛ نغِطُمِ، اٜ مِ نَنَ بٜلْطُمْ مَاکٛ؞» سٜيْ رُوحُ اَللَّه يَارِ يٜىٰسُ ندٜرْ لَدّٜ نغَمْ شٜيْطَنْ فٛوندَمٛ؞ غَطَ يٜىٰسُ وَطِي بَلْطٜ 40 اٜ سُومٛو جٜمَّ اٜ ݧَلَوْمَ، وٜىٰلٛ نَنْغِمٛ؞ سٜيْ شٜيْطَنْ وَرِ، وِعِمٛ، «تٛ اَنْ وٛنِ ٻِطّٛ اَللَّه، وِعُ طٜعٜ کَاپٜ نغَرْتَ بُرٛودِ؞» يٜىٰسُ نٛوتِي وِعِمٛ، «اَايَارٜ وِعِي، ‹نَاع اٜ ݧَمْندُ تَنْ نٜطّٛ مَرٛرْتٛو، سٜيْ نِ اٜ کٛو ندٜيٜ وٛلْدٜ غَرٛيْندٜ دَغَ تٛ اَللَّه؞› » سٜيْ شٜيْطَنْ يَارِمٛ اُرُشَلِيمَ غَرِيرِ شٜنِيندِ دَرْنِمٛ تٛنْ دٛوْ حٛورٜ وُرٛ شٜنِينغٛ، وِعِمٛ، «تٛ اَنْ وٛنِ ٻِطّٛ اَللَّه، دِوُ دَغَ طٛعٛ نغَمْ اَايَارٜ وِعِي، ‹اَللَّه وِعَيْ مَلَاعِکَعٜنْ مُوطُمْ مبَلُّمَا بٛطُّمْ؞ ٻٜ تَٻّٜتٜ ندٜرْ جُوطٜ مَٻّٜ، نغَمْ تٛع نَوْنَا کٛيْطٜ مَاطَ دٛوْ حَيْرٜ؞› » يٜىٰسُ وِعِمٛ، «طٛنْمَا اَايَارٜ وِعِي، ‹تَاع فٛوندُ اَللَّه جٛومِرَاوٛ مَاطَ!› » شٜيْطَنْ فُطِّتِ يَارِمٛ دٛوْ وٛنْدٜ حٛشّٜىٰرٜ تٛوْندٜ حٛلِّمٛ لٜيْطٜ دُونِيَارُ فُو اٜ جَوْدِ مَاجٜ، اٛ وِعِمٛ، «طُعُمْ فُو مِ حٛکّٜتٜطُمْ تَا دِشَّکٜ اَ مَوْنِنِييَمْ؞» سٜيْ يٜىٰسُ وِعِمٛ، «اُمَّ دَغَ طٛعٛ، اَنْ شٜيْطَنْ! اَايَارٜ وِعِي، ‹مَوْنِنْ اَللَّه جٛومِرَاوٛ مَاطَ، کَنْکٛ تَنْ مَوْنِنْتَا؞› » سٜيْ شٜيْطَنْ اَلِمٛ، مَلَاعِکَعٜنْ نغَرِ مبَلِّمٛ؞ تٛو، ندٜ يٜىٰسُ نَنِ طُمْ مَٻِّي يَحَيَ ندٜرْ سُودُ شُرَلْ، اٛ سٛعِّي لٜيْدِ غَلِيلِ؞ اٛ اَلِ غَرِيرِ نَجَرَتْ، اٛ يَحِ اٛ جٛوطِي غَرِيرِ کَفَرْنَحُمْ نغٛنْدِ حَادٜ مبٜىٰلَ ندٜرْ لٜيْدِ جَبَلُونَ اٜ نَفْتَالِ؞ اٛ وَطِي نٛنْ نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ وِيکِ، «لٜيْدِ جَبَلُونَ اٜ لٜيْدِ نَفْتَالِ، اٛنٛنْ لٜيْطٜ غٛنْطٜ دٛوْ لَاوٛلْ حَادٜ مبٜىٰلَ، فٛنْغٛ شَانغٛلْ اُرْدُنْ، ندٜرْ لٜيْدِ غَلِيلِ ندِ يِمْٻٜ نَاع يَحُودَنْکٛعٜنْ! يِمْٻٜ جٛوطِيٻٜ ندٜرْ ݧِوْرٜ ٻٜ نغِعِي جَيْنغٛلْ مَنْغٛلْ، ندٜنْ ٻٜنْ طٛنْ جٛوطِيٻٜ ندٜرْ لٜيْدِ ندِ طٛوْدِ مَيْدٜ، جَيْنغٛلْ وُرْتٛيَکٜ يٜيْنِ دٛوْ مَٻّٜ؞» دَغَ شَرٜلْ نغٜلْ، يٜىٰسُ فُطِّ وَعَجِنْکِ، اٜ وِعَ، «تُوبٜىٰ، نغَمْ لَامُ اَللَّه وَرِي حَادٜ مٛوطٛنْ؞» يٜىٰسُ اٜ يَحَ حَادٜ مبٜىٰلَ غَلِيلِ، اٛ يِعِ سَکِرَاٻٜ طِطٛ، سِيمَنْ بِعٜتٜىٰطٛ بِيتُرُسْ اٜ مِݧِرَاوٛ مَاکٛ اَنْدِرَاوُسْ، اٜ ٻٜ نغَطَ نَنْغِرْطُمْ لِپِّ مَٻّٜ ندٜرْ ندِيَمْ، نغَمْ ٻٜ نَنْغٛوٻٜ لِپِّ؞ سٜيْ يٜىٰسُ وِعِٻٜ، «تٛکّٜىٰيَمْ، مِ وَرْتِرَيْعٛنْ غَدَّيْٻٜ يِمْٻٜ تٛ اَمْ؞» طٛنْ اٜ طٛنْ ٻٜ اَلِ نَنْغِرْطُمْ لِپِّ مَٻّٜ ٻٜ تٛکِّمٛ؞ ندٜ اٛ ٻٜيْدِ يٜىٰسٛ سٜطَّ، سٜيْ اٛ يِعِ وٛٻّٜ سَکِرَاٻٜ طِطٛ، يَاکُبُ اٜ مِݧِرَاوٛ مُوطُمْ يَحَيَ ٻِٻّٜ جَبَدِ، اٜ ٻٜ ندٜرْ کٛمِوَلْ اٜ ݧَاکٛ مَٻّٜ جَبَدِ، اٜ ٻٜ مٛعِّنَ نَنْغِرْطُمْ لِپِّ مَٻّٜ، سٜيْ يٜىٰسُ نٛدِّٻٜ؞ طٛنْ اٜ طٛنْ ٻٜ اَلِ کٛمِوَلْ نغَلْ اٜ ݧَاکٛ مَٻّٜ اٛنْ، ٻٜ تٛکِّ يٜىٰسُ؞ يٜىٰسُ يَحِ کٛو تٛيٜ ندٜرْ لٜيْدِ غَلِيلِ، اٜ مٛ اٜکِّتِنَ ندٜرْ شُوطِ دٛعَارٜ مَٻّٜ، اٜ مٛ وَعَجِنَ حَبَرُ بٜلْطُمْ دٛوْ لَامُ اَللَّه، ندٜنْ اٜ مٛ يَمْطِتِنَ کٛو اِرِ طُمٜ ݧَوُ اٜ شِيَ نجَمُ ندٜرْ يِمْٻٜ؞ حَبَرُ مَاکٛ سَنْکِتِ کٛو تٛيٜ ندٜرْ لٜيْدِ سِيرِيَ؞ يِمْٻٜ نغَدَّنِمٛ فُو ݧَوْٻٜ، ڤِيدٛوٻٜ اٜ ݧَوُوجِ فٜىٰرٜ‑فٜىٰرٜ، اٜ ڤِيدٛوٻٜ اٜ نَوْطُمْ ٻَلِّ، اٜ غٛودُٻٜ غِنِّ، اٜ غٛودُٻٜ ڤَطّٜ، اٜ جَرَاٻٜ، اٛ يَمْطِتِنِٻٜ؞ يِمْٻٜ طُطْٻٜ تٛکِّ يٜىٰسُ پِوٛيْٻٜ لٜيْدِ غَلِيلِ، اٜ لٜيْدِ دِکَڤٛلِسْ، اٜ اُرُشَلِيمَ، اٜ لٜيْدِ يَحُودِيَ، اٜ فٛنْغٛ شَانغٛلْ اُرْدُنْ؞ ندٜ يٜىٰسُ يِعِ يِمْٻٜ طُطْٻٜ نغَرِ، سٜيْ اٛ پٜنْتِ پٛلْدٜ اٛ جٛوطِ، تٛکُّٻٜمٛ نغَرِ تٛ مَاکٛ؞ سٜيْ اٛ فُطِّ اٜکِّتِنْکِٻٜ، اٛ وِعِ، «ٻٜ بَرْکِطِنَاٻٜ غَطُٻٜ فُو کَمُّندٜ دٛوْ اَللَّه، نغَمْ کَمْٻٜ نجٜيِ لَامُ اَللَّه؞ «ٻٜ بَرْکِطِنَاٻٜ يِمْٻٜ وٛيٛوٻٜ، نغَمْ طُمْ وَلْتِنَيْ ٻٜرْطٜ مَٻّٜ؞ «ٻٜ بَرْکِطِنَاٻٜ لٜيْنٛوٻٜ کٛعٜ، نغَمْ کَمْٻٜ ندٛنَتَ دُونِيَارُ؞ «ٻٜ بَرْکِطِنَاٻٜ نَنٛوٻٜ وٜىٰلٛ اٜ طٛنْکَ وَطُکِ اَادِلَاکُ، نغَمْ ٻٜ کَرْنٜتٜىٰٻٜ؞ «ٻٜ بَرْکِطِنَاٻٜ جُرْمِنَنٛوٻٜ يِمْٻٜ، نغَمْ کَمْٻٜ مَا طُمْ يُرْمِنَنَيْٻٜ؞ «ٻٜ بَرْکِطِنَاٻٜ ٻٜ ٻٜرْطٜ لَٻْطٜ، نغَمْ ٻٜ نغِعَيْ اَللَّه؞ «ٻٜ بَرْکِطِنَاٻٜ شِرْيٛوتِرٛوٻٜ يِمْٻٜ، نغَمْ طُمْ نٛدِّرَيْٻٜ ٻِٻّٜ اَللَّه؞ «ٻٜ بَرْکِطِنَاٻٜ تٛرّٜتٜىٰٻٜ نغَمْ وَطُکِ اَادِلَاکُ، نغَمْ کَمْٻٜ نجٜيِ لَامُ اَللَّه؞ «اٛنْ بَرْکِطِنَاٻٜ تٛ يِمْٻٜ کُطِيعٛنْ، تٛرِّيعٛنْ، ڤٜوَنِيعٛنْ مبِعِي حَالَاجِ کَلُّطِ فٜىٰرٜ‑فٜىٰرٜ دٛوْ مٛوطٛنْ نغَمْ اَمْ؞ نَنٜىٰ بٜلْطُمْ، مبٜلْمبٜلْتٜىٰ، نغَمْ بَرْکَ مٛوطٛنْ طُمْ طُطُّمْ اٜ دٛوْ، نغَمْ نٛنْ ٻٜ نغَطَنّٛو اَنَّبٛعٜنْ اَرَنْدٜعٜنْ؞ «اٛنٛنْ نغٛنِ لَمْطَمْ دُونِيَارُ؞ اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ وَلَا کٛ طَمْ نَفَتَ کَدِنْ، سٜيْ نِ طَمْ رُفٜىٰ يِمْٻٜ نجَاٻَطَمْ؞ «اٛنٛنْ نغٛنِ جَيْنغٛلْ دُونِيَارُ؞ غَرِيرِ نغٛنْدِ دٛوْ پٛلْدٜ ندِ سُوطَتَاکٛ؞ وَلَا غَطَنَيْطٛ فِتِلَارُ حِيتٜ حِڤَّ تُمُّدٜ دٛوْ مَيْرُ؞ سٜيْ نِ اٛ رٜسَندُ دٛوْ دَنْکِ، ندُ يٜيْنَنٛو کٛو مٛيٜ غٛنْطٛ ندٜرْ وُرٛ نغٛنْ؞ نٛنْ اٛنٛنْ مَا، اَلٜىٰ جَيْنغٛلْ مٛوطٛنْ يٜيْنَنٛو يِمْٻٜ، نغَمْ ٻٜ نغِعَ کُوطٜ مٛوطٛنْ بٛطّٜ، ٻٜ مَوْنِنَ ݧَاکٛ مٛوطٛنْ مٛ دٛوْ؞ «تٛع اٛنْ کَمّٛ مِ وَرٛيِ نغَمْ مِ وَرْتِرَ اَتَّوْرَ کٛو دٜفْتٜ اَنَّبٛعٜنْ مٜىٰرٜ؞ مِ وَرٛيِ نَاع نغَمْ مِ وَرْتِرَطُمْ مٜىٰرٜ، اَمَّا نغَمْ مِ حٜبِّنَطُمْ؞ اٜ مِ وِعَعٛنْ غٛونغَ، حَا دٛوْ اٜ لٜيْ رٜعَ، وَلَا بِنْدٜلْ غٛعٛ کٛو تٛٻّٜلْ غٛعٜلْ اِتّٜتٜىٰنغٜلْ ندٜرْ اَتَّوْرَ نَا کٛو نغٜلٜ بِنْدٜلْ ندٜرْ اَتَّوْرَ حٜبِّنَامَ؞ نغَمْ نٛنْ، کٛو مٛيٜ يٜوِ غٛعٛ ندٜرْ کٛو کٛ ٻُرِ فَمْطُکِ ندٜرْ کٛ اَللَّه وِعِ طُمْ وَطَ، ندٜنْ اٛ اٜکِّتِنِ وٛٻّٜ نغَطَ نٛنْ، طُمْ نٛدَّيْمٛ ٻُرْطٛ فَمْطُکِ ندٜرْ لَامُ اَللَّه؞ اَمَّا کٛو مٛيٜ وَطِ کٛ اَللَّه وِعِ طُمْ وَطَ، ندٜنْ اٛ اٜکِّتِنِ وٛٻّٜ نغَطَ نٛنْ، طُمْ نٛدَّيْمٛ مَوْطٛ ندٜرْ لَامُ اَللَّه؞ اٜ مِ وِعَعٛنْ، تٛ اَادِلَاکُ مٛوطٛنْ ٻُرَايِ طُمْ مٛودِٻّٜ اَتَّوْرَ اٜ فَارِسَنْکٛعٜنْ، اٛنْ نَتَّتَا لَامُ اَللَّه کٛو سٜطَّ! «اٛنْ نَنِ طُمْ وِعِ يِمْٻٜ ندٜنّٛ، ‹تَاع وَطُ وَرْحٛورٜ،› ندٜنْ ‹کٛو مٛيٜ وَطِ وَرْحٛورٜ اٛ کِيتٜتٜىٰطٛ؞› اَمَّا اٜ مِ وِعَعٛنْ، کٛو مٛيٜ مٛنَّنِ غٛطّٛ، اَللَّه حِيتٛتٛمٛ؞ کَدِنْ کٛو مٛيٜ حُطِ غٛطّٛ، اَرْدِيٻٜ حِيتٛتٛمٛ؞ ندٜنْ کٛو مٛيٜ وِعِ غٛطّٛ ‹اَ مٜىٰرٜىٰجٛ!› اٜ مٛ دٛوْ لَاوٛلْ نَتُّکِ وُرٛ حِيتٜ؞ نغَمْ نٛنْ، تَا وَرِي حٛکُّکِ دٛکَّلْ نغَمْ اَللَّه تٛ سَکِّرْدٜ، تَا سِفْتٛرِي بَنْدِرَاوٛ مَاطَ اٜ مٛنَّنْمَا، اَلُ دٛکَّلْ مَاطَ يٜىٰسٛ سَکِّرْدٜ ندٜنْ، اَرَنْدٜ يَحُ شِرْيٛوتِرَا اٜ بَنْدِرَاوٛ مَاطَ اٛنْ، ندٜنْ نغَرْتَا کٛکَّا دٛکَّلْ مَاطَ؞ «تٛ غٛطّٛ وُلّٛيَکٜمَ، شَرٜلْ نغٜلْ نغٛنْطٛنْ دٛوْ طَتَلْ يَاکِ يٜىٰسٛ لَامُ سِرْيٛوتِرْ اٜ مَاکٛ جَوْطُمْ؞ تٛ نَاع نٛنْ، اٛ يَارٜتٜ يٜىٰسٛ غَطٛووٛ کِيتَ، غَطٛووٛ کِيتَ وَطُمَا ندٜرْ جُوطٜ تَادِيٻٜ، طُمْ مَٻُّمَا ندٜرْ سُودُ شُرَلْ؞ اٜ مِ وِعَعٛنْ غٛونغَ، اَ وُرْتَتَاکٛ نَا اَ يٛٻِي فُو شٜىٰدٜ طٜ طُمْ تٛکَّتَمَ کٛو اَنِينِيٜلْ حٛرَتَاکٛ؞ «اٛنْ نَنِ طُمْ وِعِي، ‹تَاع وَطُ نجٜىٰنُ؞› اَمَّا مِنْ، اٜ مِ وِعَعٛنْ کٛو مٛيٜ رَارِ دٜبّٛ دَرْطٜ سُونٛ يَادَکٜ وَادِي نجٜىٰنُ اٜ مَاکٛ ندٜرْ ٻٜرْندٜ؞ تٛ حِتٜرٜ مَاطَ ندٜ ݧَامٛ اٜ وَطُمَا نغَطَا حَکّٜ، اِتُّندٜ، ڤَطَّاندٜ؞ طُمْ ٻُرَنِيمَ ندُلَّا جٛکّٛودٜ غٛعٛ ندٜرْ جٛکّٛوطٜ ٻَنْدُ مَاطَ اٜ دٛوْ طُمْ حُبِنَ فُو ٻَنْدُ مَاطَ ندٜرْ وُرٛ حِيتٜ؞ تٛ جُنْغٛ مَاطَ ݧَامٛ اٜ وَطُمَا نغَطَا حَکّٜ، اِتُّنغٛ، ڤَطَّانغٛ؞ طُمْ ٻُرَنِيمَ ندُلَّا جٛکّٛودٜ غٛعٛ ندٜرْ جٛکّٛوطٜ ٻَنْدُ مَاطَ اٜ دٛوْ فُو ٻَنْدُ مَاطَ نَتَّ ندٜرْ وُرٛ حِيتٜ؞ «کَدِنْ طُمْ وِعِ، ‹کٛو مٛيٜ يٛوفِ دٜبّٛ مُوطُمْ، سٜيْ حٛکَّمٛ طٜرٜوٛلْ وَرْکِ تٜىٰغَلْ؞› اَمَّا مِنْ، اٜ مِ وِعَعٛنْ، کٛو مٛيٜ يٛوفِ دٜبّٛ مُوطُمْ تٛ نَاع نجٜىٰنُ اٛ وَطِ، تٛو، اٛ وَطِيمٛ وَطُکِ نجٜىٰنُ تٛ اٛ وَطِي وٛنْغَلْ تٜىٰغَلْ؞ ندٜنْ کٛو مٛيٜ تٜعِ جٛوفَاطٛ وَطِ نجٜىٰنُ؞ «اٛنْ نَنِي طُمْ وِعِي يِمْٻٜ ندٜنّٛ، ‹تَاع حُنَ دٛوْ فٜوْرٜ، اَمَّا حٜبِّنْ اَلْکَوَلْ نغَلْ نغَطَنْطَا جٛومِرَاوٛ؞› اَمَّا اٜ مِ وِعَعٛنْ، تٛع اٛنْ کُنٛ کٛو سٜطَّ؞ تٛع اٛنْ کُنٛرٛ دٛوْ، نغَمْ تٛنْ وٛنِ تٛ اَللَّه جٛوطٛتٛ؞ ندٜنْ تٛع اٛنْ کُنٛرٛ دُونِيَارُ، نغَمْ طٛنْ وٛنِ تٛ اَللَّه رٜسَتَ کٛيْطٜ مُوطُمْ؞ ندٜنْ تٛع اٛنْ کُنٛرٛ اُرُشَلِيمَ نغَمْ کَيْرِ وٛنِ غَرِيرِ لَامِيطٛ مَوْطٛ؞ تٛع اٛنْ کُنٛرٛ غَاسَ کٛعٜ مٛوطٛنْ، نغَمْ اٛنْ مبَاوَتَا وَرْتِرْکِ لَاسٛلْ غٛعٛتٛلْ دَنٜوٛلْ کٛو ٻَلٜوٛلْ؞ اَلْ ‹اٜىٰ› مٛوطٛنْ وَرْتَ ‹اٜىٰ،› ندٜنْ ‹اَاعَ› مٛوطٛنْ وَرْتَ ‹اَاعَ؞› فُو کٛ پَٻِّي طُعُمْ، دَغَ تٛ شٜيْطَنْ طُمْ پِوٛيِ؞ «اٛنْ نَنِ طُمْ وِعِي، ‹حِتٜرٜ نغَمْ حِتٜرٜ، ندٜنْ ݧِيندٜ نغَمْ ݧِيندٜ؞› اَمَّا اٜ مِ وِعَعٛنْ، تٛ غٛطّٛ وَطَنِيعٛنْ غٛطُّمْ کَلُّطُمْ، تٛع اٛنْ نغَاتٛ؞ تٛ غٛطّٛ فِيِيمَ تٛ وٛلٛ ݧَامٛ، وَيْلِتَنْمٛ وٛعٛتٛ نغٛنْ مَا؞ تٛ غٛطّٛ يَارِيمَ يٜىٰسٛ لَامُ نغَمْ جَٻَنْمَا تٛغّٛورٜ، حٛکُّمٛ فُو اٜ شُدَّارِ مَاطَ؞ تٛ غٛطّٛ وَطِيمَ نغَطَا يَادُ مِلْ غٛعٛ، يَادُ اٜ مَاکٛ مِلْ طِطِ؞ تٛرِيطٛمَ غٛطُّمْ فُو، حٛکُّمٛ؞ تٛ غٛطّٛ پَمِيمَ ݧَمَاندٜ، تَاع حَطُمٛ؞ «اٛنْ نَنِي طُمْ وِعِي، ‹يِطُ بَنْدِرَاوٛ مَاطَ، وَݧُ غَݧٛ مَاطَ؞› اَمَّا اٜ مِ وِعَعٛنْ، نغِطٜىٰ غَݧٛوٻٜ مٛوطٛنْ، نغَطَنٜىٰ تٛرّٛوٻٜعٛنْ دٛعَارٜ، نغَمْ نغَرْتٛنْ ٻِٻّٜ ݧَاکٛ مٛ دٛوْ؞ نغَمْ اٜ مٛ وَطَ نَانغٜ مَاکٛ يٜيْنٛو دٛوْ يِمْٻٜ کَلُّٻٜ اٜ يِمْٻٜ غَطٛوٻٜ کٛ وٛوطِ، ندٜنْ اٜ مٛ وَطَ ندِيَمْ تٛٻَ دٛوْ اَادِلِعٜنْ اٜ ٻٜ نغَلَا اَادِلَاکُ؞ تٛ يِطُٻٜعٛنْ تَنْ نغِطّٛنْ، طُمٜ بَرْکَ کٜٻٛتٛنْ؟ کٛو جَٻٛوٻٜ شٜىٰدٜ لٜيْدِ مَا اٜ نغِطِ يِطُٻٜٻٜ؞ تٛ بَنْدِرَاٻٜ مٛوطٛنْ تَنْ کٛوْنٛتٛنْ، طُمٜ نغَطٛتٛنْ ٻُرْطُمْ طُمْ وٛٻّٜ نغَطَتَ؟ يِمْٻٜ نَاع يَحُودَنْکٛعٜنْ نَاع اٜ نغَطَ نٛنْ؟ نغَمْ نٛنْ، نغَرْتٜىٰ کٜىٰوُٻٜ نٛ ݧَاکٛ مٛوطٛنْ مٛ دٛوْ اٛ کٜوْطٛ؞ «ڤَامٜىٰ تٛع نغَطٛنْ کُوطٜ اَادِلَاکُ مٛوطٛنْ يٜىٰسٛ يِمْٻٜ نغَمْ ٻٜ نغِعَ؞ نغَمْ تٛ اٛنْ نغَطِي نٛنْ، اٛنْ کٜٻَتَا مبَرْجَارِ تٛ ݧَاکٛ مٛوطٛنْ مٛ دٛوْ؞ «نغَمْ نٛنْ، تَا حٛکَّيْ ٻٜ نغَلَنَا شَاحُ، تَاع اَنْدِنْکَ کٛو مٛيٜ نٛ مُنَافُکِعٜنْ نغَطَتَ ندٜرْ شُوطِ دٛعَارٜ اٜ دٛوْ طَتَلْ نغَمْ يِمْٻٜ نغِعَ مَنْتَٻٜ؞ اٜ مِ وِعَعٛنْ غٛونغَ، ٻٜ نجَادَکٜ ٻٜ کٜٻِ مبَرْجَارِ مَٻّٜ؞ اَمَّا تَا حٛکَّيْ مٛ وَلَنَا شَاحُ، تَاع جَٻُ جُنْغٛ نَنٛ مَاطَ اَنْدَ کٛ جُنْغٛ ݧَامٛ مَاطَ وَطَتَ؞ حٛکُّ شَاحُ مَاطَ اٜ سُوطٜ، ندٜنْ ݧَاکٛ مَاطَ مٛ دٛوْ اَنْدُطٛ کٛو طُمٜ غَطَاطُمْ اٜ سُوطٜ، اٛ حٛکّٜتٜ مبَرْجَارِ؞ «تٛ اٛنْ نغَطَيْ دٛعَارٜ، تٛع اٛنْ نغَطُ نٛ مُنَافُکِعٜنْ نغَطَتَ، نغَمْ اٜ ٻٜ نغِطِ وَطُکِ دٛعَارٜ اٜ ٻٜ ندَرِي ندٜرْ شُوطِ دٛعَارٜ اٜ دٛوْ تٛ طَتٜ کَوْرِ نغَمْ کٛو مٛيٜ يِعَٻٜ؞ اٜ مِ وِعَعٛنْ غٛونغَ، ٻٜ نجَادَکٜ ٻٜ کٜٻِي مبَرْجَارِ مَٻّٜ؞ اَمَّا تَا وَطَيْ دٛعَارٜ، نَتُّ سُودُ مَاطَ مَٻَّا دَمُّغَلْ، تٛرٛطَا ݧَاکٛ مَاطَ مٛ دٛوْ مٛ يِعَتَاکٜ؞ ندٜنْ کَنْکٛ غِعٛووٛ کٛ وَطٜتٜىٰ اٜ سُوطٜ اٛ حٛکّٜتٜ مبَرْجَارِ؞ «تٛ اٛنْ نغَطَ دٛعَارٜ، تٛع اٛنْ مٜتُ حَالَاجِ مٜىٰرٜ نٛ يِمْٻٜ ٻٜ اَنْدَا اَللَّه نغَطَتَ؞ اٜ ٻٜ ݧُمَ اَلَّاجِ مَٻّٜ نَنَيْ کٛ ٻٜ مبِعِ نغَمْ ٻٜ کُوتِرِ بٛلِيطٜ طُطّٜ؞ تٛع اٛنْ نغَطُ نٛ ٻٜ نغَطَتَ نغَمْ ݧَاکٛ مٛوطٛنْ مٛ دٛوْ اٜ اَنْدِ کٛ نغِطّٛنْ کٛ تٛرٛوطٛنْمٛ؞ رَا نٛ نغَطِرْتٛنْ دٛعَارٜ، ‹يَا اَللَّه ݧَاکٛ اَمِنْ مٛ دٛوْ، اِنْدٜ مَاطَ شٜنِيندٜ مَوْنِنٜىٰ؞ لَامُ مَاطَ وَرَ، کٛ نغِطَّا وَطٜىٰ ندٜرْ دُونِيَارُ، نٛ طُمْ وَطِرْتٜىٰ اٜ دٛوْ؞ حٛکُّمِنْ کٛ مِنْ ݧَامَتَ حَنْدٜ؞ يَافَنَمِنْ حَکّٜىٰجِ اَمِنْ نٛ مِنْ نجَافٛرَنْتٛو غَطَنْٻٜمِنْ کٛ وٛوطَا؞ تَاع اَلُ مِنْ نجَحَ تٛ مِنْ نغَطَتَ حَکّٜ، اَمَّا حِسْنُمِنْ دَغَ کَلُّطٛ؞› «نغَمْ تٛ اٛنْ نجَافَنَکٜ غَطَنْٻٜعٛنْ کٛ وٛوطَا، ݧَاکٛ مٛوطٛنْ مٛ دٛوْ مَا يَافَنْتٛعٛنْ؞ اَمَّا تٛ اٛنْ نجَافَنَاکِٻٜ، کَنْکٛ مَا اٛ يَافَنْتَاکٛعٛنْ حَکّٜ مٛوطٛنْ؞ «تٛ اٛنْ شُومِي، تٛع اٛنْ مبٛنُّ غٜىٰشٜ مٛوطٛنْ نٛ مُنَافُکِعٜنْ نغَطَتَ، نغَمْ کَمْٻٜ اٜ ٻٜ مبٛنَّ غٜىٰشٜ مَٻّٜ نغَمْ ٻٜ کٛلَّ يِمْٻٜ اٜ ٻٜ شُومِي؞ اٜ مِ وِعَعٛنْ غٛونغَ، ٻٜ نجَادَکٜ ٻٜ کٜٻِي مبَرْجَارِ مَٻّٜ؞ اَمَّا تَا سُومِي، سُلْمَ، مٛيْتَنَا حٛورٜ مَاطَ نٜبَّمْ؞ تَا وَطِي نٛنْ، وَلَا اَنْدَيْطٛ اَ سُومِي، سٜيْ نِ ݧَاکٛ مَاطَ مٛ دٛوْ مٛ يِعَتَاکٜ؞ ندٜنْ کَنْکٛ غِعٛووٛ کٛ وَطٜتٜىٰ اٜ سُوطٜ، اٛ حٛکّٜتٜ مبَرْجَارِ؞ «تٛع اٛنْ ندٜسَنْ کٛعٜ مٛوطٛنْ جَوْدِ اٜ دُونِيَارُ تٛ مٛوپُ وٛنَّتَندِ، کٛو ندِ ݧٛلَ، کٛو تٛ وُيْٻٜ ڤُسَتَ، نَتَّ، نغُجَّندِ؞ اَمَّا ندٜسَنٜىٰ کٛعٜ مٛوطٛنْ جَوْدِ تٛنْ دٛوْ تٛ مٛوپُ وٛنَّتَاندِ، کٛو ندِ ݧٛلَ، تٛ وُيْٻٜ مبَاوَتَا ڤُسَ نَتَّ نغُجَّندِ؞ نغَمْ تٛ جَوْدِ مَاطَ وٛنِ، تٛنْ ٻٜرْندٜ مَاطَ مَا سٛعّٛتٛو؞ «غِتٜ نغٛنِ فِتِلَارُ ٻَنْدُ؞ تٛ غِتٜ مَاطَ اٜ نجَمْطِ، ٻَنْدُ مَاطَ فُو حٜىٰوَيْ جَيْنغٛلْ؞ اَمَّا تٛ غِتٜ مَاطَ نجَمْطَا، ٻَنْدُ مَاطَ فُو حٜىٰوَيْ ݧِوْرٜ؞ تٛ جَيْنغٛلْ غٛنْغٛلْ ندٜرْ ٻَنْدُ مَاطَ طُمْ ݧِوْرٜ، ݧِوْرٜ ندٜنْ وَرْتَيْ ٻَلٜىٰرٜ نَاع سٜطَّ؞ «وَلَا بَاوَيْطٛ جَغَّنَاکِ جٛومُ وُرٛعٜنْ طِطٛ؞ کٛو اٛ وَݧَ غٛعٛتٛ اٛ يِطَ غٛعٛتٛ، کٛو اٛ مَوْنِنَ غٛعٛتٛ اٛ يَوَنَ غٛعٛتٛ؞ نٛنْ اٛنٛنْ مَا، اٛنْ مبَاوَتَا جَغَّنَاکِ اَللَّه اٜ جَغَّنَاکِ جَوْدِ شَرٜلْ غٛعٛ؞ «نغَمْ نٛنْ، اٜ مِ وِعَعٛنْ، تٛع اٛنْ نغَنُّ دٛوْ جٛنْدٜ مٛوطٛنْ، وَاتٛ دٛوْ کٛ ݧَامٛتٛنْ، کٛو کٛ نجَرٛتٛنْ، کٛو کٛ ٻٛرْنٛتٛوطٛنْ؞ نَاع يٛنْکِ ٻُرِي ݧَمْندُ؟ ندٜنْ نَاع ٻَنْدُ ٻُرِي کٛلْتٜ؟ ندَارٜىٰ شٛلِّ! طِ اَاوَتَا، طِ ڤٜعَّتَا، طِ نغَلَا تٛ طِ ندٜسَتَ ݧَمْندُ؞ فُو اٜ نٛنْ ݧَاکٛ مٛوطٛنْ مٛ دٛوْ اٜ ݧَمْنَطِ؞ نَاع اٛنْ ٻُرِي شٛلِّ دَرَجَ؟ مٛيٜ ندٜرْ مٛوطٛنْ تٛ وَنِّي وَاوَتَ ٻٜيْدَنْکِ حٛورٜ مُوطُمْ شَرٜلْ سٜطَّ ندٜرْ بَلْطٜ مُوطُمْ؟ «تٛو، نغَمْ طُمٜ نغَنّٛتٛنْ دٛوْ کٛ ٻٛرْنٛتٛوطٛنْ؟ ندَارٜىٰ ڤِنْدِ لَدّٜ نٛ مَوْنِرْتَ، ندِ حُوَتَا، ندِ سَݧَتَا کٛلْتٜ؞ فُو اٜ نٛنْ اٜ مِ وِعَعٛنْ، اَنَّبِ سُلٜيْمَانُ فُو اٜ رِسْکُ مُوطُمْ مٜىٰطَايِ مٛعِّتِنَاکِ بٛ ڤِنْدِ وٛعٛيْرِ ندِعِ؞ تٛ اَللَّه اٜ مٛعِّتِنِرَ ڤِنْدِ لَدّٜ نِحِ، حَنْدٜ اٜ ندِ طٛنْ، جَانغٛ ندِ وُلٜىٰ، حَکّٛ اٛنٛنْ، اٛ ٻُرَيْ نٛنْ ٻٛرْنُکِعٛنْ، اٛنٛنْ کٛولِيٻٜمٛ سٜطَّ! «نغَمْ نٛنْ، تٛع اٛنْ نغَنُّ مبِعٛنْ، ‹کٛ ݧَامٜتٜنْ؟›، کٛو ‹کٛ نجَرٜتٜنْ؟›، کٛو ‹کٛ ٻٛرْنٛتٛوطٜنْ؟› نغَمْ اِرِ طُمْ طٛنْ يِمْٻٜ ٻٜ اَنْدَا اَللَّه طَٻِّتَتَ؞ ݧَاکٛ مٛوطٛنْ مٛ دٛوْ اٜ اَنْدِ اٛنْ نغِطِ فُو فِي طُعُمْ؞ اَمَّا اَرَنْدٜ طَٻِّتٜىٰ لَامُ اَللَّه اٜ اَادِلَاکُ مَاکٛ، ندٜنْ طُمْ ٻٜيْدَنَيْعٛنْ فُو فِي طُعُمْ؞ نغَمْ نٛنْ، تٛع اٛنْ نغَنُّ اٜ جَانغٛ، نغَمْ جَانغٛ اٜ وٛودِ وَنَّارٜ مُوطُمْ؞ کٛو ندٜيٜ ݧَلْندٜ اٜ وٛودِ وَنَّارٜ مَيْرٜ کٜپَيْندٜندٜ؞ «تٛع اٛنْ کِيتٛ وٛٻّٜ، نغَمْ تٛع طُمْ حِيتٛعٛنْ؞ نغَمْ نٛنْ نٛ کِيتٛرِيطٛنْ وٛٻّٜ، اٛنٛنْ مَا نٛنْ طُمْ حِيتٛرَنْتٛوعٛنْ، ندٜنْ اٜ ڤٛوندِرْغٜلْ نغٜلْ ڤٛوندِرْطٛنْ، اٜ مَاغٜلْ طُمْ فٛوندِرَنْتَعٛنْ؞ نغَمْ طُمٜ ندَارَتَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ، اَمَّا اَ وَنَّايِ اٜ لٜغَّ وٛنْغَ ندٜرْ حِتٜرٜ مَاطَ؟ نٛ وَطَتَ مبِعَا بَنْدِرَاوٛ مَاطَ، ‹اَلْ مِ اِتَّنْمَا غٜىٰنٜلْ ندٜرْ حِتٜرٜ مَاطَ،› ندٜنْ بٛو اٜ وٛودِ لٜغَّ ندٜرْ حِتٜرٜ مَاطَ؟ اَنْ مُنَافُکِيجٛ، اَرْتُ اِتُّکِ لٜغَّ وٛنْغَ ندٜرْ حِتٜرٜ مَاطَ، ندٜنْ نغِعَا بٛطُّمْ کٜٻَا نٛ اِتِّرَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ؞ «تٛع اٛنْ کٛکُّ کُتِيجِ غٛطُّمْ شٜنِيطُمْ؞ تٛ اٛنْ نغَطِي نٛنْ، طِ نغَيْلِتٛتٛ، طِ شِشِّتَعٛنْ؞ تٛع اٛنْ کُبَنٛ اَلَدٜىٰجِ لُعُ‑لُعُ؞ تٛ اٛنْ نغَطِي نٛنْ، طِ نجَاٻَيْطُمْ تَنْ؞ «تٛرٜىٰ، طُمْ حٛکَّيْعٛنْ؞ طَٻِّتٜىٰ، اٛنْ کٜٻَيْ؞ شِلْمِنٜىٰ، طُمْ مَٻِّتَنَيْعٛنْ دَمُّغَلْ؞ نغَمْ کٛو مٛيٜ تٛرِيطٛ طُمْ حٛکَّيْمٛ، طَٻُّتُطٛ بٛو حٜٻَيْ، ندٜنْ کٛو مٛيٜ شِلْمِنِيطٛ طُمْ مَٻِّتَنَيْمٛ دَمُّغَلْ؞ مٛيٜ ندٜرْ مٛوطٛنْ تٛ ٻِطّٛ مُوطُمْ تٛرَکٜمٛ بُرٛودِ، اٛ حٛکَّمٛ حَيْرٜ؟ کٛو بٛو تٛ اٛ تٛرَکٜمٛ لِنْغُ، اٛ حٛکَّمٛ مبٛودِ؟ تٛ اٛنٛنْ کَلُّٻٜ، اٛنْ اَنْدِ نٛ کٛکِّرْتٛنْ ٻِٻّٜ مٛوطٛنْ فِي بٛطُّمْ، حَکّٛ ݧَاکٛ مٛوطٛنْ مٛ دٛوْ! اٛ ٻُرَيْ نٛنْ حٛکُّکِ تٛرِيٻٜمٛ فِي بٛطُّمْ! «فُو کٛ نغِطّٛنْ وٛٻّٜ نغَطَنَعٛنْ، اٛنٛنْ مَا نغَطَنٜىٰٻٜ نٛنْ، نغَمْ کَنْجُمْ وٛنِ کٛ اَتَّوْرَ اٜ دٜفْتٜ اَنَّبٛعٜنْ مبِعِ؞ «نَتِّرٜىٰ دَمُّغَلْ ٻِطِّينغَلْ؞ نغَمْ دَمُّغَلْ جَارَيْنغَلْ حَلْکٜرٜ نغَلْ جَاجُنغَلْ، ندٜنْ نغَلْ سَطَا تٛکُّکِ، نَتِّرٛوٻٜنغَلْ اٜ طُوطِ؞ اَمَّا دَمُّغَلْ جَارَيْنغَلْ يٛنْکِ کِ رٜعَتَا نغَلْ ٻِطِّينغَلْ، طٛنْمَا طَتَلْ جَارَيْنغَلْ يٛنْکِ کِ رٜعَتَا اٜ نغَلْ سَطِ تٛکُّکِ، يِمْٻٜ سٜطَّ تٛکَّتَنغَلْ؞ «ڤَامَنٜىٰ اَنَّبٛعٜنْ فٜوْرٜ غَرَيْٻٜ تٛ مٛوطٛنْ ندٜرْ نَنْدِ بَالِ، اَمَّا ندٜرْ ٻٜرْطٜ مَٻّٜ اٜ ٻٜ نَنْدِ اٜ شَافَالِ کَلُّطِ؞ اٛنْ اَنْدِتِرَيْٻٜ کُوطٜ مَٻّٜ؞ طُمْ حٜٻَتَا ٻِکّٛيْ اِنَبٛوجٜ تٛ غِعٜحِ، کٛو اِبّٜ دَغَ تٛ کٛورَاجٜ؞ نٛنْ مَا، کٛو کِيٜ لٜکِّ بٛطْکِ اٜ کِ رِمَ ٻِکّٛيْ مبٛطْکٛيْ؞ لٜکِّ کِ وٛوطَا بٛو اٜ کِ رِمَ ٻِکّٛيْ کٛيْ مبٛوطَا؞ لٜکِّ بٛطْکِ رِمَتَا ٻِکّٛيْ کٛيْ مبٛوطَا؞ نٛنْ مَا، لٜکِّ کِ وٛوطَا رِمَتَا ٻِکّٛيْ مبٛطْکٛيْ؞ فُو لٜکِّ کِ رِمَتَا ٻِکّٛيْ مبٛطْکٛيْ طُمْ فٜعَّيْکِ طُمْ فَطَّکِ ندٜرْ حِيتٜ؞ نغَمْ نٛنْ، اٛنْ اَنْدِتِرَيْٻٜ کُوطٜ کَلُّطٜ طٜ ٻٜ نغَطَتَ؞ «نَاع فُو بِعَيْطٛيَمْ، ‹مٛودِبّٛ، مٛودِبّٛ،› نَتَّتَ لَامُ اَللَّه، سٜيْ نِ غَطُطٛ کٛ ݧَاکٛ اَمْ مٛ دٛوْ يِطِ؞ اٜ ݧَلْندٜ جَانغٛ يِمْٻٜ طُطْٻٜ مبِعَيْيَمْ، ‹مٛودِبّٛ، مٛودِبّٛ! نَاع مِنْ نغَعَجِنِي ندٜرْ اِنْدٜ مَاطَ؟ نَاع مِنْ مبُرْتِنِي غِنِّ ندٜرْ اِنْدٜ مَاطَ؟ نَاع مِنْ نغَطِي کَيْطِنِيطُمْ طُطُّمْ ندٜرْ اِنْدٜ مَاطَ؟› اَمَّا مِ وِعَيْٻٜ، ‹مِ اَنْدَاعٛنْ؞ شٜنْدِرٜىٰ اٜ اَمْ، اٛنٛنْ کَلُّٻٜ؞› «نغَمْ نٛنْ، نٜطّٛ فُو نَنْطٛ طٜعٜ بٛلِيطٜ اَمْ وَطِ کٛ مبِيمِ اٜ نَنْدِ اٜ نٜطّٛ غٛودُطٛ فَامُ مَحُطٛ وُرٛ مُوطُمْ دٛوْ تَفَارٜ؞ ندٜ ندِيَمْ وَطِ، شَنْطِ کٜىٰوِ، حٜنْدُ اُمّٛيِي ڤِيِ وُرٛ نغٛنْ، اَمَّا نغٛ يَنَايِ نغَمْ نغٛ مَحَامَ دٛوْ تَفَارٜ؞ «اَمَّا کٛو مٛيٜ نَنْطٛ بٛلِيطٜ اَمْ وَطَايِ کٛ مبِيمِ اٜ نَنْدِ اٜ نٜطّٛ مٛ وَلَا حَکِّيلٛ مَحُطٛ وُرٛ مُوطُمْ دٛوْ نجَارٜىٰندِ؞ ندٜ ندِيَمْ وَطِ، شَنْطِ کٜىٰوِ، حٜنْدُ اُمّٛيِي ڤِيِ وُرٛ نغٛنْ، سٜيْ نغٛ يَنِ نغٛ سَنْکِتِي نغٛ فُو؞» ندٜ يٜىٰسُ يٛتِّنِ کٛ وِعَتَ، يِمْٻٜ حَوْرُتُٻٜ کَيْطِنِ اٜ اٜکِّتِنٛلْ مَاکٛ، نغَمْ اٛ اٜکِّتِنِرَايِٻٜ نٛ مٛودِٻّٜ اَتَّوْرَ اٜکِّتِنِرْتَ، اَمَّا اٛ اٜکِّتِنِيٻٜ اٜ بَوْطٜ؞ ندٜ يٜىٰسُ جِڤّٛيِي دَغَ دٛوْ حٛشّٜىٰرٜ ندٜنْ، يِمْٻٜ طُطْٻٜ تٛکِّمٛ؞ سٜيْ غٛطّٛ غٛودُطٛ ݧَوُ ݧَامٛوجُمْ لَرَلْ وَرِ دِشِّي يٜىٰسٛ مَاکٛ، وِعِ، «مٛودِبّٛ، تَا جَٻِي، اَ وَاوَيْ نجَمْطِتِنَايَمْ؞» سٜيْ يٜىٰسُ فٛرْتِ جُنْغٛ مُوطُمْ، مٜىٰمِمٛ، وِعِ، «مِ جَٻِي؞ يَمْطُتُ!» طٛنْ اٜ طٛنْ ݧَوُ طُمْ اَلِمٛ، اٛ يَمْطِتِ؞ سٜيْ يٜىٰسُ وِعِمٛ، «فَامُ، تَاع وِعُکَ کٛو مٛيٜ، اَمَّا يَحُ کٛلَّا حٛورٜ مَاطَ تٛ اَرْدِيطٛ دِينَ، ندٜنْ کٛکَّا شَکِّرِ نٛ مُوسَ وِعِ طُمْ وَطَ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞» ندٜ يٜىٰسُ نَتِّ غَرِيرِ کَفَرْنَحُمْ، سٜيْ غٛطّٛ مَوْطٛ سٛوجِعٜنْ رٛومَ وَرِ تٛ مَاکٛ، اٜ تٛرٛومٛ، وِعِ، «مٛودِبّٛ، مَشُّطٛ اَمْ اٜ فُکِّي اٜ وُرٛ اٛ جَرَاطٛ، اٜ مٛ فِيدَ اٜ نَوْطُمْ کَلُّطُمْ؞» يٜىٰسُ وِعِمٛ، «مِ يَحَيْ مِ يَمْطِتِنَمٛ؞» سٜيْ مَوْطٛ سٛوجِعٜنْ اٛنْ نٛوتِي وِعِ، «مٛودِبّٛ، مِ فٛتَايِ نَتَّا وُرٛ اَمْ، اَمَّا مٜتُ تَنْ، مَشُّطٛ اَمْ يَمْطِتَيْ؞ نغَمْ مِنْ اٜ حٛورٜ اَمْ لٜيْ لَامُ وٛٻّٜ سٛوجِعٜنْ نغٛنْمِ، مِنْ مَا، اٜ مِ لَامٛو سٛوجِعٜنْ؞ تٛ مِ وِعِي اٛعٛ، ‹دِلُّ!› اٛ دِلَّيْ؞ تٛ مِ وِعِي اٛنْ تٛنْ، ‹وٛرٛيْ!› اٛ وَرَيْ؞ تٛ بٛو مِ وِعِي مَشُّطٛ اَمْ، ‹وَطُ طُعُمْ!› اٛ وَطَيْطُمْ؞» ندٜ يٜىٰسُ نَنِ نٛنْ، حَيْطِنِ، وِعِ کَوْرُتُٻٜ اٜ تٛکِّمٛ، «اٜ مِ وِعَعٛنْ غٛونغَ، کٛو ندٜرْ اِسْرَاعِيلَ مِ حٜٻَايِ کٛولِيطٛيَمْ ٻٜرْندٜ غٛعٛ بٛ اٛعٛ؞ اٜ مِ وِعَعٛنْ، يِمْٻٜ نَاع يَحُودَنْکٛعٜنْ طُطْٻٜ نغَرَيْ دَغَ فُونَ اٜ حِرْنَ ٻٜ نجٛوطٛو ٻٜ ݧَامَ ݧَمْندُ حُمْتٛ اٜ اَنَّبِ اِبْرَاهِمْ، اٜ اِشِيَاکُ، اٜ يَاکُبُ ندٜرْ لَامُ اَللَّه؞ حَانُٻٜ نغَرْتَ يِمْٻٜ اَللَّه اَمَّا ٻٜ نغَݧِ، طُمْ فَطَّيْٻٜ ندٜرْ ݧِوْرٜ ٻَلٜىٰرٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞» سٜيْ يٜىٰسُ وِعِ مَوْطٛ سٛوجِعٜنْ رٛومَ اٛنْ، «يَحُ! نغَمْ اَ حٛولَکٜ اَللَّه، مَشُّطٛ مَاطَ يَمْطِتَيْ؞» طٛنْ اٜ طٛنْ مَشُّطٛ سٛوجِيجٛ اٛنْ يَمْطِتِ؞ ندٜ يٜىٰسُ يَحِ وُرٛ بِيتُرُسْ يِعِ اٜسِرَاوٛ بِيتُرُسْ دٜبّٛ اٜ فُکِّي، جٛنْتٜ کَلُّطٜ اٜ تٛرَّمٛ، اٛ مٜىٰمِ جُنْغٛ مَاکٛ؞ جٛنْتٜ طٜنْ نجٛوفِ دٜبّٛ اٛنْ، اٛ اُمِّي، اٛ فُطِّ وَدَّنْکِمٛ ݧَمْندُ؞ ندٜ فُتُرٛ وَطِ، يِمْٻٜ نغَدَّنِ يٜىٰسُ غٛودُٻٜ غِنِّ طُطْٻٜ؞ اٛ مٜتَنِطِ وٛلْدٜ غٛعٛ طِ مبُرْتِي؞ اٛ يَمْطِتِنِ فُو ٻٜ نجَمْطَا؞ نٛنْ وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ، وِيکِ، «اٛ اِتِّي ݧَوُوجِ مٜىٰطٜنْ، اٛ يَمْطِتِنِيعٜنْ؞» ندٜ يٜىٰسُ يِعِ يِمْٻٜ طُطْٻٜ اٜ ڤِلِيمٛ، اٛ وِعِ تٛکُّٻٜمٛ، «اٜنْ کُولُ فٛنْغٛ مبٜىٰلَ؞» سٜيْ غٛطّٛ مٛودِبّٛ اَتَّوْرَ وَرِ تٛ مَاکٛ، وِعِمٛ، «مٛودِبّٛ، مِ تٛکّٜتٜ تٛ نجَحَتَا فُو؞» يٜىٰسُ وِعِمٛ، «دِلَاجِ اٜ نغٛودِ غَيْطٜ، شٛلِّ اٜ نغٛودِ شَٻّٜ، اَمَّا ٻِي نٜطّٛ وَلَا تٛ فُکّٛتٛو؞» غٛطّٛ ندٜرْ تٛکُّٻٜمٛ وِعِمٛ، «مٛودِبّٛ، اَلْ مِ يَحَ مِ اُوٛيَ ݧَاکٛ اَمْ تَوْ؞» اَمَّا يٜىٰسُ وِعِمٛ، «تٛکَّمْ، اَلُ مَيْٻٜ اُوَ مَيْٻٜ مُعّٜنْ؞» يٜىٰسُ نَتِّ کٛمِوَلْ، تٛکُّٻٜمٛ مَا تٛکِّمٛ؞ سٜيْ حٜنْدُ شٜمْبِنْدُ اُمّٛيِي دٛوْ مبٜىٰلَ نغَنْ، غٜىٰلٛوطِ ندِيَمْ ڤُطِّ ڤِيکِ کٛمِوَلْ نغَلْ، ندِيَمْ نَتِّ ندٜرْ مَاغَلْ حَا نَاکِ نغَلْ ٻَدِي حٜىٰوَ ندِيَمْ، اَمَّا يٜىٰسُ اٜ ندٜرْ مَاغَلْ اٜ طَانِي؞ سٜيْ تٛکُّٻٜمٛ ٻَدِّي ڤِنْدِنِمٛ، ٻٜ مبِعِ، «مٛودِبّٛ، حِسْنُعٜنْ! اٜنْ کَلْکَيْ!» سٜيْ اٛ وِعِٻٜ، «نغَمْ طُمٜ کُلْتٛرْطٛنْ، اٛنٛنْ کٛولِيٻٜيَمْ سٜطَّ؟» سٜيْ اٛ اُمِّي، اٛ حَٻَنِ حٜنْدُ ندُنْ اٜ غٜىٰلٛوطِ ندِيَمْ طِنْ؞ سٜيْ کٛو طُمٜ دٜعِّتِ؞ کٛو مٛيٜ حَيْطِنِ وِعِ، «اٛعٛ طُمْ اِرِ مٛيٜ نٜطّٛ، حَا کٜنِ اٜ غٜىٰلٛوطِ ندِيَمْ اٜ نغَطَ کٛ اٛ وِعِ؟» ندٜ يٜىٰسُ يٛتِّي فٛنْغٛ مبٜىٰلَ ندٜرْ لٜيْدِ غَارَسِنْکٛعٜنْ، سٜيْ وٛٻّٜ وٛرْٻٜ طِطٛ تَٻِّيمٛ، غٛودُٻٜ غِنِّ جٛوطٛتٛوٻٜ تٛ غٜنَالٜ؞ ٻٜ نغَرْتِي کٛ حُلْنِي نَاع سٜطَّ حَا مَا وَلَا بَاوَيْطٛ تٛکِّرَ لَاوٛلْ نغٛلْ طٛنْ! طٛنْ اٜ طٛنْ ٻٜ نغُلِّ، اٜ ٻٜ مبِعَ، «کٛ وَنُّمَا اٜ اَمِنْ، ٻِطّٛ اَللَّه؟ اَ وَرِي نغَمْ تٛرَّامِنْ کٛ شَرٜلْ وَطَ؟» حَادٜ طٛنْ اٜ وٛودِ اٛرْندٜ اَلَدٜىٰجِ طُطِّ اٜ دُرَ؞ غِنِّ طِنْ تٛرِي يٜىٰسُ، مبِعِ، «تَا رِيوِيمِنْ، اَلُمِنْ مِنْ نَتّٛيَ اٛرْندٜ اَلَدٜىٰجِ طِنْ نِي؞» سٜيْ اٛ وِعِطِ، «ندِلّٜىٰ!» سٜيْ طِ مبُرْتِي، طِ نَتّٛيِ اَلَدٜىٰجِ طِنْ؞ سٜيْ اٛرْندٜ ندٜنْ فُو ݧَارِ جِڤّٛيِي دَغَ دٛوْ پٛلْدٜ ندٜنْ، يَنِ ندٜرْ مبٜىٰلَ، ندِيَمْ ݧَامِطِ؞ وٛيْنَاٻٜ اَلَدٜىٰجِ طِنْ ندٛغِّ نجَحِ ندٜرْ غَرِيرِ مبِعٛيِ کٛو طُمٜ کٛ وَطِ؞ طٛنْمَا ٻٜ مبِعِ کٛ حٜٻِ غٛودُٻٜ غِنِّ طِنْ؞ سٜيْ يِمْٻٜ غَرِيرِ ندِنْ طُطْٻٜ مبُرْتٛيِي تَٻِّي يٜىٰسُ؞ ندٜ ٻٜ نغِعِمٛ، ٻٜ تٛرِيمٛ اٛ اَلَنَٻٜ لٜيْدِ مَٻّٜ؞ سٜيْ يٜىٰسُ نَتِّ کٛمِوَلْ حُولِ سٛعِّي غَرِيرِ مُوطُمْ؞ سٜيْ وٛٻّٜ نغَدَّنِمٛ غٛطّٛ جَرَاطٛ دٛوْ دَاغٛ؞ ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، «تَاع وَنُّ، حِغٛ اَمْ، اَ يَافَنَامَ حَکّٜىٰجِ مَاطَ؞» ندٜ وٛٻّٜ مٛودِٻّٜ اَتَّوْرَ نَنِ نٛنْ، ٻٜ ڤُطِّ مٜتِتَاکِ حَکُّندٜ مَٻّٜ، اٜ ٻٜ مبِعَ، «اٛعٛ نٜطّٛ اٛ فٛتِّدِنِ حٛورٜ مَاکٛ اٜ اَللَّه؞ کَعَ حَالَ کَ کَلُّکَ؞» اَمَّا يٜىٰسُ فَامِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِٻٜ، «نغَمْ طُمٜ ݧُمٛتٛنْ ݧُمٛ کَلُّنغٛ ندٜرْ ٻٜرْطٜ مٛوطٛنْ؟ کٛ ٻُرِ حٛيْکِ، طُمْ وِعَ، ‹اَ يَافَنَامَ حَکّٜ مَاطَ،› کٛو طُمْ وِعَ، ‹اُمَّ يَاٻُ؟› اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞» سٜيْ اٛ وِعِ جَرَاطٛ اٛنْ، «اُمَّ کٛشَّا دَاغٛ مَاطَ، کٛوتَا وُرٛ؞» سٜيْ جَرَاطٛ اٛنْ اُمِّي حٛوتِ وُرٛ؞ ندٜ کَوْرُتُٻٜ طٛنْ نغِعِ نٛنْ، ٻٜ کُلِ، ٻٜ مَنْتِ اَللَّه، کٛکُّطٛ يِمْٻٜ اِرِ طٜعٜ بَوْطٜ؞ يٜىٰسُ اٜ اَلَ وِغٜىٰرٜ ندٜنْ، سٜيْ يِعِ غٛطّٛ جَٻٛووٛ شٜىٰدٜ لٜيْدِ بِعٜتٜىٰطٛ مَاتِيُ اٜ جٛوطِي تٛ طُمْ جَٻَتَ شٜىٰدٜ لٜيْدِ؞ سٜيْ يٜىٰسُ وِعِمٛ، «تٛکَّمْ؞» سٜيْ مَاتِيُ اُمِّي، تٛکِّمٛ؞ غَطَ طٛنْ يٜىٰسُ يَحِ وُرٛ مَاتِيُ، جٛوطِي اٜ ݧَامَ حِرَاندٜ، سٜيْ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ نغَرِ نجٛوطِي تٛ مَاکٛ اٜ تٛکُّٻٜمٛ؞ ندٜ فَارِسَنْکٛعٜنْ نغِعِ نٛنْ، ٻٜ مبِعِ تٛکُّٻٜمٛ، «نغَمْ طُمٜ مٛودِبّٛ مٛوطٛنْ ݧَمْدَتَ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟» ندٜ يٜىٰسُ نَنِ نٛنْ، وِعِ، «نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ نجَحٜىٰ، اٜکِّتٛوطٛنْ مَعَنَ اَايَارٜ بِيندٜ، ‹اٜ مِ يِطِ کٛلّٛنْ يُرْمٜىٰندٜ، نَاع سَکُّکِ شَکِّرِ؞› مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ؞» سٜيْ تٛکُّٻٜ يَحَيَ غَطٛووٛ بَڤْتِسْمَ نغَرِ تٛ يٜىٰسُ ٻٜ پَمِمٛ، ٻٜ مبِعِ، «نغَمْ طُمٜ مِنٛنْ اٜ فَارِسَنْکٛعٜنْ اٜ مِنْ شُومٛو، اَمَّا تٛکُّٻٜمَ شُومَتَاکٛ؟» سٜيْ يٜىٰسُ نٛوتِي وِعِٻٜ، «اٜ يِيکِ مٛوطٛنْ حِغٛوٻٜ اَنْغٛوجٛ نَنَيْ بٜلْطُمْ شَرٜلْ نغٜلْ اَنْغٛوجٛ اٛنْ وٛنْدِ اٜ مَٻّٜ؟ اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، اٜ شَرٜلْ نغٜلْ ٻٜ شُومٛتٛ؞ «وَلَا ݧٛوتَيْطٛ لٜفٜلْ کٜسٜلْ تٛ لِمْشٜرٜ کِيندٜ، نغَمْ لٜفٜلْ نغٜلْ نغٜلْ سٜىٰکَيْ لِمْشٜرٜ کِيندٜ ندٜنْ؞ نٛنْ وَطَيْ ندٜ ٻُرَ نٛ ندٜنّٛ سٜىٰکُکِ؞ نٛنْ مَا وَلَا غَطَيْطٛ ندِيَمْ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ، طَمْ ڤُسَ فَاندُ ندُنْ، طَمْ رُفَ، فَاندُ ندُنْ بٛو لَلِّ وٛنْ طٛنْ؞ اَمَّا ندِيَمْ اِنَبٛجَمْ کٜسَمْ اٜ وَطٜىٰ ندٜرْ فَاندُ حٜيْرُ نغَمْ تٛع طُمْ دُلَّطَمْ طُمْ دُلَّ فَاندُ ندُنْ؞» يٜىٰسُ اٜ ندٜرْ وِيکِٻٜ نٛنْ، سٜيْ غٛطّٛ اَرْدِيطٛ سُودُ دٛعَارٜ بِعٜتٜىٰطٛ جَايِرُسْ وَرِ؞ اٛ دِشِّي يٜىٰسٛ يٜىٰسُ، اٛ وِعِ، «ٻِطّٛ اَمْ سُرْبَاجٛ مَايِي جٛونِ‑جٛونِ، اَمَّا وَرٛيْ نجَحٜنْ مٜىٰمَامٛ، اٛ اُمّٛتٛ؞» يٜىٰسُ اُمّٛدِي اٜ تٛکُّٻٜمٛ ٻٜ ندِلِّدِ اٜ مَاکٛ؞ تٛو، اٜ وٛودِ غٛطّٛ دٜبّٛ طٛنْ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ اٛ پِوٛيِ غَطَ يٜىٰسُ، اٛ مٜىٰمِ شِلْمبِ تٛغّٛورٜ مَاکٛ؞ نغَمْ اٛ وِعِي ندٜرْ ٻٜرْندٜ مَاکٛ، «کٛو تٛغّٛورٜ مَاکٛ تَنْ مٜىٰمُمِ، مِ يَمْطِتَيْ؞» ندٜ يٜىٰسُ وَيْلِتِي، يِعِمٛ، وِعِ، «تَاع وَنُّ، بَنْدِرَاوٛ؞ حٛولَارٜ مَاطَ يَمْطِتِنِيمَ؞» طٛنْ اٜ طٛنْ دٜبّٛ اٛنْ يَمْطِتِ؞ ندٜ يٜىٰسُ يٛتِّي وُرٛ جَايِرُسْ اٛنْ، يِعِ دُودٛوٻٜ دُودَالِ اٜ حَوْرُتُٻٜ اٜ ٻٜ نغُلَّ سٜمْبٜىٰ، سٜيْ اٛ وِعِٻٜ، «اَلٜىٰ طٛعٛ، نغَمْ سُرْبَاجٛ اٛنْ مَايَايِ، اَمَّا اٛ طَانِ؞» سٜيْ ٻٜ نجَلِمٛ؞ اَمَّا غَطَ اٛ وُرْتِنِي کٛو مٛيٜ يَاسِ، اٛ نَتِّ، اٛ جٛغِي جُنْغٛ سُرْبَاجٛ اٛنْ، سٜيْ سُرْبَاجٛ اٛنْ اُمِّي؞ حَبَرُ طُمْ بٛو سَنْکِتِي کٛو تٛيٜ ندٜرْ لٜيْدِ ندِنْ؞ يٜىٰسُ اٜ اَلَ وِغٜىٰرٜ ندٜنْ، سٜيْ وٛٻّٜ وُمْٻٜ طِطٛ تٛکِّمٛ اٜ نٛدَّ سٜمْبٜىٰ، اٜ مبِعَ، «ٻِطّٛ دَوْدَ، يُرْمِنَنْمِنْ!» ندٜ يٜىٰسُ نَتِّ وٛنْغٛ وُرٛ، سٜيْ وُمْٻٜ ٻٜنْ نغَرِ تٛ مَاکٛ، اٛ پَمِٻٜ، اٛ وِعِ، «اٛنْ نجَٻِي مِ وَاوَيْ يَمْطِتِنْکِعٛنْ؟» ٻٜ مبِعِمٛ، «اٜىٰ، مٛودِبّٛ؞» سٜيْ يٜىٰسُ مٜىٰمِ غِتٜ مَٻّٜ، وِعِ، «نٛنْ نٛ کٛولٛرِيطٛنْيَمْ مِ يَمْطِتِنَيْعٛنْ؞» طٛنْ اٜ طٛنْ غِتٜ مَٻّٜ مبُمْتِي؞ سٜيْ يٜىٰسُ وَغِّنِٻٜ، وِعِ، «تٛع اٛنْ مبِعُکَ غٛطّٛ؞» اَمَّا ٻٜ ندِلِّ ٻٜ شَنْکِتِ حَبَرُ مَاکٛ کٛو تٛيٜ ندٜرْ لٜيْدِ ندِنْ؞ وُمْٻٜ ٻٜنْ اٜ ندِلَّ، سٜيْ طُمْ وَدَّنِ يٜىٰسُ غٛطّٛ غٛودُطٛ غِنّٛلْ غَرْتِرْنغٛلْمٛ ڤَحٛ؞ غَطَ يٜىٰسُ وُرْتِنِي غِنّٛلْ نغٛلْ، نٜطّٛ اٛنْ فُطِّ مٜتُکِ؞ يِمْٻٜ طُطْٻٜ کَوْرُتُٻٜ طٛنْ کَيْطِنِ، مبِعِ، «طُمْ مٜىٰطَايِ يِيکِ غٛطُّمْ اِرِ طُعُمْ ندٜرْ لٜيْدِ اِسْرَاعِيلَ؞» اَمَّا فَارِسَنْکٛعٜنْ مبِعِ، «اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ؞» يٜىٰسُ يَحِ غَرِيجٜ مَوْطٜ اٜ نغَرِحٛيْ ڤَمَرٛيْ فُو، اٜ اٜکِّتِنَ ندٜرْ شُوطِ دٛعَارٜ طِ يَحُودَنْکٛعٜنْ، اٜ وَعَجِنَ حَبَرُ بٜلْطُمْ دٛوْ لَامُ اَللَّه، اٜ مٛ يَمْطِتِنَ يِمْٻٜ غٛودُٻٜ کٛو اِرِ طُمٜ ݧَوُ، اٜ کٛو اِرِ طُمٜ شِيَ نجَمُ؞ ندٜ اٛ يِعِ يِمْٻٜ طُطْٻٜ کَوْرِتِي، سٜيْ اٛ نَنِ جُرُمْطُمْ مَٻّٜ، نغَمْ اٜ ٻٜ تٛرّٛو، وَلَا بَلَّيْطٛٻٜ، بٛ بَالِ طِ نغَلَا غَيْنَاکٛ؞ سٜيْ اٛ وِعِ تٛکُّٻٜمٛ، «غٜسٜ ٻٜنْدُطٜ اٜ طُوطِ، اَمَّا حُوٛوٻٜ طُوطَا؞ تٛرٜىٰ جٛومُ غٜسٜ طٜنْ لِلٛيَ حُوٛوٻٜ ندٜرْ غٜسٜ مَاکٛ؞» سٜيْ يٜىٰسُ نٛدِّ تٛکُّٻٜمٛ سَڤّٛ اٜ طِطٛ، اٛ حٛکِّٻٜ بَوْطٜ وُرْتِنْکِ غِنِّ اٜ يَمْطِتِنْکِ يِمْٻٜ دَغَ کٛو اِرِ طُمٜ ݧَوُ اٜ شِيَ نجَمُ؞ رَا اِنْطٜ لِلَاٻٜ سَڤّٛ اٜ طِطٛ ٻٜنْ: اَرَنْدٜ اٜ وٛودِ سِيمَنْ بِعٜتٜىٰطٛ بِيتُرُسْ، اٜ مِݧِرَاوٛ مَاکٛ اَنْدِرَاوُسْ، اٜ يَاکُبُ ٻِي جَبَدِ، اٜ مِݧِرَاوٛ مَاکٛ يَحَيَ، اٜ فِلِبُسْ، اٜ بَتِلٛومِ، اٜ تٛومَ، اٜ مَاتِيُ جَٻٛووٛ شٜىٰدٜ لٜيْدِ، اٜ يَاکُبُ ٻِي حَلْفَ، اٜ تَادِيُسْ، اٜ سِيمَنْ کَنَنِيَنْکٜىٰجٛ، ندٜنْ اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞ يٜىٰسُ لِلِ تٛکُّٻٜمٛ سَڤّٛ اٜ طِطٛ ٻٜنْ، اٛ وِعِٻٜ، «تٛع اٛنْ نجَحُ تٛ يِمْٻٜ نَاع يَحُودَنْکٛعٜنْ؞ طٛنْمَا تٛع اٛنْ نَتُّ غَرِيجٜ سَمَارِيَنْکٛعٜنْ؞ سٜيْ نِ نجَحٛنْ تٛ يِمْٻٜ اِسْرَاعِيلَ غَرْتُٻٜ بٛ بَالِ مَجُّطِ؞ نجَحٜىٰ، نغَعَجِنَنٛنْٻٜ، مبِعٛنْ، ‹لَامُ اَللَّه وَرِي حَادٜ؞› نجَمْطِتِنٜىٰ ݧَوْٻٜ، اُمِّنٜىٰ مَيْٻٜ دَغَ مَيْدٜ، نجَمْطِتِنٜىٰ غٛودُٻٜ ݧَوُ ݧَامٛوجُمْ لَرَلْ، مبُرْتِنَنٜىٰ يِمْٻٜ غِنِّ؞ مِ حٛکِّيعٛنْ بَوْطٜ يَمْطِتِنْکِ يِمْٻٜ شَاحُ، نغَمْ نٛنْ نجَمْطِتِنٜىٰ يِمْٻٜ شَاحُ؞ تٛع اٛنْ نجٛغٛ شٜىٰدٜ جِينَارِ، کٛو شٜىٰدٜ اَجُرْفَارِ، کٛو شٜىٰدٜ نجَمْندِ مبٛطٜىٰرِ؞ ندٜنْ تٛع اٛنْ نجَادُ اٜ جَکَارٜ، کٛو تٛغّٛوجٜ طِطِ، کٛو ڤَطٜ کٛيْطٜ طِطِ، کٛو سَوْرُ، نغَمْ کُوٛووٛ حَانِي حٛکّٜىٰ ݧَمْندُ؞ «فُو غَرِيرِ کٛو غَرِيٜلْ ڤَمَرٜلْ تٛ نَتُّطٛنْ، طَٻِّتٜىٰ نٜطّٛ مٛ نغِکُّ بٛطُّمْ، نجٛوطٛوطٛنْ وُرٛ مَاکٛ نَا اٛنْ اَلِي وِغٜىٰرٜ ندٜنْ؞ تٛ اٛنْ نَتِّي وُرٛ نغٛنْ، شِلْمِنٜىٰ؞ تٛ يِمْٻٜ وُرٛ نغٛنْ نجَٻَّکٜعٛنْ بٛطُّمْ، اَلٜىٰ بَرْکَ مٛوطٛنْ جٛوطٛو دٛوْ مَٻّٜ؞ اَمَّا تٛ ٻٜ نجَٻَّاکِعٛنْ بٛطُّمْ، اَلٜىٰ بَرْکَ مٛوطٛنْ وَرْتَ تٛ مٛوطٛنْ؞ فُو مٛ جَٻَّاکِعٛنْ، کٛو وَݧِ کٛ مبِيطٛنْ، تٛ اٛنْ مبُرْتَکٜ وُرٛ نغٛنْ کٛو غَرِيرِ ندِنْ، ڤِطّٜىٰ سٛلَّارٜ کٛيْطٜ مٛوطٛنْ؞ اٜ مِ وِعَعٛنْ غٛونغَ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ سٛدٛمْ اٜ غٛمٛورَ دٛوْ يِمْٻٜ غَرِيرِ ندِنْ طٛنْ؞ «رَطُّمْ، اٜ مِ لِلَعٛنْ بٛنٛ مبَالٛيْ شَکَ شَافَالِ؞ نغَمْ نٛنْ، ڤَامَنٜىٰ کٛعٜ مٛوطٛنْ نٛ بٛولٜ نغَطَتَ، طٛنْمَا نغَرْتٜىٰ ٻٜ کَلَّا بٛ ڤٛولِ؞ ڤَامَنٜىٰ يِمْٻٜ، نغَمْ ٻٜ نجَارَيْعٛنْ يٜىٰسٛ مَوْٻٜ، ٻٜ ڤِيَعٛنْ ندٜرْ شُوطِ دٛعَارٜ مَٻّٜ، ٻٜ نجَارَعٛنْ يٜىٰسٛ مَوْٻٜ لٜيْدِ اٜ لَامِيٻٜ، نغَمْ اٛنْ تٛکُّٻٜيَمْ اٛنْ کٛکَّيْٻٜ حَبَرُ اَمْ؞ نٛنْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ کَمْٻٜ اٜ يِمْٻٜ نَاع يَحُودَنْکٛعٜنْ؞ فُو شَرٜلْ نغٜلْ طُمْ نَنْغِعٛنْ طُمْ يَارِعٛنْ يٜىٰسٛ لَامُ، تٛع اٛنْ نغَنُّ دٛوْ نٛ مٜتِرْتٛنْ، کٛو کٛ مبِعٛتٛنْ، نغَمْ ندٜرْ شَرٜلْ نغٜلْ طُمْ وِعَيْعٛنْ کٛ مبِعٛتٛنْ؞ نغَمْ نَاع طُمْ اٛنٛنْ مٜتَتَ، اَمَّا طُمْ رُوحُ ݧَاکٛ مٛوطٛنْ مٛ دٛوْ مٜتَتَ ندٜرْ کٛنْدُطٜ مٛوطٛنْ؞ «نٜطّٛ حٛکِّتِرَيْ سَکِرَاوٛ مُوطُمْ طُمْ وَرَمٛ، ݧَاکٛ مَا حٛکِّتِرَيْ ٻِطّٛ مُوطُمْ؞ ٻِٻّٜ اُمَّنْتٛ دَݧٛوٻٜ مَٻّٜ، ٻٜ نغَطَ طُمْ وَرَٻٜ؞ کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ اَمَّا مُݧُطٛ حَا رٜعِرْدٜ حِسَيْ؞ تٛ يِمْٻٜ تٛرِّيعٛنْ ندٜرْ وٛنْدِ غَرِيرِ، ندٛغّٜىٰ نجَحٛنْ وٛنْدِ غَرِيرِ؞ اٜ مِ وِعَعٛنْ غٛونغَ، کٛ نجَحِدٛنْ غَرِيجٜ اِسْرَاعِيلَ فُو، ٻِي نٜطّٛ وَرْتٛيَيْ؞ «اٜکِّتٛتٛوطٛ ٻُرَتَا مٛودِبّٛ مُوطُمْ، مَشُّطٛ بٛو ٻُرَتَا جٜيْطٛمٛ؞ اٜکِّتٛتٛوطٛ نَنَيْ بٜلْطُمْ تٛ وَرْتِي بٛ مٛودِبّٛ مُوطُمْ، مَشُّطٛ مَا نَنَيْ بٜلْطُمْ تٛ وَرْتِي بٛ جٜيْطٛمٛ؞ تٛ ٻٜ نٛدِّرِي جٛومُ وُرٛ اٛنْ بَعَلْجَبُلْ لَامِيطٛ غِنِّ، ٻٜ ٻُرَيْ وِيکِ کٛ حَلِّ دٛوْ ٻٜ وُرٛ نغٛنْ! «نغَمْ نٛنْ، تٛع اٛنْ کُلُ يِمْٻٜ، نغَمْ وَلَا غٛطُّمْ اٛمْبَاطُمْ طُمْ اٛمْتَتَاکٜ، نٛنْ مَا وَلَا شُوطِيطُمْ طُمْ سُورِتَتَاکٜ؞ کٛ مبِيمِعٛنْ ندٜرْ ݧِوْرٜ، مبِعٜىٰکَ ݧَلَوْمَ، نٛنْ مَا کٛ نَنْطٛنْ تٛ اَمْ اٜ سُوطٜ، مبِعٜىٰکَ اٜ نجَيْرِ؞ تٛع اٛنْ کُلُ وَرٛوٻٜ ٻَنْدُ نٜطّٛ، اَمَّا ٻٜ مبَاوَتَا وَرْکِ يٛنْکِ مَاکٛ؞ سٜيْ نِ کُلٛنْ اٛنْ طٛنْ بَاوَيْطٛ حَلْکَ ٻَنْدُ اٜ يٛنْکِ فُو ندٜرْ وُرٛ حِيتٜ؞ نَاع شٛلٛيْ طِطٛيْ اٜ شٛورٜىٰ يَمْندٜ غٛعٛ؟ فُو اٜ نٛنْ وَلَا کٛو غٛعٛتٜلْ مَاکٛيْ بَاتَيْنغٜلْ نَا اٜ يِدّٜ ݧَاکٛ مٛوطٛنْ مٛ دٛوْ؞ کٛو غَاسَ کٛعٜ مٛوطٛنْ مَا فُو کَ لِمَامَ؞ نغَمْ نٛنْ، تٛع اٛنْ کُلُ، اٛنْ ٻُرِي شٛلٛيْ طُطْکٛيْ؞ «کٛو مٛيٜ جَٻُطٛيَمْ يٜىٰسٛ يِمْٻٜ، مِ جَٻَيْمٛ يٜىٰسٛ ݧَاکٛ اَمْ مٛ دٛوْ؞ اَمَّا فُو غَݧُطٛيَمْ يٜىٰسٛ يِمْٻٜ، مِنْ مَا مِ وَݧَيْمٛ يٜىٰسٛ ݧَاکٛ اَمْ مٛ دٛوْ؞ «تٛع اٛنْ کَمّٛ مِ وَرٛيِي وَدَّنْکِ دُونِيَارُ جٛنْدٜ جَمْ؞ مِ وَرٛيَايِ نغَمْ وَدُّکِ جٛنْدٜ جَمْ، سٜيْ نِ حَوْرٜ؞ مِ وَرِي نغَمْ مِ وَدَّ سٜنْدِرْکِ حَکُّندٜ ٻِطّٛ اٜ ݧَاکٛ مُوطُمْ، ٻِطّٛ دٜبّٛ اٜ مَدُوجٛ مُوطُمْ، دٜبّٛ بٛو اٜ اٜسِرَاوٛ مُوطُمْ دٜبّٛ؞ ٻٜ نجٛوطٛدِطَا وُرٛ غٛعٛ ٻٜ نغَرْتَيْ وَݧْوَݧْٻٜ مَاطَ؞ «کٛو مٛيٜ ٻُرِ يِطُکِ ݧَاکٛ مُوطُمْ کٛو مَدُوجٛ مُوطُمْ دٛوْ اَمْ، اٛ فٛتَايِ وَرْتُکِ تٛکُّطٛيَمْ؞ طٛنْمَا فُو ٻُرْطٛ يِطُکِ ٻِطّٛ مُوطُمْ دٛوْ اَمْ، اٛ فٛتَايِ وَرْتُکِ تٛکُّطٛيَمْ؞ ندٜنْ فُو مٛ حٛشَّايِ غَافَانغَلْ مُوطُمْ تٛکِّيَمْ، اٛ فٛتَايِ وَرْتُکِ تٛکُّطٛيَمْ؞ فُو غِطّٛ حِسْنُکِ يٛنْکِ مُوطُمْ، اٛ دُلَّيْکِ؞ اَمَّا فُو دُلُّطٛ يٛنْکِ مُوطُمْ نغَمْ اَمْ، اٛ حِسْنَيْکِ؞ «فُو جَٻُطٛعٛنْ جَٻِييَمْ، طٛنْمَا فُو جَٻُطٛيَم جَٻِي اٛنْ طٛنْ لِلٛيْطٛيَمْ؞ کٛو مٛيٜ جَٻُطٛ اَنَّبِيجٛ نغَمْ اٛ اَنَّبِيجٛ، اٛ حٜٻَيْ مبَرْجَارِ اَنَّبِيجٛ؞ ندٜنْ کٛو مٛيٜ جَٻُطٛ اَادِلِيجٛ نغَمْ اٛ اَادِلِيجٛ، اٛ حٜٻَيْ مبَرْجَارِ اَادِلِيجٛ؞ کٛو مٛيٜ کٛکُّطٛ ٻُرْطٛ فَمْطُکِ ندٜرْ تٛکُّٻٜيَمْ ٻٜعٜ کٛو ندِيَمْ ڤٜوْطَمْ ندٜرْ جَرْدُغٜلْ نغَمْ اٛ تٛکُّطٛيَمْ، اٜ مِ وِعَعٛنْ غٛونغَ، اٛ دُلَّتَا حٜٻُکِ مبَرْجَارِ؞» ندٜ يٜىٰسُ يٛتِّنِ کٛ وِعَتَ تٛکُّٻٜمٛ سَڤّٛ اٜ طِطٛ، سٜيْ اٛ اُمِّي دَغَ طٛنْ، اٛ دِلِّ، اٜ مٛ اٜکِّتِنَ، اٜ مٛ وَعَجِنَ ندٜرْ غَرِيجٜ؞ اٜ شَرٜلْ نغٜلْ، يَحَيَ غَطٛووٛ بَڤْتِسْمَ سُرَامَ ندٜرْ سُودُ شُرَلْ؞ ندٜ اٛ نَنِ حَبَرُ کٛ اَلْمَسِيحُ وَطَتَ، سٜيْ اٛ نٛدِّ وٛٻّٜ ندٜرْ تٛکُّٻٜمٛ اٛ لِلِٻٜ تٛ مَاکٛ نغَمْ ٻٜ پَمَمٛ، ٻٜ مبِعَ، «اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟» يٜىٰسُ نٛوتِي، وِعِٻٜ، «نجَحٜىٰ، مبِعٛنْ يَحَيَ کٛ نَنُطٛنْ اٜ کٛ نغِيطٛنْ: وُمْٻٜ اٜ مبُمْتَ، جَرَاٻٜ اٜ نجَاٻَ، غٛودُٻٜ ݧَوُ ݧَامٛوجُمْ لَرَلْ اٜ نجَمْطِتِنٜىٰ، ڤَحُٻٜ اٜ نَنَ، مَيْٻٜ اٜ اُمِّنٜىٰ، ٻٜ نغَلَنَا اٜ نغَعَجِنَنٜىٰ حَبَرُ بٜلْطُمْ؞ اٛ بَرْکِطِنَاطٛ نٜطّٛ مٛ اَلَايِ حٛولَاکِيَمْ؞» غَطَ لِلَاٻٜ ٻٜنْ ندِلِّ، سٜيْ يٜىٰسُ فُطِّ مٜتَنْکِ يِمْٻٜ دٛوْ يَحَيَ، اٛ وِعِٻٜ، «طُمٜ نجَاطٛنْ رَارٛيْکِ ندٜرْ لَدّٜ؟ کُطٛلْ نغٛلْ حٜنْدُ دِمْبَتَ ندَارٛيْطٛنْ؟ تٛ نَاع نٛنْ، طُمٜ نجَاطٛنْ رَارٛيْکِ؟ نٜطّٛ ٻٛرْنِيطٛ لِمْشٜ بٛطّٜ؟ نَاع نٛنْ، نغَمْ ٻٛرْنٛتٛوٻٜ لِمْشٜ بٛطّٜ اٜ لَامٛرْدٜ ٻٜ نغٛنِ؞ تٛو، طُمٜ نجَاطٛنْ رَارٛيْکِ؟ اَنَّبِيجٛ؟ اٜ مِ وِعَعٛنْ غٛونغَ، اٛ ٻُرِي اَنَّبِيجٛ؞ کَنْکٛ وٛنِ مٛ اَللَّه وِعِ ندٜرْ اَايَارٜ، ‹رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ اٛ مٛعِّنَنْمَا لَاوٛلْ؞› اٜ مِ وِعَعٛنْ غٛونغَ، ندٜرْ ٻٜ رٜوْٻٜ ندَݧِ فُو وَلَا ٻُرْطٛ يَحَيَ غَطٛووٛ بَڤْتِسْمَ مَنْغُ؞ فُو اٜ نٛنْ، ٻُرْطٛ فَمْطُکِ ندٜرْ لَامُ اَللَّه ٻُرِيمٛ مَنْغُ؞ دَغَ جَامَنُ يَحَيَ غَطٛووٛ بَڤْتِسْمَ حَا وَدُّکِ حَنْدٜ، لَامُ اَللَّه اٜ تٛرّٜىٰ؞ تٛرّٛوٻٜ لَامُ طُمْ اٜ نغِطِ تٜىٰتَطُمْ اٜ سٜمْبٜ؞ نغَمْ دٜفْتٜ اَنَّبٛعٜنْ فُو اٜ اَتَّوْرَ مٜتِي دٛوْ لَامُ طُمْ نَا يَحَيَ غَطٛووٛ بَڤْتِسْمَ وَرِ؞ تٛ اٛنْ نجَٻَيْ کٛ ٻٜ مبِعِ، يَحَيَ وٛنِ اِلِيَ مٛ طُمْ وِعِ وَرَيْ؞ غٛودُطٛ نٛڤِّ نَنُکِ فُو نَنَ؞ «کٛ نَنْدِنَيْمِ يِمْٻٜ جَامَنُ طُعُمْ؟ اٜ ٻٜ نَنْدِ اٜ سُکَحٛيْ نجٛوطِيکٛيْ ندٜرْ لُومٛ اٜ نٛدِّندِرَ، اٜ مبِعَ، ‹مِنْ ندُودَنِيعٛنْ دُودَاندُ، اَمَّا اٛنْ نغَمَايِ؞ مِنْ مبٛيِ بٛ غٛطّٛ مَايِ، اَمَّا اٛنْ مبٛيَايِ؞› نغَمْ يَحَيَ غَطٛووٛ بَڤْتِسْمَ وَرِي ݧَامَتَا ݧَمْندُ يَرَتَا ندِيَمْ اِنَبٛجَمْ، سٜيْ ٻٜ مبِعِ، ‹اٜ مٛ وٛودِ غِنّٛلْ؞› ٻِي نٜطّٛ بٛو وَرِي اٜ ݧَامَ اٜ يَرَ، سٜيْ ٻٜ مبِعِ، ‹رَا اٛعٛ، اٛ بٜىٰلَاطٛ اٛ جَرٛووٛ، حِغٛ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؞› فُو اٜ نٛنْ، تٛکُّٻٜ لَاوٛلْ اَللَّه فُو اٜ ٻٜ کٛلَّ کَنْغٛلْ وٛنِ غٛونغَوٛلْ؞» سٜيْ اٛ فُطِّ حَٻَنْکِ غَرِيجٜ طٜ اٛ وَطِ کُوطٜ کَيْطِنِيطٜ ندٜرْ مَاجٜ نغَمْ يِمْٻٜ غَرِيجٜ طٜنْ تُوبَايِ؞ اٛ وِعِ، «يِمْٻٜ غَرِيرِ کٛرَسِنْ، اٛنْ مبٛنِي! يِمْٻٜ غَرِيرِ بٜتَسَيْدَ، اٛنْ مبٛنِي! دَا کُوطٜ کَيْطِنِيطٜ غَطَاطٜ ندٜرْ مٛوطٛنْ طٜ نغَطَنَامَ يِمْٻٜ تَايَ اٜ سِدٛنْ، دَا ٻٜ ٻٛرْنَکٜ کٛلْتٜ کٛلَّيْطٜ وَنَّارٜ ٻٜ نجٛوطَکٜ ندٜرْ تٛوکَ نغَمْ حٛلُّکِ ٻٜ تُوبِي؞ اَمَّا اٜ مِ وِعَعٛنْ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ تَايَ اٜ سِدٛنْ دٛوْ مٛوطٛنْ؞ اٛنٛنْ بٛو، يِمْٻٜ غَرِيرِ کَفَرْنَحُمْ، اٛنْ کَمِّي طُمْ حٛشَّيْعٛنْ يَاکِ دٛوْ؟ نَاع نٛنْ! طُمْ نَتِّنَيْعٛنْ ندٜرْ نغَيْکَ حِيتٜ؞ دَا کُوطٜ کَيْطِنِيطٜ غَطَاطٜ ندٜرْ مَاطَ طٜ نغَطَامَ ندٜرْ غَرِيرِ سٛدٛمْ، دَا اٜ ندِ طٛنْ حَا جٛونِ؞ اَمَّا اٜ مِ وِعَعٛنْ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ سٛدٛمْ دٛوْ مٛوطٛنْ؞» اٜ شَرٜلْ نغٜلْ يٜىٰسُ وِعِ، «مِ يٜتِّيمَ، ݧَاکٛ اَمْ مٛ دٛوْ، جٛومِرَاوٛ دٛوْ اٜ لٜيْ، نغَمْ اَ سُوطِي فِي طُعُمْ تٛ غٛودُٻٜ فَامُ اٜ اَنْدَلْ، اَ حٛلِّيطُمْ ٻِکّٛيْ ڤَمَرٛيْ؞ نٛنْ ݧَاکٛ اَمْ، نغَمْ نٛنْ وٜلَنْمَا نغَطَا؞» سٜيْ اٛ وِعِ يِمْٻٜ، «ݧَاکٛ اَمْ حٛکِّييَمْ کٛو طُمٜ؞ وَلَا اَنْدُطٛ مٛيٜ وٛنِ ٻِطّٛ اٛنْ سٜيْ نِ ݧَاکٛ اٛنْ، نٛنْ مَا وَلَا اَنْدُطٛ ݧَاکٛ اٛنْ سٜيْ نِ ٻِطّٛ اٛنْ، اٜ مٛ ٻِطّٛ اٛنْ يِطِ اَنْدِنَ ݧَاکٛ اٛنْ؞ «نغَرٜىٰ تٛ اَمْ اٛنْ فُو دٛنْدِيٻٜ دٛݝْلٜ تٜدُّطٜ، مِ حٛکَّيْعٛنْ سِوْتَارٜ؞ تٛکّٜىٰ کٛ مبِعَيْمِعٛنْ؞ اٜکِّتٜىٰ تٛ اَمْ، نغَمْ اٜ مِ وٛودِ حَکِّيلٛ، مِ لٜسْتِنْطٛ حٛورٜ، ندٜنْ ٻٜرْطٜ مٛوطٛنْ مبَلْتٛتٛ؞ نغَمْ کٛ مبِيمِعٛنْ نغَطٛنْ طُمْ سَطَا وَطُکِ، ندٜنْ دٛنْغَلْ اَمْ تٜدَّا؞» اٜ شَرٜلْ نغٜلْ طُمْ ݧَلْندٜ سِوْتَارٜ؞ يٜىٰسُ اٜ يَحَ ندٜرْ نغٜسَ اَلْکَمَارِ، سٜيْ تٛکُّٻٜمٛ نَنِ وٜىٰلٛ ٻٜ ڤُطِّ ٻٛرُکِ شَمّٜىٰجٜ مَيْرِ اٜ ٻٜ ݧَامَ؞ اَمَّا ندٜ وٛٻّٜ فَارِسَنْکٛعٜنْ نغِعِ نٛنْ، مبِعِ يٜىٰسُ، «رَا تٛکُّٻٜمَ اٜ نغَطَ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؞» سٜيْ يٜىٰسُ وِعِٻٜ، «اٛنْ مٜىٰطَايِ جَنْغُکِ کٛ دَوْدَ وَطِ ندٜ نَنِ وٜىٰلٛ، کَنْکٛ اٜ غٛنْدُٻٜ اٜ مَاکٛ؟ اٛ نَتِّ لُکُرُ سٜنِيطُمْ، اٛ ݧَامِ بُرٛودِ شٜنِيطُمْ، اٛ حٛکّٛرِ جَادٛوٻٜ اٜ مَاکٛ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ؞ کٛو اٛنْ مٜىٰطَايِ جَنْغُکِ ندٜرْ اَتَّوْرَ نٛ اَرْدِيٻٜ دِينَ نغٜوِرْتَ دٛوکَ ݧَلْندٜ سِوْتَارٜ ندٜرْ وُرٛ شٜنِينغٛ، اَمَّا طُمْ وَرْتَايِ حَکّٜ؟ اٜ مِ وِعَعٛنْ، رَا ٻُرْطٛ وُرٛ شٜنِينغٛ طٛعٛ؞ اَمَّا دَا اٛنْ اَنْدُنٛو مَعَنَ اَايَارٜ ندٜعٜ بِعُندٜ، ‹اٜ مِ يِطِ کٛلّٛنْ يُرْمٜىٰندٜ، نَاع سَکُّکِ شَکِّرِ،› دَا اٛنْ کِيتَاکِ ٻٜ نغَطَايِ حَکّٜ؞ نغَمْ ٻِي نٜطّٛ وٛنِ جٛومُ ݧَلْندٜ سِوْتَارٜ؞» سٜيْ يٜىٰسُ اَلِ طٛنْ دِلِّ، نَتِّ سُودُ دٛعَارٜ مَٻّٜ؞ اٜ وٛودِ غٛطّٛ مٛ جُنْغٛ جَرَانغٛ ندٜرْ مَيْرُ؞ سٜيْ فَارِسَنْکٛعٜنْ پَمِ يٜىٰسُ، مبِعِ، «اَتَّوْرَ جَٻِي طُمْ يَمْطِتِنَ ݧَلْندٜ سِوْتَارٜ؟» ٻٜ مبِعُ نٛنْ نغَمْ ٻٜ کٜٻَ کٛ ٻٜ نغُلِّرٛيْتٛومٛ؞ سٜيْ يٜىٰسُ وِعِٻٜ، «مٛيٜ ندٜرْ مٛوطٛنْ تٛ اٜ وٛودِ مبَالَ غٛعٛ تٛ نغَ يَنِي ندٜرْ نغَيْکَ ݧَلْندٜ سِوْتَارٜ، اٛ جٛغَتَاکٛنغَ اٛ اِتّٛيَنغَ؟ تٛو! نٜطّٛ ٻُرِي مبَالَ دَرَجَ نَاع سٜطَّ! نغَمْ نٛنْ، اَتَّوْرَ حَطَايِ طُمْ وَطَ کٛ وٛوطِ ݧَلْندٜ سِوْتَارٜ؞» سٜيْ اٛ وِعِ نٜطّٛ اٛنْ، «فٛرْتُ جُنْغٛ مَاطَ؞» سٜيْ اٛ فٛرْتِنغٛ، سٜيْ نغٛ يَمْطِتِ، نغٛ وَرْتِ بٛ وٛعٛتٛ نغٛنْ؞ اَمَّا فَارِسَنْکٛعٜنْ ٻٜنْ مبُرْتِي مٜدِّ دٛوْ نٛ ٻٜ مبَرْدَتَ يٜىٰسُ؞ ندٜ يٜىٰسُ فَامِ کٛ ٻٜ شِرْيٛتٛو، سٜيْ اٛ اُمِّي اٛ اَلِ وِغٜىٰرٜ ندٜنْ؞ سٜيْ يِمْٻٜ طُطْٻٜ تٛکِّمٛ، اٛ يَمْطِتِنِٻٜ ٻٜ فُو، اٛ وَغِّنِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞ طُعُمْ فُو وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ، وِيکِ، «اٛعٛ وٛنِ مَشُّطٛ مٛ شُٻُمِ، مٛ نغِطُمِ، اٜ مِ نَنَ بٜلْطُمْ مَاکٛ نَاع سٜطَّ؞ مِ حٛکَّيْمٛ رُوحُ اَمْ، اٛ حٛکَّيْ لٜݧِ حَبَرُ کِسْندَمْ اَمْ؞ اٛ يٜدَّتَا اٛ مٜتَتَا سٜمْبٜىٰ، وَلَا نَنَيْطٛ حٛولٛ حٛنٛنْدٜ مَاکٛ دٛوْ طَتٜ؞ اٛ حٜىٰݧِتَتَا يٜوُکِ پٛمْبَلْ ٻَدِينغَلْ يٜوُکِ؞ اٛ ݧِفَتَا فِتِلَارُ ٻَدِيندُ وَاتُکِ، نَا اٛ وَطِي اَادِلَاکُ حٜٻِ جَالٛرْغَلْ دٛوْ حَلّٜىٰندٜ؞ لٜݧِ فُو نغَطَيْ کَمُّندٜ دٛوْ مَاکٛ؞» سٜيْ طُمْ وَدَّنِمٛ غٛطّٛ ڤَحٛ بُمْطٛ غٛودُطٛ غِنّٛلْ؞ يٜىٰسُ بٛو يَمْطِتِنِمٛ، اٛ وَرْتِ اٜ مٛ مٜتَ، اٜ مٛ يِعَ؞ کَوْرُتُٻٜ فُو کَيْطِنِ، مبِعِ، «اٜ يِيکِ مٛوطٛنْ کٛو اٛعٛ وٛنِ ٻِطّٛ دَوْدَ؟» اَمَّا ندٜ فَارِسَنْکٛعٜنْ نَنِ نٛنْ، ٻٜ مبِعِ، «اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ؞» اَمَّا يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، اٛ وِعِٻٜ، «لَامُ فُو شٜنْدِيطُمْ اٜ وَݧْوَݧْتِرَ، طُمْ لَلَّيْ؞ نٛنْ مَا تٛ غَرِيرِ کٛو وُرٛ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو؞ تٛ شٜيْطَنْ اٜ وُرْتِنَ غِنِّ شٜيْطَنْ ندٜرْ لَامُ شٜيْطَنْ، شٜيْطَنْ سٜنْدَکٜ اٜ وَݧْوَݧْتِرَ وٛنْ طٛنْ؞ تٛ لَامُ مَاکٛ سٜنْدَکٜ، نٛيٜ لَامُ طُمْ دَرٛرْتٛو؟ تٛ اٜ مِ وُرْتِنِرَ غِنِّ ندٜرْ بَوْطٜ بَعَلْجَبُلْ، اٜ بَوْطٜ مٛيٜ تٛکُّٻٜعٛنْ مبُرْتِنِرْتَطِ؟ نغَمْ نٛنْ تٛکُّٻٜعٛنْ کٛلَّيْ اٛنْ نغَلَا غٛونغَ؞ اَمَّا، تٛ اٜ مِ وُرْتِنَ غِنِّ ندٜرْ بَوْطٜ رُوحُ اَللَّه، تٛو، حٛلِّي لَامُ اَللَّه وَرَنِيعٛنْ؞ «نٛ وَطَتَ طُمْ وَاوَ نَتُّکِ وُرٛ نٜطّٛ شٜمْبِطّٛ طُمْ تٜىٰتَنَمٛ کٛ اٛ وٛودِ، نَاع سٜيْ تٛ طُمْ اَرْتِي حَٻُّکِمٛ؟ ندٜنْ طُمْ وَاوَ حٛشُّکِ کٛ اٛ وٛودِ ندٜرْ وُرٛ نغٛنْ؞ «مٛ وٛنْدَا اٜ اَمْ فُو، اٛ غَݧٛ اَمْ؞ مٛ وَلَّايِيَمْ مٛٻْتُکِ فُو، اٛ شَنْکِتٛووٛ؞ نغَمْ نٛنْ، اٜ مِ وِعَعٛنْ، طُمْ وَاوَيْ يَافَنَاکِ يِمْٻٜ حَکّٜ اٜ کٛو اِرِ طِيٜ حَالَاجِ طِ مبٛوطَا طِ ٻٜ مٜتِ، اَمَّا بِعُطٛ کٛ وٛوطَا دٛوْ رُوحُ اَللَّه اٛ يَافَنْتَاکٜ؞ فُو بِعُطٛ کٛ وٛوطَا دٛوْ ٻِي نٜطّٛ، طُمْ وَاوَيْ يَافَنَاکِمٛ؞ اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ حَا اَبَدَا؞ «لٜکِّ بٛطْکِ اٜ رِمَ ٻِکّٛيْ مبٛطْکٛيْ، نٛنْ مَا لٜکِّ کِ وٛوطَا اٜ رِمَ ٻِکّٛيْ کٛيْ مبٛوطَا؞ کٛو کِيٜ لٜکِّ اٜ اَنْدِرٜىٰ ٻِکّٛيْ مَاکِ؞ اٛنٛنْ بٛولٜ کَلُّطٜ! نٛ وَطَتَ اٛنٛنْ کَلُّٻٜ مٜتٛنْ کٛ وٛوطِ؟ نغَمْ حٛنْدُکٛ نٜطّٛ اٜ مٜتَ کٛ وٛنِ ندٜرْ ٻٜرْندٜ مُوطُمْ؞ نٜطّٛ مٛ نغِکُّ بٛطُّمْ اٜ وُرْتِنَ فِي بٛطُّمْ دَغَ ندٜرْ ٻٜرْندٜ مُوطُمْ؞ نٛنْ مَا نٜطّٛ کَلُّطٛ اٜ وُرْتِنَ حَلّٜىٰندٜ دَغَ ندٜرْ ٻٜرْندٜ مُوطُمْ؞ «اٜ مِ وِعَعٛنْ، ندٜرْ ݧَلْندٜ جَانغٛ کٛو مٛيٜ دٛولٜ وِعَ اَللَّه نغَمْ طُمٜ وِعِ کٛو طٜيٜ بٛلِيطٜ مٜىٰرٜىٰجٜ؞ دٛوْ بٛلِيطٜ طٜ مبِعُطَا طُمْ وَطِرَنْتَمَ کِيتَ، کٛو طٜ نَنْغُمَا، کٛو طٜ مبُرْتِنْمَا؞» سٜيْ وٛٻّٜ ندٜرْ مٛودِٻّٜ اَتَّوْرَ اٜ فَارِسَنْکٛعٜنْ مبِعِمٛ، «مٛودِبّٛ، اٜ مِنْ نغِطِ يِيکِ غٛطُّمْ کَيْطِنِيطُمْ دَغَ تٛ مَاطَ تَبِّتِنَيْطُمْ اَللَّه لِلٛيْمَا؞» سٜيْ يٜىٰسُ نٛوتِي، وِعِٻٜ، «يِمْٻٜ جَامَنُ طُعُمْ کَلُّٻٜ ٻٜ کُلَتَا اَللَّه، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛ اَنَّبِ اِنُوسَ؞ نغَمْ نٛنْ، نٛ اِنُوسَ وَطِرِ بَلْطٜ تَتِ جٜمَّ اٜ ݧَلَوْمَ ندٜرْ وٛنْغَ لِنْغَ مَنْغَ، نٛنْ مَا ٻِي نٜطّٛ وَطِرْتَ بَلْطٜ تَتِ جٜمَّ اٜ ݧَلَوْمَ ندٜرْ يٜنَاندٜ؞ اٜ ݧَلْندٜ جَانغٛ يِمْٻٜ غَرِيرِ نِينٜبَ ٻٜ اُمّٛدٛتٛ اٜ يِمْٻٜ جَامَنُ طُعُمْ؞ ٻٜ کٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَمْٻٜ، ندٜ ٻٜ نَنِ وَعَجُ اَنَّبِ اِنُوسَ، ٻٜ تُوبِي؞ رَا بٛو ٻُرْطٛ اِنُوسَ طٛعٛ؞ ݧَلْندٜ جَانغٛ لَامِيطٛ لٜيْدِ فٛمْبِنَ دٜبّٛ اٛ اُمّٛدٛتٛ اٜ يِمْٻٜ جَامَنُ طُعُمْ؞ اٛ حٛلَّ کٛ ٻٜ نغَطِ طُمْ وٛوطَا، نغَمْ کَنْکٛ اٛ وَرٛيِي دَغَ ٻَدَاکِ نَنُکِ فَامُ اَنَّبِ سُلٜيْمَانُ؞ رَا بٛو ٻُرْطٛ سُلٜيْمَانُ طٛعٛ؞ «تٛ غِنّٛلْ وُرْتَکٜ ندٜرْ ٻَنْدُ نٜطّٛ، نغٛلْ يَحَيْ تٛ بِغٜىٰجٜ جٛرْطٜ اٜ نغٛلْ طَٻِّتَ تٛ نغٛلْ سِوْتٛتٛو؞ اَمَّا تٛ نغٛلْ حٜٻَايِ، سٜيْ نغٛلْ وِعَ، ‹مِ سٛعّٛتٛ وُرٛ نغٛ مبُرْتٛيِيمِ؞› تٛ نغٛلْ وَرْتِي، نغٛلْ تَوِي وُرٛ نغٛنْ وَلَا غٛطُّمْ ندٜرْ، نغٛ وُووَامَ نغٛ مٛعِّنَامَ؞ سٜيْ نغٛلْ يَحَ نغٛلْ وَدّٛيَ غِنِّ جٛوٜىٰطِطِ ٻُرْطِنغٛلْ حَلُّکِ، طِ نَتَّ طِ نجٛوطٛو طٛنْ؞ ندٜنْ رٜعِرْدٜ نٜطّٛ اٛنْ ٻُرَيْ فُطّٛودٜ مَاکٛ حَلُّکِ؞ نٛنْ طُمْ وَرْتَنْتَ يِمْٻٜ جَامَنُ طُعُمْ کَلُّطُمْ؞» يٜىٰسُ اٜ مٜدَّ اٜ يِمْٻٜ طُطْٻٜ حَوْرُتُٻٜ، سٜيْ رَا مَدُوجٛ مَاکٛ اٜ مِݧِرَاٻٜ مَاکٛ نغَرِ ندَرِي يَاسِ، اٜ ٻٜ نغِطِ مٜدُّکِ اٜ مَاکٛ؞ سٜيْ غٛطّٛ وِعِمٛ، «مَدُوجٛ مَاطَ اٜ مِݧِرَاٻٜ مَاطَ اٜ تٛنْ ندَرِي يَاسِ، اٜ ٻٜ نغِطِ مٜدُّکِ اٜ مَاطَ؞» اَمَّا اٛ وِعِ بِيطٛمٛکَ اٛنْ، «مٛيٜ وٛنِ مَدُوجٛ اَمْ، ندٜنْ ٻٜيٜ نغٛنِ مِݧِرَاٻٜ اَمْ؟» سٜيْ اٛ سَڤِّي تٛکُّٻٜمٛ، اٛ وِعِ، «رَا مَدُوجٛ اَمْ اٜ مِݧِرَاٻٜ اَمْ طٛعٛ! نغَمْ کٛو مٛيٜ وَطِ کٛ ݧَاکٛ اَمْ مٛ دٛوْ يِطِ، کَنْکٛ وٛنِ مِݧِرَاوٛ اَمْ اٜ مَدُوجٛ اَمْ؞» ݧَلْندٜ ندٜنْ يٜىٰسُ وُرْتِي وُرٛ نغٛنْ، يَحِ جٛوطِي حَادٜ مبٜىٰلَ غَلِيلِ؞ يِمْٻٜ طُطْٻٜ کَوْرِتِ تٛ مَاکٛ نَاکِ اٛ نَتِّ کٛمِوَلْ اٛ جٛوطِي ندٜرْ مَاغَلْ دٛوْ ندِيَمْ؞ کَوْرُتُٻٜ فُو ندَرِي حَادٜ مبٜىٰلَ نغَنْ؞ سٜيْ اٛ حُوتِرِ مِسَالُ اٛ اٜکِّتِٻٜ اٜکِّتِنٛلْ فٜىٰرٜ‑فٜىٰرٜ طُطْنغٛلْ، اٛ وِعِ، «غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، شٛلِّ نغَرِ شُڤِّدِندِ؞ وٛنْدِ بٛو يَنِ ندٜرْ کَاپٜ، طٛنْ ندِ حٜٻَايِ لٜيْدِ طُنْدِ؞ ندِ فُطِ جَوْطُمْ نغَمْ لٜيْدِ ندِنْ لُغَّا؞ اَمَّا ندٜ نَانغٜ وُرْتٛيِي فِيِندِ، سٜيْ ندِ يٛورِ نغَمْ ندِ وَلَا طَطِ؞ وٛنْدِ اَوْدِ بٛو يَنِ ندٜرْ غِعٜ، سٜيْ غِعٜ طٜنْ مَوْنِ ٻِطِّندِ حَا ندِ وَاوَايِ وَطُکِ شَمّٜىٰجٜ؞ اَمَّا وٛنْدِ اَوْدِ يَنِ دٛوْ لٜيْدِ مبٛنْدِ ندِ فُطِ ندِ مَوْنِ ندِ وَطِ شَمّٜىٰجٜ؞ وٛنْدِ وَطِ غَبّٜ 100، وٛنْدِ وَطِ غَبّٜ 60، وٛنْدِ وَطِ 30؞» ندٜ يٜىٰسُ حٜىٰݧِ حٛکُّکِ مِسَالُ طُعُمْ، سٜيْ وِعِ، «غٛودُطٛ نٛڤِّ نَنُکِ فُو نَنَ؞» سٜيْ تٛکُّٻٜمٛ نغَرِ پَمِمٛ، مبِعِ، «نغَمْ طُمٜ مٜتِرَنْتَاٻٜ اٜ مِسَالُ نِحِ؟» اٛ نٛوتِي اٛ وِعِٻٜ، «اٛنٛنْ اٛنْ کٛکَّامَ فَامُ سِرُّ لَامُ اَللَّه، اَمَّا کَمْٻٜ ٻٜ کٛکَّاکَ؞ نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ، حَا طُمْ طُوطَنَمٛ؞ اَمَّا مٛ وَلَا فَامُ دٛوْ لَامُ اَللَّه، کٛو کٛ اٛ وٛودِ مَا طُمْ جَٻَيْطُمْ؞ کٛ وَطِ مٜتِرَنَيْمِ يِمْٻٜ اٜ مِسَالُ وٛنِ، نغَمْ کٛو ٻٜ ندَارِي ٻٜ نغِعَتَا، کٛو ٻٜ کٜتِّنْدَکٜ ٻٜ نَنَتَا، طٛنْمَا ٻٜ ڤَامَتَا؞ دٛوْ مَٻّٜ طُمْ حٜبِّنِ کٛ اَللَّه وِعِ دَغَ حٛنْدُکٛ اِشَايَ، ‹اٛنْ نغَطَيْ کَ نَنُکِ، اَمَّا اٛنْ ڤَامَتَا کٛو سٜطَّ؞ اٛنْ نغَطَيْ کَ رَارُکِ، اَمَّا اٛنْ نغِعَتَا کٛو سٜطَّ؞ نغَمْ ٻٜرْطٜ يِمْٻٜ ٻٜنْ طٛنْ طٜ شٜمْبِطّٜ، ندٜنْ ٻٜ شُکِّي نٛڤِّ مَٻّٜ، ٻٜ مَٻِّي غِتٜ مَٻّٜ، نغَمْ تٛع ٻٜ نغِعَ اٜ غِتٜ مَٻّٜ، تٛع ٻٜ نَنَ اٜ نٛڤِّ مَٻّٜ، ٻٜ ڤَامَ ندٜرْ ٻٜرْطٜ مَٻّٜ حَا ٻٜ نغَرْتَ تٛ اَمْ، مِ يَمْطِتِنَ ٻٜرْطٜ مَٻّٜ؞› «اَمَّا اٛنٛنْ، غِتٜ مٛوطٛنْ طٜ بَرْکِطِنَاطٜ نغَمْ اٜ طٜ نغِعَ، اٜ نٛڤِّ مٛوطٛنْ نغَمْ اٜ طِ نَنَ؞ اٜ مِ وِعَعٛنْ غٛونغَ، اَنَّبٛعٜنْ اٜ اَادِلِعٜنْ طُطْٻٜ نغِطِي نغِعَ کٛ نغِيطٛنْ، اَمَّا ٻٜ نغِعَايِ؞ ٻٜ بٛو نغِطِي نَنُکِ کٛ نَنٛتٛنْ، اَمَّا ٻٜ نَنَايِ؞ «تٛو، رَا مَعَنَ مِسَالُ دٜمٛووٛ اٛنْ طٛنْ؞ فُو نَنُطٛ حَبَرُ لَامُ اَللَّه اٛ حٜٻْتَايِطُمْ، سٜيْ شٜيْطَنْ وَرَ حٛشَّ کٛ طُمْ اَاوِ ندٜرْ ٻٜرْندٜ مَاکٛ؞ طُمْ طٛنْ وٛنِ مِسَالُ اَوْدِ نجَنُندِ دٛوْ طَتَلْ؞ جَنُندِ دٛوْ کَاپٜ وٛنِ مِسَالُ نَنُطٛ وٛلْدٜ اَللَّه طٛنْ اٜ طٛنْ اٛ جَٻَندٜ اٜ بٜلْطُمْ ٻٜرْندٜ؞ اَمَّا ندٜ وٛلْدٜ ندٜنْ وَلَا طَطِ ندٜرْ ٻٜرْندٜ مَاکٛ، اٛ مُݧَيْ شَرٜلْ سٜطَّ تَنْ؞ تٛ شَطٜىٰلٜ کٛو تٛرَّ وَرِي نغَمْ وٛلْدٜ ندٜنْ، طٛنْ اٜ طٛنْ اٛ يٛوفَندٜ؞ جَنُندِ ندٜرْ غِعٜ وٛنِ مِسَالُ نَنْٻٜ وٛلْدٜ اَللَّه، اَمَّا وَنُّکِ اٜ فِي دُونِيَارُ، اٜ يِدّٜ جَوْدِ، ٻِطِّ وٛلْدٜ ندٜنْ کَطِندٜ وَلُّکِٻٜ ٻٜ نغَطَ کٛ اَللَّه يِطِ؞ اَمَّا اَوْدِ شَاکَاندِ دٛوْ لٜيْدِ مبٛنْدِ وٛنِ مِسَالُ نَنْطٛ وٛلْدٜ اَللَّه، اٛ فَامِندٜ بٛطُّمْ، اٛ وَطِ کٛ اَللَّه وِعِ، اٛ حُوتِنِرِندٜ حَا اٛ حٜٻِ ٻٜيْدَارِ؞ غٛطّٛ حٜٻِ ندٜ 100، غٛطّٛ بٛو حٜٻِ ندٜ 60، غٛطّٛ حٜٻِ ندٜ 30؞» سٜيْ يٜىٰسُ حٛکِّٻٜ غٛطُّمْ مِسَالُ وِعِ، «لَامُ اَللَّه اٜ نَنْدِ اٜ غٛطّٛ نٜطّٛ اَاوُطٛ اَلْکَمَارِ مبٛنْدِ ندٜرْ نغٜسَ مُوطُمْ؞ اَمَّا جٜمَّ، کٛو مٛيٜ اٜ طَانِي، سٜيْ غٛطّٛ غَݧٛ مَاکٛ يَحِ سَاکِ اَوْدِ غٛطّٜ غٜىٰنٜ ندٜرْ اَلْکَمَارِ ندِنْ دِلِّ؞ ندٜ اَلْکَمَارِ ندِنْ فُطِ، مَوْنِ وَطِ شَمّٜىٰجٜ، سٜيْ غٜىٰنٜ طٜنْ مَا اُمّٛيِي؞ سٜيْ مَشُّٻٜ جٛومُ نغٜسَ کَنْ نغَرِ مبِعِمٛ، ‹جٛومُ وُرٛ، نَاع اَوْدِ مبٛنْدِ اَاوُطَا تٛ نغٜسَ مَاطَ؟ تٛو، نٛ وَطِ غٜىٰنٜ ڤُطٛيِ ندٜرْ مَيْرِ؟› اٛ وِعِٻٜ، ‹طُمْ غٛطّٛ غَݧٛ اَمْ وَطِ نٛنْ؞› سٜيْ مَشُّٻٜ ٻٜنْ مبِعِمٛ، ‹اَ يِطِ مِنْ نجَحَ مِنْ اِتَّطٜ؟› اَمَّا اٛ وِعِٻٜ، ‹نَاع نٛنْ؞ نغَمْ تٛ اٛنْ اِتَّطٜ، اٛنْ اِتَّيْ فُو اٜ اَلْکَمَارِ ندِنْ؞ اَلٜىٰطٜ طٜ مَوْنِدَ اٜ مَيْرِ نَا شَرٜلْ تَپُکِندِ وَطِ؞ تٛ شَرٜلْ تَپُکِندِ وَطِ، مِ وِعَيْ تَپٛوٻٜ ٻٜنْ اَرْتَ تَپُکِ غٜىٰنٜ طٜنْ ٻٜ کَٻَّطٜ کَٻّٜ‑کَٻّٜ، طُمْ وُلَطٜ؞ اَمَّا اَلْکَمَارِ ندِنْ، ٻٜ نغَطَندِ ندٜرْ رٜسِرْدٜ غَوْرِ اَمْ؞› » يٜىٰسُ فُطِّتِ حٛکِّٻٜ غٛطُّمْ مِسَالُ وِعِ، «لَامُ اَللَّه اٜ نَنْدِ اٜ غَبّٜلْ مَسْتَتْ نغٜلْ غٛطّٛ حٛشِّ اَاوِ ندٜرْ نغٜسَ مُوطُمْ؞ کَنْغٜلْ وٛنِ غَبّٜلْ ٻُرْنغٜلْ فَمْطُکِ ندٜرْ نغَبّٛيْ فُو، اَمَّا تٛ نغٜلْ مَوْنِ، سٜيْ نغٜلْ ٻُرَ کٛو نغٜلٜ لٜغّٜلْ مَوْنُکِ، حَا شٛلِّ نغَرَ نغَطَ شَٻّٜ دٛوْ لِشٜ مَاغٜلْ؞» يٜىٰسُ فُطِّتِ حٛکِّٻٜ غٛطُّمْ مِسَالُ وِعِ، «لَامُ اَللَّه اٜ نَنْدِ اٜ پُوفِنِرْطُمْ طُمْ غٛطّٛ دٜبّٛ حٛشِّ لَنْشِندِرِ اٜ شٛنْدِ اَلْکَمَارِ ڤٛوندِرْکٛيْ تَتٛيْ، حَا ندِ فُو ندِ پُوفِ؞» يٜىٰسُ مٜتِرَنِ حَوْرُتُٻٜ ٻٜنْ فُو فِي طُعُمْ اٜ مِسَالُ؞ فُو کٛ اٛ وِعَتَٻٜ اٜ مٛ حُوتِرَ مِسَالُ؞ اٛ وَطِي نٛنْ نغَمْ اٛ حٜبِّنَ کٛ اَللَّه وِعِ دَغَ حٛنْدُکٛ اَنَّبِيجٛ وِيکِ، «مِ مٜتِرَنَيْ يِمْٻٜ اٜ مِسَالُ؞ کٛ سُوطِي دَغَ تَغُکِ دُونِيَارُ، مِ وُرْتِنَيْطُمْ اٜ نجَيْرِ؞» سٜيْ يٜىٰسُ اَلِ يِمْٻٜ ٻٜنْ نَتِّ وُرٛ؞ تٛکُّٻٜمٛ نغَرِ تٛ مَاکٛ مبِعِمٛ، «وِعُمِنْ مَعَنَ مِسَالُ غٜىٰنٜ ندٜرْ نغٜسَ اَلْکَمَارِ؞» اٛ وِعِٻٜ، «اَاوُطٛ اَوْدِ مبٛنْدِ ندِنْ وٛنِ ٻِي نٜطّٛ؞ نغٜسَ کَنْ وٛنِ دُونِيَارُ؞ ندٜنْ اَوْدِ مبٛنْدِ ندِنْ وٛنِ ٻِٻّٜ لَامُ اَللَّه؞ غٜىٰنٜ طٜنْ نغٛنِ ٻِٻّٜ شٜيْطَنْ؞ اٛنْ طٛنْ غَݧٛ اَاوُطٛ غٜىٰنٜ طٜنْ، کَنْکٛ وٛنِ شٜيْطَنْ؞ شَرٜلْ تَپُکِندِ وٛنِ رٜعُکِ دُونِيَارُ، ندٜنْ تَپٛوٻٜنْدِ نغٛنِ مَلَاعِکَعٜنْ؞ نٛنْ نٛ طُمْ حَوْرِتِرْتَ غٜىٰنٜ طُمْ وُلَطٜ، نٛنْ طُمْ وَطَتَ اٜ رٜعُکِ دُونِيَارُ؞ ٻِي نٜطّٛ لِلٛيَيْ مَلَاعِکَعٜنْ مُوطُمْ، ٻٜ مبُرْتِنَ کٛو طُمٜ ڤٛوطٛوجُمْ يِمْٻٜ نغَطَ حَکّٜ اٜ فُو غَطٛوٻٜ کٛ حَلِّ ندٜرْ لَامُ اَللَّه؞ سٜيْ مَلَاعِکَعٜنْ ٻٜنْ کُبٛوٻٜ ندٜرْ حِيتٜ کَلُّنغٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞ ندٜنْ اَادِلِعٜنْ طٜلْکِتٛتٛ بٛ نَانغٜ ندٜرْ لَامُ ݧَاکٛ مَٻّٜ مٛ دٛوْ؞ فُو غٛودُطٛ نٛڤِّ نَنُکِ نَنَ؞ «لَامُ اَللَّه اٜ نَنْدِ اٜ جَوْدِ شُوطِيندِ اٜ نغٜسَ ندِ غٛطّٛ حٜٻْتِ، اٛ فُطِّتِ اٛ سُوطِندِ؞ ندٜرْ وٜلْوٜلٛ اٛ يَحِ، اٛ سٛورِ فُو کٛ اٛ وٛودِ اٛ سٛودِ نغٜسَ کَنْ؞ «طٛنْمَا لَامُ اَللَّه اٜ نَنْدِ اٜ نٜطّٛ شٛودٛووٛ اٜ سٛورِتٛو طَٻِّتٛووٛ لُعُ‑لُعُ غٛودُطُمْ شٜىٰدٜ؞ ندٜ اٛ يِعِ غٛعٛ غٛودُطُمْ شٜىٰدٜ طُطّٜ، سٜيْ اٛ يَحِ اٛ سٛورِ فُو کٛ اٛ وٛودِ، اٛ سٛودِ لُعُ‑لُعُ طُمْ؞ «طٛنْمَا لَامُ اَللَّه اٜ نَنْدِ اٜ نَنْغِرْطُمْ لِپِّ طُمْ وٛٻّٜ کُبِي ندٜرْ مبٜىٰلَ، طُمْ نَنْغٛيِ کٛو اِرِ طِيٜ لِپِّ؞ ندٜ طُمْ حٜىٰوِ، ٻٜ ڤٛوطٛيِطُمْ دَاندٜ مبٜىٰلَ نغَنْ، ٻٜ نجٛوطِي، ٻٜ شُڤْتِ لِپِّ بٛطِّ، ٻٜ نغَطِطِ ندٜرْ فَاندُ، اَمَّا ٻٜ شَنْکِتِ طِ مبٛوطَا طِنْ؞ نٛنْ طُمْ وَطَتَ اٜ رٜعُکِ دُونِيَارُ؞ مَلَاعِکَعٜنْ نغَرَيْ کَکِّتَ کَلُّٻٜ دَغَ ندٜرْ اَادِلِعٜنْ، ٻٜ کُبٛو کَلُّٻٜ ٻٜنْ ندٜرْ حِيتٜ کَلُّنغٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞ «اٛنْ ڤَامِي فُو طُعُمْ؟» ٻٜ نٛوتِي ٻٜ مبِعِ، «اٜىٰ؞» سٜيْ اٛ وِعِٻٜ، «تٛو، فُو مٛودِبّٛ اَتَّوْرَ اٜکِّتِيطٛ دٛوْ لَامُ اَللَّه اٜ مٛ نَنْدِ اٜ جٛومُ وُرٛ بُرْتِنْطٛ جَوْدِ کٜيْرِ اٜ کِيندِ ندٜرْ ندٜسَ مُوطُمْ؞» ندٜ يٜىٰسُ حٜىٰݧِ وِيکِٻٜ فُو مِسَالُ طُعُمْ، سٜيْ اٛ اُمِّي اٛ اَلِ وِغٜىٰرٜ ندٜنْ؞ اٛ يَحِ غَرِيرِ تٛ اٛ مَوْنِ، اٛ فُطِّ اٜکِّتِنْکِ يِمْٻٜ ندٜرْ سُودُ دٛعَارٜ مَٻّٜ حَا ٻٜ کَيْطِنِ، ٻٜ مبِعِ، «تٛيٜ نٜطّٛ اٛعٛ حٜٻِ فَامُ طُعُمْ اٜ بَوْطٜ وَطُکِ کُوطٜ کَيْطِنِيطٜ طٜعٜ؟ نَاع کَنْکٛ وٛنِ ٻِطّٛ اٛنْ طٛنْ شٜحٛووٛ؟ نَاع مَدُوجٛ مَاکٛ اٜ وِعٜىٰ مَرْيَامَ؟ نَاع يَاکُبُ اٜ يُسُفُ اٜ سِيمَنْ اٜ يَحُودَ نغٛنِ مِݧِرَاٻٜ مَاکٛ؟ ندٜنْ نَاع اٜنْ نغٛنْدِ اٜ مِݧِرَاٻٜ مَاکٛ رٜوْٻٜ؟ تٛو، تٛيٜ نٜطّٛ اٛعٛ حٜٻِ فُو فِي طُعُمْ؟» سٜيْ ٻٜ نغَݧِ حٛولَاکِ يٜىٰسُ؞ اَمَّا يٜىٰسُ وِعِٻٜ، «کٛو تٛيٜ يِمْٻٜ اٜ کٛکَّ اَنَّبِيجٛ مَنْغُ، اَمَّا يِمْٻٜ غَرِيرِ مَاکٛ، اٜ يِمْٻٜ وُرٛ مَاکٛ ٻٜ کٛکَّتَامٛ مَنْغُ؞» يٜىٰسُ وَطَايِ غٛطُّمْ کَيْطِنِيطُمْ تٛنْ نغَمْ ٻٜ کٛولَاکِمٛ؞ اٜ شَرٜلْ نغٜلْ حِرُدُسْ لَامِيطٛ نَنِ حَبَرُ يٜىٰسُ؞ سٜيْ اٛ وِعِ مَشُّٻٜ مَاکٛ، «اٛنْ طٛنْ طُمْ يَحَيَ غَطٛووٛ بَڤْتِسْمَ اُمِّنَا دَغَ مَيْدٜ، کَنْجُمْ وَطِ اٜ مٛ وٛودِ بَوْطٜ وَطُکِ کُوطٜ کَيْطِنِيطٜ؞» نغَمْ ندٜنّٛ حِرُدُسْ اٜ حٛورٜ مُوطُمْ وَطِي طُمْ نَنْغِي يَحَيَ، طُمْ حَٻِّمٛ، طُمْ سُرِمٛ ندٜرْ سُودُ شُرَلْ؞ حِرُدُسْ وَطِ نٛنْ نغَمْ حِرُودِيَ دٜبّٛ مَوْنِرَاوٛ مَاکٛ فِلِبُسْ مٛ اٛ تٜعِ؞ نغَمْ ندٜنّٛ يَحَيَ وِعِي حِرُدُسْ، «طُمْ حَانَايِ تٜعَامٛ؞» نٛنْ وَطِ حِرُدُسْ اٜ يِطِ وَرْکِ يَحَيَ، اَمَّا اٜ مٛ حُلَ يِمْٻٜ، نغَمْ ٻٜ نجَٻِي يَحَيَ اٛ اَنَّبِيجٛ؞ اَمَّا ندٜ ݧَلْندٜ حُمْتٛ سِفْتٛرْکِ دَݧْنغٛلْ حِرُدُسْ وَرِ، سٜيْ ٻِطّٛ حِرُودِيَ سُرْبَاجٛ وَمِ يٜىٰسٛ حٛٻّٜ غَرْٻٜ حُمْتٛ نغٛنْ؞ غَمٛلْ مَاکٛ وٜلِي حِرُدُسْ، حَا وَطَنِمٛ اَلْکَوَلْ حُنَنِيمٛ وِيکِ حٛکَّيْمٛ کٛو طُمٜ کٛ اٛ تٛرِي؞ سٜيْ مَدُوجٛ مَاکٛ وِعِمٛ کٛ اٛ وِعَتَ؞ سُرْبَاجٛ اٛنْ وِعِ حِرُدُسْ، «حٛکَّمْ حٛورٜ يَحَيَ غَطٛووٛ بَڤْتِسْمَ ندٜرْ لٜعَلْ جٛونِ؞» لَامِيطٛ اٛنْ بٛو وَنِّ، اَمَّا نغَمْ اٛ يَادَکٜ اٛ حُنَنَکٜمٛ يٜىٰسٛ حٛٻّٜ، اٛ وَطِ طُمْ حٛکَّمٛ حٛورٜ ندٜنْ؞ اٛ لِلِ وٛٻّٜ اِتّٛنٛيِ يَحَيَ حٛورٜ ندٜرْ سُودُ شُرَلْ؞ طُمْ وَدِّ حٛورٜ ندٜنْ ندٜرْ لٜعَلْ، طُمْ حٛکِّ سُرْبَاجٛ اٛنْ؞ سُرْبَاجٛ اٛنْ بٛو وَدَّنِندٜ مَدُوجٛ مُوطُمْ؞ سٜيْ تٛکُّٻٜ يَحَيَ اٛنْ نغَرِ کٛشِّ ٻَنْدُ ندُنْ اُوٛيِندُ؞ ندٜنْ ٻٜ نجَحِ ٻٜ مبِعٛيِکَ يٜىٰسُ؞ ندٜ يٜىٰسُ نَنِ نٛنْ، سٜيْ نَتِّ کٛمِوَلْ اٜ تٛکُّٻٜمٛ ٻٜ ندِلِّ تٛ وِغٜىٰرٜ ندٜرْ لَدّٜ کَمْٻٜ تَنْ؞ اَمَّا ندٜ يِمْٻٜ طُطْٻٜ نَنِ نٛنْ، ٻٜ مبُرْتٛيِي دَغَ غَرِيجٜ، ٻٜ تٛکِّمٛ اٜ کٛيْطٜ؞ اٜ جِڤَّاکِ يٜىٰسُ دَغَ ندٜرْ کٛمِوَلْ نغَلْ اٛ يِعِ يِمْٻٜ طُطْٻٜ اٜ کَوْرِتِ، سٜيْ اٛ نَنِ جُرُمْطُمْ مَٻّٜ، اٛ يَمْطِتِنِ ٻٜ نجَمْطَا ندٜرْ مَٻّٜ؞ ندٜ نَانغٜ حِيرِي، سٜيْ تٛکُّٻٜمٛ نغَرِ تٛ مَاکٛ، مبِعِمٛ، «طٛعٛ طُمْ لَدّٜ، طٛنْمَا نَانغٜ حِيرِ؞ وِعُ يِمْٻٜ ٻٜعٜ ندِلَّ نغَمْ ٻٜ نجَحَ نغَرِحٛيْ ٻٜ شٛودَنَ کٛعٜ مَٻّٜ کٛ ٻٜ ݧَامَتَ؞» يٜىٰسُ وِعِٻٜ، «نَاع دٛولٜ ٻٜ ندِلَّ؞ اٛنٛنْ کٛکّٜىٰٻٜ کٛ ٻٜ ݧَامَتَ؞» سٜيْ ٻٜ نٛوتِي ٻٜ مبِعِمٛ، «بُرٛودِ جٛوِ اٜ لِپِّ طِطِ تَنْ مِنْ نغٛودِ؞» سٜيْ اٛ وِعِ، «نغَدَّنٜىٰيَمْطُمْ طٛعٛ؞» اٛ وِعِ حَوْرُتُٻٜ ٻٜنْ نجٛوطٛو دٛوْ حُطٛ حٜشّٛ؞ اٛ حٛشِّ بُرٛودِ جٛوِ طُمْ اٜ لِپِّ طِطِ طِنْ، اٛ رَارِ دٛوْ، اٛ يٜتِّ اَللَّه، اٛ سٜنْدِ بُرٛودِ طُمْ اٛ حٛکِّ تٛکُّٻٜمٛ، سٜيْ تٛکُّٻٜمٛ نغٜىٰدَنِ يِمْٻٜ حَوْرُتُٻٜ؞ ٻٜ فُو ٻٜ ݧَامِ ٻٜ کَارِ؞ تٛکُّٻٜمٛ مٛٻْتِ کٛ حٛرِ کٛ وَطِ کٛنْدٛوجٜ سَڤّٛ اٜ طِطِ؞ ݧَامُٻٜ ݧَمْندُ ندُنْ وٛرْٻٜ تَنْ ٻَدَکٜ 5,000، سُکَاٻٜ اٜ رٜوْٻٜ لِمَاکَ؞ طٛنْ اٜ طٛنْ يٜىٰسُ وَطِ تٛکُّٻٜمٛ نَتَّ کٛمِوَلْ ٻٜ اَرْتَمٛ حُولُکِ يَاکِ فٛنْغٛ، کَنْکٛ بٛو اٛ جَٻِّتٛتٛ کَوْرُتُٻٜ؞ غَطَ اٛ جَٻِّتَکٜ حَوْرُتُٻٜ ٻٜنْ، اٛ پٜنْتِ حٛشّٜىٰرٜ کَنْکٛ تَنْ نغَمْ اٛ وَطَ دٛعَارٜ؞ ندٜ فُتُرٛ وَطِ، اٜ مٛ تٛنْ کَنْکٛ تَنْ؞ اٜ شَرٜلْ نغٜلْ کٛمِوَلْ نغَلْ اٜ شَکَ مبٜىٰلَ؞ غٜىٰلٛوطِ ندِيَمْ اٜ ڤِيَنغَلْ، حٜنْدُ اٜ حَطَٻٜ يَادُ؞ فَجِرِ اٜ مٛ يَحَ تٛ مَٻّٜ، اٜ مٛ يَحَ دٛوْ ندِيَمْ مبٜىٰلَ نغَنْ؞ اَمَّا ندٜ ٻٜ نغِعِمٛ اٜ مٛ يَحَ دٛوْ ندِيَمْ، ٻٜ کُلْتٛرِ، ٻٜ مبِعِ، «طُمْ غِنّٛلْ!» سٜيْ ٻٜ نغُلِّ نغَمْ کُلٛلْ؞ اَمَّا طٛنْ اٜ طٛنْ اٛ مٜتَنِٻٜ، اٛ وِعِ، «ڤُکِّنٜىٰ ٻٜرْطٜ مٛوطٛنْ، طُمْ مِنْ؞ تٛع اٛنْ کُلُ؞» سٜيْ بِيتُرُسْ نٛوتِي، وِعِمٛ، «مٛودِبّٛ، تٛ طُمْ اَنْ، وِعَمْ مِ وَرَ تٛ مَاطَ دٛوْ ندِيَمْ طَمْ؞» يٜىٰسُ وِعِمٛ، «وٛرٛيْ؞» سٜيْ بِيتُرُسْ وُرْتِي ندٜرْ کٛمِوَلْ نغَلْ فُطِّ يَادُ دٛوْ ندِيَمْ طَمْ يَاکِ تٛ يٜىٰسُ؞ اَمَّا ندٜ اٛ نَنِ حٜنْدُ شٜمْبِنْدُ، سٜيْ اٛ حُلْتٛرِ، ندِيَمْ طَمْ فُطِّ مٛطُکِمٛ، سٜيْ اٛ وُلِّ، اٛ وِعِ، «مٛودِبّٛ، حِسْنَمْ!» طٛنْ اٜ طٛنْ يٜىٰسُ فٛرْتِ جُنْغٛ مُوطُمْ فٛوطٛيِمٛ، وِعِمٛ، «اَنْ غٛودُطٛ حٛولَارٜ سٜطَّ، نغَمْ طُمٜ نغَطُطَا سٜکٛ؟» اٜ نَتُّکِ مَٻّٜ ندٜرْ کٛمِوَلْ نغَلْ، حٜنْدُ ندُنْ دَرِي؞ وٛنْٻٜ ندٜرْ کٛمِوَلْ نغَلْ مَوْنِنِ يٜىٰسُ، اٜ مبِعَ، «غٛونغَ، اَنْ اَ ٻِطّٛ اَللَّه؞» ندٜ ٻٜ کُولِ فٛنْغٛ مبٜىٰلَ نغَنْ، ٻٜ نجٛتِّي لٜيْدِ جَنِسَرَتْ؞ ندٜ يِمْٻٜ لٜيْدِ ندِنْ اَنْدِتِ يٜىٰسُ، ٻٜ لِلِ کٛو تٛيٜ ندٜرْ لٜيْدِ ندِنْ طُمْ وَدّٛيَ فُو ݧَوْٻٜ تٛ مَاکٛ؞ ٻٜ تٛرِيمٛ ݧَوْٻٜ ٻٜنْ مٜىٰمَ شِلْمبِ تٛغّٛورٜ مَاکٛ تَنْ؞ فُو مٜىٰمُٻٜطِ نجَمْطِتِ؞ سٜيْ وٛٻّٜ فَارِسَنْکٛعٜنْ اٜ مٛودِٻّٜ اَتَّوْرَ نغَرِ تٛ يٜىٰسُ دَغَ اُرُشَلِيمَ، ٻٜ مبِعِ، «نغَمْ طُمٜ تٛکُّٻٜمَ تٛکَّتَا ندٛنُ مَامَعٜنْ مٜىٰطٜنْ؟ نغَمْ ٻٜ لٛوتَتَا جُوطٜ مَٻّٜ کٛ ٻٜ ڤُطَّ ݧَامُکِ ݧَمْندُ؞» سٜيْ يٜىٰسُ نٛوتِي، وِعِٻٜ، «اٛنٛنْ مَا، نغَمْ طُمٜ اٛنْ تٛکَّتَا کٛ اَللَّه وِعِ نغَمْ ندٛنُ مٛوطٛنْ؟ نغَمْ اَللَّه وِعِي، ‹حٛکُّ ݧَاکٛ مَاطَ اٜ مَدُوجٛ مَاطَ مَنْغُ،› ندٜنْ، ‹کٛو مٛيٜ حُطِ ݧَاکٛ مُوطُمْ کٛو مَدُوجٛ مُوطُمْ دٛولٜ وَرٜىٰ؞› اَمَّا اٛنٛنْ اٛنْ مبِعَ تٛ نٜطّٛ وِعِي ݧَاکٛ مُوطُمْ کٛو مَدُوجٛ مُوطُمْ، ‹فُو کٛ کٛکَّيْنٛمَامِ، مِ حٛکِّيطُمْ اَللَّه،› تٛو، نَاع دٛولٜ نٜطّٛ اٛنْ مَوْنِنَ ݧَاکٛ مَاکٛ وٛنْ طٛنْ؞ نٛنْ نغَرْتِرْطٛنْ وٛلْدٜ اَللَّه مٜىٰرٜ نغَمْ ندٛنُ مٛوطٛنْ؞ اٛنٛنْ مُنَافُکِعٜنْ! اِشَايَ وِعِي غٛونغَ ندٜ اٛ وَطِ اَنَّبَاکُ دٛوْ مٛوطٛنْ وِيکِ، اَللَّه وِعِي، ‹ٻٜنْ طٛنْ يِمْٻٜ اٜ حٛنْدُکٛ تَنْ ٻٜ مَوْنِنْتَيَمْ، اَمَّا ٻٜرْطٜ مَٻّٜ اٜ نغٛطِّتِييَمْ؞ اٜ مٜىٰرٜ ٻٜ مَوْنِنْتَيَمْ؞ اٜ ٻٜ اٜکِّتِنَ دٛوکَ يِمْٻٜ بٛ تٛ اَمْ طُمْ پِوٛيِ؞› » سٜيْ يٜىٰسُ نٛدِّ يِمْٻٜ حَوْرُتُٻٜ، وِعِٻٜ، «کٜتِّندٜىٰ، ڤَامٛنْ؞ نَاع کٛ نَتَّتَ نٜطّٛ اٜ حٛنْدُکٛ وَرْتِرْتَ ٻٜرْندٜ مَاکٛ ندٜ لَاٻَا يٜىٰسٛ اَللَّه، اَمَّا کٛ وُرْتٛيْتٛو دَغَ ندٜرْ حٛنْدُکٛ مَاکٛ وَرْتِرْتَمٛ مٛ لَاٻَا يٜىٰسٛ اَللَّه؞» سٜيْ تٛکُّٻٜمٛ نغَرِ تٛ مَاکٛ، مبِعِمٛ، «اَ اَنْدِ فَارِسَنْکٛعٜنْ نَنِي مٛنّٜرٜ ندٜ ٻٜ نَنِ کَنْ طٛنْ حَالَ کَ مبِيطَا؟» يٜىٰسُ نٛوتِي، وِعِ، «فُو اَوْرٜ ندٜ طُمْ اَاوِ، تٛ نَاع ݧَاکٛ اَمْ مٛ دٛوْ اَاوِندٜ، طُمْ طٛوفَيْندٜ؞ اَلٜىٰٻٜ! ٻٜ وُمْٻٜ اَرْدِيٻٜ وُمْٻٜ؞ تٛ بُمْطٛ اَرْدَکٜ بُمْطٛ، ٻٜ فُو طِطٛ ٻٜ نجَنَيْ ندٜرْ نغَيْکَ؞» سٜيْ بِيتُرُسْ وِعِمٛ، «وِعُمِنْ مَعَنَ طُعُمْ مِسَالُ؞» يٜىٰسُ وِعِٻٜ، «حَا جٛونِ اٛنٛنْ مَا اٛنْ ڤَامَايِ؟ اٛنْ اَنْدَا فُو کٛ نَتِّ ندٜرْ حٛنْدُکٛ نٜطّٛ ندٜرْ رٜىٰدُ مَاکٛ طُمْ نَتِّ، ندٜنْ طُمْ وُرْتٛتٛ؟ اَمَّا کٛ وُرْتٛيِي ندٜرْ حٛنْدُکٛ، دَغَ ندٜرْ ٻٜرْندٜ طُمْ پِوٛيِ؞ کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه؞ نغَمْ دَغَ ندٜرْ ٻٜرْندٜ نٜطّٛ ݧُمٛ کَلُّنغٛ وُرْتٛيْتٛو، اٜ وَرْحٛورٜ، اٜ نجٜىٰنُ، اٜ نجٜىٰنُ حَکُّندٜ يِمْٻٜ ٻٜ نغَلَا تٜىٰغَلْ، اٜ نغُيْکَ، اٜ شٜيْدَ فٜوْرٜ، اٜ وٛنُّکِ اِنْدٜ نٜطّٛ؞ طُعُمْ کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه، اَمَّا ݧَامُکِ ݧَمْندُ اٜ جُوطٜ طٜ لٛوتَاکَ نَاع کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه؞» يٜىٰسُ اَلِ طٛنْ يَحِ حَادٜ غَرِيجٜ تَايَ اٜ سِدٛنْ؞ سٜيْ رَا غٛطّٛ کَنْعَانِيَنْکٜىٰجٛ دٜبّٛ نٜطّٛ لٜيْدِ ندِنْ وَرِ نٛدِّ سٜمْبٜىٰ، وِعِ، «مٛودِبّٛ، ٻِي دَوْدَ، يُرْمِنَنَمْ! وٛنْغٛلْ غِنّٛلْ اٜ تٛرَّ ٻِطّٛ اَمْ سُرْبَاجٛ؞» اَمَّا يٜىٰسُ وِعَايِمٛ غٛطُّمْ؞ سٜيْ تٛکُّٻٜمٛ نغَرِ تٛرِيمٛ، مبِعِ، «رِيوُمٛ، نغَمْ اٜ مٛ تٛکِّعٜنْ اٜ مٛ وَنَّعٜنْ اٜ وُلُّکِ!» سٜيْ اٛ وِعِ دٜبّٛ اٛنْ، «مِ لِلٛيَاکَ تٛ وٛٻّٜ، سٜيْ تٛ بَالِ مَجُّطِ طِ لٜݧٛلْ اِسْرَاعِيلَ تَنْ؞» اَمَّا اٛ وَرِ اٛ دِشِّي يٜىٰسٛ يٜىٰسُ، اٛ وِعِ، «مٛودِبّٛ، وَلَّمْ!» يٜىٰسُ نٛوتِي، وِعِ، «طُمْ حَانَايِ طُمْ حٛشَّ ݧَمْندُ ٻِکّٛيْ طُمْ حُبَنٛوندُ کُتِحٛيْ؞» اٛ وِعِ، «اٜىٰ، طُمْ نٛنْ، مٛودِبّٛ، اَمَّا کٛو کُتِحٛيْ اٜ ݧَامَ حٛرَانٛ جَنُطُمْ دَغَ تٜىٰبُرْ جٜيْطٛکٛيْ؞» سٜيْ يٜىٰسُ نٛوتِي، وِعِمٛ، «حٛولَارٜ مَاطَ اٜ طُوطِ! طُمْ وَطَنْتٜ نٛ نغِطَّا؞» طٛنْ اٜ طٛنْ ٻِطّٛ مَاکٛ يَمْطِتِ؞ يٜىٰسُ اُمِّي، اَلِ طٛنْ، تٛکِّ حَادٜ مبٜىٰلَ غَلِيلِ، اٛ پٜنْتِ دٛوْ حٛشّٜىٰرٜ اٛ جٛوطِي؞ يِمْٻٜ طُطْٻٜ نغَرِ تٛ مَاکٛ، ٻٜ نغَدّٛيِ ٻٜ کٛيْطٜ جَرَاطٜ، اٜ وُمْٻٜ، اٜ لَپٛوٻٜ، اٜ ٻٜ مبَاوَتَا مٜتُکِ، اٜ وٛٻّٜ طُطْٻٜ غٛودُٻٜ ݧَوُوجِ؞ ٻٜ ندٜسِٻٜ يٜىٰسٛ مَاکٛ، سٜيْ اٛ يَمْطِتِنِٻٜ؞ يِمْٻٜ کَيْطِنِ ندٜ نغِعِ يِمْٻٜ ٻٜ مٜتَتَا اٜ مٜتَ، لَپٛوٻٜ اٜ نجَحَ، ٻٜ کٛيْطٜ جَرَاطٜ اٜ نجَاٻَ، وُمْٻٜ اٜ نغِعَ؞ سٜيْ ٻٜ مَنْتِ اَللَّه اِسْرَاعِيلَ؞ سٜيْ يٜىٰسُ نٛدِّ تٛکُّٻٜمٛ، وِعِٻٜ، «اٜ مِ نَنَ جُرُمْطُمْ يِمْٻٜ ٻٜعٜ نغَمْ حَنْدٜ بَلْطٜ مَٻّٜ تَتِ اٜ ٻٜ نغٛنْدِ اٜ اَمْ، اَمَّا ٻٜ نغَلَا کٛ ٻٜ ݧَامَتَ؞ مِ يِطَا ٻٜ ندِلِّدَ اٜ وٜىٰلٛ، نغَمْ طُمْ سَطَا ٻٜ ڤٜکّٛرَ دٛوْ طَتَلْ؞» سٜيْ تٛکُّٻٜمٛ مبِعِمٛ، «تٛيٜ مِنْ کٜٻٛيْتَ بُرٛودِ ندٜرْ لَدّٜ ندٜعٜ کٜپَيْطُمْ يِمْٻٜ طُطْٻٜ ٻٜعٜ؟» يٜىٰسُ پَمِٻٜ وِعِ، «بُرٛودِ نٛيٜ نغٛودُطٛنْ؟» ٻٜ مبِعِ، «بُرٛودِ جٛوٜىٰطِطِ اٜ لِپِّ سٜطَّ؞» سٜيْ اٛ وِعِ يِمْٻٜ حَوْرُتُٻٜ ٻٜنْ فُو ٻٜ نجٛوطٛو اٜ لٜيْدِ؞ اٛ حٛشِّ بُرٛودِ جٛوٜىٰطِطِ طُمْ اٜ لِپِّ طِنْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، کَمْٻٜ بٛو ٻٜ نغٜىٰدَنِ يِمْٻٜ ٻٜنْ؞ يِمْٻٜ ٻٜنْ فُو ݧَامِ کَارِ؞ غَطَ مَاجُمْ تٛکُّٻٜمٛ مٛٻْتِ کٛ حٛرِي، طُمْ حٜىٰوِ کٛنْدٛوجٜ جٛوٜىٰطِطِ؞ ݧَمْٻٜ ٻٜنْ وٛرْٻٜ تَنْ نغَطِ 4,000، رٜوْٻٜ اٜ سُکَاٻٜ لِمَاکَ؞ غَطَ يٜىٰسُ جَٻِّتَکٜ حَوْرُتُٻٜ ٻٜنْ، سٜيْ اٛ نَتِّ کٛمِوَلْ، اٛ دِلِّ لٜيْدِ مَغَدَنْ؞ فَارِسَنْکٛعٜنْ اٜ سَادُسَنْکٛعٜنْ نغَرِ تٛ يٜىٰسُ، اٜ ٻٜ نغِطِ فٛوندُکِمٛ، سٜيْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ يٜىٰسُ نٛوتِي، وِعِٻٜ، «تٛ نَانغٜ حِيرِي، دٛوْ وٛوجِي، اٛنْ مبِعَ، ‹جَانغٛ نجَيْرِ وٛوطَيْ؞› طٛنْمَا تٛ سُبَکَ وَطِي اٛنْ نغِعِي دٛوْ وٛوجِي اٜ وٛودِ دُولٜ کٛو تٛيٜ، اٛنْ مبِعَ، ‹حَنْدٜ طُمْ وَطَيْ اِيٜىٰندٜ؞› اٛنْ مبَاوِ رَارُکِ کٛ وٛنِ اٜ دٛوْ اَنْدٛنْ کٛ وَطَتَ، اَمَّا اٛنْ مبَاوَتَا فَامُکِ مَعَنَ کُوطٜ طٜ نغَطَيْمِ؞ يِمْٻٜ جَامَنُ طُعُمْ کَلُّٻٜ ٻٜ کُلَتَا اَللَّه، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛ اَنَّبِ اِنُوسَ؞» سٜيْ اٛ اَلِٻٜ اٛ دِلِّ؞ ندٜ تٛکُّٻٜمٛ کُولِ فٛنْغٛ مبٜىٰلَ، ٻٜ نغِعِ ٻٜ نغٜجِّتِي ٻٜ نغَرْدٛيَ اٜ بُرٛودِ؞ سٜيْ يٜىٰسُ وِعِٻٜ، «ڤَامٜىٰ، نغَطٜىٰ حَکِّيلٛ اٜ پُوفِنِرْطُمْ فَارِسَنْکٛعٜنْ اٜ سَادُسَنْکٛعٜنْ؞» سٜيْ تٛکُّٻٜمٛ مٜدِّ حَکُّندٜ مَٻّٜ، ٻٜ مبِعِ، «اٛ وِعُ نٛنْ نغَمْ اٜنْ نغَدَّايِ بُرٛودِ؞» ندٜ يٜىٰسُ فَامِ کٛ ٻٜ مبِعَتَ، سٜيْ اٛ پَمِٻٜ، اٛ وِعِي، «اٛنٛنْ غٛودُٻٜ حٛولَارٜ سٜطَّ، نغَمْ طُمٜ مٜدّٛتٛنْ دٛوْ اٛنْ نغَلَا بُرٛودِ؟ حَا جٛونِ اٛنْ ڤَامَايِ؟ اٛنْ شِفْتٛرَايِ نٛ ݧَمْنِرْمِ يِمْٻٜ 5,000 اٜ بُرٛودِ جٛوِ، اٜ کٛنْدٛوجٜ سَڤّٛ اٜ طِطِ طٜ ٻٛڤْتُطٛنْ اٜ کٜىٰوِ حٛرَانٛ؟ طٛنْمَا اٛنْ شِفْتٛرَايِ نٛ ݧَمْنِرْمِ يِمْٻٜ 4,000 اٜ بُرٛودِ جٛوٜىٰطِطِ، اٜ کٛنْدٛوجٜ جٛوٜىٰطِطِ طٜ ٻٛڤْتُطٛنْ اٜ کٜىٰوِ حٛرَانٛ؟ نٛ طُمْ وَطِ اٛنْ ڤَامَايِ نَاع دٛوْ بُرٛودِ مٜتَيْمِ؟ مِ وِعِي ڤَامَنٜىٰ پُوفِنِرْطُمْ فَارِسَنْکٛعٜنْ اٜ سَادُسَنْکٛعٜنْ؞» ندٜنْ تٛکُّٻٜمٛ کٜٻْتِ نَاع اٜ مٛ مٜتَنَٻٜ ٻٜ ڤَامَ دٛوْ پُوفِنِرْطُمْ غَطٜتٜىٰطُمْ ندٜرْ بُرٛودِ، اَمَّا ٻٜ نغَطَ حَکِّيلٛ اٜ اٜکِّتِنٛلْ فَارِسَنْکٛعٜنْ اٜ سَادُسَنْکٛعٜنْ؞ ندٜ يٜىٰسُ وَرِ لٜيْدِ کَيْسَارِيَ فِلِبِ، سٜيْ اٛ پَمِ تٛکُّٻٜمٛ، اٛ وِعِ، «مٛيٜ يِمْٻٜ مبِعَتَ ٻِي نٜطّٛ وٛنِ؟» سٜيْ ٻٜ مبِعِ، «وٛٻّٜ اٜ مبِعَ اَ يَحَيَ غَطٛووٛ بَڤْتِسْمَ؞ وٛٻّٜ بٛو اٜ مبِعَ اَ اَنَّبِ اِلِيَ؞ ندٜنْ وٛٻّٜ اٜ مبِعَ اَ اَنَّبِ اِرْمِيَ کٛو غٛعٛتٛ ندٜرْ اَنَّبٛعٜنْ؞» اٛ وِعِٻٜ، «اَمَّا اٛنٛنْ، مٛيٜ مبِعٛتٛنْيَمْ؟» سٜيْ سِيمَنْ بِيتُرُسْ نٛوتِي، وِعِ، «اَنْ وٛنِ اَلْمَسِيحُ، ٻِطّٛ اَللَّه مٛ يٛنْکِ؞» يٜىٰسُ نٛوتِي وِعِمٛ، «اَ بَرْکِطِنَاطٛ، سِيمَنْ ٻِي اِنُوسَ، نغَمْ نَاع طُمْ نٜطّٛ وِعِمَاکَ، سٜيْ نِ ݧَاکٛ اَمْ مٛ دٛوْ؞ اٜ مِ وِعِمَا، اَنْ وٛنِ بِيتُرُسْ، وَاتٛ تَفَارٜ؞ دٛوْ تَفَارٜ ندٜنْ نجٛوطِنَيْمِ تٛکُّٻٜيَمْ؞ مَيْدٜ فُو اٜ بَوْطٜ مَيْرٜ وَاوَتَا جَالٛوٻٜ؞ مِ حٛکّٜتٜ مَٻِّتِرْکٛيْ لَامُ اَللَّه، فُو کٛ کَطُطَا اٜ دُونِيَارُ، اَللَّه مٛ دٛوْ جَٻِ؞ طٛنْمَا فُو کٛ اَلُطَا طُمْ وَطَ اٜ دُونِيَارُ، اَللَّه مٛ دٛوْ جَٻِي؞» سٜيْ يٜىٰسُ حَطِ تٛکُّٻٜمٛ تٛع ٻٜ مبِعَکَ کٛو مٛيٜ کَنْکٛ وٛنِ اَلْمَسِيحُ؞ دَغَ نغٜلْ طٛنْ شَرٜلْ يٜىٰسُ فُطِّ وِيکِ تٛکُّٻٜمٛ دٛولٜ اٛ يَحَ اُرُشَلِيمَ، اٛ يَرَ بٛنٜ طُطُّمْ تٛ جُوطٜ مَوْٻٜ يِمْٻٜ، اٜ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، ندٜنْ اٛ وَرٜىٰ؞ ندٜرْ ݧَلْندٜ تَتَوْرٜ بٛو طُمْ اُمِّنَيْمٛ؞ سٜيْ بِيتُرُسْ نٛدِّمٛ وُتُّدُ غٛعٛ فُطِّ حَٻَنْکِمٛ، اٜ وِعَ، «اَللَّه حٛيْنَ، مٛودِبّٛ! نٛنْ حٜٻَتَامَ حَا اَبَدَا!» اَمَّا يٜىٰسُ وَيْلِتِي، وِعِ بِيتُرُسْ، «سٜنْدِرْ اٜ اَمْ، اَنْ شٜيْطَنْ! اَ کَطَيْطٛيَمْ وَطُکِ کٛ اَللَّه يِطِ، نغَمْ نَاع تٛ اَللَّه ݧُمٛ مَاطَ پِوٛيِ، اِرِ ݧُمٛ يِمْٻٜ ݧُمَتَا؞» سٜيْ يٜىٰسُ وِعِ تٛکُّٻٜمٛ، «فُو غِطّٛ وَرْتَ تٛکُّطٛيَمْ، دٛولٜ وَݧَ حٛورٜ مُوطُمْ، حٛشَّ غَافَانغَلْ مُوطُمْ، تٛکَّيَمْ؞ نغَمْ فُو غِطّٛ حِسْنُکِ يٛنْکِ مُوطُمْ اٛ دُلَّيْکِ؞ اَمَّا فُو دُلَّيْطٛ يٛنْکِ مُوطُمْ نغَمْ اَمْ اٛ حٜٻَيْکِ؞ کٛ طُمْ نَفَنْتَ نٜطّٛ تٛ اٛ حٜٻِي دُونِيَارُ فُو، اَمَّا دُلِّي يٛنْکِ مَاکٛ؟ کٛو بٛو کٛ نٜطّٛ وَاوَتَ حٛکُّکِ نغَمْ جَٻْتٛيَ يٛنْکِ مُوطُمْ؟ نغَمْ ٻِي نٜطّٛ وَرَيْ ندٜرْ تٜدُّنغَلْ ݧَاکٛ مُوطُمْ مٛ دٛوْ اٜ مَلَاعِکَعٜنْ مَاکٛ، اٛ وَاتَنَيْ کٛو مٛيٜ کٛ وَطِ؞ اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي ٻِي نٜطّٛ اٜ وَرٛيَ ندٜرْ لَامُ مُوطُمْ؞» غَطَ بَلْطٜ جٛوٜىٰغٛعٛ، سٜيْ يٜىٰسُ حٛشِّ بِيتُرُسْ اٜ يَاکُبُ اٜ مِݧِرَاوٛ مَاکٛ يَحَيَ، اٛ يَارِٻٜ دٛوْ وٛنْدٜ حٛشّٜىٰرٜ تٛوْندٜ کَمْٻٜ تَنْ؞ سٜيْ نَنْدِ مَاکٛ وَيْلِتِ يٜىٰسٛ مَٻّٜ؞ يٜىٰسٛ مَاکٛ اٜ طٜلْکِتٛو بٛ نَانغٜ؞ کٛلْتٜ مَاکٛ نغَرْتِ دَنٜىٰجٜ تَرْ بٛ جَيْنغٛلْ؞ طٛنْ اٜ طٛنْ سٜيْ اَنَّبِ مُوسَ اٜ اَنَّبِ اِلِيَ وَنْغَنِٻٜ اٜ ٻٜ مٜدَّ اٜ يٜىٰسُ؞ سٜيْ بِيتُرُسْ وِعِ يٜىٰسُ، «مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ طٛعٛ، وٛعٛيْرُ ندُ مَاطَ، وٛعٛيْرُ ندُ مُوسَ، ندٜنْ وٛعٛيْرُ ندُ اِلِيَ؞» اٜ مٛ ندٜرْ مٜتُکِ، سٜيْ رَا وٛنْغَ ندُولَ طٜلْکِتٛتٛونغَ وَرِ سُدِّٻٜ؞ ٻٜ نَنِ حٛنٛنْدٜ اَللَّه دَغَ ندٜرْ مَاغَ، وِعِ، «اٛعٛ وٛنِ ٻِطّٛ اَمْ مٛ نغِطُمِ؞ اٜ مِ نَنَ بٜلْطُمْ مَاکٛ نَاع سٜطَّ؞ نَنٜىٰ کٛ اٛ وِعَتَعٛنْ!» ندٜ تٛکُّٻٜمٛ نَنِ حٛنٛنْدٜ ندٜنْ، کُلٛلْ مَنْغٛلْ نَنْغِٻٜ ٻٜ نجَنِ اٜ لٜيْدِ؞ سٜيْ يٜىٰسُ وَرِ مٜىٰمِٻٜ، وِعِ، «اُمّٜىٰ، تٛع اٛنْ کُلُ؞» ندٜ ٻٜ پٜفْتِ کٛعٜ، ٻٜ نغِعَايِ غٛطّٛ سٜيْ يٜىٰسُ تَنْ؞ اٜ ٻٜ نجِڤّٛيٛو دَغَ دٛوْ حٛشّٜىٰرٜ ندٜنْ، سٜيْ يٜىٰسُ وَغِّنِٻٜ، وِعِ، «تٛع اٛنْ مبِعُ غٛطّٛ کٛ نغِيطٛنْ نَا طُمْ اُمِّنِ ٻِي نٜطّٛ دَغَ مَيْدٜ؞» تٛکُّٻٜمٛ پَمِمٛ، مبِعِ، «تٛو، نغَمْ طُمٜ مٛودِٻّٜ اَتَّوْرَ اٜ مبِعَ دٛولٜ اَنَّبِ اِلِيَ اَرْتَ اَلْمَسِيحُ وَرْکِ؟» اٛ نٛوتِي، اٛ وِعِ، «غٛونغَ اَنَّبِ اِلِيَ اَرْتَيْ وَرْکِ، نغَمْ اٛ سِرْيٛو کٛو طُمٜ؞ اَمَّا اٜ مِ وِعَعٛنْ، اِلِيَ يَادَکٜ وَرِي، ٻٜ بٛو کٜٻْتَايِ طُمْ کَنْکٛ، اَمَّا ٻٜ نغَطَنِمٛ فُو کٛ ٻٜ نغِطِ؞ نٛنْ مَا ٻِي نٜطّٛ يَرَيْ بٛنٜ اٜ جُوطٜ مَٻّٜ؞» ندٜنْ تٛکُّٻٜمٛ ڤَامِ اٜ مٛ مٜتَنَٻٜ دٛوْ يَحَيَ غَطٛووٛ بَڤْتِسْمَ؞ ندٜ ٻٜ نجٛتِّي تٛ يِمْٻٜ طُطْٻٜ کَوْرِتِ، سٜيْ غٛطّٛ نٜطّٛ وَرِ تٛ يٜىٰسُ دِشِّي يٜىٰسٛ مَاکٛ وِعِ، «مٛودِبّٛ، يُرْمِنَنْ سُکَ اَمْ اٜ وٛودِ ݧَوُ ڤَطّٜ، اٜ مٛ تٛرّٛو نَاع سٜطَّ؞ ندٜ طُطُّمْ اٜ مٛ يَنَ ندٜرْ حِيتٜ اٜ ندٜرْ ندِيَمْ؞ مِ يَارِيمٛ تٛ تٛکُّٻٜمَ، اَمَّا ٻٜ مبَاوَايِ يَمْطِتِنْکِمٛ؞» سٜيْ يٜىٰسُ نٛوتِي وِعِ، «اٛنٛنْ يِمْٻٜ جَامَنُ طُعُمْ کَلُّطُمْ اٛنْ کٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ نغَدَّنٜىٰيَمْ سُکَ اٛنْ طٛعٛ؞» سٜيْ يٜىٰسُ حَٻَنِ غِنّٛلْ نغٛلْ، نغٛلْ وُرْتِي سُکَ اٛنْ، طٛنْ اٜ طٛنْ اٛ يَمْطِتِ؞ سٜيْ تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، «نغَمْ طُمٜ مِنٛنْ مِنْ مبَاوَايِ وُرْتِنْکِ غِنّٛلْ نغٛلْ؟» يٜىٰسُ نٛوتِي وِعِٻٜ، «نغَمْ حٛولَارٜ مٛوطٛنْ فَمْطِي؞ اٜ مِ وِعَعٛنْ غٛونغَ، دَا اٛنْ نغٛودِ حٛولَاکِ فَمْطِرْکِ بٛ غَبّٜلْ مَسْتَتْ، اٛنْ مبَاوَيْ مبِعٛنْ حٛشّٜىٰرٜ ندٜعٜ، ‹اِتَّ دَغَ طٛعٛ، يَحُ طَاعٜ،› سٜيْ ندٜ وَطَ کٛ مبِيطٛنْ؞ وَلَا بٛو کٛ سَلٛرْتَعٛنْ؞ [اَمَّا اِرِ نغٛعٛلْ غِنّٛلْ نغٛلْ وُرْتَتَاکٛ سٜيْ اٜ دٛعَارٜ اٜ سُومَاکِ؞]» ندٜ يٜىٰسُ اٜ تٛکُّٻٜمٛ کَوْرِتِ اٜ لٜيْدِ غَلِيلِ، سٜيْ اٛ وِعِٻٜ، «طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ، ٻٜ مبَرَمٛ، اٜ ݧَلْندٜ تَتَوْرٜ طُمْ اُمِّنَيْمٛ؞» سٜيْ فِي طُمْ وَنِّ تٛکُّٻٜمٛ نَاع سٜطَّ؞ ندٜ يٜىٰسُ اٜ تٛکُّٻٜمٛ نجٛتِّي غَرِيرِ کَفَرْنَحُمْ، جَٻٛوٻٜ شٜىٰدٜ نغَمْ وُرٛ شٜنِينغٛ نغَرِ تٛ بِيتُرُسْ، ٻٜ مبِعِمٛ، «مٛودِبّٛ مٛوطٛنْ اٜ حٛکَّ شٜىٰدٜ وَلُّکِ وُرٛ شٜنِينغٛ؟» اٛ وِعِ، «اٜىٰ، اٜ مٛ حٛکَّ؞» ندٜ بِيتُرُسْ وَرْتِ وُرٛ، سٜيْ يٜىٰسُ اَرْتِ مٜتَنْکِمٛ، وِعِ، «نٛ نغِيطَا، بِيتُرُسْ؟ تٛ ٻٜيٜ لَامِيٻٜ دُونِيَارُ ندُعُ نجَٻَتَ شٜىٰدٜ لٜيْدِ، تٛ ٻِٻّٜ مَٻّٜ کٛو تٛ وٛٻّٜ؟» ندٜ بِيتُرُسْ وِعِ، «تٛ وٛٻّٜ،» سٜيْ يٜىٰسُ وِعِ، «تٛو، ٻِٻّٜ مَٻّٜ نجٛٻَتَا وٛنْ طٛنْ؞ فُو اٜ نٛنْ، نغَمْ تٛع ٻٜ نَنَ مٛنّٜرٜ مٜىٰطٜنْ، يَحُ مبٜىٰلَ نغَطَا نَنْغِرْطُمْ لِپِّ مَاطَ؞ فُو لِنْغُ نغُ اَرْتُطَا نَنْغُکِ، مَٻُّتُ حٛنْدُکٛ مَاغُ اَ تَوَيْ يَمْندٜ اَجُرْفَارِ ندٜرْ؞ حٛشُّندٜ، کٛکَّاٻٜ نجٛٻَارِ وُرٛ شٜنِينغٛ نغَمْ مِنْ اٜ مَاطَ؞» اٜ نغٜلْ طٛنْ شَرٜلْ تٛکُّٻٜ يٜىٰسُ نغَرِ پَمِمٛ، مبِعِ، «مٛيٜ ٻُرِ مَنْغُ فُو ندٜرْ لَامُ اَللَّه؟» سٜيْ يٜىٰسُ نٛدِّ وٛنْغٜلْ سُکَيٜلْ ڤَمَرٜلْ دَرْنِنغٜلْ شَکَ مَٻّٜ، وِعِ، «اٜ مِ وِعَعٛنْ غٛونغَ، تٛ نَاع اٛنْ لٜسْتِنْ کٛعٜ مٛوطٛنْ نغَرْتُطٛنْ بٛ سُکَحٛيْ، اٛنْ نَتَّتَا لَامُ اَللَّه کٛو سٜطَّ! فُو لٜسْتِنْطٛ حٛورٜ مُوطُمْ بٛ سُکَيٜلْ ڤَمَرٜلْ نغٜعٜلْ، کَنْکٛ وٛنِ ٻُرْطٛ مَنْغُ ندٜرْ لَامُ اَللَّه؞ ندٜنْ فُو جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞ «اَمَّا فُو غَطُطٛ غٛعٛتٛ ندٜرْ سُکَاٻٜ ٻٜعٜ کٛولِيٻٜيَمْ وَطِ حَکّٜ، طُمْ ٻُرَنَيْمٛ اٛ حَٻَّنٜىٰ کَاپَ نَمٛلْ مَنْغَ اٜ دَاندٜ مَاکٛ طُمْ فَطَّمٛ ندٜرْ مبٜىٰلَ لُغُّنغَ؞ دُونِيَارُ وٛنِي نغَمْ اٜ وٛودِ کٛ فٛوطَتَ يِمْٻٜ نغَطَ حَکّٜ! نغَمْ دٛولٜ کٛ فٛوطَتَ يِمْٻٜ نغَطَ حَکّٜ وَرَ، فُو اٜ نٛنْ فٛوطُطٛ غٛطّٛ وَطِ حَکّٜ وٛنِي؞ «تٛ جُنْغٛ مَاطَ کٛو کٛيْنغَلْ مَاطَ اٜ وَطُمَا نغَطَا حَکّٜ، تٛو، اِتُّنغٛ ڤَطَّانغٛ، کٛو اِتُّنغَلْ ڤَطَّانغَلْ؞ طُمْ ٻُرَنِيمَ نَتَّا وُرٛ اَللَّه اٜ جُنْغٛ وٛعٛتٛ کٛو کٛيْنغَلْ غٛعٛتَلْ دٛوْ طُمْ حُبٛمَا ندٜرْ حِيتٜ نغٜ ݧِفَتَا حَا اَبَدَا اٜ جُوطٜ طِطِ کٛو کٛيْطٜ طِطِ؞ تٛ بٛو حِتٜرٜ مَاطَ اٜ وَطُمَا نغَطَا حَکّٜ، اِتُّندٜ ڤَطَّاندٜ؞ طُمْ ٻُرَنِيمَ نَتَّا وُرٛ اَللَّه اٜ حِتٜرٜ غٛعٛ دٛوْ طُمْ حُبٛمَا ندٜرْ وُرٛ حِيتٜ اٜ غِتٜ طِطِ؞ «ڤَامٜىٰ، تٛع اٛنْ نجَوَنْ کٛو غٛعٛتٛ ندٜرْ سُکَحٛيْ ڤَمَرٛيْ کٛعٛيْ؞ نغَمْ اٜ مِ وِعَعٛنْ، مَلَاعِکَعٜنْ مَاکٛيْ تٛنْ دٛوْ کٛو ندٜيٜ اٜ ندَارَ يٜىٰسٛ ݧَاکٛ اَمْ مٛ دٛوْ؞ [ندٜنْ ٻِي نٜطّٛ وَرٛيِي نغَمْ حِسْنَ کٛ مَجِّ؞] «تٛو، کٛ ݧُمٛتٛنْ؟ تٛ نٜطّٛ اٜ وٛودِ بَالِ 100، سٜيْ غٛعٛ ندٜرْ بَالِ طِنْ مَجِّ، نَاع اٛ اَلَيْ کٛرِيطِ لٜيْ حٛشّٜىٰرٜ، اٛ دِلَّ طَٻُّتُکِ مبَالَ مَجُّنغَ نغَنْ؟ اٜ مِ وِعَعٛنْ غٛونغَ، تٛ اٛ حٜٻْتٛيِينغَ، بٜلْطُمْ طُمْ اٛ نَنَتَ دٛوْ مَاغَ طُمْ ٻُرِي طُمْ بَالِ کٛرِيطِ طِنْ طِ مٜىٰطَايِ مَجُّکِ؞ نٛنْ ݧَاکٛ مٛوطٛنْ مٛ دٛوْ يِطَا کٛو غٛعٛتٛ ندٜرْ سُکَاٻٜ ڤَمَرْٻٜ ٻٜعٜ حَلْکَ؞ «تٛ بَنْدِرَاوٛ مَاطَ وَطَنِيمَ کٛ وٛوطَا، يَحُ مبِعَامٛ کٛ وٛوطَا طُمْ اٛ وَطَنْمَا، اَنْ اٜ مَاکٛ تَنْ؞ تٛ اٛ جَٻِي، اَ وَرْتِرِي سُمْڤٛ حَکُّندٜ مٛوطٛنْ وٛنْ طٛنْ؞ اَمَّا تٛ اٛ وَݧِي جَٻُکِ، سٜيْ فُطِّتَا شٛعّٛدٛطَا اٜ نٜطّٛ غٛعٛتٛ کٛو طِطٛ تٛ مَاکٛ، نغَمْ ‹دٛولٜ طُمْ حٜٻَ شٜيْدُعٜنْ طِطٛ کٛو تَتٛ کٛ طُمْ تَبِّتِنَ حَالَ؞› تٛ بٛو اٛ وَݧِي کٛ ٻٜ مبِعِ کَمْٻٜ مَا، سٜيْ مبِعَاکَ کَوْتَلْ تٛکُّٻٜيَمْ؞ طٛنْمَا تٛ اٛ وَݧِي نَنْکِ کَوْتَلْ تٛکُّٻٜيَمْ، حٛشُّمٛ بٛ مٛ اَنْدَا اَللَّه کٛو غٛودُطٛ حَکّٜ غَݧُطٛ تُوبَ؞ «اٜ مِ وِعَعٛنْ غٛونغَ، فُو کٛ کَطُطٛنْ اٜ دُونِيَارُ، اَللَّه مٛ دٛوْ جَٻِ؞ طٛنْمَا فُو کٛ اَلُطٛنْ طُمْ وَطَ اٜ دُونِيَارُ، اَللَّه مٛ دٛوْ جَٻِ؞ «طٛنْمَا، اٜ مِ وِعَعٛنْ، تٛ يِمْٻٜ طِطٛ ندٜرْ مٛوطٛنْ کَوْتِي کٛعٜ تٛرَکٜ غٛطُّمْ اٜ دُونِيَارُ، ݧَاکٛ اَمْ مٛ دٛوْ وَطَنَيْٻٜطُمْ؞ نغَمْ تٛ يِمْٻٜ طِطٛ کٛو تَتٛ کَوْرِتِ ندٜرْ اِنْدٜ اَمْ، اٜ مِ وٛنْدِ اٜ مَٻّٜ؞» سٜيْ بِيتُرُسْ ٻَدّٛيِي وِعِ يٜىٰسُ، «مٛودِبّٛ، ندٜ نٛيٜ بَنْدِرَاوٛ اَمْ اٜ وَطَنَيَمْ کٛ وٛوطَا اٜ مِ يَافَنٛومٛ؟ ندٜ جٛوٜىٰطِطِ؟» يٜىٰسُ نٛوتِي وِعِمٛ، «نَاع ندٜ جٛوٜىٰطِطِ تَنْ، اَمَّا جٛوٜىٰطِطِ ندٜ شَڤَّنْطٜ جٛوٜىٰطِطِ؞ نغَمْ نٛنْ، طُمْ نَنْدِنَيْ لَامُ اَللَّه اٜ غٛطّٛ لَامِيطٛ غِطّٛ لِمَ جَوْدِ مُوطُمْ نغٛنْدِ جُنْغٛ کُوَنٛوٻٜمٛ؞ ندٜ اٛ فُطِّ لِمُکِندِ، سٜيْ طُمْ وَدَّنِمٛ غٛطّٛ مٛ اٛ تٛکَّتَ ݧَمَاندٜ شٜىٰدٜ طٜ اٛ وَاوَتَا يٛٻُکِ حَا کٜىٰرٛلْ جٛنْدٜ مَاکٛ اٜ دُونِيَارُ؞ ندٜ اٛ تَمڤِ يٛٻُکِ، سٜيْ لَامِيطٛ اٛنْ وَطِ طُمْ سٛورَمٛ اٜ دٜبّٛ مَاکٛ اٜ ٻِٻّٜ مَاکٛ اٜ کٛو طُمٜ کٛ اٛ وٛودِ نغَمْ طُمْ يٛٻَ شٜىٰدٜ طٜنْ؞ سٜيْ مَشُّطٛ اٛنْ دِشِّي يٜىٰسٛ مَاکٛ، تٛرِيمٛ، وِعِ، ‹وَطُ مُݧَلْ؞ مِ يٛٻٜتٜ کٛو طُمٜ؞› سٜيْ لَامِيطٛ اٛنْ نَنِ جُرُمْطُمْ مَشُّطٛ اٛنْ يَافَنِيمٛ ݧَمَاندٜ ندٜنْ يٛوفِمٛ؞ «اَمَّا مَشُّطٛ اٛنْ اٜ وُرْتَاکِ مَاکٛ اٛ تَوِ غٛطّٛ مٛ اٛ حُودَتَ مٛ اٛ تٛکَّتَ ݧَمَاندٜ شٜىٰدٜ طٜ طُمْ يٛٻَتَ کُوٛووٛ تٛ نغٜسَ لٜبِّ جٛوِ؞ اٛ طٜطَّنِمٛ دَاندٜ، اٛ وِعِمٛ، ‹يٛٻَمْ کٛ تٛکَّيْمَامِ!› سٜيْ مٛ اٛ حُودَتَ اٛنْ دِشِّ تٛرِيمٛ، وِعِ، ‹وَطَنَمْ مُݧَلْ مِ يٛٻٜتٜ؞› اَمَّا اٛ وَݧِ، اٛ وَطِ طُمْ مَٻِّمٛ ندٜرْ سُودُ شُرَلْ سٜيْ ندٜ اٛ يٛٻِمٛ کٛ اٛ تٛکَّتَمٛ؞ ندٜ حِغٛوٻٜ کُوغَلْ مَاکٛ نغِعِ نٛنْ، ٻٜ نغَنِّ نَاع سٜطَّ؞ سٜيْ ٻٜ نجَحِ ٻٜ مبِعِکَ لَامِيطٛ اٛنْ فُو کٛ وَطِ؞ «سٜيْ لَامِيطٛ اٛنْ نٛدِّ مَشُّطٛ اٛنْ، وِعِمٛ، ‹اَنْ اَ مَشُّطٛ کَلُّطٛ! مِ يَافَنَکٜمَ فُو ݧَمَاندٜ ندٜ تٛکَّيْمَامِ نغَمْ اَ تٛرَکٜيَمْ؞ تٛو، حَانَايِ نجُرْمِنَنَا مٛ کُودَتَا نٛنْ نٛ نجُرْمِنِرَنْمَامِ؟› لَامِيطٛ اٛنْ نَنِ مٛنّٜرٜ نَاع سٜطَّ، اٛ وَطِ طُمْ نَنْغِمٛ طُمْ وَطَ کَ تٛرُّکِمٛ نَا اٛ يٛٻِي کٛو طُمٜ کٛ طُمْ تٛکَّتَمٛ؞ «نٛنْ ݧَاکٛ اَمْ مٛ دٛوْ وَطَنْتَ کٛو مٛيٜ مٛوطٛنْ مٛ يَافَنَاکِ بَنْدِرَاوٛ مُوطُمْ اٜ ٻٜرْندٜ غٛعٛ؞» ندٜ يٜىٰسُ حٜىٰݧِ وِيکِ فِي طُعُمْ، سٜيْ اٛ اَلِ لٜيْدِ غَلِيلِ اٛ نَتِّ لٜيْدِ يَحُودِيَ نغٛنْدِ فٛنْغٛ شَانغٛلْ اُرْدُنْ؞ يِمْٻٜ طُطْٻٜ تٛکِّمٛ، اٛ يَمْطِتِنِ ݧَوْٻٜ تٛنْ؞ سٜيْ وٛٻّٜ فَارِسَنْکٛعٜنْ نغَرِ تٛ مَاکٛ نغَمْ ٻٜ ڤٛوندَمٛ، ٻٜ پَمِمٛ، ٻٜ مبِعِ، «اٜ يِيکِ مَاطَ اَتَّوْرَ اَلِي نٜطّٛ يٛوفَ دٜبّٛ مُوطُمْ؟» اٛ نٛوتِي، اٛ وِعِ، «تٛو، اٛنْ مٜىٰطَايِ جَنْغُکِ اَايَارٜ بِيندٜ تَغُطٛ يِمْٻٜ دَغَ فُطّٛودٜ تَغُکِ اٛ تَغِيٻٜ غٛرْکٛ اٜ دٜبّٛ؟ اٛ وِعِي، ‹نغَمْ نٛنْ نٜطّٛ اَلَيْ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، کَمْٻٜ طِطٛ ٻٜ نغَرْتَ غٛعٛ؞› نغَمْ نٛنْ نَاع ٻٜ طِطٛ کَدِنْ، اَمَّا ٻٜ نغَرْتِي نٜطّٛ غٛعٛتٛ؞ نغَمْ مَاجُمْ کٛ اَللَّه حَوْتِ، تٛع نٜطّٛ سٜنْدَطُمْ؞» سٜيْ ٻٜ مبِعِمٛ، «تٛو، نغَمْ طُمٜ اَنَّبِ مُوسَ وِعِ نٜطّٛ وِنْدَنَ دٜبّٛ مُوطُمْ طٜرٜوٛلْ وَرْکِ تٜىٰغَلْ وِعَمٛ اٛ دِلَّ؟» سٜيْ يٜىٰسُ وِعِٻٜ، «نغَمْ ٻٜرْطٜ مٛوطٛنْ طٜ شَاتُطٜ وَطِ مُوسَ اَلِعٛنْ نجٛوفٛنْ رٜوْٻٜ مٛوطٛنْ، اَمَّا نَاع نٛنْ طُمْ وٛنِ دَغَ اَرَنْدٜ؞ اٜ مِ وِعَعٛنْ، کٛو مٛيٜ يٛوفِ دٜبّٛ مُوطُمْ، تٛ نَاع نجٜىٰنُ اٛ وَطِ، ندٜنْ تٜعِ غٛطّٛ دٜبّٛ، وَطِي نجٜىٰنُ وٛنْ طٛنْ؞» سٜيْ تٛکُّٻٜمٛ مبِعِمٛ، «تٛ نٛنْ طُمْ وٛنِ حَکُّندٜ نٜطّٛ اٜ دٜبّٛ مُوطُمْ، تٛو، شِيَ تٜىٰغَلْ مَا ٻُرِي؞» اَمَّا اٛ وِعِٻٜ، «نَاع کٛو مٛيٜ وَاوَتَ جَٻُکِ حَالَ کَعَ، سٜيْ نِ ٻٜ اَللَّه وَوْنِ؞ نغَمْ اٜ وٛودِ ٻٜ طُمْ دَݧِ نغٛرْغُ مَٻّٜ اٜ وَاتِ؞ اٜ وٛودِ وٛٻّٜ بٛو ٻٜ يِمْٻٜ تَڤِّ؞ ندٜنْ اٜ وٛودِ وٛٻّٜ ٻٜ تٜعَتَا نغَمْ طَٻُّتُکِ لَامُ اَللَّه؞ فُو بَاوَيْطٛ جَٻُکِ حَالَ کَعَ جَٻَکَ؞» سٜيْ طُمْ وَدَّنِ يٜىٰسُ سُکَحٛيْ ڤَمَرٛيْ نغَمْ اٛ يٛوَنَکٛيْ جُوطٜ اٛ وَطَنَکٛيْ دٛعَارٜ؞ اَمَّا تٛکُّٻٜمٛ کَٻَنِ غَدَّيْٻٜکٛيْ؞ سٜيْ يٜىٰسُ وِعِٻٜ، «اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞» سٜيْ اٛ يٛوَنِکٛيْ جُوطٜ مَاکٛ نغَمْ بَرْکِطِنْکِ، ندٜنْ اٛ دِلِّ؞ سٜيْ غٛطّٛ ٻَدّٛيِي تٛ يٜىٰسُ وِعِ، «مٛودِبّٛ، طُمٜ فِي غٜىٰتُمْ حَانِ مِ وَطَ نغَمْ مِ حٜٻَ يٛنْکِ کِ رٜعَتَا؟» سٜيْ يٜىٰسُ وِعِمٛ، «نغَمْ طُمٜ پَمَتَايَمْ دٛوْ غٜىٰتُمْ؟ اٜ وٛودِ غٜىٰتٛ غٛعٛتٛ تَنْ؞ تَا يِطِ کٜٻَا يٛنْکِ کِ رٜعَتَا، تٛکُّ کٛ اَتَّوْرَ وِعِ؞» سٜيْ اٛ وِعِ يٜىٰسُ، «طُمٜ اَتَّوْرَ وِعِ؟» سٜيْ يٜىٰسُ وِعِ، «تَاع وَطُ وَرْحٛورٜ؞ تَاع وَطُ نجٜىٰنُ؞ تَاع وُجُّ؞ تَاع حٛکُّ شٜيْدَ فٜوْرٜ؞ حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞ يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞» سٜيْ کَيٜىٰجٛ اٛنْ وِعِمٛ، «اٜ مِ وَطَ فُو فِي طُعُمْ؞ کٛ حٛرَنِييَمْ کَدِنْ؟» يٜىٰسُ وِعِمٛ، «تَا يِطِ نغَرْتَا کٜوْطٛ، يَحُ، شٛورَا کٛ نغٛودُطَا فُو، کٛکَّا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞» ندٜ کَيٜىٰجٛ اٛنْ نَنِ نٛنْ، اٛ دِلِّ اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞ سٜيْ يٜىٰسُ وِعِ تٛکُّٻٜمٛ، «اٜ مِ وِعَعٛنْ غٛونغَ، اٜ طُمْ سَطِ نَاع سٜطَّ دِسْکُطٛ نَتَّ لَامُ اَللَّه؞ طٛنْمَا اٜ مِ وِعَعٛنْ، طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞» ندٜ تٛکُّٻٜمٛ نَنِ نٛنْ، ٻٜ کَيْطِنِ نَاع سٜطَّ، ٻٜ مبِعِ، «تٛو، تٛ طُمْ نٛنْ، مٛيٜ حِسَتَ؟» اَمَّا يٜىٰسُ رَارِٻٜ، وِعِ، «تٛ يِمْٻٜ طُمْ وَطَتَاکٛ، اَمَّا تٛ اَللَّه کٛو طُمٜ طُمْ غَطٛتٛوطُمْ؞» سٜيْ بِيتُرُسْ وِعِ، «تٛو، رَطُّمْ، مِنٛنْ مِنْ اَلِي کٛو طُمٜ مِنْ تٛکِّيمَ؞ کٛ مِنْ کٜٻَتَ؟» يٜىٰسُ وِعِٻٜ، «اٜ مِ وِعَعٛنْ غٛونغَ، اٜ جَامَنُ غَرَيْطُمْ، تٛ ٻِي نٜطّٛ جٛوطَکٜ دٛوْ جٛوطٛرْغَلْ لَامُ مُوطُمْ طُمْ تٜدُّنغَلْ، اٛنٛنْ تٛکُّٻٜيَمْ اٛنٛنْ مَا اٛنْ نجٛوطٛتٛ دٛوْ جٛوطٛرْلٜ لَامُ سَڤّٛ اٜ طِطِ، اٛنْ لَامٛو لٜݧِ اِسْرَاعِيلَ سَڤّٛ اٜ طِطِ؞ طٛنْمَا کٛو مٛيٜ اَلُطٛ غُرٜىٰجٜ، کٛو سَکِرَاٻٜ مُوطُمْ وٛرْٻٜ کٛو رٜوْٻٜ، کٛو ݧَاکٛ، کٛو مَدُوجٛ، کٛو ٻِٻّٜ، کٛو غٜسٜ نغَمْ اَمْ، اٛ حٜٻَيْ کٛ ٻُرِ نٛنْ ندٜ 100، ندٜنْ اٛ حٜٻَيْ يٛنْکِ کِ رٜعَتَا؞ اَمَّا يِمْٻٜ طُطْٻٜ اَرْتُٻٜ ٻٜ نغَرْتَيْ شَکِتِيٻٜ، ندٜنْ شَکِتِيٻٜ نغَرْتَيْ اَرْتُٻٜ؞ «لَامُ اَللَّه اٜ نَنْدِ اٜ غٛطّٛ جٛومُ نغٜسَ بُرْتِيطٛ اِلَا سُبَکَ نغَمْ اٛ حٜٻَ حُوٛوٻٜ تٛ نغٜسَ اِنَبٛوجٜ مَاکٛ؞ اٛ وَادِ اٜ مَٻّٜ اٛ يٛٻَيْٻٜ يَمْندٜ اَجُرْفَارِ غٛعٛ اٜ ݧَلْندٜ، سٜيْ اٛ وِعِٻٜ ٻٜ نجَحَ نغٜسَ کَنْ؞ ندٜ اٛ وُرْتِي فَرٛ نجَمْندِ جٛوٜىٰنَيِ سُبَکَ، سٜيْ اٛ يِعِ وٛٻّٜ اٜ نجٛوطِي اٜ مٜىٰرٜ ندٜرْ لُومٛ؞ سٜيْ اٛ وِعِٻٜ، ‹اٛنٛنْ مَا نجَحٜىٰ نغٜسَ اَمْ، مِ يٛٻَيْعٛنْ کٛ حَانِ؞› سٜيْ ٻٜ نجَحِ؞ ندٜ اٛ فُطِّتِ اٛ وُرْتِي، اٛ وَطِ نٛنْ فَرٛ شَکَ ݧَلَوْمَ اٜ فَرٛ نجَمْندِ تَتِ اَلَاسَرَ؞ فَرٛ نجَمْندِ جٛوِ اَلَاسَرَ اٛ فُطِّتِ اٛ وُرْتِي اٛ تَوِ وٛٻّٜ اٜ ندَرِي، اٛ وِعِٻٜ، ‹نغَمْ طُمٜ ݧَلُّطٛنْ اٛنْ ندَرِي اٜ مٜىٰرٜ؟› سٜيْ ٻٜ مبِعِمٛ، ‹نغَمْ وَلَا کٛشُّطٛمِنْ کُوغَلْ؞› سٜيْ اٛ وِعِٻٜ، ‹اٛنٛنْ مَا نجَحٜىٰ نغٜسَ اَمْ؞› «ندٜ فُتُرٛ وَطِ، جٛومُ نغٜسَ اٛنْ وِعِ ڤَامَنٛووٛ کُوغَلْ نغٜسَ کَنْ، ‹نٛدّٛيْ حُوٛوٻٜ ٻٜنْ، نجٛٻَاٻٜ نجٛٻَارِ مَٻّٜ، اَرْتِرَا شَکِتِيٻٜ ٻٜنْ حَا يَاکِ اَرَنْدٜعٜنْ ٻٜنْ؞› ندٜ کٛشَّاٻٜ فَرٛ نجَمْندِ جٛوِ اَلَاسَرَ نغَرِ، کٛو مٛيٜ حٛکَّا يَمْندٜ اَجُرْفَارِ غٛعٛ؞ نغَمْ نٛنْ، ندٜ اَرَنْدٜعٜنْ نغَرِ، اٜ ٻٜ کَمِّي ٻٜ کٜٻَيْ کٛ ٻُرِ نٛنْ، اَمَّا کٛو مٛيٜ مَٻّٜ حٛکَّا يَمْندٜ اَجُرْفَارِ غٛعٛ؞ ندٜ ٻٜ نجَٻِ شٜىٰدٜ طٜنْ، ٻٜ مٜتِتَنِ جٛومُ نغٜسَ اٛنْ، اٜ ٻٜ مبِعَ، ‹ٻٜعٜ شَکِتِيٻٜ اٜ وَرُکِ، شَرٜلْ سٜطَّ تَنْ ٻٜ کُوِ، ندٜنْ اَ حٛکِّيٻٜ نٛ کٛکُّطَامِنْ، مِنٛنْ ݧَلُّٻٜ ندٜرْ نَانغٜ اٜ کُوَ؞› سٜيْ اٛ نٛوتِي، اٛ وِعِ غٛعٛتٛ ندٜرْ مَٻّٜ، ‹حِغٛ، مِ حَلَّنَايِمَ؞ نَاع اٜنْ نغَادِي دٛوْ يَمْندٜ اَجُرْفَارِ غٛعٛ اٜ ݧَلْندٜ؟ جَٻُ نجٛٻَارِ مَاطَ، ندِلَّا؞ مِنْ يِطِ حٛکُّکِ شَکِتِيٻٜ ٻٜنْ نٛ کٛکُّمَامِ؞ مِ وَلَا لَامُ مِ وَطَ نٛ نغِطُمِ وَطُکِ اٜ شٜىٰدٜ اَمْ؟ کٛو اَ نَنَ لَوْلِيرُ نغَمْ مِ وَطِ کٛ وٛوطِ؟› » ندٜنْ اٛ يٛتِّنِ اٜ وِيکِ، «نٛنْ يِمْٻٜ شَکِتِيٻٜ ٻٜ نغَرْتَيْ اَرْتُٻٜ، ندٜنْ اَرْتُٻٜ نغَرْتَيْ شَکِتِيٻٜ؞» يٜىٰسُ اٜ تٛکُّٻٜمٛ اٜ دٛوْ طَتَلْ يَاکِ اُرُشَلِيمَ، سٜيْ اٛ نٛدِّٻٜ وُتُّدُ لَاوٛلْ، اٛ وِعِٻٜ، «رَطُّمْ، اٜنْ نجَحَيْ اُرُشَلِيمَ، ندٜنْ طُمْ وَطَيْ ٻِي نٜطّٛ ندٜرْ جُوطٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ؞ ٻٜ تَپَنَيْمٛ کِيتَ مَيْدٜ، ٻٜ نغَطَمٛ ندٜرْ جُوطٜ حٜىٰفٜرْٻٜ ٻٜ نجُکِّتَمٛ، ٻٜ ڤِيَمٛ، ٻٜ مبَرَمٛ دٛوْ غَافَانغَلْ؞ ندٜنْ ݧَلْندٜ تَتَوْرٜ طُمْ اُمِّنَيْمٛ دَغَ مَيْدٜ؞» سٜيْ مَدُوجٛ ٻِٻّٜ جَبَدِ وَرِ تٛ يٜىٰسُ اٜ ٻِٻّٜ مَاکٛ اٛ دِشِّي يٜىٰسٛ مَاکٛ، نغَمْ اٛ تٛرٛومٛ غٛطُّمْ؞ سٜيْ يٜىٰسُ وِعِمٛ، «کٛ نغِطَّا؟» مَدُوجٛ اٛنْ وِعِمٛ، «وَطُ ٻِٻّٜ اَمْ ٻٜعٜ طِطٛ نجٛوطٛو وُتُّدُ جٛوطٛرْغَلْ مَاطَ ندٜرْ لَامُ مَاطَ، غٛعٛتٛ ݧَامٛ مَاطَ غٛعٛتٛ نَنٛ مَاطَ؞» اَمَّا يٜىٰسُ نٛوتِي، وِعِ، «اٛنْ اَنْدَا کٛ تٛرٛتٛوطٛنْ؞ اٛنْ مبَاوَيْ نجَرٛنْ اِرِ جَرْدُغٜلْ تٛرَّ نغٜلْ نجَرَيْمِ يٜىٰسٛ طٛعٛ؟» ٻٜ مبِعِمٛ، «اٜىٰ، مِنْ مبَاوَيْ؞» سٜيْ يٜىٰسُ وِعِٻٜ، «اٜىٰ، اٛنْ نجَرَيْ اِرِ جَرْدُغٜلْ تٛرَّ نغٜلْ نجَرَيْمِ، اَمَّا جٛوطَاکِ اٜ جُنْغٛ اَمْ ݧَامٛ اٜ جُنْغٛ اَمْ نَنٛ نَاع مِنْ حٛکَّتَطُمْ؞ طٜعٜ بِغٜىٰجٜ طُمْ طٜ ٻٜنْ طٛنْ ٻٜ ݧَاکٛ اَمْ مٛ دٛوْ سِرْيَنِي؞» ندٜ حٛرِيٻٜ تٛکُّٻٜ يٜىٰسُ سَڤّٛ نَنِ نٛنْ، ٻٜ ڤُطِّ مٛنَّنْکِ يَاکُبُ اٜ يَحَيَ؞ اَمَّا يٜىٰسُ نٛدِّٻٜ ٻٜ فُو، وِعِٻٜ، «اٛنْ اَنْدِ لَامِيٻٜ يِمْٻٜ نَاع يَحُودَنْکٛعٜنْ اٜ کٛلَّٻٜ لَامُ سٜمْبٜ، ندٜنْ مَوْٻٜ مَٻّٜ مَا اٜ کٛلَّ ٻُرَلْ؞ اَمَّا اٛنٛنْ، تٛع اٛنْ نغَطُ نٛنْ حَکُّندٜ مٛوطٛنْ؞ فُو غِطّٛ وَرْتَ مَوْطٛ ندٜرْ مٛوطٛنْ دٛولٜ وَرْتَ جَغَّنْتٛوطٛعٛنْ؞ کَدِنْ فُو غِطّٛ وَرْتَ اَرْدِيطٛ مٛوطٛنْ، دٛولٜ اٛ وَرْتَ مَشُّطٛ مٛوطٛنْ؞ نٛنْ مَا ٻِي نٜطّٛ وَرِي نَاع نغَمْ اٛ جَغَّنٜىٰ، اَمَّا نغَمْ اٛ جَغَّنٛو يِمْٻٜ، اٛ حٛکَّ يٛنْکِ مَاکٛ نغَمْ رِمْطِنْکِ طُطْٻٜ؞» يٜىٰسُ اٜ تٛکُّٻٜمٛ اٜ مبُرْتٛو غَرِيرِ جٜرِيکٛ، سٜيْ يِمْٻٜ طُطْٻٜ تٛکِّمٛ؞ سٜيْ رَا وُمْٻٜ طِطٛ اٜ نجٛوطِي حَادٜ طَتَلْ؞ ندٜ ٻٜ نَنِ يٜىٰسُ اٜ پَٻّٛو، سٜيْ ٻٜ نٛدِّ سٜمْبٜىٰ، «مٛودِبّٛ، ٻِطّٛ دَوْدَ، يُرْمِنَنْمِنْ!» کَوْرُتُٻٜ ٻٜنْ کَٻَنِٻٜ ٻٜ ندٜعِّتَ، اَمَّا ٻٜ ٻٜيْدِ نٛدُّکِ اٜ سٜمْبٜ، اٜ ٻٜ مبِعَ، «مٛودِبّٛ، ٻِطّٛ دَوْدَ، يُرْمِنَنْمِنْ!» سٜيْ يٜىٰسُ دَرِي، نٛدِّٻٜ، وِعِ، «کٛ نغِطّٛنْ مِ وَطَنَعٛنْ؟» ٻٜ مبِعِمٛ، «مٛودِبّٛ، اٜ مِنْ نغِطِ مبُمْتِنَامِنْ؞» يٜىٰسُ نَنِ جُرُمْطُمْ مَٻّٜ، مٜىٰمِ غِتٜ مَٻّٜ؞ طٛنْ اٜ طٛنْ غِتٜ مَٻّٜ مبُمْتِ، ٻٜ تٛکِّمٛ؞ ندٜ يٜىٰسُ اٜ تٛکُّٻٜمٛ ٻَدِي غَرِيٜلْ بٜتَفَاجِ حَادٜ اُرُشَلِيمَ تٛ حٛشّٜىٰرٜ ندٜ لٜطّٜ جَيْتُنْ، سٜيْ اٛ لِلِ تٛکُّٻٜمٛ طِطٛ؞ اٛ وِعِٻٜ، «نجَحٜىٰ ندٜرْ غَرِيٜلْ غٛنْغٜلْ يٜىٰسٛ مٜىٰطٜنْ؞ اٜ نَتُّکِ مٛوطٛنْ، اٛنْ تَوَيْ مبَبَّ اٜ حَٻِّي اٜ ٻِنْغَ مَاغَ؞ ڤِتّٛيٜىٰطِ نغَدَّنٛنْيَمْطِ؞ تٛ غٛطّٛ مٜتَنِيعٛنْ، مبِعٜىٰ، ‹مٛودِبّٛ اٜ يِطِ حُوتِرَطِ، اٛ وَطَيْ طُمْ وَرْتِرَطِ نَاع کٛ نٜىٰٻِ؞› » نٛنْ وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ جَکَارِيَ، وِيکِ، «مبِعٜىٰ يِمْٻٜ اُرُشَلِيمَ، ‹رَا لَامِيطٛ مٛوطٛنْ اٜ وَرَ تٛ مٛوطٛنْ! اٛ لٜسْتِنْطٛ حٛورٜ اٜ مٛ دٛوْ مبَبَّ، اٜ دٛوْ مبَبَّ مٛلَ ڤَمَرَ؞› » سٜيْ تٛکُّٻٜمٛ ٻٜنْ ندِلِّ، نغَطِ کٛ يٜىٰسُ وِعِٻٜ؞ ٻٜ نجَارِ مبَبَّ نغَنْ اٜ ٻِنْغَ مَاغَ، ٻٜ مبٜعِّتِ شُدَّارِ مَٻّٜ دٛوْ مَاجِ، اٛ پٜنْتِ اٛ جٛوطِ؞ يِمْٻٜ طُطْٻٜ حَوْرُتُٻٜ مبٜعِّتِ شُدَّارِ مَٻّٜ دٛوْ طَتَلْ نغَلْ، وٛٻّٜ بٛو نغٜوٛيِ حَاکٛ تٛ لٜطّٜ اٜ مبٜعِّتَکٛ دٛوْ طَتَلْ؞ يِمْٻٜ طُطْٻٜ يَحٛوٻٜ يٜىٰسٛ يٜىٰسُ اٜ تٛکِّرْٻٜمٛ غَطَ اٜ ٻٜ مبِعَ اٜ سٜمْبٜ، «حٛسَانَ تٛ ٻِطّٛ دَوْدَ! اٛ بَرْکِطِنَاطٛ غَرٛيْطٛ ندٜرْ اِنْدٜ جٛومِرَاوٛ! اٜنْ مَنْتُ اَللَّه مٛ دٛوْ!» ندٜ يٜىٰسُ نَتِّ اُرُشَلِيمَ، حَکِّيلٛ يِمْٻٜ غَرِيرِ ندِنْ فُو اُمِّي، اٜ ٻٜ مبِعَ، «طُمْ مٛيٜ اٛعٛ؟» سٜيْ يِمْٻٜ طُطْٻٜ ٻٜنْ جَادٛوٻٜ اٜ يٜىٰسُ مبِعِ، «طُمْ يٜىٰسُ، اَنَّبِيجٛ دَغَ غَرِيرِ نَجَرَتْ ندٜرْ لٜيْدِ غَلِيلِ؞» سٜيْ يٜىٰسُ نَتِّ وُرٛ شٜنِينغٛ رِيوِ سٛورٛوٻٜ اٜ سٛودٛوٻٜ ندٜرْ مَغّٛ؞ اٛ تَلِّ تٜىٰبُرْجِ غَيْلِتٛوٻٜ شٜىٰدٜ رٛومَنْکٛعٜنْ يَاکِ شٜىٰدٜ وُرٛ شٜنِينغٛ اٜ جٛوطٛرْلٜ شٛورٛوٻٜ ڤٛولِ؞ اٛ وِعِٻٜ، «طُمْ وِنْدَامَ اَللَّه وِعِي، ‹طُمْ نٛدِّرَيْ وُرٛ اَمْ وُرٛ دٛعَارٜ،› اَمَّا اٛنْ نغَرْتِرِينغٛ لُورٛ وُيْٻٜ!» سٜيْ وُمْٻٜ اٜ لَپٛوٻٜ نغَرِ تٛ مَاکٛ ندٜرْ وُرٛ شٜنِينغٛ، اٛ يَمْطِتِنِٻٜ؞ اَمَّا مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ نَنِ مٛنّٜرٜ ندٜ ٻٜ نغِعِ کُوطٜ کَيْطِنِيطٜ طٜ اٛ وَطِ، حَا سُکَحٛيْ اٜ مبِعَ اٜ سٜمْبٜ ندٜرْ وُرٛ شٜنِينغٛ، «حٛسَانَ تٛ ٻِطّٛ دَوْدَ!» ٻٜ مبِعِمٛ، «اَ نَنَ کٛ سُکَاٻٜ ٻٜعٜ مبِعَتَ؟» يٜىٰسُ نٛوتِي، وِعِ، «اٜىٰ؞ اٛنْ مٜىٰطَايِ جَنْغُکِ اَايَارٜ بِيندٜ، ‹اَنْ سِرْيِ سُکَحٛيْ ڤَمَرٛيْ اٜ مُسِنَيْکٛيْ مَنْتُمَا؟› » سٜيْ اٛ دِلِّ اٛ اَلِٻٜ اٛ وُرْتِي غَرِيرِ ندِنْ اٛ يَحِ بٜتَنِ اٛ وَالِ تٛنْ؞ ندٜ وٜىٰتِ يٜىٰسُ اٜ وَرْتٛيَ غَرِيرِ اُرُشَلِيمَ اٛ نَنِ وٜىٰلٛ؞ ندٜ اٛ يِعِ وٛکِّ اِبِّ حَادٜ طَتَلْ، اٛ يَحِ تٛ مَاکِ، اَمَّا اٛ تَوَايِ غٛطُّمْ تٛ مَاکِ سٜيْ حَاکٛ تَنْ؞ سٜيْ اٛ وِعِکِ، «تَاع فُطُّتُ ندِمَا حَا اَبَدَا!» طٛنْ اٜ طٛنْ کِ يٛورِ؞ ندٜ تٛکُّٻٜمٛ نغِعِ نٛنْ، ٻٜ کَيْطِنِ، ٻٜ مبِعِ، «نٛ طُمْ وَطِ اِبِّ کِعِ يٛورِ طٛنْ اٜ طٛنْ؟» يٜىٰسُ نٛوتِي، وِعِٻٜ، «اٜ مِ وِعَعٛنْ غٛونغَ، تٛ اٛنْ نغٛودِ حٛولَارٜ، اٛنْ نغَلَا سٜکٛ کٛو سٜطَّ، اٛنْ مبَاوَيْ نغَطٛنْ کٛ ٻُرِ کٛ نغَطَنْمِ اِبِّ کِعِ، حَا مَا تٛ اٛنْ مبِعِي حٛشّٜىٰرٜ ندٜعٜ، ‹طٛوفَ دَغَ طٛعٛ، کُبٛطَا حٛورٜ مَاطَ ندٜرْ مبٜىٰلَ،› سٜيْ ندٜ وَطَ نٛنْ؞ تٛ اٛنْ نغٛودِ حٛولَارٜ، فُو کٛ تٛرِيطٛنْ اَللَّه اٛنْ کٜٻَيْطُمْ؞» ندٜ يٜىٰسُ نَتِّ وُرٛ شٜنِينغٛ اٜ مٛ ندٜرْ اٜکِّتِنْکِ، سٜيْ مَوْٻٜ اَرْدِيٻٜ دِينَ اٜ مَوْٻٜ يِمْٻٜ نغَرِ تٛ مَاکٛ مبِعِ، «اٜ لَامُ مٛيٜ نغَطَتَا کُوطٜ طٜعٜ؟ مٛيٜ حٛکُّمَا لَامُ طُمْ؟» سٜيْ يٜىٰسُ نٛوتِي، وِعِٻٜ، «مِنْ مَا مِ پَمَيْعٛنْ؞ تٛ اٛنْ نٛوتَنَکٜيَمْ، ندٜنْ مِ وِعَيْعٛنْ اٜ طُمٜ لَامُ نغَطِرَيْمِ کُوطٜ طٜعٜ؞ تٛو، بَڤْتِسْمَ طُمْ يَحَيَ وَطِ، تٛ اَللَّه طُمْ پِوٛيِ کٛو تٛ يِمْٻٜ؟» سٜيْ ٻٜ مٜدِّ حَکُّندٜ مَٻّٜ، ٻٜ مبِعِ، «تٛ اٜنْ مبِعِي، ‹دَغَ تٛ اَللَّه طُمْ پِوٛيِ،› اٛ وِعَيْعٜنْ، ‹کٛ وَطِ اٛنْ جَٻَايِ کٛ اٛ وِعِ؟› اَمَّا تٛ اٜنْ مبِعِي، ‹تٛ يِمْٻٜ طُمْ پِوٛيِ،› اٜنْ کُلَ کٛ يِمْٻٜ نغَطَنْتَعٜنْ، نغَمْ ٻٜ فُو ٻٜ نجَٻِي يَحَيَ اٛ اَنَّبِيجٛ؞» نغَمْ نٛنْ ٻٜ نٛوتِي، ٻٜ مبِعِ يٜىٰسُ، «مِنْ اَنْدَا؞» يٜىٰسُ وِعِٻٜ، «نٛنْ مِنْ مَا، مِ وِعَتَاعٛنْ کٛو اٜ طُمٜ لَامُ نغَطِرَيْمِ کُوطٜ طٜعٜ؞ «تٛو، نٛ نغِيطٛنْ؟ اٜ وٛودِ غٛطّٛ غٛودُطٛ سُکَاٻٜ طِطٛ؞ اٛ يَحِ تٛ سُکَ اَرَنْدٜىٰجٛ اٛنْ، اٛ وِعِ، ‹ٻِطّٛ اَمْ، حَنْدٜ يَحُ نغٜسَ اِنَبٛوجٜ کُوَا؞› سٜيْ سُکَ اٛنْ وِعِمٛ، ‹مِ يَحَتَا؞› اَمَّا دَغَ غَطَ سُکَ اٛنْ وَيْلِتِ ݧُمٛ مُوطُمْ يَحِ؞ سٜيْ ݧَاکٛ اٛنْ يَحِ تٛ سُکَ طِطَٻٛ اٛنْ وِعِمٛ کٛ وِعِ اٛنْ تٛنْ سُکَ اَرَنْدٜىٰجٛ اٛنْ؞ سُکَ اٛنْ نٛوتِي، وِعِ، ‹تٛو، مِ يَحَيْ، بَڤَّ،› اَمَّا اٛ يَحَايِ؞ تٛو، ندٜرْ مَٻّٜ مٛيٜ وَطِ کٛ ݧَاکٛ اٛنْ يِطِ؟» سٜيْ ٻٜ مبِعِ، «اَرَنْدٜىٰجٛ اٛنْ؞» يٜىٰسُ وِعِٻٜ، «اٜ مِ وِعَعٛنْ غٛونغَ، جَٻٛوٻٜ شٜىٰدٜ لٜيْدِ اٜ کَارُوَعٜنْ اٜ ٻٜ اَرْتَعٛنْ نَتُّکِ لَامُ اَللَّه؞ نغَمْ يَحَيَ وَرِي حٛلِّيعٛنْ لَاوٛلْ اَادِلَاکُ، اٛنْ کٛولَاکِمٛ؞ اَمَّا جَٻٛوٻٜ شٜىٰدٜ لٜيْدِ اٜ کَارُوَعٜنْ کٛولَکٜمٛ؞ کٛو ندٜ نغِيطٛنْ نٛنْ، دَغَ غَطَ اٛنْ تُوبَايِ کٛولِيطٛنْمٛ؞ «تٛو، رَا غٛطُّمْ مِسَالُ؞ اٜ وٛودِ غٛطّٛ جٛومُ نغٜسَ غَطُطٛ نغٜسَ اِنَبٛوجٜ، اٛ حٛوِکَ، اٛ وَسِ نغَيْکَ مَوْکَ ندٜرْ تَفَارٜ نغَمْ مٛيْلُکِ ندِيَمْ دَغَ ندٜرْ اِنَبٛوجٜ طٜنْ، اٛ مَحِ سُودُ تٛوْندُ نغَمْ رٜىٰنُکِ نغٜسَ کَنْ؞ سٜيْ اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ؞ ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّٻٜ مَاکٛ تٛ ٻٜ اٛ حٛکِّ نغٜسَ کَنْ نغَمْ ٻٜ نجَٻٛنٛيَمٛ کٛ ٻٜ نغَادُنٛ ندٜرْ کٛ ٻٜنْدِ؞ اَمَّا ٻٜ نَنْغِٻٜ ٻٜ ڤِيِ غٛعٛتٛ، ٻٜ مبَرِ غٛعٛتٛ، ٻٜ کُبٛرِي غٛعٛتٛ کَاپٜ؞ سٜيْ اٛ فُطِّتِ اٛ لِلِ وٛٻّٜ مَشُّٻٜ مَاکٛ ٻُرْٻٜ اَرَنْدٜعٜنْ طُوطُکِ؞ کَمْٻٜ مَا رٜمٛوٻٜ ٻٜنْ نغَطَنِٻٜ نٛنْ نٛ ٻٜ نغَطَنِ اَرَنْدٜعٜنْ ٻٜنْ؞ غَطَ طٛنْ جٛومُ نغٜسَ اٛنْ لِلِ ٻِطّٛ مَاکٛ تٛ رٜمٛوٻٜ ٻٜنْ، اٜ مٛ وِعَ، ‹ٻٜ کٛکَّيْ ٻِطّٛ اَمْ مَنْغُ؞› اَمَّا ندٜ ٻٜ اٛ حٛکِّ نغٜسَ کَنْ نغِعِ ٻِطّٛ اٛنْ، سٜيْ ٻٜ مبِعِ حَکُّندٜ مَٻّٜ، ‹تٛو! رَا دٛنٛووٛ جٛومُ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞› سٜيْ ٻٜ نَنْغِمٛ، ٻٜ مبُرْتِنِمٛ ندٜرْ نغٜسَ کَنْ، ٻٜ مبَرِمٛ؞ «تٛو، تٛ جٛومُ نغٜسَ اٛنْ وَرِي، کٛ اٛ وَطَنْتَ ٻٜ اٛ حٛکِّ نغٜسَ ٻٜنْ؟» سٜيْ ٻٜ مبِعِمٛ، «اٛ وَطَنَيْ کَلُّٻٜ ٻٜنْ طٛنْ وٛکِّ وَرْکِ کَلُّکِ؞ اٛ حٛکَّ وٛٻّٜ نغٜسَ کَنْ کٛکَّيْٻٜمٛ دَغَ ندٜرْ کٛ ٻٜنْدِ؞» يٜىٰسُ وِعِٻٜ، «اٛنْ مٜىٰطَايِ جَنْغُکِ کٛ اَايَاجٜ مبِعِ؟ طٜ مبِعِ، ‹حَيْرٜ ندٜ مَحٛوٻٜ نغَݧِ، کَيْرٜ وَرْتِ حَيْرٜ ٻُرْندٜ دَرْنُکِ مَادِ؞ طُعُمْ طُمْ کُوغَلْ جٛومِرَاوٛ، طُمْ کَيْطِنِيطُمْ تٛ مٜىٰطٜنْ!› «نغَمْ نٛنْ اٜ مِ وِعَعٛنْ، طُمْ جَٻَيْ لَامُ اَللَّه تٛ مٛوطٛنْ طُمْ حٛکَّطُمْ وٛٻّٜ غَطَيْٻٜ کٛ اَللَّه يِطِ؞ کٛو مٛيٜ يَنٛيِ دٛوْ حَيْرٜ ندٜنْ يٜوِ يٜوِنَيْ؛ اَمَّا تٛ حَيْرٜ ندٜنْ يَنِي دٛوْ غٛطّٛ، ندٜ نَمَيْمٛ بٛ شٛنْدِ؞» ندٜ مَوْٻٜ اَرْدِيٻٜ دِينَ اٜ فَارِسَنْکٛعٜنْ نَنِ مِسَالُ فٜىٰرٜ‑فٜىٰرٜ طُمْ اٛ حٛکِّ، سٜيْ ٻٜ ڤَامِ دٛوْ مَٻّٜ اٛ مٜتِ؞ سٜيْ ٻٜ طَٻِّتِ لَاوٛلْ نٛ ٻٜ نَنْغِرْتَمٛ، اَمَّا اٜ ٻٜ کُلَ يِمْٻٜ، نغَمْ يِمْٻٜ ٻٜنْ نجَٻِي اٛ اَنَّبِيجٛ؞ سٜيْ يٜىٰسُ فُطِّتِ مٜتِرَنِٻٜ مِسَالُ، وِعِ، «طُمْ نَنْدِنَيْ لَامُ اَللَّه اٜ غٛطّٛ لَامِيطٛ شِرْيَنِيطٛ ٻِطّٛ مُوطُمْ حُمْتٛ تٜىٰغَلْ؞ اٛ لِلِ مَشُّٻٜ مَاکٛ نٛدّٛيَ کُمْڤِتَاٻٜ حُمْتٛ نغٛنْ، اَمَّا کُمْڤِتَاٻٜ ٻٜنْ نغَݧِ نغَرَ؞ سٜيْ اٛ فُطِّتِ اٛ لِلِ وٛٻّٜ مَشُّٻٜ مَاکٛ، اٛ وِعِ، ‹نجَحٜىٰ مبِعٛنْ کُمْڤِتَاٻٜ ٻٜنْ، «رَطُّمْ مِ سِرْيَکٜ ݧَمْندُ، طُمْ حِرْسِي غَعِ اٜ ݧَلْبِ ڤَيْطِ، کٛو طُمٜ سِرْيَامَ؞ نغَرٜىٰ حُمْتٛ تٜىٰغَلْ نغَلْ!» › اَمَّا کُمْڤِتَاٻٜ ٻٜنْ نغَنَّايِ؞ غٛعٛتٛ يَحِ نغٜسَ مُوطُمْ، غٛعٛتٛ يَحِ لُومٛ مُوطُمْ؞ حٛرِيٻٜ ٻٜنْ نَنْغِ مَشُّٻٜ ٻٜنْ تٛرِّٻٜ، مبَرِٻٜ؞ سٜيْ لَامِيطٛ اٛنْ ٻٜرْنِ نَاع سٜطَّ، لِلِ سٛوجِعٜنْ مُوطُمْ ٻٜ کَلْکِ ٻٜنْ طٛنْ غَطُٻٜ وَرْحٛورٜ ٻٜ نغُلِ غَرِيرِ مَٻّٜ؞ سٜيْ اٛ وِعِ مَشُّٻٜ مَاکٛ، ‹حُمْتٛ تٜىٰغَلْ نغٛنْ سِرْيَامَ، اَمَّا کُمْڤِتَاٻٜ ٻٜنْ ٻٜ ڤٛتَايِ وَرْکِ؞ نغَمْ نٛنْ نجَحٜىٰ دٛوْ طَتٜ مَوْطٜ، کُمڤِتٛنْ فُو مٛ نغِيطٛنْ وَرَ حُمْتٛ نغٛنْ؞› سٜيْ مَشُّٻٜ ٻٜنْ نجَحِ دٛوْ طَتٜ طٜنْ ٻٜ ٻٛڤْتٛيِ کٛو مٛيٜ مٛ ٻٜ تَوِ، فُو کَلُّٻٜ اٜ ٻٜ نغِکُّ بٛطُّمْ، حَا وُرٛ حُمْتٛ نغٛنْ حٜىٰوِ حٛٻّٜ؞ «اَمَّا ندٜ لَامِيطٛ اٛنْ نَتّٛيِ نغَمْ يِعَ حٛٻّٜ ٻٜنْ، اٛ يِعِ غٛطّٛ ندٜرْ مَٻّٜ مٛ ٻٛرْنَاکِ لِمْشٜ حُمْتٛ تٜىٰغَلْ؞ سٜيْ اٛ وِعِمٛ، ‹حِغٛ، نٛ طُمْ وَطِ نَتّٛيْطَا طٛعٛ اَ ٻٛرْنَاکِ لِمْشٜ حُمْتٛ؟› اَمَّا نٜطّٛ اٛنْ دُلِّ کٛ وِعَتَ؞ سٜيْ لَامِيطٛ اٛنْ وِعِ کُوَنٛوٻٜمٛ، ‹کَٻّٜىٰ نٜطّٛ اٛعٛ جُوطٜ اٜ کٛيْطٜ، ڤَطّٛنْمٛ ندٜرْ ݧِوْرٜ کَلُّندٜ، تٛ طُمْ وٛيَتَ طُمْ ݧٜرْپِندِرَ ݧِيپٜ؞› » يٜىٰسُ ٻٜيْدِ وِيکِ، «يِمْٻٜ طُطْٻٜ کُمْڤِتَا، اَمَّا سٜطَّ شُٻَا؞» سٜيْ فَارِسَنْکٛعٜنْ نجَحِ کَوْتِ کٛعٜ، کَٻِّ دَبَرٜ نٛ ٻٜ نَنْغِرْتَ يٜىٰسُ دٛوْ کٛ اٛ وِعِ؞ سٜيْ ٻٜ لِلٛيِ تٛکُّٻٜٻٜ اٜ يِمْٻٜ حِرُدُسْ، ٻٜ مبِعِ، «مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ، اَ اٜکِّتِنَ دٛوْ لَاوٛلْ اَللَّه اٜ غٛونغَ، اَ حُلَتَا کٛ يِمْٻٜ مبِعَتَ دٛوْ مَاطَ، اَ حٛلَّتَا فٜىٰرٛوتِرٛلْ حَکُّندٜ يِمْٻٜ؞ تٛو، وِعُمِنْ، اٜ يِيکِ مَاطَ اٜ حَانِ مِنْ نجٛٻَ کَيْسَرْ شٜىٰدٜ لٜيْدِ کٛو طُمْ حَانَايِ؟» اَمَّا يٜىٰسُ حٜٻْتِ حَلّٜىٰندٜ مَٻّٜ، اٛ وِعِٻٜ، «نغَمْ طُمٜ ڤٛوندٛتٛنْيَمْ، اٛنٛنْ مُنَافُکِعٜنْ؟ کٛلّٜىٰيَمْ يَمْندٜ ندٜ طُمْ يٛٻِرْتَ شٜىٰدٜ لٜيْدِ؞» سٜيْ ٻٜ نغَدَّنِمٛ يَمْندٜ غٛعٛ؞ يٜىٰسُ وِعِٻٜ، «طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟» ٻٜ نٛوتِي، ٻٜ مبِعِ، «طُمْ کَيْسَرْ؞» سٜيْ يٜىٰسُ وِعِٻٜ، «تٛو، نغَمْ نٛنْ کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞» ندٜ ٻٜ نَنِ نٛنْ، ٻٜ کَيْطِنِ، ٻٜ اَلِمٛ، ٻٜ ندِلِّ؞ سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ اٜ ݧَلْندٜ ندٜنْ، سٜيْ وٛٻّٜ مَٻّٜ نغَرِ تٛ يٜىٰسُ، ٻٜ پَمِمٛ، ٻٜ مبِعِ، «مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سَکِرَاوٛ مَاکٛ سٜيْ تٜعَمٛ نغَمْ حٜٻَنَ سَکِرَاوٛ مُوطُمْ مَيْطٛ ٻِٻّٜ؞ تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ ندٜرْ اَمِنْ؞ اَفٛ اٛنْ تٜعِ دٜبّٛ، مَايِ؞ ندٜ اٛ دَݧِدَايِ اٜ دٜبّٛ اٛنْ، اٛ اَلَنِمٛ سَکِرَاوٛ مَاکٛ؞ نٛنْ مَا طِطَٻٛ اٛنْ اٜ تَتَٻٛ اٛنْ حَا نجٛوٜىٰطِطَٻٛ اٛنْ وَطِي نٛنْ؞ غَطَ مَاجُمْ دٜبّٛ اٛنْ مَا مَايِ؞ تٛو، ݧَلْندٜ ندٜ مَيْٻٜ اُمّٛتٛو دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو ٻٜ تٜعِيمٛ؞» سٜيْ يٜىٰسُ نٛوتِي، وِعِٻٜ، «اٛنْ مبٛوفِي نغَمْ اٛنْ اَنْدَا کٛ اَايَاجٜ مبِعِ، ندٜنْ اٛنْ اَنْدَا بَوْطٜ اَللَّه؞ تٛ مَيْٻٜ اُمَّکٜ دَغَ مَيْدٜ، وَلَا تٜعَيْطٛ وَلَا تٜعٜتٜىٰطٛ، اَمَّا ٻٜ نغَرْتَيْ بٛ مَلَاعِکَعٜنْ اَللَّه؞ ندٜنْ دٛوْ اُمَّاکِ مَيْٻٜ دَغَ مَيْدٜ، اٛنْ مٜىٰطَايِ جَنْغُکِ کٛ اَللَّه وِعِعٛنْ؟ اٜ طُمْ وِنْدِ وِيکِ، ‹مِنْ وٛنِ اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞› کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞» ندٜ حَوْرُتُٻٜ طٛنْ نَنِ نٛنْ، ٻٜ کَيْطِنِ دٛوْ اٜکِّتِنٛلْ مَاکٛ؞ کٛ يٜىٰسُ وِعِ وَطِ سَادُسَنْکٛعٜنْ ندُلِّي کٛ مبِعَ؞ ندٜ فَارِسَنْکٛعٜنْ نَنِ نٛنْ، سٜيْ ٻٜ کَوْرِتِ؞ غٛعٛتٛ ندٜرْ مَٻّٜ، مٛودِبّٛ اَتَّوْرَ، پَمِ يٜىٰسُ نغَمْ فٛوندَمٛ، وِعِ، «مٛودِبّٛ، طُمٜ دٛوکَ ٻُرِ مَنْغُ فُو ندٜرْ اَتَّوْرَ؟» يٜىٰسُ وِعِمٛ، « ‹يِطُ جٛومِرَاوٛ اَللَّه مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ حَکِّيلٛ مَاطَ فُو؞› طُعُمْ وٛنِ دٛوکَ مَوْطُمْ اَرَنْدٜجُمْ؞ طِطَٻُمْ مَا اٜ فٛتِّدِ اٜ اَرَنْدٜجُمْ طُمْ؞ ‹يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞› دٛوْ طُعُمْ دٛوکَ طِطُمْ اَتَّوْرَ اٜ دٜفْتٜ اَنَّبٛعٜنْ ندَرِي؞» ندٜ فَارِسَنْکٛعٜنْ کَوْرِتِ، يٜىٰسُ پَمِٻٜ، وِعِ، «طُمٜ ݧُمٛتٛنْ دٛوْ اَلْمَسِيحُ؟ اٛ ٻِطّٛ مٛيٜ؟» ٻٜ مبِعِمٛ، «اٛ ٻِطّٛ دَوْدَ؞» سٜيْ يٜىٰسُ وِعِٻٜ، «تٛو، نٛ طُمْ وَطِ دَوْدَ ندٜرْ بَوْطٜ رُوحُ اَللَّه نٛدِّ اَلْمَسِيحُ ‹جٛومِرَاوٛ؟› اٛ وِعِ، ‹جٛومِرَاوٛ وِعِي جٛومِرَاوٛ اَمْ، «جٛوطَ تٛ جُنْغٛ اَمْ ݧَامٛ، نَا مِ وَطِي اَ يَاٻِي وَݧْوَݧْٻٜ مَاطَ؞» › ندٜ دَوْدَ نٛدِّي اَلْمَسِيحُ ‹جٛومِرَاوٛ،› تٛو، نٛ طُمْ وَطَتَ اٛ وَرْتَ ٻِطّٛ دَوْدَ؟» وَلَا بَوْطٛ نٛوتَنَاکِمٛ؞ دَغَ ندٜنْ طٛنْ ݧَلْندٜ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞ يٜىٰسُ مٜتَنِ حَوْرُتُٻٜ اٜ تٛکُّٻٜمٛ، وِعِ، «مٛودِٻّٜ اَتَّوْرَ اٜ فَارِسَنْکٛعٜنْ کٛکَّامَ لَامُ حٛکُّکِ يِمْٻٜ مَعَنَ کٛ مُوسَ وِنْدِ؞ نغَمْ نٛنْ، نغَطٜىٰ فُو کٛ ٻٜ اٜکِّتِنِعٛنْ تٛکّٜىٰطُمْ، اَمَّا تٛع اٛنْ نغَطُ کٛ ٻٜ نغَطَتَ، نغَمْ ٻٜ نغَطَتَا کٛ ٻٜ نغَعَجِنْتَ؞ اٜ ٻٜ کَٻَّ دٛݝْلٜ تٜدُّطٜ شَطُطٜ حٛشُّکِ، ٻٜ نجٛوَطٜ دٛوْ بَلْبٜ يِمْٻٜ، اَمَّا کَمْٻٜ اٜ کٛعٜ مَٻّٜ کٛو کٛولٜلْ غٛعٛ ٻٜ نغَطَتَا ٻٜ مبَلَّٻٜ؞ فُو کٛ ٻٜ نغَطَتَ اٜ ٻٜ نغَطَطُمْ نغَمْ يِمْٻٜ نغِعَٻٜ؞ اٜ ٻٜ کَٻَّ لَايَحٛ مَوْکٛ کٛ اَايَاجٜ دٜفْتٜرٜ شٜنِيندٜ تٛ تِيطٜ مَٻّٜ اٜ جُوطٜ مَٻّٜ، اٜ ٻٜ نجُوتِنَ شِلْمبِ تٛغّٛوجٜ مَٻّٜ؞ تٛ حُمْتٛ اٜ ٻٜ نغِطِ جٛوطَاکِ تٛ مَوْٻٜ نجٛوطٛتٛو؛ ندٜرْ شُوطِ دٛعَارٜ مَا اٜ ٻٜ نغِطِ جٛوطٛرْلٜ مَوْٻٜ؞ اٜ ٻٜ نغِطِ حٛوْنِرٜىٰکِ مَنْغُ ندٜرْ لُومٛ، ندٜنْ اٜ ٻٜ نغِطِ طُمْ وِعَٻٜ، ‹اَللَّه سَبِّنَنٜىٰ، مٛودِبّٛ؞› اَمَّا اٛنٛنْ، تٛع طُمْ نٛدِّرَعٛنْ ‹مٛودِبّٛ،› نغَمْ مٛودِبّٛ مٛوطٛنْ اٛ غٛعٛتٛ، ندٜنْ اٛنْ فُو اٛنْ بَنْدِرَاٻٜ؞ تٛع اٛنْ نٛدُّ کٛو مٛيٜ ‹ݧَاکٛ› اٜ دُونِيَارُ، نغَمْ اٛنْ نغٛودِ ݧَاکٛ غٛعٛتٛ، غٛنْطٛ تٛنْ دٛوْ؞ ندٜنْ تٛع طُمْ نٛدِّرَعٛنْ ‹اَرْدِيطٛ،› نغَمْ اٛنْ نغٛودِ اَرْدِيطٛ غٛعٛتٛ، کَنْکٛ وٛنِ اَلْمَسِيحُ؞ سٜيْ مَوْطٛ ندٜرْ مٛوطٛنْ وَرْتَ جَغَّنْتٛوطٛعٛنْ؞ فُو مَوْنِنْطٛ حٛورٜ مُوطُمْ طُمْ لٜسْتِنَيْمٛ؞ فُو لٜسْتِنْطٛ حٛورٜ مُوطُمْ طُمْ مَوْنِنَيْمٛ؞ «اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ! اٛنْ مُنَافُکِعٜنْ! اٛنْ مَٻَّنِي يِمْٻٜ دَمُّغَلْ نَتُّکِ لَامُ اَللَّه؞ اٛنٛنْ اٛنْ نَتَّايِ، اٛنْ اَلَايِ غِطُٻٜ نَتُّکِ نَتَّ؞ [اٛنْ مبٛنِي اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ! اٛنْ مُنَافُکِعٜنْ! اٛنْ ݧَامَ جَوْدِ رٜوْٻٜ ٻٜ وٛرْٻٜ مَٻّٜ مَايِ، اٛنْ نغَطَ دٛعَارٜ جُوتُندٜ نغَمْ يِمْٻٜ نغِعَ؞ نغَمْ نٛنْ، اَللَّه ٻُرَيْ حٛکُّکِعٛنْ بٛنٜ؞] «اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ! اٛنْ مُنَافُکِعٜنْ! نغَمْ اٛنْ کُولَ مَايٛ اٛنْ نغِيلٛو ندٜرْ لٜيْطٜ فٜىٰرٜ‑فٜىٰرٜ نغَمْ حٜٻُکِ غٛعٛتٛ تٛکَّيْطٛ دِينَ مٛوطٛنْ؞ تٛ اٛنْ کٜٻِيمٛ، اٛنْ نغَرْتِرَمٛ کَلُّطٛ ٻُرْطٛعٛنْ حَلُّکِ ندٜ طِطِ نَتَّيْطٛ حِيتٜ بٛ مٛوطٛنْ؞ «اٛنْ مبٛنِي، اٛنٛنْ وُمْٻٜ اَرْدِيٻٜ وُمْٻٜ! اٛنْ مبِعَ، ‹کٛو مٛيٜ حُنٛرِي وُرٛ شٜنِينغٛ، نَاع طُمْ غٛطُّمْ؞ اَمَّا کٛو مٛيٜ حُنٛرِي جِينَارِ غٛنْطُمْ ندٜرْ مَاغٛ، دٛولٜ اٛ وَطَ کٛ اٛ حُنَنِي؞› اٛنٛنْ کَاݝَاٻٜ، وُمْٻٜ! طُمٜ ٻُرِ مَنْغُ، جِينَارِ طُمْ، کٛو وُرٛ شٜنِينغٛ نغٛنْ غَرْتِرْنغٛ جِينَارِ طُمْ شٜنِيطُمْ؟ طٛنْمَا اٛنْ مبِعَ، ‹کٛو مٛيٜ حُنٛرِي سَکِّرْدٜ، نَاع طُمْ غٛطُّمْ؞ اَمَّا کٛو مٛيٜ حُنٛرِي شَکِّرِ نغٛنْدِ دٛوْ سَکِّرْدٜ ندٜنْ، دٛولٜ اٛ وَطَ کٛ اٛ حُنَنِي؞› اٛنٛنْ وُمْٻٜ! طُمٜ ٻُرِ مَنْغُ، شَکِّرِ ندِنْ، کٛو سَکِّرْدٜ غَرْتِرَيْندٜ شَکِّرِ ندِنْ شٜنِيندِ؟ نغَمْ نٛنْ، کٛو مٛيٜ حُنٛرِي سَکِّرْدٜ ندٜنْ حُنٛرَکٜندٜ اٜ کٛو طُمٜ کٛ وٛنِ دٛوْ مَيْرٜ؞ طٛنْمَا کٛو مٛيٜ حُنٛرِي وُرٛ شٜنِينغٛ نغٛنْ حُنٛرَکٜنغٛ اٜ اَللَّه جٛوطِيطٛ ندٜرْ مَاغٛ؞ ندٜنْ کٛو مٛيٜ حُنٛرِي دٛوْ، حُنٛرَکٜ جٛوطٛرْغَلْ لَامُ اَللَّه اٜ جٛوطِيطٛ دٛوْ مَاغَلْ؞ «اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ! اٛنْ مُنَافُکِعٜنْ! اٛنْ کٛکَّ اَللَّه جَکَّ حَاکٛحٛيْ نجٛنْغٜتٜىٰکٛيْ، اَمَّا اٛنْ تٛکَّايِ کٛ ٻُرِ دَرَجَ ندٜرْ اَتَّوْرَ، وَاتٛ وَطَنْکِ يِمْٻٜ کٛ حَانِ، اٜ يُرْمٜىٰندٜ، اٜ حٛولَاکِ اَللَّه؞ طُعُمْ تَتُمْ اٜ حَانِ نغَطٛنْطُمْ، اَمَّا تٛع اٛنْ اَلُ وَطُکِ کٛ حٛرِي؞ اٛنٛنْ وُمْٻٜ اَرْدِيٻٜ وُمْٻٜ! اٛنْ اِتَّ بُولُلٜلْ ندٜرْ ندِيَمْ طَمْ نجَرٛتٛنْ، اَمَّا اٛنْ مٛطَ نغٜىٰلٛوبَ! «اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ، مُنَافُکِعٜنْ! اٛنْ لَيْٻَ غَطَ نجَرْدُکٛيْ مٛوطٛنْ اٜ لٜعٛيْ مٛوطٛنْ، اَمَّا ندٜرْ اٜ حٜىٰوِ نغُيْکَ اٜ شِيَ سُرُکِ حٛورٜ؞ اَنْ فَارِسَنْکٜىٰجٛ بُمْطٛ! اَرْتُ لَيْٻُکِ ندٜرْ جَرْدُغٜلْ نغٜلْ اٜ لٜعٜلْ نغٜلْ، ندٜنْ کٛو تٛيٜ مَاکٛيْ وَرْتَيْ لَٻْطُمْ؞ «اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ! اٛنْ مُنَافُکِعٜنْ! اٛنْ نَنْدِ اٜ غٜنَالٜ مٛيْتَنَاطٜ نجٛوجٜىٰرِ ندَنٜىٰرِ يَاسِ مَاجٜ اٜ مبٛوطِ يِيکِ، اَمَّا ندٜرْ مَاجٜ اٜ وٛودِ پِعٜ مَيْٻٜ اٜ کٛو اِرِ طُمٜ نٜفْنِيطُمْ؞ نٛنْ اٛنٛنْ مَا مبَاطٛنْ؞ يِمْٻٜ اٜ نغِعَعٛنْ بٛ اٛنْ اَادِلِعٜنْ، اَمَّا ندٜرْ ٻٜرْطٜ مٛوطٛنْ اٛنْ مُنَافُکِعٜنْ اٛنْ کٜىٰوِي حَلّٜىٰندٜ؞ «اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ! اٛنْ مُنَافُکِعٜنْ! اٛنْ مَحَ غٜنَالٜ بٛطّٜ طٜ سِفْتٛرْکِ اَنَّبٛعٜنْ، طٛنْمَا اٛنْ مٛعِّتِنَ غٜنَالٜ اَادِلِعٜنْ؞ اٛنْ مبِعَ، ‹دَا اٜنْ طٛنْ شَرٜلْ مَامَاجِ مٜىٰطٜنْ، دَا اٜنْ مبَلَّايِٻٜ وَرْکِ اَنَّبٛعٜنْ؞› نٛنْ کٛلِّرْطٛنْ اٛنْ ٻِٻّٜ بَرْٻٜ اَنَّبٛعٜنْ؞ تٛو، سٜيْ کٜىٰݧِتٛنْ کُوغَلْ نغَلْ مَامَاجِ مٛوطٛنْ ڤُطِّ! اٛنٛنْ بٛولٜ، ٻِٻّٜ بٛولٜ کَلُّطٜ! نٛ طُمْ وَطَتَ کِسٛنْ نَتُّکِ وُرٛ حِيتٜ؟ نغَمْ نٛنْ، اٜ مِ لِلٛنٛيَعٛنْ اَنَّبٛعٜنْ اٜ غٛودُٻٜ فَامُ اٜ مٛودِٻّٜ؞ اٛنْ مبَرَ وٛٻّٜ، اٛنْ مبَرَ وٛٻّٜ دٛوْ غَافَانغَلْ، اٛنْ ڤِيرَ وٛٻّٜ لٛوشِ ندٜرْ شُوطِ دٛعَارٜ مٛوطٛنْ، اٛنْ تٛکَّٻٜ غَرِيرِ‑غَرِيرِ اٛنْ تٛرَّٻٜ؞ نغَمْ نٛنْ پِيپَمْ فُو اَادِلِعٜنْ بَرَاٻٜ ندُفَاطَمْ ندٜرْ دُونِيَارُ طُمْ طَٻِّتَيْطَمْ دٛوْ مٛوطٛنْ، دَغَ پِيپَمْ حَبِيلَ اَادِلِيجٛ حَا يَاکِ پِيپَمْ اَنَّبِ جَکَارِيَ، ٻِطّٛ بٜرِيکِيَ، مٛ مبَرْطٛنْ حَکُّندٜ سُودُ جٛومِرَاوٛ اٜ سَکِّرْدٜ؞ اٜ مِ وِعَعٛنْ غٛونغَ، پِيپَمْجِ طِنْ طٛنْ فُو طُمْ طَٻِّتَيْطِ تٛ جُوطٜ يِمْٻٜ جَامَنُ طُعُمْ؞ «جَلَّ اُرُشَلِيمَ، اُرُشَلِيمَ اَ وَرِي اَنَّبٛعٜنْ، اَ وَرْدِي لِلٛيَاٻٜ تٛ مَاطَ اٜ کَاپٜ! ندٜ طُطُّمْ اٜ مِ يِطِ مٛٻْتُکِ يِمْٻٜ مَاطَ نٛ غٜرٛوغَلْ مٛٻْتِرْتَ ٻِکّٛيْ مَاغَلْ لٜيْ بِيٜىٰلِ مَاغَلْ، اَمَّا اَ جَٻَايِ؞ رَطُّمْ، اَللَّه اَلَنَيْعٛنْ وُرٛ شٜنِينغٛ مٛوطٛنْ وِنْدٜ؞ اٜ مِ وِعَعٛنْ، اٛنْ ڤُطِّتَتَا نغِعٛنْيَمْ، نَا ݧَلْندٜ ندٜ مبِيطٛنْ، ‹اٛ بَرْکِطِنَاطٛ، غَرٛيْطٛ ندٜرْ اِنْدٜ جٛومِرَاوٛ؞› » يٜىٰسُ اٜ وُرْتٛيٛو وُرٛ شٜنِينغٛ اٜ مٛ يَحَ، سٜيْ تٛکُّٻٜمٛ نغَرِ مبِعِمٛ اٛ رَارَ شُوطِ مَاغٛ؞ سٜيْ اٛ نٛوتِي، اٛ وِعِٻٜ، «اٛنْ نغِعِي فُو شُوطِ طِعِ؟ اٜ مِ وِعَعٛنْ غٛونغَ، وَلَا وٛنْدٜ حَيْرٜ اَلٜتٜىٰندٜ دٛوْ وٛنْدٜ؞ طٜ فُو طُمْ سَنْکِتَيْطٜ؞» يٜىٰسُ اٜ جٛوطِي دٛوْ حٛشّٜىٰرٜ ندٜ لٜطّٜ جَيْتُنْ سٜيْ تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ مبِعِ، «وِعُمِنْ، ندٜيٜ فِي طُعُمْ وَطَتَ؟ طُمٜ وٛنِ کٛ حٛلَّتَ وَرْتٛيْکِ مَاطَ اٜ رٜعُکِ دُونِيَارُ؟» سٜيْ يٜىٰسُ وِعِٻٜ، «ڤَامٜىٰ تٛع غٛطّٛ مَجِّنَعٛنْ؞ يِمْٻٜ طُطْٻٜ نغَرٛيَيْ ٻٜ مبِعَ کَمْٻٜ نغٛنِ مِنْ، ٻٜ مبِعَ، ‹مِنْ وٛنِ اَلْمَسِيحُ،› ٻٜ مَجِّنَ يِمْٻٜ طُطْٻٜ؞ اٛنْ نَنَيْ حَبَرُ کٛنُوجِ غَطٜتٜىٰطِ حَادٜ مٛوطٛنْ، اٜ حَبَرُ کٛنُوجِ غَطٜتٜىٰطِ ٻَدَاکِ؞ تٛع اٛنْ کُلُ، نغَمْ دٛولٜ طُعُمْ وَطَ، اَمَّا رٜعُکِ دُونِيَارُ اٜ حٛرِي تَوْ؞ لٜݧٛلْ اُمَّنْتٛ لٜݧٛلْ، لَامُ اُمَّنْتٛ لَامُ؞ طُمْ وَطَيْ وٜىٰلٛ کَلُّنغٛ اٜ دِمْبٛلْ لٜيْدِ تٛ بِغٜىٰجٜ فٜىٰرٜ‑فٜىٰرٜ؞ اَمَّا طُعُمْ فُو طُمْ فُطّٛودٜ تٛرَّاجِ غَرَيْطِ؞ «ندٜنْ ٻٜ نغَطَيْعٛنْ ندٜرْ جُوطٜ يِمْٻٜ تٛرَّيْٻٜعٛنْ، طُمْ وَرَعٛنْ؞ فُو لٜݧِ دُونِيَارُ نغَݧَيْعٛنْ نغَمْ اٛنْ تٛکُّٻٜيَمْ؞ اٜ شَرٜلْ نغٜلْ يِمْٻٜ طُطْٻٜ اَلَيْ حٛولَاکِيَمْ، اٜ ٻٜ نغُلّٛوتِرَ، اٜ ٻٜ نغَݧِندِرَ؞ اَنَّبٛعٜنْ فٜوْرٜ طُطْٻٜ اُمّٛيْتٛ، ٻٜ مَجِّنَ يِمْٻٜ طُطْٻٜ؞ حَلّٜىٰندٜ ٻٜيْدٛتٛ حَا يِدّٜ طُطْٻٜ اُسْتٛو؞ اَمَّا مُݧُطٛ حَا رٜعِرْدٜ اٛ حِسَيْ؞ ندٜنْ طُمْ وَعَجِنَيْ حَبَرُ بٜلْطُمْ دٛوْ لَامُ اَللَّه کٛو تٛيٜ ندٜرْ دُونِيَارُ، نغَمْ طُمْ وَرْتَ شٜيْدَ تٛ لٜپِّ فُو، ندٜنْ رٜعُکِ دُونِيَارُ کِنْ وَرَ؞ «شَرٜلْ اٜ وَرَ نغٜلْ نغِعٛتٛنْ ‹نٜفْنِيطُم› غَرْتِرٛوجُمْ وُرٛ شٜنِينغٛ نغٛ لَاٻَا اٜ دَرِي تٛ وِغٜىٰرٜ شٜنِيندٜ طُمْ اَنَّبِ دَانِيٜلْ وِعِ؞ فُو جَنْغٛووٛ فَامَ مَعَنَ مَاجُمْ؞ اٜ شَرٜلْ نغٜلْ وٛنْٻٜ ندٜرْ لٜيْدِ يَحُودِيَ ندٛغَّ نَتّٛيَ کٛشّٜىٰجٜ؞ غٛنْطٛ دٛوْ سُودُ فُو تٛع جِڤّٛيٛ نغَمْ حٛشُّکِ کٛ وٛنِ ندٜرْ سُودُ؞ غٛنْطٛ تٛ نغٜسَ تٛع سٛعّٛ نغَمْ حٛشُّکِ شُدَّارِ مُوطُمْ؞ «رٜوْٻٜ غٛودُٻٜ دٜىٰطِ اٜ مُسِنْتٜىٰٻٜ ٻٜ تٛرّٛتٛ نَاع سٜطَّ ندٜرْ طٜنْ طٛنْ بَلْطٜ! نغَطٜىٰ دٛعَارٜ تٛع دٛغُّدُ ندُنْ وَرَنَعٛنْ ندٜرْ ندُنْغُ کٛو ݧَلْندٜ سِوْتَارٜ؞ نغَمْ ندٜرْ طٜنْ طٛنْ بَلْطٜ طُمْ وَطَيْ تٛرَّ کَلُّکَ مَوْکَ اِرِ کَ طُمْ مٜىٰطَايِ وَطُکِ دَغَ شَرٜلْ نغٜلْ اَللَّه تَغِ دُونِيَارُ حَا جٛونِ؞ طُمْ بٛو فُطِّتَتَا طُمْ وَطَ اِرِ کَنْ طٛنْ تٛرَّ؞ دَا اَللَّه اُسْتَايِ طٜنْ طٛنْ بَلْطٜ، دَا وَلَا غٛطّٛ کِسَيْطٛ؞ اَمَّا نغَمْ ٻٜنْ طٛنْ شُٻَاٻٜ مَاکٛ، اٛ اُسْتَيْ بَلْطٜ طٜنْ؞ «اٜ نغٜلْ طٛنْ شَرٜلْ تٛ غٛطّٛ وِعِيعٛنْ، ‹رَا اَلْمَسِيحُ طٛعٛ!› کٛو بٛو، ‹رَمّٛ طَاعٜ!› تٛع اٛنْ نجَٻُ؞ نغَمْ اَلْمَسِيحُعٜنْ فٜوْرٜ اٜ اَنَّبٛعٜنْ فٜوْرٜ مبُرْتٛيْتٛ، ٻٜ نغَطَ اَلَامَاجِ مَوْطِ اٜ کُوطٜ کَيْطِنِيطٜ نغَمْ ٻٜ مَجِّنَ يِمْٻٜ، حَا اٜ شُٻَاٻٜ ٻٜنْ تٛ طُمْ وَطٛتٛ؞ رَطُّمْ، مِ وِعِيعٛنْ کٛو طُمٜ کٛ شَرٜلْ نغٜلْ وَرَ؞ «نغَمْ نٛنْ، تٛ ٻٜ مبِعِيعٛنْ، ‹رَمّٛ طَاعٜ ندٜرْ لَدّٜ،› تٛع اٛنْ نجَحُ؞ کٛو تٛ ٻٜ مبِعِيعٛنْ، ‹رَمّٛ طٛعٛ اٜ مٛ سُوطِي ندٜرْ شُوطِ،› تٛع اٛنْ نجَٻُ؞ نٛنْ نٛ مَپّٜرٜ مَپِّرْتَ دَغَ فُونَ ندٜ يِعٜ حَا حِرْنَ، نٛنْ وَرْتُکِ ٻِي نٜطّٛ وَعَتَ؞ «فُو تٛ بَاتُطُمْ وٛنِ، طٛنْ جِغَاجٜ کَوْرِتَتَ؞ «غَطَ تٛرَّ کَلُّکَ کَنْ، طٛنْ اٜ طٛنْ طُمْ ٻَلْوِنَيْ نَانغٜ، لٜوْرُ بٛو حٛکَّتَا جَيْنغٛلْ مَيْرُ؞ کٛودٜ نجَنٛيَيْ دَغَ دٛوْ، ندٜنْ کٛ وٛنِ دٛوْ فُو دِمْبٛتٛ؞ اٜ شَرٜلْ نغٜلْ طُمْ يِعَيْ اَلَامَ ٻِي نٜطّٛ وَنْغِي تٛنْ دٛوْ، ندٜنْ فُو لٜݧِ دُونِيَارُ مبٛيَيْ بٛجِّ نَوْطِ؞ سٜيْ ٻٜ نغِعَ ٻِي نٜطّٛ اٜ وَرَ ندٜرْ دُولٜ اٜ بَوْطٜ اٜ تٜدُّنغَلْ مَنْغَلْ؞ اٛ وَطَيْ طُمْ دُودَ لُوَلْ سٜمْبٜىٰ دُودُکِ لِلُکِ مَلَاعِکَعٜنْ مَاکٛ، ٻٜ کَوْرِتَ ٻٜ اٛ سُٻِ دَغَ کٛو تٛيٜ ندٜرْ دُونِيَارُ، دَغَ نغٛعٛلْ کٜىٰرٛلْ دُونِيَارُ يَاکِ نغٛلْ تٛنْ کٜىٰرٛلْ دُونِيَارُ؞ «تٛو، اٜکِّتٜىٰ اٜکِّتِنٛلْ نغٛعٛلْ دَغَ تٛ اِبِّ؞ تٛ لِشٜ مَاکِ ڤُطِّ وِلُتُکِ، اٛنْ اَنْدِ ندُنْغُ ٻَدَکٜ وٛنْ طٛنْ؞ نٛنْ مَا تٛ اٛنْ نغِعِي فُو فِي طُعُمْ اٜ وَطَ، تٛو، اٛنْ اَنْدَيْ ٻِي نٜطّٛ ٻَدَکٜ وَرْتٛيَ، اٜ مٛ حَادٜ دَمُّغَلْ؞ اٜ مِ وِعَعٛنْ غٛونغَ، جَامَنُ طُعُمْ طُمْ رٜعَتَا نَا فُو فِي طُعُمْ وَطِي؞ دٛوْ اٜ لٜيْ پَٻّٛتٛ، اَمَّا بٛلِيطٜ اَمْ پَٻَّتَاکٛ حَا اَبَدَا؞ «وَلَا اَنْدُطٛ ندٜنْ طٛنْ ݧَلْندٜ کٛو نغٜلْ طٛنْ شَرٜلْ نغٜلْ فِي طُمْ طٛنْ وَطَتَ؞ کٛو مَلَاعِکَعٜنْ وٛنْٻٜ دٛوْ اَنْدَا، کٛو ٻِطّٛ اٛنْ مَا اَنْدَا، سٜيْ ݧَاکٛ مٛ دٛوْ تَنْ اَنْدِ؞ نٛنْ نٛ طُمْ وَطِ اٜ جَامَنُ اَنَّبِ نُحُ، نٛنْ مَا وَرْتٛيْکِ ٻِي نٜطّٛ وَعَتَ؞ ندٜرْ بَلْطٜ کٛ ندِيَمْ تُفَانَ وَطَ، يِمْٻٜ اٜ ݧَامَ، اٜ نجَرَ، اٜ تٜعَ، اٜ تٜعٜىٰ، حَا شَرٜلْ کٛ اَنَّبِ نُحُ نَتِّ کٛمِوَلْ؞ ٻٜ ڤَامَايِ حَا ندِيَمْ تُفَانَ وَرِ حَلْکِٻٜ ٻٜ فُو؞ نٛنْ مَا وَرْتٛيْکِ ٻِي نٜطّٛ وَعَتَ؞ اٜ شَرٜلْ نغٜلْ، وٛرْٻٜ طِطٛ اٜ کُوَ اٜ نغٜسَ، طُمْ حٛشَّ غٛعٛتٛ طُمْ اَلَ غٛعٛتٛ؞ رٜوْٻٜ طِطٛ اٜ نَمِدَ، طُمْ حٛشَّ غٛعٛتٛ طُمْ اَلَ غٛعٛتٛ؞ نجٛوطٜىٰ اٛنْ شِرْيِي، نغَمْ اٛنْ اَنْدَا شَرٜلْ کٛ جٛومِرَاوٛ مٛوطٛنْ وَرَتَ؞ اَمَّا اَنْدٜىٰ طُعُمْ، دَا جٛومُ وُرٛ اٜ اَنْدِ شَرٜلْ نغٜلْ غُجّٛ وَرَنْتَمٛ جٜمَّ، دَا اٛ جٛوطٛتٛ اٜ مٛ سِرْيِي اٛ اَلَتَا اٛ نَتَّنَمٛ وُرٛ؞ نغَمْ نٛنْ، اٛنٛنْ مَا دٛولٜ نجٛوطٛوطٛنْ اٛنْ شِرْيِي نغَمْ اٜ شَرٜلْ نغٜلْ اٛنْ اَنْدَا ٻِي نٜطّٛ وَرَتَ؞ «مٛيٜ وٛنِ مَشُّطٛ مٛ غٛونغَ مٛ فَامُ، مٛ جٛومُ وُرٛ مُوطُمْ يٛوِ دٛوْ مَشُّٻٜ مُوطُمْ، نغَمْ اٛ حٛکَّٻٜ ݧَمْندُ ندٜرْ شَرٜلْ؟ اٛ بَرْکِطِنَاطٛ مَشُّطٛ مٛ جٛومُ وُرٛ مُوطُمْ وَرْتِ تَوِ اٜ مٛ وَطَ نٛنْ؞ اٜ مِ وِعَعٛنْ غٛونغَ، جٛومُ وُرٛ اٛنْ يٛوَيْمٛ دٛوْ جَوْدِ مُوطُمْ فُو؞ اَمَّا تٛ مَشُّطٛ اٛنْ اٛ کَلُّطٛ اٛ وِعَيْ حٛورٜ مَاکٛ، ‹جٛومُ وُرٛ اَمْ وَرْتَتَا جٛونِ،› سٜيْ اٛ فُطِّ فِيُکِ مَشُّٻٜ ٻٜ اٛ حُودَتَ، اٜ مٛ ݧَامَ، اٜ مٛ يَرْدَ نجَرُ اٜ يَرٛوٻٜ؞ جٛومُ وُرٛ اٛنْ وَرْتَيْ اٜ ݧَلْندٜ ندٜ مَشُّطٛ اٛنْ کَمَّاکِ اٜ شَرٜلْ نغٜلْ اٛ اَنْدَا، اٛ فِيَيْمٛ بٛطُّمْ اٛ وَطَمٛ ندٜرْ مُنَافُکِعٜنْ؞ طٛنْ طُمْ وٛيَتَ طُمْ ݧٜرْپِندِرَ ݧِيپٜ؞ «ندٜنْ طُمْ نَنْدِنَيْ لَامُ اَللَّه اٜ سُرْبَاٻٜ سَڤّٛ کٛشُّٻٜ فِتِلَاجِ ٻٜ ندِلِّ تَٻّٛيَاکِ اَنْغٛوجٛ؞ نجٛوٛ ندٜرْ مَٻّٜ اٜ نغٛودِ فَامُ، نجٛوٛ ندٜرْ مَٻّٜ بٛو نغَلَا فَامُ؞ شَرٜلْ کٛ سُرْبَاٻٜ ٻٜ نغَلَا فَامُ ٻٜنْ کٛشِّ فِتِلَاجِ مَٻّٜ، ٻٜ نجٛغَاکِ نٜبَّمْ فِتِلَ فٜىٰرٜ ندٜرْ کٛلْبَاجِ؞ غٛودُٻٜ فَامُ ٻٜنْ بٛو کٛشِّ فِتِلَاجِ مَٻّٜ اٜ نٜبَّمْ فٜىٰرٜ؞ ندٜ اَنْغٛوجٛ اٛنْ نٜىٰٻِ يٛتَّاکِ، سٜيْ ٻٜ فُو ٻٜ ڤُطِّ ݝٛݝُکِ حَا ٻٜ طَانِ؞ «تٛنْ شَکَ جٜمَّ سٜيْ طُمْ نَنِ نٛدّٛلْ سٜمْبٜىٰ، اٜ طُمْ وِعَ، ‹رَا اَنْغٛوجٛ اٛنْ! مبُرْتٛيٜىٰ، تَٻّٜىٰمٛ!› سٜيْ سُرْبَاٻٜ ٻٜنْ فُو اُمِّي شِرْيِي فِتِلَاجِ مَٻّٜ؞ ٻٜ نغَلَا فَامُ ٻٜنْ مبِعِ غٛودُٻٜ فَامُ ٻٜنْ، ‹کٛکّٛرٜىٰمِنْ نٜبَّمْ مٛوطٛنْ سٜطَّ؞ فِتِلَاجِ اَمِنْ اٜ مبَاتَ!› اَمَّا غٛودُٻٜ فَامُ ٻٜنْ مبِعِٻٜ، ‹نَاع نٛنْ، طَمْ حٜپَتَاعٜنْ؞ طُمْ ٻُرِي نجَحٛنْ تٛ سٛورٛوٻٜ، شٛودٛيٛنْ طَمْ مٛوطٛنْ؞› اٜ ٻٜ دٛوْ لَاوٛلْ سٛودٛيْکِطَمْ، سٜيْ اَنْغٛوجٛ اٛنْ يٛتِّي؞ شِرْيِيٻٜ فِتِلَاجِ ٻٜنْ نَتِّدِ اٜ مَاکٛ ندٜرْ وُرٛ تٛ طُمْ وَطَتَ حُمْتٛ نغٛنْ؞ طُمْ مَٻِّي دَمُّغَلْ وُرٛ نغٛنْ؞ «دَغَ غَطَ سٜيْ سُرْبَاٻٜ کٛرِيٻٜ ٻٜنْ مَا نغَرْتِ، ٻٜ مبِعِ، ‹جٛومُ وُرٛ! جٛومُ وُرٛ! مَٻِّتَنْمِنْ!› اَمَّا اٛ نٛوتِي، اٛ وِعِ، ‹اٜ مِ وِعَعٛنْ غٛونغَ، مِ اَنْدَاعٛنْ؞› «نغَمْ نٛنْ، سٜيْ نجٛوطٛوطٛنْ اٛنْ شِرْيِي، نغَمْ اٛنْ اَنْدَا ݧَلْندٜ ندٜنْ کٛو شَرٜلْ نغٜلْ؞ «طٛنْمَا، لَامُ اَللَّه اٜ نَنْدِ اٜ غٛطّٛ نٜطّٛ غَطَيْطٛ يَادُ، سٜيْ اٛ نٛدِّ مَشُّٻٜ مَاکٛ اٛ تَمْبِنِٻٜ جَوْدِ مَاکٛ؞ اٛ حٛکِّ غٛعٛتٛ جَکَاجٜ جٛوِ کٜوْطٜ شٜىٰدٜ جِينَارِ، غٛعٛتٛ بٛو جَکَاجٜ طِطِ، غٛعٛتٛ بٛو جَکَارٜ غٛعٛ؞ اٛ حٛکِّ کٛو مٛيٜ نٛ وَاوَتَ، ندٜنْ اٛ دِلِّ؞ جَٻُطٛ جَکَاجٜ جٛوِ اٛنْ، طٛنْ اٜ طٛنْ اٛ دِلِّ اٛ وَادِ لُومٛ اٜ شٜىٰدٜ طٜنْ حَا اٛ حٜٻِ بٛ مَاجٜ؞ نٛنْ مَا جَٻُطٛ جَکَاجٜ طِطِ اٛنْ حٜٻِ بٛ مَاجٜ؞ اَمَّا جَٻُطٛ جَکَارٜ غٛعٛ اٛنْ يَحِ وَسِ نغَيْکَ سُوطِ شٜىٰدٜ جِينَارِ جٛومُ وُرٛ مُوطُمْ؞ «تٛو، غَطَ طُمْ نٜىٰٻِي، سٜيْ جٛومُ مَشُّٻٜ اٛنْ وَرْتِ نغَمْ يِعَ کٛ کٛو مٛيٜ حٜٻَنِمٛ؞ سٜيْ جَٻُطٛ جَکَاجٜ جٛوِ کٜوْطٜ شٜىٰدٜ جِينَارِ وَرِ وَدِّ شٜىٰدٜ جَکَاجٜ جِينَارِ جٛوِ طٜ اٛ ٻٜيْدِي؞ اٛ وِعِ، ‹جٛومُ وُرٛ، اَ حٛکِّييَمْ جَکَاجٜ کٜوْطٜ شٜىٰدٜ جِينَارِ جٛوِ؞ رَا مِ ٻٜيْدِي جَکَاجٜ شٜىٰدٜ جٛوِ؞› سٜيْ جٛومُ وُرٛ اٛنْ وِعِمٛ، ‹اَ حُوِي بٛطُّمْ، مَشُّطٛ بٛطّٛ مٛ غٛونغَ؞ ندٜ اَ وَطِي غٛونغَ دٛوْ فِي سٜطَّ، مِ تَمْبِنْتٜ طُطُّمْ؞ وٛرٛيْ، نَنِدَا بٜلْطُمْ اٜ اَمْ؞› سٜيْ جَٻُطٛ جَکَاجٜ طِطِ کٜوْطٜ شٜىٰدٜ جِينَارِ مَا وَرِ، وِعِ، ‹جٛومُ وُرٛ، اَ حٛکِّييَمْ جَکَاجٜ طِطِ کٜوْطٜ شٜىٰدٜ جِينَارِ؞ رَا مِ ٻٜيْدِي جَکَاجٜ شٜىٰدٜ طِطِ؞› سٜيْ جٛومُ وُرٛ اٛنْ وِعِمٛ، ‹اَ حُوِي بٛطُّمْ، مَشُّطٛ بٛطّٛ مٛ غٛونغَ؞ ندٜ اَ وَطِي غٛونغَ دٛوْ فِي سٜطَّ؞ مِ تَمْبِنْتٜ طُطُّمْ؞ وٛرٛيْ، نَنِدَا بٜلْطُمْ اٜ اَمْ؞› ندٜنْ جَٻُطٛ جَکَارٜ غٛعٛ کٜوْندٜ شٜىٰدٜ جِينَارِ اٛنْ وَرِ، وِعِ، ‹جٛومُ وُرٛ، اٜ مِ اَنْدِ اَ نٜطّٛ شَطَنْطٛ، اَ يِطِ فٜعُّکِ کٛ اَ اَاوَايِ، اَ غِطّٛ مٜىٰرٜ؞ اٜ مِ حُلَ، نغَمْ نٛنْ نجَامِ نغَسُمِ نغَيْکَ شُوطُمِ شٜىٰدٜ مَاطَ ندٜرْ لٜيْدِ؞ رَا شٜىٰدٜ مَاطَ!› سٜيْ جٛومُ وُرٛ اٛنْ نٛوتِي، وِعِ، ‹اَنْ اَ مَشُّطٛ کَلُّطٛ، دَکِّيطٛ! تٛو، اٜ يِيکِ مَاطَ اٜ مِ فٜعَّ کٛ مِ اَاوَايِ، ندٜنْ مِ غِطّٛ مٜىٰرٜ؟ اٜ حَانِ ندٜسَنَايَمْ شٜىٰدٜ تٛ طٜ کُوتِرْتٜىٰ طٜ ٻٜيْدٛو، نغَمْ تٛ مِ وَرْتٛيِي مِ جَٻَطٜ حَا اٜ ٻٜيْدَارِ! نغَمْ نٛنْ، نجَٻٜىٰ شٜىٰدٜ طٜنْ تٛ مَاکٛ، کٛکّٛنْ اٛنْ طٛنْ غٛودُطٛ جَکَاجٜ سَڤّٛ کٜوْطٜ شٜىٰدٜ؞ نغَمْ فُو غٛودُطٛ، طُمْ ٻٜيْدَنَيْمٛ، حَا طُمْ طُوطَنَمٛ؞ اَمَّا مٛ وَلَا، کٛو کٛ اٛ وٛودِ مَا طُمْ جَٻَيْطُمْ؞ ندٜنْ ڤَطّٜىٰ مَشُّطٛ اٛعٛ مٜىٰرٜىٰجٛ ندٜرْ ݧِوْرٜ ٻَلٜىٰرٜ، تٛ طُمْ وٛيَتَ طُمْ ݧٜرْپِندِرَ ݧِيپٜ؞› «تٛ ٻِي نٜطّٛ وَرِي ندٜرْ تٜدُّنغَلْ مُوطُمْ اٜ مَلَاعِکَعٜنْ فُو، اٛ جٛوطٛتٛ دٛوْ جٛوطٛرْغَلْ لَامُ مَاکٛ طُمْ تٜدُّنغَلْ؞ طُمْ حَوْرِتَيْ يِمْٻٜ دُونِيَارُ فُو يٜىٰسٛ مَاکٛ، اٛ حَکِّتَٻٜ فٜىٰرٜ‑فٜىٰرٜ نٛنْ نٛ غَيْنَاکٛ حَکِّتِرْتَ بَالِ اٜ بٜعِ؞ اٛ وَطَ بَالِ اٜ جُنْغٛ ݧَامٛ مَاکٛ، بٜعِ اٜ نَنٛ مَاکٛ؞ سٜيْ لَامِيطٛ اٛنْ وِعَ وٛنْٻٜ ݧَامٛ مُوطُمْ، ‹نغَرٜىٰ، اٛنٛنْ ٻٜ ݧَاکٛ اَمْ بَرْکِطِنِ، ندٛنٜىٰ لَامُ طُمْ اُمْ سِرْيَنِيعٛنْ دَغَ فُطّٛودٜ دُونِيَارُ؞ نغَمْ مِ نَنِي وٜىٰلٛ اٛنْ کٛکِّييَمْ ݧَمْندُ؞ مِ نَنِي طٛنْکَ اٛنْ کٛکِّييَمْ کٛ نجَرَيْمِ؞ مِ وَطِي کٛطَاکُ اٛنْ نجِڤِّنِييَمْ؞ مِ وَلَا کٛ ٻٛرْنٛتٛومِ اٛنْ کٛکِّييَمْ کٛلْتٜ؞ مِ وَطِي شِيَ نجَمُ اٛنْ ڤَامَنِييَمْ؞ اٜ مِ سُرِ ندٜرْ سُودُ شُرَلْ اٛنْ کٛوْنِييَمْ؞› اٜ شَرٜلْ نغٜلْ اَادِلِعٜنْ نٛوتٛتٛ، مبِعَمٛ، ‹مٛودِبّٛ، ندٜيٜ مِنْ نغِيدُمَا اٜ وٜىٰلٛ مِنْ کٛکُّمَا ݧَمْندُ، کٛو مِنْ نغِيدُمَا اٜ طٛنْکَ مِنْ کٛکُّمَا کٛ نجَرَتَا؟ ندٜيٜ مِنْ نغِيمَا اَ کٛطٛ مِنْ نجِڤِّنْمَا، کٛو اَ وَلَا کٛ ٻٛرْنٛتٛطَا مِنْ کٛکُّمَا کٛلْتٜ؟ ندٜيٜ مِنْ نغِيمَا اَ يَمْطَا کٛو اَ سُرِي ندٜرْ سُودُ شُرَلْ مِنْ کٛوْنُمَا؟› سٜيْ لَامِيطٛ اٛنْ نٛوتٛو، وِعَٻٜ، ‹اٜ مِ وِعَعٛنْ غٛونغَ، ندٜ اٛنْ نغَطَنِ غٛعٛتٛ ندٜرْ ٻٜعٜ بَنْدِرَاٻٜ اَمْ ٻُرْٻٜ فَمْطُکِ، مِنْ نغَطَنْطٛنْ؞› «ندٜنْ اٛ وِعَيْ وٛنْٻٜ نَنٛ مَاکٛ، ‹شٜنْدِرٜىٰ اٜ اَمْ، اٛنٛنْ لَانَاٻٜ! نَتّٜىٰ حِيتٜ نغٜ ݧِفَتَا حَا اَبَدَا نغٜ طُمْ سِرْيَنِي شٜيْطَنْ اٜ مَلَاعِکَعٜنْ مُوطُمْ! نغَمْ مِ نَنِي وٜىٰلٛ اٛنْ کٛکَّايِيَمْ ݧَمْندُ؞ مِ نَنِي طٛنْکَ اٛنْ کٛکَّايِيَمْ کٛ نجَرَيْمِ؞ مِ وَطِي کٛطَاکُ اٛنْ نجِڤِّنَايِيَمْ؞ مِ وَلَا کٛ ٻٛرْنٛتٛومِ اٛنْ کٛکَّايِيَمْ کٛلْتٜ؞ مِ وَطِي شِيَ نجَمُ اٛنْ ڤَامَنَايِيَمْ؞ مِ سُرَامَ ندٜرْ سُودُ شُرَلْ اٛنْ کٛوْنَايِيَمْ؞› ندٜنْ کَمْٻٜ مَا ٻٜ نٛوتٛو، ٻٜ مبِعَمٛ، ‹مٛودِبّٛ، ندٜيٜ مِنْ نغِيدُمَا اٜ وٜىٰلٛ، کٛو اٜ طٛنْکَ، کٛو اٜ شِيَ کٛلْتٜ، کٛو اٜ شِيَ نجَمُ، ندٜيٜ مِنْ نغِيمَا اَ کٛطٛ، کٛو اَ ندٜرْ سُودُ شُرَلْ، مِنْ مبَلَّايِمَ؟› سٜيْ اٛ نٛوتٛو، اٛ وِعَٻٜ، ‹اٜ مِ وِعَعٛنْ غٛونغَ، ندٜ اٛنْ نغَطَنَايِ کٛو غٛعٛتٛ ندٜرْ ٻٜعٜ ٻُرْٻٜ فَمْطُکِ، مِنْ وٛنِ اٛنْ نغَطَنَايِ؞› ٻٜعٜ نغٛنِ نَتَّيْٻٜ بٛنٜ طُمْ رٜعَتَا، اَادِلِعٜنْ بٛو کٜٻَ يٛنْکِ کِ رٜعَتَا؞» ندٜ يٜىٰسُ يٛتِّنِ وِيکِ فُو فِي طُعُمْ، اٛ وِعِ تٛکُّٻٜمٛ، «اٛنْ اَنْدِ حُمْتٛ سَکِّنْکِ حَنْدٜ حٛرِي بَلْطٜ طِطِ، طُمْ حٛکِّتِرَيْ ٻِي نٜطّٛ طُمْ وَرَمٛ دٛوْ غَافَانغَلْ؞» سٜيْ مَوْٻٜ اَرْدِيٻٜ دِينَ اٜ مَوْٻٜ يِمْٻٜ کَوْرِتِ اٜ لَامٛرْدٜ مَوْطٛ مَوْٻٜ اَرْدِيٻٜ دِينَ بِعٜتٜىٰطٛ کَيَافَ؞ ٻٜ کَٻِّ ٻٜ نَنْغَ يٜىٰسُ اٜ سُوطٜ ٻٜ مبَرَمٛ؞ ٻٜ مبِعِ، «اَمَّا نَاع نِ شَرٜلْ حُمْتٛ سَکِّنْکِ، نغَمْ طُمْ غَطٛتٛوطُمْ يِمْٻٜ اُمِّنَ حَوْرٜ؞» يٜىٰسُ اٜ ندٜرْ غَرِيرِ بٜتَنِ تٛ وُرٛ سِيمَنْ غٛودُطٛ ݧَوُ ݧَامٛوجُمْ لَرَلْ، سٜيْ غٛطّٛ دٜبّٛ وَرِ تٛ مَاکٛ اٜ جٛغِي جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ مبٜلْطَمْ غٛودُطَمْ شٜىٰدٜ؞ يٜىٰسُ اٜ ݧَامَ ݧَمْندُ، سٜيْ دٜبّٛ اٛنْ وَيْلِطَمْ دٛوْ حٛورٜ مَاکٛ؞ اَمَّا ندٜ تٛکُّٻٜمٛ نغِعِ نٛنْ، سٜيْ ٻٜرْطٜ مَٻّٜ مٜتِّ، ٻٜ مبِعِ، «نغَمْ طُمٜ اٛ وٛنِّ نٜبَّمْ طَعَمْ نِحِ؟ دَا طَمْ سٛورَامَ شٜىٰدٜ طُطّٜ، طُمْ حٛکَّ ٻٜ نغَلَنَا شٜىٰدٜ طٜنْ؞» اَمَّا يٜىٰسُ فَامِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِٻٜ، «نغَمْ طُمٜ نغَنّٛتٛنْ دٜبّٛ اٛعٛ؟ کٛ اٛ وَطَنِيَمْ طُمْ بٛطُّمْ؞ کٛو ندٜيٜ ٻٜ نغَلَنَا اٜ نغٛنْدِ اٜ مٛوطٛنْ، اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞ ندٜ اٛ وَيْلِ طَعَمْ نٜبَّمْ دٛوْ ٻَنْدُ اَمْ، اٛ وَطُ نٛنْ نغَمْ سِرْيَاکِ اُوُکِيَمْ؞ اٜ مِ وِعَعٛنْ غٛونغَ، کٛو تٛيٜ تٛ طُمْ وَعَجِنِ طُعُمْ حَبَرُ بٜلْطُمْ ندٜرْ دُونِيَارُ فُو، طُمْ حٛکَّيْ حَبَرُ کٛ دٜبّٛ اٛعٛ وَطِ نغَمْ سِفْتٛرْکِمٛ؞» سٜيْ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ بِعٜتٜىٰطٛ يَحُودَ اِسْکَرِيٛوتِ يَحِ تٛ مَوْٻٜ اَرْدِيٻٜ دِينَ، اٛ وِعِ، «طُمٜ کٛکّٛتٛنْيَمْ تٛ مِ وَطِي يٜىٰسُ ندٜرْ جُوطٜ مٛوطٛنْ؟» سٜيْ ٻٜ کٛکِّمٛ شٜىٰدٜ اَجُرْفَارِ کَنْجٜ 30؞ دَغَ شَرٜلْ نغٜلْ يَحُودَ فُطِّ طَٻُّتُکِ لَاوٛلْ نٛ حٛکِّتِرْتَ يٜىٰسُ ندٜرْ جُوطٜ مَٻّٜ؞ ݧَلْندٜ اَرَنْدٜىٰرٜ ندٜ حُمْتٛ بُرٛودِ طُمْ وَلَا پُوفِنِرْطُمْ، سٜيْ تٛکُّٻٜمٛ نغَرِ تٛ مَاکٛ، ٻٜ مبِعِمٛ، «تٛيٜ نغِطَّا مِنْ نجَحَ مِنْ شِرْيَنٛمَا نغَمْ ݧَامٜنْ ݧَمْندُ حُمْتٛ سَکِّنْکِ؟» سٜيْ اٛ وِعِ، «نَتّٜىٰ غَرِيرِ تٛ غٛطّٛ نٜطّٛ مبِعٛنْمٛ، ‹مٛودِبّٛ وِعِ: شَرٜلْ اَمْ ٻَدَکٜ؞ مِ وَطَيْ حُمْتٛ سَکِّنْکِ اٜ تٛکُّٻٜيَمْ تٛ وُرٛ مَاطَ؞› » سٜيْ تٛکُّٻٜمٛ ٻٜنْ نغَطِ نٛنْ نٛ يٜىٰسُ وِعِٻٜ، سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞ ندٜ فُتُرٛ وَطِ، يٜىٰسُ جٛوطِي نغَمْ ݧَمْدَ اٜ تٛکُّٻٜمٛ سَڤّٛ اٜ طِطٛ؞ اٜ ٻٜ ندٜرْ ݧَامُکِ، سٜيْ اٛ وِعِ، «اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ حٛکِّتِرَيْيَمْ؞» سٜيْ ٻٜ نغَنِّ نَاع سٜطَّ، ٻٜ ڤُطِّ وِعُکِمٛ غٛعٛتٛ‑غٛعٛتٛ، «مٛودِبّٛ، نَاع طُمْ مِنْ، کٛو؟» سٜيْ اٛ نٛوتِي، اٛ وِعِ، «نٜطّٛ ݧَمْدَيْطٛ اٜ اَمْ اٜ لٜعَلْ غٛعٛ، کَنْکٛ حٛکِّتِرْتَيَمْ؞ ٻِي نٜطّٛ مَايَيْ نٛ طُمْ وِنْدِرَا دٛوْ مَاکٛ، اَمَّا کٛکِّتِرَيْطٛمٛ وٛنِي! طُمْ ٻُرَنَيْمٛ دَا اٛ دَݧَاکَ؞» سٜيْ يَحُودَ کٛکِّتِرَيْطٛمٛ وِعِ، «مٛودِبّٛ، نَاع طُمْ مِنْ، کٛو؟» يٜىٰسُ وِعِمٛ، «اٜىٰ، طُمْ اَنْ؞» اٜ ٻٜ ندٜرْ ݧَامُکِ ݧَمْندُ، سٜيْ يٜىٰسُ حٛشِّ بُرٛودِ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٛ وِعِ، «نجَٻٜىٰطُمْ، ݧَامٛنْ؞ طُعُمْ طُمْ ٻَنْدُ اَمْ؞» طٛنْمَا اٛ حٛشِّ جَرْدُغٜلْ ندِيَمْ اِنَبٛجَمْ، اٛ يٜتِّ اَللَّه، اٛ حٛکِّٻٜطَمْ، اٛ وِعِ، «نجَرٜىٰ، اٛنْ فُو، نغَمْ طَعَمْ کَنْجَمْ وٛنِ پِيپَمْ اَمْ تَبِّتِنَيْطَمْ اَلْکَوَلْ اَللَّه ندُفٜتٜىٰطَمْ نغَمْ يِمْٻٜ طُطْٻٜ نغَمْ يَافَاکِ حَکّٜ؞ اٜ مِ وِعَعٛنْ، مِ فُطِّتَتَا مِ يَرَ ندِيَمْ اِنَبٛوجٜ نَا ݧَلْندٜ ندٜ نجَرَيْمِ نغٛطَّمْ کٜسَمْ حَوْتِ اٜ مٛوطٛنْ ندٜرْ لَامُ ݧَاکٛ اَمْ مٛ دٛوْ؞» سٜيْ ٻٜ نغِمِ غِمٛلْ مَنْتُکِ اَللَّه، ندٜنْ ٻٜ ندِلِّ حٛشّٜىٰرٜ ندٜ لٜطّٜ جَيْتُنْ؞ يٜىٰسُ وِعِ تٛکُّٻٜمٛ، «ندٜرْ جٜمَّارٜ ندٜعٜ اٛنْ فُو اٛنْ ندٛغَّيْ اَلٛنْيَمْ، نغَمْ ندٜرْ اَايَارٜ اَللَّه وِعِي، ‹مِ وَرَيْ غَيْنَاکٛ، ندٜنْ اٛرْندٜ بَالِ طِنْ شَنْکِتٛتٛ؞› اَمَّا غَطَ مِ اُمَّکٜ دَغَ مَيْدٜ، مِ اَرْتَيْعٛنْ يَاکِ غَلِيلِ؞» سٜيْ بِيتُرُسْ وِعِمٛ، «کٛو ٻٜ فُو ٻٜ اَلِيمَ، مِنْ مِ اَلَتَامَ کٛو سٜطَّ؞» يٜىٰسُ وِعِمٛ، «اٜ مِ وِعُمَا غٛونغَ، حَنْدٜ، ندٜرْ جٜمَّارٜ ندٜعٜ، کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞» اَمَّا بِيتُرُسْ وِعِمٛ، «کٛو طُمْ وَرْدَيْيَمْ اٜ مَاطَ، مِ وِعَتَا مِ اَنْدَامَ؞» حٛرِيٻٜ ٻٜنْ مَا مبِعِ نٛنْ؞ سٜيْ يٜىٰسُ يَادِ اٜ تٛکُّٻٜمٛ وٛنْدٜ وِغٜىٰرٜ بِعٜتٜىٰندٜ غٜىٰسَمَنِ، اٛ وِعِٻٜ، «نجٛوطٜىٰ طٛعٛ، مِ يَحَ طَاعٜ مِ وَطَ دٛعَارٜ؞» اٛ حٛشِّ بِيتُرُسْ اٜ ٻِٻّٜ جَبَدِ طِطٛ؞ ٻٜرْندٜ مَاکٛ بٛو تٜدِّ، اٛ فُطِّ وَنُّکِ نَاع سٜطَّ؞ سٜيْ اٛ وِعِٻٜ، «ٻٜرْندٜ اَمْ وَنِّي نَاع سٜطَّ حَا بٛ مِ مَايَيْ؞ نجٛوطٛدٜىٰ اٜ اَمْ طٛعٛ اٛنْ ندٜىٰنَ؞» ندٜ اٛ يَحِ يٜىٰسٛ سٜطَّ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ، «ݧَاکٛ اَمْ مٛ دٛوْ، تٛ طُمْ وَطٛتٛ، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞» غَطَ طٛنْ اٛ سٛعِّي تٛ ٻٜنْ طٛنْ تٛکُّٻٜمٛ تَتٛ، اٛ تَوِ اٜ ٻٜ طَانِي، سٜيْ اٛ وِعِ بِيتُرُسْ، «تٛو، اٛنْ مبَاوَتَا جٛوطٛدَاکِ اٜ اَمْ اٛنْ طَانَاکِ کٛو شَرٜلْ سٜطَّ؟ نجٛوطٜىٰ، تٛع اٛنْ طَانٛ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞ ٻٜرْندٜ اٜ يِطِ وَطُکِ کٛ حَانِ، اَمَّا ٻَنْدُ تَمْڤِي؞» اٛ فُطِّتِ اٛ دِلِّ طِطَٻُمْ، اٛ وَطِ دٛعَارٜ، اٛ وِعِ، «ݧَاکٛ اَمْ مٛ دٛوْ، تٛ طُمْ وَطَتَاکٛ طُمْ اِتَّنَيَمْ تٛرَّ کَعَ، سٜيْ تٛ مِ يَرِيکَ، اَلْ کٛ نغِطَّا وَطٜىٰ؞» سٜيْ اٛ فُطِّتِ اٛ سٛعّٛيِي تٛ مَٻّٜ، اٛ تَوِ اٜ ٻٜ طَانِي، نغَمْ اٜ ٻٜ نَنَ طٜيْنغٛلْ تٜدُّنغٛلْ؞ سٜيْ اٛ فُطِّتِ اٛ دِلِّ تَتَٻُمْ اٛ وَطِ دٛعَارٜ، اٛ وِعِ نٛنْ نٛ اٛ وِعُنٛ؞ اٛ فُطِّتِ اٛ سٛعِّي تٛ مَٻّٜ تَتَٻُمْ، اٛ وِعِٻٜ، «حَا جٛونِ اٛنْ طَانِي، اٛنْ شِوْتٛو؟ شَرٜلْ وَرِي؞ طُمْ حٛکِّتِرِي ٻِي نٜطّٛ ندٜرْ جُوطٜ غَطٛوٻٜ حَکّٜ؞ اُمّٜىٰ ندِلّٜنْ! رَا اٛنْ طٛنْ کٛکِّتِرَيْطٛيَمْ اٜ وَرَ؞» يٜىٰسُ اٜ مٜتَ، سٜيْ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ وَرِ؞ اٛ وَرْدٛيِ اٜ يِمْٻٜ طُطْٻٜ اٜ ٻٜ نجٛغِي کَافَاجٜ اٜ شَبِّ؞ مَوْٻٜ اَرْدِيٻٜ دِينَ، اٜ مَوْٻٜ يِمْٻٜ لِلٛيِٻٜ؞ تٛو، ندٜنْ مَا کٛکِّتِرَيْطٛ يٜىٰسُ اٛنْ اٛ يَادَکٜ اٛ وِعِيٻٜ نٛ اٛ حٛلِّرْتَٻٜ يٜىٰسُ، اٛ وِعِ، «نٜطّٛ مٛ کٛوْنَيْمِ حٛوْنُکِ حِغَاکُ طُمْ کَنْکٛ؞ نَنْغٜىٰمٛ؞» طٛنْ اٜ طٛنْ يَحُودَ اٛنْ ٻَدِّي يٜىٰسُ، وِعِ، «مٛودِبّٛ، اَللَّه سَبِّنَنٜىٰ!» ندٜنْ اٛ حٛوْنِمٛ حٛوْنُکِ حِغَاکُ؞ يٜىٰسُ نٛوتِي، وِعِمٛ، «حِغٛ اَمْ، وَطُ کٛ وَدُّمَا؞» سٜيْ يِمْٻٜ ٻٜنْ ٻَدِّي نَنْغِ يٜىٰسُ ٻٜ نجٛغِيمٛ بٛطُّمْ؞ اٜ يِيکِ نٛنْ، غٛعٛتٛ ندٜرْ غٛنْدُٻٜ اٜ يٜىٰسُ نَنْغِ کَافَحِ مُوطُمْ سٛلْتِکِ، فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اٛ اِتَّنِمٛ نٛوْرُ؞ اَمَّا يٜىٰسُ وِعِمٛ، «وَتُّ کَافَحِ مَاطَ ندٜرْ حٛلْغٛ مَاکِ؞ نغَمْ فُو کٛشُّطٛ کَافَحِ، کَافَحِ وَرَتَمٛ؞ اٛنْ کَمِّي مِ وَاوَتَا تٛرَاکِ ݧَاکٛ اَمْ مٛ دٛوْ، طٛنْ اٜ طٛنْ اٛ لِلٛيَ مٛٻْطٜ مَلَاعِکَعٜنْ ٻُرْطٜ مٛٻْطٜ سَڤّٛ اٜ طِطِ؟ اَمَّا نٛ وَطَتَ اَايَاجٜ کٜىٰوَ بِيطٜ دٛولٜ طُعُمْ وَطَ نِحِ؟» اٜ نغٜلْ طٛنْ شَرٜلْ يٜىٰسُ وِعِ غَرٛيْٻٜ ٻٜنْ، «اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ مِ غُجّٛ شَلٛرْطٛ؟ کٛو ندٜيٜ اٜ مِ جٛوطٛو ندٜرْ وُرٛ شٜنِينغٛ اٜ مِ اٜکِّتِنَ، اٛنْ نَنْغَايِيَمْ؞ اَمَّا طُعُمْ وَطِي نغَمْ کٛ اَنَّبٛعٜنْ مبِنْدِ حٜىٰوَ؞» سٜيْ فُو تٛکُّٻٜمٛ اَلِمٛ، ندٛغِّ؞ سٜيْ نَنْغُٻٜ يٜىٰسُ ٻٜنْ نجَارِمٛ تٛ وُرٛ کَيَافَ مَوْطٛ مَوْٻٜ اَرْدِيٻٜ دِينَ، تٛ مٛودِٻّٜ اَتَّوْرَ اٜ مَوْٻٜ يِمْٻٜ کَوْرِتِ؞ اَمَّا بِيتُرُسْ تٛکِّرِمٛ غَطَ دَغَ تٛ وٛطِّ حَا يَاکِ شَکَ وُرٛ مَوْطٛ مَوْٻٜ اَرْدِيٻٜ دِينَ اٛنْ؞ اٛ نَتِّ اٛ جٛوطٛدِي اٜ تَادِيٻٜ وُرٛ شٜنِينغٛ، نغَمْ اٛ يِعَ نٛ طُمْ وَطَنْتَ يٜىٰسُ؞ مَوْٻٜ اَرْدِيٻٜ دِينَ اٜ فُو کَوْتَلْ مَوْٻٜ اٜ ٻٜ طَٻِّتَ شٜيْدَ فٜوْرٜ طُمْ ٻٜ نَنْغِرْتَ يٜىٰسُ، نغَمْ ٻٜ کٜٻَ ٻٜ مبَرَمٛ؞ اَمَّا ٻٜ کٜٻَايِ غٛطُّمْ، کٛو ندٜ يِمْٻٜ طُطْٻٜ ندَرَکٜ يٜىٰسٛ مَٻّٜ کٛکِّ شٜيْدَ فٜوْرٜ؞ اٜ رٜعِرْدٜ، يِمْٻٜ طِطٛ ندَرِي يٜىٰسٛ يِمْٻٜ، ٻٜ مبِعِ، «اٛعٛ نٜطّٛ وِعِي، ‹مِ وَاوَيْ سَنْکُتُکِ وُرٛ شٜنِينغٛ نغٛ اَللَّه، مِ مَحِتٛونغٛ ندٜرْ بَلْطٜ تَتِ؞› » سٜيْ مَوْطٛ مَوْٻٜ اَرْدِيٻٜ دِينَ اُمِّي دَرِي وِعِ يٜىٰسُ، «اَ وَلَا کٛ مبِعَتَا؟ کٛ ٻٜ مبِعِ دٛوْ مَاطَ طُمْ غٛونغَ؟» اَمَّا يٜىٰسُ دٜعِّتِ؞ سٜيْ مَوْطٛ مَوْٻٜ اَرْدِيٻٜ دِينَ اٛنْ وِعِمٛ، «مِ حَوْتِيمَ اٜ اَللَّه مٛ يٛنْکِ، وِعُمِنْ تٛ اَنْ وٛنِ اَلْمَسِيحُ، ٻِطّٛ اَللَّه؞» يٜىٰسُ نٛوتِي، وِعِ، «اٜىٰ، طُمْ نٛنْ نٛ مبِيطَا؞ اَمَّا اٜ مِ وِعَعٛنْ، يٜىٰسٛ طٛعٛ اٛنْ نغِعَيْ ٻِي نٜطّٛ اٜ جٛوطِي تٛ جُنْغٛ ݧَامٛ نغٛ جٛومُ بَوْطٜ اٜ مٛ وَرٛيَ ندٜرْ دُولٜ؞» سٜيْ مَوْطٛ مَوْٻٜ اَرْدِيٻٜ دِينَ اٛنْ سٜىٰکِ کٛلْتٜ مُوطُمْ وِعِ، «اٛ حُطِي اَللَّه؞ طُمٜ شٜيْدَ طَٻِّتٜتٜنْ کَدِنْ؟ جٛونِ اٛنْ نَنِي نِ حَالَ کَلُّکَ کَ اٛ مٜتِ دٛوْ اَللَّه؞ کٛ وٛنِ شُٻٛلْ مٛوطٛنْ؟» سٜيْ ٻٜ مبِعِ، «حٜوْتِي اٛ وَرٜىٰ!» سٜيْ ٻٜ تُتَّنِمٛ جٛودٜ تٛ يٜىٰسٛ، ٻٜ ڤِيِمٛ، وٛٻّٜ کٜلِّمٛ تٛ وٛلٛ، اٜ ٻٜ مبِعَمٛ، «اَلْمَسِيحُ، وَطَنْمِنْ اَنَّبَاکُ! مٛيٜ فِيُمَا؟» بِيتُرُسْ اٜ جٛوطِي شَکَ وُرٛ نغٛنْ، سٜيْ غٛطّٛ کٛرْطٛ وَرِ تٛ مَاکٛ وِعِ، «اَنْ مَا، اَ وٛنْدِ اٜ يٜىٰسُ غَلِلَنْکٜىٰجٛ!» اَمَّا بِيتُرُسْ يٜدِّ يٜىٰسٛ مَٻّٜ ٻٜ فُو وِعِ، «مِ اَنْدَا کٛ مبِعَتَا!» سٜيْ اٛ يَحِ حَادٜ دَمُّغَلْ وُرٛ نغٛنْ؞ طٛنْمَا سٜيْ غٛطّٛ کٛرْطٛ يِعِمٛ، وِعِ يِمْٻٜ دَرِيٻٜ طٛنْ، «اٛعٛ نٜطّٛ اٜ مٛ وٛنْدِ اٜ يٜىٰسُ نَجَرَنْکٜىٰجٛ!» سٜيْ بِيتُرُسْ فُطِّتِ يٜدِّ حَا اٜ حُنَاکِ، وِعِ، «مِ اَنْدَا نٜطّٛ اٛنْ!» غَطَ طٛنْ سٜطَّ، سٜيْ دَرِيٻٜ طٛنْ ٻَدِّي بِيتُرُسْ، مبِعِ، «سٜکٛ وَلَا اَنْ مَا اَ غٛعٛتٛ ندٜرْ تٛکُّٻٜمٛ، نغَمْ اِرِ نٛ مٜتِرْتَا نَنْغِيمَ؞» سٜيْ بِيتُرُسْ فُطِّ لَانُکِ حٛورٜ مُوطُمْ حُنِي وِعِ، «مِ اَنْدَا نٜطّٛ اٛنْ!» طٛنْ اٜ طٛنْ نجَکَرْدِ حَنِ؞ سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، «کٛ نجَکَرْدِ حَنَ اَ وِعَيْ ندٜ تَتِ اَ اَنْدَايَمْ؞» سٜيْ اٛ وُرْتِي يَاسِ اٛ وٛيِ بٛجِّ نَوْطِ؞ ندٜ وٜىٰتِ، سٜيْ فُو مَوْٻٜ اَرْدِيٻٜ دِينَ اٜ مَوْٻٜ يِمْٻٜ مٜدِّ دٛوْ نٛ ٻٜ مبَرْدَتَ يٜىٰسُ؞ ٻٜ کَٻِّمٛ، ٻٜ ندِلِّدِ اٜ مَاکٛ ٻٜ نجَارِمٛ تٛ بِلَاتُسْ غٛمْنَاجٛ؞ ندٜ يَحُودَ کٛکِّتِرْطٛ يٜىٰسُ يِعِ طُمْ تَپَنِي يٜىٰسُ کِيتَ مَيْدٜ، سٜيْ اٛ وَنِّ، اٛ سٛعِّتَنِ مَوْٻٜ اَرْدِيٻٜ دِينَ اٜ مَوْٻٜ يِمْٻٜ شٜىٰدٜ اَجُرْفَارِ 30 طٜنْ طٛنْ؞ اٛ وِعِ، «مِ وَطِي حَکّٜ نغَمْ مِ حٛکِّتِرِي نٜطّٛ مٛ وَطَايِ کٛ وٛوطَا؞» اَمَّا ٻٜ مبِعِمٛ، «کٛ وَنِّمِنْ؟ اَنْ اَنْدِ!» سٜيْ اٛ حُبِنِ شٜىٰدٜ طٜنْ ندٜرْ وُرٛ شٜنِينغٛ، اٛ دِلِّ اٛ سَغِ حٛورٜ مَاکٛ اٜ ٻٛغّٛلْ دٛوْ لٜکِّ اٛ وَرِ حٛورٜ مَاکٛ؞ اَمَّا مَوْٻٜ اَرْدِيٻٜ دِينَ ٻٛڤْتِ شٜىٰدٜ طٜنْ، مبِعِ، «اَتَّوْرَ حَطِي طُمْ وَطَ طٜعٜ شٜىٰدٜ ندٜرْ تٛ طُمْ رٜسَتَ دٛکَّلْ نغَمْ اَللَّه ندٜرْ وُرٛ شٜنِينغٛ، ندٜ شٜىٰدٜ طٜنْ طُمْ شٜىٰدٜ پِيپَمْ؞» نغَمْ نٛنْ ٻٜ شُٻِ ٻٜ کُوتِرَ شٜىٰدٜ طٜنْ ٻٜ شٛودَ نغٜسَ تٛ غٛطّٛ مَحٛووٛ غٛجِيجٜ، ٻٜ نغَرْتِرَکَ وِغٜىٰرٜ تٛ طُمْ اُوَتَ حٛٻّٜ؞ کَنْجُمْ وَطِ، حَا جٛونِ نغٜسَ کَنْ اٜ نٛدِّرٜىٰ «نغٜسَ پِيپَمْ؞» نٛنْ حٜبِّنِ کٛ اَنَّبِ اِرْمِيَ وِعِ، وِيکِ، «ٻٜ کٛشِّ شٜىٰدٜ اَجُرْفَارِ 30، شٜىٰدٜ طٜ اِسْرَاعِيلَنْکٛعٜنْ مبِعِ طُمْ يٛٻَ دٛوْ مَاکٛ؞ ٻٜ کُوتِرِ شٜىٰدٜ طٜنْ ٻٜ شٛودِ نغٜسَ تٛ مَحٛووٛ غٛجِيجٜ، نٛنْ نٛ جٛومِرَاوٛ وِعِ مِ وَطَ؞» يٜىٰسُ اٜ دَرِي يٜىٰسٛ غٛمْنَاجٛ، سٜيْ غٛمْنَاجٛ اٛنْ پَمِمٛ، وِعِ، «اَنْ وٛنِ لَامِيطٛ يَحُودَنْکٛعٜنْ؟» يٜىٰسُ نٛوتِي وِعِ، «اَ وِعِيکَ؞» اَمَّا ندٜ مَوْٻٜ اَرْدِيٻٜ دِينَ اٜ مَوْٻٜ يِمْٻٜ نغُلِّيمٛ، اٛ وِعَايِ غٛطُّمْ؞ سٜيْ بِلَاتُسْ وِعِمٛ، «اَ نَنَتَا ٻٜ نغُلّٛرَکٜمَ فِي طُطُّمْ؟» اَمَّا يٜىٰسُ نٛوتَنَاکِمٛ کٛو ندٜ غٛعٛ، حَا غٛمْنَاجٛ اٛنْ حَيْطِنِ نَاع سٜطَّ؞ تٛو، اٜ شَرٜلْ حُمْتٛ سَکِّنْکِ، بِلَاتُسْ غٛمْنَاجٛ وٛووِي يٛوفَنْکِ حَوْرُتُٻٜ شُرَاطٛ غٛعٛتٛ مٛ ٻٜ نغِطِ؞ اٜ شَرٜلْ نغٜلْ بٛو اٜ وٛودِ شُرَاطٛ کَلُّطٛ اِنْدِنْطٛ بِعٜتٜىٰطٛ بَرَبَّسْ؞ ندٜ يِمْٻٜ کَوْرِتِ، سٜيْ بِلَاتُسْ پَمِٻٜ، وِعِ، «مٛيٜ نغِطّٛنْ مِ يٛوفَنَعٛنْ؟ بَرَبَّسْ کٛو يٜىٰسُ بِعٜتٜىٰطٛ اَلْمَسِيحُ؟» نغَمْ بِلَاتُسْ فَامِي لَوْلِيرُ وَطِ ٻٜ نغَطِ يٜىٰسُ ندٜرْ جُنْغٛ مَاکٛ؞ بِلَاتُسْ اٜ جٛوطِي دٛوْ جٛوطٛرْغَلْ کِيتَ، سٜيْ دٜبّٛ مَاکٛ لِلٛيِ طُمْ وِعَمٛ، «تَاع مٜىٰمُ اٛنْ طٛنْ مٛ وَطَايِ کٛ وٛوطَا، نغَمْ حَنْکِ مِ حٛيْطِي دٛوْ مَاکٛ مِ وَنِّي نَاع سٜطَّ دٛوْ کٛيْطٛلْ نغٛلْ؞» مَوْٻٜ اَرْدِيٻٜ دِينَ اٜ مَوْٻٜ يِمْٻٜ نغَطِ يِمْٻٜ مبِعَ طُمْ يٛوفَ بَرَبَّسْ طُمْ وَرَ يٜىٰسُ؞ غٛمْنَاجٛ اٛنْ فُطِّتِ وِعِٻٜ، «ندٜرْ يِمْٻٜ طِطٛ ٻٜنْ مٛيٜ نغِطّٛنْ مِ يٛوفَنَعٛنْ؟» ٻٜ مبِعِ، «بَرَبَّسْ!» سٜيْ بِلَاتُسْ پَمِٻٜ وِعِ، «تٛو، کٛ نغِطّٛنْ مِ وَطَنَ يٜىٰسُ بِعٜتٜىٰطٛ اَلْمَسِيحُ؟» ٻٜ فُو ٻٜ مبِعِ، «وَرُمٛ دٛوْ غَافَانغَلْ!» بِلَاتُسْ وِعِ، «نغَمْ طُمٜ؟ طُمٜ کٛ حَلِّ اٛ وَطِ؟» اَمَّا ٻٜ ٻٜيْدِ وِعُکِ سٜمْبٜىٰ، «وَرُمٛ دٛوْ غَافَانغَلْ!» ندٜ بِلَاتُسْ يِعِ وَلَا کٛ وَاوَتَ وَطُکِ، ندٜنْ حَوْرٜ فُطِّ اُمَّاکِ، سٜيْ اٛ ݧٜطٛيِ ندِيَمْ اٛ لٛوتِ جُوطٜ مَاکٛ يٜىٰسٛ مَٻّٜ؞ اٛ وِعِ، «مِ وَلَا حَکّٜ پِيپَمْ نٜطّٛ اٛعٛ؞ طُمْ شَطُّمْ مٛوطٛنْ؞» سٜيْ يِمْٻٜ ٻٜنْ فُو نٛوتِي، مبِعِ، «اٜىٰ، حَکّٜ پِيپَمْ مَاکٛ اٜ دٛوْ اَمِنْ اٜ ٻِٻّٜ اَمِنْ!» سٜيْ اٛ يٛوفَنِٻٜ بَرَبَّسْ، اَمَّا اٛ وَطِ طُمْ فِيِ يٜىٰسُ لٛوشِ، ندٜنْ اٛ تَمْبِنِمٛ سٛوجِعٜنْ رٛومَ نغَمْ ٻٜ مبَرٛيَمٛ دٛوْ غَافَانغَلْ؞ دَغَ طٛنْ سٛوجِعٜنْ غٛمْنَاجٛ نجَارِ يٜىٰسُ ندٜرْ لَامٛرْدٜ غٛمْنَاجٛ، ٻٜ کَوْرِتِ فُو سٛوجِعٜنْ کٛرِيٻٜ يٜىٰسٛ مَاکٛ؞ ٻٜ ٻٛرْتِمٛ ٻٜ ٻٛرْنِمٛ اِرِ تٛغّٛورٜ لَامِيٻٜ؞ ٻٜ مبَالِ غِيفٛلْ غِعٜ، ٻٜ تَارَنِمٛنغٛلْ اٜ حٛورٜ، ٻٜ نغَطَنِمٛ سَوْرُ اٜ جُنْغٛ ݧَامٛ مَاکٛ، ٻٜ ندِشِّي يٜىٰسٛ مَاکٛ، اٜ ٻٜ نجُکِّتَمٛ، اٜ ٻٜ مبِعَ، «اَللَّه رٜىٰنٜ، لَامِيطٛ يَحُودَنْکٛعٜنْ!» ٻٜ تُتَّنِمٛ جٛودٜ، ٻٜ نجَٻِ سَوْرُ ندُنْ ٻٜ نغَطِ کَ ڤِيرُکِمٛندُ تٛ حٛورٜ؞ غَطَ ٻٜ نجُکِّتِيمٛ، ٻٜ ٻٛرْتِمٛ تٛغّٛورٜ لَامِيٻٜ ندٜ ٻٜ ٻٛرْنُنٛومٛ، ندٜنْ ٻٜ ٻٛرْنِمٛ کٛلْتٜ مَاکٛ؞ سٜيْ ٻٜ مبُرْتِنِمٛ ٻٜ اَرْدِنِمٛ نغَمْ ٻٜ مبَرٛيَمٛ دٛوْ غَافَانغَلْ؞ اٜ ٻٜ نجَحَ سٜيْ ٻٜ کَوْرِ اٜ غٛطّٛ نٜطّٛ سَايِرَنْکٜىٰجٛ بِعٜتٜىٰطٛ سِيمَنْ؞ ٻٜ نغَطِمٛ اٜ سٜمْبٜ اٛ حٛشَّ غَافَانغَلْ يٜىٰسُ؞ ندٜ ٻٜ نغَرِ تٛ وٛنْدٜ وِغٜىٰرٜ بِعٜتٜىٰندٜ غٛلْغٛوتَ، وَاتٛ «پِپَلْ حٛورٜ،» ٻٜ کٛکِّ يٜىٰسُ ندِيَمْ اِنَبٛجَمْ جِلِّندِرَاطَمْ اٜ غٛطُّمْ کَطُّمْ؞ اَمَّا ندٜ اٛ تَحِطَمْ، اٛ سَلِي اٛ يَرَ؞ غَطَ ٻٜ ڤِيَنِيمٛ کُوسَاجٜ دٛوْ غَافَانغَلْ، ٻٜ نغَطِ شَاشَ نغَمْ ٻٜ شٜنْدَ کٛلْتٜ مَاکٛ حَکُّندٜ مَٻّٜ؞ غَطَ نٛنْ ٻٜ نجٛوطِي اٜ ٻٜ ندٜىٰنَمٛ؞ دٛوْ حٛورٜ غَافَانغَلْ نغَلْ طُمْ تَکِّ اَلّٛوَلْ؞ طُمْ وِنْدِ دٛوْ مَاغَلْ کٛ طُمْ وُلّٛرِيمٛ وِعُکِ، «اٛعٛ وٛنِ يٜىٰسُ لَامِيطٛ يَحُودَنْکٛعٜنْ؞» ٻٜ ڤِيَنِ وُيْٻٜ طِطٛ کُوسَاجٜ دٛوْ غَافَالٜ حَادٜ يٜىٰسُ، غٛعٛتٛ اٜ جُنْغٛ مَاکٛ ݧَامٛ، غٛعٛتٛ اٜ جُنْغٛ مَاکٛ نَنٛ؞ يِمْٻٜ پَٻّٛتٛوٻٜ اٜ کُطَ يٜىٰسُ اٜ نغِيلَ کٛعٜ، اٜ ٻٜ مبِعَ، «اَنْ غِطّٛ ڤُسُکِ وُرٛ شٜنِينغٛ مَحِتٛونغٛ ندٜرْ بَلْطٜ تَتِ، حِسْنُ حٛورٜ مَاطَ! تَا ٻِطّٛ اَللَّه، جِڤّٛيَ دَغَ دٛوْ غَافَانغَلْ!» نٛنْ مَا مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، اٜ مَوْٻٜ يِمْٻٜ نجُکِّتِمٛ، اٜ مبِعَ، «اٛ حِسْنِي وٛٻّٜ، اَمَّا اٛ وَاوَايِ حِسْنُکِ حٛورٜ مَاکٛ؞ تٛ کَنْکٛ وٛنِ لَامِيطٛ اِسْرَاعِيلَ، اَلْ اٛ جِڤّٛيٛو دَغَ دٛوْ غَافَانغَلْ جٛونِ، اٜنٜنْ بٛو کٛولٛوطٜنْمٛ؞ اٛ حٛولَکٜ اَللَّه؞ اَلْ اَللَّه اٛنْ حِسْنَمٛ جٛونِ تٛ اٜ مٛ يِطِمٛ، نغَمْ اٛ وِعِي، ‹مِنْ مِ ٻِطّٛ اَللَّه؞› » نٛنْ مَا ٻٜنْ طٛنْ وُيْٻٜ ٻٜ طُمْ ڤِيَنِ کُوسَاجٜ دٛوْ غَافَالٜ کُطِمٛ؞ دَغَ شَکَ ݧَلَوْمَ ݧِوْرٜ مَٻِّ لٜيْدِ فُو، حَا يَاکِ نجَمْندِ تَتِ ندِ اَلَاسَرَ؞ اٜ نجَمْندِ تَتِ ندِنْ، سٜيْ يٜىٰسُ وِعِ اٜ سٜمْبٜ، «اٜلٛيْ، اٜلٛيْ، لَمَ سَبَتَّنِ؟» وَاتٛ، «يَا اَللَّه اَمْ، يَا اَللَّه اَمْ، نغَمْ طُمٜ شٜنْدِرْطَا اٜ اَمْ؟» ندٜ وٛٻّٜ دَرِيٻٜ تٛ وِغٜىٰرٜ ندٜنْ نَنِ نٛنْ، ٻٜ مبِعِ، «اٜ مٛ نٛدَّ اَنَّبِ اِلِيَ؞» سٜيْ طٛنْ اٜ طٛنْ غٛعٛتٛ مَٻّٜ دٛغِّ حٛشِّ سٛوسٛوَ، سُووِنغَ ندٜرْ ندِيَمْ اِنَبٛجَمْ لَمُّطَمْ، اٛ طِيسِنغَ تٛ سَوْرُ، اٛ لِوَنِي يٜىٰسُ يَرَ؞ اَمَّا وٛٻّٜ مبِعِ، «اَلٜىٰ نغِعٜنْ کٛو اِلِيَ وَرَيْ حِسْنَمٛ؞» سٜيْ يٜىٰسُ فُطِّتِ وُلِّ سٜمْبٜىٰ ندٜنْ يٛوفِ يٛنْکِ مُوطُمْ؞ سٜيْ وُدٜرٜ شٜنْدُندٜ سُودُ جٛومِرَاوٛ سٜىٰکِ طِطِ دَغَ دٛوْ يَاکِ لٜيْ؞ لٜيْدِ بٛو دِمْبِ، کَاپٜ ڤٜشَّا؞ طُمْ اٛمْتِ غٜنَالٜ، يِمْٻٜ اَللَّه مَيْٻٜ طُطْٻٜ اُمِّي اٜ يٛنْکِ؞ ٻٜ مبُرْتٛيِي ندٜرْ غٜنَالٜ طٜنْ؞ غَطَ يٜىٰسُ اُمَّکٜ دَغَ مَيْدٜ، ٻٜ نَتّٛيِ غَرِيرِ شٜنِيندِ، يِمْٻٜ طُطْٻٜ نغِعِٻٜ؞ ندٜ مَوْطٛ سٛوجِعٜنْ اٛنْ اٜ حٛرِيٻٜ سٛوجِعٜنْ رٜىٰنٛوٻٜ يٜىٰسُ نغِعِ دِمْبٛلْ لٜيْدِ نغٛلْ اٜ فُو کٛ وَطِ، سٜيْ ٻٜ کُلْتٛرِ نَاع سٜطَّ، ٻٜ مبِعِ، «غٛونغَ نٜطّٛ اٛعٛ اٛ ٻِطّٛ اَللَّه!» اٜ وٛودِ رٜوْٻٜ طُطْٻٜ تٛکّٛيْٻٜ يٜىٰسُ دَغَ لٜيْدِ غَلِيلِ وَلّٛوٻٜمٛ اٜ ٻٜ ندَارَ دَغَ تٛ وٛطِّ؞ ندٜرْ مَٻّٜ اٜ وٛودِ مَرْيَامَ پِوٛيْطٛ مَغَدَلَ، اٜ مَرْيَامَ مَدُوجٛ يَاکُبُ اٜ يُسُفُ، اٜ مَدُوجٛ ٻِٻّٜ جَبَدِ؞ ندٜ اَلَاسَرَ وَطِ، سٜيْ غٛطّٛ دِسْکُطٛ پِوٛيْطٛ غَرِيرِ اَرْمَاتِيَ وَرِ؞ اِنْدٜ مَاکٛ يُسُفُ؞ کَنْکٛ مَا اٛ تٛکُّطٛ يٜىٰسُ؞ اٛ يَحِ تٛ بِلَاتُسْ، اٛ تٛرِيمٛ اٛ حٛکَّمٛ ٻَنْدُ يٜىٰسُ؞ سٜيْ بِلَاتُسْ وَطِ طُمْ حٛکَّمٛندُ؞ سٜيْ يُسُفُ حٛشِّ ندُ تَارِندُ اٜ وُدٜرٜ لَمْندٜ ندٜ شٜىٰدٜ؞ اٛ فُکِّنٛيْندُ ندٜرْ يٜنَاندٜ مَاکٛ حٜيْرٜ ندٜ اٛ وَطِ طُمْ وَسَنِمٛ ندٜرْ حَيْرٜ؞ اٛ تَلِّتِ کَاپَ مَنْغَ اٛ مَٻِّ دَمُّغَلْ يٜنَاندٜ ندٜنْ، اٛ دِلِّ؞ مَرْيَامَ پِوٛيْطٛ مَغَدَلَ اٜ غٛعٛتٛ مَرْيَامَ اٛنْ اٜ ٻٜ طٛنْ نجٛوطِي يٜىٰسٛ يٜنَاندٜ ندٜنْ؞ ندٜ فِنِ، وَاتٛ غَطَ ݧَلْندٜ سِرْيَاکِ، سٜيْ مَوْٻٜ اَرْدِيٻٜ دِينَ اٜ فَارِسَنْکٛعٜنْ کَوْرِتِ يٜىٰسٛ بِلَاتُسْ؞ ٻٜ مبِعِ، «اَللَّه رٜىٰنٜ! مِنْ شِڤْتٛرِي کٛ اٛنْ طٛنْ مَجِّنٛووٛ يِمْٻٜ وِعِ کٛ اٛ مَايَ، اٛ وِعِ، ‹مِ اُمّٛتٛ دَغَ مَيْدٜ غَطَ بَلْطٜ تَتِ؞› نغَمْ نٛنْ، سٜيْ نغَطَا طُمْ يَحَ طُمْ رٜىٰنَ يٜنَاندٜ ندٜنْ بٛطُّمْ حَا بَلْطٜ تَتِ، نغَمْ تٛع تٛکُّٻٜمٛ نجَحَ نغُجَّ ٻَنْدُ مَاکٛ مبِعَ يِمْٻٜ اٛ اُمَّکٜ دَغَ مَيْدٜ؞ مَجِّنْکِ يِمْٻٜ شَکِتِيکِ کِنْ ٻُرَيْ اَرَنْدٜحِ حَلُّکِ؞» سٜيْ بِلَاتُسْ وِعِٻٜ، «تٛو، نجَحٜىٰ، کٛشّٛنْ سٛوجِعٜنْ، نغَطٛنْ کٛ مبَاوٛتٛنْ وَطُکِ ندٜىٰنٛنْ يٜنَاندٜ ندٜنْ؞» سٜيْ ٻٜ نجَحِ يٜنَاندٜ ندٜنْ ٻٜ ڤِيِ حَاتِمِيرٜ لَامِيطٛ دٛوْ حَيْرٜ تٛ دَمُّغَلْ يٜنَاندٜ ندٜنْ، ٻٜ نغَطِ سٛوجِعٜنْ ندٜىٰنَنْدٜ بٛطُّمْ؞ تٛو، غَطَ ݧَلْندٜ سِوْتَارٜ، ݧَلْندٜ اَلَلْ سُبَکَ، سٜيْ مَرْيَامَ پِوٛيْطٛ مَغَدَلَ اٜ مَرْيَامَ غٛعٛتٛ اٛنْ ٻٜ نجَحِ نغَمْ ٻٜ نغِعَ يٜنَاندٜ ندٜنْ؞ طٛنْ اٜ طٛنْ طُمْ وَطِ وٛنْغٛلْ دِمْبٛلْ لٜيْدِ مَنْغٛلْ، نغَمْ غٛطّٛ مَلَاعِکَاجٛ جٛومِرَاوٛ وَرِ دَغَ دٛوْ، اٛ تَلِّتِ کَاپَ نغَنْ دَغَ دَمُّغَلْ يٜنَاندٜ ندٜنْ، اٛ جٛوطِي دٛوْ مَاغَ؞ اٜ مٛ طٜلْکِتٛو بٛ مَپّٜرٜ، کٛلْتٜ مَاکٛ بٛو اٜ رَنِّ تَرْ بٛ حٛتّٛلّٛ؞ ندٜ سٛوجِعٜنْ رٜىٰنٛوٻٜ يٜنَاندٜ ندٜنْ نغِعِمٛ، کُلٛلْ مَنْغٛلْ نَنْغِٻٜ حَا ٻٜ ندِوْنِ، ٻٜ نجَنِ، ٻٜ نغَرْتِ بٛ مَيْٻٜ؞ اَمَّا مَلَاعِکَاجٛ اٛنْ وِعِ رٜوْٻٜ ٻٜنْ، «تٛع اٛنْ کُلُ؞ اٜ مِ اَنْدِ يٜىٰسُ طَٻِّتٛتٛنْ، بَرَاطٛ دٛوْ غَافَانغَلْ؞ اٛ وَلَا طٛعٛ؞ طُمْ اُمِّنِيمٛ دَغَ مَيْدٜ؞ نغَرٜىٰ نغِعٛنْ تٛ طُمْ فُکِّنّٛومٛ؞ نجَحٜىٰ ندٜرْ يَوْطَارٜ مبِعٛنْ تٛکُّٻٜمٛ، ‹اٛ اُمَّکٜ دَغَ مَيْدٜ؞ رَطُّمْ، اٛ اَرْتَيْعٛنْ يَاکِ لٜيْدِ غَلِيلِ؞ تٛنْ نغِعٛتٛنْمٛ؞› کَنْجُمْ وٛنِ حَبَرُ طُمْ نغَدَّنْمِعٛنْ؞» سٜيْ رٜوْٻٜ ٻٜنْ اَلِ يٜنَاندٜ ندٜنْ جَوْطُمْ ندٜرْ کُلٛلْ، اَمَّا اٜ وٜلْوٜلٛ مَنْغٛ؞ ٻٜ ندٛغِّ ٻٜ نجَحِ نغَمْ ٻٜ مبِعَکَ تٛکُّٻٜ يٜىٰسُ؞ سٜيْ يٜىٰسُ حَوْرِ اٜ مَٻّٜ، وِعِ، «اَکُ مٛوطٛنْ!» ٻٜ ٻَتِّيمٛ، ٻٜ ندِشِّي، ٻٜ نجٛغِي کٛيْطٜ مَاکٛ، ٻٜ مَوْنِنِمٛ؞ سٜيْ يٜىٰسُ وِعِٻٜ، «تٛع اٛنْ کُلُ؞ نجَحٜىٰ مبِعٛنْ بَنْدِرَاٻٜ اَمْ نجَحَ لٜيْدِ غَلِيلِ؞ تٛنْ ٻٜ نغِعَتَيَمْ؞» رٜوْٻٜ ٻٜنْ اٜ دٛوْ لَاوٛلْ، سٜيْ وٛٻّٜ ندٜرْ سٛوجِعٜنْ رٜىٰنٛوٻٜ يٜنَاندٜ ندٜنْ نجَحِ غَرِيرِ طِيوِتِ مَوْٻٜ اَرْدِيٻٜ دِينَ فُو کٛ وَطِ؞ ندٜ مَوْٻٜ اَرْدِيٻٜ دِينَ اٜ مَوْٻٜ يِمْٻٜ کَوْرِتِ، ٻٜ ندَرْوِ دَبَرٜ؞ ٻٜ کٛکِّ سٛوجِعٜنْ ٻٜنْ شٜىٰدٜ طُطّٜ، ٻٜ مبِعِٻٜ، «مبِعٜىٰ يِمْٻٜ، ‹تٛکُّٻٜمٛ نغَرِ جٜمَّ اٜ مِنْ طَانِي ٻٜ نغُجِّمٛ؞› تٛ غٛمْنَاجٛ نَنِي طُعُمْ حَبَرُ، مِنْ اٜسْتَيْمٛ مِنْ شُرَنَعٛنْ نَتُّکِ تٛرَّ؞» سٜيْ سٛوجِعٜنْ ٻٜنْ نجَٻِ شٜىٰدٜ طٜنْ، ٻٜ نغَطِ نٛنْ نٛ طُمْ وِعِٻٜ ٻٜ نغَطَ؞ حَبَرُ طُمْ سَنْکِتَامَ ندٜرْ يَحُودَنْکٛعٜنْ، اٜ ٻٜ کٛکَّ حَبَرُ طُعُمْ حَا حَنْدٜ؞ سٜيْ تٛکُّٻٜمٛ سَڤّٛ اٜ غٛعٛ ٻٜنْ ندِلِّ لٜيْدِ غَلِيلِ تٛ حٛشّٜىٰرٜ ندٜ يٜىٰسُ وِعِٻٜ ٻٜ نجَحَ؞ ندٜ ٻٜ نغِعِمٛ، سٜيْ ٻٜ مَوْنِنِمٛ، اَمَّا وٛٻّٜ نغَطِ سٜکٛ ندٜرْ ٻٜرْطٜ مَٻّٜ؞ سٜيْ يٜىٰسُ ٻَدِّي حَادٜ مَٻّٜ، وِعِٻٜ، «طُمْ حٛکِّييَمْ فُو لَامُ دٛوْ اٜ لٜيْ؞ نغَمْ نٛنْ، نجَحٜىٰ نغَرْتِرٛنْ فُو لٜݧِ دُونِيَارُ تٛکُّٻٜيَمْ، نغَطَنٛنْٻٜ بَڤْتِسْمَ ندٜرْ اِنْدٜ اَللَّه ݧَاکٛ مٛ دٛوْ، اٜ ٻِطّٛ، اٜ رُوحُ اَللَّه، اٛنْ اٜکِّتِنَٻٜ ٻٜ تٛکَّ کٛو طُمٜ کٛ مبِيمِعٛنْ نغَطٛنْ؞ رَطُّمْ، اٜ مِ وٛنْدِ اٜ مٛوطٛنْ کٛو ندٜيٜ حَا رٜعُکِ دُونِيَارُ؞» طُعُمْ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ، ٻِطّٛ اَللَّه؞ طُمْ وِنْدَامَ ندٜرْ دٜفْتٜرٜ اَنَّبِ اِشَايَ وِيکِ، «اَللَّه وِعِ، ‹رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ اٛ مٛعِّنَنْمَا لَاوٛلْ؞› غٛطّٛ اٜ نٛدَّ ندٜرْ لَدّٜ، اٜ وِعَ، ‹مٛعِّنٜىٰ طَتَلْ جٛومِرَاوٛ، ڤٛرْتٜىٰ لَاوٛلْ نغَمْ غَرٛلْ مَاکٛ؞› » نٛنْ بٛو يَحَيَ غَطٛووٛ بَڤْتِسْمَ جٛوطِي ندٜرْ لَدّٜ، اٜ وَعَجِنَ، اٜ مٛ وِعَ، «تُوبٜىٰ، طُمْ وَطَنَعٛنْ بَڤْتِسْمَ، ندٜنْ اَللَّه يَافَنْتٛعٛنْ حَکّٜىٰجِ مٛوطٛنْ؞» يِمْٻٜ طُطْٻٜ دَغَ لٜيْدِ يَحُودِيَ فُو اٜ غَرِيرِ اُرُشَلِيمَ نغَطِ کَ يَاکِ تٛ مَاکٛ؞ اٜ ٻٜ مبِعَ فُو کٛ وٛوطَا طُمْ ٻٜ نغَطِ، اٜ مٛ وَطَنَٻٜ بَڤْتِسْمَ ندٜرْ شَانغٛلْ اُرْدُنْ؞ يَحَيَ اٜ ٻٛرْنِي کٛلْتٜ طٜ طُمْ وَطِرِ لٜىٰٻٜ نغٜىٰلٛوبَ، اٜ مٛ تَادِي تَادٛرْدٜ لَرَلْ؞ ݧَمْندُ مَاکٛ وٛنِ بَابٜىٰجِ اٜ نجُمْرِ؞ اٜ مٛ وَعَجِنَ، اٜ مٛ وِعَ، «غٛطّٛ اٜ وَرَ غَطَ اَمْ اٛ ٻُرِييَمْ مَنْغُ، کٛو لٛکُّلِّ ڤَطٜ مَاکٛ مِ فٛتَايِ تُرَاکِ مِ فِتَّطِ؞ اٜ مِ وَطِرَنَعٛنْ بَڤْتِسْمَ اٜ ندِيَمْ، اَمَّا کَنْکٛ اٛ وَطِرَنَيْعٛنْ بَڤْتِسْمَ اٜ رُوحُ اَللَّه؞» ندٜرْ بَلْطٜ طٜنْ يٜىٰسُ وَرٛيِ دَغَ غَرِيرِ نَجَرَتْ ندٜرْ لٜيْدِ غَلِيلِ، سٜيْ يَحَيَ وَطَنِمٛ بَڤْتِسْمَ ندٜرْ شَانغٛلْ اُرْدُنْ؞ اٜ وُرْتَاکِ يٜىٰسُ دَغَ ندٜرْ ندِيَمْ طَمْ، اٛ يِعِ دٛوْ اٜ مَٻِّتٛو، رُوحُ اَللَّه اٜ جِڤّٛيٛو دٛوْ مَاکٛ بٛ فٛوندُ؞ حٛنٛنْدٜ پِوٛيِ دَغَ دٛوْ وِعِ، «اَنْ وٛنِ ٻِطّٛ اَمْ، مٛ نغِطُمِ؞ اٜ مِ نَنَ بٜلْطُمْ مَاطَ؞» طٛنْ اٜ طٛنْ رُوحُ اَللَّه يَارِمٛ ندٜرْ لَدّٜ؞ تٛنْ اٛ وَطِ بَلْطٜ 40 شٜيْطَنْ اٜ فٛوندَمٛ؞ اٜ مٛ وٛنْدِ اٜ مَرْلٜ لَدّٜ، مَلَاعِکَعٜنْ مبَلِّمٛ؞ تٛو، غَطَ طُمْ سُرِي يَحَيَ ندٜرْ سُودُ شُرَلْ، يٜىٰسُ يَحِ غَلِيلِ اٜ وَعَجِنَ حَبَرُ بٜلْطُمْ دَغَ تٛ اَللَّه؞ اٜ مٛ وِعَ، «شَرٜلْ وَطِي! لَامُ اَللَّه وَرِي حَادٜ مٛوطٛنْ؞ تُوبٜىٰ، نجَٻٛنْ حَبَرُ بٜلْطُمْ؞» يٜىٰسُ اٜ يَحَ حَادٜ مبٜىٰلَ غَلِيلِ، سٜيْ اٛ يِعِ سِيمَنْ اٜ مِݧِرَاوٛ مُوطُمْ اَنْدِرَاوُسْ اٜ ٻٜ نغَطَ نَنْغِرْطُمْ لِپِّ مَٻّٜ ندٜرْ ندِيَمْ، نغَمْ ٻٜ نَنْغٛوٻٜ لِپِّ؞ سٜيْ يٜىٰسُ وِعِٻٜ، «تٛکّٜىٰيَمْ، مِ وَرْتِرَيْعٛنْ غَدَّيْٻٜ يِمْٻٜ تٛ اَمْ؞» طٛنْ اٜ طٛنْ ٻٜ اَلِ نَنْغِرْطُمْ لِپِّ مَٻّٜ ٻٜ تٛکِّمٛ؞ ندٜ اٛ ٻٜيْدِ يٜىٰسٛ سٜطَّ، سٜيْ اٛ يِعِ يَاکُبُ ٻِي جَبَدِ اٜ مِݧِرَاوٛ مُوطُمْ يَحَيَ اٜ ٻٜ ندٜرْ کٛمِوَلْ مَٻّٜ، اٜ ٻٜ مٛعِّنَ نَنْغِرْطُمْ لِپِّ مَٻّٜ؞ طٛنْ اٜ طٛنْ اٛ نٛدِّٻٜ؞ سٜيْ ٻٜ اَلِ ݧَاکٛ مَٻّٜ جَبَدِ ندٜرْ کٛمِوَلْ اٜ کُوَنٛوٻٜٻٜ، ٻٜ تٛکِّ يٜىٰسُ؞ سٜيْ يٜىٰسُ اٜ تٛکُّٻٜمٛ نجَحِ غَرِيرِ کَفَرْنَحُمْ؞ ندٜ ݧَلْندٜ سِوْتَارٜ وَرِ، اٛ نَتِّ سُودُ دٛعَارٜ، اٛ فُطِّ اٜکِّتِنْکِ؞ يِمْٻٜ کَيْطِنِ اٜ اٜکِّتِنٛلْ مَاکٛ، نغَمْ اٛ اٜکِّتِنِرَايِٻٜ نٛ مٛودِٻّٜ اَتَّوْرَ اٜکِّتِنِرْتَ، اَمَّا اٛ اٜکِّتِنِيٻٜ اٜ بَوْطٜ؞ طٛنْ اٜ طٛنْ غٛودُطٛ غِنّٛلْ ندٜرْ سُودُ دٛعَارٜ ندُنْ وُلِّ سٜمْبٜىٰ، وِعِ، «کٛ وَنُّمَا اٜ اَمِنْ، يٜىٰسُ نَجَرَنْکٜىٰجٛ؟ اَ وَرٛيِ نغَمْ کَلْکَامِنْ؟ اٜ مِ اَنْدِ اَنْ اَ مٛيٜ؞ اَنْ وٛنِ شٜنِيطٛ اَللَّه؞» سٜيْ يٜىٰسُ حَٻَنِنغٛلْ، وِعِ، «دٜعُّتُ! وُرْتَ ندٜرْ مَاکٛ؞» سٜيْ غِنّٛلْ نغٛلْ دِمْبِمٛ دِمْبٛلْ کَلُّنغٛلْ، نغٛلْ وُلِّ سٜمْبٜىٰ، نغٛلْ وُرْتِي ندٜرْ مَاکٛ؞ ٻٜ فُو ٻٜ کَيْطِنِ، ٻٜ نغَطِ کَ پَمْپَمْتِرْکِ، اٜ ٻٜ مبِعَ، «طُمْ اُمْ طُمٜ؟ نغٛعٛلْ اٜکِّتِنٛلْ نغٛلْ کٜسٛلْ! نٜطّٛ اٛعٛ اٜ وٛودِ بَوْطٜ حَا غِنِّ اٜ نغَطَ کٛ اٛ وِعِطِ؞» ندٜرْ شَرٜلْ سٜطَّ حَبَرُ يٜىٰسُ سَنْکِتِي کٛو تٛيٜ ندٜرْ لٜيْدِ غَلِيلِ؞ ندٜ يٜىٰسُ اٜ يَاکُبُ اٜ يَحَيَ ٻٜ مبُرْتِي دَغَ سُودُ دٛعَارٜ ندُنْ، ٻٜ نَتِّ وُرٛ بِيتُرُسْ اٜ اَنْدِرَاوُسْ؞ اٜسِرَاوٛ بِيتُرُسْ دٜبّٛ اٜ مٛ فِيدَ اٜ جٛنْتٜ اٜ مٛ فُکِّي؞ اٜ نَتُّکِ يٜىٰسُ ٻٜ کٛکِّمٛ حَبَرُ مَاکٛ؞ سٜيْ يٜىٰسُ يَحِ تٛ مَاکٛ جٛغَنِيمٛ جُنْغٛ اُمِّنِمٛ؞ طٛنْ اٜ طٛنْ جٛنْتٜ طٜنْ نجٛوفِمٛ، اٛ اُمِّي اٛ فُطِّ وَدَّنْکِٻٜ ݧَمْندُ؞ فُتُرٛ، غَطَ نَانغٜ حِيرِي، يِمْٻٜ نغَدَّنِ يٜىٰسُ فُو ݧَوْٻٜ اٜ غٛودُٻٜ غِنِّ؞ سٜيْ يِمْٻٜ غَرِيرِ ندِنْ طُطْٻٜ کَوْرِتِ اٜ دَمُّغَلْ وُرٛ نغٛنْ؞ يٜىٰسُ يَمْطِتِنِ طُطْٻٜ غٛودُٻٜ ݧَوُوجِ فٜىٰرٜ‑فٜىٰرٜ؞ اٛ وُرْتِنَنِ يِمْٻٜ طُطْٻٜ غِنِّ، اٛ حَطِطِ مٜتُکِ نغَمْ اٜ طِ اَنْدِمٛ؞ اِلَا سُبَکَ، دَغَ ݧِوْرٜ اٜ حٛرِي، اٛ اُمِّي اٛ يَحِ وٛنْدٜ وِغٜىٰرٜ ندٜرْ لَدّٜ، اٛ وَطِ دٛعَارٜ تٛنْ؞ سٜيْ سِيمَنْ اٜ غٛنْدُٻٜ اٜ مَاکٛ ندِلِّ طَٻُّتُکِمٛ؞ ندٜ ٻٜ کٜٻْتِمٛ، ٻٜ مبِعِمٛ، «کٛو مٛيٜ اٜ طَٻُّتُمَا!» سٜيْ يٜىٰسُ وِعِٻٜ، «اٜنْ نجَحُ غَرِيجٜ غٛنْطٜ حَادٜ طٛعٛ مِ وَعَجِنَ تٛنْ مَا، نغَمْ کَنْجُمْ نغَرْمِ مِ وَطَ؞» اٛ يَحِ کٛو تٛيٜ ندٜرْ لٜيْدِ غَلِيلِ، اٜ مٛ وَعَجِنَ ندٜرْ شُوطِ دٛعَارٜ مَٻّٜ، اٜ مٛ وُرْتِنَنَ يِمْٻٜ غِنِّ؞ غٛطّٛ غٛودُطٛ ݧَوُ ݧَامٛوجُمْ لَرَلْ وَرِ تٛ يٜىٰسُ دِشِّي اٜ تٛرٛومٛ، اٜ وِعَ، «تَا جَٻِي، اَ وَاوَيْ نجَمْطِتِنَايَمْ؞» جُرُمْطُمْ نَنْغِ يٜىٰسُ، اٛ فٛرْتِ جُنْغٛ، اٛ مٜىٰمِمٛ، اٛ وِعِمٛ، «مِ جَٻِي؞ يَمْطُتُ!» طٛنْ اٜ طٛنْ ݧَوُ طُمْ اَلِمٛ، اٛ يَمْطِتِ؞ سٜيْ يٜىٰسُ وَغِّنِمٛ، وِعِمٛ، «دِلُّ، فَامُ، تَاع وِعُکَ کٛو مٛيٜ، اَمَّا يَحُ کٛلَّا حٛورٜ مَاطَ تٛ اَرْدِيطٛ دِينَ، ندٜنْ کٛکَّا شَکِّرِ نٛ مُوسَ وِعِ طُمْ وَطَ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞» اَمَّا اٛ دِلِّ اٜ مٛ وِعَکَ کٛو تٛيٜ، اٜ مٛ سَنْکِتَ حَبَرُ طُمْ؞ نٛنْ وَطِ يٜىٰسُ وَاوَايِ نَتُّکِ وٛنْدِ غَرِيرِ اٜ نجَيْرِ، اَمَّا اٛ جٛوطِي اٜ لَدّٜ؞ فُو اٜ نٛنْ، يِمْٻٜ طُطْٻٜ نغَطِ کَ وَرْکِ تٛ مَاکٛ دَغَ کٛو تٛيٜ؞ غَطَ بَلْطٜ سٜطَّ يٜىٰسُ سٛعِّي کَفَرْنَحُمْ؞ سٜيْ يِمْٻٜ نَنِ حَبَرُ اٜ مٛ وُرٛ؞ يِمْٻٜ طُطْٻٜ کَوْرِتِ کٜىٰوِ وُرٛ نغٛنْ حَا وَلَا نجَيْرِ ندٜرْ وُرٛ نغٛنْ اٜ يَاسِ دَمُّغَلْ مَاغٛ؞ اٜ مٛ وَعَجِنَنَٻٜ وٛلْدٜ اَللَّه؞ سٜيْ وٛٻّٜ نغَرٛيِ، ٻٜ نغَدَّنِمٛ غٛطّٛ جَرَاطٛ، يِمْٻٜ نَيٛ اٜ کٛشّٛيِمٛ؞ ندٜ ٻٜ مبَاوَايِ نَتِّنْکِمٛ تٛ يٜىٰسُ وٛنِ نغَمْ يِمْٻٜ طُوطِي، سٜيْ ٻٜ پٜنْتِنِمٛ دٛوْ سُودُ ندُنْ، ٻٜ نجُلِندُ، ٻٜ نغَطِمٛ ندٜرْ يُلْندٜ ندٜنْ دٛوْ دَاغٛ مَاکٛ، ٻٜ نجِڤِّنِمٛ يٜىٰسٛ يٜىٰسُ؞ ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، «حِغٛ، اَ يَافَنَامَ حَکّٜىٰجِ مَاطَ؞» وٛٻّٜ مٛودِٻّٜ اَتَّوْرَ اٜ نجٛوطِي طٛنْ اٜ ٻٜ ݧُمَ ندٜرْ ٻٜرْطٜ مَٻّٜ، اٜ ٻٜ مبِعَ، «نغَمْ طُمٜ نٜطّٛ اٛعٛ مٜتِرْتَ نِحِ؟ اٜ مٛ فٛتِّدِنَ حٛورٜ مَاکٛ اٜ اَللَّه! مٛيٜ وَاوَتَ يَافَاکِ حَکّٜ تٛ نَاع اَللَّه تَنْ؟» طٛنْ اٜ طٛنْ يٜىٰسُ فَامِ ندٜرْ ٻٜرْندٜ مُوطُمْ اٜ ٻٜ ݧُمَ دٛوْ فِي طُعُمْ ندٜرْ ٻٜرْطٜ مَٻّٜ، اٛ وِعِٻٜ، «نغَمْ طُمٜ ݧُمٛتٛنْ اِرِ ݧُمٛوجِ طِعِ ندٜرْ ٻٜرْطٜ مٛوطٛنْ؟ کٛ ٻُرِ حٛيْکِ، طُمْ وِعَ جَرَاطٛ اٛعٛ، ‹اَ يَافَنَامَ حَکّٜ مَاطَ،› کٛو طُمْ وِعَمٛ، ‹اُمَّ حٛشُّ دَاغٛ مَاطَ، يَاٻُ؟› اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞» نغَمْ نٛنْ اٛ وِعِ جَرَاطٛ اٛنْ، «اٜ مِ وِعُمَا، اُمَّ، کٛشَّا دَاغٛ مَاطَ، کٛوتَا وُرٛ؞» سٜيْ اٛ اُمِّي، اٛ حٛشِّ دَاغٛ مَاکٛ، اٛ وُرْتِي، اٛ دِلِّ يٜىٰسٛ کٛو مٛيٜ؞ فِي طُعُمْ حَيْطِنِ فُو يِمْٻٜ غٛنْٻٜ طٛنْ، ٻٜ مَنْتِ اَللَّه، ٻٜ مبِعِ، «مِنْ مٜىٰطَايِ يِيکِ اِرِ فِي طُعُمْ!» يٜىٰسُ فُطِّتِ وُرْتِي يَحِ حَادٜ مبٜىٰلَ غَلِيلِ؞ يِمْٻٜ طُطْٻٜ نغَرِ تٛ مَاکٛ اٛ اٜکِّتِٻٜ؞ اٜ مٛ پَٻّٛو، اٛ يِعِ لٜىٰوِ ٻِي حَلْفَ اٜ جٛوطِي تٛ طُمْ جَٻَتَ شٜىٰدٜ لٜيْدِ، سٜيْ يٜىٰسُ وِعِمٛ، «تٛکَّمْ؞» سٜيْ لٜىٰوِ اُمِّي تٛکِّمٛ؞ غَطَ طٛنْ يٜىٰسُ اٜ تٛکُّٻٜمٛ اٜ ٻٜ نجٛوطِي اٜ ٻٜ کِرْتٛو تٛ وُرٛ لٜىٰوِ؞ جَٻٛوٻٜ شٜىٰدٜ لٜيْدِ طُطْٻٜ اٜ غَطٛوٻٜ حَکّٜ اٜ ݧَمْدَ اٜ مَاکٛ اٜ تٛکُّٻٜمٛ، نغَمْ اٜ وٛودِ يِمْٻٜ طُطْٻٜ اِرِ مَٻّٜ اٜ تٛکِّمٛ؞ ندٜ مٛودِٻّٜ اَتَّوْرَ فَارِسَنْکٛعٜنْ نغِعِ اٜ مٛ ݧَمْدَ اٜ غَطٛوٻٜ حَکّٜ اٜ جَٻٛوٻٜ شٜىٰدٜ لٜيْدِ، ٻٜ مبِعِ تٛکُّٻٜمٛ، «نغَمْ طُمٜ اٛ ݧَمْدَتَ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟» ندٜ يٜىٰسُ نَنِ نٛنْ، اٛ وِعِٻٜ، «نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ؞» تٛو، تٛکُّٻٜ يَحَيَ غَطٛووٛ بَڤْتِسْمَ اٜ تٛکُّٻٜ فَارِسَنْکٛعٜنْ اٜ شُومٛو؞ سٜيْ وٛٻّٜ نغَرِ پَمِ يٜىٰسُ، ٻٜ مبِعِ، «نغَمْ طُمٜ تٛکُّٻٜ يَحَيَ اٜ تٛکُّٻٜ فَارِسَنْکٛعٜنْ اٜ شُومٛو، اَمَّا تٛکُّٻٜمَ شُومَتَاکٛ؟» يٜىٰسُ نٛوتِي، وِعِٻٜ، «اٜ يِيکِ مٛوطٛنْ حِغٛوٻٜ اَنْغٛوجٛ شُومٛتٛ اٜ شَرٜلْ نغٜلْ اَنْغٛوجٛ اٛنْ اٜ وٛنْدِ اٜ مَٻّٜ؟ تٛ نِ اٜ ٻٜ نغٛنْدِ اٜ اَنْغٛوجٛ اٛنْ، ٻٜ شُومَتَاکٛ؞ اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، ندٜنْ اٜ ݧَلْندٜ ندٜنْ ٻٜ شُومٛتٛو؞ «وَلَا ݧٛوتَيْطٛ لٜفٜلْ کٜسٜلْ تٛ لِمْشٜرٜ کِيندٜ؞ تٛ اٛ وَطِي نٛنْ، لٜفٜلْ کٜسٜلْ نغٜلْ سٜىٰکَيْ اٜ لِمْشٜرٜ کِيندٜ ندٜنْ؞ نٛنْ وَطَيْ ندٜ ٻُرَ نٛ ندٜنّٛ سٜىٰکُکِ؞ نٛنْ مَا وَلَا غَطَيْطٛ ندِيَمْ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ طَمْ ڤُسَ فَاندُ ندُنْ، ندٜنْ طُمْ دُلَّيْطَمْ، طُمْ دُلَّ فَاندُ ندُنْ؞ اَمَّا ندِيَمْ اِنَبٛجَمْ کٜسَمْ حَانِ وَطٜىٰ ندٜرْ فَاندُ حٜيْرُ؞» وٛنْدٜ ݧَلْندٜ سِوْتَارٜ يٜىٰسُ اٜ تٛکُّٻٜمٛ اٜ پَٻّٛو ندٜرْ غٜسٜ اَلْکَمَارِ، سٜيْ تٛکُّٻٜمٛ ڤُطِّ ٻٛرُکِ شَمّٜىٰجٜ مَيْرِ اٜ ٻٜ ݧَامَ؞ سٜيْ فَارِسَنْکٛعٜنْ مبِعِمٛ، «رَا کٛ تٛکُّٻٜمَ نغَطَتَ؞ کٛ وَطَتَ اٜ ٻٜ نغَطَ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؟» يٜىٰسُ وِعِٻٜ، «اٛنْ مٜىٰطَايِ جَنْغُکِ کٛ دَوْدَ وَطِ، کَنْکٛ اٜ غٛنْدُٻٜ اٜ مَاکٛ ندٜ ٻٜ نَنِ وٜىٰلٛ کَدِنْ اٜ ٻٜ ندٜرْ دُلّٜرٜ ݧَمْندُ؟ اٜ جَامَنُ طُمْ اَبِيَتَ وٛنِ مَوْطٛ مَوْٻٜ اَرْدِيٻٜ دِينَ، دَوْدَ نَتِّ لُکُرُ سٜنِيطُمْ ݧَامِ بُرٛودِ شٜنِيطُمْ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ، اَمَّا دَوْدَ ݧَامِطُمْ حَا مَا اٛ حٛکّٛرِ جَادٛوٻٜ اٜ مَاکٛ؞» سٜيْ يٜىٰسُ وِعِٻٜ، «ݧَلْندٜ سِوْتَارٜ وَطَا نغَمْ نٜطّٛ، نَاع نٜطّٛ وَطَا نغَمْ ݧَلْندٜ سِوْتَارٜ؞ نغَمْ نٛنْ ٻِي نٜطّٛ اٛ جٛومُ کٛو طُمٜ حَا اٜ ݧَلْندٜ سِوْتَارٜ؞» وٛنْدٜ ݧَلْندٜ يٜىٰسُ نَتِّ سُودُ دٛعَارٜ، اٜ وٛودِ غٛطّٛ مٛ جُنْغٛ جَرَانغٛ ندٜرْ مَيْرُ؞ سٜيْ وٛٻّٜ ندٜرْ سُودُ دٛعَارٜ ندُنْ شُتِيمٛ کٛو اٛ يَمْطِتِنَيْ نٜطّٛ اٛنْ ݧَلْندٜ سِوْتَارٜ نغَمْ ٻٜ کٜٻَ کٛ ٻٜ نغُلِّرٛيْتٛومٛ؞ سٜيْ يٜىٰسُ وِعِ مٛ جُنْغٛ جَرَانغٛ اٛنْ، «وٛرٛيْ طٛعٛ؞» ندٜنْ يٜىٰسُ پَمِٻٜ وِعِ، «کٛ اَتَّوْرَ وِعِ طُمْ وَطَ ݧَلْندٜ سِوْتَارٜ؟ طُمْ وَطَ کٛ وٛوطِ، کٛو طُمْ وَطَ کٛ وٛوطَا؟ طُمْ حِسْنَ يٛنْکِ، کٛو طُمْ وَطَ وَرْحٛورٜ؟» اَمَّا ٻٜ فُو ٻٜ ندٜعِّتِ؞ يٜىٰسُ رَارِٻٜ ٻٜرْندٜ مُوطُمْ اٜ مٜتِّ، اٛ وَنِّي نغَمْ ٻٜرْطٜ مَٻّٜ طٜ شَاتُطٜ؞ سٜيْ اٛ وِعِ مٛ جُنْغٛ جَرَانغٛ اٛنْ، «فٛرْتُ جُنْغٛ مَاطَ؞» اٛ فٛرْتِنغٛ، سٜيْ نغٛ يَمْطِتِ؞ سٜيْ فَارِسَنْکٛعٜنْ مبُرْتِي سُودُ دٛعَارٜ ندُنْ، ٻٜ ڤُطِّ مٜدُّکِ اٜ يِمْٻٜ حِرُدُسْ دٛوْ نٛ ٻٜ مبَرْدَتَ يٜىٰسُ؞ سٜيْ يٜىٰسُ دِلِّدِ اٜ تٛکُّٻٜمٛ يَاکِ حَادٜ مبٜىٰلَ غَلِيلِ؞ سٜيْ يِمْٻٜ طُطْٻٜ پِوٛيِٻٜ غَلِيلِ تٛکِّمٛ؞ ندٜ يِمْٻٜ طُطْٻٜ نَنِ حَبَرُ فُو کٛ اٛ وَطَتَ، ٻٜ نغَرِ تٛ مَاکٛ دَغَ يَحُودِيَ، اٜ اُرُشَلِيمَ، اٜ اِدُومِيَ، اٜ فٛنْغٛ شَانغٛلْ اُرْدُنْ، اٜ لٜيْدِ حَادٜ غَرِيجٜ تَايَ اٜ سِدٛنْ؞ اٛ وِعِ تٛکُّٻٜمٛ نغَدَّنَمٛ کٛمِوَلْ نغَمْ يِمْٻٜ طُطْٻٜ کَوْرِتِي تٛع ٻٜ ٻِطَّمٛ؞ اٛ وَطُ نٛنْ نغَمْ اٛ يَمْطِتِنِي يِمْٻٜ طُطْٻٜ حَا ݧَوْٻٜ طُطْٻٜ نغَطِ کَ فِيدُکِ نغَمْ ٻٜ مٜىٰمَمٛ؞ فُو شَرٜلْ نغٜلْ يِمْٻٜ غٛودُٻٜ غِنِّ نغِعِمٛ، سٜيْ ٻٜ نجَنَ يٜىٰسٛ مَاکٛ اٜ ٻٜ مبِعَ اٜ سٜمْبٜ، «اَنْ اَ ٻِطّٛ اَللَّه!» اَمَّا اٛ وَغِّنِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞ يٜىٰسُ پٜنْتِ حٛشّٜىٰرٜ نٛدِّ ٻٜ اٛ يِطِ؞ ٻٜ نجَحِ تٛ مَاکٛ؞ اٛ سُٻِ يِمْٻٜ سَڤّٛ اٜ طِطٛ نغَمْ ٻٜ نجٛوطٛدٛو اٜ مَاکٛ، ندٜنْ اٛ لِلَٻٜ ٻٜ نغَعَجِنٛيَ، اٛ نٛدِّٻٜ لِلَاٻٜ، اٛ حٛکِّٻٜ بَوْطٜ وُرْتِنْکِ غِنِّ؞ رَا اِنْطٜ يِمْٻٜ ٻٜ اٛ سُٻِ ٻٜنْ: سِيمَنْ مٛ اٛ حٛکِّ اِنْدٜ بِيتُرُسْ، اٜ يَاکُبُ ٻِي جَبَدِ، اٜ مِݧِرَاوٛ مُوطُمْ يَحَيَ، اٛ حٛکِّٻٜ اِنْدٜ بُوَرْنَجِسْ، وَاتٛ ٻِٻّٜ رِغَّانغٛ، اٜ اَنْدِرَاوُسْ، اٜ فِلِبُسْ، اٜ بَتِلٛومِ، اٜ مَاتِيُ، اٜ تٛومَ، اٜ يَاکُبُ ٻِي حَلْفَ، اٜ تَادِيُسْ، اٜ سِيمَنْ کَنَنِيَنْکٜىٰجٛ، اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞ ندٜنْ يٜىٰسُ نَتِّ وُرٛ تٛ جٛوطٛتٛو، سٜيْ يِمْٻٜ طُطْٻٜ فُطِّتِ کَوْرِتِ تٛ مَاکٛ حَا کَنْکٛ اٜ تٛکُّٻٜمٛ ٻٜ مبَاوَايِ ݧَامُکِ ݧَمْندُ؞ ندٜ بَنْدِرَاٻٜ مَاکٛ نَنِي نٛنْ، ٻٜ نجَحِ نغَمْ ٻٜ نَنْغٛيَمٛ، نغَمْ ٻٜ نَنِي يِمْٻٜ اٜ مبِعَ، «اٛ حَاݝَکٜ؞» مٛودِٻّٜ اَتَّوْرَ غَرٛيْٻٜ دَغَ اُرُشَلِيمَ مبِعِ، «بَعَلْجَبُلْ لَامِيطٛ غِنِّ نَنْغِمٛ، ندٜنْ اٜ بَوْطٜ مَاغٛلْ اٛ وُرْتِنِرْتَ غِنِّ؞» سٜيْ يٜىٰسُ نٛدِّٻٜ حٛکِّٻٜ مِسَالُ وِعِٻٜ، «نٛ وَطَتَ شٜيْطَنْ رِيوَ شٜيْطَنْ؟ تٛ لَامُ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو؞ نٛنْ مَا تٛ وُرٛ سٜنْدَکٜ اٜ وَݧْوَݧْتِرَ، نغٛنْ طٛنْ وُرٛ نغٛ وَاوَتَا نغٛ دَرٛو؞ تٛ لَامُ شٜيْطَنْ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو، رٜعِرْدٜ مَاجُمْ وَرِي وٛنْ طٛنْ؞ «وَلَا بَاوَيْطٛ نَتَّ وُرٛ شٜمْبِطّٛ تٜىٰتَنَمٛ کٛ اٛ وٛودِ، سٜيْ نِ اَرْتَ حَٻُّکِمٛ، ندٜنْ وَاوَ حٛشُّکِ کٛ اٛ وٛودِ ندٜرْ وُرٛ نغٛنْ؞ «اٜ مِ وِعَعٛنْ غٛونغَ، طُمْ وَاوَيْ يَافَنَاکِ يِمْٻٜ حَکّٜ اٜ کٛو اِرِ طِيٜ حَالَاجِ کَلُّطِ طِ ٻٜ مٜتِ؞ اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ حَا اَبَدَا؞ حَا اَبَدَا حَکّٜ طُمْ اٜ دٛوْ مَاکٛ؞» يٜىٰسُ وِعِي نٛنْ نغَمْ اٜ ٻٜ مبِعَ، «اٜ مٛ وٛودِ غِنّٛلْ؞» سٜيْ مَدُوجٛ يٜىٰسُ اٜ مِݧِرَاٻٜ مَاکٛ نغَرِ ندَرِي يَاسِ، ٻٜ لِلِ غٛطّٛ نٛدّٛيَ يٜىٰسُ؞ يِمْٻٜ طُطْٻٜ اٜ نجٛوطِي اٜ ٻٜ ڤِلِي يٜىٰسُ، ٻٜ مبِعِمٛ، «مَدُوجٛ مَاطَ اٜ مِݧِرَاٻٜ مَاطَ اٜ ٻٜ تٛنْ يَاسِ، اٜ ٻٜ طَٻُّتُمَا؞» يٜىٰسُ پَمِٻٜ وِعِ، «مٛيٜ وٛنِ مَدُوجٛ اَمْ، ندٜنْ ٻٜيٜ نغٛنِ مِݧِرَاٻٜ اَمْ؟» اٛ رَارِ جٛوطِيٻٜ اٜ ڤِلِيمٛ اٛ وِعِ، «رَا مَدُوجٛ اَمْ اٜ مِݧِرَاٻٜ اَمْ طٛعٛ! فُو غَطُطٛ کٛ اَللَّه يِطِ، کَنْکٛ وٛنِ مِݧِرَاوٛ اَمْ اٜ مَدُوجٛ اَمْ؞» طٛنْمَا يٜىٰسُ فُطِّ اٜکِّتِنْکِ حَادٜ مبٜىٰلَ غَلِيلِ؞ يِمْٻٜ طُطْٻٜ کَوْرِتِ تٛ مَاکٛ نَاکِ اٛ نَتِّ کٛمِوَلْ اٛ جٛوطِي ندٜرْ مَاغَلْ دٛوْ ندِيَمْ؞ کَوْرُتُٻٜ ٻٜنْ فُو اٜ ٻٜ حَادٜ مبٜىٰلَ نغَنْ دٛوْ نجَارٜىٰندِ؞ سٜيْ اٛ حُوتِرِ مِسَالُ اٛ اٜکِّتِٻٜ اٜکِّتِنٛلْ فٜىٰرٜ‑فٜىٰرٜ طُطْنغٛلْ؞ ندٜرْ اٜکِّتِنٛلْ مَاکٛ اٛ وِعِ، «کٜتِّندٜىٰ! غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، شٛلِّ نغَرِ شُڤِّدِندِ؞ وٛنْدِ بٛو يَنِ ندٜرْ کَاپٜ؛ طٛنْ ندِ حٜٻَايِ لٜيْدِ طُنْدِ؞ ندِ فُطِ جَوْطُمْ نغَمْ لٜيْدِ ندِنْ لُغَّا؞ اَمَّا ندٜ نَانغٜ وُرْتٛيِي فِيِندِ، سٜيْ ندِ يٛورِ نغَمْ ندِ وَلَا طَطِ؞ وٛنْدِ اَوْدِ بٛو يَنِ ندٜرْ غِعٜ، سٜيْ غِعٜ طٜنْ مَوْنِ ٻِطِّندِ حَا ندِ وَاوَايِ وَطُکِ شَمّٜىٰجٜ؞ اَمَّا وٛنْدِ اَوْدِ يَنِ دٛوْ لٜيْدِ مبٛنْدِ ندِ فُطِ ندِ مَوْنِ ندِ وَطِ شَمّٜىٰجٜ؞ وٛنْدِ وَطِ غَبّٜ 30، وٛنْدِ وَطِ غَبّٜ 60، وٛنْدِ حَا 100؞» ندٜ يٜىٰسُ حٜىٰݧِ حٛکُّکِ مِسَالُ طُعُمْ، سٜيْ اٛ وِعِ، «غٛودُطٛ نٛڤِّ نَنُکِ فُو نَنَ؞» ندٜ يٜىٰسُ اٜ جٛوطِي کَنُمْ تَنْ، تٛکُّٻٜمٛ سَڤّٛ اٜ طِطٛ اٜ وٛٻّٜ تٛکُّٻٜمٛ نجَحِ تٛ مَاکٛ ٻٜ پَمِمٛ اٛ حٛکَّٻٜ مَعَنَ طُمْ طٛنْ مِسَالُ؞ سٜيْ اٛ وِعِٻٜ، «اٛنٛنْ اٛنْ کٛکَّامَ فَامُکِ سِرُّ لَامُ اَللَّه، اَمَّا يِمْٻٜ ٻٜ نغَلَا ندٜرْ مٛوطٛنْ، کٛو طُمٜ سٜيْ اٜ مِسَالُ، نغَمْ، ‹اٜ ٻٜ ندَارَ، اَمَّا ٻٜ نغِعَتَا؞ اٜ ٻٜ نَنَ، اَمَّا ٻٜ ڤَامَتَا؞ نغَمْ تٛ نَاع نٛنْ طُمْ غَطٛتٛوطُمْ ٻٜ نَنَ، ٻٜ تُوبَ، طُمْ يَافَنٛوٻٜ؞› » سٜيْ يٜىٰسُ وِعِٻٜ، «اٛنْ ڤَامَايِ مِسَالُ طُعُمْ؟ تٛو، نٛ ڤَامِرْتٛنْ مِسَالُ کٛرِيطُمْ؟ کٛ دٜمٛووٛ اٛنْ سَاکِ وٛنِ وٛلْدٜ اَللَّه؞ وٛٻّٜ يِمْٻٜ اٜ نَنْدِ اٜ اَوْدِ نجَنُندِ دٛوْ طَتَلْ؞ شَرٜلْ نغٜلْ ٻٜ نَنِ وٛلْدٜ اَللَّه، طٛنْ اٜ طٛنْ شٜيْطَنْ وَرَ حٛشَّندٜ دَغَ ندٜرْ ٻٜرْطٜ مَٻّٜ؞ وٛٻّٜ بٛو اٜ نَنْدِ اٜ اَوْدِ نجَنُندِ حَکُّندٜ کَاپٜ؞ تٛ ٻٜ نَنِي وٛلْدٜ اَللَّه، طٛنْ اٜ طٛنْ ٻٜ نجَٻَندٜ ندٜرْ بٜلْطُمْ ٻٜرْندٜ؞ اَمَّا ندٜ ٻٜ نغَلَا طَطِ، ٻٜ مُݧَيْ شَرٜلْ سٜطَّ تَنْ؞ تٛ شَطٜىٰلٜ کٛو تٛرَّ وَرِي نغَمْ وٛلْدٜ ندٜنْ، طٛنْ اٜ طٛنْ ٻٜ نجٛوفَندٜ؞ وٛٻّٜ کَدِنْ اٜ نَنْدِ اٜ اَوْدِ شَاکَاندِ ندٜرْ غِعٜ؞ ٻٜ نَنِ وٛلْدٜ ندٜنْ، اَمَّا وَنُّکِ اٜ فِي دُونِيَارُ، اٜ يِدّٜ جَوْدِ، اٜ سُونٛ فٜىٰرٜ‑فٜىٰرٜ نَتِّ ٻٜرْطٜ مَٻّٜ ٻِطِّ وٛلْدٜ ندٜنْ کَطِندٜ وَلُّکِٻٜ ٻٜ نغَطَ کٛ اَللَّه يِطِ؞ وٛٻّٜ بٛو اٜ نَنْدِ اٜ اَوْدِ شَاکَاندِ دٛوْ لٜيْدِ مبٛنْدِ؞ ٻٜ نَنِ وٛلْدٜ اَللَّه، ٻٜ نجَٻِندٜ، ٻٜ کُوتِنِرِندٜ حَا ٻٜ کٜٻِ ٻٜيْدَارِ، وٛٻّٜ کٜٻِ ندٜ 30، وٛٻّٜ کٜٻِ ندٜ 60، وٛٻّٜ حَا ندٜ 100؞» اٛ وِعِٻٜ، «اٛنْ نغَدَّيْ فِتِلَارُ کِڤّٛنْ تُمُّدٜ دٛوْ مَيْرُ، کٛو ندٜسٛنْدُ لٜيْ لٜىٰسٛ؟ نَاع اٛنْ ندٜسَيْندُ دٛوْ دَنْکِ؟ فُو کٛ سُوطِي، طُمْ وُرْتِنَيْطُمْ اٜ نجَيْرِ، نٛنْ مَا فُو کٛ اٛمْبَا طُمْ اٛمْتٜتٜىٰطُمْ؞ غٛودُطٛ نٛڤِّ نَنُکِ فُو نَنَ؞» اٛ فُطِّتِ اٛ وِعِٻٜ، «ڤَامٜىٰ بٛطُّمْ اٜ کٛ نَنٛتٛنْ! اٜ ڤٛوندِرْغٜلْ نغٜلْ ڤٛوندِرْتٛنْ، اٜ مَاغٜلْ طُمْ فٛوندِرَنْتَعٛنْ حَا مَا طُمْ ٻٜيْدَنَعٛنْ؞ نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ؞ اَمَّا مٛ وَلَا فَامُ دٛوْ لَامُ اَللَّه، کٛو کٛ اٛ وٛودِ مَا طُمْ جَٻَيْطُمْ؞» يٜىٰسُ فُطِّتِ وِعِ، «لَامُ اَللَّه اٜ نَنْدِ اٜ نٜطّٛ شَاکٛووٛ اَوْدِ اٜ نغٜسَ؞ وَالَ فِنَ، کٛو اٜ مٛ طَانِي کٛو اٛ طَانَاکِ، اَوْدِ ندِنْ فُطَيْ مَوْنَ، اَمَّا اٛ اَنْدَا نٛ طُمْ وَطِرِ؞ لٜيْدِ اٜ وُرْتِنَ غَوْرِ اٜ حٛورٜ مَيْرِ؞ اَرَنْدٜ پٛمْبَلْ وُرْتٛتٛ، ندٜنْ سَمّٜىٰرٜ، ندٜنْ سَمّٜىٰرٜ ندٜنْ وُرْتِنَ نغَبّٛيْ؞ تٛ غَوْرِ ندِنْ ٻٜنْدِي، سٜيْ اٛ يَادَ اٜ لَوْجٜىٰرُ اٛ تَپَ، نغَمْ شَرٜلْ اِتُّکِندِ وَرِي؞» يٜىٰسُ کَدِنْ وِعِ، «کٛ نَنْدِنَيْمِ لَامُ اَللَّه؟ کٛو بٛو اٜ طُمٜ مِسَالُ نَنْدِنَيْمِطُمْ؟ اٜ طُمْ نَنْدِ اٜ غَبّٜلْ مَسْتَتْ، غَبّٜلْ ٻُرْنغٜلْ کٛو نغٜلٜ غَبّٜلْ اَاوٜتٜىٰنغٜلْ فَمْطُکِ؞ فُو اٜ نٛنْ تٛ نغٜلْ اَاوَامَ، اٜ نغٜلْ مَوْنَ نغٜلْ ٻُرَ کٛو نغٜلٜ لٜغّٜلْ مَوْنُکِ، نغٜلْ وَطَ لِشٜ مَوْطٜ حَا شٛلِّ کٛطَ ندٜرْ طٛوْدِ مَاغٜلْ؞» يٜىٰسُ حُوتِرِي اِرِ مِسَالُ طُعُمْ طُطُّمْ، اٛ وَعَجِنَنِٻٜ وٛلْدٜ اَللَّه حَا کٜىٰرٛلْ نٛ ٻٜ مبَاوِ فَامُکِ؞ فُو کٛ اٛ وِعَتَٻٜ اٜ مٛ حُوتِرَ مِسَالُ؞ اَمَّا تٛ اٜ مٛ وٛنْدِ اٜ تٛکُّٻٜمٛ کَمْٻٜ تَنْ، سٜيْ اٛ وِعَٻٜ مَعَنَ کٛ اٛ وِعِ؞ اٜ ندٜنْ طٛنْ ݧَلْندٜ اَلَاسَرَ يٜىٰسُ وِعِ تٛکُّٻٜمٛ، «اٜنْ کُولُ فٛنْغٛ مبٜىٰلَ؞» سٜيْ تٛکُّٻٜمٛ اَلِ يِمْٻٜ حَوْرُتُٻٜ، ٻٜ نَتِّ ندٜرْ کٛمِوَلْ نغَلْ اٛ وٛنِ ندٜرْ، ٻٜ ندِلِّدِ اٜ مَاکٛ؞ اٜ وٛودِ کٛمِيجٜ فٜىٰرٜ تٛکِّٻٜ؞ سٜيْ اِيٜىٰندٜ اٜ حٜنْدُ شٜمْبِنْدُ اُمّٛيِي، غٜىٰلٛوطِ ندِيَمْ ڤُطِّ ڤِيکِ کٛمِوَلْ نغَلْ، ندِيَمْ نَتِّ ندٜرْ مَاغَلْ حَا نَاکِ کٛمِوَلْ نغَلْ ٻَدِي حٜىٰوَ ندِيَمْ؞ يٜىٰسُ بٛو اٜ تٛنْ غَطَ کٛمِوَلْ نغَلْ اٜ طَانِي دٛوْ ٻَنْتِرْطُمْ حٛورٜ؞ سٜيْ تٛکُّٻٜمٛ ڤِنْدِنِمٛ مبِعِمٛ، «مٛودِبّٛ، اَ وَنَّايِ تٛ اٜنْ کَلْکِي؟» سٜيْ اٛ اُمِّي، اٛ حَٻَنِ حٜنْدُ ندُنْ، اٛ وِعِ غٜىٰلٛوطِ ندِيَمْ طِنْ، «ندٜعِّتٜىٰ! اَلٜىٰ!» سٜيْ حٜنْدُ ندُنْ اَلِ، کٛو طُمٜ دٜعِّتِ؞ اٛ وِعِ تٛکُّٻٜمٛ، «نغَمْ طُمٜ نغٛودُطٛنْ کُلٛلْ؟ حَا جٛونِ اٛنْ کٛولَاکِيَمْ؟» ٻٜ کُلْتٛرِ، ٻٜ پَمْپَمْتِرِ، ٻٜ مبِعِ، «طُمْ مٛيٜ اٛعٛ؟ حَا حٜنْدُ اٜ غٜىٰلٛوطِ ندِيَمْ اٜ نغَطَ کٛ اٛ وِعِ!» يٜىٰسُ اٜ تٛکُّٻٜمٛ کُولِ فٛنْغٛ مبٜىٰلَ ٻٜ نجٛتِّي لٜيْدِ غَارَسِنْکٛعٜنْ؞ ندٜ يٜىٰسُ وُرْتِي دَغَ ندٜرْ کٛمِوَلْ نغَلْ، سٜيْ غٛطّٛ غٛودُطٛ غِنّٛلْ پِوٛيِ تٛ غٜنَالٜ تَٻِّيمٛ؞ نٜطّٛ اٛنْ ندٜرْ غٜنَالٜ اٛ جٛوطٛتٛو، وَلَا بَاوَيْطٛ حَٻُّکِمٛ، کٛو اٜ ٻٛغِّ نجَمْندِ؞ ندٜ طُطُّمْ اٜ مٛ حَٻِّرٜىٰ ٻٛغِّ نجَمْندِ جُوطٜ اٜ کٛيْطٜ، اَمَّا اٛ تَپَطِ اٛ يٜوَ نجَمْندِ غَطَاندِ تٛ کٛيْطٜ مَاکٛ؞ وَلَا غٛودُطٛ سٜمْبٜ بَاوَيْطٛ جٛغَاکِمٛ؞ جٜمَّ اٜ ݧَلَوْمَ اٜ مٛ ندٜرْ غٜنَالٜ کٛو دٛوْ کٛشّٜىٰجٜ، اٜ مٛ وُلَّ سٜمْبٜىٰ، اٜ مٛ تَپِرَ ٻَنْدُ مَاکٛ اٜ کَاپٜ؞ ندٜ اٛ حَيْنِي يٜىٰسُ، اٛ دٛغِّ اٛ يَحِ تٛ مَاکٛ، اٛ دِشِّي يٜىٰسٛ مَاکٛ؞ اٛ وُلِّ سٜمْبٜىٰ اٛ وِعِ، «کٛ وَنُّمَا اٜ اَمْ، يٜىٰسُ ٻِطّٛ اَللَّه جٛومُ مَنْغُ؟ اٜ مِ تٛرٛمَا نغَمْ اَللَّه، تَاع تٛرَّمْ؞» اٛ وِعُ نٛنْ نغَمْ يٜىٰسُ وِعِي، «اَنْ غِنّٛلْ، وُرْتَ ندٜرْ نٜطّٛ اٛعٛ!» سٜيْ يٜىٰسُ پَمِنغٛلْ وِعِ، «نٛ اِنْدٜ مَاطَ؟» نغٛلْ نٛوتِي نغٛلْ وِعِ، «طُطِّ، نغَمْ اٜ مِنْ طُوطِ؞» سٜيْ نغٛلْ وَطِ کَ تٛرَاکِ يٜىٰسُ تٛع اٛ رِيوَطِ دَغَ لٜيْدِ ندِنْ؞ حَادٜ طٛنْ اٜ وٛودِ اٛرْندٜ اَلَدٜىٰجِ طُطِّ اٜ دُرَ تٛ رٜغٛرْدٜ حٛشّٜىٰرٜ؞ سٜيْ غِنِّ طِنْ تٛرِي يٜىٰسُ طِ مبِعِ، «اَلُمِنْ مِنْ نَتّٛيَ اَلَدٜىٰجِ طِنْ نِ؞» يٜىٰسُ جَٻِ، سٜيْ طِ مبُرْتِي طِ نَتّٛيِ اَلَدٜىٰجِ طِنْ؞ اَلَدٜىٰجِ طِنْ بٛو کٜوْتِي 2,000؞ اٛرْندٜ ندٜنْ فُو ݧَارِ جِڤّٛيِي دَغَ دٛوْ پٛلْدٜ ندٜنْ يَنِ ندٜرْ مبٜىٰلَ، ندِيَمْ ݧَامِطِ؞ وٛيْنَاٻٜ اَلَدٜىٰجِ طِنْ ندٛغِّ مبِعٛيِکَ يِمْٻٜ ندٜرْ غَرِيرِ اٜ يِمْٻٜ نغَرِحٛيْ؞ يِمْٻٜ ٻٜنْ نجَحِ نغِعَ کٛ وَطِ؞ ندٜ ٻٜ نغَرِ تٛ يٜىٰسُ وٛنِ، ٻٜ نغِعِ غٛودُنٛوطٛ غِنِّ طُطِّ اٛنْ، اٜ مٛ جٛوطِي طٛنْ، اٜ ٻٛرْنِي، اٜ مٛ ندٜرْ حَکِّيلٛ مَاکٛ؞ کٛو مٛيٜ مَٻّٜ حُلِ؞ غِعُٻٜ کٛ وَطِ ٻٜ مبِعِ يِمْٻٜ ٻٜنْ کٛ حٜٻِ غٛودُنٛوطٛ غِنِّ اٛنْ اٜ اَلَدٜىٰجِ طِنْ؞ سٜيْ يِمْٻٜ ٻٜنْ ڤُطِّ تٛرَاکِ يٜىٰسُ اَلَنَٻٜ لٜيْدِ مَٻّٜ؞ يٜىٰسُ اٜ نَتَّ کٛمِوَلْ، سٜيْ غٛودُنٛوطٛ غِنِّ اٛنْ تٛرِي دِلِّدَ اٜ يٜىٰسُ؞ اَمَّا يٜىٰسُ جَٻَايِ اٛ دِلِّدَ اٜ مُوطُمْ، وِعِمٛ، «حٛوتُ تٛ بَنْدِرَاٻٜ مَاطَ مبِعَٻٜ فِي مَوْطُمْ طُمْ جٛومِرَاوٛ وَطَنْمَا اٜ نٛ اٛ يُرْمِنِرَنْمَا؞» سٜيْ نٜطّٛ اٛنْ دِلِّ لٜيْدِ دِکَڤٛلِسْ، اٛ فُطِّ حٛکُّکِ حَبَرُ فِي مَوْطُمْ طُمْ يٜىٰسُ وَطَنِمٛ؞ فُو يِمْٻٜ ٻٜنْ کَيْطِنِ؞ ندٜ يٜىٰسُ فُطِّتِ حُولِ فٛنْغٛ مبٜىٰلَ ندٜرْ کٛمِوَلْ، يِمْٻٜ طُطْٻٜ کَوْرِتِ تٛ مَاکٛ، کَنْکٛ بٛو اٜ مٛ حَادٜ مبٜىٰلَ نغَنْ؞ سٜيْ غٛعٛتٛ ندٜرْ اَرْدِيٻٜ سُودُ دٛعَارٜ بِعٜتٜىٰطٛ جَايِرُسْ وَرِ؞ ندٜ اٛ يِعِ يٜىٰسُ، اٛ دِشِّي يٜىٰسٛ مَاکٛ، اٛ وَطِ کَ تٛرَاکِ يٜىٰسُ، اٜ مٛ وِعَ، «ٻِطّٛ اَمْ سُرْبَاجٛ ڤَمَرٛ ٻَدَکٜ مَيْدٜ، اٜ مِ تٛرٛمَا نغَرَا مٜىٰمَامٛ نغَمْ اٛ يَمْطِتَ تٛع اٛ مَايَ؞» سٜيْ يٜىٰسُ يَادِ اٜ مَاکٛ؞ يِمْٻٜ طُطْٻٜ تٛکِّمٛ، اٜ ٻٜ ٻِطَّمٛ؞ اٜ وٛودِ غٛطّٛ دٜبّٛ طٛنْ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ؞ دٜبّٛ اٛنْ تٛرَّکٜ نَاع سٜطَّ تٛ جُوطٜ ݧَوْندٛوٻٜ طُطْٻٜ، اٛ مَجِّنِي فُو جَوْدِ مَاکٛ؞ اٛ يَمْطِتَايِ، اَمَّا ݧَوُ طُمْ ٻٜيْدِي؞ ندٜنْ مَا اٛ نَنِي حَبَرُ يٜىٰسُ، سٜيْ اٛ پِوٛيِ غَطَ يٜىٰسُ ندٜرْ يِمْٻٜ، اٛ مٜىٰمِ تٛغّٛورٜ مَاکٛ؞ نغَمْ اٛ وِعِي ندٜرْ ٻٜرْندٜ مَاکٛ، «کٛو تٛغّٛورٜ مَاکٛ مٜىٰمُمِ تَنْ، مِ يَمْطِتَيْ؞» طٛنْ اٜ طٛنْ پِيپَمْ طَمْ دَرِي، اٛ نَنِ ندٜرْ ٻَنْدُ مَاکٛ طُمْ يَمْطِتِنِيمٛ دَغَ ݧَوُ مَاکٛ؞ طٛنْ اٜ طٛنْ يٜىٰسُ فَامِ بَوْطٜ مبُرْتَکٜ دَغَ ندٜرْ مُوطُمْ؞ اٛ وَيْلِتِي ندٜرْ يِمْٻٜ، اٛ وِعِ، «مٛيٜ مٜىٰمِ تٛغّٛورٜ اَمْ؟» سٜيْ تٛکُّٻٜمٛ مبِعِمٛ، «اَ يِعَ يِمْٻٜ طُطْٻٜ اٜ ٻِطُّمَا، اَمَّا اَ پَمَ مٛيٜ مٜىٰمُمَا؟» اَمَّا يٜىٰسُ وَطِ کَ رَارُکِ ندٜرْ يِمْٻٜ ٻٜنْ نغَمْ يِعَ مٛيٜ مٜىٰمِمٛ؞ دٜبّٛ اٛنْ بٛو ندٜ اٜ مٛ اَنْدِ کٛ حٜٻِ ٻَنْدُ مَاکٛ، اٛ وَرِ ندٜرْ کُلٛلْ اٜ مٛ دِوْنَ، اٛ دِشِّي يٜىٰسٛ يٜىٰسُ، اٛ وِعِمٛ غٛونغَ دٛوْ کٛو طُمٜ کٛ وَطِ؞ سٜيْ يٜىٰسُ وِعِمٛ، «بَنْدِرَاوٛ، حٛولَارٜ مَاطَ يَمْطِتِنِيمَ؞ نجِڤّٛطَا جَمْ، اَ حٛيِي دَغَ ݧَوُ مَاطَ؞» يٜىٰسُ اٜ مٜتَ، سٜيْ وٛٻّٜ دَغَ وُرٛ جَايِرُسْ اَرْدِيطٛ سُودُ دٛعَارٜ اٛنْ نغَرِ، ٻٜ مبِعِمٛ، «ٻِطّٛ مَاطَ مَايِي؞ نغَمْ طُمٜ نغَنَّتَا مٛودِبّٛ کَدِنْ؟» اَمَّا يٜىٰسُ وَنَّايِ اٜ کٛ ٻٜ مبِعِ، اٛ وِعِ اَرْدِيطٛ سُودُ دٛعَارٜ اٛنْ، «تَاع حُلُ، حٛولَيَمْ تَنْ؞» اٛ اَلَايِ کٛو مٛيٜ يَادِ اٜ مَاکٛ سٜيْ بِيتُرُسْ، اٜ يَاکُبُ، اٜ يَحَيَ مِݧِرَاوٛ يَاکُبُ؞ ندٜ ٻٜ نجٛتِّي وُرٛ جَايِرُسْ، يٜىٰسُ يِعِ يِمْٻٜ ندٜرْ وَنَّارٜ، وٛٻّٜ اٜ مبٛيَ، وٛٻّٜ اٜ نغُلَّ اٜ سٜمْبٜ؞ اٛ نَتِّ، اٛ وِعِ، «نغَمْ طُمٜ نَتُّطٛنْ وَنَّارٜ ندٜعٜ اٛنْ مبٛيَ؟ سُرْبَاجٛ اٛنْ اٛ مَايَايِ، اَمَّا اٛ طَانِ تَنْ؞» سٜيْ ٻٜ نجَلِمٛ؞ اٛ وُرْتِنِٻٜ ٻٜ فُو يَاسِ، اٛ حٛشِّ ݧَاکٛ سُرْبَاجٛ اٛنْ اٜ مَدُوجٛ مَاکٛ اٜ تٛکُّٻٜمٛ ٻٜ اٛ وٛنْدِ، ٻٜ نَتِّ تٛ سُرْبَاجٛ اٛنْ وٛنِ؞ يٜىٰسُ جٛغِي جُنْغٛ سُرْبَاجٛ اٛنْ وِعِ، «تَلِيتَ، کُمِ،» وَاتٛ، «سُرْبَاجٛ، اُمَّ!» طٛنْ اٜ طٛنْ سُرْبَاجٛ اٛنْ اُمِّي فُطِّ يَادُ؞ اٜ مٛ وٛودِ دُوٻِ سَڤّٛ اٜ طِطِ؞ فِي طُمْ حَيْطِنِٻٜ نَاع سٜطَّ؞ يٜىٰسُ وَغِّنِٻٜ وِعِ تٛع ٻٜ نجَٻَ ٻٜ مبِعَکَ کٛو مٛيٜ؞ ندٜنْ اٛ وِعِٻٜ، «کٛکّٜىٰمٛ غٛطُّمْ اٛ ݧَامَ؞» سٜيْ يٜىٰسُ اَلِ وِغٜىٰرٜ ندٜنْ سٛعِّي غَرِيرِ تٛ مَوْنِ، تٛکُّٻٜمٛ نجَادِ اٜ مَاکٛ؞ ندٜ ݧَلْندٜ سِوْتَارٜ وَرِ، اٛ فُطِّ اٜکِّتِنْکِ ندٜرْ سُودُ دٛعَارٜ؞ يِمْٻٜ طُطْٻٜ نَنْٻٜ کٛ اٛ وِعِ، ٻٜ کَيْطِنِ اٜ اٜکِّتِنٛلْ مَاکٛ؞ اٜ ٻٜ مبِعَ، «تٛيٜ نٜطّٛ اٛعٛ حٜٻِ فُو فِي طُعُمْ؟ تٛيٜ اٛ حٜٻِ اِرِ فَامُ طُعُمْ؟ تٛيٜ اٛ حٜٻِ بَوْطٜ وَطُکِ اِرِ کُوطٜ کَيْطِنِيطٜ طٜعٜ؟ نَاع کَنْکٛ وٛنِ اٛنْ طٛنْ شٜحٛووٛ، ٻِطّٛ مَرْيَامَ، مَوْنِرَاوٛ يَاکُبُ، اٜ يُسُفُ، اٜ يَحُودَ، اٜ سِيمَنْ؟ ندٜنْ مِݧِرَاٻٜ مَاکٛ رٜوْٻٜ نَاع اٜنْ نغٛنْدِ اٜ مَٻّٜ طٛعٛ؟» سٜيْ ٻٜ نجَوَنِمٛ؞ يٜىٰسُ وِعِٻٜ، «کٛو تٛيٜ يِمْٻٜ اٜ کٛکَّ اَنَّبِيجٛ مَنْغُ، اَمَّا يِمْٻٜ غَرِيرِ مَاکٛ، اٜ بَنْدِرَاٻٜ مَاکٛ، اٜ يِمْٻٜ وُرٛ مَاکٛ، ٻٜ کٛکَّتَامٛ مَنْغُ؞» يٜىٰسُ وَاوَايِ وَطُکِ غٛطُّمْ کَيْطِنِيطُمْ تٛنْ، سٜيْ نِ يِمْٻٜ سٜطَّ ٻٜ نجَمْطَا اٛ يٛوِ جُوطٜ مَاکٛ دٛوْ مَٻّٜ اٛ يَمْطِتِنِٻٜ؞ اٛ حَيْطِنِ نغَمْ ٻٜ کٛولَاکِمٛ؞ يٜىٰسُ اٜ يِيلٛو اٜ اٜکِّتِنَ ندٜرْ نغَرِحٛيْ؞ اٛ نٛدِّ تٛکُّٻٜمٛ سَڤّٛ اٜ طِطٛ، اٛ لِلِٻٜ طِطٛ‑طِطٛ، اٛ حٛکِّٻٜ لَامُ دٛوْ غِنِّ؞ اٛ وِعِٻٜ تٛع ٻٜ کٛشَّ غٛطُّمْ نغَمْ يَادُ، کٛو ݧَمْندُ، کٛو جَکَارٜ، کٛو شٜىٰدٜ اٜ جِيبَ؞ سَوْرُ تَنْ ٻٜ نجٛغٛتٛو؞ ٻٜ نغَتَّ ڤَطٜ، اَمَّا تٛع ٻٜ ٻٛرْنٛو تٛغّٛوجٜ طِطِ؞ اٛ بٛو وِعِٻٜ، «فُو وُرٛ نغٛ نجِڤِّيطٛنْ، نجٛوطٜىٰ ندٜرْ مَاغٛ نَا اٛنْ اَلِي غَرِيرِ ندِنْ؞ تٛ طُمْ جَٻَّاکِعٛنْ اٜ وِغٜىٰرٜ، کٛو طُمْ وَݧِي حٜتِّندَنَاکِعٛنْ، ڤِطّٜىٰ سٛلَّارٜ کٛيْطٜ مٛوطٛنْ شَرٜلْ کٛ اَلٛتٛنْ وِغٜىٰرٜ ندٜنْ؞ کَنْجُمْ حٛلَّتَ ٻٜ نغَطِي حَکّٜ؞» سٜيْ ٻٜ ندِلِّ اٜ ٻٜ نغَعَجِنَ وِعُکِ يِمْٻٜ تُوبَ؞ ٻٜ مبُرْتِنَنِ يِمْٻٜ طُطْٻٜ غِنِّ، طُطْٻٜ ٻٜ نجَمْطَا بٛو ٻٜ مٛيْتَنِٻٜ نٜبَّمْ ٻٜ نجَمْطِتِنِٻٜ؞ حِرُدُسْ لَامِيطٛ نَنِ حَبَرُ فِي طُعُمْ، نغَمْ اِنْدٜ يٜىٰسُ اَنْدَامَ کٛو تٛيٜ؞ وٛٻّٜ اٜ مبِعَ يَحَيَ غَطٛووٛ بَڤْتِسْمَ اُمِّنَا دَغَ مَيْدٜ، کَنْجُمْ وَطِ اٜ مٛ وٛودِ بَوْطٜ وَطُکِ کُوطٜ کَيْطِنِيطٜ؞ وٛٻّٜ بٛو مبِعِ، «طُمْ اَنَّبِ اِلِيَ؞» ندٜنْ وٛٻّٜ مبِعِ، «اٛ اَنَّبِيجٛ بٛ اَنَّبٛعٜنْ ندٜنّٛ؞» اَمَّا ندٜ حِرُدُسْ نَنِ نٛنْ، اٛ وِعِ، «يَحَيَ مٛ اِتَّنْمِ حٛورٜ، کَنْکٛ اُمِّنَا دَغَ مَيْدٜ!» نغَمْ ندٜنّٛ حِرُدُسْ اٜ حٛورٜ مُوطُمْ وَطِي طُمْ نَنْغِي يَحَيَ، طُمْ حَٻِّمٛ، طُمْ سُرِمٛ ندٜرْ سُودُ شُرَلْ؞ اٛ وَطُ نٛنْ نغَمْ حِرُودِيَ دٜبّٛ مَوْنِرَاوٛ مَاکٛ فِلِبُسْ مٛ اٛ تٜعِ؞ نغَمْ يَحَيَ وَطِي کَ وِيکِ حِرُدُسْ، «طُمْ حَانَايِ تٜعَا دٜبّٛ مَوْنِرَاوٛ مَاطَ؞» حِرُودِيَ بٛو ندٜرْ ٻٜرْندٜ مَاکٛ اٜ مٛ جٛغِتِي يَحَيَ اٜ مٛ يِطِ وَرْکِمٛ؞ اَمَّا اٛ وَاوَايِ وَرْکِمٛ، نغَمْ حِرُدُسْ اٜ حُلَ يَحَيَ اٜ سُرَنَمٛ، ندٜ اٜ مٛ اَنْدِ کَنْکٛ اٛ اَادِلِيجٛ اٛ شٜنِيطٛ؞ فُو شَرٜلْ نغٜلْ حِرُدُسْ نَنِ حَالَ يَحَيَ، اٜ مٛ نَتَّ وَنَّارٜ؞ اَمَّا فُو اٜ نٛنْ اٜ مٛ يِطِ حٜتِّندَنَاکِمٛ؞ اَمَّا حِرُودِيَ حٜٻِ لَاوٛلْ نٛ وَرِرْتَ يَحَيَ؞ ݧَلْندٜ حُمْتٛ سِفْتٛرْکِ دَݧْنغٛلْ حِرُدُسْ، حِرُدُسْ سِرْيِي حُمْتٛ نغَمْ کُوٛوٻٜ مَوْٻٜ ندٜرْ لَامُ مَاکٛ، اٜ مَوْٻٜ اَرْدِيٻٜ سٛوجِعٜنْ، اٜ مَوْٻٜ لٜيْدِ غَلِيلِ؞ ندٜ ٻِطّٛ حِرُودِيَ سُرْبَاجٛ نَتِّ وَمِ، اٛ وٜلْنَنِ حِرُدُسْ ٻٜرْندٜ اٜ حٛٻّٜ مَاکٛ؞ سٜيْ حِرُدُسْ وِعِمٛ، «تٛرَيَمْ فُو کٛ نغِطَّا، مِ حٛکّٜتٜطُمْ؞» حِرُدُسْ حُنَنِيمٛ وِعِ، «فُو کٛ تٛرِطَايَمْ مِ حٛکّٜتٜطُمْ حَا کٛ حٜوْتَتَ سٜنْدٜرٜ لَامُ اَمْ؞» سٜيْ سُرْبَاجٛ اٛنْ وُرْتِي وِعِ مَدُوجٛ مُوطُمْ، «کٛ حَانِ مِ تٛرٛو؟» مَدُوجٛ اٛنْ وِعِمٛ، «تٛرَمٛ حٛورٜ يَحَيَ غَطٛووٛ بَڤْتِسْمَ؞» طٛنْ اٜ طٛنْ سُرْبَاجٛ اٛنْ ندٜرْ يَوْطَارٜ اٛ سٛعِّي تٛ لَامِيطٛ اٛنْ اٛ وِعِمٛ، «اٜ مِ يِطِ جٛونِ‑جٛونِ کٛکَّايَمْ حٛورٜ يَحَيَ غَطٛووٛ بَڤْتِسْمَ ندٜرْ لٜعَلْ؞» حِرُدُسْ لَامِيطٛ وَنِّي نَاع سٜطَّ، اَمَّا ندٜ اٛ يَادَکٜ اٛ حُنَنَکٜمٛ يٜىٰسٛ حٛٻّٜ، اٛ يِطَا اٛ حَطَمٛ؞ طٛنْ اٜ طٛنْ اٛ وَطِ سٛوجِيجٛ اٛ يَحَ اٛ وَدّٛيَ حٛورٜ يَحَيَ؞ سٛوجِيجٛ اٛنْ يَحِ اِتَّنِ يَحَيَ حٛورٜ ندٜرْ سُودُ شُرَلْ، اٛ وَدّٛيِ حٛورٜ ندٜنْ ندٜرْ لٜعَلْ، اٛ حٛکِّندٜ سُرْبَاجٛ اٛنْ؞ سُرْبَاجٛ اٛنْ بٛو حٛکِّندٜ مَدُوجٛ مُوطُمْ؞ ندٜ تٛکُّٻٜ يَحَيَ نَنِ نٛنْ ٻٜ نغَرِ ٻٜ کٛشِّ ٻَنْدُ مَاکٛ ٻٜ ڤُکِّنٛيِندُ ندٜرْ يٜنَاندٜ غَسَاندٜ ندٜرْ حَيْرٜ؞ لِلَاٻٜ ٻٜ يٜىٰسُ لِلُنٛو نغَرْتٛيِي تٛ مَاکٛ، ٻٜ مبِعِمٛ کٛو طُمٜ کٛ ٻٜ نغَطِ اٜ کٛ ٻٜ اٜکِّتِنِ؞ اٛ وِعِٻٜ، «نغَرٜىٰ، نجَحٜنْ تٛ وِغٜىٰرٜ غٜوْتُندٜ کٜٻٛنْ شِوْتٛوطٛنْ سٜطَّ؞» اٛ وِعِي نٛنْ نغَمْ يِمْٻٜ طُطْٻٜ اٜ نغَرَ اٜ شٛعّٛو حَا حٜوْتِ ٻٜ کٜٻَايِ کٛو شَرٜلْ ٻٜ ݧَامِ ݧَمْندُ؞ سٜيْ ٻٜ نَتِّ کٛمِوَلْ ٻٜ ندِلِّ تٛ وِغٜىٰرٜ ندٜرْ لَدّٜ کَمْٻٜ تَنْ؞ اَمَّا شَرٜلْ نغٜلْ ٻٜ ندِلَّتَ يِمْٻٜ طُطْٻٜ نغِعِٻٜ اَندِتِٻٜ؞ يِمْٻٜ ٻٜنْ مبُرْتٛيِي دَغَ غَرِيجٜ طُطّٜ ٻٜ ندٛغِّ اٜ کٛيْطٜ ٻٜ اَرْتِٻٜ يَاکِ تٛنْ؞ اٜ جِڤَّاکِ يٜىٰسُ دَغَ ندٜرْ کٛمِوَلْ نغَلْ اٛ يِعِ يِمْٻٜ طُطْٻٜ اٜ کَوْرِتِ، سٜيْ اٛ نَنِ جُرُمْطُمْ مَٻّٜ، نغَمْ اٜ ٻٜ طٛنْ بٛ بَالِ طِ نغَلَا غَيْنَاکٛ؞ سٜيْ اٛ فُطِّ اٜکِّتِنْکِٻٜ فِي طُطُّمْ؞ ندٜ اَلَاسَرَ وَطِ، سٜيْ تٛکُّٻٜمٛ نغَرِ تٛ مَاکٛ مبِعِمٛ، «طٛعٛ طُمْ لَدّٜ، طٛنْمَا نَانغٜ حِيرِي؞ وِعُ يِمْٻٜ ٻٜعٜ ندِلَّ نغَمْ ٻٜ نجَحَ غُرٜ غٛنْطٜ حَادٜ اٜ نغَرِحٛيْ نغٛنْکٛيْ حَادٜ ٻٜ شٛودَنَ کٛعٜ مَٻّٜ کٛ ٻٜ ݧَامَتَ؞» اَمَّا يٜىٰسُ وِعِٻٜ، «اٛنٛنْ کٛکّٜىٰٻٜ کٛ ٻٜ ݧَامَتَ؞» سٜيْ ٻٜ مبِعِمٛ، «اَ يِطِ مِنْ نجَحَ مِنْ شٛودٛنٛيَٻٜ ݧَمْندُ کٜوْتُندُ شٜىٰدٜ طٜ کُوٛووٛ يٛٻٜتٜىٰ بَلْطٜ 200 مِنْ کٛکَّٻٜ ٻٜ ݧَامَ؟» اٛ وِعِٻٜ، «بُرٛودِ نٛيٜ نغٛودُطٛنْ؟ نجَحٜىٰ ندَارٛنْ؞» ندٜ ٻٜ ندَارِ، ٻٜ مبِعِ، «بُرٛودِ جٛوِ اٜ لِپِّ طِطِ؞» سٜيْ يٜىٰسُ وِعِٻٜ ٻٜ مبِعَ يِمْٻٜ نجٛوطٛو مٛٻْطٜ‑مٛٻْطٜ دٛوْ حُطٛ حٜشّٛ؞ سٜيْ ٻٜ نجٛوطِي مٛٻْطٜ 100‑100، وٛٻّٜ نجٛوطِي مٛٻْطٜ 50‑50؞ اٛ حٛشِّ بُرٛودِ جٛوِ طُمْ اٜ لِپِّ طِطِ طِنْ، اٛ رَارِ دٛوْ، اٛ يٜتِّ اَللَّه، اٛ سٜنْدِ بُرٛودِ طُمْ اٛ حٛکِّ تٛکُّٻٜمٛ نغٜىٰدَنَ يِمْٻٜ فُو؞ نٛنْ اٛ وَادِ اٜ لِپِّ طِطِ طِنْ مَا؞ ٻٜ فُو ٻٜ ݧَامِ ٻٜ کَارِ؞ تٛکُّٻٜمٛ مٛٻْتِ بُرٛودِ کٛرِيطُمْ اٜ لِپِّ کٛرِيطِ کٛ وَطِ کٛنْدٛوجٜ سَڤّٛ اٜ طِطِ؞ ݧَامُٻٜ بُرٛودِ طُمْ وٛرْٻٜ تَنْ ٻَدَکٜ 5,000؞ طٛنْ اٜ طٛنْ يٜىٰسُ وَطِ تٛکُّٻٜمٛ نَتَّ کٛمِوَلْ ٻٜ اَرْتَمٛ حُولُکِ يَاکِ بٜتَسَيْدَ، کَنْکٛ بٛو اٛ جَٻِّتٛتٛ کَوْرُتُٻٜ؞ غَطَ اٛ جَٻِّتَکٜٻٜ اٛ پٜنْتِ وٛنْدٜ حٛشّٜىٰرٜ نغَمْ اٛ وَطَ دٛعَارٜ؞ ندٜ فُتُرٛ وَطِ، کٛمِوَلْ نغَلْ اٜ شَکَ مبٜىٰلَ، يٜىٰسُ بٛو اٜ دٛوْ حٛشّٜىٰرٜ کَنُمْ تَنْ؞ اٛ يِعِ تٛکُّٻٜمٛ اٜ ڤِيدَ اٜ کٛمِوَلْ، نغَمْ حٜنْدُ اٜ حَطَٻٜ يَادُ؞ فَجِرِ اٜ مٛ يَحَ تٛ مَٻّٜ، اٜ مٛ يَحَ دٛوْ ندِيَمْ مبٜىٰلَ نغَنْ؞ اٜ مٛ يِطِ اٛ پَٻّٛوٻٜ، اَمَّا ندٜ ٻٜ نغِعِمٛ اٜ مٛ يَحَ دٛوْ ندِيَمْ، ٻٜ کَمِّ طُمْ غِنّٛلْ، سٜيْ ٻٜ نغُلِّ، نغَمْ ٻٜ فُو ٻٜ نغِعِيمٛ ٻٜ کُلْتٛرِي؞ اَمَّا طٛنْ اٜ طٛنْ اٛ مٜتَنِٻٜ، اٛ وِعِ، «ڤُکِّنٜىٰ ٻٜرْطٜ مٛوطٛنْ، طُمْ مِنْ؞ تٛع اٛنْ کُلُ؞» ندٜنْ اٛ نَتِّ کٛمِوَلْ نغَلْ تٛ مَٻّٜ، سٜيْ حٜنْدُ ندُنْ دَرِي؞ ٻٜ کَيْطِنِ نَاع سٜطَّ، نغَمْ ٻٜ ڤَامَايِ مَعَنَ ݧَمْنُکِ يِمْٻٜ 5,000 کِ اٛ وَطِ، نغَمْ ٻٜرْطٜ مَٻّٜ ڤَامَايِ مَعَنَ مَاجُمْ؞ ندٜ ٻٜ کُولِ فٛنْغٛ مبٜىٰلَ نغَنْ، ٻٜ نجٛتِّي لٜيْدِ جَنِسَرَتْ ٻٜ کَٻِّ کٛمِوَلْ نغَلْ؞ ندٜ ٻٜ مبُرْتِي ندٜرْ مَاغَلْ، طٛنْ اٜ طٛنْ يِمْٻٜ اَنْدِتِ يٜىٰسُ؞ يِمْٻٜ ٻٜنْ ندٛغِّ ٻٜ نجَحِ کٛو تٛيٜ ندٜرْ لٜيْدِ ندِنْ، اٜ ٻٜ نغَدّٛيَ ݧَوْٻٜ دٛوْ مبٜعِّتَارِ تٛ يٜىٰسُ کٛو تٛيٜ تٛ ٻٜ نَنِ اٛ وٛنِ؞ کٛو تٛيٜ تٛ اٛ يَحِ، کٛو ندٜرْ نغَرِحٛيْ، کٛو ندٜرْ غَرِيجٜ مَوْطٜ، کٛو ندٜرْ غُرٜ لَدّٜ، يِمْٻٜ اٜ ڤُکِّنَ ݧَوْٻٜ ندٜرْ لُومٛ، ٻٜ تٛرٛومٛ ݧَوْٻٜ ٻٜنْ مٜىٰمَ کٛو شِلْمبِ تٛغّٛورٜ مَاکٛ؞ فُو مٜىٰمُٻٜطِ نجَمْطِتِ؞ فَارِسَنْکٛعٜنْ اٜ وٛٻّٜ ندٜرْ مٛودِٻّٜ اَتَّوْرَ غَرٛيْٻٜ دَغَ اُرُشَلِيمَ ٻٜ کَوْرِتِ تٛ يٜىٰسُ؞ سٜيْ ٻٜ نغِعِ وٛٻّٜ تٛکُّٻٜ يٜىٰسُ اٜ ٻٜ ݧَامَ ݧَمْندُ ٻٜ لٛوتَايِ جُوطٜ مَٻّٜ نٛ دِينَ يَحُودَنْکٛعٜنْ وِعِ؞ فَارِسَنْکٛعٜنْ اٜ فُو يَحُودَنْکٛعٜنْ ٻٜ ݧَامَتَا ݧَمْندُ نَا ٻٜ لٛوتِي جُوطٜ مَٻّٜ نٛ دِينَ مَٻّٜ وِعِ، اٜ ٻٜ تٛکِّ ندٛنُ مَامَعٜنْ مَٻّٜ؞ تٛ ٻٜ نغَرْتٛيِي دَغَ لُومٛ، ٻٜ ݧَامَتَا ݧَمْندُ نَا ٻٜ لٛوتَکٜ نٛ دِينَ مَٻّٜ وِعِ؞ طٛنْمَا اٜ ٻٜ تٛکَّ ندٛنُ طُطُّمْ طُمْ ٻٜ ندٛنِ، بٛ لٛوتُکِ جَرْدُطٜ، اٜ غٛجِيجٜ، اٜ ڤَالِ غَطِرَاطِ نجَمْندِ مبٛطٜىٰرِ؞ سٜيْ فَارِسَنْکٛعٜنْ اٜ مٛودِٻّٜ اَتَّوْرَ ٻٜنْ پَمِ يٜىٰسُ ٻٜ مبِعِ، «نغَمْ طُمٜ تٛکُّٻٜمَ تٛکَّتَا ندٛنُ مَامَعٜنْ مٜىٰطٜنْ، اَمَّا اٜ ٻٜ ݧَامِرَ ݧَمْندُ جُوطٜ طٜ لَاٻَا؟» سٜيْ يٜىٰسُ نٛوتِي وِعِ، «اَنَّبِ اِشَايَ وِعِي غٛونغَ ندٜ وَطِ اَنَّبَاکُ دٛوْ مٛوطٛنْ، اٛنٛنْ مُنَافُکِعٜنْ، نٛ طُمْ وِنْدِرَا، اَللَّه وِعِي، ‹ٻٜنْ طٛنْ يِمْٻٜ اٜ حٛنْدُکٛ تَنْ ٻٜ مَوْنِنْتَيَمْ، اَمَّا ٻٜرْطٜ مَٻّٜ اٜ نغٛطِّتِييَمْ؞ اٜ مٜىٰرٜ ٻٜ مَوْنِنْتَيَمْ؛ اٜ ٻٜ اٜکِّتِنَ دٛوکَ يِمْٻٜ بٛ تٛ اَمْ طُمْ پِوٛيِ؞› «اٛنْ اَلِي تٛکُّکِ کٛ اَللَّه وِعِ طُمْ وَطَ، اٛنْ نجٛغَکٜ ندٛنُوجِ يِمْٻٜ؞» سٜيْ اٛ وِعِٻٜ، «اٛنْ ݧُمَ اٛنْ نغَطِي فِي بٛطُّمْ ندٜ نغَݧُطٛنْ کٛ اَللَّه وِعِ نغَمْ تٛکّٛنْ ندٛنُ مٛوطٛنْ؞ نغَمْ مُوسَ وِعِي، ‹حٛکُّ ݧَاکٛ مَاطَ اٜ مَدُوجٛ مَاطَ مَنْغُ،› ندٜنْ، ‹کٛو مٛيٜ حُطِ ݧَاکٛ مُوطُمْ کٛو مَدُوجٛ مُوطُمْ دٛولٜ وَرٜىٰ؞› اَمَّا اٛنْ مبِعَ تٛ نٜطّٛ وِعِي ݧَاکٛ مُوطُمْ کٛو مَدُوجٛ مُوطُمْ، ‹فُو کٛ کٛکَّيْنٛمَامِ، طُمْ کٛرْبَنْ، وَاتٛ مِ حٛکِّيطُمْ اَللَّه،› ندٜ مبِيطٛنْ نٛنْ اٛنْ کَطِي يِمْٻٜ مبَلَّ دَݧٛوٻٜ مَٻّٜ؞ نٛنْ نغَرْتِرْطٛنْ وٛلْدٜ اَللَّه مٜىٰرٜ لَاوٛلْ ندٛنُ طُمْ اٜکِّتِنْطٛنْ؞ کَدِنْ اٛنْ نغَطَ فِي طُطُّمْ اِرِ طُعُمْ؞» سٜيْ يٜىٰسُ فُطِّتِ نٛدِّ يِمْٻٜ حَوْرُتُٻٜ، اٛ وِعِ، «کٜتِّندٜىٰ، اٛنْ فُو، ڤَامٛنْ؞ ندٜ اٛ سٜنْدِرِ اٜ يِمْٻٜ فُو، اٛ نَتِّ وُرٛ، تٛکُّٻٜمٛ پَمِمٛ مَعَنَ اٜکِّتِنٛلْ نغٛعٛلْ؞ اٛ نٛوتِي اٛ وِعِ، «اٛنٛنْ مَا اٛنْ ڤَامَايِ مَعَنَ طُعُمْ؟ اٛنْ اَنْدَا وَلَا کٛ نَتَّتَ نٜطّٛ دَغَ يَاسِ وَرْتِرَمٛ مٛ لَاٻَا؟ نغَمْ نَاع ندٜرْ ٻٜرْندٜ طُمْ نَتَّتَ، اَمَّا ندٜرْ رٜىٰدُ، ندٜنْ طُمْ وُرْتٛ ٻَنْدُ؞» ﴿ندٜ يٜىٰسُ وِعِ طُعُمْ، اٛ حٛلِّي کٛو ندُيٜ ݧَمْندُ ندُ لَمْندُ؞﴾ اٛ ٻٜيْدِ وِعُکِ، «کٛ وُرْتٛتٛو دَغَ ندٜرْ ٻٜرْندٜ نٜطّٛ، کَنْجُمْ وَطَتَ نٜطّٛ وَرْتَ مٛ لَاٻَا يٜىٰسٛ اَللَّه؞ نغَمْ دَغَ ندٜرْ ٻٜرْندٜ نٜطّٛ ݧُمٛ کَلُّنغٛ وُرْتٛيْتٛو، اٜ وَطُکِ نجٜىٰنُ حَکُّندٜ يِمْٻٜ ٻٜ نغَلَا تٜىٰغَلْ، اٜ نغُيْکَ، اٜ وَرْحٛورٜ، اٜ نجٜىٰنُ، اٜ سُونٛ فِي دُونِيَارُ، اٜ حَلّٜىٰندٜ، اٜ پٛيْرٜ کَلُّندٜ، اٜ فُو کُوطٜ کَلُّطٜ طٜ ٻٜرْطٜ مَٻّٜ نغِطِ، اٜ لَوْلِيرُ، اٜ وٛنُّکِ اِنْدٜ نٜطّٛ، اٜ مَوْنِنْکِ حٛورٜ، اٜ وَݧُکِ وَطُکِ کٛ وٛوطِ؞ فُو طٜعٜ کُوطٜ کَلُّطٜ دَغَ ندٜرْ ٻٜرْندٜ طٜ مبُرْتٛيْتٛو طٜ نغَرْتِرَ نٜطّٛ مٛ لَاٻَا يٜىٰسٛ اَللَّه؞» دَغَ طٛنْ يٜىٰسُ دِلِّ يَحِ وِغٜىٰرٜ حَادٜ غَرِيجٜ تَايَ اٜ سِدٛنْ؞ اٛ نَتِّ وٛنْغٛ وُرٛ، اٛ يِطَا کٛو مٛيٜ اَنْدَ اٜ مٛ طٛنْ طُمْ؞ اَمَّا فُو اٜ نٛنْ اٛ وَاوَايِ سُوطَاکِ يِمْٻٜ؞ طٛنْ اٜ طٛنْ غٛطّٛ دٜبّٛ غٛودُطٛ ٻِطّٛ سُرْبَاجٛ ڤَمَرٛ غٛودُطٛ غِنّٛلْ نَنِ حَبَرُ يٜىٰسُ؞ سٜيْ اٛ وَرِ اٛ دِشِّي يٜىٰسٛ يٜىٰسُ؞ دٜبّٛ اٛنْ بٛو اٛ حٜلٜنَنْکٜىٰجٛ تٛ فِنِيکِيَ ندٜرْ لٜيْدِ سِيرِيَ اٛ دَݧَا؞ اٛ تٛرِي يٜىٰسُ وُرْتِنَنَ ٻِطّٛ مَاکٛ غِنّٛلْ نغٛلْ؞ سٜيْ يٜىٰسُ وِعِمٛ، «اَرَنْدٜ اَلْ طُمْ ݧَمْنَ ٻِکّٛيْ، نغَمْ طُمْ حَانَايِ طُمْ حٛشَّ ݧَمْندُ ٻِکّٛيْ طُمْ حُبَنٛوندُ کُتِحٛيْ؞» اَمَّا دٜبّٛ اٛنْ وِعِمٛ، «اٜىٰ، مٛودِبّٛ، اَمَّا حَا کُتِحٛيْ نغٛنْکٛيْ لٜيْ تٜىٰبُرْ اٜ ݧَامَ حٛرَانٛ سُکَاٻٜ ٻٜنْ؞» سٜيْ يٜىٰسُ وِعِمٛ، «نغَمْ اَ وِعِي نٛنْ، حٛوتُ، غِنّٛلْ نغٛلْ وُرْتَکٜ ٻِطّٛ مَاطَ؞» سٜيْ دٜبّٛ اٛنْ سٛعِّي وُرٛ تَوِ ٻِطّٛ مُوطُمْ اٜ فُکِّي دٛوْ لٜىٰسٛ، غِنّٛلْ نغٛلْ بٛو وُرْتَکٜ دَغَ ندٜرْ مَاکٛ؞ سٜيْ يٜىٰسُ اَلِ وِغٜىٰرٜ غٛنْدٜ حَادٜ غَرِيرِ تَايَ، اٛ تٛکِّرِ غَرِيرِ سِدٛنْ، اٛ رٜغٛيِي مبٜىٰلَ غَلِيلِ، اٛ نَتِّ لٜيْدِ دِکَڤٛلِسْ؞ تٛنْ وٛٻّٜ يِمْٻٜ نغَدَّنِمٛ غٛطّٛ ڤَحٛ مٛ مٜتٛ مُوطُمْ وُرْتَتَاکٛ بٛطُّمْ؞ ٻٜ تٛرِي يٜىٰسُ يٛوَ جُوطٜ مُوطُمْ دٛوْ مَاکٛ يَمْطِتِنَمٛ؞ اٜ وٛودِ يِمْٻٜ طُطْٻٜ طٛنْ، سٜيْ يٜىٰسُ حَکِّتِي کَنْکٛ اٜ ڤَحٛ اٛنْ، اٛ وَطِ کٛولِ مَاکٛ ندٜرْ نٛڤِّ ڤَحٛ اٛنْ؞ اٛ تُتِّ جٛودٜ اٛ مٜىٰمِ طٜمْنغَلْ ڤَحٛ اٛنْ؞ ندٜنْ يٜىٰسُ رَارِ دٛوْ فٛوفِ فٛوفَانغٛ جُوتُنغٛ وِعِمٛ، «اِفَتَ،» وَاتٛ، «مَٻِّتَ!» طٛنْ اٜ طٛنْ نٛڤِّ نٜطّٛ اٛنْ مَٻِّتِي، طٜمْنغَلْ مَاکٛ يٛوفِي، اٛ فُطِّ مٜتُکِ بٛطُّمْ؞ سٜيْ يٜىٰسُ وِعِٻٜ تٛع ٻٜ مبِعَکَ غٛطّٛ؞ اَمَّا فُو شَرٜلْ نغٜلْ اٛ حَطِٻٜ وِعُکِکَ، سٜيْ ٻٜ ٻٜيْدَ وِعُکِکَ کٛو تٛيٜ؞ يِمْٻٜ کَيْطِنِ نَاع سٜطَّ مبِعِ، «اٛ وَطِي کٛو طُمٜ بٛطُّمْ، حَا مَا اٜ مٛ وَطَ ڤَحُٻٜ نَنَ، اٜ مٛ وَطَ ٻٜ مبَاوَتَا مٜتُکِ مٜتَ؞» ندٜرْ طٜنْ طٛنْ بَلْطٜ يِمْٻٜ طُطْٻٜ فُطِّتِ کَوْرِ تٛ يٜىٰسُ؞ ندٜ ٻٜ نغَلَا کٛ ٻٜ ݧَامَتَ، سٜيْ يٜىٰسُ نٛدِّ تٛکُّٻٜمٛ، وِعِٻٜ، «اٜ مِ نَنَ جُرُمْطُمْ يِمْٻٜ ٻٜعٜ نغَمْ حَنْدٜ بَلْطٜ مَٻّٜ تَتِ اٜ ٻٜ نغٛنْدِ اٜ اَمْ، اَمَّا ٻٜ نغَلَا کٛ ٻٜ ݧَامَتَ؞ تٛ مِ وِعِيٻٜ ٻٜ کٛوتِدَ اٜ وٜىٰلٛ، ٻٜ ڤٜکّٛرَيْ دٛوْ طَتَلْ، نغَمْ وٛٻّٜ نغَرٛيِي دَغَ ٻَدَاکِ؞» تٛکُّٻٜمٛ نٛوتِي مبِعِ، «تٛيٜ غٛطّٛ حٜٻَتَ بُرٛودِ ندٜرْ لَدّٜ ندٜعٜ کٜپَيْطُمْ يِمْٻٜ ٻٜعٜ؟» يٜىٰسُ پَمِٻٜ وِعِ، «بُرٛودِ نٛيٜ نغٛودُطٛنْ؟» ٻٜ مبِعِمٛ، «جٛوٜىٰطِطِ؞» سٜيْ اٛ وِعِ يِمْٻٜ حَوْرُتُٻٜ ٻٜنْ فُو ٻٜ نجٛوطٛو اٜ لٜيْدِ؞ اٛ حٛشِّ بُرٛودِ جٛوٜىٰطِطِ طُمْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ نغٜىٰدَنَ يِمْٻٜ، کَمْٻٜ بٛو ٻٜ نغٜىٰدَنِ يِمْٻٜ حَوْرُتُٻٜ ٻٜنْ؞ طٛنْمَا اٜ ٻٜ نغٛودِ غٛطِّ لِپِّ ڤَمَرِ سٜطَّنَاجِ، سٜيْ اٛ يٜتِّ اَللَّه نغَمْ مَاجِ، اٛ وِعِ تٛکُّٻٜمٛ کَنْجِ مَا ٻٜ نغٜىٰدَنَ يِمْٻٜ؞ يِمْٻٜ ٻٜنْ ݧَامِ کَارِ؞ غَطَ مَاجُمْ تٛکُّٻٜمٛ مٛٻْتِ کٛ حٛرِي، طُمْ حٜىٰوِ کٛنْدٛوجٜ جٛوٜىٰطِطِ؞ يِمْٻٜ ٻٜنْ ٻَدَکٜ 4,000؞ سٜيْ اٛ جَٻِّتِيٻٜ اٛ نَتِّ کٛمِوَلْ، کَنْکٛ اٜ تٛکُّٻٜمٛ، ٻٜ ندِلِّ لٜيْدِ دَلْمَنُوتَ؞ فَارِسَنْکٛعٜنْ نغَرِ ڤُطِّ يٜدّٛوتِرْکِ اٜ يٜىٰسُ؞ اٜ ٻٜ نغِطِ فٛوندُکِمٛ، سٜيْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ سٜيْ يٜىٰسُ فٛفْتِ فٛوفَانغٛ جُوتُنغٛ وِعِ، «نغَمْ طُمٜ اٛنٛنْ يِمْٻٜ جَامَنُ طُعُمْ طَٻِّتٛتٛنْ حٛلّٜىٰکِ غٛطُّمْ کَيْطِنِيطُمْ؟ اٜ مِ وِعَعٛنْ غٛونغَ، وَلَا کٛ طُمْ حٛلَّتَ يِمْٻٜ جَامَنُ طُعُمْ؞» دَغَ طٛنْ اٛ اَلِٻٜ، اٛ فُطِّتِ اٛ نَتِّ کٛمِوَلْ، اٛ حُولِ يَاکِ نغٛنْ تٛنْ فٛنْغٛ؞ تٛکُّٻٜ يٜىٰسُ نغٜجِّتِي نغَرْدٛيَ اٜ بُرٛودِ، سٜيْ بُرٛودِ غٛعٛ تَنْ طُمْ ٻٜ نغٛودِ ندٜرْ کٛمِوَلْ مَٻّٜ؞ يٜىٰسُ وَغِّنِٻٜ وِعِ، «ڤَامٜىٰ، نغَطٜىٰ حَکِّيلٛ اٜ پُوفِنِرْطُمْ فَارِسَنْکٛعٜنْ اٜ طُمْ حِرُدُسْ؞» سٜيْ تٛکُّٻٜمٛ مٜدِّ حَکُّندٜ مَٻّٜ، ٻٜ مبِعِ، «اٛ وِعُ نٛنْ نغَمْ اٜنْ نغَلَا بُرٛودِ؞» ندٜ يٜىٰسُ فَامِ کٛ ٻٜ مبِعَتَ، سٜيْ اٛ پَمِٻٜ، اٛ وِعِ، «نغَمْ طُمٜ مٜدّٛتٛنْ دٛوْ اٛنْ نغَلَا بُرٛودِ؟ حَا جٛونِ اٛنْ کٜٻْتَايِ اٛنْ ڤَامَايِ؟ کٛو ٻٜرْطٜ شَاتُطٜ نغٛودُطٛنْ؟ اٛنْ نغٛودِ غِتٜ، اَمَّا تَمْڤُطٛنْ يِيکِ؟ اٛنْ نغٛودِ نٛڤِّ، اَمَّا تَمْڤُطٛنْ نَنُکِ؟ اٛنْ شِفْتٛرَايِ؟ شَرٜلْ نغٜلْ ݧَمْنُمِ يِمْٻٜ 5,000 بُرٛودِ جٛوِ، کٛنْدٛوجٜ نٛيٜ ٻٛڤْتُطٛنْ اٜ کٜىٰوِ حٛرَانٛ؟» ٻٜ مبِعِ، «سَڤّٛ اٜ طِطِ؞» «ندٜنْ شَرٜلْ نغٜلْ ݧَمْنُمِ يِمْٻٜ 4,000 بُرٛودِ جٛوٜىٰطِطِ، کٛنْدٛوجٜ نٛيٜ ٻٛڤْتُطٛنْ اٜ کٜىٰوِ حٛرَانٛ؟» ٻٜ مبِعِمٛ، «جٛوٜىٰطِطِ؞» سٜيْ يٜىٰسُ وِعِٻٜ، «حَا جٛونِ اٛنْ ڤَامَايِ؟» يٜىٰسُ اٜ تٛکُّٻٜمٛ نجٛتِّي غَرِيرِ بٜتَسَيْدَ، سٜيْ وٛٻّٜ يِمْٻٜ نغَدِّ بُمْطٛ، ٻٜ تٛرِي يٜىٰسُ مٜىٰمَمٛ نغَمْ يَمْطِتِنَمٛ؞ يٜىٰسُ جٛغِي جُنْغٛ بُمْطٛ اٛنْ، يَارِمٛ تٛنْ غَطَ غَرِيٜلْ، تُتَّنِمٛ جٛودٜ تٛ غِتٜ يٛوِ جُوطٜ مُوطُمْ دٛوْ مَاکٛ، سٜيْ پَمِمٛ، وِعِ، «اَ يِعِي غٛطُّمْ؟» سٜيْ بُمْطٛ اٛنْ پٜفْتِ حٛورٜ، رَارِ، وِعِ، «اٜ مِ يِعَ يِمْٻٜ، اَمَّا اٜ ٻٜ نَنْدِ اٜ لٜطّٜ اٜ ٻٜ نغِيلٛو؞» سٜيْ يٜىٰسُ فُطِّتِ مٜىٰمِ غِتٜ طٜنْ؞ بُمْطٛ اٛنْ مَٻِّتِ غِتٜ بٛطُّمْ، غِتٜ مَاکٛ نجَمْطِتِ، اٛ يِعِ کٛو طُمٜ بٛطُّمْ؞ سٜيْ يٜىٰسُ وِعِمٛ اٛ حٛوتَ، وِعِمٛ، «تَاع نَتُّ ندٜرْ غَرِيٜلْ نغٜلْ؞» يٜىٰسُ اٜ تٛکُّٻٜمٛ ٻٜ ندِلِّ يَاکِ نغَرِحٛيْ نغٛنْکٛيْ حَادٜ غَرِيرِ کَيْسَارِيَ فِلِبِ؞ اٜ ٻٜ نجَحَ دٛوْ طَتَلْ سٜيْ اٛ پَمِٻٜ، اٛ وِعِ، «مٛيٜ يِمْٻٜ مبِعَتَيَمْ؟» ٻٜ نٛوتِي ٻٜ مبِعِ، «وٛٻّٜ اٜ مبِعَ اَ يَحَيَ غَطٛووٛ بَڤْتِسْمَ؞ وٛٻّٜ بٛو اٜ مبِعَ اَ اَنَّبِ اِلِيَ؞ ندٜنْ وٛٻّٜ اٜ مبِعَ اَ غٛعٛتٛ ندٜرْ اَنَّبٛعٜنْ ندٜنّٛ؞» سٜيْ اٛ پَمِٻٜ، اٛ وِعِ، «اَمَّا اٛنٛنْ، مٛيٜ مبِعٛتٛنْيَمْ؟» سٜيْ بِيتُرُسْ نٛوتِي وِعِ، «اَنْ وٛنِ اَلْمَسِيحُ؞» ندٜنْ يٜىٰسُ وَغِّنِٻٜ نَاع سٜطَّ وِعِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞ سٜيْ يٜىٰسُ فُطِّ اٜکِّتِنْکِٻٜ اٜ وِعَ دٛولٜ ٻِي نٜطّٛ تٛرّٛو نَاع سٜطَّ؞ مَوْٻٜ يِمْٻٜ، اٜ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ نغَݧَمٛ، ندٜنْ اٛ وَرٜىٰ؞ غَطَ بَلْطٜ تَتِ بٛو اٛ اُمّٛتٛ دَغَ مَيْدٜ؞ يٜىٰسُ مٜتِي حَالَ کَعَ اٜ نجَيْرِ؞ سٜيْ بِيتُرُسْ نٛدِّمٛ وُتُّدُ غٛعٛ فُطِّ حَٻَنْکِمٛ؞ اَمَّا يٜىٰسُ وَيْلِتِي رَارِ تٛکُّٻٜمٛ کٛرِيٻٜ، حَٻَنِ بِيتُرُسْ، وِعِ، «سٜنْدِرْ اٜ اَمْ، اَنْ شٜيْطَنْ! نَاع تٛ اَللَّه ݧُمٛ مَاطَ پِوٛيِ، اِرِ ݧُمٛ يِمْٻٜ ݧُمَتَا؞» سٜيْ اٛ نٛدِّ يِمْٻٜ طُطْٻٜ حَوْرُتُٻٜ حَوْتِ اٜ تٛکُّٻٜمٛ، اٛ وِعِٻٜ، «فُو غِطّٛ وَرْتَ تٛکُّطٛيَمْ، تٛع وَطَ کٛ حٛورٜ مُوطُمْ يِطِ وَطُکِ تَنْ، اَمَّا دٛولٜ حٛشَّ غَافَانغَلْ مُوطُمْ تٛکَّيَمْ؞ نغَمْ فُو غِطّٛ حِسْنُکِ يٛنْکِ مُوطُمْ اٛ دُلَّيْکِ؞ اَمَّا فُو دُلَّيْطٛ يٛنْکِ مُوطُمْ نغَمْ اَمْ اٜ نغَمْ حَبَرُ بٜلْطُمْ اٛ حِسْنَيْکِ؞ کٛ طُمْ نَفَنْتَ نٜطّٛ، تٛ اٛ حٜٻِي دُونِيَارُ فُو، اَمَّا اٛ دُلِّي يٛنْکِ مَاکٛ؟ کٛو بٛو کٛ نٜطّٛ وَاوَتَ حٛکُّکِ نغَمْ جَٻْتٛيَ يٛنْکِ مُوطُمْ؟ کٛو مٛيٜ غَݧُطٛيَمْ اٜ بٛلِيطٜ اَمْ ندٜرْ طُعُمْ جَامَنُ طُمْ حَکّٜ، طُمْ وَلَا غٛونغَ، مِنْ ٻِي نٜطّٛ مِ وَݧَيْمٛ تٛ مِ وَرْتِدٛيِي اٜ مَلَاعِکَعٜنْ شٜنِيٻٜ ندٜرْ تٜدُّنغَلْ ݧَاکٛ اَمْ مٛ دٛوْ؞» اٛ وِعِٻٜ، «اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي لَامُ اَللَّه وَرْدِ اٜ بَوْطٜ؞» غَطَ بَلْطٜ جٛوٜىٰغٛعٛ، سٜيْ يٜىٰسُ حٛشِّ بِيتُرُسْ، اٜ يَاکُبُ، اٜ يَحَيَ، اٛ يَارِٻٜ دٛوْ وٛنْدٜ حٛشّٜىٰرٜ تٛوْندٜ کَمْٻٜ تَنْ؞ سٜيْ نَنْدِ مَاکٛ وَيْلِتِي يٜىٰسٛ مَٻّٜ؞ کٛلْتٜ مَاکٛ نغَرْتِ دَنٜىٰجٜ تَرْ؞ وَلَا غٛطّٛ بَاوَيْطٛ لَاٻِنِرَ کٛلْتٜ نٛنْ ندٜرْ دُونِيَارُ فُو؞ سٜيْ اَنَّبِ اِلِيَ اٜ اَنَّبِ مُوسَ مبَنْغَنِٻٜ اٜ ٻٜ مٜدَّ اٜ يٜىٰسُ؞ سٜيْ بِيتُرُسْ وِعِ يٜىٰسُ، «مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ طٛعٛ، وٛعٛيْرُ ندُ مَاطَ، وٛعٛيْرُ ندُ مُوسَ، وٛعٛيْرُ ندُ اِلِيَ؞» بِيتُرُسْ نٛ دُلُّ کٛ وِعَتَ نغَمْ کَنْکٛ اٜ تٛکُّٻٜ يٜىٰسُ کٛرِيٻٜ ٻٜ کُلْتٛرِي نَاع سٜطَّ؞ سٜيْ ندُولَ وَنْغِ سُدِّٻٜ، سٜيْ وٛنْدٜ حٛنٛنْدٜ پِوٛيِ ندٜرْ ندُولَ نغَنْ، وِعِ، «اٛعٛ وٛنِ ٻِطّٛ اَمْ مٛ نغِطُمِ؞ نَنٜىٰ کٛ اٛ وِعَتَعٛنْ!» طٛنْ اٜ طٛنْ ٻٜ ندَارِ ٻٜ نغِعَايِ غٛطّٛ اٜ وٛنْدِ اٜ مَٻّٜ سٜيْ يٜىٰسُ تَنْ؞ اٜ ٻٜ نجِڤّٛيٛو دَغَ دٛوْ حٛشّٜىٰرٜ ندٜنْ، سٜيْ يٜىٰسُ وَغِّنِٻٜ وِعِ تٛع ٻٜ مبِعَ کٛو مٛيٜ کٛ ٻٜ نغِعِ نَا غَطَ ٻِي نٜطّٛ اُمَّکٜ دَغَ مَيْدٜ؞ نغَمْ نٛنْ ٻٜ اَلِ حَالَ کَنْ حَکُّندٜ مَٻّٜ، اٜ ٻٜ مٜدَّ دٛوْ مَعَنَ «اُمَّاکِ دَغَ مَيْدٜ؞» سٜيْ ٻٜ پَمِمٛ، ٻٜ مبِعِ، «نغَمْ طُمٜ مٛودِٻّٜ اَتَّوْرَ اٜ مبِعَ دٛولٜ اَنَّبِ اِلِيَ اَرْتَ اَلْمَسِيحُ وَرْکِ؟» يٜىٰسُ نٛوتِي، وِعِ، «غٛونغَ، اَنَّبِ اِلِيَ اَرْتَيْ وَرْکِ نغَمْ اٛ سِرْيٛو کٛو طُمٜ؞ نغَمْ طُمٜ طُمْ وِنْدِ وِيکِ دٛولٜ ٻِي نٜطّٛ تٛرّٛو نَاع سٜطَّ ندٜنْ اٛ وَݧٜىٰ؟ اَمَّا اٜ مِ وِعَعٛنْ اِلِيَ يَادَکٜ وَرِي، يِمْٻٜ بٛو نغَطَنِيمٛ فُو کٛ ٻٜ نغِطِ، نٛنْ نٛ طُمْ وِنْدِرَا دٛوْ مَاکٛ؞» ندٜ يٜىٰسُ اٜ تٛکُّٻٜمٛ نجٛتِّي تٛ تٛکُّٻٜمٛ کٛرِيٻٜ، سٜيْ ٻٜ نغِعِ يِمْٻٜ طُطْٻٜ اٜ ڤِلِيٻٜ؞ وٛٻّٜ مٛودِٻّٜ اَتَّوْرَ اٜ نغٜدّٛوتِرَ اٜ مَٻّٜ؞ ندٜ فُو يِمْٻٜ ٻٜنْ نغِعِ يٜىٰسُ، ٻٜ کَيْطِنِ نَاع سٜطَّ، ٻٜ ندٛغِّ ٻٜ نجَحِ تٛ مَاکٛ نغَمْ ٻٜ کٛوْنَمٛ؞ سٜيْ يٜىٰسُ پَمِٻٜ وِعِ، «دٛوْ طُمٜ نغٜدّٛوتِرْتٛنْ اٜ مَٻّٜ؟» سٜيْ غٛعٛتٛ ندٜرْ يِمْٻٜ ٻٜنْ نٛوتِي وِعِ، «مٛودِبّٛ، مِ وَدَّنِيمَ ٻِطّٛ اَمْ غٛودُطٛ غِنّٛلْ؞ غِنّٛلْ نغٛلْ حَطِيمٛ اٛ مٜتَ؞ فُو شَرٜلْ نغٜلْ غِنّٛلْ نغٛلْ نَنْغِمٛ، سٜيْ نغٛلْ دٛعَّمٛ تٛ لٜيْدِ، نغُوفٛ نغَطَ کَ وُرْتَاکِ اٜ حٛنْدُکٛ مَاکٛ، اٜ مٛ ݧٜرْپِندِرَ ݧِيپٜ مَاکٛ، ٻَنْدُ مَاکٛ وَرْتَ بٛ لٜکِّ؞ مِ تٛرَکٜ تٛکُّٻٜمَ مبُرْتِنَنغٛلْ، اَمَّا ٻٜ مبَاوَايِ؞» يٜىٰسُ نٛوتِي وِعِ، «اٛنٛنْ يِمْٻٜ جَامَنُ طُعُمْ طُمْ حٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ نغَدَّنٜىٰيَمْ سُکَ اٛنْ؞» سٜيْ ٻٜ نغَدِّمٛ؞ ندٜ غِنّٛلْ نغٛلْ يِعِ يٜىٰسُ، طٛنْ اٜ طٛنْ نغٛلْ وَطِ ٻَنْدُ سُکَ اٛنْ وَطِ کَ دِوْنُکِ، اٛ يَنِ تٛ لٜيْدِ، اٜ مٛ تَلِّتٛو، حٛنْدُکٛ مَاکٛ اٜ وُرْتِنَ نغُوفٛ؞ سٜيْ يٜىٰسُ پَمِ ݧَاکٛ سُکَ اٛنْ، وِعِ، «دَغَ ندٜيٜ طُعُمْ فِي حٜٻِ سُکَ اٛنْ؟» ݧَاکٛ اٛنْ وِعِ، «دَغَ اٛ ڤَمَرٛ؞ ندٜ طُطُّمْ اٜ نغٛلْ فَطَّمٛ ندٜرْ حِيتٜ کٛو ندٜرْ ندِيَمْ نغَمْ نغٛلْ وَرَمٛ؞ اَمَّا تَا وَاوَيْ وَطُکِ غٛطُّمْ، يُرْمِنَنْمِنْ مبَلَّامِنْ؞» يٜىٰسُ وِعِمٛ، «نغَمْ طُمٜ مبِعَتَايَمْ، ‹تَا وَاوَيْ؟› کٛو طُمٜ طُمْ غَطٛتٛوطُمْ تٛ نٜطّٛ حٛولَکٜيَمْ؞» طٛنْ اٜ طٛنْ سٜيْ ݧَاکٛ سُکَ اٛنْ پٜفْتِ حٛنٛنْدٜ وِعِ، «مِ حٛولَکٜمَ؞ وَلَّمْ مِ جَالٛو شِيَ حٛولَارٜ اَمْ!» ندٜ يٜىٰسُ يِعِ يِمْٻٜ اٜ نغَرٛيَ اٜ دٛغُّدُ نغَمْ نغِعَ کٛ وَطَتَ، سٜيْ اٛ حَٻَنِ غِنّٛلْ نغٛلْ، اٛ وِعِنغٛلْ، «اَنْ، غِنّٛلْ کَطُنغٛلْ سُکَ اٛعٛ مٜتُکِ اٜ نَنُکِ، اٜ مِ وِعِمَا، وُرْتَ دَغَ ندٜرْ مَاکٛ! تَاع فُطُّتُ نَتُّکِمٛ!» سٜيْ غِنّٛلْ نغٛلْ وُلِّ، نغٛلْ وَطِ سُکَ اٛنْ دِوْنِ نَاع سٜطَّ، ندٜنْ نغٛلْ وُرْتِي؞ سُکَ اٛنْ وَرْتِ بٛ مَيْطٛ، حَا مَا يِمْٻٜ طُطْٻٜ مبِعِ، «اٛ مَايِي؞» اَمَّا يٜىٰسُ جٛغِي جُنْغٛ مَاکٛ اُمِّنِمٛ، اٛ دَرِي؞ ندٜ يٜىٰسُ نَتِّ ندٜرْ وُرٛ، تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، «نغَمْ طُمٜ مِنٛنْ مِنْ مبَاوَايِ وُرْتِنْکِ غِنّٛلْ نغٛلْ؟» يٜىٰسُ نٛوتِي، وِعِ، «اِرِ نغٛعٛلْ غِنّٛلْ نغٛلْ وُرْتَتَاکٛ سٜيْ اٜ دٛعَارٜ؞» سٜيْ يٜىٰسُ اٜ تٛکُّٻٜمٛ اَلِ طٛنْ ٻٜ ندِلِّ ٻٜ پِوِ ندٜرْ لٜيْدِ غَلِيلِ؞ يٜىٰسُ يِطَا کٛو مٛيٜ اَنْدَ تٛ ٻٜ نغٛنِ، نغَمْ اٜ مٛ اٜکِّتِنَ تٛکُّٻٜمٛ، اٜ مٛ وِعَٻٜ، «طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ ٻٜ مبَرَمٛ؞ ندٜنْ تٛ اٛ وَرَامَ، غَطَ بَلْطٜ تَتِ اٛ اُمّٛتٛ؞» اَمَّا ٻٜ ڤَامَايِ کٛ اٛ وِعِٻٜ، ندٜنْ اٜ ٻٜ کُلَ پَمُکِمٛ؞ سٜيْ ٻٜ نجٛتِّي کَفَرْنَحُمْ؞ غَطَ يٜىٰسُ نَتِّي وُرٛ، اٛ پَمِ تٛکُّٻٜمٛ، اٛ وِعِ، «دٛوْ طُمٜ مٜدّٛتٛنْ دٛوْ طَتَلْ؟» اَمَّا ٻٜ ندٜعِّتِ نغَمْ دٛوْ طَتَلْ ٻٜ نغٜدّٛوتِرِ دٛوْ مٛيٜ وٛنِ ٻُرْطٛ مَنْغُ ندٜرْ مَٻّٜ؞ سٜيْ اٛ جٛوطِي، اٛ نٛدِّ تٛکُّٻٜمٛ سَڤّٛ اٜ طِطٛ ٻٜنْ، اٛ وِعِٻٜ، «فُو غِطّٛ وَرْتَ مَوْطٛ، دٛولٜ اٛ وَرْتَ ڤَمَرٛ، ندٜنْ اٛ وَرْتَ مَشُّطٛ کٛو مٛيٜ؞» سٜيْ اٛ حٛشِّ سُکَ ڤَمَرٛ، اٛ دَرْنِنغٜلْ شَکَ مَٻّٜ، اٛ وُوندِينغٜلْ، اٛ وِعِٻٜ، «فُو جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞ فُو جَٻُطٛيَمْ بٛو نَاع مِنْ تَنْ جَٻِ، اَمَّا جَٻِي لِلٛيْطٛيَمْ مَا؞» سٜيْ يَحَيَ وِعِمٛ، «مٛودِبّٛ، مِنْ نغِعِ غٛطّٛ اٜ وُرْتِنَ غِنِّ ندٜرْ اِنْدٜ مَاطَ مِنْ کَطِمٛ، نغَمْ کَنْکٛ نَاع اٛ تٛکُّطٛعٜنْ؞» اَمَّا يٜىٰسُ وِعِ، «تٛع اٛنْ کَطُمٛ، نغَمْ وَلَا غَطٛووٛ غٛطُّمْ کَيْطِنِيطُمْ ندٜرْ اِنْدٜ اَمْ ندٜنْ طٛنْ اٜ طٛنْ وِعَ حَالَ کَلُّکَ دٛوْ اَمْ؞ نغَمْ فُو مٛ وَݧَايِعٜنْ اٜ وٛنْدِ اٜ مٜىٰطٜنْ؞ اٜ مِ وِعَعٛنْ غٛونغَ، کٛو مٛيٜ حٛکِّعٛنْ ندِيَمْ ندٜرْ جَرْدُغٜلْ نجَرٛنْ نغَمْ اٛنٛنْ طُمْ ٻٜ اَلْمَسِيحُ، غٛونغَ اٛ دُلَّتَا حٜٻُکِ مبَرْجَارِ؞ «تٛ غٛطّٛ وَطِي غٛعٛتٛ ندٜرْ سُکَحٛيْ ڤَمَرٛيْ کٛعٛيْ کٛولِيکٛيْيَمْ وَطِي حَکّٜ، طُمْ ٻُرَنِيمٛ اٛ حَٻَّنٜىٰ کَاپَ نَمٛلْ مَنْغَ اٜ دَاندٜ طُمْ فَطَّمٛ ندٜرْ مبٜىٰلَ؞ تٛ جُنْغٛ مَاطَ اٜ وَطُمَا نغَطَا حَکّٜ، اِتُّنغٛ؞ طُمْ ٻُرَنِيمَ نَتَّا وُرٛ اَللَّه جُنْغٛ وٛعٛتٛ دٛوْ طُمْ حُبٛمَا ندٜرْ وُرٛ حِيتٜ نغٜ ݧِفَتَا اٜ جُوطٜ طِطِ؞ ندٜرْ حِيتٜ نغٜنْ ‹غِلْپِ ݧَامَيْطِٻٜ طِ مبَاتَتَا، حِيتٜ نغٜنْ بٛو نغٜ ݧِفَتَا؞› «نٛنْ نٛ وٛنْدُ ݧَمْندُ دٛولٜ وَطَنٜىٰ لَمْطَمْ نغَمْ ندُ وٜلَ، نٛنْ مَا فُو يِمْٻٜ دٛولٜ نَتَّ حِيتٜ، وَاتٛ شَطٜىٰلٜ، نغَمْ نغِکُّ مَٻّٜ وَرْتَ بٛطُّمْ؞ «لَمْطَمْ طُمْ فِي بٛطُّمْ، اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ نغَرْتٜىٰ بٛ لَمْطَمْ، وَاتٛ مبٜلْنِنْدِرٜىٰ ٻٜرْطٜ مٛوطٛنْ، ندٜنْ نجٛوطٜىٰ جَمْ حَکُّندٜ مٛوطٛنْ؞» سٜيْ يٜىٰسُ اُمِّي اَلِ طٛنْ يَحِ لٜيْدِ يَحُودِيَ اٜ فٛنْغٛ شَانغٛلْ اُرْدُنْ؞ يِمْٻٜ طُطْٻٜ فُطِّتِ کَوْرِتِ تٛ مَاکٛ، اٛ اٜکِّتِنِٻٜ نٛ اٛ وٛووِ وَطُکِ؞ سٜيْ وٛٻّٜ فَارِسَنْکٛعٜنْ نغَرِ تٛ مَاکٛ نغَمْ ٻٜ ڤٛوندَمٛ، ٻٜ پَمِمٛ ٻٜ مبِعِ، «اٜ يِيکِ مَاطَ اَتَّوْرَ اَلِي نٜطّٛ يٛوفَ دٜبّٛ مُوطُمْ؟» يٜىٰسُ نٛوتِي وِعِ، «طُمٜ مُوسَ وِعِعٛنْ نغَطٛنْ؟» ٻٜ مبِعِ، «مُوسَ وِعِ نٜطّٛ وَاوَيْ وِنْدَنَ دٜبّٛ مُوطُمْ طٜرٜوٛلْ وَرْکِ تٜىٰغَلْ وِعَمٛ اٛ دِلَّ؞» سٜيْ يٜىٰسُ وِعِٻٜ، «نغَمْ ٻٜرْطٜ مٛوطٛنْ طٜ شَاتُطٜ وَطِ مُوسَ وِنْدَنِعٛنْ طُعُمْ دٛوکَ؞ اَمَّا دَغَ فُطّٛودٜ تَغُکِ ‹اَللَّه تَغِيٻٜ غٛرْکٛ اٜ دٜبّٛ؞› ‹نغَمْ نٛنْ نٜطّٛ اَلَيْ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، کَمْٻٜ طِطٛ ٻٜ نغَرْتَ غٛعٛ؞› نغَمْ نٛنْ نَاع ٻٜ طِطٛ کَدِنْ، اَمَّا ٻٜ نغَرْتِي نٜطّٛ غٛعٛتٛ؞ نغَمْ مَاجُمْ کٛ اَللَّه حَوْتِ، تٛع نٜطّٛ سٜنْدَطُمْ؞» اٜ ٻٜ ندٜرْ وُرٛ کَدِنْ، تٛکُّٻٜمٛ پَمِمٛ دٛوْ حَالَ کَنْ؞ سٜيْ اٛ وِعِٻٜ، «کٛو مٛيٜ يٛوفِ دٜبّٛ مُوطُمْ تٜعِ غٛطّٛ، نجٜىٰنُ اٛ وَادَتَ اٜ مَاکٛ؞ طٛنْمَا تٛ دٜبّٛ سٜنْدِرِي اٜ غٛرْکٛ مُوطُمْ تٜىٰرِ اٜ غٛطّٛ، نجٜىٰنُ اٛ وَطَتَ؞» يِمْٻٜ اٜ نغَدَّنَ يٜىٰسُ سُکَحٛيْ ڤَمَرٛيْ نغَمْ اٛ بَرْکِطِنَکٛيْ، اَمَّا تٛکُّٻٜمٛ کَٻَنِٻٜ؞ ندٜ يٜىٰسُ يِعِ نٛنْ، ٻٜرْندٜ مُوطُمْ مٜتِّ، اٛ وِعِٻٜ، «اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞ اٜ مِ وِعَعٛنْ غٛونغَ، فُو مٛ جَٻَايِ لَامُ اَللَّه بٛ سُکَيٜلْ ڤَمَرٜلْ، اٛ نَتَّتَا لَامُ طُمْ کٛو سٜطَّ!» سٜيْ يٜىٰسُ وُوندِيکٛيْ غٛعٛ‑غٛعٛ، اٛ يٛوَنِکٛيْ جُوطٜ مَاکٛ نغَمْ بَرْکِطِنْکِ؞ يٜىٰسُ نَنْغِ لَاوٛلْ وٛنْ طٛنْ، سٜيْ غٛطّٛ نٜطّٛ دٛغِّ يَحِ دِشِّي يٜىٰسٛ مَاکٛ؞ نٜطّٛ اٛنْ پَمِمٛ، وِعِ، «مٛودِبّٛ غٜىٰتٛ، کٛ حَانِ مِ وَطَ مِ حٜٻَ يٛنْکِ کِ رٜعَتَا؟» يٜىٰسُ وِعِمٛ، «نغَمْ طُمٜ نٛدِّرْطَايَمْ غٜىٰتٛ؟ وَلَا غٜىٰتٛ سٜيْ اَللَّه تَنْ؞ اَ اَنْدِ کٛ اَتَّوْرَ وِعِ: ‹تَاع وَطُ وَرْحٛورٜ؞ تَاع وَطُ نجٜىٰنُ؞ تَاع وُجُّ؞ تَاع حٛکُّ شٜيْدَ فٜوْرٜ؞ تَاع پٛيْرُ نٜطّٛ نجَٻَنَامٛ کٛ اٛ جٜيِ؞ حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞› » سٜيْ اٛ وِعِ يٜىٰسُ، «مٛودِبّٛ، اٜ مِ وَطَ فُو فِي طُعُمْ دَغَ اٜ مِ سُکَ؞» يٜىٰسُ رَارِمٛ ندٜرْ يِدّٜ، وِعِمٛ، «اَ دُلِّي وَطُکِ فِي غٛعٛ؞ يَحُ، شٛورَا کٛ نغٛودُطَا، کٛکَّا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞» ندٜ نٜطّٛ اٛنْ نَنِ نٛنْ، ٻٜرْندٜ مَاکٛ تَپِ، اٛ دِلِّ اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞ يٜىٰسُ رَارِ تٛکُّٻٜمٛ وِعِٻٜ، «اٜ طُمْ سَطِ دِسْکُطٛ نَتَّ لَامُ اَللَّه!» تٛکُّٻٜمٛ کَيْطِنِي اٜ کٛ اٛ وِعِ، اَمَّا اٛ فُطِّتِ اٛ وِعِٻٜ، «ٻِٻّٜ اَمْ، نَتُّکِ لَامُ اَللَّه اٜ سَطِ نَاع سٜطَّ! طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞» تٛکُّٻٜمٛ کَيْطِنِ نَاع سٜطَّ، ٻٜ مبِعِمٛ، «تٛو، تٛ طُمْ نٛنْ، مٛيٜ حِسَتَ؟» يٜىٰسُ رَارِٻٜ، وِعِ، «تٛ يِمْٻٜ طُمْ وَطَتَاکٛ، اَمَّا تٛ اَللَّه طُمْ وَطٛتٛ؞ نغَمْ تٛ مَاکٛ کٛو طُمٜ طُمْ غَطٛتٛوطُمْ؞» سٜيْ بِيتُرُسْ وِعِمٛ، «تٛو، رَطُّمْ، مِنٛنْ مِنْ اَلِي کٛو طُمٜ مِنْ تٛکِّيمَ؞» يٜىٰسُ وِعِ، «اٜ مِ وِعَعٛنْ غٛونغَ، فُو اَلُطٛ وُرٛ مُوطُمْ، کٛو سَکِرَاٻٜ مُوطُمْ وٛرْٻٜ کٛو رٜوْٻٜ، کٛو مَدُوجٛ مُوطُمْ، کٛو ݧَاکٛ مُوطُمْ، کٛو ٻِٻّٜ مُوطُمْ، کٛو غٜسٜ مُوطُمْ نغَمْ اَمْ اٜ حَبَرُ بٜلْطُمْ، اٛ حٜٻَيْ کٛ ٻُرِ نٛنْ ندٜرْ طُعُمْ جَامَنُ؞ اٛ حٜٻَيْ غُرٜىٰجٜ، اٜ سَکِرَاٻٜ وٛرْٻٜ اٜ رٜوْٻٜ، اٜ دَݧٛوٻٜ، اٜ ٻِٻّٜ، اٜ غٜسٜ ندٜ 100؞ طٛنْمَا يِمْٻٜ تٛرَّيْمٛ، اَمَّا ݧَلْندٜ جَانغٛ اٛ حٜٻَيْ يٛنْکِ کِ رٜعَتَا؞ اَمَّا يِمْٻٜ طُطْٻٜ اَرْتُٻٜ ٻٜ نغَرْتَيْ شَکِتِيٻٜ، ندٜنْ شَکِتِيٻٜ نغَرْتَيْ اَرْتُٻٜ؞» يٜىٰسُ اٜ تٛکُّٻٜمٛ سَڤّٛ اٜ طِطٛ اٜ وٛٻّٜ تٛکُّٻٜمٛ اٜ ٻٜ دٛوْ لَاوٛلْ يَاکِ اُرُشَلِيمَ، يٜىٰسُ اٜ اَرْدِيٻٜ؞ تٛکُّٻٜمٛ سَڤّٛ اٜ طِطٛ ٻٜنْ اٜ کَيْطِنِ، تٛکُّٻٜمٛ کٛرِيٻٜ بٛو اٜ کُلَ؞ يٜىٰسُ فُطِّتِ نٛدِّ تٛکُّٻٜمٛ سَڤّٛ اٜ طِطٛ ٻٜنْ کَمْٻٜ تَنْ، اٛ فُطِّ وِعُکِٻٜ کٛ حٜٻَتَمٛ، اٛ وِعِ، «رَطُّمْ، اٜنْ نجَحَيْ اُرُشَلِيمَ، ندٜنْ طُمْ وَطَيْ ٻِي نٜطّٛ ندٜرْ جُوطٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ؞ ٻٜ تَپَنَيْمٛ کِيتَ مَيْدٜ، ندٜنْ ٻٜ نغَطَمٛ ندٜرْ جُوطٜ يِمْٻٜ نَاع يَحُودَنْکٛعٜنْ، ٻٜ نجُکِّتَمٛ، ٻٜ تُتَّنَمٛ جٛودٜ، ٻٜ ڤِيَمٛ، ٻٜ مبَرَمٛ؞ ندٜنْ غَطَ بَلْطٜ تَتِ، اٛ اُمّٛتٛ دَغَ مَيْدٜ؞» سٜيْ يَاکُبُ اٜ يَحَيَ ٻِٻّٜ جَبَدِ ٻَدِّي يٜىٰسُ، مبِعِ، «مٛودِبّٛ، اٜ مِنْ نغِطِ نغَطَنَامِنْ فُو کٛ مِنْ تٛرِمَا؞» سٜيْ يٜىٰسُ وِعِٻٜ، «کٛ نغِطّٛنْ مِ وَطَنَعٛنْ؟» ٻٜ مبِعِ، «تَا جٛوطَکٜ دٛوْ جٛوطٛرْغَلْ لَامُ مَاطَ ندٜرْ تٜدُّنغَلْ مَاطَ، غٛعٛتٛ اَمِنْ جٛوطٛو تٛ ݧَامٛ مَاطَ، غٛعٛتٛ تٛ نَنٛ مَاطَ؞» اَمَّا يٜىٰسُ وِعِٻٜ، «اٛنْ اَنْدَا کٛ تٛرٛتٛوطٛنْ؞ اٛنْ مبَاوَيْ نجَرٛنْ اِرِ جَرْدُغٜلْ تٛرَّ نغٜلْ نجَرَيْمِ يٜىٰسٛ طٛعٛ؟ کٛو اٛنْ مبَاوَيْ طُمْ وَطَنَعٛنْ اِرِ بَڤْتِسْمَ تٛرَّ طُمْ اُمْ وَطَنْتَيَمْ يٜىٰسٛ طٛعٛ؟» ٻٜ مبِعِ، «اٜىٰ، مِنْ مبَاوَيْ؞» سٜيْ يٜىٰسُ وِعِٻٜ، «اٛنْ نجَرَيْ اِرِ جَرْدُغٜلْ تٛرَّ نغٜلْ نجَرَيْمِ، ندٜنْ طُمْ وَطَنَعٛنْ بَڤْتِسْمَ اِرِ طُمْ اُمْ وَطَنْتَيَمْ؞ اَمَّا جٛوطَاکِ اٜ جُنْغٛ اَمْ ݧَامٛ اٜ جُنْغٛ اَمْ نَنٛ نَاع مِنْ حٛکَّتَطُمْ؞ طٜعٜ بِغٜىٰجٜ طُمْ طٜ ٻٜنْ طٛنْ ٻٜ طُمْ سِرْيَنِيطٜ؞» ندٜ حٛرِيٻٜ تٛکُّٻٜ يٜىٰسُ سَڤّٛ نَنِ نٛنْ، ٻٜ ڤُطِّ مٛنَّنْکِ يَاکُبُ اٜ يَحَيَ؞ سٜيْ يٜىٰسُ نٛدِّٻٜ، وِعِٻٜ، «اٛنْ اَنْدِ ندٜرْ يِمْٻٜ نَاع يَحُودَنْکٛعٜنْ، يِمْٻٜ ٻٜ طُمْ اَنْدِرِ لَامُ اٜ کٛلَّ لَامُ سٜمْبٜ، ندٜنْ مَوْٻٜ مَٻّٜ اٜ کٛلَّ ٻُرَلْ؞ اَمَّا اٛنٛنْ، تٛع اٛنْ نغَطُ نٛنْ حَکُّندٜ مٛوطٛنْ؞ فُو غِطّٛ وَرْتَ مَوْطٛ ندٜرْ مٛوطٛنْ، دٛولٜ وَرْتَ جَغَّنْتٛوطٛعٛنْ؞ کَدِنْ فُو غِطّٛ وَرْتَ اَرْدِيطٛ، دٛولٜ اٛ وَرْتَ مَشُّطٛ کٛو مٛيٜ؞ نغَمْ ٻِي نٜطّٛ وَرِي نَاع نغَمْ اٛ جَغَّنٜىٰ، اَمَّا نغَمْ اٛ جَغَّنٛو يِمْٻٜ، اٛ حٛکَّ يٛنْکِ مَاکٛ نغَمْ رِمْطِنْکِ طُطْٻٜ؞» سٜيْ ٻٜ نجٛتِّي غَرِيرِ جٜرِيکٛ؞ يٜىٰسُ اٜ تٛکُّٻٜمٛ حَوْتِ اٜ يِمْٻٜ طُطْٻٜ اٜ مبُرْتٛو غَرِيرِ جٜرِيکٛ، غٛطّٛ بُمْطٛ تٛرٛتٛوطٛ اٜ جٛوطِي حَادٜ طَتَلْ؞ اِنْدٜ مَاکٛ بَرْتِمَاوُسْ، وَاتٛ ٻِي تِمَاوُسْ؞ ندٜ اٛ نَنِ يٜىٰسُ نَجَرَنْکٜىٰجٛ پَٻّٛتٛو، اٛ فُطِّ نٛدُّکِ اٜ سٜمْبٜ، اٜ مٛ وِعَ، «يٜىٰسُ، ٻِطّٛ دَوْدَ، يُرْمِنَنَمْ!» يِمْٻٜ طُطْٻٜ کَٻَنِمٛ مبِعِمٛ اٛ دٜعِّتَ، اَمَّا اٛ ٻٜيْدِ نٛدُّکِ اٜ سٜمْبٜ، اٜ مٛ وِعَ، «ٻِطّٛ دَوْدَ، يُرْمِنَنَمْ!» سٜيْ يٜىٰسُ دَرِي، وِعِ، «نٛدَّنٜىٰيَمّٛ؞» ٻٜ نٛدِّ بُمْطٛ اٛنْ، ٻٜ مبِعِمٛ، «نَنُ بٜلْطُمْ! اُمَّ! اٜ مٛ نٛدُّمَا؞» سٜيْ اٛ حُبِنِ شُدَّارِ مَاکٛ، اٛ اُمِّي جَوْطُمْ، اٛ يَحِ تٛ يٜىٰسُ؞ سٜيْ يٜىٰسُ پَمِمٛ، وِعِ، «طُمٜ نغِطَّا مِ وَطَنْمَا؟» بُمْطٛ اٛنْ نٛوتِي وِعِ، «مٛودِبّٛ، اٜ مِ يِطِ مبُمْتِنَايَمْ؞» سٜيْ يٜىٰسُ وِعِمٛ، «دِلُّ؞ حٛولَارٜ مَاطَ يَمْطِتِنِيمَ؞» طٛنْ اٜ طٛنْ غِتٜ مَاکٛ مبُمْتِ، اٛ تٛکِّ يٜىٰسُ، ٻٜ ندِلِّدِ؞ ندٜ ٻٜ ٻَدِي اُرُشَلِيمَ، تٛ غَرِيجٜ بٜتَفَاجِ اٜ بٜتَنِ تٛ حٛشّٜىٰرٜ ندٜ لٜطّٜ جَيْتُنْ، سٜيْ يٜىٰسُ لِلِ تٛکُّٻٜمٛ طِطٛ، اٛ وِعِٻٜ، «نَتّٜىٰ غَرِيٜلْ غٛنْغٜلْ يٜىٰسٛ مٛوطٛنْ؞ اٜ نَتُّکِ مٛوطٛنْ، اٛنْ تَوَيْ مبَبَّ مٛلَ اٜ نغَ حَٻِّي، طُمْ مٜىٰطَايِ وَطَّاکِنغَ؞ ڤِتّٛيٜىٰنغَ نغَدّٛنْغَ طٛعٛ؞ تٛ غٛطّٛ پَمِيعٛنْ، ‹کٛ وَطِ ڤِتّٛتٛنْغَ؟› مبِعٜىٰمٛ، ‹مٛودِبّٛ اٜ يِطِ حُوتِرْکِنغَ، اٛ وَطَيْ طُمْ وَرْتِرَنغَ نَاع کٛ نٜىٰٻِ؞› » سٜيْ ٻٜ نجَحِ ٻٜ تَوِ مبَبَّ مٛلَ نغَنْ اٜ حَٻِّي تٛ دَمُّغَلْ، حَادٜ طَتَلْ؞ اٜ ٻٜ ڤِتَّنغَ، سٜيْ وٛٻّٜ دَرِيٻٜ طٛنْ پَمِٻٜ مبِعِ، «نغَمْ طُمٜ ڤِتّٛتٛنْغَ؟» کَمْٻٜ بٛو ٻٜ مبِعِٻٜ کٛ يٜىٰسُ وِعِ، سٜيْ يِمْٻٜ ٻٜنْ اَلِٻٜ ٻٜ ندِلِّدِ اٜ مَاغَ؞ ٻٜ نجَارَنِنغَ يٜىٰسُ، ٻٜ مبٜعِّتِ شُدَّارِ مَٻّٜ دٛوْ مَغَّ؞ يٜىٰسُ وَطِّينغَ؞ سٜيْ يِمْٻٜ طُطْٻٜ مبٜعِّتِ شُدَّارِ مَٻّٜ دٛوْ طَتَلْ، وٛٻّٜ بٛو مبٜعِّتِ حَاکٛ کٛ ٻٜ نغٜوٛيِ تٛ سَابٜىٰرٜ؞ يِمْٻٜ وٛنْٻٜ يٜىٰسٛ مَاکٛ اٜ وٛنْٻٜ غَطَ مَاکٛ، اٜ ٻٜ مبِعَ اٜ سٜمْبٜ، «حٛسَانَ! اٛ بَرْکِطِنَاطٛ اٛنْ طٛنْ غَرٛيْطٛ ندٜرْ اِنْدٜ جٛومِرَاوٛ! لَامُ مَامَ مٜىٰطٜنْ دَوْدَ غَرَيْطُمْ طُمْ بَرْکِطِنَاطُمْ! اٜنْ مَنْتُ اَللَّه مٛ دٛوْ!» سٜيْ يٜىٰسُ نَتِّ اُرُشَلِيمَ، اٛ نَتِّ وُرٛ شٜنِينغٛ، اٛ رَارِ کٛو طُمٜ غَطٜتٜىٰطُمْ طٛنْ؞ نغَمْ نَانغٜ حِيرِي، سٜيْ اٛ وُرْتِي، اٛ دِلِّ بٜتَنِ کَنْکٛ اٜ تٛکُّٻٜمٛ سَڤّٛ اٜ طِطٛ؞ ندٜ وٜىٰتِ، اٜ ٻٜ اَلَ بٜتَنِ، يٜىٰسُ نَنِ وٜىٰلٛ؞ اٛ حَيْنِي لٜکِّ اِبِّ غٛودُکِ حَاکٛ، اٛ يَحِ اٛ يِعَ کٛو اٛ حٜٻَيْ اِبّٜ تٛ مَاکِ؞ ندٜ اٛ يٛتِّي تٛ مَاکِ، اٛ تَوَايِ غٛطُّمْ سٜيْ حَاکٛ، نغَمْ نَاع طُمْ شَرٜلْ ٻِکّٛيْ مَاکِ؞ سٜيْ اٛ وِعِ لٜکِّ کِنْ، «تٛع کٛو مٛيٜ ٻٜيْدَ ݧَامُکِ ٻِکّٛيْ دَغَ تٛ مَاطَ!» تٛکُّٻٜمٛ بٛو نَنِي کٛ اٛ وِعِ؞ ندٜ ٻٜ نَتِّ اُرُشَلِيمَ، يٜىٰسُ نَتِّ وُرٛ شٜنِينغٛ، سٜيْ اٛ فُطِّ رِيوُکِ سٛورٛوٻٜ اٜ سٛودٛوٻٜ ندٜرْ مَغّٛ؞ اٛ تَلِّ تٜىٰبُرْجِ غَيْلِتٛوٻٜ شٜىٰدٜ رٛومَنْکٛعٜنْ يَاکِ شٜىٰدٜ وُرٛ شٜنِينغٛ اٜ جٛوطٛرْلٜ شٛورٛوٻٜ ڤٛولِ؞ اٛ حَطِ کٛو مٛيٜ پَٻّٛدٛو اٜ دٛنْغَلْ ندٜرْ نجَيْرِ وُرٛ شٜنِينغٛ؞ اٛ وِعِٻٜ، «طُمْ وِنْدَامَ، اَللَّه وِعِي، ‹طُمْ نٛدِّرَيْ وُرٛ اَمْ وُرٛ دٛعَارٜ نغَمْ لٜپِّ فُو،› اَمَّا اٛنٛنْ اٛنْ نغَرْتِرِينغٛ لُورٛ وُيْٻٜ؞» مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ نَنِ کٛ يٜىٰسُ وَطِ، سٜيْ ٻٜ نغَطِ کَ طَٻُّتُکِ لَاوٛلْ نٛ ٻٜ مبَرْدَتَمٛ؞ اٜ ٻٜ کُلَمٛ، نغَمْ يِمْٻٜ فُو کَيْطِنِ اٜ اٜکِّتِنٛلْ مَاکٛ؞ ندٜ نَانغٜ حِيرِ، يٜىٰسُ اٜ تٛکُّٻٜمٛ مبُرْتِي غَرِيرِ ندِنْ؞ سُبَکَ اٜ ٻٜ پَٻّٛو، سٜيْ ٻٜ نغِعِ لٜکِّ اِبِّ کِنْ يٛورِي حَا اٜ طَطِ مَاکِ؞ بِيتُرُسْ سِفْتٛرِ وِعِ يٜىٰسُ، «مٛودِبّٛ، رَارُ! اِبِّ کِنْ طٛنْ کِ لَانُطَا کِ يٛورِي؞» يٜىٰسُ نٛوتِي وِعِٻٜ، «کٛولٜىٰ اَللَّه؞ اٜ مِ وِعَعٛنْ غٛونغَ، تٛ غٛطّٛ وِعِي حٛشّٜىٰرٜ ندٜعٜ، ‹دِلُّ، کُبٛطَا حٛورٜ مَاطَ ندٜرْ مبٜىٰلَ،› تٛ اٛ وَطَايِ سٜکٛ ندٜرْ ٻٜرْندٜ مَاکٛ، اَمَّا اٛ حٛولِي کٛ اٛ وِعِ طُمْ وَطَيْ، طُمْ وَطَنَيْمٛطُمْ؞ نغَمْ نٛنْ اٜ مِ وِعَعٛنْ، فُو کٛ تٛرِيطٛنْ ندٜرْ دٛعَارٜ، کٛولٜىٰ اٛنْ کٜٻِيطُمْ، ندٜنْ طُمْ وَرْتَيْ طُمْ مٛوطٛنْ؞ طٛنْمَا يٜىٰسُ اٜ تٛکُّٻٜمٛ نَتِّ اُرُشَلِيمَ؞ يٜىٰسُ اٜ يِيلٛو ندٜرْ وُرٛ شٜنِينغٛ، سٜيْ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ مَوْٻٜ يِمْٻٜ نغَرِ تٛ مَاکٛ؞ ٻٜ مبِعِمٛ، «اٜ لَامُ مٛيٜ نغَطَتَا کُوطٜ طٜعٜ؟ مٛيٜ حٛکُّمَا لَامُ وَطُکِطٜ؟» يٜىٰسُ نٛوتِي وِعِٻٜ، «مِ پَمَيْعٛنْ پَمٛلْ غٛعٛ؞ نٛوتَنٜىٰيَمْ، ندٜنْ مِ وِعَيْعٛنْ اٜ طُمٜ لَامُ نغَطِرَيْمِ کُوطٜ طٜعٜ؞ بَڤْتِسْمَ طُمْ يَحَيَ وَطِ، تٛ اَللَّه طُمْ پِوٛيِ، کٛو تٛ يِمْٻٜ طُمْ پِوٛيِ؟ نٛوتَنٜىٰيَمْ!» سٜيْ ٻٜ مٜدِّ حَکُّندٜ مَٻّٜ، ٻٜ مبِعِ، «تٛ اٜنْ مبِعِي، ‹دَغَ تٛ اَللَّه طُمْ پِوٛيِ،› اٛ وِعَيْ، ‹کٛ وَطِ اٛنْ جَٻَايِ کٛ اٛ وِعِ؟› اَمَّا تٛ اٜنْ مبِعِي، ‹تٛ يِمْٻٜ طُمْ پِوٛيِ…› » ٻٜ مبِعُ نٛنْ نغَمْ اٜ ٻٜ کُلَ يِمْٻٜ، نغَمْ کٛو مٛيٜ جَٻِي يَحَيَ اٛ اَنَّبِيجٛ؞ سٜيْ ٻٜ نٛوتِي ٻٜ مبِعِ يٜىٰسُ، «مِنْ اَنْدَا؞» يٜىٰسُ وِعِٻٜ، «نٛنْ مِنْ مَا، مِ وِعَتَاعٛنْ کٛو اٜ طُمٜ لَامُ نغَطِرَيْمِ کُوطٜ طٜعٜ؞» سٜيْ يٜىٰسُ فُطِّ مٜتِرَنْکِٻٜ اٜ مِسَالُ، وِعِ، «غٛطّٛ نٜطّٛ وَطِ نغٜسَ اِنَبٛوجٜ، اٛ حٛوِکَ، اٛ وَسِ نغَيْکَ مَوْکَ ندٜرْ تَفَارٜ نغَمْ مٛيْلُکِ ندِيَمْ دَغَ ندٜرْ اِنَبٛوجٜ طٜنْ، اٛ مَحِ سُودُ تٛوْندُ نغَمْ رٜىٰنُکِ نغٜسَ کَنْ؞ سٜيْ اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ؞ ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّطٛ مَاکٛ تٛ يِمْٻٜ ٻٜ اٛ حٛکِّ نغٜسَ کَنْ نغَمْ اٛ جَٻَنٛيَمٛ کٛ ٻٜ نغَادُنٛو ندٜرْ کٛ ٻٜنْدِ؞ اَمَّا ٻٜ نَنْغِ مَشُّطٛ اٛنْ، ٻٜ ڤِيِمٛ، ٻٜ ندِيوِمٛ کٛو کٛ ٻٜ کٛکِّمٛ؞ سٜيْ جٛومُ نغٜسَ اٛنْ فُطِّتِ لِلِ غٛطّٛ مَشُّطٛ تٛ مَٻّٜ، کَنْکٛ مَا ٻٜ ڤِيَنِمٛ حٛورٜ، ٻٜ کُطِکُطِنِمٛ؞ سٜيْ اٛ فُطِّتِ اٛ لِلِ غٛطّٛ مَشُّطٛ، کَنْکٛ بٛو ٻٜ مبَرِمٛ؞ اٛ لِلِلِلِنِي مَشُّٻٜ طُطْٻٜ؞ ٻٜ ڤِيِ وٛٻّٜ، ٻٜ مبَرِ وٛٻّٜ؞ جٛومُ نغٜسَ کَنْ اٜ وٛودِ غٛعٛتٛ مٛ اٛ لِلَايِ، وَاتٛ ٻِطّٛ مَاکٛ مٛ اٛ يِطِ؞ غَطَ مَاجُمْ فُو اٛ لِلِ ٻِطّٛ اٛنْ تٛ مَٻّٜ، اٛ وِعِ، ‹ٻٜ کٛکَّيْ ٻِطّٛ اَمْ مَنْغُ؞› اَمَّا ٻٜ اٛ حٛکِّ نغٜسَ ٻٜنْ مبِعِ حَکُّندٜ مَٻّٜ، ‹تٛو! رَا دٛنٛووٛ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞› سٜيْ ٻٜ نَنْغِمٛ ٻٜ مبَرِمٛ، ٻٜ ڤَطِّمٛ غَطَ نغٜسَ کَنْ؞ «تٛو، کٛ جٛومُ نغٜسَ کَنْ وَطَتَ؟ اٛ وَرَيْ اٛ حَلْکَٻٜ، اٛ حٛکَّ وٛٻّٜ نغٜسَ کَنْ؞ اٛنْ مٜىٰطَايِ جَنْغُکِ کٛ اَايَارٜ وِعِ؟ ندٜ وِعِي، ‹حَيْرٜ ندٜ مَحٛوٻٜ نغَݧِ کَيْرٜ وَرْتِ حَيْرٜ ٻُرْندٜ دَرْنُکِ مَادِ؞ طُعُمْ طُمْ کُوغَلْ جٛومِرَاوٛ، طُمْ کَيْطِنِيطُمْ تٛ مٜىٰطٜنْ؞› » دَغَ طٛنْ سٜيْ مَوْٻٜ ٻٜنْ طَٻِّتِ لَاوٛلْ نٛ ٻٜ نَنْغِرْتَمٛ، نغَمْ اٜ ٻٜ اَنْدِ دٛوْ مَٻّٜ اٛ حٛکِّ مِسَالُ طُمْ، اَمَّا اٜ ٻٜ کُلَ يِمْٻٜ؞ نغَمْ نٛنْ ٻٜ اَلِمٛ، ٻٜ ندِلِّ؞ غَطَ مَاجُمْ ٻٜ لِلِ وٛٻّٜ فَارِسَنْکٛعٜنْ اٜ وٛٻّٜ يِمْٻٜ حِرُدُسْ تٛ يٜىٰسُ نغَمْ ٻٜ کٜٻَ کٛ ٻٜ نَنْغِرْتَمٛ ندٜرْ مٜتٛ مَاکٛ؞ ٻٜ نغَرِ تٛ يٜىٰسُ، ٻٜ مبِعِمٛ، «مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ؞ اَ حٛلَّتَا فٜىٰرٛوتِرٛلْ حَکُّندٜ يِمْٻٜ، نغَمْ اَ حٛشِّي يِمْٻٜ فُو اٜ ڤٛتِّدِ؞ طٛنْمَا اَ اٜکِّتِنَ لَاوٛلْ اَللَّه اٜ غٛونغَ؞ تٛو، وِعُمِنْ، اٜ طُمْ حَانِ مِنْ نجٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، کٛو طُمْ حَانَايِ؟ مِنْ نجٛٻَ شٜىٰدٜ لٜيْدِ، کٛو تٛع مِنْ نجٛٻَ؟» اَمَّا يٜىٰسُ اٜ اَنْدِ اٜ ٻٜ نغِطِ پٛيْرُکِمٛ، سٜيْ اٛ وِعِٻٜ، «نغَمْ طُمٜ ڤٛوندٛتٛنْيَمْ؟ نغَدَّنٜىٰيَمْ يَمْندٜ اَجُرْفَارِ مِ رَارَندٜ؞» ٻٜ نغَدَّنِمٛ يَمْندٜ غٛعٛ؞ اٛ وِعِٻٜ، «طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟» ٻٜ نٛوتِي ٻٜ مبِعِ، «طُمْ کَيْسَرْ؞» سٜيْ يٜىٰسُ وِعِٻٜ، «تٛو، کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞» سٜيْ اٛ حَيْطِنِٻٜ نَاع سٜطَّ؞ سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ وٛٻّٜ مَٻّٜ نغَرِ تٛ يٜىٰسُ، ٻٜ پَمِمٛ، ٻٜ مبِعِ، «مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سَکِرَاوٛ مَاکٛ سٜيْ تٜعَمٛ نغَمْ حٜٻَنَ مَيْطٛ اٛنْ ٻِٻّٜ؞ تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ؞ اَفٛ اٛنْ تٜعِ، مَايِ، اَلِ دٜبّٛ وَلَا ٻِطّٛ؞ سٜيْ طِطَٻٛ اٛنْ تٜعِ دٜبّٛ اٛنْ؞ کَنْکٛ مَا اٛ مَايِ، اٛ اَلِ دٜبّٛ اٛنْ وَلَا ٻِطّٛ؞ تَتَٻٛ اٛنْ مَا نٛنْ؞ ٻٜ فُو نجٛوٜىٰطِطٛ ٻٜنْ ٻٜ تٜعِي دٜبّٛ اٛنْ، ٻٜ مَايِ، ٻٜ اَلِمٛ وَلَا ٻِطّٛ؞ غَطَ طٛنْ دٜبّٛ اٛنْ مَا مَايِ؞ تٛو، ݧَلْندٜ ندٜ مَيْٻٜ اُمّٛتٛو، دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو نجٛوٜىٰطِطٛ ٻٜ تٜعِيمٛ؞» سٜيْ يٜىٰسُ نٛوتِي وِعِٻٜ، «اٛنْ مبٛوفِي نغَمْ اٛنْ اَنْدَا کٛ اَايَاجٜ مبِعِ، ندٜنْ اٛنْ اَنْدَا بَوْطٜ اَللَّه؞ تٛ مَيْٻٜ اُمَّکٜ دَغَ مَيْدٜ، وَلَا تٜعَيْطٛ وَلَا تٜعٜتٜىٰطٛ، اَمَّا ٻٜ نغَرْتَيْ بٛ مَلَاعِکَعٜنْ اَللَّه؞ ندٜنْ دٛوْ اُمَّاکِ مَيْٻٜ دَغَ مَيْدٜ، اٛنْ جَنْغَايِ دٜفْتٜرٜ مُوسَ دٛوْ حَبَرُ لٜغّٜلْ غٛودُنغٜلْ حِيتٜ؟ اَللَّه وِعِيمٛ، ‹مِنْ وٛنِ اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞› کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞ اٛنْ مَجِّ نَاع سٜطَّ!» غٛعٛتٛ ندٜرْ مٛودِٻّٜ اَتَّوْرَ وَرِ نَنِ اٜ ٻٜ نغٜدّٛوتِرَ حَکُّندٜ مَٻّٜ؞ ندٜ اٛ نَنِ يٜىٰسُ نٛوتَنَکٜٻٜ بٛطُّمْ، سٜيْ اٛ پَمِ يٜىٰسُ، اٛ وِعِ، «ندٜرْ دٛوکَاجِ طِ اَللَّه وَطِ، طُمٜ ٻُرِ مَنْغُ؟» يٜىٰسُ نٛوتِي وِعِ، «ٻُرْطُمْ مَنْغُ وٛنِ، ‹يِمْٻٜ اِسْرَاعِيلَ نَنٜىٰ، اَللَّه جٛومِرَاوٛ مٜىٰطٜنْ اٛ جٛومِرَاوٛ غٛعٛتٛ؞ يِطُ اَللَّه جٛومِرَاوٛ مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ حَکِّيلٛ مَاطَ فُو، اٜ سٜمْبٜ مَاطَ فُو؞› طِطَٻُمْ بٛو وٛنِ، ‹يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞› ندٜرْ دٛوکَاجِ طِ اَللَّه وَطِ وَلَا ٻُرْطُمْ طِعِ طِطِ؞» سٜيْ مٛودِبّٛ اَتَّوْرَ اٛنْ وِعِ، «مٛودِبّٛ، اَ وِعِي غٛونغَ ندٜ مبِيطَا اَللَّه اٛ غٛعٛتٛ، وَلَا غٛطّٛ سٜيْ کَنْکٛ تَنْ؞ نٜطّٛ يِطَمٛ اٜ ٻٜرْندٜ مُوطُمْ فُو، اٜ فَامُ مُوطُمْ فُو، اٜ سٜمْبٜ مُوطُمْ فُو، ندٜنْ يِطَ بَنْدِرَاوٛ مُوطُمْ نٛ يِطِرِ حٛورٜ مُوطُمْ، طُمْ ٻُرِي مَرْلٜ غُلَنْتٜىٰطٜ اَللَّه اٜ فُو کٛ طُمْ سَکَّنْتَمٛ؞» ندٜ يٜىٰسُ نَنِ اٛ نٛوتٛرَکٜ فَامُ، سٜيْ وِعِمٛ، «غٛونغَ اَ وٛطِّدَا اٜ لَامُ اَللَّه؞» غَطَ مَاجُمْ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞ يٜىٰسُ اٜ اٜکِّتِنَ ندٜرْ نجَيْرِ وُرٛ شٜنِينغٛ، سٜيْ اٛ پَمِ، اٛ وِعِ، «نغَمْ طُمٜ مٛودِٻّٜ اَتَّوْرَ اٜ مبِعَ اَلْمَسِيحُ اٛ ٻِطّٛ دَوْدَ؟ نغَمْ دَوْدَ اٜ حٛورٜ مُوطُمْ، ندٜرْ بَوْطٜ رُوحُ اَللَّه اٛ وِعِي، ‹جٛومِرَاوٛ وِعِي جٛومِرَاوٛ اَمْ، «جٛوطَ تٛ جُنْغٛ اَمْ ݧَامٛ، نَا مِ وَطِي اَ يَاٻِي وَݧْوَݧْٻٜ مَاطَ؞» › دَوْدَ اٜ حٛورٜ مُوطُمْ نٛدِّرِيمٛ جٛومِرَاوٛ؞ تٛو، نٛ وَطَتَ اَلْمَسِيحُ وَرْتَ ٻِطّٛ دَوْدَ؟» يِمْٻٜ طُطْٻٜ کَوْرُتُٻٜ کٜتِّندَنِيمٛ ندٜرْ وٜلْوٜلٛ؞ يٜىٰسُ اٜ اٜکِّتِنَ، وِعِ، «ڤَامَنٜىٰ مٛودِٻّٜ اَتَّوْرَ، غِطُٻٜ يِيلَاکِ اٜ ٻٛرْنِي تٛغّٛحٛ نجُوتُکٛ، غِطُٻٜ حٛوْنِرٜىٰکِ مَنْغُ ندٜرْ لُومٛ؞ اٜ ٻٜ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ اٜ جٛوطٛرْلٜ مَوْٻٜ تٛ حُمْتٛ؞ کَمْٻٜ نغٛنِ ݧَامٛوٻٜ جَوْدِ رٜوْٻٜ ٻٜ وٛرْٻٜ مُعّٜنْ مَايِ حَا اٜ غُرٜ مَٻّٜ، اٜ ٻٜ نغَطَ دٛعَارٜ جُوتُندٜ نغَمْ طُمْ يِعَٻٜ؞ اِرِ ٻٜنْ طٛنْ يِمْٻٜ طُمْ وَطَنَيْٻٜ کِيتَ ٻُرْکَ حَلُّکِ؞» يٜىٰسُ جٛوطِي ندٜرْ وُرٛ شٜنِينغٛ حَادٜ تٛ طُمْ حٛکَّتَ شٜىٰدٜ نغَمْ اَللَّه؞ اٜ مٛ رَارَ يِمْٻٜ اٜ ٻٜ نغَطَ شٜىٰدٜ مَٻّٜ ندٜرْ تٛ طُمْ حٛکَّتَ شٜىٰدٜ نغَمْ اَللَّه؞ رِسْکُٻٜ طُطْٻٜ نغَطِ شٜىٰدٜ طُطّٜ ندٜرْ؞ سٜيْ رَا غٛطّٛ دٜبّٛ مٛ وَلَنَا مٛ غٛرْکٛ مُوطُمْ مَايِ؞ اٛ وَرِ اٛ وَطِ شٜىٰدٜ نجَمْکٛيْ طِطٛيْ کٛيْ نجَمْندِ مبٛطٜىٰرِ ندٜرْ؞ طُمْ شٜىٰدٛيْ سٜطَّنَحٛيْ تَنْ؞ سٜيْ يٜىٰسُ نٛدِّ تٛکُّٻٜمٛ، وِعِٻٜ، «اٜ مِ وِعَعٛنْ غٛونغَ، اٛعٛ دٜبّٛ مٛ وَلَنَا، کٛ اٛ حٛکِّ طُمْ ٻُرِي کٛ حٛرِيٻٜ فُو کٛکِّ؞ نغَمْ کَمْٻٜ ٻٜ کٛکِّ دَغَ ندٜرْ رِسْکُ مَٻّٜ؞ اَمَّا کَنْکٛ بٛو، دَغَ ندٜرْ شِيَ مَاکٛ، اٛ حٛکِّ فُو کٛ اٛ وٛودِ، وَاتٛ کٛو طُمٜ طُمْ اٛ مَرٛرْتٛو؞» يٜىٰسُ اٜ وُرْتٛيٛو وُرٛ شٜنِينغٛ، سٜيْ غٛعٛتٛ ندٜرْ تٛکُّٻٜمٛ وِعِمٛ، «مٛودِبّٛ، رَارُ کَاپٜ مَوْطٜ طٜ طُمْ مَحِرِ وُرٛ نغٛعٛ! رَارُ نٛ مَادِ ندِنْ وٛوطِرِ؞» سٜيْ يٜىٰسُ وِعِمٛ، «اَ يِعِي ندِعِ مَادِ مَوْندِ؟ وَلَا وٛنْدٜ حَيْرٜ اَلٜتٜىٰندٜ دٛوْ وٛنْدٜ؞ طٜ فُو طُمْ سَنْکِتَيْطٜ؞» يٜىٰسُ اٜ جٛوطِي دٛوْ حٛشّٜىٰرٜ ندٜ لٜطّٜ جَيْتُنْ دَارَيْندٜ وُرٛ شٜنِينغٛ، سٜيْ بِيتُرُسْ، اٜ يَاکُبُ، اٜ يَحَيَ، اٜ اَنْدِرَاوُسْ ٻٜ نجَحِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، «وِعُمِنْ، ندٜيٜ فِي طُعُمْ وَطَتَ؟ طُمٜ وٛنِ کٛ حٛلَّتَ فُو فِي طُعُمْ ٻَدَکٜ حٜىٰوَ؟» سٜيْ يٜىٰسُ وِعِٻٜ، «ڤَامٜىٰ تٛع غٛطّٛ مَجِّنَعٛنْ؞ يِمْٻٜ طُطْٻٜ نٛدِّرَيْ کٛعٜ مَٻّٜ اِنْدٜ اَمْ، ٻٜ مبِعَ ‹مِنْ وٛنِ اَلْمَسِيحُ،› ٻٜ مَجِّنَ يِمْٻٜ طُطْٻٜ؞ تٛ اٛنْ نَنِي حَبَرُ کٛنُوجِ غَطٜتٜىٰطِ حَادٜ مٛوطٛنْ، اٜ کٛنُوجِ غَطٜتٜىٰطِ ٻَدَاکِ، تٛع اٛنْ کُلُ؞ دٛولٜ طُعُمْ وَطَ، اَمَّا رٜعُکِ دُونِيَارُ اٜ حٛرِي تَوْ؞ لٜݧٛلْ اُمَّنْتٛ لٜݧٛلْ، لَامُ اُمَّنْتٛ لَامُ؞ طُمْ وَطَيْ وٜىٰلٛ کَلُّنغٛ اٜ دِمْبٛلْ لٜيْدِ تٛ بِغٜىٰجٜ فٜىٰرٜ‑فٜىٰرٜ؞ طُعُمْ طُمْ فُطّٛودٜ تٛرَّاجِ غَرَيْطِ؞ «اَمَّا ڤَامَنٜىٰ کٛعٜ مٛوطٛنْ؞ ٻٜ نغَطَيْعٛنْ ندٜرْ جُوطٜ مَوْٻٜ شُوطِ دٛعَارٜ، طُمْ ڤِيَعٛنْ ندٜرْ شُوطِ دٛعَارٜ طِنْ؞ نغَمْ اٛنْ تٛکُّٻٜيَمْ طُمْ يَارَيْعٛنْ يٜىٰسٛ مَوْٻٜ لٜيْدِ اٜ لَامِيٻٜ، نٛنْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ؞ اَمَّا کٛ رٜعِرْدٜ دُونِيَارُ وَرَ، دٛولٜ طُمْ اَرْتَ وَعَجِنْکِ حَبَرُ بٜلْطُمْ ندٜرْ فُو لٜپِّ دُونِيَارُ؞ فُو شَرٜلْ نغٜلْ طُمْ نَنْغِعٛنْ طُمْ يَارِعٛنْ يٜىٰسٛ لَامُ، تٛع اٛنْ نغَنُّ دٛوْ کٛ مبِعٛتٛنْ؞ اٜ شَرٜلْ نغٜلْ اَللَّه حٛکَّيْعٛنْ کٛ مبِعٛتٛنْ، سٜيْ مبِعٛنْکَ؞ نغَمْ نَاع طُمْ اٛنٛنْ مٜتَتَ، اَمَّا طُمْ رُوحُ اَللَّه؞ نٜطّٛ حٛکِّتِرَيْ سَکِرَاوٛ مُوطُمْ طُمْ وَرَمٛ، ݧَاکٛ مَا حٛکِّتِرَيْ ٻِطّٛ مُوطُمْ؞ ٻِٻّٜ اُمَّنْتٛ دَݧٛوٻٜ مَٻّٜ، ٻٜ نغَطَ طُمْ وَرَٻٜ؞ کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ اَمَّا مُݧُطٛ حَا رٜعِرْدٜ حِسَيْ؞ «شَرٜلْ اٜ وَرَ نغٜلْ نغِعٛتٛنْ ‹نٜفْنِيطُم› غَرْتِرٛوجُمْ وُرٛ شٜنِينغٛ نغٛ لَاٻَا اٜ دَرِي تٛ وِغٜىٰرٜ ندٜ حَانَا؞ فُو جَنْغٛووٛ فَامَ مَعَنَ مَاجُمْ؞ اٜ شَرٜلْ نغٜلْ وٛنْٻٜ ندٜرْ لٜيْدِ يَحُودِيَ ندٛغَّ نَتّٛيَ کٛشّٜىٰجٜ؞ غٛنْطٛ دٛوْ سُودُ تٛع جِڤّٛيٛو کٛو نَتَّ وُرٛ نغَمْ حٛشُّکِ غٛطُّمْ؞ غٛنْطٛ تٛ نغٜسَ تٛع سٛعّٛ حٛشَّ شُدَّارِ مُوطُمْ؞ رٜوْٻٜ غٛودُٻٜ دٜىٰطِ اٜ مُسِنْتٜىٰٻٜ ٻٜ تٛرّٛتٛ نَاع سٜطَّ ندٜرْ طٜنْ طٛنْ بَلْطٜ! نغَطٜىٰ دٛعَارٜ تٛع فِي طُعُمْ وَطَ ندٜرْ ندُنْغُ؞ نغَمْ ندٜرْ طٜنْ طٛنْ بَلْطٜ طُمْ وَطَيْ تٛرَّ کَلُّکَ اِرِ کَ طُمْ مٜىٰطَايِ وَطُکِ دَغَ شَرٜلْ نغٜلْ اَللَّه تَغِ دُونِيَارُ حَا جٛونِ؞ طُمْ بٛو فُطِّتَتَا طُمْ وَطَ اِرِ کَنْ طٛنْ تٛرَّ؞ دَا جٛومِرَاوٛ اُسْتَايِ طٜنْ طٛنْ بَلْطٜ، دَا وَلَا غٛطّٛ کِسَيْطٛ؞ اَمَّا نغَمْ ٻٜنْ طٛنْ شُٻَاٻٜ مَاکٛ ٻٜ اٛ سُٻِ، اٛ اُسْتِي بَلْطٜ طٜنْ؞ «اٜ نغٜلْ طٛنْ شَرٜلْ تٛ غٛطّٛ وِعِيعٛنْ، ‹رَا اَلْمَسِيحُ طٛعٛ!› کٛو بٛو، ‹رَمّٛ طَاعٜ!› تٛع اٛنْ نجَٻُ؞ نغَمْ اَلْمَسِيحُعٜنْ فٜوْرٜ اٜ اَنَّبٛعٜنْ فٜوْرٜ ٻٜ مبُرْتٛيْتٛ ٻٜ نغَطَ اَلَامَاجِ اٜ کُوطٜ کَيْطِنِيطٜ نغَمْ ٻٜ مَجِّنَ يِمْٻٜ، حَا اٜ شُٻَاٻٜ ٻٜنْ تٛ طُمْ وَطٛتٛ؞ ندَرٜىٰ، اٛنْ ندٜىٰنَ! مِ وِعِيعٛنْ کٛو طُمٜ کٛ شَرٜلْ نغٜلْ وَرَ؞ «اَمَّا ندٜرْ طٜنْ طٛنْ بَلْطٜ غَطَ کَنْ طٛنْ تٛرَّ کَلُّکَ، طُمْ ٻَلْوِنَيْ نَانغٜ، لٜوْرُ بٛو حٛکَّتَا جَيْنغٛلْ مَيْرُ؞ کٛودٜ نجَنٛيَيْ دَغَ دٛوْ، ندٜنْ کٛ وٛنِ دٛوْ فُو دِمْبٛتٛ؞ اٜ شَرٜلْ نغٜلْ طُمْ يِعَيْ ٻِي نٜطّٛ اٜ وَرَ ندٜرْ دُولٜ؞ اٛ وَرْدَيْ اٜ بَوْطٜ مَوْطٜ اٜ تٜدُّنغَلْ؞ اٛ لِلٛيَيْ مَلَاعِکَعٜنْ مَاکٛ ٻٜ کَوْرِتَ ٻٜ اٛ سُٻِ دَغَ کٛو تٛيٜ ندٜرْ دُونِيَارُ، دَغَ نغٛعٛلْ کٜىٰرٛلْ دُونِيَارُ يَاکِ نغٛلْ تٛنْ کٜىٰرٛلْ؞ «تٛو، اٜکِّتٜىٰ اٜکِّتِنٛلْ نغٛعٛلْ دَغَ تٛ لٜکِّ اِبِّ؞ تٛ لِشٜ مَاکِ ڤُطِّي وِلُتُکِ، اٛنْ اَنْدِ ندُنْغُ ٻَدَکٜ وٛنْ طٛنْ؞ نٛنْ مَا تٛ اٛنْ نغِعِي فِي طُعُمْ اٜ وَطَ، تٛو، اٛنْ اَنْدَيْ ٻِي نٜطّٛ ٻَدَکٜ وَرْتٛيَ، اٜ مٛ حَادٜ دَمُّغَلْ؞ اٜ مِ وِعَعٛنْ غٛونغَ، جَامَنُ طُعُمْ طُمْ رٜعَتَا نَا فُو فِي طُعُمْ وَطِي؞ دٛوْ اٜ لٜيْ پَٻّٛتٛ، اَمَّا بٛلِيطٜ اَمْ پَٻَّتَاکٛ حَا اَبَدَا؞ «وَلَا اَنْدُطٛ ندٜنْ طٛنْ ݧَلْندٜ کٛو نغٜلْ طٛنْ شَرٜلْ نغٜلْ فِي طُمْ طٛنْ وَطَتَ؞ کٛو مَلَاعِکَعٜنْ وٛنْٻٜ دٛوْ اَنْدَا، ٻِطّٛ اٛنْ مَا اَنْدَا، سٜيْ ݧَاکٛ مٛ دٛوْ تَنْ اَنْدِ؞ ڤَامٜىٰ، نجٛوطٜىٰ اٛنْ شِرْيِي، نغَمْ اٛنْ اَنْدَا کٛ شَرٜلْ نغٜلْ وَرَتَ؞ طُمْ بٛ نٜطّٛ غَطُطٛ يَادُ؞ ندٜ اٛ وَرِ دِلُّکِ اٛ اَلِ وُرٛ مَاکٛ ندٜرْ جُوطٜ مَشُّٻٜ مَاکٛ، اٛ حٛکِّ کٛو مٛيٜ کُوغَلْ نغَلْ وَطَتَ، اٛ وِعِ دٜىٰنٛووٛ دَمُّغَلْ نغَلْ اٛ دَرٛو اٜ مٛ رٜىٰنَ؞ نغَمْ نٛنْ، نجٛوطٜىٰ اٛنْ ندٜىٰنَ نغَمْ اٛنْ اَنْدَا شَرٜلْ نغٜلْ جٛومُ وُرٛ نغٛنْ وَرْتٛيْتَ، کٛو طُمْ فُتُرٛ، کٛو طُمْ شَکَ جٜمَّ، کٛو طُمْ فَجِرِ، کٛو طُمْ سُبَکَ؞ تٛ اٛ وَرْتِي وَلَا اَنْدُطٛ، تٛع اٛ تَوَ اٛنْ طَانِي؞ کٛ مبِيمِعٛنْ، اٜ مِ وِعَکَ کٛو مٛيٜ، کَنْجُمْ وٛنِ نجٛوطٜىٰ اٛنْ شِرْيِي!» حٛرِي بَلْطٜ طِطِ طُمْ وَطَ حُمْتٛ سَکِّنْکِ اٜ حُمْتٛ بُرٛودِ طُمْ وَلَا پُوفِنِرْطُمْ؞ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ طَٻِّتَ لَاوٛلْ نٛ ٻٜ نَنْغِرْتَ يٜىٰسُ اٜ سُوطٜ ٻٜ مبَرَمٛ؞ ٻٜ مبِعِ، «اَمَّا نَاع نِ شَرٜلْ حُمْتٛ، نغَمْ تٛع يِمْٻٜ اُمِّنَ حَوْرٜ؞» يٜىٰسُ اٜ ندٜرْ غَرِيرِ بٜتَنِ تٛ وُرٛ سِيمَنْ غٛودُطٛ ݧَوُ ݧَامٛوجُمْ لَرَلْ؞ اٜ مٛ ݧَامَ ݧَمْندُ، سٜيْ غٛطّٛ دٜبّٛ وَرِ اٜ جٛغِي جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ مبٜلْطَمْ طَمْ طُمْ وَطِرِ نَرْدِ غٛودُطَمْ شٜىٰدٜ؞ سٜيْ اٛ مَٻِّتِنغٜلْ، اٛ وَيْلِ نٜبَّمْ طَمْ دٛوْ حٛورٜ يٜىٰسُ؞ وٛٻّٜ غٛنْٻٜ طٛنْ ٻٜ مٛنِّ ٻٜ مبِعِ حَکُّندٜ مَٻّٜ، «نغَمْ طُمٜ اٛ وٛنِّ نٜبَّمْ طَعَمْ نِحِ؟ دَا طَمْ سٛورَامَ، دَا طُمْ حٜٻِي شٜىٰدٜ ٻُرْطٜ طٜ طُمْ يٛٻَتَ کُوٛووٛ حِتَاندٜ غٛعٛ، طُمْ حٛکَّطٜ ٻٜ نغَلَنَا؞» ٻٜ کَٻَنِ دٜبّٛ اٛنْ سٜمْبٜىٰ؞ اَمَّا يٜىٰسُ وِعِٻٜ، «اَلٜىٰمٛ؞ نغَمْ طُمٜ نغَنّٛتٛنْمٛ؟ کٛ اٛ وَطَنِيَمْ طُمْ بٛطُّمْ؞ کٛو ندٜيٜ ٻٜ نغَلَنَا اٜ نغٛنْدِ اٜ مٛوطٛنْ، اٛنْ مبَاوَيْ وَلُّکِٻٜ فُو شَرٜلْ نغٜلْ نغِطّٛنْ؞ اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞ اٛعٛ دٜبّٛ وَطِي کٛ اٛ وَاوَتَ وَطُکِ؞ اٛ وَيْلَنِي ٻَنْدُ اَمْ نٜبَّمْ نغَمْ سِرْيَاکِ اُوُکِيَمْ؞ اٜ مِ وِعَعٛنْ غٛونغَ، کٛو تٛيٜ تٛ طُمْ وَعَجِنِ حَبَرُ بٜلْطُمْ ندٜرْ دُونِيَارُ فُو، طُمْ حٛکَّيْ حَبَرُ کٛ دٜبّٛ اٛعٛ وَطِ نغَمْ سِفْتٛرْکِمٛ؞» سٜيْ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ بِعٜتٜىٰطٛ يَحُودَ اِسْکَرِيٛوتِ يَحِ تٛ مَوْٻٜ اَرْدِيٻٜ دِينَ نغَمْ حٛکِّتِرَ يٜىٰسُ ندٜرْ جُوطٜ مَٻّٜ؞ ٻٜ نَنِ بٜلْطُمْ نَاع سٜطَّ ندٜ ٻٜ نَنِ نٛنْ، ٻٜ نغَطِ اَلْکَوَلْ حٛکُّکِمٛ شٜىٰدٜ؞ نغَمْ نٛنْ، يَحُودَ فُطِّ طَٻُّتُکِ لَاوٛلْ نٛ حٛکِّتِرْتَ يٜىٰسُ ندٜرْ جُوطٜ مَٻّٜ؞ ݧَلْندٜ اَرَنْدٜىٰرٜ ندٜ حُمْتٛ بُرٛودِ طُمْ وَلَا پُوفِنِرْطُمْ، ݧَلْندٜ ندٜ طُمْ حِرْسَتَ کَرٛوجِ نغَمْ حُمْتٛ سَکِّنْکِ، تٛکُّٻٜ يٜىٰسُ پَمِمٛ، مبِعِ، «تٛيٜ نغِطَّا مِنْ نجَحَ مِنْ شِرْيَنٛمَا نغَمْ ݧَامٜنْ ݧَمْندُ حُمْتٛ سَکِّنْکِ؟» سٜيْ اٛ لِلِ تٛکُّٻٜمٛ طِطٛ، اٛ وِعِٻٜ، «نَتّٜىٰ غَرِيرِ، اٛنْ کَوْرَيْ اٜ غٛطّٛ اٜ مٛ رٛنْدِي پٛوغِرْدٜ ندِيَمْ؞ تٛکّٜىٰمٛ يَاکِ وُرٛ نغٛ اٛ نَتَّتَ، مبِعٛنْ جٛومُ وُرٛ نغٛنْ، ‹مٛودِبّٛ وِعِي مِنْ پَمُمَا: تٛيٜ سُودُ ندُ ݧَامَيْمِ ݧَمْندُ حُمْتٛ سَکِّنْکِ، مِنْ اٜ تٛکُّٻٜيَمْ؟› اٛ حٛلَّيْعٛنْ سُودُ مَوْندُ ندُ دٛوْ مٛعِّنَاندُ شِرْيَاندُ؞ شِرْيَنٜىٰعٜنْ کٛو طُمٜ طٛنْ نغَمْ ݧَامٜنْ ݧَمْندُ حُمْتٛ سَکِّنْکِ؞» سٜيْ تٛکُّٻٜمٛ ٻٜنْ نَنْغِ لَاوٛلْ نَتِّ غَرِيرِ ندِنْ ٻٜ تَوِ کٛو طُمٜ نٛنْ نٛ يٜىٰسُ وِعِٻٜ؞ سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞ ندٜ فُتُرٛ وَطِ، يٜىٰسُ اٜ تٛکُّٻٜمٛ سَڤّٛ اٜ طِطٛ نغَرِ وُرٛ نغٛنْ؞ اٜ ٻٜ نجٛوطِي اٜ ٻٜ ݧَامَ ݧَمْندُ، سٜيْ يٜىٰسُ وِعِ، «اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ ݧَمْندَيْطٛ اٜ اَمْ حٛکِّتِرَيْيَمْ؞» سٜيْ ٻٜ نغَنِّ، ٻٜ ڤُطِّ وِعُکِمٛ غٛعٛتٛ‑غٛعٛتٛ، «نَاع طُمْ مِنْ، کٛو؟» يٜىٰسُ نٛوتِي، وِعِ، «طُمْ غٛعٛتٛ ندٜرْ مٛوطٛنْ، اٛنٛنْ سَڤّٛ اٜ طِطٛ ٻٜ شُٻُمِ، ݧَمْدَيْطٛ اٜ اَمْ لٜعَلْ غٛعٛ؞ ٻِي نٜطّٛ مَايَيْ نٛ طُمْ وِنْدِرَا دٛوْ مَاکٛ، اَمَّا کٛکِّتِرَيْطٛمٛ وٛنِي! طُمْ ٻُرَنَيْمٛ دَا اٛ دَݧَاکَ؞» اٜ ٻٜ ندٜرْ ݧَامُکِ ݧَمْندُ، سٜيْ يٜىٰسُ حٛشِّ بُرٛودِ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٛ وِعِ، «نجَٻٜىٰطُمْ؞ طُعُمْ طُمْ ٻَنْدُ اَمْ؞» طٛنْمَا اٛ حٛشِّ جَرْدُغٜلْ ندِيَمْ اِنَبٛجَمْ، اٛ يٜتِّ اَللَّه، اٛ حٛکِّٻٜطَمْ، ٻٜ فُو ٻٜ نجَرِطَمْ؞ ندٜنْ اٛ وِعِٻٜ، «طَعَمْ کَنْجَمْ وٛنِ پِيپَمْ اَمْ تَبِّتِنَيْطَمْ اَلْکَوَلْ اَللَّه ندُفٜتٜىٰطَمْ نغَمْ يِمْٻٜ طُطْٻٜ؞ اٜ مِ وِعَعٛنْ غٛونغَ، مِ فُطِّتَتَا مِ يَرَ ندِيَمْ اِنَبٛوجٜ نَا ݧَلْندٜ ندٜ نجَرَيْمِ نغٛطَّمْ کٜسَمْ ندٜرْ لَامُ اَللَّه؞» سٜيْ ٻٜ نغِمِ غِمٛلْ مَنْتُکِ اَللَّه، ندٜنْ ٻٜ ندِلِّ حٛشّٜىٰرٜ ندٜ لٜطّٜ جَيْتُنْ؞ يٜىٰسُ وِعِ تٛکُّٻٜمٛ، «اٛنْ فُو اٛنْ ندٛغَّيْ اَلٛنْيَمْ، نغَمْ ندٜرْ اَايَارٜ اَللَّه وِعِي، ‹مِ وَرَيْ غَيْنَاکٛ، ندٜنْ بَالِ طِنْ شَنْکِتٛتٛ؞› اَمَّا غَطَ مِ اُمَّکٜ دَغَ مَيْدٜ، مِ اَرْتَيْعٛنْ يَاکِ غَلِيلِ؞» سٜيْ بِيتُرُسْ وِعِمٛ، «کٛو ٻٜ فُو ٻٜ اَلِيمَ، مِنْ مِ اَلَتَامَ؞» يٜىٰسُ وِعِمٛ، «اٜ مِ وِعُمَا غٛونغَ، حَنْدٜ، ندٜرْ جٜمَّارٜ ندٜعٜ، کٛ نجَکَرْدِ حَنَ ندٜ طِطِ، اَ وِعَيْ اَ اَنْدَايَمْ ندٜ تَتِ؞» اَمَّا بِيتُرُسْ جَٻَايِ، اٛ وِعِ، «کٛو طُمْ وَرْدَيْيَمْ اٜ مَاطَ، مِ وِعَتَا مِ اَنْدَامَ؞» حٛرِيٻٜ ٻٜنْ مَا مبِعِ نٛنْ؞ سٜيْ ٻٜ نجَحِ وِغٜىٰرٜ بِعٜتٜىٰندٜ غٜىٰسَمَنِ، يٜىٰسُ وِعِ تٛکُّٻٜمٛ، «نجٛوطٜىٰ طٛعٛ، مِ يَحَ مِ وَطَ دٛعَارٜ؞» سٜيْ اٛ حٛشِّ بِيتُرُسْ، اٜ يَاکُبُ، اٜ يَحَيَ؞ ٻٜرْندٜ مَاکٛ بٛو تٜدِّ، اٛ فُطِّ وَنُّکِ نَاع سٜطَّ؞ اٛ وِعِٻٜ، «ٻٜرْندٜ اَمْ وَنِّي نَاع سٜطَّ حَا بٛ مِ مَايَيْ؞ نجٛوطٜىٰ طٛعٛ اٛنْ ندٜىٰنَ؞» ندٜ اٛ يَحِ يٜىٰسٛ سٜطَّ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ تٛ طُمْ غَطٛتٛوطُمْ طُمْ حٛشَّنَمٛ شَرٜلْ تٛرَّ وٛنْکَ يٜىٰسٛ مَاکٛ؞ اٛ وِعِ، «يَا ݧَاکٛ اَمْ مٛ دٛوْ، کٛو طُمٜ طُمْ غَطٛتٛوطُمْ تٛ مَاطَ؞ تَا جَٻِي، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞» غَطَ طٛنْ اٛ سٛعِّي تٛ ٻٜنْ طٛنْ تٛکُّٻٜمٛ تَتٛ، اٛ تَوِ اٜ ٻٜ طَانِي، سٜيْ اٛ وِعِ بِيتُرُسْ، «بِيتُرُسْ، اَ طَانِي؟ اَ وَاوَتَا جٛوطَاکِ اَ طَانَاکِ کٛو شَرٜلْ سٜطَّ؟ نجٛوطٜىٰ، تٛع اٛنْ طَانٛ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞ ٻٜرْندٜ اٜ يِطِ وَطُکِ کٛ حَانِ، اَمَّا ٻَنْدُ تَمْڤِي؞» اٛ فُطِّتِ اٛ دِلِّ، اٛ وَطِ دٛعَارٜ، اٛ وِعِ کٛ اٛ وِعُنٛو؞ اٛ فُطِّتِ اٛ سٛعّٛيِي تٛ مَٻّٜ، اٛ تَوِ اٜ ٻٜ طَانِي، نغَمْ اٜ ٻٜ نَنَ طٜيْنغٛلْ تٜدُّنغٛلْ؞ ٻٜ ندُلِّ کٛ ٻٜ مبِعَتَمٛ؞ اٛ فُطِّتِ اٛ سٛعِّي تٛ مَٻّٜ تَتَٻُمْ، اٛ وِعِٻٜ، «حَا جٛونِ اٛنْ طَانِي، اٛنْ شِوْتٛو؟ طُمْ حٜپِي نٛنْ! شَرٜلْ وَرِي؞ طُمْ حٛکِّتِرِي ٻِي نٜطّٛ ندٜرْ جُوطٜ غَطٛوٻٜ حَکّٜ؞ اُمّٜىٰ ندِلّٜنْ! رَا اٛنْ طٛنْ کٛکِّتِرَيْطٛيَمْ اٜ وَرَ؞» يٜىٰسُ اٜ مٜتَ، سٜيْ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ يٛتِّي؞ اٛ وَرْدٛيِ اٜ يِمْٻٜ طُطْٻٜ اٜ ٻٜ نجٛغِي کَافَاجٜ اٜ شَبِّ؞ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، اٜ مَوْٻٜ يِمْٻٜ لِلٛيِٻٜ؞ تٛو، ندٜنْ مَا کٛکِّتِرَيْطٛ اٛنْ يَادَکٜ وِعِيٻٜ نٛ حٛلِّرْتَٻٜ يٜىٰسُ، اٛ وِعِ، «نٜطّٛ مٛ کٛوْنَيْمِ حٛوْنُکِ حِغَاکُ طُمْ کَنْکٛ؞ نَنْغٜىٰمٛ، نغَطٛنْ تَادِيٻٜ نجٛغٛومٛ بٛطُّمْ ندِلِّدَ اٜ مَاکٛ؞» ندٜ يَحُودَ يٛتِّي تٛ ٻٜ نغٛنِ، طٛنْ اٜ طٛنْ اٛ ٻَدِّي يٜىٰسُ، اٛ وِعِمٛ، «مٛودِبّٛ!» ندٜنْ اٛ حٛوْنِمٛ حٛوْنُکِ حِغَاکُ؞ سٜيْ يِمْٻٜ ٻٜنْ نَنْغِ يٜىٰسُ ٻٜ نجٛغِيمٛ بٛطُّمْ؞ اَمَّا غٛعٛتٛ ندٜرْ تٛکُّٻٜ يٜىٰسُ دَرِيطٛ طٛنْ سٛلْتِ کَافَحِ مُوطُمْ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ؞ سٜيْ يٜىٰسُ وِعِٻٜ، «اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ غُجّٛ شَلٛرْطٛ؟ کٛو ندٜيٜ اٜ مِ وٛنْدِ اٜ مٛوطٛنْ، اٜ مِ اٜکِّتِنَ ندٜرْ وُرٛ شٜنِينغٛ، اٛنْ نَنْغَايِيَمْ؞ اَمَّا دٛولٜ کٛ اَايَاجٜ مبِعِ حٜىٰوَ؞» سٜيْ تٛکُّٻٜمٛ فُو اَلِمٛ ندٛغِّ؞ غٛطّٛ کَيٜىٰجٛ بٛو اٜ تٛکِّرِ يٜىٰسُ تٛنْ غَطَ، اٛ ٻٛرْنَاکِ غٛطُّمْ، وُدٜرٜ ندٜ شٜىٰدٜ تَنْ اٛ وَانِي؞ ٻٜ نَنْغِمٛ، سٜيْ اٛ اَلَنِٻٜ وُدٜرٜ ندٜنْ، اٛ دٛغِّ اٛ ٻٛرْنَاکِ؞ ٻٜ نجَارِ يٜىٰسُ تٛ مَوْطٛ مَوْٻٜ اَرْدِيٻٜ دِينَ؞ فُو مَوْٻٜ اَرْدِيٻٜ دِينَ، اٜ مَوْٻٜ يِمْٻٜ، اٜ مٛودِٻّٜ اَتَّوْرَ کَوْرِتِي طٛنْ؞ بِيتُرُسْ بٛو تٛکِّرِمٛ غَطَ دَغَ تٛ وٛطِّ حَا يَاکِ شَکَ وُرٛ مَوْطٛ مَوْٻٜ اَرْدِيٻٜ دِينَ؞ اٛ جٛوطٛدِي اٜ تَادِيٻٜ وُرٛ شٜنِينغٛ، اٜ مٛ اِرْفٛو حَادٜ حِيتٜ؞ مَوْٻٜ اَرْدِيٻٜ دِينَ اٜ فُو کَوْتَلْ مَوْٻٜ اٜ ٻٜ طَٻِّتَ شٜيْدَ کٛ ٻٜ نَنْغِرْتَ يٜىٰسُ، نغَمْ ٻٜ کٜٻَ ٻٜ مبَرَمٛ، اَمَّا ٻٜ کٜٻَايِ غٛطُّمْ؞ يِمْٻٜ طُطْٻٜ مٜتِ حَالَاجِ فٜوْرٜ دٛوْ مَاکٛ، اَمَّا کٛ ٻٜ مبِعِ وَرْدَايِ غٛعٛ؞ سٜيْ وٛٻّٜ اُمِّي ٻٜ مبِعِ حَالَاجِ فٜوْرٜ طِعِ دٛوْ مَاکٛ، ٻٜ مبِعِ، «مِنْ نَنِي اٛ وِعِي اٛ سَنْکِتَيْ نغٛعٛ وُرٛ شٜنِينغٛ نغٛ يِمْٻٜ مَحِ، ندٜنْ ندٜرْ بَلْطٜ تَتِ اٛ مَحَ وٛنْغٛ نَاع اٜ جُوطٜ يِمْٻٜ؞» اَمَّا فُو اٜ نٛنْ کٛ ٻٜ مبِعِ وَرْدَايِ غٛعٛ؞ سٜيْ مَوْطٛ مَوْٻٜ اَرْدِيٻٜ دِينَ اُمِّي دَرِي يٜىٰسٛ مَٻّٜ پَمِ يٜىٰسُ، اٛ وِعِ، «اَ وَلَا کٛ مبِعَتَا؟ کٛ ٻٜ مبِعِ دٛوْ مَاطَ طُمْ غٛونغَ؟» اَمَّا يٜىٰسُ دٜعِّتِ نٛوتَنَاکِمٛ؞ مَوْطٛ مَوْٻٜ اَرْدِيٻٜ دِينَ اٛنْ فُطِّتِ پَمِ يٜىٰسُ، وِعِ، «تٛو، اَنْ وٛنِ اَلْمَسِيحُ، ٻِطّٛ جٛومُ مَنْغُ؟» يٜىٰسُ نٛوتِي، وِعِ، «اٜىٰ، طُمْ مِنْ؞ اٛنْ نغِعَيْ ٻِي نٜطّٛ اٜ جٛوطِي تٛ جُنْغٛ ݧَامٛ نغٛ جٛومُ بَوْطٜ، اٜ مٛ وَرٛيَ ندٜرْ دُولٜ؞» سٜيْ مَوْطٛ مَوْٻٜ اَرْدِيٻٜ دِينَ اٛنْ سٜىٰکِ کٛلْتٜ مُوطُمْ وِعِ، «طُمٜ شٜيْدَ طَٻِّتٜتٜنْ کَدِنْ؟ اٛنْ نَنِي نِ حَالَ کَلُّکَ کَ اٛ مٜتِ دٛوْ اَللَّه؞ کٛ وٛنِ شُٻٛلْ مٛوطٛنْ؟» سٜيْ يِمْٻٜ فُو مبِعِ اٜ حَانِ اٛ وَرٜىٰ؞ وٛٻّٜ ڤُطِّ تُتَّنْکِمٛ جٛودٜ، ٻٜ کَٻَّنِمٛ غِتٜ، ٻٜ ڤِيِمٛ، اٜ ٻٜ مبِعَمٛ، «وَطُ اَنَّبَاکُ! مٛيٜ فِيِمَا؟» سٜيْ تَادِيٻٜ وُرٛ شٜنِينغٛ کٛشِّمٛ ڤِيِمٛ؞ بِيتُرُسْ اٜ شَکَ وُرٛ نغٛنْ، سٜيْ غٛعٛتٛ ندٜرْ حٛرْٻٜ مَوْطٛ مَوْٻٜ اَرْدِيٻٜ دِينَ وَرِ وِغٜىٰرٜ ندٜنْ؞ ندٜ اٛ يِعِ بِيتُرُسْ اٜ اِرْفٛو، اٛ سُتِيمٛ، اٛ وِعِمٛ، «اَنْ مَا، اَ وٛنْدِ اٜ يٜىٰسُ اٛنْ طٛنْ پِوٛيْطٛ غَرِيرِ نَجَرَتْ؞» اَمَّا بِيتُرُسْ يٜدِّ وِعِ، «مِنْ مِ اَنْدَا، مِ فَامَايِ کٛ مبِعَتَا؞» بِيتُرُسْ وُرْتِي يَحِ نجَيْرِ دَمُّغَلْ يَاسِ، سٜيْ نجَکَرْدِ حَنِ؞ کٛرْطٛ اٛنْ يِعِ بِيتُرُسْ تٛنْ، اٛ فُطِّتِ اٛ وِعِ دَرِيٻٜ طٛنْ کَمْٻٜ مَا، «اٛعٛ نٜطّٛ اٛ غٛعٛتٛ مَٻّٜ!» اَمَّا بِيتُرُسْ فُطِّتِ يٜدِّ؞ غَطَ طٛنْ سٜطَّ، دَرِيٻٜ حَادٜ طٛنْ مبِعِ بِيتُرُسْ، «سٜکٛ وَلَا اَنْ مَا اَ غٛعٛتٛ ندٜرْ تٛکُّٻٜمٛ، نغَمْ اَ غَلِلَنْکٜىٰجٛ؞» بِيتُرُسْ فُطِّ لَانُکِ حٛورٜ مُوطُمْ حُنِي وِعِ، «مِ اَنْدَا نٜطّٛ اٛعٛ مٛ مبِعٛتٛنْ؞» طٛنْ اٜ طٛنْ نجَکَرْدِ حَنِ طِطَٻُمْ؞ سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، «کٛ نجَکَرْدِ حَنَ ندٜ طِطِ، اَ وِعَيْ اَ اَنْدَايَمْ ندٜ تَتِ؞» ندٜنْ بِيتُرُسْ فُطِّ بٛجِّ؞ اِلَا سُبَکَ مَوْٻٜ اَرْدِيٻٜ دِينَ، اٜ مَوْٻٜ يِمْٻٜ، اٜ مٛودِٻّٜ اَتَّوْرَ، اٜ فُو کَوْتَلْ مَوْٻٜ ٻٜ مٜدِّ دٛوْ کٛ ٻٜ نغَطَتَ؞ سٜيْ ٻٜ کَٻِّ يٜىٰسُ ٻٜ ندِلِّدِ اٜ مَاکٛ، ٻٜ تَمْبِنِمٛ بِلَاتُسْ غٛمْنَاجٛ؞ بِلَاتُسْ پَمِمٛ، وِعِ، «اَنْ وٛنِ لَامِيطٛ يَحُودَنْکٛعٜنْ؟» يٜىٰسُ نٛوتِي، وِعِمٛ، «اٜىٰ، اَ وِعِيکَ؞» مَوْٻٜ اَرْدِيٻٜ دِينَ نغُلّٛرِيمٛ فِي طُطُّمْ؞ سٜيْ بِلَاتُسْ فُطِّتِ پَمِمٛ، وِعِ، «وَلَا کٛ مبِعَتَا؟ رَا ٻٜ نغُلّٛرَکٜمَ فِي طُطُّمْ؞» اَمَّا يٜىٰسُ ٻٜيْدَايِ نٛوتَاکِ، حَا طُمْ حَيْطِنِ بِلَاتُسْ؞ تٛو، اٜ شَرٜلْ حُمْتٛ سَکِّنْکِ بِلَاتُسْ وٛووِي يٛوفَنْکِٻٜ شُرَاطٛ غٛعٛتٛ مٛ ٻٜ تٛرِي؞ اٜ وٛودِ غٛطّٛ بِعٜتٜىٰطٛ بَرَبَّسْ شُرَاطٛ، کَنْکٛ اٜ وٛٻّٜ شُرَاٻٜ نغَمْ ٻٜ کَٻْدِي اٜ لَامُ، ٻٜ نغَطِي وَرْحٛورٜ ندٜرْ حَوْرٜ ندٜنْ؞ سٜيْ يِمْٻٜ طُطْٻٜ نغَرِ ٻٜ تٛرِي بِلَاتُسْ وَطَنَٻٜ کٛ اٛ وٛووِ وَطَنْکِٻٜ؞ بِلَاتُسْ پَمِٻٜ وِعِ، «اٛنْ نغِطِ مِ يٛوفَنَعٛنْ لَامِيطٛ يَحُودَنْکٛعٜنْ؟» نغَمْ بِلَاتُسْ فَامِي لَوْلِيرُ وَطِ مَوْٻٜ اَرْدِيٻٜ دِينَ نغَطِ يٜىٰسُ ندٜرْ جُنْغٛ مَاکٛ؞ اَمَّا مَوْٻٜ اَرْدِيٻٜ دِينَ ٻٜنْ نغَطِ يِمْٻٜ مبِعَ بِلَاتُسْ اٛ يٛوفَنَٻٜ بَرَبَّسْ نَاع يٜىٰسُ؞ سٜيْ بِلَاتُسْ پَمِٻٜ، وِعِ، «تٛو، کٛ نغِطّٛنْ مِ وَطَنَ نٜطّٛ اٛعٛ مٛ نٛدِّرْتٛنْ لَامِيطٛ يَحُودَنْکٛعٜنْ؟» ٻٜ فُو ٻٜ مبِعِ سٜمْبٜىٰ، «وَرُمٛ دٛوْ غَافَانغَلْ!» بِلَاتُسْ پَمِٻٜ، وِعِ، «نغَمْ طُمٜ؟ طُمٜ کٛ حَلِّ اٛ وَطِ؟» اَمَّا ٻٜ ٻٜيْدِ وِعُکِ سٜمْبٜىٰ، «وَرُمٛ دٛوْ غَافَانغَلْ!» ندٜ بِلَاتُسْ اٜ يِطِ وَطَ کٛ حَوْرُتُٻٜ ٻٜنْ نغِطِ، اٛ يٛوفَنِٻٜ بَرَبَّسْ؞ اٛ وَطِ طُمْ فِيِ يٜىٰسُ لٛوشِ، ندٜنْ اٛ تَمْبِنِمٛ سٛوجِعٜنْ رٛومَ نغَمْ ٻٜ مبَرٛيَمٛ دٛوْ غَافَانغَلْ؞ سٛوجِعٜنْ ٻٜنْ اَرْدِنِ يٜىٰسُ يَاکِ لَامٛرْدٜ غٛمْنَاجٛ بِعٜتٜىٰندٜ «فِرٜتٛورِيُمْ؞» ٻٜ نٛدِّ فُو سٛوجِعٜنْ کٛرِيٻٜ ٻٜ کَوْرِتِٻٜ؞ ٻٜ ٻٛرْنِمٛ اِرِ تٛغّٛورٜ لَامِيٻٜ، ندٜنْ ٻٜ مبَالِ غِيفٛلْ غِعٜ، ٻٜ تَارَنِمٛنغٛلْ تٛ حٛورٜ؞ سٜيْ ٻٜ ڤُطِّ حٛوْنُکِمٛ، اٜ ٻٜ مبِعَ، «اَللَّه رٜىٰنٜ، لَامِيطٛ يَحُودَنْکٛعٜنْ!» ٻٜ نغَطِ کَ ڤِيرُکِمٛ سَوْرُ تٛ حٛورٜ؞ اٜ ٻٜ تُتَّنَمٛ جٛودٜ؞ ٻٜ ندِشِّي يٜىٰسٛ مَاکٛ بٛ ٻٜ کٛکَّيْمٛ مَنْغُ؞ غَطَ ٻٜ نجُکِّتِيمٛ، ٻٜ ٻٛرْتِمٛ تٛغّٛورٜ لَامِيٻٜ ندٜ ٻٜ ٻٛرْنُنٛومٛ، ندٜنْ ٻٜ ٻٛرْنِمٛ کٛلْتٜ مَاکٛ؞ سٜيْ ٻٜ مبُرْتِنِمٛ ٻٜ اَرْدِنِمٛ نغَمْ ٻٜ مبَرٛيَمٛ دٛوْ غَافَانغَلْ؞ غٛطّٛ نٜطّٛ سَايِرَنْکٜىٰجٛ اٜ پَٻّٛو بِعٜتٜىٰطٛ سِيمَنْ، ݧَاکٛ اَلِجَنْدَ اٜ رُوفُسْ؞ اٛ پِوٛيْطٛ ندٜرْ لَدّٜ اٜ مٛ نَتّٛيَ غَرِيرِ ندِنْ؞ سٜيْ ٻٜ نغَطِمٛ اٜ سٜمْبٜ اٛ حٛشَّ غَافَانغَلْ يٜىٰسُ؞ ٻٜ نجَارِ يٜىٰسُ وٛنْدٜ وِغٜىٰرٜ بِعٜتٜىٰندٜ غٛلْغٛوتَ، وَاتٛ «وِغٜىٰرٜ پِپَلْ حٛورٜ؞» ندٜنْ ٻٜ کٛکِّمٛ ندِيَمْ اِنَبٛجَمْ جِلِّندِرَاطَمْ اٜ مُرْ نغَمْ اٛ يَرَ، اَمَّا اٛ يَرَايِطَمْ؞ سٜيْ، ٻٜ ڤِيَنِمٛ کُوسَاجٜ دٛوْ غَافَانغَلْ؞ ندٜنْ ٻٜ شٜنْدِ کٛلْتٜ مَاکٛ حَکُّندٜ مَٻّٜ، ٻٜ نغَطِ شَاشَ نغَمْ ٻٜ نغِعَ کٛ کٛو مٛيٜ حٜٻَتَ؞ شَرٜلْ نغٜلْ ٻٜ ڤِيَنِمٛ کُوسَاجٜ دٛوْ غَافَانغَلْ طُمْ نجَمْندِ جٛوٜىٰنَيِ سُبَکَ؞ دٛوْ حٛورٜ غَافَانغَلْ نغَلْ طُمْ تَکِّ اَلّٛوَلْ؞ طُمْ وِنْدِ دٛوْ مَاغَلْ کٛ طُمْ وُلّٛرِيمٛ وِعُکِ، «لَامِيطٛ يَحُودَنْکٛعٜنْ؞» يِمْٻٜ پَٻّٛتٛوٻٜ اٜ کُطَ يٜىٰسُ اٜ ٻٜ نغِيلَ کٛعٜ، اٜ ٻٜ مبِعَ، «تٛو! اَنْ غِطّٛ ڤُسُکِ وُرٛ شٜنِينغٛ مَحِتٛطَانغٛ ندٜرْ بَلْطٜ تَتِ، جِڤّٛيَ دَغَ دٛوْ غَافَانغَلْ کِسْنَا حٛورٜ مَاطَ!» نٛنْ مَا مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ ٻٜ نجُکِّتِمٛ حَکُّندٜ مَٻّٜ، اٜ ٻٜ مبِعَ، «اٛ حِسْنِي وٛٻّٜ، اَمَّا اٛ وَاوَايِ حِسْنُکِ حٛورٜ مَاکٛ؞ اَلْ اٛعٛ بِعٛووٛ کَنْکٛ وٛنِ اَلْمَسِيحُ، لَامِيطٛ اِسْرَاعِيلَ، اٛ جِڤّٛيٛو جٛونِ دَغَ دٛوْ غَافَانغَلْ نغَمْ نغِعٜنْ کٛولٛوطٜنْمٛ؞» ٻٜنْ طٛنْ وُيْٻٜ ٻٜ طُمْ ڤِيَنِ کُوسَاجٜ دٛوْ غَافَالٜ مَا کُطِمٛ؞ شَکَ ݧَلَوْمَ، سٜيْ ݧِوْرٜ مَٻِّ لٜيْدِ فُو حَا يَاکِ نجَمْندِ تَتِ ندِ اَلَاسَرَ؞ اٜ نجَمْندِ تَتِ ندِنْ، سٜيْ يٜىٰسُ وِعِ اٜ سٜمْبٜ، «اٜلٛيْ، اٜلٛيْ، لَمَ سَبَتَّنِ؟» وَاتٛ، «يَا اَللَّه اَمْ، يَا اَللَّه اَمْ، نغَمْ طُمٜ شٜنْدِرْطَا اٜ اَمْ؟» ندٜ وٛٻّٜ دَرِيٻٜ تٛ وِغٜىٰرٜ ندٜنْ نَنِ نٛنْ، ٻٜ مبِعِ، «نَنٜىٰ، اٜ مٛ نٛدَّ اَنَّبِ اِلِيَ؞» سٜيْ غٛعٛتٛ مَٻّٜ دٛغِّ سٛفْنِ سٛوسٛوَ ندٜرْ ندِيَمْ اِنَبٛجَمْ لَمُّطَمْ، اٛ طِيسِنغَ تٛ سَوْرُ، اٛ حٛکِّ يٜىٰسُ يَرَ؞ اٛ وِعِ، «اَلٜىٰ نغِعٜنْ کٛو اِلِيَ وَرَيْ جِڤِّنَمٛ؞» سٜيْ يٜىٰسُ وُلِّ سٜمْبٜىٰ، ندٜنْ مَايِ؞ سٜيْ وُدٜرٜ شٜنْدُندٜ سُودُ جٛومِرَاوٛ سٜىٰکِ طِطِ دَغَ دٛوْ يَاکِ لٜيْ؞ مَوْطٛ سٛوجِعٜنْ دَرِيطٛ طٛنْ اٜ رَارَ يٜىٰسُ؞ ندٜ اٛ يِعِ نٛ يٜىٰسُ فٛفْتِرِ فٛوفَانغٛ شَکِتِينغٛ، مَايِ، اٛ وِعِ، «غٛونغَ، نٜطّٛ اٛعٛ اٛ ٻِطّٛ اَللَّه!» اٜ وٛودِ وٛٻّٜ رٜوْٻٜ اٜ ٻٜ ندَارَ دَغَ تٛ وٛطِّ؞ ندٜرْ مَٻّٜ اٜ وٛودِ مَرْيَامَ پِوٛيْطٛ مَغَدَلَ، اٜ مَرْيَامَ مَدُوجٛ يَاکُبُ ڤَمَرٛ، اٜ يُسُفُ، اٜ سَلٛومِ؞ ٻٜعٜ رٜوْٻٜ کَمْٻٜ تٛکَّيْنٛو يٜىٰسُ، اٜ ٻٜ مبَلَّمٛ کٛ اٛ وٛنّٛو لٜيْدِ غَلِيلِ؞ اٜ وٛودِ رٜوْٻٜ طُطْٻٜ فٜىٰرٜ غَرْدٛيْٻٜ اُرُشَلِيمَ اٜ مَاکٛ اٜ ٻٜ طٛنْ طُمْ کَمْٻٜ مَا؞ طُمْ اَلَاسَرَ ݧَلْندٜ سِرْيَاکِ، وَاتٛ تٛ فِنِي طُمْ ݧَلْندٜ سِوْتَارٜ؞ نغَمْ مَاجُمْ يُسُفُ پِوٛيْطٛ غَرِيرِ اَرْمَاتِيَ، اٛ وَطِ سٜمْبٜ ٻٜرْندٜ، اٛ يَحِ تٛ بِلَاتُسْ، اٛ تٛرِيمٛ اٛ حٛکَّمٛ ٻَنْدُ يٜىٰسُ؞ يُسُفُ اٛ نٜطّٛ مٛ طُمْ حٛکَّتَ مَنْغُ ندٜرْ کَوْتَلْ مَوْٻٜ، کَنْکٛ مَا اٛ حَاٻِي يِعُکِ غَرٛلْ لَامُ اَللَّه؞ بِلَاتُسْ حَيْطِنِ ندٜ نَنِ يٜىٰسُ يَادَکٜ مَايِي؞ اٛ نٛدِّ مَوْطٛ سٛوجِعٜنْ، اٛ پَمِمٛ کٛو طُمْ نٛنْ؞ ندٜ اٛ نَنِ تٛ حٛنْدُکٛ مَوْطٛ سٛوجِعٜنْ اٛنْ يٜىٰسُ يَادَکٜ مَايِ، سٜيْ اٛ جَٻِ يُسُفُ حٛشَّ ٻَنْدُ ندُنْ؞ سٜيْ يُسُفُ سٛودٛيِ وُدٜرٜ ندٜ شٜىٰدٜ، اٛ وَطِ طُمْ جِڤِّنِ ٻَنْدُ يٜىٰسُ، اٛ تَارِندُ اٜ وُدٜرٜ ندٜنْ، اٛ فُکِّنٛيِندُ ندٜرْ يٜنَاندٜ غَسَاندٜ ندٜرْ حَيْرٜ؞ اٛ تَلِّتِ کَاپَ مَنْغَ اٛ مَٻِّ دَمُّغَلْ يٜنَاندٜ ندٜنْ؞ مَرْيَامَ پِوٛيْطٛ مَغَدَلَ اٜ مَرْيَامَ مَدُوجٛ يُسُفُ ٻٜ نغِعِ تٛ طُمْ فُکِّنِ ٻَنْدُ يٜىٰسُ؞ ندٜ ݧَلْندٜ سِوْتَارٜ پَٻِّي، مَرْيَامَ پِوٛيْطٛ مَغَدَلَ، اٜ مَرْيَامَ مَدُوجٛ يَاکُبُ، اٜ سَلٛومِ ٻٜ شٛودِ نٜبَّمْ اُرٛوجَمْ مبٜلْطَمْ نغَمْ ٻٜ نجَحَ ٻٜ مٛيْتَنَ ٻَنْدُ يٜىٰسُ؞ ݧَلْندٜ اَلَلْ سُبَکَ غَطَ نَانغٜ فُطِي، اٜ ٻٜ دٛوْ لَاوٛلْ يَاکِ تٛ يٜنَاندٜ ندٜنْ، اٜ ٻٜ مبِعَ حَکُّندٜ مَٻّٜ، «مٛيٜ تَلِّتَنْتَعٜنْ کَاپَ مَنْغَ نغَ طُمْ مَٻِّرِ دَمُّغَلْ يٜنَاندٜ ندٜنْ؟» اَمَّا ندٜ ٻٜ ندَارِ ٻٜ نغِعِ طُمْ يَادَکٜ طُمْ تَلِّتِي کَاپَ نغَنْ؞ ندٜ ٻٜ نَتِّ يٜنَاندٜ ندٜنْ، ٻٜ نغِعِ غٛطّٛ کَيٜىٰجٛ اٜ جٛوطِي وُتُّدُ ݧَامٛ؞ اٜ مٛ ٻٛرْنِي کٛلْتٜ دَنٜىٰجٜ تَرْ، سٜيْ ٻٜ کُلْتٛرِ؞ کَيٜىٰجٛ اٛنْ وِعِٻٜ، «تٛع اٛنْ کُلُ؞ اٛنْ طَٻِّتَ يٜىٰسُ نَجَرَنْکٜىٰجٛ بَرَاطٛ دٛوْ غَافَانغَلْ؞ طُمْ اُمِّنِيمٛ دَغَ مَيْدٜ! اٛ وَلَا طٛعٛ؞ رَا تٛ طُمْ فُکِّنّٛومٛ؞ اَمَّا نجَحٜىٰ مبِعٛنْ تٛکُّٻٜمٛ، حَا اٜ بِيتُرُسْ، اٛ اَرْتَيْعٛنْ يَاکِ لٜيْدِ غَلِيلِ؞ تٛنْ نغِعٛتٛنْمٛ نٛنْ نٛ اٛ وِعُنٛوعٛنْ؞» کُلٛلْ نَنْغِٻٜ اٜ ٻٜ ندِوْنَ ٻٜ مبُرْتِي دَغَ ندٜرْ يٜنَاندٜ ندٜنْ ٻٜ ندٛغِّ؞ ٻٜ مبِعَايِ غٛطّٛ کٛو طُمٜ نغَمْ اٜ ٻٜ کُلَ؞ [سُبَکَ ݧَلْندٜ اَلَلْ يٜىٰسُ اُمِّي دَغَ مَيْدٜ؞ غَطَ اٛ اُمَّکٜ اٛ اَرْتِ وَنْغَنْکِ مَرْيَامَ پِوٛيْطٛ مَغَدَلَ مٛ اٛ وُرْتِنَنِ غِنِّ جٛوٜىٰطِطِ؞ سٜيْ مَرْيَامَ اٛنْ يَحِ وِعِکَ ٻٜنْ طٛنْ غٛنْدُنٛوٻٜ اٜ مَاکٛ، اٛ تَوِٻٜ ندٜرْ وَنَّارٜ اٜ ٻٜ مبٛيَ؞ اَمَّا ندٜ ٻٜ نَنِ يٜىٰسُ اٜ وٛودِ يٛنْکِ، طٛنْمَا مَرْيَامَ اٛنْ يِعِيمٛ، ٻٜ نجَٻَايِکَ؞ غَطَ مَاجُمْ وٛٻّٜ تٛکُّٻٜمٛ طِطٛ اٜ ٻٜ دٛوْ لَاوٛلْ ندٜرْ لَدّٜ يَاکِ وٛنْغٜلْ غَرِيٜلْ، سٜيْ يٜىٰسُ وَنْغَنِٻٜ ندٜرْ نَنْدِ فٜىٰرٜ؞ سٜيْ ٻٜ شٛعِّي ٻٜ مبِعِکَ حٛرِيٻٜ، اَمَّا ٻٜ نجَٻَايِ کٛ ٻٜ مبِعِ کَمْٻٜ مَا؞ دَغَ غَطَ يٜىٰسُ وَنْغَنِ تٛکُّٻٜمٛ سَڤّٛ اٜ غٛعٛ اٜ شَرٜلْ نغٜلْ اٜ ٻٜ ݧَامَ ݧَمْندُ؞ سٜيْ اٛ حَٻَنِٻٜ نغَمْ شِيَ حٛولَارٜ مَٻّٜ اٜ ٻٜرْطٜ شَاتُطٜ طٜ ٻٜ نغٛودِ، نغَمْ ٻٜ نجَٻَايِ کٛ غِيٻٜمٛ غَطَ اٛ اُمَّکٜ مبِعِٻٜ؞ ندٜنْ اٛ وِعِٻٜ، «نجَحٜىٰ کٛو تٛيٜ ندٜرْ دُونِيَارُ نغَعَجِنَنٛنْ کٛو مٛيٜ حَبَرُ بٜلْطُمْ؞ کٛو مٛيٜ کٛولِيطٛيَمْ وَطَنَا بَڤْتِسْمَ اٛ حِسَيْ، اَمَّا فُو مٛ حٛولَاکِيَمْ طُمْ تَپَنَيْمٛ کِيتَ؞ فُو کٛولِيٻٜيَمْ ٻٜ نغَطَيْ کُوطٜ کٛلَّيْطٜ اٜ ٻٜ نغٛودِ بَوْطٜ اَللَّه؞ ندٜرْ اِنْدٜ اَمْ ٻٜ مبُرْتِنَيْ غِنِّ، ٻٜ نغَطَيْ دٛعَارٜ ندٜرْ طٜمْطٜ طٜ ٻٜ اَنْدَا؞ ٻٜ نَنْغَيْ بٛولٜ اٜ جُوطٜ مَٻّٜ، ندٜنْ تٛ ٻٜ نجَرِي تٛوکٜ، طٜ نغَطَنْتَاٻٜ غٛطُّمْ؞ ٻٜ بٛو نجٛوَنَيْ ݧَوْٻٜ جُوطٜ، ݧَوْٻٜ ٻٜنْ نجَمْطِتَ؞» غَطَ يٜىٰسُ جٛومِرَاوٛ مٜتَنِيٻٜ، اٛ حٛشَّا يَاکِ دٛوْ، اٛ جٛوطِي جُنْغٛ ݧَامٛ نغٛ اَللَّه؞ سٜيْ تٛکُّٻٜمٛ ٻٜنْ ندِلِّ ٻٜ نغَعَجِنٛيِ حَبَرُ بٜلْطُمْ کٛو تٛيٜ؞ جٛومِرَاوٛ وَلِّٻٜ، اٛ حٛکِّٻٜ بَوْطٜ وَطُکِ کُوطٜ کَيْطِنِيطٜ نغَمْ تَبِّتِنْکِ کٛ ٻٜ مبِعَتَ تٛ مَاکٛ طُمْ پِوٛيِ؞] يَا تِيٛوفِلُسْ مَوْطٛ، يِمْٻٜ طُطْٻٜ فُطِّي وِنْدُکِ حَبَرُ دٛوْ کٛ يٜىٰسُ وَطِ ندٜرْ اَمِنْ؞ ٻٜ مبِنْدِ حَبَرُ طُمْ نَنْطٜنْ دَغَ کٛنْدُطٜ غِيٻٜ کٛ وَطِ اٜ غِتٜ مَٻّٜ، اَنْدِنٛوٻٜ وٛلْدٜ اَللَّه؞ نغَمْ نٛنْ، مِنْ مَا طُمْ وٛوطَنِييَمْ مِ طَٻِّتَ کٛو طُمٜ اٜ سٜىٰسٜ‑سٜىٰسٜ دَغَ فُطُّکِ مَاجُمْ، مِ وِنْدَنْمَا کٛو طُمٜ نٛ وٛنِ، نغَمْ اَنْدَا غٛونغَ دٛوْ کٛو طُمٜ کٛ طُمْ اٜکِّتِنْمَا؞ ندٜرْ شَرٜلْ نغٜلْ حِرُدُسْ لَامِيطٛ لٜيْدِ يَحُودِيَ لَامٛتٛو، اٜ وٛودِ اَرْدِيطٛ دِينَ بِعٜتٜىٰطٛ جَکَارِيَ، اٜ مٛ ندٜرْ اَرْدِيٻٜ دِينَ دَغَ لٜݧٛلْ اَبِجَ؞ دٜبّٛ مَاکٛ اَلِسَبَتُ پِوٛيِي دَغَ لٜݧٛلْ هَرُونَ، وَاتٛ اَرْدِيٻٜ دِينَ؞ ٻٜ فُو طِطٛ ٻٜ نجٛوطَکٜ جٛنْدٜ وٛوطُندٜ يٜىٰسٛ اَللَّه، اٜ ٻٜ نغَطَ کٛو طُمٜ کٛ جٛومِرَاوٛ وِعِ يِمْٻٜ نغَطَ؞ اَمَّا ٻٜ نغَلَا ٻِٻّٜ، نغَمْ اَلِسَبَتُ اٛ دَݧَتَا، کَدِمَا ٻٜ فُو طِطٛ ٻٜ نَوْيِي؞ وٛنْدٜ ݧَلْندٜ جَکَارِيَ اٜ حُوَ يٜىٰسٛ اَللَّه ندٜرْ وُرٛ شٜنِينغٛ اٜ ٻٜ اٛ حُودَتَ؞ طُمْ سُٻِيمٛ، نٛ اَرْدِيٻٜ دِينَ مبٛووِ وَطُکِ، نغَمْ اٛ نَتَّ ندٜرْ سُودُ جٛومِرَاوٛ اٛ وُلَ اُرْدٜ وٜلْندٜ نغَمْ جٛومِرَاوٛ؞ ندٜ شَرٜلْ وُلُکِ اُرْدٜ وٜلْندٜ وَطِ، مٛٻْغَلْ فُو اٜ دَرِ يَاسِ اٜ ٻٜ نغَطَ دٛعَارٜ؞ سٜيْ مَلَاعِکَاجٛ جٛومِرَاوٛ وَنْغِ تٛ مَاکٛ اٜ دَرِي وُتُّدُ ݧَامٛ تٛ طُمْ وُلَتَ اُرْدٜ وٜلْندٜ؞ ندٜ جَکَارِيَ يِعِمٛ، ٻٜرْندٜ مُوطُمْ تَپِ، کُلٛلْ نَنْغِمٛ؞ اَمَّا مَلَاعِکَاجٛ اٛنْ وِعِمٛ، «تَاع حُلُ جَکَارِيَ، جٛومِرَاوٛ نَنِي دٛعَارٜ مَاطَ؞ دٜبّٛ مَاطَ اَلِسَبَتُ دَݧَنْتٜ ٻِطّٛ غٛرْکٛ، ندٜنْ اَ حٛکَّيْمٛ اِنْدٜ يَحَيَ؞ ٻِطّٛ اٛنْ وَطٜتٜ نَنَا بٜلْطُمْ طُطُّمْ، طُطْٻٜ مَا نَنَيْ بٜلْطُمْ نغَمْ دَݧٜىٰکِ مَاکٛ، نغَمْ اٛ وَرْتَيْ مَوْطٛ يٜىٰسٛ جٛومِرَاوٛ؞ اٛ يَرَتَا ندِيَمْ اِنَبٛجَمْ کٛو نجَرُ غَيْلِتَيْنغُ حٛورٜ، ندٜنْ اٛ حٜىٰوَيْ رُوحُ اَللَّه دَغَ اٜ مٛ ندٜرْ رٜىٰدُ مَدُوجٛ مَاکٛ؞ اٛ وَرْتِرَيْ ٻِٻّٜ اِسْرَاعِيلَ طُطْٻٜ تٛ اَللَّه جٛومِرَاوٛ مَٻّٜ؞ اٛ اَرْتَيْ اَلْمَسِيحُ وَرْکِ ندٜرْ بَوْطٜ رُوحُ اَللَّه طٜ اَنَّبِ اِلِيَ حٜٻُنٛو، اٛ سِرْيٛوتِرَيْ دَݧٛوٻٜ اٜ ٻِٻّٜ مَٻّٜ؞ اٛ وَيْلِتَيْ شَلِيٻٜ طَتَلْ جٛومِرَاوٛ تٛ طَتَلْ غٛودُٻٜ غٛونغَ؞ اٛ وَطَيْ يِمْٻٜ شِرْيٛو نغَمْ غَرٛلْ جٛومِرَاوٛ؞» جَکَارِيَ پَمِ مَلَاعِکَاجٛ اٛنْ وِعِ، «نٛيٜ اَنْدِرَيْمِ کٛ مبِيطَا طُمْ غٛونغَ؟ مِنْ، مِ نَوْيِي، دٜبّٛ اَمْ بٛو دُوٻِ مُوطُمْ طُوطِي؞» مَلَاعِکَاجٛ اٛنْ وِعِمٛ، «مِنْ وٛنِ جِبِرِيلُ دَرٛتٛوطٛ يٜىٰسٛ اَللَّه، مِ لِلٛيَا تٛ مَاطَ نغَمْ مِ حٛکُّمَا حَبَرُ بٜلْطُمْ طُعُمْ؞ اَمَّا جٛونِ اَ وَاوَتَا مٜتُکِ نَا ݧَلْندٜ ندٜ فِي طُعُمْ وَطِ، نغَمْ اَ جَٻَايِ حَالَ اَمْ تَبِّتَيْکَ تٛ شَرٜلْ مَاکَ وَرِي؞» اٜ شَرٜلْ نغٜلْ يِمْٻٜ اٜ کٜطِي جَکَارِيَ يَاسِ، ٻٜ کَيْطِنِي کٛ وَطِ اٛ نٜىٰٻِرِ نٛنْ ندٜرْ سُودُ جٛومِرَاوٛ؞ ندٜ اٛ وُرْتٛيِي، اٛ وَاوَايِ مٜتَنْکِٻٜ؞ ٻٜ فَامِ اٛ يِعِ وَحَيُ ندٜرْ سُودُ جٛومِرَاوٛ؞ اٛ وَطِ کَ مٜتِرَنْکِٻٜ جُوطٜ، اَمَّا نٛنْ اٛ جٛوطٛرِي اٛ مٜتَتَا؞ ندٜ اٛ حٜىٰݧِ بَلْطٜ کُوغَلْ مَاکٛ، اٛ سٛعِّي وُرٛ مَاکٛ؞ غَطَ فِي طُعُمْ وَطِي، دٜبّٛ مَاکٛ اَلِسَبَتُ حٜٻِ رٜىٰدُ، وَطِ لٜبِّ جٛوِ اٛ وُرْتَاکِ دَغَ ندٜرْ وُرٛ؞ اٛ وِعِ، «جٛومِرَاوٛ وَطَنِييَمْ طُعُمْ؞ ندٜرْ بَلْطٜ طٜعٜ، اٛ اِتَّنِييَمْ سٜمْتٜىٰندٜ اَمْ حَکُّندٜ يِمْٻٜ؞» ندٜرْ لٜوْرُ جٛوٜىٰغٛعٛورُ غَطَ اَلِسَبَتُ حٜٻِي رٜىٰدُ، اَللَّه لِلِ مَلَاعِکَاجٛ جِبِرِيلُ تٛ غَرِيرِ بِعٜتٜىٰندِ نَجَرَتْ نغٛنْدِ ندٜرْ لٜيْدِ غَلِيلِ؞ مَلَاعِکَاجٛ اٛنْ يَحِ تٛ سُرْبَاجٛ بِعٜتٜىٰطٛ مَرْيَامَ غَطَنَاطٛ اَلْکَوَلْ تٜىٰغَلْ اٜ بِعٜتٜىٰطٛ يُسُفُ، دَغَ لٜݧٛلْ دَوْدَ؞ مَرْيَامَ اٛنْ اَنْدَا غٛرْکٛ؞ مَلَاعِکَاجٛ اٛنْ وِعِمٛ، «اٜ مِ سِلْمِنٛو، بَرْکِطِنَاطٛ جٛومِرَاوٛ! جٛومِرَاوٛ اٜ وٛنْدِ اٜ مَاطَ!» حَالَ کَنْ وَنِّي مَرْيَامَ کٛ طُوطِ؞ اٛ وِعِ ندٜرْ ٻٜرْندٜ مَاکٛ، «مِنْ، مِ مٛيٜ اٛعٛ مٜتِّرَنْتَيَمْ نِحِ؟» اَمَّا مَلَاعِکَاجٛ اٛنْ وِعِمٛ، «تَاع حُلُ، مَرْيَامَ، اَللَّه سُٻِي بَرْکِطِنْمَا؞ اَ حٜٻَيْ رٜىٰدُ، اَ دَݧَيْ ٻِطّٛ غٛرْکٛ، ندٜنْ اَ نٛدَّيْ اِنْدٜ مَاکٛ يٜىٰسُ؞ اٛ وَرْتَيْ مَوْطٛ، طُمْ نٛدَّيْمٛ ٻِطّٛ اَللَّه جٛومُ مَنْغُ؞ اَللَّه جٛومِرَاوٛ حٛکَّيْمٛ جٛوطٛرْغَلْ لَامُ مَامَ مَاکٛ دَوْدَ؞ اٛ لَامٛتٛ دٛوْ ٻِٻّٜ اِسْرَاعِيلَ حَا اَبَدَا؞ لَامُ مَاکٛ رٜعَتَا؞» مَرْيَامَ وِعِ مَلَاعِکَاجٛ اٛنْ، «نٛيٜ طُمْ وَطٛرْتٛو؟ مِ اَنْدَا غٛرْکٛ سَمْ؞» مَلَاعِکَاجٛ اٛنْ وِعِمٛ، «رُوحُ اَللَّه جِڤّٛيْتٛ دٛوْ مَاطَ، بَوْطٜ اَللَّه جٛومُ مَنْغُ سُدّٜتٜ بٛ طٛوْدِ؞ نغَمْ نٛنْ، دَݧٜتٜىٰطٛ اٛنْ طُمْ نٛدِّرَيْمٛ ‹ٻِطّٛ اَللَّه، شٜنِيطٛ؞› رَا، اَلِسَبَتُ بَنْدِرَاوٛ مَاطَ حٜٻِي رٜىٰدُ ندٜرْ نَيٜوُ مُوطُمْ، اٛ دَݧَيْ ٻِطّٛ غٛرْکٛ؞ کَنْکٛ مٛ يِمْٻٜ مبِعَتَ اٛ دَݧَتَا، جٛونِ اٜ مٛ وٛودِ رٜىٰدُ ندُ لٜبِّ جٛوٜىٰغٛعٛ؞ نغَمْ وَلَا کٛ سَلٛرْتَ اَللَّه؞» ندٜنْ مَرْيَامَ وِعِ، «مِ کٛرْطٛ جٛومِرَاوٛ، طُمْ وَرْتَنَيَمْ نٛنْ نٛ مبِيطَا؞» سٜيْ مَلَاعِکَاجٛ اٛنْ دِلِّ اَلِمٛ؞ ندٜرْ بَلْطٜ طٜنْ، مَرْيَامَ اُمِّي ندٜرْ يَوْطَارٜ يَحِ غَرِيرِ نغٛنْدِ ندٜرْ کٛشّٜىٰجٜ لٜيْدِ يَحُودِيَ؞ اٛ نَتِّ وُرٛ جَکَارِيَ، اٛ حٛوْنِ اَلِسَبَتُ؞ شَرٜلْ کٛ اَلِسَبَتُ نَنِ کٛوْنٛلْ مَرْيَامَ، ٻِطّٛ غٛنْطٛ ندٜرْ رٜىٰدُ مَاکٛ دِوِ نغَمْ بٜلْطُمْ، اَلِسَبَتُ بٛو حٜبِّنَا رُوحُ اَللَّه؞ اٛ نٛدِّ مَرْيَامَ اٜ سٜمْبٜ، اٛ وِعِ، «اَ بَرْکِطِنَاطٛ ندٜرْ رٜوْٻٜ! ٻِطّٛ مٛ شَاوُطَا اٛ بَرْکِطِنَاطٛ؞ مِنْ، مِ مٛيٜ ندٜ اِنَّ اَلْمَسِيحُ وَرَتَ تٛ اَمْ؟ ندٜ نَنُمِ کٛوْنٛلْ مَاطَ، ٻِطّٛ غٛنْطٛ ندٜرْ رٜىٰدُ اَمْ دِوِي نغَمْ بٜلْطُمْ؞ اَ بَرْکِطِنَاطٛ نغَمْ اَ جَٻِي کٛ جٛومِرَاوٛ وَطَنْمَا اَلْکَوَلْ طُمْ حٜىٰوَيْ؞» ندٜنْ مَرْيَامَ وِعِ، «اٜ مِ مَنْتَ جٛومِرَاوٛ اٜ ٻٜرْندٜ اَمْ فُو؞ اٜ مِ نَنَ بٜلْطُمْ طُطُّمْ ندٜرْ ٻٜرْندٜ اَمْ نغَمْ اَللَّه، کِسْنٛووٛيَمْ، نغَمْ اٛ يُرْمِنَنِييَمْ، مِنْ، کٛرْطٛ مَاکٛ، لٜسْتِنْطٛ حٛورٜ؞ دَغَ جٛونِ يِمْٻٜ دُونِيَارُ فُو نٛدِّرَيْيَمْ بَرْکِطِنَاطٛ، نغَمْ اَللَّه بَاوُطٛ وَطَنِييَمْ فِي مَوْطُمْ طُطُّمْ، اٛ شٜنِيطٛ؞ جُرُمْطُمْ مَاکٛ جٛوطٛتٛ دٛوْ کُلٛوٻٜمٛ حَا اَبَدَا؞ اٜ مٛ وَطَ فِي مَوْطُمْ اٜ جُنْغٛ مَاکٛ سٜمْبِنْغٛ، اٜ مٛ سَنْکِتَ مَوْنِنْٻٜ کٛعٜ مَٻّٜ اٜ کٛ ٻٜ مَنْتٛرْتٛو ندٜرْ ٻٜرْطٜ مَٻّٜ؞ اٜ مٛ اِتَّ لَامِيٻٜ دٛوْ لَامُ مَٻّٜ، اَمَّا اٜ مٛ مَوْنِنَ لٜسْنُٻٜ کٛعٜ مَٻّٜ؞ اٜ مٛ حَرْنَ نَنٛوٻٜ وٜىٰلٛ اٜ فِي بٛطُّمْ، اَمَّا اٜ مٛ اَلَ رِسْکُٻٜ جُوطٜ مٜىٰرٜ؞ اٜ مٛ وَلَّ يِمْٻٜ اِسْرَاعِيلَ مَشُّٻٜ مَاکٛ، اٛ يٜجِّتَتَا يُرْمِنَنْکِ اِبْرَاهِمْ اٜ لٜݧٛلْ مُوطُمْ حَا اَبَدَا، نٛ اٛ وِعُنٛو مَامَعٜنْ مٜىٰطٜنْ؞» مَرْيَامَ جٛوطٛدَکٜ اٜ اَلِسَبَتُ کٛ وَطِ لٜبِّ تَتِ، ندٜنْ اٛ سٛعِّي وُرٛ مَاکٛ؞ ندٜ شَرٜلْ دَݧُکِ اَلِسَبَتُ وَطِ، اٛ دَݧِ ٻِطّٛ غٛرْکٛ؞ ٻٜ اٛ حٜدِّ اٜ بَنْدِرَاٻٜ مَاکٛ ٻٜ نَنِدِ بٜلْطُمْ اٜ مَاکٛ ندٜ ٻٜ نَنِ جٛومِرَاوٛ يُرْمِنَنِمٛ؞ ندٜ ٻِنْغٜلْ نغٜلْ وَطِ بَلْطٜ جٛوٜىٰتَتِ، ٻٜ نغَرِ نَادُکِنغٜلْ؞ ٻٜ نغِطِينٛ نٛدَّنْکِنغٜلْ اِنْدٜ ݧَاکٛ مَاغٜلْ جَکَارِيَ؞ اَمَّا مَدُوجٛ مَاغٜلْ وِعِ، «نَاع نٛنْ، طُمْ نٛدَّنَنغٜلْ يَحَيَ؞» ٻٜ مبِعِمٛ، «وَلَا غٛطّٛ ندٜرْ لٜݧٛلْ مَاطَ غٛودُطٛ اِنْدٜ ندٜنْ طٛنْ؞» سٜيْ ٻٜ مٜتِرَنِ ݧَاکٛ مَاغٜلْ جُوطٜ، نغَمْ ٻٜ اَنْدَ اِنْدٜ ندٜ اٛ يِطِ طُمْ نٛدَّنَنغٜلْ؞ جَکَارِيَ حٛلِّٻٜ اٜ مٛ يِطِ اَلّٛوَلْ، اٛ وِنْدِ، «اِنْدٜ مَاغٜلْ يَحَيَ؞» ٻٜ فُو فِي طُمْ حُلْنِيٻٜ؞ طٛنْ اٜ طٛنْ، حٛنْدُکٛ مَاکٛ مَٻِّتِي، طٜمْنغَلْ مَاکٛ يٛوفِ، ندٜنْ اٛ فُطِّ مٜتُکِ، اٜ مٛ مَنْتَ اَللَّه؞ کُلٛلْ نَنْغِ ٻٜ اٛ حٜدِّ فُو، کٛو مٛيٜ وَطِ کَ مٜتُکِ دٛوْ فِي طُمْ فُو ندٜرْ کٛشّٜىٰجٜ لٜيْدِ يَحُودِيَ؞ کٛو مٛيٜ نَنْطٛ فِي طُعُمْ ݧُمِ دٛوْ مَاجُمْ، اٜ وِعَ، «طُمٜ ٻِنْغٜلْ نغٜعٜلْ وَرْتَتَ تٛ مَوْنِ؟» نغَمْ جُنْغٛ جٛومِرَاوٛ اٜ وٛنْدِ اٜ مَاغٜلْ؞ جَکَارِيَ، ݧَاکٛ ٻِنْغٜلْ نغٜلْ، اٜ حٜىٰوِ رُوحُ اَللَّه، وَطِ اَنَّبَاکُ، اٛ وِعِ، «اٜنْ مَنْتُ جٛومِرَاوٛ، اَللَّه اِسْرَاعِيلَ، نغَمْ اٛ وَرٛيِي اٛ رِمْطِنِي يِمْٻٜ مَاکٛ؞ اَللَّه وَدَّنِيعٜنْ کِسْنٛووٛ مَوْطٛ پِوٛيْطٛ دَغَ لٜݧٛلْ دَوْدَ، مَشُّطٛ مَاکٛ؞ نٛ اٛ وِعُنٛو ندٜرْ کٛنْدُطٜ اَنَّبٛعٜنْ مَاکٛ شُٻَاٻٜ دَغَ کٛ نٜىٰٻِ، اٛ حِسْنَيْعٜنْ دَغَ غَݧٛوٻٜ مٜىٰطٜنْ اٜ کَلَّنْٻٜعٜنْ؞ اٛ وِعِينٛ اٛ يُرْمِنَنَيْ مَامَعٜنْ مٜىٰطٜنْ، اٛ يٜجِّتَتَا اَلْکَوَلْ مَاکٛ شٜنِينغَلْ، نغَلْ اٛ وَطَنّٛو مَامَ مٜىٰطٜنْ اِبْرَاهِمْ؞ اٛ وِعِي اٛ حِسْنَيْعٜنْ دَغَ جُوطٜ غَݧٛوٻٜ مٜىٰطٜنْ، نغَمْ کُوَنٜنْمٛ کُلٛلْ وَلَا، نجٛوطٛوطٜنْ جٛنْدٜ شٜنِيندٜ اٜ اَادِلَاکُ يٜىٰسٛ مَاکٛ ندٜرْ بَلْطٜ مٜىٰطٜنْ فُو، نغَطٜنْ کٛو طُمٜ کٛ اٛ وِعِ؞ «اَنْ ٻِنْغٜلْ اَمْ، طُمْ نٛدِّرْتٜ اَنَّبِيجٛ جٛومِرَاوٛ جٛومُ مَنْغُ، اَ اَرْتَيْ اَلْمَسِيحُ وَرْکِ نغَمْ مٛعِّنَنَامٛ لَاوٛلْ، نغَمْ اَنْدِنَا يِمْٻٜ مَاکٛ طُمْ حِسْنَيْٻٜ لَاوٛلْ يَافَاکِ حَکّٜ مَٻّٜ؞ اَللَّه وَطِي فِي طُعُمْ نغَمْ اٛ کٜىٰوُطٛ جُرُمْطُمْ؞ نغَمْ جُرُمْطُمْ مَاکٛ، اَلْمَسِيحُ وَرٛيَيْ تٛ مٜىٰطٜنْ دَغَ دٛوْ نٛ نَانغٜ وُرْتِرٛيْتٛو، نغَمْ اٛ يٜيْنَنٛو وٛنْٻٜ ندٜرْ ݧِوْرٜ اٜ ندٜرْ کُلٛلْ مَيْدٜ، طُمْ تٛکِّنَيْ کٛيْطٜ مٜىٰطٜنْ دٛوْ لَاوٛلْ جَمْ؞» ٻِطّٛ اٛنْ مَوْنِ، فَامُ مَاکٛ ٻٜيْدِي؞ اٜ مٛ جٛوطِي ندٜرْ لَدّٜ حَا شَرٜلْ کٛ طُمْ اَنْدِنِمٛ تٛ يِمْٻٜ اِسْرَاعِيلَ؞ شَرٜلْ کٛ يَحَيَ غَطٛووٛ بَڤْتِسْمَ دَݧَا، مَوْطٛ لَامِيٻٜ لٜيْطٜ رٛومَ بِعٜتٜىٰطٛ کَيْسَرْ اَغُسْتُسْ وِعِ وٛنْٻٜ ندٜرْ لَامُ رٛومَ فُو طُمْ وِنْدَ اِنْطٜ مَٻّٜ؞ کَنْکِ وٛنِ وِنْدُکِ اَرَنْدٜحِ کِ طُمْ وَطِ شَرٜلْ کٛ کِرِينِيُسْ وٛنِ غٛمْنَاجٛ لٜيْدِ سِيرِيَ؞ کٛو مٛيٜ يَحِ تٛ لٜݧٛلْ مُوطُمْ پِوٛيِ نغَمْ طُمْ وِنْدَ اِنْدٜ مُوطُمْ؞ سٜيْ يُسُفُ مَا اُمِّي دَغَ غَرِيرِ نَجَرَتْ ندٜرْ لٜيْدِ غَلِيلِ؞ اٛ يَحِ غَرِيرِ تٛ دَوْدَ دَݧَا بِعٜتٜىٰندِ بَيْتَلَامِ نغٛنْدِ ندٜرْ لٜيْدِ يَحُودِيَ، نغَمْ کَنْکٛ دَغَ لٜݧٛلْ دَوْدَ؞ اٛ يَحُ تٛنْ نغَمْ طُمْ وِنْدَ اِنْدٜ مَاکٛ، کَنْکٛ اٜ مَرْيَامَ، مٛ طُمْ وَطَنِمٛ اَلْکَوَلْ تٜىٰغَلْ؞ مَرْيَامَ اٛنْ اٜ وٛودِ رٜىٰدُ؞ اٜ ٻٜ ندٜرْ بَيْتَلَامِ، سٜيْ شَرٜلْ دَݧْنغٛلْ مَاکٛ وَطِ؞ سٜيْ اٛ دَݧِ ٻِطّٛ غٛرْکٛ، اَفٛ مَاکٛ، اٛ سَاوِمٛ ندٜرْ وُدٜرٜ وٛوطُندٜ، اٛ فُکِّنِمٛ ندٜرْ تٛ طُمْ وَطَنْتَ مَرْلٜ ݧَمْندُ، نغَمْ وَلَا نجَيْرِ ندٜرْ سُودُ حٛٻّٜ؞ اٜ وٛودِ وٛيْنَاٻٜ حَادٜ طٛنْ اٜ ٻٜ مبَالَ يَاسِ، اٜ ٻٜ ندٜىٰنَ مَرْلٜ مَٻّٜ جٜمَّ؞ سٜيْ مَلَاعِکَاجٛ جٛومِرَاوٛ وَنْغَنِٻٜ ندٜرْ تٜدُّنغَلْ جٛومِرَاوٛ، کُلٛلْ نَنْغِٻٜ؞ اَمَّا مَلَاعِکَاجٛ اٛنْ وِعِٻٜ، «تٛع اٛنْ کُلُ! مِ وَدَّنِيعٛنْ حَبَرُ ٻُرْطُمْ وٜلْکِ نغَمْ کٛو مٛيٜ؞ حَنْدٜ ندٜرْ غَرِيرِ دَوْدَ طُمْ دَݧَنِيعٛنْ کِسْنٛووٛ، کَنْکٛ وٛنِ اَلْمَسِيحُ، جٛومِرَاوٛ؞ رَا نٛ کٜٻْتِرْتٛنْمٛ، اٛنْ تَوَيْ ٻِنْغٜلْ اٜ سَاوَا ندٜرْ وُدٜرٜ، ندٜنْ اٜ نغٜلْ فُکِّنَا ندٜرْ تٛ طُمْ وَطَنْتَ مَرْلٜ ݧَمْندُ؞» طٛنْ اٜ طٛنْ سٜيْ وٛٻّٜ مَلَاعِکَعٜنْ طُطْٻٜ وَنْغِ حَادٜ مَلَاعِکَاجٛ اٛنْ، اٜ ٻٜ مَوْنِنَ مَنْغُ اَللَّه، اٜ ٻٜ مبِعَ، «اٜنْ مَوْنِنْ اَللَّه مٛ دٛوْ، جَمْ جٛوطٛو ندٜرْ دُونِيَارُ اٜ دٛوْ يِمْٻٜ ٻٜ اٛ نَنَتَ بٜلْطُمْ مَٻّٜ؞» ندٜ مَلَاعِکَعٜنْ ٻٜنْ شٛعِّي دٛوْ، سٜيْ وٛيْنَاٻٜ ٻٜنْ نغَطِ کَ مٜدُّکِ، اٜ ٻٜ مبِعَ، «اٜنْ نجَحُ بَيْتَلَامِ نغِعٜنْ فِي طُعُمْ طُمْ جٛومِرَاوٛ وِعِعٜنْ؞» سٜيْ ٻٜ نجَوْطِي، ٻٜ نجَحِ، ٻٜ تَوِ مَرْيَامَ اٜ يُسُفُ اٜ ٻِنْغٜلْ نغٜلْ اٜ نغٜلْ فُکِّي ندٜرْ تٛ طُمْ وَطَنْتَ مَرْلٜ ݧَمْندُ؞ ندٜ ٻٜ نغِعِنغٜلْ، ٻٜ ندِلِّ، ٻٜ مبِعِ يِمْٻٜ کٛ مَلَاعِکَاجٛ وِعِٻٜ دٛوْ مَاغٜلْ؞ کٛ وٛيْنَاٻٜ ٻٜنْ مبِعِ کَيْطِنِي کٛو مٛيٜ نَنْطٛ؞ اَمَّا مَرْيَامَ بٛو اٜ جٛغِي کٛ نَنِ فُو ندٜرْ ٻٜرْندٜ مُوطُمْ، اٛ وَطِ کَ ݧُمُکِ دٛوْ مَاجُمْ؞ سٜيْ وٛيْنَاٻٜ ٻٜنْ شٛعِّي، اٜ ٻٜ مَوْنِنَ اَللَّه، اٜ ٻٜ مَنْتَمٛ نغَمْ کٛو طُمٜ کٛ ٻٜ نَنِ اٜ کٛ ٻٜ نغِعِ، نٛنْ نٛ طُمْ وِعِرِٻٜ؞ ندٜ ٻِنْغٜلْ نغٜلْ وَطِ بَلْطٜ جٛوٜىٰتَتِ، طُمْ نَادِمٛ طُمْ حٛکِّمٛ اِنْدٜ يٜىٰسُ، اِنْدٜ ندٜ مَلَاعِکَاجٛ حٛکِّمٛ کٛ طُمْ وَطَ رٜىٰدُ مَاکٛ؞ غَطَ بَلْطٜ لٛوتَاکِ مَٻّٜ حٜىٰݧِ نٛ اَنَّبِ مُوسَ وِعِ ندٜرْ اَتَّوْرَ ٻٜ نغَطَ تٛ ٻٜ ندَݧِي، يُسُفُ اٜ مَرْيَامَ نجَارِ يٜىٰسُ اُرُشَلِيمَ يٜىٰسٛ جٛومِرَاوٛ؞ نٛنْ طُمْ وِنْدِرَا ندٜرْ اَتَّوْرَ، «کٛو مٛيٜ غٛرْکٛ اَفٛ، جٛومِرَاوٛ جٜيِمٛ؞» ٻٜ شَکَّنِ اَللَّه نٛ طُمْ وِنْدِرَا ندٜرْ اَتَّوْرَ، «ڤٛولِ طِطِ کٛو بٛو تَتَّبَرَحٛيْ طِطٛيْ؞» اٜ شَرٜلْ نغٜلْ اٜ وٛودِ غٛطّٛ نٜطّٛ ندٜرْ اُرُشَلِيمَ بِعٜتٜىٰطٛ سَامِنُ، اَادِلِيجٛ، کُلٛووٛ اَللَّه؞ اٛ حَاٻِي اٛ يِعَ غَرٛلْ اَلْمَسِيحُ نغَمْ حِسْنَ يِمْٻٜ اِسْرَاعِيلَ؞ رُوحُ اَللَّه اٜ وٛنْدِ اٜ مَاکٛ، حٛلِّيمٛ اٛ مَايَتَا نَا اٛ يِعِي اَلْمَسِيحُ جٛومِرَاوٛ؞ رُوحُ اَللَّه يَارِمٛ ندٜرْ وُرٛ شٜنِينغٛ؞ سٜيْ مَرْيَامَ اٜ يُسُفُ نغَدّٛيِ يٜىٰسُ ندٜرْ وُرٛ نغٛنْ نغَمْ وَطَنْکِمٛ کٛ اَتَّوْرَ وِعِ؞ سَامِنُ جَٻِ ٻِنْغٜلْ نغٜلْ ندٜرْ جُوطٜ مُوطُمْ، ندٜنْ مَنْتِ اَللَّه، وِعِ، «يَا جٛومِرَاوٛ، اَ حٜبِّنِي اَلْکَوَلْ مَاطَ؞ جٛونِ اَلُ مَشُّطٛ مَاطَ دِلَّ جَمْ؞ نغَمْ غِتٜ اَمْ نغِعِي کِسْنٛووٛ مٛ لِلٛيْطَا، مٛ شِرْيَنِطَا لٜݧِ فُو؞ اٛ وَرْتَيْ بٛ جَيْنغٛلْ، اٛ حٛلَّيْ لٜݧِ دُونِيَارُ لَاوٛلْ مَاطَ، اٛ وَطَيْ يِمْٻٜ مَاطَ يَحُودَنْکٛعٜنْ کٜٻَ مَنْغُ؞» ݧَاکٛ ٻِنْغٜلْ نغٜلْ اٜ مَدُوجٛ مَاغٜلْ ٻٜ کَيْطِنِ اٜ کٛ طُمْ وِعِ دٛوْ مَاغٜلْ؞ سٜيْ سَامِنُ بَرْکِطِنِٻٜ، ندٜنْ اٛ وِعِ مَرْيَامَ، مَدُوجٛ يٜىٰسُ، «ٻِنْغٜلْ نغٜعٜلْ وَرْتَيْ طَتَلْ يَنُکِ طُطْٻٜ اٜ اُمَّاکِ طُطْٻٜ ندٜرْ لٜيْدِ اِسْرَاعِيلَ؞ نغٜلْ وَرْتَيْ اَنْدِتِرْطُمْ دَغَ اَللَّه طُمْ يِمْٻٜ طُطْٻٜ نغَݧَتَ؞ ٻِطّٛ اٛعٛ وَنْغِنَيْ ݧُمٛوجِ يِمْٻٜ شُوطِيطِ؞ اَنْ مَا، ٻٜرْندٜ مَاطَ نَاوَيْ بٛنٛ کَافَحِ تُفِندٜ؞» طٛنْمَا اٜ وٛودِ اَنَّبِيجٛ دٜبّٛ بِعٜتٜىٰطٛ حَنَّتُ ٻِي فَانُوٜلْ، پِوٛيْطٛ دَغَ لٜݧٛلْ اَاشِرُ؞ دٜبّٛ اٛنْ اٛ نَيٜىٰجٛ، اٛ جٛوطٛدَکٜ اٜ غٛرْکٛ مَاکٛ دُوٻِ جٛوٜىٰطِطِ، ندٜنْ غٛرْکٛ اٛنْ مَايِي؞ غَطَ غٛرِيکٛ مَايِ، اٛ جٛوطِي اٛ تٜعَاکَ حَا دُوٻِ مَاکٛ نغَطِ 48؞ کٛو ندٜيٜ اٜ مٛ يَحَ وُرٛ شٜنِينغٛ اٜ مٛ مَوْنِنَ اَللَّه، اٜ مٛ سُومٛو، اٜ مٛ وَطَ دٛعَارٜ جٜمَّ اٜ ݧَلَوْمَ؞ اٜ شَرٜلْ نغٜلْ، اٛ وَرٛيِ تٛ مَٻّٜ، اٛ يٜتِّ اَللَّه، اٛ يَحِ تٛ کَاٻُٻٜ يِعُکِ شَرٜلْ کٛ اَللَّه رِمْطِنْتَ اُرُشَلِيمَ، اٛ حٛکِّٻٜ حَبَرُ دٛوْ ٻِنْغٜلْ نغٜلْ؞ ندٜ يُسُفُ اٜ مَرْيَامَ نجٛتِّنِ کٛو طُمٜ کٛ اَتَّوْرَ وِعِ طُمْ وَطَ، ٻٜ شٛعِّي غَرِيرِ مَٻّٜ نَجَرَتْ ندٜرْ لٜيْدِ غَلِيلِ؞ يٜىٰسُ مَوْنِ، سٜمْبِطِ، فَامُ حٜىٰوِمٛ، ندٜنْ بَرْکَ اَللَّه اٜ دٛوْ مَاکٛ؞ کٛو طُمٜ ندُنْغُ دَݧٛوٻٜ يٜىٰسُ اٜ نجَحَ اُرُشَلِيمَ نغَمْ حُمْتٛ سَکِّنْکِ؞ ندٜ يٜىٰسُ وَطِ دُوٻِ سَڤّٛ اٜ طِطِ، ٻٜ نجَحِ حُمْتٛ نٛ ٻٜ مبٛووِ؞ غَطَ حُمْتٛ نغٛنْ حٜىٰݧِ، دَݧٛوٻٜ مَاکٛ اٜ دٛوْ طَتَلْ حٛوتُکِ وُرٛ، يٜىٰسُ بٛو دَرِي ندٜرْ اُرُشَلِيمَ، اَمَّا دَݧٛوٻٜ ٻٜنْ اَنْدَا اٛ دَرَکٜ؞ اٜ ٻٜ کَمِّي اٜ مٛ ندٜرْ ٻٜ ٻٜ نجَادَتَ، ٻٜ نغَطِ يَادُ ݧَلْندٜ غٛعٛ، ندٜنْ ٻٜ ڤُطِّ طَٻُّتُکِمٛ ندٜرْ بَنْدِرَاٻٜ مَٻّٜ اٜ حِغٛوٻٜ مَٻّٜ؞ ندٜ ٻٜ طَٻِّتِ ٻٜ کٜٻْتَايِمٛ، ٻٜ شٛعِّي اُرُشَلِيمَ نغَمْ طَٻُّتُکِمٛ؞ ندٜرْ ݧَلْندٜ تَتَوْرٜ ٻٜ تَوِمٛ ندٜرْ وُرٛ شٜنِينغٛ، اٜ مٛ جٛوطِي حَکُّندٜ مٛودِٻّٜ، اٜ مٛ نَنَٻٜ، ندٜنْ اٜ مٛ پَمَٻٜ؞ نَنْطٛمٛ فُو حَيْطِنِ اٜ فَامُ مَاکٛ اٜ نٛوتَاکِ مَاکٛ؞ ندٜ دَݧٛوٻٜ مَاکٛ نغِعِمٛ، ٻٜ کَيْطِنِ؞ مَدُوجٛ مَاکٛ وِعِمٛ، «ٻِطّٛ اَمْ، کٛ وَطِ نغَطَنْطَامِنْ نِينِ؟ مِنْ اٜ ݧَاکٛ مَاطَ ندٜ مِنْ طَٻِّتِ مِنْ نغِعَايِمَ، مِنْ نغَنِّي؞» اٛ وِعِٻٜ، «کٛ وَطِ طَٻِّتٛتٛيْيَمْ؟ اٛنْ اَنْدَا اٜ حَانِ مِ جٛوطٛو ندٜرْ وُرٛ ݧَاکٛ اَمْ؟» اَمَّا ٻٜ فَامَايِ کٛ اٛ وِعِٻٜ؞ سٜيْ يٜىٰسُ سٛعّٛدِي اٜ مَٻّٜ نَجَرَتْ، اٜ مٛ وَطَ کٛ ٻٜ مبِعِمٛ فُو؞ مَدُوجٛ مَاکٛ جٛغِي فِي طُعُمْ فُو ندٜرْ ٻٜرْندٜ مُوطُمْ؞ يٜىٰسُ مَوْنِ، ٻٜيْدِ فَامُ اٜ حٜٻُکِ يِدّٜ دَغَ تٛ اَللَّه اٜ تٛ يِمْٻٜ؞ مَوْطٛ لَامِيٻٜ لٜيْطٜ رٛومَ بِعٜتٜىٰطٛ کَيْسَرْ تِبَارِيَ اٜ وٛودِ دُوٻِ سَڤّٛ اٜ جٛوِ دٛوْ لَامُ، اٜ شَرٜلْ نغٜلْ بُنْتُسْ بِلَاتُسْ وٛنِ غٛمْنَاجٛ لٜيْدِ يَحُودِيَ؞ حِرُدُسْ بٛو اٜ لَامِي لٜيْدِ غَلِيلِ، مَوْنِيکٛ فِلِبُسْ بٛو اٜ لَامِي لٜيْدِ اِتُورِيَ اٜ تَرَکُنِيتَسْ، ندٜنْ لِسَانِيَسْ اٜ لَامِي لٜيْدِ اَبِيلِيَ؞ حَنَانَ اٜ کَيَافَ بٛو نغٛنِ مَوْٻٜ مَوْٻٜ اَرْدِيٻٜ دِينَ؞ اٜ شَرٜلْ نغٜلْ وٛلْدٜ اَللَّه وَرَنِ يَحَيَ، ٻِطّٛ جَکَارِيَ، ندٜرْ لَدّٜ؞ نغَمْ نٛنْ، يَحَيَ يَحِ بِغٜىٰجٜ غٛنْطٜ حَادٜ شَانغٛلْ اُرْدُنْ فُو، اٜ مٛ وَعَجِنَ، اٜ مٛ وِعَ، «تُوبٜىٰ، طُمْ وَطَنَعٛنْ بَڤْتِسْمَ، ندٜنْ اَللَّه يَافَنْتٛعٛنْ حَکّٜىٰجِ مٛوطٛنْ؞» نٛ طُمْ وِنْدِرَا ندٜرْ دٜفْتٜرٜ اَنَّبِ اِشَايَ دٛوْ يَحَيَ، «غٛطّٛ اٜ نٛدَّ ندٜرْ لَدّٜ اٜ وِعَ، ‹مٛعِّنٜىٰ طَتَلْ جٛومِرَاوٛ، ڤٛرْتٜىٰ لَاوٛلْ نغَمْ غَرٛلْ مَاکٛ؞ ڤٛغٛوجِ فُو طِ کٜبِّنْتٜىٰطِ، کٛشّٜىٰجٜ اٜ پٛولٜ فُو طٜ نَمٜتٜىٰطٜ؞ طَتٜ غُورِيطٜ طٜ دَرْتِنْتٜىٰطٜ، طَتٜ بٛنِّيطٜ طٜ مٛعِّنْتٜىٰطٜ؞ يِمْٻٜ دُونِيَارُ فُو ٻٜ نغِعَيْ کِسْندَمْ اَللَّه؞› » يِمْٻٜ طُطْٻٜ نغَرٛيِ تٛ يَحَيَ نغَمْ اٛ وَطَنَٻٜ بَڤْتِسْمَ؞ اٛ وِعِٻٜ، «اٛنٛنْ ٻِٻّٜ بٛولٜ! مٛيٜ وِعِعٛنْ ندٛغّٛنْ بٛنٜ غَرَيْطُمْ؟ نغَطٜىٰ کٛ حٛلَّتَ اٛنْ اَلِي حَکّٜىٰجِ مٛوطٛنْ؞ تٛع اٛنْ مبِعُ ندٜرْ ٻٜرْطٜ مٛوطٛنْ، ‹مِنٛنْ، مِنْ ٻِٻّٜ اَنَّبِ اِبْرَاهِمْ؞› نغَمْ اٜ مِ وِعَعٛنْ، اَللَّه وَاوَيْ اُمِّنَنْکِ اَنَّبِ اِبْرَاهِمْ ٻِٻّٜ دَغَ ندٜرْ کَاپٜ طٜعٜ؞ کٛو جٛونِ فٜعِّرْدٜ پٜفْتَامَ نغَمْ فٜعَّ لٜطّٜ دَغَ طَطِ مَاجٜ؞ لٜکِّ فُو کِ رِمَتَا ٻِکّٛيْ مبٛطْکٛيْ، طُمْ فٜعَّيْکِ طُمْ فَطَّکِ ندٜرْ حِيتٜ؞» يِمْٻٜ مبِعِمٛ، «کٛ حَانِ مِنْ نغَطَ؟» يَحَيَ وِعِٻٜ، «غٛودُطٛ تٛغّٛوجٜ طِطِ فُو حٛکَّ مٛ وَلَنَا غٛعٛ، ندٜنْ غٛودُطٛ ݧَمْندُ فُو حٛکّٛرَ مٛ وَلَنَا؞» جَٻٛوٻٜ شٜىٰدٜ لٜيْدِ مَا نغَرِ نغَمْ ٻٜ نغَطَنٜىٰ بَڤْتِسْمَ، ٻٜ مبِعِمٛ، «مٛودِبّٛ، کٛ حَانِ مِنْ نغَطَ؟» اٛ وِعِٻٜ، «تٛع اٛنْ نجَٻُ کٛ ٻُرِ نٛ طُمْ وِعِعٛنْ نجَٻٛنْ؞» وٛٻّٜ سٛوجِعٜنْ پَمِمٛ مبِعِ، «مِنٛنْ مَا، کٛ حَانِ مِنْ نغَطَ؟» اٛ وِعِٻٜ، «تٛع اٛنْ تٜىٰتَنْ يِمْٻٜ شٜىٰدٜ اٜ سٜمْبٜ، تٛع اٛنْ مبِعُ يِمْٻٜ نغَطِي کٛ ٻٜ نغَطَايِ نغَمْ نجَٻَنٛنْٻٜ شٜىٰدٜ؞ مُݧٜىٰ دٛوْ کٛ طُمْ يٛٻَتَعٛنْ؞» يِمْٻٜ کَاٻِي نغِعَ اَلْمَسِيحُ؞ کٛو مٛيٜ ندٜرْ مَٻّٜ اٜ ݧُمَ ندٜرْ ٻٜرْندٜ مُوطُمْ کٛو يَحَيَ وٛنِ اَلْمَسِيحُ؞ يَحَيَ وِعِٻٜ، «اٜ مِ وَطِرَنَعٛنْ بَڤْتِسْمَ اٜ ندِيَمْ، اَمَّا ٻُرْطٛيَمْ مَنْغُ اٜ وَرَ؞ مِ فٛتَايِ فِتُّکِ لٛکُّلِّ ڤَطٜ مَاکٛ؞ اٛ وَطِرَنَيْعٛنْ بَڤْتِسْمَ اٜ رُوحُ اَللَّه اٜ حِيتٜ؞ اٜ مٛ جٛغِي بٜسِرْطُمْ غَوْرِ مَاکٛ نغَمْ سٜنْدُکِ غَوْرِ اٜ ݧَاندٜ؞ اٛ حَوْرِتَيْ غَوْرِ ندِنْ، اٛ وَطَندِ ندٜرْ رٜسِرْدٜ غَوْرِ مَاکٛ، اَمَّا اٛ وُلَ ݧَاندٜ ندٜنْ ندٜرْ حِيتٜ نغٜ وَاتَتَا؞» نٛنْ يَحَيَ وَغِّنِ يِمْٻٜ اٜ بٛلِيطٜ طُطّٜ، اٛ اَنْدِنِيٻٜ حَبَرُ بٜلْطُمْ؞ ندٜنْ اٛ حَٻَنِ حِرُدُسْ لَامِيطٛ لٜيْدِ نغَمْ تٜعِ دٜبّٛ مَوْنِرَاوٛ مُوطُمْ بِعٜتٜىٰطٛ حِرُودِيَ، کَدِمَا نغَمْ کُوطٜ کَلُّطٜ فُو طٜ اٛ وَطِ؞ سٜيْ اٛ ٻٜيْدِ وَطُکِ کٛ ٻُرِ نٛنْ، اٛ وَطِ طُمْ مَٻِّ يَحَيَ ندٜرْ سُودُ شُرَلْ؞ ندٜ يِمْٻٜ فُو نغَطَنَا بَڤْتِسْمَ، يٜىٰسُ مَا وَطَنَا بَڤْتِسْمَ؞ اٜ مٛ ندٜرْ وَطُکِ دٛعَارٜ، سٜيْ دَمُّغَلْ دٛوْ مَٻِّتِي؞ رُوحُ اَللَّه جِڤّٛيِي دٛوْ مَاکٛ اٜ ٻَنْدُ بٛ فٛوندُ؞ حٛنٛنْدٜ پِوٛيِ دَغَ دٛوْ وِعِ، «اَنْ وٛنِ ٻِطّٛ اَمْ، مٛ نغِطُمِ؞ اٜ مِ نَنَ بٜلْطُمْ مَاطَ؞» کٛ يٜىٰسُ فُطِّ کُوغَلْ مُوطُمْ، اٛ ٻَدَکٜ دُوٻِ 30؞ يِمْٻٜ اٜ ݧُمَ يٜىٰسُ طُمْ ٻِطّٛ يُسُفُ؞ يُسُفُ ٻِطّٛ حٜىٰلِ، حٜىٰلِ ٻِطّٛ مَتَتْ، مَتَتْ ٻِطّٛ لٜىٰوِ، لٜىٰوِ ٻِطّٛ مَلْکِ، مَلْکِ ٻِطّٛ يَنَّ، يَنَّ ٻِطّٛ يُسُفُ، يُسُفُ ٻِطّٛ مَتَاتِيَ، مَتَاتِيَ ٻِطّٛ اَمٛسْ، اَمٛسْ ٻِطّٛ نَاحُمْ، نَاحُمْ ٻِطّٛ اَجَلِيَ، اَجَلِيَ ٻِطّٛ نَجَيَ، نَجَيَ ٻِطّٛ مَعَتَ، مَعَتَ ٻِطّٛ مَتَاتِيَ، مَتَاتِيَ ٻِطّٛ شِمٜىٰيَ، شِمٜىٰيَ ٻِطّٛ جٛوسٜکْ، جٛوسٜکْ ٻِطّٛ يَحُودَ، يَحُودَ ٻِطّٛ يٛوَانَنْ، يٛوَانَنْ ٻِطّٛ رٜفَيَ، رٜفَيَ ٻِطّٛ جَرُوبَبٜلْ، جَرُوبَبٜلْ ٻِطّٛ شٜيَلْتِيَلْ، شٜيَلْتِيَلْ ٻِطّٛ نٜىٰرِ، نٜىٰرِ ٻِطّٛ مَلْکِ، مَلْکِ ٻِطّٛ اَدِّ، اَدِّ ٻِطّٛ کٛسْمَ، کٛسْمَ ٻِطّٛ اَلْمَدَمَ، اَلْمَدَمَ ٻِطّٛ اٜرْ، اٜرْ ٻِطّٛ جٛوشُوَ، جٛوشُوَ ٻِطّٛ اٜلِيٜىٰجَ، اٜلِيٜىٰجَ ٻِطّٛ يٛرِمْ، يٛرِمْ ٻِطّٛ مَتَتْ، مَتَتْ ٻِطّٛ لٜىٰوِ، لٜىٰوِ ٻِطّٛ سَامِنُ، سَامِنُ ٻِطّٛ يَحُودَ، يَحُودَ ٻِطّٛ يُسُفُ، يُسُفُ ٻِطّٛ يٛنَنَ، يٛنَنَ ٻِطّٛ اٜلِيَاکِمْ، اٜلِيَاکِمْ ٻِطّٛ مَلَيَ، مَلَيَ ٻِطّٛ مَيْنَنَ، مَيْنَنَ ٻِطّٛ مَتَاتَ، مَتَاتَ ٻِطّٛ نَاتَنْ، نَاتَنْ ٻِطّٛ دَوْدَ، دَوْدَ ٻِطّٛ جٜىٰسِ، جٜىٰسِ ٻِطّٛ اٛبِدَ، اٛبِدَ ٻِطّٛ بٛعَاجَ، بٛعَاجَ ٻِطّٛ سَلْمٛنْ، سَلْمٛنْ ٻِطّٛ نَاشٛنْ، نَاشٛنْ ٻِطّٛ اَمِينَدَبْ، اَمِينَدَبْ ٻِطّٛ اَرَمْ، اَرَمْ ٻِطّٛ حٜسٜرُونَ، حٜسٜرُونَ ٻِطّٛ فٜرٜسَ، فٜرٜسَ ٻِطّٛ يَحُودَ، يَحُودَ ٻِطّٛ يَاکُبُ، يَاکُبُ ٻِطّٛ اِشِيَاکُ، اِشِيَاکُ ٻِطّٛ اِبْرَاهِمْ، اِبْرَاهِمْ ٻِطّٛ تٜىٰرَ، تٜىٰرَ ٻِطّٛ نَاحٛ، نَاحٛ ٻِطّٛ سٜرُغْ، سٜرُغْ ٻِطّٛ رٜيُ، رٜيُ ٻِطّٛ فٜىٰلٜ، فٜىٰلٜ ٻِطّٛ اٜبٜرْ، اٜبٜرْ ٻِطّٛ شٜىٰلَ، شٜىٰلَ ٻِطّٛ کٜنَنْ، کٜنَنْ ٻِطّٛ اَرْفَکَشَادِ، اَرْفَکَشَادِ ٻِطّٛ شٜمْ، شٜمْ ٻِطّٛ نُحُ، نُحُ ٻِطّٛ لَمٜکْ، لَمٜکْ ٻِطّٛ مٜتُسٜلَ، مٜتُسٜلَ ٻِطّٛ اٜنٛکْ، اٜنٛکْ ٻِطّٛ يَرٜدْ، يَرٜدْ ٻِطّٛ مَحَالَلٜلْ، مَحَالَلٜلْ ٻِطّٛ کٜنَنْ، کٜنَنْ ٻِطّٛ اٜنٛشْ، اٜنٛشْ ٻِطّٛ شِيتُ، شِيتُ ٻِطّٛ اَادَمُ، اَادَمُ مٛ اَللَّه؞ يٜىٰسُ پِوٛيِ دَغَ شَانغٛلْ اُرْدُنْ اٜ حٜىٰوِ رُوحُ اَللَّه؞ سٜيْ رُوحُ اَللَّه يَارِمٛ ندٜرْ لَدّٜ؞ تٛنْ اٛ وَطِ بَلْطٜ 40 شٜيْطَنْ اٜ فٛوندَمٛ، اٛ ݧَامَايِ غٛطُّمْ ندٜرْ بَلْطٜ طٜنْ؞ ندٜنْ غَطَ مَاجٜ، وٜىٰلٛ نَنْغِمٛ؞ شٜيْطَنْ وِعِمٛ، «تٛ اَنْ وٛنِ ٻِطّٛ اَللَّه، وِعُ ندٜعٜ حَيْرٜ وَرْتَ بُرٛودِ؞» يٜىٰسُ نٛوتِي وِعِمٛ، «اَايَارٜ وِعِي، ‹نَاع اٜ ݧَمْندُ تَنْ نٜطّٛ مَرٛرْتٛو؞› » سٜيْ شٜيْطَنْ يَارِمٛ وٛنْدٜ وِغٜىٰرٜ تٛوْندٜ، بٛ مَپُّکِ حٛلِّمٛ لٜيْطٜ دُونِيَارُ فُو؞ ندٜنْ شٜيْطَنْ وِعِمٛ، «مِ حٛکّٜتٜ لَامُ اٜ مَنْغُ دٛوْ لٜيْطٜ طٜعٜ فُو، نغَمْ طُمْ حٛکِّييَمْطٜ؞ مِ وَاوَيْ حٛکُّکِطٜ کٛو مٛيٜ مٛ نغِطُمِ؞ نغَمْ نٛنْ، تَا مَوْنِنِييَمْ، طُعُمْ فُو طُمْ وَرْتَيْ طُمْ مَاطَ؞» يٜىٰسُ وِعِمٛ، «اَايَارٜ وِعِي، ‹مَوْنِنْ اَللَّه جٛومِرَاوٛ مَاطَ، کَنْکٛ تَنْ مَوْنِنْتَا؞› » سٜيْ شٜيْطَنْ يَارِمٛ اُرُشَلِيمَ، دَرْنِمٛ تٛنْ دٛوْ حٛورٜ وُرٛ شٜنِينغٛ، وِعِمٛ، «تٛ اَنْ وٛنِ ٻِطّٛ اَللَّه، دِوُ دَغَ طٛعٛ، نغَمْ اَايَارٜ وِعِي، ‹اَللَّه وِعَيْ مَلَاعِکَعٜنْ مُوطُمْ مبَلُّمَا بٛطُّمْ؞ ٻٜ تَٻّٜتٜ ندٜرْ جُوطٜ مَٻّٜ، نغَمْ تٛع نَوْنَا کٛيْطٜ مَاطَ دٛوْ حَيْرٜ؞› » يٜىٰسُ وِعِمٛ، «اَايَارٜ وِعِ، ‹تَاع فٛوندُ اَللَّه جٛومِرَاوٛ مَاطَ؞› » ندٜ شٜيْطَنْ حٜىٰݧِ فٛوندُکِ يٜىٰسُ فُو، سٜيْ اٛ اَلِمٛ يَاکِ وٛنْغٜلْ شَرٜلْ؞ سٜيْ يٜىٰسُ سٛعِّي لٜيْدِ غَلِيلِ ندٜرْ بَوْطٜ رُوحُ اَللَّه؞ حَبَرُ مَاکٛ سَنْکِتِي ندٜرْ لٜيْدِ ندِنْ؞ اٛ فُطِّ اٜکِّتِنْکِ ندٜرْ شُوطِ دٛعَارٜ مَٻّٜ، کٛو مٛيٜ مَنْتِمٛ؞ يٜىٰسُ يَحِ نَجَرَتْ، غَرِيرِ تٛ مَوْنِ؞ ݧَلْندٜ سِوْتَارٜ، اٛ نَتِّ سُودُ دٛعَارٜ نٛ اٛ وٛووِ وَطُکِ؞ سٜيْ اٛ اُمِّي اٛ دَرِي نغَمْ اٛ جَنْغَ دٜفْتٜرٜ شٜنِيندٜ؞ طُمْ حٛکِّمٛ دٜفْتٜرٜ اَنَّبِ اِشَايَ، اٛ مَٻِّتِندٜ، اٛ جَنْغِ اَايَاجٜ بِعُطٜ، «رُوحُ جٛومِرَاوٛ اٜ دٛوْ اَمْ، نغَمْ اٛ سُٻِييَمْ مِ حٛکَّ ٻٜ نغَلَنَا حَبَرُ بٜلْطُمْ؞ اٛ لِلِييَمْ مِ وَدَّ حَبَرُ يٛوفُکِ مَشُّٻٜ، مِ وُمْتِنَ وُمْٻٜ، مِ وَطَ طُمْ اَلَ تٛرّٜتٜىٰٻٜ ندِلَّ، مِ وَعَجِنَنَ دُونِيَارُ وِيکِ حِتَاندٜ ندٜ جٛومِرَاوٛ حِسْنَتَ يِمْٻٜ مُوطُمْ وَرٛيِ؞» سٜيْ اٛ مَٻِّ دٜفْتٜرٜ ندٜنْ، اٛ حٛکِّتِندٜ بَلِّتٛووٛ اٛ جٛوطِي؞ کٛو مٛيٜ غٛنْطٛ ندٜرْ سُودُ دٛعَارٜ ندُنْ سُتِيمٛ؞ سٜيْ يٜىٰسُ وِعِٻٜ، «طٜعٜ اَايَاجٜ طٜ نَنْطٛنْ، حَنْدٜ طٜ کٜىٰوِي؞» کٛو مٛيٜ اٜ وِعَ بٛطُّمْ دٛوْ مَاکٛ؞ بٛلِيطٜ بٛطّٜ بُرْتِيطٜ ندٜرْ حٛنْدُکٛ مَاکٛ حَيْطِنِيٻٜ؞ ٻٜ مبِعِ، «نَاع اٛعٛ وٛنِ ٻِطّٛ يُسُفُ؟» اٛ وِعِٻٜ، «وَلَا سٜکٛ اٛنْ مبِعَيْيَمْ حَالَ کَعَ، ‹ݧَوْندٛووٛ، يَمْطِنْ حٛورٜ مَاطَ! کٛ مِنْ نَنِ اَ وَطِي ندٜرْ کَفَرْنَحُمْ، وَطُ طُمْ طٛعٛ ندٜرْ غَرِيرِ مَاطَ؞› » کَدِمَا اٛ وِعِٻٜ، «غٛونغَ، اٜ مِ وِعَعٛنْ، وَلَا اَنَّبِيجٛ جَٻٜتٜىٰطٛ تٛ غَرِيرِ مُوطُمْ؞ اٜ مِ وِعَعٛنْ غٛونغَ، اٜ شَرٜلْ اَنَّبِ اِلِيَ اٜ وٛودِ رٜوْٻٜ طُطْٻٜ ندٜرْ لٜيْدِ اِسْرَاعِيلَ ٻٜ وٛرْٻٜ مُعّٜنْ مَايِ؞ اٜ شَرٜلْ نغٜلْ، طُمْ وَطِ دُوٻِ تَتِ اٜ لٜبِّ جٛوٜىٰغٛعٛ ندِيَمْ تٛٻَايِ، ندٜنْ طُمْ وَطِ وٜىٰلٛ کَلُّنغٛ ندٜرْ لٜيْدِ ندِنْ فُو؞ اَمَّا اَنَّبِ اِلِيَ لِلٛيَاکَ تٛ کٛو مٛيٜ مَٻّٜ، سٜيْ تٛ غٛطّٛ دٜبّٛ نَاع يَحُودَنْکٜىٰجٛ مٛ غٛرْکٛ مُوطُمْ مَايِ، غٛنْطٛ غَرِيرِ جَرِفَتْ ندٜرْ لٜيْدِ سِدٛنْ؞ کَدِمَا اٜ وٛودِ غٛودُٻٜ ݧَوُ ݧَامٛوجُمْ لَرَلْ طُطْٻٜ ندٜرْ اِسْرَاعِيلَ اٜ شَرٜلْ اَنَّبِ اِلِيشَ، اَمَّا وَلَا جَمْطِنَاطٛ ندٜرْ مَٻّٜ سٜيْ نَعَمَنْ نٜطّٛ لٜيْدِ سِيرِيَ، نَاع اٛ يَحُودَنْکٜىٰجٛ؞» ندٜ يِمْٻٜ وٛنْٻٜ ندٜرْ سُودُ دٛعَارٜ ندُنْ نَنِ نٛنْ، ٻٜ فُو ٻٜرْطٜ مَٻّٜ مٜتِّ؞ ٻٜ اُمِّي، ٻٜ ندِيوِمٛ دَغَ ندٜرْ غَرِيرِ، ندٜنْ ٻٜ نجَارِمٛ دٛوْ پٛلْدٜ تٛ غَرِيرِ مَٻّٜ وٛنِ، نغَمْ ٻٜ تُورٛيٛومٛ لٜيْ، اَمَّا اٛ تٛکِّ حَکُّندٜ مَٻّٜ، اٛ دِلِّ؞ سٜيْ يٜىٰسُ يَحِ غَرِيرِ کَفَرْنَحُمْ ندٜرْ لٜيْدِ غَلِيلِ، اٜ مٛ اٜکِّتِنَٻٜ ندٜرْ سُودُ دٛعَارٜ ݧَلْندٜ سِوْتَارٜ؞ ٻٜ کَيْطِنِ اٜ اٜکِّتِنٛلْ مَاکٛ، نغَمْ بٛلِيطٜ مَاکٛ اٜ وٛودِ بَوْطٜ؞ اٜ وٛودِ غٛودُطٛ غِنّٛلْ ندٜرْ سُودُ دٛعَارٜ ندُنْ، اٛ وُلِّ سٜمْبٜىٰ، اٛ وِعِ، «وَيْيٛو! کٛ وَنُّمَا اٜ اَمِنْ، يٜىٰسُ نَجَرَنْکٜىٰجٛ؟ اَ وَرٛيِ نغَمْ کَلْکَامِنْ؟ اٜ مِ اَنْدِ اَنْ اَ مٛيٜ؞ اَنْ وٛنِ شٜنِيطٛ اَللَّه!» يٜىٰسُ حَٻَنِنغٛلْ وِعِ، «دٜعُّتُ! وُرْتَ ندٜرْ مَاکٛ!» سٜيْ غِنّٛلْ نغٛلْ دٛعِّ نٜطّٛ اٛنْ يٜىٰسٛ مَٻّٜ، نغٛلْ وُرْتِي نغٛلْ نَوْنَايِمٛ؞ ٻٜ فُو ٻٜ کَيْطِنِ، ٻٜ نغَطِ کَ مٜتُکِ حَکُّندٜ مَٻّٜ، اٜ ٻٜ مبِعَ، «اِرِ طٜيٜ بٛلِيطٜ نغٛنِ طٛعٛ؟ نغَمْ اٜ مٛ مٜتَنَ غِنِّ ندٜرْ لَامُ اٜ بَوْطٜ، اٜ طِ مبُرْتٛو؞» ندٜنْ حَبَرُ يٜىٰسُ سَنْکِتِي ندٜرْ لٜيْدِ ندِنْ؞ غَطَ يٜىٰسُ اَلِي سُودُ دٛعَارٜ، دِلِّي وُرٛ سِيمَنْ؞ اٜسِرَاوٛ بِيتُرُسْ دٜبّٛ جٛنْتٜ کَلُّطٜ اٜ تٛرَّمٛ، ٻٜ تٛرِي يٜىٰسُ يَمْطِتِنَمٛ؞ اٛ وَرِ تٛ ݧَوْطٛ اٛنْ، اٛ حَٻَنِ جٛنْتٜ طٜنْ، سٜيْ طٜ نجٛوفِمٛ؞ طٛنْ اٜ طٛنْ ݧَوْطٛ اٛنْ اُمِّي، فُطِّ وَدَّنْکِٻٜ ݧَمْندُ؞ ندٜ نَانغٜ حِيرِ، يِمْٻٜ نغَدَّنِ يٜىٰسُ غٛودُٻٜ ݧَوُوجِ فٜىٰرٜ‑فٜىٰرٜ، اٛ يٛوِ جُوطٜ مَاکٛ دٛوْ کٛو مٛيٜ ݧَوْطٛ، اٛ يَمْطِتِنِٻٜ؞ غِنِّ مَا مبُرْتِي ندٜرْ يِمْٻٜ طُطْٻٜ، اٜ طِ نغُلَّ، اٜ طِ مبِعَ، «اَنْ، اَ ٻِطّٛ اَللَّه!» اَمَّا اٛ حَٻَنِطِ، اٛ حَطِطِ مٜتُکِ، نغَمْ اٜ طِ اَنْدِ کَنْکٛ وٛنِ اَلْمَسِيحُ؞ ندٜ وٜىٰتِ، يٜىٰسُ وُرْتِي غَرِيرِ ندِنْ يَحِ وٛنْدٜ وِغٜىٰرٜ ندٜرْ لَدّٜ؞ يِمْٻٜ نغَطِ کَ طَٻُّتُکِمٛ؞ ندٜ ٻٜ تَوِمٛ، ٻٜ نغِطَا اٛ دِلَّ اٛ اَلَٻٜ؞ اَمَّا اٛ وِعِٻٜ، «دٛولٜ مِ وَعَجِنَ حَبَرُ بٜلْطُمْ دٛوْ لَامُ اَللَّه اٜ غٛطّٜ غَرِيجٜ، نغَمْ مَاجُمْ طُمْ لِلٛيِيَمْ؞» ندٜنْ اٛ وَطِ کَ وَعَجِنْکِ ندٜرْ شُوطِ دٛعَارٜ لٜيْدِ يَحُودِيَ؞ وٛنْدٜ ݧَلْندٜ يٜىٰسُ اٜ دَرِي دَاندٜ مبٜىٰلَ جَنِسَرَتْ، يِمْٻٜ اٜ ڤِلِيمٛ اٜ نَنَ وٛلْدٜ اَللَّه؞ اٛ يِعِ کٛمِيجٜ طِطِ اٜ طٜ ندٜسِي دَاندٜ ندِيَمْ؞ نَنْغٛوٻٜ لِپِّ مبُرْتِي ندٜرْ مَاجٜ، اٜ ٻٜ لَٻِّنَ نَنْغِرْطُمْ لِپِّ مَٻّٜ؞ اٛ نَتِّ کٛمِوَلْ سِيمَنْ، اٛ تٛرِي سِيمَنْ دِرْدِنَنغَلْ سٜطَّ ندٜرْ ندِيَمْ؞ اٛ جٛوطِي ندٜرْ مَاغَلْ، اٜ مٛ اٜکِّتِنَ يِمْٻٜ؞ ندٜ اٛ حٜىٰݧِ کٛ اٛ وِعَتَ، اٛ وِعِ سِيمَنْ، «تُرْتَ کٛمِوَلْ نغَلْ يَاکِ تٛنْ تٛ لُغِّ، نغَطَا نَنْغِرْطُمْ لِپِّ مَاطَ ندٜرْ ندِيَمْ نغَمْ نَنْغُکِ لِپِّ؞» سِيمَنْ بِيتُرُسْ وِعِ، «مٛودِبّٛ، مِنْ کُوِي جٜمَّارٜ فُو، مِنْ نَنْغَايِ غٛطُّمْ؞ اَمَّا دَغَ اَ وِعِ نٛنْ، مِ وَطَيْ نَنْغِرْطُمْ لِپِّ ندٜرْ ندِيَمْ؞» ندٜ ٻٜ نغَطِ نٛنْ، ٻٜ نَنْغِ لِپِّ طُطِّ حَا نَنْغِرْطُمْ طُمْ فُطِّ سٜىٰکُکِ؞ سٜيْ ٻٜ نٛدِّرِ حِغٛوٻٜ مَٻّٜ جُوطٜ، وٛنْٻٜ ندٜرْ وٛنْغَلْ کٛمِوَلْ، نغَمْ ٻٜ نغَرَ ٻٜ مبَلَّٻٜ؞ ٻٜ نغَرِ، ٻٜ کٜبِّنِ کٛمِيجٜ طٜنْ طٜ فُو طِطِ اٜ لِپِّ نَاکِ طٜ فُطِّ مُتُکِ ندٜرْ ندِيَمْ؞ ندٜ سِيمَنْ يِعِ نٛنْ، اٛ دِشِّي يٜىٰسٛ يٜىٰسُ، اٛ وِعِ، «مٛودِبّٛ، وٛطِّتَيَمْ، مِ نٜطّٛ غٛودُطٛ حَکّٜ!» سِيمَنْ وِعِ نٛنْ نغَمْ کَنْکٛ اٜ غٛنْدُٻٜ اٜ مَاکٛ ٻٜ کَيْطِنِي اٜ لِپِّ طُطِّ طِ ٻٜ نَنْغِ؞ يَاکُبُ اٜ يَحَيَ، ٻِٻّٜ جَبَدِ، حِغٛوٻٜ کُوغَلْ سِيمَنْ، کَمْٻٜ مَا ٻٜ کَيْطِنِي؞ يٜىٰسُ وِعِ سِيمَنْ، «تَاع حُلُ! دَغَ جٛونِ اَ وَدَّيْ يِمْٻٜ تٛ اَمْ؞» ٻٜ مبُرْتِنِ کٛمِيجٜ مَٻّٜ دَغَ ندٜرْ ندِيَمْ، ٻٜ اَلِ کٛو طُمٜ، ٻٜ تٛکِّ يٜىٰسُ؞ وٛنْدٜ ݧَلْندٜ يٜىٰسُ اٜ ندٜرْ وٛنْدِ غَرِيرِ، غٛطّٛ وَرٛيِ غٛودُطٛ ݧَوُ ݧَامٛوجُمْ لَرَلْ فُو ٻَنْدُ مَاکٛ؞ ندٜ اٛ يِعِ يٜىٰسُ، اٛ دِشِّي، اٛ تٛرِي يٜىٰسُ، اٛ وِعِ، «مٛودِبّٛ، تَا جَٻِي، اَ وَاوَيْ نجَمْطِتِنَايَمْ؞» سٜيْ يٜىٰسُ فٛرْتِ جُنْغٛ مُوطُمْ، مٜىٰمِمٛ، وِعِ، «مِ جَٻِي؞ يَمْطُتُ!» طٛنْ اٜ طٛنْ اٛ يَمْطِتِ، ݧَوُ نغُنْ اَلِمٛ؞ يٜىٰسُ وِعِمٛ، «تَاع وِعُکَ غٛطّٛ؞ اَمَّا يَحُ، کٛلَّا حٛورٜ مَاطَ تٛ اَرْدِيطٛ دِينَ، کٛکَّا شَکِّرِ نٛ اَنَّبِ مُوسَ وِعِ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞» اَمَّا کٛو ندٜ يٜىٰسُ حَطِيمٛ وِعُکِکَ، حَبَرُ طُمْ وٛطِّنِي، يِمْٻٜ طُطْٻٜ نغَرِ نغَمْ نَنُکِ اٜکِّتِنٛلْ مَاکٛ اٜ يَمْطِتِنٜىٰکِ دَغَ ݧَوُوجِ مُعّٜنْ؞ اَمَّا نٛ يٜىٰسُ وٛووِ اٜ يَحَ وِغٜىٰرٜ ندٜرْ لَدّٜ وَطَ دٛعَارٜ؞ وٛنْدٜ ݧَلْندٜ يٜىٰسُ اٜ ندٜرْ اٜکِّتِنْکِ، فَارِسَنْکٛعٜنْ اٜ مٛودِٻّٜ اَتَّوْرَ اٜ نجٛوطِي طٛنْ پِوٛيْٻٜ نغَرِحٛيْ فُو نغٛنْکٛيْ ندٜرْ لٜيْطٜ غَلِيلِ اٜ يَحُودِيَ اٜ غَرِيرِ اُرُشَلِيمَ؞ بَوْطٜ جٛومِرَاوٛ اٜ وٛنْدِ اٜ مَاکٛ، اٜ مٛ يَمْطِتِنَ ݧَوْٻٜ؞ سٜيْ وٛٻّٜ نغَدِّ غٛطّٛ جَرَاطٛ دٛوْ دَاغٛ، ٻٜ طَٻِّتِ طَتَلْ نغَلْ ٻٜ نَتِّنِرْتَمٛ ندٜرْ وُرٛ نغٛنْ، ٻٜ ڤُکِّنَمٛ يٜىٰسٛ يٜىٰسُ؞ اَمَّا ٻٜ مبَاوَايِ نَتِّنْکِمٛ نغَمْ يِمْٻٜ طُوطِي، سٜيْ ٻٜ پٜنْتِنِمٛ دٛوْ سُودُ ندُنْ، ٻٜ نجُلِندُ، ٻٜ نجِڤِّنِمٛ دَغَ دٛوْ مَيْرُ يَاکِ حَکُّندٜ يِمْٻٜ يٜىٰسٛ يٜىٰسُ؞ ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، «حِغٛ، طُمْ يَافَنَکٜمَ حَکّٜىٰجِ مَاطَ؞» سٜيْ فَارِسَنْکٛعٜنْ اٜ مٛودِٻّٜ اَتَّوْرَ ڤُطِّ مٜتِتَاکِ حَکُّندٜ مَٻّٜ، اٜ ٻٜ مبِعَ، «اٛعٛ طُمْ مٛيٜ ڤٛتِّدِنٛووٛ حٛورٜ مُوطُمْ اٜ اَللَّه؟ مٛيٜ وَاوَتَ يَافَاکِ حَکّٜ تٛ نَاع اَللَّه؟» يٜىٰسُ فَامِ ݧُمٛ مَٻّٜ، اٛ وِعِٻٜ، «نغَمْ طُمٜ ݧُمٛتٛنْ اِرِ ݧُمٛوجِ طِعِ ندٜرْ ٻٜرْطٜ مٛوطٛنْ؟ کٛ ٻُرِ حٛيْکِ، طُمْ وِعَ، ‹اَ يَافَنَامَ حَکّٜ مَاطَ،› کٛو طُمْ وِعَ، ‹اُمَّ يَاٻُ؟› اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞» سٜيْ اٛ وِعِ جَرَاطٛ اٛنْ، «اٜ مِ وِعِمَا، اُمَّ، کٛشَّا دَاغٛ مَاطَ، کٛوتَا وُرٛ!» طٛنْ اٜ طٛنْ اٛ اُمِّي يٜىٰسٛ مَٻّٜ، اٛ حٛشِّ دَاغٛ مَاکٛ، اٛ حٛوتِ وُرٛ، اٜ مٛ مَنْتَ اَللَّه؞ ٻٜ فُو ٻٜ کَيْطِنِ، ٻٜ مَوْنِنِ اَللَّه؞ کُلٛلْ نَنْغِٻٜ، ٻٜ مبِعِ، «حَنْدٜ اٜنْ نغِعِ کٛ حُلْنِي!» غَطَ طٛنْ، يٜىٰسُ وُرْتِي يِعِ جَٻٛووٛ شٜىٰدٜ لٜيْدِ بِعٜتٜىٰطٛ لٜىٰوِ، اٜ مٛ جٛوطِي تٛ طُمْ جَٻَتَ شٜىٰدٜ لٜيْدِ، يٜىٰسُ وِعِمٛ، «تٛکَّمْ؞» لٜىٰوِ اُمِّي، اَلِ کٛو طُمٜ، تٛکِّمٛ؞ سٜيْ لٜىٰوِ يَارِ يٜىٰسُ وُرٛ مُوطُمْ دٜفَنِمٛ ݧَمْندُوجِ فٜىٰرٜ‑فٜىٰرٜ؞ جَٻٛوٻٜ شٜىٰدٜ لٜيْدِ طُطْٻٜ اٜ وٛٻّٜ يِمْٻٜ اٜ ݧَمْدَ اٜ مَٻّٜ؞ اَمَّا، فَارِسَنْکٛعٜنْ اٜ مٛودِٻّٜ اَتَّوْرَ مَٻّٜ نغَطِ کَ مٜتِتَاکِ، اٜ ٻٜ مبِعَ تٛکُّٻٜ يٜىٰسُ، «نغَمْ طُمٜ ݧَمْدٛتٛنْ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟» يٜىٰسُ وِعِٻٜ، «نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ ٻٜ تُوبَ؞» ٻٜ مبِعِمٛ، «کٛو ندٜيٜ تٛکُّٻٜ يَحَيَ غَطٛووٛ بَڤْتِسْمَ اٜ شُومٛو اٜ نغَطَ دٛعَارٜ، نٛنْ مَا تٛکُّٻٜ فَارِسَنْکٛعٜنْ نغَطَتَ، اَمَّا تٛکُّٻٜمَ اٜ ݧَامَ اٜ نجَرَ؞» يٜىٰسُ نٛوتِي وِعِٻٜ، «اٛنْ مبَاوَيْ کَطٛنْ حِغٛوٻٜ اَنْغٛوجٛ ݧَامُکِ ݧَمْندُ شَرٜلْ نغٜلْ اٛ وٛنْدِ اٜ مَٻّٜ؟ اٛنْ مبَاوَتَا! اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، غَطَ طٛنْ ٻٜ شُومٛتٛ؞» اٛ وِعِٻٜ مِسَالُ طُعُمْ، «وَلَا شٜىٰکٛووٛ لٜفٜلْ دَغَ لِمْشٜرٜ حٜيْرٜ ݧٛوتَنغٜلْ تٛ لِمْشٜرٜ کِيندٜ؞ تٛ اٛ وَطِي نٛنْ، اٛ سٜىٰکَيْ لِمْشٜرٜ حٜيْرٜ ندٜنْ، لٜفٜلْ کٜسٜلْ نغٜلْ بٛو يَادَتَا اٜ لِمْشٜرٜ حِيندٜ ندٜنْ؞ نٛنْ مَا وَلَا غَطَيْطٛ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ، طَمْ ڤُسَ فَاندُ ندُنْ، طَمْ رُفَ؞ اَمَّا، اِنَبٛجَمْ کٜسَمْ حَانِ وَطٜىٰ ندٜرْ فَاندُ حٜيْرُ؞ وَلَا بٛو جَرٛووٛ اِنَبٛجَمْ کِيطَمْ غَطَ طٛنْ طَٻِّتَ کٜسَمْ، نغَمْ اٛ وِعَيْ، ‹کِيطَمْ طَمْ ٻُرِي؞› » وٛنْدٜ ݧَلْندٜ سِوْتَارٜ يٜىٰسُ اٜ يَحَ ندٜرْ نغٜسَ اَلْکَمَارِ، سٜيْ تٛکُّٻٜمٛ نغَطِ کَ ٻٛرُکِ شَمّٜىٰجٜ مَيْرِ اٜ مٛلْمَطٜ ندٜرْ جُوطٜ مَٻّٜ، اٜ ٻٜ ݧَامَ؞ اَمَّا وٛٻّٜ فَارِسَنْکٛعٜنْ مبِعِٻٜ، «کٛ وَطِ نغَطٛتٛنْ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؟» يٜىٰسُ وِعِٻٜ، «اٛنْ مٜىٰطَايِ جَنْغُکِ کٛ دَوْدَ وَطِ ندٜ نَنِ وٜىٰلٛ، کَنْکٛ اٜ غٛنْدُٻٜ اٜ مَاکٛ؟ اٛ نَتِّ لُکُرُ سٜنِيطُمْ، اٛ حٛشِّ بُرٛودِ شٜنِيطُمْ، اٛ ݧَامِطُمْ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ، اَمَّا دَوْدَ ݧَامِطُمْ حَا مَا اٛ حٛکّٛرِ جَادٛوٻٜ اٜ مَاکٛ؞» سٜيْ يٜىٰسُ وِعِٻٜ، «ٻِي نٜطّٛ وٛنِ جٛومُ ݧَلْندٜ سِوْتَارٜ؞» وٛنْدٜ ݧَلْندٜ سِوْتَارٜ اٛ نَتِّ ندٜرْ سُودُ دٛعَارٜ، اٜ مٛ اٜکِّتِنَ؞ غٛطّٛ مٛ جُنْغٛ جَرَانغٛ اٜ ندٜرْ مَيْرُ؞ مٛودِٻّٜ اَتَّوْرَ اٜ فَارِسَنْکٛعٜنْ شُتِي يٜىٰسُ کٛو اٛ يَمْطِتِنَيْ غٛطّٛ ندٜرْ ݧَلْندٜ سِوْتَارٜ، نغَمْ ٻٜ کٜٻَ کٛ ٻٜ نغُلِّرٛيْتٛومٛ؞ اَمَّا، يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِ نٜطّٛ مٛ جُنْغٛ جَرَانغٛ اٛنْ، «وٛرٛيْ، ندَرٛطَا شَکَ مَٻّٜ؞» اٛ اُمِّي، اٛ دَرِي طٛنْ؞ سٜيْ يٜىٰسُ وِعِٻٜ، «اٜ مِ پَمَعٛنْ، کٛ اَتَّوْرَ وِعِ طُمْ وَطَ ندٜرْ ݧَلْندٜ سِوْتَارٜ، وَطَ کٛ وٛوطِ کٛو وَطَ کٛ وٛوطَا، حِسْنَ يٛنْکِ کٛو حَلْکَکِ؟» غَطَ اٛ رَارِيٻٜ ٻٜ فُو، سٜيْ اٛ وِعِ نٜطّٛ اٛنْ، «فٛرْتُ جُنْغٛ مَاطَ؞» اٛ فٛرْتِنغٛ، سٜيْ نغٛ يَمْطِتِ؞ اَمَّا ٻٜرْطٜ مَٻّٜ مٜتِّ نَاع سٜطَّ، ٻٜ مٜتِ حَکُّندٜ مَٻّٜ دٛوْ کٛ ٻٜ نغَطَنْتَ يٜىٰسُ؞ ندٜرْ بَلْطٜ طٜنْ، يٜىٰسُ يَحِ دٛوْ حٛشّٜىٰرٜ نغَمْ وَطَ دٛعَارٜ؞ اٛ وَالِ وَطُکِ دٛعَارٜ؞ ندٜ وٜىٰتِ، اٛ نٛدِّ تٛکُّٻٜمٛ، اٛ سُٻِ سَڤّٛ اٜ طِطٛ، اٛ حٛکِّٻٜ اِنْدٜ لِلَاٻٜ؞ کَمْٻٜ نغٛنِ: سِيمَنْ مٛ اٛ حٛکِّ اِنْدٜ بِيتُرُسْ، اٜ مِݧِرَاوٛ مَاکٛ اَنْدِرَاوُسْ، اٜ يَاکُبُ، اٜ يَحَيَ، اٜ فِلِبُسْ، اٜ بَتِلٛومِ، اٜ مَاتِيُ، اٜ تٛومَ، اٜ يَاکُبُ ٻِي حَلْفَ، اٜ سِيمَنْ بِعٜتٜىٰطٛ جَلٛوتِ، اٜ يَحُودَ ٻِي يَاکُبُ، اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞ سٜيْ يٜىٰسُ جِڤّٛدِي اٜ مَٻّٜ اٛ دَرِي اٜ نجَيْرِ؞ تٛکُّٻٜمٛ طُطْٻٜ اٜ طٛنْ اٜ يِمْٻٜ طُطْٻٜ پِوٛيْٻٜ دَغَ لٜيْدِ يَحُودِيَ فُو، اٜ اُرُشَلِيمَ، اٜ لٜيْدِ تَايَ اٜ سِدٛنْ حَادٜ مبٜىٰلَ؞ ٻٜ نغَرٛيِ نغَمْ نَنُکِمٛ اٜ يَمْطِنٜىٰکِ دَغَ ݧَوُوجِ مَٻّٜ؞ ٻٜ غِنِّ تٛرَّتَ نجَمْطِنَا؞ وٛنْٻٜ طٛنْ فُو اٜ ٻَدّٛو نغَمْ مٜىٰمَ يٜىٰسُ، نغَمْ بَوْطٜ اٜ مبُرْتٛو دَغَ ندٜرْ مَاکٛ، اٜ مٛ يَمْطِتِنَ کٛو مٛيٜ؞ يٜىٰسُ رَارِ تٛکُّٻٜمٛ، وِعِ، «اٛنْ بَرْکِطِنَاٻٜ، اٛنٛنْ ٻٜ نغَلَنَا، نغَمْ اٛنٛنْ نجٜيِ لَامُ اَللَّه؞ «اٛنْ بَرْکِطِنَاٻٜ، اٛنٛنْ نَنٛوٻٜ وٜىٰلٛ جٛونِ، نغَمْ اٛنْ نغَرْتَيْ کَرْنٜتٜىٰٻٜ؞ «اٛنْ بَرْکِطِنَاٻٜ، اٛنٛنْ وٛيٛوٻٜ جٛونِ، نغَمْ اٛنْ نغَرْتَيْ جَلَيْٻٜ؞ «اٛنْ بَرْکِطِنَاٻٜ تٛ يِمْٻٜ نغَݧِيعٛنْ، ندِيوِيعٛنْ، کُطِيعٛنْ، مبٛنِّي اِنْطٜ مٛوطٛنْ نغَمْ ٻِي نٜطّٛ؞ نَنٜىٰ بٜلْطُمْ ندٜرْ ݧَلْندٜ ندٜنْ، نغَمٜىٰ نغَمْ بٜلْطُمْ، نغَمْ بَرْکَ مٛوطٛنْ طُمْ طُطُّمْ اٜ دٛوْ؞ نٛنْ مَامَعٜنْ مَٻّٜ نغَطَنّٛو اَنَّبٛعٜنْ اَرَنْدٜعٜنْ؞ «اٛنْ مبٛنِي، اٛنٛنْ رِسْکُٻٜ، نغَمْ اٛنْ کٜٻِي کٛ طَٻِّتٛتٛنْ؞ «اٛنْ مبٛنِي، اٛنٛنْ کَرْٻٜ جٛونِ، نغَمْ اٛنْ نَنَيْ وٜىٰلٛ؞ «اٛنْ مبٛنِي، اٛنٛنْ جَلَيْٻٜ جٛونِ، نغَمْ اٛنْ نَنَتَا بٜلْطُمْ، اٛنْ مبٛيَيْ بٛجِّ نَوْطِ؞ «اٛنْ مبٛنِي تٛ يِمْٻٜ فُو مَنِيعٛنْ، نغَمْ نٛنْ مَامَعٜنْ مَٻّٜ نغَطَنّٛو اَنَّبٛعٜنْ فٜوْرٜ؞ «اَمَّا اٜ مِ وِعَعٛنْ اٛنٛنْ نَنٛوٻٜ کٛ مبِعَيْمِ: نغِطٜىٰ غَݧٛوٻٜ مٛوطٛنْ، نغَطَنٜىٰ وَݧُٻٜعٛنْ کٛ وٛوطِ، مبَرْکِطِنٜىٰ لَانٛوٻٜعٛنْ، نغَطَنٜىٰ تٛرّٛوٻٜعٛنْ دٛعَارٜ؞ تٛ غٛطّٛ فِيِيمَ تٛ وٛلٛ، وَيْلِتَنْمٛ وٛعٛتٛ نغٛنْ مَا؞ تٛ غٛطّٛ جَٻِي شُدَّارِ مَاطَ، تَاع حَطُمٛ تٛغّٛورٜ مَاطَ؞ تٛرِيطٛمَ غٛطُّمْ فُو، حٛکُّمٛ؞ تٜىٰتَنْطٛمَ غٛطُّمْ، تَاع وِعِمٛ اٛ حٛکُّتُمَا؞ نغَطَنٜىٰ وٛٻّٜ کٛ نغِطّٛنْ ٻٜ نغَطَنَعٛنْ؞ «تٛ يِطُٻٜعٛنْ تَنْ نغِطّٛنْ، طُمٜ بَرْکَ کٜٻٛتٛنْ؟ کٛو کَلُّٻٜ مَا اٜ نغِطِ يِطُٻٜٻٜ؞ تٛ غَطَنٛوٻٜعٛنْ بٛطُّمْ تَنْ نغَطَنْتٛنْ بٛطُّمْ، طُمٜ بَرْکَ کٜٻٛتٛنْ؟ اَيْ، کَلُّٻٜ مَا اٜ نغَطَ نٛنْ؞ تٛ ٻٜ کَمِّيطٛنْ نجٛٻَيْعٛنْ تَنْ کٛکّٛتٛنْ ݧَمَاندٜ، طُمٜ بَرْکَ کٜٻٛتٛنْ؟ اَيْ، کَلُّٻٜ مَا اٜ کٛکَّ کَلُّٻٜ ݧَمَاندٜ، اٜ ٻٜ کَمّٛو حٛکِّتٜىٰکِ ݧَمَاندٜ مَٻّٜ؞ اَمَّا نغِطٜىٰ غَݧٛوٻٜ مٛوطٛنْ، نغَطَنٜىٰٻٜ بٛطُّمْ، کٛکّٜىٰٻٜ ݧَمَاندٜ، تٛع اٛنْ کَمّٛو حٛکِّتٜىٰکِ؞ تٛ اٛنْ نغَطِي نٛنْ، اٛنْ کٜٻَيْ بَرْکَ طُطُّمْ، اٛنْ نغَرْتَيْ ٻِٻّٜ اَللَّه جٛومُ مَنْغُ؞ نغَمْ اَللَّه اٜ يُرْمِنَنَ ٻٜ نغٜتَّتَا اٜ کَلُّٻٜ؞ نجُرْمِنَنٜىٰ يِمْٻٜ نٛنْ نٛ ݧَاکٛ مٛوطٛنْ مٛ دٛوْ يُرْمِرْتَ؞ «تٛع اٛنْ کِيتٛ وٛٻّٜ، اٛنْ کِيتَتَاکٜ؞ تٛع اٛنْ مٜتُ کَلُّکَ دٛوْ غٛطّٛ، طُمْ مٜتَتَا کَلُّکَ دٛوْ مٛوطٛنْ؞ نجَافٜىٰ، طُمْ يَافَنْتٛعٛنْ؞ کٛکّٜىٰ، طُمْ حٛکَّيْعٛنْ اٜ ڤٛوندِرْغٜلْ کٜوْنغٜلْ تِطَّانغٜلْ دِمْبَانغٜلْ بٛطُّمْ، طُمْ وَيْلَنَيْعٛنْ ندٜرْ تُمُّطٜ مٛوطٛنْ، نغَمْ ڤٛوندِرْغٜلْ نغٜلْ ڤٛوندِرْطٛنْ، اٜ مَاغٜلْ طُمْ فٛوندِرَنْتَعٛنْ؞» طٛنْمَا اٛ حٛکِّٻٜ مِسَالُ طُعُمْ، اٛ وِعِ، «اٛنْ نغِعَ بُمْطٛ وَاوَيْ اَرْدَاکِ بُمْطٛ؟ ٻٜ فُو طِطٛ نَاع سٜيْ ٻٜ نجَنَ ندٜرْ نغَيْکَ؟ اٜکِّتٛتٛوطٛ ٻُرَتَا مٛودِبّٛ مُوطُمْ، اَمَّا کٛو مٛيٜ اٜکِّتِنَاطٛ بٛطُّمْ وَرْتَيْ بٛ مٛودِبّٛ مُوطُمْ؞ «نغَمْ طُمٜ ندَارَتَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ، اَمَّا اَ وَنَّايِ اٜ لٜغَّ وٛنْغَ ندٜرْ حِتٜرٜ مَاطَ؟ نٛ وَطَتَ مبِعَا بَنْدِرَاوٛ مَاطَ، ‹بَنْدِرَاوٛ، اَلْ مِ اِتَّنْمَا غٜىٰنٜلْ ندٜرْ حِتٜرٜ مَاطَ،› ندٜنْ اَنْ اٜ حٛورٜ مَاطَ اَ يِعَايِ لٜغَّ وٛنْغَ ندٜرْ حِتٜرٜ مَاطَ؟ اَنْ مُنَافُکِيجٛ، اَرْتُ اِتُّکِ لٜغَّ وٛنْغَ ندٜرْ حِتٜرٜ مَاطَ، ندٜنْ نغِعَا بٛطُّمْ کٜٻَا نٛ اِتِّرَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ؞ «لٜکِّ بٛطْکِ رِمَتَا ٻِکّٛيْ کٛيْ مبٛوطَا، نٛنْ مَا لٜکِّ کِ وٛوطَا رِمَتَا ٻِکّٛيْ مبٛطْکٛيْ؞ نغَمْ کٛو کِيٜ لٜکِّ اٜ اَنْدِرٜىٰ ٻِکّٛيْ مَاکِ؞ طُمْ تٜٻِّتَتَا اِبّٜ تٛ لٜکِّ کٛورَاجٜ، نٛنْ تٛ غِعٜحِ طُمْ تٜٻِّتَتَا ٻِکّٛيْ بُمّٜىٰجٜ؞ نٜطّٛ مٛ نغِکُّ بٛطُّمْ اٜ وُرْتِنَ فِي بٛطُّمْ دَغَ ندٜرْ کٛ وٛنِ ندٜرْ ٻٜرْندٜ مُوطُمْ؞ نٛنْ مَا نٜطّٛ کَلُّطٛ اٜ وُرْتِنَ حَلّٜىٰندٜ دَغَ ندٜرْ ٻٜرْندٜ مُوطُمْ، نغَمْ حٛنْدُکٛ نٜطّٛ اٜ مٜتَ کٛ وٛنِ ندٜرْ ٻٜرْندٜ مُوطُمْ؞» اٛ وِعِٻٜ، «نغَمْ طُمٜ نٛدِّرْتٛيْيَمْ، ‹مٛودِبّٛ، مٛودِبّٛ،› اَمَّا اٛنْ نغَطَتَا کٛ مبِيمِعٛنْ؟ نٜطّٛ فُو غَرْطٛ تٛ اَمْ نَنِ بٛلِيطٜ اَمْ وَطِ کٛ مبِيمِ، مِ حٛلَّيْعٛنْ کٛ اٛ نَنْدِ؞ اٜ مٛ نَنْدِ اٜ نٜطّٛ مَحٛووٛ وُرٛ غَسُطٛ لٜيْدِ لُغُّطُمْ حَا اٛ حٜوْتِ تَفَارٜ، اٛ مَحِ وُرٛ دٛوْ مَيْرٜ؞ شَانغٛلْ حٜىٰوِ فَلْپِ فِيِ وُرٛ نغٛنْ، اَمَّا نغٛ دِمْبَاکِ، نغَمْ نغٛ مَحَامَ دٛوْ تَفَارٜ؞ اَمَّا نَنْطٛ بٛلِيطٜ اَمْ، ندٜنْ وَطَايِ کٛ مبِيمِ اٜ نَنْدِ اٜ نٜطّٛ مَحُطٛ وُرٛ دٛوْ نجَارٜىٰندِ؞ ندٜ شَانغٛلْ فَلْپِ فِيِنغٛ، طٛنْ اٜ طٛنْ نغٛ يَنِ نغٛ فُو!» ندٜ يٜىٰسُ يٛتِّنِ فُو کٛ وِعَتَ يِمْٻٜ، اٛ دِلِّ اٛ نَتِّ غَرِيرِ کَفَرْنَحُمْ؞ تٛنْ اٜ وٛودِ غٛطّٛ مَوْطٛ سٛوجِعٜنْ اٜ مٛ وٛودِ مَشُّطٛ مٛ اٛ يِطِ نَاع سٜطَّ؞ مَشُّطٛ اٛنْ يَمْطَا، اٛ ٻَدَکٜ مَيْدٜ؞ ندٜ مَوْطٛ سٛوجِعٜنْ اٛنْ نَنِ حَبَرُ يٜىٰسُ، اٛ لِلِ وٛٻّٜ مَوْٻٜ يَحُودَنْکٛعٜنْ تٛ مَاکٛ نغَمْ ٻٜ تٛرٛومٛ اٛ وَرَ اٛ يَمْطِتِنَ مَشُّطٛ مَاکٛ؞ ندٜ ٻٜ نغَرِ تٛ يٜىٰسُ، ٻٜ تٛرِيمٛ کٛ طُوطِ، ٻٜ مبِعِ، «اٜ حَانِ مبَلَّا نٜطّٛ اٛعٛ، نغَمْ اٜ مٛ يِطِ لٜݧٛلْ مٜىٰطٜنْ، کَنْکٛ مَحِ سُودُ دٛعَارٜ مٜىٰطٜنْ؞» سٜيْ يٜىٰسُ يَادِ اٜ مَٻّٜ؞ ندٜ اٛ ٻَدِي وُرٛ نغٛنْ، مَوْطٛ سٛوجِعٜنْ اٛنْ لِلٛيِ حِغٛوٻٜ مُوطُمْ مبِعَمٛ، «مٛودِبّٛ، تَاع تٛرُّ حٛورٜ مَاطَ نغَمْ مِ فٛتَايِ نَتَّا وُرٛ اَمْ؞ کَنْجُمْ وَطِ ندَارُمِ حٛورٜ اَمْ مِ فٛتَايِ وَرْکِ تٛ مَاطَ، اَمَّا مٜتُ تَنْ، مَشُّطٛ اَمْ يَمْطِتَيْ؞ نغَمْ مِنْ اٜ حٛورٜ اَمْ لٜيْ لَامُ وٛٻّٜ سٛوجِعٜنْ نغٛنْمِ، مِنْ مَا، اٜ مِ لَامٛو سٛوجِعٜنْ؞ تٛ مِ وِعِي اٛعٛ، ‹دِلُّ!› اٛ دِلَّيْ؞ تٛ مِ وِعِي اٛنْ تٛنْ، ‹وٛرٛيْ!› اٛ وَرَيْ؞ تٛ مِ وِعِي مَشُّطٛ اَمْ، ‹وَطُ طُعُمْ!› اٛ وَطَيْطُمْ؞» ندٜ يٜىٰسُ نَنِ نٛنْ، طُمْ حَيْطِنِيمٛ، اٛ يٜىٰپِي يِمْٻٜ طُطْٻٜ تٛکُّٻٜمٛ، اٛ وِعِ، «اٜ مِ وِعَعٛنْ، کٛو ندٜرْ اِسْرَاعِيلَ مِ حٜٻَايِ کٛولِيطٛيَمْ ٻٜرْندٜ غٛعٛ بٛ اٛعٛ!» سٜيْ لِلَاٻٜ ٻٜنْ شٛعِّي وُرٛ نغٛنْ، ٻٜ تَوِ مَشُّطٛ اٛنْ يَمْطِتِي؞ غَطَ مَاجُمْ سٜطَّ، يٜىٰسُ يَحِ وٛنْدِ غَرِيرِ بِعٜتٜىٰندِ نَايِنْ، کَنْکٛ اٜ تٛکُّٻٜمٛ سَڤّٛ اٜ طِطٛ اٜ يِمْٻٜ طُطْٻٜ؞ ندٜ اٛ ٻَدِي دَمُّغَلْ غَرِيرِ ندِنْ، اٛ حَوْرِ اٜ وٛٻّٜ اٜ کٛشّٛيِ مَيْطٛ ٻٜ اُوٛيَيْمٛ، کَنْکٛ تَنْ مَدُوجٛ مَاکٛ وٛودِ؞ دٜبّٛ اٛنْ بٛو غٛرْکٛ مُوطُمْ مَايِ، يِمْٻٜ غَرِيرِ ندِنْ طُطْٻٜ اٜ تٛکِّمٛ؞ ندٜ يٜىٰسُ يِعِمٛ، يُرْمِنَنِ دٜبّٛ اٛنْ، وِعِ، «اَلُ بٛجِّ؞» اٛ ٻَدِّي، اٛ مٜىٰمِ کٛشِّرْطُمْ مَيْطٛ اٛنْ؞ سٜيْ کٛشُّٻٜمٛ ٻٜنْ ندَرِي؞ اٛ وِعِ، «سُکَ، اٜ مِ وِعُمَا، اُمَّ؞» مَيْطٛ اٛنْ اُمِّي، جٛوطِي، فُطِّ مٜتُکِ؞ سٜيْ يٜىٰسُ حٛکِّتِمٛ مَدُوجٛ مَاکٛ؞ کُلٛلْ نَنْغِٻٜ ٻٜ فُو، ٻٜ مَنْتِ اَللَّه، ٻٜ مبِعِ، «اَنَّبِيجٛ مَوْطٛ وَنْغِي حَکُّندٜ مٜىٰطٜنْ! اَللَّه وَرِي وَلُّکِ يِمْٻٜ مُوطُمْ!» حَبَرُ طُمْ سَنْکِتِي ندٜرْ لٜيْدِ يَحُودِيَ اٜ لٜيْطٜ غٛنْطٜ حَادٜ فُو؞ ندٜ تٛکُّٻٜ يَحَيَ غَطٛووٛ بَڤْتِسْمَ مبِعِمٛ فِي طُعُمْ فُو، اٛ نٛدِّ طِطٛ ندٜرْ مَٻّٜ؞ اٛ لِلِٻٜ تٛ يٜىٰسُ ٻٜ پَمَمٛ، ٻٜ مبِعَ، «اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟» ندٜ ٻٜ نجَحِ تٛ يٜىٰسُ، ٻٜ مبِعِمٛ، «يَحَيَ غَطٛووٛ بَڤْتِسْمَ لِلٛيِيمِنْ تٛ مَاطَ مِنْ پَمُمَا، ‹اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟› » اٜ شَرٜلْ نغٜلْ يٜىٰسُ يَمْطِتِنِي يِمْٻٜ طُطْٻٜ غٛودُٻٜ ݧَوُوجِ، اٛ وُرْتِنِي غِنِّ، اٛ وُمْتِنِي وُمْٻٜ طُطْٻٜ؞ اٛ وِعِ لِلَاٻٜ يَحَيَ، «نجَحٜىٰ، مبِعٛنْ يَحَيَ کٛ نغِيطٛنْ اٜ کٛ نَنُطٛنْ: وُمْٻٜ اٜ مبُمْتَ، جَرَاٻٜ اٜ نجَاٻَ، غٛودُٻٜ ݧَوُ ݧَامٛوجُمْ لَرَلْ اٜ نجَمْطِتِنٜىٰ، ڤَحُٻٜ اٜ نَنَ، مَيْٻٜ اٜ اُمِّنٜىٰ، ٻٜ نغَلَنَا اٜ نغَعَجِنَنٜىٰ حَبَرُ بٜلْطُمْ؞ اٛ بَرْکِطِنَاطٛ نٜطّٛ مٛ اَلَايِ حٛولَاکِيَمْ؞» غَطَ ٻٜ يَحَيَ لِلٛيِ ندِلِّي، يٜىٰسُ فُطِّ مٜتَنْکِ يِمْٻٜ دٛوْ يَحَيَ، اٛ وِعِٻٜ، «طُمٜ نجَاطٛنْ رَارٛيْکِ ندٜرْ لَدّٜ؟ کُطٛلْ نغٛلْ حٜنْدُ دِمْبَتَ ندَارٛيْطٛنْ؟ تٛ نَاع نٛنْ، طُمٜ نجَاطٛنْ رَارٛيْکِ؟ نٜطّٛ ٻٛرْنِيطٛ لِمْشٜ بٛطّٜ؟ نَاع نٛنْ، اَيْ ٻٛرْنٛتٛوٻٜ لِمْشٜ بٛطّٜ اٜ نَنٛوٻٜ بٜلْطُمْ فُو اٜ لَامٛرْدٜ ٻٜ نغٛنِ؞ تٛو، طُمٜ نجَاطٛنْ رَارٛيْکِ؟ اَنَّبِيجٛ؟ اٜ مِ وِعَعٛنْ غٛونغَ، اٛ ٻُرِي اَنَّبِيجٛ؞ کَنْکٛ وٛنِ مٛ اَللَّه وِعِ ندٜرْ اَايَارٜ، ‹رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ، اٛ مٛعِّنَنْمَا لَاوٛلْ؞› اٜ مِ وِعَعٛنْ، ندٜرْ ٻٜ رٜوْٻٜ ندَݧِ فُو وَلَا ٻُرْطٛ يَحَيَ غَطٛووٛ بَڤْتِسْمَ مَنْغُ؞ فُو اٜ نٛنْ ٻُرْطٛ فَمْطُکِ ندٜرْ لَامُ اَللَّه ٻُرِيمٛ مَنْغُ؞» ندٜ يِمْٻٜ فُو اٜ جَٻٛوٻٜ شٜىٰدٜ لٜيْدِ نَنِ کٛ يٜىٰسُ وِعِ، ٻٜ نجَٻِ طَتَلْ اَللَّه وٛنِ غٛونغَ؞ کَمْٻٜ نغٛنِ ٻٜ يَحَيَ وَطَنّٛو بَڤْتِسْمَ؞ اَمَّا فَارِسَنْکٛعٜنْ اٜ مٛودِٻّٜ اَتَّوْرَ نغَݧِ کٛ اَللَّه يِطَنِٻٜ؞ ٻٜعٜ نغٛنّٛو غَݧُٻٜ يَحَيَ وَطَنَٻٜ بَڤْتِسْمَ؞ طٛنْمَا يٜىٰسُ وِعِ، «کٛ نَنْدِنَيْمِ يِمْٻٜ جَامَنُ طُعُمْ؟ اٜ ٻٜ نَنْدِ اٜ سُکَحٛيْ نجٛوطِيکٛيْ ندٜرْ لُومٛ اٜ نٛدِّندِرَ اٜ مبِعَ، ‹مِنْ ندُودَنِيعٛنْ دُودَاندُ، اَمَّا اٛنْ نغَمَايِ؞ مِنْ مبٛيِ بٛ غٛطّٛ مَايِ، اَمَّا اٛنْ مبٛيَايِ؞› نغَمْ يَحَيَ غَطٛووٛ بَڤْتِسْمَ وَرِي ݧَامَتَا ݧَمْندُ يَرَتَا ندِيَمْ اِنَبٛجَمْ، اٛنْ مبِعِي، ‹اٜ مٛ وٛودِ غِنّٛلْ؞› ندٜنْ ٻِي نٜطّٛ وَرِي اٜ ݧَامَ اٜ يَرَ، اٛنْ مبِعِي، ‹رَا اٛعٛ، اٛ بٜىٰلَاطٛ اٛ جَرٛووٛ، حِغٛ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؞› فُو اٜ نٛنْ، تٛکُّٻٜ لَاوٛلْ اَللَّه فُو اٜ ٻٜ کٛلَّ کَنْغٛلْ وٛنِ غٛونغَوٛلْ؞» غٛعٛتٛ ندٜرْ فَارِسَنْکٛعٜنْ وِعِ يٜىٰسُ اٜ يِطِ يٜىٰسُ يَحَ وُرٛ مُوطُمْ نغَمْ ٻٜ کِرْتٛو؞ اٛ يَحِ وُرٛ نغٛنْ اٛ جٛوطِي نغَمْ اٛ ݧَامَ ݧَمْندُ؞ اٜ وٛودِ کَارُوَاجٛ اٜ غَرِيرِ ندِنْ، ندٜ اٛ نَنِ يٜىٰسُ اٜ حِرْتٛو اٜ وُرٛ فَارِسَنْکٜىٰجٛ اٛنْ، اٛ وَدِّ جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ؞ اٛ دَرِي غَطَ يٜىٰسُ حَادٜ کٛيْطٜ مَاکٛ، اٜ مٛ وٛيَ، غٛنْطِ مَاکٛ فُطِّ سٛفْنُکِ کٛيْطٜ يٜىٰسُ، اٛ مٛيْتِرِطٜ غَاسَ حٛورٜ مَاکٛ اٛ مٜىٰمِرِطٜ حٛنْدُکٛ مَاکٛ اٛ مٛيْتَنِطٜ نٜبَّمْ اُرٛوجَمْ؞ ندٜ فَارِسَنْکٜىٰجٛ اٛنْ يِعِ نٛنْ، اٛ وِعِ ندٜرْ ٻٜرْندٜ مَاکٛ، «دَا نٜطّٛ اٛعٛ اٛ اَنَّبِيجٛ، دَا اٛ اَنْدَيْ طُمْ اِرِ مٛيٜ دٜبّٛ مٜىٰمَتَمٛ، دَا اٛ اَنْدَيْ اٛ غَطٛووٛ حَکّٜ؞» يٜىٰسُ وِعِ فَارِسَنْکٜىٰجٛ اٛنْ، «سِيمَنْ، اٜ وٛودِ کٛ مبِعَيْمَامِ؞» اٛ وِعِمٛ، «وِعُکَ مٛودِبّٛ!» يٜىٰسُ وِعِمٛ، «اٜ وٛودِ يِمْٻٜ طِطٛ جَٻُٻٜ ݧَمَاندٜ شٜىٰدٜ تٛ غٛطّٛ کٛکّٛووٛ ݧَمَاندٜ؞ غٛعٛتٛ جَٻِ شٜىٰدٜ اَجُرْفَارِ 500، غٛعٛتٛ اٛنْ جَٻِ شٜىٰدٜ اَجُرْفَارِ 50؞ وَلَا غٛودُطٛ شٜىٰدٜ ندٜرْ مَٻّٜ طٜ يٛٻِرْتَمٛ، نغَمْ نٛنْ اٛ يَافَنِيٻٜ ݧَمَاندٜ ندٜنْ؞ اٜ يِيکِ مَاطَ، مٛيٜ ندٜرْ مَٻّٜ ٻُرَتَ يِطُکِمٛ؟» سِيمَنْ وِعِمٛ، «اٜ مِ کَمّٛو مٛ اٛ يَافَنِي شٜىٰدٜ ٻُرْطٜ طُوطُکِ؞» يٜىٰسُ وِعِمٛ، «اَ وِعِي غٛونغَ؞» سٜيْ اٛ يٜىٰپِي دٜبّٛ اٛنْ اٛ وِعِ سِيمَنْ، «اَ يِعِ دٜبّٛ اٛعٛ؟ مِ نَتِّي وُرٛ مَاطَ، اَ حٛکَّايِيَمْ ندِيَمْ لٛوتُمِ کٛيْطٜ اَمْ؞ اَمَّا دٜبّٛ اٛعٛ اٛ سٛفْنِرِي کٛيْطٜ اَمْ غٛنْطِ مَاکٛ اٛ مٛيْتِرِيطٜ غَاسَ حٛورٜ مَاکٛ؞ اَ حٛوْنَايِيَمْ حٛوْنُکِ حِغَاکُ، اَمَّا دَغَ نَتّٛيْکِ اَمْ دٜبّٛ اٛعٛ حٛوْنِيَمْ بٛطُّمْ، اٛ وَطِ کَ لٛوتُکِ کٛيْطٜ اَمْ؞ اَ مٛيْتَنَايِ حٛورٜ اَمْ نٜبَّمْ، اَمَّا کَنْکٛ اٛ مٛيْتَنِي کٛيْطٜ اَمْ نٜبَّمْ اُرٛوجَمْ؞ نغَمْ نٛنْ اٜ مِ وِعُمَا، اٛ حٛلِّييَمْ يِدّٜ مَوْندٜ نغَمْ اٜ مٛ اَنْدِ اٛ يَافَنَامَ حَکّٜ طُطُّمْ؞ اَمَّا جَافَنَاطٛ سٜطَّ، يِدّٜ سٜطَّ حٛلَّتَ؞» سٜيْ يٜىٰسُ وِعِ دٜبّٛ اٛنْ، «اَ يَافَنَامَ حَکّٜىٰجِ مَاطَ؞» ݧَمْدٛوٻٜ اٜ مَاکٛ ڤُطِّ مٜتُکِ حَکُّندٜ مَٻّٜ، اٜ مبِعَ، «طُمْ مٛيٜ وٛنِ اٛعٛ، حَا حَکّٜ فُو اٜ مٛ يَافٛ؟» يٜىٰسُ وِعِ دٜبّٛ اٛنْ، «اَ حِسِي نغَمْ اَ حٛولَکٜيَمْ، يَحُ جَمْ؞» غَطَ طٛنْ، يٜىٰسُ يَحِ غَرِيجٜ اٜ نغَرِحٛيْ ڤَمَرٛيْ فُو، اٜ وَعَجِنَ حَبَرُ بٜلْطُمْ دٛوْ لَامُ اَللَّه؞ تٛکُّٻٜمٛ سَڤّٛ اٜ طِطٛ اٜ نغٛنْدِ اٜ مَاکٛ، اٜ وٛٻّٜ رٜوْٻٜ بُرْتِنَنَاٻٜ غِنِّ اٜ جَمْطِتِنَاٻٜ دَغَ ݧَوُوجِ؞ کَمْٻٜ نغٛنِ مَرْيَامَ پِوٛيْطٛ مَغَدَلَ، مٛ غِنِّ جٛوٜىٰطِطِ مبُرْتِي ندٜرْ مُوطُمْ، اٜ يٛوَانَ، دٜبّٛ کُوجَ، اَرْدِيطٛ کُوٛوٻٜ وُرٛ حِرُدُسْ، اٜ سُجَانَ، اٜ وٛٻّٜ رٜوْٻٜ طُطْٻٜ، بَلّٛوٻٜٻٜ دَغَ ندٜرْ جَوْدِ مَٻّٜ؞ يِمْٻٜ طُطْٻٜ نغَطِ کَ وَرْکِ تٛ يٜىٰسُ دَغَ غَرِيجٜ فٜىٰرٜ‑فٜىٰرٜ؞ ندٜ يِمْٻٜ طُطْٻٜ کَوْرِتِ، اٛ حٛکِّٻٜ مِسَالُ طُعُمْ، اٛ وِعِ، «غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، ندِ يَاٻَا، شٛلِّ شُڤِّدِندِ؞ وٛنْدِ بٛو يَنِ ندٜرْ کَاپٜ، ندٜ ندِ فُطِ، ندِ يٛورِ نغَمْ ندِيَمْ حٜپَايِندِ؞ وٛنْدِ اَوْدِ بٛو يَنِ ندٜرْ غِعٜ، طٜ مَوْنِدِ اٜ مَيْرِ، طٜ طٜطِّندِ؞ اَمَّا وٛنْدِ اَوْدِ يَنِ دٛوْ لٜيْدِ مبٛنْدِ، ندِ مَوْنِ، ندِ وَطِ شَمّٜىٰجٜ؞ غَبّٜلْ غٛعٛ فُو وَطِ نغَبّٛيْ 100؞» ندٜ يٜىٰسُ حٜىٰݧِ حٛکُّکِٻٜ مِسَالُ طُعُمْ، اٛ نٛدِّ اٜ سٜمْبٜ، اٛ وِعِ، «غٛودُطٛ نٛڤِّ نَنُکِ فُو نَنَ!» تٛکُّٻٜمٛ پَمِمٛ اٛ فَمْتِنَٻٜ مِسَالُ طُعُمْ؞ اٛ وِعِ، «اٛنٛنْ اٛنْ کٛکَّامَ فَامُ سِرُّ لَامُ اَللَّه، اَمَّا وٛٻّٜ سٜيْ اٜ مِسَالُ طُعُمْ، نغَمْ ‹اٜ ٻٜ ندَارَ، اَمَّا ٻٜ نغِعَتَا؛ اٜ ٻٜ نَنَ، اَمَّا ٻٜ ڤَامَتَا؞› » اٛ وِعِ، «رَا مَعَنَ مِسَالُ طُعُمْ: اَوْدِ ندِنْ وٛنِ وٛلْدٜ اَللَّه؞ نجَنُندِ دٛوْ طَتَلْ وٛنِ نَنُٻٜ وٛلْدٜ اَللَّه، ندٜنْ شٜيْطَنْ وَرَ حٛشَّندٜ دَغَ ندٜرْ ٻٜرْطٜ مَٻّٜ، نغَمْ تٛع ٻٜ مبَاوَ جَٻُکِندٜ ٻٜ کِسَ؞ نجَنُندِ دٛوْ حَيْرٜ وٛنِ يِمْٻٜ جَٻُٻٜ وٛلْدٜ اَللَّه ندٜرْ بٜلْطُمْ ٻٜرْندٜ، اَمَّا ندٜ وَلَا طَطِ، ندٜ جٛوطَاکِ ندٜرْ ٻٜرْطٜ مَٻّٜ؞ ٻٜ نجَٻُندٜ نغَمْ شَرٜلْ سٜطَّ، اَمَّا ندٜ طُمْ فٛوندِٻٜ، ٻٜ نجٛوفِندٜ؞ اَوْدِ نجَنُندِ ندٜرْ غِعٜ بٛو وٛنِ يِمْٻٜ نَنُٻٜ وٛلْدٜ ندٜنْ، اَمَّا وَنَّارٜ، اٜ رِسْکُ، اٜ بٜلْطُمْ دُونِيَارُ ٻِطِّ ٻٜرْطٜ مَٻّٜ، نغَمْ نٛنْ ٻٜ مَوْنَايِ ندٜرْ طَتَلْ اَللَّه؞ اَمَّا اَوْدِ جَنُندِ دٛوْ لٜيْدِ مبٛنْدِ وٛنِ نَنُٻٜ وٛلْدٜ اَللَّه، ٻٜ نجٛغٛوندٜ ٻٜرْندٜ غٛعٛ، ندٜرْ مُݧَلْ ٻٜ تٛکَّندٜ حَا ٻٜ نغَطَ کٛ اَللَّه يِطِ؞ «وَلَا غَطَنَيْطٛ فِتِلَارُ حِيتٜ حِڤَّ تُمُّدٜ دٛوْ مَيْرُ کٛو رٜسَندُ لٜيْ لٜىٰسٛ؞ سٜيْ نِ اٛ رٜسَندُ دٛوْ دَنْکِ، نغَمْ ندُ يٜيْنَنٛو نَتُّطٛ فُو؞ «نغَمْ وَلَا فِي شُوطِيطُمْ طُمْ سُورِتَتَاکٜ؞ نٛنْ بٛو وَلَا سِرُّ طُمْ اَنْدِتَتَاکٜ؞ «نغَمْ نٛنْ ڤَامٜىٰ بٛطُّمْ نٛ نَنِرْتٛنْ؞ نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ؞ اَمَّا مٛ وَلَا فَامُ دٛوْ لَامُ اَللَّه، حَا کٛ اٛ ݧُمَتَ اٜ مٛ وٛودِ طُمْ جَٻَيْطُمْ؞» ندٜنْ مَدُوجٛ يٜىٰسُ اٜ مِݧِرَاٻٜ مَاکٛ نغَرِ تٛ مَاکٛ، اَمَّا ٻٜ کٜٻَايِ يٛتَّاکِ حَادٜ مَاکٛ نغَمْ يِمْٻٜ طُوطِي؞ غٛطّٛ وِعِمٛ، «مَدُوجٛ مَاطَ اٜ مِݧِرَاٻٜ مَاطَ اٜ ٻٜ تٛنْ ندَرِي يَاسِ، اٜ ٻٜ نغِطِ يِيکِمَ؞» اَمَّا اٛ نٛوتِي، اٛ وِعِ، «نَنٛوٻٜ وٛلْدٜ اَللَّه، نغَطَ کٛ ندٜ وِعِ، کَمْٻٜ نغٛنِ مَدُوجٛ اَمْ اٜ مِݧِرَاٻٜ اَمْ؞» وٛنْدٜ ݧَلْندٜ يٜىٰسُ نَتِّ کٛمِوَلْ، کَنْکٛ اٜ تٛکُّٻٜمٛ، اٛ وِعِٻٜ، «اٜنْ کُولُ فٛنْغٛ مبٜىٰلَ؞» سٜيْ ٻٜ ندِلِّ؞ اٜ ٻٜ ندٜرْ حُولُکِ، يٜىٰسُ طَانِي؞ اِيٜىٰندٜ اٜ حٜنْدُ شٜمْبِنْدُ اُمّٛيِي دٛوْ مبٜىٰلَ نغَنْ، کٛمِوَلْ نغَلْ فُطِّ ݧٜطُکِ ندِيَمْ، ٻٜ ٻَدِي حَلْکُکِ؞ ٻٜ ٻَدِّي يٜىٰسُ، ٻٜ ڤِنْدِنِمٛ، اٜ ٻٜ مبِعَ، «مٛودِبّٛ، مٛودِبّٛ، اٜنْ کَلْکَيْ!» اٛ اُمِّي، اٛ حَٻَنِ حٜنْدُ ندُنْ اٜ غٜىٰلٛوطِ ندِيَمْ طِنْ؞ کٛو طُمٜ دَرِي، دٜعِّتِ؞ اٛ وِعِٻٜ، «کٛ وَطِ اٛنْ کٛولَاکِيَمْ؟» ٻٜ کُلِ، ٻٜ کَيْطِنِ، ٻٜ نغَطِ کَ مٜتُکِ حَکُّندٜ مَٻّٜ، اٜ ٻٜ مبِعَ، «اٛعٛ طُمْ مٛيٜ؟ اٛ حَٻَنِي کٜنِ اٜ ندِيَمْ، اٜ طِ نغَطَ کٛ اٛ وِعِ!» ٻٜ نجٛتِّي لٜيْدِ غَارَسِنْکٛعٜنْ نغٛنْدِ فٛنْغٛ مبٜىٰلَ غَلِيلِ؞ ندٜ يٜىٰسُ وُرْتِي ندٜرْ کٛمِوَلْ، اٛ حَوْرِ اٜ نٜطّٛ غَرِيرِ ندِنْ غٛودُطٛ غِنِّ؞ طُمْ نٜىٰٻِي نٜطّٛ اٛنْ اٜ يَحَ ٻٛرْنَتَاکٛ، اٛ جٛوطَتَاکٛ ندٜرْ وُرٛ، سٜيْ ندٜرْ غٜنَالٜ؞ ندٜ اٛ يِعِ يٜىٰسُ، اٛ يَنِ يٜىٰسٛ مَاکٛ، اٛ وُلِّ سٜمْبٜىٰ، اٛ وِعِ، «وَيْيٛو! کٛ وَنُّمَا اٜ اَمْ، يٜىٰسُ ٻِطّٛ اَللَّه جٛومُ مَنْغُ؟ اٜ مِ تٛرٛمَا، تَاع تٛرَّمْ؞» اٛ وِعُ نٛنْ نغَمْ يٜىٰسُ حَٻَنِي غِنّٛلْ نغٛلْ نغٛلْ وُرْتٛو ندٜرْ مَاکٛ؞ ندٜنْ مَا، نغٛلْ نٜىٰٻِ اٜ نغٛلْ نَنْغَمٛ؞ اٜ مٛ حَٻِّرٜىٰ ٻٛغِّ نجَمْندِ جُوطٜ اٜ کٛيْطٜ، اَمَّا اٜ مٛ تَپَ ٻٛغِّ طِنْ، نغٛلْ وَطَمٛ اٛ نَتَّ لَدّٜ؞ يٜىٰسُ پَمِمٛ، وِعِ، «نٛ اِنْدٜ مَاطَ؟» اٛ نٛوتِي اٛ وِعِ، «اٜ مِ نٛدِّرٜىٰ طُطِّ،» نغَمْ اٜ مٛ وٛودِ غِنِّ طُطِّ؞ طِ نغَطِ کَ تٛرَاکِ يٜىٰسُ تٛع اٛ وِعَ طِ نَتَّ نغَيْکَ کَلُّکَ لُغُّکَ؞ حَادٜ طٛنْ اٜ وٛودِ اٛرْندٜ اَلَدٜىٰجِ طُطِّ اٜ ندُرَ دٛوْ پٛلْدٜ؞ طِ تٛرِي يٜىٰسُ اَلَطِ طِ نَتّٛيِ ندٜرْ اَلَدٜىٰجِ طِنْ؞ سٜيْ اٛ اَلِطِ؞ طِ مبُرْتِي ندٜرْ نٜطّٛ اٛنْ، طِ نَتّٛيِ اٛرْندٜ اَلَدٜىٰجِ طِنْ؞ اٛرْندٜ ندٜنْ فُو ݧَارِ جِڤّٛيِي دَغَ دٛوْ پٛلْدٜ ندٜنْ، يَنِ ندٜرْ مبٜىٰلَ، ندِيَمْ ݧَامِطِ؞ ندٜ وٛيْنَاٻٜ اَلَدٜىٰجِ طِنْ نغِعِ نٛنْ، ٻٜ ندٛغِّ، ٻٜ مبِعٛيِکَ يِمْٻٜ غَرِيرِ اٜ يِمْٻٜ نغَرِحٛيْ؞ سٜيْ يِمْٻٜ ٻٜنْ نجَحِ نغِعٛيَ کٛ فٛفِ؞ ندٜ ٻٜ نغَرِ تٛ يٜىٰسُ، ٻٜ تَوِ بُرْتِنَنَاطٛ غِنِّ اٛنْ اٜ جٛوطِي حَادٜ يٜىٰسُ، اٜ ٻٛرْنِي، اٜ مٛ ندٜرْ حَکِّيلٛ مَاکٛ؞ کٛو مٛيٜ مَٻّٜ حُلِ؞ غِعُٻٜ کٛ وَطِ مبِعِ يِمْٻٜ نٛ غٛودُنٛوطٛ غِنِّ اٛنْ يَمْطِتِنِرَا؞ يِمْٻٜ لٜيْدِ غَارَسِنْ فُو تٛرِي يٜىٰسُ اَلَنَٻٜ لٜيْدِ مَٻّٜ، نغَمْ کُلٛلْ مَنْغٛلْ نَنْغِيٻٜ؞ نغَمْ مَاجُمْ اٛ نَتِّ کٛمِوَلْ اٛ سٛعّٛ؞ نٜطّٛ بُرْتِنَنَاطٛ غِنِّ اٛنْ تٛرِي يٜىٰسُ نغَمْ اٛ دِلِّدَ اٜ مَاکٛ، اَمَّا اٛ سٛعِّمٛ، اٛ وِعِ، «سٛعَّ وُرٛ مَاطَ، مبِعَا فِي مَوْطُمْ طُمْ اَللَّه وَطَنْمَا؞» سٜيْ نٜطّٛ اٛنْ سٛعِّي اٜ وِعَ يِمْٻٜ غَرِيرِ ندِنْ فِي مَوْطُمْ طُمْ يٜىٰسُ وَطَنِمٛ؞ ندٜ يٜىٰسُ سٛعِّي، کَوْرُتُٻٜ نجَٻِّيمٛ، نغَمْ ٻٜ فُو ٻٜ کَاٻِي ٻٜ نغِعَمٛ؞ سٜيْ غٛطّٛ بِعٜتٜىٰطٛ جَايِرُسْ، اَرْدِيطٛ سُودُ دٛعَارٜ وَرِ، دِشِّي يٜىٰسٛ يٜىٰسُ، تٛرِيمٛ اٛ يَحَ وُرٛ مَاکٛ، نغَمْ اٜ مٛ وٛودِ ٻِطّٛ غٛعٛتٛ سُرْبَاجٛ، دُوٻِ مَاکٛ نغَطَيْ سَڤّٛ اٜ طِطِ، اٛ ٻَدَکٜ مَيْدٜ؞ يٜىٰسُ اٜ يَحَ، يِمْٻٜ طُطْٻٜ اٜ تٛکِّمٛ حَا اٜ ٻٜ ٻِطَّمٛ؞ اٜ وٛودِ غٛطّٛ دٜبّٛ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ؞ اٛ مَجِّنِي فُو جَوْدِ مَاکٛ تٛ ݧَوْندٛوٻٜ، اَمَّا وَلَا بَوْطٛ يَمْطِنْکِمٛ؞ اٛ پِوٛيِ غَطَ يٜىٰسُ، اٛ مٜىٰمِ شِلْمبِ تٛغّٛورٜ مَاکٛ؞ سٜيْ طٛنْ اٜ طٛنْ رُفُکِ پِيپَمْ طَمْ دَرِي؞ يٜىٰسُ وِعِ، «مٛيٜ مٜىٰمِيَمْ؟» کٛو مٛيٜ وِعِ نَاع طُمْ کَنُمْ؞ بِيتُرُسْ بٛو وِعِمٛ، «مٛودِبّٛ، حَکُّندٜ يِمْٻٜ طُطْٻٜ نغٛنْطَا، اٜ ٻٜ ٻِطُّمَا؞» اَمَّا يٜىٰسُ وِعِ، «غٛطّٛ مٜىٰمِييَمْ؞ مِ نَنِي بَوْطٜ مبُرْتَکٜ ندٜرْ اَمْ؞» ندٜ دٜبّٛ اٛنْ اَنْدِتِ سُوطَتَاکٛ، وَرِ اٜ دِوْنَ، دِشِّي يٜىٰسٛ مَاکٛ؞ يٜىٰسٛ يِمْٻٜ فُو اٛ وِعِ کٛ وَطِ اٛ مٜىٰمِمٛ، اٜ نٛ اٛ يَمْطِتِرِ طٛنْ اٜ طٛنْ؞ يٜىٰسُ وِعِمٛ، «بَنْدِرَاوٛ، حٛولَارٜ مَاطَ يَمْطِتِنِيمَ؞ نجِڤّٛطَا جَمْ؞» يٜىٰسُ اٜ مٜتَ، سٜيْ غٛطّٛ وَرٛيِ دَغَ وُرٛ جَايِرُسْ اَرْدِيطٛ سُودُ دٛعَارٜ، وِعِمٛ، «جَايِرُسْ، ٻِطّٛ مَاطَ مَايِ؞ تَاع وَنُّ مٛودِبّٛ کَدِنْ؞» اَمَّا ندٜ يٜىٰسُ نَنِ نٛنْ، وِعِ جَايِرُسْ، «تَاع حُلُ، حٛولَيَمْ تَنْ، ندٜنْ ٻِطّٛ مَاطَ اُمّٛتٛ؞» ندٜ اٛ يٛتِّي وُرٛ جَايِرُسْ، اٛ حَطِ کٛو مٛيٜ نَتِّدَ اٜ مَاکٛ، سٜيْ بِيتُرُسْ، اٜ يَحَيَ، اٜ يَاکُبُ، اٜ ݧَاکٛ سُرْبَاجٛ اٛنْ اٜ مَدُوجٛ مَاکٛ؞ کٛو مٛيٜ اٜ وٛيَ اٜ وُلَّ سٜمْبٜىٰ؞ اَمَّا يٜىٰسُ وِعِٻٜ، «اَلٜىٰ وٛيُکِ؞ اٛ مَايَايِ، اٛ طَانِ تَنْ؞» سٜيْ ٻٜ نجَلِمٛ نغَمْ اٜ ٻٜ اَنْدِ سُرْبَاجٛ اٛنْ مَايِ؞ اَمَّا يٜىٰسُ جٛغِي جُنْغٛ مَيْطٛ اٛنْ، نٛدِّمٛ، وِعِ، «سُرْبَاجٛ، اُمَّ!» يٛنْکِ سُرْبَاجٛ اٛنْ وَرْتِ، طٛنْ اٜ طٛنْ اٛ اُمِّي؞ ندٜنْ يٜىٰسُ وِعِٻٜ ٻٜ کٛکَّمٛ کٛ اٛ ݧَامَتَ؞ دَݧٛوٻٜ سُرْبَاجٛ اٛنْ کَيْطِنِ، اَمَّا اٛ وِعِٻٜ تٛع ٻٜ مبِعَکَ کٛو مٛيٜ؞ غَطَ يٜىٰسُ نٛدِّي تٛکُّٻٜمٛ سَڤّٛ اٜ طِطٛ، اٛ حٛکِّٻٜ بَوْطٜ اٜ لَامُ دٛوْ وُرْتِنْکِ غِنِّ اٜ يَمْطِنْکِ ݧَوُوجِ؞ اٛ لِلِٻٜ ٻٜ نغَعَجِنَ لَامُ اَللَّه، ٻٜ نجَمْطِتِنَ ٻٜ نجَمْطَا؞ اٛ وِعِٻٜ، «تٛع اٛنْ کٛشُّ کٛو طُمٜ نغَمْ يَادُ، کٛو سَوْرُ، کٛو جَکَارٜ، کٛو ݧَمْندُ، کٛو شٜىٰدٜ، کٛو تٛغّٛوجٜ طِطِ؞ وُرٛ نغٛ اَرْتُطٛنْ نَتُّکِ فُو، نجٛوطٜىٰ طٛنْ نَا اٛنْ اَلِي غَرِيرِ ندِنْ؞ تٛ يِمْٻٜ ندٜرْ غَرِيرِ ندِنْ نجَٻَّاکِعٛنْ، اَلٜىٰ غَرِيرِ ندِنْ، ڤِطّٜىٰ سٛلَّارٜ کٛيْطٜ مٛوطٛنْ؞ کَنْجُمْ حٛلَّتَ ٻٜ نغَطِي حَکّٜ؞» سٜيْ ٻٜ ندِلِّ، ٻٜ نجَحِ نغَرِحٛيْ فٜىٰرٜ‑فٜىٰرٜ، اٜ ٻٜ نغَعَجِنَ حَبَرُ بٜلْطُمْ، اٜ ٻٜ نجَمْطِتِنَ يِمْٻٜ کٛو تٛيٜ؞ ندٜ حِرُدُسْ، لَامِيطٛ لٜيْدِ غَلِيلِ، نَنِ کٛو طُمٜ کٛ وَطَتَ، اٛ وَنِّي نغَمْ وٛٻّٜ اٜ مبِعَ طُمْ يَحَيَ غَطٛووٛ بَڤْتِسْمَ اُمِّي دَغَ مَيْدٜ؞ وٛٻّٜ بٛو اٜ مبِعَ طُمْ اَنَّبِ اِلِيَ وَنْغِ، اَمَّا وٛٻّٜ کَدِمَا اٜ مبِعَ طُمْ غٛعٛتٛ ندٜرْ اَنَّبٛعٜنْ ندٜنّٛ اُمِّي؞ حِرُدُسْ وِعِ، «مِ اِتَّنِي يَحَيَ حٛورٜ؞ طُمْ مٛيٜ کَدِنْ وٛنِ اٛعٛ، مٛ نَنَيْمِ فِي طُعُمْ دٛوْ مُوطُمْ؟» ندٜنْ اٛ طَٻِّتِ نٛ اٛ يِعِرْتَ يٜىٰسُ؞ ندٜ لِلَاٻٜ نغَرْتِ، ٻٜ مبِعِ يٜىٰسُ کٛ ٻٜ نغَطِ؞ سٜيْ اٛ حٛشِّٻٜ کَمْٻٜ تَنْ يَاکِ حَادٜ غَرِيرِ بِعٜتٜىٰندِ بٜتَسَيْدَ؞ اَمَّا ندٜ يِمْٻٜ طُطْٻٜ حَوْرُتُٻٜ نغِعِ نٛنْ، ٻٜ تٛکِّمٛ؞ اٛ جَٻِّيٻٜ، اٛ مٜتَنِٻٜ دٛوْ لَامُ اَللَّه؞ اٛ يَمْطِتِنِ غِطْٻٜ يَمْطِتِنٜىٰکِ؞ ندٜ نَانغٜ حِيرِ، تٛکُّٻٜمٛ سَڤّٛ اٜ طِطٛ نغَرِ تٛ مَاکٛ، مبِعِ، «وِعُ حَوْرُتُٻٜ ندِلَّ نغَرِحٛيْ اٜ غُرٜ غٛنْطٜ حَادٜ نغَمْ ٻٜ کٜٻَ کٛ ٻٜ ݧَامَتَ اٜ تٛ ٻٜ مبَالَتَ، نغَمْ طٛعٛ طُمْ لَدّٜ؞» سٜيْ اٛ وِعِٻٜ، «اٛنٛنْ کٛکّٜىٰٻٜ کٛ ٻٜ ݧَامَتَ؞» اَمَّا ٻٜ مبِعِمٛ، «بُرٛودِ جٛوِ اٜ لِپِّ طِطِ تَنْ مِنْ نغٛودِ طٛعٛ؞ سٜيْ نِ مِنْ نجَحَ، مِنْ شٛودَ ݧَمْندُ نغَمْ يِمْٻٜ ٻٜعٜ فُو؞» وٛرْٻٜ تَنْ ندٜرْ حَوْرُتُٻٜ ٻٜنْ ٻَدَکٜ 5,000؞ سٜيْ يٜىٰسُ وِعِ تٛکُّٻٜمٛ، «مبِعٜىٰٻٜ ٻٜ نجٛوطٛ مٛٻْدٜ يِمْٻٜ 50 ‑ 50 کٛو تٛيٜ؞» سٜيْ ٻٜ نغَطِ نٛنْ، کٛو مٛيٜ جٛوطِي؞ يٜىٰسُ حٛشِّ بُرٛودِ جٛوِ طِنْ اٜ لِپِّ طِطِ طِنْ، اٛ رَارِ دٛوْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ نغٜىٰدَنَ حَوْرُتُٻٜ؞ ٻٜ فُو ٻٜ ݧَامِ، ٻٜ کَارِ؞ تٛکُّٻٜمٛ مٛٻْتِ کٛ حٛرِي کٛ وَطِ کٛنْدٛوجٜ سَڤّٛ اٜ طِطِ؞ وٛنْدٜ ݧَلْندٜ يٜىٰسُ اٜ وَطَ دٛعَارٜ، کَنُمْ تَنْ، تٛکُّٻٜمٛ اٜ حَادٜ مَاکٛ؞ اٛ پَمِٻٜ، اٛ وِعِ، «مٛيٜ يِمْٻٜ مبِعَتَيَمْ؟» ٻٜ نٛوتِي ٻٜ مبِعِ، «وٛٻّٜ اٜ مبِعَ اَ يَحَيَ غَطٛووٛ بَڤْتِسْمَ؞ وٛٻّٜ بٛو اٜ مبِعَ اَ اَنَّبِ اِلِيَ؞ ندٜنْ وٛٻّٜ کَدِمَا اٜ مبِعَ غٛعٛتٛ ندٜرْ اَنَّبٛعٜنْ ندٜنّٛ اُمِّي؞» اٛ وِعِٻٜ، «اَمَّا اٛنٛنْ، مٛيٜ مبِعٛتٛنْيَمْ؟» سٜيْ بِيتُرُسْ نٛوتِي، وِعِ، «اَنْ وٛنِ اَلْمَسِيحُ مٛ اَللَّه!» اَمَّا يٜىٰسُ حَطِٻٜ تٛع ٻٜ مبِعَکَ کٛو مٛيٜ؞ ندٜنْ اٛ وِعِ، «دٛولٜ ٻِي نٜطّٛ يَرَ بٛنٜ طُطُّمْ؞ مَوْٻٜ يِمْٻٜ اٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ نغَݧَمٛ، ندٜنْ اٛ وَرٜىٰ؞ ندٜرْ ݧَلْندٜ تَتَوْرٜ بٛو طُمْ اُمِّنَيْمٛ؞» سٜيْ اٛ وِعِٻٜ ٻٜ فُو، «فُو غِطّٛ وَرْتَ تٛکُّطٛيَمْ، تٛع وَطَ کٛ حٛورٜ مُوطُمْ يِطِ وَطُکِ تَنْ، اَمَّا دٛولٜ حٛشَّ غَافَانغَلْ مُوطُمْ کٛو ندٜيٜ تٛکَّيَمْ؞ نغَمْ فُو غِطّٛ حِسْنُکِ يٛنْکِ مُوطُمْ اٛ دُلَّيْکِ؞ اَمَّا فُو دُلَّيْطٛ يٛنْکِ مُوطُمْ نغَمْ اَمْ اٛ حِسْنَيْکِ؞ کٛ طُمْ نَفَنْتَ نٜطّٛ، تٛ اٛ حٜٻِي دُونِيَارُ فُو، اَمَّا اٛ مَجِّنِي حٛورٜ مَاکٛ کٛو اٛ حَلْکِ؟ کٛو مٛيٜ غَݧُطٛيَمْ، مِنْ ٻِي نٜطّٛ اٜ بٛلِيطٜ اَمْ، مِ وَݧَيْمٛ تٛ مِ وَرْتٛيِي ندٜرْ تٜدُّنغَلْ اَمْ، اٜ ندٜرْ تٜدُّنغَلْ ݧَاکٛ اَمْ مٛ دٛوْ، اٜ مَلَاعِکَعٜنْ مَاکٛ شٜنِيٻٜ؞ اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي لَامُ اَللَّه؞» بَلْطٜ جٛوٜىٰتَتِ غَطَ يٜىٰسُ وِعِٻٜ بٛلِيطٜ طٜنْ، اٛ پٜىٰݝِ دٛوْ حٛشّٜىٰرٜ نغَمْ اٛ وَطَ دٛعَارٜ؞ بِيتُرُسْ، اٜ يَحَيَ، اٜ يَاکُبُ اٜ وٛنْدِ اٜ مَاکٛ؞ اٜ مٛ ندٜرْ دٛعَارٜ سٜيْ يٜىٰسٛ مَاکٛ اٜ کٛلْتٜ مَاکٛ نغَرْتِ دَنٜىٰجٜ تَرْ؞ طٛنْ اٜ طٛنْ سٜيْ رَا، اَنَّبٛعٜنْ طِطٛ، مُوسَ اٜ اِلِيَ، وَنْغِ ندٜرْ تٜدُّنغَلْ، اٜ ٻٜ مٜدَّ اٜ مَاکٛ؞ ٻٜ مٜدِّ دٛوْ مَيْدٜ مَاکٛ ندٜ تَبِّتَيْ نَاع کٛ نٜىٰٻِ ندٜرْ اُرُشَلِيمَ؞ بِيتُرُسْ اٜ غٛنْدُٻٜ اٜ مُوطُمْ طَانَکٜ، شَرٜلْ کٛ ٻٜ کُيْلِي، ٻٜ نغِعِ تٜدُّنغَلْ مَاکٛ اٜ يِمْٻٜ طِطٛ دَرٛدِيٻٜ اٜ مَاکٛ؞ شَرٜلْ کٛ اَنَّبٛعٜنْ ٻٜنْ اَلَتَ يٜىٰسُ، بِيتُرُسْ وِعِمٛ، «مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ، وٛعٛيْرُ ندُ مَاطَ، وٛعٛيْرُ ندُ مُوسَ، ندٜنْ وٛعٛيْرُ ندُ اِلِيَ؞» اَمَّا بِيتُرُسْ اَنْدَا کٛ وِعَتَ؞ اٜ مٛ ندٜرْ مٜتُکِ، سٜيْ ندُولَ وَنْغِ، سُدِّٻٜ، ٻٜ کُلْتٛرِ؞ ٻٜ نَنِ حٛنٛنْدٜ اَللَّه دَغَ ندٜرْ ندُولَ نغَنْ وِعِ، «اٛعٛ وٛنِ ٻِطّٛ اَمْ مٛ شُٻُمِ؞ نَنٜىٰ کٛ اٛ وِعَتَعٛنْ؞» ندٜ حٛنٛنْدٜ ندٜنْ دٜعِّتِ، ٻٜ نغِعِ يٜىٰسُ کَنُمْ تَنْ؞ تٛکُّٻٜمٛ اَلِطُمْ حَکُّندٜ مَٻّٜ، ندٜرْ ݧَلْطٜ طٜنْ ٻٜ مبِعَايِ غٛطّٛ کٛ ٻٜ نغِعِ؞ ندٜ وٜىٰتِ، ٻٜ نجِڤّٛيِي دَغَ دٛوْ حٛشّٜىٰرٜ ندٜنْ، کَوْرُتُٻٜ طُطْٻٜ تَوِمٛ؞ ندٜرْ کَوْرُتُٻٜ ٻٜنْ غٛطّٛ غٛرْکٛ نٛدِّ اٜ سٜمْبٜ، وِعِ، «مٛودِبّٛ، اٜ مِ تٛرٛمَا، رَارُ ٻِطّٛ اَمْ غٛرْکٛ نغَمْ کَنْکٛ تَنْ نغٛودُمِ؞ غِنّٛلْ نٜىٰٻِي اٜ نَنْغَمٛ؞ تٛ نغٛلْ نَنْغِيمٛ، اٛ فُطَّ وُلُّکِ، اٛ وَطَ کَ دِوْنُکِ، نغُوفٛ نغَطَ کَ وُرْتٛيَاکِ ندٜرْ حٛنْدُکٛ مَاکٛ، نغٛلْ اَلَتَامٛ نَا نغٛلْ نَوْنِيمٛ؞ مِ تٛرَکٜ تٛکُّٻٜمَ مبُرْتِنَنغٛلْ، اَمَّا ٻٜ مبَاوَايِ؞» يٜىٰسُ نٛوتِي، وِعِ، «اٛنٛنْ يِمْٻٜ جَامَنُ طُعُمْ کَلُّطُمْ اٛنْ کٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ وَدُّ ٻِطّٛ مَاطَ طٛعٛ؞» ٻِطّٛ اٛنْ اٜ وَرٛيَ، سٜيْ غِنّٛلْ نغٛلْ دٛعِّمٛ، اٜ مٛ دِوْنَ؞ اَمَّا يٜىٰسُ حَٻَنِ غِنّٛلْ نغٛلْ، يَمْطِتِنِ سُکَ اٛنْ، حٛکِّتِمٛ ݧَاکٛ مَاکٛ؞ وٛنْٻٜ طٛنْ فُو کَيْطِنِ اٜ مَنْغُ اَللَّه؞ اَمَّا اٜ ٻٜ ندٜرْ حَيْطِنْکِ دٛوْ کٛ اٛ وَطِ، يٜىٰسُ وِعِ تٛکُّٻٜمٛ، «ڤَامٜىٰ بٛطُّمْ نَنٛنْ کٛ مبِعَيْمِعٛنْ! طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ؞» اَمَّا ٻٜ ڤَامَايِ کٛ اٛ وِعِٻٜ؞ طُمْ سُوطَنَکٜٻٜ نغَمْ تٛع ٻٜ ڤَامَطُمْ، ندٜنْ اٜ ٻٜ کُلَ پَمُکِمٛ دٛوْ مَاجُمْ؞ ندٜنْ غٜدِّ اُمِّي حَکُّندٜ تٛکُّٻٜمٛ دٛوْ طُمْ مٛيٜ ٻُرِ مَنْغُ ندٜرْ مَٻّٜ؞ اَمَّا يٜىٰسُ حٜٻْتِ کٛ وٛنِ ندٜرْ ٻٜرْطٜ مَٻّٜ، سٜيْ اٛ حٛشِّ سُکَيٜلْ ڤَمَرٜلْ، اٛ دَرْنِنغٜلْ حَادٜ مَاکٛ؞ ندٜنْ اٛ وِعِٻٜ، «کٛو مٛيٜ جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞ ندٜنْ کٛو مٛيٜ جَٻُطٛيَمْ جَٻِي لِلٛيْطٛيَمْ؞ نغَمْ لٜسْتِنْطٛ حٛورٜ مُوطُمْ فُو ندٜرْ مٛوطٛنْ، کَنُمْ وٛنِ مَوْطٛ؞» يَحَيَ نٛوتِي، وِعِ، «مٛودِبّٛ، مِنْ نغِعِي غٛطّٛ اٜ وُرْتِنَ غِنِّ ندٜرْ اِنْدٜ مَاطَ، مِنْ کَطِمٛ نغَمْ کَنْکٛ نَاع اٛ تٛکُّطٛعٜنْ؞» اَمَّا يٜىٰسُ وِعِمٛ، «تٛع اٛنْ کَطُمٛ، نغَمْ فُو مٛ وَݧَايِعٛنْ اٜ وٛنْدِ اٜ مٛوطٛنْ؞» ندٜ شَرٜلْ ٻَدِي نغَمْ طُمْ حٛشَّمٛ يَاکِ دٛوْ، يٜىٰسُ اٜ حٛورٜ مُوطُمْ سُٻِ يَحُکِ اُرُشَلِيمَ؞ سٜيْ اٛ لِلِ لِلَاٻٜ يٜىٰسٛ مَاکٛ، ٻٜ نجَحَ ندٜرْ غَرِيٜلْ سَمَارِيَنْکٛعٜنْ نغَمْ ٻٜ شِرْيٛو کٛو طُمٜ نغَمْ غَرٛلْ مَاکٛ؞ اَمَّا يِمْٻٜ غَرِيٜلْ نغٜلْ نجَٻَايِمٛ نغَمْ ٻٜ کٜٻْتِي اُرُشَلِيمَ اٛ فَعِ؞ ندٜ تٛکُّٻٜمٛ يَاکُبُ اٜ يَحَيَ نغِعِ نٛنْ، ٻٜ مبِعِ، «مٛودِبّٛ، اَ يِطِ مِنْ نٛدَّ حِيتٜ دَغَ دٛوْ وَرَ حَلْکَٻٜ؟» اَمَّا يٜىٰسُ وَيْلِتِي حَٻَنِٻٜ، سٜيْ ٻٜ نجَحِ وٛنْغٜلْ غَرِيٜلْ؞ اٜ ٻٜ ندٜرْ يَادُ دٛوْ طَتَلْ، سٜيْ غٛطّٛ وِعِمٛ، «مِ تٛکّٜتٜ تٛ نجَحَتَا فُو؞» يٜىٰسُ وِعِمٛ، «دِلَاجِ اٜ نغٛودِ غَيْطٜ، شٛلِّ اٜ نغٛودِ شَٻّٜ، اَمَّا ٻِي نٜطّٛ وَلَا تٛ فُکّٛتٛو؞» اٛ وِعِ غٛطّٛ نٜطّٛ، «تٛکَّمْ؞» اَمَّا نٜطّٛ اٛنْ وِعِمٛ، «مٛودِبّٛ، اَلْ مِ يَحَ، مِ اُوٛيَ ݧَاکٛ اَمْ تَوْ؞» اَمَّا يٜىٰسُ وِعِمٛ، «اَلُ مَيْٻٜ اُوَ مَيْٻٜ مُعّٜنْ، اَمَّا اَنْ، يَحُ، نغَعَجِنَا لَامُ اَللَّه؞» غٛطّٛ کَدِمَا وِعِ، «مِ تٛکّٜتٜ، مٛودِبّٛ، اَمَّا اَلْ مِ يَحَ مِ پَمَ ٻٜ وُرٛ اَمْ تَوْ؞» اَمَّا يٜىٰسُ وِعِمٛ، «کٛو مٛيٜ جٛغِيطٛ رٜمٜرْغٛ فُطِّ رٜمُکِ اٜ يٜىٰپٛو غَطَ، وَلَا کٛ نَفِ ندٜرْ کُوغَلْ اَللَّه؞» غَطَ مَاجُمْ يٜىٰسُ سُٻِ وٛٻّٜ کَمْٻٜ 27، ندٜنْ اٛ لِلِٻٜ طِطٛ‑طِطٛ، ٻٜ اَرْتَمٛ يَاکِ کٛو ندِيٜ غَرِيرِ اٜ وِغٜىٰرٜ تٛ اٛ يِطِ يَحُکِ فُو؞ اٛ وِعِٻٜ، «غٜسٜ ٻٜنْدُطٜ اٜ طُوطِ، اَمَّا حُوٛوٻٜ طُوطَا؞ تٛرٜىٰ جٛومُ غٜسٜ طٜنْ لِلٛيَ حُوٛوٻٜ ندٜرْ غٜسٜ مَاکٛ؞ نجَحٜىٰ؞ مِ لِلِيعٛنْ تٛ يِمْٻٜ بٛنٛ مبَالٛيْ حَکُّندٜ شَافَالِ؞ تٛع اٛنْ نجَادُ اٜ جَکَارٜ شٜىٰدٜ کٛو جَکَارٜ لِمْشٜ، کٛو ڤَطٜ، ندٜنْ تٛع اٛنْ کٛوْنُ غٛطّٛ کٛوْنٛلْ جُوتُنغٛلْ دٛوْ طَتَلْ؞ وُرٛ نغٛ نَتُّطٛنْ فُو، ڤُطّٜىٰ وِعُکِ، ‹اَللَّه حٛکَّ وُرٛ نغٛعٛ جَمْ!› تٛ اٜ وٛودِ نٜطّٛ غِطّٛ جَمْ ندٜرْ وُرٛ نغٛنْ، بَرْکَ مٛوطٛنْ جٛوطٛتٛ دٛوْ مَاکٛ، اَمَّا تٛ وَلَا، طُمْ وَرْتَيْ تٛ مٛوطٛنْ؞ نجٛوطٜىٰ ندٜرْ وُرٛ نغٛ طُمْ جَٻِّيعٛنْ، ݧَامٜىٰ، نجَرٜىٰ کٛو طُمٜ کٛ ٻٜ کٛکِّعٛنْ، نغَمْ کُوٛووٛ اٜ حَانِ يٛٻٜىٰکِ؞ تٛع اٛنْ کَکِّتٛ دَغَ وُرٛ يَاکِ وُرٛ؞ فُو غَرِيرِ ندِ نَتُّطٛنْ، تٛ يِمْٻٜ مَيْرِ نجَٻَّکٜعٛنْ، ݧَامٜىٰ کٛ طُمْ رٜسِ يٜىٰسٛ مٛوطٛنْ؞ نجَمْطِنٜىٰ ݧَوْٻٜ وٛنْٻٜ ندٜرْ غَرِيرِ ندِنْ، ندٜنْ مبِعٛنْٻٜ، ‹لَامُ اَللَّه وَرِي حَادٜ مٛوطٛنْ؞› اَمَّا، غَرِيرِ ندِ نَتُّطٛنْ فُو، تٛ ٻٜ نجَٻَّاکِعٛنْ، مبُرْتٜىٰ نجَحٛنْ دٛوْ طَتٜ مَيْرِ مبِعٛنْ، ‹مِنْ ڤِطِّي سٛلَّارٜ غَرِيرِ مٛوطٛنْ دَغَ کٛيْطٜ اَمِنْ، کَنْجُمْ طُمْ حٜٻْتِرْتَ اٛنْ نغَطِي حَکّٜ؞ اَمَّا اَنْدٜىٰ طُعُمْ، لَامُ اَللَّه وَرِي حَادٜ مٛوطٛنْ؞› اٜ مِ وِعَعٛنْ، اٜ ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ غَرِيرِ سٛدٛمْ دٛوْ يِمْٻٜ غَرِيرِ ندِنْ طٛنْ؞» اٛ وِعِ، «يِمْٻٜ غَرِيرِ کٛرَسِنْ، اٛنْ مبٛنِي! يِمْٻٜ غَرِيرِ بٜتَسَيْدَ، اٛنْ مبٛنِي! دَا کُوطٜ کَيْطِنِيطٜ غَطَاطٜ ندٜرْ مٛوطٛنْ طٜ نغَطَنَامَ يِمْٻٜ تَايَ اٜ سِدٛنْ، دَا ٻٜ ٻٛرْنَکٜ کٛلْتٜ کٛلَّيْطٜ وَنَّارٜ ٻٜ نجٛوطَکٜ ندٜرْ تٛوکَ نغَمْ حٛلُّکِ ٻٜ تُوبِي؞ اَمَّا ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ تَايَ اٜ سِدٛنْ دٛوْ مٛوطٛنْ؞ اٛنٛنْ بٛو، يِمْٻٜ غَرِيرِ کَفَرْنَحُمْ، اٛنْ کَمِّي طُمْ حٛشَّيْعٛنْ يَاکِ دٛوْ؟ نَاع نٛنْ! طُمْ نَتِّنَيْعٛنْ ندٜرْ نغَيْکَ حِيتٜ؞» ندٜنْ يٜىٰسُ وِعِ تٛکُّٻٜمٛ، «جَٻُطٛ کٛ مبِيطٛنْ فُو جَٻِي کٛ مبِيمِ، غَݧُطٛعٛنْ بٛو وَݧِييَمْ، ندٜنْ غَݧُطٛيَمْ وَݧِي اٛنْ طٛنْ لِلٛيْطٛيَمْ؞» سٜيْ تٛکُّٻٜمٛ 27 نغَرْتِ اٜ نَنَ بٜلْطُمْ، ٻٜ مبِعِ، «مٛودِبّٛ، حَا غِنِّ مَا نغَطِي کٛ مِنْ مبِعِطِ فُو ندٜرْ اِنْدٜ مَاطَ!» اٛ وِعِٻٜ، «مِ يِعِي شٜيْطَنْ يَنٛيِي بٛ مَپّٜرٜ دَغَ دٛوْ؞ رَا، مِ حٛکِّيعٛنْ لَامُ يَاٻُکِ دٛوْ بٛولٜ اٜ جَحٜ اٜ حٜٻُکِ جَالٛرْغَلْ دٛوْ بَوْطٜ غَݧٛ، وَلَا کٛ حٜٻَتَعٛنْ؞ اَمَّا تٛع اٛنْ نَنُ بٜلْطُمْ نغَمْ غِنِّ اٜ نغَطَ کٛ مبِيطٛنْ، اَمَّا نَنٜىٰ بٜلْطُمْ نغَمْ اِنْطٜ مٛوطٛنْ مبِنْدَامَ اٜ وُرٛ اَللَّه؞» اٜ شَرٜلْ نغٜلْ، يٜىٰسُ نَنِ بٜلْطُمْ ندٜرْ رُوحُ اَللَّه، اٛ وِعِ، «مِ يٜتِّيمَ، ݧَاکٛ اَمْ مٛ دٛوْ، جٛومِرَاوٛ دٛوْ اٜ لٜيْ، نغَمْ اَ سُوطِي فِي طُعُمْ تٛ غٛودُٻٜ فَامُ اٜ اَنْدَلْ، اَ حٛلِّيطُمْ ٻِکّٛيْ ڤَمَرٛيْ؞ نٛنْ ݧَاکٛ اَمْ، نغَمْ نٛنْ وٜلَنْمَا نغَطَا؞» سٜيْ اٛ وِعِ يِمْٻٜ، «ݧَاکٛ اَمْ حٛکِّييَمْ کٛو طُمٜ؞ وَلَا اَنْدُطٛ مٛيٜ وٛنِ ٻِطّٛ اٛنْ سٜيْ نِ ݧَاکٛ اٛنْ، نٛنْ مَا وَلَا اَنْدُطٛ مٛيٜ وٛنِ ݧَاکٛ اٛنْ سٜيْ نِ ٻِطّٛ اٛنْ، اٜ مٛ ٻِطّٛ اٛنْ يِطِ اَنْدِنَ ݧَاکٛ اٛنْ؞» سٜيْ اٛ وَيْلِتِي تٛ تٛکُّٻٜمٛ اٛ وِعِٻٜ کَمْٻٜ تَنْ، «غِتٜ غِعُطٜ کٛ نغِيطٛنْ طٜ بَرْکِطِنَاطٜ! نغَمْ اٜ مِ وِعَعٛنْ، اَنَّبٛعٜنْ طُطْٻٜ اٜ لَامِنٛوٻٜ طُطْٻٜ نغِطِي نغِعَ کٛ نغِيطٛنْ، اَمَّا ٻٜ نغِعَايِ؞ ٻٜ نغِطِي نَنُکِ کٛ نَنٛتٛنْ، اَمَّا ٻٜ نَنَايِ؞» سٜيْ غٛطّٛ مٛودِبّٛ دٛوکَ اُمِّي دَرِي نغَمْ فٛوندَ يٜىٰسُ، اٛ وِعِ، «مٛودِبّٛ، کٛ حَانِ مِ وَطَ نغَمْ مِ حٜٻَ يٛنْکِ کِ رٜعَتَا؟» سٜيْ يٜىٰسُ وِعِمٛ، «کٛ وِنْدَا ندٜرْ اَتَّوْرَ؟ نٛيٜ نجَنْغِرْتَا؟» اٛ نٛوتِي، اٛ وِعِ، « ‹يِطُ جٛومِرَاوٛ اَللَّه مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ سٜمْبٜ مَاطَ فُو، اٜ حَکِّيلٛ مَاطَ فُو،› ندٜنْ، ‹يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞› » يٜىٰسُ وِعِمٛ، «اَ نٛوتَکٜ بٛطُّمْ؞ وَطُ نٛنْ، ندٜنْ اَ حٜٻَيْ يٛنْکِ کِ رٜعَتَا؞» اَمَّا مٛودِبّٛ دٛوکَ اٛنْ يِطِي وُرْتِنَ حٛورٜ مُوطُمْ، سٜيْ اٛ پَمِ يٜىٰسُ، اٛ وِعِ، «مٛيٜ وٛنِ بَنْدِرَاوٛ اَمْ؟» يٜىٰسُ وِعِمٛ، «غٛطّٛ نٜطّٛ اٜ يَحَ دَغَ اُرُشَلِيمَ يَاکِ جٜرِيکٛ، سٜيْ وٛٻّٜ وُيْٻٜ تَٻِّيمٛ؞ ٻٜ ٻٛرْتِمٛ، ٻٜ نجَٻِ کٛ اٛ وٛودِ فُو، ٻٜ ڤِيِمٛ بٛطُّمْ، ٻٜ ندِلِّ، ٻٜ اَلِمٛ حَکُّندٜ يٛنْکِ اٜ مَيْدٜ؞ سٜيْ اَرْدِيطٛ دِينَ تٛکّٛيِ طَتَلْ نغَلْ؞ ندٜ اٛ يِعِ نٜطّٛ اٛنْ، اٛ سٜلِ، اٛ پَٻِّي؞ کَدِمَا، غٛطّٛ لٜىٰوِيَنْکٜىٰجٛ تٛکّٛيِ طَتَلْ نغَلْ، ندٜ اٛ وَرٛيِ تٛ نٜطّٛ اٛنْ وٛنِ، اٛ يِعِمٛ، اٛ سٜلِ، اٛ پَٻِّي؞ اَمَّا غٛطّٛ سَمَارِيَنْکٜىٰجٛ اٜ ندٜرْ يَادُ اٛ وَرٛيِ تٛ نٜطّٛ اٛنْ وٛنِ، اٛ يِعِمٛ، اٛ يُرْمِنَنِمٛ؞ اٛ يَحِ تٛ مَاکٛ، اٛ لٛوتَنِمٛ نَوْنٛوطٜ اٜ نٜبَّمْ اٜ ندِيَمْ اِنَبٛجَمْ، اٛ حَٻَّنِمٛ نَوْنٛوطٜ طٜنْ؞ ندٜنْ اٛ وَطِّنِمٛ دٛوْ مبَبَّ مَاکٛ اٛ يَارِمٛ وُرٛ تٛ طُمْ يٛٻَتَ طُمْ وَالَ، اٛ وَلِّمٛ؞ ندٜ وٜىٰتِ، سَمَارِيَنْکٜىٰجٛ اٛنْ اِتِّ شٜىٰدٜ اَجُرْفَارِ طِطِ دَغَ جِيبَ مُوطُمْ، حٛکِّ مَوْطٛ وُرٛ اٛنْ وِعِمٛ، ‹وَلُّمٛ؞ تَا مَجِّنِي شٜىٰدٜ کٛ ٻُرِ طٜعٜ، مِ يٛٻٜتٜ تٛ مِ سٛعّٛيَکٜ؞› » سٜيْ يٜىٰسُ پَمِ مٛودِبّٛ دٛوکَ اٛنْ وِعِ، «مٛيٜ ندٜرْ يِمْٻٜ تَتٛ ٻٜعٜ کَمِّطَا وٛنِ بَنْدِرَاوٛ مٛ وُيْٻٜ ڤِيِ اٛنْ؟» اٛ وِعِ، «اٛنْ طٛنْ جُرْمِنَنْطٛمٛ؞» سٜيْ يٜىٰسُ وِعِمٛ، «اَنْ مَا، يَحُ نغَطَا نٛنْ؞» يٜىٰسُ اٜ تٛکُّٻٜمٛ اٜ ندٜرْ يَادُ، سٜيْ اٛ نَتِّ وٛنْغٜلْ غَرِيٜلْ، غٛطّٛ دٜبّٛ بِعٜتٜىٰطٛ مَرْتَ جَٻِّيمٛ تٛ وُرٛ مُوطُمْ؞ مَرْتَ اٛنْ اٜ وٛودِ مِݧِرَاوٛ بِعٜتٜىٰطٛ مَرْيَامَ؞ مَرْيَامَ جٛوطِي حَادٜ يٜىٰسُ اٜ مٛ نَنَ اٜکِّتِنٛلْ مَاکٛ؞ اَمَّا مَرْتَ وَنِّي نغَمْ اٜ حُوَ کُوطٜ طُطّٜ؞ سٜيْ اٛ وَرِ تٛ يٜىٰسُ، اٛ وِعِ، «مٛودِبّٛ، اَ وَنَّايِ ندٜ مِݧِرَاوٛ اَمْ اَلْدِيَمْ اٜ کُوغَلْ نغَعَلْ مِنْ تَنْ؟ وِعُمٛ اٛ اُمّٛو اٛ وَلَّيَمْ!» اَمَّا يٜىٰسُ نٛوتِي، وِعِ، «مَرْتَ، مَرْتَ، اَ وَنِّي حٛورٜ مَاطَ دٛوْ فِي طُطُّمْ؞ اَمَّا فِي غٛعٛ تَنْ يِطَا؞ مَرْيَامَ بٛو سُٻِي کٛ ٻُرِ وٛوطُکِ، طُمْ جَٻْتَتَاکٜ تٛ مَاکٛ؞» وٛنْدٜ ݧَلْندٜ يٜىٰسُ اٜ وَطَ دٛعَارٜ تٛ وٛنْدٜ وِغٜىٰرٜ؞ ندٜ اٛ حٜىٰݧِ دٛعَارٜ ندٜنْ، غٛعٛتٛ ندٜرْ تٛکُّٻٜمٛ وِعِمٛ، «مٛودِبّٛ، اٜکِّتِنْمِنْ نٛ مِنْ نغَطِرْتَ دٛعَارٜ، نٛنْ نٛ يَحَيَ غَطٛووٛ بَڤْتِسْمَ اٜکِّتِنِرِ تٛکُّٻٜمٛ؞» يٜىٰسُ وِعِٻٜ، «تٛ اٛنْ نغَطَيْ دٛعَارٜ، مبِعٜىٰ، ‹يَا اَللَّه ݧَاکٛ اَمِنْ مٛ دٛوْ، اِنْدٜ مَاطَ شٜنِيندٜ مَوْنِنٜىٰ، لَامُ مَاطَ وَرَ؞ حٛکُّمِنْ کٛ مِنْ ݧَامَتَ کٛو ندٜيٜ ݧَلْندٜ؞ يَافَنَمِنْ حَکّٜىٰجِ اَمِنْ، نغَمْ مِنٛنْ مَا اٜ مِنْ نجَافَنٛو کٛو مٛيٜ غَطَنْطٛمِنْ حَکّٜ؞ تَاع اَلُ مِنْ نجَحَ تٛ مِنْ نغَطَتَ حَکّٜ؞› » ندٜنْ اٛ حٛکِّٻٜ مِسَالُ، اٛ وِعِ، «تٛ غٛعٛتٛ ندٜرْ مٛوطٛنْ يَحِي تٛ حِغٛ مُوطُمْ شَکَ جٜمَّ وِعِمٛ، ‹حِغٛ، وُپَمْ مبُرٛودِحٛ تَتٛ، نغَمْ حِغٛ اَمْ اٜ دٛوْ يَادُ يَالٛيِي وَالَ اٜ وُرٛ اَمْ، رَا بٛو مِ وَلَا کٛ کٛکَّيْمٛمِ اٛ ݧَامَ؞› سٜيْ اٛ نٛوتِي دَغَ ندٜرْ سُودُ، اٛ وِعِ، ‹تَاع وَنَّمْ، نغَمْ طُمْ يَادَکٜ طُمْ مَٻِّي دَمُّغَلْ، ندٜنْ مِنْ اٜ ٻِٻّٜ اَمْ مِنْ نجَادَکٜ مِنْ ڤُکَّکٜ؞ مِ وَاوَتَا اُمَّاکِ جٛونِ مِ حٛکُّمَا غٛطُّمْ؞› » يٜىٰسُ وِعِ، «اٜ مِ وِعَعٛنْ، تٛ اٛ سَلَکٜ اُمَّاکِ اٛ حٛکَّمٛ بُرٛودِ طُمْ نغَمْ حِغَاکُ، اٛ اُمّٛتٛ اٛ حٛکَّمٛطُمْ نغَمْ اٛ وَطِي کَ تٛرَاکِمٛ؞ نغَمْ نٛنْ اٜ مِ وِعَعٛنْ، تٛرٜىٰ، طُمْ حٛکَّيْعٛنْ؞ طَٻِّتٜىٰ، اٛنْ کٜٻَيْ؞ شِلْمِنٜىٰ، طُمْ مَٻِّتَنَيْعٛنْ دَمُّغَلْ؞ نغَمْ کٛو مٛيٜ تٛرِيطٛ طُمْ حٛکَّيْمٛ، طَٻُّتُطٛ بٛو حٜٻَيْ، ندٜنْ کٛو مٛيٜ شِلْمِنِيطٛ طُمْ مَٻِّتَنَيْمٛ دَمُّغَلْ؞ مٛيٜ ندٜرْ مٛوطٛنْ تٛ ٻِطّٛ مُوطُمْ تٛرَکٜمٛ لِنْغُ، اٛ حٛکَّمٛ مبٛودِ؟ کٛو بٛو تٛ اٛ تٛرَکٜمٛ ٻٛشّٛوندٜ، اٛ حٛکَّمٛ يَارٜ؟ تٛ اٛنٛنْ کَلُّٻٜ، اٛنْ اَنْدِ نٛ کٛکِّرْتٛنْ ٻِٻّٜ مٛوطٛنْ فِي بٛطُّمْ، حَکّٛ ݧَاکٛ مٛوطٛنْ مٛ دٛوْ! اٛ ٻُرَيْ نٛنْ حٛکُّکِ تٛرِيٻٜمٛ رُوحُ اَللَّه؞» وٛنْدٜ ݧَلْندٜ يٜىٰسُ اٜ وُرْتِنَنَ غٛطّٛ غِنّٛلْ ڤَحٛلْ؞ غَطَ غِنّٛلْ نغٛلْ وُرْتَکٜ، نٜطّٛ اٛنْ فُطِّ مٜتُکِ، سٜيْ يِمْٻٜ طُطْٻٜ کَوْرُتُٻٜ کَيْطِنِ؞ اَمَّا وٛٻّٜ مَٻّٜ مبِعِ، «اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ» وٛٻّٜ اٜ نغِطِ فٛوندُکِمٛ، نغَمْ نٛنْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ اَمَّا يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، اٛ وِعِٻٜ، «لَامُ فُو شٜنْدِيطُمْ اٜ وَݧْوَݧْتِرَ، طُمْ لَلَّيْ؞ نٛنْ مَا وُرٛ شٜنْدِينغٛ اٜ وَݧْوَݧْتِرَ، نغٛ لَلَّيْ؞ تٛ لَامُ شٜيْطَنْ سٜنْدَکٜ اٜ وَݧْوَݧْتِرَ، نٛيٜ لَامُ طُمْ دَرٛرْتٛو؟ مِ وِعُ نٛنْ نغَمْ اٛنْ مبِعَ اٜ مِ وُرْتِنَ غِنِّ اٜ سٜمْبٜ بَعَلْجَبُلْ لَامِيطٛ غِنِّ؞ تٛ اٜ مِ وُرْتِنَ غِنِّ ندٜر بَوْطٜ بَعَلْجَبُلْ، اٜ بَوْطٜ مٛيٜ تٛکُّٻٜعٛنْ مبُرْتِنِرْتَطِ؟ نغَمْ نٛنْ تٛکُّٻٜعٛنْ کٛلَّيْ اٛنْ نغَلَا غٛونغَ؞ اَمَّا، تٛ اٜ مِ وُرْتِنَ غِنِّ ندٜرْ بَوْطٜ اَللَّه، ندٜنْ لَامُ اَللَّه وَرَنِيعٛنْ؞ «تٛ نٜطّٛ شٜمْبِطّٛ جٛغَکٜ کَافَحِ رٜىٰنِي وُرٛ مُوطُمْ، وَلَا کٛ حٜٻَتَ کٛ اٛ وٛودِ فُو؞ اَمَّا، تٛ غٛطّٛ ٻُرْطٛمٛ سٜمْبٜ وَرَنِيمٛ تٜىٰتَيْ کَافَحِ کِ اٛ مَنْتٛرْتٛو کِنْ، ٻُرْطٛ مٛ سٜمْبٜ اٛنْ سٜنْدَنَيْ وٛٻّٜ جَوْدِ ندِنْ؞ «مٛ وٛنْدَا اٜ اَمْ فُو، اٛ غَݧٛ اَمْ؞ مٛ وَلَّايِيَمْ مٛٻْتُکِ فُو، اٛ شَنْکِتٛووٛ؞ «تٛ غِنّٛلْ وُرْتَکٜ ندٜرْ ٻَنْدُ نٜطّٛ، نغٛلْ يَحَيْ تٛ بِغٜىٰجٜ جٛرْطٜ اٜ نغٛلْ طَٻِّتَ تٛ نغٛلْ سِوْتٛتٛو؞ اَمَّا تٛ نغٛلْ حٜٻَايِ، سٜيْ نغٛلْ وِعَ، ‹مِ سٛعّٛتٛ وُرٛ نغٛ مبُرْتٛيِيمِ؞› تٛ نغٛلْ وَرْتِي، نغٛلْ تَوِي وُرٛ نغٛنْ وُووَامَ نغٛ مٛعِّنَامَ، سٜيْ نغٛلْ يَحَ نغٛلْ وَدّٛيَ غِنِّ جٛوٜىٰطِطِ ٻُرْطِنغٛلْ حَلُّکِ، طِ نَتَّ طِ نجٛوطٛو طٛنْ؞ ندٜنْ رٜعِرْدٜ نٜطّٛ اٛنْ ٻُرَيْ فُطّٛودٜ مَاکٛ حَلُّکِ؞» ندٜ يٜىٰسُ وِعِ نٛنْ، غٛطّٛ دٜبّٛ ندٜرْ حَوْرُتُٻٜ نٛدِّ سٜمْبٜىٰ وِعِ، «دٜبّٛ دَݧُطٛمَ کٛکُّطٛمَ مُسِنْطَا، اٛ بَرْکِطِنَاطٛ؞» اَمَّا يٜىٰسُ وِعِمٛ، «نٛنْ، اَمَّا ٻُرْٻٜ بَرْکِطِنٜىٰکِ نغٛنِ نَنٛوٻٜ وٛلْدٜ اَللَّه اٜ تٛکَّندٜ؞» ندٜ يِمْٻٜ نغَطِ کَ مٛٻْتَاکِ تٛ يٜىٰسُ، اٛ وِعِٻٜ، «يِمْٻٜ جَامَنُ طُعُمْ ٻٜ کَلُّٻٜ، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛو اَنَّبِ اِنُوسَ؞ کٛ حٜٻِ اَنَّبِ اِنُوسَ حٛلِّي يِمْٻٜ نِينٜبَ اَللَّه لِلٛيِمٛ، نٛنْ مَا کٛ حٜٻَتَيَمْ، مِنْ ٻِي نٜطّٛ، طُمْ حٛلَّيْ يِمْٻٜ جَامَنُ طُعُمْ اَللَّه لِلٛيِيَمْ؞ ݧَلْندٜ جَانغٛ، لَامِيطٛ لٜيْدِ فٛمْبِنَ دٜبّٛ اٛ اُمّٛدٛتٛ اٜ يِمْٻٜ جَامَنُ طُعُمْ؞ اٛ حٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَنْکٛ اٛ وَرٛيِي دَغَ ٻَدَاکِ نَنُکِ فَامُ اَنَّبِ سُلٜيْمَانُ؞ رَا بٛو، ٻُرْطٛ اَنَّبِ سُلٜيْمَانُ طٛعٛ؞ اٜ ݧَلْندٜ جَانغٛ يِمْٻٜ نِينٜبَ مَا ٻٜ اُمّٛدٛتٛ اٜ يِمْٻٜ جَامَنُ طُعُمْ، ٻٜ کٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَمْٻٜ ندٜ ٻٜ نَنِ وَعَجُ اَنَّبِ اِنُوسَ ٻٜ تُوبِي، رَا بٛو ٻُرْطٛ اَنَّبِ اِنُوسَ طٛعٛ؞ «وَلَا غَطَنَيْطٛ فِتِلَارُ حِيتٜ سُوطَندُ کٛو حِڤَّ تُمُّدٜ دٛوْ مَيْرُ؞ سٜيْ نِ اٛ رٜسَندُ دٛوْ دَنْکِ نغَمْ ندُ يٜيْنَنٛو نَتُّطٛ فُو؞ غِتٜ مَاطَ نغٛنِ فِتِلَارُ ٻَنْدُ مَاطَ؞ تٛ غِتٜ مَاطَ اٜ نجَمْطِ، ٻَنْدُ مَاطَ فُو حٜىٰوَيْ جَيْنغٛلْ، اَمَّا تٛ غِتٜ مَاطَ نجَمْطَا فُو، ٻَنْدُ مَاطَ حٜىٰوَيْ ݧِوْرٜ؞ فَامُ بٛطُّمْ کٛو جَيْنغٛلْ غٛنْغٛلْ ندٜرْ مَاطَ طُمْ ݧِوْرٜ؞ تٛ ٻَنْدُ مَاطَ فُو اٜ حٜىٰوِ جَيْنغٛلْ، تٛ ندُ وَلَا ݧِوْرٜ کٛو سٜطَّ، ندُ يٜيْنٛتٛ کٛو تٛيٜ نٛ جَيْنغٛلْ فِتِلَارُ يٜيْنٛرَنْتٛمَا؞» يٜىٰسُ اٜ ندٜرْ مٜتُکِ سٜيْ غٛطّٛ فَارِسَنْکٜىٰجٛ وِعِمٛ اٛ يَحَ وُرٛ مُوطُمْ اٛ حِرْتٛيٛو؞ يٜىٰسُ يَحِ جٛوطِي فُطِّ ݧَامُکِ ݧَمْندُ؞ فَارِسَنْکٜىٰجٛ اٛنْ حَيْطِنِ ندٜ يِعِ يٜىٰسُ فُطِّي ݧَامُکِ ݧَمْندُ لٛوتَايِ جُوطٜ مُوطُمْ؞ سٜيْ يٜىٰسُ وِعِمٛ، «اٛنٛنْ فَارِسَنْکٛعٜنْ اٛنْ لَيْٻَ غَطَ نجَرْدُکٛيْ مٛوطٛنْ اٜ لٜعٛيْ مٛوطٛنْ، اَمَّا ندٜرْ مٛوطٛنْ اٛنْ کٜىٰوُٻٜ نغُيْکَ اٜ حَلّٜىٰندٜ؞ اٛنٛنْ حَاݝَاٻٜ! کٛو مٛيٜ اٜ اَنْدِ غَطُطٛ يَاسِ کَنْکٛ وَطِ ندٜرْ؞ نغَمْ نٛنْ کٛکّٜىٰ ٻٜ نغَلَنَا کٛ وٛنِ ندٜرْ جَرْدُطٜ اٜ لٜعٛيْ مٛوطٛنْ، ندٜنْ طٜ فُو طٜ لَاٻَنَيْعٛنْ؞ «اٛنْ مبٛنِي، اٛنٛنْ فَارِسَنْکٛعٜنْ، نغَمْ اٛنْ کٛکِّي اَللَّه جَکَّ حَاکٛحٛيْ نجٛنْغٜتٜىٰکٛيْ، اَمَّا اٛنْ نغَطَنْتَا يِمْٻٜ کٛ حَانِ، اٛنْ نغَلَا يِدّٜ اَللَّه؞ طُعُمْ تَتُمْ اٜ حَانِ نغَطٛنْطُمْ، اَمَّا تٛع اٛنْ اَلُ وَطُکِ کٛ حٛرِي؞ «اٛنْ مبٛنِي، اٛنٛنْ فَارِسَنْکٛعٜنْ، نغَمْ اٛنْ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ، اٛنْ نغِطِ حٛوْنِرٜىٰکِ مَنْغُ ندٜرْ لُومٛ؞ اٛنْ مبٛنِي! اٛنْ نَنْدِ اٜ غٜنَالٜ طٜ نغِعَتَاکٜ، يِمْٻٜ اٜ تٛکَّ دٛوْ مَاجٜ اَنْدَا؞» غٛعٛتٛ ندٜرْ مٛودِٻّٜ اَتَّوْرَ وِعِ يٜىٰسُ، «مٛودِبّٛ، ندٜ مبِيطَا نٛنْ، مِنٛنْ مَا اَ حُطِيمِنْ!» يٜىٰسُ وِعِ، «اٛنْ مبٛنِي، اٛنٛنْ مَا مٛودِٻّٜ اَتَّوْرَ، نغَمْ اٛنْ نجٛوَنَ يِمْٻٜ دٛݝْلٜ تٜدُّطٜ، اَمَّا اٛنٛنْ کٛو کٛولٜلْ غٛعٛ اٛنْ نغَطَتَا مبَلّٛنْٻٜ؞ اٛنْ مبٛنِي! نغَمْ اٛنْ مَحَ غٜنَالٜ بٛطّٜ طٜ سِفْتٛرْکِ اَنَّبٛعٜنْ ٻٜ مَامَاجِ مٛوطٛنْ مبَرِ؞ نٛنْ حٛلِّي کٛ مَامَعٜنْ مٛوطٛنْ نغَطِ وٜلِيعٛنْ، نغَمْ ٻٜ مبَرِي اَنَّبٛعٜنْ، اٛنٛنْ بٛو اٛنْ مَحَنِ اَنَّبٛعٜنْ ٻٜنْ غٜنَالٜ؞ کَنْجُمْ وَطِ اَللَّه وِعِ ندٜرْ اَنْدَلْ مُوطُمْ، ‹مِ لِلَنَيْٻٜ اَنَّبٛعٜنْ اٜ لِلَاٻٜ، ٻٜ مبَرَ وٛٻّٜ ٻٜ تٛرَّ وٛٻّٜ؞› نغَمْ نٛنْ پِيپَمْ اَنَّبٛعٜنْ ندُفَاطَمْ دَغَ فُطّٛودٜ دُونِيَارُ، طُمْ طَٻِّتَيْطَمْ تٛ جُوطٜ يِمْٻٜ جَامَنُ طُعُمْ، دَغَ پِيپَمْ حَبِيلَ حَا يَاکِ پِيپَمْ اَنَّبِ جَکَارِيَ بَرَاطٛ حَکُّندٜ سُودُ جٛومِرَاوٛ اٜ سَکِّرْدٜ؞ اٜ مِ وِعَعٛنْ غٛونغَ، پِيپَمْجِ طِنْ طٛنْ فُو طُمْ طَٻِّتَيْطِ تٛ جُوطٜ يِمْٻٜ جَامَنُ طُعُمْ؞ «اٛنْ مبٛنِي، اٛنٛنْ مٛودِٻّٜ اَتَّوْرَ، نغَمْ اٛنْ نجٛغَکٜ مَٻِّتِرْغٜلْ دَمُّغَلْ اَنْدَلْ، اٛنٛنْ اٛنْ نَتَّايِ، اٛنْ اَلَايِ وٛٻّٜ نَتِّ؞» ندٜ يٜىٰسُ اَلِ طٛنْ، مٛودِٻّٜ اَتَّوْرَ اٜ فَارِسَنْکٛعٜنْ ٻٜرْطٜ مَٻّٜ مٜتِّ دٛوْ مَاکٛ، ٻٜ نغَطِ کَ پَمُکِمٛ پَمْطٜ دٛوْ فِي طُطُّمْ، نغَمْ ٻٜ نَنَ اٛ وِعِي غٛطُّمْ کٛ حَانَا، ٻٜ کٜٻَ کٛ ٻٜ نَنْغِرْتَمٛ؞ اٜ شَرٜلْ نغٜلْ، يِمْٻٜ طُطْٻٜ مٛٻْتِي حَا ٻٜ نغَطِ کَ يَٻْيَٻْتِرْکِ؞ يٜىٰسُ وِعِ تٛکُّٻٜمٛ، «ڤَامٜىٰ تٛع نغَرْتٛنْ بٛ فَارِسَنْکٛعٜنْ نغَمْ ٻٜ مُنَافُکِعٜنْ؞ وَلَا غٛطُّمْ اٛمْبَاطُمْ طُمْ اٛمْتَتَاکٜ، نٛنْ مَا وَلَا غٛطُّمْ شُوطِيطُمْ طُمْ سُورِتَتَاکٜ؞ کٛ مبِيطٛنْ ندٜرْ ݧِوْرٜ فُو، طُمْ نَنَيْطُمْ ݧَلَوْمَ، نٛنْ مَا کٛ مٜتُطٛنْ اٜ سُوطٜ، طُمْ مٜتَيْطُمْ اٜ نجَيْرِ؞ «اٜ مِ وِعَعٛنْ، اٛنٛنْ حِغٛوٻٜ اَمْ، تٛع اٛنْ کُلُ وَرٛوٻٜ ٻَنْدُ نٜطّٛ، غَطَ طٛنْ ٻٜ مبَاوَتَا وَطُکِ غٛطُّمْ؞ اَمَّا مِ وِعَيْعٛنْ مٛ کُلٛتٛنْ؞ کُلٜىٰ اٛنْ طٛنْ بَاوَيْطٛ وَرْکِعٛنْ غَطَ طٛنْ اٛ وَطَعٛنْ ندٜرْ وُرٛ حِيتٜ، اٜ مِ وِعَعٛنْ، کَنْکٛ کُلٛتٛنْ! «نَاع شٛلٛيْ نجٛوٛيْ اٜ شٛورٜىٰ جَمْطٜ طِطِ؟ فُو اٜ نٛنْ اَللَّه يٜجِّتَتَا کٛو غٛعٛتٜلْ مَاکٛيْ؞ کٛو غَاسَ کٛعٜ مٛوطٛنْ مَا فُو کَ لِمَامَ؞ تٛع اٛنْ کُلُ، اٛنْ ٻُرِي شٛلٛيْ طُطْکٛيْ؞ «اٜ مِ وِعَعٛنْ، جَٻُطٛيَمْ يٜىٰسٛ يِمْٻٜ فُو، مِنْ ٻِي نٜطّٛ، مِ جَٻَيْمٛ يٜىٰسٛ مَلَاعِکَعٜنْ اَللَّه؞ اَمَّا غَݧُطٛيَمْ يٜىٰسٛ يِمْٻٜ، مِ وَݧَيْمٛ يٜىٰسٛ مَلَاعِکَعٜنْ اَللَّه؞ «فُو بِعُطٛ کٛ وٛوطَا دٛوْ ٻِي نٜطّٛ، طُمْ وَاوَيْ يَافَنَاکِمٛ؞ اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ؞ «تٛ يِمْٻٜ نجَارِيعٛنْ يٜىٰسٛ مَوْٻٜ اٜ لَامِيٻٜ، تٛع اٛنْ نغَنُّ دٛوْ نٛ مبُرْتِنِرْتٛنْ کٛعٜ مٛوطٛنْ کٛو کٛ مبِعٛتٛنْ؞ نغَمْ رُوحُ اَللَّه اٜکِّتِنَيْعٛنْ اٜ شَرٜلْ نغٜلْ کٛ حَانِ مبِعٛنْ؞» غٛطّٛ ندٜرْ حَوْرُتُٻٜ وِعِمٛ، «مٛودِبّٛ، وِعُ مَوْنِرَاوٛ اَمْ سٜنْدِدَ ندٛنُ اٜ اَمْ؞» اَمَّا يٜىٰسُ وِعِمٛ، «حِغٛ! مٛيٜ لَمْنِيَمْ دٛوْ مٛوطٛنْ؟ مٛيٜ وَرْتِرِيَمْ شٜنْدَنَيْطٛعٛنْ ندٛنُ؟» ندٜنْ اٛ وِعِٻٜ، «ڤَامٜىٰ! نغٛطِّتٜىٰ يِدّٜ جَوْدِ دُونِيَارُ، نغَمْ حٜٻُکِ جَوْدِ حٛکَّتَا نٜطّٛ يٛنْکِ؞» اٛ حٛکِّٻٜ مِسَالُ طُعُمْ، اٛ وِعِ، «نغٜسَ غٛطّٛ دِسْکُطٛ يٜىٰطِي نَاع سٜطَّ؞ اٛ وِعِ حٛورٜ مَاکٛ، ‹کٛ نغَطَيْمِ؟ مِ وَلَا تٛ ندٜسَيْمِ کٛ ندٜمُمِ؞› اٛ وِعِ، ‹يَوَّا! مِ حٜٻْتِي کٛ نغَطَيْمِ، مِ ڤُسَيْ شُوطِ رٜسُکِ ݧَمْندُ اَمْ، مِ مَحَ غٛطِّ ٻُرْطِطِ مَنْغُ، مِ مٛٻْتَ ݧَمْندُ اَمْ اٜ جَوْدِ اَمْ فُو ندٜرْ مَاجِ؞ مِ وِعَ حٛورٜ اَمْ «اَ وٛودِ فِي طُطُّمْ بٛطُّمْ کٜپَيْطُمَّ دُوٻِ طُطِّ؞ سِوْتَ، ݧَامَا، نجَرَا، نَنَا بٜلْطُمْ؞» › اَمَّا اَللَّه وِعِمٛ، ‹اَ کَاݝَاطٛ! ندٜرْ جٜمَّارٜ ندٜعٜ طُمْ حٛشَّيْ يٛنْکِ مَاطَ؞ مٛيٜ رٛنَتَ کٛ مٛٻْتَنْطَا حٛورٜ مَاطَ؟› » سٜيْ يٜىٰسُ وِعِٻٜ، «کٛو مٛيٜ مٛٻْتَنْطٛ حٛورٜ مُوطُمْ جَوْدِ دُونِيَارُ، ندٜنْ وَلَا کٛ اٛ رٜسِ تٛ اَللَّه، نٛنْ حٜٻَتَمٛ؞» غَطَ طٛنْ، يٜىٰسُ وِعِ تٛکُّٻٜمٛ، «نغَمْ نٛنْ اٜ مِ وِعَعٛنْ، تٛع اٛنْ نغَنُّ دٛوْ جٛنْدٜ مٛوطٛنْ، وَاتٛ دٛوْ کٛ ݧَامٛتٛنْ کٛو کٛ نجَرٛتٛنْ کٛو کٛ ٻٛرْنٛتٛوطٛنْ؞ نغَمْ يٛنْکِ ٻُرِي ݧَمْندُ، ٻَنْدُ بٛو ٻُرِي کٛلْتٜ؞ ندَارٜىٰ دَوْلٜ؞ طٜ اَاوَتَا، طٜ ڤٜعَّتَا، طٜ نغَلَا سُودُ تٛ طٜ مٛٻْتَتَ ݧَمْندُ کٛو تٛ طٜ ندٜسَتَ غٛطُّمْ؛ فُو اٜ نٛنْ اَللَّه اٜ ݧَمْنَطٜ؞ اٛنْ ٻُرِي شٛلِّ دَرَجَ! مٛيٜ ندٜرْ مٛوطٛنْ تٛ وَنِّي وَاوَتَ ٻٜيْدَنْکِ حٛورٜ مُوطُمْ شَرٜلْ سٜطَّ ندٜرْ بَلْطٜ مُوطُمْ؟ تٛ اٛنْ مبَاوَتَا وَطُکِ فِي ڤَمَرُمْ طُعُمْ، کٛ وَطَتَ اٛنْ نغَنَّ اٜ کٛ حٛرِي؟ ندَارٜىٰ ڤِنْدِ نٛ مَوْنِرْتَ؞ ندِ حُوَتَا، ندِ سَݧَتَا کٛلْتٜ؞ فُو اٜ نٛنْ، اٜ مِ وِعَعٛنْ، اَنَّبِ سُلٜيْمَانُ فُو اٜ رِسْکُ مُوطُمْ مٜىٰطَايِ مٛعِّتِنَاکِ بٛ ڤِنْدِ وٛعٛيْرِ ندِعِ؞ تٛ اَللَّه اٜ مٛعِّتِنِرَ ڤِنْدِ لَدّٜ نِحِ، حَنْدٜ اٜ ندِ طٛنْ، جَانغٛ ندِ وُلٜىٰ، حَکّٛ اٛنٛنْ، اٛ ٻُرَيْ نٛنْ ٻٛرْنُکِعٛنْ، اٛنٛنْ کٛولِيٻٜمٛ سٜطَّ؞ «ندٜنْ تٛع اٛنْ نغَطُ ٻٜرْطٜ مٛوطٛنْ دٛوْ کٛ ݧَامَتٛنْ کٛو بٛو کٛ نجَرٛتٛنْ؞ تٛع اٛنْ نغَنُّ کٛعٜ مٛوطٛنْ دٛوْ مَاجُمْ؞ نغَمْ اِرِ طُمْ طٛنْ فِي يِمْٻٜ دُونِيَارُ طَٻِّتَتَ؞ ݧَاکٛ مٛوطٛنْ مٛ دٛوْ اٜ اَنْدِ اٛنْ نغِطِ فِي طُمْ طٛنْ؞ اَمَّا طَٻِّتٜىٰ لَامُ مَاکٛ، ندٜنْ طُمْ ٻٜيْدَنَيْعٛنْ فِي طُعُمْ؞ «اٛنٛنْ اٛرْندٜ اَمْ ڤَمَرْدٜ، تٛع اٛنْ کُلُ، نغَمْ ݧَاکٛ مٛوطٛنْ مٛ دٛوْ اٜ نَنَ بٜلْطُمْ حٛکُّکِعٛنْ لَامُ مُوطُمْ؞ شٛورٜىٰ کٛ نغٛودُطٛنْ، کٛکّٛنْ ٻٜ نغَلَنَا شٜىٰدٜ طٜنْ؞ ندٜسَنٜىٰ کٛعٜ مٛوطٛنْ جَوْدِ ندِ وٛنَّتَاکٛ، جَوْدِ ندِ دٛوْ ندِ رٜعَتَا؞ تٛنْ غُجّٛ ٻَدَّتَاکٛندِ، ندٜنْ وَلَا مٛوپُ ݧَامَيْنغُندِ؞ نغَمْ تٛ جَوْدِ مَاطَ وٛنِ، تٛنْ ٻٜرْندٜ مَاطَ مَا سٛعّٛتٛو؞ «تَادٜىٰ شِرْيٛوطٛنْ نغَمْ کُوغَلْ اَللَّه، اَلْدٜىٰ فِتِلَاجِ مٛوطٛنْ اٜ حِيتٜ، بٛ مَشُّٻٜ کٜطِيٻٜ جٛومُ وُرٛ مَٻّٜ وَرْتٛيَ دَغَ حُمْتٛ تٜىٰغَلْ، نغَمْ تٛ اٛ وَرْتٛيِي اٛ سِلْمِنَکٜ، طٛنْ اٜ طٛنْ ٻٜ مَٻِّتَنَمٛ دَمُّغَلْ؞ ٻٜ بَرْکِطِنَاٻٜ مَشُّٻٜ ٻٜ جٛومُ وُرٛ مَٻّٜ تَوِ اٜ ندٜىٰنَ تٛ اٛ وَرْتٛيِي؞ اٜ مِ وِعَعٛنْ غٛونغَ، اٛ تَادٛتٛ نغَمْ کُوغَلْ، اٛ جٛطِّنَٻٜ، اٛ وَدَّنَٻٜ ݧَمْندُ؞ تٛ اٛ وَرْتٛيِي شَکَ جٜمَّ کٛو فَجِرِ، مَشُّٻٜ ٻٜ اٛ تَوِ اٜ ٻٜ شِرْيِ، ٻٜ بَرْکِطِنَاٻٜ؞ اَمَّا اَنْدٜىٰ طُعُمْ، دَا جٛومُ وُرٛ اٜ اَنْدِ شَرٜلْ کٛ غُجّٛ وَرَتَ، اٛ اَلَتَا اٛ نَتَّنَمٛ وُرٛ؞ اٛنٛنْ مَا دٛولٜ نجٛوطٛوطٛنْ اٛنْ شِرْيِي نغَمْ اٜ شَرٜلْ نغٜلْ اٛنْ اَنْدَا ٻِي نٜطّٛ وَرَتَ؞» بِيتُرُسْ وِعِ، «مٛودِبّٛ، اَ وِعَ مِسَالُ طُعُمْ نغَمْ مِنٛنْ تَنْ کٛو نغَمْ کٛو مٛيٜ؟» يٜىٰسُ نٛوتِي وِعِ، «مٛيٜ وٛنِ کُوٛووٛ مٛ غٛونغَ مٛ فَامُ، مٛ جٛومُ وُرٛ مُوطُمْ يٛوِ دٛوْ مَشُّٻٜ مُوطُمْ، نغَمْ اٛ حٛکَّٻٜ ݧَمْندُ ندٜرْ شَرٜلْ؟ اٛ بَرْکِطِنَاطٛ مَشُّطٛ مٛ جٛومُ وُرٛ مُوطُمْ وَرْتِ تَوِ اٜ مٛ وَطَ نٛنْ؞ اٜ مِ وِعَعٛنْ غٛونغَ، جٛومُ وُرٛ اٛنْ يٛوَيْمٛ دٛوْ جَوْدِ مُوطُمْ فُو؞ اَمَّا تٛ مَشُّطٛ اٛنْ وِعِي حٛورٜ مُوطُمْ، ‹جٛومُ وُرٛ اَمْ وَرْتَتَا جٛونِ،› سٜيْ اٛ فُطِّ فِيُکِ مَشُّٻٜ وٛرْٻٜ اٜ رٜوْٻٜ اٜ مٛ ݧَامَ اٜ مٛ يَرَ نجَرُ نَا حٛورٜ مَاکٛ وَيْلِتَکٜ؞ جٛومُ وُرٛ اٛنْ وَرْتَيْ اٜ ݧَلْندٜ ندٜ مَشُّطٛ اٛنْ کَمَّاکِ اٜ شَرٜلْ نغٜلْ اٛ اَنْدَا، اٛ فِيَيْمٛ بٛطُّمْ اٛ وَطَمٛ ندٜرْ ٻٜ نغَلَا غٛونغَ؞ «مَشُّطٛ اَنْدُطٛ کٛ جٛومُ وُرٛ مُوطُمْ يِطِ اٛ وَطَ، اَمَّا اٛ سِرْيَاکِ کٛو بٛو اٛ وَطَايِ کٛ جٛومُ وُرٛ اٛنْ يِطِ، طُمْ فِيَيْمٛ بٛطُّمْ؞ اَمَّا مَشُّطٛ مٛ اَنْدَا کٛ جٛومُ وُرٛ مُوطُمْ يِطِ اٛ وَطَ، تٛ اٛ وَطِي فِي کَلُّطُمْ، طُمْ فِيَيْمٛ سٜطَّ؞ فُو کٛکَّاطٛ طُطُّمْ، طُطُّمْ طُمْ طَٻِّتَتَ تٛ مَاکٛ؞ فُو تَمْبِنَاطٛ طُطُّمْ، اٛ پَمٜتٜىٰطٛ کٛ ٻُرِ طُطْکِ؞ «حِيتٜ نغَرٛيْمِ وَطُکِ ندٜرْ دُونِيَارُ، اٜ يِدّٜ اَمْ نغٜ حُٻّٜىٰ جٛونِ؞ اَمَّا اٜ وٛودِ بَڤْتِسْمَ طُمْ نغَطَنْتٜىٰمِ، مِ وَنِّي نَا طُمْ وَطَنِييَمْطُمْ؞ اٛنْ کَمِّي مِ وَرٛيِ وَدَّنْکِ دُونِيَارُ جٛنْدٜ جَمْ؟ اٜ مِ وِعَعٛنْ، نَاع نٛنْ، اَمَّا سٜنْدُکِ يِمْٻٜ نغَدُّمِ؞ دَغَ جٛونِ طُمْ تَوَيْ يِمْٻٜ نجٛوٛ ندٜرْ وُرٛ غٛعٛ ٻٜ کُوشِندِرَا، تَتٛ اُمَّنْتٛ طِطٛ، طِطٛ اُمَّنْتٛ تَتٛ؞ ݧَاکٛ سٜنْدِرَيْ اٜ ٻِطّٛ مُوطُمْ، ٻِطّٛ اٛنْ مَا سٜنْدِرَيْ اٜ ݧَاکٛ مُوطُمْ؞ اِنَّ سٜنْدِرَيْ اٜ ٻِطّٛ مُوطُمْ دٜبّٛ، ٻِطّٛ اٛنْ مَا سٜنْدِرَيْ اٜ اِنَّ مُوطُمْ؞ اٜسِرَاوٛ مَا سٜنْدِرَيْ اٜ اٜسِرَاوٛ مُوطُمْ؞» يٜىٰسُ وِعِ حَوْرُتُٻٜ، «تٛ اٛنْ نغِعِي دُولٜ اٜ اُمّٛيٛو دَغَ حِرْنَ، طٛنْ اٜ طٛنْ اٛنْ مبِعَيْ، ‹ندِيَمْ تٛٻَيْ،› سٜيْ طَمْ تٛٻَ بٛو؞ تٛ حٜنْدُ فٛمْبِنَ اُمّٛيَکٜ، اٛنْ مبِعَيْ، ‹طُمْ وَطَيْ نغُلٜىٰنغَ،› سٜيْ طُمْ وَطَ بٛو؞ اٛنٛنْ مُنَافُکِعٜنْ! اٛنْ مبَاوِ رَارُکِ کٛ وٛنِ اٜ لٜيْدِ اٜ کٛ وٛنِ اٜ دٛوْ اَنْدٛنْ کٛ وَطَتَ، اَمَّا نغَمْ طُمٜ اٛنْ مبَاوَتَا فَامُکِ کٛ وَطَتَ اٜ شَرٜلْ نغٜعٜلْ؟ «نغَمْ طُمٜ اٛنْ مبَاوَتَا سُٻَنْکِ کٛعٜ مٛوطٛنْ کٛ حَانِ؟ تَا يَادَ اٜ غُلّٛيِيطٛمَ يٜىٰسٛ لَامُ، طَٻُّتُ شِرْيٛوتِرٛنْ دٛوْ طَتَلْ؞ تٛ نَاع نٛنْ، اٛ يَارٜتٜ يٜىٰسٛ غَطٛووٛ کِيتَ، غَطٛووٛ کِيتَ وَطُمَا ندٜرْ جُوطٜ تَادِيٻٜ ٻٜ مَٻُّمَا ندٜرْ سُودُ شُرَلْ؞ اٜ مِ وِعُمَا، اَ وُرْتَتَاکٛ نَا اَ يٛٻِي فُو شٜىٰدٜ طٜ طُمْ تٛکَّتَمَ کٛو اَنِينِيٜلْ حٛرَتَاکٛ؞» اٜ شَرٜلْ نغٜلْ اٜ وٛودِ وٛٻّٜ طٛنْ بِعُٻٜ يٜىٰسُ کٛ حٜٻِ وٛٻّٜ غَلِلَنْکٛعٜنْ؞ غَلِلَنْکٛعٜنْ ٻٜنْ اٜ کِرْسَنَ اَللَّه شَکِّرِ، سٜيْ بِلَاتُسْ غٛمْنَاجٛ وَطِ طُمْ وَرِٻٜ حَا پِيپَمْ مَٻّٜ حَوْتِي اٜ پِيپَمْ کٛ ٻٜ شَکِّ؞ يٜىٰسُ نٛوتِي وِعِٻٜ، «اٛنْ کَمّٛو غَلِلَنْکٛعٜنْ ٻٜنْ طٛنْ ٻُرِي غَلِلَنْکٛعٜنْ کٛرِيٻٜ فُو حَکّٜ نغَمْ ٻٜ تٛرِّرَامَ نِحِ؟ اٜ مِ وِعَعٛنْ، نَاع نٛنْ! اَمَّا تٛ نَاع اٛنْ تُوبُ، اٛنٛنْ مَا اٛنْ فُو اٛنْ کَلْکٜتٜىٰٻٜ؞ کٛو مَا يِمْٻٜ سَڤّٛ اٜ نجٛوٜىٰتَتٛ مَيْٻٜ شَرٜلْ کٛ سُودُ تٛوْندُ ندُ سِلُوَمْ يَنِ دٛوْ مَٻّٜ، اٛنْ کَمّٛو ٻٜ ٻُرِي يِمْٻٜ کٛرِيٻٜ جٛوطِيٻٜ ندٜرْ اُرُشَلِيمَ فُو وَطُکِ حَکّٜ؟ اٜ مِ وِعَعٛنْ، نَاع نٛنْ! اَمَّا تٛ نَاع اٛنْ تُوبُ، اٛنٛنْ مَا نٛنْ کَلْکِرْتٛنْ؞» سٜيْ اٛ حٛکِّ مِسَالُ طُعُمْ، اٛ وِعِ، «غٛطّٛ نٜطّٛ اٜ وٛودِ لٜکِّ اِبِّ ندٜرْ نغٜسَ مُوطُمْ، اٛ يَحِ اٛ يِعَ کٛو اٜ کِ وٛودِ ٻِکّٛيْ، اَمَّا اٛ تَوِ کِ وَلَنَا؞ نغَمْ نٛنْ اٛ وِعِ نٜطّٛ کُوَنٛووٛمٛ تٛ نغٜسَ کَنْ، ‹رَا، دُوٻِ تَتِ اٜ مِ وَرَ طَٻُّتُکِ اِبّٜ دٛوْ اِبِّ کِعِ، اَمَّا مِ حٜٻَتَا؞ فٜعُّکِ! نغَمْ طُمٜ کِ سُرَتَ لٜيْدِ اٜ مٜىٰرٜ؟› کُوٛووٛ تٛ نغٜسَ کَنْ وِعِمٛ، ‹جٛومُ وُرٛ، ٻٜيْدَنْکِ ندُنْغُ غٛعٛ، مِ مٛعِّنَنَکِ لٜيْدِ، مِ وَطَنَکِ نغٛوبَارِ؞ تٛ کِ رِمِي ٻِکّٛيْ حِتَاندٜ غَرَيْندٜ، تٛو، وٛوطِي، اَمَّا تٛ کِ رِمَايِ، سٜيْ ڤٜعَّاکِ؞› » وٛنْدٜ ݧَلْندٜ سِوْتَارٜ يٜىٰسُ اٜ اٜکِّتِنَ ندٜرْ سُودُ دٛعَارٜ؞ اٜ وٛودِ دٜبّٛ طٛنْ غِنّٛلْ اٜ حَٻِّمٛ دُوٻِ سَڤّٛ اٜ جٛوٜىٰتَتِ، اٜ نغٛلْ تُرْنِمٛ، کٛو حٛورٜ مَاکٛ اٛ وَاوَتَا پٜفْتُکِ؞ ندٜ يٜىٰسُ يِعِمٛ، نٛدِّمٛ حَادٜ، وِعِمٛ، «بَنْدِرَاوٛ، اَ حٛيِي دَغَ ݧَوُ مَاطَ؞» يٜىٰسُ يٛوِ جُوطٜ مُوطُمْ دٛوْ مَاکٛ، طٛنْ اٜ طٛنْ اٛ ٻَنْتِي اٛ فُطِّ مَنْتُکِ اَللَّه؞ ٻٜرْندٜ اَرْدِيطٛ سُودُ دٛعَارٜ ندُنْ مٜتِّ نغَمْ يٜىٰسُ يَمْطِتِنِي غٛطّٛ ݧَلْندٜ سِوْتَارٜ؞ نغَمْ مَاجُمْ اٛ وِعِ يِمْٻٜ، «اٜ وٛودِ بَلْطٜ جٛوٜىٰغٛعٛ نغَمْ کُوطٜ، نغَرٜىٰ طُمْ يَمْطِتِنَعٛنْ ندٜرْ بَلْطٜ طٜنْ، نَاع نِ ندٜرْ ݧَلْندٜ سِوْتَارٜ؞» سٜيْ يٜىٰسُ نٛوتِي وِعِمٛ، «اٛنٛنْ مُنَافُکِعٜنْ! نَاع کٛو مٛيٜ مٛوطٛنْ اٜ فِتَّ نغَارِ مُوطُمْ کٛو مبَبَّ مُوطُمْ ندٜرْ ݧَلْندٜ سِوْتَارٜ يَرْنٛيَنغَ؟ اٛعٛ دٜبّٛ تَانُ اِبْرَاهِمْ، مٛ شٜيْطَنْ حَٻِّ دُوٻِ سَڤّٛ اٜ جٛوٜىٰتَتِ، حَانَا اٛ فِتّٜىٰ ݧَلْندٜ سِوْتَارٜ؟» ندٜ اٛ وِعِ نٛنْ، وَݧْوَݧْٻٜ مَاکٛ فُو شٜمْتِ، اَمَّا يِمْٻٜ نَنِ بٜلْطُمْ اٜ فِي کَيْطِنِيطُمْ فُو طُمْ اٛ وَطَتَ؞ ندٜنْ يٜىٰسُ وِعِ، «طُمٜ لَامُ اَللَّه نَنْدِ؟ کٛ نَنْدِنَيْمِطُمْ؟ لَامُ اَللَّه اٜ نَنْدِ اٜ غَبّٜلْ مَسْتَتْ نغٜلْ غٛطّٛ حٛشِّ اَاوِ ندٜرْ نغٜسَ مُوطُمْ؞ غَبّٜلْ نغٜلْ فُطِ، وَرْتِ لٜغّٜلْ، شٛلِّ نغَطِ شَٻّٜ دٛوْ لِشٜ مَاکِ؞» اٛ وِعِ کَدِنْ، «طُمٜ نَنْدِنَيْمِ لَامُ اَللَّه؟ اٜ طُمْ نَنْدِ اٜ پُوفِنِرْطُمْ طُمْ غٛطّٛ دٜبّٛ حٛشِّ لَنْشِندِرِ اٜ شٛنْدِ اَلْکَمَارِ ڤٛوندِرْکٛيْ تَتٛيْ ندِ فُو ندِ پُوفِ؞» يٜىٰسُ اٜ يَحَ اُرُشَلِيمَ اٛ تٛکِّ غَرِيجٜ اٜ نغَرِحٛيْ اٜ مٛ اٜکِّتِنَ؞ غٛطّٛ پَمِمٛ وِعِ، «مٛودِبّٛ، يِمْٻٜ سٜطَّ تَنْ کِسَتَ؟» اٛ وِعِٻٜ، «ندُرْوٜىٰ نَتِّرٛنْ تٛ دَمُّغَلْ ٻِطِّينغَلْ، نغَمْ اٜ مِ وِعَعٛنْ، طُطْٻٜ ندٛولَيْ نغَمْ نَتَّ اَمَّا ٻٜ مبَاوَتَا؞ تٛ جٛومُ وُرٛ نغٛنْ اُمَّکٜ مَٻِّي دَمُّغَلْ نغَلْ، اٛنْ ندَرٛتٛ يَاسِ اٛنْ ڤِيَ دَمُّغَلْ نغَلْ اٛنْ تٛرٛو اٛنْ مبِعَ، ‹مٛودِبّٛ، مَٻِّتَنْمِنْ دَمُّغَلْ!› اَمَّا اٛ وِعَيْعٛنْ، ‹مِ اَنْدَاعٛنْ، مِ اَنْدَا تٛ پِوٛيْطٛنْ؞› ندٜنْ اٛنْ مبِعَيْ، ‹مِنْ ݧَمْدِي، مِنْ نجَرْدِي اٜ مَاطَ، اَ اٜکِّتِنِي ندٜرْ غَرِيجٜ اَمِنْ؞› اَمَّا اٛ وِعَيْ، ‹اٜ مِ وِعَعٛنْ، مِ اَنْدَاعٛنْ، مِ اَنْدَا تٛ پِوٛيْطٛنْ؞ شٜنْدِرٜىٰ اٜ اَمْ، اٛنٛنْ کَلُّٻٜ؞› تٛ اٛنْ نغِعِي اِبْرَاهِمْ اٜ اِشِيَاکُ اٜ يَاکُبُ اٜ اَنَّبٛعٜنْ فُو ندٜرْ لَامُ اَللَّه، اَمَّا اٛنٛنْ اٛنْ مبُرْتِنَامَ، اٛنْ مبٛيَيْ ݧٜرْپِندِرٛنْ ݧِيپٜ؞ يِمْٻٜ نَاع يَحُودَنْکٛعٜنْ نغَرَيْ دَغَ فُونَ اٜ حِرْنَ اٜ وٛيْلَ اٜ فٛمْبِنَ ٻٜ نجٛوطٛو ٻٜ ݧَامَ ݧَمْندُ حُمْتٛ ندٜرْ لَامُ اَللَّه؞ رَطُّمْ، وٛٻّٜ شَکِتِيٻٜ ٻٜ نغَرْتَيْ اَرْتُٻٜ، ندٜنْ وٛٻّٜ اَرْتُٻٜ ٻٜ نغَرْتَيْ شَکِتٛتٛوٻٜ؞» اٜ شَرٜلْ نغٜلْ، وٛٻّٜ فَارِسَنْکٛعٜنْ نغَرِ تٛ يٜىٰسُ مبِعِمٛ، «اَلُ طٛعٛ نغَمْ حِرُدُسْ اٜ يِطِ وَرْمَا؞» اٛ وِعِٻٜ، «نجَحٜىٰ مبِعٛنْ دِلَارُ ندُنْ طٛنْ، ‹رَطُّمْ، حَنْدٜ اٜ جَانغٛ مِ وُرْتِنَيْ غِنِّ مِ يَمْطِتِنَيْ ٻٜ نجَمْطَا؞ اٜ ݧَلْندٜ تَتَوْرٜ مِ يٛتِّنَيْ کُوغَلْ اَمْ؞› فُو اٜ نٛنْ، دٛولٜ مِ نَنْغَ لَاوٛلْ حَنْدٜ اٜ جَانغٛ اٜ فَٻِّ جَانغٛ، نغَمْ حَانَا طُمْ وَرَ اَنَّبِيجٛ بَنْݧٜ سٜيْ ندٜرْ اُرُشَلِيمَ؞ «جَلَّ اُرُشَلِيمَ، اُرُشَلِيمَ اَ وَرِي اَنَّبٛعٜنْ، اَ وَرْدِي لِلٛيَاٻٜ تٛ مَاطَ اٜ کَاپٜ! ندٜ طُطُّمْ اٜ مِ يِطِ مٛٻْتُکِ يِمْٻٜ مَاطَ نٛ غٜرٛوغَلْ مٛٻْتِرْتَ ٻِکّٛيْ مَاغَلْ لٜيْ بِيٜىٰلِ مَاغَلْ، اَمَّا اَ جَٻَايِ؞ رَطُّمْ، اَللَّه اَلَنَيْعٛنْ وُرٛ شٜنِينغٛ مٛوطٛنْ؞ اٜ مِ وِعَعٛنْ، اٛنْ ڤُطِّتَتَا نغِعٛنْيَمْ، نَا ݧَلْندٜ ندٜ مبِيطٛنْ، ‹اٛ بَرْکِطِنَاطٛ، غَرٛيْطٛ ندٜرْ اِنْدٜ جٛومِرَاوٛ؞› » وٛنْدٜ ݧَلْندٜ سِوْتَارٜ يٜىٰسُ يَحِ وُرٛ غٛعٛتٛ ندٜرْ اَرْدِيٻٜ فَارِسَنْکٛعٜنْ نغَمْ اٛ ݧَامَ ݧَمْندُ؞ سٜيْ ٻٜ نغَطِ کَ رَارُکِمٛ، کٛو اٛ وَطَيْ کٛ ٻٜ کٜٻَتَ ٻٜ نَنْغِرَمٛ؞ حَادٜ مَاکٛ اٜ وٛودِ غٛطّٛ غٛرْکٛ غٛودُطٛ ݧَوُ ٻُدِّ؞ يٜىٰسُ پَمِ فَارِسَنْکٛعٜنْ اٜ مٛودِٻّٜ اَتَّوْرَ اٛ وِعِ، «دٛوکَ جَٻِي طُمْ يَمْطِتِنَ نٜطّٛ ݧَلْندٜ سِوْتَارٜ کٛ اَاعَ؟» اَمَّا ٻٜ نٛوتَاکِ؞ سٜيْ يٜىٰسُ مٜىٰمِ ݧَوْطٛ اٛنْ يَمْطِتِنِمٛ، وِعِمٛ اٛ دِلَّ؞ ندٜنْ اٛ پَمِٻٜ، اٛ وِعِ، «مٛيٜ ندٜرْ مٛوطٛنْ تٛ ٻِطّٛ مُوطُمْ کٛو نغَارِ مُوطُمْ يَنِي ندٜرْ ٻُنْدُ ݧَلْندٜ سِوْتَارٜ اِتّٛيْتَامٛ طٛنْ اٜ طٛنْ؟» ٻٜ کٜٻَايِ کٛ ٻٜ مبِعِمٛ؞ ندٜ يٜىٰسُ فَامِ کُمْڤِتَاٻٜ ݧَامُکِ ݧَمْندُ طٛنْ فُو اٜ شُٻَ جٛوطَاکِ تٛ مَوْٻٜ نجٛوطٛتٛو، اٛ حٛکِّٻٜ مِسَالُ طُعُمْ، اٛ وِعِ، «تٛ غٛطّٛ حُمْڤِتِيمَ حُمْتٛ، تَاع جٛوطَ تٛ مَوْٻٜ نجٛوطٛتٛو؞ طُمْ غَطٛتٛوطُمْ اٛ حُمْڤِتِي غٛطّٛ ٻُرْطٛمَ مَنْغُ؞ ندٜنْ کُمْڤِتٛيْطٛمَ اٛنْ اٛ وَرٛيَيْ اٛ وِعُمَا، ‹اُمَّ نٜطّٛ اٛعٛ جٛوطٛو؞› نغَمْ نٛنْ بٛو اَ سٜمْتَيْ، نجٛوطٛطَا تٛ جٛوطٛرْغَلْ شَکِتِينغَلْ؞ اَمَّا تٛ طُمْ حُمْڤِتِيمَ، جٛوطَ تٛ جٛوطٛرْغَلْ شَکِتِينغَلْ، نغَمْ تٛ کُمْڤِتٛيْطٛمَ وَرٛيِ، اٛ وِعٜتٜ، ‹حِغٛ، اُمَّ، نجٛوطٛيٛطَا دٛوْ جٛوطٛرْغَلْ مَوْٻٜ؞› نٛنْ حٛکّٜتٜ مَنْغُ يٜىٰسٛ غَرٛيْٻٜ طٛنْ فُو؞ نغَمْ مَوْنِنْطٛ حٛورٜ مُوطُمْ فُو اٛ لٜسْنٜتٜىٰطٛ، لٜسْنِنْطٛ حٛورٜ مُوطُمْ بٛو اٛ مَوْنِنْتٜىٰطٛ؞» ندٜنْ اٛ وِعِ کُمْڤِتٛيْطٛمٛ، «تَا حُمْڤِتَيْ يِمْٻٜ حُمْتٛ تٛ وُرٛ مَاطَ، تَاع حُمْڤُتُ حِغٛوٻٜ مَاطَ تَنْ، کٛو مَوْنِرَاٻٜ اٜ مِݧِرَاٻٜ مَاطَ تَنْ، کٛو بَنْدِرَاٻٜ مَاطَ تَنْ، کٛو ٻٜ کٜدُّطَا رِسْکُٻٜ؞ نغَمْ ٻٜ کُمْڤِتٜتٜ کَمْٻٜ مَا، ٻٜ نغَاتَنْمَا کٛ نغَطَنْطَاٻٜ؞ اَمَّا تَا وٛودِ حُمْتٛ، حُمْڤُتُ ٻٜ نغَلَنَا، اٜ جَرَاٻٜ، اٜ غُرْغُعٜنْ، اٜ وُمْٻٜ؞ طُمْ بَرْکِطِنْتٜ، نغَمْ ٻٜ مبَاوَتَا وَاتَنْکِمَ کٛ نغَطَنْطَاٻٜ؞ اَللَّه وَاتَنْتٜ ݧَلْندٜ جَانغٛ، ݧَلْندٜ ندٜ اٛ اُمِّنْتَ مَيْٻٜ غَطُٻٜ جٛنْدٜ وٛوطُندٜ؞» ندٜ غٛطّٛ ندٜرْ جٛوطٛدِيٻٜ اٜ مَاکٛ نَنِ نٛنْ، اٛ وِعِ يٜىٰسُ، «نٜطّٛ ݧَامٛووٛ ݧَمْندُ ندٜرْ لَامُ اَللَّه اٛ بَرْکِطِنَاطٛ!» سٜيْ يٜىٰسُ وِعِمٛ، «اٜ وٛودِ غٛطّٛ نٜطّٛ شِرْيِيطٛ حُمْتٛ مَنْغٛ اٛ حُمْڤِتِ يِمْٻٜ طُطْٻٜ؞ ندٜ شَرٜلْ حُمْتٛ نغٛنْ وَطِ، اٛ لِلِ مَشُّطٛ مَاکٛ وِعٛيَ کُمْڤِتَاٻٜ ٻٜنْ، ‹نغَرٛيٜىٰ، کٛو طُمٜ سِرْيَامَ!› اَمَّا ٻٜ فُو ٻٜ نغَطِ کَ طَٻُّتُکِ نٛ ٻٜ شَلٛرْتٛو نغَمْ ٻٜ نغِطَا يَاکِ؞ اَرَنْدٜىٰجٛ اٛنْ وِعِمٛ، ‹مِ سٛودِي نغٜسَ، دٛولٜ مِ يَحَ مِ يِعَکَ؞ وَطُ مُݧَلْ، مِ حٜٻَتَا يَاکِ؞› طِطَٻٛ وِعِمٛ، ‹مِ سٛودِي نَعِ دٜمٛوجِ کَنْجِ سَڤّٛ، اٜ مِ يِطِ يَاکِ مِ فٛوندَطِ جٛونِ؞ وَطُ مُݧَلْ مِ حٜٻَتَا يَاکِ؞› نٛنْ تَتَٻٛ مَا وِعِ، ‹مِ نٜىٰٻَايِ کٛ تٜعُمِ، نغَمْ نٛنْ مِ حٜٻَتَا يَاکِ؞› مَشُّطٛ اٛنْ سٛعِّي وِعِ جٛومُ وُرٛ مُوطُمْ کٛو طُمٜ؞ ٻٜرْندٜ جٛومُ وُرٛ اٛنْ مٜتِّ، اٛ وِعِ مَشُّطٛ اٛنْ، ‹يَوْنُ نجَحَا دٛوْ طَتٜ مَوْطٜ اٜ طَتٜ ڤَمَرٜ ندٜرْ غَرِيرِ، نٛدَّنٛوَايَمْ ٻٜ نغَلَنَا، اٜ جَرَاٻٜ، اٜ وُمْٻٜ، اٜ غُرْغُعٜنْ؞› غَطَ مَشُّطٛ اٛنْ وَرْتٛيِي وِعِ جٛومُ وُرٛ مُوطُمْ، ‹کٛ مبِيطَا طُمْ وَطَ وَطَامَ، اَمَّا فُو اٜ نٛنْ نجَيْرِ اٜ حٛرِي؞› سٜيْ جٛومُ وُرٛ اٛنْ وِعِ مَشُّطٛ اٛنْ، ‹يَحُ دٛوْ طَتٜ مَوْطٜ اٜ طَتٜ ڤَمَرٜ غَطَ غَرِيرِ، نٛدَّا يِمْٻٜ نغَرٛيَ نَتَّ وُرٛ اَمْ نغَمْ نغٛ حٜىٰوَ؞ اٜ مِ وِعَعٛنْ، ندٜرْ کُمْڤِتَاٻٜ اَرَنْدٜعٜنْ وَلَا ݧَامَيْطٛ ݧَمْندُ حُمْتٛ اَمْ؞› » وٛنْدٜ ݧَلْندٜ يِمْٻٜ طُطْٻٜ اٜ نجَادَ اٜ يٜىٰسُ؞ سٜيْ اٛ رَارِٻٜ اٛ وِعِ، «غَرٛيْطٛ تٛ اَمْ فُو تٛ ٻُرَايِ يِطُکِيَمْ دٛوْ ݧَاکٛ مُوطُمْ اٜ مَدُوجٛ مُوطُمْ اٜ دٜبّٛ مُوطُمْ اٜ ٻِٻّٜ مُوطُمْ اٜ مَوْنِرَاٻٜ اٜ مِݧِرَاٻٜ مُوطُمْ ‑ حَا مَا اٜ يٛنْکِ مُوطُمْ، اٛ وَاوَتَا وَرْتُکِ تٛکُّطٛيَمْ؞ کٛو مٛيٜ تٛ حٛشَّايِ غَافَانغَلْ مُوطُمْ تٛکِّيَمْ وَاوَتَا وَرْتُکِ تٛکُّطٛيَمْ؞ مِسَالُ، تٛ غٛطّٛ مٛوطٛنْ اٜ يِطِ مَحُکِ وُرٛ مَنْغٛ، اَيْ اَرَنْدٜ اٛ جٛوطٛتٛ تَوْ اٛ لِمَ کٛ اٛ مَجِّنْتَ، اٛ يِعَ کٛو اٜ مٛ وٛودِ کٛ حٜپَتَمٛ اٛ يٛتِّنَنْغٛ؞ تٛ نَاع نٛنْ، تٛ اٛ فُطِّي مَحُکِنغٛ اٛ وَاوَتَا يٛتِّنْکِنغٛ، غِعُطٛنغٛ فُو جَلَيْمٛ وِعَ، ‹رَا نٜطّٛ اٛعٛ فُطِّي مَحُکِ، اَمَّا اٛ وَاوَايِ يٛتِّنْکِ؞› کٛو بٛو تٛ لَامِيطٛ غٛودُطٛ سٛوجِعٜنْ 10,000 حٛنِدَيْ اٜ لَامِيطٛ غَرٛيْطٛ حٛنَمٛ اٜ سٛوجِعٜنْ 20,000، اَرَنْدٜ اٛ جٛوطٛتٛ تَوْ اٛ يِعَ کٛو اٜ مٛ وٛودِ سٜمْبٜ حٛنُدُکِ اٜ مَاکٛ؞ تٛ اٛ يِعِي اٛ وَاوَتَا، اٛ لِلَيْ لِلَاٻٜ تٛ غَرَيْطٛ اٛنْ کٛ اٛ يٛتّٛ، نغَمْ ٻٜ طَٻِّتَ سِرْيٛوتِرْکِ اٜ مَاکٛ؞ نٛنْ مَا، کٛو مٛيٜ تٛ سٜنْدِرَايِ اٜ کٛ وٛودِ فُو وَاوَتَا وَرْتُکِ تٛکُّطٛيَمْ؞ «لَمْطَمْ طُمْ فِي بٛطُّمْ، اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ وَلَا کٛ طَمْ وَطٜتٜىٰ؞ طَمْ نَفَتَا غٛطُّمْ، سٜيْ نِ طَمْ رُفٜىٰ؞ غٛودُطٛ نٛڤِّ نَنٛوجِ فُو نَنَ!» وٛنْدٜ ݧَلْندٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ نغَرِ تٛ يٜىٰسُ نغَمْ ٻٜ نَنَ کٛ اٛ وِعَتَ؞ اَمَّا فَارِسَنْکٛعٜنْ اٜ مٛودِٻّٜ اَتَّوْرَ نغَطِ کَ مٜتِتَاکِ اٜ ٻٜ مبِعَ، «نٜطّٛ اٛعٛ اٜ جَٻّٛو غَطٛوٻٜ حَکّٜ حَا مَا اٜ مٛ ݧَمْدَ اٜ مَٻّٜ؞» سٜيْ يٜىٰسُ حٛکِّٻٜ مِسَالُ طُعُمْ، وِعِ، «تٛ غٛطّٛ ندٜرْ مٛوطٛنْ اٜ وٛودِ بَالِ 100، غٛعٛ ندٜرْ بَالِ طِنْ مَجِّي، اٛ اَلَيْ کٛرِيطِ اٜ ندُرَ ندٜرْ لَدّٜ، اٛ طَٻِّتٛيَ مَجُّنغَ نغَنْ نَا اٛ حٜٻْتِينغَ؞ تٛ اٛ حٜٻْتٛيِينغَ، اٛ نَنَيْ بٜلْطُمْ اٛ تٛوٛيَنغَ اٜ دَاندٜ مَاکٛ؞ تٛ اٛ سٛعَّکٜ وُرٛ، اٛ نٛدَّيْ حِغٛوٻٜ مَاکٛ اٜ ٻٜ اٛ حٜدِّ، اٛ وِعَٻٜ، ‹مبَلّٜىٰيَمْ نَنْکِ بٜلْطُمْ نغَمْ مِ حٜٻْتِي مبَالَ اَمْ مَجُّنٛونغَ؞› اٜ مِ وِعَعٛنْ، بٛ نٛنْ طُمْ ٻُرَيْ نَنْکِ بٜلْطُمْ اٜ تٛنْ دٛوْ تٛ غَطٛووٛ حَکّٜ غٛعٛتٛ تُوبِي سٛعَّکٜ تٛ اَللَّه، دٛوْ يِمْٻٜ 99 ݧُمٛوٻٜ نغَلَا حَکّٜ؞ «مِسَالُ، تٛ دٜبّٛ اٜ وٛودِ جَمْطٜ سَڤّٛ طٜ اَجُرْفَارِ، غٛعٛ مَجِّي، اَيْ اٛ وَطَيْ حِيتٜ اٜ فِتِلَارُ، اٛ وُووَ وُرٛ نغٛنْ، اٛ طَٻِّتَ اٜ سٜىٰسٜ‑سٜىٰسٜ کٛو تٛيٜ نَا اٛ حٜٻْتِي يَمْندٜ مَجُّندٜ ندٜنْ؞ تٛ اٛ حٜٻْتِيندٜ، اٛ نٛدَّيْ حِغٛوٻٜ مَاکٛ اٜ ٻٜ اٛ حٜدِّ، اٛ وِعَٻٜ، ‹مبَلّٜىٰيَمْ نَنْکِ بٜلْطُمْ، نغَمْ مِ حٜٻْتِي يَمْندٜ اَمْ مَجُّنٛوندٜ؞› اٜ مِ وِعَعٛنْ، بٛ نٛنْ مَلَاعِکَعٜنْ نَنِرْتَ بٜلْطُمْ يٜىٰسٛ اَللَّه تٛ غَطٛووٛ حَکّٜ غٛعٛتٛ اَلِي وَطُکِ حَکّٜ سٛعَّکٜ تٛ اَللَّه؞» کَدِمَا اٛ وِعِ، «اٜ وٛودِ غٛطّٛ نٜطّٛ غٛودُطٛ ٻِٻّٜ طِطٛ؞ ڤَمَرٛ اٛنْ وِعِ ݧَاکٛ مُوطُمْ، ‹بَڤَّ، حٛکَّمْ ندٛنُ اَمْ؞› سٜيْ ݧَاکٛ اٛنْ سٜنْدَنِٻٜ جَوْدِ مُوطُمْ؞ غَطَ بَلْطٜ سٜطَّ، ڤَمَرٛ اٛنْ حَوْتِ کٛ وٛودِ فُو، اٛ يَحِ لٜيْدِ نغٛطُّندِ، تٛنْ اٛ لَلِّنِ جَوْدِ مَاکٛ ندٜرْ جٛنْدٜ مٜىٰرٜ؞ غَطَ اٛ لَلِّنِي جَوْدِ ندِنْ فُو، طُمْ وَطِ وٜىٰلٛ کَلُّنغٛ ندٜرْ لٜيْدِ ندِنْ، اٛ وَرْتِ مٛ وَلَا کٛو طُمٜ؞ نغَمْ نٛنْ اٛ يَحِ اٛ حُوَنَ غٛطّٛ نٜطّٛ لٜيْدِ ندِنْ، نٜطّٛ اٛنْ يَارِمٛ تٛ اَلَدٜىٰجِ مَاکٛ حٛکِّمٛ کُوغَلْ ݧَمْنُکِطِ؞ کَيٜىٰجٛ اٛنْ اٜ يِطُنٛو تٛ اٛ حٜٻَيْنٛ اٛ ݧَامَ ݧَمْندُ اَلَدٜىٰجِ، اَمَّا وَلَا کٛکُّطٛمٛ غٛطُّمْ؞ ندٜ حَکِّيلٛ مَاکٛ وَرْتِ، اٛ وِعِ ندٜرْ ٻٜرْندٜ مَاکٛ، ‹کُوَنٛوٻٜ ݧَاکٛ اَمْ اٜ نغٛودِ ݧَمْندُ کٜپَيْندُٻٜ حَا ندُ حٛرٛو، اَمَّا مِنْ بٛو اٜ مِ طٛعٛ وٜىٰلٛ ٻَدَکٜ وَرْکِيَمْ؞ مِ سٛعّٛتٛ تٛ ݧَاکٛ اَمْ، مِ وِعَمٛ، «بَڤَّ، مِ وَطِي حَکّٜ يٜىٰسٛ اَللَّه اٜ يٜىٰسٛ مَاطَ؞ مِ حٜوْتَايِ طُمْ نٛدَّيَمْ ٻِطّٛ مَاطَ، اٜ مِ تٛرٛمَا اَلَمْ مِ وَرْتَ غٛعٛتٛ ندٜرْ کُوَنٛوٻٜمَ؞» › سٜيْ اٛ اُمِّي اٛ سٛعِّي تٛ ݧَاکٛ مَاکٛ؞ «کٛ اٛ يٛتّٛو وُرٛ نغٛنْ، ݧَاکٛ مَاکٛ يِعِمٛ يُرْمِنَنِمٛ، دٛغِّ وُوندٛيِيمٛ جَٻِّيمٛ بٛطُّمْ؞ ٻِطّٛ اٛنْ وِعِمٛ، ‹بَڤَّ، مِ وَطِي حَکّٜ يٜىٰسٛ اَللَّه اٜ يٜىٰسٛ مَاطَ، جٛونِ مِ حٜوْتَايِ طُمْ نٛدَّيَمْ ٻِطّٛ مَاطَ؞› اَمَّا ݧَاکٛ اٛنْ وِعِ مَشُّٻٜ مُوطُمْ، ‹نجَوْنٜىٰ نغَدّٛنْ لِمْشٜ ٻُرْطٜ وٛوطُکِ، ٻٛرْنٛنْمٛ؞ نغَطَنٜىٰمٛ جَبَّارٜ اٜ حٛوندُ مَاکٛ اٜ ڤَطٜ اٜ کٛيْطٜ مَاکٛ؞ نغَدّٜىٰ نغَارِ ڤَيْندِ، کِرْسٛنْدِ، ݧَامٜنْ نَنٜنْ بٜلْطُمْ، نغَمْ ٻِطّٛ اَمْ اٛعٛ، اٛ مَايِينٛ، اَمَّا اٛ اُمَّکٜ، اٛ مَجِّينٛ، اَمَّا اٛ حٜٻْتَامَ!› سٜيْ ٻٜ ڤُطِّ ݧَامُکِ، اٜ ٻٜ نَنَ بٜلْطُمْ؞ «اٜ شَرٜلْ نغٜلْ مَوْنِرَاوٛ اٛنْ اٜ تٛنْ نغٜسَ؞ سٜيْ اٜ مٛ وَرْتٛيَ، ندٜ اٛ ٻَدِي وُرٛ، اٛ نَنِ اٜ طُمْ فِيَ بَوْطِ اٜ طُمْ وَمَ؞ سٜيْ اٛ نٛدِّ غٛعٛتٛ ندٜرْ مَشُّٻٜ اٛ پَمِمٛ، اٛ وِعِ، ‹کٛ وَنْغِ؟› مَشُّطٛ اٛنْ وِعِمٛ، ‹مِݧِرَاوٛ مَاطَ وَرْتِ، ݧَاکٛ مَاطَ بٛو حِرْسِي نغَارِ ڤَيْندِ نغَمْ اٛ وَرْتِي جَمْ کٛو کٛ يَنِمٛ؞› ٻٜرْندٜ مَوْنِرَاوٛ اٛنْ مٜتِّ اٛ سَلِي نَتُّکِ وُرٛ نغٛنْ؞ ݧَاکٛ اٛنْ وُرْتٛيِي تٛرِيمٛ اٛ نَتَّ؞ اَمَّا اٛ وِعِ ݧَاکٛ اٛنْ، ‹رَا، دُوٻِ طُطِّ اٜ مِ حُوَنْمَا بٛ مَشُّطٛ، مِ مٜىٰطَايِ سَلَاکِ کٛ مبِيطَايَمْ، اَمَّا فُو اٜ نٛنْ اَ مٜىٰطَايِ حٛکُّکِيَمْ کٛو دَمْنغٜلْ غٛعٜلْ نغَمْ مِ نَنْدَ بٜلْطُمْ اٜ حِغٛوٻٜ اَمْ؞ اَمَّا ندٜ ٻِطّٛ مَاطَ اٛعٛ وَرْتٛيِ، ݧَامُطٛ جَوْدِ مَاطَ دٛوْ تٛکُّکِ رٜوْٻٜ، اَ حِرْسَنِيمٛ نغَارِ ڤَيْندِ؞› «ݧَاکٛ اٛنْ وِعِمٛ، ‹ٻِطّٛ اَمْ، اَنْ اَ وٛنْدِ اٜ اَمْ کٛو ندٜيٜ، کٛ نغٛودُمِ فُو اَنْ جٜيِطُمْ؞ اٜ حَانِ نَنٜنْ بٜلْطُمْ، نغَمْ مِݧِرَاوٛ مَاطَ اٛعٛ اٛ مَايِينٛ، اَمَّا جٛونِ اٛ اُمَّکٜ، اٛ مَجِّينٛ، اَمَّا جٛونِ اٛ حٜٻْتَامَ؞› » يٜىٰسُ وِعِ تٛکُّٻٜمٛ، «اٜ وٛودِ غٛطّٛ دِسْکُطٛ جٛوُطٛ غٛطّٛ دٛوْ جَوْدِ مُوطُمْ نغَمْ فَامَنَنْدِ؞ غٛطّٛ وِعِ دِسْکُطٛ اٛنْ، ‹اٛنْ طٛنْ مٛ نجٛوْطَا دٛوْ جَوْدِ مَاطَ اٜ مٛ وٛنَّندِ؞› نغَمْ نٛنْ دِسْکُطٛ اٛنْ نٛدِّمٛ، وِعِمٛ، ‹کٛ نَنَيْمِ دٛوْ مَاطَ نِحِ؟ وِعَمْ نٛ نجٛغٛرِطَا جَوْدِ اَمْ نغَمْ دَغَ جٛونِ مِ اِتّٜتٜ دٛوْ جَوْدِ اَمْ؞› ڤَامَنٛووٛ جَوْدِ اٛنْ وِعِ ندٜرْ ٻٜرْندٜ مُوطُمْ، ‹نٛ نغَطَيْمِ جٛونِ؟ رَا جٛومُ وُرٛ اَمْ رِيوَيْيَمْ دٛوْ کُوغَلْ نغَعَلْ، رَا بٛو مِ وَلَا سٜمْبٜ رٜمُکِ، مِ سٜمْتَيْ بٛو تٛرَاکِ؞ يَوَّا! جٛونِ اٜ مِ اَنْدِ نٛ نغَطَيْمِ نغَمْ يِمْٻٜ نجَٻَيَمْ ندٜرْ غُرٜىٰجٜ مَٻّٜ تٛ مِ رِيوَامَ دَغَ کُوغَلْ نغَعَلْ؞› سٜيْ اٛ لِلَنِ ٻٜ جٛومُ وُرٛ مَاکٛ تٛکَّتَ ݧَمَاندٜ، اٛ وِعِ اَرَنْدٜىٰجٛ، ‹نٛ جٛومُ وُرٛ اَمْ تٛکَّتَمَ؟› اٛ وِعِمٛ، ‹ڤَالِ نٜبَّمْ جَيْتُنْ 800 تٛکّٜتٜىٰمِ؞› ڤَامَنٛووٛ جَوْدِ اٛنْ وِعِمٛ، ‹جَٻُ طٜرٜوٛلْ ݧَمَاندٜ مَاطَ، يَوْنُ وِنْدُ 400؞› ندٜنْ اٛ وِعِ طِطَٻٛ اٛنْ، ‹اَنْ بٛو، نٛيٜ تٛکّٜتٜطَا؟› اٛ وِعِمٛ، ‹بُحُوجِ اَلْکَمَارِ 1,000 تٛکّٜتٜىٰمِ؞› اٛ وِعِمٛ، ‹جَٻُ طٜرٜوٛلْ ݧَمَاندٜ مَاطَ وِنْدُ بُحُوجِ 800؞› جٛومُ وُرٛ اٛنْ مَنِ ڤَامَنٛووٛ جَوْدِ مٛ وَلَا غٛونغَ اٛنْ، نغَمْ اٜ مٛ وٛودِ پٛيْرٜ؞ مِ حٛکُّعٛنْ مِسَالُ طُعُمْ نغَمْ اَنْدٛنْ يِمْٻٜ ٻٜ تٛکَّايِ اَللَّه ٻُرِي يِمْٻٜ تٛکُّٻٜمٛ پٛيْرٜ دٛوْ فِي دُونِيَارُ؞ «اٜ مِ وِعَعٛنْ، کُوتِرٜىٰ جَوْدِ دُونِيَارُ نغَمْ کٜٻٛنْ حِغٛوٻٜ، نغَمْ تٛ جَوْدِ ندِنْ رٜعِي، طُمْ جَٻَعٛنْ ندٜرْ وُرٛ اَللَّه نغٛ حَا اَبَدَا؞ فُو غَطُطٛ کٛ حَانِ اٜ فِي سٜطَّ، اٛ وَطَيْ کٛ حَانِ اٜ فِي طُطُّمْ؞ نٛنْ مَا مٛ وَلَا غٛونغَ دٛوْ فِي سٜطَّ وَطَتَا غٛونغَ دٛوْ فِي طُطُّمْ؞ تٛ اٛنْ نغَلَا غٛونغَ اٜ جٛغَاکِ جَوْدِ دُونِيَارُ، مٛيٜ حٛولٛتٛوعٛنْ اٜ جٛغَاکِ جَوْدِ غٛونغَارِ؟ تٛ اٛنْ نجٛغٛرَاکِ جَوْدِ غٛطّٛ غٛونغَ، مٛيٜ حٛکَّتَعٛنْ کٛ وَرْتَتَ طُمْ مٛوطٛنْ؟ «وَلَا مَشُّطٛ بَاوَيْطٛ جَغَّنَاکِ جٛومُ وُرٛعٜنْ طِطٛ؞ کٛو اٛ وَݧَ غٛعٛتٛ اٛ يِطَ غٛعٛتٛ، کٛو اٛ مَوْنِنَ غٛعٛتٛ اٛ يَوَنَ غٛعٛتٛ؞ نٛنْ اٛنٛنْ مَا اٛنْ مبَاوَتَا جَغَّنَاکِ اَللَّه اٜ جَغَّنَاکِ جَوْدِ شَرٜلْ غٛعٛ؞» ندٜ فَارِسَنْکٛعٜنْ نَنِ فُو کٛ اٛ وِعِ، ٻٜ طُرْتِيمٛ نغَمْ ٻٜ غِطْٻٜ شٜىٰدٜ؞ اٛ وِعِٻٜ، «اٛنٛنْ نغٛنِ کٛلّٛوٻٜ کٛعٜ مٛوطٛنْ اٛنْ غَطٛوٻٜ کٛ حَانِ يٜىٰسٛ يِمْٻٜ، اَمَّا اَللَّه اٜ اَنْدِ ٻٜرْطٜ مٛوطٛنْ؞ نغَمْ کٛ يِمْٻٜ مَوْنِنْتَ اٜ حَرْمِنِ يٜىٰسٛ اَللَّه؞ «اَتَّوْرَ اٜ دٜفْتٜ اَنَّبٛعٜنْ نغٛنِ کٛ طُمْ وَعَجِنْتَ حَا شَرٜلْ يَحَيَ غَطٛووٛ بَڤْتِسْمَ؞ دَغَ شَرٜلْ نغٜلْ، اٜ طُمْ اَنْدِنَ حَبَرُ بٜلْطُمْ دٛوْ لَامُ اَللَّه، کٛو مٛيٜ اٜ دُرْوَ نغَمْ حٜٻَ نَتُّکِ؞ اَمَّا فُو اٜ نٛنْ، طُمْ ٻُرَيْ حٛيُکِ دٛوْ اٜ لٜيْ رٜعَ اٜ دٛوْ تٛٻّٜلْ غٛعٜلْ نغٜلْ اَتَّوْرَ مَجِّنٜىٰ؞ «کٛو مٛيٜ يٛوفِ دٜبّٛ مُوطُمْ تٜعِ غٛطّٛ، نجٜىٰنُ اٛ وَطَتَ؞ نٜطّٛ تٜعُطٛ جٛوفَاطٛ مَا، نجٜىٰنُ اٛ وَطَتَ؞» «اٜ وٛودِ غٛطّٛ دِسْکُطٛ ٻٛرْنٛتٛوطٛ لِمْشٜ طٜ شٜىٰدٜ، اٜ مٛ ݧَامَ کٛ اٛ يِطِ کٛو ندٜيٜ؞ اٜ دَمُّغَلْ وُرٛ مَاکٛ کٛو ندٜيٜ اٜ طُمْ وَدَّ غٛطّٛ مٛ وَلَنَا بِعٜتٜىٰطٛ لِعَاجَرُ اٜ مٛ وٛودِ ڤُتّٜ کٛو تٛيٜ اٜ ٻَنْدُ مَاکٛ؞ اٜ مٛ يِطِ ݧَامُکِ کٛ يَنِ اٜ لٜيْدِ دَغَ ندٜرْ ݧَمْندُ دِسْکُطٛ اٛنْ؞ کٛ ٻُرِ نٛنْ، کُتِيجِ مَا اٜ نغَرَ اٜ تَحَ ڤُتّٜ مَاکٛ؞ ندٜ مٛ وَلَنَا اٛنْ مَايِ، مَلَاعِکَعٜنْ نجَارِمٛ اٛ جٛوطٛو حَادٜ اَنَّبِ اِبْرَاهِمْ؞ دِسْکُطٛ اٛنْ مَا مَايِ اٛ اُوَا؞ اٛ نَتِّنَا حِيتٜ اٜ مٛ يَرَ بٛنٜ، سٜيْ اٛ پٜفْتِ غِتٜ مَاکٛ، اٛ يِعِ لِعَاجَرُ اٜ جٛوطِي حَادٜ اَنَّبِ اِبْرَاهِمْ؞ اٛ نٛدِّ اِبْرَاهِمْ اٜ سٜمْبٜ، اٛ وِعِ، ‹يَا اِبْرَاهِمْ، يُرْمِنَنَمْ، لِلٛيْ لِعَاجَرُ مبِعَامٛ اٛ سُووَ حٛوندُ مَاکٛ ندٜرْ ندِيَمْ اٛ فٜوْنَ طٜمْنغَلْ اَمْ نغَمْ اٜ مِ يَرَ بٛنٜ کَلُّطُمْ ندٜرْ حِيتٜ نغٜعٜ؞› اِبْرَاهِمْ وِعِمٛ، ‹ٻِطّٛ اَمْ، سِفْتٛرْ شَرٜلْ کٛ نغٛنّٛطَا دُونِيَارُ اَ حٜٻِي کٛ نغِطَّا فُو، لِعَاجَرُ بٛو يَرِي بٛنٜ کَلُّطُمْ؞ اَمَّا جٛونِ اٜ مٛ نَنَ بٜلْطُمْ طٛعٛ، اَنْ بٛو اَ طٛنْ يَرَ بٛنٜ کَلُّطُمْ؞ غَطَ نٛنْ، اٜ وٛودِ نغَيْکَ لُغُّکَ حَکُّندٜ مٜىٰطٜنْ؞ وَلَا بَاوَيْطٛ حُولَ دَغَ طٛعٛ يَحَ تٛ نغٛنْطَا، نٛنْ مَا دَغَ تٛ نغٛنْطَا وَلَا بَاوَيْطٛ حُولٛيَ تٛ اَمِنْ؞› اَمَّا دِسْکُطٛ اٛنْ وِعِ، ‹اٜ مِ تٛرٛمَا، بَڤَّ، لِلُ لِعَاجَرُ تٛ وُرٛ ݧَاکٛ اَمْ؞ اٜ مِ وٛودِ مِݧِرَاٻٜ نجٛوٛ، اٜ مِ يِطِ اٛ يَحَ اٛ وَغِّنَٻٜ نغَمْ کَمْٻٜ مَا تٛع ٻٜ نغَرَ تٛ نجَرَيْمِ بٛنٜ کَلُّطُمْ طٛعٛ؞› اَمَّا اِبْرَاهِمْ وِعِمٛ، ‹اٜ ٻٜ نغٛودِ اَتَّوْرَ اٜ دٜفْتٜ اَنَّبٛعٜنْ، اَلْ ٻٜ نغَطَ کٛ طٜ مبِعِ؞› دِسْکُطٛ اٛنْ وِعِ، ‹نَاع نٛنْ، يَا اِبْرَاهِمْ، تٛ غٛطّٛ ندٜرْ مَيْٻٜ يَحَنِيٻٜ، ٻٜ تُوبَيْ؞› اِبْرَاهِمْ وِعِمٛ، ‹تٛ ٻٜ نَنَايِ کٛ اَتَّوْرَ اٜ دٜفْتٜ اَنَّبٛعٜنْ مبِعَتَ، ٻٜ نجَٻَتَا کٛ اُمِّيطٛ دَغَ مَيْدٜ وِعِٻٜ؞› » سٜيْ يٜىٰسُ وِعِ تٛکُّٻٜمٛ، «دٛولٜ کٛ وَطَتَ يِمْٻٜ نغَطَ حَکّٜ وَرَ، اَمَّا غَطُطٛ غٛطّٛ وَطِ حَکّٜ يَرَيْ بٛنٜ؞ طُمْ ٻُرَنَيْ نٜطّٛ اٛنْ حَٻَّنٜىٰ کَاپَ نَمٛلْ مَنْغَ اٜ دَاندٜ اٛ فَطّٜىٰ ندٜرْ ندِيَمْ مبٜىٰلَ، دٛوْ اٛ وَطَ غٛعٛتٛ ندٜرْ سُکَاٻٜ ڤَمَرْٻٜ ٻٜعٜ کٛولِيٻٜيَمْ وَطَ حَکّٜ؞ ڤَامَنٜىٰ کٛعٜ مٛوطٛنْ؞ «تٛ بَنْدِرَاوٛ مَاطَ وَطَنِيمَ کٛ وٛوطَا، مٜتَنْمٛ؞ تٛ اٛ تُوبِي، يَافَنَمٛ؞ تٛ اٛ وَطَنِيمَ کٛ وٛوطَا ندٜ جٛوٜىٰطِطِ اٜ ݧَلْندٜ غٛعٛ، ندٜنْ ندٜ جٛوٜىٰطِطِ اٜ مٛ وَرَ تٛ مَاطَ اٜ مٛ وِعَ، ‹مِ تُوبِي،› دٛولٜ نجَافَنٛطَامٛ؞» لِلَاٻٜ يٜىٰسُ مبِعِمٛ، «ٻٜيْدَنْمِنْ حٛولَاکِ اَللَّه!» يٜىٰسُ نٛوتِي وِعِٻٜ، «دَا اٛنْ نغٛودِ حٛولَاکِ فَمْطِرْکِ بٛ غَبّٜلْ مَسْتَتْ، اٛنْ مبَاوَيْ مبِعٛنْ لٜکِّ کِعِ، ‹طٛوفَ تِغّٛيٛطَا ندٜرْ ندِيَمْ،› سٜيْ کِ وَطَ بٛ کٛ مبِيطٛنْ؞ «مٛيٜ ندٜرْ مٛوطٛنْ غٛودُطٛ مَشُّطٛ دٜمَيْطٛ کٛو دُرَيْطٛ بَالِ، تٛ مَشُّطٛ اٛنْ وَرْتٛيِي دَغَ نغٜسَ اٛ وِعَمٛ، ‹وٛرٛيْ، جٛوطَ ݧَامَا ݧَمْندُ؟› سَمْ وَلَا بِعٛووٛ نٛنْ، سٜيْ نِ اٛ وِعَمٛ، ‹ٻٛرْنَ لِمْشٜرٜ دٜفُکِ، ندٜفَنَايَمْ حِرَاندٜ، نغَدَّنَايَمْ، مِ ݧَامَ مِ يَرَ تَوْ، ندٜنْ ݧَامَا نجَرَا؞› اٛنْ کَمّٛو اٛ يٜتَّيْ مَشُّطٛ اٛنْ نغَمْ اٛ وَطِي کٛ اٛ وِعِ؟ اَاعَ؞ نٛنْ اٛنٛنْ مَا، تٛ اٛنْ کُوِي کٛ طُمْ وِعِعٛنْ، اٛنْ مبِعَيْ، ‹مِنْ مَشُّٻٜ ٻٜ نغَلَا بٛتٜ؞ مِنْ نغَطِي کٛ حَانِ مِنْ نغَطَ تَنْ؞› » يٜىٰسُ اٜ يَحَ اُرُشَلِيمَ، اٛ تٛکِّ کٜىٰرٛلْ لٜيْدِ سَمَارِيَ اٜ لٜيْدِ غَلِيلِ؞ اٜ مٛ نَتَّ وٛنْغٜلْ غَرِيٜلْ، سٜيْ يِمْٻٜ سَڤّٛ غٛودُٻٜ ݧَوُ ݧَامٛوجُمْ لَرَلْ کَوْرِ اٜ مَاکٛ، ٻٜ ندَرِي تٛ وٛطِّ؞ ٻٜ نٛدِّ اٜ سٜمْبٜ، ٻٜ مبِعِ، «يٜىٰسُ! مَوْطٛ! يُرْمِنَنْمِنْ!» ندٜ يٜىٰسُ يِعِٻٜ، اٛ وِعِٻٜ، «نجَحٜىٰ اَرْدِيٻٜ دِينَ نغِعَعٛنْ؞» اٜ ٻٜ ندٜرْ يَادُ، سٜيْ ٻٜ نجَمْطِتِ؞ ندٜ غٛعٛتٛ مَٻّٜ يِعِ يَمْطِتِي، اٛ سٛعِّي اٜ مٛ مَنْتَ اَللَّه اٜ سٜمْبٜ؞ اٛ دِشِّي يٜىٰسٛ يٜىٰسُ، اٛ يٜتِّمٛ؞ کَنْکٛ بٛو اٛ سَمَارِيَنْکٜىٰجٛ؞ يٜىٰسُ وِعِمٛ، «نَاع اٛنٛنْ سَڤّٛ نجَمْطِتِ؟ تٛ نجٛوٜىٰنَيٛ ٻٜنْ نغٛنِ؟ وَلَا مٛ طُمْ حٜٻِ سٛعّٛيِي يٜتِّ اَللَّه سٜيْ کٛطٛ اٛعٛ تَنْ؟» سٜيْ اٛ وِعِ سَمَارِيَنْکٜىٰجٛ اٛنْ، «اُمَّ ندِلَّا؞ اَ يَمْطِتِي نغَمْ اَ حٛولَکٜيَمْ؞» وٛٻّٜ فَارِسَنْکٛعٜنْ پَمِ يٜىٰسُ ٻٜ مبِعِ، «ندٜيٜ لَامُ اَللَّه وَرٛيْتَ؟» اٛ وِعِٻٜ، «طُمْ يِعَتَا لَامُ اَللَّه اٜ غِتٜ؞ وَلَا بِعٛووٛ، ‹رَا لَامُ اَللَّه طٛعٛ،› کٛو ‹رَا لَامُ اَللَّه تٛنْ نِي،› نغَمْ لَامُ اَللَّه اٜ ندٜرْ مٛوطٛنْ؞» سٜيْ اٛ وِعِ تٛکُّٻٜمٛ، «بَلْطٜ اٜ نغَرَ کٛ کَاٻٛتٛنْ يِعُکِ ݧَلْندٜ وٛعٛيْرٜ ندٜرْ ݧَلْطٜ ٻِي نٜطّٛ، اَمَّا اٛنْ نغِعَتَا؞ اٜ شَرٜلْ نغٜلْ يِمْٻٜ مبِعَيْعٛنْ، ‹رَمّٛ طَاعٜ!› کٛو بٛو، ‹رَمّٛ طٛعٛ!› تٛع اٛنْ نجَحُ؞ تٛع اٛنْ تٛکُّٻٜ؞ نٛ مَپّٜرٜ مَپِّرْتَ يِعٜىٰ کٛو تٛيٜ، نٛنْ غَرْتٛلْ ٻِي نٜطّٛ وَعَتَ؞ اَمَّا اَرَنْدٜ دٛولٜ اٛ يَرَ تٛرَّ کَلُّکَ، يِمْٻٜ جَامَنُ طُعُمْ نغَݧَمٛ؞ کٛ وَطُنٛ ندٜرْ جَامَنُ اَنَّبِ نُحُ، نٛنْ وَطٜتٜىٰ ندٜرْ بَلْطٜ کٛ ٻِي نٜطّٛ وَرْتٛيْتَ؞ يِمْٻٜ اٜ ݧَامَ، اٜ نجَرَ، اٜ تٜعَ، اٜ تٜعٜىٰ حَا شَرٜلْ کٛ اَنَّبِ نُحُ نَتِّ کٛمِوَلْ مَنْغَلْ، ندِيَمْ وَرِ حَلْکِٻٜ ٻٜ فُو؞ نٛنْ مَا نٛ طُمْ وَطُنٛ ندٜرْ جَامَنُ لُوتُ؞ يِمْٻٜ اٜ ݧَامَ، اٜ نجَرَ، اٜ شٛودَ، اٜ شٛورَ، اٜ ندٜمَ، اٜ مَحَ؞ اَمَّا ݧَلْندٜ ندٜ لُوتُ وُرْتِي دَغَ ندٜرْ غَرِيرِ سٛدٛمْ، طُمْ يٛوفٛيِ حِيتٜ اٜ کَاپٜ ݧَامٛوجٜ حِيتٜ دَغَ دٛوْ، نغٜ حَلْکِٻٜ ٻٜ فُو؞ نٛنْ وَطٜتٜىٰ ݧَلْندٜ ندٜ ٻِي نٜطّٛ وَنْغَتَ؞ «اٜ ݧَلْندٜ ندٜنْ غٛنْطٛ دٛوْ سُودُ فُو تٛع جِڤّٛيٛو نغَمْ حٛشُّکِ جَوْدِ مَاکٛ ندٜرْ سُودُ؞ غٛنْطٛ تٛ نغٜسَ بٛو تٛع سٛعّٛو وُرٛ؞ شِفْتٛرٜىٰ دٜبّٛ لُوتُ! کٛو مٛيٜ طَٻُّتُطٛ حِسْنَ يٛنْکِ مُوطُمْ دُلَّيْکِ، اَمَّا کٛو مٛيٜ دُلِّ يٛنْکِ مُوطُمْ نغَمْ اَمْ حِسْنَيْکِ؞ اٜ مِ وِعَعٛنْ، اٜ جٜمَّارٜ ندٜنْ يِمْٻٜ طِطٛ ڤُکّٛدٛتٛ دٛوْ لٜىٰسٛ غٛعٛ طُمْ حٛشَّ غٛعٛتٛ، طُمْ اَلَ غٛعٛتٛ؞ رٜوْٻٜ طِطٛ اٜ نَمِدَ، طُمْ حٛشَّ غٛعٛتٛ، طُمْ اَلَ غٛعٛتٛ؞ [يِمْٻٜ طِطٛ اٜ کُوَ ندٜرْ نغٜسَ، طُمْ حٛشَّ غٛعٛتٛ، طُمْ اَلَ غٛعٛتٛ؞]» تٛکُّٻٜمٛ مبِعِمٛ، «مٛودِبّٛ، تٛيٜ فِي طُعُمْ وَطَتَ؟» اٛ وِعِٻٜ، «تٛ بَاتُطُمْ وٛنِ، طٛنْ جِغَاجٜ کَوْرِتَتَ؞» سٜيْ يٜىٰسُ حٛکِّ تٛکُّٻٜمٛ مِسَالُ طُعُمْ نغَمْ اٛ حٛلَّٻٜ ٻٜ نغَطَ کَ وَطُکِ دٛعَارٜ تٛع ٻٜ شٛمَ؞ اٛ وِعِ، «اٜ وٛنْدِ غَرِيرِ اٜ وٛودِ غٛطّٛ اَلْکَالِيجٛ مٛ حُلَتَا اَللَّه اٛ وَنَّا اٜ يِمْٻٜ؞ اٜ وٛودِ غٛطّٛ دٜبّٛ ندٜرْ غَرِيرِ ندِنْ غٛرْکٛ مَاکٛ مَايِ؞ کٛو ندٜيٜ اٜ مٛ يَحَ تٛ اَلْکَالِيجٛ اٛنْ اٜ مٛ تٛرٛومٛ اٜ مٛ وِعَ، ‹وَطُ کٛ حَانِ حَکُّندٜ اَمْ اٜ غَݧٛ اَمْ؞› اَلْکَالِيجٛ اٛنْ نٜىٰٻِ جَٻَايِ؞ اَمَّا غَطَ طٛنْ اٛ وِعِ ندٜرْ ٻٜرْندٜ مَاکٛ، ‹کٛو ندٜ مِ حُلَتَا اَللَّه، کَدِنْ مِ وَنَّا اٜ کٛو مٛيٜ، اَمَّا نغَمْ دٜبّٛ اٛعٛ اٜ وَنَّيَمْ، مِ وَطَنَيْمٛ کٛ حَانِ، نغَمْ تٛع اٛ وَطَ مِ سٛمَ اٜ غَرٛلْ مَاکٛ؞› » ندٜنْ يٜىٰسُ وِعِ، «نَنٜىٰ کٛ اَلْکَالِيجٛ اٛعٛ مٛ حُلَتَا جٛومِرَاوٛ وِعِ؞ اٜ يِعُکِ مٛوطٛنْ اَللَّه وَطَنْتَا شُٻَاٻٜ مُوطُمْ تٛرٛتٛوٻٜمٛ جٜمَّ اٜ ݧَلَوْمَ کٛ حَانِ؟ اٛ نٜىٰٻَيْ اٛ وَلَّايِٻٜ؟ اٜ مِ وِعَعٛنْ، اٛ يَاوَيْ وَطَنْکِٻٜ کٛ حَانِ؞ اَمَّا تٛ ٻِي نٜطّٛ وَرْتٛيِي، اٛ تَوَيْ کٛولِيٻٜمٛ ندٜرْ دُونِيَارُ بٛو؟» اٜ وٛودِ نغِعٛوٻٜ کٛعٜ مُعّٜنْ ٻٜ غَطٛوٻٜ کٛ اَللَّه يِطِ، اٜ ٻٜ نجَوَنَ وٛٻّٜ؞ يٜىٰسُ حٛکِّٻٜ مِسَالُ طُعُمْ؞ اٛ وِعِ، «يِمْٻٜ طِطٛ نجَحِ وُرٛ شٜنِينغٛ نغَمْ ٻٜ نغَطَ دٛعَارٜ، غٛعٛتٛ فَارِسَنْکٜىٰجٛ، غٛعٛتٛ بٛو جَٻٛووٛ شٜىٰدٜ لٜيْدِ؞ فَارِسَنْکٜىٰجٛ اٛنْ دَرِي، وَطِ دٛعَارٜ ندٜرْ ٻٜرْندٜ مُوطُمْ وِعِ، ‹اَللَّه، مِ يٜتِّيمَ نغَمْ مِ وَطَتَا کٛ وٛٻّٜ يِمْٻٜ نغَطَتَ، بٛ وُيْٻٜ، اٜ غَطٛوٻٜ کٛ وٛوطَا، اٜ غَطٛوٻٜ نجٜىٰنُ، کٛو مَا بٛ جَٻٛووٛ شٜىٰدٜ لٜيْدِ اٛعٛ؞ اٜ مِ سُومٛو ندٜ طِطِ ندٜرْ يٛنْتٛورٜ غٛعٛ، ندٜنْ اٜ مِ اِتَّ جَکَّ ندٜرْ کٛ کٜٻُمِ فُو؞› اَمَّا جَٻٛووٛ شٜىٰدٜ لٜيْدِ اٛنْ دَرِي تٛ وٛطِّ؞ اٛ رَارَايِ دٛوْ، اٜ مٛ رٛنْدِ جُوطٜ مَاکٛ دٛوْ حٛورٜ، اٜ مٛ وِعَ، ‹يَا اَللَّه، يُرْمِنَنَمْ، مِ وَطِي حَکّٜ؞› اٜ مِ وِعَعٛنْ، جَٻٛووٛ شٜىٰدٜ لٜيْدِ اٛنْ حٛوتِي وُرٛ اٛ جَافَنَاطٛ حَکّٜ مَاکٛ، اَمَّا فَارِسَنْکٜىٰجٛ اٛنْ يَافَنَاکَ؞ نغَمْ کٛو مٛيٜ مَوْنِنْطٛ حٛورٜ مُوطُمْ اٛ ڤَمْطِنْتٜىٰطٛ، ندٜنْ لٜسْتِنْطٛ حٛورٜ مُوطُمْ بٛو اٛ مَوْنِنْتٜىٰطٛ؞» يِمْٻٜ اٜ نغَدَّنَ يٜىٰسُ سُکَحٛيْ مَٻّٜ ڤَمَرٛيْ نغَمْ اٛ بَرْکِطِنَکٛيْ، اَمَّا ندٜ تٛکُّٻٜمٛ نغِعِ نٛنْ، ٻٜ کَٻَنِٻٜ؞ اَمَّا يٜىٰسُ نٛدِّ سُکَحٛيْ کٛيْ تٛ مُوطُمْ، وِعِ، «اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞ اٜ مِ وِعَعٛنْ غٛونغَ، کٛو مٛيٜ مٛ جَٻَايِ لَامُ اَللَّه بٛنٛ سُکَيٜلْ ڤَمَرٜلْ، اٛ نَتَّتَا لَامُ طُمْ کٛو سٜطَّ؞» سٜيْ غٛطّٛ لَامِيطٛ پَمِمٛ وِعِ، «مٛودِبّٛ غٜىٰتٛ، کٛ حَانِ مِ وَطَ مِ حٜٻَ يٛنْکِ کِ رٜعَتَا؟» يٜىٰسُ نٛوتِي، وِعِمٛ، «نغَمْ طُمٜ نٛدِّرْطَايَمْ غٜىٰتٛ؟ وَلَا غٜىٰتٛ سٜيْ اَللَّه تَنْ؞ اَ اَنْدِ کٛ اَتَّوْرَ وِعِ، ‹تَاع وَطُ نجٜىٰنُ؞ تَاع وَطُ وَرْحٛورٜ؞ تَاع وُجُّ؞ تَاع حٛکُّ شٜيْدَ فٜوْرٜ؞ حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞› » اٛ وِعِ، «اٜ مِ وَطَ فِي طُعُمْ فُو دَغَ اٜ مِ سُکَ؞» ندٜ يٜىٰسُ نَنِ نٛنْ، وِعِمٛ، «حَا جٛونِ حٛرَنِمَا فِي غٛعٛ؞ سٛورُ کٛ نغٛودُطَا فُو، شٜنْدَنَا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞» ندٜ اٛ نَنِ نٛنْ، اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞ يٜىٰسُ رَارِمٛ وِعِ، «اٜ طُمْ سَطِ نَاع سٜطَّ دِسْکُطٛ نَتَّ لَامُ اَللَّه! طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞» نَنُٻٜ کٛ اٛ وِعِ مبِعِمٛ، «تٛو، تٛ طُمْ نٛنْ، مٛيٜ حِسَتَ؟» يٜىٰسُ وِعِٻٜ، «کٛ يِمْٻٜ مبَاوَتَا وَطُکِ، اَللَّه وَاوَيْ وَطُکِطُمْ؞» بِيتُرُسْ وِعِمٛ، «رَطُّمْ، مِنْ اَلِي کٛ مِنْ نغٛودِ فُو مِنْ تٛکِّيمَ؞» يٜىٰسُ وِعِٻٜ، «اٜ مِ وِعَعٛنْ غٛونغَ، کٛو مٛيٜ اَلُطٛ وُرٛ مُوطُمْ، کٛو دٜبّٛ مُوطُمْ، کٛو سَکِرَاٻٜ مُوطُمْ، کٛو دَݧٛوٻٜ مُوطُمْ، کٛو ٻِٻّٜ مُوطُمْ، نغَمْ لَامُ اَللَّه، اٛ حٜٻَيْ کٛ ٻُرِ نٛنْ طُوطُکِ ندٜرْ جَامَنُ طُعُمْ، ندٜنْ تٛ اٛ مَايِي اٛ حٜٻَيْ يٛنْکِ کِ رٜعَتَا؞» سٜيْ يٜىٰسُ نٛدِّ تٛکُّٻٜمٛ سَڤّٛ اٜ طِطٛ، ٻٜ کَکِّتِي اٛ وِعِٻٜ، «رَطُّمْ، اٜنْ نجَحَيْ اُرُشَلِيمَ، ندٜنْ کٛو طُمٜ کٛ اَنَّبٛعٜنْ مبِنْدِ دٛوْ ٻِي نٜطّٛ طُمْ حٜىٰوَيْ؞ طُمْ نَنْغَيْمٛ، طُمْ حٛکِّتِرَمٛ ندٜرْ جُوطٜ حٜىٰفٜرْٻٜ، ٻٜ نجُکِّتَمٛ، ٻٜ کُطَمٛ، ٻٜ تُتَّنَمٛ جٛودٜ، ٻٜ ڤِيَمٛ، ٻٜ مبَرَمٛ؞ ندٜنْ ݧَلْندٜ تَتَوْرٜ اٛ اُمّٛتٛ دَغَ مَيْدٜ؞» تٛکُّٻٜمٛ سَڤّٛ اٜ طِطٛ ٻٜنْ ڤَامَايِ کٛ اٛ وِعِ دٛوْ حٛورٜ مَاکٛ؞ فَامُ طُمْ سُوطَنَکٜٻٜ، ٻٜ کٜٻْتَايِ دٛوْ طُمٜ اٛ مٜتَتَ؞ ندٜ يٜىٰسُ ٻَدِي يٛتَّاکِ غَرِيرِ جٜرِيکٛ، غٛطّٛ بُمْطٛ اٜ جٛوطِي حَادٜ طَتَلْ اٜ تٛرٛو؞ ندٜ بُمْطٛ اٛنْ نَنِ يِمْٻٜ طُطْٻٜ اٜ پَٻّٛو، اٛ پَمِ، «کٛ وَنْغِ؟» ٻٜ مبِعِمٛ، «يٜىٰسُ نَجَرَنْکٜىٰجٛ پَٻّٛتٛو؞» اٛ نٛدِّ اٜ سٜمْبٜ، اٛ وِعِ، «يٜىٰسُ، ٻِطّٛ دَوْدَ، يُرْمِنَنَمْ!» جَحٛوٻٜ يٜىٰسٛ يٜىٰسُ کَٻَنِمٛ مبِعِمٛ اٛ دٜعِّتَ، اَمَّا اٛ ٻٜيْدِ نٛدُّکِ اٜ سٜمْبٜ، اٜ مٛ وِعَ، «ٻِطّٛ دَوْدَ، يُرْمِنَنَمْ!» نغَمْ نٛنْ يٜىٰسُ دَرِي وِعِ طُمْ وَدَّ بُمْطٛ اٛنْ تٛ مَاکٛ؞ ندٜ اٛ ٻَدّٛيِي حَادٜ، يٜىٰسُ پَمِمٛ، وِعِ، «طُمٜ نغِطَّا مِ وَطَنْمَا؟» اٛ وِعِ، «مٛودِبّٛ، اٜ مِ يِطِ مبُمْتِنَايَمْ؞» سٜيْ يٜىٰسُ وِعِمٛ، «وُمْتُ! حٛولَارٜ مَاطَ يَمْطِتِنِيمَ؞» طٛنْ اٜ طٛنْ غِتٜ مَاکٛ مبُمْتِ، اٛ تٛکِّ يٜىٰسُ، اٜ مٛ مَنْتَ اَللَّه؞ ندٜ وٛنْٻٜ طٛنْ فُو نغِعِ کٛ وَطِ، کَمْٻٜ مَا ٻٜ مَنْتِ اَللَّه؞ يٜىٰسُ نَتِّ جٜرِيکٛ اٜ مٛ پَٻّٛو ندٜرْ غَرِيرِ ندِنْ؞ اٜ وٛودِ غٛطّٛ نٜطّٛ تٛنْ مَوْطٛ جَٻٛوٻٜ شٜىٰدٜ لٜيْدِ، بِعٜتٜىٰطٛ جَکَّ، اٛ دِسْکُطٛ؞ اٜ مٛ يِطِ اٛ يِعَ مٛيٜ وٛنِ يٜىٰسُ، اَمَّا اٛ وَاوَايِ نغَمْ يِمْٻٜ طُوطِي، کَدِمَا اٛ دَمُّطٛ؞ سٜيْ اٛ دٛغِّ اٛ اَرْدِي اٛ پٜىٰݝِ لٜکِّ نغَمْ اٛ يِعَ يٜىٰسُ، نغَمْ طٛنْ يٜىٰسُ پِوَتَ؞ ندٜ يٜىٰسُ يٛتِّي وِغٜىٰرٜ ندٜنْ تِجِّي وِعِمٛ، «جَکَّ، يَوْنُ نجِڤّٛيٛطَا نغَمْ حَنْدٜ وُرٛ مَاطَ مبَالَيْمِ؞» سٜيْ جَکَّ يَوْنِ، جِڤّٛيِي، جَٻِّيمٛ اٜ وٜلْوٜلْتَ؞ ندٜ يِمْٻٜ نغِعِ يٜىٰسُ يَحِ وُرٛ مَاکٛ، ٻٜ فُو ٻٜ نغَطِ کَ مٜتِتَاکِ اٜ ٻٜ مبِعَ، «اٛ وَالَيْ وُرٛ نٜطّٛ غَطٛووٛ حَکّٜ؞» اَمَّا جَکَّ اُمِّي وِعِ يٜىٰسُ، «مٛودِبّٛ، مِ حٛکَّيْ ٻٜ نغَلَنَا سٜنْدٜرٜ جَوْدِ اَمْ؞ کَدِمَا تٛ اٜ وٛودِ ٻٜ نجَٻَنْمِ غٛطُّمْ کٛ حَانَا فُو، مِ يٛٻَيْٻٜ کٛ نجَٻَنْمِٻٜ ندٜ نَيِ؞» يٜىٰسُ وِعِمٛ، «حَنْدٜ کِسْندَمْ وَرِي ندٜرْ وُرٛ نغٛعٛ، نغَمْ کَنْکٛ مَا اٛ ٻِطّٛ اِبْرَاهِمْ؞ نغَمْ ٻِي نٜطّٛ وَرٛيِي طَٻِّتَ کٛ مَجِّ حِسْنَطُمْ؞» اٜ ٻٜ ندٜرْ نَنُکِ کٛ اٛ وِعَتَٻٜ، سٜيْ اٛ حٛکِّٻٜ مِسَالُ طُعُمْ نغَمْ اٛ ٻَدَکٜ اُرُشَلِيمَ، کَدِمَا نغَمْ يِمْٻٜ اٜ کَمّٛو لَامُ اَللَّه وَنْغَيْ طٛنْ اٜ طٛنْ؞ اٛ وِعِ، «غٛطّٛ نٜطّٛ مَوْطٛ يَحَيْ وٛنْدِ غَرِيرِ غٛطُّندِ نغَمْ طُمْ لَمْنَمٛ اٛ سٛعّٛيٛو؞ اٛ نٛدِّ مَشُّٻٜ مَاکٛ کَمْٻٜ سَڤّٛ، اٛ حٛکِّ کٛو مٛيٜ مَٻّٜ شٜىٰدٜ طٜ کُوٛووٛ حٜٻَتَ ندٜرْ لٜبِّ تَتِ، اٛ وِعِٻٜ، ‹شٛودٜىٰ شٛورِتٛوطٛنْ اٜ شٜىٰدٜ طٜعٜ نَا مِ وَرْتٛيِي؞› اَمَّا يِمْٻٜ لٜيْدِ مَاکٛ نغِطَامٛ، سٜيْ ٻٜ لِلِ لِلَاٻٜ غَطَ اٛ دِلِّي ٻٜ مبِعَ، ‹مِنْ نغِطَا نٜطّٛ اٛعٛ لَامٛو لٜيْدِ اَمِنْ؞› «ندٜ اٛ لَمْنَا اٛ سٛعِّي وُرٛ، اٛ وِعِ طُمْ نٛدَّنَمٛ مَشُّٻٜ ٻٜنْ طٛنْ ٻٜ اٛ حٛکُّنٛو شٜىٰدٜ، نغَمْ اٛ يِعَ ٻٜيْدَارِ نٛيٜ اٛ حٜٻِ؞ اَرَنْدٜىٰجٛ اٛنْ وَرٛيِ وِعِ، ‹جٛومُ وُرٛ، شٜىٰدٜ مَاطَ ٻٜيْدَکٜ ندٜ سَڤّٛ؞› اٛ وِعِمٛ، ‹اَ حُوِي بٛطُّمْ، اَ مَشُّطٛ بٛطّٛ؞ ندٜ اَ حٛلِّي غٛونغَ مَاطَ دٛوْ فِي ڤَمَرُمْ، اَ لَامٛتٛ غَرِيجٜ سَڤّٛ؞› طِطَٻٛ وَرِ، وِعِمٛ، ‹جٛومُ وُرٛ، شٜىٰدٜ مَاطَ ٻٜيْدَکٜ ندٜ جٛوِ؞› جٛومُ وُرٛ اٛنْ وِعِمٛ، ‹اَنْ، اَ لَامٛتٛ غَرِيجٜ جٛوِ؞› غٛطّٛ وَرٛيِ وِعِ، ‹جٛومُ وُرٛ، رَا شٜىٰدٜ مَاطَ طٜ کَٻُّمِ ندٜرْ لِمْشٜرٜ شُوطُمِ؞ اٜ مِ حُلُمَا نغَمْ اَ نٜطّٛ شَطَنْطٛ؛ اَ حٛشَّ کٛ اَ رٜسَايِ، اَ فٜعَّ کٛ اَ اَاوَايِ؞› جٛومُ وُرٛ اٛنْ وِعِمٛ، ‹اَنْ، اَ مَشُّطٛ کَلُّطٛ؞ کٛ مبِيطَا اٜ حٛنْدُکٛ مَاطَ نَنْغِيمَ! اٜ يِيکِ مَاطَ مِ نٜطّٛ شَطَنْطٛ؟ اَ ݧُمَ اٜ مِ حٛشَّ کٛ مِ رٜسَايِ، اٜ مِ فٜعَّ کٛ مِ اَاوَايِ؟ تٛ طُمْ نٛنْ، کٛ وَطِ اَ رٜسَنَايِيَمْ شٜىٰدٜ تٛ طٜ کُوتِرْتٜىٰ طٜ ٻٜيْدٛو، نغَمْ تٛ مِ وَرْتٛيِي مِ تَوَ طٜ ٻٜيْدَکٜ؟› اٛ وِعِ دَرِيٻٜ حَادٜ طٛنْ، ‹نجَٻٜىٰ شٜىٰدٜ طٜنْ تٛ مَاکٛ، کٛکّٛنْطٜ اٛنْ طٛنْ ٻٜيْدُطٛ شٜىٰدٜ مُوطُمْ ندٜ سَڤّٛ؞› ٻٜ مبِعِمٛ، ‹جٛومُ وُرٛ، اَيْ اٛنْ طٛنْ شٜىٰدٜ مَاکٛ ٻُرِي طٜ اٛعٛ طُوطُکِ ندٜ سَڤّٛ؞› ‹نٛنْ بٛو اٜ مِ وِعَعٛنْ، فُو غٛودُطٛ طُمْ ٻٜيْدَنَيْمٛ؞ اَمَّا مٛ وَلَا غٛطُّمْ، کٛو کٛ اٛ وٛودِ مَا طُمْ جَٻَيْطُمْ؞ ٻٜنْ طٛنْ وَݧْوَݧْٻٜ اَمْ بٛو ٻٜ نغِطَا مِ لَامٛو دٛوْ مَٻّٜ، نغَدّٜىٰٻٜ طٛعٛ، مبَرٛنْٻٜ يٜىٰسٛ اَمْ؞› » ندٜ يٜىٰسُ وِعِ نٛنْ، اٛ نَنْغِ لَاوٛلْ يَاکِ اُرُشَلِيمَ؞ ندٜ اٛ ٻَدِي غَرِيجٜ بٜتَفَاجِ اٜ بٜتَنِ تٛ حٛشّٜىٰرٜ ندٜ لٜطّٜ جَيْتُنْ، سٜيْ اٛ لِلِ تٛکُّٻٜمٛ طِطٛ؞ اٛ وِعِٻٜ، «نجَحٜىٰ ندٜرْ غَرِيٜلْ غٛنْغٜلْ يٜىٰسٛ مٛوطٛنْ؞ اٜ نَتُّکِ مٛوطٛنْ، اٛنْ تَوَيْ مبَبَّ مٛلَ اٜ نغَ حَٻِّي، طُمْ مٜىٰطَايِ وَطَّاکِنغَ؞ ڤِتّٛيٜىٰنغَ نغَدّٛنْغَ طٛعٛ؞ تٛ غٛطّٛ پَمِيعٛنْ کٛ وَطِ ڤِتّٛتٛنْغَ، مبِعٜىٰمٛ، ‹مٛودِبّٛ اٜ يِطِ حُوتِرْکِنغَ؞› » سٜيْ لِلَاٻٜ ٻٜنْ نجَحِ تَوِ مبَبَّ نغَنْ نٛنْ نٛ اٛ وِعِرِٻٜ؞ اٜ ٻٜ ڤِتَّنغَ، سٜيْ جٛومِيغَ وَرِ وِعِٻٜ، «نغَمْ طُمٜ ڤِتّٛتٛنْغَ؟» ٻٜ مبِعِمٛ، «مٛودِبّٛ اٜ يِطِ حُوتِنِرَنغَ؞» ٻٜ نجَارَنِنغَ يٜىٰسُ، ٻٜ مبٜعِّتِ شُدَّارِ مَٻّٜ دٛوْ مَغَّ، ٻٜ کٛشِّمٛ ٻٜ نجٛوِمٛ دٛوْ مَاغَ؞ اٜ مٛ ندٜرْ يَادُ دٛوْ مبَبَّ نغَنْ، يِمْٻٜ نغَطِ کَ وٜعُّتُکِ شُدَّارِ مَٻّٜ دٛوْ طَتَلْ نغَلْ؞ ندٜ اٛ ٻَدِي اُرُشَلِيمَ تٛ رٜغٛرْدٜ حٛشّٜىٰرٜ ندٜ لٜطّٜ جَيْتُنْ، حَوْرُتُٻٜ تٛکُّٻٜمٛ ڤُطِّ وٜلْوٜلْتُکِ اٜ مَنْتَ اَللَّه اٜ سٜمْبٜ نغَمْ کُوطٜ کُلْنِيطٜ فُو طٜ ٻٜ نغِعِ؞ اٜ ٻٜ مبِعَ، «اٛ بَرْکِطِنَاطٛ لَامِيطٛ غَرٛيْطٛ ندٜرْ اِنْدٜ جٛومِرَاوٛ! جَمْ اٜ تٛنْ دٛوْ، اٜنْ مَوْنِنْ اَللَّه!» سٜيْ وٛٻّٜ فَارِسَنْکٛعٜنْ ندٜرْ حَوْرُتُٻٜ ٻٜنْ مبِعِ يٜىٰسُ، «مٛودِبّٛ، حَٻَنْ تٛکُّٻٜمَ؞» اٛ وِعِٻٜ، «اٜ مِ وِعَعٛنْ، تٛ ٻٜ ندٜعِّتِي، کَاپٜ طٜعٜ مَنْتَيْ اَللَّه اٜ سٜمْبٜ؞» ندٜ يٜىٰسُ ٻَدِّي اُرُشَلِيمَ يِعِ غَرِيرِ ندِنْ، اٛ وٛيَنِندِ، اٜ مٛ وِعَ، «دَا اَ اَنْدُنٛو حَنْدٜ کٛ وَدَّتَ جَمْ! اَمَّا طُمْ سُوطَنَکٜ غِتٜ مَاطَ؞ نغَمْ بَلْطٜ نغَرٛيَيْ طٜ وَݧْوَݧْٻٜ مَاطَ ڤِلٛتٛمَا ٻٜ ٻِطُّمَا کٛو تٛيٜ مَاطَ، ٻٜ ندٛعُّمَا اٜ لٜيْدِ، اَنْ اٜ ٻِٻّٜ مَاطَ وٛنْٻٜ ندٜرْ مَاطَ، ٻٜ اَلَتَا وٛنْدٜ حَيْرٜ دٛوْ وٛنْدٜ ندٜرْ مَاطَ، نغَمْ اَ اَنْدِتَايِ شَرٜلْ نغٜلْ اَللَّه وَرِ حِسْنُکِمَ؞» يٜىٰسُ نَتِّ وُرٛ شٜنِينغٛ، اٛ فُطِّ رِيوُکِ ٻٜ سٛورٜ‑سٛورٜ، اٛ وِعِٻٜ، «طُمْ وِنْدَامَ اَللَّه وِعِ، ‹طُمْ نٛدِّرَيْ وُرٛ اَمْ وُرٛ دٛعَارٜ،› اَمَّا اٛنْ نغَرْتِرِينغٛ لُورٛ وُيْٻٜ؞» کٛو ندٜيٜ اٜ مٛ اٜکِّتِنَ ندٜرْ وُرٛ شٜنِينغٛ، اَمَّا مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ اَرْدِيٻٜ يِمْٻٜ اٜ نغَطِ کَ طَٻُّتُکِ نٛ ٻٜ مبَرْدَتَمٛ؞ اَمَّا ٻٜ کٜٻَايِ نٛ ٻٜ نَنْغِرْتَمٛ، نغَمْ يِمْٻٜ فُو اٜ کٜتِّندِ اٜ نَنَمٛ؞ وٛنْدٜ ݧَلْندٜ، يٜىٰسُ اٜ اٜکِّتِنَ يِمْٻٜ ندٜرْ وُرٛ شٜنِينغٛ، اٜ مٛ وَعَجِنَ حَبَرُ بٜلْطُمْ، سٜيْ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ مَوْٻٜ يِمْٻٜ نغَرِ تٛ مَاکٛ، ٻٜ مبِعِمٛ، «اٜ لَامُ مٛيٜ نغَطَتَا کُوطٜ طٜعٜ؟ مٛيٜ حٛکُّمَا لَامُ طُمْ؟» اٛ وِعِٻٜ، «مِنْ مَا مِ پَمَيْعٛنْ، جٛونِ مبِعٜىٰيَمْ، بَڤْتِسْمَ طُمْ يَحَيَ وَطِ، تٛ اَللَّه طُمْ پِوٛيِ کٛو تٛ يِمْٻٜ طُمْ پِوٛيِ؟» سٜيْ ٻٜ مٜدِّ حَکُّندٜ مَٻّٜ، ٻٜ مبِعِ، «تٛ اٜنْ مبِعِي، ‹دَغَ تٛ اَللَّه طُمْ پِوٛيِ،› اٛ وِعَيْ، ‹کٛ وَطِ اٛنْ جَٻَايِ کٛ اٛ وِعِ؟› تٛ بٛو اٜنْ مبِعِي، ‹تٛ يِمْٻٜ طُمْ پِوٛيِ،› يِمْٻٜ ٻٜعٜ فُو کُبٛرْتٛعٜنْ کَاپٜ، نغَمْ ٻٜ نجَٻِي يَحَيَ اٛ اَنَّبِيجٛ؞» نغَمْ نٛنْ ٻٜ مبِعِ يٜىٰسُ، «مِنْ اَنْدَا تٛ طُمْ پِوٛيِ؞» سٜيْ يٜىٰسُ وِعِٻٜ، «نٛنْ مِنْ مَا، مِ وِعَتَاعٛنْ کٛو اٜ طُمٜ لَامُ نغَطِرَيْمِ کُوطٜ طٜعٜ؞» سٜيْ يٜىٰسُ فُطِّ حٛکُّکِ يِمْٻٜ مِسَالُ طُعُمْ، اٛ وِعِ، «غٛطّٛ نٜطّٛ وَطِ نغٜسَ اِنَبٛوجٜ، اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ اٛ نٜىٰٻِ تٛنْ؞ ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّطٛ تٛ ٻٜ اٛ حٛکِّ نغٜسَ کَنْ اٛ جَٻٛنٛيَمٛ کٛ ٻٜ نغَادِ ندٜرْ کٛ ٻٜنْدِ؞ سٜيْ ٻٜ ڤِيِ مَشُّطٛ اٛنْ ٻٜ ندِيوِمٛ کٛو کٛ ٻٜ کٛکِّمٛ؞ جٛومُ نغٜسَ اٛنْ لِلِ غٛطّٛ مَشُّطٛ کَدِنْ، کَنْکٛ مَا ٻٜ ڤِيِمٛ ٻٜ کُطِ کُطِنِمٛ، ٻٜ شٛعِّمٛ، کٛو کٛ ٻٜ کٛکِّمٛ؞ سٜيْ اٛ فُطِّتِ اٛ لِلِ مَشُّطٛ تَتَٻٛ، کَنْکٛ بٛو ٻٜ نَوْنِمٛ ٻٜ مبُرْتِنِمٛ ندٜرْ نغٜسَ کَنْ؞ سٜيْ جٛومُ نغٜسَ اٛنْ وِعِ، ‹کٛ نغَطَيْمِ؟ مِ لِلَيْ ٻِطّٛ اَمْ مٛ ٻُرْمِ يِطُکِ؞ اٜ مِ کَمّٛو ٻٜ کٛکَّيْمٛ مَنْغُ؞› اَمَّا ندٜ ٻٜ اٛ حٛکِّ نغٜسَ کَنْ نغِعِ ٻِطّٛ جٛومُ نغٜسَ اٛنْ، سٜيْ ٻٜ مبِعِ حَکُّندٜ مَٻّٜ، ‹تٛو! رَا دٛنٛووٛ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞› سٜيْ ٻٜ مبُرْتِنِمٛ ندٜرْ نغٜسَ کَنْ ٻٜ مبَرِمٛ؞ «تٛو، کٛ کَمِّيطٛنْ جٛومُ نغٜسَ اٛنْ وَطَنْتَٻٜ؟ اٛ وَرَيْ اٛ حَلْکَٻٜ، اٛ حٛکَّ وٛٻّٜ نغٜسَ کَنْ؞» ندٜ يِمْٻٜ نَنِ نٛنْ، ٻٜ مبِعِ، «اَللَّه حٛيْنَ!» اَمَّا يٜىٰسُ رَارِٻٜ وِعِ، «تٛو، کٛ وٛنِ مَعَنَ اَايَارٜ بِعُندٜ: ‹حَيْرٜ ندٜ مَحٛوٻٜ نغَݧِ، کَيْرٜ وَرْتِ حَيْرٜ ٻُرْندٜ دَرْنُکِ مَادِ؟› «کٛو مٛيٜ يَنٛيِ دٛوْ حَيْرٜ ندٜنْ يٜوِ يٜوِنَيْ؛ اَمَّا تٛ حَيْرٜ ندٜنْ يَنِي دٛوْ غٛطّٛ، ندٜ نَمَيْمٛ بٛ شٛنْدِ؞» مٛودِٻّٜ اَتَّوْرَ اٜ مَوْٻٜ اَرْدِيٻٜ دِينَ اٜ نغِطِ نَنْغَ يٜىٰسُ طٛنْ اٜ طٛنْ، نغَمْ ٻٜ ڤَامِي دٛوْ مَٻّٜ اٛ حٛکِّ مِسَالُ طُعُمْ، اَمَّا اٜ ٻٜ کُلَ يِمْٻٜ؞ نغَمْ نٛنْ ٻٜ نغَطَنِ يٜىٰسُ غِتٜ، ٻٜ لِلِ وٛٻّٜ نَنْدِتِنْٻٜ اٜ يِمْٻٜ ٻٜ غٛونغَ نغَمْ ٻٜ نَنَ کٛو اٛ وِعَيْ غٛطُّمْ طُمْ ٻٜ کٜٻَتَ ٻٜ نغُلِّرٛيٛومٛ يٜىٰسٛ غٛمْنَاجٛ لٜيْدِ؞ لِلَاٻٜ ٻٜنْ سٜيْ پَمِ يٜىٰسُ مبِعِ، «مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ، اَ حٛلَّتَا يِدّٜ حٛورٜ، اَ اٜکِّتِنَ لَاوٛلْ اَللَّه اٜ غٛونغَ؞ اٜ يِيکِ مَاطَ اٜ حَانِ مِنْ نجٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، کٛو طُمْ حَانَايِ؟» اَمَّا يٜىٰسُ اٜ اَنْدِ پٛيْرٜ مَٻّٜ، سٜيْ اٛ وِعِٻٜ، «کٛلّٜىٰيَمْ يَمْندٜ اَجُرْفَارِ؞ طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟» ٻٜ مبِعِ، «طُمْ کَيْسَرْ؞» اٛ وِعِٻٜ، «نغَمْ نٛنْ، کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞» ٻٜ کٜٻَايِ کٛ ٻٜ نَنْغِرْتَمٛ ندٜرْ کٛ اٛ وِعِٻٜ يٜىٰسٛ يِمْٻٜ، سٜيْ ٻٜ ندٜعِّتِ اٜ ٻٜ کَيْطِنَ اٜ نٛ اٛ نٛوتٛرَنِيٻٜ؞ سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ وٛٻّٜ مَٻّٜ نغَرِ تٛ يٜىٰسُ، ٻٜ پَمِمٛ، ٻٜ مبِعِ، «مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سٜيْ سَکِرَاوٛ مَاکٛ تٜعَمٛ نغَمْ حٜٻَنَ سَکِرَاوٛ مُوطُمْ مَيْطٛ ٻِٻّٜ؞ تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ؞ اَفٛ اٛنْ تٜعِ دٜبّٛ، مَايِ، دَݧِدَايِ اٜ مَاکٛ؞ طِطَٻٛ اٛنْ تٜعِ دٜبّٛ اٛنْ، کَنْکٛ مَا اٛ مَايِ، ٻٜ ندَݧِدَايِ؞ تَتَٻٛ اٛنْ مَا تٜعِ دٜبّٛ اٛنْ، کَنْکٛ مَا اٛ مَايِ ٻٜ ندَݧِدَايِ؞ نٛنْ سَکِرَاٻٜ نجٛوٜىٰطِطٛ ٻٜنْ طٛنْ ٻٜ فُو ٻٜ تٜعِينٛمٛ، ٻٜ مَايِ، ٻٜ ندَݧِدَايِ اٜ مَاکٛ؞ غَطَ مَاجُمْ دٜبّٛ اٛنْ مَا مَايِ؞ تٛو، جٛونِ، ݧَلْندٜ ندٜ مَيْٻٜ اُمّٛتٛو، دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو نجٛوٜىٰطِطٛ ٻٜ تٜعِيمٛ؞» يٜىٰسُ نٛوتِي وِعِٻٜ، «يِمْٻٜ جَامَنُ طُعُمْ اٜ تٜعِندِرَ، اَمَّا يِمْٻٜ ٻٜ اَللَّه يِعِ اٜ حَانِ ٻٜ اُمّٛو ݧَلْندٜ جَانغٛ، ݧَلْندٜ ندٜ طُمْ اُمِّنْتَ مَيْٻٜ، وٛرْٻٜ تٜعَتَا، رٜوْٻٜ تٜعَتَاکٜ؞ ٻٜ ڤُطِّتَتَا ٻٜ مَايَ، نغَمْ ٻٜ نغَرْتَيْ بٛ مَلَاعِکَعٜنْ؞ ٻٜ ٻِٻّٜ اَللَّه نغَمْ ٻٜ اُمَّکٜ دَغَ مَيْدٜ؞ کٛو ندٜرْ حَبَرُ لٜغّٜلْ غٛودُنغٜلْ حِيتٜ، اَنَّبِ مُوسَ حٛلِّي مَيْٻٜ اُمّٛتٛ، نغَمْ اٛ نٛدِّرِي جٛومِرَاوٛ ‹اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞› کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞ نغَمْ تٛ مَاکٛ، کٛو مٛيٜ اٜ وٛودِ يٛنْکِ؞» وٛٻّٜ مٛودِٻّٜ اَتَّوْرَ مبِعِمٛ، «مٛودِبّٛ، اَ وِعِي غٛونغَ؞» دَغَ طٛنْ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞ اَمَّا يٜىٰسُ وِعِٻٜ، «نٛ وَطَتَ اٜ ٻٜ مبِعَ اَلْمَسِيحُ طُمْ ٻِطّٛ دَوْدَ؟ نغَمْ دَوْدَ اٜ حٛورٜ مُوطُمْ وِعِ ندٜرْ دٜفْتٜرٜ جَبُورَ، ‹جٛومِرَاوٛ وِعِي جٛومِرَاوٛ اَمْ، «جٛوطَ تٛ جُنْغٛ اَمْ ݧَامٛ، نَا مِ وَطِي اَ يَاٻِي وَݧْوَݧْٻٜ مَاطَ؞» › دَوْدَ اٜ نٛدِّرَ اَلْمَسِيحُ ‹جٛومِرَاوٛ؞› نٛ وَطَتَ اٛ وَرْتَ ٻِطّٛ دَوْدَ؟» يٜىٰسٛ کٛو مٛيٜ اٛ وِعِ تٛکُّٻٜمٛ، «ڤَامَنٜىٰ مٛودِٻّٜ اَتَّوْرَ، غِطُٻٜ يِيلَاکِ اٜ ٻٛرْنِي تٛغّٛحٛ نجُوتُکٛ، غِطُٻٜ حٛوْنِرٜىٰکِ مَنْغُ ندٜرْ لُومٛ؞ اٜ ٻٜ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ اٜ جٛوطٛرْلٜ مَوْٻٜ تٛ حُمْتٛ؞ کَمْٻٜ نغٛنِ ݧَامٛوٻٜ جَوْدِ رٜوْٻٜ ٻٜ وٛرْٻٜ مُعّٜنْ مَايِ، وَطٛوٻٜ دٛعَاجٜ جُوتُطٜ نغَمْ طُمْ يِعَٻٜ؞ ٻٜ ٻُرَيْ يَرُکِ بٛنٜ؞» يٜىٰسُ پٜفْتِ حٛورٜ مُوطُمْ يِعِ رِسْکُٻٜ اٜ نغَطَ دٛکّٜ مَٻّٜ ندٜرْ تٛ طُمْ حٛکَّتَ شٜىٰدٜ نغَمْ اَللَّه ندٜرْ وُرٛ شٜنِينغٛ؞ سٜيْ اٛ يِعِ غٛطّٛ دٜبّٛ مٛ وَلَنَا مٛ غٛرْکٛ مُوطُمْ مَايِ وَطِي شٜىٰدٜ نجَمْکٛيْ طِطٛيْ کٛيْ نجَمْندِ مبٛطٜىٰرِ ندٜرْ؞ يٜىٰسُ وِعِ، «اٜ مِ وِعَعٛنْ غٛونغَ، اٛعٛ دٜبّٛ مٛ وَلَنَا، کٛ اٛ حٛکِّ ٻُرِي کٛ حٛرِيٻٜ فُو کٛکِّ؞ نغَمْ حٛرِيٻٜ ٻٜعٜ فُو ٻٜ کٛکِّي سٜطَّ دَغَ ندٜرْ رِسْکُ مَٻّٜ، اَمَّا کَنْکٛ بٛو ندٜرْ شِيَ مَاکٛ اٛ حٛکِّ فُو کٛ اٛ وٛودِ؞» وٛٻّٜ اٜ مٜتَ دٛوْ نٛ طُمْ مٛعِّنِرِ وُرٛ شٜنِينغٛ اٜ کَاپٜ بٛطّٜ اٜ دٛکّٜ طٜ طُمْ حٛکِّ نغَمْ اَللَّه؞ اَمَّا يٜىٰسُ وِعِ، «کٛ نغِعٛتٛنْ طٛعٛ، شَرٜلْ وَرَيْ نغٜلْ وَلَا وٛنْدٜ حَيْرٜ اَلٜتٜىٰندٜ دٛوْ وٛنْدٜ؞ طٜ فُو طُمْ سَنْکِتَيْطٜ؞» ٻٜ پَمِمٛ، ٻٜ مبِعِ، «مٛودِبّٛ، ندٜيٜ فِي طُعُمْ وَطَتَ؟ ندٜنْ کٛ حٛلَّتَ فُطُّکِ مَاجُمْ ٻَدَکٜ؟» اٛ وِعِ، «ڤَامٜىٰ، تٛع طُمْ مَجِّنَعٛنْ؞ نغَمْ يِمْٻٜ طُطْٻٜ نغَرٛيَيْ ندٜرْ اِنْدٜ اَمْ، ٻٜ مبِعَ کَمْٻٜ نغٛنِ مِنْ، ندٜنْ، ‹شَرٜلْ ٻَدَکٜ!› تٛع اٛنْ تٛکُّٻٜ؞ اَمَّا، تٛ اٛنْ نَنِي حَبَرُ کٛنُوجِ حَکُّندٜ لٜيْطٜ اٜ کٛنُوجِ ندٜرْ لٜيْطٜ، تٛع اٛنْ کُلُ، نغَمْ اَرَنْدٜ دٛولٜ فِي طُعُمْ وَطَ، اَمَّا نٛنْ حٛلَّايِ رٜعُکِ دُونِيَارُ وَرِي؞» ندٜنْ اٛ وِعِٻٜ، «لٜݧٛلْ اُمَّنْتٛ لٜݧٛلْ، ندٜنْ لَامُ اُمَّنْتٛ لَامُ؞ اٜ بِغٜىٰجٜ فٜىٰرٜ‑فٜىٰرٜ طُمْ وَطَيْ دِمْبٛلْ لٜيْدِ شٜمْبِنْغٛلْ، طُمْ وَطَيْ وٜىٰلٛ اٜ ݧَوُوجِ کَلُّطِ؞ طُمْ وَطَيْ فِي مَوْطُمْ کُلْنِيطُمْ اٜ دٛوْ، غَطٛوجُمْ يِمْٻٜ کُلْتٛرَ؞ اَمَّا کٛ فِي طُعُمْ فُو وَطَ، يِمْٻٜ نَنْغَيْعٛنْ، تٛرَّيْعٛنْ، ٻٜ نغَطَيْعٛنْ ندٜرْ جُوطٜ مَوْٻٜ شُوطِ دٛعَارٜ، ٻٜ نغَطَعٛنْ ندٜرْ شُوطِ شُرَلْ، طُمْ يَارَيْعٛنْ يٜىٰسٛ لَامِيٻٜ اٜ مَوْٻٜ لٜيْدِ، نغَمْ اٛنْ تٛکُّٻٜيَمْ؞ طُمْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ؞ اَمَّا ڤُکِّنٜىٰ ٻٜرْطٜ مٛوطٛنْ، تٛع اٛنْ نغَنُّ کٛ شَرٜلْ نغٜلْ وَطَ نٛ مبُرْتِنِرْتٛنْ کٛعٜ مٛوطٛنْ؞ نغَمْ مِ حٛکَّيْعٛنْ بٛلِيطٜ اٜ اَنْدَلْ، حَا وَلَا غٛطّٛ ندٜرْ غَݧٛوٻٜ مٛوطٛنْ بَاوَيْطٛ دٛعُّکِعٛنْ کٛو يٜدُّکِ کٛ مبِيطٛنْ؞ دَݧٛوٻٜ مٛوطٛنْ اٜ مِݧِرَاٻٜ مٛوطٛنْ اٜ مَوْنِرَاٻٜ مٛوطٛنْ اٜ بَنْدِرَاٻٜ مٛوطٛنْ اٜ حِغٛوٻٜ مٛوطٛنْ، ٻٜ کٛکِّتِرَيْعٛنْ، ندٜنْ ٻٜ مبَرَ وٛٻّٜ مٛوطٛنْ؞ کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ اَمَّا وَلَا لَاسٛلْ کٛعٜ مٛوطٛنْ غٛعٛتٛلْ کَلْکَيْنغٛلْ؞ تٛ اٛنْ مُݧِي، اٛنْ کٜٻَيْ يٛنْکِ کِ رٜعَتَا؞ «تٛ اٛنْ نغِعِي حٛنٛوٻٜ اٜ ڤِلِي اُرُشَلِيمَ، اَنْدٜىٰ حَلْکُکِ مَيْرِ ٻَدَکٜ؞ ندٜنْ وٛنْٻٜ ندٜرْ لٜيْدِ يَحُودِيَ ندٛغَّ نَتّٛيَ کٛشّٜىٰجٜ، وٛنْٻٜ ندٜرْ غَرِيرِ مَوْندِ بٛو مبُرْتٛوندِ، ندٜنْ وٛنْٻٜ ندٜرْ لَدّٜ تٛع نَتَّ غَرِيرِ؞ نغَمْ بَلْطٜ طٜنْ طٛنْ طُمْ ‹بَلْطٜ بٛنٜ،› نغَمْ کٛ وِنْدَا فُو حٜىٰوَيْ؞ رٜوْٻٜ غٛودُٻٜ دٜىٰطِ اٜ مُسِنْتٜىٰٻٜ ٻٜ تٛرّٛتٛ نَاع سٜطَّ ندٜرْ طٜنْ طٛنْ بَلْطٜ! نغَمْ طُمْ وَطَيْ تٛرَّاجِ کَلُّطِ ندٜرْ دُونِيَارُ، مٛنّٜرٜ اَللَّه جِڤّٛنٛيْتٛ لٜݧٛلْ نغٛعٛلْ؞ طُمْ وَرْدَيْ وٛٻّٜ اٜ کَافَاجٜ، طُمْ نَنْغَيْ وٛٻّٜ، طُمْ يَارَٻٜ ندٜرْ لٜيْطٜ فُو طُمْ وَرْتِرَٻٜ مَشُّٻٜ؞ لٜݧِ دُونِيَارُ نغَطَيْ کَ سَنْکُتُکِ اُرُشَلِيمَ ٻٜ لَامٛوندِ نَا شَرٜلْ نغٜلْ طُمْ حٛکِّٻٜ وَطِي؞ «طُمْ وَطَيْ فِي کُلْنِيطُمْ ندٜرْ نَانغٜ اٜ لٜوْرُ اٜ کٛودٜ؞ يِمْٻٜ وٛنْٻٜ ندٜرْ لٜيْطٜ دُونِيَارُ فُو ٻٜ نغَنَّيْ ٻٜ کُلْتٛرَ، ندٜنْ ٻٜ ندُلَّ کٛ ٻٜ نغَطَتَ نغَمْ حٛنٛنْدٜ شٜمْبِنْدٜ ندٜ غٜىٰلٛوطِ ندِيَمْ مبٜىٰلَ؞ کُلٛلْ وَطَيْ وٛٻّٜ ڤٜکّٛرَ، نغَمْ کٛ وَرٛيْتَ ندٜرْ دُونِيَارُ، نغَمْ کٛ وٛنِ دٛوْ فُو دِمْبٛتٛ؞ اٜ شَرٜلْ نغٜلْ، ٻٜ نغِعَيْ ٻِي نٜطّٛ اٜ وَرَ ندٜرْ دُولٜ اٜ بَوْطٜ اٜ تٜدُّنغَلْ مَنْغَلْ؞ تٛ فِي طُعُمْ فُطِّي وَطُکِ، اُمّٜىٰ ندَرٛوطٛنْ، پٜفْتٛنْ کٛعٜ مٛوطٛنْ ندَارٛنْ دٛوْ، نغَمْ کِسْندَمْ مٛوطٛنْ ٻَدَکٜ؞» اٛ حٛکِّٻٜ مِسَالُ طُعُمْ، اٛ وِعِ، «ندَارٜىٰ لٜکِّ اِبِّ اٜ لٜطّٜ کٛرِيطٜ فُو؞ تٛ اٛنْ نغِعِي طٜ مبِلِتِي، اٛنْ اَنْدِ سٜىٰتٛ ٻَدَکٜ؞ نٛنْ مَا تٛ اٛنْ نغِعِي فِي طُعُمْ اٜ وَطَ، تٛو، اٛنْ اَنْدَيْ لَامُ اَللَّه ٻَدَکٜ؞ «اٜ مِ وِعَعٛنْ غٛونغَ، جَامَنُ طُعُمْ رٜعَتَا نَا فُو فِي طُعُمْ وَطِي؞ دٛوْ اٜ لٜيْ پَٻّٛتٛ، اَمَّا بٛلِيطٜ اَمْ پَٻَّتَاکٛ حَا اَبَدَا؞ «ڤَامٜىٰ تٛع يَرٜ‑يَرٜ اٜ ݧَامٜ‑ݧَامٜ اٜ وَنُّکِ اٜ کٛ وٛنِ ندٜرْ دُونِيَارُ حٛشَّ ٻٜرْطٜ مٛوطٛنْ، نغَمْ تٛع ݧَلْندٜ ندٜنْ اُدّٛوعٛنْ اٛنْ اَنْدَا؞ نغَمْ ݧَلْندٜ ندٜنْ وَرَيْ دٛوْ کٛو مٛيٜ مٛ يٛنْکِ ندٜرْ دُونِيَارُ؞ ڤَامٜىٰ کٛو ندٜيٜ نغَطٛنْ دٛعَارٜ نغَمْ کٜٻٛنْ ندَطٛنْ فِي طُعُمْ غَطَيْطُمْ فُو، ندٜنْ ندَرٛوطٛنْ يٜىٰسٛ ٻِي نٜطّٛ؞» کٛو ندٜيٜ ݧَلْندٜ يٜىٰسُ اٜ اٜکِّتِنَ ندٜرْ وُرٛ شٜنِينغٛ، اَمَّا جٜمَّ اٛ وُرْتٛو اٛ يَحَ دٛوْ حٛشّٜىٰرٜ ندٜ لٜطّٜ جَيْتُنْ اٛ وَالٛيَ؞ کٛو ندٜيٜ اِلَا سُبَکَ يِمْٻٜ فُو اٜ نجَحَ وُرٛ شٜنِينغٛ نغَمْ نَنُکِمٛ؞ تٛو، شَرٜلْ ٻَدَکٜ نغَمْ حُمْتٛ بُرٛودِ طُمْ وَلَا پُوفِنِرْطُمْ بِعٜتٜىٰنغٛ حُمْتٛ سَکِّنْکِ؞ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ طَٻِّتَ نٛ ٻٜ مبَرْدَتَ يٜىٰسُ، نغَمْ اٜ ٻٜ کُلَ يِمْٻٜ؞ سٜيْ شٜيْطَنْ نَتِّ ٻٜرْندٜ يَحُودَ بِعٜتٜىٰطٛ اِسْکَرِيٛوتِ، غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ؞ سٜيْ اٛ يَحِ تٛ مَوْٻٜ اَرْدِيٻٜ دِينَ اٜ مَوْٻٜ اَرْدِيٻٜ تَادِيٻٜ وُرٛ شٜنِينغٛ، اٛ مٜدِّ اٜ مَٻّٜ دٛوْ نٛ اٛ حٛکِّتِرْتَ يٜىٰسُ ندٜرْ جُوطٜ مَٻّٜ؞ ٻٜ نَنِ بٜلْطُمْ طُطُّمْ، ٻٜ نغَطِ اَلْکَوَلْ حٛکُّکِمٛ شٜىٰدٜ؞ کَنْکٛ بٛو اٛ جَٻِ، اٛ فُطِّ طَٻُّتُکِ لَاوٛلْ نٛ اٛ حٛکِّتِرْتَ يٜىٰسُ ندٜرْ جُوطٜ مَٻّٜ؞ سٜيْ ݧَلْندٜ وَرِ ندٜ حُمْتٛ بُرٛودِ طُمْ وَلَا پُوفِنِرْطُمْ ندٜ طُمْ حِرْسَتَ کَرٛورِ حُمْتٛ سَکِّنْکِ؞ نغَمْ نٛنْ يٜىٰسُ لِلِ بِيتُرُسْ اٜ يَحَيَ وِعِٻٜ، «نجَحٜىٰ شِرْيَنٜىٰعٜنْ کٛو طُمٜ نغَمْ ݧَامٜنْ حُمْتٛ سَکِّنْکِ؞» ٻٜ پَمِمٛ ٻٜ مبِعِ، «تٛيٜ نغِطَّا مِنْ نجَحَ مِنْ شِرْيٛوطُمْ؟» اٛ وِعِٻٜ، «رَطُّمْ، اٜ نَتُّکِ مٛوطٛنْ غَرِيرِ، اٛنْ کَوْرَيْ اٜ غٛطّٛ اٜ مٛ رٛنْدِي پٛوغِرْدٜ ندِيَمْ؞ تٛکّٜىٰمٛ يَاکِ وُرٛ نغٛ اٛ نَتَّتَ، مبِعٛنْ جٛومُ وُرٛ نغٛنْ، ‹مٛودِبّٛ وِعِي مِنْ پَمُمَا: «تٛيٜ سُودُ ندُ ݧَامَيْمِ ݧَمْندُ حُمْتٛ سَکِّنْکِ اٜ تٛکُّٻٜيَمْ؟» › اٛ حٛلَّيْعٛنْ سُودُ ندُ دٛوْ، مَوْندُ مٛعِّنَاندُ؞ شِرْيَنٜىٰعٜنْ کٛو طُمٜ طٛنْ نغَمْ ݧَامٜنْ ݧَمْندُ حُمْتٛ سَکِّنْکِ؞» سٜيْ ٻٜ نجَحِ ٻٜ تَوِ کٛو طُمٜ نٛ يٜىٰسُ وِعِٻٜ، سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞ ندٜ شَرٜلْ وَطِ، يٜىٰسُ اٜ تٛکُّٻٜمٛ سَڤّٛ اٜ طِطٛ نجٛوطِي نغَمْ ݧَامَ؞ سٜيْ اٛ وِعِٻٜ، «مِ حَاٻِي ݧَمْدُکِ ݧَمْندُ حُمْتٛ سَکِّنْکِ ندُعُ اٜ مٛوطٛنْ کٛ مِ تٛرّٜىٰ؞ نغَمْ اٜ مِ وِعَعٛنْ، مِ فُطِّتَتَا ݧَامُکِ ݧَمْندُ حُمْتٛ سَکِّنْکِ سٜيْ تٛ مَعَنَ مَاجُمْ حٜىٰوِي ندٜرْ لَامُ اَللَّه؞» سٜيْ اٛ حٛشِّ اِنَبٛجَمْ ندٜرْ جَرْدُغٜلْ، اٛ يٜتِّ اَللَّه، اٛ وِعِ، «نجَٻٜىٰ نغٜعٜلْ شٜنْدٛنْ اِنَبٛجَمْ طَمْ حَکُّندٜ مٛوطٛنْ؞ نغَمْ اٜ مِ وِعَعٛنْ، مِ فُطِّتَتَا يَرُکِ ندِيَمْ اِنَبٛوجٜ نَا لَامُ اَللَّه وَرٛيِي؞» ندٜنْ اٛ حٛشِّ بُرٛودِ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٜ مٛ وِعَ، «طُعُمْ طُمْ ٻَنْدُ اَمْ، کٛکَّاندُ نغَمْ مٛوطٛنْ؞ نغَطٜىٰ کَ وَطُکِ نٛنْ نغَمْ سِفْتٛرْکِيَمْ؞» نٛنْ مَا، غَطَ ٻٜ کِرْتَکٜ، اٛ حٛشِّ جَرْدُغٜلْ ندِيَمْ اِنَبٛجَمْ، اٛ وِعِ، «طَعَمْ وٛنِ اَلْکَوَلْ کٜسَلْ تَبِّتَيْنغَلْ اٜ پِيپَمْ اَمْ ندُفٜتٜىٰطَمْ نغَمْ مٛوطٛنْ؞ «اَمَّا، رَطُّمْ، کٛکِّتِرَيْطٛيَمْ اٜ ݧَمْدَ اٜ اَمْ طٛعٛ؞ نغَمْ ٻِي نٜطّٛ مَايَيْ نٛنْ نٛ اَللَّه سُٻِ، اَمَّا کٛکِّتِرَيْطٛمٛ وٛنِي!» تٛکُّٻٜمٛ ڤُطِّ پَمْپَمْتِرْکِ حَکُّندٜ مَٻّٜ، کٛو طُمْ مٛيٜ ندٜرْ مَٻّٜ وَطَتَ فِي طُعُمْ؞ کَدِمَا غٜدِّ اُمِّي حَکُّندٜ مَٻّٜ دٛوْ مٛيٜ ندٜرْ مَٻّٜ وٛنِ مَوْطٛ؞ يٜىٰسُ وِعِٻٜ، «لَامِيٻٜ يِمْٻٜ نَاع يَحُودَنْکٛعٜنْ اٜ کٛلَّ يِمْٻٜ مَٻّٜ لَامُ سٜمْبٜ، فُو اٜ نٛنْ اٜ ٻٜ نٛدِّرَ کٛعٜ مَٻّٜ وَلّٛوٻٜ يِمْٻٜ؞ اَمَّا اٛنٛنْ، تٛع اٛنْ نغَطُ نٛنْ؞ سٜيْ ٻُرْطٛ مَنْغُ ندٜرْ مٛوطٛنْ وَرْتَ بٛ ڤَمَرٛ، ندٜنْ اَرْدِيطٛ وَرْتَ بٛ مَشُّطٛ؞ مٛيٜ ٻُرِ مَنْغُ، جٛوطِيطٛ نغَمْ ݧَامَ کٛو غَدّٛووٛ ݧَمْندُ؟ اَيْ اٛنْ طٛنْ جٛوطِيطٛ وٛنِ مَوْطٛ؞ اَمَّا، اٜ مِ طٛنْ حَکُّندٜ مٛوطٛنْ بٛ مَشُّطٛ؞ «اٛنٛنْ نغٛنِ دَرٛدِيٻٜ اٜ اَمْ اٜ غٛونغَ ندٜرْ تٛرَّ کَ نجَرُمِ؞ نٛ ݧَاکٛ اَمْ مٛ دٛوْ حٛکِّرِيَمْ لَامُ، نٛنْ مِنْ مَا، مِ حٛکِّيعٛنْ لَامُ ݧَمْدٛنْ اٜ اَمْ نجَرْدٛنْ اٜ اَمْ ندٜرْ لَامُ اَمْ، ندٜنْ نجٛوطٛوطٛنْ دٛوْ جٛوطٛرْلٜ لَامُ، اٛنْ لَامٛو لٜݧِ اِسْرَاعِيلَ سَڤّٛ اٜ طِطِ؞ «سِيمَنْ، سِيمَنْ، رَطُّمْ شٜيْطَنْ پَمِي لَاوٛلْ فٛوندَعٛنْ، بٛو اٛ حٛکَّامَ؞ اٜ مٛ يِطِ اٛ سٜطَعٛنْ نٛ طُمْ سٜطِرْتَ اَلْکَمَارِ اٜ ݧَاندٜ؞ اَمَّا مِ وَطَنِيمَ دٛعَارٜ، سِيمَنْ، نغَمْ تٛع اَلَا حٛولَاکِيَمْ؞ اَنْ بٛو، تَا وَرْتِي تٛ اَمْ، شٜمْبِطِنَا بَنْدِرَاٻٜ مَاطَ؞» اَمَّا بِيتُرُسْ وِعِمٛ، «مٛودِبّٛ، اٜ مِ سِرْيِي يَادُکِ اٜ مَاطَ سُودُ شُرَلْ، حَا اٜ مَيْدٜ؞» يٜىٰسُ وِعِ، «اٜ مِ وِعُمَا، بِيتُرُسْ، حَنْدٜ کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞» سٜيْ يٜىٰسُ پَمِٻٜ وِعِ، «شَرٜلْ کٛ لِلْمِعٛنْ مبِيمِعٛنْ تٛع اٛنْ نجَادُ اٜ شٜىٰدٜ، تٛع اٛنْ نجَادُ اٜ جَکَارٜ کٛو ڤَطٜ کٛيْطٜ طِطِ، اٜ وٛودِ کٛ ندُلُّطٛنْ؟» ٻٜ مبِعِ، «وَلَا؞» اٛ وِعِٻٜ، «اَمَّا جٛونِ، غٛودُطٛ شٜىٰدٜ اٜ جَکَارٜ، حٛشَّ؞ مٛ وَلَا کَافَحِ، سٛورَ شُدَّارِ مُوطُمْ سٛودَ غٛعٛتِ؞ اٜ مِ وِعَعٛنْ، اَايَارٜ ندٜعٜ دٛولٜ حٜىٰوَ دٛوْ اَمْ بِعُندٜ، ‹طُمْ حٛشَّيْمٛ بٛ کَلُّطٛ،› نغَمْ کٛ وِنْدَا دٛوْ اَمْ ٻَدَکٜ حٜىٰوُکِ؞» تٛکُّٻٜمٛ مبِعِ، «مٛودِبّٛ، رَا کَافَاجٜ طِطِ؞» اٛ وِعِٻٜ، «طُمْ حٜپِي نٛنْ؞» يٜىٰسُ وُرْتِي، يَحِ حٛشّٜىٰرٜ ندٜ لٜطّٜ جَيْتُنْ نٛ اٛ وٛووِ، تٛکُّٻٜمٛ مَا اٜ تٛکِّمٛ؞ ندٜ ٻٜ نجٛتِّي وِغٜىٰرٜ ندٜنْ، اٛ وِعِٻٜ، «نغَطٜىٰ دٛعَارٜ تٛع نجَحٛنْ تٛ نغَطٛتٛنْ حَکّٜ؞» يٜىٰسُ حَکِّتِي کَنُمْ تَنْ کٛ وَطَتَ حُبَاکِ حَيْرٜ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ، «ݧَاکٛ اَمْ مٛ دٛوْ، تَا جَٻِي، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ، نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞» سٜيْ مَلَاعِکَاجٛ پِوٛيِ دَغَ دٛوْ وَنْغَنِمٛ سٜمْبِطِنِمٛ؞ اٜ مٛ ندٜرْ تٛرَّ کَلُّکَ، نغَمْ نٛنْ اٛ ٻٜيْدِ وَطُکِ دٛعَارٜ؞ اَسَوْرٜ مَاکٛ وَرْتِ بٛ پِيپَمْ اٜ سِمْتَ اٜ لٜيْدِ؞ ندٜ اٛ يٛتِّنِ دٛعَارٜ، سٜيْ اٛ سٛعِّي تٛ ٻٜنْ طٛنْ تٛکُّٻٜمٛ، اٛ تَوِ اٜ ٻٜ طَانِي نغَمْ وَنَّارٜ وَطِ ٻٜ شٛمِي؞ اٛ وِعِٻٜ، «نغَمْ طُمٜ طَانٛتٛوطٛنْ؟ اُمّٜىٰ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞» يٜىٰسُ اٜ مٜتَ، سٜيْ يِمْٻٜ طُطْٻٜ نغَرِ؞ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ اٜ مٛ اَرْدِيٻٜ؞ يَحُودَ ٻَدِّي يٜىٰسُ نغَمْ حٛوْنَمٛ؞ يٜىٰسُ وِعِمٛ، «يَحُودَ، اَ حٛکِّتِرَيْ ٻِي نٜطّٛ اٜ حٛوْنُکِ حِغَاکُ؟» ندٜ تٛکُّٻٜ يٜىٰسُ نغِعِ کٛ وَطَتَ، ٻٜ مبِعِمٛ، «مٛودِبّٛ، مِنْ ڤٜعِّرَٻٜ کَافَاجٜ؟» غٛعٛتٛ مَٻّٜ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ ݧَامٛ؞ اَمَّا يٜىٰسُ وِعِ، «اَلٜىٰ! تٛع اٛنْ ٻٜيْدُ!» يٜىٰسُ مٜىٰمِ نٛوْرُ نٜطّٛ اٛنْ، يَمْطِتِنِمٛ؞ سٜيْ يٜىٰسُ وِعِ مَوْٻٜ، اٜ مَوْٻٜ اَرْدِيٻٜ دِينَ، اٜ مَوْٻٜ تَادِيٻٜ وُرٛ شٜنِينغٛ غَرٛيْٻٜ نَنْغُکِمٛ، «اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ مِ غُجّٛ شَلٛرْطٛ؟ کٛو ندٜيٜ ݧَلْندٜ اٜ مِ وٛنْدِ اٜ مٛوطٛنْ ندٜرْ وُرٛ شٜنِينغٛ، اٛنْ نَنْغَايِيَمْ؞ اَمَّا جٛونِ طُمْ شَرٜلْ مٛوطٛنْ، اٜ لَامُ ݧِوْرٜ؞» سٜيْ ٻٜ نَنْغِ يٜىٰسُ، ٻٜ ندِلِّدِ اٜ مَاکٛ، ٻٜ نجَارِمٛ وُرٛ مَوْطٛ مَوْٻٜ اَرْدِيٻٜ دِينَ؞ بِيتُرُسْ بٛو اٜ وٛطِّتِ اٜ تٛکِّرِٻٜ غَطَ؞ ندٜنْ ٻٜ کُٻِّ حِيتٜ شَکَ وُرٛ، ٻٜ نجٛوطِي، بِيتُرُسْ مَا سٜيْ جٛوطِي ندٜرْ مَٻّٜ؞ سٜيْ غٛطّٛ کٛرْطٛ يِعِمٛ اٜ مٛ جٛوطِي اٜ مٛ اِرْفٛو؞ کٛرْطٛ اٛنْ بٛو سُتِيمٛ وِعِ، «نٜطّٛ اٛعٛ مَا اٜ وٛنْدِ اٜ يٜىٰسُ؞» اَمَّا بِيتُرُسْ يٜدِّ، وِعِ، «مِ اَنْدَامٛ؞» غَطَ طٛنْ سٜطَّ غٛطّٛ يِعِمٛ وِعِ، «اَنْ مَا، اَ غٛعٛتٛ ندٜرْ تٛکُّٻٜمٛ؞» اَمَّا بِيتُرُسْ وِعِ، «حِغٛ، نَاع مِ تٛکُّطٛمٛ!» ندٜ يَوْتِي سٜطَّ، غٛطّٛ مَا وِعِ، «سٜکٛ وَلَا نٜطّٛ اٛعٛ مَا اٜ وٛنْدِ اٜ يٜىٰسُ، نغَمْ کَنْکٛ مَا اٛ غَلِلَنْکٜىٰجٛ؞» بِيتُرُسْ وِعِمٛ، «حِغٛ، مِ اَنْدَا کٛ مبِعَتَا!» طٛنْ اٜ طٛنْ اٜ مٛ ندٜرْ مٜتُکِ، نجَکَرْدِ حَنِ؞ سٜيْ يٜىٰسُ يٜىٰپِي رَارِ بِيتُرُسْ؞ سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، «حَنْدٜ کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞» سٜيْ اٛ وُرْتِي يَاسِ اٛ وٛيِ بٛجِّ نَوْطِ؞ سٜيْ يِمْٻٜ جٛغِيٻٜ يٜىٰسُ فُطِّ جُکُّتُکِمٛ، اٜ ٻٜ ڤِيَمٛ؞ ٻٜ شُدِّ غِتٜ مَاکٛ ٻٜ نغَطِ کَ پَمُکِمٛ ٻٜ مبِعِ، «وَطُ اَنَّبَاکُ! مٛيٜ فِيُمَا؟» ٻٜ کُطِرِمٛ حَالَاجِ نَوْطِ؞ ندٜ وٜىٰتِ، کَوْتَلْ مَوْٻٜ کَوْرِتِ اٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ؞ يٜىٰسُ وَدَّا يٜىٰسٛ مَٻّٜ؞ ٻٜ مبِعِمٛ، «تٛ اَنْ وٛنِ اَلْمَسِيحُ، وِعُمِنْکَ؞» اَمَّا يٜىٰسُ وِعِٻٜ، «تٛ مِ وِعِيعٛنْکَ، اٛنْ نجَٻَتَا؞ تٛ مِ پَمِيعٛنْ بٛو، اٛنْ نٛوتَنْتَاکٛيَمْ؞ اَمَّا دَغَ جٛونِ، ٻِي نٜطّٛ جٛوطٛتٛ اٜ جُنْغٛ ݧَامٛ نغٛ اَللَّه جٛومُ بَوْطٜ؞» ٻٜ فُو ٻٜ مبِعِ، «اَنْ، اَ ٻِطّٛ اَللَّه؟» اٛ وِعِٻٜ، «نٛنْ نٛ مبِيطٛنْ؞» ٻٜ مبِعِ، «اٜنْ نَنِيکَ اٜ حٛنْدُکٛ مَاکٛ جٛونِ؞ اٜ وٛودِ کٛ طَٻِّتٜتٜنْ کَدِنْ؟» سٜيْ حَوْرُتُٻٜ ٻٜنْ فُو اُمِّي، نجَارِمٛ يٜىٰسٛ بِلَاتُسْ، غٛمْنَاجٛ لٜيْدِ يَحُودِيَ؞ ٻٜ ڤُطِّ وُلَّاکِمٛ، اٜ ٻٜ مبِعَ، «مِنْ تَوِي نٜطّٛ اٛعٛ اٜ مَجِّنَ لٜݧٛلْ اَمِنْ؞ اٜ مٛ حَطَ طُمْ يٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، ندٜنْ اٜ مٛ وِعَ وَيْ کَنْکٛ وٛنِ اَلْمَسِيحُ، لَامِيطٛ؞» سٜيْ بِلَاتُسْ پَمِ يٜىٰسُ وِعِ، «اَنْ وٛنِ لَامِيطٛ يَحُودَنْکٛعٜنْ؟» يٜىٰسُ نٛوتِي وِعِمٛ، «اٜىٰ، اَ وِعِيکَ؞» بِلَاتُسْ وِعِ مَوْٻٜ اَرْدِيٻٜ دِينَ اٜ حَوْرُتُٻٜ ٻٜنْ، «مِ يِعَايِ غٛطُّمْ کَلُّطُمْ طُمْ نَنْغِرْطٛنْ نٜطّٛ اٛعٛ؞» اَمَّا ٻٜ شَلِي کٛ اٛ وِعِ، ٻٜ نغَطِ کَ مٜتُکِ دٛوْ يٜىٰسُ اٜ سٜمْبٜ، اٜ ٻٜ مبِعَ، «کٛ اٛ اٜکِّتِنْتَ اٜ حَوْتَ يِمْٻٜ حَوْرٜ ندٜرْ لٜيْدِ يَحُودِيَ فُو؞ اٛ فُطِّي ندٜرْ لٜيْدِ غَلِيلِ، دَغَ تٛنْ حَا طٛعٛ؞» ندٜ بِلَاتُسْ نَنِ نٛنْ، اٛ پَمِ اٛ وِعِ، «اٛعٛ نٜطّٛ اٛ غَلِلَنْکٜىٰجٛ؟» ندٜ اٛ حٜٻْتِ يٜىٰسُ دَغَ لٜيْ لَامُ حِرُدُسْ پِوٛيِ، اٛ وَطِ طُمْ يَارِمٛ تٛ حِرُدُسْ، نغَمْ اٜ شَرٜلْ نغٜلْ حِرُدُسْ اٜ طٛنْ اٜ اُرُشَلِيمَ؞ ندٜ حِرُدُسْ يِعِ يٜىٰسُ، اٛ نَنِ بٜلْطُمْ طُطُّمْ، نغَمْ طُمْ نٜىٰٻِي اٜ مٛ يِطِ اٛ يِعَ يٜىٰسُ وَطِي غٛطُّمْ کَيْطِنِيطُمْ، نغَمْ کٛ اٛ نَنِ دٛوْ مَاکٛ؞ اٛ پَمِ يٜىٰسُ پَمْطٜ طُطّٜ، اَمَّا يٜىٰسُ وِعَايِمٛ غٛطُّمْ؞ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ ندَرِي طٛنْ اٜ مبِعَ اٜ سٜمْبٜ يٜىٰسُ وَطِي کٛ حَلِّ؞ سٜيْ حِرُدُسْ اٜ سٛوجِعٜنْ مُوطُمْ کُطِمٛ، نجُکِّتِمٛ، ندٜنْ حِرُدُسْ وَطِي طُمْ ٻٛرْنِمٛ کٛلْتٜ لَامِيطٛ، اٛ سٛعِّمٛ تٛ بِلَاتُسْ؞ اٜ ݧَلْندٜ ندٜنْ حِرُدُسْ اٜ بِلَاتُسْ ٻٜ نغَرْتِ حِغٛوٻٜ، نغَمْ کٛ فِي طُمْ وَطَ ٻٜ مبٜلْدَا؞ بِلَاتُسْ نٛدِّ مَوْٻٜ اَرْدِيٻٜ دِينَ، اٜ لَامِيٻٜ، اٜ يِمْٻٜ؞ اٛ وِعِٻٜ، «اٛنْ نغَدَّنِييَمْ نٜطّٛ اٛعٛ، اٛنْ مبِعِ اٜ مٛ مَجِّنَ يِمْٻٜ؞ مِ پَمِيمٛ يٜىٰسٛ مٛوطٛنْ، اَمَّا مِ يِعَايِ غٛطُّمْ طُمْ نَنْغِرْطٛنْمٛ؞ نٛنْ مَا حِرُدُسْ، نغَمْ اٛ سٛعّٛيِيمٛ تٛ مٜىٰطٜنْ؞ رَا، اٛ وَطَايِ غٛطُّمْ کٛ حَانِ طُمْ وَرَمٛ؞ نغَمْ نٛنْ، مِ وَطَيْ طُمْ فِيَمٛ، ندٜنْ مِ يٛوفَمٛ؞» [تٛو، ندٜنْ مَا کٛو ندٜيٜ حِتَاندٜ بِلَاتُسْ اٜ يٛوفَنَٻٜ کَٻَّاطٛ غٛعٛتٛ؞] اَمَّا ٻٜ فُو ٻٜ نغَطِ کَ وِعُکِ اٜ سٜمْبٜ، «وَرُ نٜطّٛ اٛعٛ؞ نجٛوفَنَامِنْ بَرَبَّسْ!» بَرَبَّسْ بٛو طُمْ غٛطّٛ مٛ طُمْ وَطِ ندٜرْ سُودُ شُرَلْ نغَمْ اٜ مٛ ندٜرْ يِمْٻٜ کَٻْدُٻٜ اٜ لَامُ ندٜرْ غَرِيرِ، کَدِنْ نغَمْ اٛ وَرِي غٛطّٛ؞ بِلَاتُسْ فُطِّتِ مٜتَنِٻٜ نغَمْ اٜ مٛ يِطِ يٛوفُکِ يٜىٰسُ؞ اَمَّا ٻٜ نغَطِ کَ وِعُکِ اٜ سٜمْبٜ، «وَرُمٛ! وَرُمٛ دٛوْ غَافَانغَلْ!» بِلَاتُسْ وِعِٻٜ تَتَٻُمْ، «نغَمْ طُمٜ؟ طُمٜ کٛ حَلِّ اٛ وَطِ؟ مِ يِعَايِ کٛ اٛ وَطِ کٛ حَانِ طُمْ وَرَمٛ؞ نغَمْ نٛنْ، مِ فِيَيْمٛ، مِ يٛوفَمٛ؞» اَمَّا ٻٜ نغَطِ کَ وِعُکِ اٜ سٜمْبٜ، «وَرُمٛ دٛوْ غَافَانغَلْ!» بٛلِيطٜ مَٻّٜ شَلٛرِي بِلَاتُسْ؞ نغَمْ نٛنْ اٛ جَٻِ اٛ وَطَ کٛ ٻٜ مبِعِ؞ اٛ يٛوفَنِٻٜ نٜطّٛ مٛ ٻٜ نغِطِ اٛ يٛوفَنَٻٜ، غَطَاطٛ ندٜرْ سُودُ شُرَلْ نغَمْ وَرْحٛورٜ اٜ حَٻْدُکِ اٜ لَامُ؞ ندٜنْ اٛ وَطِ يٜىٰسُ ندٜرْ جُوطٜ مَٻّٜ نغَمْ ٻٜ نغَطَنَمٛ کٛ ٻٜ نغِطِ؞ اٜ ٻٜ اَرْدِنِ يٜىٰسُ، سٜيْ ٻٜ نَنْغِ سِيمَنْ سَايِرَنْکٜىٰجٛ پِوٛيْطٛ ندٜرْ لَدّٜ اٜ نَتّٛيَ غَرِيرِ ندِنْ؞ ٻٜ نجٛوَنِمٛ غَافَانغَلْ، ٻٜ نغَطِ اٛ تٛکِّرِ يٜىٰسُ غَطَ؞ يِمْٻٜ طُطْٻٜ تٛکِّمٛ، حَوْتِ اٜ وٛٻّٜ رٜوْٻٜ؞ رٜوْٻٜ ٻٜنْ اٜ ندٛوندِي جُوطٜ مُعّٜنْ، اٜ ٻٜ مبٛيَ نغَمْ مَاکٛ؞ اَمَّا يٜىٰسُ يٜىٰپِيٻٜ وِعِ، «رٜوْٻٜ اُرُشَلِيمَ، اَلٜىٰ وٛيَنْکِيَمْ، مبٛيَنٜىٰ کٛعٜ مٛوطٛنْ اٜ ٻِٻّٜ مٛوطٛنْ؞ نغَمْ بَلْطٜ نغَرٛيَيْ طٜ يِمْٻٜ مبِعَتَ، ‹ٻٜ بَرْکِطِنَاٻٜ رٜوْٻٜ ٻٜ ندَݧَتَا، ٻٜ دٜىٰطِ مُعّٜنْ مٜىٰطَايِ سَاوُکِ ٻِطّٛ، ٻٜ اٜنْطِ مُعّٜنْ مٜىٰطَايِ مُسِنٜىٰکِ؞› اٜ شَرٜلْ نغٜلْ يِمْٻٜ مبِعَيْ کٛشّٜىٰجٜ، ‹نجَنٛيٜىٰ دٛوْ اَمِنْ!› ٻٜ مبِعَ پٛولٜ ‹شُوطٜىٰمِنْ!› تٛ يِمْٻٜ نغَطِي فِي طُعُمْ شَرٜلْ نغٜلْ لٜکِّ وٛنِ کٜشِّ، کٛ وَطَتَ تٛ کِ يٛورِي؟» طُمْ اَرْدِنِ يٜىٰسُ اٜ وُيْٻٜ طِطٛ، نغَمْ ٻٜ مبَرٛيَٻٜ؞ ٻٜ نغَرِ تٛ وٛنْدٜ وِغٜىٰرٜ بِعٜتٜىٰندٜ «پِپَلْ حٛورٜ؞» طٛنْ ٻٜ ٻِلِمٛ، ٻٜ ڤِيَنِمٛ کُوسَاجٜ دٛوْ غَافَانغَلْ، کَنْکٛ اٜ وُيْٻٜ طِطٛ ٻٜنْ، غٛعٛتٛ اٜ جُنْغٛ مَاکٛ ݧَامٛ، غٛعٛتٛ اٜ جُنْغٛ مَاکٛ نَنٛ؞ يٜىٰسُ وِعِ، «ݧَاکٛ اَمْ مٛ دٛوْ، يَافَنَ بَرٛوٻٜيَمْ نغَمْ ٻٜ اَنْدَا کٛ ٻٜ نغَطَتَ؞» اَمَّا سٛوجِعٜنْ رٛومَ نغَطِ شَاشَ نغَمْ ٻٜ شٜنْدَ کٛلْتٜ مَاکٛ؞ يِمْٻٜ ندَرِي اٜ ندَارَ، اَرْدِيٻٜ نجُکِّتِمٛ اٜ مبِعَ، «اٛ حِسْنِي وٛٻّٜ؞ تٛ کَنْکٛ وٛنِ اَلْمَسِيحُ مٛ اَللَّه سُٻِ، اَلْ اٛ حِسْنَ حٛورٜ مَاکٛ؞» سٛوجِعٜنْ مَا نغَطِ کَ جُکُّتُکِمٛ، ٻٜ پٜىٰݝِ حَادٜ مَاکٛ، ٻٜ کٛکِّمٛ ندِيَمْ اِنَبٛجَمْ لَمُّطَمْ، ٻٜ مبِعِمٛ، «تٛ اَنْ وٛنِ لَامِيطٛ يَحُودَنْکٛعٜنْ، حِسْنُ حٛورٜ مَاطَ!» کَدِمَا دٛوْ حٛورٜ غَافَانغَلْ نغَلْ طُمْ تَکِّ اَلّٛوَلْ؞ طُمْ وِنْدِ دٛوْ مَاغَلْ کٛ طُمْ وُلّٛرِيمٛ وِعُکِ، «اٛعٛ وٛنِ لَامِيطٛ يَحُودَنْکٛعٜنْ؞» غٛعٛتٛ ندٜرْ وُيْٻٜ طِطٛ ٻِلْدَاٻٜ اٜ مَاکٛ وَطَنِمٛ حَالَ نَوْکَ، وِعِ، «نَاع اَنْ وٛنِ اَلْمَسِيحُ؟ حِسْنُ حٛورٜ مَاطَ، ندٜنْ کِسْنَامِنْ، مِنٛنْ مَا!» اَمَّا غُجّٛ غٛعٛتٛ اٛنْ حَلْٻَنِمٛ، وِعِ، «اَ حُلَتَا اَللَّه، اَنْ جَرْدٛووٛ تٛرَّ غٛعٛ اٜ مَاکٛ؟ اٜنٜنْ اٜنْ کٜٻِي کٛ حَانِ طُمْ وَطَنَعٜنْ، نغَمْ کٛ نغَطّٜنْ وٛوطَا؞ اَمَّا نٜطّٛ اٛعٛ، اٛ وَطَايِ غٛطُّمْ کٛ وٛوطَا؞» ندٜنْ اٛ وِعِ، «يٜىٰسُ، تَاع يٜجِّتَمْ شَرٜلْ نغٜلْ نَتُّطَا لَامُ مَاطَ؞» يٜىٰسُ وِعِمٛ، «اٜ مِ وِعُمَا غٛونغَ، حَنْدٜ اَ وٛنْدَيْ اٜ اَمْ ندٜرْ وُرٛ اَللَّه؞» اٜ شَرٜلْ نغٜلْ طُمْ شَکَ ݧَلَوْمَ، اَمَّا سٜيْ ݧِوْرٜ مَٻِّ لٜيْدِ فُو حَا يَاکِ نجَمْندِ تَتِ، ݧِوْرٜ سُدِّ نَانغٜ؞ سٜيْ وُدٜرٜ شٜنْدُندٜ سُودُ جٛومِرَاوٛ سٜىٰکِ طِطِ؞ يٜىٰسُ وِعِ اٜ سٜمْبٜ، «ݧَاکٛ اَمْ مٛ دٛوْ، مِ حٛکِّي يٛنْکِ اَمْ ندٜرْ جُنْغٛ مَاطَ!» ندٜ اٛ وِعِ نٛنْ، اٛ مَايِ؞ ندٜ مَوْطٛ سٛوجِعٜنْ اٛنْ يِعِ کٛ وَطِ، سٜيْ اٛ مَنْتِ اَللَّه، اٛ وِعِ، «غٛونغَ، نٜطّٛ اٛعٛ اٛ اَادِلِيجٛ!» ندٜ يِمْٻٜ فُو مٛٻْتِيٻٜ نغِعَ کٛ وَطَتَ نغِعِ نٛنْ، ٻٜ کٛوتِ اٜ ٻٜ ندٛوندِي جُوطٜ؞ اَمَّا اَنْدُٻٜمٛ فُو اٜ رٜوْٻٜ تٛکّٛيْٻٜمٛ دَغَ غَلِيلِ ندَرِي تٛ وٛطِّ اٜ ندَارَ کٛو طُمٜ؞ کَنْکٛ يَحِ تٛ بِلَاتُسْ، اٛ تٛرِي طُمْ حٛکَّمٛ ٻَنْدُ يٜىٰسُ؞ اٛ وَطِ طُمْ جِڤِّنِ ٻَنْدُ ندُنْ دَغَ دٛوْ غَافَانغَلْ، اٛ تَارِرِندُ وُدٜرٜ ندٜ شٜىٰدٜ؞ سٜيْ اٛ فُکِّنٛيِندُ ندٜرْ يٜنَاندٜ وَسَاندٜ ندٜرْ حَيْرٜ، طُمْ مٜىٰطَايِ وَطُکِ غٛطّٛ ندٜرْ مَيْرٜ؞ طُمْ ݧَلْندٜ سِرْيَاکِ، حٛرِي سٜطَّ طُمْ نَتَّ ݧَلْندٜ سِوْتَارٜ؞ رٜوْٻٜ غَرْدُٻٜ اٜ يٜىٰسُ دَغَ لٜيْدِ غَلِيلِ ٻٜ تٛکِّ يُسُفُ، ٻٜ نغِعِ يٜنَاندٜ ندٜنْ، اٜ نٛ طُمْ فُکِّنِرِ ٻَنْدُ مَاکٛ؞ سٜيْ ٻٜ شٛعِّي وُرٛ، ٻٜ مٛعِّنِ نٜبَّمْ اُرٛوجَمْ، اَمَّا ٻٜ شِوْتِي اٜ ݧَلْندٜ سِوْتَارٜ نٛ اَتَّوْرَ وِعِ؞ ݧَلْندٜ اَلَلْ سُبَکَ، رٜوْٻٜ ٻٜنْ کٛشِّ نٜبَّمْ اُرٛوجَمْ طَمْ ٻٜ مٛعِّنِ نغَمْ ٻٜ مٛيْتَنَ ٻَنْدُ مَاکٛ، ٻٜ نجَحِ يٜنَاندٜ ندٜنْ؞ ٻٜ تَوِ حَيْرٜ ندٜنْ تَلِّتَامَ دَغَ دَمُّغَلْ يٜنَاندٜ ندٜنْ؞ اَمَّا ندٜ ٻٜ نَتِّ، ٻٜ تَوَايِ ٻَنْدُ يٜىٰسُ؞ اٜ ٻٜ ندٜرْ وَنَّارٜ دٛوْ فِي طُمْ، سٜيْ بٛ مَپّٜرٜ ٻٜ نغِعِ وٛرْٻٜ طِطٛ اٜ ندَرِي حَادٜ مَٻّٜ؞ اٜ ٻٜ ٻٛرْنِي کٛلْتٜ دَنٜىٰجٜ تَرْ؞ کُلٛلْ نَنْغِٻٜ، سٜيْ ٻٜ نجَنِ ٻٜ کِڤِّي؞ وٛرْٻٜ ٻٜنْ مبِعِٻٜ، «نغَمْ طُمٜ طَٻِّتٛتٛنْ مٛ يٛنْکِ ندٜرْ مَيْٻٜ؟ اٛ وَلَا طٛعٛ؞ طُمْ اُمِّنِيمٛ دَغَ مَيْدٜ! شِفْتٛرٜىٰ کٛ اٛ وِعُنٛوعٛنْ کٛ اٛ وٛنْدُنٛو اٜ مٛوطٛنْ ندٜرْ لٜيْدِ غَلِيلِ؞ اٛ وِعِي، ‹دٛولٜ ٻِي نٜطّٛ حٛکِّتِرٜىٰ ندٜرْ جُوطٜ کَلُّٻٜ، اٛ وَرٜىٰ دٛوْ غَافَانغَلْ، ندٜنْ اٛ اُمّٛو ندٜرْ ݧَلْندٜ تَتَوْرٜ؞› » سٜيْ ٻٜ شِفْتٛرِ کٛ اٛ وِعُنٛوٻٜ؞ ٻٜ نغَرْتٛيِ دَغَ يٜنَاندٜ ندٜنْ، ٻٜ مبِعِ تٛکُّٻٜ يٜىٰسُ سَڤّٛ اٜ غٛعٛ، حَا اٜ وٛٻّٜ، کٛ وَطِ فُو؞ رٜوْٻٜ ٻٜنْ نغٛنِ مَرْيَامَ پِوٛيْطٛ مَغَدَلَ، اٜ يٛوَانَ، اٜ مَرْيَامَ مَدُوجٛ يَاکُبُ، اٜ وٛٻّٜ رٜوْٻٜ؞ اَمَّا تٛکُّٻٜ يٜىٰسُ نجَٻَايِ کٛ رٜوْٻٜ ٻٜنْ مبِعِٻٜ، ٻٜ نغَرْتِرِ حَالَ کَنْ بٛ تَالٛلْ؞ بِيتُرُسْ بٛو اُمِّي، دٛغِّ يَحِ يٜنَاندٜ ندٜنْ، يُرْنِيندٜ، غُدٜ طٜ طُمْ تَارِرْنٛو ٻَنْدُ يٜىٰسُ تَنْ اٛ يِعِ؞ اٛ سٛعِّي اٜ مٛ پَمَ حٛورٜ مَاکٛ کٛ وَطِ؞ اٜ ݧَلْندٜ ندٜنْ تٛکُّٻٜ يٜىٰسُ طِطٛ اٜ نجَحَ وٛنْغٜلْ غَرِيٜلْ بِعٜتٜىٰنغٜلْ اِمَاوُسْ؞ حَکُّندٜ غَرِيٜلْ نغٜلْ اٜ اُرُشَلِيمَ وَطِي مِلْ جٛوٜىٰطِطِ؞ اٜ ٻٜ نجَحَ اٜ ٻٜ مٜتَ حَکُّندٜ مَٻّٜ دٛوْ کٛ وَطِ فُو؞ اٜ ٻٜ نغٜوْتَ دٛوْ فِي طُمْ حَکُّندٜ مَٻّٜ، سٜيْ يٜىٰسُ اٜ حٛورٜ مُوطُمْ حٜوْتِيٻٜ وَطِ کَ يَادُکِ اٜ مَٻّٜ؞ اَمَّا اَللَّه وَطِ ٻٜ اَنْدِتَايِمٛ؞ يٜىٰسُ پَمِٻٜ وِعِ، «دٛوْ طُمٜ نغٜوْتٛتٛنْ ندٜرْ يَادُ مٛوطٛنْ؟» سٜيْ ٻٜ ندَرِي، ٻٜ مبٛنِّ غٜىٰشٜ؞ غٛعٛتٛ مَٻّٜ بِعٜتٜىٰطٛ کِلِيٛوبَسْ وِعِ، «اَنْ تَنْ وٛنِ کٛطٛ ندٜرْ اُرُشَلِيمَ مٛ اَنْدَا کٛ وَطِ تٛنْ ندٜرْ بَلْطٜ طٜعٜ؟» اٛ وِعِ، «طُمٜ وَطِ؟» ٻٜ مبِعِ، «کٛ حٜٻِ يٜىٰسُ نَجَرَنْکٜىٰجٛ؞ اٛ اَنَّبِيجٛ غٛودُطٛ بَوْطٜ ندٜرْ بٛلِيطٜ اٜ کُوطٜ يٜىٰسٛ اَللَّه اٜ يِمْٻٜ فُو؞ مَوْٻٜ اَرْدِيٻٜ دِينَ اٜ اَرْدِيٻٜ مٜىٰطٜنْ نغَطِمٛ ندٜرْ جُوطٜ لَامُ نغَمْ طُمْ وَرَمٛ، ندٜنْ ٻٜ مبَرِمٛ دٛوْ غَافَانغَلْ؞ اَمَّا اٜ مِنْ کَمِّنٛو کَنْکٛ وٛنِ رِمْطِنَيْطٛ يِمْٻٜ اِسْرَاعِيلَ؞ کٛ ٻُرِ نٛنْ مَا، حَنْدٜ وٛنِ ݧَلْندٜ تَتَوْرٜ کٛ طُعُمْ فِي فُو وَطِ؞ کَدِمَا وٛٻّٜ رٜوْٻٜ ندٜرْ اَمِنْ کَيْطِنِيمِنْ؞ ٻٜ نجَحِ تٛ يٜنَاندٜ ندٜنْ حَنْدٜ سُبَکَ، اَمَّا ٻٜ تَوَايِ ٻَنْدُ مَاکٛ؞ سٜيْ ٻٜ نغَرْتِ ٻٜ مبِعِمِنْ ٻٜ نغِعِي مَلَاعِکَعٜنْ وِعُٻٜ يٜىٰسُ اٜ وٛودِ يٛنْکِ؞ وٛٻّٜ ٻٜ مِنْ نغٛنْدِ نجَحِ تٛ يٜنَاندٜ ندٜنْ، ٻٜ تَوِندٜ نٛ رٜوْٻٜ ٻٜنْ مبِعِ، اَمَّا کَنْکٛ ٻٜ نغِعَايِمٛ؞» يٜىٰسُ وِعِٻٜ، «اٛنْ نغَلَا فَامُ، ٻٜرْطٜ مٛوطٛنْ اٜ نٜىٰٻَ نجَٻَايِ کٛو طُمٜ کٛ اَنَّبٛعٜنْ مبِعُنٛو! اٛنْ اَنْدَا دٛولٜ اَلْمَسِيحُ يَرَ تٛرَّ نِحِ ندٜنْ نَتَّ تٜدُّنغَلْ مُوطُمْ؟» ندٜنْ اٛ فَمْتِنِٻٜ کٛ دٜفْتٜرٜ وِعِ وَطَيْ دٛوْ مَاکٛ، دَغَ اَتَّوْرَ يَاکِ دٜفْتٜ اَنَّبٛعٜنْ فُو؞ ندٜ ٻٜ ٻَدِي غَرِيٜلْ نغٜلْ ٻٜ نجَحَتَ، سٜيْ يٜىٰسُ وَطِ بٛ پَٻّٛتٛ؞ اَمَّا ٻٜ تٛرِيمٛ ٻٜ مبِعِ، «يَالُ مبَالَا تٛ اَمِنْ، نغَمْ نَانغٜ حِيرِي، جٜمَّ وَطِي؞» سٜيْ اٛ يَالِ نغَمْ اٛ وَالَ؞ شَرٜلْ کٛ ٻٜ ݧَامَتَ ݧَمْندُ، اٛ حٛشِّ بُرٛودِ، اٛ يٜتِّ اَللَّه، اٛ سٜنْدِطُمْ، اٛ حٛکِّٻٜ؞ سٜيْ اَللَّه مَٻِّتِ غِتٜ مَٻّٜ، ٻٜ اَنْدِتِمٛ؞ طٛنْ اٜ طٛنْ اٛ مَجِّتِ يٜىٰسٛ مَٻّٜ؞ سٜيْ ٻٜ مبِعِ حَکُّندٜ مَٻّٜ، «اٜنْ نَنِي بٜلْطُمْ ندٜرْ ٻٜرْطٜ مٜىٰطٜنْ کٛ اٛ مٜتَنَيْنٛوعٜنْ دٛوْ طَتَلْ اٜ مٛ فَمْتِنَعٜنْ دٜفْتٜرٜ شٜنِيندٜ؞» ٻٜ اُمِّي طٛنْ اٜ طٛنْ ٻٜ شٛعِّي اُرُشَلِيمَ؞ ٻٜ تَوِ تٛکُّٻٜ يٜىٰسُ سَڤّٛ اٜ غٛعٛ اٜ وٛنْدُٻٜ اٜ مَٻّٜ اٜ کَوْرِتِ؞ حَوْرُتُٻٜ ٻٜنْ مبِعِ طِطٛ ٻٜنْ، «غٛونغَ، مٛودِبّٛ اُمَّکٜ؞ اٛ وَنْغَنِي سِيمَنْ!» سٜيْ طِطٛ ٻٜنْ مَا مبِعِٻٜ کٛ وَطِ دٛوْ طَتَلْ اٜ نٛ ٻٜ اَنْدِتِرِمٛ ندٜ اٛ سٜنْدِ بُرٛودِ؞ اٜ ٻٜ ندٜرْ مٜتُکِ حَالَ کَنْ، سٜيْ طٛنْ اٜ طٛنْ يٜىٰسُ اٜ حٛورٜ مُوطُمْ وَنْغِ دَرِي شَکَ مَٻّٜ؞ اٛ وِعِٻٜ، «اٜ مِ سِلْمِنٛو؞ جَمْ وٛنْدَ اٜ مٛوطٛنْ؞» ٻٜرْطٜ مَٻّٜ تَپِ، ٻٜ کَمِّي غِنّٛلْ ٻٜ نغِعِ؞ اَمَّا اٛ وِعِٻٜ، «طُمٜ وَنِّعٛنْ؟ نغَمْ طُمٜ نغَطٛتٛنْ سٜکٛ ندٜرْ ٻٜرْطٜ مٛوطٛنْ؟ ندَارٜىٰ جُوطٜ اَمْ اٜ کٛيْطٜ اَمْ، طُمْ مِنْ اٜ حٛورٜ اَمْ؞ مٜىٰمٜىٰيَمْ نَنٛنْ، اَيْ غِنّٛلْ وَلَا ٻَنْدُ اٜ پِعٜ نٛ نغِيرُطٛنْيَمْ؞» ندٜ اٛ وِعِ نٛنْ، اٛ حٛلِّٻٜ جُوطٜ مَاکٛ اٜ کٛيْطٜ مَاکٛ؞ ٻٜ نجَٻَايِ طُمْ غٛونغَ نغَمْ بٜلْطُمْ اٜ حَيْطِنْکِ؞ سٜيْ اٛ وِعِٻٜ، «اٛنْ نغٛودِ غٛطُّمْ کٛ ݧَامٜتٜىٰ طٛعٛ؟» سٜيْ ٻٜ کٛکِّمٛ تَيْرٜ لِنْغُ نجُطَانغُ، اٛ حٛشِّنغُ اٛ ݧَامِ يٜىٰسٛ مَٻّٜ؞ ندٜنْ اٛ وِعِٻٜ، «طُعُمْ وٛنِ کٛ مبِينٛومِعٛنْ شَرٜلْ کٛ نغٛنْدُنٛومِ اٜ مٛوطٛنْ: کٛو طُمٜ کٛ وِنْدَا ندٜرْ اَتَّوْرَ، اٜ دٜفْتٜ اَنَّبٛعٜنْ، اٜ جَبُورَ دٛوْ اَمْ دٛولٜ طُمْ حٜىٰوَ؞» ندٜنْ اٛ مَٻِّتِ فَامُ مَٻّٜ نغَمْ ٻٜ ڤَامَ دٜفْتٜرٜ شٜنِيندٜ؞ اٛ وِعِٻٜ، «اَايَارٜ وِعِي: اَلْمَسِيحُ تٛرّٛتٛ، غَطَ بَلْطٜ تَتِ اٛ اُمّٛتٛ دَغَ مَيْدٜ؞ ندٜرْ اِنْدٜ مَاکٛ طُمْ وَعَجِنَيْ تُوبُکِ اٜ يَافَنٜىٰکِ حَکّٜ يَاکِ ندٜرْ لٜݧِ فُو؞ طُمْ فُطَّيْ دَغَ اُرُشَلِيمَ؞ اٛنٛنْ نغٛنِ اَنْدِنَيْٻٜ وٛٻّٜ فِي طُعُمْ؞ رَطُّمْ، مِ لِلْدٛيَيْعٛنْ رُوحُ اَللَّه نٛ ݧَاکٛ اَمْ وَطِ اَلْکَوَلْ؞ نجٛوطٜىٰ ندٜرْ اُرُشَلِيمَ نَا رُوحُ اَللَّه جِڤّٛيَکٜ دٛوْ مٛوطٛنْ حٛکِّيعٛنْ بَوْطٜ؞» يٜىٰسُ اَرْدِيٻٜ ٻٜ مبُرْتِي ندٜرْ اُرُشَلِيمَ يَاکِ وٛنْدٜ وِغٜىٰرٜ حَادٜ غَرِيرِ بٜتَنِ، اٛ پٜفْتِ جُوطٜ مَاکٛ اٛ بَرْکِطِنِٻٜ؞ اٜ مٛ ندٜرْ بَرْکِطِنْکِٻٜ، سٜيْ اٛ حٛشَّا يَاکِ دٛوْ؞ ٻٜ مَوْنِنِمٛ، ٻٜ شٛعِّي اُرُشَلِيمَ اٜ ٻٜ نَنَ بٜلْطُمْ طُطُّمْ؞ کٛو ندٜيٜ ݧَلْندٜ اٜ ٻٜ نجَحَ وُرٛ شٜنِينغٛ اٜ ٻٜ مَنْتَ اَللَّه؞ دَغَ کٛ دُونِيَارُ تَغٜىٰ بِعٜتٜىٰطٛ وٛلْدٜ اٜ طٛنْ، اٜ مٛ وٛنْدِ اٜ اَللَّه، ندٜنْ اٛ اَللَّه؞ دَغَ کٛ دُونِيَارُ تَغٜىٰ بِعٜتٜىٰطٛ وٛلْدٜ اٛنْ اٜ وٛنْدِ اٜ اَللَّه؞ اٛ تَغِي کٛو طُمٜ؞ وَلَا غٛطُّمْ ندٜرْ فُو کٛ تَغَا طُمْ اُمْ تَغِرَايِ لَاوٛلْ مَاکٛ؞ تٛ مَاکٛ يٛنْکِ پِوٛيِ، ندٜنْ يٛنْکِ کِنْ وٛنِ جَيْنغٛلْ يِمْٻٜ؞ جَيْنغٛلْ نغٛلْ اٜ وَطِ کَ يٜيْنَاکِ ندٜرْ ݧِوْرٜ، ݧِوْرٜ بٛو وَاوَايِ جَالَاکِنغٛلْ؞ اٜ وٛودِ غٛطّٛ نٜطّٛ مٛ اَللَّه لِلٛيِ بِعٜتٜىٰطٛ يَحَيَ؞ اٛ وَرِي اٛ اَنْدِنَ يِمْٻٜ حَبَرُ جَيْنغٛلْ نغٛلْ، نغَمْ اٜ لَاوٛلْ مَاکٛ کٛو مٛيٜ جَٻَ جَيْنغٛلْ نغٛلْ؞ نَاع کَنْکٛ وٛنِ جَيْنغٛلْ نغٛلْ؞ اٛ وَرٛيِ اٛ اَنْدِنَ حَبَرُ تَنْ دٛوْ مَاغٛلْ؞ کَنْغٛلْ وٛنِ جَيْنغٛلْ غٛونغَوٛلْ يٜيْنٛتٛونغٛلْ دٛوْ کٛو مٛيٜ؞ نغٛلْ بٛو وَرِي ندٜرْ دُونِيَارُ؞ بِعٜتٜىٰطٛ وٛلْدٜ اٛنْ ندٜنّٛ اٜ مٛ ندٜرْ دُونِيَارُ؞ کٛو ندٜ کَنْکٛ تَغِ دُونِيَارُ، فُو اٜ نٛنْ دُونِيَارُ اَنْدَامٛ؞ اٛ وَرِي تٛ ٻٜ مَاکٛ، اَمَّا ٻٜ نجَٻَايِمٛ؞ اَمَّا فُو جَٻُٻٜمٛ کٛولِيٻٜ اِنْدٜ مَاکٛ، اٛ حٛکِّيٻٜ بَوْطٜ وَرْتُکِ ٻِٻّٜ اَللَّه؞ ٻٜ نغَرْتَايِ ٻِٻّٜ اَللَّه نغَمْ ٻٜ ندَݧَامَ نٛ طُمْ دَݧِرْتَ يِمْٻٜ، کٛو نغَمْ يِمْٻٜ نغِطِ نٛنْ وَطَ؞ اَللَّه اٜ حٛورٜ مُوطُمْ وَرْتِرِٻٜ ٻِٻّٜ مَاکٛ؞ بِعٜتٜىٰطٛ وٛلْدٜ اٛنْ، اٛ وَرْتِي نٜطّٛ، اٛ جٛوطِي ندٜرْ مٜىٰطٜنْ، اٛ کٜوْطٛ يِدّٜ اٜ غٛونغَ؞ اٜنْ نغِعِي تٜدُّنغَلْ مَاکٛ، تٜدُّنغَلْ ٻِطّٛ بَجّٛ پِوٛيْطٛ تٛ ݧَاکٛ مٛ دٛوْ؞ يَحَيَ حٛکِّي شٜيْدَ دٛوْ مَاکٛ، مٜتِي سٜمْبٜىٰ وِعِي، «دٛوْ اٛعٛ مٜتُنٛومِ ندٜ مبِيمِ، ‹اٛنْ طٛنْ غَرَيْطٛ غَطَ اَمْ اٛ ٻُرِييَمْ مَنْغُ، نغَمْ اٜ مٛ طٛنْ کٛ مِ دَݧٜىٰ؞› » نغَمْ يِدّٜ مَوْندٜ ندٜ اٛ يِطِعٜنْ، اٛ بَرْکِطِنِيعٜنْ اٜنْ فُو، بَرْکَ دٛوْ بَرْکَ؞ اَللَّه حٛکِّي اَتَّوْرَ اٜ لَاوٛلْ مُوسَ، اَمَّا اٜ لَاوٛلْ يٜىٰسُ اَلْمَسِيحُ اٛ حٛلِّي يِدّٜ اٜ غٛونغَ؞ وَلَا نٜطّٛ مٜىٰطُطٛ يِيکِ اَللَّه؞ ٻِطّٛ مَاکٛ بَجّٛ، غٛنْطٛ ندٜرْ ٻٜرْندٜ ݧَاکٛ مٛ دٛوْ، کَنْکٛ حٛلِّعٜنْ نٛ اَللَّه وَعِ؞ رَا شٜيْدَ طُمْ يَحَيَ حٛکِّ شَرٜلْ کٛ اَرْدِيٻٜ يَحُودَنْکٛعٜنْ ندٜرْ اُرُشَلِيمَ لِلِ وٛٻّٜ اَرْدِيٻٜ دِينَ اٜ لٜىٰوِيَنْکٛعٜنْ تٛ مَاکٛ ٻٜ پَمَمٛ کَنْکٛ اٛ مٛيٜ؞ اٛ وَݧَايِ نٛوتَاکِٻٜ، اَمَّا اٛ وِعِٻٜ اٜ نجَيْرِ، «نَاع مِنْ وٛنِ اَلْمَسِيحُ؞» ٻٜ مبِعِمٛ، «تٛ نَاع اَنْ وٛنِ اَلْمَسِيحُ، تٛو، اَنْ اَ مٛيٜ؟ اَنْ وٛنِ اِلِيَ؟» يَحَيَ نٛوتِي وِعِٻٜ، «کٛو سٜطَّ، نَاع طُمْ مِنْ؞» ٻٜ پَمِمٛ ٻٜ مبِعِ، «اَنْ وٛنِ اٛنْ طٛنْ اَنَّبِيجٛ؟» اٛ وِعِ، «اَاعَ؞» سٜيْ ٻٜ مبِعِمٛ، «تٛو، وِعُمِنْ، اَنْ، اَ مٛيٜ؟ وِعُمِنْ کٛ مِنْ مبِعَتَ لِلٛيْٻٜمِنْ؞ مٛيٜ نٛدِّرْتَا حٛورٜ مَاطَ؟» سٜيْ يَحَيَ وِعِٻٜ کٛ اَنَّبِ اِشَايَ وِعُنٛ، اٛ وِعِ، «مِنْ وٛنِ غٛطّٛ نٛدّٛووٛ ندٜرْ لَدّٜ اٜ وِعَ، ‹ڤٛرْتٜىٰ لَاوٛلْ نغَمْ جٛومِرَاوٛ؞› » سٜيْ وٛٻّٜ فَارِسَنْکٛعٜنْ ٻٜ طُمْ لِلِ پَمِمٛ مبِعِ، «تٛ نِ نَاع اَنْ وٛنِ اَلْمَسِيحُ، کَدِنْ نَاع اَنْ وٛنِ اِلِيَ، کٛو اٛنْ طٛنْ اَنَّبِيجٛ، نغَمْ طُمٜ نغَطَنْتَا يِمْٻٜ بَڤْتِسْمَ؟» يَحَيَ وِعِٻٜ، «اٜ مِ وَطِرَ بَڤْتِسْمَ اٜ ندِيَمْ، اَمَّا ندٜرْ مٛوطٛنْ اٜ وٛودِ غٛطّٛ مٛ اٛنْ اَنْدَا، غَرٛيَيْطٛ غَطَ اَمْ؞ مِ فٛتَايِ فِتُّکِ لٛکُّلِّ ڤَطٜ مَاکٛ؞» فُو طُعُمْ طُمْ وَطِي تٛ بٜتَنِ فٛنْغٛ شَانغٛلْ اُرْدُنْ، تٛ يَحَيَ وَطَتَ بَڤْتِسْمَ؞ غَطَ طُعُمْ وَطِي ندٜ فِنِ يَحَيَ يِعِ يٜىٰسُ اٜ وَرٛيَ تٛ مُوطُمْ، اٛ وِعِ، «رَا کَرٛورِ اَللَّه، اِتَّيْندِ حَکّٜىٰجِ دُونِيَارُ! اٛعٛ دٛوْ مَاکٛ مٜتَيْنٛومِ ندٜ مبِيمِ، ‹غٛطّٛ اٜ وَرَ غَطَ اَمْ اٛ ٻُرِييَمْ مَنْغُ، نغَمْ اٜ مٛ طٛنْ کٛ مِ دَݧٜىٰ؞› مِنْ اٜ حٛورٜ اَمْ مِ اَنْدَامٛ، اَمَّا مِ وَرِي اٜ مِ وَطِرَ بَڤْتِسْمَ اٜ ندِيَمْ نغَمْ اٛ وَنْغِنَنٜىٰ يِمْٻٜ اِسْرَاعِيلَ؞» سٜيْ يَحَيَ حٛکِّ شٜيْدَ وِعِ، «مِ يِعِي رُوحُ اَللَّه اٜ جِڤّٛيٛو دَغَ دٛوْ بٛ فٛوندُ، طُمْ جٛوطِي دٛوْ مَاکٛ؞ مِنْ اٜ حٛورٜ اَمْ مِ اَنْدَامٛ، اَمَّا لِلٛيْطٛيَمْ مِ وَطِرَ بَڤْتِسْمَ اٜ ندِيَمْ وِعِيَمْ، ‹نٜطّٛ مٛ نغِيطَا رُوحُ اَمْ جِڤّٛيَکٜ دَغَ دٛوْ جٛوطِي دٛوْ مَاکٛ، کَنْکٛ وٛنِ غَطِرَيْطٛ بَڤْتِسْمَ اٜ رُوحُ اَمْ؞› » طٛنْمَا يَحَيَ وِعِ، «مِ يِعِيطُمْ، مِ شٜيْدَکٜ کَنْکٛ وٛنِ ٻِطّٛ اَللَّه؞» طٛنْمَا غَطَ طُعُمْ وَطِي ندٜ فِنِ يَحَيَ اٜ دَرِي کَنْکٛ اٜ تٛکُّٻٜمٛ طِطٛ، سٜيْ اٛ يِعِ يٜىٰسُ اٜ پَٻّٛو، اٛ وِعِ، «رَا کَرٛورِ اَللَّه!» ندٜ تٛکُّٻٜمٛ طِطٛ ٻٜنْ نَنِ اٛ وِعِي نٛنْ، سٜيْ ٻٜ تٛکِّ يٜىٰسُ؞ يٜىٰسُ وَيْلِتِي يِعِ اٜ ٻٜ تٛکِّمٛ، اٛ وِعِٻٜ، «طُمٜ طَٻِّتٛتٛنْ؟» ٻٜ مبِعِمٛ، «رَبِّ، تٛيٜ نجٛوطٛتٛطَا؟» مَعَنَ «رَبِّ» وٛنِ «مٛودِبّٛ؞» اٛ وِعِٻٜ، «نغَرٜىٰ، نغِعٛنْ؞» اٜ شَرٜلْ نغٜلْ طُمْ نجَمْندِ نَيِ اَلَاسَرَ؞ سٜيْ ٻٜ تٛکِّمٛ ٻٜ نغِعِ تٛ اٛ جٛوطٛتٛو، ٻٜ کِرْتِدِ اٜ مَاکٛ؞ غٛعٛتٛ ندٜرْ يِمْٻٜ طِطٛ نَنْٻٜ کٛ يَحَيَ وِعِ تٛکِّ يٜىٰسُ ٻٜنْ وٛنِ اَنْدِرَاوُسْ مِݧِرَاوٛ سِيمَنْ بِيتُرُسْ؞ اَرْتُطُمْ اَنْدِرَاوُسْ تَوِ مَوْنِرَاوٛ مَاکٛ سِيمَنْ، اٛ وِعِمٛ، «مِنْ کَوْرِي اٜ اَلْمَسِيحُ،» وَاتٛ شُٻَاطٛ اَللَّه؞ سٜيْ اٛ يَارِ سِيمَنْ تٛ يٜىٰسُ؞ يٜىٰسُ رَارِ سِيمَنْ اٛنْ وِعِمٛ، «اَنْ وٛنِ سِيمَنْ ٻِطّٛ يَحَيَ؞ طُمْ نٛدِّرْتٜ کٜىٰفَسْ؞» مَعَنَ کٜىٰفَسْ وٛنِ بِيتُرُسْ، وَاتٛ «حَيْرٜ؞» غَطَ طُعُمْ وَطِي ندٜ فِنِ يٜىٰسُ سُٻِ يَحَ لٜيْدِ غَلِيلِ؞ سٜيْ اٛ تَوِ فِلِبُسْ، اٛ وِعِمٛ، «تٛکَّمْ؞» فِلِبُسْ بٛو اٛ نٜطّٛ غَرِيرِ بٜتَسَيْدَ؞ کَيْرِ وٛنِ غَرِيرِ اَنْدِرَاوُسْ اٜ بِيتُرُسْ؞ سٜيْ فِلِبُسْ يَحِ تَوِ نَتَانِيَلْ وِعِمٛ، «مِنْ کَوْرِي اٜ اٛنْ طٛنْ نٜطّٛ مٛ مُوسَ وِنْدِ دٛوْ مُوطُمْ ندٜرْ اَتَّوْرَ، مٛ اَنَّبٛعٜنْ مَا مبِنْدِ دٛوْ مَاکٛ، وَاتٛ يٜىٰسُ ٻِطّٛ يُسُفُ پِوٛيْطٛ غَرِيرِ نَجَرَتْ؞» نَتَانِيَلْ وِعِ فِلِبُسْ، «اٜ يِيکِ مَاطَ غٛطُّمْ بٛطُّمْ وُرْتٛيْتٛ نَجَرَتْ؟» فِلِبُسْ وِعِمٛ، «وٛرٛيْ، نغِعَا؞» ندٜ يٜىٰسُ يِعِ نَتَانِيَلْ اٜ وَرٛيَ تٛ مُوطُمْ، سٜيْ مٜتِ دٛوْ مَاکٛ، وِعِ، «رَا اِسْرَاعِيلَنْکٜىٰجٛ مٛ غٛونغَ مٛ فٜوَتَا؞» نَتَانِيَلْ پَمِ يٜىٰسُ وِعِ، «نٛ وَطِ اَنْدُطَايَمْ؟» يٜىٰسُ وِعِمٛ، «مِ يِعِيمَ لٜيْ لٜکِّ اِبِّ کٛ فِلِبُسْ نٛدُّمَا؞» نَتَانِيَلْ وِعِمٛ، «مٛودِبّٛ، اَنْ وٛنِ ٻِطّٛ اَللَّه! اَنْ وٛنِ لَامِيطٛ اِسْرَاعِيلَ؞» يٜىٰسُ وِعِمٛ، «اَ حٛولِيَمْ نغَمْ مِ وِعِيمَ مِ يِعِيمَ لٜيْ لٜکِّ اِبِّ؟ اَ يِعَيْ فِي طُطُّمْ ٻُرْطُمْ طُعُمْ؞» سٜيْ يٜىٰسُ ٻٜيْدِ وِيکِٻٜ، «اٜ مِ وِعَعٛنْ غٛونغَ، اٛنْ نغِعَيْ دٛوْ مَٻِّتَکٜ، مَلَاعِکَعٜنْ اَللَّه اٜ پٜنْتَ اٜ نجِڤّٛيٛو يٜىٰسٛ ٻِي نٜطّٛ؞» بَلْطٜ طِطِ غَطَ نٛنْ وَطِي طُمْ وَطِ حُمْتٛ تٜىٰغَلْ اٜ غَرِيرِ کَانَ نغٛنْدِ ندٜرْ لٜيْدِ غَلِيلِ؞ مَدُوجٛ يٜىٰسُ بٛو اٜ طٛنْ؞ يٜىٰسُ اٜ تٛکُّٻٜمٛ مَا کُمْڤِتَامَ حُمْتٛ تٜىٰغَلْ نغَلْ؞ ندٜ ندِيَمْ اِنَبٛجَمْ طَمْ حٛٻّٜ نجَرَتَ تٛ حُمْتٛ تٜىٰغَلْ نغَلْ رٜعِ، مَدُوجٛ يٜىٰسُ وِعِمٛ، «ندِيَمْ اِنَبٛجَمْ رٜعِ؞» يٜىٰسُ وِعِمٛ، «نغَمْ طُمٜ نَتِّنْطَايَمْ ندٜرْ طُعُمْ؟ شَرٜلْ اَمْ وَطَايِ تَوْ؞» سٜيْ مَدُوجٛ يٜىٰسُ وِعِ مَشُّٻٜ کُوٛوٻٜ طٛنْ، «نغَطٜىٰ کٛو طُمٜ کٛ اٛ وِعِعٛنْ؞» حَادٜ طٛنْ اٜ وٛودِ لٛوطٜ جٛوٜىٰغٛعٛ طٜ کَاپٜ اِرِ لٛوطٜ طٜ يَحُودَنْکٛعٜنْ کُوتِرْتَ لٛوتٛو نغَمْ لَاٻِنْکِ کٛعٜ مَٻّٜ نٛ دِينَ مَٻّٜ وِعِ؞ کٛو ندٜيٜ لٛوندٜ اٜ حٛشَّ ڤَالِ ندِيَمْ 20 يَاکِ 30؞ سٜيْ يٜىٰسُ وِعِ مَشُّٻٜ ٻٜنْ، «کٜبِّنٜىٰ طٜعٜ لٛوطٜ اٜ ندِيَمْ؞» ٻٜ کٜبِّنِطٜ ندِيَمْ نَا کِ طٜ کٜىٰوِ تٜڤْ؞ سٜيْ اٛ وِعِٻٜ، «جٛونِ ݧٜطٜىٰ ندِيَمْ طَمْ سٜطَّ نجَارَنٛنْ ڤَامَنٛووٛ تٜىٰغَلْ نغَلْ؞» سٜيْ ٻٜ نجَارَنِمٛطَمْ؞ طَمْ يَادَکٜ طَمْ وَرْتِي اِنَبٛجَمْ، سٜيْ اٛ يَرِطَمْ؞ اٛ اَنْدَا تٛ طَمْ پِوٛيِ، اَمَّا مَشُّٻٜ ݧٜطُٻٜطَمْ اٜ اَنْدِ تٛ طَمْ پِوٛيِ؞ سٜيْ اٛ نٛدِّ اَنْغٛوجٛ اٛنْ، اٛ وِعِمٛ، «کٛو مٛيٜ اٜ اَرْتَ حٛکُّکِ حٛٻّٜ اِنَبٛجَمْ ٻُرْطَمْ وٜلْکِ، غَطَ ٻٜ نجَرِي ٻٜ کَارِي، ندٜنْ اٛ حٛکَّٻٜ اِنَبٛجَمْ طَمْ حٜوْتَايِ اَرَنْدٜجَمْ طَمْ وٜلْکِ؞ اَمَّا اَنْ، اَ اَلِ اِنَبٛجَمْ ٻُرْطَمْ وٜلْکِ طَمْ نَا جٛونِ؞» کَنْجُمْ وٛنِ فِي کَيْطِنِيطُمْ اَرَنْدٜجُمْ طُمْ يٜىٰسُ وَطِ اٜ غَرِيرِ کَانَ نغٛنْدِ لٜيْدِ غَلِيلِ؞ نٛنْ اٛ حٛلِّرِ تٜدُّنغَلْ مَاکٛ، ندٜنْ تٛکُّٻٜمٛ کٛولِيمٛ؞ غَطَ طُعُمْ، يٜىٰسُ يَحِ کَفَرْنَحُمْ، کَنْکٛ اٜ مَدُوجٛ مَاکٛ، اٜ مِݧِرَاٻٜ مَاکٛ، اٜ تٛکُّٻٜمٛ، ٻٜ نجٛوطِي تٛنْ بَلْطٜ سٜطَّ؞ ندٜ شَرٜلْ ٻَدِي نغٜلْ حُمْتٛ سَکِّنْکِ نغٛ يَحُودَنْکٛعٜنْ، يٜىٰسُ يَحِ اُرُشَلِيمَ؞ تٛنْ اٜ اُرُشَلِيمَ ندٜرْ وُرٛ شٜنِينغٛ اٛ تَوِ يِمْٻٜ اٜ شٛورَ نَعِ، اٜ بَالِ، اٜ تَتَّبَرَاجِ؞ ندٜنْ اٜ وٛودِ وٛٻّٜ غَيْلِتٛوٻٜ شٜىٰدٜ رٛومَنْکٛعٜنْ يَاکِ شٜىٰدٜ يَحُودَنْکٛعٜنْ، اٜ ٻٜ نجٛوطِي حَادٜ تٜىٰبُرْجِ مَٻّٜ اٜ ٻٜ نغَيْلِتَ شٜىٰدٜ؞ سٜيْ اٛ وَالِ ٻٛغِّ اٛ وَرْتِرِطِ لٛوسٛلْ، اٛ رِيوِ فُو ٻٜ سٛورٜ‑سٛورٜ دَغَ ندٜرْ وُرٛ شٜنِينغٛ نغٛنْ حَوْتِ اٜ بَالِ مَٻّٜ اٜ نَعِ مَٻّٜ؞ کَدِنْ اٛ سَنْکِتِ شٜىٰدٜ غَيْلِتٛوٻٜ شٜىٰدٜ ٻٜنْ، اٛ دٛعِّ تٜىٰبُرْجِ مَٻّٜ؞ سٜيْ اٛ وِعِ شٛورٛوٻٜ تَتَّبَرَاجِ ٻٜنْ، «مبُرْتِنٜىٰطِ طٛعٛ! تٛع اٛنْ نغَرْتِرْ وُرٛ ݧَاکٛ اَمْ لُومٛ؞» تٛکُّٻٜمٛ شِفْتٛرِ کٛ وِنْدَا، «يَا اَللَّه، يِدّٜ ندٜ نغِطُمِ وُرٛ مَاطَ اٜ وُلَ ندٜرْ اَمْ بٛ حِيتٜ؞» سٜيْ اَرْدِيٻٜ يَحُودَنْکٛعٜنْ پَمِ يٜىٰسُ ٻٜ مبِعِ، «طُمٜ کَيْطِنِيطُمْ نغَطَنْتَامِنْ نغَمْ حٛلُّکِ اَ وٛودِ لَامُ وَطُکِ فِي طُعُمْ؟» يٜىٰسُ وِعِٻٜ، «ڤُسٜىٰ وُرٛ شٜنِينغٛ نغٛعٛ، ندٜنْ ندٜرْ بَلْطٜ تَتِ مِ مَحِتَيْنغٛ؞» ٻٜ مبِعِمٛ، «طُمْ وَطِي دُوٻِ 64 کٛ طُمْ يٛتِّنَ ݧِٻُکِ وُرٛ شٜنِينغٛ نغٛعٛ، اَنْ، اَ وِعِي اَ مَحِتَيْنغٛ ندٜرْ بَلْطٜ تَتِ؟» اَمَّا وُرٛ شٜنِينغٛ نغٛ يٜىٰسُ مٜتَتَ دٛوْ مَغّٛ وٛنِ ٻَنْدُ مَاکٛ؞ غَطَ اٛ اُمِّنَامَ دَغَ مَيْدٜ، سٜيْ تٛکُّٻٜمٛ شِفْتٛرِ کَعَ حَالَ کَ اٛ وِعُنٛ، ندٜنْ ٻٜ نجَٻِ کٛ اَايَاجٜ مبِعِ اٜ کٛ يٜىٰسُ وِعِ؞ شَرٜلْ نغٜلْ يٜىٰسُ وٛنِ اُرُشَلِيمَ نغَمْ حُمْتٛ سَکِّنْکِ، يِمْٻٜ طُطْٻٜ کٛولِيمٛ نغَمْ ٻٜ نغِعِي کُوطٜ کَيْطِنِيطٜ طٜ اٛ وَطِ؞ اَمَّا يٜىٰسُ وٜدِّتَنَاکِٻٜ، نغَمْ اٜ مٛ اَنْدِ نغِکُّ نٜطّٛ؞ نَاع نَا غٛطّٛ حٛکِّيمٛ شٜيْدَ دٛوْ يِمْٻٜ، نغَمْ کَنْکٛ اٜ حٛورٜ مَاکٛ اٜ مٛ اَنْدِ کٛ وٛنِ ندٜرْ ٻٜرْندٜ کٛو مٛيٜ؞ اٜ وٛودِ غٛطّٛ فَارِسَنْکٜىٰجٛ بِعٜتٜىٰطٛ نِکٛودِمُسْ، اٜ مٛ ندٜرْ کَوْتَلْ اَرْدِيٻٜ يَحُودَنْکٛعٜنْ؞ اٛ يَحِ تٛ يٜىٰسُ جٜمَّ، اٛ وِعِمٛ، «مٛودِبّٛ، اٜ مِنْ اَنْدِ اَ مٛودِبّٛ مٛ اَللَّه لِلٛيِ، نغَمْ وَلَا بَاوَيْطٛ وَطَ کُوطٜ کَيْطِنِيطٜ طٜعٜ طٜ نغَطَتَا سٜيْ نِ تٛ اَللَّه اٜ وٛنْدِ اٜ مَاکٛ؞» يٜىٰسُ وِعِمٛ، «اٜ مِ وِعُمَا غٛونغَ، وَلَا بَاوَيْطٛ نَتَّ لَامُ اَللَّه سٜيْ تٛ طُمْ فُطِّتِي طُمْ دَݧِيمٛ؞» نِکٛودِمُسْ پَمِمٛ وِعِ، «نٛ نٜطّٛ مَوْطٛ دَݧِتِرْتٜىٰ؟ طُمْ وَطَتَاکٛ اٛ سٛعّٛ ندٜرْ رٜىٰدُ مَدُوجٛ مَاکٛ طُمْ فُطِّتَ طُمْ دَݧَمٛ طِطَٻُمْ؞» يٜىٰسُ وِعِمٛ، «اٜ مِ وِعُمَا غٛونغَ، وَلَا بَاوَيْطٛ نَتَّ لَامُ اَللَّه سٜيْ نِ تٛ ندِيَمْ اٜ رُوحُ اَللَّه دَݧِيمٛ؞ کٛ نٜطّٛ دَݧِ طُمْ نٜطّٛ، اَمَّا کٛ رُوحُ دَݧِ طُمْ رُوحُ؞ تَاع حَيْطِنْ نغَمْ مِ وِعِيمَ دٛولٜ طُمْ فُطِّتَ طُمْ دَݧُمَا؞ حٜنْدُ اٜ وِسَ تٛ يِطِرِ، اَ نَنَ سٛنْݧٛ مَيْرُ، اَمَّا اَ اَنْدَا تٛ ندُ پِوٛيِ کٛو تٛ ندُ يَحَتَ؞ نٛنْ مَا طُمْ وٛنْتِندِرِ اٜ کٛو مٛيٜ مٛ رُوحُ اَللَّه دَݧِ؞» نِکٛودِمُسْ پَمِمٛ وِعِ، «نٛ طُعُمْ وَطٛرْتٛو؟» يٜىٰسُ نٛوتِي وِعِمٛ، «اَ مٛودِبّٛ مَوْطٛ ندٜرْ اِسْرَاعِيلَ، اَمَّا اَ فَامَايِ طُعُمْ؟ اٜ مِ وِعُمَا غٛونغَ، اٜ مِنْ مٜتَ دٛوْ کٛ مِنْ اَنْدِ، ندٜنْ اٜ مِنْ کٛکَّ شٜيْدَ دٛوْ کٛ مِنْ نغِعِ، اَمَّا اٛنْ نجَٻَايِ کٛ مِنْ مبِعِعٛنْ؞ مِ مٜتَنِيعٛنْ دٛوْ فِي دُونِيَارُ، اَمَّا اٛنْ نجَٻَايِ؞ نٛ وَطَتَ نجَٻٛنْ تٛ مِ وِعِيعٛنْ کٛ وٛنِ اٜ دٛوْ؟ وَلَا مٜىٰطُطٛ يَاکِ دٛوْ سٜيْ نِ اٛنْ طٛنْ پِوٛيْطٛ دَغَ دٛوْ، وَاتٛ ٻِي نٜطّٛ؞ «نٛنْ نٛ مُوسَ پٜفْتِرِ مبٛودِ غَطِرَاندِ نجَمْندِ مبٛطٜىٰرِ ندٜرْ لَدّٜ، نٛنْ مَا دٛولٜ ٻِي نٜطّٛ پٜفْتٜىٰ، نغَمْ کٛو مٛيٜ کٛولِيطٛمٛ حٜٻَ يٛنْکِ کِ رٜعَتَا؞ نغَمْ يِدّٜ ندٜ اَللَّه يِطِ دُونِيَارُ حَا اٛ حٛکِّي ٻِطّٛ مَاکٛ بَجّٛ، نغَمْ کٛو مٛيٜ کٛولِيطٛمٛ تٛع حَلْکَ اَمَّا حٜٻَ يٛنْکِ کِ رٜعَتَا؞ نغَمْ اَللَّه لِلٛيَايِ ٻِطّٛ مُوطُمْ ندٜرْ دُونِيَارُ نغَمْ اٛ تَپَنَنْدُ کِيتَ؞ اَمَّا اٛ لِلٛيِيمٛ نغَمْ اٛ حِسْنَ دُونِيَارُ اٜ لَاوٛلْ مَاکٛ؞ «کٛو مٛيٜ کٛولِيطٛمٛ تَپَنْتَاکٜ کِيتَ، اَمَّا مٛ حٛولَاکِمٛ اٛ يَادَکٜ اٛ تَپَنَامَ کِيتَ، نغَمْ اٛ حٛولَاکِ ٻِطّٛ اَللَّه بَجّٛ؞ رَا کٛ وَطِ اَللَّه تَپَنْتَ يِمْٻٜ کِيتَ: جَيْنغٛلْ وَرِي ندٜرْ دُونِيَارُ، اَمَّا ٻٜ ٻُرِي يِطُکِ ݧِوْرٜ دٛوْ جَيْنغٛلْ، نغَمْ کُوطٜ مَٻّٜ طٜ کَلُّطٜ؞ کٛو مٛيٜ غَطٛووٛ کٛ حَلِّ وَݧِي جَيْنغٛلْ، ندٜنْ اٛ نَتَّتَا تٛ جَيْنغٛلْ وٛنِ، نغَمْ اٜ مٛ حُلَ تٛع کُوطٜ مَاکٛ کَلُّطٜ مبُرْتِنٜىٰ اٜ نجَيْرِ؞ اَمَّا کٛو مٛيٜ غَطٛووٛ غٛونغَ اٜ نَتَّ جَيْنغٛلْ، نغَمْ طُمْ يِعَ اٜ نجَيْرِ اٜ مٛ وَطَ کٛ اَللَّه يِطِ؞» غَطَ طُعُمْ، يٜىٰسُ اٜ تٛکُّٻٜمٛ نجَحِ لَدّٜ لٜيْدِ يَحُودِيَ؞ تٛنْ اٛ جٛوطِي اٛ نٜىٰٻِدِ اٜ تٛکُّٻٜمٛ اٜ مٛ وَطَنَ يِمْٻٜ بَڤْتِسْمَ؞ يَحَيَ مَا اٜ وَطَنَ يِمْٻٜ بَڤْتِسْمَ اٜ اَيْنٛنْ حَادٜ سَلِمْ، نغَمْ اٜ وٛودِ ندِيَمْ طُطَّمْ تٛنْ؞ يِمْٻٜ نغَطِ کَ يَاکِ تٛ مَاکٛ اٜ مٛ وَطَنَٻٜ بَڤْتِسْمَ؞ طُعُمْ طُمْ وَطُ کٛ يَحَيَ سُرٜىٰ ندٜرْ سُودُ شُرَلْ؞ سٜيْ غٜدِّ اُمِّي حَکُّندٜ تٛکُّٻٜ يَحَيَ اٜ غٛطّٛ يَحُودَنْکٜىٰجٛ دٛوْ لٛوتَاکِ کِ نٜطّٛ وَطَتَ نٛ دِينَ يَحُودَنْکٛعٜنْ وِعِ؞ تٛکُّٻٜ يَحَيَ نجَحِ تٛ مَاکٛ ٻٜ مبِعِمٛ، «مٛودِبّٛ، اٛنْ طٛنْ نٜطّٛ غٛنْدُنٛوطٛ اٜ مَاطَ اٜ فٛنْغٛ شَانغٛلْ اُرْدُنْ، مٛ کٛکُّطَا شٜيْدَ دٛوْ مَاکٛ، تٛو، اٜ مٛ تٛنْ وَطَنَ يِمْٻٜ بَڤْتِسْمَ، کٛو مٛيٜ اٜ يَحَ تٛ مَاکٛ؞» يَحَيَ وِعِٻٜ، «وَلَا کٜٻٛووٛ غٛطُّمْ سٜيْ نِ تٛ اَللَّه حٛکِّيمٛطُمْ؞ اٛنٛنْ اٜ کٛعٜ مٛوطٛنْ اٛنْ شٜيْدُعٜنْ مِ وِعِي، ‹نَاع مِنْ وٛنِ اَلْمَسِيحُ، اَمَّا مِ لِلٛيَ مِ اَرْتَمٛ وَرْکِ؞› اَنْغٛوجٛ جٜيِ ٻَݝَاطٛ؞ حِغٛ اَنْغٛوجٛ اٛنْ دَرِيطٛ اٜ نَنَ کٛ اٛ وِعَتَ، اٛ نَنَيْ بٜلْطُمْ نَاع سٜطَّ تٛ اٛ نَنِي حٛنٛنْدٜ اَنْغٛوجٛ اٛنْ؞ اِرِ بٜلْطُمْ طُمْ حِغٛ اَنْغٛوجٛ اٛنْ نَنِ، اِرِ مَاجُمْ نَنَيْمِ نَاع سٜطَّ جٛونِ؞ دٛولٜ مَنْغُ يٜىٰسُ وَطَ کَ ٻٜيْدَاکِ، مِنْ بٛو مَنْغُ اَمْ وَطَ کَ اُسْتَاکِ؞ «اٛنْ طٛنْ پِوٛيْطٛ دَغَ دٛوْ اٛ ٻُرِي کٛو مٛيٜ مَنْغُ؞ اٛنْ طٛنْ پِوٛيْطٛ دُونِيَارُ، دُونِيَارُ جٜيِمٛ، ندٜنْ اٜ مٛ مٜتَ دٛوْ فِي دُونِيَارُ؞ پِوٛيْطٛ دَغَ دٛوْ اٛنْ اٛ ٻُرِي کٛو مٛيٜ؞ اٛ مٜتِي دٛوْ کٛ اٛ يِعِ اٜ کٛ اٛ نَنِ، اَمَّا وَلَا جَٻُطٛ کٛ اٛ وِعِ؞ کٛو مٛيٜ جَٻُطٛ کٛ اٛ وِعِ تَبِّتِنِي جَٻِي کٛ اَللَّه وِعِ طُمْ غٛونغَ؞ اٛنْ طٛنْ مٛ اَللَّه لِلِ، اٜ مٛ مٜتَ کٛ اَللَّه وِعِ، نغَمْ اَللَّه حٛکِّيمٛ رُوحُ مُوطُمْ کٜىٰرٛلْ وَلَا؞ ݧَاکٛ مٛ دٛوْ اٜ يِطِ ٻِطّٛ مُوطُمْ، اٛ وَطِي کٛو طُمٜ ندٜرْ جُوطٜ مَاکٛ؞ کٛو مٛيٜ کٛولِيطٛ ٻِطّٛ اٛنْ اٜ وٛودِ يٛنْکِ کِ رٜعَتَا؞ اَمَّا کٛو مٛيٜ مٛ تٛکَّايِ کٛ ٻِطّٛ اٛنْ وِعِ، اٛ حٜٻَتَا يٛنْکِ کِ رٜعَتَا، اَمَّا مٛنّٜرٜ اَللَّه اٜ دٛوْ مَاکٛ حَا اَبَدَا؞» فَارِسَنْکٛعٜنْ نَنِ حَبَرُ يٜىٰسُ اٜ حٜٻَ تٛکُّٻٜمٛ ٻُرِي يَحَيَ، طٛنْمَا اٜ مٛ وَطَنَ يِمْٻٜ بَڤْتِسْمَ ٻُرِي يَحَيَ، ﴿کٛو ندٜ غٛونغَ نَاع طُمْ يٜىٰسُ اٜ حٛورٜ مُوطُمْ وَطَنْتَ يِمْٻٜ بَڤْتِسْمَ طُمْ، اَمَّا تٛکُّٻٜمٛ نغَطَتَطُمْ؞﴾ ندٜ يٜىٰسُ نَنِ فَارِسَنْکٛعٜنْ نَنِي حَبَرُ کٛ اٛ وَطَتَ، سٜيْ اٛ اَلِ لٜيْدِ يَحُودِيَ، اٛ سٛعِّي غَلِيلِ؞ دٛوْ لَاوٛلْ مَاکٛ طُمْ وَرْتَنِمٛ دٛولٜ اٛ تٛکَّ ندٜرْ لٜيْدِ سَمَارِيَ؞ سٜيْ اٛ يٛتِّي وٛنْدِ غَرِيرِ نغٛنْدِ ندٜرْ لٜيْدِ سَمَارِيَ بِعٜتٜىٰندِ سَيْکَرْ نغٛنْدِ حَادٜ نجَيْرِ ندِ يَاکُبُ حٛکِّ ٻِطّٛ مُوطُمْ اِسُفُ دَغَ ندٜنّٛ؞ اٜ وٛودِ ٻُنْدُ ندُ يَاکُبُ وَسِ اٜ نجَيْرِ ندِنْ؞ يٜىٰسُ بٛو سٛمِي نغَمْ يَادُ اٛ جٛوطِي حَادٜ ٻُنْدُ ندُنْ؞ اٜ شَرٜلْ نغٜلْ طُمْ شَکَ ݧَلَوْمَ؞ سٜيْ غٛطّٛ سَمَارِيَنْکٜىٰجٛ دٜبّٛ وَرِي پٛوغُکِ، يٜىٰسُ وِعِمٛ، «حٛکّٛرَمْ ندِيَمْ مِ يَرَ؞» اٜ شَرٜلْ نغٜلْ تٛکُّٻٜمٛ نجَادَکٜ نَتِّي ندٜرْ غَرِياِرِ ندِنْ نغَمْ سٛودٛيْکِ ݧَمْندُ؞ سٜيْ دٜبّٛ اٛنْ وِعِ يٜىٰسُ، «اَ يَحُودَنْکٜىٰجٛ، مِنْ بٛو مِ سَمَارِيَنْکٜىٰجٛ؞ نٛيٜ مبِعَتَايَمْ مِ حٛکُّمَا ندِيَمْ نجَرَا؟» اٛ وِعُ نٛنْ نغَمْ وَلَا کٛ حَوْتِ يَحُودَنْکٛعٜنْ اٜ سَمَارِيَنْکٛعٜنْ؞ يٜىٰسُ وِعِمٛ، «دَا اَ اَنْدِ شَاحُ طُمْ اَللَّه يِطِ حٛکُّکِمَ، کَدِنْ دَا اَ اَنْدِ پَمُطٛمَ ندِيَمْ نجَرٜتٜىٰطَمْ، دَا اَ تٛرَکٜمٛ، دَا اٛ حٛکِّيمَ ندِيَمْ کٛکّٛوجَمْ يٛنْکِ؞» سٜيْ دٜبّٛ اٛنْ وِعِ يٜىٰسُ، «مٛودِبّٛ، اَ وَلَا کٛ ݧٜطِرْتَا ندِيَمْ طَمْ، کَدِنْ بٛو ٻُنْدُ ندُنْ اٜ لُغِّ؞ تٛيٜ کٜٻَتَا طَمْ طٛنْ ندِيَمْ کٛکّٛوجَمْ يٛنْکِ؟ اَ ٻُرِي مَامَ مٜىٰطٜنْ يَاکُبُ کٛکُّطٛعٜنْ ندُعُ ٻُنْدُ؟ کَنْکٛ اٜ ٻِٻّٜ مَاکٛ اٜ مَرْلٜ مَاکٛ فُو ٻٜ نجَرِي ندِيَمْ ٻُنْدُ ندُعُ؞» يٜىٰسُ وِعِمٛ، «کٛو مٛيٜ جَرْطٛ ندِيَمْ ٻُنْدُ ندُعُ فُطِّتَيْ نَنَ طٛنْکَ، اَمَّا کٛو مٛيٜ جَرْطٛ ندِيَمْ طَمْ کٛکَّيْمٛومِ اٛ فُطِّتَتَا اٛ نَنَ طٛنْکَ کَدِنْ؞ ندِيَمْ طَمْ کٛکَّيْمٛومِ طَمْ وَرْتَيْ ندٜرْ مَاکٛ ندِيَمْ ٻُلٛوجَمْ کٛکَّيْطَمّٛ يٛنْکِ کِ رٜعَتَا؞» دٜبّٛ اٛنْ وِعِمٛ، «مٛودِبّٛ، حٛکَّمْ طَمْ طٛنْ ندِيَمْ نغَمْ تٛع مِ فُطِّتَ مِ نَنَ طٛنْکَ، طٛنْمَا تٛع مِ فُطِّتَ مِ وَرَ طٛعٛ نغَمْ پٛوغُکِ؞» يٜىٰسُ وِعِمٛ، «يَحُ نٛدّٛيَا غٛرْکٛ مَاطَ، نغَرْدٛيٛنْ؞» دٜبّٛ اٛنْ وِعِ، «مِ وَلَا غٛرْکٛ؞» يٜىٰسُ وِعِمٛ، «اَ وِعِي غٛونغَ ندٜ مبِيطَا اَ وَلَا غٛرْکٛ؞ غٛونغَ کَنْ وٛنِ اَ وَطِي تٜىٰلٜ جٛوِ، نٜطّٛ مٛ نجٛوطٛدِطَا جٛونِ بٛو نَاع اٛ غٛرْکٛ مَاطَ؞ کٛ مبِيطَا طُمْ غٛونغَ؞» دٜبّٛ اٛنْ وِعِ، «مٛودِبّٛ، مِ فَامِي اَ اَنَّبِيجٛ؞ مَامَعٜنْ اَمِنْ مَوْنِنِي اَللَّه دٛوْ حٛشّٜىٰرٜ ندٜعٜ، اَمَّا اٛنٛنْ يَحُودَنْکٛعٜنْ اٛنْ مبِعَ اُرُشَلِيمَ وٛنِ تٛ حَانِ طُمْ مَوْنِنَ اَللَّه؞» يٜىٰسُ وِعِمٛ، «جَٻُ کٛ مبِعَيْمِ، شَرٜلْ اٜ وَرَ نغٜلْ مَوْنِنْتٛنْ ݧَاکٛ مٛ دٛوْ نَاع دٛوْ حٛشّٜىٰرٜ ندٜعٜ نَاع ندٜرْ اُرُشَلِيمَ؞ اٛنٛنْ سَمَارِيَنْکٛعٜنْ اٛنْ مَوْنِنَ کٛ اٛنْ اَنْدَا، اَمَّا مِنٛنْ يَحُودَنْکٛعٜنْ اٜ مِنْ مَوْنِنَ کٛ مِنْ اَنْدِ، نغَمْ دَغَ تٛ يَحُودَنْکٛعٜنْ کِسْندَمْ پِوٛيِ؞ اَمَّا شَرٜلْ اٜ وَرَ، نغٜلْ يَادَکٜ نغٜلْ وَرِي، شَرٜلْ نغٜلْ يِمْٻٜ مَوْنِنٛوٻٜ اَللَّه نٛ حَانِ ٻٜ مَوْنِنَيْ ݧَاکٛ مٛ دٛوْ ندٜرْ غٛونغَ اٜ ندٜرْ بَوْطٜ رُوحُ اَللَّه، نغَمْ اِرِ مَٻّٜ ݧَاکٛ مٛ دٛوْ يِطِ ٻٜ مَوْنِنَمٛ؞ اَللَّه اٛ رُوحُ، مَوْنِنٛوٻٜمٛ بٛو دٛولٜ مَوْنِنَمٛ ندٜرْ رُوحُ اٜ غٛونغَ؞» دٜبّٛ اٛنْ وِعِ يٜىٰسُ، «اٜ مِ اَنْدِ اَلْمَسِيحُ اٜ وَرَ، وَاتٛ شُٻَاطٛ اَللَّه؞ تٛ اٛ وَرِي، اٛ وِعَيْمِنْ کٛو طُمٜ؞» سٜيْ يٜىٰسُ وِعِمٛ، «مِنْ مٜدّٛووٛ اٜ مَاطَ، مِنْ وٛنِ اَلْمَسِيحُ اٛنْ؞» اٜ نغٜلْ طٛنْ شَرٜلْ تٛکُّٻٜ يٜىٰسُ نغَرْتٛيِ، ٻٜ کَيْطِنِ ندٜ ٻٜ تَوِ اٜ مٛ مٜدَّ اٜ دٜبّٛ؞ اَمَّا وَلَا غٛطّٛ ندٜرْ مَٻّٜ بِيطٛمٛ، «کٛ نغِطَّا؟» کٛو، «نغَمْ طُمٜ مٜدَّتَا اٜ مَاکٛ؟» سٜيْ دٜبّٛ اٛنْ اَلِ پٛوغِرْدٜ مُوطُمْ، سٛعِّي غَرِيرِ وِعِ يِمْٻٜ، «نغَرٜىٰ، نغِعٛنْ نٜطّٛ بِيطٛيَمْ کٛو طُمٜ کٛ مٜىٰطُمِ وَطُکِ؞ کٛو کَنْکٛ وٛنِ اَلْمَسِيحُ؟» سٜيْ يِمْٻٜ ٻٜنْ اَلِ غَرِيرِ ندِنْ ٻٜ نجَحِ تٛ يٜىٰسُ؞ اٜ طُمْ ندٜرْ نٛنْ سٜيْ تٛکُّٻٜمٛ تٛرِيمٛ مبِعِمٛ، «مٛودِبّٛ، ݧَامُ غٛطُّمْ؞» اَمَّا اٛ وِعِٻٜ، «اٜ مِ وٛودِ ݧَمْندُ ندُ ݧَامَيْمِ، اٛنْ اَنْدَا کٛو طُمٜ دٛوْ مَيْرُ؞» سٜيْ تٛکُّٻٜمٛ ڤُطِّ پَمْپَمْتِرْکِ اٜ مبِعَ، «کٛو غٛطّٛ وَدَّنِيمٛ ݧَمْندُ؟» يٜىٰسُ وِعِٻٜ، «ݧَمْندُ اَمْ وٛنِ مِ وَطَ کٛ لِلْطٛيَمْ وِعِيَمْ، مِ يٛتِّنَ کُوغَلْ نغَلْ اٛ حٛکِّيَمْ؞ نَاع اٛنْ مبِعَ، ‹حٛرِي لٜبِّ نَيِ طُمْ اِتَّ کٛ رٜمَا؟› اٜ مِ وِعَعٛنْ، ندَارٜىٰ غٜسٜ بٛطُّمْ؞ کٛ رٜمَا ٻٜنْدِي طُمْ حٜوْتِي اِتّٜىٰکِ؞ اِتّٛووٛ کٛ رٜمَا اٜ يٛٻٜىٰ، کٛ رٜمَا طُمْ اٛ حَوْرِتَتَ وٛنِ يِمْٻٜ کٜٻٛوٻٜ يٛنْکِ کِ رٜعَتَا، نغَمْ اَاوُطٛ اٜ اِتُّطٛ کٛ ٻٜنْدِ ٻٜ کَوْتَ ٻٜ مبٜلْمبٜلْتَ؞ کَعَ حَالَ طُمْ غٛونغَ بِيکَ، ‹غٛطّٛ اَاوِي، غٛطّٛ بٛو اِتِّي کٛ ٻٜنْدِ؞› مِ لِلِيعٛنْ اِتّٛنْ کٛ ٻٜنْدِ طُمْ اٛنْ کُوَنَايِ؞ وٛٻّٜ کُوِي نَاع سٜطَّ، اٛنٛنْ بٛو اٛنْ ݧَامِي بٛتٜ کُوغَلْ مَٻّٜ؞» سَمَارِيَنْکٛعٜنْ طُطْٻٜ اٜ ندِنْ طٛنْ غَرِيرِ کٛولِي يٜىٰسُ نغَمْ اٛنْ طٛنْ دٜبّٛ وِعِي، «اٛ وِعِييَمْ کٛو طُمٜ طُمْ مٜىٰطُمِ وَطُکِ؞» نغَمْ نٛنْ، ندٜ سَمَارِيَنْکٛعٜنْ ٻٜنْ نغَرِ تٛ يٜىٰسُ، ٻٜ تٛرِيمٛ اٛ جٛوطٛدٛو اٜ مَٻّٜ؞ سٜيْ اٛ جٛوطٛدِي اٜ مَٻّٜ بَلْطٜ طِطِ؞ يِمْٻٜ کٛولِيٻٜ يٜىٰسُ ٻٜيْدِي نَاع سٜطَّ نغَمْ بٛلِيطٜ مَاکٛ؞ ٻٜ مبِعِ دٜبّٛ اٛنْ، «جٛونِ مِنْ کٛولَکٜ يٜىٰسُ، نَاع نغَمْ کٛ مبِيطَا تَنْ، اَمَّا نغَمْ مِنٛنْ اٜ کٛعٜ اَمِنْ مِنْ نَنِي کٛ اٛ وِعِ، مِنْ تَبِّتِنِي کَنْکٛ وٛنِ کِسْنٛووٛ دُونِيَارُ؞» غَطَ يٜىٰسُ وَطِي بَلْطٜ طِطِ طٛنْ، اٛ دِلِّ غَلِيلِ، نغَمْ کَنْکٛ اٜ حٛورٜ مَاکٛ اٛ وِعِ، «اَنَّبِيجٛ مَوْنِنْتَاکٜ تٛ لٜيْدِ مُوطُمْ؞» ندٜ اٛ يٛتِّي غَلِيلِ، غَلِلَنْکٛعٜنْ نجَٻِّيمٛ، نغَمْ کَمْٻٜ مَا ٻٜ نجَحِينٛ حُمْتٛ سَکِّنْکِ ندٜرْ اُرُشَلِيمَ، ٻٜ نغِعِي فُو کٛ اٛ وَطِ تٛنْ؞ سٜيْ يٜىٰسُ فُطِّتِ سٛعِّي غَرِيرِ کَانَ نغٛنْدِ ندٜرْ لٜيْدِ غَلِيلِ؞ کَيْرِ وٛنِ تٛ اٛ وَيْلِتِ ندِيَمْ طَمْ وَرْتِ اِنَبٛجَمْ؞ تٛو، ندٜرْ غَرِيرِ کَفَرْنَحُمْ اٜ وٛودِ غٛطّٛ مَوْطٛ ندٜرْ غٛمْنَتِ، ٻِطّٛ مَاکٛ اٜ ݧَوَ؞ ندٜ نٜطّٛ اٛنْ نَنِ يٜىٰسُ اَلِي لٜيْدِ يَحُودِيَ وَرِي لٜيْدِ غَلِيلِ، اٛ يَحِ تٛ يٜىٰسُ اٛ تٛرِيمٛ اٛ يَحَ کَفَرْنَحُمْ اٛ يَمْطِتِنَ ٻِطّٛ مَاکٛ ٻَدِيطٛ مَايَ؞ يٜىٰسُ وِعِمٛ، «اٛنٛنْ يِمْٻٜ تٛ نَاع اٛنْ نغِعُ مِ وَطِي اَلَامَاجِ اٜ کُوطٜ کَيْطِنِيطٜ، اٛنْ کٛولَتَاکٛيَمْ؞» اٛ وِعِ يٜىٰسُ، «مٛودِبّٛ، اٜنْ نجَحُ کٛ ٻِطّٛ اَمْ مَايَ؞» سٜيْ يٜىٰسُ وِعِمٛ، «يَحُ، ٻِطّٛ مَاطَ مَايَتَا؞» نٜطّٛ اٛنْ جَٻِ کٛ يٜىٰسُ وِعِمٛ، اٛ دِلِّ؞ اٜ مٛ دٛوْ لَاوٛلْ سٛعَّاکِ وُرٛ، سٜيْ مَشُّٻٜ مَاکٛ کَوْرِ اٜ مَاکٛ ٻٜ مبِعِمٛ، «ٻِطّٛ مَاطَ يَمْطِتِي؞» ندٜ اٛ پَمِٻٜ نغٜلٜ شَرٜلْ ٻِطّٛ اٛنْ يَمْطِتِ، ٻٜ مبِعِمٛ، «کٜىٰݧَ نجَمْندِ غٛعٛ ندِ ݧَلَوْمَ جٛنْتٜ طٜنْ نجٛوفِمٛ؞» سٜيْ اٛ فَامِ شَرٜلْ نغٜلْ ٻِطّٛ اٛنْ يَمْطِتِ طُمْ شَرٜلْ نغٜلْ يٜىٰسُ وِعُنٛومٛ، «ٻِطّٛ مَاطَ مَايَتَا؞» نغَمْ نٛنْ، کَنْکٛ اٜ فُو وُرٛ مَاکٛ ٻٜ کٛولِي يٜىٰسُ؞ طُعُمْ کَنْجُمْ وٛنِ کَيْطِنِيطُمْ طِطَٻُمْ طُمْ يٜىٰسُ وَطِ تٛ غَلِيلِ؞ اٛ وَطِيطُمْ غَطَ اٛ وَرْتٛيِي دَغَ لٜيْدِ يَحُودِيَ؞ غَطَ طُعُمْ يٜىٰسُ يَحِ اُرُشَلِيمَ نغَمْ وٛنْغٛ حُمْتٛ دِينَ يَحُودَنْکٛعٜنْ؞ تٛنْ اُرُشَلِيمَ اٜ وٛودِ نجٛنْغَ ندِيَمْ حَادٜ وٛنْغَلْ دَمُّغَلْ غَرِيرِ ندِنْ بِعٜتٜىٰنغَلْ دَمُّغَلْ بَالِ؞ حَادٜ نجٛنْغَ نغَنْ اٜ وٛودِ رُمڤَاجِ جٛوِ؞ ندٜرْ اِبْرَانِيَنْکٛورٜ اٜ نغَ نٛدِّرٜىٰ بٜتَسْدَ؞ اٜ وٛودِ غٛطّٛ نٜطّٛ طٛنْ غَطّٛ دُوٻِ 83 اٜ ݧَوَ؞ ندٜ يٜىٰسُ يِعِمٛ اٜ مٛ فُکِّي طٛنْ، کَدِنْ اٜ اَنْدِ اٛ نٜىٰٻِي اٜ مٛ فِيدَ اٜ طُمْ طٛنْ ݧَوُ، سٜيْ يٜىٰسُ پَمِمٛ وِعِ، «اَ يِطِ طُمْ يَمْطِتِنْمَا؟» ݧَوْطٛ اٛنْ وِعِمٛ، «مٛودِبّٛ، مِ وَلَا بَلَّيْطٛيَمْ حٛشَّيَمْ سُووَيَمْ ندٜرْ نجٛنْغَ نغَنْ شَرٜلْ نغٜلْ ندِيَمْ طَمْ لَنْشَا؞ فُو شَرٜلْ نغٜلْ نغِطُمِ نَتُّکِ، سٜيْ غٛطّٛ اَرْتَيَمْ؞» سٜيْ يٜىٰسُ وِعِمٛ، «اُمَّ کٛشَّا دَاغٛ مَاطَ، نجَاٻَا؞» طٛنْ اٜ طٛنْ نٜطّٛ اٛنْ يَمْطِتِ، حٛشِّ دَاغٛ مُوطُمْ، فُطِّ يَادُ؞ تٛو، ݧَلْندٜ ندٜ فِي طُعُمْ وَطِ طُمْ ݧَلْندٜ سِوْتَارٜ؞ نغَمْ نٛنْ، اَرْدِيٻٜ يَحُودَنْکٛعٜنْ مبِعِ جَمْطِتِنَاطٛ اٛنْ، «حَنْدٜ طُمْ ݧَلْندٜ سِوْتَارٜ، اَتَّوْرَ حَطِي کٛشَّا دَاغٛ مَاطَ؞» اَمَّا جَمْطِتِنَاطٛ اٛنْ وِعِٻٜ، «جَمْطِتِنْطٛيَمْ وِعِيَمْ مِ حٛشَّا دَاغٛ اَمْ مِ ندِلَّا؞» ٻٜ پَمِمٛ ٻٜ مبِعِ، «مٛيٜ وٛنِ بِيطٛمَ کٛشَّا دَاغٛ مَاطَ ندِلَّا؟» اَمَّا جَمْطُتُطٛ اٛنْ اَنْدَا مٛيٜ يَمْطِتِنِمٛ، نغَمْ اٜ وٛودِ يِمْٻٜ طُطْٻٜ اٜ وِغٜىٰرٜ ندٜنْ؛ يٜىٰسُ بٛو يَادَکٜ نَتِّي ندٜرْ مَٻّٜ؞ غَطَ نٛنْ يٜىٰسُ تَوِمٛ ندٜرْ وُرٛ شٜنِينغٛ وِعِمٛ، «رَا، اَ يَمْطِتِي! اَلُ وَطُکِ حَکّٜ تٛع غٛطُّمْ ٻُرْطُمْ طُعُمْ حَلُّکِ حٜٻُمَا؞» سٜيْ نٜطّٛ اٛنْ يَحِ وِعِ اَرْدِيٻٜ يَحُودَنْکٛعٜنْ يٜىٰسُ يَمْطِتِنِمٛ؞ نغَمْ يٜىٰسُ اٜ حُوَ اِرِ کُوطٜ طٜعٜ ݧَلْندٜ سِوْتَارٜ، اَرْدِيٻٜ يَحُودَنْکٛعٜنْ ڤُطِّ حَلَّنْکِمٛ؞ يٜىٰسُ بٛو وِعِٻٜ، «حَا حَنْدٜ ݧَاکٛ اَمْ اٜ حُوَ، مِنْ مَا اٜ مِ حُوَ؞» کَعَ حَالَ وَطِ اَرْدِيٻٜ يَحُودَنْکٛعٜنْ ٻٜيْدِ طَٻُّتُکِ لَاوٛلْ نٛ مبَرْدَتَمٛ؞ نغَمْ نَاع دٛوکَ ݧَلْندٜ سِوْتَارٜ تَنْ اٛ يٜوِ، اَمَّا حَا مَا اٛ وِعِي اَللَّه طُمْ ݧَاکٛ مَاکٛ، وَاتٛ اٛ وَرْتِرِي حٛورٜ مَاکٛ غٛعٛ اٜ اَللَّه وٛنْ طٛنْ؞ يٜىٰسُ نٛوتِي وِعِٻٜ، «اٜ مِ وِعَعٛنْ غٛونغَ، ٻِطّٛ اٛنْ وَطَتَا کٛو طُمٜ کَنُمْ تَنْ، کٛ اٛ يِعِ ݧَاکٛ مَاکٛ اٜ وَطَ تَنْ اٛ وَطَتَ، نغَمْ کٛو طُمٜ کٛ ݧَاکٛ اٛنْ وَطَتَ، کَنْجُمْ ٻِطّٛ اٛنْ وَطَتَ؞ ݧَاکٛ اٛنْ اٜ يِطِ ٻِطّٛ اٛنْ، ندٜنْ فُو کٛ اٛ وَطَتَ اٜ حٛورٜ مَاکٛ اٛ حٛلِّيطُمْ ٻِطّٛ اٛنْ؞ اٛ حٛلَّيْمٛ کُوطٜ مَوْطٜ ٻُرْطٜ طٜعٜ نغَمْ کَيْطِنٛنْ؞ نٛنْ نٛ ݧَاکٛ اٛنْ اُمِّنِرْتَ مَيْٻٜ حٛکَّٻٜ يٛنْکِ، نٛنْ مَا ٻِطّٛ اٛنْ اٜ حٛکَّ کٛو مٛيٜ مٛ يِطِ يٛنْکِ؞ ݧَاکٛ اٛنْ وَطَنْتَا کٛو مٛيٜ کِيتَ اٜ حٛورٜ مَاکٛ؞ اٛ حٛکِّ ٻِطّٛ مَاکٛ لَامُ وَطَنْکِ کٛو طُمٜ کِيتَ، نغَمْ کٛو مٛيٜ مَوْنِنَ ٻِطّٛ اٛنْ نٛنْ نٛ مَوْنِنِرْتَ ݧَاکٛ اٛنْ؞ کٛو مٛيٜ مٛ مَوْنِنَايِ ٻِطّٛ اٛنْ مَوْنِنْتَا ݧَاکٛ لِلٛيْطٛمٛ؞ «اٜ مِ وِعَعٛنْ غٛونغَ، کٛو مٛيٜ نَنْطٛ بٛلِيطٜ اَمْ حٛولِي اٛنْ طٛنْ لِلٛيْطٛيَمْ اٜ وٛودِ يٛنْکِ کِ رٜعَتَا، اٛ تَپَنْتَاکٜ کِيتَ، اٛ يَادَکٜ اٛ پَٻَّکٜ مَيْدٜ اٛ حٜٻِي يٛنْکِ کِ رٜعَتَا؞ اٜ مِ وِعَ اٛنْ غٛونغَ، شَرٜلْ اٜ وَرَ، شَرٜلْ نغٜلْ يَادَکٜ وَرِي نغٜلْ يِمْٻٜ ٻٜ کٜٻَايِ يٛنْکِ کِ رٜعَتَا نَنَتَ حٛنٛنْدٜ ٻِطّٛ اَللَّه؞ نَنْٻٜ ندٜ نجَٻِ کٛو ندٜ وِعِ کٜٻَيْ يٛنْکِ کِ رٜعَتَا؞ نٛنْ نٛ ݧَاکٛ اٛنْ وٛودِرِ بَوْطٜ حٛکُّکِ يٛنْکِ، نٛنْ مَا اٛ حٛکِّي ٻِطّٛ اٛنْ بَوْطٜ حٛکُّکِ يٛنْکِ؞ کَدِنْ اٛ حٛکِّي ٻِطّٛ اٛنْ لَامُ تَپُکِ کِيتَ، نغَمْ اٛ ٻِي نٜطّٛ؞ تٛع اٛنْ کَيْطِنْ اٜ طُعُمْ، نغَمْ شَرٜلْ اٜ وَرَ نغٜلْ فُو مَيْٻٜ غٛنْٻٜ ندٜرْ غٜنَالٜ نَنَتَ حٛنٛنْدٜ ٻِي نٜطّٛ ٻٜ مبُرْتٛيٛو دَغَ ندٜرْ غٜنَالٜ مَٻّٜ؞ غَطُٻٜ کٛ وٛوطِ ٻٜ اُمّٛتٛ ٻٜ کٜٻَ يٛنْکِ کِ رٜعَتَا، ندٜنْ غَطُٻٜ کٛ حَلِّ بٛو ٻٜ اُمّٛتٛ ٻٜ تَپَنٜىٰ کِيتَ؞ «مِ وَاوَتَا مِ وَطَ غٛطُّمْ اٜ حٛورٜ اَمْ، اٜ مِ وَطَ کِيتَ نٛ اَللَّه وِعِيَمْ مِ وَطَ تَنْ؞ اٜ مِ وَطَ کِيتَ غٛونغَ، نغَمْ نَاع کٛ وٜلْنَنْتَيَمْ ٻٜرْندٜ نغَطَيْمِ، اَمَّا کٛ وٜلْنَتَ ٻٜرْندٜ اٛنْ طٛنْ لِلْطٛيَمْ نغَطَيْمِ؞ «تٛ مِ حٛکِّي شٜيْدَ حٛورٜ اَمْ، طُمْ حٛشَّيْ کٛ مبِيمِ نَاع طُمْ غٛونغَ؞ اَمَّا اٜ وٛودِ غٛطّٛ کٛکّٛووٛ شٜيْدَ دٛوْ اَمْ، اٜ مِ اَنْدِ شٜيْدَ غٛونغَ اٛ حٛکَّتَ دٛوْ اَمْ؞ اٛنْ لِلِ يِمْٻٜ تٛ يَحَيَ، کَنْکٛ بٛو اٛ حٛکِّعٛنْ شٜيْدَ غٛونغَ دٛوْ اَمْ؞ نَاع مِ دَرِي دٛوْ شٜيْدَ طُمْ نٜطّٛ حٛکَّتَ، اَمَّا مِ وِعُکَ نغَمْ کِسٛنْ؞ يَحَيَ اٜ نَنْدِ اٜ فِتِلَارُ کُٻَّيْندُ حٛکَّ جَيْنغٛلْ، ندٜنْ نغَمْ شَرٜلْ سٜطَّ اٛنْ شُٻِي نَنْکِ بٜلْطُمْ جَيْنغٛلْ؞ اَمَّا اٜ مِ وٛودِ شٜيْدَ دٛوْ اَمْ ٻُرْطُمْ شٜيْدَ طُمْ يَحَيَ حٛکِّ؞ طٜعٜ کُوطٜ طٜ کُوَيْمِ جٛونِ طٜ ݧَاکٛ مٛ دٛوْ حٛکِّيَمْ مِ يٛتِّنَ، اٜ طٜ کٛکَّ شٜيْدَ ݧَاکٛ اٛنْ لِلٛيِيَمْ؞ ݧَاکٛ لِلٛيْطٛيَمْ، کَنْکٛ اٜ حٛورٜ مَاکٛ اٛ حٛکِّي شٜيْدَ دٛوْ اَمْ؞ اٛنْ مٜىٰطَايِ نَنْکِ حٛنٛنْدٜ مَاکٛ، اٛنْ مٜىٰطَايِ يِيکِ نٛ اٛ وَعِ؞ وٛلْدٜ مَاکٛ بٛو وَلَا ندٜرْ ٻٜرْطٜ مٛوطٛنْ نغَمْ اٛنْ کٛولَاکِ مٛ اٛ لِلٛيِ؞ اٛنْ نجَنْغَ اَايَاجٜ اَللَّه نغَمْ اٛنْ ݧُمَ اٜ لَاوٛلْ مَاجٜ کٜٻٛتٛنْ يٛنْکِ کِ رٜعَتَا؞ طٜعٜ اَايَاجٜ طٜ نجَنْغٛتٛنْ بٛو اٜ طٜ کٛکَّ شٜيْدَ دٛوْ اَمْ؞ اَمَّا فُو اٜ نٛنْ اٛنْ نغَݧِي وَرْکِ تٛ اَمْ کٜٻٛنْ يٛنْکِ کِ رٜعَتَا؞ «مِ طَٻِّتَتَا مَوْنِنٜىٰکِ دَغَ تٛ يِمْٻٜ؞ اَمَّا اٜ مِ اَنْدِ اٛنْ نغِطَا اَللَّه ندٜرْ ٻٜرْطٜ مٛوطٛنْ؞ مِ وَرْدِي اٜ لَامُ ݧَاکٛ اَمْ، اَمَّا اٛنْ نجَٻَايِيَمْ؞ اَمَّا تٛ غٛطّٛ وَرْدِي اٜ لَامُ حٛورٜ مُوطُمْ، اٛنْ نجَٻَيْمٛ؞ نٛ وَطَتَ کٛولٛوطٛنْيَمْ تٛ اٛنْ طَٻِّتَ مَنْتِندِرْکِ، اَمَّا اٛنْ ندُرْوَايِ کٜٻٛنْ مَنْتٜىٰکِ دَغَ تٛ اَللَّه؟ کَنْکٛ تَنْ وٛنِ اَللَّه؞ تٛع اٛنْ ݧُمُ مِ وُلّٛتٛعٛنْ يٜىٰسٛ ݧَاکٛ اَمْ؞ مُوسَ مٛ نغَطُطٛنْ کَمُّندٜ دٛوْ مُوطُمْ، کَنْکٛ وٛنِ غُلّٛتٛوطٛعٛنْ؞ دَا اٛنْ کٛولَکٜنٛ مُوسَ اٜ غٛونغَ، دَا اٛنْ کٛولَکٜيَمْ، نغَمْ دٛوْ اَمْ اٛ وِنْدِ؞ اَمَّا ندٜ اٛنْ نجَٻَايِ کٛ اٛ وِنْدِ، نٛ نجَٻِرْتٛنْ کٛ مبِيمِ؟» غَطَ طُعُمْ، يٜىٰسُ يَحِ فٛنْغٛ مبٜىٰلَ غَلِيلِ، وَاتٛ مبٜىٰلَ تِبَارِيَ؞ يِمْٻٜ طُطْٻٜ تٛکِّمٛ، نغَمْ ٻٜ نغِعِ فِي کَيْطِنِيطُمْ طُمْ اٛ وَطَنِ ٻٜ نجَمْطَا؞ سٜيْ يٜىٰسُ پٜنْتِ حٛشّٜىٰرٜ جٛوطٛدِي اٜ تٛکُّٻٜمٛ؞ اٜ شَرٜلْ نغٜلْ حُمْتٛ سَکِّنْکِ نغٛ يَحُودَنْکٛعٜنْ ٻَدَکٜ؞ ندٜ يٜىٰسُ رَارِ يِعِ يِمْٻٜ طُطْٻٜ اٜ نغَرَ تٛ مَاکٛ، اٛ وِعِ فِلِبُسْ، «تٛيٜ شٛودٜتٜنْ ݧَمْندُ کٜپَيْندُ يِمْٻٜ ٻٜعٜ؟» اٛ وِعُ فِلِبُسْ نٛنْ نغَمْ اٛ فٛوندَمٛ، نغَمْ کَنْکٛ اٜ حٛورٜ مَاکٛ اٜ مٛ اَنْدِ کٛ اٛ وَطَتَ؞ فِلِبُسْ وِعِمٛ، «کٛو نجٛٻَارِ ندِ کُوٛووٛ حٜٻَتَ ندٜرْ لٜبِّ جٛوٜىٰتَتِ ندِ حٜپَتَا سٛودُکِ ݧَمْندُ کٜپَيْندُ کٛو مٛيٜ مَٻّٜ حٜٻَ سٜطَّ؞» غٛطّٛ ندٜرْ تٛکُّٻٜمٛ بِعٜتٜىٰطٛ اَنْدِرَاوُسْ مِݧِرَاوٛ سِيمَنْ بِيتُرُسْ وِعِمٛ، «اٜ وٛودِ غٛطّٛ سُکَ طٛعٛ غٛودُطٛ مبُرٛودِحٛيْ نجٛوٛيْ اٜ لِپِّ طِطِ؞ اَمَّا غٛونغَ کٛو کٛ طُمْ وَطَنْتَ يِمْٻٜ ٻٜعٜ؞» يٜىٰسُ وِعِٻٜ، «مبِعٜىٰ يِمْٻٜ نجٛوطٛو؞» وِغٜىٰرٜ ندٜنْ اٜ وٛودِ غٜىٰنٜ طُطّٜ، نغَمْ نٛنْ يِمْٻٜ ٻٜنْ نجٛوطِي دٛوْ مَاجٜ؞ وٛرْٻٜ تَنْ ندٜرْ مَٻّٜ ٻَدَکٜ 5,000؞ سٜيْ يٜىٰسُ حٛشِّ بُرٛودِ طُمْ، اٛ يٜتِّ اَللَّه، اٛ سٜنْدَنِطُمْ جٛوطِيٻٜ طٛنْ نٛنْ نٛ حٜپَتَٻٜ؞ نٛنْ مَا اٛ وَادِ اٜ لِپِّ طِنْ؞ ندٜ فُو يِمْٻٜ ٻٜنْ ݧَامِ کَارِ، اٛ وِعِ تٛکُّٻٜمٛ، «کَوْرِتٜىٰ کٛ حٛرِي، تٛع طُمْ لَلِّنَ کٛو سٜطَّ مَاجُمْ؞» سٜيْ ٻٜ مٛٻْتِ کٛ حٛرِي دَغَ مبُرٛودِحٛيْ نجٛوٛيْ کٛيْ يِمْٻٜ ݧَامِ کٛرْنِ، ٻٜ کٜبِّنِ کٛنْدٛوجٜ سَڤّٛ اٜ طِطِ؞ ندٜ يِمْٻٜ نغِعِ فِي کَيْطِنِيطُمْ طُعُمْ طُمْ يٜىٰسُ وَطِ، ٻٜ ڤُطِّ وِيکِ، «غٛونغَ اٛعٛ وٛنِ اٛنْ طٛنْ اَنَّبِيجٛ غَرَيْطٛ دُونِيَارُ؞» يٜىٰسُ اٜ اَنْدِ اٜ ٻٜ نغِطِ نَنْغُکِمٛ، ٻٜ نغَرْتِرَمٛ لَامِيطٛ اٜ سٜمْبٜ؞ نغَمْ نٛنْ اٛ اَلِٻٜ اٛ پٜنْتِ حٛشّٜىٰرٜ کَنْکٛ تَنْ؞ ندٜ نَانغٜ حِيرِ، تٛکُّٻٜ يٜىٰسُ نجَحِ مبٜىٰلَ، ٻٜ نَتِّ کٛمِوَلْ، ٻٜ ڤُطِّ حُولُکِ مبٜىٰلَ نغَنْ يَاکِ کَفَرْنَحُمْ؞ اٜ شَرٜلْ نغٜلْ جٜمَّ وَطِي، يٜىٰسُ بٛو وَرٛيَايِ تٛ مَٻّٜ تَوْ؞ مبٜىٰلَ نغَنْ وَطِ کَ فَلْپُکِ نغَمْ حٜنْدُ شٜمْبِنْدُ اٜ وَطَ؞ ندٜ ٻٜ نغَطِ يَادُ ندٜرْ مبٜىٰلَ نغَنْ حٜوْتِ مِلْ تَتِ کٛو نَيِ، ٻٜ نغِعِ يٜىٰسُ اٜ يَحَ دٛوْ ندِيَمْ طَمْ اٜ وَرٛيَ تٛ کٛمِوَلْ مَٻّٜ، کُلٛلْ نَنْغِٻٜ؞ اَمَّا يٜىٰسُ وِعِٻٜ، «تٛع اٛنْ کُلُ، طُمْ مِنْ؞» سٜيْ ٻٜ نجَٻِ ٻٜ کٛشِّمٛ ندٜرْ کٛمِوَلْ نغَلْ، طٛنْ اٜ طٛنْ کٛمِوَلْ نغَلْ يٛتِّي تٛ ٻٜ نجِڤّٛتٛو؞ ندٜ فِنِ، حٛرِيٻٜ غٛنْٻٜ نغٛنْ تٛنْ فٛنْغٛ مبٜىٰلَ تٛ تٛکُّٻٜ يٜىٰسُ نَتِّ کٛمِوَلْ، ٻٜ ڤَامِ کٛمِوَلْ غٛعٛتَلْ تَنْ وٛنْدٛنٛ طٛنْ، ندٜنْ يٜىٰسُ بٛو نَتِّدَايِ کٛمِوَلْ نغَلْ اٜ تٛکُّٻٜمٛ، اَمَّا کَمْٻٜ تَنْ ندِلِّ ندٜرْ مَاغَلْ؞ سٜيْ غٛطّٜ کٛمِيجٜ پِوٛيْطٜ تِبَارِيَ نجٛتِّي دَاندٜ مبٜىٰلَ حَادٜ وِغٜىٰرٜ تٛ يِمْٻٜ ݧَامِ بُرٛودِ غَطَ يٜىٰسُ يٜتِّي اَللَّه؞ ندٜ يِمْٻٜ نغِعِ يٜىٰسُ اٜ تٛکُّٻٜمٛ نغَلَا طٛنْ، سٜيْ ٻٜ نَتِّ کٛمِيجٜ طٜنْ، ٻٜ نجَحِ کَفَرْنَحُمْ اٜ ٻٜ طَٻِّتَ يٜىٰسُ؞ ندٜ ٻٜ تَوِمٛ فٛنْغٛ مبٜىٰلَ تٛ کَفَرْنَحُمْ، ٻٜ مبِعِمٛ، «مٛودِبّٛ، ندٜيٜ نغَرٛيْطَا طٛعٛ؟» يٜىٰسُ نٛوتِي وِعِٻٜ، «اٜ مِ وِعَعٛنْ غٛونغَ، اٛنْ طَٻِّتَيَمْ نَاع نغَمْ اٛنْ نغِعِي کَيْطِنِيطُمْ طُمْ نغَطُمِ، اَمَّا نغَمْ اٛنْ ݧَامِي بُرٛودِ اٛنْ کَارِي؞ تٛع اٛنْ کُوَنْ ݧَمْندُ لَلَّيْندُ، اَمَّا کُوَنٜىٰ ݧَمْندُ تَبِّتَيْندُ کٛکَّيْندُ يٛنْکِ کِ رٜعَتَا، ندُ ٻِي نٜطّٛ حٛکَّتَعٛنْ، نغَمْ اَللَّه ݧَاکٛ مٛ دٛوْ وَطَنِيمٛ اَلَامَ کٛلَّيْطُمْ جَٻِيمٛ؞» سٜيْ ٻٜ پَمِ يٜىٰسُ ٻٜ مبِعِ، «طُمٜ مِنْ نغَطَتَ نغَمْ مِنْ نغَطَ کٛ اَللَّه يِطِ؟» يٜىٰسُ وِعِٻٜ، «کٛ اَللَّه يِطِ نغَطٛنْ وٛنِ کٛولٛوطٛنْ اٛنْ طٛنْ مٛ اٛ لِلٛيِ؞» ٻٜ مبِعِمٛ، «طُمٜ کَيْطِنِيطُمْ نغَطَتَا نغَمْ مِنْ نغِعَطُمْ مِنْ کٛولٛمَا؟ طُمٜ نغَطَتَا؟ مَامَعٜنْ مٜىٰطٜنْ ݧَامِي ݧَمْندُ ندٜرْ لَدّٜ پِوٛيْندُ دَغَ دٛوْ بِعٜتٜىٰندُ مَنَّ، نٛنْ نٛ طُمْ وِنْدِرَا، ‹اٛ حٛکِّيٻٜ ݧَمْندُ پِوٛيْندُ دَغَ دٛوْ نغَمْ ٻٜ ݧَامَ؞› » يٜىٰسُ وِعِٻٜ، «اٜ مِ وِعَعٛنْ غٛونغَ، نَاع مُوسَ حٛکِّعٛنْ ݧَمْندُ پِوٛيْندُ دَغَ دٛوْ، اَمَّا ݧَاکٛ اَمْ وٛنِ کٛکُّطٛعٛنْ ݧَمْندُ غٛونغَارُ پِوٛيْندُ دَغَ دٛوْ؞ نغَمْ ݧَمْندُ ندُ اَللَّه حٛکِّ وٛنِ اٛنْ طٛنْ غَرٛيْطٛ دَغَ دٛوْ کٛکّٛووٛ دُونِيَارُ يٛنْکِ کِ رٜعَتَا؞» ٻٜ مبِعِمٛ، «مٛودِبّٛ، حٛکُّمِنْ ݧَمْندُ ندُعُ کٛو ندٜيٜ؞» يٜىٰسُ وِعِٻٜ، «مِنْ وٛنِ ݧَمْندُ کٛکَّيْندُ يٛنْکِ؞ فُو غَرْطٛ تٛ اَمْ فُطِّتَتَا نَنَ وٜىٰلٛ، فُو کٛولِيطٛيَمْ فُطِّتَتَا نَنَ طٛنْکَ؞ اَمَّا نٛ مبِيمِعٛنْ، اٛنْ نغِعِييَمْ، فُو اٜ نٛنْ اٛنْ کٛولَاکِيَمْ؞ کٛو مٛيٜ مٛ ݧَاکٛ اَمْ حٛکِّيَمْ وَرَيْ تٛ اَمْ، ندٜنْ فُو غَرْطٛ تٛ اَمْ مِ رِيوَتَامٛ؞ نغَمْ مِ وَرٛيِي دَغَ دٛوْ نَاع نغَمْ مِ وَطَ کٛ نغِطُمِ، اَمَّا مِ وَطَ کٛ لِلٛيْطٛيَمْ يِطِ؞ کٛ لِلٛيْطٛيَمْ يِطِ مِ وَطَ وٛنِ، تٛع مِ دُلَّ کٛو غٛعٛتٛ ندٜرْ ٻٜ اٛ حٛکِّيَمْ، اَمَّا مِ اُمِّنَٻٜ ݧَلْندٜ جَانغٛ؞ نغَمْ کٛ ݧَاکٛ اَمْ يِطِ وٛنِ کٛو مٛيٜ دَارُطٛ ٻِطّٛ اٛنْ حٛولِيمٛ حٜٻَ يٛنْکِ کِ رٜعَتَا، ندٜنْ مِنْ بٛو مِ اُمِّنَيْمٛ ݧَلْندٜ جَانغٛ؞» سٜيْ يَحُودَنْکٛعٜنْ ڤُطِّ مٜتِتَاکِ دٛوْ مَاکٛ، نغَمْ اٛ وِعِي، «مِنْ وٛنِ ݧَمْندُ پِوٛيْندُ دَغَ دٛوْ؞» ٻٜ مبِعِ، «نَاع اٛعٛ وٛنِ يٜىٰسُ ٻِطّٛ يُسُفُ؟ اٜنْ اَنْدِ ݧَاکٛ مَاکٛ اٜ مَدُوجٛ مَاکٛ؞ نٛ وَطَتَ جٛونِ اٛ وِعَ دَغَ دٛوْ اٛ پِوٛيِ؟» يٜىٰسُ وِعِٻٜ، «اَلٜىٰ مٜتِتَاکِ حَکُّندٜ مٛوطٛنْ؞ وَلَا غَرَيْطٛ تٛ اَمْ سٜيْ تٛ ݧَاکٛ اَمْ لِلٛيْطٛيَمْ وَدِّيمٛ، مِنْ بٛو مِ اُمِّنَيْمٛ ݧَلْندٜ جَانغٛ؞ اَنَّبٛعٜنْ مبِنْدِي وِيکِ، ‹اَللَّه اٜکِّتِنَيْ کٛو مٛيٜ؞› کٛو مٛيٜ کٜتِّندَنِيطٛ ݧَاکٛ اٛنْ اٜکِّتِي دَغَ تٛ مَاکٛ اٜ وَرَ تٛ اَمْ؞ وَلَا مٜىٰطُطٛ يِيکِ ݧَاکٛ اٛنْ سٜيْ نِ اٛنْ طٛنْ پِوٛيْطٛ دَغَ تٛ مَاکٛ، کَنْکٛ تَنْ مٜىٰطِ يِيکِ ݧَاکٛ اٛنْ؞ اٜ مِ وِعَعٛنْ غٛونغَ، کٛو مٛيٜ کٛولِيطٛيَمْ اٜ وٛودِ يٛنْکِ کِ رٜعَتَا؞ مِنْ وٛنِ ݧَمْندُ کٛکَّيْندُ يٛنْکِ کِ رٜعَتَا؞ مَامَعٜنْ مٛوطٛنْ ݧَامِي ‹مَنَّ،› اَمَّا فُو اٜ نٛنْ ٻٜ مَايِي؞ اَمَّا رَا ݧَمْندُ پِوٛيْندُ دَغَ دٛوْ، تٛ نٜطّٛ ݧَامِيندُ مَايَتَا؞ مِنْ وٛنِ ݧَمْندُ کٛکَّيْندُ يٛنْکِ پِوٛيْندُ دَغَ دٛوْ؞ فُو ݧَامُطٛندُ، اٛ جٛوطٛتٛ حَا اَبَدَا؞ ندُعُ ݧَمْندُ طُمْ ٻَنْدُ اَمْ، ندُ کٛکَّيْمِ نغَمْ يِمْٻٜ دُونِيَارُ کٜٻَ يٛنْکِ کِ رٜعَتَا؞» سٜيْ يَحُودَنْکٛعٜنْ ٻٜنْ ڤُطِّ غٜدِّ حَکُّندٜ مَٻّٜ، اٜ ٻٜ مبِعَ، «نٛ وَطَتَ نٜطّٛ اٛعٛ حٛکَّعٜنْ ٻَنْدُ مَاکٛ ݧَامٜنْ؟» يٜىٰسُ وِعِٻٜ، «اٜ مِ وِعَعٛنْ غٛونغَ، تٛ اٛنْ ݧَامَايِ ٻَنْدُ ٻِي نٜطّٛ، کَدِنْ تٛ اٛنْ نجَرَايِ پِيپَمْ مَاکٛ، اٛنْ نغَلَا يٛنْکِ ندٜرْ مٛوطٛنْ؞ فُو ݧَامُطٛ ٻَنْدُ اَمْ ندٜنْ يَرِ پِيپَمْ اَمْ اٜ وٛودِ يٛنْکِ کِ رٜعَتَا، ندٜنْ مِ اُمِّنَيْمٛ ݧَلْندٜ جَانغٛ؞ نغَمْ ٻَنْدُ اَمْ وٛنِ ݧَمْندُ غٛونغَارُ، پِيپَمْ اَمْ بٛو وٛنِ نجَرَمْ طَمْ غٛونغَ؞ کٛو مٛيٜ ݧَامِ ٻَنْدُ اَمْ يَرِ پِيپَمْ اَمْ، اٜ مٛ سُمْڤٛوتِرَ اٜ اَمْ، مِنْ مَا اٜ مِ سُمْڤٛوتِرَ اٜ مَاکٛ؞ نٛنْ نٛ ݧَاکٛ غٛودُطٛ يٛنْکِ لِلِيَمْ، کَدِنْ اٜ مِ وَطَ جٛنْدٜ اَمْ نغَمْ مَاکٛ، نٛنْ مَا فُو ݧَامُطٛ ٻَنْدُ اَمْ وَطَيْ جٛنْدٜ مُوطُمْ نغَمْ اَمْ؞ کَنْجُمْ وٛنِ ݧَمْندُ پِوٛيْندُ دَغَ دٛوْ نَاع اِرِ ݧَمْندُ ندُ مَامَعٜنْ مٛوطٛنْ ݧَامِ مَايِ؞ اَمَّا فُو ݧَامُطٛ ݧَمْندُ ندُعُ اٛ حٜٻَيْ يٛنْکِ کِ رٜعَتَا؞» يٜىٰسُ وِعِ طُعُمْ شَرٜلْ کٛ اٛ اٜکِّتِنْتَ ندٜرْ سُودُ دٛعَارٜ تٛ کَفَرْنَحُمْ؞ طُطْٻٜ ندٜرْ تٛکُّٻٜمٛ ندٜ نَنِ نٛنْ، ٻٜ مبِعِ، «نغٛعٛلْ اٜکِّتِنٛلْ اٜ نغٛلْ سَطِ؞ مٛيٜ فَامَتَنغٛلْ؟» اَمَّا يٜىٰسُ اٜ اَنْدِ تٛکُّٻٜمٛ اٜ مٜتِتٛو دٛوْ کٛ اٛ وِعِ، اٛ وِعِٻٜ، «اٜکِّتِنٛلْ نغٛعٛلْ وَنِّعٛنْ؟ کٛ نغَطٛتٛنْ تٛ اٛنْ نغِعِي ٻِي نٜطّٛ اٜ سٛعّٛو تٛ وٛنْدٛنٛ؟ رُوحُ اَللَّه اٜ حٛکَّ يٛنْکِ؞ ٻَنْدُ نَاع طُمْ غٛطُّمْ؞ حَالَ کَ مٜتَنْمِعٛنْ کَ وَطَيْعٛنْ کٜٻٛنْ رُوحُ اَللَّه کٛکَّيْطُمْ يٛنْکِ؞ اَمَّا اٜ وٛودِ وٛٻّٜ ندٜرْ مٛوطٛنْ ٻٜ کٛولَاکِيَمْ؞» دَغَ اَرَنْدٜ يٜىٰسُ اٜ اَنْدِ يِمْٻٜ ٻٜ کٛولَاکِمٛ اٜ نٜطّٛ کٛکِّتِرَيْطٛمٛ؞ سٜيْ اٛ وِعِٻٜ، «کَنْجُمْ وَطِ مبِيمِعٛنْ وَلَا غَرَيْطٛ تٛ اَمْ سٜيْ تٛ ݧَاکٛ مٛ دٛوْ جَٻِي اٛ وَرَ؞» غَطَ طُعُمْ تٛکُّٻٜمٛ طُطْٻٜ شٜنْدِرِ اٜ مَاکٛ اَلِ تٛکُّکِمٛ؞ يٜىٰسُ وِعِ تٛکُّٻٜمٛ سَڤّٛ اٜ طِطٛ، «اٛنٛنْ مَا اٛنْ نغِطِ اَلُکِيَمْ؟» سِيمَنْ بِيتُرُسْ وِعِمٛ، «مٛودِبّٛ، تٛ مٛيٜ مِنْ نجَحَتَ؟ اَنْ وٛودِ بٛلِيطٜ کٛکَّيْطٜ يٛنْکِ کِ رٜعَتَا؞ مِنْ نجَادَکٜ مِنْ کٛولَکٜمَ، اٜ مِنْ اَنْدِ اَنْ وٛنِ شٜنِيطٛ مٛ اَللَّه؞» سٜيْ يٜىٰسُ وِعِٻٜ، «نَاع اٛنٛنْ سَڤّٛ اٜ طِطٛ شُٻُمِ؟ غٛعٛتٛ مٛوطٛنْ اٛ شٜيْطَنْ!» اٜ مٛ مٜتَ دٛوْ يَحُودَ ٻِي سِيمَنْ اِسْکَرِيٛوتِ، کٛو ندٜ اٛ غٛعٛتٛ ندٜرْ تٛکُّٻٜمٛ سَڤّٛ اٜ طِطٛ ٻٜنْ، کَنْکٛ وٛنِ کٛکِّتِرَيْطٛ يٜىٰسُ؞ غَطَ طُعُمْ يٜىٰسُ وَطِ کَ يِيلَاکِ ندٜرْ لٜيْدِ غَلِيلِ؞ اٛ يِطَا يِيلَاکِ ندٜرْ لٜيْدِ يَحُودِيَ، نغَمْ اَرْدِيٻٜ يَحُودَنْکٛعٜنْ وٛنْٻٜ تٛنْ اٜ ٻٜ طَٻِّتَ لَاوٛلْ نٛ ٻٜ مبَرِرْتَمٛ؞ تٛو، شَرٜلْ حُمْتٛ لُکُرُوجِ نغٛ يَحُودَنْکٛعٜنْ ٻَدَکٜ؞ نغَمْ نٛنْ مِݧِرَاٻٜ يٜىٰسُ وٛرْٻٜ مبِعِمٛ، «اَلُ وِغٜىٰرٜ ندٜعٜ نجَحَا لٜيْدِ يَحُودِيَ، نغَمْ تٛکُّٻٜمَ نغِعَ کُوطٜ طٜ کُوَتَا؞ فُو غِطّٛ اَنْدٜىٰ اٜ کٛو تٛيٜ حُوَتَا اٜ سُوطٜ؞ ندٜ اَ حُوَ کُوطٜ کَيْطِنِيطٜ اِرِ طٜعٜ، وَنْغِنْ حٛورٜ مَاطَ نغَمْ دُونِيَارُ فُو يِعُمَا؞» کٛو مِݧِرَاٻٜ مَاکٛ ٻٜنْ مَا ٻٜ کٛولَاکِمٛ؞ يٜىٰسُ وِعِٻٜ، «شَرٜلْ اَمْ وَطَايِ تَوْ، اَمَّا اٛنٛنْ کٛو نغٜلٜ شَرٜلْ نغٜلْ کَانُنغٜلْ؞ جٛونِ دُونِيَارُ حٜٻَايِ کٛ وَݧِرْتَعٛنْ، اَمَّا اٜ ندُ وَݧِييَمْ نغَمْ اٜ مِ وِعَ کُوطٜ مَيْرُ طٜ کَلُّطٜ؞ اٛنٛنْ نجَحٜىٰ حُمْتٛ نغٛنْ، مِنْ مِ يَحَتَا، نغَمْ شَرٜلْ اَمْ وَطَايِ تَوْ؞» غَطَ اٛ وِعِي نٛنْ، اٛ جٛوطِي ندٜرْ لٜيْدِ غَلِيلِ؞ اَمَّا غَطَ مِݧِرَاٻٜ مَاکٛ نجَحِي حُمْتٛ نغٛنْ، سٜيْ کَنْکٛ مَا اٛ يَحِ نَاع اٜ نجَيْرِ اَمَّا اٜ سُوطٜ؞ تٛ حُمْتٛ نغٛنْ، اَرْدِيٻٜ يَحُودَنْکٛعٜنْ اٜ طَٻِّتَمٛ، اٜ ٻٜ پَمَ يِمْٻٜ، «تٛيٜ اٛ وٛنِ؟» ندٜرْ حَوْرِيندٜ ندٜنْ يِمْٻٜ اٜ سٛوندٛوتِرَ دٛوْ مَاکٛ نَاع سٜطَّ؞ وٛٻّٜ اٜ مبِعَ، «اٛعٛ نٜطّٛ اٜ وٛودِ نغِکُّ بٛطُّمْ؞» وٛٻّٜ بٛو اٜ مبِعَ، «اٜ مٛ پٛيْرَ يِمْٻٜ؞» اَمَّا نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ وَلَا مٜتُطٛ دٛوْ مَاکٛ اٜ نجَيْرِ؞ ندٜ سٜنْدٜرٜ بَلْطٜ حُمْتٛ نغٛنْ پَٻِّي، يٜىٰسُ نَتِّ وُرٛ شٜنِينغٛ فُطِّ اٜکِّتِنْکِ؞ اَرْدِيٻٜ يَحُودَنْکٛعٜنْ کَيْطِنِ اٜ اٜکِّتِنٛلْ مَاکٛ، ٻٜ مبِعِ، «نٛ وَطِ نٜطّٛ اٛعٛ وٛودِرِ اَنْدَلْ نِحِ ندٜ کٛو جَنْدٜ اٛ مٜىٰطَايِ يَاکِ؟» يٜىٰسُ وِعِٻٜ، «کٛ اٜکِّتِنَيْمِ نَاع طُمْ اٜکِّتِنٛلْ اَمْ، اَمَّا طُمْ اٜکِّتِنٛلْ اٛنْ طٛنْ لِلٛيْطٛيَمْ؞ کٛو مٛيٜ شُٻُطٛ وَطَ کٛ اَللَّه يِطِ اٛ اَنْدَيْ کٛو کٛ اٜکِّتِنَيْمِ تٛ اَللَّه طُمْ پِوٛيِ، کٛو کٛ مبِعَيْمِ طُمْ بٛلِيطٜ اَمْ؞ کٛو مٛيٜ مٜتٛووٛ بٛلِيطٜ حٛورٜ مُوطُمْ اٜ طَٻِّتَنَ حٛورٜ مُوطُمْ مَنْغُ، اَمَّا کُوٛووٛ نغَمْ مَوْنِنَ اٛنْ طٛنْ لِلٛيْطٛمٛ اٛ نٜطّٛ مٛ غٛونغَ، وَلَا وٛنْدٜ فٜوْرٜ تٛ مَاکٛ؞ نَاع مُوسَ حٛکِّيعٛنْ اَتَّوْرَ؟ فُو اٜ نٛنْ وَلَا غٛطّٛ مٛوطٛنْ تٛکُّطٛطُمْ؞ نغَمْ طُمٜ نغِطّٛنْ وَرْکِيَمْ؟» يِمْٻٜ ٻٜنْ مبِعِمٛ، «اَ غِنَّاطٛ! مٛيٜ يِطِ وَرْکِمَ؟» يٜىٰسُ وِعِٻٜ، «مِ وَطِي کٛ حَيْطِنِي غٛعٛ، اٛنْ فُو اٛنْ کَيْطِنِي؞ مُوسَ وِعِعٛنْ نغَطٛنْ کَ نَادُکِ ٻِٻّٜ مٛوطٛنْ، اٛنْ نَادَ ݧَلْندٜ سِوْتَارٜ؞ کٛو ندٜ نَاع مُوسَ فُطِّطُمْ، اَمَّا مَامَعٜنْ مٜىٰطٜنْ اَرَنْدٜعٜنْ فُطِّطُمْ؞ تٛ طُمْ نَادِي ٻِنْغٜلْ ݧَلْندٜ سِوْتَارٜ نغَمْ تٛع طُمْ يٜوَ اَتَّوْرَ مُوسَ، نغَمْ طُمٜ مٛنَّنْتٛنْيَمْ نغَمْ مِ يَمْطِتِنِي ٻَنْدُ نٜطّٛ فُو ݧَلْندٜ سِوْتَارٜ؟ تٛع اٛنْ نغَطَنْ يِمْٻٜ کِيتَ دٛوْ کٛ غِتٜ نغِعَتَ تَنْ، اَمَّا نغَطٜىٰ کِيتَ غٛونغَ؞» وٛٻّٜ يِمْٻٜ اُرُشَلِيمَ مبِعِ، «نَاع اٛعٛ نٜطّٛ وٛنِ مٛ اَرْدِيٻٜ طَٻِّتَتَ وَرْکِ؟ رَمّٛ طٛعٛ اٜ مٛ مٜتَ اٜ نجَيْرِ ٻٜ مبِعَايِمٛ غٛطُّمْ؞ اٛنْ ݧُمَ اَرْدِيٻٜ تَبِّتِنِي اٛعٛ نٜطّٛ وٛنِ اَلْمَسِيحُ؟ اَمَّا اٜنْ اَنْدِ تٛ نٜطّٛ اٛعٛ پِوٛيِ؞ تٛ اَلْمَسِيحُ وَرِي، وَلَا اَنْدَيْطٛ تٛ اٛ پِوٛيِ؞» يٜىٰسُ اٜ ندٜرْ اٜکِّتِنْکِ ندٜرْ وُرٛ شٜنِينغٛ نغٛنْ، سٜيْ وِعِ اٜ سٜمْبٜ، «غٛونغَ، اٛنْ اَنْدِيَمْ، اٛنْ اَنْدِ تٛ پِوٛيْمِ؞ مِ وَرٛيَايِ نغَمْ حٛورٜ اَمْ؞ اَمَّا اٛنْ طٛنْ لِلٛيْطٛيَمْ اٜ مٛ وٛودِ غٛونغَ؞ کَنْکٛ بٛو اٛنْ اَنْدَامٛ، اَمَّا مِنْ اٜ مِ اَنْدِمٛ، نغَمْ دَغَ تٛ مَاکٛ پِوٛيْمِ، کَنْکٛ لِلٛيِيَمْ؞» وٛٻّٜ نغِطِي نَنْغُکِمٛ، اَمَّا وَلَا غَطُطٛ جُنْغٛ دٛوْ مَاکٛ، نغَمْ شَرٜلْ مَاکٛ وَطَايِ تَوْ؞ اَمَّا فُو اٜ نٛنْ طُطْٻٜ ندٜرْ حَوْرُتُٻٜ ٻٜنْ کٛولِيمٛ مبِعِ، «تٛ اَلْمَسِيحُ وَرِي، اٛ وَطَيْ کٛ حَيْطِنِ ٻُرْطُمْ طُمْ نٜطّٛ اٛعٛ وَطِ؟» فَارِسَنْکٛعٜنْ نَنِ يِمْٻٜ حَوْرُتُٻٜ اٜ مٜتَ اِرِ حَالَ کَعَ دٛوْ يٜىٰسُ، سٜيْ کَمْٻٜ اٜ مَوْٻٜ اَرْدِيٻٜ دِينَ ٻٜ لِلِ تَادِيٻٜ وُرٛ شٜنِينغٛ نغَمْ نَنْغَمٛ؞ يٜىٰسُ وِعِ، «مِ جٛوطٛدٛتٛ اٜ مٛوطٛنْ شَرٜلْ سٜطَّ يٜىٰسٛ طٛعٛ، غَطَ طٛنْ مِ سٛعّٛتٛ تٛ لِلٛيْطٛيَمْ؞ اٛنْ طَٻِّتَيْيَمْ اٛنْ کٜٻَتَايَمْ، تٛ نغٛنُمِ بٛو اٛنْ مبَاوَتَا يَاکِ؞» سٜيْ اَرْدِيٻٜ يَحُودَنْکٛعٜنْ مبِعِ حَکُّندٜ مَٻّٜ، «تٛيٜ نٜطّٛ اٛعٛ يِطِ يَاکِ تٛ اٜنْ مبَاوَتَا حٜٻُکِمٛ؟ کٛو اٜ مٛ يِطِ يَاکِ ندٜرْ غَرِيجٜ حٜلٜنَنْکٛعٜنْ تٛ يِمْٻٜ مٜىٰطٜنْ نغٛنِ اٛ اٜکِّتِنَ حٜلٜنَنْکٛعٜنْ؟ طُمٜ اٛ يِطِ وِيکِ ندٜ اٛ وِعِ، ‹اٛنْ طَٻِّتَيْيَمْ اَمَّا اٛنْ کٜٻَتَايَمْ؞› کَدِنْ کٛ اٛ يِطِ وِيکِ ندٜ اٛ وِعِ، ‹تٛ نغٛنْمِ اٛنْ مبَاوَتَا يَاکِ؟› » ݧَلْندٜ ندٜ حُمْتٛ نغٛنْ رٜعَتَ، کَيْرٜ وٛنِ ݧَلْندٜ مَوْندٜ ندٜ حُمْتٛ نغٛنْ؞ اٜ ݧَلْندٜ ندٜنْ يٜىٰسُ اُمِّي، دَرِي، وِعِ اٜ سٜمْبٜ، «فُو نَنَيْطٛ طٛنْکَ وَرَ تٛ اَمْ مِ حٛکَّيْمٛ کٛ اٛ يَرَتَ؞ نٛنْ نٛ طُمْ وِنْدِرَا، ‹کٛو مٛيٜ کٛولِيطٛيَمْ، شَنْطِ ندِيَمْ کٛکّٛوجَمْ يٛنْکِ وَطَيْ کَ اِلُکِ دَغَ ندٜرْ ٻٜرْندٜ مَاکٛ؞› » ندٜ يٜىٰسُ وِعِ طُعُمْ، دٛوْ رُوحُ اَللَّه اٛ مٜتَتَ طُمْ کٛولِيٻٜمٛ کٜٻَتَ؞ اٜ نغٜلْ طٛنْ شَرٜلْ اَللَّه حٛکَّايِ رُوحُ مُوطُمْ تَوْ، نغَمْ يٜىٰسُ تٜدِّنَاکَ تَوْ؞ ندٜ يِمْٻٜ حَوْرُتُٻٜ نَنِ حَالَ کَعَ کَ يٜىٰسُ وِعِ، وٛٻّٜ ندٜرْ مَٻّٜ مبِعِ، «اٛعٛ نٜطّٛ، غٛونغَ، اٛ اٛنْ طٛنْ اَنَّبِيجٛ؞» وٛٻّٜ بٛو مبِعِ، «کَنْکٛ وٛنِ اَلْمَسِيحُ؞» اَمَّا وٛٻّٜ مبِعِ، «نٛ وَطَتَ اَلْمَسِيحُ پِوٛيَ لٜيْدِ غَلِيلِ؟ «نَاع اَايَارٜ وِعِي، اَلْمَسِيحُ پِوٛيَيْ دَغَ ندٜرْ لٜݧٛلْ دَوْدَ، ندٜنْ طُمْ دَݧَيْمٛ تٛ بَيْتَلَامِ، غَرِيرِ تٛ دَوْدَ جٛوطِنٛو؟» نغَمْ نٛنْ طُمْ حٜٻِ سٜنْدِندِرْکِ حَکُّندٜ حَوْرُتُٻٜ ٻٜنْ دٛوْ يٜىٰسُ؞ وٛٻّٜ اٜ نغِطِ نَنْغُکِمٛ، اَمَّا وَلَا غَطُطٛ جُنْغٛ دٛوْ مَاکٛ؞ سٜيْ تَادِيٻٜ وُرٛ شٜنِينغٛ ٻٜنْ شٛعِّي تٛ مَوْٻٜ اَرْدِيٻٜ دِينَ اٜ فَارِسَنْکٛعٜنْ؞ مَوْٻٜ ٻٜنْ اٜ فَارِسَنْکٛعٜنْ ٻٜنْ پَمِٻٜ، مبِعِ، «نغَمْ طُمٜ اٛنْ نَنْغَايِمٛ نغَدُّطٛنْمٛ؟» تَادِيٻٜ ٻٜنْ مبِعِ، «وَلَا مٜىٰطُطٛ مٜتِرْکِ نٛ نٜطّٛ اٛعٛ مٜتِرِ؞» فَارِسَنْکٛعٜنْ مبِعِٻٜ، «کٛو اٛنٛنْ مَا اٛ پٛيْرِيعٛنْ؟ کٛو اٛنْ نغِعِي غٛطّٛ ندٜرْ اَرْدِيٻٜ يَحُودَنْکٛعٜنْ اٜ فَارِسَنْکٛعٜنْ حٛولَکٜمٛ؟ اَمَّا ٻٜعٜ حَوْرُتُٻٜ ٻٜ اَنْدَا کٛو طُمٜ دٛوْ اَتَّوْرَ، ٻٜ لَانَاٻٜ؞» نِکٛودِمُسْ جَانٛوطٛ تٛ يٜىٰسُ اٛ غٛعٛتٛ ندٜرْ فَارِسَنْکٛعٜنْ ٻٜنْ، اٛ وِعِٻٜ، «کٛ اَتَّوْرَ مٜىٰطٜنْ وِعِ وٛنِ اٜنْ نغَطَنْتَا نٜطّٛ کِيتَ نَا طُمْ نَنِي کٛ اٛ وِعِ نغَمْ طُمْ اَنْدَ کٛ اٛ وَطَتَ؞» ٻٜ مبِعِمٛ، «اَنْ مَا غَلِيلِ پِوٛيْطَا؟ جَنْغُ وٛلْدٜ اَللَّه بٛطُّمْ، اَ يِعَيْ وَلَا اَنَّبِيجٛ پِوٛيَيْطٛ دَغَ غَلِيلِ؞» سٜيْ کٛو مٛيٜ حٛوتِ؞ اَمَّا يٜىٰسُ يَحِ حٛشّٜىٰرٜ ندٜ لٜطّٜ جَيْتُنْ؞ ندٜ فِنِ اِلَا سُبَکَ اٛ سٛعِّي وُرٛ شٜنِينغٛ؞ يِمْٻٜ طُطْٻٜ کَوْرِتِ حَادٜ مَاکٛ، اٛ جٛوطِي اٛ فُطِّي اٜکِّتِنْکِٻٜ؞ سٜيْ مٛودِٻّٜ اَتَّوْرَ اٜ فَارِسَنْکٛعٜنْ نغَدِّ دٜبّٛ نَنْغَاطٛ اٜ وَطَ نجٜىٰنُ؞ ٻٜ نغَطِ دٜبّٛ اٛنْ دَرِي يٜىٰسٛ يِمْٻٜ غٛنْٻٜ طٛنْ فُو؞ ٻٜ مبِعِ يٜىٰسُ، «مٛودِبّٛ، اٛعٛ دٜبّٛ نَنْغَامَ اٜ مٛ وَطَ نجٜىٰنُ؞ ندٜرْ اَتَّوْرَ مُوسَ وِعِيعٜنْ کُبٛرٛوطٜنْ اِرِ دٜبّٛ اٛعٛ کَاپٜ مبَرٜنْمٛ؞ جٛونِ اَنْ، طُمٜ مبِيطَا؟» ٻٜ پَمُمٛ پَمٛلْ نغٛعٛلْ نغَمْ ٻٜ ڤٛوندَمٛ ٻٜ کٜٻَ کٛ ٻٜ نغُلّٛرْتٛومٛ؞ اَمَّا يٜىٰسُ تُرِي فُطِّ وِنْدِرْکِ حٛوندُ مُوطُمْ اٜ لٜيْدِ؞ ندٜ ٻٜ نغَطِ کَ پَمُکِمٛ، سٜيْ اٛ اُمِّي، اٛ دَرِي، اٛ وِعِٻٜ، «فُو مٛ مٜىٰطَايِ وَطُکِ حَکّٜ ندٜرْ مٛوطٛنْ اَرْتَ حُبَاکِ دٜبّٛ اٛعٛ حَيْرٜ؞» سٜيْ اٛ فُطِّتِ اٛ تُرِي، اٛ وِنْدِ اٜ لٜيْدِ؞ ندٜ ٻٜ نَنِ کٛ اٛ وِعِ، ٻٜ ندِلِّ غٛعٛتٛ‑غٛعٛتٛ، ندٛتِّعٜنْ اَرْتِ دِلُّکِ؞ طُمْ اَلِ يٜىٰسُ طٛنْ کَنُمْ تَنْ، دٜبّٛ اٛنْ اٜ دَرِي يٜىٰسٛ مَاکٛ؞ يٜىٰسُ اُمِّي، دَرِي، وِعِمٛ، «تٛ ٻٜ نغٛنِ؟ اٜ وٛودِ تَپَنْطٛمَ کِيتَ؟» دٜبّٛ اٛنْ نٛوتِي وِعِ، «مٛودِبّٛ، وَلَا کٛو غٛعٛتٛ؞» يٜىٰسُ وِعِمٛ، «تٛو، مِنْ مَا مِ تَپَنْتَامَ کِيتَ؞ دِلُّ، اَمَّا تَاع فُطُّتُ نغَطَا حَکّٜ؞» يٜىٰسُ فُطِّتِ مٜتَنِ يِمْٻٜ وِعِ، «مِنْ وٛنِ جَيْنغٛلْ دُونِيَارُ؞ فُو تٛکُّطٛيَمْ يَحَتَا ندٜرْ ݧِوْرٜ، اَمَّا حٜٻَيْ جَيْنغٛلْ يٛنْکِ؞» سٜيْ فَارِسَنْکٛعٜنْ مبِعِمٛ، «اَ حٛکَّ شٜيْدَ حٛورٜ مَاطَ، کٛ مبِعَتَا نَاع طُمْ غٛونغَ؞» يٜىٰسُ وِعِٻٜ، «کٛو تٛ مِ حٛکِّي شٜيْدَ حٛورٜ اَمْ، کٛ مبِعَيْمِ طُمْ غٛونغَ، نغَمْ اٜ مِ اَنْدِ تٛ پِوٛيْمِ اٜ تٛ نجَحَيْمِ؞ اَمَّا اٛنٛنْ اٛنْ اَنْدَا تٛ پِوٛيْمِ اٜ تٛ نجَحَيْمِ؞ اٛنْ نغَطَ کِيتَ نٛ يِمْٻٜ دُونِيَارُ نغَطِرْتَ کِيتَ، مِنْ بٛو وَلَا مٛ نغَطَنْمِ کِيتَ؞ اَمَّا فُو اٜ نٛنْ تٛ مِ وَطِي کِيتَ، کِيتَ اَمْ طُمْ غٛونغَ، نغَمْ نَاع مِنْ تَنْ وَطَتَ کِيتَ کَنْ، اَمَّا مِنْ اٜ ݧَاکٛ اَمْ لِلٛيْطٛيَمْ وَطَتَکَ؞ ندٜرْ اَتَّوْرَ مٛوطٛنْ طُمْ وِنْدِ وِيکِي شٜيْدَ کَ يِمْٻٜ طِطٛ کٛکِّ اٜ کَ وٛودِ غٛونغَ؞ اٜ مِ حٛکَّ شٜيْدَ حٛورٜ اَمْ، ندٜنْ ݧَاکٛ اَمْ لِلٛيْطٛيَمْ مَا اٜ حٛکَّ شٜيْدَ اَمْ؞» ٻٜ مبِعِمٛ، «تٛيٜ ݧَاکٛ مَاطَ اٛنْ وٛنِ؟» يٜىٰسُ وِعِٻٜ، «اٛنْ اَنْدَايَمْ، اٛنْ بٛو اَنْدَا ݧَاکٛ اَمْ؞ دَا اٛنْ اَنْدِيَمْ، دَا اٛنْ اَنْدِ ݧَاکٛ اَمْ مَا؞» يٜىٰسُ مٜتِي حَالَ کَعَ شَرٜلْ کٛ اٛ اٜکِّتِنْتَ ندٜرْ وُرٛ شٜنِينغٛ حَادٜ اَکْوَاتِيجِ تٛ طُمْ رٜسَتَ دٛکّٜ نغَمْ اَللَّه؞ اَمَّا وَلَا نَنْغُطٛمٛ نغَمْ شَرٜلْ مَاکٛ وَطَايِ تَوْ؞ سٜيْ يٜىٰسُ فُطِّتِ وِعِ يِمْٻٜ ٻٜنْ، «مِ دِلَّيْ، اٛنْ طَٻِّتَيْيَمْ، اَمَّا اٛنْ مَايَيْ ندٜرْ حَکّٜ مٛوطٛنْ؞ تٛ نجَحَيْمِ بٛو، اٛنْ مبَاوَتَا يَاکِ؞» طُعُمْ وَطِ اَرْدِيٻٜ يَحُودَنْکٛعٜنْ مبِعِ، «اٛ وَرَيْ حٛورٜ مَاکٛ وٛنْ طٛنْ؟ کٛو کَنْجُمْ اٛ يِطِ وِيکِ ندٜ اٛ وِعِ، ‹تٛ نجَحَيْمِ اٛنْ مبَاوَتَا يَاکِ؟› » اَمَّا يٜىٰسُ وِعِٻٜ، «اٛنٛنْ دَغَ دُونِيَارُ ندُعُ پِوٛيْطٛنْ، مِنْ بٛو دَغَ دٛوْ پِوٛيْمِ؞ اٛنٛنْ دُونِيَارُ جٜيِعٛنْ، مِنْ نَاع دُونِيَارُ جٜيِيَمْ؞ مِ وِعِيعٛنْ اٛنْ مَايَيْ ندٜرْ حَکّٜ مٛوطٛنْ، غٛونغَ اٛنْ مَايَيْ ندٜرْ حَکّٜ مٛوطٛنْ سٜيْ نِ تٛ اٛنْ نجَٻِي مِنْ وٛنِ مٛ مبِيمِعٛنْ؞» ٻٜ مبِعِمٛ، «اَنْ اَ مٛيٜ؟» يٜىٰسُ وِعِٻٜ، «مِنْ وٛنِ اٛنْ طٛنْ مٛ مبِيمِعٛنْ دَغَ اَرَنْدٜ؞ اٜ وٛودِ فِي طُطُّمْ طُمْ نغِطُمِ وِيکِ دٛوْ مٛوطٛنْ، کَدِنْ اٜ وٛودِ فِي طُطُّمْ طُمْ نغِطُمِ تَپَنْکِعٛنْ کِيتَ دٛوْ مَاجُمْ؞ اَمَّا اٛنْ طٛنْ لِلٛيْطٛيَمْ اٜ وٛودِ غٛونغَ؞ کٛ نَنْمِ تٛ مَاکٛ تَنْ مبِعَيْمِ دُونِيَارُ؞» ٻٜ ڤَامَايِ يٜىٰسُ اٜ مٜتَنَٻٜ دٛوْ ݧَاکٛ مٛ دٛوْ؞ سٜيْ يٜىٰسُ وِعِ، «شَرٜلْ نغٜلْ پٜفْتُطٛنْ ٻِي نٜطّٛ، اٛنْ اَنْدَيْ مِنْ وٛنِ اٛنْ طٛنْ مٛ مبِعَيْمِ؞ کَدِنْ اٛنْ اَنْدَيْ فُو کٛ نغَطَيْمِ نَاع اٜ لَامُ اَمْ نغَطِرَيْمِطُمْ، اَمَّا کٛ ݧَاکٛ اَمْ اٜکِّتِنِيَمْ مبِعَيْمِ؞ اٛنْ طٛنْ لِلٛيْطٛيَمْ اٜ وٛنْدِ اٜ اَمْ، اٛ اَلَايِيَمْ مِنْ تَنْ، نغَمْ کٛو ندٜيٜ اٜ مِ وَطَ کٛ وٜلْنَنْتَمٛ ٻٜرْندٜ؞» شَرٜلْ نغٜلْ يٜىٰسُ وِعَتَ نٛنْ، طُطْٻٜ کٛولِيمٛ؞ سٜيْ يٜىٰسُ وِعِ يَحُودَنْکٛعٜنْ کٛولِيٻٜمٛ، «تٛ اٛنْ تٛکِّي اٜکِّتِنٛلْ اَمْ، اٛنْ تٛکُّٻٜيَمْ ٻٜ غٛونغَ؞ ندٜنْ اٛنْ اَنْدَيْ غٛونغَ، غٛونغَ بٛو رِمْطِنَيْعٛنْ؞» ٻٜ مبِعِمٛ، «مِنْ تَانِرَاٻٜ اِبْرَاهِمْ، مِنْ مٜىٰطَايِ وَرْتُکِ مَشُّٻٜ غٛطّٛ؞ نٛ وَطَتَ مبِعَا، ‹طُمْ رِمْطِنَيْمِنْ؟› » يٜىٰسُ وِعِٻٜ، «اٜ مِ وِعَعٛنْ غٛونغَ، کٛو مٛيٜ غَطٛووٛ حَکّٜ اٛ مَشُّطٛ حَکّٜ؞ مَشُّطٛ جٛوطَتَاکٛ ندٜرْ وُرٛ حَا اَبَدَا، اَمَّا ٻِطّٛ وٛنِ جٛوطٛتٛوطٛ ندٜرْ مَاغٛ حَا اَبَدَا؞ نغَمْ نٛنْ تٛ ٻِطّٛ اٛنْ رِمْطِنِيعٛنْ، اٛنْ کٜٻِي رِمْطِنٜىٰکِ کِ غٛونغَ؞ اٜ مِ اَنْدِ اٛنْ تَانِرَاٻٜ اِبْرَاهِمْ، فُو اٜ نٛنْ اٛنْ طَٻِّتَ وَرْکِيَمْ، نغَمْ اٛنْ نجَٻَايِ اٜکِّتِنٛلْ اَمْ؞ اٜ مِ وِعَعٛنْ کٛ نغِيمِ تٛ ݧَاکٛ اَمْ، اٛنٛنْ بٛو اٛنْ نغَطَ کٛ نَنْطٛنْ دَغَ تٛ ݧَاکٛ مٛوطٛنْ؞» ٻٜ مبِعِمٛ، «اِبْرَاهِمْ وٛنِ ݧَاکٛ اَمِنْ؞» يٜىٰسُ وِعِٻٜ، «دَا اٛنْ ٻِٻّٜ اِبْرَاهِمْ، اٛنْ نغَطَيْ کٛ اِبْرَاهِمْ وَطِ؞ اَمَّا جٛونِ اٛنْ طَٻِّتَ وَرْکِيَمْ، مِنْ بِيطٛعٛنْ غٛونغَ کَ نَنْمِ دَغَ تٛ اَللَّه؞ طُعُمْ نَاع کَنْجُمْ اِبْرَاهِمْ وَطِ؞ اٛنْ نغَطَ کٛ ݧَاکٛ مٛوطٛنْ وَطِ؞» ٻٜ مبِعِمٛ، «مِنٛنْ نَاع مِنْ جَالُعٜنْ، اَللَّه وٛنِ ݧَاکٛ اَمِنْ، کَنْکٛ تَنْ وٛنِ ݧَاکٛ مٛ مِنْ نغٛودِ؞» يٜىٰسُ وِعِٻٜ، «دَا اَللَّه وٛنِ ݧَاکٛ مٛوطٛنْ، دَا اٛنْ نغِطَيْيَمْ، نغَمْ دَغَ تٛ مَاکٛ پِوٛيْمِ، جٛونِ بٛو اٜ مِ طٛعٛ؞ مِ وَرَايِ نغَمْ حٛورٜ اَمْ، اَمَّا کَنْکٛ لِلٛيِيَمْ؞ نغَمْ طُمٜ اٛنْ ڤَامَايِ کٛ مبِيمِ؟ کَنْجُمْ وٛنِ نغَمْ اٛنْ مبَاوَتَا جَٻُکِ وٛلْدٜ اَمْ؞ اٛنٛنْ اٛنْ ٻِٻّٜ ݧَاکٛ مٛوطٛنْ شٜيْطَنْ، کٛ نغِطّٛنْ وٛنِ نغَطٛنْ کٛ ݧَاکٛ مٛوطٛنْ يِطِ؞ دَغَ اَرَنْدٜ اٛ غَطٛووٛ وَرْحٛورٜ؞ وَلَا کٛ وَنِّمٛ اٜ غٛونغَ، نغَمْ اٛ وَلَا غٛونغَ؞ تٛ اٛ فٜوِي، طُمْ نغِکُّ مَاکٛ، نغَمْ اٛ ڤٜوٛووٛ، ݧَاکٛ فٜوْرٜ؞ اَمَّا نغَمْ مِ وِعِ غٛونغَ، اٛنْ کٛولَاکِيَمْ؞ مٛيٜ ندٜرْ مٛوطٛنْ وَاوَتَ تَبِّتِنْکِ مِ وَطِي حَکّٜ؟ تٛ نِ غٛونغَ مبِعَيْمِ، نغَمْ طُمٜ اٛنْ کٛولَتَاکٛيَمْ؟ کٛو مٛيٜ مٛ اَللَّه جٜيِ اٜ نَنَ کٛ اَللَّه وِعِ؞ کٛ حَطِعٛنْ نَنْکِ کٛ مبِيمِ وٛنِ اٛنٛنْ نَاع طُمْ ٻٜ اَللَّه؞» مَوْٻٜ يَحُودَنْکٛعٜنْ نٛوتِي مبِعِمٛ، «نَاع طُمْ غٛونغَ مِنْ مبِعِ ندٜ مِنْ مبِعِ اَ سَمَارِيَنْکٜىٰجٛ ندٜنْ اَ وٛودِ غِنّٛلْ؟» يٜىٰسُ وِعِٻٜ، «مِ وَلَا غِنّٛلْ، اَمَّا ݧَاکٛ اَمْ کٛکَّيْمِ مَنْغُ، اٛنٛنْ بٛو اٛنْ نجَوَنَيَمْ؞ مِ طَٻِّتَنْتَا حٛورٜ اَمْ تٜدُّنغَلْ، اَمَّا اٜ وٛودِ غٛطّٛ طَٻِّتَنَيْطٛيَمْنغَلْ، کَنْکٛ وٛنِ غَطَيْطٛ کِيتَ؞ اٜ مِ وِعَعٛنْ غٛونغَ، فُو غَطٛووٛ کٛ مبِيمِ، اٛ مَايَتَا؞» يَحُودَنْکٛعٜنْ مبِعِمٛ، «جٛونِ اٜ مِنْ اَنْدِ اَ وٛودِ غِنّٛلْ؞ اِبْرَاهِمْ مَايِي، نٛنْ مَا اَنَّبٛعٜنْ، اَمَّا اَ وِعِي فُو غَطٛووٛ کٛ مبِيطَا مَايَتَا؞ اَ ٻُرِي ݧَاکٛ اَمِنْ اِبْرَاهِمْ؟ اٛ مَايِي، نٛنْ مَا اَنَّبٛعٜنْ حٛرِيٻٜ مَايِي؞ مٛيٜ ݧُمَتَا غٛنْطَا؟» يٜىٰسُ نٛوتِي وِعِ، «تٛ مِ تٜدِّنِي حٛورٜ اَمْ، تٜدُّنغَلْ اَمْ وَرْتِي مٜىٰرٜ؞ ݧَاکٛ اَمْ مٛ مبِعٛتٛنْ وٛنِ اَللَّه مٛوطٛنْ، کَنْکٛ وٛنِ تٜدِّنْطٛيَمْ؞ کٛو ندٜ اٛنْ اَنْدَامٛ، اَمَّا مِنْ اٜ مِ اَنْدِمٛ؞ دَا مِ وِعِينٛعٛنْ مِ اَنْدَامٛ، دَا مِ وَرْتِي ڤٜوٛووٛ بٛ مٛوطٛنْ؞ اَمَّا اٜ مِ اَنْدِمٛ، اٜ مِ تٛکَّ وٛلْدٜ مَاکٛ؞ ݧَاکٛ مٛوطٛنْ اِبْرَاهِمْ اٜ وٜلْوٜلْتَ تٛ اٛ ݧُمِي دٛوْ ݧَلْندٜ ندٜ نغَرَيْمِ؞ اٛ يِعِيندٜ، اٛ بٛو نَنِي بٜلْطُمْ؞» ٻٜ مبِعِمٛ، «اَ حٜوْتَايِ دُوٻِ 50 تَوْ، اَمَّا اَ وِعَ اَ يِعِي اِبْرَاهِمْ؟» يٜىٰسُ وِعِٻٜ، «اٜ مِ وِعَعٛنْ غٛونغَ، کٛ اِبْرَاهِمْ دَݧٜىٰ اٜ مِ طٛنْ؞» ندٜ اٛ وِعِ نٛنْ، سٜيْ ٻٜ کٛشِّ کَاپٜ نغَمْ ٻٜ کُبٛومٛ، اَمَّا يٜىٰسُ سُوطِ حٛورٜ مُوطُمْ، وُرْتِي ندٜرْ وُرٛ شٜنِينغٛ نغٛنْ دِلِّ؞ يٜىٰسُ اٜ ندٜرْ يَادُ، سٜيْ اٛ يِعِ نٜطّٛ دَݧَاطٛ اٜ وُمِ؞ تٛکُّٻٜمٛ پَمِمٛ مبِعِ، «مٛودِبّٛ، حَکّٜ مٛيٜ وَطِ طُمْ دَݧِ نٜطّٛ اٛعٛ اٜ وُمِ؟ طُمْ حَکّٜ مَاکٛ کٛو حَکّٜ دَݧٛوٻٜ مَاکٛ؟» يٜىٰسُ وِعِ، «نَاع نغَمْ حَکّٜ نٜطّٛ اٛعٛ کٛو نغَمْ حَکّٜ دَݧٛوٻٜ مَاکٛ وَطِ اٛ دَݧَا بُمْطٛ؞ اٛ دَݧَا اٜ مٛ وُمِ نغَمْ طُمْ حٛلَّ بَوْطٜ اَللَّه دٛوْ مَاکٛ؞ دٛولٜ کُوٜنْ کُوطٜ اٛنْ طٛنْ لِلٛيْطٛيَمْ دَغَ نَانغٜ اٜ طٛنْ؞ جٜمَّ ٻَدَکٜ؞ اٜ شَرٜلْ نغٜلْ وَلَا بَاوَيْطٛ حُوَ؞ تٛ نِ اٜ مِ دُونِيَارُ، مِنْ وٛنِ جَيْنغٛلْ دُونِيَارُ؞» غَطَ يٜىٰسُ وِعِي نٛنْ، سٜيْ اٛ تُوتِ جٛودٜ اٜ لٜيْدِ، اٛ جِيٻِرِ لٜيْدِ ندِنْ اٜ مَاجٜ، اٛ حٛشِّندِ، اٛ مٛيْتَنِ نٜطّٛ اٛنْ تٛ غِتٜ؞ اٛ وِعِمٛ، «دِلُّ، شُلْمٛطَا تٛ نجٛنْغَ بِعٜتٜىٰنغَ سِلُوَمْ؞» مَعَنَ سِلُوَمْ وٛنِ «لِلَاطٛ؞» سٜيْ نٜطّٛ اٛنْ يَحِ سُلْمِي، وَرْتِ اٜ يِعَ؞ کٜدُّٻٜ اٜ مَاکٛ اٜ وٛووُٻٜ يِيکِمٛ اٜ مٛ تٛرٛو ندٜنّٛ مبِعِ، «نَاع طُمْ نٜطّٛ اٛعٛ وٛنِ جٛوطٛتٛنٛوطٛ اٜ تٛرٛو؟» وٛٻّٜ مبِعِ، «طُمْ کَنْکٛ؞» وٛٻّٜ بٛو مبِعِ، «نَاع طُمْ کَنْکٛ، طُمْ نَنْدُطٛ اٜ مَاکٛ؞» اَمَّا نٜطّٛ اٛنْ وِعِ، «طُمْ مِنْ؞» ٻٜ مبِعِمٛ، «نٛ طُمْ وَطِ جٛونِ اَ يِعَ؟» اٛ وِعِٻٜ، «نٜطّٛ بِعٜتٜىٰطٛ يٜىٰسُ جِيٻِ لٜيْدِ مٛيْتَنِيَمْ تٛ غِتٜ، وِعِيَمْ مِ يَحَ نجٛنْغَ سِلُوَمْ مِ سُلْمٛو؞ سٜيْ نجَحُمِ، شُلْمِيمِ سٜيْ مبُمْتُمِ؞» ٻٜ پَمِمٛ ٻٜ مبِعِ، «تٛ نٜطّٛ اٛعٛ وٛنِ؟» اٛ وِعِٻٜ، «مِ اَنْدَا؞» سٜيْ ٻٜ نجَارِ بُمْتُطٛ اٛنْ تٛ فَارِسَنْکٛعٜنْ؞ تٛو، ݧَلْندٜ ندٜ يٜىٰسُ جِيٻِ لٜيْدِ وُمْتِنِ بُمْطٛ اٛنْ طُمْ ݧَلْندٜ سِوْتَارٜ؞ فَارِسَنْکٛعٜنْ ٻٜنْ مَا ڤُطِّ پَمُکِ نٜطّٛ اٛنْ نٛ اٛ وُمْتِرِ، اٛ وِعِٻٜ، «اٛ وَطُ لٜيْدِ تٛ غِتٜ اَمْ، شُلْمِيمِ، جٛونِ اٜ مِ يِعَ؞» وٛٻّٜ ندٜرْ فَارِسَنْکٛعٜنْ ٻٜنْ مبِعِ، «نٜطّٛ غَطُطٛ فِي طُعُمْ نَاع دَغَ تٛ اَللَّه اٛ پِوٛيِ، نغَمْ اٛ تٛکَّايِ دٛوکَ ݧَلْندٜ سِوْتَارٜ؞» وٛٻّٜ بٛو مبِعِ، «نٛ وَطَتَ نٜطّٛ غَطٛووٛ حَکّٜ وَاوَ وَطُکِ اِرِ کَيْطِنِيطُمْ طُعُمْ؟» نغَمْ نٛنْ، فٜىٰرٛوتِرٛلْ نَتِّ حَکُّندٜ مَٻّٜ؞ نغَمْ نٛنْ، ٻٜ ڤُطِّتِ ٻٜ پَمِ نٜطّٛ اٛنْ ٻٜ مبِعِ، «طُمٜ مبِعَتَا دٛوْ مَاکٛ، ندٜ اَنْ اٛ وُمْتِنِ؟» نٜطّٛ اٛنْ وِعِ، «اٛ اَنَّبِيجٛ؞» اَرْدِيٻٜ يَحُودَنْکٛعٜنْ نجَٻَايِ نٜطّٛ اٛنْ ندٜنّٛ اٛ بُمْطٛ جٛونِ بٛو اٜ مٛ يِعَ، نَاکِ ٻٜ نٛدِّ دَݧٛوٻٜ مَاکٛ، ٻٜ پَمِٻٜ ٻٜ مبِعِ، «اٛعٛ طُمْ ٻِطّٛ مٛوطٛنْ مٛ مبِيطٛنْ دَݧَامَ اٜ وُمِ؟ نٛ وَطِ جٛونِ اٜ مٛ يِعَ؟» دَݧٛوٻٜ نٜطّٛ اٛنْ مبِعِ، «اٜ مِنْ اَنْدِ اٛ ٻِطّٛ اَمِنْ، کَدِنْ مَا اٛ دَݧَامَ اٜ مٛ وُمِ؞ اَمَّا مِنْ اَنْدَا نٛ وَطِ جٛونِ اٜ مٛ يِعَ، نٛنْ مَا مِنْ اَنْدَا مٛيٜ وُمْتِنِمٛ؞ پَمٜىٰمٛ، نَاع اٛ سُکَ، اٛ وِعَيْعٛنْ کَ اٜ حٛورٜ مَاکٛ؞» دَݧٛوٻٜ نٜطّٛ اٛنْ مبِعِي نٛنْ نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ؞ نغَمْ اَرْدِيٻٜ يَحُودَنْکٛعٜنْ ٻٜنْ نجَادَکٜ شِرْيَکٜ وِيکِ کٛو مٛيٜ بِيطٛ يٜىٰسُ وٛنِ اَلْمَسِيحُ طُمْ رِيوَيْمٛ دَغَ ندٜرْ لٜݧٛلْ؞ کَنْجُمْ وَطِ دَݧٛوٻٜ بُمْتِنَاطٛ اٛنْ مبِعِ، «نَاع اٛ سُکَ، پَمٜىٰمٛ؞» سٜيْ اَرْدِيٻٜ ٻٜنْ نٛدِّتِي بُمْتِنَاطٛ اٛنْ، ٻٜ مبِعِمٛ، «وِعُ غٛونغَ نغَمْ تٜدِّنَا اَللَّه؞ اٜ مِنْ اَنْدِ نٜطّٛ جَمْطِتِنْطٛمَ اٛ غَطٛووٛ حَکّٜ؞» بُمْتِنَاطٛ اٛنْ وِعِٻٜ، «کٛو اٛ غَطٛووٛ حَکّٜ مِ اَنْدَا، فِي غٛعٛ طُمْ اَنْدُمِ وٛنِ ندٜنّٛ مِ بُمْطٛ، جٛونِ بٛو اٜ مِ يِعَ؞» ٻٜ مبِعِمٛ، «طُمٜ اٛ وَطَنْمَا؟ نٛ اٛ مَٻِّتِرِ غِتٜ مَاطَ؟» نٜطّٛ اٛنْ وِعِٻٜ، «مِ يَادَکٜ مِ وِعِيعٛنْکَ اٛنْ نجَٻَايِ؞ نغَمْ طُمٜ نغِطّٛنْ نَنْکِکَ کَدِنْ؟ کٛو اٛنٛنْ مَا اٛنْ نغِطِ وَرْتُکِ تٛکُّٻٜمٛ؟» سٜيْ ٻٜ کُطِمٛ ٻٜ مبِعِ، «اَنْ وٛنِ تٛکُّطٛمٛ، اَمَّا مِنٛنْ مِنْ تٛکُّٻٜ مُوسَ! اٜ مِنْ اَنْدِ اَللَّه مٜتَنِي مُوسَ، اَمَّا نٜطّٛ اٛعٛ مِنْ اَنْدَا تٛ اٛ پِوٛيِ؞» نٜطّٛ اٛنْ وِعِٻٜ، «طُعُمْ طُمْ فِي کَيْطِنِيطُمْ! اٛنْ اَنْدَا تٛ اٛ پِوٛيِ، اَمَّا اٛ وُمْتِنِييَمْ؞ اٜنْ اَنْدِ اَللَّه نَنَتَا دٛعَارٜ غَطٛوٻٜ حَکّٜ، اَمَّا اٜ مٛ نَنَ دٛعَارٜ کُلٛووٛمٛ غَطٛووٛ کٛ اٛ يِطِ؞ دَغَ دُونِيَارُ تَغَا وَلَا مٜىٰطُطٛ نَنُکِ غٛطّٛ وُمْتِنِي نٜطّٛ دَݧَاطٛ اٜ وُمِ؞ دَا نٜطّٛ اٛعٛ نَاع تٛ اَللَّه اٛ پِوٛيِ، دَا اٛ وَاوَتَا اٛ وَطَ غٛطُّمْ؞» ٻٜ مبِعِمٛ، «اَ دَݧَامَ ندٜرْ حَکّٜ اَ مَوْنِي ندٜرْ حَکّٜ، نٛ وَطَتَ اٜکِّتِنَامِنْ؟» سٜيْ ٻٜ ندِيوِمٛ؞ يٜىٰسُ نَنِ ٻٜ ندِيوِي نٜطّٛ اٛنْ؞ ندٜ اٛ تَوِ نٜطّٛ اٛنْ، اٛ پَمِمٛ اٛ وِعِ، «اَ حٛولَکٜ ٻِي نٜطّٛ؟» نٜطّٛ اٛنْ وِعِ، «مٛودِبّٛ، مٛيٜ وٛنِ ٻِي نٜطّٛ؟ وِعَمْکَ نغَمْ مِ حٛولٛومٛ؞» يٜىٰسُ وِعِمٛ، «اَ يِعِيمٛ، کَنْکٛ وٛنِ مٜدّٛووٛ اٜ مَاطَ؞» نٜطّٛ اٛنْ وِعِ، «مٛودِبّٛ، مِ حٛولَکٜمَ؞» اٛ دِشِّي يٜىٰسٛ يٜىٰسُ، اٛ مَوْنِنِمٛ؞ يٜىٰسُ وِعِ، «مِ وَرٛيِي دُونِيَارُ ندُعُ نغَمْ وَطُکِ کِيتَ، نغَمْ وُمْٻٜ نغِعَ ندٜنْ غِعٛوٻٜ بٛو نغَرْتَ وُمْٻٜ؞» ندٜ وٛٻّٜ فَارِسَنْکٛعٜنْ غٛنْٻٜ حَادٜ يٜىٰسُ نَنِ اٛ وِعِ طُعُمْ، ٻٜ مبِعِمٛ، «مِنٛنْ مَا مِنْ وُمْٻٜ؟» يٜىٰسُ وِعِٻٜ، «دَا اٛنْ وُمْٻٜ، دَا اٛنْ تَپَنْتَاکٜ کِيتَ کٛو ندٜ اٛنْ نغَطِي حَکّٜ؞ اَمَّا جٛونِ ندٜ مبِعٛتٛنْ اٛنْ نغِعَ، طُمْ تَپَنَيْعٛنْ کِيتَ نغَمْ حَکّٜ مٛوطٛنْ؞» يٜىٰسُ وِعِ، «اٜ مِ وِعَعٛنْ غٛونغَ، کٛو مٛيٜ مٛ نَتِّرَايِ حٛغّٛ بَالِ دَمُّغَلْ، اَمَّا اٛ پٜنْتِ حٛغّٛ نغٛنْ اٛ نَتِّ، اٛ غُجّٛ اٛ تٜىٰتٛووٛ؞ نَتِّرْطٛ حٛغّٛ بَالِ دَمُّغَلْ مَاغٛ، کَنْکٛ وٛنِ غَيْنَاکٛ بَالِ طِنْ؞ دٜىٰنٛووٛ دَمُّغَلْ حٛغّٛ نغٛنْ مَٻِّتَنَيْمٛ دَمُّغَلْ، بَالِ طِنْ بٛو اٜ اَنْدِ حٛنٛنْدٜ مَاکٛ؞ اٜ مٛ نٛدِّرَطِ اِنْطٜ مَاجِ، اٛ اَرْدٛوطِ طِ مبُرْتٛو؞ تٛ اٛ وُرْتِنِي فُو بَالِ مَاکٛ، اٛ اَرْدٛتٛطِ، طِ تٛکَّيْمٛ، نغَمْ اٜ طِ اَنْدِ حٛنٛنْدٜ مَاکٛ؞ اَمَّا طِ تٛکَّتَا کٛطٛ، طِ ندٛغَّيْمٛ، نغَمْ طِ اَنْدَا حٛنٛنْدٜ کٛطٛ؞» يٜىٰسُ حٛکِّ يِمْٻٜ مِسَالُ طُعُمْ، اَمَّا ٻٜ ڤَامَايِ کٛ اٛ وِعَتَٻٜ؞ نغَمْ نٛنْ يٜىٰسُ فُطِّتِ وِعِٻٜ، «اٜ مِ وِعَعٛنْ غٛونغَ، مِنْ وٛنِ دَمُّغَلْ بَالِ؞ فُو اَرْتُٻٜيَمْ وَرْکِ ٻٜ وُيْٻٜ ٻٜ تٜىٰتٛوٻٜ، بَالِ طِنْ بٛو کٜتِّندَنَاکِٻٜ؞ مِنْ وٛنِ دَمُّغَلْ؞ فُو تٛکِّرْطٛ تٛ اَمْ نَتِّ حِسَيْ، اٛ نَتَّيْ، اٛ وُرْتٛو، اٛ حٜٻَ کٛ اٛ مَرٛرْتٛو؞ غُجّٛ وَرَيْ تَنْ نغَمْ وُجَّ، وَطَ وَرْحٛورٜ، حَلْکَ؞ مِنْ بٛو مِ وَرٛيِ نغَمْ تٛکِّرْٻٜ تٛ اَمْ کٜٻَ يٛنْکِ، ٻٜ کٜٻَکِ کٜىٰوُکِ؞ «مِنْ وٛنِ غَيْنَاکٛ بٛطّٛ؞ غَيْنَاکٛ بٛطّٛ اٜ حٛکَّ يٛنْکِ مُوطُمْ نغَمْ بَالِ مُوطُمْ؞ نٜطّٛ کٛشَّاطٛ دُرْنغٛلْ نَاع اٛ جٜيْطٛ بَالِ طِنْ؞ تٛ اٛ يِعِي شَافَاندُ اٜ وَرَ، اٛ اَلَيْ بَالِ طِنْ اٛ دٛغَّ؞ شَافَاندُ ندُنْ نَنْغَطِ سَنْکِتَطِ؞ اٛ دٛغَّيْ نغَمْ اٛ کٛشَّاطٛ دُرْنغٛلْ، وَلَا کٛ وَنِّمٛ اٜ بَالِ طِنْ؞ مِنْ وٛنِ غَيْنَاکٛ بٛطّٛ؞ اٜ مِ اَنْدِ بَالِ اَمْ، ندٜنْ بَالِ اَمْ اٜ اَنْدِيَمْ، نٛنْ نٛ ݧَاکٛ اَمْ اَنْدِرِيَمْ، اٜ نٛ اَنْدِرْمٛومِ؞ مِ حٛکِّي يٛنْکِ اَمْ نغَمْ بَالِ طِنْ؞ اٜ مِ وٛودِ غٛطِّ بَالِ طِ نغَلَا ندٜرْ حٛغّٛ نغٛعٛ؞ دٛولٜ مِ وَدَّطِ کَنْجِ مَا؞ طِ کٜتِّندَنْتٛ حٛنٛنْدٜ اَمْ؞ نغَمْ نٛنْ طِ نغَرْتَيْ اٛرْندٜ غٛعٛ، غَيْنَاکٛ غٛعٛ؞ «کٛ وَطِ ݧَاکٛ اَمْ مٛ دٛوْ اٜ يِطِيَمْ، کَنْجُمْ وٛنِ مِ حٛکَّيْ يٛنْکِ اَمْ، نغَمْ مِ فُطِّتَ مِ حٛشَّکِ کَدِنْ؞ وَلَا اِتَّنٛووٛيَمْ يٛنْکِ؞ مِنْ اٜ حٛورٜ اَمْ حٛکَّتَکِ؞ اٜ مِ وٛودِ بَوْطٜ حٛکُّکِکِ، ندٜنْ اٜ مِ وٛودِ بَوْطٜ مِ وَرْتِرَکِ؞ طُعُمْ کَنْجُمْ ݧَاکٛ اَمْ وِعِيَمْ مِ وَطَ؞» سٜيْ فٜىٰرٛوتِرٛلْ فُطِّتِ نَتِّ حَکُّندٜ يَحُودَنْکٛعٜنْ نغَمْ حَالَ کَعَ؞ طُطْٻٜ ندٜرْ مَٻّٜ مبِعِ، «اٜ مٛ وٛودِ غِنّٛلْ، اٛ کَاݝَاطٛ؞ نغَمْ طُمٜ کٜتِّندَنْتٛوطٛنْمٛ؟» وٛٻّٜ بٛو مبِعِ، «کَعَ حَالَ نَاع طُمْ کَ نٜطّٛ غٛودُطٛ غِنّٛلْ؞ نٛ وَطَتَ غِنّٛلْ وَاوَ وُمْتِنْکِ بُمْطٛ؟» تٛو، طُمْ شَرٜلْ ڤٜىٰوٛلْ، اٜ طُمْ وَطَ حُمْتٛ لَاٻِنْکِ وُرٛ شٜنِينغٛ ندٜرْ اُرُشَلِيمَ؞ يٜىٰسُ اٜ وٛوسٛو ندٜرْ رُمْڤَارُ سُلٜيْمَانُ ندٜرْ وُرٛ شٜنِينغٛ نغٛنْ؞ سٜيْ يَحُودَنْکٛعٜنْ کَوْرِتِ ڤِلِيمٛ مبِعِمٛ، «حَا ندٜيٜ اَلَتَامِنْ ندٜرْ سٜکٛ؟ تٛ اَنْ وٛنِ اَلْمَسِيحُ وِعُمِنْکَ اٜ نجَيْرِ؞» يٜىٰسُ وِعِٻٜ، «مِ وِعِيعٛنْکَ، اَمَّا اٛنْ کٛولَاکِيَمْ؞ کُوطٜ کَيْطِنِيطٜ طٜ نغَطَيْمِ ندٜرْ اِنْدٜ ݧَاکٛ اَمْ، اٜ طٜ کٛلَّ مِنْ طُمْ مٛيٜ، اَمَّا اٛنْ کٛولَاکِيَمْ، نغَمْ اٛنٛنْ نَاع اٛنْ بَالِ اَمْ؞ بَالِ اَمْ اٜ کٜتِّندَنٛويَمْ؞ اٜ مِ اَنْدِطِ، ندٜنْ اٜ طِ تٛکَّيَمْ؞ مِ حٛکِّيطِ يٛنْکِ کِ رٜعَتَا، طِ کَلْکَتَا حَا اَبَدَا، ندٜنْ وَلَا تٜىٰتَيْطٛطِ دَغَ جُنْغٛ اَمْ؞ ݧَاکٛ اَمْ کٛکُّطٛيَمْ بَالِ طِنْ، اٛ ٻُرِي کٛو طُمٜ بَوْطٜ، ندٜنْ وَلَا بَاوَيْطٛ تٜىٰتَطِ دَغَ جُنْغٛ مَاکٛ؞ مِنْ اٜ ݧَاکٛ مٛ دٛوْ مِنْ غٛعٛ؞» سٜيْ يَحُودَنْکٛعٜنْ ڤُطِّتِ کٛشِّ کَاپٜ نغَمْ کُبٛومٛ مبَرَمٛ؞ يٜىٰسُ وِعِٻٜ، «مِ حٛلِّيعٛنْ کُوطٜ بٛطّٜ طُطّٜ طٜ ݧَاکٛ مٛ دٛوْ حٛکِّيَمْ مِ وَطَ؞ نغَمْ نغَلٜ ندٜرْ مَاجٜ نغِطّٛنْ حُبٛرَاکِيَمْ کَاپٜ؟» ٻٜ مبِعِ يٜىٰسُ، «نَاع نغَمْ کُوطٜ بٛطّٜ طٜ نغَطُطَا مِنْ کُبٛتٛمَا، اَمَّا نغَمْ حُطُکِ اَللَّه؞ نغَمْ اَنْ اَ نٜطّٛ تَنْ، اَمَّا اَ وَرْتِرَ حٛورٜ مَاطَ اَللَّه؞» يٜىٰسُ وِعِٻٜ، «نَاع طُمْ وِنْدَامَ ندٜرْ اَتَّوْرَ مٛوطٛنْ، ‹مِ وِعِيعٛنْ، اٛنٛنْ اٛنْ اَلَّاجِ؟