Luwwi hundiinsim gaassaa Waa'i iimanee uullaa qooccukko. Ee ammane uulli mat luwwim bee'anee duuha'i la'isoobee'anee hee'ukko. Gambabbaakkoo tuunsim xillaalli wo'i woronne hee'ukko; Waa'i Ayyaanim wo'i hanenne chabbaa hee'ukko. Waa'im «Caakki ihona» yukko. Caakkim ihukko. Waa'im caakki eran ihukkisa moo'ukko; caakkam tuunsiinsi annanni issukko. Waa'im caakka «Balla» yaa weeshukko; tuunsom «Hiimo» yukko. Hiimukkom soodukkom oohim luxxi balli hee'ukko. Ee lasage Waa'i «Wo'o iimii aadii annanni issaa woroonii hanaanii egedoo luwwi ihona» yukko. Ixxim ee luwwa issukko; oo luwwim ixxeensi woroon yoo wo'oo ixxeensi hanaan yoo wo'oo annanni issukko; ee'isam ihukko. Waa'im ee luwwa «Iimane» yaa weeshukko; hiimukkom soodukkom oohim la'm balli hee'ukko. Ee lasage Waa'i «Uulli siidamoo'isina iimaniinsi woroon yoo wo'i mat beyyonne wixxihona» yukko. Ee'isam ihukko. Waa'im wo'bee'i beyyo «Uulla» yaa weeshukko; odim wixxaa yoo wo'om «Dambalaqa» yaa weeshukko; oo issu luwwi hundim eran ihukkisa moo'ukko. Odim Waa'i «Uulli annanni ihaakkoo sire'i hundam mutisona; sire'i hurbaataa mishoo haqqaa ixxuwwi sire'isanne mutisona» yukko; ee'isam ihukko. Ee'isinne annanni annanni ihaakkoo sire'i hundam sire'i hurbaataa mishoo haqqaa ixxuwwi sire'isinnem uulli mutisukko; Waa'im ookki eran ihukkisa moo'ukko. Hiimukkom soodukkom oohim saxxi balli hee'ukko. Ee lasage Waa'i «Ballaa hiimoo annanni issoo'isina caakkuwwi iimanenne ikhonai ixxuwwim ayyaammuwwa, agannuwwaa hiinchuwwaa la'issona. Uullina caakka uwweena iimanenne caakkuwwi ikkona» yukko. Ee'isam ihukko. Ee'isinne Waa'i lam lob caakkuwwa qooccukko; eelliinchoo ballina aganaa hiimina caakkissamisa issukko; odim boollaankam qooccukko. Waa'im ixxuwwi uullina caakka uwwitamisina iimanenne ikkamisa issukko. Ixxuwwim hiimonnee ballannee caakkissamisinaa tuunsom caakkiinsi annanni issitamisinaa malaayye uwwukko; Waa'im ookki danaam ihukkisa moo'ukko. Hiimukkom soodukkom oohim soo'l balli hee'ukko. Ee lasage Waa'i «Wo'i woronne annanni annanni fooraam luwwi hee'ona; cii'im uulliinsi hanaan yoo iima'n hafachchanne bararona» yukko. Ee'isinne Waa'i wo'i woro'l lob moochchuwwa, mikmikoo fooraam luwwaa bararoo cii'aa ixxuwwi sire'isam qooccukko. Waa'im oo hundim danaam ihukkisa moo'ukko. Waa'im ixxuwwina «Dut ikkehe fikkaannehe dambalaq wo'onnem wo'mmehe; cii'im uullanne fikkaannona» yukko. Hiimukkom soodukkom oohim onti balli hee'ukko. Ee lasage Waa'i «Uulli fooraam luwwi hundam ixxuwwi shumo'isam diinatee moochchaa mikmikoo biqinne shuroo qooccanchaa hundam lobokaa hoffokaa fissona» yukko. Oo hundim ixxi yukkisam ihukko. Waa'im uulli moochcha; fooraam diinatee mikmikoo qooccanchaa ixxuwwi shumo'isinnem qooccukko; Waa'im ookki danaam ihukkisa moo'ukko. Ee lasage Waa'i «Manna ni hagarannee ni kobi'llatonnee qooccinona; ixxuwwim wo'i woronne hee'oo qurxumme'e, iimanenne bararoo cii'a, fooraam diinatee uullanne mikmikoo qooccanchaa ee'isam uullaa hundam gassitona» yukko. Ee bikkina Waa'i ixxi hagaranne manna qooccukko; ixxi hagaranne qooccu mannam goonchoo meentichchoo issaa qooccukko. Waa'im manna «Dut ikkehe, fikkaannehe, uullannem wo'mmehee uullam gassehee; Dambalaq qurxumme'e, iima'n cii'aa uullanne mikmikoo fooraam luwwaa hundam gassehe» yukko. Odim Waa'i mannina «Ki'nnuwwina hurbaat ihoo'isina sire'i yoo mutoo luwwaa sire'i yoo haqqi mishshuwwaa hundam ki'nnuwwina hurbaat ihona uwwaammo. Ee'isam uullanne yoo moochchinaa cii'inaa uullanne mikmikoo fooraam luwwi hundinam mutaa latoo luwwi hundim hurbaat ihona uwwaammo» yukko; ee'isam ihukko. Waa'im qooccu luwwi hundam moo'ukko; oohim lobakata eran hee'ukko; hiimukkom soodukkomoohim loh balli hee'ukko. Iimanii uullii woronne yoo luwwii hundim ee'isinne qooccamukko. Waa'im baxo hundam guullaa lama'l ballanne usheexxukko. Waa'i lama'l balla maasse'ukko; keesukkome. Mashka'oomim ixxeka qooccimmi baxo hundam ee ballanne guullaa usheexxu balli ihu bikkinatte. Ee'isinne iimanii uullii ixxuwwanne yoo luwwii hundim qooccamukko. Moollanni Waa'i iimanee uullaa qooccu ammane xeen ga'nnubee'i bikkinaa uulla baxoo mannim hee'ubee'i bikkinaa uullanne matem kaashshim hee'ukkoyyo; mutoo luwwim mutoo'n hee'ukko. Ihukkaarem wo'i uulliinsi firaa uulla aashisam hee'ukko. Ee lasage Moollanni Waa'i uulli buchchiinsi mancho baxukko; manchi sanennem foore uwwoo fooshsha ufukko; ee bikkina manchi hee'oo foor yoohan ihukko. Odim Moollanni Waa'i Eedena yakkam beyyonne eelliinchi firinne liiransoo gannatta gudisukko; baxu manchom ee liiransoo Eede'n gannattanne dissukko. Ee beyyonnem moo'akkeena liiransoo luwwaa itimmina er misha mishoo haqquwwaa mutoo'isa issukko; odim ee gannatti lambe'enne heechcha uwwoo haqqichchi hee'ukko; ee'isam eroka joriinsi annanni issakka'a la'immina lachcha uwwoo mulli haqqichchim hee'ukko. Ee duubbi kaashshi beyyina wo'o agisoo mat daajji Eedeniinsi daadam hee'ukko; oo daajjim Eedeniinsi firaa lasonne soor daajji ihaa baxxamamookko. Luxxi daajjik summi Fiisoonatte; ixxim worqi hee'oo Hawiila yakkam uulli hundannem daadam hee'ukko. Ee uullannem muccur worqii odim bito xee'aalli shitto'ii bito xee'aalli kinii hee'ukko. La'm daajji summi Giiyoonatte; ixxim Tophphe'i uullanne daadam hee'ukko. Saxxi daajji summim Xeegiroosatte; ixxim Aasoo'l uullanne eelliinchi firoo kollonne daadam hee'ukko; soo'l daajjim Efiraaxiisatte. Ee lasage Moollanni Waa'i qooccu mancho Eede'n gannattanne massaa dissukko; eekkam issukkok manchi ee beyyo egeroo'isinattee axisoo'isinattee. Moollanni Waa'i ee manchina «Ka gannatti woronne yoo haqqi mish hundiinsim ite. Ihukkaarem ixxeensi ittoo balla hanqo'isam letoo bikkina erokaa joraa la'isoo haqqichchiinsi misha ittitte» yukko. Ee lasage Moollanni Waa'i «Manchi mullam hee'immi danaamoyyo; ee bikkina ixxo labbam dara'mmancho ixxena hara'mmitona qooccoommo» yukko. Moollanni Waa'im uulli buchchiinsi ki'isaa uulli moochchaa iima'n cii'aa hundam qooccukko; eehanniinsi lasage mayyaa weeshooda'e moo'eena fooraam luwwi hundam manchi beyyo eebukko; fooraam luwwi hundinam manchi summa fissukko; ixxuwwi summim ixxi fissu summam ihukko. Manchim fooraam diinaxxeka, iima'n cii'ikaa moochchikaa hundikam summa fissukko; ihukkaarem ee kee'nnek matim manchina ixxo laboo hara'mmaanchi ihaa siidamukkoyyi hee'ukko. Ee lasage Moollanni Waa'i Addaamenne kee'mmaalli diriiro eebaa diriiru ammanenne Addaamiinsi midaaxxi miqqeewwika mato aa'aa beyyooma maarinne ifiisukko. Moollanni Waa'im Addaamiinsi aa'u miqichcho meentichchotti issaa baxukko; isem Addaam beyyo eebukko. Addaamim «Eese labbamote tannette ku miqichchim i miqiinsette; isek maarim siidamukkok i maariinsette; goonchiinsi siidanto'i bikkina ‹Meentichchotte› yamantona» yukko. Ee bikkina manchi annaa amaa urookko; ixxi meentichchonnem mat ihookko; lamim mat orachchi ikkamo. Ee ammane Addaamii ixxi meentichchoo lamim kallemaram hee'llo'o; ihukkaarem tuuttam hee'llo'oyyo. Moollanni Waa'i qooccu moochchi hundiinsim hamashshichchi lobakata hantaaraanchi hee'ukko; ee bikkina hamashshichchi meentichchona «Ka gannattanne yoo haqqi hundiinsim misha ittakkambee'isa Waa'i hanqinam ijaajaatennihe?» yaa xa'mmukko. Meentichchom hamashshichchina dabatta'a «Ka gannattanne yoo haqqi mishiinsi intoommo. Ihukkaarem Waa'i ‹Ka gannatti lambe'enne yoo haqqichchiinsi misha intoombee'isaa nakkinoombee'isaa niina kuraakko; ixxeensi ittakko'aa'lleensim letakkamo› yaakko» yito'o. Hamashshichchim «Ki'nnuwwi hore'em letakkamoyyo. Waa'i ee'isa yu mashka'i ee mishiinsi ittakkam ammane Waa'isam ki'nnuwwi joraa erokaa annanni issitakka'a laqqakamisa Waa'i la'oo bikkinatte» yaa meentichchona dabarukko. Meentichchom haqqichchoom mishisoohane mishoomim itimmina heele'isoohanee qooroomam siidisoohanee ihukkisa moo'llo'i ammanenne ee mishiinsi aa'lla'a itto'o; is aro'inam uwwito'o; ixxim itukko. Lamikim illi fooqukkaare kallemar ikko'isa laqqo'i bikkina oda'i buyya mat issita'a gobba'a edde'llo'o. Maaro'i ballanne Moollanni Waa'i gannatti Woronne taakke'ukkuuyyi Waa'ika sagara macceesso'o; Addaamii ixxi aree Moollanni Waa'i ixxuwwa moo'oobee'isa haqqi woronne maaxamto'o. Ihukkaarem Moollanni Waa'i Addaame weeshaa «Hannonnette yoontok?» yaa xa'mmukko. Addaamim «An ki sagara gannatti woronne macceesummo; kallemar ihummi bikkinam keese baddaa maaxamaammo» yukko. Waa'im «Kallemar ikkittisa kiina ayyi kurukko? Hanqinam an ixxeensi ittoobee'isa yaa kurummi haqqichchi mishiinsi aa'llaa ittaatennihe?» yaa xa'mmukko. Addaamim «At iinninne maqire hee'llona uwwitti meentichcho mishiinsi uwwito'aare itaammo» yukko. Moollanni Waa'im ee meentichcho «At kaka mahina issitto?» yaa xa'mmukko. Oo meentichchom «Hamashshichchi eese qawwisukkaare an ixxeensi itaammo» yito'o. Ee lasage Moollanni Waa'i hamashshichchina «Kaka issitti bikkina diinatiinsii moochchiinsii hundiinsim annanni ikkaa xale'i at duumantaattoohan ihe; kaballiinsi ki'issaa biqinne shurittuuyyi mare; hee'lloo heechchi doollenne hundannem buchcha ite. Ki lambe'ennee ki meentichchi lambe'ennee ki shumo'i lambe'ennee is shumo'i lambe'ennee diina'ooma qooccoommo; is shumo'i ki horoore iiqookko; atim is shumo'ika sinxichcho qassootto» yukko. Meentichchonam «Ki godabonne qachchi afuuroo ammane xissoo qattoo ammanem xuuchchaa lobakata lonsoommo; ee'isa ihaa odim doo'l hundim ki aro'an ihookko; ixxim keese gassookko» yukko. Addaaminam «Ki meentichchoka sagara macceessaa an ‹Ittitte› yaa kurummi haqqichchi mishiinsi ittitti bikkina at baxxitti jor bax mashka'inne uulli ki bikkina duumamaakkoohan ihookko. Hee'llootti doolli hundannem kiina ihoo hurbaata uulliinsi siiddeena malaayyaam baxo biince'llittuuyyi baxxootto. Uullim uttaa halluttaa mutisookko; atim uulli mutisu luwwa ittootto. Buchchiinsi siidantitti bikkina buchchanne daba'lliteebe'i afeebe'e ittoo hurbaata biince'llaa baxxaa ittootto. At buchchi ikkitti bikkina buchchannem daba'llitootto» yukko. Addaamim ixxi meentichchoka summa hee'oo manni hundinam amatti ikko'i bikkina «Heewaane» yaa weeshukko. Moollanni Waa'im Addaaminaa Heewaanenaa diinaxxi omachchiinsi eddechcha axisaa eddeesukko. Moollanni Waa'im «Manchi beet niinniinsi matisa ihaa erokaa joraa la'aakko; kabadem ixxi anga iimaa'aa heechcha uwwoo haqqichchiinsi misha aa'aa itaa doolli hundam foorinne hee'immi hasisooyyo» yukko. Ee bikkina Moollanni Waa'i ixxo Eede'n gannattiinsi fissukko; ixxi qooccamu uullam abuulloo'isa issukko. Ixxuwwam Eedeniinsi fissaa lasage Eedi'n gannattiinsi eelliinchi firinne kiruubeela yakkam asse'amaano kolli hundinnem muquqqe'ukkuuyyi gii'llisa belecce'oo bisa'a dissukko; eekkam issukkok ayyi manchim foore uwwoo haqqichchi gadannonne hincoobee'isa egessiisimminatte. Ee lasage Addaam ixxi are Heewaanenne eebaqqanchi edancha edamukko; Heewaanem lam foorette ikka'a goonchi beeto qatto'o; isem «Moollanniinsi goonchi beeto siixxaammo» yito'o; ee bikkinam beetika summa «Qaayeela» yita'a weeshsho'o. Odim mulli beetom Qaayeel abbaayyi Aabeela qatto; Aabeelim gereebba allaaraanchi hee'ukko; ihukkaarem Qaayeel abuullaanchi hee'ukko. Mat ayyaamo Qaayeel ixxi abuulli mishiinsi kitim issaa hincaa'eena eebukko. Aabeelim ixxi gereebbiinsi wonika doo'l di'ira duraa Moollannina kitima hincaa'ukko; Moollannim Aabeelaa ixxi uwwu luwwaa liiramaa aa'ukko. Ihukkaarem Moollanni Qaayeelaa ixxi kitimaa sabukko; ee bikkina Qaayeel lobakata nadadukko; ixxi illim tuunsukko. Ee ammanenne Waa'i Qaayeelina «Mahina quuqqaatte? Mahindu ki illi tuunsaakkate? Er luwwa issitta'n ki ill caakkam hee'ukkoyyonnihe? Ihukkaarem ki bax jor ihu bikkina moochchi amadeena dugoo'isa baaxiil ki goocanne keese amadeena dugoolla; ihukkaarem at ixxo kaa'lleena orame» yukko. Ihukkaarem Qaayeel ixxi abbaayyi Aabeelina «Waare biir beyyo mallona» yukko; biir beyyo affa'a lasage Qaayeel ixxi abbaayyi Aabeela dangonnem aphphisaa shukko. Ee lasage Waa'i Qaayeela «Kiyyabbaayyi Aabeel hannonnette?» yaa xa'mmukko. Qaayeelim «An la'ummoyyo. An iyyabbaayyo egeraanchonnihe?» yaa dabarukko. Waa'im Qaayeelina «Mahina ka hantaaro baxxitto? Kabadem at kiyyabbaayyi xiiga duntitti uulliinsi ‹I xiiga miqise› yukkuuyyi kiyyabbaayyi xiig i kollonne laaroolla; At kabadem duumantaattoohane; odim kiyyabbaayyi xiiga at duntitti ammane ixxi xiiga ageena suume fooqaa'u uulliinsi yaayyantaattoohane; uulla abuullitoohaarem maham misha uwwooyyo; kabadiinsi ki'isaa at ka uullanne min bee'anee manniinsi yaayyantaattoohanee ikkootto» yukko. Qaayeelim Waa'ina «Ku duunttitti duunchii ku yaayyanchii an iyyeena xanoombee'i kee'mmaalla. Oono'o eese kaballa ka uulliinsi hollitaatto; ki illiinsim maaxamoommo; an ka uullanne beyyi bee'i batbataanchi ihoommo; ayyim eese siidukkok shookko» yukko. Ihukkaarem Waa'i «Ee'isayyo; ayyim keese shukkaare lamar foorinne an baado dabaroommo» yukko; ee bikkina ayyim ixxo siidukkok shoobee'isa Waa'i Qaayeelanne mare'e issukko. Ee lasage Qaayeel Waa'i illagiinsi qee'llaa marukko; Edeniinsi eelliinchi fira kollonne Nooda yakkam uullanne afuurukko. Qaayeel ixxi arenne eebaqqanchi edancha edamukko; isem lamfooratti ikka'a goonchi beeto qatto'o; beetikam summa «Heenooka» yaa weeshukko; Qaayeelim beero'o baxukko; ee beero'i summam ixxi beet summanne «Heenooka» yaa weeshukko. Heenookim Iiraada qarukko; Iiraadim Mahuyaa'eela qarukko; Mahuyaa'eelim Matushaa'eela qarukko; Matushaa'eelim Laameeka qarukko; Laamehim lam meento eebukko; luxxaantek summi Ada'atte; la'mmaantekim summi Xiila'atte. Aada'am Yaabaala qatto'o; Yaabaalim duukkaananne hee'ukkuuyyi beyyiinsi beyyo darba'a maroo keenina anni hee'ukko. Ixxi abbaayyi summim Yoobaalatte; Yoobaalim diittinnee xurumbinnee lelloo keenina anni hee'ukko. Xiila'am Tubaalqaayina qatto'o; ixxim naasiinsii xaariinsii baxamoo mu'ut hundam baxam hee'ukko. Tubaalqaayin aayyam Naa'imatti hee'lo'o. Mat ayyaamo Laameek ixxi meentina «Ki'nnuwwi i meenti Aada'aa Xiila'aa i woshsha macceessehe; an mat woraadichchi mancho eese qasaa omassu bikkina shaammo. Ayyim Qaayeela shukkaare lamar foorinne baad dabaramoohan ihulas an shummi manchi bikkina ayyim eese shuta'n lamarayyinnee lamar foorinnee baad daba'llookkoo» yukko. Addaam odim ixxi arenne eebaqqanchi edancha edamaa mulli beetom qarukko; isem «Qaayeel shu Aabeel bikkenne Waa'i iina mulli beeto uwwukko» yita'a beetika summa «Seeta» yita'a weeshsho'o. Seetim goonchi beeto qarukko; beetikam summa «Heenoosa» yukko; ee ammaniinsi ki'isaa manni Waa'i summa weeshimma asheerukko. Kuk Addaam shumo'i aganna; Waa'i manna qooccu ammane ixxi hagaranne qooccukko. Ixxuwwam goonchoo meentichchoo issaa qooccukko; maasse'ukkome; ixxuwwi summam «Manna» yukko. Addaamik umur mat xibbee sad hiinchoo ihaakkoohaannonne ixxom laboo beeto qarukko; summam Seeta yaa weeshukko. Ixxim Seeta qaraa lasage sadeenti xibbi hiincho hee'aa mulli oosom goonaa landaa qarukko. Ixxim honsi xibbee sad hiinchoo hee'aa lehukko. Seetim mat xibbee onti hiinchoo hee'aa lasage Heenoosa qarukko. Ixxim Heenoosa qaraa lasage sadeenti xibbee lamar hiinchoo hee'aa mulli ooso goonaa landaa qarukko. Ixxim honsi xibbee tommoo lam hiinchoo hee'aa lehukko. Heenoosim honsayyi hiincho hee'aa Qayinaana qarukko. Heenoosim Qayinaana Qaraa lasage sadeenti xibbee tommoo onti hiinchoo hee'aa mulli ooso goonaa landaa qarukko. Heenoosim honsi xibbee onti hiinchoo hee'aa lehukko. Qayinaan xbbee lamarayyi hiinchoo hee'aa Malaali'eela qarukko. Qayinaan Malaali'eela qaraa lasage raman xibbee sor hiinchoo hee'aa mulli ooso goonaa landaa garukko. Ixxim honsi xibbee tommi hiinchoo hee'aa lehukko. Malaali'eel lohayyee onti hiinchoo hee'aa Yaareeda qarukko. Malaali'eelim Yaareeda qaraa lasage sadeenti xibbee sad hiinchoo hee'aa mulli ooso goonaa landaa qarukko. Ixxim sadeenti xibbee honsayyee onti hiinchoo hee'aa lehukko. Yaareedim mat xibbee lohayyee lam hiinchoo hee'aa Heenooka qarukko. Yaareedim Heenooka qaraa lasage sadeenti xibbi hiincho hee'ukko; ixxim mulli keenom goonaa landaa qarukko. Ixxi umurim honsi xibbee lohayyee lam hiinchoo ihaa lasage lehukko. Heenookim lohayyee onti hiinchoo hee'aa Maatuusaala qarukko. Ee lasage Heenookim Waa'inne mateeyyooma marukkuuyyi sas xibbi hiincho hee'aa mulli ooso qoonaa landaa qarukko. Ixxim sas xibbee lohayyee onti hiinchoo hee'ukko. Heenookim hee'u heechchi hundam Waa'inne mateeyyi issu bikkina ka uullanne siidamoobee'isa Waa'i massukko. Maatuusaalim mat xibbee sadeentayyee lamar hiinchoo hee'aa Laameeka qarukko. Maatusaalim Laameeka qaraa lasage lamar xibbee sadeentayyee lam hiinchoo hee'aa mulli ooso goonaa landaa qarukko. Maatusaalim honsi xibbee lohayyee honsi hiinchoo hee'aa lehukko. Laameekim mat xibbee sadeentayyee lam hiinchoo hee'aa mat beeto qarukko. Laameekim «Ka Waa'i duumu uullanne malaayyaam baxiinsi ku beet neese gatisookko» yaa beet summa Nohe yaa weeshukko. Laameekim Nohe'e qaraa lasage onti xibbee honsayyee onti hiinchoo hee'aa mulli ooso goonaa landaa qarukko. Ixxim lamar xibbee lamarayyee lamar hiinchoo hee'aa lehukko. Nohe'im onti xibbi hiincho hee'aa sas ooso Seema, Kaamaa Yaafeetaa qarukko. Manni shumo'i uullanne fikkaannukkuuyyi maru ammanenne landi qaramukko. Ee ammanenne annanni ikko'oo qooccanchuwwi ee landika dano moo'llo'o; ee kee'n lambe'iinsim iittito'i keeninne eebaqqanto'o. Waa'im «Mannina foore uwwoo i Ayyaan manninne maqire heer heerina hee'ooyyo; manni lehoohan ihu bikkina kanniinsi eehid mat xibbiinsii lamiyyi hiinchiinsii loboka hee'ooyyo» yukko. Ee doollennee ee lasagem manni landiinsii ee annanni ikko'oo qooccanchiinsii hamaaranta'a qaranto'oo «Neefiliima» yakkam wodaam manni hee'llo'o; ixxuwwim gaassi doollenne qoxallaninne la'anto'oo keen hee'llo'o. Waa'i uullanne yo'i manni hundim lobakata boqqi ikko'isaa ixxuwwi sawwitim hundi ammanem xale'i jolli ihukkisaa moo'ukko. Ee bikkina manna qooccu bikkinaa uullanne hee'llamisa issu bikkinaa kichche'ukko; lobakatam gaabbukko. Ee bikkina «Waa'i an ixxuwwa qooccummi bikkina kichche'aammo; ee bikkina ka qooccummi mannaa diinatee biqinne shuritu'uuyyi mikmikitam qooccanchuwwaa cii'aa uulliinsi bi'isoommo» yukko. Ihukkaarem Nohe'e Waa'i illagenne nuura siidaa hee'ukko. Nohe'ek aganni kanniinsi woroon kitaabamukkane; Nohe'e ixxi hee'u doollenne hee'u manni hundiinsim loboka muccuraa boqqoomiinsi qee'llaakkoo manchoo hee'ukko; ixxim maroo googo hundoomam Waa'inne maqire issukko. Nohe'em Seema, Kaamaa Yaafeetaa sas goo'n ooso qarukko. Ee ammane uullanne hee'oo manni hundim Waa'i illagenne jor hee'ukko; ku uullim boqoominne wo'mmaakkoohan hee'ukko. Waa'im ka uulla moo'ukko; ku uulli bi'aakkoohan ihukkisaa uullanne yoo manni hundim jollinne hee'oo'isaa moo'ukko. Ee bikkina Waa'i Nohe'ena «An manni shumo'o bi'iseena murte'aammo; ku uulli manni boqqoo'm baxinne wo'mmaakkoohan ihu bikkina manna ka uullinne maqirem bi'isoommo. Ihukkaarem at er haqqiinsi markaba baxe; ixxom woronne dut beyyi hee'oo'isa issitaa baxxanse; ee markaphphekam hanee woroo leeyyinne marage. Ixxekam qeeraa'llooma mat xibbee sadee sas meetiraa midaaxxi haraarooma lamiyyee lam meetiraa uullichchi qeeraa'llooma tommoo sas meetiraa isse. Ee markaphphekam iima'n kollo meeggaro'inne axise; gortannii iimanii edamoo beyyonne mat anga ihoo qax maskoota gatise; ee markabinam sas fooq hee'oo'isa isse; goocam midaaxxi kollinne fisse. Anim imaniinsi woroon fooraam luwwi hundam uulliinsi bi'iseena bichchi wo'o eeboommo; uullanne yoo fooraam luwwi hundim bi'ookko. Kiinninne maqirem hidi'l sagara aagoommo; atii ki meentichchoo ki oosii ki oos meentii markabanne aaggehe. «Kiinninne maqirem foorinne hee'llamisina maara edde'u fooraam qooccanchuwwika hundikam lam goonchoo lam meentichchoo massitaa markabanne aagise. Foorinne hee'llamisina annanni annanni cii'iinsi annanni annanni diinatiinsii biqinne shuritu'uuyyi mikmikitam annanni annanni qooccanchuwwiinsii lam lam ki beyyo waattona. Ee'isam ki gaginaa ka qooccanchuwwinaa hundinam ihoo annanni annanni hurbaata ee markaphphi woronne wixxaa'e» yukko. Nohe'em Waa'i ijaaju luwwi hundam issukko. Nohe'e markaba baxaa guullaa lasage Moollanni Nohe'ena «Ka uullanne yoo manni hundannem xale'i at i illagenne muccur ikkaa moo'antitti bikkina ki mi'n abaroos hundam amaddaa markabanne aage. Muccur ihu diinatiinsi hundiinsim lamar goonchoo lamar meentichchoo kiinninne maqirem markabanne aagise; ihukkaarem muccur ihubee'i diinaxxeka mat goonchoo mat meentichchoo aagise. Cii'iinsim ixxuwwi sire'isam hundiinsim lamar goonchoo lamar meentichchoo markabanne aagise; mashka'oomim diinaxxek moochchikii cii'ikii sire'i ka uullanne gataa la'mmaagge sire'oo'isinatte. Lamar balliinsi lasage sor ballaa sor hiimoo ka uullanne xeena ga'nnsoommo; qooccummi fooraam luwwi hundam uulliinsi bi'isoommo» yukko. Nohe'em Moollanni ijaaju ijaajo hundam issukko. Bichchi wo'i uullanne waaru ammane Nohe'e loh xibbi hiinchi manchi hee'ukko. Nohe'e bichchi wo'iinsi gatimmina ixxi meentichcho ixxi oosoo ixxi oos meentoo amadaa markabanne aagukko. Muccur diinatiinsi muccur ihubee'i diinatiinsi cii'iinsii uullanne biqinne shurukkuuyyi mikmikoo qooccanchi hundiinsii lam lam ikka'a goonii meentii Waa'i Nohe'e ijaajukkisannem ixxenne maqirem markabanne aaggo'o. Nohe'ena Waa'i yukkisam lamar balli beeddaa lasage bichchi wo'i uullanne ga'nukko. Nohe'e qaramukkaanniinsi loh xibbi hiincho ihaakkoohaannonne la'm agananne aga'nnaannonnem tommonnee lama'l ayyaamonnee uulli woriinsi dangonnem wo'i xooqaa firukko; iima'n gooccuwwim fooqukko. Xeenim uullanne sor ballaa sor hiimoo ga'nnukko. Ee xeen ga'nnimma asheeru ayyaamonne Nohe'ee ixxi meentichchoo ixxuwwi sasem oos Seem, Kaamii Yaafeetii ixxuwwi meentinne maqirem markabanne aaggo'o. Bii'l moochchiinsi, mi'n diinatiinsi, biqinne shuritu'uuyyi mikmikitam qooccanchuwwiinsii iimaninne bararoo cii'iinsii hundiinsim ixxuwwi sire'isam ixxuwwinne maqirem aaggo'o. Ee'isinne foor yoo luwwi hundiinsim lam lam ikka'a Nohe'enne maqirem markabanne aaggo'o. Qooccanchi hundam goonchoo meentichchoo ihimminne markabanne aaggo'ok Waa'i ijaajukkisinnette; aagga'a lasage Moollanni markaphpheka u'llumma xufukko. Bichchi wo'im uullanne sor ballaa sor hiim lobakata ga'nnukkuuyyi marukko; wo'ikim xillaalloom exxukkuuyyi maru bikkina markaba uulli haniinsi iim ki'isukko. Wo'i uullanne lobakata lophphukkuuyyii exxukkuuyyii maru ammanenne markabim wo'i hanenne chabbukkuuyyi marimma asheerukko. Wo'i iimaniinsi woroon yoo lob duunnuwwa maaxeebe'i afeebe'e xillaalli ihukko. Wo'oomim duunnuwwiinsi iim higaa lamar meetir ihukko. Uullanne hee'u fooraam qooccanchi cii'i, fooraam diinat, moochchii mannii hundim mat luwwim gatoobee'isa lehaa beeddukko; uullanne mikmikoo qooccanchi hundim bi'ukko. Uullanne hee'oo foor yoo luwwi hundim lehukko. Waa'i uullanne hee'u fooraam qooccanchi hundam manna, diinate, biqinne shurukkuuyyi mikmikoo qooccanchaa cii'aa mat luwwim gatoo'n bi'isukko; lehiinsi gatukkok xale'i Nohe'ettee ixxenne maqirem markabanne hee'llo'i keenoo. Wo'im mat xibbee ontayyi balli afeebe'ee uulla maaxukkisam hee'ukko. Waa'i Nohe'ee ixxenne maqirem markabanne hee'u moochchaa diinatee hundam sawwukko; hafachchim uullanne hafachchoo'isa issukko; wo'im xa'ukkuuyyi marukko. Uulliinsi woroon yo'i xillaalli bu'uwwii iimanenne yo'i wo'i dilloo gooccuwwii hundim xufamukko. Xeenim iimaniinsi ga'nnimma urukko. Ee bikkina wo'i uulliinsi ballina ballina xa'ukkuuyyi maraa mat xibbiinsii ontayyi balliinsii lasage wo'i lobakata xa'ukko. Lama'l agananne tommonnee lama'l ayyaamonnee markab Araaraat duunnuwwaannonne mattonne afuurukko. Wo'im xa'ukuuyyi maru bikkina tommi aga'nnaannonne luxxi ayyaamonne duunnuwwi lud siidamukko. Sor balliinsi lasage Nohe'e baxu markaphpheka maskoota fooqaa'aa qooraantichcho fissaa asse'ukko. Qooraantichchim daba'llaa maroo'nnim wo'i uulliinsi beeddaa xoo'eebe'i afeebe'e ekkidii kidii bararukkuuyyi do'am hee'ukko. Hoffi ammaniinsi lasage Nohe'e wo'i uulliinsi sholle'uda'e moo'oo'isina handarekkichcho asse'ukko. Ihukkaarem wo'i uulli hundam ambaa hee'u bikkina handarekkichchi hancaacoo beyyo hoogaa Nohe'i markaphphi beyyo daba'llukko; Nohe'em ixxi anganne aa'aa markaphphi woronne aagisukko. Ee lasage Nohe'e lamar balli afeebe'e egeraa odim handarekkichcho asse'ukko. Handarekkichchim suumenne wee'l buyyika lata amadaa uulli maaro'aakkoohaannonne Nohe'i beyyo daba'llukko; ee bikkina Nohe'e wo'i uulliinsi sholle'ukkisa la'ukko. Nohe'em lamar balli afeebe'e egeraa la'mmaaggem handarekkichcho asse'ukko; ixxim od Nohe'i beyyo daba'llukkoyyo. Nohe'e qaramukkaanniinsi loh xibbee mat hiinchoo ihu ammanenne luxxi agananne aga'nnaannonnem luxxi ayyaamonne wo'i uulliinsi gogukko; ee lasage markaphphi ifiishshaancho fooqaa'aa uulli gogukkisa Nohe'e moo'ukko. La'm aga'nnaannonne lammiyyennee lama'l ayyaamonnee uulli guullaa gogukko. Ee lasage Waa'i Nohe'ena «Ki meentichchoo oosoo oos meentoo amaddaa markabiinsi fire. Odim kiinninne maqire marikabanne yoo moochcha, cii'a, diinatee uullanne biqinne shurukkuuyyi mikmikoo qooccanchuwwaa hundam la'mmaagge uullanne fikkaannitammisna kiinninne maqirem fisse» yukko. Ee lasage Nohe'e Waa'i yukkoka macceesaa ixxi meentichcho, oosoo oos meentoo amadaa markabiinsi firukko. Moochchi, mi'n diinat, cii'ii uullanne biqinne shurukkuuyyi mikmikoo qooccanchii hundim ixxuwwi sire'isam markabiinsi firukko. Nohe'em Waa'ina kitima hincaa'akkam beyyo axisukko; muccur diinatiinsii cii'iinsii sire'i hundiinsim mat mato massaa kiti'm beyyonne Moollannina kitima hincaa'aa shokkiisukko. Ee kiti'mmekim enji Waa'a liiransukko; ixxi tiironnem oosoommaniinsi ki'isaa mannik sawwit jor ihukkisa la'oommi bikkina «Manni bi'isu bi'ishshi bikkina la'mmaagge an uulla hore'em duumoommoyyo; kaba issummisa fooraam qooccanchi hundam od hore'em bi'isoommoyyo. Uulli hee'oo doollenne hundannem wiximminaa murimminaa qiidinaa iibbinaa billinaa hagayyinaa hiiminaa ballinaa muramoobee'i amman hee'ookko» yukko. Waa'i Nohe'ee ixxi oosoo «Fikkaannehe; uulli hundannem wo'mmehe. Mi'n diinat, cii'i, biqinne shuritu'uuyyi mikmikitam qooccanchuwwii qurxumme'ii hundim ki'nnuwwa baddimminnee muggimminnee hee'llona; hundim ki'nnuwi ijaacci woronne hee'llona. Ki'nuwwina uulliinsi mutoo luwwa hurbaatoomina ittakkona uwwummisam odim uullanne mikmikoo foorinne yoo luwwi hundam ittakkona uwwaammo. Ihukkaarem xiiqqi woronne foor yoo bikkina xiigaam maara ittakkotte. Ki'nnuwwik foor yoo xiiga an hanqinam hasoommo; moochchiinsii manniinsii hasoommo; manni hundiinsim mannika foore hasoommo. Manni qooccamukkok Waa'i kobi'llannetti ihu bikkina mancho shukkok hundim manni anganne lehookko. Ee bikkina «Ki'nnuwwi fikkaannehe; Barkattehe; uullanne hundannem wo'mmitakkamisina lobakat ooso qallehe; lophphehe» yukko. Ee lasage Waa'i Nohe'enaa ixxi oosinaa «An ki'nuwwinnee ki'nuwiinsi qaramoo shumo'innee hundinnem hidi'l sagara aagoommo; Ee'isam foor yoo cii'inne, mi'n diinattinne, bii'l moochchinnee ki'nnuwwinne maqirem markabiinsi firu fooraam luwwi hundinnee hidi'l sagara aagoommo. An ki'nnuwwinne aagummi hidi'l saga'l mashka'inne ka lasage fooraam qooccanchi hundam bichchi wo'inne hore'em bi'isoommoyyo; ku uullim la'mmaagge bichchi wo'inne bi'ooyyo» yukko. Odim Waa'i «I lambe'ennee ki'nnuwwi lambe'ennee ki'nnuwwinne maqire yoo fooraam luwwi hundinnem doolli hundinam hide'oommi hidi'l mare'i kane. Waadamuuncho duubanne issoommo; ixxim uullina an aagummi hidi'l mare'e. Iimane duubinne ifiisaa waadamuunchi duubanne hanenne moo'amoo amman hundam ee ammane anim ki'nnuwwinnee fooraam luwwinnee hundinnem hide'ummi hidiro sawwoommo; la'mmaage bichchi wo'i fooraam luwwi hundam bi'isooyyo. Waadamuuncho duubanne moo'oommi ammane i lambe'ennee uullanne yoo hundem fooraam luwwi lambe'ennee yoo doolli hundinam hee'oo hidiro sawwoommo» yukko. Waa'im Nohe'ena «Ku waadamuunchi ihaannonnee uullanne yoo fooraam qooccanchi lambe'nnee issummi hidi'l saga'l mare'e» yukko. Nohe'ek markabiinsi fitto'i sasem oosim Seematte, Kaamattee Yaafeetattee hee'llo'o. Kaamim Kana'aanina anni hee'ukko. Uullanne hundannem yoo minaadab hundinam Nahe'ek sasem oosim anno'o. Luxxekam woyina yakkam xuda kaasukkok abuullaanchi hee'u Nohe'ette hee'ukko. Mat balla woyi'n diqaasa agaa dimbaa leexa'am dukkaananne he'ukko. Kana'aanina anni ihu Kaam waaraa ixxi anni leexa'am iinse'ukkisa moo'aa biira firaa lamem ixxi abbaayyuwwinam kurukko. Seemii Yaafeetii ixxuwwi anni umba'adam xoo'isa macceesso'i ammanenne ixxi umba'adooma moo'llambee'isa afa'llaachcha matta'a weyyakka massita'a ixxi orachchonne eddeesso'o. Nohe'em woyi'n diqaas dimbiinsi baqu ammanenne ixxi hoffi beet maha issuda'e macceesaa la'ukko. Ixxim «Kana'aan duumamaakkoohan ihona; odim ixxi abbaayyuwwi agidina agishshi ihona. Odim Seem Moollanni Waa'i maasse'amaakkoohan ihona. Kana'aan ixxena agishshi ihona. Waa'im Yaafeetika uulla haraassona; Yaafeet shumo'i Seem shumo'inne maqirem mat ikka'a hee'llona; Kana'aanim ixxena agishshi ihona» yukko. Bichchi wo'iinsi lasage Nohe'e sas xibbee ontayyi hiinchoo hee'ukko. Ixxim honsi xibbee ontayyi hiinchoo hee'aa lehukko. Nohe'i oosik Seemik, Kaamikii Yaafeetikii shumo'i kane. Bichchi wo'iinsi lasage sasim ooso qaramukko. Yaafeet Goomeera, Maagooga, Maadaaya, Yaawaana, Tuubaala, Meesheekaa Tiiraasaa qarukko. Goomeer Ashkeenaaza, Riifaataa Toogaarimaa qarukko. Yaawaan Eeliisha, Tarseesa, Kiitimaa Roodaanaa qarukko. Oo keen hundam dambalaq tochchonnee wo'i kibbu uullannee hee'llam Yaafeet shumo'ina lobanno'o; ixxuwwi gaqqi uullannee moollonnee baxxamanta'a hee'llam minaadab hee'llo'o; ixxuwwi shumo'ina annichchi annichchinam woccam ixxuwwi gaqqi suumim hee'ukko. Kaam Kuusha, Mixiraayima, Fuuxaa Kana'aanaa qarukko. Kuushi Saaba'a, Hawiila, Saabita, Raa'imaa Sabtakaa qarukko; Raama'i oosim Saaba'attee Dadaanattee hee'llo'o. Kuushim Naamiruuda qarukko; Naamiruud uullanne luxxi malaayyaam o'l manchi hee'ukko. Ixxim Waa'i hara'mmaa lobakata malaayyaam hochchaanchi hee'u bikkina manni «Waa'i keese Naamiruudisa malaayyaam hochchaanchi issona» yam hee'ukko. Luxxi ixxi adilla'n uulli Sanaa'oor uullanne Baabiloona, Eereekaa Akaadaa edam hee'ukko. Naamiruud uulliinsi Aasoo'l uulla maraa Naanaawe'e, Rahoobootaa Kaalaahe'i beero'oo baxukko. Ee'isam Naanaawe'i beero'i lambe'ennee Kaalaahe'i beero'i lambe'ennee yoo lob beero'oo Reseenaa yakkam beero'uwwam baxukko. Mixiraayim shumo'i Luuda, Anaama, Lahaaba, Naaftuuha, Faatroosa, Filisxee'm minaadab qaranto'i Kaaftooranee Kaalkuus minaadabaa hee'llo'o. Kana'aan ixxi won beet Xiidooninaa Heetinaa anni hee'ukko; Mulli Kana'aan shumo'i odim Iyyaabuusa, Amoore'e, Gergeese'e, Hiiwe'e, Arqe'e, Siine'e, Arwaade'e, Xamaare'ee Haamaate'ee hee'llo'o. Ee lasage Kana'aan shumo'i annanni ikka'a binnito'o. Ee'isinne Kana'aa'n mannik uulli Siidooniinsi ki'isaa woroo'n qarinne Garaa'l gadanonne yoo Gaaza'anne afeebe'e hee'ukko. Odim eelliinchi firinne Soddoma, Gomora, Adaamaa Laashaa'n gada'n Xabooyimaa afeebe'e hee'ukko. Oo keen hundim Kaam shumo'o; ixxuwwim annanni annanni moolli ikka'a annanni uullanne hee'llam keen ikka'a annanni ixxuwwi moolli suumem woccam keen hee'llo'o. Yaafeetina lob abbaayyi Seem Eeboor shumo'ina lob anni hee'ukko. Seem oosim Eelaamatte, Asooratte, Arfaakisaadatte, Luudattee Araamattee hee'llo'o. Araam oosim Uuxatte, Huulatte, Geetarattee Meesheekattee hee'llo'o. Arfaakisaad Sheelaaha qarukko; Sheelaahim Eeboora qarukko. Eeboorim lam ooso qarukko; luxxaannikam summa Feeleega yukko. Mashka'oomim ixxi qaramu doollenne uulli minaadab baxxamamu bikkinatte hee'ukko; mullekim Yooqiixaanaa yakkaman hee'ukko. Yooqiixaanim Almoodaada, Sheeleefa, Haxaarmaawwa, Yeeraaha, Hadooraama, Uuzaala, Diiqila, Oobaala, Abiimaa'eela, Saaba, Oofiira, Hawiilaanaa Yoobaabaa qarukko; kukeen hundim Yooqiixaan shumo'i hee'llo'o. Ixxuwwi hee'llo'i uulli Meesha'iinsi ki'isaa Safaara afam hee'ukko; oohim eelliinchi firinne yoo duunaam uullanne afeebe'e hee'ukko. Kukeen hundim Seem shumo'o; ixxuwwim annanni annanni moollonnee uullannee baxxamanta'a hee'llam hee'llo'o; woccam sagarim ixxuwwi gaqqi moollisam hee'ukko. Oo ixxuwwi sullisanne baxxamanto'i minaadab Nohe'i shumo'i hee'llo'o; bichchi wo'iinsi lasage uulli minaadab hundam siidanto'ok ka Nohe'i oosiinsette. Uulli hundannem luxxeka hee'u minaadabina xale'i mat suum hee'u bikkina manni hundim matem sagara wocam hee'ukko. Ixxuwwim eelliinchi firoo kolliinsi ki'lla'a mattu'uuyyi mat biir beyyo Sanaa'oor uullanne siidda'a eekke'enne afuutto'o. Ixxuwwina'i ixxuwwim «Waallehe; mine baximmina awwaadoo xuuba hariinsi banxaa giirinne shokkiinsona» yaqqanto'o; ee'isinne mine baxxam xuuba siiddo'o; mat issita'a amaxxansitam leeyyam siiddo'o. Odim «Waallehe mat beero'o banxona; ee beyyonnem lud iimane afoo mine banxaa beero'i issinaa ni summa weeshinsona bagaan neese uulli hundannem binninoone» yito'o. Ee lasage Waa'i oo manni hananenne baxu iimane afoo minee beero'oo moo'eena diillukko. Waa'im «Kabadem ihukkaare ku minaadab hundim mat shumo'i ikko'i bikkinaa matem suumem woccam bikkinaa ixxuwwi mixxo'i luwwi hundam baximmina luxxaneme; ka'isinne baxxeena sawwito'i luwwi hundam issimma hooggamoyyo. Ee bikkina «Waallehe, neese dillinaa mat mullaannika sagara laqqambee'isa ixxuwwi suume hamaaransinona» yukko. Ee lasage Waa'i ixxuwwa uulli hundannem binnaa'ukko; ee beero'om baximma utto'o. Ee beyyonne minaadaphphi suume Waa'i hamaaransaa ee beyyiinsi uulli hundannem ixxuwwa binnaa'u bikkina ee beero'ik summi «Baabiloona» yamamookko. Seem shumo'i kane. Bichchi wo'iinsi la'm hiinchi lasage Seem xibbi hiincho hee'aa Arfaakisaada yakkam beeto qarukko. Ee lasage Seem onti xibbi hiincho hee'aa mulli ooso goonaa landaa qarukko. Arfaakisaadim sadee onti hiinchoo hee'aa lasage Saala'a qarukko. Ee lasage soor xibbee sas hiinchoo hee'aa mulli ooso goonaa landaa qaraa lehukko. Saala'am Sad hiincho hee'aa Eeboora qarukko. Ixxim ee lasage soor xibbee sas hiinchoo hee'aa mulli ooso goonaa landaa qaraa lehukko. Eeboor sadee soor hiinchoo hee'aa Faaleeqa qarukko. Ee lasage ixxim soor xibbee sad hiinchoo hee'aa mulli ooso goonaa landaa qaraa lehukko. Faaleeq sad hiincho hee'aa Ra'u qarukko. Ee lasage ixxim lam xibbee honsi hiinchoo hee'aa mulli ooso goonaa landaa qaraa lehukko. Ra'u'um ixxek umur sadee lam hiinchoo ihaakkoohaannonne Saruuga qarukko. Ee lasage lam xibbee lamar hiinchoo hee'aa lehukko; mulli keenom goon oosoo landaa qarukko. Saruug sad hiincho hee'aa Naakkoora qarukko. Ee lasage lam xibbi hiincho hee'aa mulli ooso goonaa landaa qaraa lehukko. Naakoor lamiyyee honsi hiinchoo hee'aa Taara'a qarukko. Ee lasage ixxim mat xibbee tommoo honsi hiinchoo hee'aa mulli ooso goonaa landaa qaraa lehukko. Taara'am lamarayyi hiincho hee'aa Abraama, Naakooraa Haaraanaa qarukko. Taara'i shumo'i kane. Taara'a Abraama, Naakkooraa Haaraanaa qarukko; Haaraanim Looxa qarukko. Haaraan qaramu uullannem Kalaawde'i uullanne Uur beero'onne anniinsi gaassaa lehukko. Abraamii Naakoorii meento eebbo'o; Abraam soora'a eebukko; Naakoorim Haaraan landichcho Milka'a eebukko; Haaraanim Yuskaaninaa Milka'anaa anni hee'ukko. Soora'a alceennatte hee'llo'o; ee bikkina isena oos hee'ukkoyyo. Taara'a ixxi beet Abraamaa ixxi beetina beet hee'u Haaraan beet Looxaa ixxi beet Abraamina arette hee'llo'i Soora'aa amadaa ixxuwwinne maqirem Kana'aana mareena Kalaawde'i uulli Uura yakkam beero'iinsi firukko. Kaaraanannem afuurukko. Taara'am lam xibbee onti hiinchoo hee'aa Kaaraananne lehukko. Waa'i Abraamina «Ki uulliinsii ki qarmanniinsii kiyyanni miniinsii annanni ikkaa an kiina moo'isoommi uulla mare. Ki shumo'o fikkaannisoommo; lobakat minaadabam issoommo; maasse'oommome; ki summam lonsoommo; mulli minaadabinam at maassi ikkootto. Keese maasse'llam keeno anim maasse'oommo; keese duuntam keenom duumoommo; uullanne yoo minaadab hundim ki mashka'inne maasse'amookko» yukko. Abraamim Waa'i ixxena yukkisam Kaaraaniinsi firaa marukko. Ee ammane ixxek umur lamarayyee onti hiinchoo ihaa hee'ukko; Looxim Abraaminne maqirem marukko. Abraam, ixxi meentichcho Saaraayyee ixxi abbaayyi beet Looxii Kaaraananne hee'llu'uuyyi siiddo'i amaxxaa awwaadaanoo hundam amadda'a Kana'aana matto'o. Ixxuwwi Kana'aana affo'i ammanenne Abraam Seekeemanne yoo More yakkam hujuphphi haqqichchi beyyi afeebe'e marukko; ee ammane Kana'aa'n uulli manni ee uullanne hee'llo'o. Waa'i Abraamina moo'amaa «Ki shumo'ina ka uulla uwwoommo» yukko; ixxim moo'amu Waa'ina kiti'm beyyo baxukko. Ee lasage Beteeliinsi eelliinchi firoo kollonne yoo duunaam uullanne firukko; Beeteelaa eelliinchi aagoo kollonne Aay beero'om eelliinchi firoo kollonne issaa dukkaana kaasukko; ee beyyonnem Waa'ina kitima hincaa'akkam beyyo axisaa Waa'ina otossukko. Abraamim ee beyyiinsi ki'aa Neegeeba marukko. Ihukkaarem Kana'aa'n uullanne qaanne'i aagu bikkina Abraam ee qaanne'i ammane higiseena qee'llaa woroo'n qararanne yoo Gibxi uulla marukko. Abraam Gibxi uulla afeena hincaakkoohaannonne ixxi are Saaraayyena «At lobakata danaam meentichchotti ikkittisa an la'oommo. Gibxi uulli manni at i aretti ikkittisa laqqo'aare ki dano moo'lla'a eese shita'a keese uttamo. Ee bikkina ki mashka'inne eese shitambee'isinaa iinam eroomma issitamisinaa at ixxuwwina ‹An ixxena aayyatte› yihe» yukko. Abraam Gibxi uulla afu ammane Gibxi uulli manni ixxi are lobakata danaamotte ikko'isa moo'llo'o. Fari'oon gassaan Abraam are danaamotte ikko'isa moo'lla'a Fari'oon illagenne bitto'o. Meentichchoomam Fari'oon mine massito'o. Ise massu mashka'inne gereebba, laro, halla, gaameela'a, goon agidoo meenti agidoo uwwimminne Faari'oon Abraamina lobakat eroomma issukko. Ihukkaarem Abraam are Saaraayyi mashka'inne Waa'i Faari'oonannee ixxi gassaa'nnaannonnee jor jabbo eebukko. Ee lasage Saaraayye Abraam aretti ikko'isa la'aa Faari'oon Abraama weeshisaa «At eesenne ka kee'mmaalli luwwa mahina issitto? Ise ki arette ikko'isa mahina iinniinsi maaxxitto? At iina mahina «Ise iyyaayyatte» yitaa kuttitto? Anim ise i aroomina massona mahina cawwitto? Otto'o, ki are amaxxitaa mare» yukko. Ee lasage Fari'oon Abraama, ixxi aree ixxena yoo luwwaa hundam ixxi gassaan geegeesoo'isina ijaajukkaare oo manni geegeesukko. Abraam ixxi aree ixxena yoo luwwaa hundam amadaa Gibxi uulliinsi firaa Neegeeba yakkam uulla marukko; Looxim ixxenne maqirem marukko. Abraam lobakat horaa biraa worqaa goddaanchi hee'ukko. Ixxim Neegeebiinsi ki'aa beyyiinsi beyyo marukkuuyyi Beetee'l kollonne marukko; ixxim Beetee'l lambe'ennee Aay lambe'ennee yoo beyyo afukko; oo beyyim ixxi kanniinsi illageen dukkaana kaasaa wiiddanu beyyoo Moollannina kiti'm beyyo axisaa hee'u beyyoo hee'ukko; ee beyyonnem Waa'ina otossukko. Abraaminne maqirem Loox marukko; Looxinam lobakat hor, abaroosii baxaanii hee'ukko. Abraaminaa Looxinaa lobakat diinaxxi allaachchi hee'u bikkina lamim mateeyyoominne afuutteena xanto'oyyo; mashka'oomim ixxuwwi diinate mateeyyoominne allaattam beyyi hee'ukkoyyo. Ee mashka'inne Abraam diinate allaaraa'n lambe'ennee Loox diinate allaaraa'n lambe'ennee woc firukko. Ee ammane Kana'aa'n mannii Ferize'i mannii ee uullanne affutta'a hee'llo'o. Ee lasage Abraam Looxina «Neese abbaayyuwwi inkummi bikkina ki lambe'ennee i lambe'ennee odim i allaaraa'n lambe'ennee ki allaa'raa'n lambe'ennee joranchi hee'immi hasisooyyo. Ee bikkina annanni inkaa hee'nnummaare erane; ka uulliinsi doo'llitti kollo aa'llaa mat kollonne mare; anim mat kollonne maroommo» yukko. Loox Yoordaanoos daajji gadanonne yoo hixii wo'ii wo'mmaakkoo danaam qaala'i uulla asi'mmaa moo'ukko. Oo uullim Zoo'aa'l beero'onne afeebe'e Waa'i kaasu gannattisa te'im Gibxi uullisa wo'i wo'mmaakkoohan ihukkisa moo'ukko; eekkam moo'ukkok Waa'i Soddo'm beero'oo Gomo'l beero'oo bi'iseena illageenette. Ee bikkina Loox Yoordaanoos daajji gadanonne yoo qaala'i uulla hundam ixxi gagina doo'llaa annanni ihaa eelliinchi firoo kollonne marukko; ee'isinne Looxii Abraamii annanni ikko'o. Abraam Kana'aa'n uullanne afuurukko. Ihukkaarem Loox qaala'anne yoo beero'uwwi lambe'enne afuurukko. Soddo'm beero'i gadanonnem dukkaana kaasukko. Ee doollenne Soddo'm manni Waa'ina ijaajantambee'i boqquwwaa baaxiilaanoo hee'llo'o. Loox annanni ihaa maraa lasage Waa'i Abraamina «Ka beyyiinsi ki'issaa hundem kollom danaamisa qoxxissaa moo'e. At moo'lloo uulli hundam an kiinaa ki shumo'inaa uwwoommo; doolli hundinam ki'nnuwwan ihookko. Ki shumo'o uulli shashsha'llisa dutisoommo; uulli shashshara ayyim xigeena xanoobee'isam ki shumo'im ee'isam xigakkeena xanakambee'an ihookko. Uullikam uullichchaa midaadoo taakke'llaa moo'e; ee uulla an kiina uwwoommo» yukko. Ee bikkina Abraam ixxi dukkaana ki'isaa Keebiroonanne yoo Maammire'i keesamaakkoo qilxo'uwwi gadanonne afuurukko; eekke'em Waa'ina kitima hincaa'oo beyyo baxukko. Ee ammane Baabiloo'n adil Amraafeel, Eelaasaa'l adil Ariyook, Eelaa'm adil Kadoorlaa'oomeerii Gooyii'm adil Tiidi'aalii hee'llo'o. Oo soorem adilluwwim Mulli keeno onti adilluwwa qasimmina matto'o. Ixxuwwi qasseena matto'i ontem adilluwwim Soddo'm adil Beera'atte, Gamo'l adil Bersha'atte, Adaa'm adil Shini'aabatte, Xabooyii'm adil Sheemeebeerattee Xoo'aara yakkam Beelaa'i adilaa hee'llo'o. Odim oo ontem adilluwwim mateeyyooma qooccita'a kaba sooqixxi dambalaqa yakkam Siidii'm cebbanne edanta'a oranto'o. Oo ontem adilluwwim Kadoorlaa'oomeerina tommoo lam hiinchoo ijaajanta'a hee'lo'o. Ihukkaarem tommonnee saxxi hiinchonnee ijaajancha sabbo'o. Tommonnee soo'l hiinchonnee Kadoorlaa'oomeerii ixxenne mat ikko'i adilluwwii ixxuwwi gaadaaninnem waatta'a Raafayaa'm manna Ashitaaroot Qaarinaayiminne, Zuuza'i manna Haaminne, Eema'i mannim Sheewe'i Qiryaataaminne qasso'o. Ixxuwwi odim Hoor manna kaa'lla'a Seeyir duunanne hee'llam beyyiinsi udma'i tochchonne yoo Eelfaraananne afeebe'e qasso'o. Ee lasage ixxuwwi Qaadeesa yakkam oogato'i bu'i yoo beyyo waatto'o Ee ammane ee beyyik summi Eyinmiishiphooxa yakkaman hee'ukko; ixxuwwim Amaaleeq uulli hundam amaddo'o; Haxaxoon Taamaaranne hee'llo'i Amoore'i mannam kaa'llo'o. Ee lasage Soddo'm adil, Gomo'l adil, Adaa'm adilii Xabooyyi'm adilii Beelaa'i uulli adilluwwaa gaadaanoo wixxaa'lla'a Siidii'm cebbanne oranto'o. Oo keenim Eelaa'm adil Kadoorilaa'oomeerinne, Goyi'm adil Tidi'aalinne, Baabiloo'n adil Amraafeelinnee Ilaasaal adil Ariyookinnee ontem adilluwwim Soorem adilluwwinnem oranto'o. Ixxuwwi oramam hee'llo'i Siidii'm cebbanne leeyyinne wo'mmaakkoo dut bar hee'ukko. Ee bikkina Soddo'mmekii Gomo'llekii adilluwwi oriinsi gibbu'uuyyim ee balleewwanne ubbo'o. Ihukkaarem gatto'i sasem adilluwwim duunnuwwi kollonne gibbo'o. Oo soorem adilluwwim Soddomannee Gomorannee siiddo'i luwwi hundam itakkam hurbaat gatoo'n bogga'a massito'o. Odim Soddomanne hee'am hee'u Abraam abbaayyi beeto Looxaa ixxena yoo amaxxaa hundam qeefadda'a massito'o. Ihukkaarem mat manchi fiikkaa waaraa ihu luwwi hundam Ibro'i uulli manchi hee'u Abraamina kurukko. Ee ammane Abraam hee'am hee'ukkok Maammire yakkam Amoore'i uulli manchi keesamaakkoo qilxo'i haqqi gadanonnette hee'ukko. Maammire, ixxi abbaayyuwwi Ashikoolii Aneerii Abraaminne maqire hidi'l sagara aaggo'oo gaaxxi besh hee'llo'o. Abraam ixxi abbaayyi beeto qeefadakka'a massakko'isa macceesaa lasage ixxi minenne qarantaa hee'llam orancha laqqam kee'nnekka sas xibbee tommoo sadeenti mannaa amadaa soorem adilluwwam Daana yakkam beyyi afeebe'e hollamaa marukko. Ixxim ee manna gaalchi gaalchinne baxxansaa lasage ee beyyonne ixxi awwaadaaninnem hiimonne oramaa kaa'ukko. Damasqo'iinsi hanaa'n qarinne yoo Hoobba'i afeebe'e hollukko. Qeefadamu luwwi hundam dabaraa worukko; ixxi abbaayyi beeto Looxam ixxi amaxxinnem dabaraa worukko. Ee'isam ixxuwwinnem meentoo mulli mannaa hundam dabaraa worukko. Abraam Kadoorlaa'oomeeraa ixxenne maqire hee'llo'i adilluwwaa kaa'aa gaadiinsi daba'llukkuuyyi Soddo'm adil «Adi'l cebba» yakkam Shaawwe'i cebbanne aa'eena firukko. Odim hundiinsi lob Waa'ina qeessichchi hee'u Malkaxeedeeqa yakkam Saalee'm adil Abraamina itoo hurbaataa woyi'n diqaasaa amadaa waarukko. Malkaxeedeeqim Abraamina «Iimanee uullaa hundam qooccu hundiinsi lob Waa'i Abraama maasse'ona. Ki diina'a ki anganne higisaa uwwu hundiinsi lob Waa'i maasse'amona» yaa masse'ukko. Abraamim diina'iinsi qeefadaa eebu luwwi hundiinsim Malkaxeedeeqina tommiinsi mato uwwukko. Soddo'm adilim Abraamina «Xale'i manna iina dabattaa mulli luwwi hundam ki gagina massaqqe» yukko. Ihukkaarem Abraam Soddo'm adilina «An iimanee uullaa qooccu hundiinsi lob Moollanni Waa'i illagenne hide'oommo. At ‹Abraama goddaanchi issummok anette› yitoobee'isina ki luchchika gootto'i fatira te'im kobe'i muuncanam ihuta'n i gagina massoommoyyo. Manni itu hurbaatiinsi bagaan ki luwwika ma'llichchom i gagina massoommoyyo. Ihukkaarem iinninne waatto'i manni Aneer, Eeshikoolii Maammiree ixxuwwi bikke massaqqitona» yukko. Ee lasage Waa'i Abraamina kaaltinne moo'amukko. Waa'im Abraamina «Abraama, baddititte; an keesenne jor luwwi afoobee'isa kiina agir ihaa egeroommo; lobakat irifo'om uwwoommo» yukko. Ihukkaarem Abraam «Moollanni Waa'a! Iina oos bee'i bikkina i luwwa lago aa'ookkok Damaasqo'i Eeli'eezaratte; ee bikkina iina uwwitoo irifo'i maha issookko? Iina ooso uwwitbee'i bikkina i minenne qaramu awwaadaa'nnek mat i luwwa lago aa'eenatte» yaa dabarukko. Ee lasage odim Waa'i Abraamina «Ki gubeexxi qachchi ki luwwa lago aa'ookko bagaan ku manchi lago aa'ooyyo» yukkuuyyi macceesukko. Odim ee lasage Waa'i Abraama biir beyyonne fissaa «Hino'o iimane moo'e; iima'n boollaanka xiggeena xantoolas xige; ki shumo'im ee'isa ihookko» yukko. Abraamim Waa'anne amma'nnukko; oohim ixxena muccuroom ihaa xigamukko. Odim Waa'i Abraamina «At ka uulla lago aa'llona Kalaade'i manni uullanne yoo Uuriinsi awwonsaa fissummi Waa'i anette» yukko. Ihukkaarem Abraam «I Moollanni Waa'a! Ka uulla an lago aa'eena xanoommisa mahinne la'eena xanoommo?» yaa xa'mmukko. Waa'im Abraamina «Sas hiinchi addichcho, sas hiinchi fellakkichchi geexa, sas hiinchi gereechchi ambula, ee'isam handarekkichchoo handarekkichchi wotaraa amaddaa waare» yukko. Abraamim ee diinate hundam Waa'ina hincaa'aa annannichchom lam gudaanchonne diqaa lam ogoranne dissukko; ihukkaarem cii'a lam beyyonne diqukkoyyo. Abraam diqaa dissu maara ammar iteena waarukkaare hollukko. Abraam maaro'i ballanne kee'mmaalli diriiro diriirukko. Lobakata baddisoo gambabbi tuunsim ixxonne ubukko. Waa'im Abraamina «Ki shumo'i manni uullanne waaraan ikka'a hee'llamisa la'e; ee uulli mannim ixxuwwa soor xibbi hiincho lobakata u'nnissu'uuyyi agiddanonne gassitamo. Ihukkaarem an ixxuwwa agiddano gassito'i minaadabanne oogatoommo; ee lasage lobakat amaxxa amadda'a fittamo. Ihukkaarem at lobakat doolle hee'llaa lasage xumminnem letaa waammantootto. Ki shumo'im soor qaranchiinsi lasage ka uulla daba'llookko; ee amman afeebe'e afamoo mashka'im Amoore'i mannik baaxii'l humbulli wo'mmeebe'ette» yukko. Eelliinchi aagaa uulli tuunsaa lasage midachchi wiriirii aphphoo giirii moo'amaa lamem ogorannem yoo maa'l lambe'inne higukko. Ee ayyaamom Waa'i Abraaminne «Gibxi uulli gabaliinsi ki'isaa lob Efiraaxiis daajjenne afeebe'e yoo uulla hundam ki shumo'ina uwwoommo. Ee'isam Qeene'i mannika, Qaaniiz mannika, Qaadmoo'n mannika, Hiite'i mmannika, Fariiz mannika, Raafaayim mannika, Amoore'i mannika, Kana'aa'n mannika, Gergeese'i mannikaa Iyyaabuus mannikaa uulla ki shumo'ina uwwoommo» yaa hidi'l sagara aagukko. Abraam meentichcho Saaraayye ooso qattoo'n hee'llo'o. Ihukkaarem isena Aggaare yakkam Gibxi uulli awwaadaancho hee'llo'o. Saaraayyem Abraamina «Oono'o, Waa'i eese ooso qaroombee'isa issaakko; ee bikkina ayyi la'ukko is kollinne ooso siideena xanoommi bikkina i awwaadaanchonne maqire iinse'e» yito'o. Ee bikkina Abraam Saaraayye wocco'i woshshanne iittamukko. Ee bikkina Saaraayye isena awwaadaanchotte hee'llo'i Gibxi uulli Aggaare Abraamina meentichchotte ikkona uwwito'o. Oohim Abraam Kana'aa'n uullanne tommi hiincho afuuraa lasagennette hee'ukko. Abraamim Aggaarenne eebaqqanchi edancha edamukko. Isem lamfooratte ikko'o. Ee lasage Aggaare lamfooratte ikko'isa laqqa'a Saaraayyenne bolxito'o; isem gaddo'o. Saaraayyem Abraamina «Eesenne afu hawwojji hundim ki hanenne ihona. Aggaare kiina uwwummok an i gagame; ihukkaarem ise lamfooratte ikko'isa laqqo'i ammaniinsi ki'isaa eese gaddo'ookko. Waa'i ki lambe'ennee i lambe'ennee oogatona» yito'o. Ihukkaarem Abraam Saaraayyena «Oono'o, ki awwaadaancho ki angannette; at hassittisa issiteena xantootto» yukko. Ee lasage Saaraayye Aggaare lobakata u'nnisso'i bikkina Aggaare Saaraayyeensi fiikkito'o. Waa'i asse'amaanchi udma'i uullanne yoo wo'i bu'i gadanonne Aggaare moo'ukko. Oo wo'i bu'oomim yookkok Shuura yakkam beyyo massoo gooqqi gadanonnette hee'ukko. Waa'i asse'amaanchim Aggaarena «Saaraayyena awwaadaanchi Aggaare, hanniinsi waattoolla? Handu mattoolla?» yukko. Isem «An i moollam Saaraayyeensi fiikkoommuulla» yito'o. Waa'i asse'amaanchim Aggaarena «Ki moollam beyyo daba'llitaa mattaa isena ijaajame» yukko. Odim Waa'i asse'amaanchi isena «Ki shumo'o lobakata fikkaannisoommo; ixxuwwam ayyim xigaa xanooyyo. «Oono'o at lamfooratte ikkaatto; goonchi beetom qattootto; Waa'i at hawwitaa wi'llittoka macceesu bikkina beetika summa Isma'eela yitootto. Ihukkaarem ixxi bii'l hallichchisa ihookko; ixxim manni hundam sabookko; ee'isam manni hundim ixxo sabookko; ixxim qarmanna sabaa annanni ihaa hee'ookko» yukko. Aggaarem ise atoorassu Waa'a «Eeliroo'ii» yita'a weeshsho'o. Ee bikkina manni Qaadees lambe'ennee Baareed lambe'ennee yoo wo'i bu'ika summa «Bii'eer Laahay Roo'ii» yaa weeshukko. Eehid yimmim «Eese moo'oo hee'oo Waa'i bu'o» yimma. Aggaarem Abraamina goonchi beeto qatto'o; Abraamim beet summa «Isma'eela» yaa weeshukko. Aggaare Abraamina Isma'eela qatto'i ammane Abraam umur sadeentayyee loh hiinchoo ihaa hee'ukko. Abraamina honsayyee honsi hiinchoo ihaakkoohaannonne, Waa'i ixxena moo'amaa «An hundam xanoommi Waa'a; hundi ammanem iina ijaajanchinne hanqo'i baxo baxe. An kiinninne maqire hidi'l sagara aagoommo; ki shumo'om lobakata fikkaannisoommo» yukko. Abraamim illillaachcha uullanne heeshaa otossukko; Waa'im «Kiinninne maqire aagoommi hidi'l sagar kane; an keese lobakat minaadabina anni issoommo. Ka balliinsi ki'isaa ki summi Abraama yamamooyyo. Ihukkaarem ki summi Abrihaama yamamookko; mashka'oomim keese lobakat minaadabina anni issoommo. An keese lobakata fikkaansoommo; lobakat minaadabam issoommo; adilluwwim kiinniinsi firookko. Ki lambe'ennee i lambe'ennee kiinniinsi lasonnem ki shumo'innee odim ixxuwwi shumo'innee heer heerinam hee'oo hidi'l sagara aagoommo; ee'isinnem kiinaa kiinniinsi lasagem ki shumo'inaa Waa'i ihoommo. At kaba koyyinanonne afuuttitti Kana'aa'n uulli hundam heer heerinam kiinaa ki shumo'inaa gaqqi uulli issaa uwwoommo; ixxuwwinam an Waa'i ihoommo» yukko. Odim Waa'i Abrihaamina «Atii ki shumo'ii iinninne maqire aaggitti hidi'l sagara qaranchiinsi qaranchi afeebe'e egellehe. Atii ki shumo'ii egettakkamisina kuroommi hidi'l sagar kane; ki'nnuwwi lambe'enne yoo goon hundim ballachchamona. Ki'nnuwi hundim ki'nuwwika goo'n orachcho ballachchantakkamo; oohim i lambe'ennee ki'nnuwwi lambe'ennee yoo hidi'l sagarina mare'i ihookko. Ka lasage qaramoo goon oos hundim qaramu sadeenti ballanne ballachchamona; ee'isam ki minenne qaranto'i keenii mulli uulliinsi diinatinne bitaa'anta'a waatto'i agidii gattoo'n ee'isinne ballachchantona. Ki minenne qaramukkokii diinatinne bitaa'amukkokii hundim ballachchamona; ku ki'nnuwwi orachchonne ihoo ballachchanchi an ki'nnuwwinne heer heerinam aagoommi hidi'l sagarina mare'i ihookko. Goo'n orachcho ballachchamubee'i goon hundim iikka hidi'l sagara egerubee'i bikkina minaadaphphi lambe'iinsi annanni ihona» yukko. Odim Waa'i Abrihaamina «Kanniinsi eehid ki meentichchi summa ‹Saaraayye› yitaa weeshshitte. Ka balliinsi ki'isaa isek summi ‹Saara'atte›. Anim ise maasse'oommo; iseensim an kiina Goonchi beeto uwwoommo; lobakat minaadabinam amatte ikkona an ise maasse'oommo; is shumo'iinsim minaadaphphi adilluwwi qaramookko» yukko. Abrihaamim Waa'i illagenne heeshaa otossukko. Ihukkaarem ixxi wodanonne «Ixxi umur xibbi hiincho ihu manchi ooso qareena hinkid xanookko? Saara'akim umur honsayyi hiincho ihaakkoohaannonne ooso qatteena hinkid xantamo?» yaa osarukko. Abrihaam Waa'ina «Isma'eela maasse'llittaare i luwwa lago aa'eena xanooyyonnihe?» yaa xa'mmukko. Waa'im «Ee'isayyo; ki meentichcho Saara'a goonchi beeto qattamo; ixxi summam Yisaaqa yitaa weeshshootto; an ixxennee ixxi shumo'innee heer heerinam hee'oo hidi'l sagara aagoommo. Isma'eel bikkina uunxittokam macceesaammo; ixxom maasse'oommo; ixxenam dut ooso uwwoommo; ixxi shumo'om lobakata fikkaannisoommo; tomminaa lam sullinaa anni issoommo; ixxi fikkaannam lob minaadab issoommo. Ihukkaarem waaroo hiinchonne kido'i ammanenne Saara'a kiina qattam Yisaaqinne maqire i hidi'l sagara qoxxisoommo» yukko. Waa'i Abrihaaminne atooraraa lasage ixxeensi annanni ihaa iim firukko. Abrihaam ee balla Waa'i ixxo ijaajukkisanne ixxi beet Isma'eela, ixxi minenne qaranto'okaa biiriinsi bitaa'anto'i agidoo edaa ixxi minenne hee'oo goon hundam ballachchukko. Abrihaam ballachchamu ammane ixxek umur honsayyee honsi hiinchoo ihaa hee'ukko. Ixxi beet Isma'eel ballachchamu ammane ixxek umur tommoo sas hiinchoo ihaa hee'ukko. Lamim ballachchanto'ok matem ballannettem hee'ukko. Ixxi minenne qaranto'i keenii biiriinsi bitaa'anto'i agidii matim gattoo'n goon hundim Abrihaaminne maqirem ballachchanto'o. Waa'i Abrihaamina samgud ballanne Maammire yakkam manchi hujuphphi haqqi gadanonne yoo Dukkaa'n u'llummanne afuuraakkoohaannonne moo'amukko. Abrihaamim ixxi illagenne uullito'oo sas manna moo'ukko. Ee ammanem afuuru beyyiinsi ki'aa sasem manchi beyyom marukko; ixxim heeshaa ixxuwwa xummaatisukko. Abrihaamim «I Moollanna! Ki illagenne an nuura siidaammoohan ihulas eese ki awwaadaancho uttaa higgitte. Lokko aanshaqqitakkam wo'o eeboommaare aanshaqqehe; ka haqqi hafannem usheexxehe. Ki'nnuwwina awwaadaanchi ihummi i beyyo waattakkolas ki'nnuwi taakkina hara'mmoo hofqax hurbaatam hincaa'oommo» yukko. Ixxuwwim «Erane, at yitittisam isse» yito'o. Abrihaamim qaqqisaa Dukkaa'n woro maraa Saara'ana «Qaqqise, qamika sas keennaancho qufissaa qorosho'o sare» yukko. Ee lasage Abrihaam la'l beyyo geeraa maraa mat xaboot wee'ichcho doo'llaa ixxi awwaadaanchi gudisoo'isina uwwukko; ixxim qaqqisaa duraa gudisukko. Ee lasage Abrihaam gi'inaakkoo adoo maaraa haqqi hafanne afuutto'i beyyonne massaa uwwaa uullaa itisukko. Ixxuwwim ixxena «Ki meentichcho Saara'a hannonnette?» yita'a xa'mmito'o; ixxim «Ise dukkaa'n woronnette» yukko. Ixxuwwiinsim mat «Kaballi hiincho kido'i ammanenne hanqo'isam an ki beyyo daba'llaa waaroommo; ki meentichcho Saara'am goonchi beeto qattamo» yukko; Ixxi ka woshsha wocoo ammane Saara'a ixxi afareen yoo dukkaa'n goocanne uullita'a macceessam hee'llo'o. Abrihaamii Saara'aa lamim hore'em lobakata lomma'nnita'a hee'llo'i bikkina meentiinsi agananne agananne waaroo luwwi Saara'aansi uullaa hee'ukko. Saara'am is wodanonne «Anii i goonchii lamim lomma'nninaa lasage iina kido'i liiranchi hee'eena xanoohonnihe?» yita'a sawwito'o. Moollannim Abrihaamina «Saara'a ‹An lomma'nnaa lasage hinkid qachcho qareena xanoommo?› yita'a osatto'ok mahinatte? Hanqinam Moollanna kaa'oo luwwi yoohonnihe? Ka balli hiincho kido'i ammanenne daba'llaa waaroommo; Saara'am goonchi beeto qattamo» yukko. Saara'a baddito'i bikkina «An osarummoyyo» yita'a laggo'o. Ihukkaarem ixxi «At hanqinam osattaatto» yukko. Ee lasage oo manni matteena ki'llo'o; ixxuwwim Soddo'm beero'o aad asi'mmitam beyyo affo'o; Abrihaamim ixxuwwa geegeeseena marukko. Moollannim «Hanqinam an isseena sawwummi luwwa Abrihaamiinsi maaxoommonnihe? Hanqinam Abrihaam shumo'i malaayyaamoo lob minaadabaa ihookko; uulli minaadab hundim ixxi mashka'inne maasse'amookko. Xabbeenaa hanqo'anee ihu luwwa issimminne Waa'ika googo egettamisina ixxi oosoo ixxi abaroosaa sogimminne awwonsoo'isina an ixxo doo'llaammo; ixxi oosimdu eekka issitolas anim ixxena uwwummi neeyyato wonshoommo» yukko. Moollannim Abrihaamina «Soddomannee Gamorannee hee'llam mannik jolli lobakkata lophphukkisa macceesaammo; ixxuwwi baaxiilim lobakata kee'mmaakko. Ixxuwwi bikkina macceesummi luwwi hundim hanqi ihukkisa la'eena ixxuwwi beyyo dilloommo» yukko. Abrihaam Moollanninne uullukkisam lamem mannim utta'a Soddo'm kollo matto'o. Abrihaamim Waa'i kollonne hincaa «Hanqinam muccur keeno baaxiilaaninne maqirem bi'issoohonnihe? Ee beero'onne ontayyi muccur manni hee'uta'n beero'i hundam bi'issoohonnihe? Ee beero'onne yo'i ontayyi muccur manna gatisimmina beero'oomina urimma issitooyyonnihe? Uulli hundannem xabbeenoominne oogattoo at hanqinam muccur keeno baaxiilaaninne maqirem hinkid shitootto? Eehid ihoone; eehido'is kiinniinsi qee'llona» yukko. Moollannim «Soddo'm beero'onne baaxiilo baxxobee'i ontayyi muccur manna siidumta'n an ixxuwwi bikkina yaa ee beero'o hore'em bi'isoommoyyo» yukko. Odim Abrihaam «An buchchaa gii'l buchchaa ihaammoo awwaad bee'i manchi i Waa'inne iggaa wocummi bikkina uraammo yihe. I Waa'a! Ontayyi muccur keeniinsi onti xa'uta'n beero'i hundoomam ee xa'u kee'n bikkina bi'issoohonnihe?» yukko. Moollannim «Soree onti muccur mannaa siidumta'n ee beero'o hundoomam bi'isoommoyyo» yukko. Odim Abrihaam «Ayyi la'ukko sor muccur manni hee'llota'nnahe?» yukko. Waa'im «Sore hee'llota'n bi'isoommoyyo» yaa dabarukko. Ixxim «I Moollanna! Odim wocoommo quuqqitte; eehanniinsim sad muccur manni xale'i hee'llota'nnahe?» yukko. Waa'im «Sade hee'llota'n bi'isoommoyyo» yaa dabarukko. Abrihaamim «I Waa'a! Kiinninne maqire iggaa wocummi bikkina uraammo yihe; ayyi la'ukko xale'i lamiyyi hee'llota'nnahe?» yukko. Waa'im «Lamiyyi manni hee'llota'n ixxuwwi bikkina yaa ee beero'o bi'isoommoyyo» yukko. Ixxim «I Moollanna! Mataagge xale'e edaa wocoommo quuqqitte; eehanniinsim tommi xale'i hee'llota'nnahe?» yaa xa'mmukko. Waa'im «Tommi manchi hee'llota'n ixxuwwi bikkina yaa ee beero'o bi'isoommoyyo» yukko. Waa'im Abrihaaminne atoorachcha guullaa lasage ee beyyiinsi marukko; Abrihaamim ixxi mine daba'llukko. Waa'ik lamem asse'amaanim ee hiimom Soddoma affo'i ammanenne Loox beero'i goocanne afuuraa hee'ukko. Looxim ixxuwwa moo'ukkisam ixxuwwinne edameena ki'aa marukko; ixxuwwi illagennem uullanne heeshaa otossukko. Looxim «I moollanno'o ki'nnuwwina awwaadaanchi ihummi i mine aaggehe; ki'nnuwwi lokkom aanshaqqitakka'a i minenne gallehe; soodo daram ki'llakka'a ki'nnuwwi googo mattakkamo» yukko. Ihukkaarem ixxuwwi dabatta'a ka nafaranne galloommo bagaan ihooyyo» yito'o. Ihukkaarem Loox ixxuwwa qoxxisaa uunxu bikkina maqirem ixxi mine aaggo'o. Looxim ixxi baxaano koyyina qorosho'o danaamisa gudissona ijaajukko; qorosho'im afaa lasage massaa uwwukkaare itto'o. Ihukkaarem ixxuwwi iinse'lleena illageen Soddo'm beero'onne yo'i goon hundim woraadiinsi ki'isaa lommannanne afeebe'e waatta'a Loox mine kibbito'o. Looxam weeshsha'a «Kabaxxaare ki mine gatteena waatto'i manni hannonnette? Ixxuwwa ni beyyo biira fisse; goon meentinne edamoo'isa neese ixxuwwinne edammeena hansoommo» yito'o. Ihukkaarem Loox ixxuwwa atoorasseena biira firaa mi'nneka gooca afa'llaachcha xufukko. Looxim «Iyyabbaayyuwwa! Kido'i jor luwwa baxxakkotte. Iina lam baajaam landi yo'o; ixxuwwa ki'nnuwwina fissaa uwwoommaare hassakko'isa issehe; ihukkaarem ku koyyi eese kutta'a waatto'oo manni ikko'i bikkina ixxuwwanne mat lichchom issitakkambee'isa» yaa uunxukko. Ihukkaarem ixxuwwi dabatta'a «Ki gagoomim waaraanchi ikkaa hee'llittuuyyi daanni ikkeena hassoolla; ka beyyiinsi laa'ihe! Laa'itbeelas ixxuwwanne issinoommi jolliinsi lonsinaa keesenne issinoommo» yito'o. Looxam afa'llaachcha gafe'lla'a u'llummi xufa iiqqeena issito'o. Ihukkaarem oo minenne hee'llo'i lamem koyyi mannim anga asse'lla'a Looxa hixixaa'lla'a mine aagissa'a u'llummi xufa xuffo'o. Ee lasage u'llummi goocanne hee'llo'i mannika hoffaanniinsi ki'isaa lobaannonne afeebe'e moo'lleena xantambee'isa hundikam ille qooqisso'o. Lamem manchim Looxina «Ka beero'onne hee'llam ki goo'n oosoo landaa ki oos balluwwaa mulli qarmannaa hundam qaqqissa'a ka beero'iinsi fittamisa isse. Ka beero'o neese bi'inseenatte; mashka'oomim ka minaadaphphek baaxiil lobakata lophphukkisa Waa'i moo'aakko; ee bikkina Soddoma bi'insona neese asse'aakko» yito'o. Ee lasage Loox ixxi miniinsi firaa ixxi landa xeehu manni mine maraa «Waa'i ka beero'o bi'iseenatte ihu bikkina qaqqissakka'a ka beyyiinsi fillehe» yukko. Ihukkaarem ixxuwwi naacamookkoka labissa'a innaannito'o. Uulli soodukkuuyyim Waa'i asse'amaan Looxina «Ka beero'inne maqire bi'llakkambee'isa ki meentichchoo kiikka lamem landaa amaddaa qaqqissaa ka beyyiinsi fire» yita'a gaaggaabisso'o. Ihukkaarem Loox dasukkaare Waa'i ixxuwwina qishixxu bikkina oo manni ixxeka, ixxi meentichchokaa ixxi lamem landikaa anga amadda'a beero'iinsi tochchonne fissito'o. Tochchonne fissita'a lasage Waa'i asse'amaa'nnek mat «Ki'nnuwwi foore gatixxitakkeena qaqqissakka'a gibbehe; laso daba'llitakka'atim moo'llakkotte; ka cebbi beyyonnem ihuta'n uullitakkambee'isa duu'n kollonne gibbehe; oobeelas bi'llakkamo» yukko. Ihukkaarem Loox «I moollanno'o, neese ee'isa issitakkotte. An ki'nnuwwina awwaadaanchi ki'nnuwwi illagenne nuura siidummi bikkina ki'nnuwwi eese gatissakkeena lobakat hara'mmato issitakko'ookko; ihukkaarem ku bichchi eesenne afoohaare lehoommo yaa baddummi bikkina ee duu'n kolli gibaa xoreena xanoommoyyo. An qaqqisaa gibaa xoreena xanoommi mat hoffi beero'i abbisonne yookko; ee bikkina gibaa ee beero'o maroommisa issehe; ki'nnuwwi moo'llakkamisam oo beero'i hoffane; eekke'e marumta'n i foor bichchiinsi gatookko» yukko. Waa'i asse'amaanchim «Erane, at yittisam ihona; ee at yitoo beero'o an bi'isoommoyyo. Qaqissaa gibbaa xore; ee beero'o afeebe'e an maham issoommoyyo» yukko. Loox ee beero'o hoffane yaa hee'u bikkina ee beero'ik summi «Xoo'aara» yamamukko. Loox Xoo'aara afukkisam eelliinchi firukko. Waa'im Soddo'm beero'onnee Gamo'l beero'onnee giiraa aphphoo kinaa iimaniinsi ixxi beyyiinsi ga'nnisukko. Ee'isinne ee beero'uwwa, ee beero'i hegeegonne yoo cebbi beyyuwwa, ee beyyonne hee'llam minaadabaa uullanne mutu luwwaa hundam bi'isukko. Ihukkaarem Loox meentichcho, laso moo'llo'i bikkina sooqixxi utub ikka'a gatto'o. Abrihaam la'm balla soodaraar daram ki'aa illageen Waa'i illagenne uullaa hee'u beyyo marukko. Ixxim Soddomma, Gamoraa cebbi uullaa hundam aad moo'u ammanenne lob midachchiinsi firoo wirii'llisa kee'mmaalli wiriir ee beyyiinsi firukkuuyyi moo'ukko. Loox hee'am hee'u lete'i uulli beero'uwwa Waa'i bi'isu ammane Abrihaama sawwaa Looxa bichchiinsi gatisukko. Loox Xoo'aaranne afuureena baddu bikkina ixxi lamem landam amadaa duunanne firaa daawwa'i woronne afuurukko. Mat balla lob landichcho is aayyana «Niyyanni lomma'nnaakko; ooso qalloommisina neese massoo goon ni kululleetanne bee'e. Ee bikkina waare; niyyannina woyi'n diqaasa aginsaa dimboohaare ixxenne maqire iinse'nnona; ixxeensim ooso qallona» yito'o. Ee hiimom annina woyi'n diqaasa agissa'a dimbisso'o; lob landichchom waatta'a anninne maqire iinse'llo'o; ihukkaarem ixxi ise waatta'a iinse'llo'isaa ki'llo'isaa la'ukkoyyo. La'm balla odim oo lob landichcho hoffi is aayyana «Hii'mmo'o an iyyanninne maqirem iinse'aammo; atim ixxenne maqire iinse'lleena xantoo'isina odim kaballi maaro'o niyyannina woyi'n diqaasa aginsona; ee lasage lamim niyyanniinsi ooso qalleena xannoommoo» yito'o. Ee bikkina ee hiimo odim annina woyi'n diqaasa agissa'a dimbissa'a hoffotem matta'a anninne maqire iinse'llo'o. Looxim ise iinse'llo'isaa ki'llo'isaa la'ukkoyyi hee'ukko. Looxik lamem landim ee'isa ihimminne ixxuwwi annina lamfoolluwwi ikko'o. Lobotem goonchi beeto qatto'o; summam Moo'aaba yita'a weeshsho'o; ixxim kaballi afeebe'e Moo'aaphphi minaadabina lobanna. Ee'isam hoffotem goonchi beeto qatto'o; summam Beeni'amii yita'a weeshsho'o; ixxim kaballi afeebe'em Amoo'n minaadabina lobanna. Abrihaam Mammire yakkam beyyo uraa Qaadees lambe'nnee Suur lambe'ennee hee'eena Kana'aaniinsi woroo'n qaranne maraa hoffi ammaninam Geeraaranne afuurukko. Ee beyyonnem Abrihaam ixxi meentichcho Saara'a «Iyyaayyatte» yaa hee'u bikkina Abemeeleeka yakkam Geeraa'l uulli adil saara'i beyyo manna asse'aa weeshisaa eebukko. Ihukkaarem Waa'i Abemeeleekina hii'm haqaawwonne moo'amaa «Manni meentichcho eebbitti bikkina at letootto» yukko. Ihukkaarem Abemeeleek Saara'anne maqire iinse'oo'n hee'u bikkina «I moollanna an matem jollam baxummoyyo; eehannah eesee i minaadabaa bi'issoohonnihe? ‹Ise, iyyaayyatte› yukkok Abrihaam ixxi gagoomame. Odim is gagam ‹Ixxi iyyabbaayyo› yito'ookko. Ise ixxi meentichchotte ikko'isa an la'ummoyyo. An kaka issummok i woda'n muccuroominnette» yukko. Waa'im ixxena haqaawwonne «At kaka ki woda'n muccuroominne issittisa an la'oommo; ee bikkina at i illagenne baaxiilo baxxoobee'isaa ise nakkitoobee'isaa hoorummo. Ihukkaarem kaba; ka meentichcho massitaa is aro'ina uwwe; mashka'oomim ixxi hiraagaancho ki bikkina Waa'a uunxukkaare at letooyyo; ihukkaarem at Saara'a ixxena dabatbeelas atii ki minaadabii hundim letakkamo» yukko. Ee bikkina adil Abemeeleek soodaraar daram ki'aa ixxi gassaano weeshaa ka woshshi hundam kurukko; oo mannim lobakata baddito'o. Ee lasage Abemeeleek Abrihaama weeshaa «Ku neesenne issitti luwwi maruchcho? Eesennee i adillanonnee ku malaayyaam hawwi afoo'isa issittok an mah jolla baxummaarette? Hore'em issimmina laboobee'i jor luwwa eesenne issitaatto» yukko. Odim Abemeeleek Abrihaamina «Kaka baxxittok maha sawwitaatette?» yaa xa'mmukko. Abrihaamim «Kaka baxummi mashka'i ka beyyonne Waa'a baddookkok matim bee'eka labisaa i meentichcho massaqqeena hasoo manchi hee'ukkaare eese shookko yaa sawwummi bikkinatte. Hanqinam ise iina aayyatte; ise iyyummataneyyo bagaan iyyanni landichchotte; ihukkaarem iyyummi landichchotte ikkobee'i bikkina an ise eebummo. Ee bikkina an iyyanni miniinsi firaa mulli uulla maroommisina eese ijaaju ammane an isena ‹Neese malloommi beyyi hundannem an ixxena aayyatte yittaa'lleensi iina lobakkat luwwa issittaannisa xigoommo› yaa hee'ummo» yukko. Ee lasage Abemeeleek Abrihaamina Saara'a dabaraa uwwukkuuyyi gereebbaa laroo goon agidoo meenti agidoo edaa uwwukko. Abemeeleekim Abrihaamina «Oono'o i uulli hundim ki illaggennette; at iittitti beyyonne afuure» yukko. Ixxim Saara'ana «At matem jollem baxxitbee'i muccuratte ikkittisa kiinninne yoo manni hundim la'ona mare'oomina kiyyabbaayyina mat kum kin bira uwwaammo» yukko. Waa'i Abrihaamina wocu neeyyaxxi saga'llisam Saara'a maasse'ukko. Saara'a Abrihaam lomma'nnaakkoohaannonne ixxena lamfoorette ikka'a goonchi beeto qatto'o; oo beetim Waa'i qaramookko yaa kuru ammanenne qaramukko. Abrihaam ixxena Saara'a qatto'i beet summa Yisaaqa yaa weeshukko. Abrihaam Waa'i ijaajukkisam Yisaaqa qaramu sadeenti ballanne ballachchukko. Saara'a Yisaaqa qatto'i ammane Abrihaamik umur xibbi hiincho ihaa hee'ukko. Saara'a «Waa'i eese liiramoommisaa osaroommisaa issaakko; kaka macceesu hundim iinninne maqirem osarookko» yito'o. Odim edda'a « ‹Saara'a Abrihaamina ooso qatta'a iicissamo› yaa kuroo manchi ayyi hee'ukko? Ihukkaarem kaba oono'o ixxi lomma'nnaakkoohaannonne an ixxena goonchi beeto qaraammo» yito'o. Ciilichchim li'aa anuuna urukko; Abrihaamim ciilichchi anuuna uru balla lobakat maadda gudisukko. Mat ayyaamo Gibxi uulliinsi Waatto'i Aggaare Abrihaamina qatto'i beet Isma'eel Saara'i beet Yisaaqinne lellukkuuyyi Saara'a moo'llo'o. Saara'a eekka moo'llo'i ammanenne Abrihaamina «Ku agishshi beet Yisaaqinne maqire ki luwwika ma'lluchchom lago aa'oobee'isa amaa beetoo miniinsi qeesse yito'o. Isma'eelim Abrihaamina qachchi hee'u bikkina oo woshshi ixxo lobakata kichche'isukko. Ihukkaarem Waa'i Abrihaamina «Ki beet bikkinaa ki agishshi bikkinaa hawwititte; Saara'a kiina yito'i luwwi hundam isse; mashka'oomim an kiina hide'ummi shumo'o siiddoottok Yisaaqiinsette. Ki agishshi beetim ki qachchi ihu bikkina dut ooso uwwoommo; ixxuwwim minaadab ikkamo» yukko. Ee lasage Abrihaam la'm balla soodaraar daram ki'aa hurbaataa cananne wo'o wonshaatii uwwukko; ixxim is afarenne ciila iyyiisaa geegeesukko; isem annanni ikka'a matta'a Bersaabe'i udma'anne jaljallitam hee'llo'o. Odim cananne amaddo'i wo'i beeddu ammanenne is ciilichcho mat shifanne ubbuusso'o. Isem «I ciil lehukkuuyyi moo'oommoyyo» yita'a ciilichchiinsi annanni ikka'a mat xibbi meetira qee'llita'a ixxi xabbeenanne matta'a afuutto'o; isem sagara iimaa'lla'a wi'llitto'o. Waa'im ee ciilichchi laachcha macceesukko; ee ammanem Waa'i asse'amaanchi Aggaarena «Aggaare, maha ikkaate? Waa'i ciilichchika laachcha macceesaakkoo bikkina baddititte. Ki'llaa mattaa ciilichcho ki'issaa amade; ixxi shumo'o an lobakat minaadab issoommo» yukko. Ee lasage Waa'i Aggaareka ille fooqaa'ukko; isem wo'i bare moo'lla'a matta'a wo'o cananne wonshita'a inkiitta'a ciilina agisso'o. Beetim li'ukkuuyyi Waa'i ixxenne maqire hee'ukko; Ixxim Faaraa'n udma'i uullanne hee'ukkuuyyi qoxar hochchaanchi ihukko. Ixxim amam Gibxi uulliinsi mat landichcho ixxena xeekka'a eebbo'o. Ee ammane Abemeeleek ixxi gaadaano ijaajoo Filkoolinne maqirem Abrihaam beyyo Waaraa «At issitti luwwi hundannem Waa'i kiinninnette. Ee bikkina kaba Waa'i illaggenne iinaa i oosinaa te'im i shumo'inaa hundinam ‹Jora issoommoyyo› yitaa hide'e. Ihukkaarem an kiina eroomma issummisam atim iinaa waaraanchoominne hee'lloo ka uullinaa eroomma issiteena hide'e» yukko. Abrihaamim «Ihona, hide'oommo» yaa dabarukko. Abrihaamim Abemeeleek awwaadaan hootto'i ba'l wo'i mashka'inne Abemeeleeka gadisukko. Abemeeleekim dabaraa «At kaballi afeebe'e ka woshsha iina kuttitbee'i bikkina ka woshsha macceesimmina iina luxxi ballame; kaka ayyi issuda'e an la'ummoyyo» yukko. Abrihaamim Abemeeleekina gereebbikaa la'llekaa uwwukko; ee lasage lamem mannim hide'anto'o. Abrihaamim ixxi gereebbi allaachchiinsi lamar geexxuwwi gereebba doo'llaa annanni issukko. Abemeeleekim «Ku annanni issitaa uullissitti lamarem gereebbi geexxuwwim maruwwa?» yukko. Abrihaamim «An ka wo'i bare hinummisina naqaash ihoo'isina ka lamarem gereebbi geexxuwwam i angiinsi aa'llootto» yukko. Lamem manchim ee beyyonne hidiro aaggo'i bikkina oo beyyi Bersaabe'e yamamukko. Ixxuwwi lamim Bersaabe'enne hide'anta'a lasage Abemeeleekii ixxi gogoxxi awwonsaanchi Fiikoolii Filisxee'm uulla daba'llito'o. Abrihaam Bersaabe'enne tamaariska yakkam haqqichcho kaasukko; ee beyyonnem heer heerina hee'oo Moollanni Waa'ina otossukko. Abrihaamim lobakat balla Filisxee'm uullanne hee'ukko. Mat qax balliinsi lasage Waa'i Abrihaama keenukko; ixxim «Abrihaama» yaa weeshukko; Abrihaamim «Yee!» yukko. Waa'im Abrihaamina «Lobakata iittitoo ki matem beeto Yisaaqa amaddaa Moore'i uulla mare; eekke'enne an moo'isoommi duunanne iina kitim issitaa hincaa'e» yukko. Abrihaamim la'm balla soodaraar daram ki'aa kitima hincaa'oo haqqa anaa hallichchonne iyyiisukko; ixxi beet Yisaaqaa ixxi awwaadaa'nneka lamoo amadaa Waa'i mare yu beyyo marukko. Saxxi ayyaamonne Abrihaam Waa'i yu beyyo qee'llonne asi'mmaa moo'ukko. Ee lasage ixxi awwaadaanina «Ki'nnuwwi hallichchinnem keyye egellehe; anii i beetii ekke'e mallaa Waa'ina otossinaa daba'llinaa waalloommo» yukko. Abrihaam kitima shokkiisoo haqqa ki'isaa ixxi beet Yisaaqanne iyyiisukko; ixxim maqulantaa giiraa amadaa ixxi awwaadaaniinsi annanni ikka'a lamim maqirem matto'o. Mattu'uuyyim Yisaaq annina «Abba!» yukko. Abrihaamim «Yee!» yukko. Yisaaqim «Kitima shokkiinsoommi haqqaa giiraa amandaammo; ihukkaarem kiti'm gereechchi hannonnette?» yaa xa'mmukko. Abrihaamim i beeto, «Kiti'm gereechcho Waa'i gudisookko» yukko. Ee lasage lamim maqirem matto'o. Ixxuwwim Waa'i Abrihaamina kuru beyyo affa'a lasage Abrihaam Waa'ina kitimoo beyyo axisukko; eehanni hanennem gii'l haqqa gudisaa edukko. Ee lasage ixxi beeto Yisaaqa karaa kiti'm beyyonne gudisu haqqi hanenne ubbuusukko. Ee lasage ixxi beeto dureena maqulanta ki'isukko. Ihukkaarem Waa'i asse'amaanchi iimaniinsi «Abrihaama, Abrihaama» yaa weeshukko; Abrihaamim «Yee!» yukko. Ixxim «Beeto nakkititte; ixxonnem matem luwwam issititte; kiikka matem beeto iina uwwiteena qishixxitbee'i bikkina at hanqinam Waa'a badditoo'isa an kaba la'aammo» yukko. Abrihaamim qerephaa moo'u ammanenne mat gereechchi ambul shifanne buud xudinne xaxamaa karamaakkoo moo'ukko; ixxim maraa ee ambula eebaa ixxi beet Yisaaq bikkenne kitim issaa hincaa'ukko. Ee bikkina Abrihaam ee beyyo «Waa'i gudisookko» yaa weeshukko; oo beyyim kaballi afeebe'em «Waa'i duunanne gudisookko» yamamaakko. Waa'i asse'amaanchi la'mmaaggem iimaniinsi Abrihaama weeshaa Waa'i ‹Iina kaka issitti bikkinaa kiikka matem beetom iina hootbee'i bikkinaa lobakat maasso kiina uwweena i gaganne hide'aammo› yoolla. Hanqoomam an keese maasse'oommo; ki shumo'om iima'n boollaankisaa wo'i woro'l shashsha'llisaa dutisoommo; ki shumo'im ixxuwwi diina'ika beero'uwwa lago aa'llamo. At iina ijaajantitti bikkina uulli minaadab hundim ki shumo'inne masse'amookko» yukko. Ee lasage Abrihaam ixxi awwaadaan beyyo daba'llaa ixxuwwinne maqirem Bersaabe'e marukko; ixxim ee beyyonne afuurukko. Ee lasage Miilka'a ixxi abbaayyi Naakoorina sadeenti ooso qatto'isa Abrihaamina kurakko'o. Ee oosikim summi wonik Uuxatte; ixxi abbaayyikim Buuzattee Araama qaru Qamu'eelattee. Keesadatte, Hazo'otte, Fiildaashatte, Yidlaafattee Batu'eelattee hee'llkko. Batu'eelim Irbiqa qarukko; ka sadeentem goo'n oosom Miilka'a Abrihaam abbaayyina Naakoorina qatto'o. Naakoorina Ira'uuma yakkam bakki meentichcho hee'llo'o; isem Naakoorina Xeebaha, Gahama, Tahashaa Ma'ikkaa soorem oosom qatto'o. Saara'a mat xibbee lamiyyee lamar hiinchoo hee'lla'a lasage Kana'aa'n uullanne yoo Qiiriyaat Arba'anne Keebiroo'n beero'onne leto'o; Abrihaamim ise leto'i bikkina lobakata kichche'aa wi'llukko. Ee lasage Abrihaam ixxi meentichchi leesh gadanonne afuuru beyyiinsi ki'aa Hiite'i manni beyyo maraa «An ki'nnuwwi lambe'enne ammanina koyyinano afuuraammoo waaraancho; ki'nnuwwi uulliinsi i meentichcho waammoommi beyyo iina biteessehe» yukko. Hiite'i mannim Abrihaamina dabatta'a «Ni moollanna macceese; at ni lambe'enne lob malaayyaam gassaanchisa; neese waamminoommi beyyuwwiinsi doo'llitti er beyyonne ki meentichcho waamme; neese hundim ki meentichchoka leesha waammitoo beyyo uwwineena liirammoommo» yito'o. Ee lasage Abrihaam ee uullanne hee'llam hee'llo'i Hiite'i manni illagenne iimaa heeshukko. Ixxuwwinam «An i meentichcho keyye waammona uwwitakko'aa'lleensi Xoo'aar beeto Efiroona xa'mmitakkona uunxoommo. Ixxi wix uulli tochchonne yoo Maakfeela yakkam daawwa'a biteesona xa'mmehe. Oo beyyi iina waammi beyyi ihona ki'nnuwwi illagenne wo'm bito miqaa bitaa'oommisa issehe» yukko. Efroonim beero'o aagakkam gooc gadanonne yoo dummakkam nafaranne mulli Hiite'i manninne maqirem afuuraa hee'ukko; ixxim ee beyyonne yo'i manni hundim macceessukkuuyyi «I moollanna macceese; abuulli uullaa abuulli uulli gadanonne yoo daawwa'aa ka i moolli illagenne kiina an uwwaammo; ee bikkina leesha waamme» yukko. Ihukkaarem Abrihaam Hiite'i manni illagenne odim heeshaa xummaatisaa manni hundim macceesukkuuyyim Efroonina «An keese mat luwwa xa'mmoommo macceese; an abuulli uulli hundam bitaa'oommo; an kiina miqoommoka aa'e; anim i meentichchi leesha ee beyyonne waammoommo» yukko. Efroonim dabaraa «I moollanna macceese; uulli fissoo bit xale'i soor xibbi bira; oohim i lambe'ennee ki lambe'ennee mahayyome; leeshooma waamme» yukko. Ee ammanenne Abrihaam Efroonii Hiite'i mannii macceessonam kuru qax bito iittaa soorem xibbi kin biram daddaraan keenoo keennaanchonne keenaa uwwukko. Ee'isinne Maammire yakkam beyyiinsi eelliinchi firoo kollinne yoo Maakfeelanne Efroonina hee'u abuulli uulla, ee beyyonne hee'u daawwa'aa ixxi kululleetannem yoo haqqaa hundam edaa Abrihaam bitaa'ukko. Oo beyyi Abrihaaman ihukkisina ee dummichchanne hee'llo'i Hiite'i mannii ee beero'i goocinne higgam keenii hundim naqaashshuwwi hee'llo'o. Ee lasage Abrihaam Keebiroonanne Maammire'i gadanonne Kana'aa'n uullanne Maakfee'l daawwa'anne ixxi meentichcho Saara'a waammukko. Ee'isinne Abrihaam Hiite'i manni abuullanne yoo daawwa'a ixxi gaqqi waammi beyyi issukko. Abrihaam lobakata lomma'nnaa hee'ukko; ixxom Waa'i luwwi hundannem maasse'ukko. Ihukkaarem an qaramummi uulla mattaa i moolli lambe'iinsi i beet Yisaaqina landa doo'llitaa eebe» yukko. Oo awwaadaanchim dabaraa «Ayyi la'ukko oo an ki beetina doo'llummi landichcho iinninne maqire ka uulla waarimma sabbota'n ki beeto at waattitti uulla dabaraa massonnihe?» yaa xa'mmukko. Abrihaamim «Eehideyyo, i beeto an waarummi uulla dabattaa massititte. Eese iyyanni miniinsii an qaramummi uulliinsii woraa ‹Ka uulla ki shumo'ina uwwoommo› yaa hide'aa kuru iima'n Moollanni Waa'i ki illagenne ixxi asse'amaancho asse'ookko. Atim i beetina ee beyyiinsi landichcho siiddeena xantootto. Oo landichcho kiinninne waarimma iittitobeelas at ka hide'llitti hidiriinsi muccur ikkootto. Ihukkaarem ma'isinnem i beeto ee beyyo dabattaa massititte» yukko. Ee lasage oo awwaadaanchi ixxi moollanni Abrihaam gurubbonne anga issaa yukkoka isseena hide'ukko. Abrihaamina hee'u luwwi hundam egeroo awwaadaanchi ixxi Moollanni gaameela'uwwiinsi tommi gaameela'uwwanne dut er mu'uta iyyiisaa Naakoor hee'u Masphexoome'e marukko. Ixxim ee beyyo afaa lasage ee beero'uwwiinsi tochchonne yoo wo'i ba'l gadanonne gaameela'i gii'mmoo'isa issukko; oo ammanim meenti wo'o inkiireena waaroo maaro'i balli hee'ukko. Ixxim «I moollanni Abrihaamina i Moollanni Waa'a! Kaballa i sawwite hundam wonshimminne i moollanni Abrihaamina heer heerina hee'oo ki iitto moo'ise. An keyye ka beero'i landi waaraa wo'o inkiiroo wo'i ba'l gadanonne uullaammo. Ixxuwwiinsim matena ‹Taa i landichche wo'i harachcho aad heeshaa'llaa wokkichchika agise› yoommaare isem ‹Age; odim ki gaameela'inam agisoommo› yitamote ise ki awwaadaanchi Yisaaqina at doo'llittotane ikkona; ee'isa ihulas at i moollanni Abrihaamina heer heerina hee'oo ki iitto moo'issoohan ikkittisa la'oommo» yaa Waa'a uunxukko. Ixxim uunxato guulloo'nnim Baatu'eel landichcho Irbiqa wo'i harachcho gudumonne iyyita'a affo'o. Baatu'eel Meelko'o Abrihaam abbaayyina Naakoorina qatto'ane. Isem gooninne edantobee'i lobakata mishissam danaam baajaam landichchotte hee'llo'o. Isem wo'i ba'l beyyo dillita'a harachchonne wo'o wonshita'a daba'llito'o. Abrihaam awwaadaanchim ee landichchi beyyo geeraa maraa «I landichche ki harachchi wokkichchika agise» yukko. Isem qaqqissa'a harachcho is gudumiinsi dilliissa'a «Aggehe» yito'o. Ixxim agaa lasage «Ki'n gaameela'uwwinam ihoo qax wo'o eeboommo» yito'o. Isem diinat wo'o agoo wongiranne is harachchi wo'o dabatta'a ixxi gaameela'uwwi agaa goddeebe'e qaqqissu'uuyyi guggutto'o. Oo manchim ixxi hasu landichcho Waa'i hanqinam uwwaada'e te'im uwwukkoyda'e ee beyyonne uullaa ise egerukkuuyyi cawwaa moo'ukko. Isem gaameela'uwwina ihoo wo'o inkiitta'a lasage oo manchi loh giraama ihoo worqa is maccenne issukko. Odim annannichchim mat xibbee tommi giraamaa ihoo worqi guma'uwwam is anganne issukko. Ee lasage «At ayyi landichchotte? Kiyyanni minenne maaro'o galloommi beyyi hee'oohonnihe?» yaa ise xa'mmukko. Isem «An Naakoorina Miilko'o qatto'i Baatu'eel landichchotte. Ni minenne gaameela'uwwina hixii bura'ii wo'mmaakko ki'nnenam gattakkam beyyi yookko» yito'o. Oo manchim Moollanni Waa'ina guruphphaa otossukko. Ixxim «Abrihaam Moollanni Waa'i galaxxamona i moollanni Abrihaamina hide'u hidiro wonsheena amma'nnamaakkoohane; odim eesem i moollanni qarmanni beyyo xabbaa'aa awwonsu Moollanni Waa'i galaxxamona» yukko. Landichchom is am beyyo mine geetta'a ka woshshi hundam kutto'o. Irbiqanam Laabaa yakkam abbaayyi hee'ukko; ixxim Abrihaam awwaadaanchi yoo wo'i ba'l beyyo geerukko. Laaba'am ee manchi beyyo marukkok ixxi aayyi maccenne gutichcho, angannem quba'aa guma'aa issito'isa moo'u bikkinaa ixxi aayyi Irbiqam oo manchi isena kuru woshsha ka'isa yukko yita'a kuttu'uuyyi macceesu bikkinattee. Oo manchim wo'i ba'l gadanonne gaameela'uwwi beyyonne uullaa hee'ukko. Laaba'am «At Waa'i maasse'aakkoo manchi mahina biiranne uullitaate? Ki'nnuwwina an minenne beyyo gudisaammo ki gaameela'uwwinam beyyi yookko» yukko. Ee bikkina oo manchi mine afaa lasage Laaba'a gaameela'uwwika iyyo tiraa gaameela'uwwina bura'aa hixee uwwukko. Abrihaam awwaadaanchinaa ixxenne maqire hee'llo'i manninam lokko aanshaqqitona wo'o uwwukko. Ee lasage hurbaata hincaa'ukko; ihukkaarem oo manchi «An waarummi woshsha ki'nnuwwina kuroo'n gassaa itoommoyyo» yukko. Laaba'am «Kure» yukko. Ixxim «An Abrihaamina awwaadaancho. Waa'i i moollannina dut gereebbaa fella'aa dut laroo lobakat biraa worqaa uwwaa odim dut meenti agidoo goo'n agidoo dut gaameela'uwwaa hallaa uwwaa lobakata maasse'aakko. Ee bikkina ixxi lobakata goddaanchi manchi ihaakko. I moollanni meentichchom Saara'a lobakata lomma'nnita'a lasage goonchi beeto i moollannina qatto'o; moollannim ixxena yoo luwwi hundam ee beetina uwwukko. I moollannim eese ixxi hee'oo Kana'aa'n ulli manni landa xeehoombee'isa ‹I beetina an hee'ummi Kana'aa'n ulli manni landiinsi xeekkitte. Ihukkaarem iyyanni minee i qa'l beyyoo mattaa i beetina landa eebe› yaa hidiisukko. Ee ammanenne an ‹Landichcho iinninne maqire waarimma sabbota'nnahe?› yaa xa'mmummo. Ixxim ‹An hundi ammanem ijaajamoommi Moollanni kiinninne maqire ixxi asse'amaancho asse'ookko. Ixxim at doo'llittoka issookko; i beetinam i qa'l woriinsii iyyanni miniinsii landa xeekkootto. At hidiriinsi gattoo matem goog i qa'l beyyo mattoohaare ixxuwwi landichcho hoottolas at ee lasage muccura› yaakko. «An kaballa wo'i bu'i gadano afummi ammane ee beyyonne uullaa ‹I moollanni Abrihaam Waa'a! An waarummi doo'lla isse. Oono'o an ka wo'i bu'i gadanonne uullaammo; ka wo'iinsi inkiitteena ka beyyo waattam landichchona «Iyya, ki harachchiinsi wokkichchika agise» yaa xa'mmoommo. Isem iina «Age; odim ki gaameela'uwwinam wo'o inkiiraa uwwoommo» yitolas ise i moollanni beetina Waa'i doo'llaakkookkotan ikko'isa la'oommo› yummo. An i wodanonne uunxato guulloo'nnim Irbiqa woharachcho is gudumonne iyyita'a waatto'o; isem bu'i beyyo dillita'a wo'o inkiitto'o; anim isena ‹Iyya, wokkichchika agise› yaa uunxummo. Isem harachcho is gudumiinsi dilliissa'a ‹Age; odim ki gaameela'uwwinam wo'o agisoommo› yito'o; anim wo'o agummo. Ee'isam gaameela'uwwinam agisso'o. Ee lasage an ise ‹At ayyi landichchotte?› yaa xa'mmummo. Isem ‹An Naakoorina Miilka'a qatto'i Baatu'eel landichchotte› yita'a dabatto'o. An eekka macceesummi ammanenne is maccenne gutichcho issummo. Odim is angannem quba'aa guma'aa issummo. Ee lasage an i moollanni abbaayyi beet landichcho ixxi beetina massoommisina xabbeen googonne awwonsu Moollanni Waa'ina guruphphaa otossummo. I moollanni Abrihaam Waa'am galaxxummo. Kaba ki'nnuwwi ka woshsha macceessakko'ookko; ee bikkina hanqinam i moollannina biijooma issitakkamda'e te'im sabbakkamda'e murte'i woshsha iina kullehe. Ee lasage an Waa'i awwonsoo googonne maroommo» yukko. Ee lasage Laaba'aa Baatu'eelii «Ku woshshi Waa'iinsi ihaakkoohane. Ee bikkina neese hoolleena xannoommoyyo. Ka woshsha Waa'i yaakkoohane; Irbiqa ki moollanni beetina aretti ikkamisina eekke'enne yo'o; amaddaa mare» yito'o. Abrihaam awwaadaanchim ee sagara ixxuwwiinsi macceesu ammanenne Moollannina guruphphaa otossukko. Ee lasage ixxim lobakat eddechchaa worqinnee birinnee baxamaakkoo wereeggi mu'utaa Irbiqana uwwakkona ixxuwwina uwwukko. Odim is amanaa is abbaayyinaa lobakata bito xee'aalli luwwa qootukko. Ee lasage Abrihaam awwaadaanchii ixxenne maqire hee'llo'i mannii itta'atii agga'atii ee hiimo eekke'em gatto'o. Ixxim daram ki'aa «I moollanni beyyo daba'llaa maroommo geegeessehe» yukko. Ihukkaarem Irbiq abbaayyii amaa «Mat tommi balla landichcho niinninne afuutta'a lasage amaddaa mattootto» yito'o. Ihukkaarem ixxi «An waarummi woshsha Moollanni gudisaakko ullehe an i moollanni beyyo maroommo neese dasissakkotte» yukko. Ixxuwwim «Huno'o landichcho mayyitamda'e weenshaa xa'mminaa lanqona» yita'a dabatto'o. Ee lasage Irbiqa weeshsha'a «Ka manchinne matteena iittitoohonnihe?» yita'a xa'mmito'o. Isem «Eeyya, iittoommo» yita'a dabatto'o. Ee bikkina ixxuwwi Irbiqaa mat isena hara'mmitamotaa edamaa Abrihaam awwaadaanchinnee ixxenne maqirem hee'u manninnee maramoo'isa issito'o. Ixxuwwim «Taa niyyaayya, keese Waa'i maasse'ona; dut kuma qare; ki shumo'i ixxuwwi diina'i beero'uwwa kaa'llona» yita'a Irbiqana maasse'llo'o. Ee lasage Irbiqa is awwaadaaninne maqirem ki'lla'a gaameela'uwwanne saa'llita'a Abrihaam awwaadaanchinne maqirem matto'o. Ee ammane Yisaaq «Bi'eerlahahroo'i te'im eese moo'oo hee'oo Waa'a» yakkam wo'i bu'i hee'oo udma'i uulla waaraa Neegeebanne hee'am hee'ukko. Mat ayyaamo maaro'i ballanne Yisaaq biir beyyonne firaa dabaransaa sawwukkuuyyi hee'onam gaameela'uwwi waarukkuuyyi asi'mmaa moo'ukko. Irbiqam Yisaaq uullaakkookkoka moo'lla'a saa'llito'i gaameelakkichchiinsi dillito'o. Isem Abrihaam awwaadaanchina «Ee biir beyyinne ni kollonne waarookkok ayyette?» yita'a xa'mmito'o. Oo awwaadaanchim «I moollanna» yaa dabarukko. Ee ammanenne Irbiqa is ille gunguu'llito'o. Ixxuwwim ixxenne edanta'a lasage awwaadaanchi issu luwwi hundam Yisaaqina kurukko. Yisaaqim Irbiqa ixxi ama Saara'a hee'llo'i dukkaana massukko; isem ixxena arette ikko'o; ixxim ise iittukko; Yisaaqim am leho Irbiq mashka'inne xadixxukko. Abrihaam Qaxuura yakkam mulli meentichcho eebukko. Isem Ziimiraana, Yooqishaana, Madaana, Miidiyaama, Yuushibaaqaa Shuuhaa qatto'o. Yooqishaanim Saabaanaa Daadaanaa qarukko. Daadaan oosim Ashuu'l manna, Leexuush mannaa Lee'uu'm mannaa hee'llo'o. Miidiyaamim Eefa, Eefara, Haanooka, Abiidaa'aa Eelda'aa qarukko. Oo keen hundim Qaxuur shumo'i hee'llo'o. Abrihaam ixxena hee'u luwwi hundam Yisaaqina uwwukko. Ihukkaarem mulli meentonne qaru oosina mat mat luwwa uwwaa ixxi foorinne hee'ukkuuyyim ixxi beet Yisaaq gadanonne hee'llambee'isa annanni issaa eelliinchi firoo kollonne qeessukko. Abrihaam lehaa lasage ixxi beet Yisaaqa Waa'i maasse'ukko; Yisaaqim «Bi'eer laahay roo'ii te'im eese moo'oo hee'oo Waa'a moo'ummo» yakkam wo'i bu'i gadanonne hee'am hee'ukko. Saara'ana agishshotte hee'llo'i Gibxi uulli Aggaare Abrihaamina qatto'i Masoophphoxaame'e shumo'ik summi kanniinsi woroon yoo'isanne ixxuwwi umu'llisinne kitaabamaakko. Ixxuwwim Nabaayotte, Qeedaaratte, Adibi'eelatte, Miibisaamatte, Miishimaa'atte, Duumatte, Maasa'atte, Hadaadatte, Teema'atte, Yixuuratte, Naafiishattee Qeediimattee hee'llo'o. Ku tommii lamem oosim Ismaa'eel tomminaa lamem sullinam maalda'uwwi hee'llo'o. Ixxuwwi afuutto'i beyyii ixxuwwi olla'ii ixxuwwi summinne weeshamukko. Ismaa'eel mat xibbee sadee lamar hiinchoo hee'aa lasage lehukko. Isma'eel shumo'i hee'ukkok Gibxiinsi eelliinchi firinne Asoo'luulla massoo googonnetti ihaa Hawwiiliinsi ki'isaa Shuura higakkam googonne afeebe'e hee'ukko. Ixxuwwim Abrihaamina qaramu mulli oosiinsi annanni ikka'a hee'llo'o. Kuk Abrihaam beet Yisaaq aganna; Yisaaqik umur sor hiincho ihaa lasage Irbiqa eebukko. Isem Masphexoome'enne hee'am hee'u Sooriy uulli manchi hee'u Baatu'eel landichchotte hee'llo'o. Isem ee uullanne hee'u Laaba'ana aayyatte hee'llo'o. Yisaaq Irbiqa ooso qattobee'i bikkina Moollanni Waa'a uunxukko. Moollannim ixxi uunxato macceesu bikkina Irbiqa lamfoorette ikko'o. Isem qaf ooso lamfoorette ikka'a hee'llo'i ammane is godabonne hee'llo'i lamem oosim gafe'antam hee'llo'i bikkina «Kido'i luwwi eesenne mahina ihukko?» yita'a Waa'a uunxiteena matto'o. Moollannim isena «Lam minaadab ki godabonne yookko. Atim gereero'llam lam minaadaba qattootto; ixxuwwikim mat matiinsi qoxarookko; lobokim hoffaannina ijaajamookko» yukko. Isem qattam amman afu ammanenne lam goo'n ooso qafa qatto'o. Ixxuwwiinsim gaassaa qaramukkok qadaalli hee'ukko; ixxi orachchim oddaam hee'ukko. Ee bikkina ixxi summi Eesa yamamukko. La'mmek qaramu ammane Eesa'aka sinxichcho amadaa hee'ukko; ee bikkina ixxi Yaaqooba yamamukko. Irbiqa ixxuwwa qatto'i ammane Yisaaq umur lohayyi hiincho ihaa hee'ukko. Lamem oosim li'llo'o; Eesa'a biiranne hee'imma iittoo qoxar hochchaanchi ihukko. Ihukkaarem Yaaqoob minenne hosoo cawween manchi hee'ukko. Yisaaqim Eesa'a hochchaa eebam hee'u maara itam hee'u bikkina ixxo lonsaa iittam hee'ukko. Ihukkaarem Irbiqa Yaaqooba Eesa'aansi lonsita'a iittitam hee'llo'o. Mat ayyaamo Yaaqoob woxa sarukkuuyyi Eesa'a hochchiinsi waarukko; ee ammanenne Eesa'a lobakata sibaaraa hee'ukko. Ee bikkina Eesa'a Yaaqoobina «An lobakata sibaaraa hoogaammo ee kashar woxika duuqise» yukko. Ee bikkina Eesa'ak summi Eedooma yamamukko. Yaaqoobim Eesa'ana «At gaasitaa ki wonoo'm lomba iina biteessittaare anim ka woxika uwwoommo» yukko. Eesa'am «An leheenatte; ku i wonoom iina maha awwaadookko?» yukko. Yaaqoobim «Ki wonooma ‹Eeyya uwwoommo› yitlas gaassitaa hide'e» yukko. Eesa'am ixxi wonooma Yaaqoobina hide'aa biteesukko. Ee lasage Yaaqoob Eesa'ana hoffi daabbo'o mishi'l woxinne uwwukko. Eesa'am itaatii agaatii lasage uraa marukko. Ixxim ixxi wonooma gadaa kora'i luwwanne xigukko. Gaassi Abrihaam doollenne ihukkisam odim mat ammane qoxxaalli qaanne'i ee uullannem ihukko. Ee bikkina Yisaaq Filisxee'm adil Abemeeleek beyyo Geeraara marukko. Ee doollenne qaanne'i uullanne aagukkuuyyi Yisaaqina Waa'i moo'amaa «An afuure yaa kurummi uullanne afuure bagaan Gibxi uulla mattitte. Ka uullanne afuure; an kiinninne maqir ihoommo; keesem maasse'oommo; ka uulla hundam kiinaa ki shumo'inaa uwwoommo; an kiyyanni Abrihaamina hide'ummi hidiro kiina wonshoommo. Ee bikkina Yisaaq geeraaranne afuurukko. Mat ayyaamo Geeraa'l manni ixxi meentichchi bikkina xa'mmito'o. Ixxim «I meentichchotte» yaa kurimma baddu bikkina «Ise iyyaayyatte» yukko. Mashka'oomim Irbiqa lobakata danaam meentichchotte hee'llo'i bikkina ee beyyi manni ise massaqqeena «Eese shookko» yaa sawwu bikkinatte hee'ukko. Lobakat balliinsi lasage mat ayyaamo Filisxee'm adil Abemeeleek Yisaaq ixxi arenne Irbiqanne gurubukkuuyyi maskootinne moo'ukko. Ee bikkina Abemeeleek Yisaaq beyyo manna asse'aa «Ise ki arette; mahina ise ‹Iyyaayyatte› yitto?» yaa xa'mmukko. Yisaaqim «Ise i arette yaa kurummaare eese shakkamo yaa baddummi bikkinatte» yaa dabarukko. Abemeeleekim «Kido'i jor luwwa neesenne mahina baxxitto? Ki arenne ni mannik mat iinse'aakkoohan ihuta'n Waa'i illagenne baaxiilo neesenne eebbaa hee'llitto» yukko. Ee mashka'inne Abemeeleek ixxi manni hundinam «Ka mancho te'im ka manchi meentichcho nakkukkok lehookko» yaa ijaajukko. Ee maarage Yisaaq ee uullanne wixaa xibbi qinxit atoota aagisukko. Moollannim ixxo lobakata maasse'aa hee'ukko. Ixxim lobakata goddaanchi manchi iheebe'i afeebe'e goddukkuuyyi marukko. Ixxenam dut gereebbii la'l allaachchii odim dut agidim hee'ukko. Filisxee'm uulli manni eekka moo'lla'a to'achchito'o. Ee bikkina ixxi anni Abrihaam foorinne hee'ukkuuyyi ixxi agidinne hinsiisaa hee'u wo'i bare Filisxee'm manni buchcha dabatta'a ifiisso'o. Ee ammane Abemeeleek Yisaaqina «Kaba at niinniinsi malaayyaam ikkaatto; ni uulliinsi fittaa mare» yukko. Ee bikkina Yisaaq ua maraa Geeraa'l lete'i cebbanne ammanina afuurukko. Abrihaam foorinne hee'ukkuuyyi hinsiisaa hee'u wo'i balleewwa Filisxee'm uulli manni Abrihaam lehaa lasage ifiissa'a hee'llo'i bikkina Yisaaq odim hinsiisaa fooqaa'isukko; ixxi anni Abrihaam weesham hee'u summannem weeshukko. Yisaaq awwaadaanim cebbi beyyo hinta'a bu'o siiddo'o. Ee ammane Geeraa'l uulli manni diinate allaaraan Yisaaq diinate allaaraanina «Ku wo'i niihane» yita'a wocanto'o. Ee bikkina Yisaaq ee ba'l wo'o «O'l bu'o» yaa weeshukko. Ee lasage Yisaaq awwaadaan mulli wo'i bare hinto'o. Ihukkaarem ee uulli manni odim wocanto'o fissito'o. Ee bikkina Yisaaq ixxi summam «Maso'ooma» yaa weeshukko. Ee lasage Yisaaq ee beyyiinsi ki'aa mulli bare hinukko. Ihukkaarem ixxonne ee beyyi manni woca fissubee'i bikkina ee wo'i ba'l summa «Kabada'i Moollanni ka beyyonne neese hee'nnoommisina gada'a uwwaakko; odim ka beyyonnem neese biddiqinaa er heechcha hee'nnoommo» yaa «Haraar beyyo» yaa weeshukko. Ee lasage Yisaaq ee beyyiinsi ki'aa Beersaabe'e marukko. Ee hiimonnem Moollanni Yisaaq beyyo waaraa «An kiyyanni Abrihaam Waa'a! At baddititte; an kiinninne maqirette; an keese maasse'oommo; eese awwonam hee'u Abrihaam bikkina ki shumo'om fikkaansoommo» yukko. Ee bikkina Yisaaq kitimohineaa'oo beyyo axisaa Moollanni Waa'ina otossukko. Ee beyyonnem dukkaana kaasaa ixxi gatti beyyo axisukko. Odim Yisaaq awwaadaan mulli wo'i barem hinto'o. Mat ayyaamo Abemeeleek ixxi suu'mmanchi Ahuzaatinnee gaadaano ijaajaanchi Filkoolinnee Geeraariinsi ki'aa Beersaabe'e waaraa Yisaaqinne edamukko. Yisaaqim ixxuwwa moo'u ammane «I beyyo waattakko'ok mahinatte? Kinnuwwi woddallam eese allagoonsittakka'a ki'nnuwwi uullanne hee'oombee'isa hollitakko'oyyonnihe?» yaa xa'mmukko. Ee lasage Yisaaq ixxuwwina maadda gudisukkaare itta'a aggo'o. Ixxuwwim la'm balla soodaraar daram ki'lla'a ixxuwwina'i ixxuwwim hide'anto'o; ee lasage Yisaaq fissaa geegeesukkaare xummam elle'llo'o. Ee ayyaamom Yisaaq baxaan ixxi beyyo waatta'a hinto'i barenne wo'o siiddo'isa kutto'o. Ee bikkina Yisaaq ee wo'i bare «Hidiro» yaa weeshukko. Ee beero'i summim kaballi afeebe'e Beersaabe'e yamamookko. Eesa'ak umur sor hiincho ihaakkoohaannonne Heetekkichchi Bi'eer landichcho Yoodiitee odim Iloon landichcho Beesmaatee eebukko. Ixxuwwim Yisaaqikaa Irbiqakaa heechcha qaraassito'o. Yisaaq lomma'nnu bikkina illi jaamaa hee'ukko; ixxi won beeto Eesa'a «I beeto» yaa weeshukko. Ixxim «Yee!» yukko. Ixxim «Oono'o, an lomma'nnaammo; hinki balla lehoomda'e la'oommoyyo. Ee bikkina kaba ki hochchi mu'uta bagadoo xiyyaa amaddaa hochcha mattaa iina maara eebe. Ixxom massitaa an iitoomisa xee'aalli hurbaata sattaa eebe; anim ixxo ittaa lasage lehoo'n kiina lasaanchi maasso uwwoommoo» yukko. Yisaaq ixxi beet Eesa'ana wocam hee'u ammane Irbiqa macceessam hee'llo'o; Eesa'am hochchaa maara ebeena haqqoro marukko. Ee bikkina i beeto kaba an keese ijaajoommi ijaajo macceessaa ijaajame. Allaachcha mattaa lam xaboot danaam fella'i geexxuwwa iina eebe; ixxuwwam an kiyyanni iittoo'isa issaa xee'isaa saroommo. Kiyyanni lehoo'n gaassaa ee hurbaata itaa keese maasse'ona kiyyanni beyyo amaddaa aaggootto yito'o. Ihukkaarem Yaaqoob eekka macceesaa lasage ixxi amana «Iyyabbaayyi Eesa'a oddaam mancho; ihukkaarem i orachchi muruga. Ayyi la'ukko iyyanni eese amadaa an ixxo qawwiisummisa la'ulas maassi ihoo'n duuncha i gaganne eebaqqoommo» yukko. Ixxi amam ixxena «I beeto macceese; oo at duumantoo duunchi i gaganne ihona; xale'i i sagara macceessaa mattaa ixxuwwa iina eebe» yito'o. Ee bikkina maraa ee geexxuwwa eebukko. Ixxi amam ee keeno aa'lla'a ixxi anni iittoo'isa issita'a xee'aalli hurbaata gudisso'o. Odim Irbiqa is won beetika Eesa'aka minenne hee'u danaam eddechcha aa'lla'a is hoffi beetina Yaaqoobina eddeesso'o. Odim ee geexxuwwi omaddam ixxi murug angannee gaanjennee katto'o. Eehid issita'a lasage annina gudisso'i xee'aalli hooshechchaa daabbo'oo massita'a Yaaqoob anganne uwwito'o. Ee lasage ixxim ee hurbaata amadaa ixxi anni beyyo aagaa «Abba!» yukko. Ixxim «Yee! An keyye yoommo; at ayyette?» yukko. Yaaqoobim ixxi annina dabaraa «An ki won beet Eesa'atte; at eese ijaajjittisa issaammo; kaba iimitaa afuure an kiina hochchaa shaa eebummi maara eese maasse'lleena ite» yukko. Ihukkaarem Yisaaq ixxi beetina «I beeto hinkid qaqqisom siidditto?» yukko. Ixxim «Ki Moollanni Waa'i iina hara'mmu bikkina siidummo» yukko. Ee lasage Yisaaq Yaaqoobina «I Beeto; at hanqinam i beet Eesa'atda'e te'im mullanda'e ikkittisa an keese amadaa la'oommo huno'o eesenne hincihe» yukko. Ee ammanenne Yaaqoob ixxi anni Yisaaq gadanonne hincukko; ixxi annim ixxi orachcho amadukkisam «Sagaroom Yaaqoob sagara laboolla; ihukkaarem anguwwi Eesa'ane» yukko. Yaaqoob angi Eesa'aannisam oddaam ihu bikkina ixxotti ihukkisa la'ukkoyyo. Ee bikkina Yaaqooba maasse'ukko. Maasse'ukkuuyyim Yaaqoobina «At hanqinam i beet Eesa'attennihe?» yukko. Ixxim «Anetteme» yukko. Ee lasage ixxim «Hochchitaa eebbaa gudissitti hurbaata iina eebe anim itaa lasage maasse'oommo» yukko. Yaaqoobim gudisu hurbaata annina itona uwwukko; ixxim itukko. Odim ixxena agoo woyi'n diqaasa uwwukko ixxim agukko. Ee lasage ixxi anni Yisaaq ixxena «I beeto, eesenne hincitaa suunqe» yukko. Yaaqoobim ixxi anna hincaa suunqukko. Ixxi annim ixxi eddechchi enja enjeesaa «Moo'llehe, i beet enji Waa'i maasse'u mishaam abuulli enjisa; Waa'i kiina iimaniinsi xeena er uullika lobakat wix hurbaa xxi atootaa odim woyi'n diqaas atootaa uwwona. Minaadab kiina ijaajamonaa heeshihonaa; kiyyabbaayyuwwina gassaanchi ihe; kiyyummi oosim kiina heeshihona; keese duumookkok duumamaakkoohan ihona. Odim keese maasse'ookkok maasse'amaakkoohan ihona» yaa maasse'ukko. Yisaaq Yaaqooba maasse'aa guullaa lasage Yaaqoob ixxi anni beyyiinsi firaa marukkisam ixxi abbaayyi Eesa'a hochchiinsi waarukko. Ixxim odim xee'aalli hurbaata gudisaa ixxi annina eebukko. Ixxim ixxi annina «Iyyanna, huno'o ki'e; ki beet an kiina eebummi maa'lleka ittaa eese maasse'e» yukko. Yisaaqim «At ayyette?» yaa xa'mmukko. Ixxim «An ki won beet Eesa'atte» yaa dabarukko. Ee ammanenne Yisaaq lobakata muggaa huxe'ukkuuyyi «At waatteena illakkichcho iina hochchi maara eebukkaare an itaa maasse'ummok ayyette? Ixxi maasse'amaakkoohan ihaa hee'ookko» yukko. Ee ammanenne Eesa'a ixxi anni sagara macceesaa lasage sagara fissaa qaraaraallisa wi'llukkuuyyi ixxi annina «Iyyanna, odim iinam ki maassika uwwe» yukko. Ihukkaarem Yisaaq «Kiyyabbaayyi waaraa eese qawwiisaa ki maasso massaqqaakko» yukko. Eesa'am «Hanqinam ixxi summi Yaaqooba yamamaakko. Ixxi eese qawwiisimmina kuk la'mmane. Ixxi i wonooma massukko; kabadem odim i maasso massaqqukko; iina od maasso gatissittoyyonnihe?» yukko. Yisaaq Eesa'ana «Oono'o, ixxo ki moollanni issaammo. Ixxi abbaayyuwwi hundim ixxena ijaajantamisa issaammo; ixxena hurbaatii woyi'n diqaasii atootoo'isa maasse'aammo; eehaare i beeto an kiina maha isseena xanoommo?» yukko. Eesa'am ixxi annina «Iyyanna, kiina yookkok xale'i matem maassonnihe? Eesem odim maasse'e» yaa sagara fissaa wi'llukko. Ee ammanenne ixxi anni Yisaaq ixxena «Er uulliinsi qee'llitaa udma'anne hee'llootto; odim kiina iima'n xeen hee'ooyyo. At bagadinne hee'llootto; kiyyabbaayyinam ijaajantootto; ihukkaarem ijaajancha sabboo ammane ki gaanjenne hee'u ixxi gaanjaqqa iiqqootto» yukko. Ee ammaniinsi ki'isaa Eesa'a ixxi anni Yaaqooba maasse'u bikkina Yaaqoobanne baado amadukko. Eesa'a ixxi wodanonne «Iyyanni lehoohaare wi'lloommi amman hincaakko; ee lasage iyyabbaayyi Yaaqooba shoommo» yukko. Ihukkaarem Irbiqa is won beet sawwukkoka laqqa'a is hoffi beeto Yaaqooba weeshissa'a «Macceese! Kiyyabbaayyi Eesa'a keese sheena hasoolla. Ee bikkina i beeto, kabadem an keese sogoommoka macceese; ki'llaa iyyabbaayyi Laaba'i beyyo Kaaraana gibe. Hofqax ammanem kiyyabbaayyi quunqi billeebe'e ixxi beyyonne afuure. Kiyyabbaayyi quunqi billaa ixxim at issitti luwwa xadoo ammane keese dabaraa worookkoka asse'oommo; matem ballannem lamem oosom mahina hoogoommo?» yito'o. Irbiqa Yisaaqina «Ku Eesa'a Hiite'i manniinsi eebu meenti eese hawwisu bikkina an lobakata jabbaammo; odim Yaaqoob ka Hiite'i manniinsi landa eeboohaanniinsi lehumta'n erane» yito'o. Yisaaqim Yaaqooba weeshisaa maasse'aa lasage «At Kana'aa'n uulli landa eebbitte. Ki'llaa Masphexoome'enne hee'oo kiyyummi anni Baatu'eel mi'n beyyo mare; ee beyyiinsi ki eeshimmi Laaba'i landika mato eebe. Hundam xanoo Waa'i keese maasse'ona; odim mishaam issonaa fikkaannisonaa. Keese dut minaadabina anni issona. Waa'i Abrihaama maasse'ukkisam keesee ki shumo'oo maasse'ona; ka at koyyinanonne hee'llitti uulla Waa'i Abrihaamina uwwukkoka at lagaallo'isa issona» yaa ijaajukko. Ee'isa yaa Yisaaq Yaaqooba asse'ukko; ixxim Yaaqoobinaa Eesa'anaa ama Irbiqana abbaayyi ihu Sooriy uulli manchi Baatu'eel beet Laaba'a hee'oo beyyo lam daajji lambe'e marukko. Eesa'a Yisaaq Yaaqooba maasse'ukkisa, Masphexoome'iinsi meento eebeena marona asse'ukkisaa odim «Kana'aa'n landiinsi meento eebbitte» yaa ijaajukkisaa macceesukko. Odim Yaaqoobim ixxi anninaa amanaa ijaajamaa Masphexoome'e marukkisa Eesa'a macceesukko. Kana'aa'n meenti ixxi anni Yisaaqina liiransubee'isa Eesa'a la'ukko. Ee bikkina Abrihaam beet hee'u Isma'eel beyyo maraa ixxi landichchotte hee'llo'i Maahileeta illageen hee'u meentinne maqirem aretti ikkona eebukko. Isem Nabaayoot aayyatte hee'llo'o. Yaaqoobim Beersaabe'e uraa Kaaraana marukko. Ixxim marukkuuyyi mat beyyo afu ammanenne eelliinchi aagaa hiimukko. Ee bikkina ee hiimo ee beyyonne gareena kina bakke'aa iinise'ukko. Ixxim haqaawwonne uullanne kaaxxaa lud iimane afaakkoo masalaala moo'ukko; ixxonnem Waa'i asse'amaan iimii aadii daba'llantam hee'llo'o. Ixxim Waa'i ixxi bakkonne uullukkisa moo'ukko; Moollannim ixxena «Kiyyanni Abrihaaminaa Yisaaqinaa Waa'i anette; ka at iinse'llitti uulla kiinaa ki shumo'inaa an uwwoommo. Odim ki shumo'o uulli shashsha'llisa fikkaannisoommo; atim eelliinchi aagoo kollonnee firoo kollonnee woroo'n qarannee hanaa'n qarannee afeebe'e binnitaa haraattoottoo kiinninnee ki shumo'innee uulli minaadaba hundam maasse'oommo. Kiinninne maqire ihoommo; odim at mattoo beyyi hundannem keese egeroommo; ka uullam keese dabaraa woroommo; an kiina kurummoka hundam isseembe'e keese uroommoyyo» yukko. Ee lasage Yaaqoob diriiriinsi baqaa «Hanqinam Waa'i ka beyyonnette; ixxi ka beyyonnetti ihukkisa an la'ummoyyi hee'ukko» yukko. Ixxim lobakata baddaa hee'u bikkina «Ku beyyi hinkaa'nna baddisoolla; ku beyyi Keesammi Mine bagaan mullaneyyo; kuk iima'n gooc fooqaakkoo beyyo» yukko. Yaaqoob soodaraarom ki'aa bakke'aa hee'u kina ki'isaa utuphphisa uullisukko; ixxi ludonnem wee'l zayta dunukko. Ixxim ee beyyi summa «Beeteela» yaa weeshukko. Illageen ee beyyi summi «Looza» yakkaman hee'ukko. Yaaqoobim Waa'ina «Waa'i iinninne maqir ihulas, ka an maroommi googonne egerulas, itoommi hurbaataa ede'oommi eddechchaa uwwulasii iyyanni minem xumminne daba'llumlasii Moollanni iina Waa'i ihookko. Odim ku utuphphisa uullisummi kin Waa'i min ihookko; at iina uwwitti luwwi hundiinsim tommiinsi mato kiina uwwoommo» yaa hide'ukko. Ee lasage Yaaqoob ki'aa eelliinchi firoo kolli manni uulla marukko. Ixxim dangonnem biir beyyonne mat wo'i bare moo'ukko; ee beyyonnem sas murat gereebbi ba'l gadanonne hee'ukko; ee wo'i bariinsim wo'o agam hee'ukko; wo'i ba'l suumennem geejji kin hee'ukko. Gereebbi allaachchi hundim ee beyyonne wixxoo ammane allaaraan wo'i ba'l suumiinsi kina hootta'a gereebbina agissa'a wo'i bare dabatta'a ifiissam hee'llo'o. Yaaqoobim ixxuwwina «Iyyabbaayyuwwa, ki'nnuwwi hanniinsette?» yaa allaaraano xa'mmukko; ixxuwwim «Neese Kaaraaniinsette» yita'a dabatto'o. Ixxim «Naakoor beet Laaba'a laqqakkamonnihe?» yaa xa'mmukko. «Eeyya, neese lanqoommo» yito'o. Ixxim «Ixxi xummannihe?» yaa xa'mmukko; ixxuwwim «Eeyya, ixxi xumma» yita'a lasage «Oono'o, ixxi landichcho Raaheelem ixxi gereebba amadda'a keyye waattamuulla moo'e» yito'o. Yaaqoobim «Kuk diinate wixxaa'akkam ammaneyyo; uulli ballame; kabadem gereebba wo'o agissakka'a itoo beyyo massehe» yukko. Ihukkaarem ixxuwwi «Diinat hundim wixxoo'nnii wo'i ba'l suumenne ifiisamu kin fooqoo'nnii gereebbina wo'o aginseena xannoommoyyo» yito'o. Yaaqoob ixxuwwinne wocukkuuyyim Raaheele is anni gereebba ushe'llu'uuyyi ee beyyo affo'o; isem gereebba allaaraanchotte hee'llo'o. Yaaqoobim ixxi eeshimmi Laaba'i landichchoo ixxi gereebbaa moo'u ammanenne wo'i ba'l beyyo maraa kina onkoroollisaa Laaba'i gereebbina wo'o agisukko. Ixxim ee lasage Raaheele suunqukko; lobakata liiramu bikkinam wi'llukko. Yaaqoobim isena «An kiyyannina aayyatte ikko'i Irbiq beeto» yaa kurukko; isem is anni beyyo geetta'a matta'a ka woshsha kutto'o. Laaba'am ixxi aayyi beet Yaaqoob waarukkisa macceesu ammanenne ixxenne edameena geerukko; ixxim qaaphphaa suunqaa lasage ixxi mine massukko; ee lasage Yaaqoob Laaba'ana ihu woshshi hundam kurukko. Ee ammanenne Laaba'a «Hanqinam at i maaraa xiigaa» yukko. Yaaqoobim ixxenne maqire mat agan hundam afuurukko. Mat ayyaamo Laaba'a Yaaqoobina «At i qarmanchi ikkitti bikkina iina kora'am baximmi hasisooyyo; ki bax bikkina miqoommi luwwi maruchcho? Iina kure» yukko. Laaba'anam lam landi hee'llo'o; lobaanti summi Liya'atte hoffaantekim Raaheelatte hee'ukko. Liya'ak illi jaam hee'ukko. Ihukkaarem Raaheele haataamotte ikka'a lobakata danaamotte hee'llo'o. Yaaqoobim Raaheele iittukko; ee bikkina Laaba'ana «At ki hoffi landichcho Raaheele iina ladiissita'n an kiina lamar hiincho awwaadam hee'ummo» yukko. Laaba'am «Mulli mannina uwwoommaanniinsi kiina uwwimma iittoommo at iinninne maqire afuure» yukko. Ee bikkina Yaaqoob Raaheele eebaqqeena lamar hiincho Laaba'ana awwaadukkuuyyi afuurukko; ise iittam hee'u bikkinam ixxena hofqax balli ihaa moo'amukko. Ee lasage Yaaqoob Laaba'ana «Amman beeddaakkoo bikkina ki landichcho iina ladiise» yukko. Laaba'am bollochcho'o issaa ee beyyi manni hundam weeshaa wixxaa'ukko. Ihukkaarem Laaba'a ee hiimo Raaheel bikkenne Liya'a massaa Yaaqoobina uwwukko. Yaaqoobim Liya'a eebukko. Laaba'am ixxi landichchi Liya'ana ixxi agishsho Zalafa ashalaloomina uwwukko. Yaaqoobim daranne ki'aa Liya'atte ikko'isa la'u ammanenne «Laaba'ana mahinatte eese ka'isa issittok? An kiina baxummok Raaheel bikkinatti hee'ukkoyyonnihe? Mahinatte eese qawwiissittok?» yukko. Laaba'am ixxena «Ni uullanne lob landichcho hee'llu'uuyyi hoffi landichcho ladiisakkamoyyo. Ka mat idaayya'n saanta higise mulli lamar hiincho eddaa iina awwaaddoohan ihulas Raaheelem kiina uwwoommo» yukko. Yaaqoobim ee'isa isseena iittukko; Liya'anne maqirem mat saanta idaayye'aa lasage Laaba'a ixxi landichchi Raaheele Yaaqoobina ladiisukko. Laaba'am ixxi landichchona Raaheelena ixxi agishshi Baalaana ashalaloomina uwwukko. Yaaqoobim Raaheelenne iinse'eena aagukko; ixxim Liya'aansi lonsaa Raaheele iittukko; ixxim mulli lamar hiincho Laaba'ana awwaadukko. Yaaqoob Liya'a iittubee'isa Waa'i moo'u ammanenne ise qattamisina iseka goosa fooqaa'ukko. Ihukkaarem Raaheele alceennatte ikko'o. Liya'am lamfoorette ikka'a goonchi beeto qatto'o; isem «Waa'i i hawwo moo'aakko; i aro'im hanqinam eese iittookko» yitta'a ixxi summa Roobeela yita'a weeshsho'o. Odim lamfoorette ikka'a goonchi beeto qatto'o. «An sabamummisa Waa'i moo'u bikkina ka beetom edaa uwwukko» yita'a ixxi summa Simi'oona yita'a weeshsho'o. Odim lamfoorette ikka'a goonchi beeto edda'a qatto'o; isem kabada'i «I aro'i eesenne lophphaa hincookko; mashka'oomim an ixxena sas goo'n ooso qaraammo» yita'a ixxeka summa Leew yita'a weeshsho'o. Odim lamfoorette ikka'a goonchi beeto qatto'o; isem «Kabada'i Waa'a galaxxoommo» yita'a ixxi summa Yihuda yita'a weeshsho'o; ee lasage qarimma uullisso'o. Raaheele Yaaqoobina ooso qattobee'isa moo'lla'a lasage is aayyanne to'achchito'o; Yaaqoobinam «At iina ooso uwwe; eebee'las an lehoommo» yito'o. Yaaqoobim Raaheelnne quuqaa «An ooso at qattoobee'isa isseena Waa'i ihummonnihe?» yukko. Ee lasage isem ixxena «I agishsho Baala'a tuto'o; at isenne; iinse'e ise i gubeedonne iina ooso qattona; ee'isinne an oos amatte iheena xanoommo» yito'o. Ee bikkina is awwaadaancho Baala'a Yaaqoobina meentichchotte ikkona uwwito'o; ixxim maraa isenne iinse'ukko. Baala'am lamfoorette ikka'a Yaaqoobina goonchi beeto qatto'o. Raaheelem «Waa'i iina oogatukko i uunxatom macceesaa goonchi beeto iina uwwukko» yito'o; ee bikkina beetika summa Daana yita'a weeshsho'o. Raaheelena awwaadaancho Baala'a odim lamfoorette ikka'a Yaaqoobina goonchi beeto qatto'o Raaheelem «An iyyaayyanne malaayyaam gubbancha gubbamaa kaa'aammo» yito'o. Ee bikkina beetika summa Niftaaleema yita'a weeshsho'o. Liya'a ooso qarimma uullisso'isa moo'llo'i ammanenne isena awwaadaanchotte hee'llo'i Zilfa'a massita'a Yaaqoobina meentichchotti ikkona uwwito'o. Ee lasage Liya'i awwaadaancho Zilfa'a Yaaqoobina goonchi beeto qatto'o. Liya'am «An hinkido'i er gada'aamotte» yita'a beetika summa Gaada yita'a weeshsho'o. Liya'ana awwaadaancho Zilfa'am la'mmekam goonchi beeto qatto'o. Liya'am «An lobakata liiramaammo; kanniinsi eehid meenti hundim eese ‹Liiranto'oo meentichchotte yookko› yita'a ixxi summa Aseera » yita'a weeshsho'o. Arasa murakkam agananne Roobeel haqqoro maraa wobax haqqi'nnoo'oka siidukko; ixxom eebaa ixxi amatte hee'llo'i Liya'ana uwwukko; Raaheelem Liya'ana «Ki beet eebu wobax haqqika iina uwwe» yita'a uunxito'o. Ihukkaarem Liya'a «Iinniinsi i aro'o hoottittok hoffe'aatennihe? Kaba odim i beet eebu wobax haqqichcho labookkoka hoottaa massiteena hassaatennihe?» yito'o; Raaheelem «At ki beet eebu wobax haqqa laboo haqqichchiinsi iina uwwitta'n at maaro'o Yaaqoobinne iinse'llam hee'llitto» yito'o. Yaaqoobim maaro'onne haqqioriinsi waarukko. Liya'am ixxo aa'lleena miniinsi fitta'a «I beet eebu wobax haqqichchinne keese bitaa'ummi bikkina at kaballa gattoottok iinninnette» yito'o. Ee bikkina ee hiimo isenne maqire garukko. Waa'im Liya'aka uunxato macceesukko; isem lamfoorette ikka'a Yaaqoobina ontika goonchi beeto qatto'o Liya'am «I awwaadaancho i aro'ina uwwummi bikkina Waa'i iina bito miqaakko» yita'a beetika summa Yisaakoora yita'a weeshsho'o. Liya'a odim lamfoorette ikka'a Yaaqoobina lohikam goonchi beeto qatto'o. Liya'am «Waa'i iina er irifo'o irifaakko; kabada'i i aro'i eese lonsookko; mashka'oomim an ixxena loh goo'n ooso qaraammo» yita'a beetika summa Zaabiloona yita'a weeshsho'o. Ee lasage ise landichcho qatto'o; landichchokkam summa Diina yita'a weeshsho'o. Waa'im Raaheele sawwukko, is uunxatom macceesaa ise qattam goosa fooqaa'ukko. Isem lamfoorette ikka'a goonchi beeto qatto'o; ee bikkina «Waa'im iinam goonchi beeto uwwukko; i game'llatom iinniinsi hoorukko. Odim iina mulli goonchi beetom edaa uwwona» yita'a ee beetika summa Yooseefa yita'a weesho'o. Raaheele Yooseefa qatta'a lasage Yaaqoob Laaba'ana «An qaramummi uulla daba'llaa marona eese geegeese. I meentoo i oosoo iina uwwe; ixxuwwi bikkina an kiina hinkaa'nna awwaadumda'e at laqqootto» yukko. Ihukkaarem Laaba'a ixxena «Kiina liiransulas at iinninne maqire afuure; Waa'i ki mashka'inne eese lobakata maase'ukkisa an mareexxaammo. Kiinam miqoommi luwwa kure; an eekka kiina uwwoommo» yukko. Yaaqoobim «An kiina hinkaa'nna awwaadumda'e ki diinaxxi allaachchim an allaarummaanniinsi ki'isaa hinkaa'nna fikkaannuda'e at laqqootto. An ki beyyo waareena illageen kiina hofqax hee'u ki diinaxxi allaachchi kaba lobakata fikkaannaakko; an ki beyyo waarummi bikkina Waa'i keese maase'aakko; an odim i mi'n abaroosina baxoommok hinka'i ammane?» yukko. Laaba'am «Eehannah an kiina hinkaa'nna miqahe?» yaa xa'mmukko. Yaaqoobim «An kiinniinsi ma'lluchchom hasoommoyyo; iina kaka issitlas odim ki gereebba allaaroommo. Yaaqoobim «An kiina yoommok xale'i mat luwwa iina issitlas an ki diinaxxi allaachcha odim allaaroommo. An kaballa ki gereebbi geexxuwwi lambe'innee fella'i geexxuwwi lambe'innee higoommo; bir digib fella'i geexxuwwaa odim heemaddi gereebbi geexxuwwaa mulli keeniinsi annanni issoommo; ixxuwwim iina miqo'i ikkamo. At i beyyonne yoo ki diinate moo'lleena waattoo ammane an xummaanchi ihummisa at moo'lleena xantootto; i beyyonnem bir fella'iinsi, digib fella'iinsii heemaddi gereebbiinsii mullek siidamulas game'ummaannisa xige» yukko. Laaba'am «Ihona at yittaannonne hundannem iittamoommo» yukko. Ihukkaarem ee ayyaamo Laaba'a fella'i ambulluwwiinsi gadar hagarii bir hagar mare'ii yoo keenoo hundem meenti fella'iinsim, biroo'm mare'i yoo keenoo qadaalloom yoo keenoo hundam odim heemaddi gereebbi hundamii annanni issaa ixxi oosina allaattona uwwukko. Ixxim ee lasage Yaaqoobiinsi sas balli googo ihoo qaxa qeessukko; Yaaqoobim Laaba'aka gatu fella'aa gereebbaa allaaram hee'ukko. Yaaqoobim siigeeda haruureeshshaa leegaa laboo haqquwwiinsi aashaalli biccuwwa fissaa eebukko; ee biccuwwikam hobara coo'aa deegar issukko. Ixxim ee coo'aa gudisu biccuwwa gereebbii fella'ii wo'ina waatto'i ammanenne wo'o agisakkam wongi'l woronne gereebbi illagennee feella'i illagennee dissukko. Fella'ii gereebbii wo'o aggeena waattam ammane mooraa'llam hee'llo'o. Gereebbii fella'ii ee biccuwwi illagenne moora heele'llam hee'llo'o; ixxuwwim guba'nnito'i bikkina gadalluwwaa billuwwaa mare'i yoo keeno qatto'o. Yaaqoobim wotalluwwa annanni issaa Laaba'i gadar fella'i kollonne heemaddi gereebbi ille dabarukko; ixxi gereebbaa fella'am annanni issukko. Ee'isinne ixxi diinate Laaba'i diinatiinsi annanni issukko. Odim qoxxaalli fayya'i gereebbii fella'ii hundim guba'nto'i ammane fella'ii gereebbii biccuwwa moo'lla'a ee biccuwwa laboo keeno qattamisina ee biccuwwa gereebbi wo'o agoo wongi'l woronne ixxuwwi illagenne dissukko. Ihukkaarem jiir gereebbi illagennee fella'i illagennee bicco dissam hee'ukkoyyo. Ee'isinne jiir keen Laaba'an ihukko; qoxxaalli keen odim Yaaqooban ihukko. Ixxenam lobakat diinat, goon awwaadaan, meenti awwaadaan, gaameela'ii hallii hee'ukko. Laaba'i oos «Yaaqoob niyyanni luwwa hundam massaqqukko; ku ixxi amaxxi hundim waarukkok niyyanniinseyyonnihe?» yita'a woccu'uuyyi Yaaqoob macceesukko. Yaaqoobim Laaba'i illi kollo moo'u ammanenne eraa'llisa danaam illinne moo'ubee'isa la'ukko. Ee ammanenne Waa'i Yaaqoobina «An kiinninne maqir ihoommo; kiyyanno'i uullaa ki qarmanni uullaa daba'llitaa mare» yukko. Ee bikkina Raaheelee Liya'aa Yaaqoob diinate allaaru beyyo waattona asse'ukko. Ixxuwwinam «Ki'n anni illi eesenne eraa'llisa ihubee'isa an la'aammo; ihukkaarem iyyanni Waa'i iinninne maqire yookko. An ki'n annina i malaayyi hundinnem baxummisa laqqakkamo. Ihukkaarem ki'n anni eese qawwiisaa iina miqoo luwwa tommi kore dabaransukko; ihukkaarem Waa'i Laaba'a eesenne jor luwwa issona uwwukkoyyo. Laaba'a ‹Bir hagar yoo diinat hundim kiihan ihona› yu ammanenne diinat hundim bira qarukko; ‹gadar hundim kiina miqamoohan ihona› yu ammanenne diinat hundim gadara qarukko. Ee'isinne Waa'i ki'nnuwwi anni horiinsi massaa iina uwwukko. «Diinat cophoo ammanenne an haqaawwonne gadar ambulluwwi, bir ambulluwwii cacar ambulluwwii damookkoka moo'ummo. Ee haqaawwonnem Waa'i asse'amaanchi ‹Yaaqooba› yaa weeshukkaare anim ‹Yee› yummo Waa'i asse'amaanchim ‹Ki gereebbanne damu ambulluwwi gadara, biraa cacaraa ihukkisa ki ille iimaa'llaa moo'e; eehid issummok anette; mashka'oomim Laaba'a keesenne issoo luwwi hundam moo'aammo. An kiina Beeteelanne moo'amummaare at kina utuphphisa kaassaa wee'l zayta labbaa iina hidiro aaggitti Waa'ana'e; kabadem ihukkaare ka uulliinsi ki'llaa at qarantitti uulla daba'lle› aakko» yaa kurukko. Raaheelee Liya'am Yaaqoobina «Niyyanni minenne neese lago aa'nnoommi luwwi mah gataate? Neese ixxi illagenne allaggisa xigammaammoo keenoyyonnihe? Ixxi neese biteesaa itaakko; kaba odim niina miqamu bito hundam bi'isaakko. Ee bikkina Waa'i niyyanniinsi hooraa kiina uwwu hor hundim niihanee ni oosanee; kabadem Waa'i kiina kuru luwwi hundam isse» yito'o. Yaaqoobim ki'aa ixxi oosoo meentoo gaameela'anne saa'llisukko. Odim ixxi Masphexoome'enne hee'u ammane ho'llu amaxxaa horaa hundam amadaa ixxi anni Yisaaq beyyo Kana'aa'n uulla marukko. Ee ammane Laaba'a ixxi gereebbi odda mureena maraa hee'ukko; ixxi bee'isa laqqo'i ammanenne Raaheele is anni ixxi minenne waa'isa issaa otossoo luwwa game'llo'o. Odim Yaaqoob Laaba'a lagaa uraa maroo'isa kurukkoyyi hee'ukko. Ixxim ixxena yoo luwwi hundam amadaa gibukkuuyyi Efiraaxiis daajje firaa Gala'aada yakkam duunaam uulla marukko. Sas ayyaamiinsi lasage Yaaqoob maaxamaa gibukkisa Laaba'a macceesukko. Ixxim ixxi qarmanninne maqirem lamar balli googo hollamaa Gala'aaxxi duunanne amadeena hincukko. Ihukkaarem ee ammane Waa'i Sooriy uulla Laaba'i beyyo hii'm haqaawwonne waaraa «Yaaqoobanne jor luwwa te'im er luwwa woccoobee'isa ege'lle» yukko. Yaaqoobim Gala'aaxxi duunanne dukkaana kaasaa wiiddanaa yoohaannonne Laaba'a afukko. Ee'isam Laaba'am ixxi qarmanninne maqirem duunaam Gala'aaxxi uullanne dukkaana kaasaa wiiddanukko. Ee lasage Laaba'a Yaaqoobina «At eese ka'isa qawwiissaa i landa orinne qeefadakka'a massakkamisa mahina ushe'llitto? Odim iina kuttoo'n eese qawwiissaa mahina maaxamtaa gibbitto? At iina kuttaattoota'n liiranchinne, kajjinne, dibbe'innee xurumbinnee geegeesam hee'ummoyyonnihe? An i oosoo i oos oosoo ‹Xummanne hee'llehe› yaa suunqaa geegeeseena mahina hoottitto? Ookkim lobakat huushancha. An keese hawwodoommi malaayyi hee'ukko; ihukkaarem ludhii'mmo'o haqaawwonne kiyyanni Waa'i ‹Yaaqoobanne jora te'im danaammo maham woccoobee'isa ege'lle› yaakko. At kaba mattoo mashka'i kiyyanni mine lobakata quluxxaatette ihukkisa an la'aammo; ihukkaarem an i minenne waa'isa otossoommi luwwa mahina game'llitto» yukko. Yaaqoobim Laaba'ana «At ki landa iinniinsi hoottaa massitoottoka labisaa baddummi bikkinatte. Ihukkaarem at ki waa'i issitaa otossitoo luwwi ixxi beyyonne siidamu manchi ayyim lehona ka niyyabbaayyuwwi illagenne ki luchchika ma'llichchom hassaa siiddilas massaqqe» yaa dabarukko; ee ammane Yaaqoob is anni waa'isa issaa otossoo luwwa Raaheele game'llo'isa la'ukkoyyi hee'ukko. Laaba'am haseena Yaaqoob dukkaa'n woro marukko; odim Liya'i dukkaanaa lamem baxaa'n dukkaanam marukko; ihukkaarem maham siidukkoyyo. Liya'i dukkaaniinsi firaa Raaheel dukkaana marukko. Raaheele Laaba'a waa'isa issaa otossoo luwwa massita'a gaameela'uwwi kooriinsi woroon issita'a ixxi hanenne afuutta'a hee'llo'o. Laaba'am dukkaannuwwi hundam hasukko. Ihukkaarem maham siidukkoyyo. Raaheelem is annina «Iyyanna, eesenne quuqqoobee'isa an ki illagenne uulleena xanumbee'ek meentonne agananne waarookkok waaru bikkinatte» yito'o. Laaba'am beyyi hundannem hasaa waa'isa issaa otossoo taraafiimmuwwa siideena xanukkoyyo. Yaaqoobim Laaba'anne quuqaa «An keese hawwodummok mahinnette? At eese kaa'nna laseessittok an kiina mah jolle issummo? Kabadem at i mu'uxxi woro hundam hassitto ihona bagaan ki luwwika maha siidditto? Huno'o kore, ku iyyabbaayyuwwii kiyyabbaayyuwwii i lambe'ennee ki lambe'ennee moo'llona. Ka lamiyyem hiinchom an hee'ummok kiinninnette; ki fella'ikii gereebbikii matim kara qarukkoyyo; ki diinaxxi geexxuwwiinsim an itummoyyo. Moochchinne itamu ki diinate miqam hee'ummo bagaan ee woshsha ki beyyo eebummoyyo; ballanne te'im hiimonne game'amukkoka i angiinsi miqissam hee'llitto. An lobakat ammane balli eelliinchonnee hii'm qiidannee hawwam hee'ummo; anim hore'em diriiram hee'ummoyyo. Ka lamiyyem hiinchom tommoo soor hiinchoo lamem landam masseena odim loh hiincho gereebbi bikkina kiina baxummuuyyi hee'ummo; iina miqamoo luwwa at tommi kore dabassitto. Iyyanno'i Abrihaamii Yisaaqii otossitam hee'llo'i Waa'i iinninne maqir hee'ubeeta'n kaballam eese leexa'i angam hollitaa hee'llitto; ihukkaarem Waa'i i hawwoo i baxoo moo'aa ludhii'mmo'o keese qoxxisaa axeeraakko» yukko. Laaba'am Yaaqoobina «Ku landi i landa ku oosim i ooso ku diinatim i diinate ku at moo'lloo hundim iihane; ihukkaarem kaballa an i landannee ixxuwwi oosonnee maha isseena xanoommo? Kabadem waare atii anii mare'e issinaa hidiro aangona; ixxim ihaannonnee ki lambe'ennee naqqasoohan ihookko» yukko. Ee bikkina Yaaqoob hidi'l kina uttuphphisa kaasukko. Yaaqoobim ixxi qarimmannina «Kinneewwika wixxaa'llehe» yukko; Ixxuwwim kina massita'a tuubba'a lasage kinneewwi gadanonne hurbaata itto'o. Laaba'am ixxo «Yigaarsaahaduta» yaa weeshukko. Ihukkaarem Yaaqoob «Gala'aadaa» yaa weeshukko. Eehid yimmim «Neesenne naqqasoo utuba» yimma. Laaba'am Yaaqoobina «Ku tuubamu kin ihaannonnee ki lambe'ennee Naqaash ihona» yukko. Ee bikkina ixxi Gala'aadaa yamamukko. Odim Laaba'a «Neese annanni inkoommi ammane Waa'i ki lambe'ennee i lambe'ennee ihaa egerona» yaa ee beyyi summa «Misiphpha» yaa weeshukko. Odim Laaba'a Yaaqoobina «At i landa hawwoddittaare te'im i landanne waameettuwwa eebbittaare eekka an la'umbee'aare Waa'i moo'oohan ihukkisa la'e. I lambe'ennee ki lambe'ennee tuubamu kinii uullisummi ki'n utubii an keese hawwodeena te'im at eese hawwoddeena higammoombee'isa ku kaaxxu kinii ku tuubamu kinii iinaa kiinaa naqaash ihona. Ihukkaarem neese kaka issinoo'n ullumlas Abrihaam Waa'ii Naakoor Waa'ii ixxi anno'i Waa'im neesenne oogatona» yukko. Yaaqoobim ixxi anni Yisaaq otossoo Waa'i summinne hide'ukko. Yaaqoobim ee duunanne kitima hincaa'ukko; ixxi qarmannam hurbaata ittona weeshukko; ixxuwwim itta'a ee duunannem gatto'o. Laaba'am soodaraar daram ki'aa ixxi landi oosoo ixxi landaa maasse'aa «Xummanne hee'llehe» yaa suunqaa annanni ihaa ixxi mine daba'llaa elle'ukko. Yaaqoob googonne hee'ukkuuyyim Waa'i asse'amaan googonne edanto'o. Ixxuwwa moo'u ammanenne «Waa'i ixxi gogotinne maqire edamoo beyyo» yukko. Ee bikkina ee beyyika summa Maahinaayim yaa weeshukko. Ee lasage Eedoo'm uullanne Seeyira yakkam beyyonne hee'oo ixxi ambeet Eesa'i beyyo gaassaa asse'amaano asse'ukko. Yooqoobim «I moollanni Eesa'ana ‹Amma'nnamaammoo ki awwaadaanchi kaballi afeebe'e Laaba'anne maqire hee'ummisa kiina kuroommo. Kuno'o lobakat lar, halli, gereebbi, fella'i, goon awwaadaanii landi awwaadaanii iina yookko. Ka assom asse'ummok ki illagenne nuura siixxoommo yoommi neeyyatinnette› yitakka'a kullehe» yaa ijaajukko. Asse'amaanim Yaaqoob beyyo daba'llita'a waatta'a «Kiyyabbaayyi Eesa'i beyyo mallaa hee'nnummo. Ixxim kiinninne edameena waaroolla. Ixxenne maqire soor xibbi manni yo'o» yito'o. Ee ammanenne Yaaqoob baddaa lobakata u'nnamukko. Ixxenne maqire hee'llo'i mannam lam beyyo baxxansukko. Ee'isam gereebba, fella'a, mulli fooraam diinatee gaameela'aa lam beyyo baxxansukko. Eekka issu mashka'im «Eesa'a dangonne waaraa luxxi baxxancha aphphisuta'n mulli baxxanchi xoraa gateena xanookko» yaa sawwaatette. Ee lasage Yaaqoob «Niyyanno'ina Abrihaaminaa Yisaaqinaa Waa'a! I uunxato macceese; i Moollanna! ‹At iina ki gaqqi uullaa ki qarmanni beyyoo daba'lle; anim kiina ee beyyonne eroomma issoommo› yitaa hee'llitto. Ki awwaadaanchina baxxitti eroommii ki iittinne ama'nnantaattoohaannoomii iina hore'em laboobee'ane; an xale'i ka sikke'oommi bicco amadaa Yoordaanoos daajje higaa hee'ummo; ihukkaarem kaba an lam kollonne baxxamamaakkoo moollo amadaa daba'llaammo. Iyyabbaayyi Eesa'i angiinsi eese gatise ixxi waaraa ‹Neese hundam amo'o oosinne maqirem bi'isookko› yaa an ixxo baddaammo. Hanqoominam at ‹Kiina eroomma issoommo ki shumo'om xigakka'a xanakkambee'i qaxa dambalaq gada'n shashsha'llisa issoommo› yitaa hee'llitto» yukko. Ixxim ee hiimo ekke'e garukko; ixxena yoo luwwi hundiinsim doo'llaa ixxi abbaayyi Eesa'ana uwweena gudisukko. Oohim lam xibbi meenti fella'a, lamiyyi fella'i ambulluwwa, lam xibbi meenti gereebba, lamiyyi ambulluwwa, sad adaam gaameela'uwwa ixxuwwi wotallinnem, sor saayya, tommi moolluwa, lamiyyi meenti hallaa odim tommi halli wodalluwwaa doo'llaa gudisukko. Ee diinatem lam beyyonne baxxansaa ixxi awwaadaanonne asse'ukko. Ixxi awwaadaaninam «Iinniinsi higgakka'a mallehe; diinate eddakkambee'isa annanni issitakka'a ushe'llehe» yukko. Luxxi awwaadaanchinam «Iyyabbaayyi Eesa'anne edantakkam ammane ‹At ayyane? Hanno mattoolla? Ku ki'nnuwwi illagenne yookkok ayyane?› yaa xa'mmulas atim ee ammane ‹Ki awwaadaanchi Yaaqoob moollanni Eesa'ana angaachchina asse'ukkane; ixxim lasinne waaroolla› yitaa dabare» yukko. Ee'isam la'mmaanninaa saxxaanninaa ee diinate ushe'oo keenina hundinam «Eesa'anne edantakkam ammane ka woshsha kullehe; Annannannem ‹Oono'o kiina awwaadaanchi Yaaqoob lasinne waaroolla› yitakka'a kullehe» yukko. Eehid yu mashka'im an afoo'n gaassaa ka ixxena asse'ummi angaachchi luwwinne ixxi quunqi billeena xanookko. Ee lasage an ixxenne edamoommi ammane ixxi eese liiranchinne aa'ookko» yaa sawwaatette. Ee'isinne angaachchi luwwooma higisaa asse'aa lasage ixxi gagoom ee wiidda'n beyyonnem garukko. Ee hiimom ixxi lamem meento, ee meenti awwaadaanoo ixxeka tommoo mat oosoo amadaa Yaabooq daajje higukko. Ixxena yoo luwwi hundam massaa ee daajje higisukko. Ihukkaarem Yaaqoob mullam daajji eeqidonne gatukko. Mat manchim uulli soodeebe'e ixxenne gubbamam hee'ukko. Oo manchim kaa'ubee'isa moo'u ammanenne gubeexxi shulluuda nakkukko; Yaaqoob gubbamukkuuyyim ixxek gubeexxi shulluud duudukko. Ee lasage oo manchim «Uulli soodeena ihaakkoo bikkina eese fatakihe» yukko. Yaaqoobim «Eese maasse'lloo'n fatakoommoyyo» yukko. Oo manchim «Ki summi ayyette?» yaa xa'mmukko. Ixxim «Yaaqoobatte» yukko. Oo manchim «Ka lasage ki summi Isra'eela yamamona bagaan Yaaqooba yamamoone; Waa'innee manninnee gubbantaa kaa'llaatto» yukko. Yaaqoobim «Ki summa kure» yukko. Oo manchim «I summa mahina xa'mmitoolla?» yaa ee beyyonnem ixxo maasse'ukko. Yaaqoobim «Waa'a i illinnem moo'aammo; ihukkaarem an foorinnem yoommo» yaa ee beyyika summa «Phini'eela» yaa weeshukko. Phini'eeliinsi higukkisam eelliinchi firukko. Ixxekim gubeed duudaa hee'u bikkina dimam hee'ukko. Ee bikkina Isra'ee'l oos ka balli afeebe'em gubeexxi shulluud maara ittamoyyo; mashka'oomim Yaaqoob ee manchinne gubbamukkuuyyim oo manchi gubeexxi shulluuda nakkaa hee'u bikkinatte. Yaaqoobim Eesa'a ixxi beyyo waarukkuuyyi asi'mmaa moo'ukko. Ee ammane Eesa'anne maqirem soor xibbi manni waattam hee'llo'o. Ee bikkina Yaaqoob ixxi ooso Liya'ana, Raaheelenaa lamem baxaan meentinaa amo'o amo'inam baxxansukko. Ixxim baxaano ixxuwwi oosinnem illageen higisaa ixxuwwi lasonne Liya'aa is oosoo higisukko. Odim Raaheelee Yooseefaa hundiinsim lasonne issukko. Yaaqoobim hundiinsim illagenne higaa ixxi abbaayyi beyyo hinceebe'e uullanne lamaraagge heeshukko. Ihukkaarem Eesa'a ixxenne edameena geerukko. Ixxi gaanjem qaaphphaa suunqukko; odim ixxuwwi lamim wi'llto'o. Eesa'am meentoo oosoo asi'aa moo'aa Yaaqoobina «Oo minaadab mahane?» yukko. Yaaqoobim «Iina Waa'i ixxi biijoominne uwwaakkoo ooso» yaa dabarukko. Ee lasage ixxi baxaan Beela'aa Zaala'aa ixxuwwi oosinne maqirem hincita'a heeshito'o. Eehanniinsi lasage Liya'aa is oosii hincita'a heeshito'o; odim lasaanchonne Yooseefii Raaheelee hincita'a heeshito'o. Eesa'am «Oo an moo'ummi diinat hundim mahanduyye?» yaa xa'mmukko. Yaaqoobim ixxuwwina «Keese i moollanna liiransoo'isina an asse'ummane» yaa dabarukko. Ihukkaarem Eesa'a «Iyyabbaayyo, iina ihoo qax yookko; kiina yookkok kiihanem ihona» yukko. Ihukkaarem Yaaqoob «Ee'isayyo, atimdu eese iittittilas an uwwummoka i angiinsi aa'e. Mashka'oomim an ki ille moo'immi Waa'i ille moo'ummaannisa. At ee'isam eese biijoominne aa'llaatto. Ka an kiina uwwummoka aa'e. Mashka'oomim Waa'i ixxi biijoominne iina hasisoo luwwi hundam uwwaakko; iina lobakat luwwi yookko» yukko. Eesa'am aa'eebe'e lobakata uunxukko. Ee lasage Eesa'a «Ki'llehe mallona; an ki'nnuwwiinsi illageen higaa maroommo» yukko. Ihukkaarem Yaaqoob Eesa'ana «I moollanna, oos qacaalluwwi ihukkisa atim laqqootto; odim wotallaa wo'llaa iicisoo gereebbaa laroo ushe'ummi bikkina an ixxuwwina sawwimmi hasisookko. Manni mat ayyaamina gaaggaabisaa ushe'uta'n matem ballannem diinat hundim lehaa beeddookko. Ee bikkina an diinatii oosii taakke'lla'a xanto'i qaxanne qaphphaa ushe'ummuuyyi keese awwonaa waaroommo. I moollanna, at higgaa Eedooma mare anim ee beyyonne kiinninne edameena waaroommo» yukko. Eesa'am «Eehaare iinninne yoo mannika mat qaxa gatisonnihe?» yukko. Ihukkaarem Yaaqoob «An i moollanni illagenne lomba siidummaa'lleensi mullek hasisooyyo» yukko. Eesa'am ee ayyaamom Eedooma mareena daba'llukko. Ihukkaarem Yaaqoob Sukoot kollonne marukko. Ee beyyonnem ixxi gagina mine ixxi diinatinam oota baxukko. Ee bikkina ee beyyika summa Sukoota yaa weeshukko. Yaaqoob Maspheexoome'iinsi daba'llu ammane Kana'aa'n uullanne yoo Seekee'm beero'o xumminnem afukko; ee beero'i gadanonnem dukkaana kaasaa afuurukko. Ixxim ee beyyo Seekeemina anni hee'u Hamoor oosiinsi mat xibbi kin bira uwwaa bitaa'ukko. Ee beyyonnem Waa'ina kiti'm beyyo baxukko; ee beyyom «Eel Eelohe Isra'eel» yaa weeshukko. Ee'isa yimmim «Isra'ee'l Moollanni Waa'a» yimma. Mat ayyaamo Liya'a Yaaqoobina qatto'i landichcho Diina'a Kana'aa'n uulli landa moo'lleena matto'o. Ee ammanenne ee uulli gassaanchi hee'u Hamoor beet Seekeem ise moo'aa gaassaa amadukko. Isennem maqire iinse'aa iseka baajoommano bi'isukko. Ixxim Yaaqoob landichcho Diina'a lobakata iittukko. Isem lobakata iittu bikkina liiranseena yakam hee'ukko. Ee bikkina Seekeem ixxi anni Hamoor beyyo maraa «Ka landichcho iina eebe» yukko. Yaaqoobim ixxi landichcho Diina'aka Seekeem baajoommano bi'isukkisa macceesukko. Ihukkaarem ixxi oos Diinattinne maqirem allaachchi beyyo matta'a hee'llo'i bikkina ixxuwwi waatteebe'e xa'nnaa egerukko. Seekeem annim Yaaqoobina kureena marukko. Ee ammanem Yaaqoob oos ee woshsha macceessa'a allaachchi beyyiinsi waatto'o. Ee ihu woshshannem lobakata muggito'o; fokko'i ihu bikkinam lobakata quuqqo'o. Mashka'oomim Seekeem Isra'ee'l landichcho gosaa isenne maqire iinse'immi ixxuwwina laboobee'i fokko'i hee'ukko. Ihukkaarem Hamoor «I beet Seekeem ki'nnuwwi landichcho lobakata iittaakko; ise ixxena uwwitakkona uunxoommo. Ki'nnuwwii neesee qarmanna; ki'nnuwwi landa niina uwwehe; ni landam ki'nnuwwi oosina massehe. Ki'nnuwwi niinninne maqire hee'llehe; ni uulli ki'nnuwwinam uulli ihookko; ka uullannem hassakko'i beyyo amaddakka'a baxxakku'uuyyii daddattakku'uuyyii hee'llakkeena xantakkamo» yukko. Seekeemim Diina'i anninaa abbaayyuwwinaa «An ki'nnuwwa uunxummi luwwamdu issitakko'aare anim ki'nnuwwi yitakkam luwwi hundam uwwoommo. Isdu iina uwwehe bagaan qoot ihukko mulluwwam ihukko ki'nnuwwi hassakko'i luwwi hundam eese xa'mmehe; anim ki'nnuwwi yitakko'oka hundam uwwoommo» yukko. Yaaqoob oosim Seekeeminaa ixxi anni Hamoorinaa qawwisseena kid yita'a dabatto'o; mashka'oomim ixxuwwi aayya Diina'a massaa iseka baajoommano bi'isaa hee'ukko. «Neese niyyaayya mat ballachchamubee'i manchina uwwineena xansiisooyyo; eehid issimmi niina fokko'o. Ni'isam ki'nnuwwi goon hundam ballachchitakko'aa'lleensi xansiisookko; mullisinne xansiisooyyo. Ee lasage ni landam ki'nnuwwi oosina uwwinoommo; ee'isam neesem ki'nnuwwi landa eembeena xannoommo; neesem ki'nnuwwinne matem minaadab inkaa hee'nnoommo. Ihukkaarem ki'nnuwwi ni woshsha gaddakka'a ballachchancha sabbakko'aa'lleensi neesem ni landichcho amandaa malloommo» yito'o. Ixxuwwi woshshim Hamoorinaa ixxi beet Seekeeminaa eroka labaa moo'amukko. Seekeemim yakko'oka isseena daseena hasukkoyyo. Mashka'oomim ixxi Yaaqoob landichcho lobakata iittaa hee'ukko. Ixxim ixxi mi'n abaroos woronne lobakat lombi yoohan hee'ukko. Ee bikkina Hamoorii ixxi beet Seekeemii beero'i gooc gadanonne manni dummoo beyyo matta'a beero'i mannina «Ku manni ni beyyonne xummaan manna; ixxuwwim ka uullanne hee'llonaa daddatonaa; mashka'oomim uulli ixxuwwinam ihoo haraara neesem ixxuwwi landa eemboommo; ni landam ixxuwwina uwwinoommo. Ixxuwwim niinninne mat minaadab ikka'a hee'lleena xantamok ixxuwwi ballachchanto'isam niikkam goona hundam ballachchinummaa'lleensette; ixxuwwi niinninne hee'imma iittinaa xale'i ee woshshina ijaajammumlas ixxuwwi diinatii ixxuwwi amaxxii hundim niihaneyyonnihe? Xale'i ka woshshanne iittammumlas niinninne afuuttamo» yito'o. Ee beero'i minaadab hundim Hamoorii ixxi beet Seekeemii yito'i woshsha macceessa'a issiteena liiranta'a goon hundim ballachchanto'o. Saxxi ayyaamonne omar fayye'oo'nnim Diina'ana abbaayyuwwi ikko'i Yaaqoob oosiinsi Simi'oonii Leewi'ii lamim bisa'a amadda'a maaxamta'a beero'o matta'a goon hundam shito'o. Ixxuwwim Hamooraa ixxi beet Seekeemaa bisa'inne shito'o; ixxuwwi aayya Diina'am Seekeem miniinsi amadda'a fitto'o. Yaaqoob mulli oosim ixxuwwi aayya bi'isso'i bikkina leto'i kee'n minneewwa matta'a beero'i manni amaxxi hundam boggo'o. Ixxuwwim gereebba, laro, hallaa biirannee beero'onnee yoo luwwaa hundam massito'o. Ixxuwwi amaxxa, ixxuwwi oosoo ixxuwwi meentoo hundam qeefadda'a massito'o. Yaaqoobim Simi'ooninaa Leewi'inaa «An hawwonne uboommisa issitakko'ookko. Mashka'oomim ka uullanne hee'llam manni hundim eese sabbamo; Kana'aa'n mannii Feerze'i mannii hundim mat ikka'a eese qasseena waatto'aare iina ixxuwwi qax manni bee'i bikkina eesee i abaroosaa hundam shita'a guullitamo» yukko. Ihukkaarem ixxuwwi «Niyyaayya mat saa'aanchosa issimma iittinoommoyyo» yita'a dabatto'o. Waa'i Yaaqoobina «Ki'llaa Beeteela mare; ee uullannem afuure; at kiyyabbaayyi Eesa'aansi gibbitti ammane an kiina moo'amummi Waa'ana'e; eekke'em iina kitimtoo beyyo baxe» yukko. Ee bikkina Yaaqoob ixxi abaroosinaa ixxenne maqire hee'u manninaa «Ki'nnuwwi lambe'enne yoo allaggichchi Waa'iinsi annanni ikkakka'a ki'nnuwwi gaga muccussehe; muccur eddechcham edde'llehe. Ee lasage ka beyyiinsi ki'nnaa Beeteela mallona; ee beyyonnem an hawwummi ammane hara'mmu Waa'ina odim an marummi beyyi hundannem iinninne maqire ihu Waa'ina kiti'm beyyo baxoommo» yukko. Ee bikkina ixxuwwim ixxuwwi anganne hee'u qophpha'n waa'uwwaa ixxuwwi maccenne hee'u gutichchoo hundam Yaaqoobina uwwito'o. Yaaqoobim Seekeem gadanonne hee'u hujuphphi haqqichchi lugumonne waammukko. Yaaqoobii ixxi abaroosii ee beero'i lambe'inne higgu'uuyyim beero'uwwanne hee'u mannanne hundannem Waa'iinsi lobakat baddimmi ubukko. Ee bikkina ixxuwwi Yaaqoob ooso laseesso'oyyo. Yaaqoobim ixxenne maqire hee'u manni hundinnem Kana'aa'n uullanne yoo «Looza» yakkam beero'o afukko; ixxim «Beeteela» yakkamane. Eekke'em Yaaqoob Waa'ina kiti'm beyyo axisukko; ixxim ee beyyi summa «Eel Beeteela» yaa weeshukko; mashka'oomim ixxi gagoomim ixxi abbaayyiinsi gibu ammane Waa'i ixxi gaga ixxena ee beyyonne moo'isaa hee'ukko. Ee beyyonnem Irbiqa li'isso'i Dboora leto'o. Isem Beeteelanne hujuphphi haqqichchi gadanonne waammanto'o. Ee bikkina oo beyyi «Wi'llishshi hujuba» yammukko. Waa'im Yaaqoob Masphexoome'iinsi daba'llaa lasage odim moo'amaa maasse'ukko. Ixxim «Ki summi Yaaqoobatte; ka lasage Isra'eela yamantaa weeshantootto bagaan Yaaqooba yamantooyyo» yukko. Ee bikkina ixxi summim «Isra'eela» yamamukko. Odim Waa'i ixxena Hundam xanoommi Moollanni anette; at fikkaanne dut oosom qare; ki shumo'iinsi minaadabii odim lobakat giichchii firona; adilluwwim kiinniinsi qaramookko. An Abrihaaminaa Yisaaqinaa uwwummi uulla kiina uwwoommo; odim kiinniinsi lasonne ki shumo'inam ee uulla uwwoommo» yukko. Waa'im Yaaqoobinne wocu beyyiinsi iim firukko. Yaaqoobim Waa'i ixxenne wocu beyyonne ki'n utuba kaasukko; ixxonnem woyi'n diqaasaa wee'l zaytaa dunukko. Ixxim ee beyyi summa «Beeteela» yaa weeshukko. Ixxuwwim Beeteeliinsi ki'lla'a Efiraata affeena hofqaxim gataakkoohaannonne Raaheele xuuchchi amadukko. Oo xuuchchim lobakata malaayyukko. Is xuuchchim lobakata joru bikkina ise qassiissam meentichcho «Kuno'o odim mulli goonchi beetom qatteenatte baddititte» yito'o. Ihukkaarem ise leh anganne hee'llo'o; is foor firukkuuyyim ciilichchika summa «Beeni'oona» yita'a weeshsho'o. «Beeni'oona» yimmim «Kichchechcha» yimma. Ihukkaarem ixxi anni «Biiniyaama» yaa weeshukko. Biiniyaama yimmim «I makki anga» te'im «Er gada'a» yimma. Raaheele ee'isinne leto'o; isem Efiraata massoo gooqqi gadanonne waammanto'o; oo beyyim «Beetaliheema» yamamukko. Yaaqoobim is waammanne kina kaasukko; ixxom kaballi afeebe'e «Raaheel waamma» yakkamo. Ee lasage Isra'eelim ee beyyiinsi ki'aa marukko. Dukkaanam «Edeer gimba» yakkam beyyi eeqidonne kaasukko. Isra'eel ee uullanne hee'ukkuuyyim Roobeel ixxi anni bakki meentichchonne Beela'anne iinse'ukko; Isra'eelim eekka macceesukko. Yaaqoob oosim tommoo lamoo hee'llo'o. Liya'a ixxena qatto'i oos Yaaqoob won beet Roobeelatte, Simi'oonatte, Leewi'ette, Yihudatte, Yisaakoorattee Zaabiloonattee. Raaheelekim Yooseefattee Biiniyaamattee. Raaheel baxaanchok Baala'akim Daanattee Niftaaleemattee. Liya'i baxaanchok Zalafakim Gaadattee Aseerattee. Ku oos hundim Yaaqoobina Masphexoome'enne qaramu keeno. Yaaqoob ixxi anni Yisaaq afuuraa hee'u beyyo Abrihaamii Yisaaqii koyyinano afuuta'a hee'llo'i Keebiroona yakkam beyyi gadanonne yoo Maammire yakkam beyyo waarukko. Yisaaqim xibbee sadentayyi hiinchoo hee'ukko. Ixxim lobakata hee'aa umura goddaa lehukko. Ixxi oosim Eesa'aa Yaaqoobii waammito'o. Eesa'i shumo'i; «Eedooma» yakkaman hee'ukko. Eesa'am Kana'aa'n landa Hiitekkichchi Eeloon landichcho Ada'a, Hiiwekkichchi Xiibaa'oon beet Aana'i landichcho Ohooliibaamee odim Isma'eel landichcho Nabayoot aayya Baasemaatee eebukko. Ada'a Eesa'ana Eelfaaza qatto'o. Baasemaatem Raa'u'eela qatto'o. Ohooliibaamem Ya'uusha Ya'ilaamaa Qore'oo qatto'o; ku hundim Eesa'a Kana'aa'n uullanne qaru ooso. Ee lasage ixxi meento, ixxi goo'n ooso, landa, ixxenne hee'oo manni hundam, ixxi fooraam diinat hundamii Kana'aa'n uullanne wixxaa'u ixxi amaxxi hundamii amadaa ixxi abbaayyi Yaaqoob beyyiinsi mulli uulla dooyyukko. Ixxi uraa maru mashka'i ixxuwwi diin at lobakata lophphaa hee'u bikkina mateeyyoomanne hee'lleena xantoobee'i bikkinattee koyyinano afuutta'a hee'llo'i uulli ixxuwwi diinaxxi lophphimmiinsi ki'ukkok allaachchina ihubee'i bikkinattee. Ee bikkina «Eedooma» yamamu Eesa'a duunaam uullanne Seeyiranne hee'ukko. Seeyira yakkam duunaam ullanne hee'u Eedoo'm uulli mannina anno'i hee'llo'i Eesa'i shumo'i ka keeno. Eesa'a ixxi meentiinsi Aada'aansi Eelfaaza, Baasmaateensi Raa'u'eela qarukko. Eelfaaz qaru ontem oosim kakeeno; ixxuwwim Teemaanatte, Amaaratte, Saafootatte, Gootattee Qanaazattee. Odim Eesa'i beet Eelfaazina bakki meentichcho Timaanaa'ee yakkamote Amaaleeqa qatto'o. Eesa'a Baasmoote yakkam ixxi meentichchoonsi Raa'u'eela qarukko. Raa'u'eelim Naahoota, Zaara'a, Shaama'aa Miiza'aa qarukko. Xiibaa'oon landichchi landichchotte hee'llo'i Aana'i landichcho Ohooliibaame Eesa'ana Ya'uusha, Ya'ilaamaa Qoore'ee sasem oosom qatto'o. Eesa'i beet Raa'u'eel shumo'i moollanno'i Naahatatte, Zaarahatte, Shamattee Miizattee hee'llo'o. Ku keen hundim Eesa'a Baasmaatenne qaru shumo'o. Eesa'a Aana'i landichchonne Ohooliibaamenne Uush moollo, Ya'ilaam moolloo Qore'i moolloo qarukko. Ku moolli hundim Eesa'aansi qaramu shumo'o. Looxaanim Hoorinaa Heemaaminaa anni hee'ukko. Looxaan aayyam Timinaayette hee'llo'o. Shoobaal oosim Alwaanatte, Maaneehatte, Eebaalatte, Safoonattee Awnaanattee hee'llo'o. Xiiba'oon oos Aya'attee Aana'attee hee'llo'o. Aana'am udma'i uullanne ixxi anni halla allaarukkuuyyi xabala siidukkan hee'ukko. Aana'i beet Diishoonatte ihaa landichom Ohooliibaamette hee'llo'o. Diishoon oosim Heemidaanatte, Eeshbaanatte, Itraanattee Kiraanattee hee'llo'o. Eexee oosim Bilihaanatte, Zaa'iwaanattee Aqaanattee hee'llo'o. Diishaan oosim Uuxattee Araanattee hee'llo'o. Ku adilluwwi Isra'ee'l minaadaba adilluwwi gasseena illageen Eedoo'm uullanne gassu adilluwwa. Eedoomanne Bee'oor beet Baalaaq adil ihukko. Ixxi beero'i summim Diinihaabatte hee'ukko. Baalaaqim lehukko. Ixxi beyyonne Baasoo'l Zaara'i beet Yoobaab adil ihukko. Yoobaab lehaa lasage ixxi beyyonne Teemeenaan uulli Hushaam adil ihukko. Hushaamim lehaa lasage ixxi beyyonne Miidiyaa'm manna Moo'aaphphi biiranne kaa'u Baadaad beet Haadaad adil ihukko. Ee beero'i summim Awiitee yamamukko. Haadaad lehaa lasage ixxi beyyonne Masireeqichchi Saamil adil ihukko. Saamilim lehukko. Ixxi beyyonne Efiraaxiis daajji gadanonne hee'u Rihoobootiinsi Saa'ool adil ihukko. Saa'oolim lehukko. Ixxi beyyonnem Akibar beet Ba'aalhanaan adil ihukko. Akorooboot beet Ba'aalhanaanim lehukko. Ixxi beyyonne hadaar adil ihukko. Ixxi beero'i summim Fuuhatte. Ixxi are summim Maheexaabe'eelatte. Isem Maazaahaabiik won landichcho Maxireede qatto'o. Eesa'i moolli anno'i gatto'i beyyi weeshamukkok ixxuwwi summannette. Oo keenim Tiiminaa'atte, Alwatte, Yeteetatte, Ohooliibaamatte, Eelatte, Fiinoonatte, Qaneezatte, Teemaanatte, Miibxaaratte, Maagdi'eelattee Iiraamattee hee'llo'o. Eesa'am Eedoo'm uullanne eekeenina hundinam anni hee'ukko. Yaaqoob ixxi anni koyyinanonne hee'u Kana'aa'n uullanne hee'am hee'ukko. Yaaqoob abaroos aganni kane; Yooseef tommoo lamar hiinchi woraadichchi hee'u ammane ixxi anni Baala'annee Zalfa'annee qaru ixxi abbaayyuwwinne maqire gereebbaa fella'aa allaaram hee'ukko. Yooseefim ixxuwwi annina ixxuwwika jor woshsha eebaa kuram hee'ukko. Isra'eelim Yooseefa lommannanonne qaru bikkina oosiinsi hundiinsim lonsaa iittam hee'ukko. Ixxim ixxena lobakata mishisoo qeeraa'l qambiisa axisaa eddeesam hee'ukko. Ixxennem xummaanchi sagara wocimmina xanto'oyyo. Mat ayyaamo hiimonne Yooseef haqaawwo haqaawwe'ukko. Ee haqaawwom ixxi abbaayyuwwina kuru ammanenne ixxuwwi ixxo lonsita'a sabbo'o. Ixxim ixxuwwina «An haqaawwe'ummi haqaawwo macceessehe! Neese hundim abuulli woronne arasa farshinsinummuuyyi hee'nnummo; ee ammanenne i farshim ki'aa uullukko. Ki'nnuwwi farshimmuwwim i farshima kibbita'a otossito'o» yukko. Ixxi abbaayyuwwim «At ni hanenne adil ikkeena sawwitaahinnihe? Te'im neese gassiteena hassaatennihe?» yito'o. Ixxi haqaawwi bikkinaa ee woshshi bikkinaa eraa'llaanniinsim lonsita'a sabbo'o. Odim mulli haqaawwom haqaawwe'ukko; eekkam ixxi abbaayyuwwina «Eelliinchi, aganii tommii mat boollaankii iina otossitu'uuyyi moo'ummo» yaa kurukko. Odim ee haqaawwo ixxi anninaa abbaayyuwwinaa kuru ammanenne ixxi annim ixxenne wocamaa «Ku haqaawwe'llitti haqaawwi maruchcho? Hanqinam an, kiyyummaa kiyyabbaayyuwwii kiina uullanne umbaa otossineenannihe?» yukko. Ixxi abbaayyuwwim ixxonne to'achchito'o. Ihukkaarem ixxi anni woshshooma ixxi wodanonne egeram hee'ukko. Mat ayyaamo ixxi abbaayyuwwi Seekeema yakkam beyyonne ixxuwwi anni gereebba allaatteena matto'o. Isra'eelim Yooseefina «Kiyyabbaayyuwwi Sekeema yakkam beyyonne gereebba allaatto'oollayyonnihe? Ixxuwwi beyyo asse'oommo waare» yukko. Yooseefim «Kuno'o gudaammo» yukko. Yaaqoobim «Mattaa kiyyabbaayyuwwii gereebbii xumda'e moo'e; ixxuwwi woshsham iina eebe» yaa Keebiroona yakkam qaala'i kolliinsi Seekeema yakkam beyyo Yooseefa asse'ukko; Yooseefm Seekeema yakkam beyyo afukko. Ee beyyonnem udma'anne Yooseef jalli jallukkuuyyi mat manchi moo'aa «Maha hassoolla?» yaa xa'mmukko. Ixxim «Iyyabbaayyuwwa hasoommuulla gereebba allaattam beyyo kutteena xantoolas kure» yukko. Oo manchim «Ka beyyo utta'a Dootaana yakkam uulla mallona yitu'uuyyi macceesaammo» yukko. Yooseefim ee beyyiinsi ixxi abbaayyuwwa hasukkuuyyi marukko. Ixxuwwam ee Dootaananne siidukko. Ixxi qee'llonnem hee'ukkuuyyi ixxi abbaayyuwwi ixxo moo'lla'a ixxi afoo'nnim gaassita'a ixxo shimmina a'llannito'o. Ixxuwwim mat matina «Oo haqaawwaanchi kuno'o waarukko. Kaba waallehe shinaa leeshooma mat wo'i bee'i barenne uunjinona; ee lasage jor moochchi itaakko yinoommo; ixxi haqaawwim ihoo'isa moo'nnoommo» yaqqanto'o. Roobeel eekka macceesaa ixxuwwi angiinsi gatiseena hasaa «Ixxo shitakkotte. Ka udma'anne yoo barenne uunjehe. Ixxi hanenne ki'nnuwwi anga higissakkotte» yukko. Ee'isa yu mashka'im ixxuwwi angiinsi gatisaa ixxi anni beyyo dabaraa asse'eenatte hee'ukko. Ka'isam ihukko; Yooseef ixxi abbaayyuwwi beyyo afu ammanenne ixxi abbaayyuwwi ixxi edde'u lobakata mishisoo qeeraa'l qambiisa maxatto'o. Ixxon massitta'a barenne uunjito'o; baroomim wo'i bee'i gogaalli hee'ukko. Ee lasage hurbaata itteena afuutto'oohaanonne Isma'eel uulli daddaraan Gibxi uulla dilliteena Gala'aada yakkam beyyiinsi waattu'uuyyi moo'llo'o ixxuwwim gaameela'uwwanne enjuwwaa karbe'e yakkam enje'oo luwwaa iyyiissa'a hee'llo'o. Ee ammane Yihud ixxi abbaayyuwwina «Niyyabbaayyo shinaa maanxummaare maha awwaadookko. Waallehe, Isma'eel uulli daddaraanina biteensona ixxi hanenne ni anga higinsoone mashka'oomim ixxi niyyabbaayyichchoo ni maarana'ee» yukko. Ixxi abbaayyuwwim ixxi woshshanne liiranto'o. Miidiyaa'm uulli daddaraanim higgu'uuyyi Yooseef abbaayyuwwi Yooseefa ubbuuso'i bariinsi fissita'a Isma'eeli uulli daddaraanina lamiyyi kin birina biteesso'o. Ixxuwwim Yooseefa Gibxi uulla massito'o. Roobeelim ee ba'l beyyo daba'llaa waaru ammanenne Yooseef ba'l woronne hee'ukkoyyo; ixxim edde'u eddechcha dereeraa lobakata kichche'ukko. Ixxi abbaayyuwwi beyyom daba'llaa «Beet bee'e kaba an hanno maro?» yukko. Yooseefikam mishisoo qeeraa'l qambiisa massita'a fellakkichchi ambula dutta'a ixxi qeeraa'l mishisoo qambiisa xiiganne ceffo'o. Lobakata mishisoo qeeraa'l qambiisam massita'a ixxuwwi annina «Kaka siindaamoohane; hino'o ki beet qambiisda'e moo'e» yita'a uwwito'o Ixxim «Eeyya; kuk i beet qambiisa; hanqinam jor moochchi ixxo muransaa itaakko» yukko. Yaaqoobim ixxi gaqqi eddechcha dereerukko xiddi eddechcham edde'ukko. Ixxi beet bikkinam lobakat ayyaamo wi'llukko. Ixxi goo'n oosii landii hundim Yaaqooba qoxxisimmina waatto'o. Ihukkaarem ixxi qoxximma sabaa «I beet bikkina leheembe'i afeebe'e wi'lloommo» yukko. Yooseef annim ixxi bikkina wi'llukko. Ee ammanem Gibxi uullanne Miidiyaa'm manni Yooseefa Phooxifaara yakkam manchina Fari'oon mine egeraa'n ijaajaanchina biteesso'o. Ee agananne Yihud ixxi abbaayyuwwiinsi annanni ihaa Hiiraa yakkam Udulaa'm uulli manchi beyyo maraa ixxi heechchi beyyo eekke'enne issukko. Ee beyyonnem Yihud Kana'aa'n uulli manchika Shuu'aa'i landichcho moo'ukko; ee landichchom eebaa ixxi aretti issukko. Isem ixxena lamfooretti ikka'a goonchi beeto qatto'o; ixxi summam Eera yita'a weeshsho'o. La'mmekam ixxena lamfooretti ikka'a goonchi beeto qatto'o; ixxi summam Oonaana yita'a weeshsho'o. Odim lamfoor ikka'a goonchi beeto qatto'o; ixxi summam Seela yita'a weeshsho'o; ixxo qotto'i ammane Akkazeebaa yakkam uullanne hee'lo'o. Yuhud ixxi won beet Eerina Ti'imaare yakkam landichcho eebukko. Yihud won beet Eer ixxi Moollanni Waa'i illagenne jor hee'u bikkina Moollanni Waa'i ixxo shukko. Yuhudim Oonaanina «Mare lehu kiyyabbaayyi meentichcho lago gasse ki heereechchonam hasisoo luwwa issitaa kiyyabbaayyik shumo'i bi'oobee'isa isse» yukko. Ihukkaarem Oonaan qaramoo shumo'i ixxena ihoobee'isa la'ukko; ee bikkina ixxi abbaayyi meentichchonne iinse'oo ammane qachchi ihoo luwwa uullanne dunam hee'ukko; mashka'oomim ixxi abbaayyina shumo'o fissoobee'isnatte hee'ukko. Oo baxu bax Moollanni Waa'i illaggenne jor ihu bikkina ixxom Moollanni Waa'i shukko. Ee lasage Yihud ixxi beetar Ti'imaarena «I beet Saalaan li'eebe'e kiyyanni mine daba'llitaa buubbeessaa afuure» yukko. Mashka'oomim ixxi ee ixxi abbaayyuwwisam lehoobee'isa baddaa hee'ukko. Ee bikkina Ti'imaare matta'a is anni minenne afuutto'o. Lobakat ammaniinsi lasage Yihud meentichcho Seewwa'i landichcho leto'o. Yihudim xiddo guullaa lasage Adulaa'mman ihu ixxi beshichchi Eraasennem gereebbi odda murakam beyyo marukko. Eekka la'u manni Ti'imaarena «Ki balli Yihud ixxi gereebbika odda mureena Taminaa yakkam beyyo firoolla» yakkam woshsha macceesso'o. Isem xiddi eddechcha sheelatta'a mulleka edde'llo'o; is illi kollom gunguu'llita'a Timina yakkam beyyo massoo gooqqi gadanonne Eenaayim beero'i goocanne afuutto'o. Mashka'oomim Saala'a li'ukkaarem ise eebona ixxi anni hasubee'isa laqqo'i bikkinatte. Yihudim moo'u ammanenne illi kollo gunguu'llito'i bikkina saa'aancho labisukko. Ixxim gooqqi gadanonne yo'i is kollo daba'llaa «An ki beyyo aageenatte at mee'o xa'mmitoottok?» yukko. Mashka'oomim ise ixxi beet arette ikko'isa la'ukkoyyi hee'ukko. Isem «I beyyo at aaggittaare iina maha uwwitootto?» yito'o. Ixxim «Allaachchiinsi mat fellakkichchi geexa asse'oommo» yaa dabarukko. Isem dabatta'a «Eekka asse'lleebe'e amadiissoo luwwa uwwittaa'lleensi danaamo» yito'o. Ixxim «Maha amadiiso?» yaa xa'mmukko. Isem «Ki summi yoo ki gaanji worqaa quba'aa ki anganne amaddoo biccoo iina uwwe» yito'o. Ixxim eekeeno uwwaa isenne iinse'ukko; isem lamfoorette ikko'o. Ee lasage ise ee beyyiinsi ki'lla'a matto'o. Ee gunguu'llito'okam sheelatta'a xiddi eddichcha odim edde'llo'o. Yihudim amadiisaa hee'u mu'uta ee meentichchi angiinsi dabassiiseena ixxi beshichchi Hiira'anne fellakkichchi geexa asse'ukko; Hiira'am ise siideena xanukkoyyo. Ixxim manna «Eenaayyim googonne affutta'a hee'llo'i Saa'aancho hannonnette?» yaa xa'mmukko. Ixxuwwim «Ka beyyonne Saa'aancho bee'e» yita'a dabatto'o. Ixxim Yihud beyyo daba'llaa «An ise siideena xanummoyyo; ee beyyi mannim <ka beyyonne saa'aancho hore'em bee'e> yito'ookko» yukko. Yihudim «Neesenne manni osaroobee'isa ka fellakkichchi geexa maaxe; mashka'oomim an isena miqeena asse'ummo; atim ise siiddeena xantittoyyo» yukko. Sas aganiinsi lasage Yihudina «Ti'imaare ki beet are Saa'lla'a kaba ise lamfoorette ikko'ookko» yakka'a kurakko'o. Yihudim «Biira fissitaka'a giirinne shokkiissakka'a shi'llehe» yukko. Ixxuwwim biira fissito'i ammanenne «An lam foorette ihummok ka mu'uxxi annichchinatte; ku summi yoo gaanji worqi, quba'ii ku biccii ayyanda'e moo'e» yita'a balli beyyo asse'llo'o. Ee ammanenne Yihud eekeeno tiiraa «An hushamaammo; ise wocco'ok hanqa i beet Saalaanim ise eebookko yummoka wonshummoyyo» yukko. Yihud la'mmeka isenne hore'em iinse'ukkoyyo. Isem qattam amman afaakkoohaannonne qafa qattamisa laqqo'o. Xuuchchi amadu ammanenne mat gaassaa anga fissukko; ee ammanenne qassiissam meentichcho ixxi anganne kashar fatira katta'a «Kuk gaassaa qaramookko» yito'o. Ihukkaarem oo qachchi anga dabaraa woronne aagisukko. Ee ammanenne ixxi abbaayyi qaramukko. Qassiissam hee'llo'i meentichchom «Mahina gafe'llaa fittoolla» yita'a ixxi summa Faareesa yita'a weeshsho'o. Ee lasage kashar fatir anganne hee'u ixxi abbaayyi fatirinnem qaramukko; ixxi summim Zaaraahaa yamamukko. Ismaa'eel shumo'i Yooseefa Gibxi uulla massita'a Fari'ooniinsi woroon awwonsaanchi hee'u phooxifaara yakkam adi'l mi'n egeraa'n ijaajaanchina biteesso'o. Moollannim Yooseefinne maqire hee'ukko; Yooseefikam baxo hundam taaphansukko. Yooseefim ixxi moollanni hee'u Gibxi uulli manchi minenne hee'ukko. Oo ixxi moollannim Moollanni Waa'i ixxenne maqire ihukkisaa ixxi issoo luwwi hundam Moollanni Waa'i ixxena taaphansoo'isaa moo'ukko. Yooseefim ixxi moollanni illagenne galaxxamaakkoohan ihaa siidamu bikkina ixxena awwaadam hee'ukko. Ixxim ixxi minenne yoo luwwi hundannem Yooseefa gassaanchi issukko. Ixxi minenne yoo luwwi hundannem gassaanchi issaa lasage Moollanni Waa'i ee Gibxi uulli mancho Yooseef mashka'inne maasse'ukko. Moollanni Waa'i maassim minennee biirannee yoo luwwi hundannem ihukko. Ixxim ixxena yoo luwwi hundam Yooseef anganne higisaa uwwukko; itoo hurbaatiinsi bagaan matem luwwam la'am hee'ukkoyyo. Yooseefim lobakata mishisoohan hee'ukko. Hofqax ammaniinsi lasage ixxi moollanni Phooxifaar meentichcho Yooseefanne ille ubbuussa'a «Iinninne iinse'e» yito'o. Ixxim «Sabummo» yaa ee ixxi moollanni meentichchona moollanni minenne yoo luwwi hundannem matem luwwim gatoo'n eese gassaanchi issaakko ixxim la'oo luwwi ma'lluwwim bee'e. Ka minenne iina ixxaanni qax malaayyi yookko; at ixxi meentichchotte ikkitti bikkina kiinniinsi bagaan iina uwwoo'n uru luwwi bee'e; hinkid kido'i kee'mmaalli jor luwwa an issoommo? Waa'i illagendu hinkid baaxiilo baxoommo?» yukko. Ihukkaarem ise Yooseefa ballina ballina isenne iinse'ona hawwissam hee'llo'o. Ihukkaarem ixxi issenne maqire iinse'immaa isenne maqire ihimmaa sabukko. Mat ayyaamo Yooseef ixxi baxo baxeena mine aagukko; ee ammane mi'n woronne baxoo baxaa'nnek matim hee'ukkoyyo. Isem «Iinninne maqire iinse'e» yita'a ixxi eddechcha hixixaa'lla'a amaddo'o. Ixxim ixxi eddechcha is anganne uraa gibaa biira firukko. Yooseefim ixxi eddechcha is anganne uraa biira gibukkisa moo'llo'i ammanenne Minenne yoo manna is beyyo weeshsha'a «Ku Ibrokkichchi manchi neesenne naacameena waaraakkoohane; ixxi iinninne iinse'eena iinsi mine aagukko; anim sagara fissaa laarummo. An sagara fissaa laarummisa moo'u ammanenne ixxi eddechcha i beyyonne uunjaa gibaa biira firukko» yita'a kutto'o. Isem Yooseef moollanni mine waareebe'e Yooseef eddechcha is beyyonne dissita'a «Oo eebbitti Ibrokkichchi agishshi iinninne Naacameena i iinsi mine aagukko. Anim sagaraa fissaa laarummi ammanenne edde'u eddechcha i beyyonne uraa bira gibukko» yita'a kutto'o. Yooseef moollannim ki agishshi ka'isa issukko yita'a kutto'i ixxi meentichchi woshsha macceesu ammanenne lobakata nadadukko. Yooseef moollannim Yooseefa massaa adil kassiisu keen karantam mine aagisukko; ee beyyonnem karamaa hee'ukko. Moollanni Waa'im Yooseefinne maqire hee'ukko; ixxom maasse'ukko; ee bikkina karaxxi mi'n ijaajaanchi ixxonne liiramu bikkina ee karaxxi minenne yoo manni hundam Yooseef gassona ixxi anganne uwwukko. Eekke'enne baxamoo bax hundam ixxi baxam hee'ukko. Ee karaxxi mi'n egeraanchim Yooseef anganne yoo luwwi hundam sawwam hee'ukkoyyo. Mashka'oomim Moollanni Waa'i ixxenne maqire hee'u bikkinatte. Ee bikkina ixxi issoo luwwi hundam Moollanni Waa'i Taaphansam hee'ukko. Mat ayyaamo Gibxi uulli adilina diqaasa danaanaanchii hurbaata sassiisaanchii lamim ixxuwwi moollanni Gibxi uulli adila hawwoddo'o. Fari'oonim lamem mannannem diqaasa danaanaanchonnee hurbaata sassiisaanchonnee quuqukko. Ixxuwwam Yooseef karamaa hee'u karaxxi minenne egraa'n awwonsaanchi yoo minenne kassiisukko. Oo egeraa'n awwonsaanchim Yooseefina higisaa uwwukko. Ixxim ixxuwwina hasisoo luwwi hundam issam hee'ukko. Ixxuwwim lobakat ayyaamo karaxxi minenne afuutto'o. Mat hiimo karaxxi minenne hee'llo'i Gibxi uulli adi'l diqaasa danaanaanchii hurbaata sassiisaanchii lamim annanni annanni ihaakkoo annanni tiratim yoo haqaawwo haqaawwe'llo'o. Yooseefim soodaakkoohaannonne ixxuwwi beyyo aagukko; ee ammanenne ixxuwwi kichche'llo'ookkoka moo'aa Ixxi moollanni minenne ixxenne maqire baxxu'uuyyi hee'llo'i Fari'oon mi'n gassaanina «Ki'nnuwwi kaballa mahina kichche'llakka'ate?» yaa xa'mmukko. Ixxuwwim «Haqaawwo haqaawwe'nnummo; ihukkaarem tiroo manna hoongummo» yito'o. Yooseefim ixxuwwina «Haqaawwo tirookkok Waa'i uwwu manchoyyonnihe? Hino'o iina kullehe» yukko. Woyi'n diqaasa danaanaanchim ixxi haqaawwe'u haqaawwo «Haqaawwonne woyi'n xud i illagenne ihaa moo'ummo Ee xudannem sas shog yoohan hee'ukko. Oo xudim fiita fiitukko misham mishukko; oo mishim li'ukko. Fari'oon agoo humbulli i anganne hee'ukko; ee misham massaa ee humbullonne ciinsummo. Ee lasage ee humbullo massaa Fari'oon anganne uwwummo» yaa kurukko. Yooseefim ka haqaawwi tirat ka'isa «Sasem shogguwwim sas ayyaamo. Sas ayyaa'm woronne Fari'oon keese tiirookko; illageen gassaanchi ikkaa hee'llitti beyyonnem dabarookko; diqaasa danaanaanchi hee'llitti ammane issitam hee'llittisam Fari'oon agoo humbullo ixxi anganne uwwitootto. Ihukkaarem kiina makkoo ammane eese sawwihe; iinam biijooma isse; i woshsham Fari'oonina kuttaa eese ka miniinsi fisse. Eese Ibro'i manni uulliinsi game'akka'a eebakka'a keyye karaxxi minenne karamummok matem jor luchchom issoo'nneteme» yukko. Hurbaata sassiisaanchim ee haqaawwo danaamisa tirukkisa moo'aa lasage Yooseefina «Odim anim haqaawwo moo'aa hee'ummo. Oohim sas leemaat hurbaat i horoorenne hee'uko; haninne yoo leemaatanne Fari'oon itoo li'u hurbaaxxi hagar hundim hee'ukko; ihukkaarem cii'i i horoo'l hanenne yoo leemaatiinsi itam hee'ukko» yaa ixxena kurukko. Yooseefim dabaraa haqaawwik kanniinsi tirat ka'isa «Sasem leemaat sas ayyaamo. Sas ayyaa'm woronne Fari'oon ki horoore muraa keese haqqanne saqalookko. Ammarim ki maara itookko» yukko. Oo saxxi ayyaam Fari'oon qaramu qaranchi balli hee'ukko. Ixxim ixxi gassaan hundinam maadda gudisaa weeshukko; ee ammanenne ee diqaasa danaanaanchoo hurbaata sassiisaanchoo karaxxi miniinsi firamoo'isa issukko. Ee lasage diqaasa danaanaancho eraa'l baxonnem dabaraa Fari'oon agoo humbullo ixxi anganne uwwukko. Ihukkaarem hurbaata sassiisaancho saqalsiisaa shukko. Lamikim haqaawwi yooseef tirukkisam ihukko. Ihukkaarem diqaasa danaanaanchi Yooseefa tiiroo'nnim xadaa urukko. Lam hiinchi higaa lasage Fari'oon haqaawwo haqaawwe'ukko; ixxim Abbaayyi daajji gadanonne uullaa hee'ukko. Hagar mishisoo geejji lamar lar abbaayyi daajji woriinsi fitta'a hixe ittam hee'llo'o. Odim mulli keen hagar mishisoobee'i nac lar wo'i woriinsi fitta'a gaassita'a daajjiinsi fitto'i kee'n gadanonne uullito'o. Ee lasage hagar mishisoobee'i nac lar ee hagar mishisoo geejji laro liqicito'o; Fari'oonim diriiriinsi baqukko. Odim daba'llaa diriiraa la'mmaaggem mulli haqaawwo haqaawwe'ukko; mat aras maqanne lamar mish yoo hamaama hamaamukko; ixxim illi danaam geejji hee'ukko. Odim eelliinchi firoo kolliinsi hafachchu hafachchinne quubaakkoo mulli lamar mish yoo hamaam mat maqanne hamaamukko; ixxim quubaakkoo illi wic hee'ukko. Oo quubu illi wic hamaamim ee lamarem illi geejji danaam hamaammuwwa liqicukko; Fari'oonim baqaa lasage haqaawwi ihukkisa la'ukko. Soodaa lasage Fari'oon u'nnamaa Gibxi uullanne yo'i haqaawwo tiraanoo qoolluwwi mannaa weeshisaa ixxuwwina ixxi haqaawwo kurukko; ihukkaarem ixxuwwiinsi matim ixxi haqaawwo tiraa kureena xanukkoyyo. Ee ammanenne diqaasa danaanaa'n awwonsaanchi Fari'oonina «Kaballa i huushancha sawwummo. At hurbaata sassiissoohaannonnee eesennee quuqqitto; neesem higissaa karaxxi mine egeraanchina uwwitto. Neesem mat hiimo annanni annanni haqaawwo haqaawwe'nnummo; lamikim haqaawwi tirat annanni hee'ukko. Ee beyyonne karaxxi mine egeraanchina awwaadaanchi hee'u Ibrokkichchi woraadichchi niinninne maqire karaxxi minenne hee'ukko; ixxenam haqaawwe'nnummi haqaawwo kullummo ixxim annannichchinam haqaawwe'nnummi haqaawwisam annanni issaa tiraa kurukko. Woshshim ixxi yukkisam ihukko; an i baxonnem daba'llummo; ihukkaarem hurbaata sassiisaanchi saqalamukko» yukko. Ee lasage Fari'oon Yooseef beyyo asse'aa weeshisukko; ixxom karaxxi miniinsi qaqisakka'a eebakko'o; ixxi horoorem hogoossakko'o; eddechcham dabassaa edde'aa adi'l illage hincukko. Fari'oonim Yooseefina «An haqaawwo haqaawwe'aa hee'ummo ihukkaarem ayyim iina tiraa kureena xanukkoyyo; at haqaawwo tittaa kuttoo'isa ki bikkina macceesaammo» yukko. Yooseefim dabaraa «Kuk iinniinseyyo; ihukkaarem Waa'i Fari'oonina ihookkoka tiraa kurookko» yukko. Fari'oonim Yooseefina «Haqaawwonne Abbaayyi daajji gadanonne uullaa hee'ummo. Hagar mishisoo lamar geejji lar daajji woriinsi fitta'a hixe ittam hee'llo'o. Odim hagar mishisoobee'i mulli lamar nac lar eekeeniinsi lasonne fitto'o; Gibxi uulli hundannem eehido'i hagar mishisoobee'i nac laro moo'ummoyyo. Oo hagar mishisoobee'i nac larim gaassita'a fitto'i hagara mishissam geejji laro liqicito'o. Ihukkaarem ee lasage oo naccuwwi geejjuwwa liqicito'isa ayyim la'ukkoyyo; mashka'oomim ixxuwwi hagar illagee'nnisam nac hee'ukko; ee lasage baqummo. Odim mulli haqaawwom moo'ummo; lamar mish hamaam mat maqanne hamaamukko; ixxim illi danaam hee'ukko. Odim eelliinchi firinne hafachchu hafachchinne quubaakkoo mulli lamar mish mat aras maqanne hamaamukko; ixxim ille wic hee'ukko. Oo illi wic hamaam lamarem danaam geejjuwwa liqicito'o; anim kaka hiraagaanina kurummo; ihukkaarem ayyim iina tiraa kureena xanukkoyyo» yukko. Yooseefim Fari'oonina «Lamem haqaawwikim tirat mato; Waa'i isseena hasukkoka kiina kuraakko. Lamarem geejji larim lamar hiincho; odim lamarem illi danaam hamaam lamar hiincho haqaawwoom matome. Lasonne fitto'i lamarem nac larii eelliinchi firoo kolli hafachchinne quubu lamarem illi wic hamaamii lamar hiinchi sibaaro. An kiina kurummisam Waa'i issoo luchcho kiina moo'isaakko. Gibxi uulli hundannem lamar hiinchina lobakat goddi ihookko. Ee lasage odim lamar hiinchina sibaar ihookko; Gibxi uullanne hee'u goddi hundim xadamookko; sibaarim uulla bi'isookko. Goddi maarag higaa lasage waaroo kee'mmaalli sibaa'l hawwi mashka'inne uullanne hee'u goddi hiinchi xadamookko. Haqaawwoomim daba'llamaa moo'amu mashka'i Waa'iinsette ihu bikkina ka abbis ammanenne ku woshshi ihookko. Ee bikkina kaba Fari'oon qoor lachchaam mancho doo'llona; ixxom Gibxi uullanne gassaanchi issona. Odim Fari'oon uullanne gassaano uwwona; lamarem hiinchi goddiinsim Gibxi uullanne hundannem ontiinsi mato massona. Ixxuwwim waaroo goddi hiinchonne hurbaata wixxaa'llona; hurbaatoomam Fari'oon ijaaccisa issitona; oo hurbaatim beero'onne wixxaa egeramoo'isina daannooma uwwe. Ee'isa ihulas manni sibaarinne lehooyyo» yukko. Oo woshshim Fari'oonaa ixxi gassaanoo liiransukko. Fari'oonim ixxi gassaanina «Kido'i Waa'i Ayyaan yoo mancho Yooseefiinsi e'lloo mancho hore'em siindoommoyyo» yukko. Ixxim Yooseefina «Kiinni'nno'i qoor lachchaam manchi bee'e; Waa'i kiina ka hundam caakkisaakko. An keese i uullanne gassaanchi issaammo; odim i minaadab ki ijaajina ijaajantona iinniinsi bagaan ki gassimmi daannoomanne lophphookkok bee'e» yukko. Odim Fari'oon Yooseefina «An keese Gibxi uullanne hundannem gassaanchi issaammo» yukko. Fari'oonim ixxi angi worqi quba'a fissaa Yooseef anganne issukko; qadaalli danaam talbi fatirinne dadamaakkoo eddechcham eddeesukko; gaanji worqam issukko. Ixxi la'm farashshi gaare'ennem afuussukko; ixxi alallaataanchim «Otossi'llehe! Otossi'llehe!» yukkuuyyi laaram hee'ukko. Yooseefim Gibxi uulli hundannem gassaanchi ihukko. Fari'oonim Yooseefina «An Fari'oonatte; Gibxi uullanne hundannem ki doo'l bee'eka ayyi manchim angam lokkom ki'isoone» yukko. Lamarem goddi hiinchi ammanenne uulli lobakat misha uwwukko. Yooseefim Gibxi uullanne yoo lamarem goddi hiinchi hurbaata hundam wixxaa'ukko; hurbaatoomam beyyonne beyyonnem wixxaa'ukko. Yooseefim wixxaa'u hurbaat daajji shashsha'llisa lobakat hee'u bikkina keenimma urukko. Lamarem sibaa'l maaragim waaroo'n gaassita'a Oon beero'i qeessichchi Phooxiifaar landichcho Asnaate Yooseefina lam ooso qatto'o. Yooseefim «Waa'i i hawwi hundam xadonaa iyyanni abaroosam xadonaa kaka issukko» yaa ixxi won beet summa Minaasee yukko. Odim Yooseef «I hawwi uullanne Waa'i ooso uwwukko» yaa la'm beetika summa Efireema yukko. Gibxi uullanne hee'u lamarem goddi maarag beeddukko. Yooseef yukkisam lamarem sibaa'l maarag waarukko; hundem uullannem sibaar ihukko; ihukkaarem Gibxi uullanne hurbaat hee'ukko. Gibxi uulli mannim sibaatta'a hurbaatina Fari'oon beyyo matta'a laatto'o; ixxim «Yooseef beyyo mallehe; ixxi kurookkokam issehe» yukko. Uulli hundannem sibaar jorisa baasukko; ee bikkina Yooseef gootalluwwa fooqaa'aa Gibxi uulli mannina hurbaata biteesimma amadukko. Mannim uulli hundiinsim Yooseefiinsi hurbaata aa'immina Gibxi uulla waattam hee'llo'o; mashka'oomim sibaar hundem beyyonnem baasaa hee'ukko. Yaaqoob Gibxi uullanne biteesamoo hurbaat yoo'isa macceesaa ixxi oosina «Mahina mat mato moo'llakkamuulla? Gibxi uullanne biteesakkam hurbaat yoo'isa an macceesaammo; sibaarinne lenoombee'isa mattakka'a Gibxi uulliinsi hurbaata bitaa'llehe» yukko. Ee lasage Yooseef abbaayyuwwiinsi tommim Gibxi uulliinsi hurbaata bitaa'immina matto'o. Ihukkaarem Yooqoob Yooseefina ambeet ihu Biiniyaama ixxi abbaayyuwwinne maqirem asse'ukkoyyo; mashka'oomim matisa ihookko yaa baddu bikkinatte. Isra'eela yamamu Yaaqoob oosim Kana'aa'n uullanne ihu sibaa'l mashka'inne Gibxi uulla mattam hee'llo'i mulli manna awwonta'a matto'o. Ee doollenne Yooseef Gibxi uulli hundam gassaanchi hee'ukko; ee uulliinsi hurbaata aa'eena maroo keenina biteesam hee'ukkok ixxotte; Yooseef abbaayyuwwim ixxi beyyo waatta'a uullanne heeshita'a ixxena otossito'o. Yooseefim ixxi abbaayyuwwa moo'u ammanenne ixxi abbaayyuwwi ikko'isa la'ukko; ihukkaarem ixxuwwa la'oobee'aannisa ihaa shaaqimminne «Hanniinsi waattakko'oo keeno?» yaa xa'mmukko; ixxuwwim «Neese waallummok Kana'aa'n uulliinsette; waallummi mashka'im hurbaata ka beyyiinsi bitaa'nneenatte» yito'o. Yooseefim kaka macceesu ammanenne hanqo'isam ixxi abbaayyuwwi ikko'isa qoossaa la'ukko; ihukkaarem ixxuwwi ixxi ayyetda'e ihukkisa laqqo'oyyo. Yooseefim ixxuwwi bikkina moo'u haqaawwo sawwukko; ixxuwwinam «Ki'nnuwwi caqassakkam keeno; ka uullanne yoo luwwaa bee'i luwwaa caqassakkeena waattakko'oo keeno» yukko. Ixxuwwim dabatta'a «Ni moollanna eehideyyo neese ki awwaadaan hurbaata bitaa'nneena waallaammoo keeno. Neese hundim mat anni ooso; neese caqasaanoyyo hanqo'i manna» yito'o. Yooseefim dabaraa «Eehideyyo ki'nnuwwi waattakko'ok ka uullanne yoo luwwaa bee'i luwwaa caqassakkeenatte» yukko. Ixxuwwim «Ni moollanna neese Kana'aa'n uullanne matem anniinsim qarammaammoo tommoo lam abbaayyuwwa; hundiinsim lasaanchik kabadem minenne niyyanninne maqire yookko; mat lehaakko» yito'o. Yooseef odim dabaraa «Ki'nnuwwi caqasaano Yummok kaneme. An adi'l summinne hide'oommo ki'nnuwwi ee ki'nnuwwi hoffi abbaayyo eebbakkobeelas ka beyyiinsi mattakkamoyyo. Woccakko'i woshshi hanqi ihukkisa qoossameebe'e ki'nnuwwiinsi matoom ki'nnuwwi hoffi abbaayyo amadaa waarona mine asse'llakka'a gattakko'i qax karaxxi minenne afuullehe; oobeelas ki'nnuwwina Fari'oon summinne hide'oommo; ki'nnuwwi caqassakkeena waattakko'oo keen ikkakko'isa la'aammo» yukko. Ee lasage sas ballina ixxuwwi hundam karaxxi mine aagisukko. Saxxi ballanne Yooseef ixxuwwina «An ki'nnuwwina yoommoka issitakko'aare foorinne hee'llakkamo; mashka'oomim an Waa'a baddoommi mancho. Hanqo'i manni ikkakkolas ki'nnuwwiinsi mat karaxxi minenne gatona; gattakko'i qax bitaa'llakko'i hurbaata amaddakka'a sibaaru ki'nnuwwi abaroosina massehe. Ki'nnuwwi hoffi abbaayyom i beyyo ebbehe; ki'nnuwwimdu ka'isa issitakkolas ki'nnuwwi woccakko'ok hanqi ihukkisa la'oommo; ki'nnuwwim letakkammoyyo» yukko; ixxuwwim ixxi yukkaannonne iittanto'o. Ixxuwwim mat matina «Hanqinam niyyabbaayyonne issinummi jolli bikkina ka kee'mmaalli hawwo moo'nnummo; ixxi ee ammane neese u'nnanchinne worwaataa uunxukkuuyyi neese ixxi laachcha macceensummooyyo; kaba ka hawwonne aangummi mashka'im kanni bikkinatte yaqqanto'o. Roobeelim ixxuwwina dabaraa «Niyyabbaayyonne mat luwwam issinoombee'isa wocummoyyonnihe? Ihukkaarem ki'nnuwwi i woshsha macceessakko'oyyo; Waa'im neese niyyabbaayyonne issinummi xiiqqi bikkina neese guzumo'oolla» yukko. Yooseefim ixxuwwi yito'oka la'ukko; ihukkaarem ixxuwwi Yooseef ixxuwwi woshsha la'ukkisa laqqo'oyyo; mashka'oomim ixxuwwi lambe'enne ixxuwwi woshsha Yooseefina tiraa kuroo manchi hee'ukko. Yooseefim ixxuwwi beyyiinsi mulli kollonne maraa wi'llukko; odim ixxuwwi kollonne daba'llaa wocukko; ee lasage Simi'oona ixxuwwiinsi annanni issaa ixxuwwi moo'llu'uuyyim karukko. Yooseefim ixxi awwaadaan gatto'i kee'n cananne hurbaata wonshitona ijaajukko; annannichchi diinatem ixxuwwi cananne dabaraa issiisukko; ixxuwwinam googina hasisoo sinqa amadiissakkamisa issukko. Ee lasage ixxuwwi bitaa'llo'i hurbaata hallanne iyyiixxita'a googo amaddo'o. Ixxuwwiinsim mat uulli hiimaa gattina usheexxito'i beyyonne iyyu hallichchina hurbaatika uwweena fooqaa'u ammanenne ca'n suumenne uwwu diinat daba'llaakkoo siidukko. Ixxi abbaayyuwwinam «I diinat kuno'o i ca'n suumenne issamaa daba'llaakko» yaa kurukko; ixxuwwim wodanonne baddita'a huxe'llu'uuyyi mat matina «Waa'i neesenne issukkok maruchcho?» yaqqanto'o. Ixxuwwim ee ixxuwwi anni beyyo Kana'aa'n uulla daba'llito'i ammanenne ixxuwwanne afu hawwi hundam ixxuwwi annina «Gibxi uulli gassaanchi ‹Beero'o caqassakkeena waattakko'oo keenoo› yaa qooxxaallisa wocukko. Neesem daballaa ‹Neese caqasaanoyyo neese hanqo'i manna. Neese matem anniinsi qarammaammoo tommoo lam abbaayyuwwa niinniinsi mat lehaakko; hundiinsim hoffok kabadem niyyanninne maqirem Kana'aa'n uullannette› yinaa daballummo. Ee lasage ee uulli gassaanchi ihu manchi ‹Hanqo'i keen ikkakko'isa la'oommisina ki'nnuwwi abbaayyuwwik mat iinninne maqire gatona; gattakko'i qax sibaaru ki'nnuwwi abaroosina bitaa'llakko'i hurbaata amaddakka'a mallehe. Ki'nnuwwi hoffi abbaayyom amaddakka'a waallehe; ee ammane ki'nnuwwi caqasaan ikkakkobee'isaa hanqo'i keen ikkakko'isaa la'oommo; ki'nnuwwi abbaayyom ki'nnuwwina dabaraa uwwoommo; ki'nnuwwim hassakko'aare keyye affuttakka'a daddattakkamo› yaakko» yita'a kutto'o. Ixxuwwim annannichchim ixxuwwi gaqqi cana titta'a moo'llo'i ammanenne ca'n suumenne hurbaatina uwwito'i diinat daba'llaakkoo moo'llo'o; ixxuwwim ca'n suumenne diinate moo'llo'i ammanenne ixxuwwii ixxuwwi anni Yaaqoobii baddito'o. Yaaqoobim ixxuwwina «Eese oos bee'i matayyichchi issitakkeena hassakkamuullannihe? Yooseef bee'e Simi'oon bee'e; kaba odim Biiniyaama massitakkeena hassakkamuulla; ku hawwi hundim eesenne afaakko» yukko. Roobeelim ixxi annina dabaraa «Biiniyaama ki beyyo dabaraa worumbeelas iikka lamem oosom shihe; ihukkaarem Biiniyaama iina uwwe anim ixxo kiina dabaraa woroommo» yukko. Ihukkaarem Yaaqoob «I beet kiinninne maqire marooyyo; ixxi abbaayyi lehaakko; gatukkokim xale'i ixxotte; ixxim googonne matisa ihukkaare an ka lommannanonne i beet bikkina kichchechchinne wiiddanne dilloommisa issitootto» yukko. Kana'aa'n uullanne sibaar qoxxukkuuyyi marukko. Gibxi uulliinsi aa'lla'a eebbo'i hurbaat beeddu bikkina ixxuwwi anni «Odim daba'llitakka'a Gibxi uulla mallehe; hoffi hurbaatam bito aa'llakka'a waallehe» yukko. Yihudim «Oo manchi ‹Ki'nnuwwi hoffi abbaayyo amaddakka'a waattakkobeelas i illage hincitakkeena xantakkamoyyo› yaa qoxxaallisa wocaakko. Atimdu Biiniyaama niinninne marona uwwitlas daba'llinaa malloommo hurbaatam bitaa'nnoommo. Ixximdu niinninne marubeelas malloommoyyo; mashka'oomim oo manchi ‹Ki'nnuwwi hoffi abbaayyo eebbakkobeelas i illage hincitakkamoyyo› yaakko» yukko. Ixxuwwi anni Yaaqoobim dabaraa «Mahina mulli hoffi abbaayyi yookko yitakka'a kuttakko'o? Eesem kido'i hawwonne mahina aagissakko'o?» yukko. Ixxuwwim «Oo manchi ni bikkinaa ni abaroos bikkinaa lobakata qoxxaallisa xa'mmukko; odim kabadem ‹Ki'nnuwwi anni foorinne yoohonnihe? Ki'nnuwwi mulli abbaayyi yoohonnihe?› yukko. Neesem xa'mmu xa'mmichchi bikkina Biiniyaam woshshaa ki woshshaa kullummo; ixxi ki'nnuwwi abbaayyo eebbehe yoo'isa neese maha lanqaate?» yita'a annina dabatto'o. Yihud ixxi anni Isra'eelina «Biiniyaam niinninne maqire maroo'isina i anganne uwwe; neese amandaa malloommo; oo beelas neese, atii mi'n abaroosii hundim sibaarinne lenoommo. An Biiniyaam bikkina lubbat ihoommo. Matem luwwim ixxo nakkooyyo; an dabaraa ixxo ki illagenne uullisoommo; animdu kaka issumbeelas doolli hundinam keese hawwodaammoohan ihane. Kabe'e afeebe'e ka beyyonne ammane bi'insumbeeta'n eekke'e amfaa la'mmaagge daba'llinam hee'nnummo» yukko. Ixxuwwi anni Isra'eelim ixxuwwina «Woshshoom danaamo; ka'isa ihulas an ki'nnuwwina kuroommi luwwa issehe; ka uullanne mutoo luwwi hundiinsim danaam ihukkoka moo'llakka'a hofqax marabo, lobakata enje'oo enjuwwika shitto'oo karbe'ee itakkam mishika tamiraa lawzaa ki'nnuwwi cananne issitakka'a ee manchina irifo'o massitakka'a uwwehe. Odim hurbaata aa'llakkeena amaddakko'i diinatenne eddakka'a lam suume issitakka'a amaddehe; mashka'oomim ee ca'n suumenne ihaa daba'llu diinate dabattakkamo; ayyi la'ukko huushanchinne daba'llaakkoohan ihookko. Ki'n abbaayyi Biiniyaamam amaddakka'a mallehe; ee manchinnem edammehe. Hundam xanoo Waa'i Biiniyaamaa ee beyyonne karamu ki'nnuwwi abbaayyoo ki'nnuwwinne maqire daba'llitamisina ee manchi wodano qacisona; anim i ooso hoogummisam gateenatte» yukko. Ee lasage Yaaqoob oos lam suum issita'a amaddo'i diinatee Biiniyaamaa amadda'a Gibxi uulla matto'o; eekke'e affa'a Yooseef illagenne uullito'o. Yooseefim Biiniyaama ixxuwwinne maqire moo'u ammanenne ixxi mi'n baxaa'n ijaajaanchina «Ee manna i mi'n kollo masse durakkam diinatikam duttaatta itakkam hurbaata gudise mashka'oomim ku manni balli hurbaata iinninne ittamo» yukko. Ee bikkina Yooseef awwaadaanchi Yooseef yukkisam issukko; ee mannam Yooseef mine aagisukko. Oo mannim Yooseef mi'n awwaadaanchi ixxuwwa Yooseef mine aagisukkisa moo'llo'i ammane baddita'a mat matina «Neese ka beyyo eebu mashka'i luxxeka waallummi ammane ca'n suumenne issakka'a daba'llu diinat bikkina ku manchi neesenne jolle isseenatte, dangonnem ixxi neese agid issaa ni hallam ixxi gagina massaqeenatte» yito'o. Ixxuwwim Yooseef mi'n awwaadaanchi beyyo hincita'a u'llummi goocanne ikka'a ixxena «Ni moollanna luxxeka neese hurbaata bitaa'nneena ka beyyo waallaa hee'nnummo. Galloommi mi'n kollonne daba'llinaa uulli hiimukkaare gattina usheexxinaammoo beyyonne aa'nnaa waallummi hurbaaxxi cana tillaa moo'nnummo; ee ammanenne annannichchikim uwwinummi diinat hundim daba'llaakkookoka ca'n suumenne siindummo; ihukkaarem kaba daballaa wollaammo. Odim mulli diinate hurbaata bitaa'nneena eembaammo; hinki manchi ni ca'n woronne ni diinate dabaraa issuda'e neese lanqummoyyo» yito'o. Yooseef mi'n awwaadaanchim dabaraa «Eehannina sawwitakkotte, badditakkotteme; ki'nnuwwi Waa'ii ki'nnuwwi anni Waa'ii ki'nnuwwi ca'n woronne diinate dissaakko; ee bikkina ki'nnuwwi miqqakko'oka an aa'aammo» yukko. Ee lasage Simi'oona ixxuwwi beyyo worukko. Oo awwaadaanchim ixxuwwa Yooseef mine aagisaa lasage lokko aanshaqqitam wo'o uwwukko. Ixxuwwim Yooseef balli hurbaata ixxuwwinne maqire iteena waaroo'isa laqqo'i bikkina ixxena uwwiteena eebbo'i irifo'o gudisso'o. Yooseefim waaraa mine aagu ammanenne amadda'a hee'llo'i irifo'o ixxena hincaa'lla'a ixxi illagenne otossito'o. Ixxim ixxuwwa xummaatisaa lasage «Ki'nnuwwi lommanchi anni bikkina kuttakka'a hee'llakko'o; ixxi xummannihe? Kabadem foorinne yoohonnihe?» yaa xa'mmukko. Ixxuwwim «Eeyya ni moollanna, niyyanni kabee'i afeebe'em foorinnem yookko; ixxim fayya'a» yita'a ixxena heeshito'o. Yooseefim ixxi am beeto Biiniyaama moo'aa «Kuttakko'i ki'nnuwwi hoffi abbaayyi kanennihe?» yaa xa'mmaa lasage Biiniyaamina «I beeto, Waa'i keese maasse'ona» yukko. Yooseefim ixxi ambeet qulunxi xansiisubee'i bikkina maaxamaa wi'lleena hasukko; ee bikkina qaqqisaa ixxi iinse'oo du'm woronne aagaa eekke'e wi'llukko. Ee lasage ille aanshaqqaa ixxuwwi beyyo waarukko; ixxi wodanom qoxxisaa itakkam hurbaata hincaa'llona ixxi baxaano ijaajukko. Ixxuwwim itakkam hurbaata eebba'a Yooseefina annannam uwwito'o; ixxi abbaayyuwwinam annannam mulli beyyonne uwwitto'o; ixxenne maqire hee'llo'i Gibxi uulli manninam annannam uwwito'o; mashka'oomim Gibxi uulli manni losa'nnisanne Ibro'i manni Gibxi uulli manninne mateeyyoomanne hurbaata ittambee'i bikkina eehido'i luwwi ixxuwwina haashaassoo luwwisa. Yooseef abbaayyuwwim wona wo'nnisam, hoffoka hoffaannisam Yooseef baxaan afuussito'o; mannim ixxuwwa afuussito'isa moo'llo'i ammanenne ixxuwwina'i ixxuwwim lobakata maalalta'a moo'aqqanto'o. Yooseef illagenne hee'u hurbaatiinsi ixxi abbaayyuwwina uwwito'o. Biiniyaamina uwwito'ok mulli keenina uwwito'aanniinsi onti suume lophphaakkoohan hee'ukko; ixxuwwim godditeebe'i afeebe'e itta'atii agga'atii Yooseefinne maqirem liiranto'o. Yooseef ixxi mi'n baxaano baxisoo manchina «Ee manni cananne can aa'oo qax hurbaata wonshe; odim annannichchikam diinate ca'n suumenne isse. Hoffi beet ca'n suumenne iikka birinne baxamu humbullo hurbaaxxi woronne diinatinne maqirem isse» yaa ijaajukko; ixxim Yooseef yukkisa issukko. Soodaraar daram abbaayyuwwi ixxuwwi halla amaxxita'a mattamisa issukko. Beero'iinsi hofqaxa qee'llito'isam Yooseef ixxi mi'n awwaadaanchina «Ee manna laseese ixxuwwam affoo ammane ‹Danaamina jora dabattakko'ok mahinatte? Mahina i moollannika bi'l humbullo game'llakko? Oo humbulli ixxi agoohanee qooroominne daphphu luwwa la'oohaneyyonnihe? Ki'nnuwwi eehid issimminne lobakat jolle baxxakko'ookko» yitaa xa'mme yukko. Baxaanchim afaa amadu ammane ka sagara dabaransaa wocukko. Ixxuwwim ixxena dabatta'a «Moollanna kido'i woshsha mahina woccoolla? Neese maham issinummoyyo; hassittaare neese hide'nnoommo. Ni ca'n suumenne siindummi diinate Kana'aa'n uulliinsi daballaa ki beyyo eembummisa at laqqootto; eehannah mahina ki moollanni miniinsi bira te'im worqa game'nnoommo? Niinniinsi matonne siidamukkaare ixxi lehona; odim gantummi qax kiina agid inkoommo» yito'o. Ixxim «Iitamoommo ihukkaarem humbullooma massu manchi ixxi i agishshi ihookko; gattakko'i qax xumminnem mattakkamo» yukko. Ixxuwwim qaqqissa'a halliinsi iyyo uullanne dilliissa'a annannichchim ixxuwwi gaqqi cana titto'o. Yooseef awwaadaanchim woniinsi ki'isaa ilmuchchaannonne afeebe'e danaamisa issaa hasaa humbullooma Biiniyaam ca'n woronne siidukko. Ixxi abbaayyuwwim kichche'lla'a ixxuwwi eddechcha dereetto'o; hurbaatoomam hallanne iyyiissa'a beero'i kollonne daba'llito'o. Yihudii ixxi abbaayyuwwii Yooseef mine aaggo'i ammane ixxi minennem hee'ukko; ixxuwwim ixxi illagenne uullanne ubba'a otossito'o. Yooseefim «Ku issitakko'i luchchi maruchcho? An qooroominne kido'i daphphu luwwa la'oommisa laqqakkamoyyonnihe?» yukko. Yihudim «Moollanna kiina mayyinoommo? Maha woncoommo? Te'im hinkid issinaa ni gaga muccur issinoommo? Waa'i ni baaxiilo biir issaakko; kaba ixxonne humbulli siidamukkan xale'i ihoo'n neese hundim ki agido» yukko. Yooseefim «Eehideyyo; an ee'isa issoommoyyo; xale'i humbulli siidamukkok i agishshi ihookko; gattakko'i qax ki'nnuwwi anni beyyo xumminne mallehe» yukko. Yihud Yooseef beyyo hincaa «I moollanna at Fari'oonisam ikkitti bikkina iinninne quuqqitte; an kiinninne wocoommo. At ni moollanni ‹Ki'nnuwina annii mulli abbaayyii yoohonnihe?› yitaa neese xa'mmitto. Neesem ‹Eeyya, lommanchi anni yookko; ixxim lommannanonne qaraakkoo beet yookko; ixxi abbaayyim lehaakko; ixxim amana matome annim ixxo lobakata iittoohane› yinummo. Ni moollanna atim ‹Ixxo moo'oommo i beyyo eebbehe› yitto. Neesem ‹Beet anniinsi annanni iheena xanooyyo; ixximdu annanni ihulas anni lehookko› yinummo. Ee lasage at ‹Ki'nnuwwi hoffi abbaayyi ki'nnuwwinne maqire waarubeelas la'mmaagge i illagenne hincitakkamoyyo› yitaa qoxxissitto. «Neesem niyyanni beyyo daba'llinaa mallummi ammane at yittoka ixxena kullummo. Niyyanni odim ‹Mattakka'a hofqax hurbaatam bitaa'llehe› yukko. Neesem ‹Malloommoyyo; hoffi niyyabbaayyi niinninne maqire marulas malloommo; ee beelas ee manchi illagenne hincineena xannoommi bee'i bikkina malloommoyyo› yinummo. Niyyannim niina ‹I meentichcho Raaheele iina xale'i lam ooso qatto'isa laqqakkamo. Ixxuwwiinsim mat bi'ukko. Ixxom moochchi muransaa ituda'e ixxi marukkaaniinsi kid an ixxo moo'ummoyyo. Kaba odim kaka iinniinsi annanni issitakka'a massitakka'a matisa ihulas an lommannanonne i beet bikkina kichchechchinne lehoommo› yukko. An ka beet bikkina lubbat ihaammo mashka'oomim an iyyannina ixxomdu dabarumbeelas ixxi xiiga i angiinsi hase; animdu kaka issumbeelas doolli hundannem keese hawwodaammoohan ihane» yaammo. Ee bikkina i moollanna, an ixxi bikkenne agishshi ihaa afuuroommo; ku beet ixxi abbaayyuwwinne maqirem marona. Oo beelas ixxo amadoo'n iyyanni beyyo hinkid ihaa daba'lloommo iyyannanne afoo hawwo iyyeena xanoommoyyo» yukko. Yooseef ixxi beyyonne uullito'i manni illagenne lobakata ixxi gaga egexxeena xanukkoyyo; ee bikkina hundim ixxi beyyiinsi fittona ijaajukko. Yooseefim ixxi abbaayyuwwina ixxi ayyetda'e ihukkisa kuru ammane ixxenne maqire ixxi abbaayyuwwiinsi bagaan ayyi manchim hee'ukkoyyo. Ixxim sagara fissaa wi'llukko. Gibxi uulli mannim macceesso'o; woshshoomim Fari'oon beyyo afukko. Yooseefim ixxi abbaayyuwwina «An Yooseefatte iyyanni kabadem foorinne yoohonnihe?» yukko. Ihukkaarem ixxi abbaayyuwwi kaka macceesso'i ammanenne lobakata muggitta'a hee'llo'i bikkina maham dabatto'oyyo. Yooseefim ixxi abbaayyuwwa «I beyyo hinci'llehe» yukko; ixxuwwim ixxi beyyo hincita'a lasage ixxuwwina «An Gibxi uullina ki'nnuwwi biteessakko'i ki'nnuwwi abbaayyi Yooseefatte. Kaba ki'nnuwwi eese kabeyyina biteessakko'i bikkina gaabbitakkotte te'im kichche'llakkotte; mashka'oomim Waa'i manni foore gatiseena hasu bikkina ki'nnuwwiinsi gaassaa eese asse'aakko. Uullanne sibaar aagukkaanniinsi kuk la'm hiincho; abuullakkambee'ekii murakkambee'ekkii onti hiinchi gataakko. Waa'i gaassaa ki'nnuwwaa ki'nnuwwi shumo'oo gatiseena sawwaa eese asse'ukko. Hanqinam ki'nnuwwi eese kabeyyo asse'llakko'oyyo. Ihukkaarem Waa'i eese asse'ukko; Fari'ooninam sogoo annisa ihoommisa issukko; anim ixxi mininaa luwwi hundinam gassaancho, odim Gibxi uulli hundam gassoommane. «Kabadem qaqqissakka'a iyyanni beyyo daba'llehe; ixxenam ‹Waa'i eese Gibxi uulli hundam gassaanchi issaakko; ee bikkina qaqqissaa i beyyo waare. At ki oosoo ki oos oosoo ki gereebbaa ki fella'aa ki laroo kiina yoo luwwi hundam amaddaa waare; iina abbis beyyonne Geeseemanne hee'llootto. Geeseemanne ikkittaare an kiina hasisoo luchchi hundam issoommo; kabadem onti hiinchi sibaar yoo bikkina kiina, ki abaroosinaa ki horinaa sibaattakka'a letakkambee'isa an hurbaata uwwoommo› yaakko yitakka'a kullehe» yukko. Odim Yooseef «Hanqoominam wocoommok an Yooseefatte ihummisa ki'nnuwwi illi moo'aakko; iyyabbaayyi Biiniyaamim moo'aakko. Mattakka'a iyyannina an Gibxi uullanne hinkaa'n nuurinne yoomda'e moo'llakko'i luwwi hundam ixxena kullehe; iyyannam qaqqissakka'a i beyyo eebbehe» yukko. Ixxim wocaa gullaa lasage ixxi abbaayyi Biiniyaam gaanje qaaphphaa wi'llukko; Biiniyaamim ixxo qaaphphaa wi'llukko. Odim gatto'i ixxi abbaayyuwwi hundam qaaphphaa wi'llukko; ee lasage ixxi abbaayyuwwi hundim ixxenne maqire atooratto'o. Fari'oonim Yooseef abbaayyuwwi ee beyyo waatto'isa macceesaa liiramukko; ixxi beshshuwwim liiranto'o. Fari'oonim Yooseefina «Kiyyabbaayyuwwi hallanne hurbaata iyyiissa'a Kana'aa'n uulla daba'llitamisina kure. ‹Ki'nnuwwi annaa ki'nnuwwi abaroosaa ammaddakka'a ka beyyo daba'llehe; an ki'nnuwwina Gibxi uullanne danaam harish beyyo uwwoommo; ka uulli danaam hurbaatam ittakkamo› yaakko yitaa kure» yukko. Odim adil «Atim ixxuwwina Gibxi uulliinsi faraxxi gaare'e amadda'a matta'a ixxuwwi meentoo hoffi oosoo annaa saa'llissa'a ka beyyo eebbona kure. Odim ixxuwwi ee beyyonne yoo ixxuwwi luwwina kichche'llambee'isa kure; ixxuwwi Gibxi uulla affam ammane danaam luwwi hundim ka beyyonnette» yukko. Isra'ee'l oosim Fari'oon ixxuwwina yukkisam issito'o; ee ammanem Yooseef Fari'oon ijaaccisa Faraxxi gaare'uwwaa gooqqi sinqaa ixxuwwina uwwukko. Odim hundinam haareechchi eddechcha uwwukko; ihukkaarem Biiniyaamina sas xibbi kin biraa onti haareechchi eddechchaa uwwukko. Ixxi anninam Gibxi uulli danaam luwwiinsi tommi hallanne iyyiisukko; odim gooqqi sinqinam daabbo'oo wix hurbaataa tommi meenti hallanne iyyiisukko. Oo hundim gudaa lasage Yooseef ixxi abbaayyuwwa geegeesaa daba'llu ammane ixxi abbaayyuwwina «Googonne jorantakkambee'isa» yukko. Yooseef abbaayyuwwim Gibxi uulla utta'a Kana'aana daba'llita'a ixxuwwi anninne edanto'o. Ixxuwwim ee beyyo affa'a lasage annina «Yooseef foorinnem yookko. Ixxim Gibxi uulli hundinam gassaanchi ihaakko» yita'a kutto'o. Yaaqoobim kaka macceesu ammanenne maggukko; ixxuwwam amma'nnukkoyyo. Ihukkaarem ixxuwwi Yooseef kurukkoka hundam kutto'o; ixxim ixxo Gibxi uulla wottona asse'u faraxxi gaare'e moo'u ammanenne muggiinsi daba'llukko. Isra'eelim «I beet Yooseef kaballi afeebe'e foorinne Yoolas ookki iina ihookko; an lehoo'n gaassaa ixxo moo'eena maroommo» yukko. Isra'eela yamamu Yaaqoob ixxena yoo luwwi hundam wixxaa'aa amadaa Bersaabe'i beero'onne ixxi anni Yisaaq Waa'ina kitimukko. Ixxim ee beyyo afaa lasage Waa'i hii'm kaaltanne ixxena moo'amaa «Yaaqooba, Yaaqooba» yaa weeshukko. Yaaqoobim «An keyye yoommo» yaa dabarukko. Waa'im ixxena «An kiyyanni Waa'a; Gibxi uulla marimma boddititte; mashka'oomim ee beyyonne ki shumo'o lobakat minaadab issoommo. Ee Gibxi uullam an kiinninne maqire maroommo; odim an ki shumo'o ka uulla dabaraa woroommo; ki foor firukkuuyyi Yooseef ixxi anginne ki ille ifiisookko» yukko. Ee lasage Yaaqoob Bersaabe'e uraa marukko; ixxi oosim ixxuwwi oosoo ixxuwwi meentoo Gibxi uulli Fari'oon asse'u faraxxi gaare'enne afuussito'o. Odim ixxuwwi gereebbaa laroo Kana'aa'n uullanne ixxuwwina hee'u luchchi hundam amadda'a Gibxi uulla matto'o; Yaaqoobii ixxi abaroosim ixxuwwinne maqirem matto'o. Ixxi oosii ixxi oos oosii ixxi landik goo'n oosii landii ixxi shumo'i hundim ixxenne maqirem Gibxi uulla matto'o. Gibxi uulla maru Yaaqoob shumo'i kane; Yaaqoobina won beet Roobeelatte; Ixxi oosim Heenookatte' Faalu'atte' Heesiroonattee Kaarmi'attee hee'llo'o. Simi'oon oos Yimu'eelatte' Yaamiinattee Oohaadattee Yaakinattee Xoohaaratte' Kana'aa'n uulli meentichchoonsi qaramu Shaa'uulattee hee'llo'o. Leewi'i oos Geershoontte, Qa'aatattee Maraarattee hee'llo'o. Yihud oos Eeratte, Oonaanatte, Sheela'atte, Faareesattee Zaaraahattee hee'llo'o. Eerii Oonaanii Kana'aa'nnanne uullanne hee'llo'i ammane leto'i keeno. Faarees oos Heesiroonattee Hamuulattee hee'llo'o. Yisaakoor oos Toollatte, Fuuwwatte, Yaashuubattee Shiimiroonattee hee'llo'o. Zaabiloon oos Seereedatte, Eeloonattee Yaahiila'eelattee hee'llo'o. Oo keen hundim lam daajji lambe'i uullanne hee'llo'i ammane Liya'a Yaaqoobina qatto'i keeno. Odim Diina yakkam landichchom qatta'a hee'llo'o; Liya'a Yaaqoobina qatto'i oos landii goonii hundim sadee sas horoore. Gaad oos Xaafoonatte, Hage'ette, Shuunatte, Eexboonatte, Eeratte, Aaroodattee Ari'eelattee hee'llo'o. Aseer oos Yimiinatte, Yishiwwatte, Yishiwiinattee Beeri'attee ikka'a ixxuwwi aayyam Seeraahattee hee'llo'o. Beere'i oos Heebeerattee Maaliki'eelattee hee'llo'o. Oo tommii lohem oosim Laaba'a ixxi landichcho Liya'ana uwwu agishsho Zalafaansi qaranto'i Yaaqoob shumo'i hee'llo'o. Yaaqoob meentichcho Raaheel oos Yooseefattee Biiniyaam attee hee'llo'o. Gibxi uullanne Yooseef Heeliyoota yakkam beero'onne qeessichchi ihu Phooxiifaar landichcho Asnaateensi Minaasee Efireemaa lam ooso qarukko. Biiniyaam oos Beelatte, Beekeeratte, Asbeelatte, Geeratte, Naa'imaanatte, Eehatte, Rooshatte, Muufiimatte, Huufiimattee Araadattee hee'llo'o. Oo tommii soorem oosim Raaheele Yaaqoobina qatto'i shumo'o. Daan beet Huushumatte. Niftaaleem oos Yaahixi'eelatte, Guni'atte, Yeexeerattee Shiileemattee hee'llo'o. Oo lamarem oosim Laaba'a ixxi landichcho Raaheelena uwwu agishsho Baala'aansi Yaaqoobina qaramu ooso. Yaaqoobinne maqirem Gibxi uulla matto'i Yaaqoob shumo'i hundoomim ixxi oos meenti bee'eka lohayyee loh horooree hee'llo'o. Gibxi uullanne Yooseef lam ooso qarukko. Ee bikkina Yaaqoobinne maqire Gibxi uullanne hee'llo'i ixxi shumo'i hundoomim lamarayyi horoor hee'llo'o. Hundiinsim gaassaa maraa Geesee'm uulla afoo'isinaa Yooseefinne edamaa kuroo'isinaa Yaaqoob Yihuda asse'ukko. Ixxuwwim Geeseema affo'o. Yooseefim araxxi gaarre'e gudisaa anna aa'eena Geeseem afeebe'e marukko. Ixxim anna moo'u ammanenne annika gaanje qaaphphaa lobakat ammane wi'llukko. Ee lasage Yaaqoob Yooseefina «At foorinne hee'llittuuyyi moo'umlas kaba lehane» yukko. Yooseefim ixxi abbaayyuwwinaa ixxi anni abaroosinaa «An Fari'oon beyyo maraa ‹Kana'aa'n uullanne hee'llo'i iyyabbaayyuwwii iyyanni abaroosii i beyyo waatto'ookko› yaa kuroommo. Odim ki'nnuwwi allaaraan ikkakko'isaa ki'nnuwwi gereebbaa laroo ki'nnuwwina yoo luchchi hundam amaddakka'a waattakko'isaa kuroommo. Faari'oonim ki'nnuwwa weeshoo ammane ki'nnuwwi bax maruchda'e xa'mmulas oosoommaniinsi ki'isaa kabad afeebe'e gereebbaa laroo allaaraan ikkakko'isaa ki'nnuwwi anno'im baxxam hee'llo'i bax kanem ihukkisaa ixxena kullehe. Ka'isa issitakka'a lasage Geeseema yakkam uullanne afuuttakkamisa issookko» yukko. Yooseef ka'isa yu mashka'i Gibxi uulli manni illagenne gereebba allaaraan gadanto'oo manni ikko'i bikkinatte. Yooseefim Fari'oon beyyo maraa «Iyyannii iyyabbaayyuwwii Kana'aa'n uulliinsi gereebba, fella'aa laroo ixxuwwina yoo luchchi hundam amadda'a waatta'a Geeseemanne yo'o» yukko. Ixxi abbaayyuwwiinsim onto Fari'oon illagenne hincaa'ukko. Fari'oonim ixxuwwa «Ki'nnuwwi bax maruchcho?» yaa xa'mmukko; ixxuwwim «Neese ki awwaadaan niyyanno'isam gereebba allaaraano. Ka uullanne koyyinano afuulleena waallaammo; mashka'oomim Kana'aa'n uullanne sibaar lophphaakko. Ni gereebbi itoo hixim bee'e. Kabadem keese uunxinoommok Geeseemanne afuulloommisa issitonatte» yito'o. Fari'oonim Yooseefina «Kiyyannii kiyyabbaayyuwwii ki beyyo waatto'ookko. Oono'o, Gibxi uulli ki angannette; at hassitti danaam hix yoo uullanne Geeseemanne kiyyannii kiyyabbaayyuwwii afuuttamisa isse; odim ixxuwwi lambe'iinsi annanni lachchi yoo keeno laqqilas i diinaxxi allaaraano ijaajjamisa isse» yukko. Ee lasage Yooseef ixxi anni Yaaqooba Fari'ooninne la'anisukko; Yaaqoobim Fari'oona maasse'ukko. Fari'oonim «Ki umur hinkaa'nna ihaate?» yaa xa'mmukko. Yaaqoobim «Iina mat xibbee sad hiinchoo ihaakko; i heechchi doollim hoffanee kee'mmaalla; iyyanno'i ixxuwwi doollenne koyyinano hee'llo'i qaxam hee'ummoyyo» yukko. La'mmaaggem Yaaqoob Fari'oona maasse'aa lasage annanni ihukko. Yooseefim ixxi anninaa ixxi abbaayyuwwinaa Fari'oon ijaajukkisam Gibxi uullanne Raamse yakkam danaam uullanne beyyo uwwukko. Odim Yooseef ixxi annina, ixxi abbaayyuwwinaa ixxuwwi abaroosinaa hundinam ihoo hurbaata uwwakkamisa issukko. Uulli hundannem hurbaat bee'i bikkina kee'mmaalli sibaar hee'ukko. Gibxi uulli mannii Kana'aa'n uulli mannii ee sibaarinne hawwodanto'o. Yooseefim ixxuwwina «Ki'nnuwwi diinat hundim beeddulas ki'nnuwina yoo hora eebbehe; anim ee horinne dabassaa hurbaata uwwoommo» yukko. Ee bikkina ixxuwwi farado, gereebba, laroo hallaa eebba'a Yooseefina uwwito'o. Yooseefim ee maarage ixxuwwi eebbo'aanninne dabassaa hurbaata uwwukko. Oo hiinchi higaa la'm hiinchi waaru ammanenne ixxi beyyo waatta'a «Ni moollanna kiinniinsi maanxoommi luchchi bee'e; ni diinat beeddaakko; odim ni hor hundam kiina uwwinaammo ni gagiinsii ni uulliinsii bagaan hurbaata a'llinona niina gatu luchchi mahim bee'e. Neese lenona cawwitaa uttitte; mat luchcho isse; ni uullim bi'oone; neesee ni uullaa hurbaatinne bitaa'e; neesem Fari'oon agid inkoommo; ni uullim ixxan ihona; neese lenoombee'isa hurbaata uwwe; ni uullim wixamoo'n kora'a garoobee'isa sire'e uwwe» yito'o. Yooseefim Gibxi uulli manni sibaar lophphu mashka'inne biteesso'i uulli hundam Fari'oonina bitaa'ukko; uullim Fari'oonan ihukko. Ixxim Gibxi uulli tochchiinsi tochchi afeebe'e mat idiinsi amadaa mulli idonne afeebe'e yoo manni hundam Fari'oonina agid issukko. Yooseef aa'ubee'i uulli xale'i qeessuwwi uulla; mashka'oomim Fari'oon ixxuwwina aganina aganina ihoo qax hurbaata uwwam hee'u bikkina ookki ixxuwwi uulla biteessambee'isa hara'mmam hee'ukko. Yooseefim ee mannina «Kaballa ki'nnuwwaa ki'nnuwwi uullaa an Fari'oonina bitaa'aammo; ee bikkina ka beyyonne sire'i yookko massitakka'a wixxehe. Ihukkaarem hurbaatooma wixxaa'llakkam ammane ontiinsi matooma Fari'oonina uwwehe; gatu qaxoom sire'ina, ki'nnuwwi gaginaa ki'nnuwwi abaroosinaa hurbaat ihona» yukko. Ixxuwwim dabatta'a «Ni moollanna ni foore at gatissaatto; neesem Fari'oonina agid inkoommo» yito'o. Ee bikkina Yooseef Fari'oonan ihubee'i qeessuwwi uulliinsi bagaan wix hundiinsim ontiinsi mat suum Fari'oonina ihoo'isina Gibxi uullanne seera fissukko; oo seerim kaballi afeebe'em baxoolla. Isra'ee'l minaadab Gibxi uullanne Geeseemanne afuutto'o; ee beyyonnem lobakat amaxxa siidda'a goddito'o; odim lobakat oosom qatto'o. Yaaqoobim Gibxanne tommoo lamar hiinchoo hee'ukko; Yaaqoobikim heechchi doolli hundoomim mat xibbee soree lamar hiincho'o. Yaaqoobim lehoo amman hincu ammanenne ixxi beet Yooseefa weeshaa «Animdu ki illagenne nuura siidaammoolas ki anga i gurubbonne issitaa eese ka Gibxi uullanne waammitoobee'isa hide'e. An lehoommi ammane eese Gibxinsi massitaa iyyanno'i waammi yoo beyyonne waamme» yukko. Yooseefim dabaraa «At yittisam issoommo» yukko. Yaaqoobim dabaraa «Kaka issitoo'isina hide'e» yukko. Yooseefim ixxi yukkisam hide'ukko; ee lasage Yaaqoob ee beyyonne ixxi ara'anne afuurukkisam Waa'a galaxxukko. Hofqax ammaniinsi lasage Yooseefina «Kiyyannina xissaakko» yakka'a kurakko'o. Ixxim lamem ixxi oosom Minaasee Efireemaa amadaa anna moo'eena marukko. Yaaqoobinam «Ki beet Yooseef waaraakko» yakka'a kurakko'o; Yaaqoobim ki'aa ixxi ara'anne afuurukko. Yaaqoobim Yooseefina «Hundam xanoo Waa'i Kana'aa'n uullanne Looza yakkam beyyonne moo'amaa eese maasse'ukko. Ixxim an keese mishaam issoommo; fikkaannisoommo; lobakat minaadaphphi dummichchisam issoommo; ka uullam kiinniinsi lasage doolliinsi doolli afeebe'e ki shumo'ina uwwoommo» yukko. «Kabadem an ki beyyo waareena illage Gibxi uullanne qaranto'i ki lamem oosim Efireemii Minaasee iihan ikkamo ixxuwwim iina Roobeelisaa Simi'oonisaa ikkamo. Ixxuwwiinsi lasage qattoo oosim kiihan ihona; ixxuwwim uulla baxxantamok lamem abbaayyuwwi summinnetteme. Anim Masphexoome'iinsi waarummi ammane Efiraata aageena hofqax gataakkoohaannonne googonne hee'ummuuyyim Kana'aa'n uullanne kiyyumma Raaheele leto'o; is bikkinam lobakata kichche'aa Efiraat googonne waammummo» yukko. Efiraatim kaba Beetaliheema yamamookko. Isra'eelim Yooseef ooso moo'aa «Kukeen ayyayyaamo?» yaa xa'mmukko. Yooseefim «Ku keen Waa'i ka uullanne uwwu i ooso» yukko. Ixxim «An maasse'oommo i kollonne hincaa'e» yukko. Isra'eelikim illi lommanna'n mashka'inne lobakata siidam hee'ukkoyyo; ee bikkina ixxi kollonne hincaa'ukkaare qaaphphaa suunqukko. Isra'eelim Yooseefina «Ki ille moo'oommo yaa sawwummoyyi hee'ukko; ihukkaarem Waa'i odim ki shumo'om moo'isukko» yukko. Yooseefim ixxi ooso Yaaqoob gubeediinsi ki'isaak uullanne guruphphaa heeshukko. Yooseefim ixxi lamem oosom Isra'eel beyyo massukko; Isra'eel makki kollinne Minaase qeddi kollinne odim Efireema issaa ixxi kollonne hincaa'ukko. Isra'eelm lob beet Minaas horoorenne issimmi hasisam hee'u ixxi makki anga woroon higisaa hoffi beet Efireem horoorenne issukko; qeddi anga odim Minaas horoorenne issukko. Yaaqoobim Yooseefa «Iyyanno'i Abrihaamii Yisaaqii ixxi illagenne matto'ok, eesem hoffoomaniinsi ki'isaa kaballi afeebe'e allaaru Waa'i, eesem jor hundiinsim egeru Waa'i asse'amaanchi ixxi ka ooso maasse'ona; i summii iyyanno'ik Abrihaamikii Yisaaq summii ixxuwwinne weeshamona; uullannem lobakata fikkaannitona» yukko. Yooseefim ixxi anniixxi makki anga Efireemmanne issukkisa moo'u ammane liiramukkoyyo; ixxi anni makki angam Efireem horooriinsi ki'isaa Minaas horoorenne isseena ihukko. Anninam «Iyyanna, ee'isayyo won kane; ki makki anga kanni hanenne isse» yukko. Annim sabaa «I beeto, an la'oommo odim Minaas shumo'im lobakat minaadab ihookko; ihukkaarem hoffi abbaayyi ixxeensi lophphookko; ixxi shumo'im lobakat minaadab ihookko» yukko. Ee balla ki'nnuwwi summinne Isra'ee'l oos ‹Waa'i keese Efireemisaa Minaasisaa issona› yita'a maasse'llamo yaa maasse'ukko; ee'isinne Yaaqoob Efireema Minaaseensi illag issukko. Ee Lasage Isra'eelim Yooseefina «An lehoommi amman hincaakko; Waa'im kiinninne maqire ihookko; kiyyanno'i uullam ki'nnuwwina dabarookko. Anim Amoore'i manniinsi bisa'innee bagadinnee massummi duu'n gabonne yoo Seekeema yakkam harish uulla kiyyabbaayyuwwiinsi lonsaa kiina uwwaammo» yukko. Yaaqoobim ixxi ooso hundam weeshaa «Wixxitakka'a i gadanonne hinci'llehe ka lasaqqi doollenne ki'nnuwwanne afoo luwwa ki'nnuwwina an kuroommo. «Ki'nnuwwi Yaaqoob oos wixxi'llehe; ki'nnuwwi anni Isra'eeliinsi macceessehe; «Roobeela at i won beeto, i malaayye iinam i gurubbiinsi fittitti luxxaneme; lombi awwonsaanchoo; malaayyinam awwonsaancho. Jambo'l wo'isa ikkitti bikkina awwonsaanchi ihimmi kiina ihooyyo; mashka'oomim at kiyyanni ara'anne fittaa kiyyanni bakki meentichchonne iinse'llaatto; i ara'am haashaassitaatto. «Simi'oonii Leewi'ii abbaayyuwwa; ixxuwwika boqqoo'm bisa'uwwam manna shimmina awwaaxxitamuulla. Ixxuwwi aranchanne i foor exxooyyo; ixxuwwi dummichchinne maqire i wodan mat ihooyyo. Mashka'oomim ixxuwwi quunqinne manna shito'ookko. Lobakat moolluwwam iiqansito'ookko. Ixxuwwi quunqi moochchisa ihu bikkina duumamaakkoohan ihona. Ixxuwwik nadajjim qishixxat bee'an hee'ukko. An ixxuwwa Yaaqoobanne baxxansoommo; Isra'eelannem binnaa'oommo. «Yihuda, kiyyabbaayyuwwi keese galaxxoolla. Ki angi ki maso'i hanennette; kiyyanni oos kiina otossitamo. Yihud hobbichchisa itoo luwwa shaa ixxi ma'nnanne massaa daabbaroo hobbichchisa. Maham daabbarukkaare ee beyyiinsi ixxo holleena ayyi xanookko? ‹Gassaanchi ihukkok waareebe'e adilla'n bicci Yihudiinsi gassaa'n mugim ixxi shumo'i lambe'iinsi bee'ooyyo; minaadabim ixxena ijaajamoo'isa issookko. Hallichchi geexa woyi'n xudinne hallichchi wotaram woyi'n geejji xudinne karookko. Ixxi eddechcham woyininne aanshookko. Hanenne edde'ookkokam xiiga laboo kashar woyininne aanshookko. Ixxi illim woyiniinsi lophphaa kashara. Ixxi inqim adiinsi lophphaa qadaalla. «Zaabiloo'n dambalaq tochchonne afuurookko; ixxim markabbuwwi uulloo beyyi ihookko. Ixxi uulli gabalim Siidoon afeebe'e afookko. «Yisaakoor miqe qoxxaalli hallichcho. Ixxim gereebbi oroxxi lambe'enne usheexxookko. «Oo usheexxu beyyim danaam ihukkisa moo'ukko. Oo beyyim harish uulli ihukkisa moo'aa ixxi gudumo iyyina heeshaa'ukko. Agixxisam kee'mmaalli baxo baxookko. «Isra'ee'l moolliinsi matisa Daan ixxi moollonne oogatookko. «Daan googonne yoo hamashshichchisa; gooqqi inqennem jor qubaam qasoo hamashshisa farashshi qubinne qasaa dimisookko; Farashshaanchim afaree'n kollonne ubukko. «I Moollanna ki gatishsha egeroommo. «Gaad moollonne lobakat gaadaan gaaddamo. Ixxim odim hollamaa ixxuwwanne gaadookko. «aseer hurbaata goddaancho; adilluwwina liiransoo hurbaata uwwookko. «Niftaaleem tiramaa taakke'ukkuuyyi hee'oo mishisoo wotalla qaroo kukkussichchisa. «Bu'i gadanonne mishoo haqqichchisa Yooseef mish wo'mmaakkoo haqqichcho; ixxi caafim haraara. Ixxom xiyyinne hollansitu'uuyyi hasso'o; qasso'ome ixxom sabbo'o. Ihukkaarem ixxi xiyyi hore'em ubukkoyyo. Oo Isra'eela egeraanchi kiina hara'mmookko. Ixxi angi Yaaqoob malaayyaam Waa'inne qoxxukko. Keese hara'mmu kiyyanno'i Waa'i keese maasse'u hundam xanoo Waa'i Iimaniinsi waaroo luwwinnee uulliinsi firoo luwwinnee keese maasse'ookko. Ki anuu'n adoo ki godaphphi misham maasse'ookko; keesem maasse'ookko. Kiyyanni maassi geejjuwwi ihu duunnuwwiinsi lobane. Doolliinsi doolle hee'oo duuniinsim ixxi maassi lobane; Ixxi abbaayyuwwi lambe'iinsi ixxi doo'llamaakkoohane. Oo maassim Yooseefina ihona. «Biiniyaam sibaaraa itoo orokkichchisa; ixxim shaa eebukkoka soodaraaronne itukko. Hiimom shaa eebukkoka annanni issaa dissukko» yukko. Ku keen tommoo lam Isra'ee'l mooll, ixxuwwinam ixxuwwi anni annannichchinam hasisoo maasso maasse'ukko. Ee lasage ka'isa yaa ixxuwwa ijaajukko; «An lehoommi ammane i leesha iyyanno'i waamminne maqirem Abrihaam Hiitekkichchi efrooniinsi uullinnem edaa aa'u makkaa'n beyyonne waammehe. Ixxim Kana'aa'n uullanne Maammire yakkam beyyi illagenne yoo Maakfee'l Daawwa'a; oo beyyim Abrihaam Hiitkkichchi Efirooniinsi waammi beyyi ihona aa'ukkane. Abrihaamii ixxi meentichcho Saara'aa ee beyyonne waammamto'o; Yisaaqii ixxi meentichcho Irbiqam eekke'em waammamto'o. Eehanniinsi odim i meentichcho Liya'a an waammummo. Oo waammi beyyi ee balla Hiite'i oosiinsi bitaa'amaakkoohane» yukko. Yaaqoobim ijaajo oosina kuraa guullu ammanenne ixxim ara'anne iinse'aa lasage foor firukko. Ixxi moollonnem exxukko. Yooseef ixxi anni lehukkisa moo'u ammanenne ixxi anni leeshanne ubaa suunqukkuuyyi wi'llukko. Ee lasage Yooseefim Gibxi uulli losa'nnisam ixxi anni leesh boboobee'isa qararinne gokkisoo qaraa'l manna ijaajukko, qaraare laqqam keenim Isra'eel leesha qaraarinne gokkisso'o. Ixxuwwim ixxi leesha sor balli afeebe'e qaraarinne gudissa'a guullito'o. Gibxi uulli mannim ixxena lamarayyi balla wi'llito'o. Wi'llimmi ayyaamim beeddaa lasage Yooseef Fari'oon gassaanino issu keenina «He'i Fari'oonina. ‹Iyyanni leheena illage Kana'aa'n uullanne ixxena gudu beyyonne ixxo waammona hidiisaakko› ee bikkina iyyanna waammaa daba'lleena maroommo» yukko. Fari'oonim dabaraa «Mare hide'llittisam kiyyanna waamme yaa» yukko. Ee lasage Yooseef ixxi anna waammeena marukko. Fari'oon gassaan issu keen, adi'l mi'n gatte awwonsaanii Gibxi uulli lommannii hundim Yooseefinne maqirem matto'o. Yooseef abaroos' ixxi abbaayyuwwii ixxi anni abaroosii hundim ixxenne maqirem matto'o. Geeseemanne xale'i hoffi oosiinsi, ixxuwwi gereebbiinsi, fella'iinsii lariinsii bagaan ayyim gatukkoyyo. Faradonnee gaarre'ennee afuutto'i mannim ixxenne maqire matto'o. Maru mannim hore'em lobakat hee'ukko. Ixxuwwim Yoordaanoos daajji eeqidonne «Axaad» yakkam oodo'o affa'a sagara fissita'a wi'llito'o. Yooseefim ixxi annina lamar balla wi'llishukko. Ee uullanne hee'llam Kana'aa'n manni Axaad oodo'onne ihu wi'llo moo'lla'a Gibxi uulli manni lobakata xishshita'a wi'llitamuulla yimminne ee beyyika summa «Gibxi uulli manni wi'llishshi beyyo» yita'a weeshsho'o. Ixxim Yoordaanoos gadanonnette. Yaaqoob oosim ixxuwwi anni ijaajukkisa issito'o. Ixxi leesha Kana'aa'n uulli afeebe'e iyyita'a Maammire'i hujuphphi gadanonne yoo Maakfeela yakkam daawwa'anne waammito'o. Oo beyyim Abrihaam keexekkichchi Efrooniinsi waammi beyyi ihona aa'u uulla. Yooseefim anna waammaa lasage Gibxi uulla daba'llukko. Ixxi abbaayyuwwii waammiseena matto'i mannii hundim ixxenne maqirem daba'llukk. Yooseef abbaayyuwwi ixxuwwi anni lehaa lasage «Ayyi la'ukko neese ixxonne issinummi jolle sawwaa neesenne baado dabarookko» yita'a baddito'i bikkina Yooseef beyyo «Kiyyanni leheena illageen niina ‹Kiyyabbaayyuwwi keesenne issu jolle uraammo yihe yitakka'a kullehe› yukko. Ee bikkina neese keesenne issinummi jolle niina haafihe; neese odim kiyyanni Waa'ina ijaajammoommi keeno» yita'a ooso asse'llo'o. Yooseefim eekka macceesu ammanenne wi'llukko. Ee lasage Yooseef abbaayyuwwi ixxi beyyo waatta'a ixxi illagenne heeshita'a «Neese ki agido» yito'o. Ihukkaarem Yooseef ixxuwwina «Badditakkotte an Waa'ayyo. Ki'nnuwwi eesenne jolle sawwitakko'o; ihukkaarem Waa'i kaballa ihukkisam lobakat minaadab gatoo'isa iina danaam luwwa issimminne dabarukko. Kabadem ihukkaare badditakkotte; ki'nnuwwinaa ki'nnuwwi oosinaa hasisoo luchcho an issoommo» yaa ixxuwwi wodano qoxxisukkoo liiraansukko. Yooseefii ixxi anni abaroosii Gibxi uullanne afuutto'o. Yooseefim mat xibbee tommi hiinchoo hee'ukko. Ixxim Efireem oosoo Efireem oos oosoo moo'eebe'e hee'ukko. Minaas beet Maakiir oosim Yooseef anganne qaranto'o. Yooseefim ixxi abbaayyuwwina «An lehoommi amman afaakko; ihukkaarem Waa'i ki'nnuwwinne maqire ihookko. Ka uulliinsim fissaa Abrihaamina, Yisaaqinaa Yaaqoobinaa uwweena hide'u uulla ki'nnuwwina uwwookko» yukko. Yooseefim Isra'ee'l minaadabina «Waa'i ki'nnuwwa ka uulliinsi fissoo ammane i miqe fissitakka'a amaddakka'a mallehe» yaa hidiisukko. Yooseefim Gibxi uullanne mat xibbee tommi hiinchoo hee'aa lehukko. Ixxuwwim ixxi leesha shamoobee'isa issoo qaraarinne gokkissa'a Gibxi uullannem Saaxinanne issita'a dissito'o. Mi'n abaroosa amadda'a Yaaqoobinne maqirem Gibxa matto'i Isra'ee'l oosik summi «Roobeelatte, Simi'oonatte, Leewe'ette, Yihudatte, Yisaakooratte, Zaabiloonatte, Biiniyaamatte, Daanatte, Niftaaleematte, Gaadattee Aseerattee. Yaaqoob shumo'i hundim lamarayyi hee'llo'o. Ihukkaarem Yooseef illagem Gibxanne hee'ukko. Doolluwwiinsi lasonne Yooseef, ixxi abbaayyuwwii ee qaranchina anno'ii hundim leto'o. Ihukkaarem Isra'ee'l oos fikkaannitu'uuyyi matto'o; ixxuwwikim xig lophphukkuuyyi maru bikkina Gibxi uullanne wo'mmito'o. Ee lasage Yooseef bikkina la'oobee'i haareechchi adil Gibxi uullanne ki'ukko. Ixxim minaadabina «Oono'o Isra'ee'l minaadaphphek xig dutaakko; ixxuwwi niinniinsi malaayyitu'uuyyi matteenatte. Ee bikkina ixxuwwik xig exxoobee'isa, or ki'uta'nnim ni diina'inne hara'mmanta'a neese qassambee'isaa uulliinsim gibba'a mattambee'isaa mat luwwa qooccinona» yukko. Ee bikkina u'nnissu'uuyyi kee'mmaalli baxo baxissam keeno doo'llito'o; Faari'ooninam Fiitoomaa Raamsee yakkam qoxxaalli beero'uwwa baxxo'o. Isra'ee'l oos wor amadanto'aarem ixxuwwik xig dutukkuuyyii uullannem wo'mmukkuuyyii marukko. Ee bikkina Gibxi uulli manni Isra'ee'l ooso baddito'o. Qishixxatbee'i monginnem baxisimma asheetto'o. Hara kade'isimminne, xuuba baxisimminnee uulla abuullisimminnee u'nnissu'uuyyi kee'mmaalli baxo baxissu'uuyyi ixxuwwika heechcha qaraassito'o. Gibxi minaadab ixxuwwa baxissam hee'llo'i baxonne hundannem ixxuwwina hore'em qishixxitam hee'llo'oyyo. Ee lasage Gibxi uulli adil Ibro'i meenti qaroo ammane qassiissam lam meento Siiphaaraa Fuhaa weeshaa «Ibro'i meenti qaroo ammane goonchi qaramulas ee ammanem shi'llehe. Ihukkaarem landi ihulas shitakkotte» yukko. Ihukkaarem oo meenti Waa'a baddito'i bikkina Gibxi uulli adil ijaajukkisa issito'oyyo; goon oosom shito'oyyo. Ee lasage Gibxi uulli adil ee meento weeshisaa «Goon ooso shitakkobee'i mashka'i maha?» yaa xa'mmukko. Ixxuwwim «Ibro'i meenti Gibxi meentisayyo; ixxuwwi qoxar meenti ikko'i bikkina neese amfoo'nnim gaassita'a qattamo» yita'a dabatto'o. Ee lasage adil «Ibro'ika haareechcho qaramoo goo'n ooso hundam massitakka'a Abbaayyi daajjenne uunjehe; ihukkaarem landa nakkitakkotte» yaa minaadaba ijaajukko. Ee lasage Leewi'i sulliinsi mat manchi ee sulliinsim mat landichcho eebukko. Isem goonchi beeto ixxena qatto'o; oo ciilichchim mishisoohan ihu bikkina sas aganina maaxxo'o. Ihukkaarem eehanniinsi loboka maaxxeena xantobee'isa laqqa'a saaxi'nnisa issakka'a leendinne baxakko'oo sananna wo'i aagoobee'isa leeyya nannita'a axisso'o; ee ciilichchom sanannanne issita'a daajji gammalanne leendi woronne dissito'o. Ee ciilichchi aayyam ixxonne afoo luwwa moo'lleena qee'llonnetti ikka'a egettam hee'llo'o. Ee lasage Faari'oon landichcho aanshaqqiteena daajje dillito'o; is awwaadaanim daajji gammalanne taakke'antam hee'llo'o; isem leendi woronne mat sananna moo'lla'a is awwaadaaniinsi mate ee sananna eebbamisina asse'llo'o. Sanannam fooqaa'lla'a mat ciilichcho moo'llo'o; wi'llam hee'u bikkinam qishixxito'o. Isem «Kuk Ibro'i ciilluwwiinsi mato» yito'o. Ee ammanenne ee ciilina aayya adi'l landichchona «Ka ciila iicissu'uuyya kiina li'issona Ibro'i meentiinsi mate weeshonnihe?» yita'a xa'mmito'o. Adi'l landichchom «Eeyya, mattaa weeshe» yito'i bikkina oo landichcho matta'a ciil ama weeshsho'o. Adi'l landichchom weeshanto'i meentichchona «Ka ciila massitaa anuuna iicissittuuyyi iina li'ise; anim ki badallatika miqoommo» yito'o. Ee bikkina oo meentichcho ciila massita'a anuuna iicisimma asheetto'o. Isem oo ciil li'aa lasonne adi'l landichchi beyyo eebbo'o; ciilim adi'l landichchona beet ihukko. Isem «Wo'iinsi fissummi bikkina ixxek summi ‹Muse› yamamona» yito'o. Muse'e li'aa lasonne ixxi moolli ikko'i Ibro'i manna do'eena firukko; eekke'ennem malaayyinne kee'mmaalli baxo baxisakku'uuyyi moo'ukko; ixxi moolli ikko'i Ibro'i mannikam mato Gibxi uulli manchi ganukkuuyyi moo'ukko. Muse'e ixxi kululleetanne ayyim bee'isa moo'aa Gibxi uulli mancho shaa leeshooma shashsha'l woronne waammukko. La'm balla daram ee beyyo daba'llaa maroohaare Ibro'i manniinsi lam ixxuwwina'i ixxuwwim ganantu'uuyyi moo'ukko; hawwodu manchom moo'aa «Kiyyabbaayyo mahina aphphissoolla?» yukko. Oo manchim «Keese neesenne daannaa gassaanchoo issukkok ayyette? Te'im ee Gibxi uulli mancho shittisam eesem shiteena hassaatennihe?» yukko. Muse'em lobakata muggaa «Adaa'nnanne an issummi luwwa manni la'aakko» yaa baa'ukko. Fari'oonim ee woshsha macceesaa Muse'e sheena hasukko; ihukkaarem Muse'e Fari'ooniinsi Miidiyaa'm uulla gibukko. Ee uulla afukkisam mat wo'i ba'l gadanonne afuurukko. Ee uulli qeessichchina lamar landi hee'ukko; ixxuwwim anni gereebbinaa fella'inaa wo'o wongiranne inkiitta'a agisseena waatto'o. Allaaraanim waatta'a landa hollito'o; Muse'em ee landina agaagaa ixxuwwi gereebbinaa fella'inaa wo'o agisukko. Oo landim ixxuwwi anni ihu Raagu'eel beyyo daba'llito'o. Raagu'eelim ixxi landina «Kaballa hinkid qaqqisom daba'llitakko'o?» yaa xa'mmukko. Ixxuwwim «Mat Gibxi uulli manchi niina agaagaa wo'o inkiirukkuuyyi ni gereebbinaa fella'inaa agisukko» yita'a dabatto'o. Ixxim «Kaba oo manchi hannonnette? Mahina uttakka'a waattakko'o? Mallehe hurbaata itona weeshshehe» yukko. Muse'e ee manchinne maqirem hee'eena iittamukko; oo manchim Siiphaara yakkam ixxi landichcho Muse'ena uwwukko. Isem Muse'ena goonchi beeto qatto'o; Muse'em «An ka uullina waaraancho» yaa beetika summa Gershooma yukko. Lobakat hiinchiinsi lasonne Gibxi uulli adil lehukko; ihukkaarem Isra'ee'l oos agiddanonne hee'llo'i bikkina hawwita'a laattam hee'llo'o. Waa'im ixxuwwi laachcha macceesukko. Ee laachcham macceesaa Abrihaamina, Yisaaqinaa Yaaqoobinaa aagu hidi'l sagara tiirukko. Waa'i Isra'ee'l oos agiddanonne hawwita'a u'nnanto'isa moo'aa ixxuwwi bikkina sawwukko. Muse'e Miidiyaa'm uulli qeessichchi hee'u ixxi balli ihu Yootirika gereebbaa fella'aa allaaram hee'ukko; ixxim ee allaachcha udma'i uulli tochchi afeebe'e ushe'aa Waa'i duuna yakkam Kooreeba afukko. Ee beyyonne Waa'ik asse'amaanchi dubbonne aphphoo gii'l laba'n woronne moo'amukko; Muse'em ee dubbonne giir aphphukkaarem dubboom shokkubee'isa moo'aa «Kuk hinkido'i maalalsiisoo luwwa? Dubboom hinkid shokkukkoyyo? Hincaa moo'immi hasisookko» yukko. Muse'e eekka moo'eena hincu ammanenne Waa'i aphphoo dubbonne aphphoo gii'l woronne ihaa «Muse! Muse!» yaa weeshukko. Muse'em «Yee!» yukko. Waa'im Muse'ena «Kid hincititte; ku at uullitti beyyi keesamaakkoohan ihu bikkina ki lokkiinsi kobe'e fisse. An gaassi kiyyanno'ina Abrihaamina, Yisaaqinaa Yaaqoobinaa Waa'a» yukko. Ee ammane Muse'e Waa'a moo'imma baddaa ille gunguu'llukko. Waa'i odim Muse'ena «Gibxi uullanne yo'i i minaadaphphi hawwo moo'aammo; ixxuwwi laachcham macceesaammo; ixxuwwika wor amadancha la'aammo. Ixxuwwa Gibxi uulli agiddaniinsi gatiseena dillaammo. Gibxi uulliinsim fissaa kaba Kana'aa'n manni, Hiite'i manni, Amoore'i manni, Ferize'i manni, Hiiwe'i mannii Iyyaabuus mannii hee'llam adii marabii daadoo haraar harish uulla uwwoommo. Isra'ee'l oosika laachcha macceesaammo; Gibxi uulli manni ixxuwwanne afissam damigoo u'nnaa moo'aammo. Oono'o, kaba i minaadaba Gibxi uulliinsi fissitoo'isina Gibxi adi'l beyyo keese asse'oommo mare» yukko. Ihukkaarem Muse'e Waa'ina «Faari'oon beyyo maraa Isra'ee'l ooso Gibxiinsi fisseena an ayyette?» yukko. Waa'im dabaraa «An kiinninne maqir ihoommo; an keese asse'ummisina mare'i ihookkok minaadaba Gibxiinsi fissitaa lasonne ka duunanne iina Waa'ina ki'nnuwwi otossimma» yukko. Muse'em Waa'ina «An Isra'ee'l oos beyyo maraa ‹Gaassi ki'nnuwwi anno'ina Waa'i ki'nnuwwi beyyo eese asse'aakko› yoommi ammane ixxuwwi odim ‹Ixxek summi ayyette?› yitota'n mayyaa dabaroommo?» yukko. Waa'im Muse'ena «An ‹Yoommanee hee'oommanee› ee bikkina ‹Yookkokii hee'ookkokii eese ki'nnuwwi beyyo asse'aakko› yitaa kure» yukko. Ee'isam Waa'i Muse'ena «Gaassi ki'nnuwwi anno'ina Abrihaamina, Yisaaqinaa Yaaqoobinaa Moollanni Waa'i eese ki'nnuwwi beyyo asse'aakko. Kuk heer heerina hee'oo i summa; ka lasaqqi qaranchi hundannem tiiramoommok ka summinnette› yaakko yitaa Isra'ee'l oosina kure. «Mattaa Isra'ee'l minaadaphpheka awwonsaano hundam mat beyyonne wixxaa'e; gaassi ki'nnuwwi anno'ina Abrihaamina, Yisaaqinaa Yaaqoobinaa Moollanni ihummi Waa'i kiina moo'amaa ‹Ki'nnuwwi beyyo waaraa Gibxi uulli manni ki'nnuwwa u'nnisso'isaa wor amaddo'isaa moo'ummo. Ee bikkina Gibxanne u'nnanchinne hee'llakkam beyyiinsi fissaa oono'o kaba Kana'aa'n manni, Hiite'i manni, Amoore'i manni, Ferize'i manni, Hiiwe'i mannii Iyyaabuus mannii hee'llam adii marabii daadoo haraar harish uulla ki'nnuwwina uwweena qoodaammo› yaakko» yitaa kure. «Isra'ee'l awwonsaanim at woccoo woshsha macceesookko; ee lasage atii Isra'ee'l minaadaphphi awwonsaanii Gibxi adi'l beyyo mattakka'a ‹Ibro'i mannina Moollanni Waa'i niina moo'amaakko; ee bikkina ni Moollanni Waa'ina kitima hincaa'nneena sas balli googo taakke'nnaa udma'i uulla malloommisina neese fatakihe› yi'llehe. Ihukkaarem Gibxi uulli adil malaayyaam wodinnette ihubeelas hore'em fatakoobee'isa la'oommo. Ee bikkina lobakata baddisoo maalalsiisoo agannuwwa Gibxanne issaa i malaayyaam wodinne ixxuwwa aphphisoommo; ee lasage ixxi ki'nnuwwa fatakookko. «Ki'nnuwwi fittakkam ammane Gibxi minaadaphphi illagenne nuura siiddakkamisa issoommi bikkina kora'i angam fittakkamoyyo. Ki'nnuwwi meenti hundim hegeegonne hee'llam Gibxi uulli meentiinsi worqinnee birinnee baxamu wereeggi mu'utaa eddechchaa xa'mmitona; ee hundam aa'llakka'a goon oosinaa landinaa eddeessakkamo; ee'isinnem Gibxi uulli manna boggakka'a fittakkamo» yukko. Muse'e Waa'ina «Isra'ee'l minaadab ‹Waa'i kiina moo'amukkoyyo› yita'a amma'nnitobee'aare te'im i woshsha aa'llobee'aare ixxuwwina mayyoommo?» yukko. Waa'im «Ki anganne amadditti luwwi maha?» yukko. Ixxim «Bicco» yukko. Waa'im «Uullanne ubbuuse» yukko. Muse'em ee bicco uullanne ubbuusu ammanenne oo bicci hamashshichchi ihukko. Muse'em ee hamashshichchiinsi gibukko. Ihukkaarem Waa'i Muse'ena «Sheerimo amade» yukko. Muse'em sheerimo amadu ammanenne daba'llaa bicci ihukko. Waa'im «Gaassi ixxuwwi anno'ina Abrihaamina, Yisaaqinaa Yaaqoobinaa Waa'i ihummi Moollanni kiina moo'amummisa Isra'ee'l minaadab ka mare'e moo'lla'a amma'nnitamo» yukko. Waa'i odim Muse'ena «Ki anga kikkilonne aagise» yukko. Ixxim aagisukko; ixxi angam kikkiliinsi fissu ammanenne baraxxisa qadaallaa abballukko. Waa'im «Ki anga dabattaa kikkionne aagise» yukko. Muse'em ixxi anga kikki'l woronne aagisukko; dabaraa fissu ammanenne daba'llaa mulli orachchisam fayya'i ihukko. Waa'i odim «Oono'o, luxxi maalalsiisoo mare'e moo'lla'a Ki woshshi hanqa› yita'a aa'llobeelas la'm maalalsiisoo agannanne amma'nnitamo. Ka lamem maalalsiisoo mare'e moo'lla'a amma'nnitobeelasii ki woshsha aa'llobeelasii Abbaayyi daajjiinsi hoffi wo'om massitaa gogaalli uullanne dune; ee daajjiinsi massitaa uullanne duntitti wo'i xiig ihookko» yukko. Ihukkaarem Muse'e «He'i i Moollanna! Eese asse'llitte; at iinninne wocimma asheettitti ammaniinsi ki'isaatettem ihukko illageenim erisa wocaa la'oombee'isa laqqootto; an duda'aa wocaa la'oombee'anee» yukko. Ee lasage Waa'i Muse'ena «Mannina wocoo suume uwwukkok ayyette? Duud te'im gawwi moo'oohan te'im moo'oobee'i qooq issookkokdu ayyette? Ka hundam issoommi Waa'i anetteyyonnihe? Ee bikkina kaba mare; an kiinninne ihaa at wocceena xantoo'isa issoommo; maha woccooda'em kuroommo» yukko. Muse'em «He'i i Moollanna! Mulli manna asse'e» yukko. Ee bikkina Waa'i Muse'enne lobakata quuqaa «Leewi'i sulliinsetti ihu kiyyabbaayyi Aaroon yookko. Ixxi woshsha erisa la'oohan ihukkisa la'oommo; oono'o; ixxim kaba ki beyyo waaroolla; keese moo'aatim lobakata liiramookko. Ka woshsha ixxena kuttaa wocoo luwwa losise; lamim danaamisa woccakkamisa issoommo. Issitakkam luwwam losisoommo. Ixxi keese bikkaa wocookko; ki summinnem ka woshsha minaadabina kurookko; atim eese Waa'a bikkitaa ixxena kuttootto. At maalalsiisoo mare'e ixxena moo'isseena ka bicco amaddaa mare» yukko. Muse'em ixxi balli Yootoor beyyo daba'llaa maraa «Gibxanne yo'i i moolli beyyo daba'llaa maraa foorinne yoda'e moo'eena xanoommisa isse» yukko. Yootoorim «Xummanne mare» yukko. Muse'e Miidiyaa'm uullanne hee'ukkuuyyim Waa'i ixxena «Keese shiteena hassam keen hundim leto'i bikkina Gibxi uulla daba'llitaa mare» yukko. Ee bikkina Muse'e ixxi aree oosoo hallichchonne saa'llisaa Gibxi uulla mareena ki'ukko. Maalalsiisoo luwwi baxamoo Waa'i biccom ixxi anganne amadaa hee'ukko. Odim Waa'i Muse'ena «Kaba at Gibxi uulla daba'llitaa mattoo ammane kiina an uwwummi malaayyinne baxxoo maalalsiisoo mare'e Faari'oon illagennem baximma xadditte; ihukkaarem an Fari'oonika wodano duudisoommi bikkina minaadaba sholle'aallisinne fatakooyyo. Ee ammane an Waa'i Fari'oonina wocoommoka ‹Isra'eel iina won qachcho. Anim ku i won beet iina awwaadona fatakitoo'isina kurummo; ihukkaarem at mareena hoottitto; ee bikkina an kiikka won beeto shoommo› yaakko yitaa kuttootto» yukko. Muse'e Gibxi uulla marukkuuyyi hiimo garu beyyonne Waa'i ixxo sheena hasukko. Ihukkaarem ixxi meentichcho Siiphaara qare'aalli banca eebba'a is beeto ballachchito'o; ee ballachchito'i shurtinnem Muse'eka lokko nakkita'a «Hanqinam at iina xiiqqi idaayyichcho» yito'o. Waa'im Muse'ena qishixxukko. Isem «At iina xiiqqi idaayyichcho» yito'ok ballachcha'n bikkinatte. Ee ammanenne Waa'i Aaroonina «Muse'enne exxiteena udma'i uulla mare» yukko. Ixxim maraa Muse'enne Waa'i duunanne edamaa suunqukko. Muse'e Gibxa marona Waa'i ijaaju ammane ixxena kuru woshshaa lobakat maalalsiisoo mare'e moo'isona ijaajukkokaa hundam Aaroonina kurukko. Ee lasage Muse'ee Aaroonii Gibxa matta'a Isra'ee'l awwonsaano mat beyyonne dummisso'o. Aaroonim Waa'i Muse'ena kuru luwwi hundam ixxuwwina kurukko. Muse'em ee awwonsaa'n illagenne maalalsiisoo agannuwwa baxukko. Minaadabim amma'nnukko; Waa'im ixxuwwi bikkina sawwoohan ihukkisaa ixxuwwi u'nnam moo'ukkisaa macceesso'i ammanenne Waa'ina otossito'o. Ee lasage Muse'ee Aaroonii Fari'oon beyyo matta'a «Isra'ee'l Moollanni Waa'i ‹Iina uguda issiteena udma'i uulla mattona i minaadaba fatakihe› yoolla» yito'o. Ihukkaarem Fari'oon «An ixxena ijaajameenaa Isra'ee'l minaadabam fatakeenaa Waa'oom ayyette? An Waa'a la'oommoyyo; Isra'eelam fatakoommoyyo» yukko. Muse'ee Aaroonim «Ibro'i manni Waa'i ixxi gaga iina la'isaakko; sas balli googo mallaa udma'anne ni Moollanni Waa'ina kitima hincaa'nneena mallona fatakitoo'isina uunxinoommo; eehid issinumbeelas jabbinne te'im orinne beeddinoommisa issookko» yito'o. Ihukkaarem Gibxi adil «Ki'nnuwwi Muse'ee Aaroonii minaadaba baxo tissiissakkamok mahinatte? Ki'nnuwwi kaba baxonne mallehe! Oono'o, ka uulli minaadaphphek xig lobakata; odim ki'nnuwwi lamim ixxuwwa baxo tissiissakkamuulla» yukko. Ee ballam Fari'oon agixxi ijaajaaninaa Isra'ee'l minaadaphphi baxisaaninaa «Xuubina ihoo bura'a gaassisa ixxuwwina hincaa'llakkotte; ixxuwwi gagim hassa'a eebbona. Ihukkaarem eraare baxxam hee'llo'i qaxiinsi mat xuubim hanqatoo'n baxxamisa issehe; ‹Ni Waa'ina kitima hincaa'nneena mallona fatakihe?› yitu'uuyyi eese hawwissamok baxo ceento'i bikkinatte. Qophpha'n woshsha macceesimma utta'a heeshita'a baxxona baxo kee'mmissehe» yaa ijaajukko. Agixxi ijaajaanii Isra'ee'l minaadaphphi baxisaanii matta'a Isra'ee'l minaadabina «Adil ‹Ka lasage an ki'nnuwwina bura'a uwwoommoyyo. Ki'nnuwwi gagim hanniinsim hassakka'a eebbehe; ihukkaarem baxxakkam xuubik xig eraa'llaanniinsi hanqatimmi hasisooyyo› yaa ijaajaakko» yito'o. Ee bikkina minaadab bura'a hassa'a eebbeena Gibxi uullanne hundannem binnito'o. Agixxi ijaajaanim gaassi bura'a uwwitu'uuyyi baxissam hee'llo'i qax xuuba baxxa'a hincaa'llona u'nnisso'o. Oo agixxi ijaajaanim Isra'ee'l minaadaphphi baxisaano «Gaassi baxxakkam hee'llakko'aanqax xuuba baxxakka'a hincaa'llakkambee'ek mahinatte» yitu'uuyyi gantam hee'llo'o. Isra'ee'l minaadaphphi baxisaan hee'llo'i keenim adi'l illage hincita'a «Adila, neesenne ki awwaadaanonne hinkid ka hundam issitto? Bura'a ma'lluwwam uwwakkoo'n xuuba banxoommisina ijaajakko'ookko; eehannonnem neese ganakkamuulla; ku hawwodanchi hundim neesenne afoo'isina issukkok ki minaadaba» yita'a laachcha hincaa'llo'o. Adilim dabaraa «Ki'nnuwwi baxo ha'yyitakkambee'i ceemmaalli keeno; hore'em ceemmaalli keeno ‹Mallaa Waa'ina kitimo hincaa'nnoommisina neese fatakihe› yitakku'uuyyi xa'mmitakkamok eehanninatte. Kabadem ki'n bax beyyo daba'llehe; bura'i ki'nnuwwina hore'em uwwamooyyo; ihukkaarem gaassi baxxakka'a uwwitakkam qax xuuba uwwimmi hasisookko» yukko. Isra'ee'l minaadaphphi baxisaanim gaassi baxxamaan qax xuuba ballina ballina baxxa'a uwwimmi hasisoohan ihukkisa adil kuru ammanenne hawwonne aaggo'isa laqqo'o. Adi'l beyyiinsi fitto'isam ixxuwwa egetta'a hee'llo'i Muse'ennee Aarooninnee edanto'o Ixxuwwina «Fari'oonaannonnee ixxi gassaa'n illagennee sabammoommisa issitakko'i bikkinaa bisa'inne shakkamisinam mashka'i ikkakko'i bikkinaa ki'nnuwwa Waa'i moo'ona; ixxim ki'nnuwwanne oogatona» yito'o. Muse'e odim Waa'ina «Waa'a! Ka minaadabanne kaa'n hawwo hundam afissoottok mahinatte? Eehidette ihulas eese mahina keyye asse'llitto? An ki summinne woceena adi'l beyyo hincummi ammaniinsi ki'isaa ixxi ka minaadabanne kee'mmaalli hawwo eebaakko; atim ka minaadaba gatisseena hore'em hassittoyyo» yukko. Waa'i Muse'ena «Faari'oonanne issoommi luwwa kaba moo'llootto; i wodinne kaa'amaa iittoo'nnim i minaadaba fatakookko; ixxi uulliinsim fittakkamisa issookko» yukko. Waa'i Muse'ena «An Waa'a. Hundam xanoommi Waa'i ihummisa Abrihaamina, Yisaaqinaa Yaaqoobinaa i gaga la'isaammo; ihukkaarem ‹Moollanni Waa'a› yamamoo keesammi i summinne la'amummoyyo. Waaraan ikka'a hee'llam hee'llo'i Kana'aa'n uulla ixxuwwina uwweena hide'aa hee'ummo. Kabadem Gibxi uulli manni agiddaninne u'nnissam Isra'ee'l oosika qaraaraalli laachcha macceesaammo; aagummi hidi'l sagaram tiiraammo. Ee bikkina an Isra'ee'l oosina ‹An Moollanni hanqo'i Waa'a! Gibxi uulli manni agiddaniinsi gatisaa wolabbanonne ki'nnuwwa fissoommo; malaayyaam i wodinnee kee'mmaalli oogato'innee ki'nnuwwa gatisoommo. Ki'nnuwwam i minaadab issoommo; anim ki'nnuwwina Waa'i ihoommo; Gibxi agiddaniinsi wolabbanonne fissoommi ammane an Moollanni Waa'i hanqo'i Waa'i ihummisa laqqakkamo. Ki'nnuwwa Abrihaamina, Yisaaqinaa Yaaqoobinaa uwweena hide'ummi uulla aagisoommo; ee uullam ki'nnuwwina gulummi issaa uwwoommo; an Moollanni Waa'a› yihe» yukko. Muse'em ee hundam Isra'ee'l oosina kurukko; ihukkaarem ixxuwwi neeyyato mutto'oo bikkinaa kee'mmaalli hawwonne hee'llo'i bikkinaa macceesseena hasso'oyyo. Odim Waa'i Muse'ena «Faari'oon beyyo mattaa Isra'ee'l oos ki uulliinsi mattona fatakihe› yitaa kure» yukko. Ihukkaarem Muse'e Waa'ina «I moolli Isra'ee'l oosim i woshsha macceessobee'eka adil hinkid i woshsha macceesookko? An wocaa la'oombee'i duda'a» yukko. Ee'isinne Waa'i Isra'ee'l oos bikkinaa Gibxi adi'l bikkinaa Muse'enaa Aarooninaa kurukko. Isra'ee'l oosom Gibxi uulliinsi awwonsita'a fissitona ijaajukko. Abaroosik annannichchikim awwonsaan kakeeno. Yaaqoob won beet Roobeelik oos Hanookatte, Faalu'utte, Heesiroonattee Kaarmi'ittee. Ixxuwwim Roobeel sullina anno'i hee'llo'o. Simi'oon oos Yimu'eelatte, Yaamiinatte, Oohaadatte, Yaakiinatte, Xoohaarattee Kana'aa'n uulli meentichchonne qaramu Sha'uulattee. Ixxuwwim Simi'oon sullina anno'i hee'llo'o. Leewi'i oos Gershoonatte, Qa'aatattee Meeraarattee. Ixxuwwim Leewi'i sullina anno'i hee'llo'o. Leewi'i xibbee sadee lamar hiinchoo hee'ukko. Gershoon oos Liibinattee Shiimi'attee hee'llo'o; ixxuwwinam dut shumo'i hee'ukko. Qa'aat oos Amiraamatte, Yixihaaratte, Keebiroonattee Uuzi'eelattee hee'llo'o; Qa'aat xibbee sadee sas hiinchoo hee'ukko. Meeraar oos Maahiilattee Muushi'attee hee'llo'o; ixxuwwii ixxuwwi shumo'ii hundim Leewi'i sulli hee'llo'o. Amiraamim Yookaabeed yakkam ixxi ada eebukko; isem Aaroonaa Muse'ee qatto'o; Amiraam xibbee sadee lamar hiinchoo hee'ukko. Yixihaar oos Ore'ette, Neefeegattee Zikri'ittee. Uuzi'eel oos Mishaa'eelatte, Eelxaafaanattee Siitirattee hee'llo'o. Aaroon Naa'oosina aayyatte hee'llo'i Aminaadaab landichcho Eelsheebaa'a eebukko. Isem Naadaaba, Abiihu, Ali'aazaraa Itaamaaraa soor goo'n ooso qatto'o. Qore'i oos Asiiratte, Eelqaanattee Abiiyaasaafattee. Kukeenim Qore'i shumo'ina hundinam sulli anno'i hee'llo'o. Aaroon beet Ali'aazar Phuti'eel landichcho eebaa Fiinihaasa qarukko; ixxuwwim Leewi'i sullina anno'oo awwonsaanoo hee'llo'o. Ka kee'n lambe'iinsi Waa'i Muse'ee Aaroonaa doo'llaa «Isra'ee'l minaadaba sulli sullinne Gibxi uulliinsi awwonsitakka'a fissehe» yaa ijaajukko. Ixxuwwim «Isra'ee'l ooso fatakihe» yita'a Gibxi uulli adila xa'mmito'o. Waa'i Muse'ena Gibxanne wocu ammane «An Moollanni Waa'a! An kiina kuroommoka hundam Gibxi uulli Faari'oonina kure» yukko. Ihukkaarem Muse'e «An wocaa la'oombee'i duda'a; adil i woshsha hinkid macceesookko?» yaa dabarukko. Waa'i Muse'ena «An keese Faari'oonina Waa'isa issoommo; kiyyabbaayyi Aaroonim hiraagaanchisa keese bikkaa wocookko. An keese ijaajoommoka hundam kiyyabbaayyi Aaroonina kure; ixxi odim uulliinsi fittona Isra'ee'l ooso fatakoo'isina adilina kurookko. Ihukkaarem an Faari'oonika wodano duudisoommo; ee bikkina maham maalalsiisoo mare'e Gibxi uullanne issumta'nnim ki'nnuwwika woshsha macceesooyyo; ee lasage kee'mmaalli oogato'inne i gogota, i minaadaba, Isra'ee'l ooso ka uulliinsi fissoommo. Gibxi minaadaba i wodinne aphphisaa Isra'ee'l ooso ee uulliinsi fissoommi ammane Gibxi uulli manni an Moollanni Waa'i ihummisa laqqamo» yukko. Muse'ee Aaroonii Waa'i ixxuwwa ijaajukkoka hundam issito'o. Adilinne wocco'i ammane Muse'ek umur sadeentayyi ihukkuuyyi Aaroonik odim sadeentayyee sas hiinchoo hee'ukko. Waa'i Muse'ee Aaroonaa «Faari'oon ‹Hino'o maalalsiisoo mare'e baxxakka'a ki'nnuwwi ayyetda'e ikkakko'isa moo'issehe› yuta'n Aaroon ixxeka bicco adi'l illagenne ubbuusona; ee ammane oo bicci hamashshichchi ihookko» yukko. Ee bikkina Muse'ee Aaroonii Faari'oon beyyo matta'a Waa'i ijaajukkisa issito'o; Aaroonim ixxi bicco adi'l illagennee ixxi gassaa'n illagennee ubbuusu ammanenne hamashshichchi ihukko. Ee lasage qoolluwwaa kiiraanoo Faari'oon weeshukko; ixxuwwim falta'a ekee'nnisam issito'o. Ixxuwwi biccuwwam uullanne ubbuusso'aare hamashshi ihukko; ihukkaarem Aaroon bicci ixxuwwika biccuwwa hundam xuuxukko. Ku hundim ihukkaarem adi'llek wodan daba'llukkoyyo. Waa'i wocukkisannem Faari'oonik wodan duudu bikkina Muse'ekaa Aaroon woshshaa macceesimma sabukko. Ee lasage Waa'i Muse'ena «Adi'llek wodan duudu bikkina ‹Minaadaba fatakoommoyyo› yaakko. Ee bikkina soodaraar daram Abbaayyi daajje Faari'oon dilloo ammanenne hamashshichchi ihu bicco amaddaa mattaa ee daajji gammalanne egere. Ixxenam ‹Ibro'i mannik Moollanni Waa'i udma'i uullanne ixxena awwaaddamisina minaadaba fatakitona kurona eese ki beyyo asse'aakko; ihukkaarem at kaballi afeebe'em macceesimma sabbaatto. Waa'i issoo luwwinne iittitoo'nnim ixxo laqqootto; an ka biccinne ka wo'o aphphisoommo; wo'im xiig ihookko. Woronne yoo qurxumme'i hundim lehookko; ka daajjik wo'i lobakata boboo bikkina Gibxi uulli manni ka daajjiinsi wo'o inkiitta'a aggeena xantamoyyo› yaakko» yukko. Waa'i Muse'ena «Aaroon ixxi biccinne Gibxi uullanne yoo wo'i bu'uwwa, daajjuwwa, boohe'inne daadoo wo'i uwwaa delbuwwaa hundam aphphisoo'isina kure; ee ammane wo'i hundim xiig ihookko; haqqinnee kininnee wo'o amadakkeena baxakko'i mu'uttuwwanne yoo Gibxi uulli wo'i hundim xiig ihookko» yukko. Muase'ee Aaroonii Waa'i ijaajukkoka issito'o. Aaroonim adi'llaannonnee ixxi gassaa'n illagennee ixxi biccinne wo'o aphphisukko; ee daajji wo'im xiig ihukko. Ee daajji woronne hee'u qurxumme'i hundim lehukko; wo'i bobu bikkina Gibxi uulli manni wo'o aggeena xanto'oyyo. Ee uullannem xiig bee'i beyyi hee'ukkoyyo. Ee lasage Gibxi uulli kiiraan ixxuwwi falinne ee'isam issito'o; Waa'i wocukkisinnem Faari'oonik wodan duudu bikkina Muse'ekaa Aaroon woshshaa macceesimma sabukko. Ixxim daba'llaa adilla'n mine aagukko bagaan ka woshsha mahannem xigukkoyyo. Gibxi uulli manni daajjiinsi wo'o aggeena xantobee'i bikkina aggam wo'o siiddeena daajji gammalanne bare hinto'o. Waa'i daajji wo'o xiiganne dabassukkaanninsi lamar balli higukko. Ee lasage Waa'i Muse'ena «Faari'oon beyyo mattaa Waa'i ‹Iina awwaaddamisina i minaadaba fatakihe. Fatakimma sabbilas ki uullanne luga fatakoommo; Abbaayyi daajjim luginne wo'mmookko. Abbaayyi daajjiinsim lug firaa ki adilla'n minenne, ki ara'anne, ki gassaa'n minneewwanne, ki minaadaphphi minneewwanne, gii'l midachchannee buko'i mu'utannee hundannem aagookko. Lug kiihaannonne, ki minaadaphphaannonnee ki gassaa'n hanennee firookko› yaakko yitaa kure» yukko. Odim Waa'i Muse'ena «Aaroonina ‹Lug firaa Gibxi uullanne hundannem wo'mmoo'isina daajjuwwa, boohe'inne maroo wo'uwwaa delbuwwaa ki biccinne aphphise› yaakko yitaa kure» yukko. Ee bikkina Aaroon Gibxi uulli wo'o hundam ixxi biccinne aphphisukko; lugim firaa uulli hundannem wo'mmukko. Ihukkaarem kiiraanim ixxuwwi falinne Muse'aamisam lug Gibxanne wo'mmoo'isa issito'o. Faari'oon Muse'ee Aaroonaa weeshaa «Ka luga iinniinsii i minaadabiinsii qeessoo'isina Waa'a uunxehe; Waa'ina kitimo hincaa'llamisinam minaadaba fatakoommo» yukko. Muse'em Faari'oonina «Lug kiinniinsii ki minaadabiinsii qee'llaa xale'i Abbaay daajjenne gatoo'isina kiina, ki gassaaninaa ki minaadabinaa hinki balla Waa'a uunxoomda'e iina kure» yukko. Adilim «Ka soodoom uunxe» yukko. Muse'em «Ni Moollanni Waa'i'nnookkok ayyim bee'isa laqqoo'isina at yittisam soodo ihookko. Ixxim lug kiinniinsi, ki miniinsi, ki gassaaniinsii ki minaadabiinsii qee'llaa xale'i Abbaayyi daajjenne gatookko» yukko. Ee lasage Muse'ee Aaroonii Faari'oon illagiinsi fitta'a matto'o; Faari'oonanne eebu luga hooroo'isina Muse'e Waa'a uunxukko. Waa'im Muse'e uunxukkisam issukko; minenne, qash woronnee biirannee hee'u lug hundim lehukko. Gibxi uulli mannim luga beyyi hundannem tuubbo'o; uullim eehanni bobinne wo'mmukko. Ihukkaarem Faari'oon oo hawwi sholle'ukkisa moo'aa Waa'i wocukkisam ixxeka wodano duudisaa Muse'ekaa Aaroon woshshaa macceesimma sabukko. Waa'i Muse'ena «Aaroonina ‹Ki biccinne uullanne yoo dira aphphise› yihe. Ee lasage Gibxanne hundannem yoo dir tushshe'i ihookko» yukko. Aaroonim ixxi biccinne uullanne yoo dira aphphisukko; Gibxi uullanne yoo dir hundim tushshe'i ihukko; mannannee diinatennee hundannem dummukko. Kiiraanim ixxuwwi falinne tushshe'e fikkaannisseena yakito'o; ihukkaarem xanto'oyyo. Tushshe'im mannaa diinatee hundam itukko. Kiiraanim «Kuk Waa'i baxo» yita'a adilina kutto'o; ihukkaarem adil ixxeka wodano duudisukko; Waa'i wocukkisam Muse'ekaa Aaroon woshshaa macceesimma sabukko. Waa'i Muse'ena «Soodo daram adi'l beyyo mattaa daajje dillukkuuyyi Faari'oonina ‹Iina awwaadoo'isina i minaadaba fatakihe. Sabbittaa'lleensi keesenne, ki gassaanonne, ki minaadabannee ki minneewwannee hundannem qasoo tikaayya fatakoommo. Gibxi uulli manni minneewwannee uullannee hundannem qasoo tikaayyi wo'mmookko. Ihukkaarem i minaadab hee'llam Geesee'm uullanne qasoo tikaayyi hee'oobee'isa issoommo. An ka uullanne yoommisa laqqoo'isina ee uulla qasoo tikaayyi nakkooyyo. I minaadabannee ki minaadabannee annannoom hee'oo'isa issoommo; ee maalalsiisoo mare'em soodo moo'llakkamo› yitaa kure» yukko. Waa'i Adi'l minii ixxi gassaa'n minii hundim qasoo tikaayyinne wo'mmoo'isa issukko; Gibxi uulli hundim qasoo tikaayyinne bi'ukko. Ee lasage Muse'ee Aaroonaa adil weeshaa «Mattakka'a ka uullannem ki'nnuwwi Moollanni Waa'ina kitimo hincaa'llehe» yukko. Muse'em «Ni Moollanni Waa'ina hincaa'nnoom kitim Gibxi minaadabina shigigaa'oohan ihu bikkina ee'isa issimmi danaamoyyo; Gibxi minaadabina shigigaa'oo kitima ixxuwwi illagenne hincaa'nnumta'n neese kininne aphphissamoyyonnihe? Ee bikkina Waa'i ijaajukkisannem sas balli googo udma'i uulla mallaa Waa'ina kitimo hincaa'immi hasisookko» yukko. Adilim «Qee'llitakka'a mattakkambee'an ihulas udma'i uullanne ki'nnuwwi Moollanni Waa'ina kitima hincaa'llakkona fatakoommo; iinam Waa'a uunxehe» yukko. Muse'em dabaraa «Soodo qasoo tikaayyi kiinniinsi, ki gassaaniinsii ki minaadabiinsii laa'oo'isina kiinniinsi annanni ihummisam kaba Waa'a uunxoommo; ihukkaarem minaadab Waa'ina kitimo hincaa'eena maroobee'isa hoottaa qawwiissittisam kabadem neese qawwissitte» yukko. Muse'em adi'l illagiinsi firaa Waa'a uunxukko. Waa'im Muse'e uunxukkisam issukko. Qasoo tikaayyim adiliinsi, ixxi gassaaninsii minaadabiinsii hundiinsim matim gatoo'n curuqaa laa'ukko. Ihukkaarem Faari'oonik wodan duudukko bagaan Isra'ee'l minaadaba fatakukkoyyo. Waa'i Muse'ena «Adi'l beyyo mattaa Ibro'i minaadaphphi Moollanni Waa'i ‹Iina awwaaddamisina i minaadaba fatakihe. Kabadem sabbaa ku minaadab mareena hootlas ki fooraam diinatenne hundannem jabbo eeboommo; ee bikkina farad, halli, gaameela'i, lar, gereebbii fella'ii hundim beeddookko. Ihukkaarem Waa'i Gibxikaa Isra'ee'llekaa diinate annanni issookko. Isra'ee'l diinatikim matim lehooyyo. An Waa'i ka hundam Gibxanne soodo isseena murte'aammo yoolla› yitaa kure» yukko. Waa'i wocukkisannem la'm balli daram eekka issukko. Gibxi uulli fooraam diinat hundim beeddukko; ihukkaarem Isra'ee'l diinaxxek matim lehukkoyyo. Adilim eekka la'eena hasaa manna asse'aa Isra'ee'l diinaxxek matim lehubee'isa la'ukko. Ihukkaarem ixxek wodan duudu bikkina minaadaba fatakukkoyyo. Ee lasage Waa'i Muse'enaa Aarooninaa «Midachchiinsi gii'lbuchcha fooccakka'a massitakka'a Faari'oon illagenne Muse'e hafachchanne binnaa'ona. Oohim di'llisa ihaa Gibxi uullanne hundannem binnoohaare mannannee diinatennee mar xooqoo dashshi firookko» yukko. Ee bikkina Muse'ee Aaroonii midachchiinsi gii'lbuchcha amadda'a adi'l illagenne uullito'o; eekkam Muse'e hafachchanne binnaa'u ammanenne Gibxi uulli mannannee diinatennee mar xooqoo dashshi firukko. Ee ammane kiiraanonnee Gibxi minaadab hundannemii dashshi firaa hee'u bikkina oo kiiraan Muse'i illagenne uulliteena xanto'oyyo. Ihukkaarem Waa'i adi'lleka wodano duudisaa hee'u bikkina Muse'ena Waa'i wocaa hee'ukkisam adil Muse'ekaa Aaroonikaa woshsha macceesimma sabukko. Ee lasage Waa'i Muse'ena «Sooxxi dara baqitem adi'l beyyo mattaa ‹Ibro'i mannik Moollanni Waa'i «Iina awwaaddona i minaadaba fatakihe. Oobeelas iinni'nnoo'i Waa'i uullanne bee'isa laqqona keesenne, ki gassaanonnee ki minaadabannee boobana qaqqisaa dilliisoommo. Keesee ki minaadabaa boobaninne bi'iseena i anga ki'isaammoohan ihuta'n kabe'e uulliinsi bee'llakkam hee'llakko'o. Ihukkaarem i summi uulli hundannem weeshamonaa i wodam kiina moo'iseenaa hasummi bikkina an keese ki'isaammo. Kabadem i minaadabinne uullixxantittisam yoonto; maramonam fatakimma sabbaatto. Ee bikkina soodo kido'i ammanenne Gibxanne ga'nnaa la'akkambee'i kee'mmaalli barada ga'nnisoommo. Kaba manna asse'llaa kiikka allaachchi diinatee amaxxaa hundam mine aagisiise; mine aagubee'i mannii diinatii hee'ulas baradinne beeddookko» yoolla› yitaa kure» yukko. Waa'i wocu woshsha macceessa'a baddito'i Faari'oon gassaa'nnek mat mat qaqqissa'a ixxuwwi agidoo diinatee mine aagisso'o. Ihukkaarem baddimma sabbo'i keen ixxuwwi awwaadaanoo diinatee allaachchi beyyonnem cawwita'a utto'o. Ee lasage Waa'i Muse'ena «Gibxi uullanne hundannem mannanne, diinatennee uullanne mutu luwwi hundannee barad ga'nnona ki anga iim ki'ise» yukko. Muse'em ixxi bicco iim ki'isukko; Waa'im banqaa baradaa dilliisukko. Banqim uullanne dillukko; Waa'i Gibxanne hundannem barada ga'nnisukko. Baradim dillukko; banqim belecce'ukko. Gibxanne hore'em eehido'i kee'mmaalli barad ga'nnu balli bee'e. Baradoom Gibxi uullanne hundannem biiranne gatu luwwa hundam mannaa diinatee uullanne mutu luwwaa hundam aphphisukko; haqqam iiqansukko. Oo barad Isra'ee'l oos hee'llam Geesee'm uulli xale'e aphphisukkoyyo. Adilim Muse'ee Aaroonaa weeshisaa «Kabada'i baaxiilo baxummisa la'aammo; Waa'i hanqo'ane; ihukkaarem anii i minaadabii huushammaammo. Baradii banqii lophphu bikkina Waa'a uunxehe; hanqo'isam ki'nnuwwa fatakoommo; ka lasage ka uullanne afuuttakkamoyyo» yukko. Muse'em adilina «Ka beero'iinsi firummisam i anga biddiqaa'aa Waa'a uunxoommo; ee ammane banqii baradii uullookko; ee'isinnem uulli Waa'an ihukkisa laqqootto. Ihukkaarem atii ki gassaanii Moollanni Waa'a badditakkambee'an ihukkisa la'oommo» yukko. So'ii hamaamaa talbii fiitaa hee'u bikkina ma'lluwwim gatoo'n hundim bi'ukko. Ihukkaarem arasii gardaammii qaphphaa afoo bikkina bi'oo'nnim gatukko. Muse'e adi'l illagiinsi firaa ee beero'iinsi tochchonne firaa ixxi anga biddiqaa'aa Waa'a uunxukko; banqii baradim ee ammanem urukko; xeenim billukko. Ihukkaarem adil banqi, baradii xeenii urukkisa moo'aa odim baaxiilo baxukko; ixxekii ixxi gassaa'nnekii wodan duudukko. Waa'i Muse'ena wocaa hee'ukkisam adi'llek wodan duudu bikkina Isra'ee'l ooso fatakukkoyyo. Ee lasage Waa'i Muse'ena «Odim Faari'oon beyyo daba'llitaa mare; an ka maalalsiisoo mare'e moo'iseena hasummi bikkina ixxekaa ixxi gassaa'nnekaa wodano duudisaammo. Ee'isam Gibxi uulli manna guzumo'ummisaa ixxuwwi lambe'ennem maalalsiisoo mare'e issummisaa ki'nnuwwi oosinaa oos oosinaa kuttakkonattee an Waa'i ihummisam laqqakkonattee» yukko. Ee bikkina Muse'ee Aaroonii adi'l beyyo matta'a «Ibro'i manni Moollanni Waa'i ‹Iina ijaajancha sabboottok hinki balli afeebe'e? Kabadem iina awwaaddona i minaadaba fatakihe. Ihukkaarem i minaadaba fatakimma sabbilas soodo qawwaawwa ki uullanne asse'oommo. Qawwaawwim uulli moo'amoobee'isa ifiisookko; baradiinsi baraara gatu luwwaa uullanne mutu luwwaa hundam itaa guullookko. Ki adilla'n minenne, ixxi gassaa'nnaannonnee ki minaadaphphi minneewwannee qawwaawwi wo'mmookko; oohim gaassi kiyyanno'i doolliinsi kid hooraa moo'amu hawwiinsi hundiinsim jor hawwi ihookko› yoolla» yito'o. Muse'em Faari'oon illagiinsi firaa marukko. Adi'l gassaanim Faarioonina «Ku manchi niina qaash ihaa hawwisookkok hinki balli afeebe'e? Ixxuwwi Moollanni Waa'a awwaaddeena mattona fatakihe; uulli bi'oolli ihukkisa laqqittoyyonnihe?» yito'o. Muse'ee Aaroonii weeshanta'a Faari'oon beyyo hincito'o; Faari'oonim «Mattakka'a ki'nnuwwi Moollanni Waa'a awwaaddakkeena xantakkamo; ihukkaarem marimmi hasisookkok ayyayyaamo?» yaa xa'mmukko. Muse'em «Neese Waa'ina uguda issineena hoffokii lobokii hundim matim gantoo'n malloommo; niikka goon ooso, landa, gereebba, fella'aa laroo hundam massinoommo» yita'a dabatto'o. Adilim «Hino'o, mallehe; Waa'i ki'nnuwwinnetti ihona; ki'nnuwwi hantaaro sawwitakko'i bikkina ki'nnuwwi meentoo oosoo amaddakka'a mattakkona fatakoommoyyo. Ee bikkina ihooyyo! Goon xale'i mattakka'a Waa'ina awwaaddakkeena hassakkolas goon xale'i mattakkeena xantakkamo» yukko. Ee lasage Muse'ee Aaroonaa Faari'oon illagiinsi hollakka'a fissakko'o. Waa'i Muse'ena «Gibxi uulla hundam qawwaawwi bi'isona ki anga iimaa'e; qawwaawwim waaraa baradiinsi gatukkokaa uullanne mutu luwwaa hundam itookko» yukko. Ee bikkina Muse'e Gibxi uullanne ixxeka bicco iimaa'ukko; Waa'i ee ballaa hiimoo eelliinchi fi'l hafachcha ki'isukko; la'm balla daram eelliinchi fi'l hafachchi qawwaawwa eebukko. Qawwaawwim Gibxi uulli hundannem weerarukko. Eehido'i qawwaawwi eehanniinsi illageen hee'ukkoyyo; ka lasagem hee'ooyyo. Uulli heemachchaa tuunseebe'e qawwaawwik gogot ifiisukko; baradiinsi gatu luwwa abuullanne mutukkokaa hane yoo mishaa hundam ma'lluchchim gatoobee'isa kankanaa itukko. Gibxi uullanne yoo haqqikii uullanne mutu luwwikii hundikim latu buyyi ma'lluchchim gatukkoyyo. Adilim qaqqisaa Muse'ee Aaroonaa weeshisaa «Ki'nnuwwi Moollanni Waa'aa ki'nnuwwaa hawwodaammo. Kaba iina xale'i matem kore haafi'llehe. Ka kee'mmaalli shoo boobana iinniinsi ki'isona ki'nnuwwi Moollanni Waa'a uunxehe» yukko. Muse'em adi'l illagiinsi firaa Waa'a uunxukko. Waa'im ee hafachcha qoxxaalli eelliinchi aaggi hafachchanne dabarukko; oo hafachchim qawwaawwa hundam fii'aa Ertiira'i dambalaqanne aagisukko; ee'isinne Gibxi uullanne qawwaawwik matichchim gatukkoyyo. Ihukkaarem Waa'i Faari'oonika wodano duudisu bikkina kabadem Faari'oon Isra'ee'l ooso fatakukkoyyo. Ee lasage Waa'i Muse'ena «Gibxi uullanne gambabbaakkoo tuunsi ihoo'isina ki anga iim ki'ise» yukko. Muse'em ixxeka anga iim ki'isukko. Sas ballinam Gibxi uulli hundannem gambabbaakkoo tuunsi ihukko. Ee sasem ballannem mat mulleka moo'eena te'im hee'u beyyiinsi mulli beyyo mareena xanukkoyyo; ihukkaarem Isra'ee'l oos hee'llam beyyi hundannem caakki hee'ukko. Adilim Muse'e weeshisaa «Ki'nnuwwi meentoo oosoo amaddakka'a mattakka'a Waa'ina awwaaddehe; ihukkaarem ki'nnuwwik gereebbi, fella'ii larii keyyem hee'ona» yukko. Muse'em «Ni Moollanni Waa'ina shookkiisakka'a hincaa'akkam kitiminaa mulli kitiminaa ihoo fooraam diinate at uwwiteenannihe? Ookki hore'em ihoobee'i woshsha; mat shuku'llim gatoo'n ni diinate hundam amandaa malloommo. Ni Moollanni Waa'ina kitim hincaa'nnoommi dinate doo'llinoommok neese gagame; ee beyyo amfoo'n kitimina ihoo diinat hinkido'anda'e lanqeena xannoommoyyo» yaa dabarukko. Ihukkaarem Waa'i Faari'oonika wodano duudisu bikkina Isra'ee'l ooso fatakimma sabukko. Adilim Muse'ena «I illagiinsi qee'lle! Macceese, la'mmeka ki ille moo'eena hasoommoyyo; i illagenne fittilas ee ballam letoo'isa la'e» yukko. Muse'em «At yittisam ihona; od ki beyyo waaroommoyyo» yukko. Ee lasage Waa'i Muse'ena «Faari'oonannee Gibxi minaadabanne mulli boobanam dilliisoommo; ee lasage Faari'oon ki'nnuwwa mattakkona fatakookko; matichchim gattakkambee'isa fissookko. Isra'ee'l minaadab goonii meentii hundim ixxuwwi olla'anne yoo Gibxi uulli manniinsi birinnee worqinnee baxamu wereeggi mu'uttuwwa xa'mmita'a aa'llona kure» yukko. Waa'im Isra'ee'l oos Gibxi uulli manni illagenne nuura siiddamisa issukko. Muse'em Gibxi uullanne adi'l gassaa'n illagennee minaadaphphi illagennee lombaam manchi ihukko. Muse'em adilina «Waa'i ‹Kaballi hii'm luxxi baqitenne Gibxi uullanne dilloommo. Adillano lago aa'oo Faari'oon won beetiinsi ki'isaa agiddano baxukkuuyyi hee'oo buxichchi beet afeebe'e Gibxanne won ihaa qaramu goon hundim lehookko; fooraam diinaxxekim won lehookko. Gibxi uullanne hundannem kanniinsi illageen ihubee'ek ka lasagem ihoobee'i kee'mmaalli wi'l ihookko. Ihukkaarem Isra'ee'l minaadabannem ihukko diinatenne wishichchim muunooyyo; ee'isinne an Waa'i Gibxaannonnee Isra'ee'l minaadaphphi lambe'ennee annannaato qooccoomman ihukkisa laqqakkamo› yoolla» yukko. Muse'em «Ki gassaan hundim i beyyo waatta'a iina fogoddamo; i minaadaba amadaa firoommisina eese uunxitamo; ee lasage maroommo» yaa wocaa lasage kee'mmaallisa quuqaa adi'l illagiinsi marukko. Waa'i Muse'ena «Maalalsiisoo i aganni Gibxanne lophphaa moo'amona Faari'oon ki'nnuwwi woshsha macceesooyyo» yaa hee'ukko. Muse'ee Aaroonii ka agannuwwa adi'l illagenne issito'o; ihukkaarem Waa'i adi'lleka wodano duudisu bikkina Isra'ee'l oos ixxi uulliinsi fitta'a mattona fatakukkoyyo. Waa'i Muse'enaa Aarooninaa Gibxi uullanne «Ku agan ki'nnuwwina agan hundinaa hiinchi hundinaa luxxi agan ihona. Isra'ee'l minaadab hundinam ka woshsha losissehe; ku agan aagu tommi ayyaamonne ayyi manchim ixxi abaroosisinne mat ambula gudisona. Ee ambu'l maara mat mi'n abaroos itaa guulleena xanoobee'an ihulas ixxii ixxena hincoo ollakkichchii matikka'a lamem mi'n abaroosim itta'a guulliteena xantam qax ihona. Ki'nnuwwi doo'llitakkam diinat gereechcho te'im fellakkichchi iheena xanookko; ihukkaarem matem miiqakkam luwwim bee'i mat hiinchi ambul ihimmi hasisookko. Ee ambulluwwam ee aga'n tommii soo'l ayyaamii afeebe'e allaallehe. Tommonnee soo'l ayyaamonnee uulli hiimukkisam Isra'ee'l minaadab hundim ee diinate durona. Ee diinaxxekam maara itakkam annannichchi minneewwi gooc hanaa'nnaannonnee midaaxxi gubanannee xiigooma labbona. Maarooma ee hiimom giiranne babisakka'a qaraaroo buyyinnee qorosho'innee ittona. Ee maa'llekam qaquulla te'im wo'inne sattakka'a ittakkotte; horoore, lokkuwwaa godaphphi mu'utaa hundam giiranne babissakka'a ittehe. Soodeebe'e ee maa'lleka mat luwwam gatissakkotte; gatu luwwimdu hee'ulas hundam giiranne shokkiissehe. Dooyyina gudu mannisa lade'llakka'a, kobe'e issaqqitakka'ahii bicco anganne amaxxitakka'ahii gaaggaabiminne ittehe; ookkim eese Waa'a lonsitakkam Shaashshiqqi Uguda. «Ee hiimo an Gibxi uullanne dillaa mannikaa diinaxxekaa wona hundam shoommo; Gibxi uulli qophpha'n waa'uwwi hundam aphphisoommo; an Waa'a. Ki'nnuwwi yoontakke'i minneewwi gubananne xiiqqi mare'i yoo bikkina ee xiiqqi mare'e moo'aa uraa higoommo. Ee'isinne Gibxi uulli minaadaba boobaninne aphphisoommi ammane ki'nnuwwanne matem boobanim afooyyo. An Waa'i ki'nnuwwina issummi luwwa hundam sawwimminne oo ayyaam ki'nnuwwina amma'nnaxxi lombi ugud ihona; ookkim ki'nnuwwi oos oosina seer ihaa waaroo doollenne hundannem lonsitakkam ugud ihona» yukko. Waa'i «Lamar balla ursho'i bee'i qorosho'o ittehe; luxxi ballanne ursho'i mahim gatoobee'isa ki'nnuwwi minneewwiinsi fissitakka'a hoollehe. Ayyi manchim ee lamarem ballannem ursho'aam hurbaata itulas Isra'ee'l minaadabiinsi annanni ihaa bi'ona. Ee lamarem balliinsim luxxi ballaa lama'l ballaa keesamaakkoo dummichcha dummehe; ee lamarem ballannem ki'nnuwwi gagina hurbaata gudisimmiinsi bagaan mat luwwam baxxakkotte. An ki'nnuwwa hundam Gibxi uulliinsi awwonsaa fissummok ee ballannetti ihu bikkina ee balla qorosho'i uguda lonsehe; waaroo doollenne hundannem ka uguda qoxxaalli seer issitakka'a egellehe. Luxxi aga'n tommiinsii soo'l balli hiimiinsii ki'isaa lamiyyii mat balli hiimii afeebe'e qorosho'o ittehe. Ee Lamarem ballannem ursho'ik ma'llichchim ki'nnuwwi minenne hee'oone; Isra'eelchom ihukko waaraanchi ursho'i exxu hurbaata itulas Isra'ee'l minaadabiinsi annanni ihaa bi'ona. Ee ayyaammuwwanne ayyi beyyonnem ikkakko'aare urshobee'i qorosho'o ittehe bagaan ursho'i yookkoka ma'lluwwam ittakkotte» yukko. Muse'e Isra'ee'l minaadaphphi awwonsaano hundam weeshaa «Ki'nnuwwi abaroos annannichchim Shaashshiqqi ugudina ihoo gereechchi ambula doo'llitakka'a dullehe. Mat qixxare'i hiisoophphi buyya gudissakka'a bixxiranne yoo xiiganne ceffakku'uuyyi ki'nnuwwi minneewwi gooc hanaa'nnaannonnee midaaxxi gubanannee labbehe; soodeebe'e ayyi manchim ixxi miniinsi firoone. Waa'i Gibxi minaadaba lehinne guzumo'eena Gibxi uullanne dillookko; hanaa'nnaannonnee midaaxxi gubanannee yoo xiigam moo'aa higaa marookko; sira'iillichchim ki'nnuwwi mine aagaa shoobee'isa hoorookko. Ki'nnuwwii ki'nnuwwi oosii ka seera heer heerinam egettakkamo. Waa'i ki'nnuwwina uwwoommo yaa sagara aagukkisinnem ee uulla aaggakkam ammane ka seera egellehe. Ki'nnuwwi oos ‹Ku seer mahane?› yaa xa'mmoo ammane ki'nnuwwi ‹Kuk Waa'a lonsimmina ihoo shaashshiqqi uguxxi kitima; mashka'oomim Waa'i Gibxi manna lehinne guzumo'u ammane Isra'ee'l minaadaphpheka minneewwa higaa neese gatisu bikkina Waa'a lonsimmina ihoo shaashshiqqi uguxxi kitima› yitakka'a kuttakkamo» yukko. Isra'ee'l minaadabim eekka macceesso'i ammanenne heeshita'a otossito'o. Isra'ee'l minaadabim Waa'i Muse'ee Aaroonaa ijaajukkoka hundam issito'o. Waa'i hii'mmaannonne luxxi baqitenne Gibxi uulli minaadaphpheka adilla'n barcumanne afuuru Faari'oon beetiinsi ki'isaa karaxxi minenne karamu manni won oos afeebe'e mannikaa diinaxxekaa wona hundam lehinne guzumo'ukko. Ee hiimonne Faari'oonii ixxi gassaanii ee'isam Gibxi minaadabii hundim diriiriinsi baqito'o; won lehubee'i min matim hee'ubee'i bikkina Gibxanne hundannem kee'mmaalli wi'l hee'ukko. Ee hiimo Faari'oon Muse'ee Aaroonaa weeshisaa «Ki'nnuwwii Ki'nnuwwi minaadab ikko'i Isra'eelii ka uulliinsi fillehe; i uullam fatakitakka'a mallehe; yitakko'isam mattakka'a Waa'ina awwaaddehe. Ki'nnuwwi yitakko'isam ki'nnuwwika gereebba, fella'aa mulli diinatee hundam amaddakka'a mallehe; eesem maasse'llehe» yukko. Isra'ee'l minaadab qaqqissa'a uulla fatakita'a fittona Gibxi uulli minaadab ixxuwwi gagim «Ki'nnuwwi qaqqissakka'a fatakitakka'a fittakkobeelas oono'o neese hundim beeddineenatte» yita'a gaaggaabisso'o. Ee bikkina Isra'ee'l minaadab qufisamu qama buko'i mu'utanne wonshita'a eddechchinne xaaxxa'a gudumonne iyyito'o. Isra'ee'l minaadabim Muse'e ijaajukkisam issito'o; oohim worqiinsii biriinsii baxamu mu'uttuwwaa eddechchaa uwwitona Gibxi minaadaba xa'mmito'o. Waa'im Gibxi minaadaphphi illagenne Isra'ee'l minaadab nuura siiddamisa issu bikkina xa'mmito'i luwwi hundam uwwito'o. Ee bikkina Isra'ee'l minaadab Gibxi uulli amaxxa bogga'a matto'o. Isra'ee'l minaadabim Raamse'iinsi ki'lla'a Sukoota matto'o; ixxuwwikim xig meentoo oosoo edoo'n loh xibbi kum hee'ukko. Ixxuwwinne maqirem annanni annanni dut minaadab lobakat gereebba, fella'aa mulli fooraam diinatee ushe'aa firukko. Gibxiinsi amadda'a fitto'i qamiinsi qorosho'o satto'o; mashka'oomam Gibxiinsi gaaggaabba'a fitto'i bikkina ixxuwwi gaqqi hurbaata gudisimmina, te'im ursho'inne qufisamaakkoo hurbaata sarimmina amman hee'ukkoyyo. Isra'ee'l minaadab Gibxi uullanne hee'llo'ok 430 hiinchoo hee'ukko. Oo 430 hiinchii beeddukkaare ee ballam Waa'i minaadab hundim Gibxa fatakaa firukko. Waa'i ee hiimo ixxi minaadaba Gibxiinsi fisseena egeraanchi ihaa garu bikkina Isra'eel waaroo qaranchanne hundannem Waa'a lonsiteena ee hiimo egeraan ikka'a garimmi hasisookko. Waa'i Muse'enaa Aarooninaa «Shaashshiqqi uguxxi seer kane; allaggichchi ihu ayyi manchim higimmi ugudina gudu hii'm hurbaata itoone. Ihukkaarem diinatinne bitaa'llakko'i ki'nnuwwi agid ballachchamaa lasage iteena xanookko. Koyyiinchi te'im baxina aagissakko'i manchi itoone. Oo hurbaat biira firimmi hasisoobee'i bikkina ee gudu minennem ittehe; miqem iiqqakkotte. Isra'ee'l minaadab hundim ka uguda lonsona. Ihukkaarem ballachchamubee'ek ayyi manchim itoone; ki'nnuwwinne hee'oo waaraan Waa'ika shaashshiqqi uguda lonseena hasulas gaassitakka'a ixxuwwi minenne hee'oo goon hundam ballachchehe; ee lasage Isra'ee'l oosisa xigamaa shaashshiqqi uguda ki'nnuwwinnem lonsona. Ku seer ki'nnuwwinaa ki'nnuwwinne hee'oo waaraaninaa hundinam ihona» yukko. Isra'ee'l minaadab hundim Waa'i Muse'ee Aaroonaa ijaajukkoka hundam issito'o. Ee ballam Waa'i Isra'ee'l minaadaba hundam gaalchi gaalchinnem Gibxiinsi fissukko. Waa'i Muse'ena «Isra'ee'l minaadaphphekii diinaxxekii won hundim iihane; ee bikkina won ihaa qaramukkoka hundam iina keese» yukko. Muse'em minaadabina «Agiddanonne Gibxanne hee'llakko'i beyyiinsi fittakko'i balli ihu bikkina kaballa sawwillehe; Waa'i ee uulliinsi ixxaanninne wodaam anginne ki'nnuwwa fissaakko; ee bikkina ursho'i yoo hurbaata ittakkotte. Kaballa Aabiib yakkamaannonne hiinchi luxxi agananne Gibxi uulla fatakitakka'a fittakko'ookko. Kana'aa'n mannika, Hiite'i mannika, Amoore'i mannika, Hiiwe'i mannikaa Iyyaabuus mannikaa uulla ki'nnuwwi anno'ina uwweena sagara aagaakko; marabii adii daadoo ee harish uulla ki'nnuwwi aaggakkam ammane hiinchaannonne luxxi agananne ka uguda lonsitakkamo. Lamar balla hundoomam xale'i qorosho'o ittakkamo; lama'l ballannem Waa'i lombina uguda issitakkamo. Lamar balla hundoomam ursho'i mahimbee'i qorosho'o ittakkamo; ursho'i te'im hufu luwwi hore'em ki'nnuwwi uullanne hee'oone. Ee balla «Ka uguda lonsinoommok Gibxiinsi fillummi balla Waa'i niina issu luwwi bikkinatte» yitakka'a ki'nnuwwi oosina kullehe. Waa'i ixxaanninne wodaam malaayyinne Gibxiinsi ki'nnuwwa fissu bikkina Waa'ik seer ki'nnuwwi angannem mare'i ihona; miinennem tiissiishshi ihona. Ee bikkina ka uguda hiinchonne hiinchonne qoodamu ballanne lonsehe. «Waa'i ki'nnuwwinaa gaassi ki'nnuwwi anno'inaa uwweena sagara aagu Kana'aa'n uulla aaggakkam ammanee uullam ki'nnuwwina uwwoo ammanee ki'nnuwwika wona hundam Waa'ina uwwehe; ee'isam ki'nnuwwi diinaxxekim goonchi ihaa qaramu won hundim Waa'ina annanni ihaakkoohan ihona. Ihukkaarem hallichchi wonina gereechchi ambula tissi issitakka'a uwwehe; ihukkaarem tisso miqqakka'a aa'llakkeena hassakkobeelas gaanje booqaaqqehe; won goo'n oosinam tisso miqimmi hasisookko. Waaroo doollenne ki'nnuwwi oos ka see'l bikkina xa'mmoo ammane ‹Gibxi agiddaniinsi Waa'i ixxi wodinne neese fissukko. Gibxi adil ixxi wodano duudisaa xiiqqinne fatakoommoyyo yu ammane Waa'i Gibxi uulli mannikaa diinaxxekaa won hundam shukko; diinaxxeka wona hundam kitim issinaa hincaa'nnoommok ee bikkinatte; ihukkaarem won goo'n oosina tisso minqoommo. Ku seerim ni angannee ni miinennee yoo mare'isa tiiramoohane; Waa'i neese Gibxiinsi ixxi wodinne fissukkisam tiissiisoohane› yitakka'a kuttakkamo» yukko. Fari'oon minaadaba fataku ammaane Waa'i abbis ihu Filisxee'm uulli googinne ixxuwwa awwonsukkoyyo; mashka'oomim minaadab ixxuwwi illagenne or yoo'isa moo'lla'a sawwite dabatta'a Gibxi uulla daba'llita'a mattambee'isa isseenatte. Ee bikkina Waa'i ixxi minaadaba do'isaa massoo googinne Ertiira'i dambalaq uulli udma'inne awwonsukko. Isra'ee'l oosim Gibxi uulliinsi orina guddo'aannisa ikka'a fitto'o. Yooseef «Waa'i ki'nnuwwina hara'mmaa ka uulliinsi fittakkam ammane i miqem amaddakka'a fillehe» yaa Isra'ee'l ooso hidiisaa hee'u bikkina Muse'e Yooseefika miqe amadaa marukko. Isra'ee'l oosim Sukootiinsi ki'lla'a udma'i uulli tochchonne yoo Eetaamanne wiidda'nto'o. Ee bikkina ixxuwwi ballaa hiimoo taakke'lleena xantamisina Waa'i ballaa googo awwonsoo duuphphi utubinne, hiimom caakkisoo gii'l utubinne awwonsam hee'ukko. Duuphphi utub ballanne gii'l utubim hiimonne amman hundam ixxuwwi illagiinsi annanni iham hee'ukkoyyo. Waa'i Muse'ena «Isra'ee'l minaadab daba'llita'a Migdoo'llaannonnee Ertiira'i dambalaq lambe'ennee yoo phihaahiiroot illagenne Ba'aalxaafoon gadanonne wiiddantona kure. Faari'oon Isra'ee'l minaadab duduqita'a uulli udma'anne karkaaddamuulla yaa sawwoolla. Anim ixxeka wodano duudisoommi bikkina ki'nnuwwa hollansookko; ee bikkina Faari'oonaa ixxi gogotaa kaa'aa iikka lomba moo'isoommo; ee ammane Gibxi uulli manni an Moollanni Waa'i ihummisa la'ookko» yukko. Isra'ee'l minaadabim ixxuwwina kuramukkisa issito'o. Gibxi adilim Isra'ee'l minaadab xotto'isa macceesu ammanenne ixxii ixxi gassaanii sawwite dabatta'a «Ku issinummi luwwi maha? Isra'ee'l minaadab niinniinsi fissaqqita'a mattamisa issimminne niina awwaaddam manna hundam hoongummuullayyonnihe?» yito'o. Adilim ixxeka faraxxi gaarre'e gudisaa ixxi gogota ki'isukko. Doo'llamaakkoo faraxxi gaarre'uwwika loh xibbe edaa Gibxi uullanne yo'i faraxxi gaare'uwwa gudisukko; gaaxxi awwonsaanom baxxansukko. Waa'i Gibxi uulli adi'lleka wodano duudisaa hee'u bikkina iggimminne fittu'uuyyi hee'llo'i Isra'ee'l minaadaba hollansukko. Gibxi gogot faradinnee faraxxi gaarre'uwwinnee ixxuwwa hollansito'o; ixxuwwim Ertiira'i dambalaq illagenne yoo Fiihaahiiroot Ba'aalxaafoon gadanonne wiiddanto'oohaannonne affo'o. Isra'ee'l minaadabim Faari'oonii ixxi gogotii ixxuwwa laseessa'a affo'isa moo'llo'i ammanenne lobakata baddito'o; Waa'i kollonnem laatto'o. Muse'enam «Gibxi uullanne manna waammakkam beyyi hee'ukkoyyonnihe? Eehannah ka uulli udma'anne lenoommisina neese wottittok mahinatte? Neese Gibxiinsi fissittaare neesenne afu luwwa hino'o moo'e! Ku woshshi hundim neesenne afoo'isa ee beyyiinsi filleena illagem kiina kullaa hee'nnummoyyonnihe? Hore'oomam neese Gibxi uulli mannina agid inkaa hee'nnona cawwitaa ure› yinummoyyonnihe? Hanqinam ka uulli udma'anne lehimmiinsi ee beyyonne agid inkaa hee'nnumita'n e'llam hee'ukko» yito'o. Muse'em minaadabina «Badditakkotte! Kaballa moo'llakkam Gibxi uulli manna heer heerinam moo'llakkamoyyo; yoontakke'i beyyonnem qoxxitakka'a uullehe; Waa'i ki'nnuwwa gatiseena issoo luwwa kaballa moo'llakkamo. Waa'i ki'nnuwwi bikkina oramookko; ki'nnuwwim cawwitakka'a ihoo luwwa hundam moo'llakkamo» yukko. Waa'im Muse'ena «I kollonne laattoottok mahinatte? Isra'ee'l minaadab taakke'llona kure. Atim ki bicco ki'issaa ka dambalaqa aphphise; wo'im lam beyyonne baxxansamookko; Isra'ee'l minaadabim dambalaq lambe'inne gogaalli uulla hance'lla'a higgamo. Gibxi uulli minaadaphphekam wodano duudisoommi bikkina Isra'ee'l minaadaba hollansitamo. Faari'oona, ixxi gogota, Faraxxi gaare'ee faradaanoo kaa'imminne lomba edde'oommo. Faari'oonaa ixxi gogotaa kaa'oommi ammane Gibxi uulli manni an Moollanni Waa'i ihummisa la'ookko» yukko. Isra'ee'l gogotiinsi illagenne awwonsam hee'u Waa'i asse'amaanchi gogoxxi lasinne daba'llaa uullukko; ee'isam duuphphi utub illagenne hee'u beyyiinsi lasonne daba'llaa uullukko. Duubim Gibxaannonnee Isra'ee'l gogoxxi lambe'ennee ihaa Gibxinaa tuunsi Isra'eelinaa caakki caakkoo'isa issukko. Ee bikkina hiimooma hundoomam ixxuwwina'i ixxuwwi moo'aqqanteena xanto'oyyo. Muse'em ixxi anga dambalaqanne biddiqaa'ukko. Waa'im ee hiimo hundoomam eelliinchi firiinsi qoxxaalli hafachcha ki'isaa dambalaq laso daba'lloo'isa issaa gogaalli uulli issukko; wo'im lam beyyonne baxxansamukko. Isra'ee'l minaadab gogaalli uullinne dambalaq lambe'inne higaa marukko; wo'im ixxuwwaanninne makkinnee qeddinnee gortannisa uullukko. Gibxi gogotim ixxuwwi faraxxi gaarre'uwwinne, faradinnee faradaaninnee hollansitu'uuyyi awwonta'a dambalaq woro aaggo'o. Uulli soodukkuuyyim Waa'i duuphphaanninnee gii'l utubinnee ihaa moo'u ammanenne Gibxi gogot hambalaachchanto'o. Waa'i ixxuwwi faraxxi gaarre'uwwika lokkuwwa uullinne amaxxansu bikkina mikmikaa'lleena xanto'oyyo; Gibxi gogotim «Waa'i Isra'ee'l minaadabina hara'mmaa niinninne oramoolla; ee bikkina ixxuwwi illagiinsi gimbona» yito'o. Waa'im Muse'ena «Ki anga dambalaqanne ki'ise; wo'im Gibxi gogotanne, faraxxi gaarre'uwwannee faradaanonnee daba'llona» yukko. Ee bikkina Muse'e ixxi anga dambalaqanne ki'isukko; dambalaqim uulli soodukkuuyyi gaassi beyyonnem daba'llukko. Gibxi gogotim wo'iinsi gibaa xoreena yakukko. Ihukkaarem Waa'i ixxuwwa dambalaqanne darabukko. Wo'im daba'llaa Isra'ee'l minaadaba hollansitam hee'llo'i gaarre'uwwanne, faradaanonnee ee'isam Gibxi uulli gogotannee hundannem gunguussamukko; ixxuwwiinsi mat manchim gatukkoyyo. Ihukkaarem Isra'ee'l minaadab wo'i makki kollinnee qeddi kollinnee gortannisa ihaa uullu bikkina gogaalli uullinne higgo'o. Ee balla Waa'i Isra'ee'l minaadaba ee'isinne Gibxi gogotiinsi gatisukko; ixxuwwim ee dambalaq gammalanne ubu Gibxi uulli mannika leesha moo'llo'o. Waa'i ixxi wodinne Gibxi gogota kaa'ukkisa moo'lla'a Isra'ee'l minaadab Waa'a baddito'o; Waa'annee ixxena awwaadaanchi Muse'ennee amma'nnito'o. Ee lasage Muse'ee Isra'ee'l minaadabii «Farashshoo farashshaanchoo dambalaqanne darabimminne lombinne iimiimu bikkina Waa'ina zammaroommo. Waa'i iina malaayyee mazmuuraa; eese gatsukkokim ixxotte. Ixxi iina Waa'i ihu bikkina galaxxoommo; iyyanninam Waa'i ihu bikkina iimiimaa'oommo. Moollanni Waa'i oramoohane; ixxi summim Moollanni Waa'a. «Faari'oon gogota faraxxi gaare'innem Ertiira'i dambalaqanne ubbuusukko; doo'llamaakkoo ixxi gaaxxi awwonsaanim Ertiira'i dambalaqanne xuuxamukko. Xillaalli wo'i ixxuwwa xuuxukko; kinisam dambalaq xillanne xuuxanto'o. «Moollanni Waa'a! Ki makki angi malaayyinne la'amaakkoohane; Moollanni Waa'a! Ki makki angi diina'a iiqansaakko. Hibbaam ki lombinnem kiinninne uullixxamoo keeno bi'issitto; ki quunqi dillaa ixxuwwa bura'isa itukko. At fooshshe'llittaare wo'i iim ki'aa uullukko; gortannisam xabbaa uullukko; xillaalli lugumonne yoo wo'im qoxxaa kin ihukko. «Diina'im ‹Hollaa amadoommo; ixxuwwi amaxxam bogoommo; hasummokam massoommo; i bisa'am makkisaa amadaa ixxuwwa bi'isoommo› yaa biramaa hee'ukko. Ihukkaarem Moollanni Waa'a! Ki fooshshinne dambalaq ixxuwwa xuuxukko; xilli dambalaqanne ubu xaa'llisam xuuxanto'o. «Moollanni Waa'a, mulli waa'uwwiinsi kiinni'nnookkok hinkane? keesammoominne nuuraa lombinne baddisookkok maalalsiisoo aganna issoo kiinni'nnookkok hinkane? Ki makki anga biddiqaa'llitto; uullim ni diina'a xuuxukko; Heer heerina hee'oo ki iittinne at gatissitti ki minaadaba awwonsitto; ki wodinnem keesammi ki uulla aaggona awwonsitaatto. Mulli minaadab eekka macceessa'a huxe'llo'o; Filisxee'm mannim xuu'llo'o. Ee ammane Eedoo'm minaadaphphi awwonsaan muggito'o; Moo'aaphphi maalaayyaammuwwim huxe'llo'o; Kana'aa'n minaadabim luqucito'o. Moollanni Waa'a, ki minaadab higeebe'e at gatissitti minaadab higeebe'e baachchii muggimmii ixxuwwanne ihaakko; ki wodinnem kinisa duuddo'o. Moollanni Waa'a, at gatti beyyi issitaa baxxitti ki heechchi beyyo, Moollanni Waa'a, ki angi baxu ki Keesammi Minee kiina gulummi ihu duunaa ixxuwwa wottaa kaassootto. Waa'i heer heerinam adila» yita'a Waa'ina zammatto'o. Isra'ee'l minaadab gogaalli uullinne dambalaqa higgo'o; Faari'oon farad, faraxxi gaare'uwwii faradaanii hundim dambalaq woronne aaggo'i ammanenne Waa'i wo'i ixxuwwanne daba'lloo'isa issukko. Aaroon aayyatte hee'llo'i hiraagaancho Maaraame is dibbe'e ki'isso'o; ee'isam mulli meentim dibbe'e ki'issa'a kaddu'uuyyi ise awwonto'o. Maaraamem «Farashshoo farashshaanchoo dambalaqanne darabimminne lombinne iimiimu bikkina Waa'ina zammallehe» yitu'uuyyi zammatto'o. Ee lasage Muse'e Isra'ee'l minaadaba Ertiira'i dambalaqa higisaa Suur udma'i uulli kolli massukko; sas balli hundoomam uulli udma'anne taakke'llo'o; wo'om siiddo'oyyo. Ee lasage Maaraa yakkam beyyo affo'o; ihukkaarem ee beyyonne yoo wo'i lobakata qaraaraalli ihu bikkina aggeena xanto'oyyo; Maaraa yamamukkokim ee bikkinatte hee'ukko. Minaadabim Muse'enne qunquunaa «Eehannah maha angeenatte?» yaa ki'amukko. Muse'em Waa'i kollonne laarukko; Waa'im ixxena mat haqqichcho moo'isukko; eekkam massaa wo'i woronne ubbuusu ammanenne oo wo'i xee'ukko. Ee beyyonne Waa'i ixxuwwina seeraa gatti ogoraa uwwukko; ee beyyonnem ixxuwwa keenukko. Ixxuwwinam «Iikka ki'nnuwwi Moollanni Waa'ika sagara macceessakkolas, i illagennem er luwwa issitakkolas, i seera guullitakka'a egettakkolasii gatti ogoram egettakkolasii Gibxi minaadabanne eebummi jabbinne matinnem ki'nnuwwa guzumo'oommoyyo; ki'nnuwwam fayyiisoommi Waa'i anette» yukko. Ee lasage Eeliima yakkam beyyo matto'o; ee beyyonnem tommii lam wo'i bu'uwwii lamarayyi tami'l haqquwwii hee'ukko; ee wo'i gadanonnem wiiddanto'o. Isra'ee'l minaadab hundim Gibxiinsi fitto'i la'm aga'nnaannonne tommonnee onti ballannee Eeliimiinsi ki'lla'a Eelii'mmaannonnee Siina'i lambe'ennee yoo Siin udma'a matto'o. Uulli udma'annem Isra'ee'l minaadab hundim Muse'ennee Aaroonannee quunquunta'a «Maara saarakkam harachchi gadanonne afuullaa hansumqax hurbaata intoommi beyyonne Gibxanne hee'nnummuuyyi Waa'i anganne lenaa usheexxinaammoohan ihuta'n maha iham hee'ukko? Ihukkaarem neese hundim sibaarinne beeddinona ka uulli udma'anne fissitakko'ookko» yito'o. Waa'im Muse'ena «Oono'o, an ki'nnuwwina hundinam ihoo hurbaata iimaniinsi dilliiseenatte; minaadab ballina ballina fitta'a ee ballina ihooqax hurbaata wixxaa'llona. Ee'isinne an uwwoommi awwonsa egettamda'e ixxuwwa keenaa moo'oommo. Ihukkaarem loh ballanne mulli ballaanniinsi lam suume wixxaa'lla'a gudissona» yukko. Ee bikkina Muse'ee Aaroonii Isra'ee'l minaadab hundinam «Ki'nnuwwa Gibxi iinsi fissukkok Waa'i ihukkisa kaballi maaro'o laqqakkamo. Sooxxi dara Waa'i lomba moo'llakkamo; Waa'i ixxonne quunquuntakko'oka macceesaakko; neesenne quunquuntakkamok neese ayyette?» yito'o. Ee lasage Muse'e «Waa'i ixxonne quunquuntakko'isa macceesu bikkina hiimonne ittakkam maaraa odim darina hassakkam qax hurbaataa ki'nnuwwina uwwookkok ixxotte bagaan neese ayyette? Neesenne qunquunimmi ixxonne quunquunimma» yukko. Muse'em Aaroonina «Waa'i ixxonne quunquunto'isa macceesu bikkina Isra'ee'l minaadab hundim ixxi illagenne hincihona kure» yukko. Aaroonim Isra'ee'l minaadab hundinam kuru ammanenne uulli udma'i kolli daba'llito'o; Waa'i lombim duubinne moo'amukko. Waa'im Muse'ena «Isra'eel eesenne quunquunto'isa macceesaammo; ee bikkina ‹Kaballi maaro'o eelliinchi aageena illageen maara ittakkamo; soodaraaronnem hurbaata godditakka'a ittakkamo; ee ammane an ki'nnuwwina Moollanni Waa'i ihummisa laqqakkamo› yoolla yihe» yukko. Uulli hiimukkisam heedoora laboo lobakat cii'i bararukkuuyyi waaraa wiidda'n hegeegonne wo'mmukko; odim soodaraaronnem ee hegeego hundam qiibat ifiisaa hee'ukko. Oo qiibat giggiraa lasonnem silliqamaakkoo caraq luwwi uulli udma'anne moo'amukko; ixxim uullanne ubu barada labam hee'ukko. Isra'ee'l minaadabim eekka moo'llo'i ammanenne mada'e ihukkisa laqqobee'i bikkina ixxuwwina'i ixxuwwim «Kuk maha?» yaqqanto'o. Muse'em «Kuk ki'nnuwwi ittakkona Waa'i uwwaakkoo hurbaata. Ayyi manchim ixxena hasisoo qaxa wixxaa'ona mat dukkaananne yoo manni xigonne mat manchina mat kiilo'oo kolloo amadoo mu'utanne keenaa massona» yukko. Isra'ee'l minaadabim ee yamamukkisam issito'o; mat mat hoffiissa'a mat mat odim lonsita'a wixxaa'llo'o. Ee wixxaa'llo'okam keento'i ammanenne lobakata wixxaa'ukkaannik xuffiinsi gatukkoyyo; hoffoka wixxaa'ukkaannikim xuffiinsi xa'ukkoyyo; hundim wixxaa'ukkok ixxi gagina ihoo qax hee'ukko. Muse'em «Ayyim ee ballina ihoo qaxiinsi higisaa soodina wixxaa'immi hasisooyyo» yukko. Ihukkaarem mat mat manni Muse'e sagara macceesimma sabba'a ee ballina wixxaa'llo'aannika gatissa'a gassito'o; ookkim la'm darina daquuraa garukko; shamaatim bobukko; Muse'em ixxuwwinne lobakata quuqukko. Darina darinam annannichchim gagina ihoo qaxa wixxaa'am hee'ukko. Ihukkaarem elliinchi iibbaa lasage uullanne gatu qax hundim bukkamam hee'ukko. Loh ayyaamonne annannichchim sas sas kiilo'o wixxaa'llo'o. Minaadaphphi awwonsaanim waatta'a eekka Muse'ena kutto'o. Ixxim «Sood ixxena annanni ihaa keesamaakkoo usheexxaxxi balli ihoo'isina Waa'i ijaajaakko; ee bikkina sattakkam luwwi hundam kaballa sallehe; gatukkok soodina hee'ona» yukko. Muse'e ijaajukkisam gatukkoka la'm ballina dissito'o; ookkim fooshsha eebukkoyyo; te'im daquurukkoyyo. Muse'em «Kaka kaballoomam ittehe; kaballi Waa'ina keesamaakkoo usheexxaxxi balli ihu bikkina ka hurbaata udma'anne siiddakkamoyyo. Ee bikkina lohem ballam uttakkoo'n ka hurbaata wixxaa'llehe. Ihukkaarem usheexxaxxi balli ihu lama'l ballanne hurbaat mahim hee'ooyyo» yukko. Lama'l ballanne minaadaphphi lambe'iinsi hofqax mannim hurbaata wixxaa'lleena fitto'o; ihukkaarem ma'lluwwam siiddo'oyyo. Ee lasage Waa'i Muse'ena «Ki'nnuwwi i ijaajoo seeraa egettakkambee'ek hinki balli afeebe'e? An ki'nnuwwina mat usheexxaxxi balla uwwaammo; loh ballanne hundi ammanem lam ballina ihoo hurbaata ki'nnuwwina uwwoommi bikkina lama'l ballanne ayyi manchim miniinsi firoo'n yoo beyyonne hundannem usheexxaa hosona» yukko. Ee bikkina minaadab lama'l ballanne usheexxukko. Isra'ee'l minaadab ee hurbaata «Maanna'a» yita'a weeshsho'o. Ookkim woldimaa'm mishi'nnoo qadaalli hee'ukko; xee'nnoomim marabinne sarakko'i qorosho'is hee'ukko. Muse'em «Waa'i neese Gibxiinsi awwonsaa fissu ammane uulli udma'anne intoommisina niina uwwu hurbaat kan ihukkisa moo'lleena xantamisina waaroo qaranchina maanna'a dissinona neese ijaajaakko» yukko. Ee bikkina Muse'e Aaroonina «Mat buchchi mu'utanne mat kiilo'oo kolloo ihoo qax maanna'a disse; waaroo qaranchi hundinam Waa'i illagenne egeramaa hee'oo'isa isse» yukko. Waa'i Muse'e ijaajukkisannem waaroo qaranchina hundinam egeramaa afuuroo'isina maanna'a Hidi'l saga'l saaxi'n illagenne Aaroon dissukko. Isra'ee'l oos hee'llam Kana'aa'n uulli gabala affeebe'e sor hiincho hundoomam ee maanna'a itto'o. Ee ammane hee'u hurbaata xufakkam mu'ut Iiiffaa Gomoraa yamamoohan hee'ukko. Iiffa yakkamok tommoo onti kilo'oo kee'mmoohan ihukkuuyyi Gomor odim mat kiilo'oo kolloo kee'mmoohan hee'ukko. Isra'ee'l minaadab hundim Waa'i ijaajukkisinne Siin udma'iinsi ki'lla'a Raafiidiimanne wiiddanto'o; ihukkaarem ee beyyonne agakkam wo'i hee'ukkoyyo. Ee bikkina «Angoommi wo'o uwwe» yita'a Muse'enne ki'llo'o. Muse'em ixxuwwina «Iinninne mahina wocantakkamuulla? Waadu mahina keentakkamuulla?» yaa dabarukko. Ihukkaarem Isra'ee'l minaadab lobakata xeebe'lla'a hee'llo'i bikkina «Neese Gibxiinsi fissittok mahinatte? Neese ni oosoo ni diinatee hundam wo'i xeebinne guulliteenannihe?» yitu'uuyyi Muse'enne quunquunto'o. Muse'em «An ka minaadaba hinkid isso? Oono'o eese kininne aphphisseena guddo'ookko» yaa Waa'i kollonne laarukko. Waa'im Muse'ena «Isra'ee'l minaadaphphi awwonsaaniinsi hofqaxam amaddaa minaadaphphi illagenne hige; Abbaayyi daajje aphphissitti biccom amaddaa mare. Oono'o, an Siina'i sifo'i kinanne ki illagenne uulloommo; atim ee kina aphphise; minaadab agoo wo'im ee kiniinsi firookko» yukko. Muse'em Isra'ee'l awwonsaa'n illagenne ee'isa issukko. Isra'ee'l minaadab «Waa'i niinninne yoohonnii bee'e?» yita'a Waa'a keento'i bikkinaa quunquunto'i bikkinaa ee beyyika summa «Maasahaa Mariibaa » yaa weeshukko. Isra'ee'l minaadab Raafiidiimanne yo'aannonne Amaaleeq minaadab dangonne waatta'a qasso'o. Muse'em Iyyaasina «Hofqax mannam doo'llitaa mattaa soodo Amaaleeq manna qase; anim Waa'i iina uwwu bicco amadaa duu'n ludonne uulloommo» yukko. Iyyaasim Muse'e ijaajukkisanne Amaaleeq minaadabinne oramukko; Muse'e, Aaroonii Hoorii duu'n ludonne fitto'o. Muse'e ixxi anga iim ki'isoo ammane Isra'ee'l minaadab kaa'am hee'ukko; ihukkaarem anga dilliisoo ammane Amaaleeq minaadab kaa'am hee'ukko. Muse'ek angi hoogukkaare Aaroonii Hoorii kina eebba'a Muse'e afuuroo'isa issito'o; ixxuwwim mat matkollinne mat mulli kollinne uullita'a ixxeka anga eelliinchi aageebe'e bakkiissa'a amaddo'o. Ee bikkina Iyyaas Amaaleeq gogota bisa'inne kaa'ukko. Ee lasage Waa'i Muse'ena «Hundi ammanem tiiramukkuuyyi hee'oo'isina ka kaachchika aganna kitaabe; Iyyaasinam Amaaleeq minaadaba guullaa bi'isoomman ihukkisa kure» yukko. Muse'em kitima hincaa'akkam beyyo baxaa ee beyyika summa «Waa'i iina kaachchi mare'e» yukko. Ee'isam «Ixxi angi Waa'i adilla'n kollonne ki'u bikkina Waa'i Amaaleeq minaadabinne heer heerinam oramookko» yukko. Muse'e balli ihu Miidiyaa'm qeessichchi Yootir Waa'i Isra'ee'l minaadaba Gibxi uulliinsi fissu ammane Muse'enaa ixxi minaadab ihu Isra'eelinaa issu luwwi hundam macceesukko. Muse'e ixxi are Siiphphaara dabaraa asse'u ammane ixxi balli Yootir isee is lamem oosoo taqeebalaa hee'ukko. Muse'e «Allaggi uullanne an waaraancho» yaa ixxi won beetika summa «Gershooma» yukko. «Iyyanno'i Waa'i iina hara'mmaancho; eesem Faari'oon bisa'iinsi gatisaakko» yaa la'm beetika summa «Eeli'eezara» yukko. Muse'e balli Yootir Muse'e goo'n oosinnee arennee maqirem uulli udma'anne yoo Waa'i duu'n gadanonne wiiddanaa hee'u Muse'i beyyo waarukko. Yootirim «An ki balli Yootir ki arennee ki lamem goo'n oosinnee maqirem waaroommuulla» yaa asse'ukko. Ee bikkina Muse'e ixxi ballo aa'eena firukko; ixxim suunqaa xummaatisukko; xummaatixxanta'a lasonnem ixxi dukkaa'n woro aaggo'o. Muse'em Waa'i Isra'eelinaa yaa Gibxi adilannee minaadabannee issu luwwa, googonne ixxuwwanne afu hawwoo Waa'i hara'mmaa gatisukkisaa ixxi ballina kurukko. Yootirim Waa'i ixxuwwa Gibxi uulli manni angiinsi gatisimminne Isra'ee'l minaadabina issu er luwwa hundam macceesaa liiramukko. Ixxim «Gibxi uulli manni angiinsii Faari'ooniinsii ki'nnuwwa gatisukkaanina, Gibxi agiddaniinsim minaadaba gatisu Waa'ina galat afona! Waa'i mulli waa'uwwiinsi hundiinsim lophphoo malaayyaam ihukkisa kaba la'ummo; Isra'ee'l minaadaba amaadinne amadda'a hee'llo'i keenonne hundannem kaka issaakko» yukko. Ee lasage Muse'e balli Yootir shokkiisakka'a hincaa'akkam kitimaa mulli kitimaa Waa'ina hincaa'ukko; Aaroonim Isra'ee'l awwonsaaninne maqirem keesammi hurbaata Waa'i illagenne Muse'i ballinnem iteena waarukko. La'm balla soodaraarom Muse'e minaadabanne oogateena afuurukko; ixxuwwim dariinsi ki'isaa maaro'i afeebe'e ixxi gadanonne uullita'a hee'llo'o. Muse'e ballim minaadabina Muse'e issoo luwwa hundam moo'aa «Maha issitoollahe? Ku manni hundim dariinsi ki'isaa maaro'i afeebe'e ki kululleetanne uullaa hee'ukkuuyyi mullam oogaxxi barcumanne mahina afuuttaate?» yukko. Muse'em «An ka hundam issoommok minaadab Waa'ika doo'lla la'eena i beyyo waaroo bikkinatte. Ixxuwwanne woshshi hee'oo amman hundam i beyyo waattamo; ee woshsham moo'aa oogatoommo; Waa'ika seeraa ogoram ixxuwwina kuroommo. Ee lasage Yootir «At baxxoo bax eraneyyo. Atii ki beyyo waaroo mannii ki'nnuwwi gaga hoogissakkamuulla; ku bax kee'mmaalli ihu bikkina at mullam issiteena xantooyyo. Kaba an keese sogoommo; Waa'i kiinninne maqir ihona; at minaadaba bikkitaa ixxuwwi quuxo Waa'ina hincaa'e. At Waa'ika ijaajoo seeraa losise; hinkid hee'immii baximmii hasisooda'em moo'ise. Ihukkaarem minaadabiinsi lachchi yoo manna, Waa'a baddoo keeno, amma'nnamaakkoo keenoo maqanxa aa'oobee'i keenoo doo'lle; ixxuwwam kuma awwonsaano, xibbe awwonsaano, ontayye awwonsaanoo tommo awwonsaanoo issitaa doo'lle. Ixxuwwi ayyi ammanem minaadabanne oogattona; sholle'aalli woshshuwwam ixxuwwi guullitona. Ihukkaarem kee'mmaalli woshshuwwa ki beyyo hincaa'llona; ee'isinne hara'mmitolas kiina bax sholle'ookko. Ee'isa issitaa baxxita'nnii oohim Waa'i doo'l ihuta'nnii ki gaga kora'am qondoodissooyyo; minaadaphphi quuxim ammaninne beeddoohaare mine elle'ookko» yukko. Muse'em ixxi ballika sogitano aa'ukko; ixxi yukkisam issukko. Muse'em Isra'ee'l minaadabiinsi lachchi yoo keeno doo'llukko; minaadabannem kuma awwonsaano, xibbe awwonsaano, ontayye awwonsaanoo tommo awwonsaanoo issukko. Ixxuwwi hundi ammanem minaadabanne oogattam hee'llo'o. Ihukkaarem kee'mmu woshsha Muse'e beyyo eebbam hee'llo'o. Ee lasage Muse'e ixxi ballo geegeesukkaare ixxi uullam elle'ukko. Isra'ee'l minaadab Gibxiinsi fitto'i saxxi aga'n luxxi ballanne Siina'i uulli udma'a affo'o. Ixxuwwim Raafiidiimiinsi ki'lla'a Siina'i udma'i uulla matta'a duu'n illagenne yoo udma'anne wiiddanto'o. Muse'em Waa'inne atoorareena duunanne firukko; Waa'im duunanne ihaa Yaaqoob shumo'i ikko'i Isra'ee'l minaadabina «‹An Waa'i Gibxi minaadabanne issummokaa gaaqichchi ixxi ciicoolla ladonne iyyoo'isa anim ki'nnuwwa hinkid issaa ka beyyi afeebe'e eebumda'ee laqqakkamo. Kabadem oono'o, iina ijaajantakkolasii hidi'l sagaram egettakkolasii uulli hundim iihan ihukkaarem ki'nnuwwi iina gulummi ikkakkamo. Ki'nnuwwi iina keesantakko'oo minaadab ikkakka'a qeessuwwisa awwaaddakkamo› yitaa Isra'ee'l minaadabina kure» yukko. Ee bikkina Muse'e duuniinsi dillaa minaadaphphi awwonsaano weeshisaa Waa'i ixxena uwwu ijaaj hundam ixxuwwina kurukko. Ee lasage minaadab mat sagarinne «Waa'i ijaajukkoka hundam issinoommo» yito'o. Muse'em ee ixxuwwi yito'oka Waa'ina hincaa'ukko. Waa'im Muse'ena «Kiinninne maqire wocummuuyyi minaadab macceessamisinaa at woccoo woshsha amma'nnitamisinaa kee'mmaalli duubinne ki kolli waaroommo» yukko. Muse'em minaadab ixxena uwwu dabachcha Waa'ina hincaa'ukko. Waa'im Muse'ena «Minaadaphphi beyyo mattaa kaballaa soodoo ixxuwwa keese; ixxuwwi eddechcham aanshitona kure. Saxxi ballanne minaadab hundim moo'llu'uuyyim an Waa'i Siina'i duunanne dilloommi bikkina minaadab hundim ee ballina gudona. Ee duu'n kululleetanne minaadabina gabala issitaa ‹Ki'nnuwwi ka duunanne fittakkotte; te'im duu'n lokkagam nakkitakkotte; ayyi manchim duunooma nakkulas hanqo'isam lehookko. Ayyi angim ixxo nakkoone; ihukkaarem nakkukkok hundim kininne aphphisamookko te'im xiyyinne oramookko; manni te'im fooraam diinat foorinne hee'ooyyo› yihe. Duunanne firimmi xansiisookkok xurumbi malaayyaamisa fugamoo amman xale'e» yukko. Ee lasage Muse'e duuniinsi minaadaphphi beyyo dillukko; minaadabam keesukko; minaadabim ixxi qaqqi eddechcha aansha'ukko. Muse'em minaadabina «Saxxi ballina ki'nnuwwi gaga gudissehe; oo balli afeebe'em ki'nnuwwi meenti kolli hincitakkotte» yukko. Saxxi balla daram kee'mmaalli duub duunanne ihaa gug, banqii malaayyaam xurumbi sagarii macceesamukko; minaadabim wiiddananne afuuru beyyonne huxe'ukko. Muse'em minaadaba wiiddaniinsi awwonsaa fissaa Waa'i kollonne hincaa'ukko; ixxuwwim duu'n lugumonne uullito'o. Waa'i ixxi giirinne Siina'i duunanne dillu bikkina oo duun wiriirinne ifiisamaa hee'ukko; wiriiroomim guudo'iinsi firoo wirii'llisa iimhooraa butukunnukko; duunoomim malaayyaamisa heekke'am hee'ukko Xurumbi sagar malaayyukkuuyyi waarukko; ee lasage Muse'e wocukkaare Waa'i guginne wocaa dabarukko. Waa'i Siina'i duu'n ludonne dillukko; Muse'em ee duu'n ludo waaroo'isina weeshukko; Muse'em ee duu'n ludonne firukko. Waa'im Muse'ena «Dille, minaadab eese Waa'a moo'eena gabala higaa waaroobee'isa qoxxissaa kure; ee gabala higamulas ixxuwwiinsi lobakat keen lehookko. I kolli hincitam qeessuwwam ihukkaare ixxuwwi gaga keesimmi hasisookko; eehid ihubeelas an Waa'i ixxuwwa guzumo'oommo» yukko. Muse'em Waa'ina «Minaadab Siina'i duunanne fireena xanooyyo; mashka'oomim ‹Duuna keese; kululleetannem gabala isse› yitaa qoxxissaa kuttaatto» yukko. Waa'im «Dillitaa Aaroona amaddaa waare; qeessuwwii minaadabii i beyyo waarimmina gabala higimmi hasisooyyo; higgolas an ixxuwwa guzumo'oommo» yukko. Muse'em minaadaphphi kolli dillaa Waa'i ijaajukkoka hundam ixxuwwina kurukko. Waa'i ka ijaajjuwwa hundam ixxi minaadabina «Isra'ee'l minaadaba, Gibxiinsi agidda'n uulliinsi keese fissummi ki Moollanni Waa'i anette. «Iinniinsi bagaan kiina mulli waa'i hee'oone. «Iimanenne te'im uullanne te'im uulliinsi woroon wo'onne hee'oo ayyi luwwiinsim misila ki gagina waa'i issitaa baxxitte. An ki Moollanni Waa'i to'achchoommanee eese sabbam kee'n shumo'om ixxuwwi anno'i baaxii'l bikkina saxxi qaranchiinsi soo'l qaranchi afeebe'e guzumo'oommanee ihu bikkina eehido'i waa'uwwina otossititte te'im awwaadditte. Ihukkaarem eese iittitam keeninaa i ijaajom egettam keeninaa hundinam kum qaranchi afeebe'e heer heerina hee'oo iitto moo'isoommo. «Ki Moollanni Waa'ika summa awwaad bee'i luwwina weeshshitte; mashka'oomim Waa'i ixxi summa awwaad bee'i luwwina weeshoo keeno guzumo'oo'n urooyyo. «Usheexxaxxi balla keessoo'isina sawwihe. Loh balla baxe; issitoo luwwi hundam isse. Ihukkaarem lama'l balli ki Moollanni Waa'ina keesamaakkoo usheexxaxxi balla; ee ballanne ayyi manchim baxo baxoone; at, ki oos, ki awwaadaan, ki diinatii ki uullanne hee'llam waaraanii matem baxom baxxakkotte. An Waa'i iimane, uulla, dambalaqaa eekee'n woronne yoo luwwaa hundam loh ballanne qooccaa lama'l ballanne usheexxaammo; ee bikkina an usheexxaxxi balla maasse'aammo; keesaammome. «Ki Moollanni Waa'i kiina uwwoo uullanne ki umur qeeraa'lloo'isina kiyyannaa kiyyummaa lonse. «Shititte. «Saa'llitte. «Game'llitte. «Ki beshichchonne qophphano naqqassitte. «Ki beshichchika mine mixxitte; ixxeka are, agido, mirgo'oo hallaa ixxeka ayyi amaxxam mixxitte» yukko. Minaadabim banqa, gugaa xurumbi sagaraa macceesaahii duun wiriiroo'isa moo'aahii baa'aa huxe'ukko; qee'llaahim uullukko. Ixxuwwim Muse'ena «At niina woce; neesem macceensoommo; Waa'i niina wocoo'isa issititte; oobeelas neese leneenatte» yito'o. Muse'em minaadabina «Badditakkotte; baaxiilo baxxakkambee'isa Waa'a baddimmi ki'nnuwwinne maqir ihoo'isina Waa'i ki'nnuwwa keeneena waaraakko» yukko. Waa'i yoo gambabbi tuunsonne Muse'e hincaakkoohaannonne minaadab qee'llonne uullaa hee'ukko. Ee lasage Waa'i Muse'ena «Isra'ee'l minaadabina ‹Iimanenne ihaa wocummisa ki'nnuwwi gagoomim moo'llakko'ookko. Iinniinsi bagaan ki'nnuwwina mulli waa'uwwi hee'oone; biriinsi te'im worqiinsi mulli waa'uwwa baxxakkotte. «Iina buchchinne kiti'm beyyo baxxehe; ixxonnem ki'nnuwwi gereebbiinsi, fella'iinsii lariinsii doo'llitakka'a shokkiisakka'a hincaa'akkamokaa mateeyyoo'm kitimaa kitimmehe; i summi lophphoo'isina qoodummi beyyi hundam waaraa ki'nnuwwa maasse'oommo. Kiti'm beyyo kininne baxxakkolas xaar nakku kininne baxxakkotte; xaarimdu nakkulas haashaaramookko. Ki'nnuwwik tuulli orachchi la'amoobee'isa kiti'm beyyo gardabbinne fittakkotte. «At Isra'ee'l minaadabina uwwitoo seer ‹Ibrokkichchi agishsho bitaa'llilas loh hiincho kiina awwaadona; lama'l hiinchonne maham miqoo'n wolabbano firona. Mullam waaraakkoohan ihulas mullam wolabbano siidaa marona; ihukkaarem waarukkuuyyi meentichchaam ihulas ise ixxenne maqirem mattona. Ixxena moollanni meento eebaa goona te'im landa qatto'oohan ihulas oo meentichchoo oosii ee moollannina gattona. Manchoom mullam wolabbano firona. Ihukkaarem oo agishshi ‹I meentichcho, i oosoo moollannaa iittoommo; wolabbano fireena hasoommoyyo› yulas ixxi moollannim ixxo oogataa'n illagenne hincaa'ona; ixxi moollannim goocanne te'im gooc gubananne hincaa'aa uullisaa macce mutinne lufona; ee lasage ixxi umu'l doolli hundoomam ixxena awwaadaanchi ihona. «Mat manchi ixxi landichcho agishshi ikkona biteesulas wolabbano fittamok goon firoohaannisayyo. Ixxi aretti isseena hasaa doo'llaa lasage is moollanna liiransitobeelas tisso miqaa geegeesona; mashka'oomim is moollanni ise gadu bikkina allaggi mannina biteeseena xanooyyo. Ihukkaarem ixxi beetaretti ikkamisina hasukkaa'lleensi ixxi landina issoo luwwa hundam issona. La'm are eebulas luxxi arena hurbaataa eddechchaa uwwimma uroone; illageen hee'u eebaqqanchi hanqam isena hooroone. Ee sasem luwwam isena issoobee'an ihulas ise maham miqqoo'n wolabbano fittona. «Manna aphphisaa shoo manchi lehinne guzumo'amona. Ihukkaarem ixxi anganne manni lehukkok dugaa egeraatetti ihoo'n Waa'i doo'l ihaa dangonnette ihulas oo manchi an gudisoommi beyyo gibona. Ihukkaarem mat manchi baadeesaa mulli mancho shuta'n ixxim ixxi gaga gatixxeena iina kitima hincaa'akkam beyyo gibaa maruta'nnim lehinne guzumo'amona. «Anna te'im ama aphphisookkok lehinne guzumo'amona. «Mat manchi mulleka game'aa biteesulas te'im ixxi anganne amadaa siidamulas lehinne guzumo'amona. «Anna te'im ama game'llookkok lehinne guzumo'amona. «Lam manchi wocanta'a mat mulleka kininne te'im tontoomminne aphphisuta'n oo manchi lehubee'aarem jabbaanchi ihulas iinse'u beyyiinsim ki'aa sikkinne biiranne taakke'amulas oo aphphisu manchi bi'u amma'n bikkina diinatinne guzumo'amona bagaan mulluwwinne guzumo'amoone; erisa fayye'eebe'em jabbisona. «Mat manchi goonchi te'im meentichchi agishsho biccinne aphphisukkisam oo agishshi ee ammanem lehulas guzumo'amimmi hasisookko. Ihukkaarem oo agishshi mat te'im lam balli woronne lehubeelas ixxo gassoo moollanni guzumo'amoone; ixxena agishshi lehimmi ixxi gagoomim guzumo'ancha. «Lam manchi ganantu'uuyyi lamfoor meentichcho ee keeniinsi mat aphphisaa isenne mulli hawwodanchi afoo'n godaphphi qachchi lehuta'n ee meentichchi aro'i xa'mmoo guzumo'o oo aphphisu manchi miqona; ee guzumo'om daannuwwi qoodona. Ihukkaarem oo meentichcho hawwodantolas foorina foore, illina ille, inqina inqe, angina anga, lokkina lokko, shokkina shokka, madina mada, qokkimmina qokkancha guzumo'amona. «Mat manchi goonchi te'im meentichcho agishshika ille qooqisuta'n ee illi bikkina ee agishsho wolabbano fissona. Ee'isam mat inqem iiquta'n ee inqi bikkina ee agishsho wolabbano fissona. «Mirgo'i mancho qasaa shuta'n ee mirgo'o kininne aphphisakka'a shakkona; ixxi maaram itakkoone; ihukkaarem ee mirgo'i annichchi xa'mmamoone. Ihukkaarem oo mirgo'i manna qasoohan ihaa annichchi karaa egedona magannaato kurakko'oka aa'imma sabaa oo mirgo'i manna qasaa shulas ee mirgo'o kininne aphphisakka'a shakkona annichchim lehinne guzumo'amona Ihukkaarem xiigo guullaa ixxi gaga gatixxeena xanulas xa'mmamu luwwi hundam miqona. Mirgo'i mat beeto te'im landichcho qasaa shulas ee see'llisinne guzumo'amona. Mat mirgo'i meentichch te'im goonchi agishsho qasaa shuta'n oo mirgo'i annichchi ee agishshi moollannina sad kin bira miqona; ee mirgo'om kininne aphphisakka'a shakkona. «Mat manchi bare hinaa ifiisoo'nnim cawwaa urukkisam mat mirgo'i te'im hallichchi ee barenne ubulas ee diinaxxeka bito miqona; bito miqaa lasage ee lehu diinate ixxi gagina gatixxona. Mat manchi mirgo'i mulli manchi mirgo'o qasaa shulas lamem manchim foorinne yoo mirgo'o biteessa'a diinatooma baxxantona; lehu mirgo'i maaram baxxantona. Ihukkaarem mirgo'i qasoohan ihukkisa la'ukkuuyyim karimma sabaa fatakulas ee lehu mirgo'i bikkenne mirgo'o miqona; lehukkokoom ixxena gatona. «Mat manchi mirgo'o te'im gereechcho game'aa duruta'n te'im biteesuta'n ee mat mirgo'i bikkenne onti mirgo'o mat gereechchi bikkennem soor gereechcho miqona. Mat gamaanchi mi'nneka saanqa iiqukkuuyyi afakka'a shakkota'n oo shu manchi xiigina xa'mmamooyyo. Ihukkaarem game'ukkuuyyi shukkok ballannetti ihulas oo shu manchi xiigina xa'mmamookko. Gamaanchi game'u luwwa hundam miqona; miqoo luwwimdu bee'an ihulas ixxi gagim biteesamona. Game'ukkok mirgo'om ihukko hallichcho te'im gereechchi ihaa foorinnem amadakkolas ee game'u luwwika lam suume miqona. «Mat manchi ixxi diinate allaachchi beyyiinsi ti'em woyi'n kaashshi beyyiinsi fatakaa mulli mannika hurbaata itisulas oo manchi ixxi hurbaatiinsi te'im woyi'n kaashshiinsi doo'lla miqona. «Mat manchi ixxi abuulli uullanne shokka uwwukkuuyyi oo giir aphphukkuuyyi maraa mulli mannika hurbaaxxi naara te'im muramubee'i hurbaata shokkiisuta'n oo shokka uwwu manchi miqona. «Mat manchi mulli manchika diinate te'im bito xee'aalli mulli mu'uta disseena yabo aa'aa dissu beyyiinsi game'u gamaanchi amadamulas lam suume miqona. Ihukkaarem gamaanchoom amadamubeelas mu'uta disseena yabo aa'u manchi Waa'i illagenne hincaa ee manchi mu'utanne ixxi angi bee'an ihukkisa hide'ona. «Lam manchi mat baa'l bikkina te'im hallichchi bikkina te'im eddechchi bikkina te'im bi'u mu'ut hundinam fitantota'n oo lamem manchim Waa'i illagenne hincitona. Waa'im ixxi awwaadaaninnetti ihaa la'isoo hawwodu manchi ee hawwodamu manchina lam suume miqona. «Mat manchi mulli manchika mat hallichcho te'im mirgo'o te'im gereechcho te'im fooraam diinaxxeka ayyem allaareena yabo aa'aa lasage lehuta'n te'im iiqamuta'n te'im bogamuta'nnii eehanninam naqaash bee'an ihulasii, oo manchi Waa'i illagenne hincaa ee diinatenne ixxi angi bee'an ihukkisa hide'aa la'isona. Ee diinaxxi annichchim ee hiditano aa'aa maham miqisoone. Ihukkaarem oo diinat game'amukkan ihulas diinaxxi annichchina miqona. Moochchi itaakkoohan ihulas moochchiinsi gatukkoka naqaashoomina hincaa'ona; moochchi itu bikkina miqoone. «Mat manchi mulli manchiinsi fooraam diinate massaa lasage oo diinat annichchi la'oo'n lehulas te'im iiqamulas ee uwwu manchina miqo'o miqona. Ihukkaarem eehid ihukkok mu'uxxi annichchi gadanonnetti ihulas massu manchi miqoone; massukkokim kera'inatte ihulas ee kera'ina miqookkok ihookko. «Mat manchi xeehantobee'i landichcho qawwiisaa baajoommano bi'isulas qoota uwwaa ixxi aretti issona. Ihukkaarem landichchi anni ixxena ladiiseena hasubeelas mat baajaam landichchona uwwakkam qoot qax bira landichchi annina uwwaa guzumo'amona. «Kiiraanchi meentichcho foorinne hee'llona caawwitaa uttitte.» «Fooraam diinatinne sha'ixxi edancha edamoo manchi hee'ulas lehinne guzumo'amona.» «Iinniinsi bagaan mulli waa'ina ayyenam kitima hincaa'oo manchi lehinne guzumo'amona.» «Ki'nnuwwi Gibxanne hee'llakko'i ammane waaraan hee'llakko'isa sawwitakka'a waaraancho wor amaddakka'a hawwoddakkotte. Aro'i lehu busar meentoo adaraar oosoo wor amaddakkotte. Eekka issitakka'a ixxuwwi i kollonne laattolas an Waa'i hanqoomam ixxuwwi laachcha macceesoommo. Anim ki'nnuwwanne quuqaa orinne beedditakkamisa issoommo. Ki'nnuwwi meentim aro'i bee'i keeno, oosim adaraalluwwi ihookko. «I minaadabiinsi mat buxichchina diinate liqaayyissaa lasage qaro'ina uwwu manchisa ixxo hawwissitte; qaro'o edaa miqonam xa'mmititte. Ki beshichchika eddechcha dabbita'n eelliinchi aagoo'n massitaa uwwe.» Mashka'oomim qiida hoo'lloo luwwi mullek mahim bee'i bikkina maha edde'aa iinse'ookko? I kollonne laarulas an qishixxoomman ihummi bikkina ixxeka laachcha macceesoommo. «Waa'inne game'llantitte. Ki minaadaphphi awwonsaanchom game'llititte. «Hurbaaxxekaa woyi'n diqaasikaa ludo iina uwwe. «Won ihaa qaramu ki goo'n oosom iina uwwe. Ee'isam ki lariinsii gereebbiinsii won ihaa qaramoo labeena te'im ambula lamar balla aminne afuuraa lasage sadeenti ballanne iina hincaa'e. «Ki'nnuwwi keesantakko'oo i minaadab ikkakko'i bikkina bii'l moochchi shu luwwika maara wishina uwwehe bagaan ki'nnuwwi ittakkotte.» «Qophpha'n woshsha taakkiissitte; baaxiilaanchi mancho qophphano naqqassaa muccur issiissitte. Jora baxxeena te'im oogato boqqisseena lobakat manni mateeyyoominne ki'llam ammane at ixxuwwinne maqire manni hanqa bi'issitte. Buxichchi oogatina hincoo ammane ixxi buxooma moo'llaa golo'llitte. «Ki masokkichchik mirgo'i te'im hallichchi bi'u beyyonne siidditlas ixxena massitaa uwwe. Keese saboo manchik hallichchi iyyi kee'mmaa ubu beyyonne siidditlas ubu beyyiinsi ki'ona hara'mme bagaan uttaa higgitte. «Buxichchi fitamoo ammane ixxi buxooma moo'llaa oogato boqqissitte. Ayyi manchom qophphaninne kasassitte; muccur mancho shititte; mashka'oomim an baaxiilaanchi mancho muccur issoombee'ane. Manni hanqo'an ihu luwwa moo'oobee'isa ille ifiisoo bikkinaa muccur mannikam oogato'o bi'isoo bikkinaa maqanxa aa'llitte. «Waaraano barche'e issitakkotte; mashka'oomim ki'nnuwwi Gibxanne waaraan ikkakka'a hee'llakko'i bikkina waaraa'nnek heechchi hinkido'anda'e ki'nnuwwim laqqakkamo. «Loh hiincho ki uulla abuullitaa atoota wixxaa'e. Ihukkaarem lama'l hiinchonne uulli usheexxona. Ki minaadaphphi lambe'enne yoo buxim hurbaata wixxaa'aqqona; ki uullanne gobbe'i ihaa mutu luwwiinsi maham wixxaa'llitte. Buxiinsi gatukkokam bii'l moochchi itona. Woyi'n kaashshi beyyii wee'l kaashshi beyyim ee'isam usheexxona. «Saantanne loh balla kiikka bax hundam baxe. Ihukkaarem lama'l ballanne mah baxom baxxitte. Ki mirgo'i, ki hallichchi, ki awwaadaanii ki minenne hee'oo waaraanii hundim usheexxona. «An Waa'i ki'nnuwwina kurummi luwwi hundam qoossitakka'a macceessehe. Mulli waa'uwwa uunxitakkotte; ki'nnuwwi suuminne weeshshakku'uuyyim macceesamoone. «Hiinchonne sas kore eese lonsitakkam ugudduwwi hee'ona. Gibxi uulliinsi fittakko'i Abiiphphi agananne an ki'nnuwwa ijaajummisinnem Qorosho'i uguda lonsehe. Ee uguda lonsakkam lamarem ballannem irsho'i nakkubee'i qorosho'o ittehe; i illagennem kora'i angam hincitakkotte. «Ki'nnuwwi uulliinsi hurbaata wixxa'llakkam ammane Hurbaaxxi uguda lonsehe. «Woyi'n kaashshiinsii mulli kaashshuwwiinsii misha wixxaa'llakkam hiinchi lasaanchonnem Daas uguda lonsehe. Hiinchonne sas kore ka ugudduwwa lonsitakkam ammane goon hundim Moollanni Waa'i kollonne hincihona. «Kiti'm xiiga hincaa'llakkam ammane irsho'i yoo hurbaatinne hincaa'llakkotte. Ee ugudduwwanne iina hincoo kiti'mmek di'ir uulli soodeebe'e garoone. «Ki uulli mishika ludo ki'nnuwwina Moollanni ihummi Keesammi Mine eebbehe. «Gereechchika te'im fellakkichchi wota'lleka maara ixxi am adinne sattitte. «Mattoo googonne keese egeronaa an kiina gudisummi uullam keese xumminne aagisonaa ki illaginne maroo asse'amaancho an asse'oommo. Ixxi kiina yookkoka qoossitaa macceese. Ixxena ijaajancha sabbaa ixxo qaraassititte. I summi ixxonnetti ihu bikkina boqqooma moo'aa haafooyyo. Ixxi kiina yookkokaa an ijaajummi ijaajoo qoxxitaa macceessilas an ki diina'a hundam saboommo; keese u'nnissam keenom u'nnisoommo. I asse'amaanchim ki'nnuwwi illaginne marookko. Ixxim ki'nnuwwa Amoore'ika, Hiite'ika, Faarze'ika Kana'aa'nneka, Hiiwe'ikaa Iyyaabuus uullaa awwonsaa massookko. Anim ixxuwwa guullaa bi'isoommo. Ee kee'n waa'uwwina otossititte; ixxuwwi losanom awwontitte. Ixxuwwika waa'uwwa guullitaa bi'ise; keesammi ki'n utubbuwwam iiqanse. Iina ki Moollanni Waa'ina otossitlas ittoo hurbaataa aggoo wo'oo uwwaa keese maasse'oommo; jabbi hundam kiinniinsi qeessommo. Ki uullanne karii alceenni meentii hee'ooyyo; ki umuram qeeraa'llisoommo. «Kiinninne uullixxantam keen hundim eese badditamisa issoommo; keesenne ora ki'issam minaadab hundannem hambalaachcha eeboommo. Ki diina'i laso daba'llita'a gibbamisa issoommo. Ki diina'a dambaqisoommo. Hiiwe'ika, Kana'aa'nnekaa Hiite'i minaadabaa ki illagiinsi fiikkisoommo. Ihukkaarem an ixxuwwa mexxo'i hiinchonne fissaa holloommoyyo; eehid issumlas uulli udma'i ihaa bii'l moochchi keese hawwisookko. At fikkaannitaa uulla wo'mmiteebe'e an ixxuwwa hoffi hoffan issummuuyyi fissoommo. Ki uulli gabalam Ertiira'i dambalaqiinsi ki'isaa Filisxee'm dambalaq afeebe'e udma'i uulliinsim ki'isaa Efiraaxiis daajji afeebe'e haraassoommo. Ee uullanne hee'oo manna kaa'lloo'isa issoommi bikkina at ixxuwwa ki illagiinsi hollitootto. Ixxuwwinnee ixxuwwi waa'uwwinnee hore'em hide'antitte. Ixxuwwi waa'uwwina otossitlas kiina qaash ihookko. Oo minaadab ki uullanne hee'llona uwwititte; ki uullanne hee'llolas baaxiilo baxxaa eese hawwoddoo'isa issitamo» yaa ijaajukko. Waa'i Muse'ena, «At, Aaroon, Naadaab, Abiyuuhii Isra'ee'l awwonsaaniinsi lamarayyi manchii an yoommi duuna waallehe; qee'llonnem otossi'llehe. Xale'i at i kollonne hincihe bagaan mulli keen hincitoone. Minaadabim kiinninne maqire firoone» yukko. Muse'em maraa Waa'i ijaajoo seeraa hundam minaadabina kurukko. Minaadabim sagara matissitta'a «Waa'i kuru luwwa hundam issinoommo» yita'a dabatto'o. Muse'em Waa'i ijaajjuwwa hundam kitaabukko; la'm balla daram ki'aa duu'n lugumonne kiti'm beyyo baxukko; tomminnee lamem Isra'ee'l shumo'i summinnem tommoo lam ki'n utubbuwwaa uullisukko. Ixxim harade'i woraada shokkiisakkam kitima hincaa'llona asse'ukko; ixxuwwim labeennuwwa mateeyyoo'm kitim issita'a Waa'ina hincaa'llo'o. Muse'em ee kiti'm xiigiinsi kollo aa'aa gabatanne dissukko; kollo odim kiti'm beyyonne wixukko. Ee lasage hidi'l saga'l kitaaba minaadabina sagara iimaa'aa qananaa'ukko; minaadabim «Waa'ina ijaajammoommo; ixxi yu luwwi hundam issinoommo» yito'o. Ee lasage Muse'e gabatanne yoo xiiga minaadabanne wixaa lasage «Ku xiig Waa'i ka ijaajo hundam ki'nnuwwina uwwu ammane ki'nnuwwinne aagu hidi'l saga'l xiiga» yukko. Muse'e, Aaroon, Naadaab, Abiiyuu Isra'ee'l awwonsaaniinsi lamarayyi manchii duuna fitto'o. Isra'ee'l Waa'am moo'llo'o. Ixxi lokki lugumonnem cuquluusa laboo kininne baxamaakkoo ca'aakko iimane labo gax hee'ukko. Waa'im ka Isra'ee'l awwonsaano guzumo'ukkoyyo. Ixxuwwim Waa'a illinne moo'llo'o. Ixxi illagennem itto'oo aggo'oo. Ee lasge Waa'i Muse'ena «Ka duunanne an yoommi beyyo waattaa keyyenne egere; minaadaba losissona seeraa ijaajoo kitaabaammoo lam ki'n ba'lla kiina uwwoommo» yukko. Muse'em ixxi awwaadaanchi Iyyaasinne maqirem ki'ukko; Muse'em keesamaakko Waa'i duunanne firukko. Isra'ee'l awwonsaanina «Neese ki'nnuwwi beyyo daba'llinaa waalleembe'e keyye egellehe. Aaroonii Huurii ki'nnuwwinne yo'i bikkina wocamu manchi hee'ulas ixxuwwi beyyo marona» yukko. Muse'em duunanne firukko; unbu'llim ee duuna ifiisukko. Waa'im lombinne Siina'i duunanne dillukko. Duubim ee duuna loh ballina ifiisukko. Lama'l ballannem duuphphi woronne ihaa Muse'e weeshukko. Duu'n ludonne caakku Waa'i lombim Isra'ee'l minaadabina itoo gii'llisa moo'amam hee'ukko. Muse'em duunanne firaa ee duunanne yoo duuphphi woronne aagukko. Eehe'em sor ballaa sor hiimoo afuurukko. Waa'i Muse'ena, «Iina irifo'o eebbona Isra'ee'l oosina kure. Ayyi manchim ixxi gaginne liiramaa iina eeboo irifo'o hundam aa'ee. Aa'llootti irifo'uwwim worqa, bira, naas xaara, shaano'inne, kuulinne, muulli kasharinnee cuquluusa laboo fatirinnee dadamaakkoo eddechcha, kashar eddechcha, talbi fatirinne dadamaakkoo eddechcha, fella'i oddinne dadamaakkoo eddechcha, kashar qalam labamaakkoo gereebbi ambu'l omachcho, cukkamaakkoo omachcho, giraa'l haqqa, caakkinaa laphphimminaa ihoo wee'l zayta, danaamisa enje'oo aduruusa, aduu'n ille laboo kinaa Eefuudannee hundiinsi lob qeessichchi edde'oo biq kiisannee issakkam bito xee'aalli kinaa ihona. An ixxuwwi lambe'enne garoommisina i minaadab iina mine baxona. Dukkaanaa ixxi woro'l mu'utaa hundam an moo'isoommisinne baxxehe. «Hidi'l Saga'l Saaxina giraa'l haqqinne baxe. Ixxekim dufaachchi lam angaa kolloo midaadii uullichchii odim mat angaa kolloo ihona. Hanee worom muccur worqinne goolabe. Ixxi kululleetanne hundannem worqi goobinaancho isse. Soor worqi guma'am baxxaa lamoo mat kollonne lamoo odim mulli kollonne issitaa soorem lokkonnem amaxxanse. Ee Saaxina iyyakkam wonnannuwwam giraa'l haqqinne baxxaa worqinne goolabe. Ee wonnannuwwam ee Saaxi'n soorem ejjo'onnem yoo guma'uwwanne aagise. Oo wonnannuwwim ee Saaxi'n guma'uwwiinsi annanni ihimmi hasisooyyo. Ee lasage ijaajjuwwi kitaabamaakkoo an kiina uwwoommi lam ki'n ba'lla ee Hidi'l Saga'l Saaxi'n woronne disse. «Dufaachchoom lam angaa kolloo midaadim mat angaa kolloo ihoo haafixxi ifichcho muccur worqinne baxe. Ladaam lam kiruubeela tumammi worqinne baxe. Ee lamem kiruubeelam ee ifichchi hanenne lamem kolli tochchinnem isse. Oohim ifichchinne maqire baxamaakkoohan ihona. Oo kiruubbuwwi ixxuwwi lado iim biddiqaa'lla'a haafixxi ifichcho ifiissona; ixxuwwim mat mato moo'aqqantaman ikka'a ifichcho aad illinne moo'llona. An kiina uwwoommi ki'n ba'llam ee Saaxi'n woronne dissitaa ee haafixxi ifichcho ifiise. Anim ee lamem kiruubeelluwwi lambe'enne ee Haafixxi ifichchi hanenne ihaa kiinninne edamoommo. Isra'ee'l oosinam kuttoo ijaajo hundam uwwoommo. Dufaachchi lam anga midaadim mat anga uullichchi odim mat angaa kolloo ihoo xaraphpheeza giraa'l haqqinne baxxaa muccur worqinne goolabe; ixxi kululleetannem worqi goobinaancho isse. Ixxi kululleetam mat taachcho'o ihoo qaxa gammaltaa worqinne goolabe. Soor guma'a worqinne baxxaa lokki yoo soorem ejjo'onnem isse. Ee xaraphpheezam iyyakkam wonnannuwwa aagisakkam guma'uwwi goobinaanchina hincaakkoohan ihona. Ee xaraphpheeza iyyakkam wonnannuwwam giraa'l haqqinne baxxaa worqinne goolabe. Aggi kitimina awwaadoo saahinnuwwa, wocittuwwa, maqorqoro'uwwaa loqooqo'i saahinnuwwaa muccur worqinne baxe. Oo xaraphpheezim Hidi'l Saga'l Saaxi'n illagenne hee'ona; iina hincoo keesammi daabbo'i hundi ammanem ee xaraphpheezanne hee'immi hasisookko. Caakka dissakkam mu'uta muccur worqinne baxe; ixxekam lugumoo amaa tumamaakkoo worqinne baxe; ludo, gurambaa fiitaa wereeggina ihona mat issitaa baxe. Sasii mat kollinne, sasii odim mulli kollinne yoo loh caafa midaadinne baxe. Lohem caaffuwwina annannichchinam sas sas humbulli'nnoo fiit hungunuuna laboo gurumbuwwa isse. Caakka dissakkam mu'uxxi caaffuwwi amanne humbulli'nnoo fiit hungunuuna laboo gurumbuwwika sooro isse. Oo lohem caaffuwwim exxoo sasem beyyonnem mat mat gurumba isse. Gurumbi, caafii caakka dissakkam mu'utii hundim matfir ihaa muccur worqinne baxamona. Caakka dissakkam luwwinam lamar caakka baxxaa illaqqi kollinne caakkisoo'isina hanenne disse. Gii'l buchcha giggissakkam mu'utaa qapha dissakkam saahinnuwwaa muccur worqinne baxe. Caakka dissakkamaanninaa ee mu'uttuwwinaa hasisoo muccur worqi sadee onti kiilo'i ihona. Ee hundam duunanne moo'isummisanne baxxeena qoossitaa la'e. «Ee'isam Keesammi Dukkaana shaano'inne, kuulinnee baar kashar fatirinnee dadamaakkoo tommi du'm eddechchinne baxe; oo du'm eddechchim talbi danaam fatirinne dadamaakkoohan ihona. Ee du'm eddechchannem angi qoor manni wereeggisaa baxakkoo kiruubeela isse. Ee du'm eddechchik annannichchikim qeeraa'lloom lamiyyee sadeenti anga midaad odim soor angi ihaa hundim gudaanchi ihona. Oo du'm eddechchim onti mat ihaa onti odim mullam ihaa gobamona. Edansakka'a gobakko'i lamem du'm eddechchaannonne annannichchi kasannem shaano'i carqinne baxamaakkoo guma'uwwa isse. Guma'uwwi edamoo'isa issitaa ontayyi guma'a ee du'm eddechchi mat kasanne ontayye guma'uwwa odim la'm du'm eddechchi mat kasanne isse. Keesammi dukkaan matfir ihoo'isina lamem du'm eddechcham amaxxansimmina worqiinsi ontayyi qapha baxe; du'm eddechchuwwam ee ontayyem qaphphuwwinnem amaxxanse. «Ee dukkaana ambimmina fella'i oddinne tommoo mat du'm eddechchaa baxe. Oo tommii mat du'm eddechchim gudaanchi ihaa qeeraa'lloom sad anga dufaachchim soor angi ihona. Ee keenom ontoo mat kollonne lohoo mulli kollonne issitaa gobe; lohika qinxaa'llaa illaqqi kollinne hanenne ede. Lamem kolli du'm eddechchaannonnem lasaanchi kasanne ontayyi ontayyi guma'uwwa isse. Ee quna'uwwannem naas xaa'lleka ontayyi qaphphuwwa aagise. Ee'isinne lamem kollim amaxxamaa mat ihoo'isa isse. Gatu du'm eddechchika mataanni kollo afaree'n kollinne calcalaa'e. Qeeraa'lloo kollinne lamem du'm eddechchiinsim mat meeti'l kolli haraaroom yoo du'm eddechchi lamem kollinnem calcalaa dukkaana ifiisona. «Dukkaananne kashar gereechchi ambu'l omachcho, eehanni hanennem fellakkichchi omachcho eddaa ambe. «Dukkaana kaasimmina awwaadoo gorte'nnoo saanqa giraariinsi gudise. Ee saanqik hundikim uullichchi tommi anga dufaachchi mat angaa zissiraa ihona. Ee saanquwwa uullisimmina annannichchikam lam lam sane luguminne mat ogoranne shobbaa axise; dukkaa'n saanquwwa hundam ee'isa isse. Dukkaa'n woroo'n qarina lamiyyi saanqa gudise. Ee saanquwwa uullisimmina annannichchinam kin bi'l lokkuwwika sore baxe; oohim mat saanqina lam lokki hee'oo'isa isse. Dukkaa'n hanaa'n qarinam lamiyyi saanqa gudise. Ee saanqina annannichchinam lam lam lokkuwwa issitaa sor lokkuwwi hee'oo'isa isse. Dukkaa'n afaree'n kollina eelliinchi aagoo kollinne loh saanquwwa gudise. Dukkaa'n lamejjuwwinam lam saanqa gudise. Oo lamejjuwwanne yoo lamem saanquwwim lam mat guma'i worinne higoo'isa ihaa gudaakkoohan ihona; oo mat ihu saanquwwim lugumiinsi lud afeebe'e mat mullaanninne amaxxamoohan ihimmi hasisookko. Ee dukkaa'n ejjo'uwwa edansoo oo saanquwwim ee'isinne gudona. Ee'isinne saanquwwina annannichchinam lam lam lokki yoohan ihaa tommii loh xaa'l lokkuwwi yoo sadeenti saanquwwi gudona. «Dukkaa'n mat midaadinne yoo saanquwwina ihoo onti qirqire'e giraa'l haqqiinsi baxe. Ee'isam mulli midaadinne yoo saanquwwina ihoo onti qirqire'uwwa gudise; dukkaa'n afareen eelliinchi aagoo kollinne yoo saanquwwina odim onti qirqire'e gudise. Lambe'i qirqire'i ee saanquwwi lambe'enne tochchiinsi tochchi afeebe'e afoohan ihimmi hasisookko. Ee saanquwwam worqinne goolabe; qirqire'uwwa aagisakkam afo'uwwam worqinne baxe; ee qirqire'uwwam woriqinne goolabe. Ee lasage an kiina duunanne moo'isummisinne dukkaana uullise. «Ee'isam Keesammi Dukkaana shaano'inne, kuulinnee baar kashar fatirinnee dadamaakkoo tommi du'm eddechchinne baxe; oo du'm eddechchim talbi danaam fatirinne dadamaakkoohan ihona. Ee du'm eddechchannem angi qoor manni wereeggisaa baxaakkoo kuruubeela isse. Ee du'm eddechcham giraa'l haqqinne baxakka'a worqinne goolabamaa soor kin bi'l lokkonne uullaakkoo soor bellanne worqinne baxamaa yoo sinxilluwwanne saqale. Du'm eddechcham qaphinne amadiissittuuyyi saqale; lamem ki'n ba'l yoo Hidi'l Saga'l Saaxina ee du'm woronne disse; ee'isinne oo du'm eddechchi Keesammi beyyoo Keesammiinsi Keesammi beyyoo annanni issookko. Ee lasage Hidi'l Saga'l Saaxina haafixxi ifichchinne ifiise. Xaraphpheezooma Keesammiinsi Keesammi beyyiinsi biireen dukkaa'n hanaa'n qarinne disse; caakka dissaanchom woroo'n qaranne disse. «Dukkaa'n goocina shaano'inne, kuulinnee kashar fatirinnee wereeggisakka'a dadakko'oo du'm eddechcha gudise; oo du'm eddechchim talbi danaam fatirinne gudaakkoohan ihona. Ee du'm eddechchina ihoo onti meeggaro'uwwa giraa'l haqqiinsi baxxaa worqinne goolabe; sinxilluwwam worqinne baxe; ee meeggaro'uwwa uullisimmina ihoo naas xaarinne baxamaakkoo onti lokkuwwam gudise. «Qeeraa'lloom onti anga dufaachchoom onti anga uullichchi sas anga ihoo soor ejjo'i yoo kitima hincaa'akkam beyyo giraa'l haqqinne baxe. Soorem ejjo'onnem naas xaarinne goolabamaakkoo buudduwwa isse; oohim kiti'm beyyinne amaxxamaa baxamaakkoohan ihimmi hasisookko. Gii'l buchcha tuubakkam disxuwwa, giira hogoofaancho, loqooqo'i saahinnuwwa, qaphphuwwaa midachchuwwaa hundam naas xaarinne baxxaa gudise. Ee kiti'm beyyo iyyimmina awwaadoo wonnannuwwam giraa'l haqqinne baxxaa naas xaarinne goolabe. Ee kiti'm beyyo iyyimmi hasisoo amman hundam wonnannuwwa ee kiti'm beyyi midaadduwwanne yoo guma'uwwanne aagissehe. An kiina duunanne moo'isummisinne kiti'm beyyo saanqinne baxxaa woronne mahim bee'an ihona. «Dukkaa'n kululleetanne wixxixxi beyyo baxe; ee wixxixxi beyyi woroo'n qar qeeraa'lloom mat xibbi angi ihona; ixxenam talbi danaam fatirinne du'm eddechchuwwa baxe. Ee du'm eddechchuwwa saqalakkam lamiyyi nottolluwwaa nottolluwwa uullisakkam lamiyyi lokkuwwaa naas xaarinne baxe; ee nottolluwwanne issakkam sinxilluwwaa meeggaro'oo kin birinne baxe. Wixxixxi beyyi hanaa'n qarinam ee'isam baxe. Ee wixxixxi beyyik eelliinchi aaggi dufaachchoom ontayyi angi ihukkuuyyi ee beyyonne issakkam du'm eddechchinam ihoo tommi lokki yoo tommi meeggaro'uwwa gudise. Wixxixxi beyyik eelliinchi fi'l dufaachchoomim ontayyi angi ihona Ee wixxixxi beyyi goocina shaano'inne, kuulinnee kashar fatirinnee anginne wereeggisakka'a axisakko'oo qeeraa'lloom lamiyyi anga ihoo du'm eddechcha gudise; oo du'm eddechchim talbi danaam fatirinne dadamaakkoohan ihona. Soor lokki yoo soor nottolluwwa ee eddechcha saqalimmina axise. Ee wixxixxi beyyi kululleetanne yoo nottolluwwa hundam birinne baxamaakkoo meeggaro'inne amaxxanse; sinxilluwwam birinne lokkuwwam naas xaarinne baxe. Wixxixxi beyyik qeeraa'lloom xibbi anga haraaroom ontayyi ang ihona; du'm eddechchikim uullichchi onti angi ihaa oohim talbi danaam fatirinne dadamaakkoohan ihona; ixxo uullisakkam nottolluwwi lokkonnem naas xaar yoohan ihona. Ee Keesammi Dukkaa'n woro'l awwaadina ihoo ayyi mu'utim, dukkaa'nnekii wixxixxi beyyi xiribbuwwii hundim naas xaarinne baxamaakkoohan ihona. «Caakka hiim hundam caakkisimmina ihoo tumakka'a qarassakko'oo wee'l zaytika doo'llamma eebbona Isra'ee'l ooso ijaaje. Eekkam Aaroon ixxi oosinne maqirem uulli hiimaa soodeebe'e Keesammi Dukkaa'n woronne Hidi'l Saga'l Saaxina dissakkam du'm eddechchiinsi biireen Waa'i illagenne caakkoo'isa issona. Oohim Isra'ee'l oosina qaranchiinsi qaranchi afeebe'e heer heerina seer ihona. Waa'i Muse'ena «Qeessoomaninne iina awwaaddona kiyyabbaayyi Aaroona, ixxeka goo'n ooso Naadaaba, Aabihu, Ali'aazaraa Itaamaaraa Isra'ee'l oosiinsi annanni issitaa ki beyyo wore. Kiyyabbaayyi Aaroon iina awwaadoo ammane lombaa nuuraa uwwoo'isina keesammi eddechcha gudise. An anga qoor issummi keeno hundam weeshshshaa Aaroonina eddechcha daddona kure. Ee'isinne Aaroon qeessoomaninne iina awwaadeena annanni ihaakkoohan ihookko. Ixxuwwi gobbam eddechchim biqenne issakkam gonoona, eefuuda, qamisa, fatirinne wereeggisakko'oo qambiisa, horoorenne xaaxakkam shaashshaa sabbataa. Kiyyabbaayyi Aaroonii ixxi oosii qeessoomaninne iina awwaaddona ka keesammi eddechchuwwa ixxuwwina gudissona. Oo qoolluwwi worqinne, shaano'i hagarinne, kuulinnee kashar talbi danaam fatirinnee wereeggissa'a baxxona. «Eefuudam shaano'inne, kuulinne, baar kasharinne, worqinnee talbi danaam fatirinnee wereeggissa'a dadokona. Eefuudika lamem kollom lamem guduminnem edansimmina awwaadoo lam xixxaab hee'ona. Ee'isam ee eefuuda baxxo'i worqinne shaano'i hagarinne, kuulinne, baar kashar hagarinne, kashar hagarinnee talbi danaam fatirinnee eefuudanne amaxxamaakkoo saqqa wereeggissa'a anginne baxxona. Aduu'n ille laboo lam kina axissaa Yaaqoob oosika tommikaa lamikam summa kitaabe. Ee lamem kinannem ixxuwwika summa lohika matonne, lohika odim la'mmaannonne ixxuwwi umu'llisinne kitaabe. Kina cabbarakka'a koobo'o baxakkamaannisa Isra'ee'l oosika summa ee lamem kinannem kitaabe; ee kinam worqinne baxamaakkoo gurumbi goobinaanchinne gammale. Tomminaa lamem Isra'ee'l sullinaa tiissiishshi ihoo'isina lamem kinam eefuuda karakkam gudu'm xixxaabanne amadiise; ee'isinne an Waa'i i minaadaba hundi ammanem tiiroommisina Aaroon ixxuwwika summa ixxi gudummonne iyyookko. Lam gurumbi goobinaancho worqinne baxe. Muccur worqinne usisa dadamaakkoo lam chimchima gudissaa ee lamem gurumbi goobinaanchonnem amadiise. Muse'enam «Waa'i doo'lla xa'mmakkam biq gonoona lob qeessichchina baxe; ixxom eefuudisam worqinne, shaano'inne, kuulinne, baar kasharinnee talbi danaam fatirinnee anginne weereeggissaa gobise. Ixxekim qeeraa'lloomii haraaroomii mat mat taachcho'o ihoohan ihaa soor ejjo'i yoohanee qinxaa biddiqaakkoohanee ihona. Ee'isam soor ogoranne bito xee'aalli kiniinsi gurumba isse; luxxi ogoranne boobeet kashar kina, ajaar bito xee'aalli kina, inqu yakkam belecce'oo kina, la'm ogoranne sandaab kina, cuquluusa laboo kina, aduu'n ille laboo kina, saxxi ogoranne sandaab kina, heemachchi lab shaano'i kina, kuul kina, soo'l ogoranne shaano'i kina, aduu'n ille loboo kinaa gagmoo'ixxa laboo shaano'i kinaa isse Ee keenom worqi gurumbi goobinaanchinne gammale. Ee tommonnee lamem bito xee'aalli kinanne annannichchonnem Isra'ee'l oosika tommikaa lamikam summa tomminaa lamem Isra'ee'l sullinam tiissiishshi ihona kitaabe. Biq kiisinam usisa chimchima muccur worqinne dade. Lam worqi quba'uwwa baxxaa biq gonoonanne lamem tochchinnem amadiise. Lamem worqi chimchimam ee lamem tochchonnem yoo quba'uwwanne aagissaa kare. Mulli kollinne yoo lamem chimchi'mmekam sane lamem goobinaanchonnem kare; ee'isinne illaqqi kollinne guduminne aad calcaloo eefuuda karakkam xixxaabbuwwinne kare. Ee'isam worqi quba'ika lamo baxxaa eefuudiinsi awwonaa yoo biq gonoo'n lamem ejjo'onnem woroo'n saninne amadiise. Odim lam quba'a worqinne baxxaa biqenne aad calcaloo eefuud xixxaabbuwwanne woroo'n kollinne kare; kattoohim anginne wereeggisakka'a dadakko'i sabbatii eefuudii edantam beyyonnette. Biq gonoo'n quba'aa eefuud quba'aa mat issitaa shaano'i fatirinne kare. Biq kiisim eefuuda lade'akkam saqqiinsi hanaanetti ihoo bikkina sho'ooyyo. «An Waa'i i minaadaba hundi ammanem tiiroommisina Aaroon keesammi beyyo aagoo ammane Isra'ee'l oosik summi kitaabamaakkoo ee biq gonoona edde'aa aagona. Aaroon ee keesammi beyyo aagoo ammane Isra'ee'l minaadab ixxi wodanonne ihoo'isina Uuriimaa Tuumiimaa biq gonoonanne aagise. Ixxim Waa'i illagenne Isra'ee'l minaadaphpheka oogato'o ixxi wodanonne iyyookko. «Eefuudinne edde'oo qamisa hundoomam shaano'i er fatirinne baxe. Ee eddechchannem gaanje aagisakkam afo'i hee'ona; oo gaanji beyyim dereeramoobee'isa gammaltaa axise. Ee qamis kasa shaano'inne, kuulinnee kashar fatirinnee roomaa'n misha kobi'llanne dade; ee mishshuwwi lambe'ennem worqinne baxamaakkoo doola isse. Oo worqinne baxamu goottokkichcha'i doolluwwii worqinne baxamu roomaalla loboo mulli doolluwwi ee qamis shoqqi mishshuwwi lambe'enne aagona. Keesammi beyyonne Aaroon i illagenne awwaadeena aagoo ammanee firoo ammanee ee qamisa edde'oo bikkina doo'llek sagar macceesamoo ammane ixxi foorinne yoo'isa la'isookko. «Muccur worqinne mat saahina baxxaa ee saahinanne ‹Waa'ina keesamaakkoohane› yitaa kitaabe. Ixxom Aaroon horoorenne xaaxoo shaashshi illagenne shaano'i fatirinne kare. Aaroon eekka ixxi miinenne karu bikkina Isra'ee'l minaadab ayyi luwwam iina uwwitu'uuyyi ixxuwwanne mah bi'ishshim hee'uta'n an aa'oommo. Aaroonika qambiisaa horoorenne ka'lloo shaashshaa talbi danaam fatirinne baxe; lade'oo sabbatam danaamisa weereeggissaa baxe. «Aaroon oosinam lombaa nuuraa ihoo'isina qambiissuwwa, sabbattuwwaa qoobe'uwwaa baxe. Ee eddechchuwwam Aarooninaa ixxi oosinaa eddeese; qeessuwwi ikka'a iina awwaaddona wee'l zayta labbaa keese. Sha'ixxi orachcho ifiixxamona lamadiinsi gurubbo afoo qolo'o talbi danaam fatirinne dade. Aaroonii ixxi oosii i illagenne keesammi beyyonne te'im kitima hincaa'akkam beyyonne qeessoomaninne awwaaddeena hincitam amman hundam sha'ixxi orachchi moo'amaa letambee'isa eekka lade'llona; oohim Aarooninaa ixxi shumo'inaa hundinam qoxxaa hee'oo seera. «Aaroonii ixxi oosii qeessuwwi ikka'a iina awwaaddamisina keesanto'oo keen isse; miiqakkam luwwi bee'i labeenaa lam gereebbi ambulluwwaa gudise. Ursho'i nakkubee'i doo'llammi aras qama wee'l zaytinne cukkitaa qorosho'o sare; ee'isam zayti bee'i qorosho'o sare; caraq qorosho'om sattaa zayta labe. Ee qorosho'om labeenaa lamem gereechchoo kitimtoo ammane soro'onne issitaa iina hincaa'e. Aaroonaa ixxi oosoo Keesammi Dukkaana aagakkam goocanne wottaa wo'inne aanshe. Ee lasage Aaroonina qeessooma'n eddechcha, qambiisa, worinne edde'akkam eefuuxxi qamisa, eefuudaa biqenne issakkam gonoonaa eddeessaa sabbata ladiise. Horoorennem shaashsha xaaxxaa keesammoo'm mare'e ee shaashshi hanenne isse. Laphphakkam wee'l zaytam ixxi horoorenne duntaa iina annanni isse. Ee'isam ixxi ooso hincaa'llaa qambiisa eddeese. Lamadonnem sabbata ladiise; horoorennem qoobe'e isse; ixxuwwik qeessooman heer heerinatti ihookko. Ee'isinne Aaroonaa ixxi oosoo qeessoomanina annanni isse. «Labeena dukkaa'n goocanne hincaa'llaa Aaroonii ixxi oosii ee labee'n horoorenne anga issitamisa isse. Ee labeenam dukkaa'n goocanne i illagenne dure. Ee labee'n xiigam ki angi maxxaarinne nakkittuuyyi kitima hincaa'akkam beyyi buudduwwanne labe; gatu xiiga hundam kitima hincaa'akkam beyyi lugumonne dune. Ee lasage godaphphi mu'uta ifiisoo di'ira, afare ifiisoo di'ira, lamem muroo lamem murom ifiisoo di'iraa massitaa kiti'm beyyonne shokkiise. Ihukkaarem mulli maara hundam, omachchoo hilleennaa manni gattiinsi biiranne fissitaa shokkiise. Oohim baaxii'l bikkina hincoo kitima. Lamem ambulluwwiinsim mato massitaa mat ambu'l hanenne Aaroonii ixxi oosii anga issitamisa isse. Ee ambulam duttaa xiigooma kiti'm beyyi soorem midaaxxi ejjo'onnem kife. Maaram beelayyitaa muttaa lasage godaphphi mu'utaa lokkuwwaa aanshitaa horoorinnee mulli maarinnee eddaa disse. Ee lasage ee maara hundichchom shokkiisakka'a himcaa'akkam kitim issitaa Waa'ina hincaa'e; ee kiti'm enjim Waa'a liiransoo er enji ihookko. «Qeessooma'n seerina qoodamu la'm ambula eebbaa Aaroonii ixxi oosii ee gereechchi ambu'l horoorenne anga issitamisa isse. Ee ambulam duttaa Aaroonaannonnee ixxi oos makki kolli macci ludonne, makki angaanonnee makki lokki lob maxxaarannee hofqax xiigam aa'llaa labe; gatu xiiga hundam kitima hincaa'akkam beyyi soorem midaaxxi ejjo'onnem kife. Kiti'm beyyi hanenne yoo xiigiinsii laphphakkam wee'l zaytiinsii aa'llaa Aaroonanne, ixxi eddechchanne, ixxi oosonnee ixxuwwi eddechchannee kife; ee'isinne ixxii ixxi oosii ixxuwwi eddechchinne maqirem iina keesanto'oo keen ikkamo. «Ee lasage ee ambu'l di'ira, sheerimo, godaphphi mu'uta ifiisoo di'ira, afare ifiisoo di'ira, lamem muroo lamem murom ifiisoo di'iraa makki lokkoo muttaa annanni isse. Mashka'oomim oo gereechchi ambul qeessoomma'n gereechcho. Soro'onne issakka'a iina hincaa'akko'i qorosho'ika annannichchikam mat mato oohim ursho'i exxoo'n saramu qoroshsho'ika mato wee'l zayti exxaa saramukkaannika mato caraq qorosho'ika mato eddaa Aaroonaannonnee ixxi oos angannee uwwe; eekkam heekkeessa'a iina kitim issita'a hincaa'llona. Eekkam ixxuwwi angiinsi aa'llaa shokkiisakka'a hincaa'akkam kitiminne eddaa kiti'm beyyonne shokkiise; eehanni enjim eese Waa'a liiransookko. «Aaroon qeessooma'n seerina durakko'i ambu'lleka eeddiraaso iina wonaceekkeesakka'a hincaa'akkam kitim issitaa ki'ise; ookkim kiina sharad ihona. «Qeessooma'n seerina duramu ambu'lleka kitimina wonceesakka'a hincaa'akko'i eeddiraasaa hayyee keese; oohim qeessuwwina uwwamoo sharad ihookko. I minaadab mateeyyoo'm kitima hincaa'oo amman hundam eediraasoo makki lokkoo qeessuwwina sharad ihona qoodaammo; oohim minaadab iina hincaa'oo kitima. «Aaroon lehoo ammane qeessooma'n eddechchi ixxi oosan ihookko; ixxuwwim wee'l zayta labakka'a qeessoomanina annanni issakkam ammane edde'llona. Aaroon bikkenne doo'llamaa keesammi beyyonne dukkaa'n woronne iina awwaadeena aagoo qeessichchi ee eddechcha lamar ballina edde'ona.» «Aaroonaa ixxi oosoo qeessoomanina keesimmina duramu gereechchika maara massitaa keesammi beyyonne sare. Ee maaram soro'onne yoo qoroshsho'inne maqirem dukkaana aagakkam goocanne ikka'a qeessuwwi ittona. Qeessoomaninne awwaaddeena annanni ikkam balla baaxii'l haafitina hincoo kitima ittona; oo kitim keesammi ihu bikkina qeessuwwiinsi bagaan mulli manni itoone. Ee kitimiinsi gatu maara te'm qorosho'o hundam giiranne shokkiise; keesammi ihu bikkina ayyim itimmi hasisooyyo.» «Aaroonii ixxi oosii qeessuwwi ikkam seera an ijaajummisanne lamar ballanne guullitaa isse. Baaxiilo haafixxi bikkina ee lamarem ballannem mat mat labeena kitime; oohim kiti'm beyyo muccussoohan ihookko; wee'l zaytam labbaa keesamaakkoohan isse. Eeham ee lamarem ballannem ballina ballina isse; ee'isinne kiti'm beyyi hore'em keesamaakkoohan ihookko; ixxim keesammi ihu bikkina nakkoo hundim keesammi ihookko.» «Qaramukkaanniinsi mat hiincho ihaakkoo gereebbi ambulluwwika lamo ballina ballina uttakkambee'isa kitimina hincaa'llaa matoo dara matoo maaro'o kitime. Mat ambulinne maqire mat kiilo'o ihoo danaam aras qama tumakka'a ciinsakko'oo mat liitir muccur wee'l zaytinne maqirem hincaa'e; mat liitir woyi'n diqaasam kitim issitaa eehanni hanenne dune. La'm ambulam maaro'onne da'llaanni qax qama, wee'l zaytaa woyi'n diqaasaa eddaa kitime; oohim enje'aa eese Waa'a liiransoo kitima. Waaroo doolli hundannem shokkiisakka'a hincaa'akkam kitima dukkaa'n u'llummanne Waa'i illagenne hincimmi hasisookko; oo beyyim keese atoorassoommanee i minaadabinne edamoommanee. Oo beyyim i minaadab Isra'eelinne edamoommane; beyyoomim i lombinne keesamookko. An ee kiti'm beyyoo dukkaanaa qeessuwwi ikka'a awwaaddona Aaroonaa ixxi oosoo keesoommo. Isra'ee'l minaadaphphi lambe'enne hee'oommo; ixxuwwinam Waa'i ihoommo. Ixxuwwi lambe'enne hee'eena Gibxi uulliinsi awwonsaa fissummok ixxuwwi Moollanni Waa'i anetti ihummisa laqqamo; anim ixxuwwina Moollanni Waa'a.» «Aduruusa wiriissakkam kiti'm mu'uta giraa'l haqqinne baxe. Ixxekim qeeraa'lloom mat anga dufaachchi mat anga uullichchi lam angi ihaa soor midaadi yoohan ihona. Ee kiti'm beyyi ludonnem matfir ihaa baxamaakkoo buudduwwi hee'ona. Ee kiti'm beyyi ludika soorem midaadoo buudduwwaa hundam muccur worqinne goolabe. Worqi gobinaanchom isse. Lam worqi guma'a baxxaa kiti'm beyyo iyyakkam wonnannuwwi aagoo'isa issitaa goobinaanchiinsi woroon amaxxanse. Wonnannuwwam giraa'l haqqinne baxxaa worqinne goolabe. Ee kiti'm beyyom Hidi'l Saga'l Saaxi'n illagenne yoo du'm eddechchiinsi biireen disse. Anim ee beyyonne kiina moo'amoommo.» «Aaroon dar dara caakka gudiseena waaroo ammane erisa enje'oo aduruusa ee kiti'm beyyonne wiriissona. Odim hundem hiimom caakka caakkisoo ammane eehid issona; oo aduruus kitim waaroo doollenne hundannem uramoobee'isa i illagenne wiriirona. Keesamubee'i aduruusa, shokkiisakka'a hincaa'akkam kitimaa hurbaaxxi kitimaa ee kiti'm beyyonne kitimtitte; woyi'n diqaas kitimam ee beyyonne duntitte. Aaroon hiinchonne mat kore baaxii'l haafixxi bikkina kitimamu diinaxxi xiigiinsi aa'aa soorem buudonnem labaa kiti'm beyyi muccuroo seera guullona; ku seerim waaroo doollenne hundannem hiinchonne hiinchonne ihona; ee'isinne oo kiti'm beyyi iina Waa'ina hore'em keesamaakkohan ihona» yukko. Ee'isam Waa'i Muse'ena «Isra'ee'l minaadaba xiggoo ammane ixxuwwanne booban uboobee'isa annannichchim ixxi foo'l bikkina tisso miqona. Xigonne exxaa xigamoo ayyi manchim keesammi dukkaa'n woronne la'amaakkoo keennaanchonne keenaa mat kin bira miqona; annannichchim eekka Waa'ina kitim issaa hincaa'ona. Umur lamiyyi hiinchoo eehanniinsi hanaanii ihu ayyi manchim minaadaphphi xigonne exxulas ee kitima iina Waa'ina hincaa'ona. Ixxuwwi foo'l bikkina ka kitima Moollanni Waa'ina hincaa'llam ammane goddaanchi edaa buxichchim hoffiisaa hincaa'oone. Ee baaxii'l haafixxi diinate Isra'ee'l oosiinsi wixxaa'llaa keesammi dukkaa'n awwaadina ihoo'isa isse; oohim ixxuwwi foo'l bikkina tissi ihaa Isra'ee'l ooso hundi ammanem tiiroomman ihookko» yukko. Waa'i Muse'ena «Aanshaqqakkam saahinaa ixxo diissakkam lokkaam mu'utaa naas xaarinne baxe; ixxom kiti'm beyyinaa dukkaaninaa lambe'enne dissitaa wo'o wonshe. Ee wo'innem Aaroonii ixxi oosii ixxuwwi angaa lokkoo aanshaqqitona. Eekkam issimmi hasisookkok Keesammi Dukkaa'n woro aaggoo'nnii giirinne shokkiisakka'a hincaa'akkam kitima hincaa'lloo'nnii gaassita'a ee'isa issitolas ixxuwwi lehiinsi gattamo. Ee bikkina ixxuwwi letambee'isa ixxuwwi angaa lokkoo aanshaqqitona; oohim ixxuwwinaa ixxuwwi shumo'i hundinamii heer heerina qoxxaa hee'oo seera» yukko. Waa'i Muse'ena «Doo'llamaakkoo enjuwwa, loh kiilo'i karbe'e, sas kiilo'i enje'oo qarafa, sas kiilo'i enje'oo aduruusa loh kiilo'i lobakata enje'oo birgudaa oohim Keesammi Dukkaananne la'amaakkoo keennaanchonnetti ihona; eehannonnem soor liitir wee'l zayta ede. Ixxom shitto'isa hamaaransitaa keesamaakkoo wee'l zayta baxe. Ee wee'l zaytam dukkaananne, Hidi'l Saga'l Saaxinanne, xaraphpheezannee ixxonne yoo mu'uttuwwannee, caakka dissakkamaannonnee ixxo gudisakkam mu'uttuwwannee, aduruus kiti'm beyyonne, shokkiisakka'a hincaa'akkam kiti'm beyyonnee ixxonne yoo mu'uttuwwannee, aanshaqqakkam saahinannee ee saahina dissakkam mu'utannee hundannem labe. Ee'isinne ee mu'uta hundam annanni issitaa hore'em keesamaakkoo keen issitootto; ixxuwwa nakkoo keen hundim keesamaakkoohan ihookko. Ee lasage Aaroonii ixxi oosii qeessoomaninne iina awwaaddona wee'l zayta labbaa qeessuwwi isse. Isra'ee'l minaadabina ‹Ku keesamaakkoo wee'l zayti waaroo doollenne hundannem i awwaadina ihona. Mulli mannanne ayyennem labbitte; kido'i wee'l zaytam ka'isinne baximmiinsi ega'llehe; ixxi keesammi ihukkisam laqqehe. Kido'i wee'l zayta baxoo manchi te'im ixxeensi massaa qeessichchi ihubee'i manchonne laboo manchi ayyim i minaadabiinsi annanni ihaa yaayyamona› yitaa kure» yukko. Waa'i Muse'ena «Enje'oo haqqiinsi firoo aqoomaada, ereeri'nnoo'i luwwi woronne hee'oo enje'oo luwwa, lobakata enje'oo aqoomaadaa muccur aduruusaa hundam gudaanchi mu'utanne keentaa shitto'isa hamaaramaakkoo aduruus issitaa axise; oohim muccuraa keesammaa ihona sooqido ede. Eehanniinsim hofqaxam silliqqaa tuntaa Dukkaa'n woronne Hidi'l Saga'l Saaxi'n illagenne disse; oohim kiina hore'em keesamaakkoohan ihookko. Ee'isinne hamaattakko'i aduruus Waa'ina keesamaakkoohan ihona bagaan ki'nnuwwi gagina awwaaxxitakkotte. Eehido'i hamaaramaakkoo enje'oo aduruusa baxaa ixxi gagina enjinne liirameena hasoo manchi hee'ulas i minaadabiinsi annanni ihaa bi'ona» yukko. Waa'i Muse'ena «Oono'o, an Yihu sulliinsetti ihu Huur beetina beet Uuriin beet Baasili'eela doo'llaammo. Anginne baxakkam ayyi baxom baxeena xaanoo angi qoorooma, lachchaa qoossimmaa siideena xanoo'isina ixxo i ayyaaninne wonshaammo. Ee bikkina ixxi worqinne, birinnee naas xaarinnee annanni annanni luwwa qooroominne qoodukkuuyyi baxona. Ee'isam weergishshina ihoo kina cabbareena, haqqam cabbaraa axiseenaa mulli baxo hundam qoorominne baxeenaa xanoo'isa issaammo. Ixxenne maqirem exxaa baxona Daan sulliinsi Ahisaamaak beeto Ohoolii'aaba doo'llaammo; an keese ijaajummi luwwi hundam baxxona mulli angiqoor manni hundinam lachcha edaa uwwaammo. Baxxakkona an ijaajummi mu'utim keesammi dukkaana, Hidi'l Saga'l Saaxinaa haafixxi ifichchoo, Keesammi Dukkaa'n woronne awwaaxxakkam mu'uttuwwa, xaraphpheezaa ixxenne maqire awwaaxxakkam mu'uttuwwaa, muccur worqinne baxamaakkoo caakka dissakkam mu'utaa ixxenne maqire awwaaxxakkam mu'utaa, aduruus kiti'm beyyo, shokkiisaakka'a hincaa'akkam kiti'm beyyoo ixxena hasisoo luwwaa, aanshaqqakkam saahinaa eekka dissakkam mu'utaa, Aaroonii ixxi oosii qeessooma'n awwaado awwaaddam ammane edde'llam keesammi eddechchuwwaa keesammi wee'l zaytaa keesammi beyyina ihoo erisa enje'oo aduruusaa an keese ijaajummisanne baxxamo» yukko. Waa'i Muse'e «Isra'ee'l oosina ‹An Waa'i ki'nnuwwa iina keesantakko'oo minaadab issaa doo'llumman ihukkisa moo'isoohan ihaa waaroo doolli hundannem i lambe'ennee ki'nnuwwi lambe'ennee qoxxaa hee'oo mare'i ihu bikkini I Usheexxaxxi balla lonsehe. Oo balli keesamaakkoo balli ihu bikkina usheexxaxxi balli issitakka'a egallehe; ee balla haashaassookkokii ee ballanne baxookkokii ayyi manchim minaadaphphi lambe'iinsi annanni ihaa bi'ona. Ki'nnuwwika baxo hundam loh ballanne baxxehe; ihukkaarem lama'l balli iina annanni ihaa keesamaakkoo Usheexxaxxi balla; ee bikkina ee Usheexxaxxi ballanne baxoo ayyi manchim lehinne guzumo'amona. Isra'ee'l oos waaroo qaranchanne hundannem usheexxaxxi balla heer heerina hee'oo Hidi'l Saga'l mare'i issitta'a lonsimmi hasisookko. Oo balli i lambe'ennee Isra'ee'l oos lambe'ennee heer heerina hee'oo mare'e; mashka'oomim an iimanee uullaa loh ballanne qooccaa lasage lama'l ballanne bax hundiinsim usheexxummi balli ihu bikkinatte› yitaa kure» yaa ijaajukko. Waa'i Muse'e Siina'i duunanne atoorassimma guullaa lasage Waa'i gagim ixxi anginne ijaajjuwwa kitaabaakkoo lam ki'n ba'lla Muse'ena uwwukko. Minaadab Muse'e duunanne lobakata dasukkisa moo'lla'a lasage wixxita'a Aaroona kibbita'a «Ee neese Gibxiuulliinsi awwonsaa fissu Muse'enne mah afuda'e lanqumbee'i bikkina ni illaginne mattu'uuyyi neese awwonsitam waa'uwwa niina baxe» yito'o. Aaroonim «Ki'nnuwwi meenti, goo'n oosii landii ixxuwwi maccenne issito'i worquwwa hundam wixxaa'llakka'a i beyyo eebbehe» yukko. Ee bikkina ixxuwwi hundim ixxuwwi macci worqa hundam fissita'a ixxi beyyo eebbo'o. Ixxim ee worqa hundam wixxaa'aa giranne bukkukko; bukkamu worqam baxakkam mu'utinne axisaa wee'ichchi misila baxukko. Minaadabim «Isra'eela; keese Gibxiinsi awwonsaa fissu waa'uwwi kakeeno» yukko. Aaroonim eekka moo'u ammanenne worqi wee'ichchi misi'l illagenne kiti'm beyyo baxaa soodo Waa'ina lombi ugud ihookko» yaa la'isukko. La'm balla daram minaadab ki'lla'a shokkiisakka'a hincaa'akkam kitimaa mateeyyoo'm kitimaa hincaa'llo'o; afuua'atim itta'atii agga'atii lasage kaddeena ki'llo'o. Waa'i Muse'ena «At Gibxi uulliinsi awwonsitaa fissitti ki minaadab huushamaakkoo bikkina qaqqissaa dille. Ixxuwwi egattona ijaajjitti googiinsi gaaggaabba'a fitto'ookko; ixxuwwi gaginam wee'ichchi kobi'llanne waa'a baxxo'ookko; ixxenam otossito'ookko; kitimam hincaa'llo'ookko; ee'isam ‹Isra'eela, keese Gibxi uulliinsi fissu waa'i kane› yito'ookko. Ixxuwwik wodan hinkaa'nna duudaakkoohanda'e an la'oommo. Kabadem an ixxuwwanne lobakata quuqaa bi'iseenatti ihu bikkina at cawwitaa ure; keesem lobakat minaadab issoommo» yukko. Ihukkaarem Muse'e ixxi Moollanni Waa'ika biijooma hasaa «Moollanni Waa'a, ki wodinnee lob malaayyinnee Gibxiinsi fissitti ki minaadabanne kaa'nna quuqqoottok mahinatte? Gibxi uulli manni ‹Waa'i ixxuwwa duunnuwwanne sheenaa uulliinsim guullaa bi'iseenaa hasu bikkina Gibxiinsi awwonsaa fissukko› yitu'uuyyi naacantamisa mahina issitoolla? Kabadem ki quunqiinsi daba'lle iyyaqqeme. Ki minaadabanne boobana eebbitte. Ki awwaadaano Abrihaama, Yisaaqaa Yaaqoobaa sawwihe; at ixxuwwina ki'nnuwwi shumo'o iima'n boollaankisa fikkaannisseenaa neeyyaxxi uullam heer heerina ixxuwwi gulummi issitaa uwwiteenaa hide'llittisa sawwihe» yukko. Ee bikkina Waa'i qishixxukko; minaadabam bi'isimma urukko. Ee lasage Muse'e lamem kollonnem Waa'ik tommem ijaajim kitaabamaakkoo lam ki'n ba'lla amadaa duuniinsi dillukko. Lamem ki'n ba'llim Waa'i bax hee'ukko. Ee ba'lluwwannem kitaabamaa hee'u ijaajjuwwa kitaabukkok Waa'a. Iyyaas minaadab coro'ookkoka macceesaa Muse'ena «Hegeegonne o'l sagar macceesamoolla» yukko. Muse'em «Ku macceesamoo sagar kaachchi sagarayyo; te'im kaa'amu minaadaphphi sagarayyo; macceesamoollak kajji sagara» yaa dabarukko. Muse'em amba'a afaa ee worqinne baxamu wee'ichchi misilaa minaadaphphi kajjaa moo'aa lobakata nadadukko; ixxi anganne amadaa hee'u lamem ki'n ba'llam duu'n lugumonne darabaa iiqansukko. Minaadab baxxa'a hee'llo'i wee'ichchi misilam massaa giiranne shokkiisukko; eekkam xaansaa liitaa lasage wo'inne hamaaraa Isra'ee'l minaadab aggamisa issukko. Aarooninam «Ku minaadab keese maha issukkaare kido'i jor baaxiilo baxoo'isa issitto?» yukko. Aaroonim dabaraa «I Moollanna! At eesenne quuqqitte; ku minaadab hundi ammanem jora baxeena hinkaa'nna hasooda'e at laqqootto. Ixxuwwim ‹Neese Gibxiinsi awwonsaa fissu Muse'enne mah afuda'e lanqumbee'i bikkina ni illaginne mattu'uuyyi neese awwonsitam waa'uwwa baxe› yito'o. Anim worqinne baxamu wereeggi mu'uta hundam sheelatta'a i beyyo eebbamisa issummo; ixxuwwim eebba'a iina uwwito'aare ee wereeggi mu'uttuwwa hundam giiranne issummi ammanenne ku wee'ichchi misil firukko» yukko. Aaroon minaadab ixxuwwi diina'i illagennem sholle'lleebe'i afeebe'e hasso'isa ikkona fatakukkisa Muse'e moo'ukko. Ee bikkina wiidda'n beyyi goocanne uullaa «Waa'an ihukkok ayyim i kolli waarona» yaa sagara iimaa'aa wocukko; ixxi kululleetannem Leewi'i oos hundim wixxito'o. Ixxim dabaraa ixxuwwina «Ki'nnuwwi annannichchim ki'nnuwwi bisa'a amaddakka'a ka goociinsi ee goocanne afeebe'e wiidda'n beyyonne daba'llammehe; ki'nnuwwiinsi ayyim ixxi gaqqi abbaayyo, beshichchoo ollakkichchoo qishixxoo'n shihona Isra'ee'l Moollanni Waa'i ijaajaakko» yukko. Leewi'i oosim Muse'e ijaajukkisa issito'o; mexxo'i ee ballannem sas kum manna shito'o. Muse'em Leewi'i oosina «Kaballa ki'nnuwwi goo'n oosoo ki'nnuwwi abbaayyuwwaa shitakka'a Waa'ina awwaaddakkam qeessuwwi ikkakka'a keesantakko'i bikkina Waa'i ki'nnuwwa maasse'aakko» yukko. La'm balli daram Muse'e Isra'ee'l oosina «Lobakata jor ihaakkoo baaxiilo baxxakko'ookko; ihukkaarem kaba odim an daba'llaa ee duuna Waa'i beyyo maroommo; ayyi la'ukko ki'nnuwwi baaxii'l bikkina haafite siideena xanoommi ihookko» yukko. Ee bikkina Muse'e Waa'i kolli daba'llaa «Ku minaadab lobakata jor baaxiilo ki illagenne baxaakko; worqiinsi baxamaakkoo misila waa'uwwi issaa otossaakko. Ihukkaarem at ixxuwwi baaxiilo haafihe; haafitbeelas i summa kitaabbitti kitaabiinsi shiinshe» yukko. Waa'im Muse'ena «Summa i kitaabiinsi shiinshoommok baaxiilo baxxa'a eese kichche'isso'i kee'nnane. At kaba mare; an kiina kurummi beyyo minaadaba awwonsitaa masse; i asse'amaanchim ki illagenne ihaa marookko; ihukkaarem an ka minaadaba ixxuwwi baaxii'l bikkina guzumo'oommi amman waarookko» yaa dabarukko. Worqi wee'ichchi misila ixxuwwina baxona Aaroona giddisso'i bikkina Waa'i ee minaadaba boobaninne aphphisukko. Waa'i Muse'ena «Atii Gibxiinsi awwonsitaa fissitti minaadabii ka beyyiinsi ki'llakka'a Abrihaamina, Yisaaqina, Yaaqoobinaa ixxuwwi shumo'inaa uwweena sagara aagummi uulla mallehe. An ki'nnuwwi illagenne higaa awwonsukkuuyyi maroo asse'amaancho asse'oommo; Kana'aa'nneka, Amoore'ika, Hiite'ika, Farze'ika, Hiiwe'ikaa Iyyaabuus minaadabaa ki'nnuwwi illagiinsi holloommo. Ki'nnuwwi mattakkamok adii marabii daadoo uulla; ihukkaarem ki'nnuwwik wodan duud ihu bikkina an ki'nnuwwa googonne bi'isoombee'isa ki'nnuwwinne maqire maroommoyyo» yukko. Minaadabim ka kichche'isoo sagara macceessa'a qaraaraallisa wi'llito'o; ee lasage wereeggi luwwa maham ixxuwwi orachchonne issito'oyyo. Waa'i odim Muse'e «Ki'nnuwwi wodan duudaakkoo minaadab ikkakko'i bikkina illi cilimmaaxxi qaxinam ihukkaare ki'nuwwinne maqire marumlas an ki'nnuwwa guullaa bi'isoommo; kabadem ki'nnuwwika wereeggina awwaaxxitakkam luwwi hundam sheelattakka'a uunjehe; an ki'nnuwwi bikkina maha issimmi hasisooda'e qoodoommo» yaa kurona ijaajukko. Ee bikkina Isra'ee'l oos Siina'i duunanne wereeggi mu'uta hundam sheelatta'a uunjito'o. Mus'e Isra'ee'l minaadab wiiddanto'i beyyonne hundannem Keesammi Dukkaana ee wiidda'n beyyiinsi haxonne massaa kaasam hee'ukko; ixxom «Keesammi Dukkaana» yaa weeshukko; Waa'i doo'lla xa'mmeena hasu manchi hundim ee beyyo maram hee'ukko. Muse'e ee Dukkaa'n beyyo maroo amman hundam minaadab hundim ixxuwwi gaqqi dukkaa'n goocanne uullita'a Muse'e Dukkaa'n woro aageebe'i afeebe'e ixxo moo'llam hee'llo'o. Muse'e ee Dukkaana aagaa lasage duub utuphphisa dillaa Dukkaa'n goocanne uullam hee'ukko; Waa'im ee duuphphi woronne ihaa Muse'e atoorassam hee'ukko. Minaadab duuphphi uwb Dukkaa'n goocanne ullukkisa moo'llam ammane ixxuwwi gaqqi Dukkaa'n goocanne guruphphita'a otossitam hee'llo'o. Mat manchi ixxi beshichchinne atooraroohaannisa Waa'i Muse'ene atooraram hee'ukko; ee lasage Muse'e wiidda'n beyyo daba'llam hee'ukko; ihukkaarem Muse'ena hara'mmaanchi hee'u Naawe'i beet woraadichchi Iyyaas Dukkaa'n woriinsi annanni iham hee'ukkoyyo. Muse'em Waa'ina «Ka minaadaba awwonse yitaa at eese ijaajjaa hee'llitto; ihukkaarem iinninne maqire ayye eddaa asse'llooda'e iina kuttittoyyo; at iina ‹An keese ki summinnem la'oommo; i illagennem nuura siiddaatto› yitaa hee'llitto. Kabadem an ki illagenne nuura siidaammoohan ihulas an keese la'aa kiina awwaadonaa keese liiransummuuyyi hee'onaa ki googo iina losise; ku minaadabim ki minaadab ihukkisa sawwihe» yukko. Waa'im «An kiinninne maqire maroommo; keesem usheexxisoommo» yukko. Muse'em «At niinninne maqire fittoobeelas neesem ka beyyiinsi fissititte. At niinninne maqire fittoobee'an ihulas eesennee ki minaadabannee liirantittan ihukkisa mulli manni hinkid la'eena xanookko? Uulli minaadab hundiinsim neese annanni issookkok at niinninne maqire hee'immayyonnihe?» yaa dabarukko. Waa'im Muse'ena «An keese ki summinnem la'oommi bikkinaa keesennem liiramummi bikkinaa at xa'mmitoo luwwi hundam kiina issoommo» yukko. Muse'em Waa'ina «He'i ki lomba iina moo'ise» yukko. Waa'im «An i eroomma hundam ki illaginne higoo'isa issoommo; an Waa'i ihummisam ki illagenne i summa alallaatoommo; haafoommaannina hundinam haafoommo; qishixxoommaanninam an qishixxoommo. Ihukkaarem manni eese moo'aa hee'eena xanoobee'i bikkina at i illi kollo moo'lleena xantooyyo. Ihukkaarem ka beyyonne i gadanonne at uullitoo sifo'i kin yookko. Iikki lombi eeheen higoo ammane keese sifo'i ki'n fonqoqanne maaxoommo; higeembe'em i anga ifiisoommo. Ee lasage atim iikka illaqqi kolli ihoo'n afa'l kollo moo'llootto» yaa dabarukko. Waa'i Muse'ena «Luxxaanni'nno'i lam ki'n ba'lluwwa cabbattaa gudise; anim at iiqqitti ba'lluwwanne hee'u sagara kitaaboommo. Sooxxi dara baqitem guddaa Siina'i duunanne fittaa i illagenne uulle. Kiinninne maqire ayyim firoone; te'im duu'nnaannonne hinki beyyonnem ayyi manchim moo'amoone; gereebbii fella'ii hinki fooraam diinatim duu'n lugumonne allaa'lloone» yukko. Ee bikkina Muse'e lam ki'n ba'lluwwa illagee'nnaannisam gudisaa Waa'i ixxo ijaajukkisannem la'm balla daram ee lamem ki'n ba'lluwwa amadaa Siina'i duunanne firukko. Waa'im duubinne dillaa ixxenne uullaa «An Moollanni Waa'a!» yaa ixxi keesammi summa la'isukko. Waa'im Muse'e illaginne higukkuuyyi «An Waa'i qishixxoommanee haafoommanee; an quunqina gaaggaaboombee'ane; iikki heer heerina hee'oo iittii amma'nnamaammoohaannoomii lobakata. Iikka heer heerina hee'oo iittom lobakat kum qaranchi afeebe'e egeroommo; boqqoomaa baaxiiloo hundam haafoommo; ihukkaarem saxxi qaranchiinsi soo'l qaranchi afeebe'e anno'i baaxii'l bikkina ooso guzumo'oo'n cawwaa uroommoyyo» yaa alallaatukko. Muse'e ee ammanenne heeshaa otossaa «I Moollanni Waa'a! An ki illagenne nuura siidaammoolas at niinninne maqire edantaa fittona uunxoommo; ka minaadabik wodan duudaakkoohane; ihukkaarem at ni baaxiiloo ni jollee hundam haafihe; ki gaqqi minaadab issitaahim neese moo'e» yukko. Waa'i Muse'ena «Oono'o, an Isra'eelinne hidi'l sagara aagoommo; kanniinsi illageen uullanne ihaa la'amoobee'i maalalsiisoo mare'e ki minaadabina moo'isoommo; ee baddisoo maalalsiisoo aganna ki kululleetanne hee'oo minaadab hundim moo'ookko. An kaballa ki'nnuwwina uwwoommi ijaajo hundam egellehe; an Amoore'ika, Kana'aa'nneka, Hiite'ika, Faarze'ika, Hiiwe'ikaa Iyyaabuusikaa minaadaba ki'nnuwwi illagiinsi holloommo. Ki'nnuwwina qaash ihoo bikkina mattakkam uullanne hee'oo minaadabinne matem hidi'l sagaram aaggakkotte. Ihukkaarem ixxuwwika kitima hincaa'llam beyyuwwaa otossitam beyyuwwaa gindansehe; Asheera yakkam qophpha'n waa'i misilam iiqansitakka'a ubbuussehe. «An Waa'i to'achchoomman ihummi bikkina iinniinsi bagaan mulli waa'ina otossitakkotte. Qophpha'n waa'uwwina otossitam ammanee kitima hincaa'llam ammanee ki'nnuwwim ee'isa issitakkona ki'nnuwwa xa'mmimminne ee waa'uwwina hincaa'llam hurbaata ittakkona ki'nnuwwa keentam bikkina ee uullanne hee'llam minaadabinne hore'em hidi'l sagara aaggakkotte. Ki'nnuwwi goo'n oosinam ixxuwwi landa eebbakkotte; mashka'oomim oo landi ixxuwwi anno'i waa'uwwina otossitam ammane ki'nnuwwi oosim otossitamisa issitam bikkinatte. «Bukkamaa baxamoo waa'uwwa baxxakkotte. Gibxi uulliinsi fittakko'ok shaashshiqqi aganannetti ihu bikkina maarag hundam Qorosho'i Uguda lonsehe; an ijaajummisannem lamar balla ursho'i bee'i qorosho'o ittehe. «Mannikii fooraam diinaxxekii won ihaa qaramoo goon hundim iihane. Ihukkaarem hallichchi wona gereechchi ambulinne dabassitakkeena xantakkamo; dabassitakkeena xantakkambee'an ihulas axo booqaaqqehe; won ihaa qaramu goo'n oosina hundinam tisso miqqehe. «Ayyi manchim i illagenne kora'i anga hincoone. «Loh balla ki'nnuwwi baxo baxxehe; abuulli aganannettem ihukko te'im hurbaata wixxaa'akkam agananne lama'l ballanne usheexxehe. «Arasa murimma asheettakkam ammane Hurbaata wixxaa'immi Uguda lonsehe; ee'isam hiinchi lasaanchonne haqqi misha wixxaa'llakkam ammane Daas Uguda lonsehe. «Hiinchonne sas ammane ki'nnuwwik goon hundim iina Isra'ee'l Moollanni Waa'ina otosseena waarona. Mulli minaadaba hundam hollaa ki'nnuwwi hee'llakkam uulla haraassoommo; ee sasem ugudduwwam lonsitakkeena i kolli hincitakkam ammanenne ki'nnuwwika uulla qaseena ayyim mixooyyo. «Iina diinaxxi kitima hincaa'llakkam ammane xiiga ursho'i yoo qorosho'inne maqire hincaa'llakkotte; Shaashshiqqi Ugudina duramu diinaxxi maa'lleka mat luwwam darina dissitakkotte. «Hiinchina hiinchina ki'nnuwwi hurbaaxxi atooxxeka ludo ki'nnuwwi Moollanni Waa'i Mine eebbehe. «Gereechchanem ihukko te'im fellakkichchi wotara ixxi am adinne maqire eddakka'a sattakkotte. «Kiinninnettem ihukko Isra'ee'l minaadabinne maqire hidi'l sagara aagoommok ka saga'llisinnette ihu bikkina ka sagara kitaabanne kitaabe» yukko. Muse'em maham itoo'nnii agoo'nnii Waa'inne maqire sor ballaa sor hiimoo higisukko; Waa'im lamem ki'n ba'lluwwannem hidi'l sagalluwwi ihu tommem ijaajom kitaabukko. Muse'e lamem ki'n ba'lluwwam ixxi anganne amadaa Siina'i duuniinsi dillu ammane Waa'inne maqire atooraraa hee'u bikkina ixxek illi kolli lobakata belecce'am hee'ukko; ihukkaarem ixxi eekka la'ukkoyyi hee'ukko. Aaroonii Isra'ee'l minaadabii hundim Muse'e moo'lla'a ixxek illi kolli lobakata belecce'am hee'u bikkina ixxi kollonne hincimma baddito'o. Ihukkaarem Muse'e ixxuwwa weeshukko. Aaroonii minaadaphphi awwonsaanii ixxi kolli hincito'aare atoorassukko. Ee lasage Isra'ee'l minaadab hundim Muse'e kolli hincito'o; Muse'em Waa'i ixxena Siina'i duunanne uwwu Seera hundam ixxuwwina uwwukko. Muse'em ixxuwwinne wocimma guullaa lasage ixxi ille shaashshinne gunguu'llukko. Ixxim Waa'inne atoorareena Keesammi Dukkaa'n woro aagoo amman hundam ee shaashsha illiinsi hooram hee'ukko; ee beyyiinsi firoo ammane Waa'i ixxo ijaaju luwwi hundam Isra'ee'l oosina kuram hee'ukko. Isra'ee'l minaadabim Muse'ek illi kolli caakkaa moo'llam hee'llo'o; ee bikkina Muse'e Waa'inne atoorareena daba'llaa mareebe'i afeebe'e ixxi illenne shaashsha gunguu'llam hee'ukko. Muse'e Isra'ee'l minaadaba hundam weeshaa «Waa'i ki'nnuwwi egettakkona ijaaju seer ‹Ki'nnuwwika baxo hundam loh ballanne baxxehe; ihukkaarem lama'l balli Waa'ina keesamaakkoohan ihu bikkina usheexxehe. Ee ballanne ayyi baxom baxoo manchi lehinne guzumo'amona. Ee bikkina usheexxaxxi ayyaamonne ki'nnuwwi minenne giiram ihuta'n giittakkotte› yoohane» yukko. Muse'e Isra'ee'l minaadabina hundinam Waa'i ki'nnuwwa «Ki'nnuwwina yoo amaxxi hundiinsim Iina Waa'ina kitima hincaa'llehe; hincaa'eena hasookkok hundim ixxi wodanonne sawwukkisinne worqa, kin bira, naas xaara, shaano'o, kuula, kashara, talbiinsi muuncamaakkoo danaam fatira, fella'i odda, kashar qalam labamaakkoo gereechchi ambu'l cukkamaakkoo omachcho, hirfana, giraa'l haqqa, caakkina ihoo wee'l zayta, labakkam wee'l zaytinaa danaamisa enje'oo aduruusinaa ihoo annanni annanni enjaa, Eefuudinaa biq kiisinaa ihoo aduu'n ille laboo bito xee'aalli kinneewwaa eebbehe› yaa ijaajaakko» yukko. «Ki'nnuwwi lambe'enne yo'i anga qoor manni hundim Waa'i ijaaju hinki baxom baxxeena waattona. Oohim Keesammi Dukkaana, haninnee worinnee edakka'a ambakkam keeno, amaxxansaano, saanquwwa, laqqo'uwwa, nottolluwwa, lokkuwwa, Hidi'l Saga'l Saaxina, iyyakkam wonnannuwwa, haafixxi ifiishshaanchoo Hidi'l Saga'l Saaxina ifiisakkam du'm eddechchaa, xaraphpheeza wonnannuwwinnemii ixxonne hee'oo mu'uttuwwa hundamii, ee'isam Waa'ina hincoo keesamaakkoo daabbo'oo, caakka dissakkam mu'utaa, eehanninam awwaadoo mu'uttuwwaa, kuraazaa wee'l zaytinne maqirem aduruusa wiriissakkam kiti'm mu'utaa ixxom iyyakkam wonnannuwwaa, laphphakkam keesammi wee'l zayta, danaamisa enje'oo aduruusa, dukkaa'n gooc du'm eddechcha, kitima shokkiisakkam kiti'm mu'uta, naas xaarinne baxamaakkoo illaanchi'nnoo'i mu'utinne maqirem ixxo iyyakkam wonnannuwwaa eehannina awwaadoo mu'uttuwwa hundamii, aanshaqqakkam saahinaa eekka dissakkam mu'utaa, wixxixxi beyyi du'm eddechcha, ixxo saqalakkam nottolluwwaa ee kee'n lokkuwwaa, wixxixxi beyyi gooc du'm eddechcha, Keesammi Dukkaa'nnekaa wixxixxi beyyi xiribbuwwaa eehanni usseewwaa, qeessuwwi keesamaakkoo beyyonne awwaaddam ammane edde'llam haarrinne wereeggaakkoo eddechchuwwaa oohim qeessichchi Aarooninaa ixxi goon oosinaa keesammi eddechcha daddona» yukko. Ee lasage Isra'ee'l Minaadab hundim Muse'e beyyiinsi elle'llo'o. Annannichchim ixxi gaqqi wodanonne sawwukkisinnee liiramukkisinnee Keesammi Dukkaa'n baxina, ee beyyi awwaadinaa qeessuwwi eddechchinaa ihoo luwwa Waa'ina uwwukko. Uwweena hasukkok hundim goonii meentii annannichchim sanenne issakkam wereeggi luwwa, macci worqa, angi quba'a, gaanji worqaa mulli wereeggi worqaa Waa'ina keesukko. Ee'isam shaano'i fatir, kuul fatir, kashar fatir, talbiinsi muuncamaakkoo danaam fatir, fella'i oddi, kashar qalam labamaakkoo gereebbi ambulluwwi omachchii cukkamaakkoo omachchii yoo keen hundim eebbo'o. Kin bira te'im naas xaaraa annanni annanni awwaadina ihoo giraa'l haqqaa uwweena xanoo manni hundim eebaa Waa'ina uwwukko. Qoor meenti anginne muuncu talbi danaam fatira shaano'o, kuulaa kashar fatiraa eebba'a uwwito'o. Odim angi qooroom yoo mulli meenti ixxuwwi wodan liiramukkisine fella'i oddinne fatira muuncita'a gudisso'o. Awwonsaanim eefuudannee biq kiisannee issakkam aduu'n ille laboo kina bito xee'aalli kinaa mulli bito xee'aalli kinneewwaa eebbo'o. Caakkinaa laphphimminaa ee'isam danaamisa er enji yoo aduruusinaa ihoo annanni annanni enjaa wee'l zaytaa eebbo'o. Isra'ee'l minaadab Goonii meentii hundim Waa'i Muse'ena ijaaju baxina hara'mmoo luwwa ixxuwwi wodanonne Waa'ina uwwiteena sawwito'isinne eebbo'o. Muse'e Isra'ee'l minaadabina «Waa'i Yihuxxi sulliinsi Huur beetina beeto, Uur beet Baasili'eela doo'llaakko. Waa'i ixxi Ayyaana ixxonne wonshaa luwwi hundam baxeena xanoo'isina angi qoorooma, mixxeellano, lachcha, qoossimmaa uwwaakko. Ixxim qooroo'm baxo worqinne, kin birinnee naasinnee baxoo bax hundam mixxeellanninne baxoo'isina lachcha uwwaakko. Ixxim inqu yakkam bito xee'aalli kininne wereeggisonaa haqqi mu'uta baxxonaa ee'isam mulli qooroo'm baxom baxonaa lachcha uwwaakko. Ixxenaa Daan sulliinsi Ahisaamaak beet Ohoolii'aabinaa angi lachchika qoorooma mulli keenina losissamisina lachcha uwwaakko. Xaa'l mu'uta baxxam keeninne, baxo sheeqqattam keeninne, shaano'inne, kuulinne, kashar fatirinnee talbi danaam fatirinnee dadakkam eddechchaa mulli baxoo qooroominne baxakkam mulli luwwi hundam wereeggisseenaa sheeqqatteenaa xantam lachcha ixxuwwina uwwaakko. «Baasili'eelii Ohooli'aabii Waa'i lachchaa qooroomaa uwwu mulli mannii Keesammi Dukkaa'n baxina hasisoo luwwi hundam Waa'i ijaajukkisanne baxxamo» yukko. Muse'e Baasili'eela, Ohooli'aaba, Waa'i annanni lachcha uwwu keenoo baxo hara'mmiteena liirantam qoolluwwaa weeshaa baxo asheettamisina kurukko. Ixxuwwim Keesammi Dukkaa'n baxina Isra'ee'l minaadab uwwito'i luwwa hundam Muse'eensi aa'llo'o; ihukkaarem Isra'ee'l minaadab Waa'ina uwwitam luwwa Muse'e beyyo darina darina eebimma utto'oyyi hee'ukko. Ee lasage anga qoolluwwi keen hundim baxo utta'a Muse'e beyyo matta'a «Minaadab Waa'i ijaaju baxina hasisoohaanniinsi hanaan hore'em lobakkat luwwa uwwiteena eebbamuulla» yito'o. Ee bikkina Muse'e keesamaakkoo dukkaa'n baxina ihoo luwwa kanniinsi eehid minaadab uwwiteena eebbambee'isa hegeeg hundannem ijaajo higisukko; ee lasage minaadab uwwitam luwwa eebimma utto'o. Mashka'oomam uwwakko'i luwwi baxo hundam baxakkeena ihaa gatooqux hee'ukko. Ee baxo baxxam keeniinsi hore'em lobakata qoolluwwi hee'llo'i keen talbi danaam fatirinne shaano'inne, kuulinnee kashar fatrinnee kiruubee'l misila axisakka'a baxakko'oo tommi du'm eddechchinne keesamaakkoo dukkaana baxxo'o. Ee du'm eddechchuwwik qeeraa'lloom lamiyyee sadeenti angaa midaad odim soor angi ihaa hundim gudaanchi hee'ukko. Ixxuwwim ontooma mat kollonne mulli onto odim mulli kollinne mat issita'a gobbo'o. Mat issita'a gobbo'i du'm eddechchi kasanne shaano'i hagar fatirinne axissa'a daddo'oo quba'uwwa issito'o; mulli kollonne mat ihaa gobamu du'm eddechchannem mataanni kasanne ee'isam issito'o. Luxxi mi'nnaannonne luxxi du'm eddechchanne ontayyi quba'aa ee'isam la'm mi'nnaannonne lasaanchi du'm eddechchanne mulli quba'uwwaannonne illagenne ihoo ontayyi quba'aa issito'o. Lamem kolli du'm eddechcham mat issita'a amadiisseena awwaadoo worqinne baxamaakkoo ontayyi qapha baxxo'o. Dukkaanina ifiishshaanchi ihoo tommoo mat du'm eddechchaa fella'i oddinne dadamaakkoo eddechchaa gudisso'o. Oo du'm eddechchuwwi hundim gudaanchi ihaa annannichchikim qeeraa'lloomii sad anga dufaachchoomii soor anga hee'ukko. Ontooma mat kollonne lohooma odim mulli kollonne issimminne mat issita'a gobbo'o. Luxxi minenne yoo lasaanchi du'm eddechchi kasanne ontayyi quba'a la'm baxxanchi du'm eddechchi kasannem ontayyi quba'a issito'o. Lamem kollonnem yoo du'm eddechcha mat issita'a mat ifiishshaancho axisseena ontayyi qapha naas xaarinne baxxo'o. Biiree'n kollinne ifiishshina ihoo du'm eddechchuwwiinsi mato gereechchi ambu'l kashar qalamanne cefakko'oo omachchinne la'mmekam duugamaakkoo hirfaninne mulli lam du'm eddechcha baxxo'o. Ee Keesammi Dukkaana uullisimmina xabbeen xarbuwwa giraariinsi baxxo'o. Ee xarbuwwik qeeraa'lloom tommi anga midaad mat angaa kolloo hee'ukko. Ee dukkaa'n xarbuwwa hundam lam lamo mat issakka'a amadiisimmina awwaadoo shobakka'a axisakko'oo lam lam lokkuwwi hee'ukko. Keesammi Dukkaa'n xarbuwwina hundinam ee'isam issito'o. Dukkaaniinsi woroo'n qarinne lamiyyi xarbuwwa issito'o. Lamiyyem xarbuwwi lugumonnem xaarinne baxxo'oo sor lokkuwwa issito'o; ee'isam lam lam xuffeewwa mat issita'a amadiissam lam lam lokkuwwi hee'ukko. Dukkaa'n la'm kollinam hanaa'n qarinne lamiyyi xarbuwwa issito'o. Ee xarbuwwi lugumonne annannichchonnem lam lam lokko issimminne xaarinne baxamaakkoo sor lokkuwwa issito'o. Dukkaaniinsi afareen eelliinchi aaggi kollinne loh xarbuwwa issito'o. Dukkaa'n afaree'n kollinne yoo lamejjuwwinam lam lam xarbuwwa baxxo'o. Oo lamejjuwwanne yo'i xarbuwwim lugumiinsi ki'isaa jagiiranne afeebe'e mat guma'inne amaxxanto'oo keen hee'llo'o; lamem lamejjuwwannem yo'i xarbuwwi baxxanto'ok ee'isinnetti hee'ukko. Ee bikkina xarbuwwina annannichchinam luguminne lam lam lokki yoohan ihaa sadeenti xarbuwwii xaariinsi baxamaakkoo tommii loh lokkuwwii yoohan hee'ukko. Tommoo onti laqqo'uwwam giraa'l haqqiinsi baxxo'o; ee'isinne ontoom baxanto'ok Keesammi Dukkaa'n mat kollinne yo'i xarbuwwinatti ihaa ontoom odim mulli kollinne yo'i xarbuwwinatti ihukko; ee'isam ontoom Keesammi Dukkaa'n eelliinchi aaggi kollinne ihoo'isina baxxo'o. Ee xarbuwwi midaaxxi kollinne lambe'enne yoo laqqo'i ee Keesammi Dukkaa'n mat kas ludiinsi ki'isaa mulli kas lud afeebe'e afam hee'ukko. Ee xarbuwwam worqinne goolabbo'o; guma'uwwam laqqo'uwwa aagisakkamisina worqinne baxxo'o; laqqo'uwwim worqinne goolabamaakkoohan hee'ukko. Du'm eddechcham talbi danaam fatirinne daddo'o; oohim shaano'inne, kuulinnee kashar fatirinnee dadamaakkoohan ihukkuuyyi ee du'm eddechchanne mixxeechchisa baxamaakkoo kiruubee'l misil hee'ukko. Ee du'm eddechchinam soor nottolluwwa giraa'l haqqinne baxxa'a worqinne goolabbo'o; ee nottolluwwannem sinxilluwwa worqinne baxxo'o; nottolluwwi uulloo soor lokko kin birinne baxxo'o. Keesammi Dukkaa'n goocina talbi danaam fatirinne, shaano'i fatirinne, kuul fatirinnee kashar fatirinnee gobakka'a wereeggisakko'oo du'm eddechcha daddo'o. Ee du'm eddechchina sinxilluwwi yoo onti nottolluwwa baxxo'o; ee kee'nnekam goobinaanchoo meeggaro'uwwaa worqinne goolabbo'o; nottolluwwinam uullisakkam onti lokko naas xaarinne baxxo'o. Baasili'eelim giraa'l haqqinne Hidi'l Saga'l Saaxina baxukko; ee saaxi'nnekim qeeraa'lloom lam angaa kolloo dufaachchi mat angaa kolloo uullichchim mat angaa kolloo hee'ukko. Hanee woroo danaam worqinne goolabukko; kululleetannem worqi goobinaancho issukko. Soor worqi guma'a baxaa lamo mat kollinne lamo odim mulli kollinne issaa ee saaxi'n soorem lokkonnem issukko. Wonnannuwwam giraa'l haqqinne baxaa worqinne goolabukko. Ee wonnannuwwam Hidi'l Saga'l Saaxina iyyimmina ee saaxi'n lamem midaadonnem yoo guma'uwwanne aagisukko. Qeeraa'lloom lam angaa kolloo dufaachchoomim mat angaa kolloo ihoo haafixxi ifichcho muccur worqinne baxukko. Lam kiruubeelam tumammi worqinne baxaa ee haafixxi ifichchi lamem kolli tochchonnem baxukko. Mat kiruuba ee ifichchi mat kolli tochchinne la'mmekam mulli kolli tochchinne baxukko. Ee kiruubam ifiishshaanchinne maqirem matfir issaa baxukko. Oo Kiruubbuwwi ixxuwwi lado iim biddiqaa'lla'a haafixxi ifichcho ladinne ifiissamisa issukko; ixxuwwim mat mato moo'aqqantaman ikka'a ifichcho aad illinne moo'llamisa issukko. Qeeraa'lloom lam anga, dufaachchi mat anga uullichchim mat angaa koolloo ihoo xaraphpheeza giraa'l haqqinne baxukko. Muccur worqinnem goolabaa kululleetanne goobinaancho issukko. Odim haraaroom mat taachcho'o ihoo goobinaancho eehanni kululleetanne issukko; ee goobinaanchi kululleetam worqinne goolabukko. Ee xaraphpheezinam soor worqi guma'uwwa baxaa soorem lokkim kaaxxu soorem lamejjannem issukko. Xaraphpheeza iyyakkam wonnannuwwa aagisakkam guma'uwwam ee tochchi goominaanchi gadanonne issukko. Oo wonnannuwwim giraa'l haqqinne baxamaa worqinne goolabamaakkoohan hee'ukko. Xaraphpheezanne hee'oo mu'uttuwwa muccur worqinne baxukko; oo keenim saahinnuwwa, wocittuwwa, cilfuwwaa woyi'n diqaasa inkiirakkam maqorqoro'uwwaa hee'ukko. Caakka dissakkam mu'utam muccur worqinne baxukko; ixxekam lugumoo amaa worqa tumaa axisukko; ludo gurumbaa fiitaa wereeggina ihona matfir issaa baxukko. Mat kollinne saso la'm kollinnem saso issaa lamem kollinnem loh caafa baxukko. Lohem caafannem gurumbinnee fiitinnee maqire lawuz fiita laboo sas gurumbi mat kollaannonne sas odim mulli kolli caaffuwwanne hee'ukko. Ee'isam gurumbi, fiitii lawuz fiita laboo soor ludduwwii ee mu'utanne hee'ukko. Lohem caaffuwwi lugumonnem lam caaffuwwi mat ihaa exxoo lugumonne annannichchaannonnem gurumbi baxamaa hee'ukko. Gurumbuwwii oo caaffuwwii ee caakka dissakkam mu'utinne matfir hee'ukko; hundim muccur worqi tumamaa baxamaakkoohane. Ee caakka dissakkam mu'uxxi lamarem caaffuwwam, gii'l buchcha giggissakkamokaa eekkam dissakkam mu'utaa muccur worqinne baxukko. Ee caakka dissakkam mu'utaa ixxenne maqire awwaaxxakkam mu'utaa hundam sadinnee onti kiilo'i giraam worqinnee baxukko. Qeeraa'lloom mat anga, dufaachchim mat anga, uullichchi odim lam anga ihoo aduruusa wiriissakkam kiti'm beyyo giraa'l haqqinne baxukko; soorem ejjo'onnem yoo buudduwwim eehanninne maqirem matfir ihaa baxamaakkoohan hee'ukko. Hane, hundem midaadduwwaa buudduwwaa muccur worqinne goolabukko; kululleetannem worqinne gooinaanch issukko. Ee goobinaanchi worinne iyyakkam wonnannuwwa aagisakkam lam worqi guma'uwwa lamem midaadinnem baxukko. Ee wonnannuwwam giraa'l haqqinne baxaa worqinne goolabukko. Keesamaakkoo laphphakkam zaytaa er enji yoo danaam aduruusaa mixxeellaninne baxukko. Qeeraa'lloom onti anga midaadim onti anga ihoo kiti'm beyyo giraa'l haqqinne baxukko; oohim soor midaad yoohan ihaa uullichchi sas anga ihoohan hee'ukko. Ee kiti'm beyyinne maqirem matfir ihaa baxamaakkoo buudduwwa soorem midaadduwwannem issaa hundam naas xaarinne goolabukko. Ee kiti'm beyyonne awwaaxxakkam mu'uttuwwa oohim disxuwwa, giira hogoofaancho, loqooqo'i saahinnuwwa, qaphphuwwaa midachchuwwaa hundam naas xaarinne baxukko. Goobinaanchiinsi ki'isaa kiti'm beyyika lam gudaanchi beyyi afeebe'e calcalaa tochchiinsi tochcho afoo illaanchi'nnookkoka naas xaarinne baxukko; ixxaannonnem soorem midaaxxi ejjo'onnem soor guma'uwwa issukko. Ee agi'l naas soorem midaaxxi ejjo'onnem wonnannuwwina ihoo soor guma'uwwa issukko. Wonnannuwwam giraa'l haqqinne baxaa naasinne goolabukko. Ee kiti'm beyyo iyyimmina ee beyyi lamem midaadonnem yoo guma'uwwanne ee wonnannuwwa aagisukko; oo kiti'm beyyim xarbinne baxamaakkoohan ihaa woroom mahim bee'an hee'ukko. Aanshaqqakkam Saahinaa eekka dissakkamokam Keesammi Dukkaa'n goocanne awwaadoo meenti eebu naas xaa'l gagmoo'ixxinne baxukko. Ee lasage wixxixxi beyyo baxukko; ee beyyikim woroo'n qa'l qeeraa'lloom mat xibbi angi ihaa talbi danaam fatirinne dadakko'oo du'm eddechchi yoohan hee'ukko. Ee du'm eddechcha saqalakkam lamiyyi nottolluwwaa lamiyyi lokkoo naas xaarinne baxukko; utuphphi meeggaro'uwwaa sinxilluwwam kin birinne baxukko. Hanaa'n qa'l qeeraa'lloomim mat xibbi angi hee'ukko; ee qarannem naas xaarinne baxamaakkoo lamiyyi nottolluwwii lokkuwwii kin birinne baxamaakkoo ee nottolluwwi sinxilluwwii meeggaro'uwwii hee'ukko. Eelliinchi aagginnem qeeraa'lloom ontayyi anga ihoo du'm eddechchi hee'ukko; ee keeninam naas xaarinne baxamaakkoo lokki yoo tommi nottolluwwi hee'ukko. Ee nottolluwwinam kin birinne baxamaakkoo meeggaro'uwwii sinxilluwwii hee'ukko. Eelliinchi fi'l dufaachchoominam ontayyi anga ihoo du'm eddechcha issukko. Mat kollinne yoo gooc du'm eddechchik qeeraa'lloom tommoo onti angaa ihukkuuyyi sas nottolluwwii sas lokkuwwii yoohan hee'ukko. Ee'isam ee wixxixxi beyyi mulli kollinne yoo goocanne qeeraa'lloom tommoo onti angaa ihoo du'm eddechchi yoohan ihukkuuyyi sas nottolluwwii sas lokkuwwii yoohan hee'ukko. Ee wixxixxi beyyi kululleetanne yoo du'm eddechchi hundim talbi danaam fatirinne dadamaakkoohan hee'ukko. Nottolluwwikim lokki naas xaarinne, sinxilluwwii meeggaro'uwwii kin birinne baxamaakkoohan hee'ukko; ee kee'nnekim lud kin birinne goolabamaakkoohane. Wixxixxi beyyi nottolluwwina hundinam kin bi'l sinxilluwwi hee'ukko. Wixxixxi beyyo aagakkam goocik du'm eddechchi shaano'inne, kuulinnee kashar talbi danaam fatirinnee wereeggisakka'a dadakko'oohan hee'ukko; eehanni uullichchim wixxixxi beyyi du'm eddechchaannisam onti angi hee'ukko; qeeraa'lloomim lamiyyi angi hee'ukko. Naasinne baxamaakoo soor lokki yoo soor nottolluwwi hee'ukko; ee nottolluwwikim, lud kin birinne goolabamaakkoohan hee'ukko. Dukkaa'nnekii wixxixxi beyyi xiribbuwwii hundim baxamukkok naas xaarinnette hee'ukko. Muse'e ijaajukkisinne qeessichchi Aaroon beet Itaamaar awwonsatinne Leewi'i oos xiggo'isanne Keesammi Dukkaa'n woronne oohim Hidi'l Saga'l Dukkaa'n woronne hee'oo mu'ut kanniinsi woroon yoohane. Yihuxxi sulliinsi Huur beetina beet ihu Uur beet Baasili'eel Waa'i Muse'e ijaajukkoka hundam issukko. Ixxenne maqirem Daan sulliinsetti ihu Ahisaamaak beet Ahooli'aab xaara tumaancho, bax sono'o sheeqqaroohanee angi qooraa ee'isam shaano'inne, kuulinnee kashar talbi danaam fatirinnee wereeggisaa dadoohan hee'ukko. Keesamaakkoo Dukkaa'n baxina ihoo'isina Waa'ina annanni ihaa uwwamu worqi hundim la'amaakkoo keennaanchonne mat kum kiilo'i giraama ihoohan hee'ukko. Xigamu minaadabiinsi hundiinsim wixxu kin bir la'amaakkoo keennaanchonne 3,430 kiilo'i giraamaa hee'ukko. Xigamu minaadab annannichchim uwwukkok la'amaakkoo keennaanchika kollo; ee xigamu minaadaphphi umur lamiyyee eehanniinsi hanaanii yoo hundikim xig 603,550 hee'ukko. 3,400 kiilo'oo ihoo kin birinnem Keesammi Dukkaanaa du'm eddechchaa uullisimmina ihoo mat xibbi lokki baxamaa hee'ukko; oohim lokkina annannichchinam sadii soor kiilo'i giraamii qoodamaa hee'ukko. Gatu sadem kiilo'i birinnem nottolluwwanne yoo sinxilluwwaa meeggaro'uwwaa Baasili'eel baxukko. Nottolluwwi ludom goolabukko. Waa'ina annanni ihaa uwwamu naas xaar 2,425 kiilo'i giraamaa kee'mmoohan hee'ukko. Ee naasinnem Keesammi Dukkaana aagakkam goocika lokkuwwa, kiti'm beyyo, kiti'm beyyi lamgudaanchi afeebe'e calcaloo illaanchi'nnoo kiti'm beyyi mu'uta hundam wixxixxi beyyi kululleetanne yoo lokkuwwa, ee wixxixxi beyyi goocika lokkuwwaa ee'isam dukkaa'nnekaa wixxixxi beyyi kululleexxi xiribbuwwaa hundam baxukko. Keesammi beyyi awwaadina ihoo eddechcha shaano'inne, kuulinne, woyi'n misha laboohaanninnee kashar danaam talbi fatirinnee daddo'o; Waa'i Muse'e ijaajukkisannem Aarooninam keesammi eddechcha daddo'o. Eefuudam worqinne, shaano'inne, kuulinnee kashar talbi danaam fatirinnee daddo'o. Worqam tumta'a caraqissa'a lasage fati'llisa issita'a muransita'a shaano'inne, kuulinne, talbi danaam kashar fatirinnee muuncita'a wereeggissa'a daddo'o. Eefuuda lamem gudumonnem amadiisimminaa lamadonne lade'imminaa awwaadoo lam xixxaabam daddo'o. Waa'i Muse'e ijaajukkisinnem worqinne, shaano'inne, kuulinnee kashar muuncamaakkoo talbi danaam fatirinnee wereeggisimminne dadamaakkoo matfir sabbata eefuudinne mat issita'a baxxo'o. Bito xee'aalli kinam worqi gurumbi goobinaanchinne gammalta'a eehannonne koobo'isa Isra'ee'l oosika summa koobbo'o. Ee kinneewwam Waa'i Muse'e ijaajukkisannem Isra'ee'l ooso tiissiisoohan ihoo'isina eefuuda karakkam gudu'm xixxaabanne issito'o. Biq kiisam anigne qoor manni baxoohaannisa issita'a baxxo'o; eefuuxxisam worqinne, shaano'inne, kuulinne, kashar fatirinnee talbi danaam fatirinnee wereeggissa'a baxxo'o. Oo kiisim lam qinxitii soor lamejjii yoohan ihaa uullichchi mat taachcho'o midaadim mat taachcho'o hee'ukko. Ee'isam ee kiis soorem ogorannem bito xee'aalli kiniinsi goobinaancho issito'o; luxxi ogoranne boobeet kashar kina, diqaasa laboo bito xee'aalli kina, inqu yakkam belecce'oo kina, la'm ogoranne sandaab kina, cuquluusa laboo kina, aduu'n ille laboo kina, saxxi ogoranne sandaab kina, heemachchi lab shaano'i kina, kuul kina, soo'l ogoranne shaano'i kina, aduu'n ille loboo kinaa gaga moo'ixxa laboo shaano'i kinaa issito'o; ee kinneewwa hundam worqi gurumbi goobinaanchinne gammalto'o. Tommonnee lamem bito xee'aalli kinneewwanne annannichchonnem tommoo lamem Isra'ee'l oosoo tiirimmina mat kinanne mat summi koobamaa hee'ukko. Biq kiisinam xixxaabisa dadamaakkoo cora danaam worqinne baxxo'o. Lam worqi gurumbi goobinaanchuwwaa lam worqi guma'uwwaa baxxa'a lamem guma'uwwam biq kiisiinsi hanaan yoo amejjuwwinne amaxxansito'o. Lamem worqi corim ee biq kiisaannonne lamem tochchonnem yoo guma'uwwinne maqire amaxxamoo'isa issito'o. Lamem co'llekam mulli kolli ludo lamem gurumbi goobinaanchinnem amaxxansito'o; ee'isinne cekkinne dilloo eefuuxxi xixxaabinne illagee'n kollinne amaxxamoo'isa issito'o. Odim lam worqi guma'uwwa baxxa'a eefuudiinsi awwonaa yoo biq kiis woroo'n saninne woro'l lam kasanne amadiisso'o. Odim lam guma'a worqinne baxxa'a cekkinne aad illagee'n kollinne calcaloo eefuuxxi xixxaabbuwwanne woroo'n kollinne amaxxansito'o; oo keenim amaxxanto'ok anginne wereeggisakka'a dadakko'i sabbatii eefuudii edantam beyyonnette. Waa'i Muse'e ijaajukkisannem biq kiisanne yoo guma'uwwi eefuuxxi guma'uwwinne mat ihaa shaano'i fatirinne karamaahii biq kiis guma'i lamadonne lade'akkam sabbatinne mat ihahii eefuudinne exxoo bikkina heekke'ooyyo. Eefuuxxi hanenne edde'akkam qambiis hundoomim dadamukkok shaano'i fatirinnette hee'ukko. Ee qambiis lambe'ennem gaanje aagisakkam beyyi hee'ukko; dereeramoobee'isam gammalamaakkoohan hee'ukko. Qambiisoo'm woroo'n kasanne shaano'inne, kuulinnee talbi danaam kashar fatirinnee roomaa'n misha laboo wereegga issito'o. Danaam worqinnem doola baxxo'o; ee doolam qamis kas kululleexxi roomaa'n misha laboo wereeganne issito'o. Waa'i Muse'e ijaajukkisannem ee doolaa roomaa'n misha laboo wereeggaa qambiis kas kululleetanne awwonansita'a issito'o. Aarooninaa ixxi oosinaa kanniinsi woroon yoo eddechcha gudisso'o; oohim talbi danaam fatirinne shamiizzuwwa, horoorenne xaaxakkam shaashshuwwa, guufo'uwwaa sure'uwwaa daddo'o. Ee'isam Waa'i Muse'e ijaajukkisannem sabbattuwwa shaano'inne, kuulinnee kashar talbi danaam fatirinnee wereeggissa'a daddo'o. Keesammoo'm mare'em muccur worqinne baxxa'a «Waa'i awwaadina keesamaakkoohane» yoo sagara koobo'onne kitaabamu kitaaphphisa koobbo'o. Eekkam Waa'i Muse'e ijaajukkisannem shaashshi hanenne illagee'n kollinne shaano'i fatirinne katto'o. Ee lasage keesammi dukkaa'n bax hundim beeddukko; Isra'ee'l minaadab hundem luwwam Waa'i Muse'e ijaajukkisanne issito'o. Ee lasage kanniinsi woroon yoo mu'uttuwwa hundam Muse'e beyyo eebbo'o. Dukkaanaa awwaaxxakkam mu'uttuwwaa oo keenim meeggaro'uwwa, xuffeewwa, laqqo'uwwa, nottolluwwa lokkuwwa, dukkaananne ambakkam kashar qalam labamaakkoo gereechchi ambu'l omachchoo cukkamaakkoo omachchoo, daphphaa'akkam du'm eddechcha, Hidi'l Saga'l Saaxina, iyyakkam wonnannuwwa, haafixxi ifiishshaancho, daphphaa'immina dadamu du'm eddechcha, xaraphpheeza, ixxenne awwaaxxakkam mu'uttuwwa hundam, keesammi daabbo'o, muccur worqinne baxamaakkoo caakka dissakkam mu'uta, ogoranne dissamaakkoo kuraazzuwwaa awwaaxxakkam mu'uttuwwaa, caakkina awwaadoo zayta, worqinne baxamaakkoo kiti'm mu'uta, keesammi labakkam zayta, enje'oo aduruusa, Keesammi Dukkaa'n gooc du'm eddechcha, naas xaarinne baxamu kiti'm mu'uta, calcaloo illaanchi'nnoo mu'uta wonnannuwwaa eehannina awwaadoo mu'uttuwwaa, aanshaqqakkam saahinaa dissakkam mu'utaa, wixxixxi beyyi du'm eddechcha, eehanni belluwwaa uullisakkam lokkuwwaa wixxixxi beyyi gooc du'm eddechcha, usseewwa, dukkaana kaasakkam xiribbuwwa, Keesammi Dukkaa'n woronne awwaaxxakkam mu'uttuwwaa qeessichchi Aaroonii ixxi goo'n oosii keesamaakkoo beyyonne qeessoomaninne awwaaddu'uuyyi edde'llam keesammi danaam qeessooma'n eddechchaa hee'ukko. Isra'ee'l minaadab Waa'i Muse'e ijaajukkisanne hundem luwwam baxxo'o. Muse'em hundem luwwam saarayyaa Waa'i yukkisanne baxxo'isa qoossukko; ee bikkina Muse'e ixxuwwa maasse'ukko. Waa'i Muse'ena «Luxxi agan aagu luxxi ayyaamonne Keesammi Dukkaana kaase. Hidi'l Saga'l Saaxina Dukkaa'n woronne dissitaa du'm eddechchinne daphphaa'e. Xaraphpheezam ee daphphaa'oo du'm eddechchiinsi biireen Hidi'l Saga'l Saaxi'n illagenne disse; caakka dissakkam mu'utam ee beyyonne dissitaa ixxi hanenne caakka caakkise. Aduruusa wiriissakkam worqinne baxamu kiti'm mu'uta ee beyyonne disse; ee Dukkaana aagakkam goocannem du'm eddechcha isse. Kitima shokkiisakka'a hincaa'akkam kiti'm beyyom Dukkaa'n goocanne disse. Aanshaqqakkam saahinam Keesammi Dukkaa'nnaannonnee kitima hincaa'akkam mu'uxxi lambe'ennee dissitaa wo'o wonshe. Wixxixxi beyyonnem kululaa'llaa du'm eddechcha isse; du'm eddechcham wixxixxi beyyi goocanne isse. «Ee lasage Dukkaanooma awwaaxxakkam mu'uttuwwinne maqirem keesammi zayta labbaa Waa'ina keesamaakkoohan isse; keesamaakkoohanem ihookko. Ee lasage kiti'm beyyo eehannina awwaaxxakkam mu'uttuwwinne maqirem keesammi zayta labbaa iina Waa'ina keese; hore'oomam keesamaakkoohan ihookko. Aanshaqqakkam saahinam ixxo dissakkam mu'utinnem keesammi zayta labbaa iina Waa'ina keese. «Aaroonaa ixxi oosoo Dukkaa'n goocanne wottaa wo'inne aanshe. Aaroonina keesamaakkoo qeessooma'n eddechcham eddeessaa zayta labbaa qeessichchi ihaa iina awwaadona keese. Ixxi goo'n oosom wottaa qambiisa eddeese. Ixxuwwim qeessuwwi ikka'a iina awwaaddona Aaroona keesammi zaytinne labbittisam ixxuwwannem labe. Ixxuwwim iina annanni ikko'i bikkina waaroo doolli hundannem qeessuwwi ikka'a iina awwaaddamo» yukko. Muse'em Waa'i ijaajukkisa hundem luwwam issukko. Ee bikkina Gibxi uulliinsi fitto'i la'm hiinchonne luxxi agan aagu luxxi ayyaamonne Keesammi Dukkaan kaasamukko. Muse'e kaasakkam lokkuwwa issaa Keesammi Dukkaana kaasukko; saanquwwaa nottolluwwam uullisukko; laqqo'uwwa aagisaahim amaxxansukko. Waa'i ijaajukkisannem ee Keesammi Dukkaana kaasukko; hanenne ambakkamokam edaa ambukko. Hidi'l Saga'l Saaxinam massaa Keesammi Dukkaananne dissukko; wonnannuwwam Hidi'l Saga'l Saaxi'n guma'uwwanne aagisukko; haafixxi ifichchom Hidi'l Saga'l Saaxi'n hanenne issukko. Hidi'l Saga'l Saaxinam Keesammi Dukkaa'n woronne aagisaa du'm eddechchinne daphphaa'ukko; ee'isinne Waa'i ixxo ijaajukkisanne Hidi'l Saga'l Saaxina daphphaa'ukko. Xaraphpheeza Keesammi Dukkaa'n woro aagisaa daphphaa'oo du'm eddechchiinsi bii'l kollinne Kukkaaniinsi hanaa'n qaranne dissukko. Waa'i ijaajukkisannem Waa'ina hincoo keesamaakkoo daabbo'o xaraphpheezanne gudisaa dissukko. Caakka dissakkam mu'utam Keesammi Dukkaa'n woro aagisaa xaraphpheez illagenne Keesammi Dukkaaniinsi woroo'n qarinne dissukko. Waa'i ijaajukkisannem Waa'i illagenne caakka caakkisukko. Waa'i ixxo ijaajukkisannem Muse'e worqinne baxamu aduruusa wiriissakkam kiti'm mu'uta Keesammi Dukkaa'n woro aagisaa daphphaa'oo du'm eddechchi illagenne dissukko. Waa'i ijaajukkisannem danaamisa enje'oo aduruusa wiriissukko. Du'm eddechcham Dukkaana aagakkam goocanne issukko. Dukkaa'n gooc illagennem shokkiisakkam kitima hincaa'akkam kiti'm mu'uta dissukko; shokkiisakkam kitimaa hurbaaxxi kitimam Waa'i ixxo ijaajukkisannem ee kiti'm mu'utanne hincaa'ukko. Aanshaqqakkam saahina Dukkaa'nnaannonnee kiti'm mu'uxxi lambe'ennee dissaa wo'o wonshukko. Muse'e, Aaroonii ixxi goo'n oosii ixxuwwi angaa lokkoo ee wo'inne aanshaqqito'o. Dukkaa'n woro aaggam ammanee kiti'm beyyom hincitam ammanee hundam Waa'i ijaajukkisanne aanshaqqitam hee'llo'o. Muse'e Dukkaa'nnaannonnee kiti'm beyyi kululleetannee wixxixxi beyyo baxukko; ee beyyo aagakkam goocannem du'm eddechcha issukko; ee'isinne bax hundam guullukko. Ee lasage Keesammi Dukkaan duubinne ifiisamukko; Waa'ikim lombi Dukkaananne wo'mmukko. Ee bikkina Muse'e dukkaa'n woro aageena xanukkoyyo. Isra'ee'l oos wiiddanto'i beyyiinsi dooyyitam hee'llo'ok Keesammi Dukkaaniinsi duub ki'oo amman xale'e hee'ukko. Duub Keesammi Dukkaaniinsi ki'ubeelas wiidda'n beyyiinsi dooyyitam hee'llo'oyyo. Dooyyitam hee'llo'i amman hundam Waa'i lombi moo'amam hee'ukkok ballanne duub Keesammi Dukkaa'n hanenne ihoohaare hiimonne odim duuphphi woronne giir moo'amoohaarette hee'ukko. Waa'i ixxi Keesammi Dukkaa'n woronne ihaa Muse'e weeshaa «Isra'ee'l minaadabina ‹Ki'nnuwwiinsi ayyim iina lariinsi, gereebbiinsi te'm fella'iinsi hincaa'llehe. « ‹Oo hincaa'ookkok lariinsetti ihulas miiqakkam luwwi bee'i labeena doo'llaa hincaa'ona. Oohim i illagenne er kitim ihoo'isina Keesammi Dukkaana aagakkam goocanne hincaa'ona. Oo manchi ee shokkiisakka'a hincaa'akkam kitimina hincaa'u diinaxxi horoorenne ixxi anga issona; oohim ixxi baaxiil haafamoo'isina eran ihookko. Oo manchi ee labeena i illagenne durona; Aaroon shumo'iinsetti ihu qeessuwwi eehanni xiiga iina hincaa'llona. Dukkaa'n goocanne yoo kiti'm beyyi midaadduwwi hundannem wixxona. Ee lasage oo manchi shookkiisakka'a hincaa'akkam kitimina duramu diinaxxeka omachcho coo'ona; qaamafeetam annanni annanni issaa fissona. Aaroon shumo'iinsetti ikko'i qeessuwwi kiti'm beyyonne haqqa tuubba'a giittona. Oo qeessuwwi ee qaamafeettuwwa, horooree di'iraa edda'a kiti'm beyyonne tuubamu haqqanne dissitona. Ihukkaarem oo manchi ee labee'nneka godaphphi mu'utaa lokkuwwaa wo'inne aanshona; qeessichchim ee kitima hundam kiti'm beyyonne shokkiisona; oohim shokkiisakka'a hincaa'akkam kitim ihu bikkina enji eese liiransoohane ihookko. « ‹Oo manchi Shokkiisakka'a hincaa'akkam kitimina gereebbiinsi te'im fella'iinsi hincaa'eena hasulas miiqakkam luwwi bee'i ambula hincaa'ona. Eeham kiti'm beyyiinsi hanaa'n qarinne i illagenne durona; Aaroon shumo'i ikko'i qeessuwwim xiiga kiti'm beyyi midaadduwwanne wixxona. Oo manchim ambu'lleka maara qaamafeetinne annanni annanni issaa lasage qeessichchi ee qaamafeettuwwa, horooree di'iraa edaa kiti'm beyyonne tuubamu haqqanne dissona. Ihukkaarem oo manchi ee ambu'lleka godaphphi mu'utaa lokkuwwaa wo'inne aanshona. Qeessichchim ee kitima hundam kiti'm beyyonne shokkiisona; oohim shokkiisakka'a hincaa'akkam kitim ihu bikkina enji eese liiransoohane ihookko. « ‹Oo manchi shokkiisakka'a hincaa'akkam kitimina hincaa'eena hasukkok cii'iinsette ihulas handare'iinsi te'im handare'i wotalliinsi hincaa'ona. Qeessichchim eekka kiti'm beyyonne hincaa'ona; gaanjem booqaaqaa annannissona. Horoorem kiti'm beyyonne shokkiisona; xiigim ee beyyi midaadonne taktakihona. Ladoo godaphphi mu'utaa annannissaa kiti'm beyyiinsi eelliinchi firinne gii'lbuchcha fincakkam beyyonne uunjona. Laddeewwam amadaa orachchooma annannissoo'nnim diqaa kiti'm beyyonne giiranne shokkiisona; eehido'i kiti'm enji eese liiransoohane ihookko. « ‹Ayyi manchim iina hurbaatiinsi kitima uwwoo ammane doo'llamaakkoo qamiinsetti ihona; wee'l zaytam hanenne dunona; aduruusam edona. Eeham Aaroon shumo'i ikko'i qeessuwwi beyyo eebona; qeessichchim ee qamiinsii zaytiinsii mat fooccaa aduruusaa hundam massona. Giiranne shokkaa enji eese liiransoo kitim issaa tiissiishshan ihona kiti'm beyyonne shokkiisona. Eehanniinsi gatu qam qeessuwwina uwwamona; ookki iina giirinne hincu kitim ihu bikkina lobakata keesamaakkohane. « ‹Oo kitim giiranne saramaakkoohan ihulas ursho'i exxubee'an ihimmi hasisookko; oohim wee'l zaytinne cukkamaa er qaminne saramaakkoo daabbo'o te'im zaytinne cukkakko'oo qorosho'i ihimmi hasisookko. « ‹Oo kitim gala'anne saramaakkoohan ihulas ursho'i bee'an ihaa wee'l zayti exxaa er qamiinne gudaakkoohan ihona. Eeham iiqansitaa wee'l zayta dune; ookki hurbaaxxi kitima. Kitim qure'enne saramaakkoohan ihulas wee'l zaytinne cukkamaakkoo er qamiinsetti ihimmi hasisookko. Eeham iina hincoo kitim issitaa qeessichchina uwwe; qeessichchim kiti'm beyyonne hincaa'ookko. Qeessichchi ee kitimiinsi tiissishshina ihoo qaxa aa'aa giiranne shokkaa enjoom eese liiransoo kitim issaa kiti'm beyyonne shokkiisona. Gatuqax qeessuwwina uwwamona; ookki iina giirinne hincu kitimiinsetti ihu bikkina lobakata keesamaakkoohane. « ‹Shokkiisakka'a hincaa'akkam kitim ihaa iina hincoo kitiminne ursho'i te'im marab exxaa hincoobee'i bikkina iina hincaa'llakkam hurbaaxxi kitimanne ursho'i exxoone. Hiinchonne hiinchonne hurbaaxxi atootiinsi ludo iina hincaa'llehe; ihukkaarem eenji eese liiransoo kiti'mmisa ihaa shokkimmi hasisooyyo. Iina hincaa'lloo hurbaaxxi kitim hundam sooqidinne xee'ise; iikka ki Moollannika hidi'l sooqido ee kitimiinsi gatissitte. Hincaa'lloo hurbaaxxi kitim hundannem sooqido ede. « ‹Ki wix hurbaatiinsi ludo iina hinca'lloo ammane goodakka'a cukkakko'oo hamaam ihona. Oohim hurbaaxxi kitim ihu bikkina wee'l zayta dune; aduruusam ede. Qeessichchi ee kitimiinsii zaytiinsii ihoo qaxaa aduruusaa hundam iina girinne hincoo tiissiishshi kitim issaa shokkiisona. « ‹Ayyi manchim mateeyyoo'm kitimina lariinsi hincaa'oo ammane miiqakkam luwwi bee'i mat labeena te'im addichcho doo'llaa i illagenne hincaa'ona. Kitimina hincaa'oo diinaxxi horoorenne anga issona; Keesammi Dukkaa'n gooc gadanonnem durona; Aaroon shumo'i ikko'i qeessuwwim ee xiiga kiti'm beyyi midaadduwwanne wixxona. Mateeyyoo'm kitimiinsi iina giirinne shokkiisakka'a hincaa'akkam kitimina godaphphi mu'uta ifiisoo di'ira, godaphphi mu'utanne yoo di'ir hundam, lamem muro, lamem muronnee midaadonnee yoo di'iraa afare ifiisoo iillanchi'nnoo'i diraa ihimmi hasisookko. Aaroon shumo'i kiti'm beyyonne aphphoo haqqanne shokkiisakka'a hincaa'akkam kitiminne maqirem shokkiissona. Oohim giirinne shokkaa enji eese liiransoo kitim ihookko. « Mateeyyoo'm kitimina hincookkok gereebbiinsetti ihulas miiqakkam luwwi bee'i ambul te'im geex ihona. Ayyi manchim kitimina hincaa'ookkok gereechchi geex ihulas i illagenne hincaa'ona. Angam ee geex horoorenne issona; eeham Keesammi Dukkaa'n gooc illagenne durona. Aaroon shumo'i ikko'i qeessuwwim ee xiiga kiti'm beyyi midaadduwwanne wixxona. Mateeyyoo'm kitimiinsi di'ira, saassaa'l miq lugum afeebe'e murakka'a fissakko'i sheerimo, godaphphi mu'uta ifiisoo di'ira, lamem murom di'irinnemii afare ifiisu iillaanchi'nnoo'i di'irii shokkiisakka'a iina hincaa'akkam kitimina hincihona. Qeessichchim ee hundam giirinne iina hincoo kiti'm hurbaat issaa kiti'm beyyonne shokkiisona. « ‹Kitimina hincaa'ookkok fellakkichchi ihulas i illagenne hincaa'ona. Angam fellakkichchi horoorenne issona; eeham Keesammi Dukkaa'n gooc illagenne durona. Aaroon shumo'i ikko'i qeessuwwim ee xiiga kiti'm beyyi midaadduwwanne wixxona. Ee hincaa'u kitimiinsi shokkiisakka'a iina hincaa'akkam kitimina godaphphi mu'uta ifiisoo di'ira, godaphphi mu'utanne yoo di'ira hundam, lamem muro, lamem muronnee midaadonnee yoo di'iraa afare ifiisoo illaanchi'nnoo'i diraa hincaa'ona. Qeessichchim ee hundam enji eese liiransoo kitim issaa kiti'm beyyonne shokkiisona; di'ir hundim iina annanni ihaakkoohan ihona. Isra'eeliinsi ayyim di'ira te'im xiiga ixxi heechchi doolli hundannem itoone; oohim heer heerina ki'nnuwwi oos oos afeebe'e hee'oo seera› yihe» yukko. Waa'i odim Muse'ena «Isra'ee'l oosina ‹Ki'nnuwwiinsi ayyim hushamaa baaxiilo baxulas te'im i ijaajiinsi mato la'oo'n gindulas ee'isam Hundiinsi lob qeessichchi minaadab hawwodukkaannisa issoo baaxiilo baxulas ee baaxii'l haafixxi bikkina miiqakkam luwwi bee'i mat labeena iina kitim issaa hincaa'ona. Ee labeenam Keesammi Dukkaa'n gooc illagenne hincaa'ona; labee'n horoorennem anga issaa i illagenne durona. Ee lasage oo doo'llamu qeessichchi ee labee'n xiigiinsi hofqaxam amadaa dukkaana aagona. Ixxim ee xiiganne maxxaara cefukkuuyyi du'm eddechchi miinsanne i illagenne lamar kore wixona. Ee'isam ee xiigiinsi Keesammi Dukkaa'n woronne aduruusa wiriissakkam beyyi lamejji buudduwwanne labona; ihukkaarem gatu xiiga hundam Keesammi Dukkaa'n goocanne kitima shokkiisakka'a hincaa'akkam kiti'm beyyi lugumonne dunona. Baaxii'l haafixxi kitimina hincu labee'nneka di'ira hundam annanni ssona. Oohim godaphphi mu'uta ifiisoo di'ira, godaphphi mu'utanne yoo di'ira, lamem muro, lamem muronnee midaadonnee yoo di'iraa afare ifiisoo illaanchi'nnoo'i di'iraa mateeyyoo'm kitimina hincu labee'nnaannisam hincaa'ona. qeessichchim shokkiisakka'a hincaa'akkam kiti'm beyyonne shokkiisona. Ihukkaarem ee labee'nneka omachcho, maara hundam, horoore, lokko, goodaphphi mu'utaa cumaa wiidda'n beyyiinsi tochchonne gii'lbuchcha uunjakkam muccur beyyonne massaa haqqa wixxaa'aa giirinne shokkiisona. « ‹Lachchoonginne Isra'ee'l minaadab hundim baaxiilo baxulasii oo baaxiilim ixxuwwiinsi daphphaa an ijaajummi ijaajiinsi mato gindimminne ixxuwwa baaxiilaan issulasii oo baaxiil la'amukkisam minaadab baaxii'l haafixxi kitimina ihoo mat labeena eebbona; ee labeenam Keesammi Dukkaa'n illagenne hincaa'llona. Isra'ee'l awwonsaanim ixxuwwi anga ee labee'n horoorenne issitona; ee Keesammi Dukkaa'n illagennem duramona. Oo qeessichchim ee labee'n xiigiinsi hofqaxam amadaa Keesammi Dukkaa'n woro aagona. Ixxim ee xiiganne maxxaara cefukkuuyyi du'm eddechchi miinsanne i illagenne lamar kore wixona. Ee'isam ee xiigiinsi Keesammi Dukkaa'n woronne aduruusa wiriissakkam beyyi buudduwwanne labona; ihukkaarem gatu xiiga hundam Keesammi Dukkaa'n goocanne shokkiisakka'a hincaa'akkam kitima kitimakkam beyyi lugumonne dunona. Ee lasage odim ee labee'nneka di'ira hundam massaa kiti'm beyyonne shokkiisona. Baaxii'l kitimina hincu labeenanne issu ogo'llisam ka labeenannem issona. Ee'isinne qeessichchi minaadaphphek baaxiil haafamoo'isa issookko; baaxiilim haafamookko. Ee lasage labeena wiidda'n beyyiinsi tochchonne fissaa ixxi baaxii'l haafixxi bikkina hincaa'u labeena shokkiisukkisam shokkiisona; oohim minaadaphphek baaxiil haafamoo'isa issoo kitima. « ‹La'oo'n huushanchinne i ijaajiinsi mato gindimminne baaxiilo baxaa hawwodukkok minaadabina awwonsaanchi ihulas baaxiilo baxukkisa la'ukkisam miiqakkam luwwi bee'i fellakkichchi ambula baaxii'l haafitina ihoo kitim issaa hincaa'ona. Ixxeka anga fellakkichchi horoorenne issaa shokkoo kitimina hincoo fooraam diinat duramoo beyyonne i illagenne durona; oo kitimim baaxii'l haafitina ihookko. Qeessichchim ee kiti'm xiiganne maxxaara cefaa shokkiisakka'a hincaa'akkam kitima kitimakkam beyyi soorem lamejji buudduwwannem labona; eehanniinsi gatukkoka odim ee kiti'm beyyi lugumonne dunona. Mateeyyoo'm kitimina hincu diinaxxi di'ira shokkiisu ogo'llisam kannikam di'ira hundam kiti'm beyyonne shokkiisona. Ee'isinne qeessichchi minaadaphphi awwonsaanchika baaxiilo haafissiisookko; ee awwonsaanchi baaxiilim haafamookko. « ‹Baaxiilo baxukkokii an ijaajummi ijaajjeewwiinsi mato la'oo'n gindaa baaxiilaanchi ihukkokii minaadabiinsetti ihulas baaxiilo baxukkisa la'ukkisam miiqakkam luwwi bee'i meentichchi fellakkichcho baxu baaxii'l haafixxi bikkina kitim issaa hincaa'ona. Ixxi angam ee fellakkichchi horoorenne issona; shokkiisakka'a hincaa'akkam kiti'm diinate durakkam beyyonnem baaxii'l haafixxi kitim issaa durona. Qeessichchim ee fellakkichchi xiiganne maxxaara cefukkuuyyi shokkiisakka'a hincaa'akkam kiti'm beyyi soorem lamejjannem yoo buudduwwanne labona. Eehanniinsi gatu xiiga ee kiti'm beyyi lugumonnem dunona. Mateeyyoo'm kitimina hincoo diinaxxi di'ira feeraa issukkisam ka fellakkichchi di'iram feerona; enjim eese liiransoo kitim issaa kiti'm beyyonne shokkiison. Qeessichchi ee manchi baaxiilo ee'isinne haafissiisookko; ee manchi baaxiilim haafamookko. « ‹Oo manchi ixxi baaxii'l haafixxi kitimina hincaa'eena hasukkok gereebbiinsetti ihulas miiqakkam luwwi bee'i meentichchi gereechchi ihona. Ixxi angam ee gereechchi horoorenne issona; shokkiisakka'a hincaa'akkam kiti'm diinate durakkam beyyonnem baaxii'l haafitina kitim issaa durona. Qeessichchim ee gereechchi xiiganne ixxi maxxaara cefukkuuyyi shokkiisakka'a hincaa'akkam kiti'm beyyi soorem lamejjanne yoo buudduwwanne labona. Gatu xiigam ee kiti'm beyyi lugumonnem dunona. Ee lasage mateeyyoo'm kitimina hincu diinaxxi di'ira feeraa issukkisam ee gereechchi di'ira hundam feerona; kiti'm beyyonne iina giirinne hincaa'akkam kiti'mmisam shokkiisona. Qeessichchi ee manchi baaxiilo ee'isinne haafissiisookko; ee manchi baaxiilim haafamookko. « ‹Ayyi manchim moo'ukkoka te'im la'ukkoka xa'mmamaa naqqasimma sabulas ixxena baaxiil ihookko. « ‹Ayyi manchim haashaarammi luwwa oohim mi'n diinaxxeka bayta bii'l moochchikaa biqinne shuroo qooccanchuwwikaa leesha la'oo'n nakkulas eekka la'u ammaniinsi ki'isaa ixxena baaxiil ihookko. « ‹Ayyi manchim manni orachchiinsi daadoo haashaarammi luwwa la'oo'n nakkulas eekka la'u ammaniinsi ki'isaa ixxena baaxiil ihookko. « ‹Ayyi manchim eranem ihukko jor luwwa isseena qoossoo'nnim hide'ulas ookki huushanchi ihukkisa la'u ammaniinsi ki'isaa ixxena baaxiil ihookko. « ‹Ayyi manchim ka keeniinsi mato baaximminne baaxiilaanchi ihulas ee baaxiilo biiraa yihona. Oo manchi baxu baaxii'l haafixxi bikkina meentichchi gereechcho te'im fellakkichcho iina baaxii'l haafixxi kitim issaa hincaa'ona; qeessichchim ee baaxiilo haafissiisookko. « ‹Ayyim ixxi baaxii'l haafixxi bikkina gereechcho te'im fellakkichcho hincaa'eena xanubeelas lam handare'e te'im handare'i wotalla matoo baaxii'l haafixxi kitimina la'mmekaa shokkoo kitimina iina hincaa'ona. Ixxim ee keeno eebaa qeessichchina uwwona; qeessichchim ee keeniinsi matika horoore muroo'nnim gaanje booqaaqaa baaxii'l haafixxi kitimina hincaa'ona. Baaxii'l haafixxi kitimina hincu handarekkichchi xiigiinsi hofqaxam aa'aa kiti'm beyyi midaadduwwanne wixona; gatu xiigam kiti'm beyyi lugumonne dunona; oohim baaxii'l haafixxi kitimo. La'm handarekkichcho odim see'llisinne shokkiisakka'a hincaa'akkam kitim issaa hincaa'ona. Ee'isinne qeessichchi ee manchika baaxiilo haafissiisookko; ee manchi baaxiilim haafamookko. « ‹Ayyi manchim lam handare'e te'im handare'i wotalla hincaa'eena xanubeelas mat kiilo'o ihoo er qama baaxii'l haafixxi kitim issaa hincaa'ona. Oohim baaxii'l haafixxi bikkina hincoo kitim ihu bikkina wee'l zayta te'im aduruusa edoone. Eeham eebaa qeessichchina uwwona; qeessichchim ee qamiinsi mat foocca aa'aa hundim iina hincukkan ihukkisa la'isimminne kiti'm beyyonne shokkiisona. Oohim baaxii'l haafitina ihoo kitima. Qeessichchim ee'isinne ee manchika baaxiilo haafissiisookko; ee manchi baaxiilim haafamookko. Gatu qam hurbaaxxi kiti'm see'llisinne qeessichchan ihona› yihe» yukko. Waa'i Muse'ena «Ayyi manchim hawwodulas iina keesamu luwwam xa'isimminne baaxiilo baxulas miiqakkam luwwi bee'i gereechchi ambula baaxii'l haafixxi kitimina hincaa'ona. Te'im Keesammi Mi'n keennaanchisanne miqona; oohim baaxii'l haafitina ihoo kitima. Ee xa'isu keesammi luwwinne maqire ontiinsi mat suume edaa miqona. Eeham eebaa qeessichchina uwwona; qeessichchim ee gereechcho ee manchi baaxiilina kitim issaa hincaa'ona; ee manchi baaxiilim haafamookko. « ‹Ayyi manchim laa'oo'n i ijaajjuwwiinsi mato gindulas baaxiilaanchi ihookko. Ee bikkina oo manchi ee baaxii'l haafixxi kitimina laboo miiqakkam luwwi bee'i mat gereechchi ambula eebaa qeessichchina uwwona. Eehanni bitim gudaanchi ihimmi hasisookko. Qeessichchim ee manchi baaxii'l haafixxi bikkina ee gereechcho kitim issaa hincaa'ona; ee manchi baaxiilim haafamookko. Oohim oo manchi eese hawwodu hawwojjina haafissiisoo kitima» yukko. Waa'i Muse'ena «Ayyi manchim baaxiilo baxulas, beshichchiinsi yabo te'im liqaayyo aa'u luwwa dabarimma sabaa eese hawwodulas te'im beshichchiinsi bogimminne, te'im qawwiisimminne, te'im bi'u luwwa siidaa moo'ummoyyo yaa qophphanaa hide'imminne, manni baxoo ka baaxiilluwwiinsi matinne hawwodulas ayyi manchim eehido'i hawwojjinne baaxiilaanchi ihulas bogimminne te'im qawwiisimminne massukkoka te'im yabo aa'ukkoka te'im bi'aa siidu luwwa dabarona. Te'im qophphaninne hide'ukkoka dabarona. Hawwojji kitima hincaa'oo ammane massu luwwi hundam ontiinsi mat suume edaa annichchina dabarona. Ee baaxii'l haafitina miiqakkam luwwi bee'i gereechchi ambula te'im Keesammi Mi'n keennaanchisanne qoodamu bito kitim issaa iina hincaa'ona. Eeham eebaa qeessichchina uwwona. Qeessichchim ee'isinne i illagenne haafissiisookko; ee manchi baaxiil hundim haafamookko» yukko. Waa'i Muse'ena «Aaroonaa ixxi ooso ‹Shokkiisakka'a hincaa'akkam kiti'm seer kane. Shokkiisakka'a hincaa'akkam kitim kiti'm beyyi haqqanne uulli soodeebe'e garona; giirim ee kiti'm beyyonne aphphukkuuyyi garona. Qeessichchim talbi fati'l qamisa edde'aahii sure'e lade'aahii shokkiisakka'a hincaa'akkam kitima giir itaa lasage gii'l buchchooma hogaa kiti'm beyyi gadanonne fincona. Ee lasage oo qeessichchi ee eddechcha fissaa mulli eddechcha edde'ona; ee gii'l buchcham iyyaa wiidda'n beyyiinsi haxonne muccur beyyonne fincona. Kiti'm beyyi giir xoo'oo'n hiimoo ballaa hundi ammanem aphphukkuuyyi hee'ona; qeessichchim darina darina haqqa edona; ee haqqi hanennem shokkiisakkam kitima taaphansaa mateeyyoo'm kiti'mmeka di'ira shokkiisona. Kiti'm beyyonne giir hundi ammanem aphphona; hore'em xoo'oone. « ‹Wix hurbaaxxi kitima hincaa'akkam seer kane; Aaroon oos ee kitima kiti'm beyyi illagenne iina hincaa'llona. Ee lasage qeessichchi zaytinne cukkamaakkoo er qamika mat fooccaa wix hurbaaxxi kiti'm beyyonne yoo aduruusaa hundam ki'isaa iina hincaa'ukkisa la'iseena kiti'm beyyonne shokkiisona. Ee kiti'm enjim eese liiransoohan ihookko. Eehanniinsi gatukkoka Aaroonii ixxi oosii ittona; eekkam ursho'i exxubee'i qorosho'o satta'a keesammi beyyonne Keesammi Dukkaa'n kululleetanne yoo wixxixxi beyyonne ittona. Ookki ursho'i bee'em saramona; shokkiisakka'a hincaa'akkam kitimiinsi ixxuwwina sharad ihona uwwamoohanee baaxii'l kiti'mmisaa hawwojji kiti'mmisaa hore'em keesamaakkoohanee. Waaroo doolle hundannem Aaroon shumo'iinsette ihu goon iina hincoo kitimiinsi ixxena qoodamu sharada iteena xanookko. Ixxuwwa nakkookkok hundim keesammi ihookko › yitaa ijaaje» yukko. Waa'i Muse'ena «Aaroon shumo'iinsi qeessichchi doo'llamoo ammane ballina ballina hundi ammanem hincoo hurbaaxxi kitiminne gudaanchi ihu mat kiilo'i er qama iina kitim issaa hincaa'ona; oohim kollii darinne kollii hiiminne kitimina hincihona. Oohim zaytinne danaamisa cukkamaa gala'anne saramona; eeham enji eese liiraansoo hurbaaxxi kitim ihona iiqansaa iina hincaa'ona. Aaroona bikkaa ixxi oosiinsi doo'llamoo qeessichchi eekka gudisona; oohim iina annanni ihaa qoodamaakkoo sharad ihu bikkina mahim gatoobee'isa hundim shokkona. Oo qeessichchi hincaa'oo hurbaaxxi kitim hundim shokkona bagaan maham itimmi hasisooyyo» yukko. Waa'i Muse'ena «Aarooninaa ixxi oosina ‹Baaxii'l haafixxi bikkina hincoo kiti'm seer kane; baaxii'l haafitina kitim ihaa hincoo diinat shokkiisakka'a hincaa'akkam kiti'm diinat duramoo beyyonne i illagenne duramona. Oo kitimim hore'em keesamma. Ee kitima hincaa'oo qeessichchi keesammi beyyonne Keesammi Dukkaa'n kululleetanne yoo wixxixxi beyyonne itona. Maara nakkoo ayyim keesammi ihookko. Ayyi eddechchannem ee diinaxxek xiig afulas keesammi beyyonne aanshakkona. Oo maar saramukkok xaa'l mu'utannetti ihulas kotootakka'a wo'inne aanshakkona; buchchi mu'utannetti ihulasim ee mu'uta iiqakkona. Qeessuwwi moolliinsetti ihu goon hundim ee kitima itona; oo kitim hore'em keesamaakkoohane. Ihukkaarem baaxii'l haafitina ihoo see'llisinne xiigiinsi Keesammi Dukkaa'n keesammi beyyomdu aagaakkoohan ihulas ee maara hundam shokkiisakkona bagaan itimmi hasisooyyo. « ‹Hore'em keesammi ihu bikkina hawwojji bikkina hincoo kiti'm seer kane. Shokkiisakka'a hincaa'akkam kiti'm diinate durakkam beyyonne hawwojji kitimina hincoo diinatim duramona; ee kiti'm xiigim kiti'm beyyi kululleetanne wixamona. Di'ir hundim feeramaa oohim sheeri'mmek, godaphphi mu'uta ifiisookkok, lamem mur, lamem muronnee midaadonnee yoo di'irii afare ifiisoo illaanchi'nnoo di'irii kitimina hiincihona. Qeessichchim shokkiisakka'a iina hincaa'akkam kitim ihona kiti'm beyyonne shokkiisona; oohim hawwojji bikkina hincoo kitima. Qeessuwwi moolliinsi goon hundim ee kiti'mmeka maara ittona; ihukkaarem oo kitim hore'em keesammi ihu bikkina keesamaakkoo beyyonne ittona. « ‹Baaxii'l haafitina hincoo kitiminaa hawwojji haafitina hincoo kitiminaa laminam ihoo mat seer yookko; oohim ee kitimmuwwina hincoo diinaxxi maar kitimmuwwa hincaa'oo qeessichchina uwwamona. Ayyi manchim shokkiisakka'a hincaa'akkam kitimina hincaa'u diinaxxik omachchi kitima hincaa'u qeessichchina uwwamona. Giiranne saramu hurbaaxxi kitim hundim qure'enne te'im mixaadanne sarakko'ok hundimii kitima hincaa'u qeessichchina uwwamona. Ihukkaarem zaytinne cukkammi te'im qaquulli hurbaaxxi kitim hundim Aaroon shumo'i ikko'i qeessuwwina uwwamona; eeham gudaanchonne baxxantona. « ‹Iina mateeyyoo'm kitim hincoo seer kane. « ‹Mat manchi kido'i kitima iina galaxxi kitim issaa hincaa'eena hasulas kitimina hincu diinatinne maqirem wee'l zaytinne cukkamaa saramaakkoo ursho'i bee'i qorosho'o, caraqisakka'a sarakko'oo zayti labamaakkoo ursho'i bee'i qorosho'oo zaytinne cukkakka'a danaam qaminne sarakko'oo qorosho'oo edaa hincaa'ona. Galatina ihoo mateeyyoo'm kitima hincaa'oo ammane ursho'inne saramaakkoo daabbo'o hincaa'ona. Ee kitim hundiinsim mat mato iina annanni kitim issaa hincaa'ona; oohim mateeyoo'm kitimina hincu diinaxxi xiiga kiti'm beyyi midaadonne wixu qeessichchan ihona. Galatina ihoo mateeyyoo'm kiti'm maara ee ballam itimma bagaan ixxeensi mahim garimmi hasisooyyo. « ‹Mat manchi hincaa'oo mateeyyoo'm kitim aagu uga'i wo'mmu bikkina te'im ixxi gaqqi doo'llinne uwwoohan ihulas ee ballam itakkona; eehanniinsi gatukkoka odim la'm dara itakkona. Ihukkaarem ee kiti'm maariinsi gataa saxxi balla afulas hundim giirinne shokkona. Ee mateeyyoo'm kiti'm maariinsi saxxi ballanne ayyim itulas ee kitima an aa'oommoyyo; kitimoomim hincukkaannisa xigamooyyo. Hore'em haashaarammi ihaa xigamookko; eehanniinsi itu manchim baaxiilaanchi ihookko. « ‹Ee maara haashaarammi luwwi mahim nakkulas shokkona bagaan itimmi hasisooyyo. Muccur ihu manchi ee maara itona. Ihukkaarem mat manchi muccur ihoo'n mateeyyoo'm kiti'm maariinsi itulas i minaadabiinsi annanni ihaa bi'ona. Ayyi manchim manniinsi te'im diinatiinsi firoo haashaarammi luwwa te'im haashaarammi luwwa maham nakkaa ka mateeyyoo'm kiti'm maariinsi itulas oo manchi i minaadabiinsi annanni ihaa bi'ona› yihe» yukko. Waa'im Muse'ena «Isra'ee'l minaadabina ‹La'lleka, gereebbikaa fella'ikaa di'ira ittakkotte. Baytika te'im moochchi shu diinaxxeka di'ira mulluwwina awwaaxxehe bagaan ittakkotte. Shokkiisakka'a iina hincaa'akkam kiti'm diinaxxeka di'ira itoo manchi i minaadabiinsi annanni ihaa bi'ona. Isra'ee'l minaadab hannonnem hee'llota'n hee'llam beyyi hundannem cii'anem ihukko mulli fooraam diinaxxeka xiiga ittoone. Ayyi manchim xiiga itulas i minaadabiinsi annanni ihaa bi'ona› yihe» yukko. Waa'i odim Muse'ena «Isra'ee'l minaadabina ‹Ayyi manchim mateeyyoo'm kitima hincaa'oo ammane eehanniinsi baxxansaa iina annanni kitim issaa hincaa'ona. Ixxom shokkoo kitim issaa iina hincaa'ona; ee diinaxxi di'iram eeddiraasinne maqirem wonceesukkuuyyi annanni kitim issaa iina hincaa'ona. Qeessichchim di'irooma kiti'm beyyonne shokkiisona; ihukkaarem eeddiraas Aarooninaa ixxi oosinaa uwwamona. Odim mateeyyoo'm kiti'mmek makki kolli hayyi qeessichchina sharad ihaa uwwamona. Mateeyyoo'm kitimina xiigaa di'iraa hincaa'u Aaroon beetina makki kolli hayyi sharada. Isra'ee'l minaadaphphi mateeyyoo'm kitimiinsi wonciwoncaa'akkam eeddiraasoo makki lokkoo Isra'eeliinsi qeessichchi Aarooninaa ixxi oosinaa hundi ammanem ihoo sharad issaa uwwaammo› yihe» yukko. Oohim Waa'i Aaroonaa ixxi oosoo qeessuwwi issaa doo'llu balla shokkiisakka'a ixxena hincaa'akkam kitimiinsi qeessuwwina annanni issu sharada. Ee balla Waa'i oo baxxanchi qeessuwwina uwwamona Isra'ee'l minaadaba ijaajukko; oohim waaroo doollenne hundannem qeessuwwina sharad ihoo'isina qoodaakko. Shokkiisakka'a hincaa'akkam kiti'mmek, hurbaaxxi kiti'mmek, baaxiilin hincoo kiti'mmek, hawwojji bikkinaa hincoo kiti'mmek, qeessoomanina doo'llanchi kiti'mmekii mateeyyoo'm kiti'mmekii seer eehane. Udma'i uulli Siina'i duunanne Isra'ee'l minaadab kitima hincaa'llona ijaaju balla Waa'i Muse'ena ka ijaajjuwwa uwwukko. Waa'i Muse'ena «Aaroona ixxi goo'n oosinne maqirem, qeessooma'n eddechcha, laphphakkam zayta, baaxii'l haafixxi kitimina hincoo labeena, lam gereebbi ambulluwwaa mat leemaat urshobee'i qorosho'oo amaddaa waare. Ee'isam Isra'ee'l minaadaba hundam Keesammi Dukkaa'n nafaranne wixxaa'e» yukko. Muse'em Waa'i ijaajukkisam issukko; minaadabim Keesammi Dukkaa'n nafaranne wixxukko. Muse'em minaadabina «Ihoo'isina Waa'i ijaaju luwwi kane» yukko. Muse'em Aaroonaa Aaroon oosoo hincaa'aa wo'inne aanshukko. Aarooninam qambiisa eddeesukko; sabbatam ladiisukko; qamisam eddeesukko; eefuudam hanenne edukko; eeham anginne wereeggisakka'a dadakko'oo sabbatinne ladiisukko. Ee eefuudanne biq kiisa gobaa Waa'i doo'lla la'isoo Uriimaa Tumiimaa dissukko. Aaroon horoorennem shaashsha xaaxukko; ee xaacci illagee'n kollinnem Waa'i Muse'e ijaajaa hee'ukkisanne worqinne wereeggisakka'a baxakko'oo adilla'nnaanninnoo'i keesammoo'm mare'e issukko. Ee lasage Muse'e ee zayta Keesammi Dukkaanannee woro yoo luwwannee hundannem labaa keesukko. Kiti'm beyyonnem ee zaytiinsi lamar kore kifukko; ee'isam kiti'm beyyonnee ee beyyonne awwaaxxakkam mu'uttuwwannee hundannem aanshaqqakkam saahinannee saahina dissakkam mu'utannee labaa keesukko. Ee zaytiinsi Aaroon horoorennem dunaa qeessooma'n awwaadina annanni issukko. Ee lasage odim Waa'i ijaajukkisannem Muse'e Aaroonika goo'n ooso hincaa'aa qambiisa eddeesukko. Ixxuwwinam sabbata ladiisukko; horoorennem qoobe'e issukko. Ee lasage Muse'e baaxii'l haafixxi kitimina hincoo labeena eebukko; Aaroonii ixxi oosii ee labee'n horoorenne ixxuwwi anga issito'o. Muse'em ee labeena durukko; ee labee'n xiigiinsi hofqaxam aa'aa maxxaarinne cefukkuuyyi kiti'm beyyi soorem ejjannem yoo buudduwwanne labaa muccussaa keesoukk. Gatu xiigam kiti'm beyyi lugumonne dunukko; ee'isinne kiti'm beyyo Waa'ina annanni issaa muccussukko. Muse'e ee labee'n godaphphi mu'utanne yoo di'ira hundam, afare illaanchisa ifiisoo di'iraa lamem muro di'irinnemii kiti'm beyyonne shokkiisukko. Ee labeena, omachcho, maaraa cumaa Waa'i ixxo ijaajukkisannem wiidda'n beyyiinsi haxonne fissaa shokkiisukko. Ee lasage odim Muse'e shokkiisakka'a hincaa'akkam kitimina ihoo gereechchi ambula eebukko; Aaroonii ixxi oosii ee ambu'l horoorenne ixxuwwi anga issito'o. Muse'em ee ambula duraa xiigooma kiti'm beyyi kululleetanne wixukko. Ee ambu'lleka maara qaamafeetinne annanni issaa murukko; horoore, ee qaamafeettuwwaa di'iraa shokkiisukko. Godophphi mu'utaa lokkuwwaa wo'inne aanshaa Waa'i ixxo ijaajukkisannem ee ambu'l maara hundoomam shokkiisakka'a hincaa'akkam kitim issaa kiti'm beyyonne shokkiisukko; oohim Waa'a liiraansoo enji hee'ukko. Ee lasage Muse'e qeessoomaninne doo'llanchi bikkina hincoo la'm gereechchi ambula hincaa'ukko; Aaroonii ixxi oosii ee ambu'l horoorenne ixxuwwi anga issito'o. Muse'e ee ambulam durukko; xiigiinsim hoffokam massaa Aaroon makki kolli macci ludonnee makki kolli angaannonnee lokkaannonnee lob maxxaalluwwannee labukko. Ee lasage Aaroon ooso ixxi illagenne hincaa'aa ixxuwwi makki kolli macci ludonnee makki kolli angaannonnee lokkaannonnee lob maxxaalluwwannee labukko. Gatu xiigam kiti'm beyyi soorem midaadonnem wixukko. Di'ira, sheerimo, godaphphi mu'uta ifiisoo di'ira hundam, afare ifiisoo illaanchi'nno'i di'ira, lamem muro di'irinnemii makki kolli gubeedoo massukko. Waa'ina annanni ihaakkoo qorosho'i yoo leemaatiinsi mat qorosho'om massukko. Ee'isam zaytinne cukkakko'oo mat qorosho'oo mat caraq qorosho'oo massaa ee di'i'llaannonnee gubeexxi hanennee dissukko. Muse'e ka hundam massaa Aaroonaannonnee ixxi oosaannonnee anganne amadiisukko; ixxuwwim Waa'ina annanni ihaakkoo kitim issita'a wonci woncaa'llo'o. Ee lasage Muse'e eekka ixxuwwi angiinsi massukko; qeessoomaninne doo'llanchi bikkina kitim ihona shokkiisakka'a hincaa'akkam kitima kitimakkam beyyonne shokkiisukko. Eehanni enjim Waa'a liiransoo kitim hee'ukko. Ee lasage Muse'e eeddiraaso Waa'ina annanni kitim issaa wonciwoncaa'ukko; qeessoomaninne doo'llanchi bikkina hincoo ambuliinsi Muse'ek sharad eehan hee'ukko. Muse'e laphphakkam zaytiinsii kiti'm beyyonne yoo xiigiinsii hoffokam massaa Aaroonanne, ixxi oosonnee ixxuwwi eddechchannee hundannem wixukko. Ee'isinne Muse'e ixxuwwaa ixxuwwi eddechchaa annanni issaa Waa'ina keesukko. Muse'e Aarooninaa ixxi oosinaa «Maara Keesammi Dukkaa'n goocanne sallehe. Eeham Waa'i ‹Aaroonii ixxi oosii ittona› yaa eese ijaajukkisanne leemaatanne yoo keesammi qoroshsho'inne ittehe. Maariinsim ihukko qorosho'iinsi gatu luwwi hee'ulas giirinne shokkiissehe. Qeessuwwi ihimmi seer beeddeebe'e lamar balla massoo bikkina oo seer beeddoo lama'l balli afeebe'e Keesammi Dukkaa'n goociinsi mattakkotte. Kaballa ihu ku seer ki'nnuwwik baaxiil haafamona Waa'i ijaajaakkoohane. Ee bikkina Waa'i ijaaju ijaajo hundam wonshitakku'uuyya lamar balla hundam himoo ballaa Dukkaa'n goocanne afuullehe. Eehamdu issitakkobeelas letakkamo; ookki Waa'i eese ijaaju seera» yukko. Ee bikkina Aaroonii ixxi oosii Waa'i Muse'enne ihaa ijaaju ijaajo hundam wonshito'o. Sadeenti ballanne Muse'e Aaroona, Aaroon oosoo Isra'ee'l awwonsaanoo weeshukko. Aarooninam «Miiqakkam luwwi mahim bee'i mat labeena baaxii'l haafixxi kitimina, mat gereechchi ambula odim shokkiisakka'a hincaa'akkam kitimina ihona Waa'ina hincaa'e. Ee lasage Isra'ee'l minaadab baaxii'l haafixxi kitimina mat fella'ichchi ambula, shokkiisakka'a hincaa'akkam kitiminam miiqakkam luwwi mahim bee'i mat hiinchi wee'ichchoo mat hiinchi gereechchi ambulaa hincaa'llona kure. Ee'isam mat labeenaa mat gereechchi ambulaa mateeyyoo'm kitimina eebbona; ee keenom zaytinne cukkamaakkoo hurbaaxxi kitiminne maqirem Waa'ina kitim issita'a hincaa'llona. Waa'i kaballa ixxuwwina caakkaa moo'amoo bikkina ee hundam issitona» yukko. Ixxuwwim Muse'e ijaaju luwwi hundam Keesammi Dukkaa'n illagenne hincaa'llo'o; minaadab hundim hincaa Waa'i illagenne uullukko. Muse'em ixxuwwina «Waa'ik lombi ki'nnuwwina caakkaa moo'amoo bikkina ka hundam issitakkona ixxi ki'nnuwwa ijaajaakko» yukko. Ee lasage Muse'e Aaroonina «Kiti'm beyyonne hincitaa ki baaxiilii minaadaphphi baaxiilii haafamoo'isina hincoo baaxii'l haafixxi kitimaa shokkiisakka'a hincaa'akkam kitimaa hincaa'e. Waa'i ijaajukkisannem ka hundem kitimam hincaa'llaa minaadaphphi baaxiilo haafissiise» yukko. Aaroon kiti'm beyyonne hincaa ixxi gaqqi baaxii'l haafixxi kitimina hincu labeena durukko. Ixxi oosim eehanni xiiga ixxi beyyo eebbo'o; ixxim ee xiiganne maxxaara cefukkuuyyi kiti'm beyyi buudduwwanne labukko; gatu xiigam kiti'm beyyi lugumonne dunukko. Ee lasage ee baaxii'l haafixxi kiti'mmeka di'ira, lamem muroo afare ifiisoo illaanci'nnoo di'iraa Waa'i Muse'e ijaajukkisannem kiti'm beyyonne shokkiisukko. Ihukkaarem maaraa omachchoo wiidda'n beyyiinsi haxonne fissaa shokkiisukko. Aaroon odim shokkiisakka'a hincaa'akkam kitimina hincu diinate durukko; ixxi oosim eehanni xiiga ixxi beyyo eebbo'o. Ixxim ee xiiga kiti'm beyyi soorem kululleetannem wixukko. Ee kiti'm maara qaamafeetinne muransita'a horoorinne maqirem ixxi beyyo eebbo'o. Aaroonim ee hundam kiti'm beyyonne shokkiisukko. Ee lasage gadaphphi mu'uta lokkinne maqirem wo'inne aanshaa kiti'm beyyonne yoo shokkoo kiti'm hanenne issaa shokkiisukko. Ee lasage minaadaphphi kitima hincaa'ukko; minaadaphphi baaxii'l haafitina hincu fellakkichchi ambula durukko. Eeham ixxi baaxii'l haafitina hincaa'u kiti'mmisam hincaa'ukko. Shokkiisakka'a hincaa'akkam kitimina hincu diinatem see'llisanne kitimukko. Hurbaatiinsim kitima eebaa mat foocci qama massaa kiti'm beyyonne shokkiisukko. Oohim dar dara shokkiisakka'a hincaa'akkam kitimiinsi mullane. Aaroon labeenaa gereechchi ambulaa duraa minaadaphphi bikkina mateeyyoo'm kitim issaa hincaa'ukko; ixxi oosim xiiga eebbo'o; ixxim ee xiiga aa'aa kiti'm beyyi soorem midaadonnem wixukko. Ee labee'nnekaa gereechchi ambu'llekaa di'ira hundam oohim sheerimo, godaphphi mu'uta ifiisoo dira, lamem muroo illaanchi'nno'i afare ifiisoo di'iraa hincaa'llo'o. Eeham eeddiraas hanenne dissito'o; Aaroonim ee di'ira kiti'm beyyonne shokkiisukko. Ee labee'nnekaa gereechchi ambu'llekaa eeddiraasoo makki kolli gubeedoo Muse'e ijaajukkisanne Waa'ina annanni kitim issaa wonciwoncaa'ukko. Aaroon baaxii'l haafixxi kitima, shokkiisakka'a hincaa'akkam kitimaa mateeyyoo'm kitimaa hundam kitimukko. Ixxi angam biddiqaa'aa minaadaba maasse'aa lasage dillukko. Ee lasage Muse'ee Aaroonii Keesammi Dukkaa'n woronne aaggo'o; ee dukkaaniinsi fitta'ahim minaadaba maasse'llo'o. Waa'ikim lombi minaadab hundinam caakkukko. Waa'i dangonnem ixxi giira asse'ukko; oo giirim kiti'm beyyonne yoo kitimaa di'iraa hundam itukko. Minaadab hundim eekka moo'aa ililukko; uullannem aad heeshaa otossukko. Aaroon oosiinsi Naadaabii Abihii annannichchim ixxuwwi mude'uwwa massita'a giira issito'o; ee giiranne aduruusa wiiriissita'a Waa'ina hincaa'llo'o. Eehido'i giira hincaa'llona Waa'i ixxuwwa ijaajubee'i bikkina oo giir keesamubee'an hee'ukko. Ee bikkina Waa'i asse'u giir ixxuwwa itukko; Waa'i illagennem leto'o. Muse'em Aaroonina «Waa'i ‹I illagenne hincaa awwaadoo hundim iikka keesammooma lonsona; anim i minaadaphphi illagenne lomba siidoommo› yaa wocu ammane qoxxisaa kurukkok kane» yukko. Aaroonim matem dabachcham uwwoo'n cawwaa urukko. Muse'e Aaroonina annabbaayyi ihu Uzi'eel ooso Misaa'eelaa Eelxaafaanaa weeshaa «Waattakka'a ka ki'nnuwwi abbaayyuwwika leesha Keesammi Dukkaa'n beyyiinsi ki'issakka'a wiidda'n beyyiinsi haxonne fissehe» yukko. Ixxuwwim waatta'a Muse'e ijaajukkisannem ee leesha qeessooma'n eddechchinnem wiidda'n beyyiinsi haxonne fissito'o. Ee lasage Muse'e Aarooninaa Aaroon oosina Ali'aazarinaa Itaamaarinaa «Ki'nnuwwika horoore hogoossitakkotte; eddechcham dereettakkotte; eekka issitakkolas letakkamo. Waa'im ixxi minaadabanne quunqa dilliisookko. Ihukkaarem ki'nnuwwina abbaayyuwwi ikko'i Isra'ee'l minaadab Waa'i asse'u giirinne leto'i keenina wi'lliteena xantamo. Waa'ik laphphakkam zayti ki'nnuwwanne yoo bikkina Keesammi Dukkaaniinsi fittakkotte; eebeelas letakkamo» yukko. Ixxuwwim Muse'e ijaajukkisanne ikko'o. Waa'i Aaroonina «Atii ki oosii letakkambee'isa woyi'n diqaasa te'im dimbisoo mulli agga aggakka'a Keesammi Dukkaana aaggakkambee'isa ege'llehe. Oohim ki'nnuwwi oos oos afeebe'e heer heerina ihoo seera. Ki'nnuwwi keesammaa keesamubee'ekaa, haashaarammaa haashaaramubee'ekaa annanni issitakka'a la'immi hasisookko. An Muse'enne ihaa uwwummi seera hundam Isra'ee'l minaadabina losissehe» yukko. Muse'e Aarooninaa lehiinsi gatto'i lamem oosina Ali'aazarinaa Itaamaarinaa «Waa'ina giirinne hincu hurbaaxxi kitimiinsi gatukkoka massitakka'a qorosho'o sallehe; oohim hore'em keesammi ihu bikkina kiti'm beyyi gadanonne ittehe. Waa'ina giirinne hincoo kitimiinsi kiinaa ki oosinaa uwwamu sharad ihu bikkina keesammi beyyonne ittehe. Waa'i ee'isa ijaajaakko. Ihukkaarem wonciwoncaa'imminne Waa'ina hincaa lasage qeessuwwina sharad ihu gubeedoo eeddiraasoo atii ki abaroosii ki landam eddaa keesammi beyyonne ittehe. Oohim Isra'ee'l minaadab mateeyyoo'm kitimina hincaa'llam kitim hundiinsim sharad ihaa kiinaa ki oosinaa uwwamaakkoohane. Minaadab di'ira Waa'ina kitim issita'a hincaa'llam ammane ee gubeedoo eeddiraasoo eebbona; oohim Waa'i ijaajukkisanne kiinaa ki oosinaa heer heerina sharad ihaa uwwamaakkoohane» yukko. Muse'e baaxii'l haafixxi kitimina hincaa hee'u fellakkichchi bikkina qoxxisaa xa'mmaa shokkukkisa la'ukko. Muse'em Aaroon oosonne Ali'aazarannee Itaamaarannee lobakata quuqukko. Ixxuwwinam «Baaxii'l haafixxi bikkina hincu kitima keesammi beyyonne mahina ittakko'oyyo? Oo kitim hore'em keesamaakkoohane. Ookki minaadaphpheka baaxiilo haafissiissakkona Waa'i ki'nnuwwina uwwaakkoohane. Ee fellakkichchik xiig Keesammi Dukkaa'n woro aagubee'i bikkina an ki'nnuwwa ijaajummisanne ee kitima keesammi beyyonne itimmi hasisam hee'ukko» yukko. Aaroonim Muse'ena «Baaxii'l haafitina hincu kitima kaballa itaammoohan ihuta'n ookki Waa'a liiransam hee'ukkonnihe? Oono'o, minaadab kaballa baaxii'l haafitina hincoo kitimaa shokkiisakka'a hincaa'akkam kitimaa Waa'i illagenne eebaakko. Ihukkaarem oono'o, kido'i luwwi eesenne afaakko» yaa dabarukko. Muse'em eekka macceesaa ee dabachchanne liiramukko. Waa'i Muse'enaa Aarooninaa «Isra'ee'l oosina ‹Uullanne hee'oo fooraam diinatiinsi kanniinsi woroon yoo keeno ittehe. Oohim shuku'l diqammaa alle'oo keenoo. « ‹Alle'oohane ihaa shuku'l diqamubee'eka te'im shuku'l diqamaakkoohan ihaa alle'oobee'eka ittakkotte. Gaameelakkichchi alle'oohane; ihukkaarem shuku'l diqamubee'i bikkina haashaaramma. Wexeexichchi alle'oohane; ihukkaarem shuku'l diqamubee'i bikkina haashaaramma. Shumagichchi alle'oohane; ihukkaarem shuku'l diqamubee'i bikkina haashaaramma. Bonkekkichchi shuku'lla diqamma; ihukkaarem alle'oobee'i bikkina haashaaramma. Haashaarammi ihu bikkina ka kee'nneka maara ittakkotte. Leeshoomam nakkitakkotte. « ‹Dambalaqquwwannee daajjuwwannee hee'oo keeniinsi ladii gilico'ii yoo keeno hundam ittehe. Ihukkaarem wo'i woronne hee'oo ladii gilco'ii bee'i keeno hundam ittakkotte. Eehido'i qooccanchuwwi haashaarammi ihu bikkina maara ittakkotte; leeshoomam nakkitakkotte. Ladii gilco'ii bee'i wo'i woro'l qooccanchi hundim haashaaramma. « ‹Iima'n cii'iinsi kanniinsi woroon yoo keeno shigigi'llehe bagaan ittakkotte. Oohim hishshammachcho, goolluunsichcho, oosame, sile'e, cingiraalla, annanni annanni qooraanta, guchchekkichcho, qurxumme'e itoo sile'e laboo ammachcho, annanni annanni sile'e, mooqqaqqichcho, hummaantichcho, laco'o, hagar digib shaashooqqi ammachcho, lokko qeeraa'l wo'agaagaancho, qurxumme'e itoo qeeraa'l ammachcho, goolluunsichcho laboo ammachcho, shimala yakkam ammachcho, gaanjo'o, qowqoweesichchoo garashshamee. « ‹Lad hee'ukkuuyyi soor lokkinne maroo fooraam qooccanchi hundim haashaaramma. Ihukkaarem lad hee'ukkuuyyi soor lokkinne maroo keeniinsi uullanne xopheena xanoo gurubbi yoo keeniinsi kanniinsi woroon yoo keeno ittehe. Oohim qawwaawwa, kochcha'nnaa annanni annanni hoffi kochcha'nnaa. Ihukkaarem lad hee'ukkuuyyi soor lokkinne maroo qooccanchi hundim haashaaramma. « ‹Kanniinsi woroon yoo diinaxxi mashka'inne haashaarantakkamo. Ee kee'nneka leesha nakkoo ayyim uulli hiimeebe'e haashaaramma. Ee kee'nneka leesha ki'isoo ayyim eddechcha aanshaqqona; uulli hiimeebe'em haashaaramma. « ‹Ihukkaarem shuku'l hee'aa diqamubee'ekii alle'oobee'ekii ki'nnuwwina haashaaramma; ki'nnuwwiinsi ee kee'nneka leesha nakkoo ayyim haashaaramma. Soor lokki hee'aa oobbinne maroo keen hundim ki'nnuwwina haashaaramma; ee kee'nneka leesha nakkoo ayyim uulli hiimeebe'e haashaaramma. Ee kee'n leesha ki'isoo ayyim ixxi eddechcha aanshaqqona; uulli hiimeebe'em haashaaramma. Oo keen ki'nnuwwina haashaaramma. « ‹Uullanne mikmikoo qooccanchuwwiinsi kanniinsi woroon yoo keen ki'nnuwwina haashaaramma. Oo keenim fuuxe'e, dabayya, maanxoganna, annanni annanni qoce'e, naachcha, gabalo'o, arajjeenaa hungubbaa. Uullanne mikmikoo keeniinsi ku keen ki'nnuwwina haashaaramma. Ka keeno te'im ka keeniinsi lehukkoka nakkoo ayyim uulli hiimeebe'e haashaaramma. Oo keen lehaa uboo mah luwwim haashaaramma. Oohim haqqinne, carqinne, omachchinne te'im oddinne baxamu mu'utam ihulas wo'onne cefamona. Uulli hiimeebe'em haashaarammi ihaa lasage muccur ihookko. Ka keeniinsi mat lehaa ayyi buchchi mu'uxxi woronnem ubulas ee mu'utanne yoo luwwi hundim haashaarammi ihoo bikkina ee mu'uta iiqqehe. Ee mu'uxxi wo'iinsi itakkam hurbaatanne afulas oo hurbaat haashaaramma. Ee mu'utanne hee'oo agakkam luwwi hundim haashaaramma. Oo keen lehaa uboo luwwi hundim haashaaramma. Xuf yoohanem ihukko xuf bee'i midachchi iiqamona. Oo keen ki'nnuwwina haashaaramma. Ka kee'nnek leesh nakku ayyi luwwim haashaaramma; ihukkaarem wo'i bu'i te'im wo'i yoo delbi haashaaramooyyo. Ee'isam zeretta nakkulas oo zeretti muccura. Ihukkaarem zerettanne wo'i dunamaa lasage ee kee'n bayit nakkulas oo zeretti ki'nnuwwina haashaaramma. « ‹Maara ittakkam diinatiinsittem ihulas bayitukkoka nakkoo ayyim hiim afeebe'e haashaaramma. Ayyim ee bayitiinsi itulas ixxeka eddechcha aanshaqqona; uulli hiimeebe'em haashaaramona. Ee kee'n bayita ki'isookkokim ixxeka eddechcha aanshaqqona; uulli hiimeebe'em haashaaramma. « ‹Uullanne biqinne shurukkuuyyi maroo qooccanchi hundim haashaarammi ihu bikkina ittakkotte. Biqinne shuroo keen, soor lokkinne maroo keen te'im lobakat lokki yoo qooccanchi hundim haashaarammi ihu bikkina ittakkotte. Ka keeniinsi maham itimminne ki'nnuwwi gaga haashaassitakkotte. An ki'nnuwwina Moollanni Waa'a. An keesammi ihummi bikkina ki'nnuwwi gaga annanni issehe; keesammuwwam ikkehe; biqinne shurukkuuyyi mikmikoo qooccanchuwwa itimminne ki'nnuwwi gaga haashaassitakkotte. An ki'nnuwwina Moollanni iheena Gibxiinsi ki'nnuwwa awwonsaa fissummi Waa'i anette. An keesammi ihummi bikkina ki'nnuwwim keesammuwwi ikkehe. « ‹Fooraam diinatinaa cii'inaa, wo'onne hee'oohanninaa uullanne mikmikoo qooccanchinaa hundinam ihoo seer kane. Muccurannee muccur ihubee'aannonnee oohim itakkamokaa itakkambee'i diinatee qoossitakka'a annanni issitakka'a laqqehe› yi'llehe» yukko. Waa'i Muse'ena «Isra'ee'l minaadabina ‹Mat meentichcho lam foorette ikka'a goonchi beeto qattolas is xur waaroo amma'nnisam lamar balli afeebe'e haashaarammatte. Oo ciilim sadeenti ballanne ballachchanchi hasisookko. Ee'isam oo meentichcho xiig uullaa muccuttam sadii sas ballii afeebe'e keesammi luwwa maham nakkimmi hasisooyyo; Keesammi Dukkaanannem aaggoone. « ‹Ihukkaarem landichcho qattolas is xur waaroo amma'nnisam tommii soor balli afeebe'e haashaarammatte; xiigiinsi muccuttam lohayyii loh ballii afeebe'e egettona. « ‹Ee meentichchok muccurimmi amman beeddaa lasage ise qatto'i beet bikkinam ihukko landichchi bikkina shokkiisakka'a hincaa'akkam kitimina mat hiinchi gereechchi ambulaa baaxii'l haafixxi kitimina odim handarekkichcho te'im handarekkichchi geexaa Keesammi Dukkaa'n goocanne eebba'a eehenne awwaadoo qeessichchina eebba'a uwwitona. Qeessichchim eekka iina hincaa'ookko; haafissiisookkome. Isem xiiqqi dunanchi haashaaranchiinsi muccuttamo; ookki gooncho te'im landichcho qattam meentichchona seera. «Oo meentichcho gereechchi ambula eebbeena xantambeelas lam handare'e te'im lam handare'i geexa eebba'a matoo shokkiisakka'a hincaa'akkam kitimina la'mmekaa baaxii'l haafixxi kitimina hincaa'llona. Ee'isinne qeessichchi isena haafissiisookko; isem muccuttamo› yitaa kure» yukko. Waa'i Muse'enaa Aarooninaa «Ayyi manchonnem dashshi te'im jenje'n te'im bacaro'i firaa baddisoo jabbi ihulas qeessichchi Aaroon beyyo te'im qeessuwwi ikko'i ixxi oosiinsi mat beyyo massakkona. Qeessichchim ee jabbo qoossaa moo'ona; eehannikim oddi qadaallaa oo beyyi cebbulas ookki shishira. Qeessichchim oo manchi haashaaramukkisa la'isona. Ihukkaarem oo jabbi orachchonne qadaallaa kululleet cebbubeelasii oddi qaadaallubeelasii qeessichchi ee mancho lamar balli afeebe'e annanni ihaa hee'oo'isa issona. Qeessichchi odim lama'l ballanne qoossaa moo'ona; oo jabbi eraa'llisam ihaa haraaroo'n yoolas odim lamar ballina annanni ihaa hee'oo'isa issona. Odim qeessichchi lama'l ballanne qoossaa moo'ona; oo jabbi haraarimmi bikkenne quubaa moo'amulas ookki qosha bagaan oo manchi muccur ihukkisa la'isona. Oo manchim ixxi muccuroo'm bikkina eddechcha aanshaqqona. Ihukkaarem qeessichchi moo'aa muccur ihukkisa la'isaa lasage oo jabbi haraaraa moo'amulas oo manchi odim qeessichchi illagenne hincihona. Qeessichchim qoossaa moo'ona; oo jabbi illagee'nnaanniinsi exxaakkoohan ihulas ookki shishir ihu bikkina oo manchi haashaarammi ihukkisa la'isona. «Ayyi manchom shishir amadulas qeessichchi beyyo eebakkona. Qeessichchim ee mancho qoossaa moo'aa ee manchonne odda qadaallisoo qadaalli dashshi hee'ulasii ee dashshannem kashar maar moo'amulasii ookki annaakkoo shishir ihu bikkina oo manchi haashaaramukkisa qeessichchi la'isona. Ixxi haashaaramukkis caakkaa la'amu bikkina annanni ihaa mulli hee'oo'isa issimmi hasisooyyo. Oo jabbi lokki xuranqiinsi horoo'l saraat afeebe'e itaakkoohan ihukkisa qeessichchi qoossaa moo'ona. Oo jabbi ee manchi orachchi hundannem afaa orachcho qadaallisaakkoohan ihulas oo manchi muccur ihukkisa qeessichchi la'isona. Ihukkaarem dashshanne kashar maar moo'amulas oo manchi haashaarammi ihookko. Qeessichchi odim qoossaa moo'aa oo beyyi maar ihaa kasharaakkoohan ihulas oo manchi haashaaramukkisa la'isona. Kashar maar ihoo'isa issookkok shishir ihu bikkina oo manchi haashaaramma. Ihukkaarem oo beyyi daba'llaa qadaallulas qeessichchi beyyo daba'llaa marona. Qeessichchi odim qoossaa moo'aa omar qadaallaakkoohan ihulas oo manchi muccur ihukkisa la'isona. «Mat manchi orachchonne dashshi fayye'aakkoo beyyi hee'aa lasage odim ee beyyonne qadaallaakkoo dashshi te'im kasharaakkoo bacaro'i firulas qeessichchi beyyo maraa moo'amona. Qeessichchim qoossaa moo'ona; oo jabbi ee beyyo cebbisaa odda qadaallisaakkoohan ihulas ookki dashshinne asheeraakkoo shishir ihu bikkina oo manchi haashaaramukkisa la'isona. Ihukkaarem oddi qadaallubee'isa, beyyi cebbubee'isaa fayye'oolli ihukkisaa qeessichchi moo'ulas oo manchi lamar ballina annanni ihaa hee'oo'isa issona. Oo jabbi edukkuuyyi marulas ookki shishir ihu bikkina oo manchi haashaaramukkisa qeessichchi la'isona. Ihukkaarem oo bacaro'i eraa'llisam ihaa haraaroo'n yoolas ookki oma'l qoonca bagaan mulluwwi ihubee'i bikkina oo manchi muccur ihukkisa qeessichchi la'isona. «Giir shokkiisaakkoo mat manchi orachchik qoonci abballulas te'im baar kashar ihulas eekka qeessichchi qoossaa moo'ona. Ee qoonci kululleetanne yoo oddim qadaallulasii oo beyyim mulli beyyiinsi cebbulasii ookki gii'l shokki mashka'inne orachchonne firaakkoo shishir; ee bikkina oo manchi haashaaramaakkoohan ihukkisa qeessichchi la'isona. Ookki shishira. Ihukkaarem oddi qadaallubee'isa, beyyi cebbubee'isaa fayye'oolli ihukkisaa qeessichchi moo'ulas oo manchi lamar ballina annanni ihaa hee'oo'isa issona. Lama'l ballanne qeessichchi edaa moo'ona; jabboom illagee'nnaanniinsi exxaakkoohan ihukkisa moo'ulas ookki shishir ihu bikkina oo manchi haashaaramukkisa la'isona. Ihukkaarem oo bacaro'i eraa'llisam ihaa haraaroo'n yoolasii fayye'ukkuuyyi marulasii ookki gii'l shokki mashka'inne firu qoonciinsi bagaan mulluwwayyo. Ee bikkina oo manchi muccur ihukkisa qeessichchi la'isona. «Mat manchaannonne te'im meentichchaannonne horoorenne te'im eergaxanne omar hee'ulas qeessichchi ee omara qoossaa moo'ona; oo beyyi mulli beyyiinsii cebbaa ee beyyi oddim baaraa wiculas ookki horoorenne te'im eergaxanne firoo boronsha te'im shishir ihu bikkina oo manchi haashaaramukkisa qeessichchi la'isona. Ihukkaarem oo beyyi mulli beyyiinsi cebbubee'isaa oddi heemachchubee'isaa qeessichchi qoossaa moo'aa oo manchi lamar balli afeebe'e annanni ihaa hee'oo'isa issona. Lama'l ballina qeessichchi odim ee boronsha moo'ona; oo beyyi illagee'nnaanniinsi exxubeelas, oddi baarubeelasii mulli beyyiinsi lophphaa cebbubeelasii oo manchi omaru beyyo nakkoo'n kululleetanne yoo oddooma hogoossona. Qeessichchi odim lamar balli afeebe'e oo manchi annanni ihaa hee'oo'isa issona. Odim qeessichchi lama'l ballanne ee omara qoossaa moo'ona; boronshi illagee'nnaanniinsi exxubeelasii oo beyyi mulli beyyiinsi lophphaa cebbubeelasii oo manchi muccur ihukkisa qeessichchi la'isona; ixxi eddechcham aanshaqqaa muccur ihona. Ihukkaarem ixxi muccur ihukkis la'amaa lasage oo boronshi illagee'nnaanniinsi exxulas qeessichchi odim moo'ona. Boronshi illagee'nnaanniinsi exxaakkoohan ihulas oo manchi haashaaramaakkoo bikkina baar oddi yoo'isaa bee'isaa moo'immi hasisooyyo. Ihukkaarem qeessichchi sawwixxisanne omar illagee'nnaanniinsi edubeelasii fayya'i heemachchi oddi mutulasii oo omar fayye'aakko. Oo manchim muccuraakko; muccur ihukkisam qeessichchi la'isona. «Mat manchonne te'im meentichchonne qadaalli bacaro'i hee'ulas qeessichchi qoossaa moo'ona; oo bacaro'i ajaar ihulas ookki hanenne firaakkoo hawwodoobee'i jenje'n ihu bikkina oo manchi muccura. Mat manchik sammi murugulas ookki booyyinna bagaan oo manchi muccura. Illaginne te'im afarinne murugulasim ookki booyyinna bagaan oo manchi muccura. Ihukkaarem sammaannonne te'im illaqqi booyyinnanne baar kashar omar hee'ulas ookki shishira. Qeessichchim eekka qoossaa moo'aa sammaannonne te'im illaqqi booyyinnanne dashshukkok shishira loboo baar kashare omar ihulas ee mancho shishir amadu bikkina haashaaramaakko. Ixxi horoo'l oma'l mashka'inne haashaaramukkisa qeessichchi la'isona. «Shishir amadu manchi dereerammi eddechcha edde'ona; ixxi horoorem tiroone. Ixxi suumennem eddechcha ifiisona; ee lasage ‹An haashaaramma! Haashaaramma!