› دٜفْتٜرٜ شٜنِيندٜ طُمْ غٛونغَ حَا اَبَدَا، ندٜنْ اَللَّه نٛدِّرِي نَنْٻٜ وٛلْدٜ مُوطُمْ اَلَّاجِ، يِمْٻٜ کٛکَّاٻٜ وٛلْدٜ مَاکٛ؞ تٛ طُمْ نٛنْ، مِنْ مٛ ݧَاکٛ مٛ دٛوْ سُٻِ نغَمْ کُوغَلْ مَاکٛ لِلٛيِيَمْ ندٜرْ دُونِيَارُ، مِ حُطِي اَللَّه وٛنْ طٛنْ ندٜ مبِيمِ، ‹مِنْ مِ ٻِطّٛ اَللَّه؟› تٛ نَاع کُوطٜ ݧَاکٛ اَمْ نغَطَيْمِ، تٛع اٛنْ کٛولَيَمْ؞ اَمَّا تٛ اٜ مِ وَطَ کُوطٜ مَاکٛ، کٛو تٛ اٛنْ کٛولَاکِيَمْ، کٛولٜىٰ کُوطٜ طٜنْ، نغَمْ اَنْدٛنْ ڤَامٛنْ ݧَاکٛ مٛ دٛوْ اٜ ندٜرْ اَمْ، مِنْ مَا اٜ مِ ندٜرْ مَاکٛ؞» ٻٜ ڤُطِّتِ ٻٜ ندَرْوِ نَنْغُکِمٛ، اَمَّا اٛ وُرْتِي جُوطٜ مَٻّٜ اٛ دَطِ؞ سٜيْ يٜىٰسُ دِلِّ حُولِ شَانغٛلْ اُرْدُنْ، وِغٜىٰرٜ تٛ يَحَيَ وَطَيْنٛ بَڤْتِسْمَ، اٛ جٛوطِي طٛنْ؞ يِمْٻٜ طُطْٻٜ نغَرِ تٛ مَاکٛ، اٜ ٻٜ مبِعَ، «يَحَيَ وَطَايِ غٛطُّمْ کَيْطِنِيطُمْ، اَمَّا کٛو طُمٜ طُمْ اٛ وِعِ دٛوْ نٜطّٛ اٛعٛ طُمْ غٛونغَ؞» يِمْٻٜ طُطْٻٜ کٛولِي يٜىٰسُ طٛنْ؞ غٛطّٛ نٜطّٛ بِعٜتٜىٰطٛ لِعَاجَرُ شِيَ نجَمُ نَنْغِمٛ؞ غَرِيرِ بٜتَنِ اٛ جٛوطٛتٛو، غَرِيرِ ندِ مَرْيَامَ اٜ مَوْنِرَاوٛ مُوطُمْ مَرْتَ نجٛوطٛتٛو؞ مَرْيَامَ اٛعٛ، کَنْکٛ وَيْلَنِ کٛيْطٜ يٜىٰسُ نٜبَّمْ اُرٛوجَمْ اٛ مٛيْتِرِطٜ غَاسَ حٛورٜ مَاکٛ؞ لِعَاجَرُ مٛ يَمْطَا اٛنْ، اٛ سَکِرَاوٛ مَاکٛ؞ سٜيْ مَرْيَامَ اٜ سَکِرَاوٛ مُوطُمْ مَرْتَ ٻٜ لِلَنِ يٜىٰسُ ٻٜ مبِعِ، «مٛودِبّٛ، حِغٛ مَاطَ مٛ نغِطَّا يَمْطَا؞» اَمَّا ندٜ يٜىٰسُ نَنِ نٛنْ، اٛ وِعِ، «طُعُمْ ݧَوُ طُمْ نَنْغُ لِعَاجَرُ نَاع نغَمْ اٛ مَايَ، اٛ ݧَوُ نغَمْ طُمْ تٜدِّنَ اَللَّه، طُمْ وَرْتَ لَاوٛلْ نٛ ٻِطّٛ اَللَّه تٜدِّنِرْتٜىٰ؞» يٜىٰسُ اٜ يِطِ مَرْتَ اٜ مَرْيَامَ اٜ لِعَاجَرُ؞ فُو اٜ نٛنْ ندٜ اٛ نَنِ لِعَاجَرُ يَمْطَا، سٜيْ اٛ ٻٜيْدِ وَطُکِ بَلْطٜ طِطِ تٛ اٛ وٛنِ؞ غَطَ مَاجُمْ اٛ وِعِ تٛکُّٻٜمٛ، «اٜنْ شٛعّٛ لٜيْدِ يَحُودِيَ؞» تٛکُّٻٜمٛ مبِعِمٛ، «مٛودِبّٛ، نَاع کٛ نٜىٰٻِ يَحُودَنْکٛعٜنْ اٜ نغِطُنٛو حُبٛرَاکِمَ کَاپٜ مبَرُمَا، فُو اٜ نٛنْ اَ يِطِ سٛعَّاکِ تٛنْ؟» يٜىٰسُ وِعِٻٜ، «نَاع ݧَلْندٜ غٛعٛ اٜ وٛودِ اَوَاجِ سَڤّٛ اٜ طِطِ؟ کٛو مٛيٜ جَحٛووٛ ݧَلَوْمَ فٜغَّتَاکٛ نغَمْ اٜ مٛ يِعِرَ جَيْنغٛلْ دُونِيَارُ ندُعُ؞ اَمَّا فُو جَحٛووٛ ندٜرْ ݧِوْرٜ اٛ فٜغّٛتٛ، نغَمْ اٛ وَلَا جَيْنغٛلْ ندٜرْ مَاکٛ؞» غَطَ يٜىٰسُ وِعِي نٛنْ، سٜيْ اٛ ٻٜيْدِ وِيکِ، «حِغٛ مٜىٰطٜنْ لِعَاجَرُ طَانَکٜ، اَمَّا مِ يَحَيْ مِ فِنْدِنَمٛ؞» تٛکُّٻٜمٛ مبِعِمٛ، «مٛودِبّٛ، تٛ نِ اٛ طَانِ، اٛ يَمْطِتَيْ؞» کٛ يٜىٰسُ وِعَتَ وٛنِ لِعَاجَرُ مَايِي، اَمَّا کَمْٻٜ اٜ ٻٜ ݧُمَ کٛ يٜىٰسُ وِعَتَ وٛنِ اٜ مٛ طَانِي نغَمْ اٛ سِوْتٛو؞ سٜيْ يٜىٰسُ وِعِٻٜ اٜ نجَيْرِ، «لِعَاجَرُ مَايِي؞ اَمَّا مِ نَنِي بٜلْطُمْ مِ وَلَا تٛنْ، نغَمْ کٛولٛوطٛنْيَمْ؞ اَمَّا اٜنْ نجَحُ تٛ مَاکٛ؞» سٜيْ تٛومَ بِعٜتٜىٰطٛ شِوْتَاطٛ وِعِ تٛکُّٻٜ يٜىٰسُ حٛرِيٻٜ، «اٜنْ نجَحُ اٜنٜنْ مَا نغَمْ مَيْدٜنْ اٜ مَاکٛ؞» ندٜ يٜىٰسُ يٛتِّي تَوِ طُمْ يَادَکٜ طُمْ اُوِي لِعَاجَرُ بَلْطٜ نَيِ پَٻِّيطٜ؞ حَکُّندٜ بٜتَنِ اٜ اُرُشَلِيمَ حٜوْتَايِ مِلْ طِطِ؞ يَحُودَنْکٛعٜنْ طُطْٻٜ نغَرِ تٛ مَرْتَ اٜ مَرْيَامَ نغَمْ ٻٜ مبَلْتِنَنَٻٜ ٻٜرْطٜ دٛوْ مَيْدٜ سَکِرَاوٛ مَٻّٜ؞ ندٜ مَرْتَ نَنِ يٜىٰسُ اٜ وَرَ، اٛ يَحِ نغَمْ اٛ تَٻّٛيٛومٛ، مَرْيَامَ بٛو جٛوطِي تٛ وُرٛ؞ مَرْتَ تَٻِّي يٜىٰسُ وِعِمٛ، «مٛودِبّٛ، دَا اَ طٛنّٛ طٛعٛ، دَا سَکِرَاوٛ اَمْ مَايَايِ؞ اَمَّا اٜ مِ اَنْدِ کٛو جٛونِ فُو کٛ تٛرِطَا اَللَّه اٛ حٛکّٜتٜطُمْ؞» يٜىٰسُ وِعِمٛ، «سَکِرَاوٛ مَاطَ اُمّٛتٛ کَدِنْ؞» مَرْتَ وِعِمٛ، «اٜ مِ اَنْدِ اٛ اُمّٛتٛ ݧَلْندٜ جَانغٛ ݧَلْندٜ ندٜ مَيْٻٜ اُمّٛتٛو؞» يٜىٰسُ وِعِمٛ، «مِنْ وٛنِ اُمِّنَيْطٛ مَيْٻٜ، مِنْ وٛنِ کٛکَّيْطٛ يٛنْکِ؞ کٛو مٛيٜ کٛولِيطٛيَمْ، کٛو اٛ مَايِي، اٛ فُطِّتَيْ اٛ وَطَ يٛنْکِ؞ کٛو مٛيٜ غٛودُطٛ يٛنْکِ کٛولِيطٛيَمْ، تٛ اٛ مَايِي اٛ حَلْکَتَا؞ اَ جَٻِي کٛ مبِيمِ؟» مَرْتَ وِعِمٛ، «اٜىٰ، مٛودِبّٛ، مِ جَٻِي اَنْ وٛنِ اَلْمَسِيحُ، ٻِطّٛ اَللَّه، مٛ طُمْ وِعِ وَرَيْ ندٜرْ دُونِيَارُ؞» غَطَ مَرْتَ وِعِي نٛنْ، اٛ يَحِ اٛ نٛدِّ مِݧِرَاوٛ مَاکٛ مَرْيَامَ ٻٜ کَکِّتِ اٛ وِعِمٛ، «مٛودِبّٛ اٜ طٛعٛ اٜ مٛ يِطِ يِيکِمَ؞» ندٜ مَرْيَامَ نَنِ نٛنْ، اُمِّي ندٜرْ يَوْطَارٜ يَحِ تٛ يٜىٰسُ؞ يٜىٰسُ بٛو يٛتَّاکِ غَرِيرِ بٜتَنِ تَوْ، اَمَّا اٜ مٛ طٛنْ اٜ وِغٜىٰرٜ تٛ مَرْتَ تَوِمٛ؞ يَحُودَنْکٛعٜنْ غٛنْدُٻٜ اٜ مَرْيَامَ ندٜرْ وُرٛ نغَمْ حِنُّکِ، ندٜ ٻٜ نغِعِ مَرْيَامَ اُمَّکٜ جَوْطُمْ وُرْتَکٜ، سٜيْ ٻٜ تٛکِّمٛ، اٜ ٻٜ کَمّٛو اٛ يَحَيْ يٜنَاندٜ اٛ وٛيَ تٛنْ؞ ندٜ مَرْيَامَ يٛتِّي تٛ يٜىٰسُ وٛنِ يِعِمٛ، دِشِّ، وِعِمٛ، «مٛودِبّٛ، دَا اَ طٛعٛ، دَا سَکِرَاوٛ اَمْ مَايَايِ؞» ندٜ يٜىٰسُ يِعِ اٜ مٛ وٛيَ حَوْتِ اٜ يَحُودَنْکٛعٜنْ غَرْدُٻٜ اٜ مَاکٛ، سٜيْ ٻٜرْندٜ مَاکٛ اُمِّي نَاع سٜطَّ اٛ وَنِّي؞ اٛ وِعِ، «تٛيٜ اُوُطٛنْمٛ؟» ٻٜ مبِعِمٛ، «مٛودِبّٛ، وٛرٛيْ، نغِعَ؞» سٜيْ يٜىٰسُ وٛيِ؞ يَحُودَنْکٛعٜنْ ٻٜنْ مبِعِ، «رَا نٛ اٛ يِطِرِمٛ!» اَمَّا وٛٻّٜ مبِعِ، «اٛ وُمْتِنِي بُمْطٛ؞ تٛو، طُمٜ حَطِمٛ وَطُکِ غٛطُّمْ کَطَيْطُمْ نٜطّٛ اٛعٛ مَايُکِ؟» يٜىٰسُ فُطِّتِ وَنِّ نَاع سٜطَّ، اٛ يَحِ يٜنَاندٜ ندٜنْ؞ يٜنَاندٜ ندٜنْ بٛو طُمْ لُورٛ حَيْرٜ، حٛنْدُکٛ مَيْرٜ اٜ مَٻِّرَا کَاپَ؞ يٜىٰسُ وِعِ، «اِتّٜىٰ کَاپَ نغَنْ؞» مَرْتَ مَوْنِرَاوٛ مَيْطٛ اٛنْ وِعِ يٜىٰسُ، «مٛودِبّٛ، جٛونِ اٜ وٛودِ لُمْنغٛلْ کَلُّنغٛلْ، نغَمْ اٛ وَطِي بَلْطٜ نَيِ دَغَ اٛ مَايِ؞» سٜيْ يٜىٰسُ وِعِمٛ، «نَاع مِ وِعِيمَ تَا حٛولَکٜيَمْ، اَ يِعَيْ تٜدُّنغَلْ اَللَّه؟» سٜيْ ٻٜ اِتِّ کَاپَ نغَنْ دَغَ دَمُّغَلْ يٜنَاندٜ ندٜنْ؞ سٜيْ يٜىٰسُ رَارِ دٛوْ وِعِ، «ݧَاکٛ مٛ دٛوْ، مِ يٜتِّيمَ نغَمْ اَ نَنِي دٛعَارٜ اَمْ؞ اٜ مِ اَنْدِ اَ نَنَ دٛعَارٜ اَمْ کٛو ندٜيٜ، اَمَّا مِ وِعُ نٛنْ نغَمْ ٻٜيْدَارِ يِمْٻٜ غٛنْٻٜ طٛعٛ، نغَمْ ٻٜ نجَٻَ اَنْ لِلٛيِيَمْ؞» غَطَ اٛ وِعِي نٛنْ، اٛ نٛدِّ اٜ سٜمْبٜ، «لِعَاجَرُ، وُرْتٛيَ!» سٜيْ مَيْطٛ اٛنْ وُرْتٛيِي دَغَ ندٜرْ يٜنَاندٜ ندٜنْ، ٻَنْدُ مَاکٛ اٜ تَارِرَا وُدٜرٜ، جُوطٜ مَاکٛ اٜ کٛيْطٜ مَاکٛ اٜ کَٻِّرَا لٜفِ، يٜىٰسٛ مَاکٛ بٛو اٜ تَارِرَا لٜفٛلْ فٜىٰرٜ؞ يٜىٰسُ وِعِٻٜ، «تَارْتٜىٰمٛ، اَلٛنْمٛ اٛ دِلَّ؞» طُطْٻٜ ندٜرْ يَحُودَنْکٛعٜنْ غَرْدُٻٜ اٜ مَرْيَامَ غِعُٻٜ کٛ يٜىٰسُ وَطِ، ٻٜ کٛولِيمٛ؞ اَمَّا وٛٻّٜ مَٻّٜ نجَحِ تٛ فَارِسَنْکٛعٜنْ مبِعِٻٜ کٛ يٜىٰسُ وَطِ؞ نغَمْ نٛنْ، مَوْٻٜ اَرْدِيٻٜ دِينَ اٜ فَارِسَنْکٛعٜنْ ٻٜ نٛدِّ کَوْتَلْ مَوْٻٜ، ٻٜ مبِعِ، «طُمٜ نغَطٜتٜنْ؟ نٜطّٛ اٛعٛ اٜ وَطَ کُوطٜ کَيْطِنِيطٜ طُطّٜ؞ تٛ اٜنْ اَلِيمٛ اٛ ݧَمْرِي يٜىٰسٛ اٜ وَطُکِ طُعُمْ، کٛو مٛيٜ حٛولٛتٛمٛ، ندٜنْ رٛومَنْکٛعٜنْ نغَرَيْ تٜىٰتَ وُرٛ شٜنِينغٛ مٜىٰطٜنْ اٜ لٜيْدِ مٜىٰطٜنْ؞» اَمَّا غٛعٛتٛ مَٻّٜ بِعٜتٜىٰطٛ کَيَافَ مَوْطٛ مَوْٻٜ اَرْدِيٻٜ دِينَ اٜ طُمْ طٛنْ ندُنْغُ وِعِٻٜ، «وَلَا کٛ اَنْدُطٛنْ! اٛنْ اَنْدَا طُمْ ٻُرَنِيعٛنْ نٜطّٛ غٛعٛتٛ مَايَ نغَمْ کٛو مٛيٜ دٛوْ لٜݧٛلْ يَحُودَنْکٛعٜنْ فُو حَلْکَ؞» حَالَ کَعَ کَ کَيَافَ وِعِ نَاع طُمْ ݧُمٛ مَاکٛ، اَمَّا ندٜ کَنْکٛ وٛنِ مَوْطٛ مَوْٻٜ اَرْدِيٻٜ دِينَ اٜ طُمْ طٛنْ ندُنْغُ اٛ وَطِ اَنَّبَاکُ وِيکِ يٜىٰسُ مَايَيْ نغَمْ لٜݧٛلْ يَحُودَنْکٛعٜنْ؞ اٛ مَايَيْ نَاع نغَمْ يَحُودَنْکٛعٜنْ تَنْ، اَمَّا حَا اٜ يِمْٻٜ اَللَّه شَنْکِتِيٻٜ ندٜرْ غٛطّٜ لٜيْطٜ، اٛ حَوْرِتَٻٜ اٛ وَرْتِرَٻٜ غٛعٛ؞ دَغَ ندٜنْ طٛنْ ݧَلْندٜ ٻٜ ندَرْوِ وَرْکِ يٜىٰسُ؞ نغَمْ نٛنْ يٜىٰسُ اَلِ يِيلَاکِ ندٜرْ يَحُودَنْکٛعٜنْ اٜ نجَيْرِ؞ اَمَّا اٛ اَلِ طٛنْ اٛ يَحِ وٛنْدٜ وِغٜىٰرٜ حَادٜ کَرٜ اٛ نَتِّ وٛنْدِ غَرِيرِ بِعٜتٜىٰندِ اِفِرَايِمْ، اٛ جٛوطِي طٛنْ، کَنْکٛ اٜ تٛکُّٻٜمٛ؞ ندٜ حُمْتٛ سَکِّنْکِ نغٛ يَحُودَنْکٛعٜنْ ٻَدِي، يِمْٻٜ طُطْٻٜ جٛوطٛتٛوٻٜ ندٜرْ نغَرِحٛيْ لَدّٜ ٻٜ ندِلِّ اُرُشَلِيمَ نغَمْ ٻٜ لَاٻِنَ کٛعٜ مَٻّٜ کٛ حُمْتٛ نغٛنْ؞ ٻٜ نغَطِ کَ طَٻُّتُکِ يٜىٰسُ؞ ندٜ ٻٜ کَوْرِتِ ندٜرْ وُرٛ شٜنِينغٛ، ٻٜ نغَطِ کَ پَمْپَمْتِرْکِ اٜ ٻٜ مبِعَ، «طُمٜ نغِيطٛنْ؟ اٛ وَرَيْ حُمْتٛ نغٛعٛ بٛو؟» مَوْٻٜ اَرْدِيٻٜ دِينَ اٜ فَارِسَنْکٛعٜنْ ٻٜ نجَادَکٜ ٻٜ مبِعِي فُو اَنْدُطٛ تٛ يٜىٰسُ وٛنِ، اٛ اَنْدِنَٻٜ نغَمْ ٻٜ نَنْغَمٛ؞ بَلْطٜ جٛوٜىٰغٛعٛ کٛ حُمْتٛ سَکِّنْکِ وَطَ، يٜىٰسُ وَرِ بٜتَنِ تٛ لِعَاجَرُ جٛوطٛتٛو، مٛ اٛ اُمِّنِ دَغَ مَيْدٜ؞ تٛنْ طُمْ جٛنْغَنِ يٜىٰسُ حِرَاندٜ؞ مَرْتَ وٛنِ غٜىٰدُطٛ ݧَمْندُ ندُنْ؞ لِعَاجَرُ بٛو اٛ غٛعٛتٛ ندٜرْ جٛوطِيٻٜ اٜ ݧَمْندَ اٜ يٜىٰسُ؞ مَرْيَامَ حٛشِّ جٛلّٛيٜلْ نٜبَّمْ اُرٛوجَمْ طَمْ طُمْ وَطِرِ نَرْدِ غٛودُطَمْ شٜىٰدٜ، اٛ وَيْلِطَمْ دٛوْ کٛيْطٜ يٜىٰسُ، اٛ مٛيْتِرِطٜ غَاسَ حٛورٜ مَاکٛ؞ وُرٛ نغٛنْ حٜىٰوِ اُرْنغٛلْ نٜبَّمْ طَمْ؞ اَمَّا يَحُودَ اِسْکَرِيٛوتِ، غٛعٛتٛ ندٜرْ تٛکُّٻٜمٛ، کٛکِّتِرَيْطٛمٛ، وِعِ، «نغَمْ طُمٜ طُمْ سٛورَايِ نٜبَّمْ طَعَمْ طُمْ حٛکَّ ٻٜ نغَلَنَا شٜىٰدٜ طٜنْ؟ شٜىٰدٜ مَاجَمْ کٜوْتَيْ شٜىٰدٜ طٜ طُمْ يٛٻَتَ کُوٛووٛ حِتَاندٜ غٛعٛ؞» اٛ وِعُ نٛنْ نَاع نغَمْ اٜ مٛ وَنِّدِ اٜ ٻٜ نغَلَنَا، اَمَّا نغَمْ اٛ غُجّٛ؞ کَنْکٛ وٛنِ دٜسٛووٛ شٜىٰدٜ مَٻّٜ، اٛ بٛو وٛووِ اِتُّکِ شٜىٰدٜ طٜنْ اٜ مٛ حُوتِرَطٜ نغَمْ حٛورٜ مَاکٛ؞ يٜىٰسُ وِعِ، «اَلُ دٜبّٛ اٛعٛ؞ اٛ رٜسُطَمْ نغَمْ ݧَلْندٜ ندٜ اُوٜتٜىٰمِ؞ کٛو ندٜيٜ اٛنْ نغٛنْدِ اٜ ٻٜ نغَلَنَا ندٜرْ مٛوطٛنْ، اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞» ندٜ يَحُودَنْکٛعٜنْ طُطْٻٜ نَنِ حَبَرُ يٜىٰسُ اٜ تٛنْ بٜتَنِ، سٜيْ ٻٜ نجَحِ، نَاع نغَمْ يٜىٰسُ تَنْ، اَمَّا نغَمْ ٻٜ نغِعَ لِعَاجَرُ، مٛ اٛ اُمِّنِ دَغَ مَيْدٜ؞ نغَمْ نٛنْ، مَوْٻٜ اَرْدِيٻٜ دِينَ کَٻِّ وَرْکِ لِعَاجَرُ کَنُمْ مَا، ندٜ نغَمْ مَاکٛ يَحُودَنْکٛعٜنْ طُطْٻٜ اٜ اَلَ دِينَ مَٻّٜ اٜ کٛولٛو يٜىٰسُ؞ ندٜ فِنِ، يِمْٻٜ طُطْٻٜ غَرْٻٜ حُمْتٛ نغٛنْ نَنِ حَبَرُ يٜىٰسُ اٜ دٛوْ لَاوٛلْ وَرْکِ اُرُشَلِيمَ؞ نغَمْ نٛنْ ٻٜ کٛشِّ لِشٜ دَبِينٛوجٜ ٻٜ مبُرْتِي نغَمْ تَٻّٛيَاکِمٛ، اٜ ٻٜ مبِعَ اٜ سٜمْبٜ، «حٛسَانَ! اٛ بَرْکِطِنَاطٛ اٛنْ طٛنْ غَرٛيْطٛ ندٜرْ اِنْدٜ جٛومِرَاوٛ؞ اٛ بَرْکِطِنَاطٛ لَامِيطٛ اِسْرَاعِيلَ!» يٜىٰسُ بٛو حٜٻِ مبَبَّ مٛلَ وَطِّينغَ، نٛنْ نٛ طُمْ وِنْدِرَا، «تَاع حُلُ، غَرِيرِ سِحِيٛونَ؞ رَا لَامِيطٛ مَاطَ اٜ وَرَ دٛوْ مبَبَّ مٛلَ؞» اَرَنْدٜ تٛکُّٻٜمٛ ڤَامَايِ طُعُمْ، اَمَّا غَطَ يٜىٰسُ تٜدِّنَامَ، سٜيْ ٻٜ شِفْتٛرِ طُعُمْ طُمْ وِنْدَا دٛوْ مَاکٛ طُمْ بٛو وَطَنِيمٛطُمْ؞ غٛنْدُنٛوٻٜ اٜ مَاکٛ شَرٜلْ نغٜلْ اٛ نٛدِّ لِعَاجَرُ دَغَ ندٜرْ يٜنَاندٜ اٛ اُمِّنِمٛ دَغَ مَيْدٜ، ٻٜ ݧَمْرِ يٜىٰسٛ اٜ وِيکِ کٛ وَطِ؞ يِمْٻٜ طُطْٻٜ نجَحِ تَٻّٛيٛومٛ نغَمْ ٻٜ نَنِي حَبَرُ اٛ وَطِي طُعُمْ فِي کَيْطِنِيطُمْ؞ سٜيْ فَارِسَنْکٛعٜنْ مبِعِ حَکُّندٜ مَٻّٜ، «نغِعٜىٰ، وَلَا کٛ مبَاوٜتٜنْ وَطُکِ، نغَمْ دُونِيَارُ فُو تٛکِّيمٛ؞» اٜ وٛودِ وٛٻّٜ حٜلٜنَنْکٛعٜنْ ندٜرْ جَاٻٜ اُرُشَلِيمَ نغَمْ مَوْنِنْکِ اَللَّه شَرٜلْ حُمْتٛ سَکِّنْکِ؞ ٻٜ نجَحِ تٛ فِلِبُسْ پِوٛيْطٛ بٜتَسَيْدَ ندٜرْ لٜيْدِ غَلِيلِ، ٻٜ مبِعِمٛ، «مٛودِبّٛ، اٜ مِنْ نغِطِ يِيکِ يٜىٰسُ؞» فِلِبُسْ يَحِ وِعِکَ اَنْدِرَاوُسْ ٻٜ کَوْتِ ٻٜ نجَحِ ٻٜ مبِعِکَ يٜىٰسُ؞ يٜىٰسُ وِعِٻٜ، «شَرٜلْ وَرِي نغٜلْ ٻِي نٜطّٛ تٜدِّنْتٜىٰ؞ اٜ مِ وِعَعٛنْ غٛونغَ، تٛ نَاع غَبّٜلْ اَلْکَمَارِ يَنِ تٛ لٜيْدِ وَاتِ، نغٜلْ جٛوطٛتٛ کَنْغٜلْ تَنْ؞ اَمَّا تٛ نغٜلْ وَاتِي، نغٜلْ رِمَيْ غَبّٜ طُطّٜ؞ فُو غِطّٛ يٛنْکِ مُوطُمْ دُلَّيْکِ، ندٜنْ کٛو مٛيٜ غَݧُطٛ يٛنْکِ مُوطُمْ ندٜرْ دُونِيَارُ ندُعُ اٛ حٜٻَيْ يٛنْکِ کِ رٜعَتَا؞ فُو کُوَنٛووٛيَمْ دٛولٜ تٛکَّيَمْ؞ ندٜنْ تٛ نغٛنْمِ، تٛنْ کُوَنٛووٛيَمْ وٛنَتَ، کَنْکٛ مَا؞ کٛو مٛيٜ کُوَنَيْطٛيَمْ، ݧَاکٛ اَمْ حٛکَّيْمٛ مَنْغُ؞» يٜىٰسُ ݧَمْرِ يٜىٰسٛ اٜ وِيکِ، «جٛونِ ٻٜرْندٜ اَمْ وَنِّي؞ طُمٜ مبِعَيْمِ؟ مِ وِعَ، ‹ݧَاکٛ اَمْ، حِسْنَمْ دَغَ شَرٜلْ نغٜعٜلْ؟› نَاع نٛنْ، نغَمْ کَنْجُمْ وَطِ نغَرْمِ شَرٜلْ نغٜعٜلْ؞ يَا ݧَاکٛ اَمْ، تٜدِّنْ اِنْدٜ مَاطَ!» سٜيْ حٛنٛنْدٜ پِوٛيِ دَغَ دٛوْ وِعِ، «مِ تٜدِّنِيندٜ، مِ فُطِّتَيْ مِ تٜدِّنَندٜ؞» يِمْٻٜ طُطْٻٜ غٛنْٻٜ طٛنْ نَنِي حٛنٛنْدٜ ندٜنْ؞ وٛٻّٜ مبِعِ طُمْ رِغَّانغٛ، ندٜنْ وٛٻّٜ بٛو مبِعِ، «مَلَاعِکَاجٛ مٜتَنِمٛ؞» اَمَّا يٜىٰسُ وِعِٻٜ، «حٛنٛنْدٜ ندٜعٜ وَرٛيِ نغَمْ ٻٜيْدَارِ مٛوطٛنْ، نَاع نغَمْ ٻٜيْدَارِ اَمْ؞ جٛونِ وٛنِ شَرٜلْ نغٜلْ طُمْ وَطَنْتَ يِمْٻٜ دُونِيَارُ ندُعُ کِيتَ؞ جٛونِ طُمْ رِيوَيْ لَامِيطٛ دُونِيَارُ ندُعُ؞ اَمَّا مِنْ، تٛ مِ پٜفْتَامَ دٛوْ غَافَانغَلْ، مِ فٛوطَيْ کٛو مٛيٜ تٛ اَمْ؞» اٛ وِعُ نٛنْ نغَمْ اٛ حٛلَّ اِرِ مَيْدٜ ندٜ اٛ مَايَتَ؞ سٜيْ يِمْٻٜ حَوْرُتُٻٜ ٻٜنْ نٛوتِي مبِعِمٛ، «اَتَّوْرَ اَلْمَسِيحُ جٛوطٛتٛ حَا اَبَدَا؞ نٛ وَطَتَ مبِعَا دٛولٜ طُمْ پٜفْتَ ٻِي نٜطّٛ دٛوْ؟ طُمْ مٛيٜ مَا نٜىٰ وٛنِ اٛعٛ ٻِي نٜطّٛ؟» يٜىٰسُ وِعِٻٜ، «جَيْنغٛلْ اٜ وٛنْدِ اٜ مٛوطٛنْ نغَمْ شَرٜلْ سٜطَّ؞ نغَطٜىٰ کَ يَادُ شَرٜلْ نغٜلْ غٛودُطٛنْ جَيْنغٛلْ، نغَمْ تٛع ݧِوْرٜ وَرَ سُدَّعٛنْ؞ فُو جَحٛووٛ ندٜرْ ݧِوْرٜ اَنْدَا تٛ يَحَتَ؞ نغٜعٜلْ شَرٜلْ نغٜلْ نغٛنْدُطٛنْ اٜ جَيْنغٛلْ، کٛولٜىٰ جَيْنغٛلْ نغٛلْ، نغَمْ نغَرْتٛنْ ٻِٻّٜ جَيْنغٛلْ؞» ندٜ يٜىٰسُ وِعِ نٛنْ، سٜيْ اٛ دِلِّ اٛ سُوطِ حٛورٜ مَاکٛ دَغَ مَٻّٜ؞ کٛو ندٜ يٜىٰسُ وَطِي کٛ حَيْطِنِ طُطُّمْ يٜىٰسٛ مَٻّٜ، فُو اٜ نٛنْ ٻٜ کٛولَاکِمٛ؞ طُعُمْ وَطِ نغَمْ طُمْ حٜبِّنَ کٛ اَنَّبِ اِشَايَ وِعِ، «جٛومِرَاوٛ، مٛيٜ جَٻِ کٛ مبِيطٜنْ؟ مٛيٜ جٛومِرَاوٛ وَنْغِنَنِ بَوْطٜ مُوطُمْ؟» کَنْجُمْ وَطِ ٻٜ کٛولَاکِمٛ، نغَمْ اَنَّبِ اِشَايَ وِعِ طٛنْمَا اَللَّه وِعِ، «مِ وُمْنِي غِتٜ مَٻّٜ مِ سَاتِنِي ٻٜرْطٜ مَٻّٜ، نغَمْ تٛع ٻٜ نغِعَ اٜ غِتٜ مَٻّٜ، ٻٜ ڤَامَ ندٜرْ ٻٜرْطٜ مَٻّٜ، ٻٜ شٛعّٛو تٛ اَمْ، مِ يَمْطِتِنَ ٻٜرْطٜ مَٻّٜ؞» اَنَّبِ اِشَايَ وِعُ طُعُمْ نغَمْ ندٜنّٛ اٛ يِعِي تٜدُّنغَلْ يٜىٰسُ، طٛنْمَا اٛ مٜتِي دٛوْ مَاکٛ؞ فُو اٜ نٛنْ، کٛو ندٜرْ اَرْدِيٻٜ، طُطْٻٜ کٛولِي يٜىٰسُ؞ اَمَّا نغَمْ فَارِسَنْکٛعٜنْ ٻٜ مبِعَايِکَ اٜ نجَيْرِ نغَمْ اٜ ٻٜ کُلَ طُمْ رِيوَٻٜ دَغَ لٜݧٛلْ؞ نغَمْ ٻٜ ٻُرِي يِطُکِ يِمْٻٜ مَنَٻٜ اٜ دٛوْ اَللَّه مَنَٻٜ؞ سٜيْ يٜىٰسُ وِعِ اٜ سٜمْبٜ، «فُو کٛولِيطٛيَمْ، نَاع مِنْ تَنْ اٛ حٛولِي، اَمَّا فُو اٜ اٛنْ طٛنْ لِلٛيْطٛيَمْ؞ فُو غِيطٛيَمْ يِعِ اٛنْ طٛنْ لِلٛيْطٛيَمْ؞ مِ وَرِي ندٜرْ دُونِيَارُ ندُعُ بٛ جَيْنغٛلْ، نغَمْ فُو کٛولِيطٛيَمْ تٛع جٛوطٛو ندٜرْ ݧِوْرٜ؞ فُو نَنْطٛ اٜکِّتِنٛلْ اَمْ تٛکَّايِنغٛلْ، مِ وَطَنْتَامٛ کِيتَ، نغَمْ مِ وَرَايِ وَطَنْکِ دُونِيَارُ کِيتَ، اَمَّا مِ وَرٛيِ نغَمْ حِسْنُکِندُ؞ فُو غَݧُطٛيَمْ وَݧِ جَٻُکِ اٜکِّتِنٛلْ اَمْ، اٜ وٛودِ غَطَنَيْطٛمٛ کِيتَ؞ وٛلْدٜ ندٜ مٜتُمِ وَطَنَيْمٛ کِيتَ ݧَلْندٜ جَانغٛ؞ نغَمْ مِ مٜتِرَايِ لَامُ اَمْ، ݧَاکٛ مٛ دٛوْ لِلْطٛيَمْ وِعِيَمْ کٛ مبِعَيْمِ اٜ نٛ مبِعِرَيْمِطُمْ؞ کٛ اٛ وِعِ طُمْ وَطَ، اٜ مِ اَنْدِ طُمْ وَدَّيْ يٛنْکِ کِ رٜعَتَا؞ نغَمْ نٛنْ، فُو کٛ مبِيمِ مِ وِعُطُمْ نٛنْ نٛ ݧَاکٛ اَمْ وِعِيَمْ مِ وِعَ؞» تٛو، طُمْ ݧَلْندٜ غٛعٛ کٛ طُمْ وَطَ حُمْتٛ سَکِّنْکِ؞ يٜىٰسُ اٜ اَنْدِ شَرٜلْ وَطِي نغٜلْ اٛ اَلَتَ دُونِيَارُ ندُعُ اٛ سٛعّٛو تٛ ݧَاکٛ مٛ دٛوْ؞ يٜىٰسُ اٜ يِطِ يِمْٻٜ مُوطُمْ غٛنْٻٜ ندٜرْ دُونِيَارُ، جٛونِ بٛو اٛ حٛلَّيْٻٜ مَنْغُ يِدّٜ مَاکٛ؞ يٜىٰسُ اٜ تٛکُّٻٜمٛ اٜ ٻٜ کِرْتٛو؞ شٜيْطَنْ يَادَکٜ وَطِي ݧُمٛ حٛکِّتِرْکِ يٜىٰسُ ندٜرْ ٻٜرْندٜ يَحُودَ اِسْکَرِيٛوتِ ٻِطّٛ سِيمَنْ؞ يٜىٰسُ اٜ اَنْدِ ݧَاکٛ مٛ دٛوْ وَطِي کٛو طُمٜ ندٜرْ جُوطٜ مُوطُمْ، کَدِنْ اٜ مٛ اَنْدِ دَغَ تٛ اَللَّه اٛ پِوٛيِ، تٛ اَللَّه کَدِنْ اٛ سٛعّٛتٛو؞ نغَمْ نٛنْ، اٛ اُمِّي دَغَ تٛ ٻٜ ݧَامَتَ ݧَمْندُ، اٛ ٻٛرْتِي تٛغّٛورٜ مَاکٛ، اٛ تَادِي غُدٜلْ؞ سٜيْ اٛ ݧٜطِ ندِيَمْ ندٜرْ تُمُّدٜ، اٛ فُطِّ لٛوتُکِ کٛيْطٜ تٛکُّٻٜمٛ، اٜ مٛ مٛيْتِرَطٜ غُدٜلْ نغٜلْ اٛ تَادِي؞ اٛ وَرِ تٛ سِيمَنْ بِيتُرُسْ، سِيمَنْ بِيتُرُسْ وِعِمٛ، «مٛودِبّٛ، اَنْ لٛوتَنْتَيَمْ کٛيْطٜ؟» يٜىٰسُ وِعِمٛ، «جٛونِ اَ فَامَتَا کٛ نغَطَيْمِ، اَمَّا يٜىٰسٛ طٛعٛ اَ فَامَيْ؞» سٜيْ بِيتُرُسْ وِعِ، «اَاعَ! غٛونغَ اَ لٛوتَنْتَايَمْ کٛيْطٜ؞» يٜىٰسُ وِعِمٛ، «تٛ مِ لٛوتَنَايِمَ کٛيْطٜ، اَنْ نَاع اَ تٛکُّطٛيَمْ؞» سِيمَنْ بِيتُرُسْ وِعِمٛ، «مٛودِبّٛ، تَاع لٛوتُ کٛيْطٜ اَمْ تَنْ، حَوْتُ فُو اٜ جُوطٜ اَمْ اٜ حٛورٜ اَمْ!» سٜيْ يٜىٰسُ وِعِ، «کٛو مٛيٜ لٛوتِيطٛ، فُو ٻَنْدُ مَاکٛ وَرْتِي لَمْندُ؞ نَاع نَا اٛ فُطِّتِي اٛ لٛوتِي حٛورٜ مَاکٛ، سٜيْ نِ اٛ لٛوتَ کٛيْطٜ مَاکٛ؞ اٛنٛنْ بٛو اٛنْ لَاٻُٻٜ، اَمَّا نَاع اٛنْ فُو مٛوطٛنْ؞» يٜىٰسُ اٜ اَنْدِ کٛکِّتِرَيْطٛمٛ، کَنْجُمْ وَطِ اٛ وِعِ، «نَاع اٛنْ فُو نغٛنِ لَاٻُٻٜ؞» غَطَ يٜىٰسُ لٛوتِي کٛيْطٜ مَٻّٜ، اٛ ٻٛرْنِي تٛغّٛورٜ مَاکٛ، اٛ سٛعِّي اٛ جٛوطِي تٛ اٛ وٛنّٛو؞ اٛ وِعِٻٜ، «اٛنْ ڤَامِي کٛ نغَطَنْمِعٛنْ جٛونِ؟ اٛنْ نٛدَّيَمْ مٛودِبّٛ اٜ مَوْطٛ، اٜ طُمْ حَانِ ندٜ نغَطّٛنْ نٛنْ، نغَمْ نٛنْ نغٛنُمِ؞ جٛونِ، ندٜ مِنْ، مَوْطٛ مٛوطٛنْ اٜ مٛودِبّٛ مٛوطٛنْ، مِ لٛوتِي کٛيْطٜ مٛوطٛنْ، اٛنٛنْ مَا اٜ حَانِ لٛوتِندِرٛنْ کٛيْطٜ؞ مِ وَطَنِيعٛنْ کٛ اٜکِّتٛتٛوطٛنْ، نغَمْ اٛنٛنْ مَا نغَطَنٛنْ وٛٻّٜ نٛنْ نٛ نغَطَنْمِعٛنْ؞ اٜ مِ وِعَعٛنْ غٛونغَ، وَلَا مَشُّطٛ ٻُرْطٛ جٜيْطٛمٛ، ندٜنْ وَلَا لِلَاطٛ ٻُرْطٛ لِلْطٛمٛ؞ جٛونِ ندٜ اٛنْ اَنْدِ فُو فِي طُعُمْ، اٛنْ بَرْکِطِنَاٻٜ تٛ اٛنْ نغَطِيطُمْ؞ «نَاع دٛوْ مٛوطٛنْ اٛنْ فُو مٜتَيْمِ؞ اٜ مِ اَنْدِ ٻٜ شُٻُمِ؞ اَمَّا اَايَارٜ ندٜعٜ دٛولٜ ندٜ حٜىٰوَ بِيندٜ، ‹نٜطّٛ مٛ ݧَمْدَيْمِ ݧَمْندُ اَمْ وَرْتِي غَݧٛ اَمْ؞› اٜ مِ وِعَعٛنْ طُعُمْ جٛونِ کٛ طُمْ وَطَ، نغَمْ تٛ طُمْ وَطِي کٛولٛوطٛنْ، ‹مِنْ وٛنِ مٛ نغٛنُمِ؞› اٜ مِ وِعَعٛنْ غٛونغَ، فُو جَٻُطٛ کٛو مٛيٜ مٛ لِلُمِ جَٻِييَمْ، کَدِنْ فُو جَٻُطٛيَمْ جَٻِي اٛنْ طٛنْ لِلٛيْطٛيَمْ؞» غَطَ يٜىٰسُ وِعِي نٛنْ، اٛ وَنِّ نَاع سٜطَّ، سٜيْ اٛ وِعِ اٜ نجَيْرِ، «اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ حٛکِّتِرَيْيَمْ؞» سٜيْ تٛکُّٻٜمٛ ندَرْندَرْتِرِ، ٻٜ ڤَامَايِ دٛوْ مٛيٜ مَٻّٜ اٛ مٜتَتَ؞ غٛعٛتٛ مَٻّٜ مٛ يٜىٰسُ يِطِ نَاع سٜطَّ اٜ جٛوطِي حَادٜ يٜىٰسُ؞ سِيمَنْ بِيتُرُسْ سَڤِّيمٛ وِعِ، «پَمُ يٜىٰسُ دٛوْ مٛيٜ مٜتَتَ؞» سٜيْ اٛ ٻَدِّي يٜىٰسُ اٛ وِعِ، «مٛودِبّٛ، طُمْ مٛيٜ؟» يٜىٰسُ نٛوتِي وِعِ، «کَنْکٛ وٛنِ مٛ کٛکَّيْمِ نغٜعٜلْ ݝٛشِّتٜلْ بُرٛودِ غَطَ مِ سُووِينغٜلْ ندٜرْ تُمُّدٜ؞» سٜيْ يٜىٰسُ سُووِ ݝٛشِّتٜلْ بُرٛودِ ندٜرْ تُمُّدٜ، اٛ حٛکِّنغٜلْ يَحُودَ، ٻِي سِيمَنْ اِسْکَرِيٛوتِ؞ غَطَ يَحُودَ جَٻِي ݝٛشِّتٜلْ نغٜلْ، شٜيْطَنْ نَتِّ ٻٜرْندٜ مَاکٛ؞ يٜىٰسُ وِعِمٛ، «يَوْنُ نغَطَا کٛ نغِطَّا وَطُکِ؞» فُو جٛوطِيٻٜ طٛنْ وَلَا ڤَامُطٛ نغَمْ طُمٜ يٜىٰسُ وِعِمٛ نٛنْ؞ ندٜ يَحُودَ وٛنِ دٜسٛووٛ شٜىٰدٜ مَٻّٜ، وٛٻّٜ ندٜرْ مَٻّٜ ݧُمِ يٜىٰسُ وِعُمٛ اٛ يَحَ اٛ سٛودَ کٛ ٻٜ کُوتِنِرْتَ ندٜرْ حُمْتٛ، کٛو اٛ حٛکَّ ٻٜ نغَلَنَا غٛطُّمْ؞ غَطَ يَحُودَ جَٻِي بُرٛودِ طُمْ، اٛ وُرْتِي طٛنْ اٜ طٛنْ؞ اٜ شَرٜلْ نغٜلْ طُمْ جٜمَّ؞ غَطَ يَحُودَ اَلِي طٛنْ، يٜىٰسُ وِعِ، «جٛونِ تٜدُّنغَلْ ٻِي نٜطّٛ وَنْغَيْ، ندٜنْ لَاوٛلْ مَاکٛ تٜدُّنغَلْ اَللَّه وَنْغَيْ؞ تٛ طُمْ تٜدِّنِي اَللَّه لَاوٛلْ مَاکٛ، ندٜنْ اَللَّه اٜ حٛورٜ مُوطُمْ نٛ تٜدِّنَيْ ٻِي نٜطّٛ، اٛ تٜدِّنَيْمٛ نَاع کٛ نٜىٰٻِ؞ ٻِٻّٜ اَمْ، مِ جٛوطٛدٛتٛ اٜ مٛوطٛنْ شَرٜلْ سٜطَّ تَنْ؞ اٛنْ طَٻِّتَيْيَمْ، اَمَّا کٛ مبِينٛومِ اَرْدِيٻٜ يَحُودَنْکٛعٜنْ، اٛنٛنْ مَا اٜ مِ وِعَعٛنْ نٛنْ جٛونِ، ‹تٛ نجَحَيْمِ، اٛنْ مبَاوَتَا يَاکِ؞› جٛونِ رَا غٛطُّمْ کٜسُمْ طُمْ نغِطُمِ نغَطٛنْ: نغِطِندِرٜىٰ؞ نٛنْ نٛ نغِطِرْمِعٛنْ، اٛنٛنْ مَا سٜيْ نغِطِنْدِرٛنْ؞ تٛ اٛنْ نغِطِندِرِي، نٛنْ وَطَيْ کٛو مٛيٜ اَنْدَ اٛنٛنْ اٛنْ تٛکُّٻٜيَمْ؞» سِيمَنْ بِيتُرُسْ پَمِ يٜىٰسُ وِعِ، «مٛودِبّٛ، تٛيٜ نجَحَتَا؟» يٜىٰسُ وِعِمٛ، «تٛ نجَحَيْمِ، اَ وَاوَتَا تٛکُّکِيَمْ جٛونِ، اَمَّا يٜىٰسٛ طٛعٛ اَ تٛکَّيْيَمْ؞» بِيتُرُسْ وِعِمٛ، «مٛودِبّٛ، کٛ حَطَتَ مِ تٛکُّمَا جٛونِ؟ اٜ مِ سِرْيِي مِ مَايَ نغَمْ مَاطَ؞» يٜىٰسُ نٛوتِي، وِعِ، «اَ سِرْيِي مَايَ نغَمْ اَمْ؟ اٜ مِ وِعُمَا غٛونغَ، کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞» يٜىٰسُ وِعِٻٜ، «تٛع اٛنْ نغَنُّ ندٜرْ ٻٜرْطٜ مٛوطٛنْ، کٛولٜىٰ اَللَّه، کٛولٜىٰيَمْ؞ ندٜرْ وُرٛ ݧَاکٛ اَمْ مٛ دٛوْ اٜ وٛودِ شُوطِ طُطِّ؞ دَا نَاع طُمْ نٛنْ، دَا مِ وِعَيْعٛنْ کَ؞ مِ يَحَيْ تٛنْ مِ سِرْيَنٛوعٛنْ تٛ نجٛوطٛتٛوطٛنْ؞ تٛ مِ يَحِي، مِ سِرْيَنَکٜعٛنْ تٛ نجٛوطٛتٛوطٛنْ، مِ سٛعّٛيْتٛ، مِ حٛشَّعٛنْ مِ يَارَعٛنْ تٛ اَمْ، نغَمْ اٛنٛنْ مَا نجٛوطٛوطٛنْ تٛ نغٛنْمِ؞ اٛنْ اَنْدِ لَاوٛلْ جَحَيْنغٛلْ وِغٜىٰرٜ ندٜ نجَحَيْمِ؞» سٜيْ تٛومَ وِعِمٛ، «مٛودِبّٛ، مِنْ اَنْدَا تٛ نجَحَتَا، نٛ مِنْ اَنْدِرْتَ لَاوٛلْ نغٛلْ؟» يٜىٰسُ وِعِمٛ، «مِنْ وٛنِ لَاوٛلْ، مِنْ وٛنِ غٛونغَ، مِنْ وٛنِ يٛنْکِ؞ وَلَا جَحَيْطٛ تٛ ݧَاکٛ مٛ دٛوْ سٜيْ تٛ تٛکِّييَمْ؞» اٛ وِعِٻٜ، «دَا اٛنْ اَنْدِيَمْ، دَا اٛنْ اَنْدِ ݧَاکٛ اَمْ مٛ دٛوْ مَا؞ دَغَ جٛونِ اٛنْ اَنْدِمٛ اٛنْ نغِعِيمٛ؞» فِلِبُسْ وِعِمٛ، «مٛودِبّٛ، حٛلُّمِنْ ݧَاکٛ مٛ دٛوْ اٛنْ، نٛنْ حٜپِيمِنْ؞» يٜىٰسُ نٛوتِي وِعِ، «فِلِبُسْ، کٛ نٜىٰٻِ اٜ مِ وٛنْدِ اٜ مٛوطٛنْ، اَمَّا فُو اٜ نٛنْ اَ اَنْدَايَمْ؟ کٛو مٛيٜ غِيطٛيَمْ يِعِي ݧَاکٛ مٛ دٛوْ؞ نغَمْ طُمٜ مبِعَتَا مِ حٛلَّعٛنْ ݧَاکٛ مٛ دٛوْ؟ فِلِبُسْ، اَ حٛولَاکِ اٜ مِ ندٜرْ ݧَاکٛ اٛنْ، ندٜنْ ݧَاکٛ اٛنْ اٜ ندٜرْ اَمْ؟ کٛ مبِيمِعٛنْ نَاع بٛلِيطٜ طٜ حٛورٜ اَمْ مبِيمِعٛنْ، اَمَّا ݧَاکٛ مٛ دٛوْ، غٛنْطٛ ندٜرْ اَمْ، کَنُمْ حُوَتَ کُوطٜ مُوطُمْ؞ نجَٻٜىٰ کٛ مبِيمِ ندٜ مبِيمِ اٜ مِ ندٜرْ ݧَاکٛ مٛ دٛوْ، کَنْکٛ مَا اٜ مٛ ندٜرْ اَمْ؞ تٛ اٛنْ کٛولَاکِ کٛ مبِيمِ، کٛولٜىٰيَمْ نغَمْ کُوطٜ طٜ نغَطُمِ؞ اٜ مِ وِعَعٛنْ غٛونغَ، کٛو مٛيٜ کٛولِيطٛيَمْ حُوَيْ کُوطٜ طٜ کُوُمِ، حَا مَا اٛ حُوَ کُوطٜ ٻُرْطٜ طٜ کُوُمِ، نغَمْ مِ يَحَيْ تٛ ݧَاکٛ مٛ دٛوْ؞ مِ وَطَيْ کٛو طُمٜ طُمْ تٛرِيطٛنْ ندٜرْ اِنْدٜ اَمْ، نغَمْ طُمْ يِعَ مَنْغُ ݧَاکٛ مٛ دٛوْ بَرْکَ ٻِطّٛ اٛنْ؞ تٛ اٛنْ تٛرَکٜيَمْ کٛو طُمٜ ندٜرْ اِنْدٜ اَمْ، مِ وَطَيْطُمْ؞ «تٛ اٛنْ نغِطِيَمْ، اٛنْ نغَطَيْ کٛ مبِيمِ نغَطٛنْ؞ مِ تٛرٛتٛ ݧَاکٛ مٛ دٛوْ، ندٜنْ اٛ حٛکَّيْعٛنْ غٛطُّمْ بَلَّيْطُمْ، جٛوطٛدٛتٛوطُمْ اٜ مٛوطٛنْ حَا اَبَدَا؞ کَنْکٛ وٛنِ رُوحُ کٛلَّيْطُمْ غٛونغَ؞ يِمْٻٜ دُونِيَارُ ندُعُ نجَٻَتَاطُمْ، نغَمْ ٻٜ نغِعَتَاطُمْ، ٻٜ اَنْدَاطُمْ؞ اَمَّا اٛنٛنْ اٛنْ اَنْدِطُمْ نغَمْ اٜ طُمْ وٛنْدِ اٜ مٛوطٛنْ، ندٜنْ طُمْ جٛوطٛتٛ ندٜرْ مٛوطٛنْ؞ «تٛ مِ دِلِّي، مِ اَلَتَاعٛنْ بٛ مَرَايَعٜنْ؞ مِ سٛعّٛيْتٛ تٛ مٛوطٛنْ؞ يٜىٰسٛ طٛعٛ سٜطَّ، دُونِيَارُ ندُعُ فُطِّتَتَا يِعَيَمْ، اَمَّا اٛنٛنْ اٛنْ نغِعَيْيَمْ؞ نغَمْ اٜ مِ وٛودِ يٛنْکِ، اٛنٛنْ مَا اٛنْ کٜٻَيْ يٛنْکِ؞ اٜ ندٜنْ طٛنْ ݧَلْندٜ اٛنْ اَنْدَيْ اٜ مِ ندٜرْ ݧَاکٛ اَمْ، ندٜنْ اٛنٛنْ بٛو اٛنْ ندٜرْ اَمْ، مِنْ مَا اٜ مِ ندٜرْ مٛوطٛنْ؞ «کٛو مٛيٜ جٛغِيطٛ کٛ مبِيمِ طُمْ وَطَ تٛکِّطُمْ، کَنْکٛ وٛنِ غِطّٛيَمْ؞ فُو غِطّٛيَمْ ݧَاکٛ اَمْ يِطَيْمٛ، ندٜنْ مِنْ مَا مِ يِطَيْمٛ مِ وَنْغِنَنَامٛ حٛورٜ اَمْ؞» سٜيْ يَحُودَ ﴿نَاع يَحُودَ اِسْکَرِيٛوتِ﴾ پَمِمٛ، وِعِ، «مٛودِبّٛ، کٛ وَطِ شُٻُطَا وَنْغِنَنْکِمِنْ حٛورٜ مَاطَ نَاع يِمْٻٜ دُونِيَارُ؟» يٜىٰسُ وِعِ، «فُو غِطّٛيَمْ تٛکَّيْ اٜکِّتِنٛلْ اَمْ؞ ݧَاکٛ اَمْ بٛو يِطَيْمٛ، ندٜنْ مِنْ اٜ ݧَاکٛ اَمْ مِنْ نغَرَيْ تٛ مَاکٛ مِنْ جٛوطٛدٛو اٜ مَاکٛ؞ کٛو مٛيٜ مٛ يِطَايَمْ بٛو تٛکَّتَا اٜکِّتِنٛلْ اَمْ؞ اٜکِّتِنٛلْ نغٛلْ نَنْطٛنْ، نَاع طُمْ نغٛلْ اَمْ، طُمْ نغٛلْ ݧَاکٛ مٛ دٛوْ لِلٛيْطٛيَمْ؞ «مِ وِعُعٛنْ فُو طُعُمْ جٛونِ ندٜ نغٛنْدُمِ اٜ مٛوطٛنْ؞ اَمَّا اٜ وٛودِ بَلَّيْطُمْ، وَاتٛ رُوحُ اَللَّه طُمْ ݧَاکٛ مٛ دٛوْ لِلٛيْتَ ندٜرْ اِنْدٜ اَمْ؞ طُمْ اٜکِّتِنَيْعٛنْ کٛو طُمٜ، طُمْ سِفْتٛرَنَيْعٛنْ فُو کٛ مبِيمِعٛنْ؞ «جَمْ وٛنِ کٛ اَلْدُمِعٛنْ، جَمْ اَمْ کٛکُّمِعٛنْ؞ مِ حٛکِّيعٛنْطُمْ نَاع نٛ يِمْٻٜ دُونِيَارُ کٛکِّرْتَ؞ تٛع اٛنْ اَلُ ٻٜرْطٜ مٛوطٛنْ نغَنَّ، تٛع اٛنْ کُلُ؞ اٛنْ نَنِي اٜ مِ وِعَ، ‹مِ دِلَّيْ، اَمَّا مِ وَرْتٛيَيْ تٛ مٛوطٛنْ؞› تٛ اٛنْ نغِطِيَمْ، اٛنْ نَنَيْ بٜلْطُمْ مِ يَحَيْ تٛ ݧَاکٛ مٛ دٛوْ، نغَمْ اٛ ٻُرِييَمْ مَنْغُ؞ مِ وِعُعٛنْکَ جٛونِ کٛ طُمْ وَطَ، نغَمْ تٛ طُمْ وَطِي نجَٻٛنْ کٛ مبِيمِ؞ مِ نٜىٰٻَتَا اٜ مِ مٜدَّ اٜ مٛوطٛنْ، نغَمْ لَامِيطٛ دُونِيَارُ ندُعُ اٜ وَرَ؞ اٛ وَلَا بَوْطٜ دٛوْ اَمْ؞ اَمَّا دٛولٜ يِمْٻٜ دُونِيَارُ ندُعُ اَنْدَ اٜ مِ يِطِ ݧَاکٛ مٛ دٛوْ، کَدِنْ اٜ مِ وَطَ کٛو طُمٜ کٛ اٛ وِعِيَمْ مِ وَطَ؞ اُمّٜىٰ ندِلّٜنْ، اَلٜنْ وِغٜىٰرٜ ندٜعٜ؞» «مِنْ وٛنِ لَيٛلْ اِنَبٛحِ غٛونغَوٛلْ، ندٜنْ ݧَاکٛ اَمْ وٛنِ ڤَامَنَيْطٛنغٛلْ؞ اٛ اِتَّيْ کٛو نغَلٜ لِسَلْ اَمْ نغَلْ رِمَتَا، ندٜنْ اٛ مٛعِّنَيْ کٛو نغَلٜ لِسَلْ دِمٛووَلْ، نغَمْ نغَلْ ٻٜيْدَ رِمُکِ؞ وٛلْدٜ ندٜ مٜتَنْمِعٛنْ يَادَکٜ وَرْتِرِيعٛنْ لَٻّٜ؞ نجٛوطٜىٰ اٛنْ نجٛکّٛوتِرِ اٜ اَمْ، ندٜنْ مِنْ مَا مِ جٛوطٛتٛ اٜ مِ جٛکّٛوتِرِ اٜ مٛوطٛنْ؞ لِسَلْ وَاوَتَا رِمَ کَنُمْ تَنْ، سٜيْ تٛ نغَلْ جٛکّٛوتِرِي اٜ لَيٛلْ؞ نٛنْ اٛنٛنْ مَا اٛنْ مبَاوَتَا نغَطٛنْ غٛطُّمْ طُمْ اَللَّه يِطِ سٜيْ تٛ اٛنْ نجٛکّٛوتِرِي اٜ اَمْ؞ «مِنْ وٛنِ لَيٛلْ اِنَبٛحِ، اٛنٛنْ نغٛنِ لِشٜ مَاغٛلْ؞ کٛو مٛيٜ جٛوطِيطٛ اٜ جٛکّٛوتِرِ اٜ اَمْ، مِنْ مَا اٜ مِ جٛکّٛوتِرِ اٜ مَاکٛ، اٛ وَرْتَيْ بٛ لِسَلْ دِمَيْنغَلْ ٻِکّٛيْ طُطْکٛيْ؞ نغَمْ تٛ نَاع اٛنْ کَوْتُ اٜ اَمْ، اٛنْ مبَاوَتَا نغَطٛنْ غٛطُّمْ؞ فُو نٜطّٛ مٛ جٛکّٛتِرَايِ اٜ اَمْ، اٜ مٛ نَنْدِ اٜ لِسَلْ ڤٜعِّتَانغَلْ يٛورِ؞ اِرِ نغَلْ طٛنْ لِسَلْ اٜ نغَلْ حٛشّٜىٰ نغَلْ حُبِنٜىٰ ندٜرْ حِيتٜ نغَلْ وُلَ؞ تٛ اٛنْ نجٛکّٛوتِرِي اٜ اَمْ ندٜنْ بٛلِيطٜ اَمْ اٜ نجٛکّٛوتِرِ اٜ مٛوطٛنْ، تٛرٜىٰ کٛو طُمٜ طُمْ نغِطّٛنْ، طُمْ حٛکَّيْعٛنْ طُمْ؞ کٛ تٜدِّنْتَ ݧَاکٛ اَمْ وٛنِ نغَطٛنْ کٛ اٛ يِطِ ندٜ طُطُّمْ؞ کَنْجُمْ حٛلَّتَ اٛنْ تٛکُّٻٜيَمْ؞ نٛنْ نٛ ݧَاکٛ مٛ دٛوْ يِطِرِيَمْ، نٛنْ مِنْ مَا اٜ مِ يِطِعٛنْ؞ نجٛوطٜىٰ ندٜرْ يِدّٜ اَمْ؞ تٛ اٛنْ نغَطِي کٛ مبِيمِ طُمْ وَطَ، اٛنْ نجٛوطٛتٛ ندٜرْ يِدّٜ اَمْ، نٛنْ نٛ نغَطِرْمِ کٛ ݧَاکٛ اَمْ مٛ دٛوْ وِعِ طُمْ وَطَ نجٛوطِيمِ ندٜرْ يِدّٜ مَاکٛ؞ «مِ وِعُعٛنْ طُعُمْ نغَمْ نَنٛنْ بٜلْطُمْ ندٜرْ ٻٜرْطٜ مٛوطٛنْ اِرِ طُمْ اَمْ، ندٜنْ بٜلْطُمْ طُمْ وَرْتَ کٜوْطُمْ؞ کٛ نغِنْمِ نغَطٛنْ وٛنِ نغِطِنْدِرٛنْ نٛنْ نٛ نغِطِرْمِعٛنْ؞ وَلَا يِدّٜ ٻُرْندٜ ندٜعٜ، وَاتٛ نٜطّٛ حٛکَّ يٛنْکِ مُوطُمْ نغَمْ حِغٛوٻٜ مُوطُمْ؞ اٛنٛنْ نغٛنِ حِغٛوٻٜ اَمْ تٛ اٛنْ نغَطِي کٛ مبِيمِ طُمْ وَطَ؞ مِ فُطِّتَتَا مِ نٛدِّرَعٛنْ مَشُّٻٜ، نغَمْ مَشُّطٛ اَنْدَا کٛ جٜيْطٛمٛ وَطَتَ؞ اَمَّا مِ نٛدِّيعٛنْ حِغٛوٻٜ، نغَمْ مِ اَنْدِنِيعٛنْ کٛو طُمٜ طُمْ نَنْمِ تٛ ݧَاکٛ اَمْ؞ نَاع اٛنٛنْ شُٻِيَمْ، مِنْ سُٻِعٛنْ حٛکِّعٛنْ کُوغَلْ نجَحٛنْ نغَطٛنْ غٛطُّمْ طُمْ اَللَّه يِطِ تَبِتَيْطُمْ؞ ندٜنْ ݧَاکٛ مٛ دٛوْ حٛکَّيْعٛنْ کٛو طُمٜ طُمْ تٛرِيطٛنْمٛ ندٜرْ اِنْدٜ اَمْ؞ کٛ مبِيمِ نغَطٛنْ وٛنِ، نغِطِندِرٜىٰ؞ «تٛ يِمْٻٜ دُونِيَارُ نغَݧِيعٛنْ، اَنْدٜىٰ مِنْ ٻٜ اَرْتِ وَݧُکِ؞ دَا دُونِيَارُ ندُعُ جٜيِعٛنْ، دَا ندُ يِطَيْعٛنْ نٛ ندُ يِطِرِ ٻٜ مَيْرُ؞ اَمَّا مِ سُٻِيعٛنْ دَغَ ندٜرْ دُونِيَارُ، نغَمْ اٛنٛنْ نَاع طُمْ ٻٜ دُونِيَارُ؞ کَنْجُمْ وَطِ يِمْٻٜ مَيْرُ نغَݧِعٛنْ؞ ݧُمٜىٰ کٛ مبِينٛومِعٛنْ، ‹وَلَا مَشُّطٛ ٻُرْطٛ جٜيْطٛمٛ؞› تٛ يِمْٻٜ دُونِيَارُ تٛرِّييَمْ، اٛنٛنْ مَا ٻٜ تٛرَّيْعٛنْ؞ تٛ ٻٜ تٛکِّي اٜکِّتِنٛلْ اَمْ، اٛنٛنْ مَا ٻٜ تٛکَّيْ اٜکِّتِنٛلْ مٛوطٛنْ؞ اَمَّا ٻٜ نغَطَنَيْعٛنْ فُو فِي طُعُمْ نغَمْ اٛنٛنْ طُمْ ٻٜ اَمْ، نغَمْ ٻٜ اَنْدَا اٛنْ طٛنْ لِلٛيْطٛيَمْ؞ دَا مِ وَرَايِ مٜتَنْمِٻٜ، دَا ٻٜ نغَلَا حَکّٜ؞ اَمَّا جٛونِ ٻٜ نغَلَا کٛ ٻٜ مبِعَتَ نغَمْ حَکّٜ مَٻّٜ؞ کٛو مٛيٜ غَݧُطٛيَمْ وَݧِي ݧَاکٛ اَمْ مَا؞ دَا مِ وَطَايِنٛ کُوطٜ طٜ غٛطّٛ مٜىٰطَايِ وَطُکِ ندٜرْ مَٻّٜ، دَا ٻٜ نغَلَا حَکّٜ؞ اَمَّا جٛونِ ٻٜ نغِعِي کُوطٜ کَيْطِنِيطٜ طٜعٜ، فُو اٜ نٛنْ ٻٜ نغَݧِييَمْ مِنْ اٜ ݧَاکٛ اَمْ مٛ دٛوْ؞ طُعُمْ طُمْ وَطُ نغَمْ طُمْ حٜبِّنَ کٛ وِنْدَا ندٜرْ اَتَّوْرَ مَٻّٜ، ‹ٻٜ نغَݧِييَمْ وَلَا دَلِيلَ؞› «بَلَّيْطُمْ وَرَيْ، وَاتٛ رُوحُ اَللَّه کٛلَّيْطُمْ غٛونغَ، طُمْ لِلٛيَيْمِ دَغَ تٛ ݧَاکٛ مٛ دٛوْ؞ تٛ طُمْ وَرِي، طُمْ حٛکَّيْ شٜيْدَ دٛوْ اَمْ؞ اٛنٛنْ مَا دٛولٜ کٛکّٛنْ شٜيْدَ دٛوْ اَمْ نغَمْ اٛنْ نغٛنْدِ اٜ اَمْ دَغَ اَرَنْدٜ؞ «مِ وِعُ فُو طُعُمْ نغَمْ تٛع اَلٛنْ حٛولَاکِيَمْ؞ طُمْ رِيوَيْعٛنْ دَغَ ندٜرْ لٜݧٛلْ؞ غٛونغَ، شَرٜلْ اٜ وَرَ نغٜلْ کٛو مٛيٜ بَرْطٛعٛنْ ݧُمَيْ اَللَّه حُوَنْتَ؞ يِمْٻٜ نغَطَنَيْعٛنْ نٛنْ نغَمْ ٻٜ اَنْدَا ݧَاکٛ مٛ دٛوْ، ٻٜ اَنْدَايَمْ؞ اَمَّا مِ وِعُعٛنْکَ نغَمْ تٛ شَرٜلْ نغٜلْ وَطِي شِفْتٛرٛنْ کٛ مبِيمِعٛنْ؞ مِ وِعَايِعٛنْکَ دَغَ اَرَنْدٜ نغَمْ اٜ مِ وٛنْدِ اٜ مٛوطٛنْ؞ «جٛونِ مِ سٛعّٛتٛ تٛ اٛنْ طٛنْ لِلٛيْطٛيَمْ، فُو اٜ نٛنْ ندٜرْ مٛوطٛنْ وَلَا پَمُطٛيَمْ تٛ نجَحَيْمِ؞ جٛونِ ٻٜرْطٜ مٛوطٛنْ نغَنِّي نغَمْ مِ وِعِيعٛنْ فُو فِي طُعُمْ؞ اَمَّا اٜ مِ وِعَعٛنْ غٛونغَ، نغَمْ ٻٜيْدَارِ مٛوطٛنْ ندِلَّيْمِ؞ نغَمْ تٛ مِ دِلَّايِ، طُمْ طٛنْ بَلَّيْطُمْ وَرَنْتَاعٛنْ؞ اَمَّا تٛ مِ دِلِّي، مِ لِلٛيَيْطُمْ تٛ مٛوطٛنْ؞ تٛ طُمْ وَرٛيِي، طُمْ حٛلَّيْ يِمْٻٜ دُونِيَارُ ٻٜ ڤَامَايِ بٛطُّمْ کٛ وٛنِ حَکّٜ، اٜ اَادِلَاکُ اَللَّه، اٜ کِيتَ مَاکٛ؞ ٻٜ ڤَامَايِ کٛ وٛنِ حَکّٜ، نغَمْ ٻٜ کٛولَاکِيَمْ؞ ٻٜ ڤَامَايِ کٛ وٛنِ اَادِلَاکُ، نغَمْ مِ سٛعّٛتٛ تٛ ݧَاکٛ مٛ دٛوْ، ندٜنْ اٛنْ ڤُطِّتَتَا نغِعٛنْيَمْ؞ ٻٜ ڤَامَايِ کٛ وٛنِ کِيتَ اَللَّه، نغَمْ لَامِيطٛ دُونِيَارُ ندُعُ يَادَکٜ تَپَنَامَ کِيتَ؞ «اٜ مِ وٛودِ فِي طُطُّمْ طُمْ نغِطُمِ وِيکِعٛنْ، اَمَّا جٛونِ طُمْ تٜدَّنَيْعٛنْ؞ اَمَّا شَرٜلْ نغٜلْ رُوحُ اَللَّه کٛلَّيْطُمْ غٛونغَ وَرِي، طُمْ اَنْدِنَيْعٛنْ غٛونغَ فُو؞ طُمْ مٜتَتَا بٛلِيطٜ طٜ حٛورٜ مَاجُمْ، کٛ طُمْ نَنِ تَنْ طُمْ مٜتَتَ، ندٜنْ طُمْ وِعَيْعٛنْ کٛ وَطَتَ يٜىٰسٛ؞ رُوحُ طُمْ حٛشَّيْ کٛ مبِيمِ طُمْ وِعَعٛنْکَ، نٛنْ طُمْ حٛلِّرْتَ تٜدُّنغَلْ اَمْ؞ فُو کٛ ݧَاکٛ مٛ دٛوْ وٛودِ، مِنْ جٜيِطُمْ؞ کَنْجُمْ وَطِ مبِيمِ رُوحُ مَاکٛ حٛشَّيْ کٛ مبِيمِ طُمْ وِعَعٛنْکَ؞ «يٜىٰسٛ طٛعٛ سٜطَّ اٛنْ نغِعَتَايَمْ، ندٜنْ غَطَ شَرٜلْ سٜطَّ اٛنْ نغِعَيْيَمْ؞» وٛٻّٜ ندٜرْ تٛکُّٻٜمٛ نغَطِ کَ پَمْپَمْتِرْکِ اٜ ٻٜ مبِعَ، «کٛ اٛ يِطِ وِيکِ ندٜ اٛ وِعِعٜنْ يٜىٰسٛ طٛعٛ سٜطَّ اٜنْ نغِعَتَامٛ، ندٜنْ غَطَ شَرٜلْ سٜطَّ اٜنْ نغِعَيْمٛ؟ کَدِنْ اٛ وِعِ نغَمْ اٛ يَحَيْ تٛ ݧَاکٛ مٛ دٛوْ؞» ٻٜ مبِعِ، «کٛ اٛ يِطِ وِيکِ ندٜ اٛ وِعِ، ‹شَرٜلْ سٜطَّ؟› اٜنْ اَنْدَا کٛ اٛ يِطِ وِيکِ؞» يٜىٰسُ اٜ اَنْدِ اٜ ٻٜ نغِطِ ٻٜ پَمَمٛ دٛوْ مَاجُمْ، نغَمْ نٛنْ اٛ وِعِٻٜ، «اٛنْ مٜدَّ حَکُّندٜ مٛوطٛنْ دٛوْ مَعَنَ کٛ مبِيمِ ندٜ مبِيمِ، ‹يٜىٰسٛ طٛعٛ اٛنْ نغِعَتَايَمْ، ندٜنْ غَطَ شَرٜلْ سٜطَّ اٛنْ نغِعَيْيَمْ؟› اٜ مِ وِعَعٛنْ غٛونغَ، اٛنْ مبٛيَيْ، اٛنْ نغَنَّيْ، اَمَّا يِمْٻٜ دُونِيَارُ مبٜلْمبٜلْتَيْ؞ اٛنْ نَنَيْ نَوْطُمْ ٻٜرْندٜ، اَمَّا نَوْطُمْ ٻٜرْندٜ ندٜنْ وَرْتَيْ بٜلْطُمْ ٻٜرْندٜ؞ شَرٜلْ نغٜلْ دٜبّٛ دَݧَتَ اٛ نَنَيْ نَوْطُمْ، نغَمْ شَرٜلْ يَرْکِ بٛنٜ مَاکٛ وَرِي؞ اَمَّا تٛ اٛ دَݧِي ٻِنْغٜلْ مَاکٛ، اٛ يٜجِّتَيْ تٛرَّ کَ اٛ يَرِ، نغَمْ نَنْکِ بٜلْطُمْ ٻِنْغٜلْ دَݧَامَ ندٜرْ دُونِيَارُ؞ نٛنْ طُمْ وٛنِ تٛ مٛوطٛنْ؞ جٛونِ طُمْ شَرٜلْ نغٜلْ نَنٛتٛنْ نَوْطُمْ ٻٜرْندٜ، اَمَّا مِ فُطِّتَيْ مِ يِعَعٛنْ، ندٜنْ اٛنْ مبٜلْمبٜلْتَيْ؞ وَلَا بَاوَيْطٛ اِتَّنَعٛنْ بٜلْطُمْ ٻٜرْندٜ؞ «اٜ ندٜنْ طٛنْ ݧَلْندٜ، اٛنْ تٛرَتَاکٛيَمْ غٛطُّمْ؞ اٜ مِ وِعَعٛنْ غٛونغَ، کٛو طُمٜ طُمْ تٛرِيطٛنْ ݧَاکٛ مٛ دٛوْ ندٜرْ اِنْدٜ اَمْ، اٛ حٛکَّيْعٛنْ طُمْ؞ حَا جٛونِ اٛنْ تٛرَاکِ غٛطُّمْ ندٜرْ اِنْدٜ اَمْ؞ تٛرٜىٰ اٛنْ کٜٻَيْ، نغَمْ وٜلْوٜلٛ مٛوطٛنْ حٜىٰوَ؞ «مِ حُوتِرِي مِسَالُ مِ وِعِيعٛنْ فُو طُعُمْ؞ اَمَّا شَرٜلْ اٜ وَرَ نغٜلْ مِ مٜتِرَنْتَاعٛنْ مِسَالُ، اَمَّا مِ مٜتَنَيْعٛنْ اٜ نجَيْرِ دٛوْ ݧَاکٛ مٛ دٛوْ؞ اٜ ندٜنْ طٛنْ ݧَلْندٜ اٛنْ تٛرٛتٛ ندٜرْ اِنْدٜ اَمْ؞ مِ وِعَايِعٛنْ مِ تٛرٛتٛمٛ نغَمْ مٛوطٛنْ؞ نغَمْ ݧَاکٛ مٛ دٛوْ کَنْکٛ اٜ حٛورٜ مَاکٛ اٜ مٛ يِطِعٛنْ؞ اٜ مٛ يِطِعٛنْ نغَمْ اٛنْ نغِطِيَمْ، ندٜنْ اٛنْ کٛولَکٜ دَغَ تٛ مَاکٛ پِوٛيْمِ؞ مِ پِوٛيِي تٛ مَاکٛ مِ وَرِ دُونِيَارُ، ندٜنْ جٛونِ مِ اَلَيْ دُونِيَارُ مِ پٜىٰݝَيْ تٛ مَاکٛ؞» سٜيْ تٛکُّٻٜ يٜىٰسُ مبِعِمٛ، «جٛونِ اَ مٜتَ اٜ نجَيْرِ اَ حُوتِرْتَا مِسَالُ؞ جٛونِ اٜ مِنْ اَنْدِ اَ اَنْدِ کٛو طُمٜ، نَاع نَا غٛطّٛ پَمِيمَ پَمْطٜ؞ طُعُمْ وَطِي مِنْ نجَٻِ دَغَ تٛ اَللَّه پِوٛيْطَا؞» يٜىٰسُ وِعِٻٜ، «جٛونِ اٛنْ کٛولَکٜيَمْ؟ شَرٜلْ اٜ وَرَ نغٜلْ يَادَکٜ نغٜلْ وَرِ نغٜلْ طُمْ سَنْکِتَتَعٛنْ، کٛو مٛيٜ سٛعّٛو وُرٛ مُوطُمْ؞ اٛنْ اَلَيْيَمْ مِنْ تَنْ؞ اَمَّا نَاع طُمْ مِنْ تَنْ، نغَمْ ݧَاکٛ مٛ دٛوْ اٜ وٛنْدِ اٜ اَمْ؞ مِ وِعُعٛنْ طُعُمْ نغَمْ کٜٻٛنْ بٜلْطُمْ ٻٜرْندٜ بَرْکَ سُمْڤٛوتِرْکِ اٜ اَمْ؞ ندٜرْ دُونِيَارُ ندُعُ اٛنْ نجَرَيْ تٛرَّ؞ اَمَّا تٛع اٛنْ نغَنُّ، مِ حٜٻِي جَالٛرْغَلْ دٛوْ دُونِيَارُ؞» غَطَ يٜىٰسُ يٛتِّنِي وِيکِ بٛلِيطٜ طٜعٜ، اٛ رَارِ دٛوْ اٛ وِعِ، «ݧَاکٛ اَمْ، شَرٜلْ وَرِي؞ مَوْنِنْ ٻِطّٛ مَاطَ، نغَمْ ٻِطّٛ مَاطَ تٜدِّنِيمَ؞ نغَمْ اَ حٛکِّيمٛ لَامُ دٛوْ يِمْٻٜ فُو، نغَمْ اٛ حٛکَّ فُو ٻٜ کٛکُّطَامٛ يٛنْکِ کِ رٜعَتَا؞ يٛنْکِ کِ رٜعَتَا وٛنِ ٻٜ اَنْدُمَا، اَنْ تَنْ وٛنِ اَللَّه غٛونغَاجٛ، ندٜنْ ٻٜ اَنْدَ يٜىٰسُ اَلْمَسِيحُ مٛ لِلٛيْطَا؞ مِ تٜدِّنِيمَ ندٜرْ دُونِيَارُ، مِ يٛتِّنِي کُوغَلْ نغَلْ کٛکُّطَايَمْ؞ ݧَاکٛ اَمْ، جٛونِ تٜدِّنَمْ يٜىٰسٛ مَاطَ تٜدُّنغَلْ نغَلْ نغٛودُنٛومِ يٜىٰسٛ مَاطَ کٛ دُونِيَارُ تَغٜىٰ؞ «مِ اَنْدِنِي حَبَرُ مَاطَ تٛ ٻٜنْ طٛنْ ٻٜ کٛکُّطَايَمْ دَغَ ندٜرْ دُونِيَارُ؞ اَنْ جٜيِٻٜ، ندٜنْ اَ حٛکِّييَمْٻٜ، کَدِنْ اٜ ٻٜ تٛکِّ وٛلْدٜ مَاطَ؞ جٛونِ اٜ ٻٜ اَنْدِ کٛو طُمٜ طُمْ کٛکُّطَايَمْ تٛ مَاطَ طُمْ پِوٛيِ؞ مِ وِعِيٻٜ بٛلِيطٜ طٜ مبِيطَايَمْ، ٻٜ بٛو نجَٻِيطٜ؞ ٻٜ اَنْدِي طُمْ غٛونغَ تٛ مَاطَ پِوٛيْمِ، ندٜنْ ٻٜ کٛولَکٜ اَنْ لِلٛيِيَمْ؞ «اٜ مِ وَطَنَٻٜ دٛعَارٜ؞ نَاع يِمْٻٜ دُونِيَارُ نغَطَنَيْمِ دٛعَارٜ، اَمَّا ٻٜنْ طٛنْ ٻٜ کٛکُّطَايَمْ، نغَمْ اَنْ جٜيِٻٜ؞ فُو ٻٜ نغٛودُمِ اَنْ جٜيِٻٜ، ندٜنْ فُو ٻٜ نغٛودُطَا مِنْ جٜيِٻٜ، ندٜنْ مِ تٜدِّنَامَ بَرْکَ مَٻّٜ؞ جٛونِ نَاع کٛ نٜىٰٻِ مِ اَلَيْ دُونِيَارُ مِ وَرٛيَ تٛ مَاطَ، اَمَّا کَمْٻٜ اٜ ٻٜ ندٜرْ دُونِيَارُ؞ ݧَاکٛ اَمْ شٜنِيطٛ، سُرِرْٻٜ بَوْطٜ اِنْدٜ مَاطَ، اِنْدٜ ندٜ کٛکُّطَايَمْ، نغَمْ ٻٜ نغَرْتَ غٛعٛ نٛنْ نٛ اَنْ اٜ مِنْ اٜنْ غٛعٛ؞ کٛ نغٛنْدُنٛومِ اٜ مَٻّٜ مِ سُرِرِيٻٜ بَوْطٜ اِنْدٜ مَاطَ، اِنْدٜ ندٜ کٛکُّطَايَمْ؞ مِ رٜىٰنِيٻٜ، وَلَا کٛو غٛعٛتٛ مَٻّٜ مَجُّطٛ، سٜيْ نِ نٜطّٛ کَلْکَتٜىٰطٛ نغَمْ کٛ اَايَارٜ وِعِ حٜىٰوَ؞ جٛونِ اٜ مِ وَرٛيَ تٛ مَاطَ؞ مِ وِعُ فُو طُعُمْ شَرٜلْ نغٜعٜلْ نغٜلْ نغٛنْمِ ندٜرْ دُونِيَارُ نغَمْ ٻٜ نَنَ اِرِ بٜلْطُمْ ٻٜرْندٜ طُمْ نَنَيْمِ ٻٜ نَنَ طُمْ کٜوْطُمْ؞ مِ وِعِيٻٜ وٛلْدٜ مَاطَ؞ دُونِيَارُ وَݧِيٻٜ، نغَمْ نَاع دُونِيَارُ جٜيِٻٜ، نٛنْ نٛ مِنْ مَا نَاع دُونِيَارُ جٜيِيَمْ؞ نَاع اٜ مِ تٛرٛمَا نغَمْ اِتَّاٻٜ ندٜرْ دُونِيَارُ، اَمَّا اٜ مِ تٛرٛمَا نغَمْ شُرَاٻٜ دَغَ اٛنْ طٛنْ کَلُّطٛ؞ دُونِيَارُ جٜيَايِٻٜ نٛنْ نٛ مِنْ مَا دُونِيَارُ جٜيَايِيَمْ؞ وَرْتِرْٻٜ يِمْٻٜ مَاطَ لَاوٛلْ غٛونغَ مَاطَ؞ وٛلْدٜ مَاطَ وٛنِ غٛونغَ؞ نٛنْ نٛ لِلِرٛيْطَايَمْ ندٜرْ دُونِيَارُ، مِنْ مَا مِ لِلِيٻٜ ندٜرْ دُونِيَارُ؞ مِ حٛکِّيمَ حٛورٜ اَمْ نغَمْ مَٻّٜ، نغَمْ کَمْٻٜ مَا ٻٜ کٛکُّمَا کٛعٜ مَٻّٜ اٜ غٛونغَ؞ «نَاع کَمْٻٜ تَنْ نغَطَنَيْمِ دٛعَارٜ، اَمَّا فُو اٜ ٻٜنْ طٛنْ کٛولٛتٛوٻٜيَمْ لَاوٛلْ وَعَجُ مَٻّٜ؞ اٜ مِ وَطَ دٛعَارٜ ٻٜ فُو مَٻّٜ ٻٜ نغَرْتَ غٛعٛ؞ ݧَاکٛ اَمْ اٜ مِ تٛرٛمَا، ٻٜ کٜٻَ ٻٜ شُمْڤٛوتِرَ اٜ مٜىٰطٜنْ نٛنْ نٛ شُمڤٛوتِرْتٜنْ، نغَمْ دُونِيَارُ جَٻَ اَنْ لِلٛيِيَمْ؞ مِ حٛکِّيٻٜ تٜدُّنغَلْ اِرِ نغَلْ کٛکُّطَايَمْ، نغَمْ ٻٜ نغَرْتَ غٛعٛ، نٛنْ نٛ مِنْ اٜ اَنْ اٜنْ غٛعٛ؞ اٜ مِ سُمْڤٛوتِرَ اٜ مَٻّٜ ندٜنْ اٜنْ شُمْڤٛوتِرَ نغَمْ ٻٜ نغَرْتَ غٛعٛ ندٜرْ کٛو طُمٜ، نغَمْ دُونِيَارُ اَنْدَ اَنْ لِلِيَمْ، کَدِنْ اَ يِطِٻٜ نٛنْ نٛ نغِطِرْطَايَمْ؞ «يَا ݧَاکٛ اَمْ مٛ دٛوْ، اٜ مِ يِطِ ٻٜنْ طٛنْ ٻٜ کٛکُّطَايَمْ ٻٜ نغٛنْدَ اٜ اَمْ تٛ نغٛنْمِ، ٻٜ نغِعَ تٜدُّنغَلْ اَمْ، تٜدُّنغَلْ نغَلْ کٛکُّطَايَمْ نغَمْ اَ يِطِيَمْ کٛ دُونِيَارُ تَغٜىٰ؞ يَا ݧَاکٛ اَمْ اَادِلِيجٛ، يِمْٻٜ دُونِيَارُ اَنْدَامَ، اَمَّا مِنْ اٜ مِ اَنْدُمَا، ندٜنْ اٜ ٻٜ اَنْدِ اَنْ لِلٛيِيَمْ؞ مِ اَنْدِنِيٻٜ حَبَرُ مَاطَ، ندٜنْ مِ ݧَمْرَيْ يٜىٰسٛ اٜ اَنْدِنْکِ حَبَرُ مَاطَ، نغَمْ يِدّٜ ندٜ کٛلَّتَايَمْ جٛوطٛو ندٜرْ ٻٜرْطٜ مَٻّٜ، ندٜنْ مِنْ اٜ حٛورٜ اَمْ مِ سُمْڤٛوتِرَ اٜ مَٻّٜ؞» غَطَ يٜىٰسُ يٛتِّنِي ندٜعٜ دٛعَارٜ، اٛ دِلِّدِ اٜ تٛکُّٻٜمٛ ٻٜ کُولِ لُغّٜرٜ کِدِرٛنْ؞ ٻٜ نجَحِ وٛنْدٜ وِغٜىٰرٜ غٛودُندٜ نغٜسَ لٜطّٜ جَيْتُنْ، ٻٜ نَتِّ ندٜرْ لٜطّٜ طٜنْ؞ تٛو، يَحُودَ کٛکِّتِرَيْطٛ يٜىٰسُ اٜ اَنْدِ وِغٜىٰرٜ ندٜنْ، نغَمْ ندٜ طُطُّمْ يٜىٰسُ اٜ حَوْرَ اٜ تٛکُّٻٜمٛ تٛنْ؞ سٜيْ يَحُودَ يَحِ نغٜسَ کَنْ اٜ اَرْدِي کَوْتَلْ سٛوجِعٜنْ رٛومَ، اٜ وٛٻّٜ تَادِيٻٜ وُرٛ شٜنِينغٛ ٻٜ مَوْٻٜ اَرْدِيٻٜ دِينَ اٜ فَارِسَنْکٛعٜنْ لِلِ؞ اٜ ٻٜ نجٛغِي فِتِلَاجِ، اٜ جَمٜ حِيتٜ، اٜ کٛ طُمْ حٛنِرْتَ؞ يٜىٰسُ ندٜ اٜ اَنْدِ فُو کٛ حٜٻَتَمٛ، اٛ دَرِي يٜىٰسٛ مَٻّٜ اٛ پَمِٻٜ، اٛ وِعِ، «طُمْ مٛيٜ طَٻِّتٛتٛنْ؟» ٻٜ مبِعِ، «يٜىٰسُ نَجَرَنْکٜىٰجٛ؞» اٛ وِعِٻٜ، «طُمْ مِنْ؞» يَحُودَ کٛکِّتِرَيْطٛمٛ بٛو اٜ دَرٛدِي اٜ مَٻّٜ؞ ندٜ يٜىٰسُ وِعِٻٜ، «طُمْ مِنْ،» ٻٜ شٛعّٛرِي غَطَ ٻٜ نجَنِ اٜ لٜيْدِ؞ سٜيْ يٜىٰسُ فُطِّتِ پَمِٻٜ وِعِ، «مٛيٜ طَٻِّتٛتٛنْ؟» ٻٜ مبِعِ، «يٜىٰسُ نَجَرَنْکٜىٰجٛ؞» اٛ وِعِٻٜ، «مِ يَادَکٜ مِ وِعِيعٛنْ طُمْ مِنْ؞ تٛ نِ مِنْ طَٻِّتٛتٛنْ، اَلٜىٰ يِمْٻٜ ٻٜعٜ ندِلَّ؞» اٛ وِعُ نٛنْ نغَمْ کٛ اٛ وِعُنٛ حٜىٰوَ، «مِ دُلَّايِ کٛو غٛعٛتٛ ندٜرْ ٻٜنْ طٛنْ ٻٜ کٛکُّطَايَمْ؞» سِيمَنْ بِيتُرُسْ اٜ وٛودِ کَافَحِ، سٜيْ سٛلْتِکِ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ ݧَامٛ؞ اِنْدٜ مَشُّطٛ اٛنْ مَلْکُسْ؞ سٜيْ يٜىٰسُ وِعِ بِيتُرُسْ، «وَتُّ کَافَحِ مَاطَ ندٜرْ حٛلْغٛ مَاکِ؞ اَ ݧُمَ مِ يَرَتَا جَرْدُغٜلْ تٛرَّ کَ ݧَاکٛ اَمْ حٛکَّتَيَمْ؟» سٜيْ سٛوجِعٜنْ رٛومَ اٜ اَرْدِيطٛٻٜ اٜ تَادِيٻٜ وُرٛ شٜنِينغٛ نَنْغِ يٜىٰسُ، ٻٜ کَٻِّمٛ؞ اَرَنْدٜ ٻٜ نجَارِمٛ تٛ حَنَانَ اٜسِرَاوٛ کَيَافَ؞ کَيَافَ اٛنْ وٛنِ مَوْطٛ مَوْٻٜ اَرْدِيٻٜ دِينَ اٜ طُنْ طٛنْ ندُنْغُ؞ کَنْکٛ وٛنِ کٛکُّطٛ اَرْدِيٻٜ يَحُودَنْکٛعٜنْ شَاوٛرِ وِيکِ، طُمْ ٻُرِي نٜطّٛ غٛعٛتٛ مَايَ نغَمْ کٛو مٛيٜ؞ سِيمَنْ بِيتُرُسْ اٜ غٛطّٛ تٛکُّطٛ يٜىٰسُ ٻٜ تٛکِّ يٜىٰسُ؞ ندٜ اٛنْ طٛنْ تٛکُّطٛ يٜىٰسُ غٛعٛتٛ اٛنْ مَوْطٛ مَوْٻٜ اَرْدِيٻٜ دِينَ اٜ اَنْدِمٛ، سٜيْ اٛ يَادِ اٜ يٜىٰسُ تٛ نجَيْرِ وُرٛ مَوْطٛ مَوْٻٜ اَرْدِيٻٜ دِينَ اٛنْ؞ اَمَّا بِيتُرُسْ دَرِي يَاسِ تٛ دَمُّغَلْ وُرٛ نغٛنْ؞ سٜيْ اٛنْ طٛنْ تٛکُّطٛ يٜىٰسُ مٛ مَوْطٛ مَوْٻٜ اَرْدِيٻٜ دِينَ اَنْدِ، اٛ وُرْتِي يَاسِ، اٛ مٜتَنِ دٜبّٛ ڤَامَنٛووٛ دَمُّغَلْ نغَلْ، اٛ نَتِّنِ بِيتُرُسْ؞ سٜيْ دٜبّٛ ڤَامَنٛووٛ دَمُّغَلْ اٛنْ وِعِ بِيتُرُسْ، «اَنْ، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟» بِيتُرُسْ وِعِ، «کٛو سٜطَّ، نَاع مِ تٛکُّطٛمٛ؞» اٜ شَرٜلْ نغٜلْ اٜ وٛودِ ڤٜىٰوٛلْ، نغَمْ نٛنْ مَشُّٻٜ اٜ تَادِيٻٜ وُرٛ شٜنِينغٛ کُٻِّ حِيتٜ، اٜ ٻٜ ڤِلِينغٜ، اٜ ٻٜ اِرْفٛو؞ سٜيْ بِيتُرُسْ کَنُمْ مَا ٻَدِّي دَرِي ندٜرْ مَٻّٜ اٜ اِرْفٛو؞ سٜيْ مَوْطٛ مَوْٻٜ اَرْدِيٻٜ دِينَ پَمِ يٜىٰسُ دٛوْ تٛکُّٻٜمٛ اٜ دٛوْ اٜکِّتِنٛلْ مَاکٛ؞ يٜىٰسُ وِعِمٛ، «کٛو ندٜيٜ اٜ مِ مٜتَنَ کٛو مٛيٜ اٜ نجَيْرِ؞ کٛو ندٜيٜ اٜ مِ اٜکِّتِنَ اٜکِّتِنٛلْ اَمْ ندٜرْ شُوطِ دٛعَارٜ اٜ ندٜرْ وُرٛ شٜنِينغٛ تٛ فُو يَحُودَنْکٛعٜنْ کَوْرَتَ؞ مِ مٜىٰطَايِ وِيکِ غٛطُّمْ اٜ سُوطٜ؞ نغَمْ طُمٜ پَمَتَايَمْ پَمْطٜ طٜعٜ؟ پَمُ يِمْٻٜ نَنْٻٜ اٜکِّتِنٛلْ اَمْ؞ غٛونغَ اٜ ٻٜ اَنْدِ کٛ مبِيمِ؞» ندٜ يٜىٰسُ وِعِ نٛنْ، غٛعٛتٛ ندٜرْ تَادِيٻٜ دَرِيطٛ حَادٜ مَاکٛ حٜلِّمٛ تٛ وٛلٛ، وِعِ، «نٛنْ مٜتِرَنْتَا مَوْطٛ مَوْٻٜ اَرْدِيٻٜ دِينَ؟» يٜىٰسُ وِعِمٛ، «تٛ نِ مِ وِعِي غٛطُّمْ طُمْ حَانَا، وِعُکَ کٛو مٛيٜ طٛعٛ؞ اَمَّا تٛ کٛ مبِيمِ طُمْ غٛونغَ، نغَمْ طُمٜ کٜلُّطَايَمْ تٛ وٛلٛ؟» سٜيْ حَنَانَ وَطِ طُمْ سٛعِّ يٜىٰسُ تٛ کَيَافَ مَوْطٛ مَوْٻٜ اَرْدِيٻٜ دِينَ، اٜ مٛ حَٻِّي؞ بِيتُرُسْ اٜ دَرِي طٛنْ اٜ اِرْفٛو، سٜيْ وٛٻّٜ مبِعِمٛ، «اَنْ مَا، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟» اَمَّا بِيتُرُسْ يٜدِّ وِعِ، «نَاع مِ تٛکُّطٛمٛ؞» غٛعٛتٛ ندٜرْ مَشُّٻٜ مَوْطٛ مَوْٻٜ اَرْدِيٻٜ دِينَ بَنْدِرَاوٛ نٜطّٛ مٛ بِيتُرُسْ اِتَّنِ نٛوْرُ اٛ وِعِ بِيتُرُسْ، «نَاع مِ يِيدِيمَ اٜ مَاکٛ تٛنْ ندٜرْ نغٜسَ لٜطّٜ جَيْتُنْ؟» بِيتُرُسْ فُطِّتِ وِعِ، «نَاع طُمْ مِنْ؞» اٜ مٛ وِعَکَ نجَکَرْدِ حَنِ؞ سٜيْ يَحُودَنْکٛعٜنْ کٛشِّ يٜىٰسُ دَغَ وُرٛ کَيَافَ ٻٜ نجَارِمٛ لَامٛرْدٜ غٛمْنَاجٛ رٛومَنْکٜىٰجٛ؞ اٜ شَرٜلْ نغٜلْ طُمْ اِلَا سُبَکَ؞ اَرْدِيٻٜ يَحُودَنْکٛعٜنْ نَتَّايِ لَامٛرْدٜ ندٜنْ، نغَمْ تٛع ٻٜ نغَرْتَ ٻٜ لَاٻَا، ٻٜ کَطٜىٰ ݧَامُکِ ݧَمْندُ حُمْتٛ سَکِّنْکِ؞ نغَمْ نٛنْ، بِلَاتُسْ وُرْتِي يَحِ تٛ مَٻّٜ پَمِٻٜ، وِعِ، «طُمٜ نغُلّٛرْتٛوطٛنْ نٜطّٛ اٛعٛ؟» ٻٜ مبِعِمٛ، «دَا نَاع اٛ غَطٛووٛ کٛ حَلِّ، دَا مِنْ نغَدَّايِمٛ تٛ مَاطَ؞» بِلَاتُسْ وِعِٻٜ، «اٛنٛنْ اٜ کٛعٜ مٛوطٛنْ کٛشّٜىٰمٛ نغَطَنٛنْمٛ کِيتَ نٛ دٛوکَ مٛوطٛنْ وِعِ؞» ٻٜ مبِعِمٛ، «اٛنٛنْ رٛومَنْکٛعٜنْ اٛنْ اَلَتَامِنْ مِنْ تَپَنَ غٛطّٛ کِيتَ مَيْدٜ؞» طُعُمْ وَطُ نغَمْ طُمْ حٜبِّنَ کٛ يٜىٰسُ وِعُنٛ دٛوْ اِرِ مَيْدٜ ندٜ مَايَتَ؞ سٜيْ بِلَاتُسْ سٛعِّي ندٜرْ لَامٛرْدٜ، اٛ نٛدِّ يٜىٰسُ، اٛ پَمِمٛ اٛ وِعِ، «اَنْ وٛنِ لَامِيطٛ يَحُودَنْکٛعٜنْ؟» يٜىٰسُ نٛوتِي، وِعِ، «نغٛعٛلْ پَمٛلْ تٛ مَاطَ نغٛلْ پِوِ، کٛو وٛٻّٜ کٛکُّمَا حَبَرُ اَمْ؟» بِلَاتُسْ وِعِ، «اَ ݧُمَ مِ يَحُودَنْکٜىٰجٛ؟ طُمْ لٜݧٛلْ مَاطَ اٜ مَوْٻٜ اَرْدِيٻٜ دِينَ نغَدُّمَا تٛ اَمْ؞ طُمٜ نغَطُطَا؟» يٜىٰسُ وِعِ، «لَامُ اَمْ نَاع دَغَ ندُعُ دُونِيَارُ طُمْ پِوٛيِ؞ دَا لَامُ اَمْ دَغَ مَيْرُ طُمْ پِوٛيِ، دَا تٛکُّٻٜيَمْ کٛنَيْ نغَمْ ٻٜ کَطَ طُمْ نَنْغَيَمْ طُمْ وَطَيَمْ ندٜرْ جُوطٜ اَرْدِيٻٜ يَحُودَنْکٛعٜنْ؞ اَمَّا لَامُ اَمْ نَاع دَغَ ندُعُ دُونِيَارُ طُمْ پِوٛيِ؞» سٜيْ بِلَاتُسْ پَمِمٛ وِعِ، «تٛو، اَنْ، اَ لَامِيطٛ وٛنْ طٛنْ؟» يٜىٰسُ نٛوتِي، وِعِ، «اَ وِعِي مِ لَامِيطٛ؞ نغَمْ طُعُمْ طُمْ دَݧِيَمْ، ندٜنْ نغَمْ مَاجُمْ نغَرْمِ ندٜرْ دُونِيَارُ نغَمْ مِ مٜتَ دٛوْ کٛ وٛنِ غٛونغَ؞ کٛو مٛيٜ غِطّٛ غٛونغَ تٛکَّيْ کٛ مبِيمِ؞» بِلَاتُسْ پَمِمٛ وِعِ، «طُمٜ وٛنِ غٛونغَ؟» غَطَ بِلَاتُسْ وِعِي نٛنْ فُطِّتِ وُرْتِي يَاسِ تٛ يَحُودَنْکٛعٜنْ وِعِٻٜ، «مِ تَوْرَايِمٛ غٛطُّمْ کَلُّطُمْ؞ اَمَّا طُمْ ندٛنُ مٛوطٛنْ مِ يٛوفَنَعٛنْ شُرَاطٛ غٛعٛتٛ شَرٜلْ حُمْتٛ سَکِّنْکِ؞ اٛنْ نغِطِ مِ يٛوفَنَعٛنْ لَامِيطٛ يَحُودَنْکٛعٜنْ؟» ٻٜ نٛوتِي ٻٜ مبِعِ اٜ سٜمْبٜ، «نَاع اٛعٛ نجٛوفَنْتَامِنْ، يٛوفَنْمِنْ بَرَبَّسْ!» بَرَبَّسْ اٛنْ بٛو اٛ غٛعٛتٛ ندٜرْ کَٻْدٛوٻٜ اٜ لَامُ؞ سٜيْ بِلَاتُسْ وَطِ يٜىٰسُ فِيَا لٛوشِ؞ سٛوجِعٜنْ مبَالِ غِيفٛلْ غِعٜ، ٻٜ تَارَنِمٛنغٛلْ تٛ حٛورٜ، ندٜنْ ٻٜ ٻٛرْنِمٛ اِرِ تٛغّٛورٜ لَامِيٻٜ؞ ٻٜ نغَطِ کَ يَاکِ يٜىٰسٛ مَاکٛ، اٜ ٻٜ مبِعَ، «اَللَّه رٜىٰنٜ، لَامِيطٛ يَحُودَنْکٛعٜنْ!» ندٜنْ اٜ ٻٜ ڤِيَمٛ تٛ يٜىٰسٛ؞ بِلَاتُسْ فُطِّتِ وُرْتِي يَاسِ وِعِ يَحُودَنْکٛعٜنْ، «ندَارٜىٰ، مِ وُرْتِنَنَيْعٛنْ مٛ طٛعٛ نغَمْ اَنْدٛنْ مِ تَوْرَايِمٛ غٛطُّمْ کَلُّطُمْ؞» ندٜ يٜىٰسُ وُرْتِنَا اٜ تَارَنَا غِيفٛلْ غِعٜ تٛ حٛورٜ ندٜنْ اٜ ٻٛرْنِي تٛغّٛورٜ اِرِ ندٜ لَامِيٻٜ، سٜيْ بِلَاتُسْ وِعِٻٜ، «رَا نٜطّٛ اٛنْ؞» ندٜ مَوْٻٜ اَرْدِيٻٜ دِينَ اٜ تَادِيٻٜ وُرٛ شٜنِينغٛ نغِعِمٛ، ٻٜ مبِعِ اٜ سٜمْبٜ، «وَرُمٛ! وَرُمٛ دٛوْ غَافَانغَلْ!» اَمَّا بِلَاتُسْ وِعِٻٜ، «اٛنٛنْ کٛشّٜىٰمٛ مبَرٛنْمٛ؞ مِنْ مِ تَوْرَايِمٛ غٛطُّمْ کَلُّطُمْ؞» سٜيْ يَحُودَنْکٛعٜنْ مبِعِمٛ، «اٜ مِنْ نغٛودِ دٛوکَ، کَدِنْ نٛنْ نٛ دٛوکَ طُمْ وِعِ دٛولٜ اٛ وَرٜىٰ، نغَمْ اٜ مٛ وِعَ کَنْکٛ وٛنِ ٻِطّٛ اَللَّه؞» ندٜ بِلَاتُسْ نَنِ نٛنْ، سٜيْ کُلٛلْ ٻٜيْدِ نَنْغُکِمٛ؞ سٜيْ اٛ سٛعِّي ندٜرْ لَامٛرْدٜ اٛ پَمِ يٜىٰسُ اٛ وِعِ، «تٛيٜ پِوٛيْطَا؟» اَمَّا يٜىٰسُ نٛوتَاکِمٛ؞ بِلَاتُسْ وِعِمٛ، «اَ وَݧُ مٜتَنْکِيَمْ؟ اَ اَنْدَا اٜ مِ وٛودِ لَامُ مِ يٛوفُمَا، کَدِنْ اٜ مِ وٛودِ لَامُ مِ وَطَ طُمْ وَرُمَا دٛوْ غَافَانغَلْ؟» يٜىٰسُ نٛوتِي وِعِ، «اَ وَلَا لَامُ دٛوْ اَمْ تٛ نَاع جٛومِرَاوٛ حٛکُّمَا؞ نغَمْ نٛنْ، نٜطّٛ غَطُطٛيَمْ ندٜرْ جُنْغٛ مَاطَ وَطِي حَکّٜ ٻُرْطُمْ حَلُّکِ؞» ندٜ بِلَاتُسْ نَنِ نٛنْ، اٛ طَٻِّتِ لَاوٛلْ نٛ اٛ يٛوفِرْتَ يٜىٰسُ، اَمَّا يَحُودَنْکٛعٜنْ نغَطِ کَ وِيکِ اٜ سٜمْبٜ، «تَا يٛوفِي نٜطّٛ اٛعٛ، نَاع اَ حِغٛ کَيْسَرْ! فُو نٛدِّرٛووٛ حٛورٜ مُوطُمْ لَامِيطٛ اٛ غَݧٛ کَيْسَرْ!» ندٜ بِلَاتُسْ نَنِ حَالَ کَعَ، اٛ وُرْتِنِ يٜىٰسُ، اٛ جٛوطِي دٛوْ جٛوطٛرْغَلْ کِيتَ تٛ وِغٜىٰرٜ بِعٜتٜىٰندٜ «حَيْرٜ شٜحَاندٜ؞» ندٜرْ اِبْرَانِيَنْکٛورٜ وِغٜىٰرٜ ندٜنْ اٜ نٛدِّرٜىٰ غَبَّاتَ؞ اٜ شَرٜلْ نغٜلْ طُمْ شَکَ ݧَلَوْمَ ݧَلْندٜ سِرْيَاکِ حُمْتٛ سَکِّنْکِ؞ بِلَاتُسْ وِعِ يَحُودَنْکٛعٜنْ ٻٜنْ، «رَا لَامِيطٛ مٛوطٛنْ؞» ٻٜ مبِعِ بِلَاتُسْ اٜ سٜمْبٜ، «وَرُمٛ! وَرُمٛ دٛوْ غَافَانغَلْ!» بِلَاتُسْ وِعِٻٜ، «اٛنْ نغِطِ مِ وَرَ لَامِيطٛ مٛوطٛنْ دٛوْ غَافَانغَلْ؟» سٜيْ مَوْٻٜ اَرْدِيٻٜ دِينَ نٛوتِي مبِعِ، «مِنْ نغَلَا غٛطّٛ لَامِيطٛ سٜيْ کَيْسَرْ!» سٜيْ بِلَاتُسْ وَطِ يٜىٰسُ ندٜرْ جُوطٜ مَٻّٜ نغَمْ ٻٜ مبَرَمٛ دٛوْ غَافَانغَلْ؞ سٜيْ ٻٜ ندِلِّدِ اٜ يٜىٰسُ، اٜ مٛ وَکِّي غَافَانغَلْ مَاکٛ اٜ حٛورٜ مَاکٛ؞ ٻٜ مبُرْتِي يَاسِ غَرِيرِ يَاکِ وِغٜىٰرٜ بِعٜتٜىٰندٜ وِغٜىٰرٜ پِپَلْ حٛورٜ؞ ندٜرْ اِبْرَانِيَنْکٛورٜ وِغٜىٰرٜ ندٜنْ اٜ نٛدِّرٜىٰ غٛلْغٛوتَ؞ تٛ وِغٜىٰرٜ ندٜنْ ٻٜ ڤِيَنِ يٜىٰسُ کُوسَاجٜ دٛوْ غَافَانغَلْ حَوْتِ اٜ يِمْٻٜ طِطٛ؞ ٻٜ ٻِلِ غٛعٛتٛ اٜ غَافَانغَلْ جُنْغٛ يٜىٰسُ ݧَامٛ، ندٜنْ غٛعٛتٛ اٜ غَافَانغَلْ جُنْغٛ يٜىٰسُ نَنٛ، يٜىٰسُ اٜ شَکَ مَٻّٜ؞ بِلَاتُسْ وِنْدِ دٛوْ اَلّٛوَلْ اٛ وَطِ طُمْ تَکِّنغَلْ حٛورٜ غَافَانغَلْ يٜىٰسُ؞ کٛ اٛ وِنْدِ وٛنِ، «يٜىٰسُ نَجَرَنْکٜىٰجٛ لَامِيطٛ يَحُودَنْکٛعٜنْ؞» يَحُودَنْکٛعٜنْ طُطْٻٜ نجَنْغِ کٛ اٛ وِنْدِ، نغَمْ وِغٜىٰرٜ تٛ يٜىٰسُ وَرَا حَادٜ غَرِيرِ وٛنِ؞ کٛ اٛ وِنْدِ اٛ وِنْدُطُمْ ندٜرْ اِبْرَانِيَنْکٛورٜ، اٜ رٛومَنْکٛورٜ، اٜ حٜلٜنَنْکٛورٜ؞ مَوْٻٜ اَرْدِيٻٜ دِينَ مبِعِ بِلَاتُسْ، «تَاع وِنْدُ ‹لَامِيطٛ يَحُودَنْکٛعٜنْ،› اَمَّا وِنْدُ نٜطّٛ اٛعٛ وِعِي کَنْکٛ وٛنِ لَامِيطٛ يَحُودَنْکٛعٜنْ؞» بِلَاتُسْ وِعِ، «کٛ مبِنْدُمِ جٛوطَکٜ؞» غَطَ سٛوجِعٜنْ ٻٜنْ ڤِيَنِي يٜىٰسُ کُوسَاجٜ دٛوْ غَافَانغَلْ، سٜيْ ٻٜ کٛشِّ کٛلْتٜ مَاکٛ، ٻٜ شٜنْدِطٜ شٜنْدٜ نَيِ، کٛو مٛيٜ سٛوجِيجٛ جٛغِي سٜنْدٜرٜ غٛعٛ؞ کَدِنْ ٻٜ کٛشِّ تٛغّٛورٜ مَاکٛ؞ تٛغّٛورٜ ندٜنْ ݧٛعَاکَ ندٜ سَݧَاندٜ دَغَ دٛوْ يَاکِ لٜيْ؞ سٛوجِعٜنْ ٻٜنْ مبِعِ حَکُّندٜ مَٻّٜ، «تٛع اٜنْ شٜىٰکُندٜ، اٜنْ نغَطُ شَاشَ دٛوْ مَيْرٜ نغِعٜنْ مٛيٜ ݧَامَتَندٜ؞» طُعُمْ وَطُ نغَمْ کٛ اَايَارٜ وِعِ حٜىٰوَ: «ٻٜ شٜنْدِي کٛلْتٜ اَمْ حَکُّندٜ مَٻّٜ؛ ٻٜ نغَادِي شَاشَ اٜ تٛغّٛورٜ اَمْ؞» طُعُمْ کَنْجُمْ وٛنِ کٛ سٛوجِعٜنْ ٻٜنْ نغَطِ؞ دَرِيٻٜ حَادٜ غَافَانغَلْ يٜىٰسُ کَمْٻٜ نغٛنِ مَدُوجٛ مَاکٛ، اٜ سَکِرَاوٛ مَدُوجٛ مَاکٛ دٜبّٛ، اٜ مَرْيَامَ دٜبّٛ کِلٛوبَسْ، اٜ مَرْيَامَ پِوٛيْطٛ مَغَدَلَ؞ ندٜ يٜىٰسُ يِعِ مَدُوجٛ مُوطُمْ اٜ دَرِي طٛنْ اٜ تٛکُّطٛمٛ مٛ اٛ يِطِ نَاع سٜطَّ؞ سٜيْ اٛ وِعِ مَدُوجٛ مَاکٛ، «رَا ٻِطّٛ مَاطَ؞» ندٜنْ اٛ وِعِ اٛنْ طٛنْ تٛکُّطٛمٛ، «رَا مَدُوجٛ مَاطَ؞» دَغَ شَرٜلْ نغٜلْ تٛکُّطٛمٛ اٛنْ حٛشِّ مَرْيَامَ جٛوطِي تٛ وُرٛ مَاکٛ؞ غَطَ مَاجُمْ، يٜىٰسُ اٜ اَنْدِ کٛو طُمٜ يٛتِّنَامَ؞ نغَمْ کٛ اَايَارٜ وِعِ حٜىٰوَ، اٛ وِعِ، «اٜ مِ نَنَ طٛنْکَ؞» اٜ وٛودِ تُمُّدٜ طٛنْ اٜ ندٜ حٜىٰوِ ندِيَمْ اِنَبٛجَمْ لَمُّطَمْ؞ سٜيْ سٛوجِعٜنْ ٻٜنْ شُووِ سٛوسٛوَ ندٜرْ مَاجَمْ، ٻٜ طِيسِنغَ تٛ سَوْرُ حِسٛڤْ، ٻٜ پٜفْتِندُ يَاکِ حٛنْدُکٛ مَاکٛ؞ ندٜ يٜىٰسُ يَرِ ندِيَمْ اِنَبٛجَمْ طَمْ، اٛ وِعِ، «طُمْ يٛتِّنَامَ؞» سٜيْ اٛ تُرْنِ حٛورٜ مَاکٛ اٛ يٛوفِ يٛنْکِ مَاکٛ؞ طُمْ ݧَلْندٜ سِرْيَاکِ، ندٜنْ تٛ فِنِ طُمْ ݧَلْندٜ سِوْتَارٜ؞ نغَمْ اَرْدِيٻٜ يَحُودَنْکٛعٜنْ نغِطَا ٻَلِّ طِنْ اَلٜىٰ دٛوْ غَافَالٜ ݧَلْندٜ سِوْتَارٜ، سٜيْ ٻٜ تٛرِي بِلَاتُسْ وَطَ طُمْ يٜوَ کٛيْطٜ يٜىٰسُ اٜ کٛيْطٜ يِمْٻٜ طِطٛ ٻٜنْ، ندٜنْ ٻَلِّ طِنْ نجِڤِّنٜىٰ؞ نغَمْ نٛنْ سٛوجِعٜنْ ٻٜنْ نجَحِ تٛ غَافَالٜ طٜنْ؞ ٻٜ نغٜوِ کٛيْطٜ اَرَنْدٜىٰجٛ، ندٜنْ ٻٜ نغٜوِ کٛيْطٜ طِطَٻٛ اٛنْ؞ اَمَّا ندٜ ٻٜ نغَرِ تٛ يٜىٰسُ ٻٜ نغِعِ اٛ يَادَکٜ اٛ مَايِي، ٻٜ نغٜوَايِ کٛيْطٜ مَاکٛ؞ اَمَّا غٛعٛتٛ ندٜرْ سٛوجِعٜنْ ٻٜنْ يُوِرِ يٜىٰسُ لَبّٛ تٛ بٜشّٜ، طٛنْ اٜ طٛنْ پِيپَمْ اٜ ندِيَمْ وُرْتِي؞ غِيطٛ طُعُمْ شَرٜلْ کٛ طُمْ وَطِ، کَنْکٛ حٛکِّي شٜيْدَ دٛوْ مَاجُمْ، نغَمْ اٛنٛنْ مَا کٛولٛوطٛنْ؞ شٜيْدَ مَاکٛ بٛو طُمْ غٛونغَ، اٜ مٛ اَنْدِ غٛونغَ اٛ مٜتِ؞ طُعُمْ وَطُ نغَمْ کٛ اَايَارٜ وِعِ حٜىٰوَ، «وَلَا پِپَلْ مَاکٛ غٜوٜتٜىٰنغَلْ؞» کَدِنْ وٛنْدٜ اَايَارٜ وِعِي، «ٻٜ ندَارَيْ مٛ ٻٜ نجُوِ؞» غَطَ طُعُمْ وَطِي، يُسُفُ پِوٛيْطٛ غَرِيرِ اَرْمَاتِيَ تٛرِي بِلَاتُسْ حٛکَّمٛ ٻَنْدُ يٜىٰسُ؞ يُسُفُ اٛنْ اٛ تٛکُّطٛ يٜىٰسُ، اَمَّا اٜ سُوطٜ نغَمْ اٜ مٛ حُلَ اَرْدِيٻٜ يَحُودَنْکٛعٜنْ؞ بِلَاتُسْ جَٻِ، کَنْکٛ بٛو اٛ يَحِ اٛ وَطِ طُمْ جِڤِّنِ ٻَنْدُ يٜىٰسُ؞ نِکٛودِمُسْ جَحُنٛوطٛ تٛ يٜىٰسُ جٜمَّ يَادِ اٜ يُسُفُ اٛنْ؞ اٛ يَادِ اٜ نٜبَّمْ مُرْ اٜ اَلٛسْ اٜ طَمْ جِلِّندِرِ، طَمْ حٜوْتَيْ کِلٛ 30؞ يِمْٻٜ طِطٛ ٻٜنْ کٛشِّ ٻَنْدُ يٜىٰسُ ٻٜ تَارَنِندُ غُدٜ طٜ شٜىٰدٜ حَوْتِ اٜ مُرْ اٜ اَلٛسْ نٛ يَحُودَنْکٛعٜنْ نغَطَتَ تٛ ٻٜ اُوَيْ مَيْطٛ؞ تٛ وِغٜىٰرٜ ندٜ يٜىٰسُ وَرَا دٛوْ غَافَانغَلْ، اٜ وٛودِ نغٜسَ؞ ندٜرْ مَاکَ اٜ وٛودِ يٜنَاندٜ حٜيْرٜ وَسَاندٜ ندٜرْ حَيْرٜ طُمْ مٜىٰطَايِ وَطُکِ غٛطّٛ ندٜرْ مَيْرٜ؞ تٛو، ندٜ طُمْ ݧَلْندٜ سِرْيَاکِ ندٜ يَحُودَنْکٛعٜنْ شِرْيٛتٛو ݧَلْندٜ سِوْتَارٜ، ندٜنْ نغَمْ يٜنَاندٜ ندٜنْ حَادٜ ندٜ وٛنِ، ٻٜ اُوِ يٜىٰسُ ندٜرْ مَيْرٜ؞ ݧَلْندٜ اَلَلْ اِلَا سُبَکَ دَغَ ݧِوْرٜ اٜ حٛرِي مَرْيَامَ پِوٛيْطٛ مَغَدَلَ يَحِ يٜنَاندٜ ندٜنْ تَوِ حَيْرٜ ندٜ طُمْ مَٻِّرِ يٜنَاندٜ ندٜنْ تَلِّتَامَ دَغَ دَمُّغَلْ يٜنَاندٜ ندٜنْ؞ سٜيْ اٛ دٛغِّ اٛ يَحِ تٛ سِيمَنْ بِيتُرُسْ اٜ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ، اٛ وِعِٻٜ، «ٻٜ کٛشِّي ٻَنْدُ يٜىٰسُ دَغَ ندٜرْ يٜنَاندٜ! مِنْ اَنْدَا تٛ ٻٜ ندٜسِمٛ؞» سٜيْ بِيتُرُسْ اٜ اٛنْ طٛنْ مٛ يٜىٰسُ ٻُرِ يِطُکِ ٻٜ نجَحِ يٜنَاندٜ ندٜنْ؞ ٻٜ فُو طِطٛ اٜ ٻٜ ندٛغَّ، اَمَّا اٛنْ طٛنْ مٛ يٜىٰسُ ٻُرِ يِطُکِ ٻُرِي بِيتُرُسْ دٛغُّدُ اٛ اَرْتِمٛ يٛتَّاکِ يٜنَاندٜ ندٜنْ؞ اٛ تُرِي اٛ يُرْنِي يٜنَاندٜ ندٜنْ اٛ يِعِ غُدٜ طٜ طُمْ تَارِرْنٛو ٻَنْدُ يٜىٰسُ، اَمَّا اٛ نَتَّايِ؞ سٜيْ سِيمَنْ بِيتُرُسْ تٛکِّرْطٛمٛ غَطَ يٛتِّي، نَتِّ يٜنَاندٜ ندٜنْ؞ اٛ يِعِ غُدٜ طٜنْ اٜ ندٜسِي طٛنْ، اٜ لٜفٛلْ نغٛلْ طُمْ تَارَنِ حٛورٜ يٜىٰسُ؞ لٜفٛلْ نغٛلْ اٜ حَکِّتِي اٜ غُدٜ طٜنْ، کَنْغٛلْ تَنْ اٜ نغٛلْ تَغِّي؞ سٜيْ اٛنْ طٛنْ مٛ يٜىٰسُ ٻُرِ يِطُکِ اَرْتُطٛ يٛتَّاکِ يٜنَاندٜ ندٜنْ، کَنْکٛ مَا اٛ نَتِّ، اٛ يِعَنِ غِتٜ مَاکٛ، اٛ جَٻِ يٜىٰسُ اُمَّکٜ دَغَ مَيْدٜ؞ حَا جٛونِ ٻٜ ڤَامَايِ اَايَارٜ بِيندٜ دٛولٜ يٜىٰسُ اُمّٛو دَغَ مَيْدٜ؞ سٜيْ تٛکُّٻٜ يٜىٰسُ ٻٜنْ شٛعِّ غُرٜ مَٻّٜ؞ مَرْيَامَ اٜ دَرِي يَاسِ يٜنَاندٜ ندٜنْ اٜ وٛيَ؞ اٜ مٛ ندٜرْ وٛيُکِ، سٜيْ اٛ تُرِي اٛ يُرْنِي يٜنَاندٜ ندٜنْ، اٛ يِعِ مَلَاعِکَعٜنْ طِطٛ اٜ ٻٜ ٻٛرْنِي کٛلْتٜ دَنٜىٰجٜ، اٜ ٻٜ نجٛوطِي تٛ ٻَنْدُ يٜىٰسُ فُکِّنَا ندٜنّٛ؞ غٛعٛتٛ اٜ جٛوطِي تٛ حٛورٜ يٜىٰسُ وٛنْدٛنٛو، غٛعٛتٛ بٛو اٜ جٛوطِي تٛ کٛيْطٜ مَاکٛ غٛنْدٛنٛو؞ ٻٜ پَمِ مَرْيَامَ اٛنْ ٻٜ مبِعِ، «نغَمْ طُمٜ مبٛيَتَا؟» اٛ وِعِٻٜ، «ٻٜ کٛشِّي ٻَنْدُ مٛودِبّٛ اَمْ، مِ اَنْدَا تٛ ٻٜ ندٜسِمٛ؞» سٜيْ اٛ يٜىٰپِي اٛ يِعِ يٜىٰسُ اٜ دَرِي طٛنْ، اَمَّا اٛ اَنْدِتَايِ طُمْ يٜىٰسُ؞ يٜىٰسُ پَمِمٛ وِعِ، «نغَمْ طُمٜ مبٛيَتَا؟ مٛيٜ طَٻِّتَتَا؟» مَرْيَامَ اٜ ݧُمَ طُمْ ڤَامَنٛووٛ نغٜسَ کَنْ، نغَمْ نٛنْ اٛ وِعِمٛ، «مٛودِبّٛ، تٛ اَنْ حٛشِّمٛ، وِعَمْ تٛ ندٜسُطَامٛ مِ يَحَيْ مِ حٛشَّمٛ؞» يٜىٰسُ وِعِمٛ، «مَرْيَامَ؞» سٜيْ اٛ وَيْلِتِي اٛ رَارِمٛ اٛ وِعِ ندٜرْ اِبْرَانِيَنْکٛورٜ، «رَبّٛنِ!» مَعَنَ مَاجُمْ وٛنِ «مٛودِبّٛ؞» يٜىٰسُ وِعِمٛ، «تَاع جٛغَيَمْ، نغَمْ مِ پٜىٰݝَايِ تٛ ݧَاکٛ اَمْ مٛ دٛوْ تَوْ؞ اَمَّا سٛعَّ تٛ بَنْدِرَاٻٜ اَمْ مبِعَاٻٜ مِ پٜىٰݝَيْ تٛ ݧَاکٛ اَمْ، ݧَاکٛ مٛوطٛنْ، اَللَّه اَمْ، اَللَّه مٛوطٛنْ؞» سٜيْ مَرْيَامَ پِوٛيْطٛ مَغَدَلَ يَحِ تٛ تٛکُّٻٜ يٜىٰسُ وِعِٻٜ، «مِ يِعِي يٜىٰسُ!» سٜيْ اٛ طِيوِتَنِٻٜ کٛ اٛ وِعِمٛ؞ طُمْ ݧَلْندٜ اَلَلْ؞ ندٜ نَانغٜ حِيرِ، تٛکُّٻٜ يٜىٰسُ کَوْرِتِ، ٻٜ مَٻِّ دَمُّغَلْ نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ؞ طٛنْ اٜ طٛنْ يٜىٰسُ وَنْغِ دَرِي شَکَ مَٻّٜ، وِعِ، «اٜ مِ سِلْمِنٛو؞ جَمْ وٛنْدَ اٜ مٛوطٛنْ؞» غَطَ اٛ وِعِ نٛنْ، اٛ حٛلِّٻٜ جُوطٜ مَاکٛ اٜ بٜشّٜ مَاکٛ؞ سٜيْ تٛکُّٻٜمٛ نَنِ بٜلْطُمْ نَاع سٜطَّ ندٜ ٻٜ نغِعِمٛ؞ يٜىٰسُ فُطِّتِ وِعِ، «جَمْ وٛنْدَ اٜ مٛوطٛنْ! نٛنْ نٛ ݧَاکٛ مٛ دٛوْ لِلِرِيَمْ، نٛنْ مِنْ مَا اٜ مِ لِلَعٛنْ؞» ندٜ اٛ وِعِ نٛنْ، سٜيْ اٛ فُوفِ دٛوْ مَٻّٜ اٛ وِعِٻٜ، «نجَٻٜىٰ رُوحُ اَللَّه؞ تٛ اٛنْ نجَافَنَکٜ يِمْٻٜ حَکّٜ، ٻٜ نجَافَنَامَ، تٛ بٛو اٛنْ نجَافَنَاکِٻٜ، ٻٜ نجَافَنَاکَ؞» غٛعٛتٛ ندٜرْ تٛکُّٻٜ يٜىٰسُ، بِعٜتٜىٰطٛ تٛومَ ﴿طٛنْمَا اٜ مٛ وِعٜىٰ شِوْتَاطٛ﴾، اٛ وٛنْدَا اٜ مَٻّٜ شَرٜلْ کٛ يٜىٰسُ وَرِ؞ سٜيْ تٛکُّٻٜ يٜىٰسُ حٛرِيٻٜ مبِعِمٛ، «مِنْ نغِعِي يٜىٰسُ؞» اَمَّا تٛومَ وِعِٻٜ، «سٜيْ تٛ مِ يِعِي جُلٛوطٜ جُوطٜ مَاکٛ تٛ اٛ فِيَنَا کُوسَاجٜ ندٜنْ مِ وَطَ حٛوندُ اَمْ ندٜرْ جُلٛوطٜ طٜنْ، ندٜنْ مِ وَطَ جُنْغٛ اَمْ ندٜرْ يُلْندٜ بٜشّٜ مَاکٛ تٛ اٛ يُوِرَا لَبّٛ، تٛ نَاع نٛنْ، مِ جَٻَتَا کٛ مبِيطٛنْ؞» يٛنْتٛورٜ غٛعٛ غَطَ مَاجُمْ، تٛکُّٻٜ يٜىٰسُ اٜ ندٜرْ وُرٛ نغٛنْ کَدِنْ، تٛومَ مَا اٜ وٛنْدِ اٜ مَٻّٜ؞ کٛو ندٜ اٜ ٻٜ مَٻِّ دَمُّطٜ، طٛنْ اٜ طٛنْ يٜىٰسُ وَنْغِ دَرِي حَکُّندٜ مَٻّٜ وِعِ، «جَمْ وٛنْدَ اٜ مٛوطٛنْ؞» سٜيْ اٛ وِعِ تٛومَ، «رَا جُوطٜ اَمْ؞ وَطُ حٛوندُ مَاطَ ندٜرْ جُلٛوطٜ طٜنْ؞ فٛرْتُ جُنْغٛ مَاطَ نغَطَانغٛ ندٜرْ يُلْندٜ بٜشّٜ اَمْ؞ اَلُ وَطُکِ سٜکٛ، حٛولَ؞» سٜيْ تٛومَ وِعِمٛ، «جٛومِرَاوٛ اَمْ، اَللَّه اَمْ!» يٜىٰسُ وِعِمٛ، «اَ حٛولِيَمْ نغَمْ اَ يِعِييَمْ؟ ٻٜ بَرْکِطِنَاٻٜ يِمْٻٜ ٻٜ نغِعَايِيَمْ، فُو اٜ نٛنْ ٻٜ کٛولَکٜيَمْ؞» يٜىٰسُ وَطِي کٛ حَيْطِنِي فٜىٰرٜ‑فٜىٰرٜ طُطُّمْ يٜىٰسٛ تٛکُّٻٜمٛ طُمْ وِنْدَاکَ ندٜرْ طٜرٜوٛلْ نغٛعٛلْ؞ اَمَّا طُعُمْ طُمْ وِنْدَا نغَمْ کٛولٛوطٛنْ يٜىٰسُ وٛنِ اَلْمَسِيحُ ٻِطّٛ اَللَّه، ندٜنْ لَاوٛلْ حٛولَاکِمٛ کٜٻٛنْ يٛنْکِ کِ رٜعَتَا بَرْکَ اِنْدٜ مَاکٛ؞ غَطَ فُو فِي طُعُمْ يٜىٰسُ فُطِّتِ وَنْغَنِ تٛکُّٻٜمٛ تٛ دَاندٜ مبٜىٰلَ تِبَارِيَ؞ رَا نٛ اٛ وَنْغِنِرِ حٛورٜ مَاکٛ؞ سِيمَنْ بِيتُرُسْ، اٜ تٛومَ بِعٜتٜىٰطٛ شِوْتَاطٛ، اٜ نَتَانِيَلْ پِوٛيْطٛ کَانَ ندٜرْ لٜيْدِ غَلِيلِ، اٜ ٻِٻّٜ جَبَدِ، اٜ وٛٻّٜ تٛکُّٻٜ يٜىٰسُ طِطٛ ٻٜ فُو اٜ ٻٜ کَوْرِتِ؞ سٜيْ سِيمَنْ بِيتُرُسْ وِعِ حٛرِيٻٜ، «مِ يَحَيْ نَنْغٛيْکِ لِپِّ؞» ٻٜ مبِعِمٛ، «مِنْ نجَادَيْ اٜ مَاطَ؞» سٜيْ ٻٜ نجَحِ ٻٜ نَتِّ کٛمِوَلْ، اَمَّا ندٜنْ طٛنْ جٜمَّارٜ وَلَا کٛ ٻٜ نَنْغِ؞ نَانغٜ اٜ وُرْتٛيٛو، سٜيْ يٜىٰسُ دَرِي دَاندٜ مبٜىٰلَ نغَنْ، اَمَّا ٻٜ اَنْدَا طُمْ کَنْکٛ؞ سٜيْ يٜىٰسُ وِعِٻٜ، «بَنْدِرَاٻٜ، اٛنْ نغٛودِ لِپِّ؟» ٻٜ مبِعِمٛ، «مِنْ نغَلَا؞» اٛ وِعِٻٜ، «نغَطٜىٰ نَنْغِرْطُمْ لِپِّ مٛوطٛنْ تٛ ݧَامٛ کٛمِوَلْ مٛوطٛنْ، اٛنْ نَنْغَيْ لِپِّ؞» ندٜ ٻٜ نغَطِ نٛنْ، ٻٜ مبَاوَايِ نَتِّنْکِ نَنْغِرْطُمْ لِپِّ طُمْ ندٜرْ کٛمِوَلْ نغَلْ، نغَمْ لِپِّ طُطِّ؞ سٜيْ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ، وِعِ بِيتُرُسْ، «طُمْ جٛومِرَاوٛ؞» ندٜ بِيتُرُسْ نَنِ طُمْ جٛومِرَاوٛ، اٛ تَادِي تٛغّٛورٜ مَاکٛ نغَمْ اٛ ٻٛرْتَکٜنٛ نغَمْ کُوغَلْ، اٛ دِوِ ندٜرْ ندِيَمْ؞ تٛکُّٻٜ يٜىٰسُ حٛرِيٻٜ ندَرِي ندٜرْ کٛمِوَلْ نغَلْ، اٜ ٻٜ ڤٛوطَ نَنْغِرْطُمْ لِپِّ طُمْ اٜ طُمْ حٜىٰوِ لِپِّ، نغَمْ اٜ ٻٜ حَادٜ دَاندٜ مبٜىٰلَ نغَنْ کٛ وَطَتَ جَاٻَنْطٜ 300؞ ندٜ ٻٜ نجٛتِّي تٛ دَاندٜ ندِيَمْ، ٻٜ نغِعِ دٛشّٜ حِيتٜ اٜ لِپِّ دٛوْ مَاجٜ اٜ بُرٛودِ؞ يٜىٰسُ وِعِٻٜ، «نغَدّٜىٰ غٛطِّ لِپِّ طِ نَنْغُطٛنْ جٛونِ؞» سٜيْ سِيمَنْ بِيتُرُسْ نَتِّي ندٜرْ کٛمِوَلْ نغَلْ، اٛ فٛوطِ نَنْغِرْطُمْ لِپِّ طُمْ يَاکِ تٛ نجَارٜىٰندِ اٜ طُمْ حٜىٰوِ لِپِّ 351 مَوْطِ؞ کٛو ندٜ اٜ طِ طُوطِ، نَنْغِرْطُمْ طُمْ سٜىٰکَايِ؞ يٜىٰسُ وِعِٻٜ، «نغَرٜىٰ، نغٜوٛنْ کٛوپٜ؞» وَلَا غٛطّٛ ندٜرْ تٛکُّٻٜمٛ غَطّٛ سٜمْبٜ ٻٜرْندٜ پَمَمٛ، «اَنْ اَ مٛيٜ؟» نغَمْ اٜ ٻٜ اَنْدِ طُمْ جٛومِرَاوٛ؞ يٜىٰسُ حٛشِّ بُرٛودِ طُمْ، حٛکِّٻٜطُمْ، کَدِنْ اٛ حٛشِّ لِپِّ طِنْ، اٛ حٛکِّٻٜطِ؞ طُعُمْ کَنْجُمْ وٛنِ تَتَٻُمْ يٜىٰسُ اٜ وَنْغَنَ تٛکُّٻٜمٛ غَطَ اٛ اُمِّنَامَ دَغَ مَيْدٜ؞ غَطَ ٻٜ نجٛتِّنِي ݧَامُکِ، يٜىٰسُ پَمِ سِيمَنْ بِيتُرُسْ وِعِ، «سِيمَنْ ٻِي يَحَيَ، اَ ٻُرِي حٛرِيٻٜ ٻٜعٜ يِطُکِيَمْ؟» بِيتُرُسْ وِعِ، «اٜىٰ، جٛومِرَاوٛ، اَ اَنْدِ اٜ مِ يِطُمَا؞» يٜىٰسُ وِعِمٛ، «دُرُ بَالِ اَمْ؞» يٜىٰسُ فُطِّتِ پَمِمٛ طِطَٻُمْ وِعِ، «سِيمَنْ ٻِي يَحَيَ، اَ يِطِيَمْ؟» اٛ وِعِ، «اٜىٰ، جٛومِرَاوٛ، اَ اَنْدِ اٜ مِ يِطُمَا؞» يٜىٰسُ وِعِمٛ، «فَامَنْ بَالِ اَمْ؞» يٜىٰسُ پَمِمٛ تَتَٻُمْ وِعِ، «سِيمَنْ، ٻِي يَحَيَ، اَ يِطِيَمْ؟» بِيتُرُسْ وَنِّ نغَمْ يٜىٰسُ پَمِمٛ تَتَٻُمْ، «اَ يِطِيَمْ؟» نغَمْ نٛنْ اٛ وِعِمٛ، «جٛومِرَاوٛ، اَ اَنْدِ کٛو طُمٜ؞ اَ اَنْدِ اٜ مِ يِطُمَا؞» يٜىٰسُ وِعِمٛ، «دُرُ بَالِ اَمْ؞ اٜ مِ وِعُمَا غٛونغَ، کٛ نغٛنّٛطَا سُکَ اَ ٻٛرْنَ حٛورٜ مَاطَ نجَحَا تٛ نغِطَّا؞ اَمَّا تَا نَوْيِي، اَ فٛرْتَيْ جُوطٜ مَاطَ غٛطّٛ ٻٛرْنُمَا اٛ يَارُمَا وِغٜىٰرٜ ندٜ اَ يِطَا يَاکِ؞» يٜىٰسُ وِعُ طُعُمْ نغَمْ حٛلَّ اِرِ مَيْدٜ ندٜ بِيتُرُسْ وَطَتَ نغَمْ مَوْنِنْکِ اَللَّه؞ سٜيْ يٜىٰسُ وِعِمٛ، «تٛکَّمْ؞» بِيتُرُسْ وَيْلِتِي يِعِ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ اٜ تٛکِّٻٜ؞ کَنْکٛ وٛنِ اٛنْ طٛنْ جٛوطِيطٛ حَادٜ يٜىٰسُ کٛ ٻٜ ݧَامِ کِرْتَارِ، بِيطٛ، «مٛودِبّٛ، طُمْ مٛيٜ حٛکِّتِرْتَمَ؟» ندٜ بِيتُرُسْ يِعِمٛ، پَمِ يٜىٰسُ وِعِ، «جٛومِرَاوٛ، طُمٜ حٜٻَتَمٛ؟» يٜىٰسُ وِعِمٛ، «تٛ اٜ مِ يِطِ اٛ جٛوطٛدٛو اٜ يٛنْکِ نَا شَرٜلْ نغٜلْ نغَرْتٛيْمِ، کٛ وَنُّمَا؟ اَنْ نِ، تٛکَّمْ؞» نغَمْ يٜىٰسُ وِعِ نٛنْ، سٜيْ حَبَرُ سَنْکِتِي ندٜرْ تٛکُّٻٜمٛ وِيکِ اٛعٛ تٛکُّطٛ يٜىٰسُ اٛ مَايَتَا؞ اَمَّا يٜىٰسُ وِعَايِ اٛ مَايَتَا؞ کٛ اٛ وِعِ وٛنِ، «تٛ اٜ مِ يِطِ اٛ جٛوطٛدٛو اٜ يٛنْکِ نَا شَرٜلْ نغٜلْ نغَرْتٛيْمِ، کٛ وَنُّمَا؟» اٛعٛ وٛنِ اٛنْ طٛنْ تٛکُّطٛ يٜىٰسُ اٜ مٛ حٛکَّ شٜيْدَ دٛوْ فُو فِي طُعُمْ ندٜنْ اٛ وِنْدِيطُمْ؞ اٜنْ اَنْدِ بٛو شٜيْدَ مَاکٛ طُمْ غٛونغَ؞ کَدِنْ اٜ وٛودِ فِي طُطُّمْ طُمْ يٜىٰسُ وَطِ؞ تٛ طُمْ وِنْدَامَ طُمْ فُو غٛعٛ اٜ غٛعٛ، اٜ مِ ݧُمَ فُو دُونِيَارُ وَلَا نجَيْرِ تٛ طُمْ رٜسَتَ دٜفْتٜ بِنْدٜتٜىٰطٜ؞ يَا تِيٛوفِلُسْ مَوْطٛ، ندٜرْ دٜفْتٜرٜ اَمْ اَرَنْدٜىٰرٜ، مِ وِنْدِينٛ دٛوْ کٛو طُمٜ کٛ يٜىٰسُ وَطِ اٜ کٛ اٛ اٜکِّتِنِ، حَا يَاکِ ݧَلْندٜ ندٜ اٛ حٛشَّا يَاکِ دٛوْ؞ کٛ اٛ حٛشّٜىٰ يَاکِ دٛوْ، اٛ اٜکِّتِنِي لِلَاٻٜ ٻٜ اٛ سُٻِ ندٜرْ بَوْطٜ رُوحُ اَللَّه؞ غَطَ اٛ تٛرَّامَ اٛ وَرَامَ، اٛ اُمِّي دَغَ مَيْدٜ اٛ وَنْغَنِٻٜ؞ اٜ طَتٜ طُطّٜ اٛ حٛلِّٻٜ اٜ مٛ فٛوفَ؞ اٛ وَطِي بَلْطٜ 40 اٜ مٛ وَنْغَنَٻٜ، اٜ مٛ اٜکِّتِنَٻٜ دٛوْ لَامُ اَللَّه؞ شَرٜلْ کٛ اٛ وٛنْدِ اٜ مَٻّٜ، اٛ وِعِٻٜ، «تٛع اٛنْ اَلُ اُرُشَلِيمَ، اَمَّا کٜطٜىٰ نَا ݧَاکٛ مٜىٰطٜنْ مٛ دٛوْ حٜبِّنِي اَلْکَوَلْ نغَلْ اٛ وَطَنِعٛنْ نغَلْ مبِيمِعٛنْ؞ کَنْغَلْ وٛنِ حٛکُّکِعٛنْ رُوحُ مَاکٛ؞ يَحَيَ وَطَنِي يِمْٻٜ بَڤْتِسْمَ اٜ ندِيَمْ، اَمَّا ندٜرْ بَلْطٜ سٜطَّ، اٛنٛنْ اَللَّه وَطِرَنَيْعٛنْ بَڤْتِسْمَ اٜ رُوحُ مَاکٛ؞» ندٜ تٛکُّٻٜمٛ فُو کَوْرِتِ، سٜيْ ٻٜ پَمِمٛ، ٻٜ مبِعِ، «جٛومِرَاوٛ، جٛونِ نغَرْتِرَنْتَا اِسْرَاعِيلَ لَامُ؟» اَمَّا يٜىٰسُ وِعِٻٜ، «اَنْدُکِ شَرٜلْ اٜ جَامَنُوجِ طِ ݧَاکٛ مٜىٰطٜنْ مٛ دٛوْ سِرْيِي ندٜرْ لَامُ مُوطُمْ نَاع اُمْ طُمْ مٛوطٛنْ؞ اَمَّا تٛ رُوحُ اَللَّه جِڤّٛيَکٜ دٛوْ مٛوطٛنْ، اٛنْ کٜٻَيْ بَوْطٜ، اٛنْ نغَرْتَيْ کٛکَّيْٻٜ وٛٻّٜ حَبَرُ اَمْ ندٜرْ اُرُشَلِيمَ، اٜ لٜيْدِ يَحُودِيَ فُو، اٜ لٜيْدِ سَمَارِيَ، حَا کٜىٰرٛلْ دُونِيَارُ؞» غَطَ اٛ وِعِي نٛنْ، اٛ حٛشَّا يَاکِ دٛوْ؞ اٜ ٻٜ ندَارَمٛ حَا دُولٜ شُدِّمٛ؞ اٜ ٻٜ تِجِّي اٜ ٻٜ ندَارَمٛ اٜ مٛ فَعِ دٛوْ، سٜيْ رَا وٛرْٻٜ طِطٛ ٻٜ کٛلْتٜ دَنٜىٰجٜ مبَنْغِي حَادٜ مَٻّٜ اٜ ندَرِي؞ وٛرْٻٜ ٻٜنْ مبِعِٻٜ، «اٛنٛنْ يِمْٻٜ غَلِيلِ، نغَمْ طُمٜ ندَرِيطٛنْ طٛعٛ اٛنْ ندَارَ دٛوْ؟ يٜىٰسُ اٛنْ طٛنْ کٛشَّاطٛ ندٜرْ مٛوطٛنْ يَاکِ دٛوْ، اٛ سٛعّٛيْتٛ نٛنْ نٛ نغِيرُطٛنْ اٛ حٛشِّرَامَ دٛوْ؞» سٜيْ ٻٜ نجِڤّٛيِي دَغَ دٛوْ حٛشّٜىٰرٜ ندٜ لٜطّٜ جَيْتُنْ، ٻٜ کٛوتِ اُرُشَلِيمَ؞ حَکُّندٜ حٛشّٜىٰرٜ ندٜنْ اٜ اُرُشَلِيمَ طُمْ ٻُرَايِ مِلْ غٛعٛ؞ ندٜ ٻٜ نَتِّ غَرِيرِ ندِنْ، ٻٜ پٜنْتِ سُودُ دٛوْ تٛ ٻٜ کَوْرِتَتَ؞ لِلَاٻٜ ٻٜنْ نغٛنِ: بِيتُرُسْ، اٜ يَحَيَ، اٜ يَاکُبُ، اٜ اَنْدِرَاوُسْ، اٜ فِلِبُسْ، اٜ تٛومَ، اٜ بَتِلٛومِ، اٜ مَاتِيُ، اٜ يَاکُبُ ٻِي حَلْفَ، اٜ سِيمَنْ جَلٛوتِ ٻٜ فُو، اٜ ٻٜ کَوْرِتَ ٻٜ نغَطَ دٛعَارٜ اٜ ٻٜرْندٜ غٛعٛ، کَمْٻٜ اٜ مَرْيَامَ مَدُوجٛ يٜىٰسُ اٜ مِݧِرَاٻٜ يٜىٰسُ وٛرْٻٜ، اٜ وٛٻّٜ رٜوْٻٜ طٛنْمَا؞ ندٜرْ بَلْطٜ طٜنْ، کَوْتَلْ کٛولِيٻٜ يٜىٰسُ يَارِي يِمْٻٜ 120؞ سٜيْ بِيتُرُسْ اُمِّي، دَرِي يٜىٰسٛ مَٻّٜ، وِعِ، «بَنْدِرَاٻٜ، رُوحُ اَللَّه مٜتِينٛ دَغَ حٛنْدُکٛ دَوْدَ دٛوْ يَحُودَ، کٛلُّطٛ نَنْغٛوٻٜ يٜىٰسُ لَاوٛلْ نٛ نَنْغِرْتَمٛ؞ دٛولٜ اَايَاجٜ طٜنْ کٜىٰوَ؞ يَحُودَ اٛ کُودَيْنٛوطٛ اٜ مٜىٰطٜنْ ندٜرْ کُوغَلْ جٛومِرَاوٛ؞» ﴿اٛ سٛودِ نغٜسَ اٜ شٜىٰدٜ طٜ اٛ يٛٻَا نغَمْ کُوغَلْ کَلُّنغَلْ نغَلْ اٛ وَطِ، اٛ يَنِ ندٜرْ مَاکَ، رٜىٰدُ مَاکٛ ڤُسِ، تٜتٜکِّ مَاکٛ فُو ندُفِ اٜ لٜيْدِ، اٛ مَايِ؞ يِمْٻٜ اُرُشَلِيمَ فُو نَنِي حَبَرُ طُمْ؞ کَنْجُمْ وَطِ ٻٜ نٛدِّرِ نغٜسَ کَنْ ندٜرْ طٜمْنغَلْ مَٻّٜ اَکٜلْدَمَ وَاتٛ «نغٜسَ پِيپَمْ؞»﴾ «نغَمْ طُمْ وِنْدَامَ ندٜرْ دٜفْتٜرٜ جَبُورَ دٛوْ مَاکٛ وِعُکِ، ‹اَلْ وُرٛ مَاکٛ وَرْتَ وِنْدٜ، تٛع کٛو مٛيٜ جٛوطٛو ندٜرْ مَاغٛ؞› کَدِمَا وٛنْدٜ اَايَارٜ وِعِي، ‹اَلْ غٛطّٛ حٛشَّ کُوغَلْ اَرْدَارٜ مَاکٛ؞› دَغَ طٛنْ، سٜيْ ٻٜ ندَرْنِ وٛرْٻٜ طِطٛ: مَاتِيَسْ اٜ يُسُفُ بَرْسَبَ بِعٜتٜىٰطٛ جُسْتُسْ؞ ٻٜ نغَطِ دٛعَارٜ، ٻٜ مبِعِ، «جٛومِرَاوٛ، اَنْ اَنْدُطٛ ٻٜرْطٜ يِمْٻٜ فُو، حٛلُّمِنْ مٛ شُٻُطَا دَغَ ندٜرْ يِمْٻٜ طِطٛ ٻٜعٜ، نغَمْ اٛ حُوَ کُوغَلْ لِلَاٻٜ نغَلْ يَحُودَ اَلِ؞ نغَمْ يَحُودَ يَحِي وِغٜىٰرٜ تٛ حَانَنِمٛ؞» سٜيْ ٻٜ نغَطِ شُٻٛلْ حَکُّندٜ يِمْٻٜ طِطٛ ٻٜنْ؞ شُٻَاطٛ اٛنْ وٛنِ مَاتِيَسْ؞ اٛ نَتِّنَا ندٜرْ لِلَاٻٜ سَڤّٛ اٜ غٛعٛ ٻٜنْ؞ ندٜ حُمْتٛ ٻٜنْدٛلْ اَلْکَمَارِ وَطِ، تٛکُّٻٜ يٜىٰسُ فُو کَوْرِتِ وِغٜىٰرٜ غٛعٛ؞ طٛنْ اٜ طٛنْ ٻٜ نَنِ اِيدٛ پِوٛيِي دَغَ دٛوْ بٛ حٜنْدُ شٜمْبِنْدُ؞ اِيدٛ نغٛنْ حٜىٰوِ وُرٛ نغٛ ٻٜ نغٛنِ ندٜرْ؞ سٜيْ غٛطُّمْ نَنْدُطُمْ اٜ طٜمْطٜ حِيتٜ وَنْغِ؞ طٜ شَنْکِتِي، طٜ کٛطِ دٛوْ حٛورٜ کٛو مٛيٜ مَٻّٜ؞ سٜيْ ٻٜ فُو ٻٜ کٜىٰوِ رُوحُ اَللَّه، ٻٜ ڤُطِّ مٜتُکِ ندٜرْ طٜمْطٜ فٜىٰرٜ‑فٜىٰرٜ نٛ رُوحُ حٛکِّرِٻٜ بَوْطٜ مٜتُکِ؞ اٜ وٛودِ يَحُودَنْکٛعٜنْ جٛوطِيٻٜ ندٜرْ اُرُشَلِيمَ پِوٛيْٻٜ دَغَ کٛو طٜيٜ لٜيْطٜ دُونِيَارُ کُلٛوٻٜ جٛومِرَاوٛ؞ ندٜ ٻٜ نَنِ اِيدٛ نغٛنْ، ٻٜ فُو ٻٜ کَوْرِتِ؞ فِي طُمْ حُلْنِيٻٜ، ٻٜ ندُلِّ کٛ ٻٜ نغَطَتَ، نغَمْ ٻٜ نَنِي لِلَاٻٜ اٜ مٜتَ ندٜرْ طٜمْنغَلْ کٛو مٛيٜ مَٻّٜ؞ فِي طُمْ حَيْطِنِٻٜ نَاع سٜطَّ، ٻٜ مبِعِ، «ٻٜعٜ مٜتٛوٻٜ نَاع ٻٜ غَلِلَنْکٛعٜنْ؟ ندٜنْ نٛ طُمْ وَطِ کٛو مٛيٜ ندٜرْ مٜىٰطٜنْ اٜ نَنَ کٛ ٻٜ مبِعَتَ ندٜرْ طٜمْنغَلْ مُوطُمْ؟ رَا ندٜرْ مٜىٰطٜنْ اٜ وٛودِ فَرْتِيَنْکٛعٜنْ اٜ مَدِيَنْکٛعٜنْ اٜ اٜلَامِيَنْکٛعٜنْ، اٜ يِمْٻٜ مٜسٛفٛتَامِيَ، اٜ وٛٻّٜ دَغَ ندٜرْ لٜيْطٜ يَحُودِيَ اٜ کَفَدٛوکِيَ اٜ فَنْتُسْ اٜ اَاسِيَ، اٜ يِمْٻٜ فِرِيجِيَ اٜ بَمْفِيلِيَ اٜ لٜيْدِ مَسَرْ اٜ لٜيْدِ لِبِيَ حَادٜ سَايِرِنْ اٜ پِوٛيْٻٜ رٛومَ، يَحُودَنْکٛعٜنْ اٜ وٛٻّٜ جَٻُٻٜ دِينَ يَحُودَنْکٛعٜنْ، اٜ وٛٻّٜ دَغَ کِرِتِ، اٜ لَارَبَنْکٛعٜنْ؞ اَمَّا فُو اٜ نٛنْ، اٜنْ فُو اٜنْ نَنَ يِمْٻٜ ٻٜعٜ اٜ مٜتَ ندٜرْ طٜمْطٜ مٜىٰطٜنْ دٛوْ کُوطٜ مَوْطٜ طٜ اَللَّه وَطِ!» ٻٜ فُو فِي طُمْ حَيْطِنِٻٜ، ٻٜ نجِيٻٛوتِرِ، ٻٜ نغَطِ کَ پَمْپَمْتِرْکِ، اٜ ٻٜ مبِعَ، «طُمٜ وٛنِ مَعَنَ فِي طُعُمْ؟» اَمَّا وٛٻّٜ نجَلِ تٛکُّٻٜ يٜىٰسُ مبِعِ، «ندِيَمْ اِنَبٛجَمْ ٻٜ نجَرِ، ٻٜ نغِلْتِي!» سٜيْ بِيتُرُسْ اُمِّي، کَنْکٛ اٜ لِلَاٻٜ سَڤّٛ اٜ غٛعٛ، ٻٜ ندَرِي، اٛ پٜفْتِ حٛنٛنْدٜ مَاکٛ، اٛ وِعِ حَوْرُتُٻٜ ٻٜنْ، «اٛنٛنْ يَحُودَنْکٛعٜنْ اٜ جٛوطِيٻٜ ندٜرْ اُرُشَلِيمَ فُو، نَنٜىٰ کٛ مبِعَيْمِعٛنْ؞ مِ حٛکَّيْعٛنْ مَعَنَ فِي طُعُمْ؞ يِمْٻٜ ٻٜعٜ نَاع ٻٜ جَرُٻٜ نٛ کَمِّيطٛنْ، نغَمْ جٛونِ طُمْ سُبَکَ نجَمْندِ جٛوٜىٰنَيِ! اَمَّا رَا کٛ اَنَّبِ يٛوٜلْ وِعِ اَللَّه وِعِي، ‹ندٜرْ بَلْطٜ شَکِتِيطٜ کٛ دُونِيَارُ رٜعَ، مِ حٛکَّيْ يِمْٻٜ فُو رُوحُ اَمْ؞ ٻِٻّٜ مٛوطٛنْ وٛرْٻٜ اٜ رٜوْٻٜ ٻٜ نغَعَجِنَيْ حَبَرُ اَمْ، کٛرِعٜنْ مٛوطٛنْ نغِعَيْ وَحَيُ، ندٛتِّعٜنْ مٛوطٛنْ کٛيْطَيْ کٛيْطِ پِوٛيْطِ تٛ اَللَّه؞ مِ حٛکَّيْ مَشُّٻٜ اَمْ وٛرْٻٜ اٜ رٜوْٻٜ رُوحُ اَمْ ندٜرْ بَلْطٜ طٜنْ، ٻٜ نغَعَجِنَيْ حَبَرُ اَمْ؞ مِ حٛلَّيْ فِي کُلْنِيطُمْ اٜ دٛوْ؛ ندٜرْ دُونِيَارُ بٛو مِ وَطَيْ اَلَامَاجِ کُلْنِيطِ، وَاتٛ پِيپَمْ اٜ حِيتٜ اٜ شُرْکَ ٻَلٜحَ؞ نَانغٜ وَرْتَيْ ݧِوْرٜ، لٜوْرُ بٛو وٛوجَيْ بٛ پِيپَمْ؞ فُو فِي طُعُمْ وَطَيْ کٛ ݧَلْندٜ جٛومِرَاوٛ مَوْندٜ تٜدُّندٜ وَرَ؞ ندٜرْ بَلْطٜ طٜنْ، کٛو مٛيٜ تٛرِيطٛ جٛومِرَاوٛ حِسْنَمٛ، جٛومِرَاوٛ حِسْنَيْمٛ؞› » طٛنْمَا بِيتُرُسْ وِعِ، «يِمْٻٜ اِسْرَاعِيلَ، نَنٜىٰ بٛلِيطٜ طٜعٜ: اَللَّه حٛلِّيعٛنْ اٛ سُٻِي يٜىٰسُ نَجَرَنْکٜىٰجٛ نغَمْ اٛ حٛکِّيمٛ بَوْطٜ حُوُکِ کُوطٜ مَوْطٜ اٜ کُوطٜ کَيْطِنِيطٜ اٜ اَلَامَاجِ طِ اٛ وَطِ ندٜرْ مٛوطٛنْ؞ اٛنٛنْ اٜ کٛعٜ مٛوطٛنْ اٛنْ اَنْدِ کٛ وَطِ؞ فُو اٜ نٛنْ اٛنْ کٛکِّتِرِيمٛ ندٜرْ جُوطٜ کَلُّٻٜ؞ اٛنْ نغَطِي ٻٜ ٻِلِيمٛ دٛوْ غَافَانغَلْ، ٻٜ مبَرِمٛ؞ فُو اٜ نٛنْ، نٛنْ اَللَّه سِرْيٛرِي فِي طُمْ وَطِرَ؞ اَمَّا اَللَّه اُمِّنِيمٛ دَغَ مَيْدٜ، وُرْتِنِيمٛ يٜنَاندٜ، نغَمْ مَيْدٜ وَاوَتَا جٛغَاکِمٛ؞ نغَمْ اَنَّبِ دَوْدَ مٜتِي دٛوْ يٜىٰسُ اَلْمَسِيحُ وِعِي، ‹کٛو ندٜيٜ اٜ مِ يِعَ جٛومِرَاوٛ يٜىٰسٛ اَمْ، وَلَا کٛ کُلَيْمِ نغَمْ اٜ مٛ وٛنْدِ اٜ اَمْ؞ نغَمْ مَاجُمْ ٻٜرْندٜ اَمْ اٜ نَنَ بٜلْطُمْ اٜ مِ وٜلْوٜلْتَ، کٛو ندٜ مِ نٜطّٛ مَايَيْطٛ مِ جٛوطٛدٛتٛ اٜ ٻٜرْندٜ وَالْتِيندٜ، نغَمْ اَ اَلَتَا يٛنْکِ اَمْ ندٜرْ يٜنَاندٜ، اَ اَلَتَايَمْ، مِنْ شٜنِيطٛ مَاطَ مِ ݧٛلَ؞ اَ حٛلِّييَمْ طَتٜ طٜ تٛکَّيْمِ مِ حٜٻَ يٛنْکِ، تَا وٛنْدِ اٜ اَمْ مِ نَنَيْ بٜلْطُمْ طُطُّمْ؞› » بِيتُرُسْ ٻٜيْدِي وِعُکِ، «بَنْدِرَاٻٜ، اَلْ مِ وِعَعٛنْ غٛونغَ؞ مَامَ مٜىٰطٜنْ دَوْدَ مَايِي اٛ اُوَامَ، يٜنَاندٜ مَاکٛ اٜ طٛعٛ حَا حَنْدٜ؞ اٛ اَنَّبِيجٛ، اٜ مٛ اَنْدِ اَللَّه وَطَنِيمٛ اَلْکَوَلْ حُنِي وِعُکِ غٛطّٛ دَغَ ندٜرْ لٜݧٛلْ مَاکٛ وَرْتَيْ لَامِيطٛ، وَاتٛ اَلْمَسِيحُ؞ اٛ يِعِي کٛ وَرٛيْتَ يٜىٰسٛ، اٛ مٜتِي دٛوْ اُمَّاکِ اَلْمَسِيحُ دَغَ مَيْدٜ؞ اٛ وِعِي اَللَّه اَلَتَا اَلْمَسِيحُ ندٜرْ يٜنَاندٜ، ٻَنْدُ مَاکٛ بٛو ݧٛلَتَا؞ اَلْمَسِيحُ اٛنْ وٛنِ يٜىٰسُ مٛ اَللَّه اُمِّنِ دَغَ مَيْدٜ؞ مِنْ فُو اٜ مِنْ شٜيْدِيطُمْ؞ اَللَّه مَوْنِنِيمٛ، جٛوطِنِيمٛ اٜ جُنْغٛ مُوطُمْ ݧَامٛ حٛکِّمٛ رُوحُ مُوطُمْ نٛ اٛ وَطُنٛو اَلْکَوَلْ؞ کَنْکٛ بٛو اٛ حٛکِّيمِنْطُمْ؞ کَنْجُمْ وٛنِ کٛ نغِعٛتٛنْ اٜ کٛ نَنٛتٛنْ جٛونِ؞ نغَمْ دَوْدَ يَحَايِ وُرٛ جٛومِرَاوٛ تٛنْ دٛوْ، اَمَّا اٛ وِعِي، ‹جٛومِرَاوٛ مٜتَنِي اَلْمَسِيحُ جٜيْطٛيَمْ، وِعِي، جٛوطَ اٜ جُنْغٛ اَمْ ݧَامٛ، نَا مِ وَطِي وَݧْوَݧْٻٜ مَاطَ نغَرْتِي تٛ نجٛوَتَا کٛيْطٜ مَاطَ؞› «نغَمْ مَاجُمْ اٜ حَانِ يِمْٻٜ اِسْرَاعِيلَ فُو تَبِّتِنَ اَللَّه سُٻِي يٜىٰسُ مٛ مبَرْطٛنْ دٛوْ غَافَانغَلْ وَرْتَ اَلْمَسِيحُ جٜيْطٛ لَامُ؞» ندٜ ٻٜ نَنِ بٛلِيطٜ طٜنْ، ٻٜرْطٜ مَٻّٜ تَپِ، ٻٜ مبِعِ بِيتُرُسْ اٜ لِلَاٻٜ حٛرِيٻٜ، «بَنْدِرَاٻٜ، طُمٜ مِنْ نغَطَتَ؟» بِيتُرُسْ وِعِ، «کٛو مٛيٜ مٛوطٛنْ تُوبَ وَطَنٜىٰ بَڤْتِسْمَ ندٜرْ اِنْدٜ يٜىٰسُ اَلْمَسِيحُ نغَمْ کٜٻٛنْ يَافَنٜىٰکِ حَکّٜ مٛوطٛنْ؞ ندٜنْ اَللَّه حٛکَّيْعٛنْ رُوحُ مُوطُمْ شَاحُ؞ نغَمْ اَللَّه وَطِي اَلْکَوَلْ مُوطُمْ نغَمْ مٛوطٛنْ، اٜ ٻِٻّٜ مٛوطٛنْ حَا اٜ يِمْٻٜ وٛطُّٻٜ، اٜ کٛو مٛيٜ مٛ اَللَّه مٜىٰطٜنْ نٛدِّ وَرَ تٛ مُوطُمْ؞» غَطَ مَاجُمْ اٛ وَغِّنِٻٜ اٜ بٛلِيطٜ طُطّٜ، اٜ مٛ تٛرٛوٻٜ، اٜ مٛ وِعَ، «کِسْنٜىٰ کٛعٜ مٛوطٛنْ دَغَ جَامَنُ کَلُّطُمْ طُعُمْ!» فُو جَٻُٻٜ کٛ بِيتُرُسْ وِعِ ٻٜ نغَطَنَا بَڤْتِسْمَ؞ ݧَلْندٜ ندٜنْ حَادٜ يِمْٻٜ 3,000 ٻٜيْدِي ندٜرْ کَوْتَلْ کٛولِيٻٜ يٜىٰسُ؞ ٻٜ نغَطِ کَ تٛکُّکِ اٜکِّتِنٛلْ لِلَاٻٜ، اٜ ٻٜ شُمْڤٛوتِرَ، اٜ ٻٜ ݧَمْدَ، اٜ ٻٜ نغَادَ دٛعَارٜ؞ کُلٛلْ نَنْغِ کٛو مٛيٜ، نغَمْ اَللَّه اٜ وَطَ اَلَامَاجِ کَيْطِنِيطِ طُطِّ دَغَ جُوطٜ لِلَاٻٜ؞ فُو کٛولِيٻٜ يٜىٰسُ کَوْتِ حٛورٜ، اٜ ٻٜ شٜنْدَ فُو کٛ ٻٜ نغٛودِ حَکُّندٜ مَٻّٜ؞ ٻٜ شٛورِ غٜسٜ مَٻّٜ اٜ کٛ ٻٜ نغٛودِ، ٻٜ شٜنْدَنِ کٛو مٛيٜ مَٻّٜ فُو کٛ حَانِ نغَمْ مُوطُمْ؞ کٛو ندٜيٜ ݧَلْندٜ اٜ ٻٜ کَوْرِتَ ندٜرْ وُرٛ شٜنِينغٛ؞ اٜ ٻٜ ݧَمْدَ ندٜرْ غُرٜ مَٻّٜ اٜ ٻٜرْطٜ لَٻْطٜ اٜ وٜلْوٜلٛ مَنْغٛ، اٜ ٻٜ مَنْتَ اَللَّه؞ يِمْٻٜ فُو اٜ نغِطِٻٜ؞ کٛو ندٜيٜ ݧَلْندٜ بٛو جٛومِرَاوٛ اٜ ٻٜيْدَنَٻٜ تُوبٛوٻٜ؞ وٛنْدٜ ݧَلْندٜ بِيتُرُسْ اٜ يَحَيَ اٜ نجَحَ وُرٛ شٜنِينغٛ شَرٜلْ دٛعَارٜ، نجَمْندِ تَتِ ندِ ݧَلَوْمَ؞ اٜ وٛودِ غٛطّٛ نٜطّٛ دَغَ اٛ دَݧَا اٛ جَرَاطٛ، اٜ مٛ جٛوطِي اٜ دَمُّغَلْ وُرٛ شٜنِينغٛ بِعٜتٜىٰنغَلْ دَمُّغَلْ بٛنْغَلْ؞ کٛو ندٜيٜ ݧَلْندٜ يِمْٻٜ مَاکٛ اٜ نجَارَمٛ تٛ دَمُّغَلْ نغَلْ نغَمْ اٛ تٛرٛو نَتّٛوٻٜ وُرٛ شٜنِينغٛ شٜىٰدٜ؞ تٛو، ندٜ اٛ يِعِ بِيتُرُسْ اٜ يَحَيَ اٜ نَتَّ، سٜيْ اٛ تٛرِيٻٜ شٜىٰدٜ؞ ٻٜ شُتِيمٛ، بِيتُرُسْ وِعِمٛ، «رَارُمِنْ!» اٛ رَارِٻٜ اٜ مٛ کَمّٛو حٜٻُکِ غٛطُّمْ تٛ مَٻّٜ؞ بِيتُرُسْ وِعِمٛ، «مِ وَلَا شٜىٰدٜ، اَمَّا مِ حٛکّٜتٜ کٛ نغٛودُمِ؞ ندٜرْ اِنْدٜ يٜىٰسُ اَلْمَسِيحُ نَجَرَنْکٜىٰجٛ، اٜ مِ وِعِمَا، اُمَّ، نجَاٻَا!» سٜيْ بِيتُرُسْ نَنْغِ جُنْغٛ مَاکٛ ݧَامٛ دَرْنِمٛ؞ طٛنْ اٜ طٛنْ کٛيْطٜ مَاکٛ شٜمْبِطِ؞ اٛ دِوِ اٛ فُطِّ يَادُ؞ اٛ نَتِّدِ اٜ مَٻّٜ ندٜرْ وُرٛ شٜنِينغٛ؞ اٜ مٛ يَحَ، اٜ مٛ دِوَ، اٜ مٛ يٜتَّ اَللَّه؞ يِمْٻٜ فُو نغِعِمٛ اٜ مٛ يِيلٛو، اٜ مٛ يٜتَّ اَللَّه؞ ٻٜ اَنْدِتِي کَنْکٛ وٛنِ جٛوطٛتٛوطٛ اٜ دَمُّغَلْ بٛنْغَلْ نغَلْ وُرٛ شٜنِينغٛ اٜ تٛرٛو يِمْٻٜ شٜىٰدٜ؞ ٻٜ فُو ٻٜ کَيْطِنِ نَاع سٜطَّ کٛ طُوطِ دٛوْ کٛ حٜٻِ نٜطّٛ اٛنْ؞ جَرَاطٛ جَمْطِتِنَاطٛ اٛنْ اٜ جٛغٛوتِرِ اٜ بِيتُرُسْ اٜ يَحَيَ ندٜرْ رُمْڤَارُ مَوْندُ بِعٜتٜىٰندُ رُمْڤَارُ سُلٜيْمَانُ، سٜيْ يِمْٻٜ طُطْٻٜ ندٛغّٛيِ کَوْرِتِ تٛ مَٻّٜ اٜ کَيْطِنَ؞ ندٜ بِيتُرُسْ يِعِ يِمْٻٜ کَوْرِتِي، سٜيْ اٛ وِعِٻٜ، «اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ، نغَمْ طُمٜ کَيْطِنْتٛنْ؟ نغَمْ طُمٜ ندَارٛتٛنْمِنْ؟ اٛنْ کَمِّي اٜ بَوْطٜ اَمِنْ کٛو نغَمْ تِينَارٜ اَمِنْ دٛوْ تٛکُّکِ اَللَّه مِنْ نجَمْطِتِنِرِ جَرَاطٛ اٛعٛ؟ اَللَّه مٛ اِبْرَاهِمْ اٜ اِشِيَاکُ اٜ يَاکُبُ، اَللَّه مٛ مَامَعٜنْ مٜىٰطٜنْ، اٛ تٜدِّنِي مَشُّطٛ مَاکٛ يٜىٰسُ؞ اَمَّا کَنْکٛ وٛنِ مٛ کٛکِّتِرْنٛوطٛنْ نغَمْ اٛ وَرٜىٰ؞ اٛنْ نغَݧِيمٛ يٜىٰسٛ بِلَاتُسْ کٛو ندٜ بِلَاتُسْ اٜ يِطِ يٛوفُکِمٛ؞ اٛ شٜنِيطٛ اَادِلِيجٛ، اَمَّا اٛنْ نغَݧِيمٛ، اٛنْ تٛرَکٜ بِلَاتُسْ يٛوفَنَعٛنْ غَطّٛ وَرْحٛورٜ؞ اٛنْ مبَرِي کٛکَّيْطٛ يٛنْکِ، اَمَّا اَللَّه اُمِّنِيمٛ دَغَ مَيْدٜ؞ مِنٛنْ بٛو، مِنْ شٜيْدُعٜنْ مَاجُمْ؞ نغَمْ دَغَ ندٜرْ بَوْطٜ غٛنْطٜ ندٜرْ اِنْدٜ يٜىٰسُ، نٜطّٛ جَرَاطٛ اٛعٛ مٛ نغِعٛتٛنْ مٛ اَنْدُطٛنْ حٜٻِ نجَمُ؞ نغَمْ حٛولَاکِ اِنْدٜ يٜىٰسُ وَطِ اٛ حٜٻِ نجَمُ يٜىٰسٛ مٛوطٛنْ، اٛنْ فُو اٛنْ شٜيْدُعٜنْ مَاجُمْ؞ «جٛونِ بَنْدِرَاٻٜ اَمْ، اٜ مِ اَنْدِ کٛ نغَطَنْطٛنْ يٜىٰسُ اٛنٛنْ اٜ مَوْٻٜ مٛوطٛنْ اٛنْ نغَطُطُمْ نغَمْ شِيَ اَنْدَلْ؞ نٛنْ اَللَّه حٜبِّنِرِ کٛ اَنَّبٛعٜنْ مُوطُمْ فُو مبِعِ کٛ نٜىٰٻِ، ٻٜ مبِعِي اَلْمَسِيحُ تٛرّٛتٛ؞ نغَمْ نٛنْ، تُوبٜىٰ، شٛعّٛوطٛنْ تٛ جٛومِرَاوٛ نغَمْ اٛ يَافَنٛوعٛنْ حَکّٜ مٛوطٛنْ، اٛ سٜمْبِطِنَعٛنْ ندٜرْ تٛکُّکِمٛ، اٛ وَرْتِرَنَعٛنْ يٜىٰسُ اَلْمَسِيحُ مٛ اٛ وَطَنِعٛنْ اَلْکَوَلْ؞ دٛولٜ يٜىٰسُ جٛوطٛو ندٜرْ وُرٛ اَللَّه تٛنْ دٛوْ حَا يَاکِ شَرٜلْ نغٜلْ اَللَّه وَرْتِرْتَ کٛو طُمٜ کٜسُمْ، نٛ اٛ وِعُنٛو ندٜرْ کٛنْدُطٜ اَنَّبٛعٜنْ مَاکٛ شٜنِيٻٜ دَغَ ندٜنّٛ؞ نغَمْ مُوسَ وِعِي، ‹اَللَّه جٛومِرَاوٛ مٛوطٛنْ لِلْدٛنٛيَيْعٛنْ اَنَّبِيجٛ دَغَ ندٜرْ مٛوطٛنْ نٛنْ نٛ اٛ لِلْدٛيِيَمْ تٛ مٛوطٛنْ؞ نجَٻٜىٰ کٛو طُمٜ کٛ اٛ وِعَتَعٛنْ؞ نٜطّٛ فُو مٛ جَٻَايِ اَنَّبِيجٛ اٛنْ، طُمْ وُرْتِنَيْمٛ ندٜرْ يِمْٻٜ اَللَّه اٛ حَلْکٜىٰ؞› اَنَّبٛعٜنْ فُو دَغَ سَمَاعِلَ حَا يَاکِ اَنَّبٛعٜنْ تٛکُّٻٜ غَطَ مَاکٛ، ٻٜ فُو ٻٜ مٜتِي دٛوْ کٛ وَطَتَ ندٜرْ بَلْطٜ طٜعٜ؞ فُو اَنَّبَاکُوجِ طِ اَنَّبٛعٜنْ نغَطِ طِ نغَطَ نغَمْ مٛوطٛنْ؞ اٛنٛنْ نغٛنِ رٛنٛوٻٜ اَلْکَوَلْ نغَلْ اَللَّه وَطَنِ مَامَعٜنْ مٜىٰطٜنْ ندٜ اٛ وِعِ اِبْرَاهِمْ، ‹دَغَ دَݧْنغٛلْ مَاطَ مِ بَرْکِطِنَيْ لٜپِّ دُونِيَارُ فُو؞› ندٜ اَللَّه سُٻِ يٜىٰسُ مَشُّطٛ مَاکٛ، اٛ اَرْتِي لِلٛيْکِمٛ تٛ مٛوطٛنْ نغَمْ اٛ بَرْکِطِنَعٛنْ، اٛ وَيْلِتَ کٛو مٛيٜ مٛوطٛنْ اَلَ کُوغَلْ مُوطُمْ کَلُّنغَلْ؞» بِيتُرُسْ اٜ يَحَيَ اٜ مٜدَّ اٜ يِمْٻٜ، سٜيْ اَرْدِيٻٜ دِينَ اٜ مَوْطٛ تَادِيٻٜ وُرٛ شٜنِينغٛ اٜ سَادُسَنْکٛعٜنْ نغَرِ تٛ مَٻّٜ؞ ٻٜرْطٜ مَٻّٜ اٜ مٜتِّ نغَمْ بِيتُرُسْ اٜ يَحَيَ اٜ نغَعَجِنَ وِعُکِ يِمْٻٜ مَيْٻٜ اُمّٛدٛتٛ اٜ يٛنْکِ، نغَمْ يٜىٰسُ اُمَّکٜ دَغَ مَيْدٜ؞ نغَمْ مَاجُمْ ٻٜ نَنْغِٻٜ، ٻٜ مَٻِّٻٜ ندٜرْ سُودُ شُرَلْ حَا سُبَکَ، نغَمْ حِيرِي کٛ ٻٜ نَنْغِٻٜ؞ طُطْٻٜ ندٜرْ نَنْٻٜ وَعَجُ مَٻّٜ تٛکِّ يٜىٰسُ، حَا طُوطٛرَلْ تٛکُّٻٜ يٜىٰسُ وَطِ يِمْٻٜ 5,000؞ ندٜ فِنِ، اَرْدِيٻٜ اٜ مَوْٻٜ اٜ مٛودِٻّٜ اَتَّوْرَ کَوْرِتِ اٜ اُرُشَلِيمَ، کَمْٻٜ اٜ حَنَانَ مَوْطٛ مَوْٻٜ اَرْدِيٻٜ دِينَ، اٜ کَيَافَ، اٜ يَحَيَ، اٜ اَلِجَنْدَ، اٜ وٛٻّٜ ندٜرْ بَنْدِرَاٻٜ حَنَانَ؞ ٻٜ ندَرْنِ بِيتُرُسْ اٜ يَحَيَ يٜىٰسٛ مَٻّٜ، ٻٜ پَمِٻٜ ٻٜ مبِعِ، «اٜ اِرِ طٜيٜ بَوْطٜ، کٛو ندٜرْ اِنْدٜ مٛيٜ نجَمْطِتِنِرْطٛنْ جَرَاطٛ اٛنْ طٛنْ؟» بِيتُرُسْ اٜ حٜىٰوِ رُوحُ اَللَّه، وِعِٻٜ، «اٛنٛنْ اَرْدِيٻٜ يِمْٻٜ اٜ مَوْٻٜ، حَنْدٜ اٛنْ پَمَمِنْ دٛوْ فِي بٛطُّمْ طُمْ مِنْ نغَطَنِ اٛعٛ جَرَاطٛ اٜ نٛ اٛ يَمْطِتِنِرَا؞ ندَرٜىٰ مِ وِعَعٛنْ اٛنٛنْ يِمْٻٜ اِسْرَاعِيلَ فُو، نٜطّٛ اٛعٛ جَمْطِتِنَاطٛ، دَرِيطٛ يٜىٰسٛ مٛوطٛنْ طٛعٛ، اٛ يَمْطِتِنَ ندٜرْ اِنْدٜ يٜىٰسُ اَلْمَسِيحُ نَجَرَنْکٜىٰجٛ مٛ مبَرْطٛنْ دٛوْ غَافَانغَلْ، مٛ اَللَّه اُمِّنِ دَغَ مَيْدٜ؞ کَنْکٛ وٛنِ مٛ جٛومِرَاوٛ وِعِ ندٜرْ دٜفْتٜرٜ شٜنِيندٜ، ‹حَيْرٜ ندٜ مَحٛوٻٜ نغَݧِ، کَيْرٜ وَرْتِ حَيْرٜ ٻُرْندٜ دَرْنُکِ مَادِ؞› تٛ مَاکٛ تَنْ کِسْندَمْ حٜٻٜتٜىٰ، نغَمْ وَلَا وٛنْدٜ اِنْدٜ فٜىٰرٜ ندٜرْ دُونِيَارُ ندٜ اَللَّه حٛکِّ ندٜ طُمْ حِسِرْتَ تٛ نَاع اِنْدٜ يٜىٰسُ؞» مَوْٻٜ ٻٜنْ کَيْطِنِ ندٜ ٻٜ نغِعِ بِيتُرُسْ اٜ يَحَيَ اٜ مٜتَ ٻٜرْندٜ غٛعٛ، حَکّٛ ندٜ ٻٜ نَنِ ٻٜ لَدّٜعٜنْ، نَاع ٻٜ جَنْغُٻٜ؞ سٜيْ ٻٜ ڤَامِ بِيتُرُسْ اٜ يَحَيَ اٜ ٻٜ نجَادَيْنٛو اٜ يٜىٰسُ؞ اَمَّا ٻٜ کٜٻَايِ کٛ ٻٜ مبِعِ نغَمْ نٜطّٛ مٛ بِيتُرُسْ اٜ يَحَيَ يَمْطِتِنِ اٜ دَرٛدِي اٜ مَٻّٜ طٛنْ؞ ٻٜ مبِعِ بِيتُرُسْ اٜ يَحَيَ مبُرْتٛو يَاسِ؞ ٻٜ نغَطِ شَاوٛرِ؞ اٜ ٻٜ مبِعَ حَکُّندٜ مَٻّٜ، «کٛ نغَطَنْتٜنْ ٻٜعٜ يِمْٻٜ؟ اٜنْ مبَاوَتَا يٜدُّکِ کٛ ٻٜ نغَطِ نغَمْ کٛو مٛيٜ جٛوطِيطٛ ندٜرْ اُرُشَلِيمَ نَنِي ٻٜ نغَطِي فِي کَيْطِنِيطُمْ؞ اَمَّا نغَمْ حَطُکِ حَالَ کَنْ سَنْکِتَاکِ ندٜرْ يِمْٻٜ، سٜيْ مبَغِّنٜنْٻٜ تٛع ٻٜ ڤُطِّتَ ٻٜ مٜتَنَ غٛطّٛ دٛوْ اِنْدٜ يٜىٰسُ؞» سٜيْ ٻٜ نٛدِّتِي بِيتُرُسْ اٜ يَحَيَ ندٜرْ سُودُ ندُنْ، ٻٜ مبِعِٻٜ تٛع ٻٜ ڤُطِّتَ ٻٜ مٜتَنَ غٛطّٛ کٛو ٻٜ اٜکِّتِنَ غٛطّٛ ندٜرْ اِنْدٜ يٜىٰسُ؞ اَمَّا بِيتُرُسْ اٜ يَحَيَ مبِعِٻٜ، «اٛنٛنْ اٜ کٛعٜ مٛوطٛنْ، شُٻٜىٰ طُمٜ ٻُرِ وٛوطُکِ يٜىٰسٛ اَللَّه، مِنْ نغَطَ کٛ نغِطّٛنْ کٛو مِنْ نغَطَ کٛ اَللَّه يِطِ؟ مِنٛنْ کَمْ، مِنْ مبَاوَتَا مِنْ اَلَ مٜتُکِ دٛوْ کٛ مِنْ نغِعِ اٜ غِتٜ اَمِنْ اٜ کٛ مِنْ نَنِ اٜ نٛڤِّ اَمِنْ؞» مَوْٻٜ اَرْدِيٻٜ دِينَ اٜ مَوْٻٜ يِمْٻٜ ٻٜيْدِ وَغِّنْکِ بِيتُرُسْ اٜ يَحَيَ؞ غَطَ مَاجُمْ ٻٜ نجٛوفِٻٜ، ٻٜ کٜٻَايِ لَاوٛلْ نٛ ٻٜ تٛرِّرْتَٻٜ نغَمْ يِمْٻٜ فُو اٜ مَنْتَ اَللَّه دٛوْ فِي کَيْطِنِيطُمْ طُمْ ٻٜ نغَطِ؞ نٜطّٛ جَمْطِتِنَاطٛ اٛنْ اٛ ٻُرِي دُوٻِ 40؞ ندٜ بِيتُرُسْ اٜ يَحَيَ نجٛوفَا ٻٜ شٛعِّي تٛ بَنْدِرَاٻٜ مَٻّٜ تٛکُّٻٜ يٜىٰسُ ٻٜ طِيوِتَنِٻٜ فُو کٛ مَوْٻٜ اَرْدِيٻٜ دِينَ اٜ مَوْٻٜ مبِعِٻٜ؞ ندٜ تٛکُّٻٜ يٜىٰسُ ٻٜنْ نَنِ نٛنْ، ٻٜ فُو ٻٜ اُمِّي ٻٜ نغَطِ دٛعَارٜ اٜ ٻٜرْندٜ وٛعٛيْرٜ، ٻٜ مبِعِ، «يَا جٛومِرَاوٛ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ فُو، اَنْ مٜتِ اٜ حٛنْدُکٛ مَامَ اَمِنْ دَوْدَ مَشُّطٛ مَاطَ ندٜرْ رُوحُ اَللَّه اٛ وِعِ، ‹نغَمْ طُمٜ يِمْٻٜ نَاع يَحُودَنْکٛعٜنْ مٜتِّنِ ٻٜرْطٜ مَٻّٜ نَاع سٜطَّ؟ نغَمْ طُمٜ يِمْٻٜ ݧُمِ ݧُمٛوجِ مٜىٰرٜ؟ لَامِيٻٜ دُونِيَارُ شِرْيَکٜ حَوْرٜ، اَرْدِيٻٜ کَوْرِتِي نغَمْ ٻٜ کٛنَ جٛومِرَاوٛ اٜ اَلْمَسِيحُ مَاکٛ؞› رَا بٛو، ندٜرْ غَرِيرِ ندِعِ حِرُدُسْ اٜ بِلَاتُسْ اٜ يِمْٻٜ اِسْرَاعِيلَ اٜ غٛطِّ لٜپِّ ٻٜ کَوْتِي کٛعٜ مَٻّٜ ٻٜ نغَݧِي يٜىٰسُ، مَشُّطٛ مَاطَ شٜنِيطٛ مٛ شُٻُطَا، نغَمْ فُو کٛ ٻٜ کُوِ دَغَ اَرَنْدٜ اٜ بَوْطٜ مَاطَ اَ سِرْيَکٜنٛ نٛنْ طُمْ وَارَتَ؞ جٛونِ جٛومِرَاوٛ، اَ نَنِي بٛلِيطٜ مَٻّٜ کَلُّطٜ، حٛکُّ مَشُّٻٜ مَاطَ سٜمْبٜ وَعَجِنْکِ بٛلِيطٜ مَاطَ کُلٛلْ وَلَا، حٛلُّ بَوْطٜ مَاطَ، يَمْطِتِنْ ݧَوْٻٜ، وَطُ اَلَامَاجِ اٜ کُوطٜ کَيْطِنِيطٜ ندٜرْ اِنْدٜ يٜىٰسُ مَشُّطٛ مَاطَ شٜنِيطٛ؞» ندٜ ٻٜ نجٛتِّنِ دٛعَارٜ وُرٛ نغٛ ٻٜ کَوْرِتِ دِمْبِي؞ ٻٜ فُو ٻٜ کٜىٰوِ رُوحُ اَللَّه، ٻٜ نغَعَجِنِ وٛلْدٜ اَللَّه کُلٛلْ وَلَا؞ فُو کٛولِيٻٜ يٜىٰسُ ٻٜرْطٜ مَٻّٜ اٜ حَکِّيلٛ مَٻّٜ وَرْتِ غٛعٛ؞ وَلَا بِعٛووٛ کَنُمْ جٜيِ کٛ وٛودِ، اٜ ٻٜ شٜنْدَ کٛو طُمٜ طُمْ ٻٜ نغٛودِ؞ لِلَاٻٜ ٻٜنْ ندٜرْ بَوْطٜ ٻٜ نغَطِ کَ وَعَجِنْکِ اُمَّاکِ يٜىٰسُ جٛومِرَاوٛ دَغَ مَيْدٜ؞ کٛو مٛيٜ مَٻّٜ اٜ وٛنْدِ اٜ بَرْکَ اَللَّه مَوْطُمْ؞ اٜ وٛودِ غٛطّٛ لٜىٰوِيَنْکٜىٰجٛ، نٜطّٛ لٜيْدِ سَيِيفُرُسْ بِعٜتٜىٰطٛ يُسُفُ، مٛ لِلَاٻٜ نٛدِّرْتَ بَرْنَبَ ﴿مَعَنَ اِنْدٜ مَاکٛ وٛنِ شٜمْبِطِنٛووٛ ٻٜرْطٜ﴾، اٛ سٛورِ نغٜسَ مَاکٛ، اٛ حٛکِّ لِلَاٻٜ شٜىٰدٜ طٜنْ؞ اَمَّا اٜ وٛودِ غٛطّٛ بِعٜتٜىٰطٛ حَنَانِيَ اٜ دٜبّٛ مَاکٛ سَفِيرَتُ؞ کَنْکٛ مَا اٛ سٛورِ نغٜسَ مَاکٛ؞ اٛ سٜنْدِ شٜىٰدٜ طٜنْ اٜ اَنْدَلْ دٜبّٛ مَاکٛ؞ اٛ سُوطِ غٛطّٜ اٛ يَارِ کٛرِيطٜ اٛ حٛکِّ لِلَاٻٜ؞ بِيتُرُسْ وِعِمٛ، «حَنَانِيَ، نغَمْ طُمٜ اَلُطَا شٜيْطَنْ نَتِّ ٻٜرْندٜ مَاطَ حَا ڤٜوَنْطَا رُوحُ اَللَّه، شُوطُطَا غٛطّٜ شٜىٰدٜ ندٜرْ شٜىٰدٜ نغٜسَ کَنْ؟ کٛ شٛورُطَا طُمْ، نَاع اُمْ طُمْ مَاطَ؟ ندٜ شٛورُطَاطُمْ نَاع اَنْ جٜيِ شٜىٰدٜ طٜنْ؟ کٛ وَطِ نغَطُطَا نٛنْ؟ نَاع يِمْٻٜ ڤٜوَنْطَا، اَمَّا اَللَّه ڤٜوَنْطَا؞» ندٜ حَنَانِيَ نَنِ بٛلِيطٜ طٜنْ، اٛ يَنِ اٛ مَايِ؞ کُلٛلْ مَنْغٛلْ نَنْغِ نَنْٻٜ حَبَرُ طُمْ فُو؞ وٛٻّٜ کَيٜعٜنْ اُمِّي، تَارِ ٻَنْدُ مَاکٛ اٜ غُدٜ، کٛشِّمٛ، مبُرْتِنِمٛ يَاسِ، اُوٛيِمٛ؞ غَطَ اَوَاجِ تَتِ سٜيْ رَا دٜبّٛ مَاکٛ وَرِ نَتّٛيِ؞ اٛ اَنْدَا کٛ وَطِ؞ بِيتُرُسْ وِعِمٛ، «وِعَمْ، طٜعٜ شٜىٰدٜ کَنْجٜ تَنْ شٛورُطٛنْ نغٜسَ مٛوطٛنْ؟» اٛ وِعِ، «اٜىٰ، طُمْ نٛنْ مِنْ شٛورِکَ؞» ندٜنْ بِيتُرُسْ وِعِمٛ، «نغَمْ طُمٜ کَوْتُطٛنْ حٛورٜ نغَمْ فٛوندُکِ رُوحُ جٛومِرَاوٛ؟ رَا، اُوٛيْٻٜ غٛرْکٛ مَاطَ طٛنْ نغَرَ، جٛونِ ٻٜ کٛشّٜتٜ اَنْ مَا!» طٛنْ اٜ طٛنْ کَنْکٛ مَا اٛ يَنِ حَادٜ کٛيْطٜ بِيتُرُسْ، اٛ مَايِ؞ کَيٜعٜنْ ٻٜنْ نَتِّ تَوِ اٛ مَيْطٛ، ٻٜ کٛشِّمٛ ٻٜ مبُرْتِنِمٛ، ٻٜ اُوٛيِمٛ حَادٜ غٛرْکٛ مَاکٛ؞ کُلٛلْ مَنْغٛلْ نَنْغِ کَوْتَلْ تٛکُّٻٜ يٜىٰسُ اٜ نَنْٻٜ حَبَرُ طُمْ فُو؞ لِلَاٻٜ نغَطِ اَلَامَاجِ اٜ کُوطٜ کَيْطِنِيطٜ طُطّٜ ندٜرْ يِمْٻٜ؞ کٛولِيٻٜ يٜىٰسُ فُو اٜ کَوْرِتَ ندٜرْ رُمْڤَارُ سُلٜيْمَانُ مَوْندُ ندٜرْ ݧُمٛ غٛعٛ؞ کٛو مٛيٜ مٛ وَلَا ندٜرْ کَوْتَلْ مَٻّٜ اٜ حُلَ نَتُّکِٻٜ، کٛو ندٜ کٛو مٛيٜ اٜ حٛکَّٻٜ مَنْغُ نَاع سٜطَّ؞ فُو اٜ نٛنْ کٛو ندٜيٜ يِمْٻٜ طُطْٻٜ، وٛرْٻٜ اٜ رٜوْٻٜ، اٜ ٻٜيْدٛو ندٜرْ تٛکُّٻٜ يٜىٰسُ، حَا طُمْ وَرْتِ يِمْٻٜ اٜ کٛشّٛيَ ݧَوْٻٜ، اٜ ٻٜ مبُرْتِنٛيَٻٜ دٛوْ طَتٜ، اٜ ٻٜ ڤُکِّنَٻٜ دٛوْ لٜىٰشٜ اٜ دَاغٜ، نغَمْ تٛ بِيتُرُسْ وَرِي کٛو طٛوْدِ مَاکٛ مَا تَنْ مٜىٰمَ وٛٻّٜ مَٻّٜ؞ يِمْٻٜ طُطْٻٜ دَغَ نغَرِحٛيْ ڤِلِيکٛيْ اُرُشَلِيمَ مَا نغَدِّنغَدِّنِ ݧَوْٻٜ اٜ غٛودُٻٜ غِنِّ؞ ٻٜ فُو بٛو ٻٜ نجَمْطِتِنَا؞ ندٜنْ مَوْطٛ مَوْٻٜ اَرْدِيٻٜ دِينَ اٜ وٛنْدُٻٜ اٜ مَاکٛ، وَاتٛ سَادُسَنْکٛعٜنْ، ٻٜ اُمِّنِ لَوْلِيرُ کَلُّندُ؞ ٻٜ نَنْغِ لِلَاٻٜ، ٻٜ مَٻِّٻٜ ندٜرْ سُودُ شُرَلْ؞ اَمَّا ندٜرْ جٜمَّارٜ ندٜنْ مَلَاعِکَاجٛ جٛومِرَاوٛ وَرِ مَٻِّتَنِ لِلَاٻٜ ٻٜنْ دَمُّطٜ سُودُ شُرَلْ ندُنْ، وُرْتِنِٻٜ، وِعِٻٜ، «نجَحٜىٰ ندَرٜىٰ ندٜرْ وُرٛ شٜنِينغٛ، کٛکّٛنْ کٛو مٛيٜ حَبَرُ يٛنْکِ کٜسُمْ؞» ندٜ ٻٜ نَنِ نٛنْ، ٻٜ نَتّٛيِ ندٜرْ وُرٛ شٜنِينغٛ سُبَکَ، طٛنْ اٜ طٛنْ ٻٜ ڤُطِّ اٜکِّتِنْکِ؞ مَوْطٛ مَوْٻٜ اَرْدِيٻٜ دِينَ اٜ وٛنْدُٻٜ اٜ مَاکٛ نٛدِّ کَوْتَلْ مَوْٻٜ اٜ اَرْدِيٻٜ يَحُودَنْکٛعٜنْ فُو؞ ٻٜ مبِعِ طُمْ وُرْتِنٛيَ لِلَاٻٜ ٻٜنْ دَغَ ندٜرْ سُودُ شُرَلْ، ٻٜ نغَدّٜىٰ؞ اَمَّا ندٜ تَادِيٻٜ نجَحِ، ٻٜ تَوَايِ لِلَاٻٜ ٻٜنْ ندٜرْ سُودُ ندُنْ؞ سٜيْ ٻٜ شٛعِّي، ٻٜ مبِعِ مَوْٻٜ ٻٜنْ، «مِنْ تَوِي سُودُ شُرَلْ ندُنْ اٜ مَٻِّي، تَادِيٻٜ اٜ ندَرِي اٜ ندٜىٰنَ دَمُّطٜ طٜنْ، اَمَّا ندٜ مِنْ مَٻِّتِ، مِنْ تَوَايِ کٛو غٛعٛتٛ ندٜرْ مَٻّٜ!» ندٜ مَوْطٛ تَادِيٻٜ وُرٛ شٜنِينغٛ اٜ مَوْٻٜ اَرْدِيٻٜ دِينَ نَنِ نٛنْ، طُمْ وَنِّيٻٜ، ٻٜ اَنْدَا نٛ فِي طُمْ وَرْتَتَ؞ سٜيْ غٛطّٛ وَرِ، وِعِٻٜ، «يِمْٻٜ ٻٜ مَٻُّطٛنْ ندٜرْ سُودُ شُرَلْ اٜ ٻٜ تٛنْ ندٜرْ وُرٛ شٜنِينغٛ اٜ ٻٜ نغَعَجِنَنَ يِمْٻٜ!» ندٜنْ مَوْطٛ تَادِيٻٜ اٛنْ يَادِ اٜ تَادِيٻٜ، ٻٜ نغَدِّ لِلَاٻٜ ٻٜنْ؞ اَمَّا ٻٜ نغَدِّرَايِٻٜ اٜ سٜمْبٜ، نغَمْ اٜ ٻٜ کُلَ تٛ يِمْٻٜ کُبٛرٛوٻٜ اٜ کَاپٜ؞ ندٜ ٻٜ نغَدِّٻٜ، ٻٜ ندَرْنِٻٜ يٜىٰسٛ کَوْتَلْ مَوْٻٜ؞ مَوْطٛ مَوْٻٜ اَرْدِيٻٜ دِينَ پَمْتِٻٜ، وِعِ، «مِنْ کَطِيعٛنْ اٜکِّتِنْکِ دٛوْ اِنْدٜ يٜىٰسُ، اَمَّا اٛنْ شَنْکِتِي وَعَجُ مٛوطٛنْ ندٜرْ اُرُشَلِيمَ فُو؞ کَدِمَا اٛنْ نغِطِ يٛوَنْکِمِنْ حَکّٜ پِيپَمْ وَرُکِمٛ؞» بِيتُرُسْ اٜ لِلَاٻٜ نٛوتِي، مبِعِ، «دٛولٜ مِنْ تٛکَّ کٛ اَللَّه وِعِ، نَاع کٛ يِمْٻٜ مبِعِ؞ اَللَّه مٛ مَامَعٜنْ مٜىٰطٜنْ اُمِّنِي يٜىٰسُ دَغَ مَيْدٜ، غَطَ اٛنْ مبَرِيمٛ دٛوْ غَافَانغَلْ؞ اَللَّه حٛکِّيمٛ مَنْغُ، جٛعِّنِيمٛ اٜ جُنْغٛ مُوطُمْ ݧَامٛ، وَرْتِرِيمٛ لَامِيطٛ اٜ کِسْنٛووٛ، نغَمْ يِمْٻٜ اِسْرَاعِيلَ تُوبَ، ٻٜ کٜٻَ يَافَنٜىٰکِ حَکّٜ مَٻّٜ؞ مِنٛنْ نغٛنِ شٜيْدِيٻٜ فِي طُعُمْ، مِنٛنْ اٜ رُوحُ اَللَّه طُمْ اَللَّه حٛکِّ يِمْٻٜ غَطٛوٻٜ کٛ اٛ وِعِ؞» ندٜ مَوْٻٜ ٻٜنْ نَنِ نٛنْ، ٻٜرْطٜ مَٻّٜ مٜتِّ نَاع سٜطَّ، ٻٜ نغِطِي ٻٜ مبَرَ لِلَاٻٜ ٻٜنْ؞ اَمَّا غٛطّٛ بِعٜتٜىٰطٛ غَمَالِيَ اُمِّي دَرِي شَکَ کَوْتَلْ مَوْٻٜ؞ کَنْکٛ اٛ فَارِسَنْکٜىٰجٛ اٛ مٛودِبّٛ اَتَّوْرَ، يِمْٻٜ فُو اٜ کٛکَّمٛ مَنْغُ؞ اٛ وِعِ طُمْ وُرْتِنَ لِلَاٻٜ ٻٜنْ يَاسِ شَرٜلْ سٜطَّ؞ غَطَ ٻٜ مبُرْتِنَامَ، اٛ وِعِ کَوْتَلْ نغَلْ، «اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ، ندٜىٰنٜىٰ کٛعٜ مٛوطٛنْ دٛوْ کٛ نغِطّٛنْ وَطَنْکِ يِمْٻٜ ٻٜعٜ؞ کٛ نٜىٰٻَايِ غٛطّٛ بِعٜتٜىٰطٛ تُدَسْ وَنْغِي؞ اٛ حٛشِّي حٛورٜ مَاکٛ بٛ اٛ مَوْطٛ؞ يِمْٻٜ کٛ وَطِ 400 تٛکِّمٛ؞ تٛو، اٛ وَرَامَ، تٛکُّنٛوٻٜمٛ فُو شَنْکِتَکٜ، وَلَا کٛو غٛعٛتٛ دَرِيطٛ؞ غَطَ مَاکٛ، يَحُودَ غَلِلَنْکٜىٰجٛ وَرِي شَرٜلْ کٛ غٛمْنَتِ لِمَتَ يِمْٻٜ، يِمْٻٜ طُطْٻٜ تٛکِّيمٛ؞ کَنْکٛ مَا اٛ وَرَامَ، تٛکُّٻٜمٛ فُو شَنْکِتَکٜ؞ جٛونِ، اٜ مِ وِعَعٛنْ، نغٛطِّتٜىٰ يِمْٻٜ ٻٜعٜ، اَلٜىٰٻٜ؞ نغَمْ تٛ ݧُمٛوجِ مَٻّٜ اٜ کُوغَلْ مَٻّٜ پِوِي تٛ يِمْٻٜ، طُمْ لَلَّيْ؞ اَمَّا تٛ طُمْ پِوٛيِي تٛ اَللَّه، ندٜنْ کَمْ اٛنْ مبَاوَتَا سَنْکُتُکِطُمْ؞ ڤَامٜىٰ تٛع کَٻْدٛنْ اٜ اَللَّه!» مَوْٻٜ ٻٜنْ نجَٻِ کٛ اٛ وِعِ؞ ٻٜ نٛدِّتِ لِلَاٻٜ ٻٜنْ، ٻٜ ڤِيِٻٜ، ٻٜ مبِعِٻٜ تٛع ٻٜ ٻٜيْدَ مٜتُکِ دٛوْ اِنْدٜ يٜىٰسُ؞ ندٜنْ ٻٜ نجٛوفِٻٜ؞ لِلَاٻٜ ٻٜنْ مبُرْتٛيِي ندٜرْ کَوْتَلْ مَوْٻٜ اٜ وٜلْوٜلٛ نغَمْ اَللَّه مَوْنِنِيٻٜ حَا ٻٜ کٜوْتِي سٜمْتِنٜىٰکِ نغَمْ يٜىٰسُ؞ کٛو ندٜيٜ ݧَلْندٜ اٜ ٻٜ نغَعَجِنَ حَبَرُ بٜلْطُمْ وِعُکِ يٜىٰسُ وٛنِ اَلْمَسِيحُ، اٜ ٻٜ اٜکِّتِنَ ندٜرْ وُرٛ شٜنِينغٛ اٜ ندٜرْ غُرٜ فُو؞ ندٜرْ بَلْطٜ طٜنْ، تٛکُّٻٜ يٜىٰسُ اٜ ٻٜيْدَ طُطْکِ؞ سٜيْ يَحُودَنْکٛعٜنْ مٜتٛوٻٜ حٜلٜنَنْکٛورٜ مٜتِتَنِ يَحُودَنْکٛعٜنْ مٜتٛوٻٜ اِبْرَانِيَنْکٛورٜ، نغَمْ رٜوْٻٜ مَٻّٜ ٻٜ وٛرْٻٜ مُعّٜنْ مَايِ کٛکَّتَاکٜ کٛ حَانِ کٛکّٜىٰ ندٜرْ ݧَمْندُ ندُ طُمْ وٛووِ يٜىٰدُکِ کٛو ندٜيٜ ݧَلْندٜ؞ سٜيْ لِلَاٻٜ سَڤّٛ اٜ طِطٛ نٛدِّ کَوْتَلْ تٛکُّٻٜ يٜىٰسُ فُو، ٻٜ مبِعِ، «مِنٛنْ، طُمْ حَانَايِ مِنْ اَلَ وَعَجِنْکِ وٛلْدٜ اَللَّه نغَمْ سٜنْدُکِ ݧَمْندُ؞ نغَمْ نٛنْ، بَنْدِرَاٻٜ، شُٻٜىٰ وٛرْٻٜ نجٛوٜىٰطِطٛ ندٜرْ مٛوطٛنْ ٻٜ طُمْ حٛولِي کٜىٰوُٻٜ رُوحُ اَللَّه، غٛودُٻٜ فَامُ نغَمْ مِنْ کٛکَّٻٜ کُوغَلْ نغَلْ؞ اَمَّا مِنٛنْ، مِنْ نغَطَيْ کَ وَطُکِ دٛعَارٜ اٜ مِنْ اٜکِّتِنَ وٛلْدٜ اَللَّه؞» حَالَ کَنْ بٛو وٜلِي کَوْتَلْ تٛکُّٻٜ يٜىٰسُ فُو؞ ندٜنْ ٻٜ شُٻِ اِسْتِفَانُسْ، نٜطّٛ کٛولِيطٛ جٛومِرَاوٛ، کٜىٰوُطٛ رُوحُ اَللَّه، کَنْکٛ اٜ فِلِبُسْ اٜ بُرٛکٛرَسْ اٜ نِکَنٛ اٜ تِمٛنْ اٜ بَرْمٜنَسْ اٜ نِکٛلَسْ پِوٛيْطٛ اَنْتَاکِيَ، نَتُّطٛ دِينَ يَحُودَنْکٛعٜنْ کَنْکٛ نَاع اٛ يَحُودَنْکٜىٰجٛ؞ ٻٜ نغَدِّٻٜ يٜىٰسٛ لِلَاٻٜ؞ سٜيْ لِلَاٻٜ ٻٜنْ نجٛوَنِٻٜ جُوطٜ، نغَطَنِٻٜ دٛعَارٜ؞ وٛلْدٜ اَللَّه بٛو ٻٜيْدِ سَنْکِتَاکِ؞ تٛکُّٻٜ يٜىٰسُ اٜ ٻٜيْدَ طُوطُکِ ندٜرْ غَرِيرِ اُرُشَلِيمَ، حَا اَرْدِيٻٜ دِينَ طُطْٻٜ تٛکِّ يٜىٰسُ؞ اَللَّه بَرْکِطِنِ اِسْتِفَانُسْ حٛکِّمٛ بَوْطٜ وَطُکِ کُوطٜ مَوْطٜ کَيْطِنِيطٜ اٜ اَلَامَاجِ ندٜرْ يِمْٻٜ؞ اَمَّا اٜ وٛودِ وٛٻّٜ ندٜرْ سُودُ دٛعَارٜ بِعٜتٜىٰندُ سُودُ رِمْطِنَاٻٜ، اٜ وٛٻّٜ پِوٛيْٻٜ غَرِيرِ سَايِرِنْ اٜ غَرِيرِ اَلِجَندِيرِيَ اٜ لٜيْدِ کِلِيکِيَ اٜ لٜيْدِ اَاسِيَ، ٻٜ اُمَّنِيمٛ اٜ ٻٜ نغٜدّٛوتِرَ اٜ مَاکٛ؞ اَمَّا ٻٜ ندُلِّ نٛ ٻٜ نجَالٛرْتٛومٛ نغَمْ اٜ مٛ مٜتِرَ فَامُ اٜ رُوحُ اَللَّه؞ سٜيْ ٻٜ کٛکِّ وٛٻّٜ شٜىٰدٜ اٜ سُوطٜ نغَمْ ٻٜ مبِعَ ٻٜ نَنِي اٜ مٛ حُطَ مُوسَ اٜ اَللَّه؞ نٛنْ ٻٜ اُمِّنِرِ ٻٜرْطٜ يِمْٻٜ اٜ مَوْٻٜ اٜ مٛودِٻّٜ اَتَّوْرَ؞ سٜيْ ٻٜ نَنْغِ اِسْتِفَانُسْ، ٻٜ نجَارِمٛ يٜىٰسٛ کَوْتَلْ مَوْٻٜ، ٻٜ نغَدِّ شٜيْدُعٜنْ فٜوْرٜ؞ شٜيْدُعٜنْ ٻٜنْ مبِعِ، «کٛو ندٜيٜ نٜطّٛ اٛعٛ اٜ مٜتَ کَلُّکَ دٛوْ وُرٛ شٜنِينغٛ اٜ اَتَّوْرَ؞ مِنْ نَنِي اٜ مٛ وِعَ يٜىٰسُ نَجَرَنْکٜىٰجٛ سَنْکِتَيْ وُرٛ شٜنِينغٛ، اٛ وَيْلِتَيْ ندٛنُوجِ طِ مُوسَ حٛکِّعٜنْ؞» سٜيْ فُو جٛوطِيٻٜ ندٜرْ کَوْتَلْ نغَلْ شُتِي اِسْتِفَانُسْ، ٻٜ نغِعِ يٜىٰسٛ مَاکٛ وَرْتِي بٛ يٜىٰسٛ مَلَاعِکَاجٛ؞ ندٜنْ مَوْطٛ مَوْٻٜ اَرْدِيٻٜ دِينَ پَمِ اِسْتِفَانُسْ وِعِ، «کٛ ٻٜ مبِعِ دٛوْ مَاطَ طُمْ غٛونغَ؟» سٜيْ اِسْتِفَانُسْ وِعِ، «بَنْدِرَاٻٜ اَمْ اٜ دَݧٛوٻٜ اَمْ، نَنٜىٰ کٛ مبِعَيْمِ! اَللَّه جٛومُ مَنْغُ وَنْغَنِي مَامَ مٜىٰطٜنْ اِبْرَاهِمْ شَرٜلْ کٛ اٛ وٛنّٛو لٜيْدِ مٜسٛفٛتَامِيَ، کٛ اٛ جٛوطٛو لٜيْدِ حَرَنْ؞ اَللَّه وِعِمٛ، ‹وُرْتَ لٜيْدِ مَاطَ اٜ يِمْٻٜ مَاطَ، نجَحَا لٜيْدِ ندِ کٛلَّيْمَامِ؞› ندٜنْ اِبْرَاهِمْ وُرْتِي لٜيْدِ کَلْدِيَ، اٛ يَحِ اٛ جٛوطِي ندٜرْ لٜيْدِ حَرَنْ؞ غَطَ مَيْدٜ ݧَاکٛ مَاکٛ، اَللَّه اُمِّنِمٛ طٛنْمَا يَارِمٛ ندٜرْ لٜيْدِ ندِ نجٛوطِيطٛنْ جٛونِ؞ اَللَّه حٛکَّايِمٛ ندٛنُ لٜيْدِ ندِنْ کٛو يَاٻَندٜ وٛعٛيْرٜ، اَمَّا اٛ وَطَنِيمٛ اَلْکَوَلْ حٛکُّکِمٛندِ، ندِ وَرْتَ ندِ مَاکٛ، کَنْکٛ اٜ ٻِٻّٜ مَاکٛ، کٛو ندٜ اٛ وَلَا ٻِطّٛ اٜ شَرٜلْ نغٜلْ؞ طُعُمْ وٛنِ کٛ اَللَّه وِعِمٛ، ‹ٻِٻّٜ ٻِٻّٜىٰجِ مَاطَ نجَحَيْ لٜيْدِ وٛٻّٜ؞ يِمْٻٜ لٜيْدِ ندِنْ نغَرْتِرَٻٜ مَشُّٻٜ، ٻٜ تٛرَّٻٜ دُوٻِ 400؞ اَمَّا مِ تٛرَّيْ ٻٜنْ طٛنْ يِمْٻٜ غَرْتِرْٻٜ ٻِٻّٜ ٻِٻّٜىٰجِ مَاطَ مَشُّٻٜ؞ غَطَ مَاجُمْ ٻٜ مبُرْتٛتٛ لٜيْدِ ندِنْ ٻٜ مَوْنِنَيَمْ ندٜرْ لٜيْدِ ندِعِ؞› ندٜنْ اَللَّه وَطَنِ اِبْرَاهِمْ اَلْکَوَلْ؞ نَادُکِ وٛنِ کٛ حٛلَّتَ اٛ جَٻِي اَلْکَوَلْ نغَلْ؞ ندٜ اِبْرَاهِمْ دَݧِ اِشِيَاکُ، غَطَ بَلْطٜ جٛوٜىٰتَتِ اٛ نَادِمٛ؞ نٛنْ اِشِيَاکُ مَا نَادِ يَاکُبُ؞ يَاکُبُ مَا نَادِ ٻِٻّٜ مُوطُمْ سَڤّٛ اٜ طِطٛ، کَمْٻٜ نغٛنِ مَامَعٜنْ مٜىٰطٜنْ؞ «مَامَعٜنْ مٜىٰطٜنْ نَنِ لَوْلِيرُ اِسُفُ، ٻٜ شٛورِمٛ اٛ وَرْتِ مَشُّطٛ ندٜرْ لٜيْدِ مَسَرْ؞ اَمَّا اَللَّه اٜ وٛنْدِ اٜ مَاکٛ، حِسْنِمٛ دَغَ تٛرَّاجِ فُو، حٛکِّمٛ فَامُ حَا فِرعَوْنَ لَامِيطٛ مَسَرْ اَنْدِ کَ مَاکٛ؞ فِرعَوْنَ وَرْتِرِمٛ مَوْطٛ ندٜرْ لٜيْدِ مَسَرْ حَا دٛوْ وُرٛ مُوطُمْ فُو؞ سٜيْ وٜىٰلٛ کَلُّنغٛ وَطِ ندٜرْ لٜيْدِ مَسَرْ اٜ لٜيْدِ کَنْعَانَ فُو؞ نغٛ تٛرِّ يِمْٻٜ حَا مَامَعٜنْ مٜىٰطٜنْ ندُلِّ کٛ ݧَامَتَ؞ ندٜ يَاکُبُ نَنِ اٜ وٛودِ ݧَمْندُ ندٜرْ لٜيْدِ مَسَرْ، اٛ لِلِ مَامَعٜنْ مٜىٰطٜنْ تٛنْ؞ اَرَنْدٜ ٻٜ نجَحِ ٻٜ نغَرْتِ، سٜيْ ٻٜ شٛعِّي کَدِنْ؞ اٜ يَادُ مَٻّٜ طِطَوْرُ، اِسُفُ حٛلِّٻٜ اٛ سَکِرَاوٛ مَٻّٜ؞ فِرعَوْنَ بٛو اَنْدِ بَنْدِرَاٻٜ اِسُفُ؞ ندٜنْ اِسُفُ لِلِٻٜ ٻٜ نغَدّٛيَ ݧَاکٛ مَاکٛ يَاکُبُ اٜ وُرٛ مُوطُمْ فُو؞ طُطْکِ مَٻّٜ وَطِي يِمْٻٜ 75؞ سٜيْ يَاکُبُ يَحِ لٜيْدِ مَسَرْ؞ اٛ مَايِ تٛنْ، کَنْکٛ اٜ مَامَعٜنْ مٜىٰطٜنْ؞ ٻٜ نجَارَا شٜىٰکٜمْ، ٻٜ اُوَا تٛنْ ندٜرْ يٜنَاندٜ ندٜ اِبْرَاهِمْ سٛودُنٛو تٛ ٻِٻّٜ حَمٛرْ اٜ اَجُرْفَارِ؞ «ندٜ اَلْکَوَلْ نغَلْ اَللَّه وَطَنِ اِبْرَاهِمْ ٻَدِي حٜىٰوُکِ، يِمْٻٜ اِبْرَانِيَنْکٛعٜنْ طُوطِ ندٜرْ لٜيْدِ مَسَرْ؞ اٜ شَرٜلْ نغٜلْ غٛطّٛ وَرْتِ لَامِيطٛ لٜيْدِ مَسَرْ مٛ اَنْدَا اِسُفُ؞ لَامِيطٛ اٛنْ حَلَّنِ لٜݧٛلْ مٜىٰطٜنْ، اٛ تٛرِّ مَامَعٜنْ مٜىٰطٜنْ اٛ دٛولِٻٜ ٻٜ کُبِنَ ٻِکّٛيْ مَٻّٜ نغَمْ کٛيْ مَايَ؞ ندٜرْ شَرٜلْ نغٜلْ مُوسَ دَݧَا، اٛ ٻِنْغٜلْ بٛنْغٜلْ نَاع سٜطَّ؞ نغٜلْ رٜىٰنَا ندٜرْ وُرٛ ݧَاکٛ مَاغٜلْ لٜبِّ تَتِ؞ ندٜ نغٜلْ حُبِنَا، ٻِي فِرعَوْنَ دٜبّٛ حٛشِّنغٜلْ، وَرْتِرِنغٜلْ ٻِنْغٜلْ مُوطُمْ؞ سٜيْ طُمْ جَنْغِنِ مُوسَ اٛنْ اَنْدَلْ مَسَرَنْکٛعٜنْ فُو، اٛ وَرْتِ بَوْطٛ حَالَ اٜ کُوطٜ؞ «ندٜ مُوسَ وَطِ دُوٻِ 40، اٛ يَحِ تٛ لٜݧٛلْ مَاکٛ، ٻِٻّٜ اِسْرَاعِيلَ نغَمْ اٛ يِعَ نٛ ٻٜ نغٛنْتِندِرِ؞ ندٜ اٛ يِعِ غٛطّٛ مَسَرَنْکٜىٰجٛ اٜ تٛرَّ غٛطّٛ اِسْرَاعِيلَنْکٜىٰجٛ، اٛ وَلِّ اِسْرَاعِيلَنْکٜىٰجٛ تٛرّٜتٜىٰطٛ اٛنْ، اٛ فِيِ مَسَرَنْکٜىٰجٛ اٛنْ، اٛ وَرِمٛ؞ اٛ ݧُمِ بَنْدِرَاٻٜ مَاکٛ اَندِتَيْ اَللَّه حُوتِرَيْمٛ نغَمْ حِسْنَٻٜ دَغَ جُنْغٛ مَسَرَنْکٛعٜنْ، اَمَّا ٻٜ اَنْدِتَايِ؞ ندٜ فِنِ اٛ تَوِ اِسْرَاعِيلَنْکٛعٜنْ طِطٛ اٜ کَٻَ؞ اٛ يِطِي اٛ سِرْيٛوتِرَٻٜ، اٛ وِعِٻٜ، ‹حِغٛوٻٜ اَمْ، اٛنٛنْ اٛنْ بَنْدِرَاٻٜ! نغَمْ طُمٜ کَلَّنْتٛنْ کٛعٜ مٛوطٛنْ؟› اَمَّا تٛرَّيْطٛ غٛعٛتٛ اٛنْ تُرْتِي مُوسَ وُتُّدُ، وِعِمٛ، ‹مٛيٜ وَرْتِرْمَا اَرْدِيطٛ اٜ کِيتٛتٛوطٛ دٛوْ اَمِنْ؟ مِنْ مَا، اَ يِطِ مبَرَايَمْ نٛ مبَرْدُطَا مَسَرَنْکٜىٰجٛ کٜىٰݧَ؟› ندٜ مُوسَ نَنِ نٛنْ دٛغِّ يَحِ لٜيْدِ مِدِيَنْ؞ تٛنْ اٛ دَݧَنَا ٻِٻّٜ وٛرْٻٜ طِطٛ؞ «غَطَ اٛ وَطِي دُوٻِ 40 تٛنْ، مَلَاعِکَاجٛ وَنْغَنِمٛ ندٜرْ طٜمْنغَلْ حِيتٜ دٛوْ لٜغّٜلْ ندٜرْ لَدّٜ، حَادٜ حٛشّٜىٰرٜ سِنَيْ؞ ندٜ مُوسَ يِعِ نٛنْ طُمْ حَيْطِنِيمٛ، اٜ مٛ ٻَتّٛو نغَمْ اٛ رَارَ، سٜيْ اٛ نَنِ حٛنٛنْدٜ جٛومِرَاوٛ وِعِي، ‹مِنْ وٛنِ اَللَّه مَامَعٜنْ مَاطَ، اَللَّه اِبْرَاهِمْ اٜ اِشِيَاکُ اٜ يَاکُبُ؞› مُوسَ دَرِي اٜ دِوْنَ، حُلِ رَارُکِ؞ جٛومِرَاوٛ وِعِمٛ، ‹اِتُّ ڤَطٜ مَاطَ، نغَمْ وِغٜىٰرٜ تٛ ندَرِطَا ندٜ شٜنِيندٜ؞ مِ يِعِي تٛرَّ يِمْٻٜ اَمْ وٛنْٻٜ لٜيْدِ مَسَرْ، مِ نَنِي بٛجِّ مَٻّٜ؞ جٛونِ مِ جِڤّٛيَکٜ نغَمْ حِسْنُکِٻٜ؞ وَرْ مِ لِلْمَا لٜيْدِ مَسَرْ؞› «مُوسَ مٛ ٻِٻّٜ اِسْرَاعِيلَ نغَݧُنٛو مبِعِ، ‹مٛيٜ وَرْتِرْمَا اَرْدِيطٛ اٜ کِيتٛتٛوطٛ دٛوْ اَمِنْ؟› کَنْکٛ وٛنِ مٛ اَللَّه لِلٛيِ، وَرْتِرِمٛ اَرْدِيطٛ اٜ جٛوفَيْطٛٻٜ دَغَ مَشُّنغَاکُ اٜ بَلَّلْ مَلَاعِکَاجٛ وَنْغَنّٛوطٛمٛ ندٜرْ لٜغّٜلْ نغٜلْ حِيتٜ؞ کَنْکٛ اَرْدِيٻٜ، ٻٜ مبُرْتِي لٜيْدِ مَسَرْ؞ اٛ وَطِي کُوطٜ کَيْطِنِيطٜ اٜ اَلَامَاجِ ندٜرْ لٜيْدِ مَسَرْ اٜ ندٜرْ مَايٛ وٛطٜوٛ اٜ ندٜرْ لَدّٜ جٛرْندٜ دُوٻِ 40؞ مُوسَ اٛنْ کَنْکٛ وٛنِ بِيطٛ ٻِٻّٜ اِسْرَاعِيلَ، ‹اَللَّه لِلْدٛيَيْعٛنْ اَنَّبِيجٛ بٛ اَمْ، دَغَ ندٜرْ بَنْدِرَاٻٜ مٛوطٛنْ؞› مُوسَ اٛنْ اٜ مٛ ندٜرْ کَوْتَلْ مَامَعٜنْ مٜىٰطٜنْ ندٜرْ لَدّٜ، اٜ مٛ وٛنْدِ اٜ مَلَاعِکَاجٛ مٜتَنْطٛمٛ دٛوْ حٛشّٜىٰرٜ سِنَيْ؞ کَنْکٛ اَللَّه حٛکِّ حَبَرُ وٛلْدٜ کٛکَّيْندٜ يٛنْکِ نغَمْ اٛ وَدَّنَعٜنْ؞ «اَمَّا مَامَعٜنْ مٜىٰطٜنْ نجَٻَايِ تٛکُّکِ کٛ اٛ وِعِ؞ ٻٜ شَلَنِيمٛ، ٻٜرْطٜ مَٻّٜ شٛعِّي مَسَرْ؞ ٻٜ مبِعِ هَرُونَ، ‹وَطَنْعٜنْ اَلَّاجِ اَرْدٛتٛوطِعٜنْ، نغَمْ اٜنْ اَنْدَا کٛ حٜٻِ مُوسَ بُرْتِنٛيْطٛعٜنْ لٜيْدِ مَسَرْ؞› ندٜرْ بَلْطٜ طٜنْ ٻٜ نغَطِ غَغٜلْ جِينَارِ، ٻٜ نغَرْتِرِنغٜلْ اَلَّح مَٻّٜ، ٻٜ کِرْسَنِنغٜلْ شَکِّرِ، ٻٜ نغَطِ حُمْتٛ نغَمْ مَوْنِنْکِ کٛ ٻٜ نغَطِ اٜ جُوطٜ مَٻّٜ؞ نغَمْ نٛنْ اَللَّه وَيْلِتَنِٻٜ ٻَاوٛ، اَلِٻٜ ٻٜ مَوْنِنَ کٛودٜ، نٛنْ نٛ طُمْ وِنْدِرَا ندٜرْ دٜفْتٜرٜ اَنَّبٛعٜنْ وِعُکِ: ‹اٛنٛنْ يِمْٻٜ اِسْرَاعِيلَ، دُوٻِ 40 طِ نغَطّٛنْ ندٜرْ لَدّٜ، مِنْ کِرْسَنْطٛنْ مَرْلٜ شَکَّنْطٛنْ؟ اَاعَ، نَاع طُمْ مِنْ؞ اٛنْ ندٛوندَکٜ لُکُرُ اَلَّح مٛوطٛنْ مٛلٜکْ، کَنْغَ اٜ اَلَّح حٛودٜرٜ مٛوطٛنْ بِعٜتٜىٰندٜ رِفَنْ، اَلَّاجِ طِ نغَطّٛنْ نغَمْ مَوْنِنْکِ! نغَمْ مَاجُمْ مِ رِيوَيْعٛنْ، مِ يَارَعٛنْ تٛنْ لٜيْدِ بَابِيلَ؞› » اِسْتِفَانُسْ ٻٜيْدِ مٜتُکِ، وِعِ، «ندٜنّٛ مَامَعٜنْ مٜىٰطٜنْ اٜ نغٛودِ لُکُرُ تٛ طُمْ حَوْرَتَ اٜ اَللَّه ندٜرْ لَدّٜ؞ کَيْرُ حٛلَّتَ اَللَّه اٜ وٛنْدِ اٜ مَٻّٜ؞ لُکُرُ طُمْ وَطِرَامَ نٛنْ نٛ اَللَّه تِندِنِرِ مُوسَ؞ مَامَعٜنْ مٜىٰطٜنْ ٻٜنْ ندٛنِ لُکُرُ طُمْ؞ ٻٜ ندِلِّدِ اٜ مَاجُمْ شَرٜلْ کٛ جٛوشُوَ اَرْدِيٻٜ؞ ٻٜ نَتِّنِطُمْ لٜيْدِ ندِ ٻٜ نجَٻِ دَغَ تٛ لٜپِّ طِ اَللَّه رِيوِ يٜىٰسٛ مَٻّٜ؞ لُکُرُ طُمْ بٛو اٜ طٛنْ حَا جَامَنُ دَوْدَ؞ دَوْدَ حٜٻِ يِدّٜ اَللَّه مٛ يَاکُبُ، اٛ تٛرِي مَحُکِ سُودُ نغَمْ مَوْنِنْکِ اَللَّه اٛنْ، اَمَّا اٛ حٜٻَايِ مَحُکِندُ؞ اَمَّا ٻِطّٛ مَاکٛ سُلٜيْمَانُ مَحِندُ؞ «اَللَّه جٛومُ مَنْغُ جٛوطَتَاکٛ ندٜرْ شُوطِ طِ يِمْٻٜ مَحِ، نٛنْ نٛ اَنَّبِيجٛ وِعِ جٛومِرَاوٛ وِعِي، ‹دٛوْ وٛنِ جٛوطٛرْغَلْ لَامُ اَمْ، لٜيْدِ وٛنِ تٛ نجٛوَيْمِ کٛيْطٜ اَمْ؞ اِرِ ندُيٜ سُودُ مَحَنْتٛنْيَمْ؟ ندٜيٜ وِغٜىٰرٜ شِوْتٛتٛومِ؟ نَاع اٜ بَوْطٜ اَمْ تَغِرْمِ طُمْ طٛنْ فُو؟› » اِسْتِفَانُسْ ٻٜيْدِ مٜتُکِ، وِعِ، «اٛنٛنْ ٻٜ کٛعٜ شَاتُطٜ ٻٜ ٻٜرْطٜ کٜىٰفٜرْطٜ، ٻٜ نٛڤِّ غَݧُطِ نَنُکِ حَالَ جٛومِرَاوٛ! کٛو ندٜيٜ اٛنْ کَٻْدَ اٜ رُوحُ اَللَّه نٛنْ نٛ مَامَعٜنْ مٛوطٛنْ نغَطُنٛو؞ مٛيٜ اَنَّبِيجٛ وٛنِ مٛ مَامَعٜنْ مٛوطٛنْ تٛرَّايِ؟ حَا مَا ٻٜ مبَرِي وِعُنٛوٻٜ اَادِلِيجٛ اٛنْ وَرَيْ؞ جٛونِ اٛنٛنْ اٜ کٛعٜ مٛوطٛنْ اٛنْ ݧَامِي اَمَانَ مَاکٛ، اٛنْ مبَرِيمٛ؞ اٛنٛنْ اٛنْ کٜٻِي اَتَّوْرَ دَغَ جُوطٜ مَلَاعِکَعٜنْ دَغَ ندٜنّٛ، اَمَّا اٛنْ تٛکَّايِطُمْ؞» ندٜ کَوْتَلْ مَوْٻٜ يَحُودَنْکٛعٜنْ نَنِ حَالَ کَنْ، ٻٜرْطٜ مَٻّٜ مٜتِّ ٻٜ ندَرِي اٜ ٻٜ ݝَتّٛو؞ اَمَّا کَنْکٛ، اٜ مٛ حٜىٰوِ رُوحُ اَللَّه، اٛ تِجِّي دٛوْ اٛ يِعِ تٜدُّنغَلْ اَللَّه، اٛ يِعِ يٜىٰسُ اٜ دَرِي اٜ جُنْغٛ اَللَّه ݧَامٛ؞ اٛ وِعِ، «رَا! اٜ مِ يِعَ دٛوْ اٜ مَٻِّتِي، ٻِي نٜطّٛ اٜ دَرِي اٜ جُنْغٛ اَللَّه ݧَامٛ؞» سٜيْ ٻٜ فُو ٻٜ نغُلِّ سٜمْبٜىٰ، ٻٜ شُکِّ نٛڤِّ مَٻّٜ؞ طٛنْ اٜ طٛنْ، ٻٜ مَکِّيمٛ، ٻٜ نَنْغِمٛ، ٻٜ مبُرْتِنِمٛ غَرِيرِ، ٻٜ کُبٛرِيمٛ اٜ کَاپٜ، ٻٜ ٻٛرْتِي کٛلْتٜ مَٻّٜ ٻٜ ندٜسِطٜ تٛ غٛطّٛ کَيٜىٰجٛ بِعٜتٜىٰطٛ شَاوُلُ نغَمْ ٻٜ کُبٛومٛ بٛطُّمْ؞ اٜ ٻٜ کُبٛرٛومٛ کَاپٜ، کَنْکٛ بٛو اٜ مٛ وَطَ دٛعَارٜ اٜ مٛ وِعَ، «يَا يٜىٰسُ جٛومِرَاوٛ، جَٻُ يٛنْکِ اَمْ!» ندٜنْ اٛ دِشِّي، اٛ وُلِّ اٜ سٜمْبٜ اٜ مٛ وِعَ، «يَا جٛومِرَاوٛ، تَاع يٛوَنْٻٜ طُعُمْ حَکّٜ!» ندٜ اٛ وِعِ نٛنْ، اٛ مَايِ؞ شَاوُلُ بٛو جَٻِي طُمْ وَرِ اِسْتِفَانُسْ؞ دَغَ ݧَلْندٜ ندٜنْ، تٛرَّ مَوْکَ وَرَنِ کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ؞ ٻٜ فُو ٻٜ شَنْکِتِي ندٜرْ لٜيْطٜ يَحُودِيَ اٜ سَمَارِيَ، سٜيْ لِلَاٻٜ تَنْ کٛرِي ندٜرْ اُرُشَلِيمَ؞ وٛٻّٜ کُلٛوٻٜ اَللَّه اُوِ اِسْتِفَانُسْ، ٻٜ مبٛيَنِ مَيْدٜ مَاکٛ بٛجِّ نَوْطِ؞ اَمَّا شَاوُلُ اُمَّنِي کَوْتَلْ تٛکُّٻٜ يٜىٰسُ، وَطِ کَ سَنْکُتُکِٻٜ؞ اٜ مٛ نَتَّ وُرٛ‑وُرٛ، اٜ مٛ نَنْغَ تٛکُّٻٜ يٜىٰسُ وٛرْٻٜ اٜ رٜوْٻٜ، اٜ مٛ دَسَٻٜ، اٜ مٛ مَٻَّٻٜ ندٜرْ سُودُ شُرَلْ؞ ندٜنْ شَنْکِتَاٻٜ نغَطِ کَ يِيلَاکِ اٜ نغَعَجِنَ حَبَرُ بٜلْطُمْ؞ فِلِبُسْ بٛو يَحِ وٛنْدِ غَرِيرِ ندٜرْ لٜيْدِ سَمَارِيَ، اٜ مٛ وَعَجِنَنَٻٜ حَبَرُ اَلْمَسِيحُ؞ ندٜ يِمْٻٜ فُو نَنِ، نغِعِ اَلَامَاجِ کَيْطِنِيطِ طِ فِلِبُسْ وَطِ، ٻٜ شٛعِّ حَکِّيلٛ مَٻّٜ دٛوْ کٛ اٛ وِعِ؞ نغَمْ يِمْٻٜ طُطْٻٜ مبُرْتِنَنَامَ غِنِّ اٜ طِ نغُلَّ سٜمْبٜىٰ، ندٜنْ جَرَاٻٜ اٜ لَپٛوٻٜ طُطْٻٜ نجَمْطِتِنَا؞ نغَمْ نٛنْ طُمْ نَنِ وٜلْوٜلٛ طُطْنغٛ ندٜرْ غَرِيرِ ندِنْ؞ ندٜرْ غَرِيرِ ندِنْ بٛو اٜ وٛودِ غٛطّٛ نٜطّٛ بِعٜتٜىٰطٛ سِيمَنْ، اٛ دَرْنٛووٛ؞ اٜ مٛ حَيْطِنَ سَمَارِيَنْکٛعٜنْ نَاع سٜطَّ اٜ کُوطٜ مَاکٛ، اٜ مٛ وِعَ حٛورٜ مَاکٛ اٛ مَوْطٛ؞ يِمْٻٜ فُو دَغَ مَوْٻٜ حَا سُکَاٻٜ نجَٻِي کٛ اٛ وِعَتَ، اٜ ٻٜ مبِعَ، «نٜطّٛ اٛعٛ اٜ وٛودِ بَوْطٜ اَللَّه بِعٜتٜىٰطٜ بَوْطٜ مَوْطٜ؞» ٻٜ تٛکُّمٛ نغَمْ اٛ نٜىٰٻِي اٜ مٛ حَيْطِنَٻٜ اٜ سِحِرِيجِ مَاکٛ؞ اَمَّا ندٜ ٻٜ نجَٻِ حَبَرُ بٜلْطُمْ طُمْ فِلِبُسْ وَعَجِنَنْتَٻٜ دٛوْ لَامُ اَللَّه اٜ اِنْدٜ يٜىٰسُ اَلْمَسِيحُ، وٛرْٻٜ اٜ رٜوْٻٜ فُو نغَطَنَا بَڤْتِسْمَ؞ حَا سِيمَنْ مَا اٜ حٛورٜ مُوطُمْ تٛکِّ يٜىٰسُ؞ غَطَ اٛ وَطَنَامَ بَڤْتِسْمَ، اٛ تٛکِّ فِلِبُسْ حَادٜ، اٛ حَيْطِنِي ندٜ اٛ يِعِ اَلَامَاجِ اٜ کُوطٜ کَيْطِنِيطٜ مَوْطٜ طٜ فِلِبُسْ وَطِ؞ ندٜ لِلَاٻٜ وٛنْٻٜ اُرُشَلِيمَ نَنِ سَمَارِيَنْکٛعٜنْ نجَٻِي وٛلْدٜ اَللَّه، سٜيْ ٻٜ لِلِ بِيتُرُسْ اٜ يَحَيَ تٛ مَٻّٜ؞ ندٜ ٻٜ نجٛتِّي، ٻٜ تٛرِي اَللَّه حٛکَّ سَمَارِيَنْکٛعٜنْ ٻٜنْ رُوحُ مُوطُمْ، نغَمْ ٻٜ نغَطَنَامَ بَڤْتِسْمَ ندٜرْ اِنْدٜ يٜىٰسُ جٛومِرَاوٛ تَنْ، اَمَّا رُوحُ اَللَّه جِڤّٛيَاکِ دٛوْ کٛو مٛيٜ مَٻّٜ تَوْ؞ سٜيْ بِيتُرُسْ اٜ يَحَيَ نجٛوِ جُوطٜ مُعّٜنْ دٛوْ مَٻّٜ، ٻٜ کٜٻِ رُوحُ اَللَّه؞ ندٜ سِيمَنْ يِعِ يٛوُکِ جُوطٜ لِلَاٻٜ دٛوْ تٛکُّٻٜ يٜىٰسُ اٜ حٛکَّ رُوحُ اَللَّه، اٛ وَدَّنِٻٜ شٜىٰدٜ، اٛ وِعِ، «کٛکّٜىٰيَمْ، مِنْ مَا بَوْطٜ طٜنْ، نغَمْ مٛ نجٛوَنْمِ جُوطٜ فُو حٜٻَ رُوحُ اَللَّه؞» اَمَّا بِيتُرُسْ وِعِمٛ، «اَنْ اٜ شٜىٰدٜ مَاطَ کَلْکِدٜىٰ، نغَمْ اَ ݧُمِي اَ وَاوَيْ سٛودُکِ دٛکَّلْ اَللَّه اٜ شٜىٰدٜ! اَ وَلَا غٜطَلْ ندٜرْ کُوغَلْ نغَعَلْ، نغَمْ ٻٜرْندٜ مَاطَ لَاٻَايِ يٜىٰسٛ اَللَّه؞ تُوبُ دَغَ حَلّٜىٰندٜ مَاطَ، تٛرَ جٛومِرَاوٛ يَافَنٛمَا ݧُمٛوجِ مَاطَ کَلُّطِ؞ نغَمْ مِ يِعِي اَ وٛودِ ٻٜرْندٜ ٻَلٜىٰرٜ، حَلّٜىٰندٜ طُوطَنِيمَ؞» سِيمَنْ وِعِمٛ، «تٛرَنٜىٰيَمْ جٛومِرَاوٛ، نغَمْ تٛع کٛ مبِيطَا حٜٻَيَمْ؞» غَطَ بِيتُرُسْ اٜ يَحَيَ تَبِّتِنَنِي سَمَارِيَنْکٛعٜنْ دٛوْ يٜىٰسُ، ٻٜ نغَعَجِنَنِٻٜ وٛلْدٜ جٛومِرَاوٛ؞ ندٜ اٜ ٻٜ دٛوْ لَاوٛلْ حٛوتُکِ اُرُشَلِيمَ، ٻٜ نغَعَجِنِ حَبَرُ بٜلْطُمْ ندٜرْ نغَرِحٛيْ سَمَارِيَ طُطْکٛيْ؞ سٜيْ غٛطّٛ مَلَاعِکَاجٛ جٛومِرَاوٛ وِعِ فِلِبُسْ، «اُمَّ دِلِّرْ فٛمْبِنَ تٛکَّا طَتَلْ پِوٛيْنغَلْ اُرُشَلِيمَ يَاکِ غَاجَ، طَتَلْ لَدّٜوَلْ؞» سٜيْ فِلِبُسْ اُمِّي دِلِّ؞ اٜ مٛ دٛوْ لَاوٛلْ اٛ حَوْرِ اٜ غٛطّٛ نٜطّٛ لٜيْدِ اِتِيٛوفِيَ تَڤَّاطٛ؞ نٜطّٛ اٛنْ اٜ وٛودِ لَامُ مَوْطُمْ ندٜرْ لَامٛرْدٜ لَامِيطٛ دٜبّٛ بِعٜتٜىٰطٛ کَندِسْ؞ کَنْکٛ وٛنِ دٜسٛووٛ شٜىٰدٜ لَامِيطٛ اٛنْ؞ اٛ يَحُنٛ اُرُشَلِيمَ نغَمْ مَوْنِنْکِ جٛومِرَاوٛ؞ اٜ مٛ حٛوتَ، اٜ مٛ جٛوطِي ندٜرْ کٜىٰکٜ ڤُشِّ، اٜ مٛ جَنْغَ دٜفْتٜرٜ اَنَّبِ اِشَايَ؞ رُوحُ اَللَّه وِعِ فِلِبُسْ، «يَحُ، ٻَدّٛطَا کٜىٰکٜ ڤُشِّ طُمْ؞» سٜيْ فِلِبُسْ دٛغِّ يَحِ تٛ مَاکٛ، نَنِ اٜ مٛ جَنْغَ دٜفْتٜرٜ اَنَّبِ اِشَايَ؞ فِلِبُسْ پَمِمٛ، وِعِ، «اَ فَامَ کٛ نجَنْغَتَا بٛو؟» نٜطّٛ اٛنْ وِعِمٛ، «نٛيٜ ڤَامِرَيْمِ ندٜ وَلَا ڤَمْتِنَيْطٛيَمْ؟» اٛ تٛرِي فِلِبُسْ نَتَّ جٛوطٛدٛو اٜ مَاکٛ؞ رَا اَايَاجٜ طٜ اٛ جَنْغَتَ ندٜرْ دٜفْتٜرٜ ندٜنْ: «اٛ فٛوطَامَ بٛ مبَالَ کِرْسٛيْتٜىٰنغَ؞ نٛ ٻِي مبَالَ دٜعِّتِرْتَ تٛ جُنْغٛ تَپٛووٛ لٜىٰٻٜ مَاغَ، نٛنْ اٛ دٜعِّتِرِ؞ ٻٜ شٜمْتِنِمٛ، ٻٜ نغَطَنَايِمٛ کِيتَ غٛونغَ؞ مٛيٜ وَاوَتَ حٛکُّکِ حَبَرُ ٻِٻّٜ مَاکٛ؟ نغَمْ يٛنْکِ مَاکٛ اِتَّامَ دَغَ ندٜرْ دُونِيَارُ؞» اِتِيٛوفِيَنْکٜىٰجٛ اٛنْ وِعِ فِلِبُسْ، «وِعَمْ دٛوْ مٛيٜ اَنَّبِيجٛ اٛعٛ مٜتِ حَالَ کَعَ، دٛوْ حٛورٜ مَاکٛ کٛو دٛوْ غٛطّٛ؟» سٜيْ فِلِبُسْ فُطِّ مٜتَنْکِمٛ دٛوْ اَايَاجٜ طٜنْ، اٜ وَعَجِنَنَمٛ حَبَرُ بٜلْطُمْ دٛوْ يٜىٰسُ؞ اٜ ٻٜ ندٜرْ يَادُ ٻٜ نجٛتِّي تٛ ندِيَمْ وٛنِ؞ سٜيْ نٜطّٛ اٛنْ وِعِ، «رَا ندِيَمْ! کٛ حَطَتَ طُمْ وَطَنَيَمْ بَڤْتِسْمَ؟» [فِلِبُسْ وِعِمٛ، «تَا حٛولَکٜ يٜىٰسُ اٜ ٻٜرْندٜ غٛعٛ، وَلَا کٛ حَطَتَ طُمْ وَطَنْمَا بَڤْتِسْمَ؞» سٜيْ نٜطّٛ اٛنْ وِعِ، «مِ جَٻِي يٜىٰسُ اَلْمَسِيحُ اٛ ٻِي اَللَّه؞»] اٛ وِعِ طُمْ دَرْنَ کٜىٰکٜ ڤُشِّ طُمْ؞ ٻٜ فُو طِطٛ ٻٜ نجِڤِّي، ٻٜ نَتِّ ندٜرْ ندِيَمْ طَمْ؞ فِلِبُسْ وَطَنِمٛ بَڤْتِسْمَ؞ ندٜ ٻٜ مبُرْتِي ندِيَمْ طَمْ، سٜيْ رُوحُ جٛومِرَاوٛ حٛشِّ فِلِبُسْ؞ نٜطّٛ اٛنْ فُطِّتَايِ يِعُکِمٛ، اٛ ݧَمْرِ يٜىٰسٛ اٜ يَادُ، اٜ مٛ نَنَ بٜلْطُمْ؞ اَمَّا فِلِبُسْ يِعِ حٛورٜ مُوطُمْ اٜ غَرِيرِ اَجٛتُسْ؞ دٛوْ لَاوٛلْ اٛ وَطِ کَ وَعَجِنْکِ حَبَرُ بٜلْطُمْ اٜ کٛو ندِيٜ غَرِيرِ حَا اٛ يٛتِّي کَيْسَارِيَ؞ ندٜرْ شَرٜلْ نغٜلْ بٛو، شَاوُلُ اٜ ٻٜيْدَ تٛرُّکِ تٛکُّٻٜ يٜىٰسُ، اٜ مٛ يِطِ وَرْکِٻٜ؞ سٜيْ اٛ يَحِ تٛ مَوْطٛ مَوْٻٜ اَرْدِيٻٜ دِينَ؞ اٛ تٛرِيمٛ اٛ وِنْدَنَمٛ طٜرٜوٛلْ نغٛلْ اٛ حٛلَّتَ مَوْٻٜ شُوطِ دٛعَارٜ غٛنْطِ غَرِيرِ دِمَسْکُ، وِيکِ تٛ اٛ تَوِي تٛکُّٻٜ لَاوٛلْ يٜىٰسُ تٛنْ، وٛرْٻٜ کٛو رٜوْٻٜ، اٛ نَنْغَٻٜ، اٛ حَٻَّٻٜ، اٛ يَارَٻٜ غَرِيرِ اُرُشَلِيمَ؞ اٜ مٛ دٛوْ لَاوٛلْ اٛ ٻَدَکٜ يٛتَّاکِ غَرِيرِ دِمَسْکُ، اٛ اَنْدَا اٛ اَنْدِتَا سٜيْ رَا جَيْنغٛلْ دَغَ دٛوْ يٜيْنَنِيمٛ فِلِيمٛ؞ اٛ يَنِ اٜ لٜيْدِ، اٛ نَنِ حٛنٛنْدٜ اٜ وِعَمٛ، «شَاوُلُ، شَاوُلُ، نغَمْ طُمٜ تٛرَّتَايَمْ؟» شَاوُلُ وِعِ، «مَوْطٛ، اَنْ طُمْ مٛيٜ؟» حٛنٛنْدٜ ندٜنْ وِعِمٛ، «مِنْ وٛنِ يٜىٰسُ مٛ تٛرَّتَا؞ اُمَّ نَتُّ ندٜرْ غَرِيرِ؞ طُمْ وِعٜتٜ کٛ حَانِ نغَطَا؞» حِغٛوٻٜ يَادُ مَاکٛ نَنِي حٛنٛنْدٜ ندٜنْ، اَمَّا ٻٜ نغِعَايِ کٛو مٛيٜ؞ ٻٜ ندَرِي، ٻٜ ندُلِّ کٛ ٻٜ مبِعَتَ؞ شَاوُلُ اُمِّي دَرِي فٜىٰرِ غِتٜ مُوطُمْ، اَمَّا يِعَتَا؞ ندٜنْ اٛ جٛغَنَا جُنْغٛ، اٛ نَتِّنَا غَرِيرِ دِمَسْکُ؞ اٛ وَطِ بَلْطٜ تَتِ اٜ مٛ وُمِ، اٛ يَرَايِ اٛ ݧَامَايِ؞ اٜ وٛودِ غٛطّٛ تٛکُّطٛ يٜىٰسُ ندٜرْ غَرِيرِ ندِنْ بِعٜتٜىٰطٛ حَنَانِيَ؞ جٛومِرَاوٛ نٛدِّمٛ ندٜرْ کٛيْطٛلْ، وِعِمٛ، «حَنَانِيَ!» اٛ وِعِ، «نَعَمْ، جٛومِرَاوٛ؞» جٛومِرَاوٛ وِعِمٛ، «اُمَّ تٛکَّا لَاوٛلْ بِعٜتٜىٰنغٛلْ لَاوٛلْ ڤٛرْتِينغٛلْ، نجَحَا وُرٛ يَحُودَ، نغٜيْنَا غٛطّٛ بِعٜتٜىٰطٛ شَاوُلُ پِوٛيْطٛ غَرِيرِ تَرْسُسْ؞ نغَمْ اٜ مٛ طٛنْ وَطَ دٛعَارٜ، حَا مَا ندٜرْ کٛيْطٛلْ اٛ يِعِي نٜطّٛ بِعٜتٜىٰطٛ حَنَانِيَ نَتّٛيِي، يٛوِي جُوطٜ مُوطُمْ دٛوْ مَاکٛ نغَمْ اٛ وُمْتَ؞» اَمَّا حَنَانِيَ وِعِمٛ، «جٛومِرَاوٛ، مِ نَنِي يِمْٻٜ طُطْٻٜ کٛکِّي حَبَرُ نٜطّٛ اٛنْ، اٜ تٛرَّاجِ طُطِّ طِ اٛ تٛرِّ يِمْٻٜ مَاطَ وٛنْٻٜ اُرُشَلِيمَ؞ اٛ وَرْدِي اٜ طٜرٜوٛلْ طٛعٛ دَغَ تٛ مَوْٻٜ اَرْدِيٻٜ دِينَ، نغَمْ اٛ نَنْغَ نٛدِّرَاٻٜ اِنْدٜ مَاطَ فُو؞» اَمَّا جٛومِرَاوٛ وِعِمٛ، «يَحُ نغَطَا کٛ مبِيمَامِ، نغَمْ مِ سُٻِيمٛ اٛ حُوَنَيَمْ، اٛ اَنْدِنَ اِنْدٜ اَمْ يٜىٰسٛ يِمْٻٜ نَاع يَحُودَنْکٛعٜنْ اٜ لَامِيٻٜ مَٻّٜ، اٜ اِسْرَاعِيلَنْکٛعٜنْ؞ مِنْ اٜ حٛورٜ اَمْ مِ حٛلَّيْمٛ دٛولٜ اٛ تٛرّٜىٰ تٛرَّاجِ طُطِّ نغَمْ اِنْدٜ اَمْ؞» ندٜنْ حَنَانِيَ يَحِ، نَتِّ وُرٛ نغٛ شَاوُلُ وٛنِ، يٛوِ جُوطٜ مُوطُمْ دٛوْ مَاکٛ، وِعِمٛ، «بَنْدِرَاوٛ اَمْ شَاوُلُ، يٜىٰسُ جٛومِرَاوٛ وَنْغَنْطٛمَ دٛوْ لَاوٛلْ نغٛلْ نغَرْدُطَا، اٛ لِلٛيِييَمْ نغَمْ مبُمْتَا، کٜٻَا رُوحُ اَللَّه؞» طٛنْ اٜ طٛنْ، غٛطُّمْ بٛ کٛٻٜ مبُرْتِي ندٜرْ غِتٜ شَاوُلُ؞ اٛ وُمْتِ، اٛ اُمِّي، اٛ وَطَنَا بَڤْتِسْمَ؞ سٜيْ اٛ ݧَامِ ݧَمْندُ، اٛ حٜٻِ سٜمْبٜ؞ دَغَ طٛنْ اٛ وَالِ بَلْطٜ سٜطَّ تٛ تٛکُّٻٜ يٜىٰسُ وٛنْٻٜ غَرِيرِ دِمَسْکُ ندِنْ؞ طٛنْ اٜ طٛنْ شَاوُلُ فُطِّ وَعَجِنْکِ حَبَرُ يٜىٰسُ ندٜرْ شُوطِ دٛعَارٜ؞ اٛ وِعِ غٛونغَ يٜىٰسُ وٛنِ ٻِطّٛ اَللَّه؞ طُمْ حَيْطِنِي نَنْٻٜمٛ فُو، ٻٜ مبِعِ، «نَاع کَنْکٛ وٛنِ تٛرَّيْنٛوطٛ کٛولِيٻٜ يٜىٰسُ وٛنْٻٜ ندٜرْ غَرِيرِ اُرُشَلِيمَ؟ نَاع اٛ وَرٛيِ طٛعٛ نغَمْ اٛ حَٻَّٻٜ اٛ يَارَٻٜ تٛ مَوْٻٜ اَرْدِيٻٜ دِينَ؟» اَمَّا شَاوُلُ ٻٜيْدِ سٜمْبُطُکِ ندٜرْ وَعَجِنْکِ، حَا طُمْ جِيٻِ حَکِّيلٛوجِ يَحُودَنْکٛعٜنْ جٛوطِيٻٜ دِمَسْکُ فُو، نغَمْ ٻٜ کٜٻَايِ کٛ ٻٜ مبِعِمٛ ندٜ اٛ تَبِّتِنَنِٻٜ يٜىٰسُ وٛنِ اَلْمَسِيحُ؞ سٜيْ غَطَ بَلْطٜ طُطّٜ، يَحُودَنْکٛعٜنْ ندَرْوِ دَبَرٜ نٛ مبَرْدَتَ شَاوُلُ؞ شَاوُلُ بٛو اَنْدِتِ دَبَرٜ مَٻّٜ؞ جٜمَّ اٜ ݧَلَوْمَ فُو اٜ ٻٜ ندٜىٰنَ دَمُّطٜ غَرِيرِ نغَمْ ٻٜ کٜٻَ نٛ ٻٜ مبَرِرْتَمٛ؞ اَمَّا حِغٛوٻٜ مَاکٛ کٛشِّمٛ جٜمَّ، نغَطِمٛ ندٜرْ سٛمْڤٛورٜ، ٻٜ نجِڤِّنِرِمٛ يٛلْندٜ مَادِ ڤِلِيندِ غَرِيرِ ندِنْ؞ ندٜ شَاوُلُ وَرْتِ اُرُشَلِيمَ اٛ يِطِي نَتُّکِ تٛکُّٻٜ يٜىٰسُ، اَمَّا ٻٜ فُو ٻٜ کُلِمٛ، ٻٜ نجَٻَايِ اٛ وَرْتِي تٛکُّطٛ يٜىٰسُ اٜ غٛونغَ؞ اَمَّا بَرْنَبَ يَارِمٛ تٛ لِلَاٻٜ، طِيوِتِٻٜ نٛ شَاوُلُ يِعِرِ جٛومِرَاوٛ اٜ نٛ جٛومِرَاوٛ مٜتِرَنِمٛ دٛوْ لَاوٛلْ، اٜ نٛ اٛ وَعَجِنِرِ حَبَرُ يٜىٰسُ اٜ غَرِيرِ دِمَسْکُ کُلٛلْ وَلَا؞ نغَمْ نٛنْ شَاوُلُ جٛوطٛدِي اٜ لِلَاٻٜ، اٜ مٛ يِيلٛدٛو اٜ مَٻّٜ ندٜرْ غَرِيرِ اُرُشَلِيمَ، اٜ مٛ اٜکِّتِنَ حَبَرُ جٛومِرَاوٛ اٜ ٻٜرْندٜ غٛعٛ، کُلٛلْ وَلَا؞ اٜ مٛ وَعَجِنَنَ يَحُودَنْکٛعٜنْ مٜتٛوٻٜ حٜلٜنَنْکٛورٜ، اٜ مٛ يٜدّٛوتِرَ اٜ مَٻّٜ، اَمَّا کَمْٻٜ اٜ ٻٜ طَٻِّتَ نٛ ٻٜ مبَرْدَتَمٛ؞ ندٜ تٛکُّٻٜ يٜىٰسُ نَنِ حَبَرُ طُمْ، ٻٜ نجَارِ شَاوُلُ غَرِيرِ کَيْسَارِيَ؞ ٻٜ نَتِّنِمٛ کٛمِوَلْ ٻٜ شٛعِّمٛ تَرْسُسْ غَرِيرِ مَاکٛ؞ غَطَ مَاجُمْ کَوْتَلْ تٛکُّٻٜ يٜىٰسُ ندٜرْ لٜيْطٜ يَحُودِيَ اٜ غَلِيلِ اٜ سَمَارِيَ فُو کٜٻِ جٛنْدٜ جَمْ؞ رُوحُ اَللَّه وَلِّٻٜ، ٻٜ شٜمْبِطِ، ٻٜ ٻٜيْدِ کُلٛلْ جٛومِرَاوٛ، ٻٜ طُوطِ؞ تٛو، ندٜ بِيتُرُسْ يِيلِي ندٜرْ لٜيْدِ ندِنْ فُو، سٜيْ جِڤِّي تٛ تٛکُّٻٜ يٜىٰسُ وٛنْٻٜ غَرِيرِ لِدَّ؞ طٛنْ اٛ تَوِ غٛطّٛ ݧَوْطٛ بِعٜتٜىٰطٛ اِنِيَسْ مٛ ٻَنْدُ مُوطُمْ فُو وَاتِي؞ اٛ وَطِي دُوٻِ جٛوٜىٰتَتِ اٜ مٛ فُکِّي؞ بِيتُرُسْ وِعِمٛ، «اِنِيَسْ، يٜىٰسُ اَلْمَسِيحُ يَمْطِتِنِيمَ! اُمَّ تَغُّ مبٜعِّتَارِ مَاطَ!» طٛنْ اٜ طٛنْ اٛ اُمِّي؞ ندٜ وٛنْٻٜ غَرِيرِ لِدَّ اٜ وٛنْٻٜ لٜيْدِ شَرٛنْ فُو نغِعِ کٛ وَطِ، ٻٜ تُوبِ ٻٜ تٛکِّ جٛومِرَاوٛ؞ ندٜرْ غَرِيرِ جٛفَّ بٛو اٜ وٛودِ غٛطّٛ دٜبّٛ تٛکُّطٛ يٜىٰسُ بِعٜتٜىٰطٛ تَبِيتَ؞ ﴿مَعَنَ تَبِيتَ ندٜرْ حٜلٜنَنْکٛورٜ وٛنِ دٛوکَسْ، وَاتٛ لٜلْوَ؞﴾اٜ مٛ حُوَ کُوطٜ بٛطّٜ، اٜ مٛ وَلَّ ٻٜ نغَلَنَا؞ ندٜرْ بَلْطٜ طٜنْ اٛ ݧَوِ، اٛ مَايِ؞ ٻٜ لٛوتِمٛ، ٻٜ ڤُکِّنِمٛ ندٜرْ سُودُ دٛوْ؞ غَرِيرِ جٛفَّ وٛطِّدَا اٜ غَرِيرِ لِدَّ؞ نغَمْ مَاجُمْ ندٜ تٛکُّٻٜ يٜىٰسُ نَنِ بِيتُرُسْ اٜ تٛنْ، ٻٜ لِلِ وٛرْٻٜ طِطٛ نجَحِ تٛرِيمٛ اٛ وَرَ تٛ مَٻّٜ جَوْطُمْ؞ بِيتُرُسْ اُمِّي، يَادِ اٜ مَٻّٜ؞ ندٜ اٛ وَرِ، ٻٜ پٜنْتِنِمٛ سُودُ دٛوْ؞ رٜوْٻٜ ٻٜ وٛرْٻٜ مُعّٜنْ مَايِ فُو ٻَدِّيمٛ، ٻٜ ندَرِي اٜ ٻٜ مبٛيَ، اٜ ٻٜ کٛلَّمٛ تٛغّٛوجٜ اٜ غٛطّٜ کٛلْتٜ طٜ دٛوکَسْ ݧٛوتَنِٻٜ کٛ اٛ وٛنْدُنٛو اٜ مَٻّٜ؞ سٜيْ بِيتُرُسْ وُرْتِنِ يِمْٻٜ فُو ندٜرْ سُودُ ندُنْ، اٛ دِشِّي اٛ وَطِ دٛعَارٜ؞ غَطَ مَاجُمْ اٛ وَيْلِتِي اٛ رَارِ ٻَنْدُ ندُنْ، اٛ وِعِ، «تَبِيتَ، اُمَّ!» سٜيْ تَبِيتَ فٜىٰرِ غِتٜ مُوطُمْ؞ ندٜ اٛ يِعِ بِيتُرُسْ بٛو، اٛ اُمِّي اٛ جٛوطِي؞ سٜيْ بِيتُرُسْ نَنْغِ جُنْغٛ مَاکٛ، اُمِّنِمٛ؞ غَطَ مَاجُمْ اٛ نٛدِّ رٜوْٻٜ ٻٜ وٛرْٻٜ مُعّٜنْ مَايِ اٜ کٛولِيٻٜ يٜىٰسُ ٻٜنْ، اٛ حٛلِّٻٜ تَبِيتَ اٜ فٛوفَ؞ حَبَرُ طُمْ نَنَامَ ندٜرْ غَرِيرِ جٛفَّ فُو، حَا طُطْٻٜ کٛولِي جٛومِرَاوٛ؞ بِيتُرُسْ بٛو وَطِي بَلْطٜ طُطّٜ اٜ مٛ جٛوطِي ندٜرْ غَرِيرِ جٛفَّ تٛ وُرٛ ڤِيٛووٛ لَرٜ بِعٜتٜىٰطٛ سِيمَنْ؞ اٜ وٛودِ غٛطّٛ نٜطّٛ بِعٜتٜىٰطٛ کٛنٜىٰلِيُسْ غٛنْطٛ غَرِيرِ کَيْسَارِيَ؞ اٛ مَوْطٛ ندٜرْ کَوْتَلْ سٛوجِعٜنْ بِعٜتٜىٰنغَلْ نغَلْ اِتَالِيَ؞ اٛ کُلٛووٛ اَللَّه، کَنْکٛ اٜ وُرٛ مَاکٛ فُو؞ اٜ مٛ وَلَّ يَحُودَنْکٛعٜنْ ٻٜ نغَلَنَا نَاع سٜطَّ، اٜ مٛ تٛرٛو اَللَّه کٛو نغٜلٜ شَرٜلْ؞ وٛنْدٜ ݧَلْندٜ حَادٜ نجَمْندِ تَتِ ندِ ݧَلَوْمَ اٛ يِعِ وَحَيُ؞ ندٜرْ وَحَيُ طُمْ اٛ يِعِ مَلَاعِکَاجٛ بُرْتَنِيطٛمٛ اٜ نجَيْرِ، وِعِمٛ، «کٛنٜىٰلِيُسْ!» اٛ رَارِ مَلَاعِکَاجٛ اٛنْ ندٜرْ کُلٛلْ، اٛ وِعِمٛ، «نَعَمْ، مَوْطٛ؟» مَلَاعِکَاجٛ اٛنْ وِعِمٛ، «اَللَّه نَنِي دٛعَاجٜ مَاطَ اٛ يِعِي کٛ کٛکَّتَا ٻٜ نغَلَنَا؞ جٛونِ لِلُ وٛٻّٜ نجَحَ غَرِيرِ جٛفَّ ٻٜ نٛدّٛيَ غٛطّٛ بِعٜتٜىٰطٛ سِيمَنْ بِيتُرُسْ؞ اٜ مٛ طٛنْ جٛوطِي اٜ وُرٛ سِيمَنْ ڤِيٛووٛ لَرٜ مٛ وُرٛ مُوطُمْ وٛنِ حَادٜ مَايٛ؞» ندٜ مَلَاعِکَاجٛ اٛنْ دِلِّ، کٛنٜىٰلِيُسْ نٛدِّ کُوَنٛوٻٜمٛ طِطٛ اٜ سٛوجِيجٛ غٛعٛتٛ کُلٛووٛ اَللَّه غٛنْطٛ لٜيْ مَاکٛ؞ اٛ طِيوِتَنِٻٜ کٛ مَلَاعِکَاجٛ وِعِمٛ فُو، اٛ لِلِٻٜ ٻٜ نجَحَ غَرِيرِ جٛفَّ؞ ندٜ فِنِ اٜ ٻٜ دٛوْ لَاوٛلْ، شَکَ ݧَلَوْمَ اٜ ٻٜ حَادٜ غَرِيرِ جٛفَّ، اٜ شَرٜلْ نغٜلْ بِيتُرُسْ پٜنْتِ دٛوْ سُودُ نغَمْ وَطُکِ دٛعَارٜ؞ سٜيْ وٜىٰلٛ نَنْغِمٛ، اٛ وِعِ طُمْ دٜفَنَمٛ ݧَمْندُ؞ اٜ طُمْ ندٜرْ سِرْيَنَاکِمٛ ݧَمْندُ، سٜيْ اٛ يِعِ وَحَيُ؞ اٛ يِعِ دٛوْ اٜ مَٻِّتِي، غٛطُّمْ نَنْدُطُمْ اٜ وُدٜرٜ مَوْندٜ اٜ طُمْ جِڤِّنِرٛيٜىٰ غُتُّلِّ مَاجُمْ نَيِ؞ ندٜرْ مَاجُمْ بٛو اٜ وٛودِ مَرْلٜ فٜىٰرٜ‑فٜىٰرٜ طٜ کٛيْطٜ نَيِ، اٜ دَسٛتٛوطٜ، اٜ شٛلِّ؞ سٜيْ اٛ نَنِ وٛنْدٜ حٛنٛنْدٜ اٜ وِعَمٛ، «بِيتُرُسْ، اُمَّ، نَنْغُ، کِرْسَا، ݧَامَا!» اَمَّا بِيتُرُسْ نٛوتِي وِعِ، «اَاعَ، جٛومِرَاوٛ! مِ مٜىٰطَايِ ݧَامُکِ کٛ حَرْمِنِي کٛو کٛ لَاٻَايِ؞» حٛنٛنْدٜ ندٜنْ ٻٜيْدِ وِعُکِمٛ، «تَاع حَرْمِنْ کٛ اَللَّه لَاٻِنِ؞» طُمْ وَطِ نٛنْ ندٜ تَتِ؞ ندٜنْ کٛ اٛ يِعِ طُمْ سٛعَّا يَاکِ دٛوْ؞ بِيتُرُسْ اٜ ندٜرْ ݧُمُکِ دٛوْ مَعَنَ وَحَيُ طُمْ اٛ يِعِ؞ اٜ شَرٜلْ نغٜلْ، وٛرْٻٜ ٻٜ کٛنٜىٰلِيُسْ لِلٛيِ اٜ نغٜيْنَ وُرٛ سِيمَنْ؞ ٻٜ نغَرِ، ٻٜ ندَرِي اٜ دَمُّغَلْ؞ ٻٜ شِلْمِنِي، ٻٜ پَمِ، ٻٜ مبِعِ کٛو طٛعٛ سِيمَنْ بِعٜتٜىٰطٛ بِيتُرُسْ وٛنِ؞ بِيتُرُسْ اٜ ندٜرْ ݧُمُکِ دٛوْ کٛ اٛ يِعِ، سٜيْ رُوحُ اَللَّه وِعِمٛ، «رَا يِمْٻٜ تَتٛ اٜ طَٻُّتُمَا؞ اُمَّ جِڤَّ، نجَادَا اٜ مَٻّٜ؞ تَاع حُلُ، نغَمْ مِنْ لِلٛيِٻٜ؞» بِيتُرُسْ جِڤِّي، وِعِ لِلٛيَاٻٜ ٻٜنْ، «مِنْ وٛنِ مٛ طَٻِّتٛتٛنْ؞ طُمٜ وَدِّعٛنْ؟» ٻٜ مبِعِمٛ، «کٛنٜىٰلِيُسْ مَوْطٛ سٛوجِعٜنْ لِلٛيِمِنْ؞ اٛ اَادِلِيجٛ، کُلٛووٛ اَللَّه، مٛ لٜݧٛلْ يَحُودَنْکٛعٜنْ فُو مَنَتَ؞ مَلَاعِکَاجٛ شٜنِيطٛ وَنْغَنِيمٛ وِعِيمٛ اٛ نٛدُّمَا نغَرَا وُرٛ مَاکٛ، نغَمْ اٛ نَنَ کٛ مبِعَتَامٛ؞» سٜيْ بِيتُرُسْ جَٻِّيٻٜ، حٛکِّٻٜ تٛ ٻٜ مبَالَتَ ندٜرْ وُرٛ نغٛنْ؞ ندٜ فِنِ، اٛ اُمِّي اٛ دِلِّدِ اٜ مَٻّٜ؞ وٛٻّٜ ندٜرْ تٛکُّٻٜ يٜىٰسُ وٛنْٻٜ جٛفَّ تٛکِّٻٜ؞ ندٜ فِنْتِ ٻٜ نجٛتِّي غَرِيرِ کَيْسَارِيَ؞ ندٜنْ مَا کٛنٜىٰلِيُسْ اٜ کَمّٛو غَرٛلْ مَٻّٜ، اٛ حَوْرِتِ بَنْدِرَاٻٜ مَاکٛ اٜ حِغٛوٻٜ مَاکٛ اٜ ٻٜ کٜطِيٻٜ؞ اٜ نَتُّکِ بِيتُرُسْ وُرٛ نغٛنْ، کٛنٜىٰلِيُسْ جَٻِّيمٛ، دِشِّي يٜىٰسٛ مَاکٛ مَوْنِنِمٛ؞ اَمَّا بِيتُرُسْ اُمِّنِمٛ، وِعِ، «اُمَّ؞ مِنْ مِ نٜطّٛ تَنْ؞» بِيتُرُسْ اٜ مٜدَّ اٜ مَاکٛ، حَا ٻٜ نَتِّ ندٜرْ وُرٛ، ٻٜ تَوِ يِمْٻٜ طُطْٻٜ اٜ کَوْرِتِ؞ سٜيْ بِيتُرُسْ وِعِٻٜ، «اٛنٛنْ اٜ کٛعٜ مٛوطٛنْ اٛنْ اَنْدِ دِينَ اَمِنْ حَطِي يَحُودَنْکٜىٰجٛ حَوْتُکِ حٛورٜ اٜ غٛطّٛ نَاع يَحُودَنْکٜىٰجٛ کٛو نَتُّکِ وُرٛ مَاکٛ؞ اَمَّا اَللَّه حٛلِّييَمْ تٛع مِ وِعَ کٛو مٛيٜ نٛ کَرْمِنِيطٛ کٛو لَاٻَا؞ نغَمْ نٛنْ ندٜ لِلٛنٛيْطٛنْيَمْ، مِ وَرِي مِ سَلَاکِ؞ جٛونِ اٜ مِ يِطِ نَنُکِ کٛ نٛدَّنْطٛنْيَمْ؞» سٜيْ کٛنٜىٰلِيُسْ وِعِمٛ، «بَلْطٜ نَيِ پَٻِّيطٜ اٜ مِ وَطَ دٛعَارٜ ندٜرْ وُرٛ اَمْ نجَمْندِ تَتِ بٛ جٛونِ؞ سٜيْ رَا، نٜطّٛ مٛ کٛلْتٜ طٜلْکِتٛتٛوطٜ وَرِي، اٛ دَرِي يٜىٰسٛ اَمْ؞ اٛ وِعِيَمْ، ‹کٛنٜىٰلِيُسْ، اَللَّه نَنِي دٛعَاجٜ مَاطَ اٛ جَٻِي سَدَکَاجِ مَاطَ؞ لِلُ غٛطّٛ غَرِيرِ جٛفَّ، نٛدَّا غٛطّٛ بِعٜتٜىٰطٛ سِيمَنْ بِيتُرُسْ غٛنْطٛ وُرٛ غٛطّٛ ڤِيٛووٛ لَرٜ بِعٜتٜىٰطٛ سِيمَنْ، مٛ وُرٛ مُوطُمْ وٛنِ حَادٜ مَايٛ؞› طٛنْ اٜ طٛنْ لِلْمِ تٛ مَاطَ؞ مِ نَنِي بٜلْطُمْ غَرٛلْ مَاطَ؞ جٛونِ مِنْ فُو اٜ مِنْ طٛعٛ يٜىٰسٛ اَللَّه نغَمْ مِنْ نَنَ کٛ جٛومِرَاوٛ وِعِمَا مبِعَامِنْ فُو؞» ندٜنْ بِيتُرُسْ فُطِّ مٜتَنْکِٻٜ وِعِ، «جٛونِ غٛونغَ اٜ مِ اَنْدِ اَللَّه حٛلَّتَا فٜىٰرٛوتِرٛلْ حَکُّندٜ يِمْٻٜ؞ تٛ غٛطّٛ حُلِيمٛ، حُوِي کٛ وٛوطِ، اَللَّه جَٻَيْمٛ کٛو طُمْ اِرِ نغٛلٜ لٜݧٛلْ؞ اٛنْ اَنْدِ حَبَرُ طُمْ اَللَّه لِلْدٛيِ اِسْرَاعِيلَنْکٛعٜنْ؞ کَنْجُمْ وٛنِ ٻٜ نغَعَجِنَ حَبَرُ بٜلْطُمْ، طُمْ جَمْ کٜٻَاطُمْ بَرْکَ يٜىٰسُ اَلْمَسِيحُ؞ کَنْکٛ وٛنِ جٛومِرَاوٛ يِمْٻٜ فُو؞ اٛنْ اَنْدِ نٛ حَبَرُ طُمْ سَنْکِتٛرِي کٛو تٛيٜ ندٜرْ لٜيْدِ يَحُودِيَ؞ طُمْ فُطِّي دَغَ لٜيْدِ غَلِيلِ غَطَ يَحَيَ وَطِي وَعَجُ دٛوْ بَڤْتِسْمَ؞ اٛنْ اَنْدِ نٛ اَللَّه سُٻِرِ يٜىٰسُ نَجَرَنْکٜىٰجٛ، اٜ نٛ اٛ حٛکِّرِمٛ بَوْطٜ رُوحُ مَاکٛ؞ اٛنْ اَنْدِ نٛ يٜىٰسُ يِيلٛرِي ندٜرْ غَرِيجٜ فُو اٜ مٛ حُوَ کُوطٜ بٛطّٜ، اٜ مٛ يَمْطِتِنَ ٻٜ شٜيْطَنْ تٛرَّتَ فُو نغَمْ اَللَّه اٜ وٛنْدِ اٜ مَاکٛ؞ مِنٛنْ مِنْ شٜيْدُعٜنْ کٛ اٛ حُوِ ندٜرْ لٜيْدِ يَحُودِيَ اٜ ندٜرْ غَرِيرِ اُرُشَلِيمَ فُو؞ ٻٜ ٻِلِمٛ دٛوْ غَافَانغَلْ، ٻٜ مبَرِمٛ، اَمَّا اَللَّه اُمِّنِمٛ دَغَ مَيْدٜ ݧَلْندٜ تَتَوْرٜ، وَنْغِنِمٛ ندٜرْ يِمْٻٜ؞ اٛ وَنْغَنَايِ يِمْٻٜ فُو، اَمَّا اٛ وَنْغَنِيمِنْ مِنٛنْ شٜيْدُعٜنْ ٻٜ اَللَّه اَرْتِ سُٻُکِ؞ مِنٛنْ نغٛنِ ݧَمْندُٻٜ اٜ مَاکٛ نجَرْدِ اٜ مَاکٛ غَطَ اٛ اُمَّکٜ دَغَ مَيْدٜ؞ اٛ وِعِمِنْ مِنْ نغَعَجِنَنَ يِمْٻٜ، مِنْ تَبِّتِنَنَٻٜ يٜىٰسُ وٛنِ مٛ اَللَّه وَرْتِرِ کِيتٛتٛوطٛ مَيْٻٜ اٜ ٻٜ يٛنْکِ؞ اَنَّبٛعٜنْ فُو مٜتِي دٛوْ مَاکٛ ٻٜ مبِعِي کٛولِيطٛمٛ فُو حٜٻَيْ يَافَنٜىٰکِ حَکّٜ مُوطُمْ بَرْکَ اِنْدٜ مَاکٛ؞» بِيتُرُسْ اٜ ندٜرْ مٜتَنْکِٻٜ، سٜيْ رُوحُ اَللَّه جِڤِّي دٛوْ نَنٛوٻٜمٛ فُو؞ يَحُودَنْکٛعٜنْ کٛولِيٻٜ يٜىٰسُ غَرْدُٻٜ اٜ بِيتُرُسْ کَيْطِنِي ندٜ ٻٜ نغِعِ نٛ اَللَّه حٛکِّرِ يِمْٻٜ نَاع يَحُودَنْکٛعٜنْ رُوحُ مُوطُمْ، نغَمْ ٻٜ نَنِي يِمْٻٜ ٻٜنْ اٜ مٜتِرَ طٜمْطٜ طٜ ٻٜ اَنْدَا، اٜ نغٜتَّ اَللَّه؞ سٜيْ بِيتُرُسْ وِعِ، «يِمْٻٜ ٻٜعٜ کٜٻِي رُوحُ اَللَّه نٛ کٜٻِرْطٜنْطُمْ؞ طُمٜ حَطَتَ ٻٜ نغَطَنٜىٰ بَڤْتِسْمَ؟» نغَمْ نٛنْ اٛ وَطِ ٻٜ نغَطَنٜىٰ بَڤْتِسْمَ ندٜرْ اِنْدٜ يٜىٰسُ اَلْمَسِيحُ؞ غَطَ مَاجُمْ، ٻٜ تٛرِيمٛ اٛ جٛوطٛو تٛ مَٻّٜ بَلْطٜ سٜطَّ؞ لِلَاٻٜ اٜ تٛکُّٻٜ يٜىٰسُ وٛنْٻٜ لٜيْدِ يَحُودِيَ فُو ٻٜ نَنِي حَبَرُ يِمْٻٜ نَاع يَحُودَنْکٛعٜنْ نجَٻِي وٛلْدٜ اَللَّه؞ ندٜ بِيتُرُسْ يَحِ اُرُشَلِيمَ، يَحُودَنْکٛعٜنْ کٛولِيٻٜ يٜىٰسُ دَرِيٻٜ دٛوْ ندٛنُ مُعّٜنْ نغُ نَادُکِ ٻٜ مبِعِ کٛ اٛ وَطِ طُمْ وٛوطَا، اٜ ٻٜ مبِعَ، «نغَمْ طُمٜ نَتُّطَا ندٜرْ وُرٛ يِمْٻٜ ٻٜ نَادَاکَ، حَا اَ ݧَمْدِي اٜ مَٻّٜ؟» بِيتُرُسْ طِيوِتَنِٻٜ نٛ کٛو طُمٜ فُطِّرِ، اٛ وِعِٻٜ، «کٛ نغٛنّٛومِ ندٜرْ غَرِيرِ جٛفَّ اٜ مِ وَطَ دٛعَارٜ، مِ يِعِي وَحَيُ؞ ندٜرْ وَحَيُ طُمْ مِ يِعِي غٛطُّمْ اٜ جِڤّٛيٛو دَغَ دٛوْ؞ اٜ طُمْ نَنْدِ اٜ وُدٜرٜ مَوْندٜ کَٻَّاندٜ اٜ غُتُّلِّ نَيِ؞ طُمْ پِوٛيِ دَغَ دٛوْ اٜ طُمْ جِڤِّنٛيٜىٰ تٛ اَمْ؞ ندٜ ندَارُمِ ندٜرْ مَاجُمْ، سٜيْ نغِيمِ مَرْلٜ طٜ کٛيْطٜ نَيِ اٜ دِيوٜ لَدّٜ اٜ دَسٛتٛوطٜ اٜ شٛلِّ ندٜرْ مَيْرٜ؞ سٜيْ نَنْمِ حٛنٛنْدٜ اٜ وِعَيَمْ، ‹بِيتُرُسْ، اُمَّ، نَنْغُ، کِرْسَا، ݧَامَا!› مبِعُمِ، ‹اَاعَ، جٛومِرَاوٛ! مِ مٜىٰطَايِ ݧَامُکِ کٛ حَرْمِنِي کٛو کٛ لَاٻَايِ؞› حٛنٛنْدٜ ندٜنْ فُطِّتِ وِعِيَمْ، ‹تَاع حَرْمِنْ کٛ اَللَّه لَاٻِنِ؞› طُمْ وَطِ نٛنْ ندٜ تَتِ؞ غَطَ نٛنْ طُمْ فُو طُمْ سٛعَّا دٛوْ؞ اٜ شَرٜلْ نغٜلْ، وٛرْٻٜ تَتٛ لِلٛيَاٻٜ تٛ اَمْ دَغَ کَيْسَارِيَ نجٛتِّي وُرٛ تٛ نغٛنْمِ؞ رُوحُ اَللَّه وِعِيَمْ مِ يَادَ اٜ مَٻّٜ تٛع مِ وَطَ سٜکٛ؞ ٻٜعٜ تٛکُّٻٜ يٜىٰسُ جٛوٜىٰغٛعٛ نجَادِ اٜ اَمْ، مِنْ نَتِّدِ وُرٛ کٛنٜىٰلِيُسْ؞ اٛ وِعِمِنْ نٛ اٛ يِعِرِ مَلَاعِکَاجٛ غَرْطٛ وُرٛ مَاکٛ وِعِمٛ، ‹لِلُ غٛطّٛ غَرِيرِ جٛفَّ، نٛدَّا غٛطّٛ بِعٜتٜىٰطٛ سِيمَنْ بِيتُرُسْ؞ اٛ وِعٜتٜ نٛ کٜٻْرَتَا کِسْندَمْ، اَنْ اٜ وُرٛ مَاطَ فُو؞› ندٜ ڤُطُّمِ مٜتُکِ، سٜيْ رُوحُ اَللَّه جِڤِّي دٛوْ مَٻّٜ نٛنْ نٛ طُمْ جِڤّٛرِي دٛوْ مٜىٰطٜنْ اَرَنْدٜ؞ سٜيْ شِفْتٛرْمِ کٛ جٛومِرَاوٛ وِعُنٛو وِعُکِ، ‹يَحَيَ وَطَنِي يِمْٻٜ بَڤْتِسْمَ اٜ ندِيَمْ، اَمَّا اٛنٛنْ، اَللَّه وَطِرَنَيْعٛنْ بَڤْتِسْمَ اٜ رُوحُ مُوطُمْ؞› تٛ اَللَّه حٛکِّيٻٜ دٛکَّلْ نغَلْ اٛ حٛکِّعٜنْ ندٜ کٛولِيطٜنْ يٜىٰسُ اَلْمَسِيحُ جٛومِرَاوٛ، تٛو، مِنْ مِ مٛيٜ کَطَيْمِ کٛ اَللَّه يِطِ وَطُکِ؟» ندٜ ٻٜ نَنِ کٛ اٛ وِعِ، ٻٜ ندٜعِّتِ، ٻٜ مَنْتِ اَللَّه، ٻٜ مبِعِ، «اَللَّه وَطَنِي يِمْٻٜ نَاع يَحُودَنْکٛعٜنْ لَاوٛلْ تُوبُکِ نغَمْ ٻٜ کِسَ ٻٜ کٜٻَ يٛنْکِ کِ رٜعَتَا؞» وٛٻّٜ تٛکُّٻٜ يٜىٰسُ شَنْکِتَامَ نغَمْ تٛرَّاجِ طِ ٻٜ تٛرَّا غَطَ طُمْ وَرِي اِسْتِفَانُسْ؞ وٛٻّٜ نجَحِ فِنِيکِيَ، وٛٻّٜ نجَحِ سَيِيفُرُسْ، وٛٻّٜ بٛو نجَحِ اَنْتَاکِيَ؞ اٜ ٻٜ نغَعَجِنَ ندٜرْ يَحُودَنْکٛعٜنْ تَنْ؞ اَمَّا وٛٻّٜ ندٜرْ مَٻّٜ پِوٛيْٻٜ سَيِيفُرُسْ اٜ سَايِرِنْ نَتِّ غَرِيرِ اَنْتَاکِيَ، اٜ ٻٜ نغَعَجِنَ حَبَرُ بٜلْطُمْ طُمْ يٜىٰسُ جٛومِرَاوٛ ندٜرْ يِمْٻٜ نَاع يَحُودَنْکٛعٜنْ؞ جٛومِرَاوٛ بٛو اٜ وٛنْدِ اٜ مَٻّٜ؛ يِمْٻٜ طُطْٻٜ تُوبِ نغَيْلِتِي تٛ جٛومِرَاوٛ؞ کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ بٛو نَنِي حَبَرُ کٛ وَطِ تٛنْ اَنْتَاکِيَ، سٜيْ ٻٜ لِلِ بَرْنَبَ تٛ مَٻّٜ؞ ندٜ بَرْنَبَ وَرِ يِعِ نٛ اَللَّه بَرْکِطِنِرِ يِمْٻٜ نَاع يَحُودَنْکٛعٜنْ تٛکُّٻٜ يٜىٰسُ، اٛ نَنِ بٜلْطُمْ، اٛ سٜمْبِطِنِٻٜ ٻٜ ندَرٛو دٛوْ کٛ ٻٜ کٛولِي، ٻٜ تٛکَّ جٛومِرَاوٛ اٜ ٻٜرْندٜ غٛعٛ؞ نغَمْ بَرْنَبَ اٛ نٜطّٛ مٛ نغِکُّ بٛطُّمْ، کٜوْطٛ رُوحُ اَللَّه کٛولِيطٛ جٛومِرَاوٛ؞ سٜيْ يِمْٻٜ طُطْٻٜ تُوبِ تٛکِّ جٛومِرَاوٛ؞ غَطَ نٛنْ، بَرْنَبَ يَحِ غَرِيرِ تَرْسُسْ نغَمْ طَٻُّتُکِ شَاوُلُ؞ ندٜ اٛ تَوِمٛ، اٛ يَارِمٛ غَرِيرِ اَنْتَاکِيَ؞ ٻٜ نجٛوطٛدِي اٜ کَوْتَلْ تٛکُّٻٜ يٜىٰسُ وٛنْٻٜ تٛنْ حِتَاندٜ وٛعٛيْرٜ، اٜ ٻٜ اٜکِّتِنَ يِمْٻٜ طُطْٻٜ؞ اٜ اَنْتَاکِيَ طُمْ فُطِّ نٛدِّرْکِ تٛکُّٻٜ يٜىٰسُ مَسِيحِيَنْکٛعٜنْ؞ ندٜرْ بَلْطٜ طٜنْ، وٛٻّٜ اَنَّبٛعٜنْ پِوٛيِ اُرُشَلِيمَ نغَرِ اَنْتَاکِيَ؞ غٛعٛتٛ ندٜرْ مَٻّٜ بِعٜتٜىٰطٛ اَغَبُسْ اُمِّي دَرِي وَطِ اَنَّبَاکُ اٜ بَوْطٜ رُوحُ اَللَّه، وِعِ وٜىٰلٛ کَلُّنغٛ وَطَيْ ندٜرْ دُونِيَارُ فُو؞ نغٛ بٛو وَطِ ندٜرْ شَرٜلْ لَامِيطٛ مَوْطٛ بِعٜتٜىٰطٛ کَلَوْدِيُسْ؞ سٜيْ تٛکُّٻٜ يٜىٰسُ ڤُطِّ حَوْرُتُکِ شٜىٰدٜ، کٛو مٛيٜ وَدَّ کٛ وَاوِ وَدُّکِ، نغَمْ ٻٜ مبَلَّ بَنْدِرَاٻٜ مَٻّٜ وٛنْٻٜ لٜيْدِ يَحُودِيَ؞ ندٜ ٻٜ کَوْرِتِ بَلَّلْ نغَلْ، سٜيْ ٻٜ لِلْدِنغَلْ اٜ جُنْغٛ بَرْنَبَ اٜ شَاوُلُ، ٻٜ نجَارَنغَلْ تٛ مَوْٻٜ کَوْتَلْ تٛکُّٻٜ يٜىٰسُ تٛنْ اُرُشَلِيمَ؞ ندٜرْ شَرٜلْ نغٜلْ، حِرُدُسْ لَامِيطٛ فُطِّ تٛرُّکِ وٛٻّٜ ندٜرْ تٛکُّٻٜ يٜىٰسُ؞ اٛ نَنْغِ يَاکُبُ مِݧِرَاوٛ يَحَيَ، اٛ وَطِ طُمْ وَرْدِمٛ کَافَحِ؞ ندٜ اٛ يِعِ کٛ اٛ وَطِ وٜلِي يَحُودَنْکٛعٜنْ، اٛ نَنْغِ بِيتُرُسْ؞ نَنْغُکِ کِنْ بٛو وَرِ دٜي‑دٜيْ اٜ شَرٜلْ حُمْتٛ بُرٛودِ طُمْ وَلَا پُوفِنِرْطُمْ؞ غَطَ اٛ نَنْغِيمٛ، اٛ مَٻِّمٛ ندٜرْ سُودُ شُرَلْ، اٛ وَطِ مٛٻْطٜ سٛوجِعٜنْ نَيِ طٜ سٛوجِعٜنْ نَيٛ‑نَيٛ ٻٜ ندٜىٰنَمٛ؞ اٜ مٛ يِطِ وَدُّکِمٛ يٜىٰسٛ يِمْٻٜ غَطَ حُمْتٛ نغٛنْ اٛ وَطَنَمٛ کِيتَ؞ بِيتُرُسْ مَٻَّا ندٜرْ سُودُ شُرَلْ، اَمَّا کَوْتَلْ تٛکُّٻٜ يٜىٰسُ نغَطِ کَ وَطَنْکِمٛ دٛعَارٜ؞ ندٜرْ جٜمَّارٜ ندٜ حِرُدُسْ ݧُمِ وُرْتِنْکِ بِيتُرُسْ، وَطَنَمٛ کٛ يِطِ تٛ وٜىٰتِ، بِيتُرُسْ اٜ طَانِي حَکُّندٜ سٛوجِعٜنْ طِطٛ، اٜ مٛ حَٻّٛرِي ٻٛغِّ نجَمْندِ؞ رٜىٰنٛوٻٜ بٛو اٜ ندٜىٰنِ دَمُّطٜ سُودُ شُرَلْ ندُنْ؞ طٛنْ اٜ طٛنْ مَلَاعِکَاجٛ جٛومِرَاوٛ وَنْغَنِمٛ، جَيْنغٛلْ يٜيْنِي ندٜرْ سُودُ ندُنْ فُو؞ اٛ دِمْبِ بِيتُرُسْ، اٛ فِندِنِمٛ، اٛ وِعِ، «يَوْنُ، اُمَّ!» سٜيْ ٻٛغِّ نجَمْندِ طِطُمْ حَٻِّرِ جُوطٜ مَاکٛ تَپِ، طِ نجَنِ؞ مَلَاعِکَاجٛ اٛنْ وِعِمٛ، «تَادَ تَادٛرْدٜ مَاطَ، فَطَ ڤَطٜ مَاطَ؞» ندٜ بِيتُرُسْ وَطِ نٛنْ، مَلَاعِکَاجٛ اٛنْ وِعِمٛ، «وَانَ شُدَّارِ مَاطَ، تٛکَّمْ؞» بِيتُرُسْ وُرْتِي، تٛکِّمٛ؞ اٛ اَنْدَا کٛ مَلَاعِکَاجٛ اٛنْ وَطَتَ طُمْ غٛونغَ؛ اٛ کَمِّ طُمْ وَحَيُ؞ ندٜ ٻٜ پَٻِّي رٜىٰنٛوٻٜ اَرَنْدٜعٜنْ اٜ شَکِتِيٻٜ، ٻٜ نغَرِ دَمُّغَلْ نجَمْندِ دَارَيْنغَلْ غَرِيرِ؞ نغَلْ مَٻِّتِي اٜ حٛورٜ مَاغَلْ يٜىٰسٛ مَٻّٜ، سٜيْ ٻٜ مبُرْتِي، ٻٜ نَنْغِ لَاوٛلْ؞ اٜ ٻٜ نجَحَ، سٜيْ طٛنْ اٜ طٛنْ مَلَاعِکَاجٛ اٛنْ مَجِّتَنِمٛ؞ ندٜنْ حَکِّيلٛ بِيتُرُسْ وَرْتِ، اٛ وِعِ، «جٛونِ مِ تَبِّتِنِي جٛومِرَاوٛ لِلٛيِي مَلَاعِکَاجٛ مُوطُمْ نغَمْ حِسْنَيَمْ دَغَ جُنْغٛ حِرُدُسْ اٜ ݧُمٛوجِ يَحُودَنْکٛعٜنْ کَلُّطِ؞» ندٜ اٛ اَنْدِتِ نٛنْ، اٛ يَحِ وُرٛ مَرْيَامَ، مَدُوجٛ يَحَيَ بِعٜتٜىٰطٛ مَرْکُسْ، تٛنْ تٛ يِمْٻٜ طُطْٻٜ کَوْرِتِ اٜ نغَطَ دٛعَارٜ؞ ندٜ بِيتُرُسْ فِيِ دَمُّغَلْ وُرٛ نغٛنْ، کٛرْطٛ بِعٜتٜىٰطٛ رٛودَ وَرِ دَمُّغَلْ نغَلْ نغَمْ يِعَ طُمْ مٛيٜ؞ ندٜ اٛ اَنْدِتِ حٛنٛنْدٜ بِيتُرُسْ، اٛ نَنِ بٜلْطُمْ حَا اٛ يٜجِّتِ مَٻِّتَنْکِمٛ دَمُّغَلْ؞ اٛ حَٻْتِي اٛ سٛعِّي ندٜرْ، اٛ وِعِٻٜ طُمْ بِيتُرُسْ دَرِي يَاسِ دَمُّغَلْ؞ ٻٜ مبِعِمٛ، «اَ کَاݝَاطٛ!» اَمَّا اٛ ٻٜيْدِ وِعُکِ طُمْ بِيتُرُسْ؞ طٛنْمَا ٻٜ مبِعِمٛ، «طُمْ مَلَاعِکَاجٛ مَاکٛ؞» اَمَّا بِيتُرُسْ دَرِي اٜ فِيَ دَمُّغَلْ؞ ندٜ ٻٜ مَٻِّتَنِمٛ ٻٜ نغِعِمٛ، طُمْ حَيْطِنِيٻٜ نَاع سٜطَّ؞ اٛ پٜفْتَنِٻٜ جُنْغٛ نغَمْ ٻٜ ندٜعِّتَ، اٛ وِعِٻٜ نٛ جٛومِرَاوٛ وُرْتِنِرِمٛ ندٜرْ سُودُ شُرَلْ، اٛ وِعِ، «کٛکّٜىٰ يَاکُبُ حَبَرُ طُعُمْ، اٜ تٛکُّٻٜ يٜىٰسُ حٛرِيٻٜ فُو؞» غَطَ مَاجُمْ اٛ وُرْتِي، اٛ يَحِ وٛنْدٜ وِغٜىٰرٜ؞ ندٜ وٜىٰتِ، وٜمْبٜرٜ مَوْندٜ نَنْغِ سٛوجِعٜنْ ٻٜنْ نغَمْ ٻٜ اَنْدَا تٛ بِيتُرُسْ وٛنِ؞ ندٜ حِرُدُسْ طَٻِّتِ بِيتُرُسْ حٜٻْتَايِمٛ، وَطِ طُمْ پَمَ سٛوجِعٜنْ رٜىٰنٛوٻٜ ٻٜنْ طُمْ وَرَٻٜ؞ غَطَ مَاجُمْ حِرُدُسْ اَلِ لٜيْدِ يَحُودِيَ، اٛ يَحِ غَرِيرِ کَيْسَارِيَ، اٛ نٜىٰٻِ تٛنْ؞ حِرُدُسْ اٜ مٛنَّنَ يِمْٻٜ غَرِيجٜ تَايَ اٜ سِدٛنْ؞ سٜيْ يِمْٻٜ غَرِيجٜ طٜنْ کَوْرِتِ نجَحِ تٛ مَاکٛ؞ ٻٜ اَرْتِ نَرُّکِ اٜ مَوْطٛ کُوَنٛوٻٜ حِرُدُسْ بِعٜتٜىٰطٛ بِلَسْتُسْ؞ ندٜنْ ٻٜ نجَحِ تٛ حِرُدُسْ، ٻٜ تٛرِي جٛنْدٜ جَمْ حَکُّندٜ مَٻّٜ، نغَمْ ندٜرْ لٜيْدِ مَاکٛ ٻٜ کٜٻَتَ ݧَمْندُ؞ ندٜ ݧَلْندٜ ندٜ اٛ رٜسَنِٻٜ وَرِ، حِرُدُسْ ٻٛرْنِي کٛلْتٜ لَامُ، جٛوطِي دٛوْ جٛوطٛرْغَلْ لَامُ، اٛ مٜتَنِٻٜ؞ سٜيْ ٻٜ مٜتِ سٜمْبٜىٰ، ٻٜ مبِعِ، «طُعُمْ طُمْ حٛنٛنْدٜ اَلَّح، نَاع طُمْ حٛنٛنْدٜ نٜطّٛ!» طٛنْ اٜ طٛنْ مَلَاعِکَاجٛ جٛومِرَاوٛ يٛوفٛنٛيِمٛ ݧَوُ نغَمْ اٛ مَوْنِنَايِ اَللَّه؞ غِلْپِ نغَطِ کَ ݧَامُکِمٛ حَا اٛ مَايِ؞ اَمَّا حَالَ اَللَّه يَحِ يٜىٰسٛ، ٻٜيْدِ سَنْکِتَاکِ؞ ندٜ بَرْنَبَ اٜ شَاوُلُ کٜىٰݧِ کُوغَلْ مُعّٜنْ ندٜرْ اُرُشَلِيمَ، ٻٜ کٛوتِدِ اٜ يَحَيَ بِعٜتٜىٰطٛ مَرْکُسْ؞ ندٜرْ کَوْتَلْ تٛکُّٻٜ يٜىٰسُ وٛنْٻٜ غَرِيرِ اَنْتَاکِيَ اٜ وٛودِ اَنَّبٛعٜنْ اٜ اٜکِّتِنٛوٻٜ، کَمْٻٜ نغٛنِ بَرْنَبَ اٜ سَامِنُ بِعٜتٜىٰطٛ ٻَلٜىٰجٛ، اٜ لُوسِيُسْ سَايِرَنْکٜىٰجٛ، اٜ مَنَيٜنْ مَوْنُدُطٛ اٜ حِرُدُسْ لَامِيطٛ، اٜ شَاوُلُ؞ وٛنْدٜ ݧَلْندٜ اٜ ٻٜ مَوْنِنَ جٛومِرَاوٛ اٜ ٻٜ شُومٛو، سٜيْ رُوحُ اَللَّه وِعِٻٜ، «کَکِّتَنٜىٰيَمْ بَرْنَبَ اٜ شَاوُلُ نغَمْ کُوغَلْ نغَلْ نٛدُّمِٻٜ ٻٜ نغَطَ؞» غَطَ ٻٜ شُومَکٜ ٻٜ نغَطِي دٛعَارٜ، ٻٜ نجٛوَنِ بَرْنَبَ اٜ شَاوُلُ جُوطٜ ٻٜ مبَرْکِطِنِٻٜ، ٻٜ طٛفْتِٻٜ ٻٜ ندِلِّ؞ غَطَ رُوحُ اَللَّه لِلِي بَرْنَبَ اٜ شَاوُلُ، ٻٜ نجَحِ غَرِيرِ سَلُوکِيَ، دَغَ تٛنْ ٻٜ نَتِّ کٛمِوَلْ ٻٜ نجَحِ لٜيْدِ سَيِيفُرُسْ نغٛنْدِ شَکَ ندِيَمْ؞ ندٜ ٻٜ نجٛتِّي سَلَمِسْ، ٻٜ نغَعَجِنِ وٛلْدٜ اَللَّه طٛنْ ندٜرْ شُوطِ دٛعَارٜ يَحُودَنْکٛعٜنْ؞ يَحَيَ بِعٜتٜىٰطٛ مَرْکُسْ بٛو اٜ وٛنْدِ اٜ مَٻّٜ، اٜ مٛ وَلَّٻٜ؞ ٻٜ نغِيلِي ندٜرْ لٜيْدِ سَيِيفُرُسْ نغٛنْدِ شَکَ ندِيَمْ حَا ٻٜ نغَرِ غَرِيرِ بَافٛسْ؞ تٛنْ ٻٜ کَوْرِ اٜ غٛطّٛ يَحُودَنْکٜىٰجٛ دَرْنٛووٛ بِعٜتٜىٰطٛ بَر‑جٛوشُوَ؞ اٛ اَنَّبِيجٛ فٜوْرٜ، غٛنْدُطٛ اٜ غٛمْنَاجٛ لٜيْدِ ندِنْ؞ اِنْدٜ غٛمْنَاجٛ اٛنْ سَرْجِيُسْ بُلُسْ، اٛ نٜطّٛ غٛودُطٛ فَامُ؞ اٛ نٛدِّ بَرْنَبَ اٜ شَاوُلُ نغَمْ اٜ مٛ يِطِ نَنُکِ وٛلْدٜ اَللَّه؞ اَمَّا بَر‑جٛوشُوَ اٛنْ بِعٜتٜىٰطٛ اَلِمَسْ، اٛ جَٻَايِ لِلَاٻٜ ٻٜنْ؞ ﴿مَعَنَ اَلِمَسْ وٛنِ دَرْنٛووٛ نغَمْ اٛ دَرْنٛووٛ؞﴾اٜ مٛ يِطِ حَطُکِ غٛمْنَاجٛ اٛنْ جَٻَ وٛلْدٜ اَللَّه؞ سٜيْ شَاوُلُ، بِعٜتٜىٰطٛ بُلُسْ، کٜىٰوُطٛ رُوحُ اَللَّه، سُتِيمٛ، وِعِمٛ، «اَنْ ٻِي شٜيْطَنْ، اَ غَݧٛ کٛو طُمٜ بٛطُّمْ، کٜىٰوُطٛ پٛيْرٜ کَلُّندٜ اٜ نغَݧَاندِ؞ اَ يِطِ وَيْلُتُکِ غٛونغَ جٛومِرَاوٛ کَ وَرْتَ فٜوْرٜ؟ جٛونِ جٛومِرَاوٛ نٛ تٛرّٜتٜ، اَ وُمَيْ، اَ يِعَتَا نَانغٜ نَا طُمْ حٛشِّي شَرٜلْ؞» طٛنْ اٜ طٛنْ وٛنْدٜ ݧِوْرٜ سُدِّ غِتٜ اَلِمَسْ اٛ وُمِ؞ اٛ وَطِ کَ مبُمْبُمْتُکِ، اٜ مٛ طَٻِّتَ جٛغَنْتٛوطٛمٛ جُنْغٛ؞ ندٜ غٛمْنَاجٛ اٛنْ يِعِ کٛ وَطِ، اٛ جَٻِ يٜىٰسُ، نغَمْ اٛ حَيْطِنِي اٜ اٜکِّتِنٛلْ نغٛلْ دٛوْ جٛومِرَاوٛ؞ سٜيْ بُلُسْ اٜ ٻٜ اٛ يَادَتَ نَتِّ کٛمِوَلْ دَغَ غَرِيرِ بَافٛسْ، ٻٜ نجَحِ فٜرْغَ ندٜرْ لٜيْدِ بَمْفِيلِيَ؞ اَمَّا يَحَيَ مَرْکُسْ اَلِٻٜ سٛعِّي اُرُشَلِيمَ؞ ٻٜ پَٻِّي فٜرْغَ، ٻٜ نجَحِ غَرِيرِ اَنْتَاکِيَ ندٜرْ لٜيْدِ بِسِيدِيَ؞ ݧَلْندٜ سِوْتَارٜ ٻٜ نَتِّ سُودُ دٛعَارٜ ٻٜ نجٛوطِي؞ غَطَ طُمْ جَنْغِي اَتَّوْرَ اٜ دٜفْتٜ اَنَّبٛعٜنْ، سٜيْ اَرْدِيٻٜ سُودُ دٛعَارٜ ندُنْ لِلِ غٛطّٛ وِعَٻٜ، «بَنْدِرَاٻٜ، تٛ اٛنْ نغٛودِ بٛلِيطٜ طٜ شٜمْبِطِنِرْتٛنْ يِمْٻٜ، مبِعٜىٰٻٜکَ؞» سٜيْ بُلُسْ اُمِّي، پٜفْتِ جُنْغٛ مُوطُمْ، وِعِ، «اٛنٛنْ بَنْدِرَاٻٜ اَمْ اِسْرَاعِيلَنْکٛعٜنْ اٜ حٛرِيٻٜ کُلٛوٻٜ اَللَّه، نَنٜىٰ کٛ مبِعَيْمِعٛنْ؞ اَللَّه مٛ اِسْرَاعِيلَنْکٛعٜنْ اٛ سُٻِي مَامَعٜنْ مٜىٰطٜنْ، اٛ مَوْنِنِي لٜݧٛلْ مَٻّٜ کٛ نغٛلْ وٛنّٛو لٜيْدِ مَسَرْ، کَدِمَا اٛ وُرْتِنِيٻٜ لٜيْدِ ندِنْ اٜ بَوْطٜ مَاکٛ؞ اٛ مُݧَنِيٻٜ دُوٻِ 40 ندٜرْ لَدّٜ؞ غَطَ اٛ حَلْکِي لٜپِّ جٛوٜىٰطِطِ جٛوطِنٛوطِ ندٜرْ لٜيْدِ کَنْعَانَ، اٛ حٛکِّٻٜ ندٛنُ لٜيْدِ ندِنْ؞ فِي طُعُمْ فُو وَطِي ندٜرْ دُوٻِ 450؞ غَطَ مَاجُمْ، اٛ سُٻَنِٻٜ غَطٛوٻٜ کِيتَ حَا يَاکِ جَامَنُ اَنَّبِ سَمَاعِلَ؞ «غَطَ طٛنْ ٻٜ تٛرِي اَللَّه حٛکَّٻٜ لَامِيطٛ؞ سٜيْ اَللَّه حٛکِّٻٜ شَاوُلُ، ٻِي کِسْ، پِوٛيْطٛ لٜݧٛلْ بِلِيَامِنُ؞ اٛ لَامِيٻٜ دُوٻِ 40؞ ندٜ جٛومِرَاوٛ جِڤِّنِ شَاوُلُ دٛوْ لَامُ، اٛ لَمْنِ دَوْدَ؞ دٛوْ دَوْدَ اٛنْ بٛو اٛ وِعِ، ‹مِ يِعِي دَوْدَ ٻِي جٜىٰسِ، اٛ نٜطّٛ ڤُکَّنِيطٛيَمْ تٛ ٻٜرْندٜ، غَطَيْطٛ کٛ نغِطْمِ؞› دَغَ ندٜرْ لٜݧٛلْ دَوْدَ اٛنْ اَللَّه وُرْتِنِ يٜىٰسُ، کِسْنٛووٛ اِسْرَاعِيلَ نٛنْ نٛ اٛ وَارُنٛو اَلْکَوَلْ؞ ندٜنْ کٛ يٜىٰسُ فُطَّ کُوغَلْ مُوطُمْ، يَحَيَ وَعَجِنَنِي لٜݧٛلْ اِسْرَاعِيلَ فُو ٻٜ تُوبَ، ٻٜ نغَطَنٜىٰ بَڤْتِسْمَ؞ ندٜ يَحَيَ ٻَدِي حٜىٰݧُکِ کُوغَلْ مُوطُمْ، اٛ وِعِ، ‹مِنْ نَاع طُمْ اٛنْ طٛنْ مٛ کَمِّيطٛنْ؞ اَمَّا اٜ وٛودِ غَرَيْطٛ غَطَ اَمْ، مٛ مِ فٛتَايِ فِتُّکِ کٛو ٻٛغِّ ڤَطٜ مَاکٛ؞› «اٛنٛنْ بَنْدِرَاٻٜ اَمْ، لٜݧٛلْ اِبْرَاهِمْ، اٜ اٛنٛنْ کُلٛوٻٜ اَللَّه وٛنْٻٜ ندٜرْ مٜىٰطٜنْ! اٜنٜنْ طُمْ وَدَّنِ حَبَرُ کِسْندَمْ؞ وٛنْٻٜ اُرُشَلِيمَ اٜ مَوْٻٜ مَٻّٜ فُو اَنْدِتَايِ يٜىٰسُ اٛ مٛيٜ؞ ٻٜ ڤَامَايِ بٛلِيطٜ اَنَّبٛعٜنْ جَنْغٜتٜىٰطٜ ݧَلْندٜ سِوْتَارٜ فُو ندٜرْ شُوطِ دٛعَارٜ؞ اَمَّا فُو اٜ نٛنْ، ٻٜ کٜبِّنِ کٛ اَنَّبٛعٜنْ ٻٜنْ مبِعِ ندٜ ٻٜ مبَرِ يٜىٰسُ؞ کٛو ندٜ ٻٜ کٜٻَايِ دَلِيلَ وَطَنْکِمٛ کِيتَ مَيْدٜ، فُو اٜ نٛنْ ٻٜ تٛرَکٜ بِلَاتُسْ وَرَمٛ؞ ندٜنْ غَطَ ٻٜ کٜبِّنِي کٛ دٜفْتٜرٜ وِعِ دٛوْ مَاکٛ فُو، ٻٜ نجِڤِّنِ ٻَنْدُ مَاکٛ دَغَ دٛوْ غَافَانغَلْ، ٻٜ نغَطِندُ ندٜرْ يٜنَاندٜ؞ اَمَّا اَللَّه اُمِّنِيمٛ دَغَ مَيْدٜ؞ بَلْطٜ طُطّٜ اٜ مٛ وَنْغَنَ وٛنْدُنٛوٻٜ اٜ مَاکٛ، تٛکُّٻٜمٛ دَغَ لٜيْدِ غَلِيلِ يَاکِ اُرُشَلِيمَ؞ جٛونِ کَمْٻٜ ٻٜ نغَرْتِي اَنْدِنٛوٻٜمٛ يٜىٰسٛ يِمْٻٜ؞ مِنْ نغَدَّنِيعٛنْ حَبَرُ بٜلْطُمْ طُمْ اَللَّه وَطَنّٛو مَامَعٜنْ مٜىٰطٜنْ اَلْکَوَلْ؞ اَللَّه حٜبِّنَنِيعٜنْ اَلْکَوَلْ نغَلْ، اٜنٜنْ ٻِٻّٜ مَٻّٜ، ندٜ اٛ اُمِّنِ يٜىٰسُ دَغَ مَيْدٜ؞ کَدِمَا نٛنْ نٛ طُمْ وِنْدِرَا ندٜرْ دٜفْتٜرٜ جَبُورَ سُورَوٛلْ طِطَٻٛلْ وِعُکِ، ‹اَنْ، اَ ٻِطّٛ اَمْ، حَنْدٜ مِ وَرْتِي ݧَاکٛ مَاطَ؞› اَللَّه اُمِّنِي يٜىٰسُ دَغَ مَيْدٜ اٛ اَلَتَا ٻَنْدُ مَاکٛ ݧٛلَ ندٜرْ يٜنَاندٜ؞ نٛنْ نٛ اٛ وِعُنٛو: ‹مِ حٛکَّيْعٛنْ بَرْکَ شٜنِيطُمْ تَبِّتَيْطُمْ، طُمْ نغَطَنْمِ دَوْدَ اَلْکَوَلْ؞› کَدِمَا بَنْݧٜ ندٜرْ جَبُورَ وِعِ، ‹اَ اَلَتَا شٜنِيطٛ مَاطَ ݧٛلَ؞› دَوْدَ حُوِي کٛ اَللَّه يِطِ ندٜرْ جَامَنُ مُوطُمْ؞ غَطَ مَاجُمْ اٛ مَايِ، اٛ اُوَا حَادٜ مَامَعٜنْ مَاکٛ، اٛ ݧٛلِي؞ اَمَّا مٛ اَللَّه اُمِّنِ دَغَ مَيْدٜ ݧٛلَايِ؞ بَنْدِرَاٻٜ اَمْ، سٜيْ اَنْدٛنْ اٜ مِنْ نغَعَجِنَنَعٛنْ حَبَرُ يَافَنٜىٰکِ حَکّٜ بَرْکَ يٜىٰسُ؞ کٛولِيطٛمٛ فُو، اٛ رِمْطِنَيْمٛ دَغَ حَکّٜ طُمْ اَتَّوْرَ وَاوَايِ رِمْطِنْکِطُمْ؞ نغَمْ مَاجُمْ، ڤَامٜىٰ تٛع کٛ اَنَّبٛعٜنْ مبِعِ حٜٻَعٛنْ؞ نغَمْ ٻٜ مبِعِي، ‹رَطُّمْ، اٛنٛنْ يَوَنْٻٜ کُوطٜ جٛومِرَاوٛ، اٛنْ کَيْطِنَيْ، اٛنْ کَلْکَيْ! نغَمْ مِ وَطَيْ غٛطُّمْ ندٜرْ جَامَنُ مٛوطٛنْ، طُمْ اٛنْ نجَٻَتَا کٛو دَا غٛطّٛ فَمْتِنِيعٛنْطُمْ!› » تٛو، بُلُسْ اٜ بَرْنَبَ اٜ مبُرْتٛو سُودُ دٛعَارٜ ندُنْ، سٜيْ يِمْٻٜ تٛرِيٻٜ ٻٜ شٛعّٛيٛو ݧَلْندٜ سِوْتَارٜ وَرَيْندٜ، ٻٜ ٻٜيْدَ مٜتَنْکِٻٜ حَالَ کَنْ؞ غَطَ يِمْٻٜ ٻٜنْ شَنْکِتَکٜ، يَحُودَنْکٛعٜنْ طُطْٻٜ اٜ نَتُّٻٜ ندٜرْ دِينَ مَٻّٜ تٛکِّ بُلُسْ اٜ بَرْنَبَ؞ کَمْٻٜ بٛو ٻٜ مٜتَنِٻٜ، اٜ ٻٜ شٜمْبِطِنَٻٜ ٻٜ نغَطَ کَ تٛکُّکِ اَللَّه نغَمْ ندٜرْ يِدّٜ مَاکٛ اٛ وَلَّٻٜ ٻٜ نغَطَ کٛ اٛ يِطِ؞ ندٜ ݧَلْندٜ سِوْتَارٜ يَلْتِ، ٻُرْٻٜ طُوطُکِ ندٜرْ غَرِيرِ ندِنْ نغَرِ نغَمْ نَنُکِ وٛلْدٜ جٛومِرَاوٛ؞ اَمَّا ندٜ يَحُودَنْکٛعٜنْ نغِعِ مٛٻْدٜ يِمْٻٜ طُطْٻٜ، ٻٜ نَنِ لَوْلِيرُ، ٻٜ نغَطِ کَ يٜدُّکِ کٛ بُلُسْ اٜکِّتِنْتَ، اٜ ٻٜ کُطَمٛ؞ اَمَّا بُلُسْ اٜ بَرْنَبَ مٜتَنِٻٜ کُلٛلْ وَلَا مبِعِ، «دٛولٜ مِنْ اَرْتَ وَعَجِنَنْکِعٛنْ وٛلْدٜ اَللَّه اٛنٛنْ يَحُودَنْکٛعٜنْ؞ اَمَّا نغَمْ اٛنْ شَلَکٜندٜ، اٛنْ کٛلِّي اٛنْ ڤٛتَايِ حٜٻُکِ يٛنْکِ کِ رٜعَتَا؞ نغَمْ نٛنْ مِنْ نجَحَيْ تٛ لٜپِّ طِ نَاع يَحُودَنْکٛعٜنْ؞ نغَمْ کَنْجُمْ وٛنِ کٛ جٛومِرَاوٛ وِعِ مِنْ نغَطَ، ندٜ اٛ وِعِ، ‹مِ وَطِيمَ نغَرْتَا جَيْنغٛلْ تٛ لٜپِّ نَاع يَحُودَنْکٛعٜنْ، نغَمْ نغَدَّنَا دُونِيَارُ فُو کِسْندَمْ؞› » ندٜ يِمْٻٜ نَاع يَحُودَنْکٛعٜنْ نَنِ نٛنْ، ٻٜ نَنِ بٜلْطُمْ، ٻٜ تٜدِّنِ وٛلْدٜ جٛومِرَاوٛ؞ ندٜنْ ٻٜنْ طٛنْ ٻٜ اَللَّه سِرْيَنِي حٜٻُکِ يٛنْکِ کِ رٜعَتَا تٛکِّ يٜىٰسُ؞ وٛلْدٜ جٛومِرَاوٛ بٛو سَنْکِتِي کٛو تٛيٜ ندٜرْ لٜيْدِ ندِنْ؞ اَمَّا اَرْدِيٻٜ يَحُودَنْکٛعٜنْ نغَطِ رٜوْٻٜ کُلٛوٻٜ اَللَّه ٻٜ طُمْ مَوْنِنْتَ، اٜ اَرْدِيٻٜ غَرِيرِ ندِنْ نغَݧَ بُلُسْ اٜ بَرْنَبَ، سٜيْ ٻٜ نغَطِ طُمْ فُطِّ تٛرُّکِ بُلُسْ اٜ بَرْنَبَ، ٻٜ ندِيوِٻٜ دَغَ ندٜرْ غَرِيرِ مَٻّٜ؞ نغَمْ نٛنْ بُلُسْ اٜ بَرْنَبَ ڤِطِّ سٛلَّارٜ ڤَطٜ مَٻّٜ نغَمْ حٛلُّکِ يِمْٻٜ ٻٜنْ نغَطِي حَکّٜ، ندٜنْ ٻٜ ندِلِّ غَرِيرِ اِکٛونِيَ؞ اَمَّا تٛکُّٻٜ يٜىٰسُ وٛنْٻٜ اَنْتَاکِيَ نَنِ بٜلْطُمْ نَاع سٜطَّ، اٜ ٻٜ کٜىٰوِ رُوحُ اَللَّه؞ تٛو، ندٜ بُلُسْ اٜ بَرْنَبَ نجٛتِّي اِکٛونِيَ، ٻٜ نَتِّ ندٜرْ سُودُ دٛعَارٜ نٛنْ نٛ ٻٜ مبٛووِ وَطُکِ؞ ٻٜ نغَعَجِنِ حَا طُطْٻٜ ندٜرْ يَحُودَنْکٛعٜنْ اٜ غٛطِّ لٜپِّ کٛولِي يٜىٰسُ؞ اَمَّا يَحُودَنْکٛعٜنْ غَݧُٻٜ کٛولٛو يٜىٰسُ اُمِّنِ ٻٜرْطٜ يِمْٻٜ نَاع يَحُودَنْکٛعٜنْ نغَمْ ٻٜ نغَݧَ تٛکُّٻٜ يٜىٰسُ؞ فُو اٜ نٛنْ بُلُسْ اٜ بَرْنَبَ نٜىٰٻِ تٛنْ، اٜ ٻٜ نغَعَجِنَ ٻٜرْندٜ غٛعٛ دٛوْ جٛومِرَاوٛ کٛلُّطٛ کٛ ٻٜ نغَعَجِنْتَ طُمْ غٛونغَ ندٜ اٛ حٛکِّٻٜ بَوْطٜ وَطُکِ اَلَامَاجِ اٜ کُوطٜ کَيْطِنِيطٜ؞ اَمَّا يِمْٻٜ اِکٛونِيَ شٜنْدِي طِطِ؞ وٛٻّٜ تٛکِّ يَحُودَنْکٛعٜنْ، وٛٻّٜ بٛو تٛکِّ لِلَاٻٜ ٻٜنْ؞ سٜيْ يِمْٻٜ نَاع يَحُودَنْکٛعٜنْ اٜ يَحُودَنْکٛعٜنْ اٜ اَرْدِيٻٜ مَٻّٜ فُو ٻٜ کَوْتِ حٛنْدُکٛ ٻٜ اُمَّنٛو لِلَاٻٜ ٻٜ کُبٛرٛوٻٜ اٜ کَاپٜ حَا ٻٜ مبَرَٻٜ؞ ندٜ لِلَاٻٜ ٻٜنْ نَنِ نٛنْ، سٜيْ ٻٜ ندٛغِّ يَاکِ غَرِيرِ لِسْتِرَ اٜ غَرِيرِ دَرْبٜ ندٜرْ لٜيْدِ لِکٛونِيَ، اٜ لَدّٜ غَرِيجٜ طٜنْ؞ تٛنْ ٻٜ نغَعَجِنِ حَبَرُ بٜلْطُمْ؞ ندٜرْ غَرِيرِ لِسْتِرَ اٜ وٛودِ غٛطّٛ جَرَاطٛ؞ دَغَ اٛ دَݧَا اٛ مٜىٰطَايِ دَرٛرَاکِ کٛيْطٜ مَاکٛ؞ وٛنْدٜ ݧَلْندٜ اٜ مٛ حٜتِّندَنٛو وَعَجِنْکِ بُلُسْ، سٜيْ بُلُسْ سُتِيمٛ، يِعِ اٜ مٛ وٛودِ حٛولَارٜ کٜوْتُندٜ اٛ يَمْطِتِنٜىٰ؞ سٜيْ اٛ وِعِ اٜ سٜمْبٜ، «اُمَّ ندَرٛطَا!» طٛنْ اٜ طٛنْ نٜطّٛ اٛنْ اُمِّي فُطِّ يَادُ؞ ندٜ يِمْٻٜ حَوْرُتُٻٜ نغِعِ کٛ بُلُسْ وَطِ، ٻٜ مبِعِ سٜمْبٜىٰ ندٜرْ طٜمْنغَلْ مَٻّٜ نغَلْ لِکٛونِيَارٜ، «اَلَّاجِ نجِڤَّنَکٜعٜنْ ندٜرْ نَنْدِ يِمْٻٜ!» ٻٜ نٛدِّرِ بَرْنَبَ جٜىٰوُسْ، ٻٜ نٛدِّرِ بُلُسْ حٜرْمٜسْ، نغَمْ کَنْکٛ وٛنِ ٻُرْطٛ مٜتُکِ؞ وُرٛ تٛ طُمْ مَوْنِنْتَ اَلَّح مَٻّٜ بِعٜتٜىٰطُمْ جٜىٰوُسْ تٛ دَمُّغَلْ غَرِيرِ ندِنْ نغٛ وٛنِ؞ سٜيْ اَرْدِيطٛ دِينَ جٜىٰوُسْ وَدِّ غَعِ اٜ ڤِنْدِ تٛ دَمُّغَلْ نغَلْ؞ کَنْکٛ اٜ حَوْرُتُٻٜ طُطْٻٜ اٜ ٻٜ نغِطِ سَکَّنْکِ لِلَاٻٜ ٻٜنْ شَکِّرِ؞ اَمَّا ندٜ بَرْنَبَ اٜ بُلُسْ نَنِ نٛنْ، ٻٜ شٜىٰکِ کٛلْتٜ مَٻّٜ نغَمْ ٻٜ نغَنِّي؞ ٻٜ کَٻْتِي ٻٜ نَتِّ ندٜرْ يِمْٻٜ ٻٜنْ، ٻٜ مبِعِ اٜ سٜمْبٜ، «نغَمْ طُمٜ نغَطٛتٛنْ نِحِ؟ مِنٛنْ يِمْٻٜ بٛ مٛوطٛنْ؞ اٜ مِنْ نغَعَجِنَنَعٛنْ حَبَرُ بٜلْطُمْ نغَمْ تُوبٛنْ، اَلٛنْ طٜعٜ کُوطٜ مٜىٰرٜ، نغَيْلِتٛيٛوطٛنْ تٛ اَللَّه مٛ يٛنْکِ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ؞ ندٜرْ جَامَنُوجِ پَٻِّيطِ اَللَّه اَلِي لٜپِّ دُونِيَارُ فُو تٛکَّ طَتٜ طٜ نغِطِ؞ فُو اٜ نٛنْ، اٛ اَلَايِ حٛلُّکِ يِمْٻٜ حٛورٜ مَاکٛ ندٜرْ کُوطٜ بٛطّٜ طٜ اٛ وَطَتَ؞ اٜ مٛ حٛکَّعٛنْ ندِيَمْ دَغَ دٛوْ، اٜ مٛ ٻٜنْدِنَنَعٛنْ غٜسٜ ندٜرْ شَرٜلْ کَانُنغٜلْ، اٜ مٛ حٛکَّعٛنْ ݧَمْندُ، اٜ مٛ وٜلْنَ ٻٜرْطٜ مٛوطٛنْ؞» اَمَّا فُو اٜ بٛلِيطٜ طٜعٜ، لِلَاٻٜ ٻٜنْ تٛرَّکٜ کٛ کَطَ يِمْٻٜ ٻٜنْ حِرْسَنْکِٻٜ شَکِّرِ؞ غَطَ مَاجُمْ يَحُودَنْکٛعٜنْ نغَرِ دَغَ اَنْتَاکِيَ اٜ اِکٛونِيَ؞ ٻٜ ڤٛوطِ حَکِّيلٛ يِمْٻٜ، حَا ٻٜ کُبٛرِي بُلُسْ اٜ کَاپٜ؞ سٜيْ ٻٜ ندَسِمٛ ٻٜ نجَارِمٛ غَطَ غَرِيرِ، نغَمْ اٜ ٻٜ کَمِّي اٛ مَايِي؞ اَمَّا ندٜ تٛکُّٻٜ يٜىٰسُ نغَرِ ڤِلِيمٛ، اٛ اُمِّي، اٛ نَتِّ ندٜرْ غَرِيرِ؞ ندٜ فِنِ، اٛ دِلِّدِ اٜ بَرْنَبَ غَرِيرِ دَرْبٜ؞ بُلُسْ اٜ بَرْنَبَ نغَعَجِنِ حَبَرُ بٜلْطُمْ تٛنْ دَرْبٜ، ٻٜ کٜٻِ تٛکُّٻٜ يٜىٰسُ طُطْٻٜ؞ غَطَ مَاجُمْ ٻٜ شٛعِّي لِسْتِرَ اٜ اِکٛونِيَ اٜ اَنْتَاکِيَ؞ اٜ ٻٜ شٜمْبِطِنَ ٻٜرْطٜ تٛکُّٻٜ يٜىٰسُ، اٜ ٻٜ مبَغِّنَٻٜ ٻٜ ندَرٛو اٜ سٜمْبٜ ندٜرْ تٛکُّکِ يٜىٰسُ؞ ٻٜ مبِعِٻٜ، «سٜيْ اٜ تٛرَّاجِ طُطِّ کٜٻٜتٜنْ نَتُّکِ لَامُ اَللَّه؞» ندٜرْ کٛو نغَلٜ کَوْتَلْ تٛکُّٻٜ يٜىٰسُ، ٻٜ شُٻَنِٻٜ مَوْٻٜ؞ ندٜرْ سُومَيٜىٰرٜ اٜ دٛعَارٜ، ٻٜ نغَطِ شُٻَاٻٜ ٻٜنْ ندٜرْ جُنْغٛ جٛومِرَاوٛ مٛ ٻٜ کٛولِي؞ ندٜ ٻٜ کُولِ لٜيْدِ بِسِيدِيَ، ٻٜ نغَرِ لٜيْدِ بَمْفِيلِيَ؞ ندٜ ٻٜ نغَعَجِنِ وٛلْدٜ اَللَّه ندٜرْ غَرِيرِ فٜرْغَ، سٜيْ ٻٜ ندِلِّرِ غَرِيرِ اَتَالِيَ؞ دَغَ تٛنْ ٻٜ نَتِّ کٛمِوَلْ، ٻٜ کٛوتِ اَنْتَاکِيَ، نغَمْ ٻٜ نجٛتِّنِي کُوغَلْ نغَلْ ٻٜ نغِطِ وَطُکِ ندٜرْ يَادُ ندُنْ؞ اَنْتَاکِيَ وٛنِ غَرِيرِ ندِ تٛکُّٻٜ يٜىٰسُ نغٛنِ غَطَنْٻٜٻٜ دٛعَارٜ اَللَّه بَرْکِطِنَٻٜ وَلَّٻٜ ندٜرْ يَادُ ندُنْ؞ ندٜ ٻٜ نجٛتِّي، ٻٜ کَوْرِتِ کَوْتَلْ تٛکُّٻٜ يٜىٰسُ، ٻٜ طِيوِتَنِٻٜ کٛ اَللَّه وَطِ لَاوٛلْ مَٻّٜ، اٜ نٛ اٛ مَٻِّتِرَنِ لٜپِّ طِ نَاع يَحُودَنْکٛعٜنْ دَمُّغَلْ حٛولَاکِ يٜىٰسُ؞ ٻٜ مبَالِ بَلْطٜ طُطّٜ تٛنْ ندٜرْ تٛکُّٻٜ يٜىٰسُ ٻٜنْ؞ سٜيْ وٛٻّٜ يِمْٻٜ پِوٛيِ لٜيْدِ يَحُودِيَ نغَرِ غَرِيرِ اَنْتَاکِيَ، اٜ ٻٜ اٜکِّتِنَ تٛکُّٻٜ يٜىٰسُ، اٜ ٻٜ مبِعَ، «تٛ اٛنْ نَادَاکَ نٛنْ نٛ اَتَّوْرَ وِعِ اٛنْ کِسَتَا؞» بُلُسْ اٜ بَرْنَبَ نغٜدّٛوتِرِ اٜ مَٻّٜ غٜدِّ نَوْطِ؞ سٜيْ کٛولِيٻٜ يٜىٰسُ وٛنْٻٜ اَنْتَاکِيَ شُٻِ بُلُسْ اٜ بَرْنَبَ اٜ وٛٻّٜ ندٜرْ مَٻّٜ، ٻٜ لِلِٻٜ اُرُشَلِيمَ نغَمْ ٻٜ مٜدَّ اٜ لِلَاٻٜ اٜ مَوْٻٜ وٛنْٻٜ تٛنْ دٛوْ حَالَ کَنْ؞ سٜيْ تٛکُّٻٜ يٜىٰسُ ٻٜنْ طٛفْتِٻٜ ٻٜ نَنْغِ لَاوٛلْ يَاکِ لٜيْطٜ فِنِيکِيَ اٜ سَمَارِيَ، اٜ ٻٜ کٛکَّ تٛکُّٻٜ يٜىٰسُ حَبَرُ تُوبُکِ يِمْٻٜ نَاع يَحُودَنْکٛعٜنْ؞ تٛکُّٻٜ يٜىٰسُ فُو نَنِ بٜلْطُمْ حَبَرُ طُمْ؞ ندٜ ٻٜ نجٛتِّي اُرُشَلِيمَ، کَوْتَلْ تٛکُّٻٜ يٜىٰسُ اٜ لِلَاٻٜ اٜ مَوْٻٜ ٻٜنْ نجَٻِّيٻٜ؞ ندٜنْ بُلُسْ اٜ بَرْنَبَ طِيوِتَنِٻٜ فُو کٛ اَللَّه حُوتِنِرِٻٜ ٻٜ نغَطِ؞ اَمَّا وٛٻّٜ کٛولِيٻٜ يٜىٰسُ ندٜرْ فَارِسَنْکٛعٜنْ اُمِّي، مبِعِ، «دٛولٜ تٛکُّٻٜ يٜىٰسُ نَاع يَحُودَنْکٛعٜنْ نَادٜىٰ، ٻٜ مبِعٜىٰ ٻٜ تٛکَّ کٛ اَتَّوْرَ وِعِ؞» سٜيْ لِلَاٻٜ اٜ مَوْٻٜ کَوْرِتِ نغَمْ ٻٜ مٜدَّ دٛوْ حَالَ کَنْ؞ ندٜ ٻٜ نٜىٰٻِ اٜ ٻٜ فٛطْفٛطْتِرَ دٛوْ فِي طُمْ، بِيتُرُسْ اُمِّي وِعِٻٜ، «بَنْدِرَاٻٜ، اٛنْ اَنْدِ کٛ نٜىٰٻِ اَللَّه سُٻِييَمْ ندٜرْ مٛوطٛنْ مِ وَعَجِنَ حَبَرُ بٜلْطُمْ ندٜرْ لٜپِّ طِ نَاع يَحُودَنْکٛعٜنْ، نغَمْ ٻٜ نَنَ ٻٜ نغَرْتَ تٛکُّٻٜ يٜىٰسُ؞ اَللَّه اَنْدُطٛ ٻٜرْطٜ يِمْٻٜ فُو حٛلِّي اٛ جَٻِيٻٜ ندٜ اٛ حٛکِّٻٜ رُوحُ مَاکٛ نٛنْ نٛ اٛ حٛکِّرِعٜنْطُمْ؞ اٛ فٜىٰرٛوتِرَايِعٜنْ اٜ مَٻّٜ، نغَمْ اٛ يَافَنَکٜٻٜ حَکّٜ ندٜ ٻٜ کٛولِي يٜىٰسُ؞ جٛونِ، نغَمْ طُمٜ ڤٛوندٛتٛنْ اَللَّه اٛنْ نجٛوَنَ تٛکُّٻٜ يٜىٰسُ دٛنْغَلْ نغَلْ اٜنْ مبَاوَايِ رٛنْدَاکِ، اٜنٜنْ اٜ مَامَعٜنْ مٜىٰطٜنْ؟ اَاعَ! نٛنْ نٛ تٛکِّرْطٜنْ يٜىٰسُ جٛومِرَاوٛ کٜٻْطٜنْ کِسْندَمْ بَرْکَ يِدّٜ مَاکٛ، نٛنْ کَمْٻٜ مَا ٻٜ کِسْرَتَ؞» حَوْرُتُٻٜ فُو ندٜعِّتِ کٜتِّندَنِي کٛ بَرْنَبَ اٜ بُلُسْ مبِعَتَٻٜ دٛوْ نٛ اَللَّه حُوتِنِرِٻٜ وَطِ اَلَامَاجِ اٜ کُوطٜ کَيْطِنِيطٜ ندٜرْ لٜپِّ طِ نَاع يَحُودَنْکٛعٜنْ؞ ندٜ ٻٜ کٜىٰݧِ مٜتُکِ، سٜيْ يَاکُبُ وِعِ، «بَنْدِرَاٻٜ، نَنٜىٰ کٛ مبِعَيْمِعٛنْ! جٛونِ سِيمَنْ يٛتِّنِ طِيوِتَنْکِعٜنْ نٛ اَللَّه سُٻِرِ وٛٻّٜ ندٜرْ لٜپِّ طِ نَاع يَحُودَنْکٛعٜنْ، وَرْتِرِٻٜ يِمْٻٜ مُوطُمْ؞ طُمْ فٛتِّدِي اٜ کٛ اَنَّبٛعٜنْ مبِنْدُنٛو، ٻٜ مبِعِي، ‹اَللَّه وِعِي، «غَطَ مَاجُمْ، مِ سٛعّٛيْتٛ، مِ مَحِتٛتٛو وُرٛ دَوْدَ سَنْکِتَانغٛ؞ مِ مَحِتٛونغٛ، مِ دَرْنَنغٛ کَدِمَا، نغَمْ يِمْٻٜ حٛرِيٻٜ فُو طَٻِّتَ جٛومِرَاوٛ، فُو اٜ يِمْٻٜ نَاع يَحُودَنْکٛعٜنْ نٛدِّرْتٜىٰٻٜ اِنْدٜ اَمْ؞ نٛنْ جٛومِرَاوٛ وِعِ، اَنْدِنْطٛ فِي طُعُمْ کٛ نٜىٰٻِ؞» › «تٛو، نغَمْ مَاجُمْ مِنْ اٜ يِيکِ اَمْ، تٛع اٜنْ نغَنُّ يِمْٻٜ نَاع يَحُودَنْکٛعٜنْ نغَيْلِتٛيِيٻٜ تٛ اَللَّه؞ اٜنْ مبِنْدَنْٻٜ طٜرٜوٛلْ تٛع ٻٜ ݧَامَ ݧَمْندُ حَرْمِنِيندُ ندُ طُمْ حِرْسَنِ اَلَّاجِ، تٛع ٻٜ نغَطَ نجٜىٰنُ، تٛع ٻٜ ݧَامَ کٛ مٛيْلَنَا دَاندٜ کٛو کٛ سَاطِ کٛو پِيپَمْ؞ نغَمْ کٛ نٜىٰٻِ اٜ طُمْ وَعَجِنَ اَتَّوْرَ اٜ کٛو ندِيٜ غَرِيرِ، اٜ طُمْ جَنْغَطُمْ کٛو ندٜيٜ ݧَلْندٜ سِوْتَارٜ ندٜرْ شُوطِ دٛعَارٜ؞» سٜيْ لِلَاٻٜ اٜ مَوْٻٜ اٜ کَوْتَلْ تٛکُّٻٜ يٜىٰسُ فُو ندَرْوِ سُٻُکِ وٛٻّٜ دَغَ ندٜرْ مَٻّٜ نغَمْ ٻٜ لِلَٻٜ غَرِيرِ اَنْتَاکِيَ، ٻٜ نجَادَ اٜ بُلُسْ اٜ بَرْنَبَ؞ ٻٜ شُٻِ مَوْٻٜ طِطٛ ندٜرْ مَٻّٜ: يَحُودَ، بِعٜتٜىٰطٛ بَرْسَبَ، اٜ سِيلَ؞ ٻٜ کٛکِّٻٜ طٜرٜوٛلْ بِينغٛلْ: «دَغَ بَنْدِرَاٻٜ مٛوطٛنْ لِلَاٻٜ اٜ مَوْٻٜ، اٜ مِنْ کٛوْنَعٛنْ، اٛنٛنْ بَنْدِرَاٻٜ اَمِنْ دَغَ غٛطِّ لٜپِّ غٛنْطِ ندٜرْ غَرِيرِ اَنْتَاکِيَ اٜ ندٜرْ لٜيْطٜ سِيرِيَ اٜ کِلِيکِيَ؞ مِنْ نَنِي حَبَرُ وٛٻّٜ ندٜرْ اَمِنْ اُمِّنَنِيعٛنْ حَکِّيلٛ اٜ مٜتٜمٜتٜىٰجِ مَٻّٜ اٜ ٻٜ نغَنَّعٛنْ، کٛو ندٜ نَاع مِنٛنْ لِلِٻٜ؞ کَنْجُمْ وَطِ مِنْ کَوْرِتِ کٛعٜ اَمِنْ مِنْ ندَرْوِ سُٻُکِ وٛٻّٜ ندٜرْ اَمِنْ مِنْ لِلٛيَٻٜ تٛ مٛوطٛنْ، حَوْتِ اٜ بَرْنَبَ اٜ بُلُسْ حِغٛوٻٜ اَمِنْ، شٛورُٻٜ يٛنْکِيجِ مَٻّٜ نغَمْ حُوَنْکِ جٛومِرَاوٛ مٜىٰطٜنْ يٜىٰسُ اَلْمَسِيحُ؞ نغَمْ نٛنْ مِنْ لِلٛيِ يَحُودَ اٜ سِيلَ ٻٜ مٜدَّ اٜ مٛوطٛنْ حٛنْدُکٛ اٜ حٛنْدُکٛ دٛوْ کٛ مِنْ مبِنْدَنِعٛنْ؞ طُمْ دَرْوُکِ رُوحُ اَللَّه اٜ اَمِنْ، تٛع مِنْ نجٛوَنَعٛنْ وٛنْغَلْ تٜدّٛرَلْ، سٜيْ نِ طُعُمْ نَنْغُطُمْ دٛولٜ: تٛع اٛنْ ݧَامُ کٛ طُمْ سَکَّنِ غُنْکِيجِ کٛو کٛ سَاطِ کٛو کٛ طُمْ مٛيْلَنِ دَاندٜ کٛو پِيپَمْ، ندٜنْ تٛع اٛنْ نغَطُ نجٜىٰنُ؞ تٛ اٛنْ شُرِي کٛعٜ مٛوطٛنْ اٜ وَطُکِ فِي طُعُمْ اٛنْ نغَطِي بٛطُّمْ؞ اَللَّه وَلَّعٜنْ!» سٜيْ ٻٜ لِلِٻٜ يَاکِ اَنْتَاکِيَ؞ ندٜ ٻٜ نجٛتِّي تٛنْ، ٻٜ کَوْرِتِ تٛکُّٻٜ يٜىٰسُ، ٻٜ کٛکِّٻٜ طٜرٜوٛلْ نغٛلْ؞ ندٜ تٛکُّٻٜ يٜىٰسُ وٛنْٻٜ اَنْتَاکِيَ نجَنْغِنغٛلْ، ٻٜ نَنِ بٜلْطُمْ نغَمْ نغٛلْ سٜمْبِطِنِيٻٜ؞ ندٜ يَحُودَ اٜ سِيلَ ٻٜ اَنَّبٛعٜنْ، ٻٜ شٜمْبِطِنِ ٻٜرْطٜ تٛکُّٻٜ يٜىٰسُ، ٻٜ مبَغِّنِٻٜ دٛوْ فِي طُطُّمْ؞ غَطَ ٻٜ مبَالِي بَلْطٜ تٛنْ، ٻٜ طٛفْتَا ٻٜ مبَرْکِطِنِٻٜ، ٻٜ شٛعِّي تٛ لِلٛيْٻٜٻٜ؞ [اَمَّا سِيلَ جٛوطِي طٛنْ؞] بُلُسْ اٜ بَرْنَبَ بٛو نجٛوطِي ندٜرْ اَنْتَاکِيَ اٜ يِمْٻٜ طُطْٻٜ اٜ ٻٜ اٜکِّتِنَ، اٜ ٻٜ نغَعَجِنَ وٛلْدٜ جٛومِرَاوٛ؞ غَطَ بَلْطٜ سٜطَّ بُلُسْ وِعِ بَرْنَبَ، «اٜنْ شٛعّٛ غَرِيجٜ تٛ نغَعَجِنّٛوطٜنْ وٛلْدٜ جٛومِرَاوٛ، ندَارٜنْ نٛ تٛکُّٻٜ يٜىٰسُ نغٛنْتِندِرِ؞» بَرْنَبَ اٜ يِطِ ٻٜ نجَادَ اٜ يَحَيَ بِعٜتٜىٰطٛ مَرْکُسْ؞ اَمَّا بُلُسْ يِعِ طُمْ حَانَايِ، نغَمْ مَرْکُسْ سٜنْدِرِينٛ اٜ مَٻّٜ اٜ لٜيْدِ بَمْفِيلِيَ، اٛ حٜىٰݧَايِ کُوغَلْ نغَلْ اٛ فُطِّدِ اٜ مَٻّٜ؞ ٻٜ نغٜدّٛوتِرِ نَاع سٜطَّ حَا غٜدِّ طِنْ نجَارِٻٜ اٜ سٜنْدِرْکِ؞ بَرْنَبَ حٛشِّ مَرْکُسْ، ٻٜ نَتِّ کٛمِوَلْ يَاکِ سَيِيفُرُسْ؞ اَمَّا بُلُسْ سُٻِ سِيلَ، دِلِّدِ اٜ مَاکٛ؞ تٛکُّٻٜ يٜىٰسُ نغَطِٻٜ ندٜرْ جُنْغٛ جٛومِرَاوٛ نغَمْ اٛ رٜىٰنَٻٜ؞ سٜيْ ٻٜ تٛکِّ ندٜرْ لٜيْطٜ سِيرِيَ اٜ کِلِيکِيَ، اٜ ٻٜ شٜمْبِطِنَ تٛکُّٻٜ يٜىٰسُ؞ بُلُسْ يَحِ غَرِيرِ دَرْبٜ اٜ غَرِيرِ لِسْتِرَ؞ تٛ لِسْتِرَ بٛو اٜ وٛودِ غٛطّٛ کٛولِيطٛ يٜىٰسُ بِعٜتٜىٰطٛ تِمٛوتِ؞ مَدُوجٛ مَاکٛ نٛ يَحُودَنْکٜىٰجٛ تٛکُّطٛ يٜىٰسُ، ݧَاکٛ مَاکٛ بٛو نٛ حٜلٜنَنْکٜىٰجٛ؞ تٛکُّٻٜ يٜىٰسُ وٛنْٻٜ لِسْتِرَ اٜ اِکٛونِيَ اٜ مٜتَ حَالَ مبٛطْکَ دٛوْ تِمٛوتِ؞ بُلُسْ اٜ يِطِ يَادُکِ اٜ مَاکٛ، نغَمْ مَاجُمْ اٛ نَادِمٛ؛ نغَمْ يَحُودَنْکٛعٜنْ وٛنْٻٜ بِغٜىٰجٜ طٜنْ فُو اٜ اَنْدِ ݧَاکٛ تِمٛوتِ نٛ حٜلٜنَنْکٜىٰجٛ؞ غَرِيجٜ تٛ ٻٜ نجَالِ فُو، اٜ ٻٜ مبِعَ تٛکُّٻٜ يٜىٰسُ کٛ لِلَاٻٜ اٜ مَوْٻٜ وٛنْٻٜ اُرُشَلِيمَ ندَرْنِ نغَمْ ٻٜ تٛکَّطُمْ؞ نٛنْ تٛکُّٻٜ يٜىٰسُ ٻٜيْدِ سٜمْبٜ ندٜرْ حٛولَاکِ يٜىٰسُ، اٜ ٻٜ ٻٜيْدَ طُوطُکِ کٛو ندٜيٜ ݧَلْندٜ؞ رُوحُ اَللَّه حَطِٻٜ وَعَجِنْکِ وٛلْدٜ اَللَّه ندٜرْ لٜيْدِ اَاسِيَ، نغَمْ نٛنْ ٻٜ ندِلِّ لٜيْطٜ فِرِيجِيَ اٜ غَلَاتِيَ؞ ندٜ ٻٜ نغَرِ کٜىٰرٛلْ لٜيْدِ مِيسِيَ، ٻٜ نغِطِي يَاکِ لٜيْدِ بِتِينِيَ، اَمَّا رُوحُ يٜىٰسُ، وَاتٛ رُوحُ اَللَّه، جَٻَايِ؞ نغَمْ مَاجُمْ، ٻٜ تٛکِّرِ ندٜرْ لٜيْدِ مِيسِيَ، ٻٜ نجَحِ غَرِيرِ بِعٜتٜىٰندِ تٛورُوَسْ؞ ندٜرْ جٜمَّارٜ ندٜنْ بُلُسْ حٛيْطِ؞ اٛ يِعِي نٜطّٛ مَکِدٛونِيَ اٜ دَرِي اٜ تٛرٛومٛ اٜ وِعَ، «وٛرٛيْ مَکِدٛونِيَ، مبَلَّامِنْ!» ندٜ بُلُسْ حٛيْطِ کٛيْطٛلْ نغٛلْ، طٛنْ اٜ طٛنْ مِنْ ندَرْوِ يَاکِ مَکِدٛونِيَ، نغَمْ مِنْ اَنْدِتِي اَللَّه نٛدِّيمِنْ مِنْ نغَعَجِنَنَٻٜ حَبَرُ بٜلْطُمْ کَمْٻٜ مَا؞ مِنْ نَتِّ کٛمِوَلْ اٜ تٛورُوَسْ، مِنْ نجَحِ حَا سَمُتَرْکِيَ؞ ندٜ فِنِ مِنْ نجَحِ نِيَافٛلِسْ؞ دَغَ طٛنْ مِنْ نجَحِ فِلِبِ، غَرِيرِ مَوْندِ ندٜرْ لٜيْدِ مَکِدٛونِيَ نغٛنْدِ لٜيْ لَامُ رٛومَنْکٛعٜنْ؞ مِنْ مبَالِ بَلْطٜ تٛنْ؞ ݧَلْندٜ سِوْتَارٜ، مِنْ مبُرْتِي غَرِيرِ ندِنْ مِنْ نجَحِ رٜغٛرْدٜ شَانغٛلْ، نغَمْ اٜ مِنْ کَمِّي اٜ وٛودِ وِغٜىٰرٜ تٛ يَحُودَنْکٛعٜنْ نغَطَتَ دٛعَارٜ تٛنْ؞ تٛنْ مِنْ تَوِ رٜوْٻٜ اٜ کَوْرِتِ؞ مِنْ نجٛوطِي، اٜ مِنْ مٜدَّ اٜ مَٻّٜ؞ ندٜرْ مَٻّٜ اٜ وٛودِ غٛطّٛ دٜبّٛ بِعٜتٜىٰطٛ لِيدِيَ، پِوٛيْطٛ غَرِيرِ تَيَاتِرَ کُلٛووٛ اَللَّه؞ اٜ مٛ سٛورَ کٛلْتٜ بٛطٜىٰجٜ طٜ شٜىٰدٜ؞ جٛومِرَاوٛ مَٻِّتِ ٻٜرْندٜ مَاکٛ اٛ حٜتِّندَنِي کٛ بُلُسْ وِعَتَ؞ غَطَ کَنْکٛ اٜ وُرٛ مَاکٛ فُو ٻٜ نغَطَنَامَ بَڤْتِسْمَ، سٜيْ اٛ تٛرِيمِنْ، اٛ وِعِ، «تٛ اٛنْ جَٻِي مِ کٛولِيطٛ جٛومِرَاوٛ اٜ غٛونغَ، نغَرٜىٰ نجٛوطٛوطٛنْ تٛ وُرٛ اَمْ؞» اٛ اٜسْتِمِنْ مِنْ نجِڤّٛو تٛ مَاکٛ، سٜيْ مِنْ نجِڤِّي؞ وٛنْدٜ ݧَلْندٜ اٜ مِنْ نجَحَ تٛ طُمْ وَطَتَ دٛعَارٜ، سٜيْ مِنْ کَوْرِ اٜ غٛطّٛ کٛرْطٛ؞ کٛرْطٛ اٛنْ اٛ دَرْنٛووٛ، اٜ مٛ حٜٻَنَ جٜيْٻٜمٛ شٜىٰدٜ طُطّٜ اٜ کُوغَلْ مَاکٛ نغَلْ رَرْنُکِ؞ سٜيْ اٛ وَطِ کَ تٛکُّکِمِنْ، مِنٛنْ اٜ بُلُسْ، اٜ مٛ وُلَّ، اٜ مٛ وِعَ، «يِمْٻٜ ٻٜعٜ ٻٜ کُوَنٛوٻٜ اَللَّه مَوْطٛ! اٜ ٻٜ اَنْدِنَعٛنْ لَاوٛلْ کِسْندَمْ؞» اٛ وَطِ بَلْطٜ طُطّٜ اٜ مٛ وَطَ نٛنْ حَا بُلُسْ ٻٜرْنِ، يٜىٰپِيمٛ، وِعِ غِنّٛلْ نغٛلْ، «ندٜرْ اِنْدٜ يٜىٰسُ اَلْمَسِيحُ، اٜ مِ وِعِمَا وُرْتَ ندٜرْ مَاکٛ!» طٛنْ اٜ طٛنْ غِنّٛلْ نغٛلْ وُرْتِيمٛ؞ ندٜ جٛومِرَاٻٜ مَاکٛ نغِعِ لَاوٛلْ حٜٻُکِ شٜىٰدٜ مَٻّٜ تٛ کٛرْطٛ اٛنْ دَرَکٜ، ٻٜ نَنْغِ بُلُسْ اٜ سِيلَ، ٻٜ ندَسِٻٜ ٻٜ نجَارِيٻٜ لُومٛ، تٛنْ تٛ مَوْٻٜ غَرِيرِ؞ ٻٜ نجَارِٻٜ يٜىٰسٛ مَوْٻٜ غَرِيرِ ندِنْ، ٻٜ مبِعِ، «ٻٜعٜ يِمْٻٜ طِطٛ ٻٜ يَحُودَنْکٛعٜنْ، اٜ ٻٜ اُمِّنَ حَکِّيلٛ يِمْٻٜ غَرِيرِ مٜىٰطٜنْ نَاع سٜطَّ؞ اٜ ٻٜ اٜکِّتِنَ ندٛنُوجِ طِ حَانَا نجَٻٜنْ کٛو تٛکّٜنْ، نغَمْ اٜنٜنْ اٜنْ رٛومَنْکٛعٜنْ؞» يِمْٻٜ طُطْٻٜ کَوْرِتِ دٛوْ مَٻّٜ؞ مَوْٻٜ غَرِيرِ نغَطِ طُمْ ٻٛرْتِٻٜ طُمْ فِيِٻٜ؞ غَطَ ٻٜ ڤِيَامَ ڤِيطٜ کَلُّطٜ، ٻٜ مَٻَّا ندٜرْ سُودُ شُرَلْ؞ مَوْٻٜ ٻٜنْ مبِعِ دٜىٰنٛووٛ سُودُ شُرَلْ رٜىٰنَٻٜ بٛطُّمْ؞ کَنْکٛ بٛو، ندٜ اٛ نَنِ نٛنْ، اٛ نَتِّنِٻٜ ندٜرْ سُودُ شُرَلْ شَکَارُ، اٛ حَٻِّ کٛيْطٜ مَٻّٜ حَکُّندٜ لٜطّٜ طِطِ مَوْطٜ؞ شَکَ جٜمَّ، بُلُسْ اٜ سِيلَ اٜ ٻٜ نغَطَ دٛعَارٜ اٜ ٻٜ مَنْتَ اَللَّه اٜ غِمِ؞ نَنْغَاٻٜ حٛرِيٻٜ اٜ کٜتِّندَنِي کٛ ٻٜ مبِعَتَ؞ طٛنْ اٜ طٛنْ لٜيْدِ دِمْبِي دِمْبَاکِ مَوْکِ، حَا فُطّٛودٜ سُودُ شُرَلْ ندُنْ دِمْبِي؞ دَمُّطٜ طٜنْ فُو مَٻِّتِي، ٻٛغِّ نجَمْندِ طِ طُمْ حَٻِّرِ وٛنْٻٜ ندٜرْ سُودُ شُرَلْ ندُنْ فُو تَپِ؞ ندٜ دٜىٰنٛووٛ سُودُ شُرَلْ اٛنْ حُيْلِي، اٛ يِعِ دَمُّطٜ طٜنْ فُو اٜ مَٻِّتِي، اٛ کَمِّ مَٻَّاٻٜ فُو ندٛغِّي؞ نغَمْ مَاجُمْ اٛ سٛرْتِ کَافَحِ نغَمْ اٛ وَرَ حٛورٜ مَاکٛ؞ سٜيْ بُلُسْ نٛدِّ اٜ سٜمْبٜ، وِعِ، «تَاع وَرُ حٛورٜ مَاطَ؞ مِنْ فُو اٜ مِنْ طٛنْ!» دٜىٰنٛووٛ اٛنْ وِعِ حٛکّٜىٰ فِتِلَارُ، اٛ دٛغِّ اٛ نَتِّ تٛ بُلُسْ اٜ سِيلَ نغٛنِ، اٛ دِشِّي يٜىٰسٛ مَٻّٜ، اٜ مٛ دِوْنَ نغَمْ کُلٛلْ؞ ندٜنْ اٛ وُرْتِنِٻٜ، اٛ وِعِٻٜ، «مٛودِٻّٜ، کٛ نغَطَيْمِ مِ حِسَ؟» ٻٜ نٛوتِي ٻٜ مبِعِ، «حٛولَ يٜىٰسُ جٛومِرَاوٛ، اَنْ اٜ وُرٛ مَاطَ فُو، اٛنْ کِسَيْ؞» ٻٜ مٜتَنِمٛ وٛلْدٜ جٛومِرَاوٛ، کَنْکٛ اٜ وُرٛ مَاکٛ فُو؞ ندٜرْ جٜمَّارٜ ندٜنْ، اٛ وُرْتِنِٻٜ، اٛ لٛوتَنِٻٜ نَوْنٛوطٜ؞ اٜ نغٜلْ طٛنْ شَرٜلْ اٛ وَطَنَا بَڤْتِسْمَ، کَنْکٛ اٜ وُرٛ مَاکٛ فُو؞ ندٜنْ اٛ يَارِ بُلُسْ اٜ سِيلَ وُرٛ مَاکٛ، اٛ حٛکِّٻٜ ݧَمْندُ؞ کَنْکٛ اٜ وُرٛ مَاکٛ فُو ٻٜ نَنِ بٜلْطُمْ نغَمْ ٻٜ نغَرْتِي کٛولِيٻٜ اَللَّه؞ ندٜ وٜىٰتِ، مَوْٻٜ غَرِيرِ ندِنْ لِلٛيِ تَادِيٻٜ مبِعَ دٜىٰنٛووٛ اٛنْ اٛ يٛوفَ بُلُسْ اٜ سِيلَ ندِلَّ؞ سٜيْ دٜىٰنٛووٛ اٛنْ وِعِ بُلُسْ، «مَوْٻٜ لِلٛيِي مبِعِ طُمْ يٛوفَعٛنْ؞ نغَمْ نٛنْ مبُرْتٜىٰ جٛونِ، نجَحٛنْ جَمْ؞» اَمَّا بُلُسْ وِعِمٛ، «ٻٜ نغَطِي طُمْ فِيِيمِنْ يٜىٰسٛ يِمْٻٜ دَغَ مِنْ نغَطَنَاکَ کِيتَ، ٻٜ مَٻِّيمِنْ ندٜرْ سُودُ شُرَلْ؞ مِنٛنْ بٛو، مِنْ رٛومَنْکٛعٜنْ؞ ندٜنْ جٛونِ ٻٜ مبُرْتِنَمِنْ اٜ سُوطٜ؟ طُمْ وَطَتَاکٛ سَمْ! دٛولٜ کَمْٻٜ اٜ کٛعٜ مَٻّٜ، ٻٜ نغَرَ طٛعٛ ٻٜ مبُرْتِنَمِنْ!» سٜيْ تَادِيٻٜ ٻٜنْ نجَحِ طِيوِتَنِ مَوْٻٜ غَرِيرِ حَالَ کَنْ؞ ندٜ ٻٜ نَنِ بُلُسْ اٜ سِيلَ ٻٜ رٛومَنْکٛعٜنْ، ٻٜ کُلِ؞ ٻٜ نجَحِ ٻٜ تُوبَنِٻٜ، ٻٜ مبُرْتِنِٻٜ سُودُ شُرَلْ ندُنْ؞ ٻٜ تٛرِيٻٜ ٻٜ مبُرْتٛو غَرِيرِ مَٻّٜ؞ ندٜ بُلُسْ اٜ سِيلَ مبُرْتِي سُودُ شُرَلْ ندُنْ، ٻٜ نَتِّ وُرٛ لِيدِيَ؞ ٻٜ نغِيدِ اٜ تٛکُّٻٜ يٜىٰسُ، ٻٜ شٜمْبِطِنِ ٻٜرْطٜ مَٻّٜ؞ غَطَ مَاجُمْ ٻٜ ندِلِّ؞ ندٜ بُلُسْ اٜ سِيلَ تٛکِّ لَاوٛلْ تٛکُّنغٛلْ ندٜرْ غَرِيجٜ اَمْڤِبٛلِسْ اٜ اَفٛلٛونِيَ، سٜيْ ٻٜ نغَرِ تَسَلٛونِکَ؞ غَرِيرِ ندِنْ اٜ وٛودِ سُودُ دٛعَارٜ يَحُودَنْکٛعٜنْ؞ سٜيْ بُلُسْ نَتِّ ندٜرْ سُودُ دٛعَارٜ ندُنْ نٛنْ نٛ اٛ وٛووِ وَطُکِ؞ اٛ وَطِ يٛنْتٛوجٜ تَتِ ݧَلْندٜ سِوْتَارٜ فُو اٜ مٛ نَتَّ سُودُ دٛعَارٜ ندُنْ اٜ مٛ مٜدَّ اٜ مَٻّٜ دٛوْ دٜفْتٜرٜ شٜنِيندٜ؞ اٜ مٛ فَمْتِنَٻٜ اٜ مٛ تَبِّتِنَنَٻٜ ندٜرْ دٜفْتٜرٜ شٜنِيندٜ وِعُکِ دٛولٜ اَلْمَسِيحُ تٛرّٜىٰ، ندٜنْ اٛ اُمّٛو دَغَ مَيْدٜ؞ اٛ وِعِٻٜ، «يٜىٰسُ اٛعٛ مٛ نغَعَجِنَنَيْمِعٛنْ حَبَرُ مَاکٛ، کَنْکٛ وٛنِ اَلْمَسِيحُ؞» وٛٻّٜ ندٜرْ يَحُودَنْکٛعٜنْ نجَٻِکَ، ٻٜ تٛکِّ بُلُسْ اٜ سِيلَ، کَمْٻٜ اٜ يِمْٻٜ نَاع يَحُودَنْکٛعٜنْ طُطْٻٜ کُلٛوٻٜ اَللَّه، حَوْتِ اٜ رٜوْٻٜ طُطْٻٜ غٛودُٻٜ مَنْغُ؞ اَمَّا وٛٻّٜ يَحُودَنْکٛعٜنْ ٻٜ کٛولَاکِ يٜىٰسُ نَنِ لَوْلِيرُ بُلُسْ اٜ سِيلَ؞ سٜيْ ٻٜ کَوْرِتِ سُکَحٛ مٜىٰرٜحٛ، نغِيلٛتٛوکٛ ندٜرْ لُومٛ؞ ٻٜ اُمِّنَنِ فُو يِمْٻٜ غَرِيرِ ندِنْ حَکِّيلٛ؞ ٻٜ نَتِّ وُرٛ جَاسٛنْ، اٜ ٻٜ طَٻِّتَ بُلُسْ اٜ سِيلَ نغَمْ ٻٜ نجَارَٻٜ يٜىٰسٛ يِمْٻٜ؞ ندٜ ٻٜ کٜٻْتَايِ بُلُسْ اٜ سِيلَ، ٻٜ ندَسٛيِ جَاسٛنْ اٜ وٛٻّٜ تٛکُّٻٜ يٜىٰسُ، ٻٜ نغَدِّٻٜ يٜىٰسٛ مَوْٻٜ غَرِيرِ، اٜ ٻٜ مبِعَ اٜ سٜمْبٜ، «رَا يِمْٻٜ کَطٛوٻٜ جٛنْدٜ جَمْ کٛو تٛيٜ، رَا ٻٜ نغَرِي حَا طٛعٛ؞ جَاسٛنْ بٛو جِڤِّنِيٻٜ ندٜرْ وُرٛ مُوطُمْ! ٻٜ فُو ٻٜ تٛکَّتَا کٛ کَيْسَرْ لَامِيطٛ وِعِ، اٜ ٻٜ مبِعَ اٜ وٛودِ غٛطّٛ لَامِيطٛ بِعٜتٜىٰطٛ يٜىٰسُ؞» ندٜ يِمْٻٜ غَرِيرِ ندِنْ اٜ مَوْٻٜ مَٻّٜ نَنِ نٛنْ، حَکِّيلٛ مَٻّٜ اُمِّي؞ مَوْٻٜ ٻٜنْ نغَطِ جَاسٛنْ اٜ ٻٜ اٛ نَنْغِدَا نجٛٻِ شٜىٰدٜ، ندٜنْ ٻٜ نجٛوفِٻٜ؞ ندٜ جٜمَّ وَطِ، تٛکُّٻٜ يٜىٰسُ نغَطِ بُلُسْ اٜ سِيلَ نجَحَ غَرِيرِ بِيرِيَ؞ ندٜ ٻٜ نجٛتِّي غَرِيرِ ندِنْ، ٻٜ نجَحِ سُودُ دٛعَارٜ يَحُودَنْکٛعٜنْ؞ يِمْٻٜ غَرِيرِ بِيرِيَ ٻُرِي يِمْٻٜ تَسَلٛونِکَ نغِکُّ بٛطُّمْ نغَمْ ٻٜ نجَٻِي حَبَرُ طُمْ بُلُسْ وَدَّنِٻٜ اٜ جُوطٜ طِطِ؞ اٜ ٻٜ لِنْشِتَ دٜفْتٜرٜ شٜنِيندٜ کٛو ندٜيٜ ݧَلْندٜ، نغَمْ ٻٜ نغِعَ کٛو کٛ بُلُسْ اٜکِّتِنْتَٻٜ طُمْ غٛونغَ؞ يَحُودَنْکٛعٜنْ طُطْٻٜ نجَٻِ وٛلْدٜ جٛومِرَاوٛ، حَا اٜ رٜوْٻٜ حٜلٜنَنْکٛعٜنْ غٛودُٻٜ مَنْغُ اٜ وٛرْٻٜ حٜلٜنَنْکٛعٜنْ طُطْٻٜ؞ ندٜ يَحُودَنْکٛعٜنْ تَسَلٛونِکَ نَنِ بُلُسْ وَعَجِنِي وٛلْدٜ اَللَّه ندٜرْ غَرِيرِ بِيرِيَ، ٻٜ نجَحِ تٛنْ مَا، ٻٜ اُمِّنِ حَکِّيلٛ يِمْٻٜ؞ طٛنْ اٜ طٛنْ تٛکُّٻٜ يٜىٰسُ نغَطِ بُلُسْ حُولَ فٛنْغٛ مَايٛ، اَمَّا سِيلَ اٜ تِمٛوتِ نجٛوطِي ندٜرْ غَرِيرِ ندِنْ؞ طٛفْتُٻٜ بُلُسْ بٛو نجَادِ اٜ مَاکٛ ندٜرْ کٛمِوَلْ حَا غَرِيرِ اَتِنَ؞ ندٜ ٻٜ نجٛتِّي تٛنْ، بُلُسْ لِلٛيِٻٜ ٻٜ مبِعَ سِيلَ اٜ تِمٛوتِ نغَرَ تٛ مَاکٛ ندٜرْ يَوْطَارٜ؞ شَرٜلْ کٛ بُلُسْ اٜ رٜنْتِ غَرٛلْ سِيلَ اٜ تِمٛوتِ اٜ غَرِيرِ اَتِنَ، ٻٜرْندٜ مَاکٛ نَاوِي نَاع سٜطَّ ندٜ اٛ يِعِ نٛ غَرِيرِ ندِنْ حٜىٰوِرِ غُنْکِيجِ؞ نغَمْ مَاجُمْ اٜ مٛ يٜدّٛوتِرَ اٜ يَحُودَنْکٛعٜنْ اٜ وٛٻّٜ نَاع يَحُودَنْکٛعٜنْ کُلٛوٻٜ اَللَّه ندٜرْ سُودُ دٛعَارٜ؞ طٛنْمَا کٛو ندٜيٜ اٜ مٛ وَطَ نٛنْ ندٜرْ لُومٛ اٜ ٻٜ اٛ حَوْرِ طٛنْ فُو؞ سٜيْ وٛٻّٜ غٛودُٻٜ اَنْدَلْ بِعٜتٜىٰٻٜ اَبِکُورِعٜنْ اٜ سِتٛوکِعٜنْ مٜدِّ اٜ مَاکٛ؞ وٛٻّٜ مَٻّٜ اٜ مبِعَ، «طُمٜ اٛعٛ مَوْنِنٛووٛ حٛورٜ مٛ اَنْدَا کٛو طُمٜ يِطِ وِعُکِ؟» وٛٻّٜ مبِعِ، «اٜ مِنْ نغِعَ بٛ اٛ غَعَجِنٛووٛ حَبَرُ اَلَّاجِ غٛطّٜ لٜيْطٜ؞» ٻٜ مبِعُ نٛنْ نغَمْ اٜ مٛ وَعَجِنَ حَبَرُ يٜىٰسُ اٜ اُمَّاکِ مَيْٻٜ؞ نغَمْ نٛنْ ٻٜ نجَارِمٛ يٜىٰسٛ مَوْٻٜ غَرِيرِ تٛ وِغٜىٰرٜ بِعٜتٜىٰندٜ پٛلْدٜ اَرَاسَ، ٻٜ مبِعِمٛ، «اٜ مِنْ نغِطِ اَنْدُکِ اٜکِّتِنٛلْ کٜسٛلْ نغٛلْ اٜکِّتِنْتَا، نغَمْ اَ وَدِّي فِي طُمْ مِنْ مٜىٰطَايِ نَنُکِ؞ اٜ مِنْ نغِطِ اَنْدُکِ مَعَنَ مَاجُمْ؞» يِمْٻٜ غَرِيرِ اَتِنَ اٜ حٛٻّٜ جٛوطِيٻٜ طٛنْ وَلَا کٛ ٻٜ ٻُرِ يِطُکِ بٛ نَنُکِ فِي کٜسُمْ ٻٜ مٜتَ دٛوْ مَاجُمْ؞ سٜيْ بُلُسْ دَرِي يٜىٰسٛ مَوْٻٜ ٻٜنْ تٛ پٛلْدٜ اَرَاسَ، اٛ وِعِ، «اٛنٛنْ يِمْٻٜ اَتِنَ، مِ يِعِي اٜ کٛو نغٛلٜ لَاوٛلْ اٛنْ غِطُٻٜ تٛکُّکِ دِينَ نَاع سٜطَّ، نغَمْ ندٜ نغِيلِيمِ ندٜرْ غَرِيرِ مٛوطٛنْ، اٜ مِ رَارَ بِغٜىٰجٜ دِينَ مٛوطٛنْ حَا مِ يِعِ سَکِّرْدٜ، طُمْ وِنْدِ دٛوْ مَيْرٜ ‹نغَمْ اَللَّه مٛ اَنْدَاکَ؞› تٛو، اٛنْ طٛنْ مٛ مَوْنِنْتٛنْ ندٜرْ شِيَ اَنْدَلْ، کَنْکٛ نغِطُمِ اَنْدِنْکِعٛنْ؞ اَللَّه تَغُطٛ دُونِيَارُ اٜ کٛ وٛنِ ندٜرْ مَيْرُ فُو، کَنْکٛ وٛنِ جٛومُ دٛوْ اٜ لٜيْ؞ اٛ جٛوطَتَاکٛ ندٜرْ شُوطِ مَحِرَاطِ جُوطٜ؞ کَنْکٛ اٛ يِطَا بَلَّلْ نٜطّٛ؞ وَلَا کٛو طُمٜ کٛ يِمْٻٜ مبَاوَتَ وَطَنْکِمٛ، نغَمْ کَنْکٛ حٛکَّتَ يِمْٻٜ يٛنْکِ اٜ فٛوفَانغٛ اٜ کٛو طُمٜ؞ دَغَ تٛ نٜطّٛ غٛعٛتٛ اَللَّه تَغِ لٜپِّ فُو، اٛ جٛوطِنِطِ ندٜرْ دُونِيَارُ؞ اٛ دَرْنِ شَرٜلْ نغٜلْ ٻٜ نغَطَتَ کٜىٰرٛلْ جٛنْدٜ مَٻّٜ فُو؞ اَللَّه وَطِي طُعُمْ نغَمْ ٻٜ طَٻِّتَمٛ طُمْ غَطٛتٛوطُمْ ٻٜ مبُمْبُنْتَ ٻٜ کٜٻَمٛ، کٛو ندٜ اٛ وٛطَّا کٛو مٛيٜ مٜىٰطٜنْ؞ نغَمْ غٛطّٛ وِعِ، ‹يٛنْکِ مٜىٰطٜنْ اٜ يَادُ مٜىٰطٜنْ اٜ جٛنْدٜ مٜىٰطٜنْ طُمْ فُو تٛ مَاکٛ طُمْ پِوٛيِ؞› نٛنْ نٛ وٛٻّٜ غِمٛوٻٜ مٛوطٛنْ مبِعِ، ‹غٛونغَ اٜنٜنْ مَا، اٜنْ لٜݧٛلْ مَاکٛ؞› تٛو، ندٜ اٜنْ لٜݧٛلْ اَللَّه، حَانَايِ کَمّٛوطٜنْ اٜ مٛ نَنْدِ اٜ غٛطُّمْ غَطِرَاطُمْ اٜ جِينَارِ کٛو اٜ اَجُرْفَارِ کٛو اٜ حَيْرٜ شٜحَاندٜ، کٛو اٜ کٛ نٜطّٛ وَطِرِ ݧُمٛ مُوطُمْ؞ اَللَّه مُݧَنِي يِمْٻٜ کٛ ٻٜ نغٛنّٛو ندٜرْ شِيَ اَنْدَلْ؞ اَمَّا جٛونِ، اٜ مٛ وِعَ يِمْٻٜ فُو کٛو تٛيٜ ٻٜ تُوبَ، نغَمْ اٛ سِرْيَکٜ ݧَلْندٜ ندٜ اٛ وَطَنْتَ دُونِيَارُ کِيتَ ندٜرْ غٛونغَ؞ اٛ وَطَيْ شُٻَاطٛ مَاکٛ وَطَ کِيتَ کَنْ؞ اٛ تَبِّتِنَنِيطُمْ يِمْٻٜ فُو ندٜ اٛ اُمِّنِمٛ دَغَ مَيْدٜ؞» ندٜ ٻٜ نَنِ بُلُسْ اٜ مٜتَ دٛوْ اُمَّاکِ مَيْٻٜ، وٛٻّٜ نجَلِمٛ، وٛٻّٜ بٛو مبِعِ، «اٜ مِنْ نغِطِ ٻٜيْدَا مٜتَنْکِمِنْ دٛوْ فِي طُعُمْ وٛنْدٜ ݧَلْندٜ؞» سٜيْ بُلُسْ دِلِّ اَلِٻٜ؞ اَمَّا وٛٻّٜ نجَٻِ کٛ بُلُسْ وِعِ ٻٜ تٛکِّ يٜىٰسُ؞ ندٜرْ مَٻّٜ اٜ وٛودِ غٛطّٛ غٛنْطٛ ندٜرْ کَوْتَلْ پٛلْدٜ اَرَاسَ بِعٜتٜىٰطٛ دِيٛنِيسِيُسْ، کَنْکٛ اٜ دٜبّٛ بِعٜتٜىٰطٛ دَمَارِسْ، ندٜنْ اٜ وٛٻّٜ؞ غَطَ مَاجُمْ، بُلُسْ اَلِ اَتِنَ، يَحِ کٛرِنْتِ؞ تٛنْ اٛ تَوِ غٛطّٛ يَحُودَنْکٜىٰجٛ بِعٜتٜىٰطٛ اَکِيلَ، کَنْکٛ اٜ دٜبّٛ مَاکٛ بِعٜتٜىٰطٛ بِرِسْکِلَ، پِوٛيْٻٜ لٜيْدِ فَنْتُسْ؞ ٻٜ نٜىٰٻَايِ کٛ ٻٜ پِوٛيِ لٜيْدِ اِتَالِيَ، نغَمْ کَلَوْدِيُسْ، مَوْطٛ لَامِيٻٜ لٜيْطٜ رٛومَ، وِعِ يَحُودَنْکٛعٜنْ فُو مبُرْتٛو غَرِيرِ رٛومَ؞ بُلُسْ يَحِ تٛ مَٻّٜ؞ اٛ جٛوطِي تٛ مَٻّٜ، اٜ مٛ حُودَ اٜ مَٻّٜ نغَمْ کَنْکٛ اٛ ݧٛوتٛووٛ شُدَّحٛ لُکُرُوجِ بٛنٛ مَٻّٜ؞ کٛو ندٜيٜ ݧَلْندٜ سِوْتَارٜ، بُلُسْ اٜ يٜدّٛوتِرَ اٜ يِمْٻٜ ندٜرْ سُودُ دٛعَارٜ، اٜ مٛ فٛوطَ حَکِّيلٛ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ نغَمْ ٻٜ تٛکَّ يٜىٰسُ؞ ندٜ سِيلَ اٜ تِمٛوتِ پِوٛيِ لٜيْدِ مَکِدٛونِيَ نجٛتِّي غَرِيرِ کٛرِنْتِ، بُلُسْ حٛشِّ شَرٜلْ مُوطُمْ فُو نغَمْ وَعَجِنْکِ اٜ تَبِّتِنَنْکِ يَحُودَنْکٛعٜنْ يٜىٰسُ وٛنِ اَلْمَسِيحُ؞ اَمَّا ندٜ ٻٜ نغٜدِّمٛ، ٻٜ کُطِمٛ؞ سٜيْ اٛ فِطِّ سٛلَّارٜ کٛلْتٜ مَاکٛ، اٛ وِعِٻٜ، «مِ وُرْتَکٜ حَکّٜ مٛوطٛنْ! پِيپَمْ مٛوطٛنْ اٜ دٛوْ کٛعٜ مٛوطٛنْ؞ دَغَ حَنْدٜ، تٛ يِمْٻٜ نَاع يَحُودَنْکٛعٜنْ نجَحَيْمِ؞» اٛ وُرْتِي اٛ اَلِ سُودُ دٛعَارٜ ندُنْ، اٛ يَحِ وُرٛ غٛطّٛ مَوْنِنٛووٛ اَللَّه، بِعٜتٜىٰطٛ تِيتِيُسْ جُسْتُسْ، مٛ وُرٛ مُوطُمْ وٛنِ حَادٜ سُودُ دٛعَارٜ ندُنْ؞ کِرِبُسْ، مَوْطٛ سُودُ دٛعَارٜ ندُنْ، کَنْکٛ اٜ وُرٛ مَاکٛ فُو ٻٜ تٛکِّ يٜىٰسُ؞ طُطْٻٜ دَغَ ندٜرْ کٛرِنْتِيَنْکٛعٜنْ نَنْٻٜ وَعَجُ بُلُسْ مَا تٛکِّ يٜىٰسُ، ٻٜ نغَطَنَا بَڤْتِسْمَ؞ وٛنْدٜ جٜمَّارٜ جٛومِرَاوٛ مٜدِّ اٜ بُلُسْ ندٜرْ وَحَيُ، وِعِمٛ، «تَاع حُلُ! وَعَجِنْ حَبَرُ اَمْ، تَاع دٜعُّتُ، نغَمْ اٜ مِ وٛنْدِ اٜ مَاطَ؞ وَلَا بَاوَيْطٛ وَطَنْکِمَ غٛطُّمْ، نغَمْ اٜ مِ وٛودِ يِمْٻٜ طُطْٻٜ ندٜرْ غَرِيرِ ندِعِ؞» نغَمْ نٛنْ بُلُسْ جٛوطٛدِي اٜ مَٻّٜ حِتَاندٜ غٛعٛ اٜ لٜبِّ جٛوٜىٰغٛعٛ، اٜ مٛ اٜکِّتِنَٻٜ وٛلْدٜ اَللَّه؞ اَمَّا شَرٜلْ کٛ غَالِيٛ لَامٛتٛو لٜيْدِ اَکَايَ، يَحُودَنْکٛعٜنْ کَوْتِ کٛعٜ، نَنْغِ بُلُسْ، نجَارِمٛ يٜىٰسٛ لَامُ؞ ٻٜ نغُلِّيمٛ، ٻٜ مبِعِ، «نٜطّٛ اٛعٛ اٜ فٛوطَ يِمْٻٜ نغَمْ ٻٜ تٛکَّ اَللَّه دٛوْ لَاوٛلْ نغٛلْ اَتَّوْرَ حَطِ؞» بُلُسْ اٜ يِطِ مٜتَنْکِٻٜ وٛنْ طٛنْ، سٜيْ غَالِيٛ وِعِٻٜ، «اٛنٛنْ يَحُودَنْکٛعٜنْ، دَا طُمْ غٛطُّمْ کٛ وٛوطَا کٛو کُوغَلْ کَلُّنغَلْ اٛ وَطِ، دَا مِ جَٻَيْ کٛ مبِيطٛنْ دٛوْ مَاکٛ؞ اَمَّا ندٜ طُمْ غٜدِّ دٛوْ دِينَ مٛوطٛنْ، اٜ اِنْطٜ، اٜ دٛوکَ مٛوطٛنْ، اٛنٛنْ اٜ کٛعٜ مٛوطٛنْ نغَطَنٜىٰمٛ کِيتَ؞ مِنْ کَمْ، مِ وَطَنْتَا اِرِ طُعُمْ فِي کِيتَ!» سٜيْ اٛ رِيوِٻٜ دَغَ ندٜرْ سُودُ کِيتَ ندُنْ؞ سٜيْ ٻٜ نَنْغِ سٛسْتَانُسْ، مَوْطٛ سُودُ دٛعَارٜ ندُنْ، ٻٜ ڤِيِمٛ يٜىٰسٛ دَمُّغَلْ سُودُ کِيتَ ندُنْ؞ اَمَّا غَالِيٛ وَنَّايِ؞ غَطَ بُلُسْ ٻٜيْدِي بَلْطٜ سٜطَّ تٛ کٛرِنْتِ، اٛ اَلِ تٛکُّٻٜ يٜىٰسُ، اٛ نَتِّ کٛمِوَلْ جَحَيْنغَلْ لٜيْدِ سِيرِيَ، کَنْکٛ اٜ بِرِسْکِلَ اٜ اَکِيلَ؞ اٛ فٜمْبِ اٜ کَنْکِيرِيَ نغَمْ اٛ وَطِي اَلْکَوَلْ يٜىٰسٛ جٛومِرَاوٛ؞ ندٜ ٻٜ نجٛتِّي غَرِيرِ اَافِسَ، طٛنْ بُلُسْ اَلِ بِرِسْکِلَ اٜ اَکِيلَ؞ کَنْکٛ اٛ نَتِّ سُودُ دٛعَارٜ، اٜ مٛ مٜدَّ اٜ يَحُودَنْکٛعٜنْ؞ ٻٜ تٛرِيمٛ اٛ ٻٜيْدَ جٛوطَاکِ بَلْطٜ سٜطَّ تٛ مَٻّٜ، اَمَّا اٛ جَٻَايِ؞ ندٜ اٛ وَرِ سٜنْدِرْکِ اٜ مَٻّٜ، اٛ وِعِ، «مِ سٛعّٛيْتٛ تٛ مٛوطٛنْ تٛ اَللَّه جَٻِي؞» اٛ نَتِّ کٛمِوَلْ، اٛ دِلِّ؞ ندٜ اٛ يٛتِّي غَرِيرِ کَيْسَارِيَ، اٛ پَٻِّي يَاکِ اُرُشَلِيمَ اٛ حٛوْنِ تٛکُّٻٜ يٜىٰسُ؞ سٜيْ اٛ يَحِ اَنْتَاکِيَ؞ غَطَ اٛ وَطِي بَلْطٜ تٛنْ، اٛ دِلِّ اٛ تٛکِّ ندٜرْ لٜيْطٜ غَلَاتِيَ اٜ فِرِيجِيَ، اٜ مٛ سٜمْبِطِنَ تٛکُّٻٜ يٜىٰسُ؞ اٜ شَرٜلْ نغٜلْ سٜيْ غٛطّٛ يَحُودَنْکٜىٰجٛ بِعٜتٜىٰطٛ اَفٛولٛسْ نٜطّٛ غَرِيرِ اَلِجَندِيرِيَ وَرِ غَرِيرِ اَافِسَ؞ نٜطّٛ اٛنْ اٛ بَوْطٛ مٜتُکِ، اٛ اَنْدُطٛ وٛلْدٜ اَللَّه نَاع سٜطَّ؞ اٛ اٜکِّتِنَامَ لَاوٛلْ يٜىٰسُ بٛطُّمْ؞ اٜ مٛ وَعَجِنَ حَبَرُ يٜىٰسُ ندٜرْ وٜلْوٜلٛ، اٜ مٛ وَعَجِنَ بٛطُّمْ، کٛو ندٜ بَڤْتِسْمَ يَحَيَ تَنْ اٛ اَنْدِ؞ سٜيْ اٛ فُطِّ وَعَجِنْکِ اٜ سٜمْبٜ مَاکٛ فُو ندٜرْ سُودُ دٛعَارٜ؞ ندٜ بِرِسْکِلَ اٜ اَکِيلَ نَنِمٛ، ٻٜ نٛدِّمٛ وُتُّدُ غٛعٛ، ٻٜ ٻٜيْدِ فَمْتِنْکِمٛ لَاوٛلْ اَللَّه؞ ندٜ اَفٛولٛسْ يِطِ حُولُکِ يَحَ لٜيْدِ اَکَايَ، تٛکُّٻٜ يٜىٰسُ مبَلِّمٛ مبِنْدَنِ تٛکُّٻٜ يٜىٰسُ وٛنْٻٜ تٛنْ طٜرٜوٛلْ نغَمْ ٻٜ نجَٻّٛومٛ جُوطٜ طِطِ؞ ندٜ اٛ يٛتِّي تٛنْ، اٛ وَرْتِ وَلِّرّٜ مَوْندٜ تٛ يِمْٻٜ غَرْتُٻٜ تٛکُّٻٜ يٜىٰسُ بَرْکَ يِدّٜ جٛومِرَاوٛ؞ اٛ يٜدّٛوتِرِ اٜ يَحُودَنْکٛعٜنْ اٛ دٛعِّٻٜ يٜىٰسٛ يِمْٻٜ فُو، نغَمْ اٛ حٛلِّيٻٜ ندٜرْ دٜفْتٜرٜ شٜنِيندٜ يٜىٰسُ وٛنِ اَلْمَسِيحُ؞ شَرٜلْ کٛ اَفٛولٛسْ وٛنِ غَرِيرِ کٛرِنْتِ، بُلُسْ تٛکِّ لَاوٛلْ پِوْرُنغٛلْ ندٜرْ کٛشّٜىٰجٜ، اٛ يَحِ اَافِسَ؞ تٛنْ اٛ تَوِ وٛٻّٜ تٛکُّٻٜ يٜىٰسُ؞ اٛ پَمِٻٜ، اٛ وِعِ، «کٛو اٛنْ کٜٻِي رُوحُ اَللَّه ندٜ نغَرْتُطٛنْ تٛکُّٻٜ يٜىٰسُ؟» ٻٜ نٛوتِي، ٻٜ مبِعِمٛ، «مِنْ مٜىٰطَايِ نَنُکِ حَبَرُ رُوحُ اَللَّه؞» اٛ وِعِٻٜ، «اِرِ طُمٜ بَڤْتِسْمَ نغَطَنَاطٛنْ؟» ٻٜ مبِعِ، «بَڤْتِسْمَ يَحَيَ؞» بُلُسْ وِعِ، «يَحَيَ وَطِي بَڤْتِسْمَ تُوبُکِ؞ اٜ مٛ وِعَ يِمْٻٜ کٛولٛو غٛطّٛ غَرَيْطٛ غَطَ مَاکٛ، وَاتٛ يٜىٰسُ؞» ندٜ ٻٜ نَنِ نٛنْ، ٻٜ نغَطَنَا بَڤْتِسْمَ ندٜرْ اِنْدٜ يٜىٰسُ جٛومِرَاوٛ؞ ندٜ بُلُسْ يٛوِ جُوطٜ مُوطُمْ دٛوْ مَٻّٜ، رُوحُ اَللَّه جِڤّٛيِي دٛوْ مَٻّٜ، ٻٜ مٜتِ ندٜرْ طٜمْطٜ طٜ ٻٜ اَنْدَا، ٻٜ ڤُطِّ وَعَجِنْکِ؞ طُطْکِ مَٻّٜ وَطِي يِمْٻٜ سَڤّٛ اٜ طِطٛ؞ بُلُسْ وَطِ لٜبِّ تَتِ اٜ مٛ وَعَجِنَنَ يَحُودَنْکٛعٜنْ ندٜرْ سُودُ دٛعَارٜ اٜ سٜمْبٜ مَاکٛ فُو، کُلٛلْ وَلَا؞ اٜ مٛ مٜدَّ اٜ مَٻّٜ، اٜ مٛ فٛوطَ حَکِّيلٛ مَٻّٜ حَا اٛ اَنْدِنِٻٜ حَبَرُ لَامُ اَللَّه؞ اَمَّا ندٜرْ مَٻّٜ اٜ وٛودِ ٻٜ کٛعٜ جٛرْطٜ؞ ٻٜ نغَݧِ حٛولَاکِ يٜىٰسُ، ٻٜ مٜتِ حَالَ کَلُّکَ دٛوْ لَاوٛلْ يٜىٰسُ يٜىٰسٛ يِمْٻٜ فُو؞ نغَمْ مَاجُمْ بُلُسْ سٜنْدِرِ اٜ مَٻّٜ، اٛ حٛشِّ تٛکُّٻٜ يٜىٰسُ؞ کٛو ندٜيٜ ݧَلْندٜ اٜ مٛ اٜکِّتِنَ ندٜرْ سُودُ جَنْغِرْدٜ تِرَانُسْ؞ اٛ وَطِ کَ وَطُکِ نٛنْ دُوٻِ طِطِ حَا يَحُودَنْکٛعٜنْ اٜ لٜپِّ اَاسِيَ فُو نَنِ حَالَ جٛومِرَاوٛ؞ اَللَّه وَطِ کُوطٜ کَيْطِنِيطٜ مَوْطٜ دَغَ جُوطٜ بُلُسْ طٜ طُمْ مٜىٰطَايِ يِعُکِ؞ حَا مَا لٜفٛيْ اٜ کٛلْتٜ مٜىٰمُطٜ ٻَنْدُ مَاکٛ فُو اٜ نجَارَنٜىٰ ݧَوْٻٜ، اٜ ٻٜ نجَمْطِتَ، غِنِّ مَا مبُرْتٛو ندٜرْ مَٻّٜ؞ تٛو، اٜ وٛودِ وٛٻّٜ يَحُودَنْکٛعٜنْ يِيلٛتٛوٻٜ نغَمْ وُرْتِنَنْکِ غِنَّاٻٜ غِنِّ؞ وٛٻّٜ مَٻّٜ ڤٛوندِي حُوتِرْکِ اِنْدٜ يٜىٰسُ جٛومِرَاوٛ، اٜ ٻٜ مبِعَ غِنِّ طِنْ، «ندٜرْ اِنْدٜ يٜىٰسُ مٛ بُلُسْ وَعَجِنْتَ اٜ مِنْ مبِعَعٛنْ مبُرْتٜىٰ!» ٻِٻّٜ غٛطّٛ مَوْطٛ اَرْدِيٻٜ دِينَ يَحُودَنْکٛعٜنْ بِعٜتٜىٰطٛ سِيبَ کَمْٻٜ نجٛوٜىٰطِطٛ اٜ نغَطَ نٛنْ؞ اَمَّا غِنّٛلْ نغٛلْ وِعِٻٜ، «اٜ مِ اَنْدِ يٜىٰسُ، اٜ مِ اَنْدِ بُلُسْ، اَمَّا اٛنٛنْ، اٛنْ ٻٜيٜ؟» غِنَّاطٛ اٛنْ يَنَنِٻٜ، نَوْنِٻٜ، جَالِيٻٜ حَا ٻٜ مبُرْتِي وُرٛ نغٛنْ، اٜ ٻٜ ندٛغَّ ٻٜ ٻٛرْنَاکِ ٻٜ فُو ٻٜ نَوْنٛوطٜ؞ حَبَرُ مَاجُمْ سَنْکِتِي ندٜرْ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ جٛوطِيٻٜ ندٜرْ غَرِيرِ اَافِسَ؞ کُلٛلْ نَنْغِٻٜ، ٻٜ فُو؞ اِنْدٜ يٜىٰسُ بٛو حٜٻِي مَوْنِنٜىٰکِ؞ يِمْٻٜ طُطْٻٜ غَرْتُٻٜ تٛکُّٻٜ يٜىٰسُ نغَرِ مبِعِ اٜ نجَيْرِ فُو کُوطٜ کَلُّطٜ طٜ ٻٜ کُوُنٛو؞ دَرْنٛوٻٜ طُطْٻٜ کَوْرِتِ طٜرٜىٰجِ مَٻّٜ، ٻٜ نغُلِطِ يٜىٰسٛ يِمْٻٜ؞ ندٜ ٻٜ لِمِ شٜىٰدٜ مَاجِ، طٜ نجَارِي شٜىٰدٜ اَجُرْفَارِ 50,000؞ نٛنْ حَبَرُ يٜىٰسُ ٻٜيْدِ سَنْکِتٛرَاکِ کٛو تٛيٜ؞ غَطَ فِي طُمْ طٛنْ فُو، بُلُسْ سُٻِ تٛکَّ لَاوٛلْ لٜيْطٜ مَکِدٛونِيَ اٜ اَکَايَ يَاکِ اُرُشَلِيمَ؞ اٛ وِعِ، «غَطَ مِ يَحِي تٛنْ، دٛولٜ مِ يَحَ غَرِيرِ رٛومَ مَا؞» سٜيْ اٛ لِلِ وَلَّيْٻٜمٛ طِطٛ، تِمٛوتِ اٜ اٜرَسْتُسْ، ٻٜ نجَحَ لٜيْدِ مَکِدٛونِيَ؞ کَنْکٛ بٛو اٛ وَالِ بَلْطٜ ندٜرْ لٜيْدِ اَاسِيَ؞ اٜ شَرٜلْ نغٜلْ حَوْرٜ مَوْندٜ اُمِّي ندٜرْ اَافِسَ دٛوْ لَاوٛلْ جٛومِرَاوٛ نغٛلْ بُلُسْ اٜکِّتِنْتَ؞ اٜ وٛودِ غٛطّٛ بَعِلّٛ اَجُرْفَارِ بِعٜتٜىٰطٛ دِمِتِيرِيُسْ؞ اٜ مٛ وَطَ شُوطِ ڤَمَرِ طِ مَوْنِنْکِ اَلَّح مَٻّٜ طِ اَجُرْفَارِ نَنْدُطِ اٜ شُوطِ غُنْکِ مَٻّٜ دٜبُمْ بِعٜتٜىٰطُمْ اَرْتٜمِسْ؞ نَاع شٜىٰدٜ سٜطَّ اٛ حٜٻَنْتَٻٜ، کَنْکٛ اٜ ٻٜ اٛ حُودَتَ؞ سٜيْ اٛ حَوْرِتِ ٻٜ اٛ حُودَتَ ٻٜنْ اٜ وٛٻّٜ غَطٛوٻٜ اِرِ کُوغَلْ نغَلْ، اٛ وِعِٻٜ، «بَنْدِرَاٻٜ اَمْ، اٛنْ اَنْدِ کُوغَلْ نغَعَلْ اٜ وَدَّنَعٜنْ شٜىٰدٜ طُطّٜ؞ کَدِمَا اٛنْ نَنِي، اٛنْ نغِعِي کٛ بُلُسْ وَطَتَ؞ اٜ مٛ سٜلْنَ يِمْٻٜ طُطْٻٜ، نَاع طٛعٛ ندٜرْ غَرِيرِ اَافِسَ تَنْ، اَمَّا حَا ندٜرْ لٜيْدِ اَاسِيَ فُو؞ اٜ مٛ وِعَٻٜ اَلَّاجِ طِ يِمْٻٜ نغَطِ اٜ جُوطٜ مَٻّٜ، نَاع طِ غٛونغَاجِ؞ تٛ اٜنْ اَلْدِيمٛ نٛنْ، يِمْٻٜ مبٛنَّيْ اِنْدٜ کُوغَلْ مٜىٰطٜنْ؞ نَاع کَنْجُمْ تَنْ، طٛنْمَا ٻٜ مبٛنَّيْ اِنْدٜ سُودُ مَوْنِنْکِ اَلَّح مٜىٰطٜنْ اَرْتٜمِسْ مَوْطٛ؞ ندٜنْ ٻٜ اَلَيْ تٜدِّنْکِمٛ، کَنْکٛ مٛ جٛوطِيٻٜ لٜيْدِ اَاسِيَ اٜ دُونِيَارُ ندُعُ فُو مَوْنِنْتَ؞» ندٜ ٻٜ نَنِ نٛنْ، ٻٜرْطٜ مَٻّٜ مٜتِّ، ٻٜ نغُلِّ، اٜ ٻٜ مبِعَ، «اَرْتٜمِسْ مٛ اَافِسَ کَنْکٛ وٛنِ مَوْطٛ!» حَکِّيلٛ يِمْٻٜ غَرِيرِ ندِنْ فُو اُمِّي، ٻٜ نجَحِ ٻٜ نَنْغِ غَايُسْ اٜ اَرِسْتَرْکُسْ، يِمْٻٜ مَکِدٛونِيَ، جَادٛوٻٜ اٜ بُلُسْ؞ ٻٜ ندَسِٻٜ، ٻٜ نجَارِٻٜ نجَيْرِ تٛ يِمْٻٜ غَرِيرِ کَوْرِتَتَ؞ بُلُسْ اٜ يِطِ نَتُّکِ ندٜرْ مٛٻْتٛرْدٜ ندٜنْ، اَمَّا تٛکُّٻٜ يٜىٰسُ کَطِمٛ؞ حَا اٜ وٛٻّٜ ندٜرْ مَوْٻٜ لٜيْدِ اَاسِيَ، حِغٛوٻٜ مَاکٛ، لِلٛنٛيِمٛ تٛرِيمٛ تٛع اٛ نَتَّ وِغٜىٰرٜ ندٜنْ؞ اٜ شَرٜلْ نغٜلْ، حَکِّيلٛ حَوْرُتُٻٜ فُو جِيٻَکٜ؞ کٛو مٛيٜ اٜ کَ وِعَتَ، نغَمْ طُطْٻٜ ندٜرْ مَٻّٜ اَنْدَا کٛ حَوْرِتِٻٜ؞ يَحُودَنْکٛعٜنْ نغَرْتِرِ اَلِجَنْدَ مٜتٛووٛ نغَمْ مَٻّٜ؞ وٛٻّٜ ندٜرْ حَوْرُتُٻٜ ٻٜنْ مبِعِمٛ اٛ مٜتَ؞ سٜيْ اَلِجَنْدَ پٜفْتِ جُنْغٛ نغَمْ ٻٜ ندٜعِّتَ اٛ مٜتَنَٻٜ؞ اَمَّا ندٜ ٻٜ اَنْدِتِ اٛ يَحُودَنْکٜىٰجٛ، ٻٜ نغَطِ اَوَاجِ طِطِ اٜ ٻٜ مبِعَ اٜ سٜمْبٜ، «اَرْتٜمِسْ مٛ اَافِسَ کَنْکٛ وٛنِ مَوْطٛ!» اَمَّا ندٜ بِنْدٛووٛ غَرِيرِ ندِنْ دٜعِّتِنِٻٜ، اٛ وِعِٻٜ، «اٛنٛنْ اَافِسَنْکٛعٜنْ، کٛو مٛيٜ اٜ اَنْدِ طٛعٛ اَافِسَ وٛنِ تٛ طُمْ رٜىٰنَتَ سُودُ مَوْنِنْکِ اَرْتٜمِسْ مَوْطٛ اٜ حَيْرٜ مَاکٛ جَنٛيْندٜ دَغَ دٛوْ؞ وَلَا بَاوَيْطٛ يٜدُّکِطُمْ؞ نغَمْ نٛنْ اٜ حَانِ ڤُکِّنٛنْ ٻٜرْطٜ مٛوطٛنْ، ڤَامٜىٰ اٜ کٛ نغَطٛتٛنْ؞ يِمْٻٜ ٻٜ نغَدُّطٛنْ طٛعٛ ٻٜ نغُجَّايِ کٛو طُمٜ ندٜرْ سُودُ دٛعَارٜ، ٻٜ کُطَايِ اَلَّح مٜىٰطٜنْ؞ تٛ دِمِتِيرِيُسْ اٜ ٻٜ اٛ حُودَتَ اٜ نغِطِ وُلَّاکِ غٛطّٛ، سُودُ کِيتَ اٜ مَٻِّتِي، اٜ وٛودِ غَطٛوٻٜ کِيتَ، سٜيْ ٻٜ نغُلّٛيٛو تٛنْ! تٛ بٛو اٜ وٛودِ غٛطُّمْ کٛ نغِطّٛنْ ٻُرْطُمْ نٛنْ، سٜيْ نجَارٛنْطُمْ تٛ مَوْٻٜ غَرِيرِ طُمْ مٛعِّنٜىٰ؞ حَنْدٜ اٜنْ ندٜرْ شَطُّمْ، طُمْ وُلّٛرْتٛعٜنْ اُمِّنْکِ حَکِّيلٛ؞ وَلَا بٛو کٛ کٜٻٜتٜنْ مبِعٜنْ دٛوْ حَوْرٜ اُمِّيندٜ حَنْدٜ؞ اٜنْ مبَاوَتَا کٛکّٜنْ شٜيْدَ غٜىٰتُمْ اُمِّنْطُمْ حَوْرٜ ندٜنْ؞» ندٜ اٛ وِعِ نٛنْ، اٛ وِعِ يِمْٻٜ ٻٜنْ شَنْکِتٛو؞ ندٜ کٛو طُمٜ وَلْتِي، بُلُسْ حَوْرِتِ تٛکُّٻٜ يٜىٰسُ، سٜمْبِطِنِ ٻٜرْطٜ مَٻّٜ؞ غَطَ اٛ جَٻّٛوتِرِ اٜ مَٻّٜ، اٛ دِلِّ لٜيْدِ مَکِدٛونِيَ؞ اٛ تٛکِّ ندٜرْ لٜيْدِ ندِنْ، اٜ مٛ سٜمْبِطِنَ ٻٜرْطٜ يِمْٻٜ اٜ بٛلِيطٜ طُطّٜ؞ ندٜنْ اٛ يٛتِّي لٜيْدِ حٜلٜنَ؞ اٛ وَطِ لٜبِّ تَتِ تٛنْ؞ شَرٜلْ کٛ اٛ سِرْيٛتٛو نَتُّکِ کٛمِوَلْ يَاکِ لٜيْدِ سِيرِيَ، سٜيْ اٛ نَنِ حَبَرُ يَحُودَنْکٛعٜنْ ندَرْوِي وَرُکِمٛ؞ نغَمْ نٛنْ، اٛ سُٻِ سٛعّٛرَاکِ لَاوٛلْ مَکِدٛونِيَ؞ اٛ يَادِ اٜ سُفَاتَ ٻِي فَارُسْ مٛ غَرِيرِ بِيرِيَ، اٜ اَرِسْتَرْکُسْ اٜ سَکُندُسْ ٻٜ غَرِيرِ تَسَلٛونِکَ، اٜ غَايُسْ مٛ غَرِيرِ دَرْبٜ، اٜ تِمٛوتِ اٜ تِيکِکُسْ اٜ تُرٛوفِمُسْ ٻٜ لٜيْطٜ اَاسِيَ؞ ٻٜ اَرْتِمِنْ يَاکِ غَرِيرِ تٛورُوَسْ، ٻٜ ندٜنْتِمِنْ تٛنْ؞ غَطَ حُمْتٛ بُرٛودِ طُمْ وَلَا پُوفِنِرْطُمْ، مِنْ نَتِّ کٛمِوَلْ تٛ غَرِيرِ فِلِبِ؞ غَطَ بَلْطٜ جٛوِ مِنْ نجٛتِّي تٛ مَٻّٜ اٜ غَرِيرِ تٛورُوَسْ، مِنْ نغَطِ بَلْطٜ جٛوٜىٰطِطِ تٛنْ؞ ݧَلْندٜ سِوْتَارٜ مِنْ کَوْرِتِ نغَمْ سٜنْدُکِ بُرٛودِ، سٜيْ بُلُسْ وَطِ کَ مٜتَنْکِ يِمْٻٜ حَا شَکَ جٜمَّ، نغَمْ اٜ مٛ يِطِ دِلُّکِ تٛ فِنِي؞ ندٜرْ سُودُ دٛوْ تٛ مِنْ کَوْرِتِ اٜ وٛودِ فِتِلَاجِ طُطِّ؞ غٛطّٛ کَيٜىٰجٛ بِعٜتٜىٰطٛ يُوتِکُسْ اٜ جٛوطِي دٛوْ يٛلْندٜ سُودُ؞ بُلُسْ جُوتِنِ حَالَ مُوطُمْ حَا کَيٜىٰجٛ اٛنْ فُطِّ ݝٛݝُکِ؞ طٜيْنغٛلْ تٜدُّنغٛلْ نَنْغِمٛ، اٛ يَنٛيِ دَغَ تٛنْ دٛوْ سُودُ تَتَوْرُ؞ کٛ ٻٜ کٛشَّمٛ فُو، اٛ مَايِي؞ اَمَّا بُلُسْ جِڤِّي، يَحِ، تُرِي دٛوْ مَاکٛ، وُوندِيمٛ اٜ جُوطٜ مُوطُمْ، وِعِ، «تٛع اٛنْ کُلُ! اٜ مٛ وٛودِ يٛنْکِ!» سٜيْ بُلُسْ پٜنْتِتِ، سٜنْدِ بُرٛودِ، ݧَامِ؞ غَطَ مَاجُمْ اٛ ݧَمْرِ يٜىٰسٛ اٜ مٜتَنْکِٻٜ حَا وٜىٰتِ، ندٜنْ اٛ دِلِّ؞ ٻٜ کٛوتِدِ اٜ کَيٜىٰجٛ اٛنْ، اٜ مٛ فٛوفَ؞ نٛنْ سٜمْبِطِنِي ٻٜرْطٜ مَٻّٜ نَاع سٜطَّ؞ بُلُسْ سُٻِ تٛکَّ طَتَلْ يَحَ اَاسُسْ؞ مِنٛنْ بٛو، مِنْ نَتِّ کٛمِوَلْ نغَمْ اٜ مٛ يِطِ نَا مِنْ نجَحِي تٛنْ مِنْ کٛشَّمٛ؞ ندٜ اٛ تَوِمِنْ تٛ غَرِيرِ اَاسُسْ، مِنْ کٛشِّمٛ ندٜرْ کٛمِوَلْ، مِنْ نجَحِ غَرِيرِ مِتِلِنْ؞ طٛنْمَا مِنْ اُمّٛيِي تٛنْ ندٜرْ کٛمِوَلْ، ندٜ فِنِ مِنْ نجٛتِّي کِيٛسْ؞ ݧَلْندٜ طِطَوْرٜ مِنْ نجٛتِّي سَامٛسْ، ندٜرْ ݧَلْندٜ تَتَوْرٜ بٛو مِنْ نجٛتِّي مِلِتُسْ؞ بُلُسْ يِطَا دَرَاکِ ندٜرْ اَافِسَ، نغَمْ اٛ يِطَا نٜىٰٻُکِ ندٜرْ اَاسِيَ؞ اٜ مٛ يِطِ يٛتَّاکِ اُرُشَلِيمَ کٛ ݧَلْندٜ حُمْتٛ ٻٜنْدٛلْ اَلْکَمَارِ وَرَ، تٛ طُمْ وَطٛتٛ؞ دَغَ غَرِيرِ مِلِتُسْ، بُلُسْ لِلٛنٛيِ مَوْٻٜ تٛکُّٻٜ يٜىٰسُ وٛنْٻٜ اَافِسَ ٻٜ نغَرَ تٛ مَاکٛ؞ ندٜ ٻٜ نغَرِ، اٛ وِعِٻٜ، «اٛنٛنْ اٜ کٛعٜ مٛوطٛنْ اٛنْ اَنْدِ نٛ نجٛوطٛرِيمِ ندٜرْ مٛوطٛنْ دَغَ ݧَلْندٜ ندٜ ڤُطُّمِ نَتُّکِ لٜيْدِ اَاسِيَ وَرْکِ حَنْدٜ؞ مِ حُوَنِي جٛومِرَاوٛ ندٜرْ لٜسْتِنْکِ حٛورٜ اٜ غٛنْطِ طُطِّ، کٛو ندٜ مِ يَرِي تٛرَّاجِ طُطِّ اٜ جُوطٜ يَحُودَنْکٛعٜنْ؞ اٛنْ اَنْدِ مِ سُوطَايِعٛنْ کٛو طُمٜ کٛ وَلَّتَعٛنْ؞ مِ وَعَجِنَنِيعٛنْ، مِ اٜکِّتِنِيعٛنْ يٜىٰسٛ يِمْٻٜ فُو، حَا ندٜرْ غُرٜ مٛوطٛنْ؞ مِ وَغِّنِي يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ فُو ٻٜ تُوبَنَ اَللَّه، ٻٜ کٛولٛو جٛومِرَاوٛ مٜىٰطٜنْ يٜىٰسُ اَلْمَسِيحُ؞ رُوحُ اَللَّه حٛلِّييَمْ مِ يَحَ اُرُشَلِيمَ جٛونِ؞ مِ اَنْدَا کٛ حٜٻَتَيَمْ تٛنْ، سٜيْ نِ رُوحُ اَللَّه وِعِييَمْ ندٜرْ غَرِيرِ ندِ نجَالُمِ فُو حَٻّٜىٰکِ اٜ تٛرَّ اٜ حٜطِييَمْ؞ اَمَّا مِ حٛشَّايِ يٛنْکِ اَمْ بٛنٛ غٛطُّمْ غٜىٰتُمْ، تٛ نِ مِ حٜٻِي مِ حٜىٰݧِي کُوغَلْ نغَلْ يٜىٰسُ جٛومِرَاوٛ حٛکِّيَمْ، وَاتٛ وَعَجِنْکِ حَبَرُ بٜلْطُمْ طُمْ يِدّٜ اَللَّه؞ «مِ يِيلَکٜ ندٜرْ مٛوطٛنْ، اٜ مِ وَعَجِنَنَعٛنْ حَبَرُ لَامُ جٛومِرَاوٛ؞ جٛونِ، اٜ مِ اَنْدِ اٛنْ ڤُطِّتَتَا يِعُکِيَمْ؞ نغَمْ نٛنْ اٜ مِ وِعَعٛنْ حَنْدٜ تٛ غٛطّٛ ندٜرْ مٛوطٛنْ سٜلِي لَاوٛلْ غٛونغَ، حَکّٜ مَاکٛ وَلَا دٛوْ اَمْ؞ نغَمْ مِ وَعَجِنَنِيعٛنْ کٛ اَللَّه يِطِ فُو، مِ سُوطَايِعٛنْ کٛو طُمٜ؞ ڤَامَنٜىٰ کٛعٜ مٛوطٛنْ، ندٜىٰنٛنْ اٛرْندٜ ندٜ رُوحُ اَللَّه حٛکِّعٛنْ؞ نغَرْتٜىٰ وٛيْنَاٻٜ کَوْتَلْ يِمْٻٜ اَللَّه، ٻٜ اٛ سٛودِرِ اٜ مَيْدٜ ٻِطّٛ مَاکٛ؞ اٜ مِ اَنْدِ غَطَ مِ اَلِي طٛعٛ يِمْٻٜ کَلُّٻٜ بٛ شَافَالِ نٛ نَتَّيْ ندٜرْ مٛوطٛنْ، کَدِمَا بٛو ٻٜ اَلَتَا اٛرْندٜ ندٜنْ؞ حَا ندٜرْ مٛوطٛنْ مَا، وٛٻّٜ اُمّٛتٛ اٜ اٜکِّتِنَ اٜکِّتِنٛلْ فٜوْرٜ نغَمْ ٻٜ ڤٛوطٛيَ تٛکُّٻٜ يٜىٰسُ تٛکَّٻٜ؞ نغَمْ نٛنْ، ڤَامٜىٰ، شِفْتٛرٜىٰ دُوٻِ تَتِ نغَطُمِ، جٜمَّ اٜ ݧَلَوْمَ، اٜ مِ وَغِّنَ کٛو مٛيٜ مٛوطٛنْ فُو حَا اٜ غٛنْطِ؞ «جٛونِ، مِ وَطِيعٛنْ ندٜرْ جُنْغٛ اَللَّه اٜ وٛلْدٜ مَاکٛ، بَاوَيْندٜ سٜمْبِطِنْکِعٛنْ حٛکَّعٛنْ ندٛنُ نغُ اٛ رٜسَنِ شٜنِيٻٜ مَاکٛ فُو؞ مِ مٜىٰطَايِ يِطُکِ شٜىٰدٜ غٛطّٛ کٛو کٛلْتٜ غٛطّٛ؞ اٛنٛنْ اٜ کٛعٜ مٛوطٛنْ، اٛنْ اَنْدِ مِ حُوتِرِي جُوطٜ اَمْ نغَمْ مِ وَلَّ حٛورٜ اَمْ اٜ وٛنْدُٻٜ اٜ اَمْ؞ مِ حٛلِّيعٛنْ مِسَالُ ندٜرْ کٛ نغَطُمِ فُو؞ نٛنْ حَانِ نغَطٛنْ نغَمْ مبَلّٛنْ تَمْڤُٻٜ؞ شِفْتٛرٜىٰ بٛلِيطٜ طٜ يٜىٰسُ جٛومِرَاوٛ وِعِ اٜ حٛورٜ مُوطُمْ، ‹کٛکّٛووٛ ٻُرِي جَٻٛووٛ بَرْکَ؞› » ندٜ بُلُسْ يٛتِّنِ بٛلِيطٜ مُوطُمْ، سٜيْ کَنْکٛ اٜ مَٻّٜ ٻٜ فُو ٻٜ ندِشِّي ٻٜ نغَطِ دٛعَارٜ؞ ٻٜ فُو ٻٜ مبٛيِ بٛجِّ طُطِّ، ٻٜ نغُوندِ بُلُسْ ٻٜ نجَٻّٛتِرِ اٜ مَاکٛ؞ کٛ ٻُرِ وَنُّکِٻٜ وٛنِ ندٜ اٛ وِعِٻٜ ٻٜ ڤُطِّتَتَا ٻٜ نغِعَمٛ؞ سٜيْ ٻٜ طٛفْتِمٛ ٻٜ نجَارِمٛ تٛ کٛمِوَلْ؞ ندٜ مِنْ شٜنْدِرِ اٜ مَٻّٜ، مِنْ نَتِّ کٛمِوَلْ، مِنْ نجَحِ لٜيْدِ کٛسْ؞ ندٜ وٜىٰتِ، مِنْ نجَحِ لٜيْدِ رٛودٛسْ، دَغَ تٛنْ مِنْ نجَحِ غَرِيرِ فَاتِرَ؞ طٛنْ مِنْ تَوِ کٛمِوَلْ جَحَيْنغَلْ لٜيْدِ فِنِيکِيَ، سٜيْ مِنْ نَتِّنغَلْ، مِنْ ندِلِّ؞ مِنْ کَيْنِي لٜيْدِ نغٛنْدِ شَکَ ندِيَمْ بِعٜتٜىٰندِ سَيِيفُرُسْ مِنْ تٛکِّ فٛمْبِنَ مَيْرِ، مِنْ اُمَّنِي لٜيْدِ سِيرِيَ؞ مِنْ نجٛتِّ غَرِيرِ تَايَ، تٛنْ تٛ طُمْ جِڤِّنَنْتَ کٛمِوَلْ اَمِنْ دٛݝْلٜ؞ مِنْ تَوِ تٛکُّٻٜ يٜىٰسُ تٛنْ، مِنْ نجٛوطٛدِي اٜ مَٻّٜ بَلْطٜ جٛوٜىٰطِطِ؞ ندٜرْ بَوْطٜ رُوحُ اَللَّه ٻٜ مبِعِ بُلُسْ تٛع اٛ يَحَ اُرُشَلِيمَ؞ اَمَّا ندٜ يٛنْتٛورٜ ندٜنْ حٜىٰݧِ، مِنْ شٛعِّي تٛ کٛمِوَلْ؞ ٻٜ فُو ٻٜ طٛفْتِمِنْ، کَمْٻٜ اٜ رٜوْٻٜ مَٻّٜ اٜ ٻِکّٛيْ مَٻّٜ، حَا مِنْ مبُرْتِي غَرِيرِ؞ مِنْ ندِشِّي دَاندٜ مَايٛ، مِنْ نغَطِ دٛعَارٜ؞ ندٜ مِنْ شٜنْدِرِ، مِنٛنْ مِنْ نَتِّ کٛمِوَلْ، کَمْٻٜ بٛو ٻٜ شٛعِّي غُرٜ مَٻّٜ؞ مِنْ اَلِ غَرِيرِ تَايَ مِنْ دِلِّ ندٜرْ کٛمِوَلْ نغَلْ، مِنْ نجٛتِّ غَرِيرِ تٛلٜمَيِسْ؞ مِنْ تَوِ تٛکُّٻٜ يٜىٰسُ تٛنْ، مِنْ مبَالِ تٛ مَٻّٜ وَلْندٜ وٛعٛيْرٜ؞ ندٜ فِنِ مِنْ اَلِ طٛنْ، مِنْ نجَحِ غَرِيرِ کَيْسَارِيَ؞ مِنْ نَتِّ وُرٛ فِلِبُسْ غَعَجِنٛووٛ حَبَرُ بٜلْطُمْ، مِنْ نجِڤِّي تٛ مَاکٛ؞ کَنْکٛ اٛ غٛعٛتٛ ندٜرْ ٻٜنْ طٛنْ نجٛوٜىٰطِطٛ ٻٜ طُمْ سُٻِ نغَمْ کُوَنَ تٛکُّٻٜ يٜىٰسُ؞ اٜ مٛ وٛودِ ٻِٻّٜ رٜوْٻٜ نَيٛ ٻٜ تٜعَاکَ، غَطٛوٻٜ اَنَّبَاکُ؞ غَطَ مِنْ نجٛوطَکٜ طٛنْ بَلْطٜ سٜطَّ، غٛطّٛ اَنَّبِيجٛ بِعٜتٜىٰطٛ اَغَبُسْ وَرِ دَغَ لٜيْدِ يَحُودِيَ وَرِ تٛ اَمِنْ؞ اٛ حٛشِّ تَادٛرْدٜ بُلُسْ، اٛ حَٻِّ جُوطٜ مَاکٛ اٜ کٛيْطٜ مَاکٛ، اٛ وِعِ، «رُوحُ اَللَّه وِعِي نِحِ يَحُودَنْکٛعٜنْ وٛنْٻٜ اُرُشَلِيمَ کَٻِّرْتَ جٛومُ تَادٛرْدٜ ندٜعٜ، ٻٜ نغَطَمٛ ندٜرْ جُوطٜ يِمْٻٜ نَاع يَحُودَنْکٛعٜنْ؞» ندٜ مِنْ نَنِ کٛ اٛ وِعِ، مِنٛنْ اٜ وٛنْٻٜ طٛنْ فُو، مِنْ تٛرِي بُلُسْ تٛع يَحَ اُرُشَلِيمَ؞ بُلُسْ نٛوتِي، وِعِمِنْ، «اَلٜىٰ بٛجِّ، تٛع اٛنْ نغٜوَنَمْ ٻٜرْندٜ! اٜ مِ سِرْيِي نَاع مِ حَٻّٜىٰ تَنْ، اَمَّا حَا مِ مَايَ تٛنْ اُرُشَلِيمَ نغَمْ اِنْدٜ يٜىٰسُ جٛومِرَاوٛ؞» ندٜ مِنْ اَنْدِتِ مِنْ مبَاوَتَا وَيْلُتُکِ ݧُمٛ مَاکٛ، مِنْ ندٜعِّتِ، مِنْ مبِعِ، «جٛومِرَاوٛ وَطَ نٛ يِطِ!» غَطَ مِنْ نغَطِي بَلْطٜ سٜطَّ تٛنْ، مِنْ شِرْيِي يَاکِ اُرُشَلِيمَ؞ وٛٻّٜ ندٜرْ تٛکُّٻٜ يٜىٰسُ دَغَ کَيْسَارِيَ طٛفْتِمِنْ، ٻٜ نجَارِمِنْ وُرٛ غٛطّٛ نٜطّٛ بِعٜتٜىٰطٛ مَنَاسٛنْ پِوٛيْطٛ سَيِيفُرُسْ؞ کَنْکٛ اٛ غٛعٛتٛ ندٜرْ تٛکُّٻٜ يٜىٰسُ اَرَنْدٜعٜنْ مٛ مِنْ نجِڤّٛتٛ تٛ وُرٛ مُوطُمْ؞ ندٜ مِنْ نجٛتِّي اُرُشَلِيمَ، تٛکُّٻٜ يٜىٰسُ نجَٻِّمِنْ ندٜرْ وٜلْوٜلٛ؞ ندٜ وٜىٰتِ مِنْ نجَادِ اٜ بُلُسْ تٛ يَاکُبُ؞ مَوْٻٜ کَوْتَلْ تٛکُّٻٜ يٜىٰسُ فُو اٜ طٛنْ؞ غَطَ بُلُسْ حٛوْنِيٻٜ، اٛ وِعِٻٜ کٛو طُمٜ کٛ اَللَّه حُوِ دَغَ جُوطٜ مَاکٛ ندٜرْ يِمْٻٜ نَاع يَحُودَنْکٛعٜنْ؞ ندٜ ٻٜ نَنِ کٛ اٛ وِعِ، ٻٜ نغٜتِّ اَللَّه؞ ٻٜ مبِعِ بُلُسْ، «اَنْ بَنْدِرَاوٛ اَمِنْ، اَ يِعِي نٛ يَحُودَنْکٛعٜنْ تٛکُّٻٜ يٜىٰسُ طُوطِرِ، ٻٜ فُو اٜ ٻٜ تِينِ تٛکُّکِ اَتَّوْرَ؞ ٻٜ نَنِي اَ اٜکِّتِنَ يَحُودَنْکٛعٜنْ وٛنْٻٜ ندٜرْ غٛطِّ لٜپِّ اَلَ تٛکُّکِ اَتَّوْرَ، اَ وِعَ تٛع ٻٜ نَادَ ٻِکّٛيْ مَٻّٜ، تٛع ٻٜ تٛکَّ ندٛنُ يَحُودَنْکٛعٜنْ؞ نٛيٜ نغَطٜتٜنْ؟ نغَمْ اٜ مِنْ اَنْدِ ٻٜ نَنَيْ اَ وَرِي طٛعٛ؞ جٛونِ وَطُ کٛ مِنْ مبِعَتَمَ؞ طٛعٛ اٜ وٛودِ وٛرْٻٜ نَيٛ غَطَنْٻٜ اَللَّه اَلْکَوَلْ؞ يَادُ اٜ مَٻّٜ، نغَطٛنْ کٛ دِينَ يَحُودَنْکٛعٜنْ وِعِ نغَطٜنْ نغَمْ نغَرْتٛنْ لَاٻُٻٜ يٜىٰسٛ جٛومِرَاوٛ؞ ندٜنْ کٛکَّا کٛ حَانِ ٻٜ کٛکَّ نغَمْ ٻٜ ڤٜمْبٜىٰ؞ نٛنْ حٛلَّيْ يِمْٻٜ کٛ نَنَتَ فُو دٛوْ مَاطَ نَاع طُمْ غٛونغَ؞ ٻٜ اَنْدَيْ کَدِمَا اَنْ اٜ حٛورٜ مَاطَ، اَ تٛکِّ اَتَّوْرَ؞ اَمَّا کٛولِيٻٜ يٜىٰسُ پِوٛيْٻٜ غٛطِّ لٜپِّ، مِنْ مبِنْدَنِيٻٜ تٛع ٻٜ ݧَامَ کٛ حِرْسَنَا غُنْکِيجِ اٜ کٛ سَاطِ اٜ کٛ مٛيْلَنَا دَاندٜ، کٛو پِيپَمْ، ندٜنْ تٛع ٻٜ نغَطَ نجٜىٰنُ؞» سٜيْ بُلُسْ حٛشِّ وٛرْٻٜ نَيٛ ٻٜنْ يَادِ اٜ مَٻّٜ؞ ندٜ فِنِ ٻٜ نغَطِ کٛ دِينَ يَحُودَنْکٛعٜنْ وِعِ ٻٜ نغَطَ نغَمْ وَرْتُکِ لَاٻُٻٜ؞ سٜيْ اٛ نَتِّ وُرٛ شٜنِينغٛ، اٛ وِعِ اَرْدِيٻٜ دِينَ ݧَلْندٜ ندٜ بَلْطٜ لَاٻِنْکِ مَٻّٜ کٜىٰݧَتَ، ݧَلْندٜ ندٜ طُمْ حِرْسَتَ شَکِّرِ نغَمْ کٛو مٛيٜ مَٻّٜ؞ ندٜ بَلْطٜ جٛوٜىٰطِطِ طٜنْ ٻَدِي حٜىٰوُکِ، وٛٻّٜ يَحُودَنْکٛعٜنْ پِوٛيْٻٜ لٜيْدِ اَاسِيَ نغِعِ بُلُسْ ندٜرْ وُرٛ شٜنِينغٛ؞ سٜيْ ٻٜ اُمِّنِ حَکِّيلٛ حَوْرُتُٻٜ طٛنْ فُو، ٻٜ نَنْغِمٛ؞ ٻٜ نغُلِّ ٻٜ مبِعِ، «اِسْرَاعِيلَنْکٛعٜنْ، مبَلّٜىٰمِنْ! رَا نٜطّٛ جَحٛووٛ کٛو تٛيٜ اٜ اٜکِّتِنَ يِمْٻٜ اٜ وِعَ لٜݧٛلْ مٜىٰطٜنْ اٜ اَتَّوْرَ مٜىٰطٜنْ اٜ وُرٛ شٜنِينغٛ نغٛعٛ وَلَا کٛ نَفِ؞ جٛونِ مَا اٛ وٛنِّي وِغٜىٰرٜ شٜنِيندٜ نغَمْ اٛ وَدِّي يِمْٻٜ نَاع يَحُودَنْکٛعٜنْ ندٜرْ وُرٛ شٜنِينغٛ!» ٻٜ مبِعُ نٛنْ نغَمْ ٻٜ نغِيدِينٛ بُلُسْ اٜ تُرٛوفِمُسْ نٜطّٛ اَافِسَ ندٜرْ غَرِيرِ ندِنْ؞ اٜ ٻٜ کَمِّي بُلُسْ نَتِّنِيمٛ ندٜرْ وُرٛ شٜنِينغٛ؞ حَکِّيلٛ يِمْٻٜ غَرِيرِ ندِنْ فُو اُمِّي؞ يِمْٻٜ اٜ مبُرْتٛيٛو کٛو تٛيٜ اٜ ندٛغّٛيَ اٜ نغَرَ؞ ٻٜ نَنْغِ بُلُسْ ٻٜ ندَسِمٛ ٻٜ مبُرْتِنِمٛ وُرٛ شٜنِينغٛ؞ طٛنْ اٜ طٛنْ دَمُّطٜ مَاغٛ فُو مَٻَّا؞ اٜ ٻٜ شِرْيٛ ٻٜ مبَرَ بُلُسْ، سٜيْ مَوْطٛ سٛوجِعٜنْ رٛومَ نَنِ حَبَرُ حَکِّيلٛ يِمْٻٜ اُرُشَلِيمَ فُو اُمَّکٜ؞ طٛنْ اٜ طٛنْ، اٛ حٛشِّ سٛوجِعٜنْ اٜ مَوْٻٜ مَٻّٜ، اٛ اُمَّنِي کَوْرُتُٻٜ ٻٜنْ؞ ندٜ يِمْٻٜ ٻٜنْ نغِيدِمٛ اٜ سٛوجِعٜنْ، طٛنْ اٜ طٛنْ ٻٜ اَلِ فِيکِ بُلُسْ؞ مَوْطٛ اٛنْ ٻَتِّي بُلُسْ وِعِ اٛ نَنْغٜىٰ اٛ حَٻِّرٜىٰ ٻٛغِّ نجَمْندِ طِطِ؞ ندٜنْ اٛ پَمِ بُلُسْ کَنْکٛ اٛ مٛيٜ، طُمٜ اٛ وَطِ؟ يِمْٻٜ ٻٜنْ بٛو اٜ نغُلَّ؞ کٛو مٛيٜ اٜ کَ وِعَتَ حَا اٛ دُلِّ غٛونغَ حَالَ کَنْ؞ سٜيْ اٛ وِعِ بُلُسْ يَارٜىٰ وُرٛ سٛوجِعٜنْ؞ ندٜ ٻٜ نجٛتِّي پٜنْتِرْطُمْ وُرٛ نغٛنْ، سٛوجِعٜنْ پٜفْتِمٛ دٛوْ نغَمْ يِمْٻٜ ٻٜنْ طُوطِي؞ يِمْٻٜ طُطْٻٜ ٻٜنْ اٜ تٛکِّمٛ اٜ ٻٜ نغُلَّ اٜ ٻٜ مبِعَ، «مبَرٜىٰمٛ!» ندٜ ٻٜ نغَرِ نَتِّنْکِمٛ وُرٛ سٛوجِعٜنْ ٻٜنْ، بُلُسْ وِعِ مَوْطٛ اٛنْ، «کٛو اَ جَٻَيْ مِ مٜدَّ اٜ مَاطَ؟» مَوْطٛ سٛوجِعٜنْ اٛنْ وِعِ بُلُسْ «اَشٜىٰ، اَ وَاوِ حٜلٜنَنْکٛورٜ؟ نَاع اَنْ وٛنِ مَسَرَنْکٜىٰجٛ اُمِّنْطٛ حَوْرٜ کٛ نٜىٰٻَايِ، حَا حَوْرِتِ يِمْٻٜ کَلُّٻٜ ندٜرْ لَدّٜ کٜوْتُٻٜ 4,000؟» بُلُسْ وِعِ، «مِنْ مِ يَحُودَنْکٜىٰجٛ دَݧَاطٛ ندٜرْ غَرِيرِ مَوْندِ بِعٜتٜىٰندِ تَرْسُسْ ندٜرْ لٜيْدِ کِلِيکِيَ؞ اٜ مِ تٛرٛمَا اَلَايَمْ مِ مٜدَّ اٜ يِمْٻٜ؞» سٜيْ مَوْطٛ سٛوجِعٜنْ اٛنْ جَٻِ اٛ مٜدَّ اٜ مَٻّٜ؞ سٜيْ بُلُسْ دَرِي دٛوْ پٜنْتِرْطُمْ سُودُ، اٛ پٜفْتَنِ يِمْٻٜ ٻٜنْ جُنْغٛ نغَمْ ٻٜ ندٜعِّتَ؞ ندٜ ٻٜ ندٜعِّتِ، اٛ مٜتِرَنِٻٜ طٜمْنغَلْ اِبْرَانِيَنْکٛورٜ، اٛ وِعِ، «اٛنٛنْ بَنْدِرَاٻٜ اَمْ اٜ دَݧٛوٻٜ اَمْ، کٜتِّندَنٜىٰيَمْ مِ وِعَعٛنْ غٛونغَ دٛوْ کٛ نغُلّٛرِيطٛنْيَمْ؞» ندٜ ٻٜ نَنِ اٜ مٛ مٜتِرَنَٻٜ اِبْرَانِيَنْکٛورٜ ٻٜ ٻٜيْدِ دٜعُّتُکِ؞ ندٜنْ اٛ وِعِٻٜ، «مِنْ مِ يَحُودَنْکٜىٰجٛ دَݧَاطٛ غَرِيرِ تَرْسُسْ ندٜرْ لٜيْدِ کِلِيکِيَ؞ اَمَّا طٛعٛ اُرُشَلِيمَ مَوْنُمِ؞ غَمَالِيَ وٛنِ مٛودِبّٛ اَمْ؞ کَنْکٛ جَنْغِنِيَمْ اَتَّوْرَ مَامَعٜنْ مٜىٰطٜنْ؞ اٜ مِ تٛکِّ اَللَّه اٜ ٻٜرْندٜ غٛعٛ نٛنْ نٛ تٛکِّرْطٛنْمٛ حَنْدٜ؞ مِ تٛرِّينٛ تٛکُّٻٜ لَاوٛلْ يٜىٰسُ حَا مِ وَرِي وٛٻّٜ؞ مِ نَنْغِي وٛرْٻٜ حَا اٜ رٜوْٻٜ، مِ مَٻِّيٻٜ ندٜرْ سُودُ شُرَلْ؞ مَوْطٛ مَوْٻٜ اَرْدِيٻٜ دِينَ اٜ کَوْتَلْ مَوْٻٜ بٛو ٻٜ مبَاوَيْ تَبِّتِنَنْکِعٛنْ کٛ مبِيمِعٛنْ طُمْ غٛونغَ؞ دَغَ تٛ مَٻّٜ کٜٻُمِ طٜرٜىٰجِ يَاکِ تٛ يَحُودَنْکٛعٜنْ وٛنْٻٜ غَرِيرِ دِمَسْکُ؞ مِ يَحِ تٛنْ نَنْغٛيْکِ تٛکُّٻٜ يٜىٰسُ، مِ وَدَّٻٜ اُرُشَلِيمَ نغَمْ ٻٜ تٛرّٜىٰ؞ «اٜ مِ دٛوْ لَاوٛلْ يَاکِ دِمَسْکُ، ندٜ ٻَدِيمِ غَرِيرِ ندِنْ، شَکَ ݧَلَوْمَ مِ اَنْدَا مِ اَنْدِتَا سٜيْ وٛنْغٛلْ جَيْنغٛلْ دَنٜوٛلْ تَرْ پِوٛيِ دَغَ دٛوْ يٜيْنَنِييَمْ؞ سٜيْ نجَنُمِ اٜ لٜيْدِ، نَنْمِ وٛنْدٜ حٛنٛنْدٜ اٜ وِعَيَمْ، ‹شَاوُلُ، شَاوُلُ، نغَمْ طُمٜ تٛرَّتَايَمْ؟› نٛوتِيمِ مبِيمِ، ‹مَوْطٛ، اَنْ طُمْ مٛيٜ؟› اٛ وِعِيَمْ، ‹مِنْ وٛنِ يٜىٰسُ نَجَرَنْکٜىٰجٛ مٛ تٛرَّتَا؞› وٛنْدُٻٜ اٜ اَمْ نغِعِ جَيْنغٛلْ نغٛلْ، اَمَّا ٻٜ نَنَايِ حٛنٛنْدٜ مٜتَنَيْطٛيَمْ اٛنْ؞ ندٜنْ مبِيمِ، ‹جٛومِرَاوٛ، کٛ نغِطَّا مِ وَطَ؟› اٛ وِعِيَمْ، ‹اُمَّ نجَحَا دِمَسْکُ؞ تٛنْ طُمْ وِعَتَمَ کٛ نغَطَتَا فُو؞› وٛنْدُٻٜ اٜ اَمْ نجٛغَنِييَمْ جُوطٜ حَا ندٜرْ غَرِيرِ دِمَسْکُ، نغَمْ جَيْنغٛلْ نغٛلْ وُمْنِييَمْ؞ «ندٜرْ غَرِيرِ ندِنْ اٜ وٛودِ غٛطّٛ نٜطّٛ بِعٜتٜىٰطٛ حَنَانِيَ، کُلٛووٛ جٛومِرَاوٛ، تٛکُّطٛ اَتَّوْرَ، مٛ يَحُودَنْکٛعٜنْ جٛوطِيٻٜ تٛنْ فُو مَنَتَ؞ اٛ وَرِ اٛ دَرِي يٜىٰسٛ اَمْ، اٛ وِعِيَمْ، ‹بَنْدِرَاوٛ اَمْ شَاوُلُ، وُمْتُ!› طٛنْ اٜ طٛنْ مبُمْتُمِ نغِيمٛومِ؞ اٛ وِعِيَمْ، ‹اَللَّه مٛ مَامَعٜنْ مٜىٰطٜنْ سُٻِيمَ نغَمْ اَنْدَا کٛ اٛ يِطِ وَطُکِ، نغِعَا اَادِلِيجٛ مَاکٛ، نَنَا کٛ اٛ وِعَتَ اٜ حٛنْدُکٛ مَاکٛ، نغَمْ اَنْ اَندِنْتَمٛ يٜىٰسٛ يِمْٻٜ فُو دٛوْ کٛ نغِيطَا اٜ کٛ نَنْطَا؞ جٛونِ، طُمٜ ندٜنْتُطَا؟ اُمَّ طُمْ وَطَنْمَا بَڤْتِسْمَ، تٛرٛطَا اَللَّه يَافَنٛمَا حَکّٜ مَاطَ؞› «غَطَ مِ وَرْتِي اُرُشَلِيمَ، اٜ مِ وَطَ دٛعَارٜ ندٜرْ وُرٛ شٜنِينغٛ، سٜيْ نغِيمِ وَحَيُ؞ ندٜرْ وَحَيُ طُمْ، مِ يِعِ جٛومِرَاوٛ اٜ وِعَيَمْ، ‹يَوْنُ، وُرْتَ اُرُشَلِيمَ، نغَمْ يِمْٻٜ طٛعٛ نجَٻَتَا کٛ مبِعَتَا دٛوْ اَمْ؞› ندٜنْ نٛوتِيمِ مبِيمِ، ‹جٛومِرَاوٛ، کَمْٻٜ اٜ کٛعٜ مَٻّٜ اٜ ٻٜ اَنْدِ مِ نَتِّي ندٜرْ شُوطِ دٛعَارٜ فُو، مِ نَنْغِي تٛکُّٻٜ يٜىٰسُ، مِ ڤِيِيٻٜ، مِ مَٻِّيٻٜ ندٜرْ سُودُ شُرَلْ؞ ندٜ اِسْتِفَانُسْ مٜتَنَيْطٛ يِمْٻٜ دٛوْ مَاطَ وَرَا، مِنْ اٜ حٛورٜ اَمْ مِ جَٻِي وَرُکِمٛ، مِنْ رٜىٰنِ کٛلْتٜ بَرْٻٜمٛ؞› جٛومِرَاوٛ وِعِيَمْ، ‹اُمَّ، مِ لِلٜتٜ تٛ وٛطِّ ندٜرْ لٜپِّ طِ نَاع يَحُودَنْکٛعٜنْ؞› » يِمْٻٜ ٻٜنْ اٜ کٜتِّندَنِي بُلُسْ نَاکِ اٛ وِعِ کَعَ حَالَ؞ سٜيْ ٻٜ نغُلِّ سٜمْبٜىٰ، ٻٜ مبِعِ، «مبَرٜىٰمٛ، اِتّٜىٰمٛ دَغَ ندٜرْ دُونِيَارُ ندُعُ! اٛ حَانَايِ اَلْدٜىٰکِ اٜ يٛنْکِ!» اٜ ٻٜ نغُلَّ، اٜ ٻٜ ٻٛرْتٛو کٛلْتٜ مَٻّٜ، اٜ ٻٜ نٛکَّ مبُلْمبُلْدِ اٜ ٻٜ شَنْکِتَندِ دٛوْ؞ سٜيْ مَوْطٛ سٛوجِعٜنْ اٛنْ وِعِ طُمْ يَارَ بُلُسْ ندٜرْ وُرٛ سٛوجِعٜنْ، ٻٜ ڤِيَمٛ نغَمْ ٻٜ اَنْدَ کٛ وَطِ يِمْٻٜ ٻٜنْ نغُلِّرْتَ دٛوْ مَاکٛ نِحِ؞ ندٜ ٻٜ کَٻِّمٛ نغَمْ ٻٜ ڤِيَمٛ، سٜيْ بُلُسْ وِعِ اَرْدِيطٛ غٛنْطٛ طٛنْ، «کٛو اٛنْ نغٛودِ لَامُ فِيکِ رٛومَنْکٜىٰجٛ مٛ وَطَنَاکَ کِيتَ تَوْ؟» ندٜ اَرْدِيطٛ اٛنْ نَنِ نٛنْ، اٛ يَحِ تٛ مَوْطٛ مَاکٛ، اٛ وِعِ، «طُمٜ نغِطَّا وَطَنْکِمٛ؟ نغَمْ نٜطّٛ اٛنْ اٛ رٛومَنْکٜىٰجٛ!» سٜيْ مَوْطٛ سٛوجِعٜنْ اٛنْ وَرِ تٛ بُلُسْ، پَمِمٛ وِعِ، «وِعَمْ غٛونغَ، اَ رٛومَنْکٜىٰجٛ؟» بُلُسْ نٛوتِي، وِعِ، «اٜىٰ، مِ رٛومَنْکٜىٰجٛ!» اٛ وِعِ بُلُسْ، «مِنْ، اٜ شٜىٰدٜ طُطّٜ کٜٻُمِ وَرْتُکِ رٛومَنْکٜىٰجٛ؞» بُلُسْ وِعِمٛ، «مِنْ بٛو مِ رٛومَنْکٜىٰجٛ نغَمْ دَݧٛوٻٜ اَمْ نغَرْتِي رٛومَنْکٛعٜنْ؞» طٛنْ اٜ طٛنْ شِرْيِنٛوٻٜ فِيکِمٛ اَلِمٛ؞ مَوْطٛ اٛنْ حُلِ، نغَمْ اٛ اَنْدِتِي بُلُسْ نٛ رٛومَنْکٜىٰجٛ، رَطُّمْ حَا ٻٜ کَٻِّرِيمٛ ٻٛغِّ نجَمْندِ؞ تٛو، مَوْطٛ سٛوجِعٜنْ اٛنْ اٜ يِطِ اَنْدُکِ کٛ وَطِ يَحُودَنْکٛعٜنْ نغُلّٛيِي بُلُسْ؞ نغَمْ نٛنْ، ندٜ وٜىٰتِ اٛ وَطِ طُمْ فِتِّ بُلُسْ اٛ نٛدِّ مَوْٻٜ اَرْدِيٻٜ دِينَ اٜ کَوْتَلْ مَوْٻٜ فُو ٻٜ کَوْرِتَ؞ اٛ وَدِّ بُلُسْ يٜىٰسٛ مَٻّٜ؞ بُلُسْ سُتِي کَوْتَلْ مَوْٻٜ، وِعِٻٜ، «بَنْدِرَاٻٜ اَمْ، اٜ ٻٜرْندٜ لَاٻُندٜ تٛکِّرْمِ اَللَّه دَغَ اَرَنْدٜ حَا وَرْکِ حَنْدٜ؞» سٜيْ حَنَانِيَ، مَوْطٛ مَوْٻٜ اَرْدِيٻٜ دِينَ وِعِ دَرِيٻٜ حَادٜ بُلُسْ ڤِيَ حٛنْدُکٛ مَاکٛ؞ سٜيْ بُلُسْ وِعِمٛ، «اَنْ مَا اَللَّه فِيٜتٜ، اَنْ مُنَافُکِيجٛ! اَ جٛوطِ نغَمْ نغَطَنَايَمْ کِيتَ دٛوْ دٛوکَ اَتَّوْرَ، اَمَّا اَنْ اَ يٜوِي دٛوکَ طُمْ نغَمْ اَ وِعِ مِ فِيٜىٰ؞» دَرِيٻٜ حَادٜ مَاکٛ مبِعِمٛ، «اَ حُطُ مَوْطٛ مَوْٻٜ اَرْدِيٻٜ دِينَ مٛ اَللَّه سُٻِ؟» بُلُسْ وِعِ، «بَنْدِرَاٻٜ اَمْ، مِ اَنْدَا اٛ مَوْطٛ مَوْٻٜ اَرْدِيٻٜ دِينَ، نغَمْ اَايَارٜ وِعِي، ‹تَاع حُطُ اَرْدِيطٛ لٜݧٛلْ!› » ندٜ بُلُسْ اَنْدِتِ وٛٻّٜ ندٜرْ کَوْتَلْ نغَلْ ٻٜ سَادُسَنْکٛعٜنْ، وٛٻّٜ ندٜرْ مَٻّٜ بٛو ٻٜ فَارِسَنْکٛعٜنْ، اٛ وِعِ اٜ سٜمْبٜ، «بَنْدِرَاٻٜ اَمْ، مِنْ مِ فَارِسَنْکٜىٰجٛ، ٻِي فَارِسَنْکٛعٜنْ؞ مِ وُلَّ دٛوْ کَمُّندٜ ندٜ نغٛودُمِ دٛوْ اُمَّاکِ مَيْٻٜ؞» ندٜ اٛ وِعِ نٛنْ، سٜيْ فَارِسَنْکٛعٜنْ اٜ سَادُسَنْکٛعٜنْ ڤُطِّ يٜدّٛوتِرْکِ؞ کَوْتَلْ نغَلْ سٜنْدِي طِطِ، نغَمْ سَادُسَنْکٛعٜنْ مبِعِ اُمَّاکِ مَيْٻٜ وَلَا، مَلَاعِکَعٜنْ نغَلَا، رُوحُوجِ نغَلَا، اَمَّا فَارِسَنْکٛعٜنْ اٜ مبِعَ طُمْ فُو تَتُمْ اٜ طُمْ وٛودِ؞ غٜدِّ ٻٜيْدِ اُمَّاکِ؞ وٛٻّٜ دَغَ ندٜرْ مٛودِٻّٜ اَتَّوْرَ ندٜرْ فَارِسَنْکٛعٜنْ ندَرِ، اُمِّنِ غٜدِّ کَلُّطِ، ٻٜ مبِعِ، «مِنْ نغِعَايِ غٛطُّمْ کٛ حَلِّ کٛ نٜطّٛ اٛعٛ وَطِ؞ طُمْ غَطٛتٛوطُمْ رُوحُ کٛو مَلَاعِکَاجٛ مٜدِّي اٜ مَاکٛ!» غٜدِّ طِنْ نغَرْتِ کَلُّطِ حَا مَوْطٛ سٛوجِعٜنْ اٛنْ حُلِ تٛ بُلُسْ شِشِّتٜىٰ؞ نغَمْ نٛنْ اٛ وِعِ سٛوجِعٜنْ مَاکٛ نجَحَ تٜىٰتٛيَ بُلُسْ تٛ يِمْٻٜ اٜ سٜمْبٜ، ٻٜ نجَارَمٛ وُرٛ سٛوجِعٜنْ؞ ندٜرْ جٜمَّارٜ ندٜنْ جٛومِرَاوٛ وَنْغِ حَادٜ بُلُسْ، وِعِمٛ، «تَاع حُلُ! نٛنْ نٛ اَندِنِرْطَا حَبَرُ اَمْ ندٜرْ اُرُشَلِيمَ، دٛولٜ نغَطَا نٛنْ ندٜرْ غَرِيرِ رٛومَ؞» ندٜ وٜىٰتِ، وٛٻّٜ يَحُودَنْکٛعٜنْ کَوْتِ کٛعٜ، ٻٜ کُنِي وِيکِ ٻٜ نجَرَتَا ٻٜ ݧَامَتَا سٜيْ تٛ ٻٜ مبَرِي بُلُسْ؞ کَٻُّٻٜ دَبَرٜ ندٜنْ ٻُرِي يِمْٻٜ 40؞ ٻٜ نجَحِ تٛ مَوْٻٜ اَرْدِيٻٜ دِينَ اٜ مَوْٻٜ، ٻٜ مبِعِٻٜ، «مِنْ کُنَنَکٜ اَللَّه مِنْ نجَرَتَا مِنْ ݧَامَتَا، سٜيْ تٛ مِنْ مبَرِي بُلُسْ؞ جٛونِ، اٛنٛنْ اٜ کَوْتَلْ مَوْٻٜ، مبِعٜىٰ مَوْطٛ سٛوجِعٜنْ اٛ وَدَّنَعٛنْ بُلُسْ، نغَطٛنْ بٛ اٛنْ نغِطِ ٻٜيْدٛنْ نَنُکِ کٛ اٛ وِعَتَ؞ مِنٛنْ بٛو، اٜ مِنْ شِرْيِي وَرُکِمٛ کٛ اٛ يٛتّٛو تٛ مٛوطٛنْ؞» اَمَّا ٻِي مِݧِرَاوٛ بُلُسْ دٜبّٛ نَنِي کٛ طُمْ شِرْيِي؞ نغَمْ نٛنْ اٛ يَحِ تٛ وُرٛ سٛوجِعٜنْ نغٛنْ، اٛ نَتِّ، اٛ وِعِکَ بُلُسْ؞ سٜيْ بُلُسْ نٛدِّ غٛعٛتٛ ندٜرْ اَرْدِيٻٜ سٛوجِعٜنْ، وِعِمٛ، «يَارُ کَيٜىٰجٛ اٛعٛ تٛ مَوْطٛ مٛوطٛنْ، نغَمْ اٜ مٛ وٛودِ کٛ اٛ وِعَتَمٛ؞» سٜيْ اَرْدِيطٛ سٛوجِعٜنْ اٛنْ يَارِمٛ تٛ مَوْطٛ اٛنْ، اٛ وِعِمٛ، «نَنْغَاطٛ بِعٜتٜىٰطٛ بُلُسْ نٛدِّيَمْ، تٛرِييَمْ مِ وَدَّ کَيٜىٰجٛ اٛعٛ تٛ مَاطَ، نغَمْ اٜ وٛودِ کٛ اٛ وِعَتَمَ؞» مَوْطٛ اٛنْ نَنْغِ جُنْغٛ مَاکٛ، فٛوطِمٛ وُتُّدُ، پَمِمٛ، وِعِمٛ، «طُمٜ نغِطَّا وِعُکِيَمْ؟» کَيٜىٰجٛ اٛنْ نٛوتِي، وِعِ، «اَرْدِيٻٜ يَحُودَنْکٛعٜنْ کَوْتِي حٛورٜ جَانغٛ ٻٜ تٛرٜتٜ نجَارَنَاٻٜ بُلُسْ يٜىٰسٛ کَوْتَلْ مَوْٻٜ، ٻٜ نغَطَيْ بٛ اٜ ٻٜ نغِطِ ٻٜ ٻٜيْدَ نَنُکِ کٛ اٛ وِعَتَ؞ اَمَّا تَاع جَٻُ کٛ ٻٜ مبِعِ! نغَمْ کٛ ٻُرِ يِمْٻٜ 40 ندٜرْ مَٻّٜ شِرْيَکٜ تَٻَّاکِمٛ دٛوْ لَاوٛلْ؞ ٻٜ فُو ٻٜ کُنَکٜ ٻٜ نجَرَتَا ٻٜ ݧَامَتَا سٜيْ تٛ ٻٜ مبَرِيمٛ؞ جٛونِ ٻٜ شِرْيَکٜ، اٜ ٻٜ کٜطِي کٛ نغَطَتَا؞» مَوْطٛ اٛنْ وِعِ کَيٜىٰجٛ اٛنْ، «تَاع وِعُ کٛو مٛيٜ اَ وِعِييَمْکَ؞» سٜيْ اٛ اَلِ کَيٜىٰجٛ اٛنْ دِلِّ؞ سٜيْ مَوْطٛ سٛوجِعٜنْ اٛنْ نٛدِّ اَرْدِيٻٜ سٛوجِعٜنْ مُوطُمْ طِطٛ، وِعِٻٜ، «شِرْيٜىٰ سٛوجِعٜنْ 200 اٜ سٛوجِعٜنْ وَطّٛتٛوٻٜ ڤُشِّ کَمْٻٜ 70 اٜ سٛوجِعٜنْ جٛغٛتٛوٻٜ لَبّٜ 200، نَنْغٛنْ لَاوٛلْ يَاکِ غَرِيرِ کَيْسَارِيَ نجَمْندِ جٛوٜىٰنَيِ حَنْدٜ جٜمَّ؞ شِرْيٜىٰ ڤُشِّ طِ بُلُسْ وَطّٛتٛو نجَارٛنْمٛ جَمْ تٛ فٜلِسْ غٛمْنَاجٛ؞» مَوْطٛ اٛنْ وِنْدِ طٜرٜوٛلْ، وِعِ، «مِنْ، کَلَوْدِيُسْ لِسِيَ، اٜ مِ حٛوْنُمَا، يَا فٜلِسْ، لَامِيطٛ مَوْطٛ؞ نٜطّٛ مٛ لِلْدٛيْمَامِ، اَرْدِيٻٜ يَحُودَنْکٛعٜنْ نَنْغِيمٛ، اٜ نغِطِ وَرْکِمٛ؞ ندٜ طُمْ وِعِيَمْ اٛ رٛومَنْکٜىٰجٛ، مِ يَادِي اٜ سٛوجِعٜنْ، تٜىٰتُمٛومِ؞ ندٜ اٜ مِ يِطِ اَنْدُکِ کٛ ٻٜ نغُلّٛرِيمٛ، نجَارُمٛومِ يٜىٰسٛ کَوْتَلْ مَوْٻٜ يَحُودَنْکٛعٜنْ؞ مِ تَوِي دٛوْ دٛوکَ مَٻّٜ تَنْ ٻٜ نغُلّٛرِيمٛ، اَمَّا کٛ ٻٜ نغُلّٛرِيمٛ حٜوْتَايِ اٛ وَرٜىٰ کٛو اٛ مَٻّٜىٰ ندٜرْ سُودُ شُرَلْ؞ ندٜ طُمْ وِعِيَمْ يَحُودَنْکٛعٜنْ شِرْيَکٜ دَبَرٜ وَرُکِمٛ، طٛنْ اٜ طٛنْ مِ لِلْدٛيِيمٛ تٛ مَاطَ؞ مِ وِعِ غُلّٛيِيٻٜمٛ نجَحَ مبِعَ کٛ اٛ وَطِ يٜىٰسٛ مَاطَ؞» سٛوجِعٜنْ ٻٜنْ نغَطِ کٛ مَوْطٛ مَٻّٜ وِعِٻٜ، ٻٜ کٛشِّ بُلُسْ جٜمَّ، ٻٜ نجَارِمٛ غَرِيرِ اَنْتِفَاتِرِسْ؞ ندٜ فِنِ، سٛوجِعٜنْ غَرْٻٜ اٜ کٛيْطٜ شٛعِّي وُرٛ سٛوجِعٜنْ؞ ٻٜ اَلْدِ بُلُسْ اٜ سٛوجِعٜنْ وَطّٛتٛوٻٜ ڤُشِّ نجَادَ اٜ مَاکٛ؞ ندٜ سٛوجِعٜنْ وَطِّيٻٜ ڤُشِّ ٻٜنْ نجٛتِّي کَيْسَارِيَ، ٻٜ کٛکِّ غٛمْنَاجٛ اٛنْ طٜرٜوٛلْ نغٛلْ، ٻٜ اَلِ بُلُسْ تٛ جُنْغٛ مَاکٛ؞ ندٜ غٛمْنَاجٛ اٛنْ جَنْغِ طٜرٜوٛلْ نغٛلْ، اٛ پَمِ ندِيٜ لٜيْدِ بُلُسْ دَݧَا؞ ندٜ اٛ نَنِ بُلُسْ نٛ نٜطّٛ لٜيْدِ کِلِيکِيَ، اٛ وِعِمٛ، «مِ نَنَيْ کٛ مبِعَتَا تٛ غُلِّيٻٜمَ نغَرِي؞» سٜيْ اٛ وِعِ رٜىٰنٛوٻٜ ندٜىٰنَ بُلُسْ ندٜرْ لَامٛرْدٜ ندٜ حِرُدُسْ مَحِ؞ غَطَ بَلْطٜ جٛوِ، حَنَانِيَ، مَوْطٛ مَوْٻٜ اَرْدِيٻٜ دِينَ، وَرِ کَيْسَارِيَ؞ اٜ مٛ وٛنْدِ اٜ وٛٻّٜ مَوْٻٜ اٜ غٛطّٛ لَوْيَاجٛ بِعٜتٜىٰطٛ تَرْتُلُسْ؞ ٻٜ نغُلِّي بُلُسْ يٜىٰسٛ فٜلِسْ غٛمْنَاجٛ؞ ندٜ طُمْ وَدِّ بُلُسْ، تَرْتُلُسْ فُطِّ مٜتُکِ دٛوْ مَاکٛ اٜ وِعَ، «اَللَّه رٜىٰنٜ، لَامِيطٛ مَوْطٛ! لَامُ مَاطَ وَدَّنِيمِنْ جٛنْدٜ جَمْ نَاع سٜطَّ، کَدِمَا اَ مٛعِّنِي کٛ حَانِ مٛعِّنٜىٰکِ، کٛ لٜيْدِ ندِعِ ٻٜيْدٛرْتٛو، اَنْ وَطِطُمْ؞ طُمْ فُو دَغَ تٛ مَاطَ مِنْ کٜٻِطُمْ، مِنْ نغٜتِّيمَ نَاع سٜطَّ؞ مِ يِطَا جُوتِنَنْکِمَ بٛلِيطٜ، اَمَّا اٜ مِ تٛرٛمَا تَا جَٻِي حٜتِّندَنَمِنْ سٜطَّ؞ مِنْ تَوِي نٜطّٛ اٛعٛ نٛ کَلُّطٛ نَاع سٜطَّ، غَدّٛووٛ حَوْرٜ حَکُّندٜ يَحُودَنْکٛعٜنْ ندٜرْ دُونِيَارُ فُو؞ اٛ مَوْطٛ ندٜرْ دِينَ نَجَرَنْکٛعٜنْ، وَاتٛ تٛکُّٻٜ يٜىٰسُ؞ حَا مَا اٛ فُطِّي لَلِّنْکِ وُرٛ شٜنِينغٛ، کَنْجُمْ وَطِ مِنْ نَنْغِمٛ؞ [مِنْ نغِطِي وَطَنْکِمٛ کِيتَ اَمِنْ، اَمَّا لِسِيَ مَوْطٛ سٛوجِعٜنْ تٜىٰتِمٛ تٛ جُوطٜ اَمِنْ اٜ سٜمْبٜ، اٛ وِعِ وُلّٛيِيٻٜمٛ نغَرَ يٜىٰسٛ مَاطَ؞] اَنْ اٜ حٛورٜ مَاطَ، پَمُمٛ، اَ نَنَيْ بٛطُّمْ کٛ مِنْ نغُلّٛرِيمٛ فُو؞» يَحُودَنْکٛعٜنْ غَرْدُٻٜ اٜ مَاکٛ کَوْتِ مبِعِ کٛ اٛ وِعِ فُو طُمْ غٛونغَ؞ سٜيْ فٜلِسْ غٛمْنَاجٛ حٛلِّ بُلُسْ مٜتَ، سٜيْ بُلُسْ وِعِمٛ، «اٜ مِ اَنْدِ اَ وَطِي دُوٻِ طُطِّ اَ وَطَنَ يِمْٻٜ لٜيْدِ ندِعِ کِيتَ؞ نغَمْ مَاجُمْ اٜ مِ نَنَ بٜلْطُمْ وِعُکِمَ کٛ يِمْٻٜ ٻٜعٜ نغُلّٛرِييَمْ؞ طُمْ ٻُرَايِ بَلْطٜ سَڤّٛ اٜ طِطِ کٛ نجَامِ اُرُشَلِيمَ نغَمْ مِ مَوْنِنَ جٛومِرَاوٛ؞ تَا طَٻِّتِي کٛو طُمٜ، اَ تَوَيْ نٛنْ طُمْ وٛنْتِندِرِ؞ وَلَا تَوُطٛيَمْ اٜ مِ يٜدّٛوتِرَ اٜ غٛطّٛ کٛو اٜ مِ اُمِّنَ حَکِّيلٛ يِمْٻٜ، کٛو ندٜرْ وُرٛ شٜنِينغٛ، کٛو ندٜرْ شُوطِ دٛعَارٜ، کٛو ندٜرْ غَرِيرِ؞ ٻٜ مبَاوَتَا تَبِّتِنَنْکِمَ کٛ ٻٜ نغُلّٛرِييَمْ جٛونِ؞ اٜ مِ اَنْدِ اٜ ٻٜ مبِعَ لَاوٛلْ يٜىٰسُ نغٛلْ تٛکُّمِ طُمْ فٜوْرٜ، اَمَّا اٜ مِ مَوْنِنَ اَللَّه مٛ مَامَعٜنْ اَمِنْ، اٜ مِ حٛولِي کٛ وِنْدَا ندٜرْ اَتَّوْرَ اٜ دٜفْتٜ اَنَّبٛعٜنْ فُو؞ طٛنْمَا اٜ مِ وَطِ کَمُّندٜ اَمْ تٛ اَللَّه، نٛ کَمْٻٜ مَا ٻٜ نغَطِرِ کَمُّندٜ مَٻّٜ دٛوْ مَاکٛ، وِعُکِ مَيْٻٜ اَادِلِعٜنْ اٜ کَلُّٻٜ فُو ٻٜ اُمّٛتٛ دَغَ مَيْدٜ؞ کَنْجُمْ وَطِ کٛو ندٜيٜ ݧَلْندٜ اٜ مِ يِطِ جٛوطٛدَاکِ اٜ ٻٜرْندٜ لَاٻُندٜ يٜىٰسٛ اَللَّه اٜ يٜىٰسٛ يِمْٻٜ؞ «مِ وَطِي دُوٻِ سٜطَّ اٜ لٜيْطٜ يَاسِ؞ غَطَ طٛنْ مِ سٛعَّکٜ اُرُشَلِيمَ نغَمْ يَارَنْکِ ٻٜ نغَلَنَا دٛکَّلْ اٜ سَکَّنْکِ جٛومِرَاوٛ؞ اٜ مِ ندٜرْ وَطُکِ کٛ دِينَ اَمِنْ وِعِ مِ وَطَ نغَمْ مِ وَرْتَ لَاٻُطٛ يٜىٰسٛ جٛومِرَاوٛ، سٜيْ ٻٜ تَوِيَمْ ندٜرْ وُرٛ شٜنِينغٛ؞ مِ وٛنْدَا اٜ يِمْٻٜ طُطْٻٜ، مِ اُمِّنَايِ حَکِّيلٛ کٛو مٛيٜ؞ اَمَّا اٜ وٛودِ وٛٻّٜ يَحُودَنْکٛعٜنْ طٛنْ پِوٛيْٻٜ لٜيْدِ اَاسِيَ، کَمْٻٜ کَانِ نغَرَ نغُلّٛويَمْ يٜىٰسٛ مَاطَ، تٛ اٜ وٛودِ کٛ ٻٜ نغُلّٛرْتٛويَمْ؞ کٛو بٛو ٻٜعٜ وٛنْٻٜ طٛعٛ سٜيْ ٻٜ مبِعَ فِي کَلُّطُمْ طُمْ ٻٜ تَوْرِيَمْ شَرٜلْ کٛ ندَرِيمِ يٜىٰسٛ کَوْتَلْ مَوْٻٜ، سٜيْ نِ حَالَ نغٛعٛتَ تَنْ کَ مبِيمِ ندٜ ندَرِيمِ يٜىٰسٛ مَٻّٜ، وِعُکِ، ‹اٛنْ نغَطَنَيَمْ کِيتَ حَنْدٜ نغَمْ مِ جَٻِي مَيْٻٜ اُمّٛتٛ دَغَ مَيْدٜ!› » ندٜ فٜلِسْ نَنِ نٛنْ اٛ پٜفْتِ حَالَ کَنْ، نغَمْ اٜ مٛ اَنْدِ لَاوٛلْ يٜىٰسُ بٛطُّمْ؞ اٛ وِعِ، «سٜيْ تٛ لِسِيَ مَوْطٛ سٛوجِعٜنْ وَرِي، مِ تَپَنَعٛنْ کِيتَ؞» اٛ وِعِ اَرْدِيطٛ سٛوجِعٜنْ سُرَ بُلُسْ، اَمَّا تٛع اٛ حَطَمٛ وٜدِّتَاکِ، اٛ اَلَ حِغٛوٻٜ مَاکٛ مبَلَّمٛ؞ غَطَ بَلْطٜ سٜطَّ فٜلِسْ وَرْدِ اٜ دٜبّٛ مُوطُمْ، يَحُودَنْکٜىٰجٛ بِعٜتٜىٰطٛ دُرُوسِلَ؞ اٛ لِلِ بُلُسْ نٛدّٛيٜىٰ اٛ نَنَ کٛ اٛ وِعَتَ دٛوْ حٛولَاکِ يٜىٰسُ اَلْمَسِيحُ؞ اَمَّا ندٜ بُلُسْ وَطِ کَ مٜتُکِ دٛوْ اَادِلَاکُ اٜ سُرُکِ حٛورٜ اٜ ݧَلْندٜ جَانغٛ، سٜيْ فٜلِسْ حُلِ، وِعِ، «جٛونِ طُمْ حٜپِي؞ يَحُ! تٛ مِ حٜٻِي شَرٜلْ، مِ نٛدّٜتٜ؞» اٜ مٛ کَمِّي بُلُسْ حٛکَّيْمٛ شٜىٰدٜ؞ کَنْجُمْ وَطِ کٛو ندٜيٜ اٜ مٛ نٛدَّمٛ نغَمْ ٻٜ مٜدَّ؞ غَطَ دُوٻِ طِطِ، فٜلِسْ جِڤِّي، فٛکِيُسْ فٜسْتُسْ وَرْتِ غٛمْنَاجٛ؞ ندٜ فٜلِسْ اٜ يِطِ وٜلْنَنْکِ يَحُودَنْکٛعٜنْ ٻٜرْطٜ، اٛ اَلِ بُلُسْ ندٜرْ سُودُ شُرَلْ؞ بَلْطٜ تَتِ غَطَ فٜسْتُسْ وَرِي ندٜرْ لٜيْدِ ندِنْ نغَمْ فُطُّکِ کُوغَلْ لَامُ مُوطُمْ، اٛ اُمِّي دَغَ کَيْسَارِيَ، اٛ يَحِ اُرُشَلِيمَ؞ تٛنْ مَوْٻٜ اَرْدِيٻٜ دِينَ اٜ اَرْدِيٻٜ يَحُودَنْکٛعٜنْ نغُلِّي بُلُسْ تٛ مَاکٛ؞ ٻٜ تٛرِيمٛ اٛ وَدَّنَٻٜ بُلُسْ اُرُشَلِيمَ، نغَمْ ٻٜ نغَطِي دَبَرٜ نٛ ٻٜ مبَرْدَتَمٛ دٛوْ لَاوٛلْ؞ فٜسْتُسْ وِعِٻٜ، «بُلُسْ اٜ تٛنْ مَٻِّي ندٜرْ سُودُ شُرَلْ غَرِيرِ کَيْسَارِيَ؞ مِنْ اٜ حٛورٜ اَمْ مِ سٛعّٛتٛ تٛنْ نَاع کٛ نٜىٰٻِ؞ نغَمْ مَاجُمْ، سٜيْ مَوْٻٜ مٛوطٛنْ نجَادَ اٜ اَمْ کَيْسَارِيَ، ٻٜ نغُلّٛومٛ تٛنْ تٛ اٜ وٛودِ غٛطُّمْ کَلُّطُمْ طُمْ اٛ وَطِ؞» فٜسْتُسْ جٛوطِي تٛ مَٻّٜ کٛ ٻَدِي بَلْطٜ جٛوٜىٰتَتِ کٛو سَڤّٛ؞ غَطَ مَاجُمْ اٛ سٛعِّي غَرِيرِ کَيْسَارِيَ؞ ندٜ وٜىٰتِ، اٛ جٛوطِي دٛوْ جٛوطٛرْغَلْ کِيتَ، اٛ وِعِ بُلُسْ وَدّٜىٰ؞ ندٜ بُلُسْ وَرِ، يَحُودَنْکٛعٜنْ پِوٛيْٻٜ اُرُشَلِيمَ ڤِلِيمٛ، ٻٜ نغُلّٛرِيمٛ غُلَّالِ طُطِّ کَلُّطِ، طِ ٻٜ مبَاوَايِ تَبِّتِنْکِ؞ اَمَّا بُلُسْ وِعِٻٜ، «مِ وَطَايِ کٛ اَتَّوْرَ حَطِ، کٛو کٛ حَانَا دٛوْ وُرٛ شٜنِينغٛ، کٛو بٛو دٛوْ کَيْسَرْ لَامِيطٛ رٛومَنْکٛعٜنْ مَوْطٛ؞» اَمَّا فٜسْتُسْ اٜ يِطِ وٜلْنَنْکِ يَحُودَنْکٛعٜنْ ٻٜرْندٜ، نغَمْ نٛنْ اٛ پَمِ بُلُسْ، اٛ وِعِ، «اَ جَٻَيْ نجَحَا اُرُشَلِيمَ نغَمْ مِ وَطَنْمَا کِيتَ تٛنْ دٛوْ کٛ طُمْ وُلّٛرْتٛمَا؟» بُلُسْ نٛوتِي، وِعِ، «جٛونِ اٜ مِ دَرِي يٜىٰسٛ جٛوطٛرْغَلْ کِيتَ لٜيْ لَامُ کَيْسَرْ لَامِيطٛ رٛومَنْکٛعٜنْ مَوْطٛ تٛ حَانِ مِ وَطَنٜىٰ کِيتَ؞ مِ وَطَنَايِ يَحُودَنْکٛعٜنْ غٛطُّمْ کٛ وٛوطَا؞ اَنْ اٜ حٛورٜ مَاطَ اَ اَنْدِ؞ تٛ مِ وَطِي غٛطُّمْ کٛ حٜوْتِ مِ وَرٜىٰ، مِ سَلَتَاکٛ وَرٜىٰکِ؞ اَمَّا تٛ کٛ ٻٜ نغُلّٛرِييَمْ نَاع طُمْ غٛونغَ، وَلَا بَاوَيْطٛ وَطُکِيَمْ اٜ جُوطٜ مَٻّٜ؞ اٜ مِ يِطِ مِ وَطَنٜىٰ کِيتَ يٜىٰسٛ کَيْسَرْ!» غَطَ فٜسْتُسْ مٜدِّي اٜ کٛکّٛوٻٜمٛ شَاوٛرِ، اٛ وِعِ بُلُسْ، «ندٜ اَ تٛرَکٜ کِيتَ مَاطَ يَارٜىٰ تٛ کَيْسَرْ، طُمْ يَارٜتٜ تٛ مَاکٛ!» بَلْطٜ سٜطَّ غَطَ مَاجُمْ، غٛطّٛ لَامِيطٛ بِعٜتٜىٰطٛ اَغَرِفَ اٜ مَوْنِرَاوٛ مَاکٛ دٜبّٛ بِعٜتٜىٰطٛ بَنِسْ ٻٜ نغَرِ غَرِيرِ کَيْسَارِيَ نغَمْ ٻٜ نجَٻّٛو فٜسْتُسْ؞ ندٜ ٻٜ مبَالِ تٛنْ بَلْطٜ سٜطَّ، فٜسْتُسْ حٛکِّ لَامِيطٛ اٛنْ حَبَرُ بُلُسْ، اٛ وِعِ، «اٜ وٛودِ غٛطّٛ نٜطّٛ مٛ فٜلِسْ لَامِيطٛ اَلِ طٛعٛ ندٜرْ سُودُ شُرَلْ؞ کٛ نجَامِ اُرُشَلِيمَ، مَوْٻٜ اَرْدِيٻٜ دِينَ اٜ مَوْٻٜ يَحُودَنْکٛعٜنْ نغُلِّيمٛ تٛ اَمْ، ٻٜ تٛرِييَمْ مِ تَپَنَمٛ کِيتَ وَرٜىٰکِ؞ نٛوتِيمِ، مبِيمِٻٜ، اٜنٜنْ رٛومَنْکٛعٜنْ اٜنْ نغَطَنْتَا غٛطّٛ کِيتَ تٛ غُلِّيطٛمٛ وَلَا طٛنْ، ندٜنْ نَاع اٛ حٛکَّامَ شَرٜلْ نغَمْ اٛ وُرْتِنَ حٛورٜ مَاکٛ دٛوْ کٛ طُمْ وُلّٛرِيمٛ؞ تٛو، ندٜ نغَرْدُمِ اٜ مَٻّٜ طٛعٛ، مِ وٛنَّايِ شَرٜلْ کٛو سٜطَّ؞ ندٜ فِنِ نجٛوطِيمِ دٛوْ جٛوطٛرْغَلْ کِيتَ، مبِيمِ نٜطّٛ اٛنْ وَدّٜىٰ؞ ندٜ غُلِّيٻٜمٛ ندَرِي، ٻٜ نغُلّٛرَاکِمٛ غٛطُّمْ کَلُّطُمْ نٛ کَمِّنٛومِ؞ سٜيْ غٜدِّ تَنْ ٻٜ نغَادِ اٜ مَاکٛ دٛوْ بٛلِيطٜ دِينَ مَٻّٜ، اٜ غٛطّٛ مَيْطٛ بِعٜتٜىٰطٛ يٜىٰسُ، مٛ بُلُسْ وِعَتَ اٜ فٛوفَ؞ مِنْ بٛو، ندٜ مِ اَنْدَا نٛ نغَطَنَيْمِ حَالَ کَنْ، پَمُمٛومِ تٛ اٛ جَٻِي اٛ يَحَ اُرُشَلِيمَ اٛ وَطَنٜىٰ کِيتَ تٛنْ دٛوْ کٛ طُمْ وُلّٛرْتٛومٛ؞ اَمَّا ندٜ اٛ تٛرِييَمْ اٛ اَلٜىٰ ندٜرْ جُوطٜ سٛوجِعٜنْ نَا کَيْسَرْ وَطَنِيمٛ کِيتَ، مبِيمِ اٛ سُرٜىٰ تٛنْ نَا شَرٜلْ نغٜلْ لِلْدَيْمٛومِ تٛ کَيْسَرْ؞» ندٜنْ اَغَرِفَ وِعِ فٜسْتُسْ، «مِنْ اٜ حٛورٜ اَمْ، اٜ مِ يِطِ نَنْکِ کٛ نٜطّٛ اٛعٛ وِعَتَ؞» فٜسْتُسْ وِعِمٛ، «اَ نَنَيْ کٛ اٛ وِعَتَ جَانغٛ؞» ندٜ فِنِ اَغَرِفَ اٜ بَنِسْ نغَرِ ندٜرْ لَامُ مَوْطُمْ، ٻٜ نَتِّ ندٜرْ سُودُ کِيتَ، کَمْٻٜ اٜ مَوْٻٜ سٛوجِعٜنْ اٜ اَرْدِيٻٜ غَرِيرِ ندِنْ فُو؞ ندٜنْ فٜسْتُسْ وِعِ بُلُسْ وَدّٜىٰ، سٜيْ اٛ وَدَّا؞ فٜسْتُسْ وِعِ، «اَنْ اَغَرِفَ لَامِيطٛ اٜ يِمْٻٜ حَوْرُتُٻٜ طٛعٛ! اٛنْ نغِعِي نٜطّٛ مٛ يَحُودَنْکٛعٜنْ فُو نغُلِّي تٛ اَمْ ندٜرْ اُرُشَلِيمَ حَا اٜ طٛعٛ، اٜ ٻٜ مبِعَ اٜ سٜمْبٜ اٛ حَانَا اَلْدٜىٰکِ اٜ يٛنْکِ؞ اَمَّا مِ تَوِي اٛ وَطَايِ غٛطُّمْ کٛ حَانِ اٛ وَرٜىٰ؞ اَمَّا ندٜ کَنْکٛ اٜ حٛورٜ مَاکٛ اٛ تٛرَکٜ کِيتَ مَاکٛ يَارٜىٰ تٛ کَيْسَرْ، مِ سُٻِي لِلْدُکِمٛ تٛ کَيْسَرْ لَامِيطٛ؞ اَمَّا مِ وَلَا حَالَ ندَرِيکَ دٛوْ مَاکٛ کٛ حَانِ مِ وِنْدَنَ لَامِيطٛ اٛنْ؞ کَنْجُمْ وَطِ نغَدُّمٛومِ طٛعٛ يٜىٰسٛ مٛوطٛنْ اٛنْ فُو، کٛ ٻُرِ مَا يٜىٰسٛ مَاطَ اَنْ، اَغَرِفَ لَامِيطٛ، نغَمْ تٛ اٜنْ طَٻِّتِي کٛو طُمٜ مِ حٜٻَ کٛ مبِنْدُمِ؞ نغَمْ اٜ يِيکِ اَمْ، طُمْ لَاٻَنَايَمْ مِ يَارَ نَنْغَاطٛ تٛ لَامِيطٛ مَوْطٛ، مِ حٜٻَايِ فِي جَمُمْ طُمْ اٛ نَنْغِرَا؞» ندٜنْ اَغَرِفَ وِعِ بُلُسْ، «مِ اَلِيمَ وِعُ کٛ نغِطَّا وِعُکِ؞» سٜيْ بُلُسْ پٜفْتِ جُنْغٛ فُطِّ وُرْتِنْکِ حٛورٜ مُوطُمْ، وِعِ، «اَللَّه رٜىٰنٜ، اَغَرِفَ لَامِيطٛ؞ مِ نَنِي بٜلْطُمْ ندٜ کٜٻُمِ شَرٜلْ مٜتُکِ نغَمْ مِ وُرْتِنَ حٛورٜ اَمْ يٜىٰسٛ مَاطَ حَنْدٜ دٛوْ کٛ يَحُودَنْکٛعٜنْ نغُلّٛرِييَمْ فُو، نغَمْ اَ اَنْدِ ندٛنُوجِ يَحُودَنْکٛعٜنْ اٜ غٜدِّ اَمِنْ فُو؞ نغَمْ مَاجُمْ اٜ مِ تٛرٛمَا، حٜتِّندَنَيَمْ ندٜرْ مُݧَلْ؞ «يَحُودَنْکٛعٜنْ فُو اٜ اَنْدِ جٛنْدٜ اَمْ دَغَ کٛ مِ سُکَيٜلْ ڤَمَرٜلْ؞ اٜ ٻٜ اَنْدِ نٛ نجٛوطٛرِيمِ ندٜرْ لٜيْدِ اَمْ اٜ ندٜرْ اُرُشَلِيمَ فُو؞ کَمْٻٜ اٜ کٛعٜ مَٻّٜ، تٛ ٻٜ نجَٻِي وَطُکِ شٜيْدَ اَمْ، اٜ ٻٜ اَنْدِ دَغَ اَرَنْدٜ مِ غٛعٛتٛ ندٜرْ تٛکُّٻٜ لَاوٛلْ دِينَ اَمِنْ ٻُرْنغٛلْ سَطُکِ نغٛلْ فَارِسَنْکٛعٜنْ؞ جٛونِ، اٜ مِ دَرِي طٛعٛ يٜىٰسٛ مٛوطٛنْ اٜ مِ وَطَنٜىٰ کِيتَ نغَمْ کَمُّندٜ اَمْ دٛوْ حٜٻُکِ اَلْکَوَلْ نغَلْ اَللَّه وَطَنِ مَامَعٜنْ اَمِنْ؞ لٜپِّ اَمِنْ سَڤّٛ اٜ طِطِ فُو اٜ ندٜنْتِ ندٜرْ کَمُّندٜ حٜٻُکِ اَلْکَوَلْ نغَلْ، کَنْجُمْ وَطِ اٜ ٻٜ مَوْنِنَ اَللَّه جٜمَّ اٜ ݧَلَوْمَ؞ اَللَّه رٜىٰنٜ، نغَمْ اٜ مِ وٛودِ کَمُّندٜ ندٜنْ وَطِ يَحُودَنْکٛعٜنْ نغُلِّييَمْ! نغَمْ طُمٜ کَمِّيطٛنْ اَللَّه وَاوَتَا اُمِّنْکِ مَيْٻٜ؟ «مِنْ اٜ حٛورٜ اَمْ، ندٜنّٛ مِ کَمَّکٜ اٜ حَانِ مِ وَطَ کٛ مبَاوَيْمِ وَطُکِ نغَمْ مِ وٛنَّ اِنْدٜ يٜىٰسُ نَجَرَنْکٜىٰجٛ؞ کَنْجُمْ نغَطُمِ ندٜرْ اُرُشَلِيمَ؞ مَوْٻٜ اَرْدِيٻٜ دِينَ کٛکِّييَمْ لَامُ مِ مَٻَّ تٛکُّٻٜ يٜىٰسُ؞ مِ مَٻِّ طُطْٻٜ ندٜرْ سُودُ شُرَلْ؞ ندٜ ٻٜ تَپَنَا کِيتَ وَرٜىٰکِ، مِ جَٻِيطُمْ؞ مِ تٛرِّيٻٜ ندٜ طُطُّمْ ندٜرْ شُوطِ دٛعَارٜ فُو؞ اٜ مِ وَطَٻٜ ٻٜ نغَݧَ تٛکُّکِ يٜىٰسُ؞ مِ حَلَّنِيٻٜ نَاع سٜطَّ حَا اٜ مِ طَٻِّتَٻٜ ندٜرْ غَرِيجٜ غٛطّٜ لٜيْطٜ، اٜ مِ تٛرَّٻٜ؞ «ندٜ مَوْٻٜ اَرْدِيٻٜ دِينَ کٛکِّيَمْ لَامُ نَنْغُکِ تٛکُّٻٜ يٜىٰسُ تٛ غَرِيرِ دِمَسْکُ سٜيْ ندِلُّمِ؞ اَللَّه رٜىٰنٜ، اٜ مِ دٛوْ لَاوٛلْ شَکَ ݧَلَوْمَ، سٜيْ نغِيمِ جَيْنغٛلْ پِوٛيِي دَغَ دٛوْ نغٛلْ ٻُرِي جَيْنغٛلْ نَانغٜ نغٛلْ يٜيْنِي دٛوْ اَمِنْ، مِنْ اٜ ٻٜ نجَادَيْمِ؞ غَطَ مِنْ فُو مِنْ نجَنِي اٜ لٜيْدِ، سٜيْ نَنْمِ حٛنٛنْدٜ اٜ وِعَيَمْ ندٜرْ اِبْرَانِيَنْکٛورٜ، ‹شَاوُلُ، شَاوُلُ، نغَمْ طُمٜ تٛرَّتَايَمْ؟ اَ تٛرَّ حٛورٜ مَاطَ اٜ مٜىٰرٜ ندٜ نغَݧُطَايَمْ؞› نٛوتِيمِ مبِيمِ، ‹مَوْطٛ، اَنْ طُمْ مٛيٜ؟› جٛومِرَاوٛ وِعِ، ‹مِنْ وٛنِ يٜىٰسُ مٛ تٛرَّتَا؞ اُمَّ دَرَ؞ مِ وَنْغَنٜ نغَمْ مِ سُٻُمَا نغَرْتَا کُوَنَيْطٛيَمْ، شٜيْدِنَا کٛ نغِيطَا دٛوْ اَمْ جٛونِ اٜ کٛ کٛلَّيْمَامِ يٜىٰسٛ طٛعٛ؞ مِ حِسْنٜتٜ دَغَ جُوطٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، ٻٜ لِلَيْمَامِ تٛ مَٻّٜ؞ اَ وُمْتِنَيْٻٜ، ٻٜ مبُرْتٛيٛ ندٜرْ ݧِوْرٜ، ٻٜ نغَرْتَ ندٜرْ جَيْنغٛلْ، ٻٜ مبُرْتٛو ندٜرْ لَامُ شٜيْطَنْ، ٻٜ شٛعّٛو تٛ اَللَّه، نغَمْ ٻٜ کٜٻَ يَافَنٜىٰکِ حَکّٜ، ٻٜ نَتَّ ندٜرْ يِمْٻٜ غَرْتُٻٜ شٜنِيٻٜ نغَمْ ٻٜ کٛولَکٜيَمْ؞› «اَللَّه رٜىٰنٜ، اَغَرِفَ لَامِيطٛ، کَنْجُمْ وَطِ مِ سَلَاکِ وَطُکِ کٛ نغِيمِ ندٜرْ وَحَيُ دَغَ دٛوْ؞ اَرَنْدٜ مِ وَعَجِنَنِي يِمْٻٜ دِمَسْکُ، ندٜنْ اٜ يِمْٻٜ اُرُشَلِيمَ اٜ لٜيْدِ يَحُودِيَ فُو؞ غَطَ نٛنْ تٛکُّمِ ندٜرْ يِمْٻٜ نَاع يَحُودَنْکٛعٜنْ، مبِيمِٻٜ ٻٜ تُوبَ، ٻٜ نغَيْلِتٛيٛو تٛ اَللَّه، ٻٜ کُوَ کُوطٜ کٛلَّيْطٜ ٻٜ تُوبِي؞ کَنْجُمْ وَطِ يَحُودَنْکٛعٜنْ نَنْغِيَمْ ندٜرْ وُرٛ شٜنِينغٛ، ٻٜ ٻَدِي وَرْکِيَمْ؞ اَمَّا اَللَّه اٜ وَلَّيَمْ حَا حَنْدٜ؞ نغَمْ نٛنْ اٜ مِ دَرِي طٛعٛ اٜ مِ مٜتَنَعٛنْ غٛونغَ يٜىٰسٛ مَوْٻٜ اٜ ڤَمَرْٻٜ فُو؞ مِ وِعَايِ کٛو طُمٜ سٜيْ کٛ مُوسَ اٜ اَنَّبٛعٜنْ حٛرِيٻٜ مبِعِ وَطَيْ، وَاتٛ اَلْمَسِيحُ تٛرّٛتٛ، ندٜنْ اٛ وَرْتَ اَرْتُطٛ اُمَّاکِ دَغَ مَيْدٜ، نغَمْ اٛ وَدَّ جَيْنغٛلْ تٛ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ؞» بُلُسْ اٜ ندٜرْ مٜتُکِ، سٜيْ فٜسْتُسْ پٜفْتِ حٛنٛنْدٜ، وِعِ، «بُلُسْ، حٛورٜ مَاطَ وَيْلِتَکٜ! طُوطُکِ اَنْدَلْ مَاطَ حَاݝِيمَ!» اَمَّا بُلُسْ وِعِ، «اَللَّه رٜىٰنٜ، فٜسْتُسْ، مِ حَاݝَاکِ؞ کٛ مبِيمِ طُمْ غٛونغَ شٜمْبِطْکَ؞ اَغَرِفَ لَامِيطٛ اٜ اَنْدِ فِي طُعُمْ فُو؞ کَنْجُمْ وَطِ مِ حُلَايِ مٜتُکِ يٜىٰسٛ مَاکٛ؞ مِ تَبِّتِنِي اٜ مٛ اَنْدِ کٛو طُمٜ نٛ وٛنْتِندِرِ، نغَمْ طُمْ وَطَاکَ اٜ سُوطٜ؞ اَغَرِفَ لَامِيطٛ! اَ جَٻِي کٛ اَنَّبٛعٜنْ مبِنْدِ؟ اٜ مِ اَنْدِ اَ جَٻِي!» اَغَرِفَ وِعِ بُلُسْ، «ندٜرْ شَرٜلْ سٜطَّ نغٜعٜلْ اَ ݧُمَ اَ وَاوَيْ وَرْتِرْکِيَمْ تٛکُّطٛ يٜىٰسُ؟» بُلُسْ وِعِمٛ، «کٛو ندٜرْ شَرٜلْ سٜطَّ، کٛو نَاع ندٜرْ شَرٜلْ سٜطَّ، اٜ مِ تٛرٛو اَللَّه نغَمْ مَاطَ اَنْ اٜ نَنْٻٜيَمْ حَنْدٜ فُو نغَرْتٛنْ کٛ نغَرْتُمِ، اَمَّا نَاع اٜ طِعِ ٻٛغِّ نجَمْندِ؞» ندٜنْ اَغَرِفَ اٜ فٜسْتُسْ اٜ بَنِسْ اٜ جٛوطٛدِيٻٜ اٜ مَٻّٜ فُو اُمِّي، ندِلِّ؞ ندٜ ٻٜ مبُرْتِي وُرٛ نغٛنْ، ٻٜ مبِعِ حَکُّندٜ مَٻّٜ، «نٜطّٛ اٛعٛ وَطَايِ کٛ حٜوْتِ اٛ وَرٜىٰ کٛو اٛ مَٻّٜ ندٜرْ سُودُ شُرَلْ؞» سٜيْ اَغَرِفَ وِعِ فٜسْتُسْ، «دَا نٜطّٛ اٛعٛ وِعَايِنٛ کِيتَ مَاکٛ يَارٜىٰ تٛ کَيْسَرْ، دَا اٛ يٛوفَامَ؞» ندٜ طُمْ سُٻِ مِنْ نجَحَ لٜيْدِ اِتَالِيَ ندٜرْ کٛمِوَلْ، سٜيْ بُلُسْ اٜ وٛٻّٜ نَنْغَاٻٜ نغَطَا ندٜرْ جُنْغٛ مَوْطٛ سٛوجِعٜنْ بِعٜتٜىٰطٛ جُولِيٛسْ؞ کَنْکٛ وٛنِ اَرْدِيطٛ کَوْتَلْ سٛوجِعٜنْ بِعٜتٜىٰنغَلْ سٛوجِعٜنْ کَيْسَرْ؞ مِنْ نَتِّ کٛمِوَلْ پِوٛيْنغَلْ اَدِرَمِتِييُمْ جَحَيْنغَلْ غَرِيجٜ غٛنْطٜ فٛنْغٛ مَايٛ ندٜرْ لٜيْدِ اَاسِيَ؛ مِنْ ندِلِّ؞ اٜ مِنْ نغٛنْدِ اٜ اَرِسْتَرْکُسْ، نٜطّٛ لٜيْدِ مَکِدٛونِيَ پِوٛيْطٛ غَرِيرِ تَسَلٛونِکَ؞ ندٜ فِنِ مِنْ نجٛتِّي غَرِيرِ سِدٛنْ؞ جُولِيٛسْ نَنِ جُرُمْطُمْ بُلُسْ؛ اٛ جَٻِ بُلُسْ يَحَ تٛ حِغٛوٻٜ مَاکٛ نغَمْ ٻٜ مبَلَّمٛ؞ ندٜ مِنْ اُمِّي طٛنْ، مِنْ تٛکِّ فُونَ لٜيْدِ سَيِيفُرُسْ نغٛنْدِ شَکَ ندِيَمْ، نغَمْ حٜنْدُ سٜمْبِطِرَا تٛنْ؞ مِنْ کُلْتِ مَايٛ نغٛ حَادٜ کِلِيکِيَ اٜ بَمْفِيلِيَ، مِنْ نجٛتِّي غَرِيرِ مِرَ ندٜرْ لٜيْدِ لِيکِيَ؞ تٛنْ اَرْدِيطٛ سٛوجِعٜنْ اٛنْ حٜٻَنِمِنْ کٛمِوَلْ پِوٛيْنغَلْ اَلِجَندِيرِيَ اُمَّنِينغَلْ اِتَالِيَ، اٛ تِّنِمِنْغَلْ؞ بَلْطٜ طُطّٜ کٛمِوَلْ اَمِنْ وَطِ اٜ يَارَ سٜىٰسٜ‑سٜىٰسٜ؞ اٜ بٛنٜ مِنْ نجٛتّٛرِي حَادٜ غَرِيرِ کِنِدُسْ؞ ندٜ حٜنْدُ حَطِمِنْ يَاکِ يٜىٰسٛ، سٜيْ مِنْ تٛکِّرِ فٛمْبِنَ حَا مِنْ نجٛتِّ کِرِتِ، لٜيْدِ نغٛنْدِ شَکَ ندِيَمْ؞ ندٜ مِنْ پَٻِّي حَادٜ سَلْمٛنِ مِنْ تٛکِّرِ فٛنْغٛ کِرِتِ تٛنْ تٛ حٜنْدُ سٜمْبِطِرَا؞ اٜ بٛنٜ مِنْ پَٻّٛرِي، مِنْ نجٛتِّي وِغٜىٰرٜ بِعٜتٜىٰندٜ جِڤّٛرْدٜ بٛنْدٜ حَادٜ غَرِيرِ لَاسِيَ؞ مِنْ مبٛنِّ شَرٜلْ طُنغٜلْ حَا ݧَلْندٜ حُمْتٛ اِتُّکِ حَکّٜ پَٻِّي؞ ندٜرْ شَرٜلْ نغٜلْ يَادُ ندٜرْ کٛمِوَلْ اٜ سَطِ نَاع سٜطَّ؞ نغَمْ مَاجُمْ بُلُسْ حٛکِّ شَاوٛرِ، اٛ وِعِ، «بَنْدِرَاٻٜ، مِ يِعِي کٛمِوَلْ نغَلْ اٜ کٛ وٛنِ ندٜرْ مَاغَلْ فُو وٛنّٛتٛ؞ نَاع کَنْجُمْ تَنْ، اَمَّا حَا اٜ اٜنٜنْ مَا اٜنْ کَلْکَيْ؞» اَمَّا مَوْطٛ سٛوجِعٜنْ ٻُرِي جَٻُکِ حَالَ جٛومُ کٛمِوَلْ نغَلْ اٜ ڤٛوطٛووٛ نغَلْ دٛوْ حَالَ بُلُسْ؞ جِڤّٛرْدٜ کٛمِيجٜ تٛ مِنْ نغٛنِ وٛوطَا ندٜرْ ندُنْغُ؞ نغَمْ نٛنْ طُطْٻٜ وٛنْٻٜ ندٜرْ کٛمِوَلْ نغَلْ ٻُرِي يِطُکِ مِنْ نجَحَ فِنِکِ نغَمْ مِنْ ندُومَ تٛنْ، تٛ طُمْ وَطٛتٛ؞ فِنِکِ وٛنِ جِڤّٛرْدٜ کٛمِيجٜ ندٜرْ لٜيْدِ کِرِتِ، دَارَيْندٜ لٛکِرّٜ حِرْنَا اٜ وٛيْلَ اٜ لٛکِرّٜ حِرْنَا اٜ فٛمْبِنَ؞ ندٜ حٜنْدُ فٛمْبِنَ فُطِّ وِسُکِ سٜىٰسٜ‑سٜىٰسٜ، حُوٛوٻٜ ندٜرْ کٛمِوَلْ نغَلْ کَمِّي ٻٜ مبَاوَيْ يَاکِ تٛ ٻٜ نغِطِ؞ ٻٜ اِتّٛيِ نجَمْنغَ دَرْنِرْغَ کٛمِوَلْ نغَلْ، مِنْ تٛکِّ حَادٜ فٛنْغٛ لٜيْدِ کِرِتِ، مِنْ ندِلِّ؞ اَمَّا غَطَ مَاجُمْ سٜطَّ، حٜنْدُ مَوْندُ بِعٜتٜىٰندُ حٜنْدُ لٛکِرّٜ وٛيْلَ اٜ فُونَ اُمّٛيِي دَغَ لٜيْدِ کِرِتِ؞ حٜنْدُ ندُنْ تَٻِّي کٛمِوَلْ نغَلْ حَا مِنْ مبَاوَايِ تٛکُّکِ ندٜرْ مَيْرُ؞ نغَمْ نٛنْ، مِنْ اَلِندُ ندُ دِلِّدِ اٜ مَاغَلْ؞ ندٜ مِنْ تٛکِّ حَادٜ وٛنْدِ لٜيْدِ ڤَمَرْدِ نغٛنْدِ شَکَ ندِيَمْ بِعٜتٜىٰندِ کَوْدَ، ندِ اُسْتَنِمِنْ حٜنْدُ؞ اٜ بٛنٜ مِنْ ڤٛوطِرٛيِ کٛمِوَلْ ڤَمَرَلْ، مِنْ نَتِّنِنغَلْ ندٜرْ کٛمِوَلْ مَنْغَلْ؞ ندٜنْ ٻٜ نغَطِ ٻٛغِّ لٜيْ کٛمِوَلْ مَنْغَلْ نغَلْ، ٻٜ کَٻِّنغَلْ، نغَمْ تٛع نغَلْ فٜشّٛو؞ اٜ ٻٜ کُلَ تٛع نغَلْ نُفَ ندٜرْ نجَارٜىٰندِ ندٜرْ ندِيَمْ حَادٜ سِرْتِسْ؞ نغَمْ نٛنْ ٻٜ نجِڤِّنِ غُدٜ غَطَيْطٜ کٛمِوَلْ دِلَّ، ٻٜ اَلِ حٜنْدُ دِلِّدِ اٜ مَاغَلْ؞ حٜنْدُ شٜمْبِنْدُ ندُنْ وَطِ کَ فِيکِ؞ نغَمْ نٛنْ ندٜ فِنِ ٻٜ ڤُطِّ حُبِنْکِ کٛ وٛنِ ندٜرْ کٛمِوَلْ نغَلْ ندٜرْ ندِيَمْ؞ ندٜرْ ݧَلْندٜ تَتَوْرٜ، کَمْٻٜ اٜ کٛعٜ مَٻّٜ ٻٜ کُبِنِ کٛ ٻٜ کُوتِرْتَ ندٜرْ کٛمِوَلْ نغَلْ ندٜرْ ندِيَمْ؞ بَلْطٜ طُطّٜ مِنْ نغِعَايِ نَانغٜ اٜ کٛودٜ، نغَمْ حٜنْدُ ندُنْ وَطِي کَ فَلْپِنْکِ مَايٛ نغٛنْ سٜمْبٜىٰ حَا مِنْ اِتِّ کَمُّندٜ حِسُکِ؞ غَطَ ٻٜ نغَطِي بَلْطٜ ٻٜ ݧَامَايِ، بُلُسْ دَرِي يٜىٰسٛ مَٻّٜ، وِعِ، «دَا اٛنْ نجَٻِينٛ حَالَ اَمْ، دَا اٛنْ اَلَايِ کِرِتِ، دَا تٛرَّ کَعَ اٜ دُلّٜرٜ ندٜعٜ حٜٻَايِعٜنْ؞ اَمَّا جٛونِ اٜ مِ تٛرٛوعٛنْ، شٜمْبِطِنٜىٰ ٻٜرْطٜ مٛوطٛنْ، نغَمْ کٛو غٛعٛتٛ ندٜرْ مٛوطٛنْ حَلْکَتَا، سٜيْ کٛمِوَلْ نغَعَلْ تَنْ؞ اَللَّه جٜيْطٛيَمْ مٛ مَوْنِنَيْمِ لِلٛيِي مَلَاعِکَاجٛ مُوطُمْ، اٛ وَرِي تٛ اَمْ جٜمَّ؞ اٛ وِعِيَمْ، ‹بُلُسْ، تَاع حُلُ، اَ دَرٛتٛ يٜىٰسٛ کَيْسَرْ لَامِيطٛ رٛومَنْکٛعٜنْ مَوْطٛ؞ کَدِمَا، بَرْکَ مَاطَ اَللَّه حِسْنَيْ يِمْٻٜ وٛنْدُٻٜ اٜ مَاطَ ندٜرْ کٛمِوَلْ فُو؞› نغَمْ نٛنْ، شٜمْبِطِنٜىٰ ٻٜرْطٜ مٛوطٛنْ، نغَمْ اٜ مِ حٛولِي اَللَّه، کٛ اٛ وِعِيَمْ طُمْ وَرْتَيْ غٛونغَ؞ اَمَّا دٛولٜ حٜنْدُ نٛ يَارَيْعٜنْ ندٜرْ وٛنْدِ لٜيْدِ نغٛنْدِ ندٜرْ ندِيَمْ؞» ندٜرْ جٜمَّارٜ سَڤّٛ اٜ نَيَوْرٜ، ندٜ حٜنْدُ وَطِ کَ دِلُّدُکِ اٜ اَمِنْ ندٜرْ مَايٛ اَدِيرِيَ، شَکَ جٜمَّ حُوٛوٻٜ ندٜرْ کٛمِوَلْ نغَلْ اٜ کَمِّي مِنْ ٻَدَکٜ لٜيْدِ، سٜيْ ٻٜ نغَطِ ٻٛغّٛلْ ڤٛوندِرْنغٛلْ لُغُّکِ ندِيَمْ ٻٜ نغِعِ لُغُّکِ ندِيَمْ طَمْ کٛيْطٜ 40؞ مِنْ ٻٜيْدِ يٜىٰسٛ سٜطَّ، ٻٜ ڤٛوندِ کَدِمَا، ٻٜ نغِعِ لُغُّکِ مَاجَمْ حَادٜ کٛيْطٜ 30؞ ٻٜ کُلِ تٛ کٛمِوَلْ نغَلْ فِيَ حَيْرٜ، نغَمْ نٛنْ ٻٜ نغَطِ نجَمْکٛ نَيٛ ندَرْنِرْکٛ کٛمِوَلْ ندٜرْ ندِيَمْ طَمْ غَطَ مَاغَلْ، ٻٜ نغَطِ کَ وَطُکِ دٛعَارٜ غَرِ وٜىٰتَ؞ ندٜنْ کُوٛوٻٜ ندٜرْ کٛمِوَلْ نغَلْ اٜ ٻٜ نغِطِ وُرْتَاکِنغَلْ ٻٜ ندَطَ، سٜيْ ٻٜ نجِڤِّنِ کٛمِوَلْ ڤَمَرَلْ ندٜرْ ندِيَمْ، ٻٜ نغَطِ بٛ ٻٜ نجِڤِّنَيْ نجَمْکٛ ندَرْنِرْکٛ دَغَ يٜىٰسٛ کٛمِوَلْ مَنْغَلْ نغَلْ؞ سٜيْ بُلُسْ وِعِ سٛوجِعٜنْ ٻٜنْ اٜ مَوْطٛ مَٻّٜ، «تٛ يِمْٻٜ ٻٜعٜ ندَرَاکِ ندٜرْ کٛمِوَلْ نغَعَلْ اٛنْ کِسَتَا؞» سٜيْ سٛوجِعٜنْ ٻٜنْ تَپِ ٻٛغِّ جٛغِيطِ کٛمِوَلْ ڤَمَرَلْ نغَلْ، ٻٜ اَلِنغَلْ نغَلْ تٛکِّ ندِيَمْ؞ ندٜ غَرِ ٻَدِي وٜىٰتُکِ، بُلُسْ تٛرِيٻٜ ٻٜ فُو ٻٜ ݧَامَ ݧَمْندُ؞ اٛ وِعِ، «حَنْدٜ وٛنِ ݧَلْندٜ سَڤّٛ اٜ نَيَوْرٜ اٛنْ ݧَامَايِ غٛطُّمْ نغَمْ وَنَّارٜ؞ نغَمْ نٛنْ اٜ مِ تٛرٛوعٛنْ، ݧَامٜىٰ نغَمْ کِسٛنْ، نغَمْ کٛو لَاسٛلْ حٛورٜ غٛعٛتٛ ندٜرْ مٛوطٛنْ حَلْکَتَا؞» ندٜ اٛ وِعِ نٛنْ، اٛ حٛشِّ بُرٛودِ، اٛ يٜتِّ اَللَّه يٜىٰسٛ مَٻّٜ ٻٜ فُو، اٛ ݝَڤِّتِطُمْ اٛ فُطِّ ݧَامُکِ؞ سٜيْ ٻٜرْطٜ مَٻّٜ شٜمْبِطِ، کَمْٻٜ مَا ٻٜ کٛشِّ ٻٜ ݧَامِ؞ مِنٛنْ وٛنْٻٜ ندٜرْ کٛمِوَلْ نغَلْ، مِنْ نغَطِي يِمْٻٜ 276؞ ندٜ ٻٜ ݧَامِ ٻٜ کَارِ، ٻٜ کٛشِّ بُحُوجِ اَلْکَمَارِ غٛنْطِ ندٜرْ کٛمِوَلْ نغَلْ، ٻٜ ڤَطِّطِ ندٜرْ ندِيَمْ نغَمْ ٻٜ اُسْتَنَنْغَلْ تٜدُّطُمْ؞ ندٜ وٜىٰتِ حُوٛوٻٜ ندٜرْ کٛمِوَلْ نغَلْ اَنْدِتَايِ لٜيْدِ ندِ ٻٜ نجٛتِّ؞ ٻٜ کَيْنِي وِغٜىٰرٜ غٛودُندٜ نجَارٜىٰندِ؞ ٻٜ نغِطِي يَارُکِ کٛمِوَلْ نغَلْ تٛنْ تٛ ٻٜ مبَاوِي؞ سٜيْ ٻٜ تَپِ ٻٛغِّ نجَمْکٛ ندَرْنِرْکٛ کٛمِوَلْ نغَلْ، ٻٜ اَلِطِ ندٜرْ ندِيَمْ؞ طٛنْمَا ٻٜ ڤِتِّ ٻٛغِّ طِطُمْ حَٻِّرِ ڤٛوطِرْطُمْ کٛمِوَلْ نغَلْ؞ غَطَ مَاجُمْ، ٻٜ پٜفْتِ وُدٜرٜ وٛنْدٜ اٜ حٛورٜ کٛمِوَلْ نغَلْ، نغَمْ حٜنْدُ فَارَنغَلْ يٜىٰسٛ، يَارَنغَلْ دَاندٜ ندِيَمْ طَمْ؞ اَمَّا کٛمِوَلْ نغَلْ فِيِ مٛٻْدٜ نجَارٜىٰندِ ندٜرْ ندِيَمْ، حٛورٜ مَاغَلْ نُفِ، نغَلْ دَرِي طٛنْ؞ غٜىٰلٛوطِ ندِيَمْ نغَطِ کَ ڤِيُکِ غَطَ مَاغَلْ حَا نغَلْ ڤُسِ؞ سٛوجِعٜنْ وٛنْٻٜ ندٜرْ مَاغَلْ شِرْيِي دَبَرٜ نٛ ٻٜ مبَرْدَتَ شُرَاٻٜ وٛنْٻٜ ندٜرْ کٛمِوَلْ نغَلْ، نغَمْ تٛع غٛطّٛ ندٜرْ مَٻّٜ يِنٛو دَطَ؞ اَمَّا ندٜ مَوْطٛ سٛوجِعٜنْ اٛنْ اٜ يِطِ حِسْنُکِ بُلُسْ، اٛ حَطِٻٜ وَطُکِ کٛ ٻٜ شِرْيِي، اٛ وِعِ بَوْٻٜ ندِيَمْ اَرْتَ نَتُّکِ ندٜرْ مَاجَمْ، مبُرْتٛو؞ ندٜنْ حٛرِيٻٜ بٛو مبَطّٛو لٜطّٜ کٛمِوَلْ نغَلْ اٜ ڤٜشّٜ مَاغَلْ؞ نٛنْ مِنْ فُو مِنْ نغَطِ مِنْ مبُرْتِي جَمْ؞ ندٜ مِنْ کِسِ، مِنْ نَنِ اِنْدٜ لٜيْدِ نغٛنْدِ شَکَ ندِيَمْ ندِنْ اٜ وِعٜىٰ مَلْتَ؞ يِمْٻٜ لٜيْدِ ندِنْ نجَٻِّيمِنْ بٛطُّمْ؞ ٻٜ کُٻَّنِمِنْ حِيتٜ، نغَمْ ندِيَمْ اٜ وَطَ، ندٜنْ اٜ وٛودِ ڤٜىٰوٛلْ؞ بُلُسْ حَوْرِتِ لٜطّٜ اٜ مٛ وَطَطٜ ندٜرْ حِيتٜ نغٜنْ، سٜيْ غُلْطُمْ حِيتٜ نغٜنْ وُرْتِنِ مبٛودِ ندٜرْ مَاجٜ، ندِ فٜعِّمٛ اٜ جُنْغٛ؞ ندٜ يِمْٻٜ ٻٜنْ نغِعِ مبٛودِ ندِنْ اٜ جٛغِي جُنْغٛ بُلُسْ، ٻٜ مبِعِ حَکُّندٜ مَٻّٜ، «غٛونغَ نٜطّٛ اٛعٛ اٛ غَطٛووٛ وَرْحٛورٜ؞ کٛو ندٜ اٛ حِسِي دَغَ مَايٛ، اَمَّا فُو اٜ نٛنْ اَلَّح مٜىٰطٜنْ دٜبّٛ تَپٛووٛ کِيتَ اَلْدَتَامٛ اٜ يٛنْکِ؞» اَمَّا بُلُسْ فِطِّ مبٛودِ ندِنْ ندٜرْ حِيتٜ نغٜنْ، اٛ نَنَايِ نَوْطُمْ کٛو سٜطَّ؞ اٜ ٻٜ کَمِّي جُنْغٛ مَاکٛ نٛ ٻُوتَيْ، کٛو اٛ يَنَ طٛنْ اٜ طٛنْ اٛ مَايَ؞ اَمَّا ندٜ يَوْتِي ٻٜ نغِعِ وَلَا کٛ يَنِمٛ، ٻٜ نغَيْلِتِ ݧُمٛلْ مَٻّٜ، ٻٜ مبِعِ، «اٛعٛ، اٛ اَلَّح فٜىٰرٜ!» حَادٜ وِغٜىٰرٜ ندٜنْ اٜ وٛودِ غٜسٜ مَوْطٛ لٜيْدِ ندِنْ، بِعٜتٜىٰطٛ فُبِلِيُسْ؞ اٛ جَٻِّيمِنْ بٛطُّمْ، اٛ جِڤِّنِمِنْ تٛ وُرٛ مَاکٛ بَلْطٜ تَتِ؞ ݧَاکٛ مَاکٛ اٜ فُکِّي فِيدَ اٜ جٛنْتٜ کَلُّطٜ اٜ دٛغّٛلْ رٜىٰدُ؞ بُلُسْ يَحِ تٛ مَاکٛ، يٛوِ جُوطٜ مُوطُمْ دٛوْ مَاکٛ، وَطَنِمٛ دٛعَارٜ، اٛ يَمْطِتِ؞ غَطَ مَاجُمْ، ݧَوْٻٜ حٛرِيٻٜ ندٜرْ لٜيْدِ ندِنْ نغَرِ تٛ بُلُسْ، اٛ يَمْطِتِنِٻٜ؞ ٻٜ مَوْنِنِمِنْ نَاع سٜطَّ؞ ندٜ مِنْ نغَرِ دِلُّکِ، ٻٜ کٛکِّمِنْ کٛ مِنْ نغِطِ فُو نغَمْ يَادُ؞ غَطَ لٜبِّ تَتِ، مِنْ نَتِّ ندٜرْ کٛمِوَلْ پِوٛيْنغَلْ اَلِجَندِيرِيَ نٛدِّرْتٜىٰنغَلْ وٛرْٻٜ شِوْتَاٻٜ دُومُنغَلْ ندٜرْ لٜيْدِ مَلْتَ، مِنْ ندِلِّ؞ مِنْ نجٛتِّي غَرِيرِ بِعٜتٜىٰندِ سِرَکُسْ، مِنْ نغَطِ بَلْطٜ تَتِ تٛنْ؞ دَغَ طٛنْ مِنْ نَتِّ کٛمِوَلْ، مِنْ ڤِلِي حَا مِنْ نجٛتِّي غَرِيرِ رِغِيُمْ؞ ندٜ فِنِ حٜنْدُ فٛمْبِنَ فُطِّ وِسُکِ؞ ندٜرْ بَلْطٜ طِطِ مِنْ نغَرِ غَرِيرِ فُتِيٛولِ؞ مِنْ تَوِ تٛکُّٻٜ يٜىٰسُ تٛنْ؞ ٻٜ تٛرِيمِنْ مِنْ نجٛوطٛو تٛ مَٻّٜ يٛنْتٛورٜ غٛعٛ؞ ندٜنْ مِنْ نجٛتّٛيِي غَرِيرِ رٛومَ؞ ندٜ تٛکُّٻٜ يٜىٰسُ وٛنْٻٜ رٛومَ نَنِ حَبَرُ غَرٛلْ اَمِنْ، ٻٜ نجَحِ لُومٛ اَافِيُسْ اٜ وٛنْدٜ وِغٜىٰرٜ بِعٜتٜىٰندٜ غُرٜ حٛٻّٜ تَتِ نغَمْ جَٻَّاکِمِنْ؞ ندٜ بُلُسْ يِعِٻٜ، اٛ يٜتِّ اَللَّه، ٻٜرْندٜ مَاکٛ سٜمْبِطِ؞ ندٜ مِنْ نغَرِ غَرِيرِ رٛومَ، طُمْ اَلِ بُلُسْ جِڤِّي ندٜرْ وُرٛ نغٛ طُمْ يٛٻَتَ طُمْ وَالَ، کَنْکٛ اٜ سٛوجِيجٛ دٜىٰنَيْطٛمٛ؞ بَلْطٜ تَتِ غَطَ مِنْ نغَرِي، بُلُسْ نٛدِّ مَوْٻٜ يَحُودَنْکٛعٜنْ؞ ندٜ ٻٜ کَوْرِتِ، اٛ وِعِٻٜ، «بَنْدِرَاٻٜ! کٛو ندٜ مِ وَطَنَايِ يِمْٻٜ مٜىٰطٜنْ کٛ حَانَايِ، مِ وٛنَّايِ ندٛنُوجِ مَامَعٜنْ مٜىٰطٜنْ، اَمَّا مِ نَنْغَامَ اٜ اُرُشَلِيمَ، مِ وَطَامَ ندٜرْ جُوطٜ رٛومَنْکٛعٜنْ؞ ٻٜ پَمِيَمْ کٛ نغَطُمِ؞ ٻٜ تَوِي مِ وَطَايِ غٛطُّمْ کٛ حٜوْتِ مِ وَرٜىٰ، نغَمْ نٛنْ ٻٜ نغِطِ يٛوفُکِيَمْ؞ اَمَّا ندٜ يَحُودَنْکٛعٜنْ غٛنْٻٜ طٛنْ نجَٻَايِ مِ يٛوفٜىٰ، طُمْ نَنْغِ مِ تٛرٛو کِيتَ اَمْ وَدّٜىٰ تٛ کَيْسَرْ، کٛو ندٜ مِ وَلَا کٛ نغُلّٛرْتٛومِ لٜݧٛلْ اَمْ؞ کَنْجُمْ وَطِ نٛدُّمِعٛنْ نغَمْ مِ يِعَعٛنْ، مِ مٜدَّ اٜ مٛوطٛنْ؞ نغَمْ کَمُّندٜ اِسْرَاعِيلَنْکٛعٜنْ کَٻِّرَامِ ٻٛغِّ نجَمْندِ طِعِ؞» يَحُودَنْکٛعٜنْ ٻٜنْ مبِعِمٛ، «مِنْ کٜٻَايِ طٜرٜوٛلْ دَغَ لٜيْدِ يَحُودِيَ کٛلَّيْنغٛلْمِنْ حَبَرُ مَاطَ؞ کَدِمَا بٛو وَلَا کٛو غٛعٛتٛ ندٜرْ بَنْدِرَاٻٜ اَمِنْ غَرْطٛ وِعِمِنْ حَبَرُ طُمْ وٛوطَا دٛوْ مَاطَ؞ اَمَّا اٜ مِنْ نغِطِ مبِعَامِنْ ݧُمٛ مَاطَ، نغَمْ اٜ مِنْ اَنْدِ يِمْٻٜ کٛو تٛيٜ اٜ نغٜدَّ دِينَ کَ تٛکُّطَا؞» ٻٜ ندٜسِ ݧَلْندٜ ندٜ ٻٜ شٛعّٛيْتٛو تٛ مَاکٛ؞ ندٜ ݧَلْندٜ ندٜنْ وَرِ، يِمْٻٜ طُطْٻٜ نغَرِ، کَوْرِتِ تٛ بُلُسْ جِڤِّي؞ اِلَا سُبَکَ حَا اَلَاسَرَ اٜ مٛ وَعَجِنَنَٻٜ، اٜ مٛ حٛکَّٻٜ حَبَرُ لَامُ اَللَّه؞ اٜ مٛ حٛلَّٻٜ حَبَرُ يٜىٰسُ ندٜرْ اَتَّوْرَ اٜ ندٜرْ دٜفْتٜ اَنَّبٛعٜنْ نغَمْ اٛ فٛوطَٻٜ ٻٜ تٛکَّ يٜىٰسُ؞ وٛٻّٜ ندٜرْ مَٻّٜ نجَٻِ کٛ اٛ وِعِ، وٛٻّٜ بٛو نجَٻَايِ؞ نغَمْ نٛنْ ٻٜ نغٜدّٛوتِرِ حَکُّندٜ مَٻّٜ، ٻٜ ڤُطِّ سَنْکِتَاکِ؞ اَمَّا بُلُسْ وِعِٻٜ، «رُوحُ اَللَّه وِعِي غٛونغَ ندٜ مٜتَنِ مَامَعٜنْ مٛوطٛنْ دَغَ حٛنْدُکٛ اَنَّبِ اِشَايَ، اٛ وِعِ، ‹يَحُ تٛ يِمْٻٜ ٻٜعٜ مبِعَاٻٜ: کٛو ندٜيٜ اٛنْ نَنَيْ، اَمَّا اٛنْ ڤَامَتَا؞ اٛنْ ندَارَيْ، اَمَّا اٛنْ نغِعَتَا؞ نغَمْ ٻٜرْطٜ لٜݧٛلْ نغٛعٛلْ نجٛورِي؞ ٻٜ شُکِّي نٛڤِّ مَٻّٜ، ٻٜ مَٻِّي غِتٜ مَٻّٜ، نغَمْ تٛع ٻٜ نغِعَ اٜ غِتٜ مَٻّٜ، تٛع نٛڤِّ مَٻّٜ نَنَ، تٛع ٻٜرْطٜ مَٻّٜ ڤَامَ، حَا ٻٜ نغَرْتَ تٛ اَمْ، مِ يَمْطِتِنَٻٜ؞› » بُلُسْ ٻٜيْدِ مٜتُکِ، وِعِ، «سٜيْ ڤَامٛنْ، اَللَّه لِلْدِي کِسْندَمْ مُوطُمْ تٛ يِمْٻٜ نَاع يَحُودَنْکٛعٜنْ؞ کَمْٻٜ بٛو ٻٜ نجَٻَيْطُمْ!» [ندٜ بُلُسْ وِعِ نٛنْ، يَحُودَنْکٛعٜنْ مبُرْتِي اٜ نغٜدّٛوتِرَ حَکُّندٜ مَٻّٜ نَاع سٜطَّ؞] بُلُسْ بٛو جٛوطِي دُوٻِ طِطِ ندٜرْ وُرٛ نغٛ طُمْ يٛٻَتَ طُمْ وَالَ؞ اٛ يٛٻَنِ حٛورٜ مَاکٛ؞ اٜ مٛ جَٻّٛو کٛو مٛيٜ غَرْطٛ تٛ مَاکٛ، اٜ مٛ وَعَجِنَنَٻٜ حَبَرُ لَامُ اَللَّه، اٜ مٛ اٜکِّتِنَٻٜ حَبَرُ يٜىٰسُ اَلْمَسِيحُ جٛومِرَاوٛ اٜ سٜمْبٜ، وَلَا کَطُطٛمٛ؞ مِنْ بُلُسْ وِنْدِ طٜرٜوٛلْ نغٛعٛلْ؞ مِ مَشُّطٛ يٜىٰسُ اَلْمَسِيحُ لِلَاطٛ مَاکٛ شُٻَاطٛ مٛ اَللَّه نٛدِّ وَعَجِنَ حَبَرُ بٜلْطُمْ؞ حَبَرُ بٜلْطُمْ طُمْ اٛ وَطِ اَلْکَوَلْ کٛ نٜىٰٻِ دَغَ تٛ کٛنْدُطٜ اَنَّبٛعٜنْ مَاکٛ ندٜرْ دٜفْتٜرٜ شٜنِيندٜ؞ حَبَرُ طُعُمْ طُمْ دٛوْ ٻِطّٛ مَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ندٜرْ ٻَنْدُ کَنْکٛ دَغَ لٜݧٛلْ دَوْدَ؞ اَمَّا اَللَّه حٛلِّي اٜ بَوْطٜ مَوْطٜ يٜىٰسُ اَلْمَسِيحُ جٛومِرَاوٛ مٜىٰطٜنْ اٛ ٻِطّٛ مَاکٛ ندٜ اٛ اُمِّنِمٛ دَغَ مَيْدٜ بَرْکَ رُوحُ مَاکٛ؞ بَرْکَ يٜىٰسُ اَلْمَسِيحُ اٜ نغَمْ اِنْدٜ مَاکٛ، اَللَّه بَرْکِطِنِييَمْ وَرْتِرِييَمْ لِلَاطٛ نغَمْ لٜݧِ دُونِيَارُ فُو حٛولٛومٛ تٛکَّ کٛ اٛ وِعِ؞ طُعُمْ حَوْتِي اٜ مٛوطٛنْ اٛنٛنْ ٻٜ اَللَّه نٛدِّ نغَمْ نغَرْتَ ٻٜ يٜىٰسُ اَلْمَسِيحُ؞ اٜ مِ حٛوْنَعٛنْ اٛنْ فُو مٛوطٛنْ غٛنْٻٜ غَرِيرِ رٛومَ، اٛنٛنْ ٻٜ اَللَّه يِطِ نٛدِّ نغَمْ ٻٜ نغَرْتَ يِمْٻٜ مُوطُمْ؞ اَللَّه ݧَاکٛ مٜىٰطٜنْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞ اَرَنْدٜ، اٜ مِ يٜتَّ اَللَّه اَمْ بَرْکَ يٜىٰسُ اَلْمَسِيحُ نغَمْ مٛوطٛنْ اٛنْ فُو، نغَمْ دُونِيَارُ فُو اٜ نَنَ حَبَرُ نٛ کٛولٛرِيطٛنْ يٜىٰسُ؞ اَللَّه مٛ کُوَنَيْمِ کُوغَلْ وَعَجِنْکِ حَبَرُ بٜلْطُمْ دٛوْ ٻِطّٛ مَاکٛ اٜ ٻٜرْندٜ اَمْ فُو، کَنْکٛ وٛنِ شٜيْدُوجٛ اَمْ، کٛو ندٜيٜ مِ يٜجِّتَتَاعٛنْ ندٜرْ دٛعَارٜ اَمْ؞ اٜ مِ تٛرٛو اَللَّه تٛ اٛ جَٻِي اٛ مَٻِّتَنَيَمْ لَاوٛلْ مِ يَحَ تٛ مٛوطٛنْ جٛونِ؞ اٜ مِ يِطِ يِيکِعٛنْ نَاع سٜطَّ نغَمْ مِ وَلَّعٛنْ کٜٻٛنْ بَرْکَ غٛنْطُمْ ندٜرْ رُوحُ اَللَّه شٜمْبِطِنَيْطُمْعٛنْ؞ کٛ نغِطُمِ وٛنِ شٜمْبِطِندِرٜنْ؛ حٛولَارٜ اَمْ سٜمْبِطِنَعٛنْ، ندٜنْ حٛولَارٜ مٛوطٛنْ سٜمْبِطِنَيَمْ؞ بَنْدِرَاٻٜ اَمْ، اٜ مِ يِطِ اَنْدٛنْ ندٜ طُطُّمْ اٜ مِ سِرْيٛو يَاکِ تٛ مٛوطٛنْ، اَمَّا کٛو ندٜيٜ غٛطُّمْ اٜ حَطَيَمْ يَاکِ؞ اٜ مِ يِطِ مِ حٜٻَ تٛکُّٻٜ يٜىٰسُ ندٜرْ مٛوطٛنْ، نٛنْ نٛ کٜٻِرْمِ تٛکُّٻٜ يٜىٰسُ ندٜرْ غٛطِّ لٜݧِ؞ اٜ وٛودِ تٜدّٛرَلْ دٛوْ اَمْ، تٜدّٛرَلْ يِمْٻٜ غَرِيرِ اٜ لَدّٜعٜنْ، اٜ جَنْغُٻٜ اٜ ٻٜ نجَنْغَايِ؞ نغَمْ مَاجُمْ، مِ حَاٻِي وَعَجِنَنْکِعٛنْ حَبَرُ بٜلْطُمْ اٛنٛنْ مَا جٛوطِيٻٜ غَرِيرِ رٛومَ؞ مِ نَنَتَا شٜمْتُطُمْ وَعَجِنْکِ حَبَرُ بٜلْطُمْ، نغَمْ طُمْ بَوْطٜ اَللَّه بَاوَيْطٜ حِسْنَ کٛو مٛيٜ کٛولِيطٛمٛ؞ اَرَنْدٜ طُمْ اَنْدِنِيطُمْ يَحُودَنْکٛعٜنْ، ندٜنْ سٜيْ يِمْٻٜ نَاع يَحُودَنْکٛعٜنْ؞ نغَمْ حَبَرُ بٜلْطُمْ اٜ حٛلَّ اَادِلَاکُ اَللَّه کٜٻٜتٜىٰطُمْ بَرْکَ حٛولَاکِ يٜىٰسُ تَنْ؞ نٛنْ نٛ طُمْ وِنْدِرَا، «اَادِلِيجٛ اٛ وَطَيْ جٛنْدٜ حٛولَاکِ اَللَّه؞» مٛنّٜرٜ اَللَّه اٜ وَنْغَ دَغَ دٛوْ دٛوْ يِمْٻٜ ٻٜ کُلَتَا اَللَّه اٜ دٛوْ کُوطٜ مَٻّٜ کَلُّطٜ طٜ ٻٜ ݧٛعِّرْتَ غٛونغَ؞ نغَمْ کٛ طُمْ وَاوَتَ اَنْدُکِ دٛوْ اَللَّه، اٜ نجَيْرِ طُمْ وٛنِ تٛ مَٻّٜ، نغَمْ اَللَّه حٛلِّيٻٜطُمْ؞ نغَمْ دَغَ فُطّٛودٜ تَغُکِ دُونِيَارُ، نغِکُّ اَللَّه طُمْ يِعَتَاکٜ، اٜ نجَيْرِ طُمْ وٛنِ، وَاتٛ بَوْطٜ مَاکٛ تَبِتَيْطٜ، اٜ کٛ حٛلِّ اٛ اَللَّه؞ طُمْ يِعَامَ اٜ نجَيْرِ ندٜرْ کٛ اٛ تَغِ؞ نغَمْ مَاجُمْ، يِمْٻٜ نغَلَا کٛ مبِعَ؞ کٛو ندٜ اٜ ٻٜ اَنْدِ اَللَّه، ٻٜ مَوْنِنَايِمٛ بٛ اَللَّه کٛو ٻٜ نغٜتَّمٛ، اَمَّا ݧُمٛ مَٻّٜ وَرْتِي مٜىٰرٜ، ٻٜرْطٜ مَٻّٜ طٜ مبَاوَتَا فَامُکِ غٛونغَ طٜ کٜىٰوِ ݧِوْرٜ؞ اٜ ٻٜ مبِعَ اٜ ٻٜ نغٛودِ پٛيْرٜ، اَمَّا ٻٜ نغَرْتِي حَاݝَاٻٜ؞ اَللَّه تَبِتَيْطٛ حَانِ ٻٜ مَوْنِنَ، اَمَّا اٜ ٻٜ مَوْنِنَ غُنْکِيجِ غَطَاطِ ندٜرْ نَنْدِ نٜطّٛ مَايَيْطٛ، اٜ ندٜرْ نَنْدِ شٛلِّ، اٜ ندٜرْ نَنْدِ مَرْلٜ، اٜ ندٜرْ نَنْدِ کٛ دَسٛتٛو؞ نغَمْ نٛنْ، اَللَّه اَلِيٻٜ ٻٜ تٛکَّ سُونٛوجِ ٻٜرْطٜ مَٻّٜ نٜفْنِيطِ نغَمْ ٻٜ نغَطِندِرَ کٛ سٜمْتِنِي اٜ ٻَلِّ مَٻّٜ؞ ٻٜ نغَيْلِتِ غٛونغَ اَللَّه وَرْتِ فٜوْرٜ؞ اٜ ٻٜ مَوْنِنَ کٛ تَغَا حَا اٜ ٻٜ کُوَنَطُمْ، اَمَّا اَللَّه تَغٛووٛ تَنْ حَانِ ٻٜ مَوْنِنَ؞ کَنْکٛ وٛنِ کَانُطٛ مَنْتٜىٰکِ حَا اَبَدَا! اَامِنْ؞ نغَمْ نٛنْ، اَللَّه اَلِٻٜ ٻٜ تٛکَّ سُونٛوجِ مَٻّٜ شٜمْتِنِيطِ؞ رٜوْٻٜ مَٻّٜ نغَيْلِتِ کٛ طُمْ اَنْدِ، رٜوْٻٜ اٜ مبَلْدَ اٜ رٜوْٻٜ؞ نٛنْ مَا وٛرْٻٜ اَلِ کٛ طُمْ اَنْدِ، ٻٜ اَلِ وَلْدُکِ اٜ رٜوْٻٜ، سُونٛ وٛرْٻٜ نَنْغِٻٜ؞ وٛرْٻٜ اٜ مبَلْدَ اٜ وٛرْٻٜ؞ نغَمْ نٜفْنِيطُمْ طُمْ ٻٜ نغَطَتَ، ٻٜ کٜٻِ حَلْکٜرٜ نٛ حَانَنِٻٜ؞ ندٜ ٻٜ نغَݧِي ٻٜ اَنْدَ اَللَّه، اَللَّه اَلِيٻٜ ٻٜ تٛکَّ ݧُمٛوجِ کَلُّطِ نغَمْ ٻٜ نغَطَ کٛ حَانَا طُمْ وَطَ؞ اٜ ٻٜ کٜىٰوِ کٛو اِرِ طُمٜ فِي طُمْ وٛوطَا، اٜ حَلّٜىٰندٜ، اٜ يِطُکِ کٛ ٻٜ نجٜيَايِ، اٜ نغِکُّ کَلُّطُمْ، اٜ لَوْلِيرُ، اٜ وَرٜ‑وَرٜ، اٜ حَوْرٜ، اٜ مَجِّنْکِ يِمْٻٜ، اٜ ٻٜرْطٜ ٻَلٜىٰجٜ؞ اٜ ٻٜ مٜتَ دٛوْ وٛٻّٜ، اٜ ٻٜ مٜتَ کَلُّکَ دٛوْ وٛٻّٜ، اٜ ٻٜ نغَݧَ اَللَّه، اٜ ٻٜ کٛلَّ مَنْغُ، اٜ ٻٜ نغٛودِ مَنْغُ حٛورٜ، مَوْنِنٛوٻٜ کٛعٜ مَٻّٜ، اٜ ٻٜ طَٻِّتَ لَاوٛلْ وَطُکِ کٛ حَلِّ، ٻٜ مَوْنِنْتَا دَݧٛوٻٜ؞ ٻٜ نغَلَا حَکِّيلٛ، ٻٜ کٜبِّنْتَا اَلْکَوَلْ، ٻٜ نغَلَا يِدّٜ، ٻٜ نجُرْمِنَنْتَا يِمْٻٜ؞ اٜ ٻٜ اَنْدِ اَللَّه وِعِي يِمْٻٜ غَطٛوٻٜ اِرِ کُوطٜ طٜنْ طٛنْ اٜ حَانِ ٻٜ کَلْکٜىٰ؞ فُو اٜ نٛنْ، نَاع کُوطٜ طٜنْ تَنْ ٻٜ نغَطَتَ، حَا مَا اٜ ٻٜ مبِعَ غَطٛوٻٜ کُوطٜ طٜنْ اٜ نغَطَ کٛ وٛوطِ؞ نغَمْ نٛنْ، اَنْ، شَڤّٛتٛوطٛ کٛ وٛوطَا طُمْ غٛطّٛ وَطِ، اَ وَلَا کٛ مبِعَتَا، کٛو اَنْ اَ مٛيٜ؞ نغَمْ فُو شَرٜلْ کٛ شَڤّٛتٛطَا کٛ وٛوطَا طُمْ غٛطّٛ وَطِ، اَ وَطَنَ حٛورٜ مَاطَ کِيتَ؞ نغَمْ کٛ وٛوطَا طُمْ شَڤّٛرْتٛطَا غٛطّٛ، کَنْجُمْ نغَطَتَا اَنْ مَا؞ اٜنْ اَنْدِ کِيتَ اَللَّه طُمْ غٛونغَ دٛوْ غَطٛوٻٜ اِرِ طُمْ طٛنْ فِي؞ اَ ݧُمَ اَنْ، اَ حِسَيْ کِيتَ اَللَّه، ندٜ اَ وَطَ کٛ وٛوطَا طُمْ شَڤّٛرْتٛطَا وٛٻّٜ؟ کٛو اَنْ اَ يَوَنَ يِدّٜ اَللَّه مَوْندٜ، اٜ شِيَ يَاوُکِ مٛنّٜرٜ مَاکٛ، اٜ مُݧَلْ مَاکٛ؟ اَ اَنْدَا يِدّٜ اَللَّه اٜ فٛوطُمَا تُوبَا؟ اَمَّا ٻٜرْندٜ مَاطَ ندٜ شَاتُندٜ غَݧُندٜ تُوبُکِ؞ نغَمْ نٛنْ، اَ حَوْرِتَنَ حٛورٜ مَاطَ مٛنّٜرٜ اَللَّه، ݧَلْندٜ مٛنّٜرٜ مَاکٛ ندٜ اٛ وَطَتَ کِيتَ غٛونغَ؞ نغَمْ اٛ وَاتَنَيْ کٛو مٛيٜ کٛ فٛتِّدِ اٜ کٛ وَطِ؞ يِمْٻٜ مُݧُٻٜ ندٜرْ وَطُکِ کٛ وٛوطِ، طَٻُّتُٻٜ تٜدُّنغَلْ اٜ مَنْغُ اٜ يٛنْکِ کِ رٜعَتَا، کَمْٻٜ اَللَّه حٛکَّتَ يٛنْکِ کِ رٜعَتَا؞ اَمَّا يِمْٻٜ غِطَنْٻٜ کٛعٜ مَٻّٜ تَنْ غَݧُٻٜ غٛونغَ تٛکِّ کٛ وٛوطَا، ٻٜ کَوْرَيْ اٜ مٛنّٜرٜ اَللَّه اٜ حَلْکٜرٜ مَاکٛ؞ کٛو مٛيٜ غَطٛووٛ کٛ حَلِّ يَرَيْ تٛرَّ اٜ بٛنٜ، کٛو مٛيٜ، يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ؞ اَمَّا فُو يِمْٻٜ غَطٛوٻٜ بٛطُّمْ، اَللَّه وَطَيْ ٻٜ کٜٻَ تٜدُّنغَلْ، اٜ مَنْغُ، اٜ جَمْ؛ اَرَنْدٜ يَحُودَنْکٛعٜنْ، ندٜنْ سٜيْ يِمْٻٜ نَاع يَحُودَنْکٛعٜنْ، نغَمْ اَللَّه حٛلَّتَا فٜىٰرٛوتِرٛلْ؞ کٛو مٛيٜ غَطّٛ حَکّٜ، تٛ اٛ وَلَا لٜيْ اَتَّوْرَ، اٛ وَطَنْتَاکٜ کِيتَ دٛوْ کٛ اَتَّوْرَ وِعِ؞ اَمَّا کٛو مٛيٜ غٛنْطٛ لٜيْ اَتَّوْرَ، تٛ وَطِي حَکّٜ، طُمْ وَطَنَيْمٛ کِيتَ دٛوْ کٛ اَتَّوْرَ وِعِ؞ نغَمْ نَاع نَنٛوٻٜ کٛ اَتَّوْرَ وِعِ نغٛنِ اَادِلِعٜنْ يٜىٰسٛ اَللَّه، اَمَّا تٛکُّٻٜ کٛ طُمْ وِعِ، کَمْٻٜ نٛدِّرْتٜىٰ اَادِلِعٜنْ؞ تٛ يِمْٻٜ نَاع يَحُودَنْکٛعٜنْ ٻٜ نغَلَا اَتَّوْرَ نغَطِي کٛ اَتَّوْرَ وِعِ ندٜرْ يِدّٜ کٛعٜ مَٻّٜ، ٻٜ کٛلِّي اٜ ٻٜ اَنْدِ کٛ حَانِ طُمْ وَطَ، کٛو ندٜ ٻٜ نغَلَا اَتَّوْرَ؞ ٻٜ کٛلِّي کٛ اَتَّوْرَ وِعِ طُمْ وَطَ اٜ وِنْدِي ندٜرْ ٻٜرْطٜ مَٻّٜ؞ ٻٜرْطٜ مَٻّٜ مَا اٜ کٛلَّ طُمْ غٛونغَ، نغَمْ بَنْݧٜ ݧُمٛ مَٻّٜ اٜ حٛلَّٻٜ ٻٜ نغَطِي کٛ وٛوطَا، بَنْݧٜ بٛو اٜ نغٛ سُرَنَٻٜ؞ نٛنْ نٛ حَبَرُ بٜلْطُمْ طُمْ نغَعَجِنْمِ وِعِ، نٛنْ وَطَيْ ݧَلْندٜ ندٜ اَللَّه وَطَنْتَ ݧُمٛوجِ شُوطِيطِ طِ يِمْٻٜ کِيتَ لَاوٛلْ يٜىٰسُ اَلْمَسِيحُ؞ اَمَّا تَا نٛدِّرَ حٛورٜ مَاطَ يَحُودَنْکٜىٰجٛ، تَا مَنْتٛرٛو اَتَّوْرَ، تَا فِيَ غَبَارٜ دٛوْ سُمْڤٛ مَاطَ اٜ اَللَّه، تَا اَنْدِ کٛ اَللَّه يِطِ نغَطَا، تَا سُٻِي کٛ ٻُرِ وٛوطُکِ نغَمْ اَ اٜکِّتِنَامَ اَتَّوْرَ، تَا تَبِّتِنِي اَنْ وٛنِ کٛلَّيْطٛ بُمْطٛ لَاوٛلْ، اَنْ وٛنِ جَيْنغٛلْ نغَمْ غٛنْٻٜ ندٜرْ ݧِوْرٜ، تَا اٜکِّتِنٛووٛ ٻٜ نغَلَا اَنْدَلْ کٛ حَانِ، تَا اٜکِّتِنٛووٛ سُکَاٻٜ، تَا تَبِّتِنِي اَ اَنْدِ کٛو طُمٜ، ندٜنْ فُو کٛ مبِعَتَا طُمْ غٛونغَ نغَمْ اَ وٛودِ اَتَّوْرَ – اَنْ اٜکِّتِنٛووٛ وٛٻّٜ، اَ اٜکِّتِنْتَا حٛورٜ مَاطَ؟ اَنْ نغَعَجِنٛووٛ دٛوْ طُمْ اَلَ نغُيْکَ، اَنْ اَ وُجَّتَا؟ اَنْ بِعٛووٛ تٛع يِمْٻٜ نغَطَ نجٜىٰنُ، اَنْ اَ وَطَتَا نجٜىٰنُ؟ اَنْ نٜفٛووٛ غُنْکِيجِ، اَنْ اَ وُجَّتَا ندٜرْ سُودُ غُنْکِيجِ؟ اَنْ ڤِيٛووٛ غَبَارٜ دٛوْ دٛوکَ اَللَّه، اَ يَوَنْتَا اَللَّه لَاوٛلْ يٜوُکِ دٛوکَ مَاکٛ؟ نٛنْ نٛ طُمْ وِنْدِرَا، «نغَمْ مٛوطٛنْ يَحُودَنْکٛعٜنْ، يِمْٻٜ نَاع يَحُودَنْکٛعٜنْ اٜ مٜتَ حَالَ کَلُّکَ دٛوْ اَللَّه؞» تَا تٛکِّي کٛ اَتَّوْرَ وِعِ، نَادُکِ مَاطَ اٜ نَفِ؞ اَمَّا تَا يٜوِي کٛ اَتَّوْرَ وِعِ، نَادُکِ مَاطَ وَرْتِي بٛ اَ نَادَاکَ؞ تٛ نٜطّٛ مٛ نَادَاکَ تٛکِّي کٛ اَتَّوْرَ وِعِ، نَاع اَللَّه يِعَيْمٛ بٛ اٛ نَادَاطٛ؟ نٜطّٛ مٛ نَادَاکَ، تٛ اٛ تٛکِّي اَتَّوْرَ، اٛ حٛلَّيْ اٛنْ نغَطِي کٛ وٛوطَا، نغَمْ اٛنْ نغٜوِ اَتَّوْرَ کٛو ندٜ اٛنْ نغٛودِطُمْ بِنْدَاطُمْ ندٜنْ اٛنْ نَادَاٻٜ؞ يَحُودَنْکٜىٰجٛ مٛ غٛونغَ نَاع اٛ يَحُودَنْکٜىٰجٛ اٜ ٻَنْدُ تَنْ، کَدِنْ نَادُکِ کِ غٛونغَ نَاع اٜ ٻَنْدُ تَنْ کِ وٛنِ، کٛو اٜ تَپُکِ لَرَلْ؞ نغَمْ مَاجُمْ، يَحُودَنْکٜىٰجٛ مٛ غٛونغَ، کَنْکٛ وٛنِ يَحُودَنْکٜىٰجٛ دَغَ ندٜرْ ٻٜرْندٜ، ندٜنْ نَادُکِ کِ غٛونغَ، کَنْکِ وٛنِ نَادُکِ ٻٜرْندٜ کِ رُوحُ وَطَتَ، نَاع نغَمْ تٛکُّکِ اَتَّوْرَ بِنْدَاطُمْ؞ اِرِ اٛعٛ نٜطّٛ نَاع يِمْٻٜ مَنْتَتَمٛ، اَللَّه مَنْتَتَمٛ؞ طُمٜ يَحُودَنْکٛعٜنْ ٻُرْدِ يِمْٻٜ نَاع يَحُودَنْکٛعٜنْ؟ طُمٜ نَادُکِ نَفَتَ؟ اٜ طُمْ وٛوطِ نَاع سٜطَّ اٜ طَتٜ طُطّٜ؞ اَرَنْدٜ، يَحُودَنْکٛعٜنْ طُمْ حٛکِّ بٛلِيطٜ اَللَّه؞ غٛونغَ، وٛٻّٜ مَٻّٜ کٛولَاکِ اَللَّه؞ اَمَّا شِيَ حٛولَاکِ مَٻّٜ وَاوَيْ وَرْتِرَ اَللَّه مٛ حٜبِّنْتَا اَلْکَوَلْ مُوطُمْ؟ غٛونغَ طُمْ وَاوَتَا! اَللَّه اٛ غٛودُطٛ غٛونغَ، کٛو ندٜ کٛو مٛيٜ نٜطّٛ اٛ ڤٜوٛووٛ؞ نٛنْ نٛ طُمْ وِنْدِرَا، «نغَمْ طُمْ تَبِّتِنَ حَالَ مَاطَ اٜ وٛودِ غٛونغَ، ندٜنْ ندٜرْ کِيتَ کٜٻَا جَالٛرْغَلْ؞» اَمَّا تٛ شِيَ اَادِلَاکُ مٜىٰطٜنْ وَرْتِي لَاوٛلْ تَبِّتِنْکِ اَادِلَاکُ اَللَّه، طُمٜ مبِعٜتٜنْ؟ اٜنْ مبَاوَيْ وِيکِ اَللَّه وَلَا اَادِلَاکُ تٛ اٛ تٛرِّيعٜنْ؟ ﴿اٜ مِ مٜتَ طٛعٛ نٛ يِمْٻٜ مٜتِرْتَ؞﴾ طُعُمْ وَطَتَاکٛ! تٛ اَللَّه وَلَا اَادِلَاکُ، نٛ اٛ وَطِرَنْتَ دُونِيَارُ کِيتَ؟ طُمْ غَطٛتٛوطُمْ غٛطّٛ وِعَ، «تٛ شِيَ غٛونغَ اَمْ وَلِّي يِمْٻٜ نغِعَ غٛونغَ اَللَّه اٜ نجَيْرِ حَا ٻٜ مَوْنِنِمٛ، نغَمْ طُمٜ حَا جٛونِ اٜ طُمْ وَطَنَيَمْ کِيتَ دٛوْ مِنْ مِ غَطٛووٛ حَکّٜ؟» تٛ نٜطّٛ اٜ ݧُمِرَ نٛنْ، اٛ وِعَيْ، «اٜنْ نغَطُ کٛ وٛوطَا نغَمْ طُمْ وَرْتَ لَاوٛلْ وُرْتِنْکِ غٛطُّمْ بٛطُّمْ؞» غٛونغَ، وٛٻّٜ يِمْٻٜ اٜ مبِعَ اٜنْ مبِعَ نٛنْ، اَمَّا نَاع طُمْ غٛونغَ، طُمْ حُطُکِ تَنْ؞ طُمْ وَطَنَيْٻٜ کِيتَ نٛ حَانَنِٻٜ؞ تٛو، طُمٜ مبِعٜتٜنْ؟ اٜنٜنْ يَحُودَنْکٛعٜنْ اٜنْ ٻُرِي يِمْٻٜ نَاع يَحُودَنْکٛعٜنْ وٛنْ طٛنْ؟ غٛونغَ نَاع نٛنْ؞ مِ يَادَکٜ مِ حٛلِّي وِيکِ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ ٻٜ فُو لٜيْ لَامُ حَکّٜ ٻٜ نغٛنِ؞ نٛنْ نٛ طُمْ وِنْدِرَا، «وَلَا نٜطّٛ اَادِلِيجٛ، وَلَا کٛو غٛعٛتٛ، وَلَا غٛودُطٛ فَامُ، وَلَا طَٻُّتُطٛ اَللَّه؞ يِمْٻٜ فُو نغَيْلِتَنِي اَللَّه ٻَاوٛ، ٻٜ نغَرْتِي وَلَا کٛ ٻٜ نَفِ؞ وَلَا غَطٛووٛ کٛ وٛوطِ، وَلَا کٛو غٛعٛتٛ؞ کٛنْدُطٜ مَٻّٜ طُمْ يٜنَاندٜ اٛمْتِيندٜ؞ اٜ ٻٜ کُوتِرَ طٜمْطٜ مَٻّٜ نغَمْ مَجِّنْکِ يِمْٻٜ اٜ فٜوْرٜ؞ بٛلِيطٜ کٛنْدُطٜ مَٻّٜ اٜ کٜىٰوِ کُلّٜ اٜ بٛلِيطٜ نَوْطٜ؞ اٜ ٻٜ نجَاوَ وَرُکِ يِمْٻٜ؞ فُو تٛ ٻٜ نجَحِ، حَلْکٜرٜ اٜ تٛرَّ اٜ تٛکِّٻٜ؞ ٻٜ اَنْدَا لَاوٛلْ وَدُّکِ جَمْ؞ ٻٜ نغَلَا کُلٛلْ اَللَّه؞» جٛونِ اٜنْ اَنْدِ کٛو طُمٜ کٛ اَتَّوْرَ وِعِ، طُمْ وِعَ نغَمْ ٻٜنْ طٛنْ غٛنْٻٜ لٜيْ اَتَّوْرَ، نغَمْ کٛو مٛيٜ مَٻَّ حٛنْدُکٛ مُوطُمْ، کَدِنْ فُو يِمْٻٜ دُونِيَارُ اَنْدَ لٜيْ کِيتَ اَللَّه ٻٜ نغٛنِ؞ نغَمْ وَلَا نٜطّٛ نٛدّٜتٜىٰطٛ اَادِلِيجٛ يٜىٰسٛ اَللَّه نغَمْ تٛکُّکِ اَتَّوْرَ، نغَمْ کٛ اَتَّوْرَ وَطَتَ وٛنِ طُمْ حٛلَّ نٜطّٛ حَکّٜ مُوطُمْ؞ اَمَّا جٛونِ اَللَّه وُرْتِنِي لَاوٛلْ نغٛلْ طُمْ تٛکَّتَ طُمْ وَرْتَ اَادِلِيجٛ يٜىٰسٛ مَاکٛ؞ طُمْ حٜٻَتَا اَادِلَاکُ طُمْ نغَمْ تٛکُّکِ اَتَّوْرَ؞ اَتَّوْرَ اٜ اَنَّبٛعٜنْ کٛکِّي شٜيْدَ دٛوْ مَاجُمْ؞ طُعُمْ اَادِلَاکُ اَللَّه اٜ طُمْ حٜٻٜىٰ بَرْکَ حٛولَاکِ يٜىٰسُ اَلْمَسِيحُ؞ فُو کٛولِيطٛ يٜىٰسُ، اَللَّه وَرْتِرَيْمٛ اَادِلِيجٛ، نغَمْ اٛ حٛلَّتَا فٜىٰرٛوتِرٛلْ؞ کٛو مٛيٜ نٜطّٛ وَطِ حَکّٜ وٛطِّتَکٜ کٛ اَللَّه يِطِ اٛ وَطَ؞ اَمَّا جٛونِ اَللَّه وَرْتِرِيعٜنْ اَادِلِعٜنْ؞ اٛ وَطَنِيعٜنْ نٛنْ شَاحُ نغَمْ يِدّٜ مَاکٛ بَرْکَ رِمْطِنْکِ کٜٻٜتٜىٰکِ لَاوٛلْ يٜىٰسُ اَلْمَسِيحُ؞ اَللَّه لِلِي يٜىٰسُ اَلْمَسِيحُ وَرْتَ شَکِّرِ، نغَمْ تٛ يِمْٻٜ کٛولَکٜمٛ طُمْ يَافَنٛوٻٜ حَکّٜ مَٻّٜ بَرْکَ پِيپَمْ مَاکٛ؞ اَللَّه وَطِي طُعُمْ نغَمْ حٛلَّ اَادِلَاکُ مُوطُمْ؞ نغَمْ ندٜنّٛ اٛ مُݧَنِي غَطُٻٜ حَکّٜ اٛ تَپَنَايِٻٜ کِيتَ؞ اٛ وَطُ نٛنْ نغَمْ اٜ شَرٜلْ نغٜلْ اٛ حٛلَّ کَنْکٛ اٜ حٛورٜ مَاکٛ اٛ اَادِلِيجٛ، ندٜنْ اٜ مٛ وَطَ کٛو مٛيٜ کٛولِيطٛ يٜىٰسُ وَرْتَ اَادِلِيجٛ؞ نغَمْ نٛنْ، وَلَا غٛطُّمْ طُمْ غٛطّٛ مَنْتٛرْتٛو؞ نغَمْ طُمٜ؟ نغَمْ اٜنْ نغَرْتَايِ اَادِلِعٜنْ نغَمْ کُوطٜ مٜىٰطٜنْ، سٜيْ نِ نغَمْ اٜنْ کٛولَکٜ يٜىٰسُ؞ نغَمْ اٜنْ اَنْدِ نٜطّٛ وَرْتَيْ اَادِلِيجٛ يٜىٰسٛ اَللَّه تٛ حٛولَکٜ يٜىٰسُ، نَاع نغَمْ تٛکُّکِ اَتَّوْرَ؞ کٛو اَللَّه اٛ اَللَّه يَحُودَنْکٛعٜنْ تَنْ؟ نَاع فُو کَنْکٛ وٛنِ اَللَّه يِمْٻٜ نَاع يَحُودَنْکٛعٜنْ؟ غٛونغَ، اٛ اَللَّه يِمْٻٜ نَاع يَحُودَنْکٛعٜنْ، کَمْٻٜ مَا؞ اَللَّه اٛ غٛعٛتٛ، غَرْتِرَيْطٛ يَحُودَنْکٛعٜنْ اَادِلِعٜنْ يٜىٰسٛ مَاکٛ تٛ ٻٜ کٛولَکٜ يٜىٰسُ؞ نٛنْ مَا يِمْٻٜ نَاع يَحُودَنْکٛعٜنْ، اٛ وَرْتِرَيْٻٜ اَادِلِعٜنْ تٛ ٻٜ کٛولَکٜ يٜىٰسُ؞ تٛ طُمْ نٛنْ، اٜنْ اَلَيْ تٛکُّکِ اَتَّوْرَ نغَمْ اٜنْ کٛولَکٜ يٜىٰسُ؟ طُمْ وَطَتَاکٛ! سٜيْ نِ، اٜنْ تَبِّتِنَطُمْ؞ تٛو، طُمٜ مبِعٜتٜنْ دٛوْ اِبْرَاهِمْ، مَامَ مٜىٰطٜنْ؟ تٛ اَللَّه وَرْتِرِي اِبْرَاهِمْ اَادِلِيجٛ نغَمْ کٛ اٛ وَطِ، اٛ حٜٻَيْ کٛ اٛ مَنْتٛرْتٛو، اَمَّا نَاع يٜىٰسٛ اَللَّه؞ اَايَارٜ وِعِ، «اِبْرَاهِمْ حٛولَکٜ اَللَّه؛ نغَمْ مَاجُمْ اَللَّه وِعِ اٛ اَادِلِيجٛ؞» نٜطّٛ کُوٛووٛ نغَمْ يٛٻٜىٰ، طُمْ حٛشَّتَا کٛ اٛ يٛٻَا بٛ شَاحُ، اَمَّا بٛ غٛطُّمْ طُمْ اٛ حٜٻَنِ حٛورٜ مَاکٛ؞ نٜطّٛ مٛ وَطَايِ ٻٜرْندٜ مُوطُمْ دٛوْ کُوطٜ مُوطُمْ، اَمَّا اٛ وَطِ ٻٜرْندٜ مَاکٛ دٛوْ اَللَّه غَطٛووٛ غَطٛوٻٜ حَکّٜ نغَرْتَ اَادِلِعٜنْ، طُمْ نٛدَّيْ حٛولَاکِ مَاکٛ اَادِلَاکُ؞ نٛنْ دَوْدَ وِعِ ندٜ اٛ مٜتِ دٛوْ نٜطّٛ بَرْکِطِنَاطٛ مٛ اَللَّه نٛدِّ اَادِلِيجٛ نَاع نغَمْ کُوطٜ مَاکٛ؞ اٛ وِعِي، «ٻٜ بَرْکِطِنَاٻٜ يِمْٻٜ ٻٜ طُمْ يَافَنِي کٛ وٛوطَا طُمْ ٻٜ نغَطِ، ٻٜ حَکّٜ مُعّٜنْ نجَافَا؞ اٛ بَرْکِطِنَاطٛ مٛ جٛومِرَاوٛ لِمَتَا حَکّٜ مَاکٛ؞» تٛو، بَرْکَ طُعُمْ، يَحُودَنْکٛعٜنْ تَنْ کٜٻَتَطُمْ، کٛو حَا اٜ يِمْٻٜ نَاع يَحُودَنْکٛعٜنْ؟ اٜنْ مبِعِي، «اِبْرَاهِمْ حٛولَکٜ اَللَّه؛ نغَمْ مَاجُمْ اَللَّه وِعِ اٛ اَادِلِيجٛ؞» ندٜيٜ فِي طُعُمْ وَطِ؟ کٛ اِبْرَاهِمْ نَادٜىٰ، کٛو غَطَ اٛ نَادَامَ؟ کٛ اٛ نَادٜىٰ طُمْ وَطِ، نَاع غَطَ اٛ نَادَامَ؞ نَادُکِ کِ اٛ وَطَنَا وٛنِ اَلَامَ کٛلُّطُمْ اَللَّه جَٻِي اٛ اَادِلِيجٛ نغَمْ اٛ حٛولَکٜمٛ کٛ اٛ نَادٜىٰ؞ نغَمْ مَاجُمْ، اِبْرَاهِمْ وٛنِ ݧَاکٛ کٛو مٛيٜ کٛولِيطٛ اَللَّه مٛ اَللَّه وَرْتِرِ اَادِلِيجٛ، کٛو اٛ نَادَاکَ؞ نٛنْ مَا کَنْکٛ وٛنِ ݧَاکٛ ٻٜنْ طٛنْ نَادَاٻٜ، نَاع نغَمْ ٻٜ نَادَاٻٜ، اَمَّا نغَمْ ٻٜ کٛولَکٜ اَللَّه اِرِ حٛولَاکِ کِ اٛ وٛودِ کٛ اٛ نَادٜىٰ؞ اَللَّه وَطَنِي اِبْرَاهِمْ اٜ ٻِٻّٜ ٻِٻّٜىٰجِ مَاکٛ اَلْکَوَلْ وِيکِ کَمْٻٜ ندٛنَتَ دُونِيَارُ؞ اَللَّه وَطِي اَلْکَوَلْ نغَعَلْ نَاع نغَمْ اِبْرَاهِمْ اٜ تٛکَّ کٛ اَتَّوْرَ وِعِ، اَمَّا نغَمْ اَادِلَاکُ کٜٻٜتٜىٰطُمْ بَرْکَ حٛولَاکِ اَللَّه؞ تٛ تٛکّٛوٻٜ اَتَّوْرَ نغٛنِ دٛنٛوٻٜ دُونِيَارُ، حٛولَارٜ نٜطّٛ وَرْتِي مٜىٰرٜ، ندٜنْ اَلْکَوَلْ اَللَّه وَرْتِي کٛو کٛ نَفِ؞ اَتَّوْرَ اٜ وَدَّ مٛنّٜرٜ اَللَّه، اَمَّا فُو تٛ دٛوکَ وَلَا، نَاع نٛ طُمْ وَطَتَ طُمْ يٜوَ دٛوکَ؞ نغَمْ نٛنْ، يِمْٻٜ کٛولِيٻٜ اَللَّه نغٛنِ کٜٻٛوٻٜ کٛ اٛ وَطِ اَلْکَوَلْ، نغَمْ طُمْ حٜٻَ کٛ اٛ وَطِ اَلْکَوَلْ شَاحُ، ندٜنْ فُو ٻِٻّٜ ٻِٻّٜىٰجِ اِبْرَاهِمْ تَبِّتِنَ حٜٻُکِطُمْ، نَاع تٛکّٛوٻٜ اَتَّوْرَ تَنْ، اَمَّا حَا اٜ کٛولِيٻٜ اَللَّه نٛنْ نٛ اِبْرَاهِمْ حٛولٛرِيمٛ؞ نغَمْ اِبْرَاهِمْ وٛنِ ݧَاکٛ مٜىٰطٜنْ اٜنْ فُو؞ نٛنْ نٛ طُمْ وِنْدِرَا، «مِ وَرْتِرِيمَ ݧَاکٛ لٜݧِ طُطِّ؞» کَنْکٛ وٛنِ ݧَاکٛ مٜىٰطٜنْ يٜىٰسٛ اَللَّه مٛ اٛ حٛولِي، اَللَّه کٛکّٛووٛ مَيْٻٜ يٛنْکِ، نٛدّٛووٛ کٛ وَلَا سٜيْ طُمْ وَنْغَ؞ اِبْرَاهِمْ حٛولَکٜ اَللَّه، اٛ وَطِي کَمُّندٜ کٛو ندٜ وَلَا دَلِيلَ وَطُکِ کَمُّندٜ مَاکٛ؞ نغَمْ مَاجُمْ، اٛ وَرْتِي «ݧَاکٛ لٜݧِ طُطِّ،» نٛنْ نٛ اٛ وِعَا، «تَانِرَاٻٜ مَاطَ طُوطِرَيْ بٛ کٛودٜ دٛوْ؞» اٛ اَلَايِ حٛولَاکِ اَللَّه، کٛو ندٜ اٛ يِعِ ٻَنْدُ مَاکٛ سٛمِي نغَمْ اٛ ٻَدَکٜ دُوٻِ 100، ندٜنْ دٜبّٛ مَاکٛ سَارَتُ دَݧَتَا؞ اٛ وَطَايِ سٜکٛ دٛوْ کٛ اَللَّه وَطَنِمٛ اَلْکَوَلْ، اَمَّا اٛ ٻٜيْدِي حٛولَاکِ اَللَّه، اٛ مَنْتِيمٛ؞ اٛ تَبِّتِنِي اَللَّه وَاوَيْ وَطَ کٛ وَطِ اَلْکَوَلْ؞ نغَمْ اِبْرَاهِمْ حٛولَکٜ اَللَّه، «اَللَّه وِعِ اٛ اَادِلِيجٛ؞» بٛلِيطٜ بِيطٜ «اَللَّه وِعِ اٛ اَادِلِيجٛ،» نَاع نغَمْ مَاکٛ تَنْ طٜ مبِنْدَا؞ طٜ مبِنْدَامَ نغَمْ مٜىٰطٜنْ اٜنٜنْ مَا ٻٜ اَللَّه وَرْتِرْتَ اَادِلِعٜنْ، اٜنٜنْ کٛولِيٻٜ اُمِّنْطٛ يٜىٰسُ جٛومِرَاوٛ مٜىٰطٜنْ دَغَ مَيْدٜ؞ اٛ وَرَامَ نغَمْ حَکّٜ مٜىٰطٜنْ، ندٜنْ اٛ اُمِّنَامَ دَغَ مَيْدٜ نغَمْ نغَرْتٜنْ اَادِلِعٜنْ يٜىٰسٛ اَللَّه؞ نغَمْ نٛنْ، ندٜ اَللَّه وَرْتِرِعٜنْ اَادِلِعٜنْ نغَمْ اٜنْ کٛولَکٜ يٜىٰسُ اَلْمَسِيحُ، اٜنْ شِرْيٛوتِرِي اٜ اَللَّه بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞ بَرْکَ مَاکٛ کٜٻُطٜنْ لَاوٛلْ حٜٻُکِ طُعُمْ شَاحُ اَللَّه طُمْ غٛنْطٜنْ ندٜرْ جٛونِ؞ طٛنْمَا اٜنْ مبٜلْمبٜلْتَ نغَمْ اٜنْ تَبِّتِنِي اَللَّه حٛلَّيْعٜنْ تٜدُّنغَلْ مُوطُمْ؞ نَاع نٛنْ تَنْ، حَا مَا اٜنْ مبٜلْمبٜلْتَ ندٜرْ تٛرَّاجِ طِ نجَرٜتٜنْ، نغَمْ اٜنْ اَنْدِ يَرُکِ تٛرَّاجِ اٜ وَدَّ مُݧَلْ؞ تٛ اٜنْ مُݧِي ندٜرْ تٛرَّ، اٜنْ کٜٻَيْ نغِکُّ طُمْ اَللَّه يِطِ، تٛ اٛ يِطِي نغِکُّ مٜىٰطٜنْ، نٛنْ وَطَيْ نغَطٜنْ کَمُّندٜ؞ کَمُّندٜ ندٜنْ سٜمْتِنْتَاعٜنْ، نغَمْ اَللَّه حٛلِّعٜنْ اٜ مٛ يِطِعٜنْ ندٜرْ ٻٜرْطٜ مٜىٰطٜنْ بَرْکَ رُوحُ مَاکٛ، طُمْ اٛ حٛکِّعٜنْ؞ ندٜرْ شَرٜلْ نغٜلْ تَمْڤُطٜنْ، اَلْمَسِيحُ مَايِي نغَمْ غَطٛوٻٜ حَکّٜ ندٜرْ شَرٜلْ نغٜلْ اَللَّه سُٻِ؞ اٜ طُمْ سَطِ غٛطّٛ مَايَ نغَمْ اَادِلِيجٛ؞ سٜيْ نِ طُمْ غَطٛتٛوطُمْ غٛطّٛ وَطَ سٜمْبٜ ٻٜرْندٜ مَايَ نغَمْ نٜطّٛ مٛ نغِکُّ بٛطُّمْ؞ اَمَّا لَاوٛلْ نغٛلْ اَللَّه حٛلِّيعٜنْ يِدّٜ مَاکٛ وٛنِ، شَرٜلْ کٛ نغٛنْطٜنْ ندٜرْ حَکّٜ، اَلْمَسِيحُ مَايِي نغَمْ مٜىٰطٜنْ؞ ندٜ جٛونِ اٜنْ نغَرْتِي اَادِلِعٜنْ بَرْکَ پِيپَمْ اَلْمَسِيحُ، فِي ٻُرْطُمْ تَبُّتُکِ وٛنِ اٛ حِسْنَيْعٜنْ دَغَ مٛنّٜرٜ اَللَّه غَرَيْندٜ؞ ندٜنّٛ اٜنْ وَݧْوَݧْٻٜ اَللَّه، اَمَّا طُمْ سِرْيٛوتِرِيعٜنْ اٜ مَاکٛ بَرْکَ مَيْدٜ ٻِطّٛ مَاکٛ؞ جٛونِ ندٜ اٜنْ شِرْيٛوتِرِي اٜ اَللَّه، اٜنْ ٻُرَيْ تَبِّتِنْکِ اَلْمَسِيحُ حِسْنَيْعٜنْ نغَمْ اٜ مٛ فٛوفَ؞ اَمَّا نَاع کَنْجُمْ تَنْ، حَا مَا اٜنْ نَنَ بٜلْطُمْ نغَمْ کٛ اَللَّه وَطِ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ، شِرْيٛوتِرْطٛعٜنْ اٜ اَللَّه جٛونِ؞ حَکّٜ نَتِّي ندٜرْ دُونِيَارُ ندُعُ لَاوٛلْ نٜطّٛ غٛعٛتٛ؞ حَکّٜ طُمْ اٛ وَطِ نغَدِّي مَيْدٜ؞ نٛنْ کٛو مٛيٜ وَرْتِي مَايَيْطٛ، نغَمْ کٛو مٛيٜ وَطِي حَکّٜ؞ غٛونغَ، کٛ اَتَّوْرَ وَدّٜىٰ، حَکّٜ اٜ طٛنْ ندٜرْ دُونِيَارُ، اَمَّا اَللَّه جٛغَتَاکٛ حَکّٜ نٜطّٛ ندٜرْ ٻٜرْندٜ مُوطُمْ تٛ دٛوکَ وَلَا؞ فُو اٜ نٛنْ، دَغَ جَامَنُ اَادَمُ يَاکِ جَامَنُ مُوسَ، مَيْدٜ لَامَکٜ دٛوْ کٛو مٛيٜ، حَا اٜ دٛوْ يِمْٻٜ ٻٜ نغَطَايِ حَکّٜ اِرِ طُمْ اَادَمُ وَطِ؞ اَادَمُ وٛنِ مِسَالُ اٛنْ طٛنْ غَرَيْطٛ؞ اَمَّا شَاحُ طُمْ اَللَّه حٛکَّتَ طُمْ نَنْدَا اٜ حَکّٜ اَادَمُ؞ يِمْٻٜ طُطْٻٜ مَايِي نغَمْ حَکّٜ نٜطّٛ غٛعٛتٛ، اَمَّا يِدّٜ اَللَّه ٻُرِي مَوْنُکِ نَاع سٜطَّ، نٛنْ مَا شَاحُ طُمْ اٛ حٛکَّتَ يِمْٻٜ طُطْٻٜ بَرْکَ نٜطّٛ غٛعٛتٛ، وَاتٛ يٜىٰسُ اَلْمَسِيحُ؞ شَاحُ اَللَّه اٜ فٜىٰرٛوتِرِ اٜ کٛ حَکّٜ طُمْ نٜطّٛ غٛعٛتٛ فٛوطِ؞ نغَمْ کِيتَ اَللَّه تٛکُّطُمْ غَطَ حَکّٜ طُمْ اَادَمُ وَطِ وٛنِ کِيتَ حَلْکٜرٜ، اَمَّا شَاحُ طُمْ اَللَّه حٛکِّ، کَنْجُمْ طُمْ وَرْتِرِعٜنْ اَادِلِعٜنْ کٛو ندٜ اٜنْ نغَطِي حَکّٜ نَاع سٜطَّ؞ نغَمْ حَکّٜ طُمْ نٜطّٛ غٛعٛتٛ وَطِ، مَيْدٜ فُطِّ لَامَاکِ دٛوْ کٛو مٛيٜ؞ اَمَّا لَامُ طُمْ، طُمْ حٜوْتَايِ کٛو طُمٜ تٛ طُمْ حَوْتَامَ اٜ لَامُ طُمْ نٜطّٛ غٛعٛتٛ وَدِّ، وَاتٛ يٜىٰسُ اَلْمَسِيحُ؞ کٛو مٛيٜ مٛ اَللَّه حٛلِّ يِدّٜ مَوْندٜ وَرْتِرِيمٛ اَادِلِيجٛ شَاحُ، اٛ حٜٻَيْ جَالٛرْغَلْ دٛوْ حَکّٜ بَرْکَ اَلْمَسِيحُ؞ نغَمْ نٛنْ، نٛنْ نٛ حَکّٜ نٜطّٛ غٛعٛتٛ فٛوطِرَنِ فُو يِمْٻٜ کِيتَ حَلْکٜرٜ، نٛنْ مَا کُوغَلْ اَادِلَاکُ نغَلْ نٜطّٛ غٛعٛتٛ وَطِ وَرْتِرِي يِمْٻٜ طُطْٻٜ اَادِلِعٜنْ حٛکِّيٻٜ يٛنْکِ کٜسِ؞ نٛنْ نٛ يِمْٻٜ طُطْٻٜ نغَرْتِ غَطٛوٻٜ حَکّٜ نغَمْ نٜطّٛ غٛعٛتٛ وَݧِي کٛ اَللَّه وِعِ، نٛنْ مَا يِمْٻٜ طُطْٻٜ نغَرْتَيْ اَادِلِعٜنْ نغَمْ نٜطّٛ غٛعٛتٛ وَطِي کٛ اَللَّه يِطِ؞ اَتَّوْرَ وَدَّامَ نغَمْ کٛ وٛوطَا طُمْ يِمْٻٜ نغَطَتَ وُرْتٛو اٜ نجَيْرِ؞ اَمَّا فُو تٛ حَکّٜ ٻٜيْدِي، سٜيْ يِدّٜ اَللَّه ٻُرَ ٻٜيْدَاکِ؞ حَکّٜ لَامَکٜ يِمْٻٜ نغَمْ طُمْ ڤٛوطَنِيٻٜ مَيْدٜ؞ اَمَّا جٛونِ يِدّٜ اَللَّه اٜ لَامٛو لَاوٛلْ اَادِلَاکُ، ندٜنْ اَللَّه جَٻِيعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞ نٛنْ وَطَيْ کٜٻٜنْ يٛنْکِ کِ رٜعَتَا؞ تٛو، طُمٜ مبِعٜتٜنْ؟ اٜنْ نغَطَيْ کَ وَطُکِ حَکّٜ نغَمْ يِدّٜ اَللَّه ٻٜيْدٛو؟ غٛونغَ نَاع نٛنْ! حَانَا ݧَمْرٜنْ يٜىٰسٛ اٜ وَطُکِ حَکّٜ، نغَمْ اٜنْ نجَادَکٜ اٜنْ نغَرْتِي بٛ مَيْٻٜ تٛ حَکّٜ؞ نٛ وَطَتَ کَدِنْ اٜنْ ݧَمْرَ يٜىٰسٛ اٜ جٛنْدٜ ندٜرْ حَکّٜ؟ غٛونغَ اٛنْ اَنْدِ ندٜ طُمْ وَطَنِيعٜنْ بَڤْتِسْمَ نغَمْ شُمْڤٛوتِرٜنْ اٜ يٜىٰسُ اَلْمَسِيحُ، اٜنْ نغَطَنَ بَڤْتِسْمَ نغَمْ اٜنْ مَيْدِ اٜ مَاکٛ؞ نغَمْ نٛنْ، بَڤْتِسْمَ طُمْ اُمْ وَطَنِعٜنْ بٛ طُمْ اُوُدُعٜنْ اٜ مَاکٛ، ندٜنْ اٜنْ نغَرْتِي غٛعٛ اٜ مَاکٛ ندٜرْ مَيْدٜ مَاکٛ، نغَمْ، نٛنْ نٛ تٜدُّنغَلْ ݧَاکٛ مٜىٰطٜنْ مٛ دٛوْ اُمِّنِرِ اَلْمَسِيحُ دَغَ مَيْدٜ، نٛنْ اٜنٜنْ مَا اٜنْ نغَطُ جٛنْدٜ حٜيْرٜ؞ نغَمْ تٛ اٜنْ نغَرْتِي غٛعٛ اٜ اَلْمَسِيحُ ندٜرْ مَيْدٜ اِرِ ندٜ مَاکٛ، نٛنْ مَا اٜنْ تَبِّتِنِي اٜنْ نغَرْتَيْ غٛعٛ اٜ مَاکٛ ندٜرْ اُمَّاکِ دَغَ مَيْدٜ نٛ اٛ اُمّٛرِي؞ اٜنْ اَنْدِ نغِکُّ مٜىٰطٜنْ طُمْ ندٜنّٛ طُمْ وَرْدَامَ اٜ اَلْمَسِيحُ دٛوْ غَافَانغَلْ، نغَمْ ٻَنْدُ مٜىٰطٜنْ ندُ حَکّٜ حَلْکٜىٰ، نغَمْ تٛع ڤُطِّتٜنْ نغَرْتٜنْ مَشُّٻٜ حَکّٜ؞ نغَمْ فُو مَيْطٛ، حَکّٜ وَلَا بَوْطٜ دٛوْ مَاکٛ؞ تٛ اٜنْ مَيْدِي اٜ اَلْمَسِيحُ، اٜنْ تَبِّتِنِي اٜنْ نجٛوطٛدٛتٛ اٜ مَاکٛ؞ نغَمْ اٜنْ اَنْدِ اَلْمَسِيحُ اُمِّنَامَ دَغَ مَيْدٜ، ندٜنْ اٛ فُطِّتَتَا اٛ مَايَ کَدِنْ؞ مَيْدٜ فُطِّتَتَا حٜٻَ بَوْطٜ دٛوْ مَاکٛ؞ مَيْدٜ ندٜ اٛ مَايِ اٛ مَايُ ندٜ غٛعٛ نغَمْ اٛ يٜوَ سٜمْبٜ حَکّٜ حَا اَبَدَا، ندٜنْ جٛنْدٜ ندٜ اٛ وَطَتَ جٛونِ اٜ مٛ وَطَندٜ ندٜرْ سُمْڤٛوتِرْکِ اٜ اَللَّه؞ نٛنْ اٛنٛنْ مَا، دٛولٜ کٛشّٜىٰ کٛعٜ مٛوطٛنْ بٛ مَيْٻٜ ٻٜ بَوْطٜ حَکّٜ لَامَاکِ دٛوْ مَٻّٜ، اَمَّا جٛونِ اٛنْ نغَطَ جٛنْدٜ نغَمْ نغَطٛنْ کٛ اَللَّه يِطِ بَرْکَ سُمْڤٛوتِرْکِ اٜ يٜىٰسُ اَلْمَسِيحُ؞ نغَمْ نٛنْ، تٛع اٛنْ اَلُ حَکّٜ لَامٛو دٛوْ ٻَلِّ مٛوطٛنْ مَايَيْطِ حَا تٛکّٛنْ کٛ سُونٛ ٻَلِّ مٛوطٛنْ نغِطِ؞ تٛع اٛنْ ڤُطُّتُ اَلَنٛنْ حَکّٜ وٛنْدٜ جٛکّٛودٜ ٻَنْدُ مٛوطٛنْ ندٜ حُوتِرٜىٰ فِي کَلُّطُمْ؞ اَمَّا کٛکّٜىٰ اَللَّه کٛعٜ مٛوطٛنْ بٛ يِمْٻٜ ٻٜ طُمْ اُمِّنِ دَغَ مَيْدٜ يَاکِ يٛنْکِ، ندٜنْ کٛکّٛنْمٛ فُو کٛعٜ مٛوطٛنْ نغَمْ اٛ حُوتِرَعٛنْ کُوطٜ اَادِلَاکُ؞ نغَمْ حَکّٜ حٜٻَتَا جَالٛرْغَلْ دٛوْ مٛوطٛنْ، ندٜ نَاع لٜيْ اَتَّوْرَ نغٛنْطٛنْ، اَمَّا لٜيْ يِدّٜ اَللَّه نغٛنْطٛنْ؞ طُمٜ نغَطٜتٜنْ؟ اٜنْ نغَطَيْ حَکّٜ نغَمْ لٜيْ يِدّٜ اَللَّه غٛنْطٜنْ نَاع لٜيْ اَتَّوْرَ؟ تٛع اٜنْ نغَطُ نٛنْ! غٛونغَ اٛنْ اَنْدِ تٛ اٛنْ تٛکِّي کٛ غٛطّٛ وِعِعٛنْ نٛ مَشُّٻٜ نغَطَتَ، اٛنْ نغَرْتِي مَشُّٻٜ اٛنْ طٛنْ مٛ نغَطٛتٛنْ کٛ وِعِ، کٛو حَکّٜ ڤٛوطَيْطُمْ مَيْدٜ، کٛو وَطُکِ کٛ اَللَّه يِطِ غَرْتِرَيْطُمْ نٜطّٛ اَادِلِيجٛ؞ اَمَّا يٜتّٛورٜ تَبِّتَنَ اَللَّه، نغَمْ ندٜنّٛ اٛنْ مَشُّٻٜ حَکّٜ، اَمَّا جٛونِ اٛنْ تٛکَّ اٜکِّتِنٛلْ نغٛلْ طُمْ اٜکِّتِنِعٛنْ اٜ ٻٜرْطٜ مٛوطٛنْ فُو؞ اٛنْ ندِمْطِنَامَ دَغَ وَطُکِ حَکّٜ، اٛنْ نغَرْتِي مَشُّٻٜ اَادِلَاکُ؞ اٜ مِ حُوتِرَ بٛلِيطٜ طٜ شَطَا نغَمْ اٛنْ شٜمْبِطَا؞ ندٜنّٛ اٛنْ نغَرْتِرِي کٛعٜ مٛوطٛنْ مَشُّٻٜ وَطُکِ فِي نٜفْنِيطُمْ اٜ فِي کَلُّطُمْ غَطُطُمْ کَ ٻٜيْدَاکِ نَاع سٜطَّ؞ نٛنْ مَا، جٛونِ نغَرْتِرٜىٰ کٛعٜ مٛوطٛنْ مَشُّٻٜ اَادِلَاکُ نغَمْ نغَطٛنْ جٛنْدٜ شٜنِيندٜ؞ کٛ نغٛنّٛوطٛنْ مَشُّٻٜ حَکّٜ، وَلَا کٛ وَنِّعٛنْ اٜ کُوطٜ اَادِلَاکُ؞ ندِيٜ ٻٜيْدَارِ کٜٻُطٛنْ ندٜرْ کٛ نغَطَيْنٛوطٛنْ ندٜنّٛ طُمْ شٜمْتٛتٛنْ جٛونِ؟ کٛ فِي طُمْ طٛنْ فٛوطَتَ وٛنِ مَيْدٜ! اَمَّا جٛونِ ندٜ طُمْ رِمْطِنِيعٛنْ دَغَ حَکّٜ، ندٜنْ اٛنْ نغَرْتِي مَشُّٻٜ اَللَّه، ٻٜيْدَارِ ندِ کٜٻٛتٛنْ وٛنِ جٛنْدٜ لَمْندٜ، ندٜنْ اٜ رٜعِرْدٜ کٜٻٛنْ يٛنْکِ کِ رٜعَتَا؞ نغَمْ نجٛٻَارِ حَکّٜ طُمْ مَيْدٜ، اَمَّا شَاحُ اَللَّه وٛنِ يٛنْکِ کِ رٜعَتَا کٜٻٜتٜىٰکِ بَرْکَ سُمْڤٛوتِرْکِ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ؞ بَنْدِرَاٻٜ اَمْ، ندٜ اٛنْ فُو اٛنْ اَنْدِ دٛوکَ، اٛنْ ڤَامَيْ کٛ نغِطْمِ وِيکِ؞ دٛوکَ اٜ لَامٛو دٛوْ نٜطّٛ تٛ اٜ مٛ فٛوفَ تَنْ؞ مِسَالُ، دٜبّٛ تٜىٰغَلْ دٛوکَ حَٻِّيمٛ اٜ غٛرْکٛ مَاکٛ تٛ نِ غٛرْکٛ اٛنْ اٜ فٛوفَ؞ اَمَّا تٛ غٛرْکٛ اٛنْ مَايِي، دٜبّٛ اٛنْ فِتَّکٜ دَغَ دٛوکَ کَٻِّندِرْطُمّٛ اٜ غٛرْکٛ اٛنْ؞ نغَمْ نٛنْ، تٛ غٛرْکٛ مَاکٛ اٜ فٛوفَ اٛ جٛوطٛدِي اٜ غٛرْکٛ فٜىٰرٜ، طُمْ نٛدِّرَيْمٛ غَطٛووٛ نجٜىٰنُ؞ اَمَّا تٛ غٛرْکٛ مَاکٛ مَايِي، دٛوکَ يٛوفِيمٛ، ندٜنْ تٛ اٛ تٜىٰرِي اٜ غٛطّٛ فٜىٰرٜ، نَاع نجٜىٰنُ اٛ وَطَتَ؞ بَنْدِرَاٻٜ اَمْ، دٛوْ اَتَّوْرَ، اٛنْ نغَرْتِي بٛ مَيْٻٜ بَرْکَ مَيْدٜ اَلْمَسِيحُ دٛوْ غَافَانغَلْ، نغَمْ نغَرْتٛنْ ٻٜ غٛطّٛ جٜيِ؞ جٛونِ جٜيْطٛعٛنْ وٛنِ اَلْمَسِيحُ اُمِّيطٛ دَغَ مَيْدٜ، نغَمْ نغَرْتٜنْ کُوٛوٻٜ ندٜرْ کُوغَلْ اَللَّه؞ شَرٜلْ کٛ نغَطٜتٜنْ کٛ ٻَلِّ مٜىٰطٜنْ نغِطِ، سُونٛوجِ ڤٛوطَيْطِ حَکّٜ، طِ ٻٜيْدِي سٜمْبٜ ندٜرْ مٜىٰطٜنْ کٛ نَنْطٜنْ ندٜرْ اَتَّوْرَ، اٜ طِ کُوَ ندٜرْ ٻَلِّ مٜىٰطٜنْ نغَمْ کُوٜنْ کٛ فٛوطَنْتَعٜنْ مَيْدٜ؞ اَمَّا جٛونِ اٜنْ ندِمْطِنَامَ دَغَ اَتَّوْرَ غَرْتِرْطُمْعٜنْ مَشُّٻٜ، نغَمْ اٜنْ مَيْدِي اٜ اَلْمَسِيحُ؞ جٛونِ اٜنْ کُوَنَ اَللَّه ندٜرْ لَاوٛلْ کٜسٛلْ نغٛلْ رُوحُ مَاکٛ، نَاع ندٜرْ تٛکُّکِ لَاوٛلْ کِينغٛلْ نغٛلْ دٛوکَ بِنْدَاطُمْ؞ طُمٜ مبِعٜتٜنْ کَدِنْ؟ اَتَّوْرَ طُمْ حَکّٜ؟ غٛونغَ نَاع نٛنْ! اَمَّا دَا اَتَّوْرَ وَلَا، دَا مِ اَنْدَا کٛ وٛنِ حَکّٜ؞ دَا اَتَّوْرَ وِعَايِنٛ، «تَاع يِطُ فِي طُمْ اَ جٜيَايِ،» دَا مِ اَنْدَا يِطُکِ فِي طُمْ مِ جٜيَايِ وٛوطَا؞ اَمَّا حَکّٜ حٜٻِي لَاوٛلْ ندٜرْ دٛوکَ فٛوطَنِييَمْ کٛو اِرِ نغٛيٜ سُونٛ يِطُکِ فِي طُمْ مِ جٜيَايِ؞ نغَمْ تٛ دٛوکَ وَلَا، سٜمْبٜ حَکّٜ وَاتِي؞ ندٜنّٛ کٛ مِ اَنْدَا کٛ دٛوکَ حَطِ، اٜ مِ ݧُمَ مِ وَلَا حَکّٜ؞ اَمَّا ندٜ اَنْدُمِطُمْ، سٜيْ ڤَامُمِ مِ يٜوِيطُمْ، مِ غَطٛووٛ حَکّٜ، ندٜنْ اَنْدُمِ يٜىٰسٛ اَللَّه مِ مَيْطٛ؞ دٛوکَ کَانُطُمْ حٛلَّيَمْ لَاوٛلْ نغٛلْ تٛکَّيْمِ مِ حٜٻَ يٛنْکِ کِ رٜعَتَا، طُمْ فٛوطَنِييَمْ حَلْکٜرٜ؞ حَکّٜ کٜٻِي لَاوٛلْ ندٜرْ دٛوکَ، طُمْ کُوتِرِيطُمْ، طُمْ پٛيْرِييَمْ، طُمْ فٛوطَنِييَمْ حَلْکٜرٜ؞ نغَمْ نٛنْ، اَتَّوْرَ دَغَ تٛ اَللَّه طُمْ پِوٛيِ، نٛنْ مَا دٛوکَ دَغَ تٛ اَللَّه طُمْ پِوٛيِ، اٜ طُمْ وِعَ کٛ حَانِ، اٜ طُمْ وٛوطِ؞ تٛو، طُمْ طٛنْ دٛوکَ بٛطُّمْ طُمْ فٛوطَنِييَمْ حَلْکٜرٜ وٛنْ طٛنْ؟ نَاع نٛنْ! اَمَّا نغَمْ حَکّٜ اَنْدٜىٰ طُمْ حَکّٜ، طُمْ ڤٛوطَنِييَمْ حَلْکٜرٜ لَاوٛلْ طُمْ طٛنْ دٛوکَ بٛطُّمْ، نغَمْ اٜ لَاوٛلْ دٛوکَ حَکّٜ وَرْتَ فِي کَلُّطُمْ نَاع سٜطَّ؞ اٜنْ اَنْدِ اَتَّوْرَ طُمْ کُوغَلْ رُوحُ اَللَّه، اَمَّا مِنْ مِ نٜطّٛ تَنْ، مِ مَشُّطٛ حَکّٜ؞ مِ فَامَايِ نغَمْ طُمٜ نغَطَيْمِ کٛ نغَطَيْمِ؞ نغَمْ مِ وَطَتَا کٛ نغِطُمِ وَطُکِ، اَمَّا اٜ مِ وَطَ کٛ نغَݧُمِ؞ تٛ مِ وَطِي کٛ مِ يِطَا وَطُکِ، نٛنْ حٛلِّي مِ جَٻِي اَتَّوْرَ اٜ وٛوطِ؞ نغَمْ نٛنْ، نَاع طُمْ مِنْ وَطَتَطُمْ، اَمَّا طُمْ حَکّٜ غٛنْطُمْ ندٜرْ اَمْ؞ اٜ مِ اَنْدِ وَلَا غٛطُّمْ بٛطُّمْ ندٜرْ اَمْ، وَاتٛ ندٜرْ نغِکُّ اَمْ طُمْ حَکّٜ؞ اٜ مِ يِطِ وَطُکِ فِي بٛطُّمْ، اَمَّا مِ وَاوَتَا وَطُکِطُمْ؞ مِ وَطَتَا فِي بٛطُّمْ طُمْ نغِطُمِ وَطُکِ، اَمَّا اٜ مِ وَطَ فِي کَلُّطُمْ طُمْ مِ يِطَا وَطُکِ؞ تٛو، تٛ مِ وَطِي کٛ مِ يِطَا وَطُکِ، نٛنْ حٛلِّي نَاع طُمْ مِنْ وَطَتَطُمْ، اَمَّا طُمْ حَکّٜ غٛنْطُمْ ندٜرْ اَمْ وَطَتَطُمْ؞ طُمْ وَرْتَنِييَمْ نغِکُّ، فُو شَرٜلْ کٛ نغِطُمِ وَطُکِ غٛطُّمْ بٛطُّمْ، سٜيْ غٛطُّمْ کَلُّطُمْ غٛنْطُمْ ندٜرْ اَمْ حَطَيَمْ وَطُکِطُمْ؞ دَغَ ندٜرْ ٻٜرْندٜ اَمْ اٜ مِ نَنَ بٜلْطُمْ دٛوکَ پِوٛيْطُمْ دَغَ تٛ اَللَّه؞ اَمَّا ندٜرْ ٻَنْدُ اَمْ مِ يِعِي غٛطُّمْ دٛوکَ فٜىٰرٜ اٜ حٛنِدَ اٜ دٛوکَ طُمْ ٻٜرْندٜ اَمْ يِطِ؞ طُمْ وَرْتِرِييَمْ مَشُّطٛ حَکّٜ غٛنْطُمْ ندٜرْ ٻَنْدُ اَمْ؞ مِ نٜطّٛ جُرْمِنِيطٛ! مٛيٜ حِسْنَتَيَمْ دَغَ ندُعُ ٻَنْدُ اَمْ ڤٛوطَنَيْندُيَمْ حَلْکٜرٜ؟ يٜتّٛورٜ تَبِّتَ تٛ اَللَّه بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ! نغَمْ نٛنْ، مِنْ اٜ حٛورٜ اَمْ ندٜرْ ٻٜرْندٜ اَمْ مِ مَشُّطٛ دٛوکَ اَللَّه، اَمَّا نغَمْ نغِکُّ اَمْ طُمْ حَکّٜ مِ مَشُّطٛ حَکّٜ؞ نغَمْ نٛنْ، جٛونِ طُمْ تَپَنْتَا ٻٜنْ طٛنْ شُمْڤٛوتِرٛوٻٜ اٜ يٜىٰسُ اَلْمَسِيحُ کِيتَ حَلْکٜرٜ؞ نغَمْ دٛوکَ رُوحُ اَللَّه کٛکّٛوجُمْ يٛنْکِ ندٜرْ سُمْڤٛوتِرْکِ اٜ يٜىٰسُ رِمْطِنِييَمْ دَغَ بَوْطٜ حَکّٜ لَامٛتٛوطُمْعٜنْ ڤٛوطَنَيْطُمْعٜنْ حَلْکٜرٜ؞ کٛ اَتَّوْرَ وَاوَايِ وَطُکِ، نغَمْ نغِکُّ حَکّٜ طُمْ نٜطّٛ وٛودِ، اَللَّه وَطِيطُمْ؞ ندٜ اٛ لِلِ ٻِطّٛ مَاکٛ ندٜرْ نَنْدِ ٻَنْدُ مٜىٰطٜنْ ندُ حَکّٜ نغَمْ اٛ وَرْتَ شَکِّرِ نغَمْ حَکّٜ مٜىٰطٜنْ، اٛ سَنْکِتِي لَامُ حَکّٜ ندٜرْ ٻَنْدُ؞ اَللَّه وَطِي طُعُمْ نغَمْ مبَاوٜنْ وَطُکِ فُو کُوطٜ اَادِلَاکُ طٜ اَتَّوْرَ وِعِ طُمْ وَطَ، اٜنٜنْ تٛکّٛوٻٜ کٛ رُوحُ اَللَّه وِعِ، نَاع کٛ ٻَلِّ مٜىٰطٜنْ نغِطِ؞ يِمْٻٜ غَطٛوٻٜ کٛ ٻَلِّ مَٻّٜ نغِطِ، اٜ ٻٜ نجٛوَ ٻٜرْطٜ مَٻّٜ دٛوْ کٛ ٻَلِّ مَٻّٜ نغِطِ؞ اَمَّا يِمْٻٜ غَطٛوٻٜ کٛ رُوحُ اَللَّه وِعِ، اٜ ٻٜ نجٛوَ ٻٜرْطٜ مَٻّٜ دٛوْ کٛ رُوحُ اَللَّه يِطِ؞ يٛوُکِ ٻٜرْندٜ دٛوْ کٛ ٻَنْدُ يِطِ اٜ طُمْ فٛوطَ حَلْکٜرٜ، اَمَّا يٛوُکِ ٻٜرْندٜ دٛوْ کٛ رُوحُ اَللَّه يِطِ اٜ طُمْ وَدَّ يٛنْکِ اٜ جَمْ؞ نغَمْ يٛوُکِ ٻٜرْندٜ دٛوْ کٛ ٻَنْدُ يِطِ طُمْ وَݧُکِ اَللَّه، طُمْ تٛکَّتَا کٛ دٛوکَ اَللَّه وِعِ، طُمْ وَاوَتَا وَطُکِطُمْ؞ يِمْٻٜ غَطٛوٻٜ کٛ ٻَلِّ مَٻّٜ نغِطِ ٻٜ مبَاوَتَا وٜلْنَنْکِ اَللَّه ٻٜرْندٜ؞ اَمَّا اٛنٛنْ اٛنْ نغَطَتَا کٛ ٻَلِّ مٛوطٛنْ نغِطِ؞ اٛنْ نغَطَ کٛ رُوحُ اَللَّه وِعِ، تٛ نِ طُمْ غٛونغَ رُوحُ اَللَّه اٜ جٛوطِي ندٜرْ ٻٜرْطٜ مٛوطٛنْ؞ کٛو مٛيٜ تٛ وَلَا رُوحُ اَلْمَسِيحُ، نَاع اَلْمَسِيحُ جٜيِمٛ؞ اَمَّا تٛ اَلْمَسِيحُ اٜ جٛوطِي ندٜرْ ٻٜرْطٜ مٛوطٛنْ، کٛو ندٜ ٻَلِّ مٛوطٛنْ مَايَيْ نغَمْ حَکّٜ، فُو اٜ نٛنْ رُوحُ اَللَّه حٛکَّيْعٛنْ يٛنْکِ، نغَمْ اٛنْ نغَرْتِرَامَ اَادِلِعٜنْ؞ تٛ رُوحُ اَللَّه اُمِّنْطٛ يٜىٰسُ دَغَ مَيْدٜ اٜ جٛوطٛو ندٜرْ ٻٜرْطٜ مٛوطٛنْ، اٛنْ طٛنْ اُمِّنْطٛ اَلْمَسِيحُ دَغَ مَيْدٜ حٛکَّيْ ٻَلِّ مٛوطٛنْ مَايَيْطِ يٛنْکِ بَرْکَ رُوحُ مَاکٛ جٛوطِيطُمْ ندٜرْ ٻٜرْطٜ مٛوطٛنْ؞ نغَمْ نٛنْ بَنْدِرَاٻٜ اَمْ، اٜ وٛودِ غٛطُّمْ طُمْ نغَطٜتٜنْ دٛولٜ، اَمَّا کَنْجُمْ نَاع طُمْ تٛکُّکِ کٛ ٻَلِّ مٜىٰطٜنْ نغِطِ؞ نغَمْ تٛ اٛنْ نغَطَ جٛنْدٜ نٛ ٻَلِّ مٛوطٛنْ نغِطِرِ، اٛنْ مَايَيْ؞ اَمَّا بَرْکَ رُوحُ اَللَّه، تٛ اٛنْ مبَرِي کُوطٜ طٜ ٻَلِّ مٛوطٛنْ نغِطِ وَطُکِ، اٛنْ کٜٻَيْ يٛنْکِ کِ رٜعَتَا؞ نغَمْ فُو يِمْٻٜ ٻٜ رُوحُ اَللَّه تٛکِّنْتَ ٻٜ ٻِٻّٜ اَللَّه؞ نغَمْ اَللَّه حٛکَّايِعٛنْ رُوحُ غَرْتِرَيْطُمْعٛنْ مَشُّٻٜ حَا ڤُطِّتٛنْ نغَطٛنْ جٛنْدٜ ندٜرْ کُلٛلْ، اَمَّا اٛ حٛکُّعٛنْ رُوحُ غَرْتِرَيْطُمْعٛنْ ٻِٻّٜ مَاکٛ؞ بَرْکَ رُوحُ طُمْ اٜنْ مبَاوَيْ نٛدّٜنْ اَللَّه «اَبَّ! ݧَاکٛ مٜىٰطٜنْ!» رُوحُ اَللَّه اٜ حٛورٜ مَاجُمْ حَوْتِ اٜ ٻٜرْطٜ مٜىٰطٜنْ تَبِّتِنْتَ اٜنٜنْ اٜنْ ٻِٻّٜ اَللَّه؞ جٛونِ ندٜ اٜنْ ٻِٻّٜ، اٜنْ نغَرْتِي دٛنٛوٻٜ؞ اٜنْ ندٛنَيْ فِي بٛطُّمْ طُمْ اَللَّه رٜسَنِ يِمْٻٜ مَاکٛ، کَدِنْ اٜنْ دٛنِدٛوٻٜ اٜ اَلْمَسِيحُ، تٛ نِ اٜنْ نجَرْدِي تٛرَّ اٜ مَاکٛ نغَمْ کٜٻٜنْ تٜدُّنغَلْ حَوْتِ اٜ مَاکٛ؞ مِ تَبِّتِنِي تٛرَّ کَ نجَرٜتٜنْ جٛونِ کَ حٜوْتَايِ کَ حَوْتٜىٰ اٜ تٜدُّنغَلْ نغَلْ طُمْ تٜدِّنْتَعٜنْ طٛعٛ يٜىٰسٛ؞ فُو کٛ تَغَا اٜ حٜطِي اٜ حَاٻِ نغَمْ يِعَ اَللَّه وَنْغِنِي ٻِٻّٜ مُوطُمْ؞ نغَمْ کٛ تَغَا وَرْتِرَامَ مٜىٰرٜ، نَاع نغَمْ يِدّٜ مَاجُمْ، اَمَّا نٛنْ اَللَّه يِطِرِ طُمْ وَطٛرٛو؞ فُو اٜ نٛنْ اٜ وٛودِ کَمُّندٜ، نغَمْ کٛ تَغَا اٜ حٛورٜ مَاجُمْ طُمْ دِمْطِنْتٜىٰطُمْ دَغَ مَشُّنغَاکُ ݧٛلُکِ، طُمْ حٜٻَ رِمْطِنٜىٰکِ اٜ تٜدِّنٜىٰکِ طُمْ يِمْٻٜ اَللَّه نجٜيِ؞ اٜنْ اَنْدِ حَا جٛونِ فُو کٛ تَغَا اٜ اٛتَّ نغَمْ نَوْطُمْ نٛ دٜبّٛ ڤِيدٛووٛ اٜ نَوْطُمْ دَݧْنغٛلْ اٛتِّرْتَ؞ اَمَّا نَاع کٛ تَغَا تَنْ اٛتَّتَ، حَا مَا اٜ اٜنٜنْ؞ اٜنٜنْ غٛودُٻٜ رُوحُ اَللَّه، دٛکَّلْ مَاکٛ اَرَنْدٜوَلْ ندٜرْ کٛ اٛ حٛکَّتَعٜنْ، اٜنْ اٛتَّ ندٜرْ ٻٜرْطٜ مٜىٰطٜنْ، اٜنْ کَاٻِي اَللَّه وَرْتِرَعٜنْ ٻِٻّٜ مَاکٛ، طٛنْمَا اٛ رِمْطِنَ ٻَلِّ مٜىٰطٜنْ؞ دَغَ شَرٜلْ کٛ طُمْ حِسْنِعٜنْ نغٛودُطٜنْ کَمُّندٜ ندٜعٜ؞ اَمَّا تٛ اٜنْ نغِعَ کٛ کَمِّيطٜنْ، نَاع طُمْ کَمُّندٜ وٛنْ طٛنْ؞ مٛيٜ وَطَتَ کَمُّندٜ دٛوْ کٛ يَادِ حٜٻِ؟ اَمَّا تٛ اٜنْ نغَطَ کَمُّندٜ دٛوْ غٛطُّمْ طُمْ اٜنْ نغِعَتَا، اٜنْ کٜطٛطُمْ ندٜرْ مُݧَلْ؞ نٛنْ مَا، رُوحُ اَللَّه اٜ وَلَّعٜنْ تٛ تَمْڤُطٜنْ؞ نغَمْ اٜنْ اَنْدَا نٛ حَانِ نغَطِرٜنْ دٛعَارٜ، اَمَّا رُوحُ اَللَّه اٜ حٛورٜ مَاجُمْ اٜ تٛرٛو اَللَّه نغَمْ مٜىٰطٜنْ شَرٜلْ نغٜلْ ندُلُّطٜنْ کٛ مبِعٜتٜنْ اٜنْ اٛتَّ؞ ندٜنْ اَللَّه اَنْدُطٛ کٛ وٛنِ ندٜرْ ٻٜرْطٜ مٜىٰطٜنْ، اٜ مٛ اَنْدِ کٛ رُوحُ يِطِ، نغَمْ رُوحُ اٜ تٛرٛو اَللَّه نغَمْ يِمْٻٜ مَاکٛ نٛنْ نٛ اٛ يِطِرِ؞ اٜنْ اَنْدِ ندٜرْ کٛو طُمٜ اَللَّه اٜ حُوَ نغَمْ ٻٜيْدَارِ يِمْٻٜ غِطْٻٜمٛ، ٻٜ اٛ سُٻِ نٛنْ نٛ اٛ يِطِرِ؞ اَللَّه اٜ اَندِٻٜ دَغَ اَرَنْدٜ اٛ سُٻِيٻٜ کٛ دُونِيَارُ تَغٜىٰ نغَمْ ٻٜ نغَرْتَ بٛ ٻِطّٛ مَاکٛ، نغَمْ ٻِطّٛ اٛنْ وَرْتَ اَفٛ ندٜرْ بَنْدِرَاٻٜ طُطْٻٜ؞ ٻٜنْ طٛنْ ٻٜ اٛ سُٻِ، اٛ نٛدِّيٻٜ، اٛ وَرْتِرِيٻٜ اَادِلِعٜنْ، اٛ نَتِّنِيٻٜ تٜدُّنغَلْ مَاکٛ؞ طُمٜ مبِعٜتٜنْ دٛوْ فِي طُعُمْ؟ تٛ اَللَّه اٜ وٛنْدِ اٜ مٜىٰطٜنْ، مٛيٜ وَاوَتَ حٜٻَ جَالٛرْغَلْ دٛوْ مٜىٰطٜنْ؟ اَللَّه حَطَايِ ٻِطّٛ مُوطُمْ يَرْکِ تٛرَّ، اَمَّا اٛ حٛکِّيمٛ نغَمْ اٛ سَکّٜىٰ نغَمْ مٜىٰطٜنْ اٜنْ فُو؞ ندٜ اٛ وَطِي نٛنْ، اٛ حٛکَّتَاعٜنْ کٛو طُمٜ شَاحُ؟ مٛيٜ وَاوَتَ وُلَّاکِ يِمْٻٜ ٻٜ اَللَّه سُٻِ؟ طُمْ اَللَّه اٜ حٛورٜ مُوطُمْ وَرْتِرِٻٜ اَادِلِعٜنْ؞ مٛيٜ وَاوَتَ تَپَنْکِٻٜ کِيتَ؟ وَلَا! يٜىٰسُ اَلْمَسِيحُ مَايِي، کٛ ٻُرِ وٛنِ اٛ اُمِّنَامَ دَغَ مَيْدٜ، اٜ مٛ تٛنْ جٛوطِي تٛ جُنْغٛ ݧَامٛ نغٛ اَللَّه، کَدِنْ اٜ مٛ تٛرٛو اَللَّه نغَمْ مٜىٰطٜنْ؞ طُمٜ وَاوَتَ سٜنْدَعٜنْ اٜ يِدّٜ ندٜ اَلْمَسِيحُ يِطِعٜنْ؟ طُمْ تٛرَّ کَلُّکَ، کٛو بٛنٜ، کٛو حَلّٜىٰندٜ يِمْٻٜ، کٛو وٜىٰلٛ، کٛو شِيَ کٛلْتٜ، کٛو نغَݧَاندِ يِمْٻٜ، کٛو مَيْدٜ؟ نٛنْ نٛ طُمْ وِنْدِرَا، «نغَمْ مَاطَ کٛو ندٜيٜ ݧَلْندٜ اٜ طُمْ طَٻِّتَ وَرْکِمِنْ؛ طُمْ حٛشِّيمِنْ بٛ بَالِ طِ طُمْ حِرْسَتَ؞» نَاع نٛنْ، ندٜرْ فُو فِي طُعُمْ اٜنْ کٜٻِي جَالٛرْغَلْ بَرْکَ اَلْمَسِيحُ غِطّٛعٜنْ؞ نغَمْ مِ تَبِّتِنِي وَلَا کٛ وَاوَتَ حَطَ اَلْمَسِيحُ يِطُکِعٜنْ، کٛو مَيْدٜ، کٛو يٛنْکِ، کٛو مَلَاعِکَعٜنْ، کٛو کٛ لَامٛتٛو دٛوْ، کٛو جَامَنُ طُعُمْ، کٛو جَامَنُ غَرَيْطُمْ، کٛو بَوْطٜ، کٛو کٛ وٛنِ اٜ دٛوْ، کٛو کٛ وٛنِ اٜ لٜيْ، وَلَا غٛطُّمْ ندٜرْ فُو کٛ تَغَا بَاوَيْطُمْ حَطَ اَللَّه يِطُکِعٜنْ يِدّٜ ندٜ اٛ حٛلَّتَعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞ کٛ مبِعَيْمِ طُمْ غٛونغَ؞ اَلْمَسِيحُ جٜيِيَمْ، نغَمْ نٛنْ مِ فٜوَتَا؞ رُوحُ اَللَّه اٜ لَامٛو ٻٜرْندٜ اَمْ ندٜ تَبِّتِنَنِييَمْ کٛ مبِعَيْمِ نَاع طُمْ فٜوْرٜ؞ اٜ مِ وَنِّي نَاع سٜطَّ، ندٜنْ نَوْطُمْ ٻٜرْندٜ اَمْ وَلَا رٜعِرْدٜ نغَمْ بَنْدِرَاٻٜ اَمْ يَحُودَنْکٛعٜنْ؞ دَا مِنْ اٜ حٛورٜ اَمْ مِ لَانٜىٰ طُمْ سٜنْدَيَمْ اٜ اَلْمَسِيحُ نغَمْ لٜݧٛلْ اَمْ کٜٻَ کِسْندَمْ؞ کَمْٻٜ نغٛنِ اِسْرَاعِيلَنْکٛعٜنْ، ٻٜ اَللَّه وَرْتِرِ ٻِٻّٜ مُوطُمْ؞ اٛ وَنْغِنَنِيٻٜ تٜدُّنغَلْ مَاکٛ، اٛ وَطَنِيٻٜ اَلْکَوَلْجِ، اٛ حٛکِّيٻٜ اَتَّوْرَ، اٛ حٛلِّيٻٜ نٛ ٻٜ مَوْنِنِرْتَمٛ مَوْنِنْکِ کِ غٛونغَ، ندٜنْ اٛ وَطَنِيٻٜ اَلْکَوَلْجِ طُطِّ؞ ٻٜ پِوٛيِ دَغَ مَامَعٜنْ يَحُودَنْکٛعٜنْ مَوْٻٜ اَنْدَاٻٜ، ندٜنْ دَغَ لٜݧٛلْ مَٻّٜ اَلْمَسِيحُ وَرٛيِ ندٜرْ ٻَنْدُ؞ اَللَّه لَامٛتٛوطٛ کٛو طُمٜ مَنْتٜىٰ حَا اَبَدَا! اَامِنْ؞ نَاع اٜ مِ وِعَ اَللَّه حٜبِّنَايِ اَلْکَوَلْ مُوطُمْ؞ نغَمْ نَاع فُو اِسْرَاعِيلَنْکٛعٜنْ نغٛنِ يِمْٻٜ اَللَّه ٻٜ غٛونغَ؞ طٛنْمَا نَاع فُو ٻِٻّٜ ٻِٻّٜىٰجِ اِبْرَاهِمْ نغٛنِ ٻِٻّٜ اَللَّه؞ اَمَّا اَللَّه وِعِي اِبْرَاهِمْ، «بَرْکَ اِشِيَاکُ کٜٻَتَا ٻِٻّٜ ٻِٻّٜىٰجِ ٻٜ نغَطَنْمَامِ اَلْکَوَلْ؞» طُعُمْ حٛلِّي ٻِٻّٜ دَݧَاٻٜ نٛ طُمْ دَݧِرِ کٛو مٛيٜ نَاع کَمْٻٜ نغٛنِ ٻِٻّٜ اَللَّه؞ اَمَّا ٻِٻّٜ ٻٜ طُمْ دَݧَنِ اِبْرَاهِمْ نغَمْ اَللَّه وَطَنِيمٛ اَلْکَوَلْ مَٻّٜ، کَمْٻٜ نغٛنِ ٻِٻّٜ مَاکٛ ٻٜ غٛونغَ؞ نغَمْ طُعُمْ وٛنِ کٛ اَللَّه وِعِ ندٜرْ اَلْکَوَلْ نغَلْ اٛ وَطِ، اٛ وِعِ، «حِتَاندٜ غَرَيْندٜ بٛ نغٜعٜلْ شَرٜلْ مِ سٛعّٛيْتٛ، ندٜنْ سَارَتُ دَݧَيْ ٻِطّٛ غٛرْکٛ؞» نَاع مَا طُعُمْ تَنْ، اَمَّا ٻِٻّٜ رِفْکَتُ سِوْتَاٻٜ، ݧَاکٛ مَٻّٜ اٛ غٛعٛتٛ، وَاتٛ مَامَ مٜىٰطٜنْ اِشِيَاکُ؞ نٛنْ نٛ طُمْ وِنْدِرَا، «اٜ مِ يِطِ يَاکُبُ، اَمَّا مِ وَݧِي اِسَوْ؞» طُمٜ مبِعٜتٜنْ؟ جٛونِ اٜنْ مبِعَيْ اَللَّه وَطِي شِيَ اَادِلَاکُ وٛنْ طٛنْ؟ نَاع نٛنْ، کٛو سٜطَّ! نغَمْ اٛ وِعِي مُوسَ، «مِ وَلَّيْ کٛو مٛيٜ مٛ نغِطُمِ وَلُّکِ، مِ يُرْمِنَنَيْ کٛو مٛيٜ مٛ نغِطُمِ يُرْمِنَنْکِ؞» نغَمْ نٛنْ، اَللَّه اٜ سُٻَ نٜطّٛ نَاع نغَمْ نٜطّٛ اٜ يِطِ اَللَّه سُٻَمٛ کٛو نغَمْ تِينَارٜ مَاکٛ، اَمَّا طُمْ يُرْمٜىٰندٜ اَللَّه تَنْ؞ نغَمْ اَايَارٜ وِعِي اَللَّه وِعِي فِرعَوْنَ، «مِ وَرْتِرِيمَ لَامِيطٛ نغَمْ مِ حُوتِرْمَا مِ حٛلَّ بَوْطٜ اَمْ طُمْ اَنْدِنَ اِنْدٜ اَمْ کٛو تٛيٜ ندٜرْ دُونِيَارُ؞» نغَمْ نٛنْ، اَللَّه اٜ يُرْمِنَنَ کٛو مٛيٜ مٛ اٛ يِطِ يُرْمِنَنْکِ، ندٜنْ اٜ مٛ سَاتِنَ ٻٜرْندٜ کٛو مٛيٜ مٛ اٛ يِطِ سَاتِنَنْکِ ٻٜرْندٜ؞ غٛطّٛ ندٜرْ مٛوطٛنْ وِعَيْيَمْ، «تٛ فِي طُعُمْ طُمْ نٛنْ، نغَمْ طُمٜ حَا جٛونِ اَللَّه اٜ يِعِرَعٜنْ کٛ وٛوطَا؟ مٛيٜ وَاوَتَ وَݧَ وَطُکِ کٛ اَللَّه يِطِ؟» اَمَّا اَنْ نٜطّٛ، اَ مٛيٜ حَا اَ فٛطْفٛطْتِرَ اٜ اَللَّه؟ غٛجِيرٜ وَاوَتَا وِعَ غَطُطٛندٜ، «نغَمْ طُمٜ نغَطِرْطَايَمْ نِحِ؟» نغَمْ غَطٛووٛ غٛجِيجٜ اٛ وَاوَيْ اٛ حُوتِرَ لٛوڤٜ نٛ اٛ يِطِ؞ اٛ وَاوَيْ اٛ حُوتِرَ لٛوڤٜ اٛ وَطَ غٛجِيجٜ، غٛطّٜ نغَمْ طٜ کُوتِنِرٜىٰ کُوطٜ طٜ دَرَجَ، غٛطّٜ نغَمْ طٜ کُوتِنِرٜىٰ کُوطٜ طٜ نغَلَا دَرَجَ؞ نٛنْ کُوطٜ اَللَّه مبَعِ؞ اٛ يِطِينٛ اٛ حٛلَّ مٛنّٜرٜ مَاکٛ، ندٜنْ اٛ وَنْغِنَ بَوْطٜ مَاکٛ دٛوْ کَانُٻٜ اٛ مٛنَّنَٻٜ، کٜوْتُٻٜ کَلْکٜىٰ، اَمَّا اٛ مُݧَنِيٻٜ مُݧَلْ مَنْغَلْ؞ طٛنْمَا اٛ يِطِي اٛ وَنْغِنَنَ يِمْٻٜ ٻٜ اٛ يُرْمِنَنِ تٜدُّنغَلْ مَاکٛ مَنْغَلْ؞ دَغَ اَرَنْدٜ کَمْٻٜ اٛ سِرْيِي کٜٻَ تٜدُّنغَلْ مَاکٛ؞ وَاتٛ اٜنٜنْ ٻٜ اَللَّه نٛدِّ نَاع دَغَ ندٜرْ يَحُودَنْکٛعٜنْ تَنْ، اَمَّا حَا مَا دَغَ ندٜرْ يِمْٻٜ نَاع يَحُودَنْکٛعٜنْ؞ نٛنْ نٛ اَللَّه وِعِ ندٜرْ دٜفْتٜرٜ يُوشَعُ، «يِمْٻٜ ٻٜ مِ جٜيَايِ، مِ نٛدَّيْٻٜ ‹يِمْٻٜ اَمْ،› لٜݧٛلْ نغٛلْ مِ يِطَا، مِ نٛدَّيْنغٛلْ، ‹لٜݧٛلْ نغٛلْ نغِطُمِ؞› ندٜنْ اٜ ندٜنْ طٛنْ وِغٜىٰرٜ تٛ طُمْ وِعِٻٜ، ‹نَاع اٛنْ يِمْٻٜ اَمْ،› طٛنْ طُمْ طُمْ نٛدَّتَٻٜ ٻِٻّٜ اَللَّه مٛ يٛنْکِ؞» ندٜنْ اِشَايَ مٜتِي اٜ سٜمْبٜ دٛوْ اِسْرَاعِيلَ وِعِ، «کٛو ندٜ ٻِٻّٜ اِسْرَاعِيلَ طُوطِرِي بٛ نجَارٜىٰندِ مَايٛ، فُو اٜ نٛنْ سٜطَّ ندٜرْ مَٻّٜ تَنْ کِسَتَ، نغَمْ جٛومِرَاوٛ يٛتِّنَيْ تَپَنْکِ دُونِيَارُ کِيتَ ندٜرْ يَوْطَارٜ؞» طٛنْمَا اِشَايَ وِعِ، «دَا جٛومِرَاوٛ جٛومُ بَوْطٜ اَلَايِ يِمْٻٜ سٜطَّ دَغَ ندٜرْ لٜݧٛلْ مٜىٰطٜنْ، دَا اٜنْ نغَرْتِي بٛ غَرِيرِ سٛدٛمْ، دَا اٜنْ نغَرْتِرَامَ بٛ غَرِيرِ غٛمٛورَ؞» طُمٜ مبِعٜتٜنْ کَدِنْ؟ يِمْٻٜ نَاع يَحُودَنْکٛعٜنْ ٻٜ طَٻِّتَايِ ٻٜ نغَرْتَ اَادِلِعٜنْ، کَمْٻٜ نغَرْتِرَا اَادِلِعٜنْ، وَاتٛ اَادِلَاکُ کٜٻٜتٜىٰطُمْ بَرْکَ حٛولَاکِ اَلْمَسِيحُ؞ اَمَّا اِسْرَاعِيلَنْکٛعٜنْ طَٻُّتُٻٜ نغَرْتَ اَادِلِعٜنْ نغَمْ تٛکُّکِ اَتَّوْرَ، ٻٜ کٜٻَايِطُمْ؞ نغَمْ طُمٜ؟ نغَمْ ٻٜ طَٻِّتَايِ وَرْتُکِ اَادِلِعٜنْ بَرْکَ حٛولَاکِ اَللَّه، اَمَّا ٻٜ طَٻِّتِيطُمْ اٜ لَاوٛلْ وَطُکِ کُوطٜ بٛطّٜ؞ ٻٜ ڤٜغِّي ندٜنْ طٛنْ «حَيْرٜ غَطٛورٜ يِمْٻٜ ڤٜغّٛو،» نٛ اَايَارٜ وِعِ، «ندَارٜىٰ، مِ رٜسِي حَيْرٜ ندٜرْ سِحِيٛونَ غَطَيْندٜ يِمْٻٜ ڤٜغّٛو، ندٜ وَطَيْ ٻٜ نجَنَ؞ فُو کٛولِيطٛمٛ سٜمْتِنْتَاکٜ؞» بَنْدِرَاٻٜ اَمْ، کٛ نغِطُمِ ندٜرْ ٻٜرْندٜ اَمْ اٜ کٛ تٛرٛتٛومِ اَللَّه، کَنْجُمْ وٛنِ اِسْرَاعِيلَنْکٛعٜنْ کِسَ؞ مِ وَاوَيْ مِ حٛکَّ شٜيْدَ دٛوْ مَٻّٜ اٜ ٻٜ نغِطِ حُوَنْکِ اَللَّه نَاع سٜطَّ، اَمَّا اٜ ٻٜ کُوَنَمٛ نَاع دٛوْ فَامُ بٛطُّمْ؞ ٻٜ ڤَامَايِ لَاوٛلْ نغٛلْ اَللَّه وَرْتِرْتَ يِمْٻٜ اَادِلِعٜنْ، ٻٜ ندَرْوِي لَاوٛلْ نغٛلْ ٻٜ تٛکَّتَ؞ نغَمْ نٛنْ، ٻٜ نجَٻَايِ تٛکُّکِ لَاوٛلْ نغٛلْ اَللَّه وَرْتِرْتَ يِمْٻٜ اَادِلِعٜنْ؞ نغَمْ اَلْمَسِيحُ وٛنِ دٜعُطٛ کُوطٜ اَتَّوْرَ، نغَمْ کٛو مٛيٜ کٛولِيطٛمٛ وَرْتَ اَادِلِيجٛ؞ مُوسَ وِنْدِي دٛوْ وَرْتُکِ اَادِلِيجٛ لَاوٛلْ تٛکُّکِ اَتَّوْرَ، اٛ وِعِي، «کٛو مٛيٜ غَطٛووٛ کٛ اَتَّوْرَ وِعِ اٛ حٜٻَيْ جٛنْدٜ ندٜ غٛونغَ؞» اَمَّا طُعُمْ وٛنِ کٛ وٛلْدٜ اَللَّه وِعِ دٛوْ وَرْتُکِ اَادِلِيجٛ بَرْکَ حٛولَاکِ اَلْمَسِيحُ، «تَاع وِعُ ندٜرْ ٻٜرْندٜ مَاطَ، ‹مٛيٜ يَحَتَ تٛنْ دٛوْ؟› » ﴿وَاتٛ نغَمْ وَدّٛيَ اَلْمَسِيحُ ندٜرْ دُونِيَارُ﴾، کٛو، «مٛيٜ يَحَتَ لَاحِرَ تٛ نغَيْکَ کَلُّکَ لُغُّکَ؟» ﴿وَاتٛ نغَمْ اُمِّنٛيَ اَلْمَسِيحُ دَغَ ندٜرْ مَيْٻٜ﴾؞ رَا کٛ اَايَارٜ وِعِ، «وٛلْدٜ اَللَّه اٜ حَادٜ مَاطَ اٜ ندٜ دٛوْ طٜمْنغَلْ مَاطَ اٜ ٻٜرْندٜ مَاطَ،» وَاتٛ وَعَجُ حٛولَاکِ اَللَّه طُمْ مِنْ نغَعَجِنْتَ؞ نغَمْ تَا وِعِي اٜ حٛنْدُکٛ مَاطَ، «يٜىٰسُ اٛ جٛومِرَاوٛ،» ندٜنْ تَا حٛولَکٜ ندٜرْ ٻٜرْندٜ مَاطَ وِيکِ اَللَّه اُمِّنِيمٛ دَغَ مَيْدٜ، اَ حِسَيْ؞ نغَمْ ندٜرْ ٻٜرْندٜ نٜطّٛ حٛولٛتٛو اَلْمَسِيحُ ندٜنْ اَللَّه وَرْتِرَمٛ اَادِلِيجٛ، ندٜنْ اٜ حٛنْدُکٛ نٜطّٛ وِعَتَ اٜ نجَيْرِ يٜىٰسُ وٛنِ جٛومِرَاوٛ حِسَ؞ وٛنْدٜ اَايَارٜ وِعِي، «کٛو مٛيٜ کٛولِيطٛمٛ سٜمْتِنْتَاکٜ؞» نغَمْ وَلَا فٜىٰرٛوتِرٛلْ حَکُّندٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، جٛومِرَاوٛ کَنْکٛ وٛنِ جٛومِرَاوٛ کٛو مٛيٜ، اٜ مٛ بَرْکِطِنَ کٛو مٛيٜ تٛرٛتٛوطٛمٛ نَاع سٜطَّ؞ نٛ اَايَارٜ وِعِ، «کٛو مٛيٜ تٛرِيطٛ جٛومِرَاوٛ حِسْنَمٛ، جٛومِرَاوٛ حِسْنَيْمٛ؞» اَمَّا نٛ طُمْ وَطَتَ يِمْٻٜ تٛرٛو مٛ ٻٜ کٛولَاکِ؟ ندٜنْ نٛ وَطَتَ ٻٜ کٛولٛومٛ تٛ ٻٜ مٜىٰطَايِ نَنْکِ حَبَرُ مَاکٛ؟ ندٜنْ نٛ وَطَتَ ٻٜ نَنَ حَبَرُ مَاکٛ تٛ نَاع غٛطّٛ وَعَجِنَنِٻٜ؟ ندٜنْ نٛ يِمْٻٜ نغَعَجِنِرْتَ تٛ ٻٜ لِلَاکَ؟ نٛنْ نٛ طُمْ وِنْدِرَا، «طُمْ فِي بٛطُّمْ يٛتَّاکِ ٻٜنْ طٛنْ غَدُّٻٜ حَبَرُ بٜلْطُمْ؞» اَمَّا نَاع فُو اِسْرَاعِيلَنْکٛعٜنْ نجَٻِ حَبَرُ بٜلْطُمْ؛ نغَمْ اِشَايَ وِعِ، «جٛومِرَاوٛ، مٛيٜ جَٻِ حَالَ مٜىٰطٜنْ؟» نغَمْ نٛنْ، حٛولَاکِ اَللَّه اٜ حٜٻٜىٰ لَاوٛلْ نَنْکِ حَبَرُ اَلْمَسِيحُ، ندٜنْ حَبَرُ اَلْمَسِيحُ اٜ نَنٜىٰ لَاوٛلْ وَعَجِنْکِ دٛوْ مَاکٛ؞ اَمَّا، اٜ مِ پَمَ، طُمْ غٛونغَ ٻٜ نَنَايِ حَبَرُ طُمْ؟ غٛونغَ ٻٜ نَنِيطُمْ، نغَمْ اَايَارٜ وِعِي، «حَبَرُ اَللَّه يَحِي کٛو تٛيٜ ندٜرْ دُونِيَارُ، بٛلِيطٜ مَٻّٜ نَتِّي کٛو تٛيٜ ندٜرْ دُونِيَارُ؞» طٛنْمَا اٜ مِ پَمَ، يِمْٻٜ اِسْرَاعِيلَ ڤَامَايِ؟ اَرَنْدٜ مُوسَ وِعِي کٛ اَللَّه وِعِ يِمْٻٜ اِسْرَاعِيلَ، «مِ وَطَيْ نغَطٛنْ لَوْلِيرُ يِمْٻٜ ٻٜ کٛشُّطٛنْ نَاع ٻٜ غٛطُّمْ؞ لَاوٛلْ يِمْٻٜ ٻٜ اَنْدَا غٛطُّمْ، مِ وَطَيْعٛنْ مٛنّٛنْ؞» ندٜنْ اِشَايَ مٜتِي اٜ سٜمْبٜ ٻٜرْندٜ وِعِي اَللَّه وِعِي، «ٻٜنْ طٛنْ ٻٜ طَٻِّتَتَايَمْ ٻٜ کٜٻِييَمْ؛ مِ وَنْغِنِي حٛورٜ اَمْ تٛ يِمْٻٜ ٻٜ پَمَايِ نٛ ٻٜ کٜٻِرْتَيَمْ؞» اَمَّا دٛوْ اِسْرَاعِيلَ اٛ وِعِ اَللَّه وِعِ، «کٛ نٜىٰٻِ اٜ مِ طَٻِّتَ سِرْيٛوتِرْکِ اٜ يِمْٻٜ ٻٜ نغَطَتَا کٛ مبِعَيْمِ، ٻٜ ٻٜرْطٜ شَاتُطٜ؞» اٜ مِ پَمَ، اَللَّه وَݧِي يِمْٻٜ مُوطُمْ؟ غٛونغَ، اٛ وَݧَايِٻٜ؞ مِنْ اٜ حٛورٜ اَمْ مِ اِسْرَاعِيلَنْکٜىٰجٛ، تَانِرَاوٛ اِبْرَاهِمْ دَغَ لٜݧٛلْ بِلِيَامِنُ؞ اَللَّه وَݧَايِ يِمْٻٜ مُوطُمْ ٻٜ اٛ سُٻِ دَغَ فُطّٛودٜ دُونِيَارُ؞ اٛنْ اَنْدِ کٛ اَايَارٜ وِعِ دٛوْ اِلِيَ، نٛ اٛ وُلّٛرِي اِسْرَاعِيلَنْکٛعٜنْ تٛ اَللَّه؞ اٛ وِعِي، «جٛومِرَاوٛ، ٻٜ مبَرِي اَنَّبٛعٜنْ مَاطَ، ٻٜ ڤُسِي شَکِّرْلٜ مَاطَ؞ مِنْ تَنْ وٛنِ کٛرِيطٛ، ندٜنْ اٜ ٻٜ طَٻِّتَ وَرْکِيَمْ؞» اَمَّا طُمٜ اَللَّه وِعِمٛ؟ اَللَّه وِعِمٛ، «مِ رٜسَنِي حٛورٜ اَمْ يِمْٻٜ 7,000 ٻٜ مٜىٰطَايِ مَوْنِنْکِ نغُنْکِوَ مبِعٜتٜىٰنغَ بَعَلْ؞» نٛنْ طُمْ وٛنْتِندِرِ ندٜرْ جَامَنُ طُعُمْ، اٜ وٛودِ يِمْٻٜ سٜطَّ کٛرِيٻٜ ٻٜ اَللَّه سُٻِ، نغَمْ يِدّٜ مَاکٛ؞ تٛ اٜ مٛ سُٻِرَ يِمْٻٜ لَاوٛلْ يِدّٜ مَاکٛ، اٛ سُٻُٻٜ نَاع نغَمْ کُوطٜ بٛطّٜ طٜ ٻٜ نغَطِ؞ نغَمْ تٛ اٜ مٛ سُٻَ يِمْٻٜ نغَمْ کُوطٜ طٜ ٻٜ نغَطِ، سُٻُکِ کِنْ نَاع طُمْ شَاحُ، طُمْ نجٛٻَارِ يِدّٜ مَاکٛ نَاع ندٜ غٛونغَ؞ تٛو، نٛيٜ وٛنْ طٛنْ؟ يِمْٻٜ اِسْرَاعِيلَ تَمْڤِي کٜٻَ کٛ طَٻِّتَتَ؞ سٜطَّ ندٜرْ مَٻّٜ کٜٻِطُمْ، ٻٜ اَللَّه سُٻِ، اَمَّا کٛرِيٻٜ طُمْ سَاتِنَنِيٻٜ ٻٜرْطٜ؞ نٛ اَايَارٜ وِعِ، «اَللَّه وَرْتِرِيٻٜ يِمْٻٜ ٻٜ نغَلَا حَکِّيلٛ ٻٜ نغَلَا فَامُ؞ اٜ ٻٜ نغٛودِ غِتٜ، اَمَّا ٻٜ نغِعَتَا، اٜ ٻٜ نغٛودِ نٛڤِّ، اَمَّا ٻٜ نَنَتَا، حَا ندٜعٜ ݧَلْندٜ؞» ندٜنْ دَوْدَ وِعِي، «اَللَّه وَطَ حُمْتٛ مَٻّٜ وَرْتَنَٻٜ تَرْکٛوٛلْ ٻٜ نجَنَ ندٜرْ مَغّٛلْ، ٻٜ نجَرَ تٛرَّ نٛ حَانَنِٻٜ؛ غِتٜ مَٻّٜ مبُمَ ٻٜ تَمْڤَ يِيکِ، تٛرَّ کَلُّکَ وَرْتَنَٻٜ دٛنْغَلْ حَا اَبَدَا؞» اٜ مِ پَمَ، ندٜ يَحُودَنْکٛعٜنْ نجَنِ ندٜرْ حَکّٜ، ٻٜ اُمَّتَاکٛ وٛنْ طٛنْ؟ غٛونغَ نَاع نٛنْ! اَمَّا نغَمْ حَکّٜ طُمْ ٻٜ نغَطِ، کِسْندَمْ وَرَنِي يِمْٻٜ نَاع يَحُودَنْکٛعٜنْ نغَمْ يَحُودَنْکٛعٜنْ نَنَ لَوْلِيرُ مَٻّٜ؞ جٛونِ تٛ حَکّٜ طُمْ يَحُودَنْکٛعٜنْ نغَطِ وَرْتِ بَرْکَ تٛ يِمْٻٜ دُونِيَارُ، ندٜنْ تٛ تَمْڤٜرٜ مَٻّٜ نغَرْتِي بَرْکَ تٛ يِمْٻٜ نَاع يَحُودَنْکٛعٜنْ، بَرْکَ طُمْ ٻُرَيْ نٛنْ تٛ فُو يَحُودَنْکٛعٜنْ ٻٜ اَللَّه سُٻِ نجَٻِي کِسْندَمْ مَاکٛ؞ جٛونِ اٜ مِ مٜتَنَعٛنْ اٛنٛنْ يِمْٻٜ نَاع يَحُودَنْکٛعٜنْ؞ ندٜ مِ لِلَاطٛ تٛ يِمْٻٜ نَاع يَحُودَنْکٛعٜنْ، مِ فِيَيْ غَبَارٜ اَمْ دٛوْ کُوغَلْ نغَلْ اَللَّه حٛکِّيَمْ مِ وَطَ، نغَمْ مِ وَطَ بَنْدِرَاٻٜ اَمْ يَحُودَنْکٛعٜنْ نَنَ لَوْلِيرُ، نٛنْ حِسْنَ وٛٻّٜ مَٻّٜ؞ نغَمْ تٛ وَݧُکِ کِ اَللَّه وَݧِٻٜ وَرْتِي لَاوٛلْ سِرْيٛوتِرْکِ مَاکٛ اٜ دُونِيَارُ، نٛيٜ طُمْ وَرْتَتَ تٛ اٛ سِرْيٛوتِرِي اٜ مَٻّٜ؟ طُمْ وَرْتَيْ بٛ اٛ اُمِّنْٻٜ دَغَ مَيْدٜ؞ تٛ طُمْ حٛکِّي اَللَّه ݝٛشِّتٜلْ بُرٛودِ، ندٜنْ فُو بُرٛودِ کٛرِيطُمْ طُمْ وَرْتِي بٛ طُمْ حٛکِّيطُمْ اَللَّه؞ تٛ طُمْ حٛکِّي اَللَّه طَطِ لٜکِّ، ندٜنْ لِشٜ مَاکِ مَا نغَرْتِي طٜ مَاکٛ؞ رَا مِسَالُ؞ لٜݧٛلْ اِبْرَاهِمْ، وَاتٛ يَحُودَنْکٛعٜنْ اٜ نَنْدِ اٜ لٜکِّ جَيْتُنْ کِ طُمْ اَاوِ، اَمَّا اَللَّه اِتِّي غٛطّٜ لِشٜ مَاکِ، اٛ وَدِّي لِشٜ کٜسٜ دَغَ لٜکِّ جَيْتُنْ کِ لَدّٜ اٛ تَکِّطٜ تٛ اٛ اِتِّ طٜنْ تٛنْ لِشٜ نغَمْ طٜ کٜٻَ بَرْکَ لٜکِّ کِنْ طٜ مَوْنِدَ اٜ مَاکِ؞ اٛنٛنْ يِمْٻٜ نَاع يَحُودَنْکٛعٜنْ، اٛنٛنْ نغٛنِ لِشٜ کٜسٜ طٜنْ؞ نغَمْ نٛنْ، تٛع اٛنْ ڤِيُ غَبَارٜ مبِعٛنْ اٛنْ ٻُرِي طٜنْ تٛنْ لِشٜ طٜ طُمْ اِتِّ؞ تٛ اٛنْ نغَطِي نٛنْ، تٛع اٛنْ نغٜجُّتُ، نَاع اٛنٛنْ نجٛغِي طَطِ لٜکِّ کِنْ، اَمَّا طَطِ طِنْ نجٛغِيعٛنْ؞ اٛنْ مبِعَيْ، «لِشٜ طٜنْ اِتِّ نغَمْ طُمْ تَکِّندِرَمِنْ اٜ لٜکِّ کِنْ؞» طُعُمْ طُمْ غٛونغَ؞ ٻٜ اِتَّ دَغَ لٜکِّ کِنْ نغَمْ ٻٜ کٛولَاکِ اَللَّه، اَمَّا اَنْ بٛو اَ تَکَّ اٜ لٜکِّ کِنْ نغَمْ اَ حٛولَکٜ اَلْمَسِيحُ؞ نغَمْ نٛنْ، تَاع مَوْنِنْ حٛورٜ، اَمَّا جٛوطَ ندٜرْ کُلٛلْ اَللَّه؞ نغَمْ ندٜ اَللَّه اِتِّ طٜنْ طٛنْ لِشٜ لٜکِّ جَيْتُنْ اَاوَاکِ، اٛنْ ݧُمَ اٛنٛنْ مَا اٛ اَلَيْعٛنْ؟ نغَمْ نٛنْ، ݧُمُ دٛوْ يِدّٜ اَللَّه اٜ مٛنّٜرٜ مَاکٛ؞ اٜ مٛ مٛنَّنَ ٻٜنْ طٛنْ اَلُٻٜ تٛکُّکِمٛ، اَمَّا اٛ حٛلّٜتٜ يِدّٜ مَاکٛ، تَا وَطِي کَ حٛولَاکِمٛ کَنْکٛ کٛلّٛووٛ يِدّٜ؞ اَمَّا تَا وَطَايِ نٛنْ، اَنْ مَا طُمْ اِتّٜتٜ دَغَ لٜکِّ کِنْ؞ ندٜنْ کٛو يَحُودَنْکٛعٜنْ اِتَّاٻٜ دَغَ لٜکِّ کِنْ، تٛ ٻٜ ݧَمْرَايِ يٜىٰسٛ اٜ شِيَ حٛولَاکِ اَللَّه، اٛ تَکِّندِرَيْٻٜ اٜ لٜکِّ کِنْ، نغَمْ اٛ وَاوَيْ اٛ فُطِّتَ اٛ تَکِّندِرَٻٜ اٜ مَاکِ؞ اٛنٛنْ يِمْٻٜ نَاع يَحُودَنْکٛعٜنْ اٛنٛنْ نغٛنِ بٛ لِشٜ اِتَّاطٜ دَغَ لٜکِّ جَيْتُنْ ڤُطُکِ ندٜرْ لَدّٜ طٜ تَکِّندِرَا اٜ لٜکِّ جَيْتُنْ اَاوَاکِ؞ نَاع نٛنْ اَللَّه تَغِرِ لٜکِّ کِنْ؞ ندٜ طُمْ نٛنْ، طُمْ سَطَنْتَا اَللَّه اٛ فُطِّتَ اٛ سٛعَّ لِشٜ لٜکِّ جَيْتُنْ اَاوَاکِ طٜ اٛ اِتُّنٛو تٛ مَاکِ اٛ تَکَّطٜ تٛ مَاکِ؞ بَنْدِرَاٻٜ اَمْ، مِ يِطَا ندُلّٛنْ اَنْدُکِ سِرُّ طُعُمْ، نغَمْ تٛع نغَرْتٛنْ ٻٜ مَنْغُ حٛورٜ؞ اِسْرَاعِيلَنْکٛعٜنْ طُطْٻٜ نغَطَيْ کَ وَݧُکِ کٛ اَللَّه وِعِ سٜيْ تٛ شَرٜلْ وَطِي نغٜلْ فُو يِمْٻٜ نَاع يَحُودَنْکٛعٜنْ ٻٜ اَللَّه سُٻِ کٛولِيمٛ؞ نٛنْ اِسْرَاعِيلَنْکٛعٜنْ فُو کِسِرْتَ؞ نٛنْ نٛ طُمْ وِنْدِرَا، «کِسْنٛووٛ وَرَيْ دَغَ سِحِيٛونَ، اٛ اِتَّيْ فُو شِيَ کُلٛلْ اَللَّه دَغَ ٻٜرْطٜ لٜݧٛلْ يَاکُبُ؞ کَنْجُمْ وٛنِ اَلْکَوَلْ نغَلْ نغَادَيْمِ اٜ مَٻّٜ شَرٜلْ نغٜلْ نجَافَنْتٛومِٻٜ حَکّٜىٰجِ مَٻّٜ؞» يَحُودَنْکٛعٜنْ نغَرْتِي وَݧْوَݧْٻٜ اَللَّه نغَمْ ٻٜ نغَݧِي حَبَرُ بٜلْطُمْ؞ طُعُمْ وَرْتِي ٻٜيْدَارِ مٛوطٛنْ؞ اَمَّا ٻٜ شُٻَاٻٜ اَللَّه، حَا جٛونِ اٜ مٛ يِطِٻٜ، نغَمْ اٛ وَطَنِي مَامَعٜنْ مَٻّٜ اَلْکَوَلْ؞ نغَمْ اَللَّه وَيْلِتَتَا ٻٜرْندٜ مُوطُمْ دٛوْ مٛ اٛ سُٻِ اٜ مٛ اٛ بَرْکِطِنِ؞ ندٜنّٛ اٛنٛنْ يِمْٻٜ نَاع يَحُودَنْکٛعٜنْ، اٛنْ نغَݧِينٛ اَللَّه، اَمَّا جٛونِ اٛ يُرْمِنَنِيعٛنْ نغَمْ يَحُودَنْکٛعٜنْ نغَݧِي نغَطَ کٛ اٛ وِعِ؞ نٛنْ مَا يَحُودَنْکٛعٜنْ ٻٜ نغَݧِي ٻٜ نغَطَ کٛ اَللَّه وِعِ، نغَمْ اٜ لَاوٛلْ يُرْمٜىٰندٜ ندٜ اَللَّه حٛلِّعٛنْ کَمْٻٜ مَا اٛ يُرْمِنَنَٻٜ؞ اَللَّه وَرْتِرِي فُو يِمْٻٜ بٛ شُرَاٻٜ نغَمْ ٻٜ نغَݧِي وَطُکِ کٛ اٛ وِعِ، اٛ وَطُ نٛنْ نغَمْ اٛ يُرْمِنَنَ کٛو مٛيٜ؞ غٛونغَ، يِدّٜ اَللَّه، اٜ فَامُ مَاکٛ، اٜ اَنْدَلْ مَاکٛ اٜ طُمْ لُغِّ؞ وَلَا بَاوَيْطٛ اَنْدَ کٛ اٛ سُٻِ وَطُکِ؞ کٛ اٛ وَطَتَ ٻُرِي سٜمْبٜ فَامُ نٜطّٛ؞ اَايَارٜ وِعِ، «مٛيٜ مٜىٰطِ اَنْدُکِ کٛ وٛنِ ندٜرْ ٻٜرْندٜ جٛومِرَاوٛ؟ مٛيٜ مٜىٰطِ وَرْتُکِ کٛکَّيْطٛمٛ شَاوٛرِ؟ مٛيٜ مٜىٰطِ حٛکُّکِ اَللَّه غٛطُّمْ طُمْ اٛ وَاتَنْتَمٛ؟» نغَمْ کٛو طُمٜ کَنْکٛ تَغِطُمْ، تٛ مَاکٛ کٛو طُمٜ پِوِ، تٛ مَاکٛ طُمْ سٛعّٛتٛ؞ مَنْغُ تَبِّتَ تٛ اَللَّه حَا اَبَدَا؞ اَامِنْ؞ نغَمْ مَاجُمْ بَنْدِرَاٻٜ اَمْ، نغَمْ يُرْمٜىٰندٜ مَوْندٜ ندٜ اَللَّه حٛلِّعٜنْ، اٜ مِ تٛرٛوعٛنْ، کٛکّٜىٰ اَللَّه کٛعٜ مٛوطٛنْ بٛ شَکِّرِ شِرْيَاندِ نغَمْ کُوغَلْ مَاکٛ، مبٜلْنَنَيْندِمٛ ٻٜرْندٜ؞ نٛنْ وٛنِ نٛ حَانِ مَوْنِنِرٛنْ اَللَّه؞ تٛع اٛنْ نجَٻُ ݧُمٛ مٛوطٛنْ وَرْتَ اِرِ نغٛ يِمْٻٜ ٻٜ تٛکَّايِ يٜىٰسُ، اَمَّا اَلٜىٰ اَللَّه مٛعِّنَ جٛنْدٜ مٛوطٛنْ اٜ ݧُمٛلْ مٛوطٛنْ، نغَمْ ڤَامٛنْ کٛ اٛ يِطِ نغَطٛنْ، وَاتٛ کٛ وٛوطِ، اٜ کٛ وٜلْنَنْتَمٛ ٻٜرْندٜ، اٜ نٛ نجٛوطٛرْتٛوطٛنْ جٛنْدٜ کٜوْندٜ؞ نغَمْ شَاحُ طُمْ اَللَّه حٛکِّيَمْ، اٜ مِ وِعَ کٛو مٛيٜ مٛوطٛنْ، تٛع حٛشَّ حٛورٜ مُوطُمْ کٛ ٻُرِ نٛ حَانِ؞ اَمَّا کٛو مٛيٜ فَامَ نٛ حٛشِّرِ حٛورٜ مُوطُمْ؞ کٛو مٛيٜ حٛشَّ حٛورٜ مُوطُمْ کٛ فٛتِّدِ اٜ حٛولَاکِ اَللَّه کِ اَللَّه حٛکِّمٛ؞ اٜنْ نغٛودِ جٛکّٛوطٜ طُطّٜ اٜ ٻَلِّ مٜىٰطٜنْ، ندٜنْ کٛو ندٜيٜ جٛکّٛودٜ اٜ وٛودِ کُوغَلْ مُوطُمْ؞ نٛنْ مَا، کٛو ندٜ اٜنْ يِمْٻٜ طُطْٻٜ، اٜنْ نغَرْتِي بٛ ٻَنْدُ غٛعٛ نغَمْ اٜنْ کٛولَکٜ اَلْمَسِيحُ، اٜنْ فُو اٜنْ نجٛکّٛوتِرِ نٛ جٛکّٛوطٜ ٻَنْدُ نجٛکِّندِرِ؞ اَللَّه حٛکِّي کٛو مٛيٜ مٜىٰطٜنْ دٛکّٜ فٜىٰرٜ‑فٜىٰرٜ؞ تٛ دٛکَّلْ مٜىٰطٜنْ طُمْ وَطُکِ اَنَّبَاکُ، سٜيْ نغَطٜنْطُمْ نٛ فٛتِّدِ اٜ حٛولَاکِ يٜىٰسُ کِ نغٛودُطٜنْ؞ ٻٜ اٛ حٛکِّ دٛکَّلْ وَلُّکِ، سٜيْ ٻٜ مبَلَّ؞ ٻٜ اٛ حٛکِّ دٛکَّلْ اٜکِّتِنْکِ، سٜيْ ٻٜ اٜکِّتِنَ؞ ٻٜ اٛ حٛکِّ دٛکَّلْ سٜمْبِطِنْکِ وٛٻّٜ، سٜيْ ٻٜ شٜمْبِطِنَٻٜ؞ ٻٜ اٛ حٛکِّ دٛکَّلْ حٛکُّکِ شَاحُ، سٜيْ ٻٜ کٛکَّطُمْ اٜ ٻٜرْندٜ غٛعٛ؞ ٻٜ اٛ حٛکِّ دٛکَّلْ اَرْدَارٜ، سٜيْ ٻٜ نغَطَ حَکِّيلٛ مَٻّٜ دٛوْ اَرْدَارٜ ندٜنْ؞ ٻٜ اٛ حٛکِّ دٛکَّلْ يُرْمِنَنْکِ يِمْٻٜ، سٜيْ ٻٜ نجُرْمِنَنَٻٜ ندٜرْ بٜلْطُمْ ٻٜرْندٜ؞ کٛلّٜىٰ يِمْٻٜ يِدّٜ ندٜ غٛونغَ؞ نغَݧٜىٰ کٛو اِرِ ندٜيٜ حَلّٜىٰندٜ، نجٛغٜىٰ کٛ وٛوطِ سٜمْبٜىٰ؞ نجٛغٛوتِرٜىٰ، نغِطِندِرٜىٰ بٛ بَنْدِرَاٻٜ، کٛکّٜىٰ يِمْٻٜ مَنْغُ بٛ ٻٜ ٻُرِيعٛنْ؞ تٛع اٛنْ اَلُ تٛکُّکِ جٛومِرَاوٛ مٛوطٛنْ فٜىٰوَ، اَمَّا کُوَنٜىٰمٛ اٜ ٻٜرْندٜ غٛعٛ؞ نَنٜىٰ بٜلْطُمْ نغَمْ کَمُّندٜ ندٜ غٛودُطٛنْ، مُݧٜىٰ ندٜرْ تٛرَّاجِ طِ نجَرٛتٛنْ، نغَطٜىٰ کَ وَطُکِ دٛعَارٜ کٛو ندٜيٜ؞ شٜنْدِدٜىٰ کٛ نغٛودُطٛنْ اٜ يِمْٻٜ اَللَّه غِطُٻٜ وَلّٜىٰکِ، نجَٻّٜىٰ حٛٻّٜ ندٜرْ غُرٜىٰجٜ مٛوطٛنْ؞ مبَرْکِطِنٜىٰ تٛرّٛوٻٜعٛنْ، مبَرْکِطِنٜىٰٻٜ، تٛع اٛنْ لَانُٻٜ؞ نَنْدٜىٰ بٜلْطُمْ اٜ نَنٛوٻٜ بٜلْطُمْ، مبٛيْدٜىٰ اٜ بٛيٛوٻٜ؞ نجٛوطٜىٰ جٛنْدٜ جَمْ حَکُّندٜ مٛوطٛنْ؞ تٛع اٛنْ مَوْنِنْ کٛعٜ مٛوطٛنْ، اَمَّا کَوْتٜىٰ کٛعٜ مٛوطٛنْ اٜ يِمْٻٜ ٻٜ طُمْ حٛشِّ نَاع ٻٜ غٛطُّمْ؞ تٛع اٛنْ کٛشُّ کٛعٜ مٛوطٛنْ بٛ اٛنْ ٻُرِي يِمْٻٜ کٛرِيٻٜ فَامُ؞ تٛع اٛنْ نغَاتٛ حَلّٜىٰندٜ اٜ حَلّٜىٰندٜ، اَمَّا ڤَامٜىٰ نغَمْ نغَطٛنْ کٛ کٛو مٛيٜ يِعَتَ طُمْ بٛطُّمْ؞ نغَطٜىٰ کٛ مبَاوٛتٛنْ وَطُکِ تٛ طُمْ وَطٛتٛ نجٛوطٛدٛوطٛنْ جَمْ اٜ کٛو مٛيٜ؞ حِغٛوٻٜ اَمْ، تٛ طُمْ وَطَنِيعٛنْ کٛ حَلِّ، تٛع اٛنْ نغَاتَنٛ کٛعٜ مٛوطٛنْ، اَمَّا اَلٜىٰ اَللَّه وَاتَنٛوعٛنْ اٜ مٛنّٜرٜ مَاکٛ؞ نغَمْ اَايَارٜ وِعِي، «جٛومِرَاوٛ وِعِ، ‹مِنْ وٛنِ غَاتٛتٛوطٛ، مِ وَاتٛتٛ؞› » وٛنْدٜ اَايَارٜ وِعِي، «تٛ غَݧٛ مَاطَ اٜ نَنَ وٜىٰلٛ، حٛکُّمٛ کٛ اٛ ݧَامَتَ؛ تٛ اٜ مٛ نَنَ طٛنْکَ، حٛکُّمٛ کٛ اٛ يَرَتَ؛ نغَمْ تَا وَطِي نٛنْ، طُمْ وَرْتَيْ بٛ اَ مٛٻْتَنَمٛ دٛشّٜ حِيتٜ دٛوْ حٛورٜ مَاکٛ؞» تَاع اَلُ حَلّٜىٰندٜ حٜٻَ جَالٛرْغَلْ دٛوْ مَاطَ، اَمَّا حٜٻُ جَالٛرْغَلْ دٛوْ حَلّٜىٰندٜ لَاوٛلْ وَطُکِ کٛ وٛوطِ؞ دٛولٜ کٛو مٛيٜ تٛکَّ لَامٛتٛوٻٜ، نغَمْ وَلَا غٛطُّمْ لَامُ لَامٛتٛوطُمْ سٜيْ تٛ اَللَّه جَٻِي؞ فُو اَرْدِيٻٜ ٻٜ نغٛودُطٜنْ، اَللَّه رٜسِٻٜ دٛوْ لَامُ طُمْ؞ نغَمْ نٛنْ، کٛو مٛيٜ غَݧُطٛ لَامُ وَݧِي کٛ اَللَّه وَطِ؞ کٛو مٛيٜ غَطُطٛ نٛنْ فٛوطَنَيْ حٛورٜ مُوطُمْ کِيتَ اَللَّه؞ لَامٛتٛوٻٜ لَمْنَا نَاع نغَمْ ٻٜ کُلْنَ غَطٛوٻٜ کٛ وٛوطِ، اَمَّا نغَمْ ٻٜ کُلْنَ غَطٛوٻٜ کٛ حَلِّ؞ اَ يِطِ اَلَا حُلُکِ نٜطّٛ لَامٛتٛوطٛ؟ تٛو، سٜيْ نغَطَا کٛ حَانِ، کَنْکٛ بٛو اٛ مَنْتٜتٜ، نغَمْ کَنْکٛ اٛ مَشُّطٛ اَللَّه کُوٛووٛ نغَمْ ٻٜيْدَارِ مَاطَ؞ اَمَّا تَا وَطِي کٛ وٛوطَا، حُلُ، نغَمْ نَاع اٜ مٜىٰرٜ اٛ جٛغِي بَوْطٜ مَاکٛ؞ اٛ مَشُّطٛ اَللَّه نغَمْ اٛ تَپَنَ غَطٛوٻٜ کٛ وٛوطَا کِيتَ؞ نغَمْ نٛنْ، دٛولٜ تٛکَّا لَامُ نَاع نغَمْ دَطُکِ مٛنّٜرٜ اَللَّه تَنْ، اَمَّا نغَمْ اَ اَنْدِ اٜ حَانِ تٛکَّاطُمْ؞ کَنْجُمْ وَطِ اٛنْ نجٛٻَ شٜىٰدٜ لٜيْدِ کَدِنْ، نغَمْ لَامٛتٛوٻٜ ٻٜ مَشُّٻٜ اَللَّه کٛکُّٻٜ شَرٜلْ مَٻّٜ فُو نغَمْ لَامَاکِ؞ نجٛٻٜىٰ کٛو مٛيٜ ݧَمَاندٜ ندٜ تٛکَّتَعٛنْ، تٛکّٛوٻٜعٛنْ ݧَمَاندٜ شٜىٰدٜ لٜيْدِ، نجٛٻٜىٰٻٜ؞ کٛکّٜىٰ مَنْغُ حَانُٻٜ کٛکّٛنْ مَنْغُ؞ تٛ غٛطّٛ حٛکِّيعٛنْ ݧَمَاندٜ، نجٛٻٜىٰمٛ؞ ݧَمَاندٜ ندٜ اٛنْ مبَاوَتَا يٛٻُدُکِ ندٜ وَرْتَ يِطِندِرْکِ؞ نغَمْ کٛو مٛيٜ غِطّٛ بَنْدِرَاوٛ مُوطُمْ حٜبِّنِي کٛ اَتَّوْرَ وِعِ؞ رَا غٛطِّ دٛوکَاجِ اَللَّه، «تَاع وَطُ نجٜىٰنُ، تَاع وَطُ وَرْحٛورٜ، تَاع وُجُّ، تَاع يِطُ کٛ غٛطّٛ جٜيِ؞» طِعِ دٛوکَاجِ اٜ فُو کٛرِيطِ طِ کَوْتَامَ دٛوْ وٛلْدٜ بِيندٜ، «يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞» تَا يِطِ بَنْدِرَاوٛ مَاطَ، اَ وَطَنْتَامٛ کٛ حَلِّ؞ نغَمْ مَاجُمْ، يِدّٜ وٛنِ کٛ حٜبِّنِ کٛ دٛوکَ اَللَّه يِطِ؞ نغَطٜىٰ طُعُمْ، نغَمْ اٛنْ اَنْدِ اِرِ جَامَنُ طُمْ نغٛنْطٜنْ ندٜرْ؞ شَرٜلْ وَطِي نغٜلْ اُمّٛتٛوطٛنْ دَغَ طٜيْنغٛلْ؞ نغَمْ ݧَلْندٜ ندٜ اَللَّه حِسْنَتَعٜنْ اٜ ٻٜيْدَ ٻَدّٛيَاکِ کٛو ندٜيٜ ݧَلْندٜ دَغَ ݧَلْندٜ ندٜ کٛولِيطٜنْ يٜىٰسُ؞ جٛونِ طُمْ جٜمَّ، سُبَکَ ٻَدَکٜ؞ نغَمْ نٛنْ، اٜنْ اَلُ حُوُکِ کُوطٜ ݧِوْرٜ، اٜنْ نغَطُ جٛنْدٜ مٜىٰطٜنْ ندٜرْ جَيْنغٛلْ؞ اٜنْ نغَطُ جٛنْدٜ مٜىٰطٜنْ نٛ حَانِ بٛ يِمْٻٜ جٛوطٛتٛوٻٜ ندٜرْ جَيْنغٛلْ؞ تٛع اٜنْ نجَرُ يَرٜيَرٜىٰجِ ڤٛوطٛوجِ جٛنْدٜ مٜىٰرٜ، تٛع اٜنْ نغَطُ نجٜىٰنُ، تٛع اٜنْ نغَطُ حَلّٜىٰندٜ، تٛع اٜنْ کَٻْدُ اٜ يِمْٻٜ کٛو نَنٜنْ لَوْلِيرُ مَٻّٜ؞ اَمَّا، نغِکُّ مٛوطٛنْ وَرْتَ اِرِ نغِکُّ يٜىٰسُ اَلْمَسِيحُ جٛومِرَاوٛ، ندٜنْ تٛع اٛنْ نغَطُ حَکِّيلٛ مٛوطٛنْ دٛوْ نٛ مبٜلْنَنْتٛنْ سُونٛوجِ ٻَلِّ مٛوطٛنْ؞ نجَٻٜىٰ فُو تٛکُّطٛ يٜىٰسُ غٛودُطٛ حٛولَارٜ ندٜ سٜمْبِطَا، اَمَّا تٛع اٛنْ نغٜدّٛوتِرْ اٜ مَاکٛ دٛوْ ݧُمٛلْ مَاکٛ؞ غٛطّٛ اٜ اَنْدِ اَللَّه اَلِيمٛ اٛ ݧَامَ کٛو اِرِ ندُيٜ ݧَمْندُ، اَمَّا نٜطّٛ غٛودُطٛ حٛولَارٜ ندٜ سٜمْبِطَا ݧَامَتَا کٛو اِرِ ندُيٜ ݧَمْندُ؞ نٜطّٛ ݧَامٛووٛ کٛو اِرِ ندُيٜ ݧَمْندُ، تٛع اٛ يَوَنَ مٛ ݧَامَتَا کٛو اِرِ ندُيٜ ݧَمْندُ، ندٜنْ نٜطّٛ مٛ ݧَامَتَا کٛو اِرِ ندُيٜ ݧَمْندُ تٛع اٛ وِعَ ݧَامٛووٛ کٛو اِرِ ندُيٜ ݧَمْندُ اٜ وَطَ کٛ وٛوطَا، نغَمْ اَللَّه جَٻِي اٛنْ طٛنْ ݧَامٛووٛ کٛو اِرِ ندُيٜ ݧَمْندُ؞ اَنْ اَ مٛيٜ مبِعَتَا مَشُّطٛ غٛطّٛ وَطِي کٛ وٛوطَا؟ اَيْ، جٛومُ مَاکٛ سُٻَتَ کٛو کٛ اٛ وَطِ اٜ وٛوطِ، کٛو طُمْ وٛوطَا؞ اٛ وَطَيْ کٛ وٛوطِ، نغَمْ جٛومِرَاوٛ وَلَّيْمٛ اٛ وَطَ کٛ وٛوطِ؞ غٛطّٛ حٛشِّي وٛنْدٜ ݧَلْندٜ ٻُرِي وٛنْدٜ مَنْغُ، غٛطّٛ بٛو حٛشِّي ݧَلْطٜ فُو اٜ ڤٛتِّدِ؞ کٛو مٛيٜ مٛوطٛنْ تَبِّتِنَ کٛ فَامِ؞ فُو کٛشُّطٛ وٛنْدٜ ݧَلْندٜ ٻُرِي وٛنْدٜ، اٜ مٛ وَطَطُمْ نغَمْ مَوْنِنْکِ جٛومِرَاوٛ؞ طٛنْمَا فُو ݧَامٛووٛ کٛو اِرِ ندُيٜ ݧَمْندُ، اٜ مٛ وَطَطُمْ نغَمْ مَوْنِنْکِ جٛومِرَاوٛ، ندٜ اٜ مٛ يٜتَّ اَللَّه نغَمْ ݧَمْندُ ندُنْ؞ کٛو مٛيٜ مٛ ݧَامَتَا کٛو اِرِ ندُيٜ ݧَمْندُ، اٜ مٛ وَطَطُمْ نغَمْ مَوْنِنْکِ جٛومِرَاوٛ ندٜنْ اٜ مٛ يٜتَّ اَللَّه؞ ندٜرْ مٜىٰطٜنْ وَلَا غَطٛووٛ جٛنْدٜ نغَمْ ٻٜيْدَارِ مُوطُمْ تَنْ، نٛنْ مَا وَلَا مَايَيْطٛ نغَمْ ٻٜيْدَارِ مُوطُمْ تَنْ؞ تٛ نِ اٜنْ نغَطَ جٛنْدٜ، اٜنْ نغَطَندٜ نغَمْ جٛومِرَاوٛ؞ تٛ اٜنْ مَايِ بٛو، اٜنْ مَايُ نغَمْ جٛومِرَاوٛ؞ نغَمْ نٛنْ، کٛو اٜنْ فٛوفَ، کٛو اٜنْ مَايِي، جٛومِرَاوٛ جٜيِعٜنْ؞ اَلْمَسِيحُ مَايِ ندٜنْ اُمِّي دَغَ مَيْدٜ، نغَمْ اٛ وَرْتَ جٛومِرَاوٛ مَيْٻٜ اٜ ٻٜ يٛنْکِ؞ ندٜنْ اَنْ، نغَمْ طُمٜ مبِعَتَا بَنْدِرَاوٛ مَاطَ وَطِي کٛ وٛوطَا؟ کٛو، نغَمْ طُمٜ نجَوَنْتَا بَنْدِرَاوٛ مَاطَ؟ نغَمْ اٜنْ فُو اٜنْ ندَرٛتٛ يٜىٰسٛ اَللَّه اٛ وَطَنَعٜنْ کِيتَ؞ نغَمْ اَايَارٜ وِعِي، «جٛومِرَاوٛ وِعِي، مِ حُنٛرَکٜ حٛورٜ اَمْ، کٛو مٛيٜ نٜطّٛ دِشّٛتٛ يٜىٰسٛ اَمْ، ندٜنْ کٛو مٛيٜ وِعَيْ اٜ نجَيْرِ مِنْ وٛنِ اَللَّه؞» نغَمْ نٛنْ، کٛو مٛيٜ مٜىٰطٜنْ وِعَيْ کٛ وَطِ يٜىٰسٛ اَللَّه؞ نغَمْ مَاجُمْ، اٜنْ اَلُ يٛوَنْکِ بَنْدِرَاٻٜ مٜىٰطٜنْ کٛ وٛوطَا، اَمَّا اٜنْ شُٻُ ندٜرْ ٻٜرْطٜ مٜىٰطٜنْ اٜنْ نغَطَتَا غٛطُّمْ غَطٛوجُمْ بَنْدِرَاٻٜ مٜىٰطٜنْ نغَطَ حَکّٜ؞ اٜ مِ اَنْدِ مِ تَبِّتِنِي نغَمْ سُمْڤٛ اَمْ اٜ يٜىٰسُ جٛومِرَاوٛ، وَلَا ݧَمْندُ ندُ لَاٻَا يٜىٰسٛ اَللَّه؞ اَمَّا فُو کٛشُّطٛ وٛنْدُ ݧَمْندُ بٛ ندُ لَاٻَا، تٛو، تٛ مَاکٛ ندُ لَاٻَا؞ تَا وٛنَّنِي بَنْدِرَاوٛ مَاطَ ٻٜرْندٜ نغَمْ کٛ ݧَامَتَا، اَ حٛلَّايِمٛ يِدّٜ وٛنْ طٛنْ؞ تَاع اَلُ کٛ ݧَامَتَا وَرْتَ لَاوٛلْ حَلْکٜرٜ بَنْدِرَاوٛ مَاطَ مٛ اَلْمَسِيحُ مَايِ نغَمْ مُوطُمْ؞ نغَمْ نٛنْ، تَاع اَلُ فِي طُمْ نغِعَتَا بٛ طُمْ بٛطُّمْ طُمْ وَرْتَ کٛ وٛٻّٜ کُطَتَ؞ نغَمْ لَامُ اَللَّه نَاع طُمْ ݧَامُکِ اٜ يَرْکِ، اَمَّا طُمْ اَادِلَاکُ، اٜ جٛنْدٜ جَمْ، اٜ بٜلْطُمْ ٻٜرْندٜ کٜٻٜتٜىٰطُمْ بَرْکَ رُوحُ اَللَّه؞ نغَمْ کٛو مٛيٜ کُوَنٛووٛ اَلْمَسِيحُ اٜ وَطَ اِرِ نغِکُّ طُعُمْ اٛ بٜلْنَنٛووٛ اَللَّه ٻٜرْندٜ؛ يِمْٻٜ بٛو کٛکَّيْمٛ مَنْغُ؞ نغَمْ مَاجُمْ، اٜنْ نغَطُ کٛ مبَاوٜتٜنْ وَطُکِ نغَطٜنْ کٛ وَدَّتَ جٛنْدٜ جَمْ اٜ کٛ سٜمْبِطِندِرْتَعٜنْ؞ تَاع لَلِّنْ کُوغَلْ اَللَّه نغَمْ ݧَمْندُ؞ کٛو ندُيٜ ݧَمْندُ اٜ لَاٻِ، اَمَّا طُمْ وٛوطَا نٜطّٛ ݧَامَ ݧَمْندُ غَطَيْندُ غٛطّٛ وَطَ حَکّٜ؞ طُمْ ٻُرِي تٛع ݧَامَا کُسٜلْ، کٛو نجَرَا ندِيَمْ اِنَبٛجَمْ، کٛو نغَطَا غٛطُّمْ غَطٛوجُمْ بَنْدِرَاوٛ مَاطَ وَطَ حَکّٜ؞ اَلُ کٛ ݧُمَتَا دٛوْ فِي طُعُمْ حَکُّندٜ مَاطَ اٜ اَللَّه؞ اٛ بَرْکِطِنَاطٛ نٜطّٛ مٛ ݧُمَايِ وَطِي کٛ حَانَا، تٛ وَطِي غٛطُّمْ طُمْ حٛشِّ طُمْ بٛطُّمْ؞ اَمَّا نٜطّٛ غٛودُطٛ سٜکٛ دٛوْ کٛ ݧَامَتَ، تٛ اٛ ݧَامِيطُمْ، اَللَّه حٛشَّيْ کٛ اٛ وَطِ طُمْ وٛوطَا، نغَمْ اٛ تَبِّتِنَايِ کٛ اٛ وَطِ طُمْ بٛطُّمْ؞ کٛو طُمٜ کٛ نٜطّٛ وَطِ، تٛ اٛ تَبِّتِنَايِ طُمْ بٛطُّمْ يٜىٰسٛ اَللَّه، تٛو، اٛ وَطِي حَکّٜ؞ اٜنٜنْ شٜمْبِطْٻٜ ندٜرْ تٛکُّکِ يٜىٰسُ، اٜ حَانِ مُݧَنٜنْ ٻٜ شٜمْبِطَا ندٜرْ تٛکُّکِ يٜىٰسُ؞ ندٜنْ تٛع اٜنْ مبٜلْنَنْ کٛعٜ مٜىٰطٜنْ ٻٜرْطٜ تَنْ؞ کٛو مٛيٜ مٜىٰطٜنْ وٜلْنَنَ بَنْدِرَاوٛ مُوطُمْ ٻٜرْندٜ نغَمْ ٻٜيْدَارِ مَاکٛ اٜ سٜمْبِطِنْکِمٛ ندٜرْ تٛکُّکِ يٜىٰسُ؞ نغَمْ اَلْمَسِيحُ وٜلْنَنَايِ حٛورٜ مُوطُمْ ٻٜرْندٜ، اَمَّا نٛ اَايَارٜ وِعِ، «ٻٜنْ طٛنْ کُطٛوٻٜمَ، مِنْ ٻٜ کُطَتَ؞» فُو کٛ وِنْدَا دَغَ ندٜنّٛ ندٜرْ دٜفْتٜرٜ شٜنِيندٜ، طُمْ وِنْدَ نغَمْ طُمْ اٜکِّتِنَعٜنْ، نغَمْ بَرْکَ مُݧَلْ مٜىٰطٜنْ اٜ سٜمْبِطِنْکِ کِ دٜفْتٜرٜ شٜنِيندٜ سٜمْبِطِنْتَعٜنْ نغَطٜنْ کَمُّندٜ؞ اَللَّه بَلّٛووٛعٜنْ مبَاوٜنْ مُݧٜنْ شٜمْبِطِنٛووٛ ٻٜرْطٜ مٜىٰطٜنْ اٛ وَلَّعٛنْ نجٛوطٛوطٛنْ جٛنْدٜ جَمْ حَکُّندٜ مٛوطٛنْ ندٜرْ تٛکُّکِ يٜىٰسُ اَلْمَسِيحُ؞ نٛنْ نغَرْتِرْتٛنْ ٻٜ حٛنْدُکٛ غٛعٛ ٻٜ ݧُمٛ غٛعٛ ندٜرْ مَوْنِنْکِ اَللَّه ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ نغَمْ نٛنْ، نٛ اَلْمَسِيحُ جَٻِرِعٛنْ، اٛنٛنْ مَا نجَٻِندِرٜىٰ نٛنْ نغَمْ يِمْٻٜ مَوْنِنَ اَللَّه؞ نغَمْ اٜ مِ وِعَعٛنْ اَلْمَسِيحُ وَرْتِي مَشُّطٛ يَحُودَنْکٛعٜنْ نغَمْ اٛ حٛلَّ اَللَّه وَطَيْ کٛ وِعِ، نغَمْ طُمْ تَبِّتِنَ اَلْکَوَلْ نغَلْ طُمْ وَطَنِ مَامَعٜنْ مَٻّٜ اَرَنْدٜعٜنْ، کَدِنْ نغَمْ يِمْٻٜ نَاع يَحُودَنْکٛعٜنْ مَوْنِنَ اَللَّه نغَمْ يُرْمٜىٰندٜ مَاکٛ؞ نٛنْ نٛ طُمْ وِنْدِرَا، «نغَمْ نٛنْ، مِ مَنْتٜتٜ ندٜرْ يِمْٻٜ نَاع يَحُودَنْکٛعٜنْ، مِ يِمَ غِمِ مَنْتُکِ اِنْدٜ مَاطَ؞» طٛنْمَا وٛنْدٜ اَايَارٜ وِعِي، «اٛنٛنْ يِمْٻٜ نَاع يَحُودَنْکٛعٜنْ، مبٜلْمبٜلْتٜىٰ حَوْتِ اٜ يِمْٻٜ اَللَّه؞» ندٜ ٻٜيْدِي وِيکِ، «مَنْتٜىٰ جٛومِرَاوٛ، اٛنٛنْ يِمْٻٜ نَاع يَحُودَنْکٛعٜنْ اٛنْ فُو مٛوطٛنْ، مَنْتٜىٰمٛ، اٛنْ فُو مٛوطٛنْ يِمْٻٜ دُونِيَارُ؞» طٛنْمَا، اَنَّبِ اِشَايَ وِعِ، «غٛطّٛ دَغَ ندٜرْ لٜݧٛلْ جٜىٰسِ وَرٛيَيْ، اٛ وَرٛيَيْ نغَمْ اٛ لَامٛو يِمْٻٜ نَاع يَحُودَنْکٛعٜنْ، ٻٜ نغَطَيْ کَمُّندٜ دٛوْ مَاکٛ؞» اَللَّه تَبِّتِنْطٛ کَمُّندٜ مٜىٰطٜنْ وَطَعٛنْ نَنٛنْ بٜلْطُمْ کٜوْطُمْ، اٛ حٛکَّعٛنْ جَمْ بَرْکَ حٛولَاکِ کِ کٛولِيطٛنْمٛ، نغَمْ کَمُّندٜ مٛوطٛنْ وَطَ کَ ٻٜيْدَاکِ لَاوٛلْ بَوْطٜ رُوحُ مَاکٛ؞ بَنْدِرَاٻٜ اَمْ، مِنْ اٜ حٛورٜ اَمْ مِ تَبِّتِنِي اٛنٛنْ اٜ کٛعٜ مٛوطٛنْ اٛنْ نغٛودِ نغِکُّ بٛطُّمْ نَاع سٜطَّ، اٛنْ کٜىٰوُٻٜ اَنْدَلْ، ندٜنْ اٛنْ مبَاوَيْ اٜکِّتِندِرٛنْ؞ اَمَّا بَنْݧٜ ندٜرْ طٜرٜوٛلْ نغٛعٛلْ مِ وِنْدَنِيعٛنْ حَالَ شٜمْبِطْکَ دٛوْ غٛطُّمْ فِي نغَمْ مِ سِفْتٛرَنَعٛنْطُمْ؞ مِ وَطُ نٛنْ نغَمْ کُوغَلْ بٛنْغَلْ نغَلْ اَللَّه حٛکِّيَمْ، نغَمْ مِ وَرْتَ کُوَنٛووٛ يٜىٰسُ اَلْمَسِيحُ ندٜرْ يِمْٻٜ نَاع يَحُودَنْکٛعٜنْ؞ اٜ مِ حُوَ کُوغَلْ اَرْدِيطٛ دِينَ ندٜرْ وَعَجِنْکِ حَبَرُ بٜلْطُمْ طُمْ اَللَّه، نغَمْ يِمْٻٜ نَاع يَحُودَنْکٛعٜنْ نغَرْتَ بٛ شَکِّرِ ندِ اَللَّه جَٻِ، ندِ رُوحُ اَللَّه وَرْتِرِ شٜنِيندِ؞ نغَمْ يٜىٰسُ اَلْمَسِيحُ جٜيِيَمْ وَطِ مَنْتٛرْتٛومِ کُوغَلْ نغَلْ کُوَنَيْمِ اَللَّه؞ مِ مٜتَتَا طٛعٛ دٛوْ غٛطُّمْ، سٜيْ دٛوْ کُوغَلْ اَلْمَسِيحُ نغَلْ اٛ وَلِّيَمْ نغَطُمِ؞ اٛ وَلِّييَمْ نغَمْ يِمْٻٜ نَاع يَحُودَنْکٛعٜنْ تٛکَّ کٛ اَللَّه وِعِ بَرْکَ بٛلِيطٜ اَمْ اٜ کُوطٜ اَمْ، اٜ کُوطٜ کَيْطِنِيطٜ طٜ نغَطُمِ لَاوٛلْ بَوْطٜ رُوحُ اَللَّه؞ دَغَ اُرُشَلِيمَ مِ فِلَکٜ حَا يَاکِ غَرِيرِ اِلِيرِکُمْ، مِ وَعَجِنِ حَبَرُ بٜلْطُمْ دٛوْ اَلْمَسِيحُ اٜ طٜنْ طٛنْ بِغٜىٰجٜ فُو؞ کٛ وٛنِ ندٜرْ ٻٜرْندٜ اَمْ وٛنِ مِ وَعَجِنَ حَبَرُ بٜلْطُمْ تٛ يِمْٻٜ ٻٜ مٜىٰطَايِ نَنْکِ حَبَرُ اَلْمَسِيحُ، نغَمْ تٛع مِ مَحَ دٛوْ تٛ غٛطّٛ فُطِّ مَحُکِ؞ نٛنْ نٛ طُمْ وِنْدِرَا، «يِمْٻٜ ٻٜ مٜىٰطَايِ حٛکّٜىٰکِ حَبَرُ مَاکٛ ٻٜ اَنْدَيْمٛ، ندٜنْ ٻٜنْ طٛنْ ٻٜ مٜىٰطَايِ نَنْکِ حَبَرُ مَاکٛ ٻٜ ڤَامَيْ؞» نغَمْ کُوغَلْ نغَلْ، مِ حٜٻَايِ شَرٜلْ وَرْکِ تٛ مٛوطٛنْ؞ اَمَّا جٛونِ، ندٜ نجٛتِّنْمِ کُوغَلْ اَمْ اٜ بِغٜىٰجٜ طٜعٜ، ندٜنْ ندٜ دُوٻِ طُطِّ اٜ مِ حَاٻِ يِيکِعٛنْ، اٜ مِ يِطِ يَالُکِ تٛ مٛوطٛنْ شَرٜلْ نغٜلْ نجَحَيْمِ اَسْبَانِيَ؞ اٜ مِ يِطِ مبَلّٛنْيَمْ مِ يَحَ تٛنْ غَطَ مِ نَنِي بٜلْطُمْ جٛوطٛدَاکِ اٜ مٛوطٛنْ بَلْطٜ سٜطَّ؞ جٛونِ بٛو مِ يَحَيْ اُرُشَلِيمَ نغَمْ مِ يَارَنَ يِمْٻٜ اَللَّه بَلَّلْ؞ نغَمْ تٛکُّٻٜ يٜىٰسُ غٛنْٻٜ مَکِدٛونِيَ اٜ اَکَايَ ٻٜ نَنِي بٜلْطُمْ حٛکُّکِ دٛکّٜ نغَمْ وَلُّکِ ٻٜ نغَلَنَا ندٜرْ يِمْٻٜ اَللَّه ندٜرْ اُرُشَلِيمَ؞ ٻٜ نَنِي بٜلْطُمْ وَطُکِ نٛنْ؞ غٛونغَ تٛ مَٻّٜ طُمْ وَرْتِي بٛ يٛٻُکِ ݧَمَاندٜ؞ نغَمْ تٛ يِمْٻٜ نَاع يَحُودَنْکٛعٜنْ کٜٻِي غٜطَلْ ندٜرْ فِي بٛطُّمْ طُمْ اَللَّه وَطَنِ يَحُودَنْکٛعٜنْ اَلْکَوَلْ، ندٜنْ اٜ حَانِ ٻٜ مبَلِّرَٻٜ جَوْدِ مَٻّٜ؞ ندٜنْ تٛ مِ يٛتِّنِي کُوغَلْ نغَعَلْ، وَاتٛ مِ حٛکِّيٻٜ بَلَّلْ نغَلْ طُمْ حَوْرِتَنِٻٜ، مِ نَنْغَيْ لَاوٛلْ يَاکِ لٜيْدِ اَسْبَانِيَ؞ دٛوْ لَاوٛلْ اَمْ يَاکِ اَسْبَانِيَ مِ يَالَيْ تٛ مٛوطٛنْ؞ اٜ مِ اَنْدِ، تٛ مِ وَرِي تٛ مٛوطٛنْ، مِ وَرْدَيْ اٜ بَرْکَ اَلْمَسِيحُ فُو؞ بَنْدِرَاٻٜ اَمْ، نغَمْ جٛومِرَاوٛ مٜىٰطٜنْ يٜىٰسُ اَلْمَسِيحُ اٜ يِدّٜ ندٜ رُوحُ اَللَّه حٛلَّتَ، اٜ مِ تٛرٛوعٛنْ مبَلّٜىٰيَمْ وَطُکِ دٛعَارٜ نَاع سٜطَّ؞ تٛرٜىٰ اَللَّه حِسْنَيَمْ دَغَ جُوطٜ غَݧُٻٜ تٛکَّ يٜىٰسُ غٛنْٻٜ لٜيْدِ يَحُودِيَ، ندٜنْ تٛرٜىٰمٛ اٛ وَطَ کٛولِيٻٜ يٜىٰسُ غٛنْٻٜ اُرُشَلِيمَ نجَٻَ شٜىٰدٜ طٜ نجَارَنَيْمِٻٜ، نغَمْ تٛ اَللَّه جَٻِي مِ وَرٛيَيْ تٛ مٛوطٛنْ اٜ بٜلْطُمْ ٻٜرْندٜ، مِ سِوْتٛدٛو اٜ مٛوطٛنْ؞ اَللَّه جٛومُ جَمْ وٛنْدَ اٜ مٛوطٛنْ اٛنْ فُو؞ اَامِنْ؞ اٜ مِ يِطِ مِ وِعَعٛنْ بَنْدِرَاوٛ مٜىٰطٜنْ دٜبّٛ بِعٜتٜىٰطٛ فِيبِ، کُوٛووٛ ندٜرْ تٛکُّٻٜ يٜىٰسُ غٛنْٻٜ کَنْکِيرِيَ، اٛ دٜبّٛ مٛ غٛونغَ؞ نجَٻّٜىٰمٛ ندٜرْ اِنْدٜ جٛومِرَاوٛ نٛ حَانِ يِمْٻٜ اَللَّه نجَٻّٛرٜىٰ؞ کٛکّٜىٰمٛ کٛو اِرِ نغَلٜ بَلَّلْ نغَلْ اٛ يِطِ تٛ مٛوطٛنْ، نغَمْ اٛ وَلِّي يِمْٻٜ طُطْٻٜ حَوْتِ اٜ اَمْ؞ کٛوْنٜىٰ بِرِسْکِلَ اٜ اَکِيلَ، ٻٜ کُودَيْمِ کُوغَلْ يٜىٰسُ اَلْمَسِيحُ؞ ٻٜ کٛشِّي يٛنْکِ مَٻّٜ نَاع طُمْ غٛطُّمْ نغَمْ اَمْ؞ مِ يٜتِّيٻٜ، نَاع مِنْ تَنْ حَا اٜ کٛو نغَلٜ کَوْتَلْ تٛکُّٻٜ يٜىٰسُ غٛنْٻٜ ندٜرْ يِمْٻٜ نَاع يَحُودَنْکٛعٜنْ؞ طٛنْمَا کٛوْنٜىٰ تٛکُّٻٜ يٜىٰسُ کَوْرِتٛوٻٜ ندٜرْ وُرٛ مَٻّٜ؞ کٛوْنٜىٰ حِغٛ اَمْ مٛ نغِطُمِ بِعٜتٜىٰطٛ اَفَانِتُسْ، اَرْتُطٛ حٛولَاکِ اَلْمَسِيحُ ندٜرْ لٜيْدِ اَاسِيَ فُو؞ کٛوْنَنٜىٰيَمْ مَرْيَامَ، کُوَنْطٛ اَلْمَسِيحُ نَاع سٜطَّ نغَمْ ٻٜيْدَارِ مٛوطٛنْ؞ کٛوْنَنٜىٰيَمْ اَنْدَرٛونِکُسْ اٜ يُونِيَ، بَنْدِرَاٻٜ اَمْ يَحُودَنْکٛعٜنْ تٛکُّٻٜ يٜىٰسُ ٻٜ طُمْ مَٻِّدِ اٜ اَمْ ندٜرْ سُودُ شُرَلْ؞ لِلَاٻٜ اٜ اَندِٻٜ بٛطُّمْ، کَدِنْ ٻٜ اَرْتِييَمْ حٛولَاکِ اَلْمَسِيحُ؞ اٜ مِ حٛوْنَ اَمْڤِلِيَاتُسْ حِغٛ اَمْ مٛ نغِطْمِ ندٜرْ سُمْڤٛوتِرْکِ اٜ جٛومِرَاوٛ؞ کٛوْنَنٜىٰيَمْ اُرْبَانُسْ، مٛ کُودٜتٜنْ ندٜرْ کُوغَلْ اَلْمَسِيحُ، اٜ حِغٛ اَمْ سِتَاکِسْ مٛ نغِطُمِ؞ کٛوْنَنٜىٰيَمْ اَفَالِسْ، مٛ طُمْ تَبِّتِنِ اٜ تٛکَّ اَلْمَسِيحُ اٜ غٛونغَ؞ کٛوْنَنٜىٰيَمْ اَرِسْتٛبُلُسْ اٜ اِيَالُ مَاکٛ اٜ فُو تٛکُّٻٜ يٜىٰسُ غٛنْٻٜ ندٜرْ وُرٛ مَاکٛ؞ کٛوْنَنٜىٰيَمْ حِرُودِيَنْ بَنْدِرَاوٛ اَمْ يَحُودَنْکٜىٰجٛ؞ کٛوْنَنٜىٰيَمْ نَرْکِسُسْ اٜ اِيَالُ مَاکٛ اٜ فُو تٛکُّٻٜ يٜىٰسُ غٛنْٻٜ ندٜرْ وُرٛ مَاکٛ؞ کٛوْنَنٜىٰيَمْ تِرِيفِنَ اٜ تِرِيفُسَ، رٜوْٻٜ کُوَنٛوٻٜ جٛومِرَاوٛ؞ طٛنْمَا کٛوْنَنٜىٰيَمْ فَرْسِسْ حِغٛ اَمْ مٛ نغِطُمِ کُوَنْطٛ جٛومِرَاوٛ نَاع سٜطَّ؞ کٛوْنَنٜىٰيَمْ رُوفُسْ کُوَنْطٛ جٛومِرَاوٛ بٛطُّمْ اٜ مَدُوجٛ مَاکٛ جٛغِيطٛيَمْ بٛ ٻِطّٛ مَاکٛ؞ کٛوْنَنٜىٰيَمْ اَسِنْکِرِيتُسْ، اٜ فِلِغٛونَ، اٜ حَرْمِسْ، اٜ فَتُرٛوبَسْ، اٜ حَرْمَسْ اٜ تٛکُّٻٜ يٜىٰسُ غٛنْدُٻٜ اٜ مَٻّٜ؞ کٛوْنَنٜىٰيَمْ فِلٛولٛغُسْ، اٜ جُولِيَ، اٜ نِرِيُسْ اٜ بَنْدِرَاوٛ مَاکٛ دٜبّٛ، اٜ اٛلِمْفَسْ، اٜ فُو يِمْٻٜ اَللَّه غٛنْدُٻٜ اٜ مَٻّٜ؞ کٛوْنِندِرٜىٰ کٛوْنٛلْ حِغَاکُ؞ کٛو نغَلٜ کَوْتَلْ تٛکُّٻٜ يٜىٰسُ اٜ کٛوْنَعٛنْ؞ بَنْدِرَاٻٜ اَمْ، اٜ مِ تٛرٛوعٛنْ، ڤَامَنٜىٰ غَدّٛوٻٜ شِيَ فَمْفَمْتِرْکِ حَکُّندٜ مٛوطٛنْ، مَجِّنٛوٻٜعٛنْ، غَݧٛوٻٜ اٜکِّتِنٛلْ نغٛلْ کٜٻْطٛنْ؞ نغٛطِّتٜىٰٻٜ؞ نغَمْ اِرِ ٻٜنْ طٛنْ يِمْٻٜ نَاع جٛومِرَاوٛ مٜىٰطٜنْ اَلْمَسِيحُ ٻٜ کُوَنْتَ، اَمَّا دٜىٰطِ مَٻّٜ ٻٜ کُوَنْتَ؞ اٜ بٛلِيطٜ بٜلْطٜ اٜ حَالَاجِ بٛطِّ ٻٜ مَجِّنِرْتَ يِمْٻٜ غٛودُٻٜ شِيَ فَامُ؞ کٛو مٛيٜ نَنِي حَبَرُ نٛ تٛکِّرْتٛنْ يٜىٰسُ، نٛنْ وَطِي مِ نَنِي بٜلْطُمْ نغَمْ مٛوطٛنْ؞ اَمَّا اٜ مِ يِطِ نغَرْتٛنْ غٛودُٻٜ فَامُ اَنْدٛنْ کٛ وٛوطِ، نغٛطِّتٛوطٛنْ وَطُکِ کٛ وٛوطَا؞ اَللَّه جٛومُ جَمْ نَاع کٛ نٜىٰٻِ اٛ لَلِّنَيْ بَوْطٜ شٜيْطَنْ اٛ يٛوَعٛنْ دٛوْ مَاکٛ؞ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ تِمٛوتِ مٛ کُودَيْمِ اٜ حٛوْنَعٛنْ، نٛنْ مَا لُوسِيُسْ، اٜ جَاسٛنْ، اٜ سٛسِفَتَ، بَنْدِرَاٻٜ اَمْ يَحُودَنْکٛعٜنْ تٛکُّٻٜ يٜىٰسُ؞ مِنْ تَرْتِيُسْ تٛکُّطٛ جٛومِرَاوٛ، بَلُّطٛ بُلُسْ، مِنْ وِنْدِ طٜرٜوٛلْ نغٛعٛلْ، اٜ مِ حٛوْنَعٛنْ؞ غَايُسْ، جَٻِّيطٛيَمْ ندٜرْ وُرٛ مُوطُمْ، مٛ تٛکُّٻٜ يٜىٰسُ کَوْرِتَتَ ندٜرْ وُرٛ مَاکٛ، اٜ مٛ حٛوْنَعٛنْ؞ اٜرَسْتُسْ، ڤَامَنٛووٛ شٜىٰدٜ غَرِيرِ، اٜ بَنْدِرَاوٛ مٜىٰطٜنْ کَوَرْتُسْ، اٜ ٻٜ کٛوْنَعٛنْ؞ [جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ اَامِنْ؞] مَنْغُ تَبِّتَ تٛ اَللَّه بَاوَيْطٛ سٜمْبِطِنَعٛنْ بَرْکَ حَبَرُ بٜلْطُمْ طُمْ نغَعَجِنَيْمِ دٛوْ يٜىٰسُ اَلْمَسِيحُ؞ حَبَرُ بٜلْطُمْ طُمْ طُمْ سِرُّ شُوطَاطُمْ دَغَ دُوٻِ طُطِّ پَٻِّيطِ؞ اَمَّا جٛونِ طُمْ وَنْغِنَامَ اٜ نجَيْرِ، طُمْ اَنْدِنِيطُمْ لٜپِّ دُونِيَارُ فُو لَاوٛلْ دٜفْتٜ طٜ اَنَّبٛعٜنْ مبِنْدِ؞ اَللَّه تَبِيطٛ وِعِي طُمْ وَطَ نٛنْ نغَمْ لٜپِّ دُونِيَارُ فُو کٛولٛومٛ تٛکَّ کٛ اٛ وِعِ؞ تٜدُّنغَلْ تَبِّتَ تٛ اَللَّه حَا اَبَدَا بَرْکَ يٜىٰسُ اَلْمَسِيحُ! کَنْکٛ تَنْ وٛنِ اَللَّه؞ کَنْکٛ تَنْ وٛودِ فَامُ ندٜرْ کٛو طُمٜ؞ اَامِنْ؞ مِنْ، بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ اٜ بَنْدِرَاوٛ مٜىٰطٜنْ سَسْتَانِسْ مبِنْدِ طٜرٜوٛلْ نغٛعٛلْ؞ مِنْ مبِنْدَنْغٛلْ کَوْتَلْ يِمْٻٜ اَللَّه وٛنْٻٜ کٛرِنْتِ، ٻٜ اَللَّه نٛدِّ نغَرْتَ يِمْٻٜ مُوطُمْ؞ مِنْ مبِنْدَنْغٛلْ يِمْٻٜ فُو غٛنْٻٜ کٛو تٛيٜ غَطٛوٻٜ دٛعَارٜ ندٜرْ اِنْدٜ يٜىٰسُ اَلْمَسِيحُ جٛومِرَاوٛ مٜىٰطٜنْ؞ کَنْکٛ وٛنِ جٛومِرَاوٛ مٜىٰطٜنْ اٜ مَٻّٜ فُو؞ اَللَّه ݧَاکٛ مٜىٰطٜنْ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ کٛو ندٜيٜ اٜ مِ يٜتَّ اَللَّه نغَمْ مٛوطٛنْ نغَمْ بَرْکَ اٜ يِدّٜ طُمْ اٛ حٛکِّعٛنْ نغَمْ سُمْڤٛوتِرْکِ مٛوطٛنْ اٜ يٜىٰسُ اَلْمَسِيحُ؞ سُمْڤٛوتِرْکِ مٛوطٛنْ اٜ مَاکٛ طُمْ بَرْکِطِنِيعٛنْ اٜ کٛو نغٛلٜ لَاوٛلْ، وَاتٛ ندٜرْ مٜتٛ فُو اٜ اَنْدَلْ فُو، نغَمْ طُمْ تَبِّتِنَنِيعٛنْ وَعَجُ طُمْ مِنْ نغَعَجِنَنِعٛنْ دٛوْ اَلْمَسِيحُ طُمْ غٛونغَ؞ نغَمْ نٛنْ، اٛنْ ندُلَّايِ کٛو نغَلٜ دٛکَّلْ نغَلْ رُوحُ اَللَّه حٛکَّتَ، اٛنْ کٜطِي اٛنْ کَاٻِي غَرْتٛلْ يٜىٰسُ اَلْمَسِيحُ جٛومِرَاوٛ مٜىٰطٜنْ؞ اٛ وَطَيْ کَ سٜمْبِطِنْکِعٛنْ حَا يَاکِ رٜعِرْدٜ، نغَمْ نغَرْتٛنْ ٻٜ نغَلَا کٛ طُمْ حُطِرْتَعٛنْ ݧَلْندٜ ندٜ اٛ وَرْتٛيْتَ؞ اَللَّه اٛ غَطٛووٛ کٛ اٛ وِعِ؞ کَنْکٛ نٛدِّعٛنْ نغَمْ شُمْڤٛوتِرٛنْ اٜ ٻِطّٛ مَاکٛ يٜىٰسُ اَلْمَسِيحُ جٛومِرَاوٛ مٜىٰطٜنْ؞ اٜ مِ تٛرٛوعٛنْ بَنْدِرَاٻٜ نغَمْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ، اٛنْ فُو نجَٻٜىٰ کٛ مبِعٛتٛنْ وَرْتَ غٛعٛ نغَمْ تٛع طُمْ حٜٻَ فٜىٰرٛوتِرٛلْ حَکُّندٜ مٛوطٛنْ، اَمَّا ݧُمٛ مٛوطٛنْ اٜ ٻٜرْطٜ مٛوطٛنْ وَرْتَ غٛعٛ؞ بَنْدِرَاٻٜ اَمْ، يِمْٻٜ وُرٛ کُلُووِ کٛکِّييَمْ حَبَرُ اٜ وٛودِ شِيَ فَمْفَمْتِرْکِ حَکُّندٜ مٛوطٛنْ؞ کٛ نغِطُمِ مِ وِعَ وٛنِ، غٛطّٛ مٛوطٛنْ اٜ وِعَ، «مِنْ بُلُسْ تٛکُّمِ؞» غٛطّٛ اٜ وِعَ، «مِنْ اَفٛولٛسْ تٛکُّمِ،» اٛنْ نِ اٜ وِعَ، «مِنْ بِيتُرُسْ تٛکُّمِ؞» اٛنْ طَاعٜ بٛو اٜ وِعَ، «مِنْ اَلْمَسِيحُ تٛکُّمِ؞» تٛو، اَلْمَسِيحُ اٜ سٜنْدِي وٛنْ طٛنْ؟ کٛو بُلُسْ وَرَا دٛوْ غَافَانغَلْ نغَمْ مٛوطٛنْ؟ کٛو اٜ اِنْدٜ بُلُسْ طُمْ وَطِرَنِعٛنْ بَڤْتِسْمَ؟ مِ يٜتِّي اَللَّه ندٜ مِ وَطَنَايِ کٛو مٛيٜ مٛوطٛنْ بَڤْتِسْمَ سٜيْ نِ کِرِبُسْ اٜ غَايُسْ؞ نغَمْ نٛنْ، وَلَا بَاوَيْطٛ وِعَ طُمْ وَطَنِيعٛنْ بَڤْتِسْمَ ندٜرْ اِنْدٜ اَمْ؞ تٛو، طٛنْمَا مِ وَطَنِي يِمْٻٜ وُرٛ اِسْتِفَانُسْ بَڤْتِسْمَ؞ غَطَ ٻٜنْ طٛنْ مِ يٜجِّتِي تٛ مِ وَطَنِي غٛطّٛ بَڤْتِسْمَ؞ نغَمْ اَلْمَسِيحُ لِلَايِيَمْ نغَمْ مِ وَطَ بَڤْتِسْمَ، اَمَّا نغَمْ مِ وَعَجِنَ حَبَرُ بٜلْطُمْ؞ نَاع اٜ فَامُ نٜطّٛ نغَعَجِنِرَيْمِطُمْ، نغَمْ تٛع بَوْطٜ مَيْدٜ اَلْمَسِيحُ دٛوْ غَافَانغَلْ وَرْتِرٜىٰ مٜىٰرٜ؞ حَبَرُ مَيْدٜ اَلْمَسِيحُ دٛوْ غَافَانغَلْ، طُمْ حَاݝٛورٜ تٛ يِمْٻٜ غٛنْٻٜ دٛوْ لَاوٛلْ حَلْکٜرٜ؞ اَمَّا تٛ مٜىٰطٜنْ اٜنٜنْ کِسْنَاٻٜ طُمْ بَوْطٜ اَللَّه؞ نغَمْ اَايَارٜ وِعِي، «مِ لَلِّنَيْ فَامُ ݧُمٛوٻٜ اٜ نغٛودِ فَامُ؛ مِ وٛنَّيْ پٛيْرٜ ݧُمٛوٻٜ اٜ نغٛودِ پٛيْرٜ؞» تٛو، تٛ غٛودُطٛ فَامُ وٛنِ؟ تٛ مٛودِبّٛ اَتَّوْرَ وٛنِ؟ تٛ بَوْطٛ غٜدِّ وٛنِ؟ نَاع اَللَّه وَرْتِرِي فَامُ دُونِيَارُ ندُعُ حَاݝٛورٜ؟ نغَمْ اَللَّه ندٜرْ فَامُ مُوطُمْ سُٻِي تٛع يِمْٻٜ اَنْدَمٛ لَاوٛلْ فَامُ مَٻّٜ؞ اٛ نَنِي بٜلْطُمْ حِسْنُکِ کٛولِيٻٜ اَلْمَسِيحُ لَاوٛلْ وَعَجِنْکِ حَبَرُ بٜلْطُمْ طُمْ وٛٻّٜ نغِعَتَ طُمْ حَاݝٛورٜ؞ يَحُودَنْکٛعٜنْ اٜ نغِطِ نغَطَنٜىٰ کٛ حَيْطِنِي کٛ ٻٜ نجَٻَ حَبَرُ طُعُمْ؞ يِمْٻٜ نَاع يَحُودَنْکٛعٜنْ بٛو اٜ نغِطِ مٜتِرَنٜىٰکِ اَنْدَلْ کٛ ٻٜ نجَٻَطُمْ؞ مِنٛنْ بٛو، اٜ مِنْ نغَعَجِنَ اَلْمَسِيحُ بَرَاطٛ دٛوْ غَافَانغَلْ؞ تٛ يَحُودَنْکٛعٜنْ طُمْ حَالَ کَلُّکَ، تٛ يِمْٻٜ نَاع يَحُودَنْکٛعٜنْ بٛو طُمْ حَاݝٛورٜ؞ اَمَّا تٛ يِمْٻٜ ٻٜ اَللَّه نٛدِّ، يَحُودَنْکٛعٜنْ اٜ نَاع يَحُودَنْکٛعٜنْ، اَلْمَسِيحُ اٛ بَوْطٜ اَللَّه اٜ فَامُ اَللَّه؞ کٛ طُمْ يِعَتَ بٛ حَاݝٛورٜ اَللَّه وَطِي طُمْ ٻُرِي پٛيْرٜ نٜطّٛ؞ ندٜنْ کٛ طُمْ يِعَتَ بٛ اَللَّه تَمْڤِي، طُمْ ٻُرِي سٜمْبٜ نٜطّٛ سٜمْبٜ؞ بَنْدِرَاٻٜ، ݧُمٜىٰ نٛ مبَانٛوطٛنْ شَرٜلْ کٛ اَللَّه نٛدِّعٛنْ؞ سٜطَّ ندٜرْ مٛوطٛنْ نغٛودِ فَامُ اٜ يِيکِ يِمْٻٜ دُونِيَارُ؞ سٜطَّ ندٜرْ مٛوطٛنْ نغٛنِ اَنْدَنْٻٜ کٛو طُمٜ، ندٜنْ سٜطَّ ندٜرْ مٛوطٛنْ نغٛودِ دَݧٛوٻٜ لَامِيٻٜ؞ اَمَّا اَللَّه سُٻِي کٛ يِمْٻٜ دُونِيَارُ ندُعُ نغِعَتَ طُمْ حَاݝٛورٜ، نغَمْ اٛ سٜمْتِنَ غٛودُٻٜ فَامُ اِرِ طُمْ دُونِيَارُ ندُعُ؞ اَللَّه سُٻِي کٛ يِمْٻٜ نغِعَتَ بٛ طُمْ تَمْڤُطُمْ ندٜرْ دُونِيَارُ ندُعُ نغَمْ اٛ سٜمْتِنَ غٛودُٻٜ لَامُ؞ کٛ يِمْٻٜ نجَوَنْتَ، اٜ کٛ ٻٜ کٛشِّ وَلَا کٛ طُمْ وَطٜتٜىٰ ندٜرْ دُونِيَارُ، اٜ کٛ ٻٜ کٛشِّ نَاع طُمْ غٛطُّمْ، کَنْجُمْ اَللَّه سُٻِ حُوتِرَ نغَمْ لَلِّنَ کٛ يِمْٻٜ نغِعَتَ اٜ طُمْ وٛودِ دَرَجَ؞ اَللَّه وَطِي نٛنْ نغَمْ تٛع غٛطّٛ نٜطّٛ مَوْنِنَ حٛورٜ مُوطُمْ يٜىٰسٛ مَاکٛ؞ اٛ وَرْتِرِيعٛنْ ٻٜ يٜىٰسُ اَلْمَسِيحُ؞ اَللَّه وَرْتِرِيمٛ فَامُ مٜىٰطٜنْ؞ لَاوٛلْ مَاکٛ طُمْ وَرْتِرِعٜنْ اَادِلِعٜنْ، شٜنِيٻٜ، رِمْطِنَاٻٜ؞ نغَمْ نٛنْ، نٛنْ نٛ طُمْ وِنْدِرَا، «فُو مَنْتِتٛتٛوطٛ، اٛ مَنْتِتٛرٛو جٛومِرَاوٛ؞» بَنْدِرَاٻٜ، شَرٜلْ کٛ نغَرْمِ تٛ مٛوطٛنْ اٜ مِ وَعَجِنَ سِرُّ اَللَّه، مِ حُوتِرَايِ بٛلِيطٜ لُغُّطٜ کٛو حٛلُّکِ اَنْدَلْ؞ شَرٜلْ کٛ نغٛنْدُنٛومِ اٜ مٛوطٛنْ، مِ سُٻِي ندٜرْ ٻٜرْندٜ اَمْ مِ مٜتَتَا دٛوْ کٛو طُمٜ، سٜيْ دٛوْ حَبَرُ يٜىٰسُ اَلْمَسِيحُ مٛ طُمْ وَرِ دٛوْ غَافَانغَلْ؞ مِ وَرِي تٛ مٛوطٛنْ مِ سٜمْبِطَا، اٜ مِ دِوْنَ نغَمْ کُلٛلْ؞ ندٜرْ کٛ مبِيمِ اٜ کٛ نغَعَجِنْمِ مِ حُوتِرَايِ فَامُ لُغُّطُمْ کٛو بٜلْطُمْ حَالَ نغَمْ نجَٻٛنْ کٛ مبِيمِ، اَمَّا بَوْطٜ رُوحُ اَللَّه تَبِّتِنَنِيعٛنْ طُمْ غٛونغَ؞ مِ وَطُ نٛنْ نغَمْ تٛع حٛولَاکِ کِ کٛولِيطٛنْ يٜىٰسُ دَرٛو دٛوْ فَامُ يِمْٻٜ، سٜيْ نِ دٛوْ بَوْطٜ اَللَّه؞ فُو اٜ نٛنْ، تٛ اٜ مِنْ مٜتَنَ کٜىٰوُٻٜ ندٜرْ حٛولَاکِ يٜىٰسُ، اٜ مِنْ مٜتِرَ فَامُ، اَمَّا نَاع اِرِ فَامُ طُمْ جَامَنُ طُعُمْ، کٛو فَامُ لَامٛتٛوٻٜ جَامَنُ طُعُمْ ٻٜ لَامُ دٜعٛوجُمْ؞ اَمَّا اٜ مِنْ مٜتَ دٛوْ فَامُ اَللَّه طُمْ سِرُّ شُوطِيطُمْ ندٜنّٛ، طُمْ اَللَّه سِرْيَنِيعٜنْ کٛ دُونِيَارُ تَغٜىٰ نغَمْ تٜدِّنْکِعٜنْ؞ ندٜرْ لَامٛتٛوٻٜ جَامَنُ طُعُمْ وَلَا ڤَامُطٛ طُعُمْ؞ نغَمْ دَا ٻٜ ڤَامِينٛطُمْ، دَا ٻٜ مبَرَايِ جٛومِرَاوٛ جٛومُ مَنْغُ دٛوْ غَافَانغَلْ؞ اَمَّا نٛنْ نٛ طُمْ وِنْدِرَا، «کٛ حِتٜرٜ مٜىٰطَايِ يِيکِ، کٛ نٛوْرُ مٜىٰطَايِ نَنْکِ، کٛ نٜطّٛ مٜىٰطَايِ ݧُمُکِ، کَنْجُمْ اَللَّه سِرْيَنِي يِطُٻٜمٛ؞» اَمَّا اَللَّه حٛلِّيعٜنْطُمْ لَاوٛلْ رُوحُ مَاکٛ؞ نغَمْ رُوحُ مَاکٛ اٜ اَنْدِ کٛو طُمٜ حَا اٜ سِرُّ مَاکٛ لُغُّطُمْ؞ مٛيٜ ندٜرْ يِمْٻٜ اَنْدَتَ کٛ وٛنِ ندٜرْ ٻٜرْندٜ نٜطّٛ تٛ نَاع نٜطّٛ اٛنْ؟ نٛنْ مَا، وَلَا اَنْدُطٛ ݧُمٛ اَللَّه سٜيْ نِ رُوحُ اَللَّه؞ رُوحُ طُمْ کٜٻُطٜنْ، نَاع تٛ دُونِيَارُ طُمْ پِوٛيِ؛ تٛ اَللَّه طُمْ پِوٛيِ، نغَمْ اَندٜنْ شَاحُ طُمْ اٛ حٛکِّعٜنْ؞ اٜ مِنْ مٜتَ دٛوْ طُعُمْ نَاع ندٜرْ حَالَ کَ فَامُ نٜطّٛ اٜکِّتَتَ، سٜيْ نِ ندٜرْ حَالَ کَ رُوحُ اَللَّه اٜکِّتِنِمِنْ؞ اٜ مِنْ اٜکِّتِنَ غٛودُٻٜ رُوحُ اَللَّه دٛوْ غٛونغَ اَللَّه؞ نٜطّٛ مٛ وَلَا رُوحُ اَللَّه، اٛ جَٻَتَا کٛ پِوٛيِ تٛ رُوحُ اَللَّه، نغَمْ تٛ مَاکٛ طُمْ حَاݝٛورٜ؞ اٛ وَاوَتَا اٛ فَامَطُمْ نغَمْ اٛ وَلَا رُوحُ اَللَّه؞ غٛودُطٛ رُوحُ اَللَّه بٛو وَاوَيْ فَامُکِ کٛو طُمٜ کٛ رُوحُ اَللَّه اٜکِّتَتَ؞ اَمَّا مٛ وَلَا رُوحُ اَللَّه فَامَتَا ݧُمٛ غٛودُطٛ رُوحُ اَللَّه؞ نٛ اَايَارٜ وِعِ، «مٛيٜ مٜىٰطِ اَنْدُکِ ݧُمٛ جٛومِرَاوٛ نغَمْ اٜکِّتِنَمٛ؟» اَمَّا اٜنٜنْ اٜنْ ڤَامَيْ فِي طُعُمْ نغَمْ اٜنْ ݧُمَ نٛ اَلْمَسِيحُ ݧُمِرْتَ؞ بَنْدِرَاٻٜ، مِنْ مِ وَاوَايِ مٜتَنْکِعٛنْ نٛ مٜتِرَنَيْمِ کٜىٰوُٻٜ ندٜرْ حٛولَاکِ يٜىٰسُ؞ سٜيْ نِ مِ مٜتِرَنِيعٛنْ نٛ مٜتِرَنَيْمِ يِمْٻٜ دُونِيَارُ ندُعُ، کٛو بٛو نٛ مٜتِرَنَيْمِ ٻِکّٛيْ ڤَمَرٛيْ، وَاتٛ تٛکُّٻٜ يٜىٰسُ حٜسْٻٜ؞ طُمْ حٛکَّتَا ٻِنْغٜلْ کٜشّٜلْ ݧَمْندُ شٜمْبِنْدُ؞ نٛنْ مِنْ مَا مِ حٛکَّايِعٛنْ ݧَمْندُ شٜمْبِنْدُ، وَاتٛ اٜکِّتِنٛلْ لُغُّنغٛلْ؞ اَمَّا مِ حٛکِّيعٛنْ اٜنْطَمْ، وَاتٛ اٜکِّتِنٛلْ نغٛلْ لُغَّا نغَمْ اٛنْ کٜوْتَايِ ݧَامُکِ ݧَمْندُ شٜمْبِنْدُ؞ غٛونغَ، حَا جٛونِ اٛنْ کٜوْتَايِ ݧَامُکِندُ؞ نغَمْ حَا جٛونِ اٛنْ نغَطَ جٛنْدٜ اِرِ ندٜ يِمْٻٜ دُونِيَارُ؞ تٛ نِ اٜ وٛودِ لَوْلِيرُ اٜ غٜدِّ حَکُّندٜ مٛوطٛنْ، تٛو، حَا جٛونِ دُونِيَارُ جٜيِعٛنْ، اٛنْ کُوَ کُوطٜ اِرِ طٜ دُونِيَارُ ندُعُ؞ نغَمْ تٛ غٛطّٛ وِعِي، «بُلُسْ تٛکُّمِ،» اٛنْ نِي بٛو وِعِي، «اَفٛولٛسْ تٛکُّمِ،» تٛو، نَاع اٛنْ نغَطَ جٛنْدٜ اِرِ ندٜ يِمْٻٜ دُونِيَارُ ندُعُ وٛنْ طٛنْ؟ تٛو، مٛيٜ وٛنِ اَفٛولٛسْ؟ مٛيٜ وٛنِ بُلُسْ؟ مِنْ مَشُّٻٜ اَللَّه تَنْ؞ لَاوٛلْ اَمِنْ کٛولِيطٛنْ يٜىٰسُ اَلْمَسِيحُ؞ کٛو مٛيٜ اَمِنْ اٜ حُوَ کُوغَلْ نغَلْ جٛومِرَاوٛ حٛکِّمٛ اٛ حُوَ؞ مِنْ مِ اَاوِي، اَفٛولٛسْ بٛو يَرْنِي اَوْرٜ ندٜنْ، اَمَّا اَللَّه وٛنِ مَوْنِنْطٛندٜ؞ نغَمْ نٛنْ، اٜ اَاوُطٛ اٛنْ اٜ جَرْنُطٛ اٛنْ نَاع ٻٜ غٛطُّمْ، اَمَّا اَللَّه تَنْ وٛنِ مَوْطٛ، نغَمْ کَنْکٛ وٛنِ مَوْنِنْطٛ اَوْرٜ ندٜنْ؞ اٜ اَاوُطٛ اٜ جَرْنُطٛ ٻٜ کُودٛوٻٜ؞ کٛو مٛيٜ حٜٻَيْ مبَرْجَارِ کٛ فٛتِّدِ اٜ کُوغَلْ مُوطُمْ؞ نغَمْ مِنٛنْ، مِنْ کُودٛوٻٜ اٜ اَللَّه؞ اٛنٛنْ بٛو اٛنْ نغٜسَ مَاکٛ، مَادِ مَاکٛ؞ بَرْکَ دٛکَّلْ نغَلْ اَللَّه حٛکِّيَمْ، مِ فُطِّي مَادِ بٛ مَحٛووٛ بَوْطٛ مَادِ نَاع سٜطَّ؞ مِ فُطِّ مَادِي، ندٜنْ غٛطّٛ اٜ مَحَ دٛوْ فُطّٛودٜ ندٜنْ؞ اَمَّا کٛو مٛيٜ مَحٛووٛ دٛوْ فُطّٛودٜ ندٜنْ اٛ فَامَ اِرِ مَحُکِ کِ اٛ مَحَتَ؞ نغَمْ وَلَا غٛطّٛ بَاوَيْطٛ فُطَّ وٛنْدٜ فُطّٛودٜ مَادِ فٜىٰرٜ ٻُرْندٜ ندٜ طُمْ فُطِّ، وَاتٛ يٜىٰسُ اَلْمَسِيحُ؞ تٛ غٛطّٛ مَحِي دٛوْ فُطّٛودٜ ندٜنْ، تٛ اٛ حُوتِرِي جِينَارِ، کٛو اَجُرْفَارِ، کٛو کَاپٜ غٛودُطٜ شٜىٰدٜ، کٛو لٜطّٜ، کٛو غٜىٰنٜ، کٛو پٛمْبٜ، وٛوطُکِ کُوغَلْ مَاکٛ وُرْتٛتٛ اٜ نجَيْرِ ݧَلْندٜ جَانغٛ؞ اٜ ندٜنْ طٛنْ ݧَلْندٜ حِيتٜ وَنْغِنَيْ کُوغَلْ کٛو مٛيٜ، نغٜ فٛوندَيْ کُوغَلْ نغَلْ نغٜ حٛلَّ نٛ نغَلْ وٛنْتِندِرِ؞ تٛ بٛو مَادِ ندِ اٛ مَحِ وُلَايِ، اٛ حٜٻَيْ مبَرْجَارِ مبٛنْدِ؞ تٛ مَادِ ندِنْ وُلِي، اٛ دُلَّيْ مبَرْجَارِ مَاکٛ، کٛو ندٜ اٛ حٜٻَيْ کِسْندَمْ، اَمَّا بٛ ندٜرْ حِيتٜ اٛ پِوِ؞ اٛنْ اَنْدَا ٻَلِّ مٛوطٛنْ طُمْ وُرٛ تٛ اَللَّه جٛوطٛتٛو، ندٜنْ رُوحُ اَللَّه اٜ جٛوطٛو ندٜرْ ٻٜرْطٜ مٛوطٛنْ؟ فُو بٛنُّطٛ وُرٛ اَللَّه، اَللَّه حَلْکَيْمٛ؞ نغَمْ وُرٛ اَللَّه نغٛ شٜنِينغٛ؛ اٛنٛنْ بٛو نغٛنِ وُرٛ مَاکٛ نغٛنْ؞ تٛع غٛطّٛ پٛيْرَ حٛورٜ مُوطُمْ؞ تٛ غٛطّٛ مٛوطٛنْ اٜ ݧُمَ اٜ وٛودِ فَامُ نٛ جَامَنُ طُعُمْ حٛشِّرِ فَامُ، سٜيْ اٛ وَرْتِرَ حٛورٜ مَاکٛ بٛ کَاݝَاطٛ، نغَمْ اٛ وَرْتَ غٛودُطٛ فَامُ طُمْ غٛونغَ؞ نغَمْ فَامُ اِرِ طُمْ دُونِيَارُ ندُعُ، يٜىٰسٛ اَللَّه طُمْ حَاݝٛورٜ؞ نٛنْ نٛ طُمْ وِنْدِرَا، «اَللَّه اٜ نَنْغَ غٛودُٻٜ فَامُ ندٜرْ دَبَرٜ مَٻّٜ؞» طٛنْمَا وٛنْدٜ اَايَارٜ وِعِي، «جٛومِرَاوٛ اٜ اَنْدِ ݧُمٛ غٛودُٻٜ فَامُ وَلَا کٛ نَفِ؞» نغَمْ نٛنْ، تٛع نٜطّٛ مَنْتٛرٛو نٜطّٛ! نغَمْ کٛو طُمٜ اٛنٛنْ نجٜيِطُمْ؞ کٛو بُلُسْ، کٛو اَفٛولٛسْ، کٛو بِيتُرُسْ، کٛو دُونِيَارُ، کٛو يٛنْکِ، کٛو مَيْدٜ، کٛو کٛ وٛنِ جٛونِ، کٛو کٛ وٛنِ يٜىٰسٛ طٛعٛ، طُمْ فُو اُمْ طُمْ مٛوطٛنْ؞ اٛنٛنْ بٛو طُمْ ٻٜ اَلْمَسِيحُ؞ اَلْمَسِيحُ بٛو طُمْ مٛ اَللَّه؞ کٛشّٜىٰمِنْ مِنْ مَشُّٻٜ اَلْمَسِيحُ ٻٜ اَللَّه حٛکِّ کُوغَلْ وَعَجِنْکِ سِرُّ مَاکٛ؞ فِي غٛعٛ کٛ طُمْ يِطِ تٛ اِرِ ٻٜنْ طٛنْ مَشُّٻٜ ٻٜ نغَطَ کٛو طُمٜ کٛ جٜيْطٛٻٜ وِعِ؞ اَمَّا مِ وَنَّايِ دٛوْ نٛ نغِيرٛتٛنْ کُوغَلْ اَمْ، کٛو بٛو نٛ وٛٻّٜ نغِيرَتَنغَلْ؞ مِنْ اٜ حٛورٜ اَمْ مِ فٛوندَتَا حٛورٜ اَمْ؞ ٻٜرْندٜ اَمْ اٜ رَنِّ تَرْ، اَمَّا نٛنْ حٛلَّايِ مِ وَطَايِ غٛطُّمْ کٛ وٛوطَا؞ جٛومِرَاوٛ وٛنِ دَارَيْطٛ کُوغَلْ اَمْ وِعَ کٛو کٛ نغَطُمِ اٜ وٛوطِ کٛو طُمْ وٛوطَا؞ نغَمْ نٛنْ، تٛع اٛنْ مبِعُ غٛطّٛ وَطِي کُوغَلْ نغَلْ اَللَّه حٛکِّمٛ بٛطُّمْ، کٛو اٛ وَطَايِنغَلْ بٛطُّمْ؞ کٜطٜىٰ نَا ݧَلْندٜ ندٜ جٛومِرَاوٛ وَرْتِ؞ کٛو طُمٜ شُوطِيطُمْ ندٜرْ ݧِوْرٜ اٛ وُرْتِنَيْطُمْ اٜ نجَيْرِ، ندٜنْ اٛ وُرْتِنَيْ ݧُمٛوجِ غٛنْطِ ندٜرْ ٻٜرْطٜ يِمْٻٜ اٜ نجَيْرِ؞ اٜ شَرٜلْ نغٜلْ اَللَّه وِعَيْ کٛو نٜطّٛ وَطِي کُوغَلْ نغَلْ اٛ حٛکِّمٛ بٛطُّمْ کٛو وَطَايِنغَلْ بٛطُّمْ؞ تٛو، بَنْدِرَاٻٜ، مِ حٛکُّ مِسَالُ طُعُمْ دٛوْ اَمْ اٜ دٛوْ اَفٛولٛسْ نغَمْ اٜ مِ يِطِ اٜکِّتٛوطٛنْ تٛ اَمِنْ: تٛع پَٻّٛوطٛنْ کٛ وِنْدَا، نغَمْ تٛع ڤِيٛنْ غَبَارٜ مبِعٛنْ غٛطّٛ اَرْدِيطٛ ٻُرِي غٛطّٛ؞ مٛيٜ وَرْتِرْمَا مَوْطٛ دٛوْ حٛرِيٻٜ؟ کٛو طُمٜ طُمْ نغٛودُطَا نَاع اَللَّه حٛکُّمَاطُمْ؟ تٛ طُمْ نٛنْ، نغَمْ طُمٜ اَ فِيَ غَبَارٜ مَاطَ بٛ کٛ نغٛودُطَا نَاع شَاحُ کٜٻُطَاطُمْ؟ اٛنْ نغِعَ بٛ اٛنْ نجَادَکٜ اٛنْ کٜٻِي کٛ نغِطّٛنْ! اٛنْ نغِعَ بٛ اٛنْ نجَادَکٜ اٛنْ نغَرْتِي دِسْکُٻٜ! اٛنْ نغِعَ بٛ اٛنْ نغَرْتِي لَامِيٻٜ، کٛو ندٜ مِنٛنْ نَاع مِنْ لَامِيٻٜ؞ دَا اٛنْ نغَرْتِي لَامِيٻٜ دَا وٛوطِي، سٜيْ لَامٛدٛوطٜنْ! نغَمْ اٜ يِيکِ اَمْ مِنٛنْ لِلَاٻٜ، اَللَّه وَرْتِرِيمِنْ يِمْٻٜ کٛشَّاٻٜ نَاع ٻٜ غٛطُّمْ، بٛ يِمْٻٜ ٻٜ طُمْ تَپَنِ کِيتَ مَيْدٜ بَرٜتٜىٰٻٜ يٜىٰسٛ کٛو مٛيٜ؞ مِ وِعُ نٛنْ نغَمْ مِنْ نغَرْتِي کٛ مَلَاعِکَعٜنْ اٜ يِمْٻٜ فُو نغَطَنِ غِتٜ؞ تٛو، مِنٛنْ مِنْ حَاݝَاٻٜ نغَمْ اٜ مِنْ تٛکِّ اَلْمَسِيحُ، اَمَّا اٛنٛنْ اٛنْ تٛکُّٻٜ اَلْمَسِيحُ غٛودُٻٜ فَامُ؞ مِنٛنْ مِنْ نغَلَا بَوْطٜ اَللَّه، اَمَّا اٛنٛنْ اٛنْ نغِعَ بٛ اٛنْ نغٛودِ بَوْطٜ اَللَّه نَاع سٜطَّ! يِمْٻٜ اٜ کٛکَّعٛنْ مَنْغُ، اَمَّا مِنٛنْ يِمْٻٜ اٜ نجَوَنَمِنْ؞ حَا جٛونِ اٜ مِنْ ڤِيدَ اٜ وٜىٰلٛ اٜ طٛنْکَ؞ مِنْ نغَلَا کٛلْتٜ بٛطّٜ؞ يِمْٻٜ اٜ کَلَّنَمِنْ، ندٜنْ مِنْ نغَلَا وُرٛ؞ اٜ مِنْ کُوَ اٜ جُوطٜ اَمِنْ نَاع سٜطَّ؞ تٛ يِمْٻٜ کُطِيمِنْ، سٜيْ مِنْ مبَرْکِطِنَٻٜ؞ تٛ ٻٜ تٛرِّيمِنْ، سٜيْ مِنْ مُݧَ؞ تٛ يِمْٻٜ مٜتِي حَالَ کَلُّکَ دٛوْ اَمِنْ، سٜيْ مِنْ مٜتَنَٻٜ حَالَ مبٜلْکَ؞ مِنْ نغَرْتِي مبُورِ دُونِيَارُ، مِنْ نغَرْتِي کٛ نٜفْنِي؞ حَا جٛونِ نٛنْ طُمْ وٛنِ؞ مِ وِنْدَنْعٛنْ طٜرٜوٛلْ نغٛعٛلْ نَاع نغَمْ مِ سٜمْتِنَعٛنْ، سٜيْ نِ نغَمْ مِ وَغِّنَعٛنْ نغَمْ اٛنْ ٻِٻّٜ اَمْ ٻٜ نغِطُمِ؞ کٛو دَا اٛنْ نغٛودِ مٛودِٻّٜ 10,000 ندٜرْ تٛکُّکِ اَلْمَسِيحُ، اٛنْ نغَلَا دَݧٛوٻٜ طُطْٻٜ؞ غٛونغَ، مِ وَرْتِي ݧَاکٛ مٛوطٛنْ ندٜرْ تٛکُّکِ يٜىٰسُ اَلْمَسِيحُ ندٜ نغَعَجِنَنْمِعٛنْ حَبَرُ بٜلْطُمْ؞ نغَمْ نٛنْ، اٜ مِ تٛرٛوعٛنْ، اٜکِّتٜىٰ اِرِ نغِکُّ اَمْ؞ کَنْجُمْ وَطِ لِلٛنٛيْمِعٛنْ تِمٛوتِ، ٻِطّٛ اَمْ مٛ نغِطُمِ، تٛکُّطٛ جٛومِرَاوٛ اٜ غٛونغَ؞ اٛ سِفْتٛرَنَيْعٛنْ اِرِ جٛنْدٜ ندٜ نغَطُمِ ندٜرْ تٛکُّکِ يٜىٰسُ اَلْمَسِيحُ؞ اٜ مِ اٜکِّتِنَ اِرِ جٛنْدٜ ندٜنْ کٛو تٛيٜ ندٜرْ تٛکُّٻٜ يٜىٰسُ؞ وٛٻّٜ ندٜرْ مٛوطٛنْ اٜ پٜفْتَ کٛعٜ نغَمْ اٜ ٻٜ کَمّٛو مِ وَرَتَا تٛ مٛوطٛنْ؞ اَمَّا تٛ جٛومِرَاوٛ جَٻِي مِ وَرٛيَيْ تٛ مٛوطٛنْ نَاع کٛ نٜىٰٻِ، مِ طَٻِّتَيْ مِ يِعَ اِرِ بَوْطٜ طٜ ٻٜنْ طٛنْ پٜفْتٛوٻٜ کٛعٜ نغٛودِ، نَاع مٜتٜ‑مٜتٜ مَٻّٜ تَنْ؞ نغَمْ کٛ حٛلَّتَ نٜطّٛ اٜ وَطَ کٛ اَللَّه لَامِيطٛ وِعِ، نَاع طُمْ بٛلِيطٜ مَاکٛ، اَمَّا طُمْ بَوْطٜ رُوحُ اَللَّه غٛنْطٜ ندٜرْ مَاکٛ؞ تٛو، طُمٜ ٻُرْطٛنْ يِطُکِ؟ مِ وَرْدَنَعٛنْ اٜ سَوْرُ، کٛو مِ وَرَنَعٛنْ ندٜرْ يِدّٜ اٜ مُݧَلْ؟ مِ نَنِي حَبَرُ اٜ وٛودِ نجٜىٰنُ کَلُّطُمْ حَکُّندٜ مٛوطٛنْ اِرِ نجٜىٰنُ طُمْ وَطَتَاکٜ کٛو ندٜرْ حٜىٰفٜرْٻٜ، حَا نٜطّٛ اٜ وَلْدَ اٜ دٜبّٛ ݧَاکٛ مُوطُمْ! فُو اٜ نٛنْ اٛنْ مَنْتٛرٛو کَوْتَلْ مٛوطٛنْ! نَاع اٜ حَانِ نغَنّٛنْ حَا مبُرْتِنٛنْ غَطُطٛ کُوغَلْ نغَعَلْ دَغَ ندٜرْ کَوْتَلْ مٛوطٛنْ؟ سٜيْ نغَطٛنْ نٜطّٛ غَطُطٛ نٛنْ ندٜرْ جُنْغٛ شٜيْطَنْ، نغَمْ شٜيْطَنْ تٛرَّ ٻَنْدُ مَاکٛ، نغَمْ طُمْ حِسْنَ يٛنْکِ مَاکٛ ݧَلْندٜ وَرْتٛيْکِ يٜىٰسُ جٛومِرَاوٛ؞ مَنْتِتَاکِ مٛوطٛنْ وٛوطَا؞ اٛنْ اَنْدَا نٛ پُوفِنِرْطُمْ سٜطَّ ٻُوتِنِرْتَ شٛنْدِ بُرٛودِ طُنْدِ؟ نٛنْ تٛ اٛنْ اَلِي حَکّٜ سٜطَّ ندٜرْ مٛوطٛنْ، طُمْ سَنْکِتٛتٛ کٛو تٛيٜ ندٜرْ مٛوطٛنْ؞ شٜنْدِرٜىٰ اٜ پُوفِنِرْطُمْ کِيطُمْ غٛنْطُمْ ندٜرْ مٛوطٛنْ، وَاتٛ حَکّٜ، نغَمْ نغَرْتٛنْ بٛ شٛنْدِ بُرٛودِ ندِ وَلَا پُوفِنِرْطُمْ، وَاتٛ کَوْتَلْ تٛکُّٻٜ يٜىٰسُ ٻٜ نغَلَا يِمْٻٜ غَݧُٻٜ تُوبَ دَغَ حَکّٜ مَٻّٜ، نٛنْ نٛ نغٛنْتِندِرْطٛنْ؞ نغَمْ طُمْ يَادَکٜ طُمْ حِرْسِي کَرٛورِ مٜىٰطٜنْ ندِ حُمْتٛ سَکِّنْکِ؞ کَيْرِ وٛنِ اَلْمَسِيحُ؞ نغَمْ نٛنْ، اٜنْ نغَطُ حُمْتٛ سَکِّنْکِ مٜىٰطٜنْ نَاع اٜ بُرٛودِ غٛودُطُمْ پُوفِنِرْطُمْ کِيطُمْ طُمْ حَلّٜىٰندٜ اٜ کُوطٜ کَلُّطٜ، سٜيْ نِ اٜ بُرٛودِ طُمْ وَلَا پُوفِنِرْطُمْ، وَاتٛ اٜنْ نغَطُ جٛنْدٜ لَمْندٜ ندٜ غٛونغَ؞ ندٜرْ طٜرٜوٛلْ اَمْ مِ وِنْدَنِيعٛنْ وِيکِ، تٛع اٛنْ کَوْتُ کٛعٜ مٛوطٛنْ اٜ غَطٛوٻٜ نجٜىٰنُ؞ نَاع اٜ مِ مٜتَ دٛوْ يِمْٻٜ ٻٜ دُونِيَارُ ندُعُ غَطٛوٻٜ نجٜىٰنُ، کٛو غٛودُٻٜ سُونٛ شٜىٰدٜ، کٛو وُيْٻٜ، کٛو مَوْنِنٛوٻٜ غُنْکِيجِ؞ نغَمْ تٛ نِ مِ وِعِيعٛنْ، تٛع کَوْتٛنْ کٛعٜ اٜ اِرِ يِمْٻٜ ٻٜعٜ، تٛو، سٜيْ نِ اَلٛنْ دُونِيَارُ؞ اَمَّا جٛونِ اٜ مِ وِنْدَنَعٛنْ وِيکِ، تٛع اٛنْ کَوْتُ کٛعٜ اٜ کٛو مٛيٜ نٛدّٜتٜىٰطٛ تٛکُّطٛ يٜىٰسُ، ݧَمْرُطٛ يٜىٰسٛ اٜ وَطُکِ نجٜىٰنُ، کٛو غٛودُطٛ سُونٛ شٜىٰدٜ، کٛو مَوْنِنٛووٛ غُنْکِيجِ، کٛو مٜتٛووٛ کَلُّکَ دٛوْ غٛطّٛ، کٛو جَرٛووٛ، کٛو غُجّٛ؞ تٛع مَا اٛنْ ݧَمْدُ اٜ اِرِ مَٻّٜ؞ نَاع طُمْ کُوغَلْ مٜىٰطٜنْ نغَطَنٜنْ يِمْٻٜ ٻٜ تٛکَّايِ يٜىٰسُ کِيتَ؞ کُوغَلْ مٛوطٛنْ وٛنِ نغَطَنٛنْ غٛنْٻٜ ندٜرْ کَوْتَلْ مٛوطٛنْ نغَلْ تٛکُّٻٜ يٜىٰسُ کِيتَ؞ اَللَّه وٛنِ غَطَنَيْطٛ يِمْٻٜ ٻٜ تٛکَّايِ يٜىٰسُ کِيتَ؞ نٛ اَايَارٜ وِعِ، «اٛنٛنْ، ندِيوٜىٰ غَطٛووٛ کٛ حَلِّ دَغَ ندٜرْ مٛوطٛنْ؞» تٛ غٛطّٛ مٛوطٛنْ وُلّٛيْتٛ غٛطّٛ تٛکُّطٛ يٜىٰسُ، نَاع طُمْ شٜمْتِنِيطُمْ اٛ وُلّٛيٛومٛ تٛ ٻٜ تٛکَّايِ يٜىٰسُ؟ نَاع اٜ حَانِ اٛ وُلّٛيٛومٛ تٛ تٛکُّٻٜ يٜىٰسُ؟ اٛنْ اَنْدَا ݧَلْندٜ غٛعٛ يِمْٻٜ اَللَّه نغَطَنَيْ دُونِيَارُ کِيتَ؟ تٛ طُمْ اٛنٛنْ نغَطَنْتَ دُونِيَارُ کِيتَ، نغَمْ طُمٜ اٛنْ مبَاوَتَا نغَطَنٛنْ يِمْٻٜ کِيتَ دٛوْ شَطُّمْ ڤَمَرُمْ؟ اٛنْ اَنْدَا اٜنْ نغَطَنَيْ مَلَاعِکَعٜنْ کِيتَ؟ تٛ طُمْ نٛنْ، اٛنْ مبَاوَيْ شِرْيٛوتِرٛنْ شِيَ فَمْفَمْتِرْکِ حَکُّندٜ يِمْٻٜ! نغَمْ نٛنْ، تٛ اٛنْ نغٛودِ شِيَ فَمْفَمْتِرْکِ، نغَمْ طُمٜ نجَارٛتٛنْطُمْ تٛ يِمْٻٜ ٻٜ تٛکُّٻٜ يٜىٰسُ کٛشِّ نَاع ٻٜ غٛطُّمْ؟ مِ وِعُ نٛنْ نغَمْ مِ سٜمْتِنَعٛنْ؞ جٛونِ، وَلَا کٛو غٛعٛتٛ ندٜرْ مٛوطٛنْ غٛودُطٛ فَامُ بَاوَيْطٛ سِرْيٛوتِرَ کٛولِيٻٜ يٜىٰسُ؟ اَمَّا کٛولِيطٛ يٜىٰسُ وُلّٛيٛو کٛولِيطٛ يٜىٰسُ، حَا يٜىٰسٛ ٻٜ کٛولَاکِ يٜىٰسُ! وُلّٛوتِرْکِ حَکُّندٜ مٛوطٛنْ طُمْ شٜمْتِنِيطُمْ؞ نَاع طُمْ ٻُرِي مُݧٛنْ تٛ يِمْٻٜ نغَطَنِيعٛنْ کٛ وٛوطَا؟ نَاع طُمْ ٻُرِي مُݧٛنْ تٛ طُمْ پٛيْرِيعٛنْ طُمْ جَٻَنِيعٛنْ کٛ نغٛودُطٛنْ؟ اَمَّا اٛنٛنْ اٜ کٛعٜ مٛوطٛنْ حَا اٛنْ نغَطَنَ وٛٻّٜ تٛکُّٻٜ يٜىٰسُ کٛ وٛوطَا اٛنْ پٛيْرَٻٜ اٛنْ نجَٻَنَٻٜ کٛ ٻٜ نغٛودِ! اٛنْ اَنْدَا غَطٛوٻٜ کٛ وٛوطَا نَتَّتَا لَامُ اَللَّه؟ تٛع اٛنْ نجَٻُ طُمْ مَجِّنَعٛنْ؞ غَطٛوٻٜ نجٜىٰنُ، کٛو اٜ ٻٜ نغٛودِ تٜىٰغَلْ کٛو ٻٜ نغَلَا تٜىٰغَلْ، اٜ مَوْنِنٛوٻٜ غُنْکِيجِ، اٜ غَطٛوٻٜ لُوطُ، اٜ وُيْٻٜ، اٜ غٛودُٻٜ سُونٛ شٜىٰدٜ، اٜ جَرٛوٻٜ، اٜ مٜتٛوٻٜ کَلُّکَ دٛوْ وٛٻّٜ، اٜ وُيْٻٜ تٜىٰتٛوٻٜ، ٻٜ فُو ٻٜ نَتَّتَا لَامُ اَللَّه؞ ندٜنّٛ نٛنْ وٛٻّٜ مٛوطٛنْ مبَعِ؞ اَمَّا جٛونِ طُمْ لٛوتِي حَکّٜ مٛوطٛنْ، اٛنْ نغَرْتِرَامَ يِمْٻٜ اَللَّه، اٛنْ نغَرْتِرَامَ اَادِلِعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ اٜ رُوحُ اَللَّه؞ وٛٻّٜ مٛوطٛنْ مبِعَيْ، «طُمْ جَٻِي مِ وَطَ کٛو طُمٜ،» اَمَّا اٜ مِ وِعَعٛنْ نَاع کٛو طُمٜ نَفَنْتَعٜنْ؞ طُمْ جَٻِي مِ وَطَ کٛو طُمٜ، اَمَّا مِ وَرْتَتَا مَشُّطٛ کٛو طُمٜ؞ طٛنْمَا وٛٻّٜ مٛوطٛنْ مبِعَيْ، «طُمْ وَطِي ݧَمْندُ نغَمْ رٜىٰدُ، نٛنْ مَا طُمْ وَطِي رٜىٰدُ نغَمْ ݧَمْندُ،» اَمَّا شَرٜلْ اٜ وَرَ نغٜلْ اَللَّه وَرْتِرْتَ فُو طِطُمْ کٛو کٛ نَفِ؞ ٻَنْدُ وَطَاکَ نغَمْ نجٜىٰنُ، اَمَّا ندُ وَطَا نغَمْ جٛومِرَاوٛ، ندٜنْ جٛومِرَاوٛ جٜيِندُ؞ اَللَّه اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ، اٜنٜنْ مَا اٛ اُمِّنَيْعٜنْ دَغَ مَيْدٜ بَرْکَ بَوْطٜ مَاکٛ؞ اٛنْ اَنْدَا ٻَلِّ مٛوطٛنْ طُمْ جٛکّٛوطٜ ٻَنْدُ اَلْمَسِيحُ؟ تٛو، مِ حٛشَّيْ ٻَنْدُ اَلْمَسِيحُ مِ حَوْتَندُ اٜ ٻَنْدُ کَارُوَاجٛ؟ سَمْ، مِ وَطَتَا نٛنْ! اٛنْ اَنْدَا فُو کَوْتُطٛ ٻَنْدُ اٜ کَارُوَاجٛ ٻٜ نغَرْتِي ٻَنْدُ غٛعٛ وٛنْ طٛنْ؟ نغَمْ نٛ اَايَارٜ وِعِ، «کَمْٻٜ طِطٛ ٻٜ نغَرْتَ ٻَنْدُ غٛعٛ؞» اَمَّا فُو شُمْڤٛوتِرٛووٛ اٜ جٛومِرَاوٛ، کَنْکٛ اٜ جٛومِرَاوٛ ٻٜ نغَرْتِي غٛعٛ؞ نغٛطِّتٜىٰ وَطُکِ نجٜىٰنُ! کٛو طُمٜ حَکّٜ طُمْ نٜطّٛ وَطَتَ، طُمْ مٜىٰمَتَا ٻَنْدُ مَاکٛ، اَمَّا غَطٛووٛ نجٜىٰنُ اٜ وٛنَّ ٻَنْدُ مُوطُمْ؞ اٛنْ اَنْدَا ٻَلِّ مٛوطٛنْ طُمْ وُرٛ تٛ رُوحُ اَللَّه جٛوطٛتٛو؟ اَللَّه حٛکِّيعٛنْطُمْ طُمْ جٛوطٛو ندٜرْ مٛوطٛنْ؞ نَاع اٛنٛنْ نجٜيِ کٛعٜ مٛوطٛنْ؞ اَللَّه حٛکِّي ٻِطّٛ مُوطُمْ نغَمْ اٛ وَرْتِرَعٛنْ ٻٜ مَاکٛ؞ نغَمْ نٛنْ، مَوْنِنِرٜىٰ اَللَّه اٜ ٻَلِّ مٛوطٛنْ؞ تٛو، جٛونِ مِ نٛوتٛتٛ پَمٛلْ نغٛلْ پَمْطٛنْيَمْ ندٜرْ طٜرٜوٛلْ نغٛلْ مبِنْدٛنٛيْطٛنْيَمْ: اٜ طُمْ وٛوطِ تٛع نٜطّٛ تٜعَ؞ اَمَّا ندٜ اٜ وٛودِ نجٜىٰنُ نَاع سٜطَّ حَکُّندٜ يِمْٻٜ، اٜ حَانِ کٛو مٛيٜ نٜطّٛ تٜعَ، ندٜنْ کٛو مٛيٜ دٜبّٛ وَطَ تٜىٰغَلْ؞ غٛرْکٛ حٛکَّ دٜبّٛ مُوطُمْ ٻَنْدُ مُوطُمْ نٛ دٛوکَ تٜىٰغَلْ وِعِ؞ نٛنْ مَا دٜبّٛ اٛنْ حٛکَّ غٛرْکٛ مُوطُمْ ٻَنْدُ مُوطُمْ نٛ دٛوکَ تٜىٰغَلْ وِعِ؞ نغَمْ دٜبّٛ جٜيَايِ ٻَنْدُ مُوطُمْ؛ غٛرْکٛ مَاکٛ جٜيِندُ؞ نٛنْ مَا غٛرْکٛ جٜيَايِ ٻَنْدُ مُوطُمْ، دٜبّٛ مَاکٛ جٜيِندُ؞ تٛع اٛنْ نغَݧُ وَلْدُکِ تٛ نَاع نٛنْ شِرْيِيطٛنْ حَکُّندٜ مٛوطٛنْ نغَمْ شَرٜلْ سٜطَّ، نغَمْ نغَطٛنْ حَکِّيلٛ مٛوطٛنْ دٛوْ دٛعَارٜ؞ غَطَ مَاجُمْ ݧَمْرٛنْ يٜىٰسٛ اٜ وَلْدُکِ نغَمْ تٛع شٜيْطَنْ فٛوطَعٛنْ نغَطٛنْ کٛ وٛوطَا نغَمْ شِيَ سُرُکِ کٛعٜ مٛوطٛنْ؞ کٛ مبِيمِعٛنْ، طُمْ شَاوٛرِ، نَاع طُمْ دٛوکَ؞ مِنْ مِ ٻُرِي يِطُکِ دَا کٛو مٛيٜ وَلَا تٜىٰغَلْ بٛ اَمْ! اَمَّا کٛو مٛيٜ اٜ اِرِ دٛکَّلْ نغَلْ اَللَّه حٛکِّمٛ، اٛعٛ اٜ نغَلْ مُوطُمْ، اٛنْ طَاعٜ اٜ نغَلْ مُوطُمْ؞ جٛونِ دٛوْ يِمْٻٜ ٻٜ نغَلَا تٜىٰغَلْ اٜ رٜوْٻٜ ٻٜ وٛرْٻٜ مَٻّٜ مَايِ، اٜ مِ وِعَ طُمْ ٻُرِي تٛع ٻٜ نغَطَ تٜىٰغَلْ بٛ اَمْ؞ اَمَّا تٛ ٻٜ مبَاوَتَا سُرُکِ کٛعٜ مَٻّٜ، اٜ حَانِ ٻٜ نغَطَ تٜىٰغَلْ؞ نغَمْ طُمْ ٻُرِي نٜطّٛ وَطَ تٜىٰغَلْ دٛوْ سُونٛ نجٜىٰنُ نَنْغَمٛ؞ غٛودُٻٜ تٜىٰغَلْ بٛو اٜ مِ حٛکَّٻٜ دٛوکَ طُعُمْ؞ نَاع طُمْ مِنْ حٛکِّطُمْ، جٛومِرَاوٛ حٛکِّطُمْ: تٛع دٜبّٛ يٛوفَ غٛرْکٛ مُوطُمْ؞ تٛ بٛو اٛ يٛوفِي غٛرْکٛ مَاکٛ، دٛولٜ اٛ وَطَتَا وٛنْغَلْ تٜىٰغَلْ، کٛو بٛو اٛ سِرْيٛوتِرَ اٜ غٛرْکٛ مَاکٛ؞ نٛنْ مَا تٛع غٛرْکٛ يٛوفَ دٜبّٛ مُوطُمْ؞ دٛوْ حٛرِيٻٜ بٛو اٜ مِ وِعَ طُعُمْ، نَاع جٛومِرَاوٛ وِعِکَ، مِنْ اٜ حٛورٜ اَمْ وِعِکَ؞ تٛ غٛطّٛ کٛولِيطٛ يٜىٰسُ اٜ وٛودِ دٜبّٛ مٛ حٛولَاکِ يٜىٰسُ، تٛ دٜبّٛ اٛنْ جَٻِي نجٛوطٛدٛو اٜ مَاکٛ، تٛو، تٛع اٛ يٛوفَمٛ؞ نٛنْ مَا تٛ دٜبّٛ کٛولِيطٛ يٜىٰسُ اٜ وٛودِ غٛرْکٛ مٛ حٛولَاکِ يٜىٰسُ، تٛ غٛرْکٛ اٛنْ جَٻِي جٛوطٛدٛو اٜ مَاکٛ، تٛع دٜبّٛ اٛنْ يٛوفَمٛ؞ نغَمْ غٛرْکٛ مٛ حٛولَاکِ يٜىٰسُ اٜ لَاٻِنٜىٰ بَرْکَ تٜىٰغَلْ مَاکٛ اٜ دٜبّٛ کٛولِيطٛ يٜىٰسُ؞ نٛنْ مَا دٜبّٛ مٛ حٛولَاکِ يٜىٰسُ اٜ لَاٻِنٜىٰ بَرْکَ تٜىٰغَلْ مَاکٛ اٜ غٛرْکٛ کٛولِيطٛ يٜىٰسُ؞ دَا نَاع طُمْ نٛنْ، دَا ٻِٻّٜ مٛوطٛنْ نغَرْتِي ٻٜ لَاٻَا، اَمَّا نٛ طُمْ وٛنْتِندِرِ جٛونِ ٻٜ نغَرْتِي لَٻّٜ؞ اَمَّا تٛ نٜطّٛ مٛ حٛولَاکِ يٜىٰسُ اٜ يِطِ يٛوفَ دٜبّٛ مُوطُمْ کٛولِيطٛ يٜىٰسُ، تٛو، سٜيْ اٛ يٛوفَمٛ؞ تٛ اِرِ نٛنْ وَطِي، کٛولِيطٛ يٜىٰسُ غٛرْکٛ کٛو دٜبّٛ نَاع طُمْ دٛولٜ اٛ جٛوطٛدٛو اٜ مٛ حٛولَاکِ يٜىٰسُ، نغَمْ اَللَّه سُٻِيعٜنْ نغَمْ نجٛوطٛدٛوطٜنْ جَمْ؞ اَنْ دٜبّٛ کٛولِيطٛ يٜىٰسُ، اَ اَنْدَا طُمْ غَطٛتٛوطُمْ نغَرْتَا لَاوٛلْ حِسْنُکِ غٛرْکٛ مَاطَ؟ اَنْ غٛرْکٛ کٛولِيطٛ يٜىٰسُ، اَ اَنْدَا طُمْ غَطٛتٛوطُمْ نغَرْتَا لَاوٛلْ حِسْنُکِ دٜبّٛ مَاطَ؟ اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ جٛومِرَاوٛ سُٻِرِ اٛ جٛوطٛرٛو نٛنْ نٛ اٛ وٛنْتِندِرْنٛو کٛ اَللَّه نٛدَّمٛ؞ کَنْجُمْ وٛنِ کٛ اٜکِّتِنَيْمِ کٛو تٛيٜ ندٜرْ تٛکُّٻٜ يٜىٰسُ؞ نٜطّٛ نَادَاطٛ کٛ اَللَّه نٛدَّمٛ، تٛع اٛ طَٻِّتَ وَرْتُکِ مٛ نَادَاکَ؞ نٛنْ مَا نٜطّٛ مٛ نَادَاکَ کٛ اَللَّه نٛدَّمٛ، تٛع اٛ طَٻِّتَ وَرْتُکِ نَادَاطٛ؞ نَادٜىٰکِ نَاع طُمْ غٛطُّمْ، نٛنْ مَا شِيَ نَادٜىٰکِ نَاع طُمْ غٛطُّمْ؞ اَمَّا وَطُکِ کٛ اَللَّه وِعِ ٻُرِي کٛو طُمٜ؞ اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ اَللَّه سُٻِرِ اٛ جٛوطٛرٛو؞ تَا مَشُّطٛ شَرٜلْ کٛ اَللَّه نٛدُّمَا، تَاع وَنُّ دٛوْ مَاجُمْ؞ اَمَّا تَا حٜٻِي لَاوٛلْ رِمْطِنٜىٰکِ، وَطُطُمْ؞ تٛ نٜطّٛ اٛ مَشُّطٛ شَرٜلْ کٛ جٛومِرَاوٛ نٛدِّمٛ، اٛ وَرْتِي رِمْطِنَاطٛ جٛومِرَاوٛ؞ نٛنْ مَا تٛ نٜطّٛ نَاع اٛ مَشُّطٛ شَرٜلْ کٛ اَللَّه نٛدِّمٛ، اٛ وَرْتِي مَشُّطٛ اَلْمَسِيحُ؞ اَللَّه حٛکِّي ٻِطّٛ مُوطُمْ نغَمْ اٛ وَرْتِرَعٛنْ ٻٜ مَاکٛ؞ نغَمْ نٛنْ، تٛع اٛنْ نغَرْتُ مَشُّٻٜ يِمْٻٜ؞ تٛو، بَنْدِرَاٻٜ اَمْ، اٜ حَانِ کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ اَللَّه سُٻِرِ اٛ جٛوطٛرٛو يٜىٰسٛ مَاکٛ؞ جٛونِ مِ نٛوتٛتٛ پَمٛلْ نغٛلْ پَمْطٛنْيَمْ ندٜرْ طٜرٜوٛلْ نغٛلْ مبِنْدٛنٛيْطٛنْيَمْ دٛوْ يِمْٻٜ ٻٜ نغَلَا تٜىٰغَلْ؞ جٛومِرَاوٛ وِعَايِيَمْ غٛطُّمْ دٛوْ مَٻّٜ، اَمَّا مِ حٛکَّيْ شَاوٛرِ؞ مِ تَبِّتِنِي اٛنْ نجَٻَيْ کٛ مبِيمِ نغَمْ جٛومِرَاوٛ وَرْتِرِييَمْ کٛولَاطٛ بَرْکَ يُرْمٜىٰندٜ مَاکٛ؞ نغَمْ تٛرَّاجِ طِ نغٛنْطٜنْ ندٜرْ حَنْدٜ، اٜ يِيکِ اَمْ طُمْ ٻُرِي کٛو مٛيٜ ݧَمْرَ يٜىٰسٛ اٜ وَطُکِ جٛنْدٜ نٛنْ نٛ وٛنْتِندِرِ؞ تَا وٛودِ دٜبّٛ، تَاع طَٻُّتُ يٛوفُکِمٛ؞ تَا وَلَا دٜبّٛ بٛو، تَاع طَٻُّتُ تٜعُکِ؞ اَمَّا تَا وَطِي تٜىٰغَلْ، نَاع حَکّٜ نغَطَّا؞ طٛنْمَا تٛ سُرْبَاجٛ وَطِي تٜىٰغَلْ، نَاع حَکّٜ اٛ وَطِ؞ فُو اٜ نٛنْ، فُو غَطُٻٜ تٜىٰغَلْ نجَرَيْ تٛرَّ ندٜرْ جٛنْدٜ مَٻّٜ؞ مِنْ بٛو، مِ يِطَا نجَرٛنْ کَنْ طٛنْ تٛرَّ؞ بَنْدِرَاٻٜ اَمْ، کٛ نغِطُمِ وِيکِ وٛنِ نَاع کٛ نٜىٰٻِ يٜىٰسُ اَلْمَسِيحُ وَرْتٛيَيْ دُونِيَارُ؞ دَغَ جٛونِ غٛودُٻٜ تٜىٰغَلْ تٛع ٻٜ نغَطَ حَکِّيلٛ مَٻّٜ دٛوْ مَاغَلْ تَنْ؞ وٛيٛوٻٜ نغَمْ مَيْدٜ، اٜ وٜلْوٜلْتٛوٻٜ، اٜ لُومٛتٛوٻٜ، اٜ کُوتِرٛوٻٜ کٛ وٛنِ ندٜرْ دُونِيَارُ ندُعُ، تٛع ٻٜ نغَطَ حَکِّيلٛ مَٻّٜ دٛوْ مَاجُمْ تَنْ، نغَمْ دُونِيَارُ ندُعُ اٜ کٛ وٛنِ ندٜرْ مَيْرُ طُمْ پَٻّٛتٛوطُمْ؞ اٜ مِ يِطِ نغَطٛنْ جٛنْدٜ ندٜ وَلَا وَنَّارٜ؞ غٛرْکٛ مٛ وَلَا دٜبّٛ اٜ مٛ وَطَ ٻٜرْندٜ مَاکٛ فُو دٛوْ وَطُکِ کُوغَلْ جٛومِرَاوٛ، نغَمْ اٜ مٛ يِطِ اٛ وٜلْنَنَ جٛومِرَاوٛ ٻٜرْندٜ؞ اَمَّا غٛودُطٛ دٜبّٛ بٛو اٜ وَنِّ اٜ فِي دُونِيَارُ، نغَمْ اٜ مٛ يِطِ اٛ وٜلْنَنَ دٜبّٛ مَاکٛ ٻٜرْندٜ؞ حَکِّيلٛ مَاکٛ سٜنْدَکٜ طِطِ وٛنْ طٛنْ؞ طٛنْمَا سُرْبَاجٛ کٛو دٜبّٛ مٛ وَطَايِ تٜىٰغَلْ اٜ مٛ وَطَ ٻٜرْندٜ مَاکٛ فُو دٛوْ وَطُکِ کُوغَلْ جٛومِرَاوٛ، نغَمْ اٛ وَرْتَ لَاٻُطٛ ندٜرْ فُو کٛ اٛ وَطَتَ اٜ کٛ اٛ ݧُمَتَ؞ دٜبّٛ غٛودُطٛ تٜىٰغَلْ بٛو اٜ مٛ وَنِّ اٜ فِي دُونِيَارُ، نغَمْ اٜ مٛ يِطِ اٛ وٜلْنَنَ غٛرْکٛ مَاکٛ ٻٜرْندٜ؞ مِ وِعُ نٛنْ نغَمْ ٻٜيْدَارِ مٛوطٛنْ، نَاع نغَمْ مِ ٻِطَّعٛنْ، اَمَّا نغَمْ نغَطٛنْ جٛنْدٜ مٛوطٛنْ نٛ حَانِ، تٛکّٛنْ جٛومِرَاوٛ اٜ ٻٜرْندٜ غٛعٛ؞ تٛ نٜطّٛ وَطِدِي اَلْکَوَلْ تٜىٰغَلْ اٜ سُرْبَاجٛ، تٛ اٜ مٛ ݧُمَ اٜ مٛ وَطَنَ سُرْبَاجٛ اٛنْ کٛ حَانَا، تٛ اٛ وَاوَتَا سُرُکِ سُونٛ مَاکٛ، اٜ مٛ ݧُمَ اٜ حَانِ اٛ تٜعَمٛ، تٛو، سٜيْ اٛ تٜعَمٛ، نَاع طُمْ حَکّٜ؞ اَمَّا تٛ اٛ سُٻِي ندٜرْ ٻٜرْندٜ مَاکٛ تٛع اٛ تٜعَ سُرْبَاجٛ اٛنْ، کَدِنْ تٛ وَلَا دٛولُطٛمٛ اٛ تٜعَمٛ، اَمَّا اٜ مٛ سُرِ سُونٛ مَاکٛ، اٛ وَطِي کٛ حَانِ؞ نغَمْ نٛنْ، فُو تٜعُطٛ سُرْبَاجٛ مٛ اٛ وَادِ اَلْکَوَلْ تٜىٰغَلْ وَطِي کٛ وٛوطِ، اَمَّا نٜطّٛ مٛ وَطَايِ تٜىٰغَلْ وَطِي کٛ ٻُرِ وٛوطُکِ؞ تٜىٰغَلْ حَٻِّي دٜبّٛ اٜ غٛرْکٛ مُوطُمْ، تٛ نِ غٛرْکٛ اٛنْ اٜ فٛوفَ؞ تٛ بٛو غٛرْکٛ اٛنْ مَايِي، اٛ وَاوَيْ اٛ تٜىٰرَ اٜ مٛ اٛ يِطِ فُو، اَمَّا سٜيْ نِ اٛ تٜىٰرَ اٜ تٛکُّطٛ يٜىٰسُ؞ اَمَّا اٜ مِ ݧُمَ اٛ ٻُرَيْ نَنْکِ بٜلْطُمْ تٛ اٛ وَطَايِ تٜىٰغَلْ، ندٜنْ اٜ يِيکِ اَمْ اٜ مِ وٛودِ رُوحُ اَللَّه؞ تٛو، جٛونِ دٛوْ کٛ طُمْ سَکَّنِ غُنْکِيجِ، اٜنْ اَنْدِ اٜنْ فُو اٜنْ نغٛودِ اَنْدَلْ؞ اَنْدَلْ بٛو اٜ وَدَّ مَنْغُ حٛورٜ، اَمَّا يِدّٜ اٜ سٜمْبِطِنَ يِمْٻٜ؞ فُو ݧُمٛووٛ اٜ اَنْدِ غٛطُّمْ، تٛو، حَا جٛونِ اٛ وَلَا اَنْدَلْ نٛ حَانِ؞ اَمَّا نٜطّٛ غِطّٛ اَللَّه، اَللَّه اٜ اَنْدِمٛ؞ نغَمْ نٛنْ، دٛوْ ݧَامُکِ کٛ طُمْ سَکَّنِ غُنْکِيجِ، اٜنْ اَنْدِ نغُنْکِوَ نَاع طُمْ غٛطُّمْ ندٜرْ دُونِيَارُ ندُعُ، ندٜنْ اٜنْ اَنْدِ اَللَّه اٛ غٛعٛتٛ، وَلَا غٛطّٛ سٜيْ کَنْکٛ تَنْ؞ کٛو ندٜ طُمْ غَطٛتٛوطُمْ اٜ وٛودِ کٛ يِمْٻٜ نٛدَّتَ «اَلَّاجِ» تٛنْ دٛوْ کٛو ندٜرْ دُونِيَارُ، غٛونغَ بٛو اٜ وٛودِ بِعٜتٜىٰٻٜ «اَلَّاجِ» طُطِّ اٜ «جٛومِرَاٻٜ» طُطْٻٜ؞ فُو اٜ نٛنْ، تٛ مٜىٰطٜنْ اَللَّه اٛ غٛعٛتٛ، ݧَاکٛ مٛ دٛوْ، تَغُطٛ کٛو طُمٜ، ندٜنْ اٜنْ نغَطَ جٛنْدٜ نغَمْ مَاکٛ؞ طٛنْمَا اٜ وٛودِ جٛومِرَاوٛ غٛعٛتٛ، وَاتٛ يٜىٰسُ اَلْمَسِيحُ؞ بَرْکَ مَاکٛ کٛو طُمٜ تَغَا، ندٜنْ بَرْکَ مَاکٛ کٜٻُطٜنْ يٛنْکِ؞ اَمَّا نَاع کٛو مٛيٜ وٛودِ اَنْدَلْ نغَعَلْ؞ اٜ وٛودِ يِمْٻٜ مَوْنُدُٻٜ اٜ ݧُمٛ وِيکِ غُنْکِيجِ اٜ نغٛودِ يٛنْکِ؞ حَا جٛونِ بٛو تٛ ٻٜ ݧَامِي ݧَمْندُ ندُ طُمْ سَکَّنِ غُنْکِيجِ، اٜ طُمْ وَنَّٻٜ نغَمْ اٜ ٻٜ ݧُمَ کٛ ٻٜ نغَطِ طُمْ حَکّٜ؞ اَمَّا نَاع ݧَمْندُ ٻَدِّنْتَاعٜنْ حَادٜ اَللَّه؞ تٛ اٜنْ ݧَامَايِ، طُمْ اُسْتَنْتَاعٜنْ غٛطُّمْ؞ تٛ بٛو اٜنْ ݧَامِي، طُمْ ٻٜيْدَنْتَاعٜنْ غٛطُّمْ؞ اٛنْ کٛکَّامَ لَاوٛلْ ݧَامٛنْ کٛو اِرِ ندُيٜ ݧَمْندُ؞ اَمَّا ڤَامٜىٰ تٛع نٛنْ وَرْتَ کٛ مَجِّنْتَ مٛ سٜمْبِطَا ندٜرْ تٛکُّکِ يٜىٰسُ؞ اَنْ غٛودُطٛ اَنْدَلْ دٛوْ طُعُمْ، تٛ نٜطّٛ مٛ سٜمْبِطَا ندٜرْ تٛکُّکِ يٜىٰسُ يِعِي اَ ݧَامَ ݧَمْندُ ندٜرْ سُودُ غُنْکِيجِ، اٜ يِيکِ مَاطَ طُمْ سٜمْبِطِنْتَامٛ اٛ ݧَامَ ݧَمْندُ ندُ طُمْ سَکَّنِ غُنْکِيجِ؟ نٛنْ، اَنْدَلْ مَاطَ مَجِّنَيْ نٜطّٛ اٛنْ مٛ اَلْمَسِيحُ مَايِ نغَمْ مُوطُمْ؞ تَا وَطِي نٛنْ، اَ مَجِّنِي تٛکُّطٛ يٜىٰسُ مٛ سٜمْبِطَا، اَ وَطَنِي اَلْمَسِيحُ حَکّٜ؞ نغَمْ مَاجُمْ، تٛ کٛ ݧَامَيْمِ وَطِي بَنْدِرَاوٛ اَمْ وَطِي حَکّٜ، تٛو، مِ فُطِّتَتَا مِ ݧَامَ کُسٜلْ، نغَمْ تٛع مِ وَطَ بَنْدِرَاوٛ اَمْ وَطَ حَکّٜ؞ مِنْ، نَاع مِ دِمٛ؟ نَاع مِ لِلَاطٛ؟ نَاع مِ يِعِي يٜىٰسُ جٛومِرَاوٛ مٜىٰطٜنْ؟ نَاع اٛنْ نغَرْتِي تٛکُّٻٜ يٜىٰسُ بَرْکَ کُوغَلْ اَمْ نغَلْ جٛومِرَاوٛ؟ کٛو تٛ نَاع مِ لِلَاطٛ تٛ وٛٻّٜ، مِ تَبِّتِنِي مِ لِلَاطٛ تٛ مٛوطٛنْ! نغَمْ اٛنٛنْ نغٛنِ کٛ تَبِّتِنِ مِ لِلَاطٛ جٛومِرَاوٛ؞ رَا کٛ مبِعَيْمِ غٛودُٻٜ پَمٛلْ دٛوْ لَامُ اَمْ طُمْ لِلَاطٛ؞ نَاع اٜ حَانِ مِنْ ݧَامَ مِنْ نجَرَ؟ نَاع مِنْ مبَاوَيْ مِنْ تٜعَ تٛکُّطٛ يٜىٰسُ مِنْ نجَادَ اٜ مَاکٛ کٛو تٛيٜ تٛ مِنْ نجَحَتَ نٛ لِلَاٻٜ حٛرِيٻٜ، اٜ مِݧِرَاٻٜ يٜىٰسُ جٛومِرَاوٛ، اٜ بِيتُرُسْ نغَطَتَ؟ کٛو مِنْ اٜ بَرْنَبَ تَنْ نغٛنِ لِلَاٻٜ کَانُٻٜ کُوَ نغَمْ کٜٻَ کٛ ݧَامِ؟ مٛيٜ سٛوجِيجٛ يٛٻَتَ حٛورٜ مُوطُمْ نجٛٻَارِ؟ مٛيٜ رٜمَتَ نغٜسَ اِنَبٛوجٜ طُمْ حَطَمٛ ݧَامُکِ ٻِکّٛيْ کٛيْ؟ مٛيٜ دُرَتَ اٛرْندٜ ندٜنْ طُمْ حَطَمٛ يَرْکِ کٛسَمْ مَاجِ؟ کٛ مبِيمِ نَاع طُمْ ݧُمٛ نٜطّٛ؞ نَاع اَتَّوْرَ مَا مٜتِي دٛوْ مَاجُمْ؟ طُمْ وِنْدَامَ ندٜرْ اَتَّوْرَ مُوسَ وِيکِ، «تَاع مَٻَّنْ نغَارِ حٛنْدُکٛ شَرٜلْ کٛ ندِ سٛرْٻَتَ؞» ندٜ اَللَّه وِعِ نٛنْ، غَعِ تَنْ اٛ وَنِّ؟ نَاع نغَمْ مٜىٰطٜنْ اٛ وِعِکَ؟ غٛونغَ نغَمْ مٜىٰطٜنْ طُمْ وِنْدَا؞ نغَمْ اٜ حَانِ کٛو مٛيٜ دٜمٛووٛ اٜ شٛرْٻٛووٛ ٻٜ نغَطَ کُوغَلْ مَٻّٜ ندٜرْ کَمُّندٜ حٜٻُکِ غٜطَلْ مَٻّٜ دَغَ نغٜسَ کَنْ؞ ندٜ مِنْ اَاوِ وٛلْدٜ اَللَّه ندٜرْ ٻٜرْطٜ مٛوطٛنْ، تٛو، طُمْ فِي مَوْطُمْ تٛ مِنْ ݧَامِي بٛتٜ مٛوطٛنْ اِرِ طُمْ دُونِيَارُ؟ تٛ وٛٻّٜ مبَاوَيْ کٜٻَ اِرِ بَلَّلْ نغَعَلْ تٛ مٛوطٛنْ، نَاع مِنْ ٻُرَيْٻٜ؟ فُو اٜ نٛنْ مِنْ کُوتِرَايِ نغٛلْ طٛنْ لَاوٛلْ، اَمَّا مِنْ مُݧِي ندٜرْ کٛو کَيٜ تٛرَّ، نغَمْ تٛع مِنْ کَطَ حَبَرُ بٜلْطُمْ دٛوْ اَلْمَسِيحُ ݧَمْرُکِ يٜىٰسٛ؞ اٛنْ اَنْدَا کُوٛوٻٜ ندٜرْ وُرٛ شٜنِينغٛ اٜ کٜٻَ ݧَمْندُ مَٻّٜ دَغَ ندٜرْ مَغّٛ؟ نٛنْ مَا کُوٛوٻٜ تٛ سَکِّرْدٜ اٜ ٻٜ کٜٻَ غٜطَلْ مَٻّٜ دَغَ ندٜرْ کٛ طُمْ سَکِّ دٛوْ مَيْرٜ؟ ندٜنْ نٛنْ مَا جٛومِرَاوٛ وِعِي وَعَجِنٛوٻٜ حَبَرُ بٜلْطُمْ اٜ حَانِ ٻٜ کٜٻَ کٛ ٻٜ ݧَامَتَ دَغَ ندٜرْ کُوغَلْ نغَلْ؞ اَمَّا مِ حُوتِرَايِ طِنْ طٛنْ لَاوِ؞ طٛنْمَا نَاع اٜ مِ وِنْدٛنٛيَعٛنْ طٜرٜوٛلْ نغٛعٛلْ نغَمْ کٛکّٛيْيَمْ غٛطُّمْ؞ طُمْ ٻُرِي مِ مَايَ دٛوْ غٛطّٛ حَطَيَمْ کٛ مَنْتٛرْتٛومِ؞ اَمَّا تٛ مِ وَعَجِنِي حَبَرُ بٜلْطُمْ، مِ مَنْتٛرْتَاکٛطُمْ، نغَمْ طُمْ دٛولٜ مِ وَعَجِنَ؞ تٛ مِ وَعَجِنَايِ حَبَرُ بٜلْطُمْ مِ وٛنِ! دَا مِنْ اٜ حٛورٜ اَمْ سُٻِ مِ وَعَجِنَ، دَا مِ حٜٻَيْ نجٛٻَارِ؞ اَمَّا تٛ نَاع مِنْ سُٻِ مِ وَعَجِنَ، کٛ نغَطَيْمِ وٛنِ اٜ مِ حُوَ کُوغَلْ نغَلْ طُمْ تَمْبِنِيَمْ؞ تٛ طُمْ نٛنْ، کٛ وٛنِ نجٛٻَارِ اَمْ؟ نجٛٻَارِ اَمْ وٛنِ وَعَجِنْکِ حَبَرُ بٜلْطُمْ شَاحُ، نَاع مِ طَٻِّتَ کٛ حَانِ مِ حٜٻَ ندٜرْ وَعَجِنْکِطُمْ؞ کٛو ندٜ نَاع مِ مَشُّطٛ کٛو مٛيٜ، مِ وَرْتِرِي حٛورٜ اَمْ مَشُّطٛ کٛو مٛيٜ نغَمْ مِ وَدّٛيَ يِمْٻٜ طُطْٻٜ تٛ اَلْمَسِيحُ؞ ندٜرْ يَحُودَنْکٛعٜنْ مِ وَرْتِرِي حٛورٜ اَمْ بٛ يَحُودَنْکٜىٰجٛ، نغَمْ مِ وَدَّٻٜ تٛ اَلْمَسِيحُ؞ کٛو ندٜ نَاع لٜيْ لَامُ اَتَّوْرَ نغٛنْمِ، ندٜرْ يِمْٻٜ غٛنْٻٜ لٜيْ لَامُ اَتَّوْرَ، مِ وَرْتِرِي حٛورٜ اَمْ بٛ غٛنْطٛ لٜيْ لَامُ اَتَّوْرَ نغَمْ مِ وَدَّٻٜ تٛ اَلْمَسِيحُ؞ ندٜرْ يِمْٻٜ ٻٜ نغَلَا لٜيْ لَامُ اَتَّوْرَ بٛو، مِ وَرْتِرِي حٛورٜ اَمْ بٛ مٛ وَلَا لٜيْ لَامُ اَتَّوْرَ نغَمْ مِ وَدَّٻٜ تٛ اَلْمَسِيحُ کَمْٻٜ مَا؞ نٛنْ حٛلَّايِ مِ تٛکَّايِ دٛوکَ اَللَّه، اَمَّا اٜ مِ تٛکَّ دٛوکَ اَلْمَسِيحُ؞ ندٜرْ يِمْٻٜ ٻٜ شٜمْبِطَا ندٜرْ تٛکُّکِ يٜىٰسُ، مِ وَرْتِرِي حٛورٜ اَمْ بٛ مٛ سٜمْبِطَا، نغَمْ مِ وَدَّٻٜ تٛ اَلْمَسِيحُ؞ مِ وَرْتِرِي حٛورٜ اَمْ بٛ کٛو اِرِ مٛيٜ نٜطّٛ نغَمْ اٜ کٛو نغٛلٜ لَاوٛلْ مِ حِسْنَ وٛٻّٜ؞ مِ وَطُ طُعُمْ فُو نغَمْ حَبَرُ بٜلْطُمْ، نغَمْ مِ حٜٻَ غٜطَلْ اَمْ ندٜرْ بَرْکَ غٛنْطُمْ ندٜرْ مَاجُمْ؞ اٛنْ اَنْدَا ندٜرْ فِجٛ دٛغُّدُ يِمْٻٜ طُطْٻٜ ندٛغَّتَ ندٜرْ فِجٛ نغٛنْ، اَمَّا نٜطّٛ غٛعٛتٛ تَنْ حٜٻَتَ دٛکَّلْ حٜٻُکِ جَالٛرْغَلْ؟ نغَمْ نٛنْ، ندٛغِّرٜىٰ نٛ کٜٻِرْتٛنْ جَالٛرْغَلْ؞ فُو غِطْٻٜ کٜٻَ جَالٛرْغَلْ ندٜرْ فِجٛ اٜ ٻٜ اٜلْتَ ٻَلِّ مَٻّٜ؞ اٜ ٻٜ نغَطَ نٛنْ نغَمْ ٻٜ کٜٻَ غِيفٛلْ کٛو ندٜ غِيفٛلْ نغٛلْ نغٛلْ دٜعٛووٛلْ؞ اَمَّا اٜنٜنْ غِيفٛلْ تَبِّتَيْنغٛلْ کٜٻٜتٜنْ؞ نغَمْ نٛنْ، مِ دٛغَّتَا بٛ نٜطّٛ غَطٛووٛ دٛغُّدُ مٜىٰرٜ؞ نٛنْ مَا مِ حَٻَتَا بٛ نٜطّٛ ڤِيٛووٛ حٜنْدُ؞ اَمَّا اٜ مِ تٛرَّ ٻَنْدُ اَمْ، اٜ مِ وَرْتِرَندُ مَشُّطٛ اَمْ، نغَمْ تٛع غَطَ مِ وَعَجِنَنِي وٛٻّٜ، مِنْ اٜ حٛورٜ اَمْ مِ دُلَّ حٜٻُکِ دٛکَّلْ نغَلْ؞ بَنْدِرَاٻٜ، اٜ مِ يِطِ اَنْدٛنْ کٛ حٜٻِ مَامَعٜنْ مٜىٰطٜنْ؞ ٻٜ نغَطِي يَادُ لٜيْ ندُولَ نجُوتُنغَ ڤٛرْتِينغَ دٛوْ، ٻٜ فُو ٻٜ کُلْتِي مَايٛ وٛطٜوٛ؞ يَادُ ندُ ٻٜ نغَطِ لٜيْ ندُولَ اٜ حُولُکِ کِ ٻٜ کُولِ مَايٛ وٛطٜوٛ بٛ ٻٜ نغَطَنَ بَڤْتِسْمَ، ٻٜ نغَرْتِ تٛکُّٻٜ مُوسَ؞ ٻٜ فُو ٻٜ ݧَامِي ݧَمْندُ غٛعٛ پِوٛيْندُ تٛ اَللَّه، ندٜنْ ٻٜ نجَرِي ندِيَمْ نغٛعٛتَمْ پِوٛيْطَمْ تٛ اَللَّه؞ نغَمْ ٻٜ نجَرِي ندِيَمْ دَغَ حَيْرٜ پِوٛيْندٜ تٛ اَللَّه يَادَيْندٜ اٜ مَٻّٜ؞ حَيْرٜ ندٜنْ بٛو وٛنِ اَلْمَسِيحُ؞ فُو اٜ نٛنْ اَللَّه نَنَايِ بٜلْطُمْ طُطْٻٜ مَٻّٜ حَا ٻٜ مبَرَا، ٻَلِّ مَٻّٜ شَنْکِتَا ندٜرْ لَدّٜ؞ فُو فِي طُعُمْ طُمْ وَطُ نغَمْ طُمْ وَرْتَ مِسَالُ تٛ مٜىٰطٜنْ، نغَمْ تٛع نغَطٜنْ سُونٛ وَطُکِ فِي کَلُّطُمْ نٛنْ نٛ ٻٜ نغَطِ؞ تٛع اٛنْ نغَرْتُ مَوْنِنٛوٻٜ غُنْکِيجِ نٛ وٛٻّٜ مَٻّٜ نغَطِ؞ نٛنْ نٛ طُمْ وِنْدِرَا، «يِمْٻٜ نجٛوطَکٜ ݧَامِي، نجَرِي، ٻٜ اُمِّي، ٻٜ نغَمِ غَمٛلْ کَلُّنغٛلْ؞» تٛع اٜنْ نغَطُ نجٜىٰنُ نٛ وٛٻّٜ مَٻّٜ نغَطِ حَا يِمْٻٜ 32,000 مَايِ ݧَلْندٜ غٛعٛ؞ تٛع اٜنْ ڤٛوندُ جٛومِرَاوٛ نٛ وٛٻّٜ مَٻّٜ نغَطِ، حَا بٛولٜ کَلْکِٻٜ؞ ندٜنْ تٛع اٛنْ مٜتِتٛ نٛ وٛٻّٜ مَٻّٜ نغَطِ حَا مَلَاعِکَاجٛ مَيْدٜ وَرِٻٜ؞ طُعُمْ فُو حٜٻُٻٜ نغَمْ طُمْ وَرْتَ مِسَالُ تٛ مٜىٰطٜنْ، ندٜنْ طُمْ وِنْدَا نغَمْ طُمْ وَغِّنَعٜنْ، اٜنٜنْ غٛنْٻٜ رٜعِرْدٜ جَامَنُ؞ نغَمْ نٛنْ، تَا ݧُمَ اَ دَرِي بٛطُّمْ، وَطُ حَکِّيلٛ تٛع نجَنَا؞ وَلَا ڤٛوندٛلْ نغٛلْ طُمْ فٛونْدَتَعٛنْ نغٛلْ طُمْ مٜىٰطَايِ فٛوندُکِ نٜطّٛ؞ اَللَّه بٛو اٛ کٜبِّنٛووٛ اَلْکَوَلْ، اٛ اَلَتَا طُمْ فٛوندَعٛنْ ڤٛوندٛلْ ٻُرْنغٛلْ سٜمْبٜ مٛوطٛنْ؞ اَمَّا ندٜرْ ڤٛوندٛلْ نغٛلْ، اٛ وَطَنَيْعٛنْ لَاوٛلْ نٛ مبُرْتٛرْتٛوطٛنْ نغَمْ مبَاوٛنْ مُݧٛنْ ندٜرْ مَغّٛلْ؞ نغَمْ نٛنْ، اٛنٛنْ ٻٜ نغِطُمِ، نغٛطِّتٜىٰ مَوْنِنْکِ غُنْکِيجِ؞ اٜ مِ مٜتَنَعٛنْ اٛنٛنْ يِمْٻٜ ٻٜ حَکِّيلٛ؞ ندَارَنٜىٰ کٛعٜ مٛوطٛنْ نغِعٛنْ کٛو کٛ مبِعَيْمِ طُمْ غٛونغَ؞ جَرْدُغٜلْ ندِيَمْ اِنَبٛجَمْ طَمْ نجَرٜتٜنْ ندٜرْ کِرْتَارِ جٛومِرَاوٛ طَمْ نغٜتّٜتٜنْ اَللَّه نغَمْ مَاجَمْ، تٛ اٜنْ نجَرِيطَمْ، نَاع اٜنْ کٜٻَيْ بَرْکَ غٛنْطُمْ ندٜرْ پِيپَمْ اَلْمَسِيحُ؟ ندٜنْ بُرٛودِ طُمْ شٜنْدٜتٜنْ، تٛ اٜنْ ݧَامِيطُمْ، نَاع اٜنْ کٜٻَيْ بَرْکَ غٛنْطُمْ ندٜرْ ٻَنْدُ اَلْمَسِيحُ؟ ندٜ بُرٛودِ طُمْ طُمْ غٛعٛتُمْ، اٜنٜنْ طُطْٻٜ اٜنْ نغَرْتِي بٛ ٻَنْدُ غٛعٛ، نغَمْ اٜنْ فُو بُرٛودِ غٛعٛ ݧَامٜتٜنْ؞ ندَارٜىٰ ٻِٻّٜ اِسْرَاعِيلَ؛ ݧَامٛوٻٜ کٛ طُمْ سَکِّ، نَاع ٻٜ نغَرْتِي غٛعٛ ندٜرْ مَوْنِنْکِ اَللَّه؟ طُمٜ نغِطُمِ وِيکِ؟ کٛ طُمْ سَکَّنِ نغُنْکِوَ طُمْ غٛطُّمْ؟ کٛو نغُنْکِوَ طُمْ غٛطُّمْ؟ نَاع نٛنْ! اَمَّا کٛ حٜىٰفٜرْٻٜ شَکَّتَ، غِنِّ ٻٜ شَکَّنْتَ، نَاع اَللَّه؞ مِ بٛو يِطَا نغَرْتٛنْ غٛعٛ اٜ غِنِّ؞ طُمْ وَطَتَاکٛ نجَرٛنْ کٛ وٛنِ ندٜرْ جَرْدُغٜلْ جٛومِرَاوٛ، ندٜنْ فُطِّتٛنْ نجَرٛنْ کٛ وٛنِ ندٜرْ جَرْدُغٜلْ غِنِّ؞ طُمْ وَطَتَاکٛ ݧَامٛنْ کِرْتَارِ جٛومِرَاوٛ، ندٜنْ ݧَامٛنْ ݧَمْندُ غِنِّ؞ اٜنْ نغِطِ نجُکِّتٜنْ جٛومِرَاوٛ اُمِّنَنٜنْمٛ لَوْلِيرُ؟ اٜنْ ݧُمَ اٜنْ ٻُرِيمٛ سٜمْبٜ؟ وٛٻّٜ مٛوطٛنْ اٜ مبِعَ، «طُمْ جَٻِي نغَطٜنْ کٛو طُمٜ؞» طُمْ نٛنْ، اَمَّا نَاع کٛو طُمٜ نَفَنْتَعٜنْ؞ کَدِنْ اٜ ٻٜ مبِعَ، «طُمْ جَٻِي نغَطٜنْ کٛو طُمٜ؞» طُمْ نٛنْ، اَمَّا نَاع کٛو طُمٜ سٜمْبِطِنْتَعٜنْ؞ تٛع غٛطّٛ مٛوطٛنْ طَٻِّتَ کٛ نَفَنْتَمٛ تَنْ، اَمَّا اٛ طَٻِّتَ کٛ نَفَنْتَ وٛٻّٜ؞ ݧَامٜىٰ کٛو نغٜلٜ کُسٜلْ شٛورٜتٜىٰنغٜلْ تٛ لُومٛ؞ تٛع اٛنْ پَمُ کٛو طُمْ سَکَّنِينغٜلْ غُنْکِيجِ؞ نغَمْ اَايَارٜ وِعِي، «دُونِيَارُ اٜ کٛو طُمٜ کٛ وٛنِ ندٜرْ مَيْرُ، جٛومِرَاوٛ جٜيِطُمْ؞» تٛ غٛطّٛ مٛ تٛکَّايِ يٜىٰسُ نٛدِّيعٛنْ ݧَامُکِ ݧَمْندُ، تٛ اٛنْ نجَٻِي اٛنْ نجَحِي، ݧَامٜىٰ کٛو طُمٜ کٛ طُمْ حٛکِّعٛنْ، نَاع نَا اٛنْ پَمِي کٛو غُنْکِيجِ طُمْ سَکَّنِ ݧَمْندُ ندُنْ؞ اَمَّا تٛ غٛطّٛ وِعِيعٛنْ، «غُنْکِيجِ طُمْ سَکَّنِ ݧَمْندُ ندُنْ،» تٛو، تٛع اٛنْ ݧَامُندُ نغَمْ اٛنْ طٛنْ بِيطٛعٛنْکَ، کَدِنْ نغَمْ ݧُمٛ ٻٜرْندٜ؞ نَاع دٛوْ ݧُمٛ مٛوطٛنْ مٜتَيْمِ، اَمَّا اٜ مِ مٜتَ دٛوْ ݧُمٛ بِيطٛعٛنْکَ؞ نغَمْ طُمٜ ݧُمٛ غٛطّٛ حَطَتَيَمْ ݧَامُکِ کٛو طُمٜ؟ تٛ اٜ مِ يٜتَّ اَللَّه دٛوْ ݧَمْندُ اَمْ، نغَمْ طُمٜ طُمْ حُطَتَيَمْ دٛوْ کٛ نغٜتُّمِ اَللَّه ݧَامُمِ؟ تٛو، کٛو اٛنْ ݧَامَ کٛو اٛنْ نجَرَ، کٛو ندٜرْ کٛو طُمٜ طُمْ نغَطٛتٛنْ، نغَطٜىٰطُمْ نغَمْ تٜدِّنْکِ اَللَّه؞ تٛع اٛنْ نغَطُ غٛطُّمْ کٛ وٛنَّتَ ݧُمٛ غٛطّٛ، کٛو اٛ يَحُودَنْکٜىٰجٛ، کٛو طُمْ وٛنْغٛلْ لٜݧٛلْ، کٛو کَوْتَلْ يِمْٻٜ اَللَّه، نٛنْ نٛ نغِطُمِ مِ وٜلْنَنَ کٛو مٛيٜ ٻٜرْندٜ؞ مِ طَٻِّتَتَا کٛ نَفَنْتَيَمْ، اَمَّا اٜ مِ طَٻِّتَ کٛ نَفَنْتَ يِمْٻٜ طُطْٻٜ، نغَمْ ٻٜ کٜٻَ ٻٜ کِسَ؞ اٜکِّتٜىٰ تٛ اَمْ نٛ اٜکِّتٛرِيمِ تٛ اَلْمَسِيحُ؞ اٜ مِ مَنَعٛنْ نغَمْ اٛنْ نغٜجِّتَايِيَمْ ندٜرْ کٛو طُمٜ، ندٜنْ اٛنْ تٛکَّ اٜکِّتِنٛلْ نغٛلْ اٜکِّتِنْمِعٛنْ؞ اَمَّا اٜ مِ يِطِ اَنْدٛنْ، اَلْمَسِيحُ وٛنِ اَرْدِيطٛ کٛو مٛيٜ غٛرْکٛ، ندٜنْ غٛرْکٛ وٛنِ اَرْدِيطٛ دٜبّٛ مُوطُمْ، اَللَّه وٛنِ اَرْدِيطٛ اَلْمَسِيحُ؞ فُو غٛرْکٛ غَطُطٛ دٛعَارٜ کٛو اَنَّبَاکُ اٜ حُرْنِي، اٛ سٜمْتِنِي اَرْدِيطٛمٛ؞ اَمَّا فُو دٜبّٛ غَطُطٛ دٛعَارٜ کٛو اَنَّبَاکُ حُرْنَاکِ اٛ سٜمْتِنِي اَرْدِيطٛمٛ، اٛ وَرْتِي بٛ اٛ ڤٜمْبُطٛ حٛورٜ مَاکٛ؞ تٛ دٜبّٛ وَݧِي حُرْنَ حٛورٜ مُوطُمْ، سٜيْ اٛ تَپَ غَاسَ مَاکٛ؞ اَمَّا تٛ اٜ طُمْ سٜمْتِنِي دٜبّٛ تَپَ غَاسَ مُوطُمْ کٛو فٜمْبٛو، تٛو، سٜيْ اٛ حُرْنٛو؞ غٛرْکٛ حَانَايِ حُرْنَ حٛورٜ مُوطُمْ نغَمْ اٛ تَغَا ندٜرْ نَنْدِ اَللَّه ندٜنْ اٜ مٛ حٛلَّ مَنْغُ اَللَّه، اَمَّا دٜبّٛ اٜ حٛلَّ مَنْغُ غٛرْکٛ؞ نغَمْ غٛرْکٛ نَاع دَغَ ٻَنْدُ دٜبّٛ تَغَا، اَمَّا دٜبّٛ تَغَا دَغَ ٻَنْدُ غٛرْکٛ؞ نٛنْ مَا طُمْ تَغَايِ غٛرْکٛ نغَمْ دٜبّٛ، اَمَّا دٜبّٛ تَغَا نغَمْ غٛرْکٛ؞ نغَمْ طُعُمْ اٜ نغَمْ مَلَاعِکَعٜنْ، اٜ حَانِ دٜبّٛ حُرْنٛو؞ فُو اٜ نٛنْ، ندٜرْ يِمْٻٜ جٛومِرَاوٛ دٜبّٛ اٜ يِطِ بَلَّلْ غٛرْکٛ، نٛنْ مَا غٛرْکٛ اٜ يِطِ بَلَّلْ دٜبّٛ؞ دٜبّٛ اَرَنْدٜىٰجٛ اٛ تَغَا دَغَ ٻَنْدُ غٛرْکٛ، ندٜنْ وٛرْٻٜ فُو دٜبّٛ دَݧِٻٜ، اَمَّا کٛو طُمٜ دَغَ تٛ اَللَّه طُمْ پِوٛيِ؞ ݧُمٜىٰ اٜ کٛعٜ مٛوطٛنْ، اٜ طُمْ حَانِ دٜبّٛ وَطَ دٛعَارٜ حُرْنَاکِ؟ نَاع اٜ يِيکِ يِمْٻٜ، تٛ غٛرْکٛ اَلِي غَاسَ حٛورٜ مُوطُمْ جُوتِي، طُمْ شٜمْتِنِيطُمْ؟ اَمَّا تٛ دٜبّٛ اٜ وٛودِ غَاسَ نجُوتُکَ، طُمْ وَرْتِي کٛ اٛ مَنْتٛرْتٛو؞ اَللَّه حٛکِّيمٛ غَاسَ کَنْ نغَمْ کَ سُدَّنَمٛ حٛورٜ؞ تٛ بٛو غٛطّٛ اٜ يِطِ يٜدَّ حَالَ کَعَ، سٜيْ اٛ اَنْدَ مِنْ نغَلَا غٛطُّمْ ندٛنُ فٜىٰرٜ، نٛنْ مَا کٛو نغَلٜ کَوْتَلْ يِمْٻٜ اَللَّه؞ تٛو، اٜ وٛودِ کٛ نغِطُمِ وِيکِعٛنْ، مِ مَنْتَتَاعٛنْ دٛوْ مَاجُمْ، نغَمْ فُو شَرٜلْ کٛ کَوْرُتُطٛنْ نغَمْ مَوْنِنْکِ اَللَّه، حَوْرُتُکِ کِنْ نَفَنْتَاعٛنْ، سٜيْ نِ اٜ کِ ٻٜيْدَ سٛعُّکِعٛنْ غَطَ؞ اَرَنْدٜ، مِ نَنِي اٛنٛنْ تٛکُّٻٜ يٜىٰسُ تٛ اٛنْ کَوْرِتِي، اٜ وٛودِ فٜىٰرٛوتِرٛلْ حَکُّندٜ مٛوطٛنْ؞ اٜ مِ ݧُمَ اٜ وٛودِ غٛونغَ ندٜرْ حَالَ کَنْ؞ وَلَا سٜکٛ دٛولٜ طُمْ حٜٻَ فٜىٰرٛوتِرٛلْ حَکُّندٜ مٛوطٛنْ، نغَمْ طُمْ وَاوَ حٜٻْتُکِ ٻٜيٜ نغٛنِ دَرِيٻٜ اٜ غٛونغَ ندٜرْ مٛوطٛنْ؞ تٛ اٛنْ کَوْرِتِي، غٛونغَ نَاع نغَمْ ݧَامُکِ کِرْتَارِ جٛومِرَاوٛ کَوْرِتٛتٛنْ؞ نغَمْ تٛ شَرٜلْ حِرْتَاکِ وَطِي، کٛو مٛيٜ اٜ ݧَمْرَ يٜىٰسٛ اٜ ݧَامُکِ ݧَمْندُ مُوطُمْ، وَلَا کٜطٛتٛوطٛ غٛطّٛ؞ غٛطّٛ اَلْدٜىٰ اٜ وٜىٰلٛ، غٛطّٛ بٛو يَرَ نَا يِلْتَکٜ؞ تٛو، اٛنْ نغَلَا غُرٜ تٛ ݧَامٛتٛنْ نجَرٛنْ؟ کٛو اٛنْ نجَوَنَ کَوْتَلْ يِمْٻٜ اَللَّه، ندٜنْ اٛنْ شٜمْتِنَ ٻٜ نغَلَنَا؟ تٛو، کٛ مبِعَيْمِعٛنْ؟ مِ مَنَعٛنْ دٛوْ نٛنْ؟ مِ وَاوَتَا مِ مَنَعٛنْ دٛوْ مَاجُمْ کٛو سٜطَّ؞ نغَمْ کٛ نَنْمِ تٛ جٛومِرَاوٛ، کَنْجُمْ اٜکِّتِنْمِعٛنْ؞ ندٜرْ جٜمَّارٜ ندٜ طُمْ حٛکِّتِرِ جٛومِرَاوٛ مٜىٰطٜنْ يٜىٰسُ، اٛ حٛشِّ بُرٛودِ، اٛ يٜتِّ اَللَّه، اٛ سٜنْدِطُمْ، اٛ وِعِ، «طُعُمْ طُمْ ٻَنْدُ اَمْ کٛکَّاندُ نغَمْ مٛوطٛنْ؞ نغَطٜىٰ کَ وَطُکِ نٛنْ نغَمْ سِفْتٛرْکِيَمْ؞» نٛنْ مَا، غَطَ ٻٜ کِرْتَکٜ، اٛ حٛشِّ جَرْدُغٜلْ ندِيَمْ اِنَبٛجَمْ، اٛ وِعِ، «طَعَمْ اِنَبٛجَمْ نغٛنْطَمْ ندٜرْ جَرْدُغٜلْ نغٜعٜلْ کَنْجَمْ وٛنِ اَلْکَوَلْ کٜسَلْ تَبِّتَيْنغَلْ اٜ پِيپَمْ اَمْ؞ نغَطٜىٰ نٛنْ فُو شَرٜلْ نغٜلْ نجَرٛتٛنْطَمْ نغَمْ سِفْتٛرْکِيَمْ؞» فُو شَرٜلْ نغٜلْ ݧَامٛتٛنْ بُرٛودِ طُمْ ندٜنْ اٛنْ نجَرَ اِنَبٛجَمْ طَمْ، نغَطٜىٰ نٛنْ اٛنْ کٛکَّ حَبَرُ مَيْدٜ يٜىٰسُ جٛومِرَاوٛ؞ نغَطٜىٰ کَ وَطُکِ نٛنْ حَا شَرٜلْ نغٜلْ اٛ وَرْتٛيْتَ؞ نغَمْ نٛنْ، فُو ݧَامُطٛ بُرٛودِ طُمْ، کٛو يَرِي اِنَبٛجَمْ طَمْ جٛومِرَاوٛ نٛ حَانَا، اٛ وَطِي حَکّٜ وَرْتِرْکِ ٻَنْدُ جٛومِرَاوٛ اٜ پِيپَمْ جٛومِرَاوٛ مٜىٰرٜ؞ اٜ حَانِ نٜطّٛ فٛوندَ حٛورٜ مُوطُمْ کٛ اٛ ݧَامَ بُرٛودِ طُمْ اٛ يَرَ اِنَبٛجَمْ طَمْ؞ فُو ݧَامُطٛ بُرٛودِ طُمْ يَرِ اِنَبٛجَمْ طَمْ، تٛ اٛ ݧُمَايِ دٛوْ ٻَنْدُ جٛومِرَاوٛ، اٛ فٛوطَنِي حٛورٜ مَاکٛ کِيتَ لَاوٛلْ ݧَامُکِ اٜ يَرْکِ کِ اٛ وَطِ؞ کَنْجُمْ وَطِ طُطْٻٜ ندٜرْ مٛوطٛنْ ٻَلِّ مَٻّٜ شٜمْبِطَا اٛنْ نغٛودِ شِيَ نجَمُ، ندٜنْ وٛٻّٜ مٛوطٛنْ بٛو مَايِي؞ اَمَّا تٛ اٜنْ ڤٛوندِي کٛعٜ مٜىٰطٜنْ، اَللَّه وَطَنْتَاعٜنْ کِيتَ؞ تٛ جٛومِرَاوٛ نَتِّنِيعٜنْ تٛرَّ، اٜ مٛ يِطِ اٛ اٜلْتَعٜنْ، نغَمْ تٛع طُمْ تَپَنَعٜنْ کِيتَ حَوْتِ اٜ دُونِيَارُ؞ نغَمْ نٛنْ، بَنْدِرَاٻٜ اَمْ، تٛ اٛنْ کَوْرِتِي نغَمْ ݧَامُکِ کِرْتَارِ ندِنْ، کٜطٛوتِرٜىٰ؞ تٛ اٜ وٛودِ نَنٛووٛ وٜىٰلٛ ندٜرْ مٛوطٛنْ، سٜيْ اٛ ݧَامَ ݧَمْندُ تٛ وُرٛ، نغَمْ تٛع حَوْرُتُکِ مٛوطٛنْ فٛوطَنَعٛنْ کِيتَ؞ دٛوْ فِي کٛرِيطُمْ بٛو، تٛ مِ وَرِي، مِ اٜکِّتِنَيْعٛنْ دٛوْ مَاجُمْ؞ جٛونِ بَنْدِرَاٻٜ اَمْ، دٛوْ دٛکّٜ طٜ رُوحُ اَللَّه حٛکَّتَ، اٜ مِ يِطِ ڤَامٛنْ؞ اٛنْ اَنْدِ شَرٜلْ نغٜلْ نغٛنّٛوطٛنْ حٜىٰفٜرْٻٜ طُمْ فٛوطِي حَکِّيلٛ مٛوطٛنْ طُمْ مَجِّنِيعٛنْ، اٛنْ مَوْنِنَ غُنْکِيجِ طِ مٜتَتَا؞ نغَمْ نٛنْ، اٜ مِ يِطِ اَنْدٛنْ وَلَا نٜطّٛ مٛ رُوحُ اَللَّه تٛکِّنْتَ وِعَ، «يٜىٰسُ اٛ لَانَاطٛ!» نٛنْ مَا وَلَا بَاوَيْطٛ وِعَ، «يٜىٰسُ اٛ جٛومِرَاوٛ،» سٜيْ نِ تٛ رُوحُ اَللَّه تٛکِّنِيمٛ؞ تٛو، اٜ وٛودِ دٛکّٜ فٜىٰرٜ‑فٜىٰرٜ، اَمَّا رُوحُ غٛعٛتُمْ حٛکَّتَطٜ؞ اٜ وٛودِ کُوطٜ فٜىٰرٜ‑فٜىٰرٜ، اَمَّا جٛومِرَاوٛ غٛعٛتٛ حُوَنْتٜىٰطٜ؞ اٜ وٛودِ لَاوِ حُوَنْکِ اَللَّه فٜىٰرٜ‑فٜىٰرٜ، اَمَّا اَللَّه غٛعٛتٛ حٛکَّتَ کٛو مٛيٜ بَوْطٜ حُوتِرْکِطِ؞ اَللَّه اٜ حٛکَّ کٛو مٛيٜ نٜطّٛ اَلَامَ کٛلّٛوجُمْ اٜ مٛ وٛودِ رُوحُ اَللَّه نغَمْ ٻٜيْدَارِ کٛو مٛيٜ؞ رُوحُ طُمْ، کَنْجُمْ حٛکَّتَ غٛطّٛ دٛکَّلْ وٛلْدٜ فَامُ، غٛطّٛ بٛو دٛکَّلْ وٛلْدٜ اَنْدَلْ؞ کَنْجُمْ حٛکَّتَ غٛطّٛ دٛکَّلْ حٛولَاکِ اَللَّه، ندٜنْ غٛطّٛ بٛو دٛکَّلْ يَمْطِتِنْکِ ݧَوْٻٜ، غٛطّٛ کَدِنْ دٛکَّلْ وَطُکِ فِي کَيْطِنِيطُمْ، غٛطّٛ وَطُکِ اَنَّبَاکُ، غٛطّٛ بٛو مبَوْکَ فٜىٰرٛوتِرْکِ حَکُّندٜ رُوحُ اَللَّه اٜ غِنِّ، غٛطّٛ بٛو مبَوْکَ وَطِرْکِ دٛعَارٜ طٜمْطٜ طٜ ٻٜ اَنْدَا، غٛطّٛ بٛو مبَوْکَ حٛکُّکِ مَعَنَ طٜمْطٜ طٜنْ؞ فُو فِي طُعُمْ طُمْ کُوغَلْ رُوحُ غٛعٛتُمْ، کَنْجُمْ حٛکَّتَ کٛو مٛيٜ دٛکَّلْ نٛنْ نٛ طُمْ سُٻِرِ؞ ٻَنْدُ غٛعٛ اٜ وٛودِ جٛکّٛوطٜ طُطّٜ؞ فُو جٛکّٛوطٜ ٻَنْدُ ندُنْ کٛو ندٜ اٜ طٜ طُوطِ، کَنْجٜ کَوْتِ نغَرْتِ ٻَنْدُ غٛعٛ؞ تٛو، نٛنْ مَا تٛکُّٻٜ اَلْمَسِيحُ نغٛنْتِندِرِ؞ يَحُودَنْکٛعٜنْ، اٜ لٜپِّ فٜىٰرٜ، اٜ مَشُّٻٜ، اٜ نَاع مَشُّٻٜ، اٜنْ فُو اٜنْ نغَطَنَامَ بَڤْتِسْمَ ندٜرْ رُوحُ غٛعٛتُمْ نغَمْ نغَرْتٜنْ بٛ ٻَنْدُ غٛعٛ، ندٜنْ اٜنْ فُو اَللَّه حٛکِّيعٜنْ رُوحُ طُمْ؞ نغَمْ ٻَنْدُ نَاع جٛکّٛودٜ وٛعٛيْرٜ تَنْ وٛودِ، اَمَّا جٛکّٛوطٜ طُطّٜ ندُ وٛودِ؞ تٛ کٛيْنغَلْ وِعِي، «ندٜ نَاع مِ جُنْغٛ، ٻَنْدُ جٜيَايِيَمْ،» وِعُکِ نٛنْ سٜنْدَتَانغَلْ اٜ ٻَنْدُ ندُنْ؞ نٛنْ مَا تٛ نٛوْرُ وِعِي، «ندٜ نَاع مِ حِتٜرٜ، ٻَنْدُ جٜيَايِيَمْ،» وِعُکِ نٛنْ سٜنْدَتَاندُ اٜ ٻَنْدُ ندُنْ؞ تٛ ٻَنْدُ فُو وَرْتِي غِتٜ، تٛو، کٛ طُمْ نَنِرْتَ؟ تٛ ٻَنْدُ فُو وَرْتِي نٛڤِّ، کٛ طُمْ نَنِرْتَ لُمْنغٛلْ؟ اَمَّا نٛ طُمْ وٛنْتِندِرِ، اَللَّه سِرْيَکٜ جٛکّٛوطٜ ندٜرْ ٻَنْدُ، اٛ سِرْيَکٜ کٛو ندٜيٜ جٛکّٛودٜ نٛنْ نٛ اٛ يِطِرِ؞ تٛ ٻَنْدُ اٜ وٛودِ جٛکّٛودٜ غٛعٛ تَنْ، ندٜنْ نَاع طُمْ ٻَنْدُ؞ نٛ طُمْ وٛنْتِندِرِ، ٻَنْدُ ندُ وٛعٛيْرُ، اَمَّا اٜ ندُ وٛودِ جٛکّٛوطٜ طُطّٜ؞ حِتٜرٜ فٛتَايِ وِعَ جُنْغٛ، «اَ نَفَنْتَايَمْ؞» طٛنْمَا حٛورٜ فٛتَايِ وِعَ کٛيْطٜ، «اٛنْ نَفَنْتَايَمْ؞» نَاع نٛنْ طُمْ وٛنِ؞ جٛکّٛوطٜ طٜ طُمْ يِعَتَ بٛ طٜ شٜمْبِطَا، کَنْجٜ ٻُرِ نَفُکِ؞ جٛکُّلٜ ٻَنْدُ طٜ نغِعٜتٜنْ بٛ سٜطَّ تَنْ طٜ نَفِ، کَنْجٜ ٻُرْطٜنْ فَامَنْکِ بٛطُّمْ، ندٜنْ جٛکّٛوطٜ طٜ شٜمْتٜتٜنْ يِيکِ، کَنْجٜ ٻُرْطٜنْ فَامَنْکِ؞ جٛکُّلٜ مٜىٰطٜنْ ٻُرْطٜ وٛوطُکِ، نَاع نَا اٜنْ ڤَامَنِيطٜ؞ اَمَّا اَللَّه حَوْتِي جٛکّٛوطٜ ٻَنْدُ فُو؞ جٛکُّلٜ طٜ نغِعٜتٜنْ بٛ سٜطَّ تَنْ طٜ نَفِ، اٛ حٛکِّيطٜ مَنْغُ ٻُرْطُمْ، نغَمْ تٛع طُمْ حٜٻَ فٜىٰرٛوتِرٛلْ ندٜرْ ٻَنْدُ، اَمَّا جٛکّٛوطٜ طٜنْ فُو طٜ نغِطِندِرَ يِدّٜ غٛعٛ؞ تٛ وٛنْدٜ جٛکّٛودٜ نَوْنَکٜ، سٜيْ کٛرِيطٜ فُو نَنِدَ نَوْطُمْ اٜ جٛکّٛودٜ ندٜنْ؞ تٛ جٛکّٛودٜ وٛعٛيْرٜ مَوْنِنَامَ، سٜيْ کٛرِيطٜ فُو کَوْتَ مبٜلْمبٜلْتَ حَوْتِ اٜ جٛکّٛودٜ ندٜنْ؞ تٛو، اٛنٛنْ نغٛنِ ٻَنْدُ اَلْمَسِيحُ، کٛو مٛيٜ مٛوطٛنْ بٛ طُمْ جٛکّٛودٜ مَاکٛ؞ ندٜرْ کَوْتَلْ تٛکُّٻٜ يٜىٰسُ، اَرَنْدٜ اَللَّه وَرْتِرِي وٛٻّٜ لِلَاٻٜ، وٛٻّٜ بٛو اٛ وَرْتِرِيٻٜ اَنَّبٛعٜنْ، ندٜنْ وٛٻّٜ اٜکِّتِنٛوٻٜ، وٛٻّٜ بٛو غَطٛوٻٜ کُوطٜ کَيْطِنِيطٜ، وٛٻّٜ بٛو يَمْطِتِنٛوٻٜ ݧَوْٻٜ، وٛٻّٜ بٛو وَلّٛوٻٜ، وٛٻّٜ اَرْدِيٻٜ، وٛٻّٜ بٛو غَطِرٛوٻٜ دٛعَارٜ طٜمْطٜ طٜ ٻٜ اَنْدَا؞ ٻٜ فُو نغٛنِ لِلَاٻٜ؟ ٻٜ فُو نغٛنِ اَنَّبٛعٜنْ؟ ٻٜ فُو نغٛنِ اٜکِّتِنٛوٻٜ؟ ٻٜ فُو نغٛنِ غَطٛوٻٜ کُوطٜ کَيْطِنِيطٜ؟ ٻٜ فُو نغٛنِ يَمْطِتِنٛوٻٜ ݧَوْٻٜ؟ ٻٜ فُو نغٛنِ غَطِرٛوٻٜ دٛعَارٜ طٜمْطٜ طٜ ٻٜ اَنْدَا؟ ٻٜ فُو مبَاوِ حٛکُّکِ مَعَنَ طٜمْطٜ طٜنْ؟ نَاع نٛنْ! اَمَّا اٛنٛنْ طَٻِّتٜىٰ حٜٻُکِ دٛکّٜ ٻُرْطٜ مَنْغُ؞ جٛونِ مِ حٛلَّيْعٛنْ لَاوٛلْ ٻُرْنغٛلْ وٛوطُکِ؞ تٛ مِ مٜتِرِي طٜمْطٜ يِمْٻٜ اٜ طٜ مَلَاعِکَعٜنْ، اَمَّا مِ وَلَا يِدّٜ، تٛو، مِ وَرْتِي بٛ لٜنْغُرُ شٛݧٛورُ تَنْ، کٛو مبَغُّ اِيدٛووُ اٜ مٜىٰرٜ؞ تٛ اٜ مِ وَطَ اَنَّبَاکُ، ندٜنْ تٛ اٜ مِ فَامَ سِرُّوجِ اَللَّه، تٛ اٜ مِ وٛودِ اَنْدَلْ کٜوْنغَلْ، کٛو تٛ اٜ مِ وٛودِ حٛولَارٜ شٜمْبِنْدٜ حَا اٜ مِ سٛتِّنَ کٛشّٜىٰجٜ، اَمَّا مِ وَلَا يِدّٜ، تٛو، وَلَا کٛ نَفُمِ؞ تٛ مِ حٛکِّي ٻٜ نغَلَنَا فُو کٛ نغٛودُمِ، کٛو مِ جَٻِي ٻَنْدُ اَمْ وُلٜىٰ، تٛ مِ وَلَا يِدّٜ، وَلَا کٛ ٻٜيْدٛرِيمِ؞ غٛودُطٛ يِدّٜ اٜ وٛودِ مُݧَلْ، اٜ نغِکُّ بٛطُّمْ؞ اٛ وَلَا لَوْلِيرُ، اٛ مَنْتِتَتَاکٛ، اٛ وَلَا مَنْغُ حٛورٜ؞ غٛودُطٛ يِدّٜ وَطَتَا کٛ سٜمْتِنِي، اٛ طَٻِّتَتَا کٛ وَلَّتَمٛ کَنْکٛ تَنْ؞ اٛ يَاوَا مٛنُّکِ، اٛ جٛغِتَتَاکٛ فِي کَلُّطُمْ طُمْ غٛطّٛ وَطَنِمٛ؞ غٛودُطٛ يِدّٜ نَنَتَا بٜلْطُمْ حَلّٜىٰندٜ، اَمَّا اٜ مٛ نَنَ بٜلْطُمْ غٛونغَ؞ اٜ مٛ مُݧَ ندٜرْ کٛو طُمٜ؞ حٛولَارٜ مَاکٛ، اٜ کَمُّندٜ مَاکٛ، اٜ مُݧَلْ مَاکٛ رٜعَتَا؞ اَنَّبَاکُ رٜعَيْ، وَطِرْکِ دٛعَارٜ طٜمْطٜ طٜ طُمْ اَنْدَا پَٻّٛتٛ، اَنْدَلْ رٜعَيْ، اَمَّا يِدّٜ رٜعَتَا حَا اَبَدَا؞ نغَمْ اَنْدَلْ مٜىٰطٜنْ اٜ اَنَّبَاکُ مٜىٰطٜنْ نَاع طُمْ کٜوْطُمْ، اَمَّا تٛ کٜوْطُمْ وَرِي، کٛ حٜىٰوَايِ رٜعَيْ؞ شَرٜلْ کٛ نغٛنْمِ سُکَيٜلْ، مِ مٜتِي نٛ سُکَيٜلْ مٜتِرْتَ، مِ ݧُمِي نٛ سُکَيٜلْ ݧُمِرْتَ؞ اَمَّا ندٜ مَوْنُمِ، مِ اَلِي نغِکُّ سُکَاکُ؞ کٛ نغِعٜتٜنْ جٛونِ، اٜنْ نغِعَتَاطُمْ بٛطُّمْ بٛ دَارٛووٛ دَارٛغَّلْ ݧِٻُّنغَلْ، اَمَّا شَرٜلْ اٜ وَرَ نغٜلْ نغِعٜتٜنْطُمْ بٛطُّمْ؞ جٛونِ سٜطَّ تَنْ اَنْدُمِ، اَمَّا شَرٜلْ اٜ وَرَ نغٜلْ اَنْدَيْمِ اَنْدَلْ کٜوْنغَلْ، نٛنْ نٛ طُمْ اَنْدِرِيَمْ؞ تٛو، جٛونِ اٜ وٛودِ فِي تَتُمْ، وَاتٛ حٛولَارٜ، اٜ کَمُّندٜ، اٜ يِدّٜ، اَمَّا يِدّٜ وٛنِ کٛ ٻُرِي مَنْغُ؞ نغَطٜىٰ کٛ مبَاوٛتٛنْ وَطُکِ نغَرْتٛنْ غٛودُٻٜ يِدّٜ، ندٜنْ طَٻِّتٜىٰ دٛکّٜ رُوحُ اَللَّه، کٛ ٻُرِ وٛنِ دٛکَّلْ وَطُکِ اَنَّبَاکُ؞ نغَمْ غَطِرٛووٛ دٛعَارٜ طٜمْنغَلْ نغَلْ طُمْ اَنْدَا نَاع يِمْٻٜ اٛ مٜتَنْتَ، اَللَّه اٛ مٜتَنْتَ؞ وَلَا ڤَامَيْطٛ کٛ اٛ وِعَتَ، نغَمْ سِرُّوجِ اٛ مٜتَتَ لَاوٛلْ رُوحُ اَللَّه؞ اَمَّا فُو غَطُطٛ اَنَّبَاکُ، يِمْٻٜ اٛ مٜتَنْتَ، نغَمْ اٛ ٻٜيْدَنَٻٜ حٛولَارٜ، اٛ سٜمْبِطِنَٻٜ، اٛ وَلْتِنَ ٻٜرْطٜ مَٻّٜ؞ غَطِرٛووٛ دٛعَارٜ طٜمْنغَلْ نغَلْ طُمْ اَنْدَا حٛورٜ مَاکٛ اٛ سٜمْبِطِنْتَ، اَمَّا غَطٛووٛ اَنَّبَاکُ، تٛکُّٻٜ يٜىٰسُ اٛ سٜمْبِطِنْتَ؞ اٜ مِ يِطِ اٛنْ فُو نغَطِرٛنْ دٛعَارٜ طٜمْطٜ طٜ طُمْ اَنْدَا، اَمَّا مِ ٻُرِي يِطُکِ نغَطٛنْ اَنَّبَاکُ؞ نغَمْ غَطٛووٛ اَنَّبَاکُ ٻُرِي غَطِرٛووٛ دٛعَارٜ طٜمْطٜ طٜ طُمْ اَنْدَا، سٜيْ نِ تٛ اٜ مٛ حٛکَّ مَعَنَ مَاجٜ، نغَمْ اٛ سٜمْبِطِنَ تٛکُّٻٜ يٜىٰسُ؞ تٛو، جٛونِ بَنْدِرَاٻٜ اَمْ، تٛ مِ وَرِي تٛ مٛوطٛنْ مِ وَطِرِي دٛعَارٜ طٜمْطٜ طٜ طُمْ اَنْدَا، طُمٜ طُمْ ٻٜيْدَنْتَعٛنْ؟ وَلَا! سٜيْ نِ تٛ مِ وِعِيعٛنْ کٛ اَللَّه وَنْغِنَنِيَمْ، کٛو مِ اٜکِّتِنِيعٛنْ کٛ اَنْدُمِ دٛوْ اَللَّه، کٛو مِ وَطَنِيعٛنْ اَنَّبَاکُ، کٛو مِ اٜکِّتِنِيعٛنْ وٛلْدٜ اَللَّه؞ رَا مِسَالُ دٛوْ فِي طُمْ وَلَا يٛنْکِ، وَاتٛ دُودَاندُ اٜ غَرَايَارُ؞ تٛ دُودَاندُ دُودَاکَ بٛطُّمْ کٛو تٛ غَرَايَارُ ڤِيَاکَ بٛطُّمْ، نٛ طُمْ اَنْدِرْتَ دُودُکِ کِنْ کٛو ڤِيٛلْ نغٛلْ؟ طٛنْمَا، تٛ دُودٛووٛ لُوَلْ کٛنُ دُودَايِنغَلْ بٛطُّمْ، مٛيٜ سِرْيٛتٛو يَاکِ کٛنُ؟ نٛنْ طُمْ وٛنِ تٛ مٛوطٛنْ، تٛ نَاع اٛنْ نغَطِرْ دٛعَارٜ طٜمْنغَلْ نغَلْ يِمْٻٜ نَنَتَ، نٛ وَطَتَ ٻٜ ڤَامَ کٛ مبِعٛتٛنْ؟ طُمْ وَرْتَيْ بٛ اٛنْ مٜتَ اٜ مٜىٰرٜ؞ غٛونغَ، اٜ وٛودِ طٜمْطٜ فٜىٰرٜ‑فٜىٰرٜ اٜ دُونِيَارُ، اَمَّا ندٜرْ طٜمْطٜ طٜنْ وَلَا طٜمْنغَلْ نغَلْ وَلَا مَعَنَ؞ تٛ مِ فَامَايِ طٜمْنغَلْ نغَلْ غٛطّٛ مٜتِ، مِ وَرْتِي کٛطٛ تٛ مَاکٛ، کَنْکٛ مَا اٛ وَرْتِي کٛطٛ تٛ اَمْ؞ اٛنٛنْ مَا، نٛنْ طُمْ وٛنِ تٛ مٛوطٛنْ؞ ندٜ اٛنْ کَاٻِي کٜٻٛنْ دٛکّٜ رُوحُ اَللَّه، نغَطٜىٰ کٛ مبَاوٛتٛنْ وَطُکِ ٻُرٛنْ حُوتِرْکِ دٛکّٜ شٜمْبِطِنَيْطٜ تٛکُّٻٜ يٜىٰسُ؞ نغَمْ نٛنْ، فُو غَطِرْطٛ دٛعَارٜ طٜمْنغَلْ نغَلْ اٛ اَنْدَا، سٜيْ اٛ تٛرٛو اَللَّه وَلَّمٛ اٛ وَاوَ حٛکُّکِ مَعَنَ طٜمْنغَلْ نغَلْ؞ نغَمْ تٛ مِ وَطِرِي دٛعَارٜ طٜمْنغَلْ نغَلْ مِ اَنْدَا، ٻٜرْندٜ اَمْ وَطِي دٛعَارٜ، اَمَّا مِ حٜٻْتَتَا کٛ مبِيمِ؞ تٛو، کٛ حَانِ مِ وَطَ؟ مِ وَطَيْ دٛعَارٜ ندٜرْ ٻٜرْندٜ اَمْ، طٛنْمَا مِ وَطَيْ دٛعَارٜ ندٜرْ ݧُمٛلْ اَمْ؞ مِ يِمَيْ غِمٛلْ مَنْتُکِ اَللَّه ندٜرْ ٻٜرْندٜ اَمْ، طٛنْمَا مِ يِمَيْ ندٜرْ ݧُمٛ اَمْ؞ تٛ نَاع نٛنْ، تَا يٜتِّي اَللَّه ندٜرْ طٜمْنغَلْ نغَلْ اَ اَنْدَا، نٛ غٛطّٛ مٛ نَنَتَانغَلْ وِيرَتَ «اَامِنْ» دٛوْ يٜتّٛورٜ مَاطَ؟ اٛ فَامَايِ کٛ مبِيطَا؞ طُمْ غٛونغَ اَ يٜتَّ اَللَّه بٛطُّمْ، اَمَّا طُمْ سٜمْبِطِنْتَا نَنَيْطٛمَ؞ مِ يٜتِّي اَللَّه نغَمْ مِ ٻُرِيعٛنْ اٛنْ فُو وَطِرْکِ دٛعَارٜ طٜمْطٜ طٜ مِ اَنْدَا؞ اَمَّا ندٜرْ کَوْتَلْ تٛکُّٻٜ يٜىٰسُ طُمْ ٻُرِي مِ مٜتَ بٛلِيطٜ جٛوِ ڤَامٜتٜىٰطٜ نغَمْ مِ اٜکِّتِنَ وٛٻّٜ اٜ دٛوْ مِ مٜتَ بٛلِيطٜ 10,000 ندٜرْ طٜمْنغَلْ نغَلْ طُمْ اَنْدَا؞ بَنْدِرَاٻٜ، اَلٜىٰ ݧُمُکِ بٛ سُکَحٛيْ؞ نغَرْتٜىٰ ٻٜ نغَلَا حَلّٜىٰندٜ بٛ ٻِکّٛيْ کٜشّٛيْ، اَمَّا نغَرْتٜىٰ بٛ مَوْٻٜ ندٜرْ ݧُمٛ مٛوطٛنْ؞ اَتَّوْرَ وِعِي جٛومِرَاوٛ وِعِي، «مِ مٜتَنَيْ يِمْٻٜ اَمْ لَاوٛلْ مٜتٛوٻٜ طٜمْطٜ طٜ اَنْدَاکَ؞ مِ مٜتَنَيْٻٜ اٜ حٛنْدُکٛ يِمْٻٜ غٛطّٜ لٜيْطٜ، اَمَّا فُو اٜ نٛنْ ٻٜ کٜتِّندَنْتَاکٛيَمْ؞» نغَمْ نٛنْ، وَطِرْکِ دٛعَارٜ طٜمْطٜ طٜ طُمْ اَنْدَا نَاع طُمْ اَلَامَ نغَمْ تٛکُّٻٜ يٜىٰسُ، اَمَّا طُمْ اَلَامَ نغَمْ يِمْٻٜ ٻٜ تٛکَّايِ يٜىٰسُ؞ اَنَّبَاکُ بٛو طُمْ نغَمْ تٛکُّٻٜ يٜىٰسُ، نَاع نغَمْ يِمْٻٜ ٻٜ تٛکَّايِ يٜىٰسُ؞ نغَمْ نٛنْ، تٛ اٛنْ فُو اٛنْ کَوْرِتِي کٛو مٛيٜ اٜ وَطِرَ دٛعَارٜ طٜمْطٜ طٜ طُمْ اَنْدَا، تٛ وٛٻّٜ ٻٜ ڤَامَايِ کٛو يِمْٻٜ ٻٜ تٛکَّايِ يٜىٰسُ نَتِّي ندٜرْ مٛوطٛنْ، نَاع ٻٜ مبِعَيْ اٛنْ حَاݝَاٻٜ؟ اَمَّا تٛ غٛطّٛ مٛ تٛکَّايِ يٜىٰسُ کٛو غٛطّٛ مٛ اَنْدَا کٛ نغَطٛتٛنْ نَتِّي ندٜرْ مٛوطٛنْ تَوِي کٛو مٛيٜ اٜ وَطَ اَنَّبَاکُ، اٛ فَامَيْ اٛ وَطِي حَکّٜ، نٛنْ وَطَيْ اٛ طَٻِّتَ اٛ تُوبَ؞ کٛ وٛنِ ندٜرْ ٻٜرْندٜ مَاکٛ شُوطِيطُمْ طُمْ وُرْتٛتٛ اٜ نجَيْرِ، اٛ دِشّٛتٛ، اٛ مَوْنِنَ اَللَّه، اٜ مٛ وِعَ، «غٛونغَ، اَللَّه اٜ طٛنْ ندٜرْ مٛوطٛنْ؞» تٛو، بَنْدِرَاٻٜ، طُمٜ نغَطٛتٛنْ؟ تٛ اٛنْ کَوْرِتِي نغَمْ مَوْنِنْکِ اَللَّه، غٛطّٛ اٜ وٛودِ غِمٛلْ، غٛطّٛ اٜ وٛودِ اٜکِّتِنٛلْ، ندٜنْ غٛطّٛ اٜ وَطِرَيْ دٛعَارٜ طٜمْنغَلْ نغَلْ طُمْ اَنْدَا، غٛطّٛ حٛکَّيْ مَعَنَ طٜمْنغَلْ نغَلْ؞ طُمْ فُو طُمْ وَطٜىٰ نغَمْ سٜمْبِطِنْکِ کَوْتَلْ تٛکُّٻٜ يٜىٰسُ؞ تٛ وٛٻّٜ اٜ نغَطِرَ دٛعَارٜ طٜمْنغَلْ نغَلْ طُمْ اَنْدَا، تٛع ٻٜ ٻُرَ طِطٛ کٛو تَتٛ؞ اٜ حَانِ ٻٜ مٜتَ غٛعٛ‑غٛعٛ، طٛنْمَا دٛولٜ غٛطّٛ حٛکَّ مَعَنَ کٛ ٻٜ مبِعَتَ؞ اَمَّا تٛ وَلَا کٛکّٛووٛ مَعَنَ کٛ ٻٜ مبِعَتَ، اٜ حَانِ ٻٜ ندٜعِّتَ ندٜرْ کَوْتَلْ تٛکُّٻٜ يٜىٰسُ، ٻٜ مٜتَنَ اَللَّه ندٜرْ ٻٜرْندٜ مَٻّٜ؞ غَطٛوٻٜ اَنَّبَاکُ مَا، تٛع ٻٜ ٻُرَ طِطٛ کٛو تَتٛ؞ اٜ حَانِ ٻٜ مٜتَ غٛعٛ‑غٛعٛ، ندٜنْ کٜتِّندَنِيٻٜٻٜ ڤٛوندَ کٛ ٻٜ مبِعَتَ اٜ حَکِّيلٛ؞ تٛ اٜ وٛودِ کٛ اَللَّه وَنْغِنَنِ غٛطّٛ ندٜرْ کٜتِّندَنْتٛوٻٜ ٻٜنْ، سٜيْ مٜتٛووٛ اَرَنْدٜىٰجٛ اٛنْ دٜعِّتَ؞ اٛنْ فُو اٛنْ مبَاوَيْ نغَطٛنْ اَنَّبَاکُ غٛعٛتٛ‑غٛعٛتٛ نغَمْ کٛو مٛيٜ اٜکِّتٛو حٜٻَ کٛ سٜمْبِطِنْتَمٛ؞ غَطٛوٻٜ اَنَّبَاکُ اٜ حَانِ ٻٜ مبَاوَنَ کٛعٜ مَٻّٜ؞ نغَمْ اَللَّه نَاع اٛ اَللَّه غَدّٛووٛ جِيٻَارٜ، اَمَّا اٛ غَدّٛووٛ جَمْ؞ تٛ تٛکُّٻٜ يٜىٰسُ کَوْرِتِي ندٜرْ کَوْتَلْ مَٻّٜ، اٜ حَانِ رٜوْٻٜ ندٜعِّتَ؞ طُمْ جَٻَايِ ٻٜ مٜتَ، اَمَّا ٻٜ نجٛوطٛو لٜيْ لَامُ وٛرْٻٜ نٛ اَتَّوْرَ وِعِ؞ تٛ اٜ وٛودِ غٛطُّمْ طُمْ ٻٜ نغِطِ ٻٜ اَنْدَ، ٻٜ پَمَ وٛرْٻٜ مَٻّٜ تٛ وُرٛ؞ نغَمْ طُمْ شٜمْتِنِيطُمْ دٜبّٛ مٜتَ ندٜرْ تٛکُّٻٜ يٜىٰسُ شَرٜلْ کٛ ٻٜ کَوْرِتِ نغَمْ مَوْنِنْکِ اَللَّه؞ تٛو، تٛ مٛوطٛنْ وٛلْدٜ اَللَّه فُطِّرِ، کٛو تٛ مٛوطٛنْ تَنْ ندٜ يَحِ؟ تٛ غٛطّٛ اٜ کَمِّي اٛ اَنَّبِيجٛ، کٛو اٛ کٜٻُطٛ دٛکَّلْ رُوحُ اَللَّه، اٜ حَانِ اٛ اَنْدَ طُعُمْ طُمْ مبِنْدَنَيْمِعٛنْ تٛ جٛومِرَاوٛ طُمْ پِوٛيِ؞ اَمَّا تٛ اٛ وَݧِي طُمْ نٛنْ، کَنْکٛ مَا سٜيْ اٛ وَݧٜىٰ؞ نغَمْ نٛنْ، بَنْدِرَاٻٜ اَمْ، نغِطٜىٰ وَطُکِ اَنَّبَاکُ، تٛع اٛنْ کَرْمِنْ وَطِرْکِ دٛعَارٜ طٜمْطٜ طٜ طُمْ اَنْدَا؞ سٜيْ کٛو طُمٜ وَطٜىٰ نٛ حَانِ اٜ لَاوٛلْ بٛنْغٛلْ؞ جٛونِ بَنْدِرَاٻٜ اَمْ، اٜ مِ يِطِ مِ سِفْتٛرَنَعٛنْ حَبَرُ بٜلْطُمْ طُمْ نغَعَجِنَنْمِعٛنْ، طُمْ نجَٻُطٛنْ، طُمْ تٛکّٛتٛنْ بٛطُّمْ؞ بَرْکَ مَاجُمْ اٛنْ کِسِي، تٛ اٛنْ نجٛغَکٜ بٛطُّمْ وَعَجُ طُمْ نغَعَجِنَنْمِعٛنْ؞ تٛ نَاع نٛنْ، اٛنْ کٛولِي يٜىٰسُ اٜ مٜىٰرٜ؞ مِ وَدَّنِيعٛنْ فِي ٻُرْطُمْ دَرَجَ طُمْ کٜٻُمِ؞ کَنْجُمْ وٛنِ اَلْمَسِيحُ مَايِي نغَمْ حَکّٜ مٜىٰطٜنْ نٛنْ نٛ غٛطّٜ اَايَاجٜ مبِعِ، اٛ اُوَامَ، اٛ اُمِّنَامَ دَغَ مَيْدٜ ݧَلْندٜ تَتَوْرٜ نٛنْ نٛ غٛطّٜ اَايَاجٜ مبِعِ، اٛ وَنْغَنِ بِيتُرُسْ، ندٜنْ اٛ وَنْغَنِي لِلَاٻٜ مَاکٛ سَڤّٛ اٜ طِطٛ؞ غَطَ طٛنْ اٛ وَنْغَنِي تٛکُّٻٜمٛ ٻُرْٻٜ 500 اٜ شَرٜلْ غٛعٛ؞ طُطْٻٜ مَٻّٜ حَا جٛونِ اٜ ٻٜ فٛوفَ، اَمَّا وٛٻّٜ مَايِي؞ طٛنْمَا اٛ وَنْغَنِي يَاکُبُ، ندٜنْ فُو لِلَاٻٜ مَاکٛ؞ غَطَ مَاجُمْ فُو، مِنْ مَا، اٛ وَنْغَنِييَمْ، کٛو ندٜ اٜ مِ نَنْدِ اٜ ٻِنْغٜلْ دَݧَانغٜلْ کٛ شَرٜلْ دَݧُکِنغٜلْ وَطَ؞ نغَمْ مِنْ وٛنِ ٻُرْطٛ فَمْطُکِ ندٜرْ لِلَاٻٜ مَاکٛ؞ مِ حٜوْتَايِ مَا مِ نٛدّٜىٰ لِلَاطٛ مَاکٛ، نغَمْ مِ تٛرِّي کَوْتَلْ يِمْٻٜ اَللَّه؞ اَمَّا نغَمْ يِدّٜ ندٜ اَللَّه حٛلِّيَمْ مِ وَرْتِي کٛ نغٛنْمِ حَنْدٜ، ندٜنْ يِدّٜ ندٜ اٛ حٛلِّيَمْ وَرْتَايِ مٜىٰرٜ؞ مِ ٻُرِي کٛو مٛيٜ لِلَاطٛ حُوُکِ، کٛو ندٜ نَاع طُمْ مِنْ حُوَتَ، طُمْ يِدّٜ اَللَّه غٛنْدُندٜ اٜ اَمْ حُوَتَ؞ تٛو، وَلَا فٜىٰرٛوتِرٛلْ کٛو تٛ مِنْ وَعَجِنَنِعٛنْ، کٛو تٛ لِلَاٻٜ حٛرِيٻٜ نغَعَجِنَنِعٛنْ؞ کٛ مِنْ نغَعَجِنْتَ طُمْ غٛعٛ؛ کَنْجُمْ بٛو نجَٻُطٛنْ؞ تٛو، تٛ اٜ طُمْ وَعَجِنَ وِيکِ اَلْمَسِيحُ اُمِّنَامَ دَغَ مَيْدٜ، نٛ وَطَتَ وٛٻّٜ مٛوطٛنْ اٜ مبِعَ مَيْٻٜ اُمَّتَاکٛ؟ دَا مَيْٻٜ اُمَّتَاکٛ دَغَ مَيْدٜ، تٛو، دَا اَلْمَسِيحُ اُمِّنَاکَ دَغَ مَيْدٜ وٛنْ طٛنْ؞ تٛ بٛو اَلْمَسِيحُ اُمَّاکِ دَغَ مَيْدٜ، تٛو، وَعَجِنْکِ اَمِنْ وَرْتِي مٜىٰرٜ، ندٜنْ حٛولَارٜ مٛوطٛنْ وَرْتِي مٜىٰرٜ؞ کٛ ٻُرِ نٛنْ وٛنِ، مِنْ نغَرْتِي شٜيْدُعٜنْ فٜوٛوٻٜ دٛوْ اَللَّه؞ نغَمْ مِنْ مبِعِي اَللَّه اُمِّنِي اَلْمَسِيحُ دَغَ مَيْدٜ؞ اَمَّا دَا طُمْ غٛونغَ مَيْٻٜ اُمِّنْتَاکٜ، دَا اَللَّه اُمِّنَايِمٛ؞ نغَمْ دَا طُمْ اُمِّنْتَا مَيْٻٜ، تٛو، دَا اَلْمَسِيحُ مَا اُمِّنَاکَ دَغَ مَيْدٜ وٛنْ طٛنْ؞ دَا اَلْمَسِيحُ اُمِّنَاکَ، تٛو، حٛولَارٜ مٛوطٛنْ وَرْتِي مٜىٰرٜ، ندٜنْ حَا جٛونِ اٛنْ نغٛنْدِ اٜ حَکّٜ مٛوطٛنْ، ندٜنْ مَيْٻٜ اٜ کٛولِي اَلْمَسِيحُ کَلْکِي وٛنْ طٛنْ؞ تٛ نِ نغَمْ جٛنْدٜ دُونِيَارُ ندُعُ تَنْ نغَطٜتٜنْ کَمُّندٜ دٛوْ اَلْمَسِيحُ، اٜنْ ٻُرِي کٛو مٛيٜ وَرْتُکِ ٻٜ طُمْ يُرْمِنَنْتَ؞ اَمَّا غٛونغَ اَلْمَسِيحُ اُمِّنَامَ دَغَ مَيْدٜ؞ کَنْکٛ وٛنِ اَرْتُطٛ اُمَّاکِ دَغَ ندٜرْ ٻٜ طُمْ اُمِّنْتَ دَغَ مَيْدٜ؞ ندٜ مَيْدٜ وَرِي لَاوٛلْ نٜطّٛ غٛعٛتٛ، نٛنْ مَا اُمَّاکِ مَيْٻٜ دَغَ مَيْدٜ وَرِي لَاوٛلْ نٜطّٛ غٛعٛتٛ؞ نٛ يِمْٻٜ فُو مَيْرَتَ نغَمْ سُمْڤٛ اٜ اَادَمُ، نٛنْ مَا فُو غٛودُٻٜ سُمْڤٛ اٜ اَلْمَسِيحُ کٜٻَيْ يٛنْکِ کِ رٜعَتَا؞ اَمَّا رَا نٛ اُمَّاکِ مَيْٻٜ وَعَتَ؞ اَرَنْدٜ اَلْمَسِيحُ اُمِّنَامَ دَغَ مَيْدٜ، ندٜنْ ݧَلْندٜ ندٜ اٛ وَرْتٛيِ طُمْ اُمِّنَيْ فُو يِمْٻٜ مَاکٛ دَغَ مَيْدٜ؞ ندٜنْ غَطَ اٛ حٜٻِي جَالٛرْغَلْ دٛوْ کٛو مٛيٜ لَامِيطٛ، اٜ کٛو طُمٜ لَامُ غِنِّ، اٜ کٛو طٜيٜ بَوْطٜ، رٜعِرْدٜ دُونِيَارُ وَرَيْ، ندٜنْ اٛ حٛکِّتَ اَللَّه ݧَاکٛ مٛ دٛوْ لَامُ؞ نغَمْ دٛولٜ اَلْمَسِيحُ لَامٛو نَا اَللَّه يٛوِيمٛ دٛوْ وَݧْوَݧْٻٜ مَاکٛ فُو؞ غَݧٛ کَلْکٜتٜىٰطٛ غَطَ کٛو طُمٜ، کَنْکٛ وٛنِ مَيْدٜ؞ نغَمْ اَايَارٜ وِعِي، «اَللَّه وَرْتِرِي کٛو طُمٜ لٜيْ لَامُ اَلْمَسِيحُ؞» اَمَّا ندٜ طُمْ وِعِ، «کٛو طُمٜ وَرْتِرَامَ لٜيْ لَامُ اَلْمَسِيحُ،» تٛو، اٜ نجَيْرِ طُمْ وٛنِ طُعُمْ حَوْتَايِ اٜ اٛنْ طٛنْ غَرْتِرْطٛ کٛو طُمٜ لٜيْ لَامُ اَلْمَسِيحُ؞ غَطَ اَللَّه وَطِي کٛو طُمٜ لٜيْ لَامُ ٻِطّٛ مَاکٛ، سٜيْ ٻِطّٛ اٛنْ وَرْتَ لٜيْ لَامُ اَللَّه غَرْتِرْطٛ کٛو طُمٜ لٜيْ لَامُ ٻِطّٛ اٛنْ، نغَمْ اَللَّه تَنْ وَرْتَ لَامِيطٛ کٛو طُمٜ کٛو تٛيٜ؞ تٛو، تٛ مَيْٻٜ اُمَّتَاکٛ دَغَ مَيْدٜ، طُمٜ غَطَنَاٻٜ بَڤْتِسْمَ نغَمْ مَيْٻٜ نغَطَتَ؟ تٛ طُمْ اُمِّنَايِ مَيْٻٜ کٛو سٜطَّ، نغَمْ طُمٜ طُمْ وَطَنْتَ يِمْٻٜ بَڤْتِسْمَ نغَمْ مَٻّٜ؟ ندٜنْ نغَمْ طُمٜ مِنْ شٛورَتَ يٛنْکِ اَمِنْ کٛو ندٜيٜ؟ غٛونغَ بَنْدِرَاٻٜ، مَنْتٛرَاکِ کِ مَنْتٛرْتٛومِعٛنْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ وَطِ کٛو ندٜيٜ ݧَلْندٜ اٜ مِ حَادٜ مَيْدٜ؞ تٛ مِ حَٻْدِي اٜ يِمْٻٜ غٛودُٻٜ نغِکُّ بٛ طُمْ مَرْلٜ لَدّٜ ندٜرْ غَرِيرِ اَافِسَ نغَمْ حٜٻُکِ فِي دُونِيَارُ ندُعُ تَنْ، طُمٜ ٻٜيْدٛرِيمِ؟ تٛ مَيْٻٜ اُمِّنْتَاکٜ دَغَ مَيْدٜ، سٜيْ نغَطٜنْ کٛ طُمْ وِعُنٛو، «اٜنْ ݧَامُ، اٜنْ نجَرُ، نغَمْ جَانغٛ اٜنْ مَايَيْ؞» تٛع اٛنْ نجَٻُ طُمْ مَجِّنَعٛنْ؞ «جٛوطٛدَاکِ اٜ غٛودُٻٜ نغِکُّ کَلُّطُمْ وٛنَّيْ نغِکُّ بٛطُّمْ؞» نغَرْتٜىٰ ندٜرْ حَکِّيلٛ مٛوطٛنْ نٛ حَانِ، اَلٜىٰ وَطُکِ حَکّٜ، نغَمْ اٜ وٛودِ وٛٻّٜ مٛوطٛنْ ٻٜ نغَلَا اَنْدَلْ دٛوْ اَللَّه؞ مِ وِعُ نٛنْ نغَمْ شٜمْتٛنْ؞ غٛطّٛ پَمَيْ وِعَ، «نٛ مَيْٻٜ اُمِّنِرْتٜىٰ دَغَ مَيْدٜ؟ اٜ اِرِ ندُيٜ ٻَنْدُ ٻٜ اُمّٛدٛرْتٛو؟» اَنْ کَاݝَاطٛ! تَا اَاوِي غَبّٜلْ، نغٜلْ فُطَتَا نَا نغٜلْ وَاتِي؞ کٛ اَاوُطَا فُو، کٛو غَبّٜلْ اَلْکَمَارِ، کٛو وٛنْغٜلْ غَبّٜلْ فٜىٰرٜ، کٛ فُطِ نَنْدَتَا اٜ کٛ اَاوُطَا؞ اَمَّا اَللَّه اٜ حٛکَّ کٛ فُطِ نَنْدِ فٜىٰرٜ نٛنْ نٛ اٛ سُٻِرِ؞ کٛو اِرِ نغٜلٜ غَبّٜلْ اٜ اِرِ نَنْدِ طُمْ نغٜلْ فُطِرْتَ؞ نَاع فُو ٻَلِّ نغٛنِ نَنْدُطِ؞ ٻَلِّ يِمْٻٜ فٜىٰرٜ، ٻَلِّ مَرْلٜ فٜىٰرٜ، ٻَلِّ شٛلِّ فٜىٰرٜ، ٻَلِّ لِپِّ فٜىٰرٜ؞ کٛو طُمٜ غٛنْطُمْ اٜ دٛوْ اٜ وٛودِ نٛ طُمْ وَعِ؞ نٛنْ مَا کٛو طُمٜ غٛنْطُمْ ندٜرْ دُونِيَارُ اٜ وٛودِ نٛ طُمْ وَعِ؞ غٛنْطُمْ اٜ دٛوْ وٛوطُکِ مَاجُمْ اٜ فٜىٰرٛوتِرِ اٜ وٛوطُکِ فِي غٛنْطُمْ ندٜرْ دُونِيَارُ؞ نَانغٜ نٛ طٜلْکِتِرْتَ فٜىٰرٜ، لٜوْرُ نٛ طٜلْکِتِرْتَ فٜىٰرٜ، کٛودٜ نٛ طٜلْکِتِرْتَ فٜىٰرٜ، ندٜنْ کٛودٜ اٜ فٜىٰرٛوتِرِ کٛو ندٜيٜ حٛودٜرٜ اٜ نٛ ندٜ طٜلْکِتٛرْتٛو؞ نٛنْ اُمَّاکِ مَيْٻٜ وَعِ؞ ٻَنْدُ اُوَاندُ ندُ ݧٛلَيْندُ، تٛ ندُ اُمِّنَامَ ندُ ݧٛلَتَا؞ ٻَنْدُ اُوَاندُ وٛوطَا يِيکِ، ندُ وَلَا سٜمْبٜ، تٛ ندُ اُمِّنَامَ، ندُ وَرْتَيْ وٛوطُندُ يِيکِ، غٛودُندُ بَوْطٜ؞ ٻَنْدُ اُوَاندُ کَيْرُ حُوتِرْتٜىٰ ندٜرْ دُونِيَارُ ندُعُ، اَمَّا ٻَنْدُ اُمِّنْتٜىٰندُ، کَيْرُ حُوتِنِرْتٜىٰ اٜ تٛنْ دٛوْ؞ ندٜ اٜ وٛودِ ٻَنْدُ کُوتِرْتٜىٰندُ ندٜرْ دُونِيَارُ، نٛنْ مَا اٜ وٛودِ ٻَنْدُ کُوتِرْتٜىٰندُ تٛنْ دٛوْ؞ نغَمْ، نٛنْ نٛ طُمْ وِنْدِرَا، «نٜطّٛ اَرَنْدٜىٰجٛ، وَاتٛ اَادَمُ، اٛ وَرْتِي غٛودُطٛ يٛنْکِ؞» اَمَّا اَادَمُ شَکِتِيطٛ، وَاتٛ اَلْمَسِيحُ، اٛ حٜٻِي ٻَنْدُ کُوتِرْتٜىٰندُ تٛنْ دٛوْ، اٛ وَرْتِي کٛکّٛووٛ يٛنْکِ کِ رٜعَتَا؞ نَاع ٻَنْدُ کُوتِرْتٜىٰندُ تٛنْ دٛوْ طُمْ اَرْتَتَ حٜٻُکِ، اَمَّا کُوتِرْتٜىٰندُ ندٜرْ دُونِيَارُ طُمْ اَرْتَتَ حٜٻُکِ، ندٜنْ طُمْ حٜٻَ کُوتِرْتٜىٰندُ تٛنْ دٛوْ؞ نٜطّٛ اَرَنْدٜىٰجٛ مبُلْمبُلْدِ اٛ تَغِرَا، ندٜنْ نٜطّٛ طِطَٻٛ بٛو، دَغَ دٛوْ اٛ پِوٛيِ؞ يِمْٻٜ دُونِيَارُ اٜ نغٛودِ ٻَنْدُ اِرِ ندُ اَادَمُ تَغِرَاطٛ مبُلْمبُلْدِ؞ جَحَيْٻٜ تٛنْ دٛوْ بٛو، ٻٜ کٜٻَيْ ٻَنْدُ اِرِ ندُ اٛنْ طٛنْ پِوٛيْطٛ دَغَ تٛنْ دٛوْ، وَاتٛ اَلْمَسِيحُ؞ نٛنْ نٛ نغٛودِرْطٜنْ نَنْدِ اٛنْ طٛنْ تَغِرَاطٛ مبُلْمبُلْدِ، نٛنْ مَا اٜنْ کٜٻَيْ نَنْدِ اٛنْ طٛنْ پِوٛيْطٛ دَغَ دٛوْ؞ بَنْدِرَاٻٜ، اٜ مِ وِعَعٛنْ، ٻَنْدُ غٛودُندُ کُسٜلْ اٜ پِيپَمْ نَتَّتَا ندٜرْ وُرٛ اَللَّه تٛنْ دٛوْ؞ ٻَنْدُ ݧٛلَيْندُ نَتَّتَا وُرٛ اَللَّه تَبِتَيْنغٛ؞ ندَرٜىٰ مِ وِعَعٛنْ غٛطُّمْ سِرُّ: نَاع اٜنْ فُو مَايَتَ، اَمَّا اٜنْ فُو طُمْ وَيْلِتَنَيْعٜنْ ٻَلِّ طٛنْ اٜ طٛنْ، بٛ مَپُّکِ حِتٜرٜ، تٛ طُمْ دُودِي لُوَلْ شَکِتِينغَلْ؞ نغَمْ تٛ لُوَلْ نغَلْ دُودَامَ، مَيْٻٜ اُمّٛدٛتٛ اٜ ٻَلِّ طِ ݧٛلَتَا، ندٜنْ اٜنٜنْ فٛوفٛوٻٜ طُمْ وَيْلِتَيْ ٻَلِّ مٜىٰطٜنْ؞ نغَمْ دٛولٜ ندُعُ ٻَنْدُ مَايَيْندُ ݧٛلَيْندُ وَرْتِرٜىٰ ٻَنْدُ ندُ مَايَتَا ندُ ݧٛلَتَا؞ شَرٜلْ نغٜلْ ٻَنْدُ مَايَيْندُ ݧٛلَيْندُ وَرْتِرَا ٻَنْدُ ندُ مَايَتَا ندُ ݧٛلَتَا، کٛ اَايَارٜ وِعِ طُمْ حٜىٰوَيْ، وَاتٛ، «طُمْ حٜٻِي جَالٛرْغَلْ دٛوْ مَيْدٜ!» «مَيْدٜ، تٛ جَالٛرْغَلْ مَاطَ؟ مَيْدٜ، تٛ تٛوکٜ مَاطَ؟» نغَمْ حَکّٜ وٛنِ تٛوکٜ ڤٛوطَيْطٜ مَيْدٜ، ندٜنْ بَوْطٜ حَکّٜ تٛ اَتَّوْرَ پِوِ؞ اَمَّا يٜتّٛورٜ تَبِّتَ تٛ اَللَّه کٛکُّطٛعٜنْ جَالٛرْغَلْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞ نغَمْ نٛنْ، بَنْدِرَاٻٜ اَمْ ٻٜ نغِطُمِ، ندَرٜىٰ بٛطُّمْ، تٛع غٛطُّمْ دِمْبَعٛنْ؞ کٛو ندٜيٜ نغَطٜىٰ کٛ مبَاوٛتٛنْ وَطُکِ کُوٛنْ کُوغَلْ جٛومِرَاوٛ، نغَمْ اٛنْ اَنْدِ کُوغَلْ نغَلْ کُوَنْتٛنْمٛ نَاع اٜ مٜىٰرٜ نغَلْ وٛنِ؞ تٛو، جٛونِ دٛوْ حَوْرُتُکِ شٜىٰدٜ نغَمْ وَلُّکِ يِمْٻٜ اَللَّه غٛنْٻٜ اُرُشَلِيمَ، نغَطٜىٰ کٛ مبِيمِ تٛکُّٻٜ يٜىٰسُ ٻٜ غَلَاتِيَ نغَطَ؞ کٛو ندٜيٜ ݧَلْندٜ اَرَنْدٜىٰرٜ ندٜ يٛنْتٛورٜ، کٛو مٛيٜ مٛوطٛنْ رٜسَ غٛطُّمْ ندٜرْ کٛ حٜٻِي کٜىٰرٛلْ نٛ وَاوَتَ؞ ندٜنْ تٛع اٛنْ اَلُ نَا مِ وَرِي ڤُطّٛنْ حَوْرُتُکِ شٜىٰدٜ طٜنْ؞ تٛ مِ يٛتَّکٜ تٛ مٛوطٛنْ، مِ حٛکَّيْ يِمْٻٜ ٻٜ شُٻُطٛنْ طٜرٜىٰجِ کٛلَّيْطِ اٛنْ شُٻِيٻٜ ٻٜ نجَارَ بَلَّلْ مٛوطٛنْ اُرُشَلِيمَ؞ تٛ اٜ حَانِ مِنْ مَا مِ يَحَ، سٜيْ ٻٜ نجَادَ اٜ اَمْ؞ مِ وَرَيْ تٛ مٛوطٛنْ غَطَ مِ يَحِي لٜيْدِ مَکِدٛونِيَ، نغَمْ مِ سُٻِي يَاکِ مَکِدٛونِيَ؞ طُمْ غَطٛتٛوطُمْ مِ جٛوطٛو تٛ مٛوطٛنْ شَرٜلْ سٜطَّ، کٛو مَا مِ رُومَ، نغَمْ مبَلّٛنْيَمْ مِ يَحَ فُو تٛ نجَحَيْمِ؞ مِ يِطَا مِ يَالَ تٛ مٛوطٛنْ تَنْ مِ پَٻّٛو، نغَمْ اٜ مِ يِطِ مِ نٜىٰٻِدَ اٜ مٛوطٛنْ تٛ جٛومِرَاوٛ جَٻِي؞ اَمَّا مِ جٛوطٛتٛ تٛ غَرِيرِ اَافِسَ نَا حُمْتٛ ٻٜنْدٛلْ اَلْکَمَارِ نغَمْ مِ حٜٻِي لَاوٛلْ حُوُکِ کُوغَلْ مَنْغَلْ، ندٜنْ اٜ وٛودِ طُطْٻٜ غَݧُٻٜيَمْ؞ تٛ تِمٛوتِ وَرِي تٛ مٛوطٛنْ، تَبِّتِنٛنْ اٛ وٜدِّتَکٜ ندٜرْ مٛوطٛنْ، نغَمْ کَنْکٛ مَا اٛ کُوَنٛووٛ جٛومِرَاوٛ بٛ اَمْ؞ نغَمْ نٛنْ، تٛع غٛطّٛ يَوَنَمٛ؞ مبَلّٜىٰمٛ ندٜرْ يَادُ مَاکٛ، نجَٻّٛوتِرٛنْ جَمْ اٜ جَمْ، اٛ وَرْتٛيَ تٛ اَمْ؞ مِنْ اٜ وٛٻّٜ بَنْدِرَاٻٜ اٜ مِنْ ندٜنْتِ غَرْتٛلْ مَاکٛ؞ جٛونِ دٛوْ بَنْدِرَاوٛ مٜىٰطٜنْ اَفٛولٛسْ، مِ تٛرَکٜمٛ نَاع سٜطَّ اٛ وَرَ تٛ مٛوطٛنْ کَنْکٛ اٜ وٛٻّٜ بَنْدِرَاٻٜ، اَمَّا اٛ يِطَا يَادُ ندُنْ جٛونِ؞ اٛ وَرَيْ تٛ مٛوطٛنْ تٛ اٛ حٜٻِي لَاوٛلْ؞ نجٛوطٜىٰ اٛنْ ڤَامَ، ندَرٜىٰ بٛطُّمْ دٛوْ حٛولَارٜ مٛوطٛنْ، نغَطٛنْ نغٛرْغُ، شٜمْبِطٜىٰ؞ فُو کٛ نغَطٛتٛنْ، نغَطٜىٰطُمْ ندٜرْ يِدّٜ؞ بَنْدِرَاٻٜ، اٛنْ اَنْدِ ندٜرْ لٜيْدِ اَکَايَ يِمْٻٜ وُرٛ اِسْتِفَانُسْ اَرْتِ وَرْتُکِ تٛکُّٻٜ يٜىٰسُ، ندٜنْ ٻٜ کٛکِّي کٛعٜ مَٻّٜ نغَمْ وَلُّکِ يِمْٻٜ اَللَّه؞ اٜ مِ تٛرٛوعٛنْ کٛکّٜىٰ اِرِ ٻٜنْ طٛنْ يِمْٻٜ مَنْغُ حَوْتِ اٜ فُو يِمْٻٜ ٻٜ مِنْ کُوِدِ مِنْ ڤِيدِ ندٜرْ کُوغَلْ؞ مِ نَنِي بٜلْطُمْ وَرٛيْکِ اِسْتِفَانُسْ، اٜ فَرْتُنَاتُسْ، اٜ اَکَيْکُسْ، نغَمْ طُمْ وَرْتَنِييَمْ بٛ اٛنٛنْ نغَرِ تٛ اَمْ، نغَمْ ٻٜ مبَلْتِنِي ٻٜرْندٜ اَمْ اٜ ٻٜرْطٜ مٛوطٛنْ اٛنٛنْ مَا؞ نغَمْ نٛنْ، کٛکّٜىٰ اِرِ ٻٜنْ طٛنْ يِمْٻٜ مَنْغُ؞ تٛکُّٻٜ يٜىٰسُ وٛنْٻٜ لٜيْدِ اَاسِيَ اٜ کٛوْنَعٛنْ؞ اَکِيلَ، اٜ بِرِسْکِلَ، اٜ تٛکُّٻٜ يٜىٰسُ کَوْرِتٛوٻٜ اٜ وُرٛ مَٻّٜ اٜ ٻٜ کٛوْنَعٛنْ بٛطُّمْ ندٜرْ اِنْدٜ جٛومِرَاوٛ؞ فُو بَنْدِرَاٻٜ غٛنْٻٜ طٛعٛ اٜ کٛوْنَعٛنْ؞ کٛوْنِندِرٜىٰ حٛوْنِرْکِ حِغَاکُ شٜنِيکِ؞ مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ فُو مٛ يِطَا جٛومِرَاوٛ، اَللَّه لَانَمٛ؞ يَا جٛومِرَاوٛ اَمِنْ، وَرٛيْ! يٜىٰسُ جٛومِرَاوٛ بَرْکِطِنَعٛنْ؞ اٜ مِ يِطِعٛنْ اٛنْ فُو نغَمْ سُمْڤٛوتِرْکِ مٜىٰطٜنْ اٜ يٜىٰسُ اَلْمَسِيحُ؞ مِنْ بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ اٜ بَنْدِرَاوٛ مٜىٰطٜنْ تِمٛوتِ مِنٛنْ مبِنْدِ طٜرٜوٛلْ نغٛعٛلْ؞ مِنْ مبِنْدَنْغٛلْ کَوْتَلْ يِمْٻٜ اَللَّه غٛنْٻٜ غَرِيرِ کٛرِنْتِ، اٜ فُو يِمْٻٜ اَللَّه غٛنْٻٜ ندٜرْ فُو لٜيْدِ اَکَايَ؞ اَللَّه ݧَاکٛ مٜىٰطٜنْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞ يٜتّٛورٜ تَبِّتَ تٛ اَللَّه، ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ کَنْکٛ وٛنِ ݧَاکٛ مٛ يُرْمٜىٰندٜ، اَللَّه بَلْتِنَيْطٛ ٻٜرْطٜ؞ اٜ مٛ وَلْتِنَ ٻٜرْطٜ مٜىٰطٜنْ ندٜرْ فُو تٛرَّاجِ طِ نجَرٜتٜنْ، نغَمْ اٜنٜنْ مَا مبَلْتِنٜنْ ٻٜرْطٜ وٛنْٻٜ ندٜرْ کٛو اِرِ کَيٜ تٛرَّ؞ اٜنْ مبَلْتِنَيْ ٻٜرْطٜ مَٻّٜ اٜ اِرِ وَلْتِنْکِ کِ اٛ وَلْتِنِ ٻٜرْطٜ مٜىٰطٜنْ؞ نٛنْ نٛ نجَرْدٜتٜنْ تٛرَّ نَاع سٜطَّ اِرِ کَ اَلْمَسِيحُ يَرِ، نٛنْ مَا بَرْکَ اَلْمَسِيحُ طُمْ وَلْتِنَيْ ٻٜرْطٜ مٜىٰطٜنْ نَاع سٜطَّ؞ تٛ مِنْ تٛرَّامَ، مِنْ تٛرَّ نغَمْ طُمْ وَلْتِنَ ٻٜرْطٜ مٛوطٛنْ ندٜنْ نغَمْ کِسْندَمْ مٛوطٛنْ؞ تٛ بٛو اَللَّه وَلْتِنِي ٻٜرْطٜ اَمِنْ، اٛ وَلْتِنْطٜ نغَمْ مِنٛنْ مَا مِنْ مبَلْتِنَ ٻٜرْطٜ مٛوطٛنْ نغَمْ کٜٻٛنْ سٜمْبٜ مُݧٛنْ ندٜرْ تٛرَّاجِ طِ نجَرٛتٛنْ اِرِ طِ مِنْ نجَرَتَ؞ مِنْ تَبِّتِنِي، اٜ مِنْ اَنْدِ نٛنْ نٛ نجَرْدٛتٛنْ تٛرَّ اِرِ کَ مِنْ نجَرِ، نٛنْ مَا ٻٜرْطٜ مٛوطٛنْ مبَلْتٛتٛ اِرِ وَلْتَاکِ ٻٜرْندٜ کِ مِنْ کٜٻِ؞ بَنْدِرَاٻٜ، اٜ مِنْ نغِطِ اَنْدٛنْ اِرِ تٛرَّ کَ مِنْ نجَرِ ندٜرْ لٜيْدِ اَاسِيَ؞ مِنْ نَتِّي تٛرَّ کَلُّکَ ٻُرْکَ سٜمْبٜ اَمِنْ حَا مِنْ اِتِّي کَمُّندٜ يٛنْکِ اَمِنْ؞ ندٜرْ ٻٜرْطٜ اَمِنْ مِنْ نَنِي بٛ کِيتَ مَيْدٜ مِنْ تَپَنَا، اَمَّا نٛنْ وَطِي نغَمْ تٛع مِنْ کٛولٛو کٛعٜ اَمِنْ، اَمَّا مِنْ کٛولٛو اَللَّه اُمِّنٛووٛ مَيْٻٜ؞ کَنْکٛ حِسْنِمِنْ دَغَ مَيْدٜ کَلُّندٜ، اٛ ݧَمْرَيْ يٜىٰسٛ اٜ حِسْنُکِمِنْ؞ دٛوْ مَاکٛ مِنْ نغَطِ کَمُّندٜ اٛ حِسْنَيْمِنْ کَدِنْ؞ اٛنٛنْ مَا مبَلِّرٜىٰمِنْ دٛعَارٜ، سٜيْ اَللَّه بَرْکِطِنَيْمِنْ، ندٜنْ طُطْٻٜ نغٜتَّمٛ نغَمْ اَمِنْ؞ کٛ مِنْ مَنْتٛرْتٛو وٛنِ ٻٜرْطٜ اَمِنْ اٜ تَبِّتِنَنَمِنْ مِنْ نغَطِي جٛنْدٜ ندٜرْ دُونِيَارُ ندٜرْ سٜنَاکِ اٜ غٛونغَ پِوٛيْطُمْ تٛ اَللَّه، حَکّٛ مَا ندٜرْ مٛوطٛنْ؞ مِنْ نجٛوطٛرِ نٛنْ نَاع دٛوْ اَنْدَلْ اِرِ نغَلْ يِمْٻٜ دُونِيَارُ، اَمَّا يِدّٜ اَللَّه وَلِّمِنْ؞ ندٜرْ طٜرٜىٰجِ اَمِنْ مِنْ مبِنْدَنَايِعٛنْ غٛطُّمْ طُمْ اٛنْ مبَاوَتَا جَنْغُکِ کٛو فَامُکِ؞ جٛونِ سٜطَّ تَنْ ڤَامُطٛنْمِنْ، اَمَّا يٜىٰسٛ طٛعٛ اٜ مِ يِطِ ڤَامٛنْمِنْ بٛطُّمْ، نغَمْ ݧَلْندٜ ندٜ يٜىٰسُ جٛومِرَاوٛ مٜىٰطٜنْ وَرْتٛيْتَ مبَاوٛنْ مَنْتٛرٛوطٛنْمِنْ نٛنْ نٛ مِنٛنْ مَا مِنْ مبَاوِرْتَ مَنْتٛرَاکِعٛنْ؞ ندٜ مِ تَبِّتِنِي طُعُمْ، مِ يِطِينٛ وَرْکِ تٛ مٛوطٛنْ اَرَنْدٜ نغَمْ کٜٻٛنْ بَرْکَ ندٜ طِطِ؞ اٜ مِ يِطُنٛو دٛوْ لَاوٛلْ اَمْ يَاکِ مَکِدٛونِيَ، مِ يَالَ تٛ مٛوطٛنْ، ندٜنْ غَطَ مِ يَحِي مَکِدٛونِيَ، مِ سٛعّٛيْتٛ تٛ مٛوطٛنْ، نغَمْ مبَلّٛنْيَمْ ندٜرْ يَادُ اَمْ يَاکِ لٜيْدِ يَحُودِيَ؞ ندٜ مِ حٜٻَايِ نغَطُمِ يَادُ ندُنْ، اٜ يِيکِ مٛوطٛنْ مِ وَطِي ٻٜرْطٜ طِطِ ندٜ شِرْيِنٛومِ وَطُکِ يَادُ ندُنْ؟ کٛو اٜ يِيکِ مٛوطٛنْ اٜ مِ سِرْيٛو يَادُ اَمْ نٛ يِمْٻٜ دُونِيَارُ نغَطَتَ، وِعٛوٻٜ «اٜىٰ» ڤُطِّتَ مبِعَ «اَاعَ؟» اَللَّه اٛ غَطٛووٛ کٛ اٛ وِعِ، اٛ شٜيْدُوجٛ اَمِنْ، مِنْ مبِعَتَا «اٜىٰ» اٜ «اَاعَ» شَرٜلْ غٛعٛ؞ نغَمْ حَبَرُ ٻِطّٛ اَللَّه، وَاتٛ يٜىٰسُ اَلْمَسِيحُ، مٛ مِنْ نغَعَجِنَنِعٛنْ، مِنْ اٜ سِيلَ اٜ تِمٛوتِ، نَاع طُمْ «اٜىٰ» اٜ «اَاعَ،» اَمَّا کَنْکٛ کٛو ندٜيٜ «اٜىٰ» مَاکٛ طُمْ «اٜىٰ؞» نغَمْ اَلْمَسِيحُ حٜبِّنِي کٛو نغَلٜ اَلْکَوَلْ نغَلْ اَللَّه وَطِ؞ کَنْجُمْ وَطِ مبِعٜتٜنْ «اَامِنْ» لَاوٛلْ مَاکٛ نغَمْ تٜدِّنْکِ اَللَّه؞ نغَمْ اَللَّه وٛنِ غَطُطٛعٜنْ ندَرِيطٜنْ بٛطُّمْ ندٜرْ سُمْڤٛوتِرْکِ مٜىٰطٜنْ اٜ يٜىٰسُ اَلْمَسِيحُ؞ کَنْکٛ سُٻِعٜنْ، اٛ وَطَنِيعٜنْ اَلَامَ مَاکٛ کٛلُّطُمْ اٜنٜنْ طُمْ ٻٜ مَاکٛ؞ اٛ حٛکِّيعٜنْ رُوحُ مَاکٛ ندٜرْ ٻٜرْطٜ مٜىٰطٜنْ، نغَمْ طُمْ تَبِّتِنَنَعٜنْ کٛ اٛ حٛکَّتَعٜنْ يٜىٰسٛ طٛعٛ؞ اَللَّه وٛنِ شٜيْدُوجٛ اَمْ تٛ مِ فٜوَيْ، مِ يِطَا مِ وَطَعٛنْ نَنٛنْ شِيَ بٜلْطُمْ، کَنْجُمْ حَطِيَمْ سٛعَّاکِ کٛرِنْتِ؞ مِنْ نغِطَا مِنْ کٛلَّعٛنْ لَامُ سٜمْبٜ دٛوْ حٛولَارٜ مٛوطٛنْ؞ مِنٛنْ مِنْ کُودٛوٻٜ اٜ مٛوطٛنْ نغَمْ نَنٛنْ بٜلْطُمْ ندٜرْ ٻٜرْطٜ مٛوطٛنْ، نغَمْ اٛنْ ندَرَکٜ بٛطُّمْ دٛوْ کٛ کٛولِيطٛنْ؞ نغَمْ مَاجُمْ شُٻُمِ تٛع مِ وَرَ تٛ مٛوطٛنْ مِ وَطَعٛنْ نَنٛنْ شِيَ بٜلْطُمْ؞ نغَمْ تٛ مِ وَطِي اٛنْ نَنِي شِيَ بٜلْطُمْ، مٛيٜ وٜلْنَنْتَيَمْ ٻٜرْندٜ تٛ نَاع اٛنٛنْ ٻٜ نغَطُمِ نَنِ شِيَ بٜلْطُمْ؟ کٛ مبِنْدَنْمِعٛنْ ندٜرْ طٜرٜوٛلْ اَمْ اَرَنْدٜوٛلْ، مِ وِنْدُطُمْ نغَمْ تٛ مِ وَرِي تٛ مٛوطٛنْ تٛع اٛنٛنْ کَانُٻٜ مبٜلْنَنَيَمْ ٻٜرْندٜ نغَطٛنْيَمْ مِ نَنَ شِيَ بٜلْطُمْ؞ نغَمْ مِ تَبِّتِنِي تٛ مِ نَنِي بٜلْطُمْ، اٛنْ فُو اٛنْ نَنَيْ بٜلْطُمْ؞ کٛ مبِنْدَنْمِعٛنْ، مِ وِنْدُطُمْ ندٜرْ نَوْطُمْ ٻٜرْندٜ اٜ وَنَّارٜ اٜ غٛنْطِ طُطِّ نَاع نغَمْ مِ مٜتِّنَنَعٛنْ ٻٜرْطٜ، سٜيْ نِ نغَمْ مِ وَطَعٛنْ اَنْدٛنْ اِرِ يِدّٜ لُغُّندٜ ندٜ نغِطُمِعٛنْ؞ تٛو، تٛ غٛطّٛ وَدِّي کٛ مٜتِّنِ ٻٜرْندٜ، نَاع مِنْ تَنْ اٛ مٜتِّنَنِ ٻٜرْندٜ، اٛنْ فُو اٛ مٜتِّنَنِ ٻٜرْطٜ؞ مِ وِعُ نٛنْ، اَمَّا مِ يِطَا مِ حَٻَنَمٛ کٛ ٻُرِ نٛ حَانِ؞ حَٻَنْکِ کِ طُطْٻٜ مٛوطٛنْ کَٻَنِمٛ حٜپِي؞ اَمَّا جٛونِ اٜ حَانِ نجَافَنٛوطٛنْمٛ شٜمْبِطِنٛنْمٛ نغَمْ تٛع نَوْطُمْ ٻٜرْندٜ مَاکٛ ٻُرَ سٜمْبٜ مَاکٛ؞ نغَمْ نٛنْ، اٜ مِ تٛرٛوعٛنْ، کٛلّٜىٰمٛ حَا جٛونِ اٛنْ نغِطِمٛ؞ مِ وِنْدَنْعٛنْ نغٛلْ تٛنْ طٜرٜوٛلْ نغَمْ مِ فٛوندَعٛنْ مِ يِعَ کٛو اٛنْ نغَطَيْ کٛ مبِيمِعٛنْ ندٜرْ کٛو طُمٜ؞ فُو مٛ نجَافَنِيطٛنْ، مِنْ مَا مِ يَافَنَکٜمٛ؞ کٛ نجَافِيمِ، تٛ اٜ وٛودِ کٛ حَانِ مَا مِ يَافٛو، مِ يَافِطُمْ نغَمْ مٛوطٛنْ يٜىٰسٛ اَلْمَسِيحُ؞ مِ وَطُ نٛنْ نغَمْ تٛع شٜيْطَنْ پٛيْرَعٜنْ، نغَمْ اٜنْ اَنْدِ ݧُمٛ مَاکٛ بٛطُّمْ؞ ندٜ نجَامِ تٛورُوَسْ نغَمْ مِ وَعَجِنَ حَبَرُ بٜلْطُمْ طُمْ اَلْمَسِيحُ، جٛومِرَاوٛ مَٻِّتَنِييَمْ لَاوٛلْ کُوغَلْ طٛنْ؞ اَمَّا مِ وَنِّي نَاع سٜطَّ نغَمْ مِ تَوَايِ تِيتُسْ بَنْدِرَاوٛ مٜىٰطٜنْ تٛنْ؞ نغَمْ نٛنْ، سٜيْ نجَٻّٛوتِرْمِ اٜ مَٻّٜ نجَامِ مَکِدٛونِيَ؞ اَمَّا يٜتّٛورٜ تَبِّتَ تٛ اَللَّه کٛکّٛووٛعٜنْ جَالٛرْغَلْ کٛو ندٜيٜ بَرْکَ سُمْڤٛوتِرْکِ مٜىٰطٜنْ اٜ اَلْمَسِيحُ؞ لَاوٛلْ مٜىٰطٜنْ اٛ سَنْکِتِي حَبَرُ اَلْمَسِيحُ کٛو تٛيٜ بٛ اُرْنغٛلْ بٜلْنغٛلْ؞ نغَمْ اٜنٜنْ نغٛنِ بٛ اُرْنغٛلْ اُرْدٜ وٜلْندٜ ندٜ اَلْمَسِيحُ حٛکِّ اَللَّه؞ اُرْنغٛلْ اُرْدٜ ندٜنْ يٛتَّکٜ کِسْنَاٻٜ اٜ غٛنْٻٜ دٛوْ لَاوٛلْ حَلْکٜرٜ؞ تٛ غٛنْٻٜ دٛوْ لَاوٛلْ حَلْکُکِ اُرْنغٛلْ نغٛلْ طُمْ اُرْنغٛلْ مَيْدٜ؞ اَمَّا تٛ کِسْنَاٻٜ اُرْنغٛلْ نغٛلْ طُمْ اُرْنغٛلْ غَدَّنٛووٛلْٻٜ يٛنْکِ؞ اٜ وٛودِ ڤٛتُطٛ حُوُکِ کُوغَلْ نغَعَلْ؟ مِنْ نغَعَجِنْتَا وٛلْدٜ اَللَّه نغَمْ مِنْ کٜٻَ شٜىٰدٜ نٛ طُطْٻٜ نغَطَتَ؞ اَمَّا اٜ مِنْ مٜتَ غٛونغَ يٜىٰسٛ اَللَّه، نغَمْ اَلْمَسِيحُ جٜيِمِنْ، ندٜنْ اَللَّه لِلٛيِمِنْ؞ تٛو، اٛنْ کَمِّي مِنْ ڤُطِّي مَنْتُکِ کٛعٜ اَمِنْ کَدِنْ؟ کٛو بٛو طُمْ دٛولٜ مِنْ نغَرْدَ اٜ طٜرٜىٰجِ کٛلَّيْطِ مِنٛنْ مِنْ ٻٜيٜ، کٛو پِوُطِ تٛ مٛوطٛنْ نغَمْ کٛلَّ وٛٻّٜ مِنْ ٻٜيٜ نٛ وٛٻّٜ نغَطَتَ؟ اٛنٛنْ اٜ کٛعٜ مٛوطٛنْ نغٛنِ طٜرٜوٛلْ اَمِنْ بِنْدَانغٛلْ ندٜرْ ٻٜرْطٜ اَمِنْ؞ کٛو مٛيٜ وَاوَيْ جَنْغَنغٛلْ اَنْدَنغٛلْ؞ اٛنْ کٛلِّي اٛنٛنْ نغٛنِ طٜرٜوٛلْ نغٛلْ اَلْمَسِيحُ وِنْدِ، نغٛلْ اٛ لِلْدِ لَاوٛلْ اَمِنْ؞ نَاع اٜ دَوَارُ نغٛلْ وِنْدِرَا، اَمَّا اٜ رُوحُ اَللَّه غٛودُطٛ يٛنْکِ نغٛلْ وِنْدِرَا؞ نَاع دٛوْ اَلّٛوَلْ حَيْرٜ نغٛلْ وِنْدَا، اَمَّا دٛوْ اَلّٛوَلْ ٻٜرْطٜ يِمْٻٜ نغٛلْ وِنْدَا؞ مِنْ مبِعُ نٛنْ نغَمْ اٜ مِنْ کٛولِي اَللَّه لَاوٛلْ اَلْمَسِيحُ؞ مِنْ کٜپَايِ مِنْ مبِعَ مِنْ مبَاوَيْ وَطُکِ کٛو طُمٜ اٜ بَوْطٜ اَمِنْ، اَمَّا بَوْطٜ اَمِنْ تٛ اَللَّه پِوٛيِ؞ کَنْکٛ وَطِ مِنْ مبَاوِ وَرْتُکِ اٜکِّتِنٛوٻٜ اَلْکَوَلْ کٜسَلْ؞ اَلْکَوَلْ نغَلْ بٛو دَرَاکِ دٛوْ دٛوکَ بِنْدَاطُمْ، اَمَّا دٛوْ رُوحُ مَاکٛ نغَلْ دَرِ؞ نغَمْ دٛوکَ بِنْدَاطُمْ اٜ فٛوطَ مَيْدٜ، اَمَّا رُوحُ اٜ حٛکَّ يٛنْکِ کِ رٜعَتَا؞ طُمْ وِنْدِ دٛوکَ مُوسَ دٛوْ اَلّٛوجٜ حَيْرٜ، ندٜنْ شَرٜلْ کٛ مُوسَ حٛکّٜتٜىٰطُمْ، تٜدُّنغَلْ اَللَّه وَنْغِ وَطِ يٜىٰسٛ مَاکٛ اٜ طٜلْکِتٛو؞ کٛو ندٜ طٜلْکِتَاکِ کِنْ اٜ اُسْتٛو، فُو اٜ نٛنْ اِسْرَاعِيلَنْکٛعٜنْ مبَاوَايِ سُتَاکِ يٜىٰسٛ مَاکٛ؞ تٛ دٛوکَ غَدَّيْطُمْ مَيْدٜ وَرْدِي اٜ اِرِ نغَعَلْ تٜدُّنغَلْ، تٛو، کُوغَلْ رُوحُ اَللَّه ٻُرَيْ نٛنْ تٜدُّنغَلْ! تٛ کٛ فٛوطَتَ کِيتَ اٜ وٛودِ تٜدُّنغَلْ، تٛو، کٛ وَطَتَ يِمْٻٜ کٜٻَ اَادِلَاکُ اَللَّه ٻُرَيْ نٛنْ تٜدُّنغَلْ نَاع سٜطَّ! غٛونغَ، تٜدُّنغَلْ اَلْکَوَلْ کِينغَلْ وَلَا مَنْغُ جٛونِ تٛ نغَلْ حَوْتَامَ اٜ تٜدُّنغَلْ اَلْکَوَلْ کٜسَلْ؞ تٛ پَٻّٛتٛوطُمْ وَرْدِي اٜ تٜدُّنغَلْ، تٛو، اَلْکَوَلْ کٜسَلْ تَبِتَيْنغَلْ ٻُرَيْ نٛنْ تٜدُّنغَلْ نَاع سٜطَّ! نغَمْ نٛنْ، ندٜ اٜ مِنْ نغٛودِ اِرِ ندٜعٜ کَمُّندٜ، اٜ مِنْ مٜتِرَ سٜمْبٜ ٻٜرْندٜ نَاع سٜطَّ؞ مِنٛنْ نَاع بٛ مُوسَ مِنْ مبَعِ، شُدِّرْطٛ يٜىٰسٛ مَاکٛ اٜ لٜفٜلْ، نغَمْ تٛع اِسْرَاعِيلَنْکٛعٜنْ شُتٛومٛ نغِعَ نٛ طٜلْکِتٛلْ يٜىٰسٛ مَاکٛ اُسْتٛرْتٛو؞ اَمَّا ٻٜ ندُلِّي فَامُ، نغَمْ حَا حَنْدٜ تٛ ٻٜ نجَنْغَنَامَ اَلْکَوَلْ کِينغَلْ، لٜفٜلْ نغٜلْ اٜ حَطَٻٜ ٻٜ ڤَامَ غٛونغَ، نغَمْ سُمْڤٛوتِرْکِ اٜ اَلْمَسِيحُ تَنْ اِتَّتَنغٜلْ؞ غٛونغَ، حَا جٛونِ تٛ ٻٜ نجَنْغَنَامَ اَتَّوْرَ، لٜفٜلْ نغٜلْ اٜ وُمْنَ ٻٜرْطٜ مَٻّٜ؞ اَمَّا تٛ نٜطّٛ تُوبِي تٛکِّي جٛومِرَاوٛ، طُمْ اِتَّيْ لٜفٜلْ نغٜلْ دَغَ ٻٜرْندٜ مَاکٛ؞ تٛو، جٛومِرَاوٛ اٛنْ وٛنِ رُوحُ اَللَّه، ندٜنْ تٛ رُوحُ اَللَّه وٛنِ طٛنْ رِمْطِنٜىٰکِ وٛنِ؞ اٜنٜنْ ٻٜ غٜىٰشٜ مُعّٜنْ شُدِّتَا اٜنْ فُو اٜنْ کٛلَّ تٜدُّنغَلْ جٛومِرَاوٛ اٜنْ ٻٜيْدَ وَرْتُکِ بٛ مَاکٛ؞ تٜدُّنغَلْ نغَلْ وَطَيْ کَ ٻٜيْدَاکِ؞ طُعُمْ طُمْ کُوغَلْ جٛومِرَاوٛ، کَنْکٛ وٛنِ رُوحُ؞ نغَمْ نٛنْ، ندٜ اَللَّه يُرْمِنَنِيمِنْ حٛکِّيمِنْ کُوغَلْ نغَعَلْ، مِنْ اِتَّتَا کَمُّندٜ؞ مِنْ نغَݧِي حُوُکِ کُوطٜ شُوطِيطٜ شٜمْتِنِيطٜ؞ مِنْ مَجِّنْتَا يِمْٻٜ، مِنْ نغَيْلِتَتَا مَعَنَ وٛلْدٜ اَللَّه؞ اَمَّا اٜ مِنْ مبِعَ غٛونغَ اٜ نجَيْرِ؞ لَاوٛلْ وَطُکِ نٛنْ، کٛو مٛيٜ اَنْدَيْ ندٜرْ ٻٜرْندٜ مُوطُمْ يٜىٰسٛ اَللَّه مِنٛنْ اٜ مِنْ نغٛودِ غٛونغَ؞ تٛ حَبَرُ بٜلْطُمْ طُمْ مِنْ نغَعَجِنْتَ اٜ سُوطِي، وٛنْٻٜ دٛوْ لَاوٛلْ حَلْکٜرٜ تَنْ طُمْ سُوطَنِي؞ شٜيْطَنْ لَامِيطٛ دُونِيَارُ ندُعُ وُمْنِي ٻٜرْطٜ يِمْٻٜ ٻٜ کٛولَاکِ يٜىٰسُ، نغَمْ تٛع ٻٜ نغِعَ جَيْنغٛلْ حَبَرُ بٜلْطُمْ طُمْ تٜدُّنغَلْ اَلْمَسِيحُ نَنْدُطٛ اٜ اَللَّه؞ نغَمْ نَاع حَبَرُ اَمِنْ مِنْ نغَعَجِنْتَ، اَمَّا کٛ مِنْ نغَعَجِنْتَ وٛنِ يٜىٰسُ اَلْمَسِيحُ اٛ جٛومِرَاوٛ، مِنٛنْ بٛو نغَمْ مَاکٛ مِنْ نغَرْتِ مَشُّٻٜ مٛوطٛنْ؞ نغَمْ اَللَّه بِيطٛ جَيْنغٛلْ وُرْتٛيٛو دَغَ ندٜرْ ݧِوْرٜ، کَنْکٛ وَطِ جَيْنغٛلْ مَاکٛ يٜيْنِي ندٜرْ ٻٜرْطٜ اَمِنْ نغَمْ مِنْ اَنْدَ تٜدُّنغَلْ اَللَّه نغَلْ طُمْ يِعِي اٜ يٜىٰسٛ يٜىٰسُ اَلْمَسِيحُ؞ اَمَّا مِنٛنْ اٜ مِنْ نَنْدِ اٜ غٛجِيجٜ لٛوڤٜ؞ طُمْ رٜسِي جَوْدِ ندٜرْ اَمِنْ نغَمْ حٛلُّکِ طٜعٜ بَوْطٜ ٻُرْطٜ کٛو طٜيٜ بَوْطٜ، تٛ اَللَّه طٜ پِوٛيِ، نَاع تٛ اَمِنْ؞ مِنْ ٻِطَّامَ اٜ کٛو ندُيٜ وُتُّدُ، اَمَّا مِنْ ڤُسَايِ؞ ݧُمٛوجِ اَمِنْ نجِيٻَکٜ، اَمَّا مِنْ اِتَّايِ کَمُّندٜ؞ اٜ مِنْ تٛرّٜىٰ، اَمَّا اَللَّه سٜنْدِرَايِ اٜ اَمِنْ؞ اٜ مِنْ ندٛعّٜىٰ، اَمَّا مِنْ کَلْکَاکَ؞ کٛو ندٜيٜ اٜ مِنْ حَادٜ وَرٜىٰکِ نٛ طُمْ وَرِرِ يٜىٰسُ، نغَمْ يٛنْکِ اِرِ کِ مَاکٛ يِعٜىٰ ندٜرْ ٻَلِّ اَمِنْ؞ نغَمْ مِنٛنْ غٛودُٻٜ يٛنْکِ اٜ مِنْ حَادٜ مَيْدٜ کٛو ندٜيٜ نغَمْ يٜىٰسُ، نغَمْ طُمْ يِعَ يٛنْکِ مَاکٛ ندٜرْ ٻَلِّ اَمِنْ طِعِ مَايَيْطِ؞ کَنْجُمْ وَطِ مِنْ کٜدِّ تٛ مَيْدٜ، نغَمْ اٛنٛنْ کٜٻٛنْ يٛنْکِ؞ ندٜ اٜ مِنْ نغٛودِ حٛولَارٜ غٛعٛ اٜ بِنْدُطٛ اَايَارٜ بِيندٜ، «مِ حٛولَکٜ، کَنْجُمْ وَطِ مٜتُمِ؞» مِنٛنْ مَا مِنْ کٛولَکٜ، کَنْجُمْ وَطِ مِنْ مٜتِ؞ نغَمْ اٜ مِنْ اَنْدِ اَللَّه اُمِّنْطٛ يٜىٰسُ جٛومِرَاوٛ مٜىٰطٜنْ دَغَ مَيْدٜ، اٛ اُمِّنَيْمِنْ مِنٛنْ مَا نٛنْ نٛ اٛ اُمِّنِرِ يٜىٰسُ، اٛ وَدَّمِنْ حَوْتِ اٜ مٛوطٛنْ يٜىٰسٛ مَاکٛ؞ فُو طُعُمْ طُمْ نغَمْ ٻٜيْدَارِ مٛوطٛنْ، نغَمْ شَاحُ اَللَّه جٛتّٛتٛوطُمْ يِمْٻٜ طُطْٻٜ، وَطَ طُمْ ٻٜيْدَ يٜتُّکِ اَللَّه نغَمْ تٜدِّنْکِمٛ؞ نغَمْ نٛنْ، مِنْ اِتَّتَا کَمُّندٜ؞ کٛو ندٜ ٻَلِّ اَمِنْ اٜ ٻٜيْدَ تَمڤُکِ، فُو اٜ نٛنْ ٻٜرْطٜ اَمِنْ اٜ شٜمْبِطِنٜىٰ کٛو ندٜيٜ؞ نغَمْ تٛرَّاجِ طِ مِنْ تٛرّٜتٜىٰ جٛونِ طِ سٜطَّنَاجِ طِ نٜىٰٻَتَا طِ نغَطَيْ مِنْ کٜٻَ تٜدُّنغَلْ نغَلْ حَا اَبَدَا ٻُرْنغَلْ کٛو طُمٜ؞ نغَمْ نٛنْ، حَکِّيلٛ اَمِنْ وَلَا دٛوْ کٛ غِتٜ نغِعَتَ؞ اٜ مِنْ نغَطَ حَکِّيلٛ اَمِنْ دٛوْ کٛ غِتٜ مبَاوَتَا يِيکِ؞ نغَمْ کٛ غِتٜ نغِعَتَ طُمْ پَٻّٛتٛوطُمْ، اَمَّا کٛ غِتٜ مبَاوَتَا يِيکِ، طُمْ تَبِتَيْطُمْ؞ نغَمْ اٜ مِنْ اَنْدِ ٻَلِّ اَمِنْ اٜ نَنْدِ اٜ لُکُرُ طُمْ مِنْ نجٛوطٛتٛو ندٜرْ، ندٜرْ دُونِيَارُ ندُعُ؞ تٛ لُکُرُ طُمْ سَنْکِتَامَ، اٜ مِنْ اَنْدِ اَللَّه حٛکَّيْمِنْ وُرٛ تَبِتَيْنغٛ تٛنْ دٛوْ، نغٛ مَحِرَاکَ اٜ جُنْغٛ نٜطّٛ؞ جٛونِ اٜ مِنْ اٛتَّ اٜ مِنْ کَاٻِي نَاع سٜطَّ نغَمْ طُمْ ٻٛرْنَمِنْ ٻَنْدُ اَمِنْ ندُ دٛوْ؞ نغَمْ تٛ مِنْ ٻٛرْنَامَ ٻَنْدُ ندُنْ، مِنْ نغَرْتَتَا يٛنْکِيجِ طِ نغَلَا ٻَنْدُ؞ نغٜعٜلْ شَرٜلْ نغٜلْ مِنْ نغٛنْدِ ندٜرْ لُکُرُ طُمْ دُونِيَارُ، وَاتٛ ٻَنْدُ اَمِنْ، اٜ مِنْ اٛتَّ نغَمْ تٛرَّاجِ طِ ٻَنْدُ ندُنْ يَرَتَ؞ نَاع نغَمْ اٜ مِنْ نغِطِ سٜنْدِرْکِ اٜ ٻَنْدُ ندُنْ، اَمَّا اٜ مِنْ نغِطِ طُمْ ٻٛرْنَمِنْ ٻَنْدُ اَمِنْ ندُ دٛوْ، نغَمْ ٻَنْدُ ندُ مَايَتَا حٛشَّ نجَيْرِ ٻَنْدُ مَايَيْندُ؞ اَللَّه اٜ حٛورٜ مُوطُمْ سِرْيِيمِنْ نغَمْ طُعُمْ، اٛ حٛکِّيمِنْ رُوحُ مَاکٛ نغَمْ تَبِّتِنَنْکِمِنْ کٛ اٛ وَطَنْتَمِنْ يٜىٰسٛ طٛعٛ؞ کَنْجُمْ وَطِ کٛو ندٜيٜ اٜ مِنْ نغٛودِ سٜمْبٜ ٻٜرْندٜ؞ اٜ مِنْ اَنْدِ تٛ نِ اٜ مِنْ ندٜرْ ٻَنْدُ اَمِنْ ندُعُ، اٜ مِنْ نغٛطِّتِي وُرٛ اَمِنْ وٛنْغٛ تٛ جٛومِرَاوٛ؞ اٜ مِنْ نغَطَ جٛنْدٜ اَمِنْ دٛوْ حٛولَاکِ اَللَّه، نَاع دٛوْ کٛ مِنْ نغِعَتَ اٜ غِتٜ؞ غٛونغَ اٜ مِنْ نغٛودِ سٜمْبٜ ٻٜرْندٜ، ندٜنْ مِنْ ٻُرِي يِطُکِ مِنْ شٜنْدِرَ اٜ ندُعُ ٻَنْدُ مِنْ نجٛوطٛدٛو اٜ جٛومِرَاوٛ تٛنْ دٛوْ؞ نغَمْ نٛنْ، کٛ مِنْ نغِطِ وٛنِ مِنْ مبٜلْنَنَمٛ ٻٜرْندٜ، کٛو اٜ مِنْ ندٜرْ ندُعُ ٻَنْدُ کٛو اٜ تٛنْ دٛوْ؞ نغَمْ اٜنْ فُو دٛولٜ اٜنْ ندَرٛتٛ يٜىٰسٛ اَلْمَسِيحُ نغَمْ کِيتَ، نغَمْ کٛو مٛيٜ حٜٻَ مبَرْجَارِ کٛ وَطِ ندٜرْ ٻَنْدُ ندُعُ، کٛو کٛ اٛ وَطِ اٜ وٛوطِ کٛو طُمْ وٛوطَا؞ ندٜ اٜ مِنْ اَنْدِ کٛ وٛنِ کُلٛلْ جٛومِرَاوٛ، کَنْجُمْ وَطِ اٜ مِنْ نغَطَ کٛ مِنْ مبَاوَتَ وَطُکِ مِنْ ڤٛوطٛيَ حَکِّيلٛ يِمْٻٜ؞ اَللَّه اٜ اَنْدِ نٛ مِنْ نغٛنْتِندِرِ بٛطُّمْ، اٜ مِ کَمّٛو اٛنٛنْ مَا اٛنْ اَندِمِنْ بٛطُّمْ ندٜرْ ٻٜرْطٜ مٛوطٛنْ؞ نَاع اٜ مِنْ نغِطِ مِنْ مَنَ کٛعٜ اَمِنْ يٜىٰسٛ مٛوطٛنْ، اَمَّا اٜ مِنْ نغِطِ مِنْ کٛکَّعٛنْ لَاوٛلْ مَنْتٛرَاکِمِنْ، نغَمْ مبَاوٛنْ نٛوتٛوطٛنْ پَمْطٜ پٜفْتٛوٻٜ کٛعٜ دٛوْ مَنْغُ مَٻّٜ نَاع دٛوْ کٛ وٛنِ ندٜرْ ٻٜرْطٜ مَٻّٜ؞ تٛ يِمْٻٜ کٛشِّيمِنْ مِنْ حَاݝَاٻٜ، فُو طُمْ نغَمْ اَللَّه؞ تٛ بٛو اٜ مِنْ ندٜرْ حَکِّيلٛ اَمِنْ، طُمْ نغَمْ مٛوطٛنْ؞ نغَمْ يِدّٜ اَلْمَسِيحُ وَطَتَمِنْ اٜ مِنْ کُوَ کُوطٜ اَمِنْ، نغَمْ اٜنْ تَبِّتِنِي غٛعٛتٛ مَايِي نغَمْ کٛو مٛيٜ، نغَمْ نٛنْ کٛو مٛيٜ مَايِي؞ اٛ مَايِي نغَمْ يِمْٻٜ فُو، نغَمْ تٛع ٻٜ نغَطَ جٛنْدٜ بٜلْنَنَيْندٜٻٜ ٻٜرْطٜ، اَمَّا ٻٜ نغَطَ جٛنْدٜ بٜلْنَنَيْندٜ اٛنْ طٛنْ مَيْطٛ نغَمْ مَٻّٜ اُمِّي دَغَ مَيْدٜ؞ نغَمْ نٛنْ، دَغَ جٛونِ مِنْ کٛشَّتَا غٛطّٛ نٛ يِمْٻٜ دُونِيَارُ کٛشِّرِمٛ؞ کٛو ندٜ ندٜنّٛ مِنْ کٛشِّي اَلْمَسِيحُ نٛ يِمْٻٜ دُونِيَارُ کٛشِّرِمٛ، جٛونِ نَاع نٛنْ مِنْ کٛشِّرِمٛ؞ نغَمْ نٛنْ، فُو غَرْتُطٛ مٛ اَلْمَسِيحُ اٛ وَرْتِي نٜطّٛ کٜسٛ؞ کٛو طُمٜ طُمْ ندٜنّٛ پَٻَّکٜ، کٛو طُمٜ وَرْتِي کٜسُمْ؞ طُعُمْ فُو اَللَّه وَطِطُمْ شِرْيٛوتِرْطٛمِنْ اٜ مَاکٛ لَاوٛلْ اَلْمَسِيحُ، ندٜنْ اٛ حٛکِّيمِنْ کُوغَلْ وَعَجِنْکِ سِرْيٛوتِرْکِ يِمْٻٜ اٜ مَاکٛ؞ وَعَجُ طُمْ وٛنِ اَللَّه اٜ سِرْيٛوتِرَ يِمْٻٜ دُونِيَارُ اٜ مُوطُمْ لَاوٛلْ اَلْمَسِيحُ، ندٜنْ اٛ وِنْدَتَا حَکّٜ طُمْ ٻٜ نغَطِ؞ کَنْکٛ حٛکِّمِنْ کُوغَلْ وَعَجِنْکِ سِرْيٛوتِرْکِ اٜ مَاکٛ؞ نغَمْ نٛنْ، مِنْ مٜتٛوٻٜ کٛ اَلْمَسِيحُ وِعِمِنْ، بٛ اَللَّه تٛرٛتٛوعٛنْ لَاوٛلْ اَمِنْ؞ اٜ مِنْ تٛرٛوعٛنْ نغَمْ اَلْمَسِيحُ، شِرْيٛوتِرٜىٰ اٜ اَللَّه؞ اَلْمَسِيحُ مٜىٰطَايِ وَطُکِ حَکّٜ، اَمَّا اَللَّه يٛوِي فُو حَکّٜىٰجِ مٜىٰطٜنْ دٛوْ مَاکٛ، نغَمْ لَاوٛلْ مَاکٛ نغَرْتٜنْ اَادِلِعٜنْ يٜىٰسٛ اَللَّه؞ مِنٛنْ، مِنْ کُودٛوٻٜ اٜ اَللَّه؞ نغَمْ مَاجُمْ اٜ مِنْ تٛرٛوعٛنْ تٛع اٛنْ اَلُ شَاحُ اَللَّه طُمْ کٜٻُطٛنْ وَرْتَ مٜىٰرٜ؞ نغَمْ اَللَّه وِعِي، «ندٜ شَرٜلْ کَانُنغٜلْ وَطِ، مِ نَنِي دٛعَارٜ مَاطَ، ندٜ ݧَلْندٜ کِسْندَمْ وَرِ، مِ وَلِّيمَ؞» رَا، جٛونِ وٛنِ شَرٜلْ کَانُنغٜلْ، جٛونِ وٛنِ ݧَلْندٜ کِسْندَمْ! مِنْ نغِطَا مِنْ نغَطَ کٛ وَطَتَ غٛطّٛ فٜغّٛو دٛوْ لَاوٛلْ غٛونغَ، نغَمْ تٛع طُمْ حٜٻَ کٛ طُمْ حُطَتَ ندٜرْ کُوغَلْ اَمِنْ؞ اَمَّا ندٜرْ کٛو طُمٜ کٛ مِنْ نغَطَتَ، اٜ مِنْ کٛلَّ مِنْ مَشُّٻٜ اَللَّه ٻٜ غٛونغَ ندٜرْ مُݧَلْ مَنْغَلْ نغَلْ مِنْ نغَطَتَ ندٜرْ تٛرَّ، اٜ شَطٜىٰلٜ، اٜ ٻِطَّارٜ؞ مِنْ ڤِيَامَ، مِنْ شُرَامَ، طُمْ اُمِّنِي حَوْرٜ دٛوْ اَمِنْ، مِنْ کُوِي نَاکِ ٻَلِّ اَمِنْ مبَاتِ، مِنْ مبَالِي بَلْطٜ مِنْ طَانَاکِ، بَنْݧٜ مِنْ کٜٻَتَا کٛ مِنْ ݧَامَتَ؞ مِنْ کٛلِّي مِنْ مَشُّٻٜ اَللَّه ٻٜ غٛونغَ ندٜرْ لَٻْکِ ٻٜرْطٜ کِ مِنْ نغٛودِ، اٜ اَنْدَلْ، اٜ مُݧَلْ، اٜ نٛ مِنْ مبَلِّرْتَ يِمْٻٜ، اٜ رُوحُ اَللَّه طُمْ مِنْ نغٛودِ، اٜ يِدّٜ ندٜ غٛونغَ، اٜ مٜتُکِ غٛونغَ، اٜ بَوْطٜ اَللَّه؞ اَادِلَاکُ وٛنِ کٛ مِنْ کٛنِرْتَ طُمْ مِنْ نجٛغِي جُنْغٛ ݧَامٛ اٜ نَنٛ؞ اٜ مِنْ کٛکّٜىٰ مَنْغُ، اٜ مِنْ شٜمْتِنٜىٰ، اٜ مِنْ کُطٜىٰ، اٜ مِنْ مَنٜىٰ؞ مِنْ کٛشَّامَ بٛ مَجِّنٛوٻٜ يِمْٻٜ، اَمَّا مِنْ غٛونغَعٜنْ؞ مِنْ کٛشَّامَ بٛ طُمْ اَنْدَامِنْ، اَمَّا اٜ طُمْ اَندِمِنْ بٛطُّمْ؞ مِنْ کٛشَّامَ بٛ مَيْٻٜ، اَمَّا اٜ مِنْ ڤٛوفَ؞ اٜ مِنْ ڤِيٜىٰ، اَمَّا مِنْ مَايَايِ؞ اٜ طُمْ وَطَ مِنْ نَنَ شِيَ بٜلْطُمْ ٻٜرْندٜ، اَمَّا کٛو ندٜيٜ اٜ مِنْ مبٜلْمبٜلْتَ؞ مِنْ نغَلَنَا، اَمَّا مِنْ نغَرْتِرِي طُطْٻٜ رِسْکُٻٜ؞ مِنْ کٛشَّامَ بٛ کٛو کٛ مِنْ نغٛودِ، اَمَّا اٜ مِنْ نغٛودِ کٛو طُمٜ؞ اٛنٛنْ کٛرِنْتِيَنْکٛعٜنْ، مِنْ مٜتَنِيعٛنْ اٜ نجَيْرِ؞ مِنْ مَٻِّتَنِيعٛنْ ٻٜرْطٜ اَمِنْ؞ نَاع مِنٛنْ نغَݧِ حٛلُّکِعٛنْ يِدّٜ، اَمَّا اٛنٛنْ نغَݧِ حٛلُّکِمِنْ يِدّٜ؞ مِ مٜتَنِيعٛنْ نٛ مٜتِرَنَيْمِ ٻِٻّٜ اَمْ؞ اٜ مِ تٛرٛوعٛنْ، ندٜ اٜ مِنْ نغِطِعٛنْ، اٛنٛنْ مَا مَٻِّتَنٜىٰمِنْ ٻٜرْطٜ مٛوطٛنْ؞ تٛع اٛنْ کَوْتُ کٛعٜ اٜ يِمْٻٜ ٻٜ کٛولَاکِ يٜىٰسُ؞ کٛ حَوْتِ اَادِلَاکُ اٜ حَلّٜىٰندٜ؟ کٛو بٛو، نغٛيٜ سُمْڤٛ وٛنِ حَکُّندٜ جَيْنغٛلْ اٜ ݧِوْرٜ؟ کِيٜ سِرْيٛوتِرْکِ وٛنِ حَکُّندٜ اَلْمَسِيحُ اٜ شٜيْطَنْ؟ کٛو بٛو، کٛ حَوْتِ تٛکُّطٛ يٜىٰسُ اٜ مٛ تٛکَّايِ يٜىٰسُ؟ ندٜنْ کٛ حَوْتِ وُرٛ شٜنِينغٛ نغٛ اَللَّه اٜ غُنْکِيجِ؟ ٻَلِّ مٜىٰطٜنْ نغٛنِ وُرٛ شٜنِينغٛ نغٛ اَللَّه مٛ يٛنْکِ؞ نغَمْ اٛ وِعِ، «مِ جٛوطٛتٛ ندٜرْ مَٻّٜ، مِ يَادَ اٜ مَٻّٜ؞ مِ وَرْتَيْ اَللَّه مَٻّٜ، ٻٜ نغَرْتَيْ يِمْٻٜ اَمْ؞» طٛنْمَا اٛ وِعِ، «نغَمْ نٛنْ، مبُرْتٛيٜىٰ دَغَ ندٜرْ مَٻّٜ، کَکِّتٜىٰ دَغَ ندٜرْ مَٻّٜ؞ تٛع اٛنْ مٜىٰمُ کٛ لَاٻَا، ندٜنْ مِ جَٻَيْعٛنْ؞ مِ وَرْتَيْ ݧَاکٛ مٛوطٛنْ، اٛنٛنْ بٛو اٛنْ نغَرْتَيْ ٻِٻّٜ اَمْ وٛرْٻٜ اٜ رٜوْٻٜ؞ نٛنْ جٛومِرَاوٛ جٛومُ بَوْطٜ وِعِ؞» تٛو، بَنْدِرَاٻٜ اَمْ ٻٜ نغِطُمِ، ندٜ اٜنْ نغَطَنَامَ اَلْکَوَلْ دٛوْ فُو طُعُمْ، اٜنْ لَاٻِنْ کٛعٜ مٜىٰطٜنْ دَغَ کٛو طُمٜ غَطٛوجُمْ ٻَلِّ مٜىٰطٜنْ اٜ ٻٜرْطٜ مٜىٰطٜنْ نغَرْتَ کٛ لَاٻَا يٜىٰسٛ اَللَّه؞ اٜنْ نغَرْتُ ٻٜ سٜنَاکِ کٜىٰوُکِ، کُلٛوٻٜ اَللَّه؞ کٛولٜىٰمِنْ ندٜرْ يِدّٜ؞ مِنْ نغَطَنَايِ غٛطّٛ کٛ وٛوطَا، مِنْ مَجِّنَايِ غٛطّٛ، مِنْ پٛيْرَايِ غٛطّٛ نغَمْ مِنْ نجَٻَنَمٛ غٛطُّمْ؞ مِ وِعَايِ حَالَ کَعَ نغَمْ مِ يٛوَنَعٛنْ غٛطُّمْ کٛ وٛوطَا؞ مِ وِعِينٛعٛنْ اٜ مِنْ نغِطِعٛنْ نَاع سٜطَّ ندٜرْ ٻٜرْطٜ اَمِنْ کٛو اٜ مِنْ فٛوفَ کٛو ندٜرْ مَيْدٜ؞ مِ حٛولَکٜعٛنْ ٻٜرْندٜ غٛعٛ، اٜ مِ مَنْتٛرٛوعٛنْ نَاع سٜطَّ، اٛنْ شٜمْبِطِنِييَمْ نَاع سٜطَّ؞ فُو اٜ تٛرَّاجِ طِ مِنْ نجَرَتَ، وٜلْوٜلٛ اَمْ وَلَا کٜىٰرٛلْ؞ نغَمْ کٛ مِنْ نغَرِ لٜيْدِ مَکِدٛونِيَ، مِنْ کٜٻَايِ سِوْتَارٜ، اَمَّا کٛو تٛيٜ تٛ مِنْ نغَيْلِتٛرِي اٜ مِنْ تٛرّٜىٰ؞ مِنْ نغٜدّٛوتِرِي اٜ وٛٻّٜ، ندٜرْ ٻٜرْطٜ اَمِنْ کُلٛلْ نَنْغِمِنْ؞ اَمَّا اَللَّه بَلْتِنٛووٛ ٻٜرْطٜ غٛنْٻٜ ندٜرْ وَنَّارٜ، اٛ وَلْتِنِ ٻٜرْطٜ اَمِنْ اٜ غَرٛلْ تِيتُسْ؞ نَاع وَرْکِ مَاکٛ تَنْ وَلْتِنِ ٻٜرْطٜ اَمِنْ، اَمَّا حَبَرُ طُمْ اٛ حٛکِّمِنْ نٛ مبَلْتِنِرْطٛنْ ٻٜرْندٜ مَاکٛ؞ اٛ وِعِيمِنْ نٛ کَاٻِرْطٛنْ نغِعٛنْيَمْ، اٜ نٛ نغَنِّرْطٛنْ دٛوْ کٛ نغَطَنْطٛنْيَمْ، اٜ نٛ نغِطِرْطٛنْ وَلُّکِيَمْ؞ کَنْجُمْ ٻٜيْدَنِيَمْ وٜلْوٜلْتُکِ؞ کٛو تٛ طٜرٜوٛلْ نغٛلْ مبِنْدَنْمِعٛنْ وَطِي اٛنْ نَنِي شِيَ بٜلْطُمْ، طُمْ وَنَّايِيَمْ جٛونِ، کٛو ندٜ ندٜنّٛ مِ وَنِّي، نغَمْ مِ فَامِي طٜرٜوٛلْ نغٛلْ وَطِي اٛنْ نَنِي شِيَ بٜلْطُمْ ٻٜرْطٜ، کٛو ندٜ طُمْ شَرٜلْ سٜطَّ تَنْ؞ جٛونِ اٜ مِ نَنَ بٜلْطُمْ ندٜرْ ٻٜرْندٜ اَمْ، نَاع نغَمْ اٛنْ نَنَايِ بٜلْطُمْ، اَمَّا نغَمْ شِيَ نَنْکِ بٜلْطُمْ مٛوطٛنْ وَطِ تُوبُطٛنْ؞ نغَمْ شِيَ نَنْکِ بٜلْطُمْ کِنْ طُمْ اِرِ کِ اَللَّه يِطِ؞ نغَمْ نٛنْ مِنْ نغَطَنَايِعٛنْ کٛ وٛوطَا؞ نغَمْ شِيَ نَنْکِ بٜلْطُمْ اِرِ کِ اَللَّه يِطِ اٜ وَطَ نٜطّٛ تُوبَ حٜٻَ کِسْندَمْ؞ کِ وَطَتَا اٛ وِعَ، «دَا اٜ مِ اَنْدُنٛو،» اَمَّا شِيَ نَنْکِ بٜلْطُمْ اِرِ کِ دُونِيَارُ اٜ فٛوطَ مَيْدٜ؞ ندَارٜىٰ نغِعٛنْ کٛ شِيَ نَنْکِ بٜلْطُمْ مٛوطٛنْ وَدَّنِعٛنْ، کِ وَطِيعٛنْ اٛنْ نغَرْتِي تِيطُٻٜ، اٛنْ نغَرْتِي کَاٻُٻٜ کٛلَّ اٛنٛنْ نَاع اٛنْ غَطٛوٻٜ کٛ وٛوطَا، اٛنْ ٻٜرْنِي دٛوْ کٛ وٛوطَا، اٛنْ کُلْتٛرِي، اٛنْ کَاٻِي نغِعٛنْيَمْ، اٛنْ نغِطِي وَلُّکِيَمْ، اٛنْ کَاٻِي نغِعٛنْ طُمْ تَپَنِي غَطٛووٛ حَکّٜ کِيتَ؞ اٛنْ کٛلِّي اٛنْ نغَطِي کٛ حَانِ دٛوْ کٛ مبِنْدَنّٛومِعٛنْ؞ نغَمْ نٛنْ، کٛو ندٜ مِ وِنْدَنِينٛعٛنْ طٜرٜوٛلْ، نَاع نغَمْ نٜطّٛ غَطُطٛ کٛ وٛوطَا مبِنْدُمِنغٛلْ، کٛو نغَمْ نٜطّٛ غَطَنَاطٛ کٛ وٛوطَا، اَمَّا مِ وِنْدُنغٛلْ نغَمْ نغِعَنٛنْ غِتٜ مٛوطٛنْ نٛ نغِرُّطٛنْمِنْ يٜىٰسٛ اَللَّه؞ کَنْجُمْ وَلْتِنِ ٻٜرْطٜ اَمِنْ؞ کٛ ٻُرِ نٛنْ، وٜلْوٜلٛ نغٛ تِيتُسْ نَنِ مبٜلْنَنِيمِنْ ٻٜرْطٜ، نغَمْ اٛنْ فُو اٛنْ مبٜلْنَنِيمٛ ٻٜرْندٜ؞ مِ مَنْتٛرَکٜعٛنْ يٜىٰسٛ تِيتُسْ، اٛنٛنْ بٛو اٛنْ شٜمْتِنَايِيَمْ؞ نٛنْ نٛ کٛو طُمٜ طُمْ مِنْ مبِعِعٛنْ طُمْ غٛونغَ، نٛنْ مَا مَنْتٛرَاکِ کِ مِنْ مَنْتٛرِيعٛنْ يٜىٰسٛ تِيتُسْ تَبِّتِنَامَ طُمْ غٛونغَ؞ يِدّٜ ندٜ تِيتُسْ يِطِعٛنْ جٛونِ ٻُرِي ندٜ ندٜنّٛ، تٛ اٛ ݧُمِي نٛ تٛکِّرْطٛنْ کٛ طُمْ وِعِعٛنْ، اٜ نٛ نجَٻّٛرِيطٛنْمٛ ندٜرْ مَنْغُ اٜ فَامَنْکِ؞ اٜ مِ نَنَ بٜلْطُمْ نغَمْ اٜ مِ حٛولِيعٛنْ اٜ ٻٜرْندٜ غٛعٛ؞ تٛو، بَنْدِرَاٻٜ اَمْ، جٛونِ اٜ مِنْ نغِطِ اَنْدٛنْ شَاحُ طُمْ اَللَّه حٛکِّ تٛکُّٻٜ يٜىٰسُ غٛنْٻٜ مَکِدٛونِيَ؞ کٛو ندٜ ٻٜ ڤٛوندِرَامَ تٛرَّ کَلُّکَ، طٛنْمَا اٜ ٻٜ ندٜرْ دُلّٜرٜ کَلُّندٜ، فُو اٜ نٛنْ وٜلْوٜلٛ مَٻّٜ مَنْغٛ وَطِي ٻٜ کٛکِّي بَلَّلْ مَنْغَلْ؞ مِ شٜيْدَکٜ ٻٜ کٛکِّي بَلَّلْ نٛ ٻٜ مبَاوِ حٛکُّکِ، حَا مَا کٛ ٻُرِ نٛنْ؞ ندٜرْ يِدّٜ ٻٜرْطٜ مَٻّٜ، ٻٜ تٛرَکٜمِنْ نَاع سٜطَّ مِنْ اَلَٻٜ ٻٜ نغَطَ جُنْغٛ ندٜرْ کُوغَلْ وَلُّکِ يِمْٻٜ اَللَّه غٛنْٻٜ اُرُشَلِيمَ؞ ٻٜ نغَطِي کٛ ٻُرِ ݧُمٛ اَمِنْ؞ اَرَنْدٜ ٻٜ کٛکِّي جٛومِرَاوٛ کٛعٜ مَٻّٜ، ندٜنْ مِنٛنْ مَا ٻٜ کٛکِّيمِنْ کٛعٜ مَٻّٜ نٛ اَللَّه يِطِ؞ ندٜ تِيتُسْ فُطِّ کُوغَلْ حَوْرُتُکِ بَلَّلْ تٛ مٛوطٛنْ، مِنْ تٛرَکٜمٛ اٛ سٛعّٛو تٛ مٛوطٛنْ اٛ يٛتِّنَنغَلْ؞ تٛو، اٛنْ نغَطِي بٛطُّمْ ندٜرْ کٛو طُمٜ، وَاتٛ ندٜرْ حٛولَاکِ يٜىٰسُ، اٜ مٜتُکِ بٛطُّمْ، اٜ اَنْدُکِ غٛونغَ، اٜ يِدّٜ وَلُّکِ، اٜ يِدّٜ ندٜ نغِطّٛنْمِنْ؞ نٛنْ مَا اٜ مِنْ نغِطِ نغَطٛنْ بٛطُّمْ ندٜرْ نغَعَلْ کُوغَلْ وَلُّکِ؞ نَاع اٜ مِ وِعَ دٛولٜ نغَطّٛنْ نٛنْ؞ مِ حٛکُّعٛنْ حَبَرُ بَلَّلْ مَنْغَلْ نغَلْ وٛٻّٜ مبَلِّ نغَمْ مِ اَنْدَ کٛو يِدّٜ ندٜ نغِطّٛنْ وٛٻّٜ ندٜ غٛونغَ؞ نغَمْ اٛنْ اَنْدِ کٛ جٛومِرَاوٛ مٜىٰطٜنْ يٜىٰسُ اَلْمَسِيحُ وَطَنِعٛنْ نغَمْ يِدّٜ مَاکٛ؞ کٛو ندٜ اٛ دِسْکُطٛ، نغَمْ مٛوطٛنْ اٛ وَرْتِ مٛ وَلَنَا، نغَمْ لَاوٛلْ دُلّٜرٜ مَاکٛ نغَرْتٛنْ رِسْکُٻٜ؞ رَا شَاوٛرِ طُمْ کٛکَّيْمِعٛنْ دٛوْ فِي طُعُمْ؞ رٛوَنِ اٛنٛنْ اَرْتِ حٛکُّکِ بَلَّلْ، نَاع اٛنْ اَرْتُ حٛکُّکِ بَلَّلْ تَنْ، حَا مَا اٛنْ اَرْتِي يِطُکِ حٛکُّکِ بَلَّلْ نغَلْ؞ تٛو، جٛونِ سٜيْ نجٛتِّنٛنْ کُوغَلْ نغَلْ اٜ اِرِ ٻٜرْندٜ ندٜ ڤُطِّرْطٛنْغَلْ؞ کٛکّٜىٰ کٛ مبَاوٛتٛنْ حٛکُّکِ؞ نغَمْ تٛ اٛنْ نغٛودِ ٻٜرْطٜ حٛکُّکِ بَلَّلْ، اَللَّه جَٻَيْ کٛ کٛکُّطٛنْ؞ اَللَّه اٜ رَارَ کٛ نغٛودُطٛنْ، نَاع کٛ اٛنْ نغَلَا؞ کٛ نغِطُمِ وٛنِ نَاع تٛرّٛنْ کٛعٜ مٛوطٛنْ نغَمْ مبَلّٛنْ وٛٻّٜ، اَمَّا اٜ مِ يِطِ يِمْٻٜ فُو ڤٛتِّدَ؞ جٛونِ طُوطُکِ جَوْدِ مٛوطٛنْ وَلَّيْ وٛنْٻٜ ندٜرْ دُلّٜرٜ؞ يٜىٰسٛ طٛعٛ کَمْٻٜ مَا، ٻٜ مبَلَّعٛنْ ندٜرْ دُلّٜرٜ مٛوطٛنْ، نغَمْ کٛو طُمٜ فٛتِّدَنَ کٛو مٛيٜ؞ نٛنْ نٛ طُمْ وِنْدِرَا، «نٛکُّطٛ طُطُّمْ طُمْ طُوطَايِ؞ نٛکُّطٛ سٜطَّ، طُمْ فَمْطَايِ؞» اَمَّا يٜتّٛورٜ تَبِّتَ تٛ اَللَّه غَطُطٛ تِيتُسْ وَرْتِ غِطّٛ وَلُّکِعٛنْ نٛنْ نٛ مِنْ نغِطِرِ وَلُّکِعٛنْ؞ نَاع نغَمْ مِنْ تٛرَکٜمٛ تَنْ وَطِ اٛ جَٻِ يَاکِ تٛ مٛوطٛنْ، اَمَّا کَنْکٛ اٜ حٛورٜ مَاکٛ سُٻِ يَحَ تٛ مٛوطٛنْ نغَمْ اٛ حَاٻِي اٛ وَلَّ؞ مِنْ لِلْدٛيَيْمٛ اٜ بَنْدِرَاوٛ مٜىٰطٜنْ مَنٜتٜىٰطٛ کٛو تٛيٜ تٛ تٛکُّٻٜ يٜىٰسُ کَوْرِتَتَ؞ اٜ مٛ مَنٜىٰ نغَمْ وَعَجِنْکِ حَبَرُ بٜلْطُمْ؞ نَاع کَنْجُمْ تَنْ، ٻٜ شُٻِيمٛ نغَمْ اٛ يَادَ اٜ اَمِنْ ندٜرْ يَادُ يَارُکِ بَلَّلْ نغَلْ طُمْ حَوْرِتَنِ تٛکُّٻٜ يٜىٰسُ غٛنْٻٜ اُرُشَلِيمَ؞ کَنْجُمْ وٛنِ کُوغَلْ بٛنْغَلْ نغَلْ مِنْ نغَطَتَ نغَمْ مَوْنِنْکِ جٛومِرَاوٛ، طٛنْمَا نغَمْ حٛلُّکِ نٛ مِنْ نغِطِرِ وَلُّکِ؞ اٜ مِنْ ندٛغَّ تٛع غٛطّٛ مٜتَ کَلُّکَ دٛوْ نٛ مِنْ کُوِرْتَ کُوغَلْ مَنْغَلْ نغَعَلْ نغَلْ مٛٻْتُکِ اٜ سٜنْدُکِ؞ اٜ مِنْ نغِطِ مِنْ نغَطَ کٛ حَانِ، نَاع يٜىٰسٛ جٛومِرَاوٛ تَنْ، اَمَّا حَا مَا اٜ يٜىٰسٛ يِمْٻٜ؞ طٛنْمَا مِنْ لِلْدٛيَيْٻٜ اٜ بَنْدِرَاوٛ مٜىٰطٜنْ، ندٜ طُطُّمْ مِنْ ڤٛوندِيمٛ مِنْ نغِعِي اٜ مٛ يِطِ وَلُّکِ اٜ طَتٜ طُطّٜ، اَمَّا جٛونِ اٛ ٻُرِي يِطُکِ وَلُّکِ نغَمْ اٜ مٛ حٛولِيعٛنْ نَاع سٜطَّ؞ تِيتُسْ، اٛ حِغٛ کُوغَلْ اَمْ، مِنْ اٜ مَاکٛ اٜ مِنْ کُودَ نغَمْ مٛوطٛنْ؞ بَنْدِرَاٻٜ مٜىٰطٜنْ جَادٛوٻٜ اٜ مَاکٛ، ٻٜ لِلَاٻٜ ندٜرْ تٛکُّٻٜ يٜىٰسُ اَلْمَسِيحُ، کُوغَلْ مَٻّٜ اٜ تٜدِّنَمٛ؞ نغَمْ نٛنْ، کٛلّٜىٰٻٜ يِدّٜ مٛوطٛنْ اٜ کٛ وَطَتَ اٜ مِنْ مَنْتِتٛرٛوعٛنْ، نغَمْ کَوْتٜ تٛکُّٻٜ يٜىٰسُ تَبِّتِنَ مَنْتٛرَاکِعٛنْ کِ مِنْ مَنْتٛرْتٛوعٛنْ طُمْ غٛونغَ؞ نَاع طُمْ دٛولٜ مِ وِنْدَنَعٛنْ دٛوْ کُوغَلْ وَلُّکِ يِمْٻٜ اَللَّه؞ نغَمْ اٜ مِ اَنْدِ اٛنْ نغِطِ وَلُّکِ نَاع سٜطَّ؞ مِ مَنْتٛرَکٜعٛنْ يٜىٰسٛ يِمْٻٜ مَکِدٛونِيَ مِ وِعِيٻٜ اٛنٛنْ يِمْٻٜ اَکَايَ اٛنْ شِرْيَکٜ کٛکّٛنْ بَلَّلْ دَغَ رٛوَنِ؞ تِينَارٜ مٛوطٛنْ وَطِ طُطْٻٜ ندٜرْ مَٻّٜ ڤُطِّ وَلُّکِ؞ اَمَّا مِ لِلٛيِي ٻٜنْ طٛنْ بَنْدِرَاٻٜ تٛ مٛوطٛنْ نغَمْ شِرْيٛوطٛنْ وَلُّکِ نٛ مبِيمِ، نغَمْ تٛع مَنْتٛرَاکِ کِ مِنْ مَنْتٛرْتٛوعٛنْ دٛوْ فِي طُعُمْ وَرْتَ مٜىٰرٜ؞ نغَمْ تٛ مِ وَرْدٛيِي اٜ وٛٻّٜ ندٜرْ تٛکُّٻٜ يٜىٰسُ وٛنْٻٜ مَکِدٛونِيَ مِنْ تَوِي اٛنْ شِرْيَاکِ، مِ نَنَيْ شٜمْتُطُمْ نَاع سٜطَّ نغَمْ مَنْتٛرَاکِ کِ مَنْتٛرْتٛومِعٛنْ، ندٜنْ نَاع مِنْ تَنْ سٜمْتَتَ، حَا اٜ اٛنٛنْ؞ نغَمْ نٛنْ، مِ ݧُمِي دٛولٜ مِ تٛرٛو بَنْدِرَاٻٜ ٻٜنْ طٛنْ اَرْتَ يَاکِ تٛ مٛوطٛنْ، ٻٜ تَبِّتِنَ اٛنْ شِرْيَکٜ بَلَّلْ مَنْغَلْ نغَلْ نغَطّٛنْ اَلْکَوَلْ کٛ مِ وَرَ؞ نغَمْ تٛ مِ وَرِي مِ تَوَ اٜ نغَلْ حَوْرِتِي، نغَلْ وَرْتَ بَلَّلْ نغَلْ کٛکُّطٛنْ ٻٜرْندٜ غٛعٛ، نَاع اٜ دٛولٜ؞ ݧُمٜىٰ طُعُمْ؞ کٛو مٛيٜ اَاوُطٛ سٜطَّ، سٜطَّ اِتَّتَ، ندٜنْ فُو اَاوُطٛ کٛ طُوطِ، کٛ طُوطِ اِتَّتَ؞ کٛو مٛيٜ سٜيْ حٛکَّ کٛ سُٻِ حٛکُّکِ ندٜرْ ٻٜرْندٜ مُوطُمْ، نَاع اٜ نَوْطُمْ ٻٜرْندٜ کٛو اٜ دٛولٜ، نغَمْ اَللَّه اٜ يِطِ کٛکّٛووٛ ندٜرْ بٜلْطُمْ ٻٜرْندٜ؞ اَللَّه اٜ وَاوَ حٛکُّکِعٛنْ کٛو اِرِ طُمٜ بَرْکَ ٻُرْطُمْ کٛ نغِطّٛنْ، نغَمْ کٛو ندٜيٜ کٜٻٛنْ کٛو طُمٜ کٛ حٜپَتَعٛنْ اٜ کٛ مبَلِّرْتٛنْ وٛٻّٜ؞ نٛنْ نٛ طُمْ وِنْدِرَا، «اٜ مٛ سَنْکِتَ شَاحُ مَاکٛ ندٜرْ يِمْٻٜ ٻٜ نغَلَنَا، کُوطٜ مَاکٛ بٛطّٜ طٜ تَبُتُطٜ حَا اَبَدَا؞» اَللَّه وٛنِ کٛکّٛووٛ دٜمٛووٛ اَوْدِ، کٛکّٛووٛ يِمْٻٜ کٛ ݧَامَتَ؞ اٛ حٛکَّيْعٛنْ کٛ حٜپَتَعٛنْ، اٛ طُطِّنَيْطُمْ، نغَمْ ٻٜيْدٛنْ بَلَّلْ نغَلْ کٛکّٛتٛنْ کَانُٻٜ مبَلّٜىٰ؞ اٛ بَرْکِطِنَيْعٛنْ اٜ کٛو نغٛلٜ لَاوٛلْ نغَمْ نغَرْتٛنْ کٛکّٛوٻٜ بَلَّلْ کٛو ندٜيٜ، ندٜنْ يِمْٻٜ نغٜتَّيْمٛ نغَمْ بَلَّلْ نغَلْ کٛکُّطٛنْ نغَلْ ٻٜ کٜٻِ لَاوٛلْ اَمِنْ؞ کُوغَلْ نغَعَلْ نغَلْ نغَطٛتٛنْ، نَاع اٜ نغَلْ وَلَّ يِمْٻٜ اَللَّه تَنْ، حَا اٜ نغَلْ وَطَ يِمْٻٜ طُطْٻٜ اٜ نغٜتَّ اَللَّه نَاع سٜطَّ؞ کُوغَلْ نغَعَلْ نغَلْ نغَطٛتٛنْ حٛلِّي اٛنْ کٛولَاٻٜ؞ طُطْٻٜ تٜدِّنَيْ اَللَّه نغَمْ اٛنْ نغَطَ کٛ حَبَرُ بٜلْطُمْ طُمْ اَلْمَسِيحُ وِعِ طُمْ نجَٻُطٛنْ يٜىٰسٛ کٛو مٛيٜ، ندٜنْ اٛنْ شٜنْدَ کٛ نغٛودُطٛنْ اٜ تٛکُّٻٜ يٜىٰسُ غٛنْٻٜ اُرُشَلِيمَ اٜ فُو حٛرِيٻٜ؞ اٜ ٻٜ نغِطِ يِيکِعٛنْ اٜ ٻٜ نغَطَنَعٛنْ دٛعَارٜ، نغَمْ بَلَّلْ مَنْغَلْ نغَلْ اَللَّه وَطَنِٻٜ لَاوٛلْ مٛوطٛنْ؞ يٜتّٛورٜ تَبِّتَ تٛ اَللَّه نغَمْ شَاحُ طُمْ اٛ حٛکِّعٜنْ طُمْ حٛنْدُکٛ وَاوَتَا وِعَ؞ اٜ مِ تٛرٛوعٛنْ ندٜرْ لٜسْتِنْکِ حٛورٜ اٜ مُݧَلْ اَلْمَسِيحُ، مِنْ بُلُسْ نٛدّٜتٜىٰطٛ «لٜسْتِنْطٛ حٛورٜ» تٛ اٜ مِ وٛنْدِ اٜ مٛوطٛنْ، اَمَّا تٛ مِ وٛنْدَا اٜ مٛوطٛنْ اٜ مِ نٛدّٜىٰ «مٜتَنٛووٛعٛنْ اٜ سٜمْبٜ؞» وٛٻّٜ يِمْٻٜ اٜ مبِعَ اٜ مِنْ نغَطَ جٛنْدٜ اِرِ ندٜ يِمْٻٜ دُونِيَارُ ندُعُ؞ تٛ مِ وَرٛيِي تٛ مٛوطٛنْ، مِ ݧُمِي اٜ حَانِ مِ حَٻَنَٻٜ؞ اٜ مِ تٛرٛوعٛنْ، تٛع اٛنْ نغَطَنْ مِ وَطَنَعٛنْ نٛنْ؞ کٛو ندٜ اٜ دُونِيَارُ مِنْ نغٛنِ، مِنْ کٛنِرْتَا بٛ دُونِيَارُ ندُعُ، نغَمْ مِنْ کٛنِرْتَا کٛ ندُ حٛنِرْتَ؞ سٜيْ نِ کٛ مِنْ کٛنِرْتَ اٜ وٛودِ بَوْطٜ اَللَّه بَاوَيْطٜ کَلْکَ کٛ وٛودِ سٜمْبٜ فُو؞ اٜ مِنْ کٜٻَ جَالٛرْغَلْ دٛوْ کٛو طِيٜ غٜدِّ اٜ مَوْنِتَارٜ کَطَيْندٜ يِمْٻٜ اَنْدَ اَللَّه؞ اٜ مِنْ نَنْغَ ݧُمٛوجِ فُو، مِنْ نغَرْتِرَطِ غَطَيْطِ کٛ اَلْمَسِيحُ وِعِ؞ غَطَ اٛنْ کٛلِّي اٛنْ غَطٛوٻٜ کٛ اَلْمَسِيحُ وِعِ، اٜ مِنْ شِرْيِي مِنْ تٛرَّ کٛو مٛيٜ مٛوطٛنْ غَݧُطٛ وَطَ کٛو طُمٜ کٛ اَلْمَسِيحُ وِعِ؞ اٛنْ ندَارَ کٛو طُمٜ دٛو‑دٛوْ تَنْ؞ فُو تَبِّتِنْطٛ اَلْمَسِيحُ جٜيِمٛ، سٜيْ اٛ فَامَ طُعُمْ، نٛنْ نٛ اَلْمَسِيحُ جٜيِرِمٛ، نٛنْ مِنٛنْ مَا اَلْمَسِيحُ جٜيِمِنْ؞ جٛومِرَاوٛ حٛکِّيمِنْ اَرْدَارٜ نغَمْ مِنْ شٜمْبِطِنَ حٛولَارٜ مٛوطٛنْ، نَاع نغَمْ مِنْ مبٛنَّندٜ؞ کٛو تٛ مِنْ مَنْتٛرَکٜ اَرْدَارٜ ندٜنْ کٛ ٻُرِ نٛ حَانِ، مِنْ نَنَتَا شٜمْتُطُمْ وَطُکِ نٛنْ؞ مِ يِطَا نغِعٛنْ بٛ اٜ مِ يِطِ مِ حُلْنِرَعٛنْ طٜرٜىٰجِ طِ مبِنْدَنْمِعٛنْ؞ نغَمْ وٛٻّٜ اٜ مبِعَ، «طٜرٜىٰجِ طِ بُلُسْ وِنْدَنِعٜنْ اٜ طِ شَاوِ حَالَ تٜدُّکَ، شٜمْبِطْکَ، اَمَّا تٛ اٜ مٛ وٛنْدِ اٜ مٜىٰطٜنْ اٛ تَمْڤُطٛ، بٛلِيطٜ مَاکٛ طٜ تٜکَّا؞» اٜ حَانِ اِرِ ٻٜنْ طٛنْ يِمْٻٜ ٻٜ اَنْدَ کٛ مِنْ مبِنْدَنْتَعٛنْ ندٜرْ طٜرٜىٰجِ تٛ اٜنْ نغٛنْدَا، کَنْجُمْ مِنْ نغَطَتَ تٛ اٜ مِنْ نغٛنْدِ اٜ مٛوطٛنْ؞ طُمْ وَطَتَاکٛ مِنْ ڤٛتِّنَ کٛعٜ اَمِنْ اٜ مَنْتٛوٻٜ کٛعٜ مَٻّٜ، کٛو مِنْ کٛشَّ کٛعٜ اَمِنْ بٛ مَٻّٜ؞ تٛ ٻٜ ڤٛوندِرِي کٛعٜ مَٻّٜ اٜ کٛعٜ مَٻّٜ، ندٜنْ تٛ وٛٻّٜ ندٜرْ مَٻّٜ کٛشِّي کٛعٜ مَٻّٜ ٻُرِي وٛٻّٜ مَٻّٜ، ٻٜ کٛلَّايِ اٜ ٻٜ نغٛودِ حَکِّيلٛ؞ مِنٛنْ بٛو، مِنْ مَنْتِتَتَاکٛ کٛ ٻُرِ نٛ حَانِ، سٜيْ نِ مِنْ ندَرٛو دٛوْ کٜىٰرٛلْ نغٛلْ اَللَّه نٛکَّنِمِنْ؞ طُعُمْ حَوْتِي اٜ کُوغَلْ نغَلْ مِنْ کُوَتَ ندٜرْ مٛوطٛنْ؞ ندٜ مِنْ نجَحِ تٛ مٛوطٛنْ، مِنْ پَٻَّاکِ کٜىٰرٛلْ نغٛلْ اَللَّه نٛکَّنِمِنْ، نغَمْ مِنٛنْ نغٛنِ اَرْتُٻٜ وَدَّنْکِعٛنْ حَبَرُ بٜلْطُمْ دٛوْ اَلْمَسِيحُ؞ مِنْ مَنْتٛرْتَاکٛ کٛ ٻُرِ کٜىٰرٛلْ نغٛلْ، وَاتٛ مِنْ مَنْتٛرْتَاکٛ کُوغَلْ نغَلْ وٛٻّٜ نغَطِ؞ اَمَّا کَمُّندٜ اَمِنْ وٛنِ حٛولَارٜ مٛوطٛنْ وَطَ کَ ٻٜيْدَاکِ، ندٜنْ کُوغَلْ نغَلْ مِنْ کُوَتَ ندٜرْ مٛوطٛنْ ٻٜيْدٛو نَاع سٜطَّ؞ نٛنْ وَرْتَيْ لَاوٛلْ نٛ مِنْ نغَعَجِنِرْتَ حَبَرُ بٜلْطُمْ ندٜرْ غٛطّٜ لٜيْطٜ غٛنْطٜ يٜىٰسٛ مٛوطٛنْ؞ مِنْ نغِطَا مَنْتٛرَاکِ کُوغَلْ نغَلْ غٛطّٛ وَطِ ندٜرْ کٜىٰرٛلْ نغٛلْ اَللَّه حٛکِّمٛ؞ نٛ اَايَارٜ وِعِ، «فُو مَنْتِتٛتٛوطٛ، اٛ مَنْتِتٛرٛو جٛومِرَاوٛ؞» نغَمْ نَاع مَنٛووٛ حٛورٜ مُوطُمْ وٛنِ جَٻَاطٛ؛ جَٻَاطٛ وٛنِ مٛ جٛومِرَاوٛ مَنِ؞ اٜ مِ يِطِ مُݧَنٛنْيَمْ کٛو تٛ مِ مٜتَنِيعٛنْ بٛ کَاݝَاطٛ؞ اٜ مِ تٛرٛوعٛنْ مُݧَنٜىٰيَمْ! اٜ مِ حَاجَعٛنْ نٛ اَللَّه حَاجِرْتَعٛنْ؞ مِ وَطَنِيعٛنْ اَلْکَوَلْ تٜىٰغَلْ اٜ غٛرْکٛ غٛعٛتٛ، وَاتٛ اَلْمَسِيحُ؞ اٜ مِ يِطِ مِ يَارَعٛنْ تٛ مَاکٛ بٛ دٜبّٛ شٜنِيطٛ مٛ اَنْدَا غٛرْکٛ؞ اَمَّا اٜ مِ حُلَ تٛ طُمْ وَرْتَ نٛ مبٛودِ پٛيْرِرِ حَوَّاعُ اٜ پٛيْرٜ مَيْرِ کَلُّندٜ، اٛنٛنْ مَا طُمْ مَجِّنَعٛنْ اَلٛنْ تٛکُّکِ اَلْمَسِيحُ اٜ ٻٜرْندٜ غٛعٛ اٜ ٻٜرْندٜ لَاٻُندٜ؞ نغَمْ مِنْ کٛکِّيعٛنْ حَبَرُ يٜىٰسُ، ندٜنْ اٛنْ کٜٻِي رُوحُ اَللَّه، اٛنْ نجَٻِي وَعَجُ اَمِنْ؞ اَمَّا اٛنْ اَلَ وٛٻّٜ يِمْٻٜ نغَعَجِنَنَعٛنْ غٛطّٛ يٜىٰسُ فٜىٰرٜ، ندٜنْ اٛنْ نجَٻِي رُوحُ فٜىٰرٜ، طٛنْمَا اٛنْ نجَٻِي وَعَجُ ڤٜىٰرٛوتِرْطُمْ اٜ کٛ مِنْ نغَعَجِنَنِعٛنْ؞ مِ کَمَّاکِ ٻٜنْ طٛنْ نٛدّٜتٜىٰٻٜ «مَوْٻٜ لِلَاٻٜ» ٻٜ ٻُرْدِييَمْ غٛطُّمْ؞ کٛو تٛ مِ وَاوَا مٜتٛ بٛطُّمْ، اٜ مِ اَنْدِ کٛ مبِعَيْمِ؞ مِنْ کٛلِّيعٛنْ نٛنْ اٜ کٛو نغٛلٜ لَاوٛلْ؞ مِ وَعَجِنَنِيعٛنْ حَبَرُ بٜلْطُمْ دٛوْ اَللَّه شَاحُ؞ مِ لٜيْنِي حٛورٜ اَمْ نغَمْ طُمْ حٛکَّعٛنْ مَنْغُ؞ کٛو مِ وٛوفِي ندٜ نغَطُمِ نٛنْ؟ مِ جَٻِي شٜىٰدٜ بَلَّلْ دَغَ تٛ وٛٻّٜ تٛکُّٻٜ يٜىٰسُ بٛ مِ تٜىٰتَنْٻٜ نغَمْ مِ وَلَّعٛنْ؞ کٛ نغٛنْدُمِ اٜ مٛوطٛنْ مِ نَتِّي دُلّٜرٜ، اَمَّا مِ تٛرَاکِ بَلَّلْ تٛ مٛوطٛنْ، نغَمْ بَنْدِرَاٻٜ مٜىٰطٜنْ غَرٛيْٻٜ دَغَ مَکِدٛونِيَ نغَدَّنِييَمْ بَلَّلْ نغَلْ نغِطُمِ؞ اٜ نغٜلْ تٛنْ شَرٜلْ مِ وَرْتَنَايِعٛنْ تٜدّٛرَلْ، مِ بٛو وَرْتَنْتَاعٛنْ تٜدّٛرَلْ؞ نٛنْ نٛ تَبِّتِنِرْمِ غٛونغَ اَلْمَسِيحُ ندٜرْ اَمْ، نٛنْ مَا مِ تَبِّتِنِي ندٜرْ لٜيْدِ اَکَايَ وَلَا بَاوَيْطٛ حَطَيَمْ مَنْتٛرَاکِطُمْ؞ تٛو، اٛنْ کَمّٛو مِ وِعُ نٛنْ نغَمْ مِ يِطَاعٛنْ؟ اَللَّه اٜ اَنْدِ اٜ مِ يِطِعٛنْ! مِ ݧَمْرَيْ يٜىٰسٛ اٜ وَطُکِ کٛ نغَطَيْمِ نغَمْ مِ حَطَ ٻٜنْ طٛنْ نٛدّٜتٜىٰٻٜ «مَوْٻٜ لِلَاٻٜ» حٜٻُکِ لَاوٛلْ مَنْتِتَاکِ اٜ وِيکِ ٻٜ کُوِي کُوغَلْ ڤٛتُّدُنغَلْ اٜ نغَلْ مِنْ کُوِ؞ اِرِ ٻٜنْ طٛنْ يِمْٻٜ ٻٜ لِلَاٻٜ فٜوْرٜ، ٻٜ کُوتِرٛوٻٜ فٜوْرٜ، اٜ ٻٜ نغَرْتِرَ کٛعٜ مَٻّٜ بٛ ٻٜ لِلَاٻٜ اَلْمَسِيحُ؞ نَاع طُمْ کَيْطِنِيطُمْ! کٛو شٜيْطَنْ اٜ وَرْتِرَ حٛورٜ مُوطُمْ بٛ مَلَاعِکَاجٛ غٛودُطٛ جَيْنغٛلْ؞ نغَمْ نٛنْ، نَاع طُمْ کَيْطِنِيطُمْ تٛ مَشُّٻٜ مَاکٛ نغَرْتِرِي کٛعٜ مَٻّٜ بٛ کُوٛوٻٜ کُوطٜ اَادِلَاکُ؞ اٜ رٜعِرْدٜ مَٻّٜ ٻٜ کٜٻَيْ کٛ فٛتِّدِ اٜ کُوطٜ مَٻّٜ؞ اٜ مِ فُطِّتَ وِيکِ، تٛع غٛطّٛ حٛشَّ مِ کَاݝَاطٛ؞ اَمَّا تٛ اٛنْ کٛشِّرِييَمْ نٛنْ، سٜيْ نجَٻٛنْيَمْ نٛ نجَٻِرْتٛنْ کَاݝَاطٛ نغَمْ مِ مَنْتِتٛو سٜطَّ؞ کٛ مبِعَيْمِ اٜ مِ مَنْتِتٛو جٛونِ، جٛومِرَاوٛ وِعَايِيَمْ مِ وِعَ نٛنْ، اَمَّا اٜ مِ مٜتَ بٛ کَاݝَاطٛ؞ ندٜ اٜ وٛودِ مَنْتِتٛتٛوٻٜ اِرِ مَنْتِتَاکِ کِ يِمْٻٜ دُونِيَارُ، مِنْ مَا مِ مَنْتِتٛتٛ؞ اٛنْ نَنَ بٜلْطُمْ حٜتِّندَنَاکِ حَاݝَاٻٜ نغَمْ اٜ يِيکِ مٛوطٛنْ اٛنْ نغٛودِ فَامُ مَوْطُمْ! حَا مَا اٛنْ مُݧَنَ کٛو مٛيٜ غَرْتِرٛووٛعٛنْ مَشُّٻٜ مَاکٛ، اٜ پٛيْرُطٛعٛنْ جَٻَنِعٛنْ کٛ نغٛودُطٛنْ، اٜ جَوَنَيْطٛعٛنْ، اٜ ڤِيطٛعٛنْ تٛ وٛلٛ؞ اٜ مِ سٜمْتَ وِيکِ مِنٛنْ مِنْ نغَلَا سٜمْبٜ وَطَنْکِعٛنْ نٛنْ! اَمَّا تٛ وٛٻّٜ اٜ مَنْتٛرٛو غٛطُّمْ، مِنْ مَا مِ مَنْتٛرْتٛطُمْ؞ تٛو، اٜ مِ مٜتَ بٛ کَاݝَاطٛ! تٛ ٻٜ اِبْرَانِيَنْکٛعٜنْ، مِنْ مَا مِ اِبْرَانِيَنْکٜىٰجٛ؞ تٛ ٻٜ اِسْرَاعِيلَنْکٛعٜنْ، مِنْ مَا مِ اِسْرَاعِيلَنْکٜىٰجٛ؞ تٛ ٻٜ لٜݧٛلْ اِبْرَاهِمْ، مِنْ مَا لٜݧٛلْ اِبْرَاهِمْ پِوٛيِمِ؞ تٛ ٻٜ کُوَنٛوٻٜ اَلْمَسِيحُ، مِنْ مِ ٻُرِيٻٜ؞ اٜ مِ مٜتَ بٛ کَاݝَاطٛ! مِ ٻُرِيٻٜ حُوُکِ نَاع سٜطَّ، مِ ٻُرِيٻٜ مَٻّٜىٰکِ ندٜرْ سُودُ شُرَلْ، مِ ٻُرِيٻٜ فِيٜىٰکِ، مِ ٻَدَکٜ مَيْدٜ ندٜ طُطُّمْ؞ ندٜ جٛوِ يَحُودَنْکٛعٜنْ اٜ ڤِيرَيَمْ لٛوشِ 93؞ ندٜ تَتِ رٛومَنْکٛعٜنْ اٜ ڤِيرَيَمْ شَبِّ؞ مِ حُبٛرَامَ کَاپٜ ندٜ غٛعٛ؞ ندٜ تَتِ اٜ مِ نَتَّ کٛمِيجٜ اٜ طٜ ڤُسِدَ اٜ اَمْ ندٜرْ مَايٛ، مِ وَالِي مِ ݧَلِّي ندٜرْ ندِيَمْ مَايٛ؞ ندٜرْ جَحَالٜ اَمْ مِ نَتِّي تٛرَّاجِ طُطِّ، شَنْطِ فٜىٰرٜ‑فٜىٰرٜ ٻَدَکٜ ݧَامَيَمْ، وُيْٻٜ تٛرِّييَمْ، يِمْٻٜ لٜݧٛلْ اَمْ تٛرِّييَمْ، يِمْٻٜ نَاع يَحُودَنْکٛعٜنْ تٛرِّييَمْ؞ مِ نَتِّي تٛرَّ ندٜرْ غَرِيرِ، مِ نَتِّي تٛرَّ ندٜرْ لَدّٜ، مَايٛ ٻَدَکٜ ݧَامَيَمْ، بَنْدِرَاٻٜ اَمْ فٜوْرٜعٜنْ تٛرِّييَمْ؞ مِ حُوِي نَاع سٜطَّ مِ فِيدِي اٜ کُوغَلْ، جٜمَّاجٜ طُطّٜ مِ طَانَتَاکٛ؞ مِ فِيدِي اٜ وٜىٰلٛ اٜ طٛنْکَ، ندٜ طُطُّمْ وَلَا کٛ ݧَامَيْمِ، مِ يَرِي فٜىٰوٛ، مِ دُلِّي کٛ ٻٛرْنٛتٛومِ؞ غَطَ کٛ مبِيمِ، اٜ وٛودِ طُطُّمْ تٛرُّطُمْيَمْ، طٛنْمَا کٛو ندٜيٜ اٜ مِ وٛودِ تٜدّٛرَلْ وَنُّکِ دٛوْ فُو تٛکُّٻٜ يٜىٰسُ؞ تٛ غٛطّٛ دُلِّي سٜمْبٜ، سٜيْ مِ نَنَ بٛ مِنْ دُلِّ سٜمْبٜ؞ تٛ غٛطّٛ نَتِّنَامَ وَطُکِ حَکّٜ، اٜ طُمْ نَاوَيَمْ نَاع سٜطَّ؞ تٛ طُمْ دٛولٜ مِ مَنْتٛو، سٜيْ مِ مَنْتٛرٛو فِي کٛلَّيْطُمْ شِيَ سٜمْبٜ اَمْ؞ اَللَّه ݧَاکٛ يٜىٰسُ جٛومِرَاوٛ مٜىٰطٜنْ اٜ اَنْدِ کٛ مبِيمِ نَاع طُمْ فٜوْرٜ؞ يٜتّٛورٜ تَبِّتَ تٛ مَاکٛ حَا اَبَدَا؞ شَرٜلْ کٛ نغٛنْمِ غَرِيرِ دِمَسْکُ، غٛمْنَاجٛ لٜيْدِ ندِنْ غٛنْطٛ لٜيْ لَامِيطٛ بِعٜتٜىٰطٛ اَرٜىٰتَسْ، اٛ وَطِي طُمْ سُرِ دَمُّطٜ غَرِيرِ ندِنْ نغَمْ اٛ نَنْغَيَمْ؞ اَمَّا حِغٛوٻٜ اَمْ نغَطِيَمْ ندٜرْ سٛمڤٛورٜ، ٻٜ کَٻِّ ٻٛغّٛلْ، ٻٜ نجِڤِّنِرِيَمْ ندٜرْ يٛلْندٜ مَادِ ڤِلِيندِ غَرِيرِ ندِنْ؞ نٛنْ کِسِرْمِ دَغَ جُنْغٛ غٛمْنَاجٛ اٛنْ؞ دٛولٜ مِ ݧَمْرَيْ يٜىٰسٛ اٜ مَنْتِتَاکِ، کٛو ندٜ طُمْ نَفَنْتَايَمْ کٛو سٜطَّ، اَمَّا جٛونِ مِ مٜتَيْ دٛوْ وَحَيُ طُمْ جٛومِرَاوٛ حٛلِّيَمْ اٜ کٛ اٛ وَنْغِنَنِيَمْ؞ اٜ مِ اَنْدِ غٛطّٛ تٛکُّطٛ اَلْمَسِيحُ دُوٻِ سَڤّٛ اٜ نَيِ پَٻِّيطِ اٛ حٛشَّامَ يَاکِ دٛوْ تَتَٻُمْ؞ کٛو ندٜرْ ٻَنْدُ اٛ حٛشَّا، کٛو نَاع ندٜرْ ٻَنْدُ، مِ اَنْدَا، اَللَّه تَنْ اَنْدِ؞ اٜ مِ اَنْدِ نٜطّٛ اٛنْ طُمْ حٛشِّيمٛ يَاکِ وُرٛ اَللَّه تٛنْ دٛوْ، کٛو ندٜرْ ٻَنْدُ اٛ حٛشَّا، کٛو نَاع ندٜرْ ٻَنْدُ اٛ حٛشَّا مِ اَنْدَا، اَمَّا اَللَّه تَنْ اَنْدِ؞ تٛنْ اٛ نَنِ غٛطّٜ بٛلِيطٜ طٜ نٜطّٛ فٛتَايِ وِيکِ، سِرُّوجِ طِ نٜطّٛ حَانَا وُرْتِنَ؞ مِ مَنْتٛرْتٛ اِرِ اٛنْ طٛنْ نٜطّٛ، اَمَّا مِ مَنْتٛرْتَاکٛ حٛورٜ اَمْ، سٜيْ نِ مِ مَنْتٛرٛو فِي کٛلَّيْطُمْ شِيَ سٜمْبٜ اَمْ؞ کٛو تٛ اٜ مِ يِطِ مِ مَنْتِتٛو، مِ وَرْتَتَا بٛ کَاݝَاطٛ، نغَمْ غٛونغَ مبِعَيْمِ؞ اَمَّا مِ مَنْتِتَتَاکٛ، نغَمْ تٛع غٛطّٛ حٛشَّ مِ ٻُرِي کٛ اٛ يِعِ تٛ اَمْ کٛو کٛ نَنِ تٛ اَمْ؞ اَللَّه حٛلِّييَمْ وَحَيُ مَوْطُمْ؞ اَمَّا نغَمْ تٛع مِ پٜفْتَ حٛورٜ اَمْ، سٜيْ طُمْ يٛوَنِيَمْ غٛطُّمْ طُمْ وَرْتَنِيَمْ بٛ غِعَلْ ندٜرْ ٻَنْدُ، بٛ غٛطّٛ شٜيْطَنْ لِلٛيِ وَطَ کَ تٛرُّکِيَمْ؞ ندٜ تَتِ اٜ مِ تٛرٛو جٛومِرَاوٛ اِتَّنَيَمْطُمْ، اَمَّا اٜ مٛ وِعَيَمْ، «يِدّٜ اَمْ حٜپِيمَ، نغَمْ شَرٜلْ نغٜلْ ندُلُّطَا سٜمْبٜ، سٜيْ بَوْطٜ اَمْ کٜوْطٜ مبَنْغَ؞» نغَمْ نٛنْ، ندٜرْ بٜلْطُمْ ٻٜرْندٜ مِ ٻٜيْدَيْ مَنْتٛرَاکِ شِيَ سٜمْبٜ اَمْ، نغَمْ بَوْطٜ اَلْمَسِيحُ نجٛوطٛو ندٜرْ اَمْ؞ کَنْجُمْ وَطِ نغَمْ اَلْمَسِيحُ اٜ مِ نَنَ بٜلْطُمْ شِيَ سٜمْبٜ اَمْ، اٜ حُطٜىٰکِ کِ کُطٜتٜىٰمِ، اٜ تٛرَّاجِ طِ نجَرَيْمِ، اٜ تٛرَّاجِ طِ تٛرّٜتٜىٰمِ، اٜ شَطٜىٰلٜ طٜ نَتُّمِ؞ نغَمْ شَرٜلْ نغٜلْ ندُلُّمِ سٜمْبٜ، شَرٜلْ نغٜلْ نغٛودُمِ سٜمْبٜ؞ مِ وَرْتِرِي حٛورٜ اَمْ بٛ کَاݝَاطٛ، اَمَّا اٛنٛنْ نغَطِيَمْ نغَطُمِ نٛنْ؞ غٛونغَ، اٛنٛنْ حَانِ مَنَيَمْ، نغَمْ ٻٜنْ طٛنْ نٛدّٜتٜىٰٻٜ «مَوْٻٜ لِلَاٻٜ» ٻٜ ٻُرَايِيَمْ کٛو سٜطَّ، کٛو ندٜ نَاع مِ غٛطُّمْ؞ مِ حُوِي کُوطٜ ندٜرْ مٛوطٛنْ کٛلَّيْطٜ مِنْ مِ لِلَاطٛ اَلْمَسِيحُ مٛ غٛونغَ، مِ حُوِرِي مُݧَلْ مَنْغَلْ؞ اَللَّه حٛکِّييَمْ بَوْطٜ وَطُکِ اَلَامَاجِ کُلْنِيطِ، اٜ کُوطٜ کَيْطِنِيطٜ، اٜ کُوطٜ مَوْطٜ؞ طُمٜ نغَطَنْمِ غٛطّٜ کَوْتٜ تٛکُّٻٜ يٜىٰسُ طُمْ مِ وَطَنَايِعٛنْ؟ فِي غٛعٛ طُمْ مِ وَطَايِ وٛنِ مِ تٛرٛوعٛنْ بَلَّلْ؞ نجَافَنٜىٰيَمْ طُعُمْ طُمْ نغَطُمِ! جٛونِ اٜ مِ سِرْيِي وَرْکِ تٛ مٛوطٛنْ غَرٛلْ تَتَٻٛلْ؞ مِ وَرْتَنْتَاعٛنْ تٜدّٛرَلْ، نغَمْ نَاع جَوْدِ مٛوطٛنْ نغِطُمِ، اٛنٛنْ اٜ کٛعٜ مٛوطٛنْ نغِطُمِ؞ نغَمْ حَانَا ٻِٻّٜ کَوْرِتَ جَوْدِ نغَمْ دَݧٛوٻٜ مَٻّٜ، اَمَّا دَݧٛوٻٜ حَانِ کَوْرِتَ جَوْدِ نغَمْ ٻِٻّٜ ٻٜنْ؞ مِ نَنَيْ بٜلْطُمْ حٛکُّکِ حٛورٜ اَمْ اٜ فُو کٛ نغٛودُمِ نغَمْ مٛوطٛنْ؞ تٛ مِ ٻٜيْدِي يِطُکِعٛنْ، اٛنْ اُسْتَيْ يِطُکِيَمْ؟ تٛو، اٛنْ نجَٻِي مِ وَرْتَنَايِعٛنْ تٜدّٛرَلْ؞ فُو اٜ نٛنْ وٛٻّٜ مبِعَيْ اٜ مِ وٛودِ پٛيْرٜ، مِ حُوتِرِي فٜوْرٜ مِ نَنْغِيعٛنْ؞ کٛو اٜ وٛودِ لِلَاٻٜ ٻٜ لِلْمِ تٛ مٛوطٛنْ پٛيْرُٻٜعٛنْ نجَٻِ کٛ نغٛودُطٛنْ؟ مِ تٛرَکٜ تِيتُسْ يَحَ تٛ مٛوطٛنْ، کَنْکٛ اٜ بَنْدِرَاوٛ مٜىٰطٜنْ؞ کٛو تِيتُسْ پٛيْرِيعٛنْ جَٻِي کٛ نغٛودُطٛنْ؟ نَاع مِنٛنْ اٜ مَاکٛ ݧُمٛ غٛعٛ مِنْ کُورَتَ؞ نَاع لَاوٛلْ غٛعٛ مِنْ تٛکَّتَ؟ کٛو اٛنْ ݧُمَ دَغَ اَرَنْدٜ اٜ مِنْ شُرَنَ کٛعٜ اَمِنْ يٜىٰسٛ مٛوطٛنْ؟ نَاع نٛنْ! مِنْ تٛکُّٻٜ اَلْمَسِيحُ، اٜ مِنْ مبِعَ غٛونغَ يٜىٰسٛ اَللَّه؞ بَنْدِرَاٻٜ ٻٜ مِنْ نغِطِ، کٛو طُمٜ کٛ مِنْ نغَطَتَ اٜ مِنْ نغَطَطُمْ نغَمْ سٜمْبِطِنْکِعٛنْ؞ اٜ مِ حُلَ تٛ مِ وَرِي تٛ مٛوطٛنْ، مِ تَوْرَتَاعٛنْ نٛ نغِطُمِ، ندٜنْ اٛنٛنْ مَا اٛنْ تَوْرَتَايَمْ نٛ نغِطّٛنْ؞ اٜ مِ حُلَ مِ تَوْرَعٛنْ حَوْرٜ، اٜ لَوْلِيرُ، اٜ مٜتِّنْکِ ٻٜرْندٜ، اٜ يِدّٜ حٛورٜ، اٜ حُطُکِ، اٜ مٜتُکِ حَالَاجِ کَلُّطِ دٛوْ وٛٻّٜ، اٜ مَوْنِنْکِ حٛورٜ، اٜ اُمِّنْکِ حَکِّيلٛ؞ اٜ مِ حُلَ تٛ مِ فُطِّتِي مِ سٛعّٛيَکٜ تٛ مٛوطٛنْ، اَللَّه اَمْ سٜمْتِنَيْيَمْ يٜىٰسٛ مٛوطٛنْ، ندٜنْ ٻٜرْندٜ اَمْ نَاوَيْ، نغَمْ طُطْٻٜ غَطُنٛوٻٜ حَکّٜ ٻٜ تُوبَايِ ٻٜ اَلِ کُوطٜ طٜ ٻٜ نغَطَتَ، وَاتٛ کُوطٜ نٜفْنِيطٜ، اٜ نجٜىٰنُ، اٜ فُو کُوطٜ کَلُّطٜ طٜ ٻٜرْطٜ مَٻّٜ نغِطِ؞ مِ وَرَيْ تٛ مٛوطٛنْ جٛونِ غَرٛلْ تَتَٻٛلْ؞ اَايَارٜ وِعِي، «دٛولٜ طُمْ حٜٻَ شٜيْدُعٜنْ طِطٛ کٛو تَتٛ کٛ طُمْ تَبِّتِنَ حَالَ؞» مِ يَادَکٜ مِ وَغِّنِي ٻٜنْ طٛنْ ݧَمْرُٻٜ يٜىٰسٛ اٜ وَطُکِ حَکّٜ کٛ نغَرْمِ تٛ مٛوطٛنْ طِطَٻُمْ؞ جٛونِ ندٜ مِ وٛنْدَا اٜ مٛوطٛنْ، اٜ مِ ٻٜيْدَ وَغِّنْکِٻٜ اٜ فُو حٛرِيٻٜ کُوٛوٻٜ طٜنْ طٛنْ کُوطٜ؞ تٛ مِ سٛعّٛيَکٜ تٛ مٛوطٛنْ، مِ تَوِي اٜ ٻٜ ندٜرْ حَکّٜ حَا جٛونِ، مِ مُݧَنْتَاٻٜ؞ ندٜ اٛنْ نغِطِ يِيکِ کٛ تَبِّتِنَنْتَعٛنْ اَلْمَسِيحُ اٜ مٜتِرَ لَاوٛلْ اَمْ، مِ حٛلَّيْعٛنْ طُمْ؞ اَلْمَسِيحُ دُلَّايِ سٜمْبٜ ندٜرْ مٛوطٛنْ، اَمَّا اٜ مٛ حُوَ ندٜرْ مٛوطٛنْ اٜ سٜمْبٜ؞ کٛو ندٜ اٛ وَرَامَ دٛوْ غَافَانغَلْ ندٜرْ شِيَ سٜمْبٜ، فُو اٜ نٛنْ جٛونِ اٜ مٛ فٛوفَ لَاوٛلْ بَوْطٜ اَللَّه؞ مِنٛنْ مَا نٛنْ نٛ اٛ وٛنْتِندِرْنٛو، مِنْ نغَلَا سٜمْبٜ؞ نٛنْ نٛ اَلْمَسِيحُ جٛوطٛرِي جٛونِ ندٜرْ بَوْطٜ اَللَّه، مِنٛنْ مَا مِنْ نجٛوطٛدٛتٛ اٜ بَوْطٜ اَللَّه ندٜرْ مٛوطٛنْ؞ پَمٜىٰ کٛعٜ مٛوطٛنْ نغِعٛنْ کٛو اٛنْ تٛکُّٻٜ يٜىٰسُ اٜ غٛونغَ؞ ڤٛوندٜىٰ کٛعٜ مٛوطٛنْ؞ اٛنْ اَنْدَا اَلْمَسِيحُ اٜ جٛوطِ ندٜرْ ٻٜرْطٜ مٛوطٛنْ؟ غٛونغَ اٜ مٛ جٛوطٛو ندٜرْ ٻٜرْطٜ مٛوطٛنْ، سٜيْ نِ تٛ اٛنْ تٛکَّايِمٛ اٜ غٛونغَ؞ مِ تَبِّتِنِي اٛنْ اَنْدَيْ مِنٛنْ اٜ مِنْ تٛکَّمٛ اٜ غٛونغَ؞ اَمَّا اٜ مِنْ تٛرٛو اَللَّه تٛع نغَطٛنْ غٛطُّمْ کٛ وٛوطَا؞ نَاع نغَمْ يِمْٻٜ نغِعَ بٛ اٜ مِنْ نغَطَ کٛ وٛوطِ، اَمَّا نغَمْ نغَطٛنْ کٛ حَانِ، کٛو ندٜ طُمْ يِعَيْمِنْ بٛ مِنْ نغَطَايِ کُوغَلْ اَمِنْ بٛطُّمْ؞ نغَمْ مِنْ مبَاوَتَا مِنْ کَطَ غٛونغَ ݧَمْرُکِ يٜىٰسٛ، سٜيْ نِ مِنْ نغَطَ کٛ وَطَتَ غٛونغَ ݧَمْرَ يٜىٰسٛ؞ مِنْ نَنَيْ بٜلْطُمْ تٛ مِنْ ندُلِّي سٜمْبٜ، تٛ نِ اٛنٛنْ اٛنْ نغَرْتِي شٜمْبِطْٻٜ؞ اٜ مِنْ تٛرٛو اَللَّه نغَرْتٛنْ کٜىٰوُٻٜ ندٜرْ تٛکُّکِ يٜىٰسُ؞ کَنْجُمْ وَطِ مبِنْدَنْمِعٛنْ فِي طُعُمْ شَرٜلْ نغٜلْ مِ وٛنْدَا اٜ مٛوطٛنْ؞ نغَمْ تٛ مِ وَرٛيِي تٛ مٛوطٛنْ، تٛع طُمْ وَرْتَنَيَمْ دٛولٜ نَاع مِ حُوتِرِي سٜمْبٜ لَامُ طُمْ جٛومِرَاوٛ حٛکِّيَمْ؞ اٛ حٛکَّمْ لَامُ طُمْ نغَمْ مِ سٜمْبِطِنَعٛنْ، نَاع نغَمْ مِ لَلِّنَعٛنْ؞ تٛو، بَنْدِرَاٻٜ اَمْ، سٜيْ ݧَلْندٜ غٛعٛ؞ مٛعِّنٜىٰ جٛنْدٜ مٛوطٛنْ، نغَطٜىٰ کٛ تٛرِيمِعٛنْ نغَطٛنْ، نغَرْتٜىٰ ٻٜ ݧُمٛ غٛعٛ، نجٛوطٛدٜىٰ جَمْ؞ اَللَّه جٛومُ يِدّٜ اٜ جَمْ وٛنْدَ اٜ مٛوطٛنْ؞ کٛوْنِندِرٜىٰ کٛوْنٛلْ حِغَاکُ؞ فُو يِمْٻٜ اَللَّه اٜ کٛوْنَعٛنْ؞ مِنْ بُلُسْ لِلَاطٛ وِنْدِ طٜرٜوٛلْ نغٛعٛلْ؞ نَاع يِمْٻٜ شُٻِيَمْ، نَاع نٜطّٛ وَرْتِرِيَمْ لِلَاطٛ؞ يٜىٰسُ اَلْمَسِيحُ اٜ اَللَّه ݧَاکٛ مٛ دٛوْ، اُمِّنْطٛ يٜىٰسُ دَغَ مَيْدٜ وَرْتِرِيَمْ لِلَاطٛ؞ مِنْ اٜ فُو بَنْدِرَاٻٜ غٛنْدُٻٜ اٜ اَمْ طٛعٛ اٜ مِنْ کٛوْنَ تٛکُّٻٜ يٜىٰسُ وٛنْٻٜ غَلَاتِيَ؞ اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ يٜىٰسُ حٛکِّي حٛورٜ مُوطُمْ نغَمْ حَکّٜ مٜىٰطٜنْ نغَمْ اٛ حِسْنَعٜنْ دَغَ جَامَنُ کَلُّطُمْ طُعُمْ؞ نٛنْ طُمْ شُٻٛلْ اَللَّه ݧَاکٛ مٜىٰطٜنْ مٛ دٛوْ؞ تٜدُّنغَلْ تَبِّتَ تٛ اَللَّه حَا اَبَدَا اَبَدِنْ؞ اَامِنْ؞ مِ حَيْطِنِي ندٜ نجَاوُطٛنْ وَيْلِتَنْکِ اَللَّه ٻَاوٛ، کَنْکٛ نٛدُّطٛعٛنْ بَرْکَ يِدّٜ اَلْمَسِيحُ مَوْندٜ شٛعَّنِيطٛنْ وٛنْغٛلْ اٜکِّتِنٛلْ اٛنْ ݧُمَ طُمْ حَبَرُ بٜلْطُمْ؞ غٛونغَ، وَلَا غٛطُّمْ حَبَرُ بٜلْطُمْ فٜىٰرٜ، اَمَّا اٜ وٛودِ وٛٻّٜ يِمْٻٜ غَنّٛوٻٜعٛنْ؞ اٜ ٻٜ نغِطِ وَيْلُتُکِ حَبَرُ بٜلْطُمْ طُمْ اَلْمَسِيحُ؞ اَمَّا کٛو مِنٛنْ، کٛو مَلَاعِکَاجٛ پِوٛيْطٛ دَغَ دٛوْ وَعَجِنَنِعٛنْ وَعَجِنْکِ فٜىٰرٛوتِرْکِ اٜ حَبَرُ بٜلْطُمْ طُمْ مِنْ نغَعَجِنَنِعٛنْ، اَللَّه حَلْکَمٛ ندٜرْ حِيتٜ؞ نٛنْ نٛ مِنْ مبِعُنٛو ندٜنّٛ، جٛونِ اٜ مِ فُطِّتَ وِيکِ: تٛ غٛطّٛ وَعَجِنَنِيعٛنْ وَعَجِنْکِ فٜىٰرٛوتِرْکِ اٜ حَبَرُ بٜلْطُمْ طُمْ نجَٻُطٛنْ اَرَنْدٜ، اَللَّه حَلْکَمٛ ندٜرْ حِيتٜ؞ تٛو، جٛونِ يِدّٜ يِمْٻٜ طَٻِّتَيْمِ، کٛو يِدّٜ اَللَّه؟ کٛو بٛو اٜ مِ طَٻِّتَ وٜلْنَنْکِ يِمْٻٜ ٻٜرْطٜ؟ نَاع نٛنْ! دَا حَا جٛونِ يِمْٻٜ طَٻِّتَيْمِ وٜلْنَنْکِ ٻٜرْطٜ، دَا مِ وَرْتَايِ مَشُّطٛ اَلْمَسِيحُ؞ بَنْدِرَاٻٜ اَمْ، اٜ مِ يِطِ اَنْدٛنْ، حَبَرُ بٜلْطُمْ طُمْ نغَعَجِنْمِ، نَاع تٛ نٜطّٛ طُمْ پِوٛيِ؞ نَاع تٛ نٜطّٛ کٜٻُمِطُمْ، نٛنْ مَا وَلَا اٜکِّتِنْطٛيَمْطُمْ، اَمَّا يٜىٰسُ اَلْمَسِيحُ وَنْغِنَنِيَمْطُمْ؞ اٛنْ نَنِي نٛ نجٛوطٛرِيمِ ندٜنّٛ ندٜرْ دِينَ يَحُودَنْکٛعٜنْ، نٛ تٛرِّرْمِ يِمْٻٜ اَللَّه تٛکُّٻٜ يٜىٰسُ، يُرْمٜىٰندٜ وَلَا، مِ وَطِي کٛ مبَاوَيْمِ وَطُکِ نغَمْ مِ حَلْکَٻٜ؞ مِ لُغِّي ندٜرْ دِينَ يَحُودَنْکٛعٜنْ حَا مِ ٻُرِي طُطْٻٜ ندٜرْ يَحُودَنْکٛعٜنْ وَلْدٜعٜنْ اَمْ، اٜ مِ وٛودِ يِدّٜ تٛکُّکِ ندٛنُوجِ مَامَعٜنْ اَمْ نَاع سٜطَّ؞ اَمَّا اَللَّه، شُٻُطٛيَمْ کٛ مِ دَݧٜىٰ، نٛدِّيَمْ بَرْکَ يِدّٜ مَاکٛ، اٛ سُٻِ وَنْغِنَنْکِيَمْ ٻِطّٛ مَاکٛ، نغَمْ مِ وَعَجِنَمٛ ندٜرْ يِمْٻٜ نَاع يَحُودَنْکٛعٜنْ؞ ندٜ نٛنْ وَطِ، مِ يَحَايِ تٛ غٛطّٛ نغَمْ حٛکَّيَمْ شَاوٛرِ، نٛنْ مَا مِ يَحَايِ اُرُشَلِيمَ نغَمْ مِ يِعَ ٻٜنْ طٛنْ اَرْتُٻٜيَمْ وَرْتُکِ لِلَاٻٜ؞ اَمَّا طٛنْ اٜ طٛنْ نجَامِ لٜيْدِ لَارَبَنْکٛعٜنْ، ندٜنْ شٛعِّيمِ دِمَسْکُ؞ غَطَ دُوٻِ تَتِ مِ يَحِي اُرُشَلِيمَ نغَمْ مِ مٜدَّ اٜ بِيتُرُسْ، ندٜنْ نجٛوطٛدِيمِ اٜ مَاکٛ بَلْطٜ سَڤّٛ اٜ جٛوِ؞ اَمَّا مِ يِعَايِ غٛطّٛ ندٜرْ لِلَاٻٜ سٜيْ نِ يَاکُبُ، مِݧِرَاوٛ يٜىٰسُ؞ کٛ مبِنْدَنْمِعٛنْ طُمْ غٛونغَ؞ اَللَّه اٜ اَنْدِ نَاع مِ فٜوَيْ؞ غَطَ طٛنْ مِ يَحِي لٜيْدِ سِيرِيَ اٜ لٜيْدِ کِلِيکِيَ؞ اٜ نغٜلْ تٛنْ شَرٜلْ، کَوْتٜ تٛکُّٻٜ يٜىٰسُ وٛنْٻٜ لٜيْدِ يَحُودِيَ مٜىٰطَايِ يِيکِيَمْ؞ کٛ ٻٜ نَنِ تَنْ وٛنِ، «نٜطّٛ تٛرَّيْنٛوطٛعٜنْ، جٛونِ اٜ مٛ وَعَجِنَ تٛکُّکِ يٜىٰسُ کِ اٛ يِطُنٛو اٛ لَلِّنَ!» ٻٜ مَنْتِ اَللَّه نغَمْ کٛ اٛ وَطَنِيَمْ؞ غَطَ دُوٻِ سَڤّٛ اٜ نَيِ مِ فُطِّتِ مِ يَحِي اُرُشَلِيمَ حَوْتِ اٜ بَرْنَبَ، مِنْ نجَادِ اٜ تِيتُسْ؞ مِ يَحُ اُرُشَلِيمَ نغَمْ اَللَّه حٛلِّييَمْ مِ يَحَ؞ ندٜ نجَامِ مِ حَوْرِي اٜ اَرْدِيٻٜ تٛکُّٻٜ يٜىٰسُ تَنْ، مِ حٛلِّيٻٜ حَبَرُ بٜلْطُمْ طُمْ نغَعَجِنَنْمِ يِمْٻٜ نَاع يَحُودَنْکٛعٜنْ؞ مِ وَطُ نٛنْ نغَمْ مِ يِطَا کُوغَلْ نغَلْ کُوُمِ ندٜنّٛ اٜ نغَلْ کُوَيْمِ جٛونِ وَرْتَ مٜىٰرٜ؞ کٛو تِيتُسْ مٛ نجَادَيْمِ، کٛو ندٜ نَاع اٛ يَحُودَنْکٜىٰجٛ، طُمْ وَطَايِمٛ دٛولٜ اٛ نَادٜىٰ، کٛو ندٜ وٛٻّٜ اٜ نغِطُنٛو اٛ نَادٜىٰ؞ ٻٜ نغَطِي بٛ ٻٜ تٛکُّٻٜ يٜىٰسُ، ٻٜ نَتِّ ندٜرْ کَوْتَلْ مٜىٰطٜنْ، اٜ ٻٜ ندَارَ اِرِ رِمْطِنْکِ کِ نغٛودُطٜنْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ، نغَمْ ٻٜ نغَرْتِرَعٜنْ مَشُّٻٜ؞ اَمَّا نغَمْ طُمْ سُرَنَعٛنْ غٛونغَ حَبَرُ بٜلْطُمْ، مِنْ نجَٻَايِ کٛ ٻٜ مبِعِ کٛو سٜطَّ؞ اَمَّا ٻٜنْ طٛنْ اَرْدِيٻٜ ٻٜ ٻٜيْدَايِ غٛطُّمْ دٛوْ اٜکِّتِنٛلْ اَمْ؞ کٛو کَمْٻٜ ٻٜ ٻٜيٜ وَلَا فٜىٰرٛوتِرٛلْ تٛ اَمْ، نغَمْ اَللَّه حٛلَّتَا فٜىٰرٛوتِرٛلْ؞ اَمَّا ٻٜ نغِعِ اَللَّه حٛکِّييَمْ کُوغَلْ وَعَجِنَنْکِ يِمْٻٜ نَاع يَحُودَنْکٛعٜنْ حَبَرُ بٜلْطُمْ، نٛنْ نٛ اٛ حٛکِّرِ بِيتُرُسْ کُوغَلْ وَعَجِنَنْکِ يَحُودَنْکٛعٜنْ حَبَرُ بٜلْطُمْ؞ نغَمْ نٛ اَللَّه وَرْتِرِ بِيتُرُسْ لِلَاطٛ تٛ يَحُودَنْکٛعٜنْ، نٛنْ اٛ وَرْتِرِيَمْ لِلَاطٛ يَاکِ تٛ يِمْٻٜ نَاع يَحُودَنْکٛعٜنْ؞ يَاکُبُ اٜ بِيتُرُسْ اٜ يَحَيَ، نٛدّٜتٜىٰٻٜ اَرْدِيٻٜ مَوْٻٜ، ندٜ ٻٜ نغِعِ اَللَّه بَرْکِطِنِي کُوغَلْ اَمِنْ بٛنْغَلْ، ٻٜ نجَٻِّييَمْ مِنْ اٜ بَرْنَبَ جُوطٜ طِطِ؞ ٻٜ نجَٻِ مِنْ اٜ بَرْنَبَ مِنْ نغَعَجِنَ ندٜرْ يِمْٻٜ نَاع يَحُودَنْکٛعٜنْ، ندٜنْ کَمْٻٜ ٻٜ نغَعَجِنَ ندٜرْ يَحُودَنْکٛعٜنْ؞ فِي غٛعٛ طُمْ ٻٜ تٛرِيمِنْ وٛنِ تٛع مِنْ نغٜجِّتَ ٻٜ نغَلَنَا وٛنْٻٜ ندٜرْ مَٻّٜ، ندٜنْ مَا کَنْجُمْ وٛنِ کٛ کَاٻُمِ وَطُکِ؞ اَمَّا ندٜ بِيتُرُسْ وَرِ اَنْتَاکِيَ، مِ حَٻَنِيمٛ غِتٜ اٜ غِتٜ، نغَمْ کٛ وٛوطَا طُمْ اٛ وَطِ اٜ نجَيْرِ طُمْ وٛنِ؞ کٛ وٛٻّٜ يِمْٻٜ ٻٜ يَاکُبُ لِلِ نجٛتّٛو تٛنْ، بِيتُرُسْ اٜ ݧَمْدَ اٜ يِمْٻٜ نَاع يَحُودَنْکٛعٜنْ؞ اَمَّا غَطَ يِمْٻٜ ٻٜنْ نجٛتَّکٜ، بِيتُرُسْ حَکِّتِ حٛورٜ مُوطُمْ اٜ مَٻّٜ، نغَمْ اٜ مٛ حُلَ ٻٜنْ طٛنْ يِمْٻٜ بِعٛوٻٜ دٛولٜ يِمْٻٜ نَاع يَحُودَنْکٛعٜنْ تٛکُّٻٜ يٜىٰسُ نَادٜىٰ؞ يَحُودَنْکٛعٜنْ تٛکُّٻٜ يٜىٰسُ کٛرِيٻٜ مَا ڤُطِّ وَطُکِ شِيَ غٛونغَ طُمْ بِيتُرُسْ وَطَتَ، حَا کٛ ٻٜ نغَطَتَ مَجِّنِ بَرْنَبَ اٛ فُطِّ وَطُکِ شِيَ غٛونغَ طُمْ ٻٜ نغَطَتَ؞ ندٜ نغِيمِ ٻٜ تٛکَّايِ غٛونغَ حَبَرُ بٜلْطُمْ، مبِيمِ بِيتُرُسْ يٜىٰسٛ مَٻّٜ ٻٜ فُو، «اَ يَحُودَنْکٜىٰجٛ، اَمَّا اَ وَطَ جٛنْدٜ اِرِ ندٜ نٜطّٛ نَاع يَحُودَنْکٜىٰجٛ؞ نٛ وَطَتَ اَ وَطَ يِمْٻٜ نَاع يَحُودَنْکٛعٜنْ نغَطَ جٛنْدٜ اِرِ ندٜ يَحُودَنْکٛعٜنْ؟» اٜنٜنْ اٜ کٛعٜ مٜىٰطٜنْ اٜنْ يَحُودَنْکٛعٜنْ غَطَ اٜ يٜىٰسٛ، نَاع اٜنْ «يِمْٻٜ نَاع يَحُودَنْکٛعٜنْ غَطٛوٻٜ حَکّٜ،» نٛ ٻٜ نٛدِّرْتٜىٰ؞ فُو اٜ نٛنْ، اٜنْ اَنْدِ اَللَّه جَٻَتَا نٜطّٛ اٛ اَادِلِيجٛ نغَمْ تٛکُّکِ اَتَّوْرَ، اَمَّا اٛ جَٻَيْمٛ بَرْکَ حٛولَاکِ يٜىٰسُ اَلْمَسِيحُ؞ اٜنٜنْ مَا اٜنْ کٛولَکٜ يٜىٰسُ اَلْمَسِيحُ نغَمْ اَللَّه جَٻَعٜنْ اٜنْ اَادِلِعٜنْ بَرْکَ حٛولَاکِ اَلْمَسِيحُ، نَاع نغَمْ تٛکُّکِ اَتَّوْرَ؞ نغَمْ وَلَا مٛ اَللَّه جَٻَتَ اٛ اَادِلِيجٛ نغَمْ تٛکُّکِ اَتَّوْرَ؞ شَرٜلْ نغٜلْ طَٻِّتٜتٜنْ اَللَّه جَٻَعٜنْ اٜنْ اَادِلِعٜنْ بَرْکَ سُمْڤٛوتِرْکِ اٜ اَلْمَسِيحُ، تٛ طُمْ تَوْرِيعٜنْ اٜ حَکّٜ، تٛو، اَلْمَسِيحُ وَرْتِي غَطٛووٛعٜنْ نغَطٜنْ حَکّٜ وٛنْ طٛنْ؟ غٛونغَ نَاع طُمْ نٛنْ! تٛ مِ فُطِّتِي مِ ݧِٻِي کٛ شَنْکُتُمِ، ندٜنْ مِ حٛلِّي مِ نٜطّٛ غٜوٛووٛ کٛ اَتَّوْرَ وِعِ؞ ندٜنّٛ اٜ مِ تٛکَّ اَتَّوْرَ، اَمَّا طُمْ يٛوفِييَمْ دَغَ بَوْطٜ مَاجُمْ، نغَمْ مِ وَطَ جٛنْدٜ حُوَنْکِ اَللَّه؞ مِنْ بٛ مِ وَرْدَامَ اٜ اَلْمَسِيحُ دٛوْ غَافَانغَلْ؞ جٛونِ جٛنْدٜ ندٜ نغَطَيْمِ نَاع مِنْ اٜ حٛورٜ اَمْ وَطَتَندٜ، اَمَّا طُمْ اَلْمَسِيحُ جٛوطِيطٛ ندٜرْ اَمْ؞ جٛونِ جٛنْدٜ ندٜ نجٛوطِيمِ ندٜرْ ٻَنْدُ، اٜ مِ وَطَندٜ ندٜرْ حٛولَاکِ ٻِطّٛ اَللَّه، غِطّٛيَمْ حٛکِّ يٛنْکِ مُوطُمْ نغَمْ اَمْ؞ مِ وَݧَتَا يِدّٜ اَللَّه؞ نغَمْ تٛ نٜطّٛ وَاوَيْ وَرْتُکِ اَادِلِيجٛ نغَمْ تٛکُّکِ اَتَّوْرَ، تٛو، مَيْدٜ اَلْمَسِيحُ وَرْتِي مٜىٰرٜ؞ اٛنٛنْ غَلَاتِيَنْکٛعٜنْ حَاݝَاٻٜ! مٛيٜ وَيْلِتِ حَکِّيلٛ مٛوطٛنْ؟ طُمْ وِعِيعٛنْ اٜ نجَيْرِ نٛ يٜىٰسُ اَلْمَسِيحُ وَرِرَا دٛوْ غَافَانغَلْ؞ اٜ مِ يِطِ مِ پَمَعٛنْ طُعُمْ تَنْ: اٛنْ کٜٻُ رُوحُ اَللَّه نغَمْ وَطُکِ کٛ اَتَّوْرَ وِعِ طُمْ وَطَ، کٛو نغَمْ نَنْکِ حَبَرُ يٜىٰسُ اٜ حٛولَاکِمٛ؟ نغَمْ طُمٜ ندُلُّطٛنْ حَکِّيلٛ؟ غَطَ اٛنْ ڤُطِّرِي رُوحُ اَللَّه، جٛونِ اٛنْ نغِطِ يٛتِّنِرْکِ سٜمْبٜ مٛوطٛنْ؟ جٛونِ فُو تٛرَّاجِ طِ نجَرْطٛنْ نغَرْتِي مٜىٰرٜ وٛنْ طٛنْ؟ غٛونغَ اٛنْ تٛرَّاکِ اٜ مٜىٰرٜ؞ اَللَّه کٛکُّطٛعٛنْ رُوحُ مُوطُمْ کُوُطٛ کُوطٜ کَيْطِنِيطٜ ندٜرْ مٛوطٛنْ، اٛنْ ݧُمَ اٛ وَطُطُمْ نغَمْ اٛنْ نغَطِي کٛ اَتَّوْرَ وِعِ، کٛو نغَمْ نَنْکِ حَبَرُ يٜىٰسُ اٜ حٛولَاکِمٛ؟ ݧُمٜىٰ دٛوْ اِبْرَاهِمْ؞ اَايَارٜ وِعِي، «اِبْرَاهِمْ بٛو حٛولَکٜ اَللَّه، نغَمْ مَاجُمْ اَللَّه وِعِ اٛ اَادِلِيجٛ؞» تٛو، اٛنْ نغِعِي ٻِٻّٜ اِبْرَاهِمْ ٻٜ غٛونغَ وٛنِ يِمْٻٜ کٛولِيٻٜ اَللَّه؞ کٛ نٜىٰٻِ اَايَارٜ وِعِي اَللَّه جَٻَيْ يِمْٻٜ نَاع يَحُودَنْکٛعٜنْ ٻٜ اَادِلِعٜنْ تٛ ٻٜ کٛولَکٜمٛ؞ کَنْجُمْ وَطِ اَللَّه وَعَجِنَنِ اِبْرَاهِمْ حَبَرُ بٜلْطُمْ وِعِ، «بَرْکَ مَاطَ طُمْ بَرْکِطِنَيْ کٛو نغٛلٜ لٜݧٛلْ ندٜرْ دُونِيَارُ؞» نغَمْ مَاجُمْ فُو کٛولِيٻٜ اَللَّه ٻٜ بَرْکِطِنَاٻٜ حَوْتِ اٜ اِبْرَاهِمْ کٛولِيطٛ اَللَّه؞ فُو غِطْٻٜ وٜلْنَنْکِ اَللَّه ٻٜرْندٜ لَاوٛلْ تٛکُّکِ اَتَّوْرَ ٻٜ لَانَاٻٜ؞ نغَمْ اَايَارٜ وِعِي، «کٛو مٛيٜ مٛ تٛکَّايِ کٛو طُمٜ بِنْدَاطُمْ ندٜرْ دٜفْتٜرٜ اَتَّوْرَ اٛ لَانَاطٛ؞» جٛونِ اٜ نجَيْرِ طُمْ وٛنِ، وَلَا مٛ اَللَّه جَٻَتَ اٛ اَادِلِيجٛ نغَمْ تٛکُّکِ اَتَّوْرَ، نغَمْ اَايَارٜ وِعِي، «اَادِلِيجٛ اٛ وَطَيْ جٛنْدٜ حٛولَاکِ اَللَّه؞» حٛولَاکِ اَللَّه اٜ فٜىٰرٛوتِرِ اٜ تٛکُّکِ اَتَّوْرَ؞ نغَمْ اَايَارٜ وِعِي، «کٛو مٛيٜ غَطٛووٛ کٛ اَتَّوْرَ وِعِ اٛ حٜٻَيْ جٛنْدٜ ندٜ غٛونغَ؞» يٜىٰسُ اَلْمَسِيحُ رِمْطِنِيعٜنْ دَغَ لَانٜىٰکِ کِ اَتَّوْرَ وَدِّ، ندٜ اٛ وَرْتِ کٛ لَانَا نغَمْ مٜىٰطٜنْ؞ نغَمْ اَايَارٜ وِعِي، «کٛو مٛيٜ بَرَاطٛ دٛوْ لٜکِّ اٛ لَانَاطٛ؞» يٜىٰسُ اَلْمَسِيحُ رِمْطِنِيعٜنْ، نغَمْ بَرْکَ مَاکٛ يِمْٻٜ نَاع يَحُودَنْکٛعٜنْ کٜٻَ بَرْکَ طُمْ اَللَّه وَطَنِ اِبْرَاهِمْ اَلْکَوَلْ؞ اٛ وَطُ نٛنْ نغَمْ بَرْکَ حٛولَاکِمٛ کٜٻٜنْ رُوحُ طُمْ اَللَّه وَطِ اَلْکَوَلْ حٛکُّکِ؞ اٛنٛنْ بَنْدِرَاٻٜ اَمْ، اَلْ مِ حٛکَّعٛنْ مِسَالُ دٛوْ فِي طُمْ اَنْدُطٛنْ؞ غَطَ يِمْٻٜ طِطٛ کَوْتِي نجَٻِي غٛطُّمْ، تٛ ٻٜ نغَادِي اَلْکَوَلْ دٛوْ مَاجُمْ، وَلَا ڤٛتُطٛ سَنْکِتَطُمْ، کٛو ٻٜيْدَ غٛطُّمْ دٛوْ مَاجُمْ؞ تٛو، اَللَّه وَطَنِي اِبْرَاهِمْ اَلْکَوَلْ مُوطُمْ اٜ ٻِٻّٜ ٻِٻّٜىٰجِ مَاکٛ؞ اَايَارٜ وِعَايِ، «اٜ تَانِرَاٻٜ،» وَاتٛ يِمْٻٜ طُطْٻٜ، اَمَّا ندٜ وِعِ، «اٜ تَانِرَاوٛ مَاطَ،» وَاتٛ نٜطّٛ غٛعٛ تَنْ، کَنْکٛ وٛنِ اَلْمَسِيحُ؞ کٛ نغِنْمِ وِيکِ وٛنِ اَتَّوْرَ طُمْ اَللَّه حٛکِّ دُوٻِ 430 غَطَ طٛنْ، طُمْ يٜوَتَا اَلْکَوَلْ نغَلْ اَللَّه وَطُنٛو، ندٜنْ طُمْ سَنْکِتَتَانغَلْ؞ نغَمْ تٛ بَرْکَ طُمْ کٜٻُطٜنْ تٛ اَللَّه اٜنْ کٜٻُطُمْ نغَمْ تٛکُّکِ اَتَّوْرَ، تٛو، اٜنْ کٜٻَايِطُمْ نغَمْ اَلْکَوَلْ نغَلْ اٛ وَطِ؞ اَمَّا اَللَّه بَرْکِطِنِي اِبْرَاهِمْ نغَمْ اَلْکَوَلْ نغَلْ اَللَّه وَطَنِمٛ؞ تٛ طُمْ نٛنْ، نغَمْ طُمٜ طُمْ وَدِّ اَتَّوْرَ؟ طُمْ وَدَّ نغَمْ طُمْ حٛلَّ کٛ وٛنِ حَکّٜ؞ اَللَّه وَدُّطُمْ طُمْ حُوتِرٜىٰ نَا شَرٜلْ نغٜلْ تَانِرَاوٛ اِبْرَاهِمْ اٛنْ طٛنْ وَرِي، مٛ طُمْ وَطُنٛ اَلْکَوَلْ؞ اَللَّه لِلِ مَلَاعِکَعٜنْ ٻٜ کٛکِّ مُوسَ اَتَّوْرَ، مُوسَ حٛکِّطُمْ اِسْرَاعِيلَنْکٛعٜنْ؞ اَمَّا ندٜ اَللَّه وَطَنِ اِبْرَاهِمْ اَلْکَوَلْ، اٛ مٜدِّ اٜ اِبْرَاهِمْ کَنْکٛ اٜ حٛورٜ مَاکٛ؞ جٛونِ طُعُمْ اٜ حٛلَّ اَتَّوْرَ اٜ وَݧَ اَلْکَوَلْ اَللَّه وٛنْ طٛنْ؟ غٛونغَ نَاع طُمْ نٛنْ؞ دَا طُمْ حٛکِّي دٛوکَ کٛکّٛوجُمْ يٛنْکِ، دَا کٛو مٛيٜ وَاوَيْ وَرْتُکِ اَادِلِيجٛ تٛ تٛکِّيطُمْ؞ اَمَّا اَايَارٜ وِعِي حَکّٜ حَٻِّي کٛو مٛيٜ غٛنْطٛ ندٜرْ دُونِيَارُ، نغَمْ کٛ اَللَّه وَطِ اَلْکَوَلْ کٜٻٜتٜىٰطُمْ تٛ طُمْ حٛولَکٜ يٜىٰسُ اَلْمَسِيحُ، طُمْ حٛکَّيْطُمْ کٛولِيٻٜمٛ؞ کٛ شَرٜلْ حٛولَاکِ يٜىٰسُ وَرَ، اَتَّوْرَ حَٻِّيمِنْ بٛ شُرَاٻٜ نَاکِ ندٜ حٛولَاکِ يٜىٰسُ وَرٛيِ؞ نغَمْ نٛنْ، مِنْ نغَطَا لٜيْ لَامُ اَتَّوْرَ يَاکِ شَرٜلْ نغٜلْ اَلْمَسِيحُ وَرِ نغَمْ مِنْ نغَرْتَ اَادِلِعٜنْ، تٛ مِنْ کٛولَکٜمٛ؞ جٛونِ ندٜ حٛولَاکِ اَلْمَسِيحُ وَرِي، اَتَّوْرَ وَلَا لَامُ دٛوْ اَمِنْ کَدِنْ؞ اٛنْ فُو اٛنْ ٻِٻّٜ اَللَّه بَرْکَ حٛولَاکِ يٜىٰسُ اَلْمَسِيحُ؞ اٛنْ فُو اٛنْ نغَطَنَامَ بَڤْتِسْمَ کٛلُّطُمْ اَلْمَسِيحُ جٜيِعٛنْ اٛنْ ٻٛرْنَکٜ نغِکُّ اَلْمَسِيحُ وٛنْ طٛنْ نٛ ٻٛرْنٛرْتٛوطٛنْ کٛلْتٜ؞ نغَمْ نٛنْ وَلَا فٜىٰرٛوتِرٛلْ حَکُّندٜ يَحُودَنْکٛعٜنْ اٜ نَاع يَحُودَنْکٛعٜنْ، اٜ حَکُّندٜ مَشُّٻٜ اٜ نَاع مَشُّٻٜ، اٜ حَکُّندٜ وٛرْٻٜ اٜ رٜوْٻٜ؞ اٛنْ فُو اٛنْ نغَرْتِي غٛعٛ ندٜرْ سُمْڤٛوتِرْکِ اٜ يٜىٰسُ اَلْمَسِيحُ؞ تٛ اَلْمَسِيحُ جٜيِعٛنْ، اٛنٛنْ نغٛنِ ٻِٻّٜ اِبْرَاهِمْ، اٛنٛنْ کٜٻَتَ کٛ اَللَّه وَطِ اَلْکَوَلْ؞ کٛ نغِنْمِ وِيکِ وٛنِ ٻِطّٛ دٛنٛووٛ جَوْدِ ݧَاکٛ مُوطُمْ بٛ مَشُّطٛ اٛ وٛنِ شَرٜلْ کٛ اٛ وٛنِ سُکَ ڤَمَرٛ، کٛو ندٜ کَنْکٛ رٛنَتَ کٛو طُمٜ کٛ ݧَاکٛ مَاکٛ وٛودِ؞ اٛ جٛوطٛتٛ لٜيْ وٛٻّٜ ڤَامَنَيْٻٜمٛ اٜ ڤَامَنَيْٻٜ جَوْدِ ندِ اٛ رٛنَتَ ندِنْ نَا ݧَلْندٜ ندٜ ݧَاکٛ مَاکٛ وِعِ؞ نٛنْ، اٜنٜنْ مَا کٛ اَلْمَسِيحُ رِمْطِنَعٜنْ، غِنِّ غٛودُطِ بَوْطٜ ندٜرْ لَامٛتٛوعٜنْ؞ اَمَّا ندٜ شَرٜلْ وَطِ، اَللَّه لِلٛيِ ٻِطّٛ مُوطُمْ؞ دٜبّٛ دَݧِمٛ، اٛ جٛوطِي لٜيْ اَتَّوْرَ، نغَمْ اٛ رِمْطِنَ ٻٜنْ طٛنْ تٛکّٛوٻٜ اَتَّوْرَ، نغَمْ نغَرْتٜنْ ٻِٻّٜ اَللَّه؞ نغَمْ اٛنْ ٻِٻّٜ اَللَّه، اٛ لِلٛيِ رُوحُ ٻِطّٛ مَاکٛ ندٜرْ ٻٜرْطٜ مٜىٰطٜنْ، اٜ طُمْ نٛدَّ اَللَّه اٜ طُمْ وِعَ، «ݧَاکٛ اَمْ، ݧَاکٛ اَمْ؞» نغَمْ نٛنْ، جٛونِ نَاع اَ مَشُّطٛ، اَمَّا اَ ٻِطّٛ؞ ندٜنْ ندٜ اَ ٻِطّٛ، اَللَّه وَرْتِرِيمَ دٛنَيْطٛمٛ؞ ندٜنّٛ کٛ اٛنْ اَنْدَا اَللَّه، اٛنْ مَشُّٻٜ تٛکّٛوٻٜ اَلَّاجِ فٜوْرٜ؞ اَمَّا جٛونِ ندٜ اَنْدُطٛنْ اَللَّه، کٛو بٛو ندٜ اَللَّه اَندِعٛنْ، نغَمْ طُمٜ شٛعَّنْتٛوطٛنْ طِنْ طٛنْ غِنِّ تَمْڤُطِ طِ نَفَنْتَاعٛنْ؟ نغَمْ طُمٜ نغِطّٛنْ وَرْتُکِ مَشُّٻٜ مَاجِ کَدِنْ؟ اٛنْ مَوْنِنَ غٛطّٜ ݧَلْطٜ، اٜ غٛطِّ لٜبِّ، اٜ غٛطِّ دُوٻِ؞ اٜ مِ حُلَ تٛع کُوغَلْ نغَلْ کُوُمِ ندٜرْ مٛوطٛنْ وَرْتَ مٜىٰرٜ؞ اٛنٛنْ بَنْدِرَاٻٜ اَمْ، اٜ مِ تٛرٛوعٛنْ، نغَرْتٜىٰ بٛ اَمْ، نغَمْ مِنْ مَا مِ وَرْتِي بٛ مٛوطٛنْ؞ اٛنْ نغَطَنَايِيَمْ غٛطُّمْ کٛ وٛوطَا؞ اٛنْ اَنْدِ نغَمْ مِ يَمْطَا وَطِ کٜٻُمِ لَاوٛلْ نغَعَجِنَنْمِعٛنْ حَبَرُ بٜلْطُمْ اَرَنْدٜ؞ کٛو ندٜ شِيَ نجَمُ اَمْ فٛوطَنِيعٛنْ تٛرَّ، اٛنْ نجَوَنَايِيَمْ، اٛنْ نغَݧَايِيَمْ؞ اَمَّا اٛنْ نجَٻِييَمْ بٛ مَلَاعِکَاجٛ اَللَّه، اٛنْ نجَٻِييَمْ نٛ نجَٻِرْطٛنْ يٜىٰسُ اَلْمَسِيحُ؞ تٛ نَنْکِ بٜلْطُمْ کِ نَنُنٛوطٛنْ وٛنِ؟ مِ تَبِّتِنِي، دَا طُمْ وَطٛتٛ، دَا اٛنْ اِتِّي غِتٜ مٛوطٛنْ اٛنْ کٛکِّييَمْ؞ جٛونِ مِ وَرْتِي غَݧٛ مٛوطٛنْ ندٜ مبِيمِعٛنْ غٛونغَ؟ ٻٜنْ طٛنْ يِمْٻٜ ٻٜ نغَطِي حَکِّيلٛ مَٻّٜ فُو دٛوْ مٛوطٛنْ نغَمْ ٻٜ نغَطَعٛنْ تٛکّٛنْٻٜ، اَمَّا کٛ ٻٜ نغِطِ وَطُکِ طُمْ وٛوطَا؞ کٛ ٻٜ نغِطِ وٛنِ ٻٜ شٜنْدَعٛنْ اٜ اَمِنْ، نغَمْ حَکِّيلٛ مٛوطٛنْ سٛعّٛو تٛ مَٻّٜ؞ اٜ طُمْ وٛوطِ تٛ نٜطّٛ وَطِي حَکِّيلٛ مُوطُمْ فُو دٛوْ غٛطُّمْ تٛ اٜ طُمْ وٛوطِ؞ اٜ حَانِ نغَطٛنْ نٛنْ کٛو ندٜيٜ، نَاع سٜيْ تٛ اٜ مِ وٛنْدِ اٜ مٛوطٛنْ تَنْ؞ اٛنٛنْ ٻِٻّٜ اَمْ ٻٜ نغِطُمِ، نٛنْ نٛ دٜبّٛ نَنِرْتَ نَوْطُمْ دَݧْنغٛلْ، بٛ نٛنْ اٜ مِ فُطِّتَ نَنُکِ اِرِ طُمْ طٛنْ نَوْطُمْ نغَمْ مٛوطٛنْ نَا شَرٜلْ نغٜلْ کٛلُّطٛنْ نغِکُّ اَلْمَسِيحُ ندٜرْ جٛنْدٜ مٛوطٛنْ؞ اٜ مِ يِطِ جٛوطٛدَاکِ اٜ مٛوطٛنْ، نغَمْ مِ اَنْدَ نٛ مٜتِرَنَيْمِعٛنْ؞ اٜ مِ وَنِّ دٛوْ مٛوطٛنْ نَاع سٜطَّ! مبِعٜىٰيَمْ، اٛنٛنْ غِطُٻٜ تٛکُّکِ اَتَّوْرَ، اٛنْ نَنَايِ کٛ اَتَّوْرَ وِعِ؟ نغَمْ اَايَارٜ وِعِي اِبْرَاهِمْ اٜ وٛودِ ٻِٻّٜ طِطٛ، غٛعٛتٛ مَشُّطٛ دٜبّٛ دَݧِمٛ، غٛعٛتٛ اٛنْ بٛو دٜبّٛ مَاکٛ دِمٛ دَݧِمٛ؞ ٻِطّٛ مٛ مَشُّطٛ اٛنْ دَݧِ، اٛ دَݧُمٛ نٛ طُمْ دَݧِرِ کٛو مٛيٜ، اَمَّا ٻِطّٛ مٛ دٜبّٛ مَاکٛ دَݧِ، اٛ دَݧُمٛ نغَمْ اَلْکَوَلْ نغَلْ اَللَّه وَطِ؞ طُعُمْ طُمْ مِسَالُ، وَاتٛ ٻٜعٜ رٜوْٻٜ طِطٛ دٛوْ اَلْکَوَلْجِ اَللَّه طِطِ ٻٜ نغٛنِ؞ دٜبّٛ مٛ ٻِٻّٜ مُوطُمْ دَݧَا ندٜرْ مَشُّنغَاکُ، کَنْکٛ وِعٜتٜىٰ حَجَرَ، اٜ مٛ جٛوطَنِي اَلْکَوَلْ نغَلْ اَللَّه وَطِ دٛوْ حٛشّٜىٰرٜ سِنَيْ؞ حَجَرَ وٛنِ مِسَالُ حٛشّٜىٰرٜ سِنَيْ غٛنْدٜ لٜيْدِ لَارَبَنْکٛعٜنْ، ندٜنْ اٛ مِسَالُ غَرِيرِ اُرُشَلِيمَ ندِ جٛونِ، نغَمْ اٜ ندِ ندٜرْ مَشُّنغَاکُ، کَيْرِ اٜ ٻِٻّٜ مَيْرِ؞ اَمَّا سَارَتُ اٛ دٜبّٛ دِمٛ اٛ مِسَالُ غَرِيرِ اُرُشَلِيمَ ندِ دٛوْ ندِ مٜىٰطَايِ مَشُّنغَاکُ، کَيْرِ وٛنِ مَدُوجٛ مٜىٰطٜنْ؞ نغَمْ اَايَارٜ وِعِي، «نَنُ بٜلْطُمْ اَنْ دٜبّٛ مٛ مٜىٰطَايِ دَݧُکِ! جَلُ سٜمْبٜىٰ، اَنْ مٛ مٜىٰطَايِ نَنْکِ نَوْطُمْ دَݧْنغٛلْ! نغَمْ دٜبّٛ مٛ غٛرْکٛ مُوطُمْ وَنَّايِ اٜ مَاکٛ اٛ حٜٻَيْ ٻِٻّٜ طُطْٻٜ ٻُرْٻٜ ٻٜ دٜبّٛ مٛ غٛرْکٛ مُوطُمْ وَنِّ اٜ مُوطُمْ؞» اٛنٛنْ بَنْدِرَاٻٜ اَمْ، اٛنٛنْ مَا بٛ اِشِيَاکُ اٛنْ ٻِٻّٜ اَلْکَوَلْ؞ اٜ نغٜلْ تٛنْ شَرٜلْ ٻِطّٛ مٛ طُمْ دَݧِ نٛ طُمْ دَݧِرِ کٛو مٛيٜ، اٛ حَلَّنِي ٻِطّٛ مٛ طُمْ دَݧِ ندٜرْ بَوْطٜ رُوحُ اَللَّه؞ جٛونِ مَا نٛنْ اٜ وَطٜىٰ؞ اَمَّا کٛ اَايَارٜ وِعِ؟ ندٜ وِعِ، «رِيوُ اٛنْ طٛنْ مَشُّطٛ دٜبّٛ اٜ ٻِطّٛ مَاکٛ، نغَمْ ٻِي دِمٛ سٜنْدِدَتَا ندٛنُ اٜ ٻِي مَشُّطٛ؞» نغَمْ نٛنْ بَنْدِرَاٻٜ، اٜنٜنْ نَاع اٜنْ ٻِٻّٜ مَشُّطٛ دٜبّٛ، اَمَّا اٜنْ ٻِٻّٜ دٜبّٛ دِمٛ؞ اَلْمَسِيحُ رِمْطِنِيعٜنْ نغَمْ تٛع نغَطٜنْ جٛنْدٜ بٛ مَشُّٻٜ؞ نغَمْ نٛنْ، ندَرٜىٰ بٛطُّمْ تٛع اٛنْ ڤُطُّتُ شٛعّٛوطٛنْ ندٜرْ مَشُّنغَاکُ؞ نَنٜىٰ کٛ مبِعَيْمِ! مِنْ بُلُسْ، اٜ مِ وِعَعٛنْ، تٛ اٛنْ اَلِي اٛنْ نَادَامَ، اَلْمَسِيحُ وَرْتَيْ وَلَا کٛ نَفِ تٛ مٛوطٛنْ وٛنْ طٛنْ؞ اٜ مِ فُطِّتَ اٜ مِ وِعَ کٛو مٛيٜ جَٻُطٛ نَادَا، دٛولٜ اٛ تٛکَّ فُو کٛ اَتَّوْرَ وِعِ؞ اٛنٛنْ غِطُٻٜ وَرْتُکِ اَادِلِعٜنْ نغَمْ تٛکُّکِ اَتَّوْرَ، اٛنْ شٜنْدِرِي اٜ اَلْمَسِيحُ، اٛنْ شٜنْدِرِي اٜ شَاحُ اَللَّه؞ اٜنْ تَبِّتِنِي دَغَ تٛ رُوحُ اَللَّه، اٛ جَٻَيْعٜنْ اٜنْ اَادِلِعٜنْ نغَمْ اٜنْ کٛولَکٜ اَلْمَسِيحُ؞ اٜنْ کَاٻِي يِيکِطُمْ؞ نغَمْ تٛ اٜنْ شُمْڤٛوتِرَ اٜ يٜىٰسُ اَلْمَسِيحُ، نَادٜىٰکِ اٜ شِيَ نَادٜىٰکِ فُو وَلَا کٛ نَفِ؞ اَمَّا کٛ ٻُرِ وٛنِ حٛولَاکِ اَلْمَسِيحُ؞ کٛ حٛلَّتَ اٜنْ کٛولِمٛ وٛنِ نغِطٜنْ يِمْٻٜ اٜ اَللَّه؞ ندٜنّٛ اٛنْ ݧَمْرَ يٜىٰسٛ بٛطُّمْ! مٛيٜ حَطِعٛنْ تٛکُّکِ غٛونغَ؟ نَاع اَللَّه نٛدُّطٛعٛنْ حَطِعٛنْ؞ نٛنْ نٛ طُمْ وِعَتَ، «پُوفِنِرْطُمْ سٜطَّ ٻُوتِنْتَ شٛنْدِ بُرٛودِ فُو؞» نغَمْ مِ حٛولَکٜ جٛومِرَاوٛ، مِ تَبِّتِنِي اٛنْ تٛکَّتَا وٛنْغٛلْ لَاوٛلْ فٜىٰرٛوتِرْنغٛلْ اٜ نغٛلْ اَمْ؞ ندٜنْ اٛنْ طٛنْ نٜطّٛ مَجِّنَيْطٛعٛنْ، کٛو اٛ مٛيٜ، اَللَّه تٛرَّيْمٛ؞ اٛنٛنْ بَنْدِرَاٻٜ اَمْ، تٛ حَا جٛونِ اٜ مِ وَعَجِنَ وِيکِ دٛولٜ يِمْٻٜ نَادٜىٰ، نغَمْ طُمٜ حَا جٛونِ اٜ طُمْ تٛرَّيَمْ؟ دَا اٜ مِ وَعَجِنَ دٛوْ طُمْ نَادَ، دَا وَعَجِنْکِ اَمْ دٛوْ مَيْدٜ اَلْمَسِيحُ دٛوْ غَافَانغَلْ فٛوطَتَا شَطُّمْ؞ دَا طُمْ وِعَ ٻٜنْ طٛنْ يِمْٻٜ مَجِّنٛوٻٜعٛنْ ٻٜ تَڤَّ کٛعٜ مَٻّٜ! اٛنٛنْ بَنْدِرَاٻٜ اَمْ، اٛنْ نٛدَّ نغَمْ نغَرْتٛنْ رِمْطِنَاٻٜ؞ اَمَّا تٛع اٛنْ کُوتِرْ رِمْطِنْکِ مٛوطٛنْ وَرْتَ لَاوٛلْ وَطُکِ کٛ سُونٛ ٻَلِّ مٛوطٛنْ نغِطِ؞ سٜيْ نِ مبَلِّندِرٛنْ ندٜرْ يِدّٜ؞ نغَمْ فُو اَتَّوْرَ حٜىٰوِي دٛوْ وٛلْدٜ غٛعٛ، وَاتٛ، «يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞» اَمَّا تٛ اٛنْ کَلِّندِرَ اٛنْ تٛرِّندِرَ بٛ مَرْلٜ لَدّٜ، ڤَامٜىٰ تٛع کَلْکِندِرٛنْ؞ کٛ مبِعَيْمِ وٛنِ، نغَطٜىٰ جٛنْدٜ مٛوطٛنْ نٛ رُوحُ اَللَّه حٛلِّرِعٛنْ، ندٜنْ اٛنْ نغَطَتَا کٛ سُونٛوجِ ٻَلِّ مٛوطٛنْ نغِطِ؞ نغَمْ کٛ ٻَلِّ مٜىٰطٜنْ نغِطِ اٜ وَݧَ کٛ رُوحُ اَللَّه يِطِ، نٛنْ مَا کٛ رُوحُ اَللَّه يِطِ اٜ وَݧَ کٛ ٻَلِّ مٜىٰطٜنْ نغِطِ؞ فِي طِطُمْ طُعُمْ اٜ طُمْ وَݧْوَݧْتِرَ؞ کَنْجُمْ وَطِ اٛنْ مبَاوَتَا وَطُکِ کٛ نغِطّٛنْ وَطُکِ؞ اَمَّا تٛ اٛنْ نغَطَ کٛ رُوحُ اَللَّه وِعِعٛنْ نغَطٛنْ، اٛنْ نغَلَا لٜيْ لَامُ اَتَّوْرَ؞ کٛ ٻَنْدُ نٜطّٛ يِطِ وَطُکِ، اٜ نجَيْرِ طُمْ وٛنِ: اٜ وٛودِ وَطُکِ نجٜىٰنُ، اٜ وَطُکِ کُوطٜ نٜفْنِيطٜ، اٜ وَطُکِ کٛ سٜمْتِنِي، اٜ مَوْنِنْکِ غُنْکِيجِ، اٜ حُوتِرْکِ بَوْطٜ غِنِّ، اٜ وَݧْوَݧْتِرْکِ، اٜ حَوْرٜ، اٜ يِطُکِ کٛ جٜيَايِ، اٜ مٛنُّکِ، اٜ يِدّٜ حٛورٜ، اٜ يٜدّٛوتِرْکِ، اٜ وَدُّکِ سٜنْدِرْکِ، اٜ لَوْلِيرُ، اٜ يِلْتَاکِ، اٜ يَرْکِ نجَرُ يِلْتٛو حَا وَطَ کٛ حَلِّ، اٜ وَطُکِ غٛطّٜ کُوطٜ اِرِ طٜعٜ؞ اٜ مِ وِعَعٛنْ نٛنْ نٛ مبِيمِعٛنْ ندٜنّٛ، کُوٛوٻٜ اِرِ کُوطٜ طٜعٜ ٻٜ کٜٻَتَا نَتُّکِ لَامُ اَللَّه؞ اَمَّا رُوحُ اَللَّه اٜ وَدَّ يِدّٜ، اٜ وٜلْوٜلٛ، اٜ جٛنْدٜ جَمْ، اٜ مُݧَلْ، اٜ يُرْمٜىٰندٜ، اٜ نغِکُّ بٛطُّمْ، اٜ وَطُکِ غٛونغَ، اٜ لٜيْنُکِ حٛورٜ، اٜ سُرُکِ حٛورٜ؞ وَلَا دٛوکَ غَݧُطُمْ کُوطٜ طٜعٜ؞ يِمْٻٜ ٻٜ يٜىٰسُ اَلْمَسِيحُ جٜيِ، ٻٜ مبَرِي کُوطٜ کَلُّطٜ طٜ ٻَنْدُ اٜ فُو سُونٛوجِ مَيْرُ دٛوْ غَافَانغَلْ، وَاتٛ ٻٜ شٜنْدِرِي اٜ مَاجُمْ؞ ندٜ رُوحُ اَللَّه حٛکِّعٜنْ يٛنْکِ، اٜنْ نغَطُ جٛنْدٜ نٛ طُمْ حٛلِّرِعٜنْ؞ تٛع اٜنْ نغَرْتُ ٻٜ مَنْغُ حٛورٜ، کٛو اُمِّنِندِرٜنْ حَکِّيلٛ، کٛو لَوْلِندِرٜنْ؞ اٛنٛنْ بَنْدِرَاٻٜ اَمْ، تٛ اٛنْ نغِعِي غٛطّٛ اٜ وَطَ حَکّٜ، اٛنٛنْ کٜىٰوُٻٜ رُوحُ اَللَّه سٜيْ شٛعّٛنْمٛ دٛوْ لَاوٛلْ ندٜرْ حَکِّيلٛ؞ اَمَّا ڤَامَنٜىٰ کٛعٜ مٛوطٛنْ، تٛع اٛنٛنْ مَا نغَطٛنْ حَکّٜ؞ مبَلِّندِرٜىٰ ندٜرْ تٛرَّاجِ مٛوطٛنْ؞ تٛ اٛنْ نغَطِي نٛنْ، اٛنْ نغَطِي کٛ دٛوکَ اَلْمَسِيحُ وِعِ؞ تٛ غٛطّٛ اٜ ݧُمَ کَنُمْ طُمْ غٛطُّمْ کٛو ندٜ نَاع اٛ غٛطُّمْ، اٜ مٛ مَجِّنَ حٛورٜ مَاکٛ؞ کٛو مٛيٜ فٛوندَ کُوطٜ مُوطُمْ يِعَ تٛ طٜ بٛطّٜ؞ ندٜنْ اٛ مَنْتٛرٛو حٛورٜ مَاکٛ نغَمْ کٛ اٛ وَطِ نَاع سٜيْ تٛ اٛ فٛوندِي حٛورٜ مَاکٛ اٜ غٛطّٛ؞ نغَمْ کٛو مٛيٜ دٛولٜ حٛشَّ تٜدّٛرَلْ مُوطُمْ؞ فُو اٜکِّتِنَاطٛ وٛلْدٜ اَللَّه اٜ حَانِ اٛ سٜنْدِدَ فُو فِي بٛطُّمْ طُمْ اٛ وٛودِ اٜ اٜکِّتِنْطٛمٛ؞ تٛع اٛنْ مَجِّنْ کٛعٜ مٛوطٛنْ، اَللَّه پٛيْرَتَاکٜ؞ فُو کٛ نٜطّٛ اَاوِ، کَنْجُمْ اِتَّتَ؞ اَاوُطٛ وَطُکِ کٛ ٻَنْدُ مُوطُمْ يِطِ، دَغَ ندٜرْ وَطُکِ کٛ ٻَنْدُ مَاکٛ يِطِ، اٛ فٛوطَنَيْ حٛورٜ مَاکٛ حَلْکٜرٜ؞ اَمَّا اَاوُطٛ وَطُکِ کٛ رُوحُ اَللَّه يِطِ، دَغَ ندٜرْ وَطُکِ کٛ رُوحُ طُمْ يِطِ اٛ حٜٻَيْ يٛنْکِ کِ رٜعَتَا؞ تٛع اٜنْ شٛمُ وَطُکِ کٛ وٛوطِ، نغَمْ تٛ شَرٜلْ وَطِي اٜنْ کٜٻَيْ بَرْکَ، تٛ اٜنْ اَلَايِ وَطُکِ کٛ وٛوطِ؞ نغَمْ مَاجُمْ فُو شَرٜلْ نغٜلْ کٜٻْطٜنْ، اٜنْ نغَطَنْ کٛو مٛيٜ کٛ وٛوطِ، کٛ ٻُرِ مَا وٛنِ ٻٜنْ طٛنْ تٛکُّٻٜ يٜىٰسُ بَنْدِرَاٻٜ مٜىٰطٜنْ؞ ندَارٜىٰ اِرِ بِنْدِ مَوْطِ طِ مبِنْدٛنٛيْمِعٛنْ اٜ جُنْغٛ اَمْ؞ ٻٜنْ طٛنْ يِمْٻٜ مَوْنِنٛوٻٜ کٛعٜ مَٻّٜ نغَمْ کٛ طُمْ وَطَنِٻٜ اٜ ٻَنْدُ، کَمْٻٜ نغِطِ دٛولٜ طُمْ نَادَعٛنْ؞ اٜ ٻٜ نغَطَ نٛنْ نغَمْ تٛع ٻٜ تٛرّٜىٰ نغَمْ غَافَانغَلْ اَلْمَسِيحُ؞ نغَمْ کٛو ٻٜنْ طٛنْ نَادَاٻٜ مَا ٻٜ تٛکَّتَا کٛ اَتَّوْرَ وِعِ، اَمَّا فُو اٜ نٛنْ اٜ ٻٜ نغِطِ طُمْ نَادَعٛنْ ٻٜ مَوْنِنَ حٛورٜ نغَمْ ٻٜ نغَطِي طُمْ نَادِيعٛنْ؞ اَمَّا مِنْ، کٛو سٜطَّ مِ مَوْنِنْتَا حٛورٜ اَمْ سٜيْ نِ دٛوْ غَافَانغَلْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ بَرْکَ مَيْدٜ مَاکٛ دٛوْ غَافَانغَلْ، کٛ وٛنِ ندٜرْ دُونِيَارُ وَرْتِي مٜىٰرٜ تٛ اَمْ، مِنْ مَا مِ وَرْتِي مٜىٰرٜ تٛ مَيْرُ؞ نغَمْ وَلَا فٜىٰرٛوتِرٛلْ حَکُّندٜ نَادَاطٛ اٜ مٛ نَادَاکَ؞ کٛ ٻُرِ وٛنِ اَللَّه وَرْتِرَ نٜطّٛ کٜسٛ؞ جَمْ اَللَّه اٜ يُرْمٜىٰندٜ مَاکٛ تَبِّتَ تٛ ٻٜنْ طٛنْ تٛکّٛوٻٜ اٜکِّتِنٛلْ نغٛعٛلْ، وَاتٛ يِمْٻٜ اَللَّه ٻٜ غٛونغَ؞ مِ يٛتِّنَيْ اٜ وِيکِ، تٛع غٛطّٛ ٻٜيْدَ وَنُّکِيَمْ، نغَمْ تَبٛوجٜ طٜ نغٛودُمِ اٜ ٻَنْدُ کٛلِّي مِ مَشُّطٛ يٜىٰسُ؞ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ اٛنْ فُو بَنْدِرَاٻٜ اَمْ؞ اَامِنْ؞ مِنْ بُلُسْ مٛ اَللَّه سُٻِ مِ وَرْتَ لِلَاطٛ يٜىٰسُ اَلْمَسِيحُ، وِنْدِ طٜرٜوٛلْ نغٛعٛلْ؞ مِ وِنْدَنْ يِمْٻٜ اَللَّه غٛنْٻٜ ندٜرْ غَرِيرِ اَافِسَ کٛولِيٻٜ يٜىٰسُ اَلْمَسِيحُ اٜ ٻٜرْندٜ غٛعٛ؞ اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ بَرْکِطِنَعٛنْ، حٛکَّعٛنْ جَمْ؞ يٜتّٛورٜ تَبِّتَ تٛ اَللَّه ݧَاکٛ يٜىٰسُ اَلْمَسِيحُ جٛومِرَاوٛ مٜىٰطٜنْ؞ ندٜرْ سُمْڤٛوتِرْکِ اٜ اَلْمَسِيحُ اٛ حٛکِّيعٜنْ کٛو اِرِ طُمٜ بَرْکَ دَغَ دٛوْ؞ کٛ دُونِيَارُ تَغٜىٰ، اَللَّه سُٻِيعٜنْ نغَرْتٜنْ ٻٜ مَاکٛ بَرْکَ يٜىٰسُ، نغَمْ نغَرْتٜنْ شٜنِيٻٜ ٻٜ نغَلَا تٛٻّٜلْ حَکّٜ يٜىٰسٛ مَاکٛ؞ اٛ دَرْوِي ندٜرْ يِدّٜ نغَرْتٜنْ ٻِٻّٜ مَاکٛ بَرْکَ يٜىٰسُ اَلْمَسِيحُ، نغَمْ کَنْجُمْ وٛنِ کٛ اٛ يِطَنِعٜنْ؞ نٛنْ وٜلَنِيمٛ؞ اٜنْ مَنْتُ اَللَّه نغَمْ اٛ يِطِيعٜنْ يِدّٜ مَوْندٜ، نغَمْ شَاحُ طُمْ اٛ حٛکِّعٜنْ بَرْکَ ٻِطّٛ مَاکٛ مٛ اٛ يِطِ؞ ندٜرْ فَامُ مَاکٛ اٜ اَنْدَلْ مَاکٛ، اٛ حٛلِّيعٜنْ سِرُّ کٛ اٛ يِطِ اٛ وَطَ بَرْکَ اَلْمَسِيحُ؞ فِي طُعُمْ طُمْ اَللَّه يِطِ وَطُکِ اٛ وَطَيْطُمْ تٛ شَرٜلْ وَطِي؞ کٛ اٛ يِطِ وَطُکِ کَنْجُمْ وٛنِ اٛ حَوْتَ کٛو طُمٜ کٛ وٛنِ اٜ لٜيْ اٜ کٛ وٛنِ اٜ دٛوْ وَرْتَ لٜيْ لَامُ اَلْمَسِيحُ؞ اَللَّه سُٻِيعٜنْ وَرْتِرِيعٜنْ يِمْٻٜ مَاکٛ بَرْکَ يٜىٰسُ اَلْمَسِيحُ؞ کٛ دُونِيَارُ تَغٜىٰ اٛ سِرْيِي فِي طُعُمْ، نغَمْ کَنْکٛ وٛنِ غَطٛووٛ فُو کٛ يِطِ نٛنْ نٛ اٛ يِطِ؞ اٛ وَطُ نٛنْ نغَمْ اٜنٜنْ، اَرْتُٻٜ نغَطِ ٻٜرْطٜ دٛوْ اَلْمَسِيحُ، نغَطٜنْ جٛنْدٜ مَنْتُکِ تٜدُّنغَلْ اَللَّه؞ اٛنٛنْ مَا، اٛنْ نغَرْتِي يِمْٻٜ اَللَّه شَرٜلْ کٛ نَنْطٛنْ وٛلْدٜ غٛونغَ، وَاتٛ حَبَرُ بٜلْطُمْ دٛوْ يٜىٰسُ غَدَّنْطُمْعٛنْ کِسْندَمْ؞ اٛنْ کٛولَکٜمٛ، اَللَّه بٛو حٛکِّيعٛنْ رُوحُ مُوطُمْ طُمْ اٛ وَطَنِعٛنْ اَلْکَوَلْ؞ رُوحُ طُمْ حٛلِّي اٛنْ نغَرْتِي ٻٜ مَاکٛ؞ ندٜ اٜنْ نغٛودِ رُوحُ اَللَّه، اٜنْ تَبِّتِنِي اٜنْ کٜٻَيْ کٛو طُمٜ بٛطُّمْ طُمْ اَللَّه وَطَنِعٜنْ اَلْکَوَلْ؞ ندٜنْ طُمْ رِمْطِنَيْعٜنْ نغَمْ طُمْ مَنْتَ مَنْغُ اَللَّه؞ نغَمْ مَاجُمْ، دَغَ شَرٜلْ نغٜلْ نَنُمِ حَبَرُ نٛ کٛولٛرِيطٛنْ جٛومِرَاوٛ مٜىٰطٜنْ يٜىٰسُ اٜ نٛ نغِرُّطٛنْ يِمْٻٜ اَللَّه، مِ اَلَايِ يٜتُّکِ اَللَّه نغَمْ مٛوطٛنْ، اٜ مِ وَطَنَعٛنْ دٛعَارٜ کٛو ندٜيٜ؞ اٜ مِ تٛرٛو اَللَّه مٛ يٜىٰسُ اَلْمَسِيحُ جٛومِرَاوٛ مٜىٰطٜنْ، ݧَاکٛ مٛ مَنْغُ، حٛکَّعٛنْ رُوحُ مُوطُمْ ڤَمْتِنَيْطُمْعٛنْ ٻٜيْدَنَعٛنْ اَنْدَلْ اَللَّه، نغَمْ اَنْدٛنْمٛ بٛطُّمْ؞ اٜ مِ وَطَ دٛعَارٜ کَدِنْ اَللَّه مَٻِّتَ ٻٜرْطٜ مٛوطٛنْ نغَمْ اَنْدٛنْ کَمُّندٜ ندٜ اٛ نٛدِّرِعٛنْ اٜ بَرْکَ مَوْطُمْ طُمْ اٛ وَطَنِ يِمْٻٜ مَاکٛ اَلْکَوَلْ؞ طٛنْمَا، اٜ مِ وَطَ دٛعَارٜ اَنْدٛنْ نٛ بَوْطٜ مَاکٛ مَوْطٜ کُوِرْتَ ندٜرْ مٜىٰطٜنْ، اٜنٜنْ تٛکُّٻٜ يٜىٰسُ؞ بَوْطٜ طٜنْ طٜ غٛعٛ اٜ بَوْطٜ شٜمْبِطّٜ طٜ اَللَّه حُوتِرِ شَرٜلْ کٛ اٛ اُمِّنِ اَلْمَسِيحُ دَغَ مَيْدٜ اٛ جٛوطِنِمٛ دٛوْ جٛوطٛرْغَلْ لَامُ تٛ جُنْغٛ مَاکٛ ݧَامٛ تٛنْ دٛوْ؞ تٛنْ يٜىٰسُ لَامِي دٛوْ کٛو مٛيٜ لَامِيطٛ، اٜ لَامُ، اٜ بَوْطٜ، اٜ اَرْدِيطٛ، اٜ کٛو اِرِ طُمٜ لَامُ غٛنْطُمْ دٛوْ اٜ لٜيْ، نَاع جٛونِ تَنْ، اَمَّا حَا اَبَدَا؞ اَللَّه وَطِي کٛو طُمٜ لٜيْ لَامُ مَاکٛ؞ اٛ وَرْتِرِيمٛ اَرْدِيطٛ کٛو طُمٜ اٜ اَرْدِيطٛ کَوْتَلْ تٛکُّٻٜمٛ؞ کَوْتَلْ تٛکُّٻٜ يٜىٰسُ نغٛنِ بٛ ٻَنْدُ مَاکٛ؞ کَنْکٛ بٛو وٛنِ کٜبِّنْطٛ کٛو طُمٜ، اٜ مٛ ندٜرْ مَٻّٜ کٛو تٛيٜ؞ ندٜنّٛ اٛنْ نَنْدِي اٜ يِمْٻٜ مَيْٻٜ، نغَمْ حَکّٜىٰجِ مٛوطٛنْ اٜ وَݧُکِ کٛ اَللَّه وِعِ؞ اٜ شَرٜلْ نغٜلْ اٛنْ تٛکَّ طَتٜ دُونِيَارُ کَلُّطٜ؛ اٛنْ تٛکَّ شٜيْطَنْ لَامِيطٛ غِنِّ؞ کَنْکٛ وٛنِ تٛکِّنٛووٛ ٻٜرْطٜ غَݧُٻٜ تٛکَّ کٛ اَللَّه وِعِ؞ غٛونغَ، نٛنْ نغِکُّ مٜىٰطٜنْ وَعُنٛو: اٜنْ نغَطَ کٛ نغِطّٜنْ، اٜنْ تٛکَّ کٛ ٻَلِّ مٜىٰطٜنْ اٜ ٻٜرْطٜ مٜىٰطٜنْ نغِطِ؞ اٜنْ دَݧِرَامَ نغِکُّ کَلُّطُمْ بٛ حٛرِيٻٜ ندٜرْ دُونِيَارُ، مٛنّٜرٜ اَللَّه بٛو اٜ دٛوْ مٜىٰطٜنْ؞ اَمَّا اَللَّه اٛ کٜوْطٛ يُرْمٜىٰندٜ؞ يِدّٜ ندٜ اٛ يِطِعٜنْ ندٜ مَوْندٜ؞ کٛو ندٜ اٜنْ نَنْدِ اٜ مَيْٻٜ نغَمْ حَکّٜ مٜىٰطٜنْ، اٛ حٛکِّيعٜنْ يٛنْکِ ندٜرْ اَلْمَسِيحُ؞ يِدّٜ مَاکٛ وَطِ کِسُطٜنْ؞ اٛ اُمِّدِنِيعٜنْ اٜ يٜىٰسُ اَلْمَسِيحُ دَغَ مَيْدٜ، اٛ جٛوطِدِنِعٜنْ اٜ مَاکٛ تٛنْ دٛوْ؞ اَللَّه وَطِي طُعُمْ نغَمْ اٜ جَامَنُوجِ غَرَيْطِ اٛ حٛلَّ يِدّٜ مَاکٛ ندٜ وَلَا کٜىٰرٛلْ نغَمْ کٛ يٜىٰسُ اَلْمَسِيحُ وَطِ؞ اٛنْ کِسِي نغَمْ يِدّٜ اَللَّه بَرْکَ حٛولَاکِ يٜىٰسُ؞ نَاع اٛنْ کِسُ نغَمْ غٛطُّمْ طُمْ نغَطّٛنْ، اَمَّا طُمْ شَاحُ اَللَّه، نَاع نغَمْ کُوطٜ مٛوطٛنْ، نغَمْ تٛع غٛطّٛ مَوْنِنَ حٛورٜ مُوطُمْ؞ اَللَّه وَرْتِرِيعٜنْ کٛ نغٛنْطٜنْ جٛونِ، بَرْکَ يٜىٰسُ اَلْمَسِيحُ اٛ تَغِتَکٜعٜنْ نغَمْ کُوٜنْ کُوطٜ بٛطّٜ طٜ اٛ يِطِ نغَطٜنْ دَغَ اَرَنْدٜ؞ نغَمْ مَاجُمْ، شِفْتٛرٜىٰ نٛ مبَانٛوطٛنْ؞ اٛنٛنْ نَاع اٛنْ يَحُودَنْکٛعٜنْ دَغَ دَݧْنغٛلْ، کَمْٻٜ نٛدِّرٛوٻٜ کٛعٜ مَٻّٜ «نَادَاٻٜ،» اٜ ٻٜ نٛدِّرَعٛنْ «ٻٜ نَادَاکَ؞» رَا بٛو نَادُکِ کِنْ طُمْ کِ ٻَنْدُ تَنْ، کِ طُمْ وَارَتَ جُوطٜ؞ شِفْتٛرٜىٰ اٜ نغٜلْ تٛنْ شَرٜلْ اٛنْ اَنْدَانٛ اَلْمَسِيحُ، اٛنْ نغَلَا ندٜرْ يِمْٻٜ ٻٜ اَللَّه سُٻِ، اٛنْ نغَلَا ندٜرْ اَلْکَوَلْ نغَلْ اَللَّه وَطِ، اٛنْ نغَلَا کَمُّندٜ، اٛنْ نغَلَا اَللَّه ندٜرْ دُونِيَارُ؞ اَمَّا جٛونِ اٛنٛنْ غٛطِّتِيٻٜ اَللَّه ندٜنّٛ، بَرْکَ پِيپَمْ يٜىٰسُ اَلْمَسِيحُ اٛنْ نغَدَّامَ حَادٜ مَاکٛ؞ يٜىٰسُ سِرْيٛوتِرِي حَکُّندٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، اٛ وَرْتِرِيٻٜ غٛعٛ؞ اٛ اِتِّي نغَݧَاندِ شٜنْدُندِٻٜ؞ مَيْدٜ مَاکٛ اِتِّي سٜمْبٜ اَتَّوْرَ اٜ دٛوکَاجِ يَحُودَنْکٛعٜنْ، نغَمْ ندٜرْ لٜݧِ طِطِ اٛ وُرْتِنَنَ حٛورٜ مَاکٛ لٜݧٛلْ غٛعٛ کٜسٛلْ؞ ندٜ اٛ وَطِ نٛنْ اٛ سِرْيٛوتِرِي لٜݧِ طِنْ؞ بَرْکَ مَيْدٜ مَاکٛ دٛوْ غَافَانغَلْ، اٛ اِتِّي نغَݧَاندِ نغٛنْدِ حَکُّندٜ مَاجِ؞ مَيْدٜ مَاکٛ حَوْتِي کٛعٜ لٜݧِ طِنْ نغَرْتِي غٛعٛ؞ اٛ سٛعِّيطِ تٛ اَللَّه؞ يٜىٰسُ وَرِي وَعَجِنَنِيعٛنْ حَبَرُ بٜلْطُمْ طُمْ جَمْ، اٛنٛنْ يِمْٻٜ نَاع يَحُودَنْکٛعٜنْ غٛطِّتِيٻٜ اَللَّه اٜ يَحُودَنْکٛعٜنْ غٛنْٻٜ حَادٜ مَاکٛ؞ جٛونِ، بَرْکَ اَلْمَسِيحُ اٜنْ فُو، يَحُودَنْکٛعٜنْ اٜ نَاع يَحُودَنْکٛعٜنْ، اٜنْ مبَاوَيْ نجَحٜنْ تٛ ݧَاکٛ مٜىٰطٜنْ مٛ دٛوْ ندٜرْ لَاوٛلْ غٛعٛ، وَاتٛ رُوحُ اَللَّه؞ نغَمْ مَاجُمْ، اٛنٛنْ يِمْٻٜ نَاع يَحُودَنْکٛعٜنْ، نَاع اٛنْ حٛٻّٜ کٛو غَرْٻٜ؞ جٛونِ اٛنْ ندٜرْ لٜݧٛلْ يِمْٻٜ اَللَّه اٜ اِيَالُ مَاکٛ؞ اٛنْ مَحَامَ دٛوْ فُطّٛودٜ مَادِ ندِ لِلَاٻٜ اٜ اَنَّبٛعٜنْ مَحِ، ندٜنْ يٜىٰسُ اَلْمَسِيحُ اٜ حٛورٜ مُوطُمْ وٛنِ حَيْرٜ دَرْنُندٜ مَادِ ندِنْ؞ کَنْکٛ جٛغِي مَادِ ندِنْ اٛ مَوْنِنِندِ ندِ وَرْتِ وُرٛ شٜنِينغٛ نغٛ جٛومِرَاوٛ؞ ندٜرْ سُمْڤٛ مٛوطٛنْ اٜ مَاکٛ، اٛنٛنْ مَا اٛنْ مَحِدَامَ اٜ فُو تٛکُّٻٜ يٜىٰسُ نغَمْ نغَرْتٛنْ وِغٜىٰرٜ تٛ رُوحُ اَللَّه جٛوطٛتٛو؞ کَنْجُمْ وَطِ مِنْ، بُلُسْ، طُمْ مَٻِّيَمْ ندٜرْ سُودُ شُرَلْ نغَمْ اٜ مِ وَعَجِنَ حَبَرُ يٜىٰسُ اَلْمَسِيحُ تٛ اٛنٛنْ يِمْٻٜ نَاع يَحُودَنْکٛعٜنْ؞ غٛونغَ اٛنْ نَنِي اَللَّه حٛکِّييَمْ کُوغَلْ نغَعَلْ مِ حُوَنغَلْ نغَمْ ٻٜيْدَارِ مٛوطٛنْ؞ اَللَّه حٛلِّييَمْ سِرُّ مُوطُمْ، نٛنْ نٛ مبِنْدِرْمِ سٜطَّ ندٜرْ مَاجُمْ؞ تٛ اٛنْ جَنْغِي کٛ مبِنْدُمِ، اٛنْ اَنْدَيْ اٜ مِ وٛودِ فَامُ دٛوْ سِرُّ اَلْمَسِيحُ؞ ندٜنّٛ يِمْٻٜ مبِعَاکَ سِرُّ طُعُمْ، اَمَّا جٛونِ اَللَّه وَنْغِنَنِيطُمْ لِلَاٻٜ مَاکٛ اٜ اَنَّبٛعٜنْ مَاکٛ شٜنِيٻٜ بَرْکَ رُوحُ مَاکٛ؞ سِرُّ طُمْ وٛنِ بَرْکَ حَبَرُ بٜلْطُمْ دٛوْ يٜىٰسُ اَلْمَسِيحُ يِمْٻٜ نَاع يَحُودَنْکٛعٜنْ کٜٻَيْ کٛو طُمٜ کٛ اَللَّه حٛکَّتَ يَحُودَنْکٛعٜنْ؞ ٻٜ نغَرْتِي بٛ ٻَنْدُ غٛعٛ اٜ يَحُودَنْکٛعٜنْ؞ حَوْتِ اٜ يَحُودَنْکٛعٜنْ ٻٜ کٜٻَيْ کٛ اَللَّه وَطِ اَلْکَوَلْ بَرْکَ يٜىٰسُ اَلْمَسِيحُ؞ بَرْکَ يِدّٜ اٜ بَوْطٜ اَللَّه، مِ حٛکَّامَ دٛکَّلْ حٛکُّکِ حَبَرُ بٜلْطُمْ دٛوْ يٜىٰسُ؞ کٛو ندٜ مِ ڤَمَرٛ ندٜرْ يِمْٻٜ اَللَّه فُو، اَللَّه سُٻِييَمْ مِ وَعَجِنَنَ يِمْٻٜ نَاع يَحُودَنْکٛعٜنْ دٛوْ بَرْکَ طُمْ لِمَتَاکٛ کٜٻٜتٜىٰطُمْ تٛ اَلْمَسِيحُ؞ ندٜنْ مِ وَطَ يِمْٻٜ فُو نغِعَ نٛ دَبَرٜ اَللَّه شُوطِيندٜ حٜىٰوِرْتَ؞ اَللَّه تَغُطٛ کٛو طُمٜ سُوطِي سِرُّ طُمْ دَغَ جَامَنُوجِ پَٻِّيطِ؞ اٛ وَطُ نٛنْ نغَمْ ندٜرْ جَامَنُ طُعُمْ، بَرْکَ کَوْتَلْ تٛکُّٻٜ يٜىٰسُ، مَلَاعِکَعٜنْ غٛودُٻٜ لَامُ اٜ بَوْطٜ دٛوْ، ٻٜ اَنْدَ دَبَرٜ اَللَّه مَوْندٜ؞ طُعُمْ طُمْ وَطَامَ نٛنْ نٛ اَللَّه يِطِ وَطِرْکِطُمْ دَغَ اَرَنْدٜ، اٛ حٜبِّنِيطُمْ بَرْکَ کٛ يٜىٰسُ اَلْمَسِيحُ جٛومِرَاوٛ مٜىٰطٜنْ وَطِ؞ بَرْکَ يٜىٰسُ اٜ حٛولَاکِ کِ کٛولِيطٜنْمٛ، جٛونِ اٜنْ مبَاوِ يَاکِ يٜىٰسٛ اَللَّه کُلٛلْ وَلَا، اٜنْ تَبِّتِنَ اٛ جَٻَيْعٜنْ؞ نغَمْ نٛنْ، اٜ مِ تٛرٛوعٛنْ، تٛع اٛنْ نغٜوْرُ دٛوْ تٛرَّ کَ نجَرَيْمِ نغَمْ مٛوطٛنْ، نغَمْ تٛرَّ کَنْ وَرْتَنَيْعٛنْ فِي بٛطُّمْ؞ نغَمْ مَاجُمْ، اٜ مِ دِشّٛو اٜ مِ تٛرٛو ݧَاکٛ مٛ دٛوْ؞ فُو لٜݧِ غٛنْطِ دٛوْ اٜ لٜيْ، کَنْکٛ حٛکِّطِ يٛنْکِ؞ اٜ مِ تٛرٛومٛ دَغَ ندٜرْ رِسْکُ مَنْغُ مَاکٛ اٛ سٜمْبِطِنَعٛنْ، اٛ حٛکَّعٛنْ بَوْطٜ لَاوٛلْ رُوحُ مَاکٛ نغَرْتٛنْ شٜمْبِطْٻٜ ندٜرْ ٻٜرْطٜ مٛوطٛنْ، نغَمْ اَلْمَسِيحُ جٛوطٛو ندٜرْ ٻٜرْطٜ مٛوطٛنْ بَرْکَ حٛولَاکِمٛ؞ اٜ مِ تٛرٛو اَللَّه نغَمْ يِدّٜ لُغَّ سٜمْبِطَ ندٜرْ ٻٜرْطٜ مٛوطٛنْ، نغَمْ يِمْٻٜ اَللَّه فُو مبَاوَ اَنْدُکِ نٛ يِدّٜ اَلْمَسِيحُ يَاجِرِ، اٜ نٛ ندٜ جُوتِرِ، اٜ نٛ ندٜ تٛوِرِ، اٜ نٛ ندٜ لُغِّرِ؞ کَدِنْ اٜ مِ يِطِ اَنْدٛنْ يِدّٜ اَلْمَسِيحُ ندٜ ٻُرِي سٜمْبٜ اَنْدَلْ، نغَمْ کٜٻٛنْ کٜىٰوٛنْ نغِکُّ اَللَّه؞ اَللَّه وَاوَيْ وَطُکِ کٛ ٻُرِ کٛ تٛرِيطٜنْمٛ کٛو کٛ ݧُمٜتٜنْ بَرْکَ بَوْطٜ مَاکٛ کُوٛوجٜ ندٜرْ مٜىٰطٜنْ؞ مَنْغُ تَبِّتَ تٛ اَللَّه بَرْکَ يٜىٰسُ اَلْمَسِيحُ اٜ تٛکُّٻٜمٛ ندٜرْ جَامَنُوجِ فُو حَا اَبَدَا اَبَدِنْ! اَامِنْ؞ نغَمْ نٛنْ، اٜ مِ تٛرٛوعٛنْ، مِنْ شُرَاطٛ نغَمْ حُوَنْکِ جٛومِرَاوٛ مٜىٰطٜنْ، نغَطٜىٰ جٛنْدٜ ڤٛتُّدُندٜ اٜ کٛ اَللَّه نٛدِّرِعٛنْ؞ کٛو ندٜيٜ نغَرْتٜىٰ غٛودُٻٜ حَکِّيلٛ، لٜسْتِنٛنْ کٛعٜ مٛوطٛنْ، نغَرْتٛنْ ٻٜ مُݧَلْ، مُݧْمُݧْتِرٛنْ ندٜرْ يِدّٜ؞ نغَطٜىٰ کٛ مبَاوٛتٛنْ وَطُکِ نجٛغٛوطٛنْ کَوْتٛلْ حٛورٜ نغٛلْ رُوحُ اَللَّه حٛکِّعٛنْ ندٜرْ جٛنْدٜ جَمْ کَوْتُندٜ کٛعٜ مٛوطٛنْ؞ اٜنْ نغَرْتِي بٛ ٻَنْدُ غٛعٛ، اٜنْ نغٛودِ رُوحُ غٛعٛ، نٛنْ مَا اٜنْ نغٛودِ کَمُّندٜ وٛعٛيْرٜ ندٜ اَللَّه نٛدِّرِعٜنْ؞ اٜ وٛودِ جٛومِرَاوٛ غٛعٛتٛ، اٜنْ کٛولِي يٜىٰسُ اَلْمَسِيحُ اٜ حٛولَارٜ وٛعٛيْرٜ، اٜ وٛودِ بَڤْتِسْمَ غٛعٛ؞ اَللَّه اٛ غٛعٛتٛ، ندٜنْ کَنْکٛ وٛنِ ݧَاکٛ مٜىٰطٜنْ اٜنْ فُو، اٜ مٛ لَامٛو کٛو مٛيٜ، اٜ مٛ حُوتِرَعٜنْ، اٜ مٛ جٛوطٛو ندٜرْ مٜىٰطٜنْ؞ طُمْ حٛکِّي کٛو مٛيٜ مٜىٰطٜنْ دٛکَّلْ نٛنْ نٛ اَلْمَسِيحُ سُٻِرِ؞ نٛ اَايَارٜ وِعِ، «ندٜ اٛ يَحِ وِغٜىٰرٜ تٛوْندٜ، اٛ يَارِي ٻٜ اٛ نَنْغِ، اٛ حٛکِّي يِمْٻٜ دٛکّٜ؞» کٛ وٛنِ مَعَنَ اٛ يَحِ وِغٜىٰرٜ تٛوْندٜ؟ مَعَنَ مَاجُمْ وٛنِ، اَرَنْدٜ اَلْمَسِيحُ وَرِي ندٜرْ دُونِيَارُ ندُعُ؞ کَنْکٛ غَرْطٛ ندٜرْ دُونِيَارُ ندُعُ، کَنْکٛ اٛنْ وٛنِ پٜنْتُطٛ تٛنْ دٛوْ تٛ ٻُرِ کٛو تٛيٜ نغَمْ اٛ حٜبِّنَ کٛو طُمٜ؞ اٛ سُٻِي وٛٻّٜ نغَرْتَ لِلَاٻٜ، وٛٻّٜ غَطٛوٻٜ اَنَّبَاکُ، وٛٻّٜ وَعَجِنٛوٻٜ، وٛٻّٜ ڤَسْتٛعٜنْ اٜ اٜکِّتِنٛوٻٜ؞ اٛ وَطُ نٛنْ نغَمْ اٛ سِرْيٛو يِمْٻٜ مَاکٛ نغَمْ ٻٜ کُوَ کُوغَلْ مَاکٛ، نغَمْ تٛکُّٻٜمٛ مَوْنَ، شٜمْبِطَ ندٜرْ تٛکُّکِمٛ؞ طُمْ وَطَيْ نٛنْ حَا نغَرْتٜنْ غٛعٛ ندٜرْ حٛولَاکِ يٜىٰسُ اٜ ندٜرْ اَنْدَلْ ٻِطّٛ اَللَّه، مَوْنٜنْ ندٜرْ تٛکُّکِ يٜىٰسُ، نغَرْتٜنْ يِمْٻٜ کٜىٰوُٻٜ بٛ اَلْمَسِيحُ؞ ندٜنْ اٜنْ ڤُطِّتَتَا نغَطٜنْ جٛنْدٜ بٛ سُکَحٛيْ، اٜنْ نغَيْلِتَ ٻٜرْطٜ مٜىٰطٜنْ دٛوْ کٛ کٛولِيطٜنْ نغَمْ مَجِّنٛوٻٜ يِمْٻٜ پٛيْرِيعٜنْ اٜ اٜکِّتِنٛلْ فٜوْرٜ؞ اَمَّا اٜنْ مبِعُ غٛونغَ ندٜرْ يِدّٜ، اٜنْ مَوْنُ اٜ کٛو نغٛلٜ لَاوٛلْ نغَرْتٜنْ بٛ اَلْمَسِيحُ؞ مِسَالُ، تٛکُّٻٜمٛ نغٛنِ بٛ ٻَنْدُ مَاکٛ، کَنْکٛ وٛنِ بٛ حٛورٜ مَيْرُ؞ کَنْکٛ حَوْتِ جٛکّٛوطٜ ٻَنْدُ ندُنْ؞ تٛ کٛو طُمٜ اٜ ٻَنْدُ ندُنْ اٜ حُوَ نٛ حَانِ، ٻَنْدُ ندُنْ مَوْنَيْ، سٜمْبِطَ، يِطِندِرَ؞ اٜ مِ وِعَعٛنْ طُعُمْ، اٜ مِ ٻٜيْدَ وَغِّنْکِعٛنْ ندٜرْ اِنْدٜ جٛومِرَاوٛ، اَلٜىٰ جٛنْدٜ اِرِ ندٜ حٜىٰفٜرْٻٜ ٻٜ ݧُمٛوجِ مٜىٰرٜ؞ ٻٜرْطٜ مَٻّٜ اٜ کٜىٰوِ ݧِوْرٜ؞ ٻٜ نغَلَا ندٜرْ کٜٻَيْٻٜ يٛنْکِ کِ اَللَّه حٛکَّتَ، نغَمْ ٻٜ نغَݧِي اَنْدَلْ، اٜ ٻٜ نغٛودِ کٛعٜ شَاتُطٜ؞ ٻٜ شٜمْتَتَا، ٻٜ نغَطِي کٛعٜ مَٻّٜ دٛوْ وَطُکِ کٛ ٻَلِّ مَٻّٜ نغِطِ، اٜ ٻٜ نغَطَ کٛو اِرِ طُمٜ نغِکُّ نٜفْنِيطُمْ کٜىٰرٛلْ وَلَا؞ نَاع اِرِ طُمْ طٛنْ نغِکُّ اٜکِّتِيطٛنْ ندٜ اَنْدُطٛنْ اَلْمَسِيحُ! مِ تَبِّتِنِي اٛنْ نَنِي حَبَرُ يٜىٰسُ؞ طُمْ اٜکِّتِنِيعٛنْ غٛونغَ نغٛنْکَ ندٜرْ مَاکٛ؞ اَلٜىٰ نغِکُّ طُمْ وٛوطَا طُمْ نغَطَيْنٛوطٛنْ ندٜنّٛ، طُمْ سُونٛ دُونِيَارُ وٛنِّ، مَجِّنِ؞ اٜ حَانِ ݧُمٛ مٛوطٛنْ اٜ نغِکُّ مٛوطٛنْ وَرْتِرٜىٰ کٜسُمْ؞ ڤُطّٜىٰ نغِکُّ کٜسُمْ اِرِ طُمْ اَللَّه ندٜرْ اَادِلَاکُ اٜ شٜنَاکِ؞ نغَمْ مَاجُمْ اَلٜىٰ فٜوْرٜ! کٛو مٛيٜ مٛوطٛنْ دٛولٜ وِعَ بَنْدِرَاوٛ مُوطُمْ غٛونغَ، نغَمْ اٜنْ فُو اٜنْ نغَرْتِي بٛ ٻَنْدُ غٛعٛ ندٜرْ تٛکُّکِ يٜىٰسُ؞ تَا مٛنِّي، تَاع جَٻُ مٛنّٜرٜ ندٜنْ وَطُمَا نغَطَا کٛ وٛوطَا؞ تَاع اَلُ نَانغٜ يَنَ اَ مٛنِّ؞ ندٜنْ تَاع اَلُ شٜيْطَنْ يَارُمَا تٛ نغَطَتَا کٛ وٛوطَا؞ کٛو مٛيٜ غُجّٛ دٛولٜ اَلَ نغُيْکَ؞ اَمَّا اٛ حُوتِرَ جُوطٜ مَاکٛ اٛ حُوَ کُوغَلْ بٛنْغَلْ، نغَمْ اٛ حٜٻَ غٛطُّمْ طُمْ اٛ حٛکّٛرْتَ ٻٜ نغَلَنَا؞ تٛع اٛنْ اَلُ وٛکَّ حَالَ کَلُّکَ وُرْتٛو ندٜرْ کٛنْدُطٜ مٛوطٛنْ، اَمَّا سٜيْ نِ حَالَ نجَمَ مبَلَّيْکَ يِمْٻٜ نَنَيْٻٜعٛنْ شٜمْبِطِنَ ٻٜرْطٜ مَٻّٜ؞ ڤَامٜىٰ، تٛع مٜتِّنَنٛنْ رُوحُ اَللَّه ٻٜرْندٜ، نغَمْ اَللَّه حٛکِّيعٛنْطُمْ نغَمْ حٛلَّ اٛنٛنْ طُمْ ٻٜ مَاکٛ، ندٜنْ ݧَلْندٜ جَانغٛ اٛ رِمْطِنَيْعٛنْ؞ اَلٜىٰ کٛو اِرِ ندٜيٜ مٛنّٜرٜ، اٜ مٜتِّنْکِ ٻٜرْندٜ، اٜ مٛنَّنْکِ وٛٻّٜ، اٜ حَوْرٜ، اٜ حُطْحُطْتِرْکِ، اٜ وَطُکِ کٛو اِرِ ندٜيٜ حَلّٜىٰندٜ؞ نغِطِندِرٜىٰ، نجُرْمِنِندِرٜىٰ حَکُّندٜ مٛوطٛنْ، نجَافٛوتِرٜىٰ نٛنْ نٛ اَللَّه يَافٛرَنِيعٛنْ بَرْکَ اَلْمَسِيحُ؞ ندٜ اٛنٛنْ نغٛنِ ٻِٻّٜ ٻٜ اَللَّه يِطِ، اٜکِّتٜىٰ اِرِ نغِکُّ مَاکٛ ندٜرْ جٛنْدٜ مٛوطٛنْ؞ نغَطٜىٰ جٛنْدٜ يِدّٜ، نٛنْ نٛ اَلْمَسِيحُ يِطِرِعٜنْ حٛکِّ يٛنْکِ مُوطُمْ نغَمْ مٜىٰطٜنْ؞ اٛ وَرْتِي شَکِّرِ ندِ اَللَّه نَنِ بٜلْطُمْ مَيْرِ بٛ اُرْدٜ وٜلْندٜ؞ ندٜ اٛنٛنْ اٛنْ يِمْٻٜ اَللَّه، حَانَا طُمْ اِنَّ غٛطُّمْ نغِکُّ کَلُّطُمْ ندٜرْ مٛوطٛنْ بٛ نجٜىٰنُ، کٛو سُونٛ فِي طُمْ اٛنْ نجٜيَايِ؞ نٛنْ مَا، تٛع طُمْ تَوَ حَالَ کَلُّکَ کٛو بٛلِيطٜ طٜ حَانَا اٜ شِيَ حَکِّيلٛ حَکُّندٜ مٛوطٛنْ، نغَمْ طُمْ حَانَا، اَمَّا اِغَّ نغَطٛنْ کَ يٜتُّکِ اَللَّه؞ تَبِّتِنٜىٰ طُعُمْ، غَطٛووٛ کُوطٜ کَلُّطٜ بٛ نجٜىٰنُ، کٛو غٛودُطٛ سُونٛ فِي طُمْ اٛ جٜيَايِ وَلَا غٜطَلْ ندٜرْ لَامُ اَلْمَسِيحُ اٜ لَامُ اَللَّه؞ غٛودُطٛ سُونٛ اٛ مَوْنِنٛووٛ فِي دُونِيَارُ؞ تٛع غٛطّٛ پٛيْرَعٛنْ اٜ بٛلِيطٜ مٜىٰرٜ، نغَمْ اِرِ کُوطٜ طٜعٜ وَطِي مٛنّٜرٜ اَللَّه وَرٛيْتَ دٛوْ يِمْٻٜ غَݧُٻٜ نغَطَ کٛ اٛ وِعِ؞ نغَمْ نٛنْ تٛع اٛنْ کَوْتُ کٛعٜ اٜ مَٻّٜ؞ نغَمْ ندٜنّٛ ندٜرْ ݧِوْرٜ نغٛنْطٛنْ، اَمَّا جٛونِ ندٜ اٛنْ نغَرْتِي يِمْٻٜ جٛومِرَاوٛ، اٛنْ ندٜرْ جَيْنغٛلْ؞ نغَمْ مَاجُمْ سٜيْ نغَطٛنْ جٛنْدٜ اِرِ ندٜ يِمْٻٜ غٛنْٻٜ ندٜرْ جَيْنغٛلْ؞ مِ وِعُ نٛنْ نغَمْ جَيْنغٛلْ اٜ وَطَ يِمْٻٜ نغَطَ کٛ وٛوطِ، اٜ کٛ اَللَّه يِطِ، اٜ غٛونغَ؞ نغَطٜىٰ کٛ مبَاوٛتٛنْ اٜکِّتٛوطٛنْ کٛ وٜلْنَنْتَ جٛومِرَاوٛ ٻٜرْندٜ؞ نغٛطِّتٜىٰ کُوطٜ مٜىٰرٜ طٜ ݧِوْرٜ طٜ يِمْٻٜ نغَطَتَ، اَمَّا کٛلّٜىٰ کٛ ٻٜ نغَطَتَ طُمْ وٛوطَا؞ نغَمْ اٜ طُمْ سٜمْتِنِي طُمْ مٜتَ دٛوْ کٛ ٻٜ نغَطَتَ اٜ سُوطٜ؞ اَمَّا تٛ طُمْ وَدِّي کٛو طُمٜ تٛ جَيْنغٛلْ، طُمْ اَنْدَيْ نٛ طُمْ وٛنْتِندِرِ، نغَمْ جَيْنغٛلْ اٜ حٛلَّ کٛو طُمٜ؞ کَنْجُمْ وَطِ طُمْ وِعِ، «اُمَّ، اَنْ طَانِيطٛ، اُمَّ دَغَ ندٜرْ مَيْٻٜ، ندٜنْ اَلْمَسِيحُ يٜيْنَنْتٜ؞» نغَمْ نٛنْ ڤَامٜىٰ نٛ نجٛوطٛرِيطٛنْ؞ تٛع اٛنْ نغَطُ جٛنْدٜ بٛ حَاݝَاٻٜ، اَمَّا نغَطٜىٰ جٛنْدٜ بٛ يِمْٻٜ ٻٜ اَنْدَلْ؞ فُو شَرٜلْ نغٜلْ کٜٻْطٛنْ نغَمْ وَطُکِ بٛطُّمْ، نغَطٜىٰطُمْ، نغَمْ بَلْطٜ طٜ نغٛنْطٜنْ طٜ کَلُّطٜ؞ نغَمْ مَاجُمْ، تٛع اٛنْ نغَرْتُ حَاݝَاٻٜ، اَمَّا طَٻِّتٜىٰ اَنْدٛنْ کٛ جٛومِرَاوٛ يِطِ نغَطٛنْ؞ تٛع اٛنْ نَتِّنْ کٛعٜ مٛوطٛنْ نجَرُ، نغَمْ طُمْ لَاوٛلْ لَلّٜرٜ؞ اَمَّا اَلٜىٰ رُوحُ اَللَّه حٜىٰوَعٛنْ؞ شٜمْبِطِنٜىٰ کٛو مٛيٜ ندٜرْ مٛوطٛنْ اٜ غِمِ جَبُورَ، اٜ غِمِ مَنْتُکِ جٛومِرَاوٛ، اٜ غِمِ طِ اَللَّه حٛکِّعٛنْ ندٜرْ ٻٜرْطٜ؞ نغِمٜىٰ غِمِ مَنْتٛنْ اَللَّه اٜ ٻٜرْطٜ مٛوطٛنْ فُو؞ کٛو ندٜيٜ نغٜتّٜىٰ اَللَّه ݧَاکٛ مٜىٰطٜنْ مٛ دٛوْ نغَمْ کٛو طُمٜ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ؞ کٛکِّندِرٜىٰ مَنْغُ نغَمْ مَوْنِنْکِ اَلْمَسِيحُ؞ اٛنٛنْ رٜوْٻٜ تٜىٰغَلْ، کٛکّٜىٰ وٛرْٻٜ مٛوطٛنْ مَنْغُ نٛنْ نٛ مَوْنِنِرْتٛنْ جٛومِرَاوٛ؞ نغَمْ غٛرْکٛ وٛنِ اَرْدِيطٛ دٜبّٛ مُوطُمْ نٛنْ نٛ اَلْمَسِيحُ وٛنِ اَرْدِيطٛ تٛکُّٻٜمٛ؞ کَنْکٛ اٜ حٛورٜ مَاکٛ وٛنِ کِسْنٛووٛٻٜ؞ نٛنْ نٛ کَوْتَلْ تٛکُّٻٜ يٜىٰسُ مَوْنِنِرْتَمٛ، نٛنْ مَا رٜوْٻٜ غٛودُٻٜ تٜىٰغَلْ مَوْنِنَ وٛرْٻٜ مَٻّٜ ندٜرْ کٛو طُمٜ؞ اٛنٛنْ وٛرْٻٜ، نغِطٜىٰ رٜوْٻٜ مٛوطٛنْ نٛ اَلْمَسِيحُ يِطِرِ کَوْتَلْ تٛکُّٻٜمٛ حٛکِّ يٛنْکِ مُوطُمْ نغَمْ مَٻّٜ؞ اٛ وَطُ نٛنْ نغَمْ اٛ وَرْتِرَ تٛکُّٻٜمٛ شٜنِيٻٜ بَرْکَ بَوْطٜ وٛلْدٜ مَاکٛ، اٛ لٛوتِرِيٻٜ ندِيَمْ نغَمْ اٛ وَرْتِرَٻٜ لَاٻُٻٜ؞ اَلْمَسِيحُ وَطِي طُعُمْ نغَمْ اٛ حٛشَّنَ حٛورٜ مَاکٛ تٛکُّٻٜمٛ ٻٜ نغَرْتَ لَٻّٜ، ٻٜ نغَلَا کٛو غٛطُّمْ نٜفْنِيطُمْ، کٛو غٛطُّمْ طُمْ وٛوطَا يِيکِ؞ کَدِنْ ٻٜ نغَرْتَ شٜنِيٻٜ ٻٜ نغَلَا غٛطُّمْ طُمْ وٛوطَا؞ نٛنْ حَانِ وٛرْٻٜ نغِطِرَ رٜوْٻٜ مَٻّٜ بٛ ٻَلِّ مَٻّٜ؞ غِطّٛ دٜبّٛ مُوطُمْ فُو يِطِي حٛورٜ مُوطُمْ؞ نغَمْ وَلَا نٜطّٛ مٜىٰطُطٛ وَݧَ ٻَنْدُ مُوطُمْ؞ سٜيْ نِ اٛ فَامَنَنْدُ، اٛ يِطَندُ نٛ يٜىٰسُ اَلْمَسِيحُ وَطَنْتَ کَوْتَلْ تٛکُّٻٜمٛ؞ نغَمْ اٜنٜنْ تٛکُّٻٜمٛ نغٛنِ بٛ ٻَنْدُ مَاکٛ؞ نٛ اَايَارٜ وِعِ، «نغَمْ مَاجُمْ سٜيْ نٜطّٛ اَلَ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، ٻٜ فُو طِطٛ ٻٜ نغَرْتَ ٻَنْدُ غٛعٛ؞» اٜ وٛودِ سِرُّ لُغُّطُمْ مَوْطُمْ ندٜرْ اَايَارٜ ندٜعٜ؞ مِ فَامِي اٜ طُمْ مٜتَ دٛوْ اَلْمَسِيحُ اٜ کَوْتَلْ تٛکُّٻٜمٛ؞ فُو اٜ نٛنْ، کٛو مٛيٜ ندٜرْ مٛوطٛنْ يِطَ دٜبّٛ مُوطُمْ نٛ يِطِرِ حٛورٜ مُوطُمْ، ندٜنْ کٛو مٛيٜ دٜبّٛ حٛکَّ غٛرْکٛ مُوطُمْ مَنْغُ؞ اٛنٛنْ سُکَاٻٜ، ندٜ اٛنْ تٛکُّٻٜ يٜىٰسُ، کٛکّٜىٰ دَݧٛوٻٜ مٛوطٛنْ مَنْغُ، نغَمْ نٛنْ اٜ وٛوطِ؞ «حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞» ندٜرْ کٛ اَللَّه وِعِ طُمْ وَطَ، کَنْجُمْ وٛنِ اَرَنْدٜجُمْ غٛودُطُمْ اَلْکَوَلْ؞ اَلْکَوَلْ نغَلْ وٛنِ، «اَ جٛوطٛتٛ جَمْ، نٜىٰٻَا اٜ دُونِيَارُ؞» اٛنٛنْ دَݧٛوٻٜ، تٛع اٛنْ نغَطُ ٻِٻّٜ مٛوطٛنْ مٛنَّ، اَمَّا اٜکِّتِنٜىٰٻٜ نغِکُّ بٛطُّمْ ٻٜ مَوْنَ ندٜرْ لَاوٛلْ جٛومِرَاوٛ؞ اٛنٛنْ مَشُّٻٜ، نغَطَنٜىٰ جٜيْٻٜعٛنْ غٛنْٻٜ ندٜرْ دُونِيَارُ ندُعُ کٛ ٻٜ مبِعِعٛنْ ندٜرْ مَنْغُ؞ نغَطٜىٰطُمْ اٜ ٻٜرْندٜ غٛعٛ بٛ اَلْمَسِيحُ نغَطَنْتٛنْ؞ نغَطَنٜىٰٻٜ نٛنْ نَاع اٜ شَرٜلْ نغٜلْ ٻٜ نغِعَتَعٛنْ تَنْ، کٛو بٛو نغَمْ ٻٜ ٻٜيْدَ يِطُکِعٛنْ؞ اَمَّا اٜ ٻٜرْندٜ غٛعٛ نغَطٜىٰ کٛ اَللَّه يِطِ بٛ مَشُّٻٜ اَلْمَسِيحُ؞ کُوَنٜىٰ جٜيْٻٜعٛنْ ندٜرْ ٻٜرْندٜ بٜلْندٜ بٛ جٛومِرَاوٛ کُوَنْتٛنْ، نَاع يِمْٻٜ؞ اٛنْ اَنْدِ جٛومِرَاوٛ وَاتَنَيْ کٛو مٛيٜ کٛو طُمٜ فِي بٛطُّمْ طُمْ وَطِ، کٛو اٛ مَشُّطٛ، کٛو نَاع اٛ مَشُّطٛ؞ اٛنٛنْ مَا جٜيْٻٜ مَشُّٻٜ ٻٜنْ، دٛولٜ نغَطَنٛنْٻٜ کٛ حَانِ؞ تٛع اٛنْ مبِعُ اٛنْ ڤِيَيْٻٜ، نغَمْ اٛنْ اَنْدِ اٛنٛنْ اٜ مَشُّٻٜ مٛوطٛنْ اٛنْ نغٛودِ مَوْطٛ غٛعٛتٛ غٛنْطٛ دٛوْ، اٛ وَلَا يِدّٜ حٛورٜ؞ کٛ مبِعَيْمِ شَکِتِيطُمْ وٛنِ اَلٜىٰ بَوْطٜ مَوْطٜ طٜ جٛومِرَاوٛ مٜىٰطٜنْ سٜمْبِطِنَعٛنْ؞ ٻٛرْنٜىٰ فُو کٛلْتٜ کٛنُ طٜ اَللَّه حٛکِّعٛنْ نغَمْ مبَاوٛنْ دَرَاکِ، نغَݧٛنْ پٛيْرٜ شٜيْطَنْ؞ نغَمْ نَاع يِمْٻٜ کٛنْدٜتٜنْ، اَمَّا اٜنْ کٛنْدَ اٜ غِنِّ غٛنْطِ دٛوْ، لَامٛتٛوطِ، اٜ غٛودُطِ بَوْطٜ، اٜ جٛغِيطِ لَامُ دُونِيَارُ ندُعُ ندُ جَامَنُ ݧِوْرٜ؞ نغَمْ نٛنْ، ٻٛرْنٜىٰ فُو کٛلْتٜ کٛنُ طٜ اَللَّه، نغَمْ تٛ ݧَلْندٜ کَلُّندٜ وَرِي، مبَاوٛنْ دَرَاکِ نغَݧٛنْ پٛيْرٜ شٜيْطَنْ؞ غَطَ اٛنْ نجٛتِّنِي کٛو طُمٜ، طُمْ تَوَ اٛنْ ندَرِي؞ نغَمْ نٛنْ، ندَرٜىٰ اٛنْ شِرْيِي؞ غٛونغَ وَرْتَ تَادٛرْدٜ مٛوطٛنْ، اَادِلَاکُ وَرْتَ تٛغّٛورٜ نجَمْندِ مٛوطٛنْ ندٜ کٛنُ؞ سِرْيَاکِ يَارُکِ حَبَرُ بٜلْطُمْ دٛوْ يٜىٰسُ اَلْمَسِيحُ طُمْ جَمْ وَرْتَ بٛ ڤَطٜ تٛ کٛيْطٜ مٛوطٛنْ؞ غَطَ مَاجُمْ مَا، حٛولَاکِ يٜىٰسُ وَرْتَ کٛ نجٛغٛتٛوطٛنْ تَٻّٛو ݧِفَ حِيتٜ ڤِطِلّٜ طٜ غَݧٛ کَلُّطٛ اٛنْ طٛنْ فِطٛيِ؞ کُمْنٜىٰ حُمْنٜىٰرٜ نجَمْندِ ندٜ کٛنُ، وَاتٛ کِسْندَمْ؞ کٛشّٜىٰ کَافَحِ رُوحُ اَللَّه، وَاتٛ وٛلْدٜ مَاکٛ؞ کٛو ندٜيٜ نغَطٜىٰ کَ وَطُکِ دٛعَارٜ نٛ رُوحُ اَللَّه حٛلِّرِعٛنْ ندٜرْ کٛو طُمٜ طُمْ نغَطٛتٛنْ؞ کَدِنْ نغَطٛنْ کَ تٛرَاکِ اَللَّه وَلَّعٛنْ؞ نغَمْ فِي طُعُمْ، ڤَامٜىٰ، تٛع اٛنْ نجَٻُ شٛمٛنْ، کٛو ندٜيٜ نغَطٜىٰ کَ وَطَنْکِ يِمْٻٜ اَللَّه فُو دٛعَارٜ؞ مِنْ مَا، نغَطَنٜىٰيَمْ دٛعَارٜ اَللَّه حٛکَّيَمْ بٛلِيطٜ طٜ مبِعَيْمِ، مِ اَنْدِنَ يِمْٻٜ سِرُّ حَبَرُ بٜلْطُمْ دٛوْ يٜىٰسُ اَلْمَسِيحُ کُلٛلْ وَلَا؞ نغَمْ حٛکُّکِ حَبَرُ طُمْ نغَرْتُمِ لِلَاطٛ يٜىٰسُ، کٛو ندٜ جٛونِ اٜ مِ ندٜرْ سُودُ شُرَلْ؞ نغَطٜىٰ دٛعَارٜ نغَمْ مِ وَطَ کَ حٛکُّکِ حَبَرُ طُمْ نٛ حَانِ کُلٛلْ وَلَا؞ تِيکِکُسْ، بَنْدِرَاوٛ مٜىٰطٜنْ مٛ نغِطّٜنْ، مَشُّطٛ مٛ غٛونغَ ندٜرْ کُوغَلْ جٛومِرَاوٛ، اٛ حٛکَّيْعٛنْ فُو حَبَرُ نجَمُ اَمْ اٜ نٛ نغٛنْتِندِرْمِ؞ کَنْجُمْ وَطِ لِلٛيْمٛومِ تٛ مٛوطٛنْ، نغَمْ اٛ وِعَعٛنْ نٛ کٛو مٛيٜ اَمِنْ وٛنْتِندِرِ اٛ سٜمْبِطِنَ ٻٜرْطٜ مٛوطٛنْ؞ اَللَّه ݧَاکٛ مٜىٰطٜنْ مٛ دٛوْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ حٛکَّ فُو تٛکُّٻٜ يٜىٰسُ جَمْ اٜ يِدّٜ اٜ حٛولَارٜ؞ اَللَّه بَرْکِطِنَ کٛو مٛيٜ غِطّٛ جٛومِرَاوٛ مٜىٰطٜنْ يٜىٰسُ اَلْمَسِيحُ يِدّٜ ندٜ رٜعَتَا؞ مِنْ بُلُسْ اٜ تِمٛوتِ مِنْ مَشُّٻٜ يٜىٰسُ اَلْمَسِيحُ؞ مِنْ مبِنْدَنْ فُو يِمْٻٜ اَللَّه تٛکُّٻٜ يٜىٰسُ وٛنْٻٜ غَرِيرِ فِلِبِ اٜ مَوْٻٜ اٜ حُوٛوٻٜ ندٜرْ کَوْتَلْ تٛکُّٻٜ يٜىٰسُ؞ اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ اٜ مِ يٜتَّ اَللَّه کٛو نغٜلٜ شَرٜلْ تٛ مِ ݧُمِي دٛوْ مٛوطٛنْ؞ کٛو ندٜيٜ ندٜرْ فُو دٛعَاجٜ اَمْ طٜ نغَطَنَيْمِعٛنْ اٛنْ فُو، اٜ مِ وَطَطٜ ندٜرْ بٜلْطُمْ ٻٜرْندٜ، نغَمْ اٛنْ نغٛنْدِ اٜ اَمْ ندٜرْ وَعَجِنْکِ حَبَرُ بٜلْطُمْ، دَغَ ݧَلْندٜ اَرَنْدٜىٰرٜ ندٜ ڤُطُّطٛنْ نَنْکِطُمْ حَا وَرْکِ جٛونِ؞ مِ تَبِّتِنِي اٛنْ طٛنْ ڤُطُّطٛ کُوغَلْ بٛنْغَلْ ندٜرْ مٛوطٛنْ اٛ يٛتِّنَيْنغَلْ حَا يَاکِ ݧَلْندٜ وَرْتٛيْکِ يٜىٰسُ اَلْمَسِيحُ؞ طُمْ وٛوطَنِييَمْ مِ ݧُمِرَ نِحِ دٛوْ مٛوطٛنْ اٛنْ فُو، نغَمْ اٛنْ ندٜرْ ٻٜرْندٜ اَمْ؞ کٛو ندٜرْ سُرُکِ کِ طُمْ سُرِيَمْ، کٛو ندٜرْ سُرَنْکِ مَنْغُ حَبَرُ بٜلْطُمْ اٜ تَبِّتِنْکِطُمْ، اٛنْ فُو اٛنْ کٜٻِي بَرْکَ اَللَّه حَوْتِ اٜ اَمْ؞ نغَمْ اَللَّه وٛنِ شٜيْدِيطٛ نٛ کَاٻِرْمِ يِيکِعٛنْ اٜ نٛ نغِطِرْمِعٛنْ، اٛنْ فُو، نٛنْ نٛ يٜىٰسُ اَلْمَسِيحُ يِطِرِعٛنْ؞ دٛعَارٜ اَمْ وٛنِ يِدّٜ مٛوطٛنْ وَطَ کَ ٻٜيْدَاکِ حَوْتِ اٜ اَنْدَلْ اٜ فُو فٜىٰرٛوتِرْکِ حَکُّندٜ غٛونغَ اٜ فٜوْرٜ، نغَمْ مبَاوٛنْ سُٻُکِ کٛ ٻُرِ وٛوطُکِ، نغَرْتٛنْ ٻٜ ٻٜرْطٜ لَٻْطٜ، نغَرْتٛنْ ٻٜ نغَلَا کٛ طُمْ حُطِرْتَعٛنْ حَا يَاکِ ݧَلْندٜ غَرْتٛلْ يٜىٰسُ اَلْمَسِيحُ، نغَمْ نغِکُّ مٛوطٛنْ حٜىٰوَ اَادِلَاکُ کٜٻٜتٜىٰطُمْ تٛ يٜىٰسُ اَلْمَسِيحُ، نغَمْ اَللَّه تٜدِّنٜىٰ، مَنْتٜىٰ؞ بَنْدِرَاٻٜ اَمْ، اٜ مِ يِطِ اَنْدٛنْ کٛ حٜٻِيَمْ وَطِي حَبَرُ بٜلْطُمْ ٻٜيْدِي سَنْکِتَاکِ، حَا مَا فُو سٛوجِعٜنْ رٜىٰنٛوٻٜ لَامٛرْدٜ اٜ يِمْٻٜ کٛرِيٻٜ اَنْدِي طُمْ حَٻَّمْ نغَمْ مِ مَشُّطٛ اَلْمَسِيحُ؞ حَٻُّکِيَمْ سٜمْبِطِنِي تٛکُّٻٜ يٜىٰسُ طُطْٻٜ ندٜرْ تٛکُّکِمٛ، ٻٜ ٻٜيْدِي حٜٻُکِ سٜمْبٜ ٻٜرْندٜ وَعَجِنْکِ وٛلْدٜ اَللَّه کُلٛلْ وَلَا؞ طُمْ غٛونغَ وٛٻّٜ اٜ نغَعَجِنَ حَبَرُ اَلْمَسِيحُ نغَمْ لَوْلِيرُ اٜ طَٻُّتُکِ فٛطْفٛطْتِرْکِ، اَمَّا وٛٻّٜ اٜ نغَعَجِنَ نغَمْ ݧُمٛوجِ بٛطِّ؞ ٻٜعٜ يِمْٻٜ اٜ ٻٜ نغَعَجِنَ نغَمْ يِدّٜ، اٜ ٻٜ اَنْدِ مِ سُرَ طٛعٛ نغَمْ سُرُکِ غٛونغَ حَبَرُ بٜلْطُمْ؞ ٻٜنْ تٛنْ بٛو اٜ ٻٜ نغَعَجِنَ حَبَرُ اَلْمَسِيحُ نغَمْ ٻٜيْدَارِ کٛعٜ مَٻّٜ، نَاع اٜ غٛونغَ، اٜ ٻٜ ݧُمَ ٻٜ اُمِّنَنَيْيَمْ حَکِّيلٛ ندٜرْ نغٜعٜلْ شَرٜلْ نغٜلْ طُمْ حَٻِّيَمْ؞ نٛنْ وَنَّايِيَمْ! کٛ ٻُرِ وٛنِ اٜ کٛو نغٛلٜ لَاوٛلْ، کٛو ندٜرْ ݧُمٛوجِ طِ مبٛوطَا، کٛو ندٜرْ ݧُمٛوجِ بٛطِّ، اَلْمَسِيحُ اٜ وَعَجِنٜىٰ؞ نغَمْ مَاجُمْ اٜ مِ نَنَ بٜلْطُمْ! مِ وَطَيْ کَ نَنُکِ بٜلْطُمْ؞ نغَمْ اٜ مِ اَنْدِ بَرْکَ دٛعَارٜ مٛوطٛنْ اٜ بَلَّلْ نغَلْ رُوحُ يٜىٰسُ اَلْمَسِيحُ حٛکَّتَ، اٜ رٜعِرْدٜ طُمْ يٛوفَيْيَمْ دَغَ ندٜرْ سُودُ شُرَلْ؞ کٛ کَاٻُمِ يِيکِ اٜ کٛ کَمِّيمِ وٛنِ تٛع مِ سٜمْتِنَ حٛورٜ اَمْ کٛو سٜطَّ، اَمَّا مِ مٜتَ اٜ سٜمْبٜ ٻٜرْندٜ، نغَمْ جٛونِ اٜ کٛو ندٜيٜ طُمْ مَوْنِنَ اَلْمَسِيحُ ندٜرْ کٛو طُمٜ کٛ نغَطَيْمِ، کٛو لَاوٛلْ جٛنْدٜ اَمْ، کٛو لَاوٛلْ مَيْدٜ اَمْ؞ تٛ مِ ݧَمْرِي يٜىٰسٛ اٜ جٛنْدٜ ندٜرْ دُونِيَارُ ندُعُ، مِ وَطَيْندٜ نغَمْ اَلْمَسِيحُ؞ تٛ مِ مَايِي بٛو، طُمْ ٻٜيْدَارِ؞ تٛ اٜ مِ وٛودِ يٛنْکِ ندٜرْ ٻَنْدُ ندُعُ، مِ حُوَيْ کُوغَلْ نَفَيْنغَلْ؞ اَمَّا مِ دُلِّي کٛ شُٻَيْمِ؞ طُمْ فُو طِطُمْ اٜ طُمْ فٛوطَنَيَمْ حَکِّيلٛ نَاع سٜطَّ؞ کٛ ٻُرْمِ يِطُکِ وٛنِ مِ دِلَّ مِ جٛوطٛدٛو اٜ اَلْمَسِيحُ، نغَمْ کَنْجُمْ ٻُرِ وٛوطُکِ نَاع سٜطَّ؞ اَمَّا طُمْ ٻُرَيْ نَفَنْکِعٛنْ مِ جٛوطٛو تَوْ؞ مِ تَبِّتِنِي طُمْ نٛنْ؞ نغَمْ مَاجُمْ اٜ مِ اَنْدِ مِ جٛوطٛدٛتٛ اٜ يٛنْکِ تَوْ، مِ ݧَمْرَ يٜىٰسٛ اٜ جٛوطٛدَاکِ اٜ مٛوطٛنْ اٛنْ فُو، نغَمْ ݧَمْرٛنْ يٜىٰسٛ، نَنٛنْ بٜلْطُمْ ندٜرْ حٛولَاکِ يٜىٰسُ؞ نٛنْ وَطَيْ نغَمْ لَاوٛلْ اَمْ کٜٻٛنْ دَلِيلَ شٜمْبِطُّمْ طُمْ مَنْتٛرْتٛوطٛنْ اَلْمَسِيحُ نغَمْ سٛعّٛيَاکِ اَمْ تٛ مٛوطٛنْ؞ کٛ ٻُرِ وٛنِ نغَطٜىٰ جٛنْدٜ ڤٛتُّدُندٜ اٜ حَبَرُ بٜلْطُمْ دٛوْ اَلْمَسِيحُ، نغَمْ کٛو مِ وَرِي مِ يِعِعٛنْ، کٛو مِ وَلَا طٛنْ، مِ نَنَ حَبَرُ اٛنْ طٛنْ ندَرِي بٛطُّمْ ندٜرْ ݧُمٛ غٛعٛ، کٛ نغِطّٛنْ غٛعٛ؞ اٛنْ ڤِيدَ نغَمْ سُرَنْکِ کٛ حَبَرُ بٜلْطُمْ وِعِ، نَاع ندٜرْ کُلٛلْ وَݧْوَݧْٻٜ مٛوطٛنْ کٛو سٜطَّ؞ نٛنْ وٛنِ اَلَامَ تَبِّتِنَنَيْطُمْٻٜ ٻٜ کَلْکَيْ، اَمَّا اٛنٛنْ طُمْ تَبِّتِنْکِ کِسْندَمْ مٛوطٛنْ؞ طُمْ فُو اَللَّه وٛنِ غَطَيْطٛطُمْ؞ اٛ بَرْکِطِنِيعٛنْ؞ بَرْکَ طُمْ وٛنِ نَاع کٜٻٛنْ کٛولٛوطٛنْ اَلْمَسِيحُ تَنْ، اَمَّا حَا کٜٻٛنْ نجَرٛنْ تٛرَّ نغَمْ مَاکٛ؞ تٛرَّ کَ نجَرٛتٛنْ طُمْ اِرِ تٛرَّ کَ نجَرُمِ کَ نغِيطٛنْ، کَ نَنٛتٛنْ اٜ مِ يَرَ حَا جٛونِ؞ ندٜ سُمْڤٛوتِرْکِ اٜ اَلْمَسِيحُ اٜ سٜمْبِطِنَعٛنْ، ندٜ يِدّٜ مَاکٛ اٜ وَلْتِنَ ٻٜرْطٜ مٛوطٛنْ، ندٜ اٛنْ شُمْڤٛوتِرَ اٜ رُوحُ اَللَّه، ندٜ اٛنْ نغٛودِ يِدّٜ اٜ يُرْمٜىٰندٜ، نٛ مبٜلْنِرَنْتٛنْيَمْ ٻٜرْندٜ وٛنِ ݧُمٛ مٛوطٛنْ وَرْتَ غٛعٛ، اٛنْ نغِطِندِرَ، اٛنْ کَوْتِ کٛعٜ؞ تٛع اٛنْ نغَطُ کٛو طُمٜ ندٜرْ يِدّٜ حٛورٜ کٛو ندٜرْ مَنْغُ حٛورٜ، اَمَّا ندٜرْ لٜسْنُکِ حٛورٜ کٛو مٛيٜ حٛشَّ بَنْدِرَاوٛ مُوطُمْ ٻُرِيمٛ؞ تٛع کٛو مٛيٜ مٛوطٛنْ يِطَ کٛ نَفَنْتَ حٛورٜ مُوطُمْ تَنْ، اَمَّا اٛ يِطَ کٛ نَفَنْتَ وٛٻّٜ مَا؞ نغِکُّ مٛوطٛنْ وَرْتَ اِرِ طُمْ يٜىٰسُ اَلْمَسِيحُ؞ کٛو ندٜ ندٜرْ کٛو طُمٜ اٛ غٛعٛ اٜ اَللَّه، اٛ حٛشَّايِ فٛتُّدُکِ اٜ اَللَّه غٛطُّمْ کٛ اٛ جٛغٛتٛو؞ اَمَّا اٛ وَرْتِرِي حٛورٜ مَاکٛ نَاع اٛ غٛطّٛ، اٛ وَرْتِ مَشُّطٛ، اٛ دَݧَا ندٜرْ نَنْدِ نٜطّٛ؞ غَطَ اٛ دَݧَامَ ندٜرْ نَنْدِ نٜطّٛ، اٛ لٜسْتِنِ حٛورٜ مَاکٛ اٛ وَطِ کٛ طُمْ وِعِمٛ حَا اٛ مَايِ مَيْدٜ دٛوْ غَافَانغَلْ؞ نغَمْ نٛنْ، اَللَّه حٛکِّمٛ مَنْغُ ٻُرْطُمْ طُمْ کٛو مٛيٜ، ندٜنْ حٛکِّمٛ اِنْدٜ ٻُرْندٜ کٛو ندٜيٜ اِنْدٜ؞ نغَمْ کٛو طُمٜ کٛ وٛنِ اٜ دٛوْ، اٜ کٛ وٛنِ اٜ دُونِيَارُ، اٜ کٛو طُمٜ کٛ وٛنِ اٜ لَاحِرَ، طُمْ دِشَّنْتٛ يٜىٰسُ؞ ندٜنْ يٜىٰسٛ کٛو طُمٜ کٛو نغَلٜ طٜمْنغَلْ وِعَيْ يٜىٰسُ اَلْمَسِيحُ اٛ جٛومِرَاوٛ، نغَمْ مَوْنِنْکِ اَللَّه ݧَاکٛ مٛ دٛوْ؞ نغَمْ نٛنْ اٛنٛنْ ٻٜ نغِطُمِ، کٛو ندٜيٜ اٛنْ نغَطَ کٛ طُمْ وِعِعٛنْ شَرٜلْ کٛ نغٛنْدُنٛومِ اٜ مٛوطٛنْ؞ جٛونِ مَا ندٜ مِ وَلَا طٛنْ، ٻٜيْدٜىٰ وَطُکِ کٛ طُمْ وِعِعٛنْ؞ نغَطٜىٰ کَ حُوُکِ کُوغَلْ کِسْندَمْ مٛوطٛنْ ندٜرْ کُلٛلْ اَللَّه؞ نغَمْ اَللَّه اٜ حُوَ ندٜرْ ٻٜرْطٜ مٛوطٛنْ نغَمْ اٛ وَطَعٛنْ نغِطٛنْ وَطُکِ کٛ اٛ يِطِ، مبَاوٛنْ وَطُکِطُمْ؞ فُو کٛ نغَطٛتٛنْ، تٛع اٛنْ نغَطُطُمْ ندٜرْ مٜتِتَاکِ، کٛو ندٜرْ غٜدِّ، نغَمْ نغَرْتٛنْ وَلَا کٛ طُمْ حُطِرْتَعٛنْ، لَاٻُٻٜ، ٻِٻّٜ اَللَّه ٻٜ نغَلَا حَلّٜىٰندٜ ندٜرْ جَامَنُ يِمْٻٜ ٻٜ نغَلَا غٛونغَ کَلُّٻٜ، نغَرْتٛنْ جَيْنٛتٛوٻٜ ندٜرْ مَٻّٜ بٛ فِتِلَاجِ اٜ دُونِيَارُ، ندٜرْ حٛکُّکِ حَبَرُ وٛلْدٜ کٛکَّيْندٜ يٛنْکِ؞ تٛ اٛنْ نغَطِي نٛنْ، ݧَلْندٜ وَرْتُکِ اَلْمَسِيحُ مِ مَنْتِتٛتٛ، نغَمْ کُوغَلْ اَمْ اٜ حَٻْدُکِ اَمْ وَرْتَايِ مٜىٰرٜ؞ کُوطٜ طٜ کُوٛتٛنْ نغَمْ اٛنْ کٛولَکٜ جٛومِرَاوٛ، بٛ شَکِّرِ طٜ نغٛنِ تٛ مَاکٛ؞ کٛو تٛ طُمْ رُفَيْ پِيپَمْ اَمْ دٛوْ شَکِّرِ ندِنْ، مِ نَنَيْ بٜلْطُمْ، مبٜلْمبٜلْتٜنْ اٜنْ فُو؞ نٛنْ اٛنٛنْ مَا، اٜ حَانِ نَنٛنْ بٜلْطُمْ، مبٜلْمبٜلْتٜنْ؞ اٜ مِ کَمِّي، تٛ يٜىٰسُ جٛومِرَاوٛ جَٻِي، مِ لِلْدٛنٛيَيْعٛنْ تِمٛوتِ نَاع کٛ نٜىٰٻِ نغَمْ مِ نَنَ حَبَرُ مٛوطٛنْ طُمْ سٜمْبِطِنَيَمْ؞ مِ وَلَا غٛطّٛ غَنُّطٛ اٜ مٛوطٛنْ بٛ مَاکٛ؞ حٛرِيٻٜ ٻٜنْ کٛو مٛيٜ کٛ وٛنِ يٜىٰسٛ مُوطُمْ تَنْ وَنِّمٛ، نَاع کٛ يٜىٰسُ اَلْمَسِيحُ يِطِ؞ اَمَّا اٛنْ اَنْدِ نٛ تِمٛوتِ حٛلِّرِ نَفُکِ مُوطُمْ، اٛ حُودِي اٜ اَمْ ندٜرْ کُوغَلْ حٛکُّکِ حَبَرُ بٜلْطُمْ بٛ ٻِطّٛ اٜ ݧَاکٛ مُوطُمْ؞ نغَمْ نٛنْ، کَنْکٛ نغِطُمِ لِلٛيْکِ تٛ مٛوطٛنْ نٛ نَنِرْمِ کٛ حٜٻَتَيَمْ؞ ندٜنْ مِ تَبِّتِنِي، تٛ جٛومِرَاوٛ جَٻِي، مِنْ مَا مِ وَرَيْ نَاع کٛ نٜىٰٻِ؞ مِ يِعِي اٜ حَانِ مِ لِلٛنٛيَعٛنْ بَنْدِرَاوٛ اَمْ اَبَافٛرٛدِتُسْ حِغٛ کُوغَلْ اَمْ، حِغٛ تٛرَّ اَمْ طٛنْمَا، مٛ لِلٛيْطٛنْ وَلَّيَمْ؞ نغَمْ اٛ حَاٻِي اٛ يِعَعٛنْ اٛنْ فُو، اٛ وَنِّي نغَمْ اٛنْ نَنِي اٛ يَمْطَا؞ غٛونغَ اٛ وَطِي شِيَ نجَمُ حَا اٛ ٻَدَکٜ اٛ مَايَ؞ اَمَّا اَللَّه يُرْمِنَنِيمٛ، نَاع کَنْکٛ تَنْ، حَا اٜ مِنْ، نغَمْ تٛع وَنَّارٜ طُوطَنَيَمْ؞ کَنْجُمْ وَطِ کَاٻُمِ نَاع سٜطَّ مِ لِلٛيَمٛ تٛ مٛوطٛنْ نغَمْ ڤُطِّتٛنْ نغِعٛنْمٛ نَنٛنْ بٜلْطُمْ، ندٜنْ وَنَّارٜ اَمْ اُسْتٛو؞ نغَمْ نٛنْ، نجَٻّٜىٰمٛ ندٜرْ وٜلْوٜلٛ طُطْنغٛ نغَمْ جٛومِرَاوٛ، ندٜنْ کٛکّٜىٰ اِرِ مَاکٛ مَنْغُ نٛ حَانِ؞ نغَمْ ندٜنّٛ اٛ ٻَدَکٜ اٛ مَايَ دٛوْ کُوغَلْ اَلْمَسِيحُ؞ اٛ سٛورِي يٛنْکِ مَاکٛ نغَمْ اٛ حُوَ کُوغَلْ وَلُّکِيَمْ نغَلْ اٛنْ مبَاوَتَا حُوُکِ؞ اٜ رٜعِرْدٜ بَنْدِرَاٻٜ اَمْ، نَنٜىٰ بٜلْطُمْ نغَمْ سُمْڤٛوتِرْکِ مٛوطٛنْ اٜ جٛومِرَاوٛ؞ مِ سٛمَايِ وِنْدَنْکِعٛنْ کٛ مبِنْدَنّٛومِعٛنْ ندٜنّٛ، نغَمْ طُمْ سُرُکِ نجَمُ مٛوطٛنْ؞ نغَطٜىٰ حَکِّيلٛ اٜ ٻٜنْ طٛنْ يِمْٻٜ ٻٜ نغِکُّ بٛ طُمْ کُتِيجِ، کُوٛوٻٜ کُوطٜ کَلُّطٜ، وِعٛوٻٜ دٛولٜ طُمْ نَادَ کٛ طُمْ حٜٻَ کِسْندَمْ؞ نغَمْ اٜنٜنْ نغٛودِ نَادُکِ کِ غٛونغَ، اٜنٜنْ مَوْنِنٛوٻٜ اَللَّه ندٜرْ رُوحُ مَاکٛ، مَنْتٛرْتٛوٻٜ يٜىٰسُ اَلْمَسِيحُ؞ اٜنٜنْ اٜنْ نغَطَتَا ٻٜرْطٜ مٜىٰطٜنْ دٛوْ کُوطٜ طٜ نغَطٜتٜنْ اٜ ٻَنْدُ نغَمْ اَللَّه جَٻَعٜنْ، کٛو ندٜ مِنْ، اٜ مِ وٛودِ دَلِيلَ وَطُکِ ٻٜرْندٜ اَمْ دٛوْ کُوطٜ ٻَنْدُ؞ تٛ اٜ وٛودِ کَمِّيطٛ اٜ وٛودِ دَلِيلَ وَطُکِ ٻٜرْندٜ دٛوْ کُوطٜ ٻَنْدُ، مِ ٻُرِيمٛ؞ مِ نَادَامَ اٜ ݧَلْندٜ جٛوٜىٰتَتَوْرٜ غَطَ مِ دَݧَامَ؞ مِ اِسْرَاعِيلَنْکٜىٰجٛ، دَغَ لٜݧٛلْ بِلِيَامِنُ، مِ اِبْرَانِيَنْکٜىٰجٛ دِمٛ، ٻِطّٛ اِبْرَانِيَنْکٛعٜنْ؞ دٛوْ تٛکُّکِ اَتَّوْرَ، مِ فَارِسَنْکٜىٰجٛ؞ مِ تٛکِّي دِينَ اَمْ حَا مِ تٛرِّي تٛکُّٻٜ يٜىٰسُ؞ دٛوْ وَطُکِ اَادِلَاکُ ندٜرْ تٛکُّکِ اَتَّوْرَ، طُمْ تَوْرَايِيَمْ غٛطُّمْ کٛ وٛوطَا؞ اَمَّا فُو کٛ نغِعَيْنٛومِ بٛ طُمْ نَفَنَيْيَمْ، جٛونِ مِ حٛشِّيطُمْ طُمْ مٜىٰرٜ نغَمْ اَلْمَسِيحُ؞ کٛ ٻُرِ نٛنْ وٛنِ مِ حٛشِّي کٛو طُمٜ مٜىٰرٜ، نغَمْ کٛ ٻُرِ مَنْغُ وٛنِ اَنْدُکِ يٜىٰسُ اَلْمَسِيحُ جٛومِرَاوٛ اَمْ؞ نغَمْ مَاکٛ شٜنْدِرْمِ اٜ کٛو طُمٜ نغَرْتِرْمِ طُمْ مٜىٰرٜ، نغَمْ مِ تٛکَّمٛ، مِ وَرْتَ شُمْڤٛوتِرٛووٛ اٜ مَاکٛ؞ مِ وَرْتَيْ نٛنْ نَاع نغَمْ اَادِلَاکُ طُمْ نغٛودُمِ نغَمْ تٛکُّکِ اَتَّوْرَ، اَمَّا نغَمْ اَادِلَاکُ کٜٻٜتٜىٰطُمْ ندٜرْ حٛولَاکِمٛ، وَاتٛ اَادِلَاکُ پِوٛيْطُمْ تٛ اَللَّه کٜٻٜتٜىٰطُمْ بَرْکَ حٛولَاکِ اَلْمَسِيحُ؞ کٛ نغِطُمِ وٛنِ، مِ اَنْدَ اَلْمَسِيحُ اٜ بَوْطٜ اُمَّاکِ مَاکٛ دَغَ مَيْدٜ؞ اٜ مِ يِطِ مِ يَرَ اِرِ تٛرَّ کَ اٛ يَرِ، مِ مَايِرَ نٛ اٛ مَايِرِ، نغَمْ فُو نٛ طُمْ وَطِ مِ حٜٻَ مِ اُمّٛو دَغَ مَيْدٜ؞ مِ وِعَايِ مِ يَادَکٜ مِ وَرْتِي کٛو طُمٜ کٛ حَانِ مِ وَرْتَ، کٛو بٛو مِ يَادَکٜ مِ وَرْتِي کٜوْطٛ؞ اَمَّا اٜ مِ وَطَ کٛ مبَاوَيْمِ وَطُکِ نغَمْ مِ وَرْتَ نٛنْ، نغَمْ يٜىٰسُ اَلْمَسِيحُ يَادَکٜ وَرْتِرِييَمْ مٛ مَاکٛ؞ بَنْدِرَاٻٜ، مِ حٛشَّايِ مِ يَادَکٜ مِ وَرْتِي نٛنْ؞ اَمَّا فِي غٛعٛ نغَطَيْمِ: اٜ مِ يٜجِّتَ کٛ پَٻِّي، اٜ مِ وَطَ کٛ مبَاوَيْمِ وَطُکِ مِ يٛتّٛو کٛ وٛنِ يٜىٰسٛ؞ اٜ مِ ݧَمْرَ يٜىٰسٛ نغَمْ مِ حٜٻَ جَالٛرْغَلْ مِ حٛکّٜىٰ دٛکَّلْ، وَاتٛ نٛدّٛلْ يَاکِ دٛوْ نغٛلْ اَللَّه نٛدِّيَمْ بَرْکَ يٜىٰسُ اَلْمَسِيحُ؞ فُو اٜنٜنْ شٜمْبِطْٻٜ ندٜرْ تٛکُّکِ يٜىٰسُ، اٜ حَانِ ݧُمِرٜنْ نٛنْ؞ تٛ اٛنْ ݧُمِي غٛطُّمْ فٜىٰرٜ، اَللَّه حٛلَّيْعٛنْ طُمْ اٜ نجَيْرِ؞ اَمَّا اٜنْ ݧَمْرَ يٜىٰسٛ اٜ تٛکُّکِ غٛونغَ کَ نجَادِيطٜنْ اٜکِّتِيطٜنْ؞ بَنْدِرَاٻٜ اَمْ، اٜکِّتٜىٰ تٛ اَمْ؞ ندَارٛنْ غَطٛوٻٜ جٛنْدٜ کَانُندٜ ندٜ مِنْ اٜکِّتِنِعٛنْ؞ نغَمْ اٜ وٛودِ يِمْٻٜ طُطْٻٜ ٻٜ مٜتَنْمِعٛنْ دٛوْ مَٻّٜ، جٛونِ اٜ مِ فُطِّتَ اٜ مِ وِعَعٛنْکَ اٜ غٛنْطِ، اٜ ٻٜ نغَطَ جٛنْدٜ وَݧْوَݧْٻٜ غَافَانغَلْ اَلْمَسِيحُ؞ رٜعِرْدٜ مَٻّٜ طُمْ حَلْکٜرٜ، دٜىٰطِ مَٻّٜ نغٛنِ اَلَّح مَٻّٜ، اٜ ٻٜ مَنْتٛرٛو کٛ سٜمْتِنِي طُمْ ٻٜ نغَطَتَ؞ ٻٜ نغَطِي ٻٜرْطٜ مَٻّٜ دٛوْ کٛ وٛنِ ندٜرْ دُونِيَارُ؞ اَمَّا اٜنٜنْ طُمْ ٻٜ لَامُ دٛوْ، اٜنْ کَاٻِي وَرْتٛيْکِ کِسْنٛووٛ، وَاتٛ يٜىٰسُ اَلْمَسِيحُ جٛومِرَاوٛ غَرٛيَيْطٛ دَغَ تٛنْ؞ اٛ وَيْلِتَيْ ٻَلِّ مٜىٰطٜنْ تَمْڤُطِ مَايَيْطِ، اٛ وَرْتِرَطِ بٛ ٻَنْدُ مَاکٛ غٛودُندُ تٜدُّنغَلْ؞ اٛ وَطَيْ نٛنْ اٜ بَوْطٜ مَاکٛ طٜ اٛ وَرْتِرْتَ کٛو طُمٜ لٜيْ لَامُ مَاکٛ؞ نغَمْ نٛنْ، اٛنٛنْ بَنْدِرَاٻٜ اَمْ ٻٜ نغِطُمِ ٻٜ کَاٻُمِ يِيکِ، اٛنٛنْ نغٛنِ بٜلْطُمْ ٻٜرْندٜ اَمْ، اٛنٛنْ مَنْتٛرْتٛومِ؞ نٛنْ حَانِ ندَرٛرٛوطٛنْ بٛطُّمْ ندٜرْ تٛکُّکِ جٛومِرَاوٛ، اٛنٛنْ ٻٜ نغِطُمِ؞ اٜ مِ تٛرٛو يُودِيَ اٜ سِنْتِکِ ٻٜ شِرْيٛوتِرَ نغَمْ کَمْٻٜ طُمْ ٻٜ جٛومِرَاوٛ؞ اَنْ حِغٛ کُوغَلْ اَمْ مٛ غٛونغَ، اٜ مِ تٛرٛمَا، وَلُّ رٜوْٻٜ ٻٜعٜ، نغَمْ ٻٜ کُودِي اٜ اَمْ کُوغَلْ شَطُنغَلْ نغَلْ وَعَجِنْکِ حَبَرُ بٜلْطُمْ، حَوْتِ اٜ کِلٜمٜنْ اٜ حٛرِيٻٜ حِغٛوٻٜ کُوغَلْ اَمْ، ٻٜ اِنْطٜ مَٻّٜ اٜ وِنْدِي ندٜرْ دٜفْتٜرٜ يٛنْکِ؞ کٛو ندٜيٜ نَنٜىٰ بٜلْطُمْ نغَمْ جٛومِرَاوٛ؞ اٜ مِ فُطِّتَ اٜ مِ وِعَعٛنْ، نَنٜىٰ بٜلْطُمْ! اَلٜىٰ کٛو مٛيٜ يِعَ مُݧَلْ مٛوطٛنْ؞ جٛومِرَاوٛ ٻَدَکٜ وَرَ؞ تٛع اٛنْ نغَنُّ دٛوْ کٛو طُمٜ، اَمَّا ندٜرْ کٛو طُمٜ مبِعٜىٰ اَللَّه کٛ نغِطّٛنْ ندٜرْ دٛعَارٜ اٜ تٛرَاکِ اٜ يٜتّٛورٜ؞ ندٜنْ جَمْ طُمْ اَللَّه حٛکَّتَ پَٻِّيطُمْ فَامُ نٜطّٛ طُمْ سُرَيْ ٻٜرْطٜ مٛوطٛنْ اٜ ݧُمٛ مٛوطٛنْ نغَمْ اٛنْ شُمْڤٛوتِرَ اٜ يٜىٰسُ اَلْمَسِيحُ؞ اٜ رٜعِرْدٜ بَنْدِرَاٻٜ اَمْ، نغَطٜىٰ کَ ݧُمُکِ دٛوْ کٛو طُمٜ کٛ وٛنِ طُمْ غٛونغَ، اٜ کٛ مَوْنِنٜىٰ، اٜ کٛ حَانِ، اٜ کٛ لَاٻِ، اٜ کٛ وٜلْنَنْتَ يِمْٻٜ ٻٜرْطٜ، اٜ کٛ طُمْ يِعَتَ اٜ وٛوطِ، اٜ کٛو طُمٜ نغِکُّ بٛطُّمْ، اٜ کٛ حٜوْتِ مَنْتٜىٰکِ؞ کٛو طُمٜ کٛ اٜکِّتِيطٛنْ، اٜ کٛ کٜٻُطٛنْ، اٜ کٛ نَنْطٛنْ، اٜ کٛ نغِيطٛنْ تٛ اَمْ، نغَطٜىٰطُمْ، ندٜنْ اَللَّه جٛومُ جَمْ وٛنْدَيْ اٜ مٛوطٛنْ؞ اٜ مِ نَنَ بٜلْطُمْ، مِ يٜتِّي جٛومِرَاوٛ نَاع سٜطَّ، نغَمْ جٛونِ اٛنْ شٛعَّکٜ اٛنْ مبَلَّيَمْ؞ غٛونغَ ندٜنّٛ اٛنْ ݧُمَ دٛوْ اَمْ، اَمَّا لَاوٛلْ وٛنِ اٛنْ کٜٻَايِ؞ مِ وِعَايِ نٛنْ نغَمْ اٜ مِ يِطِ غٛطُّمْ؞ نغَمْ مِ اٜکِّتَکٜ ندٜرْ فُو تٛ کٜٻُمِ حٛورٜ اَمْ مِ مُݧِدَ اٜ کٛ نغٛودُمِ؞ اٜ مِ اَنْدِ نٛ نجٛوطٛرْتٛومِ ندٜرْ شِيَ، اٜ مِ اَنْدِ نٛ نجٛوطٛرْتٛومِ ندٜرْ غٛودَلْ؞ مِ اٜکِّتَکٜ نٛ نجٛوطٛرْتٛومِ ندٜرْ فُو تٛ کٜٻُمِ حٛورٜ اَمْ، کٛو ندٜرْ حَارَنْدٜ، کٛو ندٜرْ وٜىٰلٛ، کٛو ندٜرْ غٛودَلْ، کٛو ندٜرْ دُلّٜرٜ؞ مِ وَاوَيْ وَطُکِ کٛو طُمٜ بَرْکَ اٛنْ طٛنْ شٜمْبِطِنْطٛيَمْ؞ اَمَّا اٛنْ نغَطِي بٛطُّمْ ندٜ مبَلُّطٛيْيَمْ ندٜرْ تٛرَّ اَمْ؞ اٛنٛنْ فِلِبِيَنْکٛعٜنْ، اٛنٛنْ اٜ کٛعٜ مٛوطٛنْ اٛنْ اَنْدِ شَرٜلْ کٛ ڤُطُّطٛنْ نَنْکِ حَبَرُ بٜلْطُمْ، ندٜ اَلْمِ لٜيْدِ مَکِدٛونِيَ، وَلَا وٛٻّٜ تٛکُّٻٜ يٜىٰسُ بَلُّٻٜيَمْ سٜيْ اٛنٛنْ تَنْ؞ نغَمْ کٛو شَرٜلْ کٛ نغٛنْمِ تَسَلٛونِکَ اٛنْ لِلْدَنِييَمْ بَلَّلْ نَاع ندٜ غٛعٛ، نَاع ندٜ طِطِ؞ نَاع اٜ مِ طَٻِّتَ دٛکَّلْ تٛ مٛوطٛنْ، اَمَّا اٜ مِ طَٻِّتَنَعٛنْ ٻٜيْدَارِ دٛوْ بَرْکَ طُمْ نغٛودُطٛنْ؞ مِ حٜٻِي دٛکَّلْ نغَلْ لِلْدٛيْطٛيْيَمْ تٛ جُنْغٛ اَبَافٛرٛدِتُسْ؞ نغَلْ ٻُرِ کٛ نغِطُمِ؞ نغَلْ وَرْتِي بٛ اُرْدٜ وٜلْندٜ ندٜ طُمْ حٛکَّتَ اَللَّه، شَکِّرِ ندِ اٛ جَٻَتَ، مبٜلْنَنَيْندِمٛ ٻٜرْندٜ؞ اَللَّه اَمْ حٛکَّيْعٛنْ کٛو طُمٜ کٛ نغِطّٛنْ دَغَ ندٜرْ رِسْکُ مَاکٛ طُطُّمْ بَرْکَ يٜىٰسُ اَلْمَسِيحُ؞ تٜدُّنغَلْ تَبِّتَ تٛ اَللَّه مٜىٰطٜنْ، ݧَاکٛ مٜىٰطٜنْ حَا اَبَدَا اَبَدِنْ! اَامِنْ؞ کٛوْنٜىٰ فُو يِمْٻٜ اَللَّه ندٜرْ اِنْدٜ يٜىٰسُ اَلْمَسِيحُ؞ تٛکُّٻٜ يٜىٰسُ وٛنْدُٻٜ اٜ اَمْ طٛعٛ اٜ کٛوْنَعٛنْ؞ فُو يِمْٻٜ اَللَّه اٜ کٛوْنَعٛنْ، کٛ ٻُرِ وٛنِ کُوٛوٻٜ اٜ لَامٛرْدٜ کَيْسَرْ؞ يِدّٜ يٜىٰسُ اَلْمَسِيحُ جٛومِرَاوٛ وٛنْدَ اٜ مٛوطٛنْ؞ اَامِنْ؞ مِنْ بُلُسْ مٛ اَللَّه سُٻِ وَرْتَ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ حَوْتِ اٜ بَنْدِرَاوٛ مٜىٰطٜنْ تِمٛوتِ؞ مِنْ مبِنْدَنْغٛلْ يِمْٻٜ اَللَّه تٛکُّٻٜ يٜىٰسُ اٜ غٛونغَ غٛنْٻٜ کٛلٛوسِ؞ اَللَّه ݧَاکٛ مٜىٰطٜنْ مٛ دٛوْ بَرْکِطِنَعٛنْ حٛکَّعٛنْ جَمْ؞ کٛو ندٜيٜ تٛ اٜ مِنْ نغَطَنَعٛنْ دٛعَارٜ اٜ مِنْ نغٜتَّ اَللَّه ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ اٜ مِنْ نغٜتَّمٛ نغَمْ مٛوطٛنْ، نغَمْ مِنْ نَنِي نٛ کٛولٛرِيطٛنْ يٜىٰسُ اَلْمَسِيحُ اٜ نٛ نغِرُّطٛنْ فُو يِمْٻٜ اَللَّه؞ اٛنْ نغَطَ نٛنْ نغَمْ اٛنْ تَبِّتِنِي اٛنْ کٜٻَيْ مبَرْجَارِ ندِ اَللَّه رٜسَنِعٛنْ تٛنْ دٛوْ؞ اٛنْ نَنِي حَبَرُ طُعُمْ فِي طُمْ کَمِّيطٛنْ دَغَ اَرَنْدٜ ندٜرْ وٛلْدٜ غٛونغَ، وَاتٛ حَبَرُ بٜلْطُمْ طُمْ نَنْطٛنْ؞ حَبَرُ بٜلْطُمْ طُعُمْ اٜ طُمْ بَرْکِطِنَ يِمْٻٜ اٜ طُمْ سَنْکِتٛو ندٜرْ دُونِيَارُ فُو، نٛنْ نٛ طُمْ وَطِ ندٜرْ مٛوطٛنْ، دَغَ ݧَلْندٜ ندٜ نَنْطٛنْطُمْ ݧَلْندٜ ندٜ ڤَامُطٛنْ بٛطُّمْ نٛ اَللَّه يِطِرِ يِمْٻٜ؞ اٛنْ نَنِي حَبَرُ بٜلْطُمْ طُعُمْ دَغَ تٛ اَبَافَرَسْ مٛ مِنْ نغِطِ، مٛ مِنْ کُودَتَ؞ اٛ کُوَنٛووٛ يٜىٰسُ اٜ غٛونغَ ندٜرْ مٛوطٛنْ؞ کَنْکٛ حٛکِّمِنْ حَبَرُ يِدّٜ مٛوطٛنْ پِوٛيْندٜ تٛ رُوحُ اَللَّه؞ نغَمْ مَاجُمْ، دَغَ ݧَلْندٜ ندٜ مِنْ نَنِ حَبَرُ طُمْ اٜ مِنْ نغَطَنَعٛنْ دٛعَارٜ؞ اٜ مِنْ تٛرٛو اَللَّه وَطَعٛنْ نغَرْتٛنْ غٛودُٻٜ فَامُ کٜوْطُمْ دٛوْ کٛ اٛ يِطِ نغَطٛنْ؞ طٛنْمَا اٜ مِنْ تٛرٛومٛ کٜٻٛنْ فَامُ اٜ اَنْدَلْ طُمْ رُوحُ اَللَّه حٛکَّتَ؞ اٜ مِنْ نغَطَنَعٛنْ ندٜعٜ دٛعَارٜ نغَمْ مبَاوٛنْ نغَطٛنْ جٛنْدٜ حَانُندٜ تٛکُّٻٜ جٛومِرَاوٛ نغَطَ، ندٜنْ نغَرْتٛنْ بٜلْنَنٛوٻٜمٛ ٻٜرْندٜ کٛو ندٜيٜ، جٛنْدٜ مٛوطٛنْ وُرْتِنَ کٛو اِرِ طٜيٜ کُوطٜ بٛطّٜ، ندٜنْ ٻٜيْدٛنْ اَنْدُکِ اَللَّه؞ اَللَّه سٜمْبِطِنَعٛنْ اٜ فُو سٜمْبٜ بَوْطٜ مَاکٛ تٜدُّطٜ، اٛ وَطَعٛنْ ندَرٛوطٛنْ اٜ سٜمْبٜ نغَمْ مبَاوٛنْ مُݧٛنْ ندٜرْ کٛو طُمٜ کٛ حٜٻِعٛنْ، اٛنْ نغٜتَّ ݧَاکٛ مٛ دٛوْ ندٜرْ بٜلْطُمْ ٻٜرْندٜ؞ کَنْکٛ وٛنِ غَرْتِرْطٛعٛنْ کٜوْتُٻٜ کٜٻَ غٜطَلْ ندٜرْ کٛ اٛ رٜسَنِ يِمْٻٜ مَاکٛ ندٜرْ لَامُ مَاکٛ طُمْ جَيْنغٛلْ؞ اٛ حِسْنِيعٜنْ دَغَ بَوْطٜ ݧِوْرٜ طٜ شٜيْطَنْ، اٛ نَتِّنِيعٜنْ ندٜرْ لَامُ ٻِطّٛ مَاکٛ مٛ اٛ يِطِ؞ لَاوٛلْ ٻِطّٛ اٛنْ اٛ رِمْطِنِيعٜنْ اٛ يَافَنِيعٜنْ حَکّٜ مٜىٰطٜنْ؞ نغِکُّ اَلْمَسِيحُ مٛ نغِعٜتٜنْ طُمْ غٛعٛ اٜ نغِکُّ اَللَّه مٛ يِعَتَاکٜ؞ اٜ مٛ طٛنْ کٛ اَللَّه تَغَ کٛو طُمٜ، اٛ مَوْطٛ دٛوْ کٛو طُمٜ کٛ تَغَا؞ بَرْکَ مَاکٛ اَللَّه تَغِ کٛو طُمٜ غٛنْطُمْ دٛوْ اٜ لٜيْ، کٛ يِعٜتٜىٰ اٜ کٛ يِعَتَاکٜ، حَوْتِ اٜ مَلَاعِکَعٜنْ، اٜ غِنِّ، اٜ کٛو طُمٜ غٛودُطُمْ لَامُ اٜ بَوْطٜ؞ کٛو طُمٜ کَنْکٛ تَغِطُمْ، ندٜنْ نغَمْ مَاکٛ کٛو طُمٜ تَغَا؞ اَلْمَسِيحُ اٜ طٛنْ کٛ کٛو طُمٜ تَغٜىٰ، بَرْکَ مَاکٛ کٛو طُمٜ اٜ يَحَ يٜىٰسٛ؞ اَلْمَسِيحُ وٛنِ حٛورٜ ٻَنْدُ، وَاتٛ تٛکُّٻٜمٛ؞ کَنْکٛ حٛکِّ ٻَنْدُ ندُنْ يٛنْکِ؞ کَنْکٛ وٛنِ اَرْتُطٛ اُمَّاکِ دَغَ مَيْدٜ، نغَمْ اٛ وَرْتَ مَوْطٛ دٛوْ کٛو طُمٜ؞ نغَمْ اَللَّه سُٻِي وَطَ فُو نغِکُّ مُوطُمْ اٜ بَوْطٜ مُوطُمْ ندٜرْ ٻِطّٛ مُوطُمْ؞ بَرْکَ ٻِطّٛ اٛنْ اَللَّه سِرْيٛوتِرِ حٛورٜ مُوطُمْ اٜ کٛو طُمٜ غٛنْطُمْ دٛوْ اٜ لٜيْ؞ اٛ سِرْيٛوتِرَ اٜ مَاجُمْ بَرْکَ پِيپَمْ ٻِطّٛ اٛنْ ندُفَاطَمْ دٛوْ غَافَانغَلْ؞ ندٜنّٛ اٛنْ نغٛطِّتَکٜ اَللَّه، اٛنْ وَݧْوَݧْٻٜ مَاکٛ نغَمْ ٻٜرْطٜ مٛوطٛنْ نغَݧِيمٛ ندٜنْ نغَمْ اٛنْ کُوَ کُوطٜ کَلُّطٜ؞ اَمَّا جٛونِ اَللَّه سِرْيٛوتِرِ اٜ مٛوطٛنْ بَرْکَ مَيْدٜ ٻِطّٛ مَاکٛ، نغَمْ اٛ وَرْتِرَعٛنْ شٜنِيٻٜ، لَٻّٜ ٻٜ نغَلَا کٛ طُمْ وُلّٛرْتٛوٻٜ يٜىٰسٛ مَاکٛ؞ اٛنْ نغَرْتَيْ نٛنْ تٛ نِي اٛنْ ݧَمْرِي يٜىٰسٛ اٜ حٛولَاکِ يٜىٰسُ، اٛنْ شٜمْبِطِي، اٛنْ دَرَکٜ بٛطُّمْ دٛوْ کَمُّندٜ ندٜ نغَطّٛنْ شَرٜلْ نغٜلْ نَنْطٛنْ حَبَرُ بٜلْطُمْ؞ حَبَرُ بٜلْطُمْ طُمْ وَعَجِنَنَامَ کٛو طُمٜ کٛ تَغَا غٛنْطُمْ ندٜرْ دُونِيَارُ؞ مِنْ بُلُسْ، مِ وَرْتِي مَشُّطٛ طُعُمْ حَبَرُ بٜلْطُمْ؞ جٛونِ اٜ مِ نَنَ بٜلْطُمْ ندٜرْ تٛرَّاجِ طِ نجَرَيْمِ نغَمْ مٛوطٛنْ؞ اٜ مِ يٛتِّنَ تٛرَّ کَ يٜىٰسُ سِرْيَنِييَمْ مِ يَرَ ندٜرْ ٻَنْدُ نغَمْ ٻٜيْدَارِ ٻَنْدُ مَاکٛ، وَاتٛ تٛکُّٻٜمٛ؞ مِ وَرْتِي مَشُّطٛ تٛکُّٻٜ يٜىٰسُ بَرْکَ کُوغَلْ نغَلْ اَللَّه حٛکِّيَمْ؞ کُوغَلْ نغَلْ وٛنِ مِ وَعَجِنَ فُو وٛلْدٜ مَاکٛ؞ وٛلْدٜ ندٜنْ وٛنِ سِرُّ طُمْ اٛ سُوطِ يِمْٻٜ دَغَ جَامَنُوجِ پَٻِّيطِ، اَمَّا جٛونِ اٛ وَنْغِنَنِيطُمْ يِمْٻٜ مَاکٛ؞ اَللَّه سُٻِي اَنْدِنَٻٜ بَرْکَ مَوْطُمْ غٛنْطُمْ ندٜرْ سِرُّ طُعُمْ طُمْ اٛ سِرْيَنِي يِمْٻٜ نَاع يَحُودَنْکٛعٜنْ؞ سِرُّ طُمْ وٛنِ اَلْمَسِيحُ اٜ جٛوطٛو ندٜرْ ٻٜرْطٜ مٛوطٛنْ، نٛنْ وَطَيْ تَبِّتِنٛنْ اٛنْ نجٛوطٛدٛتٛ اٜ مَاکٛ ندٜرْ تٜدُّنغَلْ مَاکٛ؞ اٜ مِنْ نغَعَجِنَ حَبَرُ اَلْمَسِيحُ، اٜ مِنْ مبَغِّنَ کٛو مٛيٜ نٜطّٛ، اٜ مِنْ اٜکِّتِنَ کٛو مٛيٜ ندٜرْ فُو فَامُ اَمِنْ، نغَمْ مِنْ نغَطَ کٛو مٛيٜ وَرْتَ کٜوْطٛ ندٜرْ تٛکُّکِ يٜىٰسُ يٜىٰسٛ اَللَّه؞ کَنْجُمْ وَطِ اٜ مِ حُوَ، اٜ مِ فِيدَ، اٜ مِ حُوتِرَ فُو سٜمْبٜ اَلْمَسِيحُ کُوٛوجُمْ اٜ بَوْطٜ ندٜرْ اَمْ؞ اٜ مِ يِطِ اَنْدٛنْ نٛ کُوِرْمِ نَاع سٜطَّ نغَمْ مٛوطٛنْ اٜ نغَمْ يِمْٻٜ لَوْدِيکِيَ، اٜ نغَمْ فُو يِمْٻٜ ٻٜ مٜىٰطَايِ يِيکِيَمْ غِتٜ اٜ غِتٜ؞ مِ وَطُ نٛنْ نغَمْ طُمْ سٜمْبِطِنَ ٻٜرْطٜ مَٻّٜ، ندٜنْ ٻٜ ٻٜيْدَ يِطِندِرْکِ، ٻٜ کٜٻَ فُو بَرْکَ کٜٻٜتٜىٰطُمْ لَاوٛلْ فَامُ کٜوْطُمْ، نغَمْ ٻٜ مبَاوَ اَنْدُکِ سِرُّ اَللَّه، وَاتٛ اَلْمَسِيحُ اٜ حٛورٜ مَاکٛ؞ کَنْکٛ تَنْ وٛنِ بَاوَيْطٛ حٛکُّکِٻٜ اَنْدَلْ کٜوْنغَلْ دٛوْ سِرُّ طُمْ؞ مِ وِعُعٛنْ طُعُمْ نغَمْ تٛع غٛطّٛ مَجِّنَعٛنْ اٜ بٜلْطُمْ حَالَ؞ کٛو ندٜ مِ وٛنْدَا اٜ مٛوطٛنْ ندٜرْ ٻَنْدُ، فُو اٜ نٛنْ اٜ مِ ݧُمَ دٛوْ مٛوطٛنْ کٛو ندٜيٜ؞ اٜ مِ نَنَ بٜلْطُمْ ندٜ نَنْمِ حَبَرُ اٛنْ جٛوطٛو نٛ حَانِ نجٛوطٛرٛوطٛنْ، اٜ نٛ شٜمْبِطِرْطٛنْ ندٜرْ حٛولَاکِ اَلْمَسِيحُ؞ ندٜ اٛنْ نجَٻِي يٜىٰسُ اَلْمَسِيحُ اٛ جٛومِرَاوٛ، نغَطٜىٰ کَ سُمْڤٛوتِرْکِ اٜ مَاکٛ؞ نٛ طَطِ لٜکِّ نغَطِرْتَ لٜکِّ کِنْ دَرٛو بٛطُّمْ، شٜمْبِطَ، نٛنْ اٛنٛنْ مَا، ندَرٜىٰ بٛطُّمْ، ٻٜيْدٜىٰ سٜمْبٜ ندٜرْ حٛولَاکِمٛ، نٛنْ نٛ طُمْ اٜکِّتِنِرِعٛنْ؞ نغَطٜىٰ کَ يٜتُّکِمٛ کٛو نغٜلٜ شَرٜلْ؞ تٛع اٛنْ اَلُ غٛطّٛ حُوتِرَ فَامُ دُونِيَارُ ندُعُ وَطَعٛنْ اَلٛنْ لَاوٛلْ غٛونغَ؞ اِرِ طُعُمْ فَامُ وَلَا کٛ طُمْ نَفِ طُمْ مَجِّنَيْعٛنْ؞ نَاع تٛ اَلْمَسِيحُ طُمْ پِوٛيِ، دَغَ تٛ يِمْٻٜ طُمْ پِوٛيِ اٜ غِنِّ غٛودُطِ بَوْطٜ ندٜرْ دُونِيَارُ؞ اَلْمَسِيحُ اٜ وٛودِ فُو نغِکُّ اٜ بَوْطٜ اَللَّه ندٜرْ ٻَنْدُ مَاکٛ؞ ندٜرْ سُمْڤٛوتِرْکِ اٜ مَاکٛ، جٛنْدٜ مٛوطٛنْ وَرْتِي کٜوْندٜ؞ کَنْکٛ وٛنِ مَوْطٛ دٛوْ کٛو نغٛلٜ غِنّٛلْ، اٜ مَلَاعِکَاجٛ، اٜ کٛو طُمٜ لَامُ غٛنْطُمْ دٛوْ اٜ لٜيْ؞ ندٜرْ سُمْڤٛوتِرْکِ مٛوطٛنْ اٜ اَلْمَسِيحُ اٛنْ نَادَامَ، نَاع اِرِ نَادُکِ کِ يِمْٻٜ نغَطَتَ، اَمَّا اِرِ نَادُکِ کِ اَلْمَسِيحُ وَطَتَ، وَاتٛ اٛ اِتِّي نغِکُّ مٛوطٛنْ غِطُّمْ وَطُکِ حَکّٜ؞ نغَمْ شَرٜلْ کٛ طُمْ وَطَنِعٛنْ بَڤْتِسْمَ، بٛ اٛنْ اُوِدَ اٜ اَلْمَسِيحُ، کَدِنْ بٛ اٛنْ اُمِّدِنَامَ اٜ مَاکٛ دَغَ مَيْدٜ؞ نٛنْ وَطِ نغَمْ اٛنْ کٛولَکٜ بَوْطٜ اَللَّه، اُمِّنْطٛمٛ دَغَ مَيْدٜ؞ ندٜنّٛ اٛنْ نَنْدِ اٜ مَيْٻٜ نغَمْ حَکّٜ طُمْ نغَطّٛنْ، کَدِنْ نغَمْ طُمْ اِتَّنَايِعٛنْ نغِکُّ مٛوطٛنْ غِطُّمْ وَطُکِ حَکّٜ؞ اَمَّا جٛونِ اَللَّه حٛکِّيعٛنْ يٛنْکِ ندٜرْ سُمْڤٛوتِرْکِ اٜ اَلْمَسِيحُ؞ اٛ يَافَنَکٜعٜنْ فُو حَکّٜ مٜىٰطٜنْ؞ اَللَّه وٛغِّي فُو کٛ وٛوطَا طُمْ نغَطّٜنْ بِنْدَاطُمْ طُمْ اُمْ نَنْغِرِعٜنْ؞ اٛ اِتِّيطُمْ دٛوْ مٜىٰطٜنْ ندٜ اَلْمَسِيحُ فِيَنَا کُوسَاجٜ دٛوْ غَافَانغَلْ؞ دٛوْ غَافَانغَلْ نغَلْ اٛ حٜٻِ جَالٛرْغَلْ دٛوْ غِنِّ اٜ فُو بَوْطٜ غٛنْطٜ دٛوْ اٜ لٜيْ، اٛ سٜمْتِنِيطُمْ اٜ نجَيْرِ؞ نغَمْ نٛنْ، تٛع اٛنْ اَلُ غٛطّٛ يٛوَنَعٛنْ کٛ وٛوطَا نغَمْ کٛ ݧَامٛتٛنْ اٜ کٛ نجَرٛتٛنْ، کٛو نغَمْ اٛنْ نغَطَايِ وٛنْغٛ حُمْتٛ دِينَ، کٛو حُمْتٛ دَرَاکِ لٜوْرُ، کٛو دٛوْ ݧَلْندٜ سِوْتَارٜ؞ فُو فِي طُعُمْ طُمْ طٛوْدِ فِي غَرَيْطُمْ طٛعٛ يٜىٰسٛ، غٛونغَ فُو فِي طُعُمْ وٛنِ اَلْمَسِيحُ؞ اٜ وٛودِ وٛٻّٜ يِطُٻٜ لٜسْنُکِ حٛورٜ کِ فٜوْرٜ اٜ مَوْنِنْکِ مَلَاعِکَعٜنْ؞ تٛع اٛنْ اَلُ ٻٜ نجَوَنَعٛنْ؞ اِرِ مَٻّٜ اٜ ٻٜ مبِعَ اٜ ٻٜ نغِعَ وَحَيُ؞ اٜ ٻٜ پٜفْتَ کٛعٜ مَٻّٜ اٜ مٜىٰرٜ، نغَمْ ݧُمٛوجِ مَٻّٜ طُمْ طِ دُونِيَارُ؞ اِرِ مَٻّٜ نجَادَکٜ ٻٜ شٜنْدِرِي اٜ اَلْمَسِيحُ؞ اَلْمَسِيحُ وٛنِ بٛ حٛورٜ ٻَنْدُ، وَاتٛ تٛکُّٻٜمٛ؞ جٛکّٛوطٜ اٜ رَطٛوجِ جٛغِي ٻَنْدُ ندُنْ، اٜ ندُ مَوْنَ نغَمْ اَللَّه اٜ مَوْنِنَنْدُ؞ اٛنْ مَيْدِي اٜ اَلْمَسِيحُ؞ جٛونِ اٛنْ نغَلَا لٜيْ لَامُ غِنِّ لَامٛتٛوطِ دُونِيَارُ؞ ندٜ طُمْ نٛنْ، نغَمْ طُمٜ نغَطٛتٛنْ جٛنْدٜ بٛ حَا جٛونِ دُونِيَارُ ندُعُ جٜيِعٛنْ؟ نغَمْ طُمٜ تٛکّٛتٛنْ دٛوکَاجِ دُونِيَارُ بِيطِ، «تَاع جٛغَ طُعُمْ،» «تَاع ݧَامُ طُمْ تٛنْ،» «تَاع مٜىٰمُ طُمْ طٛنْ؟» اِرِ طِعِ دٛوکَاجِ طِ دٛوکَاجِ فِي مٜىٰرٜ طِ نغَرْتَيْ مٜىٰرٜ غَطَ طِ کُوتِرَامَ، نغَمْ طِ دٛوکَاجِ يِمْٻٜ تَنْ اٜ اٜکِّتِنٛلْ مَٻّٜ؞ اٜ طِ نغَطَ بٛ اٜ طِ کٛلَّ نٛ حَانِ نٜطّٛ جٛوطٛرٛو، نغَمْ اٜ طِ اٜکِّتِنَ يِمْٻٜ نغَطَ کٛ سَطِ نغَمْ حٛلُّکِ ٻٜ تٛکُّٻٜ اَللَّه؞ اٜ ٻٜ لٜيْنَ کٛعٜ مَٻّٜ لٜيْنُکِ فٜوْرٜ، اٜ ٻٜ تٛرَّ ٻَلِّ مَٻّٜ نغَمْ اٜ ٻٜ ݧُمَ طُمْ وٜلْنَنَيْ اَللَّه ٻٜرْندٜ؞ اَمَّا طُمْ وَلَّتَاٻٜ ٻٜ کٜٻَ جَالٛرْغَلْ دٛوْ سُونٛوجِ مَٻّٜ؞ اٛنْ اُمِّدِنَامَ اٜ اَلْمَسِيحُ دَغَ مَيْدٜ؞ نغَمْ نٛنْ نغَطٜىٰ ٻٜرْطٜ مٛوطٛنْ دٛوْ فِي غٛنْطُمْ تٛنْ دٛوْ تٛ اَلْمَسِيحُ جٛوطِي دٛوْ جٛوطٛرْغَلْ لَامُ مُوطُمْ تٛ جُنْغٛ ݧَامٛ اَللَّه؞ نغَطٜىٰ کَ ݧُمُکِ دٛوْ کٛ وٛنِ اٜ دٛوْ، نَاع دٛوْ فِي غٛنْطُمْ ندٜرْ دُونِيَارُ ندُعُ، نغَمْ اٛنْ نغَرْتِي بٛ مَيْٻٜ، ندٜنْ جٛونِ اٛنْ نغٛودِ يٛنْکِ کٜسِ کِ غٛطّٛ وَاوَتَا يِيکِ اِرِ يٛنْکِ کِ اَلْمَسِيحُ وٛودِ غٛنْدُطٛ اٜ اَللَّه؞ يٛنْکِ مٛوطٛنْ کِ غٛونغَ وٛنِ اَلْمَسِيحُ؞ تٛ اٛ سٛعّٛيَکٜ دُونِيَارُ ندُعُ، اٛنٛنْ مَا، اٛنْ نغٛنْدَيْ اٜ مَاکٛ ندٜرْ تٜدُّنغَلْ مَاکٛ؞ نغَمْ نٛنْ، شٜنْدِرٜىٰ اٜ سُونٛوجِ دُونِيَارُ غٛنْطِ ندٜرْ مٛوطٛنْ، وَاتٛ نجٜىٰنُ، اٜ کُوطٜ نٜفْنِيطٜ، اٜ تٛکِّرَنْکِ کٛ ٻَنْدُ يِطِ، اٜ سُونٛوجِ کَلُّطِ، اٜ يِطُکِ کٛ غٛطّٛ جٜيِ؞ ﴿نغَمْ يِطُکِ کٛ غٛطّٛ جٜيِ طُمْ غٛعٛ اٜ مَوْنِنْکِ غُنْکِيجِ﴾؞ نغَمْ وَطُکِ کُوطٜ طٜعٜ مٛنّٜرٜ اَللَّه يَنَيْ دٛوْ فُو غَݧُٻٜ نغَطَ کٛ اٛ وِعِ؞ ندٜنّٛ اٛنْ نغَطَ اِرِ کُوطٜ طٜعٜ ندٜرْ جٛنْدٜ ندٜ نغَطَيْنٛوطٛنْ؞ اَمَّا جٛونِ، شٜنْدِرٛنْ اٜ فُو اِرِ کُوطٜ طٜعٜ، وَاتٛ مٛنّٜرٜ، اٜ وَݧُکِ يِمْٻٜ، اٜ کُلّٜ، ندٜنْ تٛع اٛنْ اَلُ بٛلِيطٜ کَلُّطٜ مبُرْتٛو دَغَ حٛنْدُکٛ مٛوطٛنْ؞ تٛع اٛنْ ڤٜوِنْدِرْ، نغَمْ اٛنْ ٻٛرْتَکٜ نغِکُّ مٛوطٛنْ طُمْ ندٜنّٛ اٜ کُوطٜ مَاجُمْ؞ جٛونِ اٛنْ ٻٛرْنَکٜ نغِکُّ کٜسُمْ؞ اَللَّه تَغُطٛ نغِکُّ طُمْ، اٜ مٛ مٛعِّنَطُمْ طُمْ وَرْتَ اِرِ نغِکُّ مَاکٛ، نغَمْ اَنْدٛنْمٛ بٛطُّمْ؞ کَنْجُمْ وَطِ جٛونِ وَلَا فٜىٰرٛوتِرٛلْ حَکُّندٜ يَحُودَنْکٜىٰجٛ اٜ نٜطّٛ نَاع يَحُودَنْکٜىٰجٛ، اٜ حَکُّندٜ نَادَاطٛ اٜ مٛ نَادَاکَ، اٜ لَدّٜىٰجٛ، اٜ کٛطٛ، اٜ حَکُّندٜ مَشُّطٛ اٜ نَاع مَشُّطٛ؞ اَمَّا اَلْمَسِيحُ وٛنِ کٛو طُمٜ، کَنْکٛ وٛنِ ندٜرْ ٻٜرْطٜ مٜىٰطٜنْ اٜنْ فُو؞ اٛنٛنْ اٛنْ يِمْٻٜ ٻٜ اَللَّه سُٻِ، اٛنْ شٜنِيٻٜ ٻٜ اٛ يِطِ نَاع سٜطَّ؞ نغَمْ نٛنْ، نغَرْتٜىٰ غٛودُٻٜ يُرْمٜىٰندٜ اٜ يِدّٜ لٜيْنٛوٻٜ کٛعٜ، غٛودُٻٜ حَکِّيلٛ اٜ مُݧَلْ؞ مُݧِندِرٜىٰ؞ تٛ غٛطّٛ وَطَنِي غٛطّٛ کٛ حَانَا، ٻٜ نجَافٛوتِرَ؞ نٛنْ نٛ جٛومِرَاوٛ يَافٛرَنِيعٛنْ، اٛنٛنْ مَا سٜيْ نجَافٛوتِرٛنْ؞ کٛ ٻُرِ طُعُمْ فُو وٛنِ نغِطِنْدِرٛنْ، نغَمْ يِدّٜ حَوْتِي کٛعٜ مٜىٰطٜنْ نٛ حَانِ؞ جَمْ پِوٛيْطُمْ تٛ اَلْمَسِيحُ وَلَّعٛنْ شُٻٛنْ کٛ حَانِ نغَطٛنْ، ندٜ اَللَّه نٛدِّيعٛنْ نغَمْ نغَرْتٛنْ بٛ ٻَنْدُ غٛعٛ نجٛوطٛدٛوطٛنْ جَمْ؞ نغَرْتٜىٰ غٜتّٛوٻٜ اَللَّه کٛو ندٜيٜ؞ اَلٜىٰ بٛلِيطٜ اَلْمَسِيحُ نجٛوطٛو ندٜرْ ٻٜرْطٜ مٛوطٛنْ نَاع سٜطَّ؞ اٜکِّتِندِرٜىٰ، وَغِّندِرٜىٰ ندٜرْ فُو فَامُ؞ نغِمٜىٰ غِمِ جَبُورَ، اٜ غِمِ مَنْتُکِ جٛومِرَاوٛ، اٜ غِمِ طِ اَللَّه حٛکِّعٛنْ ندٜرْ ٻٜرْطٜ، اٛنْ نغٜتَّمٛ ندٜرْ ٻٜرْطٜ مٛوطٛنْ؞ ندٜرْ کٛو طُمٜ طُمْ نغَطٛتٛنْ، ندٜرْ بٛلِيطٜ مٛوطٛنْ کٛو ندٜرْ کُوطٜ مٛوطٛنْ، نغَطٜىٰطُمْ ندٜرْ اِنْدٜ يٜىٰسُ جٛومِرَاوٛ، اٛنْ نغٜتَّ اَللَّه ݧَاکٛ مٛ دٛوْ لَاوٛلْ مَاکٛ؞ اٛنٛنْ رٜوْٻٜ تٜىٰغَلْ، کٛکّٜىٰ وٛرْٻٜ مٛوطٛنْ مَنْغُ نٛنْ نٛ حَانِ تٛکُّٻٜ جٛومِرَاوٛ نغَطَ؞ وٛرْٻٜ، نغِطٜىٰ رٜوْٻٜ مٛوطٛنْ، تٛع اٛنْ کٛلُّٻٜ نغِکُّ شَاتُطُمْ؞ سُکَاٻٜ، کٛکّٜىٰ دَݧٛوٻٜ مٛوطٛنْ مَنْغُ ندٜرْ کٛو طُمٜ، نغَمْ نٛنْ اٜ وٜلْنَنَ جٛومِرَاوٛ ٻٜرْندٜ؞ اٛنٛنْ غٛودُٻٜ ٻِٻّٜ، تٛع اٛنْ کَلَّنْ ٻِٻّٜ مٛوطٛنْ نغَمْ نٛنْ وَاوَيْ وَطَ ٻٜ اَلَ وَطُکِ کٛ حَانِ؞ مَشُّٻٜ، کٛکّٜىٰ جٜيْٻٜعٛنْ مَنْغُ ندٜرْ کٛو طُمٜ؞ کٛکّٜىٰٻٜ مَنْغُ نَاع اٜ شَرٜلْ نغٜلْ ٻٜ نغِعَتَعٛنْ تَنْ کٛو بٛو نغَمْ ٻٜ ٻٜيْدَ يِطُکِعٛنْ، اَمَّا نغَطٜىٰطُمْ اٜ ٻٜرْندٜ غٛعٛ ندٜرْ کُلٛلْ جٛومِرَاوٛ؞ ندٜرْ کٛو طُمٜ طُمْ نغَطٛتٛنْ، نغَطٜىٰطُمْ اٜ ٻٜرْطٜ مٛوطٛنْ فُو بٛ جٛومِرَاوٛ نغَطَنْتٛنْطُمْ، نَاع يِمْٻٜ؞ نغَمْ اٛنْ اَنْدِ اٛنْ کٜٻَيْ مبَرْجَارِ دَغَ تٛ جٛومِرَاوٛ؞ اَلْمَسِيحُ وٛنِ جٛومِرَاوٛ مٛ کُوَنْتٛنْ؞ کٛو مٛيٜ غَطٛووٛ کٛ وٛوطَا طُمْ وَاتَنَيْمٛ کٛ حَانَنِمٛ، نغَمْ اَللَّه حٛلَّتَا فٜىٰرٛوتِرٛلْ؞ اٛنٛنْ غٛودُٻٜ مَشُّٻٜ، نجٛغٜىٰ مَشُّٻٜ مٛوطٛنْ بٛطُّمْ، کٛکّٜىٰٻٜ کٛ حَانِ ٻٜ کٜٻَ، نغَمْ اٛنْ اَنْدِ اٛنٛنْ مَا اٛنْ نغٛودِ جٜيْطٛعٛنْ تٛنْ دٛوْ؞ نغَطٜىٰ کَ وَطُکِ دٛعَارٜ، نغَطٜىٰ حَکِّيلٛ مٛوطٛنْ دٛوْ دٛعَارٜ ندٜنْ، اٛنْ نغٜتَّ اَللَّه؞ نٛنْ مَا نغَطَنٜىٰمِنْ دٛعَارٜ نغَمْ اَللَّه مَٻِّتَنَمِنْ لَاوٛلْ مِنْ نغَعَجِنَ سِرُّ مَاکٛ، وَاتٛ حَبَرُ اَلْمَسِيحُ؞ دٛوْ مَاجُمْ طُمْ سُرِيَمْ؞ نغَطَنٜىٰيَمْ دٛعَارٜ نغَمْ مِ اَنْدِنَطُمْ نٛ حَانِ، نٛ کٛو مٛيٜ فَامِرْتَطُمْ بٛطُّمْ؞ ڤَامٜىٰ اِرِ نغِکُّ طُمْ نغَطَنْتٛنْ ٻٜ تٛکَّايِ يٜىٰسُ؛ کُوتِرٜىٰ کٛو نغٜلٜ شَرٜلْ نغٜلْ کَوْرُطٛنْ اٜ مَٻّٜ بٛطُّمْ؞ بٛلِيطٜ مٛوطٛنْ کٛو ندٜيٜ طٜ نغَرْتَ بٜلْطٜ نَنْکِ، ڤٛوطٛوجٜ حَکِّيلٛ يِمْٻٜ، نغَمْ اَنْدٛنْ نٛ حَانِ نٛوتٛرَنٛوطٛنْ کٛو مٛيٜ؞ تِيکِکُسْ حٛکَّيْعٛنْ فُو حَبَرُ اَمْ؞ اٛ تٛکُّطٛ يٜىٰسُ مٛ مِنْ نغِطِ، کُوٛووٛ مٛ غٛونغَ، مٛ مِنْ کُودَتَ کُوغَلْ جٛومِرَاوٛ؞ کَنْجُمْ وَطِ لِلٛيْمٛومِ تٛ مٛوطٛنْ، نغَمْ اٛ حٛکَّعٛنْ حَبَرُ نٛ مِنْ غٛنْتِندِرِ، اٛ سٜمْبِطِنَ ٻٜرْطٜ مٛوطٛنْ؞ اٜ مٛ يَادَ اٜ اٛنِسِمُسْ تٛکُّطٛ يٜىٰسُ اٜ غٛونغَ، غِطَاطٛ، غٛنْطٛ ندٜرْ کَوْتَلْ مٛوطٛنْ؞ ٻٜ کٛکَّيْعٛنْ حَبَرُ کٛو طُمٜ کٛ وَطَتَ طٛعٛ؞ اَرِسْتَرْکُسْ غٛنْدُطٛ اٜ اَمْ ندٜرْ سُودُ شُرَلْ اٜ حٛوْنَعٛنْ، نٛنْ مَا مَرْکُسْ بَنْدِرَاوٛ بَرْنَبَ؞ ﴿اٛنْ نجَادَکٜ اٛنْ مبِعَامَ نجَٻّٛوطٛنْمٛ بٛطُّمْ تٛ اٛ وَرِي تٛ مٛوطٛنْ؞﴾ جٛوشُوَ بِعٜتٜىٰطٛ جُسْتُسْ اٜ حٛوْنَعٛنْ کَنُمْ مَا؞ ندٜرْ يِمْٻٜ ٻٜ کُودَيْمِ نغَمْ لَامُ اَللَّه، کَمْٻٜ تَنْ نغٛنِ يَحُودَنْکٛعٜنْ تٛکُّٻٜ يٜىٰسُ طٛعٛ؞ ٻٜ مبَلِّييَمْ نَاع سٜطَّ؞ اَبَافَرَسْ اٜ حٛوْنَعٛنْ، کَنْکٛ مَا اٜ مٛ ندٜرْ کَوْتَلْ مٛوطٛنْ، اٛ مَشُّطٛ يٜىٰسُ اَلْمَسِيحُ؞ کٛو ندٜيٜ اٜ مٛ تٛرٛو اَللَّه سٜمْبِطِنَعٛنْ، نغَرْتٛنْ تٛکُّٻٜ يٜىٰسُ کٜىٰوُٻٜ، غَطٛوٻٜ کٛ اَللَّه يِطِ ٻٜ نغَلَا سٜکٛ؞ مِ وَاوَيْ مِ حٛکَّ شٜيْدَ اٛ حُوِي نَاع سٜطَّ نغَمْ مٛوطٛنْ اٜ نغَمْ يِمْٻٜ لَوْدِيکِيَ اٜ يِمْٻٜ حِرَفٛلِسْ؞ لُکَ ݧَوْندٛووٛ مٛ مِنْ نغِطِ اٜ دِمَسْ اٜ ٻٜ کٛوْنَعٛنْ؞ کٛوْنَنٜىٰمِنْ تٛکُّٻٜ يٜىٰسُ غٛنْٻٜ غَرِيرِ لَوْدِيکِيَ اٜ بِعٜتٜىٰطٛ نِمْفَ اٜ تٛکُّٻٜ يٜىٰسُ کَوْرِتٛوٻٜ تٛ وُرٛ مَاکٛ؞ غَطَ طُمْ جَنْغَنِيعٛنْ طٜرٜوٛلْ نغٛعٛلْ، نٛنْ مَا تَبِّتِنٜىٰ طُمْ جَنْغَنِينغٛلْ تٛکُّٻٜ يٜىٰسُ غٛنْٻٜ لَوْدِيکِيَ؞ اٛنٛنْ مَا، نجَنْغٜىٰ طٜرٜوٛلْ نغٛلْ تٛکُّٻٜ يٜىٰسُ غٛنْٻٜ لَوْدِيکِيَ لِلْدٛنٛيْتَعٛنْ؞ مبِعٜىٰ اَرْکِبُسْ، «تَبِّتِنْ اَ يٛتِّنِي کُوغَلْ نغَلْ جٛومِرَاوٛ حٛکُّمَا؞» مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ تٛع اٛنْ نغٜجُّتُ اٜ مِ طٛنْ حَٻِّرَا ٻٛغِّ نجَمْندِ ندٜرْ سُودُ شُرَلْ؞ اَللَّه بَرْکِطِنَعٛنْ؞ مِنْ بُلُسْ اٜ سِيلَ اٜ تِمٛوتِ وِنْدِ طٜرٜوٛلْ نغٛعٛلْ؞ مِنْ مبِنْدَنْغٛلْ تٛکُّٻٜ يٜىٰسُ وٛنْٻٜ غَرِيرِ تَسَلٛونِکَ ٻٜ اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ جٜيِ؞ اَللَّه بَرْکِطِنَعٛنْ حٛکَّعٛنْ جَمْ؞ کٛو ندٜيٜ اٜ مِنْ نغٜتَّ اَللَّه نغَمْ مٛوطٛنْ اٛنْ فُو، اٜ مِنْ نغَطَنَعٛنْ دٛعَارٜ؞ يٜىٰسٛ اَللَّه مٜىٰطٜنْ ݧَاکٛ مٜىٰطٜنْ مٛ دٛوْ، اٜ مِنْ ݧُمَ دٛوْ کُوطٜ مٛوطٛنْ طٜ حٛولَارٜ، اٜ نٛ يِدّٜ ندٜ نغٛودُطٛنْ وَطَتَعٛنْ اٛنْ کُوَ نَاع سٜطَّ، اٜ نٛ مُݧِرْتٛنْ ندٜرْ تٛرَّ نغَمْ کَمُّندٜ مٛوطٛنْ دٛوْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ بَنْدِرَاٻٜ ٻٜ اَللَّه يِطِ، اٜ مِنْ اَنْدِ اَللَّه سُٻِيعٛنْ؞ نغَمْ حَبَرُ بٜلْطُمْ طُمْ مِنْ نغَدَّنِعٛنْ نَاع طُمْ بٛلِيطٜ تَنْ، اَمَّا اٜ طُمْ وٛودِ بَوْطٜ، اٜ رُوحُ اَللَّه، اٜ تَبِّتِنْکِ غٛونغَ مَاجُمْ؞ اٛنْ اَنْدِ اِرِ جٛنْدٜ ندٜ مِنْ نغَطِ حَکُّندٜ مٛوطٛنْ نغَمْ طُمْ نَفَنَعٛنْ؞ اٛنْ نغَرْتِي اٜکِّتٛتٛوٻٜ تٛ اَمِنْ اٜ تٛ جٛومِرَاوٛ، نغَمْ اٛنْ نجَٻِي وٛلْدٜ اَللَّه ندٜرْ وٜلْوٜلٛ نغٛ رُوحُ اَللَّه حٛکَّتَ، کٛو ندٜ اٛنْ نجَرِي تٛرَّ نَاع سٜطَّ؞ نٛنْ نغَرْتِرْطٛنْ کٛ فُو تٛکُّٻٜ يٜىٰسُ وٛنْٻٜ لٜيْدِ مَکِدٛونِيَ اٜ اَکَايَ اٜکِّتٛتٛو؞ نغَمْ دَغَ تٛ مٛوطٛنْ وٛلْدٜ جٛومِرَاوٛ حٜٻِ سَنْکِتَاکِ نَاع اٜ لٜيْدِ مَکِدٛونِيَ اٜ اَکَايَ تَنْ، اَمَّا کٛو تٛيٜ طُمْ اَنْدِي حٛولَارٜ مٛوطٛنْ دٛوْ اَللَّه؞ نغَمْ نٛنْ نَاع سٜيْ تٛ مِنْ مبِعِي غٛطُّمْ دٛوْ مَاجُمْ؞ نغَمْ کَمْٻٜ اٜ کٛعٜ مَٻّٜ کٛکَّتَ حَبَرُ نٛ نجَٻّٛرِيطٛنْمِنْ کٛ مِنْ نغَرِ تٛ مٛوطٛنْ؞ ٻٜ کٛکِّيمِنْ حَبَرُ نٛ اَلِرْطٛنْ تٛکُّکِ غُنْکِيجِ نغَرْتُطٛنْ تٛ اَللَّه، نغَمْ کُوَنٛنْ اَللَّه مٛ يٛنْکِ مٛ غٛونغَ، ندٜنْ کٜطٛوطٛنْ وَرْتٛيْکِ ٻِطّٛ مَاکٛ دَغَ دٛوْ، مٛ اٛ اُمِّنِ دَغَ مَيْدٜ، وَاتٛ يٜىٰسُ کِسْنَيْطٛعٜنْ دَغَ مٛنّٜرٜ اَللَّه غَرَيْندٜ؞ بَنْدِرَاٻٜ، اٛنٛنْ اٜ کٛعٜ مٛوطٛنْ اٛنْ اَنْدِ غَرٛلْ اَمِنْ تٛ مٛوطٛنْ نَاع اٜ مٜىٰرٜ نغٛلْ وٛنِ؞ اَمَّا کٛو ندٜ ندٜنّٛ مِنْ نجَرِي تٛرَّ اٜ سٜمْتِنٜىٰکِ اٜ فِلِبِ، نٛنْ نٛ اَنْدُطٛنْ، اٜ بَلَّلْ اَللَّه مٜىٰطٜنْ مِنْ کٛکِّيعٛنْ حَبَرُ بٜلْطُمْ پِوٛيْطُمْ تٛ مَاکٛ کُلٛلْ وَلَا، کٛو ندٜ يِمْٻٜ نغَݧِيمِنْ نَاع سٜطَّ؞ شَرٜلْ نغٜلْ مِنْ تٛرِيعٛنْ نجَٻٛنْ حَبَرُ بٜلْطُمْ، مِنْ کُوتِرَايِ فٜوْرٜ، وَلَا حَلّٜىٰندٜ ندٜرْ ٻٜرْطٜ اَمِنْ، مِنْ پٛيْرَايِعٛنْ؞ اَمَّا نٛنْ نٛ اَللَّه حٛولٛرِيمِنْ حٛکِّمِنْ کُوغَلْ وَعَجِنْکِ حَبَرُ بٜلْطُمْ، نٛنْ مِنْ نغَعَجِنِرْتَطُمْ، نَاع نغَمْ مِنْ مبٜلْنَنَ يِمْٻٜ ٻٜرْطٜ، اَمَّا نغَمْ مِنْ مبٜلْنَنَ اَللَّه ٻٜرْندٜ کَنْکٛ ڤٛوندٛووٛ ٻٜرْطٜ اَمِنْ؞ اٛنْ اَنْدِ مِنْ مٜىٰطَايِ مٜتَنْکِعٛنْ مٜتٛ بٜلْطُمْ حٛنْدُکٛ، نٛنْ مَا مِنْ نغَلَا سُونٛ غٛطُّمْ نغٛ بٛلِيطٜ اَمِنْ سُوطَتَ، اَللَّه وٛنِ شٜيْدُوجٛ اَمِنْ؞ مِنْ طَٻِّتَايِ مَنْغُ تٛ يِمْٻٜ، کٛو تٛ مٛوطٛنْ، کٛو تٛ وٛٻّٜ، کٛو ندٜ مِنْ مبَاوَيْ مِنْ مبِعَعٛنْ دٛولٜ نغَطَنٛنْمِنْ غٛطُّمْ نغَمْ مِنْ لِلَاٻٜ اَلْمَسِيحُ؞ اَمَّا اٜ مِنْ جٛغٛرِيعٛنْ سٜىٰسٜ‑سٜىٰسٜ نٛ مَدُوجٛ جٛغٛرْتٛو ٻِنْغٜلْ مُوطُمْ؞ نغَمْ يِدّٜ ندٜ مِنْ نغِطِعٛنْ حَا اٜ مِنْ شِرْيِي نَاع مِنْ کٛکَّعٛنْ حَبَرُ بٜلْطُمْ طُمْ اَللَّه تَنْ، اَمَّا فُو اٜ يٛنْکِيجِ اَمِنْ، نغَمْ اٛنْ نغَرْتِي ٻٜ مِنْ نغِطِ نَاع سٜطَّ؞ بَنْدِرَاٻٜ، اٛنْ نغٜجِّتَايِ کُوطٜ طٜ مِنْ کُوِ نَاع سٜطَّ؞ مِنْ کُوِي جٜمَّ اٜ ݧَلَوْمَ نغَمْ تٛع مِنْ نجٛوَنَ غٛطّٛ ندٜرْ مٛوطٛنْ وٛنْغَلْ تٜدّٛرَلْ شَرٜلْ کٛ مِنْ نغَعَجِنَنْتَعٛنْ حَبَرُ بٜلْطُمْ پِوٛيْطُمْ تٛ اَللَّه؞ اٛنٛنْ اٛنْ شٜيْدُعٜنْ، اَللَّه مَا اٛ شٜيْدُوجٛ دٛوْ نٛ مِنْ نجٛوطٛرِنٛو جٛنْدٜ شٜنِيندٜ اٜ اَادِلَاکُ اٜ جٛنْدٜ ندٜ وَلَا غٛطُّمْ کٛ وٛوطَا ندٜرْ مٛوطٛنْ، اٛنٛنْ کٛولِيٻٜ يٜىٰسُ؞ نغَمْ اٛنْ اَنْدِ نٛ ݧَاکٛ جٛغٛرِي ٻِٻّٜ مُوطُمْ، نٛنْ مِنْ جٛغٛرِيعٛنْ؞ مِنْ مبَغِّنِيعٛنْ، مِنْ شٜمْبِطِنِيعٛنْ، مِنْ مبِعِيعٛنْ دٛولٜ نغَطٛنْ جٛنْدٜ بٜلْنَنَيْندٜ اَللَّه ٻٜرْندٜ نٛدُّطٛعٛنْ ندٜرْ لَامُ مَاکٛ اٜ تٜدُّنغَلْ مَاکٛ؞ نٛنْ مَا کٛو ندٜيٜ اٜ مِنْ نغٜتَّ اَللَّه، نغَمْ شَرٜلْ نغٜلْ نجَٻُطٛنْ وٛلْدٜ اَللَّه ندٜ نَنْطٛنْ تٛ اَمِنْ، اٛنْ نجَٻَايِندٜ بٛ وٛلْدٜ نٜطّٛ، اَمَّا اٛنْ نجَٻِيندٜ ندٜ وٛلْدٜ اَللَّه، نٛنْ نٛ ندٜ وٛنْتِندِرِ؞ اٜ ندٜ حُوَ ندٜرْ ٻٜرْطٜ مٛوطٛنْ، اٛنٛنْ کٛولِيٻٜ اَللَّه؞ بَنْدِرَاٻٜ، اٛنْ نغَرْتِي اٜکِّتٛتٛوٻٜ جٛنْدٜ تٛکُّٻٜ اَللَّه وٛنْٻٜ لٜيْدِ يَحُودِيَ ٻٜ يٜىٰسُ اَلْمَسِيحُ؞ اٛنْ نجَرِي تٛرَّ تٛ يِمْٻٜ لٜيْدِ مٛوطٛنْ نٛنْ نٛ کَمْٻٜ مَا ٻٜ نجَرِرِ تٛرَّ تٛ جُوطٜ يَحُودَنْکٛعٜنْ؞ يَحُودَنْکٛعٜنْ ٻٜنْ مبَرِ يٜىٰسُ جٛومِرَاوٛ اٜ اَنَّبٛعٜنْ، ندٜنْ ٻٜ ندِيوِمِنْ؞ اٜ ٻٜ نغَطَ کٛ اَللَّه يِطَا، اٜ ٻٜ نغَݧَ کٛو مٛيٜ! اٜ ٻٜ کَطَمِنْ وَعَجِنَنْکِ يِمْٻٜ نَاع يَحُودَنْکٛعٜنْ نغَمْ تٛع يِمْٻٜ ٻٜنْ کٜٻَ کِسْندَمْ؞ نٛنْ اٜ وَطَ کٛو ندٜيٜ اٜ ٻٜ کٜبِّنَ ڤٛوندِرْطُمْ حَکّٜ مَٻّٜ؞ اَمَّا مٛنّٜرٜ اَللَّه يَادَکٜ جِڤّٛنٛيَکٜٻٜ؞ بَنْدِرَاٻٜ، طُمْ سٜنْدِيعٜنْ نغَمْ شَرٜلْ سٜطَّ ندٜرْ ٻَنْدُ، اَمَّا مِنْ اَلَايِ ݧُمُکِ دٛوْ مٛوطٛنْ؞ مِنْ کَاٻِي يِيکِعٛنْ؛ نغَمْ نٛنْ مِنْ نغَطِي کٛ مِنْ مبَاوَتَ وَطُکِ مِنْ نغِعَعٛنْ غِتٜ اٜ غِتٜ؞ مِنْ نغِطِي وَرْکِ تٛ مٛوطٛنْ؞ غٛونغَ، مِنْ بُلُسْ، مِ يِطِي مِ وَرَ نَاع ندٜ غٛعٛ نَاع ندٜ طِطِ، اَمَّا شٜيْطَنْ حَطِيمِنْ؞ دٛوْ ٻٜيٜ مِنْ نغَطِ ٻٜرْطٜ اَمِنْ؟ ٻٜيٜ مبٜلْنَنْتَمِنْ ٻٜرْطٜ؟ ٻٜيٜ نغٛنِ ٻٜ مِنْ مَنْتٛرْتٛو يٜىٰسٛ جٛومِرَاوٛ مٜىٰطٜنْ يٜىٰسُ ݧَلْندٜ وَرْتٛيْکِ مَاکٛ؟ نَاع طُمْ اٛنٛنْ؟ غٛونغَ، طُمْ اٛنٛنْ مِنْ مَنْتٛرْتٛو؞ اٛنٛنْ نغٛنِ بٜلْطُمْ ٻٜرْطٜ اَمِنْ؞ نغَمْ نٛنْ ندٜ مِنْ مبَاوَايِ مُݧُکِ، سٜيْ مِنْ نغِعِ طُمْ ٻُرِي وٛوطُکِ طُمْ اَلَمِنْ اٜ اَتِنَ، مِنٛنْ تَنْ؞ مِنْ لِلٛيِ بَنْدِرَاوٛ اَمِنْ تِمٛوتِ تٛ مٛوطٛنْ، مٛ مِنْ کُودَتَ، اٜ مٛ حُوَنَ اَللَّه ندٜرْ حٛکُّکِ حَبَرُ بٜلْطُمْ طُمْ اَلْمَسِيحُ؞ مِنْ لِلُمٛ نغَمْ اٛ تَبِّتِنَ حٛولَارٜ مٛوطٛنْ اٛ سٜمْبِطِنَعٛنْ، نغَمْ تٛع تٛرَّ کَ نجَرْطٛنْ وَطَ غٛطّٛ مٛوطٛنْ يٜوْرَ اَلَ حٛولَاکِ يٜىٰسُ؞ اٛنٛنْ اٜ کٛعٜ مٛوطٛنْ اٛنْ اَنْدِ دٛولٜ نجَرٜنْ تٛرَّ اِرِ کَعَ؞ نغَمْ شَرٜلْ کٛ مِنْ نغٛنْدُنٛو اٜ مٛوطٛنْ، مِنْ نغَطِي کَ وِيکِعٛنْ دَغَ اِلَا اٜنْ نجَرَيْ تٛرَّ؞ طُمْ بٛو وَطِي نٛنْ، نٛ اَنْدُطٛنْ؞ نغَمْ نٛنْ، ندٜ تَمْڤُمِ مُݧُکِ، مِ لِلٛيِي نغَمْ مِ نَنَ حَبَرُ حٛولَارٜ مٛوطٛنْ؞ اٜ مِ حُلَ کٛو شٜيْطَنْ مَجِّنِيعٛنْ، کُوغَلْ اَمِنْ وَرْتِي مٜىٰرٜ؞ اَمَّا جٛونِ تِمٛوتِ وَرْتِي دَغَ تٛ مٛوطٛنْ، اٛ حٛکِّيمِنْ حَبَرُ بٛطُّمْ دٛوْ حٛولَارٜ مٛوطٛنْ اٜ يِدّٜ ندٜ نغٛودُطٛنْ؞ اٛ وِعِيمِنْ کٛو ندٜيٜ اٛنْ ݧُمَ ݧُمٛلْ بٛنْغٛلْ دٛوْ اَمِنْ، ندٜنْ اٛنْ نغِطِ يِيکِمِنْ نٛنْ نٛ مِنْ نغِطِرِ يِيکِعٛنْ؞ نغَمْ نٛنْ، بَنْدِرَاٻٜ، ندٜرْ فُو وَنَّارٜ اٜ تٛرَّ طُمْ مِنْ نجَرِ، اٛنْ ڤٜوْنَنِيمِنْ ٻٜرْطٜ نغَمْ حٛولَارٜ مٛوطٛنْ؞ جٛونِ اٜ مِنْ نغٛودِ يٛنْکِ غٛونغَ، تٛ اٛنْ ندَرَکٜ اٜ سٜمْبٜ ندٜرْ تٛکُّکِ جٛومِرَاوٛ؞ اِرِ ندٜيٜ يٜتّٛورٜ مِنْ نغٜتَّتَ اَللَّه نغَمْ مٛوطٛنْ؟ اٜ مِنْ نغٜتَّمٛ نغَمْ بٜلْطُمْ ٻٜرْندٜ طُمْ مِنْ نَنَتَ يٜىٰسٛ مَاکٛ نغَمْ مٛوطٛنْ؞ جٜمَّ اٜ ݧَلَوْمَ اٜ مِنْ نغَطَ دٛعَارٜ نَاع سٜطَّ نغَمْ مِنْ ڤُطِّتَ مِنْ نغِعَعٛنْ غِتٜ اٜ غِتٜ، مِنْ کٜبِّتِنَ کٛ ندُلُّطٛنْ ندٜرْ حٛولَارٜ مٛوطٛنْ؞ اَللَّه ݧَاکٛ مٜىٰطٜنْ اٜ حٛورٜ مُوطُمْ اٜ جٛومِرَاوٛ مٜىٰطٜنْ يٜىٰسُ سِرْيَنٛومِنْ لَاوٛلْ نٛ مِنْ نغَرِرْتَ تٛ مٛوطٛنْ؞ جٛومِرَاوٛ ٻٜيْدَ يِدّٜ ندٜ نغِطِندِرْطٛنْ نَاع سٜطَّ اٜ يِدّٜ ندٜ نغِطّٛنْ وٛٻّٜ مَا، نٛنْ نٛ يِدّٜ اَمِنْ ٻٜيْدٛرِي دٛوْ مٛوطٛنْ؞ اٛ سٜمْبِطِنَ ٻٜرْطٜ مٛوطٛنْ نغَمْ نغَرْتٛنْ ٻٜ نغَلَا غٛطُّمْ کٛ وٛوطَا، نغَرْتٛنْ شٜنِيٻٜ يٜىٰسٛ اَللَّه ݧَاکٛ مٜىٰطٜنْ ݧَلْندٜ وَرْتُکِ جٛومِرَاوٛ مٜىٰطٜنْ يٜىٰسُ اٜ فُو شٜنِيٻٜ مَاکٛ؞ اٜ رٜعِرْدٜ بَنْدِرَاٻٜ، اٜ مِنْ تٛرٛوعٛنْ، نغَمْ يٜىٰسُ جٛومِرَاوٛ، نغَطٜىٰ جٛنْدٜ کَانُندٜ ندٜ اَللَّه نَنَتَ بٜلْطُمْ مَيْرٜ، نٛنْ نٛ اٜکِّتِيطٛنْ تٛ اَمِنْ، نٛنْ نٛ نجٛوطٛرِيطٛنْ جٛونِ؞ ٻٜيْدٜىٰ جٛوطٛرَاکِ نٛنْ؞ نغَمْ اٛنْ اَنْدِ مِنْ مبِعِيعٛنْ کٛ يٜىٰسُ جٛومِرَاوٛ وِعِ نغَطٛنْ؞ نغَمْ اَللَّه اٜ يِطِ نغَرْتٛنْ شٜنِيٻٜ، نغٛطِّتٛوطٛنْ وَطُکِ نجٜىٰنُ؞ کٛو مٛيٜ مٛوطٛنْ اٜکِّتٛو نٛ سُرِرْتَ ٻَنْدُ مُوطُمْ ندٜرْ سٜنَاکِ اٜ مَنْغُ، نَاع ندٜرْ سُونٛ نغٛ وٛوطَا نٛنْ نٛ حٜىٰفٜرْٻٜ ٻٜ اَنْدَا اَللَّه نغَطَتَ؞ دٛوْ فِي طُعُمْ، تٛع غٛطّٛ حَلَّنَ بَنْدِرَاوٛ مُوطُمْ کٛو وَطَنَمٛ کٛ وٛوطَا؞ مِنْ مبِعِيعٛنْ کَ دَغَ اَرَنْدٜ، مِنْ مبَغِّنِيعٛنْ وِيکِ، جٛومِرَاوٛ وَاتَنَيْ غَطٛووٛ نٛنْ اٜ بٛنٜ؞ اَللَّه نٛدَّايِعٜنْ نغَمْ نغَرْتٜنْ ٻٜ شٜنَاکِ، اَمَّا اٛ نٛدُّعٜنْ نغَطٜنْ جٛنْدٜ شٜنِيندٜ؞ نغَمْ نٛنْ، فُو غَݧُطٛ اٜکِّتِنٛلْ نغٛعٛلْ، نَاع نٜطّٛ اٛ وَݧِ، اَللَّه اٛ وَݧِ، کٛکّٛووٛعٛنْ رُوحُ مَاکٛ؞ دٛوْ نٛ حَانِ نغِطِنْدِرٛنْ بٛو، نَاع سٜيْ تٛ غٛطّٛ وِنْدَنِيعٛنْ، نغَمْ اٛنٛنْ اٜ کٛعٜ مٛوطٛنْ اَللَّه اٜکِّتِنِيعٛنْ نغِطِنْدِرٛنْ؞ مِنْ تَبِّتِنِي اٛنْ نغِطِ فُو بَنْدِرَاٻٜ مٜىٰطٜنْ وٛنْٻٜ لٜيْدِ مَکِدٛونِيَ؞ فُو اٜ نٛنْ بَنْدِرَاٻٜ، اٜ مِنْ ٻٜيْدَ وِيکِعٛنْ، ٻٜيْدٜىٰ وَطُکِ نٛنْ؞ نغَطٜىٰ کٛ مبَاوٛتٛنْ وَطُکِ نغَطٛنْ جٛنْدٜ جَمْ، ڤَامَنٜىٰ کٛ وٛنِ يٜىٰسٛ مٛوطٛنْ تَنْ، اٛنْ کُوتِرَ جُوطٜ مٛوطٛنْ نٛنْ نٛ مِنْ مبِعِعٛنْ نغَطٛنْ؞ نٛنْ وَطَيْ ٻٜ تٛکَّايِ يٜىٰسُ ندَرْدَعٛنْ اٜ مَنْغُ، ندٜنْ اٛنْ نجٛوَتَا کَمُّندٜ مٛوطٛنْ دٛوْ کٛو مٛيٜ نغَمْ کٛ نغِطّٛنْ؞ بَنْدِرَاٻٜ، اٜ مِنْ نغِطِ اَنْدٛنْ غٛونغَ دٛوْ ٻٜنْ طٛنْ تٛکُّٻٜ يٜىٰسُ مَيْٻٜ نغَمْ تٛع نغَطٛنْ کَ وَنُّکِ بٛ يِمْٻٜ حٛرِيٻٜ ٻٜ نغَلَا کَمُّندٜ؞ ندٜ اٜنْ نجَٻِي يٜىٰسُ مَايِي اُمَّکٜ، نٛنْ مَا اٜنْ نجَٻِي اَللَّه وَدَّيْ تٛکُّٻٜ يٜىٰسُ مَيْٻٜ حَوْتِ اٜ يٜىٰسُ؞ اٜ مِنْ مبِعَعٛنْ دٛوْ کٛ وٛلْدٜ جٛومِرَاوٛ وِعِ، شَرٜلْ نغٜلْ جٛومِرَاوٛ وَرْتَتَ، غٛونغَ اٜنٜنْ غٛودُٻٜ يٛنْکِ اٜنْ اَرْتَتَا تٛکُّٻٜ يٜىٰسُ مَيْٻٜ يَاکِ دٛوْ؞ نغَمْ جٛومِرَاوٛ اٜ حٛورٜ مُوطُمْ جِڤّٛيْتٛ دَغَ دٛوْ اٜ نٛدّٛلْ شٜمْبِنْغٛلْ، اٜ حٛنٛنْدٜ مَلَاعِکَاجٛ مَوْطٛ، اٜ دُودٛلْ لُوَلْ اَللَّه؞ مَيْٻٜ اٜ تٛکِّ اَلْمَسِيحُ کَمْٻٜ اَرْتَتَ اُمَّاکِ؞ ندٜنْ اٜنٜنْ تٛکُّٻٜ يٜىٰسُ غٛودُٻٜ يٛنْکِ اٜ شَرٜلْ نغٜلْ طُمْ حٛشَّيْعٜنْ حَوْتِ اٜ مَٻّٜ ندٜرْ دُولٜ نغَمْ کَوْرٜنْ اٜ جٛومِرَاوٛ اٜ نجَيْرِ دٛوْ؞ غَطَ طٛنْ اٜنْ نجٛوطٛدٛتٛ اٜ مَاکٛ حَا اَبَدَا؞ نغَمْ نٛنْ، شٜمْبِطِنٜىٰ بَنْدِرَاٻٜ مٛوطٛنْ اٜ حَالَ کَعَ؞ اٛنٛنْ بَنْدِرَاٻٜ، دٛوْ شَرٜلْ اٜ ݧَلْندٜ ندٜ فُو فِي طُعُمْ وَطَتَ، نَاع سٜيْ تٛ طُمْ وِنْدَنِيعٛنْ؞ نغَمْ اٛنٛنْ اٜ کٛعٜ مٛوطٛنْ اٛنْ اَنْدِ بٛطُّمْ ݧَلْندٜ جٛومِرَاوٛ وَرَيْ نٛ غُجّٛ وَرْدَتَ جٜمَّ؞ شَرٜلْ نغٜلْ يِمْٻٜ مبِعَتَ، «اٜ وٛودِ جٛنْدٜ جَمْ، ندٜنْ ٻٜرْندٜ اٜ وَلْتِي،» ندٜنْ طٛنْ اٜ طٛنْ سٜيْ حَلْکٜرٜ يَنٛنٛيَٻٜ؞ ندٜ وَرَنَيْٻٜ نٛ دَݧْنغٛلْ وَرَنْتَ دٜبّٛ غٛودُطٛ رٜىٰدُ، ٻٜ کٜٻَتَا لَاوٛلْ حِسُکِ؞ اَمَّا اٛنٛنْ بَنْدِرَاٻٜ، نَاع ندٜرْ ݧِوْرٜ نغٛنْطٛنْ، حَکّٛ ݧَلْندٜ ندٜنْ طٛنْ اُدّٛوعٛنْ بٛ غُجّٛ؞ نغَمْ اٛنٛنْ اٛنْ فُو اٛنْ ٻِٻّٜ جَيْنغٛلْ، اٛنْ ٻِٻّٜ ݧَلَوْمَ؞ اٜنٜنْ نَاع اٜنْ يِمْٻٜ جٜمَّ کٛو يِمْٻٜ ݧِوْرٜ؞ نغَمْ نٛنْ، تٛع اٜنْ طَانٛ نٛ وٛٻّٜ نغَطَتَ، اَمَّا اٜنْ نجٛوطٛ اٜنْ شِرْيِي، اٜنْ شُرِ کٛعٜ مٜىٰطٜنْ؞ نغَمْ طَانٛتٛوٻٜ، جٜمَّ ٻٜ طَانٛتٛو، ندٜنْ جَرٛوٻٜ نجَرُ نغِلْتٛو مَا، جٜمَّ ٻٜ نجَرَتَ ٻٜ نغِلْتٛو؞ اَمَّا اٜنٜنْ، ندٜ اٜنْ يِمْٻٜ ݧَلَوْمَ، سٜيْ ڤَامَنٜنْ کٛعٜ مٜىٰطٜنْ؞ اٜنْ ٻٛرْنٛ حٛولَارٜ اٜ يِدّٜ ندٜ وَرْتَ بٛ تٛغّٛورٜ نجَمْندِ مٜىٰطٜنْ ندٜ کٛنُ، وَطُکِ ٻٜرْطٜ مٜىٰطٜنْ دٛوْ حٜٻُکِ کِسْندَمْ وَرْتَ بٛ حُمْنٜىٰرٜ نجَمْندِ ندٜ کٛنُ مٜىٰطٜنْ؞ اَللَّه سُٻَايِ نجَرٜنْ مٛنّٜرٜ مُوطُمْ، اَمَّا اٛ سُٻَنِيعٜنْ حٜٻُکِ کِسْندَمْ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞ کَنْکٛ مَايِ نغَمْ مٜىٰطٜنْ، نغَمْ کٛو اٜنْ نغٛودِ يٛنْکِ کٛو اٜنْ مَايِي، اٜنْ نجٛوطٛدٛتٛ اٜ مَاکٛ؞ نغَمْ نٛنْ، شٜمْبِطِنْدِرٜىٰ مبَلِّندِرٜىٰ نٛنْ نٛ نغَطٛتٛنْ؞ اَمَّا اٜ مِ تٛرٛوعٛنْ بَنْدِرَاٻٜ، کٛکّٜىٰ کُوٛوٻٜ ندٜرْ مٛوطٛنْ مَنْغُ، وَاتٛ اَرْدِيٻٜعٛنْ ندٜرْ کُوغَلْ جٛومِرَاوٛ وَغِّنٛوٻٜعٛنْ؞ کٛکّٜىٰٻٜ مَنْغُ نَاع سٜطَّ ندٜرْ يِدّٜ نغَمْ کُوغَلْ مَٻّٜ؞ نجٛوطٜىٰ جَمْ حَکُّندٜ مٛوطٛنْ؞ طٛنْمَا اٜ مِنْ تٛرٛوعٛنْ بَنْدِرَاٻٜ، کَٻَنٜىٰ ٻٜ نغِطَا کُوغَلْ، شٜمْبِطِنٜىٰ غٜوْرُٻٜ، مبَلّٜىٰ ٻٜ شٜمْبِطَا، نغَادٜىٰ مُݧَلْ اٜ کٛو مٛيٜ؞ تَبِّتِنٜىٰ تٛع غٛطّٛ وَاتٛ حَلّٜىٰندٜ اٜ حَلّٜىٰندٜ؞ اَمَّا کٛو ندٜيٜ طَٻِّتٜىٰ وَطُکِ کٛ وٛوطِ حَکُّندٜ مٛوطٛنْ؞ نغَطَنٜىٰ کٛو مٛيٜ نٛنْ؞ نَنٜىٰ وٜلْوٜلٛ ندٜرْ ٻٜرْطٜ مٛوطٛنْ کٛو ندٜيٜ؞ نغَطٜىٰ کَ وَطُکِ دٛعَارٜ؞ ندٜرْ فُو کٛ حٜٻِعٛنْ نغٜتّٜىٰ اَللَّه، نغَمْ کَنْجُمْ وٛنِ کٛ اَللَّه يِطِ نغَطٛنْ ندٜرْ تٛکُّکِ يٜىٰسُ اَلْمَسِيحُ؞ تٛع اٛنْ کَطُ کُوغَلْ رُوحُ اَللَّه؞ تٛع اٛنْ نجَوَنْ اَنَّبَاکُ، اَمَّا ڤٛوندٜىٰ کٛو طُمٜ، نجٛغٛوطٛنْ کٛ وٛوطِ؞ نغٛطِّتٜىٰ کٛو اِرِ ندٜيٜ حَلّٜىٰندٜ؞ اَللَّه جٛومُ جَمْ اٜ حٛورٜ مُوطُمْ وَرْتِرَعٛنْ لَاٻُٻٜ غَطَ اٜ يٜىٰسٛ؞ اٛ سُرَ يٛنْکِيجِ مٛوطٛنْ اٜ ٻٜرْطٜ مٛوطٛنْ اٜ ٻَلِّ مٛوطٛنْ بٛطُّمْ، نغَرْتٛنْ ٻٜ نغَلَا غٛطُّمْ کٛ وٛوطَا ݧَلْندٜ وَرْتُکِ جٛومِرَاوٛ مٜىٰطٜنْ يٜىٰسُ اَلْمَسِيحُ؞ اٛنْ طٛنْ نٛدُّطٛعٛنْ، اٛ وَطَيْطُمْ نغَمْ اٛ غَطٛووٛ کٛ اٛ وِعِ؞ بَنْدِرَاٻٜ، نغَطَنٜىٰمِنْ دٛعَارٜ؞ کٛوْنٛنْ فُو بَنْدِرَاٻٜ اٜ حٛوْنِرْکِ حِغَاکُ؞ اٜ مِ وِعَعٛنْ نغَمْ جٛومِرَاوٛ طُمْ جَنْغَنَ فُو بَنْدِرَاٻٜ طٜرٜوٛلْ نغٛعٛلْ؞ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ مِنْ بُلُسْ وِنْدِ طٜرٜوٛلْ نغٛعٛلْ حَوْتِ اٜ سِيلَ اٜ تِمٛوتِ؞ مِنْ مبِنْدَنْغٛلْ تٛکُّٻٜ يٜىٰسُ غٛنْٻٜ غَرِيرِ تَسَلٛونِکَ، ٻٜ اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ جٜيِ؞ اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞ بَنْدِرَاٻٜ اَمِنْ، اٜ حَانِ مِنْ نغَطَ کَ يٜتُّکِ اَللَّه کٛو ندٜيٜ نغَمْ مٛوطٛنْ، نغَمْ حٛولَارٜ مٛوطٛنْ اٜ ٻٜيْدٛو نَاع سٜطَّ، ندٜنْ يِدّٜ ندٜ نغِطِنْدِرٛنْ اٜ ٻٜيْدٛو؞ کَنْجُمْ وَطِ مِنٛنْ اٜ کٛعٜ اَمِنْ اٜ مِنْ مَنْتٛرٛوعٛنْ ندٜرْ کَوْتٜ تٛکُّٻٜ اَللَّه؞ اٜ مِنْ طِيوِتَنَٻٜ نٛ مُݧِرْطٛنْ اٜ حٛولَارٜ مٛوطٛنْ ندٜرْ فُو تٛرَّاجِ اٜ شَطٜىٰلٜ طٜ نجَرٛتٛنْ؞ فُو طُعُمْ تَبِّتِنِي کِيتَ اَللَّه اٜ وٛودِ غٛونغَ، نغَمْ مَاجُمْ طُمْ وَرْتِرَيْعٛنْ کٜوْتُٻٜ جٛوطَاکِ ندٜرْ لَامُ مَاکٛ، نغَمْ دٛوْ مَاجُمْ نجَرٛتٛنْ تٛرَّ؞ اَللَّه اٛ غَطٛووٛ کٛ حَانِ؞ اٛ وَاتَنَيْ ٻٜنْ طٛنْ تٛرَّيْٻٜعٛنْ اٜ تٛرَّ، اٛ وَلْتِنَيْ ٻٜرْطٜ مٛوطٛنْ اٛنٛنْ تٛرّٜتٜىٰٻٜ؞ مِنٛنْ مَا اٛ وَلْتِنَيْ ٻٜرْطٜ اَمِنْ؞ اٛ وَطَيْ نٛنْ ݧَلْندٜ ندٜ يٜىٰسُ اَلْمَسِيحُ وَنْغَتَ دَغَ دٛوْ ندٜرْ حِيتٜ حَوْتِ اٜ مَلَاعِکَعٜنْ مَاکٛ غٛودُٻٜ بَوْطٜ؞ غَݧُٻٜ اَللَّه اٜ غَݧُٻٜ نغَطَ کٛ حَبَرُ بٜلْطُمْ طُمْ جٛومِرَاوٛ مٜىٰطٜنْ يٜىٰسُ وِعِ، اَللَّه وَاتَنَيْٻٜ حَلْکٜرٜ کَلُّندٜ؞ ٻٜ نجَرَيْ تٛرَّ حَلْکٜرٜ ندٜ حَا اَبَدَا، طُمْ اِتَّيْٻٜ دَغَ يٜىٰسٛ جٛومِرَاوٛ اٜ يٜىٰسٛ مَنْغُ بَوْطٜ مَاکٛ؞ حَلْکٜرٜ ندٜنْ وَنْغَيْ ݧَلْندٜ ندٜ اٛ وَرْتٛيْتَ؞ اٛ وَرْتٛيَيْ نغَمْ شٜنِيٻٜ مَاکٛ تٜدِّنَمٛ فُو کٛولِيٻٜمٛ مَوْنِنَمٛ؞ اٛنٛنْ مَا اٛنْ کَوْتَيْ اٜ مَٻّٜ، نغَمْ اٛنْ نجَٻِي حَبَرُ طُمْ مِنْ کٛکِّعٛنْ؞ کَنْجُمْ وَطِ کٛو ندٜيٜ اٜ مِنْ نغَطَنَعٛنْ دٛعَارٜ؞ اٜ مِنْ تٛرٛو اَللَّه مٜىٰطٜنْ وَرْتِرَعٛنْ يِمْٻٜ غَطٛوٻٜ اِرِ جٛنْدٜ ندٜ اٛ نٛدِّعٛنْ نغَطٛنْ؞ بَرْکَ بَوْطٜ مَاکٛ اٛ حٜبِّنَ کٛو طُمٜ بٛطُّمْ طُمْ نغِطّٛنْ وَطُکِ نغَمْ اٛنْ کٛولَکٜ يٜىٰسُ؞ اٜ مِنْ نغَطَ دٛعَارٜ ندٜعٜ نغَمْ اِنْدٜ جٛومِرَاوٛ مٜىٰطٜنْ يٜىٰسُ مَوْنِنٜىٰ ندٜرْ مٛوطٛنْ، کَنْکٛ بٛو اٛ مَوْنِنَعٛنْ بَرْکَ يِدّٜ اَللَّه مٜىٰطٜنْ اٜ يٜىٰسُ اَلْمَسِيحُ جٛومِرَاوٛ؞ دٛوْ غَرْتٛلْ جٛومِرَاوٛ مٜىٰطٜنْ يٜىٰسُ اَلْمَسِيحُ اٜ حَوْرُتُکِ مٜىٰطٜنْ اٜ مَاکٛ، اٜ مِنْ تٛرٛوعٛنْ بَنْدِرَاٻٜ، تٛع حَکِّيلٛ مٛوطٛنْ اُمِّلَوٛو کٛو نغَنّٛنْ دٛوْ يِمْٻٜ بِعٛوٻٜ ݧَلْندٜ ندٜ جٛومِرَاوٛ وَرْتٛيْتَ وَرِي؞ طُمْ غَطٛتٛوطُمْ ٻٜ مبِعَ مِنٛنْ مبِعِ نٛنْ ندٜرْ اَنَّبَاکُ، کٛو ندٜرْ وَعَجِنْکِ، کٛو بٛو ندٜرْ طٜرٜوٛلْ مِنْ مبِنْدِطُمْ؞ تٛع اٛنْ نجَٻُ غٛطّٛ مَجِّنَعٛنْ اٜ کٛو نغٛلٜ لَاوٛلْ؞ نغَمْ ندٜنْ طٛنْ ݧَلْندٜ وَرٛيْتَا نَا وٛنْغٜلْ شَرٜلْ وَطِي نغٜلْ يِمْٻٜ طُطْٻٜ نغَݧَتَ اَللَّه؞ اٜ شَرٜلْ نغٜلْ، کَلُّطٛ وَنْغَيْ، مٛ طُمْ سِرْيَنِي حَلْکٜرٜ ندٜ حَا اَبَدَا؞ اٛ وَݧَيْ کٛو طُمٜ کٛ يِمْٻٜ نٛدَّتَ اَلَّح کٛو بٛو کٛ ٻٜ مَوْنِنْتَ، اٛ مَوْنِنَ حٛورٜ مَاکٛ دٛوْ مَاجُمْ؞ حَا مَا اٛ نَتَّيْ وُرٛ شٜنِينغٛ نغٛ اَللَّه، اٛ جٛوطٛو، اٛ وِعَ کَنْکٛ وٛنِ اَللَّه؞ اٛنْ شِفْتٛرَايِ کٛ نغٛنْدُنٛومِ اٜ مٛوطٛنْ مِ وِعِيعٛنْ طُعُمْ؟ جٛونِ اٛنْ اَنْدِ کٛ حَطِ کَلُّطٛ اٛعٛ وَرْکِ؞ تٛ شَرٜلْ کَانُنغٜلْ وَطِي، طُمْ وَنْغِنَيْمٛ؞ نغَمْ بَوْطٜ کَلُّطٛ اٛنْ طٛنْ يَادَکٜ فُطِّي حُوُکِ اٜ سُوطٜ؞ اَمَّا اٛنْ طٛنْ تَٻّٛتٛوطٛطٜ، اٛ وَطَيْ کَ تَٻَّاکِطٜ نَا اٛ حٛشَّامَ؞ غَطَ طٛنْ طُمْ وَنْغِنَيْ کَلُّطٛ اٛنْ، سٜيْ يٜىٰسُ جٛومِرَاوٛ وَرِرَمٛ اٜ فٛوفَانغٛ حٛنْدُکٛ مُوطُمْ، ندٜنْ حَلْکِرَمٛ تٜدُّنغَلْ وَرْتُکِ مُوطُمْ؞ کَلُّطٛ اٛنْ وَرْدَيْ اٜ بَوْطٜ شٜيْطَنْ، اٛ وَطَيْ اَلَامَاجِ اٜ کَيْطِنِيطُمْ اٜ کُلْنِيطُمْ فٜىٰرٜ‑فٜىٰرٜ طُمْ فٜوْرٜ، اٜ کٛو اِرِ طٜيٜ کُوطٜ کَلُّطٜ پٛيْرَيْطٜ يِمْٻٜ کَلْکَيْٻٜ؞ يِمْٻٜ ٻٜنْ کَلْکَيْ نغَمْ ٻٜ نغَݧِي ٻٜ نغِطَ غٛونغَ ٻٜ کِسَ؞ نغَمْ نٛنْ، اَللَّه لِلْدَنَيْٻٜ وٜمْبٜرٜ مَوْندٜ نغَمْ ٻٜ نجَٻَ فٜوْرٜ، نغَمْ طُمْ تَپَ کِيتَ دٛوْ فُو ٻٜ نجَٻَايِ غٛونغَ نَنٛوٻٜ بٜلْطُمْ حَلّٜىٰندٜ؞ اٛنٛنْ بَنْدِرَاٻٜ اَمِنْ ٻٜ جٛومِرَاوٛ يِطِ، اٜ حَانِ مِنْ نغَطَ کَ يٜتُّکِ اَللَّه نغَمْ مٛوطٛنْ کٛو ندٜيٜ؞ نغَمْ دَغَ اَرَنْدٜ اَللَّه سُٻِيعٛنْ نغَمْ کِسٛنْ بَرْکَ لَاٻِنْکِ کِ رُوحُ مَاکٛ وَطَتَ اٜ جَٻُکِ غٛونغَ؞ نغَمْ مَاجُمْ اَللَّه نٛدِّعٛنْ بَرْکَ حَبَرُ بٜلْطُمْ طُمْ مِنْ نغَعَجِنَنِعٛنْ؞ اٛ نٛدُّعٛنْ نغَمْ کٜٻٛنْ نَتُّکِ تٜدُّنغَلْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ نغَمْ نٛنْ بَنْدِرَاٻٜ، ندَرٜىٰ بٛطُّمْ نجٛغٜىٰ اٜکِّتِنٛلْ نغٛلْ مِنْ اٜکِّتِنِعٛنْ ندٜرْ مٜتٛ اَمِنْ کٛو ندٜرْ طٜرٜوٛلْ نغٛلْ مِنْ مبِنْدَنِعٛنْ؞ جٛومِرَاوٛ مٜىٰطٜنْ يٜىٰسُ اَلْمَسِيحُ اٜ حٛورٜ مُوطُمْ، اٜ اَللَّه ݧَاکٛ مٜىٰطٜنْ مٛ دٛوْ، غِطّٛعٜنْ شٜمْبِطِنْطٛعٜنْ سٜمْبِطِنْکِ کِ رٜعَتَا کٛکُّطٛعٜنْ کَمُّندٜ بٛنْدٜ بَرْکَ يِدّٜ مَاکٛ، اٛ فُکِّنَنَعٛنْ ٻٜرْطٜ، اٛ سٜمْبِطِنَعٛنْ ندٜرْ کٛو نغَلٜ کُوغَلْ بٛنْغَلْ اٜ وٛلْدٜ بٛنْدٜ؞ بَنْدِرَاٻٜ اَمِنْ، کٛ سَکِتِي وٛنِ نغَطَنٜىٰمِنْ دٛعَارٜ نغَمْ حَبَرُ جٛومِرَاوٛ سَنْکِتٛو جَوْطُمْ طُمْ مَوْنِنٜىٰ نٛنْ نٛ مَوْنِنِرْطٛنْطُمْ؞ کَدِنْ نغَطَنٜىٰمِنْ دٛعَارٜ نغَمْ جٛومِرَاوٛ حِسْنَمِنْ دَغَ يِمْٻٜ کَلُّٻٜ، نغَمْ نَاع کٛو مٛيٜ حٛولِي يٜىٰسُ؞ اَمَّا جٛومِرَاوٛ اٛ غَطٛووٛ کٛ اٛ وِعِ، اٛ سٜمْبِطِنَيْعٛنْ، اٛ رٜىٰنَيْعٛنْ دَغَ اٛنْ طٛنْ کَلُّطٛ؞ اٜ مِنْ کٛولِي جٛومِرَاوٛ، مِنْ تَبِّتِنِي اٛنْ نغَطَ کٛ مِنْ مبِعِعٛنْ نغَطٛنْ، اٛنْ نغَطَيْ بٛو کَ وَطُکِطُمْ؞ جٛومِرَاوٛ وَطَ ٻٜيْدٛنْ اَنْدُکِ يِدّٜ اَللَّه اٛ وَطَعٛنْ مُݧٛنْ ندٜرْ تٛرَّاجِ طِ نجَرٛتٛنْ نٛنْ نٛ يٜىٰسُ مُݧِرِ ندٜرْ تٛرَّاجِ کَلُّطِ طِ اٛ يَرِ؞ بَنْدِرَاٻٜ، اٜ مِنْ مبِعَعٛنْ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ، دٛولٜ نغٛطِّتٛوطٛنْ کٛو مٛيٜ دَکِّيطٛ تٛکُّطٛ يٜىٰسُ مٛ تٛکَّتَا کٛ مِنْ اٜکِّتِنِعٛنْ؞ نغَمْ اٛنٛنْ اٜ کٛعٜ مٛوطٛنْ اٛنْ اَنْدِ اٜ حَانِ نغَطٛنْ کَ اٜکِّتَاکِ اِرِ جٛنْدٜ اَمِنْ؞ نَاع مِنْ دَکِّيٻٜ شَرٜلْ کٛ مِنْ نجٛوطٛدِي اٜ مٛوطٛنْ؞ نٛنْ مَا، فُو مٛ مِنْ ݧَامَنِ ݧَمْندُ مِنْ نجٛٻِيمٛ؞ مِنْ کُوِي نَاع سٜطَّ جٜمَّ اٜ ݧَلَوْمَ نغَمْ تٛع مِنْ نجٛوَنَ غٛطّٛ مٛوطٛنْ تٜدّٛرَلْ؞ مِنْ نغَطُ نٛنْ نَاع نغَمْ مِنْ مبَاوَتَا طَٻُّتُکِ بَلَّلْ مٛوطٛنْ، اَمَّا نغَمْ مِنْ نغَطَ غٛطُّمْ کٛ اٜکِّتٛتٛوطٛنْ؞ نغَمْ کٛو شَرٜلْ کٛ مِنْ نغٛنْدُنٛو اٜ مٛوطٛنْ، رَا کٛ مِنْ مبِعِعٛنْ نغَطٛنْ، «تٛ نٜطّٛ وَݧِي حُوَ، تٛع اٛنْ کٛکُّمٛ ݧَمْندُ؞» نغَمْ مِنْ نَنِي حَبَرُ وٛٻّٜ مٛوطٛنْ ٻٜ دَکِّيٻٜ، ٻٜ کُوَتَا؞ اٜ ٻٜ نَتَّ حَالَ کَ يَالَايِٻٜ؞ اٜ مِنْ مبِعَ اِرِ يِمْٻٜ ٻٜعٜ اٜ مِنْ مبَغِّنَٻٜ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ ٻٜ نغَطَ جٛنْدٜ بٛنْدٜ ٻٜ کُوَ ٻٜ کٜٻَنَ کٛعٜ مَٻّٜ کٛ ٻٜ ݧَامَتَ؞ اٛنٛنْ بٛو بَنْدِرَاٻٜ اَمِنْ، تٛع اٛنْ شٛمُ وَطُکِ کٛ حَانِ؞ تٛ غٛطّٛ وَݧِي تٛکُّکِ کٛ مِنْ مبِعِ ندٜرْ طٜرٜوٛلْ نغٛعٛلْ، ڤَامَنٜىٰمٛ بٛطُّمْ؞ تٛع اٛنْ کَوْتُ حٛورٜ اٜ مَاکٛ نغَمْ اٛ نَنَ شٜمْتُطُمْ اٛ مٛعِّنَ نغِکُّ مَاکٛ؞ فُو اٜ نٛنْ، تٛع اٛنْ کٛشُّمٛ بٛ غَݧٛ مٛوطٛنْ، اَمَّا مبَغِّنٜىٰمٛ نٛ مبَغِّنِرْتٛنْ تٛکُّطٛ يٜىٰسُ؞ جٛومِرَاوٛ جٛومُ جَمْ اٜ حٛورٜ مُوطُمْ حٛکَّعٛنْ جَمْ کٛو ندٜيٜ ندٜرْ کٛو طُمٜ؞ جٛومِرَاوٛ وٛنْدَ اٜ مٛوطٛنْ اٛنْ فُو؞ مِنْ بُلُسْ وِنْدِ کٛوْنٛلْ نغٛعٛلْ اٜ جُنْغٛ اَمْ؞ اٜ مِ وِنْدَ طُعُمْ ندٜرْ فُو طٜرٜىٰجِ طِ مبِنْدُمِ نغَمْ طُمْ حٛلَّ مِنْ وِنْدِطِ؞ نٛنْ مبِنْدِرَيْمِ؞ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ اٛنْ فُو؞ طٜرٜوٛلْ نغٛعٛلْ پِوٛيِي دَغَ جُنْغٛ اَمْ، مِنْ بُلُسْ؞ اَللَّه کِسْنٛووٛ مٜىٰطٜنْ اٜ يٜىٰسُ اَلْمَسِيحُ مٛ نغَطّٜنْ ٻٜرْندٜ دٛوْ مُوطُمْ وِعِي مِ وَرْتَ لِلَاطٛ مَاکٛ؞ اٜ مِ وِنْدَنْمَا طٜرٜوٛلْ نغٛعٛلْ، تِمٛوتِ، ٻِطّٛ اَمْ مٛ غٛونغَ ندٜرْ تٛکُّکِ يٜىٰسُ؞ اَللَّه ݧَاکٛ مٜىٰطٜنْ مٛ دٛوْ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ بَرْکِطِنْمَا، يُرْمِنَنْمَا، حٛکُّمَا جَمْ؞ اٜ مِ يِطِ نجٛوطٛطَا اٜ اَافِسَ، نٛنْ نٛ تٛرٛرِمَامِ شَرٜلْ کٛ نجَحَيْنٛومِ مَکِدٛونِيَ، نغَمْ مبَغِّنَا وٛٻّٜ يِمْٻٜ اٜکِّتِنٛوٻٜ اٜکِّتِنٛلْ فٜوْرٜ ٻٜ اَلَ؞ وِعُٻٜ ٻٜ شٜنْدِرَ اٜ حَبَرُوجِ فٜوْرٜ طِنْ طٛنْ اٜ فٜىٰرٛوتِرْکِ لٜݧٛلْ کِ وَلَا کٜىٰرٛلْ، نغَمْ اِرِ نٛنْ حٛلَّتَا نٛ طُمْ حٛولٛرْتٛو اَللَّه، سٜيْ نِ طُمْ اُمِّنَ غٜدِّ تَنْ؞ کٛ وَطِ مبِيمِ نغَطَا نٛنْ وٛنِ نغَمْ طُمْ وَطَعٜنْ نغِطِندِرٜنْ يِدّٜ پِوٛيْندٜ ندٜرْ ٻٜرْندٜ لَمْندٜ اٜ ٻٜرْندٜ کٛلَّيْندٜ اٜنْ نغَطَ کٛ وٛوطِ، اٜ ٻٜرْندٜ کٛولِيندٜ يٜىٰسُ اٜ غٛونغَ؞ وٛٻّٜ يِمْٻٜ ندٜ اَلِ وَطُکِ نٛنْ، ٻٜ مَجِّي لَاوٛلْ غٛونغَ، ٻٜ ڤُطِّ مٜتُکِ حَالَاجِ مٜىٰرٜىٰجِ؞ اٜ ٻٜ نغِطِ طُمْ اَنْدَ ٻٜ مٛودِٻّٜ اَتَّوْرَ، اَمَّا ٻٜ ڤَامَتَا کٛ ٻٜ مبِعَتَ، کٛو دٛوْ کٛ ٻٜ اٜکِّتِنْتَ ٻٜرْندٜ غٛعٛ؞ اٜنْ اَنْدِ دٛوکَ اٜ وٛوطِ تٛ طُمْ حُوتِرَامَ نٛ حَانِ طُمْ حُوتِرٜىٰ؞ کَدِمَا اٜنْ اَنْدِ دٛوکَ وَطَاکَ نغَمْ اَادِلِعٜنْ، اَمَّا نغَمْ غٜوٛوٻٜ دٛوکَ، اٜ يِمْٻٜ ٻٜ نغَطَتَا کٛ طُمْ وِعِٻٜ، اٜ ٻٜ کُلَتَا اَللَّه، اٜ غَطٛوٻٜ کٛ وٛوطَا، اٜ يِمْٻٜ ٻٜ شٜنَاکِ، اٜ کُطٛوٻٜ اَللَّه، اٜ يِمْٻٜ بَرٛوٻٜ دَݧٛوٻٜ مُعّٜنْ، اٜ غَطٛوٻٜ وَرْحٛورٜ، اٜ غَطٛوٻٜ نجٜىٰنُ، اٜ غَطٛوٻٜ لُوطُ، اٜ شٛورٛوٻٜ مَشُّٻٜ، اٜ ڤٜوٛوٻٜ، اٜ شٜيْدٛتٛوٻٜ فٜوْرٜ، اٜ کٛو طُمٜ طُمْ تٛکَّايِ اٜکِّتِنٛلْ غٛونغَ، غٛنْغٛلْ ندٜرْ حَبَرُ بٜلْطُمْ طُمْ اَللَّه جٛومُ مَنْغُ بَرْکِطِنَاطٛ وِعِيَمْ مِ وَعَجِنَ؞ مِ يٜتِّي يٜىٰسُ اَلْمَسِيحُ جٛومِرَاوٛ مٜىٰطٜنْ کٛکُّطٛيَمْ سٜمْبٜ کُوغَلْ اَمْ؞ مِ يٜتِّيمٛ نغَمْ اٛ يِيرِييَمْ غٛونغَ اٛ سُٻِييَمْ مِ حُوَنَمٛ؞ کٛو ندٜ ندٜنّٛ مِ مٜتِي حَالَاجِ کَلُّطِ دٛوْ مَاکٛ، مِ تٛرِّي تٛکُّٻٜمٛ، مِ حُطِيمٛ، اَمَّا اَللَّه يُرْمِنَنِييَمْ، نغَمْ اٜ شَرٜلْ نغٜلْ، مِ اَنْدَا کٛ نغَطَيْمِ، مِ حٛولَاکِ يٜىٰسُ اَلْمَسِيحُ؞ جٛومِرَاوٛ مٜىٰطٜنْ يَافَنَکٜيَمْ حَکّٜ شَاحُ، ندٜنْ اٛ حٛکِّييَمْ حٛولَارٜ اٜ يِدّٜ غٛنْدٜ ندٜرْ يٜىٰسُ اَلْمَسِيحُ؞ يٜىٰسُ اَلْمَسِيحُ وَرِي ندٜرْ دُونِيَارُ نغَمْ حِسْنَ غَطٛوٻٜ حَکّٜ؞ حَالَ کَعَ کَ تَبُّتُکَ کَ حٜوْتِي طُمْ جَٻَکَ؞ مِنْ بٛو، مِ ٻُرِي کٛو مٛيٜ وَطُکِ حَکّٜ؞ اَمَّا اَللَّه يُرْمِنَنِييَمْ نغَمْ يٜىٰسُ اَلْمَسِيحُ حٛلِّييَمْ مُݧَلْ نغَلْ وَلَا کٜىٰرٛلْ، مِنْ ٻُرْطٛ کٛو مٛيٜ حَکّٜ، نغَمْ طُمْ وَرْتَ مِسَالُ تٛ کٛو مٛيٜ تٛکَّيْطٛمٛ يٜىٰسٛ طٛعٛ نغَمْ حٜٻَ يٛنْکِ کِ رٜعَتَا؞ اٛ لَامِيطٛ حَا اَبَدَا، اٛ وَلَا کٜىٰرٛلْ، اٛ يِعَتَاکٛ، کَنْکٛ تَنْ وٛنِ اَللَّه؞ مَنْغُ اٜ تٜدُّنغَلْ تَبِّتَ تٛ مَاکٛ حَا اَبَدَا اَبَدِنْ؞ ٻِطّٛ اَمْ، تِمٛوتِ، اٜ مِ وَغِّنْمَا دٛوْ کٛ اَنَّبٛعٜنْ مبِينٛو دٛوْ مَاطَ؞ تٛکُّ کٛ ٻٜ مبِعِ نغَمْ مبَاوَا وَطُکِ کُوغَلْ نغَلْ اَللَّه حٛکُّمَا، اَ حٛولٛومٛ اٜ ٻٜرْندٜ لَمْندٜ؞ وٛٻّٜ يِمْٻٜ ندٜ نغَݧِ وَطُکِ نٛنْ، ٻٜ لَلِّنِي حٛولَارٜ مَٻّٜ؞ ندٜرْ مَٻّٜ اٜ وٛودِ حِمٜىٰنِيُسْ اٜ اَلِجَنْدَ؞ مِ اَلْدِيٻٜ اٜ شٜيْطَنْ نغَمْ ٻٜ اٜکِّتٛو اَلُکِ مٜتُکِ حَالَاجِ کَلُّطِ دٛوْ اَللَّه؞ نغَمْ نٛنْ، اَرَنْدٜ اٜ مِ وِعَ طُمْ وَطَ کَ تٛرَاکِ اَللَّه، طُمْ وَطَ دٛعَارٜ، طُمْ تٛرٛومٛ، طُمْ يٜتَّمٛ نغَمْ کٛو مٛيٜ؞ طُمْ وَطَنَ لَامِيٻٜ دٛعَارٜ، اٜ کٛو مٛيٜ اَرْدِيطٛ نغَمْ نجٛوطٛوطٜنْ جَمْ حَکِّيلٛ مٜىٰطٜنْ اٜ فُکِّي، اٜنْ مَوْنِنَ اَللَّه، اٜنْ نغَطَ کٛ اٛ وِعِ؞ نٛنْ اٜ وٛوطِ؞ اَللَّه کِسْنٛووٛ مٜىٰطٜنْ اٜ نَنَ بٜلْطُمْ مَاجُمْ، نغَمْ اٜ مٛ يِطِ کٛو مٛيٜ اَنْدَ غٛونغَ حِسَ؞ نغَمْ اَللَّه اٛ غٛعٛتٛ، ندٜنْ شِرْيٛوتِرْطٛ حَکُّندٜ اَللَّه اٜ يِمْٻٜ اٛ غٛعٛتٛ؞ کَنْکٛ وٛنِ يٜىٰسُ اَلْمَسِيحُ، کٛکُّطٛ حٛورٜ مَاکٛ نغَمْ اٛ رِمْطِنَ يِمْٻٜ؞ کَنْجُمْ وٛنِ شٜيْدَ طُمْ اُمْ حٛکِّ ندٜ شَرٜلْ وَطِ؞ نغَمْ مَاجُمْ طُمْ سُٻِييَمْ مِ وَرْتَ غَعَجِنٛووٛ اٜ لِلَاطٛ اٜ اٜکِّتِنٛووٛ يِمْٻٜ نَاع يَحُودَنْکٛعٜنْ دٛوْ حٛولَاکِ غٛونغَحِ؞ غٛونغَ مبِعَيْمِ، نَاع مِ فٜوَيْ! نغَمْ نٛنْ اٜ مِ يِطِ تٛ تٛکُّٻٜ يٜىٰسُ کَوْرِتِ فُو، وٛرْٻٜ نغَطَ دٛعَارٜ اٜ ٻٜ پٜفْتَ جُوطٜ شٜنِيطٜ نَاع ندٜرْ مٛنّٜرٜ کٛو غٜدِّ؞ نٛنْ مَا، اٜ مِ يِطِ رٜوْٻٜ ٻٛرْنٛو کٛلْتٜ نٛ حَانِ نغَمْ سٜمْتٜىٰندٜ اٜ فَامَنْکِ حٛورٜ؞ مِ يِطَا ٻٜ ٻٛرْنٛو کٛلْتٜ طٜ شٜىٰدٜ اٜ مٛعِّتِنَاکِ کٛشَّيْکِ حَکِّيلٛ يِمْٻٜ بٛ مٛعِّنْکِ غَاسَ، کٛو وَطُکِ شٛدِّ، کٛو جِينَارِ، سٜيْ نِ ٻٜ کُوَ کُوطٜ بٛطّٜ نٛ رٜوْٻٜ کُلٛوٻٜ اَللَّه حَانِ نغَطَ؞ رٜوْٻٜ اٜکِّتٛو اٜکِّتِنٛلْ ندٜرْ دٜعُّتُکِ اٜ لٜسْنُکِ حٛورٜ؞ مِ جَٻَايِ غٛطّٛ دٜبّٛ اٜکِّتِنَ غٛرْکٛ کٛو لَامٛو دٛوْ مَاکٛ؛ دٛولٜ ٻٜ ندٜعِّتَ؞ نغَمْ اَادَمُ اَللَّه اَرْتِ تَغُکِ، ندٜنْ حَوَّاعُ؞ ندٜنْ نَاع اَادَمُ طُمْ پٛيْرِ، طُمْ دٜبّٛ اٛنْ طُمْ پٛيْرِ، اٛ يٜوِ دٛوکَ اَللَّه؞ فُو اٜ نٛنْ، رٜوْٻٜ ندٜرْ دَݧْنغٛلْ ٻِٻّٜ ٻٜ کِسَيْ تٛ ٻٜ نغَطِي کَ حٛولَاکِ يٜىٰسُ اٜ ٻٜ کٛلَّ يِدّٜ اٜ ٻٜ نغَطَ جٛنْدٜ لَمْندٜ اٜ سٜمْتٜىٰندٜ؞ حَالَ کَنْ طٛنْ کَ تَبُّتُکَ وِعُکِ: غَطّٛ ٻٜرْندٜ مُوطُمْ دٛوْ وَرْتُکِ مَوْطٛ کَوْتَلْ تٛکُّٻٜ يٜىٰسُ، اٛ يِطِي کُوغَلْ بٛنْغَلْ وٛنْ طٛنْ؞ نغَمْ نٛنْ دٛولٜ مَوْطٛ کَوْتَلْ تٛکُّٻٜ يٜىٰسُ وَرْتَ وَلَا کٛ طُمْ حُطِرْتَمٛ، غٛودُطٛ دٜبّٛ غٛعٛتٛ، شُرْطٛ حٛورٜ مُوطُمْ، غَطٛووٛ کٛ حَانِ، جَٻّٛتٛوطٛ حٛٻّٜ، بَوْطٛ اٜکِّتِنْکِ؞ تٛع اٛ وَرْتَ جَرٛووٛ، کٛو طَٻِّتٛووٛ حَوْرٜ، اَمَّا مٛ حَکِّيلٛ، غِطّٛ جٛنْدٜ جَمْ، نَاع غٛودُطٛ يِدّٜ شٜىٰدٜ؞ دٛولٜ اٛ جٛغٛو وُرٛ مَاکٛ بٛطُّمْ، اٛ اٜکِّتِنَ ٻِٻّٜ مَاکٛ نغَطَ کٛ اٛ وِعِ، ٻٜ کٛکَّمٛ مَنْغُ؞ نغَمْ تٛ نٜطّٛ اَنْدَا نٛ جٛغٛرْتٛو وُرٛ مُوطُمْ، نٛ اٛ اَرْدٛرْتٛو کَوْتَلْ يِمْٻٜ اَللَّه؟ حَانَا بٛو تٛکُّطٛ يٜىٰسُ کٜسٛ وَرْتَ اَرْدِيطٛ، نغَمْ طُمْ غَطٛتٛوطُمْ اٛ مَوْنِنَ حٛورٜ مَاکٛ، ندٜنْ طُمْ وَطَنَمٛ نٛ طُمْ وَطَنِ شٜيْطَنْ؞ اٜ حَانِ اٛ وَرْتَ نٜطّٛ مٛ کٛو مٛيٜ اَنْدِ جٛنْدٜ مَاکٛ اٜ وٛوطِ حَا مَا اٜ ٻٜ تٛکَّايِ يٜىٰسُ؞ نغَمْ تٛع اٛ وَرْتَ کٛ سٜمْتِنِي اٛ يَنَ ندٜرْ تَرْکٛوٛلْ شٜيْطَنْ؞ نٛنْ مَا دٛولٜ کُوٛوٻٜ ندٜرْ کَوْتَلْ تٛکُّٻٜ يٜىٰسُ نغَرْتَ غٛودُٻٜ نغِکُّ بٛطُّمْ، وِعٛوٻٜ غٛونغَ، نَاع جَرٛوٻٜ، کٛو غٛودُٻٜ يِدّٜ شٜىٰدٜ؞ دٛولٜ ٻٜ نجٛغٛو غٛونغَ لُغُّکَ دٛوْ حٛولَاکِ يٜىٰسُ اٜ ٻٜرْندٜ لَمْندٜ؞ اَرَنْدٜ طُمْ فٛوندَٻٜ تَوْ طُمْ يِعَ؞ تٛ ٻٜ نغَلَا کٛ طُمْ حُطِرْتَٻٜ، سٜيْ ٻٜ کُوَ کُوغَلْ نغَلْ؞ نٛنْ مَا رٜوْٻٜ ٻٜنْ نغَرْتَ ٻٜ نغِکُّ بٛطُّمْ، تٛع ٻٜ نغَرْتَ بِعٛوٻٜ حَالَاجِ کَلُّطِ دٛوْ وٛٻّٜ، اَمَّا ٻٜ نغَرْتَ شُرْٻٜ کٛعٜ مَٻّٜ، غَطٛوٻٜ غٛونغَ دٛوْ کٛو طُمٜ؞ کُوٛووٛ ندٜرْ تٛکُّٻٜ يٜىٰسُ وٛنَ غٛودُطٛ دٜبّٛ غٛعٛتٛ، جٛغِيطٛ وُرٛ مُوطُمْ بٛطُّمْ؞ ٻٜنْ طٛنْ کُوٛوٻٜ کُوطٜ مَٻّٜ بٛطُّمْ، ٻٜ کٜٻَنِ کٛعٜ مَٻّٜ اِنْطٜ بٛطّٜ، ٻٜ مبَاوَيْ ٻٜ مٜتَ کُلٛلْ وَلَا دٛوْ حٛولَاکِ يٜىٰسُ اَلْمَسِيحُ؞ اٜ مِ وِنْدَ طٜرٜوٛلْ نغٛعٛلْ، اٜ مِ کَمّٛو وَرٛيْکِ تٛ مَاطَ نَاع کٛ نٜىٰٻِ؞ اَمَّا تٛ مِ وَرِلَوَايِ، طٜرٜوٛلْ نغٛعٛلْ وَلّٜتٜ اَنْدَا نٛ حَانِ نجٛوطٛرٛوطٜنْ ندٜرْ وُرٛ اَللَّه، وَاتٛ کَوْتَلْ تٛکُّٻٜ اَللَّه مٛ يٛنْکِ، دَرْݝَلَلْ جٛغٛتٛونغَلْ غٛونغَ؞ وَلَا وٛنْغٛ سٜکٛ، سِرُّ دِينَ مٜىٰطٜنْ اٜ مَوْنِ، وِيکِ: اَلْمَسِيحُ وَرِي ندٜرْ ٻَنْدُ نٜطّٛ، رُوحُ اَللَّه حٛلِّي اٜ مٛ وَطَ کٛ اَللَّه يِطِ، مَلَاعِکَعٜنْ نغِعِيمٛ، طُمْ حٛکِّي حَبَرُ مَاکٛ ندٜرْ لٜݧِ، طُمْ حٛولَکٜمٛ ندٜرْ دُونِيَارُ، طُمْ حٛشِّيمٛ يَاکِ دٛوْ ندٜرْ مَنْغُ مَاکٛ؞ رُوحُ اَللَّه تَبِّتِنِي وِعُکِ اٜ بَلْطٜ رٜعُکِ دُونِيَارُ وٛٻّٜ يِمْٻٜ اَلَيْ حٛولَاکِ يٜىٰسُ، ٻٜ تٛکَّ اٜکِّتِنٛوٻٜ فٜوْرٜ کٜٻُٻٜ اَنْدَلْ مُعّٜنْ تٛ غِنِّ؞ اٜکِّتِنٛوٻٜ ٻٜنْ ٻٜ مُنَافُکِعٜنْ، ٻٜ ڤٜوٛوٻٜ ٻٜ ݧُمٛ وَاتُنغٛ؞ اٜ ٻٜ کَطَ تٜىٰغَلْ، اٜ ٻٜ کَطَ ݧَامُکِ غٛطِّ ݧَمْندُوجِ؞ اَمَّا اَللَّه وَطِي تٜىٰغَلْ اٜ کٛو اِرِ ندُيٜ ݧَمْندُ نغَمْ کٛولِيٻٜمٛ اَنْدُٻٜ غٛونغَ نجَٻَ نغٜتَّمٛ؞ نغَمْ فُو کٛ اَللَّه وَطِ اٜ طُمْ وٛوطِ؞ ندٜنْ تٛع طُمْ وَݧَ کٛو طُمٜ، اَمَّا طُمْ جَٻٜىٰ ندٜرْ يٜتّٛورٜ، نغَمْ وٛلْدٜ اَللَّه اٜ دٛعَارٜ لَاٻِنِيطُمْ؞ تَا اٜکِّتِنِي تٛکُّٻٜ يٜىٰسُ نِينِ، اَ وَرْتَيْ کُوَنٛووٛ يٜىٰسُ اَلْمَسِيحُ بٛطّٛ مَوْنٛووٛ ندٜرْ بٛلِيطٜ غٛونغَ طٜ حٛولَاکِ يٜىٰسُ اٜ اٜکِّتِنٛلْ بٛنْغٛلْ نغٛلْ تٛکُّطَا؞ وٛطِّتَ حَبَرُوجِ فٜوْرٜ طِ مٜىٰرٜ طِ نغَلَا غٛونغَ دٛوْ اَللَّه؞ اٜکِّتِنْ حٛورٜ مَاطَ تٛکُّکِ اَللَّه؞ کٛو ندٜ اٜکِّتِنْکِ ٻَنْدُ نَفَنْتٜ سٜطَّ، تٛکُّکِ اَللَّه نَفَنْتٜ کٜىٰرٛلْ وَلَا؞ نغَمْ تَا وَطِي نٛنْ، طُمْ نَفَنْتٜ جٛونِ، ندٜنْ طُمْ نَفَنْتٜ ندٜرْ يٛنْکِ کِ کٜٻَتَا غَطَ مَيْدٜ؞ حَالَ کَعَ کَ تَبُّتُکَ کَ حٜوْتِي طُمْ جَٻَکَ؞ اٜنْ کُوَ، اٜنْ ڤِيدَ نَاع سٜطَّ نغَمْ اٜنْ نغَطِي ٻٜرْطٜ مٜىٰطٜنْ دٛوْ اَللَّه مٛ يٛنْکِ، کِسْنٛووٛ کٛو مٛيٜ، وَاتٛ کٛولِيٻٜمٛ؞ وِعُ طُمْ وَطَ فُو فِي طُعُمْ، اٜکِّتِنْطُمْ؞ تَاع جَٻُ کٛو مٛيٜ يَوَنَ سُکَاکُ مَاطَ، اَمَّا وَرْتُ مِسَالُ تٛ تٛکُّٻٜ يٜىٰسُ ندٜرْ مٜتٛ مَاطَ، اٜ نغِکُّ مَاطَ، اٜ يِدّٜ مَاطَ، اٜ حٛولَارٜ مَاطَ، اٜ جٛنْدٜ مَاطَ لَمْندٜ؞ کٛ مِ وَرَ، وَطُ کَ جَنْغَنْکِ يِمْٻٜ وٛلْدٜ اَللَّه اَ وَعَجِنَ، اَ اٜکِّتِنَ؞ تَاع فِجِرْ دٛکَّلْ نغَلْ طُمْ حٛکُّمَا شَرٜلْ کٛ طُمْ وَطِ اَنَّبَاکُ مَوْٻٜ کَوْتَلْ تٛکُّٻٜ يٜىٰسُ نجٛوَنْمَا جُوطٜ دٛوْ حٛورٜ؞ وَطُ کَ وَطُکِ فُو فِي طُعُمْ، وَطُ ٻٜرْندٜ مَاطَ دٛوْ مَاجُمْ نغَمْ کٛو مٛيٜ يِعَ يَحُکِ يٜىٰسٛ مَاطَ؞ فَامَنْ حٛورٜ مَاطَ اٜ اٜکِّتِنٛلْ مَاطَ؛ وَطُ کَ وَطُکِطُمْ، نغَمْ تَا وَطَ نٛنْ، اَ حِسْنَيْ حٛورٜ مَاطَ اٜ نَنَيْٻٜمَ؞ تَاع حَٻَنْ ندٛتِّيجٛ، اَمَّا مٜتَنْمٛ نٛ مٜتِرَنْتَا ݧَاکٛ مَاطَ؞ وَغِّنْ کَيٜعٜنْ نٛ مبَغِّنِرْتَا مِݧِرَاٻٜ مَاطَ، رٜوْٻٜ نَيٜعٜنْ بٛو، بٛ مَدُعٜنْ مَاطَ، سُرْبَاٻٜ بٛو، بٛ مِݧِرَاٻٜ مَاطَ رٜوْٻٜ ندٜرْ ٻٜرْندٜ لَمْندٜ؞ مَوْنِنْ رٜوْٻٜ ٻٜ نغَلَا وَلّٛوٻٜ ٻٜ وٛرْٻٜ مُعّٜنْ مَايِ؞ تٛ دٜبّٛ مٛ غٛرْکٛ مُوطُمْ مَايِ اٜ وٛودِ ٻِٻّٜ کٛو تَانِرَاٻٜ، ٻٜ ڤُطَّ اٜکِّتَاکِ کٛ دِينَ مَٻّٜ وِعِ اٜ حَانِ ٻٜ نغَطَنَ دَݧٛوٻٜ مَٻّٜ، نٛنْ ٻٜ نغَاتِرَنْتَ دَݧٛوٻٜ مَٻّٜ کٛ ٻٜ نغَطَنِٻٜ، نغَمْ اَللَّه اٜ نَنَ بٜلْطُمْ نٛنْ؞ دٜبّٛ مٛ غٛرْکٛ مُوطُمْ مَايِ اَلَاطٛ کَنُمْ تَنْ وَلَا بَلَّيْطٛمٛ، اٛ وَطِي ٻٜرْندٜ مَاکٛ دٛوْ اَللَّه وٛنْ طٛنْ، اٜ مٛ وَطَ کَ دٛعَارٜ اٜ مٛ تٛرٛومٛ جٜمَّ اٜ ݧَلَوْمَ؞ اَمَّا دٜبّٛ مٛ غٛرْکٛ مُوطُمْ مَايِ غِطَنْطٛ حٛورٜ مُوطُمْ جٛنْدٜ نَنْکِ بٜلْطُمْ، اٛ يَادَکٜ اٛ مَايِي کٛو ندٜ اٜ مٛ فٛوفَ؞ وِعُ تٛکُّٻٜ يٜىٰسُ نغَطَ نٛنْ، نغَمْ تٛع غٛطّٛ حٜٻَ کٛ حُطِرْتَٻٜ؞ فُو مٛ وَلَّايِ بَنْدِرَاٻٜ مُوطُمْ، کٛ ٻُرِ مَا وُرٛ مُوطُمْ، اٛ اَلِي حٛولَاکِ يٜىٰسُ اٜ غٛونغَ، اٛ ٻُرِي مٛ تٛکَّايِ يٜىٰسُ حَلُّکِ؞ تٛع طُمْ وِنْدَ اِنْدٜ دٜبّٛ مٛ غٛرْکٛ مُوطُمْ مَايِ ندٜرْ اِنْطٜ رٜوْٻٜ ٻٜ وٛرْٻٜ مُعّٜنْ مَايِ نَا اٛ حٜوْتِي دُوٻِ 60 يَاکِ يٜىٰسٛ؞ نٛنْ مَا دٛولٜ اٛ جٛوطٛدَکٜنٛ اٜ غٛرْکٛ مَاکٛ اٜ غٛونغَ، اٛ تٛکَّايِ وٛرْٻٜ؞ دٛولٜ اٛ وَرْتَ مٛ طُمْ اَنْدِرِ وَطُکِ کُوطٜ بٛطّٜ، اٜکِّتِنْطٛ ٻِٻّٜ مَاکٛ بٛطُّمْ، جَٻّٛتٛوطٛ حٛٻّٜ، غَطَنٛووٛ تٛکُّٻٜ يٜىٰسُ فِي بٛطُّمْ ندٜرْ لٜسْنُکِ حٛورٜ، بَلّٛووٛ يِمْٻٜ نَتُّٻٜ تٛرَّ، غَطُطٛ حٛورٜ مُوطُمْ دٛوْ وَطُکِ بٛطُّمْ ندٜرْ کٛو طُمٜ؞ اَمَّا تَاع وِنْدُ اِنْطٜ رٜوْٻٜ سُکَاٻٜ ٻٜ وٛرْٻٜ مُعّٜنْ مَايِ ندٜرْ اِنْطٜ رٜوْٻٜ ٻٜ وٛرْٻٜ مُعّٜنْ مَايِ؞ مِ وِعُ نٛنْ نغَمْ تٛ سُونٛ وٛرْٻٜ اُمَّنَکٜٻٜ، نغٛ سٜنْدَيْ حَکِّيلٛ مَٻّٜ اٜ اَلْکَوَلْ نغَلْ ٻٜ نغَطَنِ يٜىٰسُ، ٻٜ نغَطَ وٛنْغَلْ تٜىٰغَلْ؞ ندٜنْ کِيتَ اَللَّه نَنْغَيْٻٜ نغَمْ ٻٜ نغٜوِي اَلْکَوَلْ نغَلْ ٻٜ نغَطَنّٛومٛ اَرَنْدٜ؞ غَطَ نٛنْ، ٻٜ کُوَتَا وٛنْغَلْ کُوغَلْ سٜيْ نَتّٜ‑نَتّٜ غُرٜىٰجٜ، اَمَّا کٛ ٻُرِ نٛنْ حَلُّکِ، ٻٜ نغَطَيْ کَ مٜتُکِ حَالَاجِ کَلُّطِ دٛوْ يِمْٻٜ اٜ ٻٜ مبِعَ کٛ حَانَا وِعٜىٰکِ؞ نغَمْ مَاجُمْ مِ ٻُرِي يِطُکِ رٜوْٻٜ سُکَاٻٜ ٻٜ وٛرْٻٜ مُعّٜنْ مَايِ نغَطَ تٜىٰغَلْ، ندَݧَ ٻِٻّٜ، ڤَامَنَ وُرٛ مَٻّٜ، نغَمْ تٛع وَݧْوَݧْٻٜ مٜىٰطٜنْ کٜٻَ نٛ مٜتِرْتَ فِي کَلُّطُمْ دٛوْ مٜىٰطٜنْ؞ مِ وِعُ نٛنْ نغَمْ وٛٻّٜ ندٜرْ مَٻّٜ شٜلِي تٛکِّي شٜيْطَنْ؞ تٛ غٛطّٛ دٜبّٛ تٛکُّطٛ يٜىٰسُ اٜ وٛودِ بَنْدِرَاٻٜ رٜوْٻٜ ٻٜ وٛرْٻٜ مُعّٜنْ مَايِ، سٜيْ اٛ وَلَّٻٜ؞ تٛع اٛ اَلْدَ کَوْتَلْ تٛکُّٻٜ يٜىٰسُ اٜ تٜدّٛرَلْ، نغَمْ ٻٜ مبَاوَ ٻٜ مبَلَّ رٜوْٻٜ ٻٜ وٛرْٻٜ مُعّٜنْ مَايِ ٻٜ نغَلَا وَلّٛوٻٜ؞ مَوْٻٜ ندٜرْ کَوْتَلْ تٛکُّٻٜ يٜىٰسُ اَرْدٛتٛوٻٜ بٛطُّمْ اٜ حَانِ ٻٜ ٻُرَ حٛکّٜىٰکِ مَنْغُ، ٻُرْٻٜ مَا کَمْٻٜ نغٛنِ وَعَجِنٛوٻٜ اٜ اٜکِّتِنَ؞ مِ وِعُ نٛنْ نغَمْ اَايَارٜ وِعِي، «تَاع مَٻَّنْ نغَارِ حٛنْدُکٛ شَرٜلْ کٛ ندِ سٛرْٻَتَ،» ندٜنْ، «کُوٛووٛ اٜ حَانِ طُمْ يٛٻَمٛ؞» تٛ نٜطّٛ غٛعٛتٛ وِعِي مَوْطٛ ندٜرْ کَوْتَلْ تٛکُّٻٜ يٜىٰسُ وَطِي کٛ وٛوطَا، تَاع جَٻُکَ سٜيْ نِ تٛ اٜ وٛودِ شٜيْدِيٻٜ طِطٛ کٛو تَتٛ؞ وَغِّنْ غَطٛوٻٜ حَکّٜ يٜىٰسٛ کٛو مٛيٜ، نغَمْ کٛرِيٻٜ کُلَ؞ يٜىٰسٛ اَللَّه اٜ يٜىٰسُ اَلْمَسِيحُ اٜ مَلَاعِکَعٜنْ شٜنِيٻٜ، اٜ مِ وَغِّنْمَا تَاع وَطُ يِدّٜ حٛورٜ ندٜرْ وَطُکِ کٛ مبِيمَامِ؞ تَاع يَاوُ يٛوَنْکِ کٛو مٛيٜ جُوطٜ نغَمْ وَطُکِ دٛعَارٜ سُٻُکِمٛ اَرْدِيطٛ؞ نٛنْ مَا تَاع وَطُ حٛورٜ مَاطَ ندٜرْ غٛطُّمْ کٛ وٛوطَا طُمْ وٛٻّٜ نغَطَتَ؞ وَطُ جٛنْدٜ لَمْندٜ؞ تَاع يَرُ ندِيَمْ تَنْ، اَمَّا يَرُ ندِيَمْ اِنَبٛجَمْ سٜطَّ نغَمْ فُکِّنْکِ ݧَوُ اُمَّنْتٛوطُمَّ ندٜرْ رٜىٰدُ؞ حَکّٜ وٛٻّٜ يِمْٻٜ اٜ نجَيْرِ طُمْ وٛنِ کٛ طُمْ فٛوندَ نغِکُّ مَٻّٜ، اَمَّا حَکّٜ وٛٻّٜ سٜيْ يٜىٰسٛ طُمْ وُرْتٛيْتٛ؞ نٛنْ مَا کُوطٜ بٛطّٜ اٜ نجَيْرِ طٜ نغٛنِ، کٛو مَا اٜ طٜ شُوطِي طٜ مبُرْتٛيْتٛ؞ تٛ مَشُّٻٜ اٜ تٛکَّ يٜىٰسُ، اٜ حَانِ ٻٜ مَوْنِنَ جٜيْٻٜٻٜ، نغَمْ تٛع غٛطّٛ مٜتَ حَالَ کَلُّکَ دٛوْ اَللَّه اٜ اٜکِّتِنٛلْ مٜىٰطٜنْ؞ تٛ مَشُّٻٜ ٻٜنْ اٜ نغٛودِ جٜيْٻٜٻٜ تٛکُّٻٜ يٜىٰسُ، تٛع ٻٜ نجَوَنَٻٜ نغَمْ کَمْٻٜ مَا ٻٜ تٛکُّٻٜ يٜىٰسُ؞ اَمَّا ٻٜ کُوَنَٻٜ کٛ ٻُرِ وٛوطُکِ، نغَمْ ݧَامٛوٻٜ بٛتٜ کُوطٜ مَٻّٜ ٻٜ تٛکُّٻٜ يٜىٰسُ، غِطَاٻٜ؞ دٛولٜ اٜکِّتِنَا طُعُمْ فُو نغَعَجِنَاطُمْ؞ فُو اٜکِّتِنْطٛ اٜکِّتِنٛلْ فٜىٰرٜ شَلِينغٛلْ تٛکَّ بٛلِيطٜ غٛونغَ طٜ يٜىٰسُ اَلْمَسِيحُ جٛومِرَاوٛ مٜىٰطٜنْ، طٛنْمَا اٛ وَݧِ اٜکِّتِنٛلْ کٛلُّنغٛلْ نٛ تٛکِّرْتٜنْ اَللَّه، اٛ کٜوْطٛ مَنْغُ حٛورٜ، وَلَا کٛ اٛ اَنْدِ؞ اٛ غِطّٛ غٜدِّ اٜ فٛطْفٛطْتِرْکِ دٛوْ بٛلِيطٜ؞ فٛطْفٛطْتِرْکِ کِنْ اٜ وَدَّ لَوْلِيرُ، اٜ يٜدّٛوتِرْکِ، اٜ حُطْحُطْتِرْکِ، اٜ ݧُمٛوجِ کَلُّطِ دٛوْ يِمْٻٜ؞ اٛ غِطّٛ يٜدّٛوتِرْکِ کِ رٜعَتَا اٜ يِمْٻٜ ٻٜ ݧُمٛ بَاتُنغٛ، ٻٜ نغَلَا غٛونغَ، ݧُمٛوٻٜ تٛکّٛلْ اَللَّه طُمْ طَتَلْ حٜٻُکِ شٜىٰدٜ؞ غٛونغَ، اٜ وٛودِ رِسْکُ مَوْطُمْ ندٜرْ کُلٛلْ اَللَّه تٛ اٜنْ مُݧِي دٛوْ کٛ نغٛودُطٜنْ؞ نغَمْ اٜنْ نغَرْدَايِ اٜ غٛطُّمْ ندٜرْ دُونِيَارُ، نٛنْ مَا اٜنْ شٛعّٛدَتَاکٛ اٜ غٛطُّمْ؞ تٛو، تٛ اٜنْ نغٛودِ ݧَمْندُ اٜ کٛلْتٜ، طُمْ حٜپِيعٜنْ؞ اَمَّا غِطْٻٜ رِسْکُکِ، سَطَا ٻٜ نغَطَ کٛ حَلِّ، ٻٜ نجَنَ ندٜرْ تَرْکٛوٛلْ سُونٛ فُو فِي مٜىٰرٜجُمْ؞ سُونٛ نغٛنْ فٛوطَنَيْٻٜ تٛرَّ ٻٜ لَلَّ ٻٜ کَلْکَ؞ نغَمْ يِدّٜ شٜىٰدٜ وٛنِ فُطّٛودٜ کٛو اِرِ طُمٜ فِي کَلُّطُمْ؞ نغَمْ يِدّٜ شٜىٰدٜ، وٛٻّٜ اَلِي حٛولَاکِ يٜىٰسُ ٻٜ ڤٛوطَنِ کٛعٜ مَٻّٜ تٛرَّاجِ کَلُّطِ؞ اَمَّا اَنْ، ندٜ اَ حٛولَکٜ اَللَّه، وٛطِّتَ فُو فِي طُعُمْ؞ وَطُ حٛورٜ مَاطَ دٛوْ وَطُکِ کٛ وٛوطِ، اٜ تٛکُّکِ اَللَّه، اٜ حٛولَاکِمٛ، اٜ يِدّٜ، اٜ مُݧَلْ، اٜ حَکِّيلٛ؞ وَطُ کٜىٰرٛلْ کٛ مبَاوَتَا وَطُکِ ندٜرْ حٛولَاکِ يٜىٰسُ اَلْمَسِيحُ؞ کٜٻَنَا حٛورٜ مَاطَ يٛنْکِ کِ رٜعَتَا، نغَمْ کَنْجُمْ وَطِ طُمْ نٛدُّمَا شَرٜلْ کٛ نجَٻُطَا يٜىٰسُ يٜىٰسٛ يِمْٻٜ طُطْٻٜ؞ يٜىٰسٛ اَللَّه غَطَنْطٛ کٛو طُمٜ يٛنْکِ، اٜ يٜىٰسٛ يٜىٰسُ اَلْمَسِيحُ بِيطٛ غٛونغَ دٛوْ مُوطُمْ يٜىٰسٛ بِلَاتُسْ کُلٛلْ وَلَا، اٜ مِ وِعُمَا، تٛکُّ کٛ اَللَّه وِعِ اٜ غٛونغَ نَا ݧَلْندٜ ندٜ جٛومِرَاوٛ مٜىٰطٜنْ يٜىٰسُ اَلْمَسِيحُ وَرْتٛيْتَ؞ اٛ وَرْتَيْ اٜ شَرٜلْ نغٜلْ اَللَّه سُٻَنِمٛ؞ اَللَّه اٛ بَرْکِطِنَاطٛ، کَنْکٛ تَنْ جٜيِ لَامُ، لَامِيطٛ لَمْلَمْٻٜ، جٛومُ کٛو طُمٜ؞ کَنْکٛ تَنْ وٛنِ مٛ مَايَتَا، اٜ مٛ جٛوطِي ندٜرْ جَيْنغٛلْ، وَلَا ڤٛتُطٛ ٻَدّٛو حَادٜ مَاغٛلْ، وَلَا مٜىٰطُطٛ يِيکِمٛ، وَلَا بَاوَيْطٛ يِعَمٛ؞ مَنْغُ اٜ لَامُ طُمْ رٜعَتَا تَبِّتَ تٛ مَاکٛ؞ اَامِنْ؞ وَغِّنْ غٛودُٻٜ رِسْکُ ندٜرْ دُونِيَارُ ندُعُ، تٛع ٻٜ مَوْنِنَ کٛعٜ مَٻّٜ، تٛع ٻٜ نغَطَ ٻٜرْطٜ مَٻّٜ دٛوْ رِسْکُ طُمْ تَبِّتَتَا، اَمَّا ٻٜ نغَطَ ٻٜرْطٜ مَٻّٜ دٛوْ اَللَّه، کٛکُّطٛعٜنْ کٛو طُمٜ ٻٜرْندٜ غٛعٛ نغَمْ نَنٜنْ بٜلْطُمْ؞ وِعُٻٜ ٻٜ نغَطَ کٛ وٛوطِ، ٻٜ نغَرْتَ غَطٛوٻٜ کُوطٜ بٛطّٜ، ٻٜ نغَرْتَ کٛکّٛوٻٜ شَاحُ ٻٜرْندٜ غٛعٛ، غِطْٻٜ سٜنْدُدُکِ کٛ ٻٜ نغٛودِ اٜ وٛٻّٜ؞ تٛ ٻٜ نغَطِي نٛنْ، ٻٜ ندٜسَنِي کٛعٜ مَٻّٜ رِسْکُ تَبُّتُطُمْ نغَمْ ݧَلْندٜ جَانغٛ، نغَمْ ٻٜ مبَاوَ حٜٻُکِ يٛنْکِ تَبِّتَيْکِ؞ تِمٛوتِ، جٛغَ کٛ اَللَّه حٛکُّمَا بٛطُّمْ؞ وٛطِّتَ حَالَاجِ طِ نغَلَا غٛونغَ دٛوْ اَللَّه اٜ غٜدِّ مٜىٰرٜىٰجِ طِ وٛٻّٜ يِمْٻٜ نٛدِّرْتَ «اَنْدَلْ،» اَمَّا نَاع طُمْ غٛونغَ؞ نغَمْ وٛٻّٜ اٜ مبِعَ اٜ نغٛودِ اَنْدَلْ، ندٜرْ نٛنْ ٻٜ اَلِي حٛولَاکِ يٜىٰسُ؞ اَللَّه بَرْکِطِنَعٛنْ؞ مِنْ بُلُسْ مٛ اَللَّه سُٻِ مِ وَرْتَ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ اَللَّه سُٻِييَمْ نغَمْ مِ حٛکَّ حَبَرُ يٛنْکِ کِ طُمْ وَطِ اَلْکَوَلْ حٜٻُکِ ندٜرْ تٛکُّکِ يٜىٰسُ؞ اٜ مِ وِنْدَنْمَا طٜرٜوٛلْ نغٛعٛلْ تِمٛوتِ، ٻِطّٛ اَمْ ندٜرْ تٛکُّکِ يٜىٰسُ، مٛ نغِطُمِ؞ اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ بَرْکِطِنْمَا، يُرْمِنَنْمَا حٛکُّمَا جَمْ؞ اٜ مِ يٜتَّ اَللَّه مٛ کُوَنَيْمِ اٜ ٻٜرْندٜ لَمْندٜ، نٛ مَامَعٜنْ اَمْ نغَطِ؞ اٜ مِ يٜتَّمٛ کٛو نغٜلٜ شَرٜلْ نغٜلْ نغَطَنَيْمَامِ دٛعَارٜ جٜمَّ اٜ ݧَلَوْمَ؞ تٛ مِ سِفْتٛرِي غٛنْطِ طِ ندُفُطَا، سٜيْ مِ نَنَ مِ حَاٻِي يِيکِمَ نغَمْ مِ نَنَ بٜلْطُمْ طُطُّمْ؞ مِ سِفْتٛرِي نٛ کٛولٛرِطَا يٜىٰسُ اٜ ٻٜرْندٜ غٛعٛ، نٛنْ نٛ مَامَ مَاطَ لٛويِسْ اٜ مَدُوجٛ مَاطَ يُنِسْ کٛولٛرِيمٛ ٻٜرْندٜ غٛعٛ، ندٜنْ جٛونِ بٛو مِ تَبِّتِنِي اَنْ مَا اَ حٛولَکٜمٛ نٛنْ؞ نغَمْ نٛنْ اٜ مِ تٛرٛمَا، ٻٜيْدُ حُوتِرْکِ دٛکَّلْ نغَلْ اَللَّه حٛکُّمَا شَرٜلْ کٛ نجٛوَنْمَامِ جُوطٜ؞ نغَمْ جٛومِرَاوٛ حٛکَّايِعٜنْ نغِکُّ کُلٛلْ، اَمَّا اٛ حٛکِّيعٜنْ نغِکُّ يِدّٜ اٜ بَوْطٜ اٜ سُرُکِ کٛعٜ مٜىٰطٜنْ؞ نغَمْ مَاجُمْ تَاع سٜمْتُ حٛکُّکِ يِمْٻٜ حَبَرُ جٛومِرَاوٛ مٜىٰطٜنْ، تَاع بٛو سٜمْتَمْ مِنْ مَٻَّاطٛ نغَمْ تٛکُّکِ يٜىٰسُ؞ اَمَّا اٜنْ نجَرْدُ تٛرَّ حٛکُّکِ حَبَرُ يٜىٰسُ ندٜرْ بَوْطٜ اَللَّه؞ کَنْکٛ حِسْنِعٜنْ، نٛدِّعٜنْ نغَمْ نغَرْتٜنْ يِمْٻٜ مَاکٛ کُوٜنْ کُوغَلْ مَاکٛ؞ اٛ وَطُ نٛنْ نَاع نغَمْ غٛطُّمْ بٛطُّمْ طُمْ نغَطّٜنْ، اَمَّا نٛنْ اٛ يِطِرِ فِي طُمْ وَطٛرٛو اٜ يِدّٜ ندٜ اٛ حٛلِّعٜنْ ندٜرْ يٜىٰسُ اَلْمَسِيحُ کٛ دُونِيَارُ تَغٜىٰ؞ جٛونِ بٛو اٛ وَنْغِنَنِيعٜنْ يِدّٜ ندٜنْ بَرْکَ کِسْنٛووٛ مٜىٰطٜنْ يٜىٰسُ اَلْمَسِيحُ، غَرْتِرْطٛ سٜمْبٜ مَيْدٜ مٜىٰرٜ؞ کَنْکٛ حٛلِّعٜنْ لَاوٛلْ نغٛلْ تٛکّٜتٜنْ کِسٜنْ کٜٻٜنْ يٛنْکِ کِ رٜعَتَا بَرْکَ حَبَرُ بٜلْطُمْ؞ نغَمْ حٛکُّکِ حَبَرُ بٜلْطُمْ طُعُمْ، اَللَّه وَرْتِرِيَمْ غَعَجِنٛووٛ اٜ لِلَاطٛ اٜ اٜکِّتِنٛووٛ؞ کَنْجُمْ وَطِ اٜ مِ يَرَ بٛنٜ طُعُمْ نِينِ، اَمَّا فُو اٜ نٛنْ مِ سٜمْتَايِ نغَمْ اٜ مِ اَنْدِ مٛ کٛولِيمِ؞ مِ تَبِّتِنِي اٛ وَاوَيْ رٜىٰنُکِ کٛ اٛ حٛکِّيَمْ يَاکِ ݧَلْندٜ جَانغٛ؞ کٛ اٜکِّتِنْمَامِ طُمْ غٛونغَ؞ جٛغَطُمْ بٛطُّمْ، تٛکُّطُمْ اٜ يِدّٜ ندٜ کٜٻْطٜنْ ندٜرْ حٛولَاکِ يٜىٰسُ اَلْمَسِيحُ؞ جٛغَ حَبَرُ غٛونغَ بٛطُّمْ طُمْ رُوحُ اَللَّه غٛنْطُمْ ندٜرْ مٜىٰطٜنْ حٛکُّمَا؞ اَ اَنْدِ کٛو مٛيٜ غٛنْطٛ ندٜرْ لٜيْطٜ اَاسِيَ وَݧِييَمْ، ندٜرْ مَٻّٜ حَا اٜ فَيْجٜلُسْ اٜ حَمٛوجٜنِسْ؞ جٛومِرَاوٛ يُرْمِنَنَ وُرٛ اٛنٜسِفٛرُسْ نغَمْ ندٜ طُطُّمْ اٜ مٛ سٜمْبِطِنَيَمْ، اٛ سٜمْتَايِيَمْ ندٜ طُمْ مَٻِّيَمْ ندٜرْ سُودُ شُرَلْ؞ کٛ اٛ يٛتِّي غَرِيرِ رٛومَ، اٛ طَٻِّتِييَمْ نَاع سٜطَّ نَاکِ اٛ حٜٻْتِيَمْ؞ جٛومِرَاوٛ مٜىٰطٜنْ يُرْمِنَنَمٛ ݧَلْندٜ جَانغٛ؞ اَ اَنْدِ بٛطُّمْ نٛ اٛ وَلِّرِيَمْ ندٜرْ غَرِيرِ اَافِسَ؞ اَنْ، ٻِطّٛ اَمْ تِمٛوتِ، سٜمْبُطُ ندٜرْ بَرْکَ غٛنْطُمْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ؞ کٛ نَنْطَا مِ اٜکِّتِنِي يٜىٰسٛ شٜيْدُعٜنْ طُطْٻٜ، اٜکِّتِنْطُمْ يِمْٻٜ ٻٜ غٛونغَ، بَاوَيْٻٜ اٜکِّتِنَطُمْ وٛٻّٜ؞ مُݧُ ندٜرْ تٛرَّ کَ نجَرٜتٜنْ بٛ سٛوجِيجٛ يٜىٰسُ اَلْمَسِيحُ بٛطّٛ؞ وَلَا سٛوجِيجٛ نَتِّنَيْطٛ حٛورٜ مُوطُمْ ندٜرْ وٛنْغَلْ کُوغَلْ فٜىٰرٜ، نغَمْ کٛ اٛ يِطِ وٛنِ اٛ وٜلْنَنَ مَوْطٛ مَاکٛ ٻٜرْندٜ؞ وَلَا کٜٻٛووٛ دٛکَّلْ ندٜرْ فِجٛ تٛ اٛ تٛکَّايِ دٛوکَ فِجٛ نغٛنْ؞ دٜمٛووٛ فِجٛ وَلَا، کَنْکٛ حَانِ اَرْتَ حٜٻُکِ کٛ رٜمَا؞ ݧُمُ دٛوْ کٛ مبِيمِ، نغَمْ جٛومِرَاوٛ حٛکّٜتٜ فَامُ ندٜرْ کٛو طُمٜ؞ سِفْتٛرْ يٜىٰسُ اَلْمَسِيحُ؞ اٛ اُمَّکٜ دَغَ مَيْدٜ، اٛ وَرِي دَغَ لٜݧٛلْ دَوْدَ، نٛنْ نٛ نغَعَجِنِرْمِ؞ کَنْجُمْ وَطِ تٛرّٛتٛومِ جٛونِ اٜ مِ حَٻِّرَا ٻٛغِّ نجَمْندِ بٛ غُجّٛ شَلٛرْطٛ، اَمَّا وٛلْدٜ اَللَّه حَٻَّاکِ؞ نغَمْ مَاجُمْ مِ مُݧِي ندٜرْ کٛو طُمٜ نغَمْ يِمْٻٜ ٻٜ اَللَّه سُٻِ، نغَمْ کَمْٻٜ مَا ٻٜ کٜٻَ کِسْندَمْ تٛ يٜىٰسُ اَلْمَسِيحُ، حَوْتِ اٜ مَنْغُ تَبِّتَيْطُمْ؞ حَالَ کَعَ طُمْ غٛونغَ: «تٛ اٜنْ مَيْدِي اٜ يٜىٰسُ، اٜنْ نجٛوطٛدٛتٛ اٜ مَاکٛ؞ تٛ اٜنْ مُݧِي، اٜنْ لَامٛدٛتٛ اٜ مَاکٛ؞ تٛ اٜنْ نغَݧِيمٛ، کَنْکٛ مَا اٛ وَݧَيْعٜنْ؞ تٛ اٜنْ نغَطَنْتَا يٜىٰسُ کٛ حَانِ، کَنْکٛ اٛ وَطَيْ کَ وَطُکِ کٛ حَانِ، نغَمْ اٛ وَاوَتَا وَݧُکِ حٛورٜ مَاکٛ؞» وَطُ کَ سِفْتٛرَنْکِٻٜ فُو فِي طُعُمْ، وَغِّنْٻٜ يٜىٰسٛ اَللَّه ٻٜ نغٛطِّتٛو يٜدّٛوتِرْکِ دٛوْ بٛلِيطٜ، نغَمْ وَلَا کٛ طُمْ نَفِ، سٜيْ نِ طُمْ وٛنَّ نَنٛوٻٜ؞ وَطُ کٛ مبَاوَتَا وَطُکِ نغَمْ نغَرْتِرَا حٛورٜ مَاطَ کٛ جَٻٜتٜىٰ تٛ اَللَّه، کُوٛووٛ مٛ نَنَتَا شٜمْتُطُمْ، اٜکِّتِنٛووٛ وٛلْدٜ غٛونغَ نٛ ندٜ وٛنْتِندِرِ؞ وٛطِّتَ حَالَ مٜىٰرٜحَ کَ وَلَا کُلٛلْ اَللَّه، نغَمْ کَ وَطَيْ يِمْٻٜ ٻٜيْدَ وٛطِّتَاکِ اَللَّه؞ حَالَ مَٻّٜ سَنْکِتٛتٛ نٛ ڤُتّٜ ݧَامِرْتَ ٻَنْدُ؞ ندٜرْ مَٻّٜ اٜ وٛودِ حِمٜىٰنِيُسْ اٜ فِلٜتُسْ، اَلُٻٜ تٛکُّکِ غٛونغَ اٜ مبِعَ اُمَّاکِ مَيْٻٜ يَادَکٜ پَٻَّکٜ؞ اٜ ٻٜ مَجِّنَ وٛٻّٜ کٛولِيٻٜ يٜىٰسُ؞ فُو اٜ نٛنْ، کٛ اَللَّه تِغِّ اٜ طُمْ دَرِي بٛطُّمْ؞ دٛوْ مَاجُمْ طُمْ وِنْدِ وِيکِ، «جٛومِرَاوٛ مٜىٰطٜنْ اٜ اَنْدِ ٻٜ مُوطُمْ،» ندٜنْ، «کٛو مٛيٜ بِعٛووٛ اٜ تٛکَّ جٛومِرَاوٛ مٜىٰطٜنْ دٛولٜ اٛ اَلَ وَطُکِ کٛ وٛوطَا؞» ندٜرْ وُرٛ مَنْغٛ نَاع تُمُّطٜ طٜ طُمْ وَطِرِ جِينَارِ اٜ اَجُرْفَارِ تَنْ نغٛنِ ندٜرْ، اَمَّا اٜ وٛودِ تُمُّطٜ غَطِرَاطٜ لٜطّٜ اٜ لٛوڤٜ کَدِنْ؞ غٛطّٜ اٜ کُوتِرٜىٰ نغَمْ حُمْتٛ، ندٜنْ غٛطّٜ نغَمْ کٛو ندٜيٜ؞ نٛنْ مَا تٛ نٜطّٛ اَلِي وَطُکِ کٛ وٛوطَا، اٛ وَرْتَيْ کُوتِرْتٜىٰطٛ نغَمْ فِي بٛطُّمْ؞ جٜيْطٛمٛ سُٻَيْمٛ وَرْتِرَمٛ نٜطّٛ مٛ اٛ حُوتِرْتَ، شِرْيِيطٛ نغَمْ حُوَ کٛو اِرِ نغَلٜ کُوغَلْ بٛنْغَلْ؞ دٛغُّ سُونٛ نغٛ وٛوطَا نغٛ سُکَاکُ، وَطُ کٛ مبَاوَتَا وَطُکِ تٛکَّا اَادِلَاکُ، اٜ حٛولَاکِ يٜىٰسُ، اٜ يِدّٜ، اٜ جٛنْدٜ جَمْ، حَوْتِ اٜ يِمْٻٜ تٛکّٛوٻٜ جٛومِرَاوٛ اٜ ٻٜرْندٜ لَمْندٜ؞ تَاع نَتِّنْ حٛورٜ مَاطَ ندٜرْ غٜدِّ مٜىٰرٜىٰجِ طِ نغَلَا حٛورٜ، نغَمْ اَ اَنْدِ اٜ طِ نغَدَّ حَوْرٜ؞ دٛولٜ تٛع کُوَنٛووٛ جٛومِرَاوٛ مٜىٰطٜنْ وَرْتَ غِطّٛ حَوْرٜ، اَمَّا اٛ وَرْتَ غَطَنٛووٛ يِمْٻٜ کٛ وٛوطِ، بَوْطٛ اٜکِّتِنْکِ، غٛودُطٛ مُݧَلْ؞ اٛ وَرْتَ ڤَمْتِنٛووٛ غٜدّٛوٻٜ اٜکِّتِنٛلْ مَاکٛ ندٜرْ حَکِّيلٛ؞ طُمْ غَطٛتٛوطُمْ اَللَّه وَطَ ٻٜ تُوبَ، ٻٜ ڤَامَ غٛونغَ، ٻٜ شٛڤْتٛو تَرْکٛوٛلْ شٜيْطَنْ نَنْغُنغٛلْٻٜ وَرْتِرِٻٜ غَطٛوٻٜ کٛ اٛ يِطِ؞ اَمَّا فَامُ طُعُمْ، تٛ رٜعُکِ دُونِيَارُ ٻَدَکٜ، طُمْ وَطَيْ شَرٜلْ شَطُنغٜلْ؞ يِمْٻٜ نغَرْتَيْ غِطُٻٜ کٛعٜ مَٻّٜ، غٛودُٻٜ يِدّٜ شٜىٰدٜ، مَنْتٛوٻٜ کٛعٜ مَٻّٜ، مَوْنِنٛوٻٜ حٛورٜ، غِطُٻٜ حُطُکِ، ٻٜ مَوْنِنْتَا دَݧٛوٻٜ مَٻّٜ، ٻٜ نغٜتَّتَا، ٻٜ نغَرْتَيْ ٻٜ شٜنَاکِ؞ ٻٜ نغَرْتَيْ ٻٜ نغَلَا يِدّٜ، ٻٜ نجَافَتَاکٛ، مٜتٛوٻٜ حَالَاجِ کَلُّطِ دٛوْ وٛٻّٜ، ٻٜ شُرَتَا کٛعٜ مَٻّٜ، غٛودُٻٜ حَلّٜىٰندٜ، غَݧٛوٻٜ کٛ وٛوطِ؞ ٻٜ نغَرْتَيْ ݧَامٛوٻٜ اَمَانَ، ٻٜ نغَلَا حَکِّيلٛ، نغِعٛوٻٜ کٛعٜ مَٻّٜ ٻٜ ٻُرِي کٛو مٛيٜ، ٻُرْٻٜ يِطُکِ نَنْکِ بٜلْطُمْ دٛوْ يِطُکِ اَللَّه؞ ٻٜ کٛلَّيْ بٛ ٻٜ تٛکُّٻٜ اَللَّه، اَمَّا ٻٜ نغَݧَ بَوْطٜ مَاکٛ؞ وٛطِّتَ اِرِ يِمْٻٜ ٻٜنْ طٛنْ؞ نغَمْ ندٜرْ مَٻّٜ اٜ وٛودِ نَتّٛوٻٜ غُرٜ اٜ مَجِّنَ رٜوْٻٜ ٻٜ نغَلَا فَامُ، ٻٜ حَکّٜ ݧٛعِّ، ٻٜ سُونٛ فٜىٰرٜ‑فٜىٰرٜ لَامِي؞ ٻٜنْ طٛنْ رٜوْٻٜ کٛو ندٜيٜ اٜ ٻٜ اٜکِّتٛو، اَمَّا ٻٜ مبَاوَتَا حٜٻْتُکِ غٛونغَ؞ نٛنْ نٛ جٜنِسْ اٜ جَمْبِرَسْ نغَݧِرِ کٛ مُوسَ وِعِ، نٛنْ يِمْٻٜ ٻٜنْ نغَݧِرْتَ غٛونغَ؞ ݧُمٛ مَٻّٜ نغٛ کَلُّنغٛ، حٛولَارٜ مَٻّٜ وَرْتِي لَلُّندٜ؞ اَمَّا ٻٜ نغٛطِّنْتَا ندٜرْ مَجِّنْکِ يِمْٻٜ، نغَمْ کٛو مٛيٜ اَندِتَيْ شِيَ حَکِّيلٛ مَٻّٜ نٛنْ نٛ طُمْ اَندِتِرِ جٜنِسْ اٜ جَمْبِرَسْ؞ اَمَّا اَنْ، تِمٛوتِ، اَ اَنْدِ اٜکِّتِنٛلْ اَمْ، اٜ نغِکُّ اَمْ، اٜ کٛ نغِطُمِ وَطُکِ ندٜرْ جٛنْدٜ اَمْ، اٜ نٛ کٛولٛرِيمِ يٜىٰسُ، اٜ مُݧَلْ اَمْ، اٜ يِدّٜ اَمْ، اٜ مُݧَلْ اَمْ ندٜرْ تٛرَّ، اٜ بٛنٜ طُمْ اُمْ حٛکِّيَمْ، اٜ تٛرَّاجِ طِ نجَرْمِ، اٜ کٛ حٜٻِيَمْ اٜ اَنْتَاکِيَ اٜ اِکٛونِيَ اٜ لِسْتِرَ؞ اَمَّا فُو اٜ نٛنْ، جٛومِرَاوٛ حِسْنِييَمْ ندٜرْ تٛرَّاجِ طِنْ فُو؞ غٛونغَ کٛو مٛيٜ غِطّٛ وَطَ جٛنْدٜ اِرِ ندٜ اَللَّه يِطِ ندٜرْ تٛکُّکِ يٜىٰسُ اَلْمَسِيحُ، اٛ يَرَيْ بٛنٜ؞ يِمْٻٜ کَلُّٻٜ اٜ مُنَافُکِعٜنْ ٻٜ ٻٜيْدَيْ حَلّٜىٰندٜ مَٻّٜ ٻٜ نغَطَيْ کَ مَجِّنْکِ يِمْٻٜ، کَمْٻٜ مَا وٛٻّٜ اٜ مَجِّنَٻٜ؞ اَمَّا اَنْ وَطُ کَ وَطُکِ فِي بٛطُّمْ طُمْ اٜکِّتِطَا طُمْ تَبِّتِنْطَا غٛونغَ مَاجُمْ، نغَمْ اَ اَنْدِ يِمْٻٜ اٜکِّتِنْٻٜمَ؞ اَ اَنْدِ دَغَ اَ سُکَيٜلْ ڤَمَرٜلْ اَنْدُطَا دٜفْتٜ شٜنِيطٜ، بَاوَيْطٜ کٛلُّمَا لَاوٛلْ کِسْندَمْ بَرْکَ حٛولَاکِ يٜىٰسُ اَلْمَسِيحُ؞ فُو اَايَاجٜ غٛنْطٜ ندٜرْ دٜفْتٜرٜ شٜنِيندٜ طُمْ فٛوفَانغٛ اَللَّه؞ طُمْ حُوتِرَيْطٜ نغَمْ اٜکِّتِنْکِ، اٜ وَغِّنْکِ، اٜ حٛلُّکِ يِمْٻٜ غٛونغَ تٛ ٻٜ مبٛوفِي، اٜ اٜکِّتِنْکِ کٛ اَللَّه يِطِ؞ طٜ مبَلَّيْ کُوَنٛووٛ اَللَّه وَرْتَ کُوٛووٛ بٛطّٛ شِرْيِيطٛ نغَمْ حُوُکِ کٛو اِرِ نغَلٜ کُوغَلْ بٛنْغَلْ؞ اٜ مِ وَغِّنْمَا يٜىٰسٛ اَللَّه اٜ يٜىٰسُ اَلْمَسِيحُ غَطَنٛووٛ ٻٜ يٛنْکِ اٜ مَيْٻٜ کِيتَ؞ نغَمْ سٛعّٛيَاکِ مَاکٛ دُونِيَارُ اٜ لَامُ مَاکٛ، اٜ مِ وِعُمَا، وَعَجِنْ وٛلْدٜ اَللَّه، وَطُ کَ وَعَجِنْکِندٜ اٜ شَرٜلْ نغٜلْ نغِطَّا اٜ شَرٜلْ نغٜلْ اَ يِطَا؞ تٛ يِمْٻٜ نغَطِي کٛ وٛوطَا، وِعُٻٜکَ، وَغِّنْٻٜ، سٜمْبِطِنْٻٜ، وَادُ مُݧَلْ اٜ مَٻّٜ، نغَطَا کَ اٜکِّتِنْکِٻٜ؞ نغَمْ شَرٜلْ اٜ وَرَ نغٜلْ يِمْٻٜ نغَݧَتَ اٜکِّتِنٛلْ غٛونغَ، ٻٜ تٛکَّ کٛ وٜلْنَنْتَٻٜ ٻٜرْطٜ، ٻٜ تٛکَّ مٛودِٻّٜ بِعٛوٻٜٻٜ کٛ ٻٜ نغِطِ نَنْکِ؞ يِمْٻٜ نغَݧَيْ نَنْکِ اٜکِّتِنٛلْ غٛونغَ، ٻٜ کٜتِّنْدَنٛو حَبَرُوجِ فٜوْرٜ؞ اَمَّا اَنْ، سُرُ حٛورٜ مَاطَ کٛو ندٜيٜ، مُݧُ ندٜرْ تٛرَّ کَ نجَرَتَا، حُوُ کُوغَلْ وَعَجِنْکِ، وَطُ فُو کُوغَلْ نغَلْ اَللَّه حٛکُّمَا بٛطُّمْ؞ يٛنْکِ اَمْ اٜ کُوغَلْ اَمْ وَرٛيِي رٜعُکِ؞ شَرٜلْ وَطِي نغٜلْ اَلَيْمِ دُونِيَارُ ندُعُ؞ مِ وَطِي کٛ مبَاوَيْمِ وَطُکِ ندٜرْ کُوغَلْ نغَلْ يٜىٰسُ حٛکِّيَمْ، مِ يٛتِّنِينغَلْ، مِ اَلَايِ حٛولَاکِمٛ؞ جٛونِ غِيفٛلْ اٜ تٛنْ حٜطِييَمْ، نغٛلْ طُمْ حٛکَّتَ غَطُٻٜ جٛنْدٜ بٛنْدٜ، نغٛلْ جٛومِرَاوٛ غَطٛووٛ کِيتَ غٛونغَ حٛکَّتَيَمْ ݧَلْندٜ جَانغٛ؞ نَاع مِنْ تَنْ، اَمَّا فُو غِطْٻٜ يِيکِ غَرْتٛلْ مَاکٛ؞ وَطُ کٛ مبَاوَتَا وَطُکِ نغَرَا تٛ اَمْ ندٜرْ يَوْطَارٜ؞ دِمَسْ سٜنْدِرِي اٜ اَمْ نغَمْ يِدّٜ فِي دُونِيَارُ ندُعُ، اٛ دِلِّي تَسَلٛونِکَ؞ کِرِجٜنْ بٛو دِلِّي غَلَاتِيَ، تِيتُسْ کَدِمَا دِلِّي دَلْمَاتِيَ؞ لُکَ تَنْ وٛنْدِ اٜ اَمْ طٛعٛ؞ طَٻُّتُ مَرْکُسْ نغَرْدَا اٜ مَاکٛ، نغَمْ اٛ وَاوَيْ وَلُّکِيَمْ ندٜرْ کُوغَلْ اَمْ؞ مِ لِلِي تِيکِکُسْ تٛ غَرِيرِ اَافِسَ؞ تَا وَرَيْ، نغَرْدَنَايَمْ اٜ شُدَّارِ اَمْ ندِ ندٜسُنٛومِ تٛ وُرٛ کَابُسْ تٛ غَرِيرِ تٛورُوَسْ، طٛنْمَا اٜ دٜفْتٜ اَمْ؛ کٛ ٻُرِ مَا، غَطِرَاطٜ لَرٜ؞ اَلِجَنْدَ بَعِلّٛ اَجُرْفَارِ حَلَّنِييَمْ نَاع سٜطَّ؞ جٛومِرَاوٛ وَاتَنَيْمٛ کٛ اٛ وَطِ؞ اَنْ مَا فَامَنْمٛ بٛطُّمْ، نغَمْ اٛ وَݧِي اٜکِّتِنٛلْ مٜىٰطٜنْ نَاع سٜطَّ؞ ݧَلْندٜ اَرَنْدٜىٰرٜ ندٜ ندَرِيمِ يٜىٰسٛ کِيتَ اٜ رٛومَ نغَمْ مِ وُرْتِنَ حٛورٜ اَمْ، وَلَا بَلُّطٛيَمْ؞ کٛو مٛيٜ سٜنْدِرِي اٜ اَمْ؞ اٜ مِ وَطَ دٛعَارٜ تٛع اَللَّه نَنْغَٻٜ دٛوْ کٛ ٻٜ نغَطِ؞ اَمَّا جٛومِرَاوٛ وَلِّييَمْ سٜمْبِطِنِييَمْ نغَمْ مِ وَعَجِنَ فُو وٛلْدٜ مَاکٛ نغَمْ يِمْٻٜ نَاع يَحُودَنْکٛعٜنْ فُو نَنَ؞ اٛ حِسْنِييَمْ دَغَ مَيْدٜ نٛ طُمْ حِسْنِرْتَ نٜطّٛ دَغَ حٛنْدُکٛ سٜمْبِنْدُ؞ جٛومِرَاوٛ وُرْتِنَيْيَمْ دَغَ کٛو اِرِ طُمٜ فِي کَلُّطُمْ، اٛ حِسْنَيْيَمْ نغَمْ اٛ نَتِّنَيَمْ وُرٛ مَاکٛ تٛنْ دٛوْ؞ مَنْغُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞ کٛوْنَنَايَمْ بِرِسْکِلَ اٜ اَکِيلَ اٜ اِيَالُ اٛنٜسِفٛرُسْ؞ اٜرَسْتُسْ دَرَکٜ اٜ غَرِيرِ کٛرِنْتِ؞ تُرٛوفِمُسْ بٛو، مِ اَلِيمٛ اٜ غَرِيرِ مِلِتُسْ اٛ يَمْطَا؞ وَطُ کٛ مبَاوَتَا وَطُکِ نغَرَا طٛعٛ کٛ ندُنْغُ وَرَ؞ يُبُلُسْ، اٜ فُدٜنْ، اٜ لَيْنُسْ، اٜ کَلَوْدِيَ، اٜ فُو تٛکُّٻٜ يٜىٰسُ غٛنْٻٜ طٛعٛ اٜ ٻٜ کٛوْنُمَا؞ جٛومِرَاوٛ بَرْکِطِنْمَا تِمٛوتِ، بَرْکِطِنَ فُو ٻٜ نغٛنْدُطَا؞ مِنْ، بُلُسْ مَشُّطٛ اَللَّه لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ اٛ سُٻِييَمْ نغَمْ مِ سٜمْبِطِنَ يِمْٻٜ اَللَّه شُٻَاٻٜ دٛوْ حٛولَاکِ يٜىٰسُ، مِ اٜکِّتِنَٻٜ غٛونغَ نغَمْ ٻٜ نجٛوطٛو جٛنْدٜ وٛوطُندٜ يٜىٰسٛ اَللَّه؞ غٛونغَ کَعَ وَطَيْ ٻٜ نغَطَ ٻٜرْطٜ دٛوْ حٜٻُکِ يٛنْکِ کِ رٜعَتَا؞ اَللَّه وَطِي اَلْکَوَلْ دٛوْ يٛنْکِ کِنْ کٛ دُونِيَارُ تَغٜىٰ، اٛ بٛو فٜوَتَا؞ ندٜ شَرٜلْ مَاکٛ وَطِ، کَنْکٛ اَللَّه کِسْنٛووٛ مٜىٰطٜنْ اٛ وَنْغِنِي غٛونغَ کَنْ ندٜرْ وَعَجُ، اٛ وِعِي مِ وَعَجِنَکَ؞ نغٛعٛلْ طٜرٜوٛلْ، اَنْ مبِنْدَنْمِنغٛلْ تِيتُسْ، اَ ٻِطّٛ اَمْ مٛ غٛونغَ ندٜرْ حٛولَاکِ يٜىٰسُ؞ اَللَّه ݧَاکٛ مٜىٰطٜنْ مٛ دٛوْ، اٜ يٜىٰسُ اَلْمَسِيحُ کِسْنٛووٛ مٜىٰطٜنْ بَرْکِطِنْمَا، حٛکُّمَا جَمْ؞ مِ اَلِيمَ اٜ لٜيْدِ کِرِتِ نغَمْ کٜىٰݧِتَا کٛو طُمٜ کٛ حٛرِي، شُٻَا مَوْٻٜ اٜ کٛو ندِيٜ غَرِيرِ نٛنْ نٛ مبِيمَامِ؞ دٛولٜ اَرْدِيطٛ ندٜرْ کَوْتَلْ تٛکُّٻٜ يٜىٰسُ وَرْتَ وَلَا کٛ طُمْ حُطِرْتَمٛ، غٛودُطٛ دٜبّٛ غٛعٛتٛ، مٛ ٻِٻّٜ مَاکٛ ٻٜ تٛکُّٻٜ يٜىٰسُ ٻٜ نغَلَا نغِکُّ کَلُّطُمْ کٛو شِيَ حَکِّيلٛ؞ ندٜ مَوْطٛ کَوْتَلْ تٛکُّٻٜ يٜىٰسُ اٛ کُوَنٛووٛ اَللَّه، دٛولٜ اٛ وَرْتَ وَلَا کٛ طُمْ حُطِرْتَمٛ؞ تٛع اٛ وَرْتَ مَوْنِنٛووٛ حٛورٜ، کٛو جَوْطٛ مٜتِّنْکِ ٻٜرْندٜ، کٛو جَرٛووٛ، کٛو طَٻِّتٛووٛ حَوْرٜ، کٛو غِطّٛ شٜىٰدٜ؞ اٛ وَرْتَ جَٻّٛتٛوطٛ حٛٻّٜ، غِطّٛ وَطُکِ بٛطُّمْ، شُرْطٛ حٛورٜ مُوطُمْ، اَادِلِيجٛ، شٜنِيطٛ، مٛ حَکِّيلٛ؞ اٛ وَرْتَ جٛغِيطٛ وٛلْدٜ اَللَّه تَبُّتُندٜ اٜ غٛونغَ نٛ طُمْ اٜکِّتِنِرِمٛ، نغَمْ اٛ وَاوَ سٜمْبِطِنْکِ ٻٜرْطٜ وٛٻّٜ اٛ اٜکِّتِنَٻٜ غٛونغَ؞ طٛنْمَا اٛ وَاوَ حٛلُّکِ غَݧُٻٜ وٛلْدٜ اَللَّه فَرْکُکِ مَٻّٜ؞ کَدِمَا اٜ وٛودِ يِمْٻٜ طُطْٻٜ غَݧُٻٜ تٛکَّ غٛونغَ، مٜتٛوٻٜ حَالَاجِ مٜىٰرٜ، مَجِّنٛوٻٜ يِمْٻٜ؞ طُطْٻٜ ندٜرْ يِمْٻٜ ٻٜنْ ٻٜ يَحُودَنْکٛعٜنْ تٛکُّٻٜ يٜىٰسُ؞ دٛولٜ طُمْ حَٻَنَٻٜ ٻٜ ندٜعِّتَ، نغَمْ اٜ ٻٜ اٜکِّتِنَ کٛ وٛوطَا، اٜ ٻٜ مَجِّنَ يِمْٻٜ وُرٛ‑وُرٛ نغَمْ ٻٜ کٜٻَ شٜىٰدٜ؞ غٛطّٛ مٛودِبّٛ مَٻّٜ، کِرِيتِيَنْکٜىٰجٛ، وِعِي، «کِرِيتِيَنْکٛعٜنْ ٻٜ ڤٜوٛوٻٜ کٛو ندٜيٜ، ٻٜ نغِکُّ بٛ مَرْلٜ کَلُّطٜ، ٻٜ ٻٜرْطٜ بَاتُطٜ، وٜىٰلَاٻٜ؞» کٛ اٛ وِعِ طُمْ غٛونغَ؞ نغَمْ مَاجُمْ حَٻَنْٻٜ بٛطُّمْ، نغَمْ حٛولَاکِ مَٻّٜ سٜمْبِطَ، ٻٜ اَلَ حٜتِّندَنَاکِ حَبَرُوجِ فٜوْرٜ طِ يَحُودَنْکٛعٜنْ اٜ دٛوکَاجِ غَݧُٻٜ غٛونغَ؞ کٛو طُمٜ اٜ لَاٻَنِ ٻٜ ٻٜرْطٜ لَاٻُطٜ؞ اَمَّا ٻٜ ٻٜرْطٜ طٜ لَاٻَا اٜ ٻٜ نجَٻَايِ غٛونغَ، وَلَا کٛ لَاٻَنِٻٜ، نغَمْ حَکّٜ وٛنِّي ٻٜرْطٜ مَٻّٜ اٜ ݧُمٛلْ مَٻّٜ؞ اٜ حٛنْدُکٛ اٜ ٻٜ مبِعَ اٜ ٻٜ اَنْدِ اَللَّه، اَمَّا کٛ ٻٜ نغَطَتَ اٜ حٛلَّ ٻٜ اَنْدَامٛ؞ ٻٜ نٜفْنِيٻٜ، ٻٜ نغَطَتَا کٛ اَللَّه وِعِ، وَلَا کُوغَلْ بٛنْغَلْ نغَلْ ٻٜ مبَاوَتَ وَطُکِ؞ اَمَّا اَنْ، اٜکِّتِنْ غٛونغَ؞ وِعُ ندٛتِّعٜنْ تٛع ٻٜ نغَرْتَ جَرٛوٻٜ، اَمَّا ٻٜ نغَرْتَ ٻٜ حَکِّيلٛ، ٻٜ شُرَ کٛعٜ مَٻّٜ؞ اٜ حَانِ ٻٜ کٛولٛو اَللَّه نَاع سٜطَّ، ٻٜ کٜىٰوَ يِدّٜ اٜ مُݧَلْ؞ نٛنْ مَا اٜکِّتِنَا مَدُعٜنْ نجٛوطٛو جٛنْدٜ حَانُندٜ رٜوْٻٜ تٛکُّٻٜ يٜىٰسُ نجٛوطٛو؞ تٛع ٻٜ نغَرْتَ بِعٛوٻٜ حَالَاجِ کَلُّطِ دٛوْ وٛٻّٜ، کٛو غِطُٻٜ نجَرُ؞ ٻٜ نغَرْتَ اٜکِّتِنٛوٻٜ کٛ وٛوطِ، نغَمْ ٻٜ اٜکِّتَ رٜوْٻٜ سُکَاٻٜ نٛ نغِطِرْتَ وٛرْٻٜ مَٻّٜ اٜ ٻِٻّٜ مَٻّٜ، اٜ نٛ ٻٜ نغَرْتِرْتَ شُرٛوٻٜ کٛعٜ مَٻّٜ، غٛودُٻٜ ٻٜرْطٜ لَاٻُطٜ، ڤَامَنٛوٻٜ وُرٛ مَٻّٜ، اَادِلِعٜنْ، تٛکّٛوٻٜ کٛ وٛرْٻٜ مَٻّٜ مبِعِٻٜ، نغَمْ تٛع طُمْ يَوَنَ وٛلْدٜ اَللَّه؞ نٛنْ مَا وَغِّنْ کَيٜعٜنْ ٻٜ شُرَ کٛعٜ مَٻّٜ؞ اَمَّا اَنْ وَرْتُ کٛ ٻٜ اٜکِّتٛتٛو ندٜرْ کٛ نغَطَتَا فُو؞ وَطُ حَکِّيلٛ اٜ غٛونغَ ندٜرْ اٜکِّتِنْکِ مَاطَ؞ حُوتِرْ بٛلِيطٜ بٛطّٜ طٜ نغٜدَّتَاکٜ؞ ندٜنْ ٻٜنْ طٛنْ غِطْٻٜ نغٜدَّ ٻٜ شٜمْتَيْ نغَمْ ٻٜ کٜٻَتَا غٛطُّمْ کَلُّطُمْ طُمْ ٻٜ مبِعَتَ دٛوْ مٜىٰطٜنْ؞ وِعُ مَشُّٻٜ نغَطَ کٛ جٜيْٻٜٻٜ مبِعِٻٜ، ٻٜ مبٜلْنَنَٻٜ ٻٜرْطٜ ندٜرْ کٛو طُمٜ؞ تٛع ٻٜ شَلٛو کٛ ٻٜ مبِعِ، تٛع ٻٜ نغُجَّنَٻٜ؞ اَمَّا کٛو ندٜيٜ ٻٜ کٛلَّ ٻٜ غَطٛوٻٜ بٛطُّمْ اٜ ٻٜ نغَطَ کٛ حَانِ ٻٜ نغَطَ، نغَمْ ندٜرْ کٛو طُمٜ طُمْ ٻٜ نغَطَتَ ٻٜ مَوْنِنَ اٜکِّتِنٛلْ اَللَّه کِسْنٛووٛ مٜىٰطٜنْ؞ نغَمْ اَللَّه حٛلِّي يِدّٜ مَوْندٜ ندٜ اٛ وَطِ لَاوٛلْ کِسْندَمْ نغَمْ يِمْٻٜ فُو؞ يِدّٜ ندٜنْ اٜکِّتِنِيعٜنْ اَلٜنْ جٛنْدٜ ندٜ اَللَّه يِطَا اٜ سُونٛ فِي دُونِيَارُ، نجٛوطٛوطٜنْ ندٜرْ دُونِيَارُ اٜنْ شُرَ کٛعٜ مٜىٰطٜنْ، اٜنْ نغَطَ کٛ حَانِ، اٜنْ تٛکَّ اَللَّه اٜ ٻٜرْندٜ غٛعٛ؞ اٜنْ کٜطٛو ݧَلْندٜ بَرْکِطِنَاندٜ ندٜ کَاٻُطٜنْ، ݧَلْندٜ ندٜ تٜدُّنغَلْ اَللَّه مٜىٰطٜنْ مَوْطٛ يٜىٰسُ اَلْمَسِيحُ کِسْنٛووٛ وَنْغَتَ؞ يٜىٰسُ حٛکِّي حٛورٜ مُوطُمْ نغَمْ مٜىٰطٜنْ نغَمْ اٛ رِمْطِنَعٜنْ دَغَ کٛو ندٜيٜ حَلّٜىٰندٜ، اٛ وَرْتِرَعٜنْ يِمْٻٜ مَاکٛ لَٻّٜ، غِطْٻٜ وَطُکِ بٛطُّمْ؞ اٜکِّتِنْ فُو فِي طُعُمْ، حُوتِرْ لَامُ مَاطَ ندٜرْ سٜمْبِطِنْکِ اٜ حَٻَنْکِ يِمْٻٜ؞ تَاع جَٻُ غٛطّٛ يَوَنْمَا؞ شِفْتٛرَنَا تٛکُّٻٜ يٜىٰسُ ٻٜ تٛکَّ لَامِيٻٜ اٜ اَرْدِيٻٜ ٻٜ نغَطَ کٛ ٻٜ مبِعِ، ٻٜ شِرْيٛو نغَمْ حُوُکِ کٛو اِرِ نغَلٜ کُوغَلْ بٛنْغَلْ؞ وِعُٻٜ تٛع ٻٜ مٜتَ حَالَ کَلُّکَ دٛوْ غٛطّٛ، تٛع ٻٜ نغَرْتَ طَٻِّتٛوٻٜ حَوْرٜ، تٛع ٻٜ نغَرْتَ ٻٜ ٻٜرْطٜ شَطّٜ؞ سٜيْ نِ ٻٜ کٛلَّ کٛو مٛيٜ نغِکُّ بٛطُّمْ؞ نغَمْ اٜنٜنْ مَا ندٜنّٛ اٜنْ اَنْدَانٛ کٛ نغَطٜتٜنْ، اٜنْ تٛکَّتَا کٛ طُمْ وِعِعٜنْ، اٜنْ مَجِّنَامَ؞ سُونٛ دُونِيَارُ حَٻِّيعٜنْ، اٜنْ نغِطِ کٛو اِرِ طُمٜ فِي کَلُّطُمْ؞ اٜنْ نغَطِي جٛنْدٜ مٜىٰطٜنْ ندٜرْ حَلّٜىٰندٜ اٜ لَوْلِيرُ، يِمْٻٜ نغَݧِيعٜنْ، اٜنٜنْ مَا اٜنْ نغَݧِيٻٜ؞ اَمَّا ندٜ اَللَّه کِسْنٛووٛعٜنْ وَنْغِنِ يُرْمٜىٰندٜ اٜ يِدّٜ مُوطُمْ، اٛ حِسْنِيعٜنْ، نَاع نغَمْ کُوطٜ بٛطّٜ طٜ نغَطُطٜنْ، اَمَّا نغَمْ يُرْمٜىٰندٜ مَاکٛ؞ اٛ حِسْنُعٜنْ بَرْکَ لٛوتُکِ ٻٜرْطٜ مٜىٰطٜنْ کِ رُوحُ مَاکٛ وَطِ وَرْتِرِيعٜنْ يِمْٻٜ حٜسْٻٜ؞ اٛ حٛکِّعٜنْ رُوحُ مَاکٛ بَرْکَ يٜىٰسُ اَلْمَسِيحُ کِسْنٛووٛ مٜىٰطٜنْ؞ تٛو، ندٜ يِدّٜ مَاکٛ وَرْتِرِيعٜنْ ٻٜ نغَلَا حَکّٜ يٜىٰسٛ مَاکٛ، جٛونِ اٜ مٛ يِطِ نغَرْتٜنْ دٛنٛوٻٜ يٛنْکِ کِ رٜعَتَا کِ نغَطّٜنْ ٻٜرْطٜ اٜنْ کٜٻَيْ؞ فِي طُعُمْ طُمْ مبِيمَامِ طُمْ غٛونغَ؞ اٜ مِ يِطِ شٜمْبِطِنَا حٛرِيٻٜ دٛوْ مَاجُمْ نغَمْ کٛولِيٻٜ اَللَّه نغَاتَ حَکِّيلٛ مَٻّٜ دٛوْ وَطُکِ کُوطٜ بٛطّٜ؞ فُو فِي طُعُمْ اٜ وٛوطِ طُمْ نَفَنَيْ کٛو مٛيٜ؞ اَمَّا اَنْ، وٛطِّتَ غٜدِّ مٜىٰرٜ اٜ فٜىٰرٛوتِرْکِ لٜݧٛلْ اٜ يِدّٜ حَوْرٜ اٜ يٜدّٛوتِرْکِ دٛوْ اَتَّوْرَ، نغَمْ وَلَا کٛ طُمْ نَفِ، طُمْ فِي مٜىٰرٜ؞ تٛ غٛطّٛ اٜ وَدَّ فٜىٰرٛوتِرٛلْ حَکُّندٜ مٛوطٛنْ، تٛ اٛ وَݧِي وَغِّنٛلْ مَاطَ اَرَنْدٜوٛلْ اٜ طِطَٻٛلْ، دٛغُّمٛ؞ اَ اَنْدِ اِرِ مَاکٛ اٛ غَݧُطٛ غٛونغَ، غَطٛووٛ کٛ وٛوطَا؞ کُوطٜ کَلُّطٜ طٜ اٛ وَطَتَ اٜ کٛلَّ اٛ وٛوطَا؞ تٛ مِ لِلٛيِي اَرْتٜمَسْ کٛو تِيکِکُسْ تٛ مَاطَ، سٜيْ نجَوْطٛطَا نغَرَا تٛ اَمْ اٜ غَرِيرِ نِکَفٛلِسْ نغَمْ اٜ مِ يِطِ مِ رُومَ تٛنْ؞ وَطُ کٛ مبَاوَتَا وَطُکِ مبَلَّا جٜنَسْ لَوْيَاجٛ اٜ اَفٛولٛسْ ندٜرْ يَادُ مَٻّٜ، تَبِّتِنَا وَلَا کٛ ٻٜ ندُلِّ؞ دٛولٜ يِمْٻٜ مٜىٰطٜنْ اٜکِّتٛو وَطُکِ کُوطٜ بٛطّٜ، نغَمْ ٻٜ مبَاوَ وَلُّکِ حَانُٻٜ وَلّٜىٰکِ ندٜنْ نغَمْ تٛع ٻٜ نجٛوطٛو جٛنْدٜ مٜىٰرٜ؞ فُو غٛنْدُٻٜ اٜ اَمْ اٜ کٛوْنُمَا؞ کٛوْنَنَايَمْ غِطْٻٜعٜنْ کٛولِيٻٜ يٜىٰسُ؞ اَللَّه بَرْکِطِنَعٛنْ اٛنْ فُو؞ طٜرٜوٛلْ نغٛعٛلْ پِوٛيِي دَغَ جُنْغٛ اَمْ، مِنْ بُلُسْ، اٜ بَنْدِرَاوٛ مٜىٰطٜنْ تِمٛوتِ؞ مِ مَٻَّاطٛ نغَمْ وَعَجِنْکِ حَبَرُ يٜىٰسُ اَلْمَسِيحُ؞ اٜ مِ وِنْدَنْمَا، فِلِمٛنْ، اَنْ کُودٛووٛ اٜ اَمِنْ، غِطَاطٛ، اَنْ اٜ اَافِيَ بَنْدِرَاوٛ مٜىٰطٜنْ دٜبّٛ، اٜ اَرْکِبُسْ مٛ تٛرّٛدٛتٛوطٜنْ نَاع سٜطَّ ندٜرْ وَعَجِنْکِ، اٜ تٛکُّٻٜ يٜىٰسُ کَوْرِتٛوٻٜ اٜ وُرٛ مَاطَ؞ اَللَّه، ݧَاکٛ مٜىٰطٜنْ، اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞ کٛو ندٜيٜ تٛ اٜ مِ وَطَ دٛعَارٜ، اٜ مِ يٜتَّ اَللَّه نغَمْ مَاطَ؞ اٜ مِ وَطَ نٛنْ نغَمْ اٜ مِ نَنَ حَبَرُ نٛ نغِطِرْطَا تٛکُّٻٜ يٜىٰسُ جٛومِرَاوٛ اٜ نٛ کٛولٛرِطَامٛ؞ دٛعَارٜ اَمْ وٛنِ سُمْڤٛ وٛنْغٛ حَکُّندٜ مٜىٰطٜنْ نغَمْ حٛولَاکِ يٜىٰسُ وَطُمَا اَنْدَا کٛو طُمٜ بَرْکَ طُمْ نغٛودُطٜنْ ندٜرْ سُمْڤٛوتِرْکِ اٜ مَاکٛ؞ بَنْدِرَاوٛ اَمْ، مِ نَنِي بٜلْطُمْ طُطُّمْ؞ ٻٜرْندٜ اَمْ فُکَّکٜ نغَمْ اَ حٛلَّ تٛکُّٻٜ يٜىٰسُ يِدّٜ، اَ سٜمْبِطِنَٻٜ؞ تٛو، مِ وَاوَيْ مِ وَطُمَا نغَطَا کٛ حَانِ وَطٜىٰ نغَمْ مِ مَوْطٛ ندٜرْ تٛکُّٻٜ يٜىٰسُ؞ اَمَّا نغَمْ اٜ مِ يِطُمَا، مِ ٻُرِي يِطُکِ مِ تٛرٛمَا، مِنْ بُلُسْ نَيٜىٰجٛ، مٛ يٜىٰسُ لِلِ، جٛونِ بٛو اٜ مِ سُرَا نغَمْ تٛکُّکِ يٜىٰسُ؞ اٜ مِ تٛرٛمَا نغَمْ اٛنِسِمُسْ غَرْتُطٛ بٛ ٻِطّٛ تٛ اَمْ، نغَمْ مِ حٛلِّيمٛ لَاوٛلْ اَللَّه کٛ اٜ مِ سُرِي؞ ندٜنّٛ اٛ نَفَنَايِمَ غٛطُّمْ، اَمَّا جٛونِ اٜ مٛ نَفَنْمَا فُو اٜ اَمْ؞ اٜ مِ سٛعّٛيَمٛ تٛ مَاطَ جٛونِ، اٜ مِ يِطِمٛ نَاع سٜطَّ؞ دَا مِ حٜٻَيْنٛ نٛ نغِطُمِ دَا اٛ جٛوطٛدَکٜ اٜ اَمْ طٛعٛ اٜ نغٜعٜلْ شَرٜلْ نغٜلْ طُمْ سُرِيَمْ نغَمْ حَبَرُ يٜىٰسُ، نغَمْ اٛ حُوَنَيَمْ کُوغَلْ نغَلْ کُوَنْتَايَمْ؞ اَمَّا مِ يِطَا مِ وَطُمَا دٛولٜ مبَلَّايَمْ، سٜيْ نِ اٜ مِ يِطِ مبَلَّايَمْ تَا جَٻِي؞ نغَمْ مِ يِطَا مِ وَطَ غٛطُّمْ سٜيْ نِ اٜ يِدّٜ مَاطَ؞ کِيلَ اٛنِسِمُسْ سٜنْدِرِي اٜ مَاطَ شَرٜلْ سٜطَّ نغَمْ ڤُطِّتَا نجَٻَامٛ حَا اَبَدَا؞ تَاع جَٻُمٛ بٛ مَشُّطٛ تَنْ، اَمَّا بٛ بَنْدِرَاوٛ غِطَاطٛ ندٜرْ تٛکُّکِ يٜىٰسُ؞ اٜ مِ يِطِمٛ نَاع سٜطَّ، اَمَّا اَ ٻُرَيْيَمْ يِطُکِمٛ؞ اَ يِطَيْمٛ بٛ مَشُّطٛ اٜ بٛ تٛکُّطٛ يٜىٰسُ اَلْمَسِيحُ؞ نغَمْ نٛنْ، تَا جَٻِي مِ حِغٛ مَاطَ ندٜرْ کُوغَلْ، جَٻُمٛ نٛنْ نٛ نجَٻِرْتَايَمْ؞ تٛ اٛ وَطَنِيمَ غٛطُّمْ کٛ وٛوطَا، کٛو تَا تٛکَّمٛ ݧَمَاندٜ، يٛوُطُمْ دٛوْ اَمْ؞ مِنْ بُلُسْ وِنْدِ طُعُمْ اٜ جُنْغٛ اَمْ، مِ يٛٻٜتٜ؞ مِ يِطَا مِ سِفْتٛرَنْمَا، اَ اَنْدِ اٜ حَانِ نغَطَنَايَمْ کٛو طُمٜ کٛ نغِطُمِ نغَمْ مِ حٛلِّيمَ لَاوٛلْ کِسْندَمْ؞ بَنْدِرَاوٛ اَمْ، اٜ مِ يِطِ نغَطَنَايَمْ نٛنْ نغَمْ جٛومِرَاوٛ؞ وٜلْنَنَمْ ٻٜرْندٜ نغَمْ اٜنْ فُو اٜنْ تٛکُّٻٜ يٜىٰسُ؞ اٜ مِ وِنْدَنْمَا طٜرٜوٛلْ نغٛعٛلْ نغَمْ اٜ مِ اَنْدِ اَ وَطَيْ کٛ تٛرِمَامِ حَا مَا اَ وَطَيْ کٛ ٻُرِ نٛنْ؞ طٛنْمَا مٛعِّنَنَمْ سُودُ تٛ نجِڤّٛتٛومِ، نغَمْ اٜ مِ کَمِّي اَللَّه سٛعّٛيَيْيَمْ تٛ مٛوطٛنْ نغَمْ دٛعَارٜ مٛوطٛنْ؞ اَبَافَرَسْ مٛ مِنْ نغٛنْدِ ندٜرْ سُودُ شُرَلْ نغَمْ تٛکُّکِ يٜىٰسُ اَلْمَسِيحُ، اٜ مٛ حٛوْنُمَا؞ حِغٛوٻٜ کُوغَلْ اَمْ، مَرْکُسْ اٜ اَرِسْتَرْکُسْ اٜ دِمَسْ اٜ لُکَ ٻٜ فُو اٜ ٻٜ کٛوْنُمَا؞ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ ندٜنّٛ اَللَّه مٜتَنِي مَامَعٜنْ مٜىٰطٜنْ ندٜ طُطُّمْ اٜ طَتٜ طُطّٜ دَغَ کٛنْدُطٜ اَنَّبٛعٜنْ؞ اَمَّا ندٜرْ بَلْطٜ طٜعٜ طٜ رٜعُکِ دُونِيَارُ اٛ مٜتِرَنِيعٜنْ ٻِطّٛ مَاکٛ، مٛ اٛ سُٻِ وَرْتَ دٛنٛووٛ کٛو طُمٜ؞ طٛنْمَا بَرْکَ مَاکٛ اَللَّه تَغِ دُونِيَارُ؞ اٜ مٛ حٛلَّ جَيْنغٛلْ تٜدُّنغَلْ اَللَّه، ندٜنْ ندٜرْ کٛو طُمٜ اٜ مٛ نَنْدِ اٜ اَللَّه؞ اٜ مٛ جٛغٛرِي کٛو طُمٜ وٛلْدٜ مَاکٛ غٛودُندٜ بَوْطٜ؞ غَطَ اٛ وَطِي لَاوٛلْ يَافَاکِ حَکّٜ، اٛ جٛوطِي تٛنْ دٛوْ تٛ جُنْغٛ ݧَامٛ نغٛ اَللَّه جٛومُ مَنْغُ؞ اَللَّه حٛکِّي ٻِطّٛ مُوطُمْ لَامُ ٻُرْطُمْ طُمْ مَلَاعِکَعٜنْ، نٛنْ نٛ اِنْدٜ ندٜ اَللَّه حٛکِّمٛ ندٜ ٻُرِي اِنْطٜ مَٻّٜ؞ نغَمْ اَللَّه مٜىٰطَايِ وِيکِ غٛطّٛ مَلَاعِکَاجٛ، «اَنْ، اَ ٻِطّٛ اَمْ، حَنْدٜ مِ وَرْتِي ݧَاکٛ مَاطَ؞» طٛنْمَا اَللَّه مٜىٰطَايِ مٜتِ دٛوْ غٛطّٛ مَلَاعِکَاجٛ وِعِ، «مِ وَرْتَيْ ݧَاکٛ تٛ مَاکٛ، ندٜنْ اٛ وَرْتَيْ ٻِطّٛ تٛ اَمْ؞» اَمَّا ندٜ اَللَّه سِرْيِي لِلَ ٻِطّٛ مُوطُمْ اَفٛ ندٜرْ دُونِيَارُ، اٛ وِعِي، «فُو مَلَاعِکَعٜنْ اَللَّه دٛولٜ مَوْنِنَمٛ؞» دٛوْ مَلَاعِکَعٜنْ بٛو، اٛ وِعِي، «اَللَّه وَطِي مَلَاعِکَعٜنْ مُوطُمْ نغَرْتَ بٛ حٜنْدُ، ندٜنْ اٛ وَطِي مَشُّٻٜ مَاکٛ نغَرْتَ بٛ طٜمْطٜ حِيتٜ؞» اَمَّا اٛ وِعِي ٻِطّٛ اٛنْ، «يَا اَللَّه، لَامُ مَاطَ تَبِتَيْ حَا اَبَدَا اَبَدِنْ؞ اَادِلَاکُ وٛنِ سَوْرُ ندُ لَامٛرْتٛطَا يِمْٻٜ مَاطَ؞ اَ يِطِ اَادِلَاکُ، اَ وَݧِي کٛ وٛوطَا؞ کَنْجُمْ وَطِ مِنْ، اَللَّه مَاطَ، شُٻُمَامِ نغَطُمِ کٜٻُطَا مَنْغُ غَدَّيْطُمْ نَنُکِ بٜلْطُمْ ٻُرْطُمْ طُمْ ٻٜ نغٛنْدُطَا؞» طٛنْمَا اٛ وِعِي، «اَنْ جٛومِرَاوٛ، دَغَ اَرَنْدٜ اَنْ تَغِ دُونِيَارُ ندُعُ، اٜ جُوطٜ مَاطَ نغَطِرْطَا دٛوْ؞ طُمْ رٜعَيْ، اَمَّا اَنْ اَ تَبٛتٛ؞ طُمْ فُو طُمْ حِيطَيْ بٛ کٛلْتٜ؞ اَ تَغَّيْطُمْ بٛ شُدَّارِ، طُمْ وَيْلِتَيْطُمْ نٛ طُمْ وَيْلِتِرْتَ کٛلْتٜ؞ اَمَّا اَنْ، اَ طٛنْ نٛ نغٛنْتِندِرْطَا، حَا اَبَدَا دُوٻِ مَاطَ نغَلَا کٜىٰرٛلْ؞» اَللَّه مٜىٰطَايِ وِعُکِ غٛطّٛ مَلَاعِکَاجٛ، «جٛوطَ تٛ جُنْغٛ ݧَامٛ اَمْ نَا مِ وَطِي وَݧْوَݧْٻٜ مَاطَ نغَرْتِي تٛ نجٛوَتَا کٛيْطٜ مَاطَ؞» مَلَاعِکَعٜنْ طُمْ ٻٜيٜ؟ ٻٜ رُوحُوجِ کُوَنٛوجِ اَللَّه ٻٜ اٛ لِلَتَ نغَمْ مبَلَّ کٜٻَيْٻٜ کِسْندَمْ؞ نغَمْ مَاجُمْ دٛولٜ نغَطٜنْ فُو حَکِّيلٛ مٜىٰطٜنْ دٛوْ کٛ نَنْطٜنْ، نغَمْ تٛع شٜلٜنْ دَغَ تٛکُّکِطُمْ؞ حَالَ کَ طُمْ مٜتِ دَغَ کٛنْدُطٜ مَلَاعِکَعٜنْ کَ تَبِّتِنَامَ، ندٜنْ کٛو مٛيٜ غَݧُطٛ تٛکَّکَ حٜٻِي تٛرَّ نٛ حَانَنِمٛ؞ تٛ طُمْ نٛنْ، نٛ وَطَتَ ندَطٜنْ تٛ اٜنْ نغَطَايِ حَکِّيلٛ مٜىٰطٜنْ دٛوْ کِسْندَمْ طَعَمْ مَوْطَمْ؟ جٛومِرَاوٛ اَرْتِي مٜتُکِ دٛوْ مَاجَمْ، ندٜنْ ٻٜنْ طٛنْ نَنْٻٜمٛ تَبِّتِنَنِيمِنْ وِيکِ طُمْ غٛونغَ؞ نٛنْ مَا اَللَّه تَبِّتِنِيطُمْ اٜ اَلَامَاجِ، اٜ کُوطٜ کَيْطِنِيطٜ فٜىٰرٜ‑فٜىٰرٜ، اٜ حٛکُّکِ رُوحُ مَاکٛ نٛنْ نٛ اٛ يِطِرِ؞ دُونِيَارُ غَرَيْندُ ندُ مِنْ مٜتَتَ، نَاع مَلَاعِکَعٜنْ اَللَّه وَطِ لَامٛوندُ؞ اَمَّا اٜ وٛودِ اَايَارٜ تٛ طُمْ وِعِ، «يَا اَللَّه، نٜطّٛ طُمْ طُمٜ حَا ݧُمَتَا دٛوْ مَاکٛ؟ ٻِي نٜطّٛ اٛ مٛيٜ حَا اَ فَامَنَمٛ؟ اَ لٜسْتِنِيمٛ لٜيْ مَلَاعِکَعٜنْ نغَمْ شَرٜلْ سٜطَّ، اَمَّا غَطَ طٛنْ اَ حٛکِّيمٛ تٜدُّنغَلْ اٜ مَنْغُ، اَ وَطِي کٛو طُمٜ لٜيْ لَامُ مَاکٛ؞» ندٜ اَللَّه وَطِ کٛو طُمٜ لٜيْ لَامُ مَاکٛ، اَلَايِ غٛطُّمْ طُمْ وَلَا لٜيْ لَامُ مَاکٛ؞ فُو اٜ نٛنْ، حَا جٛونِ اٜنْ نغِعَايِ کٛو طُمٜ فُو لٜيْ لَامُ مَاکٛ؞ شَرٜلْ سٜطَّ طُمْ حٛکِّ يٜىٰسُ مَنْغُ طُمْ حٜوْتَايِ طُمْ مَلَاعِکَعٜنْ؞ اَمَّا جٛونِ اٜنْ نغِعِي اٛ حٛکَّامَ تٜدُّنغَلْ اٜ مَنْغُ نغَمْ تٛرَّ مَيْدٜ کَ اٛ يَرِ، نغَمْ بَرْکَ يِدّٜ اَللَّه اٛ مَايَ نغَمْ کٛو مٛيٜ؞ اَللَّه تَغِ کٛو طُمٜ، کَنْکٛ فَامَنْتَ کٛو طُمٜ؞ اٛ وَطِي کٛ حَانِ ندٜ اٛ وَرْتِرِ يٜىٰسُ کٜوْطٛ لَاوٛلْ تٛرَّ کَ يَرِ، نغَمْ اٛ وَدَّ يِمْٻٜ طُطْٻٜ تٛ تٜدُّنغَلْ مَاکٛ؞ يٜىٰسُ وٛنِ مَٻُّتُطٛ لَاوٛلْ کِسْندَمْ تٛکِّنٛووٛٻٜ لَاوٛلْ نغٛلْ ٻٜ کِسَ؞ لٛوتَنٛووٛ يِمْٻٜ حَکّٜ، کَنْکٛ اٜ ٻٜنْ طٛنْ لٛوتَنَاٻٜ ٻٜ فُو ݧَاکٛ مَٻّٜ اٛ غٛعٛتٛ؞ کَنْجُمْ وَطِ يٜىٰسُ نَنَتَا شٜمْتُطُمْ نٛدِّرْکِٻٜ مِݧِرَاٻٜ مُوطُمْ؞ اٛ وِعِي اَللَّه، «مِ وِعَيْ مِݧِرَاٻٜ اَمْ کُوطٜ طٜ نغَطَّا، مِ مَنْتٜتٜ ندٜرْ کَوْتَلْ مَٻّٜ؞» کَدِنْ اٛ وِعِي، «مِ حٛولٛتٛ اَللَّه؞» ندٜنْ کَدِنْ اٛ وِعِي، «رَمِّ طٛعٛ اٜ ٻِٻّٜ ٻٜ اَللَّه حٛکِّيَمْ؞» ندٜ ٻِٻّٜ ٻٜنْ ٻٜ غٛودُٻٜ ٻَنْدُ اٜ پِيپَمْ، يٜىٰسُ اٜ حٛورٜ مُوطُمْ وَرْتِي نٜطّٛ بٛ مَٻّٜ؞ اٛ وَطُ نٛنْ نغَمْ بَرْکَ مَيْدٜ مَاکٛ اٛ حَلْکَ اٛنْ طٛنْ جٛغِيطٛ بَوْطٜ مَيْدٜ، وَاتٛ شٜيْطَنْ؞ نٛنْ اٛ يٛوفِرِ يِمْٻٜ ٻٜ کُلٛلْ مَيْدٜ حَٻِّ کٜىٰرٛلْ بَلْطٜ مَٻّٜ؞ اٜنْ تَبِّتِنِي نَاع مَلَاعِکَعٜنْ اٛ وَلِّ، اَمَّا ٻِٻّٜ ٻِٻّٜىٰجِ اِبْرَاهِمْ اٛ وَلِّ؞ نغَمْ مَاجُمْ دٛولٜ اٛ وَرْتِرَا نٜطّٛ اٜ کٛو نغٛلٜ لَاوٛلْ، نغَمْ اٛ وَرْتَ مَوْطٛ مَوْٻٜ اَرْدِيطٛ دِينَ مٛ غٛونغَ غٛودُطٛ يُرْمٜىٰندٜ ندٜرْ کُوغَلْ اَللَّه نغَمْ حَکّٜ يِمْٻٜ نجَافٜىٰ؞ ندٜ کَنْکٛ اٜ حٛورٜ مَاکٛ اٛ تٛرَّکٜ ندٜ اٛ فٛونْدَا، اٜ مٛ وَاوِ وَلُّکِ فٛوندٜتٜىٰٻٜ؞ نغَمْ نٛنْ، بَنْدِرَاٻٜ اَمْ تٛکُّٻٜ يٜىٰسُ ٻٜ اَللَّه نٛدِّ، ݧُمٜىٰ دٛوْ يٜىٰسُ، لِلَاطٛ، مَوْطٛ مَوْٻٜ اَرْدِيٻٜ دِينَ مٛ مبِعٜتٜنْ يِمْٻٜ اٜنْ تٛکَّ؞ اٛ حُوَنِ اَللَّه اٜ غٛونغَ شُٻُطٛمٛ، نٛنْ نٛ مُوسَ حُوِرَنِ اَللَّه ندٜرْ يِمْٻٜ مَاکٛ اٜ غٛونغَ؞ اَمَّا طُمْ يِعِي يٜىٰسُ ٻُرِي مُوسَ مَنْغُ نَاع سٜطَّ، نٛنْ نٛ مَحٛووٛ وُرٛ ٻُرِرِ مَادِ ندِنْ مَنْغُ؞ نغَمْ کٛو نغٛيٜ وُرٛ غٛطّٛ مَحِنغٛ، اَمَّا اَللَّه وٛنِ مَحُطٛ کٛو طُمٜ؞ مُوسَ اٛ مَشُّطٛ اَللَّه مٛ غٛونغَ ندٜرْ کُوغَلْ وَلُّکِ يِمْٻٜ اَللَّه، اٛ مٜتِي دٛوْ کٛ اَللَّه وِعَتَ طٛعٛ يٜىٰسٛ؞ اَمَّا اَلْمَسِيحُ اٛ ٻِطّٛ، ڤَامَنٛووٛ يِمْٻٜ اَللَّه اٜ غٛونغَ؞ اٜنْ يِمْٻٜ اَللَّه تٛ اٜنْ نجٛغَکٜ سٜمْبٜ ٻٜرْندٜ اٜ شِيَ کُلٛلْ دٛوْ کٛ کَمِّيطٜنْ؞ نغَمْ نٛنْ، نٛ رُوحُ اَللَّه وِعِ، «حَنْدٜ، تٛ اٛنْ نَنِي حٛنٛنْدٜ اَللَّه، تٛع اٛنْ شَاتِنْ ٻٜرْطٜ مٛوطٛنْ نٛ مَامَعٜنْ مٛوطٛنْ نغَطُنٛو شَرٜلْ کٛ ٻٜ نغَݧِ کٛ اَللَّه وِعِ ٻٜ ڤٛوندِمٛ ندٜرْ لَدّٜ؞ اَللَّه وِعِي، ‹تٛنْ مَامَعٜنْ مٛوطٛنْ ڤٛوندِيَمْ، کٛو ندٜ دُوٻِ 40 اٜ ٻٜ نغِعَ کُوطٜ اَمْ طٜ نغَطُمِ؞› نغَمْ نٛنْ، مِ مٛنَّنِي يِمْٻٜ جَامَنُ طُمْ، مِ وِعِ، ‹کٛو ندٜيٜ اٜ ٻٜ شٜلَ لَاوٛلْ اَمْ، اٜ ٻٜ نغَݧَ تٛکُّکِيَمْ؞› سٜيْ ٻٜرْنُمِ کُنِيمِ مبِيمِ، ‹ٻٜ نَتَّتَا تٛ شِوْتِنَيْمِٻٜ!› » بَنْدِرَاٻٜ اَمْ تٛکُّٻٜ يٜىٰسُ، ڤَامٜىٰ تٛع ٻٜرْندٜ کٛو مٛيٜ مٛوطٛنْ حَلَّ وَݧَ حٛولَاکِ، اَلٛنْ تٛکُّکِمٛ؞ اَمَّا شٜمْبِطِنْدِرٜىٰ ٻٜرْطٜ مٛوطٛنْ کٛو ندٜيٜ ݧَلْندٜ، کُوتِرٜىٰ کٛو نغٜلٜ شَرٜلْ بِعٜتٜىٰنغٜلْ «حَنْدٜ،» نغَمْ تٛع حَکّٜ پٛيْرَ غٛطّٛ مٛوطٛنْ اٛ وَرْتَ مٛ ٻٜرْندٜ شَاتُندٜ؞ تٛ اٜنْ نجٛغَکٜ حٛولَاکِ کِ نغٛودُنٛوطٜنْ دَغَ اَرَنْدٜ بٛطُّمْ حَا کٜىٰرٛلْ بَلْطٜ مٜىٰطٜنْ، اٜنْ نغَرْتِ غٛنْدُٻٜ اٜ اَلْمَسِيحُ؞ نٛ اَايَارٜ وِعِ، «حَنْدٜ، تٛ اٛنْ نَنِي حٛنٛنْدٜ اَللَّه، تٛع اٛنْ شَاتِنْ ٻٜرْطٜ مٛوطٛنْ نٛ مَامَعٜنْ مٛوطٛنْ نغَطُنٛو ندٜ ٻٜ نغَݧِ کٛ اَللَّه وِعِ؞» ٻٜيٜ نغٛنّٛو نَنْٻٜ حٛنٛنْدٜ اَللَّه، اَمَّا فُو اٜ نٛنْ نغَݧِ کٛ اٛ وِعِ؟ نَاع طُمْ ٻٜنْ طٛنْ ٻٜ فُو ٻٜ مُوسَ اَرْدِي وُرْتِنِ لٜيْدِ مَسَرْ؟ ندٜنْ ٻٜيٜ اَللَّه وَطِ دُوٻِ 40 اٜ مٛنَّنَ؟ نَاع طُمْ ٻٜنْ طٛنْ يِمْٻٜ غَطُٻٜ حَکّٜ مَايِ ندٜرْ لَدّٜ؟ دٛوْ ٻٜيٜ اَللَّه حُنِي وِيکِ ٻٜ نَتَّتَا تٛ شِوْتِنْتَٻٜ کٛو سٜطَّ؟ نَاع طُمْ ٻٜنْ طٛنْ غَݧُٻٜ کٛ اٛ وِعِ؟ نغَمْ نٛنْ، اٜنْ نغِعِي ٻٜ مبَاوَايِ نَتُّکِ لٜيْدِ ندِنْ نغَمْ ٻٜ کٛولَاکِ اَللَّه؞ ندٜ اَلْکَوَلْ نغَلْ اَللَّه وَطَنِعٜنْ نغَلْ نَتُّکِ تٛ اٛ سِوْتِنْتَعٜنْ اٜ طٛنْ، اٜنْ ڤَامُ، تٛع غٛطّٛ مٛوطٛنْ دُلَّ نَتُّکِ سِوْتَارٜ ندٜنْ؞ نغَمْ اٜنْ نَنِي حَبَرُ بٜلْطُمْ، نٛنْ نٛ ٻٜ نَنِرِطُمْ؞ اَمَّا کٛ ٻٜ نَنِ طُمْ نَفَايِٻٜ، نغَمْ شَرٜلْ نغٜلْ ٻٜ نَنِطُمْ، ٻٜ نجَٻَايِطُمْ؞ نغَمْ اٜنٜنْ کٛولِيٻٜ اَللَّه اٜنٜنْ نغٛنِ نَتّٛوٻٜ سِوْتَارٜ ندٜنْ طٛنْ؞ نٛنْ نٛ اَللَّه وِعِ، «مِ مٛنِّي مِ حُنَکٜ مِ وِعِ، ‹ٻٜ نَتَّتَا تٛ شِوْتِنَيْمِٻٜ!› » اٛ وِعِي نٛنْ کٛو ندٜ اٛ يٛتِّنِ سِرْيَاکِ کٛو طُمٜ دَغَ شَرٜلْ کٛ اٛ تَغَتَ دُونِيَارُ؞ نغَمْ بَنْݧٜ ندٜرْ دٜفْتٜرٜ شٜنِيندٜ اَللَّه مٜتِي دٛوْ ݧَلْندٜ جٛوٜىٰطِطَوْرٜ وِيکِ، «ݧَلْندٜ جٛوٜىٰطِطَوْرٜ اَللَّه سِوْتِي دَغَ فُو کُوغَلْ مُوطُمْ؞» ندٜنْ طُمْ فُطِّتِي طُمْ مٜتِي دٛوْ مَاجُمْ وِيکِ، «ٻٜ نَتَّتَا تٛ شِوْتِنَيْمِٻٜ؞» ٻٜنْ طٛنْ اَرْتُٻٜ نَنْکِ حَبَرُ بٜلْطُمْ ٻٜ کٜٻَايِ نَتُّکِ سِوْتَارٜ ندٜنْ طٛنْ نغَمْ ٻٜ نغَطَايِ کٛ اَللَّه وِعِ؞ اَمَّا اٜ وٛودِ وٛٻّٜ ٻٜ طُمْ اَلَتَ نَتَّ؞ اَللَّه فُطِّتِي وَطِي وٛنْدٜ ݧَلْندٜ اٛ نٛدِّرِندٜ، «حَنْدٜ؞» غَطَ دُوٻِ طُطِّ اٛ مٜتِرِي حٛنْدُکٛ دَوْدَ دٛوْ مَاجُمْ ندٜرْ اَايَارٜ ندٜ نَنُنٛوطٜنْ بِيندٜ، «حَنْدٜ، تٛ اٛنْ نَنِي حٛنٛنْدٜ اَللَّه، تٛع اٛنْ شَاتِنْ ٻٜرْطٜ مٛوطٛنْ؞» دَا جٛوشُوَ نَتِّنِينٛ يِمْٻٜ سِوْتَارٜ ندٜنْ، دَا اَللَّه فُطِّتَايِ مٜتِ دٛوْ وٛنْدٜ ݧَلْندٜ سِوْتَارٜ؞ نٛنْ حٛلِّي حَا جٛونِ اٜ وٛودِ وٛنْدٜ سِوْتَارٜ نغَمْ يِمْٻٜ اَللَّه؞ نغَمْ کٛو مٛيٜ نَتُّطٛ سِوْتَارٜ ندٜ اَللَّه وَطِ اَلْکَوَلْ، اٛ سِوْتٛتٛ دَغَ کُوطٜ مَاکٛ، نٛنْ نٛ اَللَّه سِوْتٛرِي دَغَ کُوطٜ مُوطُمْ؞ نغَمْ نٛنْ اٜنْ نغَطُ کٛ مبَاوٜتٜنْ وَطُکِ نغَمْ نَتّٜنْ سِوْتَارٜ ندٜنْ طٛنْ؞ تٛع غٛطّٛ مٜىٰطٜنْ وَطَ نٛ ٻٜنْ تٛنْ، وَݧَ کٛ اَللَّه وِعِ دُلَّ سِوْتَارٜ ندٜنْ؞ وٛلْدٜ اَللَّه اٜ وٛودِ يٛنْکِ اٜ ندٜ حُوَ، ندٜ ٻُرِي کٛو کِيٜ کَافَحِ وٜلْکِ؞ اٜ ندٜ تَپَ حَا ندٜ سٜنْدَ يٛنْکِ اٜ ٻٜرْندٜ، ندٜ سٜنْدَ جٛکّٛوطٜ اٜ مبٛرْٻٛوندِ؞ اٜ ندٜ سٜنْدَ سُونٛوجِ اٜ ݧُمٛوجِ ٻٜرْندٜ بٛطِّ اٜ طِ مبٛوطَا؞ ندٜرْ فُو کٛ تَغَا، وَلَا کٛ سُوطِي تٛ اَللَّه؞ کٛو طُمٜ اٜ نجَيْرِ طُمْ وٛنِ، اٜ طُمْ مَٻِّتِي يٜىٰسٛ مَاکٛ؞ ندٜنْ دٛولٜ کَنْکٛ مبِعٜتٜنْ فُو کٛ نغَطّٜنْ؞ ندٜ اٜنْ نغٛودِ مَوْطٛ مَوْٻٜ اَرْدِيٻٜ دِينَ جَاطٛ دٛوْ حَا يٜىٰسٛ اَللَّه، وَاتٛ يٜىٰسُ، ٻِطّٛ اَللَّه، اٜنْ نجٛغٛ کٛ کٛولِيطٜنْ بٛطُّمْ؞ مَوْطٛ مَوْٻٜ اَرْدِيٻٜ دِينَ مٛ نغٛودُطٜنْ نَاع اٛ غٛطّٛ مٛ وَاوَتَا يُرْمِنَنْکِعٜنْ اٜنٜنْ تَمْڤُٻٜ؞ اَمَّا اٛ فٛوندَامَ اٜ کٛو نغٛلٜ لَاوٛلْ نٛ طُمْ فٛوندِرْتَعٜنْ، فُو اٜ نٛنْ اٛ وَطَايِ حَکّٜ؞ نغَمْ نٛنْ، اٜنْ نغَطُ سٜمْبٜ ٻٜرْندٜ ٻَدّٛوطٜنْ جٛوطٛرْغَلْ لَامُ اَللَّه جٛومُ يِدّٜ، نغَمْ کٜٻٜنْ يُرْمٜىٰندٜ اٜ يِدّٜ بَلَّيْندٜعٜنْ اٜ شَرٜلْ نغٜلْ نغِطّٜنْدٜ؞ کٛو مٛيٜ مَوْطٛ مَوْٻٜ اَرْدِيٻٜ دِينَ شُٻَاطٛ دَغَ ندٜرْ يِمْٻٜ، طُمْ حٛکُّمٛ کُوغَلْ نغَمْ اٛ حُوَنَ اَللَّه نغَمْ مَٻّٜ، اٛ حٛکَّ اَللَّه شَکِّرِ اٜ دٛکّٜ نغَمْ حَکّٜ مَٻّٜ؞ ندٜ کَنْکٛ مَا اٜ حٛورٜ مَاکٛ اٛ تَمْڤُطٛ اٜ طَتٜ طُطّٜ، اٛ وَاوَيْ اٛ وَادَ مُݧَلْ اٜ ٻٜ نغَلَا اَنْدَلْ اٜ شٜلُٻٜ لَاوٛلْ؞ ندٜنْ ندٜ کَنْکٛ اٜ حٛورٜ مَاکٛ اٛ تَمْڤُطٛ، دٛولٜ اٛ سَکَّنَ اَللَّه نغَمْ حَکّٜ يِمْٻٜ اٜ حَکّٜ مَاکٛ، کَنْکٛ مَا؞ وَلَا کٜٻَنَيْطٛ حٛورٜ مُوطُمْ مَنْغُ وَرْتُکِ مَوْطٛ مَوْٻٜ اَرْدِيٻٜ دِينَ، اَمَّا اَللَّه نٛدَّتَمٛ، نٛنْ نٛ نٛدِّرِ هَرُونَ؞ نٛنْ مَا اَلْمَسِيحُ نَاع کَنُمْ مَوْنِنِ حٛورٜ مُوطُمْ وَرْتِ مَوْطٛ مَوْٻٜ اَرْدِيٻٜ دِينَ، اَمَّا اَللَّه حٛکِّمٛ کُوغَلْ نغَلْ، وِعِمٛ، «اَنْ اَ ٻِطّٛ اَمْ؞ حَنْدٜ مِ وَرْتِي ݧَاکٛ مَاطَ؞» نٛ اٛ وِعِ ندٜرْ وٛنْدٜ اَايَارٜ، «اَنْ اَ اَرْدِيطٛ دِينَ حَا اَبَدَا بٛ مَلْکِسَدِکْ؞» شَرٜلْ کٛ يٜىٰسُ وٛنِ ندٜرْ دُونِيَارُ، اٛ وَطِي دٛعَاجٜ اٜ حٛنٛنْدٜ شٜمْبِنْدٜ اٜ غٛنْطِ اٛ تٛرَکٜ اَللَّه بَاوَيْطٛ حِسْنُکِمٛ دَغَ مَيْدٜ؞ طُمْ بٛو جَٻِي دٛعَارٜ مَاکٛ نغَمْ اٛ وَطِي کٛ اَللَّه وِعِ ندٜرْ کُلٛلْ اَللَّه؞ کٛو ندٜ اٛ ٻِطّٛ اَللَّه اٛ اٜکِّتَکٜ وَطُکِ کٛ اَللَّه وِعِ ندٜرْ تٛرَّ کَ اٛ يَرِ؞ ندٜ اٛ وَرْتِرَا کٜوْطٛ، اٛ وَرْتِي کٛکّٛووٛ فُو غَطٛوٻٜ کٛ اٛ وِعِ کِسْندَمْ تَبِتَيْطَمْ؞ اَللَّه نٛدِّيمٛ اٛ وَرْتَ مَوْطٛ مَوْٻٜ اَرْدِيٻٜ دِينَ بٛ مَلْکِسَدِکْ؞ دٛوْ حَالَ کَعَ اٜ مِنْ نغٛودِ فِي طُطُّمْ طُمْ مِنْ مبِعَتَ، اَمَّا اٜ طُمْ سَطِ فَمْتِنٜىٰکِ نغَمْ اٛنْ نجَاوَا فَامُکِ؞ اٜ حَانِ جٛونِ دَا اٛنْ نغَرْتِي مٛودِٻّٜ، اَمَّا حَا جٛونِ سٜيْ تٛ غٛطّٛ اٜکِّتِنِيعٛنْ اٜکِّتِنٛلْ اَرَنْدٜوٛلْ نغٛلْ وٛلْدٜ اَللَّه؞ اٜ حَانِ ݧَامٛنْ ݧَمْندُ شٜمْبِنْدُ، اَمَّا حَا جٛونِ اٛنْ مُسِنَ؞ نغَمْ کٛو مٛيٜ مُسِنٛووٛ حَا جٛونِ اٛ ٻِنْغٜلْ، اٛ اَنْدَا اٜکِّتِنٛلْ اَادِلَاکُ؞ اَمَّا ݧَمْندُ شٜمْبِنْدُ بٛو، طُمْ ندُ مَوْنُٻٜ؞ کَمْٻٜ نغٛنِ حُوتِرْٻٜ حَکِّيلٛ مَٻّٜ کٛو ندٜيٜ حَا اٜ ٻٜ مبَاوِ فٜىٰرٛوتِرْکِ حَکُّندٜ کٛ وٛوطِ اٜ کٛ وٛوطَا؞ نغَمْ نٛنْ، اٜنْ ݧَمْرُ يٜىٰسٛ دٛوْ اٜکِّتِنٛلْ نغٛلْ طٛنْ اَرَنْدٜوٛلْ نغٛلْ کٜٻُطٜنْ دٛوْ اَلْمَسِيحُ، نغَمْ نغَرْتٜنْ ٻٜ اَنْدَلْ کٜوْنغَلْ؞ تٛع طُمْ وِعَ حَا جٛونِ اٜنْ مٜتَ دٛوْ اٜکِّتِنٛلْ نغٛلْ حٛولَاکِ اَللَّه، اٜ تُوبُکِ دَغَ کُوطٜ جَارَيْطٜ حَلْکٜرٜ، اٜ اٜکِّتِنٛلْ دٛوْ بَڤْتِسْمَ، اٜ يٛوَنْکِ يِمْٻٜ جُوطٜ نغَمْ بَرْکِطِنْکِٻٜ، اٜ اُمَّاکِ مَيْٻٜ، اٜ نٛ اَللَّه تَپِرَنْتَ يِمْٻٜ کِيتَ تَبٛتٛوکَ؞ اٜنْ ݧَمْرَيْ يٜىٰسٛ، تٛ اَللَّه جَٻِي؞ نغَمْ طُمْ وَطَتَاکٛ اَلُٻٜ جَيْنغٛلْ اَللَّه شٛعّٜىٰ تُوبَ کَدِنْ، مٜىٰمُٻٜ دٛکَّلْ مَاکٛ، کٜٻُٻٜ رُوحُ مَاکٛ؞ ندٜنْ ٻٜ مٜىٰمِي بٜلْطُمْ وٛلْدٜ اَللَّه ٻٜ نَنِي، ندٜنْ ٻٜ مٜىٰمِي بَوْطٜ غَطٜتٜىٰطٜ تٛ يٜىٰسُ وَرْتِي، ٻٜ نَنِي؞ تٛ ٻٜ نغَيْلِتَنِي اَللَّه ٻَاوٛ، طُمْ وَطَتَاکٛ ٻٜ شٛعّٜىٰ ٻٜ تُوبَ، نغَمْ کٛ ٻٜ نغَطِ بٛ ٻٜ ڤُطُّتُ فِيَنْکِ ٻِطّٛ اَللَّه کُوسَاجٜ دٛوْ غَافَانغَلْ، اٜ ٻٜ شٜمْتِنَمٛ يٜىٰسٛ يِمْٻٜ؞ لٜيْدِ نجَرَيْندِ ندِيَمْ تٛٻٛوجَمْ کٛو ندٜيٜ، ندٜنْ اٜ ندِ وُرْتِنَ فُطٜ‑فُطٜ نَفَنٛوجُمْ جٜيْٻٜ لٜيْدِ ندِنْ، اَللَّه اٜ بَرْکِطِنَنْدِ؞ اَمَّا تٛ ندِ وُرْتِنِي غِعٜ اٜ کٛورَاجٜ، ندِ وَرْتِي کٛو کٛ ندِ نَفِ، نَاع کٛ نٜىٰٻِ اَللَّه لَانَيْندِ، رٜعُکِ مَيْرِ بٛو طُمْ وُلَيْندِ؞ کٛو ندٜ اٜ مِنْ مٜتِرَ نِينِ، فُو اٜ نٛنْ، اٛنٛنْ ٻٜ مِنْ نغِطِ، مِنْ تَبِّتِنِي اٛنٛنْ اٛنْ دٛوْ لَاوٛلْ بٛنْغٛلْ، لَاوٛلْ کِسْندَمْ؞ اَللَّه نَاع اٛ غَطٛووٛ کٛ حَانَا؞ اٛ يٜجِّتَتَا کُوغَلْ نغَلْ نغَطّٛنْ کٛو يِدّٜ ندٜ کٛلُّطٛنْمٛ ندٜ مبَلُّطٛنْ يِمْٻٜ مَاکٛ، ݧَمْرُطٛنْ يٜىٰسٛ اٜ وَلُّکِٻٜ حَا جٛونِ؞ اٜ مِنْ نغِطِ کٛو مٛيٜ مٛوطٛنْ ݧَمْرَ يٜىٰسٛ اٜ وَطُکِ نِينِ حَا يَاکِ رٜعِرْدٜ، نغَمْ کٜٻٛنْ فُو کٛ نغَطّٛنْ کَمُّندٜ دٛوْ مَاجُمْ؞ مِنْ نغِطَا نغَرْتٛنْ تَمْڤُٻٜ، اَمَّا تٛکّٜىٰ لَاوٛلْ دٛنُٻٜ کٛ اَللَّه وَطِ اَلْکَوَلْ بَرْکَ حٛولَارٜ مَٻّٜ اٜ مُݧَلْ مَٻّٜ؞ شَرٜلْ کٛ اَللَّه وَطَنِ اِبْرَاهِمْ اَلْکَوَلْ، ندٜ وَلَا ٻُرْطٛمٛ مَنْغُ مٛ اٛ حُنٛرْتٛو، اٛ حُنٛرَکٜ حٛورٜ مَاکٛ، اٛ وِعِي، «غٛونغَ، مِ بَرْکِطِنْتٜ مِ طُطِّنَ لٜݧٛلْ مَاطَ؞» نٛنْ بٛو، غَطَ اِبْرَاهِمْ مُݧِي، اٛ حٜٻِي کٛ اَللَّه وَطَنِمٛ اَلْکَوَلْ؞ يِمْٻٜ اٜ کُنٛرٛو کٛ ٻُرِٻٜ مَنْغُ، ندٜنْ حُنَيٜىٰرٜ وٛنِ کٛ سٜنْدَتَ کٛو طُمٜ ندٜرْ غٜدِّ مَٻّٜ؞ نٛنْ مَا، ندٜ اَللَّه وَطِ اَلْکَوَلْ نغَلْ، سٜيْ اٛ حُنِي نغَمْ اٛ تَبِّتِنَنَ دٛنٛوٻٜنغَلْ وِيکِ اٛ وَيْلِتَتَا ݧُمٛ مَاکٛ؞ فِي طِطُمْ طُعُمْ، وَاتٛ اَلْکَوَلْ نغَلْ اٜ حُنَيٜىٰرٜ ندٜنْ طُمْ وَيْلِتَتَاکٛ حَا اَبَدَا، نغَمْ طُمْ وَطَتَاکٛ اَللَّه فٜوَ؞ نٛنْ اٜ سٜمْبِطِنَعٜنْ، اٜنٜنْ دٛغُّٻٜ نجَحِ تٛ مَاکٛ، نجٛغٛوطٜنْ کَمُّندٜ غٛنْدٜ يٜىٰسٛ مٜىٰطٜنْ بٛطُّمْ؞ کَمُّندٜ ندٜعٜ ندٜ نغٛودُطٜنْ اٜ ندٜ نَنْدِ اٜ دَرْنِرْطُمْ يٛنْکِ مٜىٰطٜنْ؞ ندٜ يَمْرٜ ندٜ تَبُّتُندٜ؞ کَيْرٜ نَتَّتَ غَطَ وُدٜرٜ غٛنْدٜ ندٜرْ وُرٛ شٜنِينغٛ تٛنْ دٛوْ؞ تٛنْ يٜىٰسُ اَرْتُطٛعٜنْ نَتِّ نغَمْ مٜىٰطٜنْ؞ اٛ وَرْتِي مَوْطٛ مَوْٻٜ اَرْدِيٻٜ دِينَ حَا اَبَدَا بٛ مَلْکِسَدِکْ؞ اٛعٛ مَلْکِسَدِکْ، اٛ لَامِيطٛ سَلٜمْ، اٛ اَرْدِيطٛ دِينَ مٛ اَللَّه جٛومُ مَنْغُ؞ اٛ حَوْرِي اٜ اِبْرَاهِمْ شَرٜلْ کٛ وَرْتٛيْتَ دَغَ کٛنُ طُمْ حٜٻِ جَالٛرْغَلْ دٛوْ وٛٻّٜ لَامِيٻٜ، اٛ بَرْکِطِنِ اِبْرَاهِمْ؞ اِبْرَاهِمْ حٛکِّمٛ جَکَّ ندٜرْ فُو کٛ حٜٻِ تٛ کٛنُ؞ مَعَنَ اَرَنْدٜجُمْ طُمْ اِنْدٜ مَلْکِسَدِکْ وٛنِ «لَامِيطٛ اَادِلَاکُ»؛ ندٜنْ کَدِنْ کَنْکٛ وٛنِ لَامِيطٛ سَلٜمْ، وَاتٛ «لَامِيطٛ جَمْ؞» طُمْ وِنْدَايِ کٛو اٜ مٛ وٛودِ ݧَاکٛ، کٛو مَدُوجٛ، کٛو لٜݧٛلْ؞ طُمْ وِنْدَايِ دٛوْ ݧَلْندٜ دَݧْنغٛلْ مَاکٛ، کٛو ݧَلْندٜ مَيْدٜ مَاکٛ؞ اٜ مٛ نَنْدِ اٜ ٻِطّٛ اَللَّه، اٛ اَرْدِيطٛ دِينَ حَا اَبَدَا؞ ندَارٜىٰ اِرِ مَنْغُ طُمْ اٛ وٛودِ، حَا اِبْرَاهِمْ مَامَ مَامَعٜنْ مٜىٰطٜنْ حٛکِّيمٛ جَکَّ ندٜرْ فُو کٛ حٜٻِ تٛ کٛنُ؞ ندٜنْ ٻٜنْ طٛنْ ٻِٻّٜ ٻِٻّٜىٰجِ لٜىٰوِ اَرْدِيٻٜ دِينَ، اَتَّوْرَ وِعِي ٻٜ نجَٻَ جَکَّ ندٜرْ فُو کٛ اِسْرَاعِيلَنْکٛعٜنْ نغٛودِ، وَاتٛ دَغَ تٛ بَنْدِرَاٻٜ مَٻّٜ، کٛو ندٜ کَمْٻٜ مَا ٻٜ ٻِٻّٜ ٻِٻّٜىٰجِ اِبْرَاهِمْ؞ مَلْکِسَدِکْ نَاع دَغَ لٜݧٛلْ لٜىٰوِ پِوٛيِ، اَمَّا اٛ جَٻِي جَکَّ تٛ اِبْرَاهِمْ، اٛ بَرْکِطِنِ اِبْرَاهِمْ مٛ اَللَّه وَطَنِ اَلْکَوَلْ؞ وَلَا سٜکٛ بَرْکِطِنْطٛ ٻُرِي مٛ اٛ بَرْکِطِنِ مَنْغُ؞ اَرْدِيٻٜ دِينَ نغٛنِ ٻٜ طُمْ حٛکَّتَ جَکَّ، اَمَّا ٻٜ مَايٛوٻٜ؞ مَلْکِسَدِکْ بٛو، اَايَارٜ وِعِي اٜ مٛ وٛودِ يٛنْکِ؞ طٛنْمَا لٜىٰوِ اٜ لٜݧٛلْ مُوطُمْ وٛنِ جَٻٛوٻٜ جَکَّ؞ اَمَّا طُمْ وَاوَيْ وِيکِ، لٜىٰوِ اٜ حٛورٜ مُوطُمْ حٛکِّي جَکَّ لَاوٛلْ اِبْرَاهِمْ؞ نغَمْ شَرٜلْ کٛ اِبْرَاهِمْ حَوْرِ اٜ مَلْکِسَدِکْ، لٜىٰوِ دَݧَاکَ تَوْ، اَمَّا اٜ مٛ ندٜرْ ٻَنْدُ اِبْرَاهِمْ؞ اٜنْ اَنْدِ شَرٜلْ کٛ اَللَّه حٛکِّ اِسْرَاعِيلَنْکٛعٜنْ اَتَّوْرَ، اٛ سُٻِي لٜىٰوِيَنْکٛعٜنْ نغَرْتَ اَرْدِيٻٜ دِينَ؞ تٛو، دَا کُوغَلْ لٜىٰوِيَنْکٛعٜنْ ٻٜنْ وَاوَيْ وَرْتِرْکِ يِمْٻٜ کٜىٰوُٻٜ، دَا حَالَ حٜٻُکِ اَرْدِيطٛ دِينَ فٜىٰرٜ اُمّٛيَاکِ؞ دَا مٛيٜ وِعَتَ طُمْ حٜٻَ اَرْدِيطٛ دِينَ بٛ مَلْکِسَدِکْ، نَاع اَرْدِيطٛ دِينَ بٛ هَرُونَ؟ نغَمْ تٛ طُمْ وَيْلِتِي کُوغَلْ اَرْدِيٻٜ دِينَ، نٛنْ مَا دٛولٜ طُمْ وَيْلِتَ دٛوکَ؞ مٛ طُمْ مٜتَتَ دٛوْ مُوطُمْ، وَاتٛ يٜىٰسُ، اٛ پِوٛيِي دَغَ وٛنْغٛلْ لٜݧٛلْ؞ ندٜرْ لٜݧٛلْ نغٛلْ بٛو وَلَا مٜىٰطُطٛ حُوَ کُوغَلْ اَرْدِيطٛ دِينَ؞ طُمْ تَبُّتُطُمْ اٛ پِوٛيِي دَغَ لٜݧٛلْ يَحُودَ، ندٜنْ مُوسَ مٜتَايِ دٛوْ لٜݧٛلْ نغٛعٛلْ ندٜ مٜتِ دٛوْ اَرْدِيٻٜ دِينَ؞ کَنْ طٛنْ حَالَ ٻٜيْدِي وُرْتَاکِ اٜ نجَيْرِ ندٜ غٛطّٛ اَرْدِيطٛ دِينَ بٛ مَلْکِسَدِکْ وُرْتٛيِي؞ اٛ وَرْتِرَاکَ اَرْدِيطٛ دِينَ نغَمْ لٜݧٛلْ مَاکٛ، اَمَّا اٛ وَرْتِرَا اَرْدِيطٛ دِينَ بَرْکَ بَوْطٜ يٛنْکِ کِ رٜعَتَا؞ نغَمْ اَايَارٜ وِعِي، «اَنْ اَ اَرْدِيطٛ دِينَ حَا اَبَدَا بٛ مَلْکِسَدِکْ؞» طُمْ رٜسِي دٛوکَ کِيطُمْ وُتُّدُ، نغَمْ طُمْ سٜمْبِطَا طُمْ نَفَتَا؞ نغَمْ اَتَّوْرَ وَطَتَا کٛو طُمٜ وَرْتَ کٜوْطُمْ؞ اَمَّا جٛونِ طُمْ حٛکِّيعٜنْ کٛ ٻُرِ وٛوطُکِ طُمْ نغَطٜتٜنْ کَمُّندٜ دٛوْ مَاجُمْ؞ لَاوٛلْ مَاجُمْ ٻَدّٛتٛوطٜنْ حَادٜ اَللَّه؞ طٛنْمَا اَللَّه حُنَکٜ وِيکِ يٜىٰسُ وَرْتَيْ اَرْدِيطٛ دِينَ حَا اَبَدَا، اَمَّا اٛ مٜىٰطَايِ وِيکِ غٛطّٛ اَرْدِيطٛ دِينَ نٛنْ؞ يٜىٰسُ تَنْ اٛ وِعِ، «جٛومِرَاوٛ يَادَکٜ حُنَکٜ ندٜنْ بٛو اٛ وَيْلِتَتَا کٛ اٛ وِعِ، ‹اَنْ اَ اَرْدِيطٛ دِينَ حَا اَبَدَا؞› » نغَمْ حُنَيٜىٰرٜ ندٜنْ، يٜىٰسُ وَرْتِي تَبِّتِنْطٛ اَلْکَوَلْ ٻُرْنغَلْ اَلْکَوَلْ کِينغَلْ؞ اَرْدِيٻٜ دِينَ ٻٜ ندٜنّٛ ٻٜ طُطْٻٜ، نغَمْ تٛ غٛطّٛ مَايِ، سٜيْ غٛطّٛ ݧَمْرَ يٜىٰسٛ اٜ کُوغَلْ نغَلْ؞ اَمَّا کُوغَلْ يٜىٰسُ نغَلْ اَرْدِيطٛ دِينَ اٜ طٛنْ حَا اَبَدَا نغَمْ کَنْکٛ مَا اٜ مٛ طٛنْ حَا اَبَدَا؞ نغَمْ نٛنْ، حَنْدٜ اٜ کٛو ندٜيٜ اٜ مٛ وٛودِ بَوْطٜ اٛ حِسْنَ ٻَدّٛتٛوٻٜ اَللَّه لَاوٛلْ مَاکٛ؞ اٜ مٛ وَاوِ حِسْنُکِٻٜ نغَمْ اٜ مٛ وٛودِ يٛنْکِ حَا اَبَدَا، ندٜنْ اٜ مٛ تٛرٛو اَللَّه نغَمْ مَٻّٜ؞ اِرِ اٛعٛ مَوْطٛ مَوْٻٜ اَرْدِيٻٜ دِينَ حَانَنِعٜنْ؞ اٛ شٜنِيطٛ، اٛ وَلَا غٛطُّمْ کَلُّطُمْ، اٛ وَلَا حَکّٜ، اٛ وُرْتِنَامَ ندٜرْ غَطٛوٻٜ حَکّٜ اٛ مَوْنِنَا دٛوْ کٛو طُمٜ تٛنْ دٛوْ؞ کَنْکٛ نَاع بٛ ٻٜنْ تٛنْ مَوْٻٜ مَوْٻٜ اَرْدِيٻٜ دِينَ حٛرِيٻٜ؞ کَمْٻٜ سٜيْ تٛ ٻٜ شَکَّنِي اَللَّه کٛو ندٜيٜ ݧَلْندٜ، اَرَنْدٜ نغَمْ حَکّٜ مَٻّٜ، ندٜنْ نغَمْ حَکّٜ يِمْٻٜ؞ اَمَّا يٜىٰسُ نَاع نٛنْ؞ اٛ سَکَّنِي اَللَّه ندٜ غٛعٛ، جٛتِّنْطُمْ کٛو طُمٜ، ندٜ اٛ سَکَّنِ اَللَّه حٛورٜ مَاکٛ؞ ندٜنْ اَتَّوْرَ اٜ سُٻَ يِمْٻٜ تَمْڤُٻٜ نغَرْتَ مَوْٻٜ مَوْٻٜ اَرْدِيٻٜ دِينَ؞ اَمَّا حُنَيٜىٰرٜ اَللَّه وَرِي غَطَ اَتَّوْرَ؞ کَيْرٜ سُٻِ ٻِطّٛ مَاکٛ غَرْتِرَاطٛ کٜوْطٛ حَا اَبَدَا؞ جٛونِ فُو کٛ مِنْ مبِعَتَ کَنْجُمْ وٛنِ، اٜنْ نغٛودِ مَوْطٛ مَوْٻٜ اَرْدِيٻٜ دِينَ؞ اٜ مٛ جٛوطِي اٜ جُنْغٛ ݧَامٛ جٛوطٛرْغَلْ جٛومُ مَنْغُ تٛنْ دٛوْ؞ اٜ مٛ حُوَ ندٜرْ وِغٜىٰرٜ ٻُرْندٜ سٜنَاکِ، وَاتٛ ندٜرْ لُکُرُ غٛونغَجُمْ طُمْ جٛومِرَاوٛ تِغِّ تٛنْ دٛوْ، نَاع اٜ جُوطٜ يِمْٻٜ؞ کٛو مٛيٜ مَوْطٛ مَوْٻٜ اَرْدِيطٛ دِينَ اٛ سُٻَ نغَمْ اٛ حٛکَّ اَللَّه دٛکّٜ اٛ سَکَّنَمٛ مَرْلٜ؞ نٛنْ مَا مَوْطٛ مَوْٻٜ اَرْدِيٻٜ دِينَ مٜىٰطٜنْ دٛولٜ حٜٻَ کٛ سَکَّتَ؞ تٛو، دَا اٜ مٛ دُونِيَارُ جٛونِ، دَا اٛ وَرْتَتَا اَرْدِيطٛ دِينَ کٛو سٜطَّ، نغَمْ اٜ وٛودِ اَرْدِيٻٜ دِينَ کٛکّٛوٻٜ اَللَّه دٛکّٜ نٛ اَتَّوْرَ وِعِ؞ ٻٜنْ طٛنْ اَرْدِيٻٜ دِينَ اٜ ٻٜ کُوَ کُوغَلْ مَٻّٜ تٛ وِغٜىٰرٜ ٻُرْندٜ سٜنَاکِ نَنْدُندٜ اٜ وٛنْدٜ تٛنْ دٛوْ؞ نغَمْ کٛ مُوسَ فُطَّ تِغُّکِ لُکُرُ سٜنِيطُمْ؞ جٛومِرَاوٛ وِعِمٛ، «تَبِّتِنْ اَ وَطِي کٛو طُمٜ نٛنْ نٛ طُمْ حٛلِّرْمَاطُمْ دٛوْ حٛشّٜىٰرٜ؞» اَمَّا جٛونِ يٜىٰسُ حٛکَّامَ کُوغَلْ اَرْدِيطٛ دِينَ ٻُرْنغَلْ وٛوطُکِ، نٛنْ نٛ اَلْکَوَلْ نغَلْ اٛ سِرْيِي حَکُّندٜ اَللَّه اٜ يِمْٻٜ نغَلْ ٻُرِي وٛوطُکِ؞ اَلْکَوَلْ نغَلْ طٛنْ نغَلْ ٻُرِي وٛوطُکِ نغَمْ نغَلْ وَطَامَ دٛوْ فِي طُمْ اَللَّه وِعِ وَطَنَيْعٜنْ ٻُرْطُمْ طُمْ ندٜنّٛ؞ دَا اَلْکَوَلْ اَرَنْدٜوَلْ وَلَا غٛطُّمْ شَطُّمْ، دَا نَاع سٜيْ تٛ طُمْ حٜٻِي اَلْکَوَلْ طِطَٻَلْ؞ اَمَّا اَللَّه يِعِي يِمْٻٜ مُوطُمْ نغٜوِي اَلْکَوَلْ اَرَنْدٜوَلْ نٛ اَايَارٜ وِعِ، جٛومِرَاوٛ وِعِي، «بَلْطٜ اٜ نغَرَ طٜ نغَادَيْمِ اَلْکَوَلْ کٜسَلْ اٜ يِمْٻٜ اِسْرَاعِيلَ اٜ يِمْٻٜ يَحُودَ؞ اَلْکَوَلْ نغَلْ وَرْتَتَا بٛ اَلْکَوَلْ نغَلْ نغَادُمِ اٜ مَامَعٜنْ مَٻّٜ ݧَلْندٜ ندٜ نجٛغَنِيمِٻٜ جُنْغٛ اَرْدِيمِٻٜ ٻٜ مبُرْتِي لٜيْدِ مَسَرْ؞ نغَمْ ٻٜ نجٛغَاکِ اَلْکَوَلْ نغَلْ نغَادُمِ اٜ مَٻّٜ، نغَمْ نٛنْ مِ وَيْلِتَنِيٻٜ ٻَاوٛ؞ مِنْ جٛومِرَاوٛ وِعِ نٛنْ؞» اٛ ٻٜيْدِ وِيکِ، «رَا اَلْکَوَلْ نغَلْ نغَادَيْمِ اٜ يِمْٻٜ اِسْرَاعِيلَ غَطَ بَلْطٜ طٜنْ؞ مِ وَطَيْ دٛوکَ اَمْ ندٜرْ ݧُمٛ مَٻّٜ، ندٜنْ مِ وِنْدَطُمْ ندٜرْ ٻٜرْطٜ مَٻّٜ؞ مِ وَرْتَيْ اَللَّه مَٻّٜ، کَمْٻٜ بٛو ٻٜ نغَرْتَيْ يِمْٻٜ اَمْ؞ نَاع نَا غٛطّٛ اٜکِّتِنِي مٛ جٛوطٛدِي، کٛو اٜکِّتِنَ بَنْدِرَاوٛ مُوطُمْ وِيکِ، ‹اَنْدُ جٛومِرَاوٛ،› نغَمْ ٻٜ فُو ٻٜ اَنْدَيْيَمْ، دَغَ ڤَمَرٛ مَٻّٜ حَا مَوْطٛ مَٻّٜ؞ مِ يَافَنْتٛٻٜ حَکّٜ مَٻّٜ، ندٜنْ مِ فُطِّتَتَا مِ سِفْتٛرَ کٛ حَلِّ طُمْ ٻٜ نغَطِ؞» ندٜ اَللَّه نٛدِّ اَلْکَوَلْ نغَعَلْ اَلْکَوَلْ کٜسَلْ حٛلِّي اٛ وَرْتِرِي اَرَنْدٜوَلْ نغَلْ کِينغَلْ؞ ندٜنْ بٛو کٛو طُمٜ غَرْتُطُمْ کِيطُمْ، تٛ طُمْ وَطِي کَ حِيطُکِ، طُمْ نٜىٰٻَتَا طُمْ لَلَّيْ؞ اَلْکَوَلْ اَرَنْدٜوَلْ اٜ وٛودِ دٛوکَاجِ نٛ طُمْ مَوْنِنِرْتَ اَللَّه ندٜنْ اٜ وُرٛ نغٛ طُمْ ݧِٻِ ندٜرْ دُونِيَارُ نغَمْ مَوْنِنْکِمٛ طٛنْمَا؞ لُکُرُ تِغَّامَ سٜنْدَا شُوطِ طِطِ؞ سُودُ اَرَنْدٜىٰرُ اٜ نٛدِّرٜىٰ وِغٜىٰرٜ شٜنِيندٜ؞ ندٜرْ مَيْرُ اٜ وٛودِ تٛ طُمْ رٜسَتَ فِتِلَارُ اٜ دَنْکِ اٜ بُرٛودِ طُمْ اُمْ حٛکَّتَ اَللَّه؞ غَطَ وُدٜرٜ شٜنْدُندٜ سُودُ ندُنْ اٜ وٛودِ وِغٜىٰرٜ بِعٜتٜىٰندٜ وِغٜىٰرٜ ٻُرْندٜ سٜنَاکِ؞ ندٜرْ وِغٜىٰرٜ ندٜنْ اٜ وٛودِ سَکِّرْدٜ جِينَارِ تٛ طُمْ وُلَتَ اُرْدٜ وٜلْندٜ، ندٜنْ اٜ وٛودِ اَکوَاتِيَ اَلْکَوَلْ شُدِّرَانغَ جِينَارِ؞ ندٜنْ ندٜرْ مَاغَ اٜ وٛودِ تُمُّغٜلْ غَطِرَانغٜلْ جِينَارِ؛ ندٜرْ مَغّٜلْ بٛو اٜ وٛودِ ݧَمْندُ بِعٜتٜىٰندُ مَنَّ؞ طٛنْمَا اٜ وٛودِ سَوْرُ هَرُونَ غَطُندُ ڤِنْدِ، اٜ اَلّٛوجٜ طِطِ طٜ کَاپٜ طٜ طُمْ وِنْدِ دٛوکَاجِ اَللَّه دٛوْ مَاجٜ؞ دٛوْ اَکوَاتِيَ نغَنْ بٛو اٜ وٛودِ کٜرُبَعٜنْ غَطِرَاٻٜ جِينَارِ کٛلّٛوٻٜ تٜدُّنغَلْ اَللَّه؞ بِيٜىٰلِ مَٻّٜ اٜ شُدِّ مَٻّٛودٜ اَکوَاتِيَ نغَنْ تٛ طُمْ يَافٛتٛو حَکّٜ؞ اَمَّا جٛونِ طُمْ وَاوَتَا طُمْ وِعَ کٛو طُمٜ نٛ وٛنْتِندِرِ دٛوْ مَاجُمْ؞ غَطَ طُمْ سِرْيَکٜ کٛو طُمٜ نٛنْ، اَرْدِيٻٜ دِينَ بٛو اٜ نَتَّ سُودُ اَرَنْدٜىٰرُ ندُ لُکُرُ نغَمْ ٻٜ کُوَ کُوغَلْ مَٻّٜ؞ اَمَّا مَوْطٛ مَوْٻٜ اَرْدِيٻٜ دِينَ تَنْ نَتَّتَ سُودُ طِطَوْرُ ندُ لُکُرُ طُمْ، ندٜنْ اٜ مٛ نَتَّندُ ندٜ غٛعٛ اٜ حِتَاندٜ؞ اٜ مٛ نَتِّدَ اٜ پِيپَمْ مَرْلٜ طٜ اٛ سَکَّنِ اَللَّه نغَمْ حٛورٜ مَاکٛ اٜ نغَمْ حَکّٜ طُمْ يِمْٻٜ نغَطِ اَنْدَا؞ نٛنْ رُوحُ اَللَّه حٛلِّرِعٜنْ وِيکِ لَاوٛلْ نَتُّکِ وِغٜىٰرٜ ٻُرْندٜ سٜنَاکِ مَٻِّتَاکَ تَوْ تٛ نِ لُکُرُ اَرَنْدٜجُمْ طُمْ اٜ طٛنْ دَرِي؞ طُعُمْ طُمْ مِسَالُ دٛوْ جَامَنُ طُعُمْ؞ طُمْ حٛلِّي حٛکُّکِ اَللَّه دٛکّٜ اٜ شَکِّرِ وَاوَتَا اِتُّکِ وَنَّارٜ حَکّٜ دَغَ ٻٜرْندٜ مَوْنِنٛووٛ اَللَّه؞ ݧَمْکِ اٜ يَرْکِ اٜ لٛوتٜ‑لٛوتٜ فٜىٰرٜ‑فٜىٰرٜ نغَمْ دِينَ، طُمْ دٛوکَاجِ نغَمْ ٻَنْدُ تَنْ، طِ طُمْ وَطِ نَا شَرٜلْ اَلْکَوَلْ کٜسَلْ وَطِي؞ اَمَّا اَلْمَسِيحُ يَادَکٜ وَرْتِي مَوْطٛ مَوْٻٜ اَرْدِيٻٜ دِينَ دٛوْ اَلْکَوَلْ کٜسَلْ نغَلْ نغٛودُطٜنْ؞ اٛ نَتِّ لُکُرُ سٜنِيطُمْ ٻُرْطُمْ طُمْ ندٜنّٛ تٜدُّنغَلْ اٜ سٜنَاکِ؞ لُکُرُ طُمْ نَاع جُنْغٛ نٜطّٛ وَطِطُمْ، نَاع اِرِ طُمْ دُونِيَارُ؞ اَلْمَسِيحُ بٛو نَتِّي ندٜرْ وِغٜىٰرٜ ٻُرْندٜ سٜنَاکِ ندٜ غٛعٛ تَنْ؞ ندٜ اٛ نَتِّ اٛ سَکَّنَ اَللَّه اٛ نَتِّدَايِ اٜ پِيپَمْ بٜعِ اٜ غَعِ، اَمَّا اٛ نَتِّدِي اٜ پِيپَمْ مَاکٛ؞ سَکُّکِ کِنْ حٜپِي حَا اَبَدَا؞ نٛنْ اٛ حٜٻِرَنِعٜنْ رِمْطِنْکِ کِ حَا اَبَدَا؞ پِيپَمْ بٜعِ اٜ پِيپَمْ غَعِ اٜ تٛوکَ وِيغٜ نغٜ طُمْ وُلِ، اٜ طُمْ مٜشَّنَطُمْ يِمْٻٜ ٻٜ دِينَ حٛلِّ ٻٜ لَاٻَا، اٜ طُمْ اِتَّ شِيَ لَٻْکِ مَٻّٜ طُمْ وَرْتِرَٻٜ لَٻّٜ ندٜرْ دِينَ؞ حَکّٛ پِيپَمْ اَلْمَسِيحُ طَمْ وَطَيْ کٛ ٻُرِ نٛنْ؞ بَرْکَ رُوحُ اَللَّه غٛنْطُمْ حَا اَبَدَا، اٛ حٛکِّي حٛورٜ مَاکٛ اٛ وَرْتِي شَکِّرِ ندِ وَلَا غٛطُّمْ کٛ حَانَا؞ پِيپَمْ مَاکٛ بٛو لَاٻِنَيْ ٻٜرْطٜ مٜىٰطٜنْ دَغَ کُوطٜ جَارَيْطٜ مَيْدٜ، نغَمْ کُوَنٜنْ اَللَّه مٛ يٛنْکِ؞ نغَمْ مَاجُمْ اَلْمَسِيحُ وٛنِ شِرْيِيطٛ اَلْکَوَلْ کٜسَلْ حَکُّندٜ اَللَّه اٜ يِمْٻٜ، نغَمْ ٻٜنْ طٛنْ ٻٜ اَللَّه نٛدِّ کٜٻَ ندٛنُ تَبِتَيْطُمْ طُمْ اٛ وَطِ اَلْکَوَلْ؞ مَيْدٜ مَاکٛ رِمْطِنِي يِمْٻٜ دَغَ حَکّٜ طُمْ ٻٜ نغَطِ شَرٜلْ نغٜلْ طُمْ حُوتِرْتَ اَلْکَوَلْ اَرَنْدٜوَلْ؞ تٛ نٜطّٛ وَطِي اَلْکَوَلْ حٛکُّکِ غٛطّٛ ندٛنُ، دٛولٜ طُمْ تَبِّتِنَ مَيْدٜ غَطُطٛ اَلْکَوَلْ نغَلْ؞ نغَمْ اَلْکَوَلْ ندٛنُ تَبِّتَتَا سٜيْ تٛ غَطُطٛنغَلْ مَايِي؛ تٛ اٜ مٛ فٛوفَ، نغَلْ حُوَتَا؞ کَنْجُمْ وَطِ کٛو اَلْکَوَلْ اَرَنْدٜوَلْ نغَلْ فُطَّايِ حُوُکِ سٜيْ اٜ پِيپَمْ؞ ندٜ مُوسَ وَعَجِنَنِ يِمْٻٜ فُو کٛ اَللَّه وِعِ طُمْ وَطَ غٛنْطُمْ ندٜرْ اَتَّوْرَ، اٛ حٛشِّي پِيپَمْ غَعِ اٜ بٜعِ، اٜ ندِيَمْ، ندٜنْ اٛ حٛشِّ حَاکٛ لٜکِّ بِعٜتٜىٰکِ حِسٛڤْ اٜ لٜىٰٻٜ مبَالَ بٛطٜىٰجٜ، اٛ سُووِطُمْ ندٜرْ مَاجَمْ، اٛ مِسِطَمْ دٛوْ دٜفْتٜرٜ اَتَّوْرَ اٜ دٛوْ فُو يِمْٻٜ؞ اٛ وِعِ، «طَعَمْ وٛنِ پِيپَمْ تَبِّتِنْطَمْ اَلْکَوَلْ نغَلْ اَللَّه وِعِعٛنْ تٛکّٛنْ؞» نٛنْ مَا اٛ مِسِ پِيپَمْ طَمْ دٛوْ لُکُرُ طُمْ اٜ دٛوْ فُو کُوتِرْتٜىٰطُمْ ندٜرْ مَوْنِنْکِ اَللَّه؞ غٛونغَ، اَتَّوْرَ وِعِي حَادٜ کٛو طُمٜ اٜ لَاٻِنِرٜىٰ پِيپَمْ، ندٜنْ تٛ نَاع پِيپَمْ رُفَا، حَکّٜ يَافَتَاکٜ؞ فُو فِي طُمْ طٛنْ طُمْ نَنْدُطُمْ اٜ غٛنْطُمْ تٛنْ دٛوْ غٛونغَجُمْ، دٛولٜ طُمْ لَاٻِنِرٜىٰ اٜ اِرِ کِنْ طٛنْ سَکُّکِ؞ اَمَّا فُو فِي غٛنْطُمْ تٛنْ دٛوْ، دٛولٜ طُمْ لَاٻِنِرٜىٰ اٜ سَکُّکِ ٻُرْکِ کِنْ تٛنْ؞ نغَمْ اَلْمَسِيحُ نَتَّايِ ندٜرْ وِغٜىٰرٜ ٻُرْندٜ سٜنَاکِ ندٜ نٜطّٛ وَطِ نَنْدُندٜ اٜ وِغٜىٰرٜ ندٜ غٛونغَ غٛنْدٜ دٛوْ؞ اَمَّا دٛوْ اٜ حٛورٜ مَاجُمْ اٛ نَتِّ، جٛونِ تٛنْ اٛ وٛنِ يٜىٰسٛ اَللَّه نغَمْ مٜىٰطٜنْ؞ اَلْمَسِيحُ نَتَّايِ دٛوْ نغَمْ وَطَ کَ سَکُّکِ حٛورٜ مُوطُمْ کٛو ندٜيٜ نٛ مَوْطٛ مَوْٻٜ اَرْدِيٻٜ دِينَ نَتِّدَتَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ کٛو ندٜيٜ حِتَاندٜ؞ دَا طُمْ نٛنْ، دَا اَلْمَسِيحُ يَرِي تٛرَّ ندٜ طُطُّمْ دَغَ شَرٜلْ نغٜلْ دُونِيَارُ تَغَا؞ اَمَّا رَطُّمْ جٛونِ اٜ رٜعِرْدٜ دُونِيَارُ اٛ وَرِي ندٜ غٛعٛ تَنْ نغَمْ اٛ اِتَّ حَکّٜ بَرْکَ سَکُّکِ حٛورٜ مَاکٛ؞ نٛنْ نٛ طُمْ سِرْيَنِي نٜطّٛ مَايَ ندٜ غٛعٛ، غَطَ مَيْدٜ ندٜنْ طُمْ وَطَنَيْمٛ کِيتَ، نٛنْ مَا اَلْمَسِيحُ سَکَّامَ ندٜ غٛعٛ نغَمْ اٛ اِتَّ حَکّٜ يِمْٻٜ طُطْٻٜ؞ اٛ وَرْتٛيَيْ غَرْتٛلْ طِطَٻٛلْ نَاع نغَمْ اٛ اِتَّ حَکّٜ، اَمَّا نغَمْ اٛ حِسْنَ ٻٜنْ طٛنْ کٜطِيٻٜمٛ؞ اَتَّوْرَ طُمْ نَنْدِنِرْطُمْ فُو فِي بٛطُّمْ غَرَيْطُمْ يٜىٰسٛ طٛعٛ، نَاع کَنْجُمْ وٛنِ فِي طُمْ اٜ حٛورٜ مَاجُمْ؞ نغَمْ نٛنْ سَکُّکِ کِ طُمْ وَطَتَ کٛو ندٜيٜ حِتَاندٜ کِ وَرْتِرْتَا ٻٜنْ طٛنْ ٻَدّٛتٛوٻٜ اَللَّه کٜىٰوُٻٜ؞ دَا اٜ کِ وَاوِ وَرْتِرْکِٻٜ کٜىٰوُٻٜ، دَا ٻٜ اَلَايِ سَکَّنْکِ اَللَّه؟ دَا مَوْنِنٛوٻٜ اَللَّه ٻٜنْ لَاٻِنَامَ دَغَ حَکّٜ مَٻّٜ فُو، دَا ٻٜرْطٜ مَٻّٜ نغَنَّتَاٻٜ مبِعَٻٜ ٻٜ نغَطِي حَکّٜ؞ اَمَّا ندٜرْ سَکُّکِ کِعِ اٜ وٛودِ کٛ سِفْتٛرَنْتَ يِمْٻٜ حَکّٜ مَٻّٜ کٛو ندٜيٜ حِتَاندٜ؞ نغَمْ طُمْ وَطَتَاکٛ پِيپَمْ غَعِ اٜ پِيپَمْ بٜعِ اِتَّ حَکّٜ؞ کَنْجُمْ وَطِ شَرٜلْ کٛ اَلْمَسِيحُ نَتِّ دُونِيَارُ اٛ وِعِي اَللَّه: «نَاع سَکَّنٜىٰکِ اٜ حٛکّٜىٰکِ دٛکّٜ نغِطَّا، اَمَّا اَ سِرْيَنَکٜيَمْ ٻَنْدُ؞ نَاع شَکِّرِ غُلٜتٜىٰندِ اٜ شَکِّرِ نغَمْ اِتُّکِ حَکّٜ وٜلْنَنْتَمَ ٻٜرْندٜ؞ سٜيْ مبِيمِ، ‹يَا اَللَّه، رَمِّ طٛعٛ؞ مِ وَرِي نغَمْ مِ وَطَ کٛ نغِطَّا، نٛنْ نٛ طُمْ وِنْدِرَا ندٜرْ اَتَّوْرَ دٛوْ اَمْ؞› » اَرَنْدٜ اٛ وِعِي، «اَ يِطَا سَکَّنٜىٰکِ اٜ حٛکّٜىٰکِ دٛکّٜ کٛو اٜ فُو کٛ طُمْ سَکَّتَ غُلٜتٜىٰطُمْ، کٛو کٛ طُمْ سَکَّتَ نغَمْ اِتُّکِ حَکّٜ، اَ نَنَتَا بٜلْطُمْ مَاجُمْ؞» اٛ وِعِي طُعُمْ کٛو ندٜ اَتَّوْرَ وِعِي طُمْ سَکّٜىٰ؞ ندٜنْ اٛ وِعِ، «رَمِّ طٛعٛ، مِ وَرِي نغَمْ مِ وَطَ کٛ نغِطَّا؞» اَللَّه اِتِّي سَکُّکِ اَرَنْدٜحِ نغَمْ اٛ وَدَّ سَکُّکِ طِطَٻِ، وَاتٛ اَلْمَسِيحُ؞ ندٜ يٜىٰسُ اَلْمَسِيحُ وَطِي کٛ اَللَّه يِطِ اٛ وَطَ، اٜنْ فُو اٜنْ لَاٻِنَامَ دَغَ حَکّٜ بَرْکَ سَکُّکِ حٛورٜ مَاکٛ ندٜ غٛعٛ تَنْ نغَمْ حَا اَبَدَا؞ کٛو مٛيٜ اَرْدِيطٛ دِينَ اٜ حُوَ کُوغَلْ مُوطُمْ کٛو ندٜيٜ ݧَلْندٜ، اٜ مٛ سَکَّ سَکُّکِ اِرِ غٛعٛ کٛو ندٜيٜ؞ سَکُّکِ کِنْ بٛو اِتَّتَا حَکّٜ حَا اَبَدَا؞ اَمَّا اَلْمَسِيحُ سَکِّي حٛورٜ مُوطُمْ ندٜ غٛعٛ نغَمْ حَکّٜ يِمْٻٜ؞ کِ بٛو حٜپِي حَا اَبَدَا؞ غَطَ اٛ وَطِي نٛنْ، اٛ جٛوطِي تٛ جُنْغٛ ݧَامٛ نغٛ اَللَّه؞ دَغَ نغٜلْ تٛنْ شَرٜلْ اٜ مٛ حٜطٛو نَا اَللَّه وَرْتِرِي وَݧْوَݧْٻٜ مَاکٛ تٛ اٛ يٛوَتَ کٛيْطٜ مَاکٛ؞ اٜ سَکُّکِ غٛعٛتِ کِنْ طٛنْ، اٛ وَرْتِرِي ٻٜنْ طٛنْ لَاٻِنَاٻٜ دَغَ حَکّٜ مَٻّٜ کٜىٰوُٻٜ حَا اَبَدَا؞ رُوحُ اَللَّه مَا اٜ حٛکَّعٜنْ شٜيْدَ دٛوْ مَاجُمْ؞ اَرَنْدٜ طُمْ وِعِي، «جٛومِرَاوٛ وِعِي، ‹رَا اَلْکَوَلْ نغَلْ نغَادَيْمِ اٜ مَٻّٜ ندٜرْ بَلْطٜ غَرَيْطٜ: مِ وَطَيْ دٛوکَاجِ اَمْ ندٜرْ ٻٜرْطٜ مَٻّٜ، مِ وِنْدَطِ ندٜرْ ݧُمٛوجِ مَٻّٜ؞› » ندٜنْ اٛ ٻٜيْدِ وِيکِ، «مِ فُطِّتَتَا مِ سِفْتٛرَ حَکّٜ مَٻّٜ اٜ کُوطٜ مَٻّٜ کَلُّطٜ؞» ندٜنْ تٛ طُعُمْ يَافَامَ، وَلَا وٛکِّ سَکُّکِ کَدِنْ نغَمْ اِتُّکِ حَکّٜ؞ نغَمْ نٛنْ، بَنْدِرَاٻٜ اَمْ، اٜنْ نغٛودِ سٜمْبٜ ٻٜرْندٜ نَتُّکِ وِغٜىٰرٜ ٻُرْندٜ سٜنَاکِ بَرْکَ پِيپَمْ يٜىٰسُ؞ اٛ مَٻِّتَنِيعٜنْ لَاوٛلْ کٜسٛلْ، جَارَيْنغٛلْ کِسْندَمْ نَتِّرْتٜىٰنغٛلْ غَطَ وُدٜرٜ شٜنْدُندٜ سُودُ جٛومِرَاوٛ، وَاتٛ نَتِّرْتٜىٰنغٛلْ ٻَنْدُ مَاکٛ؞ اٜنْ نغٛودِ اَرْدِيطٛ دِينَ مَوْطٛ ڤَامَنٛووٛ وُرٛ اَللَّه؞ نغَمْ نٛنْ اٜنْ نجَحُ حَادٜ اَللَّه اٜ ٻٜرْندٜ غٛعٛ، اٜ حٛولَارٜ تَبُّتُندٜ، اٜ ٻٜرْطٜ مٜىٰطٜنْ لَاٻِنَاطٜ دَغَ ݧُمٛ کَلُّنغٛ، اٜ ٻَلِّ لٛوتِرَاطِ ندِيَمْ لَٻْطَمْ؞ کَمُّندٜ ندٜ مبِعٜتٜنْ اٜنْ نغٛودِ، اٜنْ نجٛغَندٜ بٛطُّمْ، نغَمْ اٛنْ طٛنْ غَطُطٛ اَلْکَوَلْ اٛ حٜبِّنَيْنغَلْ؞ اٜنْ نغَطُ حَکِّيلٛ مٜىٰطٜنْ دٛوْ نٛ مبَلِّندِرْتٜنْ نغَمْ کٛلّٜنْ يِدّٜ اٜ وَطُکِ کُوطٜ بٛطّٜ؞ تٛع اٜنْ اَلُ حَوْرُتُکِ نٛ وٛٻّٜ مبٛووِ وَطُکِ؞ اَمَّا اٜنْ شٜمْبِطِندِرْ، اٜنْ ٻٜيْدُ وَطُکِ نٛنْ ندٜ اٛنْ اَنْدِ ݧَلْندٜ ندٜ يٜىٰسُ وَرْتٛيْتَ اٜ ٻَدّٛيٛو؞ تٛ اٜنْ نغَطِي کَ وَطُکِ حَکّٜ اٜ يِدّٜ ٻٜرْندٜ مٜىٰطٜنْ غَطَ اٜنْ اَنْدِ غٛونغَ، وَلَا وٛکِّ سَکُّکِ اِتَّيْکِ حَکّٜ مٜىٰطٜنْ؞ اَمَّا کٛ حٛرِي وٛنِ کٜطٛوطٜنْ کِيتَ اَللَّه ندٜرْ کُلٛلْ، کِيتَ غَرَيْکَ اٜ حِيتٜ کَلُّنغٜ کَلْکَيْنغٜ ٻٜنْ طٛنْ غَݧُٻٜ اَللَّه؞ کٛو مٛيٜ غٜوُطٛ دٛوکَ مُوسَ، اٛ وَرَامَ يُرْمٜىٰندٜ وَلَا دٛوْ شٜيْدَ يِمْٻٜ طِطٛ کٛو تَتٛ تَبِّتِنْٻٜ کٛ اٛ وَطِ؞ تٛ نٜطّٛ وَݧِي ٻِطّٛ اَللَّه، کَدِنْ اٛ وَرْتِرِي پِيپَمْ اَلْکَوَلْ اَللَّه لَاٻِنْطَنْمٛ دَغَ حَکّٜ وَلَا کٛ نَفِ، طٛنْمَا اٛ حُطِ رُوحُ اَللَّه کٛلَّيْطُمْ يِدّٜ، اِرِ طُمٜ بٛنٜ کَلُّطُمْ حَانِ اٛ يَرَ؟ اٛ يَرَيْ بٛنٜ کَلُّطُمْ ٻُرْطُمْ طُمْ غٜوٛووٛ دٛوکَ يَرَتَ؞ نغَمْ اٜنْ اَنْدِ اٛنْ طٛنْ بِيطٛ، «وَاتَاکِ طُمْ کِ اَمْ، مِ وَاتَنَيْ کٛو مٛيٜ کٛ وَطِ؞» طٛنْمَا اٛ وِعِي، «جٛومِرَاوٛ وَطَنَيْ يِمْٻٜ مُوطُمْ کِيتَ؞» طُمْ فِي کُلْنِيطُمْ نٜطّٛ نَتَّ جُنْغٛ اَللَّه مٛ يٛنْکِ؞ اَمَّا شِفْتٛرٜىٰ بَلْطٜ اَرَنْدٜىٰجٜ طٜ طُمْ فَمْتِنِعٛنْ دٛوْ اَلْمَسِيحُ؞ اٛنْ مُݧِي ندٜرْ يَرْکِ تٛرَّ کَلُّکَ؞ بَنْݧٜ اٜ طُمْ سٜمْتِنَعٛنْ يٜىٰسٛ يِمْٻٜ، اٜ طُمْ حُطَعٛنْ، بَنْݧٜ طُمْ تٛرَّعٛنْ، ندٜنْ بَنْݧٜ اٛنْ مبَلَّ جَرٛوٻٜ تٛرَّ اِرِ کَ مٛوطٛنْ؞ اٛنْ نجُرْمِنَنِي شُرَاٻٜ، ندٜنْ ندٜ طُمْ تٜىٰتَنِعٛنْ کٛ نغٛودُطٛنْ، اٛنْ نجَٻِي کٛ طُمْ وَطَنِعٛنْ اٜ وٜلْوٜلٛ؞ نغَمْ اٛنْ اَنْدِ اٛنْ نغٛودِ غٛطُّمْ ٻُرْطُمْ وٛوطُکِ تَبِتَيْطُمْ حَا اَبَدَا؞ نغَمْ نٛنْ تٛع اٛنْ ڤَطُّ سٜمْبٜ ٻٜرْطٜ مٛوطٛنْ؞ طُمْ وَدَّنَيْعٛنْ مبَرْجَارِ مَوْندِ؞ اٜ حَانِ مُݧٛنْ نغَمْ نغَطٛنْ کٛ اَللَّه يِطِ، کٜٻٛنْ کٛ اٛ وَطِ اَلْکَوَلْ؞ نغَمْ اَايَارٜ وِعِي، «نَاع کٛ نٜىٰٻِ، اٛنْ طٛنْ غَرَيْطٛ وَرَيْ؛ اٛ وٛنَّتَا شَرٜلْ؞ نٜطّٛ اَمْ اَادِلِيجٛ اٛ جٛوطٛتٛ لَاوٛلْ حٛولَاکِيَمْ؛ اَمَّا تٛ اٛ يَاتِرِي غَطَ، مِ نَنَتَا بٜلْطُمْ مَاکٛ؞» اَمَّا اٜنٜنْ نَاع اٜنْ ندٜرْ يَاتِرْٻٜ غَطَ کَلْکِ؞ اٜنٜنْ اٜنْ ندٜرْ کٛولِيٻٜ اَللَّه کِسِ؞ تٛو، حٛولَارٜ وٛنِ تَبِّتِنْکِ حٜٻُکِ کٛ نغَطّٜنْ کَمُّندٜ حٜٻُکِ، کَيْرٜ تَبِّتِنَنْتَعٜنْ فِي طُمْ اٜنْ نغِعَتَا؞ نغَمْ يِمْٻٜ اَرَنْدٜعٜنْ کٛولَکٜ اَللَّه وَطِ اٛ جَٻِٻٜ؞ نغَمْ اٜنْ کٛولِي اَللَّه وَطِ ڤَامُطٜنْ اٛ تَغِرِي دُونِيَارُ وٛلْدٜ مَاکٛ، نغَمْ کٛ يِعٜتٜىٰ وُرْتِنَامَ دَغَ ندٜرْ کٛ يِعَتَاکٜ؞ نغَمْ حَبِيلَ اٜ حٛولِي اَللَّه وَطِ سَکَّنِمٛ شَکِّرِ ٻُرْندِ ندِ کَيِنُ؞ نغَمْ اٜ مٛ حٛولِي اَللَّه وَطِ اَللَّه جَٻِمٛ اٛ اَادِلِيجٛ ندٜ جَٻِ دٛکّٜ مَاکٛ؞ کَدِمَا حٛولَارٜ ندٜنْ وَطِ کُوغَلْ مَاکٛ حَا حَنْدٜ اٜ مٜتَنَعٜنْ کٛو ندٜ اٛ مَايِ؞ نغَمْ اٜنٛکْ اٜ حٛولِي اَللَّه وَطِ اٛ حٛشَّا يَاکِ دٛوْ نغَمْ تٛع اٛ مَايَ؞ وَلَا غِيطٛمٛ کَدِنْ، نغَمْ اَللَّه حٛشِّيمٛ يَاکِ دٛوْ؞ ندٜنْ اَايَارٜ وِعِي، کٛ اٛ حٛشّٜىٰ يَاکِ دٛوْ، اٛ وٜلْنَنِي اَللَّه ٻٜرْندٜ؞ تٛ نَاع نٜطّٛ حٛولِي اَللَّه وَاوَتَا وٜلْنَنْکِمٛ ٻٜرْندٜ، نغَمْ کٛو مٛيٜ غَرَيْطٛ تٛ اَللَّه دٛولٜ جَٻَ اَللَّه اٜ طٛنْ، ندٜنْ اٜ مٛ وَاتَنَ طَٻِّتٛوٻٜمٛ؞ نغَمْ نُحُ اٜ حٛولِي اَللَّه وَطِ اٛ جَٻِ وَغِّنٛلْ اَللَّه دٛوْ کٛ وَرٛيْتَ يٜىٰسٛ طُمْ يِعَاکَ اٜ شَرٜلْ نغٜلْ؞ اٛ وَطِي کٛ اَللَّه وِعِ اٛ وَطِ کٛمِوَلْ نغَمْ اٛ حِسْنَ وُرٛ مَاکٛ؞ نٛنْ اٛ حٛلِّ يِمْٻٜ دُونِيَارُ نغَطِي کٛ وٛوطَا، اٛ بٛو وَرْتِي اَادِلِيجٛ لَاوٛلْ حٛولَاکِ اَللَّه؞ نغَمْ اِبْرَاهِمْ اٜ حٛولِي اَللَّه وَطِ اٛ جَٻِ ندٜ اَللَّه وِعِمٛ اٛ يَحَ لٜيْدِ ندِ وَطِ اَلْکَوَلْ حٛکُّکِمٛ؞ اِبْرَاهِمْ اَلِ لٜيْدِ مُوطُمْ کٛو ندٜ اَنْدَا تٛ يَحَتَ؞ نغَمْ اٜ مٛ حٛولِي اَللَّه وَطِ اٛ جٛوطِي بٛ کٛطٛ اٜ لٜيْدِ ندِ اٛ وَطَنَا اَلْکَوَلْ؞ اٛ جٛوطِي ندٜرْ لُکُرُ؞ نٛنْ مَا اِشِيَاکُ اٜ يَاکُبُ نغَطِي دٛنُدُٻٜ اَلْکَوَلْ نغَلْ اٜ مَاکٛ؞ اِبْرَاهِمْ وَطِي نٛنْ نغَمْ اٛ حَاٻِي اٛ يِعَ غَرِيرِ تَبِتَيْندِ ندِ اَللَّه سِرْيِي، مَحِ؞ نغَمْ اِبْرَاهِمْ اٜ حٛولِي اَللَّه وَطِ اٛ حٜٻِ ٻِطّٛ، کٛو ندٜ اٛ نَوْيِ؞ سَارَتُ دٜبّٛ مَاکٛ بٛو دَݧَتَا؞ اٛ حٜٻِي ٻِطّٛ اٛنْ نغَمْ اٛ حٛولَکٜ اَللَّه حٜبِّنَيْ اَلْکَوَلْ مُوطُمْ؞ نغَمْ نٛنْ، دَغَ اٛعٛ نٜطّٛ غٛعٛتٛ نَيٜىٰجٛ ٻَدِيطٛ مَايَ، طُمْ حٜٻِي ٻِٻّٜ ٻِٻّٜىٰجِ طُطْٻٜ بٛ کٛودٜ دٛوْ، بٛ نجَارٜىٰندِ دَاندٜ مَايٛ ندِ لِمَتَاکٛ؞ يِمْٻٜ ٻٜعٜ فُو مَايِي اٜ کٛولِي اَللَّه؞ ٻٜ کٜٻَايِ اَلْکَوَلْ نغَلْ، اَمَّا ٻٜ کَيْنَکٜنغَلْ ٻٜ نَنِي بٜلْطُمْ مَاغَلْ؞ ٻٜ مبِعِي اٜ نجَيْرِ ٻٜ حٛٻّٜ ٻٜ غَرْٻٜ ندٜرْ دُونِيَارُ ندُعُ؞ فُو بِيٻٜ نٛنْ، ٻٜ کٛلِّي اٜ ٻٜ طَٻِّتَ لٜيْدِ ندِ کٛعٜ مَٻّٜ؞ دَا طُمْ وِعَ ٻٜ نغَطِي کَ ݧُمُکِ دٛوْ لٜيْدِ ندِ ٻٜ اَلٛيِ، دَا ٻٜ کٜٻِي لَاوٛلْ سٛعَّاکِ؞ اَمَّا ٻٜ نغَطِي ٻٜرْطٜ مَٻّٜ دٛوْ لٜيْدِ ٻُرْندِ وٛوطُکِ، وَاتٛ ندِ تٛنْ دٛوْ؞ نغَمْ نٛنْ، نَاع طُمْ شٜمْتِنِيطُمْ تٛ اَللَّه طُمْ نٛدَّمٛ اَللَّه مَٻّٜ، نغَمْ اٛ سِرْيَنَکٜٻٜ غَرِيرِ؞ نغَمْ اِبْرَاهِمْ اٜ حٛولِي اَللَّه وَطِ اٛ سِرْيِي سَکَّنْکِ اَللَّه ٻِطّٛ مَاکٛ اِشِيَاکُ ندٜ اَللَّه فٛوندِمٛ؞ کَنْکٛ غَطَنَاطٛ اَلْکَوَلْ اٜ مٛ حَادٜ سَکُّکِ ٻِطّٛ مَاکٛ بَجّٛ کٛو ندٜ اَللَّه وِعِينٛمٛ، «بَرْکَ اِشِيَاکُ کٜٻَتَا ٻِٻّٜ ٻِٻّٜىٰجِ ٻٜ نغَطَنْمَامِ اَلْکَوَلْ؞» اِبْرَاهِمْ تَبِّتِنِي اَللَّه وَاوَيْ اُمِّنْکِ مَيْطٛ؞ بٛو طُمْ وَاوَيْ طُمْ وِعَ، طُمْ حٛکِّتِي اِبْرَاهِمْ اِشِيَاکُ دَغَ مَيْدٜ؞ نغَمْ اِشِيَاکُ اٜ حٛولِي اَللَّه وَطِ اٛ بَرْکِطِنِ يَاکُبُ اٜ اِسَوْ نغَمْ يٜىٰسٛ؞ نغَمْ يَاکُبُ اٜ حٛولِي اَللَّه وَطِ ندٜ اٛ ٻَدِي مَيْدٜ، اٛ بَرْکِطِنِ ٻِٻّٜ اِسُفُ غٛعٛتٛ‑غٛعٛتٛ؞ اٛ ٻَغِّ سَوْرُ ندُ اٛ يَحِرْتَ، اٛ مَوْنِنِ اَللَّه؞ نغَمْ اِسُفُ اٜ حٛولِي اَللَّه وَطِ ندٜ اٛ ٻَدِي مَيْدٜ، اٛ مٜتِ دٛوْ وُرْتَاکِ يِمْٻٜ اِسْرَاعِيلَ دَغَ لٜيْدِ مَسَرْ، اٛ وِعِٻٜ نٛ ٻٜ نغَادَتَ اٜ پِعٜ مَاکٛ؞ نغَمْ دَݧٛوٻٜ مُوسَ اٜ کٛولِي اَللَّه وَطِ ٻٜ شُوطِمٛ لٜبِّ تَتِ غَطَ اٛ دَݧَامَ، نغَمْ ٻٜ نغِعِي اٛ ٻِطّٛ بٛطّٛ، ٻٜ کُلَايِ وَݧُکِ کٛ لَامِيطٛ وِعِ طُمْ وَطَ؞ نغَمْ مُوسَ اٜ حٛولِي اَللَّه وَطِ ندٜ اٛ مَوْنِ اٛ وَݧِ اٛ نٛدِّرٜىٰ ٻِطّٛ ٻِي فِرعَوْنَ دٜبّٛ؞ اٛ سُٻِي اٛ يَرْدَ تٛرَّ اٜ يِمْٻٜ اَللَّه دٛوْ اٛ نَنَ بٜلْطُمْ حَکّٜ نغَمْ شَرٜلْ سٜطَّ؞ اٛ يِعِي سٜمْتِنٜىٰکِ نغَمْ اَلْمَسِيحُ طُمْ رِسْکُ ٻُرْطُمْ جَوْدِ لٜيْدِ مَسَرْ، نغَمْ حَکِّيلٛ مَاکٛ اٜ دٛوْ مبَرْجَارِ ندِ اٛ حٜٻَتَ يٜىٰسٛ؞ نغَمْ مُوسَ اٜ حٛولِي اَللَّه وَطِ اٛ اَلِ لٜيْدِ مَسَرْ، اٛ حُلَايِ مٛنّٜرٜ لَامِيطٛ لٜيْدِ ندِنْ؞ اٛ وَݧِ اٛ سٛعّٛ نغَمْ اٛ يِعِي اَللَّه مٛ يِعَتَاکٜ؞ نغَمْ اٜ مٛ حٛولِي اَللَّه وَطِ اٛ فُطِّ حُمْتٛ سَکِّنْکِ؞ اٛ وِعِ اِسْرَاعِيلَنْکٛعٜنْ مِسَنَ دَمُّطٜ مَٻّٜ پِيپَمْ، نغَمْ تٛع مَلَاعِکَاجٛ مَيْدٜ وَرَ فُو وٛرْٻٜ اَفٛعٜنْ مَٻّٜ؞ نغَمْ اِسْرَاعِيلَنْکٛعٜنْ اٜ کٛولِي اَللَّه وَطِ ٻٜ مبَاوِ حُولُکِ مَايٛ وٛطٜوٛ بٛ دٛوْ لٜيْدِ نجٛرْندِ؞ اَمَّا ندٜ مَسَرَنْکٛعٜنْ کُولَيْ، ندِيَمْ ݧَامِٻٜ؞ نغَمْ اِسْرَاعِيلَنْکٛعٜنْ اٜ کٛولِي اَللَّه وَطِ مَادِ ڤِلِيندِ غَرِيرِ جٜرِيکٛ يَنِ غَطَ ٻٜ ڤِلَکٜندِ بَلْطٜ جٛوٜىٰطِطِ؞ نغَمْ رَحَبْ کَارُوَاجٛ اٜ حٛولِي اَللَّه وَطِ اٛ وَرْدَاکَ اٜ ٻٜنْ طٛنْ غَݧُٻٜ نغَطَ کٛ اَللَّه وِعِ، نغَمْ اٛ جَٻَّکٜ اِسْرَاعِيلَنْکٛعٜنْ بٛطُّمْ دَارٛوٻٜ سِرُّ لٜيْدِ؞ طُمٜ ٻٜيْدَيْمِ وِيکِ؟ وَلَا شَرٜلْ کٜپَيْنغٜلْيَمْ مِ مٜتَ دٛوْ غِدِيٛنْ، اٜ بَرَکْ، اٜ سَمْسِنْ، اٜ جٜڤْتَ، اٜ دَوْدَ، اٜ سَمَاعِلَ، اٜ اَنَّبٛعٜنْ، نغَمْ اٜ ٻٜ کٛولِي اَللَّه وَطِ ٻٜ کٛنِ لٜيْطٜ طُطّٜ ٻٜ ݧَامِطٜ؞ ٻٜ لَامٛرَکٜ اَادِلَاکُ، ٻٜ کٜٻِ کٛ اَللَّه وَطِ اَلْکَوَلْ؞ ٻٜ مَٻِّي کٛنْدُطٜ شٜمْبِطِّ؞ ٻٜ ݧِفِي حِيتٜ کَلُّنغٜ، ٻٜ ندَطِي وَرْدٜىٰکِ اٜ کَافَاجٜ؞ ٻٜ تَمْڤُٻٜ، اَمَّا ٻٜ نغَرْتِي شٜمْبِطْٻٜ؞ ٻٜ نغَرْتِي وَوْٻٜ کٛنُ، ٻٜ ندِيوِي سٛوجِعٜنْ غٛطّٜ لٜيْطٜ؞ نغَمْ وٛٻّٜ رٜوْٻٜ مَايَنَاٻٜ اٜ کٛولِي اَللَّه وَطِ مَيْٻٜ ٻٜنْ اُمِّنَا دَغَ مَيْدٜ؞ وٛٻّٜ يِمْٻٜ بٛو ٻٜ تٛرَّا حَا ٻٜ مَايِ، ٻٜ نغَݧِي طُمْ يٛوفَٻٜ نغَمْ ٻٜ کٜٻَ ٻٜ اُمِّنٜىٰ دَغَ مَيْدٜ ندٜرْ جٛنْدٜ ٻُرْندٜ وٛوطُکِ؞ وٛٻّٜ نجُکِّتَامَ ڤِيَامَ، حَا ٻٜ کَٻِّرَا ٻٛغِّ نجَمْندِ ٻٜ مَٻَّا ندٜرْ سُودُ شُرَلْ؞ وٛٻّٜ مبَرِرَا کَاپٜ، وٛٻّٜ تَپَا شٜنْدَا طِطِ، وٛٻّٜ مبَرِرَا کَافَاجٜ؞ وٛٻّٜ اٜ نغِيلٛو اٜ ٻٛرْنِي لَرٜ بَالِ اٜ طٜ بٜعِ، کٛو کٛ ٻٜ نغٛودِ، ٻٜ تٛرَّامَ، ٻٜ نغَطَنَامَ کٛ حَلِّ؞ اٜ ٻٜ نغِيلٛو ندٜرْ لَدّٜ اٜ ندٜرْ کٛشّٜىٰجٜ، اٜ ٻٜ نجٛوطٛو ندٜرْ لُورٛوجِ کَاپٜ اٜ ندٜرْ غَيْطٜ؞ دُونِيَارُ حٜوْتَايِ ٻٜ نجٛوطٛو ندٜرْ مَيْرُ؞ فُو يِمْٻٜ ٻٜعٜ ٻٜ مَنْتَامَ نغَمْ ٻٜ کٛولَکٜ اَللَّه، اَمَّا فُو اٜ نٛنْ وَلَا غٛطّٛ ندٜرْ مَٻّٜ کٜٻُطٛ کٛ اَللَّه وَطِ اَلْکَوَلْ؞ اَللَّه سِرْيَکٜ غٛطُّمْ ٻُرْطُمْ وٛوطُکِ نغَمْ مٜىٰطٜنْ، نغَمْ تٛ نَاع حَوْتِ اٜ مٜىٰطٜنْ، ٻٜ نغَرْتِرْتَاکٜ کٜىٰوُٻٜ؞ نغَمْ مَاجُمْ، ندٜ اٜ وٛودِ يِمْٻٜ طُطْٻٜ کٛلُّٻٜ نٛ ٻٜ کٛولٛرِي اَللَّه، اٜنْ شٜنْدِرْ اٜ کٛو طُمٜ کَطَيْطُمْعٜنْ وَطُکِ کٛ حَانِ نغَطٜنْ اٜ حَکّٜ کَٻُّطُمْعٜنْ؞ اٜنْ نغَطُ کٛ مبَاوٜتٜنْ وَطُکِ نجٛتِّنٜنْ کٛ اَللَّه وِعِ نغَطٜنْ؞ اٜنْ نغَطُ حَکِّيلٛ مٜىٰطٜنْ دٛوْ يٜىٰسُ، مَٻِّتَنْطٛعٜنْ لَاوٛلْ حٛولَاکِ اَللَّه بَلَّيْطٛعٜنْ حٛولَارٜ مٜىٰطٜنْ وَرْتَ کٜوْندٜ؞ نغَمْ وٜلْوٜلٛ نغٛ اٛ حٜٻَتَ يٜىٰسٛ، اٛ مُݧِي ندٜرْ تٛرَّ ندٜ اٛ وَرَا دٛوْ غَافَانغَلْ، اٛ وَنَّايِ اٜ شٜمْتُطُمْ وَرٜىٰکِ دٛوْ غَافَانغَلْ، ندٜنْ جٛونِ اٜ مٛ تٛنْ جٛوطِي تٛ ݧَامٛ جٛوطٛرْغَلْ لَامُ اَللَّه؞ ݧُمٜىٰ دٛوْ نٛ اٛ مُݧِرِ ندٜ غَطٛوٻٜ حَکّٜ نغَݧِمٛ؞ نٛنْ وَلَّيْعٛنْ تٛع نغٜوْرٛنْ اِتّٛنْ کَمُّندٜ؞ اٛنْ کَٻْدَ اٜ حَکّٜ، اَمَّا اٛنْ نجٛتَّاکِ تٛ حٜوْتِ طُمْ وَرَعٛنْ؞ اٛنْ نغٜجِّتِي بٛلِيطٜ شٜمْبِطِنَيْطٜعٛنْ طٜ اَللَّه مٜتَنِعٛنْ کٛلُّطٜ اٛنْ ٻِٻّٜ مَاکٛ؟ اٛ وِعِي، «ٻِطّٛ اَمْ، تٛ جٛومِرَاوٛ اٜلْتِيمَ، تَاع وَرْتِرْطُمْ مٜىٰرٜ؞ تٛ اٛ حَٻَنِيمَ بٛو، تَاع يٜوْرُ؞ نغَمْ مٛ جٛومِرَاوٛ يِطِ، کَنْکٛ اٛ اٜلْتَتَ، ندٜنْ اٜ مٛ حَٻَنَ کٛو مٛيٜ مٛ اٛ جَٻِ اٛ ٻِطّٛ مَاکٛ؞» مُݧٜىٰ ندٜرْ تٛرَّ کَ نجَرٛتٛنْ نغَمْ طُمْ اٜلْتُکِعٛنْ؞ نٛنْ حٛلِّي اَللَّه اٜ جٛغِيعٛنْ بٛ ٻِٻّٜ مَاکٛ؞ مٛيٜ ٻِطّٛ وٛنِ مٛ ݧَاکٛ مُوطُمْ اٜلْتَتَا؟ کٛو مٛيٜ ٻِطّٛ طُمْ اٜلْتَيْمٛ؞ تٛ بٛو اٛنْ اٜلْتَاکَ، نٛنْ حٛلِّي نَاع اٛنْ ٻِٻّٜ، اٛنْ جَالُعٜنْ؞ کَدِمَا اٜنْ نغٛودِ دَݧٛوٻٜ اٜلْتَيْٻٜعٜنْ ندٜنْ اٜنْ کٛکَّٻٜ مَنْغُ؞ اٜنْ ٻُرَيْ نٛنْ جَٻُکِ اٜلْتُکِ کِ ݧَاکٛ مٜىٰطٜنْ مٛ دٛوْ وَطَنِعٜنْ، ندٜنْ کٜٻٜنْ يٛنْکِ کِ رٜعَتَا! دَݧٛوٻٜ مٜىٰطٜنْ اٜ اٜلْتَعٜنْ نغَرْتٜنْ نٛ ٻٜ نغِطِ نغَمْ شَرٜلْ سٜطَّ؞ اَمَّا اَللَّه اٜ اٜلْتَعٜنْ نغَمْ ٻٜيْدَارِ مٜىٰطٜنْ، نغَمْ نغَرْتٜنْ شٜنِيٻٜ بٛ مَاکٛ؞ شَرٜلْ نغٜلْ طُمْ اٜلْتَتَ نٜطّٛ، طُمْ وٜلَا، سٜيْ نَوْطُمْ؞ اَمَّا غَطَ طٛنْ، طُمْ وَدَّيْ اَادِلَاکُ اٜ جَمْ ندٜرْ جٛنْدٜ اٜلْتَاطٛعٛنْ؞ نغَمْ مَاجُمْ شٜمْبِطِنٜىٰ جُوطٜ مٛوطٛنْ تَمْڤُطٜ، اٜ کٛڤِّ مٛوطٛنْ تَغِّيطِ؞ مٛعِّنَنٜىٰ کٛيْطٜ مٛوطٛنْ طَتٜ ڤٛرْتِيطٜ، نغَمْ تٛع کٛيْطٜ مٛوطٛنْ تَغِّيطٜ نغَرْتَ نَاع کٛ نَفِ، اَمَّا طٜ کٛيَ؞ نغَطٜىٰ کٛ مبَاوٛتٛنْ وَطُکِ نجٛوطٛدٛوطٛنْ جَمْ اٜ کٛو مٛيٜ نغَرْتٛنْ شٜنِيٻٜ، نغَمْ تٛ نَاع اٜ جٛنْدٜ شٜنِيندٜ وَلَا غِعَيْطٛ جٛومِرَاوٛ؞ ڤَامَنٜىٰ کٛعٜ مٛوطٛنْ تٛع ندُلّٛنْ حٜٻُکِ بَرْکَ اَللَّه، نغَمْ تٛع وٛنْغٛلْ طَطٛلْ کَاطُنغٛلْ مَوْنَ فٛوطَ شَطُّمْ وٛنَّ يِمْٻٜ طُطْٻٜ؞ تٛع غٛطّٛ وَرْتَ غَطٛووٛ نجٜىٰنُ کٛو مٛ وَلَا کُلٛلْ اَللَّه بٛ اِسَوْ شٛورُطٛ مَنْغُ مُوطُمْ طُمْ اَفٛ نغَمْ حٜٻَ ݧَامَ ندٜ غٛعٛ تَنْ؞ اٛنْ اَنْدِ غَطَ طٛنْ، ندٜ اٛ طَٻِّتِ ݧَاکٛ مَاکٛ بَرْکِطِنَمٛ، طُمْ وَݧِيمٛ؞ اٛ حٜٻَايِ وَيْلُکِ کٛ اٛ وَطُنٛو، کٛو ندٜ اٛ طَٻِّتِي حَا اٜ غٛنْطِ؞ اٛنْ نغَرَايِ تٛ وِغٜىٰرٜ بٛ حٛشّٜىٰرٜ سِنَيْ ندٜ طُمْ وَاوَتَ مٜىٰمُکِ غٛودُندٜ حِيتٜ ݧَامٛويٜ، اٜ ندُولَ ٻَلٜوَ، اٜ حٜنْدُ شٜمْبِنْدُ، اٜ اِيدٛ دُودَاندُ، اٜ حٛنٛنْدٜ؞ ندٜ اِسْرَاعِيلَنْکٛعٜنْ نَنِ حٛنٛنْدٜ ندٜنْ، ٻٜ تٛرِي تٛع طُمْ فُطِّتَ طُمْ مٜتَنَٻٜ، نغَمْ ٻٜ نغَنِّي دٛوْ کٛ حٛنٛنْدٜ ندٜنْ وِعِٻٜ، «کٛو مَرْدِ مٜىٰمِ حٛشّٜىٰرٜ ندٜنْ، دٛولٜ ندِ وَرْدٜىٰ اٜ کَاپٜ؞» مُوسَ حُلِي اٜ کٛ يِعِ حَا وِعِ، «اٜ مِ حُلَ حَا اٜ مِ دِوْنَ؞» اَمَّا اٛنْ نغَرِي حٛشّٜىٰرٜ سِحِيٛونَ، غَرِيرِ اَللَّه مٛ يٛنْکِ، وَاتٛ اُرُشَلِيمَ ندِ دٛوْ، اٜ تٛ مَلَاعِکَعٜنْ ٻٜ لِمَتَاکٛ حَوْرُتُٻٜ ندٜرْ وٜلْوٜلٛ؞ اٛنْ نغَرِي تٛ کَوْتَلْ اَفٛعٜنْ اَللَّه، ٻٜ طُمْ وِنْدِ اِنْطٜ مَٻّٜ ندٜرْ وُرٛ مَاکٛ تٛنْ دٛوْ؞ اٛنْ نغَرِي تٛ اَللَّه، غَطَنٛووٛ فُو يِمْٻٜ کِيتَ، تٛ يٛنْکِيجِ اَادِلِعٜنْ غَرْتِرَاٻٜ کٜىٰوُٻٜ؞ اٛنْ نغَرِي تٛ يٜىٰسُ، شِرْيِيطٛ اَلْکَوَلْ کٜسَلْ حَکُّندٜ يِمْٻٜ اٜ اَللَّه؞ اٛنْ نغَرِي تٛ پِيپَمْ مِسَاطَمْ مٜتُطَمْ وٛلْدٜ ٻُرْندٜ وٛوطُکِ دٛوْ کٛ پِيپَمْ حَبِيلَ وِعِ؞ ڤَامٜىٰ، تٛع نغَݧٛنْ اٛنْ طٛنْ مٜتُطٛ؞ يِمْٻٜ غَݧُٻٜ نَنَ کٛ وَغِّنْطٛٻٜ ندٜرْ دُونِيَارُ وِعِٻٜ ٻٜ ندَطَايِ؞ تٛو، نٛ وَطَتَ اٜنٜنْ ندَطٜنْ، تٛ اٜنْ نغَݧِي اٛنْ طٛنْ بَغِّنْطٛعٜنْ دَغَ دٛوْ؟ اٜ نغٜلْ تٛنْ شَرٜلْ حٛنٛنْدٜ مَاکٛ دِمْبِي دُونِيَارُ، اَمَّا جٛونِ اٛ وَطِي اَلْکَوَلْ، اٛ وِعِي، «مِ دِمْبَيْ دُونِيَارُ ندٜ غٛعٛ کَدِنْ؞ نَاع دُونِيَارُ تَنْ ندِمْبَيْمِ، اَمَّا فُو اٜ دٛوْ؞» طٜعٜ بٛلِيطٜ، «ندٜ غٛعٛ کَدِنْ» حٛلِّي فُو کٛ تَغَا طُمْ دِمْبٜتٜىٰطُمْ طُمْ اِتّٜىٰ، نغَمْ کٛ دِمْبَتَاکٛ جٛوطٛو؞ نغَمْ مَاجُمْ اٜنْ نغٜتُّ اَللَّه نغَمْ اٜنْ کٜٻِي لَامُ طُمْ دِمْبَتَاکٛ؞ اٜنْ مَوْنِنْ اَللَّه ندٜرْ کُلٛلْ، مَوْنِنْکِ کِ اٛ جَٻَتَ؞ نغَمْ اَللَّه مٜىٰطٜنْ اٛ حِيتٜ کَلْکٛويٜ؞ نغَطٜىٰ کَ يِطِندِرْکِ بٛ بَنْدِرَاٻٜ؞ تٛع اٛنْ نغٜجُّتُ جَٻَّاکِ حٛٻّٜ؞ اٜ وٛودِ غَطُٻٜ نٛنْ نجَٻِّي مَلَاعِکَعٜنْ اَنْدَا؞ ݧُمٜىٰ دٛوْ شُرَاٻٜ ندٜرْ سُودُ شُرَلْ بٛ اٛنْ شُرِدَ اٜ مَٻّٜ؞ ݧُمٜىٰ دٛوْ تٛرّٜتٜىٰٻٜ، بٛ اٛنْ تٛرِّدٜىٰ اٜ مَٻّٜ؞ کٛو مٛيٜ مَوْنِنَ تٜىٰغَلْ، ندٜنْ تٛع غٛطّٛ وَلْدَ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ؞ بَلْدُطٛ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ، اَللَّه وَطَنَيْٻٜ کِيتَ؞ شٜنْدٜىٰ کٛعٜ مٛوطٛنْ اٜ يِدّٜ شٜىٰدٜ؞ مُݧٜىٰ دٛوْ کٛ نغٛودُطٛنْ، نغَمْ اَللَّه وِعِي، «حَا اَبَدَا مِ اَلَتَامَ، حَا اَبَدَا مِ سٜنْدِرْتَا اٜ مَاطَ؞» نغَمْ نٛنْ اٜ ٻٜرْندٜ غٛعٛ اٜنْ مبِعَيْ، «جٛومِرَاوٛ وٛنِ بَلَّيْطٛيَمْ، مِ حُلَتَا؞ طُمٜ نٜطّٛ وَاوَتَ وَطَنْکِيَمْ؟» ݧُمٜىٰ دٛوْ اَرْدِيٻٜعٛنْ، وَعَجِنَنْٻٜعٛنْ وٛلْدٜ اَللَّه؞ ݧُمٜىٰ دٛوْ نٛ ٻٜ نجٛوطٛرِي، اٜکِّتٜىٰ نٛ ٻٜ کٛولٛرِي اَللَّه؞ يٜىٰسُ اَلْمَسِيحُ اٜ طٛنْ نٛ وٛنْتِندِرِ کٜىٰݧَ اٜ حَنْدٜ اٜ حَا اَبَدَا؞ تٛع اٛنْ نجَٻُ اٜکِّتِنٛلْ نغٛلْ تٛکَّايِ لَاوٛلْ غٛونغَ مَجِّنَعٛنْ؞ اٜ طُمْ وٛوطِ يِدّٜ اَللَّه سٜمْبِطِنَ ٻٜرْطٜ مٜىٰطٜنْ، نَاع تٛکُّکِ دٛوکَاجِ دٛوْ ݧَمْندُ؞ اِرِ طِنْ طٛنْ دٛوکَاجِ نَفَنْتَا تٛکّٛوٻٜطِ؞ اَرْدِيٻٜ دِينَ کُوٛوٻٜ ندٜرْ لُکُرُ جٛومِرَاوٛ ٻٜ کٜٻَتَا ݧَامُکِ کٛ طُمْ سَکِّ دٛوْ سَکِّرْدٜ مٜىٰطٜنْ؞ مَوْطٛ مَوْٻٜ اَرْدِيٻٜ دِينَ اٜ نَتِّدَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ اٛ سَکَّنَطَمْ اَللَّه نغَمْ حَکّٜ، اَمَّا ٻَلِّ مَرْلٜ طٜنْ اٜ نغُلٜىٰ غَطَ حٛطٛرْدٜ؞ کَنْجُمْ وَطِ يٜىٰسُ مَا مَايِ غَطَ غَرِيرِ، نغَمْ اٛ لَاٻِنَ يِمْٻٜ دَغَ حَکّٜ مَٻّٜ بَرْکَ پِيپَمْ مَاکٛ؞ نغَمْ نٛنْ اٜنْ نجَحُ تٛ مَاکٛ غَطَ غَرِيرِ نجَرٜنْ سٜمْتٜىٰندٜ ندٜ اٛ يَرِ؞ نغَمْ اٜنْ نغَلَا غَرِيرِ تَبٛتٛوندِ ندٜرْ دُونِيَارُ ندُعُ، اَمَّا اٜنْ کٜطِي اٜنْ کَمِّي غَرِيرِ غَرَيْندِ؞ نغَمْ مَاجُمْ، بَرْکَ يٜىٰسُ اٜنْ مَنْتُ اَللَّه کٛو نغٜلٜ شَرٜلْ؞ مَنْتُکِ کِنْ وٛنِ کٛ شَکَّنْتٜنْمٛ، اٜنٜنْ بِعٛوٻٜ يٜىٰسُ وٛنِ جٛومِرَاوٛ؞ تٛع اٛنْ نغٜجُّتُ وَطُکِ کٛ وٛوطِ اٜ سٜنْدُدُکِ کٛ نغٛودُطٛنْ اٜ وٛٻّٜ، نغَمْ طُعُمْ کَنْجُمْ وٛنِ شَکِّرِ بٜلْنَنٛورِ اَللَّه ٻٜرْندٜ؞ تٛکّٜىٰ اَرْدِيٻٜعٛنْ نغَطٛنْ کٛ ٻٜ مبِعِعٛنْ؞ اٜ ٻٜ ڤَامَنَ يٛنْکِيجِ مٛوطٛنْ: اَللَّه بٛو پَمَيْٻٜ دٛوْ نٛ ٻٜ ڤَامِرَنِعٛنْ؞ تٛکّٜىٰ کٛ ٻٜ مبِعِ نغَمْ ٻٜ نغَطَ کُوغَلْ نغَلْ ندٜرْ بٜلْطُمْ ٻٜرْندٜ نَاع ندٜرْ تٜدّٛرَلْ؞ تٛ طُمْ وَرْتِي تٜدّٛرَلْ، نٛنْ وَرْتَيْ وَلَا کٛ نَفَنْتَعٛنْ؞ نغَطٜىٰ کَ وَطَنْکِمِنْ دٛعَارٜ؞ مِنْ تَبِّتِنِي ٻٜرْطٜ اَمِنْ طٜ لَٻْطٜ، اٜ مِنْ نغِطِ وَطُکِ کٛ حَانِ ندٜرْ کٛو طُمٜ؞ اٜ مِ ٻٜيْدَ تٛرَاکِعٛنْ نغَطٛنْ دٛعَارٜ نغَمْ اَللَّه سٛعّٛيَيَمْ تٛ مٛوطٛنْ نَاع کٛ نٜىٰٻِ؞ اَللَّه جٛومُ جَمْ اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ لَاوٛلْ پِيپَمْ اَلْکَوَلْ تَبٛتٛونغَلْ؞ کَنْجُمْ وَطِ يٜىٰسُ وَرْتِ دُرٛووٛ بَالِ مَوْطٛ، اٛ وَطَعٛنْ مبَاوٛنْ وَطُکِ کٛو نغَلٜ کُوغَلْ بٛنْغَلْ نغَلْ اٛ يِطِ نغَطٛنْ؞ اٛ وَرْتِرَعٛنْ کٛ وٜلْنَنْتَمٛ ٻٜرْندٜ بَرْکَ يٜىٰسُ اَلْمَسِيحُ؞ مَنْغُ تَبِّتَ تٛ يٜىٰسُ حَا اَبَدَا اَبَدِنْ؞ اَامِنْ؞ اٜ مِ تٛرٛوعٛنْ بَنْدِرَاٻٜ، نجَٻٜىٰ وَغِّنٛورٜ ندٜعٜ، نغَمْ طٜرٜوٛلْ نغٛعٛلْ نغٛلْ مبِنْدَنْمِعٛنْ نغٛلْ جُوتَا؞ اٜ مِ يِطِ اَنْدٛنْ بَنْدِرَاوٛ مٜىٰطٜنْ تِمٛوتِ يٛوفَامَ دَغَ ندٜرْ سُودُ شُرَلْ؞ تٛ اٛ وَرِي تٛ اَمْ نَاع کٛ نٜىٰٻِ، مِ وَرْدَيْ اٜ مَاکٛ تٛ مٛوطٛنْ؞ کٛوْنَنٛنْمِنْ فُو اَرْدِيٻٜ مٛوطٛنْ اٜ يِمْٻٜ اَللَّه حٛرِيٻٜ؞ تٛکُّٻٜ يٜىٰسُ غٛنْٻٜ لٜيْدِ اِتَالِيَ اٜ کٛوْنَعٛنْ؞ اَللَّه بَرْکِطِنَعٛنْ، اٛنْ فُو؞ مِنْ، يَاکُبُ، وِنْدِ طٜرٜوٛلْ نغٛعٛلْ؞ مِ مَشُّطٛ اَللَّه اٜ جٛومِرَاوٛ مٜىٰطٜنْ يٜىٰسُ اَلْمَسِيحُ؞ اٜ مِ حٛوْنَعٛنْ، اٛنٛنْ تٛکُّٻٜ يٜىٰسُ شَنْکِتِيٻٜ ندٜرْ دُونِيَارُ؞ بَنْدِرَاٻٜ اَمْ، تٛ تٛرَّاجِ فٜىٰرٜ‑فٜىٰرٜ نغَرَنِيعٛنْ، نجَٻٜىٰطِ اٜ وٜلْوٜلٛ، نغَمْ اٛنْ اَنْدِ تٛ حٛولَارٜ مٛوطٛنْ فٛوندَامَ، ندٜ وَطَيْ ٻٜيْدٛنْ مُݧَلْ؞ دٛولٜ اٜکِّتٛوطٛنْ مُݧَلْ ندٜرْ کٛو طُمٜ، نغَمْ نغَرْتٛنْ کٜىٰوُٻٜ، ٻٜ ندُلَّايِ غٛطُّمْ؞ تٛ غٛطّٛ ندٜرْ مٛوطٛنْ دُلِّي فَامُ، سٜيْ اٛ تٛرٛو اَللَّه کٛکّٛووٛ کٛو مٛيٜ ٻٜرْندٜ غٛعٛ مٜتِتَتَاکٛ، اٛ حٛکَّيْمٛ؞ اَمَّا تٛ اٛ تٛرٛتٛ اَللَّه، اٛ تٛرٛو ندٜرْ حٛولَارٜ؞ تٛع اٛ وَطَ ٻٜرْطٜ طِطِ، نغَمْ غَطٛووٛ ٻٜرْطٜ طِطِ اٜ نَنْدِ اٜ غٜىٰلٛوطِ ندِيَمْ طِ حٜنْدُ يِيلَتَ تٛ ندُ يِطِرِ فُو؞ اِرِ مَاکٛ تٛع اٛ کَمّٛو اٛ حٜٻَيْ غٛطُّمْ تٛ جٛومِرَاوٛ؞ ٻٜرْندٜ مَاکٛ سٜنْدَکٜ طِطِ، اٛ دَرْنَتَا ٻٜرْندٜ مَاکٛ ندٜرْ کٛ اٛ وَطَتَ فُو؞ تٛکُّطٛ يٜىٰسُ مٛ وَلَنَا نَنَ بٜلْطُمْ، نغَمْ يٜىٰسٛ اَللَّه اٛ مَوْطٛ؞ اَمَّا تٛکُّطٛ يٜىٰسُ دِسْکُطٛ نَنَ بٜلْطُمْ تٛ اَللَّه لٜسْتِنِي حٛورٜ مَاکٛ؞ نغَمْ دِسْکُطٛ اٜ نَنْدِ اٜ ڤِيندِ غٜىٰنٜ ندِ نٜىٰٻَتَا؞ تٛ نَانغٜ وُرْتٛيَکٜ غُلْطُمْ مَغّٜ فِيِي غٜىٰنٜ طٜنْ، طٜ طَيْلَيْ، ڤِيندِ مَاجٜ سَامَ، وٛوطُکِ مَاجٜ فُو لَلَّ؞ نٛنْ دِسْکُطٛ رٜعِرْتَ شَرٜلْ نغٜلْ فِيدَتَ اٜ کُوغَلْ مُوطُمْ؞ اٛ بَرْکِطِنَاطٛ فُو مُݧُطٛ ندٜرْ تٛرَّ، نغَمْ تٛ اٛ حٜٻِي جَالٛرْغَلْ دٛوْ تٛرَّ کَنْ، اَللَّه حٛکَّيْمٛ غِيفٛلْ نغٛلْ اٛ وَطَنِ يِطُٻٜمٛ اَلْکَوَلْ، وَاتٛ يٛنْکِ کِ رٜعَتَا؞ تٛ نٜطّٛ فٛوندَامَ، تٛع اٛ وِعَ، «اَللَّه فٛوندِيَمْ؞» نغَمْ اَللَّه فٛوندِرْتَاکٜ حَلّٜىٰندٜ، کَدِمَا بٛو اَللَّه فٛوندَتَا کٛو مٛيٜ؞ اَمَّا اٜ طُمْ فٛوندَ نٜطّٛ تٛ سُونٛ مَاکٛ حٛشِّي حَکِّيلٛ مَاکٛ؞ ندٜنْ تٛ سُونٛ نغٛنْ وَطِي رٜىٰدُ، نغٛ رِمَيْ حَکّٜ؞ تٛ حَکّٜ مَوْنِي بٛو، طُمْ فٛوطَيْ مَيْدٜ؞ بَنْدِرَاٻٜ اَمْ ٻٜ نغِطُمِ، تٛع اٛنْ نجَٻُ طُمْ مَجِّنَعٛنْ؞ کٛو نغَلٜ دٛکَّلْ بٛنْغَلْ اٜ کٛو طُمٜ شَاحُ جَمُمْ فُو دَغَ تٛ اَللَّه ݧَاکٛ مٛ دٛوْ طُمْ پِوٛيْتَ، تَغُطٛ نَانغٜ اٜ لٜوْرُ اٜ کٛودٜ؞ کَنْکٛ اٛ وَيْلِتَتَاکٛ، اٛ نَنْدَا اٜ طٛوْدِ غٛوسٛتٛوندِ؞ طُمْ شُٻٛلْ مَاکٛ اٛ حٛکِّعٜنْ يٛنْکِ کٜسُمْ بَرْکَ وٛلْدٜ غٛونغَ، نغَمْ نغَرْتٜنْ بٛ کٛ اَرْتِ ٻٜنْدُکِ ندٜرْ کٛ اٛ تَغِ؞ اٛنٛنْ بَنْدِرَاٻٜ اَمْ ٻٜ نغِطُمِ، اَنْدٜىٰ طُعُمْ: کٛو مٛيٜ يَاوَ نَنُکِ، اَمَّا تٛع يَاوَ مٜتُکِ، تٛع يَاوَ مٛنُّکِ؞ نغَمْ مٛنّٜرٜ نٜطّٛ وَدَّتَا جٛنْدٜ اَادِلَاکُ ندٜ اَللَّه يِطِ؞ نغَمْ مَاجُمْ، کُبِنٜىٰ فُو کُوطٜ طٜ مبٛوطَا اٜ کُوطٜ کَلُّطٜ؞ لٜسْتِنٜىٰ کٛعٜ مٛوطٛنْ، نجَٻٛنْ وٛلْدٜ اَللَّه ندٜ اٛ اَاوِ ندٜرْ ٻٜرْطٜ مٛوطٛنْ، بَاوَيْندٜ حِسْنُکِعٛنْ؞ تٛع اٛنْ مَجِّنْ کٛعٜ مٛوطٛنْ؞ نغَطٜىٰ کٛ وٛلْدٜ اَللَّه وِعِ، تٛع اٛنْ نغَرْتُ نَنٛوٻٜندٜ تَنْ؞ نغَمْ فُو نَنْطٛ وٛلْدٜ اَللَّه وَطَايِ کٛ ندٜ وِعِ اٜ نَنْدِ اٜ نٜطّٛ دَارُطٛ يٜىٰسٛ مُوطُمْ ندٜرْ دَارٛغَّلْ، يِعِ نٛ وَعِ، دِلِّ، طٛنْ اٜ طٛنْ يٜجِّتِ نٛ وَعِ؞ اَمَّا غَطّٛ حَکِّيلٛ مُوطُمْ فُو دٛوْ دٛوکَ کٜوْطُمْ رِمْطِنَيْطُمْ يِمْٻٜ، اٜ مٛ وَطِ کَ وَطُکِ حَکِّيلٛ دٛوْ مَاجُمْ، نَاع نَنٛووٛطُمْ تَنْ اٜ يٜجِّتَ، اَمَّا اٜ مٛ وَطَ کٛ طُمْ وِعِ، اٛ حٜٻَيْ بَرْکَ ندٜرْ وَطُکِطُمْ؞ نٜطّٛ فُو کَمِّيطٛ اٛ تٛکُّطٛ دِينَ نٛ حَانِ، اَمَّا اٛ سُرَايِ طٜمْنغَلْ مَاکٛ، اٛ مَجِّنِي حٛورٜ مَاکٛ، دِينَ مَاکٛ وَرْتِي مٜىٰرٜ؞ دِينَ لَاٻُکَ کَ اَللَّه ݧَاکٛ مٜىٰطٜنْ مٛ دٛوْ يِطِ، کَنْکَ وٛنِ وَلُّکِ مَرَايَعٜنْ اٜ رٜوْٻٜ ٻٜ وٛرْٻٜ مُعّٜنْ مَايِ تٛرّٛتٛوٻٜ، ندٜنْ اٜ سُرُکِ حٛورٜ دَغَ حٛشُّکِ تُوندِ دُونِيَارُ؞ بَنْدِرَاٻٜ اَمْ، ندٜ اٛنْ کٛولِي جٛومِرَاوٛ مٜىٰطٜنْ يٜىٰسُ اَلْمَسِيحُ، جٛومُ مَنْغُ، تٛع اٛنْ کٛلُّ فٜىٰرٛوتِرٛلْ حَکُّندٜ مٛوطٛنْ؞ مِسَالُ، غٛطّٛ غٛودُطٛ جَبَّارٜ جِينَارِ وَرِي کَوْتَلْ مٛوطٛنْ اٜ مٛ ٻٛرْنِي کٛلْتٜ طٜ شٜىٰدٜ، ندٜنْ غٛطّٛ مٛ وَلَنَا مٛ کٛلْتٜ شٜىٰکُطٜ کَنُمْ مَا وَرِي ندٜرْ کَوْتَلْ نغَلْ؞ تٛ اٛنْ کٛکِّي اٛنْ طٛنْ غٛودُطٛ رِسْکُ مَنْغُ اٛنْ مبِعِيمٛ، «رَا جٛوطٛرْغَلْ بٛنْغَلْ، جٛوطَ،» مٛ وَلَنَا اٛنْ بٛو مبِيطٛنْمٛ، «دَرَ طَاعٜ،» کٛو بٛو، «جٛوطَ اٜ لٜيْدِ،» اٛنْ کٛلِّي فٜىٰرٛوتِرٛلْ حَکُّندٜ مٛوطٛنْ وٛنْ طٛنْ، اٛنْ شُٻَنَ کٛعٜ مٛوطٛنْ کٛ نغَطٛتٛنْ ندٜرْ ݧُمٛ کَلُّنغٛ؞ بَنْدِرَاٻٜ اَمْ ٻٜ نغِطُمِ، نَنٜىٰ کٛ مبِعَيْمِ؞ نَاع اَللَّه سُٻِي ٻٜ نغَلَنَا ندٜرْ دُونِيَارُ ندُعُ ٻٜ نغَرْتَ کٛولِيٻٜ يٜىٰسُ ٻٜ ندٛنَ بَرْکَ غٛنْطُمْ ندٜرْ لَامُ اَللَّه طُمْ اٛ وَطَنِ يِطُٻٜمٛ اَلْکَوَلْ؟ اَمَّا اٛنْ نغَرْتِرَ ٻٜ نغَلَنَا نَاع طُمْ غٛطُّمْ؞ نَاع غٛودُٻٜ رِسْکُ تٛرَّتَعٛنْ؟ نَاع طُمْ کَمْٻٜ نجَارَتَعٛنْ يٜىٰسٛ لَامُ؟ نَاع طُمْ کَمْٻٜ کُطَتَ اِنْدٜ ندٜنْ طٛنْ مَوْندٜ ندٜ جٛومِرَاوٛ مٛوطٛنْ؟ اٛنْ نغَطِي کٛ وٛوطِ تٛ اٛنْ تٛکِّي دٛوکَ طُمْ لَامُ اَللَّه بِنْدَاطُمْ ندٜرْ اَايَارٜ بِيندٜ، «يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞» اَمَّا تٛ اٛنْ کٛلَّ فٜىٰرٛوتِرٛلْ حَکُّندٜ مٛوطٛنْ، اٛنْ نغَطِي حَکّٜ؞ کِيتَ نَنْغِيعٛنْ، نغَمْ اٛنْ غٜوٛوٻٜ دٛوکَ؞ نغَمْ فُو تٛکُّطٛ دٛوکَاجِ طِ فُو، اَمَّا اٛ يٜوِ غٛعٛ، تٛو، اٛ يٜوِيطِ طِ فُو؞ نغَمْ اٛنْ طٛنْ بِيطٛ، «تَاع وَطُ نجٜىٰنُ،» کَنْکٛ وِعِ، «تَاع وَطُ وَرْحٛورٜ؞» تَا وَطَايِ نجٜىٰنُ، اَمَّا اَ وَطِي وَرْحٛورٜ، تٛو، اَ وَرْتِي غٜوٛووٛ دٛوکَ اَللَّه وٛنْ طٛنْ؞ اَلٜىٰ مٜتٛ مٛوطٛنْ اٜ کُوطٜ مٛوطٛنْ وَرْتَ بٛ طُمْ يِمْٻٜ ٻٜ طُمْ وَطَنْتَ کِيتَ دٛوْ دٛوکَ رِمْطِنٛوجُمْ؞ نغَمْ اٜ ݧَلْندٜ کِيتَ، اَللَّه يُرْمِنَنْتَا مٛ وَلَا يُرْمٜىٰندٜ؞ اَمَّا يُرْمٜىٰندٜ اٜ حٜٻَ جَالٛرْغَلْ دٛوْ کِيتَ؞ اٛنٛنْ بَنْدِرَاٻٜ اَمْ، کٛ طُمْ نَفِ تٛ نٜطّٛ وِعِي اٜ حٛولِي يٜىٰسُ، اَمَّا کُوطٜ مَاکٛ کٛلَّايِ حٛولَارٜ ندٜنْ؟ ندٜنْ طٛنْ حٛولَارٜ مَاکٛ ندٜ وَاوَيْ حِسْنُکِمٛ؟ مِسَالُ، تٛ غٛطّٛ تٛکُّطٛ يٜىٰسُ غٛرْکٛ کٛو دٜبّٛ مٛ وَلَا کٛ ٻٛرْنٛتٛو کٛو کٛ ݧَامَتَ، غٛطّٛ مٛوطٛنْ وِعِيمٛ، «جِڤَّ جَمْ! اَللَّه حٛکُّمَا کٛ ٻٛرْنٛتٛطَا اٜ کٛ ݧَامَتَا،» اَمَّا اٛ حٛکَّايِمٛ کٛلْتٜ کٛو ݧَمْندُ، طُمٜ طُمْ نَفِ؟ نٛنْ مَا حٛولَارٜ، تٛ ندٜ وَلَا کُوطٜ کٛلَّيْطٜندٜ، ندٜ وَرْتِي وَاتُندٜ؞ اَمَّا غٛطّٛ وِعَيْ، «اَنْ اَ وٛودِ حٛولَارٜ، مِنْ اٜ مِ وٛودِ کُوطٜ؞» تٛو، حٛلَّمْ حٛولَارٜ مَاطَ ندٜ وَلَا کُوطٜ؞ مِنْ بٛو، مِ حٛلّٜتٜ حٛولَارٜ اَمْ ندٜرْ کُوطٜ اَمْ؞ اَ جَٻِي اَللَّه اٛ غٛعٛتٛ؞ تٛو، بٛطُّمْ! کٛو غِنِّ مَا نجَٻِي نٛنْ؞ کَنْجُمْ وَطِ اٜ طِ ندِوْنَ نغَمْ کُلٛلْ؞ اَنْ کَاݝَاطٛ! اَ يِطِ طُمْ حٛلُّمَا حٛولَارٜ ندٜ وَلَا کُوطٜ ندٜ مٜىٰرٜ؟ نَاع مَامَ مٜىٰطٜنْ اِبْرَاهِمْ نٛدِّرَامَ اَادِلِيجٛ نغَمْ کٛ اٛ وَطِ ندٜ اٛ حٛکِّ اَللَّه ٻِطّٛ مَاکٛ اِشِيَاکُ دٛوْ سَکِّرْدٜ؟ تٛو، اَ يِعِي حٛولَارٜ مَاکٛ اٜ يَادَ اٜ کُوطٜ مَاکٛ؞ ندٜنْ حٛولَارٜ مَاکٛ وَرْتِي کٜوْندٜ نغَمْ کٛ اٛ وَطِ؞ طُمْ حٜبِّنِي اَايَارٜ بِيندٜ، «اِبْرَاهِمْ حٛولَکٜ اَللَّه، نغَمْ مَاجُمْ اَللَّه وِعِ اٛ اَادِلِيجٛ؞» طٛنْمَا طُمْ نٛدِّمٛ حِغٛ اَللَّه؞ تٛو، اٛنْ نغِعِي اَللَّه اٜ جَٻَ نٜطّٛ اٛ اَادِلِيجٛ نغَمْ کٛ اٛ وَطِ، نَاع نغَمْ حٛولَارٜ تَنْ؞ نٛنْ مَا، کَارُوَاجٛ اٛنْ طٛنْ بِعٜتٜىٰطٛ رَحَبْ، اٛ نٛدِّرَامَ اَادِلِيجٛ نغَمْ کٛ اٛ وَطِ ندٜ اٛ جَٻِّي ٻٜ طُمْ لِلٛيِ نغَمْ ندَارَ سِرُّ لٜيْدِ ندِنْ؞ اٛ وَلِّٻٜ ٻٜ ندَطِرِ وٛنْغٛلْ لَاوٛلْ فٜىٰرٜ؞ تٛو، نٛنْ نٛ ٻَنْدُ ندُ وَلَا فٛوفَانغٛ وَرْتِي مَيْندُ، نٛنْ مَا حٛولَارٜ ندٜ وَلَا کُوطٜ وَرْتِي بَاتُندٜ؞ اٛنٛنْ بَنْدِرَاٻٜ اَمْ، تٛع طُطْٻٜ مٛوطٛنْ نغَرْتَ اٜکِّتِنٛوٻٜ، نغَمْ اٛنْ اَنْدِ مِنٛنْ اٜکِّتِنٛوٻٜ طُمْ ٻُرَيْ وَطَنْکِمِنْ کِيتَ کَلُّکَ؞ نغَمْ اٜنْ فُو اٜنْ ڤَرْکَ نَاع سٜطَّ؞ تٛ بٛو غٛطّٛ فَرْکَتَا ندٜرْ کٛو طُمٜ کٛ اٛ وِعَتَ، تٛو، کَنْکٛ اٛ کٜوْطٛ، اٜ مٛ وَاوَ اٛ سُرَ حٛورٜ مَاکٛ؞ رَا مِسَالُ؞ تٛ اٜنْ نغَطَنِي ڤُشُّ نجَمْندِ غَطٜتٜىٰندِ اٜ حٛنْدُکٛ مَاغُ نغَمْ نغُ وَطَ کٛ نغِطّٜنْ، اٜنْ مبَاوَيْ نغَيْلِتٜنْغُ فُو تٛ نغِطّٜنْ؞ ندَارٜىٰ کٛمِيجٜ ندِيَمْ مَا نغِعٛنْ؞ کٛو ندٜ طٜ مَوْطٜ، حٜنْدُ شٜمْبِنْدُ فٛوطَتَطٜ، اٜ جَمْنغٜلْ ڤَمَرٜلْ ڤٛوطٛووٛ کٛمِوَلْ نغَلْ فٛوطِرْتَنغَلْ فَادَ اٜ مَاغَلْ فُو تٛ يِطِ؞ نٛنْ مَا، طٜمْنغَلْ طُمْ غٛطُّمْ ڤَمَرُمْ ندٜرْ ٻَنْدُ، اَمَّا اٜ نغَلْ مَنْتِتٛو دٛوْ فِي مَوْطُمْ؞ ندَارٜىٰ نغِعٛنْ نٛ دٛشّٜلْ حِيتٜ وُلِرْتَ لَدّٜ مَوْندٜ؞ طٜمْنغَلْ طُمْ حِيتٜ، اٜ نغَلْ حٜىٰوِ حَلّٜىٰندٜ، اٜ نغَلْ وٛنَّ کٛو طُمٜ نٜطّٛ؞ اٜ نغَلْ نَنْغِنَنَ فُو جٛنْدٜ نٜطّٛ حِيتٜ پِوٛيْنغٜ دَغَ وُرٛ حِيتٜ؞ نٜطّٛ اٜ وَاوَ اٜلْتَ کٛو اِرِ ندِيٜ مَرْدِ، اٜ شٛلِّ، اٜ مَرْلٜ دَسٛتٛوطٜ، اٜ کٛو طُمٜ غٛنْطُمْ ندٜرْ ندِيَمْ؞ يِمْٻٜ نجَادَکٜ اٜلْتِيطٜ؞ اَمَّا وَلَا بَاوَيْطٛ اٜلْتُکِ کٛو سُرُکِ طٜمْنغَلْ؞ طٜمْنغَلْ طُمْ فِي کَلُّطُمْ، اٜ نغَلْ حٜىٰوِ تٛوکٜ بَرٛوجٜ؞ اٜ مَاغَلْ مَنْتِرْتٜنْ جٛومِرَاوٛ ݧَاکٛ مٜىٰطٜنْ مٛ دٛوْ، ندٜنْ اٜ مَاغَلْ کُطِرْتٜنْ يِمْٻٜ ٻٜ طُمْ تَغِ ندٜرْ نَنْدِ اَللَّه؞ مَنْتُکِ اٜ حُطُکِ اٜ وُرْتٛيٛو دَغَ حٛنْدُکٛ غٛعٛ؞ اٛنٛنْ بَنْدِرَاٻٜ اَمْ، نٛنْ حَانَا؞ ندِيَمْ مبٜلْطَمْ اٜ ندِيَمْ کَطَّمْ وَاوَيْ ٻُلَ وِغٜىٰرٜ غٛعٛ؟ بَنْدِرَاٻٜ اَمْ، اِبِّ وَاوَيْ رِمَ ٻِکّٛيْ جَيْتُنْ؟ کٛو اِنَبٛحِ وَاوَيْ رِمَ ٻِکّٛيْ اِبّٜ؟ نٛنْ مَا طُمْ وَطَتَاکٛ وِغٜىٰرٜ تٛ ندِيَمْ غٛودُطَمْ لَمْطَمْ ٻُلَتَ وُرْتِنَ ندِيَمْ مبٜلْطَمْ؞ مٛيٜ وٛودِ اَنْدَلْ اٜ فَامُ ندٜرْ مٛوطٛنْ؟ سٜيْ اٛ حٛلَّطُمْ ندٜرْ وَطُکِ جٛنْدٜ وٛوطُندٜ اٜ کُوطٜ بٛطّٜ ندٜرْ لٜسْنُکِ حٛورٜ اٜ فَامُ؞ اَمَّا تٛ اٛنْ نغٛودِ لَوْلِيرُ کَلُّندُ اٜ يِدّٜ حٛورٜ ندٜرْ ٻٜرْطٜ مٛوطٛنْ، تٛع اٛنْ مَنْتِتٛ دٛوْ مَاجُمْ کٛو نغَݧٛنْ غٛونغَ؞ اِرِ نغَعَلْ اَنْدَلْ نَاع دَغَ دٛوْ نغَلْ پِوٛيِ، طُمْ نغَلْ دُونِيَارُ؞ ندٜنْ نَاع دَغَ تٛ رُوحُ اَللَّه نغَلْ پِوٛيِ، تٛ شٜيْطَنْ نغَلْ پِوٛيِ؞ نغَمْ فُو تٛ لَوْلِيرُ اٜ يِدّٜ حٛورٜ وٛنِ، طٛنْ شِيَ جٛنْدٜ جَمْ اٜ کٛو اِرِ ندٜيٜ حَلّٜىٰندٜ وَطٜتٜىٰ؞ اَمَّا اَنْدَلْ پِوٛيْنغَلْ دَغَ دٛوْ، اَرَنْدٜ نغَلْ لَمْنغَلْ، ندٜنْ نغَلْ وَدَّتَا وَنَّارٜ، اٜ نغَلْ وَدَّ حَکِّيلٛ، نغَلْ وَلَا مَنْغُ حٛورٜ، اٜ نغَلْ حٜىٰوِ يُرْمٜىٰندٜ اٜ کُوطٜ بٛطّٜ؞ نغَلْ حٛلَّتَا فٜىٰرٛوتِرٛلْ، نغَلْ وَلَا شِيَ غٛونغَ؞ غَدّٛوٻٜ جٛنْدٜ جَمْ اَاوُٻٜ جَمْ، ٻٜ ڤٜعَّيْ اَادِلَاکُ؞ کٛ وَدَّتَ حَوْرٜ اٜ يٜدّٛوتِرْکِ حَکُّندٜ مٛوطٛنْ؟ نَاع سُونٛوجِ کٛنِدٛوجِ اٜ ٻٜرْطٜ مٛوطٛنْ وَدَّتَطُمْ؟ اٛنْ نغِطِي غٛطُّمْ، اٛنْ کٜٻَتَاطُمْ، نغَمْ نٛنْ اٛنْ نغَطَ وَرْحٛورٜ؞ اٛنْ نغٛودِ سُونٛ فِي طُمْ اٛنْ جٜيَايِ، اَمَّا اٛنْ کٜٻَتَاطُمْ؞ کَنْجُمْ وَطِ اٛنْ کَٻَ اٛنْ نغٜدّٛوتِرَ؞ اٛنْ نغَلَنَا نغَمْ اٛنْ تٛرَاکِ اَللَّه؞ اٛنْ تٛرٛو اٛنْ کٜٻَتَا نغَمْ اٛنْ تٛرٛرٛو ݧُمٛوجِ کَلُّطِ، اٛنْ نغِطِ مَجِّنٛنْ کٛ کٜٻْطٛنْ دٛوْ نَنْکِ بٜلْطُمْ ٻَلِّ مٛوطٛنْ؞ اٛنْ ݧَامٛوٻٜ اَمَانَ! اٛنْ اَنْدَا وَادُکِ حِغَاکُ اٜ دُونِيَارُ طُمْ وَݧُکِ اَللَّه؟ نغَمْ نٛنْ، فُو شُٻُطٛ وَادَ حِغَاکُ اٜ دُونِيَارُ، اٛ وَرْتِرِي حٛورٜ مَاکٛ غَݧٛ اَللَّه؞ کٛو اٛنْ کَمِّي اٜ مٜىٰرٜ اَايَارٜ وِعِ، «اَللَّه اٜ وٛودِ لَوْلِيرُ دٛوْ يٛنْکِ کِ اٛ وَطِ ندٜرْ مٜىٰطٜنْ؟» اَمَّا اَللَّه اٜ ٻٜيْدَ وَلُّکِعٜنْ؞ کَنْجُمْ وَطِ اَايَارٜ وِعِ، «اَللَّه وَݧِي غٛودُٻٜ مَنْغُ حٛورٜ، اَمَّا اٜ مٛ وَلَّ لٜسْنُٻٜ کٛعٜ؞» نغَمْ نٛنْ، لٜسْنٜىٰ کٛعٜ مٛوطٛنْ نغَطٛنْ کٛ اَللَّه وِعِ؞ نغَݧٜىٰ کُوطٜ شٜيْطَنْ، کَنْکٛ بٛو اٛ دٛغَّيْعٛنْ؞ ٻَدّٛيٜىٰ حَادٜ اَللَّه، کَنْکٛ مَا اٛ ٻَدّٛتٛ حَادٜ مٛوطٛنْ؞ اٛنٛنْ غَطٛوٻٜ حَکّٜ، مٛعِّنٜىٰ جٛنْدٜ مٛوطٛنْ؞ لَاٻِنٜىٰ ٻٜرْطٜ مٛوطٛنْ، اٛنٛنْ غٛودُٻٜ ٻٜرْطٜ طِطِ؞ نغَنّٜىٰ، نغُلّٜىٰ، مبٛيٜىٰ؞ نغَيْلِتٜىٰ جَلٜىٰطٜ مٛوطٛنْ نغَرْتَ بٛجِّ، نَنُکِ بٜلْطُمْ مٛوطٛنْ وَرْتَ شِيَ نَنْکِ بٜلْطُمْ؞ لٜسْتِنٜىٰ کٛعٜ مٛوطٛنْ يٜىٰسٛ جٛومِرَاوٛ، کَنْکٛ بٛو اٛ مَوْنِنَيْعٛنْ؞ بَنْدِرَاٻٜ، تٛع اٛنْ مٜتِندِرْ حَالَاجِ کَلُّطِ؞ نغَمْ فُو مٜتُطٛ حَالَ کَلُّکَ دٛوْ بَنْدِرَاوٛ مُوطُمْ، کٛو يٛوَنِمٛ کٛ وٛوطَا، مٜتِي حَالَ کَلُّکَ دٛوْ دٛوکَ اَللَّه وٛنْ طٛنْ، يٛوَنِيطُمْ کٛ وٛوطَا؞ اَمَّا تَا يٛوَنِي دٛوکَ اَللَّه کٛ وٛوطَا، اَ وَرْتِي مٛ تٛکَّتَاکَ جٛوَنٛووٛکَ کٛ وٛوطَا؞ اَللَّه تَنْ وٛنِ کٛکّٛووٛ دٛوکَ اٜ غَطٛووٛ کِيتَ؞ کَنْکٛ تَنْ وٛنِ بَاوَيْطٛ حِسْنُکِ اٜ حَلْکُکِ؞ اَمَّا اَنْ اَ مٛيٜ ندٜ نجٛوَنْتَا بَنْدِرَاوٛ مَاطَ کٛ وٛوطَا؟ نَنٜىٰيَمْ اٛنٛنْ وِعٛوٻٜ، «حَنْدٜ کٛو جَانغٛ مِنْ نجَحَيْ ندِعِ غَرِيرِ کٛو ندِنْ تٛنْ، مِنْ نغَطَ ندُنْغُ غٛعٛ تٛنْ مِنْ نغَطَ لُومٛ مِنْ کٜٻَ شٜىٰدٜ؞» رَا بٛو اٛنْ اَنْدَا کٛ وَنْغَتَ جَانغٛ؞ نٛ يٛنْکِ مٛوطٛنْ وَعِ؟ يٛنْکِ مٛوطٛنْ اٜ نَنْدِ اٜ شُرْکَ وَنْغٛوحَ نغَمْ شَرٜلْ سٜطَّ، غَطَ طٛنْ کَ مَجِّتَ؞ سٜيْ نِ مبِعٛنْ، «تٛ جٛومِرَاوٛ جَٻِي يَارِي يٛنْکِ، مِنْ نغَطَيْ طُعُمْ اٜ طُمْ طَاعٜ؞» اَمَّا رَطُّمْ جٛونِ ندٜرْ مَوْنِنْکِ کٛعٜ مٛوطٛنْ اٛنْ مَنْتِتٛو؞ فُو اِرِ کِنْ طٛنْ مَنْتِتَاکِ کِ کَلُّکِ؞ نغَمْ نٛنْ فُو اَنْدُطٛ کٛ حَانِ وَطَ، اَمَّا اٛ وَطَايِطُمْ، اٛ وَطِي حَکّٜ؞ جٛونِ بٛو، اٛنٛنْ رِسْکُٻٜ، نَنٜىٰ کٛ مبِعَيْمِ! مبٛيٜىٰ، نغُلّٜىٰ نغَمْ بٛنٜ کَلُّطُمْ غَرٛوَيْطُمْ دٛوْ مٛوطٛنْ؞ رِسْکُ مٛوطٛنْ ݧٛلِي، مٛوپِ ݧَامِي کٛلْتٜ مٛوطٛنْ؞ جِينَارِ مٛوطٛنْ اٜ اَجُرْفَارِ مٛوطٛنْ فُونِي، فُونُکِ مَيْرِ بٛو وَرْتَيْ شٜيْدَ دٛوْ مٛوطٛنْ طُمْ ݧَامَيْ ٻَلِّ مٛوطٛنْ بٛ حِيتٜ؞ اٛنْ مٛٻْتَنِي کٛعٜ مٛوطٛنْ جَوْدِ ندٜرْ بَلْطٜ طٜعٜ طٜ رٜعُکِ دُونِيَارُ؞ رَطُّمْ! نجٛٻَارِ ندِ نغَݧُطٛنْ يٛٻُکِ کُوَنٛوٻٜعٛنْ تٛ غٜسٜ ندِ وُلّٛيَکٜعٛنْ؞ بٛجِّ اِتَّنٛوٻٜعٛنْ کٛ ٻٜنْدِ تٛ غٜسٜ نجَارِي تٛ جٛومِرَاوٛ جٛومُ بَوْطٜ؞ اٛنْ نغَطِي جٛنْدٜ نَنْکِ بٜلْطُمْ اٜ دُونِيَارُ، اٛنْ ݧَامَ، اٛنْ نجَرَ، اٛنْ نغَطَ نٛ نغِطّٛنْ؞ اٛنْ ڤَيْنِي کٛعٜ مٛوطٛنْ نغَمْ ݧَلْندٜ حِرْسُکِ؞ اٛنْ تَپَنِي اَادِلِعٜنْ کِيتَ کَلُّکَ، اٛنْ مبَرِيٻٜ، کَمْٻٜ بٛو ٻٜ نغٜدَّايِعٛنْ؞ نغَمْ نٛنْ، بَنْدِرَاٻٜ اَمْ، نغَطٜىٰ مُݧَلْ حَا يَاکِ ݧَلْندٜ ندٜ جٛومِرَاوٛ وَرْتَتَ؞ ندَارٜىٰ نٛ دٜمٛووٛ مُݧِرْتَ نغَمْ ندِيَمْ سٜىٰتٛ اٜ طَمْ پَاوٛلْ ٻٜنْدِنَ فِي بٛطُّمْ طُمْ اٛ رٜمِ؞ اٛنٛنْ مَا، مُݧٜىٰ؞ شٜمْبِطِنٜىٰ ٻٜرْطٜ مٛوطٛنْ، نغَمْ وَرْتٛيْکِ جٛومِرَاوٛ ٻَدَکٜ؞ بَنْدِرَاٻٜ اَمْ، تٛع اٛنْ مٜتِندِرْ مٜتٜمٜتٜىٰجِ نغَمْ تٛ طُمْ وَطَنَعٛنْ کِيتَ؞ رَطُّمْ، غَطٛووٛ کِيتَ اٜ دَرِي تٛ دَمُّغَلْ! بَنْدِرَاٻٜ اَمْ، شِفْتٛرٜىٰ اَنَّبٛعٜنْ مٜتُٻٜ ندٜرْ اِنْدٜ جٛومِرَاوٛ، نٛ ٻٜ مُݧِرِ ندٜرْ تٛرَّاجِ؞ تٛکّٜىٰ کٛ ٻٜ نغَطِ؞ اٛنْ اَنْدِ، اٜنْ نٛدِّرَ مُݧُٻٜ بَرْکِطِنَاٻٜ؞ اٛنْ نَنِي نٛ اَيُوبَ مُݧِرِ، ندٜنْ اٛنْ اَنْدِ نٛ جٛومِرَاوٛ بَرْکِطِنِرِمٛ دَغَ غَطَ؞ جٛومِرَاوٛ اٛ کٜوْطٛ يُرْمٜىٰندٜ اٜ يِدّٜ؞ بَنْدِرَاٻٜ اَمْ، کٛ ٻُرِ کٛو طُمٜ وٛنِ تٛع اٛنْ کُنٛرٛ دٛوْ، کٛو لٜيْ، کٛو اٜ کٛو اِرِ طُمٜ فِي؞ تٛ اٛنْ پَمَامَ، تٛ طُمْ نٛنْ، مبِعٛنْ «اٜىٰ» تَنْ؞ تٛ نَاع طُمْ نٛنْ، مبِعٛنْ «اَاعَ» تَنْ؞ نغَطٜىٰ نٛنْ نغَمْ تٛ طُمْ تَپَنَعٛنْ کِيتَ کَلُّکَ؞ اٜ وٛودِ جَرٛووٛ تٛرَّ ندٜرْ مٛوطٛنْ؟ تٛو، اٛ وَطَ دٛعَارٜ؞ اٜ وٛودِ نَنٛووٛ بٜلْطُمْ ندٜرْ ٻٜرْندٜ مُوطُمْ؟ تٛو، اٛ يِمَ غِمِ مَنْتُکِ اَللَّه؞ اٜ وٛودِ غٛطّٛ مٛ يَمْطَا ندٜرْ مٛوطٛنْ؟ تٛو، اٛ نٛدَّ مَوْٻٜ ندٜرْ کَوْتَلْ تٛکُّٻٜ يٜىٰسُ، ٻٜ نغَطَنَمٛ دٛعَارٜ، ٻٜ نغَطَنَمٛ نٜبَّمْ دٛوْ حٛورٜ ندٜرْ اِنْدٜ جٛومِرَاوٛ؞ نغَمْ دٛعَارٜ غَطَاندٜ ندٜرْ حٛولَارٜ ندٜ يَمْطِتِنَيْ مٛ يَمْطَا؞ جٛومِرَاوٛ يَمْطِتِنَيْمٛ؞ تٛ اٛ وَطِي حَکّٜ، طُمْ يَافَنْتٛمٛ؞ نغَمْ نٛنْ، مبِعِندِرٜىٰ حَکّٜ طُمْ نغَطّٛنْ، ندٜنْ نغَطِندِرٜىٰ دٛعَارٜ نغَمْ طُمْ يَمْطِتِنَعٛنْ؞ دٛعَارٜ اَادِلِيجٛ اٜ ندٜ وٛودِ بَوْطٜ اٜ ندٜ حُوَ؞ اِلِيَ اٛ نٜطّٛ بٛ مٜىٰطٜنْ؞ اٛ وَطِ دٛعَارٜ نَاع سٜطَّ نغَمْ تٛع ندِيَمْ تٛٻَ تٛ لٜيْدِ ندِنْ، سٜيْ ندٜ طُمْ وَطِ دُوٻِ تَتِ اٜ لٜبِّ جٛوٜىٰغٛعٛ طَمْ تٛٻَايِ؞ ندٜنْ اٛ فُطِّتِ اٛ وَطِ دٛعَارٜ، سٜيْ دٛوْ يٛوفِ ندِيَمْ، لٜيْدِ بٛو وُرْتِنِ کٛو طُمٜ کٛ فُطَتَ؞ اٛنٛنْ بَنْدِرَاٻٜ اَمْ، تٛ غٛطّٛ مٛوطٛنْ سٜلِي لَاوٛلْ غٛونغَ، ندٜنْ غٛطّٛ وَرْتِرٛيِيمٛ دٛوْ لَاوٛلْ، اَنْدٜىٰ طُعُمْ: کٛو مٛيٜ سٛعِّ غَطٛووٛ حَکّٜ دَغَ تٛکُّکِ لَاوٛلْ نغٛلْ وٛوطَا، اٛ حِسْنَيْ يٛنْکِ غَطٛووٛ حَکّٜ اٛنْ دَغَ مَيْدٜ، ندٜنْ اٛ وَدَّيْ لَاوٛلْ يَافَاکِ حَکّٜ طُطُّمْ؞ مِنْ بِيتُرُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ مِ وِنْدَنْغٛلْ يِمْٻٜ ٻٜ اَللَّه سُٻِ، شَنْکِتِيٻٜ، غَطٛوٻٜ جٛنْدٜ کٛطَاکُ اٜ لٜيْدِ فَنْتُسْ، اٜ لٜيْدِ غَلَاتِيَ، اٜ لٜيْدِ کَفَدٛوکِيَ، اٜ لٜيْدِ اَاسِيَ، اٜ لٜيْدِ بِتِينِيَ؞ اَللَّه ݧَاکٛ مٛ دٛوْ سُٻِيعٛنْ ندٜرْ يِدّٜ مَاکٛ؞ رُوحُ مَاکٛ وَرْتِرِيعٛنْ شٜنِيٻٜ، نغَمْ تٛکّٛنْ کٛ يٜىٰسُ اَلْمَسِيحُ وِعِ، لَاٻٛنْ بَرْکَ پِيپَمْ مَاکٛ؞ اَللَّه ٻٜيْدَ بَرْکِطِنْکِعٛنْ، ٻٜيْدَ حٛکُّکِعٛنْ جَمْ؞ يٜتّٛورٜ تَبِّتَ تٛ اَللَّه، ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ نغَمْ يُرْمٜىٰندٜ مَاکٛ مَوْندٜ اٛ حٛکِّيعٜنْ يٛنْکِ کٜسُمْ بَرْکَ اُمَّاکِ يٜىٰسُ دَغَ مَيْدٜ؞ نغَمْ مَاجُمْ اٜنْ نغٛودِ کَمُّندٜ تَبُّتُندٜ، اٜنْ کٜٻَيْ ندٛنُ نغُ لَلَّتَا، نغُ وٛنَّتَاکٛ، ندٜنْ نغُ رٜعَتَا، نغُ طُمْ رٜسَنِعٛنْ تٛنْ دٛوْ؞ اٛنٛنْ بَوْطٜ اَللَّه اٜ سُرَنَعٛنْ بَرْکَ حٛولَاکِ يٜىٰسُ، نغَمْ کٜٻٛنْ کِسْندَمْ طَمْ اٛ سِرْيِي وَنْغِنْکِ ݧَلْندٜ رٜعُکِ دُونِيَارُ؞ نغَمْ نٛنْ، نَنٜىٰ بٜلْطُمْ طُطُّمْ، کٛو ندٜ جٛونِ طُمْ وَطٛتٛ اٛنْ نَتَّيْ تٛرَّاجِ فٜىٰرٜ‑فٜىٰرٜ شَرٜلْ سٜطَّ نغَمْ تَبِّتِنْکِ حٛولَارٜ مٛوطٛنْ؞ حٛولَارٜ ندٜنْ ندٜ ٻُرِ جِينَارِ؞ کٛو ندٜ جِينَارِ ݧَلْندٜ غٛعٛ طُمْ رٜعَيْ، اٜ طُمْ فٛوندِرٜىٰ حِيتٜ؞ نٛنْ مَا طُمْ فٛوندَيْ حٛولَارٜ مٛوطٛنْ طُمْ تَبِّتِنَنْدٜ نغَمْ کٜٻٛنْ مَنْتٜىٰکِ، اٜ تٜدِّنٜىٰکِ، اٜ مَوْنِنٜىٰکِ ݧَلْندٜ ندٜ يٜىٰسُ اَلْمَسِيحُ وَرْتَتَ؞ کٛو ندٜ اٛنْ مٜىٰطَايِ يِيکِمٛ، اٛنْ نغِطِمٛ؞ کٛو ندٜ نَاع اٛنْ نغِعَمٛ جٛونِ، اٛنْ کٛولَکٜمٛ، اٛنْ نَنَ بٜلْطُمْ مَوْطُمْ ندٜرْ ٻٜرْطٜ مٛوطٛنْ پَٻِّيطُمْ مٜتٜىٰکِ؞ نغَمْ اٛنْ کٛولَکٜ يٜىٰسُ اَلْمَسِيحُ وَطِ اٛنْ کٜٻَ کِسْندَمْ؞ اَنَّبٛعٜنْ غَطُٻٜ اَنَّبَاکُ دٛوْ شَاحُ طُمْ کٜٻٛتٛنْ، وَاتٛ کِسْندَمْ، ٻٜ نغَطِي کَ طَٻُّتُکِ لَاوٛلْ کِسْندَمْ طَمْ طٛنْ نَاع سٜطَّ؞ رُوحُ اَللَّه غٛنْطُمْ ندٜرْ ٻٜرْطٜ مَٻّٜ وِعِيٻٜ نٛ اَلْمَسِيحُ تٛرّٛرْتٛو، ندٜنْ غَطَ طٛنْ اٛ مَوْنِنٜىٰ؞ نغَمْ نٛنْ، ٻٜ طَٻِّتِي نَاع سٜطَّ نغَمْ ٻٜ اَنْدَ مٛيٜ وٛنِ اَلْمَسِيحُ، ندٜنْ ندٜيٜ فِي طُعُمْ وَطَتَ؞ طُمْ وِعِيٻٜ اٛنٛنْ ٻٜ کُوَنْتَ نَاع کٛعٜ مَٻّٜ، ندٜ ٻٜ مٜتِ دٛوْ فُو فِي طُمْ طٛنْ طُمْ نَنْطٛنْ جٛونِ؞ اٛنْ نَنِيطُمْ دَغَ تٛ غَعَجِنَنْٻٜعٛنْ حَبَرُ بٜلْطُمْ بَرْکَ رُوحُ اَللَّه لِلٛيَاطُمْ دَغَ دٛوْ؞ کٛو مَلَاعِکَعٜنْ اٜ نغِطِ فَامُکِطُمْ؞ نغَمْ نٛنْ، شِرْيٜىٰ ٻٜرْطٜ مٛوطٛنْ، شُرٜىٰ کٛعٜ مٛوطٛنْ، نغَطٜىٰ کَمُّندٜ مٛوطٛنْ فُو دٛوْ بَرْکَ طُمْ اُمْ حٛکَّتَعٛنْ ݧَلْندٜ وَرْتٛيْکِ يٜىٰسُ اَلْمَسِيحُ؞ نغَطٜىٰ جٛنْدٜ بٛ ٻِٻّٜ غَطٛوٻٜ کٛ طُمْ وِعِٻٜ؞ تٛع اٛنْ تٛکِّرَنْ سُونٛ مٛوطٛنْ نغٛ ندٜنّٛ، نغٛ نغٛودُنٛوطٛنْ شَرٜلْ کٛ اٛنْ اَنْدَا کٛو طُمٜ؞ اَمَّا نٛنْ نٛ اَللَّه نٛدُّطٛعٛنْ اٛ شٜنِيطٛ، اٛنٛنْ مَا، نغَرْتٜىٰ شٜنِيٻٜ ندٜرْ کٛ نغَطٛتٛنْ فُو؞ نغَمْ اَايَارٜ وِعِي، «نغَرْتٜىٰ شٜنِيٻٜ، نغَمْ مِنْ مِ شٜنِيطٛ؞» اٛنْ نٛدَّ اَللَّه ݧَاکٛ مٛ دٛوْ ندٜرْ دٛعَارٜ مٛوطٛنْ؞ ندٜ اٜ مٛ وَطَنَ کٛو مٛيٜ کِيتَ دٛوْ کُوطٜ طٜ وَطِ، اٛ حٛلَّتَا فٜىٰرٛوتِرٛلْ، نغَطٜىٰ جٛنْدٜ مٛوطٛنْ ندٜ کٛطَاکُ اٜ دُونِيَارُ ندُعُ ندٜرْ کُلٛلْ اَللَّه؞ اٛنْ اَنْدِ طُمْ رِمْطِنِيعٛنْ دَغَ نغِکُّوجِ مٜىٰرٜىٰجِ طِ ندٛنُطٛنْ تٛ مَامَعٜنْ مٛوطٛنْ؞ طُمْ رِمْطِنِرَايِعٛنْ فِي رٜعٛوجُمْ بٛ اَجُرْفَارِ اٜ جِينَارِ؞ طُمْ رِمْطِنِرِيعٛنْ پِيپَمْ اَلْمَسِيحُ غٛودُطَمْ دَرَجَ؞ کَنْکٛ وٛنِ بٛ کَرٛورِ ندِ وَلَا غٛطُّمْ کٛ حَانَا؞ کَنْکٛ اَللَّه سُٻِ دَغَ کٛ طُمْ تَغَ دُونِيَارُ، اَمَّا طُمْ وَنْغِنِمٛ نغَمْ مٛوطٛنْ اٜ بَلْطٜ طٜعٜ طٜ رٜعُکِ دُونِيَارُ؞ بَرْکَ مَاکٛ کٛولِيطٛنْ اَللَّه، اُمِّنْطٛمٛ دَغَ مَيْدٜ، حٛکِّمٛ مَنْغُ؞ نغَمْ نٛنْ، اٜ حٛولَارٜ مٛوطٛنْ اٜ کَمُّندٜ مٛوطٛنْ دٛوْ اَللَّه طُمْ وٛنِ؞ تٛکُّکِ غٛونغَ لَاٻِنَنِيعٛنْ ٻٜرْطٜ اٛنْ نغِطِندِرِ يِدّٜ ندٜ غٛونغَ؞ نغَمْ مَاجُمْ، نغِطِندِرٜىٰ اٜ ٻٜرْندٜ غٛعٛ؞ نغَطٜىٰ نٛنْ نغَمْ اَللَّه حٛکِّيعٛنْ يٛنْکِ کٜسُمْ بَرْکَ وٛلْدٜ مَاکٛ غٛودُندٜ يٛنْکِ تَبُّتُندٜ حَا اَبَدَا؞ نٛ اَايَارٜ وِعِ، «فُو يِمْٻٜ بٛ غٜىٰنٜ مبَعِ، فُو لَٻْکِ مَٻّٜ بٛ ڤِيندِ لَدّٜ وَعِ؞ غٜىٰنٜ اٜ نجٛورَ، ڤِيندِ اٜ سَامَ، اَمَّا وٛلْدٜ جٛومِرَاوٛ اٜ ندٜ طٛنْ حَا اَبَدَا؞» ندٜعٜ وٛلْدٜ کَيْرٜ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ طُمْ اُمْ وَعَجِنَنِعٛنْ؞ نغَمْ نٛنْ، اَلٜىٰ کٛو اِرِ طُمٜ نغِکُّ کَلُّطُمْ؞ اَلٜىٰ فٜوْرٜ، اٜ نغِکُّ مُنَافُکِيجٛ، اٜ لَوْلِيرُ، اٜ حُطُکِ وٛٻّٜ کٛو اِرِ کِيٜ؞ نٛ ٻِکّٛيْ کٜشّٛيْ نغِطِرِ اٜنْطَمْ، اٛنٛنْ مَا نغِطِرٜىٰ وٛلْدٜ اَللَّه نٛنْ نغَمْ ندٜ وَطَعٛنْ شٜمْبِطٛنْ ندٜرْ کِسْندَمْ طَمْ کٜٻُطٛنْ، ندٜ اٛنْ مٜىٰطِي نَنْکِ بٜلْطُمْ يُرْمٜىٰندٜ جٛومِرَاوٛ؞ نغَرٜىٰ تٛ مَاکٛ؞ کَنْکٛ وٛنِ حَيْرٜ غٛودُندٜ يٛنْکِ؞ يِمْٻٜ نغَݧِيمٛ، اَمَّا اَللَّه سُٻِيمٛ مَوْنِنِيمٛ؞ اٛنٛنْ بٛو، بٛ کَاپٜ غٛودُطٜ يٛنْکِ، اَلٜىٰ طُمْ حُوتِرَعٛنْ طُمْ مَحَ وُرٛ شٜنِينغٛ نغَمْ رُوحُ اَللَّه؞ اٛنٛنْ نغٛنِ کَوْتَلْ اَرْدِيٻٜ دِينَ، اٛنْ کٛکَّ اَللَّه شَکِّرِ ندِ رُوحُ مَاکٛ وَلَّتَعٛنْ کٛکّٛنْ؞ اٜ مٛ جَٻَندِ لَاوٛلْ يٜىٰسُ اَلْمَسِيحُ؞ نغَمْ اَايَارٜ وِعِي، «رَطُّمْ، مِ سُٻِي حَيْرٜ ٻُرْندٜ کٛو ندٜيٜ دَرْنُکِ مَادِ، مِ تِغِّيندٜ ندٜ جٛطِّنَ مَادِ غَرِيرِ سِحِيٛونَ؛ فُو کٛولِيطٛمٛ اٛ سٜمْتِنْتَاکٜ کٛو سٜطَّ؞» حَيْرٜ ندٜنْ طٛنْ اٜ ندٜ وٛودِ مَنْغُ تٛ مٛوطٛنْ اٛنٛنْ کٛولِيٻٜ يٜىٰسُ؞ اَمَّا تٛ غَݧُٻٜ کٛولٛومٛ ٻٜ نغِعَيْ نٛ، «حَيْرٜ ندٜ مَحٛوٻٜ نغَݧِ، کَيْرٜ وٛنِ حَيْرٜ ٻُرْندٜ کٛو ندٜيٜ دَرْنُکِ مَادِ؞» طٛنْمَا وٛنْدٜ اَايَارٜ وِعِي، «طُمْ حَيْرٜ غَطٛورٜ يِمْٻٜ فٜغّٛو، غَطٛورٜ يِمْٻٜ نجَنَ؞» اٜ ٻٜ ڤٜغّٛو نغَمْ ٻٜ نغَݧِي وَطُکِ کٛ وٛلْدٜ اَللَّه وِعِ؞ نٛنْ طُمْ سِرْيَنِيٻٜ؞ اَمَّا اٛنٛنْ طُمْ لٜݧٛلْ نغٛلْ اَللَّه سُٻِ، اٛنْ کَوْتَلْ اَرْدِيٻٜ دِينَ کُوَنٛوٻٜ لَامِيطٛ مَوْطٛ، يِمْٻٜ شٜنِيٻٜ، ٻٜ اَللَّه جٜيِ؞ اٛ سُٻُعٛنْ نغَمْ نغَعَجِنٛنْ حَبَرُ کُوطٜ مَاکٛ کَيْطِنِيطٜ؞ اٛ وُرْتِنٛيعٛنْ ندٜرْ ݧِوْرٜ نغَمْ نَتّٛنْ جَيْنغٛلْ مَاکٛ کَيْطِنِينغٛلْ؞ ندٜنّٛ نَاع اٛنْ يِمْٻٜ اَللَّه، اَمَّا جٛونِ اٛنْ يِمْٻٜ مَاکٛ؞ ندٜنّٛ اٛنْ کٜٻَايِ يُرْمٜىٰندٜ مَاکٛ، اَمَّا جٛونِ اٛنْ کٜٻِي؞ اٛنٛنْ ٻٜ نغِطُمِ، اٛنْ حٛٻّٜ ندٜرْ دُونِيَارُ ندُعُ، اٛنٛنْ نَاع طُمْ ٻٜ طٛعٛ؞ نغَمْ نٛنْ اٜ مِ تٛرٛوعٛنْ، شٜنْدِرٜىٰ اٜ سُونٛوجِ ٻَنْدُ غِطِّ حَلْکُکِعٛنْ؞ کٛلّٜىٰ نغِکُّ بٛطُّمْ ندٜرْ يِمْٻٜ ٻٜ اَنْدَا اَللَّه، نغَمْ تٛ ٻٜ مبِعَيْ اٛنْ کَلُّٻٜ، سٜيْ ٻٜ نغِعَ کُوطٜ مٛوطٛنْ طٜ بٛطّٜ، ٻٜ مَوْنِنَ اَللَّه ݧَلْندٜ وَرْتُکِ مَاکٛ؞ کٛو طُمٜ لَامُ لَامٛتٛوطُمْ يِمْٻٜ، تٛکّٜىٰ کٛ طُمْ وِعِ، نغَمْ نٛنْ جٛومِرَاوٛ يِطِ؞ تٛکّٜىٰ مَوْطٛ لَامِيٻٜ، اَرْدِيطٛ دٛوْ کٛو مٛيٜ، حَا اٜ غٛمْنَعٜنْ، نغَمْ لَامِيطٛ اٛنْ لِلِٻٜ ٻٜ کٛکَّ غَطٛوٻٜ کٛ وٛوطَا بٛنٜ، ٻٜ مَنْتَ غَطٛوٻٜ کٛ وٛوطِ؞ نغَمْ اَللَّه اٜ يِطِ نغَطٛنْ کٛ وٛوطِ يٜىٰسٛ يِمْٻٜ ٻٜ نغَلَا اَنْدَلْ، نغَمْ نغَطٛنْ ٻٜ اَلَ مٜتٜمٜتٜىٰجِ طِ نغَلَا فَامُ؞ نَاع اٛنْ مَشُّٻٜ، اٛنْ رِمْطِنَاٻٜ، اَمَّا تٛع اٛنْ نغَرْتِرْ رِمْطِنْکِ مٛوطٛنْ وَرْتَ لَاوٛلْ وَطُکِ کٛ حَلِّ، اَمَّا نغَطٜىٰ جٛنْدٜ بٛ مَشُّٻٜ اَللَّه؞ کٛکّٜىٰ کٛو مٛيٜ مَنْغُ، نغِطٜىٰ تٛکُّٻٜ يٜىٰسُ؞ کُلٜىٰ اَللَّه، مَوْنِنٜىٰ لَامِيطٛ؞ اٛنٛنْ مَشُّٻٜ، نغَطٜىٰ کٛ جٜيْٻٜعٛنْ مبِعِعٛنْ کٛکّٛنْٻٜ مَنْغُ کٛو ندٜيٜ؞ نَاع غٛودُٻٜ نغِکُّ بٛطُّمْ تَنْ اٜ ٻٜ شَطَا نغَطَنْتٛنْ نٛنْ، حَا مَا اٜ غٛودُٻٜ ٻٜرْطٜ کَٻٛوجٜ؞ تٛ نٜطّٛ مُݧِي ندٜرْ تٛرَّ نغَمْ اٜ ݧُمَ دٛوْ کٛ اَللَّه يِطِ، اَللَّه بَرْکِطِنَيْمٛ، تٛ اٜ مٛ يَرَ تٛرَّ کَنْ نَاع نغَمْ وَطُکِ کٛ وٛوطَا؞ تٛ اٛنْ نغَطِي کٛ وٛوطَا اٛنْ ڤِيَامَ اٛنْ مُݧِي، مٛيٜ مَنْتَتَ مُݧَلْ مٛوطٛنْ؟ اَمَّا تٛ اٛنْ نغَطِي کٛ وٛوطِ اٛنْ تٛرَّامَ اٛنْ مُݧِي، اَللَّه بَرْکِطِنَيْعٛنْ؞ دٛوْ اِرِ کَنْ طٛنْ تٛرَّ اَللَّه نٛدِّعٛنْ، نغَمْ اَلْمَسِيحُ مَا يَرِي تٛرَّ نغَمْ مٛوطٛنْ؞ اٛ اَلَنِيعٛنْ کٛ تٛکّٛتٛنْ نغَمْ نجٛوطٛرٛوطٛنْ نٛ اٛ جٛوطٛرِي؞ اٛ مٜىٰطَايِ وَطُکِ حَکّٜ کٛو سٜطَّ، طُمْ مٜىٰطَايِ نَنْکِ فٜوْرٜ وُرْتَکٜ دَغَ حٛنْدُکٛ مَاکٛ؞ ندٜ اٛ حُطَا، اٛ وَاتَاکِ؞ ندٜ اٛ يَرِ تٛرَّ، اٛ وِعَايِ اٛ وَاتٛتٛ، اَمَّا اٛ اَلَنِي اَللَّه غَطٛووٛ کِيتَ غٛونغَ؞ کَنْکٛ اٜ حٛورٜ مَاکٛ جَٻِ اٛ يٛوَنٜىٰ حَکّٜ طُمْ نغَطُطٜنْ اٛ ٻِلٜىٰ دٛوْ غَافَانغَلْ؞ اٛ وَطُ نٛنْ نغَمْ لَاوٛلْ مَيْدٜ مَاکٛ اَلٜنْ وَطُکِ حَکّٜ، نجٛوطٛوطٜنْ جٛنْدٜ اَادِلَاکُ؞ نٛ اَايَارٜ وِعِ، «بَرْکَ نَوْنٛوطٜ مَاکٛ اٛنْ نجَمْطِتِي؞» ندٜنّٛ اٛنْ نَنْدِي اٜ بَالِ مَجُّطِ لَاوٛلْ، اَمَّا جٛونِ طُمْ سٛعّٛيِيعٛنْ نغَمْ تٛکّٛنْ غَيْنَاکٛ ڤَامَنَيْطٛ يٛنْکِيجِ مٛوطٛنْ؞ نٛنْ مَا اٛنٛنْ رٜوْٻٜ تٜىٰغَلْ، تٛکّٜىٰ کٛ وٛرْٻٜ مٛوطٛنْ مبِعِ؞ نغَمْ تٛ اٜ وٛودِ وٛٻّٜ وٛرْٻٜ ٻٜ تٛکَّايِ وٛلْدٜ اَللَّه، طُمْ غَطٛتٛوطُمْ نغِکُّ رٜوْٻٜ مَٻّٜ وَطَ ٻٜ تٛکَّ اَللَّه، نَاع سٜيْ تٛ ٻٜ مٜتَنَامَ، تٛ ٻٜ نغِعِي نغِکُّ مٛوطٛنْ بٛطُّمْ ندٜنْ ٻٜ نغِعِ اٛنْ نغَطَ کٛ ٻٜ مبِعِ؞ تٛع مٛعِّتِنَاکِ کِ مٛعِّتِنْتٛوطٛنْ وَرْتَ کِ ٻَنْدُ تَنْ، بٛ مٛرْطِ، اٜ کٛ وَطِرَا اٜ جِينَارِ، اٜ کٛلْتٜ غٛودُطٜ شٜىٰدٜ؞ سٜيْ نِ مٛعِّتِنَاکِ مٛوطٛنْ وَرْتَ مٛعِّنْکِ ٻٜرْطٜ مٛوطٛنْ اٜ وَطُکِ کٛ لَلَّتَا وَاتٛ لٜسْتِنْکِ حٛورٜ، اٜ سُرُکِ حٛورٜ؞ اِرِ کِنْ طٛنْ مٛعِّتِنَاکِ کِ لَلَّتَا؛ کَنْکِ وٛنِ ٻُرْکِ وٛوطُکِ يٜىٰسٛ اَللَّه؞ نغَمْ ندٜنّٛ نٛنْ رٜوْٻٜ شٜنِيٻٜ غَطُٻٜ ٻٜرْطٜ مَٻّٜ دٛوْ اَللَّه مٛعِّتِنٛرِي ندٜ ٻٜ تٛکِّ وٛرْٻٜ مَٻّٜ؞ مِسَالُ، سَارَتُ وَطِي کٛ غٛرْکٛ مُوطُمْ اِبْرَاهِمْ وِعِ، اٜ مٛ نٛدِّرَمٛ جٛومُ مَاکٛ؞ جٛونِ، اٛنٛنْ نغٛنِ ٻِٻّٜ سَارَتُ تٛ اٛنْ نغَطِي کٛ وٛوطِ، اٛنْ نجَٻَايِ غٛطُّمْ حُلْنِعٛنْ؞ نٛنْ مَا، اٛنٛنْ وٛرْٻٜ، نجٛوطٛدٜىٰ اٜ رٜوْٻٜ مٛوطٛنْ نٛ حَانِ؞ کٛکّٜىٰٻٜ مَنْغُ نغَمْ کَمْٻٜ ٻٜ نغَلَا سٜمْبٜ بٛ مٛوطٛنْ، طٛنْمَا اٛنٛنْ اٜ رٜوْٻٜ مٛوطٛنْ اٛنْ فُو اٛنْ کٜٻَيْ شَاحُ جٛومِرَاوٛ، وَاتٛ يٛنْکِ کِ رٜعَتَا؞ نغَطٜىٰ نٛنْ نغَمْ تٛع غٛطُّمْ حَطَعٛنْ وَطُکِ دٛعَارٜ؞ جٛونِ اٜ مِ يِطِ يٛتِّنْکِ کٛ مبِعَيْمِ اٜ وِيکِ، اٛنْ فُو ݧُمٛ مٛوطٛنْ وَرْتَ غٛعٛ؞ نجُرْمِندِرٜىٰ، نغِطِندِرٜىٰ نٛ حَانِ تٛکُّٻٜ يٜىٰسُ نغَطَ، مبَلِّندِرٜىٰ، لٜسْتِنٜىٰ کٛعٜ مٛوطٛنْ؞ تٛع اٛنْ نغَاتٛ حَلّٜىٰندٜ اٜ حَلّٜىٰندٜ، کٛو حُطُکِ اٜ حُطُکِ، اَمَّا نغَاتٛرٜىٰ بَرْکِطِنْکِ، نغَمْ اَللَّه نٛدِّيعٛنْ نغَطٛنْ نٛنْ نغَمْ اٛ بَرْکِطِنَعٛنْ؞ اَايَارٜ وِعِي، «فُو غِطّٛ نَنَ بٜلْطُمْ جٛنْدٜ مُوطُمْ، نٜىٰٻَ اٜ دُونِيَارُ، سٜيْ اٛ اَلَ مٜتٛ کَلُّنغٛ، اٛ اَلَ فٜوْرٜ؞ اٛ اَلَ وَطُکِ کٛ حَلِّ، اٛ وَطَ اَادِلَاکُ؛ اٛ طَٻِّتَ جَمْ اٜ ٻٜرْندٜ غٛعٛ؞ نغَمْ جٛومِرَاوٛ اٜ فَامَنَ غٛودُٻٜ اَادِلَاکُ، اٜ مٛ نَنَ دٛعَاجٜ مَٻّٜ، اَمَّا اٜ مٛ وَݧَ کُوٛوٻٜ کٛ حَلِّ؞» تٛ اٛنْ نغَطَ کٛ مبَاوٛتٛنْ وَطُکِ نغَمْ نغَطٛنْ کٛ وٛوطِ، مٛيٜ حَلَّنْتَعٛنْ؟ اَمَّا کٛو تٛ اٛنْ نجَرِي تٛرَّ نغَمْ وَطُکِ کٛ وٛوطِ، اَللَّه بَرْکِطِنَيْعٛنْ؞ نغَمْ نٛنْ، تٛع اٛنْ کُلُ تٛرَّيْٻٜعٛنْ، تٛع اٛنْ نغَنُّ؞ اَمَّا مَوْنِنٜىٰ اَلْمَسِيحُ ندٜرْ ٻٜرْطٜ مٛوطٛنْ نغَمْ کَنْکٛ وٛنِ جٛومِرَاوٛ؞ کٛو ندٜيٜ نجٛوطٜىٰ اٛنْ شِرْيِي نٛوتَاکِ کٛو مٛيٜ پَمُطٛعٛنْ دٛوْ وَطُکِ ٻٜرْندٜ کِ نغَطّٛنْ دٛوْ اَلْمَسِيحُ؞ نغَطٜىٰ نٛنْ ندٜرْ لٜسْنُکِ حٛورٜ اٜ مَوْنِنْکِ؞ کٛو ندٜيٜ طُمْ تَوْرَعٛنْ اٜ ٻٜرْندٜ لَمْندٜ، نغَمْ تٛ طُمْ حُطِيعٛنْ، ٻٜنْ طٛنْ کُطٛوٻٜ نغِکُّ مٛوطٛنْ بٛطُّمْ نغَمْ اٛنْ تٛکُّٻٜ يٜىٰسُ ٻٜ شٜمْتَ؞ نغَمْ طُمْ ٻُرِي نٜطّٛ يَرَ تٛرَّ نغَمْ وَطُکِ فِي بٛطُّمْ، تٛ طُمْ شُٻٛلْ اَللَّه، اٜ دٛوْ يَرَ تٛرَّ نغَمْ وَطُکِ کٛ حَلِّ؞ نغَمْ اَلْمَسِيحُ مَايِي ندٜ غٛعٛ نغَمْ اِتُّکِ حَکّٜىٰجِ مٜىٰطٜنْ؞ کَنْکٛ اٛ غٛودُطٛ اَادِلَاکُ، اَمَّا اٛ مَايِي نغَمْ ٻٜ نغَلَا اَادِلَاکُ نغَمْ اٛ يَارَعٜنْ تٛ اَللَّه؞ طُمْ وَرِيمٛ، اَمَّا رُوحُ اَللَّه حٛکِّيمٛ يٛنْکِ؞ ندٜرْ بَوْطٜ رُوحُ طُمْ اٛ يَحِ اٛ وَعَجِنَنِ رُوحُوجِ مَٻَّاطِ؞ رُوحُوجِ طِنْ طٛنْ کَنْجِ نغٛنِ طِ تٛکَّايِ اَللَّه ندٜنّٛ اٜ جَامَنُ اَنَّبِ نُحُ؞ اَللَّه حٜطَکٜ اٜ مُݧَ شَرٜلْ کٛ اَنَّبِ نُحُ وَطَتَ کٛمِوَلْ؞ يِمْٻٜ سٜطَّ تَنْ نَتِّنغَلْ کِسِ ندِيَمْ تُفَانَ، کَمْٻٜ نجٛوٜىٰتَتٛ؞ ندِيَمْ طَمْ بٛو طُمْ مِسَالُ بَڤْتِسْمَ؞ جٛونِ بَڤْتِسْمَ حِسْنِيعٛنْ بَرْکَ بَوْطٜ اُمَّاکِ يٜىٰسُ اَلْمَسِيحُ دَغَ مَيْدٜ؞ بَڤْتِسْمَ نَاع طُمْ اِتُّکِ تُوندِ دَغَ ٻَلِّ مٜىٰطٜنْ، طُمْ اَلْکَوَلْ نغَلْ نٜطّٛ وَطَنِ اَللَّه اٜ ٻٜرْندٜ لَمْندٜ؞ يٜىٰسُ يَحِ دٛوْ، اٜ مٛ جٛوطِي تٛ جُنْغٛ اَللَّه ݧَامٛ، اٜ مٛ لَامٛو مَلَاعِکَعٜنْ، اٜ غٛودُٻٜ لَامُ، اٜ غٛودُٻٜ بَوْطٜ؞ ندٜ اَلْمَسِيحُ يَرِي تٛرَّ ندٜرْ ٻَنْدُ، اٛنٛنْ مَا شِرْيٜىٰ ٻٜرْطٜ مٛوطٛنْ نغَمْ يَرْکِ تٛرَّ؞ نغَمْ فُو جَرْطٛ تٛرَّ ندٜرْ ٻَنْدُ، اَلِي وَطُکِ حَکّٜ؞ نغَمْ نٛنْ، ندٜرْ بَلْطٜ مٛوطٛنْ کٛرِيطٜ اٜ دُونِيَارُ، تٛع اٛنْ ٻٜيْدُ تٛکُّکِ سُونٛ ٻَنْدُ، اَمَّا تٛکّٜىٰ کٛ اَللَّه يِطِ؞ جٛنْدٜ ندٜ نغَطّٛنْ ندٜنّٛ اِرِ ندٜ يِمْٻٜ ٻٜ اَنْدَا اَللَّه نغِطِ، ندٜ حٜپِي نٛنْ؞ ندٜنّٛ اٛنْ نغَطِ کَ حَلّٜىٰندٜ، اٜ سُونٛوجِ کَلُّطِ، اٜ يَرٜيَرٜىٰجِ ڤٛوطٛوجِ جٛنْدٜ مٜىٰرٜ، اٜ مَوْنِنْکِ غُنْکِيجِ فِي کٛو وٛوطَا؞ اٜ ٻٜ کَيْطِنَ نغَمْ اٛنْ کَوْتَتَا کٛعٜ اٜ مَٻّٜ جٛونِ ندٜرْ وَطُکِ کُوطٜ طُطّٜ طٜ مبٛوطَا؞ نغَمْ نٛنْ اٜ ٻٜ کُطَعٛنْ؞ اَمَّا ٻٜ مبِعَيْ اَللَّه کٛ ٻٜ نغَطِ، کَنْکٛ کِيتٛتٛوطٛ ٻٜ يٛنْکِ اٜ مَيْٻٜ؞ کَنْجُمْ وَطِ حَا مَيْٻٜ مَا نغَعَجِنَنَا حَبَرُ بٜلْطُمْ دٛوْ يٜىٰسُ اَلْمَسِيحُ؞ نغَمْ کٛو ندٜ اَللَّه تٛرِّرِيٻٜ مَيْدٜ ندٜرْ ٻَنْدُ بٛ کٛو مٛيٜ، يٛنْکِيجِ مَٻّٜ نجٛوطٛدٛتٛ اٜ اَللَّه؞ رٜعُکِ کٛو طُمٜ ٻَدَکٜ؞ نغَمْ نٛنْ ڤَامٜىٰ، شُرٜىٰ کٛعٜ مٛوطٛنْ نغَمْ مبَاوٛنْ وَطُکِ دٛعَارٜ؞ کٛ ٻُرِ کٛو طُمٜ وٛنِ، نغِطِندِرٜىٰ نَاع سٜطَّ، نغَمْ يِدّٜ اٜ وَطَ طُمْ يَافٛو حَکّٜىٰجِ طُطِّ؞ نغَطٜىٰ کَ جَٻّٛوتِرْکِ ندٜرْ غُرٜىٰجٜ مٛوطٛنْ نَاع اٜ مٜتٜمٜتٜىٰجِ؞ ندٜ اَللَّه حٛکِّ کٛو مٛيٜ تٛکُّطٛ يٜىٰسُ دٛکَّلْ، کُوتِرٜىٰ دٛکَّلْ نغَلْ حَکُّندٜ مٛوطٛنْ نٛ ڤَامَنٛووٛ دٛکَّلْ اَللَّه بٛطُّمْ وَطَتَ؞ فُو غَعَجِنٛووٛ، سٜيْ وَعَجِنَ وٛلْدٜ اَللَّه؞ فُو بَلّٛووٛ سٜيْ وَلِّرَ سٜمْبٜ طُمْ اَللَّه حٛکِّمٛ، نغَمْ ندٜرْ کٛو طُمٜ طُمْ مَوْنِنَ اَللَّه بَرْکَ يٜىٰسُ اَلْمَسِيحُ؞ مَنْغُ اٜ لَامُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞ اٛنٛنْ ٻٜ نغِطُمِ، تٛع اٛنْ کَيْطِنْ دٛوْ تٛرَّ کَلُّکَ کٜٻُکَعٛنْ؞ کَ حٜٻُعٛنْ نغَمْ طُمْ فٛوندَعٛنْ؞ تٛع اٛنْ ݧُمُ غٛطُّمْ فِي کٜسُمْ حٜٻِيعٛنْ؞ اَمَّا نَنٜىٰ بٜلْطُمْ تٛ اٛنْ نجَرَ تٛرَّ اِرِ کَ اَلْمَسِيحُ يَرِ، نغَمْ تٛ اٛ وَرْتِي ندٜرْ مَنْغُ مَاکٛ نَنٛنْ بٜلْطُمْ نَاع سٜطَّ؞ اٛنْ بَرْکِطِنَاٻٜ، تٛ اٜ طُمْ حُطَعٛنْ نغَمْ اِنْدٜ اَلْمَسِيحُ، نغَمْ رُوحُ اَللَّه غٛودُطُمْ تٜدُّنغَلْ اٜ وٛنْدِ اٜ مٛوطٛنْ؞ اَمَّا تٛع غٛطّٛ ندٜرْ مٛوطٛنْ يَرَ تٛرَّ نغَمْ وَطُکِ وَرْحٛورٜ، کٛو نغُيْکَ، کٛو وَطُکِ کٛ حَلِّ، کٛو وَطُکِ کٛ وَطَاکَ؞ اَمَّا تٛ غٛطّٛ يَرِي تٛرَّ نغَمْ اٛ تٛکُّطٛ يٜىٰسُ، تٛو، تٛع اٛ نَنَ شٜمْتُطُمْ، سٜيْ نِ اٛ يٜتَّ اَللَّه نغَمْ اٛ نٛدِّرَامَ اِنْدٜ اَلْمَسِيحُ؞ نغَمْ شَرٜلْ وَطِي نغٜلْ طُمْ وَطَنْتَ يِمْٻٜ کِيتَ؞ ٻٜ طُمْ فُطَّنْتَ وَطَنْکِ کِيتَ بٛو وٛنِ يِمْٻٜ اَللَّه؞ تٛ دٛوْ مٜىٰطٜنْ اٜنٜنْ يِمْٻٜ اَللَّه طُمْ فُطِّرْتَ کِيتَ، تٛو، نٛ طُمْ وَرْتَنْتَ غَݧُٻٜ تٛکَّ حَبَرُ بٜلْطُمْ طُمْ اَللَّه؟ اَايَارٜ وِعِي، «تٛ اٜ طُمْ سَطِ اَادِلِعٜنْ کِسَ، تٛو، کٛ حٜٻَتَ ٻٜ کُلَتَا اَللَّه اٜ غٛودُٻٜ حَکّٜ؟» نغَمْ نٛنْ، فُو جَرٛوٻٜ تٛرَّ دٛوْ کٛ اَللَّه يِطِ، ٻٜ نغَطَ کٛ حَانِ؞ ٻٜ نغَطَ يٛنْکِيجِ مَٻّٜ ندٜرْ جُنْغٛ اَللَّه تَغُطٛ کٛو طُمٜ؞ کَنْکٛ اٛ کٜبِّنٛووٛ اَلْکَوَلْ مَاکٛ؞ اٜ مِ تٛرٛو مَوْٻٜ کَوْتَلْ تٛکُّٻٜ يٜىٰسُ غٛنْٻٜ ندٜرْ مٛوطٛنْ؞ مِنْ مَا مِ مَوْطٛ ندٜرْ تٛکُّٻٜ يٜىٰسُ، بَنْدِرَاوٛ مٛوطٛنْ، شٜيْدِيطٛ تٛرَّ کَ اَلْمَسِيحُ يَرِ، کٜٻَيْطٛ غٜطَلْ مُوطُمْ ندٜرْ مَنْغُ مَاکٛ تٛ اٛ وَرْتٛيِي؞ اٜ مِ تٛرٛوعٛنْ، ڤَامَنٜىٰ اٛرْندٜ اَللَّه ندٜ طُمْ تَمْبِنِعٛنْ؞ ڤَامَنٜىٰندٜ ندٜرْ بٜلْطُمْ ٻٜرْندٜ، نَاع بٛ دٛولٜ طُمْ وَطَتَعٛنْ، طٛنْمَا نَاع نغَمْ حٜٻُکِ شٜىٰدٜ، اَمَّا نغَمْ اٛنْ نغٛودِ يِدّٜ کُوغَلْ نغَلْ ندٜرْ ٻٜرْطٜ مٛوطٛنْ؞ تٛع اٛنْ کٛلُّ يِمْٻٜ ٻٜ اَللَّه تَمْبِنِعٛنْ لَامُ سٜمْبٜ، اَمَّا نغَرْتٜىٰ کٛ ٻٜ اٜکِّتٛتٛو تٛ مٛوطٛنْ؞ نغَمْ تٛ اَلْمَسِيحُ لَامِيطٛ وٛيْنَاٻٜ وَرْتٛيِي، اٛنْ کٜٻَيْ غِيفٛلْ مَنْغُ نغٛلْ حَا اَبَدَا؞ اٛنٛنْ سُکَاٻٜ، نغَطٜىٰ کٛ مَوْٻٜ کَوْتَلْ تٛکُّٻٜ يٜىٰسُ غٛنْٻٜ ندٜرْ مٛوطٛنْ مبِعِ؞ اٛنْ فُو نغَرْتٜىٰ لٜيْنٛوٻٜ کٛعٜ، مبَلِّندِرٜىٰ حَکُّندٜ مٛوطٛنْ؞ نغَمْ اَايَارٜ وِعِي، «اَللَّه وَݧِي غٛودُٻٜ مَنْغُ حٛورٜ، اَمَّا اٜ مٛ وَلَّ لٜسْنُٻٜ کٛعٜ؞» نغَمْ نٛنْ، لٜسْتِنٜىٰ کٛعٜ مٛوطٛنْ يٜىٰسٛ اَللَّه مٛ بَوْطٜ، نغَمْ اٛ وَطَ کٜٻٛنْ مَنْغُ اٜ شَرٜلْ نغٜلْ اٛ يِطِ؞ تَمْبِنَنٜىٰمٛ فُو کٛ وَنَّتَعٛنْ، نغَمْ اٜ مٛ فَامَنَعٛنْ؞ شُرٜىٰ کٛعٜ مٛوطٛنْ، نجٛوطٛوطٛنْ اٛنْ شِرْيِي؞ غَݧٛ مٛوطٛنْ شٜيْطَنْ اٜ مٛ وٛوسٛو بٛ سٜمْبِنْدُ ٻٜرْنُندُ اٜ مٛ طَٻِّتَ مٛ اٛ حَلْکَتَ؞ نغَݧٜىٰمٛ، ندَرٛوطٛنْ دٛوْ حٛولَاکِ يٜىٰسُ اٜ سٜمْبٜ؞ اٛنْ اَنْدِ بَنْدِرَاٻٜ مٛوطٛنْ فُو ندٜرْ دُونِيَارُ اٜ نجَرَ اِرِ کَنْ طٛنْ تٛرَّ؞ ندٜنْ غَطَ اٛنْ نجَرِي تٛرَّ شَرٜلْ سٜطَّ، اَللَّه غٛودُطٛ يِدّٜ فُو، نٛدُّطٛعٛنْ نغَمْ کٜٻٛنْ غٜطَلْ ندٜرْ تٜدُّنغَلْ مَاکٛ تَبٛتٛونغَلْ بَرْکَ اَلْمَسِيحُ، کَنْکٛ اٜ حٛورٜ مَاکٛ اٛ وَرْتِرَيْعٛنْ کٜىٰوُٻٜ، اٛ جٛطِّنَعٛنْ، اٛ سٜمْبِطِنَعٛنْ بٛ تَفَارٜ؞ لَامُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞ سِلْبَانُسْ وَلِّيَمْ مبِنْدَنْمِعٛنْ طٜرٜوٛلْ نغٛعٛلْ ڤَمَرٛلْ؞ اٜ يِيکِ اَمْ اٛ تٛکُّطٛ يٜىٰسُ کٛولٜتٜىٰطٛ؞ اٜ مِ يِطِ مِ سٜمْبِطِنَعٛنْ مِ وِعَعٛنْ طُعُمْ وٛنِ شَاحُ اَللَّه طُمْ غٛونغَ؞ ندَرٜىٰ دٛوْ مَاجُمْ اٜ غٛونغَ؞ کَوْتَلْ تٛکُّٻٜ يٜىٰسُ وٛنْٻٜ طٛعٛ بَابِيلَ، ٻٜ اَللَّه سُٻِ نٛ اٛ سُٻِرِعٛنْ، اٜ ٻٜ کٛوْنَعٛنْ؞ مَرْکُسْ مَا، ٻِطّٛ اَمْ ندٜرْ تٛکُّکِ يٜىٰسُ، اٜ حٛوْنَعٛنْ؞ کٛوْنِرٜىٰ حَکُّندٜ مٛوطٛنْ کٛوْنٛلْ يِدّٜ؞ اَللَّه حٛکَّعٛنْ جَمْ اٛنٛنْ تٛکُّٻٜ اَلْمَسِيحُ فُو؞ مِنْ، سِيمَنْ بِيتُرُسْ، وِنْدِ طٜرٜوٛلْ نغٛعٛلْ؞ مِ مَشُّطٛ يٜىٰسُ اَلْمَسِيحُ لِلَاطٛ مَاکٛ؞ اٜ مِ وِنْدَنَ کٜٻُٻٜ حٛولَارٜ بٛنْدٜ بٛ ندٜ اَمِنْ لَاوٛلْ اَادِلَاکُ اَللَّه مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ: اَللَّه ٻٜيْدَ بَرْکِطِنْکِعٛنْ حٛکَّعٛنْ جَمْ لَاوٛلْ اَنْدُکِمٛ، کَنْکٛ اٜ يٜىٰسُ جٛومِرَاوٛ مٜىٰطٜنْ؞ اَللَّه ندٜرْ بَوْطٜ مُوطُمْ حٛکِّيعٜنْ فُو کٛ حَانِ نغَمْ وَطُکِ جٛنْدٜ کُلٛلْ مَاکٛ؞ اٛ حٛکِّيعٜنْطُمْ نغَمْ اٜنْ اَنْدِ يٜىٰسُ اَلْمَسِيحُ نٛدُّطٛعٜنْ بَرْکَ تٜدُّنغَلْ مَاکٛ اٜ نغِکُّ مَاکٛ بٛطُّمْ؞ بَرْکَ فُو فِي طُعُمْ اَللَّه وَطَنِيعٜنْ اَلْکَوَلْ مَنْغَلْ بٛنْغَلْ، نغَمْ کٜٻٜنْ نغِکُّ اِرِ طُمْ مَاکٛ، ندٜنْ کٜٻٜنْ ندَطٜنْ حَلّٜىٰندٜ غٛنْدٜ ندٜرْ دُونِيَارُ ندٜ سُونٛ کَلُّنغٛ وَدَّتَ؞ نغَمْ نٛنْ، نغَطٜىٰ کٛ مبَاوٛتٛنْ وَطُکِ ٻٜيْدَنٛنْ حٛولَارٜ مٛوطٛنْ نغِکُّ بٛطُّمْ، ٻٜيْدَنٛنْ نغِکُّ طُمْ اَنْدَلْ؞ ندٜنْ ٻٜيْدَنٜىٰ اَنْدَلْ مٛوطٛنْ سُرُکِ حٛورٜ، ٻٜيْدَنٛنْ سُرُکِ حٛورٜ مٛوطٛنْ مُݧَلْ، ٻٜيْدَنٛنْ مُݧَلْ مٛوطٛنْ کُلٛلْ اَللَّه؞ کَدِمَا ٻٜيْدَنٜىٰ کُلٛلْ اَللَّه يِدّٜ تٛکُّٻٜ يٜىٰسُ، ندٜنْ ٻٜيْدَنٛنْ يِدّٜ ندٜنْ يِدّٜ کٛو مٛيٜ؞ تٛ اٛنْ نغٛودِ اِرِ طُعُمْ نغِکُّ نَاع سٜطَّ، طُمْ حَطَيْعٛنْ نغَرْتٛنْ ٻٜ ٻٜرْطٜ بَاتُطٜ تَمْڤُٻٜ ندٜرْ اَنْدُکِ يٜىٰسُ اَلْمَسِيحُ جٛومِرَاوٛ مٜىٰطٜنْ؞ نغَمْ فُو دُلُّطٛ اِرِ نغِکُّ طُمْ طٛنْ وَرْتِي بُمْطٛ اٛ يِعَتَا غٛطُّمْ دَغَ تٛ وٛطِّ، ندٜنْ اٛ يٜجِّتِي اٛ لٛوتَامَ دَغَ حَکّٜ مَاکٛ طُمْ ندٜنّٛ؞ نغَمْ نٛنْ، بَنْدِرَاٻٜ، نغَطٜىٰ کٛ مبَاوٛتٛنْ وَطُکِ تَبِّتِنٛنْ نٛدّٛلْ اٜ شُٻٛلْ نغٛلْ اَللَّه وَطَنِعٛنْ؞ تٛ اٛنْ نغَطِي نٛنْ، اٛنْ نجَنَتَا؞ نٛنْ طُمْ جَٻّٛرْتٛوعٛنْ جَٻَّاکِ بٛطْکِ ندٜرْ لَامُ تَبِتَيْطُمْ طُمْ جٛومِرَاوٛ مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ؞ نغَمْ نٛنْ، مِ وَطَيْ کَ سِفْتٛرَنْکِعٛنْ فُو فِي طُعُمْ، کٛو ندٜ اٛنْ نجَادَکٜ اٛنْ اَنْدِيطُمْ، اٛنْ شٜمْبِطِي ندٜرْ غٛونغَ کَ نجَٻُطٛنْ؞ اٜ يِيکِ اَمْ اٜ حَانِ، تٛ نِ اٜ مِ وٛودِ يٛنْکِ، مِ وَطَ کَ سِفْتٛرَنْکِعٛنْطُمْ؞ نغَمْ اٜ مِ اَنْدِ بَلْطٜ اَمْ ندٜرْ دُونِيَارُ ٻَدَکٜ ندٜعَ، نٛنْ نٛ يٜىٰسُ اَلْمَسِيحُ جٛومِرَاوٛ مٜىٰطٜنْ حٛلِّيَمْ؞ مِ وَطَيْ کٛ مبَاوَيْمِ وَطُکِ مِ يِعَ اٛنْ نجٛغَکٜ فِي طُعُمْ ندٜرْ ٻٜرْطٜ مٛوطٛنْ کٛو نغٜلٜ شَرٜلْ غَطَ مِ اَلِي دُونِيَارُ ندُعُ؞ نغَمْ شَرٜلْ کٛ مِنْ کٛکِّعٛنْ حَبَرُ بَوْطٜ يٜىٰسُ اَلْمَسِيحُ جٛومِرَاوٛ مٜىٰطٜنْ اٜ غَرٛلْ مَاکٛ، نَاع حَبَرُوجِ طِ طُمْ سِرْيِي اٜ پٛيْرٜ مِنْ تٛکِّ؞ اَمَّا مِنْ نغِعِي مَنْغُ مَاکٛ اٜ غِتٜ اَمِنْ؞ نغَمْ شَرٜلْ نغٜلْ اَللَّه ݧَاکٛ مٛ دٛوْ حٛکِّمٛ مَنْغُ اٜ تٜدُّنغَلْ، حٛنٛنْدٜ پِوٛيِي تٛنْ دٛوْ دَغَ تٛ اَللَّه اٛنْ جٛومُ مَنْغُ ندٜ وِعِ، «اٛعٛ وٛنِ ٻِطّٛ اَمْ مٛ نغِطُمِ؞ اٜ مِ نَنَ بٜلْطُمْ مَاکٛ نَاع سٜطَّ؞» مِنْ نَنِي حٛنٛنْدٜ ندٜنْ دَغَ دٛوْ، شَرٜلْ نغٜلْ مِنْ نغٛنْدِ اٜ مَاکٛ دٛوْ حٛشّٜىٰرٜ شٜنِيندٜ؞ فُو فِي طُعُمْ وَطِي اٜنْ ٻٜيْدِي تَبِّتِنْکِ کٛ اَنَّبٛعٜنْ مبِعِ طُمْ غٛونغَ؞ اٛنْ نغَطَيْ بٛطُّمْ تٛ اٛنْ نغَطِي حَکِّيلٛ دٛوْ اَنَّبَاکُ طُمْ؞ نغَمْ اَنَّبَاکُ طُمْ اٜ طُمْ نَنْدِ اٜ فِتِلَارُ يٜيْنٛتٛوندُ ندٜرْ ݧِوْرٜ حَا وٜىٰتَ، جَيْنغٛلْ حٛودٜرٜ سُبَکَ يٜيْنٛو ندٜرْ ٻٜرْطٜ مٛوطٛنْ؞ اَمَّا اَرَنْدٜ اٜ حَانِ ڤَامٛنْ وِيکِ، وَلَا اَنَّبَاکُ غٛنْطُمْ ندٜرْ دٜفْتٜرٜ شٜنِيندٜ طُمْ اُمْ وَاوَتَ وُرْتِنْکِ مَعَنَ مَاجُمْ اٜ فَامُ نٜطّٛ؞ نغَمْ وَلَا اَنَّبَاکُ مٜىٰطُطُمْ وَرْکِ دَغَ ݧُمٛلْ نٜطّٛ؞ اَمَّا رُوحُ اَللَّه حٛلِّٻٜ ٻٜ مبِعَ کٛ اَللَّه وِعِٻٜ؞ اَمَّا ندٜنّٛ اَنَّبٛعٜنْ فٜوْرٜ نَتِّي ندٜرْ يِمْٻٜ جٛومِرَاوٛ؞ نٛنْ مٛودِٻّٜ فٜوْرٜ نَتِّرْتَ ندٜرْ مٛوطٛنْ؞ ٻٜ نغَدَّيْ وٛنْغٛلْ اٜکِّتِنٛلْ ندٜرْ مٛوطٛنْ اٜ سُوطٜ ڤٛوطَنَيْنغٛلْعٛنْ حَلْکٜرٜ، حَا مَا ٻٜ مبِعَ ٻٜ اَنْدَا جٛومِرَاوٛ رِمْطِنْطٛٻٜ؞ نٛنْ ٻٜ ڤٛوطِرَنْتَ کٛعٜ مَٻّٜ حَلْکٜرٜ جَوْندٜ؞ يِمْٻٜ طُطْٻٜ تٛکَّيْ نغِکُّ مَٻّٜ کَلُّطُمْ؞ نغَمْ کٛ ٻٜ نغَطَتَ طُمْ مٜتَيْ حَالَاجِ کَلُّطِ دٛوْ لَاوٛلْ غٛونغَ؞ کَمْٻٜ شٜىٰدٜ ٻٜ نغِطِ؞ نغَمْ نٛنْ ٻٜ مَجِّنَيْعٛنْ اٜ مٜتٜمٜتٜىٰجِ فٜوْرٜ نغَمْ ٻٜيْدَارِ کٛعٜ مَٻّٜ؞ اَمَّا دَغَ ندٜنّٛ طُمْ سِرْيَکٜ تَپَنْکِٻٜ کِيتَ، حَلْکٜرٜ مَٻّٜ اٜ طٛنْ حٜطِيٻٜ؞ کٛو مَلَاعِکَعٜنْ، اَللَّه اَلَايِٻٜ ندٜ ٻٜ نغَطِ حَکّٜ، اَمَّا اٛ وَطِٻٜ ندٜرْ وُرٛ حِيتٜ ندٜرْ غَيْطٜ لُغُّطٜ غٛودُطٜ ݧِوْرٜ ٻَلٜىٰرٜ نغَمْ طُمْ سُرَٻٜ نَا ݧَلْندٜ کِيتَ؞ ندٜنْ اٜ جَامَنُ نُحُ، اَللَّه اَلَايِ يِمْٻٜ ٻٜ کُلَتَامٛ، اَمَّا اٛ حَلْکِرِٻٜ ندِيَمْ تُفَانَ؞ نُحُ غَطٛووٛ وَعَجُ اَادِلَاکُ تَنْ اٛ حِسْنِ حَوْتِ اٜ وٛٻّٜ نجٛوٜىٰطِطٛ؞ اَللَّه بٛو تَپَنِي غَرِيجٜ سٛدٛمْ اٜ غٛمٛورَ کِيتَ حَلْکُکِ؞ اٛ حَلْکِرِيطٜ حِيتٜ، اٛ وَرْتِرِي نٛنْ مِسَالُ کٛ اٛ وَطَنْتَ يِمْٻٜ ٻٜ کُلَتَامٛ؞ اٛ حِسْنِي لُوتُ اَادِلِيجٛ غَنُّطٛ اٜ کُوطٜ کَلُّطٜ طٜ يِمْٻٜ کَلُّٻٜ نغَطَتَ؞ لُوتُ اٛ اَادِلِيجٛ، اٜ مٛ جٛوطِي ندٜرْ مَٻّٜ؞ کٛو ندٜيٜ اٜ مٛ وَنِّ نغَمْ اٜ مٛ يِعَ کُوطٜ کَلُّطٜ طٜ ٻٜ نغَطَتَ؞ فُو فِي طُعُمْ حٛلِّيعٜنْ جٛومِرَاوٛ اٜ اَنْدِ نٛ حِسْنِرْتَ کُلٛوٻٜمٛ دَغَ تٛرَّاجِ، اٜ نٛ اٛ وَطَتَ کَ تٛرِّرْکِ کَلُّٻٜ حَا اٛ حِيتٛوٻٜ ݧَلْندٜ جَانغٛ؞ تٛکُّٻٜ سُونٛ ٻَلِّ مَٻّٜ غَݧُٻٜ لَامُ، کَمْٻٜ اٛ ٻُرَتَ تَپَنْکِ کِيتَ کَلُّکَ؞ ٻٜنْ طٛنْ مٛودِٻّٜ فٜوْرٜ ٻٜ شٜمْتَتَا کٛو سٜطَّ، ٻٜ مَوْنِنٛوٻٜ کٛعٜ مَٻّٜ؞ ٻٜ کُلَتَا مٜتُکِ حَالَاجِ کَلُّطِ دٛوْ غٛودُٻٜ تٜدُّنغَلْ غٛنْٻٜ دٛوْ؞ اَمَّا مَلَاعِکَعٜنْ، کٛو ندٜ ٻٜ ٻُرِي ٻٜعٜ مٛودِٻّٜ فٜوْرٜ بَوْطٜ اٜ لَامُ، ٻٜ نغُلِّرْتَا ٻٜعٜ غٛودُٻٜ تٜدُّنغَلْ حَالَاجِ کَلُّطِ يٜىٰسٛ جٛومِرَاوٛ؞ اَمَّا مٛودِٻّٜ فٜوْرٜ ٻٜعٜ اٜ ٻٜ مٜتَ حَالَاجِ کَلُّطِ دٛوْ کٛو طُمٜ طُمْ ٻٜ ڤَامَايِ؞ اٜ ٻٜ نغٛودِ نغِکُّ بٛ مَرْلٜ لَدّٜ دِمَاطٜ نغَمْ نَنْغٜىٰ مبَرٜىٰ؞ ٻٜ تٛکّٛوٻٜ کٛ سُونٛ ٻَلِّ مَٻّٜ نغِطِ؞ طُمْ حَلْکَيْٻٜ نٛ طُمْ حَلْکِرْتَ مَرْلٜ لَدّٜ؞ طُمْ وَاتَنَيْٻٜ اٜ تٛرَّ نغَمْ ٻٜ تٛرِّي وٛٻّٜ؞ کٛ وٜلْنَنْتَٻٜ ٻٜرْندٜ وٛنِ ٻٜ نغَطَ کٛو طُمٜ کٛ ٻَلِّ مَٻّٜ نغِطِ شَکَ ݧَلَوْمَ؞ کٛو نغٜلٜ شَرٜلْ نغٜلْ ٻٜ ݧَمْدَتَ ݧَمْندُ اٜ مٛوطٛنْ اٜ ٻٜ نغَطَ کٛ ٻٜ نغِطِ وَطُکِ، اٜ ٻٜ شٜمْتِنَعٛنْ؞ کٛو ندٜيٜ طَٻُّتُکِ رٜوْٻٜ وٛنِ ݧُمٛ مَٻّٜ؞ ٻٜ شٛمَتَا وَطُکِ حَکّٜ؞ اٜ ٻٜ مَجِّنَ ٻٜ شٜمْبِطَا ندٜرْ تٛکُّکِ يٜىٰسُ؞ ٻٜ اٜکِّتِنِ ٻٜرْطٜ مَٻّٜ يِدّٜ شٜىٰدٜ؞ اَللَّه بٛو لَانِيٻٜ؞ ٻٜ اَلِي لَاوٛلْ غٛونغَ، ٻٜ مَجِّي، ٻٜ تٛکِّي لَاوٛلْ بَلَعَمُ، ٻِطّٛ بٜىٰيٛرْ، غِطّٛ وَطُکِ کٛ وٛوطَا نغَمْ حٜٻُکِ شٜىٰدٜ؞ اَمَّا طُمْ حَٻَنِيمٛ دٛوْ کٛ وٛوطَا طُمْ اٛ وَطَتَ؞ مبَبَّ مَاکٛ مٜتَنِيمٛ اٜ حٛنٛنْدٜ اِرِ ندٜ نٜطّٛ، نغَ حَطِمٛ وَطُکِ حَاݝٛورٜ؞ ٻٜنْ طٛنْ يِمْٻٜ اٜ ٻٜ نَنْدِ اٜ شَنْطِ جٛورُطِ، اٜ ٻٜ نَنْدِ اٜ دُولٜ طٜ حٜنْدُ حٛشِّ؞ اَللَّه سِرْيَنَکٜٻٜ تٛ ٻٜ نجٛوطٛتٛو ندٜرْ ݧِوْرٜ کَلُّندٜ، نغَمْ اٜ ٻٜ مَوْنِنَ کٛعٜ مَٻّٜ اٜ مٜتٜمٜتٜىٰجِ مٜىٰرٜىٰجِ؞ اٜ ٻٜ کُوتِرَ سُونٛ ٻَلِّ نغَمْ ٻٜ ڤٛوطٛيَ حَکِّيلٛ يِمْٻٜ سٛٻْتِيٻٜ کٛ نٜىٰٻَايِ دَغَ ندٜرْ يِمْٻٜ جٛوطِيٻٜ ندٜرْ حَکّٜ؞ اٜ ٻٜ نغَطَنَٻٜ اَلْکَوَلْ رِمْطِنٜىٰکِ، اَمَّا کَمْٻٜ اٜ کٛعٜ مَٻّٜ ٻٜ مَشُّٻٜ حَکّٜ، نغَمْ نٜطّٛ اٛ مَشُّطٛ کٛو طُمٜ کٜٻُطُمْ جَالٛرْغَلْ دٛوْ مَاکٛ؞ تٛ يِمْٻٜ کِسِي دَغَ کُوطٜ کَلُّطٜ طٜ دُونِيَارُ نغَمْ ٻٜ اَنْدِي يٜىٰسُ اَلْمَسِيحُ جٛومِرَاوٛ مٜىٰطٜنْ اٜ کِسْنٛووٛ مٜىٰطٜنْ، ندٜنْ دَغَ غَطَ ٻٜ شٛعِّي ٻٜ نَتِّ اِرِ کُوطٜ کَلُّطٜ طٜنْ طٛنْ، حَا طٜ نجَرِي کٛعٜ مَٻّٜ، رٜعِرْدٜ جٛنْدٜ مَٻّٜ ٻُرَيْ فُطّٛودٜ مَٻّٜ حَلُّکِ؞ نغَمْ طُمْ ٻُرَنِيٻٜ دَا ٻٜ مٜىٰطَايِ اَنْدُکِ لَاوٛلْ اَادِلَاکُ اٜ دٛوْ غَطَ ٻٜ اَنْدِينغٛلْ ندٜنْ ٻٜ شٛعِّي غَطَ، ٻٜ اَلِ تٛکُّکِ دٛوکَ طُمْ طٛنْ شٜنِيطُمْ طُمْ اُمْ حٛکِّٻٜ؞ کٛ ٻٜ نغَطِ طُمْ يَادِي اٜ حَالَ بِيکَ، «کُتِيرُ تُوتِي سٛعَّکٜ تَحِ تُرّٜ مُوطُمْ،» ندٜنْ اٜ حَالَ بِيکَ، «اَلَدٜىٰرُ ندُ طُمْ لٛوتِ سٛعَّکٜ ندٜرْ لٛوڤٜ نٜفْنِيطٜ؞» اٛنٛنْ ٻٜ نغِطُمِ، نغٛعٛلْ وٛنِ طٜرٜوٛلْ اَمْ طِطَٻٛلْ نغٛلْ مبِنْدَنْمِعٛنْ؞ ندٜرْ طٜرٜىٰجِ اَمْ طِ فُو طِطِ مِ سِفْتٛرَنِيعٛنْ کٛ اَنْدُطٛنْ نغَمْ ݧُمٛوجِ مٛوطٛنْ نغَرْتَ لَٻْطِ؞ اٜ مِ يِطِ شِفْتٛرٛنْ اٜ کٛ اَنَّبٛعٜنْ اَللَّه مبِعُنٛو ندٜنّٛ، اٜ کٛ جٛومِرَاوٛ مٜىٰطٜنْ کِسْنٛووٛ مٜىٰطٜنْ وِعِ طُمْ وَطَ دَغَ کٛنْدُطٜ لِلَاٻٜ مَاکٛ ٻٜ اٛ لِلٛيِ تٛ مٛوطٛنْ؞ اَرَنْدٜ دٛولٜ اَنْدٛنْ طُعُمْ، ندٜرْ بَلْطٜ رٜعُکِ دُونِيَارُ وٛٻّٜ يِمْٻٜ نغَرَيْ نجُکِّتَعٛنْ، تٛکّٛوٻٜ سُونٛ مَٻّٜ کَلُّنغٛ؞ اٜ ٻٜ مبِعَ، «نَاع يٜىٰسُ وَطَنِيعٛنْ اَلْکَوَلْ وِيکِ اٛ وَرْتَيْ؟ تٛو، تٛ اٛ وٛنِ؟ نغَمْ دَغَ شَرٜلْ نغٜلْ مَامَعٜنْ مٜىٰطٜنْ مَايِ، کٛو طُمٜ اٜ يَحَ نٛ وٛنْتِندِرِ دَغَ فُطّٛودٜ دُونِيَارُ؞» وِعٛوٻٜ نٛنْ اٜ مٜىٰرٜ ٻٜ نغَݧِ فَامُکِ وِيکِ ندٜنّٛ اَللَّه تَغِرِي دٛوْ اٜ وٛلْدٜ مُوطُمْ؞ اٛ وُرْتِنِ لٜيْدِ دَغَ ندِيَمْ، اٛ فِلْنِرِيندِ ندِيَمْ؞ اٜ ندِيَمْ طَمْ اٛ مَٻِّرِ دُونِيَارُ ندٜنّٛ، اٛ حَلْکِندُ؞ اَمَّا وٛلْدٜ مَاکٛ جٛغِي دٛوْ اٜ لٜيْ طُمْ نغِعٜتٜنْ جٛونِ نغَمْ طُمْ حَلْکِرٜىٰ حِيتٜ؞ اٜ مٛ جٛغِيطُمْ حَا يَاکِ ݧَلْندٜ ندٜ اٛ وَطَنْتَ ٻٜ کُلَتَامٛ کِيتَ اٛ حَلْکَٻٜ؞ اَمَّا اٛنٛنْ حِغٛوٻٜ اَمْ ٻٜ نغِطُمِ، تٛع اٛنْ نغٜجُّتُ فِي غٛعٛ، کَنْجُمْ وٛنِ ݧَلْندٜ غٛعٛ تٛ جٛومِرَاوٛ بٛ دُوٻِ 1,000 وٛنِ، ندٜنْ دُوٻِ 1,000 بٛ ݧَلْندٜ غٛعٛ وٛنِ؞ وٛٻّٜ اٜ مبِعَ جٛومِرَاوٛ نٜىٰٻَيْ کٛ حٜبِّنَ اَلْکَوَلْ مُوطُمْ؞ نَاع طُمْ نٛنْ، اَمَّا مُݧَلْ اٛ وَادَتَ اٜ مٛوطٛنْ، نغَمْ اٛ يِطَا کٛو مٛيٜ حَلْکَ، سٜيْ نِ کٛو مٛيٜ اَلَ وَطُکِ حَکّٜ، تُوبَ؞ اَمَّا ݧَلْندٜ جٛومِرَاوٛ وَرَيْ بٛ غُجّٛ؞ اٜ شَرٜلْ نغٜلْ دٛوْ مَجِّتَيْ اٜ حٛولٛ شٜمْبِنْغٛ؞ ندٜنْ فُو کٛ وٛنِ ندٜرْ مَاجُمْ حَلْکِرَيْ اٜ حِيتٜ؞ دُونِيَارُ اٜ کٛ وٛنِ ندٜرْ مَيْرُ طُمْ مَجِّتَيْ؞ ندٜ کٛو طُمٜ حَلْکِرَيْ نِينِ، اِرِ ٻٜيٜ يِمْٻٜ حَانِ نغَرْتٛنْ؟ اٜ حَانِ نغَطٛنْ جٛنْدٜ شٜنِيندٜ اٜ جٛنْدٜ کُلٛلْ اَللَّه، اٛنْ کٜطٛو وَرْکِ ݧَلْندٜ اَللَّه؞ نغَطٜىٰ کٛ مبَاوٛتٛنْ وَطُکِ نغَطٛنْ ݧَلْندٜ ندٜنْ وَرَ جَوْطُمْ؞ ندٜرْ ݧَلْندٜ ندٜنْ طُمْ حَلْکِرَيْ دٛوْ اٜ حِيتٜ، کٛو طُمٜ کٛ حٛرِي طُمْ حَلْکِرَيْ حِيتٜ؞ اَمَّا اٜنٜنْ اٜنْ کٜطِي اَلْکَوَلْ اَللَّه، وَاتٛ دٛوْ کٜسُمْ اٜ لٜيْدِ کٜيْرِ تٛ اَادِلَاکُ جٛوطِي؞ نغَمْ نٛنْ، اٛنٛنْ ٻٜ نغِطُمِ، ندٜ اٛنْ کٜطِي ندٜنْ طٛنْ ݧَلْندٜ، نغَطٜىٰ کٛ مبَاوٛتٛنْ وَطُکِ نجٛوطٛوطٛنْ جٛنْدٜ لَمْندٜ اٜ اَادِلَاکُ يٜىٰسٛ اَللَّه اٜ ٻٜرْندٜ وَلْتِيندٜ؞ تٛع اٛنْ نغٜجُّتُ، جٛومِرَاوٛ اٜ مُݧَ نغَمْ اٜ مٛ يِطِ يِمْٻٜ کِسَ؞ نٛنْ مَا حِغٛ مٜىٰطٜنْ بُلُسْ مٛ نغِطّٜنْ وِنْدَنِعٛنْ ندٜرْ فَامُ طُمْ اَللَّه حٛکِّمٛ؞ کٛو ندٜيٜ اٜ مٛ مٜتَ دٛوْ مَاجُمْ ندٜرْ طٜرٜىٰجِ مَاکٛ؞ ندٜرْ طٜرٜىٰجِ طِنْ اٜ وٛودِ فِي شَطُّمْ فَامُکِ؞ وٛٻّٜ ٻٜ نغَلَا فَامُ، ٻٜ ٻٜرْطٜ طٜ ندَرَاکِ تٛ غٛعٛ اٜ نغَيْلِتَ مَعَنَ مَاجُمْ نٛنْ نٛ ٻٜ نغَيْلِتِرْتَ غٛطّٜ اَايَاجٜ ندٜرْ دٜفْتٜرٜ شٜنِيندٜ؞ وَطُکِ نٛنْ اٜ فٛوطَنَٻٜ حَلْکٜرٜ؞ نغَمْ نٛنْ، اٛنٛنْ ٻٜ نغِطُمِ، ندٜ اٛنْ اَنْدِ فِي طُعُمْ، ڤَامَنٜىٰ يِمْٻٜ کَلُّٻٜ، تٛع اٜکِّتِنٛلْ فٜوْرٜ مَٻّٜ حٛشَّ حَکِّيلٛ مٛوطٛنْ نجَنٛنْ دَغَ دٛوْ وِغٜىٰرٜ شٜمْبِنْدٜ تٛ ندَرِيطٛنْ؞ اَمَّا ٻٜيْدٜىٰ يِدّٜ اٜ يُرْمٜىٰندٜ اٜ اَنْدُکِ جٛومِرَاوٛ مٜىٰطٜنْ کِسْنٛووٛ مٜىٰطٜنْ يٜىٰسُ اَلْمَسِيحُ؞ تٜدُّنغَلْ تَبِّتَ تٛ مَاکٛ جٛونِ اٜ حَا اَبَدَا! اَامِنْ؞ اٜ مِنْ مبِنْدَنَعٛنْ حَبَرُ غٛطّٛ بِعٜتٜىٰطٛ وٛلْدٜ کٛکَّيْندٜ يٛنْکِ؞ کٛ دُونِيَارُ تَغٜىٰ اٜ مٛ طٛنْ؞ مِنْ نَنِيمٛ، مِنْ نغِعِيمٛ اٜ غِتٜ اَمِنْ؞ مِنْ ندَارِيمٛ، مِنْ مٜىٰمِيمٛ اٜ جُوطٜ اَمِنْ؞ اٛنْ طٛنْ کٛکّٛووٛ يٛنْکِ اٛنْ، طُمْ وَنْغِنَنِيمِنْمٛ، مِنْ نغِعِمٛ؞ دٛوْ مَاکٛ مِنْ کٛکَّتَ شٜيْدَ، طٛنْمَا اٜ مِنْ نغَعَجِنَنَعٛنْ وِيکِ کَنْکٛ وٛنِ مٛ يٛنْکِ کِ رٜعَتَا؞ دَغَ ندٜنّٛ اٜ مٛ وٛنْدِ اٜ ݧَاکٛ مٛ دٛوْ، ندٜنْ طُمْ وَنْغِنَنِيمِنْمٛ؞ اٜ مِنْ نغَعَجِنَنَعٛنْ کٛ مِنْ نَنِ اٜ کٛ مِنْ نغِعِ نغَمْ کَوْتٜنْ سُمْڤٛ؞ سُمْڤٛ مٜىٰطٜنْ وٛنِ سُمْڤٛوتِرْکِ اٜ ݧَاکٛ مٜىٰطٜنْ مٛ دٛوْ اٜ ٻِطّٛ مَاکٛ يٜىٰسُ اَلْمَسِيحُ؞ اٜ مِنْ مبِنْدٛنٛيَعٛنْ طُعُمْ نغَمْ نَنٜنْ بٜلْطُمْ نَاع سٜطَّ؞ طُعُمْ حَبَرُ وٛنِ طُمْ مِنْ نَنِ تٛ يٜىٰسُ اَلْمَسِيحُ مِنْ نغَعَجِنَنِعٛنْطُمْ وِيکِ، اَللَّه اٛ جَيْنغٛلْ، ݧِوْرٜ وَلَا تٛ مَاکٛ کٛو سٜطَّ؞ تٛ اٜنْ مبِعِي اٜنْ شُمْڤٛوتِرَ اٜ اَللَّه، اَمَّا اٜنْ نجٛوطِي ندٜرْ ݧِوْرٜ، تٛو، اٜنْ ڤٜوِي، اٜنْ تٛکَّتَا غٛونغَ؞ اَمَّا تٛ اٜنْ نجٛوطَکٜ ندٜرْ جَيْنغٛلْ نٛنْ نٛ اَللَّه جٛوطٛرِي ندٜرْ جَيْنغٛلْ، اٜنْ شُمْڤٛوتِرَ حَکُّندٜ مٜىٰطٜنْ وٛنْ طٛنْ؞ طٛنْمَا پِيپَمْ يٜىٰسُ ٻِطّٛ مَاکٛ اٜ لٛوتَنَعٜنْ حَکّٜىٰجِ فُو؞ تٛ اٜنْ مبِعِي اٜنْ نغَلَا حَکّٜ، اٜنْ پٛيْرَ کٛعٜ مٜىٰطٜنْ وٛنْ طٛنْ، ندٜنْ غٛونغَ وَلَا ندٜرْ ٻٜرْطٜ مٜىٰطٜنْ؞ اَمَّا تٛ اٜنْ مبِعِي اَللَّه حَکّٜ طُمْ نغَطُطٜنْ، اٛ يَافَنْتٛعٜنْ حَکّٜ مٜىٰطٜنْ، اٛ لٛوتَعٜنْ دَغَ کٛ وٛوطَا طُمْ نغَطُطٜنْ، نغَمْ کَنْکٛ اٛ کٜبِّنٛووٛ اَلْکَوَلْ، اٜ مٛ وٛودِ اَادِلَاکُ؞ تٛ اٜنْ مبِعِي اٜنْ نغَطَايِ حَکّٜ، اٜنْ نغَرْتِرِيمٛ ڤٜوٛووٛ وٛنْ طٛنْ، ندٜنْ وٛلْدٜ مَاکٛ وَلَا ندٜرْ ٻٜرْطٜ مٜىٰطٜنْ؞ اٛنٛنْ ٻِٻّٜ اَمْ، اٜ مِ وِنْدَنَعٛنْ طُعُمْ نغَمْ تٛع نغَطٛنْ حَکّٜ؞ اَمَّا تٛ غٛطّٛ وَطِي حَکّٜ، اٜنْ نغٛودِ تٛرٛتٛوطٛ ݧَاکٛ مٛ دٛوْ نغَمْ مٜىٰطٜنْ؞ کَنْکٛ وٛنِ يٜىٰسُ اَلْمَسِيحُ اَادِلِيجٛ؞ کَنْکٛ وٛنِ مٛ طُمْ سَکِّ نغَمْ يَافَاکِ حَکّٜ مٜىٰطٜنْ؞ نَاع حَکّٜ مٜىٰطٜنْ تَنْ، اَمَّا حَا اٜ حَکّٜ يِمْٻٜ دُونِيَارُ فُو؞ تٛ اٜنْ نغَطَ کٛ اَللَّه وِعِ نغَطٜنْ، اٜ حٛلَّ اٜنْ تَبِّتِنِي اٜنْ اَنْدِمٛ وٛنْ طٛنْ؞ فُو بِيطٛ اٜ اَنْدِ اَللَّه، اَمَّا اٛ تٛکَّايِ کٛ اَللَّه وِعِ، تٛو، اٛ ڤٜوٛووٛ، غٛونغَ وَلَا ندٜرْ ٻٜرْندٜ مَاکٛ؞ اَمَّا فُو تٛکُّطٛ وٛلْدٜ اَللَّه، تٛو، اٜ مٛ يِطِ اَللَّه اٜ غٛونغَ؞ نٛنْ تَبِّتِنَنْتَعٜنْ اٜنْ شُمْڤٛوتِرَ اٜ اَللَّه؞ فُو بِيطٛ اٜ سُمْڤٛوتِرَ اٜ اَللَّه، حَانِي اٛ جٛوطٛرٛو نٛ يٜىٰسُ اَلْمَسِيحُ جٛوطٛرِي؞ حِغٛوٻٜ اَمْ غِطَاٻٜ، نَاع طُمْ غٛطُّمْ دٛوکَ کٜسُمْ مبِنْدَنَيْمِعٛنْ، اَمَّا طُمْ دٛوکَ کِيطُمْ طُمْ نغٛودُنٛوطٛنْ دَغَ اَرَنْدٜ؞ دٛوکَ کِيطُمْ طُمْ طٛنْ وٛنِ وٛلْدٜ ندٜ نَنُنٛوطٛنْ؞ فُو اٜ نٛنْ، اٜ مِ وِنْدَنَعٛنْ دٛوکَ کٜسُمْ، جٛنْدٜ اَلْمَسِيحُ اٜ جٛنْدٜ مٛوطٛنْ حٛلِّي طُمْ غٛونغَ، نغَمْ ݧِوْرٜ اٜ دِلَّ، جَيْنغٛلْ غٛونغَوٛلْ يَادَکٜ يٜيْنَکٜ؞ فُو بِيطٛ ندٜرْ جَيْنغٛلْ وٛنِ، اَمَّا اٜ مٛ وَݧَ بَنْدِرَاوٛ مَاکٛ، تٛو، حَا جٛونِ ندٜرْ ݧِوْرٜ اٛ وٛنِ؞ اَمَّا فُو غِطّٛ بَنْدِرَاوٛ مُوطُمْ، ندٜرْ جَيْنغٛلْ جٛوطِي، اٛ وَلَا غٛطُّمْ غَطَيْطُمْ اٛ وَطَ حَکّٜ؞ فُو مٛ يِطَا بَنْدِرَاوٛ مُوطُمْ، ندٜرْ ݧِوْرٜ جٛوطِي، اٜ مٛ يَحَ ندٜرْ ݧِوْرٜ؞ اٛ اَنْدَا تٛ اٛ فَعِ، نغَمْ ݧِوْرٜ وُمْنِيمٛ؞ اٛنٛنْ ٻِٻّٜ اَمْ، مِ وِنْدَنْعٛنْ نغَمْ اٛنْ نجَافَنَامَ حَکّٜ مٛوطٛنْ بَرْکَ يٜىٰسُ؞ مِ وِنْدَنْعٛنْ، اٛنٛنْ ندٛتِّعٜنْ، نغَمْ اٛنْ اَنْدِ اٛنْ طٛنْ غٛنْطٛ دَغَ اَرَنْدٜ؞ مِ وِنْدَنْعٛنْ، اٛنٛنْ کَيٜعٜنْ، نغَمْ اٛنْ کٜٻِي جَالٛرْغَلْ دٛوْ کَلُّطٛ؞ مِ وِنْدَنْعٛنْ، اٛنٛنْ ٻِٻّٜ اَمْ، نغَمْ اٛنْ اَنْدِ ݧَاکٛ مٛ دٛوْ؞ مِ وِنْدَنْعٛنْ، اٛنٛنْ ندٛتِّعٜنْ، نغَمْ اٛنْ اَنْدِمٛ، کَنْکٛ غٛنْطٛ دَغَ اَرَنْدٜ؞ مِ وِنْدَنْعٛنْ، اٛنٛنْ کَيٜعٜنْ، نغَمْ اٛنْ نغٛودِ سٜمْبٜ ٻٜرْندٜ، ندٜنْ وٛلْدٜ اَللَّه اٜ جٛوطِي ندٜرْ ٻٜرْطٜ مٛوطٛنْ؞ طٛنْمَا اٛنْ کٜٻِي جَالٛرْغَلْ دٛوْ کَلُّطٛ؞ تٛع اٛنْ نغِطُ دُونِيَارُ، کٛو بٛو کٛ وٛنِ ندٜرْ مَيْرُ؞ فُو غِطّٛ دُونِيَارُ، يِطَا ݧَاکٛ مٛ دٛوْ؞ نغَمْ کٛو طُمٜ کٛ وٛنِ ندٜرْ دُونِيَارُ، بٛ سُونٛ ٻَنْدُ، اٜ سُونٛ غِتٜ، اٜ مَوْنِنْکِ حٛورٜ نغَمْ جَوْدِ، نَاع دَغَ تٛ اَللَّه طُمْ پِوٛيِ؞ دَغَ تٛ دُونِيَارُ طُمْ پِوٛيِ؞ دُونِيَارُ اٜ کٛو طُمٜ طُمْ يِمْٻٜ نغِطِ ندٜرْ مَيْرُ طُمْ پَٻّٛتٛوطُمْ، اَمَّا غَطٛووٛ کٛ اَللَّه يِطِ جٛوطٛتٛ حَا اَبَدَا؞ اٛنٛنْ ٻِٻّٜ اَمْ، تِمّٛودٜ دُونِيَارُ ٻَدَکٜ، نٛنْ نٛ نَنْطٛنْ غَݧٛ اَلْمَسِيحُ اٜ وَرَ؞ ندٜنْ جٛونِ وَݧْوَݧْٻٜ اَلْمَسِيحُ نجَادَکٜ مبَنْغِي؞ نغَمْ مَاجُمْ اٜنْ اَنْدِ تِمّٛودٜ دُونِيَارُ ٻَدَکٜ؞ وَݧْوَݧْٻٜ اَلْمَسِيحُ ٻٜنْ ندٜنّٛ ندٜرْ مٜىٰطٜنْ ٻٜ نغٛنّٛو، اَمَّا ٻٜ شٜنْدِرِي اٜ مٜىٰطٜنْ نغَمْ دَغَ ندٜنّٛ مَا نَاع طُمْ ٻٜ مٜىٰطٜنْ؞ دَا طُمْ ٻٜ مٜىٰطٜنْ، دَا حَا جٛونِ اٜ ٻٜ نغٛنْدِ اٜ مٜىٰطٜنْ؞ اَمَّا ٻٜ اَلِيعٜنْ، نغَمْ طُمْ حٛلَّ ندٜنْ مَا ٻٜ فُو نَاع طُمْ ٻٜ مٜىٰطٜنْ؞ اَمَّا اَلْمَسِيحُ حٛکِّيعٛنْ رُوحُ اَللَّه؞ کَنْجُمْ وَطِ اَنْدُطٛنْ غٛونغَ؞ مِ وِنْدَنْعٛنْ، نَاع نغَمْ اٛنْ اَنْدَا غٛونغَ، اَمَّا نغَمْ اٛنْ اَنْدِکَ، ندٜنْ اٛنْ اَنْدِ غٛونغَ رِمَتَا فٜوْرٜ؞ طُمْ مٛيٜ وٛنِ ڤٜوٛووٛ؟ کَنْکٛ وٛنِ غَݧُطٛ يٜىٰسُ وٛنِ اَلْمَسِيحُ؞ غَݧُطٛ ݧَاکٛ مٛ دٛوْ اٜ ٻِطّٛ مَاکٛ کَنْکٛ وٛنِ غَݧٛ اَلْمَسِيحُ؞ نغَمْ کٛو مٛيٜ وَݧِ ٻِطّٛ اٛنْ، وَݧِي ݧَاکٛ اٛنْ مَا؞ فُو بِيطٛ اٜ نجَيْرِ يٜىٰسُ اٛ ٻِطّٛ اَللَّه، اٜ سُمْڤٛوتِرَ اٜ اَللَّه ݧَاکٛ مٛ دٛوْ وٛنْ طٛنْ؞ نغَطٜىٰ کَ جٛغَاکِ کٛ نَنْطٛنْ دَغَ اَرَنْدٜ ندٜرْ ٻٜرْطٜ مٛوطٛنْ؞ تٛ اٛنْ نجٛغَکٜ کٛ نَنْطٛنْ دَغَ اَرَنْدٜ ندٜرْ ٻٜرْطٜ مٛوطٛنْ، اٛنْ شُمْڤٛوتِرَ اٜ ٻِطّٛ اٛنْ اٜ ݧَاکٛ اٛنْ؞ نغَعَلْ کَنْغَلْ وٛنِ اَلْکَوَلْ نغَلْ اَلْمَسِيحُ وَطَنِعٜنْ، وَاتٛ يٛنْکِ کِ رٜعَتَا؞ مِ وِنْدَنْعٛنْ طُعُمْ دٛوْ ٻٜنْ طٛنْ غِطْٻٜ مَجِّنَعٛنْ؞ اَمَّا اٛنٛنْ، اَلْمَسِيحُ حٛکِّيعٛنْ رُوحُ اَللَّه، جٛوطِيطُمْ ندٜرْ ٻٜرْطٜ مٛوطٛنْ؞ نَاع نَا غٛطّٛ اٜکِّتِنٛووٛ فٜىٰرٜ اٜکِّتِنِيعٛنْ، نغَمْ رُوحُ طُمْ اٜ اٜکِّتِنَعٛنْ کٛو طُمٜ؞ ندٜنْ کٛ طُمْ اٜکِّتِنْتَ طُمْ غٛونغَ، نَاع طُمْ فٜوْرٜ؞ نغَطٜىٰ کَ سُمْڤٛوتِرْکِ اٜ يٜىٰسُ نٛنْ نٛ رُوحُ اَللَّه اٜکِّتِنِرِعٛنْ؞ جٛونِ، اٛنٛنْ ٻِٻّٜ اَمْ، نغَطٜىٰ کَ سُمْڤٛوتِرْکِ اٜ اَلْمَسِيحُ، نغَمْ ݧَلْندٜ ندٜ اٛ وَرْتَتَ ندَرٛوطٜنْ يٜىٰسٛ مَاکٛ ٻٜرْندٜ غٛعٛ، تٛع شٜمْتٜنْ يٜىٰسٛ مَاکٛ؞ تٛ اٛنْ اَنْدِ اَلْمَسِيحُ اٛ اَادِلِيجٛ، اٛنْ تَبِّتِنِي وِيکِ کٛو مٛيٜ غَطٛووٛ اَادِلَاکُ اٛ ٻِطّٛ اَللَّه؞ ندَارٜىٰ نٛ ݧَاکٛ مٛ دٛوْ يِطِرِعٜنْ، حَا اٜ طُمْ نٛدِّرَعٜنْ ٻِٻّٜ اَللَّه، نٛنْ بٛو نغٛنْتِندِرْطٜنْ؞ کٛ وَطِ يِمْٻٜ دُونِيَارُ ندُعُ اَنْدَاعٜنْ نغَمْ ٻٜ اَنْدَامٛ؞ اٛنٛنْ حِغٛوٻٜ اَمْ ٻٜ نغِطُمِ، جٛونِ اٜنْ ٻِٻّٜ اَللَّه؞ طُمْ حٛلَّايِعٜنْ کٛ نغَرْتٜتٜنْ طٛعٛ يٜىٰسٛ تَوْ؞ اَمَّا اٜنْ اَنْدِ تٛ اَلْمَسِيحُ وَرْتِي، اٜنْ نغَرْتَيْ بٛ مَاکٛ، نغَمْ اٜنْ نغِعَيْمٛ نٛنْ نٛ اٛ وٛنِ؞ فُو غَطُطٛ ٻٜرْندٜ دٛوْ اَلْمَسِيحُ نٛنْ، اٛ لَاٻِنَ حٛورٜ مَاکٛ نٛ اَلْمَسِيحُ لَاٻِرِ؞ فُو غَطٛووٛ حَکّٜ يٜوِي دٛوکَ اَللَّه، نغَمْ وَطُکِ حَکّٜ وٛنِ يٜوُکِ دٛوکَ اَللَّه؞ اٛنْ اَنْدِ يٜىٰسُ اَلْمَسِيحُ وَرِي نغَمْ اِتَّ حَکّٜ؞ کَنْکٛ اٛ وَلَا حَکّٜ؞ کٛو مٛيٜ وٛنْدِ اٜ مَاکٛ وَطَتَا کَ وَطُکِ حَکّٜ؞ فُو غَطّٛ کَ وَطُکِ حَکّٜ مٜىٰطَايِ يِيکِمٛ کٛو اَنْدُکِمٛ؞ اٛنٛنْ ٻِٻّٜ اَمْ، تٛع اٛنْ اَلُ غٛطّٛ مَجِّنَعٛنْ؞ کٛو مٛيٜ غَطٛووٛ اَادِلَاکُ، کَنْکٛ وٛنِ اَادِلِيجٛ نٛنْ نٛ اَلْمَسِيحُ وٛنِ اَادِلِيجٛ؞ فُو غَطّٛ کَ وَطُکِ حَکّٜ، شٜيْطَنْ جٜيِمٛ، نغَمْ دَغَ اَرَنْدٜ شٜيْطَنْ اٛ غَطٛووٛ حَکّٜ؞ کٛ وَطِ ٻِطّٛ اَللَّه وَرِ دُونِيَارُ وٛنِ نغَمْ اٛ حَلْکَ کُوطٜ شٜيْطَنْ؞ فُو ٻِطّٛ اَللَّه وَطَتَا کَ وَطُکِ حَکّٜ، نغَمْ نغِکُّ اَللَّه اٜ ندٜرْ مَاکٛ؞ ندٜنْ ندٜ اَللَّه وٛنِ ݧَاکٛ مَاکٛ، اٛ وَطَتَا کَ وَطُکِ حَکّٜ؞ رَا نٛ طُمْ فٜىٰرٛوتِرْتَ ٻِٻّٜ اَللَّه اٜ ٻِٻّٜ شٜيْطَنْ؞ فُو مٛ وَطَتَا کٛ وٛوطِ کٛو يِطَا بَنْدِرَاٻٜ مُوطُمْ، کَنْکٛ نَاع اٛ ٻِطّٛ اَللَّه؞ طُعُمْ وٛنِ کٛ نَنْطٛنْ دَغَ اَرَنْدٜ وِيکِ نغِطِندِرٜنْ؞ تٛع اٜنْ نغَرْتُ بٛ کَيِنُ غَرْتُطٛ مٛ شٜيْطَنْ، اٛ وَرِ مِݧِرَاوٛ مَاکٛ؞ نغَمْ طُمٜ اٛ وَرِمٛ؟ اٛ وَرُ مِݧِرَاوٛ مَاکٛ نغَمْ کٛ مِݧِرَاوٛ مَاکٛ وَطِ اٜ وٛوطِ، اَمَّا کَنْکٛ، کٛ اٛ وَطِ طُمْ وٛوطَا؞ بَنْدِرَاٻٜ، تٛع اٛنْ کَيْطِنْ تٛ يِمْٻٜ دُونِيَارُ اٜ نغَݧَعٛنْ؞ ندٜنّٛ اٜنْ نَنْدِ اٜ مَيْٻٜ، اَمَّا جٛونِ اٜنْ نغٛودِ يٛنْکِ، نغَمْ اٜنْ نغِطِ بَنْدِرَاٻٜ مٜىٰطٜنْ؞ فُو مٛ يِطَا بَنْدِرَاوٛ مُوطُمْ اٜ جٛوطِي ندٜرْ مَيْدٜ؞ کٛو مٛيٜ وَݧِ بَنْدِرَاوٛ مُوطُمْ اٛ غَطٛووٛ وَرْحٛورٜ؞ اٛنْ اَنْدِ غَطٛووٛ وَرْحٛورٜ وَلَا يٛنْکِ کِ رٜعَتَا ندٜرْ مَاکٛ؞ طُعُمْ وٛنِ نٛ اَنْدِرْطٜنْ کٛ وٛنِ يِدّٜ: يٜىٰسُ حٛکِّي يٛنْکِ مُوطُمْ نغَمْ مٜىٰطٜنْ؞ اٜ حَانِ اٜنٜنْ مَا کٛکّٜنْ يٛنْکِ مٜىٰطٜنْ نغَمْ بَنْدِرَاٻٜ مٜىٰطٜنْ؞ تٛ غٛودُطٛ رِسْکُ يِعِي بَنْدِرَاوٛ مُوطُمْ ندٜرْ دُلّٜرٜ اٛ وَݧِي اٛ وَلَّمٛ، تٛو، نٛ وَطَتَ اٛ وِعَ اٜ مٛ وٛودِ يِدّٜ اَللَّه ندٜرْ ٻٜرْندٜ مَاکٛ؟ اٛنٛنْ ٻِٻّٜ اَمْ، تٛع اٜنْ کٛلُّ يِدّٜ مٜىٰطٜنْ اٜ حٛنْدُکٛ تَنْ، اَمَّا اٜنْ کٛلُّ يِدّٜ مٜىٰطٜنْ اٜ غٛونغَ ندٜرْ کُوطٜ؞ تٛ اٜنْ نغِطِندِرِي نٛنْ، اٜنْ اَنْدِ اٜنْ نغٛودِ غٛونغَ وٛنْ طٛنْ؞ ندٜنْ اٜنْ مبَاوَيْ دَرَاکِ يٜىٰسٛ اَللَّه اٜ ٻٜرْندٜ غٛعٛ، کٛو تٛ ٻٜرْطٜ مٜىٰطٜنْ کٛلِّيعٜنْ اٜنْ نغَطِي کٛ وٛوطَا؞ نغَمْ اَللَّه ٻُرِي ٻٜرْطٜ مٜىٰطٜنْ، اٜ مٛ اَنْدِ کٛو طُمٜ؞ اٛنٛنْ ٻٜ نغِطُمِ، تٛ ٻٜرْطٜ مٜىٰطٜنْ کٛلَّايِعٜنْ اٜنْ نغَطِي کٛ وٛوطَا، اٜنْ نغٛودِ سٜمْبٜ ٻٜرْطٜ دَرَاکِ يٜىٰسٛ اَللَّه؞ اٜنْ کٜٻَ کٛو طُمٜ کٛ تٛرِيطٜنْمٛ نغَمْ اٜنْ تٛکِّي کٛ اٛ وِعِ نغَطٜنْ، اٜنْ نغَطَ کٛ وٜلْنَنْتَمٛ ٻٜرْندٜ؞ کٛ اَللَّه وِعِ نغَطٜنْ، کَنْجُمْ وٛنِ کٛولٛوطٜنْ اِنْدٜ ٻِطّٛ مَاکٛ يٜىٰسُ اَلْمَسِيحُ، ندٜنْ نغِطِندِرٜنْ نٛنْ نٛ اَلْمَسِيحُ وِعِ نغَطٜنْ؞ فُو تٛکُّٻٜ کٛ اَللَّه وِعِ طُمْ وَطَ اٜ ٻٜ نغٛنْدِ اٜ مَاکٛ، کَنْکٛ مَا اٜ مٛ وٛنْدِ اٜ مَٻّٜ؞ رَا نٛ تَبِّتِنِرْطٜنْ اٜ مٛ وٛنْدِ اٜ مٜىٰطٜنْ: اٜنْ تَبِّتِنِي نٛنْ نغَمْ رُوحُ مَاکٛ طُمْ اٛ حٛکِّعٜنْ؞ اٛنٛنْ ٻٜ نغِطُمِ، نَاع کٛو مٛيٜ بِيطٛ اٜ وٛودِ رُوحُ اَللَّه کٛولٛتٛوطٛنْ؞ اَمَّا ڤٛوندٜىٰٻٜ نغِعٛنْ کٛو رُوحُ اَللَّه اٜ ندٜرْ مَٻّٜ کٛو وَلَا ندٜرْ مَٻّٜ، نغَمْ اَنَّبٛعٜنْ فٜوْرٜ طُطْٻٜ شَنْکِتَکٜ کٛو تٛيٜ ندٜرْ دُونِيَارُ؞ رَا نٛ اَنْدِرْتٛنْ تٛ نٜطّٛ اٜ وٛودِ رُوحُ اَللَّه: فُو بِيطٛ يٜىٰسُ اَلْمَسِيحُ وَرِي ندٜرْ ٻَنْدُ اٜ وٛودِ رُوحُ اَللَّه؞ اَمَّا فُو مٛ وِعَايِ يٜىٰسُ اَلْمَسِيحُ وَرِي ندٜرْ ٻَنْدُ، اٛ وَلَا رُوحُ اَللَّه؞ کٛ اٛ وِعَتَ تٛ غَݧٛ اَلْمَسِيحُ طُمْ پِوٛيِ؞ غَݧٛ مٛ نَنْطٛنْ اٜ وَرَ، اٛ يَادَکٜ اٛ وَرِي ندٜرْ دُونِيَارُ؞ اٛنٛنْ ٻِٻّٜ اَمْ، اٛنٛنْ طُمْ ٻٜ اَللَّه، ندٜنْ اٛنْ کٜٻِي جَالٛرْغَلْ دٛوْ اَنَّبٛعٜنْ فٜوْرٜ ٻٜنْ طٛنْ؞ نغَمْ بَوْطٜ رُوحُ اَللَّه غٛنْطُمْ ندٜرْ مٛوطٛنْ ٻُرِي بَوْطٜ شٜيْطَنْ لَامٛتٛوطٛ يِمْٻٜ دُونِيَارُ سٜمْبٜ؞ کَمْٻٜ طُمْ ٻٜ دُونِيَارُ، نغَمْ نٛنْ کٛ ٻٜ مبِعَتَ اُمْ طُمْ دُونِيَارُ، ندٜنْ دُونِيَارُ بٛو اٜ جَٻَ کٛ ٻٜ مبِعَتَ؞ اٜنٜنْ اٜنْ يِمْٻٜ اَللَّه؞ فُو اَنْدُٻٜ اَللَّه اٜ نجَٻَ کٛ مبِعٜتٜنْ؞ ٻٜ اَنْدَا اَللَّه بٛو نجَٻَتَا کٛ مبِعٜتٜنْ؞ نٛنْ اَنْدِرْتٜنْ نٜطّٛ غٛودُطٛ رُوحُ اَللَّه وَنْغِنٛوجُمْ غٛونغَ اٜ غٛودُطٛ بَوْطٜ شٜيْطَنْ مَجِّنٛوجٜ يِمْٻٜ؞ اٛنٛنْ ٻٜ نغِطُمِ، سٜيْ نغِطِندِرٜنْ نغَمْ يِدّٜ پِوٛيِ دَغَ تٛ اَللَّه؞ فُو غٛودُطٛ يِدّٜ اٛ ٻِطّٛ اَللَّه، ندٜنْ اٜ مٛ اَنْدِ اَللَّه؞ فُو مٛ وَلَا يِدّٜ، اٛ اَنْدَا اَللَّه، نغَمْ اَللَّه اٛ يِدّٜ؞ اَللَّه حٛلِّيعٜنْ يِدّٜ مُوطُمْ ندٜ اٛ لِلٛيِ ٻِطّٛ مَاکٛ غٛعٛتٛ تَنْ مٛ اٛ وٛودِ ندٜرْ دُونِيَارُ، نغَمْ کٜٻٜنْ يٛنْکِ کِ رٜعَتَا بَرْکَ ٻِطّٛ اٛنْ؞ رَا نٛ يِدّٜ ندٜ غٛونغَ وَعِ، نَاع اٜنٜنْ نغِطِ اَللَّه، اَمَّا اَللَّه يِطِعٜنْ اٛ لِلٛيِ ٻِطّٛ مَاکٛ نغَمْ وَرْتَ شَکِّرِ يَافَاکِ حَکّٜ مٜىٰطٜنْ؞ اٛنٛنْ ٻٜ نغِطُمِ، ندٜ اَللَّه يِطِرِيعٜنْ نٛنْ، اٜنٜنْ مَا اٜ حَانِ نغِطِندِرٜنْ؞ وَلَا نٜطّٛ مٜىٰطُطٛ يِيکِ اَللَّه کٛو سٜطَّ؞ اَمَّا تٛ اٜنْ نغِطِندِرِي، اَللَّه اٜ وٛنْدِ اٜ مٜىٰطٜنْ وٛنْ طٛنْ؞ طٛنْمَا يِدّٜ اِرِ ندٜعٜ اٜ جٛوطِي ندٜرْ ٻٜرْطٜ مٜىٰطٜنْ اٜ غٛونغَ؞ اَللَّه حٛکِّيعٜنْ رُوحُ مُوطُمْ؞ کَنْجُمْ وَطِ اَنْدُطٜنْ اٜ مٛ وٛنْدِ اٜ مٜىٰطٜنْ، اٜنٜنْ مَا اٜنْ نغٛنْدِ اٜ مَاکٛ؞ مِنْ نغِعِي، مِنْ بٛو شٜيْدَکٜ وِيکِ، ݧَاکٛ مٛ دٛوْ لِلٛيِي ٻِطّٛ مُوطُمْ اٛ وَرْتَ کِسْنٛووٛ دُونِيَارُ؞ فُو جَٻُطٛ اٜ ٻٜرْندٜ مُوطُمْ اٜ حٛنْدُکٛ مُوطُمْ وِيکِ يٜىٰسُ اٛ ٻِطّٛ اَللَّه، اَللَّه اٜ وٛنْدِ اٜ مَاکٛ؞ کَنْکٛ مَا اٜ مٛ وٛنْدِ اٜ اَللَّه؞ نغَمْ نٛنْ اٜنٜنْ اٜنْ اَنْدِ يِدّٜ ندٜ اَللَّه وَطَنِعٜنْ اٜنْ نجَٻِيندٜ؞ اَللَّه اٛ يِدّٜ، فُو کٛلّٛووٛ يِدّٜ اٜ مٛ جٛوطٛدِي اٜ اَللَّه وٛنْ طٛنْ، ندٜنْ اَللَّه مَا اٜ جٛوطٛدِي اٜ مَاکٛ؞ تٛ اٜنْ نغِطِ يِمْٻٜ اٜ غٛونغَ، اٜنْ نغَطَ جٛنْدٜ نٛ يٜىٰسُ جٛوطٛرِي ندٜرْ دُونِيَارُ، اٜنْ کُلَتَا ݧَلْندٜ جَانغٛ؞ تٛ نٜطّٛ اٜ اَنْدِ اَللَّه اٜ يِطِمٛ، اٛ دَرٛتٛ يٜىٰسٛ اَللَّه ٻٜرْندٜ غٛعٛ، نغَمْ يِدّٜ ندٜ اَللَّه حٛلِّعٜنْ اٜ رِيوَ کُلٛلْ؞ نغَمْ تٛ نٜطّٛ اٜ حُلَ کِيتَ اَللَّه حٛلِّي اٛ فَامَايِ يِدّٜ ندٜ اَللَّه يِطِمٛ؞ نٛنْ حٛلِّي يِدّٜ ندٜ اَللَّه وَطَنْتَمٛ ندٜ حُوَتَا کُوطٜ طٜ اٛ يِطِ حُوتِرْکِمٛ؞ اٜنْ نغِطِندِرِ، نغَمْ اَللَّه اَرْتِي يِطُکِعٜنْ؞ تٛ غٛطّٛ وِعِي اٜ يِطِ اَللَّه، اَمَّا اٜ مٛ وَݧَ بَنْدِرَاوٛ مَاکٛ، تٛو، اٛ ڤٜوٛووٛ؞ نغَمْ فُو مٛ يِطَا بَنْدِرَاوٛ مُوطُمْ مٛ اٛ يِعَتَ، نٛ وَطَتَ اٛ يِطَ اَللَّه مٛ اٛ مٜىٰطَايِ يِيکِ؟ طُعُمْ وٛنِ کٛ اٛ وِعِعٜنْ نغَطٜنْ: اٛ وِعِي، فُو غِطّٛ اَللَّه دٛولٜ يِطَ بَنْدِرَاوٛ مُوطُمْ مَا؞ فُو کٛولِيطٛ يٜىٰسُ وٛنِ اَلْمَسِيحُ اٛ ٻِطّٛ اَللَّه؞ فُو غِطّٛ ݧَاکٛ سُکَ، اٜ مٛ يِطِ سُکَ اٛنْ مَا؞ نٛ اَنْدِرْتٜنْ اٜنْ نغِطِ ٻِٻّٜ اَللَّه وٛنِ، تٛ اٜنْ نغِطِ اَللَّه اٜنْ نغَطَ کٛ اٛ وِعِ نغَطٜنْ؞ نغَمْ يِدّٜ اَللَّه وٛنِ نغَطٜنْ کٛ اٛ وِعِ نغَطٜنْ؞ کٛ اٛ وِعِ نغَطٜنْ بٛو سَلٛرْتَاعٜنْ وَطُکِ؞ نغَمْ فُو ٻِطّٛ اَللَّه وَاوَيْ حٜٻُکِ جَالٛرْغَلْ دٛوْ دُونِيَارُ؞ حٛولَارٜ مٜىٰطٜنْ دٛوْ اَلْمَسِيحُ، کَيْرٜ وَطِ کٜٻُطٜنْ جَالٛرْغَلْ دٛوْ دُونِيَارُ؞ مٛيٜ وَاوَتَ حٜٻُکِ جَالٛرْغَلْ دٛوْ دُونِيَارُ؟ سٜيْ کٛولِيطٛ يٜىٰسُ اٛ ٻِطّٛ اَللَّه؞ يٜىٰسُ اَلْمَسِيحُ وٛنِ غَرْطٛ ندٜرْ دُونِيَارُ؞ اٛ وَرْدِي اٜ اَلَامَ ندِيَمْ اٜ پِيپَمْ؞ نَاع اٜ ندِيَمْ تَنْ اٛ وَرْدِ، اَمَّا ندِيَمْ اٜ پِيپَمْ؞ رُوحُ اَللَّه وِعِيعٜنْ نٛنْ، نغَمْ رُوحُ اٜ وِعَ غٛونغَ؞ اٜ وٛودِ فِي تَتُمْ تَبِّتِنَنْطُمْعٜنْ غٛونغَ دٛوْ يٜىٰسُ؞ کَنْجُمْ وٛنِ رُوحُ اَللَّه، اٜ ندِيَمْ، اٜ پِيپَمْ، طُمْ فُو اٜ طُمْ حٛلَّ شٜيْدَ غٛعٛ؞ تٛ اٜنْ نجَٻِي کٛ يِمْٻٜ تَبِّتِنِ، کٛ اَللَّه تَبِّتِنِ ٻُرِي غٛونغَ؞ نغَمْ طُعُمْ وٛنِ کٛ اَللَّه تَبِّتِنِ دٛوْ ٻِطّٛ مُوطُمْ؞ فُو کٛولِيطٛ ٻِطّٛ اَللَّه تَبِّتِنِي طُعُمْ ندٜرْ ٻٜرْندٜ مُوطُمْ؞ اَمَّا فُو مٛ حٛولَاکِ اَللَّه، اٛ وَرْتِرِي اَللَّه ڤٜوٛووٛ وٛنْ طٛنْ، نغَمْ اٛ وَݧِي اٛ حٛولٛو کٛ اَللَّه تَبِّتِنِ دٛوْ ٻِطّٛ مُوطُمْ؞ طُعُمْ وٛنِ کٛ تَبِّتِنَنِعٜنْ اَللَّه حٛکِّيعٜنْ يٛنْکِ کِ رٜعَتَا، ندٜنْ يٛنْکِ کِنْ تٛ ٻِطّٛ مَاکٛ کٜٻٜتٜنْکِ؞ فُو جَٻُطٛ ٻِطّٛ اَللَّه اٜ وٛودِ يٛنْکِ؞ مٛ جَٻَايِ ٻِطّٛ اٛنْ، وَلَا يٛنْکِ؞ مِ وِنْدَنْعٛنْ طُعُمْ، اٛنٛنْ کٛولِيٻٜ اِنْدٜ ٻِطّٛ اَللَّه، نغَمْ اَنْدٛنْ اٛنْ نغٛودِ يٛنْکِ کِ رٜعَتَا؞ اٜنْ نغٛودِ سٜمْبٜ ٻٜرْطٜ دَرَاکِ يٜىٰسٛ مَاکٛ، نغَمْ اٜنْ تَبِّتِنِي اٜ مٛ نَنَعٜنْ تٛ اٜنْ تٛرَکٜمٛ کٛو طُمٜ نٛنْ نٛ اٛ يِطِرِ؞ ندٜ اٜنْ اَنْدِ اٜ مٛ نَنَعٜنْ کٛو ندٜيٜ تٛ اٜنْ تٛرَکٜمٛ غٛطُّمْ، اٜنْ اَنْدِ اٜنْ کٜٻِي کٛ تٛرِيطٜنْمٛ وٛنْ طٛنْ؞ تٛ اٛنْ نغِعِي تٛکُّطٛ يٜىٰسُ اٜ وَطَ حَکّٜ طُمْ يَارَتَامٛ مَيْدٜ، سٜيْ نغَطَنٛنْمٛ دٛعَارٜ، ندٜنْ اَللَّه حٛکَّيْمٛ يٛنْکِ؞ اَمَّا اٜ وٛودِ حَکّٜ جَارَيْطُمْ نٜطّٛ مَيْدٜ، وَاتٛ سٜنْدُکِمٛ اٜ اَللَّه حَا اَبَدَا؞ مِ وِعَايِ طُمْ وَطَ دٛعَارٜ دٛوْ مَاجُمْ؞ فُو وَطُکِ کٛ اَللَّه يِطَا طُمْ حَکّٜ، اَمَّا اٜ وٛودِ حَکّٜ طُمْ يَارَتَا نٜطّٛ مَيْدٜ؞ اٜنْ اَنْدِ فُو ٻِطّٛ اَللَّه ݧَمْرَتَا يٜىٰسٛ اٜ وَطُکِ حَکّٜ، اَمَّا ٻِطّٛ اَللَّه سُرَنَيْمٛ؞ شٜيْطَنْ مٜىٰمَتَامٛ؞ اٜنْ اَنْدِ اٜنٜنْ طُمْ ٻٜ اَللَّه، کٛو ندٜ دُونِيَارُ فُو اٜ لٜيْ لَامُ شٜيْطَنْ؞ اٜنْ اَنْدِ ٻِطّٛ اَللَّه وَرِي دُونِيَارُ حٛکِّعٜنْ اَنْدَلْ، نغَمْ اَندٜنْ اَللَّه مٛ غٛونغَ؞ بَرْکَ يٜىٰسُ اَلْمَسِيحُ، جٛونِ اَللَّه مٛ غٛونغَ جٜيِعٜنْ؞ کَنْکٛ وٛنِ اَللَّه مٛ غٛونغَ، کٛکّٛووٛ يٛنْکِ کِ رٜعَتَا؞ اٛنٛنْ ٻِٻّٜ اَمْ، نغٛطِّتٜىٰ اَلَّاجِ فٜوْرٜ؞ مِنْ، يَحَيَ، مَوْطٛ ندٜرْ تٛکُّٻٜ يٜىٰسُ وِنْدَنِ کَوْتَلْ شُٻَاٻٜ اَللَّه طٜرٜوٛلْ نغٛعٛلْ؞ اٜ مِ يِطِعٛنْ اٜ يِدّٜ ندٜ غٛونغَ؞ نَاع مِنْ تَنْ يِطِعٛنْ اَمَّا حَا اٜ فُو اَنْدُٻٜ غٛونغَ؞ اٜ مِنْ نغِطِعٛنْ نغَمْ غٛونغَ وٛنْکَ ندٜرْ ٻٜرْطٜ مٜىٰطٜنْ، ندٜنْ کَ جٛوطٛدٛتٛ اٜ مٜىٰطٜنْ حَا اَبَدَا؞ اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ ٻِطّٛ مَاکٛ بَرْکِطِنَعٜنْ، يُرْمِنَنَعٜنْ، حٛکَّعٜنْ جَمْ ندٜرْ غٛونغَ اٜ يِدّٜ؞ مِ نَنِي بٜلْطُمْ نَاع سٜطَّ ندٜ نغِيمِ وٛٻّٜ ندٜرْ ٻِٻّٜ مَاطَ اٜ تٛکَّ غٛونغَ نٛنْ نٛ اَللَّه ݧَاکٛ مٛ دٛوْ وِعِ نغَطٜنْ؞ جٛونِ اٜ مِ تٛرٛوعٛنْ، اٜنْ نغِطِندِرْ؞ طُعُمْ نَاع طُمْ دٛوکَ کٜسُمْ مبِنْدَنْمِعٛنْ، اَمَّا طُمْ دٛوکَ طُمْ نغٛودُنٛوطٜنْ دَغَ اَرَنْدٜ؞ يِدّٜ ندٜ غٛونغَ وٛنِ نغَطٜنْ کٛ اَللَّه وِعِ؞ نٛ نَنْطٛنْ دَغَ اَرَنْدٜ، کٛ اَللَّه وِعِ وٛنِ نغِطِندِرٜىٰ؞ مِ وِعُ نٛنْ نغَمْ يِمْٻٜ طُطْٻٜ مَجِّنٛوٻٜ يِمْٻٜ مبُرْتٛيَکٜ ندٜرْ دُونِيَارُ؞ ٻٜ نجَٻَايِ اَلْمَسِيحُ وَرِي دُونِيَارُ ندٜرْ ٻَنْدُ؞ اِرِ ٻٜنْ طٛنْ يِمْٻٜ ٻٜ مَجِّنٛوٻٜ يِمْٻٜ، ٻٜ وَݧْوَݧْٻٜ اَلْمَسِيحُ؞ نغَمْ نٛنْ ڤَامَنٜىٰ کٛعٜ مٛوطٛنْ نغَمْ تٛع ندُلّٛنْ کٛ کُوَنْطٛنْ، اَمَّا کٜٻٛنْ مبَرْجَارِ کٜوْندِ مبٛنْدِ؞ فُو مٛ دَرَاکِ دٛوْ اٜکِّتِنٛلْ اَلْمَسِيحُ، اَمَّا اٛ ٻٜيْدِ وٛنْغٛلْ اٜکِّتِنٛلْ، اَللَّه وٛنْدَا اٜ مَاکٛ؞ اَمَّا دَرِيطٛ دٛوْ اٜکِّتِنٛلْ اَلْمَسِيحُ اٜ مٛ وٛنْدِ اٜ ݧَاکٛ مٛ دٛوْ اٜ ٻِطّٛ مَاکٛ؞ فُو غَرْطٛ تٛ مٛوطٛنْ، تٛ اٛ جَٻَايِ اٜکِّتِنٛلْ نغٛعٛلْ، تٛع اٛنْ نجَٻُمٛ تٛ غُرٜ مٛوطٛنْ، تٛع اٛنْ کٛوْنِرْ اٜ مَاکٛ؞ نغَمْ فُو کٛوْنُطٛمٛ حَوْتِي حٛورٜ اٜ مَاکٛ وٛنْ طٛنْ ندٜرْ وَطُکِ کُوطٜ کَلُّطٜ طٜ اٛ وَطَتَ؞ اٜ مِ وٛودِ فِي طُطُّمْ کٛ نغِطُمِ مِ وِعَعٛنْ، اَمَّا مِ يِطَا مِ وِنْدَطُمْ ندٜرْ طٜرٜوٛلْ؞ سٜيْ نِ اٜ مِ يِطِ مِ وَرَ مِ مٜدَّ اٜ مٛوطٛنْ حٛنْدُکٛ اٜ حٛنْدُکٛ، نغَمْ نَنٜنْ بٜلْطُمْ نَاع سٜطَّ؞ کَوْتَلْ شُٻَاٻٜ اَللَّه غٛنْٻٜ طٛعٛ اٜ کٛوْنُمَا؞ مِنْ يَحَيَ، مَوْطٛ ندٜرْ کَوْتَلْ تٛکُّٻٜ يٜىٰسُ، اٜ مِ وِنْدَنْمَا طٜرٜوٛلْ نغٛعٛلْ غَايُسْ غِطَاطٛ اَمْ مٛ نغِطُمِ اٜ غٛونغَ؞ غِطٛ اَمْ، اٜ مِ وَطَنْمَا دٛعَارٜ کٛو طُمٜ يَحَنْمَا بٛطُّمْ کٜٻَا نجَمُ ٻَنْدُ، نٛنْ نٛ اَنْدِرْمِ سُمْڤٛ مَاطَ اٜ اَللَّه اٜ يَحَ بٛطُّمْ؞ مِ نَنِي بٜلْطُمْ نَاع سٜطَّ شَرٜلْ کٛ وٛٻّٜ تٛکُّٻٜ يٜىٰسُ نغَرِ کٛکِّيَمْ حَبَرُ نٛ تٛکِّرْطَا غٛونغَ اٜ نٛ کُوتِنِرْتَاکَ؞ وَلَا کٛ ٻُرِ وٜلْنَنْکِيَمْ ٻٜرْندٜ بٛ مِ نَنَ ٻِٻّٜ اَمْ اٜ تٛکَّ غٛونغَ؞ غِطٛ اَمْ غَايُسْ، اَ وَطَ کٛو طُمٜ نٛ حَانِ نغَمْ تٛکُّٻٜ يٜىٰسُ، کٛ ٻُرِ مَا وٛنِ ٻٜ اَ اَنْدَا؞ کَمْٻٜ کٛکِّ حَبَرُ بٛطُّمْ دٛوْ مَاطَ يٜىٰسٛ کَوْتَلْ تٛکُّٻٜ يٜىٰسُ غٛنْٻٜ طٛعٛ دٛوْ يِدّٜ ندٜ نغٛودُطَا؞ اَ وَطَيْ بٛطُّمْ تَا وَطِي کَ وَلُّکِ اِرِ يِمْٻٜ ٻٜنْ طٛنْ ندٜرْ يَادُ مَٻّٜ نٛنْ نٛ حَانِ اَللَّه مَوْنِنِرٜىٰ؞ ٻٜنْ طٛنْ يِمْٻٜ ٻٜ مبُرْتٛيَکٜ نغَمْ وَعَجِنْکِ اَلْمَسِيحُ، طٛنْمَا ٻٜ نجَٻَايِ کٛو طُمٜ تٛ جُنْغٛ ٻٜ تٛکَّايِ يٜىٰسُ؞ نغَمْ نٛنْ اٜ حَانِ مبَلّٜنْ اِرِ مَٻّٜ نغَمْ نغَرْتٜنْ حِغٛوٻٜ ندٜرْ وَعَجِنْکِ غٛونغَ؞ مِ وِنْدَنِي کَوْتَلْ تٛکُّٻٜ يٜىٰسُ غٛنْٻٜ تٛ مَاطَ، اَمَّا دِيٛتَارِفِسْ وَݧِي کٛ مبِيمِ نغَمْ اٜ مٛ يِطِ اٛ وَرْتَ مَوْطٛ دٛوْ مٛوطٛنْ؞ نغَمْ نٛنْ تٛ مِ وَرِي، مِ وِعَيْ کٛو طُمٜ کٛ اٛ وَطِ اٜ نجَيْرِ نغَمْ کٛو مٛيٜ اَنْدَ فٜوْرٜ مَاکٛ اٜ مٜتٜمٜتٜىٰجِ طِ اٛ وَطَتَ دٛوْ اَمِنْ؞ ندٜنْ نَاع کَنْجُمْ تَنْ اٛ وَطَتَ؞ حَا اٜ مٛ وَݧَ جَٻَّاکِ تٛکُّٻٜ يٜىٰسُ غَرْٻٜ، طٛنْمَا اٜ مٛ حَطَ وٛٻّٜ نجَٻّٛوٻٜ اٜ مٛ رِيوَ جَٻّٛتٛوٻٜ ٻٜنْ دَغَ ندٜرْ کَوْتَلْ تٛکُّٻٜ يٜىٰسُ؞ حِغٛ اَمْ غَايُسْ مٛ نغِطُمِ، تَاع اٜکِّتَ حَلّٜىٰندٜ، اَمَّا اٜکِّتَ نغِکُّ بٛطُّمْ؞ کٛو مٛيٜ غَطٛووٛ کٛ وٛوطِ اٛ ٻِطّٛ اَللَّه؞ کٛو مٛيٜ غَطٛووٛ کٛ حَلِّ اٛ اَنْدَا اَللَّه کٛو سٜطَّ؞ کٛو مٛيٜ اٜ مٜتَ فِي بٛطُّمْ دٛوْ دِمِتِيرِيُسْ؞ طٛنْمَا غٛونغَ اٜ حٛورٜ مَاکَ اٜ حٛلَّ کُوطٜ مَاکٛ طٜ بٛطّٜ؞ مِنٛنْ مَا مِنْ شٜيْدَکٜمٛ، ندٜنْ اٛنْ اَنْدِ کٛ مِنْ مبِعِ طُمْ غٛونغَ؞ اٜ وٛودِ فِي طُطُّمْ کٛ نغِطُمِ وِعُکِمَ، اَمَّا مِ يِطَا وِنْدُکِطُمْ ندٜرْ طٜرٜوٛلْ؞ اٜ مِ کَمّٛو وَرٛيْکِ تٛ مَاطَ نَاع کٛ نٜىٰٻِ، نغَمْ مٜدّٜنْ حٛنْدُکٛ اٜ حٛنْدُکٛ؞ اَللَّه حٛکُّمَا جَمْ؞ حِغٛوٻٜ مٛوطٛنْ غٛنْٻٜ طٛعٛ اٜ کٛوْنُمَا؞ حٛوْنُ کٛو مٛيٜ حِغٛ مٜىٰطٜنْ؞ مِنْ وٛنِ يَحُودَ، مَشُّطٛ يٜىٰسُ اَلْمَسِيحُ، مِݧِرَاوٛ يَاکُبُ؞ مِ وِنْدَنْعٛنْ طٜرٜوٛلْ نغٛعٛلْ، اٛنٛنْ ٻٜ اَللَّه ݧَاکٛ مٛ دٛوْ يِطِ نٛدِّ، ٻٜ يٜىٰسُ اَلْمَسِيحُ سُرَنْتَ؞ يُرْمٜىٰندٜ اٜ جَمْ اٜ يِدّٜ ٻٜيْدَنٛوعٛنْ؞ اٛنٛنْ ٻٜ نغِطُمِ، غٛونغَ اٜ مِ يِطُنٛو مِ وِنْدٛنٛيَعٛنْ دٛوْ کِسْندَمْ مٜىٰطٜنْ اٜنْ فُو؞ اَمَّا مِ يِعِي اٜ حَانِ مِ وِنْدٛنٛيَعٛنْ نغَمْ مِ سٜمْبِطِنَعٛنْ نغَطٛنْ کٛ مبَاوٛتٛنْ وَطُکِ ندٜىٰنٛنْ اٜکِّتِنٛلْ نغٛلْ اَللَّه حٛکِّعٜنْ ندٜ غٛعٛ تَنْ؞ مِ وِعُ طُعُمْ نغَمْ وٛٻّٜ يِمْٻٜ نَتِّي ندٜرْ مٛوطٛنْ اٜ سُوطٜ؞ ٻٜ کُلَتَا اَللَّه، اٜ ٻٜ مبِعَ اَللَّه يَافَنْتٛعٜنْ حَکّٜ، نغَمْ نٛنْ اٜنْ نغَطُ کَ وَطُکِ حَکّٜ؞ ٻٜ نغَݧِي مَوْطٛ مٜىٰطٜنْ جٛومِرَاوٛ مٜىٰطٜنْ غٛعٛتٛ تَنْ مٛ نغٛودُطٜنْ، يٜىٰسُ اَلْمَسِيحُ؞ اَايَاجٜ بِنْدَاطٜ کٛ نٜىٰٻِ مبِعِ طُمْ تَپَنَيْٻٜ کِيتَ کَلُّکَ؞ کٛو ندٜ اٛنْ نجَادَکٜ اٛنْ اَنْدِ فُو فِي طُعُمْ، اٜ مِ يِطِ مِ سِفْتٛرَنَعٛنْ وِيکِ جٛومِرَاوٛ حِسْنِي يِمْٻٜ اِسْرَاعِيلَ دَغَ لٜيْدِ مَسَرْ؞ اَمَّا غَطَ طٛنْ اٛ حَلْکِي ٻٜ کٛولَاکِمٛ؞ شِفْتٛرٜىٰ مَلَاعِکَعٜنْ ٻٜ شُرَايِ مَنْغُ لَامُ مَٻّٜ، اَمَّا ٻٜ اَلِ تٛ ٻٜ نجٛوطِي؞ اَللَّه سُرِيٻٜ حَٻِّرِٻٜ ٻٛغِّ نجَمْندِ طِ حَا اَبَدَا ندٜرْ ݧِوْرٜ کَلُّندٜ اٜ ٻٜ مَٻِّي نَا ݧَلْندٜ مَوْندٜ ندٜ کِيتَ؞ نٛنْ مَا، يِمْٻٜ غَرِيجٜ سٛدٛمْ اٜ غٛمٛورَ اٜ غَرِيجٜ غٛنْطٜ حَادٜ مَاجٜ ٻٜ نَتِّنِ کٛعٜ مَٻّٜ وَطُکِ کُوطٜ نٜفْنِيطٜ بٛ لُوطُ اٜ نجٜىٰنُ؞ نغَمْ نٛنْ ٻٜ کَلْکِرَامَ حِيتٜ نغٜ ݧِفَتَا حَا اَبَدَا نغَمْ طُمْ وَرْتَ مِسَالُ تٛ کٛو مٛيٜ؞ نٛنْ مَا، نَتُّٻٜ ندٜرْ مٛوطٛنْ ٻٜنْ اٜ ٻٜ مبٛنَّ ٻَلِّ مَٻّٜ نغَمْ اٜ ٻٜ مبِعَ طُمْ وِعِيٻٜ ٻٜ نغَطَ نٛنْ ندٜرْ کٛيْطٛلْ؞ اٜ ٻٜ نغَݧَ تٛکُّکِ لَامِيٻٜ، اٜ ٻٜ کُطَ مَلَاعِکَعٜنْ اَللَّه؞ کٛو مِيکَاعِلُ اَرْدِيطٛ مَلَاعِکَعٜنْ وَطَايِ نٛنْ؞ اٜ شَرٜلْ کٛ اٛ يٜدّٛوتِرْتَ اٜ شٜيْطَنْ دٛوْ ٻَنْدُ مُوسَ کٛ مَايِ، اٛ مَوْنِنَايِ حٛورٜ مَاکٛ اٛ حَٻَنَ شٜيْطَنْ ندٜرْ حَالَ ٻَلٜحَ؞ کٛ اٛ وِعِ تَنْ وٛنِ، «جٛومِرَاوٛ حَٻَنْمَا!» اَمَّا يِمْٻٜ ٻٜنْ طٛنْ اٜ ٻٜ کُطَ فُو کٛ ٻٜ ڤَامَايِ؞ اٜ ٻٜ نغَطَ کٛ ٻَلِّ مَٻّٜ نغِطِ بٛ مَرْلٜ لَدّٜ؞ کَنْجُمْ وٛنِ کٛ يَارَتَٻٜ ندٜرْ حَلْکٜرٜ؞ ٻٜ مبٛنِي! ٻٜ تٛکِّي نغِکُّ کَيِنُ؞ ٻٜ نَتِّي اِرِ مَجّٜرٜ بَلَعَمُ نغَمْ سُونٛ شٜىٰدٜ؞ نٛنْ نٛ کٛورَ وَݧِرِ کٛ اَللَّه وِعِ، نٛنْ کَمْٻٜ مَا ٻٜ نغَݧِرِ کٛ اَللَّه وِعِ؞ نغَمْ نٛنْ، ٻٜ کَلْکَيْ؞ يِمْٻٜ ٻٜنْ طٛنْ اٜ ٻٜ شٜمْتِنَعٛنْ شَرٜلْ نغٜلْ ٻٜ ݧَمْدَتَ اٜ مٛوطٛنْ اَمَّا کَمْٻٜ ٻٜ سٜمْتَتَا، اٜ ٻٜ ندُرَ کٛعٜ مَٻّٜ تَنْ؞ اٜ ٻٜ نَنْدِ اٜ اِيٜىٰندٜ ندٜ حٜنْدُ حٛشِّ ندِيَمْ تٛٻَايِ؞ اٜ ٻٜ نَنْدِ اٜ لٜطّٜ طٜ ندِمَتَا کٛو اٜ شَرٜلْ رِمُکِ، طٛوفَاطٜ، بَاتُطٜ؞ اٜ ٻٜ نَنْدِ اٜ غٜىٰلٛوطِ ندِيَمْ مَايٛ، کٛ سٜمْتِنِي طُمْ ٻٜ نغَطِ اٜ اُمّٛو بٛ غُوفٜ؞ اٜ ٻٜ نَنْدِ اٜ کٛودٜ غِيلٛتٛوطٜ، طُمْ سِرْيَنَکٜٻٜ ݧِوْرٜ کَلُّندٜ حَا اَبَدَا؞ اٜنٛکْ دَݧَاطٛ جَامَنُوجِ جٛوٜىٰطِطِ غَطَ اَادَمُ، اٛ وَطِي اَنَّبَاکُ دٛوْ مَٻّٜ، اٛ وِعِي، «رَطُّمْ، جٛومِرَاوٛ وَرْدَيْ اٜ مَلَاعِکَعٜنْ مُوطُمْ ٻٜ لِمَتَاکٛ، نغَمْ اٛ وَطَنَ کٛو مٛيٜ کِيتَ؞ اٛ تَپَنَ فُو ٻٜ تٛکَّايِ اَللَّه کِيتَ نغَمْ کُوطٜ مَٻّٜ طٜ شِيَ کُلٛلْ اَللَّه طٜ ٻٜ نغَطِ، اٜ فُو حَالَاجِ کَلُّطِ طِ غَطٛوٻٜ حَکّٜ ٻٜ کُلَتَا اَللَّه مٜتِ دٛوْ مَاکٛ؞» ٻٜعٜ يِمْٻٜ ٻٜ مٜتِتٛتٛوٻٜ، کٛو ندٜيٜ اٜ ٻٜ نغِعَ بٛوفٛلْ وٛٻّٜ؞ اٜ ٻٜ تٛکَّ سُونٛوجِ مَٻّٜ کَلُّطِ؞ اٜ ٻٜ مٜتَ حَالَاجِ مَوْنِنْکِ کٛعٜ مَٻّٜ، اٜ ٻٜ مٜتَنَ يِمْٻٜ حَالَاجِ بٜلْطِ نغَمْ ٻٜ کٜٻَ کٛ ٻٜ نغِطِ؞ اَمَّا اٛنٛنْ ٻٜ نغِطُمِ، تٛع اٛنْ نغٜجُّتُ کٛ لِلَاٻٜ جٛومِرَاوٛ مٜىٰطٜنْ يٜىٰسُ اَلْمَسِيحُ مبِعُنٛو؞ ٻٜ مبِعِيعٛنْ، «اٜ بَلْطٜ رٜعُکِ دُونِيَارُ يِمْٻٜ جُکِّتٛوٻٜ مبُرْتٛيْتٛ، تٛکِّرَنٛوٻٜ سُونٛ مَٻّٜ کَلُّنغٛ نغٛ شِيَ کُلٛلْ اَللَّه؞» کَمْٻٜ نغٛنِ غَدّٛوٻٜ سٜنْدِرْکِ حَکُّندٜ تٛکُّٻٜ يٜىٰسُ؞ يِمْٻٜ ٻٜنْ ٻٜ تٛکّٛوٻٜ کٛ ٻَلِّ مَٻّٜ نغِطِ؞ ٻٜ نغَلَا رُوحُ اَللَّه؞ اَمَّا اٛنٛنْ ٻٜ نغِطُمِ، شٜمْبِطِنٜىٰ کٛعٜ مٛوطٛنْ دٛوْ حٛولَارٜ مٛوطٛنْ شٜنِيندٜ؞ نغَطٜىٰ دٛعَارٜ ندٜرْ بَوْطٜ رُوحُ اَللَّه؞ نجٛوطٜىٰ ندٜرْ يِدّٜ ندٜ اَللَّه وَطَنِعٜنْ، کٜطٛوطٛنْ يُرْمٜىٰندٜ جٛومِرَاوٛ مٜىٰطٜنْ يٜىٰسُ اَلْمَسِيحُ کٛکَّيْندٜ يٛنْکِ کِ رٜعَتَا؞ نجُرْمِنَنٜىٰ غٛودُٻٜ سٜکٛ؞ کِسْنٜىٰ وٛٻّٜ بٛ اٛنْ مبُرْتِنَٻٜ دَغَ ندٜرْ حِيتٜ؞ وٛٻّٜ بٛو نجُرْمِنَنٜىٰٻٜ اٜ کُلٛلْ؞ اَمَّا نغَݧٜىٰ حَا مَا کٛلْتٜ مَٻّٜ طٜ سُونٛ مَٻّٜ نغٛ حَکّٜ وٛنِّ؞ يٜتّٛورٜ تَبِّتَ تٛ بَاوَيْطٛ سُرُکِعٛنْ تٛع نجَنٛنْ، اٛ وَدَّعٛنْ يٜىٰسٛ تٜدُّنغَلْ مَاکٛ اٛنْ نغَلَا غٛطُّمْ کٛ وٛوطَا، اٛنْ نَنَيْ بٜلْطُمْ نَاع سٜطَّ؞ کَنْکٛ تَنْ وٛنِ اَللَّه، کَنْکٛ بٛو وٛنِ کِسْنٛووٛعٜنْ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞ تٜدُّنغَلْ، اٜ مَنْغُ، اٜ بَوْطٜ، اٜ لَامُ تَبِّتَ تٛ مَاکٛ دَغَ فُطّٛودٜ اٜ جٛونِ اٜ حَا اَبَدَا! اَامِنْ؞ ندٜعٜ دٜفْتٜرٜ اٜ ندٜ سَاوِ وَحَيُ طُمْ اَللَّه حٛکِّ يٜىٰسُ اَلْمَسِيحُ نغَمْ اٛ حٛلَّ مَشُّٻٜ مَاکٛ کٛ وَطَتَ نَاع کٛ نٜىٰٻِ؞ يٜىٰسُ لِلِ مَلَاعِکَاجٛ مُوطُمْ تٛ مَشُّطٛ مَاکٛ يَحَيَ نغَمْ اٛ وِعَمٛ فِي طُمْ؞ يَحَيَ وِعِ کٛو طُمٜ طُمْ يِعِ دٛوْ وٛلْدٜ اَللَّه، اٜ کٛ يٜىٰسُ اَلْمَسِيحُ وِعِ اٜ کٛ وَطِ؞ اٛ بَرْکِطِنَاطٛ نٜطّٛ جَنْغَنٛووٛ وٛٻّٜ طُعُمْ حَبَرُ طُمْ اَنَّبَاکُ، ندٜنْ ٻٜ بَرْکِطِنَاٻٜ نَنْٻٜ کٛ وِنْدَا ندٜرْ دٜفْتٜرٜ ندٜعٜ تٛکَّندٜ، نغَمْ شَرٜلْ کٛ فِي طُمْ وَنْغَتَ ٻَدَکٜ؞ مِنْ يَحَيَ اٜ مِ وِنْدَنَ تٛکُّٻٜ يٜىٰسُ وٛنْٻٜ ندٜرْ غَرِيجٜ جٛوٜىٰطِطِ ندٜرْ لٜيْدِ اَاسِيَ؞ اَللَّه غٛنْطٛ جٛونِ اٜ ندٜنّٛ اٜ طٛعٛ يٜىٰسٛ، اٜ رُوحُوجِ جٛوٜىٰطِطِ غٛنْطِ يٜىٰسٛ جٛوطٛرْغَلْ لَامُ مَاکٛ، اٜ يٜىٰسُ اَلْمَسِيحُ، شٜيْدُوجٛ اَللَّه مٛ غٛونغَ، بَرْکِطِنَعٛنْ، حٛکَّعٛنْ جَمْ؞ يٜىٰسُ اَرْتُطٛ اُمَّاکِ دَغَ مَيْدٜ کَنْکٛ وٛنِ لَامِيطٛ لَامِيٻٜ دُونِيَارُ؞ اٜ مٛ يِطِعٜنْ، اٛ حِسْنِيعٜنْ دَغَ حَکّٜىٰجِ مٜىٰطٜنْ بَرْکَ پِيپَمْ مَيْدٜ مَاکٛ؞ اٛ وَرْتِرِيعٜنْ يِمْٻٜ مَاکٛ اَرْدِيٻٜ دِينَ کُوَنٛوٻٜ اَللَّه ݧَاکٛ مَاکٛ؞ مَنْغُ اٜ لَامُ تَبِّتَ تٛ يٜىٰسُ اَلْمَسِيحُ حَا اَبَدَا اَبَدِنْ؞ اَامِنْ؞ رَطُّمْ اٜ مٛ وَرَ ندٜرْ دُولٜ، کٛو مٛيٜ يِعَيْمٛ حَا مَا اٜ بَرْٻٜمٛ؞ فُو يِمْٻٜ دُونِيَارُ مبٛيَيْ نغَمْ غَرْتٛلْ مَاکٛ! غٛونغَ، طُمْ وَطَيْ؞ اَامِنْ؞ اَللَّه جٛومِرَاوٛ جٛومُ بَوْطٜ وِعِ، «مِنْ وٛنِ اَلْفَ، مِنْ وٛنِ اٛمٜىٰغَ،» وَاتٛ فُطّٛودٜ اٜ تِمّٛودٜ؞ کَنْکٛ وٛنِ جٛونِ، اٜ ندٜنّٛ، اٜ يٜىٰسٛ طٛعٛ؞ مِنْ وٛنِ يَحَيَ بَنْدِرَاوٛ مٛوطٛنْ ندٜرْ تٛکُّکِ يٜىٰسُ؞ اٜنْ نجَرَ تٛرَّ نغَمْ اٜنْ يِمْٻٜ ندٜرْ لَامُ مَاکٛ، اَمَّا اٛ حٛکِّيعٜنْ ٻٜرْطٜ مُݧَلْ؞ طُمْ يَارِييَمْ لٜيْدِ نغٛنْدِ شَکَ ندِيَمْ بِعٜتٜىٰندِ بَتَمٛسْ نغَمْ مِ وَعَجِنِي وٛلْدٜ اَللَّه مِ حٛکِّي حَبَرُ يٜىٰسُ؞ اٜ ݧَلْندٜ اَلَلْ، رُوحُ اَللَّه جِڤّٛيِي دٛوْ اَمْ، سٜيْ نَنْمِ وٛنْدٜ حٛنٛنْدٜ شٜمْبِنْدٜ غَطَ اَمْ بٛ دُودُکِ لُوَلْ؞ حٛنٛنْدٜ ندٜنْ اٜ وِعَ، «وِنْدُ کٛ نغِيطَا ندٜرْ طٜرٜوٛلْ لِلْدَنَا کَوْتٜ تٛکُّٻٜ يٜىٰسُ وٛنْٻٜ ندٜرْ غَرِيجٜ جٛوٜىٰطِطِ، وَاتٛ ٻٜ اَافِسَ، اٜ ٻٜ سَمِرْنَ، اٜ ٻٜ بِرْغَمُمْ، اٜ ٻٜ تَيَاتِرَ، اٜ ٻٜ سَرْدِسْ، اٜ ٻٜ فِلَدٜلْفِيَ، ندٜنْ اٜ ٻٜ لَوْدِيکِيَ؞» سٜيْ نغَيْلِتِيمِ نغَمْ مِ يِعَ مٜتَنَيْطٛيَمْ؞ اٜ وَيْلِتَاکِ اَمْ سٜيْ نغِيمِ فِتِلَاجِ جٛوٜىٰطِطِ طِ جِينَارِ؞ شَکَ فِتِلَاجِ طِنْ بٛو مِ يِعِ غٛطّٛ بٛ ٻِي نٜطّٛ اٜ مٛ ٻٛرْنِي کٛلْتٜ حَا کٛيْطٜ، اٜ مٛ تَادِي تَادٛرْدٜ جِينَارِ تٛ غَبَارٜ مَاکٛ؞ حٛورٜ مَاکٛ اٜ غَاسَ مَاکٛ اٜ رَنِّ تَرْ بٛ حٛتّٛلّٛ، تَرْ بٛ ݧَالَلْ، ندٜنْ غِتٜ مَاکٛ بٛ طٜمْنغَلْ حِيتٜ؞ کٛيْطٜ مَاکٛ اٜ طٜلْکِتٛو بٛ نجَمْندِ مبٛطٜىٰرِ ٻٛلِنَاندِ نغٛغَّاندِ ندِ طُمْ دٜفِ ندٜرْ حِيتٜ وَعِلْدُ، ندٜنْ حٛنٛنْدٜ مَاکٛ بٛ حٛولٛ دٛغُّدُ ندِيَمْ؞ اٜ مٛ جٛغِي کٛودٜ جٛوٜىٰطِطِ اٜ جُنْغٛ مَاکٛ ݧَامٛ، کَافَحِ وٜلْکِ کٛو ندُيٜ وُتُّدُ اٜ وُرْتٛيٛو دَغَ ندٜرْ حٛنْدُکٛ مَاکٛ؞ يٜىٰسٛ مَاکٛ بٛو اٜ طٜلْکِتٛو بٛ نَانغٜ شَکَ ݧَلَوْمَ؞ ندٜ نغِيمٛومِ، سٜيْ نجَنُمِ يٜىٰسٛ مَاکٛ بٛ مَيْطٛ؞ اَمَّا اٛ يٛوَنِيَمْ جُنْغٛ مَاکٛ ݧَامٛ اٛ وِعِ، «تَاع حُلُ؞ مِنْ وٛنِ اَرَنْدٜىٰجٛ، مِنْ وٛنِ شَکِتِيطٛ؞ مِنْ وٛنِ مٛ يٛنْکِ! ندٜنّٛ مِ مَايِينٛ؞ اَمَّا جٛونِ اٜ مِ وٛودِ يٛنْکِ حَا اَبَدَا اَبَدِنْ، اٜ مِ وٛودِ لَامُ دٛوْ مَيْدٜ ندٜنْ اٜ مِ وٛودِ لَامُ دٛوْ لَاحِرَ؞ وِنْدُ کٛ نغِيطَا، کٛ وَطَتَ جٛونِ، اٜ کٛ وَطَتَ طٛعٛ يٜىٰسٛ؞ رَا مَعَنَ سِرُّ کٛودٜ جٛوٜىٰطِطِ طٜ نغِيطَا اٜ جُنْغٛ اَمْ ݧَامٛ، ندٜنْ اٜ مَعَنَ فِتِلَاجِ جِينَارِ جٛوٜىٰطِطِ طِ نغِيطَا: کٛودٜ جٛوٜىٰطِطِ طٜنْ طٛنْ نغٛنِ مَلَاعِکَعٜنْ فَامَنٛوٻٜ کَوْتٜ جٛوٜىٰطِطِ طٜ تٛکُّٻٜيَمْ، ندٜنْ فِتِلَاجِ جٛوٜىٰطِطِ طِنْ طٛنْ بٛو طُمْ کَوْتٜ طٜنْ؞» ندٜنْ اٛ وِعِيَمْ، «وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ اَافِسَ وِعُکِ: «مِنْ جٛغِيطٛ کٛودٜ طٜنْ طٛنْ جٛوٜىٰطِطِ اٜ جُنْغٛ ݧَامٛ، جَحٛووٛ شَکَ فِتِلَاجِ جِينَارِ جٛوٜىٰطِطِ طِنْ طٛنْ؞ اٜ مِ اَنْدِ کُوطٜ مٛوطٛنْ؞ اٜ مِ اَنْدِ اٛنْ کُوِي نَاع سٜطَّ، اٛنْ مُݧِي ندٜرْ تٛرَّاجِ طِ نجَرٛتٛنْ؞ اٜ مِ اَنْدِ اٛنْ ڤِجَنْتَا کَلُّٻٜ؞ ندٜنْ وِعٛوٻٜ کٛعٜ مَٻّٜ ٻٜ لِلَاٻٜ، اَمَّا نَاع طُمْ نٛنْ اٛنْ ڤٛوندِيٻٜ اٛنْ تَوِي ٻٜ ڤٜوٛوٻٜ؞ اٜ مِ اَنْدِ اٛنْ مُݧِي، اٛنْ نَتِّ تٛرَّاجِ کَلُّطِ نغَمْ اَمْ ندٜنْ اٛنْ شٛمَايِ؞ اَمَّا رَا کٛ وٛوطَا طُمْ نَنْغِرْمِعٛنْ: اٛنْ اَلِي يِدّٜ ندٜ نغٛودُنٛوطٛنْ؞ شِڤْتٛرٜىٰ کٛ نجٛوفُنٛوطٛنْ، تُوبٜىٰ، نغَطٛنْ کٛ نغَطَيْنٛوطٛنْ ندٜنّٛ؞ تٛ نَاع نٛنْ، مِ وَرَنَيْعٛنْ مِ اِتَّ فِتِلَارُ مٛوطٛنْ تٛ ندُ رٜسَا، سٜيْ نِ تٛ اٛنْ تُوبِي؞ اَمَّا اٛنْ نغَطَ فِي غٛعٛ بٛطُّمْ؞ اٛنْ نغَݧِي کُوطٜ نِکٛولَتَنْکٛعٜنْ، نٛنْ نٛ نغَݧِرْمِ کُوطٜ مَٻّٜ؞ «فُو غٛودُطٛ نٛڤِّ نَنٛوجِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ «فُو کٜٻُطٛ جَالٛرْغَلْ مِ اَلَيْمٛ اٛ ݧَامَ ٻِکّٛيْ لٜکِّ کٛکّٛوحِ يٛنْکِ وٛنْکِ ندٜرْ نغٜسَ اَللَّه؞ «ندٜنْ وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ سَمِرْنَ وِعُکِ: «مِنْ وٛنِ اَرَنْدٜىٰجٛ اٜ شَکِتِيطٛ، مَايُنٛوطٛ جٛونِ اٜ مٛ وٛودِ يٛنْکِ؞ اٜ مِ اَنْدِ تٛرَّ کَ نجَرٛتٛنْ، اٜ مِ اَنْدِ اٛنْ نغَلَنَا، اَمَّا اٛنْ دِسْکُٻٜ؞ اٜ مِ اَنْدِ حَالَ کَلُّکَ کَ يِمْٻٜ مٜتَتَ دٛوْ مٛوطٛنْ، وِعٛوٻٜ ٻٜ يِمْٻٜ اَللَّه، اَمَّا نَاع طُمْ نٛنْ، ٻٜ يِمْٻٜ شٜيْطَنْ؞ تٛع اٛنْ کُلُ تٛرَّ کَ نجَرٛتٛنْ يٜىٰسٛ طٛعٛ؞ رَطُّمْ شٜيْطَنْ سِرْيَکٜ مَٻَّ وٛٻّٜ مٛوطٛنْ ندٜرْ سُودُ شُرَلْ نغَمْ طُمْ فٛوندَعٛنْ؞ اٛنْ نغَطَيْ بَلْطٜ سَڤّٛ اٛنْ نجَرَ تٛرَّ کَلُّکَ؞ اَمَّا نجٛغٜىٰ کٛ کٛولِيطٛنْ کٛو طُمْ وَرَيْعٛنْ؞ مِنْ بٛو مِ حٛکَّيْعٛنْ يٛنْکِ، کَنْکِ وٛنِ دٛکَّلْ حٜٻُکِ جَالٛرْغَلْ مٛوطٛنْ؞ «فُو غٛودُطٛ نٛڤِّ نَنٛوجِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ «فُو کٜٻُطٛ جَالٛرْغَلْ، مَيْدٜ طِطَوْرٜ مٜىٰمَتَامٛ، وَاتٛ اٛ نَتِّنْتَاکٜ حِيتٜ؞ «ندٜنْ وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ بِرْغَمُمْ وِعُکِ: «مِنْ وٛنِ جٛغِيطٛ کَافَحِ وٜلْکِ تٛ کٛو ندُيٜ وُتُّدُ؞ اٜ مِ اَنْدِ تٛ نجٛوطِيطٛنْ؛ اٛنْ نجٛوطٛو تٛ شٜيْطَنْ لَامٛتٛو؞ فُو اٜ نٛنْ، اٛنْ نغَطَ کٛ مبِيمِعٛنْ، اٛنْ اَلَايِ حٛولَاکِيَمْ کٛو ندٜ طُمْ وَرِ اَنْتِفَسْ غَعَجِنْطٛ دٛوْ اَمْ مٛ غٛونغَ؞ اَمَّا اٜ وٛودِ فِي سٜطَّ طُمْ نَنْغِرْمِعٛنْ؞ اٜ وٛودِ وٛٻّٜ ندٜرْ مٛوطٛنْ تٛکُّٻٜ اٜکِّتِنٛلْ بَلَعَمُ، اٜکِّتِنْطٛ بَلَکْ نٛ وَطِرْتَ اِسْرَاعِيلَنْکٛعٜنْ نغَطَ کٛ وٛوطَا، ٻٜ ݧَامَ کٛ طُمْ حِرْسَنِ اَلَّاجِ فٜوْرٜ ٻٜ نغَطَ نجٜىٰنُ؞ نٛنْ مَا اٛنْ نغٛودِ وٛٻّٜ تٛکُّٻٜ اٜکِّتِنٛلْ نِکٛولَتَنْکٛعٜنْ؞ تُوبٜىٰ جٛونِ! تٛ نَاع نٛنْ، مِ وَرَنَيْعٛنْ نَاع کٛ نٜىٰٻِ، مِ حٛنِدَٻٜ اٜ کَافَحِ بُرْتٛيْتٛوکِ دَغَ حٛنْدُکٛ اَمْ؞ «فُو غٛودُطٛ نٛڤِّ نَنٛوجِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ «فُو کٜٻُطٛ جَالٛرْغَلْ، مِ حٛکَّيْمٛ مَنَّ شُوطِيطُمْ اٛ ݧَامَ؞ طٛنْمَا مِ حٛکَّيْمٛ حَيْرٜ رَنٜىٰرٜ اِنْدٜ حٜيْرٜ اٜ وِنْدِي دٛوْ مَيْرٜ؞ وَلَا اَنْدُطٛ اِنْدٜ ندٜنْ سٜيْ نِ کٛکَّاطٛ حَيْرٜ ندٜنْ؞ «ندٜنْ وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ اٜ غَرِيرِ تَيَاتِرَ وِعُکِ: «مِنْ وٛنِ ٻِطّٛ اَللَّه غٛودُطٛ غِتٜ بٛ طٜمْنغَلْ حِيتٜ، مٛ کٛيْطٜ بٛ نجَمْندِ مبٛطٜىٰرِ نغٛغَّاندِ؞ اٜ مِ اَنْدِ کُوطٜ مٛوطٛنْ اٜ نٛ نغِطِرْطٛنْ تٛکُّٻٜيَمْ اٜ نٛ کٛولٛرِيطٛنْيَمْ اٜ نٛ تٛکِّرْطٛنْيَمْ اٜ نٛ مُݧِرْطٛنْ؞ اٜ مِ اَنْدِ کُوغَلْ مٛوطٛنْ نغَلْ جٛونِ ٻُرِي نغَلْ ندٜنّٛ؞ اَمَّا رَا کٛ وٛوطَا طُمْ نَنْغِرْمِعٛنْ؞ اٛنْ مُݧَنِي دٜبّٛ اٛنْ طٛنْ جٜجٜبٜلْ بِعٛووٛ حٛورٜ مَاکٛ اٛ اَنَّبِيجٛ؞ اٜکِّتِنٛلْ مَاکٛ اٜ مَجِّنَ يِمْٻٜ اَمْ اٜ ٻٜ نغَطَ نجٜىٰنُ، طٛنْمَا اٜ ٻٜ ݧَامَ کُسٜلْ نغٜلْ طُمْ سَکَّنِ اَلَّاجِ فٜوْرٜ؞ مِ حٛکِّيمٛ شَرٜلْ نغَمْ اٛ تُوبَ دَغَ نجٜىٰنُ طُمْ اٛ وَطَتَ، اَمَّا اٛ وَݧِي اٛ تُوبَ؞ نغَمْ نٛنْ مِ وَطَيْ اٛ ݧَوَ ݧَوُ کَلُّطُمْ؞ ٻٜ اٛ وَادَتَ نجٜىٰنُ بٛو مِ تٛرَّيْٻٜ تٛرَّ کَلُّکَ، سٜيْ نِ تٛ ٻٜ اَلِي وَطُکِ اِرِ کُوطٜ مَاکٛ؞ مِ وَرَيْ تٛکُّٻٜ اٜکِّتِنٛلْ مَاکٛ؞ سٜيْ فُو کَوْتٜ تٛکُّٻٜ يٜىٰسُ اَنْدَ مِنْ وٛنِ اَنْدُطٛ ݧُمٛوجِ يِمْٻٜ اٜ کٛ وٛنِ ندٜرْ ٻٜرْطٜ مَٻّٜ؞ مِ وَاتَنَيْ کٛو مٛيٜ مٛوطٛنْ کٛ فٛتِّدِ اٜ کُوغَلْ مُوطُمْ؞ «اَمَّا اٛنٛنْ حٛرِيٻٜ وٛنْٻٜ غَرِيرِ تَيَاتِرَ ٻٜ تٛکَّايِ اٜکِّتِنٛلْ نغٛعٛلْ، اٛنْ اٜکِّتَاکِ کٛ وٛٻّٜ مبِعَتَ ‹سِرُّ شٜيْطَنْ لُغُّطُمْ؞› اٜ مِ وِعَعٛنْ مِ يٛوَنْتَاعٛنْ وٛنْغَلْ تٜدّٛرَلْ؞ نغَطٜىٰ کَ حٛولَاکِيَمْ بٛطُّمْ نَا مِ وَرْتِي؞ فُو کٜٻُطٛ جَالٛرْغَلْ اٜ وَطَ کٛ مبِيمِ حَا تِمّٛودٜ، مِ حٛکَّيْمٛ لَامُ دٛوْ لٜپِّ دُونِيَارُ نٛ ݧَاکٛ اَمْ مٛ دٛوْ حٛکِّرِيَمْطُمْ؞ اٛ لَامٛرْتٛٻٜ اٜ سَوْرُ نجَمْندِ، اٛ ڤُسِڤُسِنَٻٜ بٛ غٛجِيجٜ لٜيْدِ؞ طٛنْمَا مِ حٛکَّيْمٛ حٛودٜرٜ سُبَکَ؞ «فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ «وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ سَرْدِسْ وِعُکِ: «مِنْ وٛنِ جٛغِيطٛ رُوحُوجِ جٛوٜىٰطِطِ طِ اَللَّه اٜ کٛودٜ جٛوٜىٰطِطِ طٜنْ طٛنْ؞ اٜ مِ اَنْدِ کُوغَلْ مٛوطٛنْ، اٜ طُمْ يِعَ بٛ اٛنْ نغٛودِ يٛنْکِ، اَمَّا اٛنْ مَيْٻٜ؞ اُمّٜىٰ، ندَرٛوطٛنْ! مٛعِّنٜىٰ کٛ حٛرَنِيعٛنْ نغَمْ طُمْ ٻَدَکٜ لَلُّکِ، نغَمْ مِ يِعِي کُوطٜ مٛوطٛنْ طٜ کٜىٰوَايِ يٜىٰسٛ اَللَّه؞ نغَمْ نٛنْ شِفْتٛرٜىٰ اٜ کٛ طُمْ اٜکِّتِنِعٛنْ اٜ کٛ نَنْطٛنْ، تٛکّٜىٰطُمْ ندٜنْ تُوبٜىٰ دَغَ حَکّٜىٰجِ مٛوطٛنْ؞ تٛ بٛو اٛنْ اُمَّاکِ، مِ وَرَيْ اٜ شَرٜلْ نغٜلْ اٛنْ کَمَّاکِ بٛ غُجّٛ؞ ندٜنْ اٛنْ اَنْدَتَا شَرٜلْ نغٜلْ نغَرَنَيْمِعٛنْ؞ اَمَّا حَا جٛونِ اٜ وٛودِ يِمْٻٜ مٛوطٛنْ سٜطَّ ندٜرْ غَرِيرِ سَرْدِسْ ٻٜ مبٛنَّايِ کٛعٜ مَٻّٜ اٜ وَطُکِ حَکّٜ؞ ٻٜ نجَادَيْ اٜ اَمْ ندٜرْ کٛلْتٜ دَنٜىٰجٜ نغَمْ ٻٜ کٜوْتِي ٻٜ نغَطَ نٛنْ؞ فُو کٜٻُطٛ جَالٛرْغَلْ طُمْ ٻٛرْنَيْمٛ کٛلْتٜ دَنٜىٰجٜ، ندٜنْ مِ اِتَّتَا اِنْدٜ مَاکٛ دَغَ ندٜرْ دٜفْتٜرٜ يٛنْکِ؞ مِ وِعَيْ کَنْکٛ طُمْ مٛ اَمْ يٜىٰسٛ ݧَاکٛ اَمْ اٜ يٜىٰسٛ مَلَاعِکَعٜنْ مَاکٛ؞ «فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ «وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ فِلَدٜلْفِيَ وِعُکِ: «مِنْ وٛنِ شٜنِيطٛ مٛ غٛونغَ جٛغِيطٛ مَٻِّتِرْغٜلْ دَوْدَ؞ تٛ اٛ مَٻِّتِي دَمُّغَلْ، وَلَا مَٻَّيْطٛنغَلْ، تٛ اٛ مَٻِّينغَلْ، وَلَا مَٻِّتَيْطٛنغَلْ؞ اٜ مِ اَنْدِ کُوطٜ مٛوطٛنْ؞ رَا مِ اَلَنِيعٛنْ دَمُّغَلْ اٜ مَٻِّتِي، وَلَا بَاوَيْطٛ مَٻُّکِنغَلْ؞ اٜ مِ اَنْدِ اٛنْ شٜمْبِطَا، اَمَّا فُو اٜ نٛنْ اٛنْ تٛکَّ کٛ مبِيمِ، اٛنْ نغَݧَايِ وِعُکِ اٛنْ تٛکُّٻٜيَمْ؞ يِمْٻٜ ٻٜنْ طٛنْ وٛنْٻٜ ندٜرْ يِمْٻٜ شٜيْطَنْ وِعٛوٻٜ ٻٜ يِمْٻٜ اَللَّه اَمَّا ٻٜ ڤٜوَيْ، مِ وَطَيْٻٜ ٻٜ نغَرَ ٻٜ ندِشّٛو يٜىٰسٛ مٛوطٛنْ ٻٜ اَنْدَ اٜ مِ يِطِعٛنْ؞ ندٜ اٛنْ نجٛغَکٜ وٛلْدٜ اَمْ ندٜرْ مُݧَلْ اٜ سٜمْبٜ ٻٜرْندٜ، مِ سُرَنَيْعٛنْ تٛرَّ غَرَنَيْکَ دُونِيَارُ نغَمْ طُمْ فٛوندَ يِمْٻٜ مَيْرُ؞ اٜ مِ وَرٛيَ نَاع کٛ نٜىٰٻِ؞ نغَطٜىٰ کَ حٛولَاکِيَمْ بٛطُّمْ نغَمْ تٛع غٛطّٛ تٜىٰتَنَعٛنْ غِيفِ جَالٛرْغَلْ؞ فُو کٜٻُطٛ جَالٛرْغَلْ مِ وَرْتِرَيْمٛ دَرْݝَلَلْ ندٜرْ وُرٛ شٜنِينغٛ نغٛ اَللَّه اَمْ، اٛ فُطِّتَتَا اٛ وُرْتٛو وُرٛ نغٛنْ؞ مِ وِنْدَيْ اِنْدٜ اَللَّه اَمْ دٛوْ مَاکٛ اٜ اِنْدٜ غَرِيرِ اَللَّه اَمْ، وَاتٛ اُرُشَلِيمَ کٜيْرِ جِڤّٛيْتٛوندِ دَغَ تٛ اَللَّه اَمْ تٛنْ دٛوْ؞ طٛنْمَا مِ وِنْدَيْ اِنْدٜ اَمْ حٜيْرٜ دٛوْ مَاکٛ؞ «فُو غٛودُطٛ نٛڤِّ نَنْکِ فُو نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞ «وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ لَوْدِيکِيَ وِعُکِ: «مِنْ وٛنِ بِعٜتٜىٰطٛ اَامِنْ، شٜيْدُوجٛ مٛ غٛونغَ، بَرْکَ اَمْ اَللَّه تَغِ کٛو طُمٜ؞ اٜ مِ اَنْدِ کُوطٜ مٛوطٛنْ، اٛنْ ڤٜىٰوَا اٛنْ نغُلَا؞ اٜ مِ يِطِ دَا اٛنْ ڤٜىٰوِي کٛو اٛنْ نغُلِي! اَمَّا شَکَ‑شَکَ نغٛنْطٛنْ، اٛنْ ڤٜىٰوَا اٛنْ نغُلَا؞ نغَمْ نٛنْ مِ تُتَّيْعٛنْ دَغَ ندٜرْ حٛنْدُکٛ اَمْ، وَاتٛ مِ وَݧَيْعٛنْ؞ اٛنْ مبِعَ، ‹اٜ مِنْ نغٛودِ رِسْکُ؞ اٜ مِنْ نغٛودِ جَوْدِ، وَلَا کٛ مِنْ ندُلِّ؞› اَمَّا اٛنْ اَنْدَا اٛنْ شٛيْٻٜ اٛنْ نغَرْتِي کٛ يُرْمِنِي، اٛنْ نغَلَنَا، اٛنْ وُمْٻٜ، اٛنْ ٻٛرْنَاکِ؞ نغَمْ نٛنْ اٜ مِ حٛکَّعٛنْ شَاوٛرِ؞ شٛودٜىٰ جِينَارِ تٛ اَمْ طُمْ اُمْ سٜطِرِ حِيتٜ نغَمْ ندِسْکٛنْ، اٜ کٛلْتٜ دَنٜىٰجٜ نغَمْ شُدّٛنْ ٻَلِّ مٛوطٛنْ تٛع شٜمْتٛنْ، اٜ نٜبَّمْ نغَمْ مٛيْتَنٛنْ غِتٜ کٜٻٛنْ نغِعٛنْ؞ اٜ مِ حَٻَنَ ٻٜ نغِنْمِ، مِ حٛلِّتَٻٜ؞ نغَمْ نٛنْ نجَوْنٜىٰ تُوبٜىٰ؞ رَمِّ دَرِي اٜ دَمُّغَلْ اٜ مِ سِلْمِنٛو؞ فُو نَنْطٛ حٛنٛنْدٜ اَمْ، مَٻِّتِ دَمُّغَلْ، مِ نَتَّيْ مِ ݧَمْدَ ݧَمْندُ اٜ مَاکٛ کَنْکٛ مَا اٜ اَمْ؞ فُو کٜٻُطٛ جَالٛرْغَلْ اٛ لَامٛدٛتٛ اٜ اَمْ ندٜرْ لَامُ اَمْ، نٛنْ نٛ کٜٻِرْمِ جَالٛرْغَلْ اٜ مِ لَامٛدٛو اٜ ݧَاکٛ اَمْ ندٜرْ لَامُ مَاکٛ؞ «فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ!» غَطَ نٛنْ مِ رَارِي، سٜيْ نغِيمِ وٛنْغَلْ دَمُّغَلْ اٜ مَٻِّتِي اٜ تٛنْ دٛوْ؞ سٜيْ نَنْمِ حٛنٛنْدٜ ندٜ نَنُنٛومِ اَرَنْدٜ نَنْدُندٜ اٜ دُودٛلْ لُوَلْ ندٜ وِعِ، «پٜنْتٛيْ طٛعٛ، مِ حٛلُّمَا کٛ وَطَتَ غَطَ طُعُمْ؞» طٛنْ اٜ طٛنْ رُوحُ اَللَّه جِڤّٛيِي دٛوْ اَمْ، سٜيْ نغِيمِ جٛوطٛرْغَلْ لَامُ اٜ دٛوْ، غٛطّٛ اٜ جٛوطِي دٛوْ مَاغَلْ؞ جٛوطِيطٛ اٛنْ اٜ طٜلْکِتٛو بٛ طٜلْکِتَاکِ کَاپٜ جَسْفَ اٜ کَنٜىٰلِيَنْ؞ ندٜنْ تِمْبٛتِمْبٛلَ طٜلْکِتٛتٛونْغَ بٛ حَيْرٜ اٜمٜرَلْ اٜ فِلِي جٛوطٛرْغَلْ نغَلْ؞ حَادٜ مَاغَلْ اٜ وٛودِ غٛطّٜ جٛوطٛرْلٜ کَنْجٜ 42 اٜ طٜ ڤِلِينغَلْ؞ ندٜنْ وٛٻّٜ مَوْٻٜ کَمْٻٜ 42 اٜ نجٛوطِي دٛوْ مَاجٜ؞ اٜ ٻٜ بٛرْنِي کٛلْتٜ دَنٜىٰجٜ اٜ ٻٜ تَارِ غِيفِ جِينَارِ تٛ کٛعٜ مَٻّٜ اٜ ٻٜ نجٛوطِي دٛوْ جٛوطٛرْلٜ طٜنْ؞ مَپّٜ نغَطِ کَ وُرْتٛيَاکِ تٛ جٛوطٛرْغَلْ نغَلْ، اٜ حٛولٛ اٜ ڤَلْمَالِ، ندٜنْ يٜىٰسٛ مَاغَلْ فِتِلَاجِ جٛوٜىٰطِطِ اٜ ݧَامَ، کَنْجِ نغٛنِ رُوحُوجِ اَللَّه جٛوٜىٰطِطِ؞ طٛنْمَا يٜىٰسٛ مَاغَلْ اٜ وٛودِ غٛطُّمْ نَنْدُطُمْ اٜ مبٜىٰلَ طٜلْکِتٛتٛونغَ بٛ دَارٛغَّلْ؞ طٛنْمَا اٜ وٛودِ غٛطُّمْ تَغَاطُمْ کَنْجُمْ نَيُمْ غٛودُطُمْ غِتٜ کٛو تٛيٜ غَطَ اٜ يٜىٰسٛ اٜ طُمْ فِلِي جٛوطٛرْغَلْ نغَلْ کٛو ندُيٜ وُتُّدُ؞ تَغَاطُمْ اَرَنْدٜجُمْ اٜ نَنْدِ اٜ سٜمْبِنْدُ، طِطَٻُمْ طُمْ اٜ نَنْدِ اٜ نغَارِ، تَتَٻُمْ اٜ وٛودِ يٜىٰسٛ بٛ نغٛ نٜطّٛ، نَيَٻُمْ اٜ نَنْدِ اٜ شِيلَ ڤِيرٛووَ؞ طُمْ طٛنْ تَغَاطُمْ نَيُمْ غٛودُطُمْ يٛنْکِ، کٛو طُمٜ اٜ وٛودِ بِيٜىٰلِ جٛوٜىٰغٛعٛ؞ اٜ طُمْ وٛودِ غِتٜ تٛ ٻَنْدُ کٛو تٛيٜ؞ جٜمَّ اٜ ݧَلَوْمَ طُمْ اَلَتَا يِمُکِ اٜ طُمْ وِعَ، «اٛ شٜنِيطٛ، اٛ شٜنِيطٛ، اٛ شٜنِيطٛ، اَللَّه جٛومِرَاوٛ جٛومُ بَوْطٜ، کَنْکٛ وٛنِ ندٜنّٛ، کَنْکٛ وٛنِ جٛونِ، کَنْکٛ وٛنِ يٜىٰسٛ طٛعٛ!» فُو شَرٜلْ نغٜلْ طُمْ طٛنْ تَغَاطُمْ غٛودُطُمْ يٛنْکِ يِمِ غِمٛلْ مَنْتُکِ، اٜ مَوْنِنْکِ، اٜ يٜتُّکِ اٛنْ طٛنْ جٛوطِيطٛ دٛوْ جٛوطٛرْغَلْ نغَلْ غٛودُطٛ يٛنْکِ حَا اَبَدَا اَبَدِنْ، سٜيْ مَوْٻٜ 42 ٻٜنْ نجَنَ يٜىٰسٛ جٛوطِيطٛ دٛوْ جٛوطٛرْغَلْ نغَلْ ٻٜ مَوْنِنَمٛ، کَنْکٛ غٛودُطٛ يٛنْکِ حَا اَبَدَا اَبَدِنْ؞ ٻٜ ندٜسَ غِيفِ مَٻّٜ يٜىٰسٛ جٛوطٛرْغَلْ نغَلْ اٜ ٻٜ مبِعَ، «يَا جٛومِرَاوٛ اَللَّه اَمِنْ، اَ حٜوْتِي مَوْنِنٜىٰکِ؞ مَنْغُ اٜ لَامُ اٜ بَوْطٜ فُو اَنْ جٜيِطُمْ، نغَمْ اَنْ تَغِ کٛو طُمٜ؞ اٜ يِدّٜ مَاطَ طُمْ تَغَا، طُمْ جٛوطِي؞» سٜيْ نغِيمِ جٛوطِيطٛ دٛوْ جٛوطٛرْغَلْ نغَلْ اٜ جٛغِي وٛنْدٜ دٜفْتٜرٜ اٜ جُنْغٛ ݧَامٛ وِنْدَاندٜ ندٜرْ اٜ يَاسِ، اٜ ندٜ مَٻِّرَا حَاتِمِيجٜ جٛوٜىٰطِطِ؞ ندٜنْ مِ يِعِ غٛطّٛ مَلَاعِکَاجٛ غٛودُطٛ لَامُ اٜ مٛ وِعَ اٜ سٜمْبٜ، «مٛيٜ حٜوْتِ تَکِّتَ حَاتِمِيجٜ دٜفْتٜرٜ ندٜعٜ مَٻِّتَندٜ؟» اَمَّا طُمْ حٜٻَايِ غٛطّٛ اٜ تٛنْ دٛوْ کٛو ندٜرْ دُونِيَارُ کٛو ندٜرْ مَيْٻٜ ڤٛتُطٛ مَٻُّتُکِ دٜفْتٜرٜ ندٜنْ کٛو رَارَ ندٜرْ مَيْرٜ؞ سٜيْ ڤُطُّمِ بٛجِّ نَوْطِ نغَمْ طُمْ حٜٻَايِ کٜوْتُطٛ مَٻِّتَندٜ رَارَ ندٜرْ مَيْرٜ؞ سٜيْ غٛعٛتٛ ندٜرْ مَوْٻٜ ٻٜنْ وِعِيَمْ، «اَلُ بٛجِّ؞ رَطُّمْ سٜمْبِنْدُ ندُ لٜݧٛلْ يَحُودَ، سُودُ دَوْدَ، حٜٻِي جَالٛرْغَلْ، اٛ تَکِّتَيْ حَاتِمِيجٜ جٛوٜىٰطِطِ ندٜنْ اٛ مَٻِّتَ دٜفْتٜرٜ ندٜنْ؞» سٜيْ نغِيمِ وٛنْدِ کَرٛورِ اٜ دَرِي حَادٜ جٛوطٛرْغَلْ نغَلْ؞ تَغَاطُمْ نَيُمْ غٛودُطُمْ يٛنْکِ طُمْ اٜ مَوْٻٜ ٻٜنْ اٜ ڤِلِيندِ؞ کَرٛورِ ندِنْ بٛ ندِ حِرْسَانٛمَ؞ اٜ ندِ وٛودِ لُوٜ جٛوٜىٰطِطِ اٜ غِتٜ جٛوٜىٰطِطِ، کَنْجٜ نغٛنِ رُوحُوجِ اَللَّه جٛوٜىٰطِطِ لِلَاطِ ندٜرْ دُونِيَارُ فُو؞ سٜيْ کَرٛورِ ندِنْ يَحِ جَٻِ دٜفْتٜرٜ ندٜنْ اٜ جُنْغٛ ݧَامٛ جٛوطِيطٛ دٛوْ جٛوطٛرْغَلْ نغَلْ؞ ندٜ ندِ جَٻِندٜ، تَغَاطُمْ نَيُمْ غٛودُطُمْ يٛنْکِ طُمْ اٜ مَوْٻٜ 42 ٻٜنْ نجَنِ يٜىٰسٛ مَيْرِ مَوْنِنِندِ؞ کٛو مٛيٜ اٜ جٛغِي غَرَايَارُ اٜ تُمُّدٜ جِينَارِ اٜ ندٜ حٜىٰوِ اُرْدٜ وٜلْندٜ، کَيْرٜ وٛنِ دٛعَاجٜ يِمْٻٜ اَللَّه؞ ٻٜ نغِمِ غِمٛلْ کٜسٛلْ اٜ ٻٜ مبِعَ، «اَ حٜوْتِي نجَٻَا دٜفْتٜرٜ ندٜنْ تَکِّتَا حَاتِمِيجٜ مَيْرٜ، نغَمْ ندٜنّٛ اَ وَرَامَ، ندٜنْ بَرْکَ پِيپَمْ مَاطَ اَ رِمْطِنَنِي اَللَّه يِمْٻٜ دَغَ کٛو نغٛلٜ لٜݧٛلْ، اٜ کٛو نغَلٜ طٜمْنغَلْ، اٜ دَغَ کٛو ٻٜيٜ يِمْٻٜ، اٜ دَغَ کٛو ندِيٜ لٜيْدِ؞ اَ وَرْتِرِيٻٜ يِمْٻٜ مَاطَ اَرْدِيٻٜ دِينَ نغَمْ ٻٜ کُوَنَ اَللَّه مٜىٰطٜنْ، ٻٜ لَامٛتٛ اٜ دُونِيَارُ؞» غَطَ طٛنْ مِ رَارِي، سٜيْ نَنْمِ حٛنٛنْدٜ مَلَاعِکَعٜنْ طُطْٻٜ، طُوطُکِ مَٻّٜ وَلَا کٜىٰرٛلْ؞ اٜ ٻٜ ڤِلِي جٛوطٛرْغَلْ نغَلْ اٜ تَغَاطُمْ غٛودُطُمْ يٛنْکِ طُمْ طٛنْ اٜ مَوْٻٜ ٻٜنْ، اٜ ٻٜ نغِمَ سٜمْبٜىٰ اٜ ٻٜ مبِعَ، «کَرٛورِ بَرَاندِ ندِنْ ندِ حٜوْتِي ندِ حٜٻَ بَوْطٜ، اٜ رِسْکُ، اٜ فَامُ، اٜ سٜمْبٜ، اٜ مَنْغُ، اٜ مَوْنِنٜىٰکِ، اٜ مَنْتٜىٰکِ!» سٜيْ نَنْمِ کٛو طُمٜ کٛ تَغَا اٜ دٛوْ، اٜ ندٜرْ دُونِيَارُ، اٜ لٜيْ لٜيْدِ، اٜ ندٜرْ ندِيَمْ، اٜ کٛ وٛنِ ندٜرْ مَاجُمْ فُو، اٜ طُمْ يِمَ اٜ طُمْ وِعَ، «مَنْتُکِ، اٜ مَنْغُ، اٜ مَوْنِنٜىٰکِ، اٜ لَامُ طُمْ تَبِّتَ تٛ جٛوطِيطٛ دٛوْ جٛوطٛرْغَلْ لَامُ اٛنْ، اٜ کَرٛورِ ندِنْ حَا اَبَدَا اَبَدِنْ!» سٜيْ تَغَاطُمْ غٛودُطُمْ يٛنْکِ طُمْ طٛنْ نَيُمْ مبِعِ، «اَامِنْ!» سٜيْ مَوْٻٜ ٻٜنْ ندِشِّي مَوْنِنِ جٛومِرَاوٛ؞ ندٜنْ مِ يِعِ کَرٛورِ ندِنْ تَکِّتِي غٛعٛ ندٜرْ حَاتِمِيجٜ جٛوٜىٰطِطِ طٜنْ؞ سٜيْ نَنْمِ غٛعٛ ندٜرْ تَغَاطُمْ نَيُمْ غٛودُطُمْ يٛنْکِ طُمْ طٛنْ نٛدِّي سٜمْبٜىٰ بٛ حٛولٛ فَلْمَانغٛ وِعِ، «وٛرٛيْ!» ندٜ ندَرْمِ سٜيْ نغِيمِ وٛنْغُ ڤُشُّ ندَنٜوُ؞ غٛنْطٛ دٛوْ مَغُّ اٜ جٛغِي بَکَحِ، طُمْ حٛکِّمٛ غِيفٛلْ؞ اٛ کٜٻُطٛ جَالٛرْغَلْ اٛ وُرْتِي نغَمْ اٛ ٻٜيْدَ حٜٻُکِ جَالٛرْغَلْ؞ ندٜ کَرٛورِ ندِنْ تَکِّتِ حَاتِمِيرٜ طِطَوْرٜ، سٜيْ نَنْمِ تَغَاطُمْ غٛودُطُمْ يٛنْکِ طِطَٻُمْ وِعِي، «وٛرٛيْ!» سٜيْ وٛنْغُ ڤُشُّ وٛطٜوُ شٛلٛيْ وُرْتٛيِي طُمْ وِعِ غٛنْطٛ دٛوْ مَغُّ اِتَّ جَمْ دَغَ ندٜرْ دُونِيَارُ، نغَمْ يِمْٻٜ مبَرْمبَرْتِرَ؞ اٛ حٛکَّا کَافَحِ مَوْکِ؞ ندٜ کَرٛورِ ندِنْ تَکِّتِ حَاتِمِيرٜ تَتَوْرٜ سٜيْ نَنْمِ تَغَاطُمْ تَتَٻُمْ غٛودُطُمْ يٛنْکِ وِعِي، «وٛرٛيْ!» ندٜ ندَرْمِ سٜيْ نغِيمِ ڤُشُّ ٻَلٜوُ؞ غٛنْطٛ دٛوْ مَغُّ اٜ جٛغِي ڤٛوندِرْطُمْ اٜ جُنْغٛ؞ سٜيْ نَنْمِ غٛطُّمْ بٛ حٛنٛنْدٜ اٜ وُرْتٛيٛو حَکُّندٜ تَغَاطُمْ نَيُمْ غٛودُطُمْ يٛنْکِ طُمْ طٛنْ اٜ ندٜ وِعَ، «طُمْ يٛٻَيْ شٜىٰدٜ کُوغَلْ ݧَلْندٜ غٛعٛ نغَمْ ڤٛوندِرْغٜلْ اَلْکَمَارِ غٛعٛ؞ طُمْ يٛٻَيْ شٜىٰدٜ کُوغَلْ ݧَلْندٜ غٛعٛ نغَمْ ڤٛوندِرْکٛيْ تَتٛيْ کٛيْ غَوْرِ؞ اَمَّا تَاع وٛنُّ نٜبَّمْ جَيْتُنْ کٛو ندِيَمْ اِنَبٛوجٜ؞» ندٜ کَرٛورِ ندِنْ تَکِّتِ حَاتِمِيرٜ نَيَوْرٜ مِ نَنِي غٛعٛتُمْ ندٜرْ تَغَاطُمْ نَيُمْ طُمْ وِعِي، «وٛرٛيْ!» ندٜنْ مِ يِعِي وٛنْغُ ڤُشُّ حَاکٛ حَاکٛوُ؞ اِنْدٜ غٛنْطٛ دٛوْ مَغُّ مَيْدٜ، لَاحِرَ اٜ تٛکِّرِمٛ غَطَ؞ طُمْ حٛکِّٻٜ لَامُ ٻٜ مبَرَ نٜطّٛ غٛعٛتٛ ندٜرْ کٛو ٻٜيٜ يِمْٻٜ نَيٛ ندٜرْ دُونِيَارُ نغَمْ ٻٜ مبَرْدَٻٜ اٜ کَافَاجٜ ندٜ کَرٛورِ ندِنْ تَکِّتِ حَاتِمِيرٜ نجٛوَٻْرٜ ندٜنْ، مِ يِعِي يٛنْکِيجِ ٻٜ طُمْ وَرِ نغَمْ ٻٜ نغَعَجِنِي وٛلْدٜ اَللَّه اٜ غٛونغَ؞ اٜ ٻٜ لٜيْ تٛ طُمْ وُلَتَ اُرْدٜ؞ سٜيْ ٻٜ پٜفْتِ حٛنٛنْدٜ سٜمْبٜىٰ ٻٜ مبِعِ، «يَا جٛومِرَاوٛ جٛومُ کٛو طُمٜ، شٜنِيطٛ، غٛودُطٛ غٛونغَ، نَا ندٜيٜ نغَطَنْتَا دُونِيَارُ کِيتَ نغَاتَنٛطَامِنْ نغَمْ وَرْکِ کِ ٻٜ مبَرِمِنْ؟» سٜيْ طُمْ حٛکِّ کٛو مٛيٜ مَٻّٜ لِمْشٜرٜ رَنٜىٰرٜ، طُمْ وِعِٻٜ ٻٜ شِوْتٛو سٜطَّ، نَا طُمْ حٜبِّتِي وَرُکِ حٛرِيٻٜ ندٜرْ حِغٛوٻٜ کُوغَلْ مَٻّٜ تٛکُّٻٜ يٜىٰسُ، ٻٜ طُمْ وَرَتَ نٛنْ نٛ طُمْ وَرْدِٻٜ؞ ندٜ کَرٛورِ ندِنْ تَکِّتِ حَاتِمِيرٜ جٛوٜىٰغٛعٛورٜ، سٜيْ طُمْ وَطِ دِمْبٛلْ لٜيْدِ مَنْغٛلْ؞ نَانغٜ ٻَلْوِ کِرِمْ بٛ پُلْٻٜ؞ لٜوْرُ وٛوجِ شٛلٛيْ بٛ پِيپَمْ؞ کٛودٜ بٛو نجَنِ نجَنِنٛيِ نٛ ٻِکّٛيْ اِبّٜ نجَنِرٛيْتَ تٛ حٜنْدُ دِمْبِي لٜکِّ کِنْ؞ سٜيْ دٛوْ تَغِّي نٛ طُمْ تَغِّرْتَ دَاغٛ، طُمْ سٛتِّنِ کٛو ندٜيٜ حٛشّٜىٰرٜ اٜ لٜيْدِ نغٛنْدِ شَکَ ندِيَمْ دَغَ تٛ طُمْ وٛنِ؞ سٜيْ لَامِيٻٜ دُونِيَارُ، اٜ اَرْدِيٻٜ، اٜ مَوْٻٜ سٛوجِعٜنْ، اٜ غٛودُٻٜ رِسْکُ، اٜ غٛودُٻٜ لَامُ، اٜ مَشُّٻٜ، اٜ نَاع مَشُّٻٜ ٻٜ شُوطِي ندٜرْ لُورٛوجِ اٜ لٜيْ کَاپٜ ندٜرْ کٛشّٜىٰجٜ؞ ٻٜ مبِعِ کٛشّٜىٰجٜ طٜنْ اٜ کَاپٜ طٜنْ، «نجَنٛيٜىٰ دٛوْ اَمِنْ، شُوطٛنْمِنْ تٛع غٛنْطٛ دٛوْ جٛوطٛرْغَلْ لَامُ يِعَمِنْ، ندٜنْ تٛع کَرٛورِ ندِنْ حَلْکَمِنْ؞ نغَمْ ݧَلْندٜ مٛنّٜرٜ مَٻّٜ کَلُّندٜ وَرِي؞ مٛيٜ وَاوَتَ دَرَاکِ؟» غَطَ نٛنْ مِ يِعِي مَلَاعِکَعٜنْ نَيٛ اٜ ندَرِي اٜ غُتُّلِّ نَيِ طِ دُونِيَارُ؞ اٜ ٻٜ شُرِ حٜنْدُوجِ نَيِ طِ دُونِيَارُ نغَمْ تٛع حٜنْدُ وِسَ دٛوْ لٜيْدِ کٛو دٛوْ مَايٛ کٛو دٛوْ کٛو کِيٜ لٜکِّ؞ سٜيْ نغِيمِ غٛطّٛ مَلَاعِکَاجٛ اٜ پٜنْتَ دٛوْ دَغَ فُونَ اٜ مٛ جٛغِي حَاتِمِيرٜ اَللَّه غٛودُطٛ يٛنْکِ؞ اٛ مٜتَنِ مَلَاعِکَعٜنْ نَيٛ ٻٜنْ طٛنْ ٻٜ اَللَّه حٛکِّ لَامُ لَلِّنْکِ لٜيْدِ اٜ مَايٛ؞ اٛ مٜتَنِٻٜ اٜ حٛنٛنْدٜ شٜمْبِنْدٜ، اٛ وِعِ، «تٛع اٛنْ لَلِّنْ لٜيْدِ کٛو مَايٛ کٛو لٜطّٜ نَا مِنْ نغَطَنِي مَشُّٻٜ اَللَّه مٜىٰطٜنْ اَلَامَ تٛ تِيطٜ مَٻّٜ تَوْ؞» سٜيْ نَنْمِ طُطْکِ ٻٜ طُمْ وَطَنِ اَلَامَ ٻٜنْ کٜوْتِي يِمْٻٜ 144,000؞ ٻٜ فُو مَٻّٜ دَغَ ندٜرْ لٜݧِ اِسْرَاعِيلَ سَڤّٛ اٜ طِطِ ٻٜ نغٛنِ، يِمْٻٜ 12,000 دَغَ لٜݧٛلْ يَحُودَ، يِمْٻٜ 12,000 دَغَ لٜݧٛلْ رُبَيْنُ، يِمْٻٜ 12,000 دَغَ لٜݧٛلْ غَتْ، يِمْٻٜ 12,000 دَغَ لٜݧٛلْ اَاشِرُ، يِمْٻٜ 12,000 دَغَ لٜݧٛلْ نَفْتَالِ، يِمْٻٜ 12,000 دَغَ لٜݧٛلْ مَنَاسٜ، يِمْٻٜ 12,000 دَغَ لٜݧٛلْ سَامِنُ، يِمْٻٜ 12,000 دَغَ لٜݧٛلْ لٜىٰوِ، يِمْٻٜ 12,000 دَغَ لٜݧٛلْ عِسَاکَ، يِمْٻٜ 12,000 دَغَ لٜݧٛلْ جَبَلُونَ، يِمْٻٜ 12,000 دَغَ لٜݧٛلْ اِسُفُ، يِمْٻٜ 12,000 دَغَ لٜݧٛلْ بِلِيَامِنُ؞ غَطَ طُمْ طٛنْ مِ رَارِي سٜيْ نغِيمِ يِمْٻٜ طُطْٻٜ ٻٜ پَٻَّکٜ لِمْنغَلْ؞ ٻٜ نغَرٛيِي دَغَ کٛو ندِيٜ لٜيْدِ، اٜ کٛو نغٛلٜ لٜݧٛلْ، اٜ کٛو ٻٜيٜ يِمْٻٜ، اٜ کٛو نغَلٜ طٜمْنغَلْ، اٜ ٻٜ ندَرِي يٜىٰسٛ جٛوطٛرْغَلْ لَامُ نغَلْ اٜ کَرٛورِ ندِنْ اٜ ٻٜ ٻٛرْنِي کٛلْتٜ دَنٜىٰجٜ تَرْ؞ اٜ ٻٜ نجٛغِي لِشٛيْ حَاکٛ دَبِينٛوجٜ اٜ جُوطٜ مَٻّٜ؞ اٜ ٻٜ پٜفْتَ حٛنٛنْدٜ سٜمْبٜىٰ اٜ ٻٜ مبِعَ، «کِسْندَمْ وَرٛيِي دَغَ تٛ اَللَّه مٜىٰطٜنْ جٛوطِيطٛ دٛوْ جٛوطٛرْغَلْ لَامُ اٜ کَرٛورِ ندِنْ!» مَلَاعِکَعٜنْ فُو اٜ ندَرِي ڤِلِي جٛوطٛرْغَلْ لَامُ نغَلْ اٜ مَوْٻٜ ٻٜنْ طٛنْ اٜ تَغَاطُمْ نَيُمْ غٛودُطُمْ يٛنْکِ طُمْ طٛنْ؞ ٻٜ فُو ٻٜ نجَنِ ٻٜ مَوْنِنِ اَللَّه؞ اٜ ٻٜ مبِعَ، «اَامِنْ! مَنْتُکِ، اٜ تٜدُّنغَلْ، اٜ فَامُ، اٜ يٜتّٛورٜ، اٜ مَنْغُ، اٜ بَوْطٜ، اٜ سٜمْبٜ تَبِّتَ تٛ اَللَّه مٜىٰطٜنْ حَا اَبَدَا اَبَدِنْ! اَامِنْ؞» سٜيْ غٛعٛتٛ ندٜرْ مَوْٻٜ ٻٜنْ طٛنْ پَمِيَمْ وِعِ، «طُمْ ٻٜيٜ ٻٜعٜ يِمْٻٜ ٻٛرْنِيٻٜ کٛلْتٜ دَنٜىٰجٜ؟ ندٜنْ دَغَ تٛيٜ ٻٜ پِوٛيِ؟» سٜيْ مبِيمٛومِ، «مِ اَنْدَا، مَوْطٛ؞ اَنْ اَ اَنْدِ؞» سٜيْ اٛ وِعِيَمْ، «ٻٜعٜ يِمْٻٜ کَمْٻٜ پِوٛيِ دَغَ ندٜرْ تٛرَّ کَلُّکَ؞ ٻٜ لَٻِّنِرِ کٛلْتٜ مَٻّٜ اٜ پِيپَمْ کَرٛورِ ندِنْ طٜ ندَنِّ تَرْ؞ کَنْجُمْ وَطِ اٜ ٻٜ ندَرِي يٜىٰسٛ جٛوطٛرْغَلْ لَامُ اَللَّه؞ اٜ ٻٜ کُوَنَمٛ جٜمَّ اٜ ݧَلَوْمَ ندٜرْ وُرٛ مَاکٛ؞ جٛوطِيطٛ دٛوْ جٛوطٛرْغَلْ لَامُ نغَلْ اٛ سُرَنَيْٻٜ؞ ٻٜ ٻٜيْدَتَا ٻٜ نَنَ وٜىٰلٛ، ٻٜ ٻٜيْدَتَا ٻٜ نَنَ طٛنْکَ؞ نَانغٜ فُطِّتَتَا ڤِيَٻٜ کٛو غٛطُّمْ غُلْطُمْ سَمْ؞ نغَمْ کَرٛورِ نغٛنْدِ شَکَ جٛوطٛرْغَلْ لَامُ نغَلْ ندِ وَرْتَيْ غَيْنَاکٛ مَٻّٜ؞ ندٜنْ ندِ يَارَيْٻٜ تٛ ندِيَمْ يٛنْکِ ٻُلِرٛيْتَ؞ اَللَّه بٛو مٛيْتَنَيْٻٜ فُو غٛنْطِ مَٻّٜ؞» ندٜ کَرٛورِ ندِنْ تَکِّتِ حَاتِمِيرٜ جٛوٜىٰطِطَوْرٜ، سٜيْ کٛو طُمٜ دٜعِّتِ تٛنْ دٛوْ حَادٜ مِنْتِيجِ 30؞ ندٜنْ مِ يِعِي مَلَاعِکَعٜنْ نجٛوٜىٰطِطٛ دَرِيٻٜ يٜىٰسٛ اَللَّه طُمْ حٛکِّٻٜ لُوٜ جٛوٜىٰطِطِ؞ سٜيْ غٛطّٛ مَلَاعِکَاجٛ وَرِ دَرِي يٜىٰسٛ تٛ طُمْ وُلَتَ اُرْدٜ وٜلْندٜ اٜ مٛ جٛغِي تُمُّدٜ جِينَارِ ندٜ طُمْ وُلَتَ اُرْدٜ ندٜرْ مَيْرٜ؞ طُمْ حٛکِّمٛ اُرْدٜ طُنْدٜ نغَمْ اٛ حَوْتَندٜ اٜ دٛعَارٜ يِمْٻٜ اَللَّه اٛ حٛکَّندٜ اَللَّه تٛ طُمْ وُلَتَ اُرْدٜ وٜلْندٜ طُمْ جِينَارِ غٛنْطُمْ يٜىٰسٛ جٛوطٛرْغَلْ لَامُ نغَلْ؞ سٜيْ شُرْکَ اُرْدٜ ندٜنْ اُمِّي دَغَ ندٜرْ تُمُّدٜ ندٜ اٛ جٛغِي ندٜنْ حَوْتِ اٜ دٛعَاجٜ يِمْٻٜ اَللَّه ٻٜنْ کَ يَحِ يٜىٰسٛ اَللَّه؞ سٜيْ مَلَاعِکَاجٛ اٛنْ حٛشِّ تُمُّدٜ ندٜنْ حٜبِّنِندٜ حِيتٜ دَغَ تٛ طُمْ وُلَتَ اُرْدٜ وٜلْندٜ، اٛ سَنْکِتِنغٜ دٛوْ دُونِيَارُ؞ سٜيْ طُمْ نَنْغِ وَطُکِ ڤَلْمَالِ، اٜ حٛولٛ، اٜ مَپّٜ، اٜ دِمْبٛلْ لٜيْدِ؞ ندٜنْ مَلَاعِکَعٜنْ ٻٜنْ طٛنْ نجٛوٜىٰطِطٛ جٛغِيٻٜ لُوٜ جٛوٜىٰطِطِ ٻٜ شِرْيِي دُودُکِطٜ؞ مَلَاعِکَاجٛ اَرَنْدٜىٰجٛ دُودِ لُوَلْ مُوطُمْ سٜيْ رَا مَلٜمَلّٜىٰجٜ کَلُّطٜ اٜ حِيتٜ اٜ طُمْ جِلِّندِرِي اٜ پِيپَمْ طُمْ مٜشّٛيَا دٛوْ دُونِيَارُ؞ حِيتٜ نغٜنْ بٛو ݧَامِ سٜنْدٜرٜ غٛعٛ ندٜرْ شٜنْدٜ تَتِ طٜ دُونِيَارُ، نغٜ ݧَامِ سٜنْدٜرٜ غٛعٛ ندٜرْ شٜنْدٜ تَتِ طٜ لٜطّٜ اٜ فُطٜ فُطٜىٰجِ؞ ندٜ مَلَاعِکَاجٛ طِطَٻٛ دُودِ لُوَلْ مُوطُمْ، سٜيْ طُمْ حُبِي غٛطُّمْ ندٜرْ مَايٛ نَنْدُطُمْ اٜ حٛشّٜىٰرٜ مَوْندٜ اٜ طُمْ ݧَامَ حِيتٜ؞ دَغَ طٛنْ سٜنْدٜرٜ غٛعٛ ندٜرْ شٜنْدٜ تَتِ طٜ مَايٛ نغٛنْ وَرْتِ پِيپَمْ؞ ندٜنْ سٜنْدٜرٜ غٛعٛ ندٜرْ شٜنْدٜ تَتِ طٜ مَرْلٜ مَايٛ نغٛنْ مبَاتِ، ندٜنْ سٜنْدٜرٜ غٛعٛ ندٜرْ شٜنْدٜ تَتِ طٜ کٛمِيجٜ غٛنْطٜ طٛنْ کَلْکِ؞ ندٜ مَلَاعِکَاجٛ تَتَٻٛ دُودِ لُوَلْ مُوطُمْ، سٜيْ وٛنْدٜ حٛودٜرٜ يَنٛيِ دَغَ دٛوْ اٜ ندٜ ݧَامَ حِيتٜ بٛ يَوْرٜ ندٜ طُمْ يَرْدَتَ ݧَاکِ؞ ندٜ يَنِ دٛوْ سٜنْدٜرٜ غٛعٛ ندٜرْ شٜنْدٜ تَتِ طٜ شَنْطِ اٜ تٛ ندِيَمْ ٻُلِرٛيْتَ؞ اِنْدٜ حٛودٜرٜ ندٜنْ «کَطُّمْ؞» سٜيْ سٜنْدٜرٜ غٛعٛ ندٜرْ شٜنْدٜ تَتِ طٜ ندِيَمْ وَرْتِ کَطَّمْ؞ يِمْٻٜ طُطْٻٜ ندٜ نجَرِ ندِيَمْ طَمْ ٻٜ مَايِ نغَمْ طَمْ وَرْتِي کَطَّمْ؞ ندٜ مَلَاعِکَاجٛ نَيَٻٛ دُودِ لُوَلْ مُوطُمْ، سٜيْ طُمْ ڤِيِ سٜنْدٜرٜ غٛعٛ ندٜرْ شٜنْدٜ تَتِ طٜ نَانغٜ اٜ لٜوْرُ اٜ کٛودٜ، حَا سٜنْدٜرٜ غٛعٛ ندٜرْ شٜنْدٜ تَتِ طٜ جَيْنغٛلْ نَانغٜ اٜ لٜوْرُ اٜ کٛودٜ ݧِٻِّ؞ سٜنْدٜرٜ غٛعٛ ندٜرْ شٜنْدٜ تَتِ ندٜ ݧَلَوْمَ وَرْتِ ݧِوْرٜ؛ نٛنْ مَا جٜمَّ؞ ندٜنْ ندٜ ندَارُمِ، سٜيْ نَنْمِ وٛنْغَ شِيلَ اٜ نغَ فِيرَ اٜ دٛوْ اٜ نغَ وِعَ اٜ سٜمْبٜ، «اٛنْ مبٛنِي! اٛنْ مبٛنِي! اٛنْ مبٛنِي اٛنٛنْ جٛوطِيٻٜ ندٜرْ دُونِيَارُ، تٛ طُمْ دُودِي لُوٜ کٛرِيطٜ طٜ مَلَاعِکَعٜنْ ٻٜنْ طٛنْ تَتٛ شِرْيِي دُودُکِ!» ندٜ مَلَاعِکَاجٛ نجٛوَٻٛ دُودِ لُوَلْ مُوطُمْ، سٜيْ نغِيمِ حٛودٜرٜ يَنٛيِي ندٜرْ دُونِيَارُ دَغَ دٛوْ؞ سٜيْ طُمْ حٛکِّندٜ مَٻِّتِرْغٜلْ دَمُّغَلْ نغَيْکَ کَلُّکَ لُغُّکَ؞ ندٜ حٛودٜرٜ ندٜنْ مَٻِّتِ نغَيْکَ کَنْ، سٜيْ وٛکَّ شُرْکَ ٻَلٜحَ وُرْتٛيِي بٛ شُرْکَ لَدّٜ ݧَامٛورٜ حِيتٜ، کَ ٻَلْوِنِ نَانغٜ اٜ نجَيْرِ دٛوْ؞ سٜيْ مبَابٜحٛ مبُرْتٛيِي دَغَ ندٜرْ شُرْکَ کَنْ کٛ نجِڤّٛنٛيِي دُونِيَارُ؞ طُمْ حٛکِّکٛ سٜمْبٜ ݝَتُکِ بٛ جَحٜ؞ سٜيْ طُمْ وِعِکٛ تٛع کٛ مٜىٰمَ غٜىٰنٜ، کٛو لٜطّٜ، کٛو غٛطُّمْ فُطٜ‑فُطٜ، سٜيْ نِ يِمْٻٜ ٻٜ نغَلَا اَلَامَ اَللَّه اٜ تِيطٜ مَٻّٜ تَنْ؞ طُمْ اَلِکٛ کٛ تٛرَّ يِمْٻٜ ٻٜنْ تٛرَّ کَلُّکَ حَا لٜبِّ جٛوِ، اَمَّا تٛع کٛ مبَرَٻٜ؞ نَوْطُمْ ݝَتُکِ مَاکٛ بٛ نَوْطُمْ ݝَتُکِ جَحٜ؞ ندٜرْ بَلْطٜ طٜنْ يِمْٻٜ طَٻِّتَيْ مَيْدٜ، اَمَّا ٻٜ کٜٻَتَاندٜ؛ ٻٜ کَاٻَيْ ٻٜ مَايَ، اَمَّا مَيْدٜ ندٜنْ دٛغَّيْٻٜ؞ مبَابٜحٛ کٛنْ اٜ نَنْدِ اٜ ڤُشِّ شِرْيِيطِ نغَمْ کٛنُ، اٜ کٛ نغٛودِ غٛطُّمْ تٛ کٛعٜ بٛ غِيفِ جِينَارِ، غٜىٰشٜ مَاکٛ بٛو اٜ نَنْدِ اٜ طٜ يِمْٻٜ؞ غَاسَ مَاکٛ اٜ نَنْدِ اٜ غَاسَ کٛعٜ رٜوْٻٜ، ندٜنْ ݧِيپٜ مَاکٛ اٜ نَنْدِ اٜ طٜ سٜمْبِنْدُ؞ غَبَاجٜ مَاکٛ اٜ شُدّٛرِي اٜ غٛطُّمْ نَنْدُطُمْ اٜ تٛغّٛحٛيْ نجَمْندِ، سٛنْݧٛ بِيٜىٰلِ مَاکٛ بٛو اٜ نَنْدِ اٜ سٛنْݧٛ ڤُشِّ کَٻَّنَاطِ کٜىٰکٜ کٛنُ اٜ طِ ندٛغَّ اٜ طِ اُمَّنِي کٛنُ؞ اٜ کٛ نغٛودِ بِشّٜ ڤِطٛوجٜ بٛ طٜ جَحٜ؞ بِشّٜ طٜنْ بٛو اٜ نغٛودِ سٜمْبٜ نَوْنُکِ يِمْٻٜ حَا لٜبِّ جٛوِ؞ ندٜنْ اٜ کٛ نغٛودِ لَامِيطٛ لَامٛتٛوطٛکٛ، کَنْکٛ وٛنِ مَلَاعِکَاجٛ نغَيْکَ کَلُّکَ لُغُّکَ کَنْ؞ اِنْدٜ مَاکٛ ندٜرْ اِبْرَانِيَنْکٛورٜ وٛنِ «اَبَدّٛنْ،» ندٜرْ حٜلٜنَنْکٛورٜ بٛو «اَفٛولِيٛنْ،» وَاتٛ کَلْکٛووٛ؞ بٛنٜ کَلُّطُمْ اَرَنْدٜجُمْ پَٻَّکٜ؞ حٛرِي بٛنٜ کَلُّطُمْ طِطُمْ غَرَيْطُمْ؞ ندٜنْ مَلَاعِکَاجٛ جٛوٜىٰغٛعٛوجٛ دُودِ لُوَلْ مُوطُمْ، سٜيْ نَنْمِ حٛنٛنْدٜ اٜ وُرْتٛيٛو دَغَ ندٜرْ نٛڤِّ نَيِ طِ تٛ طُمْ وُلَتَ اُرْدٜ طُمْ جِينَارِ غٛنْطُمْ يٜىٰسٛ اَللَّه؞ حٛنٛنْدٜ ندٜنْ وِعِ مَلَاعِکَاجٛ اٛنْ، «يٛوفُ مَلَاعِکَعٜنْ نَيٛ ٻٜنْ طٛنْ کَٻَّاٻٜ تٛ اِلٛووٛ مَنْغٛ بِعٜتٜىٰنغٛ يُفٜرِتِسْ!» سٜيْ طُمْ يٛوفِ مَلَاعِکَعٜنْ ٻٜنْ طٛنْ نَيٛ ٻٜ طُمْ سِرْيَنِي شَرٜلْ نغٜعٜلْ، اٜ ݧَلْندٜ ندٜعٜ ندٜ لٜوْرُ ندُعُ اٜ ندُنْغُ نغُعُ نغَمْ ٻٜ مبَرَ سٜنْدٜرٜ غٛعٛ ندٜرْ شٜنْدٜ تَتِ طٜ يِمْٻٜ دُونِيَارُ؞ طُمْ وِعِيَمْ طُوطُکِ سٛوجِعٜنْ وٛنْٻٜ دٛوْ ڤُشِّ وَطِي 200,000,000؞ ندٜرْ وَحَيُ طُمْ مِ يِعِ ڤُشِّ اٜ وٛنْٻٜ دٛوْ مَجِّ، اٜ ٻٜ شُدِّ غَبَاجٜ مَٻّٜ اٜ تٛغّٛحٛيْ نجَمْندِ اٜ کٛيْ مبٛوجِ شٛلٛيْ بٛ حِيتٜ، اٜ شُوطِجُمْ، اٜ نَرٜىٰرِجُمْ؞ کَدِمَا کٛو نغُيٜ ڤُشُّ اٜ وٛودِ حٛورٜ بٛ ندٜ سٜمْبِنْدُ، ندٜنْ حِيتٜ اٜ شُرْکَ اٜ کَاپٜ ݧَامٛوجٜ حِيتٜ اٜ وُرْتٛيٛو دَغَ کٛنْدُطٜ مَجِّ؞ سٜنْدٜرٜ غٛعٛ ندٜرْ شٜنْدٜ تَتِ طٜ دُونِيَارُ مبَرْدَا اٜ بٛنٜ کَلُّطُمْ تَتُمْ طُمْ طٛنْ، وَاتٛ حِيتٜ، اٜ شُرْکَ، اٜ کَاپٜ ݧَامٛوجٜ حِيتٜ بُرْتٛيْتٛوطُمْ دَغَ کٛنْدُطٜ مَاجِ؞ سٜمْبٜ مَاجِ ندٜرْ کٛنْدُطٜ مَاجِ اٜ بِشّٜ مَاجِ نغٛنِ؞ بِشّٜ طٜنْ اٜ نغٛودِ کٛعٜ بٛ طٜ بٛولٜ، اٜ مَاجٜ طِ نَوْنِرْتَ يِمْٻٜ؞ يِمْٻٜ کٛرِيٻٜ ٻٜ بٛنٜ طُمْ طٛنْ مبَرَايِ، ٻٜ تُوبَايِ ٻٜ شٜنْدِرِ اٜ کٛ ٻٜ نغَطِ اٜ جُوطٜ مَٻّٜ؞ ٻٜ اَلَايِ مَوْنِنْکِ غِنِّ، اٜ اَلَّاجِ فٜوْرٜ غَطِرَاطِ جِينَارِ، کٛو اَجُرْفَارِ، کٛو نجَمْندِ مبٛطٜىٰرِ، کٛو حَيْرٜ، کٛو لٜکِّ؞ طِ فُو طِ نغِعَتَا، طِ نَنَتَا، طِ نجَحَتَا؞ ندٜنْ ٻٜ اَلَايِ وَرُکِ يِمْٻٜ، اٜ حُوتِرْکِ بَوْطٜ غِنِّ، اٜ نجٜىٰنُ، اٜ وُجّٜ‑وُجّٜ مَٻّٜ؞ ندٜنْ مِ فُطِّتِي مِ يِعِ غٛطّٛ مَلَاعِکَاجٛ غٛودُطٛ لَامُ، اٜ مٛ جِڤّٛيٛو دَغَ دٛوْ، اٜ مٛ سُدّٛرِي دُولٜ؞ اٜ مٛ وٛودِ تِمْبٛتِمْبٛلَ دٛوْ حٛورٜ مَاکٛ، يٜىٰسٛ مَاکٛ بٛ نَانغٜ، کٛيْطٜ مَاکٛ بٛ لٜکّٛ ݧَامٛوحٛ حِيتٜ؞ اٜ مٛ جٛغِي وٛنْغٛلْ طٜرٜوٛلْ ڤَمَرٛلْ اٜ جُنْغٛ مَاکٛ اٜ نغٛلْ مَٻِّتِي؞ اٛ وَطِ کٛيْنغَلْ مَاکٛ نغَلْ ݧَامٛ دٛوْ مَايٛ، کٛيْنغَلْ مَاکٛ نغَلْ نَنٛ بٛو دٛوْ لٜيْدِ؞ سٜيْ اٛ مٜتِ اٜ حٛنٛنْدٜ شٜمْبِنْدٜ بٛ بٛجِّ سٜمْبِنْدُ؞ ندٜ اٛ مٜتِ، سٜيْ ڤَلْمَالِ جٛوٜىٰطِطِ نٛوتِي اٜ حٛولٛ شٜمْبِنْغٛ؞ ندٜ ڤَلْمَالِ جٛوٜىٰطِطِ طِنْ کٛولِ، سٜيْ شِرْيِيمِ مِ وِنْدَيْ؞ اَمَّا سٜيْ نَنْمِ وٛنْدٜ حٛنٛنْدٜ دَغَ دٛوْ وِعِي، «تَاع وِعُ غٛطّٛ کٛ ڤَلْمَالِ جٛوٜىٰطِطِ طِنْ طٛنْ مبِعِ ندٜنْ تَاع وِنْدُطُمْ!» ندٜنْ مَلَاعِکَاجٛ مٛ نغِيمِ اٜ دَرِي دٛوْ لٜيْدِ اٜ دٛوْ مَايٛ پٜفْتِ جُنْغٛ مُوطُمْ ݧَامٛ دٛوْ؞ اٛ حُنٛرِي اِنْدٜ اَللَّه غٛودُطٛ يٛنْکِ حَا اَبَدَا اَبَدِنْ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ؞ اٛ وِعِ، «وٛنُّکِ شَرٜلْ حٛرَاکِ کَدِنْ! اَمَّا شَرٜلْ کٛ مَلَاعِکَاجٛ جٛوٜىٰطِطَٻٛ دُودَتَ لُوَلْ مُوطُمْ، اَللَّه حٜبِّنَيْ سِرُّ مُوطُمْ، نٛنْ نٛ اٛ وِعُنٛو مَشُّٻٜ مَاکٛ اَنَّبٛعٜنْ؞» ندٜنْ حٛنٛنْدٜ ندٜ نَنُنٛومِ دَغَ دٛوْ، ندٜ فُطِّتِي ندٜ مٜتَنِييَمْ ندٜ وِعِ، «يَحُ نجَٻَا طٜرٜوٛلْ نغٛلْ طٛنْ مَٻِّتِينغٛلْ اٜ جُنْغٛ مَلَاعِکَاجٛ اٛنْ طٛنْ دَرِيطٛ دٛوْ مَايٛ اٜ دٛوْ لٜيْدِ؞» سٜيْ نجَحُمِ تٛ مَلَاعِکَاجٛ اٛنْ مبِيمٛومِ اٛ حٛکَّيَمْ طٜرٜوٛلْ نغٛلْ؞ سٜيْ اٛ وِعِيَمْ، «جَٻُنغٛلْ ݧَامَا؞ نغٛلْ وَرْتَيْ کَطُّمْ ندٜرْ رٜىٰدُ مَاطَ، اَمَّا تٛ حٛنْدُکٛ مَاطَ نغٛلْ وٜلَيْ بٛ نجُمْرِ؞» سٜيْ نجَٻُمِ طٜرٜوٛلْ نغٛلْ اٜ جُنْغٛ مَلَاعِکَاجٛ اٛنْ ݧَامُمِنغٛلْ؞ سٜيْ نغٛلْ وَرْتِ بٜلْنغٛلْ اٜ حٛنْدُکٛ اَمْ بٛ نجُمْرِ، اَمَّا غَطَ مِ مٛطِينغٛلْ نغٛلْ وَرْتِ کَطُّمْ ندٜرْ رٜىٰدُ اَمْ؞ سٜيْ طُمْ فُطِّتِ طُمْ وِعِيَمْ، «دٛولٜ ڤُطِّتَا مبِعَ کٛ حٜٻَتَ يِمْٻٜ اٜ لٜيْطٜ فٜىٰرٜ‑فٜىٰرٜ، اٜ لٜݧِ، اٜ طٜمْطٜ، اٜ لَامِيٻٜ طُطْٻٜ؞» ندٜنْ طُمْ حٛکِّيَمْ غٛطُّمْ ڤٛوندِرْطُمْ نَنْدُطُمْ اٜ سَوْرُ، طُمْ وِعِيَمْ، «اُمَّ نجَحَا ڤٛوندَا وُرٛ شٜنِينغٛ اٜ تٛ طُمْ حٛکَّتَ اَللَّه شَاحُ، ندٜنْ لِمَا مَوْنِنٛوٻٜ اَللَّه ندٜرْ مَغّٛ؞ اَمَّا تَاع فٛوندُ نجَيْرِ يَاسِ وُرٛ نغٛنْ، اَلُندِ، نغَمْ طُمْ حٛکِّيندِ لٜپِّ دُونِيَارُ، ٻٜ لَامٛو غَرِيرِ شٜنِيندِ اٜ سٜمْبٜ حَا لٜبِّ 42؞ ندٜنْ مِ حٛکَّيْ شٜيْدُعٜنْ اَمْ طِطٛ لَامُ ٻٜ نغَعَجِنَ وٛلْدٜ اَمْ حَا بَلْطٜ 1,260، اٜ ٻٜ ٻٛرْنِي کٛلْتٜ کٛلَّيْطٜ وَنَّارٜ؞» ٻٜنْ طٛنْ شٜيْدُعٜنْ طِطٛ کَمْٻٜ نغٛنِ لٜطّٜ جَيْتُنْ طِطِ اٜ فِتِلَاجِ طِطِ دَرِيطِ يٜىٰسٛ جٛومُ دُونِيَارُ فُو؞ فُو غِطّٛ حَلَّنَٻٜ، سٜيْ حِيتٜ وُرْتٛيٛو دَغَ ندٜرْ کٛنْدُطٜ مَٻّٜ حَلْکَمٛ؞ نٛنْ طُمْ وَرِرْتَ کٛو مٛيٜ غِطّٛ حَلَّنْکِٻٜ؞ اٜ ٻٜ نغٛودِ لَامُ حَطُکِ ندِيَمْ تٛٻَ ندٜرْ بَلْطٜ طٜ ٻٜ نغَعَجِنْتَ وٛلْدٜ جٛومِرَاوٛ؞ ندٜنْ اٜ ٻٜ نغٛودِ لَامُ ٻٜ نغَرْتِرَ ندِيَمْ پِيپَمْ؞ طٛنْمَا اٜ ٻٜ نغٛودِ لَامُ جِڤِّنَنْکِ دُونِيَارُ کٛو اِرِ طُمٜ بٛنٜ کَلُّطُمْ طُمْ ٻٜ نغِطِ؞ غَطَ ٻٜ کٜىٰݧِي وَعَجِنْکِ مَٻّٜ سٜيْ وٛنْدِ مَرْدِ کَلُّندِ بُرْتٛيْتٛوندِ ندٜرْ نغَيْکَ لُغُّکَ کَنْ حٛنَٻٜ؞ ندِ حٜٻَ جَالٛرْغَلْ دٛوْ مَٻّٜ ندِ وَرَٻٜ؞ طُمْ اَلَيْ ٻَلِّ مَٻّٜ شَکَ لُومٛ غَرِيرِ مَوْندِ؞ اٜ طُمْ نٛدِّرَ غَرِيرِ ندِنْ «سٛدٛمْ» کٛو «مَسَرْ» نغَمْ نغِکُّ جٛوطِيٻٜ ندٜرْ مَيْرِ؞ ندٜرْ مَيْرِ طُمْ ڤِيَنِ جٛومِرَاوٛ مَٻّٜ کُوسَاجٜ دٛوْ غَافَانغَلْ؞ يِمْٻٜ دَغَ کٛو ندِيٜ لٜيْدِ، اٜ لٜݧِ، اٜ طٜمْطٜ ٻٜ ندَارَيْ ٻَلِّ طِنْ حَا بَلْطٜ تَتِ اٜ سٜنْدٜرٜ ٻٜ کَطَ طُمْ اُوٛيَطِ؞ يِمْٻٜ دُونِيَارُ فُو نَنَيْ بٜلْطُمْ ٻٜ نغَطَ حُمْتٛ ٻٜ کٛکِّندِرَ دٛکّٜ نغَمْ اَنَّبٛعٜنْ طِطٛ ٻٜنْ مبَرَامَ؞ ٻٜ نغَطَيْ نٛنْ نغَمْ اَنَّبٛعٜنْ ٻٜنْ ڤٛوطَنِينٛ دُونِيَارُ فُو تٛرَّ کَلُّکَ؞ اَمَّا غَطَ بَلْطٜ تَتِ اٜ سٜنْدٜرٜ، سٜيْ فٛوفَانغٛ يٛنْکِ وَرٛيِ دَغَ تٛ اَللَّه نَتِّٻٜ؞ ٻٜ اُمِّي ٻٜ ندَرِي، کُلٛلْ مَنْغٛلْ نَنْغِ کٛو مٛيٜ غِيطٛٻٜ؞ سٜيْ اَنَّبٛعٜنْ طِطٛ ٻٜنْ نَنِ وٛنْدٜ حٛنٛنْدٜ شٜمْبِنْدٜ دَغَ دٛوْ اٜ وِعَٻٜ، «پٜنْتٛيٜىٰ طٛعٛ!» سٜيْ ٻٜ کٛشَّا يَاکِ دٛوْ ندٜرْ ندُولَ، وَݧْوَݧْٻٜ مَٻّٜ اٜ ندَارَ؞ طٛنْ اٜ طٛنْ طُمْ وَطِ وٛنْغٛلْ دِمْبٛلْ لٜيْدِ کَلُّنغٛلْ، سٜيْ سٜنْدٜرٜ غٛعٛ ندٜرْ شٜنْدٜ سَڤّٛ طٜ غَرِيرِ ندِنْ يَنِ، طُمْ وَرِ يِمْٻٜ 7,000؞ کُلٛلْ مَنْغٛلْ نَنْغِ يِمْٻٜ کٛرِيٻٜ، ٻٜ مَوْنِنِ اَللَّه مٛ دٛوْ؞ حَلْکٜرٜ طِطَوْرٜ پَٻَّکٜ؞ حَلْکٜرٜ تَتَوْرٜ اٜ وَرَ نَاع کٛ نٜىٰٻِ؞ سٜيْ مَلَاعِکَاجٛ جٛوٜىٰطِطَٻٛ دُودِ لُوَلْ مُوطُمْ، سٜيْ طُمْ نَنِ حٛنٛنْطٜ شٜمْبِطّٜ دَغَ دٛوْ اٜ مبِعَ، «لَامُ دُونِيَارُ فُو وَرْتِي طُمْ جٛومِرَاوٛ مٜىٰطٜنْ اٜ اَلْمَسِيحُ مَاکٛ؞ اٛ لَامٛتٛ حَا اَبَدَا اَبَدِنْ!» سٜيْ مَوْٻٜ ٻٜنْ طٛنْ 42 جٛوطِيٻٜ دٛوْ جٛوطٛرْلٜ لَامُ مَٻّٜ يٜىٰسٛ اَللَّه ٻٜ نجَنِ يٜىٰسٛ مَاکٛ ٻٜ مَوْنِنِمٛ؞ اٜ ٻٜ مبِعَ، «يَا اَللَّه جٛومِرَاوٛ جٛومُ بَوْطٜ، اَنْ وٛنِ جٛونِ، اَنْ وٛنِ ندٜنّٛ! مِنْ نغٜتِّيمَ نغَمْ اَ حُوتِرِي بَوْطٜ مَاطَ اَ فُطِّي لَامَاکِ؞ يِمْٻٜ ٻٜ اَنْدَامَ ٻٜرْنِي، اَمَّا شَرٜلْ مٛنّٜرٜ مَاطَ وَرِي؞ شَرٜلْ وَرِي نغٜلْ طُمْ وَطَنْتَ مَيْٻٜ کِيتَ، ندٜنْ طُمْ وَاتَنَ مَشُّٻٜ مَاطَ اَنَّبٛعٜنْ کٛ ٻٜ نغَطِ، اٜ يِمْٻٜ کُلٛوٻٜ اِنْدٜ مَاطَ مَوْطٛ اٜ ڤَمَرٛ، ندٜنْ طُمْ حَلْکَ بَرٛوٻٜ يِمْٻٜ؞» سٜيْ طُمْ مَٻِّتِ وُرٛ شٜنِينغٛ تٛنْ دٛوْ، طُمْ يِعِ اَکوَاتِيَ اَلْکَوَلْ مَاکٛ ندٜرْ مَغّٛ؞ سٜيْ طُمْ نَنْغِ وَطُکِ مَپّٜ اٜ ڤَلْمَالِ اٜ رِغَّاکِ اٜ دِمْبٛلْ لٜيْدِ اٜ مَلٜمَلّٜحٛ مَوْکٛ‑مَوْکٛ؞ سٜيْ غٛطُّمْ کُلْنِيطُمْ کَيْطِنِيطُمْ وَنْغِ اٜ دٛوْ؞ غٛطّٛ دٜبّٛ اٜ سُدّٛرِي نَانغٜ اٜ مٛ دَرِي دٛوْ لٜوْرُ؞ اٜ مٛ تَارِ غِيفٛلْ غٛودُنغٛلْ کٛودٜ سَڤّٛ اٜ طِطِ؞ اٜ مٛ وٛودِ رٜىٰدُ اٜ مٛ دِشِّي اٛ دَݧَيْ، اٜ مٛ وٛيَ نغَمْ نَوْطُمْ دَݧْنغٛلْ کَلُّطُمْ؞ طٛنْمَا غٛطُّمْ کُلْنِيطُمْ کَيْطِنِيطُمْ وَنْغِ اٜ دٛوْ: وٛنْغَ مبٛوغَ مبٛطٜوَ نغٛودُنغَ کٛعٜ جٛوٜىٰطِطِ اٜ لُوٜ سَڤّٛ، کٛو ندٜيٜ حٛورٜ اٜ وٛودِ غِيفٛلْ؞ سٜيْ وِشّٛ مَاغَ وُووِ سٜنْدٜرٜ غٛعٛ ندٜرْ شٜنْدٜ تَتِ طٜ کٛودٜ نغَ رُفٛيِطٜ دٛوْ دُونِيَارُ؞ سٜيْ نغَ وَرِ نغَ دَرِي يٜىٰسٛ اٛنْ طٛنْ دٜبّٛ دِشِّيطٛ دَݧَيْ نغَمْ نغَ ݧَامَ ٻِنْغٜلْ مَاکٛ تٛ اٛ دَݧِينغٜلْ؞ اٛ دَݧِ ٻِطّٛ غٛرْکٛ لَامٛتٛوطٛ دُونِيَارُ اٜ سَوْرُ نجَمْندِ؞ اَمَّا طُمْ حٛشِّ ٻِطّٛ اٛنْ طُمْ يَارِمٛ تٛ اَللَّه تٛ جٛوطٛرْغَلْ لَامُ مَاکٛ؞ دٜبّٛ اٛنْ بٛو دٛغِّ نَتِّ لَدّٜ يَاکِ وٛنْدٜ وِغٜىٰرٜ تٛ اَللَّه سِرْيَنِيمٛ تٛ طُمْ فَامَنْتَمٛ حَا بَلْطٜ 1,260؞ سٜيْ کٛنُ اُمِّي تٛنْ دٛوْ؞ مِيکَاعِلُ اٜ مَلَاعِکَعٜنْ مُوطُمْ کٛنِدِ اٜ مبٛوغَ نغَنْ اٜ مَلَاعِکَعٜنْ مَغَّ؞ اَمَّا طُمْ حٜٻِ جَالٛرْغَلْ دٛوْ مبٛوغَ نغَنْ، طُمْ رِيوِنغَ اٜ مَلَاعِکَعٜنْ مَاغَ دَغَ تٛنْ دٛوْ؞ طُمْ حُبِنٛيِنغَ ندٜرْ دُونِيَارُ؞ کَنْغَ وٛنِ مبٛوغَ نغَ دَغَ ندٜنّٛ بِعٜتٜىٰنغَ غُلّٛتٛوطٛ کٛو شٜيْطَنْ، مَجِّنٛووٛ دُونِيَارُ؞ طُمْ حُبِنِنغَ ندٜرْ دُونِيَارُ فُو اٜ مَلَاعِکَعٜنْ مَاکٛ؞ سٜيْ نَنْمِ وٛنْدٜ حٛنٛنْدٜ شٜمْبِنْدٜ دَغَ دٛوْ اٜ وِعَ، «جٛونِ کِسْندَمْ، اٜ لَامُ، اٜ بَوْطٜ اَللَّه مٜىٰطٜنْ، اٜ لَامُ اَلْمَسِيحُ مَاکٛ وَرِي؞ نغَمْ اٛنْ طٛنْ غُلّٛتٛوطٛ بَنْدِرَاٻٜ مٜىٰطٜنْ يٜىٰسٛ اَللَّه جٜمَّ اٜ ݧَلَوْمَ رِيوَامَ دَغَ دٛوْ؞ ٻٜ کٜٻِي جَالٛرْغَلْ دٛوْ مَاکٛ بَرْکَ پِيپَمْ کَرٛورِ ندِنْ ندٜنْ اٜ بَرْکَ وٛلْدٜ اَللَّه نغَمْ ٻٜ نجَٻِي ٻٜ ندُلَّ يٛنْکِ مَٻّٜ؞ نغَمْ نٛنْ، اٛنٛنْ وٛنْٻٜ ندٜرْ وُرٛ اَللَّه تٛنْ دٛوْ، نَنٜىٰ بٜلْطُمْ! اَمَّا اٛنْ مبٛنِي اٛنٛنْ وٛنْٻٜ ندٜرْ دُونِيَارُ اٜ کٛ وٛنِ ندٜرْ مَايٛ! نغَمْ شٜيْطَنْ جِڤّٛنٛيَکٜعٛنْ اٜ ٻٜرْنِ بٛ ڤُسَيْ نغَمْ اٜ مٛ اَنْدِ شَرٜلْ مَاکٛ ٻَدَکٜ رٜعُکِ؞» ندٜ مبٛوغَ نغَنْ اَنْدِتِ رِيوَامَ ندٜرْ دُونِيَارُ، سٜيْ نغَ فُطِّ تٛکُّکِ دٜبّٛ اٛنْ طٛنْ دَݧُطٛ ٻِطّٛ غٛرْکٛ؞ اَمَّا طُمْ حٛکِّ دٜبّٛ اٛنْ بِيٜىٰلِ طِطِ طِ شِيلَ مَنْغَ نغَمْ اٛ فِيرَ اٛ يَحَ وِغٜىٰرٜ ندٜ طُمْ سِرْيَنِيمٛ ندٜرْ لَدّٜ؞ تٛنْ طُمْ فَامَنْتَمٛ حَا دُوٻِ تَتِ اٜ سٜنْدٜرٜ؞ سٜيْ مبٛوغَ نغَنْ تُوتِ ندِيَمْ بٛ شَانغٛلْ غَطَ دٜبّٛ اٛنْ، نغَمْ ندِيَمْ طَمْ دِلِّدَ اٜ مَاکٛ؞ اَمَّا لٜيْدِ وَلِّمٛ ندِ اٛمْتِ حٛنْدُکٛ ندِ يَرْدِ ندِيَمْ طَمْ؞ سٜيْ مبٛوغَ نغَنْ مٛنَّنِ دٜبّٛ اٛنْ، نغَ اُمّٛيِي نغَ حٛنَ لٜݧٛلْ مَاکٛ، وَاتٛ کٛو مٛيٜ تٛکّٛووٛ کٛ اَللَّه وِعِ جَٻُطٛ غٛونغَ کَ يٜىٰسُ وَدِّ؞ سٜيْ مبٛوغَ نغَنْ دَرِي دٛوْ نجَارٜىٰندِ نغٛنْدِ دَاندٜ مَايٛ؞ سٜيْ نغِيمِ وٛنْدِ مَرْدِ اٜ وُرْتٛيٛو دَغَ ندٜرْ مَايٛ اٜ ندِ وٛودِ لُوٜ سَڤّٛ اٜ کٛعٜ جٛوٜىٰطِطِ؞ کٛو نغَلٜ لُوَلْ اٜ وٛودِ غِيفٛلْ ندٜنْ کٛو ندٜيٜ حٛورٜ اٜ وٛودِ اِنْدٜ کٛلَّيْندٜ اَللَّه يَوَارٜ؞ مَرْدِ ندِ نغِيمِ ندِنْ اٜ ندِ نَنْدِ اٜ شٜمْبِنْدُ اٜ ندِ وٛودِ کٛيْطٜ مَوْطٜ غٛودُطٜ غَاسَ اٜ ڤٜطٜىٰلِ جُوتُطِ بٛ طِ وٛنْغَ ندِوْرِوَ لَدّٜ بِعٜتٜىٰنغَ بٜيَرْ؞ حٛنْدُکٛ مَيْرِ اٜ نَنْدِ اٜ کٛ سٜمْبِنْدُ؞ مبٛوغَ نغَنْ بٛو حٛکِّندِ بَوْطٜ مُوطُمْ، اٜ جٛوطٛرْغَلْ لَامُ مُوطُمْ، اٜ لَامُ مَوْطُمْ؞ ندٜنْ حٛورٜ وٛعٛيْرٜ دَغَ ندٜرْ کٛعٜ مَرْدِ ندِنْ اٜ وٛودِ وٛنْدٜ نَوْنٛودٜ بَاوَيْندٜ وَرْکِندِ؞ اَمَّا نَوْنٛودٜ ندٜنْ يَادَکٜ حٛيِي؞ نغَمْ نٛنْ کٛو مٛيٜ ندٜرْ دُونِيَارُ حَيْطِنِ تٛکِّ مَرْدِ ندِنْ؞ ٻٜ مَوْنِنِ مبٛوغَ نغَنْ، نغَمْ نغَ حٛکِّيندِ لَامُ؞ طٛنْمَا ٻٜ مَوْنِنِ مَرْدِ ندِنْ، اٜ ٻٜ مبِعَ، «مٛيٜ حٜوْتِ بٛ مَرْدِ ندِعِ؟ مٛيٜ وَاوَتَ حَٻْدَ اٜ مَيْرِ؟» طُمْ اَلِ مَرْدِ ندِنْ مَوْنِنَ حٛورٜ مُوطُمْ اٜ حُطَ جٛومِرَاوٛ، طُمْ اَلِندِ ندِ لَامٛو لٜبِّ 42؞ ندِ فُطِّ حُطُکِ اَللَّه اٜ اِنْدٜ مَاکٛ اٜ تٛ اٛ جٛوطٛتٛو، اٜ فُو جٛوطِيٻٜ تٛنْ دٛوْ؞ طُمْ اَلِندِ ندِ حٛنَ يِمْٻٜ اَللَّه ندِ حٜٻَ جَالٛرْغَلْ دٛوْ مَٻّٜ؞ ندِ حٛکَّا لَامُ دٛوْ کٛو نغٛلٜ لٜݧٛلْ، اٜ کٛو ٻٜيٜ يِمْٻٜ، اٜ کٛو نغَلٜ طٜمْنغَلْ، اٜ کٛو ندِيٜ لٜيْدِ؞ فُو يِمْٻٜ جٛوطِيٻٜ اٜ دُونِيَارُ ٻٜ مَوْنِنَيْندِ، سٜيْ نِ ٻٜ طُمْ وِنْدِ اِنْطٜ مَٻّٜ کٛ دُونِيَارُ تَغٜىٰ ندٜرْ دٜفْتٜرٜ يٛنْکِ ندٜ کَرٛورِ بَرَاندِ؞ «فُو غٛودُطٛ نٛڤِّ نَنٛوجِ نَنَ! کٛو مٛيٜ طُمْ وِنْدِ نَا يَحِي مَشُّنغَاکُ، تٛو، نَا يَحِي: ندٜنْ کٛو مٛيٜ طُمْ وِنْدِ اٜ کَافَحِ اٛ وَرْدٜتٜىٰ، تٛو، اٜ کَافَحِ کِنْ اٛ وَرْدٜتٜىٰ؞ نغَمْ مَاجُمْ سٜيْ يِمْٻٜ اَللَّه کٛولٛومٛ نغَطَ مُݧَلْ؞» ندٜنْ مِ يِعِي وٛنْدِ مَرْدِ اٜ وُرْتٛيٛو دَغَ ندٜرْ لٜيْدِ؞ اٜ ندِ وٛودِ لُوٜ طِطِ بٛ طٜ کَرٛورِ، اٜ ندِ مٜتَ بٛ مبٛوغَ؞ اٜ ندِ حُوتِرَ لَامُ مَرْدِ اَرَنْدٜىٰرِ ندِنْ فُو يٜىٰسٛ اَرَنْدٜىٰرِ ندِنْ؞ ندِ وَطِي دُونِيَارُ اٜ کٛو مٛيٜ غٛنْطٛ ندٜرْ مَيْرُ مَوْنِنَ مَرْدِ اَرَنْدٜىٰرِ ندِنْ، ندِنْ طٛنْ ندِ نَوْنٛودٜ مَيْرِ حٛيِ؞ مَرْدِ طِطَوْرِ ندِنْ وَطِ فِي کَيْطِنِيطُمْ طُطُّمْ، حَا مَا ندِ وَطِ حِيتٜ رُفٛيِ ندٜرْ دُونِيَارُ دَغَ دٛوْ؞ ندِ وَطِ نٛنْ يٜىٰسٛ غِتٜ کٛو مٛيٜ؞ ندِ مَجِّنِ يِمْٻٜ وٛنْٻٜ دُونِيَارُ اٜ کَيْطِنِيطُمْ طُمْ اُمْ اَلِندِ ندِ وَطَ اٜ يٜىٰسٛ مَرْدِ اَرَنْدٜىٰرِ نَوْنِرَاندِ کَافَحِ اَمَّا اٜ ندِ وٛودِ يٛنْکِ؞ ندٜنْ ندِ وِعِٻٜ ٻٜ نغَطَ نغُنْکِوَ نَنْدُنغَ اٜ مَرْدِ اَرَنْدٜىٰرِ ندِنْ نغَمْ حٛکُّکِندِ مَنْغُ؞ طُمْ اَلِ مَرْدِ طِطَوْرِ ندِنْ فُوفَنَ کٛ ٻٜ نغَطِ طُمْ فٛوفَانغٛ يٛنْکِ نغَمْ طُمْ مٜتَ طُمْ وَطَ فُو غَݧُطٛ مَوْنِنْکِطُمْ وَرٜىٰ؞ طٛنْمَا مَرْدِ طِطَوْرِ ندِنْ وَطِ کٛو مٛيٜ وَطَنٜىٰ اَلَامَ مَيْرِ اٜ جُنْغٛ ݧَامٛ کٛو اٜ تِيندٜ، مَوْطٛ اٜ ڤَمَرٛ، غٛودُطٛ رِسْکُ اٜ مٛ وَلَنَا، مَشُّطٛ اٜ نَاع مَشُّطٛ؞ ندِ وَطُ نٛنْ نغَمْ تٛع غٛطّٛ سٛودَ کٛو سٛورَ تٛ وَلَا اَلَامَ مَيْرِ، وَاتٛ اِنْدٜ مَيْرِ کٛو لَمْبَ اِنْدٜ مَيْرِ؞ طٛعٛ اٜ حَانِ کُوتِرٛنْ فَامُ؞ فُو غٛودُطٛ اَنْدَلْ اٛ وُرْتِنَ مَعَنَ لَمْبَ مَرْدِ ندِنْ طٛنْ، نغَمْ لَمْبَ طُمْ طُمْ اِنْدٜ نٜطّٛ؞ لَمْبَ طُمْ وٛنِ 666؞ ندٜنْ مِ رَارِي سٜيْ نغِيمِ کَرٛورِ ندِنْ اٜ دَرِي دٛوْ حٛشّٜىٰرٜ سِحِيٛونَ؞ اٜ مٛ وٛنْدِ اٜ يِمْٻٜ 144,000 ٻٜ طُمْ وِنْدَنِ اِنْدٜ مَاکٛ اٜ ندٜ ݧَاکٛ مَاکٛ تٛ تِيطٜ مَٻّٜ؞ سٜيْ نَنْمِ وٛنْدٜ حٛنٛنْدٜ دَغَ دٛوْ شٜمْبِنْدٜ بٛ حٛولٛ ندِيَمْجِ دٛغّٛوجِ، بٛ حٛولٛ رِغَّانغٛ شٜمْبِنْغٛ؞ اٜ ندٜ نَنْدِ اٜ اِيدٛ فِيکِ غَرَايَاجِ؞ اٜ ٻٜ نغِمَ وٛنْغٛلْ غِمٛلْ کٜسٛلْ يٜىٰسٛ جٛوطٛرْغَلْ لَامُ نغَلْ اٜ تَغَاطُمْ نَيُمْ غٛودُطُمْ يٛنْکِ طُمْ طٛنْ اٜ يٜىٰسٛ مَوْٻٜ ٻٜنْ طٛنْ؞ وَلَا بَاوَيْطٛ اٜکِّتَاکِ غِمٛلْ نغٛلْ، سٜيْ ٻٜنْ طٛنْ يِمْٻٜ 144,000 تَنْ ٻٜ طُمْ رِمْطِنِ دَغَ دُونِيَارُ؞ کَمْٻٜ نغٛنِ غَطُٻٜ جٛنْدٜ لَمْندٜ نغَمْ ٻٜ مٜىٰطَايِ وَلْدُکِ اٜ رٜوْٻٜ، اٜ ٻٜ تٛکَّ کَرٛورِ ندِنْ فُو تٛ ندِ فَعِ؞ کَمْٻٜ نغٛنِ رِمْطِنَاٻٜ ندٜرْ يِمْٻٜ حٛرِيٻٜ، کَمْٻٜ نغٛنِ ٻٜ طُمْ اَرْتِ حٛکُّکِ اَللَّه اٜ کَرٛورِ ندِنْ؞ طُمْ مٜىٰطَايِ نَنْکِ فٜوْرٜ دَغَ کٛنْدُطٜ مَٻّٜ، نغَمْ ٻٜ مٜىٰطَايِ وَطُکِ غٛطُّمْ کٛ وٛوطَا؞ ندٜنْ مِ يِعِي غٛطّٛ مَلَاعِکَاجٛ اٜ فِيرَ تٛنْ دٛوْ، اٜ مٛ يَادَ اٜ حَبَرُ بٜلْطُمْ تَبِتَيْطُمْ نغَمْ اٛ وَعَجِنَنَ يِمْٻٜ دُونِيَارُ ٻٜ کٛو نغٛلٜ لٜݧٛلْ، اٜ کٛو ٻٜيٜ يِمْٻٜ، اٜ کٛو نغَلٜ طٜمْنغَلْ، اٜ کٛو ندِيٜ لٜيْدِ؞ اٛ پٜفْتِ حٛنٛنْدٜ سٜمْبٜىٰ اٛ وِعِ، «کُلٜىٰ اَللَّه مَوْنِنٜىٰمٛ! نغَمْ شَرٜلْ نغٜلْ اٛ وَطَنْتَ دُونِيَارُ کِيتَ وَطِي؞ مَوْنِنٜىٰ تَغُطٛ دٛوْ اٜ لٜيْ، اٜ مَايٛ اٜ تٛ ندِيَمْ ٻُلَتَ؞» سٜيْ مَلَاعِکَاجٛ طِطَٻٛ تٛکِّ اَرَنْدٜىٰجٛ اٛنْ اٜ وِعَ، «غَرِيرِ بَابِيلَ حَلْکَامَ! غَرِيرِ مَوْندِ ندِنْ ندِ حَلْکَامَ! ندِ يَرْنِي لٜݧِ وٛنْغُ نجَرُ غَيْلِتَيْنغُ حٛورٜ، وَاتٛ نجٜىٰنُ، ندِ فٛوطٛيِ مٛنّٜرٜ اَللَّه؞» سٜيْ مَلَاعِکَاجٛ تَتَٻٛ تٛکِّ طِطٛ اَرَنْدٜعٜنْ ٻٜنْ اٜ وِعَ اٜ سٜمْبٜ، «فُو مَوْنِنْطٛ ندِنْ طٛنْ مَرْدِ اَرَنْدٜىٰرِ اٜ نغُنْکِوَ نَنْدُنغَ اٜ مَيْرِ، ندٜنْ جَٻِ اَلَامَ مَيْرِ اٜ جُنْغٛ مُوطُمْ کٛو اٜ تِيندٜ مُوطُمْ، اٛ يَرَيْ بٛنٜ کَلُّطُمْ طُمْ اَللَّه سِرْيِي اٜ سٜمْبٜ مُوطُمْ ندٜرْ تُمُّدٜ مٛنّٜرٜ مُوطُمْ؞ طُمْ تٛرِّرَيْمٛ حِيتٜ اٜ کِبِرِتُ يٜىٰسٛ مَلَاعِکَعٜنْ شٜنِيٻٜ اٜ کَرٛورِ ندِنْ؞ شُرْکَ حِيتٜ غُلَيْنغٜٻٜ کَ وَطَيْ کَ اُمَّاکِ دٛوْ حَا اَبَدَا اَبَدِنْ؞ ٻٜنْ طٛنْ مَوْنِنْٻٜ مَرْدِ ندِنْ طٛنْ اٜ نغُنْکِوَ نَنْدُنغَ اٜ مَيْرِ اٜ فُو غَطَنَاٻٜ اَلَامَ اِنْدٜ مَيْرِ، ٻٜ کٜٻَتَا اُسْتَنٜىٰکِ بٛنٜ جٜمَّ اٜ ݧَلَوْمَ؞» نغَمْ مَاجُمْ يِمْٻٜ اَللَّه تٛکّٛوٻٜ کٛ اٛ وِعِ کٛولِيٻٜ يٜىٰسُ نغَطَ مُݧَلْ؞ سٜيْ ڤُطُّتُمِ نَنْمِ وٛنْدٜ حٛنٛنْدٜ دَغَ دٛوْ اٜ وِعَ، «وِنْدُ طُعُمْ، ‹ٻٜ بَرْکِطِنَاٻٜ مَايَيْٻٜ دَغَ جٛونِ اٜ تٛکِّ جٛومِرَاوٛ؞› » رُوحُ اَللَّه وِعِي، «غٛونغَ، ٻٜ شِوْتٛتٛ دَغَ کُوغَلْ مَٻّٜ اٜ تٛرَّ مَٻّٜ، نغَمْ کٛ ٻٜ نغَطِ تٛکَّيْٻٜ؞» ندٜنْ مِ رَارِي سٜيْ نغِيمِ غٛطّٜ دُولٜ دَنٜىٰجٜ اٜ وٛودِ غٛطّٛ بٛ ٻِي نٜطّٛ اٜ جٛوطِي دٛوْ مَاجٜ، اٜ مٛ تَارِ غِيفٛلْ جِينَارِ تٛ حٛورٜ مَاکٛ، اٜ مٛ جٛغِي لَوْجٜىٰرُ ݧَاطُندُ اٜ جُنْغٛ مَاکٛ؞ سٜيْ غٛطّٛ مَلَاعِکَاجٛ وُرْتٛيِي دَغَ ندٜرْ وُرٛ شٜنِينغٛ تٛنْ دٛوْ اٛ مٜتَنِ جٛوطِيطٛ دٛوْ دُولٜ اٛنْ اٜ حٛنٛنْدٜ شٜمْبِنْدٜ اٛ وِعِ، «وَطُ لَوْجٜىٰرُ مَاطَ، ڤُطَّا تَپُکِ کٛ ٻٜنْدِ، نغَمْ شَرٜلْ فٜعُّکِ غٜسٜ دُونِيَارُ وَطِي؞» سٜيْ اٛنْ طٛنْ جٛوطِيطٛ دٛوْ دُولٜ وَطِ لَوْجٜىٰرُ مُوطُمْ تَپِ کٛ ٻٜنْدِ ندٜرْ دُونِيَارُ؞ طٛنْمَا غٛطّٛ مَلَاعِکَاجٛ وُرْتٛيِي دَغَ ندٜرْ وُرٛ شٜنِينغٛ ندٜرْ وُرٛ اَللَّه تٛنْ دٛوْ؞ کَنْکٛ مَا اٜ مٛ جٛغِي لَوْجٜىٰرُ ݧَاطُندُ؞ سٜيْ غٛطّٛ مَلَاعِکَاجٛ ڤَامَنٛووٛ حِيتٜ وُرْتٛيِي دَغَ ندٜرْ تٛ طُمْ وُلَتَ اُرْدٜ؞ اٛ مٜتَنِ مَلَاعِکَاجٛ جٛغِيطٛ لَوْجٜىٰرُ وٜلْندُ ندٜرْ حٛنٛنْدٜ شٜمْبِنْدٜ اٛ وِعِ، «وَطُ لَوْجٜىٰرُ مَاطَ تَپَا اِنَبٛوجٜ دُونِيَارُ، نغَمْ نغٜسَ اِنَبٛوجٜ دُونِيَارُ ٻٜنْدِي؞» سٜيْ مَلَاعِکَاجٛ اٛنْ وَطِ لَوْجٜىٰرُ مُوطُمْ ندٜرْ دُونِيَارُ تَپِ ٻِکّٛيْ اِنَبٛوجٜ دَغَ لَيِ مَاجٜ، اٛ حُبِيکٛيْ ندٜرْ نغَيْکَ تٛ طُمْ يَاٻَتَکٛيْ؞ طُعُمْ حٛلِّ نٛ اَللَّه مٛنِّرَنْتَ کَلُّٻٜ؞ طُمْ يَاٻِکٛيْ ندٜرْ نغَيْکَ کَنْ غَطَ غَرِيرِ؞ پِيپَمْ وَطِ کَ وُرْتٛيَاکِ اٜ دٛغَّ دَغَ ندٜرْ نغَيْکَ کَنْ، تٛ طَمْ يَارِ وَطِي مِلْ 692 ندٜنْ لُغُّکِ مَاجَمْ وَطِي سَوْرُ غٛعٛ؞ سٜيْ نغِيمِ غٛطُّمْ اَلَامَ تٛنْ دٛوْ مَوْطُمْ کَيْطِنِيطُمْ؞ مِ يِعِي مَلَاعِکَعٜنْ نجٛوٜىٰطِطٛ جٛغِيٻٜ بٛنٜ جٛوٜىٰطِطِ کَلُّطُمْ شَکِتِيطُمْ، نغَمْ کَنْجٜ نغٛنِ کٜىٰرٛلْ مٛنّٜرٜ اَللَّه؞ سٜيْ نغِيمِ غٛطُّمْ بٛ مَايٛ دَارٛلّٜ حَوْتِ اٜ حِيتٜ؞ ندٜنْ مِ يِعِ کٜٻُٻٜ جَالٛرْغَلْ دٛوْ مَرْدِ اَرَنْدٜىٰرِ ندِنْ طٛنْ اٜ نغُنْکِوَ نَنْدُنغَ اٜ مَيْرِ اٜ لَمْبَ کٛلَّيْطُمْ اِنْدٜ مَيْرِ؞ اٜ ٻٜ ندَرِي دَاندٜ مَايٛ دَارٛلّٜ نغٛنْ اٜ ٻٜ نجٛغِي غَرَايَاجِ طِ اَللَّه حٛکِّٻٜ؞ اٜ ٻٜ نغِمَ غِمٛلْ مُوسَ مَشُّطٛ اَللَّه اٜ غِمٛلْ کَرٛورِ ندِنْ، اٜ ٻٜ مبِعَ، «يَا اَللَّه جٛومِرَاوٛ جٛومُ بَوْطٜ، کُوطٜ مَاطَ طٜ مَوْطٜ کَيْطِنِيطٜ؞ لَامِيطٛ لٜپِّ فُو، کٛو طُمٜ کٛ نغَطَتَا اٜ وٛودِ اَادِلَاکُ اٜ غٛونغَ! مٛيٜ وٛنِ حُلَتَامَ، يَا جٛومِرَاوٛ؟ مٛيٜ وٛنِ مَوْنِنْتَا مَنْغُ مَاطَ؟ نغَمْ اَنْ تَنْ وٛنِ شٜنِيطٛ؞ يِمْٻٜ دُونِيَارُ فُو مَوْنِنْتٜ، نغَمْ کٛو مٛيٜ يِعِي کُوطٜ مَاطَ طٜ اَادِلَاکُ؞» غَطَ نٛنْ مِ يِعِي وِغٜىٰرٜ ٻُرْندٜ سٜنَاکِ ندٜرْ وُرٛ اَللَّه تٛنْ دٛوْ اٜ اٛمْتِي؞ سٜيْ ٻٜنْ طٛنْ مَلَاعِکَعٜنْ نجٛوٜىٰطِطٛ جٛغِيٻٜ بٛنٜ کَلُّطُمْ مبُرْتٛيِي دَغَ ندٜرْ وُرٛ نغٛنْ اٜ ٻٜ ٻٛرْنِي کٛلْتٜ طٜلْمُطٜ بٛطّٜ طٜلْکِتٛتٛوطٜ، اٜ ٻٜ تَادِي تَادٛرْطٜ جِينَارِ تٛ غَبَاجٜ مَٻّٜ؞ سٜيْ غٛعٛ ندٜرْ تَغَاطُمْ نَيُمْ غٛودُطُمْ يٛنْکِ طُمْ طٛنْ حٛکِّ مَلَاعِکَعٜنْ نجٛوٜىٰطِطٛ ٻٜنْ تُمُّطٜ جٛوٜىٰطِطِ طٜ جِينَارِ اٜ طٜ کٜىٰوِ مٛنّٜرٜ اَللَّه غٛودُطٛ يٛنْکِ حَا اَبَدَا اَبَدِنْ؞ سٜيْ شُرْکَ پِوٛيِ دَغَ تٛ بَوْطٜ اَللَّه اٜ تٜدُّنغَلْ مَاکٛ حٜىٰوِ وُرٛ نغٛنْ حَا وَلَا بَوْطٛ نَتُّکِنغٛ نَا بٛنٜ جٛوٜىٰطِطِ طُمْ طٛنْ طُمْ مَلَاعِکَعٜنْ نجٛوٜىٰطِطٛ ندٜعِي؞ سٜيْ نَنْمِ وٛنْدٜ حٛنٛنْدٜ شٜمْبِنْدٜ دَغَ ندٜرْ وُرٛ شٜنِينغٛ تٛنْ دٛوْ اٜ ندٜ وِعَ مَلَاعِکَعٜنْ نجٛوٜىٰطِطٛ ٻٜنْ طٛنْ، «نجَحٜىٰ ندُفَنٛنْ دُونِيَارُ تُمُّطٜ جٛوٜىٰطِطِ طٜنْ طٛنْ طٜ مٛنّٜرٜ اَللَّه!» دَغَ طٛنْ سٜيْ مَلَاعِکَاجٛ اَرَنْدٜىٰجٛ يَحِ وَيْلِ کٛ وٛنِ ندٜرْ تُمُّدٜ مُوطُمْ دٛوْ دُونِيَارُ؞ سٜيْ نغٛکّٛ ڤُتّٛ نَوْکٛ کَلُّکٛ مبُرْتٛنٛيِي ٻٜنْ طٛنْ غٛودُٻٜ اَلَامَ مَرْدِ اَرَنْدٜىٰرِ ندِنْ طٛنْ اٜ مَوْنِنْٻٜ نغُنْکِوَ نَنْدُنغَ اٜ مَيْرِ؞ مَلَاعِکَاجٛ طِطَٻٛ مَا وَيْلِ کٛ وٛنِ ندٜرْ تُمُّدٜ مُوطُمْ ندٜرْ مَايٛ؞ سٜيْ ندِيَمْ مَايٛ نغٛنْ وَرْتِ بٛ پِيپَمْ مَيْطٛ؞ کٛو طُمٜ کٛ وٛودِ يٛنْکِ غٛنْطُمْ ندٜرْ مَاغٛ وَاتِ؞ سٜيْ مَلَاعِکَاجٛ تَتَٻٛ مَا وَيْلِ کٛ وٛنِ ندٜرْ تُمُّدٜ مُوطُمْ ندٜرْ شَنْطِ اٜ تٛ ندِيَمْ ٻُلِرٛيْتَ؞ سٜيْ طُمْ فُو طُمْ وَرْتِ پِيپَمْ؞ مِ نَنِي مَلَاعِکَاجٛ ڤَامَنٛووٛ ندِيَمْ اٜ وِعَ، «يَا شٜنِيطٛ، اَنْ وٛنِ ندٜنّٛ اَنْ وٛنِ جٛونِ؞ اَنْ اَ اَادِلِيجٛ ندٜرْ کِيتَ مَاطَ کَنْ طٛنْ؞ نغَمْ کَلُّٻٜ ندُفِي پِيپَمْ يِمْٻٜ مَاطَ اٜ اَنَّبٛعٜنْ مَاطَ، رَطُّمْ بٛو اَ حٛکِّيٻٜ پِيپَمْ ٻٜ نجَرَ نغَمْ نٛنْ حَانَنِٻٜ؞» سٜيْ نَنْمِ حٛنٛنْدٜ دَغَ تٛ طُمْ وُلَتَ اُرْدٜ وٜلْندٜ اٜ وِعَ، «غٛونغَ، اَللَّه جٛومِرَاوٛ جٛومُ بَوْطٜ! اَ وَطِرَ کِيتَ اٜ غٛونغَ اٜ اَادِلَاکُ!» سٜيْ مَلَاعِکَاجٛ نَيَٻٛ وَيْلِ کٛ وٛنِ ندٜرْ تُمُّدٜ مُوطُمْ دٛوْ نَانغٜ؞ سٜيْ طُمْ اَلِنغٜ نغٜ وُلَ يِمْٻٜ غُلْطُمْ کَلُّطُمْ؞ سٜيْ نغٜ وُلِ يِمْٻٜ نٛ حَلِّ، ٻٜ کُطِ اِنْدٜ اَللَّه، کَنْکٛ غٛودُطٛ لَامُ دٛوْ بٛنٜ جٛوٜىٰطِطِ طُمْ طٛنْ؞ اَمَّا ٻٜ تُوبَايِ ٻٜ مَوْنِنَايِمٛ؞ مَلَاعِکَاجٛ نجٛوَٻٛ مَا وَيْلِ کٛ وٛنِ ندٜرْ تُمُّدٜ مُوطُمْ دٛوْ جٛوطٛرْغَلْ لَامُ مَرْدِ اَرَنْدٜىٰرِ ندِنْ، سٜيْ ݧِوْرٜ مَٻِّ کٛو تٛيٜ تٛ ندِ لَامٛتٛو؞ يِمْٻٜ ݝَتِ طٜمْطٜ مَٻّٜ نغَمْ بٛنٜ، ٻٜ کُطِ اَللَّه مٛ دٛوْ نغَمْ نَوْطُمْ ڤُتّٛ کَلُّکٛ کٜٻُکٛٻٜ؞ اَمَّا فُو اٜ نٛنْ ٻٜ تُوبَايِ دَغَ کُوطٜ مَٻّٜ کَلُّطٜ؞ سٜيْ مَلَاعِکَاجٛ جٛوٜىٰغٛعٛوجٛ وَيْلِ کٛ وٛنِ ندٜرْ تُمُّدٜ مُوطُمْ ندٜرْ اِلٛووٛ مَنْغٛ بِعٜتٜىٰنغٛ يُفٜرِتِسْ مَنْغٛ؞ سٜيْ نغٛ ٻٜىٰٻِ نغٛ يٛورِ نغَمْ طُمْ مٛعِّنَنَ لَامِيٻٜ فُونَ لَاوٛلْ؞ سٜيْ نغِيمِ غٛطِّ غِنِّ کَنْجِ تَتِ اٜ طِ نَنْدِ اٜ ڤَاٻِ، غٛعٛتٛلْ اٜ وُرْتٛيٛو دَغَ ندٜرْ حٛنْدُکٛ مبٛوغَ نغَنْ طٛنْ، غٛعٛتٛلْ بٛو اٜ وُرْتٛيٛو دَغَ ندٜرْ حٛنْدُکٛ مَرْدِ اَرَنْدٜىٰرِ ندِنْ طٛنْ، ندٜنْ غٛعٛتٛلْ اٜ وُرْتٛيٛو دَغَ ندٜرْ حٛنْدُکٛ اَنَّبِيجٛ اٛنْ طٛنْ مٛ فٜوْرٜ؞ کَنْجِ نغٛنِ غِنِّ غَطٛوجِ کُوطٜ کَيْطِنِيطٜ؞ کَنْجِ نغٛنِ جَحٛوجِ تٛ لَامِيٻٜ دُونِيَارُ فُو طِ کَوْرِتَٻٜ نغَمْ کٛنُ اٜ ندٜنْ طٛنْ ݧَلْندٜ مَوْندٜ ندٜ اَللَّه جٛومُ بَوْطٜ؞ يٜىٰسُ وِعِ، «رَطُّمْ اٜ مِ وَرٛيَ بٛ غُجّٛ! اٛ بَرْکِطِنَاطٛ فُو جٛوطِيطٛ اٜ سِرْيِي نغَمْ ٻٛرْنٛو کٛلْتٜ مُوطُمْ نغَمْ تٛع اٛ دِلَّ اٛ ٻٛرْنَاکِ اٛ سٜمْتَ يٜىٰسٛ لٜݧٛلْ؞» سٜيْ غِنِّ طِنْ کَوْرِتِ لَامِيٻٜ ٻٜنْ تٛ وِغٜىٰرٜ بِعٜتٜىٰندٜ اَرْمَغٜدٛنْ ندٜرْ طٜمْنغَلْ اِبْرَانِيَنْکٛورٜ؞ ندٜنْ مَلَاعِکَاجٛ نجٛوٜىٰطِطَٻٛ وَيْلِ کٛ وٛنِ ندٜرْ تُمُّدٜ مُوطُمْ اٜ نجَيْرِ دٛوْ؞ سٜيْ وٛنْدٜ حٛنٛنْدٜ شٜمْبِنْدٜ وُرْتٛيِي دَغَ جٛوطٛرْغَلْ لَامُ ندٜرْ وُرٛ شٜنِينغٛ تٛنْ دٛوْ اٜ ندٜ وِعَ، «طُمْ حٜىٰݧِي!» سٜيْ طُمْ وَطِ کَ مَپّٜ اٜ رِغَّاکِ اٜ ڤَلْمَالِ اٜ دِمْبٛلْ لٜيْدِ کَلُّنغٛلْ اِرِ نغٛلْ طُمْ مٜىٰطَايِ وَطُکِ دَغَ طُمْ فُطِّ تَغُکِ يِمْٻٜ؞ دِمْبٛلْ نغٛلْ ٻُرِي کٛو نغٛلٜ دِمْبٛلْ نغٛلْ طُمْ مٜىٰطِ وَطُکِ حَلُّکِ؞ غَرِيرِ بَابِيلَ ندِنْ طٛنْ مَوْندِ سٜنْدِي تَتِ، غَرِيجٜ دُونِيَارُ مَا نجَنِ نجَنِنِ؞ سٜيْ اَللَّه سِفْتٛرِ اٜ غَرِيرِ بَابِيلَ مَوْندِ، اٛ وَطِندِ ندِ يَرِ تٛرَّ مٛنّٜرٜ مَاکٛ کَلُّندٜ؞ کٛو ندِيٜ لٜيْدِ نغٛنْدِ شَکَ ندِيَمْ ندِيَمْ ݧَامِندِ، ندٜنْ کٛشّٜىٰجٜ شَنْکِتِي؞ مَلٜمَلّٜىٰحٛ مَوْکٛ تٜدِّرْکٛ بٛ بُحُ مَسَرَارِ نغَطِ کَ يَنٛيْکِ دٛوْ يِمْٻٜ دَغَ دٛوْ حَا يِمْٻٜ ٻٜنْ کُطِ اَللَّه نغَمْ بٛنٜ مَلٜمَلّٜحٛ کٛنْ، نغَمْ تٛرَّ کَنْ حَلِّي نَاع سٜطَّ! سٜيْ غٛعٛتٛ ندٜرْ مَلَاعِکَعٜنْ نجٛوٜىٰطِطٛ ٻٜنْ طٛنْ جٛغِيٻٜ تُمُّطٜ جٛوٜىٰطِطِ طٜنْ وَرِ وِعِيَمْ، «وٛرٛيْ مِ حٛلّٛيْمَا نٛ اَللَّه حَلْکِرْتَ کَارُوَاجٛ اِنْدِنْطٛ، اٛنْ طٛنْ وَاتٛ غَرِيرِ مَوْندِ ندِنْ طٛنْ نغٛنْدِ حَادٜ شَنْطِ؞ لَامِيٻٜ دُونِيَارُ نغَطِدِي نجٜىٰنُ اٜ مَاکٛ؞ نجٜىٰنُ طُمْ ٻٜ نغَادِ يِلْتِيٻٜ بٛ اٛ حٛکُّٻٜ نجَرُ غَيْلِتَيْنغُ حٛورٜ، کَمْٻٜ اٜ يِمْٻٜ دُونِيَارُ فُو؞» ندٜرْ وَحَيُ طُمْ، مَلَاعِکَاجٛ اٛنْ حٛشِّيَمْ يَارِيَمْ ندٜرْ لَدّٜ تٛنْ نغِيمِ غٛطّٛ دٜبّٛ اٜ جٛوطِي دٛوْ وٛنْدِ مَرْدِ مبٛطٜىٰرِ شٛلٛيْ؞ ٻَنْدُ مَيْرِ فُو اٜ وٛودِ اِنْطٜ کُطٛوجٜ اَللَّه اٜ ندِ وٛودِ کٛعٜ جٛوٜىٰطِطِ اٜ لُوٜ سَڤّٛ؞ دٜبّٛ اٛنْ اٜ ٻٛرْنِي کٛلْتٜ شُوطِيجٜ اٜ بٛطٜىٰجٜ شٛلٛيْ، اٜ مٛ مٛعِّتِنٛرِي شٛدِّ جِينَارِ، اٜ شٛدِّ غَطِرَاندِ کَاپٜ طٜ شٜىٰدٜ فٜىٰرٜ‑فٜىٰرٜ؞ اٜ مٛ جٛغِي تُمُّدٜ جِينَارِ اٜ جُنْغٛ مَاکٛ اٜ ندٜ حٜىٰوِ ندِيَمْ اِنَبٛجَمْ، وَاتٛ کٛ نٜفْنِي کَلُّطُمْ طُمْ اٛ وَطِدِ اٜ وٛرْٻٜ؞ اٜ تِيندٜ مَاکٛ طُمْ وِنْدِ وٛنْدٜ اِنْدٜ غٛودُندٜ مَعَنَ شُوطِيطُمْ، وِعُکِ، «بَابِيلَ مَوْندِ اِنَّ کَارُوَعٜنْ اِنَّ کٛو طُمٜ کٛ نٜفْنِي طُمْ دُونِيَارُ؞» سٜيْ نغِيمِ دٜبّٛ اٛنْ اٜ يِلْتِي نغَمْ پِيپَمْ يِمْٻٜ اَللَّه طَمْ اٛ يَرِ اٜ پِيپَمْ ٻٜ طُمْ وَرِ نغَمْ تٛکُّکِ يٜىٰسُ؞ ندٜ نغِيمٛومِ مِ حَيْطِنِي نَاع سٜطَّ؞ اَمَّا مَلَاعِکَاجٛ اٛنْ پَمِيَمْ وِعِ، «نغَمْ طُمٜ کَيْطِنْتَا؟ مِ وِعٜتٜ مَعَنَ سِرُّ دٜبّٛ اٛعٛ اٜ سِرُّ مَرْدِ کٛشُّندِمٛ نغٛودُندِ کٛعٜ جٛوٜىٰطِطِ اٜ لُوٜ سَڤّٛ؞ مَرْدِ ندِ نغِيطَا، ندٜنّٛ اٜ ندِ وٛودُنٛو يٛنْکِ، جٛونِ ندِ وَلَا يٛنْکِ، ندٜنْ طٛعٛ يٜىٰسٛ ندِ وُرْتٛيْتٛ دَغَ ندٜرْ نغَيْکَ کَلُّکَ لُغُّکَ ندِ يَحَ تٛ ندِ حَلْکٜتٜىٰ؞ جٛوطِيٻٜ اٜ دُونِيَارُ ٻٜ طُمْ وِنْدَايِ اِنْطٜ مَٻّٜ ندٜرْ دٜفْتٜرٜ يٛنْکِ کٛ دُونِيَارُ تَغٜىٰ، ٻٜ کَيْطِنَيْ اٜ يِعُکِ مَرْدِ ندِنْ طٛنْ؞ نغَمْ ندٜنّٛ اٜ ندِ وٛودُنٛو يٛنْکِ، جٛونِ ندِ وَلَا يٛنْکِ، ندٜنْ ندِ وَرْتٛيَيْ؞ «طٛعٛ اٜ حَانِ نٜطّٛ حُوتِرَ فَامُ نغَمْ اَنْدُکِ مَعَنَ طُعُمْ؞ کٛعٜ جٛوٜىٰطِطِ طٜنْ طٛنْ طُمْ پٛولٜ جٛوٜىٰطِطِ تٛ دٜبّٛ اٛنْ طٛنْ جٛوطٛتٛو، طٛنْمَا کَنْجٜ نغٛنِ لَامِيٻٜ نجٛوٜىٰطِطٛ؞ نجٛوٛ ندٜرْ مَٻّٜ مَايِ، ندٜنْ غٛعٛتٛ اٜ لَامٛو جٛونِ، غٛعٛتٛ اٛنْ بٛو وَرَايِ تَوْ؞ تٛ اٛ وَرِي، اٛ لَامٛتٛ شَرٜلْ سٜطَّ تَنْ؞ مَرْدِ ندِنْ طٛنْ غٛودُنٛوندِ يٛنْکِ، جٛونِ بٛو ندِ وَلَا يٛنْکِ، کَيْرِ وٛنِ غٛعٛتٛ ندٜرْ لَامِيٻٜ نجٛوٜىٰطِطٛ، ندِ وَرْتَيْ لَامِيطٛ نجٛوٜىٰتَتَٻٛ، ندٜنْ طُمْ حَلْکَندِ؞ «لُوٜ طٜنْ طٛنْ سَڤّٛ طٜ نغِيطَا بٛو طُمْ لَامِيٻٜ سَڤّٛ ٻٜ ڤُطَّايِ لَامُ تَوْ، اَمَّا طُمْ حٛکَّيْٻٜ لَامُ ٻٜ لَامٛو اَوَ غٛعٛ اٜ مَرْدِ ندِنْ طٛنْ؞ ٻٜ فُو ݧُمٛ مَٻّٜ غٛعٛ، ندٜنْ ٻٜ کٛکَّيْ مَرْدِ ندِنْ طٛنْ بَوْطٜ مَٻّٜ اٜ لَامُ مَٻّٜ؞ ٻٜ کٛنَيْ کَرٛورِ ندِنْ، اَمَّا کَرٛورِ ندِنْ حٜٻَ جَالٛرْغَلْ دٛوْ مَٻّٜ نغَمْ کَنْکٛ وٛنِ جٛومِرَاوٛ جٛومِرَاٻٜ، لَامِيطٛ لَمْلَمْٻٜ؞ وٛنْدُٻٜ اٜ مَاکٛ بٛو ٻٜ نٛدَّاٻٜ، ٻٜ شُٻَاٻٜ، ٻٜ تٛکُّٻٜ جٛومِرَاوٛ بٛطُّمْ؞» طٛنْمَا مَلَاعِکَاجٛ اٛنْ وِعِيَمْ، «ندِيَمْ طَمْ طٛنْ طَمْ نغِيطَا، تٛ دٜبّٛ اٛنْ طٛنْ جٛوطِي؞ کَنْجَمْ وٛنِ لٜݧِ، اٜ يِمْٻٜ طُطْٻٜ دَغَ لٜيْطٜ فٜىٰرٜ‑فٜىٰرٜ اٜ طٜمْطٜ فٜىٰرٜ‑فٜىٰرٜ؞ لُوٜ طٜنْ طٛنْ بٛو سَڤّٛ طٜ نغِيطَا، کَنْجٜ اٜ مَرْدِ ندِنْ طٛنْ طٜ نغَݧَيْ دٜبّٛ اٛنْ طٛنْ طٜ تٜىٰتَ کٛو طُمٜ کٛ اٛ وٛودِ، طٜ ٻٛرْتَمٛ، طٜ ݧَامَ کُسٜلْ ٻَنْدُ مَاکٛ، طٜ نغُلِرَمٛ حِيتٜ؞ نغَمْ اَللَّه وَطِيٻٜ ٻٜ کُوَ کٛ اٛ يِطِ ٻٜ نغَرْتَ ٻٜ ݧُمٛ غٛعٛ، ٻٜ کٛکَّ مَرْدِ ندِنْ لَامُ مَٻّٜ، نَا طُمْ حٜبِّنِي کٛ اَللَّه وِعِ؞ «دٜبّٛ اٛنْ طٛنْ مٛ نغِيطَا، کَنْکٛ وٛنِ غَرِيرِ مَوْندِ ندِنْ طٛنْ غٛودُندِ لَامُ دٛوْ لَامِيٻٜ دُونِيَارُ؞» غَطَ نٛنْ مِ يِعِي غٛطّٛ مَلَاعِکَاجٛ اٜ جِڤّٛيٛو دَغَ دٛوْ؞ اٜ مٛ وٛودِ لَامُ مَوْطُمْ تٜدُّنغَلْ مَاکٛ يٜيْنَنِي دُونِيَارُ فُو؞ سٜيْ اٛ نٛدِّ ندٜرْ حٛنٛنْدٜ شٜمْبِنْدٜ، اٛ وِعِ، «غَرِيرِ بَابِيلَ حَلْکَامَ! غَرِيرِ مَوْندِ يَنِي! ندِ وَرْتِي تٛ غِنِّ نجٛوطٛتٛو، تٛ غِنِّ کَوْرِتَتَ اٜ کٛو طِيٜ شٛلِّ نٜفْنِيطِ کَرْمِنِيطِ؞ نغَمْ کَيْرِ وٛنِ غَرِيرِ بٛنُّندِ لٜݧِ دُونِيَارُ اٜ وَادُکِ نجٜىٰنُ اٜ مَيْرِ؞ نجٜىٰنُ طُمْ ٻٜ نغَادِ وَرْتَنِيٻٜ بٛ نجَرُ غَيْلِتَيْنغُ حٛورٜ؞ لَامِيٻٜ دُونِيَارُ نغَادِي نجٜىٰنُ اٜ مَيْرِ؞ سٛودٛوٻٜ اٜ شٛورِتٛو کٛو تٛيٜ ندٜرْ دُونِيَارُ کٜٻِي رِسْکُ نغَمْ بَابِيلَ اٜ يِطِ وَطُکِ نجٜىٰنُ نَاع سٜطَّ؞» سٜيْ نَنْمِ وٛنْدٜ حٛنٛنْدٜ دَغَ دٛوْ اٜ ندٜ وِعَ، «اٛنٛنْ يِمْٻٜ اَمْ، مبُرْتٛيٜىٰ دَغَ ندٜرْ مَيْرِ، نغَمْ تٛع حَکّٜىٰجِ مَيْرِ حَوْتَ اٜ مٛوطٛنْ، نغَمْ تٛع بٛنٜ کَلُّطُمْ کٜٻَيْطُمْندِ حٜٻَعٛنْ؞ نغَمْ حَکّٜىٰجِ مَيْرِ تٛوِي حَا کٜوْتِي دٛوْ؛ اَللَّه بٛو يٜجِّتَايِ کَلُّطُمْ طُمْ ندِ وَطِ؞ نغَطَنٜىٰندِ نٛنْ نٛ ندِ وَطِ فُو؞ کٛ ندِ وَطِ، نغَطَنٜىٰندِ نٛنْ ندٜ طِطِ؞ شُوتَنٜىٰندِ کٛ ٻُرِ سٜمْبٜ ندٜ طِطِ ندٜرْ تُمُّدٜ مَيْرِ کٛ ندِ سُوتَنِ وٛٻّٜ؞ کٛکّٜىٰندِ بٛنٜ ڤٛوطَنٜىٰندِ وَنَّارٜ، نٛنْ نٛ ندِ مَوْنِنِرِ حٛورٜ مَيْرِ اٜ نَنْکِ بٜلْطُمْ طُمْ ندِ نَنِ؞ نغَمْ اٜ ندِ وِعَ حٛورٜ مَيْرِ، ‹اٜ مِ جٛوطِي، مِ لَامِيطٛ؞ مِنْ، نَاع مِ دٜبّٛ مٛ غٛرْکٛ مُوطُمْ مَايِ، مِ نَتَّتَا وَنَّارٜ؞› نغَمْ نٛنْ بٛنٜ کَلُّطُمْ وَرَنَيْمٛ ندٜرْ ݧَلْندٜ غٛعٛ، مَيْدٜ اٜ وَنَّارٜ اٜ وٜىٰلٛ کَلُّنغٛ، ندٜنْ طُمْ وُلَمٛ اٜ حِيتٜ، نغَمْ اَللَّه جٛومِرَاوٛ غَطَنَيْطٛمٛ کِيتَ اٛ غٛودُطٛ لَامُ؞» لَامِيٻٜ دُونِيَارُ غَادُٻٜ نجٜىٰنُ اٜ کٛ وٛوطَا اٜ مَاکٛ ٻٜ مبٛيَنَيْمٛ اٜ ٻٜ نغُلَّ تٛ ٻٜ نغِعِي شُرْکَ حِيتٜ ݧَامَيْنغٜمٛ؞ ٻٜ ندَرٛتٛ دَغَ ٻَدَاکِ نغَمْ اٜ ٻٜ کُلَ تٛع تٛرَّ کَ اٛ يَرَتَ حَوْتَ اٜ مَٻّٜ، اٜ ٻٜ مبِعَ، «وَيْيٛو! وَيْيٛو! اَنْ غَرِيرِ مَوْندِ! اَنْ بَابِيلَ غَرِيرِ مَوْندِ! ندٜرْ اَوَ غٛعٛ تَنْ تٛرَّ کَلُّکَ يَنٛنٛيِيمَ؞» سٛودٛوٻٜ اٜ شٛورِتٛو وٛنْٻٜ کٛو تٛيٜ ندٜرْ دُونِيَارُ مبٛيَنَيْمٛ نغَمْ وَنَّارٜ، نغَمْ وَلَا شٛودٛووٛ غٛطُّمْ تٛ مَٻّٜ کَدِنْ؞ وَلَا شٛودَيْطٛ جِينَارِ مَٻّٜ، اٜ اَجُرْفَارِ مَٻّٜ، اٜ کَاپٜ طٜ شٜىٰدٜ، اٜ لُعُلُعُوجِ مَٻّٜ، اٜ کٛلْتٜ طٜلْمُطٜ لَٻْطٜ طٜلْکِتٛتٛوطٜ، اٜ کٛلْتٜ طٜلْمُطٜ طٜ شٜىٰدٜ بِعٜتٜىٰطٜ سِلِکِ، اٜ کٛلْتٜ شُوطِيجٜ، اٜ کٛلْتٜ بٛطٜىٰجٜ شٛلٛيْ، اٜ کٛو اِرِ طٜيٜ لٜطّٜ شٜحَاطٜ، اٜ کٛو طُمٜ غَطِرَاطُمْ اٜ ݧِيپٜ ݧِيوَ اٜ لٜطّٜ طٜ شٜىٰدٜ، اٜ نجَمْندِ مبٛطٜىٰرِ، اٜ طُمْ جَمْطٜ، اٜ کَاپٜ شٜحَاطٜ طٜ شٜىٰدٜ، اٜ سِنَمٛنْ، اٜ شٛنْدِ ݧَطّٜ مبٜلْندِ، اٜ اُرْدٜ وٜلْندٜ غُلٜتٜىٰندٜ، اٜ نٜبَّمْ بِعٜتٜىٰطَمْ مُرْ، اٜ اُرْدٜ وٜلْندٜ غُلٜتٜىٰندٜ بِعٜتٜىٰندٜ فِرَنْکِسٜنْ، اٜ ندِيَمْ اِنَبٛجَمْ، اٜ نٜبَّمْ، اٜ شٛنْدِ اَلْکَمَارِ، اٜ شَابَارِ اَلْکَمَارِ، اٜ نَعِ، اٜ بَالِ، اٜ بٜعِ، اٜ کٜىٰکٜىٰجِ ڤُشِّ، اٜ مَشُّٻٜ، وَاتٛ يٛنْکِيجِ يِمْٻٜ؞ سٛودٛوٻٜ اٜ شٛورِتٛو مبِعَيْ، «فُو بٛطُّمْ طُمْ نغَطُطَا ٻٜرْندٜ مَاطَ اٜ دٛوْ اَ دُلِّيطُمْ؞ ندٜنْ فُو رِسْکُ مَاطَ اٜ مٛعِّتِنَاکِ مَاطَ اَ دُلِّيطُمْ، اَ فُطِّتَتَا کٜٻَاطُمْ!» سٛودٛوٻٜ اٜ شٛورِتٛو کٜٻُٻٜ جَوْدِ ندٜرْ مَيْرِ، ٻٜ ندَرٛتٛ دَغَ ٻَدَاکِ، اٜ ٻٜ کُلَ نغَمْ تٛع طُمْ حَوْتَ اٜ مَٻّٜ ندٜرْ بٛنٜ طُمْ اٛ يَرَتَ، اٜ ٻٜ مبٛيَ سٜمْبٜىٰ، بٛجِّ نَوْطِ؞ ٻٜ مبِعَيْ، «وَيْيٛو! وَيْيٛو! اَنْ غَرِيرِ مَوْندِ، ٻٛرْنِنٛوندِ کٛلْتٜ طٜلْمُطٜ لَٻْطٜ طٜلْکِتٛتٛوطٜ، اٜ کٛلْتٜ شُوطِيجٜ، اٜ کٛلْتٜ بٛطٜىٰجٜ شٛلٛيْ، مٛعِّتِنِرِيندِ جِينَارِ، اٜ کَاپٜ طٜ شٜىٰدٜ، اٜ لُعُلُعُوجِ! ندٜرْ اَوَ غٛعٛ تَنْ جَوْدِ ندِنْ فُو حَلْکِي!» سٜيْ فُو غٛودُٻٜ کٛمِيجٜ ندِيَمْ اٜ نَتّٛوٻٜطٜ اٜ ڤٛوطَيْٻٜطٜ، اٜ کٛو مٛيٜ شٛودٛووٛ اٜ سٛورِتٛو دٛوْ مَايٛ، ٻٜ ندَرِي دَغَ ٻَدَاکِ، ٻٜ مبٛيِ ندٜ ٻٜ نغِعِ شُرْکَ حِيتٜ ݧَامَيْنغٜمٛ، اٜ ٻٜ مبِعَ، «ندِيٜ غَرِيرِ حٜوْتِ غَرِيرِ ندِعِ مَنْغُ؟» ٻٜ شَنْکِتَنِ کٛعٜ مَٻّٜ مبُلْمبُلْدِ ٻٜ نغَطِ کَ بٛجِّ اٜ ٻٜ نغُلَّ اٜ ٻٜ مبِعَ، «وَيْيٛو! وَيْيٛو! اَنْ غَرِيرِ مَوْندِ! ٻٜ کٛمِيجٜ ندِيَمْ فُو ندِسْکِ دَغَ جَوْدِ مَيْرِ! اَمَّا ندٜرْ اَوَ غٛعٛ کٛو طُمٜ حَلْکِي!» نَنٜىٰ بٜلْطُمْ اٛنٛنْ وٛنْٻٜ ندٜرْ وُرٛ اَللَّه تٛنْ دٛوْ، يِمْٻٜ اَللَّه اٜ لِلَاٻٜ اٜ اَنَّبٛعٜنْ، نغَمْ اَللَّه وَاتَنَکٜعٛنْ کٛ اٛ وَطَنِعٛنْ! سٜيْ غٛطّٛ مَلَاعِکَاجٛ غٛودُطٛ لَامُ حٛشِّ کَاپَ مَنْغَ اٛ حُبِينغَ ندٜرْ مَايٛ، اٜ مٛ وِعَ، «نٛنْ طُمْ حُبٛرْتٛو بَابِيلَ غَرِيرِ مَوْندِ اٜ سٜمْبٜ، طُمْ ٻٜيْدَتَا يِعُکِندِ؞ طُمْ ٻٜيْدَتَا نَنْکِ ڤِيٛوٻٜ غَرَايَاجِ، اٜ يِمٛوٻٜ، اٜ دُودٛوٻٜ دُودَالِ، اٜ دُودٛوٻٜ لُوٜ ندٜرْ مَيْرِ، ندٜنْ طُمْ بٛو فُطِّتَتَا طُمْ يِعَ بَيِلّٛ کٛو شٜحٛووٛ ندٜرْ مَيْرِ، طُمْ فُطِّتَتَا طُمْ نَنَ حٛولٛ نَمَرْدٜ ندٜرْ مَيْرِ! فِتِلَارُ ٻٜيْدَتَا يٜيْنٛو ندٜرْ مَيْرِ؞ طٛنْمَا طُمْ ٻٜيْدَتَا طُمْ نَنَ حٛنٛنْدٜ اَنْغٛوجٛ اٜ ٻَݝَاطٛ ندٜرْ مَيْرِ؞ نغَمْ ندٜنّٛ سٛودٛوٻٜ اٜ شٛورِتٛو ندٜرْ مَيْرِ کَمْٻٜ نغٛنِ مَوْٻٜ دُونِيَارُ، سِحِرِيجِ مَيْرِ بٛو مَجِّنِي يِمْٻٜ دُونِيَارُ! ندٜنْ طُمْ تَوْرِيندِ پِيپَمْ اَنَّبٛعٜنْ اٜ طَمْ يِمْٻٜ اَللَّه اٜ طَمْ يِمْٻٜ بَرَاٻٜ فُو ندٜرْ دُونِيَارُ؞» غَطَ طٛنْ مِ نَنِي حٛولٛ شٜمْبِنْغٛ بٛ حٛنٛنْدٜ يِمْٻٜ طُطْٻٜ شٜمْبِنْدٜ تٛنْ دٛوْ اٜ ٻٜ نغِمَ اٜ ٻٜ مبِعَ، «حَالِلُويَ! اَللَّه مٜىٰطٜنْ جٜيِ کِسْندَمْ اٜ مَنْغُ اٜ لَامُ، نغَمْ کِيتَ مَاکٛ اٜ وٛودِ غٛونغَ اٜ اَادِلَاکُ، اٛ حَلْکِي کَارُوَاجٛ اٛنْ طٛنْ مَوْطٛ بٛنُّطٛ دُونِيَارُ اٜ نجٜىٰنُ مُوطُمْ؞ اَللَّه وَاتَنَکٜ مَشُّٻٜ مُوطُمْ ٻٜ کَارُوَاجٛ اٛنْ وَرِ؞» سٜيْ ٻٜ فُطِّتِ ٻٜ نَنْغِ غِمٛلْ اٜ ٻٜ مبِعَ، «حَالِلُويَ! شُرْکَ حِيتٜ ݧَامُنغٜمٛ وَطَيْ کَ اُمَّاکِ حَا اَبَدَا اَبَدِنْ؞» سٜيْ مَوْٻٜ ٻٜنْ طٛنْ 42 اٜ طُمْ طٛنْ تَغَاطُمْ نَيُمْ غٛودُطُمْ يٛنْکِ ندِشِّي مَوْنِنِ اَللَّه جٛوطِيطٛ دٛوْ جٛوطٛرْغَلْ لَامُ؞ اٜ ٻٜ مبِعَ، «اَامِنْ! حَالِلُويَ!» ندٜنْ وٛنْدٜ حٛنٛنْدٜ دَغَ جٛوطٛرْغَلْ لَامُ نغَلْ اٜ وِعَ، «مَنْتٜىٰ اَللَّه مٜىٰطٜنْ، اٛنٛنْ مَشُّٻٜ مَاکٛ کُلٛوٻٜمٛ مَوْطٛ اٜ ڤَمَرٛ؞» ندٜنْ مِ نَنِي غٛطُّمْ بٛ حٛولٛ يِمْٻٜ طُطْٻٜ، بٛ حٛولٛ ندِيَمْجِ دٛغّٛوجِ، بٛ حٛولٛ رِغَّانغٛ شٜمْبِنْغٛ، اٜ ٻٜ مبِعَ، «حَالِلُويَ! نغَمْ اَللَّه جٛومِرَاوٛ مٜىٰطٜنْ جٛومُ بَوْطٜ اٜ لَامٛو! اٜنْ وٜلْوٜلْتُ نَنٜنْ بٜلْطُمْ نَاع سٜطَّ، اٜنْ مَوْنِنْمٛ، نغَمْ شَرٜلْ نغٜلْ کَرٛورِ تٜعَتَ وَرِي؞ ندٜنْ ٻَݝَاطٛ مَاکٛ اٛنْ سِرْيَکٜ؞ طُمْ حٛکِّي ٻَݝَاطٛ اٛنْ لِمْشٜرٜ طٜلْمُندٜ لَمْندٜ طٜلْکِتٛتٛوندٜ؞ لِمْشٜرٜ ندٜنْ کَيْرٜ وٛنِ کُوطٜ يِمْٻٜ اَللَّه طٜ اَادِلَاکُ؞» سٜيْ مَلَاعِکَاجٛ اٛنْ وِعِيَمْ، «وِنْدُ طُعُمْ؞ ٻٜ بَرْکِطِنَاٻٜ کُمْڤِتَاٻٜ حُمْتٛ تٜىٰغَلْ کَرٛورِ ندِنْ؞» ندٜنْ اٛ وِعِيَمْ، «کَعَ حَالَ طُمْ غٛونغَ، تٛ اَللَّه طُمْ پِوٛيِ؞» سٜيْ ندِشِّيمِ يٜىٰسٛ مَاکٛ نغَمْ مِ مَوْنِنَمٛ، اَمَّا اٛ وِعِيَمْ، «تَاع وَطُ نٛنْ! مِنْ مَا، مِ مَشُّطٛ اَللَّه بٛ مَاطَ، اَنْ اٜ بَنْدِرَاٻٜ مَاطَ جٛغِيٻٜ غٛونغَ بٛطُّمْ کَ يٜىٰسُ وَنْغِنِ؞ مَوْنِنْ اَللَّه! نغَمْ غٛونغَ کَ يٜىٰسُ وَنْغِنِ کَنْکَ وَطِ يِمْٻٜ مبَاوِ وَطُکِ اَنَّبَاکُ؞» سٜيْ نغِيمِ دٛوْ اٜ اٛمْتِي، سٜيْ رَا وٛنْغُ ڤُشُّ ندَنٜوُ غٛنْطٛ دٛوْ مَغُّ، اٜ وِعٜىٰ غَطٛووٛ کٛ حَانِ، غٛودُطٛ غٛونغَ؞ اٜ مٛ وَطَ اَادِلَاکُ ندٜرْ کِيتَ اٜ کٛنُ؞ غِتٜ مَاکٛ بٛ طٜمْنغَلْ حِيتٜ، حٛورٜ مَاکٛ اٜ وٛودِ غِيفِ طُطِّ، ندٜنْ اِنْدٜ اٜ وِنْدِي دٛوْ مَاکٛ، وَلَا اَنْدُطٛندٜ سٜيْ کَنْکٛ تَنْ؞ اٜ مٛ ٻٛرْنِي تٛغّٛورٜ ندٜ طُمْ سٛمْنِرِ پِيپَمْ، ندٜنْ اِنْدٜ ندٜ طُمْ نٛدِّرْتَمٛ وٛنِ، «وٛلْدٜ اَللَّه؞» حٛنٛوٻٜ ٻٜ دٛوْ اٜ تٛکِّمٛ دٛوْ ڤُشِّ، اٜ ٻٜ بٛرْنِي کٛلْتٜ طٜلْمُطٜ لَاٻُطٜ؞ وٛکِّ کَافَحِ ݧَاطُکِ اٜ وُرْتٛيٛو ندٜرْ حٛنْدُکٛ مَاکٛ، اٜ مَاکِ اٛ فٜعِّرْتَ دُونِيَارُ، اٛ لَامٛرْتٛٻٜ اٜ سَوْرُ نجَمْندِ، اٛ يَاٻَيْ ٻِکّٛيْ اِنَبٛوجٜ ندٜرْ نغَيْکَ مٛنّٜرٜ اَللَّه جٛومُ بَوْطٜ؞ تٛ تٛغّٛورٜ مَاکٛ اٜ دَنْغٛ مَاکٛ وٛنْدٜ اِنْدٜ اٜ وِنْدِي وِعُکِ، «لَامِيطٛ لَمْلَمْٻٜ، جٛومِرَاوٛ جٛومِرَاٻٜ؞» ندٜنْ مِ يِعِ غٛطّٛ مَلَاعِکَاجٛ اٜ دَرِي دٛوْ نَانغٜ، اٛ نٛدِّ شٛلِّ فُو ڤِيرٛوجِ اٜ دٛوْ ندٜرْ حٛنٛنْدٜ شٜمْبِنْدٜ، اٛ وِعِ، «نغَرٜىٰ کَوْرِتٛنْ نغَمْ حُمْتٛ اَللَّه مَنْغٛ، ݧَامٛنْ کُسٜلْ لَامِيٻٜ، اٜ نغٜلْ سٛوجِعٜنْ مَوْٻٜ، اٜ نغٜلْ بَاوُٻٜ کٛنُ، اٜ نغٜلْ ڤُشِّ، اٜ نغٜلْ پٜنْتٛوٻٜ ڤُشِّ طِنْ، اٜ نغٜلْ يِمْٻٜ فُو مَشُّٻٜ اٜ نَاع مَشُّٻٜ، مَوْطٛ اٜ ڤَمَرٛ!» سٜيْ نغِيمِ مَرْدِ اَرَنْدٜىٰرِ ندِنْ طٛنْ اٜ لَامِيٻٜ دُونِيَارُ اٜ سٛوجِعٜنْ مَٻّٜ کَوْرِتِي تٛ غٛعٛ نغَمْ ٻٜ کٛنَ غٛنْطٛ دٛوْ ڤُشُّ اٛنْ اٜ سٛوجِعٜنْ مَاکٛ؞ سٜيْ طُمْ نَنْغِ مَرْدِ ندِنْ اٜ اَنَّبِيجٛ فٜوْرٜ اٛنْ؞ کَنْکٛ وٛنِ غَطُطٛ کَيْطِنِيطُمْ يٜىٰسٛ مَيْرِ مَجِّنِ غَطَنَاٻٜ اَلَامَ مَيْرِ اٜ مَوْنِنْٻٜ نغُنْکِوَ نَنْدُنغَ اٜ مَيْرِ؞ اٜ يٛنْکِ طُمْ حُبِنِ اَنَّبِيجٛ فٜوْرٜ اٛنْ اٜ مَرْدِ ندِنْ ندٜرْ مبٜىٰلَ حِيتٜ کِبِرِتُ؞ طُمْ وَرِرِ سٛوجِعٜنْ مَٻّٜ اٜ کَافَحِ بُرْتٛيْتٛوکِ دَغَ حٛنْدُکٛ اٛنْ طٛنْ جٛوطِيطٛ دٛوْ ڤُشُّ؞ سٜيْ شٛلِّ ݧَامِ کُسٜلْ مَٻّٜ کٜىٰرٛلْ نٛ طِ مبَاوَتَ ݧَامُکِ؞ ندٜنْ مِ يِعِ مَلَاعِکَاجٛ اٜ جِڤّٛيٛو دَغَ دٛوْ اٜ مٛ جٛغِي مَٻِّتِرْغٜلْ نغَيْکَ کَلُّکَ لُغُّکَ، ندٜنْ اٜ مٛ جٛغِي وٛنْغٛلْ ٻٛغّٛلْ نجَمْندِ مَنْغٛلْ شٜمْبِنْغٛلْ؞ سٜيْ اٛ نَنْغِ مبٛوغَ نغَنْ، وَاتٛ مبٛوغَ نغَنْ طٛنْ نغَ دَغَ ندٜنّٛ بِعٜتٜىٰنغَ غَݧٛ کٛو شٜيْطَنْ، اٛ حَٻِّرِنغَ ٻٛغّٛلْ نغٛلْ حَا دُوٻِ 1,000؞ مَلَاعِکَاجٛ اٛنْ حُبِينغَ ندٜرْ نغَيْکَ کَنْ، اٛ مَٻِّکَ اٛ فٜطِکَ نغَمْ تٛع نغَ وُرْتٛو نغَ ٻٜيْدَ مَجِّنْکِ لٜݧِ نَا دُوٻِ طِنْ طٛنْ 1,000 کٜىٰوِي؞ غَطَ طٛنْ دٛولٜ نغَ يٛوفٜىٰ نغَمْ شَرٜلْ سٜطَّ؞ ندٜنْ مِ يِعِي جٛوطٛرْلٜ لَامُ، وٛٻّٜ اٜ نجٛوطِي دٛوْ مَاجٜ؞ کَمْٻٜ نغٛنِ کٛکَّاٻٜ لَامُ وَطُکِ کِيتَ؞ طٛنْمَا مِ يِعِي يٛنْکِيجِ ٻٜ طُمْ اِتَّنِ کٛعٜ نغَمْ ٻٜ نغَعَجِنِي حَبَرُ يٜىٰسُ اٜ وٛلْدٜ اَللَّه؞ کَمْٻٜ نغٛنِ ٻٜ مَوْنِنَايِ ندِنْ طٛنْ مَرْدِ کٛو نغُنْکِوَ نَنْدُنغَ اٜ مَيْرِ، ٻٜ نجَٻَايِ طُمْ وَطَنَٻٜ اَلَامَ مَيْرِ اٜ تِيطٜ مَٻّٜ کٛو اٜ جُوطٜ مَٻّٜ؞ ٻٜ ڤُطِّتِ ٻٜ کٜٻِي يٛنْکِ، ٻٜ لَامٛدِي اٜ اَلْمَسِيحُ حَا دُوٻِ 1,000؞ کَنْجُمْ وٛنِ اُمَّاکِ مَيْٻٜ اَرَنْدٜحِ؞ ﴿حٛرِيٻٜ مَيْٻٜ بٛو ٻٜ فُطِّتَايِ ٻٜ کٜٻِ يٛنْکِ سٜيْ ندٜ دُوٻِ 1,000 طِنْ طٛنْ کٜىٰوِ؞﴾ ٻٜ بَرْکِطِنَاٻٜ ٻٜ شٜنِيٻٜ يِمْٻٜ غٛودُٻٜ غٜطَلْ ندٜرْ کِنْ طٛنْ اُمَّاکِ اَرَنْدٜحِ؞ مَيْدٜ طِطَوْرٜ مٜىٰمَتَاٻٜ، وَاتٛ ٻٜ نَتَّتَا وُرٛ حِيتٜ، ٻٜ نغَرْتَيْ کُوَنٛوٻٜ اَللَّه اٜ اَلْمَسِيحُ، ٻٜ لَامٛدٛتٛ اٜ مَاکٛ حَا دُوٻِ 1,000؞ غَطَ دُوٻِ 1,000 طِنْ طٛنْ کٜىٰوِي، طُمْ يٛوفَيْ شٜيْطَنْ دَغَ تٛ طُمْ حَٻِّمٛ؞ اٛ وُرْتٛيْتٛ اٛ مَجِّنَ لٜپِّ دُونِيَارُ فُو، اٛ حَوْرِتَٻٜ نغَمْ کٛنُ؞ طُمْ نٛدِّرَيْ لٜپِّ طِنْ غٛغْ اٜ مَاغٛغْ؞ طُوطُکِ مَٻّٜ وَطِي بٛ طُوطُکِ نجَارٜىٰندِ مَايٛ؞ ٻٜ شَنْکِتِي کٛو تٛيٜ ندٜرْ دُونِيَارُ، ٻٜ ڤِلِي وِغٜىٰرٜ يِمْٻٜ اَللَّه، وَاتٛ غَرِيرِ ندِ اٛ يِطِ؞ اَمَّا حِيتٜ رُفٛيِ دَغَ دٛوْ نغٜ حَلْکِٻٜ؞ شٜيْطَنْ مَجِّنْطٛٻٜ بٛو حُبِنَا ندٜرْ مبٜىٰلَ حِيتٜ کِبِرِتُ تٛ مَرْدِ ندِنْ اٜ اَنَّبِيجٛ فٜوْرٜ اٛنْ طٛنْ وٛنِ؞ طُمْ وَطَيْ کَ حٛکُّکِٻٜ بٛنٜ جٜمَّ اٜ ݧَلَوْمَ حَا اَبَدَا اَبَدِنْ؞ ندٜنْ مِ يِعِي وٛنْغَلْ جٛوطٛرْغَلْ لَامُ مَنْغَلْ دَنٜوَلْ اٜ جٛوطِيطٛ دٛوْ مَاغَلْ؞ سٜيْ دٛوْ اٜ لٜيْ دٛغِّ مَجِّتِ دَغَ يٜىٰسٛ مَاکٛ طُمْ ٻٜيْدَايِ يِعُکِطُمْ؞ سٜيْ نغِيمِ مَيْٻٜ، مَوْطٛ اٜ ڤَمَرٛ، اٜ ندَرِي يٜىٰسٛ جٛوطٛرْغَلْ نغَلْ، طُمْ مَٻِّتِ غٛطّٜ دٜفْتٜ؞ طٛنْمَا طُمْ مَٻِّتِ وٛنْدٜ دٜفْتٜرٜ، وَاتٛ دٜفْتٜرٜ يٛنْکِ؞ طُمْ وَطَنِ مَيْٻٜ کِيتَ دٛوْ کٛ ٻٜ نغَطِ نٛنْ نٛ طُمْ وِنْدِرَا ندٜرْ دٜفْتٜ طٜنْ؞ مَايٛ وُرْتِنٛيِ مَيْٻٜ وٛنْٻٜ ندٜرْ مَغّٛ؞ مَيْدٜ اٜ لَاحِرَ فُو وُرْتِنٛيِ مَيْٻٜ وٛنْٻٜ ندٜرْ مَاجُمْ؞ طُمْ وَطَنِ کٛو مٛيٜ کِيتَ دٛوْ کٛ وَطِ؞ سٜيْ طُمْ حُبِنِ مَيْدٜ اٜ لَاحِرَ ندٜرْ مبٜىٰلَ حِيتٜ نغَنْ؞ نغَنْ طٛنْ مبٜىٰلَ حِيتٜ کَنْغَ وٛنِ مَيْدٜ طِطَوْرٜ؞ فُو مٛ طُمْ تَوَايِ اِنْدٜ مُوطُمْ اٜ وِنْدِي ندٜرْ دٜفْتٜرٜ يٛنْکِ، طُمْ حُبِنِمٛ ندٜرْ مبٜىٰلَ حِيتٜ نغَنْ؞ ندٜنْ مِ يِعِي دٛوْ کٜسُمْ اٜ لٜيْدِ کٜيْرِ، نغَمْ دٛوْ اَرَنْدٜجُمْ اٜ لٜيْدِ اَرَنْدٜىٰرِ مَجِّتِي، مَايٛ مَا وَلَا کٛو سٜطَّ؞ ندٜنْ مِ يِعِي غَرِيرِ شٜنِيندِ، وَاتٛ اُرُشَلِيمَ کٜيْرِ اٜ ندِ جِڤّٛيٛو دَغَ دٛوْ، دَغَ تٛ اَللَّه، ندِ سِرْيَامَ بٛ ٻَݝَاطٛ مٛعِّتِنِيطٛ نغَمْ غٛرْکٛ مُوطُمْ؞ ندٜنْ مِ نَنِي وٛنْدٜ حٛنٛنْدٜ شٜمْبِنْدٜ دَغَ جٛوطٛرْغَلْ لَامُ نغَلْ اٜ ندٜ وِعَ، «رَطُّمْ تٛ اَللَّه جٛوطٛتٛو اٜ وٛنْدِ اٜ يِمْٻٜ! اٛ جٛوطٛدٛتٛ اٜ مَٻّٜ، ٻٜ نغَرْتَيْ يِمْٻٜ مَاکٛ؞ اَللَّه اٜ حٛورٜ مُوطُمْ وٛنْدَيْ اٜ مَٻّٜ، اٛ وَرْتَيْ اَللَّه مَٻّٜ؞ اٛ مٛيْتَنَيْٻٜ فُو غٛنْطِ مَٻّٜ، طُمْ بٛو فُطِّتَتَا طُمْ وَطَ مَيْدٜ کٛو وَنَّارٜ کٛو بٛجِّ کٛو تٛرَّ نغَمْ کٛو طُمٜ طُمْ ندٜنّٛ پَٻَّکٜ؞» سٜيْ جٛوطِيطٛ دٛوْ جٛوطٛرْغَلْ لَامُ اٛنْ وِعِ، «جٛونِ اٜ مِ وَطَ کٛو طُمٜ کٜسُمْ!» طٛنْمَا اٛ وِعِيَمْ، «وِنْدُ طُمْ طٛنْ، نغَمْ حَالَ کَعَ طُمْ غٛونغَ کَ تَبُّتُکَ؞» ندٜنْ اٛ وِعِيَمْ، «طُمْ حٜىٰݧِي! مِنْ وٛنِ اَلْفَ، مِنْ وٛنِ اٛمٜىٰغَ، وَاتٛ فُطّٛودٜ اٜ تِمّٛودٜ؞ فُو نَنْطٛ طٛنْکَ مِ حٛکَّيْمٛ ندِيَمْ شَاحُ دَغَ تٛ ندِيَمْ يٛنْکِ ٻُلِرٛيْتَ؞ فُو کٜٻُطٛ جَالٛرْغَلْ حٜٻَيْ فِي طُعُمْ فُو دَغَ تٛ اَمْ، مِ وَرْتَيْ اَللَّه مَاکٛ، کَنْکٛ اٛ وَرْتَ ٻِطّٛ اَمْ؞ اَمَّا غٛودُٻٜ کُلٛلْ اٜ ݧَامٛوٻٜ اَمَانَ، اٜ کُوٛوٻٜ کُوغَلْ کَلُّنغَلْ، اٜ غَطٛوٻٜ وَرْحٛورٜ، اٜ غَطٛوٻٜ نجٜىٰنُ، اٜ دَرْنٛوٻٜ، اٜ مَوْنِنٛوٻٜ غُنْکِيجِ، اٜ فُو فٜوٛوٻٜ، ٻٜ فُو طُمْ نَتِّنَيْٻٜ مبٜىٰلَ حِيتٜ کِبِرِتُ، کَنْغَ وٛنِ مَيْدٜ طِطَوْرٜ؞» سٜيْ غٛعٛتٛ ندٜرْ مَلَاعِکَعٜنْ نجٛوٜىٰطِطٛ ٻٜنْ وَرِ، ٻٜنْ طٛنْ جٛغِيٻٜ تُمُّطٜ جٛوٜىٰطِطِ کٜىٰوُطٜ مٛنّٜرٜ اَللَّه شَکِتِيطُمْ؞ اٛ وِعِيَمْ، «وٛرٛيْ مِ حٛلّٛيْمَا ٻَݝَاطٛ، دٜبّٛ کَرٛورِ ندِنْ؞» ندٜرْ وَحَيُ طُمْ، مَلَاعِکَاجٛ اٛنْ حٛشِّيَمْ يَارِيَمْ دٛوْ وٛنْدٜ حٛشّٜىٰرٜ تٛوْندٜ نَاع سٜطَّ اٛ حٛلِّيَمْ اُرُشَلِيمَ غَرِيرِ شٜنِيندِ اٜ جِڤّٛيٛو دَغَ دٛوْ، دَغَ تٛ اَللَّه؞ غَرِيرِ ندِنْ اٜ وٛودِ تٜدُّنغَلْ اَللَّه اٜ ندِ طٜلْکِتٛو بٛ کَاپٜ طٜلْکِتٛتٛوطٜ طٜ شٜىٰدٜ، بٛ جَسْفَ اٜ ندِ طٜلْکِتٛو بٛ دَارٛغَّلْ؞ اٜ ندِ وٛودِ مَحٛلْ تٛوْنغٛلْ اٜ نغٛلْ فِلِيندِ، غٛودُنغٛلْ دَمُّطٜ سَڤّٛ اٜ طِطِ، ندٜنْ اٜ وٛودِ مَلَاعِکَعٜنْ سَڤّٛ اٜ طِطٛ ڤَامَنٛوٻٜ دَمُّطٜ طٜنْ؞ تٛ دَمُّطٜ طٜنْ بٛو طُمْ وِنْدِي اِنْطٜ لٜݧِ اِسْرَاعِيلَ سَڤّٛ اٜ طِطِ؞ کٛو ندُيٜ وُتُّدُ اٜ وٛودِ دَمُّطٜ تَتِ، دَمُّطٜ تَتِ دَغَ فُونَ، دَمُّطٜ تَتِ دَغَ حِرْنَ، دَمُّطٜ تَتِ دَغَ فٛمْبِنَ، دَمُّطٜ تَتِ دَغَ وٛيْلَ؞ طُمْ مَحِي مَحٛلْ ڤِلِينغٛلْ غَرِيرِ ندِنْ دٛوْ کَاپٜ سَڤّٛ اٜ طِطِ، ندٜنْ دٛوْ مَاجٜ طُمْ وِنْدِي اِنْطٜ لِلَاٻٜ سَڤّٛ اٜ طِطٛ ٻٜ کَرٛورِ ندِنْ؞ مَلَاعِکَاجٛ مٜتَنْطٛيَمْ بٛو اٜ وٛودِ سَوْرُ ڤٛوندٛلْ ندُ جِينَارِ ندُ اٛ فٛوندِرْتَ غَرِيرِ ندِنْ اٜ دَمُّطٜ مَيْرِ اٜ مَحٛلْ ڤِلِينغٛلْندِ؞ غَرِيرِ ندِنْ کٛو ندُيٜ وُتُّدُ اٜ فٛتِّدِ، جُوتُکِ مَيْرِ اٜ يَاجُکِ مَيْرِ اٜ فٛتِّدِ؛ سٜيْ مَلَاعِکَاجٛ اٛنْ فٛوندِرِ غَرِيرِ ندِنْ اٜ سَوْرُ ندُنْ اٛ يِعِ ندِ وَطِي مِلْ 1,500؞ جُوتُکِ مَيْرِ اٜ يَاجُکِ مَيْرِ فُو اٜ فٛتِّدِ؞ طٛنْمَا اٛ فٛوندِ مَحٛلْ ڤِلِينغٛلْ غَرِيرِ ندِنْ، تٛوُکِ مَغّٛلْ وَطِي جَاٻَنْطٜ 216؞ اٛ فٛوندِرِ نٛ نٜطّٛ فٛوندِرْتَ؞ مَحٛلْ نغٛلْ مَحِرَامَ اٜ غٛطّٜ کَاپٜ طٜ شٜىٰدٜ، بِعٜتٜىٰطٜ جَسْفَ؞ غَرِيرِ ندِنْ بٛو اٜ جِينَارِ تَنْ ندِ مَحِرَا اٜ ندِ طٜلْکِتٛو بٛ دَارٛغَّلْ؞ طُمْ مٛعِّنِرِي کَاپٜ غَطَاطٜ لٜيْ مَحٛلْ نغٛلْ اٜ کٛو اِرِ ندٜيٜ حَيْرٜ ندٜ شٜىٰدٜ؞ اَرَنْدٜ جَسْفَ، طِطَوْرٜ سَفَايَ، تَتَوْرٜ اَغَتْ، نَيَوْرٜ اٜمٜرَلْ، نجٛوَٻْرٜ اٛنِسْ، جٛوٜىٰغٛعٛورٜ کَنٜىٰلِيَنْ، جٛوٜىٰطِطَوْرٜ کِرِسٛولَتِ، جٛوٜىٰتَتَوْرٜ بٜىٰرِلْ، جٛوٜىٰنَيَوْرٜ تٛوفَسْ، سَڤّٛورٜ کِرِسٛوفُرَسْ، سَڤّٛ اٜ غٛعٛورٜ جَاسِنْ، سَڤّٛ اٜ طِطَوْرٜ اَمٜىٰتِسْ؞ ندٜنْ دَمُّطٜ سَڤّٛ اٜ طِطِ طٜنْ طٛنْ طُمْ لُعُلُعُوجِ سَڤّٛ اٜ طِطِ، کٛو نغَلٜ دَمُّغَلْ وَطِرَامَ اٜ لُعُ‑لُعُ غٛعٛ؞ طٛنْمَا طَتَلْ مَنْغَلْ غٛنْغَلْ ندٜرْ غَرِيرِ ندِنْ اٜ جِينَارِ تَنْ نغَلْ وَطِرَا، اٜ نغَلْ طٜلْکِتٛو بٛ دَارٛغَّلْ؞ مِ يِعَايِ وُرٛ شٜنِينغٛ ندٜرْ غَرِيرِ ندِنْ، نغَمْ اَللَّه جٛومِرَاوٛ جٛومُ بَوْطٜ کَنْکٛ اٜ کَرٛورِ ندِنْ نغٛنِ وُرٛ شٜنِينغٛ مَيْرِ؞ غَرِيرِ ندِنْ يِطَايِ جَيْنغٛلْ نَانغٜ کٛو نغٛلْ لٜوْرُ، نغَمْ تٜدُّنغَلْ اَللَّه يٜيْنَنْتٛوندِ، ندٜنْ کَرٛورِ ندِنْ وٛنِ فِتِلَارُ مَيْرِ؞ يِمْٻٜ دُونِيَارُ نجَحَيْ ندٜرْ جَيْنغٛلْ غَرِيرِ ندِنْ؞ لَامِيٻٜ دُونِيَارُ بٛو نغَدَّنَيْ غَرِيرِ ندِنْ جَوْدِ مَٻّٜ؞ دَمُّطٜ مَيْرِ بٛو مَٻَّتَاکٜ ݧَلَوْمَ حَا اَبَدَا، ندٜنْ طُمْ وَطَتَا جٜمَّ ندٜرْ مَيْرِ؞ طُمْ وَدَّيْ کٛو طُمٜ کٛ وٛوطِ اٜ رِسْکُ يِمْٻٜ دُونِيَارُ ندٜرْ غَرِيرِ ندِنْ؞ وَلَا غٛطُّمْ کٛ سٜنَاکِ نَتَّيْطُمْ غَرِيرِ ندِنْ، کٛو بٛو غَطٛووٛ کُوطٜ نٜفْنِيطٜ، کٛو ڤٜوٛووٛ؞ سٜيْ نِ ٻٜ طُمْ وِنْدِ اِنْطٜ مُعّٜنْ ندٜرْ دٜفْتٜرٜ يٛنْکِ ندٜ کَرٛورِ ندِنْ، کَمْٻٜ تَنْ نَتَّتَ غَرِيرِ ندِنْ؞ ندٜنْ مَلَاعِکَاجٛ اٛنْ حٛلِّيَمْ شَانغٛلْ ندِيَمْ يٛنْکِ اٜ نغٛلْ طٜلْکِتٛو بٛ دَارٛغَّلْ اٜ نغٛلْ اِلٛيَ دَغَ جٛوطٛرْغَلْ لَامُ اَللَّه اٜ کَرٛورِ ندِنْ، اٜ نغٛلْ تٛکَّ شَکَ طَتَلْ غَرِيرِ ندِنْ؞ کٛو ندُيٜ وُتُّدُ شَانغٛلْ نغٛلْ اٜ وٛودِ لٜکِّ يٛنْکِ دِمٛوحِ ٻِکّٛيْ سَڤّٛ اٜ طِطِ فٜىٰرٜ‑فٜىٰرٜ، کٛو ندُيٜ لٜوْرُ اٜ کِ رِمَ ندٜ غٛعٛ؞ حَاکٛ لٜکِّ کِنْ اٜ حُوتِنِرٜىٰ نغَمْ يَمْطِتِنْکِ لٜپِّ؞ طُمْ حٜٻَتَا غٛطُّمْ طُمْ اَللَّه لَانِ ندٜرْ غَرِيرِ ندِنْ، اَمَّا جٛوطٛرْغَلْ لَامُ اَللَّه اٜ کَرٛورِ ندِنْ جٛوطٛتٛ ندٜرْ مَيْرِ؞ مَشُّٻٜ مَاکٛ بٛو مَوْنِنَيْمٛ؞ ندٜنْ ٻٜ نغِعَيْ يٜىٰسٛ مَاکٛ، کَدِمَا طُمْ وِنْدَيْ اِنْدٜ مَاکٛ اٜ تِيطٜ مَٻّٜ؞ طُمْ فُطِّتَتَا طُمْ وَطَ جٜمَّ، ٻٜ نغَنِّدَتَا اٜ جَيْنغٛلْ فِتِلَاجِ کٛو جَيْنغٛلْ نَانغٜ، نغَمْ اَللَّه جٛومِرَاوٛ وَرْتَيْ جَيْنغٛلْ مَٻّٜ؞ ٻٜ لَامٛتٛ حَا اَبَدَا اَبَدِنْ؞ سٜيْ مَلَاعِکَاجٛ اٛنْ وِعِيَمْ، «حَالَ کَعَ طُمْ غٛونغَ تَبُّتُکَ؞ اَللَّه جٛومِرَاوٛ کٛکُّطٛ اَنَّبٛعٜنْ رُوحُ مُوطُمْ اٛ لِلٛيِ مَلَاعِکَاجٛ مَاکٛ حٛلَّ مَشُّٻٜ مَاکٛ کٛ وَطَتَ نَاع کٛ نٜىٰٻِ؞» «رَطُّمْ اٜ مِ وَرٛيَ نَاع کٛ نٜىٰٻِ! اٛ بَرْکِطِنَاطٛ غَطٛووٛ کٛ اَنَّبَاکُ دٜفْتٜرٜ ندٜعٜ وِعِ؞» مِنْ يَحَيَ، مِنْ وٛنِ نَنُطٛ يِعِ فِي طُعُمْ فُو؞ شَرٜلْ کٛ نَنْمِطُمْ نغِيمِطُمْ، سٜيْ ندِشِّيمِ يٜىٰسٛ مَلَاعِکَاجٛ کٛلُّطٛيَمْطُمْ نغَمْ مِ مَوْنِنَمٛ؞ اَمَّا اٛ وِعِيَمْ، «تَاع وَطُ نٛنْ! مِنْ مَا، مِ مَشُّطٛ اَللَّه بٛ مَاطَ، اَنْ اٜ بَنْدِرَاٻٜ مَاطَ، اٜ اَنَّبٛعٜنْ، اٜ وَطٛوٻٜ کٛ دٜفْتٜرٜ ندٜعٜ وِعِ؞ اَللَّه تَنْ مَوْنِنْتَا!» ندٜنْ اٛ وِعِيَمْ، «تَاع سُوطُ حَالَ اَنَّبَاکُ دٜفْتٜرٜ ندٜعٜ؞ نغَمْ شَرٜلْ ٻَدَکٜ نغٜلْ فُو فِي طُعُمْ وَطَتَ؞ فُو کُوٛووٛ کٛ حَلِّ وَطَ کَ حُوُکِ کٛ حَلِّ، غَطٛووٛ کٛ وٛوطَا مَا، وَطَ کَ وَطُکِ کٛ وٛوطَا؞ فُو غَطٛووٛ کٛ وٛوطِ بٛو، وَطَ کَ وَطُکِ کٛ وٛوطِ، فُو شٜنِيطٛ وَطَ کَ جٛنْدٜ مُوطُمْ سٜنِيندٜ؞» «رَطُّمْ اٜ مِ وَرٛيَ نَاع کٛ نٜىٰٻِ! مِ وَرْدَنَيْ کٛو مٛيٜ اٜ کٛ وَاتَنْتٜىٰ نغَمْ کٛ وَطِ؞ مِنْ وٛنِ اَلْفَ، مِنْ وٛنِ اٛمٜىٰغَ، مِنْ وٛنِ اَرَنْدٜىٰجٛ، مِنْ وٛنِ شَکِتِيطٛ، مِنْ وٛنِ فُطّٛودٜ اٜ تِمّٛودٜ؞» ٻٜ بَرْکِطِنَاٻٜ لَٻِّنْٻٜ کٛلْتٜ مَٻّٜ نغَمْ ٻٜ کٜٻَ نَتُّکِ غَرِيرِ ندِنْ ٻٜ ݧَامَ ٻِکّٛيْ لٜکِّ يٛنْکِ؞ ٻٜ طُمْ حَطِ نَتُّکِ غَرِيرِ ندِنْ بٛو، کَمْٻٜ نغٛنِ بٛنُّٻٜ کٛعٜ مَٻّٜ، اٜ دَرْنٛوٻٜ، اٜ غَطٛوٻٜ نجٜىٰنُ، اٜ غَطٛوٻٜ وَرْحٛورٜ، اٜ مَوْنِنٛوٻٜ غُنْکِيجِ، اٜ غِطْٻٜ فٜوُکِ کٛو ندٜيٜ؞ «مِنْ يٜىٰسُ، مِ لِلٛيِي مَلَاعِکَاجٛ اَمْ تٛ مٛوطٛنْ اٜ حَبَرُ طُعُمْ نغَمْ کَوْتٜ تٛکُّٻٜيَمْ؞ مِنْ وٛنِ فُطّٛودٜ دَوْدَ اٜ لٜݧٛلْ مَاکٛ، مِنْ وٛنِ جَابِيرٜ، حٛودٜرٜ سُبَکَ غٛودُندٜ جَيْنغٛلْ؞» رُوحُ اَللَّه اٜ ٻَݝَاطٛ اٜ ٻٜ مبِعَ، «وٛرٛيْ!» کٛو مٛيٜ نَنُطٛ طُعُمْ فُو وِعَ، «وٛرٛيْ!» فُو نَنْطٛ طٛنْکَ وَرَ، فُو غِطّٛ سٜيْ ݧٜطَ ندِيَمْ يٛنْکِ شَاحُ؞ مِنْ يَحَيَ، اٜ مِ وَغِّنَ کٛو مٛيٜ نَنْطٛ اَنَّبَاکُ دٜفْتٜرٜ ندٜعٜ؞ تٛ غٛطّٛ ٻٜيْدِي غٛطُّمْ دٛوْ مَاجُمْ، اَللَّه ٻٜيْدَنَيْمٛ بٛنٜ کَلُّطُمْ بِنْدَاطُمْ ندٜرْ دٜفْتٜرٜ ندٜعٜ؞ تٛ بٛو غٛطّٛ اِتِّي غٛطُّمْ ندٜرْ حَالَ اَنَّبَاکُ غٛنْطُمْ ندٜرْ دٜفْتٜرٜ ندٜعٜ، اَللَّه اِتَّيْ غٜطَلْ مَاکٛ ندٜرْ لٜکِّ يٛنْکِ اٜ غَرِيرِ شٜنِيندِ بِنْدَاطُمْ ندٜرْ دٜفْتٜرٜ ندٜعٜ؞ اٛنْ طٛنْ شٜيْدِنْطٛ فِي طُعُمْ فُو اٜ وِعَ، «غٛونغَ اٜ مِ وَرٛيَ نَاع کٛ نٜىٰٻِ؞» اَامِنْ؞ وٛرٛيْ يٜىٰسُ جٛومِرَاوٛ! يٜىٰسُ جٛومِرَاوٛ بَرْکِطِنَ يِمْٻٜ اَللَّه فُو؞ اَامِنْ!