› yukkuuyyi laarona. Oo jabbi ixxonne yoo qax ammanenne oo manchi haashaaramma; mulli manniinsi annanni ihaa wiidda'n beyyiinsi haxonne mullam hee'ona. «Jabbi gereebbi oddinne te'im talbi fatirinne baxamaakkoo eddechchanne, eddechchi fatiranne te'im eddechcha dadakkam mu'utanne, talbi fatiranne te'im gereebbi oddanne, omachchonne te'im omachchinne baxamu ayyi luwwannem moo'amaa hagar buylab te'im kashar ihulas ookki daba'llamoo jabbi ihu bikkina ee eddechcha qeessichchi moo'ona. Qeessichchi qoossaa moo'aa lasage oo jabbi moo'amu luwwi hundam lamar balli afeebe'e annanni issona. Qeessichchi odim lama'l ballanne moo'aa jabbi illagee'nnaanniinsi exxaakkoohan ihulas ookki shishira; oo luwwim haashaaramma. Eekka qeessichchi giirinne shokkiisona; mashka'oomim ookki baasukkuuyyi maroo shishir ihu bikkina giirinne bi'immi hasisookko. «Ihukkaarem qeessichchi ee jabbo qoossaa moo'oohaare illagee'nnaanniinsi exxubeelas oo jabbi yoo luwwi wo'inne aanshakkona ijaajona; lamar balli afeebe'e annanni issaa dissona. Ee lasage odim qeessichchi qoossaa moo'ona; oo jabbi illagee'nnaanniinsi exxubeeta'nnim hagar daba'llubeelas haashaaramma. Haninnem ihukko worinne jabbi moo'amoo eddechchi hundim giirinne shokkona. Ihukkaarem oo eddechchi te'im mu'ut wo'inne aanshamaa lasage qeessichchi odim qoossaa moo'oohaare oo jabbi illageen yoo'isiinsi fatakaakkoolas mare'i yoo qax beyyi xale'e omachchaanniinsi te'im carqi eddechchiinsi dereeraa hoorona. Ihukkaarem oo jabbi odim daba'llaa moo'amulas illagee'nnisiinsi exxoolli ihu bikkina eehanni annichchi shokkiisona. Jabbu luwwa aanshaa lasage oo jabbi fatakkulas la'mmaaggem aanshona; ee lasage muccur ihookko» yukko. Gereebbi oddinne te'im talbi fatirinne te'im omachchinne baxamu eddechchi jabbulas haashaaramukkisaa haashaaramubee'isaa la'akkam seer kane. Waa'i Muse'ena «Mat manchi shishiriinsi fayye'aa lasage ihimmi hasisoo muccuroo'm seer kanniinsi woroon yoohane. Oo manchi muccur ihukkis kuramoo balla qeessichchi beyyo hincihona. Qeessichchim ee mancho wiidda'n beyyiinsi haxonne fissaa qoossaa moo'ona; manchoom jabbiinsi fayye'aakkoolas oo manchi muccur cii'ika lamo, digiphphi haqqa, muulli kashar fatiraa hiisoophphaa eebona qeessichchi ijaajona. Ee lasage muccur bu'i wo'i yoo loqooqo'i buchchi mu'utanne ee cii'iinsi mat duramoo'isina qeessichchi ijaajona. Digiphphi haqqi buyya, muulli kashar fatira, hiisoophphaa duramoo'n gatu cii'ichchoo ee duramu cii'ichchi xiiganne qeessichchi cefona. Shishiriinsi muccuroo manchonne ee cii'ichchi xiiga qeessichchi lamar kore wixona; ee lasage oo manchi muccurukkisa la'isona. Fooraam la'm cii'ichchim bararaa marona fatakihona. Oo muccuru manchi ixxi eddechcha aanshona; ixxi horoore hundam hogoossona; orachchom aanshaqqona. Ee lasage muccur ihaa wiidda'n beyyo daba'llona; ihukkaarem lamar balli afeebe'e ixxi dukkaaniinsi biiranne afuurona. Lama'l ballanne odim ixxi horoore, haareedda, deemmaa ixxi orachchonne yoo mulli odda hundamii hogoossona; ixxi orachchoo eddechcham wo'inne aanshona; muccuram ihookko. «Oo manchi sadeenti ballanne miiqakkam luwwi bee'i gereebbi ambulluwwika lamoo mat hiinchi gereechchi geexaa hincaa'ona. Ee'isam hurbaaxxi kitimina ihoo wee'l zaytinne cukkamaakkoo sas kiilo'i danaam qamaa leeti'l saxxi suum wee'l zaytaa hincaa'ona. Qeessichchim ee mancho hincaa'u kitimmuwwinne maqirem Keesammi Dukkaa'n goocanne i illagenne hincaa'ona. Ee lasage qeessichchi ee gereebbi ambulluwwiinsi mato leeti'l saxxi suum wee'l zaytinne maqirem hawwojji bikkina hincoo kitim issaa hincaa'ookko. Eeham wonciwoncaa'imminne annanni kitim issaa iina hincaa'ona. Ee ambula baaxii'l haafixxi kitiminaa shokkiisakka'a hincaa'akkam kitiminaa hincoo fooraam diinate durakkam keesammi beyyonne durona; oohim hawwojji bikkina hincu kitim baaxii'l haafitina hincoo kiti'mmisam qeessichchina sharad ihaa uwwamoo bikkinatte. Ookki hore'em keesamma. Qeessichchi odim ee kiti'm xiigiinsi hofqaxam aa'aa muccurukkisa la'isoo manchaannoonne makki kolli macci ludonnee makki angaannonnee lokkaannonnee lob maxxaarannee labona. Ee'isam qeessichchi wee'l zaytiinsi hofqaxam aa'aa ixxi gaqqi qeddi angi oobbanne dunona. Qeessichchi makki angi maxxaara ee zaytanne cefukkuuyyi lamar kore i illagenne wixona. Qeessichchi ixxi angi oobbanne gatu zaytiinsi ee muccuroo manchi makki macci ludonnee makki angaannonnee lokkaannonnee lob maxxaarannee labona. Qeessichchi ixxi angi oobbanne gatu zayta ee muccuroo manchi horoorenne dunona; ee'isinne qeessichchi ee mancho i illagenne haafissiisookko. «Ee lasage qeessichchi baaxii'l haafixxeka kitima hincaa'aa ee manchina muccuroo'm seera wonshona; ee lasage shokkiisakka'a hincaa'akkam kitimina hincukkoka durona. Qeessichchi ee kitima hurbaaxxi kitiminne maqirem kiti'm beyyonne hincaa'ona; ee'isinne ee manchina haafissiisookko; oo manchim muccurookko. «Oo manchi ee hundam hincaa'eena xanoobee'i buxichchi ihulas wonciwoncaa'imminne ixxi baaxii'l haafitina ihoo mat gereechchi ambula hawwojji kitimina hincaa'ona. Eehanninne maqirem wee'l zaytinne cukkamaakkoo mat kiilo'i er qama hurbaaxxi kitimina hincaa'ona; ee'isam wee'l zaytika leeti'l saxxi suume edaa hincaa'ona. Ee'isam lam handare'e te'im handare'i wotalla matoo baaxii'l haafixxi kitimina matoo odim shokkiisakka'a hincaa'akkam kitimina ixxi malaayqaxinne hincaa'ona. Muccuroo'm seer ihoo sadeenti ballanne ka keeno hundam eebaa Keesammi Dukkaa'n goocanne i illagenne qeessichchina uwwona. Qeessichchim ee gereechchi ambulaa wee'l zaytaa aa'aa i illagenne wonciwoncaa'akka'a kitim issaa hincaa'ona. Qeessichchi hawwojji bikkina kitim ihaa hincu gereechchom durona; eehanni xiigiinsi hoffokam aa'aa ee muccuroo manchi makki kolli macci ludonnee makki angaannonnee lokkaannonnee lob maxxaalluwwannee labona. Qeessichchi ee zaytiinsi hofqaxam ixxi qeddi angi oobbanne dunona. Ixxi makki angi maxxaaram eehannonne cefukkuuyyi i illagenne lamar kore wixona. Ee'isam ixxi anganne yoo zaytiinsi aa'aa hawwojji bikkina hincu kiti'm xiiga labukkisam ee muccuroo manchi makki kolli macci ludonnee makki angaannonnee lokkaannonnee lob maxxaalluwwannee labona. I illagenne haafissiiseena qeessichchi ixxi anganne gatu zayta ee manchi horoorenne dunona. Muccuroo manchi handare'iinsi te'im handare'i wottalliinsi mato ixxi malaayqaxa hincaa'ona. Oo manchi ee handare'iinsi matoo baaxii'l haafixxi kitimina la'mmekaa shokkiisakka'a hincaa'akkam kitimina hurbaaxxi kitiminnem hincaa'oona. Ee'isinne qeessichchi ee muccuroo mancho i illagenne haafissiisookko. Shishiriinsi muccurimmi bikkina qoodamu kitima hincaa'eena xanoobee'i buxichchina ihimmi hasisoo seer kane» yukko. Waa'i Muse'enaa Aarooninaa «An ki'nnuwwina uwwoommi Kana'aa'n uulla aaggakkam ammane ki'nnuwwi minneewwiinsi mat jabboo'isa issumlas ixxi min jabbukkisa la'u ayyi manchim qeessichchi beyyo maraa ‹I minenne jabbi yookkoka laboolla› yaa kurona. Ee minenne yoo mu'ut hundim haashaaramoobee'isa qeessichchi jabbo moo'eena ee mine aagoo'n illage ee miniinsi mu'ut hundim firoo'isa issona; ee lasage mine aagaa qoossaa moo'ona. Qeessichchi eekka moo'aa lasage oo jabbi shaano'o te'im bir kashar ihaa gorte'e bi'isukkuuyyi moo'amulas qeessichchi ee miniinsi firaa lamar balli afeebe'e xufamoo'isa issona. Lama'l ballanne daba'llaa waaraa odim qoossaa moo'ona; oo jabbi gorte'enne illagee'nnaanniinsi exxaa haraaraakkoolas oo jabbi yoo kinneewwa fissakka'a beero'iinsi tochchonne haashaarammi beyyonne uunjakkamisa issona. Ee'isam woro'l gorte'i hundim huufamaa ee huufamu buchcha beero'iinsi tochchonne haashaarammi beyyonne uunjakkamisa issona. Ee lasage ee kinneewwi bikkenne mulli haareechchi kinneewwi aaggaa haareechchi harinne nannakkona. «Kina fissakka'a, gorte'e huufakka'ahii hara nannakka'ahii lasage oo jabbi odim ee minenne moo'amulas qeessichchi maraa qoossaa moo'ona; oo jabbi ee minenne daba'llaa moo'amulas ookki fatakkoobee'i jabbi ihu bikkina oo min haashaaramaakko. Ee bikkina oo min gindamona; haqqii harii hundim gindamaa beero'iinsi tochchonne haashaarammi beyyonne uunjamona. Oo min xufamaa hee'u ammane ayyi manchim ee mine aagaakkoohan ihulas uulli hiimeebe'i haashaarammi ihookko. Ee mine aagaa iinse'ukkok te'im hurbaata itukkok hee'ulas ixxi eddechcha aanshaqqona. «Ee mine la'mmaagge nannakka'a lasage qeessichchi waaraa moo'oohaare jabbi illagee'nnaanniinsi exxubeelas oo jabbi fataku bikkina oo min muccurukkisa qeessichchi la'isona. Ee mine muccussimmina lam cii'a, digiphphi haqqa, muulli kashar fatiraa hiisoophphaa hincaa'ona. Ee cii'iinsi mato muccur bu'i wo'i yoo buchchi mu'utanne durona. Ee lasage digiphphi haeqa, hiisoophpha, ee fatiraa foorinne yoo cii'ichchoo duramu cii'ichchi xiigannee bu'i wo'onnee cefona; eekkam minenne lamar kore wixona. Ee'isinne qeessichchi ee mine cii'ichchi xiiginne, muccur bu'i wo'inne, foorinne yoo cii'ichchinne, digiphphi haqqinne, hiisoophphinnee muulli kashar fatirinnee muccuroo'isa issookko. Ee lasage foorinne yoo cii'ichcho beero'iinsi tochchonne biir uullanne bararona fatakookko; ee'isinne ee mine see'llisinne muccussookko; oo minim muccur ihookko. «Kuk keen annanni annanni shishiriinsi, boronshiinsi, eddechchannee minennee moo'amoo jabbiinsi, dashshiinsi, jenje'nniinsii bacaro'iinsii muccurda'e haashaaramda'e la'isimmina awwaadoo seera» yukko. Waa'i Muse'enaa Aarooninaa «Isra'ee'l oosina ‹Ayyi manchi sha'ixxi orachchiinsim jabbi mashka'inne daadoo luwwi firulas oo manchi haashaaramma. Oohim oo daadoo luwwi firukkom firimma uullisukkome oo manchi haashaaramma. Oo manchi iinse'oo luwwam ihukko afuuroo luwwi hundim haashaaramma. Ixxeka iinsi beyyo nakku manchi te'im oo manchi afuuru ayyi luwwannem afuuru manchi ixxeka eddechchaa orachchoo aanshaqqona; uulli hiimeebe'em haashaarammi ihookko. Ee'isam daadoo luwwi firoo mancho nakkookkok ixxeka eddechchaa orachchoo aanshaqqona; uulli hiimeebe'em haashaarammi ihookko. Oo daadoo luwwi firoo manchi muccur manchonne anja tuhulas oo manchi ixxi eddechchaa orachchoo aanshaqqona; uulli hiimeebe'em haashaarammi ihookko. Orachchiinsi daadoo luwwi firoo manchi afuuroo kooram ihukkaare haashaaramma. Oo daadoo luwwi firoo manchi afuuru mu'uta hinkam nakku manhchi uulli hiimeebe'e haashaarammi ihookko; oo manchi afuuru mu'uta hinkam ki'isu manchim ixxi eddechchaa orachchoo aanshaqqona; uulli hiimeebe'em haashaarammi ihookko. Orachchiinsi daadoo luwwi firoo manchi anga aanshaqqoo'n mat mancho nakkulas oo manchi ixxi eddechchaa orachchoo aanshaqqona; uulli hiimeebe'em haashaarammi ihookko. Orachchiinsi daadoo luwwi firoo manchi nakku buchchi mu'ut hinkim iiqamona; haqqi mu'utam ihukkaare wo'inne aanshamona. « ‹Sha'ixxi orachchiinsi daadoo luwwi firoo manchi ee jabbiinsi fayye'aa lasage muccur iheena lamar balli afeebe'e egerona; ee lasage ixxi eddechchaa orachchoo muccur bu'i wo'inne aanshaqqona; muccuram ihookko. Sadeenti ballina lam handare'e te'im handare'i wotalla eebaa Keesammi Dukkaa'n goocanne i illagennee qeessichchina uwwona. Qeessichchim ee keeniinsi mato baaxii'l haafixxi kitim la'mmekam shokkiisakka'a hincaa'akkam kitim issaa hincaa'ookko; i illagennem ee daadoo luwwi bikkina haafissiisookko. « ‹Ayyi manchikim qansi firaa daadoo ammane ixxi orachcho hundam aanshaqqona; uulli hiimeebe'em haashaarammi ihookko. Qansi daadaa afu ayyi eddechcham ihukko omachcho wo'inne aanshamona; oohim uulli hiimeebe'e haashaarammi ihookko. Mat meentichchoo goonchii sha'ixxi edancha edamamaa lasage ixxuwwi orachcho wo'inne aanshaqqamona; uulli hiimeebe'em haashaarammi ihamookko. « ‹Mat meentichchok aga'n xur waaroo ammane lamar balli afeebe'e haashaarammi ikkamo; ise nakkoo ayyim uulli hiimeebe'e haashaarammi ihookko. Isek aga'n xur waaroo ammane ise afuuttam luwwam ihukko iinse'llam luwwi hundim haashaaramma. Iseka iinsi beyyo nakkoo ayyim ixxi eddechchaa orachchoo aanshaqqona; uulli hiimeebe'em haashaaramma. Afuuttam luwwa nakkookkokim ixxi eddechchaa orachchoo aanshaqqona; uulli hiimeebe'em haashaaramma. Ise iinse'llam beyyo te'im afuuttam luwwa nakkoo manchi uulli hiimeebe'e haashaarammi ihookko. Ayyi manchim isenne sha'ixxi edancha edamaa iseka xura nakkulas lamar balli afeebe'e haashaarammi ihookko. Ixxi iinse'oo luwwi hundim haashaarammi ihookko. « ‹Mat meentichchok aga'n xur uulloo ammaniinsi higaa lobakat ballina te'im uulloo'n lobakat xiig daadulas oo xiig uulleebe'e aga'n xu'l amma'nnisam haashaarammi ikkamo. Ee amman hundam ise iinse'llamokii afuuttam luwwii hundim haashaarammi ihookko. Ee keeno nakkoo ayyim haashaarammi ihookko; ixxi eddechchaa orachchoo aanshaqqona; uulli hiimeebe'em haashaarammi ihookko. Isek xiig firimma uullulas lamar balli afeebe'e egettona; ee lasage muccuratte ikkamo. Sadeenti ballina lam handare'e te'im handare'i wotalla eebba'a Keesammi Dukkaa'n goocanne qeessichchina uwwitona. Qeessichchim ee keeniinsi mato baaxii'l haafixxi kitim la'mmekam shokkiisakka'a hincaa'akkam kitim issaa hincaa'ookko; ee'isinne i illagenne qeessichchi iseensi daadaa haashaassoo luwwiinsi haafissiisookko› yitakka'a kullehe. «Ixxuwwi lambe'enne yoo iikka Keesammi Dukkaana haashaassita'a eehanninne letambee'isa Isra'ee'l ooso haashaassoo luwwiinsi annanni issehe» yukko. Haashaassoo daadoo luwwi te'im qansi daadaa haashaaramu ayyi manchinam, aga'n xur waaru meentichchona, orachchiinsi daadoo luwwi firoo goonchina te'im meentichchonaa haashaaranto'oo meentichchonne sha'ixxi edancha edamoo goonchinaa uwwamu seer kane. Aaroon lamem oosim Waa'i illagenne hincita'a leta'a lasage Waa'i Muse'ena wocukko. Waa'i Muse'na «Hidi'l sagar yoo saaxi'n ifiishshaanchonne duubinne caakkaa moo'amoommi bikkina du'm eddechcha higaa Keesammiinsi Keesammi beyyo aagimmi hasisookkok hundi amman ihoo'n xale'i qoodamaakkoo ammanennetti ihukkisa kiyyabbaayyi Aaroonina kure. Ixxi ka ijaajomdu egeroobee'an ihulas lehookko. Ixxi ee Keesammi beyyo aagoo ammane mat labeena baaxii'l haafixxi kitimina mat gereechchi ambula odim shokkiisakka'a hincaa'akkam kitimina amadaa hincihona. Aaroon ee Keesammi beyyo aageena illage ixxi orachcho aanshaqqaa qeessooma'n keesammi eddechcha oohim talbi fatirinne baxamaakkoo qeeraa'l qambiisaa worinne lade'oo sure'ee edde'ona; ee'isam talbi danaam fati'l sabbata lade'ona; shaashsham horoorenne karona. «Isra'ee'l minaadab fella'i ambulluwwika lamo baaxii'l haafixxi kitimina, mat gereechchi ambulam shokkiisakka'a hincaa'akkam kitimina eebba'a Aaroonina uwwitona. Aaroonim ixxi gaqqekaa ixxi abaroosikaa baaxiilo haafissiiseena mat labeena kitim issaa hincaa'ona. Ee lasage ee lamem fella'i ambulluwwam Keesammi Dukkaa'n goocanne i illagenne uullisona. Aaroonim mato Waa'ina la'mmeka fatakakkamaannina lamem fella'annem saamo issona. Saaminne Waa'an ihu fella'ichcho baaxii'l haafixxi kitim issaa hincaa'ona. Ihukkaarem fatakimmina saam afu fellakkichchim minaadaphpheka baaxiilo iyyaa udma'i uulla marona fatakameena foorinnem i illagenne hincookko. «Aaroon ee labeena ixxaanninaa ixxi abaroos baaxii'l haafixxi kitiminaa durona. Kiti'm beyyonne yoo giiriinsi kashara aduruusa wiriissakkam mu'utanne wonshaahii danaam enji yoo tumakko'oo lam foocci aduruusa amadaahii Keesammiinsi Keesammi beyyo aagona. Ee beyyonnem i illagenne aduruusa ee giiranne edona; Hidi'l Saga'l Saaxina moo'aa lehoobee'isa ee aduruusik wiriir ee Saaxina ifiisona. Ee labee'n xiigiinsi hoffokam aa'aa angi maxxaara cefukkuuyyi Hidi'l Saga'l Saaxi'n ifichchonne illaqqi kollinne wixona; ee xiigiinsi ifichchi illagenne lamar kore wixona. «Ee lasage minaadaphphi baaxii'l haafixxi kitimina hincu fellakkichcho durona; xiigam Keesammiinsi Keesammi beyyo amadaa aagaa labee'n xiiga issukkisam issona; Hidi'l Saga'l Saaxi'n ifichchonnee ifichchi illagennee wixona. Ee'isinne Keesammiinsi Keesammi beyyo Isra'ee'l minaadaphphi haashaaranchiinsii baaxiil hundiinsimii haafissiisookko; haashaarammi ixxuwwi wiidda'n lambe'enne hee'oo Keesammi Dukkaanam haafissiisookko. Aaroon haafissiiseena Keesammiinsi Keesammi beyyo aagaa ixxi gagina, ixxi abaroosinaa Isra'ee'l minaadab hundinamii haafissiisaa fireebe'e Keesammi Dukkaa'n woronne ayyim hee'oone. Ee'isam i illagenne hee'oo kiti'm beyyo haafissiisona; ee labee'nnaanniinsii fellakkichchi xiigiinsii hofqaxam aa'aa kiti'm beyyi kululleetanne yoo buudduwwanne labona. Ee xigiinsi hofqaxam aa'aa maxxaara cefukkuuyyi kiti'm beyyonne lamar kore wixona; ee'isinne Isra'ee'l minaadaphphi haashaaranchiinsi muccussimminne kiti'm beyyo keesammi issookko. Aaroon Keesammiinsi Keesammi beyyo, Keesammi Dukkaanaa kiti'm beyyoo muccussim seera guullaa lasage fatahimmina saam afu fellakkichcho hincaa'ona. Ixxi lamem angam ee fellakkichchi horoorenne issona; Isra'ee'l minaadaphphekam howwojja, baaxiiloo boqqoomaa hundam biiraa yimminne ee fellakkichchi horoorenne iyyiisona; ee lasage ee fellakkichcho qoodamaa yoo manchi udma'i uulli kolli hollona. Oo fellakkichchi Isra'ee'l minaadaphpheka baaxiilo hundam iyyaa udma'i uulla marookko; oo manchim manni hee'eena xanoobee'i udma'anne fatakihona. «Ee lasage Aaroon Keesammi Dukkaana aagona; Keesammiinsi Keesammi beyyo aageena edde'u qeessooma'n eddechcha sheelataa ee beyyonne dissona. Keesammi beyyonne ixxi orachcho aansha'aa ixxi gaqqi eddechcha edde'ona; ee lasage ee beyyiinsi firaa ixxi gaqqekaa minaadaphphekaa baaxiilo haafissiiseena shokkiisakka'a hincaa'akkam kitima hincaa'ona. Baaxii'l hafitina kitim ihaa hincu diinaxxi di'iram kiti'm beyyonne shokkiisona. Udma'anne fatakamoo fellakkichcho udma'a massu manchi wiidda'n beyyo aageena illage ixxi eddechchaa orachchoo aanshaqqona. Baaxii'l haafitina kitim ihaa xiig Keesammiinsi Keesammi beyyo aagaa hee'u labee'nnekii fellakkichchikii omachchi, maarii cumii hundim wiidda'n beyyiinsi tochchonne shokkona. Ee keeno shokkiisoo manchim wiidda'n beyyo aageena illage ixxi eddechchaa orachchoo aanshaqqona. «Kanniinsi woroon yoo seer ki'nnuwwina heer heerane; lama'l agan aagu tommi ballanne ki'nnuwwi gaga heeshaa'llehe; ki'nnuwwii ki'nnuwwinne hee'oo waaraanii hundim ee balla maham baxxakkotte. Ee balla ki'nnuwwina haafamaa i illagenne baaxiil hundiinsim muccuttakkamo. Oo balli ki'nnuwwina usheexxaxxi ayyaa'mmisa ihona; ee balla ki'nnuwwi gaga heeshaa'llehe; ookki ki'nnuwwina heer heerina seera. Ixxi anni bikkenne hundiinsi lob qeessichchi ihaa doo'llamoo qeessichchi keesammi er eddechcha edde'aa haafissiisona. Oo qeessichchi Keesammiinsi Keesammi beyyo, Keesammi Dukkaana, kiti'm beyyo, qessuwwaa minaadabaa hundam haafissiisona. Ku seer Isra'ee'l minaadaphpheka baaxiilo hundam haafissiisimmina hiinchonne mataa'lle ihoo heer heerina hee'oo seera» yukko. Ee'isinne Muse'e Waa'i ixxo ijaajukkisanne issukko. Waa'i Muse'ena «Aarooninaa ixxi oosinaa ee'isam Isra'ee'l minaadab hundinamii ‹Isra'ee'l minaadabiinsi ayyim mirgo'o te'im gereechcho te'im fellakkichcho iina kitim issaa wiidda'n beyyonne te'im wiidda'n beyyiinsi tochchonne durulas keesammi beyyonne iina kitim issaa hincaa'eena Keesammi Dukkaa'n gooc illagenne eebubeelas xiig kora'am dunamukkaannisa xigamaa ixxonne oogatamookko; minaadabiinsim annanni ihaa bi'ona. Ee bikkina Isra'ee'l oos biir beyyonne kitimina duttamoka i beyyo Keesammi Dukkaa'n gooc illagenne hincaa'llona; qeessichchim mateeyyoo'm kitim issaa iina hincaa'ookko. Xiigam Dukkaa'n goocanne yoo kiti'm beyyonne wixookko; di'iram eese liiransoo enji ihona shokkiisookko. Isra'ee'l minaadab amma'nnatiinsi ixxuwwa qeessoo habusina ixxuwwika fooraam diinate beyyi hundannem kitim issita'a durimminne iina boqqimmi hasisooyyo; Isra'ee'l minaadab ka seera waaroo doollenne hundannem egettona› yihe yaa ijaajaakko. «Ixxuwwina odim ‹Isra'ee'l oosiinsi te'im ixxuwwi lambe'enne hee'oo waaraaniinsi ayyim shokkiisakka'a hincaa'akkamoka te'im mulli kitima iina hincaa'eena Keesammi Dukkaa'n gooca eebubeelas oo manchi i minaadabiinsi annanni ihaa bi'ona. « ‹Isra'eeliinsi te'im ixxuwwinne hee'oo waaraaniinsi ayyim xiiga itulas oo manchi i illagenne sabamaakkoohene; ixxi minaadabiinsim annanni ihaa bi'ona. Fooraam luwwi hundikim foor hee'ookkok xiigannette; xiig kiti'm beyyonne dunamaa ki'nnuwwika baaxiilo haafissiisoo'isa issaammo. Mannina haafite siidisiisookkok xiiga. Ee bikkina Isra'eelina «Ki'nnuwwiinsi te'im ki'nnuwwi lambe'enne hee'oo waaraaniinsi ayyim xiiga itoone» yaammo. « ‹Isra'ee'l oosiinsi te'im ixxuwwi lambe'enne hee'oo waaraaniinsi ayyim itakkam bii'l moochchiinsi te'im cii'iinsi hochchaa amadulas xiiga uullanne dunaa buchcha ifiisona. Fooraam luwwi hundikim foor hee'ookkok xiigannette. Ee bikkina an Isra'eelina «Fooraam luwwi hundikim foor xiig ihu bikkina ayyi fooraam luwwi hundikam xiiga ittakkotte. Xiiga itoo ayyim ixxi minaadabiinsi annanni ihaa bi'ona» yaammo. « ‹Isra'eeliinsi te'im waaraaniinsi ayyim bayta te'im moochchi shu diinate itulas ixxi eddechchaa orachchoo aansha'ona; uulli hiimeebe'e haashaarammi ihookko; ee lasage muccurookko. Ihukkaarem orachchoo eddechchaa aansha'ubeelas ee baaxii'l mashka'inne guzumo'amookko› yihe» yukko. Waa'i Muse'ena «Isra'ee'l oosina ‹An Waa'i ki'nnuwwina Moollanna. Ki'nnuwwi hee'llakko'i Gibxanne te'im an kaba ki'nnuwwina uwwoommi Kana'aananne hee'oo manni baxoo baxo baxxakkotte; ixxuwwi gatti ogoram awwontakkotte. I seeraa gatti ogoraa qoxxitakka'a egellehe. An Waa'i ki'nnuwwina Moollanna. An ki'nnuwwina uwwoommi seeraa gatti ogoraa egellehe; eekka issimminne ayyi manchim ixxi foore gatixxookko An Waa'a. « ‹Ki'nnuwwiinsi ayyim ixxi qarmanchinne sha'ixxi edancha edamoone; an Waa'a. Kiyyummanne sha'ixxi edancha edantaa kiyyanna sholliissitte; kiina amatte ikko'i bikkina kiyyummam maxattitte. Kiyyanni meentinne sha'ixxi edancha edantaa kiyyanna sholliissitte. Kiyyaayyanne sha'ixxi edancha edantitte; minenne te'im mulli beyyonne qaranta'a kiina aayyatte ikko'i landichchonnem sha'ixxi edancha edantitte. Kiina sholle'n ihoobee'isa ki oos oosinne sha'ixxi edancha edantitte. Kiina aayyatte ikko'i bikkina kiyyanni landichchonne sha'ixxi edancha edantitte. Kiyyannina aayyatte ikko'i bikkina kiyyadanne sha'ixxi edancha edantitte. Kiyyummana aayyatte ikko'i bikkina ki amaayyanne sha'ixxi edancha edantitte. Kiyyadasatte ikko'i bikkina kiyyannabbaayyaantenne sha'ixxi edancha edantitte. Ki beet meentichchotte ikko'i bikkina ki beet arenne sha'ixxi edancha edantitte. Ki heereechchotte ikko'i bikkina kiyyabbaayyi meentichchonne sha'ixxi edancha edantitte. Mat meentichchonne, is landichchonnee ee'isam is oos landinnee sha'ixxi edancha edantitte; ixxuwwi isena hincixxi qarmanni ikko'i bikkina kiina baaxiil ihookko. Ki meentichcho foorinne hee'llu'uuyyi is aayya waameettano eebbitte; isennem sha'ixxi edancha edantittee. « ‹Aga'n xur waaraa haashaaranto'i meentichchonne sha'ixxi edancha edantitte. Mulli manchi meentichchonne sha'ixxi edancha edantaa isenne haashaattitte. Ki oosiinsi matom Mooleekina kitim issitaa uwwititte; ki Moollannika summa haashaassititte; an Waa'a. I illagenne sabamaakkoohan ihu bikkina meentinne edantoo'isa gooninne sha'ixxi edancha edantitte. Gooniinsi te'im meentiinsi ayyim diinatinne sha'ixxi edancha edamaa ixxi gaga haashaassoone; eehido'i bax sabamaakkoohane. « ‹Ki'nnuwwi aaggakkona an fissaa holloommi uulli minaadaba haashaattamisa issu bikkina ka keeniinsi matinnem ki'nnuwwi gaga haashaassitakkotte. Eehanninne ixxuwwi uulla haashaassito'ookko; anim ee uulla ee mashka'inne guzumo'ummo; uullim ixxonne hee'oo manna sabukko. I seeraa gatti ogoraa egellehe. Ki'nnuwwii ki'nnuwwinne hee'oo waaraanii ka haashaassoo luwwiinsi matom baxxakkotte. Kinnuwwiinsi illage ee uullanne hee'u manni ka haashaassoo luwwi hundam baximminne uullooma haashaassukko. Ee uullamdu haashaassitakkolas ki'nnuwwiinsi illageen hee'u mulli minaadaba sabukkisam ki'nnuwwam sabookko. Ka haashaassoo baxo baxoo ayyim ixxi minaadabiinsi annanni ihaa bi'ona. « ‹Ee bikkina i seera hundam egellehe; illageen ee uullanne hee'llo'i manni baxam hee'u shigigaa'oo baxo maham baxxakkotte; eehido'i baxinnem ki'nnuwwi gaga haashaassitakkotte. An Waa'i ki'nnuwwina Moollanna› yihe» yukko. Waa'i Muse'ena «Isra'ee'l minaadabina ‹An ki'nnuwwi Moollanni Waa'i keesammi ihummi bikkina ki'nnuwwim keesammuwwi ikkehe. Ki'nnuwwiinsi annannichchim ixxi amaa annaa lonsona; i Usheexxaxxi ballam egellehe. An Waa'i ki'nnuwwina Moollanna. « ‹Qophpha'n waa'ina otossitakkotte; te'im xaara bukkitakka'a qophpha'n waa'i misila baxxakkotte. An Waa'i ki'nnuwwina Moollanna. « ‹Mateeyyoo'm kitima iina kitimtakkam ammane eese liiransoo'isinne hincaa'llehe. Ee kiti'm maara ee balla te'im ee la'm balli dara ittehe; ihukkaarem saxxi balla afu maara hundam shokkiissehe. Ki'nnuwwiinsi ayyim saxxi balla afu maariinsi itulas oo kitim haashaaramu bikkina an aa'oommoyyo. Eehanniinsi itoo ayyim iina keesamu luwwa awwaad bee'i luwwisa xigu bikkina ixxena baaxiil ihookko; ixxi minaadabiinsim annanni ihaa bi'ona. « ‹Ki'nnuwwi uulliinsi hurbaata muttakkam ammane gaba'lleka muttakkotte; muttakku'uuyyi gatu qiimam laso daba'llitakka'a feettakkotte. Woyi'n misha wixxaa'llakkam ammane guullitakka'a feettakkotte; uullanne ubukkokam ki'issakkotte. Eekka buxii waaraanii qiima fee'llitona. An Waa'i ki'nnuwwina Moollanna. « ‹Game'llakkotte. Laggakkotte. Ki'nnuwwina'i ki'nnuwwim qophphano woccakkotte. I summinne qophphano hide'llakkotte. Iikka ki'nnuwwi Moollannika summa haashaassitakkotte. An Waa'a. « ‹Ki beshichchonne damigo baxxitte; ixxeka maham boggitte. Balli baxaa'nneka miqo'o gassititte. Duuda duumtitte; illi qooq qolamoo'isa issititte; eese ki Moollanna badde. An Waa'a. « ‹Oogato boqqissakkotte; buxichcho yitakka'a golo'llakkotte; goddaanchom amaxxi yoo bikkina badditakkotte. Ihukkaarem ki'nnuwwi beshichchina hanqa oogattehe. Ki minaadaphphi lambe'enne daba'llantittuuyyi summa bi'issitte; manna lehina afisoo ayyi luwwam issititte. An Waa'a. « ‹Kiina baaxiil ihoobee'isa ki beshichcho hanqinne axeere bagaan wodaninne sabbitte. Baado miqissitte te'im baado amadditte; ihukkaarem ki beshichcho ki gaqqisa iitte. An Waa'a. « ‹I ijaajo egellehe; annanni annanni diinatiinsi mulli shumo'i qaramoo'isa issititte; mat abuullanne lam sire'e wixxitte; lam luwwinne baxamaakkoo eddechcha edde'llitte. « ‹Mat manchi ixxena awwaaddam landichcho mulli manchina ladiiseena iittamaa lasage oo iittamu manchi bito miqoo'nnim ladiisaanchi ee landichchonne sha'ixxi edancha edamulas lamim guzumo'antona. Ihukkaarem ise wolabbano siiddobee'i agishshotte ikko'i bikkina lamim lehinne guzumo'anchi hasisooyyo. Eehido'i baxo baxu manchi ixxi hawwojji haafixxi kitimina mat gereechchi ambula i beyyo eebaa Keesammi Dukkaa'n goocanne hincaa'ona. Qeessichchim ee manchika baaxiilo hawwojji kiti'm gereechchinne haafissiisookko. Anim ixxi hawwojja haafoommo. « ‹Kana'aana aaggakka'a misha mishoo haqqa kaassakkam ammane luxxi sasem hiinchonnem mishoo misha itimmi hasisooyyo. Ee sasem hiinchonnem mishoo misha ittakkotte. Soo'l hiinchik odim iina Waa'ina keesamaakkoo galaxxi kitim ihona. Ihukkaarem onti hiinchika ittehe; eekka issitakkolas ki'nnuwwi haqqi lobakat misha mishookko. An Waa'i ki'nnuwwina Moollanna. « ‹Xiig yoo maara maham ittakkotte; kiittakkotte te'im gennitakkotte. Horoore gannaale'e mussiissakkotte; haareeddam gundissakka'a muttakkotte. Ki'nnuwwi orachchonne haxara issitakkotte; lehu mannina kichche'llakka'a orachcho muransitakkotte. An Waa'a. « ‹Uulli saa'imminnee haashaaranchinnee wo'mmoobee'isa ki landichcho saa'aanchotte ikkona cawwititte. I usheexxaxxi balluwwa egellehe; i Keesammi beyyo lonsehe. An Waa'a. « ‹Wiidda weeshsham keeno te'im kiiraano sogitano xa'mmitakkotte; eekka issitakkolas haashaarantakkamo. An Waa'i ki'nnuwwina Moollanna. « ‹Umuranne shiqoohaannina ki'llaa beyyo uwwe; lommannam lonse; eese ki Moollanna badde. An Waa'a. « ‹Ki'nnuwwi uullanne ki'nnuwwinne maqire waaraan hee'llolas ixxuwwa wor amaddakkotte. Ki'nnuwwi moollina Isra'eelina issitakkamisam ixxuwwinam er luwwa issehe. Ki'nnuwwi gaqqisam iittehe; ki'nnuwwi illageen Gibxanne waaraan hee'llakko'isam sawwi'llehe. An Waa'i ki'nnuwwina Moollanna. «‹Ayyem usinne, kiilo'innee mulli keennaanchinnee hawwoddakkotte. Qeeraa'llooma, kee'mmaalloomaa dunamoo luwwaa keenakkam hanqo'i keennaanchi ki'nnuwwina hee'ona. Gibxiinsi ki'nnuwwa fissummi Moollanni Waa'i anette. An ki'nnuwwina uwwummi seerinaa gatti ogorina hundinamii amma'nnantakko'oo keen ikkehe› yitaa kure» yukko. Waa'i Muse'ena «Isra'ee'l minaadabina ‹Ki'nnuwwiinsi te'im ki'nnuwwinne hee'oo waaraaniinsi ayyim Mooleekina oosiinsi mato higisaa uwwulas hundem Isra'ee'l oosim kininne aphphissa'a shitona. Ayyim ixxi oosiinsi mato Mooleekina higisaa uwwimminne iikka Keesammi Dukkaanaa Keesammi Summaa haashaassulas oo manchi i illagenne sabamaakkoohane. Ixxi minaadabiinsim annanni issaa bi'isoommo. Ihukkaarem oo manchi issukkoka hundam minaadab moo'aa cawwulasii lehinne guzumo'ubeelasii ee manchonnee ixxi abaroosannee an quuqoommo; ee'isinne iina amma'nnancha hoogga'a Mooleekina otossimminne ixxenne maqirette ikkam keenoo ee manchoo ixxuwwi minaadaphphi lambe'iinsim annanni issaa bi'isoommo. « ‹Ayyi manchim sogitano xa'mmeena wiidda weeshsham kee'n beyyoo kiiraa'n beyyoo marulas ee manchonne i quunqa dilliisoommo. Ixxi minaadaphphi lambe'iinsim annanni issaa bi'isoommo. An ki'nnuwwina Moollanni Waa'i ihummi bikkina ki'nnuwwi mannoomato keessehe; keesammuwwam ikkehe. I seera egellehe; wonshehem. Ki'nnuwwa keesoommi Waa'i anette. « ‹Ayyi manchim ama te'im anna game'llaa sholliisulas lehona; leh ixxonne oogatamukkok amaa annaa duumimminne hawwodu bikkinatte. « ‹Mat manchi mulli manchi meentichchonne saa'ulas, saa'u ixxii saa'llo'i isee lamim letona. Mat manchi ixxi anni arenne sha'ixxi edancha edamulas ixxi anna sholliisaakkoo bikkina ixxii oo meentichchoo lamim letona. Ixxuwwanne oogatamukkokim ixxuwwi hawwojji bikkinatte. Mat manchi ixxi beetaarenne saa'ulas lamim letona; ixxuwwina yoo qarooma saa'imminne haashaassamaakkoo bikkina ee xiigina ixxuwwi gagim xa'mmantamo. Mat goonchi meentinne edancha isso'isam mulli goonchinne edancha issulas haashaassoo baxo baxxo'i bikkina lamim letona; ee xiigina ixxuwwi gagim xa'mmantamo. Mat manchi amaa landichchoo eebulas ee issamu haashaassoo bax bikkina sasom giirinne shokkiisakka'a shakkona; eehido'i jor luwwi ki'nnuwwi lambe'enne ihimmi hasisooyyo. Mat manchi meentinne edamakkamaannisa fooraam diinatinne edamulas ixxii oo fooraam diinatii lamim letona. Mat meentichcho meentii goonii edamoohaannisa fooraam diinatinne edantolas isee oo fooraam diinatii lamim letona. Ee xiigina ixxuwwi gagim xa'mmantamo. « ‹Mat manchi ixxena anninne te'im amanne aayyatte ikko'ota eebaa isenne sha'ixxi edancha edamulas ookki tuulli ihu bikkina ixxuwwi minaadaphphi lambe'iinsi annanni ihamaa bi'amona. Ixxi aayyanne edamu bikkina hawwo aa'ookko. Mat manchi aga'n xur waaraakkoo meentichchonne sha'ixxi edancha edamulas muccuroo'm seera gindamu bikkina lamim ixxuwwi minaadaphphi lambe'iinsi annanni ikka'a bi'llona. « ‹Mat manchi ixxi adanne te'im ixxi amaayyanne sha'ixxi edancha issoone; eekka issimmi qarooma bi'isimmi ihu bikkina lamim hawwo aa'llamo. Mat manchi ixxi annabbaayyaantenne iinse'aa sha'ixxi edancha edamulas ixxi annabbaayyo sholliisaakkoo bikkina ixxii oo meentichchoo lamim hawwo aa'llamo; ooso qaramoo'nnim lehamookko. Mat manchi ixxi abbaayyi meentichcho eebulas ookki haashaassoohane; ixxi abbaayyi lombam sholliisookko; ee mashka'inne lamim oos be'em gattamo. « ‹Ki'nnuwwi aaggakkamisa issoommi Kana'aa'n uulli ki'nnuwwa saboobee'isa iikka seeraa gatti ogoraa hundam egellehe; wonshehem. Ki'nnuwwi illagiinsi holloommi minaadaphphi losano awwontakkotte; ixxuwwi eehido'i jor baxo baxxo'i bikkina sabaammo. Ihukkaarem ixxuwwika uulla lago aa'llakkamo; adii marabii daadoo uulla lago aa'llakkamisina ki'nnuwwina uwwoommo; mulli minaadabiinsi annanni ikkakkamisina issummi ki'nnuwwi Moollanni Waa'i anette. Ee bikkina muccur ihu fooraam diinate muccur ihubee'i fooraam diinatiinsi, muccur ihu cii'am muccur ihubee'i cii'iinsi annanni issitakkamo; haashaaramma yaa la'isummi fooraam diinatinnee cii'innee ee'isam uullanne mikmikoo luwwi hundinnem ki'nnuwwi gaga haashaassitakkotte. An Waa'i keesammi ihummi bikkinaa iihan ikkakkonam mulli minaadabiinsi annanni issummi bikkinaa iina keesantakko'oo keen ikkehe. « ‹Wiidda weeshsham keen te'im kiiraan goonchom ihukko meentichcho letona; kininne aphphisakka'a shakkona; oo keen letamok ixxuwwi hawwojji bikkinatteme› yihe» yukko. Waa'i Muse'ena «Aaroon oos ikko'i qeessuwwiina ‹Ayyim ixxi minaadabiinsi lehu mannika leesha nakkaa ixxi gaga haashaassoone. Ihukkaarem ixxi abaroos ikko'i ixxi amaka, annika, beetika, ixxi landichchoka, abbaayyikaa mine issitoo'n ixxenne hee'llam aayyakaa nakkaa haashaareena xanookko. Ixxi balluwwanem ihukkaare nakkaa ixxi gaga haashaassoone. « ‹Qeessuwwi lehu mannina kichche'lla'a horoore hogoossitoone; ixxuwwi haareeddam gundissoone; xabanom kotooxxitoone. Shokkiisakka'a iina hincaa'akkam kitimaa hurbaaxxi kitimaa iina ixxuwwi Waa'ina hincaa'llam qeessuwwi iina annanni ikko'oo i summam haashaassitambee'i keen ihimmi hasisookko. Ee bikkina keesammuwwi ikkona. Qeessuwwi iina annanni ikka'a keesanto'oo keen ikko'i bikkina saa'aancho, buubbeesaancho te'im baajoomman bee'i landichcho eebboone. Qeessichchi keesamaakkoohan ihukkisa minaadab la'ona; ixxi ki'nnuwwi Waa'ina iina hurbaaxxi kitima hincaa'oohane; ki'nnuwwa keesoommi Waa'i an keesamma. Ayyi qeessichchikim landichcho saa'aanchotte ikkolas is anna sholliisso'ookko. Ee bikkina ise giirinne shokkitona. « ‹Hundiinsi lob qeessichchi ixxi abbaayyuwwi lambe'iinsi doo'llamaa ixxi horoorenne zayti labamaa qeessooma'n eddechcha edde'eena keesamu bikkina manni lehoo ammane ixxi horoore hogoossoone; ixxi eddechcham dereeroone. Ayyi leeshim yoo mine aagoone; annaanninnem ihukko amaanninne haashaassoone. Iikki keesammi ixxi Waa'ik zayti ixxonne yoo bikkina i Keesammi Miniinsi firaa Keesammi Mine haashaassoone. An Waa'a. Ixxim meento eeboo ammane baajaamo eebona. Busara, bubbeesaancho te'im saa'aancho eeboone. Ihukkaarem ixxi minaadabiinsi baajaamo doo'llaa eebona. Eehid ihubeelas ixxi minaadaphphi lambe'enne ixxi oos haashaarammi ihookko. Ixxo keesummi Waa'i anette› yihe» yukko. Waa'i Muse'ena «Aaroonina ‹Ki shumo'iinsi orachchonne miiqakkam luwwi yoo ayyim iina ixxi Waa'ina hurbaaxxi kitima hincaa'immi hasisooyyo. Ku seer waaroo qaranchi hundannem egeranchi hasisookko. Qooq te'im dim te'im hagar te'im qoocci bi'aakkookkok anga te'im lokko iiqammi quut te'im uulli gunchi te'im illi ciimfi te'im qosh te'im bacaro'i yookkok te'im muleessa'i hurbaaxxi kitima iina hincaa'oone. Qeessichchi Aaroon shumo'iinsi miiqakkam luwwi yoo ayyim shokkiisakka'a hincaa'akkamoka te'im hurbaaxxeka kitima iina ixxi Moollannina hincaa'oone. Eehido'i manchi keesammaa hore'em keesammaa ihu hurbaaxxi kitima iteena xanookko. Ihukkaarem ixxonne miiqakkam luwwi yoohan ihu bikkina keesammi du'm kolli te'im kiti'm beyyi kolli hincoone. Ee iina keesamu luwwa haashaassimmi hasisooyyo; ee keeno keesummok an Waa'a› yitaa kure» yukko. Muse'e ee hundam Aaroonina, Aaroon oosinaa Isra'ee'l minaadabinaa hundinam kurukko. Waa'i Muse'ena «Aarooninaa ixxi oosinaa ‹Iikka keesammi summa haashaassitakkambee'isa Isra'ee'l oos iina annanni issita'a hincaa'llam kitima hundam aa'llakka'a keesammisa egellehe. An Waa'a. Ixxuwwi shumo'iinsi haashaarammi ihukkok ayyim Isra'ee'l oos iina annanni issita'a hincaa'llo'i keesammi kitimanne hinculas i illagiinsi bi'ookko. Ku seer waaroo qaranchi hundannem egeranchi hasisookko. An Waa'a. « ‹Aaroon shumo'iinsi ayyim shishir te'im orachchiinsi daadaa firoo luwwi yoohan ihulas eehanniinsi muccureebe'e keesammi kitimiinsi itoone. Ee'isam leeshinne haashaaramu luwwa te'im qansi firukkuuyyi yoo mancho nakkaa te'im biqinne shuroo haashaassoo luwwa te'im haashaassoo ayyi luwwinnem haashaaramu mancho nakkookkok ayyim ka keeno nakkulas hiim afeebe'e haashaarammi ihookko. Ixxi orachcho wo'inne aanshaqqubeelas keesammi kitimiinsi itoone. Ihukkaarem eelliinchi aagaa lasage muccuroo bikkina keesamaakkoo kiti'mmeka ixxi sharada iteena xanookko; ixxena hurbaatame. Bayta te'im moochchi shu diinaxxeka maara itoone; eekka itulas haashaaramookko. An Waa'a. « ‹Qeessuwwi i ijaajo gadda'a baaxiilo baximminne letambee'isa i ijaajo egettona. Ixxuwwa keesoommi Waa'i anette. « ‹Qeessichchi abaroosiinsi bagaan koyyiinchi te'im miqo'inne baxookkok ayyim itoone. Ihukkaarem qeessichchi ixxi birinne bitaa'u te'im ixxi minenne qaramu ixxena awwaadaanchi ee qeessichchi sharadiinsi itona. Qeessichchi landichcho qeessichchi ihubee'i manchina ladiisantolas keesammi kitimiinsi ittoone. Ihukkaarem ooso qattobee'i is aro'i lehukkete te'im aro'i hollukkaare waatta'a is anni minenne hee'llam qeessichchi landichcho oosoomma'n amma'nnisam is anni sharadiinsi ittona. Ihukkaarem qeessichchi abaroosiinsi bagaan mulli manchi ee keesammi luwwiinsi itoone. « ‹Qeessuwwi abaroosiinsetti ihubee'ek ayyim keesammi kitimiinsi la'oo'n itulas ee kiti'm bitoo ontiinsi mat suumee edaa qeessichchina dabarona. Isra'ee'l oos iina hincaa'llam keesammi kitima qeessuwwi haashaassimmi hasisooyo. Ee keesammi kitima itimmi hasisoobee'i manchi itona cawwitolas ee manchina baaxiil ihaa oo manchi guzumo'amookko. Kitima keesoommok an Waa'a› yihe» yukko. Waa'i Muse'ena «Aaroonina, ixxi oosinaa Isra'ee'l minaadabinaa hundinam ‹Isra'ee'l minaadab te'im ixxuwwinne hee'oo waaraan uga'a te'im gaqqi doo'llinne uwwitam kitima shokkoo kitimina hincaa'llolas ookki eese liiransoo'isina miiqakkam luwwi mahimbee'i labeen te'im gereechchi ambul te'im fellakkichchi ambul ihona. Ihukkaarem miiqakkam luwwi yoo ayyi fooraam diinatem hincaa'llolas eekka an aa'oommoyyo. Ayyi manchim aagu uga'ina te'im ixxi gaqqi doo'llinne uwweena lariinsi te'im gereebbiinsi te'im fella'iinsi mateeyyoo'm kitimina hincaa'oo ammane ookki eese liiransoo'isina miiqakkam luwwi mahim bee'an ihona. Qooqa te'im iiqamma te'im muramma te'im orachchiinsi mar firookkoka te'im qosh te'im bacaro'i yookkoka iina hincaa'llakkotte. Eehido'i diinate kiti'm beyyonne shokkiisakka'a hincaa'akkam kitim issitakka'a iina hincaa'llakkotte. Hore'em qeeraa'lla te'im uulli gunchi diinate gaqqi doo'llinne uwwitakkam kitimina iina hincaa'llakkeena xantakkamo. Ihukkaarem uga'a uwwoommoo yu manchi kitim issaa hincaa'eena xanooyyo. Qoccamma te'im laarohoora te'im fenamma te'im muramma iina hinca'llakkotte; eehido'i keeno ki'nnuwwi uullannem kitimtakkotte. « ‹Allaggi mannika diinate iina kitim issitakka'a hincaa'llakkotte; eehido'i diinat miiqakkam luwwi yoo diinaxxisa xigamoo bikkina an aa'oommoyyo› yoolla yihe» yukko. Waa'i Muse'ena «Labeen te'im gereechchik te'im fellakkichchi wotar qaramoo ammane lamar balli afeebe'e aminne hee'ona; ihukkaarem sadeenti balliinsi ki'isaa iina shokkiisakka'a hincaa'akkam kitim ihaa hinceena xanookko. « ‹Saayya wee'ichchinne, gereechchom wotarinne maqire mat ballanne duttakkotte. Iina galaxxi kitima hincaa'llakkam ammane ookki eese liiransoo'isanne hincaa'llehe. Ee kitima ee ballam ittehe bagaan la'm ballina gassitakkotte. An Waa'a. «I ijaajo egellehe; wonsheheme. An Waa'a. Iikka keesamaakkoo summa haashaassitakkotte; Isra'ee'l minaadab hundim an keesammi ihummisa laqqa'a lonsitona; ki'nnuwwa keesoommi Waa'i anette. An ki'nnuwwina Moollanni iheena Gibxiinsi ki'nnuwwa fissummi Waa'i anette» yukko. Waa'i Muse'ena «Isra'ee'l oosina ‹Keesamaakkoo keeno yitakka'a alallaattakkam i ugudduwwi ka keeno. Baxo baxxakkam loh balli ki'nnuwwina yookko; ihukkaarem lama'l balli ki'nnuwwina Usheexxaxxi balla. Ee balla iina otossitakkeena wixxi'llehe bagaan maham baxxakkotte; hee'llakkam uulli hundannem Usheexxaxxi balli iina keesamaakkoohane. Qoodamaakkoo ammanenne «Waa'i ugudduwwa» yitakku'uuyyi alallaattakkam keesammi ugudduwwi ka keeno. « ‹Luxxi agan aagu tommonnee soo'l balli eelliinchi aagganne Waa'ik Higimmi Ugud asheerookko. Tommonnee o'onti ballannee odim Qorosho'i Ugud asheerookko; ee taabo lamar balli afeebe'e xale'i urshobee'i qorosho'o ittehe. Ee saanti luxxi ballanne otossitakkeena wixxi'llehe. Ee balla maham baxxakkotte. Lamar balli afeebe'e shokkiisakka'a hincaa'akkam kitima iina hincaa'llehe; lama'l ballanne odim ki'nnuwwi baxo hundam uttakka'a otossitakkeena wixxi'llehe› yitaa kure» yukko. Waa'i Muse'ena «Isra'ee'l oosina ‹An ki'nnuwwina uwwoommi uulla aaggakka'a hurbaata muttakkam ammane luxxi farshima qeessichchina uwwehe. Ookki eese liiransoo'isina qeessichchi ee farshima i illagenne wonciwoncaa'ukkuuyyi iina annanni kitim issaa hincaa'ona. Eeham Usheexxaxxi balliinsi awwonaa yoo ballanne issona. Ee hurbaaxxi kitima hincaa'llakko'i ballannem miiqakkam luwwi bee'i mat hiinchi gereechchi ambula shokkiisakka'a hincaa'akkam kitim issitakka'a iina hincaa'llehe. Eehanninne maqirem wee'l zaytinne cukkakko'oo lam kiilo'i danaam qama hurbaaxxi kitim issitakka'a hincaa'llehe; eehanni enjim eese liiransoo shokkoo kitim ihookko. Ixxennem mat liitira ihoo woyi'n diqaasa hincaa'llehe. Ka kitima hincaa'immiinsi gaassitakka'a haareechchi hurbaaxxeka qaquulla te'im inqalo te'im qorosho'o sattakka'a ittakkotte. Ku seer waaroo doollenne hundannem ki'nnuwwi oos oos afeebe'ina ihoo seera. « ‹Hurbaaxxeka luxxi farshima iin wonceessakka'a hincaa'llakko'i Usheexxaxxi balli la'm dariinsi ki'isaa lamar saanta xiggehe. Lama'l Usheexxaxxi balliinsi lasage ontayyi ballanne odim haareechchi hurbaaxxeka kitima iina hincaa'llehe. Abaroos abaroosinne lam daabbo'o wonceesimminne annanni kitim issitakka'a iina hincaa'llehe; oo daabbo'i ursho'i exxaakkoo lam kiilo'i danaam qaminne saramaa haareechcho murakka'a wixxoo hurbaaxxi bikkina iina kitim ihaa hincoo hurbaaxxi wona. Ee daabbo'inne maqire miiqakkam luwwi bee'i mat hiinchi gereebbi geexxuwwika lamara, mat labeenaa lam gereebbi ambulluwwaa ebbona. Oo keenim hurbaaxxaanninnee woyi'n diqaas kitiminnee shokkiisakka'a Waa'ina hincaa'akkam hurbaaxxi kitim ihookko. Giirinne hincoo ee kiti'mmek enji eese liiransoohan ihookko. Ee lasage baaxii'l haafixxi kiti'm bikkina mat fellakkichchi ambulaa mateeyyoo'm kitimina mat hiincho ihaakkoo lam gereebbi ambulluwwaa hiincaa'llehe. Qeessichchim ee hurbaaxxi wona lamem geexxuwwinnem wonciwoncaa'aa iina annanni kitim issaa hincaa'ookko; oohim qeessichchina sharad ihookko; oo uwwamaa hincu luwwim keesamaakkoohane. Ee ballanne iina otossakkam dummichchi ihoo'isina alallaattakkamo; matem baxom baxxakkotte; kuk ki'nnuwwi hee'llakkam uullanne hundannem ki'nnuwwi oos oos afeebe'e heer heerina ihoo seera. « ‹Ki'nnuwwi uulliinsi hurbaata muttakka'a wixaa'llakkam ammane ki'nnuwwi uulli gabalanne yookkoka muttakkotte; hurbaata muttakko'i beyyiinsim qiima feettakkeena laso daba'llitakkotte; eekka buxinaa waaraninaa uullehe. An Waa'i ki'nnuwwina Moollanna› yihe» yukko. Waa'i Muse'ena «Isra'ee'l minaadabina ‹Lama'l agananne oo agan aagu luxxi ayyaa'm xurumbinne alallaatamaakkoo iina otossimminne tiittakkam Usheexxaxxi balli ihona. Ee ayyaamonne shokkiisakkam kitima iina hincaa'llehe bagaan mah baxom baxxakkotte› yihe» yukko. Ki'nnuwwi Moollanni Waa'i illagenne minaadaphphi baaxiilo bi'isoommi ogor ihoo ayyaam ihu bikkina ee balla mah baxom baxxakkotte. Ee balla ixxi gaga heeshaa'oobee'ek minaadabiinsi annanni ihaa bi'ona. Ee ayyaamonne baxo baxoo manchi ayyim hee'uta'n minaadabiinsi annanni issaa bi'isoommo. Ee bikkina ee ayyaamonne ma'lluchchom baxxakkambee'isina ku seer hee'llakkam beyyonne hundannem ki'nnuwwi shumo'ina egeramaa afuurookko. Oo agan aagu honsi ayyaa'm eelliinchi aagoo ammaniinsi ki'isaa tommi ayyaa'm eelliinchi aagoo amman afeebe'e baaxiilo biiraa yimmina ki'nnuwwi gaga heeshaa'llehe; ee ayyaamo annanni Usheexxaxxi balli issitakka'a egellehe» yukko. Ee balluwwiinsi luxxi ayyaamonne iina otossitakkam ugud ihona bagaan maham baxxakkotte. Ee lamarem ballannem ballina ballina shokkiisakka'a hincaa'akkam kitima iina hincaa'llakkamo; sadeenti ballina keesamaakkoo dummichcha issitakkamo; iinam shokkiisakka'a hincaa'akkam kitima hincaa'llehe; oohim dummichcha guullitakkam balli ihu bikkina maham baxxakkotte. « ‹Shokkiisakka'a hincaa'akkam kitima, wix hurbaaxxi kitima, kitimaa aggi kitimaa qoodamu ayyaammuwwanne iina hincaa'llakkeena ki'nnuwwi alallatakkam keesammi i ugudduwwi ka keeno. Ku ugudduwwim i Usheexxaxxi ayyaammuwwinne maqirem edakka'a lonsakkam ugudduwwa; ka ugudduwwanne hincoo luwwi iina uwwitakkam luwwinne, uga'a uwwimmina yitakko'i luwwi wo'mmoohaare uwwitakkam luwwinnee gaqqi doo'llinne hincaa'llakkam luwwinnee exxaa hincoo keeno. « ‹Ki'nnuwwi uullika hurbaata wixxaa'llakka'a lasage lama'l agan aagu tommiinsii onti balliinsii ki'isaa lamar balli afeebe'e ka i uguda lonsehe; luxxi ayyaamii sadeenti ayyaamii annanni ihaakkoo usheexxaxxi ayyaammuwwi ihookko. Ee luxxi ayyaamonne ki'nnuwwi uulli haqqiinsi er misha, dinbaaphphi buyya, buyyaam haqqi caafaa daajji gammalanne mutoo «Ahaayyaa» yakkam haqqichchoo amaddakka'a ki'nnuwwi Moollanni ihummi i illagenne liirantakku'uuyya lamar balli afeebe'e uguda issehe. Ka ugudam hiinchina hiinchina lama'l agananne lamar ballina i ugud issitakka'a lonsehe; kukim ki'nnuwwi shumo'ina hundinam heer heerina uwwamu seera. Lamar ballina Isra'ee'l minaadab hundim daassuwwanne afuuttamo. Ee bikkina An Waa'i Isra'ee'l minaadaba Gibxiinsi fissummi ammane daasa baxxu'uuyya afuuttamisa issummisa ki'nnuwwi shumo'i hundim laqqakkamo. An Waa'i ki'nnuwwina Moollanna› yihe» yukko. Muse'e ka'isinne Waa'ika doo'llamu ugudduwwa Isra'ee'l oos egettona la'isukko. Waa'im Muse'ena «kworonne yoo caakki hundi ammanem caakkukkuuyyi hee'oo'isa issimmina ciinsamaa mararammaakkoo muccur wee'l zayta kiina eebbona Isra'ee'l minaadaba ijaaje. Aaroon hiimiinsi uulli soodeebe'e Keesammi Dukkaa'n woronne yoo Hidi'l Sagar yoo Saaxi'n illagenne yoo du'm eddechchiinsi biireen i illagenne gudisona. Oohim heer heerina ki'nnuwwi shumo'ina ihoo seer ihona. Aaroon oo caakki muccur worqiinsi baxamaakkoo caakka dissakkam mu'utanne i illagenne hundi ammanem caakkoo'isa egerookko. «Tommoo lam kiilo'i danaam qamaa massitaa tommoo lam qorosho'oo sare. Ee qorosho'om i illagenne yoo worqa goolabakko'oo xaraphpheezanne lohoo mat kollonne gatu lohoo odim mulli kollonne lam ogoranne disse. Iina hincaakkoo keesamaakkoo qorosho'i ihukkisa tiirakkamisina muccur aduruusa lamem ogorannem disse. Aaroon Isra'ee'l minaadaba bikkaa ee qorosho'o hundi ammanem saantina saantina Usheexxaxxi ballanne i illagenne dissona; kukim Isra'ee'l minaadab heer heerina egerimmi hasisoo hidi'l sagara. Oo qorosho'i Aarooninaa ixxi shumo'inaa sharada; ixxuwwim eekka keesamaakkoo beyyonne ittona; oohim iina lobakata keesamaakkoo shokkoo kitim ihaa hincaa lasage qeessuwwina annanni ihaakkoo hundi amma'n sharad ihookko» yukko. Ixxonne issitam luwwa Waa'i ixxuwwina caakkiiseebe'e waardiyyinne egeramoo'isa issito'o. Isra'ee'l oosina ‹Ayyi manchim ixxi Waa'a duumulas baaxiilo baxu bikkina guzumo'amookko. I summa duumookkok ayyim lehona; minaadab hundim ixxo kininne aphphissa'a shitona; Isra'ee'l manniinsim ihukko waaraaniinsi i summa duumookkok lehona. « ‹Manna shoo manchi ayyim lehona. Mulli mannika fooraam diinate shukkok masalo'o uwwona; kido'i gatti ogorim foorina foo'l masalo'o yimma. Ayyi manchim mulli manchonne afisu hawwojji ixxonnem afona. Mulli manchika miqe iiqulas ixxi miqim iiqamona; mulli manchika ille fissulas ixxi illim firona; inqe iiqukkaannikim inqi iiqamona. Mulli mannanne mah hawwojjam afisulas eekka laboo hawwojji ixxonnem afona. Fooraam diinate shookkok shukkaanni qaxa miqona; ihukkaarem manna shookkok ixxi gagim lehona. Ku seer ki'nnuwwina Isra'ee'l minaadabinam ihukko ki'nnuwwinne hee'oo waaraanina awwaadoohan ihookko. An Waa'i ki'nnuwwina Moollanna› yihe» yukko. Muse'e ka hundam minaadabina kuraa gullaa lasage ee mancho amba'iinsi tochchonne fissita'a kininne aphphissa'a shito'o; ee'isinne Isra'ee'l minaadab Waa'i Muse'e ijaajukkisanne issito'o. Waa'i Muse'ena Siina'i duunanne «Isra'ee'l oosina ‹An ki'nnuwwina uwwoommi uulla aaggakkam ammane uulli gagim i usheexxato lonsona. Loh hiincho abuullitakka'a wixxehe; ki'nnuwwi woyinam ballachchehe; misham wixxaa'llehe. Ihukkaarem lama'l hiinchonne uulli usheexxona; oohim iina Waa'ina usheexxaxxi hiincho. Ee hiincho ki'nnuwwi uullanne wixxakkotte; woyinam ballachchitakkotte. Wixakkoo'n mutu hurbaata muttakkotte; ballachchakka'a axisakkobee'i woyiniinsim misha wixxaa'llakkotte; oo hiinchi uulli usheexxoo hiinchi ihona. Ee usheexxaxxi hiincho uulli uwwoo mish hundim ki'nnuwwina, ki'nnuwwi agidina gooninaa meentinaa, miqqakku'uuyyi ki'nnuwwina baxoo baxaaninaa ki'nnuwwinne maqire yo'i waaraaninaa hurbaaxxi misha uwwookko. Ee'isam ki'nnuwwi mi'n fooraam diinatinaa bii'l moochchinaa uulliinsi firoo luwwi hundim hurbaat ihona. « ‹Lamar usheexxaxxi hiinchuwwa xige; lamarem usheexxaxxi hiinchuwwam lamarinne fikkaannissoohaare soree honsi hiinchoo ihookko. Ee lasage hiinchi aagu tommi ayyaamonne ihoo baaxii'l haafixxi ballanne uullanne hundannem xurumba fuggu'uuyyi alallaattam manna asse'llakkamo. Ontayyi hiincho ee'isinne annanni issitakka'a uullanne hee'llam keenina hundinam wolabbano alallaattakkamo. Ka illageen biteesamu uulli hundim anchinam te'im ixxi shumo'ina daba'llona; agiddanina biteesamu manchim ixxi mi'n abaroos beyyo daba'llona. Ontayyi hiinchi haafixxi hiinchi ihu bikkina ki'nnuwwi uullanne hurbaata wixxakkamoyyo. Wixxakkoo'n mutu hurbaataa ballachchamubee'i woyi'n mishaa wixxaa'llakkotte. Oo hiinchi haafixxi hiinchi ihu bikkina ki'nnuwwina keesamaakkoohan ihookko; ki'nnuwwi uullanne ixxi anginnem mutukkoka xale'e ittakkamo. « ‹Ka illageen biteesamu uulli hundim ka haafixxi hiinchonne annichchinam daba'llookko. Ee bikkina ki moolliinsi Isra'eelchina uulla biteessaattoolas te'im ixxeensi bitaa'llaattoolas dufdufaa'llitte. Haafixxi hiinchi lasage yoo hiinchuwwi xigo shooho'i issitaa ki moolliinsi bitaa'llootto; ixxim hurbaata wixxaa'akkam hiinchuwwa shooho'i issimminne kiina biteesookko. Lobakat hiinchi ihulas bit edookko; hofqax hiinchi ihulas bit hoffe'ookko; mashka'oomim biteesamoo bit issamookkok uulli uwwoo hurbaaxxisannette. Mat mulleka qawwiisoone; ihukkaarem ki'nnuwwi Moollanna baddehe. An Waa'i ki'nnuwwina Moollanna. « ‹Uullanne xumminne hee'llakkeena iikka seeraa gatti ogoraa hundam lonsehe. Uullim lobakat misha uwwoo bikkina ittakkam luwwi hundam siiddakka'a makkixxitakka'a xumminne hee'llakkamo. Ihukkaarem ki'nnuwwi «Lama'l hiinchonne sire'e winxumbeelasii atoota wixxaa'nnumbeelasii maha intoommo» yitakka'a xa'mmitakkolas Loh hiinchonne an uulla maasse'oommo; ee bikkina sas hiinchina ihoo misha uwwookko. Sadeenti hiinchonne sire'e wixxakko'aarem ittakkamok illageen wixxa'llakko'i hurbaatiinsetti ihookko. Honsi hiinchika hurbaata wixaa'llakkeebe'em ee illagee'n hurbaatiinsim ittakkamo. « ‹Uulloom miq biteesamoone; mashka'im oo uulli ihane bagaan ki'nnuwwaneyyo; ki'nnuwwim ee uullanne waaraa'nnisaa koyyisaa afuuttakkona uwwaammo. Uulli biteesamoo ammane illagee'n ee uulli annichchi dabaraa bita'eena xanoohan ihukkis la'anchi hasisookko. Mat Isra'eelchi buximmiinsi ki'ukkok uulla biteesulas ixxena abbis qarmanchi ee uulla dabaraa ixxena aa'immi hasisookko. Ihukkaarem ee uulla ixxena dabaraa bitaa'eena xanoo hincixxi qarmanchi bee'ulas ixxi amaxxa siidoo ammane bitaa'eena xanookko. Eekka isseena xanoo ammane biteesu ammaniinsi ki'isaa awwonaa yoo amaxxa dabarakkam hiinchi afeebe'e yoo ammane xigaa bito aa'u manchina diinate dabaraa lasage hosixxeena xanookko. Ihukkaarem ee uulla dabaraa bitaa'eena xansiisoo diinat hee'ubeelas hanenne waaroo haafixxi hiinchi afeebe'e ee bitaa'u manchi anganne hee'eena xanookko. Ihukkaarem ee haafixxi hiinchonne uulloom annichchinam daba'llookko; uulli annichchim ixxi gaqqi uullanne daba'llookko. « ‹Mat manchi, kululleet kininne ootamaakkoo beero'onne hee'oo ixxi mine biteesuta'n ee biteesamu ammaniinsi yoo mat hiinchi woronne dabaraa hosixximmi hanqi yookko. Ihukkaarem ee hiinchi woronne ee mine dabaraa hosixxeena xanubeelas od dabaraa hosixxeena xanooyyo; oo min ee bitaa'u manchina te'im ixxi shumo'ina gaqqi amaxxi ihookko. Haafixxi hiinchonnem biteesu manchina daba'llooyyo. Kululleet kininne ootamubee'i gattuwwanne hee'oo minneewwa biteesseena xantamok abuulli uulli biteesamoo'isannette ihookko; ee minneewwa annichchi dabaraa bitaa'eena xanookko; haafixxi hiinchonnem annichchina daba'llimmi hasisookko. Ihukkaarem Leewi'i oos ixxuwwina uwwamu beero'uwwanne yoo min hundam ayyi ammanem dabatta'a bitaa'lleena xantamo. Leewi'i oos ixxuwwi beero'onne baxxo'i minneewwa biteessa'a dabatta'a bitaa'lleena xantobeelas haafixxi hiinchonne ixxuwwina daba'llona. Mashka'oomim Leewi'i oos beeroo'uwwanne hee'oo minneewwi Isra'ee'l minaadaphphi lambe'enne hee'llam Leewi'i oosina amaxxa. Ihukkaarem Leewi'i oos beero'uwwi kululleetanne yoo diinat hixe allaa'lloo uulli hundim hore'em biteesamooyyo; oo uulli ixxuwwi gaqqi uulli ihaa heer heerina hee'ookko. « ‹Kiina moolli ihu Isra'eeliinsi mat buxaa ixxi gaga xanimma hooguta'n kiinninne hee'oo waaraanchina te'im koyyiinchina hara'mmitoo'isam hara'mme. Kiina moolli ihu Isra'eelchi kiinninne hee'ona cawwihe; qaro'o eddaa miqissitte. Eese Waa'a badde. Liqaayye uwwitoo diinatiinsi qaro'o hassitte; ixxena biteessitti hurbaatiinsim exxo'o xa'mmititte. Kana'aa'n uulla ki'nnuwwina uwweenaa ki'nnuwwina Waa'a iheenaa Gibxi uulliinsi ki'nnuwwa fissummi Moollanni Waa'i anette. « ‹Kiina hincitenne hee'oo ki moolli ihu Isra'eelchi buxoomiinsi ki'ukkok agishshi ihaa kiina baxeena ixxi gaga biteesulas agid baxoo bax hundam baxoo'isa issititte. Hanenne waaroo haafixxi hiinchi afeebe'e qaxxarakko'i awwaadaanchisa kiina awwaadukkuuyyi waaraa'nnisa kiinninne maqire hee'ona. Ee lasage ixxim ixxi oosinne maqirem kiinniinsi annanni ihaa ixxi qarmanni beyyoo ixxi anno'i amaxxi yoo beyyoo daba'llona. Isra'ee'l minaadab An Gibxi uulliinsi wolabbanonne fissummi i awwaadaan ikko'i bikkina agid ikka'a biteesanchi hasisooyyo. Ixxuwwa u'nnissittuuyyi gassititte; ihukkaarem eese ki Waa'a badde. Kiina agid ihoo'isina hassootti goonaa meentoo ki kululleetanne yo'i mulli minaadabiinsi bitaa'lleena xantootto. Ee'isam ki'nnuwwi lambe'enne hee'oo waaraaniinsii ixxuwwi oosiinsii agido bitaa'llehe; ixxuwwim ki'nnuwwina amaxxi ikkona. Ixxuwwam ki'nnuwwi oosina lago aa'issehe; ixxuwwim ki'nnuwwi oosina hee'llam heechchi doollenne hundannem agid ikkamisa issehe. Ihukkaarem ki'nnuwwina moolli ihu Isra'ee'l minaadaba u'nnissakku'uuyyi gassitakkotte. « ‹Ayla'ukko ki lambe'enne hee'oo mat waaraanchi te'im koyyiinchi goddaanchi ihaa ki moolli ihu Isra'eelchi buxaa ee waaraanchina te'im koyyiinchina te'im ixxi abaroosiinsi matina oo Isra'eelchi ixxi gaga biteesuta'n ee lasage daba'llaa bitaa'ameena xanookko; ee bikkina ixxi abbaayyuwwiinsi mat dabaraa bitaa'ona. Te'im ixxi anni abbaayyi te'im ixxena annabbaayyi beet te'im ixxena abbis qar ihoo keeniinsi mat dabaraa bitaa'eena xanookko; ihoo qax diinate hee'ulas ixxi wolabbano ixxim dabareena xanookko. Ookki ihoo ammane bitaa'u manchinne atoorarona; ixxi gaga biteesu hiinchiinsi ki'isaa awwonaa yoo Iyyoobeeliyyu'i hiinchi afeebe'e doolle xigona; ixxo wolabbaninne geegeesimmi bit ee hiinchuwwanne diinatinne qaxxaramaa baxoo manchina miqakkamisanne qoodamona. Lobakat hiincho gatulas ixxuwwi xiqqisanne ee biteesamu bitiinsi gatukkoka dabarona. Iyyoobeeliyyu'i hiinchi afeebe'e gatookkok hofqax hiinchi ihulas ee gatu hiinchi xiqqisanne wolabba'n diinate miqona. Hiinchiinsi hiinchi afeebe'e qaxxaramu awwaadaanchisa ihaa hee'ona; moollannim ixxo u'nnisukkuuyyi gassoone. Ka'isinne wolabbano siideena xanubeelas hanenne waaroo Iyyoobeeliyyu'i hiinchonne ixxoo ixxi oosoo kora'am fatakihona. Isra'ee'l minaadab i awwaadaan ikko'i bikkina Isra'eeliinsetti ihu ayyi manchim heer heerina agishshi ihaa hee'immi hasisooyyo. Mashka'oomim Isra'ee'l minaadab an Gibxi uulli agiddaniinsi fissummi i awwaadaano; an ixxuwwina Moollanni Waa'a. « ‹Ki'nnuwwi ee keenina otossitakkeena qophpha'n waa'i misila baxxakkotte; misila te'im soodda te'im shobamaakkoo ki'n utuba ki'nnuwwi uullissakkotte; an Waa'i ki'nnuwwina Moollanna. Iikka usheexxaxxi ayyaammuwwa egellehe; i Keesammi beyyom lonsehe; an Waa'a. « ‹I seera awwontakkolasii i ijaaj hundam egettakkolasii ki'nnuwwik uulli hurbaatinne, haqqim mishinne wo'mmaakkoohane ihoo'isina xeena ammaninne ga'nnisoommo. Ki'nnuwwik hurbaat lophphaakkoohane ihukkaanniinsi ki'aa hurbaata muttakka'a wixxaa'llakka'a guullitakkoo'nnim woyi'n misha feettakkam amman afookko. Woyi'n misha feettakka'a guullitakkoo'nnim wix hurbaata wixxakkam amman afookko; hurbaata godditakka'a ittakkamo. Xumminne ki'nnuwwi uullanne hee'llakkamo. « ‹Ki'nnuwwi uullina xumma uwwoommo; ayyem badditakkoo'n matem baachchi bee'em iinse'llakkamo; jor moochcham ki'nnuwwi uulliinsi bi'isoommo; ka lasage ki'nnuwwi uullanne or hee'ooyyo. Ki'nnuwwi diina'a hollitakkamo; ki'nnuwwi illagennem orinne beedditamo. Ki'nnuwwik onti ki'nnuwwi diina'ika xibbe kaa'llamo; ki'nnuwwik xibbi odim ki'nnuwwi diina'ika tommi kuma kaa'llamo; ki'nnuwwik diina'i orinne ki'nnuwwi illagenne beedditamo. I illem uratinne ki'nnuwwi kollonne dabaroommo; ki'nnuwwi shumo'om fikkaannisoommo; ki'nnuwwinne aagummi i hidi'l sagaram qoxxisoommo. Ittakku'uuyyi yoo ludmaaraqqi hurbaat sechchiinsi beeddoo'nnim kamaaraqqi hurbaatina beyyo fatakissiissakkamo. Anim i heechchi beyyo ki'nnuwwi lambe'enne issoommo; ki'nnuwwam shigigoommoyyo. An ki'nnuwwinne maqire maroommo; ki'nnuwwinam Waa'i ihoommo; ki'nnuwwim i minaadab ikkakkamo. Gibxi uulli mannina agid ikkakkambee'isa Gibxi uulliinsi fissummi ki'nnuwwi Moollanni Waa'i anette. Ki'nnuwwanne iyyiisamaa hee'u agidda'n gaanjaqqa iiqaa xabbitakka'a mattakkamisa issaammo. «Ihukkaarem eese macceessakkobeelas, ka ijaajom egettakkobeelas, iikka gatti ogora egettakkobeelas, i seeram gaddakkolasii i ijaajo hundam egerimma hoogimminne i hidi'l sagara ginditakkolasii anim ka keeno ki'nnuwwanne eboommo. Dangonne muggitakkamisa, qasaa ki'nnuwwi ille bi'isookkokaa lobakata jiissoo iibbaa ki'nnuwwanne fatakoommo. Wixxakkam hurbaat ki'nnuwwina awwaadooyyo. Mashka'oomim eekka itookkok ki'nnuwwi diina'a. Quuqimminne i ille ki'nnuwwanne dabaroommo; ki'nnuwwi diina'im ki'nnuwwa kaa'ookko; ki'nnuwwa saboo keenim ki'nnuwwa gassookko; ayyim holloo'n gibbakkamo. « ‹Kuk hundim ki'nnenne afaa lasagem iina ijaajantakkambee'an ihulas ki'nnuwwi baaxii'l bikkina ki'nnuwwanne eeboommi guzumo'o illagee'nnaanniinsi lamar kore lophphoo'isa issoommo. Ki'nnuwwi daba'llitakkambee'isa issoo bolxooma bi'isoommo. Iimane xaa'llisa qoxxisaa xeen ga'nnoobee'isa issoommo; uullim gogaa naas xaa'llisa ihoo'isa issoommo. Ki'nnuwwik uulli hurbaata haqqim misha uwwoobee'i bikkina kora'am badattakkamo. « ‹Eesenne moo'issakkam boqooma uttakkobeelasii eesem macceessakkambee'an ihulasii ki'nnuwwik baaxiil lophphukkisanne illagee'nnaanniinsi lamar kore lophphoo boobana ki'nnuwwanne eeboommo. Ki'nnuwwina moochcha asse'oommo; oo moochchi hundim ki'nnuwwi ooso shookko; ki'nnuwwi mi'n fooraam diinatem shookko; ki'nnuwwiinsi xale'i hofqax mannim gatoo bikkina ki'nnuwwi bobba'i hundim dihookko. « ‹Oo guzumo'i hundim ki'nnuwwanne afaa lasage eese macceessakkobeelasii eese sabimmannem qoxxitakka'a uullitakkolasii anim ki'nnuwwina diinakkichchi ihoommo; ki'nnuwwi baaxii'l bikkinam illagee'nnaanniinsi lamar kore lophphaakkoo'isinne ki'nnuwwa guzumo'oommo. Iinninne aaggakko'i hidi'l sagara ginditakko'i bikkina ki'nnuwwika baado miqiseena ki'nnuwwanne ora eeboommo; ki'nnuwwi beero'uwwannem wixxitakkolas fayye'llakkeena xantakkambee'i jabbinne ki'nnuwwa aphphisoommo; diina'inam ki'nnuwwi anga uwwitakkamo. Hurbaat bee'oo'isa issoommi ammane tommi meentichcho mat mixaadanne hinjeera sattamo. Ee hinjeeram qoodda'a uwwitamo; ki'nnuwwim ittakkamo; ihukkaarem godditakkamoyyo. « ‹Oo luwwi hundim ki'nnuwwanne ihaa lasage iina ijaajantakkobeelasii boqqitakkolasii ki'nnuwwanne quunqinne ki'oommo; ki'nnuwwi baaxii'l bikkina ki'nnuwwanne eeboommi guzumo'om illagee'nnaanniinsi lamar kore edoommo. Ee bikkina sibaar lophphimmiinsi ki'ukkaaninne ki'nnuwwi ooso ittakkamo. Duunnuwwanne yoo otossakkam beyyi hundam bi'isoommo; aduruusa kitimtakkam beyyi hundam gindansoommo; ki'nnuwwi leesham leeshisa ubu otossitakkam ki'nnuwwi waa'uwwanne ubbuusoommo; ki'nnuwwa hore'em shigigoommo. Ki'nnuwwi beero'uwwam guullaa bi'isoommo; ki'nnuwwi otossitakkam beyyi hundam gindansoommo; ki'nnuwwika enje'oo kitima aa'oommoyyo. Ee uullanne hee'oo ki'nnuwwi diina'i maalalteebe'e ee uulla guullaa bi'isoommo. Ki'nnuwwanne ora ki'isaa hanqo'i Waa'a laqqambee'l minaadaphphi uullanne hundannem binnaa'oomo; bisa'am ki'nnuwwanne ki'isiisoommo; ki'nnuwwi uullim manni bee'ane ihookko; ki'nnuwwi beero'uwwim diihookko. Ki'nnuwwi, ki'nnuwwi diina'i uullanne hee'llakkam hundem hiinchonnem ki'nnuwwi uulli ma'llichchim bee'an ihoo bikkina usheexxaxxi hiinchuwwa lonsookko; ee lasage uulli usheexxaa usheexxaxxi ayyaammuwwanne usheexxaa liiramookko. Uulloom ki'nnuwwi hee'llakko'i ammane usheexxixxi ammanenne siidubee'i usheexxato kaba manni bee'i ammanenne usheexxaakko. « ‹Ki'nnuwwiinsi foorinne diina'i uullanne gatto'i keen muggitamisa issoommo. Hafachchi buyya heekkeesoo ammane ee sagara macceessa'a bobatta'a gibbamo; ixxuwwa hollookkok hee'oo'nnim oriinsi giboo mannisa gibbamo; qolanta'ahim ubbamo. Ayyim ki'nnuwwa holloo'n oriinsi gibbakkaman ikkakka'a mat mullaanni hanenne qolantakka'a ubbakkamo; ki'nnuwwi diina'inne ayyennem uullixxantakka'a qasantakkeena xantakkamoyyo. Hanqo'i Waa'a laqqambee'i minaadaphphi lambe'enne bi'llakkamo; ki'nnuwwi diina'i uullannem xuuxantakka'a gattakkamo. Ki'nnuwwina diina'i uullanne lehiinsi gattakko'i keen ki'nnuwwi baaxii'l mashka'innee ki'nnuwwi anno'i baaxii'l mashka'innee mat mat ikkakku'uuyyi beedditakkamo. Ihukkaarem ki'nnuwwi shumo'i iina amma'nnancha hooggo'i ixxuwwi baaxiilo, eesenne boqqito'i ixxuwwi baaxiiloo ixxuwwi anno'i baaxiiloo biiraa yitolas oohim an ixxuwwina diinakkichchi ihoommisinaa ixxuwwi diina'i ikko'i manni uulla mattamisa issoommisinaa issu ixxuwwi baaxiilo biiraa yitolas ixxuwwik duud wodan iiqamaa ixxuwwi baaxii'l bikkina laboo guzumo'o aa'llolas Yaaqoobinne, Yisaaqinnee Abraaminnee aagummi hidi'l sagara sawwoommo; ee uullam i minaadabina uwweena aagummi neeyyaxxi sagara areesoommo. Uulloom ixxuwwi utta'a matto'i bikkina diihookko. Ixxuwwi bee'i ammane udma'i ihaa usheexxukkisam usheexxaa liiramookko; ixxuwwim i seera sholliisso'i bikkinaa gatti ogoram gaddo'i bikkinaa ixxuwwi baxxo'i baaxii'l mashka'inne guzumo'antamo. Ihona bagaan ixxuwwi diina'i uullanne hee'llu'uuyya guullaa saboommoyyo te'im guullaa bi'isoommoyyo; ookki ihukkan ihulasa'e ixxuwwinne maqire aagummi hidi'l sagara lasaanchi afeebe'e egerummoyyi hee'ummo; an Waa'i ixxuwwina Moollanna. Ihukkaarem ixxuwwina Waa'i ihoommisina mulli minaadab moo'llo'uuyyim Gibxi uulliinsi fissaa ixxuwwi anno'inne aagummi hidi'l sagara sawwoommo. An Waa'a› yihe» yukko. Waa'i ixxi lambe'ennee Isra'ee'l minaadaphphi lambe'ennee Muse'enne ihaa Siina'i duunanne uullisu gatti ogorii seerii ka keeno. Waa'a uunxaxxi minenne la'amaakkoo keenaanchonne umur lamiyyiinsi ki'isaa lohayyi afeebe'e ihoo goonchina loh xibbi giraama kee'mmoo kin bir ihona. Umur lamiyyiinsi ki'isaa lohayyi afeebe'e ihoo meentichchona sad kin bir ihona. Umur ontiinsi lamiyye ihoo goonchik lamiyyi kin bir ihona; umur ontiinsi lamiyye ihoo meentichchok tommi kin bir ihona. Umur mat aganiinsi ki'isaa onti hiinchi afeebe'e ihoo goo'nnek onti kin bir ihukkuuyyi ee umuranne yoo meentik sas kin bir ihona. Umur lohayyi hiinchiinsi hanaan ihu goonchik tommoo onti kin bir ihukkuuyyi ee umuranne yo'i meentichchok tommi kin bir ihona. «Uga'a uwwoommo yu manchi ee bito miqeena xanoobee'an ihulas ee uwweena sawwu mancho qeessichchi beyyo eebona; qeessichchim oo uga'a uwwoommo yu manchi miqeena xanoo'isanne bito murona. «Manchom uwwoommo yu uga'i Waa'ina kitim ihaa hincoo fooraam diinat ihulas eehanni bito miqooyyo; Waa'ina hincu kitim hundim Waa'ina annanni ihaakkoohan ihookko. Oo manchi mishisoo fooraam diinate mishisoobee'i fooraam diinatinne, dabaransoone; mato bikkoo'isina mulleka hincaa'ukkaarem lamim Waa'ina annanni ikko'oo keen ikkamo. Oo kitimim Waa'ina kitim issakka'a hincaa'akkeena Waa'i aa'oobee'i muccuroombee'i fooraam diinat ihulas oo manchi ee fooraam diinate qeessichchi beyyo eebona. Qeessichchim oo fooraam diinat mishisoo'isaa mishisoobee'isaa moo'aa bito murona; oo bitim lasanchi bit ihookko. Ee fooraam diinaxxi annichchim dabaraa bitaa'eena hasulas eehanni bitonne xibbiinsi lamiyyi anga edona. «Mat manchi ixxi mine Waa'ina annanni issaa hincaa'ulas qeessichchi oo min jor ihukkisaa danaam ihukkisaa moo'aa bito murona; oo bitim lasaanchi bit ihookko. Ihukkaarem ee mi'n annichchi ee mine dabaraa bita'eena hasulas eehanni bitonne xibbiinsi lamiyyi anga edona. «Mat manchi ixxi gaqqi uulliinsi baxxansaa Waa'ina annanni issaa uwwulas ee uullanne wixakkam zerettisanne bit muramona; oohim mat mat kiilo'i so'o massoo uullina ontayyi kin bira miqona. Ee uulla haafixxi hiinchi higukkisam annanni issaa uwwulas eehanni bito hundam miqimmi hasisookko. Uullooma uwwookkok haafixxi hiinchi higaa lasagette ihulas waaroo haafixxi hiinchi afeebe'e yoo gatu amma'nneka xigimminne eehannik bit hoffe'oo'isa issona. Ee abuulli uulla uwwu manchi dabaraa bitaa'eena hasulas illagee'n bitaannonne xibbenne lamiyye edaa miqona; ee lasage ixxan ihookko. Ihukkaarem ellageen ee uullina annichchi hee'u manchi Waa'ina uwwu ixxi gulummi issoo'nnim mulli manchina biteesaa siidamulas ee uulla dabaraa bitaa'oo hanqi hee'ooyyo. Illagee'n uulli annichchina dabarimmina xansiisoobee'i oo uulli hanenne waaroo haafixxi hiinchonne Waa'ina annanni ihaa hee'oo Waa'i amaxxi ihookko. Ookkim qeessichchi sharad ihookko. «Mat manchi ixxi gulummi issaa lago aa'ubee'i uulla, ihukkaarem mulli manchiinsi bitaa'u abuulli uulla Waa'ina annanni issaa hincaa'ulas, Qeessichchi eekka moo'aa waaroo haafixxi hiinchi afeebe'e yoo bito murona; oo manchim ee ayyaamoom eehanni bito miqona; oo diinatim Waa'ina keesamaakkoohan ihookko. Iyyoobeeliyyu'i hiinchonne oo abuulli uulli illageen biteesu manchina te'im ixxi shumo'ina gulummi ihaa daba'llona. Eekee'nnek annannichchikim bit muramookkok Waa'i uunxaxxi «Saqil» yamamoo keennaanchonnette ihukkuuyyi mat saqil lamiyyi kiilo giraama. «Fooraam diinatiinsi won Waa'an ihu bikkina ayyi manchim ixxi gaqqi doo'llinne uwwoohan issaa hincaa'eena xanooyyo; labeenam ihukko gereechchi geex te'im fellakkichchi geex illageenim Waa'ina annanni ihaakkoo keeno. Ihukkaarem miiqakkam luwwi yoo fooraam diinaxxek won erisa la'amaakkoo bitonne xibbenne lamiyye edaa bitaa'eena xanookko; Ihukkaarem ee fooraam diinaxxi annichchi bitaa'oobee'an ihulas laboo bitina mulli mannina biteesamona. Mat manchi, manchom ihukko fooraam diinate te'im uulla issaa lasage biteeseenam ihukko dabaraa bitaa'eena hore'em xanooyyo. Lehoo'isina oogatakko'i manchi eekka dabaraa bitaa'eena xanooyyo; eehido'i manchi lehim hasisookko. Uulliinsi siidamoo wix hurbaatiinsim ihukko mulli mishiinsi tommiinsi mat Waa'ina annanni ihaakkoohane. Ee tommiinsi mato uwwu luwwiinsi maham dabaraa bitaa'eena hasoo manchi erisa la'amaakkoo bitonne xibbenne lamiyye edaa bitaa'eena xanookko. Mi'n fooraam diinatiinsi tommiinsi mat Waa'i sharada; oo fooraa diinat xigamoo ammanem tommiinsi mat Waa'ina keesamaakkoohane. Ee diinaxxi annichchi ee fooraam diinate hagarinne hagarinne beyyo amadiisoo ammane miiqakkam luwwi yookkoka miiqakkam luwbee'aanniinsi annanni issoone; matinam mulleka masalo'i issoone; mat fooraam diinatina mulleka masalo'i issulas lamem fooraam diinatim Waa'ina keesamaakkoohan ihona; eekka la'mmage dabarakka'a bitaa'akkeena xanakkamoyyo» yukko. Isra'ee'l minaadabina kuroo'isina Muse'e, Siina'i duunanne hee'u ammane Waa'i uwwu ijaaj hundim eekeeno. Isra'ee'l minaadab Gibxiinsi fitto'i la'm hiinchonne la'm agan aagu luxxi ballanne Siina'i udma'i uullanne yo'aannonne Waa'i Keesammi Dukkaa'n woronne Muse'ena, «Isra'ee'l minaadaphpheka goona hundam sulli sullinnee moolli moollinnee annanni issitakka'a summa kitaabbehe. Umur lamiyye te'im lamiyyiinsi hanaan ihu orameena xanoo Isra'ee'l goo'n ooso hundam atii Aaroonii xiggehe. Sulliinsi annannichchiinsim mat mat manchi ixxi abaroosina awwonsaanchi ihaa ki'nnuwwina hara'mmona. Oo ki'nnuwwina hara'mmoo kee'n summim kanniinsi woroon yoohane. Roobeel sulliinsi Shade'uur beet Eelxuur Simi'oon sulliinsi Xurshaadaay beet Shalumi'eel Yihuxxi sulliinsi Aminaadaab beet Na'aasoon Yisaakoor sulliinsi Xu'aar beet Naatinaa'eel Zaabiloo'n sulliinsi Heeloon beet Eeli'aab Yooseef oosiinsi Efireem moolliinsi Amhuud beet Eelshaama'i Minaas moolliinsi Phadaaxuur beet Gamaali'eel Biiniyaam sulliinsi Gidi'oon beet Abidaan Daan sulliinsi Amishadaay beet Ahi'eezer Aseer sulliinsi Okiraan beet Fagi'eel Gaad sulliinsi Raagu'eel beet Eeliyaasaafattii Niftaaleem sulliinsi Eenan beet Ahira'attii» yukko. Isra'ee'l minaadaphphi sulluwwiinsi annannichchiinsim ixxuwwi abaroosina awwonsaan ikka'a doo'llanto'i keen ka keeno. Muse'ee Aaroonii ka summinne weeshanto'i manna massita'a la'm agan aagu luxxi ballanne minaadaba hundam wixxaa'llo'o; umur lamiyyee eehanniinsi hanaanii ihu goon hundim Waa'i ijaajukkisinne ixxuwwi summi kitaabamukkuuyyi xiganto'o. Waa'i Muse'e ijaajukkisanne Siina'i udma'anne minaadaba xigukko. Gaadaan ikka'a awwaaddeena xantam umur lamiyyi hiinchoo eehanniinsi hanaanii ihu goon Isra'ee'l oosina won hee'u Roobeel sulliinsi ki'isaa sulli sullinnee moolli moollinnee kitaabanto'o. Roobeel sulliinsi 46,500 hee'llo'o. Simi'oon sulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinnee abaroosinne abaroosinnee summinne summinnee kitaabamukko. Simmi'oon sulliinsi 59,300 hee'ukko. Gaad suulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne, abaroosinne abaroosinnee summinne summinnee kitaabamukko. Gaad suulliinsi 45,650 hee'ukko. Yihuxxi suulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinnee abaroosinne abaroosinnee summinne summinnee kitaabamukko. Yihuxxi suulliinsi 74,600 hee'ukko. Yisaakoor suulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne abaroosinne abaroosinnee summinne summinnee kitaabamukko. Yisaakoor suulliinsi 54,400 hee'ukko. Zaabiloon sulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne, abaroosinne abaroosinnee summinne summinnee kitaabamukko. Zaabiloon sulliinsi 57,400 hee'ukko. Yooseef shumo'onne Efireem sulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne, abaroosinne abaroosinnee summinne summinnee kitaabamukko. Efireem sulliinsi 40,500 hee'ukko. Minaas sulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne, abaroosinne abaroosinnee summinne summinnee kitaabamukko. Minaas sulliinsi 32,200 hee'ukko. Biiniyaam suulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne, abaroosinne abaroosinnee summinne summinnee kitaabamukko. Biiniyaam sulliinsi 35,400 hee'ukko. Daan sulliinsi gaadeena xanoo umur lamiyyi hiinchoo eehanniinsi hanaanii ihu goon moollinne moollinne, abaroosinne abaroosinnee summinne summinnee kitaabamukko Daan sulliinsi 62,700 hee'ukko. Aseer sulliinsi gaadeena xanoo umur lamiyyi hiinchoo eehanniinsi hanaanii ihu goon moolli moollinne, abaroosinne abaroosinnee summinne summinnee kitaabamukko. Aseer sulliinsi 41,500 hee'ukko. Niftaaleem sulliinsi gaadeena xanoo umur lamiyyi hiinchoo eehanniinsi hanaanii ihu goon moolli moollinne, abaroosinne abaroosinnee summinne summinnee kitaabamukko. Niftaaleem sulliinsi 53, 400 hee'ukko. Muse'ennee Aarooninnee ixxuwwi abaroosa bikkito'i tomminnee lamem Isra'ee'l awwonsaaninnee xiganto'i goon kakeeno. Isra'ee'llek hundikim gaadeena xanoo umur lamiyyi hiinchoo eehanniinsi hanaanii ihu goon moolli moollinne, abaroosinne abaroosinnee summinne summinnee kitaabamukko. Hundikim xig 603,550 hee'ukko. Ihukkaarem Leewi'i sulli mulli keeninne maqire exxita'a xiganto'oyyo. Mashka'oomim Waa'i Muse'ena «Isra'ee'l goo'n ooso xiggoo ammane Leewi'i sullo eddaa xiggitte. Ee bikkenne ixxuwwa i keesammi Dukkaanannee ee woronne awwaaxxakkam mu'uttuwwannee hundannem egeraan isse. Ixxuwwim ee Dukkaanaa ixxi woronne awwaaxxakkam mu'uttuwwaa hundam iyyitona. Dukkaa'n woronnem awwaaddona; ixxi kululleetannem afuuttona. Keesammi Dukkaan ki'oo ammane hundam Leewi'i oos ki'issona; kaasamoo ammanem xale'i ixxuwwi kaassona; ixxuwwiinsi bagaan mullek ayyim ee Dukkaa'n kolli hinculas lehinne guzumo'amona. Mulli Isra'ee'l minaadab tuutinne tuutinne dukkaana kaassona; annannichchim ixxuwwi wiidda'nnisinnee mare'isinnee wiiddantona. Ihukkaarem Isra'ee'l oosonne i quunqi dillaa gulloobee'isa Leewi'i oos Keesammi Dukkaa'n kululleetanne widdanta'a egettona» yukko. Isra'ee'l oos Waa'i Muse'e ijaajukkisanne hundam issito'o. Waa'i Muse'enaa Aarooninaa kanniinsi woroon yoo ijaajo uwwukko. Isra'ee'l oos sulli sullinnee mare'isinee wiiddantona; wiiddantamokim Keesammi Dukkaa'n kululleetannetti ikka'a nafara Keesammi Dukkaa'n kollonne dabatta'atette. Eelliinchi firinne wiiddanookkok Yihud mare'inne wiiddanona qoodamu sulluwwa. Yihuxxi sullo awwonsaanchim Aminaadaab beet Na'aasoonatte. Ixxi gogoxxekim xig 74,600 hee'ukko. Ee sulli gadanonne wiiddanookkok Yisaakoor sulli ihookko. Yisaakoor sullo awwonsaanchim Xu'aar beet Naatinaa'eelatti hee'ukko. Ixxi gogoxxi xigim 54,400 hee'ukko. Ee sulli gadanonne wiiddanookkok Zaabiloon sullo; Zaabiloo'n sullo awwonsaanchim Keeloon beet Eeli'aabatte hee'ukko. Ixxi gogoxxekim xig 57,400 hee'ukko. Yihud wiiddananne wiiddanoo'isina qoodamu mannik hundikim xig 186,400 hee'ukko. Gaassaa firookkok ka gaalcha. Woroo'n qarinne wiiddanookkok Roobeel mare'inne wiiddanona qoodamu sulluwwa. Roobeel sullo awwonsaanchi Shade'uur beet Eelxuuratte. Ixxi gogoxxekim xig 46,500 hee'ukko. Ee sulli gadanonne wiiddanookkokim Simi'oon sulli ihookko. Simi'oon sulli awwonsaanchi Xurshaadaay beet Shalumi'eelatte. Ixxi gogoxxekim xig 59,300 hee'ukko. Ee sulli gadanonne wiiddanookkok Gaad sullo. Gaad sullo awwonsaanchim Raagu'eel beet Eeliyaasaafatte. Ixxi awwonsoo gogotikim xig 45,650 hee'ukko. Roobeel wiiddananne qoodamu mannik hundikim xig 151,450 hee'ukko. La'mmaagge firookkok ka gaalcha. Luxxi lamem baxxanchinaa lassaanchi lamem baxxanchinaa lambe'enne Leewi'i oos Keesammi Dukkaana amadda'a mattamo; ixxuwwim annannichchim ixxi gaqqi mare'inne kor kore marookko. Eelliinchi aagginne wiiddanookkok Efireem mare'inne wiiddaneena qoodamu sulluwwa; Efireem sullo awwonsaanchi Amhuud beet Eelshaamaatte. Ixxi gogoxxekim xig 40,500 hee'ukko. Ixxuwwi gadanonne wiiddantamok Minaas sullo. Minaas sullo awwonsaanchi Pheedaaxuur beet Gamaali'eelatte. Ixxi gogoxxekim xig 32,200 hee'ukko. Ee sulliinsi awwonaa Biiniyaam sulli wiiddanookko. Biiniyaam sulli awwonsaanchi Giidi'oon beet Abiidaanatte hee'ukko. Ixxi gogoxxekim xig 35,400 hee'ukko. Efireem wiiddananne qoodamu mannik hundikim xig 108,100 hee'ukko. Ee'isinne saxxaagge firookkok ka gaalcha. Hanaa'n qarinne wiiddanookkok Daan sulli mare'inne wiiddaneena qoodamu sulluwwa. Daan sullo awwonsaanchi Amishshadayyi beet Ahi'eezeeratte hee'ukko. Ixxi gogoxxekim xig 62,700 hee'ukko. Ee sullo awwonaa Aseer sulli wiiddanookko. Aseer sullo awwonsaanchi Ookriin beet Fagi'eelatte hee'ukko. Ixxi gogoxxekim xig 41,500 hee'ukko. Ee sullo awwonaa Niftaaleem sulli wiiddanookko. Niftaaleem sullo awwonsaanchi Eenan beet Ahira'atte hee'ukko. Ixxi gogoxxekim xig 53, 400 hee'ukko. Daan wiiddananne wiiddaneena qoodamu mannik hundikim xig 157,600 hee'ukko. Ee'isinne lasaanchonne firookkok ka gaalcha. Isra'ee'l oos ixxuwwi abaroosisinne, baxxanchisinnee gogoxxisinnee xiganto'i xig 603,550 hee'ukko. Ihukkaarem Waa'i Muse'e ijaajukkisanne Leewi'i oos Isra'ee'l oosinne maqire xiganto'oyyo. Ee'isinne Isra'ee'l oos Waa'i Muse'e ijaajukkisanne hundem luwwam guullita'a issito'o; sulli annannichchim mare'i mare'inne wiiddanam hee'ukko; ee'isam moolli moollinne baxxamanta'a mattam hee'llo'o. Waa'i Muse'e Siina'i duunanne atoorassu ammane Aaroonikii Muse'ekii abaroos kanniinsi woroon yo'i keen hee'llo'o. Aaroonik goo'n oos sooro; ixxuwwi summim wonik Naadaabatte; mulli kee'nnek odim Abiyuudatte, Ali'aazarattee Itaamaarattee hee'ukko. Qeessoomaninne awwaaddeena annanni ikka'a doo'llanto'i keen ka keeno. Ihukkaarem ixxuwwiinsi Naadaabii Abiyuudii Siina'i udma'i uullanne keesamoo'n yoo giira giitta'a Waa'ina kitima hincaa'llo'i bikkina ixxi illagenne ubba'a leto'o; ixxuwwinam oos hee'ukkoyyo. Ee bikkina Aaroon hee'u doollenne hundannem xale'i Ali'aazarii Itaamaarii qeessoomaninne awwaaddam hee'llo'o. Waa'i Muse'ena «Leewi'i sullo wottaa qeessichchi Aaroonina awwaadinne hara'mmitona ixxi illagenne uullise. Ixxuwwim Aarooninaa minaadabinaa Keesammi Dukkaananne awwaadimminne baxamoo baxo hundam baxxamo. Ee Dukkaa'n woronne awwaadoo mu'uta hundam egeraan ikkamo. Isra'ee'l oosina hasisoo awwaad hundam ee Dukkaananne awwaaddona. Leewi'i ooso Aarooninaa ixxi oosinaa uwwe; ixxuwwi Isra'ee'l oosiinsi annanni ikka'a hore'oomam ixxena uwwanto'oo keeno. Qeessoomaninnem awwaaddona Aaroonaa ixxi oosoo doo'lle; ixxuwwiinsi bagaan ayyim ee baxo baxulas lehona» yukko. Odim Waa'i Muse'ena «Oono'o, Isra'ee'l oosiinsi won ihaa qaramoohaanni bikkenne Leewi'i ooso i gagina massaammo; ee bikkina Leewi'i oos iihane. Mashka'oomam won hundim iihan ihu bikkinatte. Gibxi uullanne wona hundam aphphisummi ammane Isra'ee'lleka mannikaa diinaxxekaa wona i gagina annanni issaammo; ixxuwwi iihan ikkona. An Waa'a» yukko. Waa'i Siina'i udma'i uullanne Muse'ena «Leewi'i ooso moollinne moollinnee abaroosinnee annanni issitaa xige; qaramukkaanniinsi mat aganaa eehanniinsi hanaanii ihaa yoo goo'n ooso hundam xige» yukko. Ee bikkina Muse'e Waa'i saga'llisanne ijaajamaa xigukko. Leewi'ina sas goo'n oos hee'ukko; ixxuwwim Gershoonatte, Qa'aatattee Meeraarattee. Gershooninam Liibinaa Shimi'aa yamamoo lam goo'n oos hee'ukko. Qa'aatinam Amiriim, Yixihar, Keebiroonaa Uzi'eelaa yamamoo soor goo'n oos hee'ukko. Meeraarina Mahiliinaa Mushaa yamamoo lam goo'n oos hee'ukko. Ku keen ixxuwwi abaroosisinne Leewi'i shumo'ina anno'o. Libinikii Shimi'ikii abaroos Gershoon moolli hee'llo'o. Qaramukkaanniinsi mat aganaa eehanniinsi hanaanii ihu ixxuwwi goo'n oosik xig 7,500 hee'ukko. Gershoon moolli wiiddanukkok Keesammi Dukkaaniinsi afareen eelliinchi aagginnetti hee'ukko. Ixxuwwi moollo awwonsaanchim La'eel beet Eeliyaasaafatti hee'ukko. Gershoon moollik bax Keesammi Dukkaana, ee Dukkaa'nneka worinnee biirinnee yoo ifiishshaancho, Dukkaa'n goocika du'm eddechcha, ooxxi du'm eddechchuwwa, kiti'm beyyikaa kululleetanne yoo wixxixxi beyyi goocikaa du'm eddechcha, usseewwaa eekeeninne awwaaxxakkam luwwaa hundam egerimmi hee'ukko. Aamiraamik, Yixihaarik, Keebiroonikii Uzi'eelikii abaroos Qa'aat moolliinsetti hee'llo'o; ixxuwwim Qa'aat moolli hee'llo'o. Ixxuwwim Keesammi Dukkaana eggettam hee'llo'o; ixxuwwikim qaramukkanniinsi umur mat aganaa eehanniinsi hanaanii yoo goonik hundikim xig 8,600 hee'ukko. Ixxuwwi wiidda'n beyyim Keesammi Dukkaaniinsi woroo'n qarinnetti hee'ukko. Qa'aat moolli awwonsaanchim Uzi'eel beet Eelxaafaanatti hee'ukko. Ixxuwwim Hidi'l Saga'l Saaxina, xaraphpheeza, caakka caakkisakkam mu'uta, kiti'm beyyuwwa, Keesammi beyyonne awwaaxxakkam mu'uttuwwa, du'm eddechchuwwaa mulli awwaadoo mu'uttuwwaa hundam eggattam hee'llo'o. Leewi'i oosina hundinam lob awwonsaanchi Qeessichchi Aaroon beet Ali'aazaretti hee'ukko. Ixxim Keesammi beyyonne awwaaddam keenina hundinam awwonsaanchi hee'ukko. Mahiilikii Muushikii abaroos Meeraar moolli hee'llo'o; ixxuwwim Meeraar moollo. Ixxuwwikim qaramukkanniinsi umur mat aganaa eehanniinsi hanaanii yoo goonik hundikim xig 6,200 hee'ukko. Meeraar moolli awwonsaanchim Abihaayil beet Xuri'eelatti hee'ukko; ixxuwwi wiidda'n beyyim Keesammi Dukkaaniinsi hanaa'n qarinnetti hee'ukko. Ixxuwwi baxim Dukkaa'n saanquwwa, laqqo'uwwa, utubbuwwa, utubbuwwi uulloo lokkuwwa, Keesammi Dukkaa'n mu'utaa hundam eekeeninne maqire awwaaxxakkam mu'uttuwwaa hundam eggarimmi hee'ukko. Ee'isam wixxixxi beyyi kululleetanne yoo nottolluwwa, ixxuwwa uullisakam lokkuwwa, xiribbuwwaa dukkaana karakkam usseewwaa eggettam hee'llo'o. Muse'e, Aaroonii Aaroon oosii Keesammi Dukkaa'n illagenne eelliinchi fi'l kollinne widdantam hee'llo'o. Ixxuwwim Isra'ee'l ooso bikkitta'a Keesammi Dukkaana egerimmina uwwanto'oo keen hee'llo'o. Ixxuwwiinsi bagaan Keesammi Dukkaa'n kolli hincookkok ayyim lehinne guzumo'amookko. Waa'i ijaajukkisannem Muse'ee Aaroonii abaroosisinne xiggo'i Leewi'i goon oosik qaramukkaanniinsi umur mat aganaa eehanniinsi hanaanii yoo kee'nnek hundikim xig 22,000 hee'ukko. Waa'i Muse'ena «Umur mat aganaa eehanniinsi hanaanii yoo Isra'ee'lleka won ihu goo'n ooso hundam xiggaa summi summinne kitaabe. Won ihaa qaramu Isra'ee'l goo'n oos bikkenne Leewi'i ooso, won ihaa qaramu Isra'ee'l fooraam diinaxxi bikkenne Leewi'i oos fooraam diinate iihan issitaa masse. An Waa'a» yukko. Muse'em Waa'i ijaajukkisanne Isra'ee'lleka won ihaa qaramu goon ooso hundam xigukko. Qaramukkaanniinsi umur mat aganaa eehanniinsi hanaanii yoo won goonik hundikim summi kitaabamukkisanne xig 22,273 hee'ukko. Odim Waa'i Muse'ena «Won ihaa qaramoo Isra'ee'l goo'n oos bikkenne Leewi'i ooso iina annanni isse; ee'isam won ihaa qaramoo Isra'ee'l fooraam diinaxxi bikkenne Leewi'i oos fooraam diinate iina annanni isse. An Waa'a. Leewi'i oos xigiinsi Isra'ee'l won goo'n oos xig 273 lophphoo bikkina ee qax oos bikkenne diinate aa'e. Annannichchi bikkinnem Keesammi beyyi keennaanchonne onti kin bira aa'e. Ee aa'llitti diinatem Aarooninaa ixxi oosinaa uwwe» yukko. Muse'em Leewi'i oos xigiinsi hanaan ikka'a hee'llo'i 273 mannika wixxu tissi bira aa'ukko. Isra'ee'l won oosika Keesammi beyyi keennaanchonne 1,365 kin bira aa'ukko. Muse'em Waa'i ijaajukkisanne ee tissi bira Aarooninaa ixxi oosinaa uwwukko. Waa'i Muse'enaa Aarooninaa «Qa'aat shumo'insetti ikko'i Leewi'i ooso moolli moollinnee abaroos abaroosinnee xiggehe. Keesammi Dukkaananne awwaaddeena xantam umur sadii ki'isaa ontayyi afeebe'e yoo goo'n ooso hundam xiggehe. Ixxuwwi baxim ee Dukkaa'n woronne hee'oo keesammi mu'uttuwwa egerimma. «Minaadabim wiiddanto'i beyyiinsi ki'llam ammane Aaroonii ixxi oosii Dukkaa'n woro aagga'a Hidi'l Saga'l Saaxi'n illagenne yoo du'm eddechcha dilliissa'a ee Hidi'l Saga'l Saaxina xaaxxona. Cukkamaakkoo omachcho ee du'm eddechchanne eddeese; ixxi hanenne hagaroom xale'i shaano'i ihu eddechcha biddiqaa'lla'a eddeessona; wonnannuwwam aagissona. «Keesammi daabbo'o issakkam xaraphpheezanne shaano'i eddechcha ifiissona; ixxi hanennem saahinnuwwa, wocittuwwa, humbulluwwaa woyi'n diqaasa inkiirakkam mu'uttuwwaa dissitona; daabbo'im hundi ammanem bee'oobee'isa ee xaraphpheezanne dissitona. Ee hundam kashar eddechchinne iffiissa'a ee eddechchi hanenne odim cukkamaakkoo omachcho eddeessona; wonnannuwwam aagissona. «Shaano'i eddechcha massita'a caakka dissakkam mu'uta kuraazinnem, qapha, gii'l buchchi giggiroo mu'utaa wee'l zayixxi mu'uta hundam ifiissona. Caakka dissakkam mu'utaa ixxenne maqire awwaaxxakkam mulli mu'uttuwwaa hundam cukkamaakkoo ommachchinne xaaxxa'a iyyakkam xarbi hanenne dissitona. «Worqinne baxamaakkoo kiti'm beyyo shaano'i eddechchinne ifiissa'a cukkamaakkoo omachcho ixxi hanenne eddeessona; wonnannuwwam aagissona. Ee'isam Keesammi beyyonne awwaadoo mu'uttuwwa hundam massita'a shaano'i eddechchinne xaaxxona; cukkamaakoo omachchom ixxi hanenne eddeesakka'a dissakkam iyyakkam xarbi hanenne dissitona. Kiti'm beyyonne hee'oo gii'l buchcha fii'lla'a lasage kuul eddechcha eddeessona. Kiti'm beyyina awwaadoo mu'uttuwwa hundam midachchuwwa, qapha, giira hogoofakkam mu'uttuwwa loqooqo'i saahinnuwwa dissitona; cukkamaakkoo caraq omachchom eddeessona; wonnannuwwam aagissona. Wiiddanto'i beyyiinsi ki'llam ammane Aaroonii ixxi oosii Keesammi Dukkaa'n mu'uttuwwaa ee mu'uttuwwinne maqire awwaaxxakkam mu'utaa hundam xaaxxa'a ifiissa'a lasage Qa'aat oos waatta'a iyyitona; ihukkaarem letambee'isa keesammi mu'uta nakkitoone; Dukkaan ki'oo amman hundam Qa'aat oos bax eehane. «Qeessichchi Aaroon beet Ali'aazar caakkisimmina awwaaxxakkam zayta, danaamisa eenje'oo aduruusa, hundi ammanem hincoo hurbaaxxi kitima, laphphakkam zayta, Keesammi Dukkaanaa ixxi woronne yoo keesammi mu'utaa hundam egerona» yukko. Waa'i Muse'enaa Aarooninaa «Qa'aat oos Leewi'i moolliinsi annanni ikka'a bi'llamisa issitakkotte. Keesammiinsi keesammi bexxi mu'utanne hincitam ammane foorinne hee'llona bagaan letambee'isa isse; Aaroonii ixxi oosii Keesammi beyyo aaggona; annannichchim baxxam baxoo iyyitamokaa annanni issita'a kuttona. Ihukkaarem Qa'aat oos letambee'isa ee keesammi mu'uta hore'em moo'lleena aaggoone; aaggolas letamo» yukko. Waa'i Muse'ena «Gershoon shumo'i ikko'i Leewi'i ooso ixxuwwi moollinne moollinnee abaroosinne abaroosinnee xige. Umur sadiinsi ki'isaa ontayyi afeebe'e ihu Keesammi Dukkaananne awwaaddeena xantam goona hundam xige. Ixxuwwi baxim annanni annanni mu'uttuwwa iyyimma. Oohim Keesammi Dukkaa'nneka woro'llekaa ha'n eddechchaa, hanenne edakka'a eddeesakkam duugammi omachchoo Keesammi Dukkaana aagakkam gooc du'm eddechchaa iyyitamo. Ee'isam Keesammi Dukkaa'nnaannonnee kiti'm beyy kululleetanne yoo wixxixxi beyyikaa ee wixxixxi beyyo aagakkam goocikaa du'm eddechcha usseewwaa ee awwaadina qoodamu mu'uttuwwaa hundam iyyitamo; ee mu'uttuwwina hasisoo awwaado hundam awwaaddamo. Gershoon shumo'i ikko'i Leewi'i oosina qoodamu baxoo iyyoo hundam baxxona Aaroonii Aaroon oosii ijaajjona; ixxuwwi iyyitam mu'uta hundam at qooddootto. Gershoon shumo'i ikko'i Leewi'i oos Keesammi Dukkaananne awwaaddam awwaad eehane; odim eekka hundam Qeessichchi Aaroon beet ihu Itaamaar ijaajinne baxxamo» yukko. Waa'i Muse'ena «Meeraar shumo'i ikko'i Leewi'i ooso ixxuwwi moollinne moollinnee abaroosinne abaroosinnee xige. Umur sadiinsi ki'isaa ontayyi afeebe'e ihu Keesammi Dukkaananne awwaaddeena xantam goona hundam xige. Keesammi Dukkaananne awwaaddam ammane saanquwwa, loqqo'uwwa, utubbuwwaa Keesammi Dukkaana uullisakkam lokkuwwaa iyyitamo. Ee'isam wixxixxi beyyi kululleetanne yoo nottolluwwa uullisakkam lokkinnem xiribbuwwa, usseewwa, eekeeninne maqire awwaaxxakkam mu'uttuwwaa hundam iyyitona; annannichchinam summinne summinne baxxansitaa uwwe. Meeraar shumo'i ikko'i Leewi'i oos Keesammi Dukkaananne uwwitam awwaad kane; ku hundim qeessichchi Aaroon beet ihu Itaamaar awwonsatinne baxamookko» yukko. Muse'e, Aaroonii moolli awwonsaanii Qa'aat shumo'o moollinne moollinnee abaroosinne abaroosinnee xiggo'o. Umur sadiinsi ki'isaa ontayyi afeebe'e ihu Keesammi Dukkaananne awwaaddeena xantam goona hundam xiggo'o. Moollinne moollinne xiganto'i manni 2,750 hee'llo'o. Oohim Waa'i ijaajukkisanne Muse'ee Aaroonii Qa'aat shumo'iinsi xiggo'i Keesammi Dukkaananne awwaaddo'i manni xigo. Gershoon shumo'i moollinne moollinnee abaroosinne abaroosinnee xiganta'a hee'llo'o. Umur sadiinsi ki'isaa ontayyi afeebe'e ihu Keesammi Dukkaananne awwaaddeena xantam goona hundam xiggo'o. Moollinne moollinne xiganto'i manni 2,630 hee'llo'o. Oohim Waa'i ijaajukkisanne Muse'ee Aaroonii Gershoon shumo'iinsi xiggo'i Keesammi Dukkaananne awwaaddo'i manni xigo. Meeraar shumo'i moollinne moollinnee abaroosinne abaroosinnee xiganta'a hee'llo'o. Umur sadiinsi ki'isaa ontayyi afeebe'e ihu Keesammi Dukkaananne awwaaddeena xantam goona hundam xiggo'o. Moollinne moollinne xiganto'i manni 3,200 hee'llo'o. Oohim Waa'i ijaajukkisanne Muse'ee Aaroonii Meeraar shumo'iinsi xiggo'i Keesammi Dukkaananne awwaaddo'i manni xigo. Ee bikkina Muse'e, Aaroonii Isra'ee'l awwonsaanii Qa'aat shumo'o moollinne moollinnee abaroosinne abaroosinnee xiggo'o. Umur sadiinsi ki'isaa ontayyi afeebe'e ihu Keesammi Dukkaananne awwaaddeenaa iyyiteenaa xantam goo'n xig 8,580 hee'ukko. Waa'i Muse'ena uwwu ijaaccisanne annannichchim awwaaxxekaa iyyimmikaa bax sharada a'llito'o. Ee bikkina Waa'i ijaajukkisanne Muse'e ixxuwwa xigukko. Waa'i Muse'ena «Daba'llamoo oddomachchi jabbi yoo mancho te'im orachchiinsi daadoo luwwi firoo manchoo leeshaa nakkaa see'llisanne haashaaramu mancho wiiddaniinsi tochchonne fissitamisina Isra'ee'l ooso ijaaje. Goonam ihukko meento fissehe. I minaadaphphi lambe'enne an hee'oommi wiiddana haashaassitambee'isa ee wiiddaniinsi fissehe» yukko. Waa'i Muse'e ijaajukkisannem Isra'ee'l minaadab eehido'i manna wiiddaniinsi fissito'o. Waa'i Muse'ena «Isra'ee'l minaadabina ‹Goonam ihukko meenti ayyi manchim hinka'isinnem mulleka hawwoduta'n ee mashka'inne Waa'ina amma'nnamaakkoohan ihimma hooguta'n oo manchi hawwodaakkoohane. Oo manchi ixxi baaxiilo biiraa yihona; ee hawwojji bikkina miqimmi hasisoo bitonne xibbiinsi lamiyyi suume edaa hawwodamu manchina miqona. Ihukkaarem oo hawwodamu manchi lehuta'nnii ee miqo'om ixxeensi aa'oo abbis qarmanchi bee'uta'nnii oo miqo'i Waa'ina uwwamukkaansanne xigamaa baaxii'l haafitina kitim ihaa Waa'ina hincoo gereechchi ambulinne maqirem qeessichchina uwwamona. Isra'ee'l oos eebbam keesamaakkoo uwwanchi hundim eekka aa'u qeessichchina sharad ihookko. Annannichchim hincaa'oo keesamaakkoo uwwanchi qeessichchan ihona; qeessichchina uwwakkamok hundim ixxi gulummi ihookko› yihe» yukko. Ee lasage Waa'i Muse'ena «Isra'ee'l minaadabina ‹Mat manchite meentichcho mullaannonne tiiro massita'a is aro'ina amma'nnancha hooggota'n mulli goonchinnem saa'lla'a oo woshshi anganga la'amoo'n is aro'iinsi daphphuta'n naaqaash bee'aa haashaaranto'is la'amubeeta'n oo meentichcho haashaaranta'a te'im haashaarantoo'nnim is aro'i to'achchimminne malamulas ee meentichcho qeessichchi beyyo massona; ixxim is bikkina mat kiilo'i so'i qama kitimina hincaa'ona; oohim hawwojja moo'isoo kitim ihu bikkina ixxonne wee'l zayta dunoone aduruusam edoone. «Qeessichchim ee meentichcho hincaa'aa Waa'i illagenne uullitamisa issona. Keesamaakkoo wo'o buchchi mu'utanne inkiirona; Keesammi Dukkaananne gaxiinsi hofqax buchcham aa'aa ee wo'onne issona. Oo qeessichchi ee meentichcho Waa'i illagenne uullisona; is horooriinsim shaashsha hooraa ee hurbaaxxi kitima is anganne amadiisona; duuncha eeboo qaraaraalli wo'o ixxi anganne amadona. Qeessichchim ee meentichcho ‹At aro'o uttaa mulli goonanne tiiro dabattaa ee gooninne iinse'lloo'nnoolasii ki gaga haashaassitoo'nnoolasii duuncha eeboo ku qaraaraalli wo'i keese hawwodoone. Ihukkaarem ki aro'i hee'onam mulli goonchonne tiiro dabattaa ee goonchinne iinse'llaa ki gaga haashaassitaattoolas Waa'i ki gubeedo shiihisaa ki godabo fugaa ki minaadaphphi lambe'enne duunchinaa hidirinaa ikkoo'isa issona. Duuncha eeboo ku wo'i ki godabonne aagaa fugona; ki gubeedom shamsona› yaa hidiisona. «Oo meentichchom ‹Aameen, aameen, Waa'i eekka eesenne issona› yita'a dabattamo. «Ee lasage oo qeessichchi ee duunchi sagara kitaabookko; kitaabamukkokam aanshaa qaraaroo wo'i yoo buchchi mu'utanne issookko. Oo meentichcho kee'mmaalli jabbo eeboo wo'o aggamisa isseena gaassaa qeessichchi Waa'ina hincoo hurbaaxxi qama meentichchi angiinsi aa'aa Waa'ina iimii aadii wonciwoncaa'akka'a hincaa'akkam annanni kitim ihoo'isina kiti'm beyyonne hincaa'ona. Ee lasage Waa'ina annanni ihaa hincu hurbaatiinsi mat oobo'o massaa Waa'ina hincoo hurbaaxxi tissiishshi ihona kiti'm beyyonne shokkiisona; ee lasage oo meentichcho ee wo'o aggamisa issona. Oo meentichcho is gaga haashaassitu'uuyyi is gooncho utta'a mullaanninne saa'llo'oohan ihulas oo wo'i kee'mmaalli jabbo isenne eebookko; oohim iseka godabo dashshisookko; is goosim kottookko; is summim minaadaphphi lambe'enne duumamaakkoohan ihaa gatookko. Ihukkaarem oo meentichcho hawwojja maham issitoo'n yo'i muccuratti ikkolas matem hawwodanchim isenne afooyyo; oosom qatteena xantamo. Is aro'im hawwojjiinsi muccur ihookko; ihukkaarem oo meentichcho saa'llo'oohan ihulas is hawwojji mashka'inne waaroo hawwo aa'llamo» yukko. Waa'i Muse'ena «Isra'ee'l minaadabina ‹Goonchi te'im landichcho gaga iina annanni issaa Naazirakkichchi iheena uga'a aagulas Woyi'n diqaasa te'im dimbisoo agga agoone; woyi'nneka te'im mulli luwwika ayyi shiishaalli aggam agoone; ciinsakko'i woyina agoone; aashaallam ihukko gogaalli woyi'n misha itoone. Ixxi gaga Naazirakkichchi issaa yoo ammanenne woyi'n mishika hobara te'im illichcho itoone. «‹Uga'a aagu qax ammanenne horoore hogoossiisoone; Naazirakkichchi ihimmi amman beeddeebe'e ixxi gaga iina keesaakkoohane; ee bikkina ixxi horoore li'isona. Ee ixxi gaga annanni issu qax ammanenne leeshshanne hincoone. Ixxi Waa'ina aagu uga'ik mare'i ixxi horoorenne yoo bikkina anni te'm ama abbaayyi te'im aayya lehamoo ammane ixxuwwika leesha nakkaa ixxi gaga haashaassoone. Naazirakkichchi ihu qax ammanenne ixxi Waa'ina annanni ihaakkoohane. «‹Dangonne mat manchi ixxi gadanonne lehaa ixxeka keesamu horoore haashaassulas ixxi gaga muccussoo lama'l ballanne ee horoore hogoossaqqona. Sadeenti ballanne lam handare'i geexxuwwa te'im lam handare'e Keesammi Dukkaa'n goocanne yoo qeessichchi beyyo eebona. Qeessichchim eekeeniinsi mato baaxii'l haafixxi kitimina la'mmekam shokkiisakka'a hinca'akkam kitimina issaa hincaa'imminne oo Naazirakkichchi leesha nakkaa haashaaramu bikkina haafissiisookko. Ee ballam oo Naazirakkichchi ixxi horoore odim iina annanni ihaakkoohan issookko. Naazirakkichchi ihaa awwaadeena ixxi gaga odim iina annanni issookko; iina keesamaa hee'u horoor haashaaramu bikkina Naazirakkichchi ihaa hee'u doolli xigamooyyo. Ee ixxi hawwojji kitimina ihoo mat hiinchi gereechchi ambula eebona. «‹Mat Naazirakkichchi ihaa ixxi gaga annanni issu manchi aagu uga'a guulloo ammane egeroo seer kane; oo manchi Keesammi Dukkaa'n goocanne hincihona. Ee goocannem iina kitima hincaa'ona. Oohim shokkiisakka'a hincaa'akkam kitimina mat hiinchi gereechchi ambula, baaxii'l haafixxi kitimina miiqakkam luwwi bee'i mat gereechchi geexaa mateeyyoo'm kitimina mat gereechchi ambulaa hincaa'ona. Odim ursho'i exxoo'n saramu mat leemaat qorosho'o, wee'l zaytinne cukkamaa danaam qaminne saramaakkoo xuruuro'uwwa, wee'l zayti labamaakkoo caraq qorosho'oo hincoo hurbaaxxi kitiminnee aggi kitiminnee maqirem hincaa'ona. «‹Qeessichchi ee hundam baaxii'l haafitinaa shokkiisakka'a hincaa'akkam kitiminaa ihona i illagenne hincaa'ona. Gereechchi ambula leemaaxxi qorosho'inne maqirem mateeyyoo'm kitim issaa iina hincaa'ona; ee lasage hurbaaxxekaa aggikaa kitima hincaa'ona. Naazirakkichchi iheena ixxi gaga annanni issu manchi Keesammi Dukkaana aagakkam goocanne ixxi horoore hogoossona; ee horoorem massaa ee mateeyyoo'm kiti'm giiranne edona. «‹Oo Naazirakkichchi ixxeka keesamu horoore hogoossaa lasage qeessichchi ee gereechchi ambu'lleka li'aalli hayyi maara leemaatanne yoo qorosho'iinsi matoo caraqisakka'a sarakko'i qorosho'ika matoo edaa ee naazirekkichchi anganne massaa issona. Ee lasage qeessichchi ee hundam wonciwoncaa'akka'a iina hincaa'akkam kitim issaa hincaa'ookko; oo hundim qeessichchina sharad ihaa ki'oo gereechchi ambu'l eeddiraasinnee hayyi maarinnee maqirem qeessichchina keesamaakkoo sharad ihookko. Ee lasage Naazirakkichchi woyi'n diqaasa ageena xanookko. «‹Naazirakkichchi aagu uga'isanne ixxi siidoohaanniinsi mulleka iina hincaa'oo kiti'm seer kane; uga'a aagukkisannee Naazire'oo'm see'llisannee guullaa issona› yitaa kure» yukko. Waa'i Muse'ena «Aaroonii ixxi oosii Isra'ee'l minaadaba maasse'llam ammane ‹Waa'i keese maasse'onaa egeronaa; Waa'i ixxeka ille kiina caakkisonaa kiina qishixxonaa. Waa'i ixxeka ille ki kollonne dabaronaa xummam kiina uwwonaa› yita'a maasse'llona kure» yukko. Odim Waa'i «Ee'isinne iikka summa weeshsha'a Isra'ee'l minaadaba maasse'llolas anim ixxuwwa maasse'oommo» yukko. Muse'e Keesammi Dukkaana kaasaa guullaa lasage Dukkaanaa ixxenne awwaaxxakkam mu'utaa, kiti'm beyyoo ee beyyonne ixxenne awwaaxxakkam mu'utaa zayta labaa keesamaakkoohan issukko. Ee lasage Isra'ee'l sulluwwa awwonsaan ikko'i oohim minaadab xigamu ammane awwonsaan hee'llo'i keen hundim lam lam awwonsaa'n summinne mat mat faraxxi gaarre'ee awwonsaan annannichchim mat mat baaraa ihaa hundoomim loh faraxxi gaare'ee tommoo lam baaraa Waa'ina uwwito'o. Ee keenom Keesammi Dukkaa'n illagenne hincaa'llo'o. Waa'i Muse'ena «Keesammi Dukkaananne ihoo awwaadina ihona kakeeno aa'e; Leewe'i oosina annannichchinam ixxuwwi awwaadina hasisoo qaxa qooddaa uwwe» yukko. Ee bikkina Muse'e ee faraxxi gaare'uwwaa baalluwwaa aa'aa Leewi'i oosina uwwukko. Ixxim Gershoon abaroosina ixxuwwi awwaaxxisinne lam faraxxi gaarre'ee soor ba'araa uwwukko. Meeraar abaroosina soor faraxxi gaarre'ee sadeenti ba'araa ixxuwwi awwaaxxisinne uwwukko; ixxuwwa awwonsookkokim Aaroon beet Itaamaaratte hee'ukko. Ihukkaarem Qa'aat abaroos Keesammi mu'uta egettamanee gudumonne iyyitamanee ihu bikkina Muse'e ixxuwwina maham uwwukkoyyo. Odim oo awwonsaan kiti'm beyyi keesamoo ugudina ihoo luwwa eebba'a kiti'm beyyi illagenne hincaa'llo'o. Waa'i Muse'ena «Tommonnee lamem balli woronnee ballina ballina tommiinsii lamem awwonsaanchiinsii mat ee kiti'm beyyi keesanchi ugudina ihoo luwwa hincaa'oo'isina kure» yukko. Luxxi ballina ihoo luwwa uwwukkok Yihud sulliinsetti ihu Aminaadaab beet Na'aasoonatte. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo saahinaa sadeenti xibbi giraama kee'mmoo biriinsi baxamaakkoo wocitaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwa, onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Aminaadaab beet Na'aasoon hincaa'u kitim eehan hee'ukko. La'm ballina ihoo luwwa hincaa'ukkok Yisaakoor sulli awwonsaanchi ihu Xu'aar beet Naatinaa'eelatte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo saahinaa sadeenti xibbi giraama kee'mmoo biriinsi baxamaakkoo wocitaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwaa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Xu'aar beet Naatinaa'eel hincaa'u kitim eehan hee'ukko. Saxxi ballina ihoo luwwa hincaa'ukkok Zaabiloon sulli awwonsaanchi ihu Heeloon beet Eeli'aabatte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fillakkichchi ambula mateeyyoo'm kitimina ihoo lam baalluwwa, onti gereebbi ambulluwwaa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Heeliyoon beet Eeli'aab hincaa'u kitim eehan hee'ukko. Soo'l ballina ihoo luwwa hincaa'ukkok Roobeel sulli awwonsaanchi Sadiyoor beet Eelxuuratte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambul hee'ukko. Baaxii'l haafixxi kitimina mat fillakkichchi ambula mateeyyoo'm kitimina ihoo lam baalluwwa, onti gereebbi ambulluwwa, onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Sadiyoor beet Eelxuur hincaa'u kitim eehan hee'ukko. Onti ballina ihoo luwwa hincaa'ukkok Simi'oon sulli awwonsaanchi Xurshaadaay beet Shalumi'eelatte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo saahin ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fillakkichchi ambula, mateeyyoo'm kitimina ihoo lam baalluwwa, onti gereebbi ambulluwwa, onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Xurshaadaay beet Shalumi'eel hincaa'u kitim eehan hee'ukko. Loh ballina ihoo luwwa hincaa'ukkok Gaad sulli awwonsaanchi Raagu'eel beet Eeliyaasaafatti hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwaa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Raagu'eel beet Eeliyaasaaf hincaa'u kitim eehan hee'ukko. Lama'l ballina ihoo luwwa hincaa'ukkok Efireem sulli awwonsaanchi Amhuud beet Eelishaamatte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwa, onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Amhuud beet Eelsaam hincaa'u kitim eehan hee'ukko. Sadeenti ballina ihoo luwwa hincaa'ukkok Minaas sulli awwonsaanchi ihu Fidaaxuur beet Gamaali'eelatti hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwa, onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Fidaaxuur beet Gamaal'eel hincaa'u kitim eehan hee'ukko. Honsi ballina ihoo luwwa hincaa'ukkok Biiniyaam sulli awwonsaanchi ihu Gidaa'oon beet Abiidaanatte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Biiniyaam sulli awwonsaanchi ihu Gidaa'oon beet Abiidaan hincaa'u kitim eehan hee'ukko. Tommi ballina ihoo luwwa hincaa'ukkok Daan sulli awwonsaanchi Amiishaadaay beet Aki'eezeratte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwaa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Daan sulli awwonsaanchi Amiishaadaay beet Aki'eezer hincaa'u kitim eehan hee'ukko. Tomminaa mat ballinaa ihoo luwwa hincaa'ukkok Aseer sulli awwonsaanchi ihu Eekiraan beet Faagi'eelatte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwaa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Ekiraan beet Faagi'eel hincaa'u kitim eehan hee'ukko. Tomminaa la'm ballinaa ihoo luwwa hincaa'ukkok Niftaaleem sulli awwonsaanchi ihu Eenaan beet Ahiira'atte hee'ukko. Oohim Keesammi mi'n keennaanchonne mat kilo'oo kolloo ihoo kin birinne baxamaakkoo wocitaa sadeenti xibbi giraama kee'mmoo biriinsi baxamaakkoo loqooqo'i saahinaa ihukkuuyyi lamim hurbaaxxi kitimina ihoo zaytinne cukkakko'i qaminne wo'mmaakkoohan hee'ukko. Ee'isam xibbee tommi giraamaa ihoo worqinne baxamaakkoo cilfi ihaa ixxim aduruusinne wo'mmaakkoohan hee'ukko. Shokkiisakka'a hincaa'akkam kitimina ihoo mat labeena, mat gereechchi ambulaa mat hiinchi gereechchi ambulaa hee'ukko. Baaxii'l haafixxi kitimina mat fellakkichchi ambula mateeyyoo'm kitimina ihoo lam baalluwwa, onti gereebbi ambulluwwa onti fella'i ambulluwwaa mat hiincho ihaakkoo onti gereebbi ambulluwwaa hee'ukko. Ee'isinne Eenaan beet Ahiira'i hincaa'u luwwi eehan hee'ukko. Isra'ee'l awwonsaan kiti'm beyyonne zayti labamu balla oo kiti'm beyyi keesamona hincaa'llo'i luwwi ka keen hee'ukko. Oo keenim kin birinne baxamaakkoo tommoo lam wocita, kin birinne baxamaakkoo tommoo lam loqooqo'i saahinnuwwaa tommoo lam worqinne baxamaakkoo cilfuwwaa. Keesammi mi'n keennaanchonne kin birinne baxamu wocittuwwi annannichchim mat kiilo'oo kolloo kee'mmoohanee loqooqo'i saahinnuwwi annannichchim sadeenti xibbi giraama kee'mmoohanee ihaa kin birinne baxamu saahinnuwwi hundoomim Keesammi mi'n keennaanchonne lamiyyee sadeenti kilo'oo kee'mmoohan hee'ukko. Aduruus wo'mmu tommii lamem worqi cilfuwwi annannichchim Keesammi mi'n keennaanchonne mat xibbee lamiyyi giraamaa kee'mmoohan ihaa worqi cilfuwwi hundoomim mat kilo'oo soor xibbee sor giraamaa kee'mmoohan hee'ukko. Shokkiisakka'a hincaa'akkam kitimina hincu fooraam diinaxxi kitimaa hurbaaxxi kitimaa edaa hundoomim tommoo lam labeennuwwa, tommoo lam gereebbi ambulluwwa, mat hiinchi ihaakkoo tommoo lam gereebbi ambullaa baaxii'l haafixxi kitimina hincu tommoo lam fella'i ambulluwwaa hee'ukko. Mateeyyoo'm kitimina lamiyyee soor baalluwwa, lohayyi gereebbi ambulluwwa, lohayyi fella'i ambulluwwaa mat hiincho ihaakkoo lohayyi gereebbi ambulluwwaa eebbo'o. Kiti'm beyyonne zayti labamaa lasage maasse'amaa uwwamu luwwi eehan hee'ukko. Muse'e Waa'inne atoorareena Keesammi Dukkaa'n woro aagu ammane Waa'i kiruubeela yakkam asse'amaa'n lambe'enne yoo Hidi'l Saga'l Saaxi'n ifiishshaanchiinsi hanaan ihaa wocukkuuyyi macceesukko. Ixxim atoorassukko. Waa'i Muse'ena «Lamarem caakkuwwam caakka dissakkam mu'utanne dissoo ammane eehanni caakki illaqqi kollo caakkisoo'isa issaa dissona Aaroonina kure» yukko. Aaroonim ee'isa issukko; Waa'i Muse'e ijaajukkisannem ee caakka dissakkam mu'uxxi illagenne caakkisoo'isa issaa dissukko. Oo caakka dissaakkam mu'utim Waa'i Muse'ena moo'isukkisanne lugumiinsi ki'isaa fiitanne afeebe'e tumammi worqinne baxamaakkoohan hee'ukko. Waa'i Muse'ena «Isra'ee'l oosiinsi Leewi'i ooso annanni issitaa muccusse. Oohim muccurimmi seerina gudu wo'o ixxuwwanne kife; ixxuwwi orachchi hundam hogoossitona; ixxuwwi eddechcha aansha'ita'a gagam muccussaqqitona. Ee lasage mat labeenaa hurbaaxxi kitimina gudu zaytinne cukkammaakkoo qamaa hincaa'llona; atim baaxii'l haafixxi kitimina ihoo mulli labeena hincaa'e. Ee lasage Isra'ee'l minaadaba hundam wixxaa'llaa Leewi'i ooso keesammi Dukkaa'n illagenne uullitamisa isse. Leewi'i ooso Waa'i illagenne hincaa'lloohaare Isra'ee'l minaadabim ixxuwwi Leewi'i oos horoorenne anga issitona. Leewi'i oos Isra'ee'l minaadabiinsi iina Waa'ina wonciwoncaa'akka'a hincaa'akkam kiti'mmisa ikka'a hincimminne awwaaddamisina Aaroon Waa'i illagenne hincaa'ona. Ee lasage Leewi'i oos ixxuwwi anga lamem labee'n horoorennem issitona; atim matoo baaxii'l haafitina la'mmeka shokkiisakka'a hincaa'akkam kitim issitaa iina hincaa'e. Leewi'i oos baaxii'l haafitina hincoo kitim ee'isinne ihookko. «Ee lasage Leewi'i ooso Aaroonaannonnee ixxi oos illagennee uullise; Leewi'i ooso iina wonciwoncaa'akka'a hincaa'akkam kiti'mmisa issitaa Waa'i illagenne hincaa'e. Ee'isinne Leewi'i ooso Isra'eeliinsi annanni isse; ixxuwwim iihan ikkamo. Ixxuwwa muccussitaahii keessaahii lasage Leewi'i oos Keesammi Dukkaananne awwaaddeena xantamo. Ixxuwwi Isra'ee'l oos lambe'iinsi hore'em iina uwwanto'oohan ihu bikkina Isra'eeliinsi qaramoo won goo'n oos bikkenne i gaqqan issaa a'llaammo. Gibxika won ihaa qaramu goona hundam shummi ammane hundem Isra'ee'l minennem qaramoo mannik te'im diinaxxekee wona hundam keesaa iihan issaammo. Ee bikkina kaba Isra'ee'l oos won bikkenne Leewi'i ooso annanni issaammo. Isra'ee'l minaadaba bikkita'a Keesammi Dukkaananne awwaaddonaa Isra'ee'l oosim keesammi beyyo hincimminne aphphixxitambee'isa haafissiissonaa Leewi'i ooso Isra'ee'liinsi Aarooninaa ixxi oosinaa uwwaammo» yukko. Ee bikkina Waa'i Muse'e ijaajukkisannem Muse'e, Aaroonii Isra'ee'l minaadabii hundim Leewi'i ooso keesso'o. Leewi'i oosim ixxuwwi gaga muccussito'o; ixxuwwi eddechcham aanshito'o. Aaroonim ixxuwwa wonciwoncaa'akkam kiti'mmisa Waa'i illagenne hincaa'ukko; muccuttamisam haafissiisukko. Waa'i Leewi'i oos bikkina Muse'enne ihaa uwwu ijaaccisanne minaadab hundem luwwam issito'o; Leewi'i oosim Aaroonii ixxi oosii ijaajjamisinne Keesammi Dukkaananne awwaaddeena guddo'o. Waa'i Muse'ena «Umur lamiyyee onti hiinchoo eehanniinsi hanaanii ihu Leewi'i goo'n oos hundim Keesammi Dukkaananne awwaaddona. Ihukkaarem ontayyi hiincho ihaa lasage awwaado uullissona; ee lasage od baxxoone. Ixxuwwi abbaayyuwwi ikko'i mulli Leewi'i oos Keesammi Dukkaananne awwaaddam awwaadonne hara'mmaan ikkona; ihukkaarem ixxuwwi mulla maham baxxoone; ee bikkina Leewi'i oosika awwaaxxi ogora amadiissoottok ee'isinnette» yukko. Isra'ee'l oos Gibxi uulliinsi fitto'i la'm hiinchaannonne luxxi agananne Waa'i Muse'ena siina'i udma'anne, «Isra'ee'l oos qoodamu ammanenne Shaashshiqqi uguda lonsitamisa isse. Ku agan aagu tommonnee soo'l ballannee eelliinchi aagoo ammanniinsi ki'isaa see'llisannee ogo'llisannee lonsitona» yukko. Muse'em Shaashshiqqi Uguda lonsitona Isra'ee'l minaadabina kurukko. Ixxuwwim luxxi agan aagu tommonnee soo'l ballannee eelliinchi aagoo ammanenne Siina'i udma'anne ee uguda lonsito'o; Isra'ee'l minaadab Waa'i Muse'e ijaajukkisanne hundem luwwam issito'o. Ihukkaarem hofqax mannim leesha nakkita'a haashaaranto'oo bikkina ee balla Shaashshiqqi Uguda lonsiteena xanto'oyyo. Ee bikkina ixxuwwi ee ballam Muse'e beyyoo Aaroon beyyoo hincita'a, «Neese leeshsha nakkinaa haashaarammaammo; ihukkaarem gatto'i Isra'ee'l oosinne maqire qoodamu ammanenne Waa'ina kitima hincaa'nneena hoorakko'ok mahinatte?» yito'o. Muse'em «Waa'i ki'nnuwwi bikkina kuroo ijaajo macceeseembe'e egallehe» yukko. Waa'i Muse'ena «Isra'ee'l oosina ‹Ki'nnuwwi shumo'iinsi ayyim leesha nakkaa haashaaramulas te'im qee'l uulla marukkuuyyi googonne ihaa Shaashshiqqi Uguda lonsona. Oohim la'm agan aagu tommonnee soo'l ballannee eelliinchi aagaa lasage ee uguda lonsona; ee uguxxi gereechchi maaram urshobee'i qorosho'innee qaraaroo buyyinnee itona. Uulli soodeebe'e ee hurbaatiinsi maham gatisoone; ee gereechchika miqe maham iiqoone; ayyim Shaashshiqqi Uguda lonsoo ammane uwwamu seera hundam egerimmi hasisookko. Ihukkaarem see'llisanne muccur ihu manchi te'im qee'l googo taakke'ubee'i ayyi manchim Shaashshiqqi Uguda lonsoo'n gatulas Isra'ee'l minaadabiinsi annanni ihaa bi'ona; iina hasisoo kitima qoodamu ammanenne hincaa'ubee'i bikkina ixxi baaxiilina laboo guzumo'o aa'ookko. «‹Ki'nnuwwinne hee'oo waaraanchi Waa'ika Shaashshiqqi Uguda lonseena hasulas qoodamu see'llisinnee ogo'lliisinnee lonsona; uulli beetinam ihukko waaraanchina ihoo seer matome› yihe» yukko. Keesammi Dukkaan kaasamu balla duub ee dukkaana ifiisukko; maaro'iinsi ki'isaa uulli soodeebe'e Dukkaa'n hanenne gii'llisa caakkisam hee'ukko. Balla duub Keesammi Dukkaana ifiisam hee'ukko; oo duubim hiimonne gii'llisa caakkisam hee'ukko. Oo duub Dukkaaniinsi ki'oo ammane Isra'ee'l oos wiiddanto'i beyyiinsi ki'lla'a dooyyitam hee'llo'o; oo duub dilloo beyyonne odim wiiddantam hee'llo'o. Isra'ee'l oos mat wiidda'n beyyo fatakitamok te'im mulli beyyonne wiiddantamok Waa'i ijaaccisinnetti hee'ukko. Duub Dukkaana ifiisaa yoo qax ammane ixxuwwim ee wiiddanto'i beyyiinsi mikmiktam hee'llo'oyyo. Duub dukkaana ifiisaa lobakat ammane afuurulas Isra'ee'l oos Waa'ina ijaajanta'a egettamo bagaan mikmiktam hee'llo'oyyo. Mat mat ammane duub dukkaana ifiisookkok xale'i hofqax ballinatti hee'ukko; ihukkaarem ixxuwwi wiiddantamanem ihukko dooyyitamok Waa'i ijaaccisinnetti hee'ukko. Mat mat ammane duub maaro'iinsi ki'isaa soodeebe'e xale'e afuuram hee'ukko; duub daram ki'oo ammane ixxuwwim ki'lla'a dooyyitam hee'llo'o; ballam ihukko hiimo duub ki'u amman hundam ki'lla'a dooyyitam hee'llo'o. Duub lam ballam ihukko mat agana te'im mat hiinchina Dukkaa'n haniinsi ki'ubeelas Isra'ee'l oos wiiddanto'i beyyiinsi mikmikitamoyyi hee'llo'o; ihukkaarem duub ki'u amman hundam dooyyitam hee'llo'o. Dukkaana kaassa'a wiiddantamokii wiiddanto'i beyyo fatakita'a dooyyitamokii Waa'i Muse'ena uwwu ijaaccisinnetti hee'ukko. Waa'i Muse'ena «Isra'ee'l minaadaba wixxaa'lleenaa wiiddanto'i beyyiinsim dooyyitona kutteenaa lam xurumba tumamaakkoo kin birinne baxe. Lamem xurumbim fugamoo ammane minaadab hundim Keesammi Dukkaa'n gooccanne ki gadanonne wixxitona. Ihukkaarem xurumbik mat fugamoo ammane Isra'ee'l sulli awwonsaan xale'i ki gadanonne wixxitona. Xurumbi shiqaakkoo sagarinne fugamoo ammane eelliinchi firinne wiiddanto'i sulli dooyyitona. Xurumbi la'mmaagge shiqaakkoo sagarinne fugamoo ammane odim woroo'n qaranne wiiddanto'i sulli dooyyitona. Xurumbi shiqqeen sagarinne fuganchi dooyya asheerimmina mare'i ihookko. Minaadaba wixxaa'immina xurumbi hoffi sagarinne fugamona. Ee xurumbuwwa fuggamok qeessuwwi ikko'i Aaroon ooso. Oohim ki'nnuwwi oos oosonne afeebe'e heer heerina hee'oo seera. Ki'nnuwwi uullanne ki'nnuwwinne uullixxamoo diina'inne orantakkeena fittakkam ammane sagara iimaa'llakka'a ee xurumbuwwa fuggehe; ee ammane an ki'nnuwwi Moollanni Waa'i ki'nnuwwa sawwoommo; ki'nnuwwi diina'iinsim gatisoommo. Ee'isam ki'nnuwwi liirantakkam aga'n aaggi ugudanne, qoodamaakkoo annanni annanni ugudduwwannee ee'isam shokkiisakka'a hincaa'akkam kitimaa mateeyyoo'm kitimaa hincaa'llakkam ammanee ee xurumbuwwa fuggehe. Oo xurumbuwwim ki'nnuwwa iina tiissiissoohan ihookko. An Waa'i ki'nnuwwina Moollanna» yukko. Isra'ee'l oos Gibxiinsi fitto'i la'm hiinchonne, la'm agan aagu lammiyyi ballanne Keesammi Dukkaa'n haniinsi duub ki'ukko. Isra'ee'l oosim moolli moollisinne Siina'i udma'i uulliinsi ki'lla'a matto'o; duubim Faaraa'n udma'i uullanne uullukko. Isra'ee'l oos Waa'i Muse'ena uwwu ijaaccisinne luxxi ammi'n dooyya asheetto'o. Yihuxxi sulli baxxanchi ixxuwwi mare'isanne gaassaa dooyyukko; ixxuwwi awwonsaanchim Aminaadaab beet Na'aasoonatte hee'ukko. Yisaakoor sulli awwonsaanchi Xu'aar beet Naatinaa'eelatti hee'ukko Zaabiloon sulli awwonsaanchi Heeloon beet Eeli'aabatti hee'ukko. Ee lasage Dukkaanim ki'ukko; ee Dukkaanam Gershoonikii Meeraar moollii iyyita'a dooyyito'o. Roobeel sulli baxxanchi ixxuwwi mare'isanne awwonta'a dooyyito'o; ixxuwwi awwonsaanchim Sadiyoor beet Eelxuuratti hee'ukko. Simi'oon sulli awwonsaanchi Xurishaadaay beet Shalumi'eelatti hee'ukko. Gaad sulli awwonsaanchi Raagu'eel beet Eeliyaasaafatti hee'ukko. Ee lasage Leewi'i sulli ihu Qa'aat moolli keesammi mu'uta iyyaa dooyyukko; ixxuwwi affeebe'em Dukkaan kaasamaa hee'ukko. Ee lasage Efireem sulli ixxuwwi mare'isanne awwonaa dooyyukko; ixxuwwi awwonsaanchim Amhuud beet Eelshaama'atti hee'ukko. Minaas sulli gogoxxi awwonsaanchi Phedaaxuur beet Gamaali'eeletti hee'ukko. Biiniyaam sulli awwonsaanchi Giidi'oon beet Abiidaanatti hee'ukko. Lasaanchonnem Daan sulli ixxuwwi mare'isinnee hundem baxxanchinam afare egeraanni ihimminnee lasaanchonne dooyyukko; ixxuwwi awwonsaanchim Amiishaadaay beet Ahi'eezeratti hee'ukko. Aseer sulli awwonsaanchi Okiraan beet Faagi'ii'eelatti hee'ukko. Niftaaleem sulli awwonsaanchi Eenaan beet Ahii'ira'atti hee'ukko. Isra'ee'l oos wiiddanto'i beyyiinsi ixxuwwi baxxanchisinne awwo'nnanta'a dooyyitamok ee'isinnetti hee'ukko. Muse'e ixxena balli hee'u Miidiyaa'm uulli Raagu'eel beet Hoobaabina «Oono'o, Waa'i niina uwweena sagara aagu uulla malleena ki'nnaammo; Waa'i Isra'eelina er neeyyaxxi sagara aagu bikkina at niinninne maqire masse; neesem kiina er luwwa hundam issinoommo» yukko. Hoobaabim dabaraa «An qaramummi uullaa i moolli beyyoo daba'llaa maroommo bagaan ihooyyo» yukko. Muse'em «He'i neese uttaa mattitte; niina udma'i uullanne hinke'enne wiiddanim hasisooda'e laqqootto; googom awwonsitootto. At niinninne maqire mattittaare Waa'i niina issoo danaam luwwiinsi hundiinsim neesem kiina issinnommo» yukko. Minaadabim Waa'i duun yoo Siina'i udma'i uulliinsi ki'lla'a sas balli googo matto'o; Waa'ik Hidi'l Saga'l Saaxin wiiddantam beyyo moo'iseena ee sasem ballam ixxuwwa higaa illaginne maram hee'ukko. Wiiddanto'i beyyi hundiinsim ki'llam ammane Waa'ik duub balli balla haf iham hee'ukko. Hidi'l Saga'l Saaxin mareena mikmikoo amman hundam Muse'e «Waa'a, ki'e; ki diina'i binnihona. Keese saboo keenim ki illagiinsi gibona» yam hee'ukko. Hidi'l Saga'l Saaxinim uulloo ammane «Waa'a! Lobakat kumaa kaakumaa ihoo Isra'ee'l kolli daba'lle» yam hee'ukko. Minaadabim afu hawwi bikkina Waa'anne qunquunimma asheetto'o; Waa'im eekka macceesaa lobakata quuqu bikkina ixxuwwi lambe'enne itoo giira asse'ukko; oo giirim ixxuwwi wiiddanta'a yo'i beyyi tochchika hofqaxam itukko. Minaadabim Muse'e kolli laatto'o; Muse'em Waa'a uunxukko; giirim xoo'ukko. Waa'ik giir ixxuwwi lambe'enne aphphu bikkina ee beyyik summi «Taabi'eera» yamamukko. Isra'ee'l oosinne maqirem dooyyitam hee'llo'i mulli minaadab maara itteena lobakata hassa'a hee'llo'o; Isra'ee'l oosim «Intoommi maara niina ayyi uwwookko? Gibxanne hee'nnummi ammane maham minqoo'n hansummisa intam hee'nnummi qurxumme'e tiillummo; eekke'enne hee'nnummi ammane intam hee'nnummok dabaqula, habaaba, kurata, shunkuruttaa tumaa hee'ukko. Ihukkaarem kaba ni orachchi gogaa ni malaayyi hoogaakko; balli hundam moo'nnoommok ka maanna'a bagaan mulli luwwi bee'e» yitu'uuyyi wi'llimma asheetto'o. Maanna'im leeyya laboo baar hagar ihaa wordimaa'm mishi'nnoo'i goottokkichcha'i hee'ukko. Minaadabim do'ukkuuyyi feeraa liitimmanne liitaa te'im mooyye'enne tumaa lasage qure'enne hufaa'aa saram hee'ukko; oohim wee'l zaytinne cukkakka'a sarakko'i qorosho'isa xee'oohan hee'ukko. Hiimonne qiibat wiiddananne dilloo ammane maanna'im dillam hee'ukko. Minaadab hundim ixxuwwi gaqqi Dukkaa'n gooccanne abaroosinne abaroosinnem uullita'a wi'llitu'uuyyi Muse'e macceesukko. Waa'im ixxuwwanne lobakata quuqaa hee'u bikkina Muse'e u'nnamukko. Muse'em Waa'ina «Eesenne ki awwaadaanchonne kiddo'i kee'mmaalli hawwo mahina eebbitto? Eesennem liirantibee'ek mahinatte? Ka minaadaphpheka hundikam iyyo mahina i hanenne iyyiissitto? Gaassi anno'ina uwwiteena sagara aaggitti uulla aageebe'i afeebe'e ka minaadabina hundinam awwonsaanchi issita'a ciilluwwa ‹Li'issamaantesa qaaphphe› yitoottok mahinatte? Hanqinam an ka manna hundam i goosanne uumaatennihe? Te'im qaraatennihe? ‹Intoommi maara niina uwwe!› yitu'uuyyi i beyyo waatta'a wi'llitamuulli ihu bikkina ka manninna hundinam ihoo maara an hanniinsi eebbonatte? Iina lobakata kee'mmaakkoo bikkina an kaa'n minaadaba hundam mullam awwonseena xanoommoyyo. Ka'isa issitoohaanniinsi ki illagenne nuura siidaammoohaa'lleensi eesenne afoo hawwo moo'oo'n he'i eese shihe» yukko. Waa'im Muse'ena «Isra'ee'l minaadabiinsi awwonsimminne la'anto'oo lamarayyi lommanna doo'lle; ixxuwwam wixxa'llaa Keesammi Dukkaa'n beyyo wottaa ki gadanonne uullitonna. Anim eekkeen dillaa kiinninne atooraroommo; kiina uwwummi Ayyaaniinsim massaa ixxuwwanne issoommo; ee lasage ka minaadaba awwonsimminne at mulla hawwitoobee'isa ixxuwwi kiina hara'mmitamo. Odim minaadabina ‹Intoommi maara niina ayyi uwwokko? Gibxanne hee'nnummi amman niina e'llam hee'ukko› yitakku'uuyyi wi'llitakko'oka Waa'i macceesu bikkina soodina ki'nnuwwi gaga muccussehe. Waa'i ki'nnuwwina maara uwwoo bikkina ittakkamo. Ittakkamokim mat ballina te'im lam ballina te'im onti ballina te'im tommi ballina te'im lamiyyi ballinayyo. Ihukkaarem ki'nnuwwi lambe'enne yoo Waa'a gaddakka'a «Gibxiinsi mahina fillummo› yitakka'a ixxi illagenne wi'llitakko'i bikkina ki'nnuwwi saninne fireebe'ee ceentakkeebe'ee mat agan hundam ittakkammo› yoolla yitaa kure» yukko. Muse'em Waa'ina «Onno'o, an yoommok loh xibbi kum lokkaa'n lambe'ennette; atim mat agana hundam ittam maara uwwoommo yitaa sagara aaggaatto. Eehannah hinkaa'n lar, gereebbii fella'ii duramukkaare ixxuwwa goddiseena xannookko? Te'im Dambalaq woronne yoo qurxumme'i hundim wixxuta'n iheena xanoohonnihe?» yukko. Waa'im Muse'ena «Hanqoomam iikki Waa'ik angi gundannihe? An woccummi sagar wo'mmoo'isaa wo'mmoobee'isaa kaba moo'llootto!» yaa dabarukko. Muse'em Firaa Waa'i yukkoka hundam minaadabina kurukko. Minaadaphphi awwonsaaniinsim lamarayyi mancho wiixxaa'aa Keesammi Dukkaa'n kululleetanne uullitamisa issukko. Waa'im duubinne dillaa Muse'ena wocukko. Muse'enne hee'u Ayyaaniinsim massaa lamarayyem lommannannem dilliisukko. Oo Ayyaanim ixxuwwanne dillaa lasage sagara iimaa'lla'a hiraago wocco'o. Ihukkaarem ee lasage od eedda'a wocco'oyyo. Doo'llanto'i lamarayyi Awwonsaaniinsi Eeldaadii Meedaadii lamim Dukkaa'n beyyo mattoo'nnim ambanne hossa'a hee'llo'o. Ixxuwwim ambanne hee'llo'isam ixxuwwannem Ayyaan dillukkaare ambanne hee'llo'isam hiraago wocco'o. Mat woraadichchim Muse'e beyyo geerukkuuyyi maraa «Eeldaadii Meedaadii ambanne hiraago woccamuulla» yaa kurukko. Woraadda'n doolliinsim ki'isaa Muse'ena hara'mmaanchi hee'u Naawe'i beet Iyyaas «I Moollanni Muse, wocceena hoore!» yukko. Muse'em «At i bikkina to'achchitaatennihe? Waa'i minaadab hundim hiraagaan ihuta'nnii Waa'im ixxuwwanne ixxi Ayyaana dilliisuta'nnii iina liirancha!» yukko. Ee lasage Muse'ee Isra'ee'l lamarayyem awwonsaanii wiidda'n beyyo daba'llita'a matto'o. Dangonnem Waa'i dambalaqiinsi wiidda'n beyyo heedoora laboo cii'a eeboo hafachcha asse'ukko. Oo heedoora laboo cii'im uulliinsi lam anga ihoo qaxa iim shiqaa bararukkuuyyi waarukko; ee wiidda'n kululleetanne heedoora laboo cii'i tuubamu beyyi mat balli gooqqi qax hee'ukko. Minaadabim ee balla, ee hiimoo eehanniinsi la'm ballaa ki'lla'a heedoora laboo cii'a wixxaa'llo'o. Tommi sananniinsi hoffiisaa wixxaa'ukkok hee'ukkoyyo. Eeham gokkisimmina wiidda'n kululleetanne fitiissam hee'llo'o. Ihukkaarem maar ixxuwwi inqenne hee'ukkisam iicca'a liqicitoo'nnim Waa'i quunqi ixxuwwi hanenne ihukko; malaayyaam boobaninnem lobakata aphphisukko. Ee beyyik summi «Mixa'n waamma» yamammukko. Mashka'oomim maa'l mixa'n mashka'inne lobakat manna ee beyyonne waammita'a hee'llo'i bikkinatte. Minaadabim ee beyyiinsi Haxeeroota Matta'a ee beyyonne wiiddanto'o. Muse'e Tophphe'i uulliinsi meento eebaa hee'u bikkina is mashka'inne Maaraamee Aaroonii Muse'ena «Waa'i wocukkok xale'i Muse'enattennihe? Niindu wocukkoyyonnihe?» yamukko. Waa'im ixxuwwi wocamu luwwi hundam macceesukko. Muse'em uullanne hee'oo manni hundiinsim lophphaa maashaalli manchi hee'ukko. Dangonnem Waa'i Muse'e, Aaroonaa Maaraamee «Ki'nnuwwi sasim Keesammi Dukkaa'n beyyo waallehe» yukko. Ixxuwwim matto'o. Waa'im utuphphisa uullaakkoo duubinne dillaa Dukkaa'n goocanne uullukko. Aaroonaa Maaraamem weeshukko. Ixxuwwim ixxi illagenne hincito'o. Waa'im ixxuwwina «I sagara macceessehe! Ki'nnuwwi lambe'enne hiraagaanchi hee'ulas An Waa'i ixxena kaaltinne caakkaa moo'amoommo; haqaawwinnem atoorassoommo. Ihukkaarem i agishshi Muse'e ee'isayyo; ixxi i minenne hundannem amma'nnamaakkoohane. An ixxena illagenne moo'amaa i sagarinne wocoommo bagaan maaxaqqanne wocoommoyyo; ixxi iikka Waa'ika hagara moo'ookko. Eehannah ki'nnuwwi i agishshi Muse'enne ullixxantakkeena mahina iggitakko'o?» yukko. Waa'im ixxuwwanne quuqaa ee beyyiinsi marukko. Duubim Dukkaa'n hanniinsi ki'ukko. Maaraamem oddomachchonne firoo baddisoo jabbi amadukko; is orachchim baraxxisa qadaallukko. Aaroonim ise ee jabbinne amadanto'isa moo'ukko. Aaroonim Muse'ena «I moollanna, ni huushanchinne banxummi baaxii'l bikkina ku kee'mmaalli guzumo'i neesenne ihoo'isa issititte. Isem am godabonne hee'ukkisam lehaa kolli orachchi shamaa lasage qaramu kara labbamisa issititte» yukko. Muse'em «I Moollanna, he'i ise fayyiise!» yaa Waa'i kolli laarukko. Waa'im Muse'ena «Is anni is illenne anja tuhuta'n tuullinne lamar balli afeebe'e affam hee'llo'oyyonnihe? Kabadem wiidda'n beyyiinsi biiranne lamar balli afeebe'e mullam afuuttona. Ee lasage wiidda'n beyyo daba'lliteena xantamo» yaa dabarukko. Maaraamem lamar ballina wiidda'n beyyiinsi biiranne annanni ikka'a affutto'o. Isem daba'llita'a waatteebe'e minaadab wiidda'n beyyiinsi marukkoyyo. Ee lasage odim minaadab Haxeerootiinsi ki'aa maraa Faaraa'n udma'i uullanne wiiddanukko. Waa'i Muse'ena «Tommiinsii lamem Isra'ee'l sulliinsim awwonsaa'nneka mat mato doo'llitaa an Isra'ee'l oosina uwwoommi Kana'aa'n uulla shaashshitona asse'e» yukko. Muse'em Waa'i ijaaccisinne Isra'ee'l awwonsaa'nneka tommoo lamoo Faaraa'n udma'iinsi asse'ukko. Ixxuwwim, Roobeel sulliinsi Zaakur beet Shaamu'atte. Simi'oon sulliinsi Hoor beet Shaafaaxatte. Yihuxxi sulliinsi Yaafun beet Kaaleebatte. Yisaakoor sulliinsi Yooseef beet Yigaalatte. Efireem sulliinsi Naawe'i beet Hooshe'atte. Biiniyaam sulliinsi Raafu'i beet Falixatte. Zaabiloon sulliinsi Soode'i beet Gaadu'eelatte. Yooseef sulliinsi oohim Minaas sulliinsi Suusi'i beet Gaadi'atte. Daan sulliinsi Gamaali'i beet Ami'eelatte. Aseer sulliinsi Mikaa'eel beet Saturatte. Niftaaleem sulliinsi Waafisi'i beet Naahiibattee Gaad sulliinsi Maaki'i beet Ga'u'eelattee hee'llo'o. Uullooma saarayyita'a waattona Muse'e asse'u manni kakeen hee'llo'o. Naawe'i beet Hoshe'ekam «Iyyaasu» yaa summa dabassukko. Muse'em Kana'aana shaashshitona asse'u ammane Ixxuwwina «Woroo'n qarinne aa'llakka'a duunaam uullanne fillehe. Uulloom hinkido'anda'e, hinkaa'n manni hee'oohanda'e, ee uullanne hee'llam mannim malaayyaammuwwi te'im hoogaanda'e, ixxuwwi hee'llam uulli danaamda'e te'im jorda'e ihukkisaa minaadaboom hee'llamok matem oot bee'i hegeegguwwannetda'e te'im girbamaakkoo beero'uwwannetda'ee ihukkisa saarayyehe. Uulli harishda'e te'im haqqi yoohanda'e bee'anda'e moo'llehe. Ee uullannem hee'oo haqqi mishiinsi ammaddakka'a waallehe; qoxxehe» yukko. Oo ammanim woyin mishimma asheeraakkoo amman hee'ukko. Ee bikkina oo manni hanaa'n qara matta'a woroo'n qarinne yoo Xiin udma'i uulliinsi ki'issa'a Haamaata daba'llamakkam beyyina abbis ihu Rahoob afeebe'e shaashshito'o. Gaassita'a woroo'n qarinne yoo uulli kolli matta'a Keebiroona waatto'o; oo Keebiroonim «Anaaqiima» yakkam geejji manni shumo'i ikko'i Ahimaanik, Sheeshaayikii Taalmaay shumo'ii hee'llam beero'i hee'ukko. Keebiroon baxamukkok Gibxi uullanne «Xoo'aana» yakkam beero'i baxameena lamar hiinchiinsi gaassaatette. Ee beyyo higga'a Eshkoo'l cebba affo'o. Ee beyyiinsim shogaam woyi'nneka mat caafa mutto'o. Oohim mat manchi mulla iyyeena xanoobee'i kee'mmaalli ihu bikkina lam manchi wonnanninne gudumonne iyyito'o. Ixxenne maqirem oroomaanikaa oda'ikaa misha edda'a amadda'a waatto'o. Isra'ee'l oos ee beyyiinsi woyi'nneka shoga mutto'i bikkina ee beyyika summa «Eshkoo'l cebba» yito'o. Oo mannim uullooma sor ayyaamo shaashshita'a lasage daba'llito'o. Faaraa'n udma'i uullanne Qaadeesanne Muse'e, Aaroonii Isra'ee'l minaadabii hundim yo'i beyyo daba'llito'o. Ixxuwwim moo'llo'oka hundam ixxuwwinaa minaadabinaa kutto'o. Eebbo'i misham moo'isso'o. Muse'enam «At asse'llitti uulla mallaa moo'nnaammo. Oo uullim adii marabii wo'mmaakkoohane; ee uulli mishim kido'ane. Ihukkaarem ee uullanne hee'llam minaadab lobakata malaayyaammuwwa. Ixxuwwi beero'uwwim geejjuwwaa girbamaakkoo keenoo. Eehanniinsi hundiinsim lobakata baddissam Anaaq shumo'o moo'nnaammo. Ee uullannem woroo'n qarinne Amaaleeq manni, duunaam uullannem Hiite'ik, Iyyaabuusikii Amoore'i mannii hee'llaman ihaa Kana'aa'n manni odim Yoordaanoos daajji gammalannee Meedeteraaniyaa'n dambalaq gammalanne hee'llamo» yita'a kutto'o. Ihukkaarem Kaaleeb ee minaadaba Muse'e illagenne sa'itamisa issaa «Fillona! Ee uullam lago aa'nnona; mashka'oomim ixxuwwa kaa'nneena xannoommi malaayyi niina yookko» yukko. Ihukkaarem Kaaleebinne matta'a hee'llo'i manni «Neese ee minaadabinne uullixammeena hore'em xannoommoyyo. Mashka'oomim ixxuwwi niinniinsi malaayyaammuwwa» yito'o. Odim shaashshita'a moo'llo'i uulli bikkina Isra'ee'l oosina wocco'i woshshi neeyyato mussiisoohan hee'ukko. Odim «Neese do'nnaa moo'nnummi uulli manna itoohane; eekke'em moo'nnummi manni hundim lobakata qeera'lluwwa. Odim Neefiliim moolliinsetti ikko'i Anaaq shumo'o eekke'e moo'nnaammo. Neesem ixxuwwi illaggenne ni gaga moo'aqqinoommaare kochcha'nnisa hee'nnummo. Ixxuwwim neese ee'isinne moo'lloo'n uttamoyyo» yito'o. Minaadabim ee hiimo hundoomam sagara iimaa'aa laarukkuuyyii wi'llukkuuyyii garukko. Muse'ennee Aaroonannee ki'lla'a «Gibxanne hee'nnummi ammane te'im ka udma'i uullanne lenaammoota'n niina eran hee'ukko! Waa'i ee uulla massoollak mahinatte? Oranne bisa'inne beeddinonannihe? Ni meentii oosim qeefadamookko; Gibxa daba'llinummaare e'llooyyonnihe?» yitu'uuyyi quunquunto'o. Ixxuwwina'i ixxuwwim «Waallehe! Neese awwonsoo mancho do'llinaa Gibxa daba'llinona» yaqqanto'o. Ee bikkina Muse'ee Aaroonii hundem Isra'ee'l minaadaphphi dummichchi illagenne uullanne aad heeshito'o. Ee uullam shaashshitona asse'anto'i manniinsi lam Naawe'i beet Iyyaasii Yaafun beet Kaaleebii kichche'lla'a ixxuwwi eddechcha dereetto'o. Isra'ee'l oosinam «Neese do'nnaa moo'nnummi uulli lobakata danaam uulla. Waa'i neesenne liiramaakkoohan ihulas neese ee uulla massookko. Adii marabii wo'mmaakkoo ee harish uulla niina uwwookko. Ihukkaarem Waa'anne boqqitakkotte; ee uulli manna badditakkotte. Injee'llisa issinaa ulloommo; ixxuwwik haf ki'aakko; ni Waa'i niinninnetti ihu bikkina hore'em badditakkotte» yito'o. Ihukkaarem minaadab ixxuwwa kinninne aphphissa'a shiteena a'llanto'o. Ee ammanenne Waa'i lombi Isra'ee'l oosina hundinam Keesammi DukkaaDukkaa'n hanenne caakkaa moo'amukko. Waa'i Muse'ena «Ku minaadab eese gadookkok hinkiballi afeebe'e? Dut mare'e ixxuwwi illagenne issummaarem eese amma'nnoobee'ek hinkiballi afeebe'e? Oono'o, an ixxuwwa boobaninne aphphisoommo; Keesem Ixxuwwiinsi lophphoo malaayyaam minaadabina anni issoommo» yukko. Ihukkaarem Muse'e Waa'ina «Ka minaadaba Gibxi uulliinsi ki malaayyinne at fissitaatto; eehidimdu ixxuwwanne issitoohan ihulas Gibxi uulli manni macceessamo. Ee hundam ka uulli mannina kuttamo; ka uulli manni at Waa'i niinninnetti ikkittisaa ki duub niina haf ihu ammane at caakkitaa moo'antittisaa, balla uttuphphisa uullaakkoo duubinne hiimo odim gii'l utubinne ni illaginne mattittuuyyi awwonsittisaa gaassita'ahim macceesso'ookko. Kaba ka ki minaadaba hundam guullittaare kiikka sado macceesso'i mulli minaadab hundim ‹Uwweena sagar aagu uulla afiseena xanubee'i bikkina guullukko› yitamo. Ee bikkina Moollanna, ki malaayye niina moo'issona uunxoommo. Odim at ‹Waa'i iyyaqqa, uratii iittii lobakata; baaxiiloo boqqoomaa haafoohane. Ihukkaarem anno'i baaxii'l bikkina sas qaranchiinsi soor qaranchi afeebe'e oosoo oos oosoo guzumo'oommo› yitaa woccitti neeyyaxxi sagara wonshe. Kabadem Moollanna, lobakataa dabassamoobee'anee ihu ki iitinne ka minaadaba Gibxiinsi fissittaanniinsi ki'isaa kaballi afeebe'e haafittisam kabadem ka minaadaphpheka baaxiilo haafitona uunxoommo» yukko. Waa'im «At xa'mmittisinnem haafaammo. Ihukkaarem an hee'oommanee i lombim uulli hundannem wo'mmaakkoohanee ihukkisam Gibxannee udma'i uullannee ixxuwwina moo'isummi i lombaa agannaa moo'lla'a minaadaphphek matim lombaa moo'isummi maalalsiisoo agannaa hundam moo'lla'a lasage eese tommi kore keenta'a iina ijaajancha sabbo'i ka manniinsi matim ee uulla aageena foorinne hee'ooyyo. Ee bikkina ixxuwwi anno'ina uwwoommo yaa sagara aagummi uulla hore'em aaggamoyyo. Eese gadu keenniinsi matim ee uulla hore'em aagooyyo. Ihukkaarem iina awwaadaanchi ihu Kaaleebanne annanni ayyaan yoo bikkinaa ixxim eese qoxxaallisa amma'nnoo bikkinaa ixxi maraa moo'u uulla an ixxena uwwoommo. Ixxi shumo'im ee uulla lago aa'ookko. Kaba Amaaleeq mannii Kana'aa'n mannii cebbuwwanne yo'i bikkina soodo laso daba'llitakka'a Ertiira'i Dambalaq gammala massoo googinne udma'i uulla mallehe» yaa dabarukko. Waa'i Muse'enaa Aarooninaa «Ku boqqi minaadab eesenne qunquunookkok hinki balli afeebe'e? Isra'ee'l oos eesenne qunquunoo qunquunimma an macceesaammo. Ee bikkina ixxuwwina ‹Ki'nnuwwi xa'mmitakko'isinnem ki'nnuwwanne issoomman ihukkisa hee'oo i summinne hide'oommo. An Waa'i kaka wocaammo. Xigamu xiqqisanne ki'nnuwwi umur lamyi hiincho te'im eehanniinsi hanaan ihukkaannikii eesenne qunquunukkaanikii hundikim leesh ka udma'i uullanne ubookko. Ee uulla aaggakka'a hee'llakkona an i anga biddiqaa'aa hide'ummi uulla Yaafun beet Kaaleebiinsii Naawe'i beet Iyyaasiinsii bagaan hanqoomam ki'nnuwwiinsi matichchim aagooyyo. Ki'nnuwwi ni oos qeefadanta'a gattamo yitakka'a woccakko'ookko. Ihukkaarem an ixxuwwa ki'nnuwwi gaddakko'i ee uulla aagga'a lago aa'llamisa issoommo. Ihukkaarem ki'nnuwwi leesh ka udma'i uullanne ubaa gatookko. Ki'nnuwwanne amma'nnat bee'immiinsi ki'ukkok ki'nnuwwiinsi lasaanchi manchi uulli udma'anne leheebe'i afeebe'e ki'nnuwwi oos sor hiinchi hundam kee'mmaalli hawwo aa'ukkuuyyi ka udma'i uullanne karkaadookko. Ki'nnuwwi baaxii'l mashka'inne sor hiincho hundam hawwitakkamo. Oohim ee uulla shaashshitakko'i sorem ballim ki'nnuwwina mat balli mat hiinchisa ihookko. Ee ammane eesenne boqqimmi ki'nnuwwina hinkaa'n hawwo eebooda'e qoossitakkamo. Eesenne mat ihaa ki'u ka boqqi minaadabanne eekka hundam an issoommo; ka udma'i uullanne hundichchim leta'a beedditamo. An Waa'i kaka wocaammo» yukko. Muse'e uulla shaashshitona asse'ukkaare matta'a daba'llita'a waatto'i keeniinsi ee uulli bikkina jor woshsha kutta'a minaadab Muse'enne qunquunoo'isa issito'i keen Waa'i illagenne boobaninne leto'o. Ee uulla shaashshiteena matto'i manniinsi foorinne gatto'ok Naawe'i beet Iyyaasottee Yaafun beet Kaaleebattee hee'llo'o. Waa'i yukkoka Isra'ee'l oosina hundinam Muse'e kuru ammanenne lobakata kichche'llo'o. La'm balla daram duunaam uulla matteena ki'llo'o. Ixxuwwim «Neese hawwondaammo; Waa'i neeyyato aagu uullam malleena gundaammo» yito'o. Ihukkaarem Muse'e «Kabadem Waa'ina ijaajantakkambee'ek mahinatte? Ki'nnuwwi sawwitakko'isa ihooyyo. Waa'i ki'nnuwwinne bee'i bikkina diina'i ki'nnuwwa aphphisoobee'isa mattakkotte. Amaaleeqikii Kana'aa'n mannii ki'nnuwwi illagenne yo'i bikkina bisa'inne beedditakkamo. Mashka'oomam Waa'a awwonimma sabbakko'i bikkina ixxi ki'nnuwwinne maqire ihooyyo» yukko. Ihukkaarem Waa'ik Hidi'l Saga'l Saaxinii Muse'ee wiidda'n beyyiinsi ki'lloo'nnim duunaam uulla matteena iggimminne ki'llo'o. Ee duunam uullannem hee'llam Amaaleeqikii Kana'aa'n mannii dillita'a qasso'o. Hormaam afeebe'em hollito'o. Waa'i Muse'ena «Isra'ee'l oosina ‹An ki'nnuwwina uwwoommi uulla aaggakkam ammane Shokkiisakka'a hincaa'akkam kitima te'im aagakko'i uga'ina hincaa'akkam kitima gaqqi doo'llinne hincaa'akkam kitima te'im losamaakkoo ugudduwwanne hincaa'akkam enji iina mishisoohan ihona lariinsi te'im gereebbiinsi iina hincaa'llehe. Eehido'i kitima hincaa'oo ayyim mat leetiro'i soo'l suum wee'l zaytinne cukkamaakkoo mat kiilo'i er qama hurbaaxxi kitim issaa hincaa'ona. Ee'isam shokkiisakka'a hincaa'akkam te'im mulli kitimina hincoo geex ambulluwwinne annannichchinnem aggi kitimina ihoo mat leetiro'i soo'l suum woyi'n diqaasa hincaa'llehe. Gereechchi ambul kitim ihaa hincoo ammane odim mat liitiro'oo kolloo ihoo wee'l zaytinne cukkamaakkoo lam kiilo'i er qama hincaa'llehe. Aggi kitimina ihoo mat liitiro'i saxxi suume ihoo woyi'n diqaasa hincaa'llehe; oohim eese liiransoo enje'oo enji ihaa hincihona. Uga'i bikkina, te'im mateeyyoo'm kiti'm bikkina mat labeena shokkiisakka'a hincaa'akkam kitimina liitiro'i kolli wee'l zaytinne cukkamaakkoo sas kiillo'i er qama hurbaaxxi kitim ihona hincaa'llehe. Ee'isam liitiro'i kollo ihoo woyi'n diqaasa aggi kitim ihona hinccaa'llehe; oohim enji eese liiransoo shokkiisakka'a hincaa'akkam kitima. « ‹Ee'isinne mat labeeninne te'im gereechchi ambulinne te'im gereechchaanninne te'im fellakkichchi geex ambulinne hincoo hurbaaxxi kitim kane. Kitimina hincoo diinat matiinsi hanaan ihulas hincoo hurbaaxxi kitimim ee'isam exximmi hasisookko. Ee uullanne qaramu Isra'eel hundim enji Waa'a liiransoo hurbaaxxi kitima hincaa'oo ammane ee hundam issimmi hasisookko. Ki'nnuwwinne hee'oo waaraan te'im waaroo ki'nnuwwi qaranchinne ayyim hee'ulas Waa'ina inje'oo hurbaaxxi kitima giirinne hincaa'eena hasulas ee ki'nnuwwi issitakkamisa ixxim issimmi hasisookko. Ki'nnuwwinaa ki'nnuwwinne hee'oo waaraaninaa ku seer heer heerina gudaanchoominne egeranchi hasisookko. Ki'nnuwwii ki'nnuwwinne hee'oo waaraanii hundim Waa'i illagenne gudo. Ki'nnuwwinaa ki'nnuwwinne hee'oo waaraaninaa hundinam seerii gattii gudaancho› yitaa kure» yukko. Waa'i Muse'ena «Isra'ee'l oosina ‹An ki'nnuwwa awwonsaa massoommi uulla aaggakkam ammane ee uulli atootiinsi ittakkam ammane ee atootiinsi ludo iina Waa'ina kitim issitakka'a hincaa'llehe. Oohim gaassaa liitamu haareechchi hurbaaxxi qamiinsi qorosho'o sattakka'a oodo'iinsi hincoo hurbaaxxi kiti'mmisa issitakka'a iina hincaa'llehe. Waaroo doollenne hundannem haareechchi hurbaatiinsi liitissakkam luxxi balli qamiinsi sattakkam qorosho'iinsi iina Waa'ina annanni kitim ihaa hincimmi hasisookko. «Ki'nnuwwi lachchoonginne an Waa'i Muse'ena uwwummi seeriinsi mato ginditakkolas te'im ki'nnuwwi shumo'i an Waa'i Muse'enne ihaa ijaajummi ijaajina ijaajamubeelas Oo huushanchim ihukkok minaadaphphi lachchoonginnetti ihulas oo minaadab hundim mat labeena hurbaaxxi kitiminnee aggi kitiminnee maqirem enji eese Waa'a liiransoohan ihona shokkiisakka'a hincaa'akkam kitima hincaa'ona. Ee'isam baaxii'l haafitina mat fellakkichchi ambula kitim issaa hincaa'ona. Qeessichchim hundem Isra'ee'l minaadabinam haafissiisookko; minaadab huushamukkok la'oo'nnetti ihu bikkinaa baaxii'l haafitina ihoo kitimaa hurbaaxxi kitimaa iina Waa'ina hincaa'llo'i bikkinaa ixxuwwi baaxiil haafamookko. Hundim lachchoonginne huushamu bikkina hundem Isra'ee'l minaadabinaa ixxuwwinne hee'oo waaraaninaa baaxiil haafamookko. «Ihukkaarem mat manchi la'oo'n baaxiilo baxulas mat hiinchi meentichchi fellakkichcho ixxi baaxii'l haafixxi kitimina hincaa'ona. Qeessichchim ee la'oo'n baaxiilo baxu manchika baaxiilo Waa'i illagenne haafiissiisookko; ee manchi baaxiilim haafamookko. Isra'ee'l oosinam ihukko ixxuwwinne hee'oo waaraanina la'oo'n baaxiilo baxoo hundinam ihoo seer kane. «Ihukkaarem Isra'ee'l oosiinsettem ihukko waaraaniinsi ayyim iggimminne baaxiilo baxookkok Waa'a sholliisu bikkina hundim minaadabiinsi annanni ihaa bi'ona. Mashka'oomim ixxi Waa'i sagara gadu bikkinaa ijaajom gindu bikkinaa oo manchi hore'em bi'ona. Ee baaxii'l bikkina xa'mmamookkok ixxi gagame› yihe» yukko. Isra'ee'l minaadab udma'i uullanne hee'llu'uuyyi mat manchi usheexxaxxi ballanne haqqa feerukkuuyyi amadamukko. Oo amaddo'i mannim Isra'eel hundim, Muse'ee Aaroonii yo'i beyyo massitto'o. Ixxonnem maha issimmi hasisooda'e caakkaa la'amubee'i bikkina karaxxi minenne egeroo'isa issito'o. Ee lasage Waa'i Muse'ena «Oo machi lehona; Isra'ee'l oos hundim wiidda'n beyyiinsi haxonne fissita'a kininne aphphissa'a shitona» yukko. Ee bikkina Isra'ee'l oos hundim Waa'i ijaajukkisannem wiidda'n beyyiinsi haxonne fissita'a kininne aphphissa'a shito'o. Waa'i Muse'ena «Isra'ee'l oosina ‹Ki'nnuwwi eddechchi kasanne shoga axissehe; ixxim shaano'i fatirinne dadamaakkoohan ihona. Eeham waaroo qaranchi hundannem issehe. Oo shog Waa'ika ijaajo tiittakkonaa egettakkonaa ee'isam ki'nnuwwi tiironne mixxakko'okaa illi moo'ukkokaa awwontakka'a saa'llakkambee'isa tiissiisoohan ihookko. I ijaajo hundam sawwitakkonaa egettakkonaa iina ki'nnuwwi Waa'inam keesantakko'oo keen ikkakkonaa oo shog ki'nnuwwi eddechchi kasanne moo'amoohan ihona. An ki'nnuwwina Moollanni Waa'a. An ki'nnuwwina Moollanni iheena Gibxi uulliinsi ki'nnuwwa fissummo. An ki'nnuwwina Moollanni Waa'a› yoolla yitaa kure» yukko. Leewi'i sulliinsitti ihu Qa'aat moollan ihoo Yixi'aar beet Qore'e Roobeel sulliinsetti ihu Eeli'aab oos Daataanii Aberoonii ee'isam Feeleet beet Oonii Muse'enne uullixanto'o. Isra'ee'l oosiinsim minaadaphphi awwonsaannek la'anto'oo 250 manchii ixxuwwinne maqirem ki'llo. Ixxuwwim Muse'aannonnee Aaroon illagennee wixxita'a «Ku minaadab hundim annannichchim keesamaakkohane. Waa'im ixxuwwinnette. Ki'nnuwwi hore'em higissakko'ookko. Ka Waa'i minaadabanne ki'nnuwwi gaga iimiimaa'llakkamuullak mahinatte?» yito'o. Muse'em eekka macceesaa lasage uullanne aad heeshukko. Qore'enaa ixxi awwonaaninaa hundinam «Waa'i ixxan ihukkokii keesamukkokii ayyetda'e ihukkisa sooxxi dara annanni issaa la'issookko. Ixxi doo'llu manchom ixxi kollonne hincoo'isa issookko. Qore macceese; atii ki awwonaanii soodo mude'uwwa ammaddakka'a waallehe. Ixxonnem soodo giiraa aduruusaa issitakka'a Waa'i illagenne hincaa'llehe. Waa'i doo'lloo manchi keesamaakkoohan ihookko. Leewi'i ooso, hore'em higissakko'ok ki'nnuwwa!» yukko. Muse'e odim Qore'ena «Ki'nnuwwi Leewi'i oos macceessehe. Isra'ee'l Waa'i ki'nnuwwa Isra'ee'l minaadabiinsi annanni issaa ixxi Keesammi Dukkaanannee minaadaphphi illagenne uullitakka'hii awwaaddakkona ixxi kollonne hincaa'u qax ki'nnuwwina ihooyyonnihe? Ixxi keesee kiina abbaayyuwwi ikko'i Leewi'i oosoo ixxi kollonne hincaa'aakko. Ihukkaarem kaba ki'nnuwwi qeessoomanom eddakka'a hassakko'ookko. Ee bikkina atii ki awwonaanii mat ikkakka'a ki'llakko'ok Waa'annette. Ixxonne quunquuntakkeena Aaroon ayyette?» yukko. Ee lasage Muse'e Eeli'aab ooso Daataanaa Aberoonaa weeshisukko. Ihukkaarem ixxuwwi «Waalloommoyyo. Adii marabii dadoo Gibxi uulliinsi ka udma'anne lenona fissittok ihooyyonnihe? Kaba odim neesenne moollanni ikkeena hassaahinnihe? Harish uullanne neese wotbee'is te'im abuulli uullaa woyi'n kaashshi beyyoo lago'aa'issibee'is la'amaakkoohane. Kaba odim neese qawwiisseena hassaatto. Ee bikkina ki beyyo waalloommoyyo» yito'o. Muse'em lobakata quuqukko. Waa'inam «Ixxuwwika kitima at aa'llitte. An ixxuwwika mat hallichchom massummoyyo. Ixxuwwiinsim mat manchom hawwodummoyyo» yukko. Muse'em Qore'ena «Soodo atii lam xibbii ontayyi ki awwonaanii Keesammi Dukkaa'n beyyo waallehe. Aaroonim eekke'enne hee'ookko. Ki'nnuwwi annannichchim mude'e amaddakka'a waallehe; ee mude'uwwannem aduruusa issehe; lam xibbennee ontayyi mude'uwwannee Waa'i illagenne ki'nnuwwi aduruusa hincaa'llehe; atii Aaroonim ki'nnuwwi aduruusa hincaa'llehe» yukko. Ee bikkina annannichchim mude'enne giiraa aduruusaa issita'a Keesammi Dukkaa'n nafaranne Muse'ennee Aarooninnee maqirem uullito'o. Ee lasage Qore'e ixxi awwonaano hundam wixxaa'aa waaraa Dukkaa'n nafaranne Muse'aannonnee Aaroon illagennee uullukko. Waa'ikim lombi ee manni hundinam Moo'amukko. Waa'im Muse'enaa Aarooninaa «Ka minaadabiinsi annanni ikke'e; an ixxuwwa mexxo'aa'llem bi'isoommo» yukko. Muse'ee Aaroonim uullanne aad heeshita'a «Waa'a, at manni hundinam Waa'a; mat manchi baaxiilina manni hundannem quuqqoohonnihe?» yito'o. Waa'im Muse'ena «Qore'aanniinsi, Daataanaanniinsii Aberoon Dukkaa'n gadaniinsii laa'itona minaadabina kure» yukko. Ee lasage Muse'e Isra'ee'l awwonsaano amadaa Daataan beyyoo Aberoon beyyoo marukko. Minaadabinam «Ka boqqi manni Dukkaa'n gadaniinsi laa'i'llehe. Ixxuwwika maham nakkitakkotte. Eebeelas ki'nnuwwim ixxuwwi baaxii'l mashka'inne beedditakkamo» yukko. Ee bikkina minaadab Qore'aanniinsi, Daataanaanniinsii Aberoon dukkaannuwwiinsii qee'llito'o. Daataanii Aberoonim ixxuwwi meentinne, oosinnee ciilluwwinnee maqirem ixxuwwi dukkaannuwwi goocanne uullita'a hee'llo'o. Muse'em «Ka hundam issoommok Waa'i asse'ukkaarette bagaan i gagiinsi ihubee'isa kanninne laqqakkammo. Ku manni ayyi manchim lehoo'isa letolasii mulli mannanne afookkok xale'i ixxuwwanne afulasii eese Waa'i asse'ukkoyyo. Ihukkaarem Waa'i macceesakka'a la'akkambee'i haareechchi luwwa qooccaa foorinne hee'llu'uuyyim si'oolanne dillitona uulli suume fooqaa'aa ixxuwwaa ixxuwwina yoo luwwaa hundam xuuxulas oo manni Waa'inne uullixxanto'an ihukkisa laqqakkamo» yukko. Muse'e eekka wocaa guullukkisam Daataanii Aberoonii uullita'a hee'llo'i beyyi fooqukko. Ixxuwwa, ixxuwwi abaroosaa ee'isam Qore'e awwonaanoo ixxuwwi amaxxa hundammii xuuxukko. Ee bikkina foorinne hee'llu'uuyyim ixxuwwi amaxxinnem Si'oolanne dillito'o. Uullim ixxuwwi hanenne shiraashiramukko; minaadaphphi lambe'iinsim bi'llo'o. Ee beyyonne hee'llo'i Isra'ee'l minaadab hundim ee kee'n laachcha macceessa'a gibbo'o. «Ku uulli neesem xuuxeena xanoo bikkina gimbona!» yitu'uuyyi laatto'o. Ee lasage Waa'i giira dilliisaa aduruusa wiriissitam hee'llo'i lam xibbee ontayyi manchoo shokkiisukko. Ee lasage Waa'i Muse'ena «Aaroon beet Ali'aazar naas xaa'l Mude'uwwa keesammi ihu bikkina giirinne shokkito'i manni beyyiinsi massaa woronne yoo giira qee'lli beyyonne fuqaa'ona kure. Mude'uwwi Waa'i illagenne hincu ammane keesammuwwi ihaakko. Ee bikkina ixxuwwi baaxiilinne leto'i mannika mude'uwwa xaamsitaa caraqisimminne kiti'm beyyonne goolabe; oohim Isra'ee'l oosina mare'i ihookko» yukko. Ee bikkina qeessichchi Ali'aazar giirinne shokku manni hincaa'u naas xaa'l mude'uwwa wixxaa'aa kiti'm beyyonne goolabeena xaamsaa caraqisukko. Oohim Waa'i Muse'ennetti ihaa ixxo ijaajukkisinnette. Aaroon shumo'iinsette ihubee'i ayyi manchim Waa'i illagenne aduruusa wiriisseena hincimmi hasisoobee'isa Isra'ee'l oosina mare'e. Eebeelas Qore'ennee ixxi awwonaanonnee afukkok ixxonnem afookko. Ee la'm balla daram odim Isra'ee'l minaadab hundim «Ki'nnuwwi Waa'i minaadaba shitakko'ookko» yita'a Muse'ennee Aaroonannee ki'llo'o. Muse'ennee Aaroonannee hundim wixxita'a ki'lla'a lasage Keesammi Dukkaa'n kolli daba'llita'a moo'llu'uuyyi duub Keesammi Dukkaana ifiisukko. Waa'i lombim caakkukko. Muse'ee Aaroonim Keesammi Dukkaa'n illagenne waatta'a uullito'o. Waa'im Muse'ena «Ka minaadabiinsi qee'llitakka'a uullehee. An ixxuwwa mexxo'aa'llem bi'isoommo» yukko. Ixxuwwi lamim uullanne aad heeshito'o. Muse'em Aaroonina «Ki mude'e massitaa ixxonne kiti'm beyyi giiriinsi isse. Ee giirannem aduruusa isse. Minaadabina haafissiisseena qaqqissaa ixxuwwi mare. Waa'i quuqu bikkina booban asheeraakko» yukko. Aaroonim Muse'e ijaajukkisannem mude'e amadaa minaadaphphi beyyo geeraa marukko. Ee ammanenne booban minaadaphphi lambe'enne asheeraa hee'ukko; Aaroonim aduruusa wiriissaa minaadabina haafissiisukko. Ee'isinne booban uulloo'isa issukko. Areenim leto'i kee'nnaannonnee foorinne yoo manni lambe'ennee uullaa hee'ukko. Ee ammane leto'i mannik xig Qoore'inne maqire boqqita'a beeddito'i manniinsi mulli manna edoo'n 14,700 hee'ukko. Booban uullaa lasage Aaroon Keesammi Dukkaa'n goocanne hee'u Muse'i beyyo daba'llukko. Waa'i Muse'ena «Isra'ee'l minaadab sulli awwonsaaniinsi annannichchiinsim tommoo lam biccoo aa'lla'a kiina uwwitona xa'mme. Annannichchikam summa ixxi bicconnem kitaabe. Sulli awwonsaanina annannichchinam mat mat bicci hee'immi hasisso bikkina Leewi'i sulli bicconne Aaroon summa kitaabe. Ee biccuwwam Keesammi Dukkaa'n woronne an kiinninne atooraroommi Hidi'l Saga'l Saaxi'n illagenne disse. Ee lasage an do'lloommi manchi bicci latookko. Ee'isinne Isra'eel oos hundi ammanem keesenne quunquuntam qunquunancha bi'isoommo» yukko. Muse'em eekka Isra'ee'l oosina kurukko. Hundem sulli awwonsaanim ixxuwwi sulli sullinnem tommoo lam biccoo eebba'a uwwitto'o. Aaroon biccim ee biccuwwi lambe'enne hee'ukko. Muse'em ee biccuwwa hundam aa'aa Hidi'l Saga'l Saaxin yoo Keesammi Dukkaa'n woronne Waa'i illagenne dissukko. La'm balla daram Muse'e Keesammi Dukkaa'n woro aagoohaare Leewi'i sulli summinne hincu Aaroon bicci quuxo eebaa, lataahii fiitaahii Lawuzika misha mishaahii hee'ukko. Muse'em ee biccuwwa hundam Waa'i illagiinsi massaa Isra'ee'l oosina hundinam moo'isukko. Ixxuwwim eekka moo'lla'a lasage annannichchim ixxi gaqqi bicco massukko. Waa'im Muse'ena «Aaroon bicco Hidi'l Saga'l Saai'n illagenne dabattaa disse. Isra'ee'l oos eesenne boqqita'a qunquunimma uttobeelas letaman ihukkisa moo'isoohan ihaa hee'ona» yukko. Muse'em Waa'i ixxo ijaajukkisannem issukko. Isra'ee'l oosim Muse'ena «Oono'o neese hundim lenoommo! Bi'nnoommome! Neese hundim bi'nnoommo! Keesammi Dukkaananne hincookkok hundim lehookko. Hanqinam hundim leneenannihe?» yito'o. Waa'i Aaroon ina «Keesammi Dukkaa'n woronne awwaado moo'oo'isinne ihoo baaxii'l bikkina hundinam atii ki oosii ee'isam Leewi'i oosii xa'mmantakkammo. Qeessooma'n awwaado moo'oo'isinnem ihoo baaxii'l bikkina odim xale'i atii ki oosii xa'mmantakkammo. Atii ki oosii Keesammi Dukkaa'n woronne Hidi'l Saaxi'n illagenne awwaaddakkam ammane ki'nnuwwina hara'mmeena kiina moolli ihu Leewi'i sulli kiinninne ihona. Ixxuwwim kiina ijaajantu'uuyyi Dukkaananne ihoo awwaado egettona; ihukkaarem ixxuwwii ki'nnuwwii hundim letakkambee'isa Keesammi beyyi mu'utannee kiti'm beyyonnee hincitoone. Ixxuwwi hundi ammanem ki'nnuwwinne maqire Keesammi Dukkaa'n woronne baxamoo baxo baximmi hasisookko. Mullek Leewwekkichchi ihubee'i ayyi manchim ki'nnuwwi kollonne hincimmi hasisooyyo. Isra'ee'l oosonne odim i quunqi ihoobee'isa Keesammi beyyikaa kiti'm beyyikaa awwaado xale'i ki'nnuwwi awwaadimmi hasisookko. Ki'nnuwwi qarmanni ikko'i Leewi'i ooso an Isra'ee'l oos lambe'iinsi doo'llaa massaammo. Ixxuwwim Dukkaa'n woronne baxamoo baxo hundam baxxeena iina annanni ikka'a uwwanto'oo keeno. Ihukkaarem kiti'm beyyonnee dumiinsi worinne Keesammiinsi Keesammi beyyonnee ihoo qeessooma'n awwaado awwaaddakkamok xale'i atettee ki oosoo. Ookki ki'nnuwwa moo'oohane. Mashka'oomim qeessoomano an ki'nnuwwina sharad issaa uwwaammo; ki'nnuwwiinsi bagaan qeessichchi ihubee'ek ayyim ee beyyo hinculas lehona» yukko. Ee lasage Aaroonina Waa'i «Isra'ee'l oos iina hincaa'llam shokkoobee'i annanni kitima kiina sharad issaa uwwaammo. Ixxim kiinaa ki shumo'inaa heer heerina sharad ihona uwwaammo. Hore'em keesammi ihaa iina hincoo kitim hundiinsim oohim hurbaaxxi kitimiinsii baaxii'l haafixxi bikkinaa hawwojji bikkinaa hincoo kitimiinsii shokkoo'n hincoo kitim hundim kiihanee ki oosanee. Eeham keesammi beyyonne ittehe. Ookki keesamma. Goon hundim ittona. «Odim Isra'ee'l oos i illagenne wonciwoncaa'llu'uuyyi hincaa'llam kitimmuwwi hundim ki'nnuwwane; ee keeno kiina, ki goo'n oosinaa landinaa waaroo doollenne hundannem sharad ihona uwwaammo. Ki abaroosiinsi muccur ihukkok ayyim iteena xanookko. «Isra'ee'l oos wee'l zaytiinsi, woyi'n diqaasiinsii hurbaatiinsii iina uwwitam doo'llammi wona an ki'nnuwwina uwwaammo. Ixxuwwi uulli mishiinsi iina Waa'ina uwwitam won hundim ki'nnuwwan ihu bikkina ki'nnuwwi minenne muccur ihukkok ayyim iteena xanookko. «Isra'eelanne iina annanni ihaa uwwamu luwwi hundim ki'nnuwwan ihookko. «Isra'ee'l oos iina uwwitam mannik te'im fooraam diinaxxek won hundim ki'nnuwwane. Ihukkaarem manni won tissina kin bira aa'llehe. Ee'isam muccur ihubee'i diinaxxi won tissinam kin bira aa'llehe. Qaramukkaanniinsi mat agana ihu ciilluwwa la'amaakkoo bito oohim onti kin bira tisso ee bikkenne aa'llakkeena xantakkamo. La'lleka, gereebbikaa fella'ikaa wona tisso miqakka'a hosisimmi xansiisooyyo; oo keen iina keesamaakkoo keen ihu bikkina hasisookko. Ee kee'n xiiga kiti'm beyyonne wixxehe. Di'iram enji eese Waa'a liiransoo kitim ihona giiranne shokkiissehe. Ee diinaxxi maarim wonceesimminne annanni kitim ihaa hincoo eeddiraasisaa makki lokkisaa ki'nnuwwan ihookko. «Isra'ee'l oos iina annanni issita'a hincaa'llam ki'nnuwwina, ki'nnuwwi goon oosinaa landinaa doolli hundannem hee'oo sharad issaa uwwaammo. Oohim ki'nnuwwinnee ki'nnuwwi shumo'innee aagoommi gindamoobee'i sooqixxi hidiro» yukko. Odim Waa'i Aaroonina «Kiina Isra'ee'l uullanne amaxxi ixxuwwi lambe'ennem sharad bee'e. Isra'ee'l oos lambe'enne kiina sharadii gulummii anette. «Isra'ee'l oos iina uwwitam tommiinsi mato Keesammi Dukkaananne awwaaddam awwaaxxi bikke Leewi'i oosina gulummi issaa uwwaammo. Ka lasage baaxii'l mashka'inne lehinne guzumo'antambee'isa Isra'ee'l oos Keesammi Dukkaa'n kolli hincitoone. Keesammi Dukkaa'n woronne awwaaddamokii ee hawwojji bikkina xa'mmantamokii Leewi'i ooso. Oohim ki'nnuwwi oos oosonne afeebe'e heer heerina hee'oo seera. Leewi'i oosina Isra'ee'l oos lambe'enne ixxuwwi gulummi issita'a a'llitam amaxxi bee'e. Isra'ee'l oos iina Waa'ina kitim issita'a hincaa'llam tommiinsi mato Leewi'i oosina ixxuwwi gulummi issaa uwwaammo; an ‹Ixxuwwina Isra'ee'l oos lambe'enne sharad hee'ooyyo› yummok ee bikkinatte» yukko. Waa'i Muse'ena «Leewi'i oosina ‹An ki'nnuwwina gulummi issaa uwwoommi tommiinsi mato Isra'ee'l oosiinsi aa'llakkam ammane ki'nnuwwim ixxeensi tommiinsi mato annanni issitakka'a Waa'ina hincaa'llehe. Oo kitimim ki'nnuwwina oodo'i hurbaatiinsi te'im woyi'n diqaasiinsi hincoo kiti'mmisa xigamookko. Ee'isinne ki'nnuwwim Isra'ee'l oosiinsi tommiinsi mato aa'llakkamaanniinsi hundiinsim tommiinsi mato iina Waa'ina kitim issitakka'a hincaa'llehe. Eehanniinsim iina sharad ihu tommiinsi mato qeessichchi Aaroonina uwwitakkamo. Ki'nnuwwina uwwamoo luwwi hundiinsim doo'llammaa keesammaa ihukkoka iina Waa'ina hincaa'llehe. Doo'llamukkoka iina Waa'ina uwwitakkam ammane abuullaanchi tommiinsi mato uwwaa lasage gatukkok ixxi gaqqan ihoo'isa ki'nnuwwim gatukkoka a'llehe. Oohim Keesammi Dukkaananne ki'nnuwwi awwaaddakkam awwaadina miqo'i ihu bikkina ki'nnuwwii abaroosinnem hannonnem ittakkeena xantakkamo. Doo'llamaakkookkoka iina Waa'ina hincaa'llaka'a'a lasage ittakkam ammane hawwojji ki'nnuwwanne hee'ooyyo. Ihukkaarem doo'llammi ihukkoka ki'issakkoo'n ee kitimiinsi ittakkolas Isra'ee'l oos keesso'oka haashaassitakkambee'isa ege'llehe. Eekkamdu issitakkolas letakkamo› yoolla yitaa kure» yukko. Waa'i Muse'enaa Aarooninaa an ijaajoommi seer kane «Isra'ee'l oos gaanjaqqi issambee'ekaa miiqakkam luwwi bee'i mat kashar addichchoo eebbona kure. Ee addichchom qeessichchi Ali'aazarina uwwehe. Ee addichchom wiidda'n beyyiinsi haxonne Ali'aazar illagenne mat manchi durona. Qeessichchi Ali'aazarim ee addichchi xiigiinsi aa'aa maxxaara cefukkuuyyi keesammi Dukkaa'n illagenne kollonne lamar kore wixona. Qeessichchi moo'ukkuuyyim oo addichchi hundoomim shokkona; omachchi, maar, xiigii godaphphi mu'ut hundimii shokkona. Qeessichchim digiphphi haqqa, hiisoophphi caafaa kashar fatiraa massaa addichchi shokkoo giiranne edona. Ee lasage qeessichchi ixxi eddechchaa orachchoo wo'inne aanshaqqaa wiidda'n beyyo daba'llona. Ihukkaarem uulli hiimeebe'e muccurubee'an ihookko. Ee addichcho shokkiisu manchim ixxi eddechchaa orachchoo wo'inne aanshaqqona. Ixxim uulli hiimeebe'e muccurubee'an ihookko. Muccur ihu mulli manchi ee addichchika gii'l buchcha wixxaa'aa wiidda'n beyyiinsi haxonne muccur beyyo moo'aa dissona. Oo beyyim Isra'ee'l minaadaphpheka haashaarancha muccussimmina awwaadoo wo'o gudisimmina hara'mmoohan ihookko. Oo seerim ihookkok baaxiiliinsi muccurimminatte. Gii'l buchcha wixxaa'u manchim ixxi eddechcha aanshona. Ihukkaarem uulli hiimeebe'e muccurubee'an ihookko. Oohim Isra'ee'l oosinaa ixxuwwinne hee'oo waaraaninaa waaroo doolli hundannem qoxxaa hee'oo seer ihookko. «Lehu manchika leeshsha nakkoo ayyim lamar ballina haashaarammi ihookko. Saxxi ballannee lama'l ballannee muccurimmina gudu wo'nne ixxi gaga muccussona. Ee lasage muccur ihookko; saxxi ballannee lama'l ballannee ixxi gaga muccussubeelas muccureena xanooyyo. Lehu manchika leeshsha nakkaa ixxi gaga muccussubee'ek Waa'ika Keesammi Dukkaana haashaassookko. Oo manchim Isra'ee'l minaadabiinsi annanni ihaa bi'ona. Mashka'oomim muccussoo wo'o ixxi hanenne wixamubee'i bikkina ixxi haashaaramma; ixxi haashaaranchiinsi muccurukkoyyo. «Mat manchi ixxi gaqqi Dukkaa'n woronne lehoo ammane issimmi hasisoo seer kane; mat manchi lehoo ammane ee Dukkaa'n woronne hee'u manchi te'im ee Dukkaa'n woro aagoo manchi lamar ballina haashaarammi ihookko. Ee'isam ee Dukkaa'n woronne ifiishaanchi bee'e hee'oo mu'ut hundim haashaarammi ihookko. Manni te'im jabbi shaa biiranne ubaa yoo leesha te'im lehu mannika miqe te'im waamma nakkookkok ayyim lamar ballina haashaarammi ihookko. «Haashaaramu mancho muccussimmina shokku addichchi gii'l buchchiinsi hoffokam massita'a harachchonne issitona; ixxi hanennem muccur bu'i wo'o issitona. «Ee lasage muccur ihu mulli manchi Hiisoophphi buyya ee wo'onne cefukkuuyyi ee dukkaanannee Dukkaa'n woronne yoo mu'utanne hundannemii ee'isam ee Dukkaa'n woronne yoo mannannee wixona. Ee'isam lehu mannika miqe te'im leesha te'im waamma nakkukkaannonne ayyi manchonnem wixxona. Saxxi ballannee lama'l ballannee muccuru manchi muccurubee'i manchonne wo'o wixona; lama'l ballannem muccussookko; oo muccuroo manchim ixxi orachchoo eddechchaa aanshaqqaa lasage eelliinchi aagoo ammane muccur ihookko. «Mat manchi haashaaramaa ixxi gaga muccussubeelas oo manchi Waa'ika Keesammi Dukkaana haashaassaakkoo bikkina minaadabiinsi annanni ihaa bi'ona. Mashka'oomim muccussoo wo'i ixxonne wixamubee'i bikkina haashaaramma. Ka seera waaroo doolli hundinam egellehe; muccussoo wo'o wixoo manchim ixxi edechcha aanshimmi hasisookko; odim ee muccussoo wo'o nakkookkok ayyim uulli hiimeebe'e haashaarammi ihookko. Muccurubee'i manchi nakkoo luwwi hundim haashaaramaakkoohan ihookko. Odim eekka nakkoo manchim uulli hiimeebe'e haashaaramaakkoohan ihookko» yukko. Isra'ee'l minaadab hundim luxxi agananne Xiin udma'i uulla waatta'a Qaadeesanne wiiddanto'o. Maaraamem eekke'enne leta'a waammanto'o. Ee wiidda'n beyyonnem wo'i hee'ubee'i bikkina minaadab wixxaa Muse'ennee Aaroonannee ki'ukko. Muse'ennem wocanta'a «Niyyabbaayyuwwi Waa'i illagenne leto'i ammane neesem lenaammoota'n eran hee'ukko. Waa'ika minaadaba ka udma'i uulla wottakko'ok neese ni diinatinne maqirem keyye beeddinonannihe? Ka jor uulla wottakkeena neese mahina Gibxiinsi fissitakko'o? Ka beyyonne hurbaat te'im oda'i mish woyin te'im oroomaan bee'e; agakkam wo'im bee'e!» yito'o. Muse'ee Aaroonim minaadabiinsi annanni ikka'a Keesammi Dukkaa'n gooca matta'a uullanne aad heeshito'o; Waa'ikim lombi caakkaa moo'ammukko. Waa'im Muse'ena «Hidi'l Saga'l Saaxi'n illagenne yoo bicco amaddaa Aaroon innem minaadaba hundam wixxaa'llehe; ixxuwwi moo'llu'uuyyim illagenne yoo sifo'i kiniinsi wo'i firona ijaaje. Ee'isinne ee kiiniinsi wo'o fissitootto; ee lasage ixxuwwii ixxuwwi diinatii agookko» yukko. Ijaajamukkisannem Muse'e Waa'i illagiinsi bicco massukko. Muse'ee Aaroonii Isra'ee'l minaadaba hundam ee ki'n illagenne wixaa'lla'a lasage Muse'e minaadabina «Ka boqqi keeno! Ka kiniinsi ki'nnuwwina wo'o fissinonnihe?» yukko. Ee lasage Muse'e anga iimaa'aa biccinne ee kina lam kore aphphisukko. Lobakat wo'im firukkaare mannii diinatii hundim agukko. Ihukkaarem Waa'i Muse'enaa Aarooninaa «Isra'ee'l minaadaphphi illagenne eese Keesammoomaninne lonsitakkeena amma'nnantakkobee'i bikkina ki'nnuwwina uwweena sagara aagummi uulla ka minaadaba awwonsitakka'a aaggakkamoyyo» yukko. Isra'ee'l minaadab Waa'inne wocanto'okii Waa'im ixxi keesammoo'm lomba moo'isu beyyi Mariiba yamamu bikkina oo wo'i Mariiphphi wo'o. Muse'e Eedoo'm adilina Qaadeesiinsi asse'amaano asse'ukko. Ixxuwwim «Ki qarmanni ikko'i Isra'eel ‹Neesenne afu hawwi hundam laqqaatto. Gaassi niyyanno'i Gibxa hinkid dillitoda'ee neesem lobakat doolle Gibxanne hee'nnummisaa at laqqootto. Gibxi uulli manni gaassi niyyanno'oo neesee lobakata u'nnisso'ookko. Neesem niina hara'mmona ni Waa'i kollonne laallummaare ni laachcha macceesukko. Ixxi asse'amaancho asse'aa neese Gibxiinsi fissukkaare waallaa at gassitoo uulli gabalanne yoo Qaadees beero'onne yoommine. Ee bikkina hay ki uullinne higise; neesee ni diinatii googiinsi fillaa ki abuulli uullannem ihukko woyi'n kaashshanne aangoommoyyo. Ki wo'i balleewwiinsi wo'o angoommoyyo; ki uulla hingaa mallambe'e adi'l googiinsi bagaan makkannem qeddannem filloommoyyo› yitamuulla» yito'o. Ihukkaarem Eedoo'm uulli manni «Neese ni uullinne higgakka'a mattakkona hansoommoyyo. Ayyi la'ukko ni uullinnemdu higgakkeena waattakkolas neese hundim fillaa ki'nnuwwa bisa'inne qansoommo» yito'o. Odim Isra'ee'l oos ixxuwwina «Neese lob bobba'iinsi hore'em filloommoyyo. Neese te'im ni diinatiinsi matim ki'nnuwwi wo'iinsi angumlas ki'nnuwwina ixxi bikke bito minqoommo. Xale'i lokkinne hancaancaa hingoommi qaxa bagaan mulleka maham hansoommoyyo» yita'a dabatto'o. Ihukkaarem Eedoo'm uulli manni «Ihooyyo! Keen hore'em higgakkamoyyo» yaa dabarukko. Malaayyaam o'l gogotam gudissa'a Isra'ee'l minaadabinne oranteena fitto'o. Eedoo'm uulli manni Isra'ee'l oos ixxuwwi uullinne higgambee'isa hootto'i bikkina Isra'ee'l oos daba'llita'a mulli googinne matto'o. Hundem Isra'ee'l oosim Qaadeesiinsi ki'lla'a Hoo'l duuna affo'o. Oohim Eedoo'm uulli tochchonne hee'oo beyyi hee'ukko. Waa'im ee beyyonne Muse'enaa Aarooninaa «Aaroona, an Isra'ee'l oosina uwweena sagara aagummi uulla aagooyyo. Mashka'oomim Mariibanne ki'nnuwwi lamim i ijaajo ginditako'i bikkina Aaroon lehookko. Aaroonaa ixxi beeto Ali'aazaraa amaddaa Hoo'l duunanne fire. Aaroonim ixxi moolli kollonne wixxoo bikkina ixxi edde'u eddechcha sheelattaa ixxi beetina Ali'aazarina eddeese. Aaroonim eekke'enne lehookko» yukko. Muse'em Waa'i ijaajukkoka hundam issukko; hundem minaadabim moo'llu'uuyyi Hoo'l duunanne fitto'o. Muse'em Aaroon edde'u qeessooma'n eddechcha sheelataa Ali'aazarina eddeesukko. Aaroonim ee duu'n ludonne lehukko; Muse'ee Ali'aazarim daba'llita'a ee duu'n ludiinsi dillito'o. Isra'ee'l minaadabim Aaroon lehukkisa macceesaa sad balla wi'llukko. Woroo'n qa'l Kana'aa'n uullik Araad adil Isra'ee'l oos Ataarii'm kollinne waatto'isa macceesukko; ixxuwwinnem oramaa hofqax mannam qeefadukko. Isra'ee'l oosim «Ka minaadaba ni anganne higissaa uwwittaare ixxuwwaa ixxuwwi beero'uwwaa hundam guullinaa bi'insoommo» yita'a Waa'ina uga'a aaggo'o. Waa'im ixxuwwi uunxato macceesaa hara'mmu bikkina Kana'aa'n manna kaa'llo'o. Isra'ee'l oosim ixxuwwaa ixxuwwi beero'uwwaa hundam guullita'a bi'isso'o. Ee bikkina ee beyyika summa «Hoorima » yita'a weeshsho'o. Isra'ee'l oos Eedoo'm uulli tochchinne do'lla'a matteena hasso'i bikkina Hoor duuniinsi ki'lla'a Ertiira'i dambalaq tochchinne massoo googinne matto'o. Ihukkaarem taakki lophphimmiinsi ki'ukkok gancatto'o. «Itakkam hurbaatii wo'ii bee'i ka udma'i uullanne beeddinona Gibxiinsi neese mahina fissitakko'o? Ka awwaad bee'i hurbaatam ni orachchi ceemaakko» yita'a Waa'annee Muse'ennee ki'llo'o. Ee lasage Waa'i minaadabanne qubaam hamashsha asse'ukkaare Isra'ee'l oosiinsi lobakata oo hamashshi qasukkaare beeddito'o. Minaadabim Muse'e beyyo waatta'a «Waa'annee keesennee jor sagara woncaa hawwondaammo. Ka qasoo hamashsha niinniinsi qeessona Waa'a uunxe» yito'o. Muse'em minaadaphphi bikkina Waa'a uunxukko. Waa'im Muse'ena «Mat hamashshichcho naas xaarinne baxxaa qeeraa'l haqqanne saqale; hamashshi qasukkok ayyim eekka moo'aa gatookko» yukko. Muse'em naas xaarinne hamashshichcho baxaa haqqanne saqalukko. Hamashshi qasukkok ayyim ee xaa'l hamashshichcho moo'aa gatam hee'ukko. Isra'ee'l oos odim taakko asheetta'a Oobootanne wiiddanto'o. Oobootiinsim matta'a Moo'aaphphi uulliinsi eelliinchi firinne yoo udma'i uullanne hee'oo Abaariimanne wiiddanto'o. Ee beyyiinsim matta'a Zareed cebbanne wiiddanto'o. Ee beyyiinsim matta'a Amoore'i manni uulli afeebe'e afoo udma'i uullanne yoo Arnoo'n daajji eeqidonne wiiddanto'o. Arnoo'n daajji Moo'aaphphi uullinaa Amoore'i uullinaa lambe'enne hee'oohan ihaa Moo'aabina gabal hee'ukko. Ee bikkina Waa'i awwonsatinne ihu o'l bikkina kuroo aganni kitaabanne «Sufa'anne hee'oo Waaheeb, Arnoo'n cebbaa Eer beero'i afeebe'e afoo Moo'aaphphi uulli tochchi cebbuwwaa» yamamukko. Ee beyyiinsim ki'lla'a Bii'eera matto'o. Oo beyyim Waa'i Muse'ena «Minaadab hundam mat issitaa wixxaa'e. Anim ixxuwwina wo'o Uwwoommo» yaa wocu wo'i ba'l beyyo. Ee ammane Isra'ee'l minaadab «Ate wo'i bu'o, buqbuqaa'llaa wo'o fisse; ki'nnuwwim ixxena zammallehe. Adilla'n biccinnee ixxuwwi biccuwwinnee Daannuwwi hogooffo'ok, minaadaphphi awwonsaanim hinto'i wo'i bu'o» yoo mazmuura zammatto'o. Ee lasage ee udma'i uulliinsi ki'lla'a Maataana matto'o. Maataaniinsi Naahili'eela Naahili'eeliinsi odim Baamoot afeebe'e higga'a matto'o. Baamootiinsim ki'lla'a Moo'aabanne yoo cebbi afeebe'e matto'o. Oo cebbim hee'ookkok Phisga'i duu'n lugumonne yoo udma'i uullina illagennette hee'ukko. Ee lasage Isra'ee'l minaadab Amoore'i mannina adil ihu Siihoon beyyo «Hay neese ki uullinne higse; neesee ni diinatii googiinsi fillaa ki abuulli uulluwwannem ihukko woyi'n kaashshi beyyuwwanne aangoommoyyo; ki wo'i balluwwiinsim wo'o angoommoyyo; ki uulla hingaa malleembe'e adi'l googiinsi bagaanmakkannem qeddannem malloommoyyo» yita'a kuttam asse'amaano asse'llo'o. Ihukkaarem Siihoon ixxi uullinne Isra'ee'l minaadab higeena hoorukko; hore'oomam ixxi gogota wixxaa'aa udma'anne hee'oo Yahaaxa maraa Isra'eelinne oramukko. Ihukkaarem Isra'ee'l oos ixxuwwa kaa'llo'o. Arnoo'n daajjiinsi ki'isaa hanaa'n qarinne Amoo'n manni uulli gabal afeebe'e oohim Yaabooq manni daajjenne afeebe'e amaddo'o. Amoo'n manni uulli gabalim girbamaakkoohan ihu bikkina higga'a aaggeena xanto'oyyo. Isra'ee'l oosim Haseeboonaa ixxi kululleetanne yoo beero'uwwaa eedda'a Amoore'i manni beero'uwwa hundam amaddo'o. Ee beero'uwwannem afuutto'o. Haseeboo'n beero'i Amoore'i uulli adil Siihoon hee'oo beero'i hee'ukko. Ixxim gaassi Moo'aaphphi uulli adilinne oramaa Arnoo'n daajji afeebe'e yoo uulla hundam massaa hee'ukko. Ee bikkina mazmuuranne zammaaraan «Haseeboona waallehe; Ku beero'i baxamon! Siihoo'n beero'i areesamonaa. Giir Haseebooniinsi labanim Siihoo'n beero'iinsi firukko. Moo'aaphphi Eera bi'isukko; Arnoo'n duunnuwwanne hee'oo gassaanom bi'isukko. Moo'aaba, kiina aayye! Kaamoosh minaadaba bi'llakkamo. Ixxi ki'nnuwwika goo'n ooso yaayyanchina landam qeefadanchina Amoore'i manni adil Siihoonina higisaa uwwaakko. Ihukkaarem kaba ixxuwwik shumo'im bi'ukko. Haseebooniinsi ki'isaa Diiboon afeebe'e Naashimiinsi ki'isaa Meedaphphi gadanonne yoo Noofa'i afeebe'e hee'llam keen hundim bi'llo'o» yitu'uuyyi zammattam hee'llo'o. Ee bikkina Isra'ee'l minaadab Amoore'i manni uullanne afuutto'o. Muse'em Ya'izeer beero'o shaashshitam manna asse'aa lasage Isra'ee'l oos ee beero'oo ee beero'i gadanonne yoo hoffi beero'uwwaa hundam massito'o. Eehe'e hee'llam Amoore'i mannam yaayyito'o. Ee lasage lasso daba'llita'a Baasaana massoo googinne aa'lla'a matto'o. Baasaa'n adil Oogim Edira'anne Ixxuwwinne orameena ixxi o'l gogota hundam amadaa firukko. Waa'im Muse'ena «An ixxo, ixxi minaadabaa ixxi uullaa hundam kiina higisaa uwwummi bikkina baddititte. Haseeboonanne ihaa gassam hee'u Amoore'i adil Siihoonanne issittoka hundam kannonnem isse» yukko. Ee bikkina Isra'ee'l oos Oogaa ixxi oosoo ixxi minaadabaa hundam matom gatissoo'n guullita'a lasage uullooma lago aa'llo'o. Ee lasage Isra'ee'l oos Yoordaanoos daajjiinsi eelliinchi firinne Iyyaarko'i illagenne hee'oo Moo'aaphphi biir beyyonne wiiddanto'o. Ee ammane Moo'aaphphi adil hee'u Siifoor beet Baalaaq Isra'ee'l oos Amoore'i mannanne issito'oka hundam moo'ukko. Isra'ee'l oosikim xig dut ihu bikkina Moo'aaphphi minaadab lobakata baa'ukko. Isra'ee'l minaadabam lobakata baddito'o. Moo'aaphphi uulli manni Miidiyaa'm lommannina «Ku ki'nnuwwi moo'llakkam minaadaphphi gogot mat mirgo'i aashaalli hixe guullaa itoo'isa ni kululleetanne yoo luwwa hundam itoo minaadaba» yito'o. Ee bikkina Siifoor beet Maa'aaphphi adil Baalaaq Aamaawe'i uullanne Efiraaxiis daajji gadanonne Phaatoo'l beero'onne hee'oo Bii'oor beet Baala'aama weeshsham manna asse'ukko. Oo asse'u assim «Gibxiinsi firaakkoo minaadab ka uulla hundoomam ifiisaakko; ni gadanonnem wiiddanaakko. Ee minaadaphphek xig niihaanniinsi hore'em duta; at waattaa ixxuwwa qange. Ayyi la'ukko ee'isinne an ixxuwwa kaa'eenaa uulliinsim fissaa holleenaa xanoommi ihookko. At maasse'llootok maasse'amoo'isa duuntoottokim duumamoo'isa la'oommo» yoohan hee'ukko. Ee bikkina Moo'aaphphekii Miidiyaa'mmekii lommanni genno'ina miqakkam bira amadda'a matto'o; Baala'aam beyyom affa'a Baalaaq asse'u asso kutto'o. Baala'aamim «Kaballa keyye gallehe. Soodo daram Waa'i iina kuroo luwwa hundam an ki'nnuwwina kuroommo» yukko. Ee bikkina Moo'aaphphi awwonsaan Baala'aam beyyonne afuutta'a egetto'o. Waa'im Baala'aam beyyo waaraa «Ku kiinninne yoo manni mah manna?» yaa xa'mmukko. Ixxim «Moo'aaphphi adil Siifoor beet Baalaaq i beyyo ‹Gibxiinsi firaa waaraakkoo minaadab uulla hundannem wo'mmaakko. Ee bikkina at waattaa ka minaadaba qangitta'n ayyi la'ukko ixxuwwinne oramaa holleena xanoommi ihookko› yaa i beyyo asse'aakkoo manna» yukko. Waa'im Baala'aamina «Ee manninne maqire mattitte. Maasse'amaakkoohan ihu bikkina Isra'ee'l minaadaba at duuntitte» yukko. Baala'aamim ee la'm balla daram Baalaaq asse'u asse'amaa'n beyyo maraa «An ki'nnuwwinne maqire maroombee'isa eese Waa'i hooru bikkina ki'nnuwwi uulla elle'llehe» yukko. Ee bikkina Moo'aaphphi lommanni Baalaaq beyyo daba'llita'a Baala'aam ixxuwwinne waarimma sabukkisa kutto'o. Ee lasage Baalaaq odim illagee'n keeniinsi lombi yoo keenoo dut lommannaa la'm korem asse'ukko. Ixxuwwim Baala'aam beyyo matta'a «I beyyo waatteena hooroo luwwi mahim hee'oone. An kiina lobakat bito miqoommo. At xa'mmitoo luwwa hundam kiina issoommo. Ee bikkina at waattaa hay ka minaadaba qange» yaa Baalaaq asse'ukkisa kutto'o. Ihukkaarem Baala'aam ixxuwwina «Baalaaq ixxi adila'n minenne wo'mmaa hee'oo biraa worqaa hundam uwwuta'nnim I Moollanni Waa'i ijaajiinsi gootto'om ihukko araqa gindeena xanoommoyyo. Ihukkaarem Waa'i iina kuroo luwwi yoohaare la'eembe'e ki'nnuwwim ekee'nnisam keyyem kaballa gallehe» yukko. Ee hiimom Waa'i Baala'aam beyyo waaraa «Ku manni ki beyyo waatto'ok ixxuwwinne maqire at exxitaa mattonatti ihaakkoolas mare. Ihukkaarem an kiina kuroommoka xale'e isse» yukko. Baala'aamim ee la'm balla daram hallichchonne saa'llaa Moo'aaphphi manni awwonsaaninnem marukko. Baala'aam maru bikkina Waa'i ixxonne quuqukko. Baala'aamim hallichchonne saa'llaa lam awwaadaaninne maqire maronam Waa'i asse'amaanchi ixxi illagenne uullaa googo ifiisukko. Waa'i asse'amaanchim bisa'a gudisaa googonne uullukkisa hallichchi moo'aa ee googiinsi firaa abuulli woronne aagukko. Baala'aamim googonne dabareena ee hallichcho lobakata aphphisukko. Ee lasage lamem kollinnem woyi'n kaashshi yoo kininne ootamaakkoo xuqqi googonne Waa'i asse'amaanchi waaraa illagenne uullukko. Hallichchim Waa'i asse'amaancho moo'u ammanenne ki'n ooxxi kolli hincaa Baala'aam lookko ootanne edaa xiibukko. Baala'aamim eeda lobakata aphphisukko. Oo asse'amaanchim higaa maraa hore'em makkannem qeddannem daba'llakkeena xanakkambee'i xuqqi beyyonne uullukko. Hallichchim ee beyyonne Waa'i asse'amaancho moo'aa uullanne gii'mmukko. Baala'aamim lobakata quuqaa ee hallichcho biccinne lobakata aphphisukko. Ee ammanenne Waa'i hallichchi woccona suume fooqa'ukko. Baala'aaminam «Eese sas kore kaa'n aphphissittok an keese ma'issummaarette?» yukko. Baala'aamim dabaraa «Eesenne lobakata lellitti bikkinatte. Anganne bisa'i yoota'n keyyem keese sham hee'ummo» yukko. Hallichchim dabaraa «Lobakat doolliinsi ki'isaa kaballi afeebe'e saa'llitam hee'llitti ki hallichchoyyonihe? Hanqinam an ka ballisa ihummi balli yoohonnihe?» yukko. Baala'aamim «Ka'isa ikkaa hore'em laqqooyyo» yukko. Ee ammanenne Waa'i Baala'aamika ille fooqaa'ukko. Ixxim Waa'i asse'amaanchi bisa'a makkisaa amadaa googonne uullaakkoo moo'ukko. Baala'aamim illillaachcha uullanne heeshukko. Waa'i asse'amaanchi «Ki hallichcho sas kore kaa'nna aphphissittok mahinatte? Ki goog i illagenne boqqi ihu bikkina kiinninne uullixxameena an waaraammo. At saa'llititti hallichchi eese moo'aa sasem korem i illagiinsi laa'ubeeta'n hanqo'isam an kabe'e keese shaa hallichchooma gatisam hee'ummo» yukko. Baala'aamim «An baaxiilo baxaammo. At iinninne uullixxanteena googonne uullittisa la'ummoyyo. Kabadem i marimmanne at liirantoobee'an ihulas daba'lloommo» yukko. Waa'i asse'amaanchim ixxena dabaraa «Marimmooma ka manninne maqirem mare. Ihukkaarem an kiina kuuroommoka xalle'i woce» yukko. Ee bikkina Baala'aam Baalaaq uulli awwonsaaninne maqirem marukko. Baalaaq Baala'aam waaroolli ihukkisa macceesaa ki'aa Moo'aaphphi uulli tochchonne Arnoo'n daajji gadanonne hee'oo Eer beero'onne aa'eena marukko. Baalaaqim Baala'aamina «Qaqqissaa waattona asse'aa hee'ummoyyonnihe? Eehaare mahina waattittoyyo? Hanqinqm an kiina bito miqeena xanoombee'eka labissaahinnihe?» yukko. Baala'aamim «Kaba waaraammoollayyonnihe? Ihukkaarem iina mah malaayyi yookko? An woceena xanoommok iina Waa'i wocu qax xale'e» yaa dabarukko. Ee bikkina Baala'aam Baalaaqinne maqirem Qiiryaat Huxoot beero'o marukko. Baalaaqim laroo gereebbaa duraa lasage ee maariinsi Baala'aaminaa ixxenne maqire hee'llo'i awwonsaaninaa uwwukko. Ee la'm balla daram Baalaaq Baala'aama Isra'ee'l minaadaphpheka hofqaxam moo'isoo Baamootba'aa'l qoffitenne fissukko. Baala'aamim Baalaaqina «Kiti'm beyyika lamara ka beyyonne iina gudise. Ee'isam lamar mooraa lamar gereebbi ambulluwwaa hincaa'e» yukko. Baalaaqim Baala'aam yukkisa issukko; odim ixxuwwi lamim ee kiti'm beyyuwwanne annannichchonnem mat mooraa mat gereechchi ambulaa kitimto'o. Ee lasage Baala'aam Baalaaqina «Ayyi la'ukko Waa'i ixxi doo'lla iina kureena waareena xanookko. Ee bikkina an ekke'e maroommo. At eebee'e ka ki kiti'm beyyonne egere. Waa'i iina kuroo luwwa hundam kiina kuroommo» yukko. Ee lasage ixxi mullam mat qoffit beyyo marukko. Waa'im Baala'aaminne exxukko. Ixxim Waa'ina «Lamar kiti'm beyyo gudisaammo. Ee lamarem kiti'm beyyuwwannem mat mat mooraa mat mat gereechchi ambulaa kitim issaa hincaa'aammo» yukko. Waa'im Baala'aam Baalaaqina kuroo luwwa wocaa lasage ee beyyom daba'llaa maroo'isa issukko. Ixxim daba'llaa maroohaare Baalaaq Moo'aaphphi uulli awwonsaaninne hundinnem ee ixxi kiti'm beyyi gadanonnem uullaa hee'ukko. Baala'aamim kanniinsi woroon yoo hiraago. «Moo'aaphphi uulli adil Baalaaq eelliinchi firinne duunnuwwi hee'oo Sooriyiinsi eese weeshisukko. Ixxim ‹Waare; Yaaqooba qange; Waare; Isra'eelam duume› yukko. An Waa'i qangubee'eka hinkid qangoommo? Waa'i duumubee'ekdu hinkid duumoommo? An duu'n ludonne ihaa ixxuwwa moo'ummo; qoffit beyyonnetti ihaatim ixxuwwi bikkina qoossummo; Ixxuwwi mullam hee'llam minaadaba; Ixxuwwi mulli minaadabiinsi annanni keen ikko'isa laqqam minaadaba. Di'llisa xig lophphaakkoo Yaa'qoob shumo'o te'im Isra'ee'l oosika soo'l suumem ayyi xigeena xanookko? Xummaan kee'n leho an lehoommo. I lasaanchim ixxuwwaannisa ihona» yaa hiraagukko. Baalaaqim Baala'aamina «At ku issitti luwwi maha? An keese weeshummok i diina'a duuntonatti hee'ukko. Ihukkaarem at ixxuwwa maasse'llitto bagaan maham issittoyyo» yukko. Ixxim «Waa'i eese woce yukkoka xale'e an wocimmi hasisooyyonnihe?» yukko. Baalaaqim Baala'aamina «Isra'ee'l oosika hundi ihoo'n xale'e hofqaxooma moo'lleena xantoo mulli beyyo iinninne maqirem mallona; eekke'em ixxuwwa qange» yukko. Ee lasage Phisga'i duu'n ludonne yoo Xoofii'm biira massukko. Eekke'em kiti'm beyyika lamara baxaa annanchonnem mat mat mooraa mat mat gereechchi ambulaa kitimukko. Baala'aamim Baalaaqina «An ekke'e Waa'inne atoorareena maroommo; eebee'e at ka ki kiti'm beyyonne egere» yukko. Waa'im Baala'aaminne eekke'enne exxaa Baalaaqina wocoo woshsha kuraa lasage ixxi beyyo daba'llitaa maroo'isa issukko. Ixxim daba'llaa maroohaare Baalaaq Moo'aaphphi uulli awwonsaaninnem kiti'm beyyi gadanonne uullaa hee'ukko. Baalaaqim Baala'aama Waa'i maha wocuda'e xa'mmukko. Baala'aamim kanniinsi woroon yoo hiraago «Siifoor beet Baalaaqa, kid hincitaa kuroommi woshsha hundam macceese. Qophphano woceena Waa'i mannisayyo. Saxxeenam ixxi manchi beetoyyo. Aagu neeyyato hundam wonshookko. Wocukkoka hundam issookko. Eese ijaajukkok maasse'onatte. Ixxi maasse'ukkoka an dabasseena xanoommoyyo. Yaaqoobanne jor luwwi moo'amukkoyyo. Isra'eelannem hawwi la'ammukkoyyo. Waa'i ixxuwwinnette. Ixxuwwi Moollanni Waa'im ixxuwwinnette. Adi'l ilillaatim ixxuwwi lambe'ennette. Gibxiinsi ixxuwwa fissukkok Waa'a! Ixxuwwikim malaayyi mat buud yoo moochchichchisa. Yaaqoob oosonne kiirat Isra'eelannem genno'i baxooyyo. Kaba Yaaqoobinaa Isra'eelinaa ‹Waa'i issukkoka moo'llehe!› yamamookko. Isra'ee'l minaadab meentichchi hobbichchisa ki'ookko. Odim hochchukkoka iteebe'ee shukkaannika xiiga ageebe'ee Usheexxoobee'i hobbichchisa ihaa ki'ookko» hiraagukko. Ee lasage Baalaaq Baala'aamina «Eehan ihulas guullitaa duuntitte; te'im guullitaa maasse'llitte» yukko. Baala'aamim «Waa'i iina kurukkoka xale'e issoommisa an kiina gaassaa kuraa hee'ummoyyonnihe?» yukko. Ee lasage Baalaaq Baala'aamina «Waare mulli beyyo massoommo. Ayyi la'ukko eekke'enne ka minaadaba qangitoo'isina Waa'i doo'l iheena xanookko» yukko. Baalaaqim Baala'aama udma'i uulli aad moo'eena xanoo Phee'oor duuna'n ludonne fissukko. Baala'aamim «Ka beyyonnem kiti'm beyyika lamara baxe; lamar moolluwwaa lamar gereebbi ambulluwwam gudise» yukko. Baalaaqim Baala'aam yukkisanne issukko; lamarem kiti'm beyyonnem lamar moolluwwaa lamar gereebbi ambulluwwaa kitimukko. Baala'aamim Waa'i Isra'ee'l ooso maasse'eena hasukkisa la'aa lasage od kiireena marukkoyyo. Ixxim ixxi ille udma'i uulli kollonne dabaraa Isra'ee'l minaadab sulli sullinne wiiddanta'a afuutto'ookkoka moo'ukko. Waa'i Ayyaanim ixxonne dillu bikkina «Bi'oor beet Baala'aama, woccoo hiraaqqi sagar kane; illi fooqaa hundem luwwam moo'eena xanoo manchi Waa'ika sagara macceesookkok hundam xano Waa'ika kaalta moo'ookkok ubaa hee'ukkok ihukkaarem illi fooqaa wocoo manchi sagar Yaaqooba, ki dukkaannuwwi Isra'eela, at wiiddantaa yoonti beyyuwwi hinkaa'nna mishisoolla? Ixxuwwim biddiqaakkoo haraar cebbisa; wo'i gadanonne hee'oo duubbi kaashshi beyyisa; Waa'i kaasu geneeno'isaa te'im wo'i gadanonne mutu digiphphisaa ikko'ookko. Ixxuwwi haralliinsi wo'i wo'mmaa daadoohane; Ixxuwwi zeretim hundi ammanem wo'o hoogoobee'ane; Ixxuwwi adilim Agaagiinsi lophphaakkoohan ihookko; ixxi adillanim iimiimakkoohan ihookko. Ixxuwwa Gibxiinsi fissu Waa'i ixxuwwina mat buud yoo moochchisa ihaa oramookko. Ixxuwwina diina'i ikko'i minaadaba hundam dereeransookko. Ee diina'i miqem iiqansookko. Xiyyuwwinnem qasookko. Ku minaadab amadeena gudu hobbichchisaa dugoo meentichchi hobbichchisaa dufaakko. Ixxuwwa nakkeena xanookkok ayyette; Isra'eela maasse'ookkok maase'amona; Duumookkokim duumamona» yaa hiraago wocukko. Ee lasage Baalaaq Baala'aamanne lobakata quuqaa «An keese i diina'a duuntona weeshaa hee'ummo. Ihukkaarem at ixxuwwa sasem korem maasse'llitto. Ee bikkina kaba at ki mine qaqqissaa mare. An kiina lobakat luwwa uwweena sagara aagaa hee'ummo. Ihukkaarem at eekka siixxitoobee'isa Waa'i kiina xufaakko» yaa ixxi anga qoxxisaa amadaa wocukko. Baala'aamim Baalaaqina «I beyyo asse'llitti mannina, ‹Baalaaq ixxi adilla'n minenne wo'mmaa yoo biraa worqaa hundam uwwuta'nnimii i doo'llinne eroka te'im jora maham issaa Waa'i ijaajo gindeena xanoommoyyo; an wocoommok Waa'i wocona kurukkan xale'e» yaa kuraa hee'ummoyyonnihe?» yaa dabarukko. Lasaanchonne Baala'aam Baalaaqina «An oona'a, kaba i minaadaphphi beyyo daba'llaa maroommo. Ihukkaarem ku Isra'ee'l minaadab ki minaadabanne Waaroo doollenne issookkoka kiina qoxxisaa kuroommo waare» yukko. Ixxim «Oo illi erisa fooqaa moo'oo manchi, Bii'oor beet Baala'aam wocoo sagar kane; Waa'i sagara macceesookkok, adil Waa'ika lachcha la'ookkok, hundam xanoo Moollannika kaalta moo'ookkok; ubaa hee'ukkok kaba illi fooqu manchi kid yoolla. Moo'oommuulla; ihukkaarem kabadeyyo. Qoossoommuulla ihukkaarem abbis ammanenneyyo. Yaaqoobiinsi boollaankichchi firookko. Isra'eeliinsim adilla'n bicci ki'ookko. Ixxim Moo'aaphphi uulli gaballuwwa aphphisookko. Seetikam goo'n ooso bi'isookko. Eedoo'm uulla ixxi gulummi issookko. Diinakkichchi hee'u Seer yakkam uullim ixxi gulummi ihookko. Isra'eelim malaayyaam ihukkuuyyi marookko. Yaaqoobiinsi firookkok gassaanchi ihookko. Beero'i woronne gatto'i keenom guullaa bi'isookko» yaa hiraago wocukko. Ee lasage odim Baala'aam Amaaleeqa moo'aa, «Amaaleeq hundiinsim lophphoo malaayyaam minaadab hee'ukko. Ihukkaarem lasaanchonne heer heerinam bi'ookko» yaa hiraaqqi sagara wocukko. Odim Qeenaawe'i uulli manna moo'aa, «At hee'lloo beyyi amma'nnisaakkoo beyyo; ki minim qoxxaalli ki'n woronnetti ihuta'nnim Ki'nnuwwi Qeenaawe'i uulli manni Aasoor kaa'aa qeefadoo ammane bi'llakamo» yaa hiraaqqi sagara wocukko. Baala'aamim lasaanchonne «Aayye! Waa'i eekka issoo ammane ayyi foorinne hee'eena xanookko? Markabbuwwi Qophphiroosiinsi waarookko. Asooraa Eebiroonaa u'nnisookko. Ixxuwwim heer heerina bi'llamo» yaa hiraago wocukko. Ee lasage Baalaaqim ki'aa ixxi googo marukko; Baalaaqim ixxi googo marukko. Isra'ee'l oos Shiixii'm cebbanne wiiddanta'a hee'llo'i ammane ixxuwwi goo'n oos Moo'aaphphi uulli landinne maqire saa'imma asheetto'o. Oo landim ee ooso Moo'aaphphi uulli waa'uwwina kitimamaa hee'u kitimiinsi ittona weeshsho'o. Isra'ee'l oosim ee kiti'm hurbaatiinsi itta'a Ba'aalina otossito'o. Ee'isinne Isra'ee'l oos Phee'ooranne yoo Ba'aalina otossito'i bikkina Waa'i ixxuwwanne quuqukko. Muse'enam «Isra'ee'l minaadabanne ihu i quunqi ixxuwwiinsi daba'llona ka minaadaphphi awwonsaano hundam massitaa sammi gud balli eelliinchonne shitaa i illagenne saqale. Muse'em Isra'ee'l awwonsaanina «Annannichchim ki'nnuwwi sulli lambe'ennem Phaa'ooranne yoo Ba'aalina otossukkoka hundam shi'llehe» yukko. Ee lasage Muse'ee minaadabii Keesammi Dukkaa'n goocanne wixxita'a wi'llitu'uuyyim Isra'ee'l oosiinsi mat Miidiyaa'm uullitan ikko'i mat meentichcho amadaa waarukko. Ixxim ee meentichcho ixxuwwi illaginne higisaa ixxi abaroosina hincaa'ukko. Eekkam qeessichchi Aaroonina beet beet ihu Ali'aazar beet Finihaas moo'ukko. Ixxim dummichchi lambe'enne afuuru beyyiinsi ki'aa bagado amadaa marukko. Ixxim oo manchii meentichchoo yo'i Dukkaa'n woro aagaa lamom bagadinne matissaa qasaa shukko. Ee lasage Isra'ee'l oosonne dillam hee'u booban uullukko. Ihukkaarem ee qax amman afeebe'e lamiyyii soor kum mannii boobaninne lehaa hee'ukko. Waa'im Muse'ena «Qeessichchi Aaroonina beet beet Ali'aazarina beet Finhaas an ixxuwwi lambe'enne to'achchoommi to'achcha ixxi to'achchu bikkina Isra'ee'l oosonne hee'u i quunqi billaakko. Ee bikkina anim Isra'ee'l ooso i to'achchinne bi'isummoyyo. Ee bikkina oono'o, an ixxenne i xummi hidi'l sagara aagoomman ihukkisa kure. Ixxi iina ixxi Moollannina to'achchoohan ihu bikkinaa Isra'ee'l oosikam baaxiilo uramoo'isa issu bikkinaa ixxii ixxi shumo'i hundimii heer heerina qeessuwwi ikkamo» yukko. Miidiyaa'm uulli meentichchonne maqire lehu Isra'ee'l manchi summi Saalu'i beet Zimiiratti hee'ukko; ixxim Simi'oon sulli woronne moolli awwonsaanchi hee'ukko. Meentichchokim summi Kooziibatte. Is annim Xuura yakkaman hee'ukko; ixxim mat ikka'a hee'llam hofqax Miidiyaa'm moolli mannina awwonsaanchi hee'ukko. Waa'i Muse'ena «Miidiyaa'm manna diina'isa issitakka'a bi'issehe. Mashka'oomim ixxuwwi ki'nnuwwa Phaa'ooranne qawwiissa'a barche'e baxxo'i bikkinattee Phaa'ooranne mashka'inne ubu booba'n bikkina leto'i ixxuwwi awwonsaanchi landichchonne Kooziibanne ihamaa ki'nnuwwa qawwiisamu bikkinattee» yukko. Booban uullaa lasage Waa'i Muse'ee qeessichchi Aaroon beet Ali'aazaraa lamom «Umur lamiyyi hiinchoo eehanniinsim hanaanii ihaa yo'i oranteena xantam goo'n ooso hundam Isra'ee'l minaadabiinsi abaroosinne abaroosinne xiggehe» yukko. Ee bikkina Muse'ee Qeessichchi Ali'aazarii Yoordaanoos gadanonne Iyyaarko'i illagenne yoo Moo'aaphphi biir beyyonne minaadaba wixxaa'lla'a, «Waa'i Muse'e ijaajukkisannem umur lamiyyee lamiyyiinsi hanaanii ihu goo'n ooso hundam xiggehe» yito'o. Gibxiinsi fitto'i Isra'eel kanniinsi woroon yo'i keeno. Yaaqoob won beet hee'u Roobeel sulliinsetti ikko'i Hanookatte, Faaluusatte, Heesiroonatte, Kariimattee ixxuwwi moolloo hee'ukko. Roobeel sulliinsi xiganto'i moolli awwonsaa'nnek hundikim xig mat ihaa soree sas kumaa lamar xibbee sadee hee'ukko. Faaluu'i shumo'im Eeli'aabatte, Eeli'aab oosim Naamu'eelatte, Daataanattee Aberoonattee hee'llo'o. Daataanii Aberoonii minaadaphphi awwonsaan hee'llo'o; ixxuwwim Qore'ennee ixxi awwonaaninnee mat ihimminne Waa'anne boqqito'i ammane Muse'ennee Aarooninnee uullixxanto'i keeno. Ixxuwwam uulli fooqaa Qore'enne maqirem xuuxukko. Ixxuwwi leto'i ammane Giir lam xibbee ontayyi manchoo shookkiisukko; minaadabinam guzumo'anchi mare'i ikko'o. Ihukkaarem Qore'i shumo'i guullaa bi'ukkoyyo. Simi'oon sullim ixxuwwi moolli moollinnem Namu'eelette, Yaamiinatte, Yaakiinatte, Zaara'atte, Saa'ullattee ixxuwwi moolloo hee'ukko. Simi'oon sulliinsim xiganto'i moolli awwonsaan lamiyyee lam kumaa lam xibbee hee'ukko. Gaad sullim ixxuwwi moolli moollinnem Xaafoonatte, Haga'atte Shuuni'atte, Eesnaanatte, Eeratte, Arood Ari'eelattee ixxuwwi moolloo hee'ukko. Gaad moolliinsi xiganto'i keen hundoomim sor kumaa onti xibbee hee'ukko. Yihuxxi sulliinsette hee'llo'i Eerii Awnaanii Kana'aa'n uullanne leto'o. Gatto'i Yihuxxi sulli ixxuwwi moolli moollinnem Seeloomatte, Faareesatte, Zaaraanattee ixxuwwi moolloo hee'ukko. Faarees oosim Eesiroommatte, Hamuulattee ixxuwwi moolloo hee'ukko. Yihuxxi sulliinsi xiganto'i moolli awwonsaa'nnek xig lamarayyee loh kumaa onti xibbee hee'ukko. Yisaakoor sullim ixxuwwi moolli moollinnem Toolatte, Fuuwwatte, Yaasuubatte, Shiimroonattee ixxuwwi moolloo hee'ukko. Yisaakoor sulliinsi xiganto'i moolli awwonsaan lohayyee soor kumaa sas xibbee hee'ukko. Zaabiloon sullim ixxuwwi moolli moollinnem Seereedatte, Eeloonatte, Yahiyi'eelattee ixxuwwi moolloo hee'ukko. Zaabiloon sulliinsi xiganto'i moolli awwonsaan lohayyi kumaa onti xibbee hee'ukko. Yooseef sullim ixxuwwi moollisinnem Minaasettee Efreemattee hee'ukko. Minaas sulli shumo'iinsetti ihu Maakiir Gala'aada qarukko. Gala'aad oosim Ii'eeziratte, Heeleeqatte, Asiri'eelatte, Seekeematte, Shamiidatte, Heefeerattee ixxuwwi moolloo hee'ukko. Heefeer beet Xaloofihaadina landiinsi bagaan goon oos hee'ukkoyyo; ixxuwwim Mahilatte, No'atte, Hoogilatte, Miilkattee Tiriisattee hee'llo'o. Minaas sulli moolli awwonsaa'nnek xig ontayyee lam kumaa lamar xibbee hee'ukko. Efireem sullim moolli moollinnem Sutuulatte, Bekkeeratte, Taahoonatte, Sutuul beet Eerattee ixxuwwi moolloo hee'ukko. Oo keenim Efreem sulli hee'llo'o; ixxuwwiinsim xiganto'i keen sadee lam kumaa onti xibbee hee'llo'o. Moolli moollinnem Yooseef shumo'i ee keeno. Biiniyaam sulli moolli moollinnem Beela'atte, Ashbeelatte, Ahiiraamatte, Shufaamatte, Hufaamattee ixxuwwi moolloo hee'llo'o. Beela'i oosim Ardinatte, Naa'imaanattee ixxuwwi moolloo hee'ukko. Ku keen Biiniyaam moolli ikka'a ixxuwwiinsi hundiinsim xiganto'i keen soree onti kumaa loh xibbee hee'ukko. Daan sullikim moolli Samee'itee ixxi moolloo ihaa Samee'i moolli hundim ixxuwwiinsi xigakko'isinne lohayyee soor kumaa soor xibbee hee'ukko. Aaseer sullik moolli Yiimatte, Yasuwaattee Barii'attee Barii'i oosiinsim Hebeeratte, Maaliki'eelattee ixxuwwi moolloo hee'ukko. Aseerinam Seeraa yakkam landichcho hee'llo'o. Oo keen hundim Aaseer moolli hee'ukko; ixxuwwiinsim xiganto'i keen ontayyee sas kumaa soor xibbee hee'llo'o. Niftaaleem sulli moolli moollinnem Yaahxeelatte, Guni'atte, Yeexiratte, Shiileemattee ixxuwwi moolloo hee'ukko. Niftaaleem sulli ixxuwwi moollinnem kakeen ihaa xiganto'i keen soree onti kumaa soor xibbee hee'ukko. Ka'isinne Isra'ee'l minaadabiinsi hundiinsim xiganto'i keen loh xibbee mat kumaa lamar xibbee sadee hee'llo'o. Waa'im Muse'ena «Sulli sullinne xiganto'i xiqqisinne uullooma hundem sullim gulummi issita'a lago aa'llona baxxanse. Lobakat xig yoo sullina lonsitaa hoffi xig yoo sullinam hoffiissaa uwwe. Ee lago aa'llam uullikim baxxanchi annichchi annichchi sulli xiqqisinnetteme. Ihukkaarem baxxanchoom ihookkok saaminnette. Saamim firookkok sulli anno'i summinnette. Saamim firookkok xigonne lobanee hoffanee ihu abaroos lambe'nnette» yukko. Leewi'i sullim moolli moollinne Gershoonatte, Qa'aatatte, Meeraarattee ixxuwwi moolloo hee'ukko. Ixxuwwi shumo'im moolli moollinne Libinatte, Keebiroonatte, Mahilatte, Mushe'ette, Qoraahattee ixxuwwi moolloo hee'ukko. Qa'aatim Amiraama qarukko. Ixxim Gibxi uullanne qaranto'i Leewi'i landihcho Yookobeede eebaa hee'ukko. Isem Aaroona, Muse'ee ixxuwwi aayyat ikko'i Maariyaamee ixxena qatto'o. Aarooninam Naadaab, Abiihu, Ali'aazaree Itaamaaree yamantam soor goo'n oos hee'llo'o. Ihukkaarem Naadaabii Abiihuu keesamoo'n yoo giira Waa'ina hincaa'llo'i bikkina leto'o. Umur mat aganaa eehanniinsim hanaan ihu Leewi'i goo'n oos hundikim xig lamiyyee sas kumaa ihukko. Ixxuwwim mulli Isra'ee'l oosiinsi annanni ikka'a xiganto'o. Mashka'oomim mulli Isra'ee'l oosinne maqire ixxuwwina matem gulummim uwwamubee'i bikkinatte. Muse'ee Ali'aazarii Iyyaarko'i illagenne Yoordaanoos daajji gadanonne yoo Moo'aaphphi biir beyyonne Isra'ee'l ooso xiggo'i ammane kitaabanto'i moolli awwonsaan ka keen hee'llo'o. Luxxeka siina'i udma'i uullanne Muse'ee Aaroonii minaadaba xiggo'i ammane kitaabbo'i gooniinsi matichchim foorinne hee'llo'oyyo. Mashka'oomim Waa'i «Hundim udma'i uullanne letamo» yaa hee'u bikkinatte. Ee bikkina Yaafun beet Kaaleebiinsii Naawe'i beet Iyyaasiinsii bagaan hundim leto'ookko. Yooseef Beet ihu Minaas moolliinsi Maakiir beet, Gala'aad beet, Heefeer beet Xaloofihaadina Mahila, Noo'aa, Hogila, Miilikaa Tiirtisaa yakkam landi hee'llo'o. Ixxuwwim Keesammi Dukkaa'n gooc kolli hincita'a Muse'e illagenne, qeessichchi Ali'aazar illagenne, awwonsaa'n illagennee hundem minaadaphphi illagennee uullita'a «Niyyanni goo'n ooso qaroo'nnim udma'i uullanne lehaakko. Ixxim lehukkok ixxi baaxiilinnetteme bagaan mat ikka'a Waa'anne ki'llo'i Qoore'i awwonaanonne exxaateyyo. Eehannah goo'n ooso qarubee'i bikkina xalle'i niyyannik summi Isra'ee'l lambee'iinsi annanni ihaa hinkid shiinshamaa bi'ookko? Ee bikkina niinam nayyanni qarimanni lambe'enne uulli sharada uwwehe» yito'o. Muse'em ixxuwwi xa'mmichcha Waa'i kollonne hincaa'ukko. Waa'im Muse'ena, «Xaloofihaad landi xa'mmichchi hanqo'ane. Ee bikkina ixxuwwi anni qarmanni lambe'enne ixxuwwina ixxuwwi anni uulli sharada uwwehe; ixxuwwi anni uulli sharad ixxuwwan ihona. Goo'n ooso qaroo'n lehoo manchi hee'uta'n ixxi amaxxa landi lago aa'eena xanoo'isa Isra'ee'l minaadabina la'ise. Landim beelas ixxi abbaayyuwwi anni uulli sharada lago aa'llona. Ixxenam abbaayyuwwi bee'an ihulas ixxi annabbaayyuwwi lago aa'llona. Odim ee manchina abbaayyuwwam ihukko annabbaayyuwwi bee'an ihulas ixxena hincixxi qarmanchi ihoo manchi lago aa'eena xanookko. An Waa'i keese ijaajummisinnem Isra'ee'l minaadab ka seeraa gattee qoxxaalli awwonsi issita'a egettona» yukko. Waa'i Muse'ena «Ka Abaariim duunanne Fittaa Isra'ee'l oosina uwweena sawwummi uulla hundam moo'e. Ixxom moo'llaa lasage kiyyabbaayyi Aaroonisam atim ki minaadaphphi kollonne wixxitootto. Mashka'oomim ki'nnuwwi lamim Xiin udma'i uullanne Mariiphphi wo'i gadanonne minaadab hundim eesenne boqqito'i ammane iikka keesamaakkoo malaayye ixxuwwi illagenne moo'isimma sabbakko'i bikkinatte» yukko. Mariib Xii'n udma'i uullanne Qaadeesanne hee'oo bu'o. Muse'em Waa'ina Waa'im Muse'ena «Keesammi Ayyaan yoo Naawe'i beet Iyyaaso massitaa ki anga ixxi horoorenne isse. Ixxom Qeessichchi Ali'aazar illagennee hundem minaadaphphi illageennemii uullo'isa isse. Ee lasage ixxuwwi hundim yo'i beyyonne keese bikkukkisa la'ise. Ixxenam Isra'ee'l minaadab hundim ijaajantona ki gassiinsi baxxanse. Qeessichchi Ali'aazar Uriiminne Waa'ika doo'lla la'oohan ihu bikkina ixxi Iyyaaso hara'mmookko. Iyyaasii Isra'ee'l minaadabii hundim ixxi Yoo'isanne mattona» yukko. Muse'em Waa'i ijaajukkisa issukko. Iyyaasom massaa qeessichchi Ali'aazar illagennee hundem Isra'ee'l minaadaphphi illagennee uullo'isa issukko. Waa'i ixxo ijaajukkisannem Muse'e ixxi anga Iyyaas horoorenne issaa lasage Iyyaas ixxi bikkoohan ihukkisa caakkisaa la'isukko. Waa'i Muse'ena «Isra'ee'l oos enji mishisoo shokkiisakkam hurbaaxxi kitima amman hundam iina hincaa'llona kure» yukko. Odim giirinne shokkiisakka'a iina Waa'ina hincaa'akkam hurbaaxxi kitim «Hundem ballam Waa'ina hincoo shokkoo kitimina miiqakkam luwwi bee'i mat hiinchi gereebbi ambulluwwik lam ihona. Mat ambula daranne la'mmeka maaro'i ballanne hincaa'llehe. Odim ambulluwwinne annannichchinnem danaam mat liitir wee'l zaytinne cukkamaakkoo mat kiilo'i qaminne maqirem wix hurbaaxxi kitim ihaa hincihona. Oohim danaamisa mishisoo enji ihaa giirinne iina Waa'ina hundi ammanem hincoo kitima. Ixxim illageen hincukkok Siina'i duunannetti hee'ukko. Luxxi ambulinne maqire aaggi kitim ihaa hincihona mat liitira ihoo qoxxaalli agga ee keesamaakkoo kiti'm beyyonne dunnehe. Uulli hiimaa maaro'oohaarem la'm ambula luxxeka hincaa'llakko'aannisam wix hurbaaxxi kitimaa aggi kitimaa eddakka'a hincaa'llehe. Oohim iina Waa'ina enji mishisoo giiranne hincoo kitim ihookko. «Usheexxaxxi ayyaamonne matem miiqakkam luwwi bee'i mat hiinchi gereebbi ambulluwwika lamo, wix hurbaaxxi kitimina wee'l zaytinne cukkamaakkoo lam kiilo'i er qamaa aggi kitimaa hincaa'llehe. Oohim aggi kitiminnee hundi ammanem shokkiisakka'a hincaa'akkam kitiminnee maqirem usheexxaxxi ayyaam hundam hincoo kitima. «Agan aagu luxxi ballanne miiqakkam luwwi bee'i lam labeennuwwa, mat gereechchi ambulaa mat hiinchi gereebbi ambulluwwika lamaraa shokkiisakka'a incaa'akkam kitim ihona hundem aganannem iina Waa'ina hincaa'llehe. Labeennuwwina annannichchinam wix hurbaaxxi kitimina wee'l zaytinne cukkamaakkoo danaam qama hincaa'llehe. Oohim labeennuwwinne annannichchinnem sas kiilo'i qam gereechchi ambulinne lam kiilo'i qam mat hiinchi gereebbi ambulluwwinne annanchinnem wix hurbaaxxi kitimina mat kiilo'i qama hincaa'llakkamo. Oo shokkoo kitim hundim eese Waa'a liiransoo hurbaaxxi kitim ihaa hincookko. Labeennuwwinne annannichchinnem maqire lam liitir agga gereechchi ambulinnem mat liitiro'oo liitiro'i kolli agga mat hiinchi ambulluwwinne annannichchinnem mat liitir woyi'n diqaasaa hincaa'llehe. Oohim hiincho hundoomam agan aagu luxxi ballanne hincoo shokkiisakkam kitima. Hundi ammanem aggi kitiminne maqirem hincoo shokkiisakkam kitimiinsi mulleka mat fellakkichchi ambula baaxii'l haafixxi kitim issitakka'a iina Waa'ina hincaa'llehe. Waa'ik shaashshiqqi ugud luxxi agan aagu tommonnee soo'l ayyaamonnee ihona. Ee aga'n tommonnee onti ayyaamonnee ugud ihona. Lamar balli afeebe'em ursho'i nakkube'i qorosho'o ittehe. Ee uguxxi luxxi ayyaamonne keesamaakkoo dummichcha dummehe. Ee balla mah baxom baxxakkotte. Matem haashaaranchim bee'i lam labeennuwwaa mat gereechchi ambulaa mat hiinchi gereebbi ambulluwwika lamaraa shokkiisakka'a hincaa'akkam kitim issitakka'a iina Waa'ina hincaa'llehe. Annannichchi labeeninne maqirem wee'l zaytinne cukkamaakkoo sas kiilo'i er qama Ee'isam gereechchi ambulinne maqire lam kiilo'i er qama wix hurbaaxxi kitim issitakka'a hincaa'llehe. Odim lamarem mat hiinchi gereebbi ambulluwwinne maqirem mat kiilo'i qama hincaa'llehe. Mat fellakkichchi ambula baaxii'l haafixxi kitim issitakka'a hincaa'llehe. Hundem ballam dar dara hincoo shokkiisakkam kitiminne hincoo kitimiinsi mulleka ee keeno hincaa'llakkamo. Enji iina Waa'ina mishisoo hurbaaxxi kitimam eehido'isinne lamarem ballam hincaa'llehe. Eeham aggi kitiminne maqirem hundem ballam hincaa'llehe. Lama'l ballannem keesamaakkoo dummichcha dummehe. Mah baxom ee ballanne baxxakkotte. «Saanta saantanne ihoo ugudanne haareechchi hurbaaxxi kitimina hurbaaxxeka ludo iina Waa'ina hincaa'llakkam balla keesammi dummichcha dummehe. Mah baxom ee ballanne baxxakkotte. Lam labeennuwwa, mat gereechchi ambulaa mat hiinchi gereebbi ambulluwwika lamaraa enji iina Waa'ina mishisoo shokkiisakkam kitim issitakka'a hincaa'llehe. Labeennuwwinne annannichchinnem wix hurbaaxxi kitimina ihoo wee'l zaytinne cukkamaakkoo sas kiilo'i er qama ee'isam gereechchi ambulinne maqirem lam kiillo'i qama hincaa'llehe. Ee'isam lamarem gereebbi ambulluwwinne maqirem mat mat kiilo'i qama hincaa'llehe. Ki'nnuwwi baaxii'l haafitina ihoo mat fellakkichchi ambula hincaa'llehe. Ka hundem kitimaa aggi kitimaa balli hunda hincoo shokkiisakka'a hincaa'akkam kitimiinsii wix hurbaaxxi kitimiinsii mullan ihaa hincihona. Kitimina hincoo diinatim miiqakkam luwwi bee'i muccur ihukkisa qoossitakka'a laqqehe. «Lama'l agan aagu luxxi ayyaamonne keesamaakkoo dummichcha dummehe. Ee balla maham baxxakkotte. Oo balli xurumbi fugamoo balla. Miiqakkam luwwi bee'i mat labeena, mat gereechchi ambulaa mat hiinchi gereebbi ambulluwwika lamaraa enji eese Waa'a liiransoo shokkiisakka'a hincaa'akkam kitim issitakka'a hincaa'llehe. Hurbaaxxi kitiminam Wee'l Zaytinne cukkamaakkoo er qama hincaa'llakkamo; oohim labeeninne sas kiilo'i qama, gereechchi ambulinne lam kiilo'i qama, lamarem gereebbi ambulluwwinne annannichchinnem mat mat kilo'i qama hincaa'llehe. Baaxii'l haafitina ihoo mat fellakkichchi ambula hincaa'llehe. Ku kitimmuwwi see'llisanne hurbaaxxi kitiminnee aggi kitiminnee maqirem balla ballannee agananne aganannee shokkiisakka'a hincaa'akkam kitimiinsi mulleka ee'isam enji Waa'a liiransoo shokkiisakka'a hincaa'akkam kitimmuwwa. «Lama'l agan aagu tommi ballanne keesamaakkoo dummichcha dummehe. Ee balla mah hurbaatam ittakkotte; baxom baxxakkotte. Miiqakkam luwwi bee'i mat labeena, mat gereechchi ambulaa mat hiinchi gereebbi ambulluwwika lamaraa enji eese Waa'a liiransoo shokkiisakka'a hincaa'akkam kitim issitakka'a hincaa'llehe. Hurbaaxxi kitiminam wee'l zaytinne cukkamaakkoo er qama hincaa'llehe; oohim labeeninne sas kiilo'i qama, gereechchi ambulinne lam kiilo'i qama lamarem gereebbi ambulluwwinne annanchinnem mat mat kiilo'i qama hincaa'llehe. Baaxii'l haafitina hurbaaxxaanninnee aggi kitiminnee exxaa hundi ammem shokkiisakka'a hicaa'akkam kitimiinsi mulleka mat feellakkichchi ambula eddakka'a baaxii'l haafixxi kitim issitakka'a hincaa'llehe. «Lama'l agan aagu tommonnee onti ballannee keesamaakkoo dummichcha dummehe. Ee balla maham baxxakkotte; Waa'ina lomba uwwimminne ee uguda lamar balla lonsehe. Ee uguxxi luxxi ballanne miiqakkam luwwi bee'i tommoo sas labeennuwwa, lam gereebbi ambulluwwaa mat hiinchi gereebbi ambulluwwika tommoo sooroo enji eese Waa'a liiransoo shokkiisakka'a hicaa'akkam kitim issitakka'a hincaa'llehe. Hurbaaxxi kitim ihoo'isina wee'l zaytinne cukkamaakkoo er qama ee labeennuwwinne annannichchinnem sas kiilo'o qama, ambulluwwinne annannichchinnem lam kiilo'i qama, mat hiinchi gereebbi ambulluwwinne annannichchinnem mat mat kiilo'i qama hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «La'm ballam miiqakkam luwwi bee'i tommoo lam labeennuwwaa lam gereebbi ambulluwwaa mat hiinchi gereebbi ambulluwwika tommoo sooroo hincaa'llehe. Ee labeennuwwinne, ambulluwwinnee mat hiinchi gereebbi ambulluwwinnee hurbaaxxekaa aggikaa kitima qoodamukkisinne hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «Saxxi ballanne miiqakkam luwwi bee'i tommoo mat labeennuwwa, lam gereebbi ambulluwwaa mat hiinchi gereebbi ambulluwwika tommoo sooroo hincaa'llehe. Labeennuwwinne, gereebbi ambulluwwinnee mat hiinchi gereebbi ambulluwwinnee maqire hincoo'isina qoodamukisinne hurbaaxxekkaa aggikaa kitima hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. Soo'l ballanne miiqakkam luwwi bee'i tommi labeennuwwa, lam gereebbi ambulluwwaa mat hiinchi gereebbi ambulluwwika tommo sooro kitimina hincaa'llehe. Ee labbennuwwinne, gereebbi ambulluwwinnee mat hiinchi gereebbi ambulluwwinnee maqire hincaa'immina qoodamu xiqqisinne hurbaaxxekaa aggikaa kitima hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «Onti ballanne miiqakkam luwwi bee'i honsi labeennuwwa, lam gereebbi ambulluwwaa mat hiinchi gereebbi ambulluwwika tommoo sooroo hincaa'llehe. Ee labbennuwwinne, gereebbi ambulluwwinnee mat hiinchi gereebbi ambulluwwinnee maqire hincihona qoodamu xiqqisanne hurbaaxxekaa aggikkaa kitima hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «Loh ballanne miiqakkam luwwi bee'i sadeenti labeennuwwa, lam gereebbi ambulluwwaa mat hiinchi gereebbi ambulluwwika tommoo sooroo hincaa'llehe. Ee labeennuwwinne, gereebbi ambulluwwinnee mat hiinchi gereebbi ambulluwwinnee maqire hincihona qoodamu xiqqisinne hurbaaxxekaa aggikaa kitima hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «Lama'l ballanne miiqakkam luwwi bee'i lamar labeennuwwa, lam gereebbi ambulluwwaa mat hiinchi gereebbi ambulluwwika tommoo soroo hincaa'llehe. Ee labeennuwwinnee gereebbi ambulluwwinnee mat hiinchi gereebbi ambulluwwinne maqire hincihona qoodamu xigisinne hurbaaxxekaa aggikkaa kitima hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «Sadeenti ballanne keesamaakkoo dummichcha dummehe. Ee ballannem mah baxom baxxakkotte. Matem miiqakkam luwwi bee'i mat labeena, mat gereechchi ambulaa mat hiinchi gereebbi ambulluwwika lamaraa shokkoo kitim issitakka'a inje'oo enji iina Waa'ina mishsoo kitima hincaa'llehe. Labeeninnee gereechchi ambulinnee lamarem gereebbi ambulluwwinnemii hurbaaxxi kitimaa aggi kitimaa hincihona qoodamu xiqqisinne hincaa'llehe. Baaxii'l haafitinam mat fellakkichchi ambula hincaa'llehe; oo kitim hurbaaxxi kitiminnee aggi kitiminnee maqirem hundim shokkona hincoo kitimiinsi mullane. «Uga'innee gaqqi doo'llinnee hinca'llakkam kitimiinsi mulleka shookkiisimminne hincoo kitimmuwwa, hurbaaxxi kitimmuwwa, aggi kitimaa mateeyyoo'm kitimmuwwaa la'amakkoo ki'nnuwwi ugudeewanne iina Waa'ina hincaa'llehe» yukko. Muse'em Waa'i ijaajukkoka hundam Isra'ee'l oosina kurukko. Muse'e Isra'ee'l sulli awwonsaanina «Waa'i ijaajukkok, mat manchi Waa'ina uga'a aagulas te'im ma'llichcho isseena hide'ulas ee sagara wonshimmi hasisookko. Mat landichcho anni minenne hee'llu'uuyyim Waa'ina ma'llichcho uwwiteena uga'a aaggota'n te'im mat luchcho issitambee'isa hide'llota'n, is annim eekka macceesaa sabubeelas aaggo'i hidi'l sagara te'im uga'a hundam issita'a guullimmi hasisookko; issoommoyyo yito'i luwwam ginditeena xantamoyyo. Ihukkaarem is anni ee ise aaggo'i hidi'l sagara macceesaa lasage wonshitambee'isa hoorulas ee uga'i bikkina ise xa'mmantamoyyo. Mashka'oomim ee ise aaggo'i uga'a issita'a guulliteena xantobee'ek is anni hooru bikkinatte; ee bikkina Waa'i isena haafookko. Ee'isam mat landichcho laqa'atem ihukko jalagga'a uga'a te'im ma'llichchiinsi ega'lliteena sagara aagga'a lasage mine issitota'n eekkam is manchi macceesaa hoorubeelas ise aaggo'i uga'a hundam wonshimmi hasisookko. Ihukkaarem is manchi eekka macceesaa aaggo'i uga'am ihukko jalanganne wocco'i luwwa wonshitambee'isa hoorulas ise eekka issitambee'isa hoorukkok ixxotti ihu bikkina Waa'i isena haafookko. Goonchi lehukkotte te'im goonchiinsi fitto'ote aaggo'i ayyi uga'am te'im ma'llichchiinsi is gaga ega'lliteena sagara aaggota'n eekka hundam wonshimmi hasisookko. Mat meentichcho ise manchinne maqire hee'llu'uuyyi uga'a aaggota'n te'im ma'llichcho issiteena hide'llota'nii is manchim eekka la'aa lasage eekka wonshitambee'isa hoorubeelas is ee hundam wonshimmi hasisookko. Ihukkaarem is manchi macceesaa lasage aaggo'i uga'a wonshitambee'isa hoorulas guulliteena hoorukkok ixxotti ihu bikkina Waa'i issena haafookko. Is manchim ise aaggo'i ayyi uga'am te'im is gaga ege'lliteena hidi'llo'i woshshi hundam wonshitona cawweena te'im gindeena xanookko. Ihona bagaan is manchi ee quux bikkina maham yoo'n hosaa garulas ise aaggo'i uga'a te'im hide'llo'i woshsha wonshimmi hasisookko. Mashka'oomim ee woshshi bikkina macceesaa maham yoo'n cawwaa urulas ise aaggo'i te'im hide'llo'i woshsha iittaa aa'aakkoo yimma. Ihukkaarem ee woshshi bikkina macceesaa mat qax balliinsi lasage ookki ihoo'n gatoo'isa issulas ee baaxii'l bikkina xa'mmammookkok ixxotti ihookko» yukko. Ku keen manchi lambe'ennee meentichchi lambe'ennee odim anni lambe'ennee mine issitobee'i landichchi lambe'ennee ihoo'isina Waa'i Muse'ena uwwu seelluwwa. Waa'i Muse'ena «Isra'ee'l minaadaba barche'e issito'i bikkina Miidiyaa'm manniinsi baado miqise; ee'isa issitaa lasage atim letootto» yukko. Muse'em minaadabina «Miidiyaa'm manni Waa'anne afisso'i hawwojji bikkina baado miqissakkeena orina guddehe. Isra'ee'l sulluwwiinsi annannichchiinsim mat mat kum mancho doo'llitakka'a orina asse'llehe» yukko. Ee bikkina lobakat kum Isra'ee'l minaadaphphi sulluwwiinsi annannichchiinsim mat mat kum mannicho fissita'a ee orina tommii lam kum manchii gudukko. Muse'em Keesammi mi'n mu'utaa orina mare'i ihona fugakkam xurumbuwwaa amadaa hee'u qeessichchi Ali'aazar beet Finihaasinne maqirem hundem sulliinsim mat mat kum mancho orina asse'ukko. Ixxuwwim Waa'i Muse'e ijajukkisinnem Miidiyaa'm manninne qasanta'a goona hundam shita'a guullito'o. Miidiyaa'm uulli ontem dilluwwam Eewi'i, Reeqeema, Xuura, Huuraa Reebaa'aa shito'o. Bii'oor beet Baala'aamam bisa'inne shito'o. Isra'ee'l oosim Miidiyaa'm mannika meentoo oosoo qeefaddo'o; laro, gereebba, fella'aa mulli amaxxa hundamii bogga'a massito'o. Miidiyaa'm manni hee'oo beero'uwwaa wiiddanta'a hee'llam beyyuwwaa hundam shokkiisso'o. Qeefaddo'i manna, boggo'i diinatee mu'utaa hundam guggutto'o. Qeefaddo'i manna, boggo'i diinatee amaxxaa hundam Yoordaanoosiinsi eeqidonne Iyyaarko'ina illagenne yoo Moo'aaphphi uulli biir beyyonne wiiddanta'a hee'llo'i Muse'ee qeessichchi Ali'aazarii ee'isam Isra'ee'l minaadabii hundim yo'i beyyo eebbo'o. Muse'e, Ali'aazarii minaadaphphi awwonsaanii hundim gogota aa'lleena wiiddanto'i amba'iinsi fitto'o. Ihukkaarem Muse'e ee gaadiinsi daba'llito'i gaaxxi awwonsaanonne, shaalaqquwwannee xibbi halaqquwwannee quuqukko. Muse'em ixxuwwa «Meento hundam shitakkoo'n uttakko'ok mahinatte? Phee'ooranne hee'nnummi ammane Baala'aam sogitano aa'lla'a minaadab Waa'anne yoo amma'nnto uttamisina issito'ok meentoyyonnihe? Waa'i minaadabannem booban dillukkok ee mashka'innette. Ee bikkina kaba goo'n oosoo gooninne edanto'i meentoo hundam shi'llehe. Ihukkaarem gooninne edantobee'i baajaam landa hundam ki'nnuwwi gagina gatixxehe. Ki'nnuwwi lambe'iinsi manna shukkok te'im leesha nakkukkok ayyim wiidda'n beyyiinsi tochchonne lamar balla afuurona. Saxxi ballannee lama'l ballannee ki'nnuwwi gagaa qeefaddakko'i landaa haashaaranchiinsi muccussehe. Ee'isam ayyi eddechcham te'im omachchinne, fella'i oddinne te'im haqqinne baxamu luwwi hundam muccussehe» yukko. Qeessichchi Ali'aazarim oriinsi daba'llito'i gaadaanina «Waa'i Muse'ena uwwu see'l awwonsi kane. Lama'l ballannem ki'nnuwwi eddechcha aanshehe. Ee lasage muccuttakko'oohan ikkakkam bikkina wiidda'n beyyo daba'llitakka'a aaggehe» yaa awwonsa uwwukko. Waa'i Muse'ena Atii Ali'aazarii minaadaphphi awwonsaaninne maqirem qeefadamu mannaa diinatee hundam xiggehe. Ee qeefajjo'om lam beyyonne baxxansitakka'a lasage kolloo gaadaanina kolloo minaadabina hundinam uwwehe. Gaadaanina afu sharadiinsi manniinsi, lariinsi, halliinsi, gereebbiinsii fella'iinsii onti xibbiinsi mato iina Waa'ina kitim issitakka'a annanni issehe. Eeham iina Waa'ina annanni uwwanchi issitakka'a qeessichchi Ali'aazarina uwwehe. Minaadaphphi sharadiinsim manniinsi, lariinsi, halliinsi, fella'iinsii gereebbiinsii ontayyiinsi mato annanni issitakka'a Keesammi Dukkaananne awwonsaan ikko'i Leewi'i oosina uwwehe» yukko. Muse'ee Ali'aazarim Waa'i Muse'e ijaajukkisanne issito'o. Gaadaan qeefadda'a massito'i qeefajjo'iinsi gatukkok loh xibbee lamarayyee onti kum gereebba, lamarayyee lam kum laro, lohayyee mat kum hallaa sadee lam kum baajaam landaa hee'ukko. Qeefajjo'o lam gudaanchonne baxxansakko'aare gaadaanina uwwamu sharad sas xibbee sadee lamar kumaa onti xibbi gereebbaa hee'ukko. Ee gereebbiinsim loh xibbii lamarayyii ontii Waa'ina kitim ihaa uwwamukko. Gaadaanina uwwamu la'llek xig sadee loh kumaa hee'ukko. Ee lariinsim lamarayyii lamii Waa'ina kitim ihaa uwwamukko. Gaadaanina uwwamu hallikim xig sad kumaa onti xibbee hee'ukko; ee halliinsim lohayyii matii Waa'ina uwwamukko. Gaadaanina uwwamu baajaam landikim xig tommoo loh kumaa hee'ukko. Ee keeniinsim sadii lamii Waa'ina annanni ihukko. Muse'em Waa'i ixxo ijaajukkisinne ee kitimmuwwa Waa'ina annanni sharad issaa qeessichchi Ali'aazarina uwwukko. Muse'e minaadabina baxxansu sharad gaadaa'n sharadinne gudaanchi hee'ukko. Oohim sas xibbee sadee lamar kumaa onti xibbi gereebba, sadee loh kum laro, sad kumaa onti xibbi hallaa tommoo loh kum baajaam landaa hee'ukko. Muse'em minaadaphphi sharad ihu manniinsii diinatiinsii ontayyiinsi mato Waa'i ixxo ijaajukkisinne Keesammi Dukkaana egettam Leewi'i oosina uwwukko. Ee lasage o'l gogoxxi awwonsaan hee'llo'i shaalaqquwwii xibbi halaqquwwii Muse'e beyyo waatta'a, «Neese ki awwaadaan ni ijaacci woronne yoo gaadaano hundam xingaammo. Ixxuwwiinsim matim bi'ukkoyyo. Ee bikkina neese annannichchim massinaa hee'nnummi worqinne baxamaakkoo wereeggi mu'uttuwwa, oohim lokki guma'a, angi laakka, guma'a, macci gutichchoo gaanji worqaa hundam niina Waa'i haafihona kitim issinaa ixxena eenbaammo» yito'o. Muse'ee Ali'aazarii weereggina baxamaa hee'u worqa hundam aa'llo'o. Muse'ee Ali'aazarii Shaalaqquwwiinsii xibbalaqquwwiinsii aa'lla'a Waa'ina kitim issita'a hincaa'llo'i worqi lam xibbi kilo'o ihoohan hee'ukko. Mulli gaadaan hundim qeefaadda'a eebbo'i luwwa ixxuwwi gaginam a'llito'o. Ee bikkina Muse'ee qeessichchi Ali'aazarii worqa shaalaqquwwiinsii xibbalaqquwwiinsii aa'lla'a Isra'ee'l oosina tiissishshi mare'i ihona Keesammi Dukkaa'n beyyo eebbo'o. Roobeel sullinaa Gaad sullinaa la'llek, gereebbikii fella'ikii lobakat hor hee'ukko. Ixxuwwim Yaa'izeer uullii Gala'aad uullii diinate allaachchina makki ihukkisa moo'lla'a, Muse'e beyyo, qeessichchi Ali'aazar beyyoo awwonsaa'n beyyoo waatta'a, «Axaarootika, Diiboo'nneka, Yaa'izeerika, Niimira'ika, Haseeboo'nneka, Eeli'aa'lleka, Siibii'mmeka, Nabo'ikaa Ba'oo'nnekaa minaadaba Waa'i Isra'ee'l illagenne kaa'antamisa issu ku uulli hundim diinate allaachchina makka. Niina odim lobakat diinat yookko. Ee bikkina neese ki illagenne nuura siindaammoohaare ka uulla niina ki awwaadaanina gulummi issitaa uwwe. Yoordaanoos eeqidonnem fissititte» yito'o. Muse'em Gaadaaninaa Roobeel sullinaa «Ki'nnuwwi abbaayyuwwi ikko'i Isra'ee'l oos orina mattu'uuyyi ki'nnuwwi keyye gattakkeena hassakkamonnihe? Isra'ee'l oos Yoordaanoos daajje higga'a Waa'i ixxuwwina owwu uulla aaggambee'isa neeyyato mussiissakkamok mahinatte? Uulla shaashshitona Qaadees baarne'iinsi asse'ummi ammane ki'nnuwwi anno'im issito'ok kane. Eshkoo'l cebbi afeebe'e matta'a uullooma moo'lla'a lasage Waa'i uwwu uulla Isra'ee'l minaadab aagoobee'isa neeyyato mussiisso'o. Ee balla Waa'i lobakata quuqaa ‹Ixxuwwi eese wo'm sawwitinne awwontobee'i bikkina Gibxiinsi fitto'i keeniinsi umur lamiyye ihukkokii eehanniinsi hanaan ihukkokii ayyim Abrihaamina, Yisaaqinaa Yaaqoobinaa uwweena sagara aagummi uulla hore'em aagoobee'isina hide'aammo› yukko. Oohim Waa'a wo'm sawwitinne awwonto'i Qaniizichchi Yaafun beet Kaaleebiinsii Naawe'i beet Iyyaasiinsii bagaan mulli manna hundam edohane. Waa'i illagenne amma'nnanto'oo keen ikka'a siidanto'ok xale'i ixxuwwa. Waa'i quunqim Isra'ee'l oosonne qoxxukko. Ixxi illagennem jora issu oo qaranchi hundim lehaa beeddeebe'i afeebe'e sor hiinchina udma'i uullanne karkaadoo'isa issukko. Kaba odim ki'nnuwwi ki'nnuwwi anno'o bikkitakka'a Waa'i quunqi Isra'eelanne lophphoo'isa issitakkeena guddakko'oo haareechchi baaxiilaanchi qaranchi ikkakko'ookko. Ki'nnuwwi Roobeel sullii Gaad sullii kaba Waa'a awwonimma sabbakkolas Waa'im ka minaadaba udma'i uullanne urookko. Ixxuwwanne afoo bichchi bikkinam ki'nnuwwi xa'mmantakkamo» yaa dabarukko. Ixxuwwim Muse'e kolli hincita'a «Gaassinaa ka beyyonne neese ni diinatina oota, ni oosinaa meentinam girbamaakkoo beero'uwwa banxoommisa isse. Ee lasage neese Isra'ee'l oosinne maqire orina mallaa ixxuwwi gulummi ihu uulla aagga'a afuutteebe'e orammeena gundoommo. Neesem ee oriinsi daba'llineembee'e ni oosii meentii ee girbamu beero'uwwanne afuutta'a ee uulli manniinsi daphphixxitamo. Neesem Isra'ee'l oos annannichchim ixxuwwi gulummi ihu uulla siixxiteebe'e ni mine daba'llinoommoyyo. Neese ni gulumma Yoordaanoos daajjiinsi eelliinchi firanne yoo uulliinsi a'llinummi bikkina Yoordaanoos eeqidonne ixxuwwina uwwameena qoodamu uulliinsi maham baxxammoommoyyo» yito'o. Muse'em ixxuwwina «Kaba woccakko'isam Waa'i illagenne orina mattakkolas ee'isam Waa'i ixxi diina'a ixxi illagiinsi yaayyaa fisseebe'e ki'nnuwwi hundichchim ixxi illagenne guddakka'a Yoordaanoosa higgakkolas oo uulli Waa'i anganne ihaa lasage daba'llitakkeenaa Waa'ii Isra'ee'l oosii xa'mmitam xa'mmichchiinsim gattakkeenaa xantakkamo. Ku uullim Waa'i illagenne ki'nnuwwina gulummi ihookko. Ihukkaarem ki'nnuwwi eekka issitakkobee'las Waa'i illagenne baaxiilo baxxakkamulli ihukkisa laqqehe. Ki'nnuwwim ee baaxiilina xa'mmantakkaman ihukkisa laqqehe. Ee bikkina ki'nnuwwi oosinaa meentinaa beero'muwwa, ki'nnuwwi diinatina oota baxxehe. Ihukkaarem aaggakko'i sagara egellehe» yukko. Gaad sullii Roobeel sullii Muse'ena «Neese ki awwaadaan at ni Moollanni neese ijaajjittoka hundam issinoommo. Ni oos, meentii ni diinatii hundim ka Gala'aaxxi beero'uwwanne afuurookko. Ihukkaarem neese gaadina gundummi ki awwaadaan hundim Waa'i illagenne orammeena at ni moollanni ijaajjittisanne eeqido filloommo» yito'o. Ee bikkina Muse'e qeessichchi Ali'aazarina, Naawe'i beet Iyyaasinaa Isra'ee'l minaadaphphi sulli awwonsaaninaa hundinam ka ijaajo uwwukko. Gaadikii Roobeel sullikii goon hundim Yoordaanoosa higaa Waa'i illagenne orina firulasii ixxuwwim hara'mmita'a oo uulli ki'nnuwwi anganne ihulasii Gala'aaxxi uulla ixxuwwina gulummi issitakka'a uwwehe. Ihukkaarem ixxuwwi orina gudda'a ki'nnuwwinne maqire Yoordaanoosa higga'a mattobeelas ki'nnuwwisam Kana'aa'n uulliinsi ixxuwwi sharada baxxanta'a a'llitona» yukko. Gaad sullii Roobeel sullim «Waa'i niina ki awwaadaanina yukkoka hundam neese issinoommo. Waa'i illagenne orinam gundaa Yoordaanoosa hingaa Kana'aa'n uulla malloommo. Ihukkaarem neese ni gulummi issinaa a'llinoommi uulli Yoordaanoos daajjiinsi kid yoo beyyi ihookko» yito'o. Ee bikkina Muse'e Amoore'i adil Siihoon uulla, Baasaa'n adil Oog uulla, ee uullanne hee'oo beero'uwwaa odim ee uulli kululleetanne hee'oo uulluwwaa hundam Gaad sullinaa Roobeel sullinaa ee'isam Yooseef beet ihu Minaas sulli kollinaa uwwukko. Gaad sulli girbamaakkoo Diiboonika, Axaarootika, Aaro'eerika, Aaxiroot Soofaanika, Yaa'izeerika, Yoogbahaanika, Beetniimraanikaa Bethaaraanikaa beero'uwwa dabatta'a girbita'a baxxo'o. Diinatinam oota baxxo'o. Roobeel sullim Haseeboo'nneka, Eeli'aalika, Qiiryaataaymi'nneka, Nabo'ika, lasage summi daba'llu Ba'aalma'oonikaa Siibima'ikaa beero'uwwa dabatta'a girbissa'a baxxo'o. Ixxuwwim ee dabatta'a baxxo'i beero'uwwina hundinam haareechchi summa fissito'o. Minaas beet Maakir abaroos Gala'aaxxi uulla matta'a kaa'lla'a amadda'ahii ee uullanne hee'oo Amoore'i mannam yaayyita'ahii lasage uullooma ixxuwwi gulummi issita'a amaddo'o. Ee bikkina Muse'e Gala'aaxxi uulla Minaas shumo'i ikko'i Maakir abaroosina uwwukkaare ixxuwwi ee uullanne hee'llo'o. Minaas sulliinsetti ihoo Yaa'iir mat mat hegeegguwwa kaa'aa amadaa lasage «Yaa'iir hegeegguwwa» yaa summa fissukko. Ee'isam Noobaah Qanaataa ee hegeegguwwaa kaa'aa amadaa lasage ixxi gaqqi summanne «Nobaah» yaa weeshukko. Isra'ee'l oos sulli sullinne baxxamanta'a Gibxiinsi Muse'aanninnee Aaroon awwonsatinnee fitta'a lasage taakkonne hee'llo'i ammanne wiiddanto'i beyyuwwa kuroo aganni kanniinsi woroon yoohane. Muse'e Waa'i ijaajukkisinnem taakkonne hee'llo'i ammane wiiddanto'i beyyuwwika summa kitaabukko. Isra'ee'l oos Gibxi uulliinsi fitto'ok luxxi agan aagu tommonnee onti ballannee oohim luxxi higimmi uguxxi la'm ayyaamonne Ramise'i beero'o fatakita'a fitto'o. Ixxuwwim Gibxi uulli manni hundim moo'llu'uuyyim iggimminne taakke'llo'o. Ee ammane Gibxi uulli manni Waa'i quunqinne leto'i won ooso waammitam hee'llo'o. Waa'im Gibxi uulli qophpha'n waa'uwwanne oogatukko. Isra'ee'l minaadab Ramse'iinsi ki'lla'a matta'a Sukootanne wiiddanto'o. Ee beyyiinsim matta'a udma'i uulli tochchonne hee'oo Eetaamanne wiiddanto'o. Etaamiinsim ki'lla'a Ba'aalxaafooniinsi Eelliinchi firinne Phiihaahiiroot kolli daba'llita'a Miigdool gadanonne wiiddanto'o. Phiihaahiirootiinsi ki'lla'a Ertiira'i dambalaqa higga'a udma'i uulla matto'o; ee lasage Eetaa'm udma'i uulla sas balla taakke'lla'a Maara'anne wiiddanto'o. Ee beyyiinsim matta'a tommii lam wo'i bu'ii lamarayyi dimbaaba laboo haqqii yoo Eeliimanne wiiddanto'o. Eeliimiinsim ki'lla'a matta'a Ertiira'i Dambalaq gadanonne wiiddanto'o. Ee lasage odim Ertiira'i Dambalaqiinsi daba'llita'a Siin udma'i uullanne wiiddanto'o. Siin udma'i uulliinsi matta'a Duufiqanne wiiddanto'o. Duufiqiinsi matta'a Alushanne wiiddanto'o. Alushiinsi ki'lla'a lasage odim agakkam wo'i bee'i Rafiidiimanne wiiddanto'o. Refiidiimiinsi ki'lla'a matta'a Siina'i udma'i uullanne wiiddanto'o. Siina'i udma'i uulliinsi ki'lla'a matta'a Kiibroot Haatawwanne wiiddanto'o. Kiibiroot Hatawwiinsi ki'lla'a matta'a Haxeerootanne wiiddanto'o. Haxeerootiinsi ki'lla'a matta'a Riitimanne wiiddanto'o. Riitimiinsi ki'lla'a matta'a Riimoonpherezanne wiiddanto'o. Riimoonphereziinsi ki'lla'a matta'a Liibinanne wiiddanto'o. Liibiniinsi ki'lla'a matta'a Riisanne wiiddanto'o. Riisiinsi ki'lla'a matta'a Qaheelaatanne wiiddanto'o. Qaheelaatiinsi ki'lla'a matta'a Sheefaar duunanne wiiddanto'o. Sheefaar duuniinsi ki'lla'a matta'a Haraadanne wiiddanto'o. Haraadiinsi ki'lla'a matta'a Maaqiheelootanne wiiddanto'o. Maaqiheelootiinsi ki'lla'a matta'a Taahatanne wiiddanto'o. Taahatiinsi ki'lla'a matta'a Taara'anne wiiddanto'o. Taara'iinsi ki'lla'a matta'a Miitiqanne wiiddanto'o. Miitiqiinsi ki'lla'a matta'a Hashmoonanne wiiddanto'o. Hashmooniinsi ki'lla'a matta'a Moserotanne wiiddanto'o. Mooserootiinsi ki'lla'a matta'a Beeneeyaa'iqanne wiiddanto'o. Beeneeyaa'iqiinsi ki'lla'a matta'a Hoorhaagdigaadanne wiiddanto'o. Hoorhaagdigaadiinsi ki'lla'a matta'a Yooxbaatanne wiiddanto'o. Yooxbaatiinsi ki'lla'a matta'a Aabroonanne wiiddanto'o. Aberooniinsi ki'lla'a matta'a Eexiyoongaabiranne wiiddanto'o. Eexiyoongaabiriinsi killa'a Xiin udma'i uullanne yoo Qaadeesanne wiiddanto'o. Qaadeesiinsi ki'lla'a matta'a Eedoo'm uulli tochchonne hee'oo Hoor duunanne wiiddanto'o. Qeessichchi Aaroon Waa'i ijaajinne Hoor duunanne firukko; eekke'ennem Isra'ee'l oos Gibxiinsi fitto'i sor hiinchonne, onti aga'nnaannonne luxxi ballanne lehukko. Aaroon Hoor duunanne lehu ammane ixxek umur mat xibbee lamiyyee sas hiinchoo ihaa hee'ukko. Kana'aanniinsi woroo'n qarinne yoo Araad uulli adil Isra'ee'l oos waatto'isa macceesukko. Hoor duuniinsi ki'lla'a matta'a Xalmoonanne wiiddanto'o. Xalmooniinsi ki'lla'a matta'a Funoonanne wiiddanto'o. Funooniinsi ki'lla'a matta'a Obotanne wiiddanto'o. Obotiinsi ki'lla'a matta'a Moo'aaphphi uulli gadanonne yoo Abaariimanne wiiddanto'o. Abaariimiinsi ki'lla'a matta'a Diibongaadanne wiiddanto'o. Diibongaadiinsi ki'lla'a matta'a Almondiibilaataayimanne wiiddanto'o. Almondiibilaataayimiinsi ki'lla'a matta'a Naaba'i illagenne yoo Abirii'm duunnuwwanne wiiddanto'o. Abirii'm duunnuwwiinsi ki'lla'a matta'a Yoordaanoos gadanonne Yaarko'i illagenne yoo Moo'aaphphi biiranne wiiddanto'o. Yoordaanoos gadanonne Moo'aaphphi biir uullanne Beetiyaashimootiinsi Abeel Shuutiim afeebe'e yoo beyyuwwanne wiiddanto'o. Iyyaarko'i illagenne Yoordaanoos daajjiinsi eeqidonne Moo'aab biir uullanne hee'llu'uuyyi Isra'ee'l oosina kuroo'isina Waa'i Muse'ena «Yoordaanoosa higgakka'a Kani'aana aaggakkam ammane, ee uullanne hee'llam manna hundam ki'nnuwwi illagiinsi xoqoltakka'a hollehe. Kininnee xaarinnee baxamu ixxuwwi waa'uwwa iiqansehe; duunnuwwanne yoo otossakkam beyyuwwaa hundam ginditakka'a bi'issehe. An ki'nnuwwina gulummi issaa uwwaammoohan ihu bikkina ee uulla lago aa'llakka'a ixxonne hee'llehe. Ixxom annanni annanni sullinaa moollinaa saamo issitakka'a saaminne baxxammehe. Lobakat abaroos yoo moollina haraar uulli uwwamona. Hoffi moollinam hoffi uulli uwwamona; hinki uullim saaminne afulas oo uulli ee afu sullane; ki'nnuwwi si'l anno'isinne sullinne sullinne gulummi issitakka'a baxxammehe. Ihukkaarem ee uullanne hee'llam manna hundam gullitakka'a fissitakkoo'n gatulas oo manni ki'nnuwwi illina shiincaara midaadinam utti ikka'a hawwissamo. Ki'nnuwwi hee'llakkam uullanne ora qooccitu'uuyyi hawwissamo. Ixxuwwamdu guullitakka'a bi'issakkobeelas an ixxuwwa bi'iseena sawwumisam ki'nnuwwam bi'isoommo» yoo awwonsa uwwukko. Waa'i Muse'na «Isra'ee'l oosina, ‹An ki'nnuwwina gulummi issaa uwwoommi Kana'aa'n uulla aaggakkam ammane ee aaggakkam uullina gabal ihoo uulluwwi kanniinsi woroon yoo keeno. Woroo'n qa'l uulli gabal Xiin udma'i uulliinsi ki'isaa Eedoo'm uulli tochchinne aa'aa higookko. Oohim eelliinchi fi'l kollinne sooqixxi dambalaq woroo'n qa'l tochchiinsi asheerookko. Ee'isam Aqiraabima daba'llakkam beyyinne woroo'n qa'l kolli maraa Xiina higaa Qaadees Baarne'e afookko. Ee beyyiinsim Haxaaradaa'l hanaa'n qa'l eelliinchi aaggiinsi ki'isaa Aaxiimoona afookko. Aaxiimooniinsi ki'isaa Gibxi uulli gaballanne yoo cebba do'aahim Meedeteraaniyaa'n dambalaqanne uullookko. «‹Eelliinchi aaggi uulli gabalim Meedeteraaniyaa'n dambalaq ihookko. «‹Hanaa'n qa'l gabalim Meedeteraaniyaa'n dambalaqiinsi ki'isaa Hoor duuna afookko. Hoor duuniinsi ki'isaa Leebo'i Haamaata afookko; eehanniinsi ki'isaa Xadaada afookko. Eehanniinsi ki'isaa Ziifiroona higaa Haxaari'eenaananne uullookko. Ookkim ki'nnuwwina hanaa'n qa'l gabal ihookko. «‹Eelliinchi fi'l uulli gabal Haxaareenaanniinsi ki'isaa Shafaama afookko. Shafamiinsi ki'isaa Aayiinsi eelliinchi firinne Riibilinne aa'aa Galii'l dambalaqiinsi eelliinchi firinne yoo duunnuwwa afookko. Oo gabalim Yoordaanoos daajjinne dillaa tochchoom Sooqixxi Dambalaqanne afookko. Oo keen ki'nnuwwi uulli gaballuwwi ihookko› yitaa kure» yukko. Ee bikkina Muse'e Isra'ee'l oosina «Honsii kolli sullii saaminne baxxantakkona Waa'i uwwu uulli kane. Roobeel sullii Gaad sullii ee'isam Minaas sullik kollii abaroosinne abaroosinnem baxxanta'a ixxuwwi sharada Iyyaarko'i illagenne Yoordaanoosiinsi eeqidonne eelliinchi firinne a'llito'ookko» yukko. Waa'i Muse'ena «Qeessichchi Ali'aazar Naawe'i beet Iyyaasii ee uulla minaadabina gulummi issita'a baxxansitona. Ixxuwwinam hara'mmitona hundem sulliinsim mat mat awwonsaancho doo'lle» yukko. Doo'llamu manni summim Yihuxxi sulliinsi Yifun beet Kaaleeb, Simi'oon sulliinsi Aamihud beet Salaamii'eel, Biiniyaam Sulliinsi Kiisiloon beet Eelidaad, Daanni Sulliinsi Yoogil beet Buqi'i, Yooseef oosiinsi Minaas sulliinsi Sufiid beet Ani'eel, Efireem sulliinsi Shiifxaan beet Qamu'eel, Zaabiloon sulliinsi Faarnaak beet Eeliisaafaan, Yisaakoor sulliinsi Hooza'i beet Phaaltii'eel, Aseer sulliinsi Seleem beet Ahiihudaa Niftaaleem sulliinsi Amhuud beet Pheedaaheelaa yamantam keen hee'llo'o. Waa'i Isra'ee'l oosina Kana'aa'n uullanne uulla baxxansitamisina doo'llu manni eekeen hee'llo'o. Iyyaarko'i illagenne Yoordaanos daajjiinsi eeqqixxi idinne yoo Moo'aaphphi biir beyyonne Waa'i Muse'ena, «Isra'ee'l oosina gulum ihu uulliinsi Leewi'i oosina hee'llam beero'uwwaa ee beero'uwwi kululleetannem ixxuwwi diinate allaa'llitam beyyoo uwwitona kure. Oo beero'uwwim Leewi'i oosina gulummi ihaa ixxuwwi hee'llam beyyi ihookko. Hix uullim ixxuwwi diinat allaa'lloo uulli ihookko. Oo diinat allaa'lloo hix uullim beero'i girbamu girbiinsi ki'isaa hundem kollinnem soor xibbee ontayyi meetiraa afeebe'e qeeraa'llona. Ee'isinne beero'oom lambe'ennetti ihaa eelliinchi firinne lam kum anga woroo'n qarinne lam kum anga eelliinchi aagginne lam kum anga hanaa'n qarinne lam kum anga ee beero'iinsi biireen keene; oo beyyuwwim beero'uwwanne ixxuwwina allaachchi beyyi ihookko. Ayyi manchim la'oo'n dangonne manna shuta'n gibaa magannaato aagoo beero'uwwika loho Leewi'i oosina uwwehe. Odim soree lam beero'uwwaa hix uullinne maqirem uwwehe. Ee'isinne ixxuwwina hundoomim soorii sadeenti beero'uwwii hee'ookko. Isra'ee'l sulluwwiinsi annannichchiinsim amaxxito'i uullisinne haraar yoohaanniinsi dut bero'uwwa hoffi uulli yoohaanniinsi hofqax bero'uwwam Leewi'i oosina uwwe» yukko. KUK hanqa. Waa'i Muse'ena, «Isra'ee'l oosina ‹Yoordaanoos daajje higgakka'a Kana'aa'n uulla aaggakkam ammane, mat manchi huushamaa dangonne mancho shuta'n gibaa maaxamoo magannaaxxi beero'uwwa doo'llehe. Ee beero'uwwannem xiiga miqiseena hollamoo lehu manchi qarmanniinsi maaxameena xanookko. Manna shaa kasasamu manchi oogatina hincoo'n ee mancho shimmi hasisooyyo. Loh beero'uwwa doo'llehe. Ee doo'llitakkam beero'uwwik sas Yoordaanoos daajjiinsi eelliinchi firinne sas odim Kana'aa'n uullanne ihona. Oo beero'uwwim Isra'ee'l oosinaa ixxuwwi lambe'enne hee'llam waaraaninaa hundinam magannaaxxi beero'uwwi ihookko. Huushamaa mancho shukkok ayyim ka beero'uwwiinsi matonne gibaa maggannaato aageena xanookko. «‹Mat manchi mulleka xaarinne lehoo qaxa aphphisaa shulas oo manchi manna shaakkoohane; oo shu mannichi lehinne guzumo'amona. Mat manchi mulli mancho lehona sheena xanoo kininne aphphisulas oo manchi manna shaakkoohane; oo shu mannichi lehinne guzumo'amona. Mat manchi mulli mancho lehona haqqinne aphphisulas oo manchi manna shaakkoohane; oo shu mannichi lehinne guzumo'amona. Ee lehu manchina abbis qarmanchi ihu manchi ee mancho sheena xanookko. Ee bikkina siidu amman hundam sheena xanookko. «‹Mat manchi mulli mancho sabimmiinsi ki'aa gafe'aa ubbuusaa te'im daphphaa egeraa ixxonne ma'llichcho huushaa, te'im diina'oominne ki'aa mat mancho anginne aphphisaa shulas oo manchi manna shaakkoohane; oo shu manchi lehinne guzumo'amona. Ee lehu manchina abbis qarmanchi ee shu mancho siidu ammanni hundam sheena xanookko. «‹Ihukkaarem mat manchi mulleka shukkok sabimminnetti ihoo'n la'oo'n dangonne gafe'aa ubbuusimminne te'im ma'lliluchcho huushimminne te'im diina'ooman hee'oo'nnii hawwodeena sawwoo'nnii kina huushaa oo kin mat mancho shuta'n eehido'i woshshi ihoo ammane dummichchi ee shukkaannonnee xiiga miqisoo qarmanchi lambe'ennee oogatookkok kanniinsi woroon yoo see'llisannette. Dummichchi ee kasasamu mancho lehu manchi qaramanchi angiinsi gatisaa xoraa hee'am hee'u magannaatto aagakkam beero'o dabarimmi hasisookko. Ixxim ee doollenne hundiinsi lob qeessichchi hee'u manchi leheebe'i afeebe'e eehe'em afuurimmi hasisookko. «‹Ihukkaarem oo manna shu manchi gibaa magannaatto aagu beero'iinsi haxonne firulasii xiiga miqiseena hasoo manchi magannaaxxi beero'iinsi haxonne siidaa shulasii ee xiigina xa'mmamooyyo. Mashka'oomim oo manna shu manchi hundiinsi lob qeessichchi leheebe'e magannaato aagakkam beero'onne afuurimmi hasisam hee'ukko. Ihukkaarem qeessuwwa awwonsaanchi lehaa lasage oo manna shu manchi ixxi mine daba'lleena xanookko. «Ku seerii gatti ogorii ki'nnuwwi hee'llakam uullanne hundannem ki'nnuwwinaa ki'nnuwwi shumo'inaa awwonsi ihookko. «‹Manna shaa kasasamu ayyi manchonnem leh oogatameena xanookkok lam te'im lamiinsi hanaan ihaakkoo manni naqqasulasette. Ihukkaarem xale'i mat manchi naqqasimminne ayyi manchonnem leho oogatimmi xanamooyyo. Manna shukkok ayyim lehinne guzumo'anchi hasisookko; diinate miqimminne eedo'i guzumo'iinsi gateena xanooyyo. Mat manchi gibaa magannaaxxi beero'o xoraa lasage hundiinsi lob qeessichchi lehoo'n gaassaa diinate miqaa ixxi mine daba'lloo'isa issitakkotte. «‹Eekka issitakkolas ki'nnuwwi hee'llakkam uulla haashaassitakkamo. Xiig uulla haashaassoohanne. Manna shu manchik xiig dunamubeelas uulla xiigiinsi muccussimmina ihoo mulli seer od bee'e. An Moollanni Waa'i Isra'eelinne hee'oomman ihu bikkina ki'nnuwwi hee'llakkamoka anim ki'nnuwwi lambe'enne hee'oommi ka uulla haashaassitakkotte› yihe» yukko. Yooseef beet Minaase qaru Maakiir beet Gala'aad moolliinsetti ikko'i abaroos awwonsaan Muse'e beyyoo Isra'ee'l mulli awwonsaa'n beyyoo hincita'a «Uulla Isra'ee'l oosina saaminne baxxansitaa uwwitona Waa'i ni moollanna keese ijaajaakko; niyyabbaayyi Xaloofihaad gulummam ixxi landina uwwitona keese ijaajaakko. Ihukkaarem ixxuwwi mulli sulliinsi goona aagissolas oo ixxuwwi gulummi ee ixxuwwi ladiisanto'i sullan ihimmi hasisoo'isaa ni gulummim hoffe'eena xano'isaa la'e. Amaxxi daba'lloo maarage biteesamu luwwi hundim annichchinam daba'lloo ammane Xaloofihaad landi sharad ixxuwwi ladiisanto'i sullan ihaa gatookko. Oohim ni sulli gulummi hoffe'oo'isa issoohane» yito'o. Ee bikkina Muse'e Waa'iinsi aa'u ijaaccisanne Isra'ee'l minaadaba «Yooseef oos sulli wocco'i woshshi hundim hanqa. Ee bikkina Waa'i ‹Xaloofihaad landi xale'i ixxuwwi gaqqi sulliinsi iittito'i manchina ladiisanteena xantamo› yoolla. Ee'isinne Isra'ee'l oosik gulummi mat sulliinsi mulli sullonne higooyyo. Isra'ee'l oos annannichchim gaassi ixxuwwi anno'iinsi lago aa'llo'i gulummi gulumminem hee'llona. Isra'ee'l sulli lambe'iinsi uulli sharada baxxanto'i ayyi landichchom xale'i ee sulliinsetti ihu goonina ladiisantona. Ee'isinne Isra'ee'l oosiinsi ayyim gaassi anno'i uulli sharada ixxi gulummi issaa amadeena xanookko. Mat sulli gulummi mulli sullina hore'em uwwamoone. Sulli annannichchim ixxi gaqqi gulummam amadaa hee'ona» yaa ijaajukko. Ee bikkina Xaloofihaad landi Waa'i Muse'e ijaajukkisanne issito'o. Ixxuwwi summim Maahilatte, Tiirxatte, Hoogilatte, Miilka'attee No'attee ihaa ixxuwwi anni abbaayyuwwi oosinne eebaqqanto'o. Oo landim Yooseef beet ihu Minaas sulli moolli oosinne eebaqanto'o. Ixxuwwi amaxxim ixxuwwi sullanem ihukko. Iyyaarko'iinsi illagenne Yoordaanoos daajjiinsi eeqidonne yoo Moo'aaphphi uulli biir beyyonne hee'llo'i ammane Waa'i Muse'ennetti ihaa Isra'ee'l oosina uwwu ijaajii seerii ee keeno. Yoordaanoos daajjiinsi eeqidonne Araba'i udma'anne Suufa yakkam beyyi illagenne Faaraa'n beero'ina, Xoofee'l beero'ina, Laabaa'n beero'ina, Haxeeroot beero'inaa Diizaahaab beero'inaa lambe'enne hee'llu'uuyyi Muse'e Isra'ee'l minaadabina kanniinsi woroon yookkoka kurukko. 9Eedoo'm duu'n googinne Siina'i duuniinsi ki'isaa Qaadees baarne'enne afeebe'e tommoo mat ballaa massookko. Gibxiinsi fitto'i sor hiinchonne tommonnee mat aga'n luxxi ballannee Isra'ee'l minaadabina kurona Waa'i ijaaju luwwi hundam Muse'e ixxuwwina kurukko. Oohim Haseeboo'n beero'onne ihaa gassam hee'u Amoore'i adil Siihoonaa Astaarootannee Edira'i beero'uwwannee ihaa gassam hee'u Baasaa'n adil Oogaa Muse'e kaa'aa lasonnetti hee'ukko. Yoordaanoosiinsi eelliinchi fi'l kollinne Moo'aaphphi uullanne hee'llu'uuyyi Waa'ika seera Muse'e. «Siina'i duunanne hee'nnummi ammane ni Moollanni Waa'i ‹Oono'o, ka duunanne lobakat ammane higissakko'ookko. Kaba ki'nnuwwi ka wiidda'n beyyiinsi dooyyitakka'a duunaam Amoore'i uullaa ee hegeegonne yoo uulluwwaa Araba'i hansawwinnee qaala'innee, Neegeebinnee Meedeteraaniyaa'n dambalaq gammalinnee aa'llakka'a mallehe. Ee'isam Kana'aana, Liibaanoosaa lob Efiraaxiis daajji afeebe'ee mallehe. Oon'o, uulloom ki'nnuwwi illagennette; an Waa'i ki'nnuwwi lob anno'ina Abrihaamina, Yisaaqinaa Yaaqoobinaa ee'isam ixxuwwi shumo'inaa uwweena sagara aagummi uulla mattakka'a lago aa'llehe› yaakko» yukko. Muse'e minaadabina «Siina'i duunanne hee'nnummi ammane ‹An ki'nnuwwa mullam awwonseena xanoommoyyo. Moollanni Waa'i ki'nnuwwika xigo iima'n boollaankisa dutisaakko. Kabadem ki'nnuwwi lob anno'ina Moollanni Waa'i ki'nnuwwina uwwu neeyyaxxi saga'llisannem kumaa kaakumaa issaa maasse'ona. Ihukkaarem ki'nnuwwika fitoo atanaachchoo an mullam hinkid issaa iyyeena xanoommo? Ee bikkina sulliinsi sulliinsi qooroominne, qoossimminnee lachchinnee la'anto'oo manna doo'llehe; anim ixxuwwa ki'nnuwwina awwonsaan issoommo› yaa hee'ummo. Ki'nnuwwim eehannonne iittantakka'a hee'llakko'o. Ee bikkina annannichchi sulliinsim doo'llitakko'i qooroominnee lachchinnee la'anto'oo keeno aa'aa ki'nnuwwi sullina awwonsaano, shaalaqa, xibbi halaqa, ontayyi halaqaa tommi halaqaa issaa doo'llummo. «Ee ammane ixxuwwina ‹Ki'nnuwwi minaadaphphi lambe'enne ki'oo fitoo atanaachchaa daannantakka'a moo'llehe; ki'nnuwwi midaadinne te'im ki'nnuwwinne hee'oo waaraa'n lambe'enne ki'oo fitoo atanaachcham moo'llakka'a hanqo'i oogato oogattehe. Oogattakkam ammanem golo'llakkotte; labaanninam ihukko hoffaannina ayyi manchinam golo'llakkoo'n oogattehe. Oogato'i Waa'an ihu bikkina ayyem badditakkotte; ki'nnuwwina kee'mmoo luwwi hee'ulas i beyyo eebbehe. Anim ee woshsha guulloommo› yummo. Anim Isra'ee'l minaadab issimmi hasisoo luwwi hundi bikkinam ee ammanem kurummo. «Neese ni Moollanni Waa'i ijaajukkisannem Siina'i duuniinsi ki'nnaa ki'nnuwwi moo'llakko'i baddisoo udma'i ihu duunaam Amoore'i uulli googinne taakke'nnaa Qaadees baarne'e amfummo. Ee ammane an ‹Waa'i niina lago aa'iseena neeyyaxxi sagara aagu Amoore'i duunaam uulla affakko'ookko. Moo'llehe, ki'nnuwwi Moollanni Waa'i ka uulla ki'nnuwwina uwwaakko. Ki'nnuwwi anno'ina Moollanni Waa'i yukkisannem aaggakka'a lago aa'llehe; badditakkottee muggitakkottee› yummo. «Ihukkaarem ki'nnuwwi i beyyo waattakka'a ‹Ee uulla shaashshitam manna higinsaa asse'nnona. Ixxuwwim ee uulla neese afisoo xabbee'n googoo hinkido'i beero'uwwim yooda'ee qoossita'a moo'lla'a niina kuteena xantamo› yitakko'o. «Ookki iina eroka labaa moo'amu bikkina annannichchi sulliinsim mat mat mancho doo'llaa tommoo lam manchoo asse'ummo. Ixxuwwim ee duunaam uulli afeebe'e matta'a Eshkoo'l cebbi afeebe'e shaashshita'a waatto'o. Ee uulli mishiinsim hoffokam amadda'a waatta'a ‹Ni Moollanni Waa'i niina uwweena qoodu uulli lobakata harisha› yita'a kutto'o. «Ihukkaarem ki'nnuwwi Waa'ina ijaajancha sabimminne ee uulla mattakkeena hassakko'oyyo. Ki'nnuwwim ki'nnuwwi dukkaannuwwi woronnette ikkakka'a ‹Waa'i neese sabaakko; Gibxi uulliinsi fissukkokim ku Amoore'i manni shitona ixxuwwi anganne higisaa uwweena hasaatette. Eehidette ihulas eekke'e malloommok mahinate? Niyyabbaayyuwwi niina «Ee uulli manni niinninsi lophphitam malaayyaammuwwaa qeeraa'lluwwaa ixxuwwi beero'uwwim haraaraa kininne girbamaakkoohanee ihukkisaa ee'isam Eenaaq oosoo eekke'enne moo'nnaammo» yita'a baddisoo woshsha kutto'ookko› yitakka'a quunquuntakko'o. «Ihukkaarem an ki'nnuwwina ‹Ee minaadaba badditakkotte; hambalaachchantakkottem. Ki'nnuwwa awwonsoo Moollanni Waa'i Gibxi uullanne issukkuuyyi moo'llakko'isam ixxi ki'nnuwwi bikkenne oramookko. Mat manchi ixxi beeto abooyyoo'isam ki'nnuwwi Moollanni Waa'i udma'i uullanne ki'nnuwwa abooyyukkuuyyi ka beyyo xumminne hinkid affakkoda'e moo'llakko'ookko› yummo. «Waa'im ki'nnuwwi quunquuntakku'uuyyi laattakko'i laachcha macceesaa quuqukko. Ee bikkina Waa'i ‹An ki'nnuwwi lob anno'ina uwweena neeyyaxxi sagara agaa hee'ummi ka er uulla ka boqqi qaranchiinsi ayyim aagooyyo. Ee er uulla aageena xanookkok xale'i Yaafun beet Kaaleebatte. Ixxi eesenne hanqo'i wodaninne amma'nnamu bikkina ee ixxi do'aa moo'u uulla ixxenaa ixxi shumo'inaa uwwoommo› yaa hide'aakko. Ki'nnuwwi mashka'inne Waa'i eesenne quuqaa ‹Muse, atim ee uulla aaggooyyo. Ihukkaarem kiina hara'mmaanchi ihu Naawe'i beet Iyyaas ee uulla aagookko; Isra'ee'l oos ee uulla lago aa'llona awwonsoo bikkina ixxo qoxxise› yukko. «Ee lasage Waa'i niina hundinam ‹Ni diina'i qeefaddamo› yitakko'i ki'nnuwwi ciilluwwii erokaa joraa annanni issita'a laqqambe'i oosii xale'i ee uulla aaggamo. Ee uullam ixxuwwina uwwoommo; ixxuwwim ee uulla lago aa'llamo. Ihukkaarem ki'nnuwwi Ertiira'i Dambalaqa moo'oo kollinne yoo googinne udma'i uulla daba'llitakka'a mallehe› yukko. «Ki'nnuwwim ‹Muse, neese Waa'a hawwondaammo; ihukkaarem kaba ni Moollanni Waa'i neese ijaajukkisanne orammoommo› yitakka'a dabattakko'o. Duunaam uulla marakka'a oranchi sholle'aalla labissakka'a ki'nnuwwi annannichchim o'l mu'uta amaddakka'a ki'llakko'o. «Ihukkaarem Waa'i ‹An ki'nnuwwinne maqire firoombee'i bikkina orina mattakkotte. Sabbakka'a mattakkolas diina'i anganne kaa'antakkamo› yitaa kure. Waa'i kure yukkoka hundam ki'nnuwwina kurummo; ihukkaarem ki'nnuwwi macceesimma sabbakko'o. Ixxenam ijaajancha sabbakka'a bolximminne duunaam uullanne gaaddakko'o. Ee duunaam uullanne hee'llam Amoore'i gogot hundim diishshisa wixxita'a ki'nnuwwi hanenne waatto'o; Hoorim afeebe'em ki'nnuwwa hollita'a duunaam Eedoo'm uullanne kaa'llo'o. Ee bikkina ki'nnuwwi Qaadees Barne'e daba'llitakka'a Waa'i kollonne laattakku'uuyyi wi'llitakko'o. Ihukkaarem ki'nnuwwika laachcha macceeseenaa ki'nnuwwina hara'mmeenaa hasukkoyyo. Ee bikkina Qaadees anne lobakat ammane afuuttakko'o. «Ee lasage Waa'i eese ijaajukkisannem Ertiira'i Dambalaqa marakkam googinne aa'nnaa udma'i uulla daba'llinaa mallummo; Eedoo'm duunaam uullannem lobakat ammane do'nnummuuyyi karkaandummo. Ee lasage Waa'i iina ‹Ka duunaam uullanne lobakat ammane karkaaddakko'ookko; ihukkaarem kaba hanaa'n qaranne mallehe. Minaadabam «Ki'nnuwwi qarmanni ikko'i Eesa'i shumo'i hee'llam duunaam Eedoo'm uullinne higgona kure› yitaa ijaaje» yukko. Ixxuwwi ki'nnuwwa badditamo; ihukkaarem lobakata ege'llehe. Eedoo'm duunaam uulla Eesa'i shumo'ina gulummi issaa uwwaammo. An ki'nnuwwina ee uulliinsi mat lokki oobbi qaxam uwwoombee'i bikkina ixxuwwinne wocantakkotte; nakkitakkotte. Ki'nnuwwina hasisoo hurbaataa wo'oo ixxuwwiinsi diinatinne bitaa'llehe» yitaa ijaaje› yukko. «Moollanni Waa'i ki'nnuwwika anginne baxxakko'i luwwi hundam maasse'aakko. Ka haraar udma'i uullanne karkaaddakko'i amman hundam abooyyukkuuyyi ki'nnuwwa egeraakko. Ee sorem hiinchonnem Waa'i ki'nnuwwinne maqire hee'u bikkina ma'lluchchim ki'nnuwwina xa'ukkoyyo. Ee bikkina niyyabbaayyuwwi ikko'i Eesa'i shumo'i hee'llam Eedoo'm uulla hingaa Eelaataa Eexiyoongaabiir beero'uwwaa massoo googo ullaa Araba'inne Moo'aaphphi udma'i uulli kolli daba'llinummo. Waa'i ‹Loox shumo'i ikko'i Moo'aaphphi minaadaba hawwissakkotte; ixxuwwinne wocantakkotte. Eer beero'o ixxuwwi gulummi issaa uwwaammo. Ee bikkina ixxuwwi uulliinsi ki'nnuwwina maham uwwoommoyyo› yaakko» yukko. Eeranne Eenaaq oosi'nnoo'i geejjuwwa, qeera'lluwwaa malaayyaammuwwaa ikko'i Eemiim minaadab hee'llam hee'llo'o. Ixxuwwi Eenaaq oosisam Raafaayi'm minaadaba yamantam hee'llo'o. Ihukkaarem Moo'aaphphi minaadab ixxuwwa Eemiim minaadaba yita'a weeshsham hee'llo'o. Hoor minaadab Eedoommanne hee'llam hee'llo'o. Ihukkaarem Eesa'i shumo'i ixxuwwa ee beyyiinsi hollita'a beyyonne ixxuwwi afuutto'o. Oohim Isra'ee'l minaadab hofqax ammaniinsi lasage Waa'i ixxuwwina lago aa'isu uulliinsi ixxuwwi diina'a hollito'aannisa. «Ee lasage Waa'i niina kurukkisanne Zareed daajje fillummo. Oohim Qaadees baarne'iinsi ki'nnummi sadiinsii sadeenti hiinchiinsii lasonnetti hee'ukko; Waa'i ixxuwwi bikkina hide'ukkisannem orina afaa hee'u ee amma'n qaranchiinsi goo'n oos hundim beeddaa hee'ukko. Waa'i ixxuwwa hundam guulleebe'i afeebe'e Waa'i angi ixxuwwannetti hee'ukko. Ixxuwwi hundim beeddita'a lasage, Waa'i, iina Moo'aaphphi uullanne yoo Eer beero'inne aa'llakka'a kaballa higimmi hasisookko. Ee lasage Loox shumo'i hee'llam Amoo'n uullanne hincitakkamo; ixxuwwa wocissakkotte; ixxuwwinnem orantakkotte. Mashka'oomim ixxuwwina uwwummi uulliinsi ki'nnuwwina maham uwwoommoyyo› yaakko» yukko. Oo uullim ee beyyonne hee'llam hee'llo'i Raafaayi'm minaadaphphi summinne weeshamam hee'ukko. Amoo'n minaadab ixxuwwa «Zamzumiima» yita'a weeshsham hee'llo'o. Ixxuwwim Eenaaq oosisam qeeraa'lluwwa, malaayyaammuwwaa dut minaadabaa hee'llo'o. Ihukkaarem Waa'i ixxuwwa guullaa bi'isu bikkina Amoo'n minaadab ixxuwwi uulla lago aa'lla'a ee beyyonne afuutta'a hee'llo'o. Waa'i duunaam Eedoo'm uullanne hee'llam Eesa'i shumo'inam ee'isam issaa hee'ukko; oohim gaassi ee beyyonne hee'llo'i Hoor minaadaba guullaa Eedoo'm minaadab kabad afeebe'e hee'llam uulla lago aa'llamisa issaakko. Qarxeesa yakkam wo'inne kibbamaakkoo uulliinsi waatto'i minaadab Gaaza'i hegeegonne hee'llo'i Eewe'i manna guullita'a ee uullanne afuutto'o. «Moo'aaphphi uullinne hingaa lasage Waa'i niina ‹Kaba ki'llakka'a Arnoo'n daajji eeqidonne fillehe. Haseeboonanne afuuraa gassoo Amoore'i adil Siihoonaa ixxi uullaa ki'nnuwwina higisaa uwwaammo. Ixxo qassakka'a uullooma lago aa'llehe. Hannonnem hee'oo uulli minaadab hundim kaballiinsi ki'isaa ki'nnuwwa baddoo'isa issoommo. Ki'nnuwwi bikkina macceesso'i amman hundam baachchinne huxe'llamo› yukko. «Xummika asso amaddo'oo asse'amaano Qidemoot udma'i uulliinsi Haseeboo'n adil Siihoon beyyo ‹Ki'nnuwwi uullinne hingaa malloomisina googo uwwe. Googiinsi makkannem qeddannem filloo'n xabbinaa malloommo. Intoommi hurbaatinaa angoommi wo'inaa bito minqoommo. Neese hansoommok ki uullinne hingona xale'i googo uwwitonatte. Eedoomanne hee'llam Eesa'i shumo'ii Eeranne hee'llam Moo'aaphphi shumo'ii ixxuwwi uullinne hingoommisina uwwito'isam Yoordaanoos daajje hingaa Waa'i niina lago aa'isoo uulla aangeembe'i afeebe'e eeheen hingona googo uwwe› yaa asse'ummo. «Ihukkaarem Haaseeboo'n adil Siihoon ixxi uullinne hingaa malloomisina googo uwwubee'i bikkina kaba issukkisam ki'nnuwwi Moollanni Waa'i ixxo ki'nnuwwina higisaa uwweena hasaa Siihoon bolxoo'isa issaa ixxeka wodano duudisukko. Ee lasage Waa'i iina ‹Oono'o, adil Siihoonaa ixxi uullaa ki anganne higisaa uwwaammo; ee uulla lago aa'llaa ee beyyonne afuure› yukko. Adil Siihoon, ixxena yoo manni hundam wixxaa'aa Yaahaxxi beero'i gadanonne niinninne orameena firukko. Ihukkaarem ni Moollanni Waa'i ni anganne higisaa uwwu bikkina ixxoo ixxi oosoo ixxenne maqire hee'llo'i mannaa hundam kaa'nnummo. Ee ammanem hundem beero'om amandaa shokkiinsummo; ee beero'uwwanne hee'llo'i manna, goona, meentoo ciilluwwaa hundam shinaa guullinummo. Ixxuwwika fooraam diinatee beero'uwwanne yoo awwaadoo luwwaa bongummo. Ni Moollanni Waa'i Arnoo'n cebbina tochchonne yoo Aaro'eer beero'iinsi ki'isaa Gala'aad afeebe'e ee cebbanne yoo beero'uwwi hundam niina higisaa uwwukko. Ihukkaarem Amoo'n uullanne te'im Yaabooq daajjenne te'im duunam uulli beero'uwwanne te'im Waa'i hincinoombee'isa ijaaju uulluwwanne matonnem hincinummoyyo. «Ee beyyiinsim ki'nnaa hanaa'n qarinne Baasaa'n uulli kolli mallummo. Adil Oogim ixxi gogota wixxaa'aa niinninne orameena Eedira'i beero'o waarukko. Ihukkaarem Waa'i iina ‹Ixxo, ixxi minaadabaa uullaa ki anganne higisaa uwwoommi bikkina baddititte; Haseeboo'n beero'onne afuuraa gassam hee'u Amoore'i adil Siihoonanne issittisam ixxonnem isse› yukko. «Ee bikkina ni Moollanni Waa'i, adil Oogaa ixxi gogotaa ni anganne higisaa uwwukko. Neesem ixxuwwika matom gatinsoo'n hundam guullinummo. Ee ammanem ixxi beero'uwwa hundam amandummo; Baasaa'n adil Oog gassam hee'u Argobbi beero'uwwiinsi matom gatinsoo'n lohayyem beero'uwwam amandummo. Oo beero'uwwi hundim qeeraa'l ootinne girbamaakkoo keen hee'ukko. Ee beero'uwwi ooxxi gooc hundim laqqo'inne xufamaakkoohan hee'ukko; oot bee'i lobakat heegeegguwwim hee'ukko. Haseeboo'n adil Siihoon beero'uwwa bi'insummisam Argobbi beero'uwwam bi'insummo; goona, meentoo ciilluwwaa hundam shinaa guullinummo. Ixxuwwika fooraam diinatee beero'uwwaa hundam bongummo. «Ee ammane Amoore'i lamem adilluwwikam Yoordaanoos daajjiinsi eelliinchi firinne Arnoo'n daajjiinsi ki'isaa Heermoo'n duun afeebe'e yoo uulli hundam amandummo. Heermoo'n duunina Siido'n minaadab ‹Siiriyoona› yitamo; Amoore'i minaadab ‹Saniira› yitamo. Ee'isinne Baasaa'n adil Oog gassi woronne hansawwanne hee'oo Saalakaa Eedira'i beero'uwwaa ee'isam Gala'aaxxekaa Baasaa'n uullaa hundam amandummo. Raafaayim moolliinsi adil Oog lasaanchan hee'ukko. Ixxi iinse'oo ara'im baxamukkok xaariinsetti ihukkuuyyi uullichchi soor meetira midaadim lam meetir hee'ukko. Oo ara'im «Raaba» yakkam Amoo'n beero'onne kaballi afeebe'e yookko. «Uullooma lago aa'nnaa lasage Arnoon daajji gadanonne yoo Aaro'eer beero'iinsi ki'isaa hanaa'n qarinne yoo uullaa Gala'aaxxi duunika kolloo beero'uwwinnem Roobeel sullinaa Gaad sullinaa uwwummo. Minaas sullaannina kollina Gala'aaxxi uulliinsi gatu qaxaa Oog gassam hee'u Baasaanaa hundam uwwummo. Oohim Argobbi uulla» yamamookko. Baasaan Raafaayi'm manni uulla yamamookko. «Minaas sulliinsetti ihu Yaa'iir Gashuurikaa Maa'ik uulli tochcho afoo Argobbi uullaa hundam lago aa'ukko. Ee hegeeqqi uulla hundam ixxi summinne weeshamoo'isa issukko. Oo hegeegguwwim kaballi afeebe'em Yaa'iir uulla yamamookko. «Gala'aaxxi uullam Minaas sulliinsetti ihu Maakiir abaroosina uwwummo. Roobeel sullinaa Gaad sullinaa Gala'aadiinsi ki'isaa Arnoon daajji gadanonne yoo uulli afeebe'e uwwummo; woroo'n qa'l gabal Arnoo'n daajjika kollo edaatetti ihukkuuyyi hanaa'n qa'l gabalim Amoonina tochchi ihu Yaabooq daajje. Eelliinchi aagoo kollinne yoo uullim Araba'a, Yoordaanoos daajjee ee kululleetanne yoo uulla hundamii edoohane. Eelliinchi firoo kollinnem Galii'l Dambalaqinne aa'aa Phisga'i duu'n lugumonne yoo Sooqixxi Dambalaqa afookko. Ee ammanem an ixxuwwina ‹Ni Moollanni Waa'i Yoordaanoosiinsi eelliinchi fi'l kollinne yoo uulla lago aa'llakkona ki'nnuwwina uwwaakko. Ee'isam gaadeena xanoo manna ladiissakka'a Isra'ee'l minaadaphphek mulli sulli ixxuwwi uulla lago aa'lleebe'i afeebe'e hara'mmimmina illagenne higga'a fitta'a gaaddamisa issehe. Lobakat fooraam diinat ki'nnuwwina yoo'isa la'oommo. Ee bikkina ka an ki'nnuwwina uwwummi beero'uwwanne ki'nnuwwi meentoo oosoo fooraam diinatee uttakka'a xale'i ki'nnuwwi gaaddehe. Waa'i ki'nnuwwina ka beyyonne issukkisam ki'nnuwwi abbaayyuwwinam Yoordaanoosiinsi eelliinchi aagginne lago aa'isoo uulla uwwaa xumminne usheexxiseebe'i afeebe'e ki'nnuwwi moolli ikko'i Isra'eela hara'mmehe. Ee lasage an ki'nnuwwina uwwummi ka uulla daba'llitakkamo» yukko. Ee lasage an Iyyaasina ‹Ki'nnuwwi Moollanni Waa'i Siihoonaa Oogaa yamantam lamem adilluwwannem issukkoka ki'nnuwwi illinnem moo'llakko'ookko. Uulla lago aa'llakkam hinka'i minaadabannem ee'isam issookko. Ki'nnuwwi Moollanni Waa'i ki'nnuwwi bikkenne oramoo bikkina ixxuwwa badditakkotte› yaa» sogummo. «Ee ammane an ‹Hundam xantoo Waa'a! At issitoo maalalsiisoo malaayyaam luwwi hundiinsim iina moo'isimma asheettittis xale'e la'oommo. At issitoo maalalsiisoo luwwa isseena xanoo mulli waa'i iimanennem ihukko uullanne hore'em bee'e. Yoordaanoos daajji eeqidonne firaa mishisoo duunaam harish uullaa Liibaanoos duunaa moo'oommisa iisse› yaa qoxxisaa Waa'a uunxummo. Ihukkaarem ki'nnuwwi mashka'inne Waa'i eesenne quuqukko; i uunxatom macceeseena hasukkoyyo; i uunxato macceesimmi bikkenne iina ‹Ihookko! Ka woshsha la'mmaagge eddaa ki'issitte. Ka Yoordaanoos daajji eeqidonne fittoobee'i bikkina Phisga'i duu'n ludonne fittaa eelliinchi aaggannee eelliinchi firannee, hanaa'n qarannee woroo'n qarannee daba'llantaa xanti qaxa moo'e. Ku minaadab Yoordaanoosa fitta'a at moo'llootti uulla lago aa'llamisina awwonsookkok Iyyaasotte ihu bikkina ixxena hasisoo sogitano uwwe; baddoobee'isam qoxxise› yukko. «Ee bikkina Beetifee'oor beero'i illagenne yoo cebbanne afuullummo» yukko. Ee lasage minaadabina Muse'e «Isra'eela, an ki'nnuwwina losisoommi gatti ogorinaa seerinaa ijaajammehe; eekkamdu issitakkolas foorinne hee'llakkamo; gaassi ki'nnuwwi anno'ina Moollanni Waa'i ki'nnuwwina uwwoo uullam lago aa'llakkamo. An ki'nnuwwina uwwoommi ki'nnuwwi Moollanni Waa'i ijaaj hundinam ijaajammehe; eehannonne mulleka maham eddakkotte; te'im maham xa'issakkotte. Beetifee'oor duunanne Waa'i issu luwwi hundam ki'nnuwwi illinnem moo'llakko'ookko. Oohim ee duunanne Ba'aala yakkam mulli waa'ina otossitam hee'llo'i keeno hundam bi'isaakko. Ihukkaarem ki'nnuwwi Moollanni Waa'ina amma'nnantakko'oo keen ikkakko'i bikkina kaballi afeebe'em foorinne yoontakke'e. «I Moollanni Waa'i kuroommisina ijaaju seeraa gatti ogoraa hundam ki'nnuwwi egettakkona losisaammo; ki'nnuwwi aaggakka'a lago aa'llakkam uullanne hee'llakkam ammane ka ijaajuwwa qoxxitakka'a egellehe. Ee'isa issitakkolas ki'nnuwwi lachchaammuwwaa qoolluwwaa ikkakko'isa mulli minaadab hundim moo'aahii ka hundem ijaacci bikkinam macceesaahii ‹Ku malaayyaam minaadab hanqinam lachchaamoo qooraa› yookko. «Neese ixxo uunxinoommi amman hundam ni Moollanni Waa'i niina hincixxi Waa'i ihukkisa ixxuwwi waa'i niihaannisa abbisoo lob minaadab hinka'i minaadaba? Hinkaa'nnam malaayyaam minaadab ihuta'nnim kaballa an ki'nnuwwi illagenne uullaa losisoommi kido'i hanqo'i ijaajii seerii yoo minaadab hannonne hee'ookko? Ki'nnuwwi illinne moo'llakko'i luwwi hundam hee'llakkam heechchi doollenne hundannem xaddakkambee'isaa ki'nnuwwi wodaniinsim bi'oobee'isaa erisa ege'llehe; ki'nnuwwi oosinaa oos oosinam losissehe. Waa'i iina ‹Iikka sagara macceessona hasoommi bikkina minaadaba wixxaa'e› yu ammane ki'nnuwwim Siina'i duunanne Waa'i illagenne uullitakko'i balla ‹Ixxuwwi heechchi doollenne hundannem iina ijaajaajantamisinaa ixxuwwi oosim eese baddimma laqqamisinaa losissona› yukkoka sawwillehe. «Iimane afoo gii'l labaninnee kee'mmaalli duubinnee ifiisamaakkoo duu'n lugumonne waattakka'a uullitakko'o. Ee ammane Waa'i ki'nnuwwina gii'l laba'n lambe'ennette ihaa wocu sagara xale'e macceessakko'o bagaan ixxeka hagara moo'llakko'oyyo. Ixxi ki'nnuwwina ixxeka hidi'l sagara la'isaa egettakkona ijaajukko; oohim cabbaramaa axisamaakkoo lam kinanne ixxi kitaabu tommem ijaajome. Anim ki'nnuwwi kaa'llakka'a lago aa'llakkam uullanne hee'llakkam ammane egerimmi hasisoo seeraa gatti ogoraa hundam losisoommisina Waa'i eese ijaajaakko. «Siina'i duunanne gii'l laba'n woronne ihaa Waa'i ki'nnuwwina wocu ammane ixxeka hagara maham moo'llakko'oyyo. Ee bikkina goonchaannonne te'im meentichchi hagaranne misila baxxakka'a otossimminne haashaarantakkambee'isa ki'nnuwwi gaga ege'llehe. Uullanne mikmikoo soko'ikam ihukko cii'ika te'im biqinne shuraa marukkuuyyi mikmikoo qooccanchuwwikaa qurxumme'ikaa misila baxxakkotte. Iimanenne moo'llakkam eelliinchinaa aganinaa te'im boollaankina te'im iima'n gogotina otossimminnee awwaadimminnee keenantakkambee'isa ege'llehe; ki'nnuwwi Moollanni Waa'i ee keenina hundinam mulli minaadab xale'i otossoo'isina higisaa uwwaakko. Ihukkaarem ki'nnuwwa giir aphphoo xaa'l midachchisa ihaakkoo Gibxiinsi Waa'i gosaa fissukkok kaballa ikkakko'isam ixxi gaqqi minaadab ikkakkonatte. Ki'nnuwwi mashka'inne Waa'i iinninne quuqaa Yoordaanoos daajji eeqidonne firaa maroombee'isaa ki'nnuwwina lago aa'isoo ee harish uulla aagoombee'isaa hide'aa kurukko. Ee bikkina Yoordaanoos eeqidonne firoo'nnim ka uullannem lehoommo; ihukkaarem ki'nnuwwi daajji eeqidonne fittakka'a ee harish uulla lago aa'llakkamo. Ki'nnuwwi Moollanni Waa'i ki'nnuwwinne aagu hidi'l sagara xaddakkambee'isa qoxxehe; ayyi qophpha'n waa'i misilam ki'nnuwwi gagina baxxakkotte. Mashka'im ki'nnuwwi Moollanni Waa'i itoo giiri'nnoohanee to'achchoohanee. «Ee uullanne oosoo oos oosoo qattakka'a liiranchinne hee'llakkam doollenne Waa'i illagenne sabamaakkoo ayyi misilam baaximminne haashaarantakka'a ki'nnuwwi Moollanni Waa'a quuqissakkotte. Eekkamdu issitakkaman ihulas Yoordaanoos daajje fittakka'a lago aa'llakkam uullanne lobakat doolle hee'llakkambee'an ihukkisaa hundim beedditakkaman ihukkisaa an kaballa iimanee uullaa immaannisaa kuroommo. Waa'im ki'nnuwwa mulli minaadaphphi lambe'enne binnaa'ookko. Ee ixxi binnaa'oo minaadaphphi lambe'enne hofqaxim gattakkamo. Ee uulluwwanne moo'lleena, macceesseena, itteenaa enjeesseenaa xantambee'i haqqaa kinaa cabbarakka'a anginne baxakko'oo misilluwwina otossitakkamo. Ihukkaarem ee beyyonne hee'llakku'uuyyi ki'nnuwwi Moollanni Waa'a hassakkamo; ixxom hanqo'i wodaninnee tiirinnee hassakkolas siiddakkamo. Oo luwwi hundim ki'nnuwwanne afoo ammane hawwi woronne ikkakka'a lasaanchi doollenne ki'nnuwwi Moollanni Waa'i kollonne daba'llitakka'a ixxena ijaajantakkamo. Ixxi haafoo Waa'i ihu bikkina uunjooyyoo urooyyoo; hundim beedditakkona cawwooyyo. Gaassi ki'nnuwwi anno'inne aagu hidi'l sagaram xadooyyo. «Waa'i uullanne manna qoocu ammaniinsi ki'isaa ki'nnuwwi qarantakkeebe'i afeebe'e hee'u doollenne ihaa higu luwwi hundam saarayyehe; uulli hundam saarayyehe. Ka illageen kido'nne'i maalalsiisoo luwwi ihaa la'amoohonnihe? Kido'nne'i luwwa macceesukkokdu hee'oonnihe? Gii'l lambe'innette ihaa Waa'i ki'nnuwwina wocukkaare ixxeka sagara macceessakko'isa macceesaa foorinne gatu minaadab yoohonnihe? Ki'nnuwwi Moollanni Waa'i moo'llakku'uuyyim ki'nnuwwina Gibxanne issukkisa keenanchinne, aganninne, maalalsiisoo mare'inne, orinne, ixxi wodinnee malaayyinnee, te'im baddisoo malaayyaam aganninne mat minaadaba mulli minaadabiinsi annanni issaa ixxi gaqqan isseena xanu waa'i yoohonnihe? Waa'i ixxi xale'i ihukkisaa ixxeensi bagaan mulli waa'i bee'isaa ki'nnuwwina la'iseena ka hundam moo'isukko. Ki'nnuwwa losiseena hasu bikkina iimaniinsi ixxeka sagara macceesisukko; uullannem ixxeka malaayyaam giira moo'llakkamisa issukko. Ee gii'l lambe'ennem ihaa ixxeka sagara macceessakkamisa issukko. Ki'nnuwwi anno'o iittu bikkinaa ixxuwwi lasagem ixxuwwi shumo'o doo'llu bikkinaa ixxaanninne lob malaayyinne ki'nnuwwa Gibxiinsi fissukko. Ki'nnuwwiinsi hore'em geejjuwwi minaadabbuwwaa malaayyaammuwwi minaadabaa ki'nnuwwi illagiinsi fissaa hollukko. Eekkam issukkok ixxuwwi uulla ki'nnuwwina lago aa'iseena hasu bikkinatte. Ee bikkina iimanennee uullannee Moollanni, xale'i Waa'i ihukkisa tiillehe. Ixxeensim mulli Waa'i bee'isa xaddakkotte. Ki'nnuwwinaa ki'nnuwwi lasage ki'nnuwwi oosinaa danoo'isina ee'isam ki'nnuwwi Moollanni Waa'i heer heerina uwwoo uullanne ki'nnuwwi umur qeeraa'lloo'isina kaballa ijaajoommi gatti ogoraa seeraa egellehe» yukko. Ee lasage Muse'e Yoordaanoos daajji eeqidonne eelliinchi firinne sas beero'uwwa annanni issukko. Ookkim illageen matem maso'oommanim hee'oo'n dangonne ixxi beshichcho shu ayyi manchim ee kollonne gibaa ixxi foore gatiseena xanoo'isinatte. Ee beero'uwwanne matonne gibaa aagaa lasage shimmi hasisooyyo. Oo beero'uwwim Roobeel sullina udma'i uullanne qoffitenne yoo Beexeer beero'o, Gaad sullina Gala'aadanne yoo Iraamoot beero'oo Minaas sullina Baasaananne yoo Goolaa'n beero'oo hee'ukko. Muse'e Waa'ika Seeraa losanoo hundam Isra'ee'l minaadabina uwwukko. Ixxuwwi ee ammane ixxi uulla Yoordaanoosina eelliinchi firanne yoo Baasaana gassam hee'u Amoore'i adil Oog uullaa ixxuwwi gagina lago aa'llo'o. Oo uullim Aaro'eer beero'iinsi ki'isaa Arnoo'n daajji gammalinne higaa hanaa'n qarinne Siiriyoon duuna afookko. Siiriyoo'n duuna yakkamok Hermoo'n duuninatte. Oo uullim Yoordaanoos daajjiinsi eelliinchi firanne yoo uulla hundam edaa woroo'n qarinne Sooqixxi Dambalaqa edaa ee'isam eelliinchi firinne Phisga'i duu'n lugumo afookko. Muse'e Isra'ee'l minaadaba hundam weeshaa «Isra'ee'l minaadaba, an kaballa ki'nnuwwina kuroommi seeraa gatti ogoraa hundam macceessehe. Ka ijaajo hundam erisa lossakka'a egellehe. Ni Moollanni Waa'i niinninne maqire Siina'i duunanne hidi'l sagara aagukko. Waa'i Hidi'l Sagara aagukkok xale'i niyyanno'innette ihoo'n kaballa foorinne yoommine'i niinninnetteme. Ee duunannem ihaa aphphoo gii'l woronne ki'nnuwwa atoorassukko. An ee ammane ixxi yoo luwwa ki'nnuwwina kureena ki'nnuwwi lambe'ennee Waa'i lambe'ennee uullummo. Mashka'oomim giira badditakka'a duunanne fittakkobee'i bikkinatte. «Waa'im ‹Gibxanne agiddanonne hee'llitti beyyiinsi keese fissummi ki Moollanni Waa'i anette. «Iinniinsi bagaan mulli waa'uwwina otossititte. « ‹Iimanenne, te'im uullanne te'im wo'onne hee'oo ayyi luwwi kobi'llannem misila baxxaa otossitiitte. Eese sabba'a mulli waa'uwwina otossitam anno'i baaxiilo ixxuwwi oosonne sasiinsi soor qaranchi afeebe'e baado miqisoommi to'achchaanchi Waa'i ihummi bikkina ee waa'uwwina otossititte te'im awwaadditte. Ihukkaarem eese iittoo keeninaa i ijaajom egeroo keeninaa kum qaranchi afeebe'e heer heerina hee'oo i iitto moo'isommo. « ‹Ixxi summa kora'am weeshoo mancho Waa'i guzumo'oo'n uroobee'i bikkina iikka ki Moollanni Waa'ika summa awwaad bee'i beyyonne weeshshitte. « ‹Ki Moollanni Waa'i An keese ijaajummisannem Usheexxaxxi Ayyaam keesammi ihu bikkina egere. Bax hundam baxxoo loh balli kiina yookko. Ihukkaarem lama'l balli iina ki Moollanni Waa'ina keesamaakkoo Usheexxaxxi Balla. Ee bikkina ee ballanne mah baxom baxxitte. At, ki oos, ki awwaadaan, fooraam diinatii ki hegeegonne hee'oo waaraanii mah baxom baxxakkotte. Ki awwaadaanim ki'isam usheexxona. Gibxanne agiddanonne hee'llitti beyyiinsi an ki Moollanni Waa'i malaayyinnee wodinnee fissummisa sawwihe. Usheexxaxxi Ayyaamo egettona ijaajummok eehanninatte. « ‹An ki Moollanni Waa'i ijaajummisannem kiyyannaa kiyyummaa lonse. Eekka issittilas luwwi hundim kiina makkookko; an kiina uwwoommi uullannem ki umur qeeraa'llookko. « ‹Shititte. « ‹Saa'llitte. « ‹Game'llitte. « ‹Ayyi manchonnem qophphano naqqassitte. « ‹Mulli mannika meentichcho, mine, uulla, awwaadaano, laro, hallaa ixxena yoo amaxxa mahamii mixxitte› yukko. «Duunanne Waa'i gii'l woronne, duuphphi worinnee gambabbi tuunsi worinnee ihaa ki'nnuwwina hundinam wixxitakko'i beyyonne kee'mmaalli sagarinne ka ijaajjuwwa ijaajukko bagaan mullaneyyo. Ka ijaajjuwwam cabbaramaa axisamaakkoo lam kinanne xafaa iina uwwukko. «Duunanne giir aphpham hee'u ammane tuunsi woronne sagara macceessakka'a ki'nnuwwik sulli awwonsaanii lommannii i beyyo waattakka'a ‹Ni Moollanni Waa'i gii'l worinne wocukkuuyyi macceensummi ammane ixxi malaayyaamoo lombaamoo ihukkisa moo'isaakko. Waa'i atoorassaa lasage manchi foorinne hee'eena xanoo'isa kaballa moo'nnaammo. Ihukkaarem oo malaayyaam giir neese bi'iseena xanookko. Eehidette ihulas lehimma hansoommok mahinatte? Ni Moollanni niina edaa woculas hanqo'isam lenoommo. Gii'l lambe'ennetti ihaa ixxi wocukkaare neese macceensummisa hee'oo Waa'ika sagar macceesaa foorinne hee'eena xanukkok maara edde'u keeniinsi ayyette? Muse, at hincitaa ni Moollanni Waa'i wocookkoka hundam macceessaa niina kure. Neesem eekka macceensaa ijaajammoommo› yitakko'o. Waa'im eekka iina yitakku'uuyyi macceesu ammane ‹Ku minaadab kiina kutto'oka hundam macceesammo; wocco'ok hundim hanqa. Hundi ammanem ka'isinne sawwitota'n hinkaa'n eran hee'ukko. Hundi ammanem eese lonsito'aaree i ijaaj hundam egetto'aaree hundem luwwim ixxuwwinaa ixxuwwi shumo'inaa hundi ammanem ixxuwwina taaphanookko. Kabadem mataa ixxuwwi dukkaanam daba'llita'a ee'lle'llona kure. Ihukkaarem at ka beyyonnem egere. Anim i Seera, ijaajoo gatti ogoraa hundam kiina uwwoommo. An ixxuwwina uwwoommi uullanne ka Seera, ijaajoo gatti ogoraa egettona minaadabina losise› yukko. «Isra'ee'l minaadaba, ki'nnuwwi Moollanni Waa'i ijaajo hundam egellehe. Ee ijaajjuwwiinsim makkannem qeddannem daba'llitakkotte. Hundem luwwim ki'nnuwwina makkonaa lago aa'llakkam uullannem ki'nnuwwik umur qeeraa'llonaa ki'nnuwwi Moollanni Waa'i ijaajo hundam egellehe. Yoordaanoos daajje higgakka'a lago aa'llakkam uullanne egettakkona losisoommisina ki'nnuwwi Moollanni Waa'i iina uwwu seer, ijaajii gatti ogorii ee uullannem lobakat doolle hee'llakkeena ki'nnuwwi, ki'nnuwwi oosii oos oosii hundim hee'llakkam doolli hundannem Ki'nnuwwi Moollanni Waa'a baddimmii ee seera, ijaajoo gatti ogoraa egerimmi hasisookko. Isra'ee'l minaadaba, macceessehe; ee seer hundinam ijaajammehe. Eekka issitakkolas luwwi hundim ki'nnuwwina makkookko. Xigonnem lobakat minaadab ikkakkamo; kiyyanno'i Waa'i gaassi niyyanno'ina uwwu neeyyaxxisannem marabii adii daadoo harish uullanne hee'llakkamo. «Isra'eela, macceese. Ni Moollanni Waa'i mexxo'i mat Waa'a. Ki Moollanni Waa'a ki wodan hundinnem, ki foor hundinnemii ki malaayyi hundinnemii iitte. An kaballa kiina uwwoommi ka ijaajjuwwa hundam xadditte. Ka ijaajjuwwa hundam ki oosina losise; minenne afuuttoo ammanem ihukko googo mattoo ammane, iinse'lloo ammanem ihukko ki'lloo ammane ka ijaajo hundi ammanem dabaransitaa tiire. Mare'i ihona ki anganne kare; ki miinennem kitaaphphe. Ki mi'n goocannee ooxxi gooccuwwannee kitaabe. «Ki Moollanni Waa'i gaassi kiyyanno'ina Abrihaamina, Yisaaqinaa Yaaqoobinaa aagu neeyyaxxi saga'llisannem at baxxitbee'i mishisoo lob beero'uwwi yoo uulla kiina uwwookko. Ee uullanne at lago aa'lloo minneewwim dissitbee'i mishisoo mu'utinne wo'mmaakkoohane; hintibee'i wo'i balleewwi, kaassitbee'i woyi'n kaashshii weerii yoohane; Waa'i keese ee uulla aagisoo ammane ittaa godditaa lasage Gibxi uulli agiddaniinsi fissu Waa'a xaddoobee'isa ege'lle. Ki Moollanni Waa'a baddimminne lonse. Xale'i ixxena otossihe; hidi'l sagaram xale'i ixxi summinne aage. Ki hegeegonne hee'llam hanqo'i Waa'a laqqambee'i minaadab otossitam mulli waa'uwwina otossititte. Mulli waa'uwwina otossitakkolas Moollanni Waa'ik quunqi ki'nnuwwa uulliinsi bi'isookko. Mashka'oomim ki'nnuwwinne hee'oo Moollanni Waa'i to'achchoohane. «Maasa'anne issitakko'isa ki'nnuwwi Moollanni Waa'a keentakkotte. Ixxi ki'nnuwwina uwwu ijaajo, seeraa gatti ogoraa hundam qoxxitakka'a egellehe. Waa'ina xabbeenaa hanqo'anee ihu luwwi hundam issitakkolas hundem luwwim ki'nnuwwina taaphanookko; gaassi ki'nnuwwi anno'ina aagu neeyyaxxi saga'llisannem er harish uulla lago aa'llakkamo. Waa'i ki'nnuwwina aagu neeyyaxxi saga'llisannem ki'nnuwwi diina'a hundam hollitakkamo. «Waaroo doollenne ki'nnuwwi oos ‹Ni Moollanni Waa'i ka ijaaj hundam egellona ijaajukkok mahinatte?› yaa xa'mmoo ammane ‹Gaassi neese Gibxi adilina agid hee'nnummo. Ihukkaarem Waa'i ixxi wodaam malaayyinne agiddaniinsi fissukko. Waa'i, Gibxi minaadabanne, Faari'oonannee ixxi gassaanonnee kee'mmaallisa baddisoo mare'ee agannaa issukkisa moo'nnaammo. Gaassi niyyanno'ina uwweena neeyyaxxi sagara aagukkisannem ka uulla uwweena neese Gibxiinsi fissukko. Ee lasage ni Moollanni Waa'i ka Seer hundam egelloommisinaa ixxom baddinoommisinaa ijaajukko. Neese ijaajammumlas hundi ammanem hundem luwwim niina taaphanoo'isa issaakko. Kaballa issukkuuyyi yoo'isam neese foorinne hee'isookko. Ixxi neese ijaajukkisanne ni Moollanni Waa'i illagenne ka ijaajo hundam qoxxinaa egellumlas ookki niina muccuroom ihookko› yi'llehe. «Ki'nnuwwi Moollanni Waa'i lago aa'llakkona uwwoo uulla affakkam ammane malaayyaammuwwaa ki'nnuwwiinsi xigonne lophphitamanee ikko'i Hiite'ika, Gergeese'ika, Amoore'ika, Kana'aa'nneka, Faarze'ika, Hiiwe'ikaa Iyyaabuusikaa lamarem sulluwwam fissaa hollookko. Ki'nnuwwi Moollanni Waa'i ee minaadaba ki'nnuwwi anganne higisaa uwwoo ammanee ixxuwwam kaa'llakkam ammanee qishixxitakkambee'isa guullehe. Ixxuwwinne mah hidi'l sagaram aaggakkotte; ixxuwwinam qishixxitakkotte. Ixxuwwinne eebaqqantakkotte; ki'nnuwwi landa ixxuwwina ladiissakkotte; ixxuwwi landam ki'nnuwwi goo'n oosina eebbakkotte. Mashka'oomim ixxuwwi ki'nnuwwi ooso qophpha'n waa'uwwina otossitamisa issitamo; eehid ihulas Waa'i ki'nnuwwanne quuqaa ee ammanem ki'nnuwwa bi'isookko. Ee bikkina ixxuwwika kitima hincaa'llam beyyo gindansehe; ixxuwwi otossitam utubbuwwam iiqansehe; Asheera yakkam qophpha'n waa'i misilam iiqansehe; mulli misilluwwam shokkiissehe. Mashka'oomim ki'nnuwwi Moollanni Waa'ina keesantakko'oo minaadaba; Moollanni Waa'i uullanne yoo minaadab hundiinsim ixxena minaadab ikkakakkamisina ki'nnuwwa doo'llaakko. «Waa'i ki'nnuwwa iittukkokii doo'llukkokii mulli minaadabiinsi xigonne lophphitakko'i bikkinayyo; uullanne yoo mulli minaadab hundiinsim ki'nnuwwi hore'im xigonne hoffi keen hee'llakko'o. Ihukkaarem Waa'i ki'nnuwwa iittu bikkinaa gaassi ki'nnuwwi anno'ina uwwu neeyyaxxi sagara egereena hasu bikkinaa Gibxi adilina agid hee'llakko'i beyyiinsi ixxi wodinne wolabbanonne fissukko. Ee bikkina ki'nnuwwi Moollanni Waa'i hore'em amma'nnamaakkoo Waa'i ihukkisa laqqehe. Ixxi aagu sagara egeroohane. Ixxo iitoo keeninaa ixxi ijaajom egeroo keeninaa hundinam kum qaranchi afeebe'e heer heerina hee'oo ixxi iitto moo'isookko. Ihukkaarem ixxo saboo keeno ixxuwwi illi moo'ukkuuyyim dasoo'n guzumo'ookko. Ee bikkina kaballa ki'nnuwwina uwwoommi ijaajo, seeraa gatti ogoraa qoxxitakka'a egellehe. «Ka ijaajo hundam macceessakkolasii amma'nnanchinne egettakkolasii ki'nnuwwi Moollanni Waa'i gaassi ki'nnuwwi anno'ina neeyyato uwwukkisannem heer heerina hee'oo ixxi iittoo aagu hidi'l sagaraa ki'nnuwwinam qoxxisookko. Ee'isam ki'nnuwwa iittookkoo maasse'ookkoo; ee bikkina dut ooso qattakka'a fikkaannitakkamo. Ki'nnuwwi uulli misham maasse'ookko; ee bikkina lobakat hurbaata, woyi'n mishaa wee'l zaytaa siiddakkamo. Ee'isam lobakat laroo gereebbaa uwwaa maasse'ookko. Gaassi ki'nnuwwi anno'ina uwweena neeyyatu uullanne ee maasso hundam ki'nnuwwina uwwookko. Mulli minaadab hundiinsim lobakata maasse'antakko'oo keen ikkakkamo. Ki'nnuwwik goonam ihukko meenti alceennooyyo; ee'isam diinatim lijjooyyo. Waa'i keese jabbi hundiinsim egerookko. Gibxi uullanne hee'llitti ammane moo'llitti kee'mmaalli jabbi hundiinsi matom keesenne eebooyyo. Ihukkaarem ee jabbo hundam ki diina'anne issookko. Waa'i ki anganne higisaa uwwu mulli minaadaba hundam maham qishixxitoo'n guullitaa bi'ise; ki'nnuwwina qolat ihoo bikkina ixxuwwi waa'uwwina otossitakkotte. « ‹Ku minaadab iinniinsi lophphoo bikkina an hinkid issaa ixxuwwa guullaa fissoommo› yitaa sawwimminne Ixxuwwa baddititte. Ki Moollanni Waa'i Gibxi uulli adilannee ixxi minaadabannee issu luwwi hundam sawwihe. Ki illinne moo'llitti baddisoo boobana, agannaa maalalsiisoo mare'ee ee'isam ki Moollanni Waa'ika keese wolabbanonne fissu wodaa malaayyee sawwihe. Gibxi uulli minaadabanne issukkisam ka at badditoo minaadaba hundam ixxi bi'isookko. Ki Moollanni Waa'im ixxuwwi lambe'enne dambaq ki'oo'isa issookko. Kiinniinsi gibba'a maaxamto'i keenom ihukkaare bi'llamo. Ee bikkina ka minaadaba at baddititte; ki Moollanni Waa'i kiinninnette. Ixxi lobanee baddimmim hasisoohanee. Ki Moollanni Waa'i ka minaadaba hoffi hoffan issukkuuyyi xoqolaa fissookko. At ixxuwwa hundam mexxo'i mataagge bi'isseena xantooyyo. Ee'isamdu issitlas moochchi uullanne lophphaa keese hawwisookko. Waa'i ki diina'a ki anganne higisaa uwwookko; bi'lleebe'i afeebe'em lobakata dambaqqamisa issookko. Ixxuwwika adilluwwam kiina higisaa uwwookko; atim ixxuwwa bi'issaa summi xadamoo'isa issitootto. Ayyim kiinninne uullixxamaa keese uulliseena xanooyyo; hundam guulitaa bi'issootto. Ixxuwwika qophpha'n waa'uwwa giirinne shokkiise; ee waa'uwwanne goolabakko'i bira te'im worqa ki gaqqi amaxxi issitaa massiteena ki wodanonne mixxitte. Eehamdu issitlas ookki kiina qaash ihookko. Waa'i qophpha'n waa'a saboohan ihu bikkina kee'mmaalli bichcha eebookko. Ee haashaarammi waa'uwwa ki minenne aagissitte; ihukkaarem aagissittaa'lleensi atim ixxuwwisam bi'llootto. Ixxuwwi bi'immi hasisoo keen ikko'i bikkina at ixxuwwa sabimmii shigigimmii hasisookko. «Foorinne hee'llakkeena, fikkaannitakkeenaa Waa'i gaassi ki'nnuwwi anno'ina uwweena neeyyatu uulla aaggakkeena xantakkamisinaa kaballa an ki'nnuwwina uwwummi ijaaj hundam qoxxitakka'a egellehe. Ki Moollanni Waa'i kiina uwwu ixxi ijaajjuwwa egettittisaa ki woda'nnekam la'eenaa keeneenaa ka udma'i uullanne sor hiincho hundam hawwi worinne higisukkuuyyi hinkid awwonsuda'e sawwihe. Sibaarinne hawwitoo'isa issukko. Ee lasage atii gaassi kiyyanno'ii ittakka'a laqqakkambee'i maanna'a itisukko. Eekka issukkokim manchi beet foorinne hee'eena xanookkok Waa'i sagarinnette bagaan xale'i hurbaatinnetti ihubee'isa losiseenatte. Ka sorem hiinchi woronnem ki eddechchi beeddukkoyyo; ki lokkim dashshukkoyyo. Anni ixxi ooso axeeroo'isa ki Moollanni Waa'im keese axeeroohan ihukkisa la'e. At ixxo baddimminnee ixxi googonnem marimminnee ki Moollanni Waa'ika ijaajo hundam egere. Oono'o, ki Moollanni Waa'i kiina harish uulla uwweena keese woraakko. Oo uullim cebbuwwiinsii duunnuwwiinsii firoo bu'uwwii daajjuwwii yoohane. Arasii so'ii, woyinii oda'ii, oroomaanii wee'l mishii, ee'isam marabii wo'mmaakkoohane. Oo uulli sibaattoobee'anee maham hooggoobee'anee. Oo uulli kiniinsi xaara, duunnuwwiinsim madaaba fissakkamane. Atim ittaa godditootto; kiina ka harish uulla uwwu ki Moollanni Waa'am galaxxitootto. «Ki Moollanni Waa'a xaddaa an kaballa keese ijaajoommi ijaajo, seeraa gatti ogoraa xaddoobee'isa egere. Ittaa godditoohaaree er minneewwa baxxaa hee'lloohaaree gereebbikii la'llekii allaachchi, birii worqii ee'isam mulli amaxxii hundim lophphoohaare, bolxitoobee'isaa agiddanonne hee'lloo Gibxi uulliinsi fissu ki Moollanni Waa'a xaddoobee'isaa ege'lle. Ixxi keese qubaam hamashshii ginxa yakkam daquurii wo'mmaakkoo baddisoo ee haraar udma'i uullanne awwonsaakko; wo'i maham hee'oobee'i gogaalli uullanne sifo'i kiniinsi wo'o fissaakko. At ijaajantoo'isa moo'eena, keeneenaa lasonne kiina er luwwa isseenaa gaassi kiyyanno'i itta'a laqqambee'i maanna'a udma'i uullanne uwwukko. Ee bikkina ‹I malaayyinnee qoxallaninnee goddaanchi ihaammo› yitaa hore'em sawwititte. Goddaanchi ikkoo'isina malaayyee qoxallanoo uwwukkok ki Moollanni Waa'i ihukkisa sawwihe; ixxi eekka issookkok kaballa issoo'isam gaassi ki lobanno'inne aagu hidi'l sagara wonsheenatte. Ki Moollanni Waa'a xaddaa otossiteenaa awwaadeenaa qophpha'n waa'uwwi kolli daba'llitlas hanqoomam bi'lloohan ikkittisa kaballa an kiina qoxxisaa kuroommo. Ki Moollanni Waa'ina ijaajantibeelas ki illagenne hee'oo mulli minaadaba bi'isoo'isam keesem xoqolansaa bi'isookko. «Isra'ee'l minaadaba, macceese. Kiinninsi lophphitamanee malaayyaammuwwaa ikko'i minaadaphphi uullaa oot iimane afoo ixxuwwi lob beero'uwwaa ki gulummi issitaa a'lliteena kaballa Yoordaanoos daajji eeqidonne fittootto. Eekke'enne hee'llam minaadab uullichchi qeeraa'lluwwaa malaayyaammuwwaa; ixxuwwinnem ‹Ayyim uullixxameena xanoobee'i Eenaaq shumo'o› yakku'uuyyi macceessaatto. Ihukkaarem itoo giiri'nnoo'i ki Moollanni Waa'i ki illaginne maroo'isa kaballa moo'llootto. At illage matqaxanne ixxi kaachcha issookko. Ee bikkina ixxi uwwu neeyyaxxisanne ixxuwwa xoqoltaa hollitaa qaqqisom bi'issootto. «Ki'nnuwwi Moollanni Waa'i ki'nnuwwi illagiinsi ixxuwwa hollaa lasage ‹Waa'i ka uulla neese worukkok ni er bax bikkinatte› yitakka'a sawwitakkotte. Waa'i ee minaadaba xoqolaa hollookkok ixxuwwi jolli bikkinatte. Waa'i ixxuwwika uulla ki gulummi issitaa a'llitoo'isa issukkok at eranee hanqo'i luwwa issitoohanee ikkittaareyyo. Waa'i ixxuwwa xoqolaa holloo mashka'i ixxuwwi jor ikko'i bikkinaa ee'isam gaassi ki lob anno'ina, Abrihaamina, Yisaaqinaa Yaaqoobinaa uwwu neeyyaxxi sagara egereenatte. Ki wodan duud ihukkaarem ki Moollanni Waa'i ka er uulla ki gulummi issaa kiina uwwookko; oohim ki muccuroominnette ihubee'isa qoossitaa la'e. «Ki Moollanni Waa'a udma'i uullanne hinkid quuqissida'e xadditte. Gibxi uulliinsi fittitti balliinsi ki'isaa keyye waatteebe'i afeebe'e ixxonne boqqitaatto. Siina'i udma'i uullanne ki'nnuwwa bi'iseena ki'eebe'i afeebe'e Waa'a lobakata quuqissakko'ookko. Waa'i ki'nnuwwinne aagu hidi'l sagar kitaabamaakkoo ki'n ba'lluwwa aa'eena duunanne firaa hee'ummo. Anim eekke'enne maham itoo'nnii agoo'nnii sor ballaa sor hiimoo afuurummo. Ee lasagem ki'nnuwwi ee duu'n lugumonne wixxitakko'i ammane Waa'i gii'l woronnette ihaa wocukkuuyyi macceessakko'i sagara ixxi gaqqi anginne kitaabaakkoo lam ki'n ba'lluwwa iina uwwukko. Sor balliinsii sor hiimiinsii lasage Waa'i hidi'l sagara kitaabaakkoo lam ki'n ba'lluwwaa iina uwwukko. «Ee lasage Waa'i ‹Qaqqissaa duuniinsi dille. At Gibxi uulliinsi awwonsitaa fissitti minaadab jor luwwa issimminne haashaaramaakko. An ixxuwwina uwwummi ijaaj hundiinsim ee ammanem qee'llita'a otossitam qophpha'n waa'a ixxuwwi gagina baxxo'ookko› yukko. «Ee lasage odim Waa'i ‹Oono'o, ku minaadab wodan duudaakkoohan ihukkisa la'oommo. Kanniinsi eehid ixxuwwa ayyim tiireena xanoobee'isa issaa bi'isoommo bikkina at cawwitaa ure. Anim ee lasage keese ixxuwwiinsi lophphaa malaayyaamoo dut minaadabina annaa ikkoo'isa issoommo› yukko. «Ee bikkina hidi'l sagar kitaabamaakkoo lamem ki'n ba'lluwwam i lamem angannem amadummisam duuniinsi dillummo. Ee ammane gii'l laban duunanne moo'amam hee'ukko. Ki'nnuwwim ki'nnuwwi Moollanni Waa'i ki'nnuwwina uwwu ijaajiinsi qaqqissakka'a qee'llitakka'a worqa bukkitakka'a addichchi hagaranne qophpha'n waa'a baxxakka'a Waa'anne boqqitakko'isa moo'ummo. Ee bikkina lamem ki'n ba'lluwwam ki'nnuwwi illagenne huushaa iiqummo. Ee lasage odim sor ballaa sor hiimoo an maham itoo'nnii agoo'nnii Waa'i illagenne illillaachcha qubbaa otossummo. Eehid issummi mashka'im Waa'a kichche'isoo baaxiilo baxxakka'a ixxo quuqissakko'i bikkinatte. Waa'i ki'nnuwwa boobaninne bi'iseena ki'u bikkina ixxek malaayyaam quunqi eese baa'isaa hee'ukko. Ihukkaarem Waa'i odim i unxato macceesukko. Waa'i Aaroonannem lobakata quuqu bikkina sheena gudaa hee'ukko. Ee bikkina an ee ammane Aarooninam edaa uunxummo. Ee addichchi kobi'llanne baxxakko'i baaxiilinne wo'mmaakkoo shigigaa'oo misila ki'isaa giiranne edummo. Ixxom iiqansaa dir issaa xaansummo; ixxi diram duuniinsi dilloo wo'onne issummo. «Ki'nnuwwi odim Taabi'eranne, Maasahannee Qiibroot Hataawannee Waa'a quuqissakko'o. Waa'i ‹Mallehe; an ki'nnuwwina uwwummi neeyyaxxi uulla lago aa'llehe› yaa Qaadees Baarne'iinsi asse'u ammanem ixxonne boqqitakko'o bagaan amma'nnantakko'oyyo. Ixxi sagarinam ijaajantakko'oyyo. An ki'nnuwwa la'ummi ammaniinsi ki'isaa ki'nnuwwi Waa'anne boqqimma uttakko'oyyome. «Anim ee bikkina sor ballaa sor hiimoo Waa'i illagenne illillaachcha ubummo. Eehid issummokim ixxi ‹Ki'nnuwwa bi'isoommo› yaa hee'u bikkinatte. Anim ‹Hundam xantoo Waa'a! Ki malaayyinne wodinnee gatissaa Gibxi uulliinsi fissitti ki minaadaba bi'issitte. Kiina awwaadaano Abrihaama, Yisaaqaa Yaaqoobaa sawwihe. Ka minaadaphpheka woda'n duudooma, boqqoomaa baaxiiloo hundam xiggitte› yaa uunxummo. Eehid ihubeelas ‹Waa'i aagu neeyyaxxi saga'llisanne minaadaba ee uulla aagiseena xanukkoyyo› yita'a Gibxi uulli manni naacantamo. Hore'oomam ‹Minaadaba sabu bikkina sheena hasaa udma'i uullanne fissukko› yitamo. Eehanniinsi hundiinsim hanaan ku minaadab ki gulummi ihona doo'llittanee ki lob malaayyinnee wodinnee Gibxi uulliinsi fissittanee. «Ee lasage Waa'i iina ‹Illaageen iiqamukkaanni'nnoo'i lam ki'n ba'lla cabbattaa gudise; ee ba'lluwwa dissakkam Saaxinam haqqinne baxe. Atim an yoommi duuna fire. Anim luxxeka iiqqitti ki'n ba'llanne hee'u ijaajjuwwa la'm korem kitaaboommo. Atim saaxi'n woronne dissitootto› yukko. «Anim giraa'l haqqinne Saaxina baxummo; iiqamukkoka laboo lam ki'n ba'llam cabbaraa gudisummo. Ee lamem ki'n ba'llam amadaa duuna firummo. Waa'im duu'n lugumonne wixxitakka'a hee'llakko'i balla gii'l woronne ihaa ki'nnuwwina kuru tommem ijaajjuwwam luxxeka kitaabukkisam ka ba'lluwwannem kitaabukko. Ee kitaabu ba'lluwwam iina uwwukko. Anim duuniinsi daba'llaa dillaa Waa'i eese ijaajukkisanne ee ba'lluwwa saaxi'n woronne dissummo. Ee ammaniinsi ki'isaa oono'o, saaxi'n woronne yookko. Isra'ee'l oos Been Yaa'iqaa'n manni wo'i ba'l beyyiinsi ki'lla'a Mooseera matto'o. Aaroonim ee beyyonne lehaa eekke'em waammamukko; ixxi beyyonnem ixxi beet Ali'aazar qeessichchi ihukko. Ee beyyiinsi ki'lla'a Gudgooda yakkam beyyo matto'o. Ee lasage daadoo wo'i hee'oo Yoxbaata yakkam beyyo matto'o. Ee ammane Waa'ika Hidi'l Saga'l Saaxina iyyitona, ixxi illagennem uullita'a awwaadonaa Waa'i summinne minaadaba maasse'llonaa Leewi'i shumo'o annanni issaa doo'llukko. Kaballi afeebe'em Leewi'i shumo'ik awwaad eehane. Leewi'i shumo'ina mulli abbaayyuwwisa uulli sharad uwwamubee'ek ee bikknatte. Ki'nnuwwi Moollanni Waa'i gaassaa wocukkisam qeessuwwi ikka'a awwaaddam bikkina Waa'i ixxi gagim Leewi'i oosina gulumma. «Anim kanniinsi illageen issummisam duunanne odim sor ballaa sor hiimoo Waa'a uunxummo. Odim Waa'i i uunxato macceesaa keese bi'isimma urukko. Ee lasage ‹Kaba mare. Ixxuwwi gaassi anno'ina uwwummi neeyyaxxi saga'llisanne ee uulla ixxuwwi gagina gulummi issita'a lago aa'llona minaadaba awwonse› yukko. Iimanii iimaniinsi hanaan yoo iimannuwwii uullii uullanne yoo luwwi hundimii Waa'ane. Waa'i gaassi kiyyanno'o lobakata iittam hee'u bikkina keesem kaballa lobakat minaadaphphi lambe'iinsi doo'llaakko. Atim kaballi afeebe'e doo'llantaattoo ixxi minaadaba. Ee bikkina ka lasage ki'nnuwwika wodano duudisimmaa xiiqqanchaa uttakka'a Waa'ina ijaajammehe. Ki'nnuwwi Moollanni Waa'i qophpha'n waa'uwwiinsi hundiinsimii malaayyuwwiinsi hundiinsimii hanaan lobanee malaayyaamoo ihu bikkina baachchinne lonsimmi hasisoohane. Ixxi oogato boqqisoobee'ane; maqanxam aa'oobee'ane. Ixxi annii amaa bee'i adaraar oosinaa aro'i lehu meentinaa hanqo'isa oogatoohane. Ni minaadaphphi lambe'enne hee'llam waaraanom iittoo bikkina ittam hurbaataa eddechchaa uwwoohane. Ee bikkina ki'nnuwwim ee waaraanina ki'nnuwwi iitto moo'isimmi hasisookko. Ki'nnuwwim Gibxi uullanne waaraan hee'llakko'o. Ki Moollanni Waa'a baddimminne ixxena ijaajame; xale'i ixxenam otossihe. Ixxena amma'nnantaattoohan ikkaa xale'i ixxi summinne hide'e. Ixxi kiina Waa'a. Ixxi kiina issu lob maalalsiisoo luwwi hundam ki illinne moo'llitti bikkina hundi ammanem galaxxe. Gaassi kiyyanno'i Gibxi uulla matto'i ammane xale'i lamarayyi manchi hee'llo'o. Ihukkaarem kaba ki Moollanni Waa'i keese iima'n boollaanki qaxa fikkaannisaakko. «Ee bikkina ki Moollanni Waa'a iitte; ixxi kiinniinsi hasoo seera, ogoraa ijaajoo hundi ammanem egere. Ki'nnuwwi oos moo'llobee'anee laqqambee'anee ihuta'nnimii ki'nnuwwi Waa'ika axeellano, lobaannooma, malaayyee daannoomaa moo'llakko'an ihukkisa kaballa sawwi'llehe. Ixxi Gibxi uulli adilannee ee uullannee issu maalalsiisoo baxoo agannaa hundam moo'llakko'ookko. Gibxi uulli gogot ki'nnuwwa hollito'i ammane ixxuwwa faradinnee faraxxi gaarre'innee maqirem Ertiira'i Dambalaqanne xuuxantamisa issaa Waa'i guullukkisa moo'llakko'ookko. Ki'nnuwwi keyye affakkeena illageen Waa'i ee udma'i uullanne maha issuda'e laqqakkamo. Roobeel sulliinsi Eeli'aabina oos ikko'i Daataanannee Aberoonannee issukkoka sawwi'llehe. Isra'ee'l oos hundim ixxuwwi illinne moo'llu'uuyyim uulli fooqaa ixxuwwa, ixxuwwi abaroosa, ixxuwwi dukkaannuwwaa ixxuwwan ihu foor yoo luwwi hundamii xuuxukko. Waa'i issu ka lob baxo hundam ki'nnuwwi illinnem moo'llakko'oko. «Ki'nnuwwan issitakka'a lago aa'llakkam uulla Yoordaanoos daajje fittakka'a amaddakkeena malaayye siidimmina an kaballa ki'nnuwwa ijaajoommi ijaaj hundam egellehe. Ee ijaajjuwwam egettakkolas Waa'i gaassi ki'nnuwwi anno'inaa ixxuwwi shumo'inaa uwweena sagara aagu adii marabii wo'mmaakkoo ee harish uullanne lobakat doolle hee'llakkamo. Ku lago aa'llakkam uulli kanniinsi illageen hee'llakko'i Gibxi uulli'nnoohaneyyo. Gibxanne hurbaata wixxakka'a lasage duubbi kaashshisa wixamu hurbaatanne wo'o agissakkeena boohe'e lokkinne fissitakkam hee'llakko'o. Ihukkaarem Yoordaanoos daajje fittakka'a lago aa'llakkam uulli duunnuwwii cebbuwwii yoohan ihaa xeen ga'nnaa aashisoohane. Ki Moollanni Waa'i ka uulla hiinchi hundoomam abooyyoohanee egeroohanee. «Ee bikkina an kaballa ki'nnuwwa ijaajoommi seer hundam egellehe; ki'nnuwwi Moollanni Waa'am iittehe; ki'nnuwwi wo'm wodaninnem ixxena awwaaddehe. Eehamdu issitakkolas Waa'i ki'nnuwwina qaraax amma'nnekaa hagayyikaa xeena ammaninne ga'nnisookko. Ee'isinne ichchina ihoo hurbaata, woyi'n diqaasa, wee'l zaytaa ki'nnuwwi diinatina ihoo hixee lonsaa uwwookko; hasisoo hurbaata hundam siiddakkamo. Waa'iinsi qee'llitakka'a mulli waa'uwwina awwaaddakkeenaa otossitakkeenaa laso daba'llitakkambee'isa ege'llehe. Eehamdu issitakkolas Waa'i ki'nnuwwanne quuqookko. Iimane xufaa xeen ga'nnoobee'isaa uullanne hurbaat mishoobee'isaa issookko. Waa'im ki'nnuwwina uwwoo uulliinsi qaqqissakka'a bi'llakkamo. «Ka ijaajjuwwa hundi ammanem ki'nnuwwi wodanonnee ki'nnuwwi tiironne dissehe; ki'nnuwwi angannee miinennee mare'i issitakka'a kallehe. Ki'nnuwwi oosina losissehe; minenne afuuttakkam ammane te'im goog taakke'llakku'uuyyii usheexxitakkam ammanem ihukko baxxakkam amman hundamii ee bikkina woccehe. Ki mi'nnaannonnee ooxxaannonnee goocanne kitaabe. Eehamdu issitakkolas ki'nnuwwi Moollanni Waa'i ki'nnuwwi gaassi anno'ina uwweena hide'aa sagara aagu uullanne ki'nnuwwikii ki'nnuwwi oosikii umur uulliinsi hanaan yoo iima'nnisa qeeraa'llookko. «Ee bikkina an ki'nnuwwina uwwummi ijaajjuwwa qoxxitakka'a egellehe; ki'nnuwwi Moollanni Waa'a iittehe; ixxi googonnem mattakka'a ixxena amma'nnantakko'oo keen ikkehe. Eehamdu issitakkolas Waa'i ka ki'nnuwwiinsi xigonne dutaa malaayyaammuwwaa ikko'i minaadaphphi uulla lago aa'llakkamo; illagenne hee'llam minaadaba hundam fissookko. Ki'nnuwwim malaayyinnee wodinnee ki'nnuwwiinsi hore'em lophphitam minaadaphphi uulla lago aa'llakkamo. Ki'nnuwwi higgakku'uuyyi ki'nnuwwi lokkinne hancaaccakkam uulli hundim ki'nnuwwan ihookko. Ki'nnuwwi gaassi uullim woroo'n qarinne hee'oo udma'i uulliinsi ki'isaa hanaa'n qarinne hee'oo Liibaanoos uulli duunnuwwa, ee'isam eelliinchi firinne hee'oo Efiraaxiis daajjiinsi ki'isaa eelliinchi aagginne hee'oo Meedeteraaniyaa'n dambalaq afeebe'e haraarookko. Ee uullanne ki'nnuwwi mattakkam beyyi hundannem Moollanni Waa'i ki'nnuwwina uwwu neeyyaxxisanne minaadab hundim ki'nnuwwa baddoo'isa issookko. Ki'nnuwwinne uullixxameena xanookkokim hore'em hee'ooyyo. «Oono'o, an kaballa ki'nnuwwi illagenne maassoo duunchaa lamom dissoommo. Kaballa an ki'nnuwwina uwwoommi ki'nnuwwi Moollanni Waa'i ijaajjuwwa hundam egettakkolas maasso siiddakkamo. Ihukkaarem kanniinsi illageen laqqakkambee'i mulli waa'uwwa awwontakka'a ka ijaajjuwwa egettakkambee'an ihulas duunchi ki'nnuwwanne ihookko. Waa'i at lago aa'lloo uulla aagisoo ammane at maassoo Garzaa'n duunanne, duunchaa odim Eebaa'l duunanne alallaattootto. Ku duunnuwwim Yoordaanoosiinsi eeqidonne eelliinchi aagginne Arabanne hee'llam Kana'aa'n manni uullanne Gelge'l illagenne hee'oo Moore'i haqqi gadanonne hee'oo keeno. Ki'nnuwwi Moollanni Waa'i hee'llakkona ki'nnuwwina uwwu uulla lago aa'llakkeena Yoordaanoosa higgakka'ahii ki'nnuwwi gulummi issitakka'ahii hee'llakkam ammane kaballa an ki'nnuwwina uwwoommi Seeraa ogoraa hundam erisa egellehe. «Gaassi ki'nnuwwi anno'ina Moollanni Waa'i ki'nnuwwina uwwoo uullanne hee'llakkam doollenne hundannem qoxxitakka'a egettakkam seerii gatti ogorii, ki'nnuwwi lago aa'llakkam uullanne hee'oo minaadab duunnuwwaannonnee hujuphphi haqqi lugummuwwannee ixxuwwi waa'uwwina otossitam beyyuwwa hundam bi'issehe. Kitima hincaa'llam beyyuwwam gindansehe; otossakkam beyyi utubbuwwa xaansehe. Asheera yakkam qophpha'n waa'i misilluwwa hundam giirinne shokkiissehe; cabbarakka'a axisakko'i waa'uwwam iiqansehe; ixxuwwi summim od tiiramoobee'isa issehe. Moollanni Waa'ina ki'nnuwwi otossitakkamis hanqo'i Waa'a laqqambee'i minaadab ixxuwwi waa'uwwina otossitamis ihimmi hasisooyyo. Moollanni Waa'i hundem sulli lambe'iinsim ixxena heechchi beyyi ihoo'isinaa ixxi summim weeshamoo'isinaa doo'lloo beyyo hassakka'a mallehe. Eekke'em shokkiisakka'a hincaa'akkam kitimaa mulli kitimaa, tommiinsi matoo Waa'ina annannisinne uwwitakkam luwwaa, uga'aa gaqqi doo'llinne uwwitakkam luwwaa, la'llekaa gereebbikaa wona hincaa'llakkamo. Eekke'em maasse'u ki'nnuwwi Moollanni Waa'i illagenne ki'nnuwwii ki'nnuwwi abaroos wixxitakka'a ittakkamo. Badattakka'a siiddakkam er luwwi hundannem liirantakkamo. Oo amman afoohaare kabe'e afeebe'e issitakkamisa issitakkamoyyo. Oono'o, kaballi afeebe'e hassakko'oka issitakkam hee'llakko'o. Moollanni Waa'i xumminne ki'nnuwwi usheexxitakka'a hee'llakkona uwwoo uulla aaggakko'oyyome. Moollanni Waa'i ki'nnuwwina uwwoo uullanne hee'llakkeena Yoordaanoos daajje fittakka'a mattakkamo; xumminne hee'llakkonam ki'nnuwwi kululleetanne hee'oo diina'i hundiinsim ki'nnuwwa usheexxisookko. Ee lasage an ijaajummi luwwi hundam eebbakkamok ki'nnuwwi Moollanni Waa'i ixxi summina doo'llu beyyonnetti ihookko. Oohim shokkiisakka'a hincaa'akkam kitimaa mulli kitimaa hundam, tommiinsi matoo Waa'ina annannisinne uwwitakkam luwwa, uga'aa gaqqi doo'llinne uwwitakkam luwwaa eebbakkamo. Ki'nnuwwi oosinne, ki'nnuwwina awwaaddam awwaadaaninnee ee'isam ki'nnuwwinne maqire ixxuwwina uulli sharad bee'i ki'nnuwwi beero'uwwanne hee'llam Leewi'i oosinnee ki'nnuwwi Moollanni Waa'i illagenne liirantakkamo. Shokkiisakka'a hincaa'akkam kitima hannonnem hincaa'llakkambee'isa ege'llehe. Ihukkaarem shokkiissakka'a hincaa'llakkam kitimii an ijaajoommok hundimii ki'nnuwwi sulli lambe'iinsi Waa'i doo'lloo xale'i mat beyyonnetti ihimmi hasisookko. Ihukkaarem hassakko'i amman hundam Moollanni Waa'i ki'nnuwwa maasse'ukkisinne ki'nnuwwi beero'uwwanne ayyi beyyonnem duttakka'a ittakkeena xantakkamo. Saaro'ikaa kukkussikaa maara itoo'isam muccuram ihukko muccur ihubee'i ayyi manchim ee maaram iteena xanookko. Ihukkaarem wo'isa uullanne dunnehe bagaan xiiga ittakkotte. Waa'ina kitim issitaa hincaa'lloo luwwa at hee'lloo ayyi beyyonnem ittitte. Oohim wixxoo hurbaaxxeka, woyi'n diqaasika, wee'l zaytiinsi uwwitakkam tommiinsi mato te'im lariinsii gereebbiinsii uwwakkam wona, uga'aa gaqqi doo'llinne uwwitakkam luwwaa ki'nnuwwi hee'llakkam ayyi beyyonnem ittakkotte. Ee keeno ki'nnuwwi Moollanni Waa'i doo'lloo beyyonne oosinne, ki'nnuwwina awwaaddam awwaadaaninnee ki'nnuwwinne beero'uwwanne hee'llam Leewi'i oosinnee maqirem ittehe. Eekke'em baxxakka'a siiddakkam er luwwi hundannem liirantakkamo. Ki uullanne hee'lloo doollenne hundannem Leewi'i ooso xaddoobee'isa ege'llehe. «Waa'i ki'nnuwwina uwwu neeyyaxxisanne hee'llakkam uulla haraassoo ammane ki'nnuwwina heele'isu amman hundam maara ittakkeena xantakkamo. Ihukkaarem Waa'i doo'llu oo mat beyyi qee'l ihulas maara ittakkeena hassakkam ammane Waa'i ki'nnuwwina uwwu lariinsi te'im gereebbiinsi doo'llitakka'a ki'nnuwwi minenne an ijaajummisanne duttakka'a ittakkeena xantakkamo. See'llisinne muccurukkanem ihukko muccurubee'i ayyi manchim saaro'ika te'im kukkussika maara itoo'isam ee maaram itona. Ihukkaarem foor hee'ookkok xiigannette ihu bikkina xiig yoo maara itimmiinsi ege'llehe. Ee bikkina foore maarinne maqire ittakkotte. Xiiga ittakkotte; ihukkaarem ixxo uullanne wo'isa dunnehe. Kiinaa ki shumo'inaa er luwwi ihona hassakkolas xiiga ittakkotte; ki'nnuwwi eekka issimmannem Waa'i ki'nnuwwanne liiramookko. Ee bikkina keesamaakkoo kitimaa uga'aa doo'llamu xale'e ee beyyo massehe. Shokkiissakka'a Waa'ina hincaa'llakkam kitima, oohim maaraa xiigaa hundam ki'nnuwwi Moollanni Waa'ina kitima hincaa'akkam beyyi hanenne hincaa'llehe. Mulli kiti'mmek xiig ee kiti'm beyyi gadanonne dunamona; ihukkaarem maarooma ittakkeena xantakkamo. Ki'nnuwwinaa ki'nnuwwi shumo'inaa heer heerina er luwwi ihona an kaballa ijaajoommi ijaajo hundam erisa egellehe. Ee'isa issitakkam ammane ki'nnuwwi Moollanni Waa'i illagenne erokaa xabbeen luwwaa issitakko'aannisa. «Ki'nnuwwi mulli minaadaphphi uullanne orantakkam ammane ki'nnuwwi Moollanni Waa'i ki'nnuwwinne oramoo minaadaba bi'isookko. Ki'nnuwwim ee minaadaphphi uulla lago aa'llakkamo. Oo minaadab bi'aa lasage ixxuwwi baxo baxxakka'a qaashanne aaggakkotte. ‹Neesem ixxuwwisam issinoommo› yimminne ‹Ku minaadab ixxuwwi waa'uwwina otossam hee'ukkok hinkidette?› yitakka'a xa'mmitakkotte. Ki'nnuwwi Moollanni Waa'ina otossitakkamok ku minaadab ixxuwwi waa'uwwina otossitamaannisa ihimmi hasisooyyo. Ixxuwwi ee waa'uwwina otossitam ammane issitam luwwi hundim lobakata shigigaa'oohanee Waa'i illagenne sabamaakkoohanee. Mullek gataa ixxuwwi gaqqi oosom kitima hincaa'llam beyyonne ixxuwwi waa'uwwina giirinne shokkiissamane. «Ee bikkina an ki'nnuwwa ijaajummoka hundam issehe. Ixxonnem maham eddakkotte te'im ixxeensi ma'llichchom xa'issakkotte. «Ki'nnuwwi lambe'iinsi hiraagaanchi te'im kaalta moo'oo manchi ki'aa ‹Aganna te'im maalalsiisoo mare'e issoommo› yeena xanookko. ‹Issoommo› yukkisam aganna te'im maalalsiisoo luwwa issuta'nnii ki'nnuwwam laqqakkambee'i mulli waa'uwwina awwaandonaa otossinonaa yuta'nnii ki'nnuwwi Moollanni Waa'i wo'm wodaninne ixxo iittitakkamda'e la'eena hasaa asse'aakkoohan iheena xanoo bikkina ee hiraagaancho te'im kaalta moo'oo mancho macceessakkotte. Ki'nnuwwi Moollanni Waa'a awwonnehe; xale'i ixxom baddehe; ixxi ijaajjuwwam egellehe; ixxi sagaram macceessehe. Ixxenam otossi'llehe; ixxenne maqire yoo mateeyyoomam qoxxissehe. Agiddanonne hee'llakko'i Gibxiinsi wolabbanonne fissaa gatisu Waa'anne boqqitakkammisa issoo kaalta moo'oo te'im hiraagoo mancho shi'llehe. Eehido'i manchi qoxxitakka'a hee'llakkona Moollanni Waa'i ijaaju googiinsi annanni isseena qoodaakkoohane. Ee bikkina eehido'i jor luwwa ki'nnuwwi lambe'iinsi bi'issehe. Ihukkaarem eehido'i manchi ki'nnuwwa qawwiisona ha'yyitakkotte. Ixxi wocoo woshsham macceessakkotte. Ixxena qishixxitakka'a te'im urato issitakka'a ixxi foore gatissakkeena yakitakkotte. Maham mallantakkoo'n lehoo'isa issehe; hore'oomam ixxonne kina huushshakkeena luxxan ikkehe. Mulli manni ayyim hara'mmamaa kininne aphphisaa shihona. Agidda'n uullanne Gibxanne hee'llakko'i beyyiinsi wolabbanonne fissu ki'nnuwwi Moollanni Waa'iinsi qeesseena hasaakkoohan ihu bikkina leheebe'i afeebe'e kininne aphphissehe. Ee lasage Isra'ee'l minaadab hundim ee woshsha macceessa'a badditamo. Ee bikkina eehido'i jor luwwa isseena sawwookkok od hee'ooyyo. Ki'nnuwwi ee woshsha macceessakka'a lasage ee bikkina xa'mmitakka'a erisa saarayyehe. Ku jor luwwi ki'nnuwwi lambe'enne ihukkisa qoossitakka'a laqqakkolas, Ee beero'onne hee'oo mannaa ixxuwwi fooraam diinatee hundam shi'llehe; ee beero'om hore'oomam bi'issehe. Ee beero'i manni amaxxa hundam wixxaa'llaakka'a wottakka'a ee beero'i wixxixxi beyyonne naallehe. Ee lasage ee beero'oo ee beero'i amaxxi hundamii ki'nnuwwi Moollanni Waa'ina kitim issitakka'a giirinne shokkiissehe. Oo beero'im od daba'llaa baxamoobee'isa heer heerinam gindamaakkoohan ihona. Waa'i baddisoo quunqiinsi daba'llaa ki'nnuwwina qishixxato issoo'isinaa iittoo'isinaa ee beero'i amaxxiinsi maham ki'nnuwwi gagina gatissakkotte. Eekka issitakkolas gaassi ki'nnuwwi anno'ina aagu hidi'l saga'llisanne ki'nnuwwika xigo lonsookko. Kaballa an ki'nnuwwina uwwummi Waa'i ijaajjuwwa egettakkolasii ixxi ki'nnuwwiinsi hasoo luwwi hundam issitakkolasii ku neeyyat hanqo'isam wo'mmookko. «Ki'nnuwwi, Moollanni Waa'ina ooso. Ee bikkina lehu manchina kichche'llakkam ammane ki'nnuwwika xabano hokookkakkotte. Horoorem hogoossitakkotte. Ki'nnuwwi, Moollanni Waa'ina annanni ikkakko'oo minaadaba. Uullanne hee'oo mulli minaadabiinsi ixxena annanni minaadab ikkakkona ixxi gagina doo'llaakko. «Haashaaramu luwwa maham ittakkotte. Ki'nnuwwi ittakkam diinat laro, gereebba, fella'a, saaro'o, kukkussa, gaalla, bii'l fella'a, gibbaa damaallaa. Shuku'l lam ihukkokaa alle'oo diinate hundamii ittehe. Ihukkaarem shuku'l lam ihubee'ekaa alle'oobee'ekaa ittakkotte. Ee'isinne gaameela'a, shumagee wexeexaa ittakkotte. Oo keen alle'oo keen ihuta'nnim shuku'l lam ihubee'i bikkina haashaaramaakkoo keeno. Boonke'ikim shuku'l lam ihaakkoohan ihuta'nnim alle'oobee'i bikkina haashaaramma; ee bikkina ittakkotte. Eehido'i diinate ittimmi gataa leeshoomam nakkitakkotte. «Ee'isam qurxumme'iinsi ladii gilco'ii yoo keeno ittehe. Ihukkaarem wo'i woronne hee'oo ladii gilco'ii bee'i qooccancha hundam ittakkotte. Eehido'i qooccanchi ki'nnuwwina haashaaramaakkoohan ihona. «Iimaninne bararoo keeniinsim muccur ihu keeno ittehe. Ihukkaarem hishshammachcho, gadee yakkam ammachcho oosame, cingiraalla, sile'e, qooraanta, guchche'e, xalaqa, ziyye'e, oosame hundam, mooqqaqqichcho, gaagaano, wo'i wo'l antabaa'aa, «Lad yoo hoffi foochcha'i hundim haashaaramma; eehido'i keeno ittakkotte. Ihukkaarem ee keeniinsi muccur ihu keeno ittehe. «Bayita maham ittakkotte. Ihukkaarem ki'nnuwwi lambe'enne hee'llam waaraan itteeda'e te'im ixxuwwina biteessakkeena xantakkamo. Ihukkaarem ki'nnuwwi Moollanni Waa'ina annanni ikkakko'oo minaadaba. «Fellakkichchi wota'l maara am adinne maqire sattakkotte. «Hiincho hiinchonne abuullitakka'a siiddakkam hurbaatiinsi hundiinsim tommiinsi mato annanni issitakka'a dissehe. Ki'nnuwwi Moollanni Waa'a hundi ammanem baddimma lossakkeena ixxi summi weeshamona doo'llu beyyonne ki'nnuwwaanniinsi hurbaaxxeka, woyi'n diqaasika, wee'l zayxeka tommii matoo ee'isam la'llekaa gereebbikaa wonaa ki'nnuwwi Moollanni Waa'i illagenne ittehe. Ihukkaarem ki'nnuwwi Moollanni Waa'i ki'nnuwwa maasse'u ammane ixxi summi weeshamona ixxi doo'llu beyyi ki'nnuwwi hee'llakkam beyyiinsi lobakata qee'l ihaa annanni issitakka'a dissitakko'i tommiinsi mato massitakkeena hawwisoohan ihulas ee tommiinsi mato biteessakka'a lasage diinate amaddakka'a Waa'i ixxena otossitakkona doo'llu beyyo mallehe. Eekke'em ee diinatinne laro te'im gereebba te'im woyi'n diqaasa te'im kee'mmaalli agga te'im ki'nnuwwi doo'llitakkam luwwa maham bitaa'llakka'a Moollanni Waa'i illagenne ki'nnuwwi abaroosinne hundinnem ittakku'uuyyi liirammehe. «Ki'nnuwwi beero'uwwanne hee'llam Leewi'i oosina sharad te'im gulummii mahim bee'an ihu bikkina ixxuwwa uttakkotte. Saxxi hiinchonne saxxi hiinchonne lasaanchi agananne ki'nnuwwi abuulli uulli hurbaatiinsi hundiinsim tommiinsi mato fissitakku'uuyyi ki'nnuwwi beero'uwwanne wixxaa'llehe. Eeham ki'nnuwwi beero'uwwanne hee'llam gulumma ki'nnuwwinne maqire baxxantobee'i Leewi'i oos, waaraan, amaa annii bee'i adaraar oosii busar meentii waatta'a ittona. Ki'nnuwwim ee hundam issitakkolas ki'nnuwwi Moollanni Waa'i baxxakkam luwwi hundannem ki'nnuwwa maasse'ookko. «Diinate liqaayyissakko'i manni hundikam lama'l hiinchi lama'l hiinchi lasaanchonne badano miqisimma ullehe. Eekka urimmi seerim Isra'ee'l moollina diinate liqaayyisukkok ayyim ee liqaayye urona. Waa'i ‹Badano urimmi hiincho› yaa alallaataakkoo hiinchi ihu bikkina ixxena moolli ihu Isra'ee'l manchiinsi badano miqisoone. Mulli uulli mannina liqaayyissakko'i diinate xa'mmitakka'a miqissakkeena xantakkamo. Ihukkaarem ki'nnuwwi moolli ihu Isra'eelina liqaayyissakko'oka dabarona xa'mmitakkotte. Waa'i ki'nnuwwina uwwu neeyyaxxi saga'llisanne maasse'ookko. Ki'nnuwwi lobakat minaadabina liqaayyissakkamo; ihukkaarem ki'nnuwwi ixxuwwiinsi matiinsim liqaayye aa'llakkamoyyo. Lobakat minaadabiinsi hanaanette ikkakkamo; ihukkaarem ki'nnuwwiinsi ayyim hanaan ihooyyo. «Moollanni Waa'i ki'nnuwwina uwwoo uullanne hee'llakkam beero'uwwi hundannem Isra'ee'l oosiinsi mat hawwaa moo'llakkolas ixxi ki'nnuwwina abbaayyi ihu bikkina ixxena moggakkotte; diinatem hoottakkotte. Ixxena hasisoo luwwi hundam biijoominne liqaayyissehe. ‹Badano urakkam lama'l hiinchi afaakko› yitakka'a ixxena liqaayye hoottakkotte. Eehido'i jor sawwitim ki'nnuwwi wodanonne hee'oone. Ki'nnuwwi ixxena liqaayye hoottakka'a lasage oo manchi Waa'i kollonne laaruta'n oo woshshi ki'nnuwwanne hawwojjisa xigamookko. Ee bikkina ki'nnuwwi ixxena biijoominne uwwehe. Eehid issitakkolas Moollanni Waa'i ki'nnuwwa baxxakkam luwwi hundannem maasse'ookko. Hinki ammanem uullanne hawwaanchii buxichchii bee'oobee'i bikkina ki'nnuwwi uullanne hee'oo buxinaa hawwaaninaa biijoominne uwwitakkona ijaajoommo. «Isra'ee'l oosiinsi mat manchi goonam ihukko meenti ixxi gaga agishshi issaa kiina biteesuta'n loh hiincho kiina awwaadaa lasage lama'l hiinchina fatakihe. Ixxo fatakitoo ammane kora'i angam geegeessitte. Waa'i kiina uwwu maassiinsi lariinsi, hurbaatiinsii woyi'n mishiinsii biijoominne uwwe. Ki'nnuwwim Gibxi uullanne agid ikkakka'a hee'llakko'isaa ki'nnuwwi Moollanni Waa'i agiddaniinsi fissukkisaa sawwi'llehe. Anim kaballa ki'nnuwwa ijaajoommok ee bikkinatte. «Ihukkaarem ki agishshi keesee ki abaroosaa iittaahii kiinninnem shiinnaatamaahii mareena hasubeelas ixxo ki'nnuwwi mi'n goocanne bakkiissakka'a ixxi macce mutinne luffehe. Ee lasage ixxi umu'l doolli hundannem ki'nnuwwina agishshi ihookko. Meenti agidom eehid issehe. Ixxo wolabbano firona fatakitoo ammane lam suume kiina loh hiincho hundam awwaadu bikkina kichche'llitte. Eehid issitlas Waa'i baxxoo bax hundannem keese maasse'ookko. «Ki'nnuwwi lariinsi te'im gereebbi allaachchiinsi won ihu ambula te'im labeena Moollanni Waa'ina annanni ihaakkoohan issehe. Won ihu mirgo'uwwa hundam mahinam awwaaxxitakkotte; ee'isam gereebbi allaachchi woniinsi odda muttakkotte. Ee keeno Waa'i doo'lloo beyyonne hiincho hiinchonne ki'nnuwwi Moollanni Waa'i illagenne ki'nnuwwi abaroosinne maqirem ittehe. Ihukkaarem oo diinat miiqakkam luwwi yoohan ihaa oohim shiih te'im qooq ihaa te'im lophphaakkoo haashaarammi luwwi ihulas ixxuwwa ki'nnuwwi Moollanni Waa'ina kitim issitakka'a hincaa'llakkotte. Eehido'i diinate ki'nnuwwi minenne ittakkeena xantakkamo. See'llisinne muccuttakko'oo te'im muccuttakkobee'an ihuta'nnim gaallichchoo gibbichchoo ittakkamisa ee keenom ittehe. Ihukkaarem xiiga hurbaaxxisa issitakka'a ittakkotte; wo'isa uullanne dunnehe. «Ki'nnuwwa Moollanni Waa'a Abiiba yakkam agananne Gibxiinsi ki'nnuwwa mat hiimonne wolabbanonne fissu bikkina Higimmi Uguda gudisimminne Waa'a lonsehe. Ki'nnuwwi Moollanni Waa'i ixxi summina doo'lloo beyyonne ixxo lonsitakkeena lariinsi te'im gereebbiinsi mato doo'llitakka'a ee ugudanne kitimmehe. Ee hii'm hurbaata ittakkam ammane hufaa'akka'a sarakko'oo qorosho'inne ittakkotte. Ee'isinne Gibxiinsi qaqqissakka'a fittakko'i ammane issitakko'isa sawwimmina lamar balli afeebe'e hufubee'i qorosho'o ittehe. Oo qorosho'im ‹Hawwi qorosho'o› yamamookko. Oohim ki'nnuwwi hee'llakkam doolli hundannem lobakat hawwo aa'llakko'i Gibxi uulliinsi fittakko'i balla sawwitakkamane. Lamar balli afeebe'e ki'nnuwwi uullanne ayyi minennem ursho'i hee'oone. Luxxi balli hiimo kitimina duramu diinaxxi maara hundam ee hiimom ittakka'a guullimmi hasisookko. «Ee ugudanne duttakkam diinate Waa'i uwwoo uullanne hinka'i beero'onnem durimmi hasisooyyo. Ihukkaarem Moollanni Waa'i ixxi summi weeshamona doo'llu beyyonne eelliinchi aagukkuuyyi Gibxiinsi fittakko'i ammanenne dullehe. Maarooma sattakka'a Moollanni Waa'i doo'lloo beyyonne ittehe; la'm balla daram odim ki'nnuwwi gattakkam dukkaana daba'llehe. Awwonaa hee'oo lohem ballam odim xale'i qorosho'o ittehe. Lama'l balla ki'nnuwwi Moollanni Waa'ina otossitakkeena wixxi'llehe. Ee balla maham baxxakkotte. «Hurbaata murimma asheettakkam balliinsi ki'isaa lamar saanta xiggehe. Ee lasage ki'nnuwwi Moollanni Waa'i uwwu maassisanne gaqqi doo'llinne kitimo hincaa'llakka'a hurbaaxxi aga'n uguda gudisimminne ki'nnuwwi Moollanni Waa'a lonsehe. Ki'nnuwwi oosinne, awwaadaaninne, Leewi'i oosinne, waaraaninne, adaraar oosinnee busar meentinnee maqirem Waa'i illagenne ixxi summi bikkina doo'llu beyyonne wixxitakka'a liirammehe. Ka ogolluwwa qoxxitakka'a egellehe. Ki'nnuwwim Gibxanne agidduwwi hee'llakko'isa sawwi'llehe. «Hurbaata wixxaa'llakkahii woyi'n misha ciinsitakkahii lasage lamar balli afeebe'e Daas Uguda lonsehe. Ee ugudam ki'nnuwwi oosinne, awwaadaaninne, Leewi'i oosinne, waaraaninne, adaraar oosinnee busar meentinnee maqirem lonsehe. Ki'nnuwwi Moollanni Waa'i doo'lloo beyyonne lamar ballina ee uguda gudissakka'a ixxo lonsehe. Moollanni Waa'i ki'nnuwwika atootaa issitakkam luwwi hundamii maasse'oo bikkina ee uguda liiranchinne lonsehe. «Hiinchonne sas kore goon hundim Higimmi Uguda, Hurbaata murakkam aga'n Ugudaa Daas Ugudaa lonsiteena ki'nnuwwi Moollanni Waa'i doo'lloo beyyonne wixxitona. Ee ugudduwwa lonsiteena fittam ammane kora'i angam fittoone. Annannichchim Waa'i uwwu uwwanchisinne eebimmi hasisookko. «Ki'nnuwwi Moollanni Waa'i sulli sullinne uwwoo uullanne hee'oo ki'nnuwwi beero'uwwanne daannuwwaa gassaanoo doo'llehe. Oo keenim minaadabina hanqo'isinne oogattona. Oogato boqqissakkotte; ille moo'llakka'a golo'llakkotte; qawwiissakkotte; maqanxi qoor kee'nneka ille qooqisoo bikkinaa oogato boqqisoohan ihu bikkinaa ixxo aa'llakkotte. Waa'i ki'nnuwwina uwwoo uulla lago aa'llakka'a lasage lobakat doolle hee'llakkeena hundi ammanem xabbeenaa hanqo'anee ikkehe. «Ki'nnuwwi Moollanni Waa'ina baxxakkam kiti'm beyyi gadanonne otossitakkam utuba kaassakkotte. Odim ki'nnuwwi Moollanni Waa'i saboo ki'n utubam otossitakkeena uullissakkotte. «Lariinsi te'im gereebbiinsi haashaaramma ki'nnuwwi Moollanni Waa'ina kitim issitakka'a hore'em hincaa'llakkotte. Eehido'i kitim Waa'i illagenne sabamaakkoohane. «Moollanni Waa'i ki'nnuwwina uwwoo beero'uwwiinsi matonne hee'oo mat manchi te'im meentichcho ki'nnuwwi Moollanni Waa'i illagenne jor luwwa issaa hidi'l sagara gindeena xanookko. Ee'isam an otossitakkambee'isa hoorummi eelliinchonne, aganchonnee boollaankannee otosseena xanookko. Eehido'i jor woshsha macceessakkam ammane erisa saarayyehe. Kido'nne'i jor woshshi Isra'ee'l oos lambe'enne ihukkis hanqi ihaa la'amulas ee mancho te'im ee meentichcho beero'iinsi biiranne fissitakka'a kininne aphphissakka'a shi'llehe. Oo manchi lehimmi hasisookkok lam te'im sas manchi ixxonne naqqasukkaarette; ihukkaarem naqaash mexxo'i mat ihulas oo manchi lehoone. Naqaashshuwwim gaassita'a kina huushshona; ee lasage mulli manni kininne aphphisona. Ee'isinne eehido'i jor luwwa hundam ki'nnuwwi lambe'iinsi bi'issakkamo. «Manna shimminne, damiginne, gananchinnee, eehido'i mulli woshshuwwinnee ki'nnuwwi beero'uwwanne ki'oo fitonne oogatimmina hawwisoohan ihulas ki'nnuwwi Moollanni Waa'i doo'lloo beyyo qaqqissakka'a mattakka'a Leewi'i shumo'iinsi qeessi ikko'i keeninaa ee ammane daanni ihu manchinaa ee sawwite hincaa'llehe. Eeham ixxuwwi moo'lla'a guullitona. Waa'i doo'lloo beyyonne ikka'a qooddam woshsha baxonne hosissehe. Ixxuwwi yitamoka hundam erisa egellehe. Ixxuwwi uwwitam seerinnee awwonsatinnee hundem luwwam issehe bagaan hore'em qee'llitakkotte. Daanna te'im ki'nnuwwi Moollanni Waa'ina awwaadoo qeessichcho iggoo manchi hee'ulas lehona. Ee'isinne eehido'i jor luwwa hundam Isra'ee'l lambe'iinsi bi'issakkamo. Ee lasage manni hundim eekka macceesaa baddookko. Eehido'i jor luwwa isseena iggoohim hee'ooyyo. «Ki'nnuwwi Moollanni Waa'i uwwoo uulla aaggakka'a uullooma lago aa'llakka'ahii ki'nnuwwina makkaahii lasage ni kululleetanne hee'oo minaadaphphisam ‹Neesem adila doo'llinona› yitakkolas Moollanni Waa'i ki'nnuwwina doo'llaa uwwoo adila doo'llitakkeena xantakkamo. Oo adilim ki'nnuwwi moolliinsette ihona. Ki'nnuwwi moolliinsette ihubee'i allaggichchi mancho doo'llimmi hasisooyyo. Oo adilim ixxi oo'l gogotina lobakat farad hee'oohan ihimmi hasisooyyo. Mashka'oomim Waa'i ixxi minaadab Gibxa daba'llaa maroobee'isa ijaajaakkoohan ihu bikkina farada bitaa'llona manna eekke'e asse'immi hasisooyyo. Odim adilina dut meenti hee'ulas Waa'a awwonimmiinsi huushisoo bikkina dut meenti hee'oone. Biraa worqam lonsaa wixxaa'oone. Annannam ixxi adil ihoo ammane Leewi'i oos egettam Waa'i Seer kitaabamu ka kitaabiinsi mat ixxi anganne hee'ona. Ee kitaaba ixxi gadanonne dissaa ixxi umu'l doollenne hundannem qananaa'ona. Ixxi eehid issulas Waa'a lonsimmaa ka kitaab woronne kitaabamu Seeraa ogoraa amma'nnamaa erisa egerimmaa losookko. Oohim ixxena moolli ihu Isra'eeliinsi ‹Lophphoommo› yaa bolxoobee'isaa Waa'i Seeriinsim qee'lloobee'isaa egerookko. Ee'isamdu issulas lobakat doollina adil ihookko. Ixxi oosim Isra'eelanne lobakat doollina adil ihookko. «Qeessoomaninne awwaaddam Leewi'i shumo'ina hundinam Isra'ee'l sulluwwinne maqire baxxanto'i uulli sharad bee'e. Ee bikkina ixxuwwi Waa'ina kitim issakka'a hicaa'akkam luwwa ittu'uuyyi hee'llona. Ixxuwwina abbaayyuwwi ikko'i Isra'ee'l oos lambe'enne sharad hee'ooyyo. Waa'i ixxuwwina uwwu neeyyaxxisanne Waa'i ixxi gagim ixxuwwina gulumma. «Laro te'im gereebba kitimakkam ammane qeessuwwi hayye, gaangee'l maaraa sattoo massitona. Ki'nnuwwi hurbaatiinsi, woyi'n diqaasiinsi, wee'l zaytiinsii gereebbi oddiinsii ludo ixxuwwina uwwehe. Heer heerina qeessoomaninne awwaaddona Waa'i ki'nnuwwi sulli lambe'iinsi Leewi'i ooso doo'llaakko. «Leewi'i shumo'iinsi ayyim Isra'ee'l beero'uwwiinsi hinkannonnem hee'oo beyyiinsi Waa'i doo'lloo beyyo mareena hasulas ee maru beyyonne hee'llam Leewi'i oos awwaaddamisam ixxim ixxi Moollanni Waa'i illagenne awwaadona. Ixxi mi'n abaroos amaxxa biteesoo ammane diinate aa'oohan ihuta'nnim mulli qeessuwwi siiddam qax sharada ixxim a'llona. «Ki'nnuwwi Moollanni Waa'i uwwoo uulla aaggakkam ammane ee uullanne hee'llam minaadab issitam shigigaa'oo losano hundam awwontakkotte. Ki'nnuwwiinsi ayyim ixxeka beeto te'im landichcho giiranne shokkoo kitim issaa hincaa'ookkok hee'oone. Te'im kiiraanchoo gennaanchoo ihoone. Te'im ayyaannuwwa weeshoo te'im ixxuwwinne atooraroo te'im wiidda weeshoo hee'oone. Eehid issoo ayyim ki'nnuwwi Moollanni Waa'i illagenne sabamaakkoohanee shigigaa'oohanee. Ki'nnuwwi illagenne mattakko'i qaxanne ki'nnuwwi Moollanni Waa'i odim mulli minaadaba ki'nnuwwi illagiinsi xoqolaa hollookkok ixxuwwi eehido'i haashaarammi baxo baxxo'i bikkinatte. Ihukkaarem ki'nnuwwi Waa'ina hore'em amma'nnantakko'oohan ihimmi hasisookko» yukko. Ee lasage Muse'e «Ku ki'nnuwwi hollitakka'a ixxuwwi uulla lago aa'llakkam minaadab gennimmaa kiirimmaa iittitamane. Ihukkaarem ki'nnuwwi eekka issitakkona ki'nnuwwi Moollanni Waa'i hasooyyo. Waa'i ki'nnuwwi lambe'iinsi ki'nnuwwina iinni'nnoo'i hiraagaancho doo'llaa ki'isookko. Ki'nnuwwim ixxi kuroo woshsha hundam macceessakka'a ijaajammehe. «Siina'i duunanne wixxitakko'i balla ‹Lenoommo› yitakka'a badditakko'i bikkina Waa'i od wocoobee'isaa baddisoo giirinnem caakkaa moo'amoobee'isaa uunxitakka'a hee'llakko'o. Ee bikkina Waa'i ‹Ixxuwwi yito'ok hanqame. Kiinni'nnoo'i mulli hiraagaancho ixxuwwi abbaayyuwwi lambe'iinsi ki'isoommo. Ixxi minaadabina kuroo woshsha an ixxena kuroommo. Anim ixxo ijaajoommi luwwi hundam minaadabina kurookko. Ixxi i summinne kuroo woshshina ijaajamoobee'i mancho an guzumo'oommo. Ihukkaarem an ijaajumbee'i ayyi woshsham i summinne iggaa wocoo hiraagaanchi te'im mulli waa'uwwi summinne wocoo hiraagaanchi lehona› yukko. «Ki'nnuwwi ‹Mat hiraagaanchi wocoo hiraaqqi sagar Waa'iinsette ihubee'isa mahinne annanni issinaa lanqoommo?› yitakkeena xantakkamo. Mat hiraagaanchi Waa'i summinne hiraago wocaa lasage oo woshshi wo'mmoo'n gatulas oo hiraag oo manchi ee'isam ixxi gagiinsi wocaakkoohane bagaan Waa'iinsi aa'aa wocaakkoohan ihubee'isa laqqakka'a ee manchi woshsha badditakkotte. «Moollanni Waa'i ki'nnuwwina uwwoo uullanne hee'llam minaadaba guulloohaare ki'nnuwwi ee minaadaphpheka beero'uwwaa minneewwaa lago aa'llakka'a ee uullanne hee'imma ashsheettakkam ammane Illageen wocanchi hee'ubee'i mat mancho shukkok la'aatetti ihoo'n dangonnette ihulas gibaa ee beero'uwwiinsi matonne aagaa ixxi gaga gatixxona. Kobi'llishshina lam manchi haqqa muttu'uuyyi haqqiinsi heed firaa dangonnem mulli mancho shuta'n, oo shu manchi ee sasem beero'uwwiinsim matonne gibaa ixxi gaga gatixxona. Gibakka'a magannaato aagakkam beero'imdu qee'l ihulas xiiga miqiseena xanoo lehu manchina hincixxi qarmanchi hollaa amadaa ee mancho nadajjinne sheena xanookko. Ihukkaarem ixxenne wocanchi bee'i ee mancho shukkok la'oo'nnim dangonnette hee'ukko. An sas beero'uwwa doo'llitakka'a annanni issitakkona ki'nnuwwa ijaajoommok ee bikkinatte. «Ki'nnuwwi Moollanni Waa'i gaassi ki'nnuwwi anno'ina hide'aa aagu neeyyaxxi saga'llisanne ki'nnuwwika uulla haaraassookko. An kaballa ijaajoommi ijaajo hundam egettakka'a ki'nnuwwi Moollanni Waa'a iittitakkolasii ixxi googonnem mattakkolasii ee uulla ki'nnuwwina uwwoo bikkina gibbakka'a magannaato aaggakkam mulli beero'uwwika saso eddakka'a baxxehe. Eeham issitakkamok ki'nnuwwi Moollanni Waa'i hee'llakkona sharad issaa uwwoo uullanne muccur xiig dunamoobee'isinattee ki'nnuwwim ee xiigina xa'mmantakkambee'isinattee. «Ihukkaarem mat manchi diina'oominne mulli mancho dugaa egeraa monginne shaa lasage ixxi gaga gatixxeena ka beero'uwwiinsi mat kolli gibulas oo manchi hee'oo beero'i awwonsaan manna asse'lla'a wossiissa'a lasage lehu manchika xiiga miqiseena xanoo hincixxi qarmanchina higissa'a uwwitona. Ixxena maham qishixxitakkotte; ki'nnuwwina hundi luwwannem er luwwi ihona manna shu mancho Isra'ee'l oos lambe'iinsi bi'issehe. «Ki Moollanni Waa'i gulummi issaa lago aa'llona uwwoo uullanne kihaannonnee ki ollakkichchi gabalannee gaassi anno'i kaasso'i gaba'l mare'e gindititte. «Mat manchika bi'ishsha la'immina xale'i mat naqaash ihooyyo. Mat manchika bi'ishsha la'immina lam te'im sas naqaash hasisookko. Mat jor manchi mulli mancho qophphaninne kasasuta'n lamem kollim Waa'ina otossakkam beyyonne ee ammane qeessuwwaa daannuwwaa ikka'a hee'llam manni illagenne hincitona. Daannuwwim ee woshsha erisa saarayyitona; oo manchim ixxena abbaayyi ihu Isra'ee'l mancho qophphaninne kasasaa siidamulas kasasamu manchi guzumo'amoo guzumo'o ixxi guzumo'amona. Ki'nnuwwim eehido'i jor luwwa hundam ee'isinne bi'issehe. Manni hundim eekka macceesoo bikkina eehido'i jor bax ki'nnuwwi lambe'enne od hee'ooyyo. Eehido'i jor luwwa baxu manchina qishixxitakkotte. Manna shukkoka ixxom shi'llehe; ille qooqisukkaannika illem qooqissehe; inqe iiqukkaannika inqem iiqqehe; anga murukkaannika angam mullehe; lokko iiqukkaannika lokkom iiqqehe. «Gibxi uulliinsi fissu Waa'i ki'nnuwwinne maqiretti ihu bikkina diina'inne orantakkeena gaaddakkam ammane farado, faraxxi gaarre'ee ki'nnuwwiinsi lophphoo o'l gogotaa moo'llakka'a badditakkotte. Orancha asheerimmiinsi gaassaa qeessichchi ki'nnuwwi gogoxxi kolli hincaa ‹Isra'eela, macceessehe. Oono'o, kaballa ki'nnuwwi orina mattakkamuulla. Ki'nnuwwi diina'a moo'llakkam ammane ki'nnuwwik wodan baa'oone; badditakkotte; muggitakkotteme. Ki'nnuwwi Moollanni Waa'i ki'nnuwwinne maqire maroo bikkina ki'nnuwwina kaachcha uwwookko› yihona. «Ee lasage gaaxxi awwonsaan gaadaanina ‹Ki'nnuwwiinsi haareechchi mine baxaa maassiisaa aagubee'i manchi yoohonnihe? Yoolas oo manchi ixxi mine daba'llona. Oo manchimdu oranne lehuta'n mulli manchi ixxi mine maassiisaa aagookko. Te'im haareechchi woyi'n kaashshika luxxi misha itaa liiramubee'i manchi yoohonnihe? Eehido'i manchi yoolas oo manchi ixxi mine daba'llona. Mashka'oomim oo manchimdu oranne lehuta'n ixxi woyi'n diqaas mulli mannina liiranchi ihookko. Odim landa eebeena xeehu manchi hee'oonnihe? Eehan ihulas oo manchi mine daba'llona. Eebeelas ixxi oranne lehoo ammane ixxi xeehu landichcho mulli manchina arette ikkamo› yitona. «Oo gassaan odim ‹Baachchaanchi manchi yoohonnihe? Eehido'i manchi ixxi mine daba'llona. Mashka'oomim ixxi mulli keenim baa'llamisa issookko› yita'a xa'mmitona. O'l awwonsaan gogotina eekka wocca'a guullita'a lasonne baxxanchi baxxanchinne ijaajjam ijaajaano doo'llitona. «Mat beero'o orina gaaddakkam ammane gaassitakka'a ee beero'i manni ki'nnuwwina gibittona iittinne xa'mmehe. Ixxuwwimdu beero'i ooxxi gooccuwwa fooqaa'lla'a ki'nnuwwina gibitteena iittantolas kee'mmaalli baxo baxxu'uuyyi ki'nnuwwina awwaadaan ikkona. Ihukkaarem ee beero'i manni gibirimma sabba'a ki'nnuwwinne oramimma doo'llitolas ee beero'o kibbehe. Ki'nnuwwi Moollanni Waa'i ee beero'o ki'nnuwwina higisaa uwwoo ammane ee beero'onne hee'oo goona hundam shi'llehe. Ihukkaarem meentoo oosoo, fooraam diinatee, ee beero'onne hee'oo amaxxa hundamii qeefaddakka'a massehe. Ki'nnuwwina diina'an ihu luwwa hundam ki'nnuwwi awwaaxxitakkeena xantakkamo. Ki'nnuwwi Moollanni Waa'i eekka ki'nnuwwina higisaa uwwaakko. Ki'nnuwwiinsi qee'llonnee abbisonnee hee'oo beero'uwwanne hundannem ee'isa issehe. «Moollanni Waa'i ki'nnuwwina gulummi issaa uwwoo uullanne hee'oo beero'uwwa orinne kaa'llakka'a amaddakkam ammane ee beero'uwwi manna hundam shi'llehe. Ee bikkina Hiite'i manna, Amoore'i manna, Kana'aa'n manna, Farze'i manna, Hiiwe'i mannaa Iyyaabuus mannaa Waa'i ijaajukkisinne guullitakka'a bi'issehe. Mashka'oomim ixxuwwi qophpha'n waa'uwwina otossimmi bikkina shigigaa'oo luwwi hundam ki'nnuwwina losisamaa Waa'i saboo baaxiilo baxxakkamisa issitambee'isinatte. «Mat beero'o qeefaddakkeena guddakkam ammane kibbitakko'aanniinsi lobakat ammane massulas haqqi misha ittakkaman ihu bikkinaa haqqa mannisa kibbitakkeena xanakkambee'an ihu bikkinaa haqqa muttakkotte. Kibbitakkeena haqqi mannannihe? Ihukkaarem misha mishoobee'i mulli haqqa muttakku'uuyyi ee beero'o qeefaddakkeebe'i afeebe'e girba baxxakka'a kibbitakkam duuha'ina awwaaxxitakkeena xantakkamo. «Waa'i ki'nnuwwi gulummi issaa uwwoo uullanne ayyi shuda'e la'amubee'i leesh siidamulas ki'nnuwwik awwonsaanii daannuwwii matta'a oo leesh ubu beyyina abbisoo beero'i hinkanda'e keenta'a laqqona. Ee lasage oo leesh ubaa hee'u beyyina lobakata hincoo beero'i awwonsaan baxina afubee'ekaa axonnem gaanjaqqa issakkobee'ekaa mat addichcho doo'llitona. Ee addichchom abuullakkoo'n, haqqa kaasakkoo'nnii wo'im xoo'oo'nni hee'oo cebba amadda'a mattona. Eekke'em ee addichchika gaanje booqaaqqa'a iiqqona. Ixxena awwaaddona, ixxi summinne maasse'llonaa fitikaa annanni annanni hawwikaa woshsha moo'llonaa ki'nnuwwi Moollanni Waa'i doo'llu bikkina qeessuwwi ikko'i Leewi'i oos ee leesh kolli hincitona. Ee lasage leesh ubaa siidamu beyyina hincoo beero'i awwonsaan ee addichchi hanenne ixxuwwi anga aanshaqqitona. Ixxuwwim ‹Neese ka mancho shinummoyyo; ayyi shuda'em lanqummoyyo. Waa'a! At Gibxiinsi fissitaa gatissitti Isra'ee'l minaadabina haafihe; niinam at haafihe. Ka dunamu muccur xiigina hawwondummaannisa issitaa xa'mmititte› yitona. Waa'i illagenne hanqi ihaakkoo luwwa issitakkam bikkina ee muccur manchi leh bikkina xa'mmantakkamoyyo. «Ki'nnuwwi diina'inne orantakkeena fittakka'a ki'nnuwwi Moollanni Waa'i ixxuwwa ki'nnuwwina higisaa uwwoo ammanee qeefaddakkam ammanee ki'nnuwwiinsi ayyim ee qeefadamu meentiinsi danaamo moo'aa heele'ulas ixxi gagina eebaqqeena xanookko. Oohim ise mine massaa lasonne horoore hogossita'ahii xuranqa mu'llita'ahii lasage eddechcha mulleka edde'llona. Isem ee manchinne maqire ixxi minenne afuutta'a oranne lehu is qarmannina mat agan afeebe'e wi'llitona. Ee lasage arette issona. Ihukkaarem ee lasage hasubeelas holleena xanookko. Ise malaayyinne arette issu bikkina agishshotte issaa biteeseena xanooyyo. «Mat manchi lam meento eebaa lasonne mate iitaa mate sabuta'nnii lamem goo'n ooso ixxena qattota'nnii ayyi la'ukko luxxi beet qaramukkok iittoobee'i meentichchoonsette ihulas oo manchi ixxeka amaxxaa horaa ixxi oosina baxxansoo ammane ixxi won beetina uwwimmi hasisoo sharada golo'aa ixxi iittoohaanti beetina uwwimminne won beetika hanqa bi'isimmi hasisooyyo. Ixxi iittoobee'i meentichchoonsi qaramaakkoohan ihuta'nnim won beetik sharad mulli keenina annannichchinam afoo sharadiinsi lam suume lophphimmi hasisookko. Ee bikkina anni won beetina wonoomma'n sharada la'aa uwwimmi hasisookko. «Mat manchina guzumo'akko'aarem daba'lloobee'i xiiqqaamoo boqqaa ihaa anninaa amanaa ijaajamoobe'i beet hee'ulas ee beeto annii amaa ixxuwwi beero'i wixxixxi beyyonne oogattam awwonsaa'n beyyo massitona. Ee lommanninam ‹Oono'o, ku ni beet boqqaa xiiqqaamoo; niina ijaajancha sabaa dimboohanee diinate bi'isoohanee ihaakko› yitona. Ee beero'i manni hundim kininne aphphissa'a shitona. Ki'nnuwwim ee'isinne eehido'i jor luwwa bi'issakkamo. Isra'eel hundim eekka macceesaa baddookko. «Mat manchi baxu kee'mmaalli damiqqi mashka'inne haqqanne saqaltakka'a shitakko'an ihulas haqqanne saqalamookkok Waa'i illagenne duumamaakkoohan ihu bikkina oo leesh haqqanne saqalamukkisam garoone. Ki'nnuwwi Moollanni Waa'i ki'nnuwwina gulummi issaa uwwoo uulli haashaaramoobee'isa ee leesha ee ballam waammehe. «Ki'nnuwwina abbaayyi ihu Isra'ee'llek mirgo'i te'im gereechchi bi'u beyyonne siiddakkolas caawwitakka'a higgakkotte. Annichchinam massitakka'a uwwehe. Ihukkaarem ee diinaxxeka annichcho laqqakkobeelas te'im hee'oo beyyi qee'l ihulas ki'nnuwwi mine massehe; annichchi hasukkuuyyi waaroo ammanem dabattakka'a uwwehe. Ee'isam hallichcho te'im eddechcha te'im mulli ayyi luwwam ki'nnuwwina abbaayyi ihu Isra'eeliinsi bi'aa siiddakkolas dabattakka'a uwwehe bagaan cawwitakkotte. «Ki'nnuwwina abbaayyi ihu Isra'ee'llek hallichchi te'im baar googonne ubaa moo'llakkolas ki'issakka'a hara'mmehe bagaan uttakka'a higgakkotte. «Ki'nnuwwi Moollanni Waa'i shigigoohan ihu bikkina goon meentika, meentim goo'n eddechcha edde'immi hasisooyyo. «Mat cii'ichchi mat haqqichchonne te'im uullanne ciicoolla te'im quunqa qaaphphaa afuuru beyyo affakka'a siiddakkolas ama ciicoollinne maqirem massitakkotte. Ciicoollam massitakkeena xantakkamo; ihukkaarem am marona fataki'llehe. Ee'isamdu issitakkolas goddaan ikkakka'a lobakat doolle hee'llakkamo. «Haareechchi mine baxxakkam ammane mi'n fenganne dimdima kallehe. Ee beelas mat manchi mi'n iimaniinsi ubaa lehulas ee xiigina xa'mmantakkamo. «Woyi'n kaashshi woronne mulli luwwa wixxakkotte. Eehamdu issitakkolas woyi'n misham ihukko mulli hurbaata awwaaxxitakkeena xantakkamoyyo. «Mirgo'oo hallichchoo mat gaanjaqqanne qaashshakka'a harqoottakkotte. «Suufikaa talbi hoba'llekaa fatira hamaarakka'a dadakko'i eddechcha edde'llakkotte. «Ki'nnuwwi eddechchi soorem kasannem shoga axissehe. «Mat beet mat landichcho eebaa lasage ise sabulasii ‹Isenne baajoomma'n mare'i bee'etane› yaa qophphaninne summa bisulasii ee lasage ee landichchok annii amaa landichcho baajaamotte ikko'isa moo'isoo mare'uwwa eebba'a beero'i manni wixxixxi beyyonne oogattam awwonsaanina moo'issona. Is annim ‹An i landichcho ka beetina ladiisaa hee'ummo. Oono'o, kaba ixxi ise sabukkisa la'isaakko. ‹Ki landichchonne baajoommano moo'isoo mare'e siidummoyyo› yaa i landichchoka summa bi'isaakko. I landichchonne baajoomman hee'ukkisa moo'isoo mare'i kuno'o!› yaa ee awwonsaa'n illagenne hirfana biddiqaa'ona. Ee beero'i awwonsaanim ee beeto ganitona. Odim mat xibbi kin bira miqissa'a ee landichchi annina uwwitona. Oo beet Isra'ee'l mat baajaam landichchoka summa bi'isaakko. Eehanniinsim mulleka ise ee beetina mi'n amatte ikka'a hee'llona; ixxi hee'oo umu'l doollenne hundannem ise holleena xanooyyo. «Ihukkaarem ee beetik woshshi hanqi ihaa siidamulasii landichcho baajaamotte ikko'isa moo'isoo mare'i hee'ubeelasii anni minenne hee'llu'uuyyim saa'lla'a Isra'ee'l minaadaphphi lambe'enne tuussiisoo baxo baxxo'i bikkina is anni mi'n goocanne massita'a ise hee'llam beero'i manni kininne aphphissa'a shitona. Ki'nnuwwim ee'isinne eehido'i jor luwwa ki'nnuwwi lambe'iinsi bi'issehe. «Mat manchi mulli manchi meentichchonne iinse'aa siidamulas lamom shakkona. Ee'isinne eehido'i jor luwwa Isra'ee'l lambe'iinsi bi'issehe. «Mat manchi mat beero'onne mulli manchina xee'anto'oo landichchonne iinse'aa siidamulas ixxuwwa lamom beero'iinsi haxonne fissitakka'a kininne aphphissakka'a shi'llehe. Ise lehimmi hasisoo mashka'i manni macceeseena xanoo beero'i lambe'enne hee'llu'uuyyi manni hara'mmona laattobee'i bikkinatte. Manchim lehimmi hasisoo mashka'i mulli manchina xeehanto'oo baajaam landichchonne iinse'u bikkinatte. Ki'nnuwwim ee'isinne eehido'i jor luwwa ki'nnuwwi lambe'iinsi bi'issehe. «Mat manchi mulli manchina xeehanto'oo mat baajaam landichcho beero'iinsi haxonne mullam yo'i beyyonne siidaa malaayyinne iseka baajoommano bi'isulas ixxi xale'i lehona. Oo landichcho lehina afisoo hawwojja maham issitobee'i bikkina isenne maham issitakkotte. Eehido'i woshshi mat manchi mulli mancho dugaa egeraa shoohaannisa. Ookki ihoo mashka'im oo manchi ee xeehanto'oo landichcho beero'iinsi haxonne yo'i beyyonne siidu bikkinaa laattota'nnim hara'mmato siiddeena xantambee'isa la'u bikkinattee. «Mat manchi mulli manchina xeehantobee'i landichcho massaa sha'ixxi edancha edamukkuuyyi amadamulas ee landichchi annina ontayyi kin bira miqona. Isem ee manchina mi'n amatte ikka'a ixxenne hee'llona; malaayyisaa isenne sha'ixxi edancha edamu bikkina ixxi heechchi doollenne hundannem ise holleena xanooyyo. «Ayyi manchim ixxi annarenne edamaa ixxi anna sholliisoone. «Laaro qoccammi te'im abaajjammi manchi Waa'i minaadaphphi dummichchanne exxoone. «Quumaantii tommi qaranchi afeebe'e yoo ixxi shumo'ii hundim Waa'i minaadaphphi dummichchanne exxaa xigamoone. «Amoo'n mannam ihukko Moo'aaphphek te'im ixxuwwi shumo'iinsette ihoo ayyim tommi qaranchi afeebe'e Waa'i minaadaphphi dummichchinne exxoone. Ki'nnuwwi Gibxiinsi fittakka'a googonne hee'llakko'i ammane ki'nnuwwina wo'oo waasaa hootto'ok xadamooyyo. Ee'isam Masphexoome'enne Phaatoora yakkam beero'onne hee'am hee'u Bii'oor beet Baala'aam ki'nnuwwa duumona bitaa'lla'a hee'llo'o. Ihukkaarem ki'nnuwwi Moollanni Waa'i ixxeka macceesukkoyyo. Waa'i ki'nnuwwa iittoo bikkina ixxeka duuncha hore'em maassonne dabarukko. Ki'nnuwwi hee'llakkam doolli hundannem oo minaadab makkixxita'a xumminne hee'llona cawwitakkotte. «Eedoo'm uulli manni ki'nnuwwina qar ikko'i bikkina shigigitakkotte; ixxuwwi uullanne waaraan ikkakka'a hee'llakko'oo bikkina Gibxi mannam shigigitakkotte. Sas qaranchiinsi lasage ixxuwwi shumo'im Waa'i minaadaphphi dummichchanne exxitona. «Orantakkam ammane orina wiiddantakko'i beyyiinsi haashaarammi luwwa hundam bi'issehe. Mat manchi hii'm haqaawwonne daadu ixxi qansik aash ixxi orachchonne hee'ulas wiidda'n beyyiinsi haxonne firaa afuurona. Uulli hiimeena ihoohaare orachcho aanshaqqona; eelliinchi aagaa lasonnem wiidda'n beyyo daba'llona. «Shume'llakkam beyyo wiidda'n beyyiinsi haxonne gudissehe. Shumina afuuttakkam ammane shume'llakko'oka dabattakka'a waammitakkeena bare hintakkam shoodira o'l mu'utinnem amaddehe. Ki'nnuwwi Moollanni Waa'i ki'nnuwwa egereenaa diina'am ki'nnuwwi anganne higisaa uwweenaa wiidda'n beyyonne hee'oo bikkina ki'nnuwwi lambe'enne shigigaa'oo luwwa moo'aa afare dabaroobee'isa ki'nnuwwik wiidda'n beyyi keesamakkoohan ihona. «Mat agishshi ixxi moollanniinsi gibaa keesenne yabo aaguta'n ixxo dabattaa ixxi moollannina higissaa uwwititte. Ki'nnuwwi beero'uwwiinsi matonne hasu beyyonne ki'nnuwwinne hee'ona bagaan ixxo u'nnissakkotte. «Isra'ee'llek goon te'im meenti ayyim qophpha'n waa'ina otossitam kee'nnisam saa'aanchi ihoone. Waa'i saa'imma shigigoohan ihu bikkina saa'imminne siidamoo diinat hinka'i uga'inam irifo'i ihaa ki'nnuwwi Moollanni Keesammi Mine aagoone. «Ki'nnuwwina abbaayyuwwi ihu Isra'ee'l oosina diinate liqaayyissakkam ammane te'im hurbaataa ayyi luwwamii uwwitakka'a lasonne qaro'o xa'mmitakkotte. Waaraaniinsi qaro'inne miqissakkeena xantakkamo. Ihukkaarem ki'nnuwwi gulummi issitakka'a a'llitakkam uullanne ki'nnuwwi angi tafoo ayyi luwwannem Moollanni Waa'i ki'nnuwwa maasse'ona Isra'eel ihu ki'nnuwwi abbaayyina qaro'inne liqaayyissakkotte. «Ki'nnuwwi Moollanni Waa'ina uga'a aaggakkam ammane ee aaggakko'i uga'a dasissakkotte. Waa'i ki'nnuwwi aaggakko'i sagara qoxxisaa hasoohane. Eekkamdu wonshitakkobeelas ki'nnuwwina baaxiil ihookko. Waa'ina uga'a aagakkobeelas odim baaxiil ihooyyo. Ihukkaarem ki'nnuwwi Moollanni Waa'ina sawwitakka'a aaggakko'i uga'isinne ki'nnuwwi suuminne woccakko'oka ege'llimminne wonshimmi hasisookko. «Mat manchi woyi'n kaashshi beyyinne higgakku'uuyyi mishiinsi hassakko'i qaxa ittehe. Ihukkaarem mah mu'utannem ee mishiinsi ki'nnuwwi gagina massitakkotte. Mat manchi hurbaaxxi worinne higgakkam ammane anginne muttakka'a hamaam ittakkeena xantakkamo. Ihukkaarem jajjarinne muttakka'a massitakkotte. «Mat manchi mat meentichcho eebaa lasage ise hasoobee'i mashka'a la'aa ise sabulas furma uwwaa hollona. Isem ee lasage mulli goonchonne affo'oolas ixxim luxxi manchisam sabaa furma uwwaa hollulas te'im lehulas ee lasage luxxaagge hollu manchi ise haashaaranto'oo bikkina od dabaraa eebeena xanooyyo. Oohim Waa'i illagenne lobakata shigigaa'oohane. Ki'nnuwwi Moollanni Waa'i uwwoo uullanne hee'llakku'uuyyi eehido'i jor baaxiilo baxxakkotte. «Haareechcho mine issa'u manchi orina maroone; te'im mulli baxo baxona giddissakkotte. Ixxi mat hiinchi afeebe'e mah luwwiinsim annanni ihaa minenne afuuraa ixxi meentichcho liiransona. «Mat manchina liqaayyissakko'i diinatina ee manchika liitimma te'im ifichcho dabbakka'a massitakkotte. Eehid issimmi foore dabakka'a massimminne gudaanchoo. «Ixxena abbaayyi ihu Isra'eelcho urussaa massaa agishshi issaa awwaaxxookkok te'im mulli mannina biteesookkok ayyim lehinne guzumo'amona. Ki'nnuwwim ee'isinne jor luwwa ki'nnuwwi lambe'iinsi bi'issakkamo. «Oddamachchonne firoo baddisoo jabbiinsi lobakata ege'llehe. An ixxuwwa ijaajummisanne qeessuwwi ikko'i Leewi'i oos ki'nnuwwina kuttam awwonsisanne erisa ege'llehe. Gibxi uulliinsi fittakka'a googonne hee'llakko'i ammane ki'nnuwwi Moollanni Waa'i Maaraamenne issukkoka sawwi'llehe. Mat manchina ma'llichcho aggiissakkam ammane dabo'i issaa uwwoo luwwa aa'llakkeena ixxi mine aaggakkotte. Ixxi gagim dabo'ina ihoo luwwa eebeebe'e ki'nnuwwi biiranne egellehe. Odim ixxi buxichchi ihulas eddechcha dabbaa gassititte. Leexa'a garoobee'isa eelliinchi aagoo'nne gaassitaa ixxena dabare; ixxim keese galaxxookko. Oohim kiina Waa'i illagenne muccuroo'm bax ihaa xigamookko. «Isra'ee'l oosiinsettem ihukko waaraanchi ihaa ki'nnuwwi uulli beero'uwwiinsi matonne balli baxo baxukkuuyyi hee'oo buxichchika baxaqqu diinate hoottakkotte. Oo manchi buxichchi ihu bikkina ee diinate lobakat qulunxinne egeroo bikkina ixxi baxika bito eelliinchi aagoo'n gaassitakka'a uwwehe. Eehid issitakkobeelas Waa'i kollonne laaroohaare ki'nnuwwina baaxiil ihookko. «Oos bi'isu bi'ishshina anno'i lehinne guzumo'anchi hasisooyyo. Ee'isam anno'i bi'isu bi'ishshina oos lehinne guzumo'amoone. Ayyi manchim bi'isu bi'ishshina ixxi gagim lehinne guzumo'amona. «Adaraa'llikaa waaraan oosikaa hanqa bi'issakkotte. Busar meentikam eddechcha badanina dabbakkotte. Ki'nnuwwi gagim Gibxanne agid ikkakka'a hee'llakko'isaa ki'nnuwwi Moollanni Waa'i wolabbanonne fissukkisaa sawwi'llehe. Anim ka ijaajo ki'nnuwwina uwwoommi mashka'i eehanninatte. «Ki'nnuwwika hurbaata wixxaa'llakkam ammane xaddakko'i farshimmi hee'ulas ixxo massitakkeena laso daba'llitakkotte. Eekka waaraanina, adaraarinaa busar meentinaa ullehe. Eehamidu issitakkolas baxxakkam bax hundannem Waa'i ki'nnuwwa maasse'ookko. Wee'l misham xale'i mat kore feettakka'a lasage gatu misha feettakkeena la'mmaagge ixxi kolli mattakkotte. Eekka waaraanina, adaraar oosinaa busar meentinaa ullehe. Woyi'n misha wixxaa'llakkam ammanem gatu misha feettakkeena la'mmaagge ixxi kolli mattakkotte; gatu misha waaraanina, adaraar oosinaa busar meentinaa ullehe. Ki'nnuwwi Gibxi uullanne agid ikkakka'a hee'llakko'isa sawwi'llehe. Anim ka ijaajo uwwummok ee bikkinatte. «Lam manchi wocanta'a fitanteena oogaxxi beyyo waattolas daannuwwi ee woshsha saarayyita'a hawwodamu mancho fatakita'a hawwodu manchonne oogattona. Hawwodu manchomdu ganimminne guzumo'akkaman ihulas biqinne uullanne iinse'oohaare afa'l kollo ganakkona daanni ijaajona. Ganimmi hasisoohim daanni illagennette; aphphisanchi hasisoo xig hawwodu hawwojjisannettee ihimmi hasisookko. Sor afeebe'e ganimmi xansiisookko; ihukkaarem soriinsi lophphimmi hasisooyyo. Eehanniinsi lophphulas ki'nnuwwina abbaayyi ki'nnuwwi illagenne sholle'aakkoohan ihookko. «Hurbaata gantakkam ammane ganoo baa'lleka suume kattakkotte. «Abbaayyuwwi ixxuwwi uullanne hee'llu'uuyyi ixxuwwiinsi mat abbaayyi qachcho qaroo'n lehuta'n ee le'u manchi meentichcho ee abaroosiinsetti ihubee'i manchi gassimmi hasisooyyo. Is manchina abbaayyi ise gissimmi hasisookko. Ee lasage ise gaassita'a qattam ciilika summa le'u is manchi shumo'i Isra'ee'l oos lambe'iinsi bi'oobee'isa ixxi summanne fissitona. Ihukkaarem le'u is manchina abbaayyi ise gasseena hasubeelas ise hee'llam beero'i gassaa'n beyyo matta'a ‹I heereechchi iina issimmi hasisoo luwwa isseena hasukkoyyo. Ixxi abbaayyika summa Isra'ee'l oos lambe'enne weeshiseena hasukkoyyo› yita'a kuttona. Ee lasage ee beero'i gassaan ee mancho weeshsha'a atoorassitona. Ixxim ise gasseena iittubeelas le'u manchi meentichchom beero'i awwonsaa'n illagenne is heereechchi kolli hincitona. Ixxi lokki caamma'iinsim mato fissita'a anja ee is heereechchi illagenne tufita'a ixxi abbaayyina shumo'o uullisimma hasoobee'i manchina kido'i sholle'n hasisookko› yitona. Ee manchi abaroosim Isra'ee'l oos lambe'enne ‹Caamma'a tirakko'oo manchi shumo'o› yaa gadukkuuyyi hee'ookko. «Lam manchi wocanta'a ganantu'uuyyi mataanni are is aro'ina agaagga'a mullaannika foo'l beyyo amadda'a hixixaa'llolas isena maham qishixxitakkoo'n anga mullehe. Moollanni Waa'i ki'nnuwwina uwwoo uullanne lobakat doolle hee'llakkeena hanqo'anee amma'nnamaakkoohanee ihaakkoo keennaanchii qunnii xale'i hee'ona. Moollanni Waa'i eehido'i luwwa issukkuuyyi aphphisansoo manchoo shigigookko. «Ki'nnuwwi Gibxi uulliinsi fittakko'i ammane Amaaleeq uulli manni ki'nnuwwanne afisso'i hawwojja xaddakkotte. Ixxuwwi Waa'a badditam keenoyyo; ki'nnuwwi taakkinne hooggakka'a hee'llakko'i ammane lasinne waatta'a ki'nnuwwa qasso'o. Hoogga'a lasonne taakke'llam keeno hundam shito'o. Ee bikkina ki'nnuwwi Moollanni Waa'i uullooma ki'nnuwwina lago aa'isaa ki'nnuwwi kululleetanne hee'llam diina'i hundiinsim usheexxisoo ammane ka uullanne ixxuwwa od ayyim tiireena xanoobee'i qax afeebe'e Amaaleeq minaadaba hundam guullehe! Ki'nnuwwim kaka hore'em xaddakkotte! «Moollanni Waa'i ki'nnuwwina uwwoo uulla aaggakka'a lago aa'llakka'a makkixxitakka'a hee'llakkam ammane ee uulliinsi baxxakka'a siiddakkam hurbaatiinsi wona sanannanne issitakka'a ki'nnuwwi Moollanni Waa'i ixxi summi weeshamona doo'llu beyyo massehe. Ee ammane awwaadonne yoo qeessichchi beyyo mattakka'a ‹Waa'i niina uwweena gaassi niyyanno'ina hide'aa sagara aagu uulla aangummisa kaballa ki Moollanni Waa'i illagenne la'insoommo› yi'llehe. «Qeessichchim ee sananna aa'aa ki'nnuwwi Moollanni Waa'ina kitima hincaa'akkam beyyi illagenne dissona. Ki'nnuwwim Moollanni Waa'i illagenne ‹Niyyanni beyyiinsi beyyo darba'ukkuuyyi hee'oo Sooriy uulli manchi hee'ukko. Ixxim hofqax abaroosam amadaa Gibxa dillaa ee beyyonne waaraanchi ihaa hee'ukko. Ixxim lobakata malaayyaamoo dut minaadabaa ihukko. Ihukkaarem Gibxi uulli manni neese hawwisso'o; sholliissa'a agid inkaa awwaandoommisam issito'o. Neesem niyyanno'i Moollanni Waa'i kolli laallummo. Ixxim ni laachcha macceesaa niikka hawwo, neesenne issakko'i barche'ee wor amadanchaa moo'ukko. Waa'i ixxi lob malaayyinnee daannoominnee, jorisa baa'isimminne, maalalsiisoo aganninnee mare'innee Gibxiinsi fissukko. Neesem marabii adii daadoo ka harish uulla woraa niina uwwukko. Ee bikkina oono'o, niina Waa'i uwwukkaanniinsi wona ixxena eembaammo› yi'llehe. «Ee lasage sananna Waa'i illagenne dissitakka'a ixxena otossi'llehe. Ki'nnuwwinaa ki'nnuwwi abaroosinaa Waa'i issu er luwwi hundinam liirantakka'a ixxo galaxxehe. Leewi'i oosii ki'nnuwwinne maqire hee'llam waaraanii ee galaxximmi seeranne edanta'a hee'llona. «Tommiinsi mato annanni issakka'a uwwakkam saxxi hiinchonne eekka wixxaa'llakka'a lasage ki'nnuwwi beero'onne hee'llam Leewi'i oosina, waaraanina, adaraar oosinaa busar meentinaa goddita'a ittona uwwehe. Ee lasage ki'nnuwwi Moollanni Waa'ina ‹Ni miniinsi keesammi sharada annanni issinaa neese ijaajjittisanne Leewi'i oosina, waaraanina, adaraarinaa busar meentinaa uwwinaammo. Ki ijaajom gindinummoyyo; xandummi luwwim bee'e. Lehonnem ixxeensi intummoyyo; muccur inkumbee'i ammane ixxo nakkinummoyyo; lehu manchina uwwakkam halinam nakkinummoyyo. At neese ijaajjittisanne kiikka ni Moollanni Waa'ika ijaajo egellaammo. Iimanenne hee'oo ki Keesammi Minennette ikkaa ni kolli aad moo'e. Kiina minaadab ihu Isra'eelam maasse'e. Gaassi anno'ina aaggitti hidi'llisanne niina uwwittisanne marabii adii daadoo ka harish uullam maasse'e› yi'llehe. «Oono'o, Moollanni Waa'i ixxeka seeraa ijaajoo egettakkona kaballa ki'nnuwwa ijaajoolla. Ee bikkina wo'm wodaninnee wo'm tiirinnee ege'llimminne ijaajammehe. Waa'i ki'nnuwwina Moollanni ihukkisaa ixxi googonnem taakke'llakkaman ihukkisaa kaballa la'issakko'ookko. Ixxeka ijaajo, seeraa ogoraa egettakkeenaa ijaajantakkeenaa sagara aaggakko'ookko. Ee bikkina oono'o, Waa'i ki'nnuwwina uwwu neeyyaxxisanne kaballa ixxena annanni ikkakko'oo xee'aalli minaadab issaa aa'aakko. Ixxi ijaajo hundam egettakkona ijaajaakko. Eehamdu issitakkolas ixxi qooccu ka uulli minaadab hundiinsim galatinne, summinnee lombinnee ki'nnuwwa lonsoo'isaa uwwu neeyyaxxisannem ixxena annanni ikkakko'oo minaadab issoo'isaa ki'nnuwwina kuraakko» yukko. Ee lasage Muse'e Isra'ee'l Minaadaphphi awwonsaaninne maqirem minaadabina «An kaballa ki'nnuwwina uwwoommi ijaajo hundam egellehe. Yoordaanoos daajje higgakka'a Moollanni Waa'i ki'nnuwwina uwwoo uulla aaggakkam ammane geejji geejji ki'nneka hofqaxam uullissakka'a boorjo'inne nannehe. Ki'nnuwwi gaassi anno'ina Waa'i aagu neeyyaxxisanne adii marabii daadoo uulla aaggakkeena Yoordaanoos daajje higgakkam ammane ka seera ee kinneewwanne kitaabbehe. Yoordaanoosa higgakkam ammane an kaballa ki'nnuwwa ijaajummisanne ka kinneewwa Eebaa'l duunanne uullissakka'a boorjo'inne nannehe. Eekke'ennem xaar nakkubee'i kininne ki'nnuwwi Moollanni Waa'ina kiti'm beyyo baxxehe. Ki'nnuwwi Moollanni Waa'ina baxxakkam ayyi kiti'm beyyim cabbaramubee'i kininnette ihimmi hasisookko. Eehe'em shokkiisakka'a Waa'ina hincaa'akkam kitimo hincaa'llehe. Mateeyyoo'm kitimam hincaa'llakka'a eekke'enne liirantakku'uuyyi ki'nnuwwi Moollanni Waa'i illagenne ittehe. Ee kinneewwannem Waa'i Seera hundam danaamisa moo'amoo'isa issitakka'a kitaabbehe» yukko. Muse'e odim qeessuwwi ikko'i Leewi'i oosinne maqirem Isra'ee'l minaadab hundinam «Isra'ee'l minaadaba, ki'nnuwwi wodaninne macceessehe. Oono'o, kaballa Moollanni Waa'ina minaadab ikkakko'ookko. Ee bikkina Moollanni Waa'ina ijaajammehe; anim kaballa ki'nnuwwina uwwoommi ijaajoo seeraa egellehe» yukko. Ee ballam Muse'e Isra'ee'l minaadabina «Yoordaanoos daajje fittakka'a lasage minaadaba maasse'lleena Gariizaa'n duunanne uullimmi hasisookkok sulli xale'i Simi'oonane, Leewe'ane, Yihudane, Yisaakoorane, Yooseefanee Biiniyaam sulloo ihona. Odim duunchina Eebaa'l duunanne uullimmi hasisookkok Roobeelane, Gaadane, Aseerane, Zaabiloonane, Daananee Niftaaleem sulloo ihona. Leewi'i oos sagara iimaa'lla'a Isra'ee'l minaadab hundinam. « ‹Waa'i illagenne shigigaa'oohan ihu angi lachchi manni baxoo misila te'im Waa'i bikkenne otossakkam luwwa baxaa maaxaa uullisoo manchi duumamaakkoohan ihona› yitona. «Minaadab hundim dabaraa ‹Aameen› yihona. « ‹Anna te'im ama sholliisookkok duumamaakkoohan ihona› yitona. «Minaadab hundim ‹Aameen!› yihona. « ‹Ixxi ollakkichchi gabala gindookkok hundim duumamaakkoohan ihona› yitona. «Minaadabim ‹Ameen› yihona. « ‹Qooq mancho huushanchi googonne awwonsookkok hundim duumamaakkoohan ihona› yitona. «Minaadab hundim ‹Aameen!› yihona. « ‹Waaraa'nneka, adaraa'llekaa busar meentikaa hanqa bi'isookkok duumamaakkoohan ihona› yitona. «Minaadab hundim ‹Aameen!› yihona. « ‹Anni meentiinsi matinne iinse'aa annika lombe sholliisoo ayyim duumamaakkoohan ihona› yitona. «Minaadab hundim ‹Aameen!› yihona. « ‹Ayyi fooraam diinatinnem saa'oo manchi duumamaakkoohan ihona› yitona. «Minaadab hundim ‹Aameen!› yihona. « ‹Aayyanne saa'ookkok duumamaakkoohan ihona› yitona. «Minaadab hundim ‹Aameen!› yihona. « ‹Ixxi ballonne saa'oo hundim duumamaakkoohan ihona› yitona. «Minaadab hundim ‹Aameen!› yihona. « ‹Dugaa egeraa manna shoo manchi hundim duumamaakkoohan ihona› yitona. «Minaadab hundim ‹Aameen!› yihona. « ‹Diinatinne bitaa'amaa muccur mancho shoo hundim duumamaakkoohan ihona› yitona. «Minaadab hundim ‹Aameen!› yihona. « ‹Ka seerina ijaajamoobee'ek ayyim duumamaakkoohan ihona› yitona. «Minaadab hundim ‹Aameen› yihona. «Ki'nnuwwi Moollanni Waa'ina ijaajantakkolasii anim kaballa ki'nnuwwina uwwoommi ixxi ijaajo hundam amma'nnanchinne egettakkolasii uullanne hee'oo minaadab hundiinsim hanaan ki'nnuwwa iimiimaa'ookko. Moollanni Waa'inamdu ijaajantakkolas kanniinsi woroon yoo maassuwwi hundim ki'nnuwwan ihookko. «Waa'i ki'nnuwwa beero'onnee hax uullannee maasse'ookko. «Ki'nnuwwi ooso, uulli mish hundam, laro, gereebbaa fella'aa maasse'ookko. «Sechchoo gabataa maasse'ookko. «Ki'nnuwwika firimmaa aagimmaa maasse'ookko. «Ki'nnuwwanne ki'oo ki'nnuwwi diina'a ki'nnuwwi anganne higisaa uwwookko. Mexxo'i mat googinne waattamo; ihukkaarem lamar googinne gibbamo. «Ixxi ki'nnuwwika gootaraa ki'nnuwwi angi baxoo luwwi hundamii maasse'ookko. Ee'isam ki'nnuwwina uwwoo uullanne ki'nnuwwa maasse'ookko. «Ki'nnuwwi Moollanni Waa'ina ijaajantakkolasii ixxi ijaaj hundam egettakkolasii ixxi aagu saga'llisanne ixxi gagina doo'llaakkoo annanni minaadab issookko. Ee lasage uullanne hee'oo minaadab hundim Waa'ina annanni ikkakko'oo minaadab ikkakko'isa moo'aa baddookko. Waa'i ki'nnuwwina uwweena gaassi ki'nnuwwi anno'ina sagara aagu uullanne lobakat ooso, fooraam diinatee hurbaaxxi atootaa ki'nnuwwina uwwookko. Ixxi odim ki'nnuwwi uullina xeena ammaninne uwweenaa ki'nnuwwi angi baxu luwwi hundam maasse'eenaa ixxeka er doona iimane fooqaa'ookko. Atim dut minaadabina liqaayyissoottoo bagaan ayyeensim liqaayye aa'llooyyo. Moollanni Waa'i lobakat minaadaphphi lambe'enne horoor issookko bagaan sheerim issooyyo. Kaballa an ki'nnuwwina uwwoommi Waa'i Seera hundam amma'nnanchinne egettakkolas maham ubbakkoo'n illage mattakkamo bagaan laso gattakkamoyyo. Ayyisinnem ka see'llisiinsi biiranne qophpha'n waa'uwwina otossimmii ixxuwwina awwaadimmii hasisooyyo. «Ihukkaarem ki'nnuwwi Moollanni Waa'ina ijaajantakkobeelasii anim kaballa ki'nnuwwina uwwoommi ixxi seeraa ijaajoo amma'nnanchinne egettakkobeelasii kanniinsi woroon yoo duunchi hundim ki'nnuwwanne afookko. «Beero'uwwannem ihukko hax uullanne duumantakko'oohan ikkakkamo. «Ki'nnuwwik sechchii gabatii duumamaakkoohan ihookko. «Ki'nnuwwi oos, uulli mish, lar, gereebbii fella'ii duumamaakkoohan ihookko. «Aaggakku'uuyyii fittakku'uuyyii duumantakko'oohan ikkakkamo. «Jor luwwa issitakka'a Waa'a uttakko'i bikkina issitakkam luwwi hundannem guullitakka'a bi'llakkeebe'i afeebe'e ki'nnuwwanne duunchi, hambalaachchanchii sholle'nnii afookko. Lago aa'llakkeena aaggakkam uulliinsi guullaa bi'iseebe'i afeebe'e fatakoobee'i shoo jabbo ki'nnuwwanne eebookko. Waa'i ki'nnuwwa ciissoo jabbinne, iibbinne, dashshinne, hafuroo iibbinnee xeen bee'aa uulla gogoo'isa issimminnee bi'llakkeebe'i afeebe'e aphphisookko. Ki'nnuwwi hurbaatam lasho'innee waagginnee bi'isookko. Ki'nnuwwiinsi hanaan yoo iimane xeen ga'nnoobee'isa naas xaa'llisa gokkisoommo; lokkiinsi woroon yoo uullam xaa'llisa gokkisoommo. Bi'llakkeebe'i afeebe'e xee'n bikkenne hambu'llaminne binnoo diraa shashsharaa asse'ookko. «Ki'nnuwwam diina'i anganne higisaa uwwookko. Ki'nnuwwi mat googinne diina'i kolli waattakkamo; ihukkaarem lamar kollinne gibbakkamo. Uullanne hee'oo minaadab hundim ki'nnuwwanne afoo luwwi hundam moo'aa baachchinne dambaqookko. Ki'nnuwwi leesham iima'n ammarii haqqo'l moochchii itookko bagaan ixxuwwa hollookkok hee'ooyyo. Waa'i odim fayye'llakkeena xantakkambee'i Gibxi uulli dashshinne, satti jabbinne, madinnee hankarattinnee aphphisookko. Odim machchaallinne, qooqimminnee tiir bi'oo'isa issimminnee u'nnisookko. Samgud ballanne qooqisa timtimitakkamo; mattakkam googom laqqakkeena xantakkamoyyo. Baxxakko'i luwwi ki'nnuwwina danooyyo. Hundi ammanem wor amadanchii boganchii afookko; hara'mmooham siiddakkamoyyo. «Landa xeekkakkamo; ihukkaarem mulli manni malaayyisaa edamookko. Mine baxxakkamo; ihukkaarem hee'llakkamoyyo. Woyi'n haqqa kaassakkamo; ihukkaarem mish ittakkamoyyo. Ki'nnuwwi diinat moo'llakko'uuyyim duramookko; ihukkaarem maariinsi suumennem amaddakkamoyyo. Ki'nnuwwi halla moo'llakku'uuyyim massakkamo; ihukkaarem daba'llooyyo. Gereebba diina'i massookko; ihukkaarem hara'mmaa hoorookkok hee'ooyyo. Ki'nnuwwi illi moo'ukkuuyyim ki'nnuwwika ooso mulli minaadab manni agid issaa massookko. Ki'nnuwwi illim ki'nnuwwi oosika daba'llimma egerukkuuyyi qulunxinne hee'ookko; ihukkaarem maham issitakkeena xantakkamoyyo. Kee'mmaallisa orba'llakko'i ki'nnuwwi hurbaaxxeka atoota laqqakkambee'i manni itookko. Ihukkaarem doolli hundichchonnem hawwodanchiinsii wor amadanchiinsii bagaan ki'nnuwwi siiddakkam luwwi hee'ooyyo. Moo'llakkam luwwi hundim machchaassoohan ihookko. Waa'i ki'nnuwwika xumxuumee gubeedoo fayye'oobee'isa omassookko; lokki xuranqiinsi horoo'l saraat afeebe'em kee'mmaalli omarinnee jabbinnee aphphisookko. «Waa'i ki'nnuwwa ki'nnuwwi adilinne maqirem gaassi anno'ii ki'nnuwwii hee'llakka'a laqqakkambee'i mulli minaadab manni uulla xoqoolaa massookko. Eehe'em haqqinnee kininnee baxamaakkoo qophpha'n waa'uwwina otossitakkamo. Waa'i ki'nnuwwa binnaa'oo uullanne hee'llam minaadab hundim ki'nnuwwanne afu luwwa moo'lla'a muggitamo; ki'nnuwwannem naacakkamo; gadantakkamome. «Lobakat hurbaata wixxakkamo; ihukkaarem qawwaawwi itoo bikkina gootto'i atoota wixxaa'llakkamo. Woyi'n kaashsha kaassakka'a danaamisa axissakkamo; ihukkaarem daquur itoo bikkina misha wixxaa'llakkamoyyo te'im ixxi mishika diqaasa aggakkamoyyo. Weer ki'nnuwwi uullanne beyyi hundannem mutookko; ihukkaarem wee'l mish amman bee'em giggiroo bikkina wee'l zayti hee'ooyyo. Ooso goonaa landaa qattakkamo; ihukkaarem qeefadamaa maroo bikkina ee ooso od siiddakkamoyyo. Ki'nnuwwika haqqaa hurbaataa hundam qawwaawwi itookko. «Ki'nnuwwik malaayyi hoogukkuuyyi marookko; ihukkaarem ki'nnuwwi uullanne hee'llam waaraan malaayyitu'uuyyi mattamo. Waaraan ki'nnuwwina liqaayyissamo; ihukkaarem ki'nnuwwi ixxuwwina liqaayyissakkam diinat hee'ooyyo. Lasaanchonne ixxuwwi horoor ikkamo; ihukkaarem ki'nnuwwi sheerim ikkakkamo. «Ki'nnuwwi Moollanni Waa'ina ijaajantakkobee'i bikkinaa ki'nnuwwina ixxi uwwu gatti seeraa ijaajoo egettakkobee'i bikkinaa ku booban hundim ki'nnuwwane afookko. Hore'em beedditakkeebe'i afeebe'e ki'nnuwwiinsi qee'llooyyo. Oohim Waa'i ki'nnuwwaa ki'nnuwwi shumo'oo guzumo'ukkisa heer heerina tiissiisoo mare'i ihookko. Ki'nnuwwi Moollanni Waa'i ki'nnuwwa lobakat googinne maasse'aa hee'ukko; ihukkaarem ki'nnuwwi lobakat liiranchinne ixxo awwaaddakko'oyyo. Ee bikkina Waa'i asse'oo ki'n diina'ina awwaadaan ikkakkamo; hundem luwwannem hawwitakku'uuyyi sibaattakkamo, xeebe'llakkamoo leexa'llakkamoo. Hore'em bi'llakkeebe'i afeebe'e ki'nnuwwi diina'i anganne xaa'llisa qoxxaakkoo gassi gaanjaqqanne wor amadantakka'a hee'llakkamo. Ki'nnuwwi suume laqqakkambee'i minaadaphphi gogota Waa'i qee'l uulliinsi ki'nnuwwi hanenne eebookko. Ixxuwwim hishshi ammachchisa ki'nnuwwi hanenne dillitamo. Ixxuwwim ki'nnuwwika lommanna lonsitambee'i keeno, ciilluwwinam qishixxitambee'i mogaalluwwaa baddissam keenoo ikkamo. Ixxuwwi ki'nnuwwika fooraam diinatee hurbaataa hundam fii'lla'a ittam bikkina sibaarinne hawwitakkamo. Bi'llakkeebe'i afeebe'e hurbaata, woyi'n diqaasa, wee'l zayta, wo'lla, gereebbikaa fella'i wotallaa matim gatoo'n guullitamo. Odim Moollanni Waa'i ki'nnuwwina uwwoo uullanne hee'oo ki'nnuwwi beero'uwwa hundam kibbitamo; amma'nnantakkam lob oottuwwi yoo girbuwwa hundam ginditamo. «Diina'i ki'nnuwwi beero'uwwa kibbaa ki'nnuwwa u'nnisoo ammane ittakkam luwwa hoogimminne mal bi'oohaare ki'nnuwwi Moollanni Waa'i ki'nnuwwina uwwu oosika maara ittakkamo. Ki'nnuwwi lambe'enne makkixxaa, heellamaahii ee qaranchannem bakke'aahii hee'oo manchom ihuta'n ee oos maariinsi ixxi abbaayyina, qaaphphaa iinse'oo ixxi arenaa gatu ixxi oosinaa uwweena qishixxookko. Neeyyato mussiisoo ki'nnuwwi beero'uwwi hundannem ihoo diina'inne kibbanchi ammane ittakkam luchchi mullek mahim hee'oobee'i bikkina ittakkam ki'nnuwwi oos maariinsi ayyenam uwwitakkamoyyo. Makkixxita'a, hee'llantahii ee qaranchannem bakke'lla'ahii ki'nnuwwi lambe'enne hee'llam cenqellimmi lophphimmiinsi ki'ukkok lokki uullam hance'aa la'oobee'etem maqire iinse'llam is manchinaa qatto'i oosinaa uwwiteena qishixxitamo. Ki'nnuwwi beero'uwwanne neeyyato mussiisoo diina'inne kibbanchi ihoo ammane ittam luchcho mulleka maham siiddambee'i bikkina maaxanta'a ittam is godabiinsi firu oosiinsii godaphphi amiinsii ayyenam uwwitamoyyo. «Ka kitaabanne kitaabamu Waa'i See'l sagara hundam qoxxitakka'a egettakkobeelasii maalalsiisoohanee baddisoohanee ihu ki'nnuwwi Moollanni Waa'i summa lonsitakkobeelasii Waa'i ki'nnuwwannee ki'nnuwwi oosonnee baddisookkokaa lobakat ammanina hee'oo boobanaa qaqqiso fayye'oobee'i kee'mmaalli jabboo eebookko. Gibxi uullanne dillu ammane moo'llakka'a badditakkam hee'llakko'i ee kee'mmaalli jabbo hundam odim ki'nnuwwi hanennem asse'ookko; ee jabbiinsim fayye'llakkamoyyo. Waa'i Seer kitaabamu ka kitaabanne kitaabamubee'i jabboo boobanaa hundam beedditakkona ki'nnuwwanne eebookko. Ki'nnuwwik xig maham iima'n boollaankisa ihukkaarem ki'nnuwwi Moollanni Waa'ina ijaajantakkobee'i bikkina ki'nnuwwiinsi xale'i hofqax manni gattakkamo. Waa'i ki'nnuwwina amaxxa uwweenaa ki'nnuwwam fikkaanniseenaa iittukkisam ee'isam ki'nnuwwa guullaa bi'isimmanne liiramookko; lago aa'llakkam uulliinsi xoqolantakka'a bi'llakkamo. «Waa'i heer uullanne hee'oo minaadaphphi lambe'enne mat tochchiinsi mulli tochchi afeebe'e uulli hundannem bi'nnaa'ookko. Eehe'em ki'nnuwwii gaassi ki'nnuwwi anno'ii otossitakka'a laqqakkambee'i haqqinnee kininnee baxamaakkoo qophpha'n waa'uwwina otossitakkamo. Ee minaadaphphi lambe'ennem ki'nnuwwina usheexxatii ki'nnuwwi lokkom usheexxissakkam beyyii hee'ooyyo. Waa'i ki'nnuwwina baachchaanchi tiiro, mixaninne jaliilaakkoo illee neeyyato muraakkoo sawwitee uwwookko. Hundi ammanem u'nnanchinne hee'llakkamo. Ki'nnuwwi heechchi lubbat bee'an ihu bikkinam ballaa hiimoo baachchinne hee'llakkamo. Woda'n baachchinnee illinne moo'llakkam muggisoo luwwi mashka'innee hiimoohaare ‹Hinki ammandu soodookko? Soodoohaare odim hinki ammandu hiimookko?› yitakkamo. Waa'i ‹La'mmaagge ee beyyo mattakkamoyyo› yukkaarem markabanne aaggakka'a Gibxa mattakkamisa issookko. Ee beyyonnem ki'nnuwwi gaga diina'ina agid issitakka'a biteessakkeena hassakkamo; ihukkaarem agiddanina aa'ookkokam siiddakkamoyyo» yukko. Waa'i Siina'i duunanne aagu hidi'l sagariinsi mulleka Moo'aabanne Isra'ee'l oosinne hidi'l sagara aagona Muse'e ijaaju sagar kanniinsi woroon yoohane. Muse'em Isra'ee'l minaadaba weeshaa «Waa'i Gibxi uulli adilanne, gassaanonnee ee uullanne hundoomannemii issu luwwi hundam, baddisoo boobana, issu agannaa maalalsiisoo mare'ee hundam ki'nnuwwi illinnem moo'llakko'ookko. Ihukkaarem Waa'i kaballi afeebe'e ki'nnuwwina issu luwwi hundam moo'llakkam ille, macceessakkam maccee qoossitakkam tiiroo uwwukkoyyo. An ki'nnuwwa sor hiincho hundam udma'i uullanne awwonsummuuyyi ki'nnuwwik eddechchii issaqqitakko'i kobe'ii beeddukkoyyo. Ittakkeena qorosho'i te'im aggakkeena woyi'n diqaas te'im mulli aggi hee'ukkoyyo. Ihukkaarem Moollanni Waa'i ixxi ki'nnuwwina Waa'i ihukkisa laqqakkamisina eekka issukko. Neese keyye amfummi ammane Haseeboo'n uulli adil Siihoonii Baasaa'n uulli adil Oogii neese qasseena waatta'a hee'llo'o. Ihukkaarem neese ixxuwwa kaa'nnummo. Ixxuwwi uullam lago aa'nnaa Roobeel sullina, Gaad sullinaa ee'isam Minaas sullaannina kollinaa gulummi ihoo'isina baxxansinaa uwwinummo. Ee bikkina baxxakkam luwwi hundim ki'nnuwwina taaphanona ka hidi'l saga'l ijaajo hundam erisa egellehe. Uullitakko'ohim ki'nnuwwi Moollanni Waa'inne hidi'l sagara aaggakkeenatte. Ku hidi'l sagarim ki'nnuwwi Moollanni Waa'i ki'nnuwwina kaballa hide'aa la'isaakkoohane. Waa'i kaka issukkok ixxi ki'nnuwwina uwwu neeyyaxxisannee gaassi ki'nnuwwi anno'i hee'llo'i Abrihaamina, Yisaaqinaa Yaaqoobinaa uwwu Hidi'l Saga'llisannee ki'nnuwwa ixxi gaqqi minaadab issaa uulliseenatte. Waa'i ka hundem hiditaninne wo'mmaakkoo sagara aagookkok xale'i ki'nnuwwinneyyo. Ixxi ka hidi'l sagara aagookkok kaballa ka beyyonne ixxi illagenne uullinummi keeninnee kaballa ka beyyonne niinninne maqire bee'i keeninnee hundinneteme. Gibxi uullanne hinkid hee'nnumda'ee mulli minaadaphphi lambe'innem hinkid hingaa waallumda'ee ki'nnuwwi laqqakkamo. Ee minaadaphphi lambe'enne haqqinne, kininne, birinnee worqinnee baxakko'oo shigigaa'oo ixxuwwi waa'uwwa moo'llakko'ookko. Ka beyyonne uullitakko'i keeniinsi goonam ihukko meenti, mat abaroos te'im sulli, ni Moollanni Waa'iinsi qee'llaa mulli minaadaphphi waa'uwwa awwonoobee'isa ege'llona. Ki'nnuwwi lambe'enne eehido'i shoo qaraaraalli luwwa baxoo manchi hee'oone. Eehido'i manchi ka duunchi sagara macceesaa ‹I tii'llisa hee'ummaarem an xummaa› yaa ixxi tiironne sawwulas er manninaa jor manninaa hundinam bichcha eebookko. Waa'i eehido'i manchina haafooyyo; hore'oomam Waa'ik quunqii to'achchii ee manchonne gii'llisa aphphookko. Waa'i ee mancho bi'iseena ka kitaabanne kitaabamu booban hundam ixxonne dilliisookko. Waa'i eehido'i mancho ka See'l kitaabanne kitaabamu duunchi saga'llisinne Isra'ee'l sulluwwi lambe'iinsi fissaa bi'isookko. Waaroo qaranchuwwanne ki'nnuwwi shumo'ii qee'l uulliinsi waatto'i waaraanii Waa'i ki'nnuwwi uullanne eebu jabboo bichchaa moo'llamo. Uulloomim diininnee sooqidinnee ifiisamookko. Ixxonne mah luwwim kaasamooyyo; mah luwwim mutooyyo; Waa'i ixxi kee'mmaalli quunqinne bi'isu Soddomisaa Gamorisaa, Adaamisaa Xibaayisaa ihookko. Ee ammane heer uulli minaadab hundim ‹Waa'i ka uullanne ka luwwa hundam mahina issukko? Ka kee'mmaalli ixxi quunqindu mashka'i maruchcho?› yitu'uuyyi xa'mmitamo. Dabachchoom ‹Ixxuwwi gaassi anno'o Moollanni Waa'i Gibxi uulliinsi fissu ammane ixxuwwinne aagu hidi'l sagara gindito'i bikkinatte. Oohim illageen otossita'a laqqambee'aaninaa Waa'im otossitambee'isa ijaajaa hee'u qophpha'n waa'uwwinaa otossito'o. Ee bikkina Waa'i ee minaadabanne quuqaa ka kitaabanne kitaabamu ka boobbannuwwa hundam ixxuwwi uullanne dilliisukko. Waa'i kee'mmaallisa quuqaa ee uulliinsi xoqolanta'a mulli minaadaphphi uulla mattamisa issukko. Ee bikkina oono'o, kaballam ee uullannem yo'o› yoohane. Ni Moollanni Waa'i daphphaa'aakkoo lobakat luwwi yookko; ihukkaarem la'amu See'l sagar hundim neesee ni oosii heer heerina egerimmi hasisookko. «An kaballa ki'nnuwwi illagenne maassoo duunchaa dissaammo; Waa'i ki'nnuwwa binnaa'u minaadaphphi lambe'enne hundannem ikkakka'a sawwitakkolas, ki'nnuwwi shumo'inne maqirem Waa'i kolli daba'llitakkolasii kaballa an ki'nnuwwina uwwoommi Waa'i Seerina wodaninne ijaajantakolasii Moollanni Waa'i ki'nnuwwina qishixxookko. Mulli minaadaphphi lambe'enne ki'nnuwwa binnaa'u beyyi hundiinsim dabaraa woraa wixxaa'ookko. Uulli tochchi afeebe'e binnitakka'a hee'llakkaman ihuta'nnim Waa'i mateeyyoominne wixxaa'aa worookko. Ee'isinne gaassi ki'nnuwwi anno'i hee'llo'i uulla odim lago aa'llakkamo; ixxim gaassi ki'nnuwwi anno'iinsi loboka godditakka'a fikkaantakkamisa issookko. Moollanni Waa'i ki'nnuwwii ki'nnuwwi shumo'ii ixxena ijaajantakkam wodano uwwookko. Ee bikkina ki'nnuwwi ixxo wo'm wodaninne iittitakkamo. Ee uullannem hee'llakkamo. Ee duuncha hundam ki'nnuwwa saboohaannonnee wor amadoo diina'annee dabarookko. Odim ki'nnuwwi ixxena ijaajantakkamo; kaballa an ki'nnuwwina uwwoommi ixxi ijaajjuwwam egettakkamo. Baxxakkam luwwi hundannem Waa'i anceeta uwwookko; qachchinne, horinnee atootinnee hundinnem maasse'ookko. Waa'i gaassi ki'nnuwwi anno'ina godda uwwaa liiramam hee'ukkisam ki'nnuwwinam anceeta uwwaa liiramookko. Eeham issookkok ka See'l kitaabanne xafamu ijaajoo Seeraa egerimminne wo'm tiirinnee wodaninnee ki'nnuwwi Moollanni Waa'i kollonne daba'llitakko'aarette. «Kaballa an ki'nnuwwa ijaajoommi ijaaj kee'mmaallayyo te'im laqqakkeena xantakkambee'aneyyo. Ki'nnuwwim ‹Macceensaa ijaajammona ayyi iimane firaa niina eebookko› yitakkambee'isa ku Seer hee'ookkok iimanenneyyo. Ee'isam ‹Macceensaa ijaajammona dambalaqa eeqidiinsi niina ayyi eebookko?› yitakkambee'isa seer hee'ookkok dambalaq eeqidonneyyo. Sagaroom ki'nnuwwina hore'em abbisonnette; egettakkamisinam ki'nnuwwi suumennettee wodanonnettee. An kaballa ki'nnuwwina heechchaa maassoo te'im lehoo jollee doo'llitakkona uwwaammo. Hee'llakkamisina, fikkaannitakkamisina, Waa'i ki'nnuwwina uwwoo uullanne aaggakka'a maasse'antakkamisina, Moollanni Waa'a iittitakkamisina, ixxi googonnem taakke'llakkamisinaa seeraa ijaajoo heechchi ogoraa egettakkamisinaa an kaballa ki'nnuwwa ijaajoommo. Ihukkaarem wodano Waa'iinsi qeessitakka'a sagara macceesimma sabbakkolasii mulli waa'uwwinam otossitakkolasii bi'llakkaman ihukkisa oono'o, an kaballa ki'nnuwwina qoxxisaa kuroommo. Yoordaanoos eeqiddonne fittakka'a lago aa'llakkam uullanne qeeraa'l doolle hee'llakkamoyyo. Oono'o, ki'nnuwwi illagenne heechchaa lehoo, Waa'ika maassoo duunchaa doo'llitakkona kaballa dissummisina uullaa iimanee ki'nnuwwanne naqaash issaammo. Ki'nnuwwii ki'nnuwwi shumo'ii foorinne hee'llakkamisina heechcha doo'llehe. Ki'nnuwwi Moollanni Waa'a iittehe; ixxenam ijaajammehe; ixxonnem amma'nnehe. Oohim ki'nnuwwina heechchi ihimmiinsi loboka gaassi ki'nnuwwi anno'i ikko'i Abrihaamina, Yisaaqinaa Yaaqoobinaa hide'aa neeyyato uwwukkisinnem ki'nnuwwi aaggakkam uullanne lobakat doolle hee'llakkamo» yukko. Odim Muse'e Isra'ee'l minaadabina «Oono'o, i umur mat xibbee lamiyyee ihu bikkina ka lasage an ki'nnuwwa awwonseena xanoommoyyo. Waa'im ‹Yoordaanoos daajji eeqido fittooyyo› yaa kuraakko. Ki'nnuwwina Moollanni Waa'i ki'nnuwwi illagenne ihaa awwonsookko; mulli minaadaba bi'isaa ixxuwwi uulla ki'nnuwwina uwwookko. Iyyaasim Waa'i yukkisanne ki'nnuwwa awwonsookko. Waa'i Amoore'i uulli adilluwwa Siihoonaa Oogaa bi'isukkisam ixxuwwam eehid bi'issookko. Waa'i ki'nnuwwi ixxuwwa kaa'llakkamisa issookko. Ee bikkina an ijaajummi ijaajo hundam ixxuwwannem issitakkamo. Ki'nnuwwi Murte'aalluwwaa iggaalluwwaa ikkehe; ixxuwwam badditakkotte; te'im muggitakkotte; Moollanni Waa'i ki'nnuwwinne maqir ihookko. Ixxi ki'nnuwwa uunjooyyo; urooyyome» yukko. Ee lasage Muse'e Iyyaaso weeshaa hundem Isra'ee'l minaadaphphi illagenne «Qoxxe, murte'e. Waa'i gaassi ixxuwwi anno'ina hide'aa neeyyato uwwukkisanne ka uulla ka minaadaba awwonsitaa amadiissoottok atette. Waa'i ixxi gagim kiinninnetti ihaa keese awwonsookko. Ixxi keese uunjooyyoo hore'em urooyyoo. Ee bikkina baddititte; neeyyatom muttitte» yukko. Ee lasage Muse'e Waa'ika Seera kitaabaa Hidi'l Saga'l Saaxina iyyitam hee'llo'i Leewi'i oosina, qeessuwwinaa Isra'ee'l minaadaphphi awwonsaaninaa uwwukko. Ixxuwwinam «Hundem badanim shiinshamoo lama'l hiinchi lasaanchonne lonsakkam Daas Ugudanne Isra'ee'l oos hundim Moollanni Waa'i illagenne ixxi doo'lloo beyyonne wixxitam ammane ka Seera ixxuwwi illagenne qananaa'e. Hundim macceessa'a Moollanni Waa'a baddimma lossonaa ka See'l sagara erisa egettonaa goona, landa, oosoo ki'nnuwwi beero'uwwanne hee'llam waaraanoo mateeyyoomanne wixxaa'llehe. Yoordaanoos daajje fittakka'a amaddakkam uullanne hee'llakkam doollenne hundannem ka Seera macceessa'a laqqambee'i ki'nnuwwi shumo'i Waa'i Seera macceessa'a ki'nnuwwi Moollanni Waa'ina ijaajancha lossona» yaa ijaajukko. Ee lasage Waa'i Muse'ena «Kaba at letoo amman afaakko. Minaadaba awwonsoo Seera an uwwona Iyyaaso weeshshaa atii ixxii lamim keesamaakkoo dukkaana waallehe» yukko. Ixxuwwim keesammi dukkaa'n beyyo waatto'o. Waa'im keesamaakkoo dukkaa'n goocanne uullu duuphphi utuphphi worinnette ihaa caakkaa moo'amukko. Waa'i Muse'ena «At abbis ammanenne gaassi ki lob anno'isam letootto. Ee lasage an ixxuwwinne aagummi hidi'l sagara ku minaadab gindookko. Eesem uraa lago aa'oo uullanne hee'oo qophpha'n waa'uwwina otossookko. Ee ammane an ixxuwwanne quuqaa ixxuwwiinsi annanni ihoommo. I illem ixxuwwiinsi daphphaa'oommo. Ixxuwwim beedditamo; ixxuwwannem lobakata baddisoo booban dillookko. Ixxuwwim ee ammanenne ‹Ku hawwi neesenne afukkok ni Moollanni ni lambe'enne bee'i bikkinayyonnihe?› yitamo. Allaggi waa'uwwina otossimminne baxxo'i baaxii'l bikkina ee ammane an ixxuwwina hore'em hara'mmoommoyyo. At ka mazmuura kitaabbaa Isra'ee'l oosina losissaa zammattamisa isse. Ku mazmuurim iina naqaash ihookko. An gaassi ixxuwwi anno'ina hide'aa uwwummi neeyyaxxisanne adii marabii daadoo uulla aaggamisa issoommo. Eehe'em itta'a godditahii geejjita'ahii lasage eese uttamo; i Hidi'l Sagaram gindita'a mulli waa'uwwina otossitamo. Ixxuwwanne dut kee'mmaalli hawwi afoo amman hundam ka xadamoobee'i mazmuura ixxuwwi oos zammattam ammane ixxuwwina naqaash ihookko. Anim ixxuwwina uwweena neeyyato uwwummi uulla aaggeena illageenim ixxuwwi maha sawwitamda'e la'oommo» yukko. Ee ballam Muse'e ee mazmuura kitaabaa Isra'ee'l oosina losisukko. Ee lasage Waa'i Naawe'i beet Iyyaasina «Qoxxe, murte'aallam ihe. An ixxuwwina uwweena neeyyatummi uulla Isra'ee'l ooso awwonsitaa aagissootto. Anim kiinninnette ihoommo» yaa ijaajukko. Muse'em ka See'l Sagara lasaanchi afeebe'e kitaabanne kitaabaa guullaa lasage Waa'ika Hidi'l Saga'l Saaxina iyyitam Leewi'i oosina «Waa'i Seer kitaabamu ka kitaaba massitakka'a ki'nnuwwi Moollanni Waa'i Hidi'l Saga'l Saaxi'n gadanonne dissehe. Oohim minaadabanne naqaash ihookko. Isra'ee'l minaadab hinkaa'nna boqquwwaa wodan duudaakkoo keenoo ikko'isa la'oommo. An awwonsam hee'ummi doollennem ihuta'n ixxuwwi Waa'anne boqqitu'uuyyi hee'llo'o. An lehaa lasaga'i hore'em boqqitamo. Ee bikkina ka hundam an ixxuwwina kurona minaadaphphi awwonsaanoo sulli awwonsaanoo wixxaa'llehe. An uullaa iimanee ixxuwwanne naqaash issaa weeshoommo. An lehaa lasage an ijaajummi ijaajiinsi haxonne aa'lla'a haashaarammi baxo baxxamisa la'oommo. Ixxuwwi Waa'i illagenne jor luwwa baxxa'a ixxo quuqissam bikkina ixxuwwanne boobana dilliisookko» yaa kurukko. Ee lasage Muse'e hundem Isra'ee'l dummichchi illagennem ka mazmuura luxxaanniinsi ki'isaa lasaanchi afeebe'e qananaa'ukko. Ixxim «Iimane, an wocoommi sagara macceese; uullim i suumiinsi firoo sagara macceesona. I losan xee'nnisa ga'nnona; I woshshim hoffi qiibaxxisa taktakihona; hixenne hee'oo qiibaxxisa mutanne yiroo xee'nnisa an Waa'i summa alallaatoommo. Ni Waa'i hundiinsi loban ihukkisa kullehe. «Ixxi niina girba ixxek bax hundim muccura; ixxek googim xabbeena. Ixxi huushamoobee'i amma'nnamaakkoo Waa'a; ixxi hanqo'anee xabbeenaa. Ixxuwwi ixxi illagenne haashaaramaakkoo haalata moo'isso'ookko. Eehanninne ixxi oos ikkakkobee'isa la'isso'ookko; ixxuwwim kolbanto'oo boqqi qarancha. Ki'nnuwwi qawwuwwaa qoossitakkabee'i keenoo, Waa'ina anga dabattakkamok ka'isinnettennihe? Ixxi ki'nnuwwa qooccu annayyonnihe? Baxukkokii qoxxisukkokdu ixxotteyyonnihe? «Huno'o gaassi doolle sawwi'llehe; lobakat doolliinsi illageen hee'u ammanem sawwi'llehe. Huno'o, ki'nnuwwi anna xa'mmehe; ixxim kurookko. Lommannam xa'mmehe; ixxuwwim aganna kuttamo. Hundam xanoo Waa'i ixxi minaadabina sharada baxxansu ammane manni ooso annanni issu ammane Isra'ee'l oosina xiqqisinne ixxi minaadabina gabala kaasukko. Isra'eel Waa'ina sharada; Yaaqoobim annanni ixxi amaxxa. «Hafachchaam mat luwwim bee'i uulli udma'anne siidukko. Agiram ihaa dakkukko; illi beetichchisam egerukko. Ciicoolli hanenne do'oo do'nna egeroo hishshammachchisa ixxo qaaphpheena lada biddiqaa'ookko; ixxi ladannem iyyookko. Waa'i mullam awwonsukko; mulli waa'uwwi ayyim ixxenne hee'ukkoyyo. «Duunanne hee'isukko; uullikam hurbaata itisukko. Ki'n farqaqiinsi marabo kinaam uullanne mutu wee'llekam zayta itisukko. La'llekaa gereebbikaa adoo buuroo di'ir gereebbaa fella'aa Baasaa'nneka doo'l gereebbi ambulluwwa, doo'llammi aras daabbo'inne itisukko. Ixxi minaadab ki'nnuwwim kashar woyininne lubamaakkoo diqaasa aggakko'o. «Isra'ee'l oosim geejjito'o; boqqito'ome; lobakata itta'a geejjito'o; di'itto'ome. Ixxuwwa qooccu Waa'am utto'o; daphphaa'aa gatisookkoka sholliisso'o. Waa'am mulli waa'ina otossimminne to'achchisso'o; baxxam jor luwwi hundinnem quuqisso'o. Kanniinsi illageen laqqambee'i haareechcho waatto'oo keenina, Waa'inatte ihoo'n habusinaa ixxuwwi gaassi anno'i otossitobee'i waa'uwwinaa kitimto'o. Ixxuwwa qooccu waa'a utto'o; ixxuwwa li'isukkokam xaddo'o. «Waa'i eekka moo'aa qannaxukko; goo'n oosonnee landannem quuqukko. Ixxim ‹I ille ixxuwwiinsi daphphaa'oommo; ixxuwwikam lasaanchi mah ihooda'e moo'oommo; ixxuwwim boqqi qaranchaa amma'nnantambee'i oosoo. Qophpha'n waa'uwwinne eese to'achchisso'ookko; awwaad bee'i waa'uwwina otossimminne quuqisso'ookko. Anim ixxuwwa gadamaakkoo minaadabinne to'achchisoommo; qoossoobee'i minaadabinnem quuqisoommo. I quunqi aphphoo gii'llisa xanqookko; Si'oo'l xillaalloom afeebe'em aphphookko; uullaa uullanne yoo luwwaa hundam itookko; duu'n lugum afeebe'em shokkiisookko. « ‹Ixxuwwi hawwonnem hawwo edoommo; i xiyyuwwam ixxuwwanne guulloommo. Guulloo sibaaro ixxuwwanne asse'oommo. Ixxuwwim kee'mmaalli jabbinnee boobaninnee beedditamo. Odim itoo moochchaa qubaam hamashshaa asse'oommo. Goog hundannem ixxuwwa bisa'i guullookko; min hundannem baachchi hee'ookko. Woraad, landi, oosii lommannii hundim beeddookko. An ixxuwwa guullaa bi'isoommo. Ee lasage od ixxuwwa tiiroo hee'ooyyo. Ihukkaarem ixxuwwi diina'i «Kaa'nnummok neesette bagaan Waa'ayyo» yita'a amaadimminne eese quuqissamda'e› yaa sawwoommo. «Isra'eel tiir bee'i minaadaba; hore'em qoossitambee'i keeno. Qoolluwwi ikka'a kaka laqqota'n lasaancho hindihitakkeena xantam hee'llo'o. Qooccaanchi higisaa uwwubeelasii Waa'i uunjubeelasii hinkid mat manchi kuma te'im lam manchi tommi kuma holleena xanookko? Ni diina'im laqqamisam ixxuwwi waa'i ni Waa'isayyo. Ni diina'i Soddo'mmisaa Gomo'llisaa haashaaranto'oo keeno. Ixxuwwi qaraaraallaa qubaam mishaa mishoo woyi'n kaashshisa. Ixxuwwik woyi'n diqaas hamashshi qubisaa jor woraqaallichchi qubisaa. «Ni diina'i hawwoddo'i hawwojji Waa'i doonanne kitaabamaakko. Baado miqisoommok anette; ayyenam ixxi gaqqi baxisam miqoommo. Ixxuwwi bi'llam balli afu bikkina qo'llantamo; qaqqisonnem bi'llamo. Hooggo'isa moo'aa Waa'i ixxi minaadabina qishixxookko; agishshoo wolabichchoo annanni issoo'n Waa'i ixxi minaadabina oogatookko. Waa'im ixxi minaadaba ‹Amma'nnantam ixxuwwi waa'uwwi hannonne yo'o? Bakke'llam sifo'i kiinni'nno'i waa'uwdu hannonne yo'o? Ixxuwwika di'ir kitima itto'i woyi'n diqaasam aggo'i waa'uwwi ki'lla'a hara'mmitona; girbuwwam ikkona. « ‹Waa'i xale'e anette ihummisa laqqehe; iinniinsi bagaan mulli Waa'i bee'e. Shoommokii gatisoommokii anette; an omassoommo; dabaraahim fayyiisoommo. I angiinsi ayyim gatiseena xanooyyo. I anga iima'n kolli biddiqaa'aa an heer heerinam hee'oomman ihummisa kuroommo. Belelle'oo bisa'a qareesoommo; oogatom oogatoommo. I diina'ikam baado miqisoommo; eese sabbam keeniinsim bito miqoommo. Shakko'i kee'n xiiginne, qeefadakko'i kee'n xiiginnee diina'i awwonsaa'n xiiginnee i xiyya dimbisoommo; i bisa'im diina'i maara muransookko› yukko. «Minaadaba, Waa'i ixxi minaadaphpheka xiiga miqisookko; diina'am bi'isookko; ixxo sabbam keeno guzumo'aa ixxi minaadaphphi baaxiilo shiinshookko; uulliinsi jolle bi'isookko. Ee bikkina ixxi minaadabinne maqire liirammehe» yaa qananaa'ukko. Muse'e Naawe'i beet Iyyaasinnem maraa minaadabina ka mazmuura qananaa'ukko'o. Muse'e ka mazmuura hundam minaadabina macceesisaa lasage «Ka seera ki'nnuwwi oos erisa egettamisina ijaajjakkona an kaballa naqaash ihona ki'nnuwwina wocoommi sagara hundam qoossaqqehe. Ku Seer kora'i saga'l woshshayyo; ixxi ki'nnuwwi foorina shooho'o. Ee bikkina ka Sagarina ijaajantakkolas Yoordaanoos daajji eeqidonne lago aa'llakkam uullanne lobakat doolle hee'llakkamo» yukko. Waa'i ee ballam Muse'ena «Moo'aaphphi uullanne Iyyaarko'i beero'i illagenne yoo Abaarii'm duunnuwwi koolli mare. Atim Naabo'i duunanne fittaa Isra'ee'l minaadabina uwwoommi Kana'aa'n uulla asi'mmitaa moo'e. Kiyyabbaayyi Aaroon Hoo'l duunanne lehaa ixxi moollonne exxukkisam atim ee Naabo'i duunanne letootaa ki moollonne exxitootto. Ki'nnuwwi lamim Isra'ee'l minaadaphphi illagenne iina amma'nnantakko'oyyo. Xii'n udma'i uullanne Qaadees beero'i gadanonne yoo Mariiphphi bu'uwwi gadanonne hee'llakko'i ammane an Isra'ee'l minaadaphphi illagenne lombaam ihoommisa issitakko'ookko. Ee bikkina an Isra'ee'l minaadabina uwwoommi uulla asi'mmitaa moo'llootto bagaan aaggooyyo» yukko. Waa'i manchi Muse'e leheen illageen Isra'ee'l minaadaba kanniinsi woroon yoo'isanne maasse'ukko. Muse'em «Waa'i Siina'i duuniinsi waarukko; Eedoo'm uulliinsi soodaraa'l laaqqisa caakkisukko; Faaraa'n duuniinsim belecceesukko; ixxi makki anganne gii'l laban hee'ukko; ixxenne maqirem xigiinsi hanaan ihaakkoo asse'amaan hee'ukko. Waa'i hanqinam ixxi minaadaba iittookko; ixxi minaadaba hundam egerookko. Ixxuwwim ixxi lokkiinsi woroon ixxena otossitamo; ixxenam ijaajantamo. Isra'ee'l minaadabina amaxxi ihu an uwwummi Seera egettamo. Isra'ee'l sulluwwii minaadaphphi awwonsaanii wixxito'i ammane Waa'i Isra'ee'l minaadabanne adil ihukko» yukko. Muse'em Roobeel sulli bikkina «Moollanna, Roobeel sullik xig hoffan ihukkaarem hee'ona bagaan bi'oone» yukko. Yihuxxi sullinam «Waa'a! Yihuxxi sullika laachcha macceese; mulli sullinnem mat ikkamisa isse; ixxuwwika malaayye qoxxise; diina'inne orantam ammanem ixxuwwina hara'mme» yukko. Leewi'i sullinam «Moollanna, Tumiiminnee Uriiminnee Maasa'annee Mariiba'i wo'i beyyonnee fitantaa keentitti ki awwaadaanina Leewi'i oosina ki doo'lla la'ise. ‹Ixxuwwi kiina› yitu'uuyyi anno'oo amo'oo xaddo'ookko; qarmanniinsim annanni ikko'ookko; ooso utto'ookko; ki sagara lonsito'ookko; hidi'l sagaram egetto'ookko. Ixxuwwi kiikka ogora Yaaqoobina, Seeram Isra'eelina losissamuulla; ki illagennem aduruusa wiriissitamuulla; shokkiisakka'a hincaa'akkam kitimam kiina kitima hincaa'akkam beyyonne hincaa'llamuulla. Moollanna, ixxuwwika amaxxa at maasse'e; ixxuwwi baxxam er bax keese liiransona; ixxuwwi diina'ika malaayye hoogise; ixxuwwa sabbam keen la'mmeka ki'llambee'isa isse» yukko. Biiniyaam sullinam «Waa'i iittookkok ixxonne amma'nnamaa hee'ookko; malaayyaam Waa'i balla hundoomam ixxo egerookko; Waa'i egechchi woronnem hee'ookko» yukko. Yooseef sullina «Waa'i iimaniinsi ga'nnoo xeeninnee xilli uulliinsi firoo wo'innee ixxuwwi uulla maasse'ona. Ixxuwwi uullim eelliinchinne mishaa doo'llammi mishinne wo'mmaakkoohan ihona; amman hundam lobakat atoota uwwona. Ee'isam hinaxxi doolliinsim hee'u duunnuwwiinsii hoffi duunnuwwiinsii lobakata doo'llamaakkoo atootinne goddaan ikkona. Ixxuwwi uulli doo'llamaakkoo luwwi hundinnem wo'mmaakkoohan ihona; aphphoo shif worinne moo'amu Waa'iinsi anceet lophphona; ixxi abbaayyuwwiinsi awwonsaanchi ihu Yooseefina adilla'n mare'e issakkona. Yooseefek hibbi lob moo'llisa baddisoohane; buudim boobi'l buuxxisa qoxxaalluwwa. Ee buudduwwinnem mulli minaadaba qasookko; uulli tochchi afeebe'em hollookko. Efireem sullik tommi kum Minaas sullikim kummuwwi ee'isame» yukko. Zaabiloo'n sullinaa Yisaakoor sullinaa «Zaabiloon markabinne daba'llamukkuuyyi liiramona; Yisaakoorim ixxi minenne ihaa liiramona. Ixxuwwim Minaadaba duuna weeshsha'a hanqo'i kitima duunanne hincaa'llamo; dambalaqiinsi amaxxa shashsha'l woriinsim maaxamaakkoo amaxxa siiddamo» yukko. Gaad sullina «Gaad sullikka gabala haraassu Waa'i galaxxamona; Gaad woda te'im miine iiqeena hobbichchisa dugoolla. Awwonsimmi ixxena sharad ihu bikkina ixxi gagina er uulla doo'llukko; minaadaphphi awwonsaan wixxito'i ammane Waa'ika Seeraa ogoraa Isra'eelina issukko» yukko. Daan sullina «Daan sulli hobbichchi geexisa calalaa Baasaa'n uulliinsi firookko» yukko. Niftaaleem sullina «Niftaaleem Waa'i illagenne nuura siidaakkoohane; Waa'i maassinnem wo'mmaakkoohane; ixxi uullim Galii'l Dambalaq afeebe'ee woroo'n qar afeebe'ee biddiqaakkoohane» yukko. Aseer sullinam «Aseer mulli sulli hundiinsim lophphaa maasse'amaakkoohan ihona; ixxom abbaayyuwwi iittoohan ihona; ixxi uullim wee'l haqqinne wo'mmaakkoohan ihona. Beero'i ooxxi gooccuwwim xaarinnee naas xaarinnee qoxxaakkoohan ihona; ixxim doolli hundannem malaayyaam ihona» yukko. Isra'ee'l minaadaba, iima'n hibbinne ki'nnuwwina hara'mmeena duubinnee iimaninnee marookkok ni Moollanni Waa'i'nnookkok ayyim bee'e. Heer heerina hee'oo Waa'i ki'nnuwwina girba; ixxek heer heerina hee'oo wod bakkiisoohane; ki'nnuwwika diina'a ki'nnuwwi illagiinsi hollookko; guullitakka'a bi'issakkamisam issookko. Ee bikkina Yaaqoob shumo'i iimaniinsi ga'nnoo xeen, hurbaatii woyi'n diqaasii wo'mmaakkoo uullanne lubbat yoo xummaanchi heechcha hee'ookko. Isra'eela, at hinkido'i maassaamo; ki'isa Waa'i gatisu minaadab hinkane? Ixxi kiina hara'mmoo agira; ki kaachchinam bisa'a. Ki diina'i uunxitu'uuyyi ki beyyo waattamaare afare hancaaccootto. Muse'em Moo'aaphphi biir beyyiinsi ki'aa Naabo'i duunanne firukko. Iyyaarko'iinsi eelliinchi firinne hee'oo Phisga'i duu'n ludonnem firukko. Ee lasage Waa'i ee uulla hundam daaphphaa moo'oo'isa issukko. Oohim Gala'aaxxi uulliinsi ki'isaa hanaa'n qarinne hee'oo Daan beero'i afeebe'e Niftaaleem uulla hundam, Efireemikaa Minaas uullaa, eelliinchi aagginne Meedeteraaniyaa'n Dambalaq tochchi afeebe'e yoo Yihuxxi uulla, Neegeebaa biir uullaa, Iyyaarko'i cebbanne yoo dimbaaphphi beero'o yakkam Iyyaarko'oo, Xoo'aar afeebe'e moo'isukko. Ee lasage Waa'i Muse'ena «An ixxuwwi shumo'ina lago aa'llakkeena Abrihaamina, Yisaaqinaa Yaaqoobinaa hide'aa neeyyato uwwummi uulli kane. Oono'o, at ee uulla illinne moo'llootto bagaan aaggooyyo» yukko. Ee bikkina Waa'i awwaadaanchi Muse'e Waa'i wocukkisinnem ee Moo'aaphphi uullanne lehukko. Waa'im Beetipha'oor beero'i illagenne hee'oo Moo'aaphphi uulli cebbanne waammukko. Ihukkaarem kaballi afeebe'em Muse'e waammamu beyyo la'oo manchi bee'e. Muse'e lehoo ammane ixxek umur xibbee lamiyyi hiinchoo hee'ukko. Ihukkaarem ixxek illi jaamukkoyyo; malaayyim hoogubee'i qoxxaalli manchi hee'ukko. Isra'ee'l minaadabim Muse'e lehonne kichche'lla'a sad balla hundam Moo'aaphphi biir uullanne afuutta'a wi'llito'o. Ixxi bikkenne minaadaba awwonsona Muse'e anga horoorenne issaa doo'llaa hee'u Naawe'i beet Iyyaas qooroominne wo'mmaakkoohan ihukko. Isra'ee'l minaadabim ixxena ijaajamukko. Waa'i Muse'ennette ihaa uwwu ijaajom egerukko. Waa'i moo'amaa atoorassu Muse'e'nnoo'i hiraagaanchi Isra'eelanne hore'em ki'aa la'ooyyo. Waa'i Muse'e Gibxi uulli adi'l beyyo, gassaa'n beyyoo ee'isam ee uulli hundannem asse'aa ixxenne ihaa issu agannaa maalalsiisoo baxoo hundam moo'isu mulli hiraagaanchi hore'em bee'e. Muse'e hundem Isra'ee'l oos illagennem issukkaanni'nnoo'i lophphaakkoo malaayyaam baddisoo agannaa hundam moo'isu mulli hiraagaanchi hore'em bee'e. Waa'ina awwaadaanchi Muse'e lehaa lasage Waa'i Muse'ena hara'mmaanchi hee'u Naawe'i beet Iyyaasina, «I awwaadaanchi Muse'e lehaakko; ee bikkina atii ku minaadabii hundim ki'llakka'a An Isra'ee'l oosina uwwoommi uulla aaggakkeena ka Yoordaanoos Daajje fillehe. Muse'ena aagummi saga'llisannem lokkinne hance'llakkam beyyi hundam ki'nnuwwina uwwoommo. Ki'nnuwwi uulli gabalim woroo'n qarinne Siina'i udma'i uulliinsi ki'isaa hanaa'n qarinnem Liibaanoos Duun afeebe'e ihookko; ee'isam Efiraaxis lob Daajiinsi ki'isaa Hiite'i minaadaphphi uulli hundam edaa eelliinchi aagginne Meedeteraaniyaa'n Dambalaq afeebe'e ihookko. Iyyaasu, an Muse'enne maqire ihummisam kiinninnem ihoommo; ee bikkina ki heechchi doollenne hundannem ayyim kiinninne uullixxamaa kaa'ooyyo; an keese hore'em uroommoyyoo unjoommoyyoo. Ixxuwwi maalda'uwwina uwwoommoo yaa hide'ummi uulla ku minaadab lago aa'llamisa issiteena awwonsaanchi ikkoo bikkina murte'ee qoxxee. I awwaadaanchi Muse'e ijaaju ijaajo hundam qoxxitaa egere. Mattoot beyyonne hundannem luwwi hundim makkoo'isina ee ijaaj hundinsim makki kollonnem qeddi kollonnem daba'llititte; at murte'ee lobabeero'i qoxxee. Ihukkaarem ka see'l kitaaba hundi ammanem qananaa'e; ixxonne kitaabamukkokka hundam egetoo'isinaa issitoo'isinaa ballam ihukko hiimo qoossitaa sawwihe. Ee ammane ki goog xabbookkomee makkokkomee. Mattoo beyyi hundannem an ki Moollanni Waa'i kiinninne maqire yoo bikkina murte'ee qoxxee yaa ijaajummoyyonihe? Ee bikkina badditittee muggitittee» yukko. Ee lasage Iyyaas minaadaphphi awwonsaanina, «Amba'a huruuttakka'a mattakka'a minaadabina ‹Ki'nnuwwi Moollanni Waa'i ki'nnuwwina uwwoo uulla aaggakka'a lago aa'llakkeena ka sas balli woronne Yoordaanoos Dajjinne fittakkam bikkina googonne ittakkeena hasisoo hurbaata gudixxehe› yitakka'a kullehe» yaa ijaajukko. Iyyaasim Roobeel sullinaa Gaad sullinaa Minaas sulliinsim kollinaa, «Waa'ina awwaadaanchi Muse'e ‹Ki'nnuwwi Moollanni Waa'i ka uulla ki'nnuwwina hee'llakkam beyyi issaa uwwookkoo› yaa kurukkoka tiillehe. Ki'nnuwwik meentii oosii ho'llitakko'i luwwii Yoordaanoosiinsi eelliinchi firinne Muse'e ki'nnuwwina uwwu uullanne afuuramona; ihukkaarem qasancha xantam keen hundim o'l mu'uta lade'lla'a ixxuwwi abbaayyuwwa hara'mmiteena awwonsita'a Yoordaanoos eeqidonne fittona. Waa'i ki'nnuwwa usheexxisukkisam ki'nnuwwi abbaayyuwwam usheexxiseebe'i afeebe'ee ixxuwwinam uwwoo uulla lago aa'lleebe'i afeebe'ee hara'mmehe; ee lasage Waa'ina awwaadaanchi Muse'e eelliinchi firinne uwwu uulla daba'llitakkamoo ki'nnuwwi gulummame issitakkamo» yukko. Ixxuwwim Iyyaasina «Ijaajjittoka hundam issinoommo; asse'llitti beyyi hundam mallommo. Muse'ena hundi luwwam ijaajammummisam kiinam ijaajammoommo; Waa'i Muse'enne maqire ihukkisam kiinninnem ihona. Ki ijaajonne boqqookkokii ijaajjitti sagar hundam macceesoobee'ekii ayyim lehona; ihukkaarem atoom baddititte; qoxxe!» yito'o. Naawe'i beet Iyyaas «Uullooma annanni issitakka'ahim Iyyaarko'o mattakka'a moo'llehe» yaa Saxiima yakkam beyyiinsi lam shaashshaano maaxaqqanne asse'ukko. Ixxuwwim matta'a Ra'aaba yakkam buubbeesaanchi meentichchi mine aagga'a eekke'em gatto'o. Iyyaarko'i Adilim «Isra'ee'l oosiinsi ka uulla shaashshiteena ka hiimo Iyyaarko'i beero'o aago'ookko» yakkam woshsha maccesukko. Ee bikkina ixxim «Ka uulla shaashshiteena waatto'oo manni ikko'i bikkina ki mine aaggo'i manna fisse» yaa Ra'aab beyyo asse'ukko. Oo meentichchom lamem manchom massita'a maaxxo'o. Isem ixxuwwa hasoo keenina «Eeyya hanqame; mannoom i mine aagga'a hee'llo'o; ihukkaarem hanniinsi waattoda'e la'ummoyyo. Uulli hiimaa kulkullaakkoohaannonne beero'i qash gooc xufameena illage mannoom fitta'a matto'o; hanno mattoda'e la'umbee'i bikkina qaqqissakka'a laseessakkolas siiddakkamo» yito'o. Ihona bagaan lamem manchom mi'nnaannonne fooqanne fissita'a tuubbo'i talbi gaaphphi woronne maaxxa'a hee'llo'o. Adil asse'u keenim beero'iinsi fitta'a matto'isam beero'i qash gooc xufamukko; asse'anto'i keenim shaashshitam keeno laseessu'uuyyi Yoordaanoos Daajje firakkam googo amadda'a matto'o. Shaashshitam keenim iinse'lleena illage Ra'aabe fooqanne fitto'o. Isem ixxuwwina «Waa'i ka uulla ki'nnuwwina uwwukkisaa ki'nnuwwa baddimmim ni hanenne ubukkisaa ka uullanne yo'i keen hundim ki'nnuwwi illagenne baa'lla'a bukkanto'isaa la'aammo. Gibxi uulliinsi fittakko'i ammane Waa'i Ertiira'i Dambalaqa ki'nnuwwi illagenne hinkid gokkisuda'ee Yoordaanoosiinsi eelliinchi firinne hee'llo'i lamem Amoore'i adilam Siihoonaa Oogaa maha issitakkoda'ee hinkid shitakka'a gullitakkodda'ee maccensaammo. Eekka macceensummi ammanenne ni wodan baachchinne bukkamukko; ki'nnuwwiinsi ki'ukkaaninne hundim baachchinne huxxe'nnumo; ki'nnuwwi Moollanni Waa'i hanaan iimanennee woroonim uullannee ixxi Waa'a. An kaba ki'nnuwwina eroka baxummisa ki'nnwwim iyyanni minina eroka baxxakkeena Waa'a summinne hide'llehee hanqo'i mare'em uwwehee. Odim iyyanna, iyyumma, iyyabbaayyuwwa, iyyaayyuwwaa ixxuwwi abaroosaa hundam gatissehe; neesem shitakkotte» yito'o. Oo mannim isena «Ka ni woshsha hundam mulli keenina kuttibeelas Waa'i ka uulla niina higisaa uwwoo ammane hanqo'isam kiina er luwwa issinoommo. Eekka issinummibeelas Waa'i ni foore ki'nnuwwi foo'l bikkenne bi'isona» yito'o Ra'aabe hee'llam hee'llo'i minim Iyyaarko'i beero'i qashinne mat ihaa baxamaakkoohan hee'u bikkina ee shaashshitam keeno maskootinne aad usinne dilliisso'o. Isem ixxuwwina «Ki'nnuwwa laseessam keen siiddambee'isa duunnuwwanne fillehe; ixxuwwi daba'lliteebe'i afeebe'e sas balli googo mattakkamo» yito'o. Oo mannim isena «Ka hidiissitti hidiro hundam egelloommo. Ka uulla aangoommi ammane ka kashar fatira neese dilliissit maskootanne calcalaa'llitbeelasii kiyyanna, kiyyumma, kiyyabbaayyuwaa kiyyanni mi'n abaroosaa hundam ki minenne wixxaa'llitbeelasii hidiissitti hiditaniinsi neese mucculluwwa. Ayyim ki miniinsi biiranne firaa lehulas ee xiigiinsi neese mucculluwwa. Ee xiigina xa'mmamookkok ixxi gagame; ihukkaarem ki minenne afuutta'a yo'i keeniinsi matim aphphisaamuta'n ee xiigina xa'mmammoommok neesette. Ihukkaarem ka issinoommi luwwa ayyenam kuttilas neese hidiissitti hiditaniinsi neese muccuwwa» yito'o. Isem ixxuwwina «Ki'nnuwwi yitakko'isa ihona» yita'a geegeesso'aare iseensi annanni ikka'a matto'o; ee lasage Rahaabe kashar fatira maskootanne katta'a calcalaa'llo'o. Ixxuwwim ee beyyiinsi duunnuwwanne fitto'o; laseessam mannim goog hundannem hassa'a hoogga'a daba'lliteebee'e sas ballina ee beyyonne maaxamto'o. Lamem manchim duuniinsi dillita'a daajji eeqidonne fitto'o; ixxuwwim Naawe'i beet Iyyaas beeyyo daba'llita'a ixxuwwanne afu luwwi hundam kutto'o. Ixxuwwim Iyyaasina «Waa'i hanqinam ee uulla hundam ni anganne higisaa uwwaakko; mashka'oomim ee uullanne yoo manni hundikim neese baddimminne ki'ukkok wodan bukkamaakko» yito'o. Iyyaas soodaraar daram ki'ukko; ixxii Isra'ee'l minaadabii hundim Saxiima yakkam beyyiinsi ki'lla'a Yoordaanoos Daajje watto'o; ee daage fitteena illageen eekke'enne wiiddanto'o. Sas balliinsi lasage minaadaphphi awwonsaan ee wiidda'n lambe'inne higgo'o. Ixxuwwim minaadabin «Ki'nnuwwi Moollanni Waa'ika Hidi'l Saga'l Saaxina Leewi'i oosiinsi qeessuwwi iyyita'a moo'llakkam ammane yoontakke'i wiiddaniinsi ki'llakka'a ixxuwwa awwonnehe. Kanniinsi illageen ka googinne mattakka'a laqqakkambee'i bikkina googooma ixxuwwi moo'issamo; ee bikkina Waa'i Hidi'l Sagara dissakkam Saaxinanne hincitakkotte; ki'nnuwwaannonnee Waa'i Hidi'l Sagara dissakkam Saaxi'n lambe'ennee yoo qee'lloom lam kum angi ihona» yita'a ijaajjo'o. Iyyaasim minaadabina «Soodo Waa'i ki'nnuwwi lambe'enne maalallisiisoo luwwa baxoo bikkina ki'nnuwwi gaga muccussehe» yukko. Ixxim qeessuwwina «Hidi'l Sagara dissakkam Saaxina iyyitakka'a minaadaphphi illagenne higgehe» yukko. Ixxuwwim ee Hidi'l Sagara dissakkam Saaxina iyyita'a minaadaphphi illagenne higgo'o. Waa'im Iyyaasina «Muse'enne maqire ihummisam ee'isam kaballam kiinninne maqire yoommisa ku Isra'ee'l minaadab hundim la'oo'isina keese ixxuwwi illagenne kaballa iimiimaa'imma asheeroommo. Atim Hidi'l Sagara dissakkam Saaxina iyyitam qeessuwwina ‹Yoordaanoos Daajji gammala affakkam ammane wo'i woronne aaggakka'a uullehe› yitaa kure» yukko. Iyyaasim Isra'ee'l minaadabina «Kid hincitakka'a ki'nnuwwi Moollanni Waa'ika sagara macceessehe» yukko. Ixxim minaadabina «Hee'oo Waa'i ki'nnuwwi illagiinsi Kana'aa'n minaadabaa Hiiwe'i minaadabaa Ferize'i minaadabaa Gerigeese'i minaadabaa Amoore'i minaadabaa Iyyaabuus minaadabaa holloo ammane ixxi ki'nnuwwi lambe'ennetti ihukkisa laqqakkamo. Macceesseehe; uulli hundinam Moollanni Waa'i Hidi'l Sagara dissakkam Saaxin ki'nnuwwi illagenne higaa Yoordaanoos firookko. Kabadem Isra'ee'l tommiinsii lamem sulliinsii anannichchiinsim mat mat mancho hincaa'llakka'a tommoo lam manchoo doo'llehe. Uulli hundinam Moollanni Waa'ikka Hidi'l Sagara dissakkam Saaxina iyyito'i qeessuwwi lokki Yoordaanoos Wo'i uullaa mat beyyonne wixxaa naaramooko» yukko. Ee bikkina minaadab Yoordaanoos Daajje fitteena wiiddanto'i beyyiinsi dukkaannuuwa gindita'a fitto'i ammanenne Hidi'l Sagara dissakkam Saaxina iyyito'i qeessuwwi ixxuwwi illagenne higga'a matto'o. Ammanoom hurbaata murakkam amman ihu bikkina Yoordaanoos Daajji wo'mmaa hee'ukko. Hidi'l Sagara dissakkam Saaxina iyyito'i qeessuwwim Yoordaanoos Dajji gammala affa'a ixxuwwi lokki wo'onne aagu ammanenne hanaanaad daadoo wo'i uullukko. Xaartaan gadanonne yoo Addaam yakkam qee'llonne yoo beero'onne afeebe'e mat beyyone wixxukko. Sooqixxi Dambalaqanne daadaa dilloo wo'i ma'llichchim daadoobee'isa uullukko. Minaadabim fittu'uuyyi Iyyaarko'i ixxuwwi illagenne hee'ukko. Isra'ee'l minaadab hundichchim Yoordaanoos Daajje gogaalli uullinne fitteebe'i afeebe'e Waa'ika Hidi'l Sagara dissakkam Saaxina iyyito'i qeessuwwi Yoordaanoos Daajji lambe'enne qoxxita'a uullita'a hee'llo'o. Minaadab hundichchim Yoordaanoos firaa lasage Waa'i Iyyaasina, «Minaadaphphi lambe'iinsi tommiinsii lamem sulliinsii mat mat mancho doo'llitaa tommoo lammancho aa'e. Ixxuwwim Yoordaanoos Daajji lambe'enne qeessuwwi uullito'i beyyiinsi tommoo lam kinaa ki'issa'a iyyita'a ki'nnuwwinne maqire matta'a kaballi maaro'o gattakkam beyyonne dissitamisina ijaaje» yukko. Ee lasage Iyyaas Isra'ee'l minaadaphphi tommiinsii lamem sulliinsii annannichchiinsim mat mato doo'llu tommoo lamem manchoo weshukko. Iyyaasim ixxuwwina «Ki'nnuwwi Moollanni Waa'ika Hidi'l Sagara disakkam Saaxi'n illagenne higgakka'a Yoordaanoos Daajji lambe'enne mallehe. Ki'nnuwwi annannichchim Isra'ee'l sulli xiqqisanne mat mat kina ki'issakka'a ki'nnuwwi gudumonne iyyehe. Ku kinneewwi Waa'i Isra'ee'l minaadabina issu luwwi hundam tiissiisoohane; lasaqqi doollennem ki'nnuwwi oos «Ku kinneewwi marichcho» yita'a ki'nnuwwa xa'mmitam ammane ki'nnuwwim ixxuwwina Waa'i Hdi'l Sagara dissakkam Saaxi'n illagenne Yoordaanoos Daajji wo'i uullukkisaa oo daajji uullu ammanenne Hdi'l Sagara dissakkam Saaxin firukkisaa ku kinneewwi Isra'ee'l minaadabina heer heerinam tiissiisoohan ihukkisaa kuttakkamo» yukko. Isra'ee'l oosim Iyyaas ijaajukkisa issito'o; Waa'im Iyyaasina kurukkisanne Isra'ee'l xiqqisanne Yoordaanoos lambe'iinsi tommoo lam kinaa ki'issa'a iyyita'a gattam beyyi afeebe'e massita'a dissito'o. Iyyaasim Hidi'l Sagara dissakkam Saaxina iyyito'i qeessuwwi uullita'a hee'llo'i Yoordaanoos Daajji lambe'enne mulli tommoo lam kinaa uullissukko. Oo kinneewwim kaballi afeebe'e eekke'em yookko. Muse'e Iyyaasina uwwu ijaaccisannem minaadabim Iyyaas kuroo'isina Waa'i ijaaju luwwi hundim wo'mmeebe'i afeebe'e Waa'ika Hdi'l Sagara dissakkam Saaxina iyyito'i qeessuwwi Yoordaanoos Daajji lambe'enne uullita'a egetto'o. Minaadabim qaqqissa'a ee daajje fitto'o. Minaadab hundim fitta'a lasage ixxuwwi moo'llonam Waa'ika Hdi'l Sagara dissakkam Saaxina iyyito'i qeessuwwi daajjiinsi fitta'a ee minaadaba awwonsito'o. Roobeel sulli, Gaad sullii Minaas sulliinsim kollii Muse'e ijaajukkisanne ikka'a o'l mu'uta amadda'a Isra'ee'l oos illagenne higga'a fitto'o. Sor kuma ikkam manni agilluwwaa bagadduwwaa amadda'a orina Iyyaarko'i gadanonne yoo biir uulla Waa'i illagenne higga'a fitto'o. Waa'i ee balla Isra'ee'l oos illagenne Iyyaaso iimiimaa'ukko; ixxuwwim Muse'e lonsito'isam Iyyaasom ixxi heechchi doolli hundannem lonsito'o. Waa'im Iyyaasina «Waa'ika Hdi'l Saga'l Saaxina iyyito'i qeessuwwi Yoordaanoos Daajjiinsi fittamisina ijaaje» yukko. Iyyaasim qeessuwwina «Yoordaanoos daajjiinsi fillehe» yaa ijaajukko Waa'ika Hidi'l Saga'l Saaxina iyyito'i qeessuwwi Yoordaanoos daajjiinsi fitta'a ixxuwwi lokkim gogaal uulla hance'u ammanenne Yoordaanoos illagee'nnisam tochchiinsi tochchi afeebe'e wo'mmaa daadukko. Minaadabim luxxi aga'nnaannonne tommi ayyaamonne Yoordaanoosiinsi fitta'a Iyyaarko'iinsi eelliinchi firoo kolli gabalanne yoo Gelgalanne wiiddanto'o. Iyyaasim ixxuwwi Yoordaanoosiinsi massito'i tommoo lamem kinam Gelgalanne kaasukko. Ixxim minaadabina «Ku kinneewwi mahane» yita'a xa'mmitamaare Ixxuwwinam «Isra'ee'l oos ka Yoordaanoos daajje gogaalli ullinne fitto'o» yitakkamo. Odim ki'nnuwwi Moollanni Waa'i neese Ertiira'i dambalaqa filleembe'i afeebe'e ni illagiinsi gokkisukkisam ki'nnuwwim Yoordaanoos wo'o fittakeebe'i afeebe'e ki'nnuwwi illagiinsi gokkisukkisa kullehe. Waa'i eekka issukkok ixxek angi wodaam ihukkisa uullanne yo'i minaadab hundim laqqamisinattee ki'nnuwwim ixxo heer heerinam badditakka misinattee» yaa kurukko. Yoordaanoos daajji eeqidonne eelliinchi aagginne hee'llo'i Amoore'i adilluwwii Meedeteraaniyaa'n Dambalaq gadanonne hee'llo'i Kana'aa'n adilluwwii hundim Isra'ee'l oos higgeebe'e Yoordaanoos wo'o waa'i hinkid gokkisuda'e macceesso'o; ee bikkina ixxuwwi wodan baachchinne bukkamukko. Isra'ee'l oosinnem uullixanteena xanto'oyyo. Ee ammane Waa'i Iyyaasina «Banca axxissaa Isra'ee'l oosika ballachchantobeekeeno ballachche» yukko. Ee bikkina Iyyaas banca axisaa «Ballachchimmi duunaa» yamamoo beyyonne Isra'ee'l ooso ballachchukko. Iyyaas ballachchu mashka'im Gibxi uulliinsi fitto'i minaadaphphek gaadina affa'a hee'llo'i goon hundim Gibxiinsi fitta'a lasage udma'i uullanne googonne leta'a beeddito'i bikkinatte. Ee ammane Gibxiinsi fitto'i minaadaphphek goon hundichchim ballachchanto'aarem googonne qaranto'i goo'n oos hundim ballachchanto'oyyi hee'llo'o. Gibxiinsi fitto'i ammane orina affa'a hee'llo'i Isra'ee'l oosik goon hundim Waa'ina ijaajantobee'i bikkina leta'a beedditeebe'i afeebe'e Isra'ee'l oos sor hiincho udma'i uullanne karkaaddo'o. Waa'i oos oosina uwweena ixxuwwi anno'ina hide'aa hee'u adii marabii daadoo uulla illinne moo'llambee'isa hide'ukko. Waa'i ixxuwwi bikkenne ixxuwwi ooso ki'isukko; googonne hee'llu'uuyyi qaranto'i goo'n ooso ballachchukko. Oo keen ballachchanta'a lasage mada fayye'lleebee'i afeebe'e minaadab hundim wiiddanto'i beyyonne afuutto'o. Waa'im Iyyaasina «Gibxi uulli agidda'n maala ki'nnuwwiinsi onkoroollisaammo» yukko. Ee bikkina ee beeyyi summi kaballi afeebe'e «Gelgala» yamamookko. Isra'ee'l oosim Iyyaarko'i hincitenne yoo Gelgalanne wiiddanta'a hee'llo'isam aga'nnaannonne tommonnee soo'l ayyaa'm hiimonnee eekke'em Shaashshiqqi Uguda lonsito'o. Shaashshiqqi Uguxxi la'm darinam uulli mishiinsi qorosho'oo goodakko'i hamaamaa itto'o. Ee uulli mishiinsi itto'i la'm dariinsi ki'isaa maanna'a yakkam hurbaat iimaaniinsi ga'nnimma urukko. Ee hiinchonne Isra'ee'l oos Kana'aa'n uullii mishiinsi itto'o bagaan la'mmeka ee maanna'a siiddeena xanto'oyyo. Iyyaas Iyyaarko'ina hincitenne hee'ukkuuyyi bisa'a amadaakkoo manchi ixxi kollonne hincaa «At ni kolliinsettennii ni diina'i kolliinsette?» yukko. Ixxim Iyyaasina «Waa'i gogoxxi awwonsaanchi ihummi bikkina waaraammo bagaan ki'nnuwwi kolliinsi te'im ki'nnuwwi diina'i kolliinsi waarummoyyo» yukko. Iyyaasim uullanne illillaachcha ubaa «I moollanna an ki awwaadaanchi kiina maha issona hassootto?» yukko. Waa'i gogoxxi awwonsaanchim ixxena «At uullitti beeyyi keesamaakkoohan ihu bikkina ki lokkiinsi caamma'a fisse» yukko. Iyyaasim oo Waa'i gogoxxi awwonsaanchi yukkisa issukko. Isra'ee'l ooso baddimiinsi ki'ukkok Iyyaarko'i qash gooc qoxxaallisa xufamaa waardiyyinne egeramaa hee'ukko; ee bikkina beero'o aagookkokii firookkokii ayyim hee'ukkoyyo. Waa'im Iyyaasina «Oono'o; Iyyaarko'oo Iyyaarko'i adilaa qoxalluwwi gaadaanoo ki anganne higisaa uwwaammo. Atii ki gaadaanii beero'ooma ballanne mataagge loh balli afeebe'e. Lamarem qeessuwwim lamar xurumba Waa'i hdi'l saga'l saaxxi'n illagenne amaddamisa isse; odim lama'l ballanne qeessuwwi xurumba fuggu'uuyyi beero'ooma lamaraagge do'llehe. Ee lasage qeessuwwi xurumba uttambee'isa fuggona; xurumbikkam sagara maccessakkam ammane minaadab hundim lobakata shuurona; ee ammane beero'ik qash uboohaare manni hundichchim ee beero'o xabbaa aagona» yukko. Naawe'i beet Iyyaasim qeessuwwa weeshaa «Waa'ika Hidi'l Saga'l Saaxina iyyehe; ki'nnuwwiinsim lamar qeessuwwi lamar xurumba amadda'a Waa'i Hidi'l Saga'l Saaxi'n illagenne mattona» yukko. Minaadabinam «Beero'ooma mattakka'a doo'llehe; gaadaanim Waa'ika Hdi'l Saga'l Saaxina higga'a mattona» yukko. Iyyaasim minaadaba ijaaju ammanenne lamaren qeessuwwim lamar xurumba amadda'a fuggu'uuyyi Waa'i illagenne matto'o; ee ammane Waa'ik Hidi'l Saga'l Saaxin ixxuwwa awwonam hee'ukko. Gaadaanim xurumba fuggam qeessuwwi illagenne higga'a mattu'uuyyi ixxuwwi hara'mmitam keenim Hidi'l Saga'l Saaxina awwonta'a mattam hee'llo'o ee amman hundam qeessuwwi uttambee'isa xurumba fuggam hee'llo'o Iyyaasim minaadabina «An shuullehe» yoommaare shuuttakkam bikkina «Shuullehe» yoommi amman afeebe'e shuuttakkotte; ki'nnuwwi suumiinsim matem sagarim firoonee macceesamoonee» yaa ijaajukko. Ixxim minaadab Waa'i Hidi'l Saga'l Saaxininne maqirem beero'ooma mataagge do'llamisa issukko; ee lasage minaadab wiiddanto'i beyyo daba'llita'a gatto'o. Iyyaasim soodaraar daram ki'ukko; qeessuwwi Waa'ika Hidi'l Saga'l Saaxina iyyito'o Lamarem qeessuwwim lamar xurumba amadda'a uttambee'isa fuggu'uuyyi Waa'i Hidi'l Saaxi'n illagenne higga'a matta'a hee'llo'o; gaadaanim ixxuwwi illagenne mattam hee'llo'o; ixxuwwi hara'mmitamkeenim Hidi'l Saga'l Saaxi'n lasonne awwontam hee'llo'o; ee amman hundam xurumbi fugamam hee'ukko. La'm ballinam beero'ooma mataagge do'lla'a wiiddanto'i beyyo daba'llito'o. Lohem ballam ee'isa issito'o. Odim lama'l balli soodukkuuyyi daram ki'lla'a beero'ooma lamar kore do'llo'o. Lamar kore do'llo'ok xale'i ee balli hee'ukko. Lama'l kore do'llo'i ammanenne qeessuwwi xurumba fuggo'o; Iyyaasim minaadabina «Waa'i beero'ooma ki'nnuwwina higisaa uwwu bikkina shuullehe. Beero'oomaa beero'i woronne yoo luwwaa hundam Waa'ina hincaa'akko'i kiti'mmisa issitakka'a ma'llichchim gatoobee'isa bi'issehe. Neese asse'nnummi shaashshitam keeno maaxxa'a gatisso'i bikkina buubbeesaanchi Rahaabee is minenne yoo luchchoo hundam shitakkotte. Ihukkaarem hirim ihu luwwiinsi ma'llichchom massitakka'a hawwo eebaqqitakkambee'isa ki'nnuwwi gaga ege'llehe; hirim ihu luwwiinsi massitakka'a Isra'ee'l gattenne u'nnii duunchii afoo'isa issitakkamo. Ihukkaarem bir, worqi, xaariinsii naas xaariinsii baxaamu mu'utii hundim Waa'ina keesamaakkoohan ihu bikkina Waa'i mu'ut afuuroo beyyonne dissamona» yukko. Qeessuwwi xurumba fuggo'i ammanenne minaadab shuutto'o; xurumbika sagara macceesso'isam minaadab lobakata shuutto'o. Ee beero'i qash gindamukko; gaadaan hundichchim matem hawwi bee'em beero'o aagga'a qeefaddo'o. Ee lasage beero'i wororonne hee'u luchchi hundichchom goona, meento, harde'e, lommanna, mirgo'uwwa, gereebbaa, hallaa qare'aalli bisa'inne ma'llichchim gatoobee'isa bi'isso'o. Iyyaasim ee uulla shaashshitto'i lamem manchinam «Buubbeesaanchi meentichchi mine mattakka'a isena hide'llakko'isinnem isee is abaroosaa hundam fissehe» yukko. Ee bikkina ixxuwwi Ra'aab mine aagga'a ise, is anna, ama, abbaayyuwwa, abaroosaa qaroo hundam fissita'a Isra'eel wiiddanto'i beyyiinsi tochchonne dissito'o. Beero'oo woronne yoo luwwaa hudam giirinne shokkiisso'o. Ihukkaarem bira, worqaa naasiinsii xaariinsii baxamu mu'uttuwwaa waa'i mu'ut afuuroo minenne dissito'o. Iyyaarko'o shaashshitamisina Iyyaas asse'u lamem manchom buubbeesaanchi Ra'aabe maaxxa'a gatisso'i bikkina ise, is anni abaroosaa is abaroosaa hundam Iyyaas gatisukko; is shumo'im kaballi afeebe'e Isra'ee'l lambe'enne yookko. Ee ammane Iyyaas «Ka Iyyaarko'i beero'o baxeena ki'oo mancho Waa'i duumaakkoohan ihona; shooho'o muroohaare won beeto hoogona; qash goocam uullisoohaare hoffi beeto hoogona» yukkuuyyi qoxxaalli hidiro gassukko. Waa'i Iyyaasinne maqire hee'u bikkina uulli hundannem ixxek sad firukko. Isra'ee'l oos hirim ihu luwwa bi'isimma hoogimminne Waa'a hawwoddo'o oohim Yihuxxi sulliinsi Zaara'i moolliinsi Zabid abaroosiinsi Kaarim beet akkaane hirim ihu luwwiinsi massukko. Ee bikkina Waa'i Isra'ee'l oosonne lobakata quuqukko. Iyyaasim Beeteeliinsi eelliinchi firinne beeti'aawe'ina gadanonne yoo Aay beero'o Iyyaarko'iinsi manna asse'aa «Fillehe uullooma shaashshehe» yukko. Oo mannim fitta'a matta'a uullooma shaashshito'o. Ixxuwwim matto'i beyyiinsi Iyyaas beyyo daba'llita'a «Lam kuma te'im sas kuma ikkam manni matta'a Aay beero'o aphphissona bagaan minaadab hundichchim mattoone; mashka'oomim ixxuwwi hofqax mannam ikko'i bikkina hundichchim ee beyyo matta'a badattoone» yito'o. Ee bikkina sas kuma ikkam manni Aay beero'o matto'o ihukkaarem Aay beero'i manni illagiinsi gibbo'o. Aay beero'i mannim ixxuwwa ee beero'i qash goociinsi ki'issa'a kina anakkam beyyi afeebe'e aad hootta'a hollitu'uuyyi qasso'o; ixxuwwiinsim sadee lohoo ikkam qax manna shito'o; ee bikkina Isra'ee'l minaadaphphek wodan baachchinne bukkamaa wo'isa ihukko. Ee ammanenne Iyyaas ixxi eddechcha dereerukko; ixxii Isra'ee'l lommannii Waa'i Hidi'l Saga'l Saaxi'n illagenne uulli hiimeebe'e uullanne illillaachcha ubbo'o. Ixxuwwi horoorennem buchcha laphphito'o. Iyyaasim «Moollanni Waa'a, neese Amoore'i anganne higissaa uwwiteenaa bi'isseenaa mahina Yoordaanoos daajje fissitto. Yoordaanoos eeqidonne afuurimmi niina e'llam hee'ukkoyyonihe? Waa'a, Isra'ee'l minaadab ixxuwwi diina'i illagiinsi gibbolas mayyoommo; Kana'aa'n mannii ka uullanne yoo mulli minaadabii hundim ka woshsha macceessa'a neese kibbita'a guullitamo; ni summam ka uulliinsi bi'issamo; ki geejji summi bikkina marichcho issitootto?» yaa uunxukko. Waa'im Iyyaasina «Ki'e! Mahina uullanne illillaachcha ubbaate? Isra'ee'l minaadab an ijaajummi hidi'l sagara gindita'a hirim ihu luwwa game'lla'a massita'a ixxuwwi mu'uxxi woronne maaxxo'ookkoo qophphanto'ookkoo; ee'isa issimminne eese hawwoddo'ookko. Ee bikkina Isra'ee'l minaadab ixxuwwi diina'i illagenne uulliteena xantamoyyo. Ixxuwwi duumanto'oo keen ikko'i bikkina ixxuwwi diina'i illagiinsi gibbamo; hirim ihaakkoo luwwa ixxuwwi lambe'iinsi bi'issobeelas ka lasage an ixxuwwinne maqir ihoommoyyo. Mare! Ka minaadaba muccusse! Ixxuwwinam ‹Ki'nnuwwi lambe'enne hirim ihaakkoo luwwi yoo bikkina Isra'ee'l Moollanni Waa'i sood afeebe'e ki'nnuwwi gaga muccussaqqehe! Isra'eela! Ka hirim ihaakkoo luwwa ki lambe'iinsi fissitbeelas ki diina'i illagenne uulliteena xantooyyo Ee bikkina soodo daram sulli sullinne hinci'llehe; an annanni issoommi sulli moollinne moollinne hincihona; ee'isam an annanni issoommi moolli abaroosinne abaroosinnem hincihona; odim an annanni issoommi abaroos annannichchim hincihona. Hirim ihu luwwa issu manchi iinninne aagu hidiro gindaa Isra'eelanne jor sholle'nna afisu bikkina ixxi massu luwwii yoo luwwii hundim giirinne shokkona› yoolla yihe» yukko. Iyyaasim la'm ayyaamo soodaraar daram ki'aa Isra'eela sullinne sullinne hincaa'ukko. Ee keeniinsim Yihuxxi sulli annanni ihukko. Ixxim Yihuxxi sullo moollinne moollinne hincaa'ukko. Ixxuwwi shumo'om abaroosinne abaroosinnem hincaa'ukko. Ixxuwwiinsim Zabid abaroosa annanni issukko. Zabid abaroos annannichchim hincu ammanenne, Yihuxxi sulliinsi Zaara'i moolliinsi Zabidaan beet hee'u Kaarme'i beet Akkaan annanni ihukko. Ee lasage Iyyaasim Akkaanina «I beeto Isra'ee'l Moollanni Waa'ina ki baaxiilo biiraa yimminne lomba uwwe; issitti luwwam maaxxoo'n iina kure» yukko. Akkaanim ixxena dabaraa «Hanqame; Isra'ee'l Moollanni Waa'a baaxiilo baximminne hawwodaammo; issummokim kane. Boggi mu'uxxi lambe'enne mat mishisoo Baabiloo'n manni kaabba, lam kiilo'o ihoo biiraa kiilo'oo kolloo ihoo worqaa moo'aa mixummi bikkina massummo. Ee mu'utam i dukkaa'n woronne birooma hundiinsi woroon issaa uullanne waammaammo» yukko. Ee lasage Iyyaas mat qax manna asse'ukkaare ixxuwwim dukkaa'n beyyo geetta'a matta'a biroom woroonette ihaa mu'utoom waammammukkisam siiddo'o. Ixxuwwim eekka dukkaa'n woriinsi fissita'a Iyyaasii Isra'ee'l oosii hundim yoo beyyo eebba'a Waa'i illagenne dissito'o. Iyyaasii Isra'ee'l oosii hundim Akkaana, bira, worqa, kaabba, ixxeka goo'n ooso, landaa mirgo'uwwa, halla, gereebba, dukkaanaa ixxena yoo luwwaa hundam «Hawwi cebba» yakkam beyyo massito'o. Iyyaasim Akkaanina «Mahina neese u'nnissitto? Waa'im kaballa keese u'nnisooko» yukko. Isra'ee'l oos hundim Akkaana aphphissa'a shito'o. Ee lasage ixxi abaroosaa ixxena yoo luwwaa hundam kininne aphphissa'a giirinne shokkiisso'o. Ixxuwwim ixxi hanenne kaballi afeebe'e yoo lobakat kina tuubbo'o. Ee lasage Waa'i lobakat quunqiinsi daba'llukko. Ee bikkina ee beyyi summi kaballi afeebe'e «Hawwi cebba» yamamookko. Waa'im Iyyaasina «Badditittee muggitittee; gaadaan hundam kiinninne masse; Aay adila, minaadaba, beero'oomaa uulloomaa ki anganne higisaa uwwoommo. Kanniinsi illageen Yaarko'onnee Yaarko'i adilannee issittisam Aayannee Aay adilannee issitootto. Kaba ihukkaarem Aay beero'iinsi boggakkam amaxxaa fooraam diinatee ki'nnuwwi gagina massitakkamo. Beero'iinsi afareen gafannita'a qassam keen maaxamta'a egettamisa isse» yukko. Ee bikkina Iyyaasii gaadaanii hudim. Aay beero'o matteena ki'llo'o. Iyyaasim ee keeniinsi sad kum qoxalluwwaa malayyaammuwwi mannaa doo'llaa hiimonne asse'ukko. Iyyaasim ixxuwwina «Beero'iinsi afareen beero'ooma qassakkeena xantakkam beyyonne maaxamtakka'a guddakka'a egellehe bagaan beero'iinsi qee'llitakkotte. Anii iinninne maqire yoo minaadabii hundim beero'onne hincinoommo. Ka illageen inkummisam qasseena fittamaare ixxuwwiinsi gimboommo. Kanniinsi illageen gimbummisam ixxuwwa baddinaa gimbummoka labissa'a neese hollitam ammane beero'iinsi qee'lliteebe'i afeebe'e gimboommo. Ee ammane ki'nnuwwi moollanni Waa'i beero'ooma ki'nnuwwi anganne higisaa uwwoo bikkina maaxamtakko'i beyyiinsi fittakka'a beero'ooma amaddehe. Beero'o amaddakka'a lasage Waa'i ijaajukkisannem giirinne shokkiissehe. Waa'i yukkisannem issitakkamisina ku keen ki'nnuwwi issitakkona uwwummi ijaajo» yukko. Ee lasage Iyyaas ixxuwwa asse'ukkaare Aayenaa Beeteelinaa lambe'enne Aayena eelliinchi aagginne maaxamteena matto'o. Ihukkaarem Iyyaas ee hiimo minaadabinne maqirem garukko. Iyyaas la'm ayyaamo soodaraar daram ki'aa gaadaano weeshaa wixxaa'ukko. Ixxii Isra'ee'l awwonsaanii gaadaano awwonsita'a. Aay beero'o matto'o. Ixxenne maqire hee'llo'i gaadaan hanaa'n qarinne ixxuwwinaa Aayenaa lambe'enne yoo cabbanne wixxito'o. Iyyaasim onti kuma ihoo manna doo'llaa Beeteelinaa Aayenaa lambe'enne Aay beero'iinsi eelliinchi aagginne gafannitamisa issukko. Gaadaanim ee beero'iinsi hanaa'n qarinnee eelliinchi aagginnee maaxamta'a afuutto'i gogotinne maqirem mat ikka'a qasseena hundam luwwam gudisso'o Iyyaasim ee hiimo cebbanne garukko. Aay beero'i adiim Iyyaasoo Iyyaas gogotaa moo'u ammanenne ixxii ixxi gogotii hundim Isra'eela qasseena gudda'a soodaraar daram Yoordaanoos Daajji gadanonne yoo cebbi lallabo qaqqissa'a matto'o. Ihukkaarem ee beero'iinsi afareen maaxamto'i gaadaan yo'isa laqqo'oyyo. Iyyaasii Isra'ee'l minaadabii hundim kaa'amto'an ikka'a ixxuwwi illagiinsi udma'i uulli kolli gibbo'o. Ee bikkina beero'onne yoo manni hundim ixxuwwa holliteena weeccanta'a mat ikko'o Ixxuwwim Iyyaaso hollitu'uuyyi beero'iinsi qee'llito'o. Aayiinsi Beeteeliinsi Isra'eela holleena firubee'i manchi hee'ukkoyyo. beero'i ooxxi gooc fooqukkisam utta'a Isra'eela hollito'o. Waa'im Iyyaasina «Aaya ki anganne higisaa uwwummi bikkina ki anganne amadditti bagado ee beero'i kollonne dabare» yukko. Iyyaasim ixxi anganne yoo bagado ee kollonne dabarukko. Iyyaas eekka issu ammanenne gafannita'a hee'llo'i Isra'ee'l gaadaan maaxamto'i beyyiinsi qaqqissa'a fitta'a beero'ooma qeefadda'a ee ammanem giirinne shokkisso'o. Aay beero'i mannim laso daba'llita'a moo'llo'i ammanenne beero'iinsi wiriir iim hooraa firam hee'ukko; udma'i uulla gibbam hee'llo'i Isra'ee'l oos ixxuwwa hollitam hee'llo'i Aay manni kollonne daba'llito'i bikkina gibba'a xottam goog hore'em hee'ukkoyyo. Iyyaasii Isra'ee'l minaadabii hundim beero'iinsi afareen maaxamta'a hee'llo'i keen beero'ooma amaddo'isaa shokkisso'isaa moo'llo'i ammanenne laso daba'llita'a Aay beero'i manna shito'o Beero'o amadda'a hee'llo'i Isra'ee'l oosim ixxuwwi hanenne waatto'i Isra'ee'l oos hundi kollinnem ixxuwwa kibbita'a matim xoroo'n shito'o. Ihukkaarem Aay adila shitoo'nnim Iyyaas beyyo wotto'o. Isra'ee'l ooso holliteena matto'i Aay beero'i manna hundam udma'i biiranne bisa'inne guullita'a shita'a lasage daba'llita'a Aay beero'onne gatu keen hundam bisa'inne shito'o. Ee balla leto'i Aay beero'i mannik goonnekii meentikii xig tommoo lam kumaa hee'ukko. Iyyaas Aay beero'onne hee'u manni hundam guullaa bi'iseebe'i afeebe'e qaseena bagado ki'isu anga dabarukkoyyo. Waa'i Iyyaas ijaaju saga'llisannem Isra'ee'l oos ee beero'i fooraam diinatee mulli amaxxaa hundam ixxuwwi gagina qeefadda'a mossito'o. Iyyaasim Aay beero'o shokkisaa kaballi afeebe'e yo'isam dolli hundinam udma'i uulli ihoo'isa issukko. Aay beero'i adilam haqqanne saqalaa leesh uulli hiineebe'i afeebe'e calcaloo'isa issukko. Eelliinchi aagoo ammanenne Iyyaas ijaaju manni leesha haqqiinsi dilliissa'a beero'o aagakkam qash goocanne ubusso'o. Kaballi afeebe'e yoo lobakat kinam ee leesh hanenne tuubbo'o. Ee lasage Iyyaas Geebaa'l Duunanne Isra'ee'l Moollanni Waa'ina kitima hincaa'akkam beyyo axisukko. Waa'ina awwaadaanchi Muse'e Isra'ee'l ooso ijaajukkisanne Muse'i See'l kitaabanne kitaabamukkisanne kitima hincaa'akko'i beyyom axisamukkok cabbaramubee'aanniinsettee xaar nakkubee'i kiniinsettee hee'ukko. Ee beyyonnem shokkoo kitimaa maateeyyoo'm kitimaa Waa'ina hincaa'llo'o. Isra'ee'l oos moo'llonam Iyyaas ee kaasu kinneewwanne Muse'e kitaabu Seera kitaabukko. Ee ammane Waa'ina awwaadaanchi Muse'e Isra'ee'l minaadab maasse'antamisina gaassaa ijaajukkisannem Isra'eel hundichchim lommannii gaaxxi awwonsaanii oogattam keenii ixxuwwi lambe'enne hee'llam waaraanii Leewi'i oos hee'llo'i qeessuwwi iyyito'i Waa'i Hidi'l Saga'l Saaxi'n illagenne qeddi kollinnee makki kollinnee uullita'a hee'llo'o; ixxuwwim kollii Gariizaa'n Duu'n kollonne kollii Geebaa'l duu'n kollonne afare dabatta'a uullito'o. Ee lasage Iyyaas sagara iimaa'aa see'l kitaabanne maassi bikkinaa duunchi bikkinaa kitaabamu seer hundam qananaa'ukko. Muse'e ijaajukkaannika Iyyaas mat sagaram gatisoo'n Isra'ee'llek meenti, ciilluwwii lambe'enne yoo waraanii wixxito'i wixxixxi beyyonne qananaa'ukko. Yoordaanoosiinsi eelliinchi agoo kollinne hansawwannee qaala'annee Meedeteraaniyaa'n Dambalaq tochchonne hanaa'n qarinnem Liibaanoos Duun afeebe'e hee'llo'i Keexe'ik, Amore'ik, Kana'aannek, Feerze'ik, Hiiwwe'ikii Yaabusikii adilluwwi hundim Isra'eel kaa'ukkisa maccesso'o. Ee lasage oo keen hundim Iyyaasoo Isra'eelaa qasseena mat ikka'a wixxito'o. Hiiwe'i shumo'insette hee'llo'i Gaba'oo'n manni ihukkaarem Iyyaas Yaarko'onnee Aayannee issukkoka macceesso'i ammanenne Iyyaaso qawwissam baxo baxxo'o. Ixxuwwim googina hasisoo hurbaata gudissa'a ixxuwwi hallannem moosir jooniyyaa ka illageenim awwaado uwwaa dereerammukkaare qaafunta edakko'oo woyi'n diqaasa issakkam ebeer canaa iyyiisso'o. Ixxuwwi lokkonnem ka illageenim issakka'a beeddukkaare gobakko'oo barbaasso'o issita'a moosir eddechcha edde'llo'o. Amaddo'i hurbaatim gogaakkoohanee buuhaakkoo qorosho'oo hee'ukko. Ee lasage Iyyaas yoo beyyo Gelgala matta'a ixxenaa Isra'ee'l minaadabinaa «Neese qee'l uulliinsi waallummok ki'nnuwwinne maqire xumminne hee'nneena xansiisoo hidiro aangeenatte» yito'o. Ihukkaarem Isra'ee'l minaadab hiiwwe'i mannina «Ayyi la'ukko ki'nnuwwi yoontakke'i beyyi niina abbis ihaakkoohaare ki'nnuwwinne maqire hinkid hidiro aangeena xannoommo» yito'o. Ixxuwwim Iyyaasina «Neese ki awwaadaano» yito'o. Iyyaasim ixxuwwina «Ki'nnuwwoom ayyayyaamo? Wattakko'okim hanniinsette?» yaa xa'mmukko. Ixxuwwim Iyyaasina «Neese ki awwaadaan waallummok lobakata qee'l ulliinsette; mashka'oomim ki'nnuwwi Moollanni Waa'i ki'nnuwwina hara'mmimminne Gibxanne issukkoka macceensaammo. Ee'isam Yoordaanoos daajjinsi eelliinchi firinne hee'llo'i lamem Amoore'i adilluwwannem Haseeboo'n adillanne Siihoonannee Ashtaarootanne hee'u Baashaa'n adilanne Oogannee issu luwwi hundam macceensaammo. Ni awwonsaanii ni lambe'enne yoo minaadabii hundim googina hurbaata amandaa ki'nnuwwinne exxinona asse'llo'ookko; neesem ki'nnuwwina awwaadaan inkoommisinaa ki'nnuwwii neesee xumminne hee'nnoomisinaa issoo hidita'n sagara aaggakkona xa'mminoommisina ijaajjo'ookko. Ku googina amandummi qorosho'i ki'nnuwwi beyyo waalleena ki'nnummi ammane iibaalli hee'ukko; ihukkaarem kaba gogaakkoo'isaa buuhaakkoo'isaa moo'llehe. Ku woyi'n diqaas canneewwim wonshinnummi ammane haareelli hee'ukko; ihukkaarem kaba dereeraamaakkoo'isa moo'llehe; goog lobakata qee'llimmiinsi ki'ukkok edde'nnummi eddeechchii issaqqinnummi barbaasso'ii beedaakko» yito'o. Ee bikkina Isra'ee'l minaadab Waa'a xa'mmitoo'nnim ee manni hurbaatiinsi aa'llo'o. Iyyaasim ixxuwwinne maqire xumminne hee'immina hidi'l sagara aagukko. Isra'ee'l minaadaphphi awwonsaanim ee hidi'l sagara egetteena hide'llo'o. Ixxuwwinne maqire hidiro aaggo'i saxxi balli lasage oo manni ixxuwwina hincitenne hee'llam olla'i manni ikko'isa Isra'ee'l oos laqqo'o. Ee bikkina Isra'ee'l oos Gaba'oo'n minaadab hee'llam hee'llo'i beero'uwwa matta'a saxxi ballina affo'o. Ixxuwwi beero'uwwim Kaafira, Bi'erootaa Qiiriyaat Yi'aariimaa hee'ukko. Isra'ee'l minaadaphphi awwonsaanim Isra'ee'l Moollanni Waa'i summinne hide'lla'a hee'llo'i bikkina Isra'ee'l oos ee manna shiteen xanto'oyyo. Ee bikkina Isra'ee'l minaadab hundim awwonsaanonne quunquunto'o. Ihukkaarem awwonnsaan hundim Isra'ee'l minaadabina «Isra'ee'l Moollanni Waa'i summinne hide'nnummi bikkina ixxuwwa nakkim hasisooyyo. Neese hide'nnummi hidi'l sagara gindinumlas Waa'i quunqi neesenne dilloo bikkina hee'llona» yito'o. Odim awwonsaan edda'a «Ixxuwwi hee'llona ullehe; ihukkaarem Isra'ee'l minaadab hundinam haqqa iiqqam keenoo wo'o eebbam keenoo ikkona» yito'o. Iyyaasim Gaba'oo'n manna weeshaa «Ki'nnuwwi niina hincit beyyonne hee'llakku'uuyyi «Ki'nnuwwiinsi lobakata qee'l uullanne hee'nnoommi keeno› yitakka'a neese qawwiissakko'ok mahinatte? Ee bikkina kaba ki'nnuwwi duumaantakko'oo keeno; ki'nnuwwi Moollanni Waa'i minnina agid ikkakka'a hundi ammanem haqqa iiqqakku'uuyyaa wo'o eebbakku'uuyyaa hee'llakkamo» yukko. Ixxuwwim Iyyaasina dabata'a «Ki'nnuwwi Moollanni Waa'i uullooma hundam ki'nnuwwina uwweenaa uulloomanne yoo keeno hundam ki'nnuwwi illagiinsi bi'iseenaa ixxi awwaadaanchi Muse'e ijaajukkisa neese ki agid macceensaammo. Eehanniinsi ki'ukkaanninne ni foo'l bikkina ki'nnuwwa baddinaa eekka issinaammo. Kabaden neese ki anganne yoomminne'i bikkina eroka labaa moo'amukkoka hundam neesenne isse» yito'o. Ee bikkina Iyyaas ee balla Gaba'oo'n manna Isra'ee'l oos angiinsi shitambee'isa gatisukko. Ihukkaarem Iyyaas ee balla Gaba'oo'n manni Isra'ee'l minaadabinaa Waa'inaa kitima hincaa'akkam beyyina haqqa iiqqam keenoo wo'o eebbam keenoo issukko. Kaballi afeebe'em Waa'i ixxena otossakkamisina doo'llu beyyonne eekka issitamuulla. Iyyaas Aay beero'o amadukkisaa gullaa bi'isukkisaa Yaarko'onnee Iyyaarko'i adilannee issukkoka Aayannee Aay adilannee issukkisaa Gaba'oo'n mannim Isra'eelinne maqire hee'immina iittanto'isaa ixxuwwi lambe'ennem yo'isaa Yerusaalee'm adil Adoonixeedeeq maccesukko. Gaba'oo'n beero'im adilluwwi hee'oo beero'uwwiinsi mat lob beero'isa hee'u bikkinaa Aay beero'iinsim lophphoo bikkinaa mannim malaayyaammuwwi ikko'i bikkinaa Adooniixeedeeqii ixxi minaadabii lobakata baddito'o. Ku ontem Amoore'i adilluwwim Yerusaalee'mmek, Keebroo'nnek, Eegiloo'nnek, Yaarmuuxxekii Laakishikii ixxuwwi googttuwwinne maqirem wixxita'a fitta'a Gaba'oo'n manna qasimmina kibbito'o. Gaba'oo'n mannim Gelgalanne Iyyaas wiiddanaa yoo beeyyo manna assee'lla'a «Dassoo'n waattaa niina ki awwaadaano qaqqissaa hara'mme; mashka'oomim duu'n uullanne hee'llam Amoore'i adilluwwi wixxita'a ni beeyyo watto'ookk. Ee bikkina ni beyyo waataa neesem gatisee» yito'o. Ee bikkina Iyyaasii ixxenne maqire hee'llo'i gaadaanii ee'isam doo'llanto'oo geedduwwii hundim Geligeliinsi fitto'o. Waa'im Iyyaasina «Ixxuwwa ki anganne higisaa uwwaammoo bikkina baddititte; ixxuwwiinsi mat manchim kiinninne uullixxamookkok bee'e yukko. Iyyaasim Gaadaaninne maqirem Geligeliinsi Gaba'oon afeebe'e hiimo hundoomam taakke'aa dangonne ixxiwwanne ubukko. Waa'im Isra'ee'l gaadaa'n illagenne ee Amoore'i gaadaano lobakata muggitami'isa issukko. Isra'eelim ixxuwwikka Gaba'oonanne shito'i qaxa shita'a hollitu'uuyyi Azeeqannee Maqeedannee afeebe'e qasso'o. Ixxuwwimmi Isra'ee'l gaadaaniinsi Beetihoorooninne dillita'a Azeeqanne afeebe'e gibbu'uuyyi kini'nnoo'i geejji geejji barada iimaniinsi ixxuwwanne Waa'i ubbuusukkaare leto'o. Isra'ee'l oos bisa'inne shito'i keeniinsi baradinne leto'i keen lophphito'o. Waa'i Amoore'i manna Isra'ee'l anganne higisaa uwwu balla Iyyaas Isra'ee'l illagenne Waa'ina «Eelliinchi aagoobee'isa Gaba'oonanne uullona; aganim Ayaaloo'n cebbanne uullona» yukko. Ee bikkina Isra'ee'l minaadab ixxuwwi diina'a kaa'lleebe'i afeebe'e eelliinchi uullukko. Aganim yoo beyyiinsi mikimikukkoyyo. Eelliinchi mat balli hundomam aagoo'n iima'n lambee'enne uulukko; kukim Yaashaar kitaabanne kitaabamaa siidamookko. Waa'i ee ballisa mannika sagara maccesu balli eehanniinsi illageenim ihuta'n lasageen hore'em hee'ukkoyyo; mashka'oomim Waa'i Isra'eelina hara'mmaa oramam hee'ukko. Ee lasage Iyyaasii ixxenne maqire hee'llo'i Isra'eelii hundim ilageen hee'llo'i Gelgala daba'llito'o. Oo ontem Adilluwwim gibba'a Maaqeeda yakkam beero'onne yoo daawwa'anne maaxamto'o. Iyyaasinam «Ontem Adilluwwim Maaqeed daawwa'anne maaxamto'i beyyonne siidanto'ookko» yakka'a kurakko'o. Iyyaasim «Ee daawwa'i suumenne geejji geejji kinnewwa onkoroollissakka'a ifiissehe ixxuwwa egeeroo mannam ee beyyonne dissehe. Ihukkaarem ki'nnuwwi diina'a losonne aaggakka'a hollitallu'uuyyi shi'llehe bagaan dasakkotte. Ki'nnuwwi Moollanni Waa'i ixxuwwa ki'nnuwwi anganne higisaa uuwwaakko bikkina ki'nnuwwi diina'i ixxuwwi beero'o aaggambee'isa hollehe» yukko. Isra'ee'l diina'iinsi hoffi qaxim xotta'a kininne girbamaakkoo ixxuwwi beero'uwwanne maaxamta'a gatto'aarem Iyyaasii Isra'ee'l mannii ixxuwwi diina'a bi'iseebee'i afeebe'e dutta'a guullito'o. Ee lasage minaadab hundim Iyyaas wiiddanaa hee'u Maqeeda xummam daba'llito'o. Isra'ee'l minaadabinne mat sagaram iggaa wocookkok ayyim hee'ukkoyyo. Ee lasage Iyyaasim «Daawwa'ika suume fooqaa'llakka'a ee ontem Adilluwwam ee daawwa'iinsi fissitakka'a i beyyo eebbehe» yukko. Ee bikkina ixxuwwim ontem Adilluwwam Yarusalee'mmeka, Keebroo'nneka, Yarmuuxxeka, Laakiishikaa Eegloo'nnekaa daawwa'iinsi fissita'a Iyyaas beyyo eebbo'o. Ee Adilluwwa ixxi beyyo fissita'a eebbo'i ammanenne Iyyaas Isra'ee'l manni hundam ixxi beyyo weeshukko. Oo adilluwwi ubbamisa issaa ixxenne maqire maru gaaxxi awwonsaanina «Kid hincitakka'a ka adilluwwi gaanjenne ki'nnuwwi lokko issehe» yukko. Ixxuwwim hincita'a eekee'n gaanjenne ixxuwwi lokko issito'o. Iyyaasim «Qassakkam ki'nnuwwi diina'anne hundannem Waa'i ee'isa issoo bikkina badditakkotte; muggitakkotte; qoxxehe» yukko. Ee lasage ee ontem adilluwwam aphphissa'a shito'o; ixxuwwi leesham onti haqqanne saqalto'o; hiim afeebe'e ixxuwwik leesh haqqanne saqalamaa hosukko. Eeliinchi aageena ihaakkoohaannonne ee adilliwwika leesha saqalakko'i haqqiinsi dilliisakka'a ixuwwi maaxamta'a hee'llo'i daawwa'anne uunjakkona ijaajukko; geejji geejji kinneewwa onkoroollisakka'a ee daawwa'i suume ifiisakko'o; kaballi afeebe'em ifiisamukkisam yookko. Ee balla Iyyaas Maqeeda amadukko; adilam bisa'inne shukko; ee beero'onne hee'u manna hundam matim gatoobee'isa shaa guullukko. Maqeed adilanne issukkisam Iyyaarko'i adilannem issukko. Ee lasage Iyyaasii ixxi gogotii Maqeediinsi matta'a Libina qasso'o. Waa'im Libinaa ixxuwwi adilaa Isra'eel kaa'oo'isa issukko; Iyyaasim ixxuwwi beero'oo ee beero'onne yoo mannaa hundam guullukko. Iyyaarko'i adila issukkisa Libi'n adilam issukko. Iyyaasii ixxenne maqire hee'llo'i Isra'eelii Libiniinsi Laakiiso'o higgo'o; kibbita'ahim qasso'o. Waa'im or asheeramu la'm ballanne Isra'eel Laakiisha kaa'oo'isa issukko. Libinanne issito'isam ee beero'onne hee'u manna hundam bisa'inne guullito'o. Ee ammane Geezeer adil Hooraam Laakiisha hara'mmeena waaraa hee'ukko. Laakiishina hara'mmeena waaraa hee'ukko; ihukkaarem Iyyaas ixxoo ixxi gogotaa matim gatoobee'isa guullukko. Ee lasage Iyyaasii ixxi gogotii Laakiishiinsi Eegiloona gaadda'a kibbita'a qasso'o. Ee balla ee beero'o amaddo'o; bisa'innem aphphisso'o; Laakiish beero'onne issito'isam ee beero'onne hee'u manna hundam shita'a guulliito'o. Ee lasage Iyyaasii ixxi gogotii Eegilooniinsi fitta'a Keebroona qasso'o. Ee beero'o aagga'a adila, ee hegeegonnee hax uulli beero'uwwannee yoo keeno hundam shito'o. Iyyaasim Eegiloonanne issukkisam oo beero'i bi'oo'isa issukko. Ee beero'onne foorinne gatukkok matim hee'ukkoyyo. Ee lasage Iyyaasii ixxi gogotii odim dabiira gaadda'a qasso'o. Adilaa ee beero'uwwaa hundam amaddo'o; ee beero'uwwi minaadabam bisa'inne guullito'o; Keebroonanne, Libinannee ixxuwwi adilluwwannee issito'isam Doobiirannem mat manchim gatoobee'isa guullito'o. Ee'isinne Iyyaas ee uulla hundam, duu'n uulla, Neegeeba, duunnuwwaa adilluwwaa hundam amadukko; Isra'ee'l Moollanni Waa'i ijaajukkisannem hundam guullukko bagaan mat manchom gatisukkoyyo. Iyyaasim Qaadees Barne'iinsi ki'isaa Gaaza'i afeebe'e Gooshee'n hegeegom edaa Gaba'oon afeebe'e qasaa kaa'ukko. Iyyaas ee adilluwwaa ixxuwwi gassi uullaa hundam mexxo'aa'lle gaadaa kaa'ukkok Isra'ee'l Moollanni Waa'i ixxuwwina oramu bikkinatte. Ee lasage Iyyaasii ixxi gogotii Gelgelanne hee'u wiidda'n beyyo daba'llito'o. Hasoo'l adil Yaabine Isra'eel kaa'llo'isa Macceesu ammanenne Maadoo'n adi'l Yoobaab beyyo, Shiimiroo'n adi'l beyyo, Akshaaf adi'l beyyoo Hanaa'n qarinne yoo duu'n uullannee Galii'l Dambalaqiinsi woroo'n qaranne Yoordaanoos cebbanne yoo qaala'annee duunnuwwiinsi woroon yoo Door beero'i gadanonnee Meedeteraaniyaa'n tochchonne hee'llam adilluwwi beyyoo asse'ukko. Odim Yoordaanoos Daajjiinsi eelliinchi firinnee aagoo kollinnee yoo Kana'aa'n adi'l beyyo, Keexe'i adi'l beyyo, Hiite'i adi'l beyyo, Farze'i adi'l beyyo, duu'n uullanne yoo Iyyaabuus adi'l beyyoo Armoo'n Duuniinsi woroon Misiphphanne yoo Hiiwe'i adi'l beyyoo asse'ukko. Oo keenim ixxuwwi gaadaaninne hundinnem lobakat gogot ikka'a faradinnee faraxxi gaarre'innee fitto'o. Oo gogotim xigakka'a xanakkambee'i wo'i woro'l shashsha'llisa lobakat hee'ukko. Oo adilluwwi hundim malaayye mat issita'a Isra'eela qasimmina Meeroo'm Wo'i gadanonne wixxito'o. Waa'im Iyyaasina «Soodo kido'i ammanenne ixxuwwa hundam leeshisa issaa Isra'ee'l anganne higisaa uwwoommi bikkina baddititte. Atim ixxuwwi faraxxekam mogole'i nigga muttootto; faraxxi gaarre'uwwam giirinne shokkiissootto» yukko. Ee bikkina Iyyaasii ixxenne maqire hee'llo'i gaadaanii hundim dangonnem Meeroo'm Wo'i beyyo waatta'a ixxuwwinne ubbo'o. Waa'im Isra'ee'l anganne ixxuwwa higisaa uwwu bikkina Isra'eel ixxuwwa kaa'llo'i hanaa'n qarinnem lob Siidoo'n beero'oo Misirafootaa Mayyimaa afeebe'e eelliinchi firinnem Misiphphi cebbanne afeebe'e hollitu'uuyyi matom gatissoo'n shito'o. Iyyaasim Waa'i ijaajukkisannem faraxxeka mogolle'i nigga murukko. Faraxxi gaarre'uwwam giirinne shokkiisukko. Ee ammanem Iyyaas laso daba'llaa Hasoo'l beero'o ammadukko. Hasoo'l adilam bisa'inne shukko. Hasoor hundiinsim malaayyaam beero'i hee'ukko. Ixxuwwim ee beero'onne yoo luwwi hundam bisa'inne guullita'a shito'i bikkina foor yoo luwwik ma'llichchim gatukkoyyo. Beero'oomam giirinne shokkiisso'o. Waa'ina awwaadaanchi Muse'e ijaajukkisannem Iyyaas ee adilluwwi beero'uwwaa ee beero'uwwi adilluwwa hundam amadaa qare'aal bisa'inne matim gatoobee'isa aphphisaa bi'isukko. Isra'eelim Iyyaas shokkiisu Hasoo'l beero'iinsi bagaan duunnuwwanne hee'u beero'uwwika matom shokkiisso'oyyo. Isra'eel Iyyaas shokkiisu Hasoo'l beero'uwwika awwaadoo mu'uttuwwaa fooraam diinatee ixxuwwi gagina bogga'a massito'o; ihukkaarem manni hundam matom gatissoo'n bisa'inne shita'a guullito'o. Waa'i ixxena awwaadaanchi Muse'e ijaajukkisam ee'isam Muse'e Iyyaaso ijaajukko. Waa'i Muse'e ijaaju jjaacceka ma'llichchom gatisoo'n Iyyaas hundam guullaa issukko. Iyyaas duu'n uulla duuniinsi woroon hanaa'n qarannee woroo'n qarannee yoo uula, Yoordaanoos cebbi uulla, Gooshee'm ullaa Goosheemiinsi woroo'n qaranne yoo udma'i uullaa hundam amadukko. Gaba'oonanne hee'llo'i hooffi qax Hiiwwe'i manniinsi bagaan Isra'ee'l minaadabinne iitanta'a hee'lleena hasso'i beero'i manni matichchim bee'e. Isra'ee'l mulli beero'uwwi hundam qasanchinne kaa'lla'a amaddo'o. Waa'i Muse'e ijaajukisannem Isra'ee'l minaadab matem qishixatambee'isa guullita'a bi'isamisina ee beero'uwwanne hee'llam minaadab Isra'eelinne orantona Waa'i ixxuwwikka wodano qoxxisukko. Ee ammanenne Iyyaas maraa hundem duu'n uulliinsim Keebirooniinsi, Dabiiriinsi, Anaabiinsii ee'isam Yihudannee Isra'eelannee yoo duunaam uullanne hundannem hee'llam Anaaq ooso ixxuwwi beero'uwwannem bi'isukko. Anaaq oosik Gaaza'annee Gaatannee Ashdoodannee hofqaxim gatukko bagaan Isra'ee'l uullanne matim gatukkoyyo. Waa'i Muse'ena kurukkisannem Iyyaas uullooma hundam amadukko. Iyyaasim Isra'ee'l minaadab hundim uullooma lago aa'llona sullinne sullinnem baxansaa uwwukko. Ee lasage Isra'ee'l minaadab qasanchiinsi usheexxito'o. Isra'ee'l minaadab illageen Yoordaanoos Daajjiinsi eelliinchi firinne yoo uulla qasanchinne kaa'lla'a amadda'a hee'llo'o; oo amaddo'i uulli hundim Arnoo'n Cebbiinsi ki'isaa Yoordaanoos cebbiinsi eelliinchi firoo kollonne yoo uulla hundam edaa handd'n qarinne Hermoon Duun afeebe'e hee'ukko. Ee uulli hundam gassitam hee'llo'o lam adilluwwi hee'llo'o. Ee adilluwwoomikim mat Haseboonanne ihaa gassoo Amoore'i manni adil Siihoonatte hee'ukko. Ixxi gassam hee'u uullim Arnoo'n Cebbi gadononne yoo Aro'eeriinsii ee cebbi lambe'enne yoo beero'iinsii ki'isaa Gala'aaxxi uullika kollo edaa Amoo'n Mannina gabal hee'u Yaabooq Daajji afeebe'e hee'ukko. Odim Galii'l Dambalaqiinsi ki'isaa Yoordaanoos Cebba edaa woroo'n Sooqixxi Dambalaqiinsii eelliinchi firinne Beetiyaashiimoot afeebe'e piisigaa Duuniinsi woroo'n qariinne yoo uulli hundam edaa gassam hee'ukko. Odim Isra'ee'l minaadab Iraafaay moolliinsi lasaanchonne gataa hee'u Baasaa'n adil Ooga kaa'llo'o. Ixxim Ashitaarotannee Ediira'annee hee'oohan hee'ukko. Oogim Hermoo'n duuna, Saalkaanaa Gashurinaa Maa'ikatinaa gabal afeebe'e yoo Baasaa'n uullaa Haseboo'n adil shiihoon gassam hee'u uulli gabal afeebe'e Gala'aaxxi uullika kollo edaa gassan hee'ukko. Waa'ina awwaadaanchi Muse'ee Isra'ee'l minaadaabii ee lamem adilluwwam kaa'llo'o. Muse'em uullooma Roobeel sullina, Gaad sullinaa Minaas sulliinsim kollinaa ee uulla gulummi issaa uwwukko. Iyyaasii Isra'ee'l minaadabii kaa'llo'i adilluwwi uulli Yoordaanoos Dajjiinsi eelliinchi aagginne Liibaanoos cebbanne yoo Ba'aalgaadiinsi ki'isaa woroo'n qarinne Eedoo'm uulli gadanonne yoo Halaaq Duun afeebe'e yoohan hee'ukko. Iyyaasim ee uulla hundam Isra'ee'l minaadabina sullinne sullinne lago aa'llona uwwukko. Oo a'llito'i uullim duu'n uulla, eelliinchi aagginne yoo duuniinsi woroon yoo uulla, Yoordaanoos cebbanne yoo duunnuwwi magara, eelliinchi firinne yoo beqeraam uullaa woroo'n qarinnem yoo udma'i uullaa hee'ukko. Ee uulli hundannem Hiite'ik, Amoore'ik, Faarze'ik, Hiiwe'ikii Iyyaabuus minaadabii hee'llam hee'llo'o. Isra'ee'l minaadab kaa'llo'i adilluwwim Iiyaarko'i adila, Beetee'l gadanonne yoo Aay adila, Yerusaalee'm adila, Keebiroo'n adila, Yarmuuxxi adila, Laakiish adila, Eegiloo'n adila, Geezee'l adila, Dabii'l adila, Geedee'l adila, Hormaa'i adila, Arulaa'm adila, Liibi'n adila, Adulaa'm adila, Maaqeexxi adila, Beetee'l adila, Taaphu'i adila, Heefee'l adila, Afeeq adila, Laashaaroo'n adila, Maadoo'n adila, Hoxoo'l adila, Shiimiro'imaaroo'n adila, Akishaaf adila, Taanaaq adila, Magiido'i adila, Qedeesh adila, Qarmeeloosanne hee'u Yooqinaa'm adila, Doora'i qoffitenne hee'u Door adila, Galgalanne Gooyi'm adilaa Tirza'i adilaa. Ee adilluwwoomikim xig sadee matoo hee'ukko. Iyyaasu, lobakata loma'nnitaatto. Ihukkaarem lobakat amadamiu'i bee'i uulli yookko. Gatukkokim Filisxee'm uulli hundanne, Gashuu'l uulli hundamee Gibxiinsi eelliinchi firinne yoo Shihoo'l daajjiinsi ki'isaa hanaa'n qarinne Eqiroo'n gabal afeebe'e yoo uullannee hundamem Kana'aa'n uullanne exxaa filisxee'm ontem gassaanim hee'llo'i beero'uwwa. Ookeenim Gaaza'a, Ashdooda, Asqaloona, Gaataa Eqiroonaa ihukkuuyyi woroo'n qarinnem Awiimaa yakkam uulli afeebe'e hee'ukko. Woroo'n qarinnem Kana'aa'n uulli hundaa Siidoo'n minaadaphphan hee'u Ma'aara'a edaa Amoore'i gabalanne yoo Aafeeq afeebe'e. Odim Geebaa'l manni uullaa eelliichchi firoo kollinnem Hermoo'n Duuniinsi woroo'n kollonne yoo Ba'aalgaadiinsi ki'isaa Haamaata aagakkam gooc afeebe'e yoo Liibaanoos uulli hundaa; Liibaanoosiinsi ki'isaa Miisiraafotimaayim afeebe'e duun uullanne hee'llam mannaa Siidoo'n minaadabaa hundam edaa Isra'ee'l oos illagiinsi holloommo. An keese ijaajummisannem uullooma hundam Isra'eelina lago aa'llona baxxanse. Ee uulloomam honsem sullinaa sulli kollinaa lago aa'llamisina baxxanse» yukko. Waa'ina awwaadaanchi Muse'e uwwukkisannem Minaas sullik kolli, Roobeel sullii Gaad sullii Yoordaanoos Daajji eeqidonne eelliinchi firinne yoo uulla lago aa'llo'o. Uulloomim Arnoo'n Cebbina tochchonne yoo beero'iinsi ki'isaa Medabaa'iinsi Diiboonanne afeebe'e yoo hansawwi uulli hundam edookko. Haseeboonannetti ihaa gassoo Amoore'i adil Siihoon beero'uwwa hundam edaa Amoo'n minaadaphphi uullinne gaba'llamookko. Ee'isam Gaala'aaxxekaa Gashuurikaa Maa'ikaa'n uullaa Heermoo'n Duunaa hundam edaa Baasaaniinsi ki'isaa Saalakaa afookko. Odim Raafaayim moolliinsi lasaanchi adil hee'u Oog Asitaarootannee Eediraya gassam hee'u Baa'sa'n uulla hundam edaakkatette. Muse'e ee minaadaba hundam kaa'aa hollukko. Ihukkaarem Isra'ee'l minaadab Gashuur minaadabaa Maa'ikaan minaadabaa hollitobee'i bikkina kaballi afeebe'em ixxuwwi Isra'ee'l minaadaphphi lambe'enne yo'o. Muse'e Leewi'i sullina uulli gulumma uwwukkoyyo; mashka'oomim Waa'i illagenne Muse'ena kurukkisannem Isra'ee'l Moollanni Waa'ina shokkao ihaa hincoo kitim Leewi'i sullina gulummi hee'ukko. Muse'em roobeel sullina moollinne moollinne uulla uwwukko. Ixxuwwi uulli gabaloomim Arinoo'n cebbi tochchonne yoo Aaro'eeriinsi ki'isaa ee cebbi lambe'enne yoo beero'oo Meediba'i gadanonne yoo duunanne yoo biir uullaa hundam edookko. Ee'isam Haseboona, duu'n biir uullanne yoo beero'uwwa Diiboona, Baamootba'ala, Beetiba'aalmina, Yaahaxa, Qademoota, Meefaa'aata, Qiiryaataayima, Siibaamaa, duu'n cebbanne yoo Xeretishaahaara, Beetipha'oora, Phiisga'i duuniinsi woroon yoo beqer uullaa Beetiyaashiimootaa hundam edookko. Duu'nnaanonne biir uullanne yoo beero'uwwaa Haseboonanne ihaa gassam hee'u Amoore'i adil Siihoon uulla hundamee hee'ukko. Muse'em adil Siihoona, ixxeensi woroon ikka'a gassitam ee uullanne afuutto'i Miidiyaa'm awwonsaan heello'i Eewwe'e, Reeqeema, Xuura, Huuraa Reeba'aa kaa'ukko. Isra'ee'l oos shito'i keeninne maqirem gennaanchi hee'u Bi'oor beet Bala'aama edda'a bisa'inne shito'o. Roobeel oos uulli gabal Yoordaanoos Daajji hee'ukko; Roobeel oosina moollinne moollinne uwwamu beero'uwwii hegeegguwwii eekeen hee'ukko. Odim Mse'e Gaad sulli lago aa'llona moollinne moollinne uulla uwwukko. Ixxuwwi uulli gabalim Yaa'izeeraa Gala'aaxxi beero'uwwi hundaa Amoo'n oos uullika kollo edaa Raabaa'iinsi eelliinchi firinne yoo Aaro'eera afookko. Odim Haseboniinsi ki'isaa Raamaat Misiphpaa Bixooniimaa afeebe'e ee'isam Maahinaayimiinsi ki'isaa Loodabeer tachcho afookko. Yoordaanoos ceebbannem Beetiharaamaa Beetiniimiraa sukotaa Tsafoonaa Yoordaanoos Daajjiinsi eelliinchi firinne yoo gatu Haseboo'n adil Siihoon gassoo uulla hundam edaa hanaa'n Qarinnem Galii'l Dambalaqa afookko. Gaad sulli lago aa'llamisina moollinne moollinne uwwamu beero'uwwii hegeegguwwii eekeen hee'ukko. Muse'e Minaasek kolli sulli lago aa'llamisina moollinne moollinne uwwu uulluwwi kakeeno. Ixxuwwi uullim Mahinaayimiinsi ki'isaa Baasaa'n adil Oog gassam hee'u Baasaan hundamee Baasaananne yoo Yaa'iir lohayyem beero'uwwaa hee'ukko. Gala'aaxxeka kolloo Oog gassoo uulli beero'uwwika Baasaananne yoo Asitaarootaa Eedira'aa edam hee'ukko. Oo keenim Minaas beet Maakii'l Oosaannina kollina moollinne moollinne uwwamukko. Muse'e Iyyaarko'iinsi eelliinchi firinne Yoordaanoos Daajjiinsi eeqidonne Moo'aaphphi biir uullanne hee'u ammane ee uulla hundam lago aa'llona baxxansukko. Ihukkaarem Muse'e Leewi'i sullina uulla uwwukkoyyo; mashka'oomim Waa'i ixxi gagim yukkisannem Isra'ee'l Moollanni Waa'i ixxi gagim yukkisannem Isra'ee'l Moollanni Waa'ina hincoo kitim ixxuwwina gulummi hee'ukko. Kana'aa'n uullanne Isra'ee'l oos ixxuwwi gagina lago aa'llo'i uulla qeessichchi Ali'aazar, Nawwe'i beet Iyyaasii Isra'ee'l sullina moolli awwonsaanii minaadabina baxxansito'i uulli kakeeno. Waa'i Muse'e ijaajukkannem ixxuwwi lago aa'llo'i uulla honsinaa kolli sullinaa saaminne baxxansito'o. Waa'i Muse'e ijaajukkisanne Isra'ee'l minaadab uulla baxxanto'o. Yihud oos Gelgalanne yoo Iyyaas beyyo waatto'o. Ixxuwwiinsim mat hee'u Qaniiz moolli Yaafun beet Kaaleeb Iyyaasina «Waa'i manchi hee'u Muse'i kollinne Qaadees Barne'enne Waa'i Kibikkina ibikkina wocu woshsha laqqootto. Waa'ina awwaadaanchi Muse'e uullooma shaashshoomisina Qaadees barne'iinsi asse'ummane i umur sor hiincho ihaa hee'ukko; anim hanqo'i woshsha kurummo. Ihukkaarem iinninne maqire matto'i iyyabbaayyuwwi minaadaphphi wodan baachchiine bukkamoo'isa issitoohan ihukkaarem i Moollanni Waa'a murte'aa awwonummo. Muse'em ee balla iina «Moollanni Waa murte'llaa awwoontaatoo bikkina ki lokki hance'u uulli hundam hanqinam kiinaa ki oosinaa heer heerina ki'nnuwwi gulummi uulli ihookko» yaa hide'ukko. Waa'i Muse'ena ee sagara wocaa lasage Isra'eel udma'i uullanne taakke'llu'uuyya Waa'i wocukkisannem ee soree onti hinchoo eese foorinne egerukko. Ihukkaarem kaba iikki umur sadeentayyee onti hinchoo ihaakko. Ihona bagaan Muse'e eese ass'u ammane malaayyaam hee'ummisam kabadem an malaayyaamo. I malaayyi ee ammane hee'ukkisam kaballam orameena, fireenaa aageenaa illagee'nnisam yookko. Ee bikkina Waa'i uwweena ee ammane wocu ka duu'n uulla kaba iina uwwe. Eekke'e hee'llo'i. Anaaq oosim hinkido'i keen hee'lloda'ee ixxuwwi beero'uwwim geejjuwwa lob keenoo girbamaakkoo keenoo ihukkisa at macceessaa hee'llitto. Ihukkaarem Waa'i iinninne maqire ihoo bikkina ixxi yukkisannem ixxuwwa holloommo» yukko. Ee lasage Iyyaas Yaafun beet Kaaleeba maase'ukko. Ixxenam Keebroona gulummi issaa a'lloo'isina uwwukko. Daniiz moolliinsi Yaafun beet Kaaleeb Isra'ee'l Moollanni Waa'a murte'aa awwonu bikkina Keebiroon kaballi afeebe'e Kaaleeb shumo'ina gulummi ihaakko. Keebiroonika summa gaassi Qiriyaat Arba'a yakkam hee'akko'o. Mashka'oomim Arba'a Anaaq manni hundiinsim loban hee'ukko. Ee lasage oo uulli qasanchiinsi usheexxukko. Yihuxxi sullina moollinne moollinne uwwamu uulli sharad Eedoo'm uulli afeebe'e dilloohan ihukkuuyyi woroo'n qarinne Xii'n udma'i uulla afookko. Ku woroo'n qarinne yoo ixxuwwi uulli gabalim sooqixxi Dambalaq woroo'n qar tochchiinsi ki'ookko. Ehanniinsim Aqiraabim higakkam woroo'n qarinne Xiina afookko. Qaadees Barinne'ina woroo'n qarinne Heesiroona higaa Adaar kolli iim shiqaa Qaarqa'i kolli daba'llookko. Axmoo'n kollinnem ihaa Gibxi gabalanne yoo Daajje higaa Meedeteraaniyaa'n Dambalaqanne afookko. Woroo'n qarinne yoo Yihuxxi gabal eehan hee'ukko. Eeliinchi firoo kollinne yoo gabal odim Sooqixxi Dambalaq ihukkuuyyi Yoordaanoos Daajji beeddoo tochcho afookko. Ee'isam hanaa'n qarinne yoo gabal Yoordaanoos Daajji beeddoo dambalaq tochchiinsi ki'isaa Beetihoogilanne iim hooraa Beeti'arabina hanaa'n qarinne higaa Roobeel beet Booha'n kin yoo beyyo afookko. Eehanniinsim gabaloom Aakoo'l cebbiinsi ki'isaa Daabiiranne iim firaa eecebbiinsim woroo'n qarinne Gelgeelanne daba'llookko. Ee'isam Enrhemeshi wo'o higaa Enirogeela afookko. Ee'isam Hiinoo'm beet cebbinne Iyyaabuus manni beero'i hee'u Yerusaaleemiinsi woroo'n qarinne iim firookko. Odim Iraafaayi'm cebbi hanaa'n qa'l kollinne higaa Heenoo'm cebbina eelliinchi aagginne yoo duu'n ludoone afookk. Ee duu'n ludiinsi ki'isaa Nefitto'i Daajjuwwa higaa Efiroo'n Duunanne yoo beero'uwwanne firookko. Ee hanniinsim Qiriyaat Yi'aariim yamamoo Ba'aala'i Beero'onne daba'llookko. Odim Ba'aala'iinsi eelliinchi aagginne Seeyiraa'i Duunanne daba'llaa Kisaaloona yamamoo Yi'aariim Duu'n hanaa'n qarinne higaa Beetishaamiis kollonne dillaa Tiiminaa'inne higookko. Eehanniinsim gabaloom Eeqirooniinsi hanaa'n qarinne duunanne iim firaa Shiikiroonanne daba'llaa Baal Duuna higaa Yaabini'eela afookko. Lasaanchi gabalim Meedeteraaniyaa'n Dambalaq hee'ukko. Eeliinchi aagoo kollinne yoo uulli gabal lob dambalaq tochchi afeebe'e ihukkuuyyi Yihuxxi minaadabina moolinne moollinne uwwamu uullina kululleetanne hee'u gaballuwwi kakeen hee'ukko. Waa'i Iyyaaso ijaajukkisannem Yihud oos lambe'enne Keebiroona yamamoo Qiriyaat Arba'i beero'o Yaafun beet Kaaleebina sharad issaa uwwukko. Arbaaq Anaaqina anni hee'ukko. Kaaleeb Anaaq oos shumo'o sasom Sheeshaayika Aahiimaanikaa Taaliimaayikaa ee beyyiinsi hollukko. Eeheenim Dabii'l minaadaba qaseena firukko. Ku Dabii'l beero'i illageen Qiriyaatiseefiraa yamamam hee'ukko. Kaaleebim «Qiriyaatiseefira qasaa amadoohaannina landichcho Adkaase uwwoommo» yukko. Ee bikkina Kaaleebina abbaayyi hee'u Qeenaaz beet Otooni'eel ee beyyo amadukko. Kaaleebim ixxi landichcho Otooni'elina ladiisukko. Aakkaasem Otooni'eelina ladiisanto'i balla is anniinsi uulla uunxoo'isina qoxxissa'a soggo'o. Isem hallichchiinsi dillito'isam Kaaleeb isena «Maha issona hassootto?» yukko. Isem irifo'o uwwe; Woroo'n qarinne yoo gogaalli uulla uwwitaa hee'llitto; kabadem eddaa wo'i bu'o uwwe» yito'o. Kaaleebim hanaa'n kolli bu'oo woroo'n kolli bu'oo uwwukko. Yihuxxi sullina moollinne moollinne uwwamu uulli kane. Ixxuwwim lago aa'llo'i beero'uwwim woroo'n qarinne Eedoo'm gaballina hincitenne yoo Qaabxi'eela, Edeera, Yaagura, Qiina, Diimoona, Aadi'aada, Qaadeesa, Haxoora, Yitinaana, Ziifa, Xeleema, Ba'aaloota, Haxoorhadaata, Haxoor yamamoo Qiiriiyaatiheesiroona, Amaama, Shamaa'a, Molaada, Haxoorgaada, Heshimoona, Betiphaaleexa, Haxoorishu'aala, Berisaabeeha, Biziyotiya, Ba'aala, Iiyuma, Axeema, Eelitolaada, Kasiila, Hoorima, Xiqilaaga, Maadimaana, Saanisaana, Libawoota, Shiilihiima, Aayininaa Kakee'nne hundikkim xig mat ihaa lamiyyee honsi beero'uwwaa ihukkuuyii ka beero'uwwi hegeegonne yoo hoffi beero'uwwa hundam edookko. Odim Qaala'anne yoo beero'uwwim; Eshitaa'oolaa Tsori'aa Ashinna Zaanobaa Engaaniimaa Taaphuha, Enaama, Yaarimuta, Adolaama, Sokoohaa Aazeqa, Shaa'iraayima, Adiitaayima, Gaderotaayimaa; kakeen hundikim xig mat ihaa tommoo soor beero'oo ihukkuuyyi ka beero'uwwi hegeegonne yoo hoffi beero'uwwa hundam edookko. Ee'isam Xinaana, Hadaasha, Miigdaalgaad, Diili'aana, Misiphpha, Yaqixi'eela, Laakiisha, Boxiqaata, Eegiloona, Kaaboona, Lahimaasa, Kiitiliisha, Gaderota, Beetidaagona, Naa'ima, Maqeda; Kakee'nne hundikim xig mat ihaa tommoo loh beero'oo ihukkuuyyi ka beero'uwwi hegeegonne yoo hoffi beero'uwwa hundam edookko. Kakeeninne maqire hee'u keen Liibina, Eteera, Aashaana, Yifitaha, Ashina, Naxiiba, Qa'iila, Akziibaa, Mareshaa; ka beero'uwwi hundikim xig mat ihaa honsi beero'i ihukkuuyyi ka beero'uwwi hegeegoonne yoo hoffi beero'uwwa hundam edookko. Eeqiroo'n beero'i kululleetanne hoffi beero'uwwi hegeegguwwi hee'ukko. Ashdood beero'i gadanonne Eeqirooniinsi ki'isaa Meedeteraaniyaa'n Dambalaqanne afeebe'e yoo beero'uwwii hegeegguwwii hee'ukko. Ee'isam Ashdood beero'uwwinnee hegeegguwwinnee Gaaza'im beero'uwwinnee hegeegguwwinnee Gibxi Daajjiinsi Meedeteraaniyaa'n Dambalaq tochchi afeebe'e hee'ukko. Odim duu'n uullane Shamiraa Yaatiraa Sokohaa Daanaa Dabiiraa yamamoo Diriyaaxefeeraa Anaaba, Eshitaamoo'a, Aniima, Goosheena, Holoonaa Giiloo yamamoo tommoo mat berooi'muwwi ihukkuuyyi ixxuwwi kululleetanne yoo hoffi beero'uwwam edoohane. Odim Araaba, Duuma, Eshi'aana, Yaanima, Beetitaaphuha, Afeeqa, Humixa, Keebiroona yamamoo Qiriyaat Arba'aa Xi'ooraa yamamoo honsi beero'uwwaa ihukkuuyyi ixxuwwi kululleetanne yoo hoffi beero'uwwam edoohane. Mulli keenim Maa'oona, Qarmeeloosa, Ziifa, Yuuxa, Yizra'eela, Yoqidi'aama, Zaanoha, Qaayina, Gibi'aa Taaminaa yamamoo tommi beero'uwwi ihukkuuyyi ixxuwwi kululleetanne yoo hoffi beero'uwwam edoohane. Ee'isam Halihula, Beetxuura, Gedoora, Ma'iraata, Beeti'aanootaa Eeltiqoonaa yamamoo loh beero'uwwi ihukkuuyyi ixxuwwi kululleetanne yoo hoffi beero'uwwam edoohane. Odim Qiiriyaatiyi'aarim yamamoo Qiriyaatbaa'aalaa Raabaa yamamoo lam beero'uwwi ihukkuuyyi ixxuwwi kululleetanne yoo hoffi beero'uwwam edoohane. Ee keeninne hundinnem udma'i uullanne yoo Beeti'araaba, Miidiina, Sekaaka, Niibishaana, Sooqixxi beero'oo Eengaadaa yamamoo loh beero'uwwi ihukkuuyyi ixxuwwi kululleetanne yoo hoffi beero'uwwam edoohane. Ihukkaarem Yihuxxi sulli Yerusaaleemanne hee'llo'i Iyyaabuus minaadaba holliteena xanto'oyyo; ee bikkina ixxuwwi kaballi afeebe'em Yihuxxi sullinne maqirem Yerusaaleemanne yo'o. Yooseef shumo'ina uwwamu uulli sharad Iyyaarko'ina gadanonne yoo Yoordaanoos Daajjiinsi ki'ookko; oohim Iyyaarko'i wo'i bu'uwwiinsi eelliinchi firinne udma'i uulla afookko. Odim Iyyaarko'iinsi ki'isaa duu'n uullinne Beeteelanne firookko. Looza yakkam Beeteeliinsi ki'isaa Arke'i manni hee'oo Axaaroot Adaar tochcho afookko. Eehanniinsim eelliinchi aagginne hee'llam Yaafileexe'i manni uullinne aa'aa woroo'n Beetihororoo'n uulla edaa Gezeeranne higaa Meedeteraaniyaa'n Dambalaqanne afookko. Yooseef shumo'i hee'llo'i Efireem sullii eelliinchi aagginne hee'llam Minaas sullik kollii ee uulla lago aa'llo'o. Efireem sullina moollinne moollinne uwwamu uulli sharad kanniinsi woroon yoohane; ixxuwwi uulli gabalim eelliinchi firinne Axaaroti'adariinsi ki'isaa Kanaa'n Betihorona afeebe'e firookko. Eehaniinsim ki'isaa Meedeteraaniyaa'n Dambalaqa afookko; odim hanaan yoo ixxuwwi uulli gabalim Miikimataatiinsi ki'isaa Ta'aanaat Shiilo'inne muquqaa eelliinchi firinne Yaanoha afookko. Yaanohiinsi ki'isaa Axarotannee Na'aratannee dillaa Iyyaarko'o afaa Yoordaanoos Daajje afookko. Oo gabalim Taaphuwiinsi eelliinchi aagginne Qaanaa Daajjenne afookko. Efireem sullina moollinne moollinne uwwamu uulli eehan hee'ukko. Oohim Minaas sullina uwwamu uullanne yoo beero'uwwikaa beero'uwwi hegeegguwwikaa mato edaa Efireem sullina uwwamukko. Efireem sulli Geezeeranne hee'llam Kana'aa'n manna hollito'i lambe'enne yo'o. He'llona bagaan ixxuwwi Efireem sullina malaayyi baxo baxxeena agid ikko'o. Minaas Yooseefina won hee'u bikkina ixxi shumo'ina uwwamu uulli sharad kane. Minaasena won beet maakiire Gala'aadina anni hee'ukko; ixxim qoxar gaadaanchi hee'u bikkina Yoordaanoosiinsi Eelliinchi firoo kollinne Gala'aadii Baasaanii ixxena uwwamukko. Odim Yoordaanoosiinsi eelliinchi aagginne yoo uulli gatto'i Minaas sullina moollinne moollinne uwwamukko; uwwamukkokim Abi'eezerina, Heleeqina, Asiri'eelina, Shekeemina, Hefeerinaa Shamiidaa'inattee ihukkuuyyi ixxuwwim awwonsaan hee'llo'o. Xalophahaad Hefeer beeto; Hefeer Gala'aad beeto; Gala'aad Maakiir beeto; Maakiir Minaas beeto; Xalophahaadina landiinsi bagaan goo'n oos hee'ukkoyyo. Ee landikim summi Maahilatte, Noo'atte, Hogilatte, Miilikattee Tiirxa'attee hee'ukko. Ixxuwwim qeessichchi Ali'aazar beyyoo Naawwe'i beet Iyyaas awwonssaa'n beyyoo hinchita'a «Niyabaayyuwwi lambe'enne niina uulla uwwoo'isaa Waa'i Muse'e isaajaakko» yito'o Ee bikkina Waa'i ijaajukkisannem Iyyaas ixxuwwina anni abayyuwwinne maqirem uullika sharada gulummi issaa uwwukko. Ee mashka'inne Minaasena Yoordaanoos eeqidonne yoo Gala'aadiinsii Baasaa'n Uulliinsi mulli tommi sharad exaa uwwamukko. Minaas landina goo'n lambe'enne uulli uwwamu bikkina Gala'aaxxi uulli gatu Minaas oosina uwwamukko. Minaas uullim Aseeriinsi ki'isaa Seekeemiinsi eelliinchi firinne yoo Miikmataata afookko. Gabaloomim woroo'n qarinne higaa Eentaaphu'ahane hee'llam mana edookko. Taaphuh uulli Minaasan hee'ukko; ihukkaarem Minaas uulli gabalanne yoo Taaphuh beero'i Efireem oosan ihukko. Eehanniinsim gabaloom Qaana Daajji afeebe'e dillookko. Ee daajjiinsim woroo'n qarinne hee'u Minaas beero'uwwi woronne Efireem beero'uwwim hee'ukko. Minaas uulli gabal Qaana Daajjiinsi hanaa'n qarinne aa'aa Meedeteraaniyaa'n Dambalaqanne afookko. Woroo'n qaranne yoo uulli Efireeman ihukkuuyyi hanaa'n qaranne yoo uulli Minaasan hee'ukko. Minaas uulli gabal Meedeteraaniyaa'n Dambalaq ihaa hanaa'n qarinne Aseeraa eelliinchi firinne Yisaakooraa afookko. Odim Minaas Yisaakoor uullinaa Aseer uullinaa lambe'enne yoo beero'uwwa Betishaanaa Yiibila'aamaa Doraa Door manaa, Andoraa Ando'l manaa, Taa'inaakaa Taa'inaak manaa, Magiidoonaa Magidoo'n manaa, hegeeuwwanne yoo hoffi beero'uwwinne maqirem a'llukko; saxxekkim Naafoot hee'ukko. Ihona bagaan Minaas oos ee beero'uwwanne hee'llam manna holliteena xanto'oyyo. Ee bikkina Kana'aa'n manni ee uullanne yo'o. Isra'ee'l minaadab malaayyinne qoxattu'uuyyi matto'i ammanenne Kana'aa'n manni malaayyi baxo baxxamisa issito'o bagaan hollito'oyyo. Yooseef shumo'im Iyyaasina «Waa'i neese maasse'aakkoo bikkina niina uullika mexxo'i mat sharadichcho mahina uwwitto» yito'o. Iyyaasim ixxuwwina «Xigonne lobakat ihimminne Efiree'm duu'n uulli ki'nnuwwina xuqqaakkoolas Faarize'i mannii Irafaay mannii hee'llam uullanne matakka'a haqqa bachchitakka'a uulla a'llehe» yukko. Ixxuwwim dabata'a «Duu'n uulli niina ihooyyo; biir uullanne Beexhaanannee Beexhaa'n hegeegonne yoo hoffi beero'uwwannee ee'isam Yizra'eel cebbannee hee'llam Kana'aa'n mannina Xaarinne baxamaakkoo Faraxxi gaarre'uwwi yookko» yiitto. Iyyaasim Yoseef shumo'i hee'llo'i Efireem sullinaa Yoordaanoosiinsi eelliinchi aagoo Kollinne yo'i Minaas sullinaa «Ki'nnuwwi xigonne lobakataa malaayyaammuwwaa ikkakko'i bikkina mexxo'i mat sharad ihim hasisooyyo. Ee bikkina duu'n uulli ki'nnuwwina ihookko. Kana'aa'n munninna xaariinne baxamu faraax gaarre'uwwim maham hee'uta'mimii malayyaammuwwi ikkota'annimii ixxuwwa ee beyyiinsi fissitakka'a hollitakeena xantakkamo» yukko. Isra'ee'l minaadab kaa'lla'a ee uulla amadda'a lasage Seello'onne wixxita'a Waa'ina otossakkam dukkaana kaasso'o. Isra'ee'l minaadabiinsi uulla amaddobee'i lamar sulli hee'llo'o. Ee bikkina Iyyaas Isra'ee'l minaadabina «Gaassi ki'nnuwwi anno'i Moollanni Waa'i ki'nnuwwina uwwu uulla aaggakka'a lago aa'lloo'n afuuttakkamok hinki balli afeebe'e? Sulluwwiinsi annannichchiinsim sas sas mancho doo'llehe; anim annannichchinam afoo qaxa la'eena uullik haraaroom hinkaa'nda'e soroobba'a laqqam manna uulloomanne hundoomannem asse'oommo; ee lasage i beyyo daba'llita'a waattamo. Oo ixxuwwi saarayyita'a laqqam uulli lamarem sullinam baxxansamookko; Yihuxxi sulli woroo'n qarinne Yooseef sullim hanaa'n qarinne ixxuwwina uwwamu uulli sharada amadda'a hee'llamo. Uulla lamar beyyonne baxxansitakka'a kitaabbakko'i woraqata i beyyo eebbehe; ki'nnuwwina ni Moollanni Waa'a xa'mmeena saamo issoommo. Ihukkaarem Leewi'i oosik bikki qeessuwwi ikka'a Waa'ina awwaadimmi ihu bikkina ixxuwwina mulli keeninne maqire uulla baxxantamoyyo; Roobeelik Gaadikii ee'isam Minaas sullik kollii Yoordaanoos Daajjiinsi eelliinchi firinne Waa'ina awwaadaanchi Muse'e uwwu uulla gaassita'ahim lago aa'llo'ookko» yukko. Oo asse'anto'i maanni uullika duuha'a saarayyita'a moo'lleena matteena illageen Iyyaas «Uullooma hundoomam do'llakka'a moo'llakka'a kitaabbakka'a i beyyo daba'llitakka'a waallehe; anim ka Seelo'onne ki'nnuwwi bikkina Waa'a xa'mmeena saamo issoommo» yaa kurukko. Iyyaas asse'u mannim uulla do'lla'a moo'llo'o; yoo beero'uwwa hundam lamar sullina hinkid baxxansamooda'e kitaabba'a amaddo'o; ee lasage Iyyaas yoo beyyo Seelo'o daba'llita'a waatto'o. Iyyaasim Waa'a xa'mmeena saamo issukko; gatto'i Isra'ee'l sullina annannichchinam ihoo uulli baxxanchi gudukko. Biiniyaam sullik uulli sharaxxi saam firukko; ixxuwwina afu uulli saam yookkok Yihudaannonnee Yooseef sulli lambe'ennettee hee'ukko. Hanaa'n qarinne yoo gabalim Yoordaanoos Daajjiinsi ki'isaa Iyyaarko'iinsi hanaa'n qarinne iim firaa eelliinchi aaggi kollonne yoo duunaam uulli kollinne Beeti'aaween udma'i uulla afoohane. Oo gabalim woroo'n qa'l kollinne gaassi Looza yakkam Beetee'l kollonne firaa woroo'n Beetihooroon duu'n kolli firaa Axaaroot Adaaranne dillookko. Oo gabal mulli kollinne ee duuniinsi eelliinchi aagginne woroo'n qaranne qinxaa Yihuxxi sulli sharad ihu Qiiryaatba'aal beero'onne te'im Qiiriyaat Yi'aariimanne higookko; oohim eelliinchi fi'l kollinne yoo gabala. Woroo'n qarinne yoo gabalim eelliinchi aaggi kollinne Qiiriyaat Yi'aariim lasaanchiinsi ki'aa Neeftoh wo'i bu'uwwanne afookko. Ee beyyiinsim oo gabal Heenoom beet cebba moo'oo duu'n lugumonne dillookko; ookkim Raafaayi'm cebbi hanaa'n qarinnette; eehanniinsim Heenoom cebbanne dillaa Iyyaabuus manni gabalinne aa'aa Eenroogeela afookko. Ee lasage hanaa'n qaranne daba'llaa Eenishimeesh kolli marookko; ee beyyiinsim Galiiloota marookko; oohim Adumii'm beqera moo'oo'isiinsette; ee'isam Roobeel beet Booheen kinanne dillookko. Hanaa'n qarinne Yoordaanoos cebba moo'oo kollinne dillookko. Gabaloom Beetihoolaag midaadinne higookko. Sooqixxi Damlaqiinsi hanaa'n qarinne Yoordaanoos Daajjiinsi woroo'n qar afeebe'e marookko; oohim woroo'n qarina gabala. Eelliinchi firinne yoo gabal Yoordaanoos daajje; oohim ee kululleetannee ee gabalannee afeebe'e Biiniyaam sulli uulla. Biiniyaam sulli beero'uwwi moolli moollinnem Beetihoogila, Eemeqaxiixa, Yoordaanoos cebbanne yoo Xamaaraayima, Beeteela, Awiim Faaraa, Oofiraa, Kafaaramoonaay, Oofiniinaa Geebaa'aa yakka'a weeshakkam tommoo lam beero'uwwaa ihukkuuyyi ixxuwwi kululleetanne yoo hoffi beero'uwwaa olla'uwwaa edookko. Odim Gaba'oona, Raama'a Ba'eeroota, Misiphpha, Kafiira, Mooxa, Reeqeema, Yirpha'eela, Taaraala, Xeelaa'a, Eeleefa, Iyyaabuusa, Giibi'aa Qiryaat Yi'aariimaa yakkam tommoo soor beero'oo ihukkuuyyi ee kululleetanne yoo hoffi beero'uwwam edookko; oohim Biiniyaam sulli moolli moollinnem aa'llo'i uulla. La'm saam Simi'oon sullina moollinne moollinne firukko. Ixxuwwi uullim Yihuxxi sullina uwwamu uulli lambe'ennette hee'ukko. Oo beyyuwwim Berisaabeha, Molaada, Haxarisu'aala, Baala, Exeema, Eeltoolaada, Batuula, Heerma'a, Xiqilaaga, Beetimaarikaaboota, Haxarisuusa, Beetlabaa'ootaa Shaaruheenaa hee'ukko. Ku keen hundim mat ihaa tommoo sas beero'oo ihukkuuyyi kakee'n kululleetanne yoo hoffi beero'uwwa hundam edookko. Kakeeninne maqirem Aayina, Riimoona, Eteeraa Oshaanaa hee'ukko. Ku keen hundim mat ihaa soor beero'i ihukkuuyyi ka beero'uwwi kululleetanne yoo hoffi beero'uwwi hundam edookko. Odim woroo'n qarinne yoo Baa'ilaatiba'eera yakkam Raamaa'i afeebe'e ee beero'uwwi kululleetanne yoo hoffi beero'uwwi hundam edam hee'ukko. Simi'oon sullina moollinne moollinne uwwamu uulli ka keen hee'ukko. Yihuxxi sullina uwwamu uulli sharad lobakata haraar ihu bikkina eehanniinsi murakka'a Simi'oon sullina uwwakko'o. Ee bikkina Simi'oon sulli Yihuxxi sulli lambe'enne uulla a'llito'o. Saxxi saam Zaabiloo'n sullina mollinne mollinne firukko. Ixxuwwi uulli gabalim Saariida afookko. Gabaloomim eelliinchi aagginne Maari'ilaa firaa Daabisheet gadaninne aa'aa Yooqini'aamiinsi eelliinchi firinne yoo daajje afookko. Saariidiinsim ki'isaa eelliinchi firinne Ki'iisilotitaabara higaa Dabiraatinne aa'aa Yaafi'anne firookko. Ee eelliinchi firinnem Gaatiheefeerinnee Etiqaaxiininnee higaa Riimonanne masoo googinne Ne'aanne daba'llookko. Hanaa'n qarinne yoo gabalim Hanaatoonanne daba'llaa Yifitahi'ee'l cebbanne uullookko. Odim Qaaxaata, Nahilaala, Shiimiroona, Yidaalaa Beetaliheemaa edookko. Ku keen hundim mat ihaa tommoo lam beero'o ihukkuuyyi ka beero'uwwi kululleetanne yoo hoffi beero'uwwi hundam edookko. Ee bikkina ku beero'uwwii kululleetanne yoo hoffi beero'uwwii hundim Zaabiloon sullina moollinne moollinne ixxuwwi gulummi ihoo'isina uwwammukko. Soo'l saam Yisaakoor sullina moollinne moollinne firukko. Ixxuwwi uullim Yizra'eela, Kaasaloota, Shuneema, Hafaaraayima, Shii'oona, Anaaharata, Raabiita, Qiishoona, Abeexa, Remeta, Enigaaniima, Enhadaa Beetiphaaxeedaa edookko. Gabaloomim Taaboora, Shaaxumaa Beexhaamishaa afaa Yoordaanoosanne uullookko. Ku keen hundim mat ihaa tommoo loh beero'oo ihukkuuyyi kakee'n kululleetanne yoo hoffi beero'uwwa hundam edookko. Ku beero'uwwii ka beero'uwwi kululleetanne yoo hoffi beero'uwwii hundim Yisaakoor sullina moollinne moollinne ixxuwwi gulummi ihoo'isna uwwamukko. Onti saam Aseer sullina moollinne moollinne firukko. Ixxuwwi uullim Heliqaata, Hala, Baxeena, Akshaafa, Aalaameleeka, Ami'aadaa Miishi'aalaa edookko. Eelliinchi aagoo kollinnem Qarimeloosinnee Shiihoriliibinaatinnee gaba'llamookko. Eelliinchi firoo kollinnem Beetidaagoosinne daba'llaa Zaabilooninnee Yifitaahi'ee'l Cebbinnee aa'aa hanaa'n qarinne Beeti'eemeeqaa Ni'i'eelaa afookko. Qeddi kollinnem Kaabula afookko. Eeheenim Eebroona, Raahooba, Haamoonaa Qaanaa'aa higaa Lob Siidoona afookko. Gabaloomim Ramaa'i kolli daba'llaa girbamaakkoo Xiiroos beero'o afookko. Eehanniinsim Hoosa'i kolli daba'llaa Meedeteraaniyaa'n Dambalaqanne uullookko. Odim Mahalaaba, Akiziiba, Uma, Aafeeqaa Rahoobaa edookko. Ku keen hundim mat ihaa lamiyyee lam beero'oo ihukkuuyyi kululleetanne yoo hoffi beero'uwwa hundam edookko. Ee bikkina ku beero'uwwi ka beero'uwwi kululleetanne yoo hoffi beero'uwwi hundim Aseer sullina moollinne moollinne ixxuwwi gulummi ihoo'isina uwwamukko. Lah saam Niftaaleem sullina moollinne moollinne firukko. Ixxuwwi uullina gabalinne Heleefiinsi Da'inaaniimanne yoo qilxokkichchiinsi ki'isaa Adaamiineqeeba, Yaamiiniiyaa Laaqumaa afaa Yoordaanoos Daajjenne uullookko. Eehanniinsim gabaloom eelliinchi aagginne Azinotitaabooranne daba'llaa huqooqa afookko; Woroo'n qarinnem Zaabilooniinsi eelliinchi agoo kollinnee Aseeriinsi eelliinchi firinnee Yoordaanoos Daajji gabal ihookko. Girbamu beero'uwwim Xiidiima, Xeera, Hamaata, Raaqaata, Kiinaareeta, Adaama, Raama, Hasoora, Qeedeesha, Eediraa'a, Eenihaxoora, Yiri'oon, Miigidaali'eela, Horeemaa Beetisheemiishaa hee'ukko. Ku keen hundim mat tommoo honsi beero'oo ihukkuuyyi ka beero'uwwi kululleetanne yoo hoffi beero'uwwa hundam edookko. Ee bikkina ku beero'uwwii ka beero'uwwi kululleetanne yoo hoffi beero'uwwii hundim Niftaaleem sullina moollinne moollinne ixxuwwi gulummi ihoo'isina uwwamukko. Lama'l saam Daan sullina moollinne moollinne firukko. Ixxuwwi a'llito'i uullim Xori'a, Eshta'oola, Iirishemeesha, Sha'aalibiima, Ayaaloona, Yitila, Eeloona, Tiimina, Eqeeroona, Ilitaqa, Gibtoona, Baa'ilaata, Yihuda, Banebaraaqa, Gaatirimoona, Meyaariqoona, Raaqonaa Iyoophphe'i kululleetanne yoo uullaa edookko. Daan sullim ixxuwwi uulla hooggo'i bikkina Laayishaa yakkam beero'o matta'a qassa'a amaddo'o. Ee lasage ee uulli manna bisa'inne shita'a gullita'a uullooma lago aa'llo'o. Ee beyyonnem afuutto'o. Ee beyyi summam ixxuwwi anni summanne Daana yita'a weeshsho'o. Ku beero'uwwii ka beero'uwwi kululleetanne yoo hoffi beero'uwwii hundim Daan sullina moollinne moollinne ixxuwwi gulummi ihoo'isina uwwamukko. Isra'ee'l oos ixxuwwi gagina uulla baxxanta'a lasage Naawe'i beet Iyyaasina ixxuwwi lambe'enne uullika sharada uwwito'o. Waa'i ijaajukkisannem duunaam Efireem uullanne yoo Taminaatseeraaha yakkam beero'o uwwakko'o. Iyyaasim ee beero'o axisaa baxaa heechchi beyyi issukko. Qeessichchi Aali'aazarii Nawwe'i beet Iyyaasii Isra'ee'l sullik moolli awwonsaanii Seelo'onne Keesammi Dukkaana aagakkam goocanne Waa'i illagenne saaminne baxxansito'i uulli ee keeno. Ee'isa issimminne uulla baxxansita'a guullito'o. Ee lasage Waa'i Iyyaasina, «Isra'ee'l minaadabina ‹Muse'e ki'nnuwwina kuroo'isa ijaajummisannem la'oo'n dangonne manna shu manchi magannaato aagoo beero'uwwa doo'llehe. Mashka'oomim la'oo'n dangonne manna shu manchi xiiga miqiseena holloo manchiinsi ee kollonne gibaa gatookko. Ixxim ee beero'uwwaannonne matonne gibaa ee beero'o aagakkam goocanne uullaa ihu woshshi hundam beero'i lommannina kurookko. Ee lasage ixxuwwi beero'o aagoo'isina issita'a afuuroo beyyo uwwitamaare ixxim ee manninne maqire afuurona. Xiiga miqiseena hasoo manchi laseesuta'n ixxi beshichcho shukkok garu wocinnetti ihoo'n la'oo'nnetti ihu bikkina ixxo laseesoohaannina higissa'a uwwim hasisooyyo. Oo manna shu manchi dummichchi illagenne oogato'o aa'eena uulleebe'ee ee ammane hee'u hundiinsi lob qeessichchi leheebe'ee ee beero'onne afuurona. Ee lasage gibaa firu ixxi beero'oo ixxi minee daba'lleena xanookko› yihe» yukko. Ee bikkina Niftaaleem Duunaam uullanne Galiilanne yoo Qaadeesa, Efireem Duunaam uullanne Seekkeema, Yihuxxi Duunaam uullanne Keebiroonaa yamamoo Qiiriyaat Ariba'a annanni issito'o. Yoordaanoos eeqidonnem Iyyaarko'iinsi eelliinchi firinne Roobeel Sulli uulli lambe'enne qoffitenne siidamoo udma'i uullanne yoo Beexeeraa Gaad sulliinsim Gala'aadanne yoo Raamootaa Minaas sulliinsim Baasaananne yoo Goolaanaa annanni issito'o. Ku beero'uwwi Isra'ee'l minaadabiinsi hundiinsemii ixxuwwi lambe'enne hee'llam waaraaniinsii ayyim la'oo'n dangonne manna shukkok dummuchchi oogateena illage xiiga miqiseena hasooha hasoohanni anganne lehoobee'isa eekoollonne gibaa xoroo'isina doo'llamaakkoo keen hee'ukko. Leewi'i abaroosina gassaan hee'llo'i keen Qeessichchi Ali'aazaar beyyoo Naawe'i beet Iyyaas beyyoo Isra'ee'l sullina abaroosikka gassaan kee'n beyyoo matto'o. Kana'aa'n uullanne yoo Seelo'o yakkam beero'onne ixxuwwi beyyo hincita'a «Waa'i Mise'i kollinnetti ihaa hee'nnoommi beero'uwwii ni diinat alaa'lloo uullii niina uwwamona ijaajaakko» yito'o. Ee bikkina Waa'i ijaajukkisannem Isra'ee'l minaadab ixxuwwi gaqqi uulliinsi kanniinsi woroon yoo beero'uwwaa diinat allaa'lloo uullaa Leewi'i sullina uwwito'o. Luxxi saam Leewi'i sulliinette hee'llo'i Qa'aat moollina firukko. Leewi'i oos hee'llo'i qeessichchi Aaroon shumo'ina Yihuxxi sulliinsi, simi'oon sulliinsii Biiniyaam sulliinsii tommoo sas beero'oo saaminne uwwito'o. Qa'aat moolliinsi gatto'i keenina Efireem sulliinsii Daan sulliinsii Minaasaanniinsim kolli sulliinsii tommi beero'o saaminne uwwito'o. Gershoon moollina Yisaakoor sulliinsi, Aseer sullinsi, Niftaaleem sulliinsii, Baasaananne hee'llam Minaasaanniinsi kolli sulliinsii tommoo sas beero'oo saaminne uwwito'o. Meeraar oosinam moollinne moollinne Roobeel sulliinsi, Gaad sulliinsii Zaabiloon sulliinsii baxxansita'a tommoo lam beero'oo uwwito'o. Muse'e Kollinne ihaa Waa'i ijaajukkisannem Isra'ee'l minadab ka beero'uwwaa diinat allaa'lloo uullaa Leewi'i oosina saaminne baxxansito'o. Ixxuwwim Yihudaannonne duunaam uullanne yoo Qiiriyaat Arba'i yamamoo Keebiroo'n beero'oo ee beero'i kululleetanne yoo diinat allaa'lloo uullaa uwwito'o. Arbaa'i Anaaq anni hee'ukko. Ihona bagaan ee beero'onne yoo abuulli uullaa ee beero'i kululleetanne yoo hoffi beero'uwwaa Yaafun beet Kaaleebina gulummi issita'a uwwita'a hee'llo'o. La'oo'n dangonne manna shu manchi magannaato aagoo beero'uwwiinsi mat hee'u Keebiroona diinaat allaa'lloo uullinne mqirem qeessichchi Aaroon shumo'ina uwwito'o. Odim kanniinsi woroon yoo beero'uwwa uwwito'o. Oo keenim Libina, Yaatiira, Eshtaamo'a, Hooloona, Dabiira, Aaya, Yuxaanaa Beetisheemeeshaa. Ku honsem beero'uwwim hundem sulluwwiinsim uwwanto'oo keeno. Biiniyaam sulliinsim soor beero'o Gaba'oona, Geebaa'a, Anaatootaa Alimoonaa diinaat Alaa'lloo uullinne maqirem uwwito'o. Qeessuwwi hee'llo'i Aaroon shumo'ina ixxuwwi diinaat alaa'lloo uullinne maqirem tommoo sas beero'oo uwwito'o. Leewi'i sulliinsi gatto'i Qa'aat moollina Efireem sulli beero'uwwiinsi hofqax beero'uwwam uwwito'o. La'oo'n manna shu manchi maganaaf aagoo beero'uwwiinsi mat hee'u Efireem duunanne yoo Seekeem beero'o diinat alaa'lloo uullinne maqirem uwwukko. Odim Geezeeraa Qiibixaayimaa Beetihoroonaa Soorem Beero'om diinat alaa'lloo uullinne maqirem uwwito'o. Daan sulliinsim Eelitaqa, Giibatoona, Ayaaloonaa Gatirmonaa Soorem beero'om diinat allaa'lloo uullinne maqirem uwwito'o. Eelliinchi aagoo kollinne hee'llam Minaas sulliinsim Ta'inaakaa Gaatiriimonaa diinat alaa'lloo uullinne maqirem uwwito'o. Ka tommem beero'om diinat alaa'lloo uullinne maqirem gatto'i Qa'aat moollina uwwito'o. Leewi'i sulliinsette hee'llo'i Gershoon moollina eelliinchi firinne hee'llam Minaas sulliinsi la'oo'n dangonne manna shu manchi magannaato aagoo beero'uwwiinsi mat hee'u Baasaananne yoo Goolanaa Ba'eshitaaraa lamem beero'om diinat alaa'lloo uullinne maqirem uwwito'o. Yisaakoor sullinsim Qiishiyoonaa Daabaraata, Yaarimutaa Engaaniimaa soorem beero'om diinat alaa'lloo uullinne maqirem uwwito'o. Aseer sulliinsim Miishi'aala, Aabdoona, Heliqaataa Rahoobaa soorem beero'om diinat alaa'lloo uullinne maqirem uwwito'o. Niftaaleem sulliinsim la'oo'n dangonne manna shu manchi maganaato aagoo beero'uwwiinsi mat hee'u Galiilanne yoo Qeedeeshaa hamatidooraa Qaaritaa sasem karamam diinat alaa'lloo uullinne maqirem uwwio'o. Gershoo'n moollik karammuwwi hundim diinat allaa'lloo uullinne maqirem tommoo sasoo hee'ukko. Leewi'i sulliinsetti hee'llo'i gatto'i Meeraar moollina Zaabiloon sulliinsi Yooqini'aama, Qaarita'a, Diiminaa Naahilaalaa soorem beero'om diinat allaa'lloo uullinne maqirem uwwito'o. Roobeel sullinsi Beexeera Yahaxaa Qademootaa Meefaa'aataa soorem beero'om diinat alaa'lloo uullinne maqirem uwwito'o. Gaad sulliinsim la'oo'n dangonne manna shu manchi magannaato aagoo beero'uwwiinsi mat hee'u Gala'aadanne yoo Raamootaa Maahinaayimaa. Haseboonaa Yaa'izeeraa soorem beero'om diinaat alaa'lloo uullinne maqirem uwwito'o. Leewi'i sulliinsi hee'llo'i gatto'i Meeraar moolli beero'uwwi tommoo lamoo hee'ukko. Waa'i ixxuwwi maalda'uwwina uwwoommoo yaa hide'u uulla hundam Isra'ee'l minaadabina uwwukko. Ixxuwwi uullooma lago aa'lla'a lasage heechchi beyyi issito'o. Waa'i illagee'n maalda'uwwina aagu saga'llisannem ixxuwwi kululleetanne yoo diina'iinsi hundichchiinsim ixxuwwa usheexxisukko. Ixxuwwi diina'i hundichchom ixxuwwi anganne higisaa uwwu bikkina ixxuwwinne uullixxameena xanookkok ayyim hee'ukkoyyo. Waa'i Isra'ee'l minaadabina wocu er neeyyaxxi sagara hundam wonshukko bagaan matom gatisukkoyyo. Ee lasage Iyyaas Roobeel sulloo Gaad sulloo Minaas sulliinsim kolloo weeshaa ki'nnuwwa ijaajukkoka hundam issitakko'ookko; «Waa'ina awwaadaanchi Muse'e ki'nnuwwa ijaajukkoka hundam egettakko'ookko; anim ijaajummi sagara hundam egettakko'ookko. Lobakat ammaniinsi kaballi afeebe'e ki'nnuwwi abbaayyuwwa laggakko'oyyo; Moollanni Waa'ikam ijaajo qoxxitakka'a egettakko'ookko. Oonoo'llehe; ki'nnuwwi Moollanni Waa'i aagu neeyyaxxi saga'llisannem ki'nnuwwi abbaayyuwwi ikko'i Isra'eela usheexisaakko. Ee bikkina Waa'ina awwaadaanchi Muse'e Yoordaanoos eeqidonne uwwu ki'nnuwwi lago aa'llakko'i uullanne yoo mine daba'llitakka'a mallehe. Waa'ina awwaadaanchi Muse'e ki'nnuwwi Moollanni Waa'a iittitakkamisina, ixxi googonnem mattakkamisina, ixxi doo'llam wonshitakkamisina, ixxi ijaajom egettakkamisina, ixxenam amma'nnantakko'oo keen ikkakka'a hanqo'i wodaninnee hanqo'i foorinnee awwaaddakkamisinaa ijaaju ijaajoo seeraa qoxxitakka'a egellehe» yukko. Iyyaasim ixxuwwa maasse'aa geegeesukkaare hee'llam beyyo matto'o. Minaas sullina kollina Muse'e Baasaananne uulla uwwaa hee'ukko. Gatu kollina odim Iyyaas Yoordaanoosiinsi eelliinchi aaggi kollonne ixxuwwi abbaayyuwwinne maqirem uulla uwwukko; Iyyaasim ixxuwwa maasse'aa geegeesukko. Ixxim «Oono'llehe kaba lobakat amaxxa oohim laro, bira, worqa, naasxaara, xaaraa lobakat eddechchaa amaddakka'a ki'nnuwwi mine elle'llehe; diina'iinsi boggakko'i luwwa ki'nnuwwi abbaayyuwwinne maqirem baxxammehe» yukko. Ee bikkina Roobeel sulli, Gaad sullii Minaas sulliinsim kollii Kana'aananne yoo Seelo'onne yo'i Isra'ee'l minaadabiinsi annanni ikka'a Waa'i Muse'i kollinnetti ihaa ijaajukkisanne illageen ixxuwwi uulli issita'a lago aa'llo'i Gala'aaxxi uulla daba'llita'a matto'o. Roobeel sulli, Gaad sullii Minaas sullik kollii Kana'aa'n uullanne yoo Yoordaanoosa hincita'a affo'isam ee daajji gadanonne kitima kitimakkam lobakata haraar beyyo axisso'o. Isra'ee'l minaadabinam «Oono'llehe, Kana'aa'n uullaannonne tochchonne Yoordaanoos Daajji gadanonne yoo ni uulli tochchonne Roobeel sulli, Gaad sullii Minaas sulliinsim kollii kitima kitmakkam beyyo axisso'ookko» yakkam woshshi afukko. Isra'ee'l minaadab eekka maccesso'i ammanenne hundim mat ikka'a ixxuwwa qassena seelo'onne wixxito'o. Ee lasage Isra'ee'l minaadab Gala'aaxxi uullanne yo'i Roobeel sulli beyyoo, Gaad sulli beyyoo Minaas sullik kolli hee'llo'i beyyo qeessichchi Ali'aazar beeto Finihaase asse'llo'o. Ixxenne maqirem Isra'ee'l minaadaphphi sulliinsi annannichchiinsim mat mato tommi awwonsaano asse'llo'o. Oo mato'i keenim Isra'eeliinsi moollinne, moollinne feeranto'i awwonsaan hee'llo'o. Ixxuwwim Gala'aaxxi uullanne Roobeel sulli beeyyo, Gaad sulli beeyyoo Minaas sullikim kolli hee'llo'i beyyoo matta'a, «Waa'i minaadab hundim ki'nnuwwina ‹Isra'ee'l Waa'anne baxxakko'i ku baaxiil marichcho? Kitima kitimakkam beyyo axisimminne kaballa waa'ina boqqitakkakko'ookko; ixxo awwonimmiinsim laso daba'llitakko'ookko. Feegooranne banxummi baaxiil ihooyyoonnihe? Ee mashka'inne Waa'i minaadabanne booban dillukko. Kaballi afeebe'e neese eehanniinsi muccullummoyyo. Ki'nnuwwi kaballam Waa'a awwonimmiinsi laso daba'llitakkamonnihe? Kaballa Waa'anne boqqitakkolas soodo ixxi Isita'ee'l minaadab hundannem quuqookko. Ki'nnuwwi yoontakke'i uulli Waa'ina otossimmina makkoobee'an ihulas Waa'i ixxi minaadabinne edamoo dukkaan kaaxxu uulla waattakka'a niinninne maqire uulla baxxammehe; ihukkaarem ni Moollanni Waa'ina kitima kitimakkam beyyiinsi bagaan mulli kiti'm beyyo baximminne Waa'anne boqitakka'a neesem ki'nnuwwinne mqire boqquwwi issitakkotte. Zaaraah beet Akkaane hirim ihu luwwa massimminne baaxiilo baxu bikkina Isra'ee'l minaadab hundannem quunqi dillukkoyyonihe? baxu baaxiilina xale'i ixxi lehukkoyyo› yito'ookko» yito'o. Ee lasage Roobeel sullii Gaad sulli Minaas sullik kolli Isra'ee'l moolli awwonsaanina. «Ixxi hundiinsim lophphoo Malaayyaam Moollanni Waa! Ixxi hundinsim Lophphoo Malaayyaam Moollanni Waa! Eekka mahina baxummida'e ixxi la'ookko; Isra'ee'l minaadabim eekka laqqona hansoommo. Waa'ina boqqinoomilas tee'm amma'nnancha hongoomildas kaballa neese gatissakkotte. Ka kitima kitimakkam beyyo Waa'a awwonimmiisi daba'llinoommisinaa shokkoo kitimaa huribaaxxi kitimaa mateeyyoo'm kitimaa hincaa'imminaa yinaa banxaammoolas Waa'i niinninsi baado miqisona. Neese kaka issummok Waaroo doollenne ki'nnuwwi oos ni oosina ‹Isra'ee'l Moollanni Waa'inne ki'nnuwwina mah edanchi hee'aate? Ki'nnuwwi Roobeel oosoo Gaad oosoo; Waa'i ki'nnuwwi lambe'enne ni lambe'ennee Yordaaoos Daajje sharad bee'e› yimminne «Ni oos Waa'a badoobee'isa ki'nnuwwi oos issiteena xantamo yinaa badinummi bikkinatte. Ee bikkina neese banxummi kiti'm beyyi shokkoo kitima te'im mulli kitima hincaa'akkamaneyyo› yinummok ee bikkinatte. Ihukkaarem neese kaka issinummok ni minaadaphphi lambe'ennee ki'nnuwwi minaadaphphi lambe'ennee mare'i ihaa hee'oo'isinatte. Oohim ni lasaqqi qaranchina Keesamaakkoo Dukkaananne Waa'ina otossinummisinaa shokkook kitimaa mulli kitima, mateeyyoo'm kitimaa kitimmummuuyyi hee'nnummisinaa mare'i ihoo'isinatte. Oohim ki'nnuwwi oos ni oosina «Waa'i beyyonne ki'nnuwwina sharad bee'e» yamoobee'isina awwaadookko. Ayyillaukko waaroo doollenne niina te'im ni shumo'ina eehid yakkota'n ‹Niyyanno'i baxxo'i Waa'ina kitima ki'nnuwwi lambe'ennee ni lambe'ennee naqaash ihoo'isinattee bagaan shokkoo kiti'm bikkina te'im mulli kiti'm bikkinayyo› yinoommo. Neese hanqoomam Waa'anne boqqinummoyyo; shokkoo kitima hincaa'nneena sawwinaa kitima kitimakam beyyo baximminne Waa'a awwonimma kaballa ulloommoyyo; ixxonne otossakkam dukkaa'n illagenne yoo ni Moollanni Waa'ina baxamukkaanniinsi mulli annanni ihaakkoo kitima kitimakkamaanniinsi mulli annanni ihaakkoo kitima kitimakkam beyyo banxummoyyo. Eekka sawwinaammoolas ookki niinniinsi qee'llona» yito'o. Roobeel sullii Gaad sullii Minaas sullii wocco'i woshsha macceesso'i ammanenne qeessichchi Finihaasii minaadab asse'llo'aare ixxenne maqire matto'i Isra'eelina moolli awwonsaanii lobakata liiranto'o. Qeessichchi Ali'aazar beet Finihaas Roobeel sullina, Gaad sullinaa Minaas sullinaa «Ki'nnuwwi Waa'anne boqqitakkobee'i bikkina oono'llehe Waa'i niinninne maqire yoo'isa kaba lanqaammo; Isra'ee'l minaadabam Waa'i quunqiinsi gatissakko'ookko» yukko. Ee lasage qeessichchi Ali'aazar beet Finihaasii awwonsaanii Gala'adanne yoo Roobeel oos beyyiinsii Gaad oos beyyiinsii Kana'aananne yo'i Isra'ee'l minaadaphphi beyyo daba'llito'o; ixxuwwinam ee beyyonne ihu woshshi hundam kutto'o. Isra'ee'l minaadab eekka macceesso'i ammanenne liiranta'a Waa'a galaxxito'o. Ee lasage Roobeel oosii Gaad oosii hee'llam uulla qassa'a orinne bi'isseena hasso'oyyo. Roobeel oosii Gaad oosii «Waa'i Moollanni ihukkisina kuki ni lambe'enne naqaasha» yitu'uuyyi ee kitima kitimakkam beyyo «Naqqaasha» yita'a weeshsho'o. Waa'i Isra'ee'l minaadoba ixxuwwi kululleetanne yoo diina'iinsi hundiinsim usheexxisaa lasage lobakat doolli higukko. Ee ammane Iyyaas lobakata lomma'nnaa hee'ukko. Iyyaas Isra'ee'l minaadaba, ixxuwwika lommana, awwonsaano, oogataanoo daannuwwaa weeshaa «An lobakata lomma'nnaammo. Ki'nnuwwi Moollanni Waa'i ki'nnuwwa hara'mmeena mulli minaadabanne issukkoka hundam moo'llakko'ookko; ki'nnuwwi Moollanni Waa'i ixxoteme. Oonoo'llehe an Yoordaanoosiinsi ki'isaa eelliinchi aagoo kollonne yoo Meedeteraaniyaa'n Dambalaq afeebe'e Kaa'ummi minaadaphphi uullaa mulli kaa'umbee'i minaadaphphi uullaa ki'nnuwwi sullinne sullunne gulummi issitakka'a a'llitakkamisina saaminne baxansaa uwwaammo. Ki'nnuwwi Moollanni Waa'i ixxuwwa ki'nnuwwi illagiinsi binaa'ookko ki'nnuwwi illagiinsim ixxuwwa fisaa hollookko; ki'nnuwwi Moollanni Waa'i yukkisannem ixxuwwi uulla lago aa'llakkamo. Ee bikkina Muse'i see'l kitaabanne kitaabamukkoka hundam egettakkeenaa issitakkeenaa lobakata qoxxehe; ee ijaajiinsim makkannem qeddannem daba'llititte. Ki'nnuwwi lambenne gatto'i Isra'ee'l ikkobee'i mulli minaadabinne mateeyyooma issitakkote; ixxuwwi waa'uwwikam summa weeshakkote; ee waa'uwwi suminnem hide'llakkote; ee waa'uwwinam awwaadaan ikkakkottee otossitakkotemee. Ihukkaarem kaballi afeebe'e issitakko'isam ki'nnuwwi Moollanni Waa'ina amma'nnamitakko'o keen ikkehe. Waa'i lob keenoo malaayyaam minaadabaa ki'nnuwwi illagiinsi hollaa fissaakko. Ka balli afeebe'em ayyim ki'nnuwwinne uullixxameena xanukkoyyo. Ki'nnuwwi Moollanni Waa'i yukkisannem ki'nnuwwina oramookkok ixxot ihu bikkina ki'nnuwwik mat manchim ixxuwwika kum manna hollookko. Ee bikkina ki'nnuwwi Moollanni Waa'a iittitakkamisina lobakata qoxxehe. Ihukkaarem ki'nnuwwi daba'llitakka'a ki'nnuwwi lambe'enne gatto'i Isra'eel ikkobee'i minaadabinne mateeyyooma issitakkolasii ki'nnuwwim ixxuwwi meento ixxuwwim ki'nnuwwi meento eebimminne hamarantakkolasii. Ki'nnuwwik Moollanni Waa'i uwwu ka er uulliinsi ki'nnuwwi bi'llakkeebe'i afeebe'e ixxuwwi ki'nnuwwina qaashaa qolatoo; ki'nnuwwi afarinam jiraafaa ki'nnuwwina qaashaa qolatoo; ki'nnuwwi afarinam Waa'i ka Isra'eel ikkobee'i minaadaba ki'nnuwwi illagiinsi fisaa holloobee'isa erisa laqqehe. «Oono'llehe an ka lasage lobakat ammane hee'oommoyyo; ki'nnuwwi Moollanni Waa'i aagu neeyyaxxi saga'llisannem ki'nnuwwina issu er luwwi hundam ki'nnuwwi hundim ki'nnuwwi wodaninnee foorinnee hundinnem laqqakkamo. Eehannikim ma'llichchim Gatoo'n hundim wo'mmaakko. Ihukkaarem ki'nnuwwi Waa'i yu er luwwi hundam ki'nnuwwina wonshukkisam ee'isam ki'nnuwwina uwwu ka er uulliinsi ki'nnuwwi bi'iseebe'i afeebe'e jor luwwam ki'nnuwwanne eebookko. Waa'i egetakkona ijaaju hidi'l sagara gindltakkolasii mulli Waa'uwwam qophpha'n waa'uwwam matakka'a awwaaddakkolasii ee keeninam otossitakkolasii ee ammane Waa'i quunqi ki'nnuwwanne dillookko. Ki'nnuwwina uwwu ka er uulliinsim qaqisonne bi'llakkamo» yukko. Ee lasage Iyyaas Isra'ee'l sulli hundam seekeemanne wixxaa'ukko; Isra'ee'l lommanna, awwonsaano, oogataanoo daannuwwaa weeshukko; ixxuwwim Waa'i illagenne wixxito'o. Iyyaasim minaadabina hundinam «Isra'ee'l Moollanni Waa'i ‹Lobakat doolliinsi illageen gaassi ki'nnuwwi anno'i Efiraaxis daajji eeqidonne mulli waa'uwwanne otossitu'uuyyi hee'llo'o; Abrihaaminaa Naakoorinaa anni hee'u Taara'i ee keeninne maqirem hee'ukko. Ki'nnuwwina anni hee'u Abrihaam ee daajji eeqidonne yoo uulliinsi woraa Kana'aa'n uulli hundam uwwummo. Odim Yisaaqam ixxena uwwummo ixxi shumo'om Fikkaannisummo. Yisaaqina Yaaqoobaa Eesa'aa uwwummo; Eesa'ana Eedoo'm duuna gulummi issaa uwwummo; Ihukkaarem Yaaqoobii ixxi oosii Gibxi uulla dillito'o. Ee lasage Muse'ee Aaroonaa asse'ummo. Gibxi uulli mannam boobaninne aphphisaa lasage ki'nnuwwa ee beyyiinsi fissummo. Ki'nnuwwi anno'om Gibxiinsi fissummi ammane Ertira'i Dambalaqa affakko'o; faraxxi gaarre'innee faradaaninnee Ertii'l Dambalaq afeebe'e hollansito'o. An hara'mmoommisina I kollonne laatto'aare ixxuwwaannonnee Qibxi uulli manni lambe'ennee tuunsi ihoo'isa issummo; dambalaqam Gibxi uulli mannanne dabaraa ixxuwwa xuuxoo'isa issummo, Gibxanne issummoka ki'nnuwwi laqqakkamo. Udma'i uullannem lobakat ammane hee'llakko'o. Ee lasage Anim ki'nnuwwa Yoordaanoosiinsi eelliinchi firinne hee'llam Amoore'i manni uulla worummo. Ixxuwwim ki'nnuwwinne qasanto'aare An ixxuwwa ki'nnuwwi anganne higisaa uwwummi bikkina ixxuwwi uulla ki'nnuwwi lago aa'llakkamo iaxxuwwam bi'isummo. Ee lasage Moo'aaphphi adil hee'u Siifor beet Baalaq Isra'eelinne orameena ki'ukko; ki'nnuwwam qangona Bii'eer beet Baala'aama weeshukko. Ihukkaarem An Baala'aamika macceeseena hasummibee'i bikkina ixxi ki'nnuwwa lobakatisa maasse'ukko. Anim ki'nnuwwa ixxi angiinsi gatisummo. Yoordaanoosa fittakka'a Iyyaarko'o waattakko'o; Iyyaarko'i manni ki'nnuwwinne oranto'o; ee'isam Amoore'i manni, Feerze'i manni, Kana'aa'n manni, Hiite'i manni, Gergeese'i manni, Eewi'i mannii Iyyaabuus mannii ki'nnuwwinne oranto'o. Ihukkaarem An ixxuwwa ki'nnuwwi anganne higisaa uwwammo. Ki'nnuwwi illagiinsi lamem Amoore'i manni adilluwwam fissaa hollukkok an asse'ummi haldiishsha bagaan ki'nnuwwi bisa'ayyo te'im ki'nnuwwi xiyyayyo. Badattakkobee'i uullaa baxxakkobee'i beero'oo ki'nnuwwina uwwummaare eekke'ennem afuuttakko'o; kaassakkobee'i woyi'n mishiinsii wee'l mishiinsii ittakkamuulla› yoolla. «Kabadem Waa'a baddehe. Xabbeenoominnee amma'nnantakko'oo keen ikkakka'atii Waa'a awwaaddehe. Ki'nnuwwi anno'i Mesophphoxaame'ennee Gibxannee otossitam hee'llo'i Waa'i bikkenne otossitakkam waa'uwwa ki'nnuwwiinsi qeessitakka'a hanqo'i Waa'anne xale'enne otossi'llehe. Waa'anne otassimmi ki'nnuwwina jora labaa moo'amaakkoohaare ki'nnwwi anno'i Efiraaxis daajji eeqidonne hee'llu'uuyyi Waa'i bikkenne otossito'i qophpha'n waa'uwwa te'im kaba yoontakke'i uullanne hee'llo'i Amoore'i manni Waa'i bikkenne otossitam waa'uwwina otossitakkamoka kaballa doo'llehe; ihukkaarem anii i abaroosii Waa'anne otossinoommo» yukko. Minaadabim «Waa'a ullaa ixxi bikkenne mulli waa'uwwanne otossimmi niinniinsi qee'llona. Ni Moollanni Waa'i niyyanno'oo neesee Gibxi uulli agiddaniinsi fissukkisaa ni illagennem issu maalalsiisoo mare'uwwaa hundam moo'nnaammo; mallummi googonne hundannee hingummi mulli minaadaphphi lambe'enne hundannemii neese xumminne egeraakko. Ee'isam ka uullanne hee'llo'i Amoore'i mannaa mulli minaadabaa hundam ni illagiinsi hollaakko; ee bikkina ixxi niina Waa'i ihu bikkina ixxena awwandoommo» yita'a dabatto'o. Iyyaasim minaadabina «Ixxi keesammaa to'achchoo Waa'aa ihu bikkina ixxena awwaaddakkeena xantakkamoyyo; ixxim ki'nnuwwi baxxakkam baaxiiloo boqqoomaa haafooyyo. Ki'nnuwwimdu Waa'a uttakka'a ixxi bikkenne mulli waa'uwwanne otossitakkolas kinnuwwa quunqinne daba'llaa guzumo'ookko; ki'nnuwwam bi'isookko» yukko. Minaadabim Iyyaasina «Ee'isa hore'em ihoone; neese Waa'anne otossinoommo» yito'o. Iyyaasim ixxuwwina «Waa'anne otossitakkeena doo'llitakko'isina ki'nnuwwi bikkina ki'nnuwwi minaadabim «Eeyya! Nees naqaashshuwwa!» yito'o. Ixxim «Eehid ihulasa'e ki'nnuwwi lambe'enne yoo mulli waa'uwwa hoollehe ki'nnuwwi wodanom Isra'ee'l Moollanni Waa'i kollonne daballehe» yukko. Minaadabim Iyyaasina «Ni Moollanni Waa'ina otossinoommo; ixxi ijaajom egelloommo» yito'o. Ee bikkina Iyyaas ee ayyaamo minaadabinne maqire hidi'l sagara aagukko. Seekeemannem ixxuwwina seeraa gatti ogoraa uwwukko. Iyyaasim ee seeraa gatti ogoraa hundam Waa'i see'l kitaabanne kitaabukko. Ee lasage mat lob kina massaa Keesammi Mi'n gadanonne yoo qilxokkichchi lugumonne kaasukko. Ixxim minaadabina hundinam oono'llehe! Ku kin niina naqaash ihookko; mashka'oomim Waa'i niina wocu sagara hundam macceesaakko. Ee bikkina ki'nnuwwi Waa'a laggakkambee'isina egereena ku kin ki'nnuwwina naqaash ihookko» yukko. Ee lasage Iyyaasim minaadab hundam annannichchom ixxi gaqqi uulla maroo'isina geegesukko. Ixxuwwim matto'o. Oo luwwi hundim ihaa lasage Waa'ina awwaadaanchi Naawwe'i beet Iyyaasik umur xibbee tommi hiinchoo ihaakkoohaannonne lehukko. Minaadabim Iyyaaso duunaam Efiree'm uullanne Gaa'aash duuniinsi hanaa'n qaranne yoo ixxi gaqqi uullanne Tiimnaatseeraahanne waammito'o. Iyyaas foorinne hee'u doollenne hundannee ee lasagem Waa'i Isra'eelina issu maalalsiisoo luwwa hundam moo'llo'i lommanni hee'llo'i doolli hundannee Isra'ee'l minaadab Waa'anne otossito'o. Isra'ee'l minaadab Gibxiinsi eebbo'i Yooseef miqe Seekeemanne waammito'o. Oo beyyim Yaaqoob Sheekeemina anni hee'u Hamoor oosiinsi mat xibbi kin birina bitaa'u uulli hee'ukko. Oo uullim Yooseef shumo'ina uwwamukko. Ee'isam Aaroon beet Ali'aazarim lehukko; ixxim duunaam Efireem uullanne oohim ixxi beet Fiinihaasina uwwu hoffi Giibi'i uullanne waammamukko» yito'o. Iyyaas lehaa lasage Isra'ee'l minaadab «Kana'aa'n manna qasimmina ni sulliinsi hinki sulli gaassaa gaadona?» yita'a Waa'a xa'mmito'o. Waa'im «Yihuxxi sulli gaassaa gaadona; anim uullooma ixxuwwina higisaa uwwoommo» yukko. Yihuxxi sulli ixxuwwina abbaayyuwwi ikko'i Simi'oon sullina «Kaana'aa'n manna qanseena niina sharad ihu uulla maqirem gaandona; ee'isam neesem ki'nnuwwina sharad ihu uulla ki'nnuwwinne gaandoommo» yito'o. Ee bikkina Simi'oon sulli ixxuwwinne maqirem gaaddo'o. Ee bikkina Yihuxxi sulli gaadukko; Waa'im Kaana'aa'n mannaa Feerze'i mannaa ixxuwwi anganne higisaa uwwukko. Ixxuwwim Beezeeqanne tommi kum manna shito'o. Adoonbeezeqam ee beyyonne qasso'o. Kaana'aa'n mannaa Feerze'i mannam kaa'llo'o. Adoonbeezeeqim ixxuwwi illagiinsi gibukko. Ihukkaarem ixxuwwi hollita'a amadda'a ixxi angikaa lokkikaa lob maxxaalluwwa mutto'o. Adoonbeezeeqim «Angikii lokkikii lob maxxaalluwwi muramaakkoo lamarayyi adilluwwi i maaddiinsi ubu giggira feetta'a ittam hee'llo'o. Ixxuwwanne an baxummi barche'e kaballa Waa'i dabaraa eesennem issaakko» yaa wocukko. Ixxom Yerusaaleema massakko'aare eekke'em lehukko. Yihuxxi sulli Yerusaalee'm beero'o qassa'a amaddo'o. Ee beero'i mannam bisa'inne guullita'a beero'ooma giirinne shokkiisso'o. Ee lasage Yihuxxi sulli duunaam ullanne, Neegeebannee qaala'i uullannee hee'llam Kana'aa'n manna qasseena gaaddo'o. Yihuxxi sulli odim gaassi «Qiiryaat Arba'a» yakkam Keebiroon beero'onne hee'llam Kana'aa'n manna qasseena gaaddo'o. Ixxuwwim Sheeshaayika, Ahiimaanikaa Taalimaay moolloo kaa'llo'o. Ee lasage Yihuxxi sulli Daabiiranne hee'llam manninne oranteena gaaddo'o. Ee ammane ee beero'o «Qiiriyaat Seefeera» yakkam hee'akko'o. Kaaleebim «Gaassaa Qiriyaat Seefeera amadoo manchina i landichchi Aksaame ladiisoommo» yukko. Kaaleebina hoffi abbaayyi Qaanaaz beet Ootini'eel ee beero'o gaassaa qeefadaa amadukko. Ee bikkina Kaaleeb ixxi landichcho Aksaame ixxena ladiisukko. Ixxuwwi bollochcho'i ayyaamonnem Ootini'eel isena «Kiyyanni kiina abuulli uulla uwwona xa'mme» yukko. Isem is anni Kaaleeba siidda'a hallichchiinsi dillito'i ammanenne Kaaleeb «An kiina maha uwwona hassootto?» yaa xa'mmukko. Isem annina «At iina uwwittok udma'i uulli ihu bikkina wo'i bu'ika hofqaxam uwwe» yito'o. Kaaleebim hanaa'nnekaa woroo'n bu'oo uwwukko. Muse'ena balli hee'u Qeene'i shumo'i Yihuxxi sullinne maqirem dimbaab yoo Yaarko'i beero'iinsi ki'lla'a Yihuxxi uulli Araadiinsi woroo'n qarinne hee'oo gogaalli uulla matta'a Amaaleeq manninne maqirem afuutto'o. Yihuxxi sullim ixxuwwina abbaayyuwwi ikko'i Simi'oon sullinne maqirem gaadda'a Kitaabaat beero'onne hee'oo Kana'aa'n manna kaa'llo'o. Ee beero'om guullita'a bi'issa'a lasage summooma «Hoorima» yito'o. Yihuxxi sulli Gaaza, Asqiloona, Eeqiroonaa ee kululleetanne yoo uulluwwaa edda'a amaddo'o. Waa'im Yihuxxi sullinne maqire hee'u bikkina duunaam uulla kaa'lla'a amaddo'o. Ihukkaarem cebbi uullanne hee'llam mannina xaariinsi baxamaakkoo faraxxi gaarre'uwwi hee'u bikkina Yihuxxi sulli ixxuwwa holliteena xanto'oyyo. Muse'e ijaajukkisannem Keebiroo'n beero'i Kaaleebina uwwamukko. Ixxim Anaaq sasem moollom ee beero'iinsi fissaa hollukko. Ihukkaarem Biiniyaam sulli Yerusaaleemanne hee'oo Iyyaabuus manna fissaa hollukkoyyo. Ee bikkina Iyyaabuus manni kaballi afeebe'em Biiniyaam sullinne maqirem yookko. Yooseef sullim Beeteela qasseena gaaddo'o; Waa'im ixxuwwinne maqire hee'ukko. Ixxuwwim Beetee'l beero'o shaashshitam keeno asse'llo'o. Ee beero'i gaassi summi «Looza» yakkaman hee'ukko. Oo shaashshaanim ee beero'iinsi firoo mat mancho siidda'a «Ka beero'o hinkeen aagakkamda'e niina moo'issilas keese hawwondoommoyyo» yito'o. Ixxim ixxuwwina beero'o aagakkam googo moo'isukko. Ixxuwwim ee beero'o bisa'inne bi'isso'o; ihukkaarem ee manchinaa ixxi abaroosinaa qishixxito'o. Oo manchim Hiite'i manni uulla maraa beero'o baxukko. Ee beero'ikam summa «Looza» yaa weeshukko. Kaballi afeebe'em ee summinne weeshamookko. Minaas sulli Beetishaananne, Taa'inaakanne, Dooranne, Yubili'aamanne, Magido'onnee ixxuwwi hegeegguwwanne hee'oo minaadaba fissita'a hollito'bee'i bikkina Kana'aa'n manni ee beero'uwwannem afuutto'o. Ihukkaarem Isra'ee'l minaadab malaayyitu'uuyyi matta'a Kana'aa'n manna malaayyi baxo baxxona giddissam hee'llo'o bagaan guullita'a hollito'oyyo. Efireem sullim Geezeeranne hee'oo Kana'aa'n minaadaba hollito'oyyi hee'ukko. Ee bikkina Kana'aa'n manni ixxuwwinne maqirem hee'llo'o. Zaabiloo'n sullim Qiitiroonannee Naahilaalannee hee'oo manna ho'llito'oyyi hee'ukko. Ee bikkina Kana'aa'n manni ixxuwwinne maqirem hee'llo'o. Ihona bagaan Zaabiloo'n sulli giddinne malaayyi baxo baxissam hee'llo'o. Ee'isam Aseer sullim Ako'onne, Siidoonanne, Ahilaabanne, Akiziibanne, Heeleebanne, Afeeqannee Rahoobannee hee'oo manna hollito'oyyi hee'ukko. Asee'l sulli Kana'aa'n minaadaba hollitobee'i bikkina ixxuwwinne maqirem hee'llam hee'llo'o. Niftaaleem sullim Beetisheemeeshannee Beeti'aanaatannee hee'oo manna hollito'oyyi hee'llo'o. Ee bikkina Niftaaleem sulli Kana'aa'n manninne maqirem hee'llo'o. Ihukkaarem Kaana'aa'n manna malaayyi baxo baxxona giddissam hee'llo'o. Amoore'i manni Daan sullo duunaam uullanne hollito'o; cebbi uullam dilliteena hootto'o. Amoore'i minaadab Heerees duunanne, Ayyaaloonannee Sha'aalbiimannee hee'llam hee'llo'o. Ihukkaarem Yooseef sulli ixxuwwi gassi woronnette issita'a malaayyi baxo baxxona giddissam hee'llo'o. Amoore'i uulli gabal Aqiraabiim beqeriinsi Seela'iinsi iim yoo kolloo hee'ukko. Waa'i asse'amaanchi Gelgeliinsi Bookiima maraa Isra'ee'l minaadabina «An Gibxi uulliinsi fissaa gaassi ki'nnuwwi anno'ina uwweena sagara aagummi uulla woraa ‹Ki'nnuwwinne aagummi hidi'l sagara hore'em gindoommoyyo. Ki'nnuwwim ka uullanne hee'llam minaadabinne matem hidirom aaggakkotte. Ixxuwwi kitima hincaa'llam beyyuwwam gindehe› yummo. Ihukkaarem ki'nnuwwi iina ijaajantakko'oyyo. Eehid mahina issitakko'o? Ee bikkina ka minaadaba ki'nnuwwi illagiinsi fissaa holloombee'an ihukkisa ki'nnuwwina kuroommo. Ixxuwwim ki'nnuwwina qoxxaalli diina'i ikkamo; ixxuwwi waa'uwwim ki'nnuwwina qaash ihookko» yukko. Waa'i asse'amaanchi Isra'ee'l minaadab hundinam eekka wocaa lasage sagara iimaa'lla'a wi'llito'o. Ixxuwwim ee beyyika summa «Bookiima» yita'a weesho'o. Odim ixxuwwi ee beyyonne Waa'ina kitima hincaa'llo'o. Iyyaas Isra'ee'l minaadaba geegeesaa lasage ixxuwwi hundim ixxuwwina sharad ihaa qoodamu uulla lago aa'lleena matto'o. Iyyaas foorinne hee'u doollenne hundannee ixxi lehaa lasagee Waa'i Isra'ee'l minaadabina issu maalalsiisoo luwwuwwa moo'llo'i lommanni hee'llo'i doolli hundannem Isra'ee'l minaadab Waa'ina otossito'o. Waa'ina awwaadaanchi hee'u Naawe'i beet Iyyaasik umur mat xibbee tommi hiinchoo ihaa lasage lehukko. Isra'ee'l oosim ixxena sharad ihu Efireem duunaam uullanne Gaa'aash duuniinsi hanaa'n qarinne yoo Tiiminaat Seerah yakkam beyyonne waammito'o. Oo qaranchi hundim lehaa ixxuwwi anno'onne exxaa lasage Waa'aa Isra'ee'l minaadabina Waa'i issu er luwwaa la'oobee'i qaranchi ki'ukko. Ee lasage Isra'ee'l minaadab Waa'i illagenne jor baxo baxaa Waa'a hawwodukko. «Ba'aala» yakkam qophpha'n waa'uwwinam otossukko. Gibxi uulliinsi fissu gaassi ixxuwwi anno'i Waa'ina otossimma utto'o. Ee bikkenne ixxuwwi kululleetanne hee'llam minaadaphphi qophpha'n waa'uwwa awwonta'a otossimma asheetto'o. Waa'am ee'isinne quuqisso'o. Ixxuwwim Waa'ina otossimma utta'a ixxi bikkenne «Ba'aalaa Astaarootaa» yakkam qophpha'n waa'uwwina otossito'o. Ee bikkina Waa'i Isra'ee'l minaadabanne lobakata quuqukko. Ixxuwwa boggam diina'inam higisaa uwwukko. Ixxuwwi kululleetanne yo'i ixxuwwi diina'im kaa'llamisa issukko. Ee lasage ixxuwwi diina'inne uullixxanteena xanto'oyyo. Orina gaaddam amman hundam Waa'i ixxuwwina hide'aa wocukkisannem kaa'antamisa issam hee'ukko. Ee bikkina lobakata u'nnantam hee'llo'o. Ee lasage Waa'i diina'i angiinsi gatiseena ixxuwwina gassaano ki'isukko. Ihukkaarem Isra'ee'l minaadab ee gassaanina ijaajantambee'i keen ikko'o. Waa'inam amma'nnantambee'i keen ikka'a qophpha'n waa'uwwina awwaadaan ikko'o. Ixxuwwi gaassi anno'i Waa'i ijaajo lonsitam hee'llo'o. Ihukkaarem ixxuwwi, ixxuwwi anno'i googonne matto'oyyo. Waa'i ixxuwwina gassaano uwwoo amman hundam Waa'i ee gassaanchinne maqir ihoo bikkina ee gassaanchi doolli hundannem ixxuwwa diina'iinsi gatisam hee'ukko. Diina'i ixxuwwa wor amadda'a u'nnisam ammane Waa'i kollonne laattamaare qishixxam hee'ukko. Ihukkaarem oo gassaanchi lehoo ammane odim laso daba'llita'a qophpha'n waa'uwwa awwonimminne, otossimminnee ixxuwwinam awwaadimminnee ixxuwwi anno'iinsi baas jolle issitam hee'llo'o. Ixxuwwi jor baxoo xiiqqoo utto'oyyi hee'ukko. Ee bikkina Waa'i Isra'eelanne lobakata quuqaa «Ku minaadab an ixxuwwi anno'inne aagummi hidi'l sagara gindaakko. I ijaajom egerukkoyyo. Ee bikkina Iyyaas lehu ammane ee uullanne hee'llo'i ixxi fissoo'n gatto'i mulli minaadaphpheka ayyem ixxuwwi illagiinsi holloommoyyo. An eehid issummok Isra'ee'l minaadab gaassi ixxuwwi anno'isam i googonne mattamda'e mattamoyda'e ee minaadabinne keenaa moo'eena hasummi bikkinatte» yukko. Ee bikkina Waa'i ee minaadaba ee uullanem hee'llona cawwukko; Iyyaas anganne higisaa matemaaggenne fissaa hollukkoyyo. Kana'aa'n uullane ora maham laqqambee'i Isra'ee'l minaadaba keeneena Waa'i fissoo'n gatisu mulli minaadab kanniinsi woroon yoo keeno. Eeham issukkok Isra'ee'l oosina eraa laqqambee'i orancha ixxuwwinne losiseenatti hee'ukko. Ee uulliinsi hollantoo'n gatto'i keenim ontem Filisxee'm gassaano, Kana'aa'n minaadab hundam, Siidoo'n minaadabaa Ba'aalherimmoo'n duuniinsi ki'isaa Haamaat afeebe'e Liibaanoos duunnuwwanne hee'oo Hiiwe'i minaadabaa hee'ukko. Gaassi anno'ina Waa'i Muse'enne uwwu ijaajina Isra'ee'l minaadab ijaajantamisa ixxuwwinne keeneenatti hee'ukko. Ee'isinne Isra'ee'l minaadab Kana'aa'nnaanninne, Hiite'aanninne, Amoore'aanninne, Faarize'aanninne, Hiiwe'aanninnee Iyyaabuus minaadabinnee maqirem hee'llo'o. Ee kee'n landam ixxuwwi gagina aa'lla'a ixxuwwi landa odim eekee'n oosina uwwito'o; ookeen otossitam qophpha'n waa'uwwinam otossito'o. Isra'ee'l minaadab Waa'i illagenne jor baxo baxxo'o. Ixxuwwi Waa'a xadda'a Ba'aalinaa Asheerinaa otossito'o. Ee bikkina Waa'i Isra'ee'l minaadabanne lobakata quuqukko. Ixxuwwam Masphexoo'm adil hee'u Kushaanrishi'aataayimina higisaa uwwukko. Ixxim ixxuwwa sadeenti hiinchina gassukko. Ee lasage Isra'ee'l minaadab Waa'i kollonne laatto'aare ixxuwwa gatisona Kaaleebina hoffi abbaayyi hee'u Qeeneez beet Ootni'eela ki'isukko. Ixxonne Waa'i Ayyaan dillu bikkina Isra'ee'l gassaanchi ihukko. Ixxim Masphexoo'm adil hee'u Kushaanrishi'aataayiminne orameena marukkaare Waa'i ixxi anganne higisaa uwwu bikkina kaa'ukko. Ee bikkina Isra'ee'l uulli sor hiinchina xumminne hee'aa lasage Qeeneez beet Ootni'eel lehukko. Odim Isra'ee'l minaadab Waa'i illagenne jor baxo baxxo'o. Ee bikkina Waa'i Moo'aaphphi adil hee'u Egloona Isra'eeliinsi lophphaakkoo malaayyaam issukko. Egloonim Amoore'ikaa Amaaleeq minaadabaa wixxaa'aa maraa Isra'ee'l minaadaba qasaa dimbaab wo'mmaakkoo Yaarko'i beero'o ammadukko. Isra'ee'l minaadabim Moo'aaphphi adil Egloonina tommoo sadeenti hiinchoo gibitto'o. Ee lasage Isra'ee'l minaadab Waa'i kollonne laatto'aare Waa'im ixxuwwa gatisoo mancho Biiniyaam sulliinsetti hee'u Geera'i beet Eehuuda ki'isukko. Ixxim qeddi angi hee'ukko. Isra'ee'l minaadabim Moo'aaphphi adil Egloonina gibiro Eehuudanne asse'llo'o. Eehuud qeeraa'lloom mat anga ihoo lam qar bisa'a ixxi gagina baxisukko. Eeham makkollinne eddechchi woronne lade'ukko. Ee lasage lobakata geejji hee'u Egloonina ee gibiro amadaa marukko. Eehuud gibirooma adilina uwwaa lasage gibiro iyyita'a matto'i manna mine mattona geegeesukko. Ihukkaarem Eehuud Gelgelanne cabbaramaa kaasamaakkoo qophpha'n waa'i misilluwwi beyyo afaa lasage Egloon beyyo daba'llaa maraa «Adila, kiina mullam moqqo'onne kuroommi luwwi yookko» yukko. Ee bikkina adil ixxi gassaano «Sa'i'llehe» yukko. Ixxuwwim biira fitto'o. Ee ammane adil fooqanne er hafachchi yoo beyyonne mullam afuuraa hee'ukko. Eehuudim ixxi kolli hincaa «Waa'i eesenne kiina asse'aakkoo assi yookko» yukkaare adil shottaa uullukko. Eehuud ixxi bisa'a makkollinne lade'u beyyiinsi qeddi anginne shaaxxa'aa fissaa adi'l godabonne kaasukko. Bisa'oom hundoomim amadakkam beyyi gatoo'n godaphphi mu'utanne aagaa afarinne firukko. Moochchim bisa'ooma ifiisukko. Eehuudim ee bisa'a godabiinsi fissubee'i bikkina goda'mmut firukko. Ee lasage Eehuud biira firaa gooccuwwa qulfinne xufukko. Eehuud maraa lasonne adi'l gassaan waatta'a gooccuwwi xufamaakkookkoka moo'llo'o. Ihukkaarem adil wororonne shumina afuuraa dasukkoka labisso'o. Ixxuwwim mat qaxa egetta'a lasonne gooc fooqubee'isa moo'lla'a qulfinne fooqaa'lla'a aaggo'o. Ixxuwwi moollannikim leesh ee beyyonne ubaakkoo moo'llo'o. Ixxuwwi biiranne uullita'a egattu'uuyyim Eehuud qee'llaa maraa hee'ukko. Waa'i bikkenne otossimmina cabbarakka'a kaasakko'oo misilleewwam higaa Sa'iira maraa xorukko. Ixxim Efireem duunaam uulla afukkisam Isra'ee'l minaadab orina wixxitamisina xurumba fugukko. Ee lasage duuniinsi ixxuwwa aad awwonsukko. Ixxuwwinam «Eese awwonnehe; Waa'i ki'nnuwwina diina'i ikko'i Moo'aaphphi minaadaba ki'nnuwwi anganne higisaa uwwookko» yukko. Ee bikkina ixxuwwi Eehuuda awwonta'a matta'a Moo'aaphphi minaadab Yoordaanoos daajjinne daba'llantam beyyo amaddo'o. Ee beyyinnem mat manchim higoobee'isa issito'o. Mexxo'i ee ballannem tommi kum Moo'aaphphi doo'llanto'oo gaadaano shito'o. Ee Moo'aaphphi gaadaaniinsim matichchim xoraa marukkoyyo. Ee balla Isra'ee'l minaadab Moo'aaphphi minaadaba kaa'llo'i bikkina ee lasage ee uullanne sadeentayyi hiinchi hundoomam xummi ihukko. Ee lasage Anaat beet Shaamgaar gassaanchi ihukko. Ixxim mirgo'uwwa ushe'akkam xaa'l loshinne Filisxee'm mannika loh xibbe shaa Isra'ee'l minaadaba gatisukko. Eehuud lehaa lasage Isra'ee'l minaadab odim Waa'i illagenne jor baxo baxxo'o. Ee bikkina Waa'i Haaxoor beero'onne ihaa gassam hee'u Kana'aa'n adil Yaabiin anganne Isra'ee'l minaadaba higisaa uwwukko. Ixxi gogoxxi awwonsaanchim mulli minaadaphphan ihu Haarosheet beero'onne hee'oo Siisaaratte hee'ukko. Yaabiinina honsi xibbi xaa'l faraxxi gaarre'uwwi hee'ukko. Ixxim Isra'ee'l minaadaba monginnee wor amadimminnee lammiyyi hiincho gassukko. Ee bikkina Isra'ee'l minaadab Waa'i kollonne laatto'o. Ee ammane Lafiidootina aretti ikko'i hiraagaancho Diiboora Isra'ee'l minaadabanne oogattamotan hee'llo'o. Isem duunaam Efireem uullanne Raaminaa Beeteelinaa lambe'enne yoo Diiboor dimbaaphphi hafanne afuutta'a oogattam hee'llo'i bikkina Isra'ee'l minaadab oogato'ina ise beyyo maram hee'ukko. Mat balla Abiini'aam beeto Baaraaqa Niftaalee'm uullanne yoo Qaadees beero'iinsi weeshissa'a «Isra'ee'l Moollanni Waa'i ‹Niftaaleem sulliinsii Zaabiloonaanniinsii tommi kum manna doo'llitaa Taaboor duuna awwonsitaa mare. Adil Yaabiin gogoxxi ijaajaanchi Siisaar Qiishoo'n daajjenne kiinninne orameena waaroo'isa issoommo. Ixxim faraxxi gaarre'uwwaa gaadaanoo awwonsaa waarookko. Ihukkaarem an ixxo ki anganne higisaa uwwoommo› yaa ijaajaakko» yito'o. Ee lasage Baaraaq «At iinninne maqire mattittaare maroommo. Atimdu iinninne mattoobeelas maroommoyyo» yukko. Isem «Ihona, hanqinam an kiinninne maqirem maroommo. Ihukkaarem Waa'i Siisaara meenti anganne higisaa uwwoo bikkina kaachchi lomboom kiina ihooyyo» yito'o. Ee bikkina Diiboora Baaraaqinne maqirem Qaadeesa gaaddo'o. Baaraaqim Niftaalee'm sulloo Zaabiloo'n sulloo Qaadeesa weeshisukkaare ixxuwwiinsi tommi kum manni ixxo awwonto'o. Diibooram ixxenne maqirem gaaddo'o. Ee ammane Qeene'i manniinsetti ihu Heebeer Muse'ena ballichchi Hoobaab shumo'i ikko'i Qeene'iinsi annanni ihaa Qaadeesa waarukko; Xa'inaayim hujuphphi haqqichchi gadanonnem dukkaana kaasaa hee'ukko. Abini'eel beet Baaraaq Taaboor duuna marukkisa Siisaar macceesu ammanenne xaarinne baxamaakkoo honsi xibbi faraxxi gaarre'uwwaa gaadaanoo hundam weeshisaa Haarosheetiinsi Qiishoo'n daajjenne wixxaa'ukko. Ee ammanenne Diiboora Baaraaqina «Ki'e, Waa'i Siisaara ki anganne higisaa uwwu balli kaballa; oono'o, Waa'i ki illagenne higaa firaakko» yito'o. Ee bikkina Baaraaq tommi kum gaadaano awwonsaa Taaboor duuniinsi dillukko. Baaraaq ixxi gogotinne maqirem qasu ammanenne Waa'i Siisaara ixxi faraxxi gaarre'uwwinnee gaadaaninnee maqirem timtimaa'oo hambalaachchanne uboo'isa issukko. Siisaarim gaarre'iinsi dillaa lokkinne gibukko. Baaraaqim Siisaarika faraxxi gaarre'uwwaa ixxi gogotaa mulli minaadaphphi uullanne yoo Haarosheet afeebe'e hollukko. Ee gogotam matem manchim gatoobee'isa hundam guullukko. Haxoo'l adil Yaabiin Heebeer abaroosinne iittinne hee'am hee'u bikkina Siisaar gibaa Qeene'i manniinsetti ihu Heebeer meentichchotte hee'llo'i Yaa'eel dukkaana aagukko. Yaa'eelem Siisaara aa'lleena fitta'a «I moollanna; waallehe! Badditakkotte; i dukkaa'n woro aaggehe» yito'o. Ee bikkina ixxi maraa aagukkaare du'mmoronne maaxxo'o. Siisaarim isena «An lobakata xeebe'aammo wokkichchika uwwe» yukko. Isem axxiharachcho titta'a ado agissa'a lasonne odim gunguussita'a maaxxo'o. Ixxim isena «At dukkaa'n goocanne uullitaa ayyim waaraa ‹Keyye aagu manni yoohonnihe?› yaa xa'mmuta'n ‹Ayyim bee'e› yihe» yukko. Siisaar lobakata qondoodaa hee'u bikkina qallaa diriirukko. Ee ammanenne Yaa'eele dukkaa'n xiribbaa fanxiizaa amadda'a qaphphita'a hincito'o; amaddo'i xiribba macce huruuraa uullanne kaaxxeebe'e aphphisso'o; Siisaarim lehukko. Ee lasage Baaraaq Siisaara hasukkuuyyi waaru ammanenne Yaa'eele ixxo aa'lleena fitta'a «Keyyaare, at hassoo mancho moo'isoommo» yito'o. Ee bikkina isenne maqirem dukkaa'n woro aagaa xiribbi maccenne kaaxxukkisam leesh uullanne ubaakkoo moo'ukko. Ee balla Waa'i Isra'ee'l minaadab Kana'aa'n minaadaphphi adila Yaabiina kaa'llamisa issukko. Isra'ee'l minaadab Kana'aa'n adila Yaabiina shita'a hootteebe'i afeebe'e ixxuwwik wod qoxxukkuuyyi marukko. Ee balla Diibooraa Abiini'aam beet Baaraaqii kanniinsi woroon yoo mazmuura zammatto'o. Awwonsaan Isra'eela awwonsito'i bikkina minaadabim liiranchinne gaga uwwita'a ki'llo'i bikkina Waa'i galaxxamona. Ki'nnuwwi adilluwwi, macceessehe! Ki'nnuwwi gassaanim qoossitakka'a macceesseehe! An Waa'ina zammaroommo. Isra'ee'l Moollanni Waa'ina zammaroommo. Waa'a! Seeyriinsi dillitti ammanee Eedoo'm uullannem taakke'llitti ammanee uulli huxe'ukko. Iimaniinsim xeen ga'nnukko; Eeyya, wo'i duubiinsi aad dillukko. Siina'i duu'n Moollanni illagenne Isra'ee'l Moollanni Waa'i illagenne duunnuwwi huxe'ukko. Anaat beet Shaamgaaraannonnee Yaa'eel doollennee goog diihukko; araat maaxamaa mulli googinne marukko. Diiboora, at ki'lleebee'i afeebe'e Isra'eelinam amatte ikkaa waatteebee'e Isra'ee'l beero'uwwi geedduwwi bee'i diih hee'ukko. Isra'eel gaassi laqqambee'i qophpha'n waa'uwwina otossito'aare uulli o'llan ihukko. Sor kum Isra'ee'l oosiinsi agiraa bagadoo ayyim amadukkoyyo. I wodan Isra'ee'l gaaxxi awwonsaaninnette. Ixxuwwi doo'llinne liiranta'a ki'llo'i keeninnette. Waa'i galaxxamona. Ki'nnuwwi, koora issakko'i qadaalli hallanne saa'llitakka'a taakke'llakkam keen ki'nnuwwi, xuroobee'i danaam gilaasanne saa'llitakkam keen lokkinne chiritakkam keen ka bikkina woccehe. Oono'o, qoossitakka'a macceessehe! Wo'o inkiirakkam ba'l gadanonne macceesamoo lobakat manni corochchi, Waa'ika kaachcha alallaatoolla. Isra'ee'l minaadaphphekam kaachcha kuroolla. Ee lasage Waa'i minaadab ixxuwwi beero'uwwiinsi wixxita'a dillito'o. Diiboora, baqihe! Baqihe! Baqihe! Mazmuuram zammare! Abiini'eel beeto Baaraaqa, ki'e! At qeefadditti keeno higgaa awwonse! Ee lasage gatto'i keen ixxuwwi awwonsaa'n beyyo dillito'o. Waa'i minaadab i bikkina geedduwwa qasseena dillito'o. Illageen Amaaleeq minaadab hee'oo Efireem sulliinsi gaadaan waarukko; mulli keenim Biiniyaam sulliinsi waatto'o. Maakiiriinsi gaaxxi awwonsaan waatto'o; ee'isam adi'l bicco amaddam keenim Zaabilooniinsi waatto'o. Yisaakoor awwonsaan Diibooranne maqirem waatto'o. Eeyya, Yisaakoorim Baaraaqa awwonaa cebbi uulla marukko. Ihukkaarem Roobeel sulli lam tiir ihukko; waarimmaa hosimmaa malamukko. Mahina gereebbi lambe'enne ikkaa dassitto? Gereebbina allaaraan fiinqeesoo fiinqeeshsha macceesseenattennihe? Roobeel sulli waarimmaa hosimmaa malamukko. Gaad sulli Yoordaanoos daajji eeqidonne afuurukko. Daan sulli markaphphi woronne mahina gatukko? Aseer sullim dambalaq gadanonne afuurukko; ee beyyonnem hee'ukko. Ihukkaarem Zaabiloo'n sulli ixxuwwi gaga lehina higissa'a uwwito'o. Niftaaleem sullim ee uulli duunnuwwanne ee'isa ikko'o. Adilluwwi waatta'a oranto'o; Kana'aa'n adilluwwi Magiido'i wo'i bu'i gadanonne yoo Taa'inaakanne oranto'o. Ihukkaarem ni bira bogga'a massito'oyyo. Boollaanki iimaninne ixxuwwi taakkisinne Siisaarinne oramukko. Qiishoo'n diris ixxuwwa fii'aa massukko. Gaassi Qiishoo'n daajjim ixxuwwa massukko. I foore, qoxxitaa mare! Siisaar faradaan jigisukkuuyyi waarukko; ixxuwwi konte'im banqisa gugukko. Waa'ina asse'amaanchim «Meerooza duummehe. Ee beyyonne hee'oo keeno hundam guullitakka'a duummehe. Ixxuwwi Waa'i kollonnetti ikka'a ixxi diina'inne oranto'oyyo» yukko. Qeene'i uulli Hebeer meentichcho Yaa'eela meenti hundiinsim maasse'anto'ookkotan ikkona. Dukkaananne hee'oo meenti hundiinsim maasse'anto'ookkotan ikkona. Siisaar isena «Wo'o agise» yukko. Ihukkaarem ise ado uwwito'o. Danaam injaffanne issita'a gi'ina uwwito'o. Isem mat anganne dukkaana kaasakkam xiribba makki angannem baxaa'n fanxiiza amaddo'o. Siisaarikam horoore aphphisso'o; macqontannem kaasso'o. Ixxim is lokki beyyonne tuude'aa ubukko. Is lokkiinsi woroonim qubbukko. Qubbu beyyonnem lehukko. Siisaar ama maskootinne moo'llo'o. Hoffi afokkichchinnem xuxxita'a moo'lla'a «I beetik faraxxi gaarre'i mahina dasukko? Faraxxi gaarre'i gug mahina qaqqisaa waarukkoyyo?» yita'a xa'mmito'o. Isenne yoo qoor landi dabachcha uwwukko; ihukkaarem ise tiironne dabaransitu'uuyyi «Malonnem ixxuwwi boggam luwwa siidda'a baxxantu'uuyyatte ihookko? Mato te'im lam baajaam landa mat manchina, Siisaarinam hagaraam doo'l eddechchi afaatette. I gaanjinam wereeggi eddechcha siidaakkatetti ihookko» yito'o. Waa'a! Ki diina'i hundim eehido'isinne lehaa beeddona. Ihukkaarem ki besh da'l eelliinchisa bololhona. Ee lasage uulli sor hiinchi hundoomam xummukko. Odim Isra'ee'l minaadab Waa'i illagenne jor baxo baxxo'o. Ee bikkina Waa'i Miidiyaa'm manni anganne higisaa uwwukko. Ixxuwwim lamar hiincho gassito'o. Miidiyaa'm mannik ciimo'i Isra'ee'l minaadabanne wodu bikkina Isra'ee'l minaadab duunnuwwanne bare, daawwa'uwwaa girbuwwaa axisso'o. Isra'ee'l minaadab sire'e wixxam ammane Miidiyaa'mmek, Amaaleeqikii eelliinchi firoo kolli uulli mannii waattu'uuyyi ixxuwwa qassam hee'llo'o. Ixxuwwi uullannem wiiddantu'uuyyi Gaaza'i afeebe'e wixamu hurbaata bi'issam hee'llo'o; gereebbika, larikaa hallikaa allaachcha ushe'lla'a massitam hee'llo'i bikkina Isra'eelina mahim gatam hee'ukkoyyo. Larinnee dukkaannuwwinnee waattam hee'llo'i bikkina qawwaawwi waarukkoka labam hee'ukko. Ixxuwwikaa ixxuwwi gaameela'uwwikaa xigo la'akkeena hore'em xanakkambee'an hee'ukko. Waattu'uuyyi uulla bi'issam hee'llo'o. Ee'isinne Isra'ee'l minaadab Miidiyaa'm minaadaphphi kee'mmaalli hawwonne ubbo'i bikkina hara'mmona Waa'i kollonne laatto'o. Isra'ee'l minaadab Waa'i ixxuwwa Miidiyaa'm manni angiinsi gatisona laatto'aare ixxuwwina mat hiraagaancho asse'ukko. Oo hiraagaanchim Isra'ee'l Moollanni Waa'iinsi «Gibxanne agiddanonne hee'llakko'i beyyiinsi fissummo. An ki'nnuwwa Gibxi uulli manni angiinsii ka uullannem wor amaddam kee'n angiinsii gatisummo. Ixxuwwa ki'nnuwwi illagiinsi hollaa uullooma ki'nnuwwina uwwummo. An ki'nnuwwina Moollanni Waa'i ihummisaa kaba uullooma lago aa'llakka'a hee'llakkam Amoore'i manni qophpha'n waa'uwwina otossitakkambee'isaa kuraa hee'ummo. Ihukkaarem ki'nnuwwi i sagara macceessakko'oyyo» yoo asso amadaa waarukko. Ee lasage Waa'ina asse'amaanchi «Oofira yakkam hegeego waaraa Abi'eezer moolliinsette ihoo Yoo'aas hujjuphphi haqqichchi lugumonne afuurukko. Yoo'aas beet Geedewoon Miidiyaa'm manniinsi maaxamaa woyina ciinsakkam beyyonne arasa ganam hee'ukko. Waa'ina asse'amaanchi ixxena mo'amaa «Kaa, qoxar malaayyaam mancho, Waa'i kiinninnette» yukko. Geedewoonim «I moollanna, Waa'i niinninnetti ihuta'n ku hawwi hundim neesenne hinkid afookko? Waa'i neese Gibxiinsi fissaakko yitu'uuyyi niyyanno'i kutto'i aganni hannonne yookko? Ihukkaarem kaba Waa'i neese uraakko. Miidiyaa'm manni angannem neese higisaa uwwaakko» yukko. Ee lasage Waa'i «Mare, kiina yoo malaayyi hundinnem Isra'ee'l minaadaba Miidiyaa'm manni angiinsi gatise; an gagim keese asse'ummo» yaa ijaajukko. Geedewoonim «I moolli Minaas sulliinsi hundiinsim hoongaancho; anim i abaroos lambe'enne hore'em hoffan ihummi bikkina Isra'ee'l minaadaba hinkid gatiseena xanoommo?» yukko. Waa'im ixxena «Hanqinam an kiinninne maqire ihaa hara'mmoommi bikkina at Miidiyaa'm manna mexxo'i mat manchisa issitaa aphphissootto» yukko. Geedewoonim «An ki illagenne nuura siidaammoohan ihulas hanqinam at Waa'i ikkittisa la'isoo mare'e moo'ise. An kiina daba'llaa waaraa kitima hicaa'eembe'em hay at ka beyyiinsi mattitte» yukko. Waa'im «At waatteebe'e egeroommo» yukko. Geedewoonim ixxi mine maraa mat fellakkichchi geexa duraa maara gudisukko; tommi kiilo'o ihoo qax qamam aa'aa ursho'i bee'i qorosho'o sarukko; maara leemaatanne, maraqooma qure'enne issaa hujuphphi haqqichchi lugumonne hee'u Waa'i asse'amaanchina hincaa'ukko. Waa'i asse'amaanchim ixxena «Maaraa qoroshsho'oo massitaa ee geejji kinanne dissitaa maraqooma ixxi hanenne dune» yaa ijaajukko. Geedewoonim ijaajamukkisam issukko. Waa'i asse'amaanchim ee kinanne hincaa ixxi anganne ammadu bicci ludinne maaraa qoroshsho'oo nakkukkaare ee kiniinsi giir firaa ee maaraa qorosho'oo itukko. Ee lasage oo asse'amaanchi illiinsi daphphukko. Geedewoonim moo'ukkok Waa'ina asse'amaanchi ihukkisa qoossaa lasage «I Moollanni Waa'a! An ki asse'amaancho moo'ummi bikkina iina aayye!» yukko. Ihukkaarem Waa'i «Xummi kiina ihona; baa'llitte; letooyyo» yukko. Geedewoonim ee beyyonne kitti'm beyyo baxaa «Waa'i xummi Waa'a» yaa weeshukko. Oo kitti'm beyyim kaballi afeebe'e Abi'eezeer moolli uullanne Oofiranne uullaa yookko. Waa'i ee hiimonnem Geedewoonina «Kiyyannika mooraa mullekam lamar hiinchi mooraa masse; kiyyanni Ba'aala yakkam qophpha'n waa'ina baxisu kiti'm beyyom ginde; ee kiti'm beyyi gadanonnem yoo ‹Asheera› yakkam meentichchi waa'i misilam iiqansitaa uunje. Ee gindamu luwwi tuubbanne ki Moollanni Waa'ina kiti'm beyyo danaamisa axissaa baxe. Ee lasage la'm moora massitaa iiqansitaa uunjitti Asheer misi'l hururanne ee moo'l maara hundam shokkiisakka'a hincaa'akkam kitim issitaa hincaa'e» yukko. Ee bikkina Geedewoon ixxi awwaadaaniinsi tomminne maqirem Waa'i ixxo ijaajukkisam issukko. Ihukkaarem ixxi moolloo ee beero'i mannaa baddaa hee'u bikkina eekka issukkok ballannette ihoo'n hiimonnette. Ee beero'i minaadab la'm balli daram ki'aa Ba'aalina kitima hincaa'akkam beyyi gindamukkisaa Asheer misilim iiqamaa ubukkisaa moo'llo'o. Eehe'ennem haareechcho baxamaakkoo kiti'm beyyonne la'm moor duramaa shokkiisakka'a hincaa'akkam kitim hincaakkoo moo'llo'o. Ee bikkina ixxuwwina'i ixxuwwim «Kaka issukkok ayyette?» yaqqanto'o. Eeham lobakata saarayyita'a lasage eekka issukkok Yoo'aas beet Geedewoonatte ihukkisa laqqo'o. Ee lasage ee beero'i manni Yoo'aasina «Ba'aalina kitima hincaa'akkam beyyo gindaahii ixxi gadanonnem uullaa hee'u Asheer misilam iiqansaahii ubbuusu bikkina ki beeto shinoommo keyye fisse» yito'o. Ihukkaarem Yoo'aas nadajjinne ixxo kibitta'a uullitto'i manni hundinam «Ki'nnuwwi fitantakkamok Ba'aalinattennihe? Te'im ixxo gatissakkamonnihe? Ki'nnuwwiinsi ixxi bikkenne fitamookkok hee'ulas soodeebee'e lehona. Ba'aal waa'i ihaakkoolas gindamukkok ixxena kitimakkam beyyi ihu bikkina ixxi gagim fitamona» yukko. Ee lasage Yoo'aas «Gindamaa ubukkok ixxena kitimakkam beyyi ihu bikkina xanoohane ihulas Ba'aal ixxi gagim fitamona yeena hasaa ee balla Geedewoonina Yiruba'aala» yaa summa fissukko. Ee lasage Miidiyaa'mmek, Amaaleeqikii eelliinchi firoo kolli uulli mannii mat ikka'a Yoordaanoos daajje fitta'a Yizra'ee'l cebbanne wiiddanto'o. Waa'ik Ayyaan Geedewoonanne dillukko. Ixxim Abi'eezer moolli hundim awwonta'a fittona xurumba fugukko. Odim Minaas sullim ixxo awwontamisina manna asse'ukko. Ee'isam Aseerik, Zaabiloonikii Niftaaleem sulluwwii ixxo awwontona asse'ukko. Ixxuwwim mulli keeninne maqirem ixxo awwonteena fitto'o. Ee lasage Geedewoon Waa'ina «At Isra'eela iinninne gatisseena eese doo'llittan ihukkisa woccaatto. Oono'o, neese arasa gannoommi oodo'onne fintamaakkoo gereebbi odda dissoommo. Sooxxi dara eehanni kululleet hundim gogaalli ihaa xale'i ka oodo'onne qiibat hee'ulas at woccittisam Isra'eela gatisona doo'llittan ihukkisa an eehanninne la'oommo» yukko. Ixxi yukkisam ihukko. Geedewoon la'm balla soodaraar daram ki'aa ee gereebbi odda ciinsukkaare mat injaffi wo'i firukko. Ee lasage odim Geedewoon Waa'ina «He'i odim mataagge wocoommo; at eesenne quqqitte. Kaba odim ee oddanne mulli mare'i moo'amona xa'mmoommo. Kakore xale'i oo oddi gogaalli ihaa ixxi kululleet hundim aashaalli ihoo'isa isse» yukko. Waa'im ee hiimom oo mare'i ihoo'isa issukko. La'm balli daranne oo oddi xale'i gogaalli ihaa ixxi kululleet hundim hadaddinne aashaa hee'ukko. La'm balla daram Yiruba'aala yamamu Geedewoonii ixxenne maqire hee'u mannii hundim soodaraar daram ki'aa Harood bu'i gadanonne wiiddanukko. Miidiyaa'm mannim ixxuwwiinsi hanaa'n qaranne Moore'i duu'n gada'n cebbi woronne wiiddanaa hee'ukko. Waa'im Geedewoonina «Miidiyaa'm minaadaba ki'nnuwwi anganne higisaa uwwoombee'isa kiinninne yoo minaadab dut ihu bikkina gaqqi malaayyinne kaa'ukkoka labisaa iina lomba uwwooyyo. Ee bikkina minaadabina ‹Ki'nnuwwi lambe'iinsi baddoohii muggoohii yoolas ixxi mine daba'llaa marona; neese ka Gala'aaxxi duunanne egelloommo› yitaa kure» yukko. Ee mashka'inne lamiyyii lam kumii daba'llukkaare tommi kum gatukko. Ee lasagem Waa'i Geedewoonina «Manni kabadem lobakat ihu bikkina ixxuwwa daajje ammaddaa dille; anim ee beyyonne hasoommi keeno annanni issoommo. Ku manchi kiinninne maqire marona yoommok marona; odim daba'llona yoommok daba'llona» yukko. Ixxim manna amadaa daajje dillukko; Waa'im Geedewoonina «Wish wo'o agoo'isa ixxi allabinne wo'o ki'isaa agookkoka ixxi gurubbinne guruphphaa agoo keeniinsi annanni isse» yukko. Wo'o ixxuwwi oobo'inne ki'issa'a aggo'i kee'n xig sas xibbi ihukko; ihukkaarem gatto'i qax hundim ixxuwwi gurubbinne guruphphita'a wo'o aggo'o. Waa'im Geedewoonina «Ixxuwwi oobo'inne ki'issa'a aggo'i sas xibbi manninne ki'nnuwwa gatisoommo. Miidiyaa'm minaadabam ki anganne higisaa uwwoommo. Ihukkaarem gatto'i qax ixxuwwi mine daba'llita'a mattona kure» yukko. Ee bikkina Geedewoon ee minaadaphphi sinqaa xurumbuwwaa sasem xibbem mannim aa'lla'a mulli Isra'ee'l minaadab ixxuwwi minem daba'llita'a mattamisina geegeesukko. Ee ammane hundam Miidiyaa'm minaadab ixxuwwiinsi woroon yoo cebbanne wiiddanaa hee'ukko. Ee hiimom Waa'i Geedewoonina «An ixxuwwa ki anganne higisaa uwwoommi bikkina ki'llaa ixxuwwi wiiddanta'a yo'i beyyo dille» yaa ijaajukko. Atimdu dillimma badditlas kiina awwaadaanchi Phuura'anne maqirem ixxuwwi wiidda'n beyyo dille. Ixxuwwi woccam woshsham macceessaa lasage ixxuwwa qasseena iggitootto» yukko. Ee bikkina Geedewoonii ixxena awwaadaanchi hee'u Phuura'aa diina'i wiiddanaa hee'u beyyonne hincito'o. Xig lobakat qawwaawwi qaxa ihoo Miidiyaa'mmek, Amaaleeqikii eelliinchi firoo kolli mannii cebbanne wiiddanaa hee'ukko. Ixxuwwi gaameela'uwwim dambalaq shashsha'llisa xigakkeena xanakkambee'i qax hee'ukko. Geedewoon ee beyyo afoohaare mat manchi ixxi beshichchina moo'aakkoo haqaawwo kuram hee'ukko. Oohim «Mat xeffo'i so'i qorosho'i duuniinsi onkoroollaa dillaa neese wiiddannummi Miidiyaa'm dukkaana aphphisukko. Ixxim malaayyaamisa aphphisu bikkina dukkaan himbiriiqamaa uullanne biddiqukko» yoohane. Ixxi beshichchim «Kuka'i Isra'eeliinsetti ihu Yoo'aas beet Geedewoon bisa'a bagaan mullaneyyo. Waa'i Geedewoonina Miidiyaa'm minaadabaa ni gogotaa hundam ixxi anganne higisaa uwwaakko» yaa haqaawwo tirukko. Geedewoon haqaawwoo haqaawwi tiratoo macceesaa Waa'ina otossukko. Ee beyyiinsim Isra'ee'l manni wiiddanaa yoo beyyo daba'llaa maraa «Waa'i Miidiyaa'm gogota hundam ki'nnuwwi anganne higisaa uwwu bikkina ki'llehe» yukko. Sasem xibbi manchom sas beyyonne baxxansaa gaadaanina annannichchinam mat mat xurumbaa woronne xomboor yoo mat mat harachchoo uwwukko. Ixxuwwinam «An ni diina'i wiidda'n gadanonne hincaa issoommi luwwa qoxxitakka'a moo'llakka'a ki'nnuwwim ee an issummisa issehe. Anii iinnenne maqire yo'i mannii xurumba fungoommi ammane ki'nnuwwi annannichchim xurumba ee wiidda'n kululleetanne hundannem fuggakku'uuyyi ‹Waa'inaa Geedewooninaa orammehe!› yitakku'uuyyi shuullehe» yukko. Hii'm baqitenne waardiyyuwwi dabassanta'a lasage Geedewoon ixxenne hee'u mat xibbi gaadaaninnem ixxuwwi diina'i wiiddanto'i gadanonne hincita'a ixxuwwi xurumba fuggo'o; amaddo'i harallam iiqansito'o. Mulli kollinne hee'llo'i lamem gaalchim ee'isa issito'o. Hundim qeddi anganne aphphoo xomboora, makki angannem xurumba amadda'a «Waa'inaa Geedewooninaa orammoommo» yitu'uuyyi shuutto'o. Gaadaan annannichchim ixxena qoodamu beyyonne uullukko; diina'i gogoot hundim laarukkuuyyi gibukko. Geedewoonik sasem xibbi mannim xurumba fuggo'i ammanenne diina'i gogot ixxuwwina'i ixxuwwim bisa'inne beeddixxantamisa Waa'i issukko. Gatto'i qaxim «Xireera» yakkam kollonne daba'llita'a Betishiixanne afeebe'ee ee beyyiinsim higga'a Xaabaat gadanonne yoo Aabeelmahool afeebe'ee gibbo'o. Ee lasage Isra'ee'l gaadaan Niftaaleem sulliinsi, Aseer sulliinsii Minaas sulliinsii hundiimii weeccanta'a fitta'a Miidiyaa'm manna laseessu'uuyyi hollito'o. Geedewoonim duunaam uullanne hee'llam Efireem sullina «Dillitakka'a Miidiyaa'm gogota qassehe. Miidiyaa'm gogot Yoordaanos daajjee ixxonne exxoo daajjuwwaa Beetbaar afeebe'e yoo goog hundam fitta'a xottambee'isa qassehe» yaa asse'ukko. Ee bikkina Efireem sulli hundim weeccanta'a Yoordaanoos daajjee ixxonne exxoo daajjuwwa firakkam gooccuwwaa hundam Beetbaaranne afeebe'e ifiissa'a amaddo'o. Ixxuwwim Miidiyaa'm awwonsaa'nneka lamo Ooreebaa Zaa'eebaa qeefaddo'o. Ixxuwwam Ooreebaa «Ooreeb kina» yakkam beyyi gadanonne Zaa'eebaa «Zaa'eeb woyina ciinsakkam beyyo» yakkam beyyi gadanonne massita'a shito'o. Ee lasage gatto'i Miidiyaa'm manna hollansito'o. Ooreebikaa Zaa'eebikaa horoore mutta'a Geedewoon beyyo eebbo'o. Ee ammane Geedewoon Yoordaanoos daajjiinsi eelliinchi firanne hee'ukko. Ee lasage Efireem sulli Geedewoonina «Mahina kid issitto? Miidiyaaminne oranteena mattittuuyyi neese mahina weeshshittoyyo?» yita'a ixxonne qaraatta'a quuqqo'o. Ihukkaarem ixxuwwina «An issummok ki'nnuwwi issitakko'aanninne akeekamoohaare mahannem xigamooyyo. I sulli hundim baxukkaanniinsi Efreem sulli baxu hoffi luwwim lophphookko. Efireem sullik woyi'n qarme'i Abi'eezer woyi'n mishiinsi e'llooyyoonnihe? Waa'i Miidiyaa'm mannika awwonsaano Ooreebaa Zaa'eebaa ki'nnuwwi anganne higisaa uwwukko. Eehaare ki'nnuwwi baxxakko'aanninne akeekamoo baxo an maha baxaate?» yu ammanenne ixxuwwik nadajji billukko. Ee ammane Geedewoon ixxenne maqire hee'llo'i sasem xibbi manninnem Yoordaanoos daajji eeqidonne firaa hee'ukko. Ixxuwwim mahaa hooggo'aarem ixxuwwi diina'i lasonne aagga'a hollitam hee'llo'o. Sukoota affo'i ammanenne Geedewoon ee beero'i mannina «Miidiyaa'm adilluwwa Zeebaahaa Xalmuunaa'i laseesummuuyyi eese awwonto'i manni lobakata hooggo'i bikkina he'i ittam qorosho'o uwwehe» yukko. Ihukkaarem Sukooxxi awwonsaan «Ki gogotina neese ittam luwwa uwwinoommok at Zeebaahaa Xalmuunaa'aa qeefaddaahinnihe?» yito'o. Geedewoonim «Eehaare danaamo; Waa'i Zeebaahaa Xalmuunaa'aa i anganne higisaa uwwoo ammane udma'i uulli uttinnee halluttinnee ki'nnuwwa loodoommo» yukko. Ee lasage Geedewoon Phinu'eela maraa Sukoot manna xa'mmikkisam xa'mmukko. Ihukkaarem ixxuwwim Sukoot manni dabatto'isam dabatto'o. Ee bikkina ixxuwwinam «An kaachchinne xummam daba'lloommi ammane ka kininne baxamaakkoo qoto'akka'a beero'i egerakkam beyyo gindansoommo» yukko. Zeebaahii Xalmuunaa'ii eelliinchi firoo kolli gogotiinsi gatto'i tommoo onti kum gaadaaninnem Qaarqooranne hee'llo'o. Xibbii lamiyyi kum o'l mu'uta lade'llo'oo goon hundim beeddita'a hee'llo'o. Geedewoon udma'i uulla massoo googinne maraa Noobaahiinsii Yoogbaahiinsii eelliinchi firinne hee'u gogot jalagaakkoohaannonne dangonnem qasukko. Miidiyaa'm adilluwwi lamim Zeebaahii Xalmuunaa'ii gibbo'o; ihukkaarem Geedewoon ixxuwwa hollaa qeefadukko. Ixxuwwi gogotam binnaa'ukko. Yoo'aas beet Geedewoon oriinsi Heerees duu'n googinne daba'llukko. Ixxim Sukoot beero'ika mat woraadichcho qeefadukko; oo woraadichchim ee beero'i gassaa'nnekaa lommannikaa lamarayyikaa lamar manchikaa summa kitaabaa uwwukko. Ee lasage Geedewoon Sukoot manni beyyo waaraa « ‹Zeebaahaa Xalmuunaa'aa kabe'e afeebe'e qeefaddibee'i bikkina kaba sibaaronne hooggo'i ki gaadaanina ittam hurbaata uwwinoommok mahinatte?› yitakka'a gaddakka'a hee'llakko'o. Ihukkaarem kaba Zeebaahii Xalmuunaa'ii kuno'o kaba i angannette» yukko. Ee lasage Geedewoon uttaa halluttaa udma'iinsi massaa Sukoot beero'i awwonsaano loodukko. Phinu'eel beero'o qoto'akka'a egerakkam beyyom gindukko; ee beero'onne hee'oo goon hundam shaa guullukko. Odim ee lasage Geedewoon Zeebaahaa Xalmuunaa'aa «Taabooranne shitakko'i manni hinkido'i keen hee'llo'o?» yaa xa'mmukko. Ixxuwwim «Keese labbam keen hee'llo'o. Hundichchim adi'l ooso labbamane» yita'a dabatto'o. Geedewoonim «Ixxuwwi iyyummoos ikko'i iyyabbaayyuwwi hee'llo'o. Ki'nnuwwi ixxuwwa shitakkobeeta'n anim ki'nnuwwina qishixxoomman hee'ukkisa hanqo'isinne hide'oommo» yukko. Ee lasage Geedewoon ixxi won beetina Yeeteerina «Kaba ki'llaa ixxuwwa shihe» yaa ijaajukko. Ihukkaarem ixxi beet ooshshichchi hee'u bikkina bisa'a makkisaa shimma baddukko. Ee lasage Zeebaahii Xalmuunaa'ii Geedewoonina «At ki gagim shihe! Manchi beetik malaayyi ixxi gaqqi orachchisame» yito'o. Ee bikkina Geedewoon ixxuwwa shaa ixxuwwi gaameela'uwwi gaanjenne hee'u wereeggi mu'uta hundam massukko. Ee lasage Isra'ee'l minaadab Geedewoonina «At neese Miidiyaa'm manni angiinsi gatissaatto. Ee bikkina atii ki oosii ee'isam ki oos oosii neese gassaan ikkehe» yito'o. Geedewoonim «Anim i beetim ki'nnuwwi gassaan inkoommoyyo. Ki'nnuwwi gassaanchi Waa'i ixxi gagoomame» yaa dabarukko. Ee lasage Geedewoon ixxuwwina «An mat luwwa ki'nnuwwa xa'mmoommo; ki'nnuwwi annanchim qeefaddakka'a massitakko'i macci gutichcho iina uwwehe» yukko. Isma'eel shumo'ina maccenne worqi gutichcho issimmi losanom hee'ukko. Minaadabim «Liiranchinne uwwinoommo» yito'o. Eddechcha dakka'a annannichchim massitto'i macci gutichcho ee eddechchanne wixxaa'llo'o. Geedewoon massu macci gutichchi lamiyyi kilo'o ihoo qax hee'ukko. Oohim mulli wereeggi luwwa, gaanji worqaa Miidiyaa'm uulli adilluwwi edde'llam muulli kashar edechchaa ee'isam ixxuwwi gaameela'uwwi ganjenne hee'u wereeggi luwwaa edoo'nnette. Geedewoon eehanninne qophpha'n waa'a baxaa qaramu beero'onne Oofiranne dissukko. Isra'ee'l minaadab hundim Waa'a uraa ixxone otossimma asheerukko. Ookkim Geedewooninaa ixxi abaroosinaa qaash ihukko. Ee'isinne Miidiyaa'm manni Isra'ee'l minaadabinne kaa'anto'o. Ee lasage od Isra'eela baddisseena xanto'oyyo. Geedewoon leheebe'i afeebe'e sor hiinchi hundoomam uulli xummukko. Yoo'aas beet Geedewoon qaramu uulla maraa ixxi minenne afuurukko. Ixxi dut meento eebaa hee'u bikkina ixxi gurubbiinsi fitto'oo lamarayyi goo'n oos hee'llo'o. Ixxenam Seekeemanne hee'llam mat bakki meentichcho hee'llo'o. Isem ixxena mat goonchi beeto qatto'o. Ee beet summam Abemeeleeka yaa weeshukko. Yoo'aas beet Geedewoon umura goddaa lehukko. Ixxi anni Yoo'aas waammannem waammamukko. Oo waammim Abi'eezer moolli beero'i ihu Oofiranne yookko. Geedewoon lehaa lasage Isra'ee'l minaadab odim Waa'ina amma'nnancha hoogimminne Ba'aala yakkam qophpha'n waa'uwwina otossito'o. Ba'aalbariitam ixxuwwi waa'i issito'o. Isra'ee'l minaadab ixxuwwi kululleetanne hee'llo'i diina'iinsi hundiinsim gatisu ixxuwwi Moollanni Waa'a xaddo'o. Geedewoon ixxuwwina issu er luwwi hundam xadimminne ixxi abaroosina anga dabattam keen ikko'oyyo. Geedewoon bet Abemeeleek ixxi eeshimmuwwi hee'llam Seekee'm beero'o maraa ixxuwwina hundinam «Seekee'm manni hundinam ‹Geedewoonik lamarayyem oosiminnii mat manchi ki'nnuwwa gassutta'n e'llookko? Odim an ki'nnuwwina miqee maaraa ihummisam xaddakkotte› yitakka'a kullehe» yukko. Eeshimmuwwim ixxo bikkita'a ee woshsha Seekee'm manni hundinam kutto'o. Ixxuwwim «Ixxi niyyabbaayyo» yita'a Abemeeleeka awwonteena tiiro woncaa'llo'o. Ba'aalbariit miniinsi lamarayyi kin bira aa'lla'a uwwito'aare awwaad bee'i keenoo funaanaanoo bitaa'ukko. Ixxuwwim ixxo awwonto'o. Ixxim ixxi anni mi'n beyyo Oofira maraa Geedewoonina oos hee'llo'i lamarayyem ixxi abbaayyuwwam mat kinanne durukko. Ihukkaarem Geedewoonina ilmuchchi hee'u Yoo'aataam maaxamaa hee'u bikkina lehiinsi gatukko. Ee lasage Seekee'mmekii Beetimiilo'i mannii hundim wixxita'a Seekeemanne yoo hujuphphi haqqichchi lugumo matta'a Abemeeleeka adil issito'o. Yoo'aataamim eekka macceesaa Gariizaa'n duu'n ludonne firaa sagara iimaa'aa Seekee'm mannina awwonaa yoo woshsha wocukko. Ki'nnuwwi i woshsha macceessakko'aare Waa'im ki'nnuwwika macceesookko. Mat ayyaamo huqquwwi mat haqqichcho adil issiteena wixxita'a matta'a weerina «Neesenne adil ihe» yito'o. Ihukkaarem weer «Waa'uwwinaa manninaa awwaadoo i zayta uwwimma uraa haqquwwanne adil ihonnihe?» yukko. Odim ee lasage haqquwwi odakkichchina «Ni beyyo waattaa neesenne adil ihe» yito'o. Ihukkaarem oda'i «Iikka xee'aallaa danaamoo ihu misha mishimma uraa ki'nnuwwanne adil iheena maronnihe?» yukko. Odim haqquwwi woyinina ‹Waattaa neesenne adil ihe› yito'o. Ihukkaarem woyin «An waa'uwwaa mannaa liiransoommi misha uwwimma uraa haqqanne adil ihonannihe?» yukko. Ee bikkina haqquwwi uttina «Waattaa neesenne adil ihe» yito'o. Uttim «Hanqinam eese ki'nnuwwanne adil issitakkeena hassakkolas waattakka'a i hafanne usheexxehe. Ee'isa issitakkobeelas iihaanniinsi uttaam caaffuwwiinsi giir firaa Liibaanoos digibbuwwa shokkiisookko» yaa dabarukko. Yoo'aataam odim «Abemeeleeka adil issitakko'ok hanqinnee xabbee'n googinnettennihe? Geedewoon ki'nnuwwina issu luwwa tiittakka'a ixxi abaroosa laboo'isinne abooyyitakkahinnihe? Iyyanni ki'nnuwwi bikkina oramukkisa sawwi'llehe. Ki'nnuwwa Miidiyaa'm angiinsi gatiseena ixxi gaga lehina higisaa uwwaa hee'ukko. Ihukkaarem kaballa ki'nnuwwi iyyanni mininne diina'oominne ki'llakko'ookko; ixxeka lamarayyem oosom matem kinanne duttakko'ookko. Eeham issitakko'ok Geedewoon ixxi mi'n baxaanchonne qaru Abemeeleek ki'nnuwwina qarmanchi ihu bikkinatte; ixxom Seekeemanne adil issitakko'o. Eehaare kaballa Geedewooninaa ixxi abaroosinaa issitakko'ok hanqinnee xabbee'n googinnettee ihulas Abemeeleekinnem liirammehe. Odim ixxim ki'nnuwwinne liiramona. Eehid ihubeelas Abemeeleekiinsi giir firaa Seekee'mmekaa Beetimiiloo'n mannaa itona. Ee'isam Seekeemiinsii Beetimiilooniinsii giir firaa Abemeeleeka itona» yukko. Yoo'aataam eekka wocaa lasage ixxi abbaayyo Abemeeleeka baddu bikkina gibaa maraa Ba'eeranne afuurukko. Abemeeleek Isra'ee'l minaadaba sas hiincho gassukko. Ee lasage Waa'i Abemeeleek lambe'ennee Seekee'm manni lambe'ennee jor ayyaana asse'ukko. Ee bikkina Seekee'm manni Abemeeleeka laggo'o. Oohim ihukkok ixxuwwi abbaayyi Abemeeleek shu Geedewoon lamarayyem oosikam xiigaa ixxuwwa shihona ixxo iggisso'i Seekee'm mannika baadoo miqisimminatte. Seekee'm manni Abemeeleekanne diina'oominne ki'lla'a hofqax mannam doo'llita'a duunnuwwi ludonne daphphita'a egetto'o; ixxuwwim ee googinne higoo arata hundam boggo'o. Abemeeleekim ee woshsha macceesukko. Ee lasage Eebeed beet Gaa'aal ixxi abbaayyuwwinne maqirem Seekeema waarukko. Seekee'm mannim ixxonne amma'nnanto'o. Ixxuwwi hundim woyi'n kaashshi beyyo matta'a ixxuwwi woyi'n misha feetto'o. Woyi'n diqaasam lubba'a lob uguda issito'o. Ixxuwwi waa'ina otossitam mine aagga'a ee beyyonne ittu'uuyyii aggu'uuyyii Abemeeleeka game'llitam hee'llo'o. Eebeed beet Gaa'aalim «Abemeeleek ayyette? Neese Seekee'm manni Abemeeleekina ho'llammoommok mahinate? Ixxi Geedewoon beetoyyonnihe? Zeebuldu ixxi gaaxxi awwonsaanchoyyonnihe? Hore'em ki'nnuwwina lugu'm anni ihu Seekee'm annina Hamoorina ijaajammehe. Ka minaadaba awwonsoommok anetti ihumta'n Abemeeleeka haniinsi hooram hee'ummo. Odim ‹Ki gogota qoxxissaa fittaa orame!› yaa kuram hee'ummo» yukko. Ee beero'i gassaanchi Zeebuul Eebeed beet Gaa'aal wocu woshsha macceesaa hore'em lobakata quuqukko. Ixxim Aruumanne hee'oo Abemeeleekina «Eebeed beet Gaa'aal ixxi abbaayyuwwinne maqirem Seekeema waaraakko. Beero'i mannim keesenne ki'oo'isa issaakko. Ee bikkina at ki manninnem hiimonne ki'llaa biir beyyonne maaxantakka'a egellehe. Soodo daram eelliinchi firukkuuyyi ki'llakka'a dangissakka'a beero'o qassehe. Gaa'aalii ixxenne yo'i keenii ki'nnuwwa qasseena fittam ammane xantakkoqaxinne qoxxitakka'a qassehe» yitakka'a kullehe yaa manna asse'ukko. Ee bikkina Abemeeleekii ixxi mannii baqitenne ki'lla'a Seekeemiinsi biireen soor beyyonne baxxamanta'a maaxanta'a egetto'o. Abemeeleekii ixxenne yo'i keenii Eebeed beet Gaa'aal beero'i ooxxi goocanne firaa uullaakkoo moo'lla'a maaxanto'i beyyiinsi fitto'o. Gaa'aalim ixxuwwa moo'aa Zaabuulina «Moo'e, manni duu'n luddiinsi dilloolla» yukko. Zeebulim «Ookki duunnuwwanne moo'amoo awkare'e bagaan mannayyo» yaa dabarukko. Odim Gaa'aal dabaraa «Moo'e; manni duuniinsi aad dilloolla. Mat qooxo'i gennaa'n qilxo'i googinne waaroolla» yukko. Ee lasage odim Zeebul « ‹Neese ixxena ijaajammeena Abemeeleek ayyette?› yaa wocu ki suum kaba hannonnette? Kuk oo at gadditti minaadabayyonnihe? Kaba mattaa ixxuwwinne orame» yukko. Gaa'aalim Seekee'm manna awwonsaa maraa Abemeeleekinne oramukko. Gaa'aal gibukko; Abemeeleekim lasonne aagaa hollukko; beero'i ooxxi goocanne afeebe'e dut keen hawwodanto'o. Abemeeleek Aruuma heechchi beyyi issukko. Ihukkaarem Zeebul Gaa'aalaa ixxi abbaayyuwwaa Seekeemiinsi hollaa fissukko. Ee lasage ixxuwwi Seekeemanne hee'lleena xanto'oyyo. La'm balla Seekee'm manni ixxuwwi abuulli uulla matto'isa Abemeeleek macceesukko. Ixxenne yo'i mannam sas beyyonne baxxansaa hax beyyuwwanne maaxanta'a egettamisa issukko. Ixxim beero'iinsi Seekee'm manni firookkoka moo'aa maaxamu beyyiinsi firaa shukko. Abemeeleekii ixxenne hee'llo'i mannii beero'i gooca egetteena geetta'a fitta'a goocanne uullito'o. Gatto'i lamem qooxo'im abuulli beyyika manna hundam shita'a guu'llito'o. Abemeeleek qasanchinne mat balli hundoomam hosukko. Beero'ooma ixxi anganne issaa mannooma hundam shaa guullukko. oomam gindaa uulloommanne sooqido wixukko. Seekee'm gimbi woronne hee'llo'i maanni eekka macceesso'i ammanenne Ba'aalbaariitina otossakkam mi'n woronne yoo giribanne aaggo'o. Abemeeleekim Ixxuwwi ee beyyonne maaxanta'a wixxito'isa macceesukko. Ee bikkina ixxi awwonaaninne maqirem Xaalmoo'n duunanne firukko; ee lasage heeda aa'aa haqqa muraa gudumonne iyyukko. Ixxi awwonaanim qaqqissa'a ee'isa issitona kurukko. Ee bikkina annanchim haqqika caafa muraa iyyaa Abemeeleeka awwonaa maraa ee girbanne dissukko. Ixxuwwim oo maaxanto'i manni girbi woronne hee'llonam ee haqqanne shokka uwwito'o. Ee bikkina girbanne hee'llo'i manni hundim letto'o. Ee girbanne hee'llo'i goo'nnekii meentikii xig mat kuma ihoo qax hee'ukko. Ee lasage Abemeeleek Toobeex beero'o maraa kibbukko. Ihukkaarem ee beero'i woronne beero'o qoto'akka'a egerakkam qoxxaalli gimbi hee'u bikkina goonii meentii gibaa ixxonne maxamukko; xufam issita'a ixxi iimanenne fitto'o. Abemeeleek oramukkuuyyi ee gimba afaa shokka uwweena goocanne hincukko. Ihukkaarem mat meentichcho liitimmi ifichcho hanaanaad fatakita'a Abemeeleekika sammo anto'o. Ixxi o'l mu'uta amadu woraadichchina «Qaqqissaa waattaa eese ki bisa'inne shihe; meenti anganne lehukko yimma hasoommoyyo» yukko. Ixxim bisa'ine aphphisaa shukko. Isra'ee'l minaadab Abemeeleek lehukkisa laqqo'i ammanenne annanchim ixxi gaqqi mine marukko. Ee'isinne Abemeeleek lamarayyem ixxi abbaayyuwwam shaa ixxi annanne baxu hantaarina Waa'i baado miqisukko. Ee'isam Seekee'm manni issito'i jollina hawwitamisa issukko. Ee'isam Geedewoon beet Yoo'aataam duumu duunchi afoo'isa kurukkok hundim wo'mmukko. Abemeeleek lehaa lasage Doodo'ina beet beet Phu'a beet Toola'a Isra'eela gatiseena ki'ukko. Ixxim Yisaakoor sulliinsette ihaa duunaam Efireem uullane Shaamiira yakkam beyyonne hee'ukko. Ixxim lamiyyee sas hiinchoo Isra'ee'l minaadaba awwonsaa lasage lehukko; Shaamiirannem waammamukko. Toola'aansi lasonne Gala'aaxxi Yaa'iir ki'aa Isra'ee'l minaadaba lamiyyee lam hiinchoo awwonsukko. Ixxena sad hallanne saa'llita'a jigissam sad goo'n oos hee'llo'o. Ixxuwwinam Gala'aaxxi uullane sad beero'uwwi hee'ukko. Oo beero'uwwi kaballi afeebe'em Yaa'iir gatteewwaa yamamookko. Yaa'iirim lehaa Qaamoona yakkam beyyonne waammamukko. Isra'ee'l minaadab Waa'i illagenne odim jor luwwa baxxo'o. Ba'aalaa Astaarootaa ee'isam Sooriy manni, Siidoo'n manni, Moo'aaphphi manni, Aammoo'nnekii Filisxee'm mannii otossitam waa'uwwanne otossito'o. Waa'inam otossimma utto'o. Ee bikkina Waa'i Isra'ee'l minaadabanne ququkko; Filisxee'mmaanninaa Aamoo'n manninam higisaa uwwukko. Ixxuwwim Yoordaanoosiinsi eelliinchi firoo kollonne Amoore'i manni uullanne yoo Gala'aadanne hee'llam Isra'ee'l minaadab hundannem kee'mmaa'l hawwo afissu'uuyyi tommoo sadeenti hiinchoo gassito'o. Amoo'n manni Yihudika, Biiniyaamikaa Efireem sulloo qasseena Yoordaanos daajje fitto'o. Ee bikkina Isra'ee'l minaadab kee'mmaallisa u'nnanto'o. Ee lasage Isra'ee'l minaadab «Waa'a; neese ni Waa'a keese ullaa Ba'aala yakkam qophpha'n waa'uwwina otosimminne keese hawwondammo» yitu'uuyyi Waa'i kollonne laatto'o. Waa'im ixxuwwina «Gibxik, Amoore'ik, Amoo'nnek, Fi'lisixee'mmek, Siidoo'nnek, Amaaleeqikii Maa'oo'n mannii kanniinsi illageen ki'nnuwwa u'nnissu'uuyyi gassito'aare i kollonne laattakko'i ammane an ixxuwwi angiinsi ki'nnuwwa gatisummoyyonnihe? Ihukkaarem ki'nnuwwi kabad afeebe'em eese uttakka'a qophpha'n waa'uwwina otossitakko'o. Ee bikkina od ki'nnuwwa gatisoommoyyo. Ki'nnuwwi otostakkeena doo'llitakko'i waa'uwwi kolli mattakka'a laallehe. Ixxuwwim ki'nnuwwanne hawwi afoo ammane gatissona» yaa dabarukko. Ihukkaarem Isra'ee'l minaadab Waa'ina «Hanqinam neese keese hawwondaammo; at neesenne doo'llitti luwwi hundam isse; kaballa neese gatise» yito'o. Ee bikkina qophpha'n waa'uwwa ixxuwwi lambe'iinsi fissita'a uunjita'a Waa'ina otossito'o. Waa'im Isra'ee'l adaraalla'n bikkina lobakata kichche'ukko. Ee lasage Amoo'n uulli gogot oranteena gudda'a Gala'aadanne wiiddanto'o. Isra'ee'l mannim wixxita'a Gala'aadanne Misiphpha yakkam beyyonne wiiddanto'o. Ee beyyonnem minaadabii Gala'aadanne Isra'ee'l sulluwwi awwonsaan hundimii «Amoo'n manninne orammummuuyyi neese awwonsookkok ayyette? Ka orina awwonsaanchi ihookkok Gala'aadanne hee'oo manni hundinam awwonsaanchi ihookko» yaqqanto'o. Gala'aaxxi uulli Yooftaahe mat buubbeesaanchoonsi qaramaakkoo geed gaadaanchi hee'ukko. Ixxi annikim summi Gala'aadatte hee'ukko. Gala'aad gaassaa eebaakkoo meentichcho ixxena qatto'oo mulli goo'n oos hee'ukko; ixxuwwim li'lla'a lasage ixxuwwi abbaayyi hee'u Yooftaahina «At mulli meentichchoonsi qarantitti bikkina niyyanni luwwika maham lago aa'lleena xantooyyo» yita'a Miniinsi hollito'o. Yooftaahem abbaayyuwwiinsi gibaa Xooba yakkam uullanne hee'ukko. Ee beyyonnem ixxo awwaad bee'i hofqax mannim wixxita'a awwonto'o. Hoffi ammaniinsi lasage Amoo'n manni Isra'ee'l manna qasseena gaaddo'o. Ookki ihu ammanenne Gala'aaxxi awwonsaan Yooftaaha Xoobiinsi dabatta'a wotteena matto'o. Ixxuwwim Yooftaahina «Amoo'n minaadabinne orammona waattaa neese awwonse» yito'o. Ihukkaarem Yooftaahe «Eese ceentakka'a iyyanni miniinsi hollitakko'ok ki'nnuwwayyonnihe? Kaba ki'nnuwwanne hawwi afukkaare i beyyo waattakko'ok mahinatte?» yukko. Ixxuwwim Yooftaahina «Kaba neese ki kollonne daba'llinaa waallaammo; niinninne gaaddaa Amoo'n manna qassonaa Gala'aaxxi minaadab hundinam awwonsaanchi ikkonaa hansoommo» yito'o. Yooftaahim Gala'aaxxi lommannina «An Amoo'n manninne oramona mine dabattakka'a massitakka'a lasage Waa'i kaachcha iina uwwoo ammane ki'nnuwwina awwonsaanchi issitakkamonnihe?» yukko. Ixxuwwim «Neese eehannonne iittammaammo; Waa'i neessenne naqaash ihona» yito'o. Ee bikkina Yooftaah Gala'aaxxi awwonsaaninne maqirem marukko. Minaadabim ixxo ixxuwwi gassaanchoo awwonsaanchoo issukko. Yooftaahim Misiphpha yakkam beyyonne ee woshshanne iittamukkisa Waa'i illagenne caakkisaa la'isukko. Ee lasage Yooftaah Amoo'n adi'l beyyo «At niinne wocantittok mahinatte? Ni uulla qassittokdu mahinatte?» yita'a xa'mmitam asse'amaano asse'ukko. Amoo'n adilim Yooftaah asse'amaanina «Isra'ee'l minaadab Gibxiinsi fitto'i ammane Arnoo'n daajjiinsi ki'isaa Yaabooq daajji afeebe'e yoo i uullaa Yoordaanoos daajjee iinniinsi massitto'o. Ihukkaarem kaba xumminne iina dabarimmi hasisookko» yaa dabarukko. Yooftaahim Amoo'n adi'l beyyo la'mmaaggem asse'amaano asse'ukko. Yooftaahim ixxena «Isra'ee'l minaadab Moo'aaphphanem ihukko Amoo'nneka uullaa massito'oyyo. Isra'ee'l minaadab Gibxiinsi fitto'i ammane udma'i uulla huruutta'a Ertiira'i dambalaqa affo'o. Ee beyyiinsim Qaadeesanne higgo'o. Ee lasage odim ixxi uullinne higimmina Eedoo'm adi'l beyyo asse'amaano asse'llo'o. Ihukkaarem Eedoo'm adil higgeena hoorukko. Ee'isam Moo'aaphphi adilam xa'mmito'o; ixxim higgeena hoorukko. Ee bikkina Isra'ee'l minaadab Qaadeesanne afuutto'o. Udma'i uulla huruutta'a mattu'uuyyi Eedoo'mmekaa Moo'aaphphekaa uulla do'lla'a Moo'aabiinsi eelliinchi firinne Arnoo'n daajji eeqidonne yoo beyyonne waatta'a wiiddanto'o. Ihukkaarem Arnoo'n daajji Moo'aabina gabal ihu bikkina ee daajje fitto'oyyo. Ee lasage Isra'ee'l minaadab Haseeboo'n uullanne ihaa gassoo Amoore'i uulli adil hee'u Siihoon beyyo «Ki uullinne ni gaqqi uulla hingonnihe?» yita'a asse'amaano asse'llo'o. Ihukkaarem Siihoon Isra'ee'l minaadab uullinne higga'a mattambee'isa hoorukko. Eehanniinsim Yahaax yakkam beyyonne ixxi googota hundam wixxaa'a Isra'ee'l minaadaba qasukko. Ihukkaarem Isra'ee'l Moollanni Waa'i, Isra'ee'l minaadab Siihoonaa ixxi googotaa hundam kaa'llamisa issukko. Ee'isinne ee uullanne hee'llam hee'llo'i Amoore'i mannika uulla hundam ixxuwwi gulummi issito'o. Woroo'n qarinne Arnoo'n daajjiinsi ki'isaa hanaa'n qarinne Yaabooq daajjenne afeebe'ee ee'isam eelliinchi firinne udma'iinsi ki'isaa eelliinchi aagganne Yoordaanoos daajjenne afeebe'ee Amoore'i uulla hundam amaddo'o. Ee bikkina ixxi minaadabina Isra'ee'l bikkina Amoore'i manni hollaa fissukkok Isra'ee'l Moollanni Waa'i ixxi gagoomame. Eehaare at dabattaa massiteena hassaatennihe? Kiina waa'i Kaamoosh uwwukkoka ammaxxitaa afuuttooyyonnihe? Ihukkaarem ni Moollanni Waa'i niina uwwu luwwi hundam lagidachchinaa hee'nnoommo. At Moo'aaphphi adil hee'u Siifoor beet Baalaaqiinsi lophphoommo yitaa sawwitoollannihe? Ixxim Isra'ee'l minaadabinne hore'em uullixamukkoyyo; orameenam iggukkoyyo. Ee bikkina sas xibbi hiinchi hundoomam Isra'ee'l minaadab Haseeboonaa ee hegeegoo Aro'eeraa ee hegeegoo ee'isam Arnoo'n daajji gadanonne yoo beero'uwwaa hundam lago aa'lla'a hee'llam hee'llo'o. Eehaare ee doollenne hundannem mahina dabattakka'a hoottakko'oyyo? An keese hawwodummoyyo. Ihukkaarem eesenne bagado ki'issaa hawwoddeena ki'llittok atette. Oogataanchi Waa'i Isra'ee'l minaadaphphi lambe'ennee Amoo'n manni lambe'ennee kaballa oogato'o uwwookko» yukko. Ihukkaarem Yooftaahika asso Amoo'n adil mahannem xigukkoyyo. Ee lasage Waa'i Ayyaan Yooftaahanne dillukko. Yooftaahim Gala'aadaa Minaas uullaa higaa odim Gala'aadanne yoo Misiphphinne aa'aa eeheenim Amoo'n uulla marukko. Ixxim Waa'ina «Hanqinam Amoo'n manna i anganne higissaa uwwitlasii kaachchinne gaadiinsi i mine xumminne daba'llumlasii i miniinsi firaa eese aa'ookkok kiihan ihookko. Ixxo an shokkoo kitim issaa kiina uwwoommo» yaa uga'a aagukko. Ee lasage Yooftaah Amoo'n manninne orameena marukko. Waa'im ixxena kaachcha uwwukko. Aroo'eeriinsi ki'isaa Miiniit kululleetanne yoo lamiyyem beero'uwwaa ee'isam Aabeel karamimmanne afeebe'e yoo beyyuwwaa hundam bi'isukko. Ee'isinne Isra'ee'l minaadabina Amoo'n minaadab ho'llamo. Yooftaah Misiphphanne yoo ixxi mine daba'llu ammanenne ixxi landichcho dibbe'inne kaddu'uuyyi ixxo aa'lleena fitto'o. Ixxenam iseensi bagaan landam ihukko goon mulli oos mahim hee'ukkoyyo. Ixxim ise moo'u ammanenne lobakata kichche'aa eddechcha dereeraa «Aayye, i landichche! Kichchechchinne i tiiro bi'issitto; eesem u'nnissitto. Mashka'oomim an Waa'ina ‹Uga'a uwwoommo› yaa hide'aammo; ee sagara dabareena xanoommoyyo» yukko. Isem ixxena «Iyyanna, uga'a aaggaattoolas Waa'i ki diina'i ikko'i Amoo'n manna baado miqisu bikkina uga'a aaggittisinne eesenne isse!» yito'o. Ihukkaarem anna «Kaba an mine isseena xanoombee'i bikkina i beshinne maqirem duunanne firaa daba'llamummuuyyi i baajoo'm bikkina wi'lloona lam agana ihoo qax ammane uwwe» yita'a uunxito'o. Ixxim lam aganina mattona geegeesukko. Isem beshinne landinne maqirem duunnuwwanne fitta'a eekke'enne mine issiteena xantambee'i bikkina ixxuwwinnem wi'llito'o. Lamem aganim beeddaa lasage is anni mine daba'llito'o; annim Waa'ina aagu uga'a isenne wonshukko. Isem baajaam landichchotte hee'llo'o. Ee ammaniinsi ki'isaa Isra'ee'l baajaam landi hiinchina hiinchina soor balla ixxuwwi miniinsi qee'llita'a mattu'uuyyi Gala'aaxxi Yooftaah landichchi bikkina kichche'immii wi'llimmii losamaakkoon ihukko. Efireem manni orina gudda'a Yoordaanos dajje fitta'a Xaafoona affa'a Yooftaahina «Amoo'n manninne oranteena mattittuuyyi neese weeshshibee'i mashka'i maruchcho? Neesem kaba ki mine ki hanenne shokkiinsoommo» yito'o. Yooftaahim ixxuwwina «Anii i minaadabii Amoo'n manninne maqire qoxxaallisa wocammaa hee'nnummi ammane an ki'nnuwwa weeshaa hee'ummo. Ihukkaarem ki'nnuwwi eese ixxuwwi angiinsi gatissakko'oyyo. Ki'nnuwwi iina hara'mmitakkeena ee beyyo mattakkobee'isa la'ummi ammanenne i foorina qishixxoo'n ixxuwwinne orameena gabala higaa marummo. Waa'im ixxuwwa i anganne higisaa uwwukko. Kaba ki'nnuwwi iinninne orantakkeena ki'llakko'i mashka'i maruchcho?» yukko. Ee lasage Yooftaah Gala'aaxxi manna wixxaa'aa Efireem manninne oramaa kaa'ukko. Mashka'oomim Efireem manni «Ki'nnuwwi Efireemaannonnee Minaas manni uullannee hee'llakkam Gala'aaxxi manni Efireem manna laggakka'a waattakko'o keeno» yitam hee'llo'i bikkinatte. Efireem manni xottambee'isa Yoordaanos daajje firakkam beyyi hundam Gala'aaxxi manni ifiissa'a amadda'a hee'llo'o. Xoreena yakoo ayyi Efireem manchim «Fironnihe?» yuta'n Gala'aaxxi manni «At Efireem kolli manchonnihe?» yita'a xa'mmitam hee'llo'o. «A'a'e» yulas «Hino'o, ‹Shiibooleeta› yihe» yitam hee'llo'o; ee sagara xabbaa'aa weesheena xanoobee'i bikkina «Siibooleeta» yam hee'ukko. Ee lasage ixxo amadda'a daajje firakkam beyyuwwiinsi matonne shitam hee'llo. Ee ammane ee'isinne sorii lam kum Efireem mannii beeddukko. Yooftaah loh hiincho Isra'eelanne awwonsaanchi ihaa lasage lehukko. Ixxi qaramu Gala'aaxxi beero'uwwiinsi matonne waammamukko. Yooftaah lasagenne Beeteelihee'm Ibsaan Isra'ee'l awwonsaanchi ihukko. Ixxena sad goo'n oosii sad landii hee'ukko. Ixxim landa Isra'eel ikkobee'i mannina ladiisukko; goo'n oosinam Isra'eel ikkobee'i landa eebukko. Ibsaan lamar hiinchina Isra'eela awwonsukko. Ixxim lehukko; Beetaliheemannem waammamukko. Ibsaaniinsi lasonne Zaabiloo'n manchi hee'u Eeloon Isra'ee'l minaadaba tommi hiinchina awwonsukko. Ee lasage ixxi lehukko; Zaabiloo'n uullanne yoo Ayaaloonannem waammamukko. Eelooniinsi lasage Phiri'aatoo'n Hiileel beet Abdoon Isra'ee'l awwonsaanchi ihukko. Abdoonina lamarayyi hallane saa'llita'a jigissam sor goo'n oosii sad oos oosii hee'llo'o. Abdoon sadeenti hiincho Isra'eela awwonsukko. Ee lasage Phiri'aatooniinsetti ihoo Hiileel beet Abdoon lehukko. Duunaam Amaaleeq manni uullane Efireem sulli gassoo Phiri'aatoonannem waammamukko. Isra'ee'l minaadab odim Waa'i illagenne jor luwwa baxxo'o. Ee bikkina Waa'i sor hiincho hundam Filisxee'm manni anganne higisaa uwwukko. Ee doollenne Xoori'a yakkam beero'onne hee'oo Maanuhe yakkam manchi hee'ukko. Ixxim qaramukkok Daan sulliinsetti hee'ukko; ixxi meentichchom ooso qatobee'i alceennatti hee'llo'o. Waa'i asse'amaanchi isena moo'amaa «Oono'o, at alceennatti ikkitti bikkina kiina oos bee'e. Ihukkaarem lamfooretti ikkaa goonchi beeto qattootto. Ee bikkina woyi'n diqaasaa dinbisoo aggaa ma'llichchom agimmiinsii haashaarammi hurbaata maham itimmiinsii ki gaga ege'lle. Hanqinam at lam fooretti ikkootto; goonchi beetom qattootto. Oo beetim qaramu balliinsi ki'isaa Waa'ina annanni ihaa Naaziraawekkichchi ihoo bikkina ixxek horoor hore'em hogoossamoone. Ixxim Isra'ee'l minaadaba Filisxee'm manni angiinsi gatisimma asheerookko» yukko. Ee lasage oo meentichcho waatta'a is aro'ina «Mat Waa'i manchi i beyyo waaraa hee'ukko. Ixxim Waa'ina asse'amaanchisa hore'em baddisoohan hee'ukko. Anim hanniinsi waarude'e xa'mmummoyyo. Ixxi summam kurukkoyyo. Ihukkaarem ixxi iina ‹At lamfooretti ikkootto; goonchi beetom qattootto; oo qaramoo beetim ixxi umu'l doolli hundoomannem Waa'ina annanni ihaakkoo Naaziraawekkichchi ihoo bikkina woyi'n diqaasaa mulli dinbisoo agga maham agimmiinsii ee'isam haashaarammi hurbaatam itimmiinsii egge'lle› yaa kuraakko» yito'o. Ee lasage Maanuhe Waa'ina «Moollanna, oo ciilichchi qaramoo ammane neese maha issimmi hasisooda'e kuroo'isina ee at asse'llitti Waa'i mancho la'mmaaggem ni beyyo daba'llaa waaroo'isa isse» yaa uunxukko. Waa'im Maanuheka uunxatto macceesukko. Waa'i asse'amaanchim la'mmaaggem oo meentichcho abuulli woronne afuutto'oohaannonne moo'amukko. Ee ammane Maanuhe iseenne hee'ukkoyyo. Is aro'i beyyom qaqqissa'a geetta'a matta'a «Oono'o, oonballa i beyyo waaraa hee'u manchi odim iina moo'amukko» yito'o. Maanuhem afuuru beyyiinsi ki'aa ixxi meentichcho awwonaa marukko. Ixxim ee manchi beyyo hincaa «Ka meentichchonne atoorattaa hee'llittok atettennihe?» yaa xa'mmukko. Manchim «Eeyya; anette» yaa dabarukko. Maanuhem «At woccitti woshshi wo'mmoo ammane ee qaramoo ciilina maha issimmi hasisookko?» yaa xa'mmukko. Waa'i asse'amaanchim «An kurammi luwwi hundam ki meentichcho qoxxita'a ege'llitona. Woyi'n mishaa ixxeeniinsi siidamoo luwwaa maham ittoone. Woyi'n diqaasam ihukko te'im dimbisoo agga maham agoone; haashaarammi hurbaatam ittoone. An ise ijaajummi luwwi hundam egettona» yukko. Odim Maanuhe «At yitti luwwi wo'mmoo ammane keese galaxxinoommisina ki summi ayyette?» yaa xa'mmukko. Oo asse'amaanchim «I summa mahina xa'mmitto? I summi maalalisiisootte» yaa dabarukko. Ee lasage Maanuhe mat fellakkichchi geexaa hurbaatiinsi Waa'ina uwwakkamokaa massaa kiti'm kinanne Waa'ina kitim issaa hincaa'ukko. Maanuhee ixxi meentichchoo moo'amukkuuyyim Waa'i maalalsiisoo luwwa baxukko. Ee kiti'm beyyiinsi laban iim firu ammanenne oo Waa'ina asse'amaanchi ee kiti'm laba'n worinne iimane firukko. Ixxuwwim eekka moo'amaa illillaachcha uullanne ubamukko. Waa'ina asse'amaanchi Maanuhenaa ixxi meentichchonaa od moo'amukkoyyo. Ee ammanenne Maanuhe ookki Waa'ina asse'amaanchi ihukkisa la'ukko. Maanuhe ixxi meentichchona «Neese Waa'a moo'nnummi bikkina hanqinam lenoommo» yukko. Ihukkaarem ixxi meentichcho «Waa'i neese shoota'n niikka shokkiisakka'a hincaa'akkam kitimaa hurbaaxxi kitimaa ni angiinsi aa'am hee'ukkoyyo. Odim ka luwwi hundam moo'isam hee'ukkoyyo. Kido'i luwwam niina kuram hee'ukkoyyo» yito'o. Meentichchom goonchi beeto qatto'o. Beet summam «Somsoona» yita'a weeshsho'o. Beetim li'ukko; Waa'im ixxo maasse'ukko. Xoora'inaa Eshtaa'oolinaa lambe'enne yoo Daan sulli hee'oo gattenne hee'ukkuuyyi Waa'ik Ayyaan ixxo naashaaxisimma asheerukko. Mat balla Somsoon Tiimina yakam beero'o dillukko. Eehe'em Filisxee'm landiinsi mate moo'ukko. Ixxim mine daba'llaa ixxi anninaa amanaa «Tiiminanne Filisxee'm manniinsi mat landichcho moo'aa ise iittaammo. Ee bikkina xeekkakka'a ise iina eebbehe» yukko. Ihukkaarem annii amaa «Landina ballachchamubee'i Filisxee'm manni beyyo mattoottok ki moollonne te'im ni minaadaphphi lambe'enne landa hooggaatennihe?» yita'a xa'mmito'o. Ihukkaarem Somsoon annina «I illenne aaggo'i bikkina ise iina eebe» yukko. Somsoon eekka issoo'isina awwonsam hee'ukkok Waa'i ihukkisa ixxi annii amaa laqqo'oyyi hee'ukko. Ee ammane Filisxee'm manni Isra'ee'l minaadaba ijaajja'a gassitam hee'llo'i bikkina Waa'i Filisxee'm manninne orameena mashka'a hasam hee'ukko. Ee lasage Somsoon ixxi anninnee amannee maqirem Tiimina dillukko. Ee beyyonne yoo woyi'n kaashshi worinne higamukkuuyyim mat hobbichchi geex muunukkuuyyi ixxi beyyo afukko. Dangonnem Waa'ik Ayyaan ixxonne malaayyaamisa dillukko. Ee bikkina ee hobbichcho mat fellakkichchi geexisa xigaa ixxi anganne ma'lluchchom amadoo'n masharansaa ubbuusukko. Ixxi issu luwwa ixxi anninaa amanam kurukkoyyo. Ee lasage landichchi beyyo maraa atoorassukko. Isem lobakata iittukko. Hofqax balliinsi lasage ise eebeena is beyyo daba'llaa marukko. Maru kkuuyyim ee shu hobbichchi duuha'a moo'eena googiinsi koratukko. Leeshoomanne diishshi dummaa hee'ukko; woronnem marab hee'ukko. Marabiinsim anginne hofqaxam aa'aa itukkuuyyi marukko. Ixxi anni beyyoo am beyyoo afaa ammadu marabiinsi uwwukkaare ixxuwwim itto'o. Ihukkaarem ee marabo lehu hobbichchiinsi massukkisa ixxuwwina kurukkoyyo. Ixxi anni ee landichchi mine maru ammane Somsoon danaam maadda gudisukko. Eehido'i maadda gudisimmi woradduwwina losanome hee'ukko. Filisxee'm manni ixxo moo'llo'i ammanenne ixxenne maqire afuuttona sad woraada doo'llita'a asse'llo'o. Somsoonim ixxuwwina «Huno'o, laqqakkamlas mat heesso heesse'oommo. Eekkam ka lamarem bollochcho'i uguxxi ayyaammuwwannem tittakka'a iina kuttakko'aare sad wereeggi eddechchaa sad lago'i eddechchaa uwwoommo. Ihukkaarem tittakkeenamdu xantakkobeellas sad wereeggi eddechchaa sad lago'i eddechchaa iina uwwitakkamo» yukko. Ixxuwwim «Hino'o heessooma kure, macceensoommo» yito'o. Ixxim ixxuwwina «Itoohaanniinsi itakkam luwwi siidamukko. Qoxariinsim xee'aalli luwwi firukko» yukko. Ixxuwwim sas balli afeebe'e ee heesso titteena xanto'oyyo. Soo'l ballanne Somsoon arena «Ki aro'o qawwisansitaa heessika tirato kuroo'isa isse; eebeelas keesennee kiyyaanni minennee shokka uwwinoommo. Neese maaddina weeshshakko'ok adaa boggakkeenannihe?» yito'o. Ee bikkina Somsoon are wi'llitu'uuyyi ixxi kollonne hincita'a «Adaa'nnaarenne at eese iittitooyyo. Hore'em sabboolla. Mashka'oomim ni uulli ooso heesso xa'mmitaa iina tiratooma kuttittoyyo» yito'o. Ixxim isena «Moo'e, an kaka iyyanninaa iyyummanam kurumbee'ane; eehaara'i an kiina kuroommi mashka'i mahinatte?» yukko. Ee bikkina bollochcho'i uguxxi lamarem ballam wi'llimminne higisso'o. Xa'mta'a hawwisso'i bikkinam heessoo'm tirato lama'l ballanne isena kurukko. Isem eehanni tirato is uulli oosina kutto'o. Ee bikkina ee beero'i manni lama'l ballanne eelliinchi aageena illageen «Marabiinsi lophphaa xee'ookkokii hobbichchiinsi lophphaa qoxarookkokii mah yookko?» yita'a heessoo'm tirato kutto'o. Somsoonim ixxuwwina «I addichchinne abuullitakkobeeta'n dabachcha siiddakkeena xantakkam hee'llakko'oyyo» yukko. Waa'i Ayyaanim Somsoonenne malaayyaamisa dillukko. Asqaloona yakkam beyyom maraa sad manichcho shukko. Mishisoo eddechcha maxaraa eebaa heessika tirato kutto'i keenina uwwukko. Ee ihu luwwanne hundannem lobakata nadadaa ixxi moolli beyyo daba'llukko. Ixxi arem ixxi bollochcho'i ayyaamonne saawwi hee'u mulli beshichchina ladiisanto'o. Hofqax ammaniinsi lasage arasa murakkam agananne Somsoon ixxi meentichcho moo'eena fellakkichchika geexa amadaa marukko. Is anninam «I meentichchi beyyo du'm woro aageenatte» yukko. Ihukkaarem is anni aageena hoorukko. Somsooninam «At sabbittoka labisaa ki saawwina ladiisummotte. Ihona bagaan iseensi hoffote danonne lophphitamoyyonnihe? he'i at ise elleexxe» yukko. Somsoonim ixxuwwina «Ka lasage Filisxee'm manna hawwodoo luwwa maham issumta'n an xa'mmamoommoyyo» yukko. Ixxim maraa sas xibbi wengereella hochchaa amadaa lam lamika sheerimo matissaa karaa lamem sheeri'm lambe'ennem xomboora karukko. Ee lasage xomboolluwwanne giira xanqisaa Filisxee'm mannaannonne muramubee'i aras woronne fatakukko. Ee'isinne muramaa naaramu aras xale'i ihoo'n muramubee'i arasaa wee'llekaa woyi'n kaashshaa hundam shokkiisukko. Filisxee'm manni «Kaka issukkok ayyette?» yita'a xa'mmito'o; ixxuwwim «Ixxi meentichcho ixxi saawwina ladiisanto'i bikkina Tiimi'n beero'i manchi ballichchi Somsoonatte» yito'o. Ee bikkina Filisxee'm manni isee is annaa giirinne shokkiisso'o. Somsoonim «Ki'nnuwwi kaka issitakko'ookko. An odim ki'nnuwwika baado miqisimma uroombee'isa laqqehe» yaa hide'ukko. Ee ammanem ixxuwwa jorisa aphphisaa dut keeno shukko. Ee lasage maraa Eexaam yakkam beyyonne daawwa'i woronne afuurukko. Filisxee'm manni waatta'a Yihuxxi uullanne wiiddanto'o; Leehii yakkam beero'om qasso'o. Yihuxxi mannim «Neese qasakkamok mahinate?» yita'a xa'mmito'o. Ixxuwwim «Neese waallummok Somsoona amandeenaa ixxo kallaa massinaa ixxi neesenne issukkok hundam ixxonnem issineenattee» yita'a dabatto'o. Ee bikkina sas kuma ikkam Yihuxxi manni Eexaamanne yoo daawwa'a matta'a «Filisxee'm manni niina gassaan ikko'isa laqqooyyonnihe? Eehare ku neesenne issitoo jolli maruchcho?» yita'a Somsoona xa'mmito'o. Ixxim ixxuwwina «An ixxuwwanne issummok ixxuwwi eesenne issito'aneme» yukko. Ixxuwwim «Kaba neese keyye waallummok keese kallaa ixxuwwina higinsaa uwwineenatte» yito'o. Somsoonim «Ki'nnuwwi shitakkambee'an ihukkisa hide'llehe» yukko. Ixxuwwim «Erane; keese usinne kallaa ixxuwwina higinsaa uwwinoommo bagaan neese shinoommoyyo» yita'a dabatto'o. Ee lasage lam haareechchi usinne katta'a daawwa'iinsi fissita'a massito'o. Somsoonam Leehii'e afu ammanenne Filisxee'm manni geettu'uuyyii shuttu'uuyyii ixxi beyyo waatto'o. Dangonnem Waa'ik Ayyaan malaayyaamisa ixxonne dillukko. Ixxi anga karakko'i usseewwam giir nakku haarri fati'llisa muransaa uunjukko. Ee lasage abbis ammane lehaakkoo mat hallichchi gaangeera siidaa heeshaa ki'isaa mat kum manna shukko. Somsoonim «Hallichchi gaangeerinne mat kum manna shummo. Ee gaangeerinnem lesha leshanne tuubummo» yaa diraamukko. Ee lasage amadaa hee'u gangeera darabukko. Ee beyyom «Raamaat Leehii» yaa weeshukko. Ee lasage Somsoon lobakata xeebe'u bikkina «Kido'i lob kaachcha iina ki awwaadaanchina uwwitaatto. Eehaare kaba an wo'i xeebinne lehonannihe? Ka ballachchantobee'i manni angandu ubonannihe?» yaa Waa'a weeshukko. Waa'im ee Leehii'enne hee'u mat wo'i bu'i bare fooqaa'ukko. Ixxeensim wo'i firukko. Somsoonim agaa xeebo mu'llu bikkina qoxxukko. Ee bikkina ee wo'i bu'o «Ayin Haaqoore» yaa weeshukko. Kaballi afeebe'em Leehii'enne yookko. Filisxee'm manni Isra'eela gassitam hee'llo'i doollenne Somsoon lamiyyi hiincho hundoomam Isra'ee'l minaadaba awwonsukko. Mat balla Somsoon Filisxee'm manni beero'i hee'u Gaaza'a marukko. Ee beero'onnem mat saa'aanchi meentichcho siidaa isenne gareena aagukko. Gaaza'i beero'i mannim Somsoon eekke'e yoo'isa macceesso'i bikkina ee beyyo kibbito'o; beero'i goocannem hiim hundoomam egettu'uuyyi gatto'o. Ixxuwwi «Soodeebe'e egellaa shinoommo» yita'a sawwimminne ee hiimo hundoomam maaxanta'a egetto'o. Ihukkaarem ee meentichchonne Somsoon hii'm kolli afeebe'e xale'e hee'ukko. Ee lasage iinse'u beyyiinsi ki'aa ee beero'i ooxxi goocika xufa, lamem gubanaa laqqo'uwwaa hundam xoqolaa ixxi gudumonne iyyaa Keebiroo'n illagenne yoo duun afeebe'e massukko. Ee lasage Somsoon Sooreeq cebbanne hee'llam mat Daliila yakkam meentichcho iittukko. Filisxee'm gassaan is beyyo waatta'a «Somsoon kaa'n malaayye mahiinsi siidooda'e neesem hinkid issinaa ixxo kallaa kaa'nneena xannoomda'e qawwiissaa xa'mme; neese annannichchim mat kumaa mat xibbi kin biraa kiina uwwinoommo» yito'o. Ee lasage Daliila Somsoonina «Keese kaa'nna qoxasookkok mada'e ihukkisaa odim mat manchi keese karaa kaa'eena xanookkok mahinneda'e ihukkisaa he'i kure» yito'o. Somsoonim isena «Lamar haareechchi aashaalli xafirinne eese karakko'aare an mulli mannisam hoogaanchi ihoommo» yukko. Ee lasage Filisxee'm gassaan lamar haareelli aashaalli xafilluwwa isena eebbo'aare isem eehanninne katto'o. Du'm woronne ihaa ixxo egeru manni hee'u bikkina «Somsoona! Filisxee'm manni ki hanenne waarukko» yita'a laatto'o. Ihukkaarem ixxi giir fatira muransoo'isa ee xafilluwwa muransaa ubbuusukko. Ee bikkina ixxi malaayyi mahiinsetda'i la'isukkoyyi hee'ukko. Daliilam Somsoonina «Macceese! At eese qawwiissoolla hanqi woshsham iina kuttittoyyo. Kabadem at karanteena xantoottok mahinneda'i ihukkisa he'i kure» yito'o. Ixxim isena «Illageen awwaaxxakkobee'i haareechchi ussinne karakko'aare mulli mannisam hoonganchi ihoommo» yaa dabarukko. Ee bikkina Daliila haareelli ussuwwinne ixxo katto'o. Du'm woronne maaxamaa egeraakkoo manni hee'u bikkina «Somsoona! Filisxee'm manni ki hanenne waatto'o» yita'a laatto'o. Ihukkaarem ixxi usooma fati'llisa murukko. Daliilam Somsoonina «Kabad afeebe'e at eese qawwiissitto; hanqi woshsham iina kuttittoyyo. Kabadem keese hinkid karimmi xansiisooda'e he'i iina kure» yito'o. Ixxim isena «Iikka lamarem horoo'l shogam fatirinne daddaa xiribbanne kattilas anim ayyi manchisam hoogaanchi ihoommo» yukko. Ee lasage Daliila, Somsoon diriirukkisa moo'lla'a ixxeka lamarem horo'l shogam fatira eddu'uuyyi dadda'a xiribbanne katta'a lasage «Somsoona! Fillisxee'm manni ki hanenne waatto'o!» yita'a laatto'o. Ixxim diriiriinsi baqaa ixxi horoor exxaa dadamu shogaa xiribbaa xoqolukko. Ee bikkina ise «Ki wodan iinninne ihoo'nmi hinkid ‹Keese iitoommo› yito'olla? Sas ammane eese qawwiissaa kabad afeebe'e kaa'n qoxallan hundam siiddittok mahiinseda'e iina kuttitto'oyyo» yito'o. Ballina ballina xa'mmitu'uuyyi leho mixeebe'i afeebe'e hawwisso'o Ixxim lasaanchonne isena «An iyyummi godabiinsi qaramummaanniinsim Waa'ina annanni ihaammoo Naaziraawekkichchi ihummi bikkina i horoor hogoossamukkoyyo. I horoor hogoossamulas malaayyi annanni ihaa mulli mansammi hoogaanchi ihoommo» yaa hanqa kurukko. Daliila ixxi isena hanqa kurukkisa laqqa'a «Iina kaba hanqi woshsha kuru bikkina mataagge daba'llitakka'a waallehe» yita'a Filisxee'm gassaa'n beyyo asse'llo'o. Ixxuwwim diinate amadda'a waatto'o. Daliila Somsoona ise gubeedonne iinsiissa'a diriiroo'isa issito'o; ee lasge mat mancho weeshsha'a ixxi hooroo'l lamarem shogam hogoossiisso'o. Ixxi malaayyim ixxeensi annanni ihukko. Isem ixxo u'nnisimma asheetto'o. Ee lasage ise «Somsoona! Filisxee'm manni ki hanenne waatto'o!» yito'o. Ixxim diriiriinsi baqaa «Erallisam muransaa maroommo» yaa sawwukko. Waa'i ixxeensi annanni ihukkisa la'ukkoyyi hee'ukko. Filisxee'm mannim ixxo qeefadda'a lasage lamem illem fissito'o. Ixxom Gaza'a massita'a naas chimchiminne katta'a karamu beyyonnem hurbaata liitoo'isa issito'o. Ihukkaarem hogoossamaa hee'u ixxi horoor odim li'imma asheerukko. Ee ammane Filisxee'm gassaan «Ni waa'i Daagoon niina diinakkichchi Somsoona ni anganne higisaa uwwaakko» yita'a liiranchi uguda issiteenaa ixxuwwi waa'i Daagooninam lophphaakkoo kitimmo hincaa'lleenaa wixxitto'o. Minaadabim Somsoon moo'lla'a «Ni uulla bi'isukkokaa niinniinsim dut manna sh ni diinakkichchoo ni waa'i ni anganne higisaa uwwukko» yitu'uuyyi ixxuwwi waa'a galaxxito'o. Lobakatam liiranta'a «Neese wossooroo'isina Somsoona keyye wollehe» yito'o. Ee bikkina Somsoona karaxxi miniinsi fissita'a wotto'o. Ixxim ixxuwwi illagenne kadukko. Ixxom lam utuphphi lambe'enne uullisso'o. Somsoonim ixxi anga amadaa awwonsam hee'u beetina «Ka mine bakkiisaa amadu utubbuwwa i anganne amadiise; anim ixxuwwa bakke'aa uulloommo» yukko. Ee mi'n woronnem dut goonii meentii ee'isam Filisxee'm gassaan hundimii hee'llo'o. Ee mi'n fooqannem Somsoon wossoorukkuuyyi moo'llam sas kum goonii meentii hee'llo'o. Ee lasage Somsoon «Moollanni Waa'a! He'i eese sawwihe. I Moollanna! Odim mexxo'i mataagge iina malaayye uwwitaa Filisxee'm manni i ille qooqisso'i bikkina baado miqisoommisa isse» yaa uunxukko. Ee lasage Somsoon mine bakkiisaa amadu lambe'i lamem utubbuwwam ammadukko. Makki anginne mato qeddi anginnem mulleka hincaa amadukko. Ixxim «An ka Filisxee'm manninne maqirem lehoommo» yaa laaraa yoo qax malaayyi hundinnem gafe'u ammanenne min Filisxee'm gassaanonnee ee minenne hee'llo'i keen hundannemii toroshamukko. Somsoon foorinne hee'ukkuuyyi shukkaanniinsi lehukkuuyyi shukkok lobane. Ixxi abbaayyuwwii gatto'i qarmannii hundim waatta'a ixxi leesha massito'o. Massita'ahim Xoora'inaa Eshtaa'oolinaa lambe'enne yoo ixxi anni Maanuhe waammanne waammito'o. Somsoon lamiyyi hiincho hundoomam Isra'ee'l minaadaba awwonsaa hee'ukko. Duunaam Efiree'm uullanne Miika yakkam mat manchi hee'ukko. Miika'am mat ayyaamo ixxi amana «Mat manchi ‹Iikka mat kumaa mat xibbi kin biraa iinniinsi game'aakko› yitaa duuntittuuyyi macceesaa hee'ummo; ee diinate an massummi bikkina i anganne yookko» yukko. Ixxi amam «I beeto, Waa'i keese maasse'ona» yito'o. Ixxim ee diinate eebaa ixxi amana uwwukko. Isem «Anim ee bira Waa'ina i beet bikkenne keesamaakkoohan issaa uwwaammo. Oo birim haqqinne baxakka'a kin birinne goolabakkam misila baxisimmina ihona. Ee bikkina ka bira kiina dabaraa uwwoommo» yito'o. Beetim biirooma amana dabaraa uwwukkaare isem ee bi'lleka lam xibbi kin bira massita'a anga qoor manchina uwwito'o. Haqqa cabbaraa birinne goolabaakkoo misilam baxukko. Oo misilim Miika'i minenne afuurukko. Miika'a otossoo ixxi gaqqi beyyi yoohane; otossakkam misilluwwaa eefuudaa baxaa ixxi oosiinsi mato qeessichchi ihaa awwaadoo'isa issukko. Ee doollenne Isra'eelina adil hee'ukkoyyo. Manni hundim ixxena danaamo labaa moo'amu luwwi hundam issam hee'ukko. Ee ammane Yihuxxi uullanne Beeteelihee'm beero'onne hee'oo Leewi'i sulliinsetti ihaakkoo mat woraadichchi hee'ukko. Oo manchi hee'oo beyyo hasukkuuyyi Beeteelihee'm beero'iinsi ki'aa marukko. Googonne hee'ukkuuyyim duunaam Efiree'm uullanne hee'oo Miika'i mine afukko. Miika'am ixxena «At waattittok hanniinsette?» yaa xa'mmukko. Oo manchim «An waarummok Yihuxxi uullanne hee'oo Beetalihee'm beero'iinsette; i moollim Leewi'i sullo; anim hee'oommi beyyo hasoommi mancho» yaa dabarukko. Miika'am «Eehaare iinninne maqire hee'e. Iinam sogaanchoo qeessichoo ihe; anim hiinchonne tommi bira, ee'isam hurbaataa eddechchaa kiina uwwoommo» yukko. Ee bikkina oo Leewekkichchi Miika'anne hee'eena iittamukko. Oo woraadichchi Miika'ana qachchisa ihukko. Miika'am ixxo qeessichchi issaa doo'llukko. Ixxi minennem hee'isukko. Miika'am «An Leewi'i sulliinsi qeessichcho siidumlas kaba Waa'i hundem luwwam iina makkisoo'isa la'oommo» yukko. Ee doollenne Isra'eelanne adil hee'ukkoyyo. Isra'ee'l sulluwwiinsi Daan sulli ixxuwwina gaqqi sharad ihoo uulla siiddobee'i bikkina hee'llam uulla hassu'uuyyi hee'llo'o. Ee bikkina Daan sulli ixxuwwi abaroos lambe'iinsi qoxxaalluwwika onti mancho doo'llita'a uulla shaashshita'a waattona Xooraa Eshtaa'oolaa yamantam beero'uwwiinsi asse'llo'o. Ixxuwwim duunaam Efiree'm uulla affa'a Miika'i minenne gatto'o. Ixxuwwi ee minenne hee'llu'uuyyim Leewekkichchi woraadichchi hanniinsetda'e ihukkisa wocoo'isinne laqqa'a ixxi kollonne hincita'a «Keese keyye ayyi worukko? Keyye maha baxxoolla?» yita'a xa'mmito'o. Ixxim ixxuwwina «Miika'ana an qeessichchi ihaa awwaadona ixxim iina hasisoo luwwa hundam miqeena iittammaammo» yaa dabarukko. Ixxuwwim ixxena «Neese malloommi goog niina makkoohanda'e lanqoommissina Waa'a xa'mme» yito'o. Oo qeessichchim ixxuwwina «Ka mattakkam googonne ki'nnuwwa Waa'i egeroo bikkina matem hawwim ki'nnuwwanne afooyyo» yaa dabarukko. Ee lasage oo ontem mannim ee beyyiinsi killa'a Laayisha affo'o. Ee beyyonnem hee'llam manni Siidoo'n mannisam xummanne hee'llam manni ikko'isa moo'llo'o. Oo minaadabim ayyennem wocantoo'nnim xumminne hee'llam xummam iittitam manni hee'llo'o. Odim ixxuwwina hasisoo luwwi hundim yoo bikkina ayyi minaadabinnem mateeyyooma amaddoo'nnim Siidoo'n manniinsi qee'llita'a hee'llam hee'llo'o. Oo ontem mannim Xoorannee Eshtaa'oolannee hee'llam ixxuwwi abbaayyuwwi beyyo daba'llita'a matto'i ammanenne «Hinkido'i woshsha amaddakka'a waattakko'o» yita'a xa'mmito'o. Ixxuwwim «Uulloom hore'em danaam ihukkisa moo'nnaammo; kaba ki'llehe, Laayisha mallaa qansoona; ka beyyonne bax bee'eka cawwitakka'a afuuttakkotte. Qaqqissakka'a mattakka'a amaddehe. Ee beyyom Mattakka'a affakkam ammane ee beyyi manni maham malantambee'i xumma iittitam manni ikko'isa laqqakkamo; uulloomim haraaraa mannina hasisoo luwwi hundim wo'mmaakkoohane; Waa'im ka uulla ki'nnuwwina uwwaakko» yito'o. Ee bikkina Daan sulliinsi loh xibbi manni orina gudda'a Xooraa'iinsii Eshtaa'ooliinsii ki'lla'a matto'o. Ixxuwwim matta'a Yihuxxi uullanne hee'oo Qiiriyaatyi'aariimiinsi eelliinchi aagoo kollonne wiiddanto'o. Oo beyyi kaballi afeebe'em Daan wiidda'n beyyo yamamookkok ee bikkinatte. Ee beyyiinsim matta'a duunaam Efiree'm uullanne hee'oo Miika'i mine affoo'o. Ee lasge Laayish kululleetanne yoo uulla shaashshiteena asse'anto'i ontem mannim ixxuwwi abbaayyuwwina «Ka minneewwanne eefuudii taraafiimii, haqqa cabbarakka'a axisakko'oo misilii bukkakka'a baxakko'oo misilii yoo'isa laqqakkamonnihe? Ee bikkina ki'nnuwwi maha issimmi hasisooda'e laqqehe» yito'o. Oo Leewekkichchi woraadichchi hee'oo Miika'i mine aaggo'o; Leewekkichchim hinkid hee'ooda'e xa'mmito'o. Orina gudda'a Daan sulliinsi waatto'i lohem xibbi mannim ee ammane ooxxi gooc gadanonne uullita'a hee'llo'o. Ee uulla shaashshiteena matto'i ontem mannim Miika'i mine aagga'a cabbarakka'a axisakko'oo misila, eefuuda, taraafiimaa bukkakka'a baxakko'oo misilaa massito'o. Eekka issitu'uuyyi qeessichchi o'l mu'uta lade'llo'i lohem xibbi manninne maqirem oox gooc gadanonne uullaa hee'ukko. Ixxim oo manni Miika'i mine aagga'a cabbarakka'a axisakko'oo misila, eefuuda, taraafiimaa bukkakka'a baxakko'oo misilaa massitu'uuyyi moo'aa «Maha issitakkamuulla?» yaa xa'mmukko. Ixxuwwim «Sa'ihe! Suume amade! At ki gagoomim waattaa niina qeessichchoo sogaanchoo ihe. Mat mi'n abaroosina qeessichchi ihimmiinsi Isra'ee'l sulluwwiinsi matina qeessichchi ihimmi e'llooyyonnihe?» yito'o. Eehid yimmi ee qeessichcho lobakata liiransukko. Ixxim cabbarakka'a axisakko'oo misila, eefuudaa taraafiimaa amadaa ixxuwwinne maqirem marukko. Ixxuwwim ixxuwwi ooso, fooraam diinatee ixxuwwina yoo mu'utaa hundam ixxuwwi illagenne higissa'a ixxuwwi lasinne ikka'a daballita'a elle'llo'o. Miika'i miniinsi qee'llita'a matta'a lasage Miika'i ixxi olla'i manna wixxaa'aa Daan sulliinsi waatto'i manna hollansaa afukko. Ixxuwwannem sharukko. Daan sulli mannim laso daba'llita'a Miika'ana «Maha ikkaate? Ku luchchi hundim mahina wixxaa'llaattoo manna?» yita'a xa'mmito'o. Miika'am «An baxisummi waa'uwwaa qeessichchoo boggakka'a mattakko'ookko; iina od mah gataate? Eehannah «Hinkid maha ikkaate yitakamuulla?» yukko. Daan sulli mannim «Mogaalli manni keese hawwodoobee'isa, atii ki abaroosim bi'llakkambee'isa maham woccoobee'isa suume amade» yito'o. Ee lasage Daan sulli matto'o. Miika'am ixxuwwi hore'em qooxalluwwi ikko'isa moo'u ammanenne daba'llaa ixxi mine elle'ukko. Daan sulliinsi waatto'i mannim Miika'a baxu misilaa ixxi qeessichchoo amadda'a ferseyita'a afuutto'oo Laayish manni beyyo affa'a bisa'inne guullito'o. Beero'oomannem shokka uwwito'o. Beero'oom Siidooniinsi qee'llonne hee'u bikkinaa ixxuwwim mulli manniinsi annanni ikka'a hee'llo'i bikkinaa ixxuwwina hara'mmookkok hee'ukko. Oo beero'im Betirahoob gadanonne yoo lette'i cebbanne hee'ukko. Daan sullim beero'o baxxa'a ee beyyonne afuutto'o. Ee beero'ikam Laayisha yakkam gaassi summa dabassita'a gaassi ixxuwwi lobanni hee'u Yaaqoob beet ihu ixxuwwi anni summanne Daan yita'a weeshsho'o. Ee misilluwwam Daan sulli otossiteena ee beyyonne kaasso'o. Muse'e beet Gershooniinsi qaramu Yoonaataan Daan sullina qeessichchi ihaa awwaadimma asheerukko. Ixxi shumo'im minaadab qeefadamaa mareebee'i afeebe'e awwaaddam hee'llo'o. Ee'isinne Miika'a baxu misil Waa'ina otossakkam dukkaan Seelo'onne hee'u doollenne hundannem ee beyyonne uulla hee'ukko. Isra'eelanne adil hee'ubee'i doollenne duunaam Efireem uullanne qee'l beyyonne hee'oo mat Leewekkichchi hee'ukko. Oo manchi Yihuxxi uullanne yoo Beetaliheemiinsi mat landichcho ixxena bakki meentichchotte issaa massukko. Ihukkaarem oo meentichcho ixxena amma'nnancha hoogga'a Beeteeliheema is anni mine matto'o; eehe'em soor agana afuutto'o. Ee lasage is aro'i er maashshalli allabo isenne wocaa ixxi mine dabaraa woreena sawwite muraa is beyyo marukko. Ixxim baxaanchoo lam hallaa amadaa marukko. Beyyo afukkisam ise aa'lla'a mine aagisso'o. Is annim ee mancho moo'u ammanenne liiranchinne aa'ukko. Annim ixxo ee beyyonne afuuroo'isa issukko. Ee bikkina ixxim sas balla ee beyyonne afuurukko. Ixxuwwim ittu'uuyii aggu'uuyyii ee beyyonne afuutto'o. Soo'l ballanne daram mareena gudukko. Ihukkaarem anni «Googina hara'mmookko gassitaa hurbaatika duuqe. Ee lasage mattootto» yukko. Ee bikkina lamem mannim mateeyyanne afuutta'a itto'oo aggo'oo. Manchi mareena ki'u ammanenne is anni manchina «He'i kaballam keyye gattaa liirame» yaa uunxukko. Manchoom mareena ki'ukko; ihukkaarem is anni maroobee'isa issukkaare ee ballam eehe'enne garukko. Onti ballanne soodaraar daram mareena ki'ukko. Ihukkaarem is anni «He'i hurbaatika duuqe; uullim siggona» yukko. Ee bikkina lamem itto'o. Manchii ixxi bakki meentichchoo awwaadaanchinne maqirem marameena ki'amu ammanenne landichchi anni «Moo'llehe! Kaba uulli hiimaakko; kaballa keyye gattakko'aare e'llookko. Kaba qaqqisom tuunsookko. Kaballa keyyem gatakka'a liirammehe; soodo daram ki'llakka'a mine affakkamisa mattakkamo» yukko. Ihukkaarem oo Leewekkichchi ee hiimo edaa gareena hasukkoyyo. Ee bikkina ixxi, bakki meentichchoo ixxi awwaadaanchii ki'lla'a matto'o. Koora issakko'oo lam hallim ixxuwwinne maqirem hee'llo'o. Uulli hiimu ammanenne Iyyaabuusa yakkam Yerusaalee'm beero'i gadano affo'o. Iyyaabuusa affo'i ammanenne hiimukko. Awwaadaanchim moollannina «He'i ka Iyyaabuus manni beero'o mallaa gallona» yukko. Ihukkaarem ixxi moollanni «Isra'eel ikkobee'i manni beero'o aangoommoyyo. Ka beyyiinsi ekkid Gibi'anne hingaa galloommo» yukko. Odim ixxi awwaadaanchina «Waare, ee beero'uwwiinsi matonne hincinaa Gibi'anne te'im Iraama'anne gallona» yukko. Ee bikkina Yerusaaleema higga'a matto'o; Biiniyaam manni uullanne hee'oo Gibi'a affo'isam eelliinchi aagukko. Ee Gibi'anne gattam beyyo hasseena googo fatakita'a beero'o aagga'a ee beero'i wixxixxi beyyonne afuutto'o. Ihukkaarem ixxuwwa mine massaa gassookkoka ayyem siiddo'oyyo. Ee beyyonne afuutto'isam balla abuulli bax beyyonne hosaa hiimonne ixxi mine maroo mat lommanchi manchi ixxuwwi gadaninne higeena waarukko. Oo manchim illageen duunaam Efiree'm uulliinsi waaraakkoohane; ihukkaarem kaba hee'ookkok Biiniyaam sulliinsi qaranto'i manni hee'llam Gibi'annette hee'ukko. Oo lommanchim beero'i wixxixxi beyyonne afuuraakkoo mat mancho moo'aa «Hanno mattoo mancho? Hanniinsidu waattoolla?» yaa xa'mmukko. Oo Leewekkichchim «Neese Yihuxxi uullanne yoo Beetaliheemanne hee'nnummo. Kaba Keesammi Minee duunaam Efireem uullanne hiixxe'enne yoo ni minee amfeena malloommuulla. Ihukkaarem kaba neese ixxi mine massaa gassookkoka siindummoyyo. Ni hallina gaabii hixii yookko. I bakki meentichchonaa iinaa ee'isam i awwaadaanchinaa hurbaatii woyi'n diqaasii yookko. Niina hasisoo luwwi hundam ammandaammo» yukko. Oo lommanchim «Xuummi kiina ihona. Masse, i mine mallona! An kiina hasisoo luwwi hundam gudisoommo. Ee bikkina at ka beero'i wixxixxi beyyonne garimmi hasisooyyo» yukko. Ee bikkina ixxi mine massaa hallina itoo hixe uwwukko. Koyyim ixxuwwi lokko aanshaqqito'o; hurbaatam itto'o; aggam aggoo. Ixxuwwi ee maaddanne liirantu'uuyyi hee'llonam jora issitam manni ee beero'iinsi wixxita'a waatta'a ee mine kibbita'a ee mi'n xufa aphphissu'uuyyi ee lommanchina «Ee ki mine aagu mancho fisse! Neese ixxenne sha'ixxi edancha edammeenatte!» yita'a shuutto'o. Ihukkaarem oo lommanchi biiranne firaa «I qarmanna, ihooyyo! He'i kido'i jor luwwa issitakkotte! Ku manchi i koyyiincho. Oono'o, ka manchi bakki meentichchoo iitte baajaam landichchoo yo'o. Ixxuwwa fissoommaare massitakka'a hassakko'isa issehe! Ihukkaarem ka manchonne kido'i jor luwwa issitakkotte!» yukko. Ihukkaarem ixxuwwi macceesso'oyyo. Oo koyyiinchim ixxi bakki meentichcho fissaa uwwukko. Hiim hundoomam korkore isenne edantu'uuyyi gatta'a uulli soodukkaare mattona fatakito'o. Meentichchooma uulli soodukkuuyyi waatta'a is aro'i garu lommanchi mi'n goocanne affa'a ubbo'o. Eelliinchi fireebe'em eekke'e hee'llo'o. Is aro'im taakke'eena daram ki'aa mi'n gooca fooqaa'oohaare ixxi bakki meentichcho is anga gooc kollonne biddiqaa'lla'a mi'n goocanne ubba'a yo'oka moo'ukko. Ixxim «Ki'e; mallona!» yukko. Ihukkaarem dabachchika maham siidukkoyyo. Ee lasage is leesha hallichchonne iyyiisaa ixxi mine elle'ukko. Ixxi mine afukkisam mine aagaa ixxi bakki meentichchi leesha billawwinne tommoo lam beyyonne muransaa Isra'ee'l sulli hundinam mat mato asse'ukko. Eekka moo'ukkok hundim Isra'ee'l minaadab Gibxi uulliinsi firukkaanniinsim kido'i luwwi hore'em ihaa moo'amukkoyyo; issamukkoyyome; ka woshshanne neese maha issimmi hasisooda'e sawwi'llehe; atooralleheme» yaqqanto'o. Hanaa'n qariinsi woroo'n qaranne oohim Daaniinsi Beersaabe'enne afeebe'e ee'isam eelliinchi firinne Gala'aadanne yoo Isra'ee'l minaadab hundim orina gudda'a mat ikka'a Misiphphanne Waa'i illagenne wixxito'o. Isra'ee'l sulli hundiinsim awwonsaanii bisa'a lade'llo'oo soor xibbi kum lokkaanii Waa'i minaadaphphi illagenne uullito'o. Ee ammane Isra'ee'l minaadab Misiphphanne wixxito'isa Biiniyaam sulli macceesso'o. Isra'ee'l minaadabim «Kido'i jor luwwi hinkid iheena xanuda'e kullehe» yaqqanto'o. Ixxi bakki meentichcho shakko'i Leewekkichchi «Anii i bakki meentichchoo Biiniyaam manni uullanne yoo Giibi'anne hiimukkaare galleena mallummo. Giiba'i mannim eese shiteena waatta'a an garummi mine hiimonne kibbito'o. Luxxeka eese shiteena sawwita'a hee'llo'o. Ihukkaarem lasonne i bakki meentichchonne korkore iinse'llo'o; ee bikkina ise leto'o. Ee lasge i bakki meentichchoka leesha massaa muransummo; ixxuwwi kido'i jor baxo baxxo'i bikkina muransummi qaamafeettuwwa Isra'ee'l sullina annanninchinam asse'ummo. Ee bikkina ka beyyonne yoontakke'i Isra'ee'l minaadab hundim ki'nnuwwi sawwitee oogatoo uwwehe» yukko. Minaadab hundim mateeyyoomanne uullita'a «Ni lambe'iinsi ayyim ixxi dukkaana te'im ixxi mine daba'llaa maroone. Kaba neese issinoommok kane. Giibi'a maraa qasoo manna saaminne doo'llinoommo. Hundem Isra'ee'l sulliinsim gaadaanina hurbaata gudissona xibbiinsi tommi mancho, kumiinsi xibbi mancho, tommi kumiinsi odim mat kum mancho massinoommo. Gaadaanim Biiniyaam gassonne hee'oo Giibi'a affa'a Giiba'i manni Isra'eelanne baxxo'i jor bax bikkina laboo guzumo'i uwwitamo» yukko. Ee bikkina Isra'ee'l minaadab hundim mexxo'i mat manchisa ihaa ee beero'onne wixxukko. Isra'ee'l sulli Biiniyaam gassi uullanne hundannem daba'llantu'uuyyi «Ku ki'nnuwwi issitakko'i jor luwwi maha? Ixxuwwi shinaa ka jor luwwa Isra'eeliinsi qeessinoommisina Giiba'anne ee teeda'a baxxo'i keeno niina fissitakka'a uwwehe» yita'a kuttam manna asse'llo'o. Ihukkaarem Biiniyaam sulli Isra'ee'l minaadab kutto'i woshsha aa'llo'oyyo. Hore'oomam ixxuwwa qasseena beero'i hundiinsim weeccanta'a Giiba'i beero'o waatto'o. Ee balla beero'uwwiinsi waatto'i Biiniyaam sulli manni xigakko'aare Giiba'i keeno exxoo'n bisa'a lade'llo'oo lamiyyii loh kum manni hee'llo'o. Giiba'iinsim lamar xibbi manni doo'llanto'o. Ee minaadabanne hundannem lamar xibbi doo'llanto'oo qeddi angi manni hee'llo'o. Oo keen hundichchim wombarashe'inne kina darabbam ammane matichchi horoo'l saraatam yakkota'n haare'llam keen hee'llo'o. Isra'ee'l minaadab Biiniyaam sulli exxoo'n soor xibbi kum lade'llo'oo gogota gudisso'o. Isra'ee'l minaadab Beeteelanne Waa'ina otossakkam beyyonne «Biiniyaam sullinne gaassaa oramookkok hinka'i sullo» yita'a Waa'a xa'mmito'o. Waa'im ixxuwwina «Yihuxxi sulli gaassaa gaadona» yukko. Ee bikkina Isra'eel la'm balla soodarar daram killa'a Giiba'i beero'i hegeego matta'a wiiddanto'o. Isra'ee'l mannim Biiniyaam sullinne oranteena fitto'o. Giiba'i beero'i illagennem gudda'a uullito'o. Biiniyaam gogot Giiba'iinsi fitta'a ee balla Isra'ee'l minaadabiinsi lamiyyee lam kum mannaa shito'o. Isra'ee'l gogot odim qoxxixxanta'a illageen ullito'i beyyonnem waatta'a gudda'a uullito'o. Isra'ee'l minaadab fitta'a Waa'i illagenne uulli hiimeebe'e wi'llito'o. Ixxuwwim «Niyyabbaayyuwwi Biiniyaam sullinne orammeena odim gaandonnihe?» yita'a Waa'a xa'mmito'o. Waa'im «Eeyya, ixxuwwanne gaaddehe» yukko. Isra'ee'l gogot la'm balla Biiniyaam sullinne oranteena hincito'o. La'm ayyaamom Biiniyaam sulli Isra'ee'l minaadabinne oranteena Giiba'iinsi fitta'a odim orancha laqqam mannika tommoo sadeenti kumaa shito'o. Ee lasage Isra'ee'l minaadabii ixxuwwi gaadaanii hundim Beeteela matta'a wi'llito'o. Ee beyyonnem Waa'i illagenne afuutta'a uulli hiimeebe'e soommanto'o; shokkiisakka'a hincaa'akkam kitimaa xummi kitimaa hincaa'llo'o. Ee doollenne Waa'ik Hidi'l Saga'l Saaxin Beeteelanne hee'u bikkina Isra'ee'l minaadab Waa'a xa'mmito'o. Aaroon beet Ali'aazariinsi qaramu Finihaas Waa'i illagenne awwaadaanchi hee'ukko. Isra'ee'l minaadabim «Waa'a! Niyyabbaayyuwwi ikko'i Biiniyaam sullinne orammeena odim fillonnii ullo?» yita'a Waa'a xa'mmukko. Waa'im ixxuwwina «Mallehe, orammehe! Soodo an ixxuwwa ki'nnuwwi anganne higisaa uwwoommo» yaa dabarukko. Ee bikkina Isra'ee'l minaadab hofqax gaadaanom Giiba'i kululleetanne daphphita'a egettamisa issito'o. Kanniinsi ellageen issito'isam saxxi ballanne Biiniyaam gogotanne gaaddo'o; ixxuwwi gaadaanom Giiba'i beero'i illagenne gudissa'a uullisso'o. Biiniyaam mannim oranteena fitto'o. Awwonanta'ahim beero'iinsi qee'llita'a matto'o; illagee'nnisam Isra'ee'l minaadaphpheka sad manna Beeteelaa Giiba'aa massoo googonne shito'o. Biiniyaam mannim «Kanniinsi illageen issinummisam kumaandummo» yito'o. Ihukkaarem Isra'ee'l gaadaan «Lasinne gimbona; beero'iinsim qee'llinsaa lob bobba'anne fissinona» yito'o. Ee lasage Isra'ee'l googot Ba'aaltaamaaranne afeebe'e lasinne matto'o; ee ammanenne Giiba'anne biir beyyonne maaxanta'a hee'llo'i gogot dangonne bulluqito'o. Isra'ee'l minaadabiinsi doo'llanto'i tommi kum manni Giiba'i beero'o qasso'o. Oranchoomim lobakata kee'mmaalli hee'ukko. Ihukkaarem Biiniyaam manni ixxuwwina beeddichchi amman afukkisa laqqo'oyyi hee'llo'o. Waa'im Isra'eel Biiniyaam sullo kaa'llamisa issukko. Isra'ee'l minaadab ee balla bisa'a lade'llo'oo Biiniyaam gogotiinsi lamiyyee onti kumaa mat xibbee shito'o. Ee ammanenne Biiniyaam sulli kaa'anto'isa laqqo'o. Ihukkaarem Isra'ee'l minaadab Giiba'i biir beyyonne maaxamaa hee'u gogotanne amma'nnanta'a kaa'anto'aannisa ikka'a lasinne gibbo'o. Daphphita'a hee'llo'i gaadaan Giiba'i beero'o aagga'a beero'i woronne binnita'a eekke'e siiddo'oka hundam shito'o. Maaxanto'i keenii mulli Isra'ee'l gogotii beero'iinsi kee'mmaalli wiriir firoo mare'e egetta'a edanteena atooratta'a hee'llo'o. Isra'ee'l minaadab lasonne gibbo'aare Biiniyaam manni sad manna shito'i bikkina «Kanniinsi illageen issinummisam kabadem kummaandummo» yitu'uuyyi diraantam hee'llo'o. Ee lasage mare'i moo'amukko; oohim wiriir umbu'llisa beero'iinsi firam hee'ukko; Biiniyaam gogot laso qerephita'a moo'llo'i ammanenne ee beero'i hundoomannem shokki aphphaa gii'l laban firukkuuyyi moo'llo'o. Isra'ee'l minaadab daba'llita'a qasso'i ammanenne Biiniyaam sulli ixxuwwina beeddichchi afukkisa laqqa'a baachchinne u'nnanto'o. Ixxuwwim afa'llaachcha daba'llita'a Isra'ee'l illagiinsi udma'i uulli kollonne gibbo'o. Ihukkaarem lasinne hollitam keenii beero'iinsi illaginne waatto'i keenii lambe'enne amadda'a guullito'o. Isra'eel ixxuwwi diina'a kibbita'a Giiba'iinsi eelliinchi firoo kollonne hollitu'uuyyi guullito'o. Biiniyaam sulli doo'llanto'oo gaadaaniinsi 18,000 beeddito'o. Gatto'i qax lasonne daba'llita'a mat udma'i uulla mutta'a ‹Riimoon geejji kina› yakkam beyyonne fitto'o. Ixxuwwiinsim 5,000 googonnem beeddito'o. Odim gatto'i qaxam Isra'ee'l gaadaan Giidi'oom yakam beyyi afeebe'e hollita'a 2,000 manna shito'o. Ee balla Biiniyaam sulliinsi leto'i qax hundoomim 25,000 doo'l gaadaanoo hee'llo'o. Ihukkaarem 600 manni udma'i uullanne yoo ‹Riimoon geejji kina› yakkam beyyo gibba'a xotto'o. Ixxuwwim ee beyyonne soor agana afuutto'o. Isra'ee'l minaadab lasonne daba'llita'a gatto'i Biiniyaam sullinne oranta'a goona, meento, ooso, fooraam diinatee ixxuwwi siiddo'i luwwaa hundam guullita'a shito'o; ee hegeegonne hee'u beero'uwwi hundam shokkiisso'o. Isra'ee'l minaadab Misiphphanne wixxito'i ammane «Ni lambe'iinsi ayyi manchim Biiniyaam sullina landa ladiisoobee'isa» yita'a Waa'i illagenne hide'lla'a hee'llo'o. Ee bikkina Isra'ee'l minaadab Beeteela matta'a uulli hiimeebe'e Waa'i illagenne afuutta'a sagara iimaa'lla'a wi'llito'o. Ixxuwwim «Isra'ee'l I Moollanni Waa'a! Kaballa Isra'eeliinsi mat sulli bee'ukkok mahinatte? Kuk mahina Isra'eelanne ihukko?» yito'o. La'm balla daram minaadab Waa'ina kitima hincaa'akkam beyyo baxxa'a shokkiisakka'a hincaa'akkam kitimaa mateeyyoo'm kitimaa hincaa'llo'o. Isra'ee'l minaadab Waa'i illagenne Misiphphanne siidamubee'ek ayyim lehona hide'anta'a hee'llo'i bikkina «Isra'ee'l sulluwwiinsi Waa'i illagenne firubee'ek ayyette» yita'a xa'mmanto'o. Ixxuwwi abbaayyuwwi hee'llo'i Biiniyaam sulli bikkina Isra'ee'l minaadab kichche'lla'a hee'llo'i bikkina «Kaballa Isra'ee'l minaadabiinsi mat sullo hoongaammo. Neesa'i ixxuwwina ayyim landa uwwinoombee'isa hide'nnaammo; ixxuwwiinsi letoo'n gatto'i keenina meento siiddammisina maha issino?» yaqqanto'o. Ixxuwwim «Isra'ee'l sulluwwiinsi Waa'i illagenne Misiphpha waarubee'ek yoohonnihe?» yaqqanto'o. Yaabeesh Gala'aadiinsi matem manchim ee dummichcha waarukkoyyi hee'ukko. Gaadaano xigakkeena moollinne moollinne weeshakko'i ammanenne Yaabeesh manniinsi an yoommo yookkok matim hee'ukkoyyo. Ee bikkina oo dummichchi «Yaabeesh manni uulla mattakka'a meentii oosim gatoobee'isa Gala'aaxxi manna hundam shi'llehe» yita'a ixxuwwiinsi qoxar kee'nneka tommoo lam kum manna asse'llo'o. Ixxuwwim «Goonaa gooninne edamu meentoo hundam shi'llehe» yita'a ijaajjo'o. Ee Yaabeeshanne hee'llo'i Gala'aaxxi manniinsi soor xibbi baajaam landa siiddo'i bikkina Isra'ee'l minaadab yo'i Kana'aananne yoo Seelo yakkam beyyo amadda'a waatto'o. Ee lasage Isra'ee'l minaadab hundim Riimoon geejji kinanne yo'i Biiniyaam sulli beyyo manna asse'lla'a or uulloo'isina iittanto'o. Biiniyaam mannim daba'llita'a waatto'o; Isra'eel Yaabeesh manniinsi qeefadda'a eebbo'i landa ixxuwwina uwwito'o. Ihukkaarem ee landik xig ixxuwwina ihukkoyyo. Waa'i Isra'ee'l minaadabinne hee'u mateeyyooma muraa hee'u bikkina minaadab Biiniyaam sulli bikkina lobakata kichche'llo'o. Ee bikkina dummichchi «Biiniyaam sullonne kanniinsi eehid meenti bee'e; eehannah lehiinsi gatto'i Biiniyaam sulli goonina meento siindeena xannoommok hinkidette? «Isra'ee'l tommiinsii lamem sulliinsii mat sulli bi'aa gatoobee'isa Biiniyaam sulliinsi lago aa'ookkok hee'immi hasisookko. Ihukkaarem ni lambe'iinsi ayyi manchim Biiniyaam sullina landa uwwookkok duumamona hide'nnaammoo bikkina ni landa uwwineena xannoommoyyo» yito'o. Ee lasage «Hiinchonne hiinchonne Seelo'onne Waa'ina gudisakkam ugud hincaakko» yita'a sawwito'o. Seello'i beero'i Beeteeliinsi hanaa'n qarinnee Laabooniinsi woroo'n qarinnee ee'isam Beeteelaa Seekeemaa higakkam googiinsi eelliinchi firinnee hee'oo beero'i hee'ukko. Ee bikkina Biiniyaam sullina «Mattakka'a woyi'n kaashshi woronne maaxantakka'a egellehe! Ee uguxxi ayyaamonne Seelo'i landi kajjina waaroo ammane woyi'n kaashshi woriinsi fittakka'a annanchim ee landiinsi ki'nnuwwi gaqqi meenti issitakkeena gossakka'a Biiniyaam uulla amaddakka'a mallehe. Ixxuwwi anno'i te'im abbaayyuwwi ki'nnuwwi beyyo waatta'a ki'nnuwwinne wocanteena hassota'n ‹Ki'nnuwwi landa massinummok orinnetti ihubee'i bikkina he'i niina haafi'llehe; ki'nnuwwim niina iittitakka'a uwwitakkobee'i bikkina hidiro ginditakka'a bi'isaan ikkakkamoyyo› yitakka'a dabattakkeena xantakkamo» yito'o. Biiniyaam mannim ixxuwwi yito'isam issito'o; annannichchim ixxuwwi xiqqisannem Seelo'onne kaddam landiinsi gossa'a ammadda'a matto'o. Ixxuwwi uullam daba'llita'a matta'a beero'uwwa dabatta'a baxxa'a hee'llo. Ee ammanem mulli Isra'ee'l minaadab hundim binnito'o. Annannichchim ixxuwwi gaqqi sulli beyyoo moolli beyyoo ee'isam ixxuwwi gaqqi amaxxii minii yoo beyyoo daba'llito'o. Ee doollenne Isra'eelina adil hee'ukkoyyo. Manni hundim ixxena danaamo labaa moo'amu luwwi hundam issam hee'ukko. Isra'ee'l uullanne daannuwwi gassitam hee'llo'i doollenne ee uullanne sibaar aagukko; ee mashka'inne Yihuxxi uullanne yoo Beetalihee'm beero'iinsi mat manchi ixxi meentichchoo lamem ixxi oosoo amadaa Moo'aaphphi uullanne hee'eena marukko. Ee manchi summim Abemeeleekatte; ixxi meentichchi summim Naa'oomette; ixxuwwi lamem oos summim Mahiloonattee Keelwoonattee; ixxi qaramu uullim Efiraat ihukkuuyyi Beetalihee'm beero'onne hee'am hee'ukko; ixxim abaroosinne maqirem Moo'aaphphi uulla maraa afuurukko. Ihukkaarem Naa'oom aro'i Abemeeleek eekke'em lehukko; isem is lamem oosinne maqirem gatto'o. Ixxuwwim Moo'aaphphi uulliinsi landa eebbo'o; ee kee'n summim matekii Orfa'atte; la'mmaantekkim Ruutatte hee'ukko; ixxuwwim ee uullanne tommi hiinchi qaxa hee'lla'a lasage Maahiloonii Keelwoonii lamim leto'o; Naa'oomem is aro'oo is lamem goo'n oosoo hoogga'a mullam gatto'o. Naa'oome Moo'aaphphi uullanne hee'llu'uuyyim Waa'i Isra'ee'l minaadabina qishixxato issukkisaa lobakat atootam uwwukkisaa macceessa'a lamem is oos meentinne maqirem Isra'ee'l uulla daba'lliteena ki'llo'o. Ixxuwwim Yihuxxi uulla marimma asheetto'o; ihukkaarem googonne hee'llu'uuyyim Naa'oome is oos meentina «Mallehe; ki'nnuwwi mine daba'llitakka'a ki'nnuwwi amo'innem hee'llehe; iinaa lehu i oosinaa eroomma issitakko'isam Moollanni ki'nnuwwinam biijooma issona. Moollanni ki'nnuwwina er saamo uwwona; ee minennem usheexxato uwwona» yito'o. Ee lasage Naa'oome «Xumma hee'llehe» yita'a suunqito'o; ihukaarem ixxuwwi sagara iimmaa'lla'a wi'llitu'uuyyi «Ihooyyo; kiinninnem ki moollo malloommo» yito'o. Naa'oomem «I ooso, mahina iinninne mattakkamane? An ki'nnuwwina goon ihoo ooso la'mmaagge qareena xanoommoka labissakka'atennihe? I landa, hay ki'nnuwwi mine daba'llehe; an goonanne afoombee'isa lobakata lo'mma'nnaammo; an ayyi la'ukko qaroommoo yaa ka hiimo goonanne afumta'nnii goo'n oosom qarumta'nnii ixxuwwi li'lla'a affeebe'e egattakkamonnihe? Ee bikkinaa yitakka'adu mulli goonanne affakkoo'n egattakkamonnihe? I landa ee'isayyo; an ki'nnuwwanne afu luwwanne lobakata qaraaraammo; mashka'oomim Moollanni angi i hanenne kee'mmaakko» yito'o. Ixxuwwim sagara iimaa'lla'a la'mmaagem wi'llito'o; ee lasage Orfa'a is ballo suunqita'a xumma hee'e yita'a daba'llito'o; ihukkaarem Ruuta hincito'o. Naa'oomem Ruutana «Ki heereechchi are is moolli beyyoo ise otossitam waa'uwwi beyyoo daba'llito'i bikkina atim issenne maqirem daba'lle» yito'o. Ihukkaarem Ruuta isena «An keese awwonoombee'isa hoottitte; at mattoo beyyo hundam maroommo; gattoo beyyonnem garoommo; keese uronaa ki beyyiinsi daba'llonaa eese hawwissitte; ki qarmanni iinam qarmanna; ki Waa'i iinam Waa'a. At letoo beyyonne anim lehoommo; waammantoo beyyonnem waammamoommo; lehiinsi bagaan eesee keesee annanni issoo luwwi hee'ukkaare Waa'i eese bi'isona» yita'a hide'llo'o. Naa'oomem Ruuta issenne maqire matteena murte'llo'isa moo'lla'a ee woshsha od wocimma utto'o. Lamim Beetaliheem afeebe'e maqirem matto'o; Beetalihee'm beero'o afamaa lasagem ee beero'i manni hundim ixxuwwanne maalalto'o; ee beero'i meentim «Hanqoomam tute Naa'oomattennihe?» yitu'uuyyi coro'llam hee'llo'o. Naa'oomem «Hundam xanoo Waa'i i heechcha qaraaraalli issaakkoo bikkina eese Maara'a yi'llehe bagaan ‹Naa'oome› yitakka'a weeshshakkotte. Ka uulliinsi marummi ammane abaroosinne marummo; ihukaarem Waa'i eese murugatti issaa dabaraakko; Waa'i eese sholliisaakko; hundam xanoo Waa'i eese u'nnisaakko; ee bikkina mahina eese ‹Naa'oome› yitakkamane? yito'o. Naa'oome is beet aretti hee'llo'i Moo'aaphphi uulli Ruutanne maqirem Moo'aaphphi uulliinsi Beeteeliheema daba'llito'ok so'o murimma amadakko'oo ammanennetti hee'ukko. Naa'oomena aro'i hee'u Abemeeleekina hincixxi qarmanchi Boo'eeza yakkam la'amaakkoo goddaanchi manchi hee'ukko. Mat balla Moo'aaphphi Ruuta Naa'oomena «Ayyi la'ukko mat manchi illagenne nuura siidummaare ixxo awwonaa hurbaaxxi qarme'iinsi qiima feereena maronnihe?» yito'o. Isem «I landichche, ihona mare» yito'o. Ruutam hurbaata murakkam beyyo matto'o; is gada'isam ihaa Boo'eez hurbaata murakkam beyyo affa'a muroo kee'n laso awwontu'uuyyi qiima feetto'o. Hofqax ammanniinsi lasage Boo'eez Beetaliheemiinsi ki'aa hurbaata murakkam beyyo waaraa hurbaata muttam keenina «Waa'i ki'nnuwwinne maqir ihona» yukko. Ixxuwwim dabatta'a «Waa'i keesem maasse'ona» yito'o. Boo'eezim ixxi hurbaata muttam kee'n ijaajaancho «Tu mishissam landichcho ayyetane?» yaa xa'mmukko. Oo baxaano baxisaanchim «Tute Naa'oomenne maqire Moo'aaphphi uulliinsi waatto'oo Moo'aaphphi uullitane. Isem hurbaata muttam kee'n lasonne ‹Farshimiinsi ubu qiima fee'llonnihe?› yita'a xa'mmito'o; hofqax ammanem daasanne aagga'a usheexxito'ookko bagaan dariinsim ki'issa'a kabad afeebe'em feettamuulla» yukko. Ee ammanenne Boo'eez Ruutana «I landichche macceese; keyyenne baxxam landa awwontaa feere bagaan ka qarime'e uttaa mulli beyyo mattitte. Ixxuwwi hinke'enne hurbaata muttamuulda'e moo'llaa ixxuwwinne maqire ihe; keese hawwissambee'isam an woraada ijaajaammo; at xeebe'llitti ammanem ixxuwwi inkiitta'a dissito'i wo'i haralli beyyo mattaa wo'o age» yukko. Ruutam uullanne aad heeshshita'a «An allaggichchotti ihaa hee'ummuuyyi at iina eroomma issitoo'isna ki illagenne an nuura siideena xanummok hinkidette?» yito'o. Boo'eezim isena «Ki aro'i lehu ammaniinsi ki'isaa ki ballona at issitti eroomma hundam an macceesaammo; kiyyannaa kiyyummaa qarantitti uullaa hundam uttaa kanniinsi illageen laqqoobee'i minaadabinne maqire hee'lleena waattittisa la'aammo. At issitti eroommina hundinam Waa'i kiina bito miqona; ixxi hafiinsi woroon usheexxato siiddeena waattitti Isra'ee'l Moollanni Waa'i kiina eekka miqona» yukko. Ruutam «I moollanna, ki awwaadaaniinsi matisam ihumbee'i iina qishixxitaa wocimminne eese qoxxissaatto» yito'o. Balli hurbaata itakkam ammanenne Boo'eez Ruutana «Waare, ka hurbaaxxi kollonne hincihe; ka hurbaata hooshechchinne hooshe'llittuuyyi ite» yukko. Isem hurbaata muroo keeninne maqirem afuutto'o; Boo'eezim giiranne saramaakkoo hamaama uwwukkaare itto'o; goddita'ahim kollo gatisso'o. Odim qiima feetteena ki'llo'aare Boo'eez ixxi baxaanina «Farshimmuwwi lambe'iinsettem ihukkaare fee'llitona bagaan hore'em hoottakkotte. Hore'oomam karamu farshimiinsim mat mato huduuddakku'uuyyi gatissehe bagaan hoottakkotte» yaa ijaajukko. Ruutam uulli hiimeebe'e feettu'uuyyi hossa'a lasage feetto'i qiima ganta'a mat qunni so'o fissito'o. Iyyita'ahim beero'o aaggo'o; is ballonam ee qarme'iinsi feetto'oka moo'isso'o; ise itta'a goddita'a gatu hurbaatam is ballona uwwito'o. Is ballom isena «Kaballa hannonnette qiima feettittok? Ayyi uulliinsette feettittok? Ka eroomma kiina issu manchi maasse'amaakkoohan ihona» yito'o. Ruutam «An qiima feerummuuyyi hosummok Boo'eeza yakkam manchi uullannette» yito'o. Naa'oomem is beet arena «Foorinne yo'i keeninaa leto'i keeninaa aagu neeyyaxxi sagara wonshoo'n uroobee'i Waa'i ixxo maasse'ona; oo manchi niina hincixxi qarmanchona'e; neese lago gasseena xanoo manniinsi matona'e» yito'o. Ruutam dabatta'a « ‹Hurbaaxxi murat beeddeebe'i afeebe'e i baxaa'n lasonne hincitaa fee'lle› yaakko» yito'o. Naa'oomem is beet arena «I landichche, Boo'eez hurbaaxxi qarme'enne baxoo meentinne maqire feettittaare eranne; mulli manni hurbaaxxi woro mattittaare ayyi la'ukko keese woraad hawwiseena xanookko» yito'o. Ee bikkina Ruuta so'oo arasaa murakkam agan beeddeebe'e Boo'eezina baxxam meentinne maqirem feetto'o; is balloonsim annanni ikkoo'n maqirem hee'llo'o. Ee lasage Naa'oome Ruutana «I landichche, an keese usheexxisoo goonanne affona hasoommo. Qiima feettittuuyyi kiinninne maqire hee'u meenti awwaadoo Boo'eez niina hincixxi qarmanchi ihukkisa la'e; an kabadem kiina kuroommi woshsha macceese; kaballi maaro'o ixxi so'o ganukkuuyyi oodo'onne garoohane. Ee bikkina at kaba aanshaqqitaa shitto'o laphphe; ki eddechcham edde'llaa ixxi hurbaata ganoo beyyo odo'o mare; ihukkaarem ixxi hii'm hurbaata itaahii agaahii ki'eebe'e ixxena moo'antitte. Hinke'enne iinse'ooda'e moo'llaa lasage diriiroo ammane hincitaa ixxi lokki kolli eddechcha fooqaa'llaa iinse'e; ee lasagem ixxi at issitoo luwwa kiina kurookko» yito'o. Ruutam «At yitti luwwi hundam issoommo» yito'o. Ruutam oodo'o matta'a is ballo yito'i luwwi hundam issito'o. Boo'eez itaa agaa ixxi wodano liiransaa lasage hurbaaxxi atooxxi gadanonne iinse'eena marukko; Ruutam qaphphita'a matta'a ixxi lokki kollinne eddechcha fooqaa'lla'a iinse'llo'o. Luxxi baqitenne Boo'eez diriiriinsi baqaa midaado daba'lloohaare mat meentichcho ixxi gadanonne inse'llo'oo moo'aa muggukko. Ixxim «Taa at ayyette?» yaa xa'mmukko. Isem «I moollanna, an Ruutatte; iina hincixxi heereechchi ikkitti bikkina ki eddechcha eesenne ki awwaadaanchonne ambe» yito'o. Boo'eezim isena «I landichche, Waa'i keese maasse'ona; at kanniinsi illageen ki ballona issittaanniinsi loboka ka abaroosina issimminne lophphaakkoo iitto moo'issaatto; goddaancho te'im buxichcho yitaa woraada awwontittoyyo. Kabadem ihukkaare i landichche at baddititte; at xa'mmitti luwwi hundam an issoommo; mashka'oomim at er meentichchotti ikkittisa beero'i manni hundim la'ookko. An kiina heereechchi ihimmi hanqame; ihukkaarem kiina hincoo heereechchi yookko. Ka hiimo at keyyem gare; uulli soodoohaare oo kiina hincoo heereechchi keese gassooda'e te'im sabooda'e xa'mmoommo; ixxi keese laggassoohan ihulas danaamo; ihukkaarem ixxi keese lago gasseena hasubeelas an keese lago gasseena hee'oo Waa'i summinne sagara aagoommo; uulli soodeebe'e keyyem iinse'e» yukko. Ee bikkina Ruuta Boo'eez lokki gadanonne iinse'llo'o; ihukkaarem Boo'eez ise ixxenne gatto'isa matim la'ona hasubee'i bikkina ayyim qoossaa moo'eena xanoobee'i soodaraar daranne iinsiinsi ki'llo'o. Boo'eezim isena «Ki weyyakka kid biddiqaa'e» yukko; isem biddiqaa'lla'a amaddo'o; Boo'eezim mat qunna ihoo qax so'o keenaa is afarenne iyyiisukko; isem ee so'o iyyita'a beero'o daba'llito'o. Is balli beyyom waatto'o; is ballom «I landichche, oo mattitti woshshi hinkidette?» yita'a xa'mmito'o; isem Boo'eez issu luwwi hundam kutto'o. Odim « ‹Ki balli beyyo kora'i angam mattitte› yaa ka lamiyyi kilo'i so'o uwwaakko» yito'o. Naa'oomem isena «Oo manchi kaballa ka woshsha guulloo'n usheexxoobee'an ihu bikkina lasaancho laqqeebe'e egere» yito'o. Boo'eez beero'o aagakkam goocanne yoo wixxixxi beyyonne maraa afuuraakkoohaannonne gaassaa Boo'eez Ruutana kuraa hee'u Abemeeleekina abbis qarmanchi ee beyyo waarukko; Boo'eezim «Iyyabbaayyo, hino'o kid waattaa i gadanonne afuure» yukko. Oo manchim eekke'e maraa afuurukko. Odim Boo'eez ee beero'i lommanniinsi tommi mancho weeshaa ee dummichchi beyyonne afuutamisa issukko; oo maanni afuutta'a lasage ixxi ee lago aa'eena xanoo hincixxi qarmanchina «Moo'aaphphi uulliinsi daba'llita'a waatto'i Naa'oome niyyabbaayyi Abemeeleek uulla biteesseena hassamuulla. Ee woshsham at la'immi hasisookko yaa sawwummi bikkina kaba keyyenne afuuru lommanni illagenne lago aa'llona tiissiiseena hasoommo; at hassoobee'an ihulasim murte'i woshsha kure; mashka'oomim ee uulla lago aa'lleena xantoo hincixxi qarimanchi atette; at hassoobee'an ihulas kiinniinsi lasonne lago aa'eena xanoommok anette» yukko. Oo manchim «An lago aa'oommo» yukko. Boo'eezim «Erane; ihukkaarem Naa'oomeensi uulla aa'lloo ammane uulli lehu manchi summinne weeshamona is aro'i lehu Moo'aaphphi uulliinsetti ikko'i Ruutam eddaa lago aa'lloohan ihukkisa la'e» yukko. Oo hincixxi qarmanchim Boo'eezina dabaraa «Ee'isa ihulas an lago aa'eena hasoommoyyo; mashka'oomim ixxi i gaqqi uullanne hawwo qoocceena xanoohan ihu bikkina an i hanqa kiina uwwaammo at lago aa'e» yukko. Ee doollenne mat luwwa biteesakkam ammane te'im dabassamakkam ammane biteesaanchi bitaa'aanchina mare'i ihona kobe'e fissaa uwwimmi Isra'ee'l uullanne losamaakkohan hee'ukko. Ee bikkina oo manchi Boo'eezina «At ki gagim bito aa'e» yaa ixxi kobe'e lokkiinsi fissaa uwwukko. Ee lasage Boo'eez lommanninaa ee beyyonne hee'llo'i manninaa hundinam «Kaballa an Abemeeleekikaa ixxi oos hee'llo'i Keelwoonikaa Maahloonikaa amaxxa hundam Naa'oomeensi lago aa'ummisina ki'nnuwwi hundim naqaashshuwwa. Odim lehu manchi summi ixxi moolli lambe'ennee ixxi uullannee la'amaa hee'onaa ixxi amaxxim ixxi summinne weeshamoo'isnaa Maahloonina aretti hee'llo'i Moo'aaphphi uulliinsi waatto'i Ruutam iina aretti ikkona eebaammo; ki'nnuwwim ee luwwi hundinam kaballa naqaasha» yukko. Ee wixxixxi beyyonne wixxaa hee'u lommannii mulli minaadabii hundim «Eeyya; neese naqaasha; Waa'i ka ki mine aaggam meentichcho Yaaqoobina lobakat ooso qaramu Raaheelisaa Liya'isaa issona; Waa'i keese Efiraatanne goddaanchi issona; Beetaliheemannem ki sado la'amaakkoohan issona. Waa'i ka mishissam landichchoonsi kiina uwwoo ooso Ti'imaare Yihudina qatto'i Faarees abaroosisa issona» yito'o. Ee bikkina Boo'eez Ruuta ixxi aretti isseena ixxi mine massukko; ixxim isenne maqire iinse'ukko; Waa'im ise maasse'u bikkina lamfooretti ikka'a goonchi beeto qatto'o. Olla'i meentim Naa'oomena «Kaballa keese abooyyoo oos ooso uwwu Waa'i galaxxamona; ixxom Isra'eelanne summamaakkoohan issona. Keese lobakata iittitam ki beet are lamar goo'n oos issoohaanniinsi loboka issito'ookko; kaba odim ki heechcha haareechchi issookkokaa lommannanonne keese abooyyookkokaa qatto'ookko» yito'o. Ee lasage Naa'oome ee ciila aa'lla'a qaaphphito'o; erisa abooyyita'ahim li'isso'o. Is olla'i meentim ee ciilika summa «Yoobeeda» yita'a fissito'o. «Naa'oomena goonchi beet qaramukko» yitu'uuyyim manni hundinam kutto'o. Adil Daawiitina anni ihu Issayye qarukkok ka Yoobeedatte. Duunaam Efiree'm uullanne Raama yakkam hoffi beero'onne hee'oo Efireem sullik Hilqaanaa yakkam mat manchi hee'ukko. Ixxim Yirohaam beet, Eelihu'i beetina beet ihukkuuyyi odim Eeluh Toohu'ina beet ihu Xuuf beetina beet hee'ukko. Ixxenam lam meenti hee'ukko. Ixxuwwi summim matek Haanna'atte ihukkuuyyi mullaantek odim Finaanatte hee'ukko. Finaanana oos hee'ukko. Ihukkaarem Haanna'a maham qatto'oyyi hee'ukko. Hilqaanim hiinchonne hiinchonne gogoxxi Moollanni Waa'ina otosseenaa kitima hincaa'eenaa Seelo'o maram hee'ukko. Ee doollenne Eel'i oos Hofiniinii Finihaasii Seelo'onne Waa'ina qeessuwwi ikka'a awwaaddam hee'llo'o. Hilqaanim kitima hincaa'am hee'u amman hundam ee kiti'm maariinsi mat suume Finaanana uwwam hee'ukko; ee'isam is oosina annichchi annichchinam mat mat suume baxxansam hee'ukko. Haanna'a lobakata iittam hee'u bikkina lam suume uwwam hee'ukko. Ihukkaarem Waa'i isena qachcho uwwubee'i bikkina alceennatte hee'llo'o. Waa'i isena qachcho uwwubee'i bikkina is Waameeta Finaana Haanna'a kichche'isimminne gancassitam hee'llo'o. Oohim maarag hundam uramoo'n cawwaa iham hee'ukko. Ixxuwwi Keesammi Mine mattam amman hundam Haanna'a wi'llitu'uuyyi hurbaata itimma hooggeebe'i afeebe'e Finaana lobakata gancassitam hee'llo'o. Ee bikkina is manchi Hilqaan «Haanna, mahina wi'llitoolla? Mahinatte hurbaata ittoobee'ek? Hundi ammanem kaa'nna kichche'lloottok mahinatte? An kiina tommi goo'n oosiinsi e'lloommoyyonnihe?» yam hee'ukko. Mat balla ixxuwwi Seelo'onne itta'atii agga'atii lasage Haanna'a ki'llo'o. Qeessichchi hee'u Eeli'im Keesammi Mi'n gooc gadanonne afuuraa hee'ukko. Isem lobakata kichche'lla'a hee'llo'i bikkina qaraaraallisa wi'llitu'uuyyi Waa'a uunxito'o. Isem Waa'ina «Gogoxxi Moollanni Waa'a! Eese ki awwaadaancho moo'e i hawwo moo'llaattahim eese sawwihe; eesem xadditte. Iinam mat goonchi beeto uwwitta'n ixxi heechchi doollenne hundannem kiina annanni ihaakkoohan issoommo. Ixxi horoorim hore'em hogoossamooyyo» yita'a uga'a aaggo'o. Haanna'a Waa'i uunximminne qeeraa'l ammane massito'i bikkina Eeli'i is suume moo'am hee'ukko. Haanna'a is wodanonne uunxitam hee'llo'i bikkina suum mikimkam hee'ukko bagaan sagar macceesamam hee'ukkoyyo. Ee bikkina Eeli'i agga'a dimbito'oka labisukko. Ixxim isena «Hinki balli afeebe'e dimbitoottok? Ka dimbisoo woyi'n diqaasa kiinniinsi qeesse» yukko. Haanna'am «I Moollanna! An dimbummoyyo. Ihukkaarem an wodan kichchechchinne wo'mmaakkoo meentichchotte. Diqaasaa mulli dimbisoo aggaa agummoyyo. Ihona bagaan an neeyyato muraa kichche'aammoo bikkina i foor u'nnamoo'isa issaa i hawwo Waa'ina hincaa'imminne uunxaammo. Eese ki awwaadaancho kora'i dimbaan meentonne eddaa xiggitte. An kaa'n ammane qeeraa'llisaa uunxummok kichchechchi lophphaakkoo hawwaanchotte ihummi bikkinatte» yita'a dabatto'o. Eeli'im «Xummanne mare! Isra'ee'l Waa'i kiina uunxitti luwwa uwwona» yukko. Isem «Iina ki awwaadaanchona Waa'a uunxe» yito'o. Ee beyyiinsi ki'lla'a matta'a hurbaata itto'o. Ee lasge is illi kollonne kichchechchi moo'amukkoyyo. La'm balla daram Hilqaanii ixxi abaroosii ki'amaa Waa'ina otossamaa lasage Raama'anne hee'oo ixxuwwi mine maramukko. Hilqaanim ixxi meentichcho Haanna'anne eebaqqanchi edancha edamukko. Waa'im ise uunxatina dabachcha uwwukko. Isem lam foorette ikko'o. Goonchi beetom qatto'o. Isem «Waa'a uunxaa siixxaammoohane» yita'a ixxi summa «Saamu'eela» yita'a weeshsho'o. Hilqaan ixxi abaroosinne maqirem hiinchonne Waa'ina kitimaa, uga'aa hincaa'oo amman afukkaare Seelo'o marukko. Ihukkaarem Haanna'a «I beet anuuna uroo ammane ixxi heechchi doolli hundam hee'oo'isina Keesammi Mine massoommo» yita'a ixxuwwinne maqire is manchina kutta'a hee'llo'i bikkina ee ammane ixxuwwinne maqire matto'oyyo. Hilqaanim «Erane, kiina danaamo labu luwwa hundam isse; anuuna ureebe'e minenne afuutteena xantootto; Waa'i kiina uwwu neeyyaxxi sagara wonshona» yaa dabarukko. Ee bikkina Haanna'a minenne afuutta'a ciilichchi anuuna ureebe'e li'isso'o. Anuuna hootta'a lasage Seelo'o amadda'a matto'o. Ixxenne maqirem sas hiinchi baa'l moora, tommi kiilo'i qamaa mat harachchi woyi'n diqaasaa amadda'a matto'o. Saamu'eelam oosoommanninnem Seelo'onne yoo Keesammi Mine massito'o. Ee massito'i baa'l mooram durakka'a lasage ciilichcho Eeli'i beyyo hincaa'llo'o. Haanna'am Eeli'ina «I moollanna! Hee'oo Waa'i summinne urimma issitoo'isina keese uunxoommo. Eese tiittoohonnihe? An mataagge keyye uullaa Waa'a uunxummuuyyi moo'llitti meentichchotte. An ee ammane Waa'a uunxummokim Waa'i iina ka ciilichcho uwwoo'isinatte hee'ukko. Waa'im an uunxummisannem ka goonchi beeto iina uwwukko. Ee'isam anim odim dabaraa Waa'ina uwwaammo. Ee bikkina ixxi hee'oo heechchi doollenne hundannem Waa'ina uwwamaakkoohan ihaa hee'ookko» yito'o. Ee lasage ixxuwwi Waa'ina otossito'o. Haanna'a «I wodan Waa'anne liiramaakko. I lombim Waa'inne iimiimaakko. An i diina'anne osaroommo. Waa'i iina hara'mmu bikkinam lobakata liiramaammo. «Waa'i'nnoo'i keesammi bee'e; ixxe'nnookkok hore'em bee'e; Ni Moollanni Waa'a laboo maaxamakkam girbi bee'e. Bolximminne woccakkotte; amaadimminnem woccakkotte; Moollanni Waa'i hundi luwwam la'oohane; manni bax hundam keenoohane. Malaayyaam gaadaa'nnek xiyyi iiqamukko. Ihukkaarem hoongaan keen malaayye siixxita'a qoxxito'o. Goddaa hee'u keen sibaaraakko; sibaaraa hee keenim goddaakko. Alceenna lamar ooso qatto'ookko; lobakat ooso qatto'otem mullatti ikko'ookko. Waa'i shookko, gatisookkome. Si'oolanne dilliisookko; sii'ooliinsim fissookko. Ixxi buxoonsookko, goddisookkome; sholliisookko, lonsookkome. Ixxi buxa buchchiinsi adaraalluwwam gii'l buchchiinsi ki'isookko. Adi'l oosinne afuussookko. Lombi adillanom lago aa'isookko; uulli shooto'o qoxxisaa baxukkok Waa'a; ee shooto'onnem ka uulla qooccukkok ixxotte. «Ixxonne amma'nnitam minaadaba egerookko. Ihukkaarem Jora baxxam keen tuunsonne uunjantamo. Ayyi manchim ixxi gagina malaayyi yookkoka labisuta'nnim ixxi gaqqi qoxallaninne kaachcha siidooyyo. Waa'inne wocantam keen bi'llamo. Mashka'oomim Waa'i iimanenne ihaa ixxuwwi hanenne gugookko. Waa'i ka uullanne hundannem oogatookko; Adilinam malaayye uwwookko. Ixxi doo'llu adilim kaa'oo'isa issookko» yitu'uuyyi Waa'a galaxxito'o. Ee lasage Hilqaan Raama'anne yoo ixxi mi'n beyyo daba'llaa marukko. Ciilichchi Saamu'eelim Seelo'onne afuuraa qeessichchi Eeli'i illagenne ihaa Waa'ina awwaadam hee'ukko. Eeli'i oos awwaad bee'i jor oos hee'llo'o. Waa'am lonsitam hee'llo'oyyo. Qeessuwwi minaadabiinsi xa'mmitam irifo'ina uwwamu seeram egettam hee'llo'oyyo. Oohim mat manchi kitima hincaa'oo ammane qeessichchina asse'amaanchi sas qaf yoo xaa'l qapha amadaa waaram hee'ukko. Maar li'oo'nnim Maara sarakkam lob harachchiinsi oo qaph fissu qax maara massaa qeessichchina uwwam hee'ukko. Kitima hincaa'immina Seelo'o waattam Isra'ee'l manni hundim ee'isam bogantam hee'llo'o. Odim eehanniinsi mulli woshshi oo kiti'm maar saramoo'n qaquullam hee'ukkuuyyim di'ira shi'nnisakkoo'nnim qeessichchina asse'amaanchi kitima hincaa'oo manchi beyyo waaraa hanqi egeramu bee'i wocinne «Qeessichchina sarakkam maara iina uwwe; mashka'oomim qeessichchi hasookkok qaquulli maara bagaan ki li'aalli maarayyo» yam hee'ukko. Oo manchim dabarukkuuyyi «See'llisanne gaassaa di'ir shokkaa shi'nnona; ee lasage at hassoottoka doo'llitaa massitootto» yuta'n oo qeessichchi asse'amaanchi «Eehid ihooyyo; eebe'i afeebe'em egeroommoyyo; kaba uwwitoobeelasii sabbittilasii malaayyinne hooraa massoommo» yam hee'ukko. Ee'isinne Eeli'i oos Waa'ina hincoo kitima sholliisso'i bikkina Waa'i illagenne ixxuwwi baaxiil lobakata jor hee'ukko. Saamu'eel ciiloommaninnem talbiinsi baxamu bito xee'aalli «Eefuuda edde'aa Waa'i illagenne awwaadam hee'ukko. Ixxi amam is manchinne maqirem maarag hundam hiinchi kitima hincaa'akkeena firakkam ammanenne hundannem hanenne edde'akkam gootto'i kaabba eebbam hee'llo'o. Eeli'im Hilqaana ixxi meentichcho Haanna'anne maqire maasse'oo ammane Hilqaana Waa'ina annanni ihaakkoo manchi issitakka'a uwwitakko'i ka ciilichchi bikkenne ka meentichchoonsi Waa'i kiina mulli ooso uwwona» yaa maasse'am hee'ukko. Ee lasage mine daba'llita'a elle'llam hee'llo'o. Hanqo'isam Waa'i Haanna'a maasse'ukko. Ee bikkina ee lasage sas goo'n oosoo lam landaa edda'a qatto'o. Laaddi woradichchi Saamu'eelim Waa'ina awwaadukkuuyyi li'ukko. Eeli'im lobakata lomma'nnaa hee'ukko. Ixxi oosim Isra'ee'l minaadabanne issitam hee'llo'i jor baxoo odim hore'em Waa'ina otossakkam dukkaananne awwaaddam landinne maqire eebaqqanchi edancha edanitam hee'llo'isaa hundam macceesam hee'ukko. Ee bikkina «Mahina ka jor woshsha issitakkamuullahe? Baxxakkam jor baxo hundam annannichchiinsim macceesaammo. I ooso kido'i jor woshshi gatona. Ku Waa'i minaadab iina kuttam luwwi hundim hore'em lobakata tuussiisoohane. Mat manchi mulli mancho shuta'n Waa'i urimminne gatiseena xanookko; ihukkaarem Waa'a hawwodu manchina Waa'a uunxeena ayyi xanookko? Ihona bagaan Waa'i Eeli'i ooso bi'iseena murite'aa hee'u bikkina anni sogitano macceesseena xanto'oyyo. Ihukkaarem ooshshichchi Saamu'eel uullichchinne li'ukkuuyyi manni illagennee Waa'i illagennee hibbaa nuuraa siidukkuuyyi li'ukko. Mat Waa'i asse'aakkoo hiraagaanchi Eeli'i beyyo waaraa «Waa'i ‹Faari'oon minenne Gaassi kiyyanni Aaroonii ixxi abaroosii Gibxi adilina agid hee'llo'i ammane an I gaga ixxena la'isummo. Ixxuwwim Iina qeessuwwi ikka'a kitima hincaa'akkam beyyonne aduruusa wiriissimminne Iinniinsi sogitano xa'mmitam Eefuuda edde'imminne Iina awwaaddona Aaroon abaroosa mulli Isra'ee'l minaadaphphi sulluwwiinsi annanni issaa doo'llummo. Iina kitima hincaa'akkam beyyonne shokkoo kitimiinsim ixxuwwina sharada siixximmi hanqi hee'oo'isa issummo. An garoommi beyyonne hincaa'akkamisina ijaajummi kitimaa Iina uwwakkam luwwaa mahina hance'llakko'o? Ki'nnuwwi gaga geejjissakkeena yitakka'a I minaadab Isra'eel Iina uwwiteena eebbo'i luwwa hundam gaassitakka'a itimminne Iinniinsi loboka ki ooso mahina lonsitto? Ee bikkina Isra'ee'l Waa'i Moollanni ihummi an Waa'i ki abaroosii ki moollii heer heerinam Iina awwaaddamo› yaa neeyyata issaa hee'ummo. Ihukkaarem kaba ee neeyyaxxi sagara kiina qoxxisaa uwwoommoyyo. Mashka'oomim an eese lonsoo keeno lonsoommo; eese sholliisoo keenom sholliisoommo. Kaba ka woshsha macceese; oono'o, an ki abaroosiinsii ki moolliinsii qaranto'i goo'n oosikka woraadduwwa hundam shoommi amman afaakko. Ee bikkina ki abaroos woronne qeeraa'l umura siidoo manchi hee'ooyyo. Oono'o, kabadem keesenne lobakat hawwi afookko. An mulli Isra'ee'l minaadabina uwwoommi goddanne to'achchitoo'isa issoommo. Odim ki minennem lommanchi hee'ooyyo. Ihukkaarem ki shumo'i lammibe'iinsi gatoo qeessoomaninne Iina awwaadoo manchi ki ille inddiiddinne jaamisookko; ki foorem kichche'isookko. Mulli ki shumo'i odim woraaddanninem daafamookko. Ki lamem oosim Hofinii Finihaasii mat balla matemaa'llem oranne letamaare ku an wocummi sagar hundim hanqi ihaa wo'mmoo'isa moo'llooto. Iinam ki bikkenne ihaa amma'nnamaakkookokaa An iittoommi luwwa issookkokaa mulli qeessichcho doo'lloommo. Ixxenam an doo'lloommi adi'l illagenne qeessuwwi ikka'a awwaadam shumo'o uwwoommo. Ki shumo'i lambe'iinsi lehoo'n gatukkok ayyim hee'uta'n ee qeessichchi beyyo maraa ixxena gaga heeshaa'aa ixxeensi diinatee hurbaataa uunxookko. Mat ballina itoo hurbaata siixxena qessuwwina awwaadaanchi issakkamisina uunxookko» yukko. Saamu'eelim woraaddaninne Eeli'i illagennetti ihaa Waa'ina awwaadam hee'ukko. Ee doollennem Waa'i sagar kuramam hee'ukkoyyo; kaaltim moo'amam hee'ukkoyyo. Eeli'ik illi lomma'nnimmiinsi ki'ukkok jaamaa hee'ukko. Ixxim mat hiimo ixxi iinse'oo minenne iinse'aa hee'ukko. Keesammi Minenne caakkisakko'i caakki xoo'oo'nnim Saamu'eel Keesammi Hidi'l Saga'l Saaxin yoo Keesammi Minenne iinse'aa hee'ukko. Waa'im Saamu'eela weeshukko; Saamu'eelim «Yee!» yukko. Ixxim Eeli'i beyyo geeraa maraa «Oono'o eese weeshshittaare waaraammo» yukko. Ihukkaarem Eeli'i «An weeshummoyyo; mattaa iinse'e» yukko. Saamu'eelim maraa iinse'ukko. Waa'i Saamu'eela saxxaagge odim weeshukko. Saamu'eelim ki'aa Eeli'i beyyo maraa «Oono'o, eese weeshshitti bikkina waaraammo» yukko. Ee lasage Saamu'eela weesham hee'ukkok Waa'i ihukkisa Eeli'i la'ukko. Ee bikkina Eeli'i Saamu'eelina «Mattaa iinse'e; odim weeshukkaa'lleensi I Moollanna! Oono'o, an ki awwaadaanchi macceesoommuulla woce› yihe» yaa Saamu'eela sogukko. Saamu'eelim daba'llaa maraa iinse'ukko. Waa'im waaraa ee beyyonne uullukko. Illagee'nnisam Saamu'eela! Saamu'eela! «Yaa weeshukko». Saamu'eelim «I Moollanna! Oono'o, ki awwaadaanchi macceesoommuulla woce» yukko. Waa'im Saamu'eelina «Ono'o, an Isra'ee'l minaadabanne lobakata u'nnisoo mat woshsha issoommi balli hincaakko. Ee woshsha macceesu manni hundim hirirookko. Ee balla luxxaanniinsi ki'isaa lasaanchi afeebe'e Eeli'innee ixxi abaroosannee gaassaahim qoxxisaa kurummi woshsha hundam guullaa issoommo. Mashka'oomim Eeli'i ixxi oos eese gadda'a jor luwwa issito'isa la'ukkuuyyim axeeraa hoorubee'i bikkina heer heerinam ixxi abaroosa guzumo'oommisa gaassaatim kuraammo. Ee bikkina Eeli'i abaroos baaxiil ayyi kitiminnem te'im Waa'ina uwwakkam luwwi hundinnem heer heerinam haafamoobee'isa hide'aammo» yukko. Saamu'eelim soodeebe'i afeebe'e iinse'aa egerukko. Soodaa lasage ki'aa Keesammi Mi'nneka gooccuwwa fooqaa'ukko. Moo'u kaaltam Eeli'ina kurimma baddukko. Ihukkaarem Eeli'i «I beeto! Saamu'eela» yaa weeshukko. Saamu'eelim «Yee!» yukko. Eeli'im «Waa'i kiina kuru luwwi maha? Iinniinsi maham maaxxitte; Waa'i kiina kuru woshshi hundam iina kuttibeelas Waa'i kee'mmaalli guzumo'o keesenne eebookko» yukko. Ee lasage hundem woshsham Saamu'eel Eeli'ina kurukko. Mat woshsham maaxaa gatisukkoyyo. Eeli'im «Ixxi Waa'i ihu bikkina ixxena eran ihaa moo'amukkoka hundam issona» yukko. Saamu'eelim li'ukkuuyyi marukko. Waa'im ixxenne maqire hee'u bikkina Saamu'eel wocam hee'u woshshi hundam wonsham hee'ukko. Eehanniinsi ki'ukkok Daaniinsi Bersaabe'i afeebe'e hee'llam Isra'ee'l minaadab hundim Saamu'eel Waa'i hiraagaanchi ihukkisa laqqo'o. Waa'i illagee'nnisam Saamu'eelina edaa, edaa caakkaa la'amukko; Saamu'eel wocam hee'u woshshi hundam Isra'ee'l minaadab erisa macceesam hee'ukko. Ee ammane Isra'ee'l minaadab Filisxee'm minaadaba qasseena fitta'a Abeni'eezera yakkam beyyonne wiiddanto'o. Filisxee'm minaadabim Afeeqa yakkam beyyonne wiiddanto'o. Filisxee'm minaadabim qasimma amaddo'o. Kee'mmaalli oriinsi lasage Isra'ee'l minaadaba kaa'lla'a o'l beyyonne soor kum manna shito'o. Oriinsi gatta'a xotto'i manni ixxuwwi wiidda'n beyyo daba'llito'i ammanenne Isra'ee'l awwonsaan «Kaballa Filisxee'm minaadab neese kaa'llamisina Waa'i cawwaa urukkok mahinatte? Niinninne maqire maraa ni diina'i angiinsi gatisoo'isina kaba mallaa Hidi'l Saga'l Saaxina Seelo'iinsi eembona» yito'o. Ee bikkina ixxuwwi Seelo'o manna asse'lla'a Kiruubbuwwi lambe'enne ixxi adilla'n barcumanne afuuru gogoxxi Moollanni Waa'i Hidi'l Sagai'l Saaxina eebisso'o. Eeli'i lamem oosim Hofiniinii Finihaasii ee Hidi'l Saga'l Saaxininne maqirem waatto'o. Waa'ik Hidi'l Saga'l Saaxin ee beyyo afu ammanenne Isra'ee'l minaadab uulli heekke'oo qaxa liiranchinne lophphaakkoo ilillaaxxi sagara macceesisso'o. Filisxee'm manni ee ilillaaxxeka sagara macceessa'a «Ku Ibro'i manni hegeegonne macceensoommi ilillaaxxi sagar mahane?» yaqqanto'o. Waa'i Hidi'l Saga'l Saaxin Ibro'i manni wiidda'n beyyo Waarukkisa laqqo'i ammanenne baddita'a «Waa'uwwiinsi mat ixxuwwi wiidda'n beyyo waaraakko; neese bi'nnaammo! kanniinsi illageen kido'i luwwi ihaa la'ooyyo. Aayye! Ka wodaam waa'uwwi angiinsi neese ayyi gatisookko? Ixxuwwi Gibxi uulli manna annanni annanni boobannuwwinne uulli udma'anne bi'isso'oo keeno! Filisxee'm manna! Ee bikkina kaba qoxxehe! Goonoo'mmitakka'a orammehe; ixxuwwi niina agid hee'llo'isam neesem odim Ibro'i mannina agid inkaa ganteenatte; ee bikkina goonoo'mmitakka'atii qoxxitakka'atii orammehe!» yito'o. Filisxee'm mannim qoxxita'a qasanta'a Isra'ee'l manna kaa'llo'o; Isra'ee'l mannim ixxuwwi dukkaa'n kolli gibbo'o; lobakat beeddanchi ihu bikkina sad kum Isra'ee'l gaadaan leto'o. Waa'ik Hidi'l Saga'l Saaxinim qeefadamukko. Eeli'i Lamem oosim Hofiniinii Finihaasii leto'o. Biiniyaam sulliinsi mat manchi o'l beyiinsi gerukkuuyyi ee ayyaamom Seelo'i beero'o afukko. Ixxim kichchechcha la'iseena ixxi eddechcha dereeraa ixxi horoorennem dira laphphaa hee'ukko. Eeli'im Waa'i Hidi'l Saga'l Saaxi'n bikkina sawwiminne u'nnamukuuyyi gooqqi inqenne gudisakko'oo barcumanne afuuraa egeraa hee'ukko. Oo woshsha amadaa waaru manchim hegeegonne hundannem wocukkuuyyi macceesso'i manni hundim muggita'a laachcha gugisso'o. Eeli'im ee laachcha macceesaa «Ku laachchi hundim maruchcho» yaa xa'mmukko. Oo manchim ka woshsha eeli'ina kureena qaqqisaa marukko. Ee doollenne Eeli'i honsayyee sadeenti hiinchi lommanchoo hee'ukko. Ixxekim illi jaamaa hee'ukko. Oo woshsha kuram hee'u manchim hincaa «An o'l beyyiinsi xoraatette waarummok; kaballa keyye afummokim kee'mmaalli geellichchinnette» yukko. Eeli'im «I beetoo! Eehannah hinkidette?» yukko. Oo woshsha amadaa waaru manchim «Isra'ee'l gaadaan kaa'anta'a Filisxee'm gaadaa'n illagiinsi gibbo'o. Oo sholle'nnim neesenne afimmi lobakata kichche'isoohane! Ee beeddu manninne maqirem ki oos Hofiniinii Finihaasii leto'ookko. Waa'i Hidi'l Saga'l Saaxinim qeefadamaakko» yaa dabarukko. Oo manchim Waa'i Hidi'l Saga'l Saaxin qeefadamukkisa kuru ammanenne Eeli'i ooxxi gooc gadanonne afuuru barcumiinsi afa'llaachcha ubukko. Ixxim lomma'nnaahii lobakata geejjaahii hee'u bikkina ubu ammanenne qo'llo mu'llaa lehukko. Eeli'im Isra'ee'l minaadaba awwonsukkuuyyi hee'ukkok sor hiinchi hee'ukko. Finihaas mi'n amatte hee'llo'i Eeli'i beet are lamfooratte hee'llo'o; qattam ammanim hincaa hee'ukko. Waa'i Hidi'l Saga'l Saaxin qeefadamukkisaa is ballii is manchii leto'isaa macceesso'i ammanenne dangonnem xuuchchi amadukkaare qatto'o. Isekim foor fireena ihukkuuyyi qassiissam meentichcho «Baddititte qoxxe! Goonchi beeto qattaatto» yito'o; ihukkaarem ise macceessa'a dabachcha uwwiteena xanto'ooyyo. Ihukkaarem hoffi sagarinne «Waa'ik lombi Isra'eeliinsi annanni ihukko» yita'a ee beet summa Iikaabood yita'a fissito'o. Ka'isa yimmim Waa'i Hidi'l Saga'l Saaxi'n qeefadanchaa is ballikaa is manchikaa lehoo moo'isoohan hee'ukko. Odim «Waa'i Hidi'l Saga'l Saaxin qeefadamu bikkina Waa'ik lombi Isra'eeliinsi annanni ihaakko» yito'o. Filisxee'm manni Hidi'l Saga'l Saaxina qeefadda'a lasage Abeni'eezeriinsi Ashidooda yakkam ixxuwwi beero'o massito'o. Daagoona yakkam ixxuwwi qophpha'n waa'i minenne aagissa'a Daagoo'n misi'l gadanonne dissito'o. Soodaraar daram Ashdooxxi manni ki'lla'a moo'llo'aare Daagoon misil Hidi'l Saga'l Saaxi'n illagenne illillaachcha qubbaakkoo moo'llo'o. Ee beyyiinsim ki'issa'a illageen hee'u beyyonne uullisso'o. La'm ayyaamo soodaraarom ki'lla'a moo'llo'aare oo misil Hidi'l Saga'l Saaxi'n illagenne odim ubaakkoo moo'llo'o. Ee ammane horoorii lamem anguwwii iiqamaa aagakkam goocanne ubaa gatu orachchim mullam ubaa hee'ukko. Kabadem Daagoo'n qeessuwwii Ashdoodanne Daagoonina otossitam mannii hundim ixxuwwi lokkinne ee gooca hance'llambee'isa qaphphita'a caallita'a higgamok eehanninatte. Waa'im Ashdood minaadaba lobakata u'nnisukko. Ixxuwwaa ixxuwwi kululleetanne yoo minaadabaa hundam dashshi jabbinne aphphisukko. Ixxuwwim ee ihu luwwi hundam moo'llo'i ammanenne «Isra'ee'l Waa'i neesee ni waa'i Daagoonaa guzumo'oolla; ee bikkina ka lasage ku Hidi'l Saga'l Saaxin ka beyyonne hee'ona cawwineena xannoommoyyo» yito'o. Ka mashka'inne ontem Filisxee'm adilluwwi beyyom asse'amaano asse'lla'a weeshissa'a «Isra'ee'l Waa'i Hidi'l Saga'l Saaxina mah issino?» yita'a xa'mmito'o. Ixxuwwim «Gaata yakkam beyyo massehe» yita'a dabatto'o. Ee bikkina Gaata yakkam Filisxee'm mulli beero'o massito'o. Ihukkaarem Hidi'l Saga'l Saaxin eekke'e afaa lasage Waa'i ee beero'om edaa aphphisukko. Ee beero'i minaadabam lobakata u'nnisukko. Ciilluwwaa lommannaa annanni issoo'n minaadaba hundam mat issaa dashshisoo jabbinne guzumo'ukko. Ee bikkina Hidi'l Saga'l Saaxina Eeqiroona yakkam Filisxee'm mulli beero'o massakkamisa issito'o. Ihukkaarem ee beyyo afu ammanenne minaadab laachchinne wi'llitu'uuyyi «Isra'ee'l Waa'ika Hidi'l Saga'l Saaxina keyye eebakko'ok neese hundam guullisimminatte!» yito'o. Ee bikkina Filisxee'm adilluwwi beyyo hundam «Neesee ni abaroosaa hundam guulleena illage ka Isra'ee'l Hidi'l Saga'l Saaxina waaru beyyom dabattakka'a geegeessehe» yita'a manna asse'llo'o. Waa'i ixxuwwa lobakata guzumo'u bikkina ee beero'o hundoomam leh oogat muggisaa hee'ukko. Lehiinsi gatto'i keenim dashshi jabbi lophphu bikkina hara'mmato siixxiteena ixxuwwi waa'i kollonne laatto'o. Waa'i Hidi'l Saga'l Saaxin Filisxee'm uullanne lamar agana afuuraa lasge Filisxee'm minaadab ixxuwwi qeessuwwaa kiiraanoo weeshsha'a «Hidi'l Saga'l Saaxina maha issimmi niina e'llookko? Hee'u beyyonne dabarimmina hinkid issinaa asse'nnoomda'e niina bilaato kullehe» yito'o. Ixxuwwim «Isra'ee'l Waa'ika Hidi'l Saga'l Saaxina dabattakka'a asse'llakkeena hassakkolas ki'nnuwwi hawwoddakko'i hawwojjina guzumo'i ihoo luwwa eddakka'a asse'immi hasisookko. Waa'i Hidi'l Saga'l Saaxin matem guzumo'im exxoo'n marimmi hasisooyyo. Eehid issitakkolas ki'nnuwwi jabbiinsi fayye'llakamo ixxi ki'nnuwwa qoxxaallisa guzumo'u mashka'am laqqakkamo» yito'o. Filisxee'm minaadabim «Ni bi'ishshi bikkina guzumo'i ihoo'isina hinkido'i luwwa endaa asse'nno? yita'a xa'mmito'o. Ixxuwwim «Ee dashshi kobi'llanne baxanto'oo onti worqi gawje'ee filisxee'm adilluwwi xigonne odim dabayya kobi'llanne baxamu onti worqi gawje'ee ihimmi hasisookko. Mashka'oomim ki'nnuwwannee ki'nnuwwi adilluwwannee asse'amu booban mato» yito'o. Ki'nnuwwi uulla bi'isimmina asse'anto'i dabayyannee dashshannee kobi'llissakka'a baxxakka'a kitim ihoo'isina hincaa'imminne Isra'ee'l Waa'ina lomba uwwimmi hasisookko. Eekka issitakkolas ayyi la'ukko ki'nnuwwa, ki'nnuwwi waa'uwwaa ki'nnuwwi uullaa guzumo'oo boobana egedeena xanookko. Gibxi uulli adilii Gibxi uulli mannii issito'isa mahina ki'nuwwi wodano duudissakamuulla? Isra'ee'l minaadab Gibxi uulla fatakita'a fitto'ok Waa'i Gibxi uulli manna qoxxaallisa guzumo'aa lasageyyonnihe? Ee bikkina haareechchi Faraxxi gaarre'ee gaanjaqqi issamubee'i lam siichcham laroo gudissehe. Ee lamem laronnem gaanjaqqa issitakka'a faraxxi gaarre'ika ludo ee gaanjaqqanne kallehe; ee la'l wo'llooma mine daballehe. Ee lasage Waa'ika Hidi'l Saga'l Saaxina massitakka'a ee faraxxi gaarre'enne dissehe. Ki'nnuwwi bi'ishshi bikkina guzumo'i ihoo'isina ixxenne maqire asse'llakkeena baxxakko'i annanni annanni worqa Saaxinanne issitakka'a Waa'i Hidi'l Saga'l Saaxi'n gadanonne dissehe; ee faraxxi gaarre'em ixxi gaginnem marona googo amadiissakka'a fataki'llehe. Ee lasage maroo kollo moo'llehe. Marookkokim Beetisheemeesh beero'i kollonne ihulas ka u'nnisoo boobana neesenne fatakukkok Isra'ee'l Waa'i ihukkisa moo'isookko. Ihukkaarem ee kollonne marubeelas oo booban niina waarukkok dangonnette bagaan Waa'i asse'ubee'an ihukkisa lanqoommo» yito'o. Ixxuwwim ee kuramukkisa issito'o; lamem larom massita'a oo faraxxi gaarre'i karamu gaanjaqqanne qaashsho'o; ee la'l wo'llam orodonne aagissa'a gooca xuffo'o. Hidi'l Saga'l Saaxinam massita'a dabayyi kobi'llannee dashshi kobi'llannee baxamu worqi wo'mmu saaxininne maqirem faraxxi gaarre'enne dissito'o. Oo larim googo fatakitoo'nnii makki kollonnee qeddi kollonnee daba'llitoo'nnii xabbita'a Beetisheemeesh kollonne matto'o. Mattu'uuyyim «Humbaa» yita'a muuntam hee'llo'o. Ontem Filisxee'm adilluwwim Beetisheemeesh gabal afeebe'e awwonta'a geegeesso'o. Ee ammane Beetisheemeesh manni cebbi woronne arasa muttam hee'llo'o. Ixxuwwim xabbita'a moo'llo'i ammanenne Hidi'l Saga'l Saaxina moo'llo'o; eekka moo'llo'i bikkina lobakata liiranto'o. Oo faraxxi gaarre'im Beetisheemeeshanne hee'oo Iyyaas uullanne waaraa geejji ki'n gadano afaa uullukko. Oo minaadabim ee faraxxi gaarre'ika haqqa anto'o; ee larom dutta'a Waa'ina shokkoo kitim issita'a hincaa'llo'o. Leewi'i mannim Waa'ika Hidi'l Saga'l Saaxinaa ixxenne maqire hee'u worqi wo'mmaakkoo Saaxinaa ki'issa'a ee lob ki'n hanenne dissito'o. Oo Beetisheemeesh mannim shokkiisakka'a hincaa'akkam kitimaa mulli kitimaa hundam Waa'ina hincaa'llo'o. Filisxee'm ontem adilluwwim ka hundam moo'llu'uuyyi hossa'a ee ballam Eeqiroo'n beero'o daba'llito'o. Filisxee'm manni ixxuwwi hawwojji bikkina hincoo kitim ihoo'isina Waa'ina asse'llo'i dashshi kobi'llanne baxamu onitem worqi gawje'uwwim Ashdooda, Gaaza, Asqaloona, Gaataa Eeqiroonaa yakkam ixxuwwi beero'uwwi summinne asse'amaakkoohan hee'ukko. Oo worqi dabayyi xigim ontem Filisxee'm adilluwwi gassitam girbamaakkoo beero'uwwaa ee beero'uwwi hegeegguwwaa ixxuwwi bikkoohan hee'ukko. Beetisheemeeshanne hee'u Iyyaas uullanne Hidi'l Saga'l Saaxina dissakko'i oo lob kin kaballi afeebe'e naqaash ihaa siidamookko. Beetisheemeesh manni Hidi'l Saga'l Saaxi'nneka woro moo'llo'i bikkina Waa'i quuqaa ixxuwwiinsi lamarayyi mancho shukko. Waa'im eehaa'n manna guullu bikkina Beetisheemeesh manni kichche'lla'a wi'llito'o. Beetisheemeesh manni «Ka keesammi Waa'i illagenne ayyi uulleena xanookko? Ku Hidi'l Saga'l Saaxindu ka beyyiinsi firaa ayyi beyyo marookko?» yito'o. Ee lasage Qiriyaat Yi'aariimanne hee'llam manni beyyo asse'amaano asse'lla'a «Filisxee'm manni Hidi'l Saga'l Saaxina ni beyyo eebbo'ookko. Waattakka'a massehe» yito'o. Qiriyaat Yi'aarii'm manni Hidi'l Saga'l Saaxina massita'a duunanne hee'oo Aminaadaab mine aagisso'o. Ee Hidi'l Saga'l Saaxina egeroo'isinam ixxi beet Ali'aazara Waa'i awwaadina annanni ihaakkoo manchi issita'a keesso'o. Waa'ik Hidi'l Saga'l Saaxin qeeraa'l ammanina Qiriyaat Yi'aariimanne afuurukko. Ookkim lamiyyi hiinchinatte hee'ukko. Ee ammane Isra'ee'l minaadab hundim hara'mmoo'isina hassa'a Waa'i kollonne laatto'o. Saamu'eelim Isra'ee'l minaadabina «Ki'nnuwwi wo'm wodaninne Waa'i kollonne daba'llitakkolas mulli waa'uwwaa Astaarootaa ki'nnuwwi lambe'iinsi qeessehe. Ki'nnuwwi gaga hundoomam Waa'ina uwwitakka'a xale'i ixxena otossi'llehe. Ixxim Filisxee'm manni angiinsi ki'nnuwwa gatisookko» yukko. Ee bikkina Isra'ee'l minaadab Ba'aalaa Astaaroota yakkam waa'uwwaa qeessita'a xale'i Waa'ina otossito'o. Ee lasage Saa'mu'eel «An ki'nnuwwina ee beyyonne ihaa Waa'a uunxoommi bikkina Misiphphanne wixxi'llehe» yaa Isra'ee'l minaadaba hundam weeshukko. Ixxuwwim Misiphphanne wixxito'o; wo'om inkiitta'a Waa'i illagenne kitim issitta'a dunta'a ee balla hundoomam soommanta'a «Neese Waa'a hawwondaammo» yita'a baaxiilo biiraa yito'o. Saamu'eelim Isra'ee'l minaadaphphi lambe'enne oogatam hee'ukkok Misiphphannette. Isra'ee'l minaadab Misiphphanne wixxito'isa macceesso'i ammanenne ontem Filisxee'm adilluwwim Isra'ee'l minaadaba qasseena ixxuwwi gaadaano awwonsita'a fitto'o. Isra'ee'l minaadabim ee woshsha macceesso'i ammanenne baddito'o. Saamu'eelinam «Filisxee'm manni angiinsi neese gatisoo'isina Ni Moollanni Waa'a cawwitaa uunxe» yito'o. Saamu'eelim anuuna urubee'i gereechchi geexa duraa hundoomam shokkiisakka'a uwwakkam kitim issaa Waa'ina hincaa'ukko; ee lasage Isra'ee'l minaadabina hara'mmoo'isina Waa'a uunxukko; Waa'im ixxi uunxato macceesukko. Saamu'eel kitima hincaa'ukkuuyyim Filisxee'm manni Isra'ee'l manna qasseena gaaddo'o. Ihukkaarem Waa'i Filisxee'm manni hanenne kee'mmaalli guga iimaninne macceesisukko; muggisukkome. Isra'ee'l manni illagiinsi gibbo'o. Isra'ee'l mannim Misiphphiinsi fitta'a Beetikaariinsi woroon yoo uullanne affeebe'e hollansitu'uuyyi shito'o. Saamu'eelim mat kina massaa Misiphphaannonnee Sheen lambe'ennee uullisaa «Waa'i neese kaballi afeebe'e hara'mmaakko» yeena «Abeni'eezera» yaa weeshukko. Filisxee'm manni ee'isinne kaa'anto'o. Saamu'eel hee'u doollenne hundannem la'mmeka ee lasage Isra'ee'l gabalanne hincito'oyyo. Filisxee'm manni Eeqiroonii ki'isaa Gaatanne afeebe'e amadda'a hee'llo'i beero'uwwi hundim Isra'ee'l minaadabina daba'llukko. Isra'ee'l minaadabim ixxuwwi uulla Filisxee'm angiinsi gatisso'o. Isra'ee'llaannonnee Amoore'i minaadaphphi lambe'ennee xummi hee'ukko. Saamu'eelim ixxi hee'u umu'l doollenne hundannem Isra'ee'l minaadaba awwonsukko. Maarag hundam Beeteela, Gelgelaa Misiphphaa marukkuuyyi oogatam hee'ukko. Ixxi minim Raama'annette hee'u bikkina ee beyyo daba'llamukkuuyyi daannoo'm baxo baxam hee'ukko. Ee beyyonnem Waa'ina kitimakkam beyyo baxukko. Saamu'eel lomma'nnu ammanenne ixxeka lamem oosom Isra'ee'l minaadabanne oogattamisina daannuwwi issukko. Won beetikim summi yoo'eelatte ihukkuuyyi hoffi beet summi odim Abiyatte hee'ukko. Ixxuwwim Beersaabee'enne oogattam hee'llo'o. Ihukkaarem oo oos ixxuwwi annika er googo awwonto'oyyo. Ee bikkenne ixxuwwi diinate iittitam keen ikka'a maqanxa aa'llu'uuyyi oogato inciiccam hee'llo'o. Ee lasage Isra'ee'l minaadaphphi awwonsaan hundim wixxita'a Saamu'eel hee'oo beyyo Raama'a waatta'a «Oono'o, kaba at lomma'nnitaatto; ki oosim kiikka er googo awwonto'oyyo. Ee bikkina mulli uullanne issakkamisam ni uullannem neese awwonsoo adila uullise» yito'o. Ixxuwwina adila doo'lloo'isina xa'mmito'aare Saamu'eel kichche'aa Waa'a uunxukko. Waa'im Saamu'eelina «Minaadab kiina yoo luwwa hundam macceese. Ixxuwwi gaddo'ok keeseyyo; An ixxuwwanne adil ihaa hee'oombee'isa gaddo'ok eesette. Ixxuwwa Gibxi uulliinsi fissummi balliinsi kaballi afeebe'e eese utta'a mulli waa'uwwanne otossitu'uuyyi hee'llo'ookko. Ee'isam eesenne issitu'uuyyi hee'llo'oka hundam keesennem ee'isam issimma asheetto'ookko. Ee bikkina ixxuwwi woccam woshsha macceese; ihukkaarem ixxuwwanne adil ihoo manchi ixxuwwanne issoo luwwa qoxxissaa kure» yukko. Saamu'eelim adila uullisona Waa'i ixxena kuru woshsha hundam ixxuwwina kurukko. Ixxuwwinam «Ki'nnuwwinne adil ihoo manchi ki'nnuwwanne issoo luwwi ‹Ki'nnuwwi ooso massaa faraxxi gaarre'e ushe'aanoo faradaanoo issookko. Mulli keenom faraxxi gaarre'i illagenne geettam keen issookko. Ixxuwwiinsim mat mat keeno shaalaqquwwaa ontayyi halaqquwwaa issaa doo'llookko. Ki'nnuwwi goon ooso ixxi uulla abuullaano, hurbaata muraano, o'l mu'uta baxaanoo faraxxi gaarre'i mu'uta baxaanoo issookko. Ki'nnuwwi landam massaa shitto'o gudisaanoo hurbaata saraanoo issookko. Ki'nnuwwi abuulli uulliinsi woyi'n kaashshiinsii wee'l kaashshiinsii doo'lla hooraa ixxi gassaanina uwwookko. Ki'nnuwwi hurbaatiinsii woyi'n mishiinsii tommiinsi mato aa'aa ixxi awwaadaaninaa sogaaninaa massaa uwwookko. Ki'nnuwwika goon awwaadaanoo meenti awwaadaanoo lariinsii halliinsim doo'llaa ixxi gagina massaa awwaaxxookko. Ki'nnuwwi gereebbiinsii fella'iinsii tommiinsi mat mato massookko; ki'nnuwwim ixxena agid ikkakkamo. Ee ammane ki'nnuwwi doo'llitakko'i adil ki'nnuwwa hawwodoo hawwojjiinsi ki'ukkok qaraaraallisa laattakkamo; laattakkamo Ihukkaarem Waa'i ki'nnuwwi laachcha macceesooyyo› yoohane» yukko. Ihukkaarem minaadab Saamu'eel woshsha mahannem eddo'oyyo. Hore'oomam «Ee'isayyo! Niina adil hee'oo'isina hansoommo. Neesem ee'isinne mulli minaadaphphisam inkoommo; ni adil niinam oogatookko; ni illagenne higaa ni bikkina oramookko» yito'o. Saamu'eelim minaadaphphi woshsha hundam macceesukko; Waa'inam maraa kurukko. Waa'im Saamu'eelina «Yitam woshsha macceese ixxuwwinam adila doo'lle» yukko. Saamu'eelim Isra'ee'l mannina «Annannichchim ki'nnuwwi beero'o mallehe» yukko. Biiniyaam sulliinsi Qiisa yakka'a weeshakkam la'amaakkoo mat goddaanchi manchi hee'ukko. Ixxim Abi'eel beet hee'u Xaroor beet beet ihaa Afiih moolliinsi won miniinsette hee'ukko. Qiisinam daninne ixxenne gudookkok matim bee'ek Saa'oola yakkam beet hee'ukko; Saa'ool uullichchinne Isra'ee'l oos hundiinsim lophphoo qeeraa'l hee'ukko; danonnem Ayyeensim lophphoohan hee'ukko. Qiisik halli bi'aa hee'ukko; ee bikkina ixxi Saa'oolina «Awwaadaanika mato eddaa mattaa ka bi'u halla hase» yaa ijaajukko. Saa'oolii awwaadaanchii ki'lla'a duunaam Efireem uullannee Shaallish uullinnee higga'a halla hasimma asheetto'o; ihukkaarem halla siiddeena xanto'oyyo. Eehanniinsim Shaa'iliim uulli kollinne higga'a siiddoo'nnim gotto'o; odim Biiniyaam gassi kollinne higgo'o; ihukkaarem kabadem siiddeena xanto'oyyo. Xuufa yakkam uulla affo'i ammanenne Saa'ool ixxenne maqire hee'u awwaadaanchina «Kaba mi'n kolli daba'llinona; mashka'oomam niyyanni ixxi halliinsi loboka ni bikkina kichche'ookko» yukko. Ixxi awwaadaanchim «Hino'o egere ka beero'onne lobakata lombaam ihaakkoo mat Waa'i manchi yookko; ixxi wocoo woshshi hundim wo'mmoohane; ee bikkina ixxi kolli mallona; ayyi la'ukko halla siindeena xannoommi beyyo ixxi kureena xanookko» yaa dabarukko. Saa'oolim «Marimma'i mallona; ihukkaarem ee Waa'i manchina hinkido'i irifo'o uwwineena xannoommo; googina amaxxinummi hurbaatim ni caniinsi beeddaakko; ee bikkina mulli luwwi uwwinoommi luwwi mah yookko?» yukko. Ixxi awwaadaanchim «Iina mat kin bi'llek soo'l suum yookko; an eekka uwwaa uroommo; ixxim ni halla hannonne siindeena xannoomda'e niina kurookko» yaa dabarukko. Ee lasage Saa'oolii oo awwaadaanchii ee beero'i kolli fitto'o. Ee beero'i kolli aaggu'uuyyim Saamu'eel ee otossakkam beyyo mareena ixxuwwi kolli waarukkuuyyi moo'llo'o. Ee balliinsi illageen Waa'i Saamu'eelina «Biiniyaam suulliinsi mat mancho soodo kido'i ammanenne ki beyyo asse'oommo; Isra'ee'l I minaadabina adil ihoo'isina ee mancho doo'lle; ixxim I minaadaba Filisxee'm angiinsi gatisookko; mashka'oomam an I minaadaphphi u'nna moo'aammo; I kolli hincaa'llo'i laachcham macceesaammo» yaa kuraa hee'ukko. Saamu'eel Saa'oola moo'u ammanenne Waa'i Saamu'eelina « ‹I minaadabina awwonsaanchi ihookko› yaa kurummi manchi kane» yukko. Saa'oolim qash gooc gadanonne hee'u Saamu'eel kolli hincaa «Kaaltaam manchik min hinkane?» yukko. Saa'mu'eelim «Kaaltaam manchi anette iinniinsi gaassitaa ee otossakkam beyyo mare; ki'nnuwwim kaballa iinninne maqire hurbaata ittakkamo; soodo daram ki xa'mmichchuwwi hundinam dabachcha uwwaa geegeesoommaare elle'llootto. Sas balliinsi ellageen bi'aa hee'u halli siidamaakko; kichche'llitte. Ihukkaarem Isra'ee'l minaadab ayye siidimmina mixukko labookko? Ixxuwwi hassammok keesee kiyyanni mineyyonnihe?» yukko. Saa'oolim «An Isra'ee'l sulluwwi lambe'iinsi hore'em hoffan ihu Biiniyaam sulliinsette; ka sulli woronnem ihuta'n i abaroos lobakata hoffane; eehannah kido'i woshsha iina mahina kuttoolla?» yaa dabarukko. Ee lasage Saa'oolaa ixxi awwaadaanchoo massaa lob mine aagisaa sade ihoo qax mannanne edaa hurbaata ittona hundiinsi lophphoo lombi beyyonne afuussukko. Saamu'eelim hurbaata gudisaancho weeshaa « ‹Mullam disse› yaa uwwummi maara eebe!» yukko. Ee bikkina hurbaata gudisaanchi doo'l maara eebaa Saa'ool illagenne dissukko; Saamu'eelim Saa'oolina «Moo'e kuk kiina annanni ihaa dissamaakkoo doo'l maara; an weeshummi koyyinne maqirem ittoo'isina dissumman ihu bikkina kaka ite» yukko. Ee bikkina ee balla Saa'ool Saamu'eelinne maqirem itukko. Ee otossakkam beyyiinsi dillita'a beero'o aaggo'i ammanenne Saa'ool iinse'oo ara'a Saamu'eel ixxi mi'n fooqanne gudisukko. Saa'oolim ee beyyonne iinse'aa garukko. Soodaraaronne Saamu'eel fooqiinsi Saa'oola weeshaa «Eelle'lloo'isina geegeesoommo kaba ki'e!» yukko. Saa'oolim iinse'u beyyiinsi ki'aa Saamu'eelinne maqirem googonne fitto'o. Ee beero'i tochcho affa'a lasage Saamu'eel Saa'oolina «Ki awwaadaanchi higaa maroo'isina kure» yukko. Oo awwaadaanchim higaa maraa lasage Saamu'eel Saa'oolina odim «At ka beyyonne hoffokam egere an Waa'i kuru woshsha hundam kuroommo» yukko. Ee lasage Saamu'eel wee'l zayti yoo humbullo ki'isaa Saa'ool horoorenne zayta dunaa «Ixxi minaadab ihu Isra'eelina awwonsaanchi ikkoo'isina Waa'i keese doo'llaakko. Atim ka minaadaba awwonsittuuyyi ixxuwwi diina'iinsi hundiinsim egettootto; at minaadaphphi awwonsaanchi ikkoo'isina Waa'i keese doo'llukkisa laqqoo mare'i kane. Kaballa iinniinsi annanni ikkaa mattittuuyyi Biiniyaam gabalanne yoo «Xelxaah» yakkam beyyonne yoo Raaheel waammi gadanonne lam manchinne edantootto. Ixxuwwim hassam hee'llitti halli siidamukkisaa kiyyannim ee halli bikkina sawwimma uraa ‹I beetina maha ihoo?› yaa ki bikkina kichche'ukkuuyyi yoo'isaa kiina kuttamo. Atim ee beyyiinsi higgaa Taabooranne yoo keesamaakkoo lob haqqichchi yoo beyyo affootto; eekke'em, Waa'i beyyo, Beeteela mattam sas manchinne edantootto; ixxuwwiinsim mat, sas fella'i geexxuwwa ushe'aa la'mmekii sas daabbo'o iyyaa saxxek mat can woyi'n diqaasa iyyaakkoohan ihookko. Ixxuwwim keese xummaatissa'a lam daabbo'o kiina uwwitam ammane at ixxuwwi angiinsi aa'llootto. Ee lasag Filisxee'm gogot wiiddanaa yoo Waa'i duuna Giibi'aa yakkam beyyo affootto. Ee beero'o aagakkam gooca affoo ammane ee duunanne Waa'ina kitima hincaa'lla'a dillitam Hiraagaa'n dummichchinne edantootto. Ixxuwwim diitta'a laboo mu'uta, dibbe'e, gambaabuyyaa maasinqo'oo amadda'a zammattu'uuyyi macceessootto; Ixxuwwim shimshimmitu'uuyyii ixxuwwi sagara iimaa'lla'a hiraago woccu'uuyyii edantootto. Dangonnem Waa'ik ayyaan keesenne dillookko. Atim ixxuwwinne maqirem girshimmittuuyyi ki sagara iimaa'llaa hiraago woccootto; annanni manchom ikkootto. Ku mare'uwwi ihoo ammane Waa'i kiinninne maqirette ihu bikkina issimmi hasisoo luwwi hundam isse. Atim iinniinsi gaassitaa Gelgela dillitootto; anim shokkiisakka'a hincaa'akkam kitimaa mateeyyoo'm kitimaa hincaa'eena ki beyyo waaroommo; ki beyyo waaraa at issitoo luwwa kureembe'e lamar balla ee beyyonne egere» yaa suunqukko. Saa'ool Saamu'eeliinsi annanni ihaa marukkisam Waa'i Saa'oolika tiiro dabassukko; Saamu'eel mare'inne kuru luwwi hundim ee ayyaamonne wo'mmukko. Saa'ool ixxi awwaadaanchinne maqirem Giibi'a afu ammanenne hiraagaa'n wixxit ixxenne edanto'o. Dangonnem Waa'i Ayyaan Saa'oolanne dillukko. Ee ammanenne ixxi ixxuwwinne maqirem hiraago wocimma asheerukko. Ixxo illageen laqqam hee'llo'i keen hiraagaaninne maqire hiraago wocukkuuyyi moo'lla'a ixxuwwina'i ixxuwwim «Ku Qiis beet mah ihukko? Saa'oolim hiraagaaniinsettennihe?» yaqqanto'o. Ee beyyonne hee'oo mat manchi «Ka hiraagaa'nnek duuha'i hinkidette? Ixxuwwikidu anno'i «Ayyayyette?» yaa xa'mmukko. «Saa'oolim hiraagaaniinsettennihe?» Yamamukkuuyyi wocamoo kobi'llishshi woc kanniinsi ki'ukkane. Saa'oolim hiraago wocimma uullisaa lasage duunanne yoo kiti'm beyyo marukko. Saa'ool annabbaayyim Saa'oolaa ixxi awwaadaanchoo moo'aa «Hannonne hee'llakko'o» yaa xa'mmukko. Saa'oolim «Halla hanseena mallaa siindeena xannumbee'i bikkina Saamu'eela xa'mmineena aangaa hee'nnummo» yaa dabarukko. Ixxi annabbaayyim «Mayyukkahe?» yaa xa'mmukko. Saa'oolim «Halli siidamukkisa niina kuraakko» yaa dabarukko. Ihukkaarem ixxi adil ihoo'isa Saamu'eel kurukkoka hundam ixxi annabbaayyina kurukkoyyo. Saamu'eel Isra'ee'l minaadab Waa'inne edamona Misiphpha weeshukko. Ixxim «Isra'ee'l Moollanni Waa'i ‹An ki'nnuwwa Gibxi uulliinsi fissummo. Gibxi uulli manniinsii ki'nnuwwa woramaddam hee'llo'i mulli adilluwwiinsii hundiinsim gatisummo› Ihukkaarem kaballa Ki'nnuwwa hawwiinsii u'nniinsii fissaa gatisummi eese gaddakko'ookko. Ki'nnuwwim ‹Ihooyyo! Niina adila uwwe› yitakko'o. Erane! Eehid ihukkaa'lleensi ki'nnuwwi sullisinnee giichchisinnee Waa'i illagenne hinci'llehe» yukko. Saamu'eelim Isra'eel sulli sullinnem hincoo'isa issukko. Saamim Biiniyaam sullina afukko. Odim Saamu'eel Biiniyaam sulli moollinne moollinne hincitamisa issukko. Ee moolli woriinsim Maaxir abaroosina saam afukko. Maaxir moolliinsim goon illagenne fittamisa issukko. Ixxuwwiinsim Qiis beet Saa'oolina saam afukko. Ihukkaarem ee ammane ixxo hassa'a siiddeena xanto'oyyo. Ee bikkina ixxuwwi «Mullek hincoo'n gatu manni yooda'e?» yita'a Waa'a xa'mmito'o. Waa'im «Oono'o Saa'ool mu'uttuwwi lambe'enne maaxamaakko» yaa dabarukko. Ixxuwwim qaqqissa'a matta'a maaxamu beyyiinsi fissita'a minaadaphphi beyyo eebbo'o. Minaadabim Saa'ool ixxi uullichchinnee guduminnee hundiinsim loban ihukkisa moo'llo'o. Saamu'eelim ee minaadabina «Waa'i doo'llu manchi kane! Ni lambe'ennem ixxenne gudoo manchi bee'e» yukko. Minaadab hundim sagara iimaa'lla'a «Adi'llek umur uullona!» yito'o. Saamu'eelim minaadabina adilina manni issimmi hasisoo seerii gatti ogorii mada'e ihukkisa losisukko. Ee woshsham kitaabanne kitaabaa Waa'i illagenne dissukko; ee lasage minaadab hundam mine elle'llamisina geegeesukko. Saa'oolim Giibi'anne yoo ixxi mine elle'ukko; Waa'a iittinne wo'mmito'oo malaayyaammuwwi o'l mannim ixxo awwonta'a matto'o. Ihukkaarem mat mat seera egettambee'i awwaad bee'i keen «Ku manchi neese gatisoohonnihe?» yita'a gaddo'o; irifo'om uwwimma sabbo'o. Saa'oolim cawwaa urukko. Mat aganiinsi lasage Amoo'n adil Naa'oos Gala'aaxxi uullanne yoo Yaabeesh beero'onne ixxi gogot weerattamisa issimminne kibbukko; oo Yaabeesh manni Naa'oosina «Niinninne hide'ammona; neesem kiina awwaadaan inkoommo» yito'o. Naa'oosim «Ki'nnuwwinne maqire hidiro aagoommisa issoo mat woshshi yookko; oohim annannichchikam makki kolli ille fissimminne Isra'ee'l minaadabanne tuussiisoo sholle'nna eeboommo» yaa dabarukko. Yaabeesh awwonsaanim «Hundem Isra'ee'l uulla manna asse'nneembe'e lamar ayyaamo ihoo qax ammane uwwe; neese gatisookkoka hoongummaa'lleensi kiina ni anga uwwinoommo» yito'o. Asse'amaanim Saa'ool beyyo Gibi'a affa'a ee woshsha kutto'i ammanenne minaadab hundim sagara iimmaa'lla'a wi'llitto'o. Saa'ool ee ammane mat kado'i mirgo'uwwa ushe'aa abuulli beyyiinsi daba'llam hee'ukko; ixxim «Woshshoom maruwwa?» yaa xa'mmukko; ixxuwwim Yaabeeshiinsi waatto'i asse'amaan yito'i woshsha kutto'o. Saa'ool ka woshsha macceesu ammanenne Waa'ik Ayyaan ixxi hanenne wodaamisa dillukko. Saa'oolim lobakata quuqukko. Ee mat kado'i mirgo'uwwa muransaa ee muransu maara hundam amadiisaa «Saa'oolaa Saamu'eelaa awwonaa orina firoobee'i manchik mirgo'uwwi ka'isa muramookko» yoo qoxxaalli asso Isra'ee'l minaadab hundinam asse'ukko. Isra'ee'l minaadab hundim Waa'a lobakata baddita'a mat manchim gatoo'n hundim matikka'a fitto'o. Saa'oolim Beezeeqanne wixxaa'ukko. Ixxuwwi xigim Isra'eeliinsi waaru kee'nnek sas xibbi kum hee'ukko. Yihudiinsi Waaru kee'nnekim sad kum hee'ukko. Yaabeeshiinsi waatto'i asse'amaanom «Soodo samgud balliinsi gaassinaa diina'iinsi gatinsoomman ihukkisa ki'n minaadabina kullehe» yito'o. Yaabeesh minaadabim ee asso macceesso'i ammanenne lobakata liiranto'o. Naa'oosinam «Soodo ni anga kiina uwwinoommo; atim neese kiina liiransukkis hundam issitootto» yito'o. Soodaraarom ki'aa Saa'ool o'l gogota sas beyyonne baxxansukko. Soodukkuuyyim ki'lla'a Amoo'n manna qasso'o; balli kolli afeebe'em Amoo'n manna guullito'o. Ee beeddichchiinsi gatto'i qaxim annannichchim gibbu'uuyyi binnito'o. Ee lasage Isra'ee'l minaadab Saamu'eelina « ‹Saa'ool neesenne adil ihooyyo› yito'i manni ayyayyette? ixxuwwa niina higissaa uwwe shinoommo» yito'o. Ihukkaarem Saa'ool «Kaballa mat manchom shimmi hasisooyyo; mashka'oomim ku ayyaam Waa'i Isra'ee'l minaadaba gatisu balla» yukko. Saamu'eelim «Neese hundim Gelgela mallaa Saa'ool niina adil ihukkisa erisa la'insona» yukko. Ee bikkina hundim Gelgela matta'a Waa'i illagenne Saa'ool adil ihukkisa la'isso'o; ee beyyonnem mateeyyoo'm kitima hincaa'llo'o. Saa'oolii Isra'ee'l minaadabii hundim ee uguda liiranchinne lonsito'o. Ee lasage Saamu'eel Isra'ee'l minaadabina «Ki'nnuwwi xa'mmichcha hundam aa'aa ki'nnuwwina adila uullisaammo. Kanniinsi eehid ki'nnuwwa awwonsoo adila siiddakko'ookko. An lomma'nnaammo; i horoorim abo'aakko; i oosim ki'nnuwwinne maqire yo'o; woraaddaniinsi ki'isaa kaballi afeebe'e ki'nnuwwa awwonsaammo. Oono'o kaba ki'nnuwwi illagenne uullaammo. Waa'i illagennee ixxi doo'llu adi'l illagennee kullehe. An ayyi mirgo'o aa'ummo; Ayyi hallichcho mussummo? Ayye qawwisummo? Ayye barche'e issummo? Oogato boqqiseena ayyeensi maqanxa aa'ummo? Ka qaxiinsi matom issaammoohan ihulas dabaroommo» yukko. Ixxuwwim «Neese qawwiissittoyyo, Neesem barche'e issittoyyo; ayyeensim ma'lluwwam aa'llittoyyo» yita'a dabatto'o. Saamu'eelim «Oono'o an kaballa kinnuwwi illagenne muccur ihummisina Waa'ii ixxi doo'llu adilii naqaashshuwwa» yukko. Minaadabim «Eeyya! Ixxi niina naqaasha» yito'o. Ee lasage Saa'mu'eel minaadabina «Muse'ee Aaroonaa doo'llukkok gaassi ki'nnuwwi anno'om Gibxi uulliinsi fissukkok Waa'a. Kabadem ki'nnuwwinaa ki'nnuwwi anno'inaa Waa'i issu muccuroo'm bax hundinam Waa'i illagenne an ki'nnuwwinne fitamoommi bikkina keyye uullehe. Yaaqoobii ixxi abaroosii Gibxi uulla dillita'a ee beyyonne hee'llu'uuyyi Gibxi uulli manni woramadoo gaanjaqqa iyyiisso'o. Gaassi anno'im hara'mmato siiddeena Waa'i kollonne laatto'o. Waa'im Muse'ee Aaroonaa asse'ukko. Ixxuwwim Gibxiinsi awwonsita'a fissimminne ka uullanne hee'llamisa issito'o. Ihukkaarem minaadab ixxuwwi Moollanni Waa'a xaddo'o. Ee bikkina Waa'i Filisxeemina, Moo'aaphphi adilinaa Haxoor beero'i gogoxxi ijaajaanchi hee'u Siisaarinaa gaassi ki'nnuwwi anno'o higisaa uwwukko. Ixxuwwim Isra'eela kaa'llamisa issukko. Ee lasage ixxuwwi ‹Waa'a! Kiinniinsi qee'llinaa Ba'aalinaa Astaarootinaa otossinaa keese hawwondaammo; ihukkaarem kaba ni diina'i angiinsi neese gatise neesem kiina otossinoommo› yita'a Waa'i kollonne laatto'o. Waa'im gaassaa Geedewoona ee lasagem Baaraaqaa Yooftaahee lasaanchonnem eese asse'aa ki'nnuwwi maso'iinsi gatisukko; ki'nnuwwim xumminne hee'llakkammisa issukko. Ihukkaarem ki'nnuwwi Amoo'n adil Naa'oos ki'nnuwwanne hawwo afiseena ki'ukkisa moo'llakko'i ammanenne ki'nnuwwi adil hee'u Waa'a laggakka'a ‹Neese awwonsoo adila uullise› yitakku'uuyyi eese xa'mmitakko'o. Kabadem doo'llitakko'i adila xa'mmitakko'isinnem oono'llehe Waa'i doo'llaa uullisaakko. Waa'a badditakko'aare, ixxenam otossitakko'aare, ixxi sagaram macceessakko'aaree ixxi ijaajom egettakko'aaree ee'isam ki'nnuwwii ki'nnuwwi adilii Moollanni Waa'a awwontakkolas ki'nnuwwina hundem luwwim taaphanookko. Ihukkaarem Waa'i sagara macceessakkobee'aaree Waa'i ijaajonnem boqqitakko'aare Waa'i angi ki'nnuwwi adilannee ki'nnuwwannee diina'oominne ki'ookko. Ee bikkina yoontakke'i beyyonne qoxxitakka'a uullehe; Waa'i issoo maalalsiisoo luwwa moo'llakkamo. Oono'o kaba laqqakkamisam eelliinchi iibbi lophphaakkoo hurbaata wixxaa'akkam aganayyonnihe? Ihukkaarem an kaba Waa'a uunxoommo. Waa'im gugaa xeenaa asse'ookko. Kuk ihoo ammanem ki'nnuwwina adila uullisoommisina xa'mmitakko'i mashka'inne Waa'a hawwoddakko'isaa kichche'issakko'isaa qoossitakkamo» yukko. Ee lasage Saamu'eel Waa'a uunxukko. Ee ayyaamonnem Waa'i xeenaa gugaa asse'ukko. Ee bikkina minaadab hundim Waa'aa Saamu'eelaa lobakata baddito'o. Minaadab hundim Saa'mu'eelina «Niikki mulli jolli hoffe'oo'nnim niina adil doo'llamoo'isina xa'mmimminne Waa'a hawwondummisa kaba lanqaammo. Ni jollinne lenoombee'isina niina ki awwaadaanina ki Moollanni Waa'a uunxe» yito'o. Saamu'eelim «Baa'llakkotte! Kido'i jor luwwa issitakko'oo keen ikkakko'aarem wo'm wodaninne Waa'ina awwaaddehe bagaan ki'nnuwwi ille Waa'iinsi mulli kollonne dabattakkotte. Qophpha'n Waa'uwwa awwontakkotte; ixxuwwi hanqo'i keen ikko'i bee'i bikkina maham hara'mmiteenaa gatisseenaa xantamoyyo. Waa'i ki'nnuwwina wo'm neeyyata uwwu bikkina ki'nnuwwa urooyyo. Mashka'oomim ixxi ki'nnuwwa ixxi gaqqan isseena gaassaatim murte'aakko. An i kollinne ki'nnuwwi bikkina Waa'a uunximma urimminne Waa'a hawwodoomman ihaa siidamoombee'isa eese ixxi egerona. Ki'nnuwwi bikkina Waa'a uunximma urimmi bikkenne ki'nnuwwi issimmi hasisoo xabbeen er woshsha an ki'nnuwwina losisoommo. Ee bikkina Waa'ina ijaajammehe. Ki'nnuwwi wo'm wodaninnem amma'nnantakka'a ixxi ki'nnuwwina issu maalalsiisoo luwwuwwa hundam sawwi'llehe. Ihukkaarem baaxiilo baximmanne qoxxitakko'aa'lleensi ki'nnuwwii ki'nnuwwi adilii bi'llakkamo» yukko. Saa'ool adil ihu ammane ixxi umur sad hiincho ihaa hee'ukko. Adil ihu la'm hiinchonne Saa'ool Isra'ee'l minaadabiinsi feeranto'oo sas kum manna doo'llaa ixxuwwi lambe'iinsi lam kum manna Miikmaasannee Beeteelannee yoo duunaam uullanne ixxenne ikkamisa issukko. Odim mat kum manna ixxi beet Yoonaataaninne maqirem edaa Biiniyaam shumo'i gassi woronne Geeba'a yakkam duunaam uulla asse'ukko; ihukkaarem eehanniinsi gatto'i mulli manna mine elle'llamisa issukko. Yoonaataanim Geeba'anne Filisxee'm manna qasukko. Filisxee'm minaadabim ka woshsha macceesso'o. Saa'oolim manna asse'aa ee uullanne hundannem xurumba fugisaa Ibro'i manna orina weeshukko. Saa'ool Filisxee'm manni gaaxxi awwonsaancho shukkisaa Filisxee'm mannim Isra'ee'l manna sabbo'isaa Isra'ee'l manni laqqo'o. Ee bikkina Isra'ee'l manni hundim Saa'oolinne maqire gaadina fittaman ihukkisa la'isseena Gelgelanne wixxito'o. Filisxee'm mannim Isra'ee'l manna qasseena wixxito'o. Ixxuwwinam sad kum o'l gaarre'uwwi, loh kum faradaanii ee'isam xigakkeena xanakkambee'i dambalaq shashsha'l qax gogotii hee'ukko. Ixxuwwim Beeti'aawe'iinsi eelliinchi firinne Miikmaasa yakkam beyyonne matta'a giribba baxxa'a afuutto'o. Isra'ee'l oos duuha'i jor ihukkisaa ixxuwwi o'l gogotim hambalaachchamukkisaa moo'lla'a worko'onne, utti shif woronne, ki'n lambe'enne, barennee baallennee maaxamto'o. Mulli keen odim Yoordaanoos daajje higga'a Gaad uullaa Gala'aaxxi uullaa matto'o. Ihukkaarem Saa'ool ee amman hundam Gelgelanne hee'ukko. Ixxenne hee'llo'i gogotim baddimmiinsi ki'ukkok huxe'llam hee'llo'o. Saa'oolim lamar ayyaam afeebe'e Saamu'eel waaroo'isa egerukkuuyyi afuurukko. Mashka'oomim ee'isa issoo'isina Saamu'eel Saa'oola ijaajaa hee'ukko. Ihukkaarem oo amman afeebe'e Saamu'eel Gelgela waarukkoyyi hee'ukko. Eehanniinsi ki'ukkok minaadab Saa'oola lagga'a laso daba'llimma asheetto'o. Ee bikkina Saa'ool minaadabina «Shokkiisakka'a hincaakkam kitimaa mateeyyoo'm kitimaa eebbehe» yaa ijaajaa shokkiisakkam kitima hincaa'ukko. Kitima hincaa'aa ki'ukkisam Saa'mu'eel waarukko. Saa'oolim firaa aa'ukko. Saamu'eelim «Mah baxo baxxittok?» yaa xa'mmukko. Saa'oolim «I gogot binnukkisa, atim yitti ammanenne waatbee'isaa ee'isam Filisxee'm manni Miikmaasanne wixxito'isaa moo'ummo. Ee bikkina ‹Filisxee'm manni an Gelgelanne heemmisam waatta'a eese qasseenatte. Anim Waa'iinsi hara'mmato siidummoyyo› yaa sawwummo. Ee bikkina shokkiisakkam kitima hincaa'immi iina hasisukkisa moo'aatette» yaa dabarukko. Saamu'eelim Saa'oolina «Qawwoo'm baxo baxxaatto; ki moollanni Waa'i uwwu ijaajo egettittoyyo. Egettaattoota'n ki adillano Isra'ee'l hanenne heer heerinam qoxxisam hee'ukko. Ihukkaarem ka lasage ki adillan uullooyyo. Oono Waa'i ixxi woda'nnisa ihoo mancho doo'llaakko. At Waa'i ijaajo egerimma hoogimminne ixxo minaadabina awwonsaanchi issaa doo'llaakko» yaa dabarukko. Ee lasage Saamu'eel Gelgeliinsi ki'aa Biiniyaam gassi woronne yoo Gibi'aa yakkam uulla marukko. Saa'oolim ixxenne maqire yoo manna xigukko. Ixxuwwi xigim loh xibbi hee'ukko. Filisxee'm manni Miikmaasanne wiiddannita'a hee'llo'i ammane Saa'ool, ixxi beetii ixxenne maqire hee'llo'i mannii Biiniyaam gassonne yoo Gibi'anne hee'llo'o. Filisxee'm gaadaan sas beyyonne baxxamanta'a qasanteena worko'iinsi fitto'o. Mat gaalchi Shuu'aal gassoo Oofiraa yakkam uulli kolli marukko. La'm gaalchim Beetihooroo'n kolli marukko. Sax gaalchi Xaboo'ii'm cebbiinsi udma'i illagenne yoo tochchi uulla higukko. Ee doollenne Isra'ee'l uullanne xaara tumaa baxoo anga qoor manni hee'ukkoyyo. Mashka'oomim Ibro'i manni bisa'aa bagadoo baxxambee'isa Filisxee'm manni hoottam hee'llo'o. Ee bikkina Isra'ee'l minaadab hundim uulla abuullitam mu'uttuwwa hundam mutussiteena meesaanaa jajjaraa qareesseena Filisxee'm manni beyyo mattam hee'llo'o. Heeda qareesisimminaa mirigo'o abuullakkam ammane ushe'akkeena awwaaxxakkam losha mutussimminaa miqamoo bit soor giraama kee'mmoo kin bir hee'ukko. Abuulli mu'uttuwwa mutussimmina miqamoo bit eehanni lam suume hee'ukko. Eehanniinsim ki'ukkok o'l ayyaamonne Saa'ooliinsii ixxi beet Yoonaataaniinsii bagaan Isra'ee'l gaadaa'n lambe'enne bisa'aa bagadoo amaddo'i keen hee'llo'oyyo. Filisxee'm mannim Mikmaasinne higakkambee'isa hooroo mat gaalcha asse'llo'o. Mat balla Saa'ool beet Yoonaataan ixxeka o'l mu'uta iyyoo woraadichchina «Waare Filisxee'm manni gaadaa'n hegeego mallona» yukko. Ihukkaarem ka woshsha Yoonaataan ixxi anni Saa'oolinam kurukkoyyo. Ee ammane Saa'ool Giibi'iinsi lobakata qee'lloo'n Miigroonanne mat Roomaa'n haqqichchi lugumonne wiiddanaa hee'ukko. Ixxenne maqirem loh xibbi gaadaan hee'ukko. Seelo'onne Waa'ina qeessichchi hee'u Eeli'i beet, Fiinihaas beet, Iikaabood abbaayyi Ahiixoob beet, Eefuuda edde'am hee'u Akiiym ixxenne maqirem hee'ukko. Ixxuwwim Yoonaataan maru beyyo laqqo'oyyo. Yoonaataan Filisxee'm manni wiiddanta'a yo'i beyyo afeena Miikmaasa higakkam googinne higimmi hasisam hee'ukko. Ee higakkam beyyi makkinnee qeddinnee Booxeexaa Seenaa yakkam lam qeeraa'l kin hee'ukko. Ee kinneewwiinsim mat ee higakkam beyyiinsi hanaa'n qarinne Miikmaas illaginne hee'oohan ihukkuuyyi la'mmek odim woroo'n qarinne Geebaa'i illagenne hee'oohan hee'ukko. Yoonaataanim ixxi o'l mu'uta iyyoo woraadichchina «Waare! Ee ballachchantobee'i keen wiiddanta'a yo'i beyyo mallona. Ayyi la'ukko Waa'i niina hara'mmeena xanookko. Lobakatinnem ihukko hofqaxinne Waa'i kaachcha uwwaa gatiseena hooroo luwwi bee'e» yukko. Oo woraadichchim «At doo'llitti luwwi hundam isse. An kiinniinsi annanni ihoommoyyo. Iihaanninne wo'm wodaninnem kiinninnette» yukko. Yoonaataanim «Ihona! Eehid ihulas eeqido fillona; Filisxee'm manninam moo'ammona. Ixxuwwim ‹Neese waalleembe'e ee beyyonne egellehe› yitolas yoommine'i beyyonne egelloommo. Ihukkaarem ‹Ni beyyo waallehe› yitolas ixxuwwi beyyo malloommo; oohim neese Filisxee'm manna kaa'nnoomisa Waa'i issaakkoo mare'i ihookko» yukko. Ixxuwwim fitta'a Filisxee'm mannina moo'anto'o. Filisxee'm mannim «Oono'o, mat mat Ibro'i manni maaxamto'i bariinsi fittamuulla» yaqqanto'o. Ee lasage Filisxee'm manni Yoonaataanaa ixxi o'l mu'uta iyyoo woraadichchoo weeshsha'a «Ki'nnuwwina kulloommi woshshi yoo bikkina ni kollonne waallehe» yito'o. Yoonaataanim ixxi o'l mu'uta iyyaanchina «Kaba eese awwone! Waa'i Isra'eelina Filisxeema higisaa uwwaakko» yukko. Yoonaataanim anginnee gurubbinnee ankakkarukkuuyyi iim firukko. Ixxi o'l mu'uta iyyaanchim awwonukko. Yoonaataanim Filisxee'm manna dangonnem qasaa ubbuusimma asheerukko; ixxi ubbuusu keenom o'l mu'ta iyyaanchi woraadichchi shukko. Luxxeka oranne mat abuulli beyyonne lamiyye ihoo qax manna shito'o. Hax uullanne hee'llo'i Filisxee'm manni hundim hambalaachchanto'o. Dangissam keenii hegeegonne gatto'i gaadaanii hundim baachchinne huxe'llo'o; Waa'i ixxuwwanne ubbuusu u'nnisoo hambalaachchanchiinsi ki'ukkok uulli huxe'ukko. Biiniyaam gassi woronne Gibi'aa yakkam beyyonne hee'llo'i Saa'ool gaadaan Filisxee'm gaadaan kolli hundinnem gibbamisa moo'llo'o. Saa'oolim ixxenne maqire hee'llo'i mannina «Hino'o, ni gaadaano xiggakka'a ka beyyiinsi marukkok ayyetda'e laqqehe» yaa ijaajukko. Xiggo'i ammanenne Yoonaataanii ixxi o'l mu'ta iyyaanchii ee beyyonne hee'llo'oyyo. Saa'oolim ixxi Qeessichchi Akiiyina «Eefuuda amaddaa waare» yukko. Akiiy ee balla Eefuuda edde'aa Isra'ee'l minaadaphphi illagenne hee'ukko. Saa'ool ee qeessichchinne atoorarukkuuyyim Filisxee'm mannik hambalaachchanchi exxukkuuyyi marukko. Saa'oolim qeessichchina «Waa'a xa'mmineena Kaba amman bee'e» yukko. Ee lasage ixxi yo'i beyyiinsi ki'lla'a orina matto'o. Filisxee'm mannim duduqita'a ixxuwwina'i ixxuwwim ee beyyonne bisa'inne shaqqantam hee'llo'o. Filisxee'm manninne maqirem gaadina matta'a hee'llo'i mat mat Isra'ee'l manni Filisxee'm manna lagga'a Saa'oolannee Yoonaataanannee exxito'o. Efiree'm uulli duunnuwwanne maaxamta'a hee'llo'i mulli Isra'ee'l mannim Filisxee'm manni gibbu'uuyyi yo'isa macceesso'o. Ee bikkina ixxuwwi kolli o'l gogotinne mat ikka'a Filisxee'm manna hollansimma asheetto'o. Ee'isam Beeti'aawee'n beero'iinsi eeqiddonne yoo goog hundannem afeebe'e matta'a qasso'o. Waa'im ee balla Isra'ee'l mannina agaagaa gatisukko. Saa'oolim «Kaballa i diina'ika baado fireembe'e hurbaata itoo manchi ayyim duumamaakkoohan ihona» yaa minaadaba hidiisaa hee'u bikkina ee balla Isra'ee'l manni sibaatta'a hooggo'o. Ee bikkina ee balla Isra'ee'l mannik mat manchim hurbaata itukkoyyo. Ixxuwwim lobakat haqqi yoo beyyo affa'a beyyi hundannem marabo siiddo'o. Haqqi hundim marabo iyyaakkoohan ihukkaarem Saa'ool duuncha baddito'i bikkina ee marabiinsi duuqukkok ayyim hee'ukkoyyo. Ihukkaarem Yoonaataan ixxi anni minaadaba hidiisukkisa macceesubee'i bikkina amadu biccinne maraphphi damaamiinsi ki'isaa hofqax marabom itukko. Ee ammanem ixxi malaayye siidukko; ixxekim illi caakkaa moo'ukko. Ihukkaarem gaadaaniinsi mat «Neese hundim sibaallaa hoongaammo. Ihukkaarem kiyyanni ‹Kaballa mah hurbaatam itoo manchi duumamaakkoohan ihona› yaa qoxxisaa kuraakko» yukko. Yoonaataanim «Iyyanni ni minaadabanne afisu hawwi hinkaa'nna kee'mmaalla! gootto'i marabo siidaa itummi bikkina malaayye siidummisaa i illim caakkaa moo'ukkisaa moo'e! Kaballa ni minaadab diina'a kaa'aa qeefadaa siidu hurbaatiinsi itaakkoohan yakkota'n hinkaa'nna eran hee'ukko; Filisxee'm mannikam hinkaa'nna sheena xanam hee'uda'e hino'o sawwihe!» yukko. Ee balla Isra'ee'l manni Miikmaasiinsi Ayyaaloonanne yoo googonne hundannem hollansitu'uuyyi qassimminne Filisxee'm manna kaa'llo'o. Ee ammane Isra'ee'l manni sibaatto'i bikkina lobakata hoogga'a hee'llo'o. Ee bikkina diina'iinsi siiddo'i qeefado'iinsi aa'llu'uuyyi gereebba, laroo wo'llaa batbatita'a aa'llu'uuyyi siiddo'i beyyonne hundannem duttu'uuyyi maara xiiginnem itimma asheetto'o. Saa'oolinam «Ka moo'e ku minaadab xiigaam maara ittu'uuyyi Waa'i illagenne baaxiilo baxxo'ookko» yakkam woshshi ixxi beyyo afukko. Saa'oolim «Kuk lagimmi mare'e! Hino'o, mat geejji kina onkoroollissakka'a kid eebbehe» yaa laarukko. Ee lasage mulli ijaajom «Minaadaphphi beyyo mattakka'a ‹Ki'nnuwwika laroo gereebbaa hundam eebbehe; ixxuwwam duttakka'a ka beyyonne itimmi hasisookko; xiigaam aashaalli maara itimminne Waa'i illagenne baaxiilo baxxakkotte› yitakka'a kullehe» yaa ijaajo higisukko. Ee bikkina minaadab ee hiimo ixxuwwika laroo gereebbaa hundam eebba'a ee beyyonne dutto'o. Saa'oolim ee beyyonne Waa'ina kitima hincaa'akkam beyyo baxukko. Oo ixxi baxu kit'm beyyim luxxanem hee'ukko. Saa'oolim ixxi gaadaano «Kaba dillinaa Filisxee'm minaadaba qansona soodeebe'i afeebe'em ixxuwwi diinate bongaa guullinona» yukko. Ixxuwwim «Kiina eroka labaa moo'amu luwwi hundam isse» yito'o. Ihukkaarem qeessichchi «Gaassinaa Waa'a xa'mminona» yukko. Saa'oolim «Filisxee'm minaadaba qansonnihe? Kaachcham niina uwwitoohonnihe? yaa Waa'a xa'mmukko. Ihukkaarem Waa'i ee hiimo maham dabarukkoyyo. Ee lasage Saa'ool ixxi minaadaphphi awwonsaanina «Kid hincitakka'a kaballa hinkido'i baaxiil baxamuda'e saarayyitakka'a laqqehe. Jora baxaa siidamu manchi i beet Yoonaataanattem yakkota'n lehinne guzumo'amoohan ihukkisa Isra'ee'l minaadabina kaachcha uwwu hee'oo Waa'i summinne hide'oommo» yukko. Ihukkaarem matem dabachcham uwwoo manchi siidamukkoyyo. Ee lasage Saa'ool «Ki'nnuwwi hundim ee kollinne uullehe; anii i beet Yoonaataanii odim ka kollinne uullinoommo» yukko. Ixxuwwim kiina danaa moo'amu luwwa isse» yito'o. Saa'oolim Isra'eelina Moollanni ihu Waa'i kolli «Waa'a! Kaballa iina mahina dabachcha hoottitto? Isra'ee'l Moollanni ikkitti Waa'a! Ka keesamu kinneewwi mashka'inne iina dabachcha uwwe; keese hawwondummok Yoonaataan te'im anetti inkaammoolas ka Uriiminne ka keese hawwodukkok ki minaadab Isra'eel ihaakkoolas ka Tumiiminne dabachcha uwwe» yukko. Dabachchoomim Yoonaataanaa Saa'oolaa moo'isukkaare minaadab muccurukko. Ee lasage Saa'ool «I beet Yoonaataanannee eesennee saamo issehe» yukko. Saamim Yoonaataananne firukko. Ee lasage Saa'ool Yoonaataanina «Issitti luwwi maha?» yaa xa'mmukko. Yoonaatanim «Hofqax marabom biccinne qasaa duuqaammo. Oono'o ka beyyonne yoommo lehinam gudaammo» yukko. Saa'oolim «Waa'i eesenne oogatona; at lehinne guzumo'anchiinsi gattooyyo» yukko. Ihukkaarem minaadab Saa'oolina «Isra'eelina ka lob kaachcha siidisu Yoonaataan lehimmi laboohanennihe? Ee'isa ihooyyo. Lehimmi gataa ixxi horoo'l saraatik matichchim uboobee'isa hee'oo Waa'i summinne hide'nnoommo. Kaballa ixxi issu luwwi hundim Waa'i hara'mmatinne ihaakkoohane» yito'o. Ee lasage Saa'ool Filisxee'm manna hollansimma urukko. Ixxuwwim daba'llita'a ixxuwwi uullam matto'o. Saa'ool Isra'eelanne adil ihaa lasage hundem beyyonnem yo'i diina'a qasukko. Oo diina'im Moo'aaphphane, Aamoo'nnane, Eedoo'm minaadaba, Xooba'i adilluwwaa Filisxee'm mannaa hee'llo'o. Ixxim ora oramu beyyonne hundannem kaa'ukko. Gitannoominne oramaa Amaaleeq minaadab gatoo'n kaa'ukko. Ixxim Isra'ee'l minaadaba ixxuwwi diina'iinsi gatisukko. Saa'oolikim goo'n oos Yoonaataanatte, Yishiwiinattee Maalkiishu'attee hee'llo'o. Lob landichchom Meeraabette ihukkuuyyi hoffotem Meelkoolette hee'llo'o. Ixxi arem Ahimaax landichcho Ahino'aamette hee'llo'o. Ixxi gogoxxi ijaajaanchim ixxi annabbaayyi Neer beet hee'u Abaaneeratte hee'ukko. Saa'ool anni qiisii Abaaneer anni Neerii Abi'eel oos hee'llo'o. Saa'ool hee'u doollenne hundannem Filisxee'm manninne kee'mmaalli or hee'ukko. Ee bikkina Saa'ool qoxar manna siidoo amman hundam ixxi gaadaanonne edam hee'ukko. Saamu'eel Saa'oolina «Isra'ee'l minaadabina an keesee doo'llaa adil issoommisina Waa'i asse'ukkok anette; kabadem hundam xanoo Waa'i kuroo woshsha macceese. Waa'i Amaaleeq manna guzumo'eena murte'aakko; Isra'ee'l minaadab Gibxiinsi fitto'i ammane ka Amaaleeq mannik lugu'm anno'i uullixanta'a hee'llo'o. Amaaleeq manna dangonnem mattaa qassaa ixxuwwina yoo luwwa hundam bi'ise; mat luwwam gatissoobee'isa goona, meento, ooso, Ciilluwwa, laro, gereebba, gaameela'aa hallaa hundam shihe» yukko. Saa'ool ixxi gogota hundam weeshaa Xeeleema yakkam beyyonne xigukko; ixxi gaadaa'nnekim xig Isra'eeliinsi lam xibbi kuma, Yihudiinsi tommi kum hee'ukko. Ee lasage ixxii ixxi gaadaanii Amaaleeq beero'o matta'a mat cebbi woronne maaxamta'a egetto'o. Isra'ee'l manni Gibxi uulliinsi fitto'i ammane ixxuwwi anno'i ixxuwwina eroomma issito'i Qeene'i oos beyyo «Amaaleeq manninne ki'nnuwwa edaa bi'isoombee'isa annanni ikkakka'a mulli beyyo mallehe» yaa qoxxaalli asso asse'ukko; ixxuwwim ee beyyo fatakita'a matto'o. Saa'oolim Hawwiilaa yakkammi beyyiinsi ki'isaa Gibxi uullanne eelliinchi firinne yoo Shuura massoo goog afeebe'e qasukkuuyyi Amaaleeq manna kaa'ukko. Amaaleeqina adil hee'u Agaago foorinnem amadaa qeefadukko; ixxi minaadabam guullukko. Ihukkaarem Saa'oolii ixxi gaadaanii Agaago shitoo'n gatisso'o; ee'isam doo'l, doo'l gereebba, laro, di'ir mirgo'uwwaa geexxuwwaa ee keeninne maqirem er luwwi hundam bi'isso'oyyo; ihukkaarem ixxuwwi bi'isso'ok xale'i awwaadoobee'i shufur luwwi hee'ukko. Ee lasage Waa'i Saamu'eelina «Saa'oola adil issummi bikkina gaabbaammo; mashka'oomim ixxi eese awwonimma uraakko; i ijaajom egerukkoyo» yukko. Saamu'eelim ee woshshanne kichche'aa ee hiimo hundoomam Waa'i kollonne laarukko. Saamu'eelim soodaraarom ki'aa Saa'oolinne edameena marukko; ihukkaarem «Saa'ool Qarmeeloos duuna maraakko; ixxim ee beyyonne ixxo tiirakkam soodda baxaa ixxi lombina uullisaa daba'llaa Gelgela dillaakko» yakka'a kurakko'o. Saamu'eelim Saa'ool beyyo marukko. Saa'oolim «Saamu'eela, Waa'i keese maasse'ona; Waa'i ijaajo guullaa wonshaammo» yukko. Saamu'eelim «Eehaare ku an macceesoommi gereebbikii mirgo'uwwi muunii mahane?» yaa xa'mmukko. Saa'oolim «Ku keen i gaadaan Amaaleeq manniinsi qeefadda'a eebbo'oo keeno; gereebbikaa la'llekaa doo'l doo'lla ki Moollanni Waa'ina kitim issakka'a hincaa'akkona eebbo'ookko; ihukkaarem mulli keeno guullinaa bi'insaammo» yaa dabarukko. Saamu'eelim «Kaba ihookko! Waa'i iina hii'mmo'o kuru luwwa kiina kuroommo» yukko. Saa'oolim «Hino'o kure» yukko. Saamu'eelim «At ki gaga hoffiissaa moo'llittaarem Isra'ee'l sulluwwina awwonsaanchoyyonnihe? Waa'im Isra'ee'l minaadabina adil ikkoo'isina keese annannissaa doo'llaakko. Ee lasage ixxi ee baaxiilaan Amaaleeq minaadaba kumaaddoo'isina keese asse'aakko; ixxuwwi beedditeebe'i afeebe'e ixxuwwa shihe yaa kuraakko. Eehannah mahina ee ijaajo wonshittoyyo? Qeefadimmina gollitaatta Waa'a liiransoobee'i baxo mahina baxxitto?» yukko. Saa'oolim «An Waa'i ijaajo egeraammo; eese ijaajukkisannem gaadaammo; xale'i adil Agaago amadaa waaraammo bagaan mulli Amaaleeq minaadaba hundam shaammo. Ihukkaarem i gaadaan doo'llito'i doo'l, doo'l gereebbaa laroo shito'oyyo; eekka issimmi bikkenne Gelgelanne ki Moollanni Waa'ina kitim issakka'a hincaa'akkamisina eebbo'ookko» yaa dabarukko. Saamu'eelim «Waa'i hinka iittoo labookko? Ijaajanchannii hurbaaxxekkaa mulli kitimaa hincaa'imma? Ixxena ijaajamimmi doo'l gereebbi kitima hinca'immiinsi lophphookko. Waa'anne boqqimmi kiirimmisa; xiiqqamimmim qophpha'n waa'anne otossimmisa baaxiil ihaa xigamookko. At Waa'i ijaajo gadditti bikkina ixxim adil ikkittisa hee'lloobee'isa keese gadaakko» yukko. Saa'oolim «Eeyya! An baaxiilo baxaammo. I gaadaano baddummi bikkina Waa'i ijaajoo at uwwitti awwonsaa uraa ixxuwwi hasso'i luwwa issaammo. Ihukkaarem i bi'ishsha uraammo yitoo'isina an keese uunxoommuulla; iinninne maqirem Gelgela mallona anim ee beyyonne i Waa'ina otossoommo» yukko. Saamu'eelim «An kiinninne maqire maroommoyyo; at Waa'i ijaajo gaddaatto. Waa'im at Isra'eelanne adil ikkittisa hee'lloobee'isa keese gadaakko» yukko. Ee lasage Saamu'eel daba'llaa mareena ki'ukkaare kaabbika kasa amadukkaare dereeramukko. Saamu'eelim Saa'oolina Waa'i Isra'ee'l adillano ki angiinsi dereeraa kiinniinsi e'lloo mulli manchina higisaa uwwaakko. Isra'ee'l minaadabina lombi ihu Waa'i qophphanooyyo. Ixxi saawitem dabassooyyo; Waa'i mannisa ihubee'i bikkina ixxi sawwite dabassooyyo» yukko. Saa'oolim «Hanqinam an hawwodaammo. Ihona bagaan mulli luwwi gatukkaarem i minaadaphphi awwonsaa'n illagennee Isra'ee'l minaadaphphi illagennee eese lonse; ki moollanni Waa'inam otossoommisina iinninne maqirem mallona» yaa uunxukko. Ee bikkina Saamu'eel ixxenne maqirem Gelgela marukko. Saa'oolim Waa'ina otossukko. Saa'mu'eelim «Adil Agaago keyye eebbehe!» yaa ijaajukko; Agaagim baa'aa huxe'ukkuuyyi ixxi beyyo waarukko; ixxi wodanonnem «Leh hinkido'i qaraaraalla?» yaa Saawwam hee'ukko. Ee ammanenne Saamu'eel «Ki bisa'i lobakat ammo'o oos bee'an issukkisam kiyyummam kaballa oos bee'etan ikkamo» yukko. Ee lasage Gelgelanne yoo Waa'ina kitima hincaa'akkam luwwi illagenne Agaago muransaa ubbuusukko. Ee lasage Saamu'eel Raama'a marukko. Adil Saa'oolim Gibi'a marukko. Ee balliinsi ki'isaa Saamu'eel hee'u doollenne hundannem adil Saa'oola od moo'ukkoyyo. Ihukkaarem Waa'i Isra'eelanne Saa'oola adil issu bikkna gaabbukkaare Saamu'eel kichche'aa wi'llam hee'ukko. Waa'i Saamu'eelina «Isra'ee'l minaadabanne adil ihaa hee'oo'isina an ixxo hasumbee'i bikkna at Saa'oolina kichche'llaa wi'llitoottok hinki balli afeebe'e? Eekka uttaa wee'l zayta buudonne wonshitaa amaddaa Beteliheemanne hee'oo Issayyi mine mare. Ixxi oosiinsim mato adil ihoo'isina doo'llaammo» yukko. Saa'mu'eelim «Kaka issimmi iina hinkid xanamookko? Mashka'oomim Saa'ool kaka macceesukkaare eese shookko» yukko. Waa'im « ‹An Waa'ina kitima hincaa'eena waaraammo› yitaa addichcho amaddaa mare. Issayyem ee kiti'm beyyo weeshe; anim at issitoo luwwa kuroommo; an kiina moo'isoommi manchom doo'llitaa adil issitootto» yaa dabarukko. Saamu'eelim Waa'i ijaaju luwwa isseena Beetaliheema marukko. Ee beyyo afukkisam ee beero'i awwonsaan baa'lla'a huxe'llu'uuyyi Saamu'eel beyyo hincita'a «Waattittok xumminateminnihe?» yit'a xa'mmito'o. Ixxim «Eeyya! Xumminatte; Waa'ina kitima hincaa'eena waaraammo; ki'nnuwwim gaga keessakka'a i kolli Waallehe» yaa dabarukko. Ee lasagem Issayyee ixxi abaroosaa keesaa kiti'm beyyo weeshukko. Ee beyyo affo'i ammanenne; Saamu'eel Eeli'aaba moo'aa «Hanqinam Waa'i doo'llu manchi oono'o Waa'i illagenne uullaakko» yaa sawwukko. Ihukkaarem Waa'i «Eeliyaabika uullichchaa danoo moo'llitte an ixxo gadaammo. Waa'i moo'ookkok manni moo'oo'isayyo. Manni hane moo'ookko. Ihukkaarem Waa'i wodano moo'ookko» yukko. Ee lasage Issayye Aminaadaaba weeshaa Saamu'eel beyyo eebukko. Ihukkaarem Saamu'eel ‹Kaka Waa'i doo'llukkoyyo» yukko. Odim Issayye Shaamaa yakkam ixxi beeto hincaa'ukko. Ihukkaarem Saamu'eel ixxom Waa'i doo'llukkoyyo» yukko. Issayyem ee'isinne ixxeka lamarem oosom Saamu'eel illagenne hincaa'ukko. Ihukkaarem Saamu'eel kakeeniinsi matom Waa'i doo'llukkoyyo» yukko. Odim Issayyena «Ki oos xale'i ka qaxammennihe» yaa xa'mmukko. Issayyem «Hundiinsim hoffe'oo mat beet yookko. Ihukkaarem ixxi gereebba allaaraakko» yaa dabarukko. Saamu'eelim ixxo manna asse'llaa weeshisseebe'i afeebe'e kitima hincaa'nnoommoyyo» yukko. Ee bikkina Issayye weeshisukko. Ixxim mishisoo illi kolli danaam er beet hee'ukko. Waa'im Saamu'eelina «An doo'llummok kane ki'llaa zayta labe» yukko. Saamu'eelim wee'l zayti wo'mmaa hee'u buudo ki'isaa ixxi abbaayyuwwi illagennem Daawiitanne labukko; ee ammanchom Waa'i Ayyaan Daawiitanne dillukko. Ee balliinsim ki'isaa ixxeensi annanni ihukkoyyo; eehanniinsi lasage Saamu'eel Raama'a daba'llaa elle'ukko. Saa'ooliinsi Waa'i Ayyaan annanni ihu bikkina Waa'iinsi asse'amu jor ayyaan u'nnisam hee'ukko. Ixxi awwaadaanim «Oono'o, keese u'nnisoollak Waa'iinsi asse'amaakkoo jor ayyaana. Ee bikkina adila, diitta'inne zammareena xanoo mancho hansaa eemboommo neese ijaaje; ee lasage jor ayyaan keesenne waaroo ammane oo manchi kiina diitta lelloohaare at gaassisam fayya'i ikkootto» yito'o. Saa'oolim «Diitta erisa lelloo mancho hassakka'a eebbeehe» yukko. Ixxi awwaadaaniinsim mat «Diitta danaamisa lelloo Beeteeliheemanne yoo Issayyi beeto moo'aammo; ixxim geeda, qoxxalli gaadaancho, wocoo'isannem qoossimmi yoohanee liiranchinne wo'mmaakkoohanee Waa'im ixxenne maqire yoohanee» yaa dabarukko. Ee lasage Saa'ool «Gereebba allaaroo ki beet Daawiita iina asse'e» yaa Issayyi beyyo manna asse'ukko. Issayyem daabbo'oo woyi'n diqaasaa cananne wonshaa hallichchonne iyyiisaatii fellakkichchi qeexa amadiisaatii ixxi beet Daawiita Saa'ool beyyo asse'ukko. Daawiitim Saa'ool beyyo waaraa ixxi awwaado asheerukko. Saa'oolim lobakata iittu bikkina ixxeka o'l mu'uta amadaanchi issukko. Ee lasage Saa'ool «Daawiita iittaammo; i beyyonne ihaa iina awwaadoo'isina uwwe» yaa Issayyi beyyo asse'ukko. Ee ammaniinsi ki'isaa Waa'i beyyiinsi jor ayyaan Saa'ool hanenne waaroo amman hundam Daawiit diitta lelloo ammane Saa'ooliinsi oo jor ayyaan firam hee'u bikkina fayye'am hee'ukko. Filisxee'm manni Soko yakkam Yihuxxi uullanne orina guddo'o. Ixxuwwim Sokko'onnee Aazeeq lambe'ennee yoo Efeesxaamiimaa yakkam beyyonnee gudda'a wiiddanta'a hee'llo'o. Saa'oolii Isra'ee'l mannii wixxita'a Eela'i cebbanne guddo'o. Filisxee'm mannam qasseena hundim beyyi beyyo ammadda'a hee'llo'o. Filisxee'm manni mat duunanne odim Isra'ee'l mannim mulli duunanne ikka'a ixxuwwi lambe'enne Cebbi hee'ukko. Gaat beero'iinsi waaraakkoo Gooliyaada yakkam mat geejji manchi Filisxee'm manni kolliinsi firaa Isra'ee'l mannanne sha'llamukkuuyyi baddisam hee'ukko. Ee manchikim uullichchi sas meetira ihoo qax hee'ukko. Ixxim naas xaariinsi baxxamaakkoo ontayyee lamar kilo'oo kee'mmoo o'l eddechcha edde'aa naas xaariinsi baxamaakkoo qoobe'e issaqqaa hee'ukko. Lokkonnem naas xaariinsi baxamaakkoo gambaalle'e issaqqaa naas xaariinsi baxamaakkoo bagado gudumonne iyyaa hee'ukko. Bagaxxi qaalleenchik geejjoom eddechcha dadoo manni xaaxoohaanni qax hee'ukko; bagaxxi xaaroomim lamar kilo'o ihoo qax hee'ukko. Ixxi agiram mat gaadaanchi iyyaa ixxi illagenne maram hee'ukko. Gooliyaadim ki'aa uullaa Isra'ee'l gogotanne «Ee beyyonne orina guddakko'i keen maha ikkakkeenatte? An Filisxeemchona'e! Ki'nnuwwim Saa'ool agidona'e! Iinninne oramoo mat mancho ki'nnuwwi gaadaaniinsi doo'llitakkamaare inninne waaraa uullixxamona. Ixxi eese kaa'aa shulas neese ki'nnuwwina agid inkoommo; ihukkaarem an kaa'aa shummaa'lleensi ki'nnuwwi ni agid ikkakkamo. Oono'o, an ka'isinne Isra'ee'l gaadaaninne uullixamoommo. Iinninne oramoo mat mancho doo'llitakkamisina iggimminne xa'mmoommo!» yukkuuyyi damfamii sha'llamamii hee'ukko. Saa'oolii Isra'ee'l gaadaanii Filisxee'm manni sagara macceessa'a lobakata baddito'o; muggito'ome. Daawiit Yihuxxi Beetaliheemanne yoo Efiraatanne hee'oo Issayyi beet hee'ukko. Issayye sadeenti goo'n oos yoohan ihukkuuyyi Saa'ool adil hee'u doollenne umurinne massamaakkoo lommanchi hee'ukko. Issayyekim sas lob oos Saa'oolinne maqirem orina gaadda'a hee'llo'o. Ixxuwwim wonii Eeli'aaba, la'mmekim Aminaadaaba saxxekim Shaamaa yakkam keen hee'llo'o. Daawiit hundiinsim hoffi beet ihukkuuyyi sasem lob abbaayyuwwim Saa'oolinne maqire gaado matta'a hee'llo'o. Daawiit hundi ammanem Saa'ool beyyiinsi daba'llamukkuuyyi anni gereebba allaareena Beetaliheema maram hee'ukko. Gooliyaadim Isra'ee'l mannanne sor ayyaamo daraa maaro'oo damfam hee'ukko. Mat ayyaamo Issayye Daawiitina «Tommi kilo'i saramaakkoo hamaamaa tommi xeffo'i qorosho'oo amaddaa qaqqissaa mattaa o'l beyyonne yo'i kiyyabbaayyuwwina afise. Ka tommem quunqi salalom gaaxxi awwonsaanchina uwwe. Kiyyabbayuwwim hinkid yoda'e ki illinne moo'llaa ixxuwwi xummaato eebe. Ixxuwwi, adil Saa'oolii Isra'ee'l mannii hundim Eela'i cebbanne Filisxee'm manninne qasantamuulla» yukko. Daawiitim soodaraarom ki'ukko. Ixxi allaaroo gereebba mulli allaaraanchina yabo uwwaa Issayye ijaajukkisanne gudu hurbaata amadaa marukko. Isra'ee'l manni oranteena sagara iimaa'lla'a damfitam ammanenne Daawiit o'l beyyo afukko. Filisxee'm gaadaanii Isra'ee'l gaadaanii beyyo ammadda'a bagaxxi miinsanne asi'mmannitam hee'llo'o. Daawiitim amadu hurbaata hurbaaxxi egeraanchi beyyonne dissaa o'l beyyo geeraa abbaayyuwwi beyyo afukko. Ixxuwwi xummaatom xa'mmukko. Daawiit ixxi abbaayyuwwinne wocukkuuyyim, Gooliyaada yakkam geejji Filisxee'm manchi eraare issam hee'ukkisam illagenne firaa Isra'ee'l mannanne damfukko. Daawiitim ixxi damfoo'isa macceesukko. Isra'ee'l mannim Gooliyaada moo'llo'i ammanenne lobakata baddita'a ixxi illagiinsi gibbo'o. Isra'ee'l gaadaani xxuwwina'i ixxuwwim «Ka ballina ballina Isra'eela keenoo mancho moo'llakkahinnihe? Adil Saa'ool ka mancho shoo manchina lobakat amaxxa uwweena sagara aagaakko. Ixxi landichchom ee manchina ladiiseenaa ee manchi moollim adilina gibiro gibiroo'n hee'oo'isaa wocaakko» yaqqantam hee'llo'o. Daawiitim ixxi gadanonne uullito'i mannina «Ka Filisxee'm mancho shaa Isra'eela ka tuussiisoo sholle'nniinsi gatisoo manchina mah issakkamo? Ihona bagaan ku hee'oo Waa'i gogota keenoo ku ballachchamoo'n yoo Filisxee'm manchi ayyette?» yaa xa'mmukko. Ixxuwwim Gooliyaada Shoo manchina issakkam luwwi mada'e ihukkisa kutto'o. Daawiitina lob abbaayyi Eeli'aab Daawiit manninne wocoo woshsha macceesukko. Ixxim Daawiitanne lobakata quuqaa «Keyye maha baxxoolla? Ee udma'i uullanne yoo ki hoffi gereebba ayyena uttaa waattaa? An ki bolxoomaa ki woda'n jollaa la'oommo! Kaba at waattittok o'l duuha'a moo'lleenate» yukko. Daawiitim «An kaba maha issummo? Xa'mmenam xanoommoyyonnihe?» yaa dabarukko. Ee lasage odim mulli manchi kolli daba'llaa ee xa'mmichcham xa'mmukko. Xa'mmamu manni hundim uwwoo dabachchi mat hagar hee'ukko. Mat mat manni Daawiit wocoo woshsha macceessa'a hee'llo'i bikkina ee woshsha massitta'a Saa'oolina kutto'o. Saa'oolim Daawiita ixxi beyyo weeshisukko. Daawiitim Saa'oolina «Adila! Ka filisxee'm mancho ayyim baddimmi hasisooyyo. An ki awwaadaanchi maraa ee manchinne oramoommo» yukko. Saa'oolim Daawiitina «At ixxenne hinkid oranteena xantootto? At gootto'i ooshshichchoyyonnihe? Ihukkaarem ixxi oosoommanniinsim ki'isaa o'l mancho» yukko. Daawiitim «Adila! An ki awwaadaanchi iyyanni gereebba allaaraancho. Hobbii gereebba itoo tibbe'nnoo moochchii waaraa wotalla amadoo ammane awwonaa maraa aphphisaa amadaa massu wotara an geeraa maraa hooraa ubbuusisam hee'ummo. Oo moochchim i kolli daba'llaa waaroohaare leella'a xagaraa amadaa aphphisaa sham hee'ummo. An ki awwaadaanchi hobbaa tibbe'i'nnoo'i moochchaa shaammo; ka hee'oo Waa'i gogotinne uullixamoo ballachchamoo'nnoo Filisxee'm manchom ee'isa issoommo. Hobbiinsii tibbe'i'nnoo'i moochchiinsii gatisu Waa'i ka Filisxee'm manchi angiinsim eese gatisookko» yukko. Saa'oolim «Danaamo! Eehannata'i mare; Waa'i kiinninne maqir ihona» yaa dabarukko. Saa'oolim ixxi gaqqi o'l eddechcha Daawiitina eddeesukko; naas xaariinsi baxamu horoo'l qoobe'em Daawiit horoorenne issukko. Daawiitim Saa'ool bisa'a o'l eddechchi hanenne lade'aa mareena ki'ukko. Ihukkaarem eehido'i eddechcha illageen edde'aa la'oobee'i bikkina Saa'oolina «Kido'i eddechcha losumbee'i bikkina ka'isa ihaa mareena xanoommoyyo» yukko. Ee bikkina Daawiit hundam sheelatukko. Ee lasage ixxi bicco amadaa quunqammi ki'nnekam onto daajjiinsi doo'llaa allaaraa'n gonoonanne issaa lasonne yambarasha anganne amadaa ee Filisxee'm manchi kolli hincukko. Filisxeemchi Gooliyaad o'l mu'uta iyyaancho illageen higisaa Daawiit kolli hincukkuuyyi marukko. Gooliyaadim Daawiita xuxxaa moo'aa mishisoo gootto'i beetichchi ihu bikkina gadukko. Ee bikkina Gooliyaad Daawiitina ku bicco amaddaa waattittok eese wishichcho labissaatennihe?» yukko. Ixxi waa'i summinnem qangukko. Ixxim «Kid waare! Ki maara iima'n ammarinaa uulli moochchinaa uwwoommo» yukko. Daawiitim «At bisa'aa bagaxxi qaphphanaa amaddaa iina waattaatto; an ihukkaarem at sha'llantoo Isra'ee'l gogoxxi Moollanni ihu hundam xanoo Waa'i summinne keesenne waaraammo. Kaballa Waa'i keese i anganne ubbuusookko. Anim keese kaa'aa ki horoore muroommo. Filisxee'm gaadaa'nnekam maara ammarinaa moochchinaa hurbaat issaa uwwoommo. Ee lasage heer uullanne yoo manni hundim Isra'eelina Waa'i yoohan ihukkisa la'ookko. Ka beyyonne yoo manni hundim Waa'i manna gatiseena bisa'i te'im bagad hasisoobee'an ihukkisa la'ookko. Ku or Waa'an ihu bikkina ki'nnuwwa ni anganne higisaa uwwookko» yukko. Gooliyaadim qaseena Daawiit kolli hincukko. Daawiitim ee Filisxee'm manchi Gooliyaadinne oramoo o'l beyyo gerukkuuyyi marukko. Ixxi angam gonoonanne aagisaa mat kina fissaa yambarishinne Gooliyaadanne huushukko. Oo kinim miine huruuraa horoorenne aagu bikkina Gooliyaad qubbaa illillaachcha ubukko. Ee bikkina Daawiit bisa'a amadoo'nnim Gooliyaada yambarishinnee kininnee aphphisaa shimminne kaa'ukko. Ixxi ubu kolli geeraa maraa ixxi hanenne uullaa Gooliyaad bisa'a seejjiinsi fissaa horoore murukko. Filisxee'm mannim ixxuwwi gitanni gaadaanchi lehukkisa moo'llo'i ammanenne utta'a gibbo'o. Ee lasage Isra'ee'llekii Yihuxxi mannii sagara fissita'a damfitu'uuyyi Gaatannee Eeqiroonannee yoo ooxxi gooc afeebe'e ixxuwwa hollansito'o. Filisxee'm manni leeshshim Gaatanne, Eqiroonannee Sha'iraayima marakkam googonnee ubukko. Isra'ee'l mannim ixxuwwa hollansita'a daba'llita'a lasonne Filisxee'm manni wiiddanta'a hee'llo'i beyyo boggo'o. Daawiitim Gooliyaadika horoore muraa amadaa Yerusaaleema waarukko. Ihukkaarem Gooliyaadika o'l mu'uta Daawiit ixxi gaqqi dukkaananne dissukko. Daawiit Goliyaada qaseena maru ammane Saa'ool moo'aa ixxi gaaxxi awwonsaanchi Abaaneera «Ku beet ayyane?» yaa xa'mmukko. Abaaneerim «Adila, ki angi la'ona! Ku beet ayyanda'e kabad afeebe'em la'ummoyyo» yukko. Saa'oolim «Mattaa ku beet ayyanda'e qoossitaa la'e» yaa ijaajukko. Ee bikkina Daawiit Gooliyaada shaa gaadaa'n kolli daba'llu ammanenne Abaaneer taqeebalaa Saa'ool beyyo hincaa'ukko. Ee ammane Daawiit Gooliyaad horoore amadukkisam hee'ukko. Saa'oolim «Kaa woraadichcho at ayyi beeto?» yaa xa'mmukko. Daawiitim «Beetaliheemanne hee'oo ki awwaadaanchi Issayyi beeto» yaa dabarukko. Daawiit Saa'oolinne wocam hee'u woshsha guullukkisam Saa'ool beet Yoonaataan Daawiitinne maqire lobakata iittamimma asheerukko. Ixxi gaqqisam issaa iittukko. Ee balliinsi ki'isaa Saa'ool Daawiit ixxenne maqire hee'oo'isa issukko. Ixxi mine elle'oo'isinam geegeesukkoyyo. Yoonaataan Daawiita hore'em lobakata iittu bikkina ixxenne maqire Saawwoo'm hidiro aagukko. Edde'u kaabbam sheelaxxaa Daawiitina uwwukko. Ee'isam gaaxxi eddeehchcha bisa'a, xiyyaa lade'akkam sabbataa edaa uwwukko. Saa'ool ijaajaa gaadisoo beyyonne hundannem Daawiit muraado hasisoo'isinne wonsham hee'u bikkina Saa'ool gaadaa'n awwonsaanchi issukko. Ookkim Saa'ool gaadaa'n awwonsaanoo gaadaanoo hundam liiransukko. Daawiit Gooliyaada shaa daba'llukkuuyyaa gaadaan mine daba'llukkuuyyaa Isra'ee'l uullanne yo'i beero'uwwanne hundannem hee'llam landi Saa'oola taqeebalteena fitto'o. Ixxuwwim ilil yitu'uuyyi maasinqo'innee dibbe'innee kaddam hee'llo'o. Oo landim taqeebalukkuuyyi «Saa'oolii kuma shukko Daawiitii kumaa kaakumaa shukko» yaa birukko'o. Saa'oolim ku woshshi liiransubee'i bikkina lobakata quuqaa « ‹Daawiit kumaa kaakumaa shaakko iinaa xale'i mat kuma shaakko› yakko'aa'lleensi ixxena adillaniinsi bagaan od mah gataate?» yukko. Ee balliinsi ki'isaa Saa'ool Daawiita to'achchimmaa malimmaa ashee'ukko. Ee la'm daram dangonnem Waa'iinsi asse'amaakkoo jor ayyaan Saa'oola amadukko. Ixxi minennem machchaaraa'nnisa wocam hee'ukko. Daawiitim balli hundam issam hee'ukkisam Saa'oolina diitta lellam hee'ukko. Saa'oolim bagado amadaa «Qasaa gortannanne edaa uroommo» yaa wodanonne sawwukko. Ee lasage bagado Daawiitanne lamaagge huushukko. Ihukkaarem Daawiit lamem ammanem koratukkuuyyi xorukko. Waa'i ixxo uraa Daawiitinne maqir ihu bikkina Saa'ool Daawiita baddukko. Eehanniinsi ki'ukkok Saa'ool Daawiita ixxi illagiinsi qeesseena mat kum gaadaanina ijaajaanchi issaa asse'ukko; Daawiitim ee gaadaano awwonsukko. Waa'i Daawiitinne maqire hee'u bikkina issoo luwwi hundim taaphanam hee'ukko. Saa'oolim Daawiit issoo luwwi hundim taaphanukkisa moo'aa lobakata baddukkuuyyi marukko. Ihukkaarem ixxi issoo luwwi hundim taaphanaakkoo awwonsaanchi ihu bikkina Isra'eelannee Yihudannee yo'i minaadab hundim Daawiita iittitam hee'llo'o. Ee lasage Saa'ool Daawiitina «Waa'ika ora geedoominne orantilas iitta lob landichcho Meeroobe kiina ladiisoommo» yukko. Saa'ool eehid yukkok ixxi «Daawiit xiigiinsi muccur iheena Filisxee'm manni Daawiita shitamo» yaa sawwu bikkinatte. Daawiitim «Adilina landichchi aro'i iheena an ayyette? I abaroosdu Isra'ee'l minaadaphphi lambe'enne mah xigonne exxookko?» yaa dabarukko. Ihukkaarem Meeroobe Daawiitina ladiisantam amman afukkaare Mahoola yakkam beyyiinsi waaraakkoo Adiri'eela yakkam manchina ladiisanto'o. Ihona bagaan Meelkool yakkam Saa'ool landichcho Daawiita iittito'o. Saa'oolim ee woshsha macceesu ammanenne lobakata liiramukko. Ixxi wodanonnem «Meelkoole Daawiitina uwwoommo. Isem Daawiita amaddamisa issoommo. Ee lasage ixxi Filisxee'm manni anganne lehookko» yaa sawwukko. Ee bikkina la'mmaaggem Daawiita weeshaa «Kaba at iina landichchi aro'i ikkootto» yukko. Ixxi gassaano weeshaa «Adil keesenne liiramaakko. Ixxi gassaanim keese iittitamuulla. Ee bikkina ixxi landichcho eebboo'isina kaba er amman kane» yita'a Daawiitina mullam kuttamisina ijaajukko. Ixxi gassaanim ka hundam Daawiitina kutto'i ammanenne ixxi «Iinni'nnoo'i hoffi buxichchi manchina Adi'l landichchi aro'i ihimmi xanamoohonnihe?» yaa dabarukko. Ixxi gassaanim Daawiitiinsi macceesso'i woshsha ixxena kutto'o. Odim Saa'ool « ‹Adil ixxi landichchi bikkina kiinniinsi hasoo qoot ixxi diina'ika baado miqisoo'isina xale'i mat xibbi Filisxee'm manna shitaa ixxuwwi uraaga eebboo'isinatte› yitakka'a kullehe» yaa ixxi gassaano ijaajukko. Saa'ool kaka issu mashka'i Daawiit Filisxee'm manni anganne lehoo'isina sawwu bikkinatte. Saa'ool gassaanim ka woshsha Daawiitina kutto'o. Daawiitam adilina ladichchi aro'i ihoosina sawwamukkis liiransukko. Bollochcho'i balli afeena illageen Daawiitii ixxi gaadaanii gaadda'a lam xibbi Filisxee'm manna shito'o. Daawiitim adilina landichchi aro'i iheena xanoo'isina; ixxuwwi uraaga adi'l beyyo massaa xigaa uwwukko. Ee bikkina Saa'ool ixxi landichcho Meelkoole Daawiitina ladiisukko. Saa'oolim Waa'i Daawiitinne maqir ihukkisaa ixxi landichcho Meelkoolem ixxo iittito'isaa qoossaa la'ukko. Saa'ool Daawiita lobakata baddu bikkina ixxi heechchi doollenne hundannem Daawiitina diinakkichchi ihukko. Filisxee'm gaadaan amman hundam waattu'uuyyi qasantam hee'llo'o. Ihona bagaan ayyi orannem Saa'ool gaaxxi awwonsaaniinsi hundiinsim lobaka kaachcha siidookkok Daawiitatte hee'ukko. Eehanniinsi ki'ukkok Daawiit lobakata summamukko. Saa'ool Daawiita shitamisina ixxi beet Yoonaataaninaa ixxi gassaan ikko'i Daannuwwinaa hundinam kurukko. Ihukkaarem Yoonaataan Daawiita lobakata iittam hee'ukko. Yoonaataanim «Iyyanni Saa'ool keese sheena makka hasoolla; sooxxi dara ki gaga ege'lle; mat daphphit beyyonne maaxantaa egere. Anim firaa at maaxanti beyyonne iyyanni gadanonne uulloommo. Ki bikkinam atoorassoommo. Ixxeensi macceesummi woshsham kiina kuroommo» yukko. Yoonaataanim ixxi anni Saa'oolina Daawiit bikkina er woshsha wocukkuuyyi «Adila, ki awwaadaanchi Daawiitanne jora issititte; ixxi keese hawwodukkoyyo. Ixxi issu luwwim kiina lobakata awwaadaakko. Daawiit Gooliyaada shukkok murte'aa ixxi gaga higisaa uwwaateyyonnihe? Waa'i Isra'ee'l minaadab hundinam kee'mmaalli kaachcha eddeesukko. Atim eekka moo'llaatta liirantitto. Eehannah ixxo kora'am shimminne Daawiit'nnoo'i muccur manchonne mahina jor luwwa issitoohane?» yukko. Saa'oolim Yoonaataan woshsha macceesaa lasonne «Hee'oo Waa'i la'ona Daawiita shakkammoyyo» yaa hide'ukko. Ee bikkina Yoonaataan Daawiita weeshaa ka woshsha hundam kuraa lasonne Saa'ool beyyo hincaa'ukko. Daawiitim illagee'nnisam adii'l illagenne awwaadimma asheerukko. Filisxee'm manninne hee'u or odim ki'ukko. Ihukkaarem Daawiit firaa kee'mmaallisa dangisaa qasamukko. Ixxuwwim kaa'anto''i bikkina gibba'a matto'o. Mat balla Waa'iinsi asse'amaakkoo jor ayyaan Saa'oola amadukko. Ee bikkina ixxi bagado anganne amadukkisam ixxi minenne afuuraa hee'ukko. Daawiitim ee beyyonne diitta lellam hee'ukko. Saa'ool Daawiita qasaa gortannanne edaa ureena sawwaakka amadu bagado huushukko. Ihukkaarem Daawiit koratukkaare bagad gortannanne kaaxxukko. Daawiitim ee beyyiinsi gibaa xorukko. Ee hiimom Daawiitika mine kibbita'a soodaraar daranne shitona Saa'ool manna asse'ukko. Daawiit mi'n ama Meelkoolem «Kaballi maaro'o ki gaga gatixxitbeelas soox dara shakkeenatte» yita'a qoxxissa'a kutto'o. Isem maskootinne fissita'a dilliisso'aare gibaa xorukko. Ee lasage Meelkoole is abaroos otossoo qophpha'n waa'i misila Daawiit ara'anne iinsiisso'o. Horoo'llagannem fella'i oddinne baxamaakkoo barkuma dissita'a eddechchinne ifiisso'o. Daawiita amaddona Saa'ool asse'u manni waatto'i ammanenne Milkoole «Ixxi xissaa iinse'aakko» yito'o. Saa'oolim «An i gagim ixxo shoommo ara'innem iyyitakka'a eebbehe» yaa ee manna dabaraa asse'ukko. Oo asse'anto'i mannim mine aagga'a moo'llo'i ammanenne; ara'anne iinse'aakkoo qophpha'n waa'i misilaa ixxi horoo'l aganne fellakichchi oddinne baxamaakkoo barkumaa xale'e siiddo'o. Saa'oolim Meelkoolena «I diinakkichchi xorona ka hantaaro baxxaa mahina eese qawwiissitto?» yaa xa'mmukko. Meelkoolem « ‹Xoroommisina hara'mme; oo beelas an keese shoommo› yukko» yita'a dabatto'o. Daawiitim gibaa xoraa Saamu'eel hee'oo Raama'a marukko. Saa'ool ixxo hawwodu hawwojji hundam kurukko. Ee lasage Saamu'eelii Daawiitii Raama'anne yoo Naayootanne matta'a afuutto'o. Saa'oolinam «Daawiit Raama'anne yoo Naayootanne yookko» yakka'a kurakko'o. Ee bikkina Daawiita amaddam manna Saa'ool asse'ukko. Ixxuwwim ee beyyo affa'a Saa'mu'eel awwonsatinne wixxito'oo hiraagaan sagara iimmaa'lla'a hiraago woccu'uuyyi moo'llo'i ammanenne Waa'i Ayyaan Saa'ool asse'u mannanne dillukko. Ixxuwwim ee'isam hiraago wocco'o. Saa'oolim ka woshsha macceesu ammanenne la'mmekam mulli manna asse'ukko. Ixxuwwim hiraago wocco'o. Saxxekam Saa'ool mulli manna asse'ukko ixxuwwim ee'isam hiraago wocco'o. Lasaanchonne ixxi gagim Raama'a marukko. Eekke'em Sekku yakkam beyyonne yoo mat lob geejji wo'i bar yoo beyyo afaa «Saamu'eelii Daawiitii hee'llamok hannonnette?» yaa xa'mmukkaare Naayootanne yo'isa kurakko'o. Ee bikkina Saa'ool Raama'anne yoo Naayoota marukkuuyyam Waa'i Ayyaan ixxonnem dillukko. Ixxim Naayoot afeebe'e googonne hiraago wocukkuuyyi marukko. Ixxim eddechcha sheelaxxaa Saamu'eel illagenne odim hiraago wocukko. Ee'isinne ballaa hiimoo hundoomam kallemaram iinse'aa hosukko. Saa'oolim «Odim hiraagaaniinsi matisa xigamukkonnihe?» yakkam yanni waarukkok ee mashka'innette. Ee lasage Daawiit Raama'anne yoo Naayootiinsi gibaa Yoonaataan beyyo maraa «Hore'em an maha issummo? Damigummi luwwidu maruwwa? Kiyyanni eese sheena hasookkok an maha hawwodummaarette?» yaa xa'mmukko. Yoonaataanim «Kaka'i kiinniinsi qeessona! Iyyanni issoo luwwi hundam hoffokaa lobokaa iina kuroolla; ki woshsham iina maaxooyyo. Ee bikkina ku at yitoo woshshi hanqi iheena xanooyyo» yukko. Ihukkaarem Daawiit «Kiyyanni at eese hinkaa'nna iittitooda'e erisa la'ookko. Ee bikkina ixxi isseena sawwu luwwa at laqoobee'isa isseena murte'aakko. Mashka'oomim at eekka laqqilas lobakata kichche'lloo'isa la'ookko! Hee'oo Waa'i Summannee ki foorennee hide'oommo. Kab iina mexxo'i lehiinsi bagaan gatu luwwi bee'e» yukko. Yoonaataanim «At hassoo luwwi hundam an kiina issoommo» yukko. Ee bikkina Daawiit «Oono'o, sood aga'n aaggi balla. Ee bikkina soodo an adilinne maqire hurbaata itimmi hasisookko. Ihukkaarem insooxxi maaro'i afeebe'e maaxamona eese geegeese» yaa dabarukko. «Kiyyanni eese hasulas ixxi qarmanni hundinam hiinchi kitim hincoo balli ihu bikkina <Daawiit ixxi hee'oo beero'o Beetaliheema mareena qoxxisaa xa'mmaakko> yitaa kurerukko.» Ixxim «Erane yulas ki awwaadaanchina kichche'isoo luwwi bee'e. Ihukkaarem quuqulas eesenne jora isseena sawwukkisa eehanninne laqqootto. Ihukkaarem at ki awwaadaanchina eroomma isse; mashka'oomim ki awwaadaanchinne maqire Waa'i illagenne hidi'l sagara aaggakko'ookko. An joraammoolas at ki gagim eese shihe; mahina eese kiyyannina higissaa uwwitoohane?» yukko. Yoonaataanim «Kuk kiinniinsi qee'llona. Iyyanni keesenne jora sawwukkisa la'umta'n an hinkid kiina kuroo'n uroommo?» yukko. Daawiitim «Kiyyanni jor sagara dabaruta'n iina ayyi kurookko?» yaa xa'mmukko. Yoonaataanim «Waare ee biiranne fillona!» yukko. Ee bikkina amaxxanta'a fitto'o. Ee lasage Yoonaataan Daawiitina «Isra'ee'l Moollanni Waa'i naqaash ihona. Iyyanna xa'mmaa xassaa soodo te'im insoodo kido'i ammanenne asse'oommo. Ixxek ki bikkina yoo sawwit eran ihulas kiina la'isoommo. Ihukkaarem iyyanni kiina jora sawwaakkoolasii ee woshsham kiina la'isumbeelasii Waa'i eesenne jor luwwa issona. Eehanniinsi baasoo luwwam eesenne eebona. Waa'i iyyanninne hee'ukkisam ee'isam kiinninnem ihona. Atim an foorinne yoommi qax doollenne awwaadoommisina Waa'ika eroomma iina isse. Waa'i Daawiit diina'a hundam uulliinsi bi'isoo ammanem ihuta'n ki eroommi bax i abaroosiinsi hore'em annanni ihoone» yukko. Ee bikkina Yoonaataan «Daawiit Diina'anne Waa'i oogatona» yaa Daawiitinne maqire hidi'l sagara aagukko. Yoonaataan Daawiita ixxi gaqqisa iittam hee'u bikkina «Eese hanqo'isa iittitoo'isa la'oommisina odim hide'e» yukko. Ee lasage Yoonaataan «Sood agan aagoo balla; at afuuttoo barcum kora'am gatoo bikkina at maaddanne hee'lloobee'is la'amaakkoohane. Hore'oomam insooxxi maaro'o kanniinsi illageen ku hawwi asheeroo ammane at maaxamti beyyo mattaa Eexeel kin yoo beyyonne afaree'n kollinne maaxame. Anim ee kina qasoomman issaa sas xiyyuwwa daraboommo. Ee lasage «Mare ee xiyyuwwa eebe» yaa mat beeto asse'oommo. Ee beetinam « ‹Oo darabummi xiyyuwwi yookkok kiinniinsi keenette mattaa eebe› yummaa'lleensi Hee'oo Waa'i la'ona! Keese jor luwwi nakkooyyo; jor daafim hee'ooyyo fittaa waare» yukko. Ihukkaarem ee beetina «Xiyyuwwi yookkok kiinniinsi ekkeen higaatette yummaa'lleensi Waa'i mattoo'isina hasaakkoo bikkina mare. Atii anii aangummi hidirina Waa'i ni lambe'enne heer heerinam naqaasha» yukko. Ee bikkina Daawiit haqqoronne maaxamaa egerukko. Haareechchi agan aagoo balli ugudanne maadda itakkam mine Saa'ool waarukko. Ixxim gortanni gammalanne losamukkisam lombi beyyonne afuurukkaare Abaaneer ixxi gadanonne afuurukko. Yoonataanim adi'l illagenne afuuraa hee'ukko. Ihukkaarem Daawiit barcum kora'am hee'ukko. Ihona bagaan Saa'ool ee balla matem sagaram wocukkoyyo. Mashka'oomam Saa'ool Daawiit bikkina sawwukkuuyyi «Ayyi la'ukko mat luwwi ixxonne afaatette te'im See'llisinne laboo'isa muccuroo'n hee'aate» yaa sawwam hee'ukko. Agan aagu la'm balli daranne Daawiit afuuroo beyyi kora'am hee'ukko. Eehanniinsi ki'ukkok Saa'ool ixxi beet Yoonaataana «Issayyi beet beeballam kaballam maaddanne siidamubee'ek mahinatte?» yaa xa'mmukko. Yoonaataanim «Daawiit Beetaliheema mareena eese lobakata uunxaakko. Ixxim ‹Ni abaroos beero'i woronne kitima hincaa'oo bikkina anim ee beyyonne ihoommisina iyyabbaayyi eese ijaaju bikkina maroommo ki illagenne nuura sixxaammoolas iyyabbaayyuwwa moo'eena marona eese geegeese› yaa eese xa'mmaa hee'ukko. Adi'l maaddanne siidameena xanubee'ek eehanninatte» yaa dabarukko. Saa'oolim Yoonaataananne lobakata quuqaa «At ee inciicammi boqqi meentichchi beeto! At ki gagina tuulle, kiyyummanam Sholle'nna eebbeena Issayyi beetinne iittantittisa huushummoka labissaatennihe? Issayyi beet foorinne hee'ukkuuyyi atim ki adillanim qoxxitakamoyyo. Ixxi lehimmi hasisoo bikkina manna asse'llaa i beyyo wossiise» yukko. Yoonaataanim «Mah bikkina lehoohane? Maha bi'isaate?» yaa dabarukko. Eehanniinsi ki'ukkok Yoonaataana sheena amadu bagado huushukko. Ee bikkina ixxi anni Daawiita sheena murte'ukkisa Yoonaataan qoossaa la'ukko. Yoonaataanim lobakata quuqaa maaddiinsi ki'ukko. Ixxi anni Daawiita sholliisu bikkina kichche'aa hee'u bikkina agan aagu la'm ballanne hurbaata hore'em itukkoyyo. Eehanniinsi la'm ayyaamonne Yoonaataan mat gootto'i beetichcho awwonsaa Daawiitinne maqire ansa issaqanto'i beyyo marukko. Ee beetina «Geere! Ka daraboommi xiyyuwwa hase» yukko. Oo beet geerukkaare xiyya eeqixxi kolli darabukko. Oo beetim Yoonaataan darabu xiyyi ubu beyyo afukkaare Yoonaataan weeshaa «Oo xiyyi kiinniinsi ekkeen higaakkoollayyonnihe?» yukko. Ixxim «Ee beyyonne cawwitaa uullititte! Qaqqise!» yaa shuurukko. Oo beetim ee xiyyuwwa wixxaa'aa ixxi moollanni beyyo daba'llukko. Daawiitiinsii Yoonaataanniinsii bagaan ka woshshi bikkina la'ookkok matim hee'ukkoyyo. Yoonaataanim ee beetina «Ka o'l mu'uta amaddaa beero'o mare» yukko. Oo beet maraa lasage Daawiit ki'n tuubbiinsi afaree'n kollinne maaxamu beyyiinsi firaa uullanne guruphphaa sas kore heeshukko. Ixxii Yoonaataanii lamim suunqantu'uuyyi wi'llitam hee'llo'o. Ihukkaarem Lobakata wi'llukkok Daawiitatte hee'ukko. Ee lasage Yoonaataan Daawiitina « ‹Ki lambe'ennee i lambe'ennee ki shumo'i lambe'ennee i shumo'i lambe'ennee Waa'i heer heerinam naqaash ihona› yaqqammaa Waa'i summinne hide'ammaa hee'nnummi bikkina kaba od xummanne mare» yukko. Daawiitim ee beyyiinsi ki'aa marukko. Yoonaataanim beero'o daba'llukko. Daawiit Nooba yakkam beero'onne hee'oo qeessichchi Abemeeleek beyyo marukko. Abemeeleekim baddimminne ixxo taqeebaleena huxe'ukkuuyyi firaa «Ayyi manchim keese awwonoo'n mullam mahina keyye waattitto?» yaa xa'mmukko. Daawiitim Abemeeleekina «An keyye waarummok adil Saa'ool asse'aakkoo luwwa isseenatte; an keyye waarummi quuxo ayyi manchinam kuroombee'isa adil eese ijaajaakko. Eese awwontam keenom mat beyyonne exxinoommisina ijaajaammo. Eehannah kaba ki anganne itakkam luwwik mah yookko? Onti injeera te'im yoo luwwa maham uwwe» yukko. Qeessichchim «Keesamaakkoo daabbo'iinsi bagaan mulli manni iteena xanoo hurbaat ma'lluwwim bee'e; ki awwonaan ka taabonne meentinne eebaqqanchi edancha edantoo'n muccuroominne ege'llito'oo keen ikko'oolas ka daabbo'o itteena xantamo» yaa dabarukko. Daawiitim qeessichchina «Hanqinam i awwaadaaninne maqirem asse'ammaa malloommi amman hundam see'llisanne muccurooma meentiinsi ege'llinoommo; hoffi assinam ihuta'n filloommi ammane ni gaqqi muccurooma ege'llinoommo; kaballa'i hinkid lophphaakkoo'isinne ni gaga ege'llinoommoyyo?» yukko. Ee bikkina qeessichchi ee keesamu daabbo'o ki'isaa Daawiitina uwwukko; mashka'oomim ee qeessichchina yoo hurbaat xale'i Waa'ina uwwakkam daabbo'i hee'ukko. Oo daabbo'im keesamaakkoo xaraphpheeziinsi ki'aa mulli haareechchi daabbo'inne dabassamaakkoohan hee'ukko. Saa'ool allaaraa'n awwonsaanchi hee'u Eedoo'm Dooyiq ee ayyaamo Waa'i illagenne afuuroo'isina ijaajamaa hee'ukko. Daawiit Abemeeleeka «Eese adi'l quux gaaggaabisu bikkina iikka bisa'aa mulli o'l mu'utaa eebummoyyo. Keyye ki beyyonne bagad te'im bisa'i yoohonnihe?» yaa xa'mmukko. Abemeeleekim «Eela'i cebbanne at shitti Filisxee'm Gooliyaadik bisa'i i beyyonne yookko. Ixxim eefuudiinsi ekkeen carqinne xaaxamaa yookko; ixxo hassoolas eekka amaddaa mare. Ka beyyonne yoo gaaxxi mu'ut xale'i ixxotte» yukko. Daawiitim «Eeyya, ixxo iina uwwe! Ixxeensi e'lloo bisa'i hannonnem hee'ooyyo» yukko. Daawiitim Saa'ooliinsi gibaa Gaat uulli adi'l Akiish beyyo marukko. Ee adi'l gassaan «Kuk ixxi gaqqi uullanne adil ihu Daawiitatteyyonnihe? Saa'ool kuma shukko! Daawiit kumaa kaakumaa shukko› yaa landi kajjinne birukkok ixxotteyyonnihe?» yita'a Akiisha xa'mmito'o. Ixxuwwi wocco'isanne Daawiit wodan qoxxaallisa hoogukko. Adil Akiisham lobakata baddukko. Ee bikkina Daawiit ixxuwwi illagenne machchaaraa'nnisa ihaa ee beero'i gooca xuranqinne kotootukko. Hambaraallam ixxi haareeddanne cukkukko. Akiishim ixxi gassaanina «Oono'o, ku manchi machchaaraancho! Eehannah i beyyo mahina wottakko'o? Kaballi afeebe'e an machchaaraano hannonne hoogaate? I beyyonne machchaarona ka mancho i mine aagisimmi hasisoohonnihe?» yukko. Daawiit Gaat beero'iinsi gibaa Aduulaa'm beero'i gadanonne yoo mat daawwa'a marukko. Ixxi abbaayyuwwii mulli ixxi abaroosii kaka macceesso'i ammanenne eekke'e matta'a ixxonne exxito'o. Wor amadanto'i keen, badan yoo keenii tiir kichche'u keenii mat mat ikka'a ixxi beyyo mattu'uuyyi ixxuwwik xig soor xibbe afukko. Daawiitim ixxuwwina awwonsaanchi ihukko. Daawiit ee beyiinsi ki'aa Moo'aabanne yoo Misiphpha yakkam beyyo marukko. Moo'aaphphi adilam «Waa'i iina issoo luwwa la'eembe'i afeebe'e hay iyyannii iyyummaa waatta'a ki beyyonne afuutamisina ‹iina uunxame»› yaa xa'mmukko. Ee'isinne ixxi annaa amaa Moo'aaphphi adi'l beyyonne dissukko. Ixxuwwim daawiit maaxamukkuuyyi hee'am hee'u doollenne hundannem ee beyyonne afuutto'o. Ihona bagaan hiraagaanchi Gaad Daawiitina «Daphphixxi beyyonne afuuttitte; mattaa Yihuxxi uulla aage» yukko. Ee bikkina Daawiit ee beyyiinsi maraa Heereet doomanne aagukko. Mat balla Saa'ool bagado anganne amadukkisam «Gibi'a» yakkam duunanne «Tamaarisk» yakkam haqqi lugumonne afuuraa hee'ukko. Ixxi gassaanim ixxi kululleetanne uullita'a hee'llo'o. Ee ammanenne Daawiitii ixxi awwonaan hee'llo'i mannii mat beyyonne yo'isa Saa'ool macceesukko. Saa'oolim ixxi gassaanina «Ki'nnuwwi Biiniyaam manni macceessehe! Hanqinam Issayyi beet Daawiit ki'nnuwwina hundinam abuulli uullaa woyina kaassakkam beyyoo uwwookkokaa gogoxxi lambe'enne gaaxxi awwonsaan issookkokaa labissaka'atennihe? I hanenne dollottakkamok kanninatennihe? I beet Daawiitinne maqir ihukkisa iina kurukkok ki'nnuwwik mat manchim bee'e. I bikkina sawwookkok hore'em matim bee'e. Te'im I gaqqan ihu manniinsi mat ihu Daawiit ka ammanenne eese sheena ixxena makkoo ammane hasukkuuyyi yoo'isaa i beetim ixxo qoxxisukkuuyyi yoo'isaa iina kurukkok bee'e» yukko. Ihukkaarem ee beyyonne hee'llo'i Saa'ool ixxi gassaaninne maqire uullaa hee'u Eedoo'm Dooyiq «Issayyi beet Noobanne yoo Ahiixoob beet ihu Abemeeleek beyyo waarukkuuyyi moo'aammo. Abemeeleekim ixxena hasisoo luwwina Waa'a xa'mmaakko; ee'isam Filisxee'm manchi Gooliyaadika bisa'a uwwaakko» yukko. Ee bikkina adil Saa'ool Ahiixoob beet qeessichchi Abemeeleekaa Noobanne qeessuwwi hee'llo'i ixxi anni abaroos hundamii asse'aa weeshisukko. Hundim adi'l beyyo waatto'o. Saa'oolim Abemeeleekina «Abemeeleeka! Macceese» yukko. Abemeeleekim «I Moollanna! Ihona» yukko. Saa'oolim «Atii Daawiitii i hanenne dollottakkamok mah bikkinatte? Ixxena Waa'a uunxitaa hurbaataa bisa'aa uwwitaatto. Oono'o ixxi kaba i diinakkichchi ihaa eese sheena ixxena makkoo ammane hasukkuuyyi yookko» yukko. Abemeeleekim «Daawiit kiina ama'nnamaakkoo gaaxxi awwonsaancho; ki landichchi aro'o; ki lomba egettam waaridiyya ijaajaanchoo ki adilla'n minennem dummichchanne manni hundim lonsoo manchoo» yaa dabarukko. Hanqinam an ixxena Waa'a xa'mmaammo kukim ixxena xale'i luxxi ammaneyyo. Adila, ki hanenne dollotimmi bikkinatti yakkota'n eese te'im i abaroosa aceeqasimmi kiina labooyyo. Mashka'oomim an ka woshshi bikkina la'oommok ma'lluwwim bee'e. Adilim «Abemeeleeka! Kiinaa ki moollinaa hundinam leh hasisookko» yukko. Eehanniinsi lasage Saa'ool ixxi gadanonne uullito'i waardiyyuwwi kolli daba'llaa «Ka Waa'i qeessuwwa shi'llehe! Mashka'oomim ixxuwwi Daawiitinne maqire eesenne boqqito'ookko. Ee'isam hundem woshsham laqu'uuyyim Daawiit eese lagaa marukkisa laqqu'uuyyim iina kutto'oyyo» yukko. Ihukkaarem waardiyyuwwi «Waa'i qeessuwwa shinoommoyyo» yito'o. Ee bikkina Saa'ool Dooyiqina «Ixxuwwa at shihe» yukko. Dooyiqim ki'aa hundam shukko. Ee balla Dooyiq shaa guullu eefuuda edde'llo'i qeessuwwik xig sadeentayyee ontoo hee'ukko. Ee lasage Saa'ool qeessuwwi hee'llam hee'llo'i Noobanne hee'llam goona, meento, ooso, ciilluwwa, laro, hallaa gereebbi allaachchaa hundam guullisukko. Ihukkaarem Abemeeleek goo'n oosiinsi mat Abiyaataar yakkamok xale'i xoraa maraa Daawiitanne exxukko. Ixxim Waa'ina awwaaddam qeessuwwa Saa'ool guullukkisa Daawiitina kurukko. Daawiitim Abiyaataarina «Ee balla Eedoo'm Dooyiq ee beyyonne hee'u bikkina ka woshsha Saa'oolina kuroo'isa la'aammo. Beeddu kiyyanni mi'n abaroosina xa'mmamoommok anette. Ihukkaarem kaba iinninne afuure; baddititte. Saa'ool keesee eesee lamom sheena hasookko. Ihukkaaram at iinninne maqire xumminne hee'llootto» yukko. Daawiitinam «Oono'o, Filisxee'm manni Qa'iila qassa'a oodo'onne yoo hurbaata boggamuulla» yakka'a kurakko'o. Ee bikkina Daawiit «Maraa Filisxee'm manna qasonnihe?» yaa Waa'a xa'mmukko. Waa'im «Eeyya! Filisxee'm manna qassaa Qa'ii'l manna bichchiinsi gatise» yaa dabarukko. Ihukkaarem Daawiita awwontam keen «Ka Yihuxxi uullanne hee'nnummuuyyi baddinoommi lobakat woshshi yookko. Kaba odim Qa'iila mallaa Filisxee'm manna qansumita'n lobakat hawwi neesenne afookko» yito'o. Eehanniinsi ki'ukkok Daawiit la'mmaagem Waa'a xa'mmukko. Waa'im Filisxee'm manna ki anganne higisaa uwwoommi bikkina Qa'iila dille» yukko. Ee bikkina Daawiitii ixxi awwonaanii Qa'iila matta'a Filisxee'm manna qassa'a lobakat manna shito'o. Ixxuwwi diinatem qeefadda'a massito'o. Daawiitim Qa'ii'l minaadaba ee'isinne gatisukko. Abemeeleek beet Abiyaataar Daawiit beyyo Qa'iila gibu ammane Eefuuda amadaa dillaa hee'ukko. Saa'oolinam Daawiit Qa'iila waarukkisa kurakko'i ammanenne «Waa'i ixxo i anganne ubbuuseenatte. Daawiit kininne girbamu ootii baxamu ooxxi gooccuwwii yoo beero'o iggaa aagimminne ixxi gaga woshaadanne aagisaakko» yukko. Ee bikkina Saa'ool ixxi gogata orina weeshaa Qa'ii'l uulla gaadimminne Daawiitaa ixxi awwonaanoo kibbitamisna ijaajukko. Daawiit ixxonne hawwo afiseena Saa'ool gudukkisa macceesu ammanenne qeessichchi Abiyaataarina «Eefuuda amaddaa waare» yukko. Ee lasage Daawiit «Isra'ee'l Moollanni ikkitti Waa'a! Ki awwaadaanchi ihummi i mashka'inne Saa'ool waaraa Qa'iila bi'iseena gudukkisa macceesaammo. Eehannah Qa'ii'l manni eese higissa'a uwwitamda'e? Saa'oolim ka uulla dillooda'e? Isra'ee'l Moollanni Waa'a ki agishshina kutto'isina an keese uunxoommo» yukko. Waa'im «Eeyya! Saa'ool hanqinam waarookko» yaa dabarukko. Daawiitim «Qa'ii'l beero'onne hee'llam manni eesee awwontam mannaa Saa'oolina higissa'a uwwitamda'e?» yaa odim xa'mmukko. Waa'im «Eeyya! Ki'nnuwwa higissa'a uwwitamo» yaa dabarukko. Ee bikkina Daawiitii loh xibbe ikkam ixxi awwonaanii hundim ee ammanchom Qa'iila utta'a matto'o. Saa'oolim Qa'ii'l beero'iinsi maraa ixxeensi xorukkisa macceesu ammanenne gudisu woshsha urukko. Daawiit uulli udma'anne Ziif gadanonne yoo duunaam uullanne afuurukko. Saa'oolim balli hundichchom ixxo laseesam hee'ukko. Ihukkaarem Waa'i Daawiita higisaa uwwukkoyyo. Daawiitim Saa'ool ixxo sheena waarukkisa moo'ukko. Daawiit Ziif gadanonne yoo uulli udma'anne Hooreesh yakkam beyyonne hee'ukko. Yoonaataanim ee beyyi afeebe'e maraa Waa'i amma'nnisoo'isanne egeroohan ihukkisa la'isimminne «Baddititte iyyanni Saa'ool keese ixxi anginne hawwodeena hore'em xanooyyo. At Isra'eelina adil ikkoo'isaa iinam kiinniinsi woroon la'm beyyi adillan hee'oo'isaa iyyanni danaamisa la'ookko» yaa qoxxisansukko. Ee bikkina lamim Waa'i illagenne iitti saga'l hidiro aaggo'o. Ee beyyiinsim Yoonaataan ixxi mi'n beyyo marukko. Ihukkaarem Daawiit Hooreeshannem afuurukko. Ziif manniinsi mat mat Giibi'anne hee'oo Saa'ool beyyo matta'a «Daawiit ni uullanne Yihuxxi uulli udma'iinsi woroo'n qarinne yoo Hakii'l duunanne yoo Hooreeshanne maaxamaakko. Adila, at ixxo amaddeena hinkaa'nna hassooda'e lanqoommo. Ee bikkina ni uulla waattita'n neese ixxo kiina amaddaa hara'mminam hee'nnummo» yito'o. Saa'oolim ixxuwwina «Iina ka eroomma sawwitakko'i bikkina Waa'i ki'nnuwwa maasse'ona Kabadem mattakka'a ka woshsha odim qoossehe. Ixxi yoo beyyo moo'u manchi ayyetda'e ihukkisa annan issitakka'a laqqehe. Ixxi xorakkamisa la'oohan ihukkisa macceesaammo. Ixxi maaxamoo beyyuwwa erisa laqqehe; siiddakko'i mare'uwwa ee ammanem amaddakka'a waallehe. Ee lasage anim ki'nnuwwinne maqirem maroommo. Kabadem ixxi ee uullanne yoohan ihulas Yihuxxi uulla hundam hasimmi iina hasisoohan ihukkaarem an ixxo hochchaa amadoommo» yukko. Ee bikkina ixxuwwi Saa'ool mareena illaageen Ziifa daba'llita'a matto'o. Ee ammane Daawiitii ixxi awwonaanii Yihuxxi uulli udma'iinsi woroo'n qaranne hee'oo ayyi manchim hee'oobee'i cebbi ihaakkoo Maa'oo'n udma'anne hee'llo'o. Saa'oolii ixxi gogotii Daawiita hollansiteena fitta'a matto'o. Daawiitim eekka la'u bikkina Maa'oo'n uulli udma'anne kin wo'mmaakkoo mat duunanne firaa eehe'e afuurukko. Saa'oolim eekka macceesu ammanenne Daawiita lobakata hollansukko. Saa'oolii ixxi gogotii ee duuniinsi mat kollinne hee'llu'uuyyi Daawiitii ixxi awwonaanii ee duuniinsi mulli kollonne hee'llo'o. Daawiitii ixxi awwonaanii qeefaddeena hincito'i Saa'ooliinsii ixxi gogotiinsii xoteena gaaggaabbam hee'llo'o. Ee'isanne hee'llu'uuyyim mat asse'ammaanchi Saa'ool beyyo waaraa «Filisxee'm manni uullanne weeratto'i bikkina qaqqissaa afe» yukko. Ee bikkina Daawiit hollansimma uraa Saa'ool Filisxee'm manninne orameena marukko. Eehanniinsi ki'ukkok ee beyyika summa «Xorimmi kina» yita'a weeshsho'o. Daawiitim ee beyyiinsi maraa maaxamaa hee'u «Eengadii» yakkam beyyonne afuurukko. Saa'ool Filisxee'm manna hollansimmiinsi daba'llaa lasonne «Oono, Daawiit Eengaadii yakkam ulli udma'anne yookko» yakka'a kurakko'o. Ee bikkina Saa'ool Isra'ee'l minaadab hundiinsim doo'llanto'oo sas kum manna amadaa «Eengaadii» yakkam ulli udma'a eelliinchi firoo kollo Daawiitaa ixxi mannaa hollansaa amadeena marukko. Gooqqi inqenne yoo gereebbi garoo beyyuwwi gadanonne yoo mat giriboronne usheexxeena aagukko. Daawiitii ixxi awwonaanim ee giriboronne maaxamta'a afuutta'a hee'llo'o. Daawiit awwonaanim ixxena «Waa'i iittittoka issitoo'isina ki diinakkichcho ki anganne higisaa uwweena kiina kuru balli kaballa» yito'o. Daawiitim biqinne shurukkuuyyi maraa Saa'ool eddechchika kasa ayyim la'oo'n muraa massukko. Ihukkaarem Daawiitik tiir usheexxukkoyyo. Ee bikkina ixxi awwonaanina «Waa'i doo'llaa adil issu i moollanni hanenne i anga ki'isimmiinsi Waa'i eese egerona; an ixxonne matem hawwojjam afisimmi hasisooyyo. Mashka'oomim ixxo Waa'i adil issaakkoohane» yukko. Eehid Yimminne ixxi awwonaan Saa'oola hawwoddambee'isa Daawiit hoorukko. Saa'oolim ee beyyiinsi ki'aa ee worko'iinsi firaa marukko. Daawiitim ee beyyiinsi firaa Saa'oola awwonaa «Adila!» yukko. Saa'oolim daba'llaa ixxi kululleeta moo'ukkaare Daawiit uullanne heeshaa xummaatisaa «An keesenne hawwo afisoommaannisa issita'a kuttam mannika woshsha mahina macceessoolla? Kaballa ka ammanenne giriboronne hee'llittuuyyi Waa'i keese i anganne ubbuusaa hee'ukkisa at gagoomim moo'lleena xantootto. Mat mat manni keese shoommisina kutta'a hee'llo'o. Ihukkaarem an kiina qishixxaa keesenne matem hawwom isseena hasoombee'isa kurummo. Mashka'oomim at Waa'i doollaakkoo adila. Iyyanna! Oono'o! At ede'llitti kaabbiinsi muraa amadummi kasa moo'ee! Ee ammane an keese sheena xanam hee'ummo; ihukkaarem eekka issoommi bikkenne ki eddechchika kasa muraa aa'ummo. Ihukkaarem ka jolla te'im boqqooma issumbee'isa la'e; qoosseme. An keesenne jor luwwa baxummoyyo. Ihukkaarem at eese shiteena hollansitoolla. Ee bikkina ka woshshanne huushamukkok Ayyetda'e moo'aa Waa'i oogatona. An keesenne mah hawwom afiseena hasoombee'i bikkina i hanenne issitoo jor luwwi bikkina hundinam Waa'i kiinniinsi baado miqisona bagaan, i anginne an keese hawwodoommoyyo. ‹Jor luwwa baxxamok xale'i jor manna› yamamoo gaassi woshsha laqqootto; ee bikkina an keese hawwodeena hasoommoyyo. Oono'o, Isra'ee'l adil ayye sheena hasoolda'e moo'ee! Ayyem hollansoolda'e qoosse! Lehu wishichchonnii te'im kora? Ayye hollansoolda'e moo'e! Kabadem Waa'i daanni ihaa ni lame'enne oogatona. I quuxo moo'aa ixxi iina fitamona. Eesem ki angiinsi gatisona» yukko. Daawiit ee woshsha wocaa guullukkisam Saa'ool «I beet Daawiita! Hanqinam kuk ki sagarannihe?» yaa wi'llukko. Ee lasage Saa'ool Daawiitina at hanqo'i mancho. Ihukkaarem an huushamaammo. An keesenne kido'i jora issummuuyyim at iina eroomma issitaatto! Iina eroomma issitoo manchi ikkittisam kaballa naqqasissaatto. Mashka'oomim Waa'i eese ki anganne ubbuusukkaarem at eese shittoyyo. Ixxi Diinakkichchi ixxi anganne aagoohaare hawwodoo'n fatakoo manchi hannonne hee'ookko? Kaballa iina issitti eroommi bikkina Waa'i keese maasse'ona! Oono'o, at Isra'ee'l adil ikkoo'isaa Isra'ee'l minaadaphphi adillanim ki gassonne qoxxaa hee'oo'isaa kaballa qoossaa la'aammo. I shumo'o bi'issoobee'isaa i summam iyyanni miniinsi bi'issoobee'isaa kaba Waa'i illagenne hide'e» yukko. Daawiitim eekka isseena hide'ukko. Ee lasage Saa'ool mine daba'llaa elle'ukko. Daawiitii ixxi awwonaanim maaxamtam beyyo daba'llita'a matto'o. Saamu'eel lehukko. Isra'ee'l minaadab mateeyyoominne waatta'a ixxena wi'llito'o. Ee lasage Raama'anne yoo ixxi minenne waammakko'o. Ee lasage Daawiit ki'aa Faaraanaa yakkam uulli udma'a marukko. Naabaalim ixxi gereebbi odda mussiisoo'isa Daawiit udma'anne hee'ukkuuyyi macceesukko. Ixxim tommi woraadduwwa «Qarmeeloosanne yoo Naabaal beyyo mattakka'a i summinne xummaato hincaa'llehe. Ixxenam ‹Ki umur qeeraa'llona! Xummim kiina ihona; xummi ki abaroosinaa kiihan ihu luwwinaa hundinam ihona. Ka ammanenne ki gereebbika odda mutto'isa macceesaammo. Ki allaaraan niinninne maqire hee'llo'i ammane ma'lluwwam hawwondummoyyo. Qarmeeloosanne hee'llo'i amman hundannem ixxuwwiinsi ma'lluwwim bi'ukkoyyo. Ixxuwwam xa'mmitta'n ka woshsha kuttamo. Oono'o kaballa liiranchi maadda issitoo ballanne neese waallaammo; ee bikkina ku ki beyyo asse'ummi woraadduwwi ki illagenne nuura siiddona. Ee bikkina ka ki awwaadaaninaa ki iitti manchi Daawiitinaa at uwwiteena xantoo qax luwwa uwwe» yaa asse'ukko. Daawiit asse'u mannim ka asso Daawiit summinne Naabaalina kutta'a ixxi uwwoo luwwa ege'llita'a hee'llo'o. Naabaalim Daawiit asse'u awwaadaanina «Issayyi beetdu ayyette? An ixxi bikkina macceesaa la'oommoyyo. Ka ammanenne ixxuwwi moollanno'iinsi gibbam awwaadaan duta. Eehannah i hurbaataa i wo'oo ee'isam i gereebbi odda muttam mannina durummi lijjaa hanniinsi waattoda'e la'amoobee'i mannina mahina uwwoommane?» yukko. Daawiit asse'u mannim waatto'i kollom daba'llito'o; eekke'e affo'isam Naabaal yu luwwi hundam Daawiitina kutto'o. Daawiitim ixxi mannina «Ki'llehe bisa'a lade'llehe!» yaa ijaajukko. Ixxuwwim ijaajanto'isam issito'o. Daawiit ixxi gagoomim bisa'a lade'ukko. Mu'uta egettam lam xibbi manna uraa soor xibbi manna awwonsaa gaalgaala mareena ki'ukko. Naabaal awwaadaaniinsi mat Naabaal aretti ikko'i Abigeelena «Ka woshsha macceessaa hee'llitonnihe? Daawiit ixxi yoo udma'i uulliinsi ixxi awwaadaano xummaatinne maqirem ni moollanni beyyo asse'aa hee'ukko; ihukkaarem ixxi game'llaa ixxuwwa sholliisukko. Ihukkaarem ixxuwwi niina lobakata er manni hee'llo'o. Neesennem matem hawwom afisso'oyyo. Ixxuwwinne maqire haqqoronne hee'nnummuuyyi ni diinatiinsi matim bi'u balli bee'e. Ni diinate allaallaa afuullummi ammanenne hundannem ixxuwwi neese ballaa hiimoo egeraan hee'llo'o. Kabadem ihukkaare ni moollannannee ixxi abaroosannee hawwi waarukkuuyyatte ihu bikkina sawwitaa issitoo luwwa isse; ihukkaarem ixxi manni woshsha aa'oobee'i manchi ihu bikkina ixxenne iggaa wocookkok mat manchim bee'e» yukko. Abigeelem qaqqissa'a lam xibbi injeera, lam can woyi'n diqaasa, saramaakkoo onti gereebbi maara, tommoo lamar kiilo'i saramaakkoo hamaama, mat xibbi woyi'n shogaa lam xibbi oda'i mishaa wixxaa'lla'a hallanne iyyiisso'o. Ee lasage is awwaadaanina «Higgakka'a mallehe; anim ki'nnuwwa awwonoommo» yito'o. Ihukkaarem is manchina ma'lluwwam kutto'oyyo. Isem hallichchonne Saa'llita'a gaalgaaltu'uuyyi duu'n gammalanne yoo inciicammi googinne dillitu'uuyyi dangonnem Daawiitii ixxi awwonaanii is kolli waattu'uuyyi siiddo'o. Daawiitim ixxi wodanonne «Ee awwaad bee'i manchikka amaxxa ka uulli udma'anne mahina allaarummo? Ixxan ihu amaxxiinsi ma'llichchim game'amaa la'ooyyo; eehannina ixxi iina dabaroo angi kan ihaa gatukkonnihe? Ku uulli soodoo'n ixxan ihu goo'n ooso hundam shoo'n urumlas Waa'i eese lehinne guzumo'ona» yaa sawwam hee'ukko. Abigeelem Daawiita moo'llo'i ammanenne ee ammanchom saa'llito'i hallichchiinsi dillita'a Daawiit illagenne heeshita'a xummaatisso'o. Ixxi lokkonnem ubba'a «I Moollanna ixxi bi'ishshi xale'i eesenne ihona; hay an ki awwaadaancho wocoommi woshsha macceese. Naabaal woshsha umuraam issitaa xiggite! Ixxi ma'llichchom awwaadoobee'i mancho! Ixxi ee ixxi summisam qawwoom tuubamaakkoo mancho. I Moollanna oo ki awwaadaan waatto'i ammane an ee beyyonne hee'ummoyyo. Baado fitteena ki diina'a shitoobee'isa keese egerukkok Waa'i ixxi gagoomame. Ono'o, kaba an hee'oo Waa'i summinne kiina hide'oommo. Ki diina'ii keese hawwoddeena hassam keenii hundim Naabaalisam guzumo'antona. I Moollanna! Hay ka kiina uwweena eebummi luwwa aa'llaa keese awwonto'i keenina baxxanse. I moollanna! An keese hawwodummoka uraammo yihe. Waa'i keesee ki shumo'oo adilluwwi issookko. Mashka'oomim at orantoollak Waa'i bikkinatte; at hee'lloo doollenne hundannem matem jor luwwam issiteena hassooyyo. Ayyi manchim keese dangisaa sheena hasuta'nnim mat manchi ixxeka iittoo hora allaaroo'isa ki Moollanni Waa'i keese xumminne egerookko. Ki diina'uwwam ihuta'n mat manchi kina yambarishiinsi daraboo'isa Waa'i ixxi gagoomim ee'isam darabookko. Waa'i kiina aagu neeyyaxxi saga'llisannem er luwwa hundam issaa Isra'eelanne keese adil issoo ammane ki tiironne keese gaabbisoo luwwi te'im acceeqasoo luwwi hee'ooyyo. I moollanna, at baado miqisseena mashka'i bee'em shitti manni bee'e. Ee bikkina i moollanna, keese Waa'i maasse'oo ammane eesem xadditte» yito'o. Daawiitim Abigeelena «Kaballa iinninne edantoo'isina keese i beyyo asse'u Isra'ee'l Moollanni Waa'i galaxxamona! Kaballa an xiiga dunimmiinsii baado miqisimmiinsii egedu ki er sawwit maasse'amaakkoohan ihona atim maasse'ame. An keesenne hawwojja afisoombee'isa Waa'i eese egeraakko. At qaqqissaa i beyyo waattibeeta'n Naabaal goo'n oosiinsi matom gatisoo'n uulli soodeebe'e shaa guulleena hee'oo Waa'i summinne hide'aa hee'ummo!» yukko. Ee lasage Daawiit ise ixxena eebbo'i luwwa aa'aa «Ki mine daba'llitaa xumminne elle'e; ki uunxato an macceesummi bikkina at xa'mmitti luwwi hundam kiina issoommo» yukko. Abigeelem adi'l mi'n maaddisa lobakat maadda issam hee'u Naabaal beyyo daba'llita'a matto'o. Ixxim dimbaa liiranchinne hindiqam hee'u bikkina la'm balli dar afeebe'e matem woshsham kutto'oyyo. La'm balli dara ixxek dimbi billaa lasage hundem luwwam kutto'o. Ixxi wodanim muggimminne duudaa kin ihukko. Naabaalim tommi balliinsi lasonne Waa'i ixxo qasu bikkina lehukko. Daawiitim Naabaal lehukkisa macceesu ammanenne «Eese game'llu bikkina Waa'i Naabaaliinsi baado miqisu bikkinaa eesem huushanchiinsi egeru bikkinaa Waa'i galaxxamona! Ixxi Naabaala ixxi jor bax bikkina guzumo'aakko» yukko. Ee lasage Daawiit Abigeel beyyo manna asse'aa ise eebeena hasoo'isa kurukko. Ixxi awwaadaanim Abigeel beyyo Qarmeeloosa matta'a «Keese Daawiit aretti ikkona hasu bikkina massineena waallaammo» yito'o. Abigeelem uullanne heeshita'a anga ki'issa'a «An ixxena mi'n awwaadaanchotte; ixxi awwaadaa'nnekam lokko aansheena gudaammookkotane» yito'o. Qaqqissa'a ki'lla'a is hallichchonne saa'llito'o. Is awwaadaa'nnekam onti meento edda'a Daawiit awwaadaaninne maqirem matta'a Daawiitina arette ikko'o. Kanniinsi illageen Daawiit Yizra'ee'l Ahino'aame eebaa hee'ukko. Kaba odim Abigeele eebukko. Ihukkaarem Saa'ool Daawiit meentichchotte hee'llo'i ixxi landichcho Meelkoole Gaalii'm uulli Laawiish beet Faaliidina ladiisukko. Ziif yakkam uulliinsi hofqax mannim Saa'ool yoo Gibi'aa yakkam beyyo matta'a «Oono'o, Daawiit Yihuxxi uulli udma'i tochchonne Hakiilaa yakkam duunanne maaxamaakko» yita'a kutto'o. Ee bikkina Saa'ool Isra'ee'l minaadabiinsi doo'llanto'i sas kum gaadaano awwonsaa Daawiita haseena Ziif uulli udma'a qaqqisaa marukko. Saa'ool Hakiila yakkam duu'n hanenne yoo gooqqi gadanonne wiiddanaa hee'ukko; Daawiit uulli udma'anne hee'ukkuuyyim Saa'ool ixxo sheena waarukkisa macceesaa Shaashshoo manna asse'aa Saa'ool ee beyyo hanqo'isam afukkisa la'ukko. Ee beyyiinsim qaqqisaa maraa Saa'oolii ixxi gaadaanii ixxi gaadaa'n awwonsaanchi Neer beet Abaaneerii hee'llam beyyo qoossukko. Saa'oolim ixxi wiiddanu beyyi lambe'enne iinse'aa hee'ukkuuyyi ixxi gaadaan ixxi kululleetanne wiiddanta'a hee'llo'o. Ee lasage Daawiit Hiite'kkichchi Abemeeleekaa Xaruy oosiinsi Yoo'aab abbaayyi Abiisaa «Ki'nnuwwi lamiinsim iinninne maqire Saa'ool wiiddanu beyyo marookkok ayyette?» yaa xa'mmukko. Abiisim «An maroommo» yaa dabarukko. Ee bikkina Daawiitii Abiisii ee hiimo Saa'ool wiiddanu beyyo aaggo'o; Saa'oolim ixxi wiiddanu beyyi lambe'enne iinse'aakkoo siiddo'o. Ixxi bagadim ixxi horoo'llaganne uullanne kaasamaa hee'ukko. Abaaneerii ixxi gaadaanim ixxi kululleelanne iinse'lla'a hee'llo'o. Abiisim Daawiitina «Waa'i ka hiimonne ki diinakkichcho ki anganne ubbuusaakko. Ee bikkina ka ixxi bagadinnem ixxo qasaa uullanne amaxxansaa uroommo; xale'i mat qashshi ihoo bikkina la'mmek hasisooyyo» yukko. Ihukkaarem Daawiit «Ixxo at shimmi hasisooyyo! Waa'i doo'llaa adil issu manna shoo manna Waa'i ixxi gagoomim guzumo'ookko. hee'oo Waa'i summinne kiina hide'aa kuroommo; Waa'i ixxi gagoomim Saa'oola shookko. Lehoo balli afaa te'im orinne ixxi lehoo'n gatooyyo. Waa'i doo'llaa adil isukkaannonne hawwojja afisimmi iinniinsi qee'llona. Eehan ihoo'n ixxeka bagadoo wo'o inkiiraanchoo amandaa mallona» yukko. Ee bikkina Daawiit ixxi bagadoo wo'o inkiiraanchoo Saa'ool horoo'llagiinsi ki'isaa ixxii Abiisii ee beyyiinsi matto'o. Ku woshshi hundim ihukkuuyyi ayyim eekka moo'ukkokii baqaahim la'ukkokii hee'ukkoyyo. Mashka'oomim Waa'i ixxuwwanne kee'mmaalli diriiro fatakaa hee'u bikkina qallita'a diriitta'a hee'llo'o. Ee lasage Daawiit cebbi eeqidonne ixxi Diina'i afeena xanoobee'i beyyonne duu'n ludonne firukko. Ixxi sagara iimaa'aa Saa'ool gaadaa'n kollii Abaaneer kollii Shuurukkuuyyi «Abaneeraa macceesaatennihe?» yukko. Abaaneerim «Ka'isa shuurukkuuyyi adilina diriiro hoorookkok ayyette?» yukko. Daawiitim «Abaneeraa! At Isra'eelanne la'antaattoo geejji manchoyyonnihe? Eehannah ki moollanni adila danaamisa egettoobee'ek mahinatte? Oono'o ni manniinsi mat manchi ki moollanna sheena wiidda'n woro aagaa hee'ukko. At ki baxonne amma'nnantaa siidantittoyyo. Abaneeraa! An hee'oo Waa'i summinne hide'oommo. Ki'nnuwwina hundinam lehimmi hasisookko. Mashka'oomim Waa'i doo'llaa adil issu ki'n moollanni adila egettakkeena xantakko'oyyo. Ixxi horoo'llaganne hee'u adi'l bagadii wo'o inkiiraanchii kaba hannonne yooda'e moo'e!» yukko. Saa'oolim Daawiit sagara annanni issaa la'u bikkina «I beet Daawiita! Hanqinam kuk ki sagarannihe?» yaa xa'mmukko. Daawiitim «Eeyya adila!» yaa dabarukko. I moollanna eese ki awwaadaancho mahina hoollansitoolla? Issummi luwwi mahaa? Mah jora baxummahe? Adila! An kiina kuroommi woshsha macceese! Keese iina adil issukkok Waa'i ihaakkoota'n kitima hincaa'imminne ixxi quunqa dabaroo'isina issimmi xansiisam hee'ukko. Ihukkaarem kaka issito'ok manni ikko'oolas Waa'ik duunchi ixxuwwi hanenne dillona. Mashka'oomim Waa'anne otossakkam uulliinsi yaayyamaa firaa qophpha'n waa'uwwanne otossakkam uullanne afuuroommisa issito'ookko. Waa'iinsi qee'llaa mulli minaadab uullanne lehoommisa issititte. Kaa'n lombaam Isra'ee'l adil kochchisa xigamoommi eese mahina hollansoohane? Uulli udma'i heedoo'llisa eese hollansookkok mahinate?» yukko? Saa'oolim «Hanqinam an huushamaammo; I beet Daawiita! I beyyo daba'llitaa waare; an la'mmaagge keese hawwodeena hasoommoyyo; mashka'oomim ka hiimonne i foore gatissaatto; an qawwi manchisa ihaammo; Kee'mmaallisam huushamaammo!» yaa dabarukko. Daawiitim «Adila! Oono'o, ki bagado ki gaadaaniinsi mat manchi waaraa massona. Ama'nnanto'i er mannina ixxuwwi er baxika bito miqookkok Waa'a! Oono'o, Waa'i keese kaballa i anganne ubbuusaa hee'ukko. Ihukkaarem Waa'i doo'llaa adil issu keese an hawwodeena hasummoyyo. An kaballa ki foore lonsummisa Waa'i eese ee'isam hawwii fissimminne egerona» yaa dabarukko. Saa'oolim Daawiitina «I beeto! Waa'i keese maasse'ona; baxxoo luwwi hundim kiina makkona» yukko. Ee bikkina Daawiit hasu beyyo marukko. Saa'oolim ixxi mine elle'ukko. Daawiitim ixxi wodanonne «Mat balla Saa'ool eese shookko. Kaba iina e'llookkok ixxeensi xoraa Filisxee'm uulla marimma; ee lasage Saa'ool Isra'ee'l uullanne eese hasimma uroo bikkina xumminne hee'eena xanoommo» yaa sawwukko. Ee bikkina Daawiitii ixxek lohem xibbi awwonaanii ee ammanem ki'lla'a Gaat adil ihu Maa'ook beet Akiish beyyo matto'o. Daawiitii ixxi awwonaanim ixxuwwi abaroosinne maqirem Gaatanne afuutto'o. Daawiitim ixxi lamem meentinne, Yizra'ee'l Ahino'aamennee Qarmeeloos Naabaal arette hee'llo'i Abigeelennee maqire hee'ukko. Saa'oolim Daawiit Gaata yakkam uulla gibaa marukkisa macceesu ammanenne ixxo hasaa siideena issam hee'u yakit hundam urukko. Daawiitim adil Akiishina «Eese iittitoohan ikkittaa'lleensi mat hoffi beero'onne hee'oommisa isse. I moollanna, ki adilla'n beero'onne kiinninne maqire hee'immi iina labooyyo» yukko. Ee bikkina Akiish Xiqlaaga yakkam beero'o Daawiitina uwwukko. Ee mashka'inne ee ammaniinsi ki'isaa Xiqlaag Yihuxxi adilluwwi uulli ihaa gatukko. Ee'isinne Daawiit Filisxee'm uullanne mat hiinchoo soor aganaa afuurukko. Ee doollenne Daawiitii ixxi awwonaanii ee uullanne qeeraa'l doolle hee'llo'i Gashuu'lleka, Geriizikaa Amaaleeq mannaa qasso'o. Oo mannim Tele'oomiinsi ki'isaa Suurannee Gibxi uullannee afeebe'e yoo uullanne hee'llo'o. Goonaa meentoo hundam shukkuuyyii gereebba, laro, halla, gaameela'aa eddechchaa hundam massam hee'ukko. Ee lasage Daawiit Akiish beyyo daba'llukko. Akiishim «Kakore, gaaddakko'ok hinka'i kollinnette?» yaa xa'mmukkaare Daawiiti «Neese gaandummok Yihuxxi uulliinsi woroo'n qarinne yoo kollinnee ee'isam Yiraahimaa'eel sulli uullinnee Qeene'i manni hee'llam uullinette» yaa dabarukko. Daawiitim «Ixxi ka'isa issaakko yita'a ni bikkina kuttamo» yaa sawwu bikkina goonchom ihukko meentichcho foorinne gatisaa Gaata yakkam beero'o eebukkoyyo. Filisxee'm uullanne hee'u doollenne hundannem ee'isa issimmi ixxena losamaakkoohan hee'ukko. Ihukkaarem Akiish Daawiita amma'nnam hee'u bikkina «Ixxi gaqqi minaadab ihu Isra'eel ixxo iittoobee'i bikkina ixxi heechchi doollenne hundannem iina awwaadookko» yaa sawwam hee'ukko. Ee lasage Filisxee'm manni Isra'ee'l manna qasseena ixxuwwi gogota wixxaa'llo'o. Akiishim Daawiitina «Atii ki awwonaanii maqirem orina firimmi hasisoo'isa la'e!» yukko. Daawiitim «An ki awwaadaanchi maha issoomda'e ee ammane at ki gagoomim moo'llootto» yukko. Akiishim «Erane! An keese hee'oommi doollenne hundannem i lombi waardiyyichchi issoommo» yukko. Kaba Saamu'eel lehukkaanniinsi bashil amman higaakko. Isra'ee'l minaadabim ixxi bikkina kichche'lla'a wi'llita'a ixxi hee'am hee'u Raama'i beero'onne waammito'ookko. Kanniinsi illageen Saa'ool kiiraanoo wiidda weeshoo keenoo Isra'ee'l uulliinsi yaayyaa hee'ukko. Filisxee'm gaadaan wixxita'a waatta'a Shuunee'm beero'i gadanonne wiiddanto'o. Saa'oolim Isra'ee'l manna wixxaa'aa waaraa Gilbo'i duunanne wiiddanukko. Saa'ool Filisxee'm gaadaa'n dutooma moo'u ammanenne lobakata baa'aa huxe'ukko. Ee bikkina maha issimmi hasisooda'e Waa'a xa'mmukko. Ihukkaarem Waa'i haqaawwinne, Uuriiminne, Tuumiiminnee hiraagaa'n kollinnee dabachcha uwwukkoyyo. Ee bikkina Saa'ool «Wiidda weeshsham mat meentichcho hassehe; anim iseensi sogitano aa'oommo» yaa ixxi gassaano ijaajukko. Ixxuwwim «Mat Indoorekkichcho meentichcho yo'o» yita'a dabatto'o. Saa'oolim ixxi gaqqi eddechcha dabassaa ixxo ayyim la'oobee'isa ihaa hiimonne lam mancho awwonsaa ee meentichchi beyyo marukko. Ee beyyo afukkisam «Ayyaannuwwa weeshshaa ka lasage ihoo woshshi bikkina kure. Ixxi summa weeshoommi manchikam wiidda weeshe» yukko. Oo meentichchom «Adil Saa'ool issu luwwa laqqootto; ixxi kiiraanoo wiidda weeshoo keenoo Isra'ee'l uulliinsi bi'isaakko; eehannah at eese qaashanne aagissaa shisiisseena hassoottok mahinatte?» yita'a dabatto'o. Ee lasage Saa'ool «Ka woshshanne keesenne matem hawwim afoobee'isina hee'oo Waa'i summinne hide'oommo» yukko. «Eehannah ayye ki'isahe?» yita'a xa'mmito'o. Ixxim «Saamu'eela ki'ise» yukko. Isem Saamu'eela moo'llo'i ammanenne sagara haraassita'a laattu'uuyyi «Eese mahina qawwiissitto? At adil Saa'oolatte» yita'a laatto'o. Adilim «Maham baddititte! Eehan ihoo'n moo'l luwwi maha?» yaa xa'mmukko. Isem «Waa'ik mat hibbaam ayyaan waammiinsi firukkuuyyi mo'oommuulla» yito'o. Ixxim «Maha laboolla?» yaa xa'mmukko. Isem «Oono'o kaabba edde'aakkoo mat lommanchi ki'oolla» yita'a dabatto'o. Saa'oolim oo ayyaan Saamu'eelatte ihukkisa la'aa ixxi lombi bikkina uullanne heeshaa anga ki'isukko. Saamu'eelim Saa'oolina «Usheexeena hoottoollak mah bikkinatte? Mah bikkina waammiinsi ki'oommisina weeshissitto?» yukko. Saa'oolim «Oono'o an kee'mmaalli hawwonne yoommo; Filisxee'm manni iinninne orantamuulla; Waa'im eese uraakko; hiraagaa'n kollinnee haqaawwinnee dabachcha uwweena hasukkoyyo; ee bikkina an maha issimmi hasisooda'e iina kuttona ki'lloo'isina weeshisummo» yaa dabarukko. Saamu'eelim Saa'oolina «Waa'i kiinniinsi annanni ihaa ki diinakkichchi ihukkaa'lleensi eese mahina weeshissoolla? Waa'i i kollinne ihaa kiina kuru luwwi hundam kaba wonshoolla. Adillanom kiinniinsi hooraa Daawiitina uwwaakko. At Waa'ina ijaajantibee'i bikkina ixxi Amaaleeq minaadabanne lobakata quuqaa isse yu luwwa issitti bee'i bikkina kaballa keesenne Waa'i kaka issaakko. Ee bikkina Waa'i keesee Isra'ee'l minaadabaa Filisxee'm minaadabina higisaa uwwookko. Soodo atii ki oosii an yoommi beyyo waattakkamo; Waa'im Isra'ee'l gogota Filisxeemina higisaa uwwookko» yukko. Saa'oolim Saamu'eel wocu sagaranne muggaa lafilafaa ubukko. Uullanne biddiqaa ubaa ballaa hiimoo hundam wo'oo hurbaataa suumenne aagisu bee'i bikkina hoogaa hee'ukko. Oo meentichchom hincita'a moo'llamaare baddaa huxe'am hee'ukko. Isem «I moollanna! At yitti luwwa isseena i gaga higisaa uwwaammo. At odim ki kollinne an keese xa'mmoommi luwwa isse; hoffi hurbaatam kiina gudisoommo qoxxitaa taakke'lloo'isina hurbaata itimmi hasisookko» yito'o. Saa'oolim «Ma'lluwwam itoommoyyo» yaa sabukko. Ihukkaarem ixxi gassaan itoo'isina meentichchonne maqirem xishshaa'lla'a uunxito'i bikkina «Ihona» yukko. Uullanne ubu beyyiinsim ki'aa ara'anne afuurukko. Oo meentichchom is minenne hee'u di'ir wee'ichcho qaqqissa'a dussiissa'a hoffi qamam aa'illa'a qufissa'a, urisho'i bee'i qorosho'o satto'o. Ee hurbaatam Saa'oolinaa ixxi gassaaninaa hincaa'llo'aare itto'o. Ee hiimom ee beyyiinsi ki'lla'a matto'o. Filisxee'm manni ixxuwwi gogota hundam Afeeqa yakkam beyyonne wixxaa'llo'o. Isra'ee'l minaadabim Yizra'ee'l cebbanne yoo bu'i gadanonne wiiddanto'o. Ontem Filisxee'm adilluwwim xibbee kumaa ikka'a gaalchi gaalchinne baxxansanto'i gaadaaninne maqire gaaddo'o. Daawiitii ixxi awwonaanim Akiishina hara'mmaan ikka'a gaaddo'o. Filisxee'm gaaxxi awwonsaan ixxuwwa moo'lla'a «Ku Ibro'i manni keyye maha baxxamuulla?» yita'a xa'mmito'o. Akiishim «Kuk Isra'ee'l adilina gassaanchi hee'u Daawiitatteyyonnihe? Ixxi iinninne hee'imma asheerukkaanniinsi lobakat ammane ihaakko. Ixxi Saa'oola lagaa waaru ammaniinsi kid eese kichche'isoo hawwojja maham siidummoyyo» yukko. Ihukkaarem Filisxee'm gaaxxi awwonsaan Akiishanne quuqqa'a «Ka mancho ee uwwitti beero'om daba'llaa maroo'isa isse; orammummuuyyi ni hanenne diinakkichchi ihaa ki'oobee'isa niinninne maqire orina marimmi hasisooyyo; ni mannika horoore muraa massubeelas ixxi moollanninne hinkid ihaa iittameena xanookko? Kanniinsi ellageenim landi ‹Saa'ool kuma shukko! Daawiit kaakuma shukko› yaa kadukkok ka Daawiitinayyonnihe?» yito'o. Ee bikkina Akiish Daawiita weeshaa «At iina ama'nnantaattoohan ikkittisa hee'oo Waa'i summinne hide'oommo. Ka orannem gaaddita'n liiramam hee'ummo. Mashka'oomam i beyyo waattittaanniinsi kid eese kichche'isoo jolla baxxittuuyyi moo'ummoyyo. Ihukkaarem mulli adilluwwi at exxitaa gaadimma hasso'oyyo. Ee bikkina ixxuwwa liiransoobee'i baxo baximmiinsi xummanne ki mine daba'llitta'n e'llookko» yukko. Daawiitim «I moollanna an maha hawwodummo? At yitittisam an kiina awwaadimma amadummi ammaniinsi ki'isaa eesenne jolli siidamubeelas i moollannaa i adilaa ikkitti keese awwonaa gaadimminne ki diina'a qaseena xanoombee'ek mah bikkinatte?» yukko. Akiishim Daawiitina «An i bikkina iittamoommo; mashka'oomim at Waa'i asse'amaani'nnoo'i muccur ikkittisa an la'oommo. Ihukkaarem Filisxee'm gaaxxi awwonsaan ‹Ixxi niinninne gaadimmi hasisooyyo› yito'ookko. Ee bikkina Saa'ooliinsi xottakka'a i beyyo waatta'kko'i keen hundim soodo baqitem ki'llakka'a eelliinchi firoo'n ki'nnuwwi hegeego daba'llehe» yaa dabarukko. Ee bikkina Daawiitii ixxi awwonaanii soodaraaronne Filisxee'm uulla matteena ki'llo'o. Filisxee'm mannim Yizra'ee'l uulla gaaddo'o. Saxxi ayyaamonne Daawiitii ixxi awwonaanii Xiqlaaga yakkam beyyo affo'o. Ee ammanenne Amaaleeq manni woroo'n qarinne yoo uullaa Xiqlaagaa qassa'a hee'llo'o; Xiqlaagam qassa'a shokkiissa'a hee'llo'o. Ixxuwwim meento, ee beyyonne hee'llo'i woraadaa lommannaa hundam qeefadda'a massito'o. Qeefaddo'i keenom amadda'a matto'o bagaan matom shito'oyyi hee'llo'o. Daawiitii ixxi awwonaanii Xiqlaag beero'o affamaare, oo beero'i giirinne shokkaa ixxuwwi meenti, goo'n oosii landii qeefadanta'a hee'llo'o. Ee bikkina Daawiitii ixxi awwonaanii sagar shaaggoo qaxa hooggeebe'e wi'llito'o. Daawiit lamem meentim Yizra'ee'l Ahino'aamee Qarmeeloos uulli Naabaal meentichchotti hee'llo'i Abigeelee qeefadanta'a hee'llo'o. Daawiita awwontam hee'llo'i manni ixxuwwi goo'n oos bikkinaa landi bikkinaa lobakata qaraatta'a ixxo kininne aphphisseena a'llanto'o. Daawiitim lobakata u'nnamukko. Ihukkaarem Moollanni Waa'i ixxo abooyyimminne qoxxisukko. Daawiitim Abemeeleek beet hee'u qeessichchi Abiyaataarina «Hino'o, eefuuda eebe» yukko. Abiyaataarim eefuuda eebukko. Daawiitim «Ee gogota hollansaa amadonnihe?» yaa Waa'a xa'mmukko. Waa'im «Laseese! Ixxuwwa amaddaa qeefadamu keeno agaago affaa gatissootto» yaa dabarukko. Ee bikkina Daawiitii ixxenne maqire hee'llo'i loh xibbi awwonaanii Biisoora yakkam daajje affa'a lasage ixxuwwiinsi hofqax mannim ee beyyonne usheexxiteena afuutto'o. Oo usheexxito'i lamem xibbi mannim lobakata hoogga'a hee'llo'i bikkina ee daajje higgeena xanto'oyyo. Ihukkaarem Daawiitii soor xibbi mannii hollansimma amaddo'o. Daawiit awwonaan hee'llo'i soor xibbi manni mat woraadichchi Gibxi uulli udma'iinsi waarukkuuyyi siidda'a Daawiit beyyo hincaa'llo'o. Ixxuwwim ee manchina itoo hurbaata, agoo wo'o, ee'isam oda'i mishika gokkisakko'ookkokaa lam gogaalli woyi'n mish shogaa uwwito'o. Sas ballaa sas hiimoo hurbaata itoo'n hee'u bikkinaa wo'om agubee'i bikkinaa kaka itaa lasonne qoxxukko. Daawiitim ee woraadichcho «At Ayyane? Hanniinsi waattolla?» yaa xa'mmukko. Oo woraadichchim «An Gibxi uulli manchi ihummuuyyi mat Amaaleeq uulli manchina awwaadaancho; Sas balliinsi illageen xissaammoohaannonne i moollanni eese uunjaa marukko. Ihukkaarem eehannii illageen Yihuxxi uulli woroo'n qarinne yoo Kaarte'i manni uullaa Kaaleeb shumo'i gassi uullaa qasimminne Xiqlaaga shokkiinsaammo» yaa dabarukko. Daawiitim «Oo gogot yo'i beyyo neese awwonsitaa afisseena xantoohonnihe?» yaa xa'mmukko. Oo woraadichchim «Eese shitoobbe'isaa i moollanninam higissaa uwwitoobee'isaa hide'llittaa'lleensi moo'iseena xanoommo» yaa dabarukko. Ee lasage oo gogot hee'oo beyyo Daawiita awwonsukkuuyyi afisukko. Oo gogotim beyyi hundannem binnita'a ittu'uuyyii aggu'uuyyii lobakat liiranchinne kaddam hee'llo'o. Mashka'oomim Filisxee'm manniinsii Yihuxxi manniinsii lobakat luwwa qeefadda'a hee'llo'i bikkinatte. Daawiitim ee ayyaa'm hiimiinsi ki'isaa la'm ayyaa'm hiim afeebe'e oramukko; gaameela'anne saa'llita'a gibbo'i soor xibbi woraadduwwiinsi bagaan ee gogotiinsi xorukkok matim hee'ukkoyyo. Daawiitim «Amaaleeq manni massito'i luwwa hundam manna, diinatee ixxeka lamen meentoo gatisukko. Daawiitim ixxi awwonaa'nneka goo'n oosoo landaa ee'isam Amaaleeq manni qeefadda'a massito'i luwwik mat luwwim gatoo'n hundam dabassiisukko. Daawiitim gereebba, fella'aa laroo hundam qeefadukko; ixxo awwonaanim «Kuk Daawiit qeefada» yitu'uuyyi ee diinate mulli diinaxxi illagenne ushe'llam hee'llo'o. Daawiitim hoogga'a Biisoo'l bu'i gadanonne usheexxita'a egetta'a hee'llo'i lamem xibbi ixxi awwonaa'n beyyo daba'llaa marukko. Ixxuwwim Daawiitaa ixxi awwonaanoo aa'lleena fitto'o. Daawiitim ixxuwwi kolli hincaa ixxuwwi xummaato xa'mmukko. Ihukkaarem Daawiitinne maqire gaaddo'i keeniinsi jor haalat yoo mat mat «Ixxuwwi niinninne gaaddobee'i bikkina neese eembummi qeefadiinsi baxxansinoommoyyo; annanchim ixxi gaqqi meentoo oosoo amaxxaa mareena xanookko» yito'o. Daawiitim «Iyyabbaayyuwwa! Waa'i niina uwwu kaachchanne ki'nnuwwi kaka issitakkeena xantakkamoyyo; neese xumminne egeraa ni diina'a niina higisaa uwwukkok ixxotte. Ki'nnuwwi yitakkam woshshanne ayyim iittamooyyo; laso gataa mu'uta egru keen te'im orina gaadu keen hundim siidamu qeefada gudaancho baxxamimmi hasisookko» yaa dabarukko. Daawiitim ka woshsha see'llisa issaa awwaaxxu bikkina Isra'ee'l uullanne kabad afeebe'em baxukkuuyyi hee'ookko. Daawiit Xiqlaaga daba'llu ammane ixxi qeefadiinsi baxxansaa ixxi qarmanni ikko'i Yihuxxi lommannina asse'ukko; ixxi asse'u qeefadinne maqirem «Kuk Waa'i diina'i angiinsi aa'aa ki'nnuwwina asse'aakkoo irifo'o» yamamoo assi hee'ukko. Ee qeefadiinsim Beeteelanne, Yihudiinsi woroo'n qarinne yoo Raama'annee Yaatii'l beero'uwwannee yo'i ixxi moollina hundinam asse'ukko. Ee keeniinsi mullek Aaro'eeranne, Siifimootanne, Eshtaamoo'annee Raakaalannee yo'i keeninaa ee'isam Raayma'eel moollinaa Qeene'i moollinaa Horima'anne, Bori'aashananne, Ataakannee Keebiroo'n beero'uwwannee hee'llam manni hundinam asse'ukko. Eehanniinsi mulleka ixxii ixxi awwonaanii daba'llanto'i beyyuwwanne hundannem hee'llam mannina irifo'o asse'ukko. Filisxee'm manni Gilbo'i duunanne Isra'ee'l manninne oramto'o. Eekke'em lobakat Isra'ee'l manna shito'o. Gatto'i keenim adil Saa'oolii ixxi oosii edanta'a gibbo'o. Ihukkaarem Filisxee'm manni hollanta'a affo'i bikkina sasem Saa'ool oosom Yoonaataana, Aminaadaabaa Maalkiishu'aa shito'o. Saa'ool kululleetanne or qoxxu bikkina Saa'ool gagoomim ixxi diina'iinsi darabamu xiyyinne aphphisamaa jorisa madaa'ukko; Saa'oolim ixxi gaaxxi mu'uxxi iyyaanchina «Ku ballachchantobee'i Filisxee'm manni waatta'a qassu'uuyyi eesenne lellitambee'isa ki bisa'inne eese shihe» yukko. Ihukkaarem oo gaaxxi mu'uta iyyaanchi eekka issimma baddukko; ee bikkina Saa'ool ixxi gagim ixxi bisa'i qaranne ubukko. Oo gaaxxi mu'uta iyyaanchim Saa'ool lehukkisa moo'u ammanenne ixxim ixxi gaqqi bisa'i qaranne ubaa Saa'oolinne maqirem lehukko. Saa'ool, ixxek sasem goo'n oosii gaaxxi mu'uta iyyaanchii leto'ok ee'isinnetti ihukkuuyyi Saa'ool awwonaanim ee balla maqirem leto'o. Yoordaanoos daajjiinsi eelliinchi firinnee Iyziraa'ee'l cebbiinsi eeqidinnee hee'llo'i Isra'ee'l mannim Isra'ee'l gogot gibukkisaa Saa'oolii ixxi oosim leto'isaa macceessa'a ixxuwwi beero'o utta'a gibbo'o. Filisxee'm mannim waatta'a ee beero'uwwa amaddo'o. Oriinsi lasage la'm ayyaamonne Filisxee'm manni leto'i manni leeshiinsi lade'llo'i o'l mu'uta titteena matta'a Saa'oolaa ixxeka sasem oosoo Gilbo'i duuninne ubbo'oo siiddo'o. Saa'ool horoorem mutta'a o'l mu'utam maxatta'a amadiisimminne ixxuwwi qophpha'n waa'uwwinaa ixxuwwi minaadabinaa kaachchi mishiraachcha kuttona manna asse'llo'o. Ee lasage Filisxee'm manni Saa'oolika o'l mu'uttuwwa Asitaaroota yamantam meentichchi qophpha'n waa'i minenne dissito'o. Saa'ool leesham Beetishaana yakkam beero'i ki'n ootanne musmaarinne tollito'o. Gala'aadanne hee'llam Yaabeesh mannim Filisxee'm manni Saa'oollanne issito'i luwwa macceesso'i ammanenne, ixxuwwik gitannuwwi dangonnem ki'lla'a hiimonne Beetishaa'n beero'o matto'o. Saa'oolikaa ixxi oosikaa leesha beero'i ki'n ootiinsi dilliissa'a Yaabeesh beero'onne eebba'a shokkiisso'o. Ixxuwwi miqem ee beero'i woronne Taamaariska yakkam haqqi lugumonne waammita'a lamar balla soommanto'o. Saa'ool lehaa lasage Daawiit Amaaleeq manna kaa'aa daba'llukko. Xiqlaagannem lam ayyaamo hosukko. Saxxi ayyaamonnem mat woraadichchi Saa'ool gaaxxi wiiddaniinsi ixxi beyyo waarukko. Ixxim kichchechchinne eddechcha dereeraa horoorennem buchcha laphphaa hee'ukko. Daawiit kolli hincaa uullanne aad heeshaa ixxena lomba uwwukko. Daawiitim «Hanniinsi waattitto» yaa xa'mmukko. Ixxim «Isra'ee'l gogoxxi wiiddaniinsi xoraa waarummo» yaa dabarukko. Daawiitim «Hino'o, or hinkid ihoolda'e kure» yukko. Ixxim «Ni gogot o'l beyyiinsi gibaakko. Ni manniinsim lobakat lehaakko. Saa'oolaa ixxi beet Yoonaataanam shakko'ookko» yukko. Daawiitim «Saa'oolii Yoonaataanii leto'isa hinkid laqqitto?» yaa xa'mmukko. Oo woraadichchim «An Gilbo'i duunanne hee'ummo; Saa'oolim bagaxxi qaalleencho bakke'aa uullaa hee'ukko; diina'i faraxxi gaarre'ii faradaanii ixxuwwi beyyo hincitu'uuyyi moo'ummo. Ixxim laso daba'llaa eese moo'aa weeshukko. Anim, ‹Yee!› yummo. Ixxim ‹At ayyette?› yaa xa'mmukko. Anim xa'mmu ammanenne Amaaleeq uulli manchi ihummisa kurummo. Ixxim ‹I kolli hincitaa eese shihe; lobakata mada aa'aammoo bikkina an leheenatte?› yukko. Anim ixxi koolli hincaa shummo; mashka'oomim ee beyyonne ubulas gatoobee'isa la'ummi bikkinatti hee'ukko. Ee lasage adilla'n mare'e ixxi horooriinsi laakkam angiinsi aa'ummo. I Moollanna! Ee keenom kuno'o kiina eebaammo» yaa dabarukko. Daawiitim kichchechchinne ixxi eddechcha deree'llukko. Ixxenne maqire hee'llo'i keen hundim ee'isa issito'o. Ee oranne beeddito'i Saa'oolina, ixxi beet Yoonaataaninaa Waa'i gogot ikko'i Isra'eel hundinaa uulli hiimeebe'e soommanimminnee kee'mmaalli kichchechchinnee wi'llito'o. Daawiitim ixxena woshsha kuru woraadichcho «At hinka'i uulli mancho?» yaa xa'mmukko. Ixxim «An ki uullanne waaraanchi ihaa hee'oo Amaaleeq uulli manchi beeto» yaa dabarukko. Daawiitim «Eehannah Waa'i doo'llu adila hinkikid iggitaa shitto?» yaa xa'mmukko. Ee lasage Daawiit ixxi awwaadaaniinsi mato weeshaa «Shihe!» yaa ijaajukko. Oo manchim ee Amaaleeq uulli mancho aphphisaa shukko. Daawiitim ee Amaaleeq uulli manchina «Ka bichcha ki hanenne eebaqqittok at ki gagame. Waa'i doo'llaa adil issu mancho ‹Shaammo› yitaa wocimminne ki gaganne oogaxxitaatto» yukko. Daawiit Saa'oolinaa ixxi beet Yoonaataaninaa kichchechchinne sorukkuuyyi wi'llukko. Ee'isam xiyyi wi'llishsha yakkamoka Yihuxxi minaadabina losisakkamisina ijaajukko. Ookkim Yaashaar Kitaabanne kitaabamaakko. Daawiitim «Isra'eelaa, ki lombi duunnuwwanne oramaa lehaakko! Geedduwwi hinkid ka'isa ubbo'o! Filisxee'm landi liiramoobee'isa ballachchamubee'i kee'n landim ilil yoobee'isa ka woshsha Geetanne woccakkotte! Asqaaloo'n googguwwannem alallaattakkotte. «Gilbo'i duunnuwwa! xeen te'im qiibat ki'nnuwwanne ga'nnoone; ki'nnuwwi abuullannem mahim mutoone. Mashka'oomim geedduwwi agir eekke'e sholle'nninne ubaakko. Saa'ool agirim Zaytinne shiinshanchiinsi gataakko. Yoonaataan xiyyim shoo'n daba'lloobee'an Saa'ool bisa'im diina'a muransoohan geedduwwa aphphisaa iiqoohan Diina'am shoohan hee'ukko. «Saa'oolii Yoonaataanii maalasiisoo iittinne hee'llo'o; lehonnem heechchannem annanni ikko'oyyo. Ixxuwwim gaaqichchiinsi loboka qare'aalluwwi Hobbichchiinsim loboka wodaammuwwi hee'llo'o. «Isra'ee'l landa! Ki'nnuwwina mishisoo kashar eddechcha eddeesam hee'u worqinnem wereeggisam hee'u Saa'oolina wi'llehe. «Oranne geedduwwi hinkid beeddito'o! Yoonaataanim lehaa ki duunnuwwanne ubaakko! «Iyyabbaayyi Yoonaataana! An ki bikkina lobakata kichche'aammo; At iina er kobichchi hee'llitto. Ki iittim iina maalalsiisoohan hee'ukko; meenti iittiinsi loboka qoxxaalli hee'ukko. ‹Geedduwwi hinkid ubbo'o! O'l mu'utdu hinkid bi'ukko!›» yaa sorukko. Ee lasage Daawiit «Yihuxxi beero'uwwiinsi mato maraa amadonnihe?» yaa Waa'a xa'mmukko. Waa'im «Eeyya, mattaa amade» yukko. Daawiitim «Hinki beero'o amado?» yaa xa'mmukko. Waa'im «Keebiroona amade» yukko. Ee bikkina Daawiit ixxi lamem meentinne maqirem Keebiroona marukko; ixxuwwim Yizra'eeliinsette ikko'i Ahino'aamettee lehaa hee'u Qarmeeloos uulli Naabaal meentichcho Abigeelettee hee'llo'o. Ee'isam Daawiit ixxi awwonaano ixxuwwi abaroosinne maqirem massukko. Ixxuwwim Keebiroo'n kululleetanne yo'i hoffi beero'uwwanne afuutto'o. Ee lasage Yihuxxi manni Keebiroona waatto'o. Daawiitam doollita'a Yihuxxi adil issito'o. Yaabeesh Gala'aaxxan ikko'i manni Saa'oola waammito'isa Daawiit macceesaa Yaabeesh gala'aada manna asse'aa «Ixxeka leesha waammimminne ki'n moollanni Saa'oolina ama'nnantakko'oo manni ikkakko'isa moo'issakko'i bikkina Waa'i ki'nnuwwa maasse'ona. Odim Waa'i ixxi biijoomaa amma'nnamaakkoohaanoomaa ki'nnuwwina la'isona. Ki'nnuwwi issitakko'i eroommi bikkina anim anga dabaroommo. Eehannah qoxxehe; malaayyem issehe; ki'nnuwwi moollanni Saa'ool lehaakko; Yihuxxi minaadab eese doo'llita'a ixxuwwi adil issito'ookko» yukko. Saa'ool gogoxxi ijaajaanchi Neer beet Abaneer Saa'ool beet Iyyaabustenne maqire Yoordaanoos daajje higaa Mahinaayima gibaa marukko. Ee beyyonnem Abaneer Iyyaabuste'e Gala'aaxxi uullanne, Aaseeranne, Yizra'eelanne, Efireem uullannee Biiniyaam uullannee oohim Isra'ee'l minaadabanne hundannem adil issukko. Iyyaabuste adil ihu ammane ixxek umur sor hiincho ihaa hee'ukko. Ixxim lam hiincho gassukko. Ihukkaarem Yihuxxi sulli Daawiita awwonto'o. Daawiitim Keebiroonanne afuuraa lamar hiinchinaa kollinaa Yihudanne adil ihukko. Neer beet Abaneerii Iyyaabuste'i gassaanii Mahinaayimiinsi ki'lla'a Gaba'oo'n beero'o waatto'o. Xaruy beet Yoo'aabii Daawiitik mulli gogotii fitta'a delbi gadanonne edanto'o. Yoo'aab gaalchi ee delbi mat idonne Abaneer gaalchim mulli idonne afuutta'a hee'llo'o. Ee ammanenne Abaneer Yoo'aabina «Niinniinsi lamem kolliinsim woraadduwwa doo'llinaa o'l mu'utinne orantamisa issinona» yukko. Yoo'aabim «Erane» yaa dabarukko. Ee bikkina Biiniyaam sulliinsi Iyyaabuste'e bikkita'a oranteena tommii lam manchii doo'llanto'o. Daawiit kollinnem tommii lam manchii doo'llanta'a oramimma asheetto'o. Annannichchim ixxi diinakkichchika horoore amadaa bisa'a midaadonne kaasukko. Ee'isinne lamiyyii soorem manchim mateeyyam ubba'a leto'o. Ee bikkina Gaba'oonanne oo beyyi «Bisa'i uulla» yamamukko. Ee balla kee'mmaalli or ihaa Abaneeraa Isra'ee'l mannaa Daawiit manni kaa'ukko. Ee beyyonnem Xaruyyek sasem oosim Yoo'aab, Abiisii Asaaheelii hee'llo'o; Asaaheelim geellichchanne udma'i kukkussichchisa qoxar hee'ukko. Abaneera hollaa amadeena ixxi kolli geerukko. Ixxo hollimmiinsi makkannem qeddannem daba'llukkoyyo. Abaneerim laso daba'llaa «Ookki Asaaheelattennihe?» yaa xa'mmukko. Asaaheelim «Eeyya anette!» yaa dabarukko. Abaneerim «Eese hollansititte! Gaadaaniinsi mato hollansitaa amadu o'l mu'uta hoore» yukko. Ihukkaarem Asa'eel sabaa ixxo hollansukko. Odim Abaneer «Ka eese hollansimma ure! An keese shoommisina mahina gafe'ansitoolla?» An keese shaa kiyyabbaayyi Yoo'aabika ille hinkid moo'eena xanoommo?» yukko. Ihukkaarem Asa'eel kabadem hollansimma urimma sabukko. Ee bikkina Abaneer laso daba'llaa ixxi bagado huushaa godabonne kaasukkaare ludoom afarinne firukko. Asa'eelim uullanne ubaa lehukko. Ixxi leesh ubu beyyinne higoo manni hundim gadanonne uullaa moo'am hee'ukko. Ihukkaarem Yoo'aabii Abiisii Abaneera hollansito'o. Eelliinchi aagukkuuyyim Giiyaahiinsi eelliinchi firinne Gaba'oo'n uulli udma'anne massoo googonne yoo Ama'i duuna affo'o. Biiniyaam sulli manni odim wixxita'a Abaneer beyyo waatto'o. Ixxuwwim mat duunanne orina gudda'a uullito'o. Abaneerim Yoo'aaba weeshaa « Heer heerinam orammummuuyyi hee'nnoommonnihe? Lasaanchonne qaraarimmiinsi bagaan mat luwwam siindeena xannoombee'isa sawwitooyyonnihe? Ku ki manni neese ixxuwwi abbaayyuwwa hollansimma uttamisina ijaajoobee'ek hinki balli afeebe'e?» yukko. Yoo'aabim «At ka sagara woccibeeta'n ku manni sooxxi dar afeebe'e ixxuwwi abbaayyuwwa hollansimmiinsi daba'llitambee'an ihukkisa hee'oo Waa'i summinne hide'oommo» yaa dabarukko. Ee bikkina Yoo'aab xurumba fugukko. Ee lasge ixxenne maqire hee'llo'i manni hundim Isra'eela hollansimma utto'o; orim uullukko. Abaneerii ixxenne maqire hee'llo'i awwonaanii ee hiimo hundoomam taakke'lla'a Araab cebbi kollinne matto'o. Yoordaanoos daajjem higga'a Biitirooninne aa'lla'a Mahanaayima affo'o. Yoo'aab Abaneera hollansimma uru ammanenne ixxi manni hundim mat ikka'a wixxito'o. Daawiit manniinsi Asa'eela edoo'n tommii honsi manchii bee'ukkis la'amukko. Daawiit manni Biiniyaam sulliinsi Abaneera awwonto'i mannika sas xibbee lohayyi manchoo shito'o. Yoo'aabii ixxenne maqire hee'llo'i awwonaanii Asa'eel leesha massita'a Beetaliheemanne yoo ixxuwwi abaroos waammi beyyonne waammito'o. Ee hiimom taakke'llu'uuyyi gatta'a soodaraarom Keebiroona affo'o. Ee'isinne Saa'ool abaroos lambe'ennee Daawiit abaroos lambe'ennee lobakat ammanina or hee'ukko. Ihukkaarem Daawiit wodukkuuyyi marukko; Saa'ool abaroosim hoogukkuuyyi marukko. Daawiit Keebiroonanne hee'u ammane loh goo'n ooso qarukko. Ixxuwwim Yizra'ee'l Ahino'aameensi qaramu won beet Aminoonatte, la'mmek Qarmeeloos Naabaalina arette hee'llo'i Abigeeleensi qaramu Kiili'aabatte; saxxek Taalmaayaa yakkam Gashuu'l adi'l landichchotte hee'llo'i Ma'ikkaansi qaramu Abeseloomatte; soo'llek Hagiitaansi qaramu Adooniyaasatte, ontik Abiixaaleensi qarumu Shafaaxiyatte; lohik Egilaansi qaramu Yutiri'aamatte. Kukeen hundim qaranto'ok Keebiroonannette. Saa'ool abaroos lambe'ennee Daawiit abaroos lambe'ennee or edukkuuyyi marukko; ee'isam Abaneer Saa'ool abaroos lambe'enne wodukkuuyyi marukko. Ayya'i landichcho Riisifa Saa'oolina bakki meentichchotte hee'llo'o; Iyyaabustem Abaneerina «Iyyanni bakki meentichchonne mahina iinse'llitto?» yaa xa'mmukko. Abaneerim ee woshshanne lobakata quuqaa «An Saa'oola lagaa Ayihuxxi mannina awwaadummoka labissaatennihe? An kiyyannina, ixxi abbaayyuwwinaa ixxi qarmanninaa amma'nnamaammoohane. Keesem Daawiitina higisaa uwwummoyyo. Eehannah at eese ka meentichchi woshshanne acceeqassoohonnihe? Adillano Saa'ooliinsii ixxi shumo'iinsii hooraa Daawiitina uwwaa Daawiit adillanom Isra'eelannee Yihudannee Daaniinsi ki'isaa Beersaabe'i afeebe'e iimiimaa'eena Waa'i Daawiitina hide'aa uwwu neeyyaxxisnnea ani ihoo'isa issumbeelas Waa'i eesenne oogatona!» yukko. Iyyaabustem lobakata baddaa hee'u bikkina Abaneerina matem sagaram dabarukkoyyo. Abaneerim ee ammanenne Keebiroonanne hee'oo Daawiit beyyo manna asse'aa «Ka uullina gassaanchi ihookkok ayyette? Ee bikkina kaba at iinninne iittame. Anim Isra'ee'l minaadab hundoomim kiina ijaajantamisa issaa hara'mmoommo» yukko. Daawiitim «Erane, kiinninne ka woshshanne iittamoommo. Ihukkaarem at iina gaassitaa issitoo luwwi yookko. Oohim at i beyyo waattoo ammane Saa'ool landichcho Meelkoole iina amaddaa waattibeelas i beyyo waattoobee'isa!» yaa dabarukko. Ee'isam Daawiit Saa'ool beet Iyyaabusti beyyo manna asse'aa «I meentichcho Meelkoole iina dabare; an isena mat xibbi Filisxee'm mannikka uraaga qootaammoohane» yukko. Ee bikkina Iyyaabusti manna asse'aa Meelkoole Laawiish beet hee'u is manchi Phaalxi'eeliinsi hooraa massukko. Phaalxi'eelim Baahuurim beero'i afeebe'e wi'llukkuuyyi ise awwonukko. Ihukkaarem Abaneer «Kaba ihookko ki mine daba'lle!» yukkaare uraa daba'llukko. Abaneer Isra'ee'l awwonsaa'n beyyo maraa «Daawiit ki'nnuwwina adil ihoo'isina lobakat ammane hassakka'a hee'llakko'o. Oono'o, kaba issehe. Odim Waa'i ‹I awwaadaanchi Daawiitinne i minaadab Isra'eela, Filisxee'm manniinsii mulli ixxuwwi diina'i hundiinsimii gatisoommo› yaa hee'ukkisa sawwi'llehe» yukko. Abaneer Biiniyaam sullina eekka kurukko. Ee lasage Biiniyaam minaadabii Isra'ee'l minaadabii issiteena iittanto'i luwwa Daawiitina kureena Keebiroona marukko. Abaneerim lamiyyi manna awwonsaa Daawiit yoo beyyo Keebiroona waarukko. Daawiitim ee mannina maadda issukko. Abaneerim Daawiitina «I moollanna, kaba an maraa Isra'ee'l minaadab hundim keese awwontamisa issoommo. Ki adillanom hundim amma'nnita'a aa'llamo. Atim ki tiironne sawwittisam ka ulla hundam gassitootto» yukko. Daawiitim Abaneera xumminnem geegeesukko. Hofqax ammaniinsi lasage Daawiit gaadaanii Yoo'aabii lobakat qeefajjo'o amadda'a gaadiinsi daba'llito'o. Ihukkaarem Daawiit xumminem geegeesaa hee'u bikkina ee ammane Abaneer Keebiroonanne hee'ukkoyyo. Yoo'aabii ixxenne maqire hee'llo'i gaadaanii ee beyyo affo'isam Neer beet Abaneer adi'l beyyo waarukkisa, adil geegeesukkisaa ixxim xummam elle'ukkisaa Yoo'aab macceesukko. Ee bikkina Yoo'aab adi'l beyyo hincaa «Ku baxxi bax maruwwa? Abaneer ki beyyo waarukkaare xumminne geegeessitok mahinatte? Ixxi ka beyyo waarukkok keese qawwiseenaa maha baxxooda'ee hinkid yoontida'ee daadeeseenatte; atim ka woshsha erisa laqqootto!» yukko. Yoo'aab Daawiit illagiinsi firaa maraa lasonne Abaneera ixxi beyyo eebakkamisina manna asse'ukko. Oo mannim ixxo Siira'i wo'i ba'l gadaniinsi dabatta'a wotto'o. Ihukkaarem Daawiit ee woshshi bikkina la'oo luwwi mahim hee'ukkoyyo. Abaneer Keebiroona afu ammanenne Yoo'aab moqqo'onne atoorassoohaannisa issaa qashi gooc kolli shiqqaa'aa massukko. Ee beyyonnem godabo qasaa shukko. Yoo'aab eekka issu mashka'i Abaneer illageen ixxi abbaayyi Asa'eela shu bikkina baado fireena hasaatette. Daawiitim Abaneera shakko'isa macceesu ammanenne «Anii i adilla'n gassi woronne yo'i minaadabii Abaneera shakko'i xiigiinsi muccur inkummisa Waa'i la'ookko. Ee bikkina eehanni guzumo'i Yoo'aabannee ixxi abaroosannee dillona! Doolli hundannem ixxi abaroosiinsi sha'ixxek te'im oddomachchi jabbi yoo manchi bee'oone! Ee'isam dim, oranne lehookkok te'im sibaaraanchi bee'oone!» yukko. Yoo'aabii ixxi abbaayyi Abiisii Abaneer ixxuwwi abbaayyi hee'u Asa'eela Gaba'oonanne hee'u oranne shu bikkina Abaneera shito'o. Ee lasage Daawiit kichchechchinne ixxuwwi eddechcha dereetta'a xiddi eddechcha edde'lla'a Abaneerina wi'llitamisina Yoo'aabaa ixxi awwonaanoo ijaajukko. Ixxo waammakkam ballannem adil Daawiit ixxi gagoomim leesha awwonaa marukko. Abaneerim Keebiroonanne Waammamukko. Ixxi waammannem adil sagara iimaa'aa wi'llukko. Minaadab hundim ixxo moo'imminne qaraaraallisa wi'llukko. Daawiitim Abaneerina «Abaneer mahina kora'i manchisa lehukko? Ki angi karamukkoyyo; ki lokkim kuttubbamukkoyyo; at damigaa'n anganne lehoo manchisa letitto!» yaa sorukkuuyyi wi'llukko. Minaadab hundim ixxi bikkina odim wi'llukko. Manni hundim Daawiit hurbaata itoo'isa isseena ee ayyaamo hundoomam yakukko. Ihukkaarem ixxi «Kaballi eelliinchi aagoo'n an hurbaata duuqummaare Waa'i eese guzumo'ona!» yaa hide'ukko. Minaadabim eekka moo'aa liiramukko; hanqo'isam adil issu luwwi minaadaba liiransukko. Yihuxxi sullii Isra'ee'l minaadabii hundim Abaneer lehonne adil Daawiit maham exxubee'isa qoossukko. Adilim ixxi gassaan ikko'i Daannuwwina «Kaballa Isra'ee'llek mat la'amaakkoo geed lehukkisa qoossitakka'ahinnihe? An Waa'i doo'llaakkoo adil ihummaarem kaballa hoogaanchi ihaammo; ku Xaaruyyi oos eese kaa'llo'ookko; ka xiiga dunto'i bikkina Waa'i ixxi gagoomim laboo guzumo'o uwwona» yukko. Saa'ool beet Iyyaabuste Keebiroonanne Abaneera shakko'isa macceesaa lobakata baddukko. Isra'ee'l minaadabim lobakata baa'ukko. Iyyaabustina gaadaano awwonsitam lam gaaxxi awwonsaan hee'llo'o. Ixxuwwim Biiniyaam sulliinsette ikka'a Ba'erootanne qaranto'oo Riimoon oos Ba'aanattee Reekaabattee hee'llo'o. Ba'eeroot Biiniyaam uulliinsi matisa xigamookko. Ba'eerootanne illageen hee'llo'i manni gibba'a Giitaayimanne kaballi afeebe'em yo'o. Saa'ool beet Yoonaataanina Mafiiboosheeta yakkam lokko shiihaakkoo beet hee'ukko. Ixxim Saa'oolaa Yoonaataanaa shakko'i ammane onti hiinchi beet hee'ukko. Ixxuwwa shakko'isa Yizra'ee'l beero'i manniinsi macceesso'i ammanenne li'issam meentichcho ixxo amadda'a gibbo'o. Ixxi shiihukkok ise gaaggaabba'a gibbam hee'llo'i bikkina is angiinsi ubaatette hee'ukko. Riim oos Reekaabii Ba'aanii Iyyaabusti mine matta'a samgud ballanne affo'o. Ee ammane ixxi balli usheexxatina laphaa hee'ukko. Ixxo egeraanchi meentichchom goocanne afuutta'a arasa ufeessu'uuyyim gissam hee'llo'o. Ee bikkina Reekaabii Ba'aanii shullita'a aaggo'o. Ixxuwwim aagga'a Iyyaabusti iinse'u beyyonnem qassa'a shito'o. Ixxi horoorem mutta'a massitto'o. Ee hiimo hundoomam taakke'lla'a Araba'i googinne higga'a matto'o. Iyyaabuuste'i horoorem Keebiroonanne hee'u adil Daawiitina hincaa'lla'a lasonne «Keese sheena hasam hee'u ki diinakkichchi Saa'ool beet Iyyaabustik horoor kuno'o! Adila, kaballa Saa'ooliinsii ixxi shumo'iinsii ki baado Waa'i miqisaakko» yito'o. Daawiitim Reekaabinaa ixxi abbaayyi Ba'aaninaa «Hawwi hundiinsim eese gatisu hee'oo Waa'i summinne hide'oommo! Xiqlaaganne i beyyo waaraa Saa'ool lehukkisa kuru manchi er woshsha kurukkoka labisaa hee'ukko. Ihukkaarem ixxo amadaa shisiisummo. Er woshsha yaa i beyyo waaru manchina an miqummok eehane. Eehannah ixxi gaqqi minenne iinse'aa hee'u muccur mancho shito'i mannina miqamoo baad hinkaa'nna kee'mmaalla? Ixxo shitakko'i bikkina an ki'nnuwwa shaa uulliinsi bi'isaa xiiga miqisoommo» yaa dabarukko. Ee ammanem Daawiit ixxuwwa shitona ixxi gaadaano ijaajukko; ixxi gaadaanim Reekaabaa Ba'aanaa shito'o. Ixxuwwi angaa lokkom mutta'a Keebiroonanne yoo wo'i delbi gadanonne haqqanne saqalto'o. Iyyaabusti horoorem massita'a Keebiroonanne yoo Abaneer waammanne Waa'mmito'o. Ee lasage Isra'ee'l sulluwwi hundim Keebiroonanne yoo Daawiit beyyo matta'a «Oono'o, neese kiinninne mat xiigaa mat maaraa. Kanniinsi illageen Saa'ool ni adil hee'u ammanem ihuta'n oranne Isra'eelina gaaxxi awwonsaanchi hee'llitok atette. Waa'im kiina ‹I minaadab Isra'eela egettootto; ixxuwwam gassitootto› yaa hee'ukko» yito'o. Ee bikkina Isra'ee'l awwonsaan hundim Keebiroonanne hee'u Daawiit beyyo waatto'ok ee'isinnette. Ixxim Waa'i illagenne ixxuwwinne maqire saga'l hidiro aagukko. Ixxuwwim ixxo doo'llita'a Isra'eelanne adil issito'o. Daawiit adil ihu ammane ixxek umur sad hiincho ihaa hee'ukko. Ixxi adilla'n doolli hundoomim sor hiinchi hee'ukko. Oohim Keebiroonanne hee'ukkuuyyi Yihudanne lamar hiinchoo kolloo, ee'isam Yerusaaleemanne ihaa Ayihuxxi minaadabaa Isra'ee'l minaadabaa hundam sadee sas hiinchoo adillaninne gassukko. Adil Daawiitii ixxi awwonaanii Yerusaaleemanne hee'llam Iyyaabuus manninne oranteena matto'o. Iyyaabuus mannim Daawiit ee beero'o aageena xanoobee'eka labissa'a Daawiitina «Niikki qooqquwwii dimmuwwii keese aaggeena hoottam bikkina at ka beero'o aaggeena xantooyyo» yito'o. Ihukkaarem Daawiit Xiyoonanne ixxuwwi baxxo'i girba amadukko. Oo beyyim Daawiit beero'o» yamukko. Ee balla Daawiit «Iyyaabuus manna kaa'aa Daawiit saboo qooqquwwaa dimmuwwaa fissookkok wo'i daadoo kollinne firona» yukko. Ee bikkina kobi'llishshanne «Qooqquwwii dimmuwwii adilla'n mine aaggamoyyo» yamamukko. Daawiitim ee girba amadaa lasage ixxi heechchi beyyo eekke'enne issukko. Ee beyyom «Daawiit beero'o» yaa weeshukko. Duuniinsi eelliinchi firinne buchcha shiraashirakko'oo beyyiinsi ki'isaa ee duu'n kululleetanne hundannem beero'o baxukko. Gogoxxi Moollanni Waa'i ixxenne maqire hee'u bikkina Daawiit wodukkuuyyi marukko. Xiiroos adil Kiiraam, Daawiitina adi'lla'n mine baxxona anga qoor manna, kina cabbaraanoo digibaa asse'ukko. Waa'i ixxo Isra'eelina adil issaa ki'isukkisaa ixxi minaadabinaa yaa ixxi adillano iimiimaa'ukkisaa Daawiit qoossukko. Daawiit Keebirooniinsi Yerusaaleema maraa lasage eraa'llaanniinsi loboka lobakat meentoo bakki meentoo eebukko. Lobakat goo'n oosoo landaa qarukko. Yerusaaleemanne qaranto'i oosim Shaamu'atte, Shoobaabatte, Naataanatte, Salamoonatte, Yibihaaratte, Eeliishu'atte, Neefeegatte, Yaafi'atte, Eelshaama'atte, Eeliyaadaa'attee Eelifeeleexattee hee'llo'o. Daawiit Isra'ee'l minaadabina adil ihukkisa Filisxee'm minaadab macceesukko. Ee bikkina ixxuwwi gogot Daawiita qeefadeena marukko; Daawiitim ixxuwwi Waatto'isa macceesu ammanenne girba marukko. Ee ammanenne Filisxee'm gogot waatta'a Raafaayii'm cebbanne wiiddanta'a orina beyyi beyyo amaddo'o. Ee bikkina Daawiit «Filisxee'm gogota qasonnihe? Iina kaachcha uwwitoohonnihe?» yaa Waa'a xa'mmukko. Waa'im «Eeyya ixxuwwa qase! Anim ixxuwwa kaa'lloo'isa issoommo!» yaa dabarukko. Ee bikkina Daawiit Ba'aal Faraaxiima maraa Filisxee'm gogota kaa'ukko. Ixxim «Diris iiqaa firimminne gindansoo'isa Waa'i i diina'a i illaggennem gindansukko» yukko. Ee bikkina ee beyyik summi «Ba'aal faraaxiima» yamamukko. Filisxee'm gogotim ixxuwwi waa'uwwa utta'a gibbo'o. Daawiitii ixxi gaadaanim qeefadda'a massito'o. Ee lasage Filisxee'm gogot daba'llita'a Raafaayimanne odim wiiddanta'a orina guddo'o. Odim Daawiit Waa'a xa'mmukko. Waa'im «Kaba yoonti kollinne ixxuwwa qassitte. Ihukkaarem afaree'n kollinne do'llaa oda'uwwi kollinne qasseena gude. Oda'uwwi ludonne o'l sagara macceessoo ammane Waa'i Filisxee'm googota aphphiseena firukkisa laqqaa qaqqissaa qase» yaa dabarukko. Daawiitim Waa'i ixxo ijaajukkisam issukko. Filisxee'm gogotam Geebaa'iinsi ki'isaa Geezeer afeebe'e hollukkuuyyi qasukko. Odim Daawiit Isra'ee'l minaadab hundiinsim doo'llanto'oo sad kum gaadaano wixxaa'ukko. Daawiitii ixxenne maqire hee'llo'i mannii hundim ixxek adilla'n barcum kiruubeel hanenne ihu gogoxxi Moollanni Waa'i summinne weeshamu Hidi'l Saga'l Saaxina eebbeena Yihudanne yoo Ba'aala yakkam beyyo matto'o. Ixxuwwim Hidi'l Saga'l Saaxina duunanne yoo Aminaadaab miniinsi fissita'a haareechchi Faraxxi gaarre'enne iyyiisso'o. Aminaadaab oos Uuzii Ahiyyii ee faraxxi gaarre'e awwonsita'a mattu'uuyyi Ahiyyi Hidi'l Saga'l Saaxina iyyiisakko'i faraxxi gaarre'i illagenne ihaa awwonsam hee'ukko. Daawiitii Isra'ee'l minaadabii hundim diittinne, maasinqo'inne, dibbe'inne, xinaaxilinne, doolinnee ixxuwwina yoo malaayyi hundinnemii Waa'i lombina girshimmitu'uuyyi zammattam hee'llo'o. Naakoona yakkam oodo'o affo'oohaannonne ee faraxxi gaarre'e gosaasoo mirgo'uwwi qolamukko. Uuza'am ixxi anga biddiqaa'aa Hidi'l Saga'l Saaxin uboobee'isa bakkiisukko. Uuza'am iggimminne amadu bikkina Waa'i ixxonne quuqaa aphphisukkaare Hidi'l Saga'l Saaxi'n gadanonne ubaa lehukko. Waa'i quuqaa Uuza'a shu bikkina Daawiit kichche'ukko. Ee ammaniinsi ki'isaa ee beyyik summi «Feereez Uuza» yamamukko. Ee lasage Daawiit Waa'a baddu bikkina «Ka'isa ihukkaa'lleensi Hidi'l Saga'l Saaxina hinkid issaa i beyyo masseena xanoommo?» yukko. Ee bikkina Hidi'l Saga'l Saaxina Yerusaaleema massoobee'isina murte'ukko. Ee bikkina googiinsi dabaraa Gaat beero'onne hee'oo Oobeed Eedooma yakkam manchi mine aagisukko. Ee minennem sas agana afuurukko. Waa'im Oobeed Eedoomaa ixxi abaroosaa maasse'ukko. Hidi'l Saga'l Saaxi'n mashka'inne Waa'i Oobeed Eedoomika abaroosaa ixxena yoo luwwaa hundam maasse'ukkisa adil Daawiit macceesukko. Ee bikkina Hidi'l Saga'l Saaxina lophphaakkoo liiranchinne Yerusaaleema masseena sawwaa Oobeed Eedoom mine maraa fissukko. Ee Hidi'l Saga'l Saaxina iyyito'i manni lohaagge taakke'llamaare Daawiit uullisukkuuyyi mat labeenaa di'ir addichchoo Waa'ina kitim issaa hincaa'am hee'ukko. Daawiitim talbi fatiriinsi dadamaakkoo Eefuuda edde'aa Waa'a lonsukkuuyyi wo'm wodaninne girshimmam hee'ukko. Ee'isinne Daawiitii Isra'ee'l minaadabii hundim liiranchinne ilil yitu'uuyyii xurumba fuggu'uuyyii Hidi'l Saga'l Saaxina amadda'a Yerusaaleema aaggo'o. Hidi'l Saga'l Saaxinam amadda'a beero'o aaggu'uuyyi Saa'ool landichcho Meelkoole maskootinne Adil Daawiit Waa'i illagenne xophxophukkuuyyi girishshimmoo'isa moo'lla'a is tiironne gaddo'o. Ee Hidi'l Saga'l Saaxinam Daawiit gudisu dukkaananne dissimmina qoodamu beyyonne dissakko'o. Ee lasage Daawiit shokkiisakka'a hincaa'akkam kitimaa mateeyyoo'm kitimaa Waa'ina hincaa'ukko. Ee kitima hincaa'aa lasage minaadaba gogoxxi Moollanni Waa'i summinne maasse'ukko. Odim hundinam hurbaata danaanukko. Isra'ee'l minaadabina gooninaa meentinaa annannichchinam mat mat daabbo'o, mat mat giiranne saramaakkoo maaraa mat mat xexefamaakkoo zabiibaa uwwukko; ee lasage minaadab hundim ixxi gaqqi mine elle'ukko. Ee lasage Daawiit ixxi abaroosa maasse'eena mine daba'llukko. Saa'ool landichcho Meelkoolem ixxo aa'lleena fitta'a «Isra'ee'l adil kaballa geejji summa siidaakko! Ixxi gassaa'n awwaadaan meenti illagenne kora'i manchisa maxaramaakko!» yito'o. Daawiitim «An girshimmummok ixxi minaadab Isra'eela awwonsaanchi isseena kiyyanni bikkennee kiyyanni abaroos bikkennee eese doo'llu Waa'inatte. Kabadem ihuta'n ixxo lonseena girshimmimmiinsi egexxamoommoyyo. Eehanniinsim lonsaa i gaga sholliisoommo. Kiina labukkisanne gadamaammoohan ihummaarem ‹Ixxuwwi illagenne ki gaga hoffiissitto› yitaa woccitti landi illagenne lobakata lombaam ihoommo» yaa dabarukko. Ee bikkina Saa'ool landichcho Meelkoole leteebe'i afeebe'e ooso hore'em qatto'oyyo. Waa'i diina'iinsi hundiinsim ixxo usheexxisu bikkina adil Daawiit ixxi adilla'n minenne usheexxaa xummanne hee'am hee'ukko. Adilim hiraagaanchi Naataanina «An digibinne baxamaakkoo adilla'n minenne hee'oommuulla. Ihukkaarem Waa'ik Hidi'l Saga'l Saaxin dukkaananne hee'oo'isa moo'e!» yukko. Naataanim «Waa'i kiinninnette ihu bikkina ki tiironne sawwittoka hundam isse» yaa dabarukko. Ihukkaarem Waa'i ee hiimo Naataanina «Mattaa i awwaadaanchi Daawiitina ‹An hee'oommi mine iina baxxoottok atettennihe? An Isra'ee'l minaadaba Gibxiinsi fissummi ammaniinsi kaballi afeebe'e dukkaananne garummuuyyii beyyi hundam do'ummuuyyii hee'ummo bagaan minenne hee'ummoyyo. Isra'ee'l minaadabinne maqire marummi amman hundam an doo'llummi awwonsaaniinsi matom digibinne iina mine baxoo'isina xa'mmummok yoohonnihe?› yoolla Waa'i. «Ee bikkina i awwaadaanchi Daawiitina gogoxxi Moollanni Waa'i ‹An keese gereebba allaattoo beyyiinsi i minaadab Isra'eelina awwonsaanchi issummo. Matti beyyi hundannem an kiinninne maqire ihaa ki diina'a kaa'lloo'isa issummo. Odim heer uullanne la'anto'i lob awwonsaa'nnisa sadaam issoommo. At letaa gaassi kiyyanno'inne maqire usheexxitoo ammane ki oosiinsi mato adil issaa ixxi adillano qoxxisoommo. I summi weeshamoo i mine baxookkokim ixxotte. Ixxi adillanom heer heerina qoxxaa hee'oo'isa issoommo. An ixxena anni ihoommo; ixxim iina beet ihookko; huushamoo ammanem anni beeto ijaajoo'isa axeeraa ijaajoommo. Ihukkaarem ixxi beyyonne adil ikkona beyyiinsi ki'isummi Saa'ooliinsi i iitto hoorummaannisa ixxeensi heer heerinam hooroommoyyo. Ki minii ki adillanii i illagenne heer heerinam qoxxaa hee'ookko. Ki adillanim heer heerina qoxxaakkoohan ihookko› yitaa kure» yukko. Ee'isinne Naataan ixxena Waa'i kuru luwwa hundam Daawiitina kurukko. Ee lasage adil Daawiit Waa'i illagenne afuuraa «Moollanni Waa'a! At iina ka hundam issiteena an ayyette? I abaroosdu ayyette? Moollanni Waa'a! Kuhim ki illagenne hoffe'aa kaba odim lophphaakkoo luwwa issitoolla; Waaroo doolluwwanne hee'llam i shumo'ina hundinam lobakat neeyyaxxi sagara aaggaatto; Moollanni Waa'a! Kuk manni hundinam issitoo'isannihe? I Moollanni Waa'a! Od an mayyeena xanoommo? At eese ki awwaadaancho laqqootto. Ka lophphaakkoo eroomma ki saga'llisinnee ki doo'llisinnee issittok ki awwaadaancho losiseenatte. Moollanni Waa'a! At hinkido'i lobane; keese labookkok hore'em bee'e; neese ni maccinne macceensummisannem kiinniinsi bagaan mulli Waa'i bee'e. Ki gaqqi minaadab issiteena ki summi bikkina, ki minaadaba gatisseena, agannaa maalalsiisoo mare'ee moo'isseenaa mulli minaadabaa ee minaadaphphi waa'uwwaa ixxuwwi illagiinsi bi'isseenaa Gibxi uulli agiddaniinsi gatissitti Isra'eeli'nnoo'i minaadab hannonne hee'ookko? Isra'ee'l minaadaba heer heerinam ki minaadab issitto; Moollanna, atim ixxuwwina Waa'i ikkitto. «Kabadem Moollanni Waa'a! Iinaa i shumo'inaa woccitti neeyyaxxi sagara hundam heer heerinam xadditte; issoommoo yittoka hundam isse. Ki summi heer heerinam lophphaakkoohan ihookko; minaadab hundim ‹Gogoxxi Moollanni Waa'i Isra'ee'l Waa'a› yookko. Ki awwaadaanchi Daawiit minim ki illagenne qoxxaakkoohan ihookko. Hundam xantoo Isra'ee'l Moollanni Waa'a! Iina ki awwaadaanchina mine baxoommo yitaa la'issitti bikkina an ki awwaadaanchi ka uunxato iggimminne ki illagenne hincaa'ummo. «Kabadem Moollanni Waa'a! At Waa'a; ki sagar amma'nnamaakkoohane. Oono'o kabadem ka danaam neeyyaxxi sagara iina ki awwaadaanchina uwwitaatto. Heer heerinam ki illagenne qoxxaa hee'oo'isina ki awwaadaanchika mine maasse'e. Moollanni Waa'a! At woccittisam ki awwaadaanchi min heer heerinam maasse'amaakkoohan ihona» yaa uunxukko. Hofqax ammaniinsi lasage adil Daawiit Filisxee'm minaadaba kaa'ukko. «Meeteeg Amaa» yakkam beero'om ixxuwwiinsi hooraa ixxi gulummi issukko. Odim adil Daawiit Moo'aaphphi minaadaba kaa'ukko. Qeefadanto'i ee uulli mannam uullanne laphitamisa issaa sas sasiinsi lam lamooma shaa mat matooma gatisukko. Ee bikkina Moo'aaphphi manni ixxena ijaajanta'a gibittam hee'llo'o. Ee lasage Daawiit Sooriy gassi woronne yoo Xoobi'i adil hee'u Rahoob beet Hadaadi'eezera kaa'ukko; Hadaadi'eezeera kaa'u ammane Efiraaxiis daajjiinsi hanaa'n kollinne hee'oo uulla dabareena marukkuuyyatte hee'ukko. Daawiitim Hadaadi'eezerika mat kumaa lamar xibbi faradaanoo lamiyyi kum lokkaanoo qeefadukko. Gaare'e gosaassam mat xibbi farado gatisaa mulli qaxika mogole'i nigga muraa awwaad bee'i keen issukko. Damaasqo'onne hee'llam Sooriy mannim adil Hadaadi'eezerina hara'mmiteena gogota asse'llo'aare Daawiit lamiyyee lam kum gogotaa shukko. Ee lasage ixxuwwi gassi woronne gaadaan wiiddantam beyyuwwa gudisukko. Sooriy mannim ixxena ijaajanta'a gibitto'o. Waa'im Daawiitina maru beyyi hundannem kaachcha uwwukko. Daawiit Hadaadi'eezer gaaxxi awwonsaa'nneka worqinne baxamaakkoo agilluwwa qeefadaa Yerusaaleema massukko. Ee'isam Hadaadi'eezer gassi woronne hee'oo Beexaahaa Beerootaayyaa yakkam beero'uwwiinsi lobakat naas xaara massukko. Haamaaxxi adil Too'i'i Daawiit Hadaadi'eezer gogota hundam kaa'ukkisa macceesukko. Daawiit Hadaadi'eezera kaa'u bikkina xummaatoo liirammatoo hincaa'oo'isina Too'i ixxi beet Yooraama Daawiit beyyo asse'ukko. Eehanniinsi illageen Too'i'i Hadaadi'eezerinne oramam hee'ukko. Yooraamim biriinsi, worqiinsii naas xaariinsii baxamaakkoo annanni annanni irifo'o Daawiitina amadaa waarukko. Daawiit Sooqixxi Cebba yakkam beyyonne tommoo sadeenti kum Eedoo'm mannaa shaa daba'llu ammanenne ixxek sad la'amukko. Eedoo'm uullanne hundoomannem lobakat wiidda'n beyyuwwa gaadaanina gudisukko. Ee beyyuwwanne hee'llam Eedoo'm minaadabim hundim ixxena ijaajanto'o. Waa'i Daawiitina maru beyyonne hundannem kaachcha uwwukko. Isra'ee'l minaadab hundim hanqo'i oogato siiddamisa issukkuuyyi Daawiit adil ihaa gassukko. Xaruy beet Yoo'aab gogotina awwonsaanchi hee'ukko; Ahiluud beet Yoosaafix aganna kitaaboohan hee'ukko. Ahiixoob beet Saadooqii Abiyaataar beet Abemeeleekii qeessuwwi hee'llo'o. Saraayyim ee'isam adi'l minina kitaabaanchi hee'ukko. Yoodaah beet Baanaay Daawiitika lombi waardiyya ijaajaanchi hee'ukko; Daawiit oosim adilla'n mi'n sogaan hee'llo'o. Mat ayyaamo Daawiit «Saa'ool miniinsi lehiinsi gatu manchi yoohonnihe? Ayyi la'ukko yoolas Yoonaataan bikkinaa yaa eroomma issoommo» yukko. Saa'ool mi'n awwaadaaniinsi Siibaa yakkam mat awwaadaanchi hee'ukko. Ixxim Daawiit beyyo waarona weeshakko'o. Daawiitim «At Siiba'attennihe?» yaa xa'mmukko. Siiba'am «Moollanna! Eeyya, an ki awwaadaanchi Siiba'atte» yaa dabarukko. Adilim «Waa'ina sagara aagumsinnem eroomma issoommisina Saa'ool abaroosiinsi lehiinsi gatu manchi yoohonnihe?» yaa Siiba'a xa'mmukko. Siiba'am «Yoonaataan goo'n oosiinsi mat kabadem foorinne yookko; ixxim lokko shiihaa» yaa dabarukko. Adilim «Hannonnette yookkok?» yaa xa'mmukko. Siiba'am «Loodaabaaranne Ami'eel beet Maakiir minenne yookko» yaa dabarukko. Ee bikkina adil Daawiit Mafiiboosheeta Lodabaaranne yoo Ami'eel beet Maakiir miniinsi wossiisukko. Saa'ool beetina beet Yoonaataan beet Mafiiboosheet waaru ammane Daawiit illagenne uullanne heeshaa ixxena lomba uwwukko. Daawiitim «Mafiiboosheeta!» yaa weeshukko. Mafiiboosheetim «I Moollanna! An ki awwaadaancho!» yaa dabarukko. Daawiitim «Baddititte! Kiyyanni Yoonaataan bikkina eroomma issoommo. Ki lobanni Saa'ool amaxxi hee'u uulla hundam kiina dabaroommo; hundi ammanem iinninne hurbaata ittootto» yukko. Mafiiboosheetim odim uullanne heeshaa anga ki'isaa «I moollanna! An lehu wishichciinsi e'lloombee'ane; eehannah iina kaa'n eroomma issitoottok mahinatte?» yukko. Ee lasage adil, Saa'oolina awwaadaanchi hee'u Siiba'a weeshaa «Saa'oolanee ixxi abaroosanee hee'u amaxxa hundam mat luwwim gatoo'n ki moollanni beet, beet ihu Mafiiboosheetina uwwaammo. At, ki goo'n oosii ki awwaadaanii ki moollanni beet beet itoo luwwa siidona uulla abuullitakka'a hurbaaxxi atoota Mafiiboosheetina aagissehe; ihukkaarem ki moollannina beet beet Mafiiboosheet amman hundam iinninne itookko» yukko. Siiba'anam tommii onti goo'n oosii lamiyyi awwaadaanii hee'ukko. Siiba'am «Adila! An at ijaajji luwwi hundam issoommo» yaa dabarukko. Ee'isinne Mafiiboosheet adi'l oosiinsi matisa ihaa adi'l maaddiinsi itam hee'ukko. Mafiiboosheetina Miikaa yakkam woraadichchi beet hee'ukko. Siiba'i abaroos hundim Mafiiboosheetina awwaadaan ikko'o. Ee bikkina lamem lokkim shiih ihu Mafiiboosheet adi'l maaddiinsi itukkuuyyi Yerusaaleemanne hee'ukko. Hofqax ammaniinsi lasage Amoo'n adil Naa'oos lehu bikkina ixxi beet Hanuun ixxi beyyonne adil ihukko. Adil Daawiitim «Ixxi anni Naa'oos iina eroomma issu bikkina an ixxi anga dabareena hasoommo» yukko. Ee bikkina Daawiit Naa'oos lehonne kichche'ukkisa la'iseena Hanuun beyyo manna asse'ukko. Ixxi asse'amaanim Amoona affo'o. Amoo'n uulli gassaan adil Hanuunina «Daawiit ka manna asse'ukkok kiyyanna lonsimminne kiyyanni lehonne kichche'ukkisa moo'iseena labissaahinnihe? Hore'em ee'isa labissitte! Ixxi ka manna asse'ukkok ka beero'o qaseena heele'aa shaashshitonayyonnihe?» yito'o. Hanuun Daawiit asse'u manna amadaa haareeddika mat kollo hogoossukko. Ixxuwwi eddechcham lamad afeebe'e gundisaa muraa hollukko. Ixxuwwim ixxuwwi mine daba'lliteena tuutto'o. Daawiit ee mannanne issamu luwwa macceesu ammanenne ixxuwwi beyyo manna asse'aa ixxuwwik haareeddi muteebe'e waattoo'n Yaarko'onne afuuttamisa issukko. Amoo'n minaadabim Daawiita ixxuwwi anginnem diinakkichchi issito'isa laqqo'o. Ee bikkina Sooriy uulli Beetirahoobiinsii Sooba'iinsii lamiyyi kuma, Xoobiinsim tommoo lam kuma ee'isam Maa'ika'i adiliinsi mat kum gaadaano gudisso'o. Daawiitim ee woshsha macceesaa hundem gogotinne maqirem ixxuwwanne Yoo'aaba gaadisukko. Amoo'n gaadaanim fitta'a ixxuwwi lob beero'i goocanne orina guddo'o; Sooba'ikii Ma'ikki gaadaanii mullam biir beyyonne; Sooba'iinsii Raaba'iinsii waatto'i Sooriy gaadaan ee'isam mat biir beyyonne orina guddo'o. Yoo'aabim Diina'i gogot illaginnee lasaginnee qaseena gudukkisa moo'ukko. Ee bikkina Isra'ee'l gaadaaniinsi geedduwwi ikko'i keeno doo'llaa Sooriy gogot illagenne makki beyyonne orina gudisukko. Ee gogotiinsi gatu kollo ixxi abbaayyi Abiis ijaajoo'isa issukko. Abiisim ixxuwwa Amoo'n gogot illagenne uullisukko. Yoo'aabim Abiisina «Sooriy gogot eese kaa'lleena hincito'isa moo'llilas waattaa iina agaage. Anim Amoo'n gaadaan keese kaa'lleena hincitam ammane waaraa agaagoommo. Eehannah baddititte qoxxe! Ni minaadabinaa ni Waa'i beero'uwwinaa yinaa qoxxinaa orammona! Hundi luwwim Waa'i doo'llisa ihona!» yukko. Yoo'aabii ixxi gogotii qasseena illagenne hincitu'uuyyi matto'aare Sooriy gogot gibbo'o. Amoo'n gogot Sooriy gogot gibbo'isa moo'llo'i ammanenne Abiis illagiinsi gibba'a beero'o aaggo'o. Yoo'aabim Amoo'n gogota qasimma uullisaa Yerusaalee'm kolli daba'llukko. Sooriy gogot Isra'ee'l gogotinne kaa'anto'isa laqqo'i ammanenne ixxuwwi gogota hundam matissita'a wixxaa'llo'o. Adil Haddaadi'eezer Efiraaxiis daajjiinsi eelliinchi fir kollinne yo'i Sooriy gogotina woshsha asse'ukko. Ixxuwwim Hadaadi'eezer gogoxxi awwonsaanchi Shoobaak awwonsatinne Heelaama Waatto'o. Daawiitim eekka macceesu ammanenne Isra'ee'l gaadaano mateeyyanne wixxaa'aa Yoordaanoos daajje eeqido firaa Sooriy gogot wiiddanto'i Heelaama marukko. Sooriy gogotim fitta'a Daawiitinne oranto'o. Isra'ee'l gogot Sooriy gogota kaa'lla'a hollito'o; Daawiitii ixxi gogotii lamar xibbi Sooriy gaadaa'n faraxxi gaarre'uwwa ushe'llam keenoo sor kum faradaanoo shito'o. Ee'isam diina'i gogoxxi awwonsaanchi hee'u Shoobaakam aphphissa'a omassita'a hee'llo'i bikkina ee o'l beyyonnem lehukko. Hadaadi'eezer gassi woronne hee'llo'i adilluwwi Isra'ee'l gogotinne kaa'anto'isa qoossito'i ammanenne ixxuwwinne maqire iittanta'a Isra'ee'l gassina ijaajanto'o; ee lasage sooriy uulli manni baddito'i bikkina la'mmek Amoo'n mannina hara'mmito'oyyo. Adilluwwi hiinchonne hiinchonne ixxuwwi losa'nnisam orina mattam qaraax agananne Daawiit gaaxxi awwonsaaninnee Isra'ee'l gogotinnee maqirem Yoo'aaba gaadisukko. Ixxuwwim Amoo'n gogota kaa'lla'a Raabaa yakkam beero'o kibbito'o; ihukkaarem Daawiit orina maroo'nnim Yerusaaleemanne hosukko. Mat ayyaamo maaro'i ballanne Daawiit balli diriichchiinsi ki'aa adi'lla'n minenne fooqanne firaa chirukkuuyyi mat danaam meentichcho orachcho aanshaqqitu'uuyyi moo'ukko. Ee bikkina ise ayyetda'e ikko'isa la'eena ixxi mat mancho asse'aa ise Eeli'aam landichcho Beersaabe'ettee Hiitekkichchi Ooriyo'i meentichchottee ikko'isa la'ukko. Isem ixxi beyyo eebakkona manna asse'ukko. Oo mannim ise ixxi beyyo eebo'aare isenne maqire iinse'ukko. Oo ammanim ise agananne meentiinsi waaroo luwwiinsi muccutto'oo amman hee'ukko. Ee lasage oo meentichcho mine daba'llita'a elle'llo'o. Hofqax ammaniinsi lasage lamfooratte ikko'isa laqqa'a manna asse'lla'a lamfoorette ihaammo yita'a Daawiitina kutto'o. Ee lasage Daawiit «Hiitekkichchi Ooriyo i beyyo asse'e» yaa Yoo'aab beyyo manna asse'ukko. Ee bikkina Yoo'aab Ooriyo Daawiit beyyo asse'ukko. Daawiitim Ooriy waaraa afukkaare «Yoo'aabii gogotii hundim xummannihe? O'l duuha'im hinkidette?» yaa xa'mmukko. Ee lasage Daawiit Ooriyina «Eehidette ihukkaa'lleensi ki mine mattaa usheexxe» yukko. Ooriyim Daawiit illagiinsi marukko. Daawiitim er hurbaata ixxena asse'ukko. Ihukkaarem Ooriy ixxi mine maroo'nnim adi'l lombi waardiyyinne maqirem adilla'n mi'n ooxxi goocanne iinse'aa garukko. Ooriy ixxi mine maroo'n gatukkisa Daawiit macceesaa «Lobakat ammane ki abaroosiinsi annanni ikkaa hee'llitto. Eehannah mahina ki mine mattittoyyo?» yaa xa'mmukko. Ooriyim «Isra'ee'llekii Yihuxxi gaadaanii o'l beyyonne wiiddanta'a dukkaananne yo'o. Hidi'l Saga'l Saaxinim ixxuwwinnette. I gaaxxi awwonsaanchi Yoo'aabii ixxi gaadaa'n awwonsaanii udma'anne wiiddanto'ookko; eehaare an i mine maraa itimma, agimmaa i mi'n amannem iinse'immaa hinkid xanoommo? Kaka an hore'em issoombee'an ihummisa ki illagenne hide'oommo» yaa dabarukko. Daawiitim «Eehidette ihulas kaballa keyye hose; ihukkaarem soodo dabaraa asse'oommo» yukko. Ee bikkina Ooriy ee lamem ballam Yerusaaleemanne hosukko. Daawiitim Ooriyina hii'm hurbaaxxi maadda itisaa woyi'n diqqaasa dimbeebe'e agisukko. Ee hiimom Ooriy adilla'n mi'n waardiyyuwwi minenne dakka daqqaa iinse'aa garukko bagaan ixxi mine marukkoyyo. Daram Daawiit Yoo'aabina askura kitaabaa Ooriyonnem asse'ukko. Oo askurim «Ooriyo or iibbu kollinne bagaxxi miinsanne higoo'isa isse; ee lasage at lasinne gibbaa ixxi shakkamisa isse» yoohan hee'ukko. Ee'isinne Yoo'aab ee beero'o kibbaa amadukkuuyyi diina'i malaayyukkisa la'oo kollinne Ooriyo illagenne higisukko. Diina'i gaadaan beero'iinsi fitta'a Yoo'aab gogota qasso'o. Daawiit gaaxxi awwonsaaniinsi hofqaxim leto'o; Ooriyim ee keeninne maqirem lehukko. Ee lasage Yoo'aab ee oranne ihu luwwa hundam kuroo mancho Daawiit beyyo asse'ukko. Ee asse'amu manchinam «O'l bikkina hundam luwwam adilina kuttaa lasage adil quuqaa ‹Ixxuwwinne orantakkeena beero'onne mahina hincitakko'o? Kininne ootamu ooxxi hanenne uullita'a ki'nnuwwanne xiyya darabbamisa laqqakko'oyyonnihe? Geedewoon beet Abemeeleek hinkid lehuda'e tiittakkamoyyonnihe? Ixxo Teebeex yakkam beyyonne mat meentichcho liitimmi ifichcho hanaanaad fatakita'a Abemeeleekika sammo anta'a shito'o. Eehannah ki'nnuwwi ee ootanne hincitakko'ok mahinatte?› yaa adil keese xa'mmulas ‹Ki gaadaanchi Ooriyim lehaakko› yitaa kure» yaa ijaajukko. Ee bikkina oo asse'amaanchi Daawiit beyyo maraa Yoo'aab ijaaju luwwa hundam «Ni diina'i malaayyita'a neese qasseena beero'iinsi fitta'a udma'a waatto'o. Ihukkaarem neese hollinaa beero'i ooxxi gooca afinsummo. Ee lasage ki'n ooxxi hanenne uullita'a xiyya neesenne darabbo'o; Adila! Ki gaaxxi awwonsaaniinsi hofqaxim ee ammanenne leto'o; ki awwaadaanchi Ooriyim lehaakko» yaa kurukko. Daawiitim ee asse'amaanchina «Yoo'aabina oranne ayyi lehooda'e gaassakka'a la'akkeena xanakkambee'i bikkina ‹Kichche'llitte! Ka lasage qoxxitaa qasantaa ee beero'o bi'ise› yitaa kure» yukko. Beersaabe is manchi lehukkisa macceesso'i ammanenne kichche'lla'a wi'llito'o. Wi'l siggaa lasage Daawiit manna asse'aa ixxi adilla'n mine eebisukko. Ixxenam aretti ikka'a goonchi beeto qotto'o; ihukkaarem Daawiit baxu bax Waa'a kichche'isukko. Waa'i hiraagaanchi Naataana Daawiit beyyo asse'ukko. Naataanim Daawiit beyyo maraa «Mat beero'onne lam manchi hee'am hee'ukko. Ixxuwwiinsim matii goddaancho matii buxichchi hee'ukko. Ee goddaanchi manchinam lobakat larii gereebbii hee'ukko. Ihukkaarem ee buxichchi manchina bita'llaakkoo xale'i mat gereechchichchi hee'ukko. Ee gereechchom abooyyukkuuyyi ixxi oosinne maqirem ixxi minenne li'ixxaakkoohan hee'ukko. Ixxi itoo hurbaatiinsim itisam hee'ukko; ixxi agoo aggiinsim agisam hee'ukko; qaaphphaahim iinse'am hee'ukko. Oo gereechchim ixxena qachchisa hee'ukko. Ee goddaanchi manchi mine mat balla koyyiinchi waarukko. Ihukkaarem oo goddaanchi manchi ixxena yoo gereebbiinsi te'im lariinsi mato duraa ixxi mine waaru koyyiinchina hurbaata gudiseena hasukkoyyo. Ee bikkenne ee buxichchi manchi gereechcho massaa duraa ee koyyiinchina hurbaata gudisukko» yukko. Daawiitim eehid issu manchonne lobakata quuqaa «Ee baxo baxu manchi lehimmi hasisoohan ihukkisa hee'oo Waa'i summinne hide'oommo. Eehido'i jor baxo baxu bikkina ee manchiinsi massukkoka soor suum issaa dabarimmi hasisookko» yukko. Naataanim Daawiitina «Oo manchi at ki gagame; Isra'ee'l Moollanni Waa'i ‹An keese Isra'eelanne adil issummo; Saa'ool angiinsim gatisummo. Ixxeka adillanoo meentoo kiina uwwummo; Isra'eelannee Yihudannee keese adil issummo. Oo hundim kiina hoffe'uta'n odim edaa uwwam hee'ummo. Eehannah i ijaajo gaddittok mahinatte? Ka hantaaro mahina baxxitto? Ooriyo o'l beyyonne shisiissitto; muccur manchom Amoo'n gogot shitamisa issitto; ixxi meentichchom ki gagina eebaqqitto. At iina ijaajantibee'i bikkinaa ooriy meentichcho hoo'llit bikkinaa ki shumo'iinsi doolli hundinam bisa'inne lehookkok bee'ooyyo. Oono'o, ki abaroosiinsi mat ki'aa keesenne hawwo afisoo'isa issoomman ihukkisa hide'oommo. Ki meento kiiniinsi horaa kiina hincoo manchina uwwoommo; oo manchim uullaannonne salaat ballanne ki meentinne maqire iinse'ookko. At ka baaxiilo maaxaqqanne baxxaatto; ihukkaarem an ka woshsha salaat ballanne Isra'ee'l minaadaphphi illagenne hundannem la'amoo'isa issoommo› yoolla» yukko. Daawiitim «Baaxiilo baximminne Waa'a kichche'isaammo» yukko. Naataanim ixxena «Waa'i ki baaxiilo uru bikkina letooyyo. Ihukkaarem kido'i damigo baximminne Waa'a gadditti bikkina oo qaramu ki beet lehookko» yaa dabarukko. Naataan ixxi mine elle'aa lasonne Ooriy meentichcho Daawiitina qatto'i beetonne Waa'i kee'mmaalli xisso eebukko. Oo ciilichchom fayyiisoo'isina Daawiit Soommanukkuuyyi Waa'a uunxukko. Hiimina hiimina iinse'oo minenne uullanne iinse'am hee'ukko. Adilla'n mi'n gassaanim ixxi kolli hincita'a uulliinsi ki'oo'isa issiteena yakito'o. Ihukkaarem ixxi uulliinsi ki'oobee'isinaa ixxuwwinne maqirem ma'lluwwam duuqoobee'isinaa murte'ukko. Xissu saantina oo ciilichchi lehukko. Daawiit gassaanim lehukkisa kurimma baddita'a «Ciilichchi foorinne hee'u ammanem songummaare ni woshsha macceesukkoyyo; eehannah kaba ixxi beet lehukkisa hinkid issinaa kulleena xannoommo? Ayla'ukko matisa ihooda'e» yaqqanto'o. Daawiitim ixxuwwina'i ixxuwwim hashaashshantu'uuyyi macceesaa ciilichchi lehukkisa la'ukko; ee bikkina «Ciilichchi lehukkonnihe?» yaa xa'mmukko. Ixxuwwim «Eeyya lehaakko» yita'a dabatto'o. Daawiitim uullanne iinse'u beyyiinsi ki'aa ixxi orachcho aansha'ukko orachcho lii'lle'isoo luwwam laphphukko. Mulli eddechcham edde'ukko; ee lasage Keesammi Mine maraa Waa'ina otossukko. Ixxi adilla'n minem daba'llaa maraa hurbaata hincaa'akkamisina xa'mmukko; hincaa'akko'isam itukko. Ixxi gassaanim Daawiitina «At ka'isa ikkittok mahinatte? Ciilichchi foorinne hee'ukkuuyyi soommantittuuyyi wi'llitto. Ihukkaarem ixxi lehaa lasonne ee ammanem ki'llaa ittitto!» yito'o. Daawiitim «Ciilichchi foorinne hee'ukkuuyyi soommanummokii wi'llummokii hanqame; oohim Waa'i iina haafaa ciilichcho fayyiissooda'e yaatette hee'ukko. Ihukkaarem kaba lehaa lasonne mahina soommanoomane? Ka ciilichcho la'mmeka foorinne hee'oo'isa isseena xanoommonnihe? An ixxi kolli maroommo bagaan ixxi i kolli daba'llaa waarooyyo» yukko. Ee lasage Daawiit ixxi meentichcho Beersaabe'e qoxxisukko; isenne maqirem iinse'ukko. Isem ixxena goonchi beeto qatto'o. Daawiitim ee beetika summa «Salamoona» yaa fissukko. Waa'im ee ciilichcho iittu bikkina summa «Yidiidiyaa» yaa fissona hiraagaanchi Naataana ijaajukko; oohim «Waa'i iittaakkoohane» yimma. Ee ammane Yoo'aab Raabaa yakkam Amoo'n manni Beero'o amadeena gaadu gaadinne gafe'ukkuuyyi maraa ee beero'i girba amadukko. Ixxim Daawiit beyyo manna asse'aa «Raaba'i beero'o qasaa ee beero'i wo'i firoo beyyi girba ammadaammo. Oono'o, kaba ki gogotiinsi gatu qaxa wixxaa'llaa ee beero'o qassaa at ki gagoomim amade; eebeelas an ee beero'o amadaa i summinne weeshamoo'isa issoommo» yukko. Ee bikkina Daawiit ixxi gogota wixxaa'aa Raaba'i beero'o gaadaa kaa'aa amadukko. Daawiit Amoo'n adi'l horooriinsi worqinnee inqu yakkam bito xee'aalli kininnee baxamaakkoo sadee onti kilo'oo kee'mmoo adilla'n mare'e massaa ixxi horoorenne issaqqukko. Ee'isam ee beero'iinsi lobakat luwwa qeefadaa massukko. Ee beero'i minaadabim magaazinne, uulla abuullakkam xaarinnee heedinnee baxxamisa issukko. Mine baxakkam xuubam baxxamisina ijaajukko. Mulli Amoo'n uulli beero'uwwanne yo'i minaadab hundam ee'isam baxxamisa issukko; ee lasage ixxii ixxi gogotii hundim Yerusaaleema matto'o. Daawiit beet Abeseloomina Ti'imaare yakkam mishissam aayya hee'llo'o. Isem minina ikkoo'n yo'i landichchotti hee'llo'o. Daawiit oosiinsi mat hee'u Amiinoon Ti'imaare iittukko. Ixxim ise lobakata iittu bikkina xissukko. Isem baajaamotte hee'llo'i bikkina goo'n oosinne edantambee'isa egeranta'a hee'llo'i bikkina isenne edameena hore'em xanukkoyyo. Ihukkaarem ixxena Yoonaadaaba yakkam qoor beshichchi hee'ukko. Ixxim Daawiit abbaayyi Shaama'i beet hee'ukko. Yoonaadaabim Amiinoonina «At adi'l beet ikkittuuyyi ki orachchi ballina ballina nacukkuuyyi moo'oommok mahinatte? Hino'o iina kure» yaa xa'mmukko. Amiinoonim «Iyyabbaayyi Abeseloom aayya Ti'imaare iittummi bikkinatte» yaa dabarukko. Yoonaadaabim «Eehidette ihulas xissittaannisa ikkaa ki ara'anne iinse'e; kiyyanni moo'eena waaroo ammane «Iyyaayya Ti'imaare waatta'a i gadanonne ikka'a an moo'ummuuyyi hurbaata satta'a iina duuqissona hasoommo› yihe» yukko. Ee bikkina Amiinoon xissukkaannisa ihaa ixxi ara'anne iinse'ukko. Adil Daawiitim moo'eena Amiinoon beyyo marukkaare «Ti'imaare i beyyo waatta'a an moo'ummuuyyi i gadanonne lam injeera satta'a ise gagoomim iina duuqissamisa isse» yukko. Ee bikkina Daawiit ixxi adilla'n minenne hee'llam Ti'imaarena «Kiyyabbaayyi Amiinoon mine mattaa ixxena hurbaata sare» yoo ijaajo asse'ukko. Isem is abbaayyi Aminoon mine matta'a ara'anne iinse'aakkoo moo'llo'o; hofqax qamam qufissa'a lasage Aminoon moo'ukkuuyyim satto'o. Satto'okam mixaadiinsi fissita'a itona hincaa'llo'o. Ihukkaarem ixxi itimma sabaa «Manna hundam ka miniinsi fissehe» yukko. Hundim firukko. Ee lasage «Hurbaata ka an iinse'ummi beyyo amaddaa waattaa ki anginne duuqise» yukko. Isem satto'i hurbaata amadda'a is abbaayyi Aminoon beyyo matto'o. Hincaa'llo'i ammanennem calammaa'aa amadaa «Waare maqirem iinse'nnona» yukko. Isem «Ihooyyo! Iyyabbaayyo, hay eese sholliissitte; kido'i tuussiisoo jor bax Isra'eelanne ihaa la'ooyyo; ee bikkina kido'i tuusiisoo jor baxo baxxitte. At eese ka'isa sholliissaa lasonne minaadaphphi illagenne hinkid iggaa mareena xanoommo? Atdu maha ikkootto! Isra'ee'l minaadaphphi lambe'enne lobakata sholle'llaattoo jor manchi ikkootto. Ee'isiinsi at adila xa'mmitta'n eese kiina aretti issaa uwwoo'isa amma'nnoommo» yito'o. Ihukkaarem ixxi is woshsha macceeseena hasukkoyyo. Isem malaayyinne amadaa iseka baajoommano bi'isukko. Ee lasage Amiinoon ise Hore'oomam gaassi iittukkaanniinsi loboka sabu bikkina «Ka miniinsi fire» yukko. Isem «Ee'isa ihooyyo! Kaba eese fissitaa hollimmi illageen eesenne issitti jolliinsi baasa» yito'o. Ihukkaarem Amiinoon is woshsha macceeseena hasukkoyyo. Ixxim ixxi awwaadaancho weeshaa «Ka meentichcho i illagiinsi ekkid hoore; isem biira fissitaa gooca xufe» yukko. Is Abbaayyi ise moo'aa «Keese sholliisukkok Aminoonattennihe? Iyyaayya! Hay kaba wi'llititte; ixxi kiyyabbaayyi ihu bikkina cawwitaa ure» yukko. Ee bikkina Ti'imaare Abeseloom minenne wossaanchotte ikka'a afuutto'o. Adil Daawiit ee ihu woshsha macceesu ammanenne lobakata quuqukko. Abeseloom ixxi Aayyi Ti'imaare sholliisu bikkina Amiinoona lobakata sabukko. Ixxennem joraa erokaa woceena od hasukkoyyo. Lam hiinchiinsi lasage Abeseloom Efireem beero'i gadanonne Haxoora yakkam beyyonne gereebbika odda muram hee'ukko. Ee bikkina adi'lleka goo'n ooso hundam ee beyyo weeshukko. Adil Daawiit beyyom maraa «Adila, i gereebbika odda muroommuulla; ee bikkina atii ki gassaanii an gudisoommi maaddina waattakkeena xantakkamonnihe?» yukko. Adilim «I beeto, neese waarimmi hasisooyyo; mashka'oomam neese hundim waallumlas koyyinan kee'mmookko» yaa dabarukko. Abeseloomim qoxxisaa uunxukko; ihukkaarem adil ixxi sawwite dabasseena hasubee'i bikkina Abeselooma maasse'aa geegeesukko. Ihukkaarem Abeseloom «Erane! At waatteena hassibee'aa'lleensi iyyabbaayyi Amiinoon waaroo'isa issitooyyonnihe?» yaa xa'mmukko. Adilim «Ixdu mahina waaroohane?» yaa xa'mmukko. Abeseloom qoxxisaa uunxu bikkina Daawiit Aminoonii mulli goo'n oos hundimii mattamisa issukko. Abeseloomim adilina laboo maadda gudisaa hee'ukko. Ixxi awwaadaaninam «Aminoon lobakata agaa dimboo'isa egellehe; ixxi dimboo ammanem ixxo shitakkamisina ijaajoommaare shi'llehe; shi'llehe yummok anetti ihummi bikkina xa'mmamoommok anette; ee bikkina ki'nnuwwi hore'em badditakkotte; qoxallehe; ma'llichchom malantakkotte» yukko. Ee bikkina Abeseloom awwaadaan ixxi kurukkisanne Aminoona shito'o; mulli Daawiit oosim ixxuwwi baqullanne saa'llita'a gibbo'o. Mine elle'llu'uuyyi googonne hee'llonam «Abeseloom ki ooso hundam shaa guullukkotte; matim gatukkok bee'e» yakkam woshshi Daawiitina afukko. Adilim afuuru beyyiinsi ki'aa kichchechchinne ixxi eddechcha dereeraa uullanne biddiqaa ubukko; ee beyyonne ixxenne maqire hee'llo'i ixxi awwaadaanim kichchechchinne ixxuwwi eddechcha dereetto'o. Ihukkaarem Daawiit abbaayyi Shaama'i beet Yoonaadaab «Adila, ooso hunda shakko'oyyo; shakko'ok xale'i Amiinoonatte. Abeseloom ka baxo baxeena sawwukkok Aminoon ixxi aayyi Ti'imaare sholliisu balliinsi ki'isaa qoodaakkoo qoodo'o. Ee bikkina ki oos hundim lehaakko yakka'a kurakko'i woshsha amma'nnititte; lehukkok xale'i Amiinoonatte» yukko. Ee ammane Abeseloom gibaa xoraa hee'ukko. Waardiyyichchim ee ammane Horoonaayimiinsi kid woroo googinne lobakat manni duuniinsi dillukkuuyyi moo'ukko; ixxim adilina «Horonaayi'm kollinne duuniinsi lobakat manni aad dillukkuuyyi moo'oommuulla» yukko. Yoonaadaabim Daawiitina «An ki awwaadaanchi kurummisam oono'o ki oos waattamuulla» yukko. Ixxi kaka wocaa guullukkisam Daawiit oos mine aagga'a wi'llito'o. Ee'isam, adilii ixxi awwaadaanim iranta'a wi'llitto'o. Ihukkaarem Amiinoon leh xadamukkuuyyi maru ammanenne ixxi beet Abeselooma moo'eena quluxukko. Adil Daawiit Abeselooma moo'eena quluxukkisa Yoo'aab la'ukko. Ee bikkina Taqo'anne hee'llam mat qoor meentichcho weeshisukko. Isem waatto'aare «Wi'llaancho labbeena yakihe; xiddi eddechcham edde'e; buurom laphphititte; lobakat ammane kichchechchanne hee'llitoka labbeena gude. Ee lasage adi'l beyyo hincitaa an kiina kuroommi woshsha kure» yukko. Ee lasage ise adilina kurimmi hasisoo woshsha hundam Yoo'aab isena kurukko. Oo meentichchom adi'l beyyo hincita'a uullanne heeshita'a «Adila, hay iina hara'mme» yito'o. Adilim «An kiina hara'mmona hassoo luwwi maruwwa?» yaa ise xa'mmukko. Isem «An goonchi lehaakkoo busaratte. Adila iina lam goo'n oos hee'llo'o. Mat ayyaamo araaro'isoo manni be'i beyyonne lamem oosim gananta'a mat mulleka shukko. Adila, oono'o kaba qar hundim ki'aa ‹Ixxi abbaayyo shu bikkina ixxom shineenatte ki beeto niina higissaa uwwe› yukkuuyyi eese hawwisaakko. Ixxuwwi eese ee'isa issito'aalleensi an oos bee'em gateenatte; iikka gatu mexxo'i beetichchom shita'a i ille qooqisseenatte. I aro'ikam shumo'o bi'isseenatte» yito'o. Adilim «Ki mine daba'llitaa mare; anim ki woshsha axisoommo» yukko. Isem «At issitoo luwwi hundinam hawwojjoom iihanee i abaroosanee ihona; ihukkaarem adilii ixxi adillanii muccuraakkoohan ihona» yito'o. Adilim «Ayyi manchim keese hawwisulas iina kure; keese la'mmeka hawwiseena hore'em xanooyyo» yukko. Isem «Adila, i beetika xiiga miqisoo manchi iikka mulli beeto shimminne illagee'nnaanniisi lophphaakkoo damigo baxoobee'isa issiteena Waa'i summinne hide'e» yito'o. Adil Daawiitim «Ki beetonne hawwodanchi afimmi gataa ixxi horoo'l saraatiinsi matim uullanne uboobee'an ihukkisa hee'oo Waa'i summinne hide'oommo» yukko. Oo meentichchom «Adila, an ki awwaadaancho odim mat woshsha wocoommo» yito'o. Ixxim «Woce» yukko. Isem «Waa'i minaadaba ka'isa hawwoddittok mahinatte? Ki beet yaayyamaa maraa hee'u uulliinsi waaroo'isa issittoyyo; ee bikkina kaba wocci sagarinne ki gaganne oogattaatto. Neese hundim lehimmi gatoobee'ane; neesem uullanne dunamaa lasage la'mmeka inkiirakkeena xanakkambee'i wo'isa. Ihukkaarem Waa'i ixxeensi qee'llu manchina daba'lloo googo gudisookko bagaan ixxeka foore bi'isooyyo. Kabadem adila, an ki beyyo waarummok ka woshshanne eese manni baddisukkisa kureenatte. ‹An xa'mmummi luwwa hundam iina issookko› yoommi neeyyatinne ki illagenne hincaammo. Kaba an kiina kuroommi woshsha macceessaa i beetoo eesee shimminne Waa'i ixxi minaadabina gulummi issaa uwwu uulliinsi neese hooreena hasoo manchiinsi eese gatissootto yaa sawwaatette. Ee'isam adil Moollanni Waa'i asse'amaanchisa joraa erokaa annanni issaa la'oo bikkina at uwwitti neeyyaxxi sagar xumminne hee'oommisa issookko yaa sawwaatette. Eehannah ki Moollanni Waa'i kiinninne maqir ihona» yito'o. Adilim «An mat xa'mmichcha keese xa'mmoommo; atim iina hanqa woce» yukko. Isem «Adila, hassitti luwwi hundam xa'mme» yito'o. Ixxim «Kaka issitoo'isina keese ijaajukkok Yoo'aabattennihe?» yaa xa'mmukko. Isem «Adila; at yitoo luwwi hundiinsim fireena xanoo manchi bee'an ihukkisa an ki summinne hide'oommo. Hanqinam an kid yaa wocoommisina eese sogukkok ki gaaxxi awwonsaanchi Yoo'aabatte. Ixxim kaka issukkok woshsha hundam axiseena sawwu bikkinatte. Ihukkaarem Adila, at Waa'i asse'amaanchisa qoora; uullanne ihoo luwwa hundam laqqoohane» yito'o. Ee lasage Adil, Yoo'aabina «At yitti woshsha aa'aammo; mattaa Abeselooma hassaa wore» yukko. Yoo'aabim Daawiit illagenne heeshaa ixxo galaxxukko. Ixxim «An yummi woshsha aa'llitti bikkina ki illagenne nuura siixxummisa kaba la'aammo» yukko. Yoo'aabim Gashuura maraa Abeselooma dabaraa Yerusaaleema worukko. Ihukkaarem adil «Ixxi mine elle'ona; ixxi i ille moo'oone» yukko. Ee bikkina Abeseloom ixxi mine elle'ukko. Adi'llekam ille moo'ukkoyyo. Ee doollenne Abeseloome'nnoo'i danaam manchi Isra'ee'l uullanne hee'ukkoyyo. Ixxim horoo'l saraatiinsi ki'isaa lokki xura'anne afeebe'e miiqakkam luwwi bee'i manchi hee'ukko. Ixxek horoo'l saraat hore'em lobakat hee'ukko. Ixxenam kee'mmoo bikkina hiinchonne mataagge muram hee'ukko. Ee muramu horoo'l saraatam adilla'n mi'n kilo'onne keenakkamaare lam kilo'iinsi lophpham hee'ukko. Abeseloomina sas goo'n oosii mat landichchoo hee'amukko. Landichchokam summa Ti'imaare yakkamotan ikka'a lobakata danaamotte hee'llo'o. Abeseloomim adi'lleka ille moo'oo'n Yerusaaleemanne lam hiincho hee'ukko. Ee lasage Abeseloom adi'l beyyo maraa ixxi bikkina xa'mmona Yoo'aaba weeshisukko. Ihukkaarem Yoo'aab waarimma sabukko. Abeseloom Yoo'aab waaroo'isina la'mmaaggem asse'ukko. Ihukkaarem kabadem Yoo'aab waareena hasukkoyyo. Ee bikkina Abeseloom ixxi awwaadaanina «Moo'llehe Yoo'aab uulli i uulli bakkonnetti ihaa so'i yoohane; ee bikkina mattakka'a shokka uwwehe» yaa ijaajukko. Ixxuwwim matta'a ee hurbaatanne shokka uwwitto'o. Ee lasage Yoo'aab Abeseloom mine maraa «Ki awwaadaan i hurbaata shokkiisso'ok mahinatte?» yaa xa'mmukko. Abeseloomim «An weeshummaare at waatbee'i bikkinatte. Adi'l beyyo mattaa ‹An Gashuuriinsi keyye Waarummok mahinatte? Eehe'em hee'immi iina e'llam hee'ukkoyyonnihe?› yitaa i bikkina xa'mme; an adilinne edameena xanoommi duuha'a taaphanse; an bi'isaanchi ihaa siidamumlas eesenne leho oogatona» yukko. Ee bikkina Yoo'aab adil Daawiit beyyo maraa Abeseloom ixxena yu luwwa hundam kurukko. Adilim Abeselooma weeshisukko. Abeseloomim maraa adi'l illagenne uullanne heeshaa obodda yukko. Adilim ixxo suunqukko. Ee lasage Abeseloom mat faraxxi gaarre'ee faradoo ixxi illagenne geettam ontayyi gaadaanoo gudisukko. Ixxim hundi ballam dar dara ki'aa ee beero'o aagakkam ooxxi gooc kolli massoo gooqqi inqenne uullam hee'ukko. Adil ixxeka meto'o moo'ooisina waaroo annanni annanni woshshi yoo manni hundim ee beyyo waaroo ammane Abeseloom ixxi beyyo weeshaa hanniinsi waaruda'e xa'mmam hee'ukko. Oo manchim hinka'i sulliinsi waaruda'e kuraa lasage Abeseloom «Moo'e! Ki quux hanqo'an hee'ukko. Eehannah adila bikkaa ki woshsha hanqo'isinne moo'ookkok bee'e» yam hee'ukko. Odim «An daanni ihaammoota'n fit te'im meto'i yoo manchi i beyyo waaroohaare hanqa oogatam hee'ummo» yam hee'ukko. Oo manchim ixxi illagenne hincaa heeshaa obodda yeena waaroohaare Abeseloom ee mancho qaaphphaa suunqam hee'ukko. Abeseloom hanaqo'i oogato'o siixxiteena adi'l beyyo waattam keenina hundinam ee'isa issam hee'u bikkina ixxuwwika tiiro agukko. Soor hiinchiinsi lasonne Abeseloom adil Daawiitina «Adila, an Waa'ina Uwwoommoo yaammoo uga'a uwweena Keebiroona maroommisa isse. Mashka'oomam Sooriy uulli Gashuuranne hee'ummi ammane ‹Eese Yerusaaleema dabattittaare Keebiroonanne kitima hincaa'oommo› yaa Waa'ina uga'a aagaammo» yukko. Adilim «Xummanne mare» yukko. Ee bikkina Abeseloom Keebiroona marukko. Ihukkaarem ixxi hundem Isra'ee'l sulli beyyom worinne manna asse'aa «Xurumbullika sagara macceessakkam ammane sagara iimaa'llakka'a ‹Abeseloom Keebiroonanne adil ihaakko!› yitakka'a shuullehe!» yita'a ixxuwwina kuttamisa issukko. Abeseloom weeshukkaare ixxenne maqire Yerusaaleemiinsi matto'oo lam xibbi manni hee'llo'o. Ixxuwwim awwonta'a matto'ok ixxi sawwixxeka maham laqqoo'nnim godaphphi fayya'oomminnetti hee'ukko. Abeseloom kitima hincaa'oo ammane adil Daawiit sogaaniinsi mat hee'u Akxoofeela yakkam mancho manna asse'aa Giilo'i beero'iinsi weeshisukko. Abeseloom Adilanne sawwu bangujjaat qoxxukkuuyyii ixxo awwonoo mannik xig exxukkuuyyii marukko. Mat asse'amaanchi Daawiitina «Isra'ee'l minaadabik tiir Abeseloominnetti ihaakko» yukko. Ee bikkina Daawiit ixxenne maqire Yerusaaleemanne hee'llam gassaan hundinam «Abeseloom angiinsi ganteena hansummaa'lleensi ka beyyiinsi gimbaa xollona! Ee bikkina qaqqissehe! Eehid ihubeelas qaqisaa waaraa neese guullookko. Ka beero'onne siidu manni hundam shookko!» yukko. Ixxuwwim «Ihona adila, at yittoka hundam issimmina gundaammo» yita'a dabatto'o. Ee bikkina adil adilla'n mine egettona gatisu tommi bakki meentiinsi bagaan ixxi abaroosaa mulli gassaanoo hundam amadaa gibukko. Adilii ixxi awwonaanii hundim beero'iinsi fitta'a mattu'uuyyi beero'i lasaanchonne yoo mat mi'n gadanonne uullito'isam adi'l gassaan, lombi waardiyyuwwii Gaatiinsi waatto'i loh xibbi gaadaanii ixxi illaginne higgo'o. Adilim Iitaaya yakkam ee gaadaa'n awwonsaanchina «Niinninne maqire mahina mattoolla? Daba'llitaa haareechchi adil Abiseloominne maqire afuure. At ka uullanne manni uulli manchi ikkaa hee'lloo mulli uulli mancho. Waattittokim beeballa; eehannah kaba iinninne maqire mahina badattoohane? An hanno maroomda'em la'ummoyyo; ee bikkina ka ki uulli manna amaddaa daba'lle; Waa'i ixxeka biijoomaa amma'nnamaakkoohaanoomaa kiina moo'isona» yukko. Ihukkaarem Iitaay «An ki awwaadaanchi keesenne leh afoohan ihuta'nnim at mattoo beyyo hundam maroomman ihukkisa an kiina Waa'i summinne hide'oommo» yaa dabarukko. Daawiitim «Erane, eehid ihulas higgaa mare» yukko. Ee bikkina Iitaay ixxi gaadaaninnee ixxuwwi abaroosinnee marukko. Daawiit awwonaan fitta'a matto'i ammanenne minaadab sagara iimaa'lla'a willito'o. Adil ixxi awwonaaninne maqirem Qeediroo'n cebba firukko. Mateeyyoominnem udma'i uulla matto'o. Qeessichchi Saadooqim ixxuwwinne hee'ukko. Keesamakkoo Hidi'l Saga'l Saaxina iyyita'a Leewi'i oos ixxenne maqire hee'llo'o. Ixxuwwim Hidi'l Saga'l Saaxina minaadab hundim beero'iinsi fireebe'e eekke'e dissito'o. Abiyaataarim ee beyyonne hee'ukko. Ee lasage Saadooqina adil «Hidi'l Saga'l Saaxina dabattaa beero'o masse; an Waa'i illagenne nuura siidumlas mat balla Hidi'l Saga'l Saaxinaa garoo beyyoo moo'oommisa issookko. Ihukkaarem Waa'i an keesenne liiramummoyyo yulas eesenne hasu luwwa issona; anim aa'eena gudaammo. Odim Saadooqina ‹Ki beet Ahimaaxaa Abiyaataar beet Yoonaataanaa amaddaa beero'o xummanne mare. Anim kiinniinsi mat woshsha macceeseembe'e uulli udma'anne yoo daajje firakkam beyyonne egeroommo» yukko. Ee bikkina Saadooqii Abiyaataarii Hidi'l Saga'l Saaxina dabatta'a Yerusaaleema massito'o. Ee beyyonnem afuutto'o. Daawiitim kichche'ukkisa la'iseena caamma'a issaqqoo'nnim gunguu'llaa Wee'l duuna wi'llukkuuyyi firukko. Ixxo awwontam hee'llo'i keenim gunguu'llita'a wi'llitam hee'llo'o. Daawiitim Akxoofeel Abeseloominne maqirem bangujjukkisa macceesaa «Waa'a, Akxoofeel sogitano awwaad bee'an issitoo'isina keese uunxoommo» yaa Waa'a uunxukko. Daawiit Waa'ina otossakkam beyyi yoo duu'n ludo afukkaare amma'nnamaakkoo ixxi beshichchi Arke'i uulli Huushaay ixxi eddechcha dereeraahii horoorennem dira laphphaahii ixxenne edameena waarukko. Daawiitim «At niinninne marimminne iina ma'llichchom issitooyyo. Ihukkaarem at iina hara'mmiteena xantoottok beero'o daba'llitaa mattaa Abeseloomina ‹Kiyyannina awwaadummisam kiinam amma'nnanchinne awwaadoommo› yitaa kuttilasii ee'isam Akxoofeel sogoo sogitano hundam sabbilasii odim Qeessuwwi ikko'i Saadooqii Abiyaataarii ee beyyonne hee'llam bikkina adilla'n minenne macceessoo woshshi hundam ixxuwwina kuttilasette. Ixxuwwinne maqirem ixxuwwi oos Ahimaaxii Yoonaataanii hee'llamo; at macceessitti woshshi hundam ixxuwwanne iina asse'lleena xantootto» yukko. Ee bikkina Daawiit beshichchi Huushaay beero'o daba'llukko. Abeseloomim ee ammanem ee beyyo afukko. Daawiit duu'n ludiinsi ekkollinne hofqaxa marukkisam lam xibbi xeffo'i daabbo'o, mat xibbi xexxefammi zabiiba, mat xibbi oda'i mishaa mat can woyi'n diqaasaa iyyaakkoo lam hallichcho ushe'am hee'u Mafiiboosheet awwaadaanchi Siiba'anne dangonnem edamukko. Adil Daawiitim «Ku luwwi hundim maruwwa?» yaa xa'mmukko. Siiba'am «Adila, ka halla worummok ki abaroos saa'llonatte, daabbo'oo oda'i misham keese awwontam keen ittonattee woyi'n diqaasam uulli udma'anne hooggam ammane aggonattee» yaa dabarukko. Adilim «Ki moollanni Saa'ool beet beet Mafiiboosheet hannonnette?» yaa xa'mmukko. Siiba'am «Isra'ee'l minaadab ixxena lobanni Saa'oolika adillano dabatta'a uwwitamoo yaa sawwu bikkina ixxi kaba yookkok Yerusaaleemannette» yaa dabarukko. Adilim Siiba'ana «Mafiiboosheetan ihu amaxxi hundim ka lasage kiihane» yukko. Siiba'am «Adila, oono'o an ki awwaadaancho; hundi ammanem an keese liiransoo baxo qoxxaa baxoommo» yaa dabarukko. Adil Daawiit Baahuuriima afu ammanenne Saa'ool qarmanchi Geera'i beet Shiimi'i firaa qangukkuuyyi Daawiit kolli hincukko. Daawiit ixxi gogoxxaannonnee ixxi lombi waardiyyuwwi lambe'ennee hee'ukkuuyyi Shiimi'i Daawiitannee ixxenne maqire yoo gassaanonnee kina darabimma asheerukko. Daawiitam «At manna shitaattoo damigaancho; ka uulliinsi laa'ihe! At Saa'ool adillano aa'llaatto; ixxi abaroosa hundam shitaatto; oono'o, kaba odim Waa'i keese guzumo'oolla. Waa'i ki adillano ki beet Abeseloomina higisaa uwwaakko; At manna shitaattoohane; oono'o, at bi'lloo amman kaba afaakko!» yukko. Ee ammanenne Xaruy beet Abiis adilina «Adila, ku lehu wishichchiinsi e'lloobee'i manchi i moollanna, adila hinkid qangoolla? An maraa ixxeka horoore muraa uroommo!» yukko. Adilim Abiisina ixxi abbaayyi Yoo'aabinaa «Ku woshshi ki'nnuwwa moo'ooyyo; Waa'i ixxo eese qangona ijaajulas ‹Mahina ka'isa issitoolla?› yaa ixxo xa'mmeena xanookkok ayyette?» yukko. Odim Daawiit Abiisinaa gassaaninaa «I beet eese sheena hasoolla; eehannah ka Biiniyaam manchonne mahina maalaltakkamuulla? Eese qangoo'isina Waa'i ixxena kuraakko; ee bikkina ullehe sawwu luwwa issona. Ayyi la'ukko Waa'i i hawwo moo'aa ixxi qangimmi bikkenne iina maasso uwweena xanookko» yukko. Ee lasage Daawiitii ixxi gogotii mattam hee'llo'i googo amadda'a matto'o. Shiimi'im duu'n gammalinne awwonukkuuyyi ixxuwwi hanenne kina huushukkuuyyii dira binnaa'ukkuuyyii qangam hee'ukko. Adilii ixxenne maqire hee'llo'i mannii hundim Yoordaanoos daajje affa'a lasonne lobakata hoogga'a hee'llo'i bikkina ee beyyonne usheexxito'o. Abeseloomii ixxenne maqire hee'llo'i Isra'ee'l mannii hundim Yerusaaleema aaggo'o; Akxoofeelim ixxuwwinne maqirem hee'ukko. Daawiitik amma'nnamaakkoo beshichchi Huushaay Abeseloominne edamu ammanenne «Adil heer heerina hee'ona! Adil heer heerina hee'ona!» yukkuuyyi shuurukko. Abeseloomim «Ki beshichchi Daawiitina hee'u ki amma'nnanchi ka'isannihe? Ixdu awwontaa mahina mattittoyyo?» yaa xa'mmukko. Huushaayim «An hinkid ee'isa issoommo? An hundi ammanem Waa'i, ku minaadabii Isra'ee'l oosii hundim doo'llu adilinne ihoommo. Kabadem kiinninne maqire hee'oommo. I moollanni beetina awwaadoo'n od ayyena awwaadeenatte? Ee bikkina kiyyannina awwaadummisam kiinam awwaadoommo» yukko. Ee lasage Abeseloom Akxoofeel kolli daballaa «Oono'o, kaba neese ka beyyonne yoommine'e; eehannah maha issinona soggootto» yaa xa'mmukko. Akxoofeelim Abeseloomina «Kiyyanni ixxi adilla'n mine egettona gatisu ixxi bakki meentinne iinse'e. Ee'isinne Isra'ee'l minaadab hundim kiyyanna sholliissittisa la'ookko. Kiinninne maqire Yoo mannik hundikim malaayyi qoxxookko» yukko. Ee bikkina adi'l mi'n iimanenne Abeseloomina dukkaana kaasakko'o; ixxim manni hundim moo'ukkuuyyi ee dukkaa'n woronne aagaa ixxi anni bakki meentinne iinse'ukko. Ee ammane Akxoofeel sogoo sogitan hundim Waa'i saga'llisa macceesamoohan hee'ukko. Illageen Daawiit ixxi sogitano macceesam hee'ukkisam kaba odim Abeseloom macceesam hee'ukko. Hofqax ammaniinsi lasonne Akxoofeel Abeseloomina «Kaballi maaro'o an Daawiita hollansaa amadeena tommoo lam kum mannaa doo'lloomisa isse. Hoogaa neeyyata muraa yoohaannonne dangisaa qasoommo; ee ammane ixxi muggookko; ixxi awwonaanim utta'a gibbamaare adila mullam afaa shoommo. Idaayyichcho is aro'i beyyo daba'llitamisa Daawiita awwontam manni hundim ki beyyo daba'llita'a waattamisa issoommo. Kaba at shiteena hassoottok mat mancho. Ihukkaarem gatu mulli manni xummanne hee'ookko» yukko. Ku woshshim Abeseloominaa mulli Isra'ee'l awwonsaaninaa hundinam er sogitano labaa moo'amukko. Abeseloomim «Kaba odim Huushaaya weeshshehe ixxi yoo woshsha macceensona» yukko. Huushaay afu ammanenne Abeseloom «Akxoofeel neese kid yaa sogaakko; eebeelas at kuttoo woshshi yoohonnihe?» yaa xa'mmukko. Huushaayyim «Ka ammanenne Akxoofeel ki'nnuwwa sogu sogitan eraneyyo. Kiyyanni Daawiitii ixxi awwonaanii qoxxaalli o'l manni ikko'isaa wotalla aa'akko'i tibbekkichchisa baddissam keen ikko'isaa laqqootto; kiyyanni ora la'oo qoxar gaadaanchi ihu bikkina hiimo ixxi gogotinne maqire garooyyo. Ayyi la'ukko kabadem daawwa'i woronne te'im mulli beyyonne maaxamaa hee'ookko. Daawiit ki googota qasukkisa macceesu manni hundim ee qaxannem ki gaadaan kaa'anto'aannisa issaa wocookko. Kiyyanni lob o'l manchi ihukkisaa ixxi awwonaanim qoxxaalli o'l manni ikko'isaa Isra'ee'l uullanne yoo manni hundim la'oo bikkina hobbisa iggaalluwwi ikko'i ki gaadaa'nnekim ihuta'n wodan baa'eena xanookko. Ee bikkina an keese sogoommok ullaannonne soorem lamejjannem Daaniinsi Beersaabe'i afeebe'e yo'i keenoo ixxuwwikim xig dambalaq shashsha'llisa ihu Isra'ee'l minaadabaa hundam mateeyyoomminne wixxaa'llaa at ki gagoomim gaaxxi awwonsaanchi ikkaa orina awwonsitoo'isinatte. Ee ammane hannonnem maaxamuta'n Daawiita hansaa siindoommo. Barad uullanne dilloo'isa ixxonne dillinoommo. Ixxottem ihukko te'im ixxi awwonaaniinsi mat manchim gatooyyo. Gibaa beero'o aaguta'nnim ni minaadab ee beero'o usinne gosaasaa mat kinchim gatoo'n cebbanne dilliisookko» yukko. Abeseloomii Isra'ee'l minaadabii hundim Akxoofeel sogitaniinsi Huushaay sogitan lophphookko» yito'o. Waa'i Abeselooma bi'iseena hasu bikkina Akxoofeelika danaam sogitano aa'llambee'isa issukko. Ee lasage ixxii Akxoofeelii Abeseloominaa Isra'ee'l awwonsaaninaa soggo'i sogitano qeessuwwi ikko'i Saadooqinaa Abiyaataarinaa Huushaay kurukko. Ee'isam «Kaballi maaro'o udma'i uullanne yoo daajje higakkam beyyonne garoobee'isa qaqqissakka'a manna asse'llakka'a Daawiitina kullehe! Ixxoo ixxi awwonaanoo amadakka'a shakkambee'isa qaqqissa'a Yoordaanoos daajji eeqidonne fittona!» yukko. Abiyaataar beet Yoonaataanii Saadooq beet Ahimaaxii ee beero'o aaggu'uuyyi ayyim moo'oobee'isa baddito'i bikkina Yerusaalee'm gadanonne yoo Eenroogee'l bu'i gadanonne egetta'a hee'llo'o; mat landichchom hundi ammanem ee beyyo mattu'uuyyi ihoo woshshi hundam ixxuwwina kuttam hee'llo'o. Ee lasage odim ixxuwwi matta'a adil Daawiitina kuttam hee'llo'o. Ihukkaarem mat balla mat beet ixxuwwa moo'u bikkina maraa Abeseloomina kurukko; ee bikkina ixxuwwi Baahuuriimanne hee'oo mat manchi minenne maaxamteena gibba'a matto'o. Ee manchina ixxi mi'n gadanonne wo'i bar hee'u bikkina ee barenne aaggo'o. Ee manchi meentichchom ee ba'l suumenne hurbaata fitiissa'a ayyi manchim maloobee'isa issito'o. Abiseeloom mannim ee mine waatta'a ee meentichcho «Ahimaaxii Yoonaataanii hannonne yo'o?» yita'a xa'mmito'o. Isem «Daajje fitta'a matto'ookko» yita'a dabatto'o. Oo mannim hassa'a ixxuwwa siiddeena xantobee'i bikkina Yerusaaleema daba'llito'o. Ixxuwwim matta'a lasage Ahiimaa'aaxii Yoonaataanii qaqqissa'a ee bariinsi fitta'a matta'a ee hundam adil Daawiitina kutto'o; Akxoofeel ixxuwwanne isseena sawwu luwwa kutta'a lasage «Qaqqisaa daajji eeqidonne fire» yito'o. Ee bikkina Daawiitii ixxi awwonaanii Yoordaanoos daajji eeqidonne firimma asheetto'o. Uulli soodeebe'e hundim daajji eeqidonne fitta'a hee'llo'o. Akxoofeelim ixxi sogu sogitano manni aa'ubee'isa qoossaa la'u ammanenne hallichchonne saa'llaa ixxi hee'oo beero'o daba'llaa elle'ukko. Hundem luwwam ansaadaa lasonne xaga'llaa lehukko. Ixxi abaroos waammanem waammamukko. Abeseloomii Isra'ee'l minaadabii hundim Yoordaanoos daajje higgo'i ammanenne Daawiit Mahinaayima yakkam hoffi beero'o afaa hee'ukko. Abeseloom Yoo'aab bikkenne Amaasaa yakkam mancho gaaxxi awwonsaanchi issaa doo'llukko; Amaas Isma'eelchi hee'u Yeeteer beet hee'ukko. Ixxi amam Abigeele yakkam Nahaash landichchotti ikko'uuyyi Yoo'aab am Xaaruyyana aayyatte hee'llo'o. Abeseloomii ixxi gogotii Gala'aaxxi uullanne wiiddanto'o. Daawiit Mahannaayima afu ammanenne Amoo'n gassi uullanne Raabaa yakkam beero'iinsi waaraakkoo Naa'oos beet Shooba'i, Lodobaar beero'iinsi waaru Ami'eel beet Maakiirii Gala'aad gassi uullanne Roogaaliim yakkam beero'iinsi waaru Barzilaayii ixxi beyyo waatto'o. Adil Daawiit ixxi awwonaan hundam mat issaa weeshaa lasage kumaa xibbee issaa gaalcha fissukko; ee gaalchuwwina annannichchinam gaaxxi awwonsaano doo'llukko. Ee lasage sas beyyo baxxansaa asse'ukko. Yoo'aab, ixxi abbaayyi Abiisii Gaatiinsette ihu Iitaayii annannichchim mat mat gaalchina gaaxxi awwonsaan ikko'o; adilim ixxi awwonaanina «Anim ki'nnuwwi maqirem maroommo» yukko. Ixxuwwim «At niinninne maqire marimmi hasisooyyo; niinniinsi hofqaxim laso daba'llinaa mallummita'n te'im kolli lenummita'n ni diina'ina ookki mahayyome. Ihukkaarem at tommi kuma inkoommi qax manniinsi lophphitootto. Ee bikkina at ka beero'onne afuuttaa niina hasisoo hara'mmato asse'llittaare e'llookko» yito'o. Adilim «Ki'nnuwwina eran ihaa moo'amu luwwa hundam issoommo» yaa dabarukko. Ee lasage beero'i ooxxi gooc gadanonne uullaa kumannee xibbennee baxxansamu gaadaan orina gudaa firukkuuyyi moo'ukko. Yoo'aaba, Abiisaa Iitaayimaa «Iinaa yitakka'a i beet Abeselooma shitakkotte» yaa ijaajukko. Daawiit ee ijaajo uwwukkuuyyi gaadaan hundim macceessam hee'llo'o. Daawiitik gaadaan hax uulla matta'a Isra'ee'l manninne Efireem haqqi woronne qasanto'o. Isra'ee'l mannam Daawiit gaadaan kaa'llo'o. Kaa'anto'i duuha'im lobakata hiriraa'oohan hee'ukko. Mashka'oomim ee balla ixxuwwiinsi lehukkok lamiyyi kuma ihoo qax manni hee'ukko. Oo orim hax uullanne hundannem haraaru bikkina oranne leto'i manniinsi loboka haqqoronne leto'i mannik xig lophphukko. Abeseloom Dangonnem Daawiit awwonaaniinsi hofqaxinnem edamukko. Ee ammane Abeseloom baquchchonne saa'llaa jigisam hee'u bikkina oo ixxi saa'llu baquchchi mat geejji qillixo'i luguminne higukkuuyyi ee haqqichchik caaf Abeseloomika horoo'l saraata amadukko. Oo baquchchi ixxi koofiinsi luxuunxaa firu ammanenne Abeseloom calcalaa gatukko. Daawiit gaadaaniinsi mat eekka moo'aa Yoo'aabina «I Moollanna! Abeseloom mat qilxo'onne calcalaakkoo moo'aammo» yaa kurukko. Yoo'aabim «Eehannah moo'llittahe ee ammanem shiteenahe? Eekka issitaattoohan ihuta'n an kiina tommi kin biraa mat zinnaaraa irifam hee'ummo» yaa dabarukko. Ihukkaarem oo manchi Yoo'aabina «Mat kum kin bira uwwitta'nnim adi'l beetonne an i anga higisoommoyyo. Adil keese, Abiisaa Iitaayaa ‹Iinaa yitakka'a i beet Abeselooma shitakkotte› yaa ijaajukkisa hundim macceensaammo. Eehannah an adi'l ijaajo gindaa Abeselooma shaammoohan ihuta'n adil woshshi hundam macceesoo'isam ka woshsham macceesimmi gatooyyo; atim agaaggaa eese gatissam hee'llittoyyo» yaa dabarukko. Yoo'aabim «An kaba kiinninne ammane bi'iseena hasoommoyyo» yaa sas bagado amadaa maraa Abeseloom qilxo'onne calcalaa foorinne hee'onam afaa wodano qasukko. Ee lasage Yoo'aab gaadaaniinsi tommi Abeselooma kibbita'a qassa'a shito'o. Ee lasage or uulloo'isina Yoo'aab xurumba fugakkamisina ijaajukko. Gaadaanim Isra'ee'l manna hollansimma utta'a daba'llito'o. Abeseloomikam leesha massita'a haqqoronne yoo xillaalli barenne uunjito'o. Ixxonnem geejji geejji kina tuubba'a ifiisso'o; Isra'ee'l mannim gibba'a annannichchim ixxuwwi gaqqi minem aaggo'o. Abeseloomina summa weeshisoo goo'n oos hee'ubee'i bikkina foorinne hee'ukkuuyyim «Adi'l cebba» yakkam beyyonne ixxi gagina soodda baxisaa hee'ukko. Oohim ixxi lehoo'n illageen ixxi summinne hee'u bikkina kaballi afeebe'em «Abeseloom Soodda» yamamaa weeshamookko. Ee lasage Saadooq beet Ahimaax Yoo'aabina «Adila Waa'i ixxi diina'iinsi gatisukkisa kureena er woshsha amadaa adi'l beyyo geeroommo» yukko. Yoo'aabim «Ihooyyo; kaballa at amaddaa mattoo er woshshi mahim bee'e; ayyi la'ukko mulli balla kaka issiteena xantootto; ihukkaarem kaballa adi'l beet lehu bikkina ka woshsha massittibe'aare eranne» yukko. Ee lasage Yoo'aab ixxi awwaadaanchi hee'u mat Tophphe'i mancho weeshaa «At moo'llitti luwwi hundam mattaa adilina kure» yukko. Oo awwaadaanchim ixxena obodda yaa ki'aa geerukkuuyyi marukko. Ahimaaxim «Hasu luwwi hundim ihuta'nnim hawwi bee'e; ee bikkina anim ka woshsha afisoommisa isse» yukko. Ihukkaarem Yoo'aab «I beeto, mah bikkina kaka issiteena hassitto? Kaka issitti bikkina matem irifo'om siiddooyyo» yukko. Ahimaax odim «Hasu luwwi hundim ihuta'nnim hawwi bee'e; an mareena hasoommo» yukko. Yoo'aabim «Eehaare mare» yukko. Ee bikkina Ahiima'aax Yoordaanoos daajji cebbinne massoo googinne geerukkuuyyi maraa Tophphe'i mancho gaassukko. Daawiitim ee beero'i woro'llaannonnee bii'l gooccuwwi lambe'enne yoo biir beyyonne afuuraa hee'ukko. Ee beero'i waardiyyichchi ooxxi gimbanne baxamaakkoo godo'onne firaa daaphphoohaare mat manchi mullam geellichchinne waaram hee'ukko. Ixxim sagara haraassaa moo'u luwwa adilina kurukko. Adilim «Mullatte ihukkaa'lleensi er woshsha amadaa waaraakkoohan ihookko» yukko. Oo geeram hee'u manchim hincukkuuyyi waarukko. Ee lasage odim mat mulli manchim geerukkuuyyi waaroo moo'aa ee qashi gooc egeraancho weeshaa «Ee moo'e! Mullekim mat manchi geerukkuuyyi waaroolla» yukko. Adilim «Kukim er woshsha amadaa waaraakkoohan iheena xanookko» yaa dabarukko. Oo egeraanchim «Oo luxxan ihaa geeroo manchi waaroo'is Ahimaaxisa» yukko. Adilim «Ixxi er mancho; er woshsha amadaa waarookko» yukko. Ahimaaxim ixxi sagara iimaa'aa adila xummaatisukko; adi'l illagennem uullanne heeshaa «Adila, keesenne bangujjaatinne ki'llo'i keeno kaa'lloo'isina hara'mmu ki Waa'i galaxxamaakkoohan ihona!» yukko. Adilim «Abeseloomanne matem hawwodanchim afukkoyyonnihe?» yaa xa'mmukko. Ahimaaxim «I moollanna, ki gaaxxi awwonsaanchi Yoo'aab ki beyyo asse'u ammane kee'mmaalli dambaq firaakkoo moo'ummo; ihukkaarem woshshoom mada'e ihukkisa la'ummoyyo» yukko. Adilim «Eehid higgaa uulle!» yukko. Ixxim eehid higaa uullukko. Ee lasage Tophphe'i uulli manchi ee beyyo afaa adilina «Adila! An kiina mishiraachcha amadaa waaraammo; keesenne bangujjaatinne ki'llo'i kee'n angiinsi kaballa Waa'i keese gatisaakko» yukko. Adilim ee Tophphe'i mancho «Abeseloom xummannihe?» yaa xa'mmukko. Oo Tophphe'i uulli manchim «I moollanna, ixxonne afu luwwi ki diina'annee keesenne bangujjaatinne ki'llo'i hundannemii afona!» yaa dabarukko. Adilim lobakata kichche'ukko; qash gooc hanenne baxamaakkoo minenne aagaa wi'llukko. Ee beyyo marukkuuyyim «I beeto! I beeto Abeselooma! Abeselooma i beeto! Ki bikkenne an lehaammoota'n! I beeto! Abeselooma i beeto!» I beeto!» yukkuuyyi wi'llam hee'ukko. Adil Daawiit Abeseloom leh bikkina lobakata kichche'aa wi'llukkuuyyi yoo'isa Yoo'aab macceesukko. Ee'isam adil kichchechchanne yoo'isa macceesso'i bikkina ixxi gaadaan siiddo'i liiranchi ee balla kichchechchanne daba'llukko. Ee bikkina gaadiinsi kaa'amaa waaroo gaadaa'nnisa ikka'a sagara maaxxa'a beero'o aaggo'o. Adilim gunguu'llaa «I beetoo! I beetoo Abeseloomaa! Abeseloomaa i beetoo!» yukkuuyyi sagara iimaa'aa wi'llam hee'ukko. Ee ammanenne Yoo'aab adi'l mine maraa «Keese, ki oosoo ki meentoo gatisso'i manna kaballa sholliissaatto. At keese iittoo manna sabboohane; ihukkaarem keese saboo manna iittitoohane; ki gaadaa'n awwonsaaninaa gaadaaninaa maham sawwitoobee'i manchi ikkittisa la'issaatto; Abeseloom foorinne hee'aa neese hundim beeddinumta'n lobakata liirantoohan ikkittisa kaballa la'aammo. Kaba ki'llaa ki gaadaano qoxxisanse; ihukkaarem kaka issitoobee'an ihulas ixxuwwiinsi sooxxi dara mat manchim kiinninne ihoobee'an ihukkisa kiina Waa'i summinne hide'aa kuroommo. Oohim ki heechchi doollenne keesenne afu hawwi hundiinsim hore'em lophphaakkoohan ihookko» yukko. Ee lasage adil afuuru beyyiinsi ki'aa maraa ee beero'i ooxxi gooc gadanonne afuurukko. Ixxi awwonaanim ixxi ee beyyonne afuurukkisa macceessa'a hundim ixxi kululleetanne wixxito'o. Ee ammane Isra'ee'l minaadab hundim gibba'a annannichchim ixxuwwi gaqqi minem elle'lla'a hee'llo'o. Isra'ee'l minaadab hundim «Adil Daawiit ni diina'i angiinsi neese gatisaakko; Filisxee'm minaadaphphi angiinsim neese xossiisaakko. Ihukkaarem kaba Abeseloomiinsi uulla uraa gibaakko. Neese awwonsoo'isina Abeselooma doo'llinaa adil issinummo. Ihukkaarem oranne lehukko. Eehannah adil Daawiita dabaraa woroo manchi hinkid bee'ukko?» yitu'uuyyi fitantam hee'llo'o. Adil Daawiitim qeessuwwi hee'llo'i Saadooq beyyoo Abiyaataar beyyoo «Yihuxxi lommannina ‹Isra'eelanne hundannem wocakkam woshshi hundam adil macceesaakkoo bikkina adila adilla'n mine dabattakka'a worimmina hinkid lasaanchi manni ikkakkammo? Ki'nnuwwi iina maaraa xiigaa ikkakko'oo abbaayyuwwa. Eehannah eese massimmina luxxan ihimmi bikkenne hinkid lasaanchi manni ikkakkamo?› yitakka'a xa'mmehe. Ee'isam Amaasina ‹Atim iina maaraa xiigaa; keese kabadiinsi ki'isaa Yoo'aab bikkenne i gaadaanina awwonsaanchi issoommo; eekkamdu issumbeelas Waa'i eesenne oogatona!› yaakko yitakka'a kullehe» yaa asse'ukko. Daawiit asse'u assi Ayihuxxi minaadab hundam ixxi kollonne sawwita dabattamisa issukko; ee bikkina ixxi ixxenne yoo manni hundinnem daba'llaa waaroo'isina asse'llo'o. Daawiit daba'llaa Yoordaanoos daajji afeebe'e waarukko; ee ammane Ayihuxxi manni Daawiita taqeebalta'a Yoordaanoos daajje higisseena Gelgel afeebe'e waatta'a hee'llo'o. Ee ammane Baahuurii'm beero'an ihu Geera'i beet hee'u Biiniyaam sulli Shiim'i Yihuxxi manninne maqire adil Daawiita aa'eena qaqqisaa Yoordaanoos daajje dillukko. Ixxenne maqirem Biiniyaam sullik mat kum manni hee'llo'o. Saa'ool abaroosina awwaadaanchi hee'u Siiba'am tomminnee onti ixxi goo'n oosinnee lamiyyi awwaadaaninnee maqirem waarukko. Ixxuwwim adil yoo beyyo Yoordaanoos daajje qaqqissa'a affo'o. Ixxuwwim adilaa ixxenne yoo mannaa wongirinne eeqidonne fissiteenaa adil hasoo luwwi hundam issiteenaa Yoordaanoos daajje higgo'o. Adil daajji eeqidonne fireena gudukkuuyyim Shiimii'i ixxi illagenne ubaa «Adila, at Yerusaaleemiinsi fittaa matti balla keese hawwodummi hawwojja haafihe; ee woshsham baado amadditte; la'mmaage od sawwititte. I moollanna, an ki awwaadaanchi baaxiilo baxummisa la'aammo. Ihukkaarem kaballa hanaa'n qaranne yoo Isra'ee'l sulliinsi luxxan ihaa keese taqeebaleena waaraammo» yukko. Ee lasage Xaruy beet Abiis «Waa'i doo'llaa adil issukkoka game'llu bikkina Shiimi'i lehimmi hasisookko» yukko. Ihukkaarem Daawiit Abiisinaa ixxi abbaayyi Yoo'aabinaa «Ku woshshi ki'nnuwwa moo'ooyyo; kaballa iina maso'i ikkakkeenannihe? Kaba Isra'ee'l adil anette; odim kaballa Isra'ee'l mannik ayyim lehimmi hasisooyyo» yukko. Ee bikkina Shiimi'inam «At kaballa letooyyo» yaa hide'ukko. Ee lasage Saa'ool beetina beet Mafiiboosheet adila aa'eena marukko; adil Yerusaaleemiinsi firu ammaniinsi ki'isaa kaba kaachchinne daba'llu ayyaam afeebe'e Mafiiboosheet ixxi lokko aanshaqqukkoyyo; haareeddam hogoossukkoyyo; eddechcham aanshukkoyyo. Mafiiboosheet Yerusaaleemiinsi ki'aa adila taqeebaloo beyyo afu ammanenne adil «Mafiiboosheeta, iinninne maqire mattoo'n gattittok mahinatte?» yaa xa'mmukko. Mafiiboosheetim «Adila, at laqqoo'isam an shiiha; kiinninne maqire mareena hasaa i awwaadaanchina ‹I baquchchonne koora isse› yummaare ixxi eese lagaa marukko. Adila, xale'i eehan ihoo'n i bikkina keesenne hamaassiisaakko. Ihukkaarem at Waa'i asse'amaanchisa ikkitti bikkina kiina eroka labaa moo'amu luwwi hundam isse. Adila, iyyanni abaroos hundim lehimmi hasisoohan hee'ukko. Adila, ihukkaarem at ki maaddanne hincaa itoommisa issitto; eehanniinsi lophphoo biijooma issitoo'isina xa'mmoommi hanqi bee'e» yaa dabarukko. Adilim «Kanniinsi lonsitaa od woccitte; atii Siiba'aa Saa'ool amaxxa lam beyyo baxxantakkamisa issaammo» yukko. Mafiiboosheetim «Adila, hundem amaxxam Siiba'a massona; iina at xummanne ki mine daba'llitti qax xale'i ihookko» yukko. Gala'aaxxi uulli Barzilaay adila Yoordaanoos daajje fissaa geegeeseena Roogaaliimiinsi waarukko. Barzilaay sadeentayyi hiinchi lommanchi hee'ukko. Ixxim Lobakata goddaanchi hee'u bikkina adil Daawiit Mahinaayimanne hee'u ammane hurbaata hincaa'am hee'ukko. Adilim Barzilaayina «Iinninne maqirem Yerusaaleema waare; anim er makkanne liiranchinne hee'lloo'isa issoommo» yukko. Ihukkaarem Barzilaay «Adila, ka lasage an lobakat doolle hee'oommoyyo. Eehannah an kiinninne maqire Yerusaaleema marimmi iina mahina hasisookko? Kaba i umur sadeentayyi hiincho ihaakko. Ka lasage iina mahim mishisooyyo; itoommi luwwii agoommi luwwii iina xee'ooyyo; i maccim kadoo kee'n kajja macceesooyyo. Adila, an kiina mahina kee'mmoommo? Odim adil iina kaa'n lob eroomma isseena an laboombee'i mancho; Yoordaanoos daajje firaa keese hofqax beyyom geegeesoommo. Ee lasage i mine daba'llaa maroommisaa iyyanno'i waammi gadanonne usheexxoommisaa isse. Oono'o, ku i beet Kiimihaam kiina awwaadona. Adila, ixxo amaddaa mare. At sawwitti eroommi hundam ixxena isse» yaa dabarukko. Adilim «Kiimihaam iinninne maqirem marookko. At ixxena issona hassoo luwwi hundam issoommo; kiinam xa'mmitti luwwi hundam issoommo» yukko. Ee lasage Daawiitii ixxi awwonaanii hundim Yoordaanoos daajje higgo'o; Daawiitim Baarziilaaya suunqaa maasse'ukko; Baarziilaayim ixxi mine daba'llaa elle'ukko. Adil Daawiit hundem Yihuxxi minaadabinnee kolli Isra'ee'l minaadabinnee kibbamaa daajje higaa lasage Gelgela marukko. Kiimihaamim ixxenne maqirem marukko. Ee lasage Isra'ee'l minaadab hundim adi'l illage hincita'a «Adila, niyyabbaayyuwwi ikko'i Yihuxxi manni keese niinniinsi maaxxa'a massita'a keese, ki abaroosaa keese awwontam keenoo hundam kibbita'a Yoordaanoos daajje higissa'a massitamok mahinatte?» yita'a xa'mmito'o. Yihuxxi mannim «Neese kaka issinummok adil ni moollan ihu bikkinatte; eehannah ki'nnuwwi ka woshshanne mahina quuqqakkamuulla? Ixxi niina ki'nnuwwiinsi maaxaa itisu luwwi yoohonnihe? Te'im uwwu luwwi yoohonnihe?» yita'a dabatto'o. Isra'ee'l minaadabim «Maham ixxi ki'nnuwwan ihukkaarem adil Daawiitik tommi suum niihane. Eehannah ki'nnuwwi neese gaddakkamok mahinatte? Adila daballaa worimmi bikkina gaassinaa woncummok neesetti inkummisa ki'nnuwwi laqqakkamo» yito'o. Ihukkaarem ka woshshanne Isra'ee'l manniinsi loboka Yihuxxi manni qoxxaallisa fitanto'o. Ee ammane Sheeba yakkam mat jor manchi ee beyyonne hee'ukko; ixxim Biiniyaam sulliinsette ihaa Biikirina beet hee'ukko; ixxim xurumba fugaa «Niina Daawiitinne maqire matem sharadim bee'e! Issayyi beetiinsim lago aa'nnoommi luwwi bee'e. Isra'ee'l minaadaba, Annannichchim ki mine elle'e» yaa sagara iimaa'aa wocukko. Ee bikkina Isra'ee'l minaadab Daawiita lagga'a Sheeba'a awwonta'a matto'o. Ihukkaarem Yihuxxi minaadab ixxuwwi adiliinsi annanni ikkoo'n Yoordaanoosiinsi ki'isaa Yerusaaleem afeebe'e maqirem matto'o. Daawiit Yerusaaleemanne yoo ixxi adilla'n mine afu ammanenne ixxi adilla'n mine egettona dissaa hee'u tommem bakki meentom mulli mine massaa waardiyyinne egerantamisa issukko. Ixxuwwina hasisoo luwwi hundam uwwakkamisa issukko. Ihona bagaan ixxuwwinne maqire iinse'ukkoyyo. Ee ammaniinsi ki'isaa lehameebe'e minenne egeramaa manniinsi annanni ihamaa busar meentisa hee'amukko. Adilim Amaasina «Yihuxxi manna hundam wixxaa'llaa sas balli woronne amaddaa waare» yukko. Amaasim Yihuxxi manna weesheena marukko. Ihukkaarem adil yu ballanne waareena xanukkoyyo. Daawiitim Abiisina «Sheeba'a Abeseloomaanniinsi lophphaakkoo hawwo neesenne afiseenatti ihu bikkina i gaadaano amaddaa laseese; eehid ihubeelas girbamu beero'uwwa amadaa niinniinsi xoreena xanookko» yukko. Ee bikkina Yoo'aab gaadaan, adi'l lombi waardiyyuwwii mulli gaadaanii Abiis awwonsatinne Yerusaaleemiinsi fitta'a Sheeba'a laseesso'o. Gaba'oonanne hee'oo lob kin yoo beyyo affo'i ammanenne Amaas ixxuwwinne edamukko. Ee ammane Yoo'aab ixxi bisa'a seejjanne aagisaa ee seejjam lade'u sabbatanne edaa karaa orina gudaa hee'ukko. Ixxim taakke'ukkuuyyi oo bisa'i ubukko. Yoo'aabim Amaasa «Iyyabbaayyo, xummannihe?» yaa suunqoohan ihaa haareedda makki anginne amadukko. Mulli anganne Yoo'aab bisa'a amadukkisa moo'ubee'i bikkina Amaas ixxi gaga ege'lloo'n hee'ukko; ee bikkina Yoo'aab ixxi godabo qasukko. Ixxekim godaphphi mu'ut uullanne fuqukko. Ixxim ee ammanem lehu bikkina Yoo'aab la'mmeka qasukkoyyo. Ee lasage Yoo'aabii ixxi abbaayyi Abiisii Sheeba'a hollansimma amaddo'o. Yoo'aab gaadaaniinsi mat Amaas leeshi gadanonne uullaa «Yoo'aabaa Daawiitaa awwontakkam hundim Yoo'aaba awwonnehe!» yaa sagara iimaa'aa wocukko. Amaasikim leesh xiiginne kolbamaa gooqqi lambe'enne ubaa hee'ukko. Oo manchim Yoo'aab gaadaan hundim uullita'a moo'llu'uuyyi moo'aa ee leesha googiinsi haxonne hooraa eddechcha hanenne ambukko. Oo leesh gooqqi lambe'iinsi ki'aa lasage gogot hundim Shee'ba'a laseesseena Yoo'aaba awwonta'a matto'o. Sheebaa'im Isra'ee'l sulli yoo uulli hundam higaa maraa Aabeelbeetma'ika yakkam beero'o afukko. Biikir moolli manni hundim wixxita'a Sheeba'a awwonta'a ee beero'o aaggo'o. Yoo'aab gaadaan Sheeba'a ee beyyonne yoo'isa macceessa'a ee beero'o matta'a kibbito'o. Ee beero'i ooxxi girbi lud afeebe'em oota bakkiissa'a dichchira baxxo'o. Odim ee ootam ginditam hee'llo'o. Ee beero'onne hee'llam mat qoor meentichcho ee beero'i ooxxi hanenne ikka'a sagara iimaa'lla'a «Macceessehee! Macceessehee! Yoo'aab kid waaroo'isina kullehe; an ixxo atoorasseena hasoommo!» yito'o. Yoo'aabim ee beyyo maru ammanenne oo meentichcho «Yoo'aab atettennihe?» yita'a xa'mmito'o. Ixxim «Eeyya anette!» yukko. Isem «I moollanna, hino'o macceese» yito'o. Ixxim «Ihona, macceesoommo» yukko. Isem «Gaassi doollenne ‹Aabeel beero'o mattakka'a ki'nnuwwi xa'mmichchika dabachcha ee beyyiinsi siiddakkamo› yakkam hee'akko'o. Mannim eekka issam hee'ukko. Ihukkaarem at Isra'eelanne xummii amma'nnanchii wo'mmaakkoo keeniinsi mat anette; at Isra'eelina am ihaakkoo beero'o ginditeena sawwitoohonnihe? Ka Waa'ina gulummi ihaakkoo beero'o bi'isseenannihe?» yito'o. Yoo'aabim «An ki'nnuwwi beero'o bi'isoommoyyo! Hore'em gindoommoyyo! Ni sawwit eehaneyyo. Ee duunaam Efiree'm uulli Sheeba'a yakkam Biikir beet adil Daawiitanne bangujjaato ki'saakko; ee bikkina xale'i ee mancho iina uwwehe bagaan an ka beero'o fatakaa maroommo» yaa dabarukko. Isem «Ixxeka horoore mullaa ooxxi hanenne daramboommo» yito'o. Ee lasage oo meentichcho qooroom wo'mmaakkoo sogitano amadda'a ee beero'i minaadaphphi beyyo matto'o. Ixxuwwim Sheeba'i horoore mutta'a ki'n ooxxi haninne Yoo'aabina darabbo'o. Ixxim gaadaan beero'o fatakita'a fittona mare'i ihoo'isina xurumba fugukko; ixxuwwim mine elle'llo'o; Yoo'aabim adilinne edameena Yerusaaleema marukko. Yoo'aab Isra'ee'l gaaxxi awwonsaanchi hee'ukko; Yoodaah beet Baanaay Daawiit lombi waardiyyi awwonsaanchi hee'ukko. Adooniiraam adi'l baxaano ijaajaanchi hee'ukko; Ahiiluud beet Yoosaafix aganna kitaabaanchi hee'ukko. Suusa'a adi'l mi'n kitaabaanchi hee'ukko; Saadooqii Abiyaataarii qeessuwwi hee'llo'o. Ee'isam Yaa'iir beero'iinsetti ihu Iira'a Daawiit qeessuwwiinsi mat hee'ukko. Daawiit adilla'n doollenne sas hiincho hundoomam qoxxaalli sibaar ihukko. Ee bikkina Daawiit ku sibaar mahina ihuda'e Waa'a xa'mmukko. Waa'im «Saa'oolii ixxi abaroosii mannika xiiga dunito'oo bikkinatte; Saa'ool Gaba'oo'n manna guullaakko» yaa dabarukko. Ee bikkina adil Gaba'oo'n manna weeshaa atoorassukko. Gaba'oo'n manni Amoore'i manniinsi gatto'oo manni hee'llo'o bagaan Isra'ee'l minaadab hee'llo'oyyo. Isra'ee'l minaadab ixxuwwa nakkinoommoyyo yita'a hide'llo'aarem Saa'ool Isra'ee'l minaadabinaa Yihuxxi minaadabinaa yoo to'achchiinsi ki'ukkok ixxuwwa hundoomam bi'iseena hasaa hee'ukko. Daawiitim Gaba'oo'n minaadabina «An ki'nnuwwina maha issoo? Ka Waa'i minaadaba maasse'llakamisina xiiga guulleena maha isso?» yaa xa'mmukko. Ixxuwwim «Saa'oolinnee ixxi abaroosinnee niina yoo baad birinnee worqinnee beeddoobee'ane. Neese Isra'ee'l minaadaphpheka matom Shineena xannoommooyyo» yita'a dabatto'o. Daawiitim «Eehannah maha issona hassakkamo?» yaa xa'mmukko. Ixxuwwim «Saa'ool neese hundam bi'iseenaa niinniinsi matem manchim Isra'ee'l uullanne mat beyyonnem foorinne hee'oobee'isaa isseena hasaa hee'ukko. Ee bikkina Saa'ool shumo'iinsi lamar goona niina higissaa uwwe; neesem ee manna Waa'i doo'llaa adil issu Saa'ool beero'onne Gibi'aa yakkam beyyonne Waa'i illagenne Saqalloommo» yita'a dabatto'o. Adil Daawiitim «Ixxuwwa ki'nnuwwina higisaa uwwoommo» yukko. Ihukkaarem Daawiitii Yoonaataanii issena'i issem aaggo'i keesammi hidi'l mashka'i bikkina Daawiit Saa'ool beet hee'u Yoonaataan beet Mafiiboosheeta higisaa uwwukkoyyo. Ihona bagaan Daawiit Aya'i landichcho Riisifa Saa'oolina qatto'i lamem goo'n oosom Armooninaa Mafiiboosheetaa massukko. Ee'isam Saa'ool landichcho Meeraabe Mahoolaaniinsetti ihu Baarziilaay beet Adiri'eelina qatto'i ontem goo'n oosom edaa massukko. Daawiit ee keen hundam Gaba'oo'n mannina higisaa uwwukko; ixxuwwim Waa'i illagenne duunanne saqallito'o; lamarim mateeyyam leto'o; ixxuwwam shakko'ok hurbaata wixxaa'akkam aga'n aaggannetti hee'ukko. Ee lasage Saa'ool bakki meentichchotti hee'llo'i Aya'i landichcho Riisifa oo leeshshuwwi yoo beyyonne yoo geejji kinanne kichchechchi eddechcha biddiqaa'lla'a eehanni lugumonne afuutto'o. Isem hurbaata murakkam aga'n aaggiinsi ki'isaa xeen ga'nneebe'i afeebe'e ee beyyonne afuutto'o. Balli balla ammar afuuroobee'isa hiim, hiimo moochchi itoobee'isa ee leesha egettam hee'llo'o. Daawiit Saa'ool bakki meentichcho Riisifa issito'i luwwa macceesu ammanenne Gala'aaxxi uullanne yoo Yaabeesh minaadaphphi beyyo maraa Saa'oolikaa ixxi beet Yoonaataanikaa miqe eebukko. Yaabeesh minaadab ee miqe siiddo'ok Filisxee'm manni Saa'oola Giilibo'anne shito'i balla leeshshuwwa Beetishaananne yoo wixxixxi beyyonne saqalakko'i beyyiinsi game'lla'atetti hee'ukko. Daawiit Saa'oolikaa Yoonaataanikaa miqe massukko; ee'isam saqalanta'a hee'llo'i lamarem manni leesham wixxaa'ukko. Ee lasage Saa'oolikaa Yoonaataanikaa miqe massita'a Biiniyaam uulli Xeelaa'anne Saa'ool anni hee'u Qiis waammanne adi'l ijaajinne waammito'o. Oo hundim ihaa lasage minaadab ixxuwwi uulli bikkina hincaa'llo'i uunxato Waa'i macceesukko. Filisxee'mmaannonnee Isra'ee'l minaadaphphaannonnee lambe'enne odim or ki'ukko. Ee bikkina Daawiitii ixxi awwonaanii gaadda'a Filisxee'm manna qasso'o. Ee qasanchaannonne matonne Daawiit hoogaa hee'ukko. Sas kilo'oo kolloo kee'mmoo Naasiinsi baxamaakkoo bagado amadaakkoo haareechchi bisa'a lade'aakkoo Raafaayim moollik Yushibiibanoob yakkam mat malaayyaam geed Daawiita sheena hasaa hee'ukko. Ihukkaarem Xaruy beet Abiis Daawiita gatiseena ee qoxxaalli Mancho dangonnem shukko. Ee lasage ixxi awwonaan Daawiitina «Isra'ee'l minaadaphphek caakki bi'oobee'isa ka lasage at niinninne maqire gaadina hore'em fittooyyo» yita'a hide'llo'o. Ee lasage Gooba yakkam beyyonne Filisxee'm manninne mulli orim ki'ukko. Ee ammanenne Huush uulli Siibakaay Saafa yakkam Raarafaayim moolli malaayyaam geeda shukko. Odim Goobanne Filisxee'm manninne mulli orim firukko. Ee ammanenne Beeteelihee'm Yaa'iir beet Eelihaanaan, Gooliyaada yakkam Filisxeemanne Gaata yakkam uulli mancho shukko. Ee manchi bagaxxekim qaalleenchi eddechcha dadakkeena xaaxakkam luwwa laboohan hee'ukko. Ee lasage Gaatanne odim or ki'ukko. Ee orannem angannee lokkonnee loh, loh maxxaar ihaa hundoomim lamiyyii soor maxxaarii yoo mat malaayyaam geed hee'ukko. Ixxi qaramukkokim Raafaayi'm shumo'iinsetti hee'ukko. Oo manchim Isra'ee'l minaadaba jorisa keenukko. Ihukkaarem ixxo Daawiit abbaayyi Shaama'i beet Yoonaataan shukko. Ku soorim Gaat uulli malaayyaam geedduwwi ikka'a Raafaayi'm shumo'iinsetti hee'llo'o. Ihukkaarem Daawiitii ixxi awwaadaanii ee manna shito'o. Waa'i Daawiita Saa'ooliinsii mulli ixxi diina'i angiinsii agaagaa gatisu ammane ka mazmuura Waa'i lombina zammarukko. Waa'i eesenne jor afoobee'isa egeraancho; qoxxaalli girbaa gatisaanchoo. Waa'i eesenne jor afoobee'isa egeraancho; ixxi iina agiraa bagadoo; ixxi iina qoxxaalli girba; daphphoommi beyyoo gatisaanchoo; ixxi eese malaayyaammuwwi angiinsi gatisookko. An galat hasisoo Waa'a weeshoommo; ixxi eese i diina'iinsi gatisaakko. Leh u'n eese kibbukko; bichchi dirisim eese xuuxukko. Waammi us eesenne xaaxamukko; leh qaashim amadukko. Eesenne hawwi afu ammane Waa'a weeshummo; iina hara'mmonam i Moollanna uunxummo. Ixxim i sagara ixxi minenne ihaa macceesukko; i laachcham macceesukko. Waa'i quuqu bikkina uulli heekke'amukko; huxe'amukkom; uulli shooho'uwwim sheephsheephukko; heekke'amukkom. Ixxi saniinsim quuqimmik wiriir firukko. Ixxi suumiinsim itoo gii'l labanii shokkiisoo gii'l kasharii firukko. Iimane diqaa aad dillukko. Ixxi lokkiinsi woroonim tuunsaakkoo duub hee'ukko. Kiruubeelanne afuuraa bararukko. Hafachchi ladannem afuuraa bararukkuuyyi iim firukko. Ixxi gaga hundoomam tuunsinne ifiisukko. Xeenaam tuunsi duubim ixxo kibbaakko. Ixxi illagenne yoo caakkiinsi banqi belelukko. Moollanni iimaninne banqisa gugukko. Hundam xanoo Waa'i sagarim macceesamukko. Ixxi xiyyuwwam tokkosukko. Diina'am binnaa'ukko. Banqi belellaatinnem hollukko. Waa'i ixxi diina'a axeeru ammanee quunqinnem sagara macceesisu ammanee dambalaqik lugum moo'amukko; uullikim shooho'i la'amukko. Waa'i iimaniinsi ixxi anga biddiqaa'aa eese amadukko; xilli wo'i woriinsim hixixaa'aa fissukko. Lobakata eesenne wodda'a hee'llo'i malaayyaammuwwi diina'iinsii eese sabbam kee'n angiinsii Waa'i gatisukko. An hawwummi ammane diina'oominne eesenne ki'llo'o. Ihukkaarem i Waa'i eese egerukko. Eesem haraar beyyonne fissukko. Eesenne iittu bikkinam gatisukko. I muccuroo'mmisinne iina miqookko. I angi muccuroo'mmisinnem iina dabarookko. An Waa'ika googo awwonaammo. Waa'anne afare dabaraa jor baxo baxummoyyo. Waa'ika seera hundam egeraammo; ixxi ijaajiinsim laso daba'llummoyyo. An ixxi illagenne miiqakkam luwbee'ane; I gagam baaxiiliinsi ege'llummo. Waa'i i muccuroo'mmisinnee i angi muccuroo'mmisinnee iina miqookko. Waa'a! Kiina amma'nnamu keenina atim amma'nnantaattoohane; xabbeen keenina atim xabbeena. Muccur keenina atim muccura; ihukkaarem boqqi keenina atim boqqa. At wor amadamu keeno gatissootto; ihukkaarem bolxitam keeno sholliissootto. Waa'a! At iina caakka; i tuunsom caakkissootto. I diina'a kaa'ona iina malaayye uwwitootto; ixxuwwi girba xophihonam hara'mmitootto. Waa'ik goog lobakata muccura; ixxek sagarim hore'em muccura; ixxonne magannaato aaggam keen hundinam ixxi agira. Waa'iinsi bagaan mulli Waa'i bee'e Ixxeensi bagaan joriinsi daphphixxi beyyi bee'e. Iina qoxximma uwwookkokii i googom xabbaa'ookkokii Waa'a. Ixxim i lokko saarokkichchi lokkisa qoxxisookko. Duunnuwwannem baachchi bee'e uullisookko. Ixxim i angina qaxxancha losisookko. I wodam naas xiyya daraboommisina qoxxisukko. I Waa'a, eese gatisoo ki agira iina uwwitto; ki hara'mmatim eese lombaam issaakko. I taakko haraassitaatto; i lokkim qolamukkoyyo. I diina'a hollaa amadoommo. Ixxuwwam bi'isoo'n laso daba'lloommoyyo. La'mmeka ki'llambee'isa aphphisoommo; ixxuwwam kaa'aa hance'oommo. Oramoommisina malaayye uwwitootto; i diina'am i illagenne guruphphissootto. I diina'i iinniinsi laso daba'llita'a gibbamisa issitto; eese sabbam keenom bi'isummo. Ixxuwwim agaago hassa'a laattamo; ihukkaarem ayyim ixxuwwa gatisooyyo. Waa'am weeshshamo. Ihukkaarem ixxi hore'em dabarooyyo. Ixxuwwi silliqanta'a dir ikkeebe'e aphphisoommo; googonne hee'oo ha'llisam hance'amoommo. I minaadaphphi angiinsi eese gatissitto; minaadab hundinam adil issitto. An la'oombee'i minaadabim iina ijaajamaakko. Allaggi minaadab eese shoobbookko; i sado macceesukkisam iina ijaajamookko. Ixxuwwim baachchinne u'nnantamo; huxe'antu'uuyyi girbiinsi fitta'a i beyyo waattamo. Waa'i hee'oohane! eese joriinsi egeru Waa'ina galat ihona; eese gatisu malaayyaam Waa'im iimiimihona. Ixxi i diina'iinsi baado miqisookko; minaadabim iina ijaajantamisa issookko. Eese i diina'iinsi gatissaatto. I Waa'a! At i Diina'i illagenne imiimaa'llaatto. Damiggam kee'n angiinsim eese gatissaatto. Ee bikkina minaadaphphi lambe'enne keese galaxxoommo; ki summi bikkinam mazmuura zammaroommo. Ixxi doo'llaa adil issu Daawiitinaa ixxi shumo'inaa Waa'i kaachchanne edaa kaachcha uwwookko; ixxi iittom heer heerinam moo'isookko. Daawiit lasaanchonne wocu sagar kane Waa'i lonsukkok, Yaaqoob Waa'i adillanina doo'llukkok, mishisoo mazmuulluwwa Isra'ee'l minaadabina gudisu Issayyi beet Daawiit kid yaa wocukko. Waa'ik Ayyaan eesennetti ihaa wocookko. Ixxi sagarim i suumiinsi firookko. Isra'ee'l Waa'i kaka wocaakko; Isra'ee'l egeraanchi iina «Hanqa oogatimminnee Waa'a baddimminnee gassoo adil, duub bee'i da'l caa'mmisaa xeen ga'nnaa lasage hixe mutisoo eelliinchisaa» yaakko. I min Waa'i illagenne amma'nnamaakkoohaneyyonnihe? hundisinnem wo'm ihaakkoo heer heerina hee'oo hidi'l sagara iinninne aagaakkoollayyonnihe? iina gatimmaa i mixxa'nnekaa hundam uwwookkokidu ixxotteyyonnihe? Ihukkaarem boqquwwi keen ayyim anginne amadeena xanoobee'i uunjamu uttisa. Ixxuwwam ayyim anginne amadeena iggooyyo. Utta amadoo manni hundim xaa'lleka te'im haqqika hookko'o amadookko; oo uttim yoo beyyonnem giirinne shokkookko. La'anto'oo Daawiit gaadaa'n summi kanniinsi woroon yoohane. Luxxek Taahik moouiinsetti ihu Yoosheeb Baasheebeeta yakkaman ihukkuuyyi ixxim sasem malaayyaammuwwiinsim lophphoo awwonsaanchi hee'ukko. Ixxim mat gaadonne ixxi bagadinne sadeenti xibbi mancho shukko. Ee sasem malaayyaammuwwiinsi la'mmek Ahooh moolliinsette ihu la'amaakkoo Doodo'i beet Ali'aazaretti hee'ukko. Mat ayyaamo ixxii Daawiitii gaadina fitto'oo Filisxee'm manninne uullixanto'o; Isra'ee'l mannim lasinne gibbo'o. Ihukkaarem ku manchi yoo beyyonne qoxxaa uullimminne ixxi angi hoogaa amadu bisa'anne amaxxameebe'i afeebe'e Filisxee'm manna qasukko. Waa'i ee ayyaamo kee'mmaalli kaachcha uwwukko. Ee lasage Isra'ee'l manni Ali'aazar hee'u beyyo daba'llita'a leto'i Filisxee'm manniinsi lobakat o'l mu'uta qeefaddo'o. Ee sasem malaayyaammuwwiinsim saxxek odim Haraariinsetti ihu la'amaakkoo Age'i beet Shaama'atti hee'ukko; mat balla Filisxee'm manni mishir yoo abuulli uullanne Lehii yakkam beyyonne orina gudda'a wixxita'a hee'llo'o. Isra'ee'l mannim Filisxee'm manni illagiinsi gibbo'o. Ihukkaarem Saama'a uullu beyyo fatakukkoyyo. Ee beyyonnem Filisxee'm manna guullukko; ee ayyaamo Waa'i lophphaakkoo kaachcha uwwukko. Hurbaata wixxaa'akkam ammanenne sadem malaayyaammuwwiinsim sasoom Daawiit yoo Aduulaa'm daawwa'a dillito'o. Ee ammane Filisxee'm gaadaaniinsi hofqaxim Raafaayim cebbanne wiiddanaa hee'ukko. Ee ammane Daawiit girbamaakkoo duunanne hee'ukko. Filisxee'm gaadaaniinsi mat gaalchi Beetaliheema amadaa hee'ukko. Daawiitim ee uulla heele'imminne «Betelihee'm ooxxi gadanonne yoo wo'i bariinsi agoommi wo'o eeboo mancho siidaammoota'n» yukko. Ee bikkina oo la'anto'oo sasem malaayyaammuwwi gaadaanim ee Filisxee'm manni wiiddana iggimminne iiqqa'a higimminne ee bariinsi wo'o inkiitta'a Daawiitina eebbo'o. Ihukkaarem Daawiit ageena iittukkoyyo. Agimmi bikkenne Waa'ina kitim issaa dunaa lasage «Waa'a! An ka wo'o hore'em agoommoyyo! An ka wo'o aagumlas ixxuwwi gaga higissa'a uwwita'a ka wo'o eebbo'i ee malaayyaam manni xiiga agimmisanne xigamookko. Ee wo'om agimma sabukko. Oo la'anto'oo sasem malaayyaam gaadaan baxxo'i geedoo'm bax kakeeno. Xaaruyyi beet Yoo'aab abbaayyi Abiis la'anto'oo sadem gaadaa'n awwonsaanchi hee'ukko. Ixxim sas xibbi manchinne oramaa hundam shukko. Ee bikkina ee sasem geedduwwisam la'amaakkoohan ihukko. Ee sadem gaadaaniinsim la'amaakkoohan ihu bikkina ixxuwwina awwonsaanchi ihukko. Ihukkaarem sasem geedduwwi qaxa ixxi summamukkoyyo. La'amaakkoo mulli gaadaanchim Qabxi'ee'l Yoodaah beet Baanaayatti hee'ukko. Ixxim Moo'aaphpheka la'anto'oo lam gaadaano shimmiinsi higaa lobakat geedoo'm baxo baxaakko; mat ammane uullanne barad ubaakkoohaannonne mat barenne aagaa hobbichcho shukko. Ee'isam bagado amadaakkoo mat malaayyaam Gibxi uulli mancho shukko. Oohim Baanaay mugiinsi bagaan o'l mu'uta maham amadoo'n ee Gibxi manchi kolli hincaa ixxi bagado angiinsi gosaa ixxi bagadinnem ixxo shukko. Lanto'oo sasem malaayyaammuwwisam Baanaay baxu geedooma'n bax eekeeno. Ee sadiinsim lobakata la'amaakkoohan ihuta'nnim geedoommaninne sasem malaayyaammuwwiinsim hoffe'am hee'ukko; Daawiitim Baanaaya lombi waardiyyina ijaajaanchi issukko. Odim Waa'i Isra'eelanne quuqu bikkina Daawiit kollinne ixxuwwanne hawwi waaroo'isa issukko. Waa'im Daawiitina «Mattaa Isra'ee'llekaa Yihuxxi minaadabaa xige!» yukko. Ee bikkina Daawiit ixxi gaada'n ijaajaanchi ihu Yoo'aabaa ixxenne maqire yo'i gaaxxi awwonsaanoo «Daaniinsi Beersaabe'i afeebe'e yo'i Isra'ee'l sulluwwi beyyi hundam mallehe. Ixxuwwikim xig hinkaa'nda'e la'eena xanoommisina gaadeena xanoo qaxa xiggehe» yukko. Ihukkaarem Yoo'aab «Adila, ki Moollanni Waa'i Isra'ee'l minaadab kaba yoohaanniinsi lophphaa xibbi suume fikkaannoo'isa issona. I moollanni ikkitti adi'llekim illi eekka moo'oo'isina umur qeeraa'llona. I moollanna, kaka issiteena hassitok mahinatte?» yukko. Ihukkaarem adil qoxxisaa ijaaju bikkina Yoo'aabii gaaxxi awwonsaanii Isra'ee'l minaadaba xiggeena matto'o. Ixxuwwim Yoordaanoos eeqidonne fitta'a Gaad sulli uulli cebbanne yoo Aro'ee'l beero'i woroo'n qarinne wiiddant'o. Ee beyyiinsim hanaa'n qaranne yoo Yaa'izeera affo'o. Ee lasage Gala'aadannee Hiite'i uullannee yoo Qaadeesa affo'o. Ee beyyiinsim Daana, Daaniinsim eelliinchi aagoo kollonne yoo Siidoona matto'o. Ee beyyiinsim woroo'n qarinne girbamookkoo Xiiroos beero'o ee'isam Hiiwe'ikaa Kaani'aa'n beero'muwwaa hundam matto'o. Lasaanchonnem Yihuxxi uullanne yoo Bersaabe'e affo'o. Ee'isinne Isra'ee'l uullanne hundannem daba'llantu'uuyyi honsi aganaa lamiyyi ballaa ihaa lasage Yerusaaleema daba'llito'o. Yoo'aabim Isra'eelanne sadeenti xibbi kum Yihudanne onti xibbi kum gaadeena xanoo manni yoo'isa adilina la'isukko. Ihukkaarem Daawiit minaadaba xigaa lasage ixxi tiir acceeqasaa u'nnisu bikkina Waa'ina «An eekka issimminne lobakata keese hawwodaammo; iikkam qawwoo'm baxo haafihe» yaa uunxukko. Gaad ixxi beyyo maraa Waa'i ixxena kure yukkoka kurukko. Ixxim «Ki uullanne sas hiinchi sibaariinsi, sas agana ki diina'i keese hollansimmiinsii ki uullanne sas balla booban ihimmiinsii hinka doo'llitootto? Ka woshsha danaamisa sawwitaa Waa'ina kuroommi ki doo'lla kure» yukko. Daawiitim Gaadina «Ku woshshi iina kee'mmaalla; ihukkaarem manni anganne ubimmiinsi Waa'ik haafit lobakat ihu bikkina ixxi anganne ubimmi niina e'llookko» yaa dabarukko. Ee bikkina Waa'i ee balli dariinsi ki'isaa ixxi yu balli afeebe'e Isra'eelanne boobana dilliisukko. Ee boobaninnem Daaniinsi Bersaabe'i afeebe'e yoo Isra'ee'llek lamarayyi kum manni beeddukko. Waa'ik asse'amaanchi Yerusaaleema bi'iseena gudaakkoohaannonne minaadaphphi hawwodanchanne Waa'i kichche'u bikkina asse'amaanchina «Ihookko! Uullise!» yukko. Ee ammane Waa'i asse'amaanchi Iyyaabuus uulli Ooriyo'i oodo'onne uullaa hee'ukko. Daawiit minaadaba guullam hee'u Waa'i asse'amaancho moo'aa Waa'ina «Hawwodummokii huushamummokkii anette; ku ma'lluwwam la'oobee'i minaadab keese maha hawwodaatte? Ku booban ixxuwwanne dillukkaanniinsi eesennee i abaroosannee ihona» yaa xa'mmukko. Ee ballam hiraagaanchi Gaad Daawiit beyyo maraa «Oorin oodo'o mattaa Waa'ina kitima hincaa'akkam beyyo baxe!» yukko. Daawiitim Waa'ina ijaajamaa Gaad kurukkisa issukko. Oorinim Adil Daawiit ixxi gassaaninnem ixxi beyyo worooniim waarukkuuyyi moo'ukko. Ixxim Daawiit illagenne heeshaa otossukko. Ixxim «Adila, mah bikkina ka beyyo waattitto?» yaa xa'mmukko. Daawiitim «Waa'i boobana niinniinsi dabarona ki oodo'o bitaa'aa Waa'ina kitima hincaa'akkam beyyo baxeenatte» yukko. Oorinim «Adila, ka oodo'onne at hassittisa issitaa Waa'ina kitima hincaa'e. Shokkiisakka'a hincaa'akkam kitiminam mirgo'uwwi keyye yookko; giirinattem ihuta'n ixxuwwi gaanjaqqii hurbaata ganakkam mu'utii hundim keyye yookko» yukko. Oorinim ee hundam adilina uwwaa «Ki kitim Waa'a liiransoohan ihona» yukko. Ihukkaarem adil Daawiit Oorinina «Eehideyyo; an bito miqimmi hasisookko; an bito miqumbee'i luwwa i Waa'ina kitim issaa hincaa'immi hasisooyyo» yukko. Ee lasage Daawiit oodo'oo mirgo'uwwaa ontayyi kin birina bitaa'ukko. Ee oodo'onnem Daawiit kiti'm beyyo baxaa shokkiisakka'a hincaa'akkam kitimaa mateeyyoo'm kitimaa Waa'ina hincaa'ukko. Waa'im Daawiitika uunxato macceesukko; Isra'eelanne dillam hee'u boobanim uullukko. Adil Daawiit lobakata lomma'nnaa hee'u bikkina ixxi gassaan lobakat eddechcha tuubba'a eddeesso'o. Ihukkaarem iibba uwweena xanukkoyyi hee'ukko. Ee bikkina adi'l gassaan «Ni adila, kiinninne ikka'a keese abooyyitam baajaam landichcho hansaa eemboommo; isem kiinninne maqire iinse'lla'a keese iibbissamo» yito'o. Isra'ee'l uullanne hundannem hassa'a Shuunaam yakkam beyyonne Abishaage yakkam mat danaam landichcho siidda'a adilina eebbo'o. Isem lobakata mishissamotan hee'llo'o. Adilinne maqire afuutta'a abooyyitu'uuyyi awwaaddam hee'llo'o. Ihukkaarem adil issenne eebaqqanchi edancha edamukkoyyo. Ee bikkina Xaruy beet Yoo'aabinnee qeessichchi Abiyaataarinnee maqire a'llamukko. Ixxuwwim ixxi sawwitenne iittanto'o. Ihukkaarem qeessichchi Saadooq, Yoodaah beet Baanaay, hiraagaanchi Naataan, Shiimi'i, Ree'iinii Daawiit lombi waardiyyii Adooniyaas woshshanne iittanto'oyyo. Mat balla Adooniyaas Eniroogeela yakkam wo'i bu'i gadanonne Zoheeleet kina yakkam beyyonne gereebba, mirgo'uwwaa di'ir labeennuwwaa duraa kitima hincaa'ukko; adi'l oos ikko'i ixxi abbaayyuwwaa Yihuxxi uulli gassaanoo hundam ee kiti'm ugudina waattona weeshukko. Ihukkaarem hiraagaanchi Naataana, Baanaayaa adi'l lombi waardiyyuwwaa ixxi abbaayyi Salamoonaa weeshukkoyyo. Ee lasage Naataan Salamoon am Bersaabeh beyyo maraa «Ni moollanni Daawiit la'oo'nnim Hagiit beet Adooniyaas adil ihukkisa macceessittoyyonnihe?» yaa xa'mmukko. «Ki gagaa ki beet Salamoonaa gatisseena xantoo sogitano sogoommo. Adil Daawiit beyyo mattaa ‹Ki beet Salamoon i lasage adil ihaa i adilla'n barcumanne afuurookko› yitaa iina ki awwaadaanchona hidi'l sagara aaggaa hee'llittoyyonnihe? Eehannah kaba Adooniyaas hinkid adil iheena xanukko?» yihe. Odim Naataan «At adil Daawiitinne woccittuuyyim anim aagaa at woccittok hundim hanqi ihukkisa qoxxisaa kuroommo» yukko. Ee bikkina Bersaabeh adila atoorassiteena ixxi yoo jagara aaggo'o; adil Daawiit lobakata lomma'nnu bikkina Shuunaa'm uulli landichcho Abiishaage erisa abooyyitam hee'llo'o. Bersaabehem uullanne aad heeshita'a anga ki'isso'o. Adilim maha hassoolla?» yukko. Bersaabehem «I moollanna, i beet Salamoon ki adillano lago aa'aa adil ihoo'isaa adilla'n barcumannem afuuroo'isaa ki Moollanni Waa'i summinne iina hide'llaa hee'llito. Ihukkaarem kaba at laqqoo'nnim Adooniyaas adil ihaakko. Ee bikkina lobakat mirgo'uwwa, di'ir labeennuwwaa gereebbaa kitimina hincaa'aakko; ee ugudannem siidantona adi'l ooso, qeessichchi Abiyaataaraa ki gogoxxi ijaajaanchi Yoo'aabaa weeshaakko. Ihukkaarem ki awwaadaanchi Salamoona weeshukkoyyo. I moollanna, adila, Isra'ee'l minaadab hundim kiinniinsi lasonne adil ihookkok ayyetda'e ihukkisa kuttoo'isina egeraakko. Kakamidu issittibeelas at letoohaare ee ammanem i beet Salomoonii anii bi'isaan inkaa xigammoommo» yito'o. Bersaabeh woccu'uuyyim hiraagaanchi Naataan aagukko. Adilinam hiraagaanchi waarukkisa kurakko'o; Naataanim adi'l illagenne hincaa aad heeshaa anga ki'isukko. Ee lasage «I moollanna, Adooniyaas kiinniinsi lasage adil ihaa ki adillanonne afuuroo'isa issitaahinnihe? Ixxi kaballa lobakat mirgo'uwwa, di'ir labeennuwwaa gereebbaa duraa kitima hincaa'aakko; mulli ki ooso, ki gogoxxi ijaajaanchi Yoo'aabaa qeessichchi Abiyaataaraa weeshaakko. Oono'o, kaba ka ammanenne ‹Adil Adooniyaas heer heerina hee'ona!› yitu'uuyyi damfitu'uuyyi ixxenne maqire ittamuullaa aggamuulla. Ihukkaarem eese ki awwaadaancho, qeessichchi Saadooqa, Yoodaah beet Baanaayaa ki awwaadaanchi Salamoonaa ee maaddina weeshukkoyyo. I moollanna, adila, kiinniinsi lasonne adil ihookkoka ki gassaaninam kuttoo'nnim ku Adooniyaas adil ihimmi at issitaattoohanennihe?» yukko. Adil Daawiitim «Bersaabeh keyye weeshshehe» yaa ijaajukko. Isem waatta'a ixxi illagenne uullito'o. Isenam «Eesenne afu hawwi hundiinsim gatisu hee'oo Waa'i summinne kiina sagara aagoommo. Hanqinam ki beet Salamoon iinniinsi losonne adil ihaa i adilla'n barcumanne afuuroo'isa Isra'ee'l Moollanni Waa'i summinne kanniinsi illageen kiina aagummi sagara kaballa gullaa wonshoommisa la'isoommo» yukko. Bersaabehem uullanne heeshita'a anga ki'issa'a «I moollanni adil Daawiit heer heerina foorinne hee'ona» yito'o. Ee lasage adil Daawiit qeessichchi Saadooqa, hiraagaanchi Naataanaa Yoodaah beet Baanaayaa weeshisukko. Ixxuwwim aagga'a ixxi kolli hincito'aare Adilim «I adilla'n minenne siidantam i gassaaninne maqirem mallehe. I beet Salamoona an saa'lloommi baquchchonne saa'llissakka'a kibbitakka'a Giiyoo'n bu'i beyyo dillehe. Ee beyyonnem qeessichchi Saadooqii hiraagaanchi Naataanii labba'a Isra'eelina adil issitona. Ee lasage buuxxi xurumba fuggakku'uuyyi sagara iimaa'llakka'a Salamoon ‹Heer heerina adil ihona› yi'llehe. I adillanonne afuureena daba'llaa keyye waaroo ammane kibbitakka'a wollehe. I bikkennem adil ihaa i adilla'n barcumanne afuurona. Isra'eelinaa Yihudinaa i lasonne adil ihoo'isina an ixxo doo'llaammo» yukko. Yoodaah beet Baanaayim «I moollanni adil yukkisam ihona; eekkam ki Moollanni Waa'i wonshona. Adila, Waa'i kiinninne maqir ihukkisam Salamooninnem maqir ihona. Ixxi adillanom ki adilla'n doollenne hee'ukkaanniinsi loboka lophphaakkoohan issona» yukko. Ee bikkina qeessichchi Saadooq, hiraagaanchi Naataan, Yoodaah beet Baanaayii adi'l lombi waardiyyuwwii Salamoona Daawiit saa'lloo baquchchonne saa'llissa'a Giiyoo'n bu'i beyyo massito'o. Qeessichchi Saadooq Keesammi Dukkaaniinsi amadaa waaru labakkam zayti yoo buudo ki'isaa Salamoonanne labukko. Ee ammanenne xurumba fuggo'o; minaadabim sagara iimaa'aa «Adil Salamoon heer heerina hee'ona!» yukko. Adilla'n minem daba'llita'a waattu'uuyyi ixxo kibbita'a waatto'o. Lobakat liiranchinne xurumba fuggu'uuyyii kaddu'uuyyii lomba uwwitam hee'llo'i bikkina lobakata shuurimmiinsi ki'ukkok uulli heekke'am hee'ukko. Adooniyaasii ixxi weeshu mannii hundim maadda itta'a guulliteena ikko'oohaannonne corochchi sagara macceesso'o. Yoo'aabim xurumbi sagara macceesaa «Ku ka beero'onne macceesamoo corochchi mahane?» yaa xa'mmukko. Ixxi wocaa guulloo'nnim dangonnem qeessichchi Abiyaataar beet Yoonaataan afukko. Adooniyaasim «Hino'o, keyye waare er manchi ikki bikkina iina er woshsha amaddaa waattoo'n uttooyyo» yukko. Yoonaataanim «Er woshsha amadaa waarummoyyo. Ni hibbaam adil Daawiit Salamoona adil issaakko. Adilim ixxo kibbitona qeessichchi Saadooqa, hiraagaanchi Naataana, Yoodaay beet Baanaaya, adilla'n mi'n lombi waaridiyyuwwa, Kaalite'i mannaa Faalite'i mannaa asse'aakko. Ixxuwwim ixxo adi'l baquchchonne saa'llisso'ookko. Qeessichchi Saadooqii hiraagaanchi Naataanii Giiyoo'n bu'onne massita'a labba'a adil issito'ookko. Ee lasage minaadab hundim liiranchinne wo'mmita'a ilil yitu'uuyyii hoo yiitu'uuyyii sagara shiqaa'lla'a kaddu'uuyyi beero'o daba'llito'ookko. Kaba macceessakkamokim ee sagara. Oono'o, Salamoon adil ihaa adilla'n barcumanne afuuraakko. Eehanniinsim loboka la'anto'oo adi'l gassaan adil Daawiit beyyo hincita'a ‹Ki Moollanni Waa'i Salamoona kiinniinsi loboka sad la'amaakkoohanee adillanim haraaraakkoohanee issona› yita'a maasse'llo'ookko. Ee lasage adil Daawiit ara'anne hee'ukkisam Waa'ina otossukko. Odim ‹Kaballa i shumo'iinsi mat eese bikkaa adil ihoo'isa issukkokii kakam moo'oona hara'mmukkokii Isra'ee'l Moollanni Waa'i lombaa galataa aa'ona!› yaa Waa'a galaxxaakko» yukko. Ee ammane Adooniyaas weeshu manni hundim eekka macceessa'a lobakata baddito'o; hundim ki'lla'a goog googom binnito'o. Adooniyaasim Salamoona lobakata baddu bikkina Keesammi Dukkaana maraa kiti'm buudduwwa amadaa magannaato aagukko. Salamooninam «Adooniyaas keese baddu bikkina kiti'm beyyika buudduwwa amadaa ‹Mahiinsim gaassaa adil Salamoon eese shoobee'isina sagara aagona› yaa magannaato aagaakko» yito'o. Adil Salamoonim «Ixxi jor googiinsi daba'llaa eroomma issulas ixxi horoo'l saraatiinsi matim nakkamooyyo. Ihukkaarem jora baxulas lehookko› yaa dabarukko. Ee lasage adil Salamoon Adooniyaasa kiti'm beyyiinsi dilliissa'a wottona manna asse'ukko. Adooniyaasim adi'l illagenne hincaa heeshaa otossukko. Adilim «Mine elle'e» yukko. Daawiit lehoo amman afukkaare ixxi beet Salamoona weeshaa «Oono'o, an lehoommi ayyaam hincaakko. Ee bikkina qoxxe! Murte'aalli manchi ihe. Ki Moollanni Waa'i issitona keese ijaajoo luwwi hundam isse. Mattoo beyyi hundannem issitoo luwwi hundim taaphanoo'isina Muse'enne uwwamaa kitaabamu Waa'ika ijaajo, Seera, oogato'oo siyya'aa hundam egere. Ka hundam ijaajantaa egettilas ‹Ki shumo'i qoxxaa ege'llimminne ixxuwwi wo'm wodaninnee sawwitinnee i illagenne xabbeenoominne daba'llantolas Isra'ee'l adilla'n barcumanne adil ihaa gassookkok ki shumo'iinsi bee'ooyyo› yaa iina uwwu neeyyaxxi sagara wonshookko. «Xiruyyi beet Yoo'aab Isra'ee'l minaadaphphi gaaxxi awwonsaan hee'llo'i Neer beet Abaneerannee Yiteer beet Amaasannee issukkoka atim laqqootto; oohim o'l ammane dunamu xiiqqi baadina xummi ammanenne ixxuwwa shaa ixxi lade'u o'l mu'utaa caamma'aa xiiginne kolbaakko. Ee bikkina kiina uwwamu qooroominne ixxonne issimmi hasisoo'isa isse bagaan umura goddaa xumminne abo'aa lehona cawwititte. «Ihukkaarem Gala'aaxxi Barzilaay oos Abeseloomiinsi gibummi ammane iina eroomma issito'i bikkina atim ixxuwwina eroomma issimminne abooyye; ki maaddiinsi ittam keeninnem ittona. «Eehanniinsim mullek xadimmi hasisoobee'ek Biiniyaam gassi uullanne Baahuuriim beero'onne hee'oo Geera'i beet Shiimi'i ki angannette. Ixxi an Maahinaayima marummi balla eese jorisa game'llaakkoohane; ee'isa ihaa odim Yoordaanoos daajji gadanonne siidaa eese taqeebalukkaare ‹An keese shoommoyyo› yaa Waa'i summinne hide'aa hee'ummo. Ihukkaarem kiina uwwamu qooroominne ixxonne maha issimmi hasisooda'e laqqoo bikkina ixxo guzumo'lloo'n uttitte. Ixxo shimmi hasisoo'isam la'e» yaa ka lasaanchi ijaajo uwwukko. Daawiitim lehukko. Ixxan ihu Yerusaalee'm beero'onnem waammamukko. Daawiit Isra'ee'l minaadaba adillaninne sor hiincho gassukko. Keebiroonanne lamar hiincho Yerusaaleemannem sadee sas hiinchoo adil ihukko. Salamoonim ixxi anni Daawiit adilla'n barcumanne afuurukko. Ixxi adilla'n gassim lobakata qoxxaakkoohan ihukko. Hagiit beet Adooniyaas Salamoon amatte ikko'i Beersaabeeh beyyo marukko. Isem «I beyyo xumminam waattaahinnihe?» yita'a xa'mmito'o. Ixxim «Eeyya an waarummok xumminatteme» yaa dabarukko. Odim «An keese xa'mmeena hasaammoo luwwi yookko» yukko. Isem «Maha?» yito'o. Adooniyaasim «Adillano amadimmi iina laboohan hee'ukkisaa eekkam Isra'ee'l minaadab hundim ege'llaa hee'ukkisaa atim laqqooto; ihukkaarem oo adillan Waa'i doo'l ihu bikkina iinniinsi higaa iyyabbaayyina uwwamaakko. «Kabadem keese uunxoommi luwwi yoo bikkina sabbaa eese tuussiissoobee'isina uunxoommo» yukko. Bersaabehem «Kure» yito'o. Ixxim «Adil Salamoon kiina saboobee'isa la'oommo. Ee bikkina Suunaa'm uullitan ikko'i Abiishaage yamantam landichcho iina ladiisona i bikkenne uunxe» yukko. Isem «Erane; eekka adilina kuroommo» yito'o. Ee bikkina Bersaabeh ee woshsha kutteena adil Salamoon beyyo aaggo'o. Adilim ki'aa taqeebalaa adilla'n barcumanne afuuraa lasage mulli barcuma eebisaa makki kollinne afuuttamisa issukko. Isem «Iina issitona hasoommi gootto'i luwwi yookko. Ha'i sabbaa eese tuussiissitte» yito'o. Adilim «Iyyumma, keese tuussiisoommoyyo; maha?» yukko. Isem «Kiyyabbaayyi Adooniyaasina Abiishaage uwwe» yito'o. Adilim «Abiishaage xale'e mahina xa'mmitoolla? I adillanom fatakihona mahina eddaa xa'mmittoyyo? Ixxi iina lob abbaayyo; qeessichchi Abiyaataarinaa Yoo'aabinam eroomma issona mahina eddaa xa'mmittoyyo!» yukko. Ee lasage adil Salamoon «Adooniyaas kaka xa'mmu bikkina an ixxo shoo'n urummaa'lleensi Waa'i eese shihona. Kabadem eese Waa'i iyyanni Daawiit adilla'n barcumanne qoxxaalli issaakko. Ka adillanom iinaa i shumo'inaa uwwimminne aagu hidi'l sagara egeraakko. Ee bikkina Adooniyaas kaballa lehoo'isa hee'oo Waa'i summinne hide'oommo!» yaa hide'ukko. Ee bikkina adil Salamoon Yoodaah beet Baanaay Adooniyaasa shoo'isina ijaajukko. Baanaayim maraa Adooniyaasa shukko. Adil Salamoon qeessichchi Abiyaataarina «At qarantitti uulla Anaatoota mare. At lehimmi hasisoohan hee'ukko. Ihukkaarem kaba an keese shoommoyyo. Mashka'oomim Moollanni Waa'i Hidi'l Sagara dissakkam Saaxina iyyanni Daawiit illagenne iyyitaa ixxennem hawwi hundam baxxantaatto» yukko. Ee lasage Adil Salamoon Abiyaataara Waa'ina awwaadimminne hee'oo qeessooma'n daannoomiinsi hollukko. Ee'isinne Seelo'onne Waa'i qeessichchi Eeli'i bikkinaa ixxi shumo'i bikkinaa wocu sagar wo'mmukko. Yoo'aabim ee woshsha macceesukko. Ixxim Adooniyaas woshsha aa'am hee'ukko bagaan Abeseloom woshsha aa'am hee'ukkoyyo. Yoo'aabim Keesammi Dukkaana gibaa marukko; ee beyyonne kiti'm beyyika buudo amadaa magannaato aagukko. Adil Salamoonim Yoo'aab gibaa Keesammi Dukkaa'n beyyo marukkisaa kiti'm beyyi gadanonne yoo'isaa macceesaa Yoo'aaba shihona Baanaaya ijaajukko. Baanaayim Keesammi Dukkaa'n beyyo maraa «Adil ka Dukkaaniinsi fittona ijaajaakko» yukko. Yoo'aabim «Keyyem lehoommo bagaan firoommoyyo» yukko. Baanaayim daba'llaa Yoo'aab wocu woshsha adilina kurukko. Adil Salamoonim Baanaayina mattaa «Ixxi yukkisam shitaa waamme; Yoo'aab kora'am dunu muccur kee'n xiigiinsi eesee iyyanni shumo'oo gatise. Iyyanni Daawiit la'oo'nnim Yoo'aab ixxeensi e'llitam lam muccur gaaxxi awwonsaano oohim Isra'ee'l gaaxxi awwonsaancho Neer beet Abaneeraa Yihuxxi gaaxxi awwonsaancho Yeeteer beet Amaasaa bisa'inne shaakko. Ee bikkina Waa'i ee xiigina ixxo guzumo'aakko. Yoo'aab ee manna shu bikkina ixxena uwwamu leh guzumo'i ixxonnee ixxi shumo'onnee heer heerinam qoxxaa hee'ona; ihukkaarem adilla'n barcumanne afuuroo Daawiit shumo'iinsi Waa'i xummi heer heerinam annanni ihoone» yukko. Ee bikkina Baanaay ijaajamukkisannem Yoo'aaba shukko; ixxi mi'n gadanonne yoo udma'annem waammamukko. Adil Salamoonim Yoo'aab bikkenne Baanaaya gaaxxi awwonsaanchi issaa Abiyaataar bikkennem Saadooqa qeessichchi issaa doo'llukko. Ee lasage adil Salamoon Shiimi'a weeshisaa «Yerusaaleemanne mine baxxaa afuure; ka beero'iinsi mulli beyyo mattitte. Ka beero'iinsimdu fittaa Qeediroo'n daajje higgaa siidantittaa'lleensi hanqo'isam letootto. Ee xiiginam xa'mmantoottok atetteme ikkitti bikkina ki xiig kora'am bi'ookko» yukko. Shiimi'im «Adila, yittok eran ihu bikkina ee'isam issoommo» yukko. Ee bikkina Yerusaaleemanne lobakat doolle hee'ukko. Sas hiinchiinsi lasage Shiimi'i awwaadaaniinsi lamo Gaat adi'l Ma'ak beet Akiish beyyo bi'lla'a matto'o. Shiimi'inam «Ki awwaadaan Gaatanne yo'o» yakka'a kurakko'o. Shiimi'im hallichchonne koora issaa ixxi awwaadaano haseena Gaatanne hee'oo Akiishaa yakkam adi'l beyyo marukko; ixxuwwam ee beyyonne siidaa dabaraa ixxi mine eebukko. Salamoon Shiimi'i Yerusaaleemiinsi Gaata maraa waarukkisa macceesukko. Adil Salamoon Shiimi'i weeshisaa «Yerusaaleemiinsi fittoobee'isa Waa'i summinne hidiisaa hee'ummoyyonnihe? Fittaa siidantitaa'lleensi hanqo'isam letoo'isa qoxxisaa kuraa hee'ummoyyonnihe? Ee woshshandu iitantaa i jaajo egetteena sagara aaggaa hee'llitoyyonnihe? Eehannah Waa'i summinne hide'llaa lasonne Waa'i hidiro mahina egettittoyyo? I ijaajo mah bikkina lonsittoyyo? Iyyanni adil Daawiitanne baxxitti jor baxo hundam laqqootto. At baxxitti jor bax bikkina Waa'i keese guzumo'ookko. Ihukkaarem Adil Salamoon maasse'amaakkoohan ihookko; Daawiit adillanim Waa'i illagenne heer heerina qoxxaa hee'ookko» yukko. Ee lasage adil Salamoon Yoodaah beet Baanaay Shiimi'i shihona ijaajukko; Baanaayim maraa Shiimi'i shukko. Ee'isinne Salamoon adillan qoxxukko. Salamoon Gibxi uulli adi'l landichcho eebaa ee adilinne maqire qarooma amadukko. Isem adilla'n mine, Keesammi Minee Yerusaalee'm beero'i kululleexxi ootaa baxaa guulleebe'e Daawiit beero'onne dissukko. Ee ammane Keesammi Min baxamoo'nnim hee'ukko. Eehanniinsi ki'ukkok duunnuwwanne kitima hincaa'akkam hee'akko'o. Salamoonim Waa'a iittam hee'ukko. Ixxi anni Daawiit uwwu gassi awwonsam egeram hee'ukko. Ihona bagaan diinate kitimukkuuyyi annanni annanni duunnuwwanne kitima hincaa'amii aduruusam wiriissamii hee'ukko. La'amaakkoo kiti'm beyyi Gaba'oonanne hee'u bikkina mat balla adil Salamoon kitima hincaa'eena ee beyyo marukko. Illageenim ee beyyonne mat kum diinate shokkiisakka'a hincaa'akkam kitima kitimaa hee'ukko. Waa'i ee hiimo Gaba'oonanne Salamoonina haqaawwonne moo'amaa «Kiina maha uwwona hassootto» yaa xa'mmukko. Salamoonim «Ki awwaadaanchi hee'u iyyanni Daawiit erane, ama'nnamaakoohannee xabbeen manchoo ihu bikkina qoxxaalli ki iitto ixxena mo'issaa hee'llitto. Kaballam ixxi beyyonne ihaa adilla'n barcumanne afuuroo beeto uwwimminne lophphaakkoo qoxxaalli ki iitto ixxena moo'issaatto. Kabadem i Moollanni Waa'a! Oono'o, an ooshshichcho. Manna gassimikim losan iina bee'e. Ihukkaarem at eese iyyanni adillano aa'oommisa issitaatto. Oono'o, an ki awwaadaanchi yoommok xigakkeena xanakkambee'i at doo'llitti lophphaakkoo ki minaadaphphi lambe'ennette. Ee bikkina joraa erokaa annanni issaa ki minaadaphpheka hanqo'i oogato egeraa gassimma xanoommisina qoorooma uwwe; eehid ihubee'aa'lleensi ka ki haraar minaadaba hinkid gasseena xanoommo?» yukko. Salamoon eekka uunxu bikkina ookki Waa'a liiransukko. Waa'im «Ki gagina qeeraa'l umuraa goddaa siiddeena te'im ki diina'i bi'oo'isina uunxittoyyo. Ihukkaarem gudaanchi hanqa egerimminne gassiteena qoorooma xa'mmitti bikkina oono'o, ki xa'mmichchisanne issoommo; hore'oomam ayyi manchim kanniinsi illageen siidukkaanniinsii ka lasagem siideena xanoohaanniinsii hanaan lophphaakkoo lachchaa qooroomaa kiina uwwoommo. Odim adilluwwiinsi ki'isa ihookkok ayyim hee'oobee'isa at uunxitbee'i goddaa lombaa hundam kiina uwwaammo. Kiyyanni Daawiit issukkisa iina ijaajantittaa'lleensi i seeraa i ijaajoo egettittaa'lleensi i googonnem mattiittaa'lleensi kiina qeeraa'l umura uwwoommo» yukko. Salamoon diriiriinsi baqaa ki'aa Waa'i haqaawwonne moo'amaa ixxo atoorassukkisa la'ukko. Eehanniinsi lasage Salamoon Yerusaaleema daba'llaa waaraa Waa'i Hidi'l Saga'l Saaxi'n illagenne uullaa shokkiisakka'a hincaa'akkam kitimaa mateeyyoo'm kitimaa Waa'ina hincaa'ukko. Ee lasage ixxi awwaadaan ikko'i gassaanina hundinam maadda issukko. Mat balla lam buubbeesaan waatta'a Salamoon illagenne uullito'o. Ee keeniinsim mate «I moollanna, tu meentichchoo anii mat minenne maqirem hee'nnummuuyyim an beeto qarummo. An qarummi saxxi ballanne isem goonchi beeto qatto'o. Ee minenne odim iinniinsii iseensii bagaan mullek matim hee'ukkoyyo. Mat ayyaamo hiimonne is ciil hanenne iinse'llo'aare lehukko. Isem ee hiimom i ciilichcho qaaphphaa an iinse'ummi beyyiinsi massita'a is ara'anne iinsiissa'a iseka lehu ciilichcho i ara'anne i gadanonne iinsiisso'o. Daram ki'aa i ciilichcho anuuna iiciseena moo'ummi ammanenne lehaa hee'ukko; ihukkaarem da'l caakkanne qoossaa moo'oommaare i ciilayyi hee'ukko» yito'o. Ihukkaarem oo la'm meentichcho «Ee'isayyo foorinne yoo ciilichchii iihane lehukokii kiihane› yito'o. Luxxete odim «Ee'isayyo lehu ciilichchii kiihane ihukaarem foorinne yookkok iihane» yito'o. Ee'isa yaqqantu'uuyyi adi'l ellagenne lamim fitanto'o. Ee lasage adil Salamoon «Tute ‹Foorinne yookkok i beeto; oo lehukkok ki beeto› yitamuulla. Ottem odim ‹Ee'isayyo, ki beet lehaakko; ku foorinne yookkok i beeto!› yitamuulla» yukko. Adilim bisa'a eebakkona ijaajukko. Bisa'a eebakko'aarem «Kaba ee fooraam ciila lam beyyo muttakka'a lamenam kolli kollo uwwehe» yaa ijaajukko. Ihukkaarem hanqo'i amatte ikko'ote is ciilichchina qishixxita'a «Adila! Hay i beeto shititte; isena uwwamona!» yito'o. Ihukkaarem mullete odim «Iinam isenam ihoone; lam beyyonne muramona!» yito'o. Ee lasage adil Salamoon «Kaba ciila shitakkotte; hanqo'i ama isette ikko'i bikkina luxxi meentichchona uwwehe!» yaa ijaajukko. Isra'ee'l minaadab ee danaamisa oogatu woshsha macceesso'i ammanenne Salamoona lophphaakkoo lomba uwwimminne lonsito'o. Mashka'oomim minaadabina hanqo'i oogato uwwoo qoorooma Waa'iinsi siidukkisa laqqo'i bikkinatte. Adil Salamoon Isra'ee'l minaadabina hundinam adil ihukko. Ixxi doo'llu gassaanim, Saadooq beet Azaariyaas qeessichcho, Shiisha'i oos hee'llo'i Eelihooreefii Akiiyi Adi'l mi'n kitaabaano, Ahiiluud beet Yoosaafix Aganna kitaabaanchoo doono'i mi'n daannaa. Yoodaa'i beet Baanaay gaaxxi awwonsaancho; Saadooqii Abiyaataarii qeessuwwa; Naataan beet Azaariyaas zoo'n gassaanina awwonsaancho; Naataan beet qeessichchi Zaabuud adilina sogaanchoo kobichchoo. Ahiishaar adi'l mi'n awwaadaa'n ijaajaancho; Abiid beet Adooniiraam malaayyi baxaano ijaajaancho hee'llo'o. Adil Salamoonina Isra'ee'l uullanne hundannem tommii lam gassaanii hee'llo'o. Ixxuwwi baxim adil gassoo uulli hundiinsim adilinaa adi'l mi'n abaroosinaa hurbaata hincaa'immi hee'ukko. Oo gassaan annannichchim mat hiinchina matoom mat aganina hurbaata hincaa'am hee'ukko. Ka tommikii lamem zoo'n gassaa'nnekii ixxuwwi gassitam zoo'nnekii summuwwi Beenihuur duunaam Efiree'm uulli gassaancho Maaqaaxa, Shaa'aalbiima, Beetisheemeesha, Eeloonaa Beet hanaa'n beero'uwwaa gassaanchi Bendeeqaaratte; Aruboota, Sookko'i beero'uwwaa ee'isam Heefeer gassi uulli hundamii gassaanchi Beeniheeseedatte; Kitaabaate yamanto'i Salamoon landichcho eebu Been Aminaadaab Door uulla hundam gassam hee'ukkok; Ahiiluud beet Ba'aan Taa'inaakikii Magiido'i beero'uwwa, ee'isam Beetishaa'n gadanonne yoo gassi uulla hundam, Xaaritaa'n beero'i gadanonne yoo uullaa Yizra'ee'l beero'iinsi woroo'n qarinne yoo uullaa ee'isam Aabeelmahoolannee Yooqima'aa'm beero'uwwannee afeebe'e yoo uulli hundinam gassaanchi hee'ukko. Geebeer beet Ben Gala'aadanne Raamoot beero'o, Gala'aadanne Minaas shumo'ika Yaa'iir moollina amaxxi ihu hegeegguwwa, Baasaannanne Argobba yakkam uullaa ee'isam gooccuwwina Naas qirqire'i yoo kininne baxamaakkoo giribuwwi yoo lohayyi lob beero'uwwaa gassaanchi hee'ukko. Iido'i beet Ahiinaadaab Mahanaayi'm uulla gassaanchi hee'ukko. Salamoon landichchona Baasimaatena aro'i Ahiima'aax Niftaalee'm uulli gassaanchi hee'ukko. Aaseer uullaa Ba'aaloot beero'oo gassaanchi Huushaay beet Ba'aanatte hee'ukko. Faaruh beet Yoosaafaax Yisaakoor uulla gassaanchi hee'ukko. Eela'i beet Saami'i Biiniyaam uulli gassaanchi hee'ukko. Amoore'i adil Siihoonii Baasaa'n adil oogii gassitam hee'llo'i Gala'aaxxi uulli gassaanchi Uur beet Geberatte hee'ukko. Ee uullanne hundoomannem ka tommoo lamem gassaanom ijaajoo mat lob gassaanchi hee'ukko. Yihudikii Isra'ee'l minaadaphphekii fikkaanni dambalaq shashsha'llisa hee'ukko; Oo hundim ittu'uuyyii agu'uuyyii amman hundam liirantam hee'llo'o. Salamoon gassoo uullim Efiraaxiis daajjiinsi ki'isaa Filisxee'm uulli afeebe'e; eeham higaa Gibxi uulli gabal afeebe'e yoo uulli hundam edam hee'ukko. Ee uulli minaadab hundim Salamoon hee'u doollenne hundannem ixxena ijaajanta'a gibittam hee'llo'o. Salamoonina ballina ballina ihoo hurbaata onti kum kiilo'o ihoo qax doo'l qam, tommi kum kiilo'o kora'i qama tommi xiikkammi mirgo'uwwi, kuturanne hosoo lamiyyi lijjuwwi, mat xibbi gereebbi, ee'isam gaalli, gibbi, kukkussii doo'l antabaa'ii hasisam hee'ukko. Salamoon Efiraaxiis daajjiinsi eelliinchi aagginne yoo uulla hundam Tifisaah beero'iinsi ki'isaa Gaaza'i beero'onne afeebe'e gassam hee'ukko; oohim Efiraaxiis daajjiinsi eelliinchi aagginne hee'oo adilluwwa hundam edoohane. Ixxi olla'i ihu uulluwwinne hundinnem xumminne hee'am hee'ukko. Hee'u doollenne hundannem Daaniinsi ki'isaa Bersaabe'i afeebe'e Yihuxxekii Isra'ee'l minaadabii hundim matem kichchechchi bee'em xumminne hee'ukko. Hundem mi'n abaroosinam ixxi gaqqi woyi'n xudii misha itakkam oda'ii hee'u bikkina ee duubbi kaashshuwwi hafanne usheexxam hee'ukko. Salamooninam faraxxi gaarre'e gosaasoo sor kum soorammi faradii tommii lam kum orina awwaadoo faradii hee'ukko. Salamooninaa ixxi adilla'n minenne hurbaata ittam manninaa hundinam hasisoo hurbaata hincaa'llam tommikii lamem uulli gassaanii annannichchim ixxuwwina uwwamu agananne maham xa'issoo'n ammaninne eebbam hee'llo'o. Eehan xale'i ihoo'n gassaan annannichchim hasisoo'isinne so'oo gaabaa gaarre'e gosaasimminaa mulli awwaadinaa ihoo faradina hurbaat ihoo'isina eebbam hee'llo'o. Waa'i Salamoonina lobakata maalalsiisoo qooroomaa qoossimmaa ee'isam tungi bee'i lachchaa uwwukko. Salamoon eelliinchi firinne yoo uulli manniinsii Gibxi uulli qoolluwwiinsii loboka lachchaam hee'ukko. Ixxi manniinsi hundiinsim lophphoo qooroom uwwamaakkoo manchi hee'ukko. Odim Yizra'ee'l Etaaniinsi, Maahool oos hee'llo'i Heemaaniinsi, Kaalkooliinsii Daarda'iinsii lophphoo qoor hee'ukko. Ixxi sad hegeeqqi uulli hundannem lobakata la'amukko. Ixxim sas kum kobi'llishshuwwaa mat kumaa onti mazmuuraa kitaabukko. Salamoonim haqquwwi bikkina Liibaanoos digibiinsi ki'isaa kininne baxamu mi'n hanenne mutoo hoffi mutaancha'i afeebe'e kobi'llisukkuuyyi wocaakko. Ee'isam annanni annanni diinattuwwi bikkina, cii'uwwi bikkina, biqinne shurukkuuyyi maroo qooccanchuwwi bikkinaa qurxumme'i bikkinaa wocaakko. Uullanne hundannem hee'llo'i adilluwwi Salamoon qooroo'm bikkina macceessa'a ixxeensi qoorooma macceessona manna asse'llam hee'llo'o. Xiiroos adil Kiiraam Daawiitinne maqire ixxi gassoo doollenne hundannem iitti manchi hee'u bikkina Salamoon ixxi anni Daawiit bikkenne adil ihukkisa macceesaa ixxi beyyo manna asse'ukko. Salamoonim Kiiraam beyyo «Iyyanni Daawiit ixxi kululleetanne yo'i diina'i uulluwwi gogotinne hundinnem oramukkuuyyi hee'ukkisa at ki gagim laqqootto; diina'a kaa'oo'isa isseebe'i ixxi Moollanni Waa'ina Keesammi Mine baxeena xanubee'isa laqqootto. Ihukkaarem kaba i Moollanni Waa'i i uulli kululleetanne hundannem xumma uwwaakko. Matem hawwom afisoo diina'i bee'e. Waa'i iyyanni Daawiitina ‹Ki lasonne adillano uwwoom ki beet iina otossakkam mine baxookko› yaa neeyyataa hee'ukko; eehanniinsim ki'ukkok i Moollanni Waa'ina otossakkam mine baxeena kaba murte'aammo. Ee bikkina digiphphi haqqa muroo manna ki manniinsi Liibaanoos kolli asse'e; i mannim ki manninne maqire baxxamisa issoommo; ki manninam at qoodditti diinate miqoommo; at laqqoo'isam i manni haqqa murimma ki mannisa laqqamoyyo» yoo asso asse'ukko. Kiiraamim Salamoon assi afu ammanenne lobakata liiramaakka «Ixxi beyyonne ihaa ka lob minaadabanne adil ihoo'isina ka laboo qoor beeto Daawiitina uwwu Waa'i galaxxamona!» yukko. Ee lasage Kiiraam Salamoonina «Iina asse'llitti assi afaakko. Ee bikkina at hassoo luwwi hundam isseena an gudaammoohane; digiphphekaa hoo'mmekaa gudeelluwwa gudisaa kiina hincaa'oommo. I mannim ee gudeelluwwa Liibaanoosiinsi dambalaq afeebe'e dilliissamo; mateeyyannem mat issita'a katta'a at doo'llitti dambalaq tochchi afeebe'e chabbaa afoo'isa issitamo. Ee beyyonnem eekka titta'a dilliissa'a ki mannina uwwitamo. Atim ki kollinne i adilla'n minenne hee'oo mannina hurbaata asse'imminne i mixa'nneka wonshitootto» yoo asso asse'ukko. Ee'isa issimminne kiiraam Salamoonina hasisoo digiphphekaa hoo'mmekaa gudeelluwwa hincaa'ukko. Salamoonim ixxi kollinne Kiiraam adilla'n minenne yo'i mannina ittam hurbaata lamiyyi kum kuntaal arasaa soor xibbi kum liitir muccur wee'l zaytaa hiinchi hundam uwwam hee'ukko. Waa'i illageen kurukkisam yu hidi'l sagara egerimminne Salamoonina qoorooma uwwukko. Kiiraam lambe'ennee Salamoon lambe'ennee xummi hee'ukko. Lamim hidi'l sagara aago'o. Adil Salamoon Isra'ee'l minaadabiinsi hundiinsim malaayyi baxaa'nneka sad kuma doo'llukko. Ixxuwwannem Adniiraamaa yakkam mancho daanni issaa doo'llukko; ee baxaanom tommi tommi kum issaa sas beyyonne baxxansaa ee tuuttuwwam korinne korinne mat agana Liibaanoosanne baxxamisa lam agana odim minenne usheexxitamisa issukko. Adil Salamoon duunaam uullanne kina anitam keeno sadeentayyi kuma, anamu kina gugguttam keeno lamarayyi kuma gudisukko. Ee mannika hanaan ikka'a baxo egettam sas kumaa sas xibbi mannaa gudisukko. Oo baxaanim adil Salamoon ijaajinne ee Keesammi Mine baximmina ihoo shooto'ina geejji geejji kina anto'o. Salamoonikii Kiiraamikii anga qoor baxaanii Biibiloos mannii ee Keesammi Mine baxakkam kinaa haqqaa cabbatta'a gudisso'o. Isra'ee'l minaadab Gibxi uulliinsi fitto'i soor xiibbiinsii sadeentayyi hiinchiinsii lasage Salamoon Isra'eelanne adil ihu soo'l hiinchonne «Ziifa» yakkam la'm agananne Waa'ika Keesammi Mine baximma asheerukko. Adil Salamoon Waa'ina baxu mi'nnek woro'l kollinne yoo qeeraa'lloom lohayyi anga, dufaachchoom lamiyyi anga, uullichchoom sad anga hee'ukko. Keesammi Mi'n barandik dufaachchi ee Keesammi Mi'n dufaachchisam lamiyyi anga, haraaroomim tommi anga hee'ukko. Ee Keesammi Mininam wororinne haraaraa bii'l kollinne xuqqaakkoo maskoottuwwi hee'ukko. Ee Keesammi Mi'n gorte'enne hincaa'aa Keesammiinsi Keesammi beyyi kululleetanne annanni annanni baxxanchuwwi yoo mine baxukko. Ee mi'nnek woroo'n fooq dufaachchi onti anga, la'm fooqik loh anga, saxxaannikim lamar angi hee'ukko. Fooq min baxamu farashshaano Keesammi Mi'n gorte'e hawwodoobee'isa bii'l kollinne bella uullisukko. Oo Keesammi Min baxamu kinneewwim cabbaramaa gudukkok ee kina anakko'i beyyonnettem hee'ukko. Ee bikkina oo Keesammi Min baxamukkuuyyi fanxiizik, heexxek te'im mulli xaa'llek sagar macceesamam hee'ukkoyyo. Exxaa baxamu mi'n woroo'n fooqa aagakkam gooc siidamookkok Keesammi Mi'n woroo'n qa'l kollinnette hee'ukko. Ixxom la'mmaanninnee saxxi fooqinnee maqire edansoo gardabbuwwi baxamaakkoohan hee'ukko. Ee'isinne Salamoon Keesammi Mine baxaa guullukko. Iimanem woro'l kollinne digiphphi haqqinne baxaa eekka xarbinne ifiisukko. Fooqquwwik uullichchi annannichchikim onti onti anga ihoo minneewwa bii'l kollinne Keesammi Mi'n kululleetanne hundannem baxukko; ee Minennem edaa diggiphphi haqqinne amaxxansukko. Waa'im Salamoonina Ee'isinne Salamoon Keesammi Mine baxaa guullukko. Ee Keesammi Mi'nnekim gortanni woro'l kollinne gaxiinsi ki'isaa iiman afeebe'e digibiinsi cabbaramaa axisamu xarbinne goolabamaakkoohan hee'ukko. Odim gaxanne dahamu xarbim hoomiinsi baxamaakkoohan hee'ukko. Keesammiinsim keesamma yamamoo mat woro'l baxxanchi ee Keesammi Miniinsi afaree'n kollinne woronne aagaa baxamukko. Ixxekim qeeraa'lloom lamiyyi anga hee'ukko. Odim gaxiinsi ki'isaa iiman afeebe'e digiphphi haqqiinsi cabbaramaa baxamu xarbinne baxamaakkoohan hee'ukko. Keesammiinsi keesammi beyyi illagenne yoo keesammi baxxanchik qeeraa'lloom sor anga hee'ukko. Oo digiphphi xarbuwwim fiit quuxaa haareechcho fiitu fiitaa kobi'llimminne wereeggaakkoohane. Woro'l kolli hundim digiphphi haqqiinsi cabbaramaa baxamaakkoo xarbinne eddeesamu bikkina ee Mi'n gorte'ik kin moo'amam hee'ukkoyyo. Keesammi Mi'n woronne afaree'n kollinne Waa'ik Hidi'l Saga'l Saaxin afuuroo woro'l kosh baxamukko. Oo Keesammiinsi keesammi woro'l koshik qeeraa'lloom lamiyyi anga, haraaroomim lamiyyi anga, uullichchoomim lammiyyi angi ihaa hundim muccur worqinne goolabamma. Kiti'm beyyim cabbaramaa axisamaakkoo digiphphi haqqinne goolabamaa hee'ukko. Salamoon Keesammi Mi'nneka wororooma muccur worqinne eddeesukko. Ixxim worqinne eddeesamu woro'l mine aagakkam gooca worqinne baxamaakkoo chimchiminne wereeggisukko. Ee Keesammiinsi keesammi kosh woronne yoo kiti'm beyyom edaa Keesammi Mi'nneka woro hundam worqinne goolabukko. Ee Keesammiinsim keesammi beyyonne uullichchoom tommi anga ihoo weerinne lam kiruubeel misilluwwi baxukko. Mat kiruubee'l uullichchim tommi anga hee'ukko; la'mmekim ee'isa hee'uko. Oo kiruubbuwwim Keesammiinsi keesammi beyyonne uulloo'isa issakko'o. Ee bikkina oo biddiqu lamem laadduwwim ee kosh lambe'i beyyonne edanta'a mulli lamem ladduwwim ee'isam biddiqito'i kollinne mi'n gortanna nakkitam hee'llo'o. Ee lamem kiruubbuwwannem worqa goolabukko. Ee Keesammi Mi'n kululleetaa woro'l koshshuwwaa kiruubee'llaanninne, dinbaaphphaanninnee fiit misilinnee wereeggisukko. Woro'l koshikii bii'l koshikii aaxxagguwwi worqi goolabamaakkoo keen hee'ukko. Weeriinsi baxamu lam kollinne fooqoo gooc Keesammiinsi keesammi beyyo aagakkam goocanne baxukko; goocoomim onti midaad yoohan ihaa horoo'l kollinne xabbaa baxamaakkoo mutur hee'ukko. Lamem wee'l gooccuwwam kiruubbuwwinnee dinbaabinnee fiit gurumbi kobi'llanne axisukko. Gooccuwwa, kiruubbuwwaa dimbaaphphi misilaa worqinne goolabukko. Ee'isam ee lob kosha aagakkam goocina weeriinsi baxamaakkoo soor midaad guban hee'ukko. Lamem gooccuwwam hoominne baxukko; oo goccuwwi lam qinxoohan ihaa maaxafe'inne amaxxansamaakkoohan hee'ukko. Oo keen hundim worqi goolabamaa kiruubeelinne, dinbaabinnee fiit kobi'llinnee wereeggisamaa hee'ukko. Ee Keesammi Mi'n illagenne wororinne mat wixxixxi beyyo baxukko. Ee wixxixxi beyyi kululleetannem sas madada cabbaramu kininne mat madadam digibiinsi cabaramaa baxamu xarbinne baxukko. Ka Keesammi mi'nnekim shooto'i baxamukkok Salamoon adil ihu soo'l hiinchonne Ziifa yakkam la'm aganannette hee'ukko. Salamoon adil ihu tommonnee mat hiinchonnee «Buul» yakkam sadeenti agananne ee Keesammi Mi'nnek bax beeddookko yakka'a qoodakko'isanne baxamaa beeddukko. Adil Salamoon ee Keesammi Mine lamar hiinchonne baxaa guullukko. Salamoon ixxi gagina adilla'n mine baxukko. Ee minem tommonnee sas hiinchonnee baxaa guullukko. Ee mi'n lamem moo'aqqantam gortannuwwannem mat mullaanni miinsanne ihaa sas, sas maskoottuwwi hee'ukko. Gooccuwwinaa maskoottuwwinaa hundinam soor midaad yoo gubannuwwi hee'ukko. Ee gorte'uwwanne annannichchonnem madadanne baxamaakkoo sas sas maskoottuwwi hee'ukko; Ee gorte'uwwanne annannichchonnem baxamu maskoottuwwi mat mulli mi'n maskoottuwwi miinsannetti hee'ukko. «Lobakat utubbuwwaamo» yakkam lob goyye'i mi'nnek qeeraa'lloom ontayyi anga dufaachchoom sad anga hee'ukko; ixxi illagenne odim lobakat utubbuwwinne bakkiisakka'a baxakko'oo daba'llamakkam barandi hee'ukko. Salamoon afuuraa woshshanne oogato'o uwwoo adilla'n barcum yoo min gaxiinsi ki'isaa iiman afeebe'e digiphphi haqqiinsi baxamu xarbinne wereeggisakka'a baxakko'oohan hee'ukko. Salamoon oogato'o uwwoo miniinsi afaree'n kollinne yoo mulli wixxixxi beyyonne eraare baxamu minneewwisam ixxi gaqqi mine baxisukko. Gibxi uulli adi'l landichchotte hee'llo'i ixxi arenam ee keenom kobi'lloo mine baxisukko. Ku minneewwi hundim lob wixxixxi beyyo edaa shooto'iinsi ki'isaa dimdim afeebe'e cabbarakka'a axisakko'oo kininne wereeggisakko'oohan hee'ukko. Oo kinim kina anakkam beyyonne lasaginnee illaginnee hundemisinnem gudisakka'a cabbarakka'a axisakko'oohan hee'ukko. Ee mi'nnekim shooto'i baxamukkok tommi angaa sadeenti angaa ihoo doo'llamaakkoo lob kinneewwinnetti hee'ukko. Ka geejjuwwi kinneewwi hanennem keenakka'a baxakko'oo mulli kinneewwii digiphphi saanqinne baxamu dufaa'akkam farashshaanii hee'ukko. Adilla'n mi'n wixxixxi beyyi, Keesammi Mi'n woro'l wixxixxi beyyii Keesammi Mine aagakkam goocii annannichchim sas ogora cabbaramaakkoo kininne mat ogora digiphphi saanqinne baxakko'oohan hee'ukko. Adil Salamoon Huuraama yakkam mancho Xiiroos beero'iinsi weeshisukko. Huuraamim naas xaara bukkaa baximmi qooroom yoo manchi hee'ukko. Huuraam anni lehaa hee'ukko. Ixxim qaramukkok Xiiroos beero'onnetti ihukkuuyyi naasa bukkaa baximmi qooroomii angi lachchii yoo manchi hee'ukko. Huuraam ama Niftaalee'm sullitan hee'llo'o. Huuraam angi bax qooroominne lobakat losan yoo qoor manchi hee'ukko. Adil Salamoon weeshisukkaare waaraa ixxena uwwamu naas xaa'l baxo hundam baxukko. Huuraam ixxuwwi uullichchi tommoo sadeenti angaa kululleexxi haraaroomim tommoo lam angaa ihaakkoo lam naas utubbuwwa baxukko. Odim ee lamem utubbuwwi ludonnem issakkam lam naas goobinaancho baxukko. Ee goobinaanchuwwik annannichchikim uullichchi onti anga hee'ukko. Ee utubbuwwi ludonne yoo goobinaanchuwwa wereeggisona lamar ogoranne illaanchi'nnoo'i luwwika lamo dadaa goobinaanchuwwina annannichchinam mat mato issukko. Ee utubbuwwi ludonne yoo goobinaanchuwwa wereeggisimmina roomaa'n misha laboo wereeggi luwwa lam ogoranne baxukko. Lamem goobinaanchonnem eekka issukko. Daba'llamakkam beyyi utubbuwwi ludonne yoo goobinaanchuwwik uullichchi soor angi ihukkuuyyi suuf fiita laboo luwwinne wereeggisamaa hee'ukko. Oo keenim illaanchi'nnoo'i luwwiinsi hanaan yoo kulullees beyyonne uulloo'isa issamukko. Ee goobinaanchuwwaannonne annannichchi kululleetannem lam ogoranne dissamaakkoo lam xibbi roomaa'n misha laboo haxar hee'ukko. Huuraamim ee naas xaarinne baxamu utubbuwwa Keesammi Mine aagakkam gooc illagenne uullisukko. Keesammi Mine aagakkam goociinsi woroo'n qarinne uullu utuba «Yaakiina » yaa weeshukko. Hanaa'n qarinne uullukkoka odim «Boo'eeza » yaa weeshukko. Ee utubbuwwi ludonne suuf fiita laboo naas xaarinne baxamaakkoo goobinaanchuwwi hee'ukko. Ee utubbuwwi baxim ee'isinne beeddukko. Huuraamim naas xaarinne haraaroom tommi anga uullichchi onti anga ixxi kululleetim sad anga ihoo wongira baxukko. Ee wongi'l suu'm woroo'n kollinne mat mat anganne qoo'm hagaranne baxamaakkoo tommi haxar lamem kululleetannem hee'ukko; oo keenim wongirinne matfir ihaa lam ogoranne baxamaa hee'ukko. Oo wongirim naas xaarinne baxamaakkoo tommonnee lam moolluwwi misilluwwi afarenne afuurukko; oo keenim ilkollo biiranne dabatta'a sas hanaa'n qaranne sas woroo'n qaranne sas eelliinchi firanne gatto'i sas odim eelliinchi aagganne daba'llitta'a moo'llamoka laboohan hee'ukko. Ee kee'nnekim las kolli worinnetti hee'ukko. Ee wongi'llekim gumu'llaalloom mat angi oobba ihoohan hee'ukko. Suumim humbulli suu'mmisa baxamaakkoohan ihaa gammalamukkis suuf fiita laboohan hee'ukko. Oo wongirim sor kum liitir wo'o amadoohan hee'ukko. Huuraam mu'uta dissimmina awwaadoo shafe'isa tululoo lokki yoo tommi mu'uta naas xaarinne baxukko. Ee mu'uttuwwik annannichchikim qeeraa'lloom soor anga haraaroomim soor anga uullichchim sas anga hee'ukko. Oo mu'utim baxamukkok haxarinne amaxxamaakkoo gudaan ihaakkoo soor midaad yoo biddiqaakkoo naas xaarinnetti hee'ukko. Ee caraq naas xaaranne hobbika, moolluwwikaa kiruubeelikaa misilluwwa baxaa hee'ukko. Ee hobbik, moolluwwikii kiruubee'llekii misilluwwi horoo'l kollinnee lokki kollinnee yoo haxalluwwi fiit gurumba laboohan hee'ukko. Ee Mu'uttuwwa dissakkamaannina annannichchinam soor shafe'isa tululoo luwwii oo keen kululoo naas xaarinne baxamaakkoo qirqire'ii hee'ukko. Ee'isam soorem midaadduwwinnem aanshaqqakkam wongira bakkiisaan hee'ukko. Oo bakkiisaanim fiit gurumba laboo haxalluwwinne wereeggisamaa hee'ukko. Ee wongira dissakkam kee'n woronne xillaalloom mat anga ihoo quunqammi afo'i hee'ukko. Oo afo'im quunqammi ihaa woroon uulloo kollinne yoo haraaroom mat angaa kolloo ihaa eehanni kululleetanne haxar yoohan hee'ukko. Ihukkaarem eehanni gammal soor midaad hee'ukko bagaan quunqammi hee'ukkoyyo. Soorem shafe'isa tululoo luwwim mu'uta dissakkamaanni biddiqu naas xaa'l lugummonnetti ihaa odim eehanni qirqire'i mu'uta dissakkamaanninne amaxxamaakkoohan hee'ukko. Ee shafe'isa tululoo luwwikim uullichchi mat angaa kolloo hee'ukko. Oo shafe'uwwisa tululoo luwwi baxamukkis faraxxi gaarre'ika laboohan hee'ukko. Qirqire'uwwi, gammalluwwii ee keeno qaaphphaa amadoo keenii hundim bukkamaakkoo naas xaarinne baxamaakkoohan hee'ukko. Mu'uta dissakkam keenonne annannichchonnem soorem midaadduwwannem amadakkam beyyuwwi yoohan hee'ukko. Mu'uta dissakkam kee'n ludonne annannichchaannonnem gamma'l kululleetanne mat taachcho'o ihoo quunqammi luwwi hee'ukko. Oo bakkiishshaanchuwwii caraq naassuwwii mu'uta dissakkamaaninne matfir ikka'a baxanto'oo keen hee'llo'o. Ee bakkiishshaanchuwwaannonnee caraq naas xaalluwwaannonnee lambe'enne yoo bon beyyi hundannem kiruubeelinne, hobbinnee dimbaabbuwwi kobi'llinnee baxxamaakkoo haxalluwwinne wereeggisamaa hee'ukko. Ee'isam ixxuwwi kululleetim fiit gurumba laboo haxalluwwinne wereeggisamaa hee'ukko. Tommem shafe'isa tululoo lokki yoo mu'uta dissakkam luwwuwwi baxamukkok ee'isinnette. Oo keenim hundemisinnem gudaan hee'u bikkina hundim kobi'llamam hee'ukko. Huuraam mu'uta dissakkam keenina annannichchinam tommi aanshaqqakkam wongilluwwa baxukko. Ee wongilluwwik annannichchikim kululleexxi haraaroom soor anga hee'ukko. Oo aanshaqqakkam wongilluwwim sadeenti xibbi liitir wo'o amadoohan hee'ukko. Huuraamim mu'uta dissakkam luwwika Keesammi Miniinsi woroo'n qarinne, gatu onto odim Keesammi Miniinsi hanaa'n qarinne uullisukko. Ee wongiram Keesammi Miniinsi woroo'n qarinne eelliinchi firinne yoo midaadonne uullisukko. Huuraam qure'uwwa, giira hogoofakkam qaphphuwwa loqooqo'i saahinnuwwaa baxukko. Ee'isam adil Salamoonina asheeru Keesammi Mi'n baxo guullukko. Baxu luwwiinsim horoor, horoor luwwi kanniinsi woroon yoo keeno. Lamem utubbuwwa, ee utubbuwwi ludonne hee'u shafe'e laboo goobinaanchuwwaa ee utubbuwwanne hee'u lamem goobinaanchuwwaa ifiisu illaancho laboo luwwaa ee goobinaanchuwwanne annannichchonnem illaanchisa baxamaakkoo chimchimmuwwi goobinaanchi haxalluwwi hanenne annannichchonnem lam ogoranne mat mat xibbaagge kululaakkoo naas xaarinne baxamaakkoo soor xibbi roomaa'n haxalluwwi, shafe'isa tululoo lokki yoo tommem mu'uta dissakkam luwwa, tommem aanshaqqakkam wongilluwwa, wo'o wixxaa'akkam wongiraa ee wongira bakkiisaa amadoo tommoo lam moolluwwi kobi'llanne baxamaakkoo luwwaa, disxuwwa, giira hogoofakkam qaphphuwwaa loqooqo'i saahinnuwwaa. Keesammi Mi'n awwaadina Huuraam ka mu'uta hundam Salamoonina baxukkok axisakko'oo belecce'oo muccur naas xaarinnetti hee'ukko. Adil Salamoon ka keeno hundam baxisukkok Yoordaanoos cebbanne, Sukootannee Xaartaa'n lambe'ennee yoo xaara bukkakkam beyyonnetti hee'ukko. Naas xaarinne baxamu ku hundem mu'uttuwwim lobakata dut hee'u bikkina Salamoon oo mu'uttuwwi keennaanchonne keenamoo'isa issukkoyyo. Ee bikkina oo mu'uttuwwi hinkaa'nna kee'mmooda'e la'immina xansiisukkoyyo. Keesammi Mi'n awwaadina Salamoon kanniinsi woroon yoo mu'uttuwwa baxisukko. Ookeenim, worqinne baxamaakkoo kiti'm mu'uta, Waa'ina hincaa'akkam qorosho'o dissakkam worqi xaraphpheeza, Keesammuwwiinsi Keesammi beyyi illagenne ontoo woroo'n qarinne ontoo odim hanaa'n qarinne dissakkam worqinne baxamu tommem caakka dissakkam mu'uta, fiittuwwa, kuraazzuwwa, gii'l buchcha giggissakkam mu'uta, humbulluwwa, gii'lbuchcha dissakkam mu'uta, loqooqo'i saahinnuwwa, aduruusa wiriissakkam mu'uta, midachchaa Keesammiimsi keesammi beyyi goocinaa ee Keesammi Mi'n biiree'n gooccuwwinaa awwaadoo gooca iyyaanchuwwaa hee'ukko. Oo mu'uttuwwi hundim worqiinsi baxamaakkoo keen hee'ukko. Adil Salamoon Keesammi Mi'n baxo baxaa guullaa lasage ixxi anni Daawiit Keesammi Mi'n awwaadina annanni issu bira, worqaa mulli mu'uttuwwaa hundam ee Keesammi Mi'n mu'uttuwwa dissakkam minenne dissukko. Ee lasage adil Salamoon Hidi'l Saga'l Saaxina Daawiit beero'i ihu Xiyooniinsi worimminaa ee baxu Keesammi Minenne aagisimminaa Isra'ee'l sulli lommannaa moolli awwonsaanoo hundam ixxi hee'oo Yerusaaleemanne wixxaa'ukko. Isra'ee'l minaadaphphek goo'n oos hundim daas uguda lonsakkam Iitaaniimaa yakkam lama'l agananne adil Salamoon beyyonne wixxito'o. Isra'ee'l awwonsaan hundim wixxito'i ammanenne qeessuwwi Hidi'l Saga'l Saaxina ki'issa'a iyyito'o. Keesammi Minennem aagisso'o; ee'isam Leewi'i sullii qeessuwwii Keesammi Dukkaanaa ee woronne hee'u keesammi mu'utaa hundam eebba'a Keesammi Mine aagisso'o. Adil Salamoonii Isra'ee'l minaadab hundim Hidi'l Saga'l Saaxi'n illagenne wixxito'o; dutimmiinsi ki'ukkok xigakkeena xanakkambee'i lobakat gereebbaa moolluwwaa kitimina hincaa'llo'o. Ee lasage qeessuwwi Hidi'l Saga'l Saaxina iyyita'a Keesammi Minenne aagissa'a ee Keesammuwwiinsi Keesammi beyyonne kiruubeel laxxi lugumonne ixxena gudu beyyonne dissito'o. Biddiqu kiruubeel laddeewwim Hidi'l Saga'l Saaxinaa ee Saaxina iyyakkam wonnannuwwaa ifiisaa hee'ukko. Oo wonnannuwwim qeeraa'lluwwi ihu bikkina ixxuwwik lud ee Keesammi Mi'n woronne Keesammuwwiinsi Keesammi beyyi illagenne uulloo manchi hundinam erisa moo'amam hee'ukko. Ihukkaarem mulli kollinne uulloo manni moo'ooyyo. Oo wonnannuwwim kaballi afeebe'e ee beyyonnem yookko. Isra'ee'l minaadab Gibxi uulliinsi fitto'isam Waa'i ixxuwwinne maqire hidiro aagu ammane Muse'e Siina'i duunanne Hidi'l Saga'l Saaxi'n woronne issu lam ba'lluwwi kiniinsi bagaan ee Saaxi'n woronne mulli luwwi mahim hee'ukkoyyo. Qeessuwwi Keesammi Miniinsi fitto'isam oo Keesammi Min dangonnem duubinne wo'mmukko. Ee duuphphi woronne hee'u Waa'i lombi Keesammi Minenne wo'mmaa hee'u bikkina oo qeessuwwi daba'llita'a aaggeenaa ixxuwwi awwaado awwaaddeenaa xanto'oyyo. Ee ammanenne Salamoon, «Moollanni Waa'a! At duuphphi tuunsi woronne hee'oommo yitaatto. Oono'o, kaba hibbinne nuuraakkoo mine kiina baxaammo; ixxim at heer heerina hee'lloo beyyi ihookko» yukko. Minaadab ee beyyonne uullaa hee'ukkisam adil Salamoon ixxuwwi kollonne daba'llaa Waa'ik maassi ixxuwwanne dilloo'isina «Isra'ee'l Moollanni Waa'i galaxxamona. Iyyanni Daawiitina aagu hidi'l sagara wonshaakko. Ixxim, ‹I minaadaba Gibxiinsi fissummi ammaniinsi ki'isaa i summi weeshamoo Keesammi Mine baxakkam beyyo hundem Isra'ee'l uullannem ayyi beero'om doo'llummoyyo. Ihukkaarem i minaadab ikko'i Isra'eela awwonsoo'isina Daawiita doo'llaammo› yoohan hee'ukko» yaa Waa'a uunxukko. Odim Salamoon «Iyyanni Daawiit Isra'ee'l Moollanni Waa'ina Keesammi Mine baxeena sawwaa hee'ukko. Ihukkaarem Waa'i iyyanni Daawiitina ‹I summi weeshamoo Keesammi Mine baxxeena sawwittis erane. Ihukkaarem iina mine baxookkok ki beeto bagaan ateyyo. Kiinniinsi qaramoo beet iina mine baxookko› yukko. «Oono'o, Waa'i uwwu neeyyaxxi sagara egeraakko. Ee bikkina an iyyanni beyyo aa'aa Isra'eelina adil ihaammo. Isra'ee'l Moollanni Waa'i summina Keesammi Mine baxaammo. Waa'i Gibxi uulliinsi fissu ammane gaassi niyyanno'inne hidiro aagu ki'n ba'llanne yoo Hidi'l Sagar yoo Saaxina dissakkam beyyo ka Keesammi Minenne gudisaammo» yukko. Ee lasage Salamoon minaadaphphi illagenne ki'aa kiti'm beyyi illagenne uullukko. Ixxim lamem angam iimaa'aa «Isra'ee'l Moollanni Waa'a! Hanaan iimanenne woroonim uullanne keese laboo Waa'i hore'em bee'e! Ki minaadabim wo'm wodaninne ijaajantam ammane ixxuwwinne maqire aaggitti hidi'l sagara qoxxissootto. Ki iittom moo'issootto. Iyyanni Daawiitina uwwitti neeyyaxxi sagara qoxxissaatto. Woccitti sagar hundim oono'o kaballa wo'mmaakko. Kabadem Isra'ee'l Moollanni Waa'a! Iyyanni Daawiitina aaggitti mulli hidi'l sagaram wonshe. Oohim ‹At issitam hee'llittisam ki oos ijaajantam keen ikkolasii i illagennem xabbeenoominne daba'llantolasii hundi ammanem ki shumo'iinsi Isra'ee'l adilla'n barcumanne afuurookkokaa i illagennem adil ihoo beeto kiina hooroommoyyo› yitaa woccitti neeyyaxxi sagara wonshe. Kabadem Isra'ee'l Waa'a! Ki awwaadaanchi hee'u iyyanni Daawiitina uwwitti neeyyaxxi sagar hundim wo'mmoo'isa isse. «Waa'a! Hanqinam uulli kiina heechchi beyyi iheena xanoohonnihe? Oono'o, iimanii iimaniinsi hanaan yoo iimannuwwii hundim ihuta'n ihoobee'an ihukkuuyyi ku an baxummi gootto'i Keesammi Min kiina hinkid iheena xanookko? Ihukkaarem I Moollanni Waa'a! Ki awwaadaanchi kolli moo'e. Kaballam ki awwaadaanchi illagenne uunxoo uunxatoo weeshaanoo macceese. At ‹I summi weeshamookko› yitti ka ki mi'n kolli ballaa hiimoo moo'e. An ki awwaadaanchim ka Keesammi Mi'n kollonne i ille dabaraa keese uunxoommi ammane i uunxato macceese. Ni ille ka ki mi'n kolli daballaa keese uunxinoommi ammane iikkaa ki minaadaphphekaa uunxato macceese. Iimannenne at hee'lloo beyyonne ikkaatta ni uunxato macceese; niinam uraammo yihe. «Mat manchi ixxi beshichcho hawwodu bikkina kasasamaa ka minenne yoo kiti'm beyyonne hincaa'akkamaare ixxi gaqqi muccuroo'm bikkina ee beyyonne hide'oo ammane, Waa'a! Iimanenne ikkaa macceese; ki awwaadaaninam oogate. Hawwodu manchom ixxi bi'ishshisanne guzumo'amoo'isaa muccur manchim muccuroomminne firoo'isaa isse. «Ki minaadab ikko'i Isra'ee'l oos jora baxxa'a keese kichche'isso'i mashka'inne ixxuwwi diina'i illagenne kaa'anta'a odim ee bikkina gaabbita'a ki kolli daba'llimminne ka mi'n kolli Waatto'ok kiiniinsi haafite siideena ixxuwwi gaga hoffiissa'a maashaalloominne keese uunxitota'n at iimanennetti ikkaa ixxuwwika uunxato macceese; qeefadanta'a hee'llam ki minaadaphphekam baaxiilo uttaa gaassi anno'ina uwwitti uullanne dabattaa wore. «Ki minaadab jora baximminne keese hawwodda'a kichche'isso'i mashka'inne xeen ixxuwwina ga'nnoobee'isa issitaa guzumo'lloo ammane issito'i jolli bikkina gaabbita'a ixxuwwi ille ka ki mi'n kollonne dabatta'a maashaalloominne keese uunxitota'n at iimanenne ikkaa ixxuwwi uunxato macceese; kiina awwaadaan ikko'i Isra'ee'l minaadaphpheka baaxiilo ure. Xabbeen luwwam issiteena xantamisina losise. Ee lasage odim Waa'a! Heer heerina ixxuwwi gulummi issitaa ki minaadabina uwwitti ka uullanne xeen ga'nnoo'isa isse. «Ka uullanne sibaar te'im booban ihoo ammane; ee'isam wix hurbaata shokkiisoo hafachchinne, waagginnee qawwaawwinnee te'im qawwaawwi wotallinne bi'oo ammane te'im ixxuwwi diina'i ki minaadaba dangonne kibbita'a hawwo afissam ammane; te'im ki minaadaphphi hanenne annanni annanni jabbii kee'mmaalli xissii afoo ammane ixxuwwika uunxato macceese. Ki minaadab Isra'ee'l lambe'enne tiiro bi'isoo qaraaraalli kichchechchi afoohaare ixxuwwi anga ka ki mi'n kollonne biddiqaa'lla'a keese uunxitam ammane ixxuwwi uunxato macceese. At hee'lloo iimanenne ikkaa ixxuwwi uunxato macceessaa ixxuwwi jolla uraammoo yihe. Ixxuwwinam hara'mme; manni wodanonnee tiironnee yoo sawwite hundam saarayyitaa laqqoottok xale'i atette. Ee bikkina annichchi annichchinam ixxi gaqqi baxisa miqe. Ee'isinnem ki minaadab gaassi niyyanno'ina ixxuwwi gaqqi uulli issitaa uwwitti uullanne hee'llam doollenne hundannem kiina ijaajantamisaa keese lonsitamisaa isse. at hee'lloo iimanenne ikkaa ixxi uunxato macceese. Ki minaadab Isra'eel issoo'isam heer uullanne hee'oo minaadab keese la'imminne kiina ijaajamoo'isaa keesem lonsoo'isaa isse. Oo mulli manchi at ixxena issitona uunxoo luwwi hundam isse. Oohim ihoo ammane ku an baxummi Keesammi Min ki summi weeshamoo beyyi ihukkisa minaadab la'ookko. «Ixxuwwi diina'a qasseena gaaddamisina ki minaadaba ijaajjoo ammane ayyi beyyonnem ikka'a ka at doo'llitti beero'onnee an kiina baxummi ka minennee ille dabatta'a keese uunxitam ammane, iimanenne ikkaa ixxuwwika xa'mmichchaa uunxatoo macceessaa kaachcha uwwe. «Maham ihukkaare hawwojji bee'i manchi hee'oo bee'i bikkina ki minaadab baaxiilo baximminne keese kichche'issamaare atim quuqqaa ixxuwwa diina'i kaa'llamisaa qeefadda'a mulli uulla massitamisaa issitoo ammane oo uulli maham qee'lluta'nnim qeefadanta'a hee'llam ee uullanne hee'llu'uuyyi ‹Baaxiilo banxaammo; hawwondaammo; baqinaammome› yita'a gaabbita'a baaxiilo biira yitolas, qeefadda'a massito'i ixxuwwi diina'i uullanne hee'llu'uuyyi ixxuwwi wo'm wodaninne hanqinnee xabbeen tiirinnee gaabbita'a baaxiilo biira yita'a at gaassi niyyanno'ina uwwitti ka uulli kolli, atim doo'llitti ka beero'i kollii an kiina baxummi ka ki mi'n kollii ixxuwwi ille dabatta'a keese uunxitolas, at hee'lloo beyyonne iimanenne ikkaa ixxuwwi uunxato macceessaa ixxuwwina oogate. Ixxuwwika baaxiiloo keese kichche'isso'i boqqoomaa hundam uraammoo yihe. Ixxuwwi diina'im ixxuwwina qishixxitamisa isse. Mashka'oomim ixxuwwi xaa'l midachchisa shokkiisoo Gibxi uulliinsi fissitti ki minaadaba. «Ki illi ki awwaadaanchinaa ki minaadab ikko'i Isra'ee'l uunxatinaa fooqaakkoohan ihona; ki kollonne laaramoo amman hundam macceese. Moollanni Waa'a! Gaassi niyyanno'o Gibxi uulliinsi fissitti ammane ki awwaadaanchi Muse'i kollinne woccittisam kiina annanni ihaakkoo minaadab issitaa mulli minaadab hundiinsim doo'llittan ihukkisa sawwihe» yaa uunxukko. Salamoon Waa'a uunxato guullaa lasonne kiti'm beyyi illagenne guruphphaa hee'u beyyiinsi anga biddiqaa'ukkisam ki'aa uullukko. Ixxim sagara iimaa'aa ee beyyonne wixxaa hee'u minaadabanne hundannem Waa'ik maassi dilloo'isina, «Aagu neeyyaxxi saga'llisanne minaadabina xumma uwwu Waa'i galaxxamona. Ixxena awwaadaanchi hee'u Muse'enne uwwu er neeyyaxxi sagariinsi matim xa'ukkoyyo. Ni Moollanni Waa'i gaassi niyyanno'inne maqire hee'ukkisam niinninnem maqire hee'ona. Ayyi ammanem neese uunjoone; urooneme. Gaassi niyyanno'ina uwwu seera, ijaajoo ogoraa egerimminne ixxi doo'llisanne hee'nneena xannoommisaa ixxena ijaajammoommi keen inkoommisaa issona. Iina ixxi awwaadaanchinaa ixxi minaadab ikko'i Isra'eelinaa ballina ballina hasisoo luwwi wo'mmoo'isina ku an Waa'a uunxummi uunxat ballaa hiimoo ni Moollanni Waa'ina hincihona. Ee'isinne ka heer uullanne yoo minaadab hundim xale'i Waa'i Moollanni ihukkisaa ixxeensi bagaan mulli Waa'i bee'an ihukkisaa la'ookko. Ki'nnuwwi kaballa issitakko'isam ixxeka seelluwwaa ijaajjuwwaa egerimminne ni Moollanni Waa'ina amman hundam amma'nnantakko'oo keen ikkehe» yaa maasse'ukko. Ee lasage adil Salamoonii ixxenne maqire hee'llo'i Isra'ee'l minaadabii hundim Waa'ina kitima hincaa'llo'o. Salamoonim lamiyyee lam kum mirigo'uwwaa mat xibbee lamiyyi kum gereebbaa mateeyyoo'm kitim issaa hincaa'ukko. Ee'isa issimminne adil Salamoonii Isra'ee'l minaadabii hundim Keesammi Min Waa'ina keesamaakkoon issito'o. Ee'isam ee ayyaamonne Keesammi Mi'n illagenne yoo wixxixxi beyyika lambe'i beyyo Waa'ina keesamaakkoohan issukko. Odim hundoomam shokkiisakka'a Waa'ina hincaa'akkam kitima, hurbaaxxi kitima, mateeyyoo'm kitimaa diinaxxi di'iraa hundam Waa'ina hincaa'ukko. Mashka'oomim Naas xaarinne baxamu kitima hincaa'akkam beyyi ee hundem kitimam amadeena xanoobee'i bikkinatte. Ee Keesammi Minennem Salamoonii Isra'ee'l minaadabii hundim lamar balla hundoomam daas uguda lonsita'a higisso'o. Hanaa'n qarinne Haamaata aagakkam googiinsi ki'isaa woroo'n qarinne Gibxi gabal afeebe'e yoo uulliinsi waaru minaadab hore'em lobakat hee'ukko. Sadeenti ayyaamonne odim Salamoon minaadaba geegeesukko. Minaadab hundim Salamoona maasse'ukko; Waa'i ixxi awwaadaanchi Daawiitinaa ixxi minaadab Isra'eelinaa uwwu biijoo'm bikkina liirammukkuuyyi min minem elle'ukko. Adil Salamoon Keesammi Mine, ixxi adilla'n minee baxeena hasu mulli luwwaa hundam baxaa gullaa lasonne Waa'i illageen Gaba'oonanne moo'amukkisam odim moo'amukko. Waa'im «I illagenne hincaa'llitti xa'mmichchaa uunxatoo macceesaamo. Oohim heer heerinam i summi weeshamoo'isina ka baxxitti Keesammi Mine keesaammo; i illii i tiirim hundi ammanem eekke'e ihookko. Ihukkaarem at kiyyanni Daawiitisam xabbeenoominnee amma'nnanchinnee iina awwaaddilas, iikka seeraa siyya'aa egettilas, keese ijaajummi luwwi hundam issitlas, kiyyanni Daawiitina ‹Ki shumo'iinsi Isra'ee'l adilla'n barcumanne afuuraa adil ihoo beeto kiina hooroommoyyo› yaa uwwummi neeyyaxxi sagara egerimminne ki adilla'n barcum Isra'eelanne heer heerina qoxxaa hee'oo'isa issoommo. Ihukkaarem at te'im ki shumo'i eese awwonimma uttakka'a an uwwummi ijaajoo seeraa egettakkobeelasii mulli minaadab waa'uwwina otossitakkolasii Isra'ee'l minaadabim an ixxuwwina uwwummi uulliinsi fitta'a yaayyantamisa issoommo. I summi weeshamoo'isina keesummi ka Keesammi Minem uroommo. Uulli hundannem hee'oo minaadab hundim Isra'eelanne naacamookkoo osarookkoo. Ku iimiimaa yoo Keesammi Minim gindamaa hacci tuubbi ihaa gatookko. Eeheen higoo manni hundim eekka moo'aa maalalookko. Ixxuwwi ‹Waa'i ka uullaa ka Keesammi Minee mahina ka'isa issukko?› yukkuuyyi naacamookko. Ixxuwwim dabatta'a ‹Isra'ee'l minaadab gaassi ixxuwwi anno'o Gibxi uulliinsi fissu Moollanni Waa'a utta'a mulli waa'uwwa awwonta'a ee waa'uwwina otossito'i bikkinaa awwaaddo'i bikkinaa Waa'i ka bichchi boobana hundam ixxuwwanne eebukko› yitamo» yukko. Salamoon Keesammi Minee adilla'n minee lammiyyi hiinchonne baxaa guullukko. Xiiroos uulli adil Kiiraam ee bax hundinam hasisoo digibaa hoomaa lobakat worqinne maqirem uwwaa hee'ukko. Oo bax hundim beeddaa lasage Salamoon Galii'l uullanne hee'oo lamiyyi hoffi beero'uwwa Kiiraamina uwwukko. Ihukkaarem Kiiraam ee beero'uwwa moo'aa liiramukkoyyo. Ixxim Salamoonina «Iyyabbaayyo, iina uwwitti beero'uwwi ada kakeenonnihe?» yukko. Ee bikkina ee beero'uwwik summi kaballi afeebe'em «Kaabula» yamamookko. Kiiraam Salamoonina asse'u worqi soor kum kiilogiraama ihoohan hee'ukko. Adil Salamoonina Keesammi Mine, ixxi adilla'n mine, Yerusaalee'm kululleexxi ootaa ee beero'iinsi eelliinchi firinne hee'oo Miiloo yakkam cebbaa shiraashitta'a gudisso'i malaayyi baxaan hee'llo'o. Oo keenim Haxoora, Magiidoo Gezeeraa yakkam beero'uwwa baxxamisa issukko. Eehanniinsi illageen Gibxi uulli adil Faari'oon Geezeera kaa'aa amadaa ee beero'onne hee'oo Kana'aa'n mannam shaa ee beero'om shokkiisaa ixxi gassi woronne issaa hee'ukko. Ee lasage ixxi landichcho Salamoonina ladiisu ammanenne ee Geezeer beero'o irifo'i issaa ixxena uwwaa hee'ukko. Ee beero'om Salamoon odim baxxukko; ee'isam woroo'n Beetihooroonaa Baa'ilaataa Yihuxxi uulli udma'anne yoo Taamaaraa odim baxukko. Odim Salamoon Liibaanoosanne, Yerusaaleemannee ixxi gassi woronne Isra'eel ikkobee'i mulli beyyuwwannee sinqa wixxaa'akkamokaa faradoo faraxxi gaarre'ee egerakkam beero'uwwaa ee'isam baxeena hasu luwwi hundam baxukko. Salamoon Isra'ee'l oosiinsi ayyi manchom agishshi issaa baxisukkoyyo. Ixxuwwi daannuwwa, gaadaano, gaaxxi awwonsaanoo ijaajaanoo faraxxi gaarre'e ushe'llam kee'n ijaajaanoo faradaanoo ikka'a awwaaddam hee'llo'o. Salamoon baxoo kininne baxakkam mi'n baxo gudda'a baxxam manna ijaajjam keen onit xibbii ontayyi awwonsaanii hee'llo'o. Gibxi uulli adi'l landichchotte hee'llo'i Salamoon mi'n ama Daawiit beero'iinsi Salamoon isena baxisu adilla'n minenne daba'llita'a lasage Salamoon eelliinchi firinne yoo Miiloon yakkam cebbi beyyo shiraashiramaa baxamoo'isa issukko. Salamoon Waa'ina baxisu kiti'm beyyonne shokkiisakka'a Waa'ina hicaa'akkam kitimaa gatimmina ihoo mateeyyoo'm kitimaa hiinchonne sas ammane hincaa'am hee'ukko. Ee hanninne hundinnem Waa'ina aduruus kitima hincaa'am hee'ukko. Ka hundam issimminne Keesammi Minina hasisoo awwaado taaphansukko. Ee'isam adil Salamoon Eedoo'm uullanne Ertiira'i dambalaq gadanonne hee'oo Eelaat gadanonne yoo Eexiyoongaabiiranne markabbuwwa baxukko. Adil kiiraamim Salamoon manninne maqirem awwaaddam markaba ushe'imma laqqam manna asse'ukko. Ixxuwwim marikabinne Oofiira yakkam uulla matta'a daba'llitu'uuyyi adil Salamoonina tommiinsii soor kum kiilo giraamiinsii lophphaa kee'mmoo worqa amadda'a waatto'o. Saaba'i adila Salamoonika er sado macceessa'a kee'mmaalli xa'mmichchinne keenteena Yerusaaleema waatto'o. Lobakat maate'inne shitto'o, lobakat worqaa bito xee'aalli kinaa gaameela'anne iyyiissa'a Yerusaaleema waatto'o. Salamoon beyyo affa'a is wodanonne yoo sawwite hundam atoorassito'o. Ixxim ise xa'mmito'i kee'mmaalli xa'mmichchuwwi hundinam dabachcha uwwukko. Ixxim tirimma hoogukkokii ixxeensi daphphu luwwii ma'llichchim hee'ukkoyyo. Saaba'i adilam Salamoon qooroominne wocukkuuyyi macceesso'o. Baxu adi'lla'n minem moo'llo'o. Salamoon maaddanne hincoo dut hagar hurbaata, gassaan hee'llam hegeego, adi'l mi'n baxaan baxxam baxo, ixxuwwika seeramaakkoo eddechcha, maadda danaanaanoo Keesammi Minennem hincaa'oo kitimmuwwaa hundam moo'llo'o. Ee hundem luwwam ise moo'lleena egetto'aanniinsi hanaanetti ihu bikkina lobakata maalalto'o. Isem adil Salamoonina «Ki bax bikkinaa ki qooroo'm bikkinaa i uullanne hee'ummuuyyi macceesummok hundim hanqa. Ihukkaarem keyyi afeebe'e waaraa i illinne moo'eembe'i afeebe'e iina kuramu woshshi hundam amma'nneena xanummoyyi hee'ukko. Ihona bagaan i maccinne macceesummok i illinne moo'ummaanni kollom ihooyyo. Ki qooroomii ki goddii hanqinam an i uullanne hee'ummuuyyi iina kuramukkaanniinsi hore'em lobane» yito'o. Amman hundam ki illagenne ikka'a qooroom wo'mmaakkoo ki woshsha macceessam mannii ki gassaanii hinkido'i gada'aammuwwa! Keese iittaa Isra'ee'l adilla'n barcumanne afuussu ki Moollanni Waa'i maasse'ammaakkoohan ihona. Waa'i Isra'ee'l minaadaba heer heerinam iittaakkoo bikkina muccur woshshaa hanqo'i oogatoo'o issitoo'isina keese adil issaa ki'isaakko» yito'o. Adil Saaba'a eebbo'i luwwi hundam adil Salamoonina uwwito'o. Eebbo'i luwwim soor kum kiilo'iinsi lophphoo worqa, lobakat shitto'oo lobakata bito xee'aalli inqu yakkam kinaa hee'ukko. Ise Salamoonina hincaa'llo'i shitto'i ee lasage ixxena uwwamu shitto'i hore'em loban hee'ukko. Oofiiriinsi worqa eebbo'i Kiiraam markabbuwwi Oofiriinsi sandalaa inqu yakkam bito xee'aalli kinaa ixxena eebba'a hee'llo'o. Adil Salamoon ee sandaliinsi haqqiinsi Keesammi mi'nnekaa adilla'n mi'nnekaa bakkishshaancho, diitta'aa maasinqo'oo baxisukko. Oo hoo'm haqqim Isra'ee'l uulli hundam aagu hoo'm haqqiinsi hundiinsim lophphoohan hee'ukko. Ee lasagem eekka laboo hoo'm haqqi hore'em moo'amaa la'ooyyo. Adil Salamoon ixxena losamaakkoo biijoominne uwwoo luwwanne edaa Adil Saaba'a xa'mmito'i luwwi hundam uwwukko. Ee lasage adila Saaba'a maate'e awwonsita'a is gaqqi uulla daba'llito'o. Adil Salamoon maarag hundam lamiyyee sas kum kilo'oo ihoo qax worqa siidam hee'ukko. Ookkim daddaraan miqoo qaraxiinsi, daddariinsi siidakkam qaro'iinsi, ee'isam Araphphi uulli adilluwwiinsii Isra'ee'l uulla gassaaniinsii aagoo gibiro edoo'nnette hee'ukko. Adil Salamoon lam xibbi geejji agilluwwa baxisaa annannichchom lamar lamar kiilo'o ihoo qax worqinne goolabisukko. Odim sas xibbi hoffi agilluwwa baxisaa annannichchom lam lam kilo'o ihoo qax worqinne goolabisukko. Ee keeno hundam «Liibaanoos dooma» yakkam lob haraar minenne dissukko. Odim adil Salamoon daane'i inqinne mat lob adilla'n barcuma baxisaa muccur worqinne goolabisukko. Ee adilla'n barcu'm beyyo firakkam gardabbi loh hee'ukko. Ee adilla'n barcu'mmek afaree'n kolli horoo'l kolli quunqamaakkoohan ihaa makkinnee qeddinnee anga usheexxisakkam beyyi hee'ukko. Ee anga usheexxisakkam beyyi midaadinne hobbi kobi'llanne baxamaakkoo mat mat misilluwwi uullaa hee'ukko. Ee gardabbuwwinne annannichchinnem lamem kollinne hobbi kobi'llanne baxamaakkoo mat mat misilluwwi hundoomim mat ihaa tommii lam misilluwwii uullaa hee'ukko. Eekka laboo adilla'n barcum mulli uullanne hannonnem baxamukkoyyo. Adil Salamoon agga agoo humbulluwwii «Liibaanoos doo'mmoro» yakkam haraar minenne hee'oo mu'uttuwwii hundim muccur worqinnette bagaan birinne baxamubee'ane. Mashka'oomim Salamoon doollenne bir awwaad bee'an hee'ukko. Salamoonina Kiiraam markabbuwwinne maqirem cambalaqanne maroo Tarsees markabbuwwi hee'ukko; oo markabbuwwim saxxi hiinchonne saxxi hiinchonne worqa, bira, daane'i inqe, qamaraa daageeraa eebam hee'ukko. Adil Salamoonim goddinnee qooroominnee uullanne hee'u adilluwwiinsi hundiinsim loban hee'ukko. Heer uullanne hee'oo manni hundim Waa'i Salamoonina uwwu qooroo'm woshsha macceeseena ixxi beyyo waarimma hasam hee'ukko. Ixxi beyyo waaroo manni hundim hiincho hiinchonne bira, worqa, eddechcha, o'l mu'uta, shitto'o, baqullaa faradoo amadaa waaram hee'ukko. Salamoonim faraxxi gaarre'uwwaa faradoo wixxaa'ukko; Salamoonina mat kumii soor xibbi faraxxi gaarre'uwwii tommii lam kum faradii hee'ukko. Eekeeniinsim kollii ixxenne maqirem Yerusaaleemanne kolli odim mulli annanni annanni beero'uwwanne hee'oo'isa issukko. Adil Salamoon gassam hee'u doollenne hundannem Yerusaaleemanne bir ki'nnisa, digiphphi haqqi Yihuxxi uulli duu'n logumonne beyyi hundannem mutoo oda'isa, xigamam hee'ukko. Salamoonim farado Gibxiinsii Qawwe'e yakkam uulliinsii eebisam hee'ukko. Adi'l daddaraanim farado bitaa'lla'a Qawwe'iinsi eebbam hee'llo'o. Faraxxi gaarre'uwwa Gibxi uulliinsi mat faraxxi gaarre'e loh xibbi kin birina, ee'isam mat farashsho mat xibbinaa ontayyi kin birinaa eebisam hee'ukko. Ee lasage odim ixxuwwi Hiite'i adilluwwinaa Sooriy uulli adilluwwinaa biteessam hee'llo'o. Adil Salamoon Gibxi adil landichchoonsi higaa lobakat mulli minaadab uulli meento eebukko. Oo meentim Hiite'ane, Moo'aaphphane, Amoo'nnane, Eedoo'mmanee siidoo'n meentoo hee'llo'o. Waa'i Isra'ee'l oosina «Ki'nnuwwi tiiro agga'a ixxuwwi waa'anne awwontakkamisa issitam bikkina hanqo'i Waa'a laqqambee'i minaadabinne maqire eebaqantakkotte» yaa qoxxisaa hee'ukko. Salamoon iittaa hee'u meenti Waa'i eebaqqantambee'isa hooru minaadaphphi lambe'iinsette. Ihukkaarem Salamoon ixxuwwi iittinne qaashamukko. Ixxenam adilluwwi landi ikko'i lamar xibbi meentii sas xibbi bakki meentii hee'llo'o. Oo meentim Salamoona Waa'iinsi qee'lloo'isa issito'o. Hore'oomam Salamoon lomma'nnukkuuyyi maru ammanenne mulli waa'uwwanne otossoo'isa issito'o. Salamoon ixxi anni Daawiit amma'nnamaa Moollanni Waa'ina awwaadukkisa amma'nnamaa hee'ukkoyyo. Ixxim Siidoo'n manni meentichchi waa'i hee'u Astaarootannee Moolooka yakkam shigigaa'oo Amoo'n manni waa'annee otossukko. Salamoonim Waa'i illagenne jor baxo baxukko. Ixxim ixxi anni Daawiitisa Waa'a xabbeenoominne awwonukkoyyo. Yerusaaleemiinsi eelliinchi firinne yoo duunanne shigigaa'oo Kaamoosh yakkam Moo'aaphphi manni waa'inaa Mooloka yakkam Amoo'n manni waa'inaa otossakkam beyyuwwa gudisukko. Ee'isam mulli uulliinsi eebu meenti hundinam qophpha'n waa'uwwina aduruusa wiriissitam beyyoo kitima hincaa'llam beyyoo baxukko. Waa'i Salamoonina «At iinninne maqire aaggitti hidi'l sagara ginditti bikkinaa i ijaajom egettitbee'i bikkinaa ki adillano kiinniinsi hooraa ki awwaadaaniinsi matina uwweena murte'aammo. Ihukkaarem kiyyanni Daawiit bikkina yaa ki adilla'n doollenne eekka issoommoyyo. Oo woshshim ki beet adilla'n doollenne ihookko. Ihukkaarem kiyyanni Daawiit bikkinaa i gagina annanni issaa doo'llummi Yerusaalee'm beero'i bikkinaa yummuuyyi mat sullo ki beetina uwwoommo bagaan adillano hundoomam hooroommoyyo» yukko. Waa'i Eedoo'm adilluwwi Shumo'iinsi ihu Haadaada Salamoonanne diinakkichchi issaa ki'isukko. Hadaad ciilichchi hee'ukkuuyyi Hadaadii ixxi an awwaadaan hee'llo'i hofqax Eedoo'm mannii gibba'a Gibxi uulla matto'o. Ixxuwwim Miidiyaamiinsi ki'lla'a Faaraana matto'o. Ee beyyonnem hofqax mannim ixxuwwanne exxito'o. Ee lasage Gibxi uulla matta'a adil Faari'oon beyyo hincito'o. Adilim Hadaadina hofqax uulla, mat minee hurbaataa uwwukko. Hadaadim adilina iitti manchi ihukko. Ee bikkina adil ixxi meentichchotti hee'llo'i Xaafinees aayya Hadaadina ladiisukko. Isem Ganubaata yakkam goonchi beeto ixxena qatto'o. Ee ciilam Xaafineese massita'a adilla'n minenne li'isso'o. Ganubaatim adi'l goo'n oosinne maqirem li'ukko. Hadaad Gibxi uullanne hee'ukkuuyyi Adil Daawiitikaa ixxi gogoxxi awwonsaanchi Yoo'aabikaa leho macceessu ammanenne «I uulla daba'llaa marona eese geegeese» yaa adila xa'mmukko. Faari'oonim «Mahina mattoohane? Ki uulla matteena sawwittok kiina mah hoffe'aate?» yukko. Hadaadim «Iina mahim hoffe'ukkoyyo. Ihukkaarem i uulla maroommisa isse» yaa adilina dabarukko. Odim Waa'i Raazoona yakkam Eeli'aad beeto Salamoonanne diinakkichchi issaa ki'isukko. Raazoon Xooba'i uulli adil hee'u ixxi moollanni Hadaadi'eezeriinsi gibaa faanno'uwwina awwonsaanchi ihaa hee'ukko. Mashka'oomim Daawiit Hadaadi'eezera kaa'aa ixxenne oranne besh hee'llo'i Sooriy manna guullaa lasonnette hee'ukko. Raazoonii ixxi awwonaanii Damasiqo'o matto'o. Ee beyyonne hee'llu'uuyyim ixxo Sooriy uulli adil issito'o. Salamoon doollenne hundannem Haadaad afisu hawwiinsi mullek odim Raazoon Isra'ee'l minaadabina diinakkichchi ihukko. Ee bikkina Raazoon Sooriyina adil ihaa Isra'eelannem diina'oomano qoxxisukko. Salamoonanne bangujjaatinne ki'u mulli manchi odim Efiree'm uullanne Xaareeda yakkam beyyonne qaramu Naabaax beet Yoorbi'aamatte. Ixxim Salamoonina awwaadoo keeniinsi mat hee'ukko. Ixxi amam aro'i lehaakkoo Xiru'aa yakkam meentichchotte hee'llo'o. Yoorbi'aam bangujjaatinne ki'u mashka'i ka'isa. Ee ammane Salamoon Yerusaaleemiinsi eelliinchi firinne yoo Miilo yakkam cebbi beyyo wonshimminne shiraashirukkuuyyii Daawiit beero'i ootam qoxxisukkuuyyii hee'ukko. Yoorbi'aamim shiqqeen bax lachchi yoo qoxxaalli woraadichchi hee'ukko. Salamoonim ixxi baxonne galaxxamaakkoo qoxxaalli manchi ihukkisa moo'u ammanenne Yooseef sulli gassinaa malaayyi baxo baxxam keenina ijaajaanchi issukko. Mat balla Yoorbi'aam Yerusaaleemiinsi firaa marukkuuyyi haareechchi weyyakka edde'aakkoo See'lo'o yakkam beero'iinsi waaraakkoo hiraagaanchi Akiiy beero'iinsi tochchonne yoo googonne mullam marukkuuyyi edamukko. Akiiyim edde'aa hee'u haareechchi weyyakka tommonnee lam beyyonnee muransukko. Yoorbi'aaminam «Ka muransummi weyyakkika tommi qaafunta ki gagina massaqqe. Mashka'oomim Isra'ee'l Moollanni Waa'i ‹Adillano Salamooniinsi hooraa tommi sullo kiina uwwoommo. Iina awwaadaanchi Daawiit bikkinaa Isra'ee'l uulliinsi hundiinsim i gulummi issaa doo'llummi Yerusaalee'm beero'i bikkinaa yummuuyyi Salamoonina mat sullo gatisaammo. Eekka issoommok Salamoon eese uraa mulli qophpha'n waa'uwwanne Astaaroota yakkam Siidoo'n manni waa'ina, Kaamoosha yakkam Moo'aaphphi manni waa'inaa Miilko yakkam Amoo'n manni waa'inaa otossu bikkinatte. Salamoon iina ijaajamukkoyyo. Ixxi anni Daawiit iina ijaajamam hee'ukkisa I Seeraa Ijaajoo egerimma sabaa hawwodaakko. Ihukkaarem Salamooniinsi adillano hundam hooroommoyyo. Foorinne hee'ukkuuyyi adillaninne hee'oo'isa issoommo. Kaka issoommokim I seelluwwaa ijaajjuwwaa egeru an doo'llumm I awwaadaanchi Daawiit bikkinaa yaatette. Ee bikkina adillano Salamoon beetiinsi hooraa kiina tommi sullo uwwoommo. Ihukkaarem i summi weeshamoo'isina doo'llummi Yerusaalee'm beero'onne i awwaadaanchi Daawiitina i illagenne mat shumo'i hee'oo'isina ixxi beetina mat sullo uwwoommo. Yoorbi'aama, an keese Isra'eelanne adil issoommo. At doo'llitti beyyonne hundannem adil ikkootto. I awwaadaanchi Daawiit issukkisa an ijaajummi luwwi hundam wo'm wodaninne ijaajantitaare i seerannee ijaajonnee qoxxitaa hee'lliitaare, i illagennem xabbeen luwwa issittaare an hundi ammanem kiinninne ihoommo. Isra'eelannem adil issoommo. Daawiitina issummisam ki shumo'im kiinniinsi lasonne adil ihoo'isa issoommo. Salamoon baaxii'l mashka'inne Daawiit shumo'o guzumo'oommo. Ihukkaarem heer heerina guzumo'oommoyyo› yoolla» yukko. Ee bikkina Salamoon Yoorbi'aama sheena hasukko. Ihukkaarem Yoorbi'aam Gibxi uulli adil hee'u Shiishaaq beyyo gibaa xorukko. Ixxim Salamoon leheebe'e ee beyyonne afuurukko. Salamoon issu mulli luwwii baxu baxii ixxi qooroomii hundim Salamoon aganni kitaabanne kitaabamaakko. Salamoon ixxi heechchi beyyo Yerusaaleemanne issaa Isra'eela hundam sor hiincho gassukko. Ee lasage Salamoon lehukko. Ixxi anni Daawiit beero'onnem waammamukko. Ixxi beet Oroobi'aamim ixxi beyyonne adil ihukko. Hanaa'n qaranne yo'i Isra'ee'l minaadab hundim Oroobi'aama adil issiteena Seekeemanne wixxita'a egetta'a hee'llo'o. Oroobi'aamim Seekeema marukko. Salamooniinsi gibaa Gibxi uulla maraa hee'u Naabaax beet Yoorbi'aam ka woshsha macceesaa waarukko. Ixxom Isra'ee'l uullanne hanaa'n qarinne hee'llam sulluwwi weeshisso'o; ixxuwwim Yoorbi'aaminne maqirem Oroobi'aam beyyo hincita'a «Kiyyanni Salamoon neesenne gassika kee'mmaalli gaanjaqqa iyyiisaa neese u'nnisaa hee'ukko. At kaba ka kee'mmaalli kiyyanni gassi gaanjaqqa sholliissaa neese hee'nnoommi heechchi ogora axissita'n neese kiina ijaajammoommo» yito'o. Oroobi'aamim «Kaba mallehe. Sas balliinsi lasonnem daba'llitakka'a waallehe» yukko. Ee bikkina minaadab daba'llaa marukko. Ee lasage adil Oroobi'aam «Ka minaadabina dabaroommisina iina uwwitakkam sogitan maha?» yaa ixxi anni Salamoonina gassaan hee'llo'i lommanna wixxaa'aa xa'mmukko. Oo lommannim «At kaba ka minaadabina ijaajantaa awwaaddita'nnii ixxuwwi xa'mmichchinam laboo dabachcha uwwitta'nnii ku minaadab amman hundam amma'nnanchinne awwaaddamo» yita'a dabatto'o. Ihukkaarem Oroobi'aam oo lommanni soggo'i sogitano uraa illageen ixxenne maqire li'lla'a kaba ixxo gassaan ikko'i woraaxxi beyyo maraa «An issimmi hasisoo luwwi bikkina iina mah sogitano uwwitakkamo? Ka kiyyanni neesenne kee'mmisu gaanjaqqa sholliise yita'a xa'mmito'i minaadabina maha dabaro?» yaa xa'mmukko. Ixxuwwim «At uwwitoo dabachchi ‹Iikki hoffi maxxaachchi iyyanni lamadiinsi loboka geejjookko. Iyyanni ki'nnuwwanne kee'mmaalli gassi gaanjaqqa iyyiisaa hee'ukko. An odim oo gassi gaanjaqqi lobakata kee'mmoo'isa issoommo. Ookkoomim iyyanni halanginne ganam hee'ukko. Ihukkaarem an ginxaa yakkam daqquuchchisa qasoo halanginne ganummuuyyi u'nnisoommo› yihe» yita'a soggo'o. Oroobi'aam «Saxxi ayyaamina daba'llehe» yaa issu jinni ayyaamonne Yoorbi'aamii minaadabii hundim ixxi beyyo daba'llita'a waatto'o. Adil Oroobi'aamim lommanni soggo'i sogitano gennihona uraa minaadaba quuqisoo sagarinne wocimma asheerukko. Woraadduwwi soggo'isinne «Iyyanni ki'nnuwwanne kee'mmaalli gaanjaqqa iyyiisaa hee'ukko. An odim ku gassi gaanjaqqi gaassaanniinsi loboka kee'mmoo'isa issoommo. Iyyanni ki'nnuwwa halanginne ganam hee'ukko. Ihukkaarem an ki'nnuwwa ginxaa yakkam daqquuchchisa qasoo halanginne ganummuuyyi u'nnisoommo» yaa dabarukko. Ku woshshi ka'isa ihu mashka'i Seeloo yakkam beyiinsi waaru hiraagaanchi Akiiyanne ihaa Naabaax beet Yoorbi'aamina Waa'i wocukkok wo'mmoo'isinatte. Adil Oroobi'aam minaadaphphi sawwita aa'ubee'i mashka'i Waa'i ka dabassancha isseena qoodu bikkinatte. Isra'ee'l minaadab hundim adil Oroobi'aam ixxuwwi xa'mmito'i xa'mmichcha aa'imma sabukkisa moo'llo'i ammanenne adilina «Niina Daawiitinne mah sharad hee'aa Issayyi beetiinsidu maha siindoommo! Isra'ee'l minaadaba! Ki mine elle'e! Daawiita, ka lasage ki mine ege'lle!» yita'a dabatto'o. Ee bikkina Isra'ee'l minaadab min mine elle'llo'o. Ee bikkina Oroobi'aam xale'i Yihuxxi uullanne hee'llam minaadabina adil ihukko. Ee lasage adil Oroobi'aam malaayyi baxo baxxu'uuyyi hee'llam keenina awwonsaanchi hee'u Adooniiraama Isra'ee'l minaadaphphi beyyo marona asse'ukko. Ihukkaarem ixxo kininne aphphissa'a shito'o. Ee ammanenne Oroobi'aam qaqqisaa faraxxi gaarre'enne aagaa Yerusaalee'm kolli gibaa xorukko. Ee ammaniinsi ki'isaa hanaa'n qaranne yo'i minaadab Isra'eela yakkam summinne Daawiit shumo'i adilla'n gasso sabbo'o. Isra'ee'l minaadabim Yoorbi'aam Gibxiinsi daba'llaa waarukkisa macceesso'i ammanenne ixxuwwi dummichcha aagoona manna asse'lla'a weeshissa'a Isra'ee'l minaadabina adil issito'o. Yihuxxi sulliinsi bagaan Daawiit shumo'o awwonukkok mullek hee'ukkoyyo. Oroobi'aam Yerusaaleema waaraa afu ammanenne Yihuxxi sulliinsii Biiniyaam suullinsii mat xibbee sadeentayyi kum gaadaanoo weeshaa wixxaa'ukko. Eehid issukkokim Isra'ee'l sulluwwa qasaa gassi uulla ixxi anganne dabareena qoodaa hee'u bikkinatte. Ihukkaarem Waa'ik sagar hiraagaanchi Shamaa'iyyanne dillukko. Yihuxxi adil Salamoon beet Oroobi'aamina, Yihuxxaanninaa Biiniyaam moollinaa ee'isam gatu minaadab hundinaa «Waa'i ‹Ki'nnuwwina abbaayyuwwi ikko'i Isra'ee'l minaadaba qassakkotte; hundim annannichchi minem elle'llehe. Ku woshshi ihukkuuyyi yookkok i kollinnetti ihu bikkina qasantakkeena fittakkotte› yoolla» yukko. Ixxuwwim Waa'i sagara macceessa'a ijaajanta'a ixxuwwi mine daba'llita'a elle'llo'o. Isra'ee'l adil Yoorbi'aam duunaam Efiree'm uullanne Sekkee'm beero'o girbisaa ee beyyonne hofqax ammaninam afuurukko. Odim ee beyyiinsi ki'aa Phanu'eel beero'o girbisaa baxukko. Adilim ka woshsha atooraraa lasonne lam labeennuwwi misila worqinne baxisaa Isra'ee'l minaadaba kanniinsi illageen issitakkamee'llakko'isa otossitakkeena Yerusaaleem afeebe'e marimmi gatookko; ki'nnuwwa Gibxi uulliinsi fissito'i waa'uwwi kuno'o kakeeno» yukko. Ee lasage worqinne baxanto'i lamem labeennuwwi misilluwwam matoo Beeteelanne; la'mmekam Daananne uullisukko. Oohim ixxuwwina baaxiil ihukko; minaadabim ee qophpha'n waa'ina otosseena Daan afeebe'e marukko. Yoorbi'aam odim duunnuwwanne otossakkam beyyuwwa baxaa Leewi'i sulli ikkobee'i moolliinsi ayyi manchom qeessichchi issaa doo'llukko. Yoorbi'aam Yihudanne iham hee'u uguxxisam sadeenti agan aagu tommonnee onti ballannee qophpha'n waa'ina ugud ihoo'isa qoodukko. Worqinne baxisu misilluwwinam Beeteelanne hee'oo kiti'm beyyonne yoo labee'n misilina kitima hincaa'ukko. Ee Beeteelannem otossimmina baxisu beyyuwwanne awwaaddam qeessuwwa dissukko. Ugud ihoo'isina ixxi gagim qoodu sadeenti agan aagu tommonnee onti ballannee Beeteela marukko. Ee beyyonnem Isra'ee'l oosina qoodaa hee'ukkisanne uguda lonseena kitima hincaa'akkam beyyonne kitimukko. Yoorbi'aam aduruusa wiriisseena kiti'm beyyi gadanonne uullaakkoohaannonne Waa'i ijaajinne asse'amaakkoo mat hiraagaanchi Yihudiinsi waaraa eekke'e afukko. Oo hiraagaanchim Waa'i ixxo ijaajukkisanne ee kiti'm beyyo sabimminne «Kiti'm beyyoo! Kiti'm beyyoo! Waa'i ki bikkina ‹Oono'o! Daawiit moolliinsi Iyyoosiyaasa yakkam beet qaramookko. Ixxim ee duunanne baxamu mulli minaadaphphi kiti'm beyyi awwaadaan ikka'a kiina aduruusa wiriissitam qeessuwwa ki hanenne durookko. Ee manni miqem ki hanenne shokkiisookko. Ee balla Waa'i ku kiti'm beyyi quruxxe'aa iiqamaa ubookko. Ixxi hanenne yoo gii'l buchchim binnookko› yoo mare'e uwwookko. Adil Yoorbi'aam ka woshsha macceesu ammanenne ixxi anga ki'isaa «Amaddehe!» yaa ijaajukko. Ee hiraagaanchi kollonne biddiqaa'u angi ee ammanchom gogaa xa'u bikkina ee anga ixxi gaganne dabareena xanukkoyyo. Oo hiraagaanchim wocu hiraaqqi saga'llisannem Waa'i kuru mare'i wo'mmukko. Kitima hincaa'akkam mu'utim ee ammanem butbutaa iiqamaa ubukko; hanenne hee'u gii'l buchchim uullanne fincamukko. Adil Yoorbi'aamim «Hay! I angi fayye'oo'isina ki Moollanni Waa'a uunxe» yaa hiraagaancho uunxukko. Hiraagaanchim Waa'a uunxukko; adi'l angim ixxi gaganne daba'llukko. Gaassisam ihukko. Ee lasage adil ee hiraagaanchina Waare «Iinninne maqirem i mine mallona, hurbaata ite; i amaxxiinsi uwwoommo» yukko. Oo hiraagaanchim adilina «Ki amaxxika iina kollo uwwitta'nnim ki mine maroommoyyo; kiinninne maqirem itoommoyyoo agoommoyyoo. Mashka'oomim ee beyyonne hurbaata ittitte wo'om aggitte waattitti googinnem daba'llitaa ki mine mattitte yaa Waa'i eese ijaajaakko» yaa dabarukko. Ee bikkina oo hiraagaanchi Beeteela waaru googo uraa mulli googinne daba'llaa marukko. Ee ammane Beeteelanne hee'oo mat hiraagaanchi lommanchi hee'ukko. Ixxek goo'n oos ixxi kolli hincita'a Yihuxxi uulliinsi waaru hiraagaanchi Beeteelanne issu luwwi bikkinaa adil Yoorbi'aamanne wocu saga'l bikkinaa kutto'o. Oo hiraagaanchi lommanchim «Ee beyyiinsi ki'aa hinka'i googinne marukkahe?» yaa xa'mmukko. Ixxuwwim Yihudiinsi waaru hiraagaanchi maru googo moo'isso'o. Ee lasage ixxi oosina «Hallichchonne koora issehe» yukko. Ixxi oosim hallichchonne koora issito'aare saa'llaa marukko. Oo Yihudiinsi waaru hiraagaanchi maru googinne laseesaa mat qilxo'i hafanne afuuraakkoohaannonne afukko. Lommanchim «Yihuxxi uullinsi waattitti hiraagaanchi atettennihe?» yaa xa'mmukko. Hiraagaanchim «Eeyya anette» yaa dabarukko. Oo lommanchim «Iinninne maqirem mine mallona; hurbaatam ite» yukko. Ihukkaarem Yihudiinsi Waaru hiraagaanchi «Kiinninne mareena te'im gudissitti maadda iteenaa ageenaa hore'em xanoommoyyo. Mashka'oomim hurbaataa wo'oo ma'lluwwam suumenne aagisoombee'isa, waarummi googinnem daba'llaa maroombee'isa Waa'i eese ijaajaakko» yaa dabarukko. Ee lasage Beeteeliinsi waaru hiraagaanchi lommanchi «Anim ki'isam hiraagaancho; Waa'i asse'amaanchi an keese massaa i minenne hurbaata itisoommisina kuraakko» yukko. Ihukkaarem oo hiraagaanchi lommanchi ee woshsha wocukkok qophphanaatette hee'ukko. Ee bikkina Yihudiinsi waaru hiraagaanchi ee hiraagaanchi lommanchinne maqirem mine maraa ixxenne maqirem hurbaata itukko; wo'om agukko. Hurbaata itimmina afuuramaa hee'amukkisam Waa'i sagar ee hiraagaanchi lommanchi beyyo waarukko. Yihudiinsi waaru hiraagaanchina sagara haraassaa «Waa'i ‹Waa'i sagara lonsittoyyo; Ki Moollanni Waa'i ijaaju ijaajo egettittoyyo. Daba'llitaa hurbaata ittitte wo'om aggitte yummi beyyonne hurbaata ittaa wo'o aggitti bikkina letootto. Ki leeshim kiyyanni uullanne yoo waammi beyyo afooyyo» yaa shaaqukko. Hurbaata itta'a lasonne hiraagaanchi lommanchi googiinsi dabaraa eebu hiraagaanchina hallichchonne koora issukko. Ixxim ee hallichchonne saa'llaa marukko; marukkuuyyim googonne hobbichchi siidaa shukko. Ixxi leeshim googonne ubukko. Hallichchii hobbichchii lamim leesh gadanonne uullita'a hee'llo'o. Mat mat manni eeheen higgu'uuyyi hiraagaanchika ubu leeshaa gadanonne uullu hobbichchoo moo'llo'o. Ixxuwwim ee woshsha hiraagaanchi lommanchi hee'oo Beetee'l beero'onne waatta'a moo'llo'i woshsha wocco'o. Oo hiraagaanchi lommanchi ee woshsha macceesaa ki'aa «Oo manchi Waa'i ijaajo egeroo'n gatu hiraagaanchi ihookko. Waa'i wocu saga'llisam hobbichcho asse'aa ixxo aphphisaa iiqaa shaakkoo› yimma» yukko. Ee lasage ixxi oosina «Hallichchonne koora issehe» yukko. Ixxuwwim koora issito'o. Ixxim ee hallichchonne Saa'llaa marukko. Maraa afoohaare kabad afeebe'em hallichchii hobbichchii ee hiraagaanchi leeshi gadanonne uullito'isam, leeshim googonne dufukkisam afukko. Oo hobbichchi ee hiraagaanchi leesha itukkoyyo; hallichchom hawwodukkoyyi hee'ukko. Oo hiraagaanchi lommanchim ee leesha ki'isaa hallichchonne iyyiisukko. Wi'llakkamisinaa waammamoo'isinaa dabaraa Beeteela massukko. Oo hiraagaanchi lommanchim ixxi qaqqi abaroos waammi beyyonne massaa waammukko; ixxuwwim «Kiyyabbichchoo, kiyyabbichchoo!» yitu'uuyyi wi'llito'o. Ee leesha waammaa lasonne oo hiraagaanchi lommanchi ixxi oosina «An lehoommi balla ka waammanne waammehe; i leesham eddakka'a ixxi leesh gadannonne waammehe. Beeteelanne yoo kiti'm beyyonne, Samaare'i hoffi beero'uwwannee ee duunnuwwanne yo'i otossakkam beyyuwwannee Waa'iinsi uwwamu ijaaccisanne ku hiraagaanchi wocu woshshi hanqo'isam wo'mmookko» yukko. Kuk hundim ihukkaarem Isra'ee'l adil Yoorbi'aam issam hee'u jor baaxiiliinsi daba'llukkoyyo; hore'oomam ixxi baxu kiti'm beyyuwwanne awwaaddam Leewi'i shumo'iinsi tochchonne yo'i moolliinsi qeessuwwa doo'llimma urubee'i bikkina qeessichchi iheena hasu mancho hundam qeessichchi issam hee'ukko. Ku baaxiilim Yoorbi'aam abaroos adillan uboo'isinaa uulliinsi bi'oo'isinaa mashka'i ihukko. Ee ammane adil Yoorbi'aamik Abiya yakkam beet xissaa hee'ukko. Ee bikkina Yoorbi'aam ixxi arena at iittan ikkittisa manni la'oobee'isa eddechcha dabassitaa an ka minaadabanne adil ihoommisa hiraago wocu hiraagaanchi Akiiy hee'oo beyyo Seelo'o mare. Ixxenam tommi injeera, hofqax daabbo'oo mat harachchi maraboo masse. Ixxim ku beet maha ihooda'e kurookko» yukko. Ee bikkina Yoorbi'aam are ixxi yu luwwa hundam gudissa'a Seelo'onne hee'oo Akiiy mine matto'o. Akiiyim lomma'nnaa hee'u bikkina illi jaamaa hee'ukko. Ihukkaarem Waa'i hiraagaanchi Akiiyina Yoorbi'aam meentichcho xissu is beet bikkina xa'mmiteena waattamisaa maha kurimmi hasisooda'ee gaassaahim la'isaa hee'ukko. Yoorbi'aam meentichcho ee beyyo affa'a mulli meentichcho labbeena yakito'o. Ihukkaarem ise ixxi beyyo aaggu'uuyyim is konte'i sagara macceesaa «Taa Yoorbi'aam meentichche aage mahina mulli meento labbeena yakitto? An kiina kureena asse'amaammoo kichche'isoo woshshi yookko. Yoorbi'aam beyyo mattaa Isra'ee'l Moollanni Waa'i ‹An keese minaadaphphi lambe'iinsi doo'llaa iim shiqaa'aa i minaadab Isra'eela awwonsitoo'isa issaa hee'ummo. Daawiit shumo'iinsi adillano hooraa kiina uwwummo. Ihukkaarem at guullaa amma'nnamaa i ijaajom egeraa eese liiransoo luwwi hundam issu i awwaadaanchi Daawiitisa ikkittoyyo. Hore'oomam kiinniinsi illageen hee'llo'i keeniinsi hundiinsim lophphaakkoo jor baaxiilo baxxitto. Eese uttaa qophpha'n waa'uwwinaa xaariinsi misilluwwi baxxaa otossitto. Eesem quuqissitto. Ee bikkina Yoorbi'aam minenne hawwo eeboommo; ixxi miniinsi agishshom ihukko wolabichcho ixxekam goon ooso hundam Isra'ee'l uulliinsi hooroommo; koboot gii'l buchchi iheebe'e shokkoohaannisa an Yoorbi'aam abaroosa guullaa bi'isoommo. Yoorbi'aam moolliinsi beero'onne lehukkoka ayyi manchom wish itookko. Biir uullanne lehu keenom ammar itookko. Ka woshsha wocummok An Waa'a› yoolla yitaa kure» yukko. Akiiyim Yoorbi'aam meentichchona «Kaba ki'llaa ki mine daba'llitaa elle'e; ki lokki beero'o aagukkisam oo beet lehookko. Isra'ee'l minaadab hundim ixxena wi'llookko; waammookkome. Yoorbi'aam abaroosiinsi er waamma siixxookok xale'i ixxotte ihookko. Mashka'oomim Isra'ee'l Moollanni Waa'i ee abaroosiinsi liiramukkok xale'i ka beetonnette ihu bikkinatte. Waa'i Yoorbi'aam mine bi'isoo mulli adila kaballa ki'isookko. Oohim kabadette. Waa'i Isra'eela guzumo'ookko. Isra'ee'l minaadabim shomboqo'i wo'i woronne huxe'amoo'isa huxe'amookko. Isra'ee'l minaadabam gaassi anno'ina uwwu ka er uulliinsi fissaa Efiraaxiis daajji eeqidonne fitta'a bintamisa issookko. Mashka'oomim Asheera yakkam meentichchi qophpha'n waa'a baximminne Waa'a quuqisso'i bikkinatte. Yoorbi'aam baaxiilo baximminne Waa'a hawwodu bikkinaa Isra'ee'l minaadabim baaxiilo baxoo'isa issu bikkinaa Waa'i Isra'eela uunjookko» yukko. Yoorbi'aam meentichcho ee beyyiinsi ki'lla'a Tirxa'a matta'a is mi'n gooca affo'isam oo beet lehukko. Waa'ina awwaadaanchi ihu hiraagaanchi Akiiyina Waa'i kurukkisam Isra'ee'l minaadab kichchechchinne wi'llaa waammukko. Adil Yoorbi'aam baxu luwwi hundim, ora oramukkisii minaadaba gassukkisii hundim Isra'ee'l Adilluwwi Aganni Kitaabanne kitaabamaakko. Yoorbi'aamim adillaninne lamiyyee lam hiinchoo gassaa lasage lehukko. Ixxi beet Naadaabim ixxo bikkaa adil ihukko. Salamoon beet Oroobi'aam Yihuxxi uullanne adil ihu ammane ixxek umur soree mat hiinchoo hee'ukko. Ixxi heechchi beyyom Waa'i hundem Isra'ee'l gassi uulliinsim ixxi summi weeshamoo'isina doo'llu Yerusaaleemanne issaa tommoo lamar hiinchoo gassukko. Oroobi'aam ama Naa'ima yakkamotan ikka'a Amoo'n uullitan hee'llo'o. Yihuxxi minaadabim Waa'i illagenne jor baxo baxxo'o; Ixxuwwi gaassi anno'i issitam hee'llo'aanniinsi lophphaakkoo jor baxo baximminne Waa'a quuqisso'o. Ixxuwwim qophpha'n waa'uwwina otossakkam beyyuwwa baxxo'o; haqqi lugummuwwi hundannee duunnuwwannee ixxuwwi otossitam cabbaramaakkoo ki'n utubbuwwaa Asheeraa yakkam misilluwwaa uullisso'o. Ee hundiinsim baas jor woshshi ee qophpha'n waa'uwwina otossakkam beyyuwwanne saa'llam keen hee'llo'o. Ixxuwwim Isra'ee'l minaadab ee uulla aageena hincukkuuyyi maru ammane Waa'i ixxuwwi illagiinsi fissaa hollu hanqo'i Waa'a la'oobee'i minaadab baxam hee'u haashaarammi baxo hundam Ayihuxxi minaadabim baxam hee'ukko. Oroobi'aam adil ihu onti hiinchonne Gibxi uulli adil Shiishaaq Yerusaaleema qasukko. Keesammi Minennee adilla'n minennee hee'u amaxxaa Salamoon worqinne baxisaa hee'u agilluwwaa hundam bogaa massukko. Ee massakko'i agilluwwi bikkennem adil Oroobi'aam naas xaarinne mulli agilluwwa baxisaa adilla'n mi'n ooxxi gooca egeroo waardiyyuwwi awwonsaaninne egeramoo'isa issukko. Adil Keesammi Mine waaroo amman hundam Keesammi Mine egettam keen ee agilluwwa amadda'a ixxo aa'llam hee'llo'o. Ixxi maraa lasage odim dabatta'a waardiyyuwwi egeroo minenne dissitam hee'llo'o. Adil Oroobi'aam issu mulli luwwi hundim Yihuxxi Adilluwwi Aganni kitaabanne kitaabamaakko. Ee doollenne hundannem Oroobi'aamii Yoorbi'aamii ixxuwwina'i ixxuwwim muramoobee'i orancha orantam hee'llo'o. Oroobi'aamim lehukko. Daawiit beero'onne hee'oo adilluwwa waammakkam beyyonnem waammamukko. Ixxi beyyonnem ixxi beet Abiy adil ihukko. Oroobi'aam ama Naa'ima yakkamotan ikka'a isem Amoo'n uullitane hee'llo'o. Naabaax beet Yoorbi'aam adil ihu tommonnee sadeenti hiinchonnee Abiy Yihuxxi uullanne adil ihukko. Ixxi heechchi beyyom Yerusaaleemanne issaa sas hiincho gassukko. Ixxi amam Ma'ika yakkamotan ikka'a Abeseloomina landichchotte hee'llo'o. Abiyim ixxi lob anni Daawiitisa Waa'i illagenne muccurisinne amma'nnamaakkoo manchi ihaa hee'immi hasisukkuuyyi ixxi anni Oroobi'aam baxam hee'u baaxiilo ixxim baxam hee'ukko. Ihona bagaan ixxeensi lasage Yerusaaleemanne adil ihonaa Yerusaaleemam xumminne egeronaa ixxi Moollanni Waa'i Daawiit bikkinaa yaa Abiyina mat goonchi beeto uwwukko. Waa'i Daawiitina eekka issukkok ixxi Hiite'i uulli Ooriyonne baxu baaxiiliinsi bagaan Waa'a liiransoo luwwa issu bikkinattee ijaajom qoxxaa egeru bikkinattee. Abiy adilla'n doollenne hundannem Oroobi'aam lambe'ennee Yoorbi'aam lambe'ennee hee'u or uullukkoyyi hee'ukko. Abiy baxu mulli bax hundim Yihuxxi Adilluwwi Aganni Kitaabanne kitaabamaakko. Abiyii Yoorbi'aamii orantam hee'llo'o. Ee lasage Abiy lehukko; Daawiit beero'onnem waammamukko. Ixxi beyyonnem ixxi beet Asa'a adil ihukko. Yoorbi'aam Isra'eelanne adil ihu lamiyyi hiinchonne Asa'a Yihudanne adil ihukko. Ixxi heechchi beyyom Yerusaaleemanne issaa soree mat hiinchoo gassukko. Ixxi lob amam Maa'ika yakkamotan ikka'a Abeseloomina landichchotte hee'llo'o. Asa'a ixxi lob anni Daawiitisam Waa'a liiransoo baxo baxukko. Adil Asa'a Waa'a laqqambee'i minaadab otossitam beyyuwwanne qophpha'n waa'i minenne saa'llam keeno hundam uulliinsi bi'isukko. Ixxi anno'i baxxo'i qophpha'n waa'uwwi hundam gindansaa uunjukko. Ixxi lob ama Maa'ika Asheeraa yakkam shigigaa'oo meentichchi qophpha'n waa'a baxxo'i bikkina ise adillaniinsi dilliisukko. Ee baxxo'i qophpha'n waa'am iiqansaa Qeediroo'n cebbanne shokkiisukko. Asa'a duunnuwwanne hee'u hanqo'i Waa'a laqqambee'i minaadab otossitam beyyuwwa hundam bi'isubee'aarem ixxi hee'u doollenne hundannem Waa'ina amma'nnamaakkoohan hee'ukko. Ixxi anni Waa'ina keesamaakkoohan issu keenoo ixxi gagim worqinnee birinnee baxisaa xale'i Keesammi Mi'n awwaadina ihoo'isa issu keesammi mu'uttuwwaa hundam Keesammi Mine aagisukko. Yihuxxi adil Asa'aa Isra'ee'l adil Baa'ishii ixxuwwi adilla'n doollenne hundannem orantam hee'llo'o. Baa'ish Yihuxxi uulla qasaa Raama'a girbisaa baxisukko. Eekka issu mashka'im Yihuxxi uulla ayyim aagoobee'isaa firoobee'isaa hoorimminatti hee'ukko. Ee mashka'inne adil Asa'a Keesammi Miniinsii ixxi adilla'n miniinsii gatu worqaa biraa hundam fissaa Damaasqo'i beero'onne hee'oo Xabriimoon beet hee'u Heezyoonina beet beet ihu Sooriy uulli adil Beenhadaadina ixxi gassaanonne asse'ukko. Ixxim «Iyyannii kiyyannii issitam hee'llo'isanne ni lambe'ennem mateeyyoom gindamoobee'isa issinona. Ku birii worqii kiina an asse'aammoohane. Ka lasage Isra'ee'l adil Baa'ish ixxi gaadaano i gassi uulliinsi fissoo'isina iina hara'mmiteena illageen ixxenne hee'u mateeyyooma kaba ginditoo'isina uunxoommo» yoo asso edaa asse'ukko. Adil Benhadaadim Asa'a hincaa'u sawwitenne iittamaa gaaxxi awwonsaanoo gaadaanoo asse'aa Isra'ee'l beero'uwwa qassamisa issukko. Ixxuwwim Iyyoona, Daana, Abeelbeetmaa'ikka, Galii'l dambalaqa yakkam beero'uwwa, ee'isam Galii'l dambalaq gadanonne yoo uullaa Niftaalee'm gassi uullaa hundam amaddo'o. Adil Baa'ishim eekka macceesu ammanenne Raama'a girbimma uraa Tirixa'a marukko. Adil Asa'am Yihuxxi uullanne hundannem alallaatisaa minaadab matim gatoo'n firaa Baa'ish Raama'a girbeena wixxaa'aa hee'u kinaa haqqaa ee beyyiinsi hara'mmita'a ki'issamisa issukko. Ee beyyiinsi ki'isso'i kininnee haqqinnee massaa Misiphphaa Biiniyaam gassi uullanne hee'oo Geeba'i beero'oo baxukko. Adil Asa'a issu mulli luwwi hundim, geedoo'm baxii girbisu beero'uwwii Yihuxxi Adilluwwi Aganni Kitaabanne kitaabamaakko. Ihukkaarem adil Asa'a lommanna'n doollenne lokki xissam hee'u bikkina shiihaa hee'ukko. Ixxim lehukko. Daawiit beero'onne yoo adilluwwi waammi beyyonne waammamukko. Ixxi beyyonnem ixxi beet Yoosaafix adil ihukko. Asa'a Yihuxxi uulli adil ihu la'm hiinchonne Yoorbi'aam beet Naadaab Isra'ee'l adil ihaa lam hiincho gassukko. Illageen hee'u ixxi annisam baaxiilo baximminne Waa'i illagenne jor baaxiilo baxukko. Isra'ee'l minaadaba baaxii'l googonne awwonsaa waa'i illagenne jor baxo baxukko. Yisaakoor sullik Akiiy beet Baa'ish Naadaabanne bangujjaa shukko. Ee ammane Naadaabii ixxi gaadaanii Filisxee'm uullanne hee'oo Giibaatoo'n beero'o kibbittu'uuyyi hee'llo'o. Oohim ihukkok Asa'a Yihuxxi adil ihu saxxi hiinchonnette. Ee'isinne Baa'ish Naadaab beyyonne Isra'ee'l adil ihukko. Ixxi adil ihukkisam Yoorbi'aam abaroosa guullimma asheerukko. Waa'i Seelo'onne qaramu ixxi awwaadaanchi hee'u hiraagaanchi Akiiyinne wocu saga'llisam Yoorbi'aam abaroosa hundam shukko. Ixxuwwiinsi matim foorinne gatukkoyyo. Mashka'oomim Yoorbi'aam ixxi gagoomim baxu baaxiilinnee Isra'ee'l minaadab baaxiilo baxxamisa issimminnee Isra'ee'l Moollanni Waa'a quuqisu bikkinatte. Naadaab baxu mulli luwwi hundim Isra'ee'l Adilluwwi Aganni Kitaabanne kitaabamaakko. Yihuxxi adil Asa'aa Isra'ee'l adil Baa'ishii adillanonne hee'llo'i doollenne hundannem orantam hee'llo'o. Asa'a Yihuxxi uullanne adil ihu saxxi hiinchonne Akiiy beet Baa'ish Isra'ee'l minaadabanne hundannem adil ihukko. Ixxi heechchi beyyom Tirxa'anne issaa lamiyyee soor hiinchoo gassukko. Baa'ishim baaxiilo baximminnee Isra'ee'l minaadabam baaxiilo baxxamisa issimminnee ixxeensi illageen hee'u adil Yoorbi'aamisam Waa'i illagenne jor baxo baxukko. Hanaan beet ihu hiraagaanchi Iyyu'innetti ihaa Baa'ish bikkina Waa'i wocu sagar «An keese buchchiinsi ki'isaa i minaadab Isra'eelina awwonsaanchi issummo. Atim Yoorbi'aamisam baaxiilo baxxitto. I minaadabam baaxiilo baxoo'isa issitto. Ixxuwwi baaxiilim lophphaa eese quuqisaakko. Ee bikkina ono'o, Baa'ishaa ixxi minee guullaa bi'isoommo. Ki minem Naabaax beet Yoorbi'aam mi'nnisa issoommo. Baa'ish abaroosiinsi beero'onne lehookkoka ayyem wish itookko. Hax uullanne lehookkokam ammar itookko» yoohane. Baa'ish baxu mulli baxii geedoomma'n baxii hundim Isra'ee'l Adilluwwi Aganni Kitaabanne kitaabamaakko. Baa'ishim lehukko. Tiirxa'annem waammamukko. Ixxi beyyonnem ixxi beet Eela'a adil ihukko. Waa'i hiraagaanchi Iyyu'inne ihaa Baa'ishinaa ixxi abaroosinaa ee hiraaqqi sagara wocu mashka'i Baa'ish baxu baaxiilinne Waa'a quuqisu bikkinatte. Baa'ish Waa'a quuqisukkok Yoorbi'aam mi'nnisam Waa'i illagenne jor baxo hundam baxu bikkinattee Yoorbi'aam abaroosa hundam shu bikkinattee. Asa'a Yihudanne adil ihu lammiyyennee loh hiinchonnee Baa'ish beet Eela'a Isra'ee'l adil ihukko. Ixxi heechchi beyyom Tiirxa'anne issaa lam hiincho gassukko. Ixxaannina kolli faraxxi gaarre'uwwina ijaajaanchoo gaaxxi awwonsaaniinsi matoo hee'u Zimiir adilanne bangujjaa ki'ukko. Eela'a mat balla Tiirxa'i beero'onne adi'l mi'n awwonsaanchi hee'u Arixaa yakkam ixxi gassaanchi minenne lobakat agga agaa dimbaa hee'ukko. Ee ammanenne Zimiir ee mine aagaa Eela'a shukko. Ixxim Eela'i beyyonne adil ihukko. Oohim ihukkok Asa'a Yihuxxi uullanne adil ihu lamiyyennee lama'l hiinchonnette. Zimiir adil ihukkisam Baa'ish abaroosa matim gatoobee'isa hundam shukko. Baa'ishina qaroo beshaa ihu goona hundam ma'lluwwim gatoobee'isa shukko. Waa'i Baa'ishina hiraagaanchi Iyyu'inne wocu hiraaqqisannem Zimiir Baa'ish abaroosa hundam shaa guullukko. Mashka'oomim Baa'ishii ixxi beet Eela'aa qophpha'n waa'anne otossimminnee Isra'ee'l minaadabam baaxiilo baaxxamisa issimminnee Isra'ee'l Moollanni Waa'a quuqisso'i bikkinatte. Eela'a issu mulli luwwi hundim Isra'ee'l Adilluwwi Aganni Kitaabanne kitaabamaakko. Asa'a Yihudanne adil ihu lammiyyennee lama'l hiinchonnee Zimiir Isra'eelina adil ihukko; ixxi heechchi beyyom Tiirxanne issaa Isra'eelanne xale'i lamar balla adil ihukko. Ee ammane Isra'ee'l gaadaan Filisxee'm uullanne yoo Giibatoo'n beero'o kibbita'a hee'llo'o. Ee beero'o kibbita'a hee'llo'i Isra'ee'l gaadaan Zimiir bangujjaato firaa adila shukkisa macceesso'isam ee ballam gaaxxi awwonsaanchi Oomiira adil issito'o. Ee lasage Oomiirii ixxi gaadaanii kibbita'a hee'llo'i Giibaatoona fatakita'a qaqqissa'a matta'a Tiirxa'a kibbita'a amaddo'o. Zimiirim oo beero'i kibbamukkisa moo'u ammanenne adilla'n mi'n woro'l minenne yoo giribanne aagaa ee adilla'n minenne giira xanqisukko. Ee lasage ixxim ee gii'l labaninne shokkaa lehukko. Mashka'oomim ixxi gagim baxu baaxiilinnee Isra'ee'l minaadabim baaxiilo baxxamisa issimminnee odim ixxeensi gaassaa hee'u Yoorbi'aamisa Waa'i illagenne jor baxo baximminnee Waa'a quuqisu bikkinatte. Zimiir baxu mulli baxii bangujjukkisii Isra'ee'l Adilluwwi Aganni Kitaabanne kitaabamaakko. Ee ammane Isra'ee'l minaadab beyyo fee'llanchinne lam beyyonne baxxamamaa hee'ukko. Eehanniinsi ki'ukkok mat kollii Giinaat beet Tiibina adil isseena hasukkuuyyi mulli kollii odim Oomiirina hara'mmeana hasam hee'ukko. Lasaanchonne Oomiir kolli ikko'i manni kaa'llo'o. Ee bikkina Tiibiina shito'o. Oomiirim adil ihukko. Ee'isinne Asa'a Yihuxxi uullanne adil ihu sadennee mat hiinchonnee Oomiir Isra'ee'l uullanne adil ihaa tommoo lam hiinchoo gassukko. Luxxi lohem hiinchom ixxi heechchi beyyo Tiirxa'i beero'onne issaa gassukko. Ee lasage ixxim Sheemeera yakkam manchiinsi Samaare'i uulli duuna loh kum kin birinne bitaa'ukko. Oomiir ee duuna giribaa lasonne beero'o baxukko. Ee beero'i summam illageen ee duu'n annichchi hee'u Sheemeer summanne «Samaariya» yaa weeshukko. Oomiir Waa'i illagenne jor baxo baxukko. Ixxeensi illageen hee'llo'i adilluwwiinsi hundiinsim lophphoo baas baaxiilo baxukko. Ixxim baxu baaxiilinnee ee'isam Isra'ee'l minaadab baaxiilo baxxamisaa qophpha'n waa'ina otossitamisa issimminnee ixxeensi illageen hee'u Yoorbi'aamisam Isra'ee'l Moollanni Waa'a quuqisukko. Oomiir baxu luwwii taaphansu luwwii hundim Isra'ee'l Adilluwwi Aganni Kitaabanne kitaabamaakko. Oomiir lehukko. Samaare'ennem waammamukko. Ixxi beyyonnem ixxi beet Aki'aab adil ihukko. Asa'a Yihuxxi uullanne adil ihu sadennee sadeenti hiinchonnee Oomiir beet Aki'aab Isra'ee'l adil ihukko. Ixxi heechchi beyyom Samaare'enne issaa lamiyyee lam hiinchoo gassukko. Aki'aab ixxeensi illageen hee'llo'i adilluwwiinsi hundiinsim lophphaakkoo jor baxo Waa'i illagenne baxukko. Aki'aab adil Yoorbi'aam baxu baaxiilo sholle'aalli issaa xigimminne ixxi gagim ee baaxiilo baxukko. Eehanniinsi hundiinsim Siidoo'n uulli adil Etba'aal landichchotte hee'llo'i hanqo'i Waa'a laqqambee'i Eelzaabeele eebukko. Ba'aala yakkam qophpha'n waa'ina awwaadukko; otossukkome. Samaare'i beero'onnem Ba'aalina otossakkam mine baxisukko; ixxenam kitima hincaa'akkam beyyo axisukko. Odim Asheeraa yakkam meentichchi waa'i misila uullisukko. Ixxeensi illageen hee'llo'i Isra'ee'l adilluwwi hundiinsim lophphaa Isra'ee'l Moollanni Waa'a quuqisoo baaxiilo baxukko. Aki'aab doollenne Hii'eela yakkam Beetee'l uulli manchi Yaarko'o dabaraa baxukko. Waa'i Naawe'i beet Iyyaasinne gaassaa wocu saga'llisannem Hii'eel Yaarko'ika shooto'i kina kaasu ammane ixxek won beet Abiiraam lehukko. Odim ee beero'i ooxxi gooccuwwa baxu ammanenne ixxek hoffi beet Saguub lehukko. Gala'aaxxi uullanne Tuubi'i yakkam beyyi hiraagaanchi Eeliyaas adil Aki'aabina «I Sagarinnetti ihubeelas waaroo lam hiinchonne te'im sas hiinchonne uullanne aash te'im xeen hee'oobee'an ihukkisa an awwaadoommi Isra'eelina Moollanni ihu hee'oo Waa'i summinne kuroommo» yukko. Ee lasage Waa'i Eeliyaasina «Ka beyyiinsi ki'llaa eelliinchi firoo kollonne mare; ee beyyonnem Yoordaanoos daajjiinsi eelliinchi firinne hee'oo Karaata yakkam cebbi woronne maaxame. Atim wo'o ee daajjiinsi aggootto. Kiinam ittoo hurbaata qooraanti eeboo'isa ijaajaammo» yukko. Eeliyaasim Waa'i ijaajukkisannem maraa Koraat cebbanne afuurukko. Ee beyyonnem qooraanti hundi ammanem daraa maaro'oo injeeraa maaraa eebam hee'ukko. Wo'om ee daajjiinsi agam hee'ukko. Hofqax ammaniinsi lasonne uullanne xeen hee'ubee'i bikkina oo daajji gogukko. Ee lasage Waa'i Eeliyaasina «Kaba ka beyyiinsi ki'llaa mattaa Siidoo'n uullanne hee'oo Saraaphphit beero'onne afuure. Oona'a, ee beyyonne hee'llam mat busar meentichcho kiina hurbaata uwwitona ijaajaammo» yukko. Ee bikkina Eeliyaas ee beyyiinsi ki'aa Saraaphphita marukko. Ixxim ee beero'i ooxxi goocanne hincu ammanenne mat busar meentichcho haqqa feettu'uuyyi moo'aa «He'i, agakkam wo'o eebe» yukko. Wo'o eebbeena mattu'uuyyi odim weeshaa «He'i, gootto'i injeeram eddaa eebe» yukko. Isem dabatta'a «I minenne injeer ma'lluwwim bee'an ihukkisa hee'oo ki Moollanni Waa'i summinne hide'oommo. Qama dissoommi harachchonne yoo mat oobo'i qamiinsii humbullonne yoo cuungi wee'l zaytiinsii bagaan iina ma'llichchim bee'e. An keyye waarummok hofqax qoxaxxam fee'llaa mine daba'llaa ee yoo gootto'i qanchom i beetinaa i gaginaa sa'lleenatte. Oottem niina lasaanchi hurbaatichchotte. Ee lasage sibaarinne lehimmiinsi gantoombee'ane» yito'o. Eeliyaasim isena «Hawwititte! Mattaa ee hurbaata sare. Ihukkaarem gaassitaa iina gootto'i ongochcho'o sattaa eebe; gatukkokam ki gaginaa ki beetinaa sare. Mashka'oomim Isra'ee'l Moollan Waa'i ‹An xeena ga'nniseembe'e qam harachchiinsi zaytim humbulliinsi hore'em beeddooyyo› yaa wocaakko» yukko. Oo busar meentichchom matta'a Eeliyaas wocukkisam issito'o. Ee'isinne ise, is abaroosii Eeliyaasii lobakat ballina ihoo hurbaata siiddo'o. Waa'i Eeliyaasena uwwu neeyyaxxisannem qam harachchiinsi zaytim humbulliinsi beeddukkoyyo. Hofqax ammaniinsi lasonne ee busar meentichchi beet xissukko. Xissim baasukkuuyyi maru bikkina lehukko. Isem Eeliyaasina «Kaa Waa'i mancho, mahinatte eesenne kaka issittok? Keyye waattittok i baaxiilo Waa'ina tiissiissaa i beet lehoo'isa issiteenattennihe?» yita'a xa'mmito'o. Eeliyaasim «Ki beeto keyye eebe» yukko. Ee beetom ise qaaphphito'i beyyiinsi aa'aa ixxi hee'oo fooqanne fissaa ixxi ara'anne iinsiisukko. Ee lasage Eeliyaas sagara iimaa'aa «I Moollanni Waa'a! Ka busar meentichchonne kaa'nna kichche'isoo kee'mmaalli luwwa mahina issitto? Ise eese koyyinano aa'imminne lobakat biijooma iina issito'ookko. Eehaare at mahina is beet lehoo'isa issito?» yaa Waa'a uunxukko. Ee lasage Eeliyaas ee leesh hanenne sasaagge biddiqaa «I Moollanni Waa'a! He'i, ka beeto lehiinsi ki'ise!» yaa Waa'a uunxukko. Waa'im Eeliyaasika uunxato macceesukko. Ee beetikim foor daba'llaa oo beet lehiinsi ki'ukko. Eeliyaasim ee beeto fooqiinsi amadaa uulla dillukko. Ixxom amana uwwaa «Ka moo'e, oono'o ki beet lehiinsi heechchanne daba'llaakko!» yukko. Oo meentichchom Eeliyaasina «At Waa'i manchi ikkittisaa at woccoottokim hanqo'i Waa'i sagar hanqo'an ihukkisaa an kaba qoossaa la'ummo» yito'o. Lobakat ammaniinsi lasage saxxi hiinchonne Waa'i Eeliyaasina «Mattaa adil Aki'aabina moo'ame; anim uullanne xeen ga'nnoo'isa issoommo» yukko. Eeliyaasim ijaajamukkisanne Aki'aab beyyo marukko. Ee ammane Samaare'i uullanne sibaar lobakata qoxxaa hee'ukko. Ee bikkina adil Aki'aab adi'l mi'n awwonsaanchi ihu Abdiyu weeshisukko. Abdiyim Waa'a lobakata baddoo manchi hee'ukko. Eelzaabeele Waa'i hiraagaano shisiissam hee'llo'i doollenne Abdiy mat xibbi Waa'i hiraagaano ontayyi ontayyi issaa lam beyyo baxxansaa daawwa'anne maaxaa hurbaataa wo'oo uwwam hee'ukko. Aki'aabim Abdiyina «Faradoo baqullaa lehiinsi gatinseena ayyi la'ukko ihoo hixe siindoomman ihaakkoolas ka uullanne yoo bu'uwwii daajjuwwii yoo beyyuwwa mattaa moo'e. Ayyi la'ukko ni diinate lehiinsi gatinsoommi ihookko» yukko. Lamem manchim mattam uulla baxxanta'a matteena iittanta'a lasage Aki'aabii Abdiyii mulli mullam annanni annanni googom matto'o. Abdiy marukkuuyyim dangonne Eeliyaasinne edamukko. Eeliyaasatte ihukkisa la'u ammanenne illillaachcha uullanne ubaa «I moollanna, Hanqinam Eeliyaas atettennihe?» yaa xa'mmukko. Eeliyaasim «Eeyya anette. Ka beyyonne yoommisa mattaa ki moollannina kure» yaa dabarukko. Abdiyim «Adil Aki'aab eese ki agishsho shoo'isina ixxi anganne higissaa uwwitoottok an maha hawwodummaarette? Adil keese hasukkuuyyi ka uullanne manna asse'u bee'i uulli bee'isa hee'oo ki Moollanni Waa'i summinne hide'oommo. Mat uulli gassaanchi at ee uullanne bee'isa kuroo amman hundam adil Aki'aab at ee uullanne bee'isa hide'aa la'isoo'isa issaakko. Eehannah ku woshshi ka'isanne ihaa hee'ukkuuyyi at ka beyyonne yoontisa maraa ixxena kurona hassoohonnihe? An ka beyyiinsi marummisam ee ammanchom Waa'i Ayyaan keese an la'oombee'i beyyo massaa uruta'n an maha ihoommo? Mashka'oomim at ka beyyonne yoontisa Aki'aabina kuraa keese siidoo'n gatuta'n ixxi eese shookko. An oosoommaniinsi ki'isaa kaballi afeebe'e Waa'a baddoommi manchi ihummisa sawwihe. Odim Eelzaabeele Waa'ina awwaaddam hiraagaano shisiissam hee'llo'i ammane mat xibbi hiraagaano lam beyyonne baxxansaa ontayyi ontayyi issaa daawwa'i woronne maaxaa hurbaataa wo'oo uwwummuuyyi hee'ummisa macceessittoyyonnihe? Eehannah kaba at ka beyyonne yoontisa mattaa adil Aki'aabina kure yitoollannihe? Eekka issumlas adil eese shookko» yukko. Eeliyaasim «Kaballa an adilina moo'amoomman ihukkisa an awwaadoommi hundam xanoo Waa'i summinne sagara aagoommo» yaa dabarukko. Ee lasage Abdiy maraa adil Aki'aabina kurukko. Aki'aabim ki'aa Eeliyaasinne edameena marukko. Aki'aabim Eeliyaase moo'aa «Isra'eelanne kaa'n hawwi afoo'isa issittok atettennihe?» yukko. Eeliyaasim «Waa'ika ijaajjuwwa gindimminnee Ba'aala yakkam qophpha'n waa'i misilluwwina otossimminnee hawwi afoo'isa issitakko'ok atettee kiyyanni minee bagaan Isra'ee lanne hawwi afoo'isa issummok aneyyo. Isra'ee'l minaadaba hundam, Eelzaabeel maaddiinsi ittam soor xibbee ontayyi Ba'aa'l hiraagaanoo soor xibbi Ashee'l hiraagaanoo Qarmeeloos duunanne wixxaa'e» yukko. Ee bikkina Aki'aab Isra'ee'l minaadabii hiraagaanii hundim Qarmeeloos duunanne wixxitamisa issukko. Eeliyaasem minaadaphphi illagenne hincaa «Hinki balli afeebe'e lameeqqitakku'uuyyi hee'llakkamo? Waa'i hanqo'an ihaakkoolas ixxena otossi'llehe; te'im Ba'aal hanqo'an ihaakkoolas ixxena otossi'llehe» yukko. Ihukkaarem minaadab maham dabarukkoyyo. Ee lasage Eeliyaase minaadabina «Waa'i hiraagaaniinsi gatummok xale'i anette. Ihukkaarem soor xibbii ontayyi Ba'aa'l hiraagaanii oono'o, keyye yo'o. Ee bikkina lam baa'l moolluwwa ebbakka'a matooma Ba'aa'l hiraagaan massita'a duttona; maarooma muransita'a haqqa tuubba'a ee haqqi hanenne issitona. Ihukkaarem giira xanqissoone. Anim la'm baa'l moora massaa ee'isa issoommo; giiram xanqisoommoyyo. Ee lasage Ba'aa'l hiraagaan ixxuwwi waa'a uunxitona. Anim Waa'a uunxoommo. Uunxato macceesaa ee kitimanne giira dilliisookkok ixxi hanqo'i Waa'a» yukko. Minaadab hundim sagara iimaa'aa ee sawwitenne iittamukkisa la'isukko. Ee lasage Eeliyaase Ba'aa'l hiraagaanina «Ki'nnuwwi dut ikkakko'i bikkina gaassitakka'a mat baa'l moora doo'llitakka'a duttakka'a ki'nnuwwi waa'a uunxehe. Ihukkaarem haqqanne giira xanqissakkotte» yukko. Ixxuwwim ixxuwwina uwwamu baa'l moora massita'a kitimta'a balli kolli afeebe'e Ba'aala uunxito'o. «Ba'aala! Hay macceese!» yitu'uuyyi shuutto'o. Ee gudisso'i kiti'm kululleetanne shimmishimmitu'uuyyi hayyaatto'o. Ihukkaarem matem dabachcham siiddo'oyyo. Samgud ballannem Eeliyaase «Ixxi waa'ayyonnihe? Sagara iimmaa'llakka'a shuuttakku'uuyyi uunxehe; ayyi la'ukko ixxo kee'mmaalli sawwit amadaatette ihookko. Te'im chireena firaat ihookko. Te'im qee'l uulla maraat ihookko. Te'im diriiraakkoolas baqaa'immi hasisookko» yukkuuyyi naacamukko. Ee bikkina oo qophpha'n hiraagaan sagara iimaa'lla'a shuuttu'uuyyi ixxuwwi losa'nnisam ixxuwwiinsi xiig dunameebe'e ixxuwwi orachco billawwinnee bisa'innee madissam hee'llo'o. Samgud balli higaa lasonne maaroo'i balli kitima hincaa'akkam amman afeebe'e hiraago woccu'uuyyi uunxitam hee'llo'o. Ihona bagaan matem dabachcham siiddo'oyyo; sagarim macceesamukkoyyo. Ee lasage Eeliyaas minaadab hundinam «I kolli hinci'llehe» yukko. Minaadabim ixxi kululleetanne wixxito'o. Ixxim Waa'ina kitima hincaa'akkam gindamaa hee'u beyyo dabaraa baxukko. Ee lasage Eelyaase Waa'i «Isra'eela» yaa summa fissu Yaaqoobiinsi qaranto'i tomminnee lam sulli summinnee tommoo lam kinaa massukko. Ee kinnewwinnem Waa'i summina kiti'm beyyo baxukko. Ee kit'm beyyi kululleetannem tommoo soor liitir wo'oo amadoo bare hinukko. Ee kiti'm beyyonnem haqqa dahaa ee baa'l moo'l maara qaamafeettuwwanne muransaa haqqi hanenne issaa lasage «Soor jaalo'i wo'o kiti'm hanennee haqqi hanennee dunnehe» yukko. Ixxuwwim ee'isam issito'o. «Odim eddehe» yukko. Ixxuwwim ee'isam issito'o. Ixxim «Kabadem odim mataagge eddehe» yukko. Ixxuwwim ee'isam issito'o. Wo'im ee kiti'm beyyi kululleetanne daadukko; barennem wo'mmukko. Maaro'i balli kitima hincaa'akkam ammanenne hiraagaanchi Eeliyaas kit'm beyyo hincaa «Abirihaamina, Yisaaqinaa Yaaqoobinaa Moollanni Waa'a! At Isra'eelina Waa'i ikkittisa, anim ki awwaadaanchi ihummisaa anim ka hundam issummok ki saga'llisannetti ihukkisaa at ki gagim la'ise. I Waa'aa, ku minaadab at hanqo'i Waa'i ikkittisaa ixxuwwi wodanom ki kollonne dabattittok atetti ikkittisaa laqqona hay at iina dabachcha uwwe. I Moollanna, i uunxato macceese!» yaa uunxukko. Ee lasage Waa'i giira asse'ukko. Oo giirim kitima, haqqa, kinaa buchchaa shokkiisukko. Barenne hee'u wo'om gokkisukko. Minaadabim eekka moo'llo'i ammanenne illillaachcha uullanne ubba'a maalaltu'uuyyi «Waa'i Moollanna! Hanqo'i Moollanni Waa'i xale'i ixxotte!» yito'o. Eeliyaasim «Ba'aa'l hiraagaaniinsi mat manchim xoroobee'isa amaddehe» yaa ijaajukko. Minaadabim hundam amaddo'o. Eeliyaasim Qiishoo'n daajje awwonsaa massaa ee beyyonne hundam dussiisukko. Ee lasage Eeliyaase adil Aki'aabina «Kaba mattaa itee agee; mashka'oomim an kaba kee'mmaalli xee'nnek gug hincukkisa macceesoommuulla» yukko. Aki'aab iteenaa ageenaa marukkuuyyi Eeliyaas Qarmeeloos duunanne firukko. Ee beyyonnem ixxi lamem gurubbi lambe'ennem horoore aagisaa uullanne qubbukko. Eeliyaasim ixxi awwaadaanchina «Mattaa dambalaq kolli moo'e» yukko. Ixxi awwaadaanchim moo'aa daba'llaa «Matem luwwim iina moo'amukkoyyo» yukko. Eeliyaas ixxi awwaadaanchi lamar kore daba'llamaa moo'ona» ijaajukko. Ixxi awwaadaanchim lama'l korenne daba'llaa «Mat manchi angi oobbiinsi lophphoobee'i winxo'i duub dambalaqiinsi firukkuuyyi moo'ummo» yaa kurukko. Eeliyaasim «Adil Aki'aab beyyo mattaa ‹Xeen amadoo'n qaqqissaa ki faraxxi gaarre'enne saa'llitaa ki mine daba'llitaa mare› yitaa kure» yaa ijaajukko. Hofqax ammaniinsi losonne iiman heemachchi duubinne ifiisamukko. Hafachchim hafachchimmaa kee'mmaalli xeenim ga'nnimmaa asheerukko. Adil Aki'aabim faraxxi gaarre'enne saa'llaa Yizra'eela marukko. Waa'i Malaayyim Eeliyaasenne dillukko. Eeliyaasim ixxi eddechcha ixxi lamadonne xishshaa'aa lade'aa Yizra'eela aagakkam gooc afeebe'e Aki'aab illagenne higaa geeram hee'ukko. Eeliyaas baxu baxo hundamii Baa'aa'l hiraagaano hundam bisa'inne shisiisukkisaa adil Aki'aab ixxi meentichchona Eelzaabeelena kurukko. Ee bikkina ise «Ee hiraagaanonne issittoka anim soodo kido'i ammanenne keesenne issoo'n urumlas waa'uwwi eese eehid issona» yita'a Eeliyaas beyyo asso asse'llo'o. Eeliyaasim baddu bikkina ixxi gaga gatixxeena ixxi awwaadaanchinne maqirem Yihuxxi uullanne hee'oo Bersaabe'i beero'o marukko. Ixxi awwaadaanchom ee beyyonne uraa «Eeliyaase mat balli googo uulli udma'anne taakke'ukko. Ee lasage ixxi taakko uullisaa mat kitkixxi haqqi hafanne afuurukko. Ixxim leho mixaa «I Waa'a, kabada'i iina ihookko. Gaassi iyyanno'iinsi lophphoommoyyo i foore massee!» yaa Waa'a uunxukko. Ee lasage ee kitkixxi haqqichchi lugummonne laphaa hekkukkisam diriir massukko. Dangonnem Waa'i asse'amaanchi waaraa orachcho nakkaa ki'isaa «Ki'llaa ite!» yukko. Eeliyaasim ki'aa ixxi kululleeta moo'u ammanenne ki'n iibbanne saramaakkoo daabbo'ii mat harachchi wo'ii ixxi horoo'l baganne afuuraakkoo moo'aa itaahii agaahii lasonne daba'llaa iinse'ukko. Waa'i asse'amaanchim daba'llaa waaraa «Mattoo goog qee'l ihu bikkina ki'llaa ite» yaa la'mmaaggem ki'isukko. Eeliyaasim ki'aa ee hurbaata itukko; wo'om agukko. Ee hurbaata itaa siidu malaayyinne keesammi Siina'i duun afeebe'e sor ballaa sor hiimoo hundam taakke'ukko. Eekke'e afukkisam mat daawwa'anne aagaa ee beyyonne garukko. Dangonnem Waa'i «Eeliyaasa! Ka beyyonne maha issitoollaa?» yaa xa'mmukko. Eeliyaasim «Hundam xantoo gogoxxi Moollanni Waa'a! An ki Waa'oo'm bikkina lobakata to'achchaa hundi ammanem xale'i kiina awwaadoommo. Ihukkaarem Isra'ee'l minaadab kiinninne maqire aaggo'i hidi'l sagara gindito'ookko. Kiina kitima hincaa'akkam beyyom iiqansito'ookko. Ki hiraagaanom shito'ookko. Oono'o, kaba xale'i an gataammo. Eesem ihukkaare shiteena hassamuulla» yaa dabarukko. Waa'im Eeliyaasina «Yoonti beyyiinsi fittaa duu'n ludonne i illagenne uulle» yukko. Ee lasage Waa'i ixxi gadaninne higukko. Waa'i illagennem kee'mmaalli hafachchi duunnuwwa diqansukko; kinneewwam iiqansukko. Ihukkaarem Waa'i ee hafachchi woronne hee'ukkoyyo. Ee hafachchiinsi lasage uulli huxe'ukko. Ihukkaarem Waa'i ee uulli huxechchi lambe'enne hee'ukkoyyo. Uulli huxe'aa lasonne giir waarukko; ihukkaarem ee gii'l woronne Waa'i hee'ukkoyyo. Giiriinsi lasonne hoffi sagar macceesamukko. Eeliyaas ee hoffi sagara macceesu ammanenne ille weyyakkinne ifiisukko. Daawwa'i goocanne firaa uullukko. Ee beyyonne uullukkisam «Eeliyaasa, ka beyyonne maha issitoolla?» yoo sagara macceesukko. Eeliyaasim «Hundam xantoo gogoxxi Moollanni Waa'a! An ki Waa'oo'm bikkina lobakata to'achchaa hundi ammanem xale'i kiina awwaadoommo. Ihukkaarem Isra'ee'l minaadab kiinninne maqire aaggo'i hidi'l sagara gindito'ookko. Kiina kitima hincaa'akkam beyyom iiqansito'ookko. Ki hiraagaanom shito'ookko. Oono'o, kaba xale'i an gataammo. Eesem ihukkaare shiteena hassamuulla» yaa dabarukko. Waa'im «Damaasqo'i beero'i gadanonne hee'oo udma'i uulla daba'llitaa mare. Eekke'e affaa lasage Azaaheela doo'llitaa Sooriy uulli adil isse. Niimiish beeto Iyyu'u doo'llitaa Isra'ee'l minaadabina adil isse. Aabeelmahool beero'iinsetti ihu Yoosaafaax beeto Elsa'am doo'llitaa ki beyyonne hiraagaanchi ihoo'isa isse. Azaa'ee'l angiinsi xoraa gatoo ayyi manchom Iyyu'u shookko. Iyyu'i angiinsi gataa xorookkokam Eelsa'a shookko. Ihona bagaan Ba'aalina otossitobee'i keenoo ee misilluwwam suunqitobee'i lamar kum mannaa Isra'ee'l uullanne i gagina gatisoommo» yukko. Eeliyaase ee beyyiinsi maraa lasage Yoosaafaax beet Eelsa'a lam mirgo'uwwa qaashaa abuullukkuuyyi edamukko. Ixxenne maqirem tomminnee mat qaash mirgo'uwwinnee abuullitam dawwaan hee'llo'o. Eelsa'am tommaanninnee la'm qaashinnee abuullam hee'ukko. Eeliyaasim ixxi weyyakka sheelataa Eelsa'anne eddeesukko. Ee ammanenne Eelsa'a ixxi mirgo'uwwa uraa Eeliyaas kollonne geeraa «Iyyannaa iyyummaa suunqaa xummanne hee'llehe yaa lasage keese awwonoommisa isse» yukko. Eeliyaasim «Ihona; mattaa waare an hooroommoyyo» yaa dabarukko. Ee lasage Eelsa'a ixxeka mat qaash mirgo'uwwa durukko. Qaashaa hee'u gaanjaqqa giiraa ee maara saraa mannina hincaa'ukko. Ixxuwwim itto'o; ee lasage Eeliyaase awwonaa maraa ixxena hara'mmaanchi ihukko. Sooriy uulli adil Benhadaad ixxi gaadaano hundam wixxaa'ukko. Lobakat faradii faraxxi gaarre'uwwii yoo sadinnee lam adilluwwinnee hara'mmamaa gaadimminne Isra'ee'l lob beero'i ihu Samaare'e kibbaa qasukko. Ee lasage adil Benhadaad ee beero'onne yoo Isra'ee'l adil Aki'aabina «Beenhadaad ‹Ki birii worqii, kiikki danaam meentii qoxxaalli oosii iihane› yoolla» yita'a kuttam asse'amaano asse'aakko. Aki'aabim «I moollanni ikkitti adila, yittaannonne hundannem iittamoommo. Anii iina yoo luwwi hundimii kiihane» yaa dabarukko. Hofqax ammaniinsi lasonne oo asse'amaan adil Benhadaadiinsi mulli ijaajom amadda'a odim Aki'aab beyyo waatto'o. Ijaajoomim «Ki biraa worqaa, Meentoo oosoo iina uwwitona asse'aa hee'ummo. Kabadem odim ki adilla'n mininnee ki uulli gassaa'n mininnee hee'oo awwaadoo mu'uta hundam haassa'a amadda'a waattona i gaaxxi awwonsaano asse'oommo. Ixxuwwim sooxxi dara kido'i ammanenne eekke'e affamo» yoohan hee'ukko. Isra'ee'l adil Aki'aabim ixxi uulli lommanna hundam weeshaa «Ku manchi woshsha hinkaa'nna hasuda'e moo'llehe! Kanniinsi illageen i meentoo i oosoo, i biraa worqaa uwwona xa'mmukkaare uwweena iittamaa hee'ummo» yukko. Lommannii minaadabii hundim «Ixxi yoo luwwina hundinam beyyo uwwititte; ixxi woshsham aa'llitte» yito'o. Ee bikkina Aki'aab Benhadaad asse'amaanina «I moollanni ihu adilina ‹Kanniinsi illageen xa'mmitti xa'mmichchanne iittamaa hee'ummo. Ihukkaarem kaba la'm xa'mmichchanne iittamoommoyyo yaakko yitakka'a kullehe» yukko. Asse'amaanim daba'llita'a matta'a ee dabachcha kutto'o. Benhadaadim «Samaare'i beero'i buchchiinsi mat mat fooccim afeena xanoobee'i qax gaadaano amadaa ki hanenne waarumbeelas waa'uwwi eese shitona!» yoo baddishshi asso asse'ukko. Adil Aki'aabim waatto'i asse'amaanina «Hanqo'i gaadaanchi diraamimmi hasisookkok o'l kaachchiinsi lasonnette bagaan oriinsi illageeneyyo yitakka'a adil Beenhadaadina kullehe» yaa dabarukko. Benhadaadii ixxena o'l besh ikko'i mulli adilluwwii ixxuwwi gaqqi dukkaannuwwannetti ikka'a agu'uuyyim Aki'aab assi afukko. Ee ammanenne Benhadaad ee beero'o qasseena ixxi manni guddona ijaajukko. Ee bikkina ixxuwwi qaqqissa'a gudda'a beyyi beyyo amaddo'o. Ee ammanenne mat hiraagaanchi adil Aki'aab beyyo hincaa «Waa'i ‹Benhadaad gogoxxi dutoo'm bikkina baddititte; an kaballa ka gogota kaa'lloo'isa issoommo; atim an Waa'i ihummisa eehanninne laqqootto› yoolla» yukko. Aki'aabim «Gaadina ayyi illag ihon?» yaa xa'mmukko. Hiraagaanchim «Waa'i ‹uulli gassaanina ijaajantam harde'i gaadaan illag ikka'a gaaddona› yoolla» yukko. Adilim «Orancha gaassaa ayyi asheerona» yaa xa'mmukko. Hiraagaanchim «At ki gagim asheere» yukko. Ee bikkina adil xale'i lam xibbee sadee lam gaadaano uulli gassaanina ijaajantam harde'uwwa weeshukko; ee lasonne lamar kum ihoo qax Isra'ee'l gaadaano weeshukko. Benhadaadii ixxena o'l besh ikko'i sadii lam adilluwwii ixxuwwi gaqqi dukkaa'n woronne agginne dimbita'a yo'aannonne samgud ballanne Isra'ee'l o'l gogot fitto'o. Oo harde'i gaadaanim illagenne ikka'a higga'a awwonsito'o. Benhadaad asse'aa hee'u shaashshaanim «Mat gaadaa'n gaalchi Samaare'iinsi firaa kid waaroolla» yita'a kutto'o. Benhadaadim «Ee waattam keeno orinam ihukko xummina waatto'aarem foorinnem amaddakka'a i beyyo eebbehe» yaa ijaajukko. Oo harde'i gaadaanim Isra'ee'l gadaa'n illagenne ikka'a fitto'o. Annannichchim orameena firu diinakkichcho shukko. Sooriy uulli mannim fiikkaa gibukko. Isra'ee'l mannim hollansimma asheetto'o; ihukkaarem Benhadaad farashshonne saa'llaa hofqax faradaaninne maqirem gibaa xorukko. Adil Aki'aabim oramaa diina'i faradoo faraxxi gaarre'uwwaa qeefadukko. Sooriy uulli mannannem kee'mmaalli hawwo afisimminne ixxuwwa kaa'ukko. Ee lasage hiraagaanchi adil Aki'aab illage hincaa «Daba'llitaa mattaa ki gaadaano qooroominne qoxxaallisa issitaa orina gudise. Mashka'oomim Sooriy adil waaroo hiinchina qaraax agananne la'mmekam qaseena waarookko» yukko. Sooriy uulli adil Benhadaadina gassaan ikko'i awwaadaan «Isra'ee'l minaadaphphi waa'uwwi duu'n waa'uwwa; ixxuwwi neese kaa'lleena xanto'ok ee bikkinatte. Ihukkaarem neese ixxuwwinne biir uullanne orammumlas kaa'nnoommo. Ee bikkina kaba sadee lamem adilluwwam daannoomiinsi dilliissaa ixxuwwi bikkenne mulli ijaajaano doo'lle. Kanniinsi illageen beeddukkaanni qax lobakat gogota, ee'isam gaassi qax faradoo faraxxi gaarre'uwwaa gudise. Ee lasage Isra'ee'l minaadaba biir uullanne orammaa kaa'nnoommo» yito'o. Adil Benhadaadim ixxuwwi sogitanonne iittamukko. Eekka isseenam murte'ukko. Ee bikkina waaroo qaraax agananne ixxi gaadaano matissaa wixxaa'aa Isra'ee'l minaadaba qasimmina Afeeq beero'o marukko. Isra'ee'l minaadabim weeshanta'a hasisoo gooqqi hurbaataa o'l mu'utaa amaxxita'a orina guddo'o; ixxuwwim o'l beyyo gaadda'a lam beyyonne baxxanta'a Sooriy manni illagenne yoo uullanne wixxito'o. Isra'ee'l gaadaa'n xigim uulli hundannem wo'mmu Sooriy o'l gogoxxi xiginne akeekamoohaare lam beyyonne baxxansakko'i fella'i hoffi allaachcha labam hee'ukko. Mat Waa'i hiraagaanchi adil Aki'aab beyyo hincaa «Waa'i ‹Sooriy uulli manni «Waa'i duu'n Waa'a bagaan biir uulli Waa'ayyo» yito'ookko; ee bikkina an ixxuwwika ee hore'em lobakat ihu gogota at kaa'lloo'isa issoommo. Atii ki minaadabim an Waa'i ihummisa laqqakkamo› yoolla» yukko. Sooriy mannii Isra'ee'l mannii kolli kollinnem gudda'a wiiddanto'isam lamar balli afeebe'e afuutto'o. Lama'l ballannem orancha asheetta'a Isra'ee'l manni ee balla mat xibbi kum Sooriy manna shito'o. Lehiinsi gatto'i Sooriy manni gibba'a Afeeq beero'o aaggo'o. Ee beyyonnem lamiyyee lamar kumaa ihoo qax gaadaa'n hanenne ee beero'i oot toroshamaa hanenne ubaa beeddito'o. Benhadaadim xoraa ee beero'o aagaa mat mi'nnaannonne firkixxi kollinne yoo koshanne maaxamukko. Ixxi gassaan ikko'i ixxi uulli daannuwwim ixxi kolli hincita'a «Isra'ee'l adilluwwi haafitam keen ikko'isa macceensaammo. Ee bikkina ni lamadonne kichchechchi eddechcha lade'nnaah, ni gaanjennem usa issaqinaahii Isra'ee'l adi'l beyyo mallaahii urato niina issona xa'mminoommisa isse. Ayyi la'ukko ixxi keese shoo'n gatiseena xanookko» yito'o. Ee lasage ixxuwwi lamadonne kichchechchi eddechcha lade'llahii ixxuwwi gaanjennem usa ka'llita'ahii adil Aki'aab beyyo matta'a «Ki awwaadaanchi Benhadaad haafita issitaa ixxo uttoo'isina uunxoolla» yito'o. Aki'aabim «Ixxi kabad afeebe'em foorinne yoohonnihe? Eehid ihaakkoolas erane! Ka lasage ixxi iina iyyabbaayyisa!» yaa dabarukko. Adil Beenhadaad gassaan haafixxi asso egetta'a hee'llo'i bikkina Aki'aab «Iyyabbaayyo» yukkuuyyi macceesso'i ammanenne eekka aa'lla'a at yittisam Benhadaad hanqinam kiyyabbaayyo!» yito'o. Aki'aabim «I beyyo eebbehe!» yukko. Benhadaadim waaru ammanenne Aki'aab ixxi faraxxi gaarre'enne aagaa afuurona Benhadaada weeshukko. Benhadaadim Aki'aabina «Iyyanni kiyyanniisi massu beero'uwwa kiina dabaroommo. Iyyanni Samaare'enne issukkisa atim Damaasqo'onne ki gagina dadda'llitoo beyyo baxaqqiteena xantooto» yukko. Aki'aabim «Eehannata'i ka woshshanne sagara aangumlas anim keese xummam fatakkoommo» yaa dabarukko. Aki'aabim ee'isinne ixxenne maqire sagara aagaa iittamu bikkina xummam marona fatakukko. Hiraagaa'n moolliinsi ihoo mat hiraagaanchi Waa'i ijaajinne ixxi beshichchi hee'u mulli hiraagaanchina «Eese aphphise» yukko. Ihukkaarem oo hiraagaanchi ixxo aphphisimma sabukko. Ee bikkina oo hiraagaanchi «Waa'i ijaajo wonshimma sabbitti bikkina iinniinsi annanni ikkaa mattittuuyyim mat hobbichchi keese shookko» yukko. Yukkisam ixxeensi annanni ihaa marukkuuyyi hobbichchi dangonnem siidaa shukko. Ee lasage oo hiraagaanchi mulli mancho siidaa ixxi beyyonne hincaa «Eese aphphise» yukko. Oo manchim «Ihona» yaa malaayyaamisa aphphisaa madoo'isa issukko. Oo hiraagaanchim ixxo la'akkambee'isa horoorenne eddechcha gunguu'llukko. Eeheen higoo Isra'ee'l adila egereena mat gooqqi gammalanne maraa uullukko. Ixxim adil ixxi gadaninne higukkuuyyi weeshaa «Adila, an o'l lambe'enne oramummuuyyi hee'ummo. Ee ammanem gaadaaniinsi mat diina'i kolliinsi mat mancho qeefadaa eebaa ‹Ka mancho egere; ihukkaarem ixxi xorukkaa'lleensi ixxi bikkenne at letootto te'im sadee soor kiilo'o ihoo kin bira guzumo'antootto› yukko. Ihukkaarem iina bax lophphaa kidii ekkidii daba'llamumuuyyim oo manchi xoraa marukko» yukko. Adilim «Ki gaganne oogattitti bikkina at guzumo'anchi hasisookko» yukko. Oo hiraagaanchim illenne gunguu'llaa hee'u eddechcha qaqqisaa hoorukko. Adilim oo manchi hiraagaa'n moolliinsi mat ihukkisa ee ammanem la'ukko. Ee lasage oo hiraagaanchi adilina «Waa'i ‹An lehoo'isina oogatummi mancho xoroo'isa issitti bikkina at ixxi bikkenne lehinne guzumo'antootto. Ki gaadaanim ee manchi gaadaan xotta'a mattamisa issito'i bikkina beedditamo› yoolla» yukko. Adilim kichche'imminnee nadadimminnee Samaare'enne hee'oo ixxi adilla'n mine daba'llaa marukko. Naabuute yakkam mat manchi hee'ukko. Ixxim Yizra'eelanne hee'oo adil Aki'aab adilla'n mi'n gadanonne woyina kaasakkam ixxi gaqqi uulli hee'ukko. Mat balla Aki'aab Naabuutena «Ki woyi'n kaashshi beyyo iina uwwe. I adilla'n mi'n gadanonnetti ihu bikkina i duubbi kaashshi beyyi issaqqeena hasaammo. Ixxi bikkennem eehanniinsi e'lloo woyi'n beyyo kiina uwwoommo. Biteesseena hassittaarem e'lloo er bito miqoommo» yukko. Naabuutem «Ka woyi'n beyyo lago aa'ummok gaassi iyyanno'iinsette; kiina uwwoommisa eekka Waa'im eeboone» yaa dabarukko. Yizra'ee'l Naabuute «Gaassi iyyanno'iinsi lago aa'ummi uulla fatakoommoyyo» yu bikkina Ahaab nadadaa qacqacukkuuyyi ixxi mine aagukko. Ixxi illem gortanni kollonne dabaraa ara'anne dufukko. Hurbaatam itimma sabukko. Ixxi meentichcho Eelzaabeelem ixxi gadano hincita'a «Keese ka'isa qaciqacaa'u luwwi maruwwa? Hurbaata ittoobee'ekdu mahinatte?» yita'a xa'mmito'o. Ixxim «Eese qacqacaa'ukkok Yizra'ee'l Naabuute iina dabaraakkoo dabachcha. Oohim ixxeka woyina kaasu beyyo bitaa'eena te'im hasulas e'lloo beyyo uwweena ixxo xa'mmummaare ee woyina kaasu beyyo ‹Ma'isinnem kiina uwwoommoyyo› yaa eese nadadiisaakko» yaa dabarukko. Eelzaabeelem «Eehannah at Isra'ee'l adil ikkaa hee'llittuuyyi ka'isa ihimmi kiina hasisoohonnihe? Kaba ki'llaa liiranchinne hurbaata ite; wo'om age. Yizra'ee'l Naabuuteka woyi'n kaashshi beyyo siiddoo'isa issoommo» yito'o. Ee lasage ise assikura kitaabba'a Aki'aab summinne mare'e issita'a ixxi koobo'inne koobbo'o. Ee askuram Naabuute hee'oo Yizra'ee'l daannuwwi beyyoo lommanni beyyoo asse'llo. Oo askurim «Mat balli soommano alallaattehe; minaadabam mat beyyonne wixxi'llehe. Naabuutenam minaadaphphi lambe'enne lombi beyyo uwwehe. ‹Waa'aa adilaa duumaakko› yitam lam qophpha'n naqaashshuwwa gudissehe; ee lasage Naabuute beero'iinsi tochchonne fissitakka'a kininne aphphissakka'a shi'llehe» yoohan hee'ukko. Yizra'ee'l daannuwwii lommannii Eelzaabeele ijaajjo'oka issito'o. Mat balli soommanom alallaatto'o; minaadabam mateeyyanne wixxaa'llo'o. Naabuutenam lombi beyyo uwwito'o. Lamem qophpha'n naqaashuwwim ki'lla'a «Naabuut Waa'aa adilaa duumaakko» yita'a minaadaphphi illagenne qophphano naqqasso'o. Ee bikkina ee beero'iinsi tochchonne fissita'a kininne aphphissa'a shito'o. Shita'a lasage «Naabuute kininne aphphisamaa lehaakko» yita'a Eelzaabeel beyyo asse'llo'o. Asse'amaan kurukkisam Eelzaabeele Aki'aabina «Yizra'ee'l Naabuute lehaakko; ee bikkina kaba mattaa kiina biteesimma sabu woyi'n kaashshi beyyo ki gaqqi uulli issitaa aa'lle» yito'o. Aki'aabim Naabuuteka woyina kaasakkam beyyo lago aa'eena ee ammanem ki'aa marukko. Ee lasage Waa'i Tiisbe'i uulli hiraagaanchi Eeliyaasena «Samaare'i uulli adil Aki'aab beyyo mare. Ixxim Naabuut woyi'n kaashshi hee'u beyyo lago aa'ukkuuyyi affootto. An Waa'i ixxena ‹Naabuute shittok hoffe'ukkaare kaba ixxi uulla lago aa'lleenannihe?› yoommoka kure. Odim ‹Wish Naabuut xiiga aallu beyyonne ee'isam ki xiigam aallookko!› yoolla» yukko. Aki'aabim Eeliyaasa moo'u ammanenne «I diinakkichcho! Eese siiddituullannihe?» yukko. Eeliyaasim «Eeyya, siidaammo. Waa'i illagenne jor ihu luwwi hundam issimmina ki gaga baaxiilina biteessaatto. Ee bikkina Waa'i ‹Oono'o, ki hanenne boobana eeboommo; keesem i illagiinsi bi'isoommo. Ki abaroosiinsim goona hundam agishshom ihukko wolabichcho hundam guulloommo. Ki abaroosim Naabaax beet adil Yoorbi'aam abaroosisaa Akiiy beet adil Baa'ish abaroosisaa bichchina gudaakkoohan ihookko. Mashka'oomim Isra'ee'l minaadab baaxiilo baxoo'isa issimminne eese quuqissaatto› yoolla. Eelzaabeelinam ‹Iseka leesha Yizra'ee'l beero'onne wish itookko› yoolla. Ki qarmanniinsi beero'i woronne lehookkoka ayyi manchom wish itookko. Hax uullanne lehookkokam ammar itookko» yaa dabarukko. Waa'i illagenne jor baxo baximminne ixxi gaga baaxiilina higisaa biteesu Aki'aabi'nnookkok ayyim hee'ukkoyyo. Ee hundam issukkok ixxi meentichcho Eelzaabeele ixxo jollanne awwonsito'i bikkinatte. Aki'aab issu jor baxiinsi hundiinsim lophphookkok Isra'ee'l minaadab ixxuwwi gaqqi uulla aaggo'i ammane Waa'i ixxuwwi illagiinsi xoqolaa hollu Amoore'i manni qophpha'n waa'anne otossimma. Eeliyaas ee woshsha wocaa guullaa lasonne Aki'aab ixxi gaqqi eddechcha dereeraahii sheelaxxaahii uunjaa lasage xiddi eddechcha edde'ukko. Hurbaatam itimma sabukko. Kichchechchi eddechcha edde'ukkisam iinse'am hee'ukko. Taakke'ukkuuyyim lobakata kichche'immiinsi ki'ukkok illi heemachchaa moo'amam hee'ukko. Waa'im hiraagaanchi Eeliyaasina «Aki'aab i illagenne ixxi gaga hinkid hofiisukda'e moo'llitonnihe? Ixxi i illaggenne ixxi gaga hoffiisu bikkina foorinne hee'ukkuuyyi ixxonne boobana eeboommoyyo. Ihukkaarem ka yamamu jor luwwa ixxi abaroosanne ihoo'isa issoommok ixxi beet heechchi doollennette» yukko. Eehanniinsi ki'isaa yoo sas hiinchina Isra'ee'llaannonnee Sooriy lambe'ennee hee'u or uullaa xummi leeraa hee'ukko. Ihukkaarem saxxi hiinchonne Yihuxxi adil Yoosaafix Isra'ee'l adil Aki'aaba moo'eena marukko. Aki'aab ixxi gassaan ikko'i gassaanina «Gala'aadanne yoo Raamoota Sooriy adiliinsi daballeena matem mikmikaatom issinumbee'ek mahinatte? Raamoot ni uullana'e!» yukko. Yoosaafixinam «Raamoota qansoommisina iinninne maqire gaaddoohonnihe?» yaa xa'mmukko. Yoosaafixim «An ki'isame; i minaadabim ki minaadaphphisame; i faradim ki faraxxisame. Ihukkaarem gaassitaa Waa'i doo'lla xa'mme» yaa dabarukko. Ee bikkina Aki'aab Soor xiibbe ihoo qox hiraagaano weeshaa «Raamoota maraa qasonnii uro?» yaa xa'mmukko. Ixxuwwim «Mattaa qase; Moollannim kiina kaachcha uwwookko» yita'a dabatto'o. Ihukkaarem Yoosaafix «Waa'ika doo'lla xa'mminoommi mulli hiraagaanchi bee'ennihe?» yaa xa'mmukko. Aki'aabim «Yimila'i beet Mikiyaasa yakkam mulli hiraagaanchi yookko. Ihukkaarem an ixxo ha'yyoombee'ane. Mashka'oomim ixxi iina ayyi ammanem ihuta'n joriinsi bagaan er hiraago hiraagaa la'ooyyo» yaa dabarukko. Yoosaafixim «Adil eehid yimmi hasisooyyo» yukko. Ee lasage Aki'aab ixxi adilla'n mi'n gassaaniinsi mato weeshaa «Mikkiyaasa hassaa qaqqisaa keyye waaroo'isa isse» yukko. Ee ammane Isra'ee'llekii Yihuxxekii lamem adilluwwim ixxuwwi adilla'n eddechcha edde'lla'a Samaare'i beero'i ooxxi gooc gadanonne yoo wixxixxi beyyonne ixxuwwi gaqqi adilla'n barcumanne afuutta'a hee'llo'o. Ee ammane hiraagaan hundim adilluwwi illagenne hiraago woccam hee'llo'o. Ee hiraagaaniinsim mat hee'u Kanaa'in beet Sedeeqiyaas, Xaariinsi buudduwwa baxaa amadaa Aki'aabina «Waa'i ‹Xaariinsi baxamu ka buudduwwinne Sooriy manna qassaa guullitaa kaa'llootto› yoolla» yukko. Mulli hiraagaanim ixxi wocukkoka bakkiissa'a «Raamootanne gaade; Waa'i ki anganne higisaa uwwoo bikkina kaa'llootto» yito'o. Mikkiyaasa weesheena maraa hee'u asse'amaanchim ixxena «Mulli hiraagaan hundichchim mat sagarinne adil Aki'aab kaa'oohan ihukkisa hiraaggo'ookko. Ee bikkina atim ixxuwwisam yitoo'isina keese uunxoommo» yukko. Ihukkaarem Mikkiyaas «An Waa'i iina caakkisookkoka xale'e wocoomman ihukkisa hee'oo Waa'i summinne hide'oommo!» yaa dabarukko. Mikkiyaas adil Aki'aab illaggenne hincukkaare adil «Mikkiyaasa, Adil Yoosaafixii anii Raamoota mallaa qansonnii ullo?» yaa xa'mmukko. Mikkiyaasim «Gaaddaa qase hanqo'isam kaa'llootto; Waa'im kiina kaachcha uwwookko» yaa dabarukko. Ihukkaarem Aki'aab «At Waa'i summinne Hiraaqqi woshsha iina woccoohaare hanqo'i woshsha woce, yaa an kiina mee'i ammane kuroommo?» yukko. Mikkiyaasim «Isra'ee'l minaadab hundim allaaraan bee'i gereebbisa duunnuwwanne binnito'oo moo'ummo. Waa'im ‹Ka minaadabina awwonsaan bee'e. Ee bikkina hundim ixxi gaqqi mine xummanne daba'llona› yaakko» yaa dabarukko. Aki'aabim Yoosaafixina an kiina «Ixxi i bikkina hundi ammanem joriinsi bagaan er hiraaqqi sagara wocooyyo yaa hee'ummoyyonnihe?» yukko. Mikkiyaasim «Oono'o, Waa'i yoo woshsha macceese! Waa'i iimanenne yoo ixxi adilla'n barcumanne afuuraa ixxi asse'amaanim ixxi makkinnee qeddinnee uullito'ookkoka moo'ummo. Waa'im ‹Aki'aab Raamoota maraa ee beyyonne lehona ixxo huushiseena xanookkok ayyette?› yukko. Ixxi asse'amaaniinsi mat mat woshsha hincaa'oohaare mullek odim mulli woshsham hincaa'am hee'ukko. Ihukkaarem lasaanchonne mat ayyaan Waa'i illage hincaa ‹An huushanseena xanoommo› yukko. Waa'im ‹Hinkid issitaa huushisseena xantootto?› yukko. Oo ayyaanim ‹Maraa Aki'aab hiraagaan hundim qophphano woccamisa issoommo› yaa dabarukko. Waa'im ‹Eehid ihukkaa'lleensi mattaa hushise; eehid issimmi kiina xanamookko› yaakko» yukko. Mikkiyaasim «Oono'o, Waa'i ka ki hiraagaa'n suumenne hundaannonnem qophpha'n ayyaana issaakko. Ki hanennem Waa'i hawwo eebeena murte'aakko!» yukko. Ee lasage kani'aan beet Sedeeqiyaas Mikkiyaas kolli hincaa oobo'inne aphphisaa «Hinki ammaniinsette ku Waa'i ayyaan eese uraa higaa keese atoorassukkok?» yukko. Mikkiyaasim «Duubbonne yoo koshanne mattaa maaxamtoo ammane moo'llootto» yaa dabarukko. Ee ammanenne adil Aki'aab gaaxxi awwonsaaniinsi matina «Mikkiyaasa amade! Ka beero'i gassaanchi Amoon beyyoo adi'l beet ihu Yoo'aash beyyoo masse. Anim xummanne daba'lleembe'i afeebe'e karaxxi minenne aagisakka'a gogaalli injeeraa wo'oo xale'e uwwakku'uuyyi afuuroo'isa issakamisina i summinne kure» yaa ijaajukko. Mikkiyaasim «At xumminne daba'llittaa'lleensi Waa'i i kollinne wocukkoyyo yimma!» yukko. Odim sagara shiqaa'aa «Ka beyyonne yoontakke'i minaadab hundim an wocummoka hundam qoossitakka'a macceessehe!» yukko. Ee lasage Isra'ee'l adil Aki'aabii Yihuxxi adil Yoosaafixii gala'aaxxi uullanne yoo Raamoot beero'o qasseena gaaddo'o. Aki'aabim Yoosaafixina «Orina malleena ki'nnoommi ammane an mulli mancho labaa moo'ameena mulli eddechcha edde'oommo. Ihukkaarem at adilla'n eddechcha edde'e» yukko. Ee bikkina Isra'ee'l adil Aki'aab mulli eddechcha edde'aa ixxi gagooma la'isoobee'isa ihaa gaadukko. Sooriy adil «Isra'ee'l adila Aki'aaba annanni issitakka'a qassehe bagaan mulli manna matom qassakkotte» yaa sadinnee lam faraxxi gaarre'uwwinnee oramoo gaaxxi awwonsaano ijaajaa hee'ukko. Ee bikkina adil Yoosaafixa moo'llo'i ammanenne Isra'ee'l adila labu bikkina ixxo qasseena kibbito'o. Ihukkaarem laarukkuuyyi macceesso'i ammanenne ixxi Isra'ee'l adil ihubee'isa qoossita'a ixxo qassoo'nnim utto'o. Ihukkaarem dongonnem mat Sooriy gaadaanchi xiyya tokkosaa adil Aki'aaba o'l eddechchi edamoo beyyinne qasukko. Adil Aki'aabim faraxxi gaarre'e ushe'oohaannina «An mada aa'aammo! Ee bikkina ka faraxxi gaarre'e laso dabattaa ka qasanchi beyyiinsi tochchonne fisse!» yaa ijaajukko. Or iibbamu ammanenne adil Aki'aab Sooriy manni illagenne faraxxi gaarre'enne bakke'aa hee'ukko. Madiinsi firoo xiigim ee faraxxi gaarre'enne dunamaa hee'ukko. Ee ayyaamom maaro'i ballanne lehukko. Eelliinchi aageena hofqax ammanim gataakkoohaannonne «Manni annannichchim ixxi gaqqi uullaa ixxi gaqqi beero'oo daba'llaa marona» yoo ijaaj Isra'ee'l gaadaa'n awwonsaaniinsi kuramukko. Adil Aki'aab eehido'isinne lehukko. Ixxi leesham Samaare'e massakka'a waammakko'o. Ixxi afuuraa hee'u faraxxi gaarre'em Samaare'enne yoo wo'i delbanne aanshakko'o. Waa'i wocaa hee'u hiraaqqisannem ixxi xiiga wish aallukko. Odim ee wo'i delbannem buubbeesaan aanshaqqito'o. Adil Aki'aab issu luwwi hundim adilla'n mine daane'i inqinne wereeggisaa baxukkisii baxisu beero'uwwi duuha'ii hundim Isra'ee'l Adilluwwi Aganni Kitaabanne kitaabamaakko. Adil Aki'aab lehu bikkina ixxi beyyonne ixxi beet Akaaziyaas adil ihukko. Isra'ee'l adil Aki'aab adillano aa'u Soo'l hiinchonne Asa'i beet Yoosaafix Yihuxxi adil ihukko. Ixxim ixxek umur sadee onti hiinchoo ihaakkoohaannonne adillano aa'aa lamiyyee onti hiinchoo Yerusaaleemanne afuuraa gassukko. Ixxi amam Azuubaa yakkamotan ikka'a Shiiliih landichchotte hee'llo'o. Yoosaafix ixxeensi illageen hee'u Asa'asa Waa'i illagenne eran ihu luwwa hundam issukko. Ihukkaarem Waa'a laqqambee'i minaadab otossitam beyyo gindukkoyyo. Ee bikkina oo minaadab ee beyyuwwanne kitima hincaa'immaa aduruusa wiriissimmaa utto'oyyi hee'llo'o. Yoosaafixim Isra'ee'l adilinne iittamaa hee'am hee'ukko. Yoosaafix issu luwwii oranne moo'isu geedoommanii hundim Yihuxxi Adilluwwi Aganni Kitaabanne kitaabamaakko. Ixxi anni Asa'i adilla'n doolliinsi ki'isaa gatu keeno Waa'a laqqambee'i minaadab otossitam beyyonne goon gooninne meentim meentinne saa'llam goonaa meentoo hundam bi'isukko. Ee doollenne Eedoo'm uullina ixxi gaqqi adil hee'ukkoyyo. Eehanniinsi ki'ukkok Yihuxxi adil doo'llu gassaan gassam hee'ukko. Adil Yoosaafix Cambalaqanne matta'a Oofiraa yakkam beyyiinsi worqa eebbam markabbuwwa baxisaa hee'ukko. Ihukkaarem oo markabbuwwi Eexiyoon Gaabiiraa yakkam beyyonne iiqamukko bagaan mareena xanukkoyyo. Ee lasage Isra'ee'l adil Akaaziyaas ixxi markaba ushe'llam keen Yoosaafix markaba ushe'llam keeninne maqire baxxamisina sawwite hincaa'aa hee'ukko. Ihukkaarem Yoosaafix ixxeka sawwite aa'ukkoyyo. Adil Yoosaafix ixxi anno'isam lehukko. Daawiit beero'onne hee'oo adilluwwa waammakkam beyyonne waammamukko. Ixxi beyyonnem ixxi beet Yooraam adil ihukko. Yihuxxi Adil Yoosaafix Adil ihu tommonnee lama'l hiinchonnee Aki'aab beet Akaaziyaas Isra'ee'l adil ihukko. Ixxi heechchi beyyom Samaare'i beero'onnette issaa lam hiincho gassukko. Ixxim ixxi anni Aki'aabika, ixxi ama Eelzaabeelekaa ee'isam Isra'ee'l minaadab hundam baaxiilonne awwonsu adil Yoorbi'aamikaa jor kobi'llato awwonaa Waa'i illagenne baaxiilo baxukko. Ixxeensi illageen hee'u ixxi annisam Ba'aala yakkam qophpha'n waa'ina otossimminnee awwaadimminnee Isra'ee'l Moollanni Waa'a quuqisukko. Isra'ee'l adil Aki'aab lehaa lasage Moo'aaphphi minaadab Isra'ee'l minaadabina ijaajancha sabbo'o. Ee ammane Isra'ee'l adil Akaaziyaas Samaare'enne yoo adila'n minenne yoo fooqiinsi ubaa aphphixxaa xissaa hee'ukko. Ixxim «An ka jabbiinsi gatoomada'e gatoommoyda'e Filisxee'm uullanne Eekiroo'n beero'i waa'a Bi'eelzeebula xa'mmitakka'a waallehe» yaa manna asse'ukko. Ihukkaarem Waa'i asse'amaanchi Teesbi'i uulli Eeliyaasina «Ki'llaa Samaare'i adil Akaaziyaas asse'u asse'amaaninne mattaa edantaa ‹Eekiroo'n waa'a Bii'eelzeebula xa'mmitakkeena mattakkamok Isra'ee'l uullanne Waa'i bee'e yitakka'attennihe?› yitaa xa'mme» yaa ijaajukko. Ee bikkina Waa'i ‹At letootto bagaan Fayye'llooyyo. Iinse'llitti ara'iinsim ki'llooyyo› yaakko› yi'llehe» yukko. Ee bikkina Eeliyaas Waa'i ixxo ijaajukkisa issukko. Asse'anto'i mannim adi'l beyyo daba'llita'a matto'o. Adilim «Mahina daba'llitakka'a waattakko'o?» yaa xa'mmukko. Ixxuwwim «Mat manchi niinninne googonne edamaa ‹ki'nnuwwa asse'u adi'l beyyo daba'llitakka'a mattakka'a Waa'i «Bi'eelzeebula yakkam Eeqaaroo'n waa'a xa'mmiteena manna asse'lloottok Isra'eelanne Waa'i bee'ukkaarennihe? ee bikkina at hanqinam letootto bagaan iinse'llitti ara'iinsi ki'llooyyo» yinaa kulloommisina neese ijaajukko» yito'o. Adilim «Ki'nnuwwi googonne siiddakko'i ka woshsha ki'nnuwwina kuru manchi hinkido'ane?» yaa ixxuwwa xa'mmukko. Ixxuwwim «Oo manchi diinaxxi oddiinsi baxamaakkoo eddechcha edde'aa ixxi lamado saqinne lade'aakkoohane» yita'a dabatto'o. Adilim «Ookka'i Eeliyaasatte!» yukko. Ee lasage adil mat gaaxxi awwonsaanchi ontayyi manninne maqire maraa Eeliyaasa amadaa waaroo'isina ijaajukko. Oo gaaxxi awwonsaanchim Eeliyaas mat duunanne afuuraakkoohaannonne siidaa «Kaa Waa'i mancho! Dillitaa ixxi beyyo waattoo'isina adil keese ijaajaakkoo» yukko. Eeliyaasim «An Waa'i manchi ihaammoohaa'lleensi iimaniinsi giir dillaa keesee ki ontayyem mannaa itona!» yukko. Ee ammanem giir iimaniinsi dillaa ee gaaxxi awwonsaanchoo ontayyem mannaa itukko. Adilim mulli gaaxxi awwonsaanchom ontayyi manninne maqire asse'ukko. Ixxim Eeliyaas beyyo maraa «Kaa Waa'i mancho! Qaqqisonne dillitaa waattoo'isina adil ijaajaakko» yukko. Eeliyaasim «An Waa'i manchi ihummaa'lleensi giir iimaniinsi dillaa keesee ki ontayyem mannaa itona!» yukko. Ee ammanem Waa'i giir gaaxxi awwonsaanchoo ontayyem mannaa itukko. Adilim saxxaagem mulli gaaxxi awwonsaanchom ontayyi manninne maqirem asse'ukko. Ihukkaarem oo gaaxxi awwonsaanchi duunanne firaa Eeliyaas illagenne guruphphaa «Waa'i mancho, iinaa iinninne maqire yo'i manninaa qishixxe. Lam gaaxxi awwonsaanoo ixxuwwinne maqire hee'llo'i keenoo iimaniinsi giir dillaa itaakko. Ihukkaarem iina at qishixxee» yukko. Ee ammanenne Waa'i asse'amaanchi Eeliyaasina «Ixxenne maqire mare; horem baddititte» yukko. Ee bikkina Eeliyaas ee gaaxxi awwonsaanchinne maqirem adi'l beyyo maraa «Waa'im ‹Isra'ee'l uullanne Waa'i bee'aannisa xigimminne Aqaaroo'n Waa'a Bii'eelzeebula xa'mmitamisina manna asse'llitti bikkina letootto bagaan gattooyyo› yaakko» yukko. Ee bikkina Waa'i Eeliyaas kollinne wocu saga'llisam Akaaziyaas lehukko. Akaaziyaasina goo'n oos hee'ubee'i bikkina ixxi beyyonne ixxi abbaayyi Yooraam adil ihukko. Oohim ihukkok Yoosaafix beet Yihooraam Yihudanne adil ihu la'm hiinchonnette hee'ukko. Adil Akaaziyaas baxu mulli baxxuwwi hundim Isra'ee'l Adilluwwi aganni kitaabanne kitaabamaakko. Waa'i Eeliyaasa hambu'llaminne iimane massoo amman afukkaare Eeliyaasii Eelsa'aa Gelgeliinsi ki'lla'a mattam hee'llo'o. Taakke'llu'uuyyi googonne Yo'aannonne Eeliyaas Elsa'ana «Oono'o, at ka beyyonne egere; an Beeteela maroommisina Waa'i asse'aakko» yukko. Ihukkaarem Eelsa'a «An hee'oo Waa'i summinne hide'oommo; an hore'em kiinniinsi annanni ihoommoyyo» yaa dabarukko. Ee bikkina maqirem Beeteela matto'o. Ee beyyonne hee'llam hiraagaan mateeyyoominne Eelsa'i beyyo matta'a «Waa'i kaballa ki Moollanna kiinniinsi annanni issaa massoohan ihukkisa laqqaahinnihe?» yita'a xa'mmito'o. Eelsa'am «Eeyya la'aammo; ihukkaarem sayi'llehe» yaa dabarukko. Ee lasage Eeliyaas Eelsa'ana «At ka beyyonne egere an Yaarko'o maroommisina Waa'i asse'aakko» yukko. Ihukkaarem Eelsa'a «An hee'oo Waa'i summinne hide'oommo; hore'em kiinniinsi annanni ihoommoyyo» yaa dabarukko. Ee bikkina maqirem Yaariko'o matto'o. Ee beyyonne hee'llam hiraagaan mateeyyoominne Eelsa'i beyyo matta'a «Waa'i kaballa ki moollanna kiinniinsi annanni iissaa massoo'isa laqqaahinnihe?» yita'a xa'mmito'o. Eelsa'am eeyya la'aammo ihukkaarem ki'nnuwwi sayi'llehe» yaa dabarukko. Ee lasage Eeliyaas Eelsa'ana «At ka beyyonne egere; an Yoordaanoos daajje maroommisina Waa'i asse'aakko» yukko. Ihukkaarem Eelsa'a «An hee'oo Waa'i summinne hide'oommo; hore'em kiinniinsi annanni ihoommoyyo» yaa dabarukko. Ee hiraagaaniinsim ontayyi ixxuwwa awwonta'a Yoordaanoosa matto'o; Eeliyaasii Eelsa'am Yoordaanoos daajji inqenne uullito'o. Odim oo ontayyem hiraagaanim qee'llita'a uullita'a hee'llo'o. Ee lasage Eeliyaas ixxi edde'aa hee'u kaabba sheelaxxaa xaaxaa wo'o aphphisukko. Oo wo'im lam beyyonne baxxamamukkaare Eeliyaasii Eelsa'aa gogaalli uullinne taakke'lla'a higgo'o. Ee beyyonnem Eeliyaas Eelsa'ana «An kiinniinsi massameena illageen kiina maha issona hassooda'e iina kure» yukko. Eelsa'am «Keese bikkoommisina xansiisoo ayyaana lam suume uwwe» yaa dabarukko. Eeliyaasim «Iina hincaa'llitti xa'mmichchi kee'mmaalla; ihukkaarem an kiinniinsi annanni ihaa iimane massamoommaare eese moo'llittaare ka iinniinsi xa'mmittoka siiddeena xantootto; ihukkaarem eese moo'llitbeelas siiddeena xantooyyo» yaa dabarukko. Ixxuwwim woccu'uuyyi taakke'llonam dangonnem gii'l faraxxi gaarre'uwwi ixxuwwi lambe'enne aagaa lamom annanni issukko. Eeliyaasim hambu'llaminne iimane massamukko. Eelsa'am eekka moo'aa «Iyyannaa! Iyyannaa! Isra'ee'l faraxxi gaarre'uwwaa faradaanoo» yaa Eeliyaas kolli moo'ukkuuyyi laarukko. Ee lasage Eeliyaase od moo'ukkoyyo. Eelsa'am lobakata kichche'u bikkina eddechcha deree'llukko. Ixxim Eeliyaasiinsi ubu kaabba uulliinsi ki'isukko. Ee lasage Yoordaanoos daajji inqenne maraa uullukko. Eeliyaasiinsi ubukkaare ki'isu kaabbinne ee daajji wo'o aphphisaa «Eeliyaas Moollanni Waa'a! Hannonnette?» yukko. Ee lasage la'mmekam aphphisu ammanenne oo daajji wo'i lam beyyonne foshokukkaare eeqidonne firukko. Yaarko'iinsi waatto'i ontayyem hiraagaanim ixxo moo'llo'i ammanenne «Eeliyaasanne dillaa hee'u ayyaa'n malaayyi Eelsa'anne usheexxaakko!» yito'o. Ixxuwwim ixxi kolli hincita'a otossita'a «Oono'o! Ka beyyonne ontayye inkoommi qoxxaalli manni yoommine; mallaa ki moollanna hansona; ayyi la'ukko Waa'i ayyaan ki'isaa massaa mat duu'n hanenne te'im mat cebbanne usheexisaa hee'ookko» yito'o. Eelsa'am «Marimmi hasisooyyo» yaa dabarukko. Ihukkaarem ixxuwwi xa'mmita'a hawwisso'aare hoogaa mattamisa issoo'isina dabaransita'a qoxxissa'a xa'mmito'o. Ontayyem mannim matta'a sas ayyaamo hundam Eeliyaasa hasso'o. Ihukkaarem siiddeena xanto'oyyo. Ee lasage Yaarko'onne ihaa ixxuwwa egeram hee'u Eelsa'i beyyo daba'llito'o. Eelsa'am «An mattakkotte yaa hee'ummoyyonnihe?» yukko. Hofqax mannim Yaarko'iinsi Eelsa'i beyyo waatta'a «Ni Moollanna at laqqoo'isam ku uulli danaamo; ihukkaarem wo'oom jor ihu bikkina ka uullanne yoo luwwi hundim misha uwwooyyo» yito'o. Eelsa'am «Buchchiinsi baxamu haareechchi harachchonne sooqido issitakka'a iina eebbehe» yaa ijaajukko. Ixxuwwim ixxi yukkisam issita'a eebbo'o. Ixxim ee wo'i bu'i beyyo maraa sooqido ee wo'onne issaa «Waa'i ka wo'o an fayyiisaammo; ka lasage lehina mashka'i ihooyyo. Uullim la'mmeka mish bee'an ihooyyo» yaa wocukko. Ee ammanniinsi ki'isaa Eelsa'a wocukkisam oo wo'i muccur ihukko. Eelsa'am ee beyyiinsi ki'aa Beeteela marukko. Marukkuuyyim oos ee beero'iinsi fitta'a «Ka booyyinnaamo fire! Ka booyyinnaamo fire!» yitu'uuyyi shuutto'o. Eelsa'am ixxi kululleeta xishshaa'aa moo'aa lasonne Waa'i summinne ee ooso qangukko. Ee lasage lam meenti dibba yakkam moochchi haqqoriinsi firaa ee oosiinsi soree lamoo muransaa urukko. Eelsa'am Qarmeeloos duunanne firukko. Ee beyyiinsi Samaare'e daba'llukko. Yihuxxi Adil Yoosaafix Adil ihu tommonnee sadeenti hiinchonnee Aki'aab beet Yooraam Isra'ee'l minaadabina adil ihaa ixxi heechchi beyyo Samaare'enne issaa tommoo lam hiinchoo gassukko. Ixxim baaxiilo baximminne Waa'a kichche'isukko. Ihukkaarem ixxi annisaa ixxi am Eelzaabeelisaa jor manchi hee'ukkoyyo. Ixxi anni baxisaa hee'u Ba'aalaa yakkam qophpha'n waa'ika misila bi'isukko. Ihukkaarem Naabaax beet Yoorbi'aam Isra'ee'l minaadaba huushisu baaxiilinne amadamukko bagaan eehanniinsi annanni iheena xanukkoyyo. Moo'aaphphi adil Meeshaa'i gereebba ho'lloohan hee'ukko. Ixxim hiinchina hiinchina mat xibbi kum geex gereebbi ambulluwwaa mat xibbi kum gereebbi ambulluwwi oddaa Isra'ee'l adilina gibiram hee'ukko. Ihukkaarem Isra'ee'l adil Aki'aab lehu ammanenne Moo'aaphphi adil Meeshaa'i Isra'ee'l minaadabanne bangujjaatinne ki'ukko. Ee ammanenne adil Yooraam qaqqisaa Samaare'iinsi firaa Isra'ee'l gaadaano hundam wixxaa'ukko. Yihuxxi adil Yoosaafix beyyom «Moo'aaphphi adil i hanenne bangujjaatinne ki'aakko; ixxenne oramoommi oranne iina haar'mmitaa qassoohonnihe?» yaa asse'ukko. Adil Yoosaafixim «Eeyya hara'mmoommo; eese ki'isam, i gaadaano ki gaadaa'nnisa, i faradom ki faraxxisa xiggeena xantootto» yukko. Ihukkaarem «Orina malloommi googoom hinkeenette?» yaa xa'mmukko. Adil Yooraam «Eedoo'm udma'anne yoo googinne malloommo» yaa dabarukko. Ee bikkina adil Yooraamii ee'isam Yihuxxekii Eedoo'm adilluwwii gaadina fitto'o. Lamar balla taakke'lla'a lasonne amaddo'i wo'i beeddukko. Gaadaaninaa mu'uta iyyoo diinatinaa wo'i ma'llichchim hee'ukkoyyo. Adil Yooraam «Waa'i neese sasem adilluwwam Moo'aaphphi adilina higisaa uwweenatte aayye!» yaa laarukko. Adil Yoosaafixim «Ixxenne inkaa Waa'a xa'mmeena xannoommisina ka beyyonne matem hiraagaanchim bee'ennihe?» yaa xa'mmukko. Adil Yooraam gaadaa'n ijaajaaniinsi mat «Kanniinsi illageen Eeliyaasina awwaadaanchi hee'u Saafaax beet Eelsa'a ka beyyonne yookko» yaa dabarukko. Adil Yoosaafixim «Ixxi hanqo'i hiraagaancho» yukko. Ee lasage sasem adilluwwim Eelsa'i beyyo matto'o. Eelsa'am Isra'ee'l adil Yooraamina «Iinaa kiinaa mah edanchi hee'aate? Kiyyannii kiyyummaa xa'mmitam hee'llo'i hiraagaano mattaa xa'mme» yukko. Adil Yooraam dabaraa «Ee'isayyo! Waa'i neese sasem adilluwwam Moo'aaphphi adilina higisaa uwweena weeshukko» yukko. Eelsa'am «An awwaadoommi hee'oo gogoxxi Moollanni Waa'i summinne hide'oommo. Kiina hara'mmeena waaru Yihuxxi adil Yoosaafix lombinaa yaate bagaan kiina maham issimmi hasisam hee'ukkoyyo. Kabadem diitta'a lelloo mancho i beyyo eebbehe» yukko. Diitta'a lelloo manchi lellimma amadukkaare Waa'i ayyaan Eelsa'anne dillaa «Waa'i ‹Ka gogaakkoo cebbi uullanne hundannem wo'i bare hinnehe. Xeenaa hafachchaa maham moo'llakkobee'aarem ku cebbi wo'inne wo'mmaakkoohan ihookko; ki'nnuwwii ki'nnuwwi diinatii hundim aggakkeena ihoo wo'o siiddakkamo› yoolla. Ihukkaarem kaka issimmi Waa'ina sholle'aalla; kanniinsim loboka ixxi Moo'aaphphi minaadaba kaa'llakkamisa issookko. Ixxuwwika Girbamaakkoo doo'l beero'uwwa hundam kaa'llakka'a amaddakkamo; ixxuwwika mishoo haqquwwa hundam muttakkamo; bu'uwwam ifiissakkamo; ixxuwwika harish abuulli beyyuwwam bi'issakka'a kina tuubbakkamo» yukko. La'm ayyaamo daram kitima hincaa'akkam amman afaakkoohaannonne Eedoo'm kollinne wo'i daadaa uullanne waaraa wo'mmukko. Moo'aaphphi minaadabim sasem adilluwwim qasseena waatto'isa macceesso'i ammanenne lommanniinsi woraadanne afeebe'e o'l mu'uta amaddeena xantam manni hundim weeccanta'a fitta'a beero'i tochchonne egetto'o. La'm balla soodaraar daram diriiriinsi baqita'a moo'llo'aare wo'onne caakkisoo eelliinchi laag xiiga labaa moo'amukko. Ee bikkina sagara iimaa'lla'a shuuttu'uuyyi «Kuk xiigayyonnihe! Sasem ni diina'ikim gaadaan ixxuwwina'i ixxuwwim du'llanta'a beeddito'ookko; ee bikkina bongona mallona» yaqqanto'o. Ihukkaarem ixxuwwi wiidda'n beyyo affo'i ammanenne Isra'ee'l gaadaan ki'lla'a qasimminne daba'llita'a gibbamisa issito'o. Ee lasage Isra'ee'l gaadaan Moo'aaphphi gaadaano qassa'a shita'a guullito'o. Ixxuwwi beero'uwwam bi'isso'o; harish uullannennem ixxuwwi hundim kina darabba'a tuubbo'o; wo'i bu'uwwa ifiisso'o; misha uwwoo haqquwwam mutto'o; lasaanchonnem ee uulli lob beero'i hee'u Qiiriheerees xale'i gatukko. Ee beero'om kina darabbam o'l manni kibbita'a qasso'o. Moo'aaphphi adil kaa'amukkisa la'u ammanenne bisa'a lade'llo'oo lamaar xibbi manna awwonsaa Eedoo'm adi'l kollinne xoreenaa yakukko; ihukkaare hore'em xanukkoyyo. Ee bikkina ixxi bikke adil ihimmi hasisoo won beeto ee beero'i ki'n ootanne Moo'aaphphi waa'ina kitim issaa hincaa'ukko. Isra'ee'l minaadabim ee woshsha shigigito'i bikkina ee beero'o fatakita'a ixxuwwi uulla daba'llita'a matto'o. Hiraagaa'n wixxixxi mateeyyoo'm woriinsette ihaakkoo manchi lehaakkoo mat meentichcho Eelsa'i beyyo waatta'a «I moollanna! I mi'n anni lehaakko; ixxim at laqqoo'isam Waa'a baddoo manchi hee'ukko. Ihukkaarem ee i manchina diinate liqaayye uwwaakkoo mat manchi ee bada'n bikkina iikka lam goo'n ooso massaa agid isseena hasaakko» yito'o. Eelsa'am «Eehannah an kiina maha issona hassootto? Ki minennem kiina mah yooda'e kure» yaa xa'mmukko. Isem «Iina ki awwaadaanchona mat hoffi harachchonne yoo zaytiinsi bagaan mullek ma'llichchim bee'e» yita'a dabatto'o. Eelsa'am «Ki olla'a mattaa siiddeena xantoo qaxa lobakat haralla aggiise. Ee lasage mine aaggaa ki gagannee ki oosonnee gooca afa'llaachcha xufe. Ee harachchiinsim zayta ee harallanne daballehe. Wo'mmu harallam haxonne fissitakku'uuyyi dissehe» yukko. Ee bikkina oo meentichcho ixxi beyyiinsi matta'a is hanennee oos hanennee u'llumma xuffo'o. Ee zayti hee'u harachchiinsi is oos hincaa'am hee'u harallanne hundannem wonshito'o. Ee harallanne hundannem wonshita'a lasonne «Mullek gatu haralli bee'ennihe?» yita'a xa'mmito'o. Is oosiinsim mat «Kuk lasaanchaneme» yaa dabarukko. Ee lasage oo zayti daadimma uullisukko. Isem daba'llita'a hiraagaanchi Eelsa'i beyyo matto'o. Ixxim «Kaba ka zayta biteessaa ki badano hundam miqe. Gatukkokam atii ki oosii awwaaxxehe» yukko. Mat balla Eelsa'a mat goddaanchi meentichcho hee'llam Suunaama yakkam beyyo marukko. Isem hurbaata itoo'isina weeshsho'o. Ee balliinsi ki'isaa ixxi Suunaama waaroo amman hundam is minenne hurbaata itam hee'ukko. Isem is manchina «Lobakat ammane ni mine waaroo ku manchi keesamaakkoo Waa'i manchi ihukkisa qoossaa la'aammo. Ee bikkina ni mi'n fooqanne mat beyyo gudinsaa ee beyyonne mat ara'a, mat xaraphpheeza, mat xaqashaa mat caakka dissakkam mu'utaa dissinona; ixxim neese moo'eena waaroo ammane hundam eekke'e usheexxookko» yito'o. Mat balla Eelsa'a daba'llaa Suunaama marukko. Ee ixxena gudu minem usheexxeena aagukko. Ixxena awwaadaanchi Giyaazina «Mattaa ee meentichcho keyye weeshe» yukko. Oo meentichchom waatto'aare Giyaazina «Ise niina issito'i er luwwi hundinam maha issona hassamda'e xa'mme. Ayyi la'ukko gaaxxi awwonsaanchina te'im adilina maraa kurimmi hasisoo luwwi hee'eena xanookko» yukko. Isem «I qarmanni lambe'enne ka beyyonne hee'ummuuyyi iina hawwisoo luwwi ma'lluwwim bee'e» yita'a dabatto'o. Eelsa'am Giyaazina «Eehannah an maha isseena xanoommo?» yaa xa'mmukko. Giyaazim «Isena qachchi bee'e; Is goonchim lommancho» yaa dabarukko. Eelsa'am keyye waattamisina kure» yaa ijaajukko. Isem waatta'a goocanne uullito'o. Eelsa'am «La'm maarage kido'i ammanenne goonchi beeto qaaphphitoott» yukko. Isem sagara iimaa'lla'a «I moollanna at Waa'i manchona'e hay ihoobee'i neeyyata at iina kuttitte» yito'o. Ihukkaarem oo meentichcho lam fooretti ikko'o; Eelsa'a kurukkisam ee hiinchina goonchi beeto qatto'o. Ciilichchim li'ukko. Hurbaaxxi mu'l agananne mat ayyaamo daranne oo beet hurbaata muroo manninne maqirem hurbaata murakkam beyyonne yoo ixxi anni beyyo marukko. Ixxim dangonnem «Horooree! Horooree!» yaa anni kolli daba'llaa laarukko. Annim mat awwaadaancho weeshaa «Ka ciila iyyitaa am beyyo masse» yaa ijaajukko. Oo awwaadaanchim ee ciila iyyaa massaa ixxi amana uwwukko. Ixxom ama balli kolli afeebe'e qaaphphito'oohaannonne is angannem lehaa xa'ukko. Ixxi leesham iimanenne fissita'a Eelsa'a iinse'oo ara'anne iinsiisso'o. Goocam afa'llaachcha xuffa'a daba'llita'a matto'o. Is manchom weeshsha'a «Mat awwaadaanchoo mat hallichchoo asse'e. Mashka'oomam hiraagaanchi Eelsa'i beyyo marimmi iina hasisaakko. Ee beyyiinsim qaqqisaa waaroommo» yito'o. Ihukkaarem is manchi «Ka balli usheexxaxxi ballayyo; te'im aga'n ugudayyo; eehannah at mahina mattoolla?» yukko. Isem «Hawwi bee'e; yummisa isse» yito'o. Isem hallichchonne koora issiissa'a lasage awwaadaanchina «Hallichchi xanu qax hundam geeroo'isa isse; an kiina kureembe'e qaphphaa taakke'ona uwwititte. Qaqqisaa taakke'oo'isa isse» yita'a ijaajjo'o. Isem ee beyyiinsi ki'lla'a Eelsa'a hee'u Qarmeeloos duuna fitto'o. Eelsa'am qee'llonne hee'llo'uuyyim ise ixxi beyyo waattu'uuyyi moo'aa ixxi awwaadaanchi Giyaazina «Moo'e, oo Suunaa'm meentichcho keyye waattamuulla! Qaqqissaa mattaa iseka, is manchikaa is beetikaa xummaato xa'mme» yukko. Isem Giyaazina «Neese hundim xumma» yita'a dabatto'o. Ihukkaarem Eelsa'i gadano hincita'a heeshita'a ixxi lokko amaddo'o. Ee ammanenne Giyaaz ise gafe'aa hooreena heele'ukko. Ihukkaarem Eelsa'a cawwitaa ure hinkaa'n u'n isenne afaada'e moo'llooyyonnihe? Waa'i is hawwi bikkina iina caakkisu luwwi bee'e» yukko. Isem «I Moollanna iina qachcho uwwitoo'isina an keese xa'mmaa hee'ummonnihe? ‹Ihoobee'i neeyyaxxi sagara iina uwwititte› yaa hee'ummoyyihe?» yito'o. Eelsa'am Giyaazina «Qaqqissaa lade'e; an sikke'oommi bicco amaddaa mare! Mat manchom xummaatisseena googonne uullititte; ayyi manchim keese xummaatisuta'n xummaatisseena ammane bi'issitte; qaqqissaa mattaa ka i bicco ciilichchi hanenne isse» yukko. Ihukkaarem ee ciilichchi ama Eelsa'ana «An hee'oo Waa'i summannee ki foorenne hide'oommo; hore'em keese uraa maroommoyyo» yito'o. Ee bikkina isenne maqirem mareena ki'ukko. Giyaazim ixxuwwiinsi gaassaa maraa Eelsa'i bicco ciil hanenne issukko. Ihukkaarem sagar te'im foor daba'llukkisa moo'isoo mare'i ma'llichchim moo'amukkoyyo. Ee bikkina daba'llaa maraa Eelsa'ana «Beet ki'ukkoyyo!» yukko. Eelsa'am afu ammanenne mullam oo beet yoo mine aagaa cii'l leesh ara'anne dufaakkoo moo'ukko. Ixxim mi'nneka gooca xufaa mullam Waa'a uunxukko. Ee lasage ee ciil leeshanne suume suumenne illem illenne angam anganne issaa laphphukko. Eelsa'am biddiqaa hanenne laphphukkisam ciilik orachchi iibbimma asheerukko. Eelsa'am ki'aa ee minenne ekkidii kidii daba'llamukko; odim daba'llaa ciil hanenne laphphukko. Oo beetim lamar kore haxxishshu yaa lasage illi fooqukko. Eelsa'am Giyaazina «Ka ciil ama weeshe» yukko. Isem waatta'a lasage Eelsa'a «Ki ciil oono'o!» yukko. Isem uullanne heeshita'a Eelsa'i lokkonne ubba'a ee lasage is ciila amaxxita'a matto'o. Ee uullanne hundoomannem sibaar hee'u mat doollenne Eelsa'a Gelgela daba'llaa waarukko. Ee beyyonnem hiraagaa'n wixxitenne losisukkuuyyi ixxi awwaadaanchina «Lob disxa kaassaa ixxuwwina woxa sare» yukko. Ee hiraagaaniinsim mat shaana laboo buyyuwwa feereena biira marukko. Ixxim haqqi woronne li'aakkoo qoo'm xuda siidukko. Iyyeena xanu qaxa lobakat buyya muraa eebukko. Oo eebu luwwi mada'e ihukkisa qoossaa la'oo'nnim muraa woxanne issukko. Oo hiraagaanim saramu woxa itteena duuqqo'i ammanenne «Ka woxanne shoo qaraar yookko!» yita'a Eelsa'i kolli laatto'o. Itteenam iittito'oyyo. Eelsa'am ixxuwwi qama uwwitamisina xa'mmaa ee disxanne issaa «Kaba woxa aa'llittuuyyi uwwe!» yaa ijaajukko. Ee ammanenne woxanne qaraaroo luwwi ma'lluwwim hee'ukkoyyo. Mulli ammanennem Ba'aalshaaliishaa yakkam beyyiinsi mat manchi hurbaata murakkam agananne luxxeka ganamu so'iinsi saramaakkoo lamiyyi xeffo'i daabbo'oo haareechchi hamaamaa Eelsa'ana amadaa waarukko. Eelsa'am «Hiraagaa'n wixxitina ittona uwwe» yaa awwaadaancho ijaajukko. Ihukkaarem oo awwaadaanchi «Kuk xibbi mannina ihoo laboohonnihe?» yaa xa'mmukko. Eelsa'am ittamisina hincaa'e; mashka'oomam itta'a goddimmi xale'i ihoo'n gatoo'isam Waa'i wocaakko» yukko. Ee bikkina awwaadaanchi hurbaata hincaa'ukko. Waa'i wocukkisam hundim itta'a goddita'a lasage hurbaat gatukko. Sooriy Minaadabina gaaxxi awwonsaanchi hee'u Ni'imaan Sooriy uulli adi'l illagenne lobakata lombaamoo la'amaakkoo gaaxxi awwonsaanchoo hee'ukko. Mashka'oomam Waa'i Ni'imaan kollinne Sooriy ulli gaadaanina kaachcha uwwaa hee'ukko. Ni'imaan la'amaakkoo gaadaanchi ihukkaarem oddomachchonne firoo baddisoo xissinne hawwam hee'ukko. Sooriy manni Isra'ee'l minaadabanne weeratto'i ammane mat gootto'i Isra'ee'l landichcho qeefadda'a massita'a hee'llo'o. Isem Ni'imaan meentichchona awwaaddam hee'llo'o. Mat ayyaamo is moollamana «I Moollanni Ni'imaan Samaare'enne yoo hiraagaanchi beyyo maruta'n eran hee'ukko. Mashka'oomim oo hiraagaanchi ka oddomachchonne yoo baddisoo xissiinsi fayyiiseena xanam hee'ukko» yito'o. Ni'imaanim maraa ka Isra'ee'l uulli landichchoonsi macceesu woshsha hundam adilina kurukko. Adilim «Ka assikitaaba amaddaa Isra'ee'l adi'l beyyo mare» yaa geegeesukko. Ee bikkina Ni'imaan 340 kilo'i kin bira, 69 kilo'i worqaa tommi kitti eddechchaa iyyiisaa marukko. Amadaa maru assim «Ka askitaaba amadaa waaroo Ni'imaana amadu jabbiinsi fayyiissoo'isina an ki beyyo asse'aammo» yoohan hee'ukko. Isra'ee'l adilim ee askitaaba qananaa'aa nadadaa eddechcha dereerukko; ixxi sagaram iimaa'aa «Sooriy adil an ka mancho fayyiisona i beyyo mahina asse'ukko? An sheenaa gatiseenaa xanoommi malaayyi yoo Waa'a labisaatennihe? Hanqinam ku adil eesenne jora hasukkisa caakkisaa moo'isoohane!» yukko. Hiraagaanchi Eelsa'am ee woshsha macceesu ammanenne ixxi beyyo manna asse'aa «Mahina u'nnantoolla? Ee mancho i beyyo waarona asse'e; ixxim Isra'eelanne hiraagaanchi yoo'isa la'ookko» yukko. Ee bikkina Ni'imaan faraxxi gaarre'enne afuuraa maraa Eelsa'i mi'n goocanne afaa uullukko. Eelsa'am mat ixxi awwaadaanchina «Mattaa Ni'imaanina Yoordaanoos daajjenne lamaraagge aaggaa aanshaqqe ki jabbiinsim fayye'llaa muccuttootto› yitaa ka manchina kure» yaa asse'ukko. Ihukkaarem Ni'imaan quuqaa ixxi uulla daba'llaa mareena ki'ukko. Ixxim «An hanqinam ixxi i beyyo waaraa i gadanonne uullaa ixxi Moollanni Waa'ika summa weeshaa ixxi anginnem amadaa ka oddomachchonne firoo baddisoo jabbiinsi eese fayyiisoo labisaa hee'ummo. Wo'ina, wo'inat ihukkaalleensa'i Isra'ee'l uullanne yo'i daajjuwwii'nsi i uullanne Damaasqo'onne siidantam Abaanii Faarfaarii e'llitamoyyonnihe? Ka'isa ihoo'isa la'ummita'n eekeenonne aanshaqqaa muccuram hee'ummoyyonnihe!» yaa quuqaa ixxi uulla daba'llaa mareena ki'ukko. Ni'imaan awwaadaanim ixxi kolli hincita'a «Ni moollanna, ku hiraagaanchi mulli kee'mmaalli luwwa issitoo'isina ijaajuta'n issitam hee'llitto. Eehannah hiraagaanchi keese ijaajukkisanne aanshaqqitaa jabbiinsi fayye'immina kiina kee'mmoo luwwi maha?» yito'o. Ee bikkina Ni'imaan Yoordaanoos daajje dillaa Waa'i manchi Eelsa'a ijaajukkisanne lamar kore aagaa aanshaqqukko. Ixxi oddomachchi jabbiinsim guullaa muccurukko. Ixxi orachchim ciilluwwi orachchisa haareechchi ihaa guullaa fayye'ukko. Ee lasage ixxi awwonaaninne maqirem Waa'i manchi Eelsa'i beyyo daba'llaa waaraa ixxi illagenne uullaa «Isra'ee'l Waa'iinsi bagaan heer uullanne mulli Waa'i bee'isa an kaba la'aammo. Ee bikkina i Moollanna hay ka an uwwoommi luwwa aa'e» yukko. Eelsa'am «Ka an awwaadoommi Waa'i summinne hide'oommo. Ma'llichchom aa'oommoyyo» yaa dabarukko. Ni'imaan ixxi uwwoo luwwa aa'oo'isina qoxxisaa uunxukkaarem Eelsa'a aa'imma sabukko. Ee bikkina Ni'imaan «An uwwoommi luwwa iinniinsi aa'lloobeelas lam baqullanne iyyiisaa massoommi qax buchcha amaxxaa maroommisa isse; mashka'oomam kabadiinsi ki'isaa xale'i Waa'inatte bagaan mulli qophpha'n Waa'uwwina shokkiisakka'a hincaa'akkam kitimaa mulli kitimaa hore'em hincaa'oommoyyo. Ihukkaarem i uulli adila awwonaa Riimoona yakkam Sooriy uulli waa'ina otossakkam mine aagumta'nnii otossumta'nnim Waa'i iina haafihona xale'i ee woshsha uunxoommo; hanqinam iina ki awwaadaanchina uraammoo yookko» yukko. Eelsa'am «Xummanne mare» yukko. Ni'imaanim «Xummanne hee'llehe» yaa marukko. Ixxim hoffi qaxa qee'llaa marukkisam Waa'i manchi Eelsa'ana awwaadaanchi ihu Giyaaz «I moollanni ma'lluwwam miqisoo'nnim Ni'imaana geegeesaakko. Oo Sooriy uulli manchi ixxena uwwu luwwa aa'immi hasisam hee'ukko. An hee'oo Waa'i summinne hide'oommo; an qaqqisaa geerummuuyyi maraa ixxeensi mat luwwa siixximmi hasisookko» yaa ixxi wodanonne sawwukko. Ee bikkina Giyaaz Ni'imaana laseesukko. Ni'imaanim laso daba'llaa mat manchi ixxo laseesaa geeraa waarukkuuyyi moo'aa faraxxi gaarre'iinsi dillaa «Maruwwa xumminam waattaahinnihe?» yaa xa'mmukko. Giyaazim «Waarummoka'i xumminateme. Ihukkaarem i moollanni duunaam Efree'm uullanne hee'llam hiraagaa'n wixxitiinsi lam manni dangonnem koyyinano waatto'i bikkina sas kum biraa lam kitti eddechchaa ixxuwwina uwwitoo'isina kurona ki beyyo eese asse'aakko» yaa dabarukko. Ni'imaanim «Eehid ihukkaa'lleensi 68 kilo'i kin bira uwwoommo» yaa uunxukko. Eehid yaa 68 kilo'i kin biraa lam kitti eddechchinne maqirem gonoonanne wonshaa lam kitti eddehchchinne maqirem lam awwaadaanonne amadiisaa Giyaaziinsi higga'a illagenne mattamisa issukko. Eelsa'a hee'oo duuna affo'i ammanenne Giyaaz ee lamem gonoonam aa'aa mine aagisukko. Ee lasage Ni'imaan awwaadaano geegeesaa mine daba'llaa aagaa ixxi moollanni Eelsa'i illagenne uullukko. «Kabad afeebe'e hannonne hee'llitto?» yaa xa'mmukko. Giyaazim «I moollanna, an hannom marummoyyo» yaa dabarukko. Eelsa'am «Oo manchi keese atoorasseena faraxxi gaarre'iinsi dillukkuuyyi an Keesammi Ayyaaninne kiinninne maqire hee'ummoyyonnihe? Ku amman diinatee eddechchaa, weeraa woyi'n kaashsha kaasakkam beyyoo, gereebbaa laroo te'im awwaadaano aa'immina kuk ammanennihe? Ee bikkina oono'o Ni'imaan oddomachchonne yoo baddisoo jabbi kiinniinsii ki shumo'iinsii heer heerinam annanni ihooyyo» yukko. Ee lasage Giyaaz Eelsa'i beyyiinsi firukko; ixxi orachchim baddisoo jabbinne baraxxisa qadaallaa hee'ukko. Hiraagaa'n wixxitim Eelsa'ina oono'o «Neese ki illagenne hee'nnoommi beyyi xuqqaakko. Yoordaanoos daajje dillinaa haqqa mullaa neese hee'nnoommi mine banxoommisa isse» yito'o. Eelsa'am «Ihona mallehe» yukko. Hiraagaaniinsi mat Eelsa'a maqire maroo'isina xa'mmukko. Eelsa'am ixxuwwi xa'mmichchanne iittamukko. Ixxuwwinne maqirem marukko. Ixxuwwim Yoordaanoos daajje affa'a lasage haqqa murimma asheetto'o. Ixxuwwiinsim mat manchi haqqa murukuuyyim dangonnem haqqiinsi firaa meesaan wo'onne ubukko. Ixxim sagara iimaa'aa «I moollanna, kaba an maha iho? Meesaan aggiishsha eebaammoohane» yaa laarukko. Eelsa'am «Hinka'i beyyonnette ubukkok? Yaa xa'mmukko. Oo manchim meesaan ubu beyyo moo'isu ammanenne Eelsa'a mat haqqichcho muraa wo'onne darabukkaare meesaan chabbukko. Ee lasage Eelsa'a «Fissitaa masse» yukko. Oo manchim anga asse'aa fissukko. Ee ammane Sooriy adil Isra'eelinne oramam hee'ukko. Ixxim gaaxxi awwonsaaninne a'llamaa wiiddantam beyyo doo'llukko. Waa'i manchim «Sooriy uulli gogot eeheen dillito'oo bikkina ee kollinne higgoobee'isa ege'lle» yaa Isra'ee'l adi'l beyyo asse'ukko. Ee bikkina Isra'ee'l adil oo Waa'i manchi kuru beyyi hundam shaashshisukko; Eelsa'am Isra'ee'l adil eehido'i beyyuwwiinsi ege'llona edaa, edaa kuram hee'ukko. Ee bikkina ki'ukkok Sooriy uulli adil lobakata gancarukko. Ixxi gaaxxi awwonsaanom weeshaa «Ni lambe'iinsi Isra'ee'l adilina ni woshsha massaa kurookkok ayyette?» yaa xa'mmukko. Ixxuwwiinsim mat «Adila! Ni lambe'iinsi kaka issookkok ayyim bee'e; Isra'ee'l uullanne hee'ukkisam ki ara'anne ikkaa woccoo woshsham ihukkaare hundam Isra'ee'l adilina kuroo Eelsa'a yakkam hiraagaancho» yaa dabarukko. Sooriy adilim «Ixxi yoo beyyo hassehe; anim ixxo manna asse'aa amadoommo» yukko. Eelsa'am Dootaananne yoo'isa kurakko'o. Ee bikkina adil faradinnee faraxxi gaarre'uwwinnee maqire dut gogota ee beyyo asse'ukko. Ixxuwwim hiimonne waatta'a ee beero'o kibbito'o. Ee Waa'i manchi awwaadaanchi daram ki'aa biira firoohaare dut gogot faradinnee faraxxi gaarre'innee ee beero'o kibbaakkoo moo'ukko. Oo awwaadaanchim «I moollanna, aayye! Neese maha issinummaare e'llookko?» yaa xa'mmukko. Eelsa'am «Niinninne maqire yo'i keen ixxuwwinne maqire yo'i keeniinsi lophphitam bikkina baddititte!» yukko. Ee lasage Elsa'a «Waa'a! Moo'eena xanoo'isina ixxi ille fooqaa'e» yaa uunxukko. Waa'im ee awwaadaanchika ille fooqoo'ukkaare gii'l faradii gii'l faraxxi gaarre'uwwii Eelsa'i kululleetanne duunanne wo'mmaakkoo moo'ukko. Sooriy uulli mannim duuniinsi dillita'a ixxi beyyo waattu'uuyyi Eelsa'a «Ixxuwwika ille qooqise!» yaa Waa'a uunxukko. Ee bikkina Waa'im ixxuwwi ille qooqisukko. Ee lasage Eelsa'a ixxuwwi kolli hincaa «Googo huushantakko'ookko; ki'nnuwwi hassakkam beero'i kaneyyo; ki'nnuwwi hassakkam manchi beyyo an awwonsoommo; eese awwonnehe» yaa Samaare'i beero'i afeebe'e massukko. Ee beero'o aagga'a lasage Eelsa'a «Waa'a! Moo'llamisina ka mannika ille fooqaa'e» yaa uunxukko. Waa'im ixxuwwi ille fooqaa'ukko. Ee ammanenne ixxuwwi Samaare'i beero'i woronne yo'isa laqqo'o. Isra'ee'l adilim ka manna moo'aa «I moollanna, ka manna shihonnihe? Shihonnihe?» yaa Eelsa'a xa'mmukko. Ixxim «Shititte! Kakeena'i uttaa ki bagadinnee ki xiyyinnee qeefaddi keenom shimmi hasisooyyo. Kaba ixxuwwina ittam luwwaa aggam luwwaa uwwe. Itta'atii agga'atii lasonne ixxuwwi moollanni beyyo mattona» yukko. Ee bikkina Isra'ee'l adil ixxuwwina lobakat maadda gudisukko. Itta'ahii agga'ahii lasagem Sooriy uulli adi'l beyyo dabaraa asse'ukko. Ee ammaniinsi ki'isaa Sooriy uulli manni Isra'ee'l minaadaba qasimma utto'o. Ee lasage Sooriy uulli adil Beenihaadaad ixxena yoo gaadaano hundam Isra'ee'l minaadabanne gaadisimminne Samaare'i beero'o kibbukko. Ee mashka'inne Samaare'i beero'onne kee'mmaalli sibaarii qaanne'ii ihu bikkina mat hallichchi horoor sadeentayyi kin birina, lam xibbi giraama ihoo handare'i cirim onti kin birina biteesamam hee'ukko. Mat balla Isra'ee'l adil ee beero'i ki'n ooxxi hanenne daba'llamukkuuyyi mat meentichcho is sagara iimaa'lla'a «Adila, hay iina hara'mme» yita'a laatto'o. Adilim «Waa'i kiina hara'mmeena hasubeelas an kiina hinkido'i hara'mmato isseena xanoommo? Aras te'im woyi'n diqaas iina yookkoka labissaatennihe? Ihona bagaan ki hawwi maruchcho?» yaa xa'mmukko. Isem «Ku meentichcho ‹Kaballa ki ciila intona, soodo odim i ciila intoommo› yita'a sawwite hincaa'llo'o. Ee bikkina i ciila sallaa intummo. La'm dara odim ‹Ki ciila intona eebe› yaa xa'mmummo. Ihukkaarem ise maaxxo'o» yita'a dabatto'o. Adilim eekka macceesu ammanenne ixxeka eddechcha kichchechchinne dereerukko. Ki'n ooxxi hanenne uullaa hee'u bikkina ee ammane ixxi gadanonne uullita'a hee'llo'i manni adil ixxi eddechchi worinne kichchechchi eddechcha edde'aakkoo moo'llo'o. Adilim sagara iimaa'aa «Eelliinchi kaballa aagoo'n illageen Safaax beet Eelsa'ik horoor muramoo'n garulas Waa'i eese lehinne guzumo'ona!» yaa wocukko. Ee ammanchom Eelsa'a amadaa worona mat mancho asse'ukko. Ee ammane Eelsa'a ixxo moo'lleena waatto'oo hofqax lommanninne maqirem minenne hee'ukko. Adi'l asse'amaanchi afeena illageenim Eelsa'a ee lommannina «Oo foore shaanchi eese shisiiseena mat mancho asse'aakko; ixxi keyye afoohaare gooca xuffehe; woro aagona uwwitakkotte; adilim ixxo awwonaa waaroolla» yukko. Eelsa'a ee lommanninne woconam asse'amaanchi afukko; adilim dangonne waaraa «Ka hawwo neesenne eebukkok Waa'a! Eehannah ka lasage an Waa'iinsi egeroommi luwwi maha?» yukko. Eelsa'am «Waa'i yookkoka macceese! Soodo kido'i ammanenne Samaare'i beero'onne sas kilo'i doo'l arasa te'im loh kilo'i so'o mat kin birina bitaa'akkamo» yaa dabarukko. Ee ammanenne adilina hincixxi gassaanchi ihu ixxi awwaadaanchi Waa'i manchi Eelsa'ana «Waa'i ixxi gagoomim iima'n gooccuwwa fooqaa'aa hurbaata xee'nnisa ga'nnisuta'nnim kuk hore'em iheena xanooyyo!» yaa malanchinne wocukko. Eelsa'am «Ee hurbaata ki illinne moo'llootto! Ihukkaarem eehannika ma'lluwwam duuqqooyyo» yukko. Ixxuwwi oddomachchonne baddisoo jabbi yoo soor manchi Samaare'i beero'i goociinsi biireen hee'llo'o. Ixxuwwina'i ixxuwwim «Leneembe'i afeebe'e ka beyyonne mahina afuulloomane? Beero'o aagimmi niina maham awwaadooyyo; eekke'e aangumlas sibaarinne lenoommo. Ka beyyonne afuullummaarem lehiinsi gantoommoyyo. Ee bikkina Sooriy gaadaan wiiddanta'a yo'i beyyo mallaa anga uwwinona; ixxuwwi neese shitobeelas lehiinsi gantoommo; shito'aarem lenoommo» yaqqanto'o. Ee lasage uulli hiimeena ihaakkoohaannonne Sooriy gaadaan wiiddanto'i beyyo matto'o. Ee beyyo affamaare ee wiiddananne ayyim hee'ukkoyyo. Mashka'oomim Waa'i Sooriy uulli gaadaanina faradinnee faraxxi gaarre'innee waaraakkoo lobakat gogoxxi sagara macceesisaa hee'u bikkina ixxuwwina'i ixxuwwim ‹Oono'o Isra'ee'l adil neese qaseena Hiite'ikkaa Gibxi adilluwwaa bitaa'aa waaraakko› yaqqanto'o. Ee bikkina ee balla uulli hiimukkisam Sooriy gogot ixxuwwika dukkaannuwwa, farado, hallaa wiiddanta'a hee'llo'i beyyoo hundam utta'a ixxuwwi foorina gibba'a hee'llo'o. Oo soorem manchim Sooriy gaadaa'n wiidda'n gadano affa'a mat dukkaa'n woro aaggo'o. Ee beyyonnem siiddo'i luwwi hundam itta'atii agga'atii bira, worqaa eddechchaa amadda'a matta'a maaxxo'o. Odim daba'llita'a mulli dukkaa'n worom aagga'a ee'isam issito'o. Ee lasage ixxuwwina'i ixxuwwim «Neese er baxo banxummoyyo. Oono'o, kaballi lophphaakkoo mishiraachchi balla. Ka danaam aganna maanxaa gatisimmi niina hasisooyyo. Ka er woshsha kulloo'n soodeebe'e afuullummaare neessenne hawwi afookko. Ee bikkina kaba mallaa adi'l gaaxxi awwonsaanina kullona!» yaqqanto'o. Ee lasage oo manni Sooriy uulli gaadaa'n wiidda'n beyyiinsi ki'lla'a Samaare'i uulla daba'llita'a matto'o. Ee beyyo affo'isam ee beero'i gooca egeraano weeshsha'a «Neese Sooriy gaadaa'n wiidda'n beyyo mallaa hee'nnummo. Ihukkaarem ee wiiddananne matem manchim te'im macceesamoo sagarim bee'e. Faradii hallii karamukkisam yookko. Dukkaannuwwim Sooriy gaadaan utta'a matto'i bikkina diihaakko» yita'a kutto'o. Oo gooca egettam waardiyyuwwi ee woshsha la'amoo'isa issito'i bikkina woshshoom adi'l gassi min afeebe'e macceesamukko. Oo ammanim hiim hee'ukko. Ihukkaarem adil iinse'u beyyiinsi ki'aa ixxi gassaanina «Sooriy gaadaa'n sawwite an ki'nnuwwina kuroommo. Neese sibaallummisa laqqo'i bikkina ‹Hurbaata hasseena fittam ammane foorinnem ixxuwwa qeefandoommo; ixxuwwi beero'om matem hawwi bee'em aangoommo› yita'a hax uullanne maaxamteena ixxuwwi wiiddaniinsi fitto'ookko» yukko. Ee gassaaniinsi mat «Hofqax mannim ka beero'onne gatu faraxxeka onto amadda'a ka woshsha xassitona asse'nnona; ixxuwwi leto'aarem leto'ok keyyi gatu mulli Isra'eelim lehoo'isame. Ee bikkina oo manni matta'a ee duuha'a xassita'a waattona» yaa sawwite hincaa'ukko. Ee bikkina lam faraxxi gaarre'uwwa faradinnem doo'llito'o. Adilim «Mattakka'a ee beyyonne ihu luwwa moo'llehe» yaa Sooriy manni gogoxxi hanenne asse'ukko. Oo mannim ee beyyiinsi ki'lla'a Yoordaanoos daajji afeebe'e matto'o; goog hundannem Sooriy uulli manni gibbu'uuyyi uunjita'a matto'i eddechchaa mu'utaa hundam moo'llo'o. Ee lasage daba'llita'a waatta'a ee woshsha hundam adilina kutto'o. Ee lasage minaadab gaaggaabaa firaa Sooriy manni wiidda'n beyyo bogukko. Ee bikkina Waa'i illageen wocukkisam sas kilo'i muccur aras te'im loh kilo'i so'i mat kin birina biteesamukko. Ee ammanenne Isra'ee'l adil ee beero'i ooxxi gooca ixxena hincixxi gassaanchi egeroo'isa issaa hee'ukko. Ihukkaarem ee egeraancho minaadab hance'amu bikkina ee beyyonnem lehukko. Ookkim ihukkok adil Eelsa'a atoorasseena maru ammane Waa'i manchi Eelsa'a ee awwaadaanchina wocu hiraaqqi sagar wo'mmu bikkinatte. Ee bikkina Waa'i manchi Eelsa'a adilina «Soodo kido'i ammanenne Samaare'i beero'onne sas kilo'i muccur aras te'im loh kilo'i so'i mat kin birina biteesamookko» yukkok wo'mmukko. Oo gassaanchim «Waa'i ixxi gagoomim iima'n gooccuwwa fooqaa'aa hurbaata xee'nnisa ga'nnisuta'nnim kuk iheena hore'em xanooyyo» yu bikkina Waa'i manchi Eelsa'a «Ee hurbaata ki illinne moo'llootto. Ihukkaarem eehanniinsi ma'lluwwam ittooyyo» yaa hee'ukko. Ee bikkina beero'i gooca egeram hee'u gassaanchi Samaare'i beero'i goocanne minaadab hance'amukkaare lehukkok ku hiraag ixxonne wo'mmu bikkinatte. Eelsa'am is beeto lehiinsi ki'isu Suunaa'm uulli meentichchona «Waa'i lamar hiinchi afeebe'e afoo sibaaro ka uullanne ihona qoodaakko; letakkambee'isa ki abaroosinne maqirem ka uulliinsi ki'llaa mulli uulla mare» yukko. Ee bikkina Eelsa'i sogitano macceessa'a is abaroosinne maqirem Filisxee'm uulla matta'a lamar hiincho afuutto'o. Ee lamarem hiinchiinsi lasage Filisxee'm uulliinsi daba'llita'a waatto'o. Isem adi'l illagenne hincita'a is uullii minii daba'llaa uwwamona xa'mmito'o. Adilim Waa'i manchi Eelsa'i awwaadaanchi Giyaaza «Hino'o Eelsa'a baxu maalalsiisoo agannuwwa hundam iina kure» yaa xa'mmam hee'ukko. Eelsa'a is beeto lehiinsi ki'isu meentichchi bikkina Geyaaz adilina kuronam oo meentichcho waatta'a is mi'n bikkinaa is uulli bikkinaa adilina kutto'o. Giyaazim «Adila! Oo meentichcho tannette! Eelsa'a lehiinsi ki'isu beetim kane!» yukko. Adilim «Kuk hanqamennihe?» yaa ee meentichcho xa'mmukko. Isem kutto'o. Ee lasage adil mat gassaanchina «Isena hee'u luwwi hundam uullaa lamarem hiinchonnem is uulliinsi firu atootaa hundam dabassiise» yaa ijaajukko. Sooriy uulli adil Beenhaadaad xissaakkoohaannonne Eelsa'a Damaasqo'o marukko. Adilinam Waa'i manchi Eelsa'a waarukkisa kurakko'o. Ixxi gassaaniinsi mat hee'u Azaaheela weeshaa «Waa'i manchina irifo'o amaddaa mattaa ka jabbiinsi fayye'oommisina Waa'a xa'mmona uunxe» yukko. Ee bikkina Azaaheel Damasqo'onne hee'oo doo'l ee uulli uwwanchi hundiinsim sor gaameela'anne iyyiisaa Eelsa'i beyyo marukko. Azaaheelim Eelsa'i illagenne uullaa «Ki awwaadaanchi Sooriy adil Beenhadaad ‹An ka jabbiinsi fayye'eena xanoommonnihe?› yaa eese ki beyyo asse'aakko» yukko. Eelsa'am «Beenhaadaad lehoo'isa Waa'i iina caakkisaakko. Ihukkaarem at mattaa «Fayye'llootto» yaakko yitaa kure» yukko. Ee ammanenne Azaaheel tuureebe'e ixxo xuxxaa moo'ukko. Ee lasage odim oo Waa'i manchi Eelsa'a indiidda fissaa wi'llukko. Azaaheelim «I moollanna, mahina wi'llitoolla?» yaa xa'mmukko. Eelsa'am «At Isra'ee'l minaadabanne afissoo hawwo la'aatette. Ixxuwwika girbuwwa giirinne shokkiissootto. Ixxuwwika woraadduwwa bisa'inne duttootto. Ciilluwwa kinanne xooqissaa shitootto. Lamfoor meentika godabo dereettootto» yaa dabarukko. Azaaheelim «An mahinam awwaadoombee'i kora'i manchi kaka hinkid isseena xanoommo?» yaa xa'mmukko. Eelsa'am dabaraa «At Sooriy uullanne adil ikkoo'isa iina Waa'i moo'isaakko» yukko. Ee lasage Azaaheel daba'llaa waarukkaare «Eelsa'a mayyukko?» yaa Beenhaadaad xa'mmukko. Azaaheelim «At hanqinam fayye'lloohan ihukkisa iina kuraakko» yaa dabarukko. Ihukkaarem la'm balla daram Azaa'eel bullukko'o wo'onne cefaa eehanninne adila urussaa shukko. Azaaheelim Benhadaad beyyonne adil ihukko. Isra'ee'l adil Aki'aab beet Yooraam adil ihu onti hiinchonne Yoosaafix beet Yihooraam Yihuxxi minaadabina adil ihukko. Ixxim adil ihukkok ixxek umur sadee lamoo ihaakkoohaannonnette hee'ukko. Ixxim hee'oo beyyo Yerusaaleemanne issaa sadeenti hiincho gassukko. Ixxi meentichchom Aki'aab landichchotte hee'llo'i bikkina Aki'aab abaroosisam Isra'ee'l adilluwwi issitam hee'llo'i jolli googo awwonukko. Jor baxo baximminnem Waa'a kichche'isukko. Ihukkaarem Waa'i ixxeensii ixxi shumo'iinsii heer heerinam adillano hooroobee'an ihukkisa ixxi awwaadaanchi Daawiitina neeyyato uwwaa hee'u bikkina Yihuda bi'iseena hasukkoyyo. Yihooraam adillaninne gassam hee'u doollenne Eedoo'm minaadab Yihuxxi minaadabanne ki'llo'o. Ixxuwwi gaqqi adilam doo'llito'o. Ee bikkina Yihooraam ixxeka faraxxi gaarre'uwwa hundam wixxaa'aa Xaa'ira yakkam beyyo gaadukko. Eedoo'm uulli gogotim ixxoo ixxi faraxxi gaarre'uwwa ijaajaanoo gaadaaninne maqirem kibbito'o. Hiimonne ixxii faraxxi gaarre'uwwa ijaajaanii kibbanto'i beyyiinsi iiqqa'a xotto'aare gaadaan hundim gibba'a mine elle'llo'o. Eedoo'm minaadab ee ammaniinsi ki'isaa Ayihuxxi minaadabiinsi bangujjaatinne fitto'o. Ee ammanenne Libi'n beero'i minaadabim bangujjito'o. Yihooraam issu mulli luwwi hundim Yihuxxi adilluwwi aganni kitaabanne kitaabamaakko. Yihooraam lehukko. Ixxim Daawiit beero'onne yoo adilluwwa waammakkam beyyonne waammamukko. Ixxi beyyonnem ixxi beet Akaaziyaas adil ihukko. Isra'ee'l adil Aki'aab beet Yooraam adillano aa'u tommonnee la'm hiinchonnee Yihooraam beet Akaaziyaas Yihuxxi uullanne adil ihukko. Ixxim adil ihu ammane ixxek umur lamiyyee lam hiinchoo hee'ukko. Ixxi hee'oo beyyom Yerusaaleemannette issaa mexxo'i mat hiincho gassukko. Ixxi amakim summi Ataaliyatte hee'ukko; isem Isra'ee'l adil Oomirina landichchotte hee'llo'o. Akaaziyaas adil Aki'aab abaroosina ballichchi ihu bikkina ixxuwwi matto'i jor googom awwonaa Waa'a kichche'isukko. Sooriy adil Azaaheelanne alallaatamu oranne adil Akaaziyaas Isra'ee'l adil Yooraamina hara'mmaa gaadukko. Lamem adilluwwi gogotim Sooriy uulli gaadaaninne maqirem Gala'aadanne yoo Raamootanne oramu ammane Yooraam ee oranne mada aa'ukko. Yooraam ee ammane aphphixxu madiinsi fayye'eena Yizra'ee'l beero'o daba'llaa marukko. Yihuxxi adil Yihooraam beet Akaaziyaasim Yooraama moo'eena ee beyyo marukko. Ee ammane hiraagaanchi Eelsa'a hiraagaa'n wixxitiinsi mato weeshaa «Qaqqissaa edde'llaa ka zayixxi humbullo amaddaa Gala'aadanne yoo Raamoota mare. Ee beyyo affaa Yoosaafix beeto, Niimshina beet beeto Iyyu'u hase. Ixxom ixxi beshiinsi annanni issitaa kosha aagise. Ka Wee'l zayta ixxi horoorenne dune. Ixxenam ‹At doo'llantaa Isra'ee'l minaadabina adil ikkoo'isina Waa'i keese doo'llaakko› yitaa kure. Ee lasage gooca fooqaa'llaa ee beyyiinsi qaqqissaa gibe» yukko. Ee bikkina oo hiraagaanchi woraadichchi Gala'aadanne yoo Raamoota marukko. Ee beyyo afukkisam gaaxxi awwonsaan afuutta'a atoorattu'uuyyi afaa «I moollanna, an kiina uwwoommi assi yookko» yukko. Iyyu'um «Ni lambe'iinsi ayyenatte woccoollak?» yaa xa'mmukko. Hiraagaanchim «Moollanna kiinatte» yaa dabarukko. Ee lasage lamim mine aagga'a oo woraadichchi hiraagaanchi wee'l zayta Iyyu'i horoorenne dunaa «Isra'ee'l Moollanni Waa'i ‹I minaadab ihu Isra'eelanne doo'llantaa adil ikkoo'isa issaammo. At kiina moollanni ihu Aki'aab abaroosa guullitootto. Ee'isinne i hiraagaanoo mulli awwaadaanoo shito'i Eelzaabeeleka baado miqisoommo. Aki'aabik abaroosii shumo'ii hundim bi'ookko. An ixxi abaroosika goona ayyem agishshom ihukko wolabichcho bi'isoommo. Isra'ee'l adilluwwi hee'llo'i Yoorbi'aamaannonnee Baa'ish abaroosannee issummoka hundam Aki'aab abaroosannem issoommo. Ihukkaarem Eelzaabeele Yizra'ee'l uullanne wish itookko; isem ayyim waammooyyo› yoolla» yukko. Ee woshshi hundam wocaa guullaa lasage oo woraadichchi hiraagaanchi ee mi'n gooca fooqaa'aa firaa gibukko. Iyyu'um ixxi besh hee'llo'i ixxi gaaxxi awwonsaa'n beyyo waarukkaare «Luwwi hundim xummannihe? Ku machchaaraanchi kiinniinsi maha hasaatette?» yita'a xa'mmito'o. Iyyu'um «Ka manchoo ixxi wocoo woshshaa ki'nnuwwim laqqakkamo» yukko. Ixxuwwim «Ookki qophphano! Kiina maha kuruda'e niina kure» yita'a dabatto'o. Iyyu'um « ‹Isra'ee'l minaadabanne doo'llantaa adil ikkoo'isina Waa'i ijaajaakko› yaakko» yaa ixxuwwina kurukko. Ee ammanem Iyyu'i beshshuwwi hee'llo'i gaaxxi awwonsaan ixxuwwika eddechcha sheelaxxita'a Iyyu'u maroo googonne dakku'uuyyii eehannonnem uulloo'isa issita'a xurumba fuggu'uuyyii sagara iimaa'llaahim «Iyyu'u adil ihaakko» yitu'uuyyi shuutto'o. Ee lasage Yoosaafixina beet hee'u Niimiish beet Iyyu'u adil Yooraaminne uullixxancha asheerukko. Ee ammane Isra'eel hundim Gala'aadanne yoo Raamootanne Sooriy adil Azaaheelinne orantam hee'llo'o. Ihukkaarem Yooraam bikkina Iyyu'i ixxi besh hee'llo'i gaaxxi awwonsaanina «Ki'nnuwwi hanqinam iinninne maqir ikkakko'oolas Yizra'eelanne hee'oo minaadab gaga ege'lloo'isa issimmina mat woshsham ihukkaare taakkiisoo manni ayyim Raamootiinsi firaa Yizra'eela maraa woshsha afisoobee'isa issehe» yukko. Ee lasage Iyyu'u ixxi faraxxi gaarre'enne saa'llaa Yizra'eela marukko. Ee ammane Yooraamik omar erisa fayye'oo'nnim hee'ukko. Yihuxxi adil Akaaziyaasim ixxo xa'mmeena waaraa ee beyyonne hee'ukko. Yizra'ee'l beero'o egerimmina kininne baxamaakoo beyyonne hee'u egeraanchi Iyyu'u ixxo awwontam gogotinne maqirem waatta'a hincito'isa moo'aa «Gogot waarukkuuyyi moo'oommuulla!» yaa shuuraa wocukko. Yooraamim «Mat farashshaancho asse'llaa oo waattam manni xummina waattam manda'e qoosse» yukko. Oo asse'amaanchim farashsho jigisukkuuyyi maraa Iyyu'una Adil at waattittok xumminatda'e ihukkisa la'eena hasaakko» yaa xa'mmukko. Iyyu'um «Xummi bikkina keese mah hawwisaate? Ee woshsha uttaa afareen mattaa eese awwone!» yaa dabarukko. Ee beero'o egerakkam beyyonne ihaa egeram hee'u waardiyyichchi «Asse'amu manchi waaroo gogoxxi beyyo afaakko. Ihukkaarem daba'llaa waarukkoyyo» yaa kurukko. Mulli asse'amaanchim maraa ee laboo xa'mmichcham Iyyu'u xa'mmukko. La'mmaaggem Iyyu'u «Xummi bikkina keese mah hawwisaate? Afareen mattaa eese awwone» yaa dabarukko. Oo waardiyyichchim la'mmaaggem «Asse'amu manchi waarukkuuyyi yoo gogot yoo beyyo afaakko. Ihukkaarem daba'llaa waarukkoyyo. Oo gogoxxi awwonsaanchim faraxxi gaarre'e ushe'oo'is machchaaraa'nnisa ixxoom hore'oomam Niimiish beet Iyyu'u laboolla» yaa wocukko. Ee lasage adil Yooraam «I faraxxi gaarre'e gudise!» yaa ijaajukko. Ixxuwwinam faraxxi gaarre'uwwi gudaa hincukkaare ixxii Yihuxxi adil Akaaziyaasii annannichchim ixxuwwi gaqqi faraxxi gaarre'enne afuutta'a firiixissu'uuyyi Iyyu'unne edanteena fitto'o. Ixxuwwim Iyyu'unne gaassi Yizra'ee'l Nabuut abuulli hee'u beyyonne edanto'o. Yooraamim «Iyyu, waattittok xumminamettennihe?» yaa xa'mmukko. Iyyu'um «Kiyyumma Eelzaabeele eebbo'i kiirimmii qophpha'n waa'ina otossimmii hee'ukkuuyyi mah xummi yookko?» yaa dabarukko. Yooraamim ixxi faraxxi gaarre'e laso dabaraa gibukkuuyyi «Akaaziyaasa! Kuk hantaaro!» yukkuuyyi gibukko. Iyyu'um ixxi amadu xiyya tokkosaa Yooraama afa'l dalkasinne qasu ammanenne wodan afeebe'e afukko. Yooraamim faraxxi gaarre'i woronne ubaa lehukko. Iyyu'um Biidiiqaar yakkam ixxena hincoo awwaadaanchina «Leeshooma ki'issaa Yizra'ee'l Nabuut uulli hee'u abuullanne darabe. Anii atii adil Yooraam anni hee'u Aki'aab lasonne firiiximminne mallummuuyyi Waa'i Aki'aabanne wocu woshsha sawwihe. ‹Beeballa Nabuutekaa ixxi oosikaa leho moo'ummo. Ka abuullanne keese guzumo'oommo› yoohan hee'ukko. Ee bikkina Iyyu'u «Waa'i wocukkok wo'mmoo'isina Yooraam leesha ki'issaa Naabuut abuulli hee'u beyyonne darabe» yaa ixxi hincixxi hara'mmaancho ijaajukko. Adil Akaaziyaas ee ihu luwwa hundam moo'u ammanenne ixxi faraxxi gaarre'enne afuuraa Beetihagaan beero'o gibaa marukko. Iyyu'um laseesaa hollansukkuuyyi «Ixxom shi'llehe!» yaa ixxi gaadaanina ijaajo uwwukko. Ixxuwwim Akaaziyaasa laseessa'a Yiibila'aa'm beero'i gadanonne yoo Guura yakkam beqe'l googonne faraxxi gaarre'enne afuuraa firiixukkuuyyim aphphissa'a omassito'o. Ihukkaarem ixxi magiido'i beero'i afeebe'e maraa ee beyyonne lehukko. Akaaziyaas gassaanim ixxi leesha faraxxi gaarre'inne Yerusaaleema massito'o. Daawiit beero'onne adilluwwa waammakkam beyyonne waammito'o. Akaaziyaas Yihuxxi minaadabina adil ihukkok Isra'ee'l adil Aki'aab beet Yooraam adil ihu tommonnee mat hiinchonnette hee'ukko. Ee lasage Iyyu'u Yizra'ee'l kolli marukko. Eelzaabeelem ka ihu woshsha macceessa'a is illi kollo wereeggissa'a is horoorem dadissa'a adilla'n mi'n iimanenne wossoo'llakkam beyyonne afuutta'a masikootinne aad heeshita'a googo moo'llam hee'llo'o. Iyyu'um ooxxi gooca higaa aagukkuuyyi «Kaa Zimiira, at ki moollanna shitaattoohaneyyonnihe! Odim keese keyye mah worukko?» yita'a shuutta'a xa'mmito'o. Iyyu'um iim xabbaa maskooxxi kolli moo'aa sagara fissaa «Iinninne maqire iheena hasookkok ayyette?» yaa shuurukko. Ee ammanenne lam saso ikkam qax adi'l mi'n baxaan masikootinne gaanje eebba'a ixxo moo'llo'o. Iyyu'um «Eelzaabeele aad darabbehe!» yukko. Ixxuwwim ki'issa'a darabbo'i ammanenne isek xiig mi'n gimbannee faraxxi hanennee wixamukko. Iyyu'um is leesh hanenne ixxi faradoo faraxxi gaarre'ee ushee'ukko. Ixxim adi'l mine aagaa hurbaata itukko. Ee lasage «Maham ikko'aare adi'l landichchotte ikko'i bikkina ee duumanto'oo meentichcho massitakka'a waammehe!» yukko. Ihukkaarem waammiteena matto'i manni is horoo'l qoomiinsi, lokiinsii angi miqiinsii bagaan ma'lluwwam siiddo'oyyo Ka woshshi hundam Iyyu'una kurakko'aare Iyyu'u «Ku hundim ihukkok Waa'i ixxi awwaadaanchi Eeliyaasinnette ihaa gaassaa wocukkisinnette. Oohim «Eelzaabeel leesha Yizra'ee'l uulli wish itookko. Is leeshikim wishiinsi gatukkok Yizra'ee'l abuullanne oreexxisa binnookko. Ee bikkina ayyim annanni issaa la'imminne Eelzaabeelette yeena xanooyyo› yukkane» yukko. Xig lamarayye ikkam qax Aki'aab shumo'i Samaare'i beero'onne hee'llam hee'llo'o. Iyyu'u assi kitaaba kitaabaa ee beero'i gassaanina, uulli lommanninaa Aki'aab ooso li'issammi keeninaa asse'ukko. Oo assi kurim «Adi'l shumo'i ki'nnuwwi anganne yo'i bikkina faradii faraxxi gaarre'ii, o'l mu'uttuwwii girbamaakkoo beero'uwwii hundim ki'nnuwwi angannette. Ee bikkina ku assi kur ki'nnuwwi anganne afukkisam. Adi'l shumo'iinsi e'llookkoka doo'llitakka'a adil issehe. Ixxenam agaaggakka'a orammehe» yoohan hee'ukko. Eehanniinsi ki'aa Samaare'i beero'i gassaan baa'lla'a «Adil Yooraamii adil Akaaziyaasii uullixxanteena xantobee'i Iyyu'u neese hinkid issinaa uullixxameena xannoommo?» yito'o. Ee bikkina adi'l mi'n gassaanchii ee beero'i gassaanchii la'anto'oo uulli lommanninnee adi'l ooso li'issam keeninnee maqirem Iyyu'una «Neese kiina awwaadaano; at neese ijaajjoo luwwi hundam issineena gundaammo. Neese ayyem adil issinoommoyyo; at kiina eran ihaa moo'amu luwwi hundam isse» yita'a asso asse'llo'o. Iyyu'um «Ki'nnuwwi iinninne iittantakkolasii i ijaajom egettakkeena guddakko'oo keen ikkakkolasii soodo kido'i ammanenne adil Aki'aab shumo'i hundikam horoore muttakka'a amaddakka'a i beyyo Yizra'eela waallehe» yaa mulli assi kitaaba kitaabukko. Adil Aki'aabik lamarayyem oosim Samaare'i beero'i ixxuwwa li'isaan ikko'i la'anto'oo lommanni anganne egeranta'a hee'llo'o. Samaare'i beero'i awwonsaan Iyyu'i assi kur ixxuwwi beyyo afukkisam Aki'aabika lamarayyem oosom shito'o. Ixxuwwikam horoore mutta'a sanannanne issita'a Yizra'ee'l uullanne hee'oo Iyyu'i beyyo asse'llo'o. Aki'aab oosik horoor muramaa waarukkisa Iyyu'u macceesu ammanenne beero'i ooxxi gooc gadanonne lam ogoranne tuubamaa la'm balli dar afeebe'e afuurona ijaajukko. La'm balla daram ee beero'i ooxxi gooca maraa ee beyyonne wixxito'i minaadabina «Adil Yooraama dollotaa shummok anette hee'ummo. Ee bikkina ki'nnuwwi ee quuxonne xa'mmantakkamoyyo. Ihukkaarem ka manna hundam shukkok ayyette? Ku hundim Waa'i Aki'aab shumo'i bikkina wocu sagar hanqo'an ihukkisa moo'isookko. Waa'i hiraagaanchi Eeliyaasennetti ihaa wocu sagara wonshaakko» yaa wocukko. Ee lasage Iyyu'u Yizra'eelanne hee'llam mulli Aki'aab qarmanna, ixxi gassaano, ixxi beshshuwwaa qeessuwwaa matim gattambee'isa hundam shukko. Iyyu'u Yizra'ee'l uulliinsi ki'aa Samaare'i uulla marukko. Googonne hee'ukkuuyyim «Allaaraa'n hegeego» yakkam beyyo afaa lehu Yihuxxi adil Akaaziyaas qarmanni lambe'iinsi hofqax mannam siidaa «Ki'nnuwwi ayyayyaamo?» yaa xa'mmukko. Ixxuwwim «Neese Akaaziyaas qarmanna; kabadem adil Eelzaabeel oosoo gatto'i adi'l mi'n abaroosaa xa'mmineena Yizra'ee'l uulla malloommuulla» yita'a dabatto'o. Iyyu'um «Ka manna foorinne hee'llonam amaddehe!» yaa ixxi gaadano ijaajukko. Ixxi gaadaanim amaddo'aare Iyyu'u ee beyyonnem wo'i ba'l gadanonne shukko. Ixxuwwikim xig hundoomim soree lamoo ihaa ixxuwwiinsi matim foorinne gatukkoyyo. Iyyu'u ee beyyiinsi ki'aa odim taakke'imma asheerukko. Googonne hee'ukkuuyyim Reekaab beeto Yoonaadaaba siidukko. Iyyu'um xummaatisaa lasonne «Anii atii sawwitinne matome. Eehannah iina hara'mmiteena xantoohonnihe?» yaa xa'mmukko. Yoonaadaabim «Eeyya xanoommo» yaa dabarukko. Iyyu'um «Eehannata'i ki anga uwwe» yukko. Ee lasage angi anga amaxxanta'a Iyyu'u bakkiisaakka ixxi faraxxi gaarre'enne afuussaa «Iinninne maqire ikkaa an Waa'ina hinkaa'nna amma'nnamaammoohanda'e ihummisa at ki gagoomim moo'e» yukko. Ixxuwwim matikka'a faraxxi gaarre'inne matto'o. Ee beyyo affa'a lasage Iyyu'u Aki'aab abaroosiinsi matim gatoobee'isa hundam shukko. Ku hundim ihukkok hiraagaanchi Eeliyaasinne kuramu Waa'i saga'llisannette. Iyyu'u Samaare'i beero'i minaadaba mat issaa weeshaa «Adil Aki'aab Ba'aalina awwaadukkok hofqaxam hee'ukko. Ihukkaarem an ixxeensi lonsaa awwaadeena hasoommo. Ee bikkina Ba'aa'l hiraagaano, awwaadaanoo qeessuwwaa hundam weeshshehe. Ba'aalina kee'mmaalli kitima hincaa'oommi bikkina mat manchim gatoo'n waarona; waaroo'n gatukkok hundim lehinne guzumo'amookko» yukko. Ihukkaarem Iyyu'u eehid yukkok Ba'aa'l awwaadaano hundam guulleena sawwaa hee'u bikkinatte. Iyyu'um «Ba'aa'l lombina alallaattakka'a minaadaba weeshshehe» yukko. Ixxuwwim minaadabina alallaatto'o. Ixxim eekka Isra'eel hundinam asse'ukko. Ba'aa'l awwaadaan hundim matim gatoo'n waaraa Ba'aalina otossakkam mine aagukko. Ixxuwwim ee minenne aagga'a tochchiins tochchi afeebe'e wo'mmito'o. Iyyu'um eddechchi mi'n gaassaanchina «Ba'aa'l awwaadaanina hundinam eddechcha fisse» yukko. Ixxim ee eddechcha fissaa Ba'aa'l awwaadaanina hundinam uwwukko. Ee lasage Iyyu'u Reekaab beet Yoonaadaabinne maqirem Ba'aalina otossakkam mine aagukko. Ba'aa'l awwaadaaninam «Xale'i Ba'aa'l awwaadaaniinsi bagaan Waa'i awwaadaan ki'nnuwwinne maqire bee'isa qoossehe» yukko. Ee lasage shokkiisakka'a hincaa'akkam kitimaa mulli kitimaa hincaa'lleena aaggo'o. Ee ammanenne Iyyu'u biiranne gudisaa hee'u sadeentayyi manchina «Ki'nnuwwi anganne higisaa uwwummi manniinsi matichchim xoroo'isa issookkok ixxi gagim ee manchi bikkenne lehookko!» yaa qoxxisaa kuraa hee'ukko. Shokkiisakka'a hincaa'akkam kitima hincaa'akka'a guullakko'isam Iyyu'u egeraanoo gaaxxi awwonsaanoo «Kaba aaggakka'a ee manna mat manchim xooroobee'isa shi'llehe!» yaa ijaajukko. Ixxuwwim bisa'inne shita'a guullito'o. Egeraanii gaaxxi awwonsaanii ee mannika leesha hundam biiranne fissita'a uunjito'o. Ee lasage ixxuwwi Ba'aalina otossakkam mi'n koshoro aaggo'o. Kiniinsi baxamu otossakkam misilluwwam Ba'aalina otossakkam miniinsi fissita'a shokkiisso'o. Ba'aalina otossakkam misila iiqansito'o; otossakkam minem gindito'o; oo beyyim kaballi afeebe'e manni shume'oo beyyi ihukko. Ee'isinne Iyyu'u Ba'aa'l otossaato Isra'ee'l uulliinsi bi'isukko. Ihukkaarem Naabaax beet Yoorbi'aam Beeteelannee Daanannee worqinne baxamaakkoo wo'l misilina otossitamisa issimminne Isra'eela huushisu baaxiiliinsi Iyyu'u qee'llukkoyyo. Waa'im Iyyu'una «I illagenne er luwwa issitti bikkinaa Aki'aab mine guzumo'eena sawwaa hee'ummoka issitti bikkinaa ki shumo'i soor beet afeebe'e Isra'eelanne adil ihookko» yukko. Ihukkaarem Iyyu'u Isra'ee'l Moollanni Waa'ika Seera guullaa egerukkoyyo; Yoorbi'aam Isra'ee'l minaadaba huushisu baaxiiliinsim qee'llukkoyyo. Ee doollenne Waa'i Isra'ee'l uulla qoroshimma asheerukko; Azaaheel Isra'eela tochchiinsi tochchi afeebe'e qasukko. Oohim Yoordaanoosiinsi eelliinchi firinne yoo Gala'aaxxi uulla hundam Arnoo'n daajji gadanonne yoo Aro'eeriinsi ki'isaa Gaadika, Roobeelikaa Minaas ullaa Baasaanam edaa amadukko. Iyyu'u ixxi adilla'n doollenne baxukkokii taaphansu luwwii hundim Isra'ee'l Adilluwwi Aganni Kitaabanne kitaabammaakko. Iyyu'um ixxi anno'isam lehukko; Samaare'ennem waammamukko. Ixxi beyyonnem ixxi beet Yoo'aakaaz adil ihukko. Iyyu'u Samaare'enne afuuraa Isra'eela lamiyyee sadeenti hiinchoo adillaninne gassukko. Adil Akaaziyaas ama Ataaliya iseka beeto shakko'isa macceesso'isam Yihuxxi adi'l abaroosa hundam shakkamisina ijaajjo'o. Is angiinsim xoreena xanukkok Akaaziyaas beet xale'i Yoo'aasatte hee'ukko. Ixxom mulli keeninne maqirem shakkeena atoorarakko'o. Ihukkaarem ixxi adatte hee'llo'i adil Yooraam landichcho Yihoosheeba'a maaxxa'a lehiinsi gatisso'o. Isem ixxoo ixxo li'issam meentichchoo massita'a Keesammi Mi'n ooxxi woronne yoo usheexxaxxi minenne maaxxo'i bikkina Ataaliy anganne lehoo'n gatukko. Ataaliya adil hee'llo'i lohem hiinchi woronnem ciilichchi hee'u Iyyoosiyaas ixxo li'issam meentichchonne Keesammi Minenne maaxamaa li'ukko. Ihukkaarem lama'l hiinchonne qeessichchi Yoodaah adi'l lombi waardiyyuwwinaa adi'l mi'n egeraaninaa ijaajaan ikko'i gaaxxi awwonsaano hundam Keesammi Mi'n beyyo weeshisaa ixxi sawwu luwwanne iittantamisina hidiisukko. Ee lasage Akaaziyaas beet Iyyoosiyaasa moo'isaa «Usheexxaxxi ballanne egerimmina fittakkam ammane ki'nnuwwiinsi saxxi suum adi'lla'n mine egerona. Ki'nnuwwik mulli saxxi suum Suur gooca egerona; gatu saxxi suumim Keesammi mi'n waardiyyuwwiinsi lasinne yoo ooxxi gooca egerona. Usheexxaxxi ayyaamonne egerimmiinsi usheexxito'i lamem gaalchim adilanne hawwi afoobee'isa Keesammi Mine egettona. Adil Yoo'aasa egettakkam amman hundam ki'nnuwwika bisa'a makkissakka'a amaddakka'a ixxi maroo beyyi hundam maqirem mallehe. Ayyi manchim iggaa ki'nnuwwi beyyo hincookkok hee'uta'n shi'llehe» yaa ijaajukko. Gaaxxi awwonsaanim Yoodaahe uwwu awwonsa aa'lla'a usheexxaxxi ayyaamonne waardiyyooma egerimmina aaggam keenoo egerimmiinsi fittam keenoo wixxaa'lla'a ixxi beyyo eebbo'o. Yoodaahem Keesammi Minenne hee'u adil Daawiitika bagadduwwaa agilluwwaa fissaa gaaxxi awwonsaanina uwwukko. Gaadaanim o'l mu'uta amadda'a Keesammi Mi'n woroo'n qariinsi hanaa'n qar afeebe'e adila egerimmina kiti'm beyyaannonnee Keesammi Mi'n illagennee adi'l kululleetanne uullito'o. Ee lasage Yoodaah Yoo'aasa fissaa ixxi horoorenne adilla'n mare'e issukko. Ixxi adillaninam awwonsi ihoo seer kitaabamaakkoo woraqata eebaa uwwukko. Eehido'isinne Yoo'aas doo'llamaa adil ihukko. Minaadabim anga aphphissu'uuyyi sagara iimaa'lla'a «Adil kum hiinchina adil ihona» yito'o. Ataaliyam lombi waardiyyuwwikaa minaadaphphekaa corochcha Keesammi Mi'n beyyiinsi macceesso'i ammanenne minaadab wixxaa hee'u Keesammi Mine qaqqissa'a matto'o. Ee beyyo affo'isam haareechchi adil losamu heechchi qaanqisanne Keesammi Mine aagakkam goocanne yoo utuphphi gadanonne uullaakkoo moo'llo'o. Ixxim gaaxxi awwonsaaninnee xurumba fuggam keeninnee kibbamaa hee'ukko. Minaadab hundim liiranchinne wo'mmaa ilil yikkuuyyi xurumba fugam hee'ukko. Ataaliyam muggita'a eddechcha dereetta'a «Kuk bangujjaato! Bangujjaato!» yitu'uuyyi laatto'o. Yoodaahem Ataaliya Keesammi Mi'n gadanonne shakkona hasubee'i bikkina gaaxxi awwonsaanina «Makkinnee qeddinnee uullu waardiyyi lambe'inne fissitakka'a massehe. Isena hara'mmeena hasoo manni hee'ulas shi'llehe» yaa ijaajukko. Ixxuwwim ise amadda'a adi'lla'n mine massitta'a Faraxxi goocanne shito'o. Yoodaahem adilii minaadabii Waa'i minaadab ikkeena Hidi'l Sagara aaggamisa issukko; ee'isam adi'lii minaadabii hide'antamisa issukko. Ee lasage minaadab ee Ba'aala yakkam qophpha'n waa'i mine maraa gindansukko; misilluwwaa kiti'm mu'uttuwwaa hundam iiqansukko. Mataana yakkam Ba'aa'l qeessichchom kitima hincaa'akkam beyyuwwi illagenne shukko. Yoodaahem Keesammi Mine kor kore egettam waardiyya gudisukko. Ee lasage ixxi, Gaaxxi awwonsaan, adi'l lomba egettam waardiyyii adilla'n mine egettam waardiyyii adila Keesammi Miniinsi adilla'n min afeebe'e kibbita'a mattamisaa minaadab hundim lasonne ihaa awwonoo'isaa issukko. Yoo'aasim waaridiyyuwwi ooxxi goocinne aagaa adilla'n barcumanne afuurukko. Ataaliya adilla'n minenne shakko'i bikkina manni hundim liiramukko; beero'oomim gaaga'ukko. Yoo'aas adil ihu ammane ixxek umur lamar hiinchi hee'ukko. Iyyu'u Isra'ee'l minaadabanne adil ihu lama'l hiinchonne Yoo'aas Ayihuxxi minaadabanne adil ihukko. Ixxi heechchi beyyom Yerusaaleemanne issaa sor hiincho gassukko. Ixxi amakim summi Xiibiyatte hee'ukko; isem Beersaabeeh beero'itan hee'llo'o. Qeessichchi Yoodaahe sogamii losisamii hee'u bikkina Yoo'aas ixxi hee'u doollenne hundannem Waa'a liiransoo baxo baxukko. Ihona bagaan duunnuwwanne hundannem hee'llo'i hanqo'i Waa'a laqqambee'i minaadab otossitam beyyuwwi bi'ubee'i bikkina minaadab ee beyyuwwanne aduruusa wiriissitu'uuyyi kitima hincaa'imma utto'oyyi hee'llo'o. Yoo'aasim qeessuwwina «Keesammi Minenne kitim ihaa hincoo diinat hundim oohim xigamu manchi hincaa'oo diinatee Waa'i minina liiramakkam diinatee hundam wixxaa'llehe. Qeessuwwi annannichchim awwaaddam manni Waa'ina uwwitam diinate hundam qoxxita'a egettamisina annoomat uwwamukko. Ee diinatem hasisoo'isinne Keesammi Mine axisimmina awwaaxxitona kurukko. Ihukkaarem Yoo'aas adil ihu lamiyyii sas hiinchii afeebe'e qeessuwwi Keesammi Mi'nneka ma'lluwwam areesso'oyyi hee'ukko. Ee bikkina Yoo'aas Yoodaahee mulli qeessuwwaa ixxi beyyo weeshaa «Ka Keesammi Mine haareechchissakkobee'ek mahinatte? Ka balliinsi ki'isaa aa'llakkam diinate amadimmi hasisooyyo. Ku Keesammi Min areesamoo'isina diinate uwwehe» yukko. Qeessuwwim ee woshshanne iittanta'a ee Keesammi Mine ixxuwwi anginne areesimmaa diinate wixxaa'immaa uullisso'o. Ee lasage Yoodaahe mat saaxi'n ifiishshaanchonne afo'o fissukko. Ee Saaxinam massaa Keesammi Mine aagisukkuuyyi makki kollinne yoo kitima hincaa'akkam beyyi gadanonne dissukko. Ballina ballina kor kore awwaaddam qeessuwwi otossimmina waaroo minaadab Waa'i awwaadina uwwoo diinate aa'llu'uuyyi ee saaxinanne aagissam hee'llo'o. Ee saaxinanne diinat wo'mmoo ammanem kitaabaanchii hundiinsi lob qeessichchii waatta'a bira xigga'a gonoonanne katta'a dissitam hee'llo'o. Yoo qax diinate xigga'a shallago'ooma amadda'a lasage Keesammi Mine areesisaa baxisoo keenina uwwitam hee'llo'o. Ixxuwwim ee diinate aa'lla'a haqqinnee kininnee areessam angi qoor mannina uwwitam hee'llo'o. Ee'isam kina cabbaraanina, areesimmina awwaadoo haqqaa kinaa bitaa'llam keeninaa annanni annanni awwaadoo luwwi hundinaa miqqam hee'llo'o. Ihukkaarem biriinsi baxamoo xuwwa'uwwina, loqooqo'i saahinnuwwa, xurumbuwwinaa gii'l buchcha wixxaa'akkam mu'uttuwwinaa odim biriinsii worqiinsii baxakkam keesammi mu'uttuwwinaa ee diinatiinsi miqqo'oyyo. Oo diinat hundim Keesammi Mine areesimmi baxonne hossam baxaanina xale'e awwaadam hee'ukko. Ee baxo awwonsimmina doo'llanto'i mannim hore'em amma'nnanto'oo keen hee'llo'i bikkina oo diinat firoo ogora shallagimmi hasisam hee'ukkoyyo. Hawwojji bikkinaa baaxii'l haafixxi kitiminaa miqamoo diinat qeessuwwina awwaadoohan hee'ukko bagaan Keesammi Mine areesimmi saaxinanne aagam hee'ukkoyyo. Ee ammane Sooriy uulli adil Azaaheel Gaat beero'o dangisaa qasaa amadukko. Odim Yerusaaleemam dangisaa qaseena qoodukko. Yihuxxi adil Yoo'aasim ixxeensi illageen hee'llo'i adilluwwi Yoosaafix, Yihooraamii Akaaziyii annanni issita'a dissito'i Waa'ina uwwakkam luwwa ixxi gaqqekam edaa Keesammi Minennee adi'l mu'uta dissakkam minennee yoo worqa hundam wixxaa'aa adil Azaaheela qooxxaqqeena asse'ukko. Azaaheelim eekka aa'aa ixxi gogota Yerusaaleemiinsi dabarukko. Adil Yoo'aas issu luwwi hundim Yihuxxi adilluwwi aganni kitaabanne kitaabamaakko. Akaaziyaas beet Yoo'aas Yihuxxi uullanne adil ihu lamiyyennee saxxi hiinchonnee Iyyu'i beet Yoo'akaaz Isra'eelanne adil ihukko. Ixxi heechchi beyyom Samaare'ennetti issaa tommoo lamar hiinchoo gassukko. Ixxim ixxeensi illageen hee'u adil Yooroobi'aamisam baaxiilo baximminne Waa'a kichche'isukko. Isra'ee'l minaadabam baaxii'l googonne awwonsukko. Ixxi jor baxiinsim hore'em daba'llukkoyyo. Ee bikkina Waa'i Isra'ee'l minaadabanne quuqaa Sooriy adil Azaaheelinaa ee'isam ixxi beet Beenihaadaadinaa ixxuwwa higisaa uwwam hee'ukko. Ee lasage Yoo'akkaaz Waa'a uunxukko. Waa'im Sooriy adil Isra'ee'l minaadabanne issu luwwa moo'aa Yoo'akkaazika uunxato macceesukko. Ee bikkina Waa'i Isra'ee'l minaadaba Sooriy minaadaphphi angiinsi wolabbanonne fissoo awwonsaancho asse'ukko. Ixxuwwim gaassisam xumminne hee'llo'o. Ku hundim ihukkaarem Isra'ee'l minaadab adil Yoorbi'aam aagisu baaxiiliinsi daba'llito'oyyo. Hawwojjiinsi daba'llimmi bikkenne baaxiilo baximmanne qoxxita'a Asheeraa yakkam qophpha'n waa'i misilina Samaare'enne otossimma asheetto'o. Adil Akaazina Ontayyi faradiinsi, tommi faraxxi gaarre'uwwiinsii tommi kum lokkaan gaadaaniinsii bagaan mulli gudu gaaxxi malaayyi hee'ukkoyyo. Mashka'oomim Sooriy adil mulli gogota di'llisa hancaacamaa guullu bikkinatte. Adil Yoo'akkaaz baxu mulli baxii qoxallanii hundim Isra'ee'l adilluwwi aganni kitaabanne kitaabamaakko. Yoo'akkaaz lehukko; Samaare'ennem waammamukko; ixxi bikkennem ixxi beet Yoo'aas adil ihukko. Yihuxxi adil Yoo'aas adil ihu sadennee lama'l hiinchonnee Yoo'akkaaz beet Yoo'aas Isra'ee'l adil ihukko. Hee'oo beyyom Samaare'ennetti issaa tommoo loh hiinchoo gassukko. Ixxim Isra'ee'l minaadaba baaxiilonne awwonsu adil Yoorbi'aamika jor baxo awwonimminne baaxiilo baxaa Waa'a kichche'isukko. Yoo'aas baxu mulli baxii Yihuxxi adil Ameesiyaasinne oramu oranne hee'u qoxallanii hundim Isra'ee'l adilluwwi aganni kitaabanne kitaabamaakko. Ee lasage Yoo'aas lehukko; Samaare'enne yoo adilluwwi waammi beyyonne waammamukko. Ixxi beyyonnem ixxi beet la'm Yoorbi'aam adil ihukko. Hiraagaanchi Eelsa'a lehoo qaxa kee'mmaallisa xissaa hee'ukko. Ee bikkina Isra'ee'l adil Yoo'aas xa'mmeena maraa sagara iimaa'aa «Iyyannaa! Iyyannaa! At Isra'ee'l minaadabina malaayyee agiraa!» yaa wi'llukko. Eelsa'am adilina «Mat xiyyaa tokkaashshe'ee eebe» yaa ijaajukko. Yoo'aasim Eelsa'a ijaajukkisa issukko. Eelsa'am «Xiyya tokkosseena gude!» yukko. Adilim Eelsa'a ijaajukkisa issukko. Eelsa'am ixxi anga adi'l angi hanenne issukko. Ee lasage «Eelliinchi fi'l maskoota fooqaa'e» yukko. Adilim fooqaa'ukko; Eelsa'am «Kaba xiyya tokkose» yukko. Adil xiyya tokkosukkisam Eelsa'a «At Waa'ina xiyya! Kiininne ihaa Waa'i Sooriy minaadaba kaa'ookko. Sooriy minaadaba Afeeq beero'onne kaa'lleebe'i afeebe'e qassootto» yukko. Ee lasage Eelsa'a adilina «Mulli xiyyuwwa ki'issaa uulla qase» yukko. Adilim uulla sasaagge qasukko. Ixxi issukkisanne Eelsa'a quuqaa «Uulla ontaagge te'im lohaagge qassaattoota'n Sooriy minaadaba guullitaa kaa'llam hee'llitto; ihukkaarem kaba xale'i sasaagge kaa'llootto» yukko. Eelsa'am lehukko; waammamukkom. Moo'aabiinsi waattam dangissa'a daaffam manni maarag hundam Isra'ee'l uullanne weerattam hee'llo'o. Mat ammane Isra'ee'l minaadab mat manchi lehukkaare waammitu'uuyyi ee dangonne aphphisoo gogoxxek mat tuut waarukkuuyyi moo'llo'o. Ee bikkina ee leeshooma manchi leesha Eelsa'a waammakko'i waammi woronne uunjita'a gibbo'o. Oo leeshim Eelsa'i miq nakkukkaare fooraam ihaa lehiinsi ki'aa uullukko. Yoo'akkaaz adil ihu doollenne hundannem Sooriy adil Hazaa'eel Isra'ee'l minaadaba wor amadimminne hawwisam hee'ukko. Ihukkaarem Waa'i ixxi biijoominne urimma issaa hara'mmukko bagaan ixxuwwi bi'llamisina cawwaa urukkoyyo. Eekkam issu mashka'i Abrihaamina, Yisaaqinaa Yaaqoobinaa uwwu hidi'l sagara sawwimminne minaadaba xadubee'i bikkinatte. Sooriy adil Azaaheel lehu ammanenne ixxi beet Beenhadaad adil ihukko. Ee lasage Isra'ee'l adil Yoo'aas Beenihadaada sas ammane kaa'aa ixxi anni Yoo'akkaaz adilla'n doollenne Beenhadaad amadaa hee'u beero'uwwa dabassiisukko. Yoo'akkaaz beet Yoo'aas Isra'ee'l minaadabanne adil ihu la'm hiinchonne Yoo'aas beet Ameesiyaas Yihuxxi uullanne adil ihukko. Ixxi adil ihu ammanem ixxek umur lamiyyee onti hiinchoo ihaa hee'ukko. Ixxi heechchi beyyom Yerusaaleemanne issaa lamiyyee honsi hiinchoo gassukko. Ixxi amam Yihoo'aadiina yamantaman ikka'a Yerusaalee'm beero'itan hee'llo'o. Ameesiyaasim Waa'a liiransoo baxo baxukko. Ihukkaarem gaassi ixxi lobanni Daawiitisayyi hee'ukko. Daawiitisa ihimmi bikkenne ixxi anni Yoo'aas duuha'a awwonukko. Oohim duunnuwwanne qophpha'n waa'ina otossakkam beyyuwwa gindukkoyyi hee'ukko. Eehanniinsi ki'ukkok minaadab duunnuwwanne kitima hicaa'immaa aduruusa wiriisimmaa utto'oyyi hee'llo'o. Ameesiyaas ixxi adillano qoxxisukkisam ixxeensi illageen adil ihaa hee'u ixxi anna shito'i gassaano shukko. Ihukkaarem ee gassaa'nneka ooso shukkoyyo. Ee'isinne Muse'e seeranne Waa'i «Oos baxu baaxiilinne anno'i lehinne guzumo'amooyyo; anno'i baxu baaxiilinnem oos lehinne guzumo'amooyyo. Annannichchim ixxi gag baxu jor baxinne lehinne guzumo'amona» yu ijaajo wonshukko. Ameesiyaas «Sooqixxi cebba» yakkam beyyonne tommi kuma ikkam qax Eedoo'm gaadaano guullukko. Seela'i yakkam beero'om amadaa «Yooqti'eela» yaa weeshukko. Kabad afeebe'em ee summinne weeshamookko. Ee lasage Ameesiyaas Isra'ee'l adil ihu Iyyu'i beet Yoo'aas beyyo manna asse'aa «Waare exxammona» yaa orina ki'isansukko. Ihukkaarem adil Yoo'aas «Mat ammane Liibaanoos duunanne yoo qarxaffichchi digibina ‹I beetina aretti ikkona ki landichcho uwwe› yaa manna asse'ukko; ihukkaarem mat moochchichchi eheen higukkuuyyim hance'ukkaare oo qarxaffichchi gogukko. Ameesiyaasa, at Eedoo'm manna kaa'l bikkina ki wodan bolximminne iimiimaakko. Siidditti kaachchanne liirantaa usheexxitaa ki minenne afuuttita'n kiina erane; at ki Yihudinne maqire ubbeena gagannee ki minaadabannee boobana eebbeena mahina hassoolla?» yukko. Ihukkaarem Ameesiyaas Yoo'aas uwwu dabachcha mahannem xigukkoyyo. Ee bikkina adil Yoo'aas ixxi gogota awwonsaa Ameesiyaasanne weeraraa Yihuxxi uulli Beetisheemeeshanne oramukko. Ameesiyaas gogotim kaa'amukko. Ixxi gaadaanim binnita'a ixxuwwi gaqqi minem aaggo'o. Yoo'aasim Akaaziyaas beet, Yoo'aas beet Ameesiyaasa foorinnem qeefadukko. Yerusaaleemam afimmina gaaggaabukko. Eekke'e afukkisam Efireem ooxxi goociinsi «Lamejji ooxxi gooca» yamamaa weeshamoo gooc afeebe'e qeeraa'lloom lam xibbi meetira ihoo kininne ootamaakko oota gindukko. Ee beyyonnem siidu biraa worqaa Keesammi Mi'n keesammi mu'utaa adi'l mi'n amaxxaa hundam iyyiisaa Samaare'i uulla daba'llukko. Qeefadamu mannam edaa amadaa marukko. Adil Yoo'aas baxu mulli bax hundim, ee'isam Yihuxxi adil Ameesiyaasinne oramu ammane baxu qoxalla'n bax hundim exxaa Isra'ee'l adilluwwi aganni kitaabanne kitaabamaakko. Yoo'aas lehukko. Samaare'enne yoo adilluwwi waammannem waammamukko. Ixxi beyyonnem la'm Yoorbi'aam adil ihukko. Isra'ee'l adil Akaaziyaas beet Yoo'aas lehaa lasage Yihuxxi adil Yoo'aas beet Ameesiyaas tommoo onti hiinchoo hee'ukko. Ameesiyaas adilla'n doollenne baxamu mulli bax hundim Yihuxxi adilluwwi aganni kitaabanne kitaabamaakko. Ameesiyaasa shimmina Yerusaaleemanne manni a'llamaa hee'u bikkina Ameesiyaas gibaa Laakiish beero'o marukko. Ihukkaarem ixxi diina'i manna asse'lla'a shisiisso'o. Ixxekam leesha farashshonne iyyiisakka'a Yerusaaleema eebakka'a Daawiit beero'onne yoo adilluwwi waammanne waammakko'o. Yihuxxi minaadabim umur tommoo loh hiinchoo ihaakkoo ixxi beet Ooziya adil issukko. Ooziyim illageen amadamaa hee'u Eelaat beero'o ixxi anni lehiinsi lasonne oramaa kaa'aa dabaraa baxaa Yihuxxan issukko. Yoo'aas beet Ameesiyaas Yihudanne adil ihu tommonnee onti hiinchonnee Yoo'aas beet Yoorbi'aam Isra'ee'l minaadabina adil ihukko. Ixxi heechchi beyyom Samaare'enne issaa soree mat hiinchoo gassukko. La'm Yoorbi'aamim Isra'ee'l minaadaba baaxii'l googonne awwonsaa Naabaax beet Yoorbi'aamisam Waa'a kichche'isukko. Illageen Isra'ee'l anganne hee'u hanaa'n qarinne Haamaata yakkam beyyo higakkam googiinsi ki'isaa woroo'n qaranne sooqixxi dambalaq afeebe'e yoo uulla hundam kaachchinne dabarukko. Oo hundim ihukkok Gaatiheefeer moolliinsi qaramu awwaadaanchi Amiitaayyi beet hiraagaanchi Yoonaasanne ihaa Isra'ee'l Waa'i uwwu neeyyaxxi saga'llisinnette. Waa'i Isra'ee'l minaadaphpheka hawwo moo'ukko; agidinattem ihukko wolabina hee'u u'nnanne hara'mmookkok matim hee'ukkoyyo. Ihona bagaan ixxuwwi guullita'a bi'llamisina Waa'i hasukkoyyo. Ee bikkina la'm Yoorbi'aamanne ihaa Waa'i gatisukko. La'm Yoorbi'aam issu luwwi hundim oranne moo'isu qoxallanii Yihuxxi uulli gassi woronne ikka'a hee'llo'i Damasqo'ii Haamaatii Isra'eelina daba'llitamisa issu agannaam bax hundim Isra'ee'l adilluwwi aganni kitaabanne kitaabamaakko. Ee lasage la'm Yoorbi'aam lehukko. Adilluwwi waammi beyyonnem waammamukko. Ixxi beyyonnem ixxi beet Zakkaariyaas adil ihukko. La'm Yoorbi'aam Isra'ee'l uullanne adil ihu lamiyyennee lama'l hiinchonnee Ameesiyaas beet Ooziy Yihuxxi uullanne adil ihukko. Ixxi adil ihu ammane ixxek umur tommoo loh hiinchoo ihaa hee'ukko; ixxi heechchi beyyom Yerusaaleemanne issaa ontayyee lam hiinchoo gasukko; ixxi amam qaranto'ok Yerusaaleemanne; isekim summi Yikooliyatti hee'ukko. Ixxim annika er kobi'lla awwonaa Waa'a liiransoo baxo baxukko. Ihukkaarem duunnuwwi hundannem qophpha'n waa'uwwina otossakkam beyyuwwa bi'isukkoyyo. Ee bikkina minaadab duunnuwwi hundannem kitima kitimimmaa aduruusa wiriisimmaa urukkoyyi hee'ukko. Ee lasage Waa'i, Ooziya oddomachchonne firoo baddisoo jabbi amadoo'isa issukko; leheebe'i afeebe'em oo jabbi fatakubee'i bikkina bax hundiinsim annanni ihaa mat minenne hee'am hee'ukko. Ee ammane ixxi adilla'n gasso awwonsam hee'ukkok ixxi beet Yoo'aataamatti hee'ukko. Adil Ooziy issu mulli luwwi hundim Yihuxxi adilluwwi Aganni Kitaabanne kitaabamaakko. Ooziy lehukko; Daawiit beero'onne hee'oo gaassi anno'i waammi beyyonne waammamukko. Ixxi beyyonnem ixxi beet Yoo'aataam adil ihukko. Ooziy Yihuxxi uullanne adil ihu sadennee sadeenti hiinchonnee la'm Yoorbi'aam beet Zakkaariyaas Isra'ee'l uullanne adil ihukko; ixxi heechchi beyyom Samaare'enne issaa loh agana gassukko. Ixxim ixxeensi illageen hee'llo'i adilluwwisa baaxiilo baximminne Waa'a kichche'isukko; ee'isam Isra'ee'l minaadaba baaxiilonne awwonsu Naabaax beet adil Yoorbi'aam jor kobi'lla awwonukko. Yaabeesh beet Shaaluum woshsha dadimminne Yibila'aam yakkam beyyonne adil Zakkaariyaasa shaa ixxi beyyonne adil ihukko. Adil Zakkaariyaas issu mulli luwwi hundim Isra'ee'l Adilluwwi Aganni Kitaabanne kitaabamaakko. Ee'isinne Waa'i adil Iyyu'una «Ki oos soor qaranchi afeebe'e Isra'eelanne adilluwwi ikkamo» yaa wocu neeyyaxxi sagar wo'mmukko. Ooziy Yihuxxi uullanne adil ihu sadennee honsi hiinchonnee Yaabeesh beet Shaaluum Isra'ee'l adil ihukko; ixxi heechchi beyyom Samaare'ennetti issaa mexxo'i mat agana gassukko. Gaad beet Minaaheem Tiirxaa yakkam beyyiinsi ki'aa Samaare'e marukko; ixxim Shaaluuma shaa ixxi beyyonne adil ihukko. Shaaluum issu mulli luwwii ixxi baxu bangujjaatii hundim Isra'ee'l Adilluwwi Aganni Kitaabanne kitaabamaakko. Minaahem Tiirxa'iinsi ki'aa marukkuuyyi higgonnem Tiifsaah beero'onne hee'oo mannaa ee beero'i kululleetanne hee'oo gattuwwaa bi'isukko. Eeham issu mashka'i ee beero'i manni ixxena anga uwwiteena hassobee'i bikkinatti hee'ukko. Eehanniinsi ki'ukkok qishixxoo'n lamfoor meentika godabo dereerukko. Ooziy Yihuxxi uullanne adil ihu sadennee honsi hiinchonnee Gaad beet Minaahem Isra'ee'l uullanne adil ihukko; ixxi heechchi beyyom Samaare'ennetti issaa tommi hiincho gassukko. Ixxi hee'u qax doollenne hundannem Isra'ee'l minaadaba baaxii'l googonne awwonsu Naabaax beet Yoorbi'aamika jor kobi'lla awwonimminne baaxiilo baxaa Waa'a kichche'isukko. Aasoor adil Tigilaat-Phaleeseer Isra'ee'l minaadabanne weerarukko. Minaaheem ixxi uulli adillanonne ixxi adillano qoxxisoo'isinaa bakkiisoo'isinaa magannaatina sadee soor kum kiilo'i bi'l irifo'o Tigilaat-Phaleeseerina uwwukko. Minaaheem ee diinate wixxaa'ukkok Isra'ee'l uullanne yo'i goddaan annannichchim ontayyi kin bira uwwitamisa ciimo'o issimminnette. Ee'isinne Tigilaat-Phileeseer xumminnem ixxi uulla daba'llaa elle'ukko. Minaaheem baxu mulli luwwi hundim Isra'ee'l Adilluwwi Aganni Kitaabanne kitaabamaakko. Minaaheem lehukko; waammamukkom. Ixxi beyyonnem ixxi beet Faaqaahiy adil ihukko. Ooziy Yihuxxi uullanne adil ihu ontayyi hiinchonne Minaaheem beet Faaqaahiy Isra'ee'l uullanne adil ihukko; ixxi heechchi beyyom Samaare'ennetti issaa lam hiincho gassukko. Isra'ee'l minaadaba baaxiilonne awwonsu Naabaax beet adil Yoorbi'aamika jor kobi'lla awwonaa baaxiilo baximminne Waa'a kichche'isukko. Faaqaahiy gogotiinsi gaaxxi awwonsaanchi Faaquhe yakkam Ramaaliy beet hee'u ontayyi Gala'aaxxi manninne maqire dollotukko. Samaare'i adilla'n woronne hee'oo girbanne aagaa Faaqaahiya Argobbinnee Haariyinnee maqirem shaa Faaqaahiy beyyonne adil ihukko. Faaqaahiy issu mulli luwwi hundim Isra'ee'l Adilluwwi Aganni Kitaabanne kitaabamaakko. Ooziy Yihuxxi uullanne adil ihu ontayyennee la'm hiinchonnee Raamaaliy beet Faaquhe Isra'eelanne adil ihukko. Ixxi heechchi beyyom Samaare'enne issaa lamiyyi hiincho gassukko. Isra'ee'l minaadaba baaxiilonne awwonsu Naabaax beet adil Yoorbi'aamika jor kobi'lla awwonimminne baaxiilo baximminne Waa'a kichche'isukko. Aasoo'l adil Tigilaat-Phaleeseer, Iiyoona, Abeelbeetmaa'ika, Yaanoha, Qeedeeshaa Haxoora yakkam beero'uwwaa ee'isam Gala'aaxxeka, Galii'llekaa Niftaalee'm gassi uulluwwaa weeraraa qasimminne minaadaba Aasoo'l uulla qeefadaa massukkokim ka Faaquh adilla'n doollennette. Ooziy beet Yoo'aataam Ayihuxxi uullanne adil ihu lammiyyi hiinchonne Eela'i beet Hose'i adil Faaquhanne dollotukko. Ixxom shaa Isra'ee'l minaadabina adil ihukko. Faaquhe issu mulli luwwi hundim Isra'ee'l Adilluwwi Aganni Kitaabanne kitaabamaakko. Raamaaliy beet Faaquhe Isra'eelanne adil ihu la'm hiinchonne Ooziy beet Yoo'aataam Yihudanne adil ihukko. Adil ihu ammane ixxek umur lammiyyee onti hiinchoo ihaa hee'ukko. Ixxi heechchi beyyom Yerusaaleemanne issaa tommoo loh hiinchoo gassukko; ixxi amam Yaruusha yamantam Xaadooq landichchotte hee'llo'o. Ixxim, ixxi anni Ooziyika er haalata awwonimminne Waa'a liiransoo baxo baxukko. Ihukkaarem duunnuwwi hundannem hee'llo'i qophpha'n waa'uwwina otossakkam beyyuwwa bi'isukkoyyi hee'ukko. Minaadabim kitima hincaa'immaa aduruusa wiriissimmaa utto'oyyi hee'llo'o. Keesammi mi'nneka hanaa'n qarinne yoo ooxxi gooca baxisukkokim Yoo'aataamatti hee'ukko. Yoo'aataam issu mulli luwwi hundim Yihuxxi Adilluwwi Aganni Kitaabanne kitaabamaakko. Waa'i luxxeka Sooriy adil Raxiinaa Isra'ee'l adil Faaquhee Yihuda qassona asse'ukkok Yoo'aataam Ayihuxxi uullanne adil ihu doollennette hee'ukko. Yoo'aataam lehukko. Daawiit beero'onne yoo adilluwwa waammakkam beyyonne waammamukko. Ixxi beyyonnem ixxi beet Akaaz adil ihukko. Ramaaliy beet Faaquhe Isra'eelanne adil ihu tommonnee lama'l hiinchonnee Yoo'aataam beet Akaaz Yihudanne adil ihukkok Ixxek umur lamiyyi hiincho ihaakkoohaannonnetti hee'ukko; ixxi heechchi beyyom Yerusaaleemannetti issaa tommoo loh hiinchoo gassukko; ixxi lobanni adil Daawiit er kobi'lla awwonimmi bikkenne Waa'a kichche'isoo baxo baxukko. Isra'ee'l adilluwwika jor haalata awwonimminne ixxi beeto shokkiisakka'a hincaa'akkam kitim issaa hincaa'imminne Waa'i Isra'ee'l oos illagiinsi yaayyaa hollu mulli minaadaphphisam shigigaa'oo baxo baxukko. Akaaz duunnuwwanne baxam hee'u, ee hujuphphi haqquwwi yoo beyyuwwannee kitima hincaa'amii aduruusa wiriissamii hee'ukko. Ee ammanenne Sooriy adil Raxiinii Isra'ee'l adil Faaquhee Yerusaaleema qasseena kibbito'o; ihukkaarem Akaaza kaa'lleena xanto'oyyo. Ee doollenne Sooriy adil Raxiin Eelaat beero'o Sooriyina dabarukko; Ayihudam Eelaatiinsi hollukko; Eedoo'm minaadabim Eelaata waatta'a kaballi afeebe'e ee beyyonne hee'llamo. Akaazim «An kiina awwaadaanchoo qachchoo ihummi bikkina iinninne orantam Sooriy adiliinsii Isra'ee'l adiliinsii eese gatise» yaa Aasoo'l adi'l Tigilaat-Phaleeseer beyyo manna asse'ukko. Akaazim Keesammi Minennee adi'l doono'i minennee yoo biraa worqaa massaa Aasoo'l adilina asse'ukko. Aasoo'l adil Tigilaat-Phaleeseerim Akaaz xa'mmichcha aa'aa Damaasqo'onne gaadaa ixxi anganne aa'ukko; adil Raxiinam shukko; minaadabam qeefadaa Qiira massukko. Yihuxxi adil Akaazim Damasqo'o maraa Aasoo'l adil Tigilaat Philaaseerinne edamukko; ee beyyonnem mat kiti'm beyyo moo'ukko; ixxim ee kiti'm beyyo labookkoka baxakkam misila gudisaa qeessichchi Uuriyina asse'ukko. Ee bikkina Uuriy adil Akaaz waaroo'n gaassaa ee kiti'm beyyo labookkoka baxukko. Akaazim Damaasqo'iinsi waaraa kiti'm beyyi danaamisa baxamukkisa moo'eenaa kitima hincaa'eenaa ee kiti'm beyyo marukko. Ee kiti'm beyyonnem diinaxxeka shokkiisakka'a hincaa'akkam kitimaa hurbaaxxi kitimaa hincaa'ukko; woyi'n diqaas kitimaa mateeyyoo'm kiti'm xiigam dunukko. Haareechchi kiti'm beyyaannonnee Keesammi Mi'nnaannonnee lambe'enne Waa'i illagenne uullaa hee'u naasinne baxamaakkoo kiti'm beyyo ee beyyiinsi ki'isaa haareechchi kiti'm beyyiinsi hanaa'n qarinne dissukko. Ee lasage adil Akaaz hundiinsi lob qeessichchi Ooriyo «Lob haareechchi kiti'm beyyonne daranne shokkiisakka'a hincaa'akkam kitimaa hiimonne hincaa'akkam hurbaaxxi kitimaa adi'lleka shokkiisakka'a hincaa'akkam kitimaa hurbaaxxi kitimaa ee'isam minaadaphpheka shokkiisakka'a hincaa'akkam kitima hurbaaxxekaa aggi kitimaa hincaa'e; shokkiisakka'a hincaa'akkam kiti'm xiigaa mulli kiti'm xiigaa hundam ee kiti'm beyyonne kife; ihukkaarem oo naas kiti'm beyyi an kiissiixxeena awwaaxxoommi beyyi ihona» yukko. Hundiinsi Lob qeessichchi Ooriyim adil Akaaz ijaajukkoka hundam issukko. Adil Akaaz midaadduwwanne yoo saanquwwa fissaa massukko; aanshaqqakkam saahinnuwwam shafe'nnoo'i tululoo lokki yoo luwwiinsi ki'isukko. Wo'o issakkam jaalo'o tommiinsii lam naasiinsii baxamu moolluwwi haniinsi dilliisaa kinanne dissukko. Asoo'l adila liiranseena usheexxaxxi ballanne adilla'n barcuma dissimmina Keesammi Minenne baxamaakkoo iim shiqaakkoo beyyoo Waa'ika Keesammi Mine adilluwwi aagoo biireen yoo goocaa ki'isukko. Akaaz ixxi adilla'n doollenne baxu baxii issu luwwii hundim Yihuxxi adilluwwi Aganni Kitaabanne kitaabamaakko. Akaazim ixxi anno'isam lehukko. Daawiit beero'onnem waammamukko. Ixxi beyyonnem ixxi beet Hizqiyaas adil ihukko. Akaaz Yihudanne adil ihu tommonnee la'm hiinchonnee Eela'i beet Hoose'i Isra'eelanne adil ihukko; ixxi heechchi beyyom Samaare'ennetti issaa honsi hiincho gassukko. Ixxim jor baxo baximminne Waa'a kichche'isukko; ihukkaarem ixxi jor bax ixxeensi illageen hee'llo'i Isra'ee'l adilluwwi baxxo'aanni qax hee'ukkoyyo. Aasoo'l adil Salminaasoor oramu ammane kaa'amu bikkina anga uwwaa maarag hundam gibirimma asheerukko. Ihukkaarem hofqax hiinchuwwiinsi lasonne adil Hoose'i Soo'i yakkam Gibxi adi'l beyyo manna asse'aa hara'mmoo'isina xa'mmukko; maarag hundam Aasoo'l adilina uwwam hee'u gibirom miqimma sabukko. Salminaasoor ee woshsha macceesu ammanenne Hoose'a amadiisaa karaxxi mine aagisukko. Ee lasage Salminaasoor Isra'ee'lanne weeraraa Samaare'e sas hiinchina kibbukko. Hoose'i adil ihu honsi hiinchonne Salminaasoor kaa'aa Samaare'e amadukko. Isra'ee'l minaadabam qeefadaa Aasoo'l uulla massukko. Ixxuwwiinsim mat qaxa Halaah beero'onne hofqaxam Goozaa'n uullanne yoo Haboor daajji gadanonne ee'isam mulli keeno Meedoo'n beero'uwwanne wiiddantamisa issukko. Mashka'oomim Isra'ee'l minaadab Gibxi agiddaniinsi fissaa neeyyaxxi uulla awwonsu Waa'a xadda'a mulli waa'uwwina otossimminne Waa'a kichche'isso'i bikkinatte. Isra'ee'l minaadab Waa'i ixxuwwi illagiinsi hollaa fissu mulli minaadaphphekaa Isra'ee'l adilluwwikaa jor losano awwonto'i bikkinatte. Ee'isam Isra'ee'l minaadab ixxuwwi Moollanni Waa'i saboo luwwi hundam issito'o. Ixxuwwi hee'llam hoffi gattuwwiinsi ki'isaa lob beero'onne afeebe'e ixxuwwi beero'uwwanne hundannem qophpha'n waa'ina otossakkam beyyuwwa baxxo'o. Duunnuwwannee haqqi lugum hundannee ki'n utubbuwwaa Asheera yakkam qophpha'n waa'i misilluwwaa uullisso'o. Waa'i xoqolaa uulliinsi fissu mulli minaadaphphi losano awwonta'a ee minaadaphphi kiti'm beyyuwwi hundannem aduruusa wiriissito'o. Ee ixxuwwi jor baxxuwwinne hundinnem Waa'a quuqisso'o. Waa'i qophpha'n waa'ina otossitambee'isa ijaajukkoka hundam gindito'o. Waa'im «Jor googiinsi daba'llehe i awwaadaaninnee hiraagaaninnee gaassi ki'nnuwwi anno'inaa ki'nnuwwinaa uwwummi ijaajonnee seerannee kitaabamu ijaajo hundam eggellehe» yita'a Isra'ee'llaaninaa Yihuxxi minaadabinaa kuttam asse'amaanoo hiraagaanoo asse'aa hee'ukko. Ihukkaarem ixxuwwi ijaajanteena hasso'oyyo; ixxuwwi Moollanni Waa'anne amma'nnitobee'i gaassi anno'isam wodan duudaakkoo keen ikko'o. Waa'ika seera gindito'o; gaassi anno'inne aagu hidi'l sagaram egetto'oyyo; ege'llitamisina qoxxisaa kuru woshshannem zebereyito'o. Qophpha'n waa'uwwina otossimminne haashaaranto'o; mulli minaadaphpheka jor kobi'lla awwontambee'isina Waa'i ijaaju ijaajo gindita'a ixxuwwi kululleetanne hee'llam minaadaphphi losano awwonto'o. Ixxuwwim Moollanni Waa'ika ijaajo hundam gindita'a otossiteena lam adduwwi misila worqinne baxxa'a uullisso'o; ee'isam Asheera yakkam qophpha'n waa'i misilam baxxo'o; boollaankina otossito'o; Ba'aala yakkam waa'inam awwaadaan ikko'o. Ee waa'uwwinam ixxuwwi ooso landaa goonaa shokkiisakka'a hincaa'akkam kitim issita'a hincaa'llo'o; lehu manna weeshsham kee'nnekaa kiiraa'nnekaa woshsha aa'llo'o. Waa'i saboo jor luwwi hundinam gaga higissa'a uwwita'a Waa'a quuqisso'o. Waa'i Isra'ee'l minaadabanne quuqaa Yihuxxi minaadaba gatisaa Isra'ee'l minaadaba bi'isukko. Ihukkaarem Yihuxxi minaadab Isra'ee'l minaadaphphisam mulli losano awwanto'o bagaan ixxuwwi Moollanni Waa'ika ijaajo egetto'oyyo. Ee bikkina Waa'i Isra'ee'l ooso hundam ixxi illagiinsi bi'lleebe'i afeebe'e ixxuwwi diina'ina higisaa uwimminne guzumo'ukko. Waa'i Isra'ee'l minaadaba Ayihuxxi minaadabiinsi annanni issaa lasage Isra'ee'l minaadab Naabaax beeto Yoorbi'aama doo'llita'a adil issito'o. Yoorbi'aamim ixxuwwi Waa'iinsi annanni ikka'a kee'mmaalli baaxiilo baxxamisa issukko. Ixxuwwim Yoorbi'aam baxam hee'u baaxiilo hundam baxxo'o bagaan Waa'i kollonne daba'llito'oyyo. Waa'i ixxena awwaadaan ikko'i hiraagaaninne qoxxisaa kuraa hee'ukkisam ixxi illagiinsi bi'iseebe'i afeebe'e daba'llito'oyyo. Ee bikkina Isra'ee'l minaadab kaballi afeebe'e hee'llam Aasoo'l uulla qeefadanta'a matto'o. Aasoo'l adil Kuta, Aawa, Haamaataa Safaarwaayimaa yamantam Baabiloo'n beero'uwwanne hee'llam hee'llo'i hanqo'i Waa'a laqqambee'i minaadaba woraa hollanta'a matto'i Isra'ee'l minaadab hee'llo'i Samaare'i beero'uwwanne hee'llamisa issukko. Ixxuwwim ee beero'uwwa lago aa'lla'a hee'imma asheetto'o. Ixxuwwi ee uullanne hee'imma asheetto'aarem Waa'ina otossito'oyyi hee'ukko. Ee bikkina Waa'i hobba asse'aa ixxuwwiinsi hofqaxam iiqansaa shoo'isa issukko. Aasoo'l adilinam «Samaare'enne hee'llamisa issitti minaadab ee uulli waa'ika seera laqqobee'i bikkina ixxuwwa iiqansaa shoo hobba asse'aakko» yoo assi afukko. Adilim «Neese qeefandaa eembummi Isra'ee'l qeessuwwiinsi mato ee uulla asse'llehe; ixxim ee uulla daba'llaa maraa ee uulli waa'ika seera minaadabina losisona» yukko. Ee bikkina Samaare'iinsi qeefadamaa hee'u mat Isra'ee'l qeessichchi daba'llaa maraa Beeteelanne afuurukko. Ee uullannem minaadab Waa'ina hinkid otossimmi hasisooda'e losisukko. Ihukkaarem annanni annanni beero'onne hee'llo'i minaadab ixxuwwi gaqqi waa'uwwa baxxa'a Isra'ee'l minaadab duunnuwwanne otossiteena axissa'a hee'llo'i beyyuwwanne dissito'o. Ee'isinne Baabiloo'n minaadab Sukootbaanoot, Kut minaadab Neergaal, Haamaat minaadabim Iishiima, Aawa'i minaadab Niibihazinaa Taartaaqaa yakkam waa'uwwaa ixxuwwi gagina baxxo'o. Safaarwaayim minaadab odim Adiraameeleekaa Anaameeleekaa yakkam waa'uwwina ixxuwwi ooso shokkiisakka'a hincaa'akkam kitim issita'a hincaa'llo'o. Oo minaadab hanqo'i Waa'inam otossitam hee'llo'o; ihukkaarem annannichchim ixxuwwi moolli losano awwonimminne duunnuwwanne otossitam waa'uwwina kitima hincaa'llu'uuyyi awwaaddam qeessuwwa doo'llito'o. Ee'isinne Waa'inaa gaassi hee'llo'i losano awwonimminne qophpha'n waa'uwwinaa otossitam hee'llo'o. Oo minaadab kabad afeebe'em ee losano awwontu'uuyyi yo'o; Waa'inam hanqo'isinne otossitamoyyo; Waa'i Isra'eela yu Yaaqoob shumo'ina uwwu ijaajoo seeraa egettamoyyo. Waa'i Isra'ee'l minaadabinne hidi'l sagara aagaa «Qophpha'n waa'uwwina otossitakkotte; ixxuwwinam awwaaddakkottee kitima hincaa'llakkottee. Lob malaayyinnee qoxxaalli i wodinnee Gibxiinsi fissummi iina Waa'ina ijaajammehe; ki'nnuwwi otossimmii kitima hincaa'immii hasisookkok xale'i iinatte. An ki'nnuwwina kitaabaa uwwummi seeraa ijaajoo hundi ammanem egellehe; qophpha'n waa'uwwinam otossitakkotte. An ki'nnuwwinne aagummi hidi'l sagaram xaddakkotte; qophpha'n waa'uwwinam otossitakkotte. Eese ki'nnuwwi Moollanni Waa'a baddehe; ki'nnuwwam Anim ki'nnuwwa diina'i angiinsi gatisoommo» yaa ijaajaa hee'ukko. Ihukkaarem oo minaadab ixxuwwika gaassi losano awwonto'o bagaan macceesso'oyyo. Ee bikkina oo minaadab eehido'isinne Waa'inaa qophpha'n ixxuwwi waa'inaa laminam otossitam hee'llo'o; ixxuwwi shumo'im kabad afeebe'em ee'isa issitu'uuyyi yo'o. Eela'i beet Hoose'i Isra'eelanne adil ihu saxxi hiinchonne Akaaz beet Hizqiyaas Yihudanne adil ihukko. Hizqiyaas adil ihu ammane umur lamiyyee onti hiinchoo ihaa hee'ukko; heechchi beyyom Yerusaaleemanne issaa lamiyyee honsi hiinchoo gassukko. Ixxi amak summi Abiyat ihaa Zakkaariyaasina landichchotte hee'llo'o. Ixxim ixxi lobanni adil Daawiitisam Waa'a liiransoo baxo baxukko. Waa'a laqqambee'i minaadab otossitam beyyuwwa bi'isukko; ki'n utubbuwwa iiqansukko. Asheera yakkam meentichchi waa'i misilluwwa hundam muransukko. Isra'ee'l oos ee amman afeebe'e aduruusa wiriissitam hee'llo'i bikkina Muse'e naasinne baxaa hee'u Nahushtaana yakkam hamashshichchi misilam xaansukko. Hizqiyaas Isra'ee'l Moollanni Waa'anne amma'nnamukko. Yihuxxi adilluwwiinsi Ixxe'nnookkok ixxeenninsi illageenim ihukko lasageen hee'ukkoyyo. Hizqiyaas Waa'anne amma'nnamaakkoohan hee'u bikkina ixxi googiinsi qee'llu amman hee'ukkoyyo. Waa'i Muse'ena uwwu ijaaj hundam ersa egeram hee'ukko. Ee bikkina Waa'i ixxena hara'mmam hee'u bikkina ixxena luwwi hundim taaphanam hee'ukko; Hizqiyaas Aasoo'l adilina bangujjaa gibirimma sabukko. Filisxee'm mannam hoffi hegeegguwwiinsi ki'isaa lob beero'o Gaaza'aa ixxi kululleetanne yoo uulluwwaa hundam kaa'aa amadukko. Hizqiyaas adil ihu soo'l hiinchonne oohim Hoose'i Isra'ee'l uullanne adil ihu lama'l hiinchonne Aasoo'l adil Salminaasoor Samaare'i beero'o kibukko. Samaare'e kibbu saxxi hiinchonne hundoomam guullaa amadukko. Oohim Hizqiyaas adil ihu loh hiinchonnettee Hoose'i adil ihu honsi hiinchonnettee. Aasoo'l adil Isra'ee'l minaadaba qeefadaa ixxi uulla massaa Halaah beero'onne, Goozaa'n uullanne hee'oo Haboor daajji gadanonnee Meedoo'n beero'uwwannee binbinnaa'aa hee'llamisa issukko. Oo hundim ihukkok Isra'ee'l minaadab ixxuwwi Moollanni Waa'ina ijaajantobee'i bikkinatte; Waa'i ixxuwwinne aagu hidi'l sagara gindito'ookko; Ixxena awwaadaanchi ihu Muse'enne uwwu ijaajom egetto'oyyo. Hizqiyaas adil ihu tommonnee soo'l hiinchonnee Aasoo'l adil Sanaakireem Yihuxxeka girbamaakkoo beero'uwwa ka'aa amadukko. Yihuxxi adil Hizqiyaasim Laakiishanne hee'oo Sanaakireemina «An keese hawwodaammo; at eese xa'mmitoo luwwi hundam an kiina miqoommo ora uullise» yaa asse'ukko. Adilim «An hasoommok tommi kum kiilo'i biraa mat kum kiilo'i worqaa iina asse'lloo'isinatte» yaa dabaraa asse'ukko. Hizqiyaasim Waa'i minennee adilla'n minennee hee'oo bira hundam wixxaa'aa asse'ukko. Ee'isam Yihuxxi adil Hizqiyaas Keesammi Mi'n gooccuwwannee xuffuwwannee goolabaa hee'u worqa ki'isaa adil Sanaakireemina uwwukko. Aasoo'l adil sas gaaxxi awwonsaaninne qoxxaalli gogota Laakiishiinsi Yerusaaleema maraa adil Hizqiyaasa qasona asse'ukko; oo gogot Yerusaaleema afukkisam delbi wo'i daadoo beyyi gadaninne eddechcha aanshitam kee'n abuulli uulla massoo googonne uullukko. Ee lasage adil Hizqiyaasa weeshisso'o; Hizqiyaasim ixxi gassaa'nneka saso asse'ukko; oo keenim adilla'n mi'n gassaanchi hee'u Hiliqiy beet Eeliyaaqeematte, adilla'n mi'n kitaabaanchi hee'u Sheebinaanattee adilla'n mi'n doo'n gassaanchi hee'u Asaaf beet Yoo'ahattee hee'llo'o. Aasoo'l gaaxxi awwonsaaniinsi mat «Adil Hizqiyaasina ‹Asoo'l at kaa'nna amma'nnantitti luwwi maha? Woshshik lobakat orina qooroomaa malaayyee uwwoo labissaatennihe? Aasooranne bangujjittok kiina ayyi hara'mmookko yitaate? Gibxi adil iina hara'mmookko yitaa sawwitaattoolas xaam shomboqo'o sikke'oo manchisa; oohim iiqamaa shiincaar anga omassoo bikkinatte. Gibxi adilanne amma'nnamoo keen hundinam ee'isa› yoolla yi'llehe» yaa asse'ukko. Ee'isam «At ki Moollanni Waa'i kiina hara'mmookko yitaa sawwitoollannihe? Eehid ihoobee'isa Waa'ika keesamaakkoo beyyuwwaa kitima hincaa'akkam beyyuwwaa bi'issaa ‹Yihuxxekii Yerusaalee'm minaadabii otossimmi hasisookkok Yerusaaleemanne yoo mexxo'i mat kitima hincaa'akkam beyyonnette› yitaatto. Oono'o, ka an keese adi'l summinnette ihaa orina xa'mmoommo; saa'lleena xanoo manna siiddeena xantoohan ihulas lam kum farado kiina uwwoommo! At amma'nnantoottok ‹Gibxi uulli faraxxi gaare'uwwannettee faradonnettee ihukkuuyyi› i moollanni gaaxxi awwonsaanniinsi hoffe'oohaanninne hinkid uullixxanteena xantootto? An ka uulla bi'iseena firummok Waa'i ijaajoo'nnim labissaahinnihe? Waa'i eese ee uulla mattaa bi'ise yaakko» yukko. Ee lasage Eeliyaaqeem, Sheebinaanii Yoo'aahii ee gaaxxi awwonsaanchina «Neese ki awwaadaan lanqeena xannoommi bikkina Sooriy uulli suuminne woce. Ka ooxxi hanenne yo'i manni macceessam Ibro'isinne woccitte» yito'o. Oo gaaxxi awwonsaanchim «Aasoo'l adil ka hundam ki'nnuwwinaa ki'nnuwwi adilinaa xale'e wocoommisina eese asse'ukkoka labissakka'attennihe? An wocoommok ki'nnuwwisam ixxuwwi gaqqi qoxxaalli shuma ittamanee wo'i shuma aggamanee ihu bikkina ka ootanne afuutto'i manni hundim macceessonatte» yaa dabarukko. Ee lasage oo Aasoo'l gaaxxi awwonsaanchi afuuru beyyiinsi ki'aa uullukko. Ixxi sagaram haraassaa Ibro'isinne «Aasoo'l adi'l woshsha macceessehe! Hizqiyaas ki'nnuwwa gatiseena xanoobee'i bikkina ixxena hore'em qawwisantakkotte; Hizqiyaas ‹Waa'anne amma'nnammehe; ixxi ki'nnuwwa gatisookko; ni beero'im Aasoo'l gogoxxi anganne aagoobee'isa issookko› yukkuuyyi alallaatoo woshsha macceessakkotte. Hizqiyaas woshsha macceessakkotte; Aasoo'l adil ‹Iina anga uwwitakka'a ijaajantakkolas ki'nnuwwi kaassakko'i woyi'nnekaa oda'ikaa misha ittakkamo; hintakko'i bariinsim wo'o aggakkamo› yoolla. Oohim ki'nnuwwi uullisam woyi'n diqaas hurbaat, woyinaa weeraa kaasakkam beyyii marabii wo'mmaakkoo uulla masseebe'e letakkambee'isa foorinne hee'llakkonatte. Hizqiyaas ‹Waa'i ki'nnuwwa gatisookko› yaa qawwiisoone. Mulli minaadaphphi waa'uwwiinsi hinkim Aasoo'l adi'l angiinsi ixxuwwi uulla gatisukkok yoohonnihe? Eehan ihulas Haamaatikii Arfaad waa'uwwii hannonne yo'o? Safaarwaayimik, Heenaa'ikii Iiwa'i waa'uwwii hanno affo'o? Ixxuwwiinsi matim Samaare'e i angiinsi gatisseena xanta'a hee'llo'onnihe? Ee uulluwwik hundikim waa'uwwi ni adi'l angiinsi ixxuwwi uulla gatisseena xanto'i amman yoohonnihe? Eehannah ki'nnuwwi ‹Waa'i Yerusaaleema gatisookko› yitakka'a sawwitakkamok hinkidette?» yukko. Minaadabim adil Hizqiyaas ixxuwwa ijaajaa hee'ukkisinne ma'llichchom woccambee'isa cawwito'o. Ee lasage Eeliyaaqeem, Sheebinaanii Yoo'ahii kichche'lla'a ixxuwwi eddechcha dereetto'o; adil Hizqiyaas beyyom matta'a Aasoo'l uulli gaaxxi awwonsaanchi wocu woshsha hundam kutto'o. Adil Hizqiyaas ee woshsha macceesaa kichche'aa ixxeka eddechcha dereerukko; xiddi eddechcham edde'aa Keesammi Mine marukko. Ee lasage adi'l mi'n gassaanchi ihu Eeliyaaqeem, adil mi'n kitaabaanchi Sheebinaanii qeessuwwi awwonsaanii xiddi eddechcha edde'lla'a Aamoox beet hiraagaanchi Issaayyaas beyyo mattona asse'ukko. Issaayyaasinam «Kaballi kee'mmaalli hawwi balla; guzumo'ii sholle'nnii neesenne afeenatte; qattam amman afaa qatteena malaayyi bee'u meentichchosa inkaammo. Asoo'l adil hee'oo Waa'inne game'llamona ixxeka gaaxxi awwonsaancho asse'aakko; ki Moollanni Waa'i eekka macceesaa ixxo guzumo'eena xanookko; ee bikkina gatto'i ka ni minaadabina Waa'a uunxe› yaakko» yita'a kutto'o. Issaayyaasim adil Hizqiyaasa asso aa'aa lasage «Waa'i kiina ‹Ki'nnuwwa gatiseena xanooyyo› yitu'uuyyii eese game'llitu'uuyyii Aasoo'l gaaxxi awwonsaan woccam sha'llancha baddititte. Oono'o, an ixxena dambaqisoo ayyaana asse'oommo; ixxim uulla daba'llaa maroo'isaa ixxi gaqqi uullannem bisa'inne aphphisamaa lehoo'isaa issoommo› yoolla» yukko. Aasoo'l gaaxxi awwonsaanchi, adil Laakiisha yakkam beyyiinsi ki'aa Libina'i beero'onne orameena marukkisa macceesaa ixxenne a'llameena ee beyyo marukko. Tophphe'i adil Tiirihaaq awwonsoo Gibxi gogot ixxuwwa qaseena waarukkuuyyi yoo'isa Aasoo'l adil macceesaa ee ammanem Hizqiyaas beyyo «Yihuxxi adil Hizqiyaasa, at amma'nnantoo Waa'i ‹Yerusaaleem Aasoo'l adil anganne ubooyyo› yaa keese qawwisoone. Aasoo'l adil mat uulla bi'iseena hasoo ammane hundam mah issooda'e macceessaatto. Atdu xottoottoka labissaatennihe? Gaassi iyyanno'i Goozaa'nneka, Kaaraa'nnikaa Reexeefikaa beero'uwwa bi'isso'ookko. Talaasaaranne hee'llam Ede'n minaadaba shito'ookko. Oo hundim ihukkuuyyi ixxuwwi waa'uwwiinsi matim gatiseena xanukkoyyo. Ee'isam Haamaatik, Arfaadik, Safaarwaayimik, Heenaa'inikii Iiwa'ikii beero'uwwi adilluwwi hannonne yo'o?» yoo assikitaaba asse'amaa'n anganne asse'ukko. Adil Hizqiyaasim ee askitaaba asse'amaaniinsi aa'aa qananaa'aa Keesammi Mine massaa Waa'i illagenne biddiqaa'aa «Isra'ee'l Waa'a! Kiruubeela yakkam asse'amaa'n hanenne afuuttitti Moollanni xale'i atette; ka uulli adilluwwam awwonsitoottok atette; uullaa iimanee qooccittok atette. Kabadem Waa'a! neesenne afu hawwo hundam moo'e; keese hee'lloo Moollanni Waa'a gamme'llukkuuyyi Sanaakireem wocu sha'llancha hundam macceese. Waa'a! Aasoo'l adilluwwi lobakat minaadabaa uullaa bi'isso'is hanqa. Haqqaa kinaa cabbarakka'a baxakko'i malaaybee'i waa'uwwa giirinne shokkiissa'a bi'isso'ookko. I Moollanni Waa'a! Xale'i at Moollanni ikkittisa uulli hundannem yo'i adilluwwi laqqamisina kaba Aasoo'l minaadaphphi angiinsi neese gatise» yaa uunxukko. Ee lasage Aamoox beet Issaayyaas adil Hizqiyaasina «Isra'ee'l Moollanni ihu Waa'i ‹Aasoo'l adil Sanaakireem sha'llanchi bikkina uunxitti uunxato macceesaammo. Ee'isam Sanaakireemina «Xiyoo'n baajaammuwwi keese gaddamoo keesennem osattamo; at gibbittuuyyi Yerusaalee'm landi moo'lla'a horoore heekkeessamo. At game'llittokii iggittokii ayyette? Shaaqqaa woccittokii sholliissaa moo'llittokii ayyette? Isra'eelina keesammi ihummi eesette. Ee'isam ki asse'amaano asse'llaa ‹An faraxxi gaarre'uwwinne lob duunnuwwanne firaammo; Liibaanoos ludom afaammo; lob qeeraa'l liibaanoos haqquwwaa doo'l digibbuwwaa muraammo. Tochchiinsi tochchoo tiiwwi haqqoroo afaammo. Allaggi uullanne bare hinaa wo'o agaammo; i konte'innem hancaacaa Gibxi uulli daajjuwwa gokkisaammo› yitaa amaadinne Waa'inne uullixxantaatto. Macceessittoyyonnihe? An eraarem sawwummokaa qoodummokaa kaba issoommuullak anette. At girbamaakkoo beero'uwwa gindansitaa ubbuussoo'isa issummok anette. Ee uullanne hee'llo'i minaadaphphek hundikim malaayyi hoogukko; hundim muggita'a jallito'o; udma'i uullanne mutu hixisa, mi'n iimanenne mutu bochchisaa quubaa gogu hurbaaxxisaa ikko'ookko. An kiikka aagimma, firimma, uullitoo'isa, afuuttoo'isaa eese sabbittisaa la'oommo. Eese sabbittisaa amaaddittisaa la'aammo; kaba ee bikkina an ki sanenne guma'a ki aqonnem hakkamma issaa waattitti googinnem dabaroommo» yukko. Ee lasage Issaayyaas adil Hizqiyaasina «Eehanninam mare'i ihoo'isina ka maaragee la'm maaragee gobbe'e ittakkamo. Ihukkaarem saxxi maarage ki'nnuwwi gaqqi hurbaata wixxakka'a atoota wixxaa'llakkamo; woyinam kaassakka'a misha ittakkamo. Bichchiinsi gatu Yihuxxi minaadab haqqisa uullanne xapha kaasaa misha mishookko. Yerusaaleemannee Xiyoo'n duunannee bichchiinsi xotta'a gatto'i minaadab hee'llamo. Gogoxxi Moollanni Waa'ik to'achchi eekka issookko» yukko. Waa'i Aasoo'l adilina «Sanaakireem ka beero'o hore'em aagooyyo; mat xiyyam ihuta'n darabooyyo; agira amadu gaadaanchim ixxonne hincooyyo; buchchi dichchirinnem kibbamooyyo. Ixxi ka beero'o aagoo'nnim waaru googinnem daba'llaa marookko. Kaka wocummok an Waa'a. I gaqqi lombi bikkinaa i awwaadaanchi Daawiitinaa uwwummi saga'l neeyyaxxi bikkina ka beero'ina an i gagoomim uullixamaa gatisoommo› yoolla» yukko. Ee hiimom Waa'i asse'amaanchi Aasoo'l gaadaan wiiddanto'i beyyo maraa 185,000 gaadaanoo shukko; la'm balli daram manni ki'aa moo'oohaare wiidda'n beyyonne leesh wo'mmaa hee'ukko. Ee lasage Aasoo'l adil Sanaakireem laso daba'llaa Naanaawe'i beero'o maraa eekke'enne afuurukko. Ixxim mat balla Niisirooka yakkam qophpha'n waa'i minenne aagaa otossukkuuyyim ixxi oosiinsi lam Adiraameeleekii Saareexeerii bisa'inne shito'o. Ixxuwwim Araaraata yakkam uulla gibba'a matto'o. Ixxi beyyonnem ixxi beet Asiraad adil ihukko. Ee maarage adil Hizqiyaas kee'mmaallisa jabbaa leheena ihaa hee'ukko; Amoox beet hiraagaanchi Issaayyaas ixxo moo'eena maraa «Waa'i ‹Letootto bagaan ka jabbiinsi fayye'lloobee'i bikkina ki mine axixxe› yoolla» yukko. Hizqiyaasim gortanni kollonne daba'llaa «Waa'a! Amma'nnanchinnee xabbeenoominnee kiina awwaadummokaa keese liiranseenam yakummokaa sawwihe» yaa Waa'a uunxaa lasage qaraaraallisa wi'llukko. Issaayaas adi'l illagiinsi firaa adilla'n mi'n lambe'enne yoo wixxixxi beyyo higoo'nnim Waa'i ixxena «I minaadaba awwonsoo adil Hizqiyaas beyyo daba'llitaa mattaa ‹An gaassi kiyyanni Daawiit Moollanni Waa'i ki uunxato macceesaammo; ki indiiddam moo'aammo; an keese fayyiisoommo. Sas balliinsi lasage Keesammi Mine mattootto. Ki umurannem tommoo onti hiinchoo edoommo. Keesee ka Yerusaalee'm beero'oo Aasoo'l adi'l angiinsi gatisoommo. I lombi bikkinaa i awwaadaanchi Daawiitina uwwummi neeyyaxxi saga'l bikkinaa ka beero'o egeroommo› yoolla yitaa kure» yukko. Ee lasage Issaayyaas adi'l awwaadaanina oda'i mishika xuruuro'o eebbehe» yukko. Ixxuwwim eebba'a madanne issito'aare adil fayye'ukko. Adil Hizqiyaasim «Waa'i eese fayyiisaa sas ayyaamiinsi lasage Waa'i Keesammi Mine mareena xanoommisa mahinne la'eena xanoommo?» yaa Issaayyaasa xa'mmukko. Issaayyaasim «Waa'i uwwu neeyyaxxi sagara wonshoohan ihukkisina ixxi gagoomim mare'e uwwookko. Eehannah at kaba doo'llitoottok haf tommi gardabba illage higonannii laso daba'lloo'isinatte?» yaa xa'mmukko. Hizqiyaasim «Haf tommi gardabba illage maroo'isa issimmi sholle'ookko. Ee bikkina tommi gardabba laso daba'lloo'isa isse» yukko. Ee lasage Issaayyaas Waa'a uunxukko; Waa'im adil Akaaz ammane kurona baxisu gardabbi hanenne hee'u haf tommi gardabba laso daba'lloo'isa issukko. Ee ammanem Baabiloo'n adil Balaadaan beet Maroodaak Balaadaan adil Hizqiyaas jabbaa hee'ukkisa macceesaa irifo'inne maqirem asso asse'ukko. Hizqiyaasim asse'amaa waaru manna liiranchinne aa'ukko; adilla'n mu'uta dissakkam minenne yoo amaxxa hundam biraa worqaa, enjuwwaa shito'oo, o'l mu'utaa hundamii moo'isukko. Adilla'n mi'n mu'uta dissakkam minennem ihukko ixxi adilla'n gassi uullanne hannonnem yoo amaxxiinsi moo'isubee'i luwwi mahim hee'ukkoyyo. Ee ammanenne hiraagaanchi Issaaysaas adil Hizqiyaas beyyo maraa «Ku manni waatto'ok hanniinsette? Kiindu maha kutto'o?» yaa xa'mmukko. Hizqiyaasim «Ixxuwwi waatto'ok Baabiloona yakkam qee'l uulliinsette» yaa dabarukko. Issaayyaasim «Adilla'n minenne maha moo'llo'o?» yaa xa'mmukko. Hizqiyaasim «Hundem luwwam moo'llo'ookko. Adilla'n mu'uxxi minenne yoo amaxxiinsi ixxuwwina moo'isoo'n urummi luwwi mahim bee'e» yukko. Issaayyaasim adilina «Hundam xanoo Waa'i ‹Gaassi kiyyanno'i kaballi afeebe'e adilla'n minenne wixxaa'llo'i amaxxi hundim fii'amaa Baabiloo'n uulla massamoo balli waarookko; mahim gatooyyo. Ki shumo'ikim mat mat keen Baabiloo'n uulla qeefadanta'a marimminne Baabiloo'n adilla'n minenne muleessa'uwwi ikka'a awwaaddamisa issakkamo» yukko. Adil Hizqiyaasim ixxi adilla'n doolli xumminne higoo'isa la'u bikkina «Waa'iinsi asse'antaa iina kuttitti woshshi danaamo» yaa dabarukko. Adil Hizqiyaasik geedoomman, jaalo'uwwaa wo'i delbuwwaa baxisukkis, Yerusaalee'm beero'onne wo'o aagiseena uulli worinne boohe'e baxamukkisii mulli baxii hundim Yihuxxi Adilluwwi Aganni Kitaabanne kitaabamaakko. Hizqiyaasim lehukko; ixxi beyyonnem ixxi beet Minaase adil ihukko. Minaase Yihudanne adil ihu ammane ixxek umur tommoo lam hiinchoo hee'ukko; ixxi heechchi beyyom Yerusaaleemanne issaa ontayyee onti hiinchoo gassukko. Ixxi amakim summi Heefxiibatti hee'ukko. Waa'i Isra'ee'l oos illagiinsi xoqolaa bi'isu mulli minaadaphpheka shigigaa'oo losano awwonaa Minaas Waa'a kichche'isukko. Ixxi anni Hizqiyaas gindaa hee'u duunnuwwanne yoo otossakkam beyyuwwa dabaraa baxukko; Isra'ee'l adil Aki'aabisam Ba'aala yakkam qophpha'n waa'ina kitima hincaa'akkam beyyoo Asheera yakkam meentichchi waa'i misilaa baxukko; Iima'n boollaankinam otossukko. Waa'i «Yerusaaleemanne i summa hee'isoommo» yu Keesammi Minenne qophpha'n waa'uwwina kiti'm beyyuwwa baxukko. Keesammi Mi'nnaannonne lamem wixxixxi beyyonnem iima'n boollaankuwwina otossakkam kiti'm beyyuwwa baxukko. Ixxi gaqqi beetom kitim issaa hincaa'ukko; ixxi gagim gennaanchoo karo'aanchoo ihaa kiiraaniinsii wiidda weeshsham keeniinsii sogitano xa'mmam hee'ukko; eehido'i jor baxo baximminne Waa'a quuqisukko. Keesammi Minennem Asheeraa yakkam qophpha'n waa'ika misila dissukko; oo Keesammi Minim, Waa'i Daawiitinaa ixxi beet Salamooninaa «Ku Yerusaaleemanne yoo Keesammi Min iina heer heerina otossakkamisina tommii lamem Isra'ee'l sulli gattam uulli hundiinsim doo'llaammoo beyyo. Isra'ee'l minaadab iina ijaajantolasii i awwaadaanchi Muse'ena uwwummi seeram egettolasii gaassi ixxuwwi anno'ina uwwummi ka uulliinsi xoqolanta'a bi'llamisa issoommoyyo» yaa kuraa hee'ukkane. Ihukkaarem Ayihuxxi minaadab Waa'ina ijaajanto'oyyo. Hore'oomam Isra'ee'l minaadab illagenne gafe'llu'uuyyi waatto'i ammane Waa'i ixxuwwi illagiinsi xoqolaa bi'isu hanqo'i Waa'a laqqambee'i minaadab issitam hee'llo'aanniinsi lophphoo baaxiilonne Minaase awwonsukko. Waa'im ixxi awwaadaan ikko'i hiraagaaninne «Minaas lobakata haashaaramaakkoo baxo baxukko; oohim gaassi Kana'aa'n minaadab baxxo'aanniinsi hundiinsim lophphoo jor baxo baxukko; Yihuxxi minaadabam ixxi baxu qophpha'n waa'uwwinne baaxiilonne awwonsukko. Ee bikkina Isra'ee'l Moollanni Waa'i «Oono'o, macceesukkok hundam muggisaa jallaa'oo kee'mmaalli boobana Yerusaaleemannee Yihudannee eeboommo. Samaare'i uullaa Isra'ee'l adil Aki'aabaa ixxuwwi shumo'inne maqire guzumo'ummisam Yerusaaleemam guzumo'oommo; wocita aanshakka'a lasage qubbaa'akka'a dissakkamisa anim Yerusaalee'm minaadaba baaxiiliinsi aanshoommo. Bichchiinsi gatto'i i minaadabam diina'ina higisaa uwwoommo; oo keenim ixxuwwika amaxxa boggamoo qeefaddamoo. I minaadabanne ka hundam issoommi mashka'i gaassi ixxuwwi anno'i Gibxiinsi fitto'i ammaniinsi ki'isaa kabad afeebe'e baaxiilo baxxa'a eese kichche'isso'i bikkinattee quuqisso'i bikkinattee» yukko. Odim Minaase Yihuxxi minaadaba qophpha'n waa'ina otossitamisa issukkaanniinsi mulleka Yerusaalee'm beero'onne lobakat muccur mannika xiiga dunimminne Waa'i illagenne jor baaxiilo baxaakko. Minaas baxu mulli luwwii issu baaxiilii hundim Yihuxxi adilluwwi Aganni Kitaabanne kitaabamaakko. Minaasem lehukko. Adilla'n mi'n qash woronne «Uuza'i duubbi kaashshi beyyo» yakkam beyyonne waammamukko. Ixxi beyyonnem ixxi beet Amoon adil ihukko. Amoon Ayihuxxi uullanne adil ihu ammane ixxek umur lamiyyee lam hiinchoo hee'ukko; ixxi heechchi beyyom Yerusaaleemanne issaa lam hiincho gassukko; ixxi amam Yaaxib beero'i Haruux landichcho Mashulaamette hee'llo'o. Amoonim ixxi anni Minaasisam Waa'i illagenne jor baxo baxukko. Ixxi annika jor kobi'lla hundam awwonukko; ixxi annisam qophpha'n waa'uwwina otossukko. Gaassi ixxi anno'i Moollanni Waa'a lagukko; Waa'i sagarinam ijaajancha sabukko. Ixxi gassaanim dollotta'a adilla'n minenne shito'o. Ayihuxxi minaadabim Amoona shito'i manna guullita'a ixxi beet Iyyoosiyaasa adil issito'o. Amoon issu mulli luwwi hundim Yihuxxi Adilluwwi Aganni Kitaabanne kitaabamaakko. Amoon «Uuza'i duubbi kaashshi beyyo» yakkam waammi beyyonne waammamukko; ixxi beyyonnem ixxi beet Iyyoosiyaas adil ihukko. Iyyoosiyaas adil ihu ammane ixxek umur sadeenti hiinchi hee'ukko; ixxi heechchi beyyom Yerusaaleemanne issaa sadee mat hiinchoo gassukko; ixxi amam Booxqaat beero'i Adaay landichcho Yidiida'atti hee'llo'o. Iyyoosiyaas illagee'n ixxi anni Daawiitika er kobi'lla awwonimminnee Waa'i seerina hanqo'isa ijaajanchinnee Waa'a liiransoo baxo baxukko. Iyyoosiyaas adil ihu tommonnee sadeenti hiinchonnee Mashulaam beet Axaaliy beet ihu adilla'n mi'n kitaabaanchi Saafaana «Hundiinsi lob qeessichchi Hiliqiy beyyo mare; Keesammi Mine aagakkam gooc gadanonne kor kore minaadabiinsi diinate wixxaa'llam qeessuwwi kabad afeebe'e hinkaa'n diinate wixxaa'lloda'e la'isoo shallago'o amaddaa waare. Keesammi Mi'n baxaa'n awwonsaanina uwwitona; ixxuwwim diinatooma Keesammi Minenne gindamu beyyo baxxam keenina, anga qoor mannina, kina cabbattam keenina, kininne mine baxxam keenaa Keesammi Mine areesimmina haqqaa kinaa aa'llam keeninaa miqqona. Baxo awwonsim keen hore'em amma'nnanto'oo keen ikko'i bikkina ixxuwwa diinate hinkid fissitamda'e egerimmi hore'em hasisooyyo» yoo asso amadiisaa Keesammi Mine asse'ukko. Ee lasage Saafaan adiliinsi asse'amu ijaajo hundiinsi lob qeessichchi ihu Hilqiyina uwwukko; hundiinsi lob qeessichchi ihu Hilqiyim «See'l Kitaaba Keesammi Minenne siidummo» yaa Saafaanina uwwukko. Saafaanim aa'aa qananaa'ukko. Ee lasage Saafaan adi'l beyyo daba'llaa maraa «Ki awwaadaan Keesammi Minenne hee'u diinate aa'lla'a ee areesimmi baxo awwonsaanina uwwito'ookko» yaa kurukko. Odim «Hundiinsi Lob qeessichchi Hilqiy siidaa iina uwwu kitaab kuno'o» yaa adilina qananaa'ukko. Adilim See'l Kitaaba qananaa'ukkuuyyi macceesu ammanenne kichchechchinne ixxi eddechcha dereerukko. Ee ammanem qeessichchi Hilqiyina, Saafaan beet Ahiiqaamina, Miikaay beet Akboorina, adilla'n mi'n kitaabaanchi Saafaaninaa adi'l gassaanchi Asaayinaa «Gaassi niyyanno'i ka kitaabanne kitaabamu awwonsa aa'llobee'i bikkina Waa'i neesenne lobakata quuqaakko; ee bikkina anii Yihuxxi minaadabii ka siidamu kitaabanne yoo losano lanqeena xannoommisina mattakka'a Waa'a uunxehe» yaa ijaajukko. Hiilqiy, Ahiiqaam, Akboor, Saafaanii Asaayii Yerusaalee'mmaannonne haareechcho baxamu hegeegonne hee'llam hiraagaanchotti hee'llo'i Hulda'a xa'mmiteena matto'o; Harhaas beetina beet Tiiqiw beet ihu is aro'i Shaaluum Keesammi Mi'n eddechcha egeraanchi hee'ukko; ixxuwwim ee beyyonne ihu luwwi hundam ee hiraagaanchona kutto'o. Isem ixxuwwina «I beyyo asse'u manchi beyyo daba'llitakka'a mattakka'a Isra'ee'l Moollanni Waa'i ‹Yihuxxi Adil qananaa'u kitaabanne kitaabamu saga'llisanne Yerusaaleemaa ka minaadabaa guzumo'eenatte. Ixxuwwi eese lagga'a qophpha'n waa'uwwina kitima hincaa'llo'ookko; ixxuwwi anginne baxxo'i qophpha'n waa'uwwinne eese quuqisso'ookko; i quunqi Yerusaaleemanne aphphaakko; xoo'ooyyome. At ee kitaabanne kuramu woshsha macceessaa Yerusaaleemaa ka minaadabaa hinkid guzumo'oomda'e macceessitti ammanenne ki gaga heeshaa'llaa eddechcha dereettaa wi'llitti bikkina ki uunxato macceesaammo. Ee bikkina Yerusaaleem guzumo'amoo'isa at ki illinne moo'llooyyo; at leteebe'i afeebe'em eekka issoommoyyo; at uulli xumminne hee'ukkuuyyim letootto› yoollaa yitakka'a kullehe» yito'o. Asse'anto'i mannim ee dabachcha amadda'a adil Iyyoosiyaas beyyo daba'llito'o. Adil Iyyoosiyaas Yihuxxekaa Yerusaalee'mmekaa lommanna hundam weeshukko. Adilim Keesammi Mine marukko. Ixxennem Yihuxxi minaadab, Yerusaaleemanne hee'oo manni, qeessuwwi, hiraagaanii minaadabii hoffaanniinsi ki'isaa lobaannonne afeebe'e hundim Keesammi Mine waatto'o. Adilim Keesammi Minenne siidamu Hidi'l Saga'l Kitaabanne kitaabamaa yoo sagara hundam ee mannina qananaa'ukko. Iyyoosiyaasim worqi utuphphi gadanonne uullaa Waa'a awwoneena, ixxeka ijaajo, seeraa ogoraa wo'm wodaninnee tiirinnee egereenaa ka kitaabanne kitaabamu hidi'l sagara qoxxiseenaa Waa'i illagenne hidi'l sagara areesukko; oo manni hundim hidi'l sagara egetteena hide'llo'o. Ee lasage adil Iyyoosiyaas hundiinsi lob qeessichchi Hilqiy, ixxeensi la'm beyyi awwonsaan ikko'i qeessuwwii Keesammi Mine aagakkam gooca egettam waardiyyii Ba'aala yakkam qophpha'n waa'ina, Asheera yakkam qophpha'n waa'inaa boollaankinaa otossakkam ammane awwaaxxakkam mu'uta hundam Keesammi Miniinsi fissitona ijaajukko. Adilim ee mu'uta hundam Yerusaaleemiinsi haxonne yoo Qeediroo'n cebbanne yoo biiranne shokkiisaa gii'l buchchooma Beeteela massukko. Yihuxxi beero'uwwannee Yerusaalee'm kululleetanne yo'i duunnuwwannee qophpha'n waa'ina kitima hincaa'llona Yihuxxi adilluwwi doo'llita'a hee'llo'i qeessuwwi hundam baxiinsi hollukko. Ba'aalina, eelliinchina, aganina, eelliinchi kululleetanne hee'oo qooccanchuwwinaa boollaankinaa aduruusa wiriissitam hee'llo'i keenom hollukko. Asheera yakkam qophpha'n waa'i misila Keesammi Miniinsi xoqolaa ee beero'iinsi fissaa Qeediroo'n cebbanne massaa shokkiisukko; eekkam dir issaa silliqaa minaadaphphi waammanne binnaa'ukko. Gooninne saa'llam goon Keesammi Minenne hee'llam beyyoo meentim Asheera yakkam qophpha'n waa'ina du'm eddechcha daddam beyyoo bi'isukko. Gaba'iinsi ki'isaa Beersaabee'i afeebe'e yoo Yihuxxi beero'uwwanne qophpha'n waa'uwwina aduruusa wiriissitam hee'llo'i qeessuwwa hundam Yerusaaleema worukko; ixxuwwi kitima hincaa'llam hee'llo'i kiti'm beyyuwwi hundim haashaaramaakkoohan issukko; ee'isam Yerusaalee'm beero'o aagakku'uuyyi ee beero'i gassaanchi Iyyaas goociinsi qeddi kollinne hee'u otossakkam beyyuwwa gindukko. Oo qeessuwwim Keesammi Minenne awwaaddambee'isa hoorukko; ihukkaarem ixxuwwina beshshuwwi hee'llo'i qeessuwwina uwwakkam ursho'i exxubee'i qorosho'o ittamisa issukko. Hiinoo'm cebbanne hee'u Toofeeta yakkam qophpha'n waa'ina otossakkam beyyi haashaaramaakkoohan ihukkisa la'isukko. Ee'isinne Mooleeka yakkam qophpha'n waa'ina ayyim ixxeka beeto te'im landichcho kitim issaa hincaa'oobee'isa issukko. Yihuxxi adilluwwi eelliinchina otossakkam ammane awwaaxxakkamisina qoodda'a hee'llo'i farado hundam bi'isukko; faraxxi gaarre'uwwam shokkiisukko; oo keen hundim illageen lob daanni Naataan Meeleek hee'am hee'u beyyi hincitenne Keesammi Mi'n wixxixxi biiranne ooxxi gooc gadanonne hee'ukko. Adil Akaaz gattina baxisu mi'n fooqanne yoo adilla'n minenne Yihuxxi adilluwwi baxissa'a hee'llo'i kiti'm beyyuwwaa Keesammi Mi'n lam wixxixxi beyyuwwanne adil Minaase baxisaa hee'u kiti'm beyyuwwaa hundam Iyyoosiyaas bi'isukko; iiqansaatim Qediroo'n cebbanne massaa uunjukko. Ee'isam Yerusaaleemiinsi eelliinchi fi'l kollinne Haashaaranchi duuniinsi woroo'n qarinne Astaaroota yakkam Siidoo'n waa'ina, Kaamoosha yakkam Moo'aaphphi waa'inaa Mooleek yakkam Amoo'n waa'inaa adil Salamoon baxisaa hee'u otossakkam beyyuwwa hundim haashaaramaakkoo keen ihukkisa la'isukko. Kininne baxamu utubbuwwam iiqansukko; Asheera yakkam qophpha'n waa'i misilam iiqansaa uunjukko; ixxuwwi uullita'a hee'llo'i beyyuwwannem lehu mannika miqe wonshukko. Isra'ee'l minaadaba baaxiilonne awwonsu Naabaax beet Yoorbi'aam Beeteelanne baxisaa hee'u otossakkam beyyo Iyyoosiyaas gindansukko; ee beyyonne hee'u kiti'm beyyom xoqolaa baxakko'i kinneewwam xaamsaa dir issukko; Ashee'l misilam shokkiisukko. Ee lasage Iyyoosiyaas duunnuwwanne yoo waammi beyyuwwa daaphphaa moo'ukko; ee waammuwwi woronne hee'u miqqeewwam fissaa ee kitima hincaa'akkam beyyonne shokkiisukko; oo kiti'm beyyim haashaaramaakkoohan ihukkisa la'isukko. Iyyoosiyaas eehid issimminne lobakat doolliinsi illageen mat ugudanne Yoorbi'aam ee kiti'm beyyi gadanonne uullaakkoohaannonne hiraagaanchi wocu Waa'i sagar wo'mmukko. Odim Iyyoosiyaas daaphphaa ee hiraago wocu hiraagaanchika waamma moo'aa «Oo waammi ayyane?» yaa xa'mmukko. Beetee'l minaadabim «Yihudiinsi waaraa ku at issitti luwwi hundim ka kiti'm beyyonne ihoo'isa wocaa hee'u hiraagaanchi waamma» yita'a dabatto'o. Iyyoosiyaasim «Ee waamma nakkitakkotte; hee'ona Ullehe! Ixxeka miqe ayyim ka beyyiinsi ki'isoone» yukko. Ee bikkina ixxekaa Samaare'i uulliinsi waaraa hee'u hiraagaanchikaa miqe yoo'isam utto'o. Adil Iyyoosiyaas Samaare'i beero'uwwanne hundannem Isra'ee'l adilluwwi qophpha'n waa'uwwina otossimmina baxissa'a Waa'a quuqisso'i beyyuwwa hundam gindansukko; Beeteelanne issukkoka ee kiti'm beyyuwwi hundannem issukko. Ee kiti'm beyyuwwanne qophpha'n waa'ina awwaaddam hee'llo'i qeessuwwa shaa ixxuwwi miqe shokkiisukko; ee lasage daba'llaa Yerusaalee'm beero'o waarukko. Adil Iyyoosiyaas minaadab hundim Hidi'l Saga'l Kitaabanne kitaabamukkisanne ixxuwwi Moollanni Waa'ika Higimmi Uguda lonsona ijaajukko. Gassaa'n doolliinsi ki'isaa adilluwwi Isra'eelaa Yihudaa gassitam hee'llo'i doollenne hundannem eehido'i ugud issamukkoyyo. Ihukkaarem Iyyoosiyaas adil ihu tommonnee sadeenti hiinchonnee Moollanni Waa'ina oo Higimmi Ugud Yerusaaleemanne issamukko. Hundiinsi lob qeessichchi Hilqiy Keesammi Minenne siidu kitaabanne kitaabamu seer hundim wo'mmoo'isina sawwimminne adil Iyyoosiyaas Yerusaaleemiinsii Yihuxxi mulli beero'uwwiinsii hundiinsim wiidda weeshsham keeno, kiiraano, moolli waa'uwwa, mulli qophpha'n waa'uwwaa hanqo'i Waa'a laqqambee'i minaadab otossimmina awwaaxxitam mu'uttuwwaa hundam bi'isukko. Muse'e Seerina wo'm wodaninne, foorinnee malaayyinnee Waa'ina awwaadaakkoo Iyyoosiyaas'nnoo'i adil ixxeensi illageenii lasageenii siidamukkoyyo. Ihukkaarem adil Minaase issu jolli bikkina Yihudanne aphphu Waa'ik baddisoo quunqi kabad afeebe'e xoo'ukkoyyo. Ee bikkina Waa'i «Isra'ee'l minaadabanne issummi luwwi hundam Yihuxxi minaadabannem issoommo; oohim Ayihuxxi minaadaba i illagiinsi hooroommo; an doo'llummi Yerusaalee'm beero'oo iina otossakkam Keesammi Minee uunjoommo» yukko. Adil Iyyoosiyaas issu mulli luwwi hundim Yihuxxi adilluwwi Aganni Kitaabanne kitaabamaakko. Iyyoosiyaas adilla'n doollenne Nakko yakkam Gibxi uulli adil Aasoo'l adilina agaageena ixxi gogota awwonsaa Efiraaxiis daajje marukko; adil Iyyoosiyaasim Magidonne Gibxi uulli gogota dabareena oramukkuuyyim shakko'o. Ixxi gassaanim ixxaka leesha faraxxi gaarre'inne Yerusaaleema wotta'a adilluwwi waammi beyyonne waammito'o. Ayihuxxi minaadabim ixxi beet Yoo'aakaaza doo'llita'a adil issito'o. Yoo'aakaaz Ayihuxxi uullanne adil ihu ammane ixxek umur lamiyyee sas hiinchoo hee'ukko; ixxi heechchi beyyom Yerusaaleemanne issaa sas agana gassukko; ixxi amam Libi'n beero'i Ermiyaas landichcho Hamuuxaalatte hee'llo'o. Yoo'aakaazim gaassi ixxi anno'isam Waa'i illagenne jor baxo baxukko. Ixxom Nakko yakkam Gibxi uulli adil Haamaat uullanne yoo Riibiilanne karaa Ayihuxxi minaadab sas kumaa soor xibbi kilo'i biraa sadee soor kilo'i worqaa gibitamisa issu ammanenne Yoo'aakaaz adilla'n doolli beeddukko. Adil Nakko'o Iyyoosiyaas beet Eeliyaaqeem ixxi anni hee'u Iyyoosiyaas beyyonne Ayihuxxi minaadabina adil ihoo'isa issukko; ixxi summam dabassaa Yoo'aaqeema yaa weeshukko. Yoo'aakaazam adil Nakko'o qeefadaa Gibxi uulla massukko; ee beyyonnem lehukko. Adil Yoo'aaqeem Gibxi uulli adil xa'mmu gibiro miqeena iittamu bikkina minaadab annichchi annichchi amaxxisinne gibiro miqoo'isa issukko. Yoo'aaqeem Ayihuxxi uullanne adil ihu ammane ixxek umur lamiyyee onti hiinchoo hee'ukko; ixxi heechchi beyyom Yerusaaleemanne issaa tommoo mat hiinchoo gassukko; ixxi amam Ruuma'i beero'i Fadaay landichcho Zabiidatti hee'llo'o. Yoo'aaqeemim gaassi ixxi anno'isam Waa'i illagenne jor baxo baxukko. Yoo'aaqeem adilla'n doollenne Baabiloo'n adil Nabukadanaxoor Yihuxxi uulla weeraraa amadukko; Yoo'aaqeemim ixxena sas hiincho gibiraa lasonne bangujjukko. Waa'i ixxena awwaadaan ikko'i hiraagaaninne Yihuxxi uulla bichchi bikkina wocu hiraag wo'mmoo'isina Baabiloo'nneka, Sooriyika, Moo'aaphphekaa Amoo'nnekaa gaadaano Yihuxxi uulla bi'issamisa issukko. Oohim adil Minaase baxu baaxii'l mashka'inne Yihuxxi minaadaba ixxi illagiinsi bi'iseena Waa'i ijaaju ijaajinnette. Annannam Minaase muccur mannika xiiga dunu bikkinattee Yerusaaleemim muccur manni xiiginne wo'mmoo'isa issu bikkinattee. Ee bikkina Waa'i qishixxeena hasukkoyyo. Yoo'aaqeem baxu mulli bax hundim Yihuxxi Adilluwwi Aganni Kitaabanne kitaabamaakko. Yoo'aaqeem lehukko; ixxi bikkennem ixxi beet Ikkooniyaan adil ihukko. Baabiloo'n adil Efiraaxiis daajjiinsi ki'isaa hanaa'n qarinne yoo Gibxi uulli tochchi afeebe'e ka'aa amadaa hee'u bikkina ee lasage Gibxi adilii ixxi gogotii Gibxiinsi orina fitto'oyyo. Ikooniyaan Yihuxxi adil ihu ammane ixxek umur tommoo sadeenti hiinchoo hee'ukko; ixxi heechchi beyyom Yerusaaleemanne issaa sas agana gassukko; ixxi amam Yerusaalee'm Eelnaataan landichcho Nahuushtatte hee'llo'o. Ikooniyaanim ixxi annisam Waa'i illagenne jor baxo baxukko. Ixxi adilla'n doollenne Baabiloo'n adil Nabukadanaxoor gogot Yerusaaleema kibbukko. Kibbu ammanenne Nabukadanaxoor gagoomim Yerusaalee'm beero'o waarukko. Yihuxxi adil Ikooniyaan, ixxi ama, lombi waardiyyuwwa, gassaanoo gaaxxi awwonsaanoo hundam edaa Baabiloo'n adilina anga uwwukko. Nabukadanaxoor adil ihu sadeenti hiinchonne Ikooniyaana amadaa karukko. Illageen Waa'i wocaa hee'ukkisannem Nabukadanaxoor Keesammi Minennee adilla'n minennee hee'u amaxxa hundam Baabiloona massukko. Salamoon worqiinsi baxisu Keesammi Minenne awwaaxxakkam mu'uta hundam iiqansukko. Ee'isam Yerusaalee'm minaadaba, gassaano, gaadaano, angi bax lachchi yoo keenoo xaara tumtam keenoo edaa tommi kum manna qeefadaa ixxi uulla massukko; Ayihuxxi uullanne xale'i bux manna gatisukko. Nabukadanaxoor Ikooniyaana qeefadaa ixxi ama, ixxi meento, ixxi gassaanoo Yihuxxi minaadaphphi awwonsaanoo Baabiloona massukko. Nabukadanaxoor lamar kum gaaddeena xantam manna, mat kum xaara tumtam keenoo anga qoor mannaa qeefadaa Baabiloona massukko. Nabukadanaxoor Ikooniyaan beyyonne Maataaniya yakkam Ikooniyaan annabbaayyo Yihuxxi adil issukko; ixxekam summa dabassaa Sedeeqiyaasa yukko. Sedeeqiyaas Ayihuxxi uullanne adil ihu ammane ixxek umur lamiyyee mat hiinchoo hee'ukko; ixxi heechchi beyyom Yerusaaleemanne issaa tommoo mat hiinchoo gassukko; ixxi amam Liibi'n beero'i Ermiyaas landichcho Hamuuxaalatti hee'llo'o. Adil Sedeeqiyaas Yoo'aaqeemisam baaxiilo baximminne Waa'i illagenne jor baxo baxukko. Ee bikkina Waa'i Yerusaaleemannee Yihuxxi minaadabannee quuqaa ixxi illagiinsi ixxuwwa qeessukko. Odim kaba Sedeeqiyaas Baabiloo'n adilina ijaajancha sabukko. Sedeeqiyaas adil ihu honsi hiinchaannonne tommi agan aagu tommi ayyaamonne Nabukadanaxoor gogota hundam awwonsaa Yerusaaleemanne weerarukko; ixxi gogotim ee beero'iinsi tochchonne wiiddanta'a ee beero'i kululleetanne buchcha tuubbo'o. Ixxuwwim Sedeeqiyaas adilla'n tommii mat hiinchii afeebe'e kibbito'o. Ee maarage soo'l agan aagu honsi ayyaamonne minaadab ittam luwwa hoogga'a sibaatto'o. Ee beero'ikim oot gindamukko; Baabiloo'n gaadaan ee beero'ika kululleeta kibbito'isam Yihuxxi adi'l gaadaan hiimonne fitta'a xotto'o; adi'l duubbi kaashshi beyyo aagisoo googinne ki'lla'a lamem oottuwwam edansoo ooxxi gooc kollinne higga'a Yoordaanoos cebbi kollonne gibbo'o. Ihukkaarem Baabiloo'n gogot adil Sedeeqiyaasa hollita'a Yaarko'i gadanonne yoo biiranne qeefaddo'o; ixxi gaadaanim utta'a gibbo'o. Sedeeqiyaasam amadda'a Riibii'l beero'onne yoo Nabukadanaxoor beyyo massito'o; ee beyyonnem Nabukadanaxoor ixxonne oogatukko. Oohim Sedeeqiyaas ixxi illinne moo'ukkuuyyim ixxi ooso shakko'o; ee lasage Nabukadanaxoor Sedeeqiyaasika ille fissaa qooqisukko; ixxi angam chimchiminne karaa Baabiloona massukko. Nabukadanaxoor Baabiloonanne adil ihu tommonnee honsi hiinchonnee onti agan aagu lama'l ballannee, Nabukadanaxoor lombi waaridiyya ijaajaanchoo adi'l lob gassaanchoo hee'u Nabuzaardaan Yerusaalee'm beero'o aagukko. Ixxim Keesammi Mine, adilla'n mine, Yerusaaleemanne hee'u er minneewwaa ee beero'onne yo'i mulli minneewwaa hundam shokkiisukko. Ixxi gaadaanim ee beero'ika kininne ootamu oota gindito'o. Ee lasage Nabuzaardaan ee beero'onne gatta'a hee'llo'i mannaa Baabiloo'n adilina anga uwwita'a hee'llo'i mannaa Baabiloo'n beero'o massukko. Ihukkaarem amaxxi bee'i bux manna duubbi kaashsha shuquntonaa uulla abuullitonaa Yihuxxi ullannem uraa marukko. Baabiloo'n gaadaanim Keesammi Minenne hee'u naas utubbuwwa, mu'uta dissakkam shafe'isa tululoo lokki yoo luwwaa naas xaarinne baxamu wo'o dissakkam wongilluwwaa iiqansito'o; naas xaara hundam Baabiloo'n uulla massito'o. Qure'uwwa, giira hogoofakkam mu'uta, gii'l buchcha issakkam mu'uta, cilfuwwaa Keesammi Minenne awwaaxxakkam naas xaarinne baxamu mulli mu'uttuwwaa hundam boggo'o. Birinnee worqinnee baxamu mu'uta hundam saahinnuwwaa gii'l midachchuwwaa edda'a massito'o. Adil Salamoon Keesammi Mi'n awwaadina naas xaariinsi baxisu keesammi lamem utubbuwwi, mu'uta dissakkam shafe'aam mu'uttuwwii wo'o dissakkam lob jaalo'oo lobakata kee'mmaalluwwi ikko'i bikkina keenteena xanto'oyyo. Utubbuwwik annannichchikim uullichchi tommoo sadeenti angaa hee'ukko; ixxuwwi ludonnem sas anga ihoo qax uullichchi yoo naas xaariinsi baxamaakkoo goobinaanchi hee'ukko; ee goobinaanchuwwi kululleetannem roomaa'n misha laboo naas xaariinsi baxamaakkoo wereeggisaanchi hee'ukko. Lombi waardiyyi ijaajaanchi Nabuzaardaan hundiinsi lob qeessichchi Saaraaya, la'm beyyi awwonsaanchi qeessichchi Safooniyaasaa Keesammi Mi'n waardiyyuwwa sasomii qeefadaa massukko. Ee beero'iinsim gaaxxi awwonsaancho, adi'l sogaano ontom, minaadabiinsi gaadaano doo'lloo gaaxxi ijaajaanchi kitaabaanchoo mulli mannikam lohayyee qeefadaa massukko. Nabuzaardaan ee hundam amadaa Riibi'l beero'onne hee'u Baabiloo'n adi'l beyyo massukko. Adilim ee Haamaatanne yoo Riibilanne ixxuwwa gansiisaa shisiisukko. Eehido'isinne Yihuxxi minaadab ixxuwwi uulliinsi qeefadanta'a matto'o. Baabiloo'n adil Nabukadanaxoor Saafaan beetina beet hee'u Ahiqaam beet Gadaaliya qeefadanta'a Baabiloona mattoo'n Yihuxxi uullanne gatto'i qax mannina gassaanchi issukko. Qeefadantobee'i Yihuxxi gaaxxi awwonsaanii gaadaanii ka woshsha macceesso'i ammanenne Gadaaliy beyyo Misiphpha waatto'o; oo gaaxxi awwonsaanim Naataaniy beet Isima'eelatte, Qaareeh beet Yoohaanaanatte, Naxoof beero'i Taanihuumeet beet Saraayattee Maa'ik beet Yazaaniyattee hee'llo'o. Gadaaliyim ee gaaxxi awwonsaaninaa gaadaaninaa «Baabiloo'n gassaano badditakkotte; ka uullanne afuullehe; Baabiloo'n adilinam ijaajammehe; ee hundam issitakkolas ki'nnuwwina hundem luwwim taaphanookko» yaa hide'ukko. Ihukkaarem ee hiinchonne lama'l agananne adi'l shumo'iinsette ihoo Eelshaamaa'i beetina beet ihu Nataaniy beet Isma'eel tommi manchinne maqirem Misiphpha maraa Gadaaliya, ixxenne maqirem ee beyyonne hee'llo'i Yuxxekaa Baabiloo'n mannaa hundam shukko. Ee bikkina minaadab hoffokii lobokii gaaxxi awwonsaaninne maqirem Baabiloo'n manna baddito'i bikkina Gibxi uulla gibbo'o. Ewiilmaroodaak Baabiloo'n uullanne adil ihu hiinchonne Yihuxxi adil Ikooniyaanina qishixxaa qeefadamaa maru sadennee lama'l hiinchonnee tommonnee la'm aga'n lamiyyennee lama'l ballannee karatiinsi tirukko. Ewiilmaroodaak Ikooniyaanina eroomma issukko; ixxesam qeefadanta'a Baabiloonanne hee'llam adilluwwi hundiinsim shiqqeen lomba uwwukko. Ee bikkina Ikooniyaan karaxxi minenne edde'aa hee'u eddechcha dabassaa ixxi umu'l doollenne hundi ammanem adi'l maaddiinsi itoo'isa issukko. Ixxi hee'u doollenne hundannem hasisoo luwwi hundinam awwaaxxona balli hundam hurbaata uwwam hee'ukko. Addaam Seeta qarukko; Seet Heenoosa qarukko; Heenoos Qaayinaana qarukko. Qaayinaan Mahalaali'eela qarukko; Mahalaali'eel Yaareeda qarukko. Yaareed Heenooka qarukko; Heenook Maatusaala qarukko; Maatusaal Laameeka qarukko. Laameek Nohe'e qarukko; Nohe'e Seema, Kaamaa Yaafeetaa qarukko. Yaafeet Gomeera, Maagooga, Maadaaya, Yaawaana, Tuubaala, Meshikaa Tiiraasaa Yamantam goo'n ooso qarukko. Ixxuwwim ixxuwwi moolli moollinnem weeshantam minaadabina gaassi anno'i hee'llo'o. Gomeer Ashkeenaaza, Riifaataa Togaarimaa qarukko. Yaawaanim Eeliisha, Tarseesa, Kiitimaa Roodiihiimaa qarukko. Kaam Kuusha, Mixiraayima, Fuuxaa Kana'aanaa qarukko; ixxuwwim ixxuwwi summinne weeshantam minaadabina gaassi anno'i hee'llo'o. Kuush Saaba'a, Hawiila, Sabita, Raa'imaa Saabtakaa qarukko; Raa'iim Saaba'aa Diidaanaa qarukko. Kuush Naamruuda qarukko; Naamruudim ka uullanne la'amaakkoo luxxi o'l manchi ihukko. Mixiraayim Luudiima, Anaamiima, Leehaabiima, Naftuuheema, Yefaxruusiima, Yekasluuhiimaa Filisxee'm minaadabina anni hee'u Yekafteeriimaa qarukko. Seem Eelaama, Asoora, Arfaakisaada, Luuda, Araama, Uuxa, Huula, Geeteeraa Mesheekaa qarukko. Ixxuwwim ixxuwwi gaqqi summinne weeshantam minaadaphphi sullina anno'i hee'llo'o. Arfaakisaad Shaalaha qarukko; Shaalahim Eeboora qarukko. Eeboor lam goo'n ooso qarukko; ixxi hee'u doollenne hee'llo'i uulli minaadab baxxansanta'a hee'llo'i bikkina luxxi beet Feleeqa yamamaa weeshamukko; la'm beet odim Yooqixaana yamamaa weeshamukko. Yooqixaan Almoodaada, Sheleefa, Haxarmaaweeta, Yereeha, Hadoraama, Uuzaala, Diiqila, Eebaala, Abiimaa'eela, Saaba'a, Oofiira, Hawwiilaa Yobaabaa qarukko; ku keen hundim Yooqixaan oos hee'llo'o. Seemiinsi ki'isaa Abraamanne afeebe'e yoo qaranchi lugum Seema, Arfaakisaada, Shaalaaha, Eeboora, Faleeqa, Ra'uuna, Saruuga, Naakoora, Taara'aa lasonnem Abrihaama yamamu Abraamaa edoohane. Abrihaam Yisaaqaa Isma'eelaa qarukko. Yixura, Naafiishaa Qeedimaa'aa yakkam sulli hee'llo'o. Abrihaam Qaxuura yakkam bakki meentichchonne Zimiira, Yoqshaana, Madaana, Miidiyaama, Yushbaaqaa Shuhaa loh goo'n ooso qarukko. Yooqishaanim Saaba'aa Daadaanaa lam goo'n ooso qarukko. Miidiyaamim Eefa, Eefeera, Haanooka, Abiidaa'aa Eeldaa'aa onti goo'n ooso qarukko. Abrihaam beet Yisaaq Eesa'aa Yaaqoobaa qarukko. Eesa'am Eelfaaza, Raagu'eela, Yi'uusha, Yaa'ilaamaa Qore'ee qarukko. Eelfaazim Teemaana, Omaara, Xafi'a, Gaa'itaama, Qanaaza, Tiiminaa'aa Amaaleeqaa qarukko. Raagu'eelim Naahata, Zaraaha, Shaamaa'aa Miiza'aa qarukko. Isra'eelina matem adilim hee'ubee'i doollenne kanniinsi woroon yo'i adilluwwi Eedoo'm uullanne kor korinne awwonsita'a hee'llo'o. Ixxuwwim, Diinihaaba yakkam beero'iinsetti ihoo Baa'oor beet Beela'a adil ihukko. Beela'am lehukko. Ixxi beyyonne Baasoora yakkam uulli manchi hee'u Zaara'i beet Yoobaab adil ihukko. Yoobaab lehaa lasage Temaa'n uullik Hushaam adil ihukko. Hushaam lehaa lasage Moo'aaphphi uullanne Miidiyaa'm manna kaa'u Badaad beet Hadaad adil ihukko; ee beero'ikim summi Awiitee yakkaman hee'ukko. Hadaad lehaa lasage Maasireeq uulli manchi hee'u Shaamil adil ihukko. Shaamil lehaa lasage Efiraaxiis daajji gadanonne yoo Rahaaboot uulli manchi hee'u Shaa'uul adil ihukko. Shaa'uul lehaa lasage Akboor beet hee'u Ba'aalhanaan adil ihukko. Ba'aalhanaan lehaa lasage Faa'u'i uulli manchi hee'u Hadaad adil ihukko. Mahexaabi'eele yakkam ixxi meentichchom Zahaab beetina beet hee'u Maanaareed landichchotte hee'llo'o. Haadaad lehaa lasage Eedoo'm minaadab kanniinsi woroon yo'i sulluwwanne baxxamanta'a hee'llo'o. Ixxuwwim Tiimina'a, Aliwaa'a, Yeteeta, Ohooliibaama, Eela, Fiinoona, Qanaaza, Temaana, Miibdaara, Magdii'eelaa Iiraamaa yakkam keen hee'llo'o. Yaaqoob tommoo lam goo'n oosoo qarukko; ixxuwwim Roobeelatte, Simi'oonatte, Leewe'ette, Yihudatte, Yisaakooratte, Zaabiloonatte, Daanatte, Yoosefatte, Biiniyaamatte, Niftaaleematte, Gaadattee Aseerattee hee'llo'o. Yihudina Kana'aa'n uullitan hee'llo'i Baatishuha yakkam meentichcho Eera, Onaanaa Seeloomaa sas goo'n ooso qatto'o. Won beet hee'u Eerim Waa'i illagenne jor manchi hee'u bikkina Waa'i lehinne guzumo'u bikkina Yihud ixxi beetaretti hee'llo'i Ti'iimaarenne Faareesaa Zaaraahaa lam goo'n ooso qarukko. Ee bikkina Yihudina onti goo'n oos hee'ukko. Faareesim Heesiroonaa Hamuulaa lam goo'n ooso qarukko. Ixxi abbaayyi Zaaraahim Zimiira, Eetaana, Heemaana, Kaalkoolaa Daardaa'aa onti goo'n ooso qarukko. Zaaraah shumo'iinsi mat ihu Kaariim beet Akaan Waa'ina annanni ihu luwwiinsi game'aa massaa maaxu bikkina Isra'ee'l minaadabanne booban waarukko. Eetaanim Azaariya yakkam mat beeto qarukko. Heesiroon Yiraahima'eela, Raamaa Kaaleebaa sas goo'n ooso qarukko. Araam Aaminaadab anni hee'ukko. Aaminaadab Yihud oosina awwonsaanchi hee'u Na'aasoona qarukko. Na'aasoon Saalmoona qarukko. Saalmoon Boo'eeza qarukko. Boo'eez Yoobeeda qarukko. Yoobeedim Issayye qarukko. Issayyem won beeto Eeli'aaba, la'mmekam Aaminaadaba, saxxekam Shaama'a, soo'llekam Naatinaa'eela, ontika Raadaya, lohika Ooxeemaa lama'lleka Daawiitaa qarukko. Issayyi Xiruyee Abigeelee lam landa qarukko. Xiruyam sas goo'n ooso Abiisa, Yoo'aabaa Asaaheelaa qatto'o. Issayyet Abigeele yakkam la'm landichchom Isma'eel shumo'iinsetti ihu Yeeteerina Amaasa yakkam goonchi beeto qatto'o. Heesiroon beet Kaaleeb Azuuba yakkam landichcho eebaa Yiri'oota yakkam landichcho qarukko. Yiri'ootam Yesheera, Shobaabaa Ardoonaa sas goo'n ooso qatto'o. Azuuba leta'a lasage odim Kaaleeb Efiraata yakkam meentichcho eebaa Huur yakkam goonchi beeto qarukko. Huurim Uur yakkam beeto qarukko. Uurim Baasili'eela yakkam beeto qarukko. Heexiroon ixxek umur lohayyi hiincho ihaakkoohaannonne Gala'aadina aayyat hee'llo'i Maakir landichcho eebaa Saguuba yakkam beeto qarukko. Saguubim Yaa'iira yakkam beeto qarukko. Yaa'iirim Gala'aaxxi uullanne hee'u lamiyyee sas beero'uwwaa gassam hee'ukko. Ihukkaarem Gaashuurikii Araa'm adilluwwii hoffi beero'uwwika lohayye ihooqaxa ee Gala'aaxxi uulla kaa'lla'a amaddo'o. Oohim Yaa'iirikaa Qanaatikaa hegeegguwwa edaa ixxuwwi kululleetanne yoo hoffi beero'uwwa hundam edaatette hee'ukko. Eekke'enne hee'llo'i minaadab hundim Gala'aadina anni hee'u Maakir shumo'o hee'llo'o. Heexiroon Kaaleeb Efiraatanne lehaa lasage Abiyaa yakkam ixxi meentichcho Ashuura yakkam beeto ixxena qatto'o. Ashuur Taqo'ina anna. Heesiroonina won hee'u Yiraahima'eel onti goo'n ooso qarukko. Ixxuwwim Raamatte, Buunatte, Oreenatte, Oxeemattee Ahiyattee hee'llo'o. Oonaamim Shaamaayaa Yaadaa'aa lam goo'n ooso qarukko; Shaamaayim Naadaabaa Abiishuuraa lam goo'n ooso qarukko. Abishuurim Abiihaayila yakkam meentichcho eebaa Ahibaanaa Mooliidaa lam goo'n ooso qarukko. Naadaab Seleedaa Afaayimaa lam goo'n ooso qarukko; ihukkaarem Seleed matem oosom qaroo'nnim lehukko. Afaayiimim Yushii'i yakkam goonchi beeto qarukko; Yushii'im Sheshaana yakkam beeto qarukko; Sheshaanim Ahilaay yakkam beeto qarukko. Shaamaay abbaayyi Yaadaa'i Yeteeraa Yoonaataanaa lam goo'n ooso qarukko; ihukkaarem Yeteer matem oosom qaroo'nnim lehukko. Yoonaataanim Feeleetaa Zaazaa lam goo'n ooso qarukko; ixxuwwi hundim Yiraahima'eel shumo'i hee'llo'o. Eshaanina landiinsi bagaan goo'n oos hee'ukkoyyo; ixxenam Yaarha'a yakkam mat Gibxi uulli awwaadaanchi hee'ukko. Ixxim ee awwaadaanchina ixxi landiinsi mato ladiisukko; Yaarha'imim Aataaya yakkam mat beeto qarukko. Aataayiinsi Eeliishaamanne afeebe'e yoo qaranchi lugum Iitaayatte, Naataanatte, Zaabaadatte, Eefilaalatte, Oobeedatte, Iyyu'utte, Azaariyatte, Heeleexatte, Eeli'aasatte, Sismaayatte, Shaaluumatte, Yiqaamiyattee Eeliishaamaa'attee hee'ukko. Yiraahima'eelina abbaayyi hee'u Kaaleeb won beetik summi Meshaa'a yakkaman hee'ukko; ixxim Ziifa yakkam beeto qarukko. Ziifim Maareesha qarukko; Maareeshim Keebiroona qarukko. Keebiroonim Qore'e, Taaphuha, Reeqeemaa Sheemaa'aa soor goo'n ooso qarukko. Shemaa'im Raahama qarukko; Raahamim Yorqa'aama qarukko; Sheemaa'i abbaayyi Reqemim Shaamaaya qarukko. Shaamaayim Maa'oona qarukko; Maa'oonim Beetxuura qarukko. Kaaleebina Eefaa yakkam bakki meentichcho hee'llo'o. Iseensim Haraana, Mooxaanaa Gaazeezaa sas goo'n ooso qarukko. Haraanim Gazeezaa yakkam beeto qarukko. Yaahidaayya yakkam manchim Regema, Yootaama, Geeshaana, Pheeleexa, Eefaanaa Shaa'aafaa loh goo'n ooso qarukko. Kaaleebina Maa'ikaa yakkam mulli bakki meentichchom hee'llo'o. Isseensim Shebeeraa Tiirihanaa lam goo'n ooso qarukko. Oo meentichchom hofqax ammanniinsi lasage lam goo'n ooso edda'a qatto'o. Ixxuwwikim summi Maadimaanina anni hee'u Saafaanattee Maakibinaa Giibi'inaa anni hee'u Shaawaanattee hee'ukko. Kaaleebina odim Akisa yakkam mat landichcho hee'llo'o. Kanniinsi woroon yo'i keenim Kaaleebina shumo'i hee'llo'o. Huur Kaaleebina Efiraata yakkam ixxi meentichchoonsi qaramaakkoo won beet ihukkuuyyi Huur beet Qiiryaatyi'aariimina anni hee'u Shoobaalatte. Odim Huurina la'm beet hee'u Saalimaa'i Beeteeliheemina anna. Huurina saxxi beet hee'u Hareefim Beetigaaderina anna. Qiiryaatyi'aariim anni ihu Shoobaalina mulli oosim hee'ukko. Ixxuwwim Heeroo'eetaanninaa Manuhoot moollaanninaa kolloomina anni hee'ukko. Ee'isam Qiiryaatyi'aariim abaroos hee'llo'i keen Yutira'i manna, Fuutaa'i manna, Shumaataa'i mannaa Miishiraa'i mannaa yamantam manni hee'llo'o. Ixxuwwiinsim Xoore'ikii Eeshtaa'ool qaranchii siidamukko. Saalimaa'i oos Naaxoof manna, Axaarootbeetiyo'aab manna, Maanaahat minaadaphphi kolloo Xoore'i mannaa hee'llo'o. Aganna kitaabimminnee la'imminnee qoolluwwi hee'llo'i Tiire'i manni, Shiimi'i mannii Suuka'i mannii Yaabeex beero'onne hee'llam hee'llo'o. Ixxuwwim Reekaab mannina anni hee'u Hameetiinsi qaranto'oo Qeena'i manni hee'llo'o. Ku lohem oosim qaranto'ok Keebiroonannetti ihukkuuyyi Daawiit ixxi heechcha ee beyyonnetti issaa lamar hiinchoo kolloo adil ihaa gassu ammanennette hee'ukko. Odim Daawiit ixxi heechchi beyyo Yerusaaleemanne issaa sadee sas hiinchoo gassukko. Ee beyyonnem lobakat goo'n ooso qarukko. Aamii'eel landichcho Bersaabeh Shiimi'a, Shobaaba, Naataanaa Salamoonaa soor goo'n ooso qatto'o. Ixxena mulli honsi goo'n oosim hee'ukko. Ixxuwwim Yibihaara, Eeliishu'a, Eelifeeleexa, Nogaha, Neefeega, Yaafi'a, Eeliishaamaa'a, Eeliiyaadaa'aa Eelifeeleexaa yakkam keen hee'llo'o. Odim ka keeniinsi mulleka Daawiit bakki meentiinsi qaru goo'n oos hee'ukko. Ti'imaare yakkam landichchom hee'llo'o. Adil Salamoon shumo'i lobaanniinsi hoffaannonne afeebe'e yookkok kanniinsi woroon yoohane. Oohim Salamoonatte, Oroobi'aamatte, Abiiyatte, Asa'atte, Yoosaafixatte, Yooraamatte, Akaaziyaasatte, Yoo'aasatte, Ameesiyaasatte, Azaaryaasatte, Yoo'aataamatte, Akaazatte, Hizqiyaasatte, Minaasatte, Amoonattee Iyyoosiyaasattee hee'llo'o. Iyyoosiyaasim Yoohaana, Yoo'aaqeema, Sedeeqiyaasaa Yoo'ahaazaa soor goo'n ooso qarukko. Yoo'aaqeemim Ikooniyaanaa Xeedeeqiyaa lam goo'n ooso qarukko. Fadaaymi Zarubaabeelaa Shiimi'aa yakkam lam goo'n ooso qarukko. Zarubaabeelinam Mashulaamaa Hanaaniyaa yakkam lam goo'n oosii Salomiite yakkam mat landichchoo hee'llo'o. Ee'isam mulli onti goo'n oosim hee'ukko; ixxuwwim Hashuubatte, Oheelatte, Bereekiyatte, Hasaadiyattee Yushaabheesedattee hee'llo'o. Hanaaniyim Falaaxiyaa Yishaa'iyaa lam goo'n ooso qarukko. Yishaa'iyim Raafaaya qarukko. Raafaayim Arnaana qarukko. Arnaanim Abaadiyu qarukko. Abaadiyum Shakaaniya qarukko. Shakaaniyim Shamaa'iya qarukko. Shamaa'iyim Haxuusha, Yugaala, Baariiyaaha, Na'aariyaa Shaafaaxaa onti goo'n ooso qarukko. Na'aaryim Eeliyo'enaaya, Hizqiyaasaa Aziriiqaamaa sas goo'n ooso qarukko. Eeliyo'enaayim Hoodaayiwa, Eelyaashiiba, Falaaya, Aquuba, Yohanaana, Dalaayaa Anaanaa lamar goo'n ooso qarukko. Yihud shumo'i Faareesatte, Heesiroonatte, Kaarmatte, Huurattee Shobaalattee hee'llo'o. Shobaali Raa'aaya qarukko. Raa'aayim Yaahata qarukko. Yaahatim Xooraa'anne hee'llam minaadabina gaassi anno'i hee'llo'i Ahumaayinaa Laahaadaa qarukko. Taqo'aa'i beero'o luxxeka baxukkok Ashihuuratte. Ixxenam Heelaa Naa'iraa yakkam lam meenti hee'ukko. Ashihuurim ixxi meentichchonne Naahiranne Ahuzaama, Heefeera, Teminaa Ahaashitaaraa soor goo'n ooso qarukko. Ee'isam heela'aansi odim Dereeta, Yixihaara, Etinaa Qooxaa soor goo'n ooso qarukko. Qoox odim Aanubaa Xoobeebaa lam goo'n ooso qarukko. Qooxim Haarum beet Aharheel shumo'ina anni hee'ukko. Ixxi abaroos lambe'enne lobakat lombaam hee'u Yaabeexa yakkam mat manchi hee'ukko. Ixxi ama ixxo qatto'i ammane kee'mmaallisa xuu'lla'a hee'llo'i bikkina ixxeka summa «Yaabeexa» yita'a weeshsho'o. Yaabeexim «I moollanna, eese at maasse'e; uullam at haraasse; at iinniinsi hore'em annanni ikkitte; eesenne hawwo afiseena xanoo jor luwwiinsi hundiinsim at eese egere» yaa Isra'ee'l Moollanni Waa'a uunxukko; Waa'im ixxi uunxukkoka uwwukko. Shuha'i abbaayyi Kaluub Mahiir yakkam mat goonchi beeto qarukko. Mahiirim Eshtoona qarukko. Eshtoonim Betraafa, Faasehanaa Tahiinaa sas goo'n ooso qarukko. Tahiinim Naahasha yakkam beero'o baxukko. Ixxuwwi shumo'im Rekaa yakkam uullanne hee'llam hee'llo'o. Qanaazim Otni'eelaa Saraayaa lam goo'n ooso qarukko. Otni'eelim Hataataa Ma'ontaayaa lam goo'n ooso qarukko. Ma'ontaayim Oofira qarukko. Saraayim angi lachchi bax qooroom yoo manni hee'llam Geehaaraasha yakkam beero'o baxu Yoo'aaba qarukko. Yaafun beet Kaaleeb Iira, Eelaa'a, Naa'aama, sas goo'n ooso qarukko. Eela'am Qanaaza qarukko. Yihaali'eelim Ziif, Ziifaa, Tiiriiyaa Asaari'eelaa soor goo'n ooso qarukko. Hoodiyim Naaham aayya eebukko. Ixxuwwi Shumo'im Qa'iilaa'i beero'onne hee'llam hee'llo'i Gaarim moollinaa Eshitamo'i beero'onne hee'llam hee'llo'i Maa'ikaat moollinaa anno'i ikko'o. Shiimoonim Aminoona, Riina, Benhanaanaa Tiiloonaa soor goo'n ooso qarukko. Yushi'im Zohetaa Benzohetaa lam goo'n ooso qarukko. Sheelaa'i Yihuxxi oosiinsi mat ihaa ixxi shumo'im Lekaa'n beero'o baxu Eeratatte, Maareeshaa'n beero'o baxu Laa'idaatatte, Bet Ashbee'i beero'i manni ikko'i talbi fatirinne dadamaakkoo qeeraa'l eddechcha baxxam moollo, Yooqiimatte, Koozeephphi beero'onne hee'llam Moo'aaphphi uulli meento eebba'a Beeteliheemanne afuutta'a hee'llo'i Yoo'aasattee Saaraafattee hee'llo'o. Ku aganni gaassiinsim ki'isaa hee'ukko. Ixxuwwim adi'l buchchi mu'uta baxaan ikka'a Naxaa'iimaa Gadeeraa yakkam beero'uwwanne hee'llam hee'llo'o. Simi'oon Namu'eela, Yaamiina, Yaariiba, Zeraahi'aa Shaa'uulaa onti goo'n ooso qarukko. Shaa'uulim Shaaluuma qarukko. Shaaluumim Miibsaama qarukko. Miibsaamim Miishima'a qarukko. Ee lasage Miishima'i Hamu'eela qarukko. Hamu'eel Zaakura qarukko. Zaakur Shiimi'a qarukko. Shiim'i tommoo loh goo'n oosoo loh landaa qarukko. Ihukkaarem ixxi abbaayyuwwi lobakat ooso qatto'oyyo. Ee bikkina Simi'oon sulli Yihuxxi sullisa lobakata fikkaannukkoyyo. Adil Daawiit adilla'n doolli afeebe'e Simi'oon shumo'i hee'llam hee'llo'i beero'uwwi Bersaabeha, Molaada, Haxaarshu'aala, Biiliha, Eexeema, Tolaada, Baatu'eela, Hoorima, Xiqlaaga, Beetmaarkaaboota, Hoxaarsuusiima, Beetbiiraa Shaa'iraayimaa hee'ukko. Ee'isam Eexaama, Aayina, Rimoona, Tokeena, Ashaana, mulli onti hoffi beero'uwwannee ee hegeegguwwanne hee'oo hoffi beero'uwwannee hee'llam hee'llo'o. Oo ixxuwwi hee'llam beyyim woroo'n qarinne Baa'ilaat beero'i afeebe'e afam hee'ukko. Simi'oon sullim ixxuwwi abaroos bikkinaa ixxuwwi hee'llam hee'llo'i beyyuwwi bikkinaa kitaabba'a dissita'a hee'llo'ok eehan hee'ukko. eelliinchi aagginne Garaar afeebe'e haraatto'o. Lete'i cebbiinsi eelliinchi firinne beero'i yoo beyyonnem ixxuwwi gereebbi allaa'llam hee'ukko. Eekke'em cawwaakkoo xummi leerakkoo biir uullanne harish ihaakkoo lobakat hixaam uulla siiddo'o. Illageen ee beyyonne hee'llam hee'llo'i minaadab Kaam shumo'i hee'llo'o. Yihuxxi adil Hizqiyaas adilla'n doollenne hanaan summi kitaabamu manni Garaara matta'a eekke'enne hee'llam minaadaphpheka dukkaanaa minneewwaa hundam gindito'o. Kaam sulloo Ma'uun mannaa guullita'a bi'isso'o. Ixxuwwi gereebbina ihoo lobakat allaachchi beyyo siiddo'i bikkina ee beyyonne hee'llo'i manna hollita'a ixxuwwi hore'oomam ee beyyonne hee'imma asheetto'o. Simi'oon shumo'iinsi onti xibbe ikkam qax manni eelliinchi firinne aa'lla'a Eedoo'm duunanne fitto'o. Ixxuwwam awwonsitam hee'llo'ok Yuushi'i oos Phalaaxiyatte, Na'aaryatte, Raafaayattee Uzi'eelattee hee'llo'o. Ixxuwwim eekke'enne gatta'a hee'llo'i Amaaleeq manna hundam guullitto'o; ixxuwwim ee ammaniinsi ki'isaa ee beyyonne afuutto'o. Yaaqoobina won beet hee'u Roobeel shumo'i kanniinsi woroon yoo'i keeno; Roobeel ixxi anni bakki meentichchonne iinse'u bikkina wonooma'n hanqa hoogaa hee'u bikkina oo hanqi Yooseefina uwwamukko. Ihona bagaan hundiinsim lophphoo malaayyaamoo sulli hundinam awwonsaanchoo ihoo manchi siidamookkok Yihuxxi sulliinsetti hee'ukko. Yaaqoob oosina won hee'u Roobeel soor goo'n ooso qarukko; ixxuwwim Hanookatte, Faalu'utte, Heesiroonattee Kaarimattee hee'llo'o. Abaroosika summa finto'o moo'isoo doonanne siidamukkisinne Roobeel sullik moolli awwonsaan hee'llo'i keen Yoo'eelattee Zakkaaryaasattee Yoo'eel moolliinsi Shemaa'i beetina beet ihu Aazaaz beet Bela'attee hee'ukko; ku moollim hee'am hee'ukkok Aaro'eeranee eehanniinsim hanaa'n qarinne Naabo'oo Ba'aalma'oonaa afeebe'e yoo uullannetti hee'ukko. Ixxuwwim Gali'aaxxi uullanne lobakat allaachchi diinat hee'u bikkina eelliinchi firinne Efiraaxiis daajji afeebe'e yoo haraar udma'i uulla amaddo'o. Adil Saa'ool adilla'n doollenne Roobeel sulli Aggaar moollinne qasanta'a hundam kaa'lla'a guullito'o; Gala'aaxxi uulliinsim eelliinchi firinne hee'oo ixxuwwi hee'llam beyyuwwa hundam amaddo'o. Gaad sulli Roobeel sulli hee'oo beyyiinsi hanaa'n qarinne hee'oo uullanne hee'am hee'ukko; oo uullim Baasaa'n uulli lambe'ennetti ihaa eelliinchi firinne Saalakanne afeebe'e afoohane. Yoo'eel hundiinsim lophphoo moollina anni hee'ukko; Shaafa'i odim la'm gardabbanne yo'i moollina anni hee'ukko. Yaa'inaayii Shaafaaxii odim Baasaananne hee'llam mulli moollina anno'i hee'llo'o. Gatto'i ka sulli anno'i Mikaa'eela, Mashulaama, Shebaa'a, Yoraa'iyya, Ya'ikaana, Zii'aa Ebeeraa yakkam lamar moollo edoohan hee'ukko. Ixxuwwim Huur beet ihu Aabihaayil shumo'i ikku'uuyyi ixxuwwina gaassi anno'i Abiihaayilatte, Huratte, Yaarohatte, Gala'aadatte, Mikaa'eelatte, Yeshiishaayatte, Yaahidottee Buuzattee hee'llo'o. Guni'i beetina beet ihu Abdi'eel beet Ahii'i ee moolli hundinam awwonsaanchi hee'ukko. Ixxuwwim Baasaa'n uullanne, Gala'aaxxi uullanne, ee uullanne hee'oo hoffi beero'uwwannee ee'isam Saaroo'n uullanne hixaam beyyi hundannee hee'llam hee'llo'o. Abaroos summa amadaakkoo ku doono'i gudukkok Yihuxxi uulli adil Yoo'aataam adilla'n doollennettee Isra'ee'l adil Yoorbi'aam adila'n doollennettee hee'ukko. Roobeelikii Gaadikii eelliinchi firinne hee'oo Minaas sullik kollii agirinnee bisa'innee ee'isam xiyyinnee oramakkamisa erisa losso'oo 44,760 gaadaanii ixxuwwina hee'llo'o. Ixxuwwim Aggaar sulli ikko'i Yaxuranninnee Naafiishaanninnee Nodaab minaadabinnee oranteena fitto'o. Ixxuwwi amma'nnatom Waa'anne issita'a ixxi hara'mmona uunxito'o; Waa'im ixxuwwi uunxato macceesaa Aggaar mannaa ixxuwwinne hee'llo'i mulli keenoo hundam kaa'llamisa issukko. Ee Aggaar sulliinsim so'o, gaameela'a, 250,000 gereebba, 2,000 hallaa 100,000 mannaa qeefadda'a massito'o. Oo or ihoo'isina Waa'i doo'l ihu bikkina diina'i kolliinsi lobakat manni lehukko. Ixxuwwi gagim qeefadanteebe'i afeebe'e oo uulli ixxuwwi anganne hee'ukko. Eelliinchi firinne hee'u Minaas sullik kolli hanaa'n qarinne Ba'aalhermoona, Saniiraa Hermoo'n duunaa afeebe'e afoo Baasaa'n uullanne hee'llam hee'llo'o. Ixxuwwi minaadaphphekim xig dutukkuuyyi marukko. Ixxuwwi moolli awwonsaanim Eferatte, Yushii'atte, Eeli'eelatte, Aazri'eelatte, Ermiyaasette, Hoodaayiwattee Yaahdi'eelattee hee'llo'o. Ku keen hundim la'anto'oo moolli awwonsaanoo geedduwwaa hee'llo'o. Ihona bagaan Ixxuwwim ixxuwwi anno'i Waa'a hawwoddo'o. Waa'i ixxuwwi illagiinsi bi'isu ee uulli manni waa'uwwina otossimminne haashaaranto'o. Ee bikkinam Waa'i Phuul te'im Tigilaat-Phaleeseer yakkam Aasoo'l uulli adila ki'isaa ee ixxuwwi uullaa ixxuwwi sullikam oohim Roobeel sullo, Gaad sulloo Minaas sullika kolloo qeefadaa massaa Halaahanne, Habooranne, Haaraa'annee ee'isam Goozaa'n daajji lallabonnee hee'llamisa issukko; ixxuwwim kaballi afeebe'e eekke'enne hee'llamo. Leewwe'e sas goo'n ooso qarukko; ixxuwwim Gershoonatte, Qa'aatattee Meeraarattee. Qa'aatim Aamiraama, Yixihaara, Kebroonaa Uzi'eelaa soor goo'n ooso qarukko. Amiraamim Aaroona, Muse'e, lam goo'n oosoo Maaryaame yakkam mat landichchoo qarukko. Aarooninam Naadaaba, Abiihu, Ali'aazaraa Itaamaaraa yakkam soor goo'n oos hee'ukko. Ali'aazar Fiinihase qarukko Fiinihas Abiishu'a qarukko; Abiishu'i Buqi'i qarukko. Buqi'i Uuza qarukko. Uuz Zaraahiya qarukko. Zaraahiy Maraayoota qarukko. Maraayoot Amaariya qarukko. Amaariy Ahiixooba qarukko. Ahiixoob Sadooqa qarukko. Sadooqim Ahimaasa qarukko. Ahimaas Azaariyaasa qarukko. Azaariyaas Yohaana'a qarukko. Yohaana'i Azaariyaasa qarukko. Azaariyaasim Adil Salamoon Yerusaaleemanne baxisu Keesammi Minenne qeessoomaninne awwaadam hee'ukko. Ixxim Amaariya qarukko. Amaariyim Ahiixooba qarukko. Ahiixoob Saadooqa qarukko. Saadooqim Shaaluuma qarukko. Shaaluumim Hiilqiya qarukko. Hiilqiy Azaariyaasa qarukko. Azaariyaas Seraaya qarukko. Seraayim Yooseedeeqa qarukko. Waa'i Yihuxxekii Yerusaalee'mmekii minaadab Nabukadanaxoor anganne qeefadanta'a matta'a qeefadanchi uullanne hee'llamisa issu ammane Yooseedeeq ixxuwwinne maqirem qeefadamaa marukko. Leewi'ik goo'n oos Gershoonatte, Qa'aatattee Meeraarattee sasome hee'ukko. Gershoonim Liibinaa Shiimiinaa qarukko. Qa'aatim Aamiraama, Yixihaara, Keebiroonaa Uzii'eelaa qarukko. Meeraar odim Maahlii'inaa Muushaa qarukko. Gershoon Liibina qarukko. Liibin Yaahata qarukko. Yaahat Ziima qarukko. Ziim Yoo'aha qarukko. Yoo'ah Iido'o qarukko. Iido'i Zeraaha qarukko. Zeraah Ye'atraaya qarukko. Qa'aat Aminaadaaba qarukko. Aminaadaab Qoraaha qarukko. Qoraah Asiira qarukko. Asiir Eelqaana qarukko. Eelqaan Eebiiyaasaafa qarukko. Eebiiyaasaaf Asiira qarukko. Asiir Taahata qarukko. Taahat Uri'eela qarukko. Uri'eel Uziya qarukko. Uziy Shaa'uula qarukko. Eelqaan Amaasaayaa Ahiimootaa qarukko. Ahiimoot Eelqaana qarukko. Eelqaanim Soofaaya qarukko. Soofaayim Naahaata qarukko. Naahaat Eeli'aaba qarukko. Eeli'aab Yirohaama qarukko. Yirohaam Hilqaana qarukko. Saamu'eel lam goo'n ooso qarukko. Ixxuwwim won ihu Yoo'eelattee wona awwonaanchi Abiyattee hee'llo'o. Meeraar Maahila qarukko. Maahil Liibina qarukko. Liibin Shiimi'i qarukko. Shiimi'i Uuza qarukko. Uuz Shiimi'i qarukko. Shiimi'i Hagiya qarukko. Hagiy Asaaya qarukko. Hidi'l saga'l Saaxin Yerusaaleema waaraa lasage adil Daawiit Keesammi Minenne awwaaddam zammaaraa'n awwonsaano doo'llukko. Ixxuwwim adil Salamoon Keesammi Mine baxisoo'n gaassaa Waa'ina otossakkam dukkaa'n illagenne taritarinne hundi ammanem awwaaddam hee'llo'o. Ee beyyonne awwaaddam awwaadaa'n qaranchi lugum kanniinsi woroon yoo abaroosa moo'isoohane. Qa'aat moolli luxxi zammaraa'n tuuta awwonsaanchi Yoo'eel beet Heemaanatte hee'ukko; ixxi qaranchi lugumim kanniinsi woroon Yaa'iqoobanne afeebe'e yoohane; oohim Heemaanatte, Yoo'eelatte, Saamu'eelatte, Hilqaanatte, Yirohaamatte, Eeli'eelatte, Toohatte, Xuufatte, Eelqaanatte, Maahatatte, Amaasaayatte, Eelqaanatte, Yoo'eelatte, Azaaryatte, Xafaanyatte, Taahatatte, Asiiratte, Ebiiyaasaafatte, Qoraahatte, Yixihaaratte, Qa'aatatte, Leewi'ittee Yaaqoobattee. Makki kollinne yoo zammaraa'n tuuta awwonsaanchi odim Asaafatte hee'ukko; ixxi abaroos lugumim kanniinsi woroon Leewwe'enne afeebe'e yoo qarancha moo'isoohanne; oohim Asaafatte, Baraakiyatte, Shiimi'atte, Mika'eelatte, Baa'iseeyatte, Maalkiyatte, Etinatte, Zeraahatte, Adaayatte, Eetaanatte, Ziima'atte, Shiim'atte, Yaahatatte, Gershoonattee Leewe'ettee. Odim qeddi kollinne yoo saxxi zammaraa'n tuutina awwonsaanchi Meeraar beet Eetaanatti hee'ukko; ixxi abaroos qaranchi lugumim kanniinsi woroon Leewwe'enne afeebe'e yoohane; oohim Etaanatte, Qiishii'atte, Abdi'atte, Maalukatte, Hashaabiyatte, Ameesiyaasatte, Hilqiyatte, Amoosatte, Baani'ette, Sheemeeratte, Maahilii'atte, Muushatte, Meeraarattee Leewwe'ettee. Ixxuwwi abbaayyuwwi ikko'i mulli Leewi'i oos odim Waa'ina minenne baxamoo baxo hundam baxxam hee'llo'o. Aaroonii Aaroon shumo'ii xale'i kiti'm beyyonne shokkiisakam kitimaa Aduruus kitimaa Isra'ee'l oos baaxiil shiinshamoo'isina keesammiinsi keesammi beyyonne ihoo luwwaa ixxena awwaadaanchi hee'u Muse'ena Waa'i uwwu see'llisanne issitam hee'llo'o. Aaroon shumo'i qaranchi lugum Ali'aazaratte, Fiinhaasatte, Abiishu'atte, Buqatte, Uzatte, Zaraahiyatte, Maraayotatte, Amaariyatte, Ahiixoobatte, Saadooqattee Ahimaaxattee hee'llo'o. Aaroon shumo'iinsi mat hee'u Qa'aat moolli Leew'i oosina qoodamu beyyuwwiinsi luxxi sharada saaminne aa'llo'o. Oohim Yihuxxi uullanne hee'oo Keebiroonaa ixxi kululleetanne hee'oo allaachchi beyyoo hundam edoohan hee'ukko. Ihukkaarem Keebiroon kululleetanne hee'oo abuulli uulluwwii hoffi beero'uwwii Yaafun beet Kaaleebina uwwamukko. Biiniyaam sulli sharadiinsim Geeba'a, Aalemeetii Anaatootii allaachchi biirinne maqirem Aaroon oosina uwwamukko; Aaroon shumo'i ikko'i abaroosina hundinam baxxansamaa uwwamu beero'uwwi hundim mat ihaa tommoo sasoo hee'ukko. Eelliinchi aagoo kollinne hee'llam kolli Minaas sulli sharadiinsi odim tommi beero'uwwa gatto'i Qa'aat moollina saaminne uwwamukko. Gershoon moollinam Yisaakooriinsi, Aaseeriinsi, Niftaaleemiinsii Baasaa'n uullanne eelliinchi firinne hee'oo Minaas sulli baxxanchiinsii tommoo sas beero'uwwaa uwwamukko. Ee'isam Meeraar moollina Roobeelaanniinsi, Gaadaanniinsii Zaabiloon baxxanchiinsii tommoo lam beero'uwwaa uwwito'o. Ee'isinne Isra'ee'l oos Leewi'i oosina hee'llam beero'uwwa kululleetanne hee'oo allaachchi beyyuwwinne maqirem qoodda'a uwwito'o. Hanaan weeshamu Yihuxxaannonnee Simi'oonaannonnee Biiniyaam sulli baxxanchi lambe'enne hee'oo beero'uwwi mulli beero'uwwisam saamminne qoodamaa uwwamukko. Mat mat Qa'aat moollina Efireem sulli baxxanchiinsi beero'uwwii allaachchi beyyuwwii uwwamaa hee'ukko. Oo beero'uwwim Efireem duunaam uullanne hee'oo magannaato aagakkam beero'uwwi yoo Seekeema, Geezeera, Yoqma'aama, Beethooroona, Ayaaloonaa Gatirimoonaa hee'ukko. Eelliinchi aagoo kollinne yoo Minaas sulli baxxanchiinsi odim Aaneer beero'oo Biili'aam beero'oo lamom ixxuwwi kululleetanne hee'oo allaachchi biirinne maqirem gatto'i Qa'aat moollina uwwito'o. Gershoon moollina kanniinsi woroon yoo beero'uwwa ixxuwwi kululleetanne hee'oo allaachchi biirinne maqirem uwwito'o; ixxuwwim. Eelliinchi firoo kollinne yoo Minaas sulli baxxanchiinsi Baasaa'n uullanne hee'oo Goolaanaa Astaarootaa. Yisaakoor sulli baxxanchiinsi odim Qaadeesa, Daabaraata, Raamootaa Aaneemaa. Aaseer sulli baxxanchiinsi Aabdoona, Huqooqaa Rihoobaa. Niftaaleem sulli baxxanchiinsim Galiilanne hee'oo Qeedeesha, Hamoonaa Qiiryaataayimaa hee'ukko. Gatto'i Meeraar moollina odim kanniinsi woroon yoo beero'uwwi ixxuwwi kululleetanne hee'oo allaachchi biirinne maqirem uwwamukko; ixxuwwim Rimoonaa Taabooraa. Yoordaanos daajjiinsi eelliinchi firinne Yaarko'iinsi eeqidonne hee'oo Roobeel sulli baxxanchiinsi udma'i uullanne yoo Beexeera, Yaahixa, Qadeemootaa Meefaataa. Gaad sulli baxxanchiinsi Gala'aadanne hee'oo Raamoota, Mahinaayima, Haseeboonaa Yaa'izeeraa hee'ukko. Yisaakoor Soor goo'n ooso qarukko; ixxuwwim Tola, Fuuwa, Yaashuubaa Shiimroonaa yakkam keen hee'llo'o. Toola'i Uuza, Raafaaya, Yirii'eela, Yaahimaaya, Yubsaamaa Shamu'eelaa yakkam loh goo'n ooso qarukko; ixxuwwim Toola'i moolli abaroosina awwonsaan ikku'uuyyi adil Daawiit adilla'n doollenne la'anto'oo o'l manni hee'llo'o; ixxuwwi shumo'i xigim 22,600 hee'ukko. Uuzi'i Yuziraahiya yakkam mat goonchi beeto qarukko; Yuziraahiy ixxi soor goo'n oosinne maqirem Mikaa'eelinne, Abdiyinne, Yoo'eelinnee Yushiiya'innee maqirem abaroos awwonsaan hee'llo'o. Ixxuwwinam lobakat meentii oosii hee'u bikkina ixxuwwi shumo'iinsi oranteena xantam 36,000 goo'n oosoo hincaa'lla'a hee'llo'o. Yisaakoor sulli abaroosiinsi umur gaadina afu goo'n oosik xig 87,000 ihukkisa kuroo qaranchi doono'i hee'ukko. Biiniyaam Beela'a, Beekeeraa Yidii'eelaa yakkam sas goo'n ooso qarukko. Beelaa'im Exiboona, Uuza, Uuzi'eella, Yaariimootaa Iiraa onti goo'n ooso qarukko; ixxuwwim ixxuwwi moollina awwonsaanoo la'anto'oo o'l mannaa hee'llo'o; ixxuwwi shumo'iinsim umur orina afu goo'n oosik xig 22,034 hee'ukko. Beekeer Zamiira, Yoo'aasha, Eeli'eezara, Eelyo'eenaaya, Oomira, Yirmoota, Abiiya, Anaatootaa Alemeetaa honsi goo'n ooso qarukko. Ixxuwwi shumo'i abaroosiinsi umur orina afu 20,200 goo'n oosii hee'ukkis la'amaa hee'ukko. Yidii'eel Biilihaa yakkam beeto qarukko; Biilihim Yaa'usha, Biiniyaama, Ehuda, Kanaa'ina, Zeetaana, Taarshiishaa Ahiishaaharaa lamar goo'n ooso qarukko. Ixxuwwim ixxuwwi moollina awwonsaanoo la'anto'oo o'l mannaa hee'llo'o; ixxuwwi shumo'iinsim umur orina afu 17,200 goo'n oos hee'ukko. Shufiimii Hufiimii Ahiir oos hee'llo'o; Hushiimim Aheer beet hee'ukko. Niftaaleem Yaahaaxi'eela, Guna, Yeexeeraa Shaaluumaa soor goo'n ooso qarukko; ixxuwwim Biileh shumo'i hee'llo. Minaas Sooriy uulli bakki meentichchoonsi Asri'eelaa Maakiiraa lam goo'n ooso qarukko; Maakiire odim Gala'aada qarukko. Maakiir Hufiimii Shiifiimii mat mat meento eebbamisa issukko; Maakiirina Maa'ikaa yakkam mat aayya hee'llo'o; Maakiirina la'm beet ihu Xaloofihaad xale'i landa qarukko. Maakiir meentichcho Maa'ikka Pheereshaa Sheereshaa lam goo'n ooso qatto'o; Pheeresha yakkam summa fissito'okim ise gagattem hee'llo'o; Pheereshim Ulaamaa Raaqeemaa lam goo'n ooso qarukko. Ulaamim Badaana yakkam mat beeto qarukko; ku keen hundim Minaas beetina beet hee'u Maakiir beet Gala'aad shumo'i hee'llo'o. Gala'aadina aayya Haamoleekette Iishooda, Abi'eezeraa Mahilaa sas goo'n ooso qatto'o. Shaamiid Ahiyana, Seekeema, Liiqihaa Anii'aamaa soor goo'n ooso qarukko. Efireem Shuuteelaaha qarukko; Shuuteelaah Beereeda qarukko; Beereed Taahata qarukko; Taahat Eeli'aada qarukko; Eeli'aad Taahata qarukko. Taahat Zaabaada qarukko; Zaabaad Shuuteelaaha qarukko; Efireem Shuuteelahiinsi mulleka Eezeeraa Eeli'aadaa lam goo'n ooso qarukko; ixxuwwim Gaat mannika laro game'llu'uuyyi amadanta'a leto'o. Ixxuwwi anni Efireemim ixxuwwina lobakat balla wi'llukko; ixxi qarimannim ixxo qoxxisseena waatto'o. Ee lasage Efireem ixxi meentichchonne iinse'ukko; isem ixxena goonchi beeto qatto'o; ixxi abaroosanne afu hawwiinsi ki'isaatim ee beetika summa Barii'a yaa weeshukko. Efireem Shee'iiraa yakkam landichcho qarukko; isem hanaa'nnekaa woro'n Beetihooraa ee'isam Uzeenshee'iiraa yakkam beero'uwwa baxisso'o. Efireem Reefa yakkam mulli beetom qarukko; Reefa'i shumo'im Reesheefa, Telaaha, Taahana, Laa'ida, Amhuuda, Eeliisha, Maa'a, Naawe'ee Iyyaasoo yakkam keen hee'llo'o. Efireem shumo'i hundim massita'a ixxuwwi gaqqi heechchi beyyi issito'i uulli Beeti'eelaa ixxi kululleetanne hee'oo hoffi beero'uwwaa ihaa eelliinchi firinne Naa'iraananne afeebe'e, eelliinchi aagginne odim Geezeeranne afeebe'e, ee'isam Geezee'l kululleetanne hee'oo hoffi beero'uwwa hundam edoohan hee'ukko. Seekeemaa Aayaa ixxuwwi kululleetanne hee'oo hoffi beero'uwwam edookko. Minaas shumo'i Beetishaana, Taa'inaaka, Magidoona, Dooraa ee'isam ixxuwwi kululleetanne hee'oo hoffi beero'uwwaa ixxuwwi gulummi issita'a hee'llo'o. Ku beyyuwwi hundim Yaaqoob beet Yooseef shumo'i hee'llam hee'llo'i beyyuwwi hee'ukko. Aaseer Yimina, Yishiwaa'a, Yishiwii'aa Barii'aa soor goo'n ooso qarukko; ee'isam Seeraah yakkam mat landichchom qarukko. Barii'aam Heebeeraa Maaliki'eelaa lam goo'n ooso qarukko; Maaliki'eel Biirzaaw yakkam beeto qarukko. Heebeer Yaafileexa, Shoomeeraa Hotaamaa sas goo'n ooso qarukko; Shu'aa yakkam mat landichchom eeda qarukko. Yaafileex Phaasaaka, Biimihaalaa Aashiwaataa sas goo'n ooso qarukko. Yaafileet abbaayyi Shoomeer Roohigaa Yeehuubaa Araamaa yakkam sas goo'n ooso qarukko. Yaafileet abbaayyi Hootaam Xoofaahaa Yuumnaa'aa Sheeleeshaa Aamaalaa yakkam soor goo'n ooso qarukko. Xoofaah Shumo'i Suuha, Harneefeera, Shuu'aala, Beera, Yuumeera, Beexeera, Hooda, Shaamaa'a, Shiilisha, Yuutiraanaa Ba'eeraa yakkam keen hee'llo'o. Yeeteer shumo'i Yaafuna, Phiisiphphaa Araa'aa yakkam keen hee'llo'o. Uulaa'i shumo'i Araaha, Hanii'eelaa Riixiyaa yakkam keen hee'llo'o. Ku keen hundim Aaseer shumo'i hee'llo'o; ixxuwwim abaroosina awwonsaanoo doo'llanto'oo mannaa oranne la'anto'oo keenoo hee'llo'o; Aaseer shumo'ina oranteena xantam 26,000 goo'n oosii hee'llo'o. Biiniyaam onti goo'n ooso qarukko; ixxuwwim ixxuwwi umu'llisinne Taara, Beela, Ashibeela, Ahiraaha, Nohe'ee Raafaa yakkam keen hee'llo'o. Beelaa'i shumo'i Adaara, Geera, Abiihu, Abiishu'a, Naa'imaana, Ahooha, Geera, Shafuufaa Huuraamaa yakkam keen hee'llo'o. Ya'uxa, Saakiyaa Miirimaa yakkam keen hee'ukko; Ixxi goo'n oos hundim abaroosina awwonsaan ikko'o. Odim Hushiim yakkam meentichchoonsi Ahiitoobaa Eelphaa'aalaa lam goo'n ooso qarukko. Eelphaa'aalim Eebeera, Miisha'aamaa Ohemeedaa sas goo'n ooso qarukko; Sheemeedim Oonoo Lood yakkam beero'uwwaa ee kululleetanne hee'oo hegeegguwwaa maqirem baxukkan hee'ukko. Baari'ii Seemaa'ii Ayaaloo'n beero'onne hee'llo'i mannina awwonsaan hee'llo'o; ixxuwwim Gaat beero'onne hee'u manna fissita'a hollito'o. Baari'i shumo'im Ahiyo, Shaashaaqa, Yireemoota, Zabaadiya, Araada, Edeera, Mikaa'eela, Yushiiphaa Yoohaa yakkam keen hee'llo'o. Eelphaa'aal shumo'i Zabaadiya, Mashulaama, Hiiziqa, Hebeera, Yushimaraaya, Yuzlii'aa Yoobaabaa yakkam keen hee'llo'o. Shiimi'i shumo'i Yaaqiima, Ziikiira, Zaabiida, Eelii'enaaya, Xiiltaaya, Eelii'eela, Adaaya, Baraayaa Shiimraataa yakkam keen hee'llo'o. Shaashaaq shumo'i Ishphaana, Ebeera, Eelii'ela, Aabdoona, Ziikra, Hanaana, Hanaaniya, Eeli'aama, Aantootya, Yufidaayaa Faanu'eelaa yakkam keen hee'llo'o. Yirohaam shumo'i Shamsharaaya, Shaharya, Ataaliya, Yaa'ireeshiya, Eeli'iiyaa Ziikiraa yakkam keen hee'llo'o. Ku keen hundim Yerusaaleemanne hee'llam hee'llo'i illagee'n abaroosa awwonsaanoo ixxuwwina la'anto'oo shumo'oo hee'llo'o. Yii'eel Gaaba'oon beero'o baxaa eebeyyonne hee'am hee'ukko; ixxi meentichchokim summi Maa'ikatti hee'ukko. Ixxi won beetikim summi Abdoonatti hee'ukko; mulli goo'n oosikim summi Xuura, Qiisha, Ba'aala, Nera, Naadaaba, Gadoora, Ahiyo, Zeekeeraa Shiimi'i anni hee'u Miiqlootaa yakkam keen hee'llo'o; ixxuwwi shumo'im mulli ixxuwwi moolli abaroos hee'llam beyyi hincitenne Yerusaaleemanne hee'llam hee'llo'o. Neer Qiis qarukko; Qiis Adil Saa'oola qarukko; Saa'oolim Yoonaataana, Maalkiishu'a, Abiinaadaabaa Eshibaa'aalaa soorem goo'n oosom qarukko. Yoonaataan Mariiba'aala qarukko; Mariibaa'aalim Miika qarukko. Miikim Phiitona, Meleeka, Taare'aa Akaazaa soorem goo'n oosom qarukko. Akaaz Yahoo'aada qarukko; Yahoo'aadim Aaleemeeta, Aazmaaweetaa Zimiiraa sasem goo'n oosom qarukko; Zimiirim Mooxa qarukko. Moox Biini'i qarukko; Biini'i Raafa'a qarukko; Raafa'a Eeli'aasa qarukko. Axeel Aazriiqaama, Bookaara, Isma'eela, Sha'aariya, Abdiyoo Hanaanaa loh goo'n ooso qarukko. Axeel abbaayyi Eesheeq Ulaama, Yaa'uushaa Eelifeeleexaa sas goo'n ooso qarukko. Ulaam goo'n oos malaayyaammuwwa, qoxxaalluwwaa xiyyinne orancha laqqam keenoo hee'llo'o; ixxuwwinam 150 oosii oos oosii hee'ukko; ku keen hundim Biiniyaam sulli hee'ukko. Isra'ee'l minaadab hundim ixxuwwi abaroosinne abaroosinnem kitaabanta'a hee'llo'o; oohim Isra'ee'l adilluwwi doonanne kitaabamaakko. Yihuxxi minaadab ixxuwwi baaxii'l mashka'inne qeefadakka'a Baabiloo'n uulla massakka'a hee'ukko. Ixxuwwi beero'uwwannee ixxuwwi ullannee daba'llita'a waatta'a afuutto'i Qeessuwwii Leewi'i oosii Keesammi Mi'n awwaadaanii mulli Isra'ee'l oosii hee'llo'o. Yihudaanniinsi, Biiniyaamaanniinsi, Efreemaanniinsii Minaas sulliinsii Yerusaaleemanne hee'lleena matto'o. Yerusaaleemanne Keesammi Mine egattam hee'llo'i waardiyyuwwi Shaaluumatte, Aquubatte, Xaalmoonatte, Ahiimaanattee ixxuwwi abbaayyuwwaa hee'llo'o; ixxuwwi awwonsaanchi Shaaluumatti hee'ukko. Ee doolli afeebe'em eelliinchi firinne adi'l ooxxi gooca ee moolli abaroos egettam hee'llo'o; ixxuwwim illageen Leewi'i oos amba'a aagakkam ooxxi gooccuwwa egattam hee'llo'o. Abiyaasaaf beetina beet hee'u Qore'i beet Shaaluum Qore'i moolliinsetti ikko'i mulli qarmanninne maqirem gaassi ixxuwwi anno'i Waa'i gatti mi'n hegeego egattam hee'llo'isinnem Waa'ina otossakkam dukkaa'n woro aagakkam gooca egettam hee'llo'o. Illagee'n doollenne gooca egeram hee'ukkok awwonsaanchi Ali'aazar beet Finihaasatti hee'ukko; Waa'im ixxenne maqire hee'ukko. Mesheleemiy beet Zakkaariyaas Waa'ina otossakkam dukkaana aagakkam gooca egeraanchi hee'ukko. Aagakkam gooca egetteena doo'llanto'i waardiyyuwwi hundikim xig 212 hee'ukko. Ixxuwwim hee'llam hegeeqqis hegeeqqisinne xiganta'a kitaabanto'o; ee egeraanom ee beyyonne egettamisa issito'ok adil Daawiitattee Hiraagaanchi Saamu'eelattee hee'llo'o. Ixxuwwii ixxuwwi shumo'ii Keesammi Mi'n dukkaa'n gooccuwwina egeraan hee'llo'o. Ixxuwwim eelliinchi aagginne, eelliinchi firinne, hanaa'n qarinnee woroo'n qarinnee soorem kollinnem yoo gooccuwwa egattam hee'llo'o. Ixxuwwi hegeegonne hee'llam ixxuwwi qarmannim lamar lamar balla egettu'uuyyi hara'mmitam hee'llo'o. Soorem Leewi'i oosim waardiyyuwwina awwonsaan ikka'a Keesammi Mi'n woronne yoo baxxanchuwwinaa ee baxxanchuwwanne hee'oo mu'uttuwwinaa hundinam anno'i ikka'a egettam hee'llo'o. Keesammi Mine egerimmikii dar dara ooxxi gooccuwwa fooqaa'immikii bax ixxuwwan ihu bikkina ixxuwwi gattam hee'llo'ok Keesammi Mi'n hegeegonnetti hee'ukko. Mulli Leewi'i oos Waa'ina otossakkam ammane awwaaxxakkam mulli mu'uttuwwaa egeraan hee'llo'o; awwaadina hasisoo ammane xigga'a uwwita'a odim awwaad beeddaa lasage xigga'a aa'lla'a dissitam hee'llo'o. Mulli keen odim mulli mu'uttuwwina, qamina, woyi'n diqasina, wee'l zaytina, aduruusinaa mulli annanni annanni ihaakkoo enjuwwinaa hundinam anno'i ikka'a egettam hee'llo'o. Ihukkaarem shitto'o gudisimmik bax xale'i qeessuwwan hee'ukko. Qooraah moolliinsi Shaaluumina won beet ihu Maatiitiy kitimina ihoo daabbo'o gudisaanchi hee'ukko. Qa'aat moolli abaroos odim Keesammi Minenne usheexxaxxi ayyaamonne hincoo daabbo'ina gudisaan hee'llo'o. Leewi'i oos abaroosiinsi kolli odim Keesammi Minenne zammattam hee'llo'o; ee abaroosikim awwonsaan hiimoo ballaa hundam awwaaddam bikkina Keesammi Mi'n ooxxi woronne hee'oo minneewwanne hee'llam hee'llo'o; ixxuwwi mulli awwaado maham awwaaddam hee'llo'oyyo. Ku Leewi'i oosik abaroos hundim awwonsaan hee'llo'o; ixxuwwim ixxuwwi sullisinne awwonsaan ikka'a Yerusaaleemanne hee'llam hee'llo'o. Yi'ii'eel Gaba'oon beero'o baxaa eekke'enne hee'am hee'ukko; ixxi meentichchokim summi Maa'ikatti ihukkuuyyi ixxi won beet summim Aabdoona yakkaman hee'ukko; mulli ixxi goo'n oosikim summi Xuuratte, Qiishatte, Ba'aalatte, Neratte, Naadaabatte, Gaadooratte, Ahiyotte, Zakkaariyaasattee Shiimii'i anni Miiqlotattee hee'llo'o. Ixxuwwi shumo'im mulli ixxuwwi moolli abaroosinne gadanonne Yerusaaleemanne hee'llam hee'llo'o. Neer Qiisa qarukko; Qiis adil Saa'oola qarukko; Saa'oolim Yoonaataana, Maalkiishu'a, Abiinaadaabaa Eshbaa'aalaa soorem goo'n oosom qarukko. Yoonaataanim Mariibaa'aala qarukko; Mariibaa'aalim Miika'a qarukko. Miikim Phiitona, Meeleeka, Taare'aa Akaazaa soor goo'n ooso qarukko. Akaazim Yaa'iira qarukko; Yaa'iirim Aalemata, Aazmaaweetaa Zimiiraa sas goo'n ooso qarukko; Zimiirim Mooxa qarukko. Moox Biini'a qarukko; Biini'im Raafaaya qarukko; Raafaay Eeli'aasaana qarukko; Eeli'aasaanim Axeela qarukko. Axeelim Aazriiqaama, Bookaara, Isma'eela, Sha'aariya, Abdiyoo Hanaanaa loh goo'n ooso qarukko. Ee lasage Filisxee'm uulli manni Isra'ee'l oosinne qaxxancha asheetto'o. Isra'ee'l oosim ixxuwwi illagiinsi gibbo'o; ixxuwwiinsim lobakata Giilbo'i duunanne oranne shakko'o. Ihukkaarem Filisxee'm Manni hollanta'a affa'a Saa'ool oosiinsi saso Yoonaataana, Aminaadaabaa Maalkiishu'aa shito'o. Orim Saa'oolanne qoxxukko; ixxim diina'i xiyyi qasukkaare jorisa madukko. Ixxim ee ammane o'l mu'uta amadoo woraadichchi beetina «Ku ballachchantoo'nno'i Filisxee'm manni eesenne naacantoo'n gaassitaa kiikka bisa'a fissitaa eese qassaa shihe» yukko. Ihukkaarem oo woraadichchi beet eekka isseena lobakata baddukko; ee bikkina Saa'ool ixxi gagim ixxi bisa'annem ubaa lehukko. Oo beetim Saa'ool lehukkisa moo'aa lasage ixxim ixxi bisa'annem ubaa lehukko. Ee bikkina Saa'ool ixxi sasem oosinnem lehukko; ixxi adillaninam lasaanchi ihukko. Yizra'ee'l cebbanne hee'llo'i Isra'ee'l oos o'l gogot gibukkisaa Saa'oolii ixxi oosim leto'isaa macceessa'a lasage ixxuwwi hee'llam beero'uwwa utta'a gibbo'o; Filisxee'm mannim waatta'a ee beero'uwwa amaddo'o. Eehanniinsim la'm balla daram Filisxee'm manni leto'i Isra'ee'l oos mu'uta maxatteena mattamaare Saa'oolekii ixxi oosikii leesh Giilbo'i duunanne ubaakkookkoka siiddo'o. Saa'oolika horoore mutta'ahii edde'aa hee'u o'l mu'utam sheelatta'ahii lasage asse'amaanonne amadiissa'a ixxuwwi waa'uwwinaa ixxuwwi minaadabinaa mishiraachcha kuttona asse'llo'o. Ee lasage ee o'l mu'uta ixxuwwi waa'uwwi minneewwanne dissito'o; ixxi horoorem «Daagoona» yamamoo qophpha'n waa'i minenne dissito'o. Gali'aadanne hee'oo Yaabeeshanne hee'llam minaadab Filisxee'm uulli manni Saa'oolanne issito'i luwwa macceessa'a lasage lobakat malaayyaammuwwi ikko'i manni matta'a Saa'oolikaa ixxi oosikaa leesha Yaabeesh afeebe'e eebbo'o; eekke'em mat geejji qilxokkichchi lugumonne waammita'a lasage lamar ballina soommanto'o. Saa'ool Waa'ina amma'nnamaakkoohan ihimmi hoogimminne lehukko; ixxi Waa'ikam ijaajo egerimmaa ixxom xa'mmimmaa sabaa lehu manna weeshsham keeniinsi sogitano xa'mmukko. Ee bikkina ixxo Waa'i shukko; ixxi Adillanom Issayyi beet Daawiitina higisaa uwwukko. Isra'ee'l minaadab hundim Keebiroonanne hee'oo Daawiit beyyo matta'a «Neese hundim kiina qarmanna Saa'ool adil ihaa hee'u illagee'n doollennem ihuta'n Isra'ee'l minaadaba oranne awwonsitam hee'llitok atette. ‹I minaadab ihu Isra'eela awwonsitoottokii gassitoottokii atette› yaa ki moollanni Waa'i kiina kuraakko» yito'o. Hundem Isra'ee'l lommannim Keebiroonanne yoo adil Daawiit beyyo waatto'o; ixxim ixxuwwinne maqirem eekke'enne hidi'l sagara aagukko; ixxuwwim Waa'i Saamu'eelannetti ihaa uwwu neeyyaxxi saga'llisinne Daawiita doo'llita'a Isra'eelina adil issito'o. Adil Daawiitii Isra'ee'l minaadabii hundim Iyyaabuusa yakkaman hee'u Yerusaalee'm beero'o matta'a qasso'o; ee ammane eekke'enne hee'llam hee'llo'i Iyyaabuus manni Daawiitina «Ka uulla hore'em aaggooyyo» yito'o. Ihukkaarem Daawiit ixxuwwi baxxa'a hee'llo'i Xiyoonanne yoo girbuwwa amadukko; ee lasage oo beero'i «Daawiit beero'o» yamamaa weeshamukko. Daawiitim «Gaassaa Iyyaabuus manna qasoo manchi o'l gogoxxi awwonsaanchi ihookko» yukko. Ee bikkina Xaruy beet Yoo'aab gaassaa maraa Iyyaabuus manna qasu bikkina o'l gogoxxi awwonsaanchi ihukko. Ee lasage Daawiit maraa girbi woronne hee'imma amadu bikkina oo beyyi «Daawiit beero'o» yamamaa weeshamukko. Daawiitim duuniinsi eelliinchi firinne buchchinne shiraashiramaakkoo beyyiinsi ki'isaa ee beero'o dabaraa baxukko; Yoo'aab odim gatu kollo baxukko. Gogoxxi Moollanni Waa'i ixxenne maqire hee'u bikkina Daawiit ammaniinsi ammanenne qoxarukkuuyyi marukko. La'anto'oo Daawiit gaadaa'nnek summi kanniinsi woroon yoohane; ixxuwwim mulli Isra'ee'l minaadabinnem Waa'i yu neeyyaxxi saga'llisinne Daawiit adil ihona hara'mmita'a hee'llo'o. Ixxi adillanim qoxxaallaa malaayyaamoo ihoo'isa issita'a hee'llo'o. Luxxek Hakmoo'n moolliinsetti ihu Yaashoobi'aamatti ihukkuuyyi ixxim sasem malaayyaammuwwinam awwonsaanchi hee'ukko; ixxim bagadinne qasaa sas xibbi manna matem ko'l orannem shaa guullukko. Sasem malaayyaammuwwiinsim mat hee'u Ahooh moolliinsi Doodo'i beet Eeli'aazaratti hee'ukko. Ixxim Phasdaamanne or ihu ammane Filisxee'm manna qaseena Daawiitinne maqirem gaadaa hee'ukko; so'o wixakko'oo beyyonne Isra'ee'l minaadab Filisxee'm manni illagiinsi gibbo'o. Ixxii ixxi awwonaanii ee so'i woronne Filisxee'm manna qassa'a shito'o; Waa'i ixxuwwina lob kaachcha uwwukko. Mat balla sadem qoxalli gaaxxi awwonsaaniinsim sasoom Daawiit hee'oo Aduulaam daawwa'i gadanonne yoo qoxxaalli ki'n beyyo matto'o; ee ammane Filisxee'm gogotiinsi hofqaxim Raafaayim cebbanne wiiddanta'a hee'llo'o. Daawiitim girbamaakkoo duunanne hee'ukko; Filisxee'm gogotiinsi mat gaad Beetaliheema weeraraa amadukko. Daawiitim wo'o xeebe'aa hee'u bikkina «Beetalihee'm ooxxi gooc gadanonne yoo bariinsi wo'o agona iina ayyi uwwookko?» yukko. Ee ammanenne sasem qoxxalli gaadaanim Filisxee'm manni wiiddanta'a hee'llo'i beyyo iiqqa'a matta'a Beetalihee'm ooxxi gooc gadanonne yoo bariinsi wo'o Daawiitina eebbo'o; ihukkaarem Daawiit ee wo'o ageena iittubee'i bikkina Waa'i illagenne kitim issaa dunukko. Daawiitim «An ka wo'o ageena hore'em xanoommoyyo; an ka wo'o agumlas ixxuwwi foorenne mu'llita'a matto'i ee la'anto'oo qoxxalli mannika xiiga agummaannisa xigamookko» yukko. Ee bikkina ixxi ee wo'o ageena ittukkoyyo; oo la'anto'oo sasem geedduwwi gaadaanim baxxo'i qoxxaalli baxxi ka keen hee'ukko. Yoo'aab abbaayyi Abiis sasem geedduwwi gaadaaninam lob awwonsaanchi hee'ukko; ixxim bagado ki'isaa sas xibbi mancho shaahaa hee'u bikkina ee sasem geedduwwi gaadaa'nnisam la'amaakkoohan ihukko. Sasem geedduwwi gaadaaniinsim mat ihaa xigamubeeta'nnim baxu geed bax bikkina ixxuwwiinsi lophphaa ixxi lobakat lomba siidaakkah ixxuwwina awwonsaanchi ihukko. Qaabxi'eel uullanne Yoodaah beet Baanaay la'amaakkoo gaadaanchi hee'ukko; ixxim lam la'anto'oo Moo'aaphphi uulli gaadaano shukkaanniinsi mulleka lobakat geedooma'n baxo baxaakko; mat ammane uullanne barad xee'nnisa ga'nnoo agananne mat baalli woro aagaa hobbichcho shukko. Ee'isam uullichchi onti anga ihoo lobakata geejji bagado amadaakkoo mat geejji Gibxi uulli mancho shukko; Baanaay ee mancho sheena xanukkok bicciinsi bagaan mulli luchcho maham amadoo'n ee Gibxi uulli manchi kolli hincaa aphphisaa lasage ixxi gaqqi bagadinnem qasa shukko. Sadiinsi mat ihu Baanaay baxu geedooma'n bax eehane. Sad malaayyaam kee'n woriinsi ixxi lobakat la'amaakkoohan ihuta'nnimii hore'em la'anto'oo sas malaayyaam geedduwwi beyyo afukkoyyo; Daawiitim Baanaaya ixxi egeraanina ijaajaanchi issaa doo'llaa hee'ukko. Daawiit adil Saa'ooliinsi gibaa Xiqlaaganne maaxamaa hee'u ammane amma'nnanto'oohii orancham laqqam lobakat gaadaanii matta'a ixxenne maqire mat ikko'o. Ixxuwwim Biiniyaam sulliinsetti ikko'i bikkina Saa'oolina qarmanni hee'llo'o; ixxuwwim makki anginnee qeddi anginnee xiyya tokkosseenaa kina yambarishinne huushsheenaa xantam keen hee'llo'o. Daawiit uulli udma'anne yoo girbi woronne hee'u ammane Gaad sulliinsi waatta'a ixxi gogotanne exxito'i orancha erisa laqqam la'anto'oo gaadaa'nnek summi kanniinsi woroon yoohane; ixxuwwim agiraa bagadoo amadda'a qasanchinne la'anto'o keen hee'llo'o; ixxuwwim hobbichchisaa baddissam keenoo duu'n hanenne hee'oo saarokkichchisa barattam keenoo hee'llo'o. Gaad sulliinsetti ikko'i ka manniinsi hofqaxim shiihalquwwi ikka'a hundiinsi hanaan yo'i ijaajaanoo xibbalaqquwwi ikka'a woroon yo'i ijaajaanoo hee'llo'o. Gaad sulliinsetti ikko'i manni mat ammane luxxi agan aagukkisam Yoordaanoos daajji tochchiinsi tochcho afaa aqqaakkoohaannonne ee daajje fitto'o; ee daajjiinsim eelliinchi firinnee eelliinchi aagginnee yoo cebbanne hee'llam hee'llo'i minaadab hundam hollito'o. Mat ammane Yihuxxi sulliinsii Biiniyaam sulliinsii hofqax mannim feeranta'a Daawiit hee'oo girba matto'o. Daawiitim ixxuwwi kolli hincaa «Kid waattakko'ok besh ikkakka'a iina hara'mmitakkeenatti ihulas eranne; an liiranchinne ki'nnuwwa aa'oommo; neesennem exxehe; ihukkaarem an ki'nnuwwa maham issoo'n i diina'ina eese higissakka'a uwwitakkeenatti ihaakkoolas gaassi niyyanno'i Waa'i ki'nnuwwi sawwite la'aa ki'nnuwwanne oogatona» yukko. Waa'i Ayyaanim sadem malaayyaammuwwinam awwonsaanchi ihu Amaasaayanne dillukko. Ixxim «Daawiita, neese ki keeno Issayyi beet Daawiita, neese kiinninnette kiinaa kiina hara'mmitam keeninaa hundinam xummi ihona ki Waa'i kiina hara'mmookko» yaa sagara iimaa'aa laarukko; Daawiitim issuwwa liiranchinne aa'aa lasage ixxi gogoxxi woronne awwonsaan issukko. Daawiit Adil Saa'oolinne orameena Filisxee'm manninne maqirem gaadu ammane Minaas sulliinsetti ikko'i hofqax gaadaanim Daawiitinne maqire matto'o; ihukkaarem Filisxee'm mannik awwonsaan «Daawiit neese lagaa gaassi ixxena moollanni hee'u Saa'ool kolli daba'llookko» yita'a baddito'i bikkina aranta'a lasage Xiiqlaaga daba'lloo'isa issito'o. Daawiit daba'llu ammane Minaas sulliinsi ixxi kolli matto'i gaadaa'nnek summi Aadinaahatte, Yoozaabeedatte, Yidii'i'eelatte, Miikaa'eelatte, Yoozaabaadatte, Eeliihattee Xiiltaayattee hee'llo'o. Ku keen hundim Minaas uullanne hee'llo'i ammane shaalaqquwwi hee'llo'o. Hundim la'anto'oo gaadaan hee'llo'i bikkina gogoxxi woronne o'l awwonsaan ikka'a Daawiitina awwaaddo'o; ee lasage odim Isra'ee'l gogotina hundinam o'l awwonsaan ikko'o. Ballina-ballina haareechchi haareechchi manni Daawiit o'l gogotanne exxam hee'u bikkina hofqax ammanenne ixxi gogot lobakata lophphukkuuyyi marukko. Ku orina guddo'oo gaadaan hundim Daawiita Isra'eelanne hundannem adil issiteena murte'lla'a Keebiroona matto'o; mulli gatto'i Isra'ee'l minaadab hundim ee sawwitenne iittanta'a hee'llo'o. Ixxuwwim ixxuwwina moolli gudisso'i luwwa liiranchinne ittu'uuyyii aggu'uuyyii Daawiitinne maqirem sas balla higisso'o. Hanaa'n qarinne hee'llam Yisaakoor sulliinsi, Zaabiloon sulliinsii Niftaaleem sulliinsii gatoo'n lobakat minaadab Hallanne, Gaameela'anne, Baqullannee Mirgo'uwwannee lobakat hurbaata, qama, oda'i misha, zabiiba, woyi'n diqaasaa wee'l zaytaa iyyiissa'a waatta'a hee'llo'o. Ee'isam durakka'a itakkam laroo gereebbaa amaada'a waatta'a hee'llo'o; mashka'oomim Isra'ee'l minaadab hundim liiranta'a hee'llo'i bikkinatte. Adil Daawiit shaalaquwwaa xibbalaquwwaa ikko'i o'l awwonsaaninne a'llamukko. Ee lasage hundem Isra'ee'l minaadabinam «Ki'nnuww iittantakkoasii ni Moollanni Waa'i doo'l ihulasii gatto'i mulli ni uulli mann Qeessuwwii Leewi'i oosii hee'llam hoffi beero'uwwa hundam asse'ammaano asse'nnaa keyye waatta'a niinninne dummitona issinona. Saa'ool adil ihaa hee'u doolle xadamaa hee'u Waa'i Hidi'l Saga'l Saaxina manna eemboommo» yukko. Minaadabim ee sawwitenne liiramaa iitamukko. Daawiitim Hidi'l Saga'l Saaxina Qiiryaatyi'aariimiinsi Yerusaaleema worimmina woroo'n qarinnee Gibxi uulli gabala, hanaa'n qarinnee odim Haamaata higakkam beyyi afeebe'e Isra'ee'l uullanne hundannem hee'oo minaadaba wixxaa'ukko. Daawiit minaadab hundinnem Kiruubee'l ladanne afuuru Waa'i summinne weeshamu Moollanni Hidi'l Saga'l Saaxina woreena Yihuxxi uullanne hee'oo Ba'aalaa yakkam Qiiryaatyi'aariim beero'o marukko. Ee Hidi'l Saga'l Saaxinam Amiinaadaab miniinsi fissita'a haareechchi faraxxi gaarre'enne iyyiisso'o; Uuzii Ahiiyii ee faraxxi gaarre'e ushe'llam hee'llo'o. Daawiitii minaadabii hundim maasinqo'oo diitta'aa lellitu'uuyyii doola chilchichilchi'aa'llu'uuyyii xurumba fuggu'uuyyii ixxuwwina yoo qax malaayyinne hundinnem Waa'i lombina zammattam hee'llo'o. Kiidoo'n oodo'om affo'oohaannonne gaarre'e gosaasam hee'u mirgo'uwwi bobaru bikkina taritarukko; Uuzim anga asse'aa Hidi'l Saga'l Saaxina amadukko. Uuzim ee Saaxina nakku bikkina Waa'i quuqaa ee'ammanem shukko; ee bikkina Uuz ee beyyonnem Waa'i illagenne lehukko. Oo beyyim kaballi afeebe'em «Pherexuuza» te'im «Uuz iiqancha» yamamaa weeshamookko; Waa'i quuqaa Uuza shu bikkina Daawiit lobakata kichche'ukko. Ee lasage Daawiit Waa'a lobakata baddu bikkina «Eehannah Waa'ika Hidi'l Saga'l Saaxina i mine hinkid masseena xanoommo» yukko. Daawiitim ee bikkina Hidi'l Saga'l Saaxina Yerusaaleema massimmi bikkinne Gaat beero'onne hee'oo Oobeedi'eedooma yakkam manchi minenne uraa urukko. Saaxinim eekke'enne sas agana hundam afuurukko Waa'im Oobeedi'eedooma ixxi abaroosaa ixxena yoo luwwaa hundam maasse'ukko. Xiiroos uulli adil Kiiraam Daawiitina adilla'n mine baxxam anaaxe'ee kininne baxxam baxaanoo digiphphi haqqaa Daawiit beyyo asse'ukko. Daawiitim Waa'i Isra'eelina adil issaa qoxxisukkisaa ixxi minaadab Isra'ee'l bikkina adillano iimiimaa'ukkisaa la'ukko. Daawiitim Yerusaaleemanne lobakat meento edaa eebukko; lobakat goonaa landam qarukko. Ixxim Yerusaaleemanne hee'u ammane qaru goo'n oos Shaamu'atte, Shoobaabatte, Naataanatte, Salamoonatte, Yibihaaratte, Eeliishu'atte, Eeliipheeleetatte, Noogaahatte, Neefeegatte, Yaafi'atte, Eel iishaama'atte, Be'eelyaadattee Eel ifeeleexattee hee'ukko. Daawiit Isra'ee'l uullanne hundannem adil ihukkisa Filisxee'm manni macceessa'a ixxo qeefadeena gogota gaadisso'o; ixxim eekka macceesaa ixxuwwinne orameena firukko. Filisxee'm mannim Raafaayi'm cebba waatta'a weeratto'o. Daawiitim «Filisxee'm manninne oramummaare at ixxuwwa i anganne higissaa uwwitoohonnihe?» yaa Waa'a xa'mmukko. Waa'im ixxena dabaraa «Eeyya, fittaa ixxuwwinne orame; an ixxuwwa ki anganne higisaa uwwoommo» yukko. Daawiitim Ba'aalfaraaxiima yakkam beyyonne Filisxee'm manna qasaa kaa'aa lasage «Diina'i gogota dirisisa iiqaa higona Waa'i iina hara'mmukko» yukko; ee lasage oo beyyi «Ba'aalfaraaxiima» yamamaa weeshamukko. Filisxee'm manni gibbu'uuyyi ixxuwwi waa'uwwa uunjita'a gibbo'o; Daawiitim oo waa'uwwi hundim shokkoo'isina ijaajukko. Filisxee'm manni odim ee cebbanne ee ammanem daba'llita'a weeratto'o. Daawiitim Waa'ika doo'lla xa'mmukko; Waa'im «Ixxuwwiinsi afaree'n kollinne oda'i haqqi gammallinne aa'llaa qase bagaan ka kollinne biqe fittaa qasantitte; an ki illaginne maraa Filisxee'm gogota aphphisoommi bikkina oda'i haqqi hanenne shaahookki sagara macceesoo ammane qase» yukko. Daawiitim Waa'i ijaajukkoka hundam issimminne Filisxee'm manna Gaaba'ooniinsi ki'isaa Geezeer afeebe'e kaachcha issaa hollukko. Ixxekim sad beyyi hundam afukko; Waa'im Daawiita mulli minaadaphphi adilluwwi illagenne hundannem lophphaakkoohan ihoo'isa issukko. Daawiit hee'oo minneewwa ixxi gaqqi beero'i ihu Yerusaaleemanne baxukko; Waa'i Hidi'l Saga'l Saaxin hee'oo beyyom gudisaa dukkaana kaasukko. Daawiitim ee lasage «Hidi'l Saga'l Saaxina iyyimmi hasisookkok Leewi'i oos xale'e; mashka'oomim Hidi'l Saga'l Saaxina iyyitonaa ixxom awwaaddonaa Waa'i heer heerinam doo'llukkok ixxuwwa» yukko. Daawiitim Waa'ika Hidi'l Saga'l Saaxinina gudisu beyyo masseena Isra'ee'l minaadaba hundam Yerusaaleema weeshisukko. Ee lasage odim Aaroon shumo'oo Leewi'i oosoo weeshisukko. Qa'aat moolliinsi Uri'eel 120 ikkam ixxi moolli mannina awwonsaanchi ihaa waarukko. Meeraar moolliinsi Asaay 220 ikkam ixxi moolli mannina awwonsaanchi ihaa waarukko. Gershoon moolliinsi yoo'eel 130 ikkam ixxi moolli mannina awwonsaanchi ihaa waarukko. Eelixaafaan moolliinsi Shamaa'iy 200 ikkam ixxi moolli mannina awwonsaanchi ihaa waarukko. Keebiroon moolliinsi Eelii'eel 80 ikkam ixxi moollina awwonsaanchi ihaa waarukko. Uuzii'eel moolliinsi Aminaadaab 112 ikkam ixxi moolli mannina awwonsaanchi ihaa waarukko. Daawiit qeessuwwi ikko'i Saadooqa; Abyaataara; ee'isam Leewi'i ooso Uri'eela, Asaaya, Yoo'eela, Shaamaa'iya, Eelii'eelaa Aminaadaabaa lohom dukkaa'n woro weeshisukko. Leewi'i oosinam «Oona'a, ki'nnuwwi Leewi'i moollina awwonsaano; Isra'eelina Moollanni ihu Hidi'l Saga'l Saaxina an gudisummi beyyo iyyitakka'a wottakkeena ki'nnuwwi gagaa Leewi'i oos ikko'i ki'nnuwwi qarmannaa hundam keessehe. Kanniinsi illageen ki'nnuwwi siidantakka'a Hidi'l Saga'l Saaxina iyyimma hoogimminne seer yoo'isinne ni Waa'a awwaandumbee'i bikkina ni Moollanni Waa'i neese guzumo'aakko» yukko. Ee lasage Isra'ee'l Moollanni Waa'ika Hidi'l Saga'l Saaxina wotteena qeessuwwii Leewi'i oosii ixxuwwi gaga keesso'o. Waa'i Muse'ennett ihaa ijaaju ijaaccisannem Leewi'i oos ee Saaxina wonnannanne issita'a ixxuwwi gudumonne iyyita'a matto'o. Daawiit «Maasiinqo'inne Diitta'innee Doolinnee liiranchi mazmuura zammattamisina ki'nnuwwi abbaayyuwwi ikko'i Leewi'i ooso doo'llehe» yaa Leewi'i oosina awwonsaano ijaajukko. Kanaanyina mazmuu'llek uwwanchi hee'u bikkina zammaaraan hee'llo'i Leewi'i oosina awwonsaanchi ihaa doo'llamukko. Eehanniinsi lasage Daawiit Isra'ee'l minaadaphphi awwonsaan o'l gogoxxi awwonsaanii Hidi'l Saga'l Saaxina lobakat liiranchinne wotteena Oobeedi'eedom mine matto'o. Ee Hidi'l Saga'l Saaxinam iyyitam Leewi'i oosina Waa'i hara'mmoo'isina lamar baa'l moolluwwaa lamar gereebbi ambulluwwaa kitimto'o. Daawiit, zammaraan, zammaraa'n awwonsaanchi Hanaanyii Hidi'l Saga'l Saaxina iyyito'i Leewi'i oosii talbi danaam fatirinne dadamaakkoo eddechcha ede'lla'a hee'llo'o. Daawiit annannam Eefuudaa weyyakkaadde'aa hee'ukko. Ee'isinne hundem Isra'ee'l minaadabim xaarinnee buudinnee baxamaakkoo xurumba fuggu'uuyyii doola chilchichilchi'aa'llu'uuyyii diitta'aa maasiinqo'oo aphphissu'uuyyii lobakat liiranchinne ilil yitu'uuyyii Hidi'l Saga'l Saaxina kibbita'a Yerusaaleema wotto'o. Waa'i Hidi'l Saga'l Saaxinim Daawiit beero'o afaakkoohaannonne Saa'ool landichcho Meelkoole adil Daawiit liiranchinne shimmukkuuyyi maskootinne daaphphita'a moo'lla'a is wodanonne ixxo gaddo'o. Hidi'l Saga'l Saaxina massita'a Daawiit gudisu dukkaa'n woronne dissito'o; ee lasage shokkiisakkamokaa mateeyyoo'm kitimaa Waa'ina hincaa'llo'o. Daawiitim ee kitima hincaa'aa lasage minaadaba Waa'i summinne maasse'ukko. Isra'ee'l minaadabina gooninaa meentinaa mat mat xeffo'i daabbo'o, maaraa mat mat xeffo'i zabiibaa uwwukko. Odim Leewi'i oosiinsi hofqaxam Hidi'l Saga'l Saaxi'n illagenne ikka'a Isra'ee'l Moollanni Waa'ina galataa lombaa hincaa'llona doo'llukko. Ixxuwwinam awwonsaanchi Asaafatte hee'ukko; Zakkaaryaasim ixxena hara'mmaanchi ihaa doo'llammukko. Yi'ii'eel, Shamiiraamoot, Yihii'eel, Maatiitiy, Eelii'aab, Baanaay, Oobeedi'edoomii Yi'i'eelii maasinqo'oo diitta'aa lelliteenaa Asaafim doola chilchiyyeeseenaa doo'llanto'o. Ee'isam Baanaayii Yaahazii'eelii lamem qeessuwwim Hidi'l Saga'l Saaxi'n illagenne hundi ammanem xurumba fuggeena doo'llanto'o. Daawiit Asaafinaa Asaafinne maqire Yo'i Leewi'i oosinaa Waa'ina hincoo galaxxi mazmuurina awwonsaan ikkamisa issu luxxi balli ee balli hee'ukko. Waa'a galaxxehe Ixxi summam weeshshehe Ixxi baxu bax hundam minaadabina kullehe. Waa'ina galaxxi mazmuura zammallehe. Ixxi baxu maalalsiisoo luwwi hundam kullehe. Ixxi keesammi summanne liirammehe Waa'a hasookki manni hundikim wodan liiramona. Waa'aa Waa'ika malaayyee hassehe, hundi ammanem ixxo hassehe. Waa'i niina Moollanni Waa'a ixxi oogatim uulli hundannetteme. Ixxi aagu hidi'l sagara heer heerina ijaaju sagaram kum qaranchina sawwoohane. Ixxi Abrihaamanne aagu hidi'l sagara Yisaaqinam uwwu neeyyaxxi sagara Yaaqoobina seer issaa qoxxisukko Isra'eelinam heer heerina hee'oo hidi'l sagar issukko. Oohim, «Kani'aa'n uulla kiina uwwoommo; ixxim kiina sharad ihookko» yoohane. Waa'ik minaadab xigonne hofqax hee'llo'o. Kaani'aa'n uullannem waaraan hee'llo'o. Ixxuwwi mat uulliinsi mulli uulla mat minaadaphphi uulliinsi mulli minaadaphphi uulla karkaaddo'o. Ihukkaarem Waa'i ixxuwwa ayyim woramadona cawwukkoyyo. Ixxuwwi bikkinam adilluwwa «Doo'llanto'oo i awwaadaano nakkitakkotte. I hiraagaanom hawwoddakkotte» yaa axeerukko. Ka uulli minaadab hundim Waa'ina zammallehe ixxi gatisaanchoo'mmekam er mishiraachcha balli hundam alallaattehe. Minaadab hundinam ixxi lomba kullehe; manni hundinam maalalsiisoo ixxi baxo kullehe. Waa'i lobane; lophphaakkoo galatim ixxena hasisoohane; ixxo qophpha'n waa'uwwiinsi hundiinsim loboka baddimmi hasisoohane. Mulli minaadab otossitam waa'uwwi anginne baxamaakkoo misilluwwa; ihukkaarem Waa'i iimane qooccu Waa'a. Lombii hibbii ixxi kululleetanne yookko. Ixxi minem malaayyii liiranchii wo'mmoo'isa issaakko. Uullanne hee'llakkam minaadab hundim ixxi lombi bikkinaa ixxi malaayyi bikkinaa Waa'a galaxxehe. Waa'ika lombaam summa galaxxehe. Kitimina ihoo luwwa amaddakka'a ixxi mine aaggehe. Keesammi Waa'i moo'amoo ammane ixxena otossi'llehe. Uulli minaadab hundim ixxi illagenne huxe'llehe; uulli qoxxaallisa shooto'amu bikkina heekke'ooyyo. Uullii iimanii liirammehe; minaadab hundinam Waa'i adil ihukkisa kullehe. Dambalaqii dambalaq woronne wo'mmaa yoo luwwii hundim ilil yihona; uullii uullanne mutu luwwii hundim liiramona. Waa'i uullanne oogateena waaroo ammane doo'm woronne yoo haqquwwi ixxi illagenne liiranchinne zammarookko. Biijaallaa ixxek iittim heer heerina hee'oohanee ihu bikkina Waa'a galaxxehe. Ixxom «Neese gatisaanchi Waa'a! He'i niina at agaage; keese laqqambee'i minaadaphphi lambe'iinsi neese ni uullanne at wixxaa'e; ee ammane neese keese galaxxinoommo; ki keesammi summam lonsinoommo» yi'llehe. Heerii heerina Isra'ee'l Moollanni Waa'i galaxxamaakkoohan ihona; Minaadab hundim «Eeyya ihona» yito'o; Waa'am galaxxito'o. Adil Daawiitim Asaafaa Asaafinne maqire hee'llo'i Leewi'i oosoo Hidi'l Saga'l Saaxin yoo beyyonne Waa'ina otossakkam seerina hundi ammaninam awwonsitamisa issukko; ixxuwwim eekke'enne ballina ballina awwaaddam hee'llo'o. Ixxuwwinam hara'mmitona Yiduutuun beet Oobeedi'eedoomaa ixxi moolliinsi odim lohayyee sadeenti manchoo eedaa doo'llukko. Yiduutuun beet Hosaa'ii Oobeedi'eedoomii ooxxi gooca egeraan ikko'o. Qeessichchi Saadooqii ixxi beshshuwwi ikko'i mulli qeessuwwii Gaba'oonanne yoo Waa'ina otossakkam dukkaa'n illagenne ihoo awwaadina hundinam awwonsaan ikko'o. Eekkam issukkok ixxuwwim Waa'i See'l kitaabanne kitaabamaa yoo Isra'ee'l oosina uwwamu ijaaccisinne shokkiisakkam kitima kitimakkam beyyonne daraa maaro'oo hincaa'llamisinatte. Eekke'em ixxuwwinne maqire Heemaanii Yiduutuunii Waa'ina heer heerina hee'oo iitto sawwimminne hundi ammanem ixxena galaxxi mazmuura hincaa'lleena annanni ikka'a doo'llanto'oo mulli mannii hee'llo'o. Heemaanii Yiduutuunii xurumbuwwina, doolinaa galaxxi mazmuur zammaramoo ammane awwaaxxakkam mulli mu'uttuwwinaa hundinam egeraan hee'llo'o. Yiduutuun oos ooxxi gooca egetteena doo'llanto'o. Ee lasage minaadab hundim ki'aa ixxi gaqqi mine marukko; Daawiitim ixxi abaroosa maasse'eena mine daba'llukko. Adil Daawiit ixxi adilla'n minenne afuuraa hee'ukkisam hiraagaanchi Naataana weeshisaa «Oono'o, An digibinne baxamaakkoo minenne yoommo; ihukkaarem Waa'i Hidi'l Saga'l Saaxin dukkaa'n woronne yookko» yukko. Naataanim «Waa'i kiinninne maqire yoo bikkina at ki wodanonne sawwit luwwi hundam isse» yaa dabarukko. Ihukkaarem Waa'i ee hiimom Naataanina «I awwaadaanchi Daawiit beyyo mattaa ‹An hee'oommi Keesammi Mine baxxoottok ateyyo. Isra'ee'l minaadab Gibxi uulli agiddaniinsi wolabbanonne fissummi ammaniinsi kid kabad afeebe'e minenne hee'aa la'oommoyyo; hundi ammanem dukkaa'n woronne ihaa mat beyyiinsi mulli beyyo daba'llamam hee'ummo. Isra'ee'l minaadabinne maqire taakke'ummi doollenne hundannem i minaadabanne awwonsaan ikkona doo'llummi awwonsaanniinsi matom ‹Digiphphi haqqinne Keesammi Mine iina mahina baxxakko'oyyo? yummi amman hee'aatennihe?» yukko. «Ee bikkina kaba at i awwaadaanchi Daawiitina gogoxxi Moollanni Waa'i ‹An keese gereebba allaaraanchi hee'l beyyiinsi ki'isaa Isra'ee'l I minaadabanne awwonsaanchi issummo. At mattitti beyyi hundannem an kiinninne maqire hee'ummo; ki diina'a hundam ki illagiinsi bi'isummo; kabadem an ki summa ka uullanne la'amaakkoo manni summiinsi hundiinsem lophphaa la'amaakkoohan issoommo. At gaassi kiyyanno'isam letoo ammane ki oosiinsi mato an adil issaa ki'isoommo; ixxi adillanom qoxxaalli issoommo. Keesammi Mine iina baxookkokim ixxotti ihookko; ixxi adillanim heer heerina qoxxaakkoohan ihoo'isa issoommo. Ixxena anni ihoommo; ixxim iina beet ihookko; heer heerina hee'oo i iitto kiinniinsi illageen hee'u Saa'ooliinsi massummisa ixxeensi hore'em massoommoyyo. I minaadabannee i adillanonnee heer heerinam hee'oo'isa issoommo; ixxi adillaninam tungi hee'ooyyo› yihe» yukko. Naataanim ka kaalti sagara hundam Daawiitina kurukko. Ee lasage adil Daawiit Waa'ina otossakkam duukkaa'n beyyo maraa Waa'i illagenne afuuraa «I Moollanni Waa'a! Kannina afissittok an ayyette? I abaroosdu ayyette? I Moollanni Waa'a! Kabadem odim at lophphaakkoo luwwa issittuuyyatte; waaroo doollenne ki'llam shumo'ina at lobakat neeyyaxxi sagara uwwitaatto; eesem geejji manchi issitaatto. Ki awwaadaanchi eese lonsitti bikkina kanniinsi loboka an keese mayyeena xanoommo; at i bikkina lonsitaa laqqootto. At iina kaka issitoo'isaa ka lasage eese lonsitoo'isaa la'isseena ki doo'llaa mare'ee issitaatto. I Waa'a! Kiinninne kobi'llamookkok hore'em bee'e; neese macceensummisam kiinniinsi bagaan mulli Waa'i bee'e. Ki minaadaba ki gaqqan issiteena agiddaniinsi gatissitti Isra'eeli'nnoo mulli minaadab hore'em bee'e; at ixxuwwina issitti maalalsiisoo lob luwwiinsi ki'aa la'antaattoohaannoom uulli hundannem macceesamaakko; ki minaadaba Gibxi agiddaniinsi gatissitto; ixxuwwi illagiinsi mulli minaadaba hollitto. Isra'ee'l minaadaba heer heerina ki gaqqi minaadab issitto; Waa'a! Atim ixxuwwina Waa'i ikkitto. «Moollanni Waa'i, kabadem kiina ki awwaadaanchinaa i shumo'inaa aaggitti neeyyaxxi sagara wonshe; issoommo yitti luwwa hundam isse. Oohim ki summi heer heerina qoxxaakkoohannee la'amaakkoohanee ihonatte; mulli minaadabim heer heerina ‹Gogoxxi Moollanni Waa'i Isra'ee'l Waa'a› yitonatte; iikka ki awwaadaanchikam mine heer heerina qoxxissootto. Waa'a! At mine baxxoo'isa ki agishshina la'issitti bikkina ka uunxato ki kollonne hincaa'eena an iggimma siidaammo. Waa'a! At hanqo'i Waa'a; ka malallisiisoo neeyyaxxi sagara iina uwwitaatto. Ee bikkina ki illagenne hee'oo'isinaa iikka ki awwaadaanchika mine maasse'lloo'isinaa ki doo'l ihona; Waa'a! At i abaroosa maasse'llaatto; ixxuwwim heer heerina maasse'anto'oo keen ikkamo» yaa uunxukko. Eehanniinsi lasage Daawiit Filisxee'm manninne oramaa kaa'ukko; ixxim Gaat beero'oo ee kululleetanne hee'oo hegeegguwwaa hundam qeefadukko. Ee'isam Moo'aaphphi uulli manna kaa'aa ixxena gibittamisa issukko. Ee lasage odim adil Daawiit Sooriy uullanne Efiraaxiis daajji gammalanne yoo uulla amadeena maru ammane Xoobaa'i uulli adil Hadaadi'eezeer Haamaat afeebe'e maraa qasukko. Daawiitim Hadaadi'eezeerika mat kum faraxxi gaarre'ee lamar kum faradaanoo lamiyyi kum lokkaanoo qeefadukko; mat xibbi gaarre'e gosaasoo farado ixxi gagina gatisaa gatu qaxika odim moqonti nigga murukko. Damasqo'onne hee'llam Sooriy uulli manni adil Hadaadi'eezeerina hara'mmitona gaadaano asse'llo'o; Daawiitim ixxuwwinne oramaa lamiyyee lam kum gaadaanoo shukko. Ee lasage Sooriy uullanne yoo Damasiqo'onne ixxi gaadaan hee'llam beyyo axisukko; minaadabim ixxena ijaajamukko; gibirom gibirukko; Waa'im Daawiitina hundi beyyonnem kaachcha uwwukko. Daawiitim Hadaadi'eezerina awwaaddam awwonsaan iyyita'a hee'llo'i worqinne baxamaakkoo agira qeefadaa Yerusaaleema massukko. Odim Hadaadi'eezeer uullanne yoo Xiibihata Kunaa yakkam beero'uwwiinsi lobakat naas xaaraa massukko; ee lasage Salamoon jaalo'o, Keesammi Mi'n utubbuuwwaa mulli mu'uttuwaa baxukkok ee naas xaarinnette hee'ukko. Haamaat uulli adil Too'i Daawiit Xoob uulli adil Hadaadi'eezeer gogota hundam shaa guullukkisa macceesukko. Too'im Hadaadi'eezeerinne oramaa hee'u bikkina adil Daawiit Hadaadi'eezeer kaa'ukkisa macceesaa lasage ixxena macceesamu liirancha kurona ixxi beeto Yooraama Daawiit beyyo asse'ukko; Yooraamim worqinnee birinnee naas xaarinnee baxamaakkoo mu'uttuwwa Daawiitina irifo'i issaa eebukko. Adil Daawiitim Eedoo'm manniinsi, Moo'aaphphi manniinsi, Amoo'n manniinsi, Filisxee'm manniinsii Amaaleeq manniinsii qeefadaa eebu birinne, worqinnee naas xaarinnee baxamu mulli mu'uttuwwinne maqirem Waa'ina otossakkam ammane awwaaxxakkamisa issukko. Xaruy beet Abiis Eedoo'm manna sooqixxi cebbanne kaa'aa tommoo sadeenti kumaa ikkam qaxa ixxuwwiinsi shukko. Ixxim Eedoo'm uullanne hundannem gaadaan hee'llam beyyuwwa uullisukko; ee uullanne hee'llam minaadab hundim adil Daawiitina ijaajanto'o; Waa'im Daawiitina hundi beyyonnem kaachcha uwwukko. Daawiit Isra'eelanne hundannem adil ihukko; minaadabim hundi ammanem golo'i bee'i hanqa siixxoo'isa issukko. Abiis abbaayyi Yoo'aab gogotina awwonsaanchi hee'ukko. Ahiiluud beet Yoosaafix kitaabamaa yoo luwwina hundinam awwonsaancho hee'ukko. Ahiixoob beet Saadooqii Abiyaataar beet Abemeeleekii qeessuwwi hee'llo'o. Suusa'i odim adilla'n mininne kitaabaanchi hee'ukko. Yodaah beet Baanaay Daawiit lombi waardiyyuwwina ijaajaanchi hee'ukko. Adil Daawiit goo'n oos odim ixxuwwi anni adilla'n minenne ixxuwwi anniinsi awwonta'a lob beyyo ammada'a hee'llo'o. Hofqax ammaniinsi lasage Amoo'n adil Naa'oos lehukko; ixxi beet Hanuunim ixxi beyyonne adil ihukko. Adil Daawiitim «Ixxi anni Naa'oos iina issukisam anim ixxi beet Hanuunina amma'nnamaammoo beshichchi ihaa anga dabaroommo» yukko. Ee bikkina Daawiit Hanuunik anni lehukkaare kichche'ukkisa la'iseena asse'amaano asse'ukko. Daawiit asse'u manni Hanuun yoo Amoo'n uulla qoxxiseena afu ammanenne, Amoo'n uulli gassaan adilina «Daawiit kiyyanni lehukkaare kichche'ukkan ihaa ka manna asse'ukkok kiyyanna lonsaa labissaahinnihe? Ixxi ka manna asse'ukkok ka uulla weeraraa amadeena makkoo'isina shaashshitonatte» yito'o. Ee bikkina Hanuun Daawiit asse'u manna amadaa haareedda hogoossukko; sha'ixxi orachchi moo'ameebe'i afeebe'em lamadiinsi aad yoo ixxuwwi edde'llo'i eddechchika lamadiinsi aad yoo qaxa muransaa ixxuwwi uulla mattona hollukko. Ixxuwwim ixxuwwi mine daba'llita'a waatteena tuutto'o. Daawiitim ee woshsha hundam macceesaa lasage ixxuwwi yo'i beyyo asse'amaano asse'aa «Ki'nnuwwik haareeddi li'eebe'i afeebe'e Yaarko'onne afuullehe. Ee lasage waattakkamo» yukko. Amoo'n uulli manni ixxuwwi anginnem Daawiita diinakkichchi issito'isa laqqo'o; ee bikkina sadee soor kum kiilo'oo ihoo qax kin bira miqqa'a faraxxi gaarre'ee faradaanoo, hanaa'n Masphexoome'ennee Sooriyannee hee'llam Maa'ikiinsii Xoobaa'iinsii eebbo'o. Awwaaxiteena miqqa'a eebbo'i sadii lam kum faraxxi gaarre'ii adil Maa'ikki o'l gogotii waatta'a Meedaab gadanonne wiiddanto'o; Amoo'n mannim hee'llam beero'uwwiinsi fitta'a orina guddo'o. Daawiitim eekka macceesaa Yoo'aaba hundem gogotinne maqirem gaadina asse'ukko. Amoo'n mannim waatta'a ixxuwwika lob beero'i Raabaa'a aagakkam gooc gadanonne beyyo amadda'a guddo'o; ixxuwwina hara'mmiteena waatto'i adilluwwi odim biir ihaakkoo hax ullanne beyyo amadda'a guddo'o. Yoo'aabim illaginnee lasaginnee o'l gogot yoo'isa la'ukko; ee bikkina Isra'eeliinsi la'anto'oo geedduwwa doo'llaa Sooriy o'l gogoxxi illagenne uullisukko. Gatto'i qax odim ixxi abbaayyi Abiis uwwoo ijaaccisinne Amoo'n manninne qasantamisina illaginne uullisukko. Yoo'aabim Abiisina «Sooriy uulli manni qoxatta'a eese kaa'lleena hincito'isa laqqilas at iina agaage; anim Amoo'n uulli manni keese kaa'lleena hincito'isa la'umlas kiina agaagoommo. Qoxxe! Ni minaadaphphi bikkinaa ni Waa'i beero'uwwi bikkinaa qoxxinaa orammona; Waa'im ixxi doo'llika hundam issona. Yoo'aabii ixxenne yo'i gogotii Sooriy manninne oranteena mikmikito'i ammanenne oo Sooriy manni ixxuwwi illagiinsi gibbo'o. Amoo'n mannim Sooriy manni gibbo'isa moo'lla'a ixxuwwim Abiis illagiinsi gibba'a beero'onne aaggo'o; ee lasage Yoo'aab Yerusaaleema daba'llukko. Sooriy uulli manni Isra'ee'l oosinne kaa'anto'isa laqqo'i ammanenne Efiraaxiis daajjiinsi eelliinchi firinne hee'llam Sooriy uulluwwiinsi o'l gogota eebisso'o. Ixxuwwam Xooba'i uulli adil Hadaadi'eezeerina o'l awwonsaanchi hee'u Shoobaak awwonsoo'isa issito'o. Daawiitim eekka macceesaa lasage Isra'ee'l o'l gogota hundam wixxaa'aa Yoordaanoosiinsi eeqidonne orameena beyyo amadukko; Sooriy uulli mannim ee'isam beyyo amadda'a Daawiitinne oranto'o. Sooriy uulli mannim Isra'ee'l oos illagiinsi gibbo'o; Daawiitim lamar kum faraxxi gaarre'e ushe'llam hee'llo'i keenoo sor kum lokkaanoo ee gogoxxi awwonsaanchi hee'u Shoobaakaa shukko. Hadaadi'eezeer gassi woronne hee'llam awwonsaanim Isra'ee'l oos illagenne kaa'anto'isa laqqa'a Daawiitinne iittanto'o. Ixxenam gibiraan ikko'o. Ee lasage Sooriy manni Amoo'n mannina hara'mmiteena hasso'oyyo. Adilluwwi lonsita'a orina mattam qaraax agananne Yoo'aab ixxi gogota awwonsaa maraa Amoo'n uulla bi'isukko; ihukkaarem adil Daawiit Yerusaaleemannem hee'ukko; Yoo'aabim Raabaa'i beero'o kibbaa amadaa bi'isukko. Milkoom yakkam Amoo'n uulli qophpha'n waa'ina 34 kiilo'i qaxa kee'mmoo worqinne baxamaakkoo adilla'n mare'e hee'ukko; eehanni woronnem inqu'u yakkam bito xee'aalli kin hee'ukko; Daawiitim ee adilla'n mare'e ixxi gaqqi horoorenne issukko; ee beero'iinsim lobakat luwwa qeefadaa massukko. Ee beero'i minaadabim magaazinne, doominnee heedinnee baxxamisa issukko; Amoo'n uullanne hee'oo mulli hoffi beero'uwwi minaadabim eehido'isinne baxxamisa issukko; ee lasage Daawiitii ixxi gogotii hundim Yerusaaleema daba'llito'o. Ee lasage odim Geezeeraa yakkam beyyonne hee'llam Filisxee'm mannanne or ihukko; Hushaa'i moolliinsetti ihoo Siibaakaay Raafaayim moollika Siiphaaya yakkam malaayyaam mancho shukko; Filisxee'm mannim kaa'anto'o. Mulli ammane odim Filisxee'm uulli manninne or ihukko; ee ammanenne Yaa'iir beet Eelihanaan Gaatik Laahim, Gooliyaad abbaayyo shukko; Laahimim amadaa hee'u bagaxxi qaalleenchi eddechcha dadoo manni dadu eddechcha xaaxoo xaa'l qaxa geejji hee'ukko. Mulli orim Gaatanne ihukko; ee orannem lamem angannee lamem lokkonnee loh-loh maxxaar yoo mat malaayyaam manchi hee'ukko; ixxim gaassi doollenne malaayyaam hee'llo'i Raafaayim shumo'iinsette hee'ukko. Ixxim Isra'ee'l oosinne sha'llamukko; ixxom Daawiitina abbaayyi hee'u Shaama'i beet Yoonaataan shukko. Daawiitii ixxi gogotii shito'i ku sasem manchim Gaatanne hee'llam malaayyaam Raafaayim shumo'iinsette hee'llo'o. Sheexaanchi Isra'ee'l oosinne uullixxameena ki'aa Daawiit Isra'ee'l ooso xigoo'isa issukko. Daawiit Yoo'aabinaa o'l gogoxxi awwonsaaninaa «Mattakka'a Daaniinsi ki'isaa Bersaabe'i afeebe'e yoo Isra'ee'l minaadaphpheka xigo xiggakka'a iina la'issehe; an minaadaphpheka xigo la'eena hasaammo» yaa ijaajukko. Yoo'aabim «Adila, Waa'i Isra'ee'l minaadaba kaba yoohaanniinsi hanaan xibbi kore lonsona; ixxuwwi hundim kiina awwaaddam awwaadaanoyyonnihe? At minaadaba xigimminne minaadaba hawwodaan issitoottok mahinatte?» yukko. Ihukkaarem Yoo'aab ee ijaajo wonshoo'isina adil ijaajukko; Yoo'aabim adi'l illagiinsi firaa minaadaba xigeena Isra'ee'l uullanne hundannem do'aa lasage Yerusaaleema daba'llukko. Ixxim oranteena xantam qax mannika xigo Daawiitina la'isukko; oo keenim Isra'eeliinsi mat kaakumaa mat xibbi kumaa, Yihudiinsi odim soor xibbee lamarayyi kumaa hee'ukko. Ihukkaarem Yoo'aab adil ijaaju ijaajonne iittamubee'i bikkina Leewi'i sulloo Biiniyaam sulloo edaa xigukkoyyo. Waa'im eehannonne quuqu bikkina Isra'ee'l minaadaba guzumo'ukko. Eehanniinsi lasage Daawiit «An kaka issimminne lobakata kee'mmaalli baaxiiloo qawwoo'm baxoo baxaammo; ee bikkina hay iina haafihe» yaa Waa'a uunxukko. Waa'im Daawiitina hiraagaanchi hee'u Gaada «Mattaa Daawiitina ‹oono'o, an kiina sas doo'lla uwwaammo; anim at doo'llittoka keesenne ihoo'isa issoommo› yoolla» yitaa kure yukko. Gaadim Daawiit beyyo maraa Waa'i ixxina wocukkoka hundam Caakkisaa kurukko. Ixxim «Uullanne sas hiinchi sibaar ihimma te'im sas agana ki diina'i bisa'inne qasseena keese hollimma te'im Waa'i ki uullanne sas ballina bisa'inne aphphisimmiinsii boobana uullanne eebaa Isra'ee'l minaadaba lehinne aphphisoo Waa'i asse'ammaancho asse'immiinsii hinka doo'llitootto? Anim Waa'ina dabaroommi dabachchina at doo'llitoka kure» yaa xa'mmukko. Daawiitim «Oono'o, an doo'lleena xanoombee'isanne yoommo; ihukkaarem manni anganne ubimmiinsi Waa'i qishixxaalli ihu bikkina ixxi eese guzumo'ona» yaa dabarukko. Ee bikkina Waa'i Isra'ee'l minaadaphphi hanenne booban ihoo'isa issukko; minaadabiinsim lamarayyi kuma ikkam qax beeddito'o. Ee'isam Waa'i Yerusaaleema bi'isoo ixxi asse'amaancho asse'ukko; oo asse'amaanchim bi'iseena hincaakkoohaannonne iheena yoo bichchi bikkina Waa'i moo'aa qishixxukko; Waa'im ee ixxi asse'amaanchina «Kaba ihookko, ki anga dabare» yukko; ee ammane oo asse'amaanchi Iyyaabuus uulli Oorin oodo'i gadanonne uullaa hee'ukko. Daawiitim Waa'i asse'amaanchi Yerusaaleemanne qara dabaraakkoo bisa'a ixxi anganne amadaa iimanenne uullaakkoo moo'ukko; ee ammane Daawiitii xiddi eddechcha edde'lla'a hee'llo'i minaadaphphi awwonsaanii hundim illillaachcha uullanne ubbo'o. Daawiitim «Waa'a! Minaadab xigamoo'isina ijaajummok anette; baaxiilo baxummokii lobakatam hawwodummokii anette; ku xummaan minaadab ma'issaate? I Moollanni Waa'a! Eesee i abaroosaa at guzumo'e bagaan ku booban ki minaadabanne ihoone» yaa uunxukko. Ee lasage Waa'i asse'amaanchi Gaadina «Daawiit Iyyaabuus uulli manchi hee'u Oorin oodo'o maraa Waa'ina kitima hincaa'akkam beyyo baxona kure» yukko. Daawiitim Gaad Waa'i summinne kuru saga'llisannem baxeena marukko. Ee oodo'onnem Oorin ixxi soor oosinne maqirem arasa ganam hee'ukko; ixxim laso daba'llaa Waa'i asse'amaancho moo'ukko; ixxi soorem goo'n oosim ee asse'amaancho moo'lla'a gibba'a maaxamto'o. Daawiitim ixxuwwi kolli waaroo'isa Oorin moo'aa oodo'iinsi firaa maraa Daawiitina aad heeshukko. Daawiitim «Minaadabanne ubu booban ki'ona Waa'ina kitima hincaa'akkam beyyo baxeenatti ihu bikkina ka ki oodo'o biteese; anim kiina oodo'i bikkenne wo'm bito miqoommo» yukko. Orinim Daawiitina «Adila, massitaa at hassitti luwwi hundam isse; kiti'm beyyonne shokkoo kitimina ka mirgo'uwwa, kiti'm beyyonne aphphoo giirina ihona ka hurbaata ganakkam haqqaa hurbaaxxi kitimina ihoo ka arasaa hundam masse; oona'a an hundam kiina uwwaammo» yukko. Ihukkaarem adil Daawiit Oorinina «Ee'isa ihoone, hundikam bito an kiina miqoommo; ki gaqqi amaxxi ihukkokaa bito maham miqummibee'i luwwaa Waa'ina kitim issaa hincaa'eena hasoommoyyo» yaa dabarukko. Ee bikkina Daawiit Oorinina ixxi oodo'i beyyi bikke loh xibbi saqila worqa bira uwwukko. Daawiitim ee beyyonne Waa'ina kitima hincaa'akkam beyyo baxaa shokkiisakkam kitimaa mateeyyoo'm kitimaa hincaa'ukko; Waa'am uunxukko; Waa'im kitima hincaa'akkam beyyonne yoo kitima itoo giira iimaniinsi asse'aa ixxi uunxatina dabachcha uwwukko. Waa'im ixxi asse'amaanchina «Ki bisa'a seejjanne aagise» yukko. Ixxim ijaajamukkisanne issukko. Eehido'isinne Waa'i ixxekka uunxato macceesukkisa Daawiit la'ukko. Ee lasagem Iyyaabuus uulli manchi hee'u Oorin oodo'i beyyonne yoo kiti'm beyyonne odim kitima hincaa'ukko. Muse'e udma'i uullanne baxu Waa'ina otossakkam dukkaanii kitim hincaa'am hee'u kiti'm beyyii ee amman afeebe'e Gaba'oonanne Waa'ina otossakkam beyyuwwanne hee'ukko. Ihukkaarem Waa'i asse'amaanchika bisa'a baddu bikkina ee beyyo maraa Waa'a xa'mmeena xanukkoyyo. Daawiitim «Keesammi Minii Isra'ee'l minaadab shokkiisakkam kitima hincaa'llam kiti'm beyyii hee'immi hasisookkok ka beyyonnette» yukko. Adil Daawiit Isra'ee'l uullanne hee'llam waaraano wixxitona ijaajukko; ixxuwwiinsim mat mat keen Keesammi Mine baxakkam kina cabbattamisa issukko. Daawiit ooxxi gooca baximmina ihoo misimaara, maaxafe'e, baxakkam lobakat xaaraa ee'isam keenakkeena xanakkambee'i lobakat naas xaaraa gudisukko. Xiiroos uullikii Siidoo'n uulli minaadabii xigo lobakat ihaakkoo digiphphi haqqa eebbamisa issukko. Daawiit «I beet Salamoon Waa'ina baxoo Keesammi Min lobakata mishisoohanee uullanne hundannem la'amaakkoohanee ihimmi hasisookko; ihukkaarem ixxi ooshshichchoo lobakat malaayyi bee'anee ihu bikkina hundem luwwam an gudisoommo» yukko. Daawiitim lehoo'n gaassaa Keesammi Mine baxakkam lobakat mu'uta gudisukko. Daawiit ixxi beet Salamoona weeshisaa Isra'ee'l Moollanni Waa'ina Keesammi Mine baxona ijaajukko. Ixxenam «I beeto, an I Moollanni Waa'i lombina Keesammi Mine baxeena sawwaa hee'ummo. Ihukkaarem Waa'i iina ‹At lobakat xiiga duntaatto; dut ammanem orantaatto. Lobakat xiiga uullanne duntaattoohan ihu bikkina Keesammi Mine iina baxxona hasoommoyyo› yaakko. Ihukkaarem Waa'i iina ‹An ixxi diina'iinsi hundiinsim usheexxisaa xumma uwwoommi bikkina xumminne awwonsoo goonchi beeto at qattootto; ixxi adilla'n doollennem Isra'eelina xummaa usheexxatoo uuwwoommi bikkina ixxi summi Salamoona yamamookko. Iina Keesammi Mine baxookkok ixxotte; ixxi iina beet ihookko; anim ixxena anni ihoommo; ixxi adillanim Isra'eelanne heer heerina qoxxaa hee'ookko› yaa neeyyaxxi sagara uwwaakko» yukko. Daawiit odim Salamoonina «Kabadem i beeto, ki Moollanni Waa'i kiinninne maqir ihona; ixxena Keesammi Mine baxxona uwwu neeyyaxxi sagara hundam egerimminne luwwi hundam kiina taaphansona. Keese Isra'eelanne adil issoo ammane ki Moollanni Waa'ika ijaajo egettoo'isina Waa'i kiina qoossimmaa qooroomaa uwwona. Waa'i Muse'ennetti ihaa Isra'ee'l oosina uwwu seeraa gatti ogoraa hundam qoxxitaa egattilas kiina hundem luwwim taaphanookko; qoxxe; murte'e; badditittee neeyyato muttittee. Anim Keesammi Mi'n baxina ihona sad miiliyoonaa soor xibbi kum kiilo'oo ihoo worqa, sadee soor miliyoon kiilo'i kin biraa yakaa gudisaammo; odim xigiinsi hanaan ihaakkoo naas xaaraa mulli xaaraa gudisaammo; ee'isam haqqaa kinam gudisaammo; ihona bagaan atim ki kollinne eddaa gudisimmi hasisookko. Kiinam lobakat baxaan yookko; kina cabbattam keen, gimba baxxam keen, anga qoor mannii ee'isam lobakat worqinne, kin birinne, naas xaarinne, mulli xaarinnee annanni annanni luwwa baximminnee la'amookkoo annanni annanni lachchi yoo manni ki'aa kaba baxo asheere; Waa'i kiinninne maqire ihona» yukko. Odim Daawiit Isra'ee'l minaadaphphi awwonsaan hundim ixxi beet Salamoonina hara'mmitona «Ki'nnuwwi Moollanni Waa'i kabe'em ki'nnuwwinnette; hundem kollinnem ki'nnuwwina xumma uwwaakko; ka uullanne hee'llam hee'llo'i minaadaba hundam kaa'aa amadoommisa issaakko; ixxuwwim ki'nnuwwinaa Waa'inaa ijaajanto'ookko. Kabadem ki'nnuwwi Moollanni Waa'a, tiirinnee wodaninnee awwaaddehe; Hidi'l Saga'l Saaxinaa Waa'ina otossakkam ammane awwaaxxakkam Keesammi Mi'n mu'uttuwwaa hundam woronne dissitakkeena Keesammi Mine Waa'i lombi bikkina baxxehe» yaa ijaajukko. Daawiit lobakata lomma'nnaa lasage ixxi beet Salamoona Isra'eelanne adil issukko. Adil Daawiit Isra'ee'l minaadaphphi awwonsaano, qeessuwwaa Leewi'i oosoo mat issaa wixxaa'ukko. Umur sadee eehanniinsi hanaanii ihu Leewi'i oosika goona xigukko. Ixxuwwikim xig sadee sadeenti kumaa hee'ukko. Adilim ixxuwwiinsi lamiyyee soor kumaa Keesammi Mi'n baxo baxissona doo'llukko; loh kuma odim daannuwwaa awwonsaanoo issukko. Odim soor kuma waardiyyi, mulli soor kuma adil gudisu mazmuu'l mu'utinne zammattu'uuyyi Waa'a galaxxitamisa issukko. Daawiit Leewi'i ooso ixxuwwi moolli moollinnem sas beyyonne baxxansukko; ixxuwwim Gershoonatte, Qa'aatattee Meeraarattee hee'llo'o. Gershoonina Laa'idaana Shiimi'aa yakkam lam goo'n oos hee'ukko. Laa'idaanina Yihii'eela, Zeetaamaa Yoo'eelaa yakkam sas goo'n oos hee'ukko. Shiimi'inam Shaalomoota, Hazii'eelaa Haaraanaa yakkam sas goo'n oos hee'ukko; ixxuwwim Laa'idan shumo'i ikko'i moollina awwonsaan hee'llo'o. Shiimi'ina Yaahata, Ziina, Yi'ushaa Bariiyaa yakkam soor goo'n oos hee'ukko. Ixxuwwiinsim lobok Yaahatatte. Yaahat awwonaanchi odim Ziinatte hee'ukko; Yi'uushinaa Bariiyinaa lobakat oos hee'ubee'i bikkina ixxuwwi mat moollisa ikka'a xigantam hee'llo'o. Qa'aatina Aamraama, Yuxihaara, Keebiroonaa Uzii'eelaa yakkam soor goo'n oos hee'ukko. Qa'aat won beet Aamraamim Aarooninaa Muse'enaa anni hee'ukko; Aaroon keesamoo'isina annanni ihukko; Aaroonii ixxi shumo'ii hundim heer heerina keesammi ihu luwwa keessona, Waa'i illagenne kitima hincaa'lleena, Waa'ina awwaaddeenaa ixxi summinnem minaadaba heer heerina maasse'lleenaa annanni ikko'o. Waa'i manchi hee'u Muse'i goo'n oosim Leewi'i sullinne xiganto'o. Muse'ena Gershoomaa Eeli'eezaraa yakkam lam goo'n oos hee'ukko. Gershoom goo'n oosiinsi Shabu'eel awwonsaanchi hee'ukko. Eeli'eezarina Rahabiyaa yakkam mexxo'i mat beet hee'ukko; ihukkaarem Rahabiyina lobakat shumo'i hee'ukko. Qa'aatina la'm beet hee'u Yixihaarina moollo awwonsaanchi ihu Shaaloomiit yakkam mat beet hee'ukko. Keebiroonina won Yiriiyatte; la'mmek Amaariyatte; saxxek Yaahizi'eelatte; soo'llekim Yiqaami'aamatte hee'ukko. Qa'aatina soo'l beyyi beet hee'u Uzii'eelina won Miika'atte; la'mmekim Yuushiiyaa yakkam lam goo'n oos hee'ukko. Meeraarinam Maahiilaa Muushaa yakkam lam goo'n oos hee'ukko; Maahiilina Ali'aazaraa Qiishaa yakkam lam goo'n oos hee'ukko. Ihukkaarem Ali'aazar landiinsi bagaan goo'n ooso maham qaroo'nnim lehukko. Ee landam ixxi abbaayyi hee'u Qiish oos eebbo'o. Meeraar la'm beet hee'u Muushina Maahila, Edeeraa Yirmootaa yakkam sas goo'n oos hee'llo'o. Ku keen hundim ixxuwwi moolli moollinnee abaroosisinnee kitaabanto'i Leewi'i shumo'i ikku'uuyyi annannichchim ixxuwwi summi summinnem kitaabanto'ookko; ixxuwwi umur lamiyyi hiincho ihukkokii lamiyyi hiinchiinsi hanaan yoo Leewi'i shumo'ii Keesammi Minenne awwaaddam hee'llo'o. Daawiitim «Isra'ee'l Moollanni Waa'i ixxi minaadabina xumma uwwaakko; ixxim Yerusaaleemanne heer heerina hee'ookko. Ee bikkina kanniinsi eehid Keesammi Dukkaanaa Waa'ina otossakkam ammane awwaaxxakkam mu'uttuwwaa hundam Leewi'i oos iyyimmi hasisooyyo» yukko. Daawiit lasaanchonne ijaaju ijaaccisanne umur lamiyyi hiinchoo eehanniinsi hanaanii ihu Leewi'i oos hundim xigamukko. Ixxuwwi baxim Waa'i Keesammi Mi'nneka otossakkam ammane ihoo awwaadduwwanne Aaroon shumo'i ikko'i qeessuwwina hara'mmimma, Keesammi Mi'n woro'l baxxanchuwwii wixxixxi beyyii haccoobee'isa egerimmaa keesammi mu'uttuwwi hundam haashaaramoobee'isa muccussimmaa ee'isam Keesammi Mi'n mulli baxxuwwam baximmaa hee'ukko. Waa'ina kitim ihaa hincoo daabbo'inaa urshobee'e sarakkam qorosho'inaa wee'l zaytinne cukkakkam qaminaa wollisaan hee'llo'o; Keesammi Mi'n awwaadina hincoo luwwi hundam xuffamokii keentamokii ixxuwwi hee'llo'o. Odim Waa'a galaxxiteenaa heebbisseenaa daraa maaro'oo uullitam hee'llo'o. Eekkam hiim hiimo, ee'isam usheexxaxxi ayyaammuwwanne, aga'n aagguwwannee mulli ugudduwwannee Waa'ina kitim ihaa hiinchoo luwwi hundim kitimamoo ammane ixxuwwina qoodamu xiqqisinnee uwwamu see'llisannee hundi ammanem Waa'i illagenne awwaaddam hee'llo'o. Ee bikkina Keesammi Dukkaanaa Keesammi beyyoo egerimmi ixxuwwi bax hee'ukko. Ee'isam Keesammi Mi'n awwaadonnem ixxuwwi qarmanni ikko'i Aaroon shumo'i qeessuwwa hara'mmitam hee'llo'o. Aaroon shumo'i kanniinsi woroon yoohane; Aaroonina soor goo'n oos hee'ukko; ixxuwwim Naadaabatte, Ali'aazaratte, Itaamaarattee Aabihuttee hee'llo'o. Ihukkaarem Naadaabii Abihii ooso qattoo'nnim ixxuwwi anniinsi gaassita'a leto'o; ee bikkina ixxuwwi abbaayyuwwi Ali'aazarii Itaamaarii qeessuwwi ikko'o. Adil Daawiit Aaroon shumo'o ixxuwwi bax sharaxxisinne baxxansukko; eekkam issukkok Ali'aazar shumo'i ihu Saadooqinnee Itaamaar shumo'i ihu Abemeeleek hara'mmatinnettee hee'ukko. Ali'aazar shumo'i Itaamaar shumo'iinsi lophphu bikkina baxxansamukkok ee'isinnetti hee'ukko; Ali'aazar shumo'i awwonsaan tommoo lohoo ihukkuuyyi Itaamaar shumo'i awwonsaan sadeenti ihoo'isina qoodukko. Ali'aazar shumo'onnee Itaamaar shumo'onnee Keesammi beyyinaa Waa'i baxinaa awwonsaan hee'u bikkina baxxam baxik sharad saaminne uwwamam hee'ukko. Ee saamom fissimmiinsi gaassaa Ali'aazar shumo'ii Itaamaar shumo'ii ogoranne aagam hee'ukko. Ee lasage Leewi'i oosiinsetti ihu Naatinaa'eel beet kitaabaanchi Shamaa'iy kitaabam hee'ukko. Adilii ixxi gassaanii, qeessiehchi Saadooqii Abiyaataar beet Abemeeleekii ee'isam qeessuwwikii Leewi'i abaroosikii awwonsaan hundim naqaashshuwwi hee'llo'o. Ee'isinne Luxxi saam Yihooyaariibina la'mmek Yidaa'iyyina Saxxek Hariimina soo'llek Sa'ooriimina ontik Maalkiiyina lohik Miiyaamina lama'llek Haqooxina sadeentik Abiiyina honsik Iyyaasina tommik Shaakaaniyina tommikii matik Eeliyaashshiibina tommikii la'mmek Yaaqiimina tommikii saxxek Huphina tommikii soo'llek Yesheebi'aabina tommikii ontik Biilga'ana tommikii lohik Iimeerina tommikii lama'llek Heeziirina tommikii sadeentik Haaphiixeexina Tommikii honsik Phataahiyina lamiyyik Yiheeziqeelina lamiyyikii matik Yaakiinina lamiyyikii la'mmek Gaamuulina lamiyyikii saxxek Daalaayina lamiyyikii soo'llek Maa'aaziyinina afukko. Ku manni Isra'ee'l Moollanni Waa'i ijaajukkisinnee ixxuwwi gaassi anni Aaroon uwwu see'llisinnee Waa'i Mine aaggam ammane baxxam bax sharad eehan hee'ukko. Leewi'i shumo'i awwonsaa'nnek summi kanniinsi woroon yoohanne. Oohim Aamiraam oosiinsi Shabu'eel; Shabu'eel oosiinsi Yehidaayatte. Rahabiy oosiinsi won Yushiiyatte. Yixihaar oosiinsi won Shaloomiitatte. Shaloomiit oosiinsi won Yaahatatte. Kebiroon oosiinsi won Yiriiyatte; la'mmek Amaariyatte. Saxxek Yaahizii'eelatte; soo'llek Yiqaami'aamatte hee'ukko. Uzii'eel beet Miika'atte; Miika'i beet Shaami'eeratte hee'ukko. Miik abbaayyi Yuushiiyatte; Yuushiiy oosiinsi Zakaaryaasatte hee'ukko. Meeraar oos Maahilatte, Muushattee Yaa'iziiyattee hee'llo'o. Yaa'iziiyina odim Banno'o, Shoohaama, Zaakuuraa Iibiraa yakkam soor goo'n oos hee'llo'o. Muushina Maahila, Edeeraa Yaariimootaa yakkam sas goo'n oos hee'llo'o. Ku kanniinsi hanaan kitaabanto'i keen hundim Leewi'i shumo'i abaroos hee'llo'o. Ku keenim adil Daawiit, Saadooq, Abemeeleek, qeessuwwii Leewi'i abaroos awwonsaanii hundim yo'i beyyonne saamo issaqanto'o; ixxuwwi abbaayyuwwi ikko'i Aaroon shumo'i hee'llo'i qeessuwwi issito'isam lobaanni abaroosii hoffaanni abaroosii hundim gudaanchi saamo issito'o. Adil Daawiitii Leewi'i oos awwonsaanii Asaafika, Heemaanikaa Yiduutuunikaa ooso maasinqo'inne, diitta'innee doolinnee hiraago woccona do'llito'o. Ee awwaadina doo'llanto'i keenim kanniinsi woroon yo'i keeno. Zaakur, Yooseef, Nataaniyii Asaari'eelii soorim Asaafina oos ikka'a adil ijaaccisinne hiraago wocoo ixxuwwi anni ihu Asaaf awwonsaxxi woronne hee'llo'o. Gadaaliy, Xar, Yaashaay, Shiimi'i, Hashaabiyii Maatitiyii lohim Yiduutuun oos ikku'uuyyi maasiinqo'inne Waa'a galaxxukkuuyyii lonsukkuuyyii hiraago wocoo ixxuwwi anni awwonsaxxi woronne hee'llo'o. Heemaan oos tommoo sooroo; ixxuwwim Buqiyatte, Maataaniyatte, Uzii'elatte, Shabu'eelatte, Yaarmootatte, Hanaaniyatte, Hanaanatte, Eeli'aatatte, Giidaaltatte, Romaamti'eezeratte, Yoshbaqaashatte, Maalotatte, Hotiirattee Maahzii'attee hee'lloo. Waa'im adilina hiraagaanchi ihu Heemaanina ka tommoo soorem goo'n oosoo sas landaa uwwukko; eekkam issukkok Heemaanika malaayye qoxxiseena uwwaa hee'u neeyyaxxi saga'llisinnette. Ku ixxi goo'n oos hundim Keesammi Minenne doolinne, diitta'innee maasiinqo'innee ihoo Keesammi Mi'n awwaadina ixxuwwi anni awwonsaxxi woronne hee'llo'o; Asaaf, Yiduutuunii Heemaanii odim adi'l awwonsaxxi woronne hee'llo'o. Ku keen ixxuwwi qarmanninne maqirem Waa'ina hincoo mazmuura erisa laqqam keen hee'llo'o; ixxuwwikim xig mat ihaa 288 hee'ukko. Bax sharada qoodimmina woraadam ihukko lommanna losisaanom ihukko losaano ayyem annanni issitoo'n ixxuwwina'i ixxuwwim saamo issaqqantam hee'llo'o. Luxxi saam Asaaf moolliinsetti ihu Yooseefna firukko; ixxek oosikii ixxi abbaayyuwwikii xig 12 hee'ukko. La'mmek Gadaaliyina firukko; ixxek, oosikii ixxi abbaayyuwwikim xig 12 hee'ukko. Saxxek Zaakuurina firukko; ixxek, oosikii ixxi abbaayyuwwikii xig 12 hee'ukko. Soo'llek Yiixiirina firukko; ixxek, oosikii ixxi abbaayyuwwikii xig 12 hee'ukko. Ontik Naataaniyina firukko; ixxek, oosikii ixxi abbaayyuwwikii xig 12 hee'ukko. Lohik Buuqiyina firukko; ixxek, oosikii ixxi abbaayyuwwikii xig 12 hee'ukko. Lama'llek Asaari'eelina firukko; ixxek oosikii ixxi abbaayyuwwikii xig 12 hee'ukko. Sadeentik Yaasha'iyyina firukko; ixxek oosikii ixxi abbaayyuwwikii xig 12 hee'ukko; Honsik Maataaniyina firukko; ixxek, oosikii ixxi abbaayyuwwikii xig 12 hee'ukko. Tommik Shiimi'ina firukko; ixxek, oosikii ixxi abbaayyuwwikii xig 12 hee'ukko. Tommikii matikii Azaari'eelina firukko; ixxek, oosikii ixxi abbaayyuwwikii xig 12 hee'ukko. Tommikii la'mmekii Hashaabiyina firukko; ixxi, ixxi oosii ixxi abbaayyuwwii 12 hee'llo'o. Tommikii saxxi saamii Shubaa'eelina firukko; ixxi, ixxi oosii ixxi abbaayyuwwii 12 hee'llo'o. Tommikii soo'l saamii Maatitiyina firukko; ixxi, ixxi oosii ixxi abbaayyuwwii 12 hee'llo'o. Tommikii onti saamii Yaariimootina firukko; ixxi, ixxi oosii ixxi abbaayyuwwii 12 hee'llo'o. Tommikii loh saamii Hanaaniyina firukko; ixxi, ixxi oosii ixxi abbaayyuwwii 12 hee'llo'o. Tommikii lama'l saamii Yooshbaaqaashina firukko; ixxi, ixxi oosii ixxi abbaayyuwwii 12 hee'llo'o. Tommikii sadeenti saamii Hanaanina firukko; ixxi, ixxi oosii ixxi abbaayyuwwii 12 hee'llo'o. Tommikii honsi saamii Maalootina firukko; ixxi, ixxi oosii ixxi abbaayyuwwii 12 hee'llo'o. Lamiyyi saam Eeliyaatina firukko; ixxi, ixxi oosii ixxi abbaayyuwwii 12 hee'llo'o. Lamiyyikii mat saamii Hootiirina firukko; ixxi, ixxi oosii ixxi abbaayyuwwii 12 hee'llo'o. Lamiyyikii la'm saamii Gidaaliitina firukko; ixxi, ixxi oosii ixxi abbaayyuwwii 12 hee'llo'o. Lamiyyikii saxxi saamii Maaziyootina firukko; ixxi, ixxi oosii ixxi abbaayyuwwii 12 hee'llo'o. Lamiyyikii soo'l saamii Roomaamiti'eezerina firukko. Ixxi, ixxi oosii ixxi abbaayyuwwii 12 hee'llo'o. Keesammi Mi'n waardiyyuwwi ikko'i Leewi'i oosik bax sharad kanniinsi woroon yoohane. Qore'i Moolliinsi Asaaf abaroosiinsi Qore'i beet Mashelemyatti hee'ukko. Ixxenam lamar goo'n oos hee'ukko; oo oosim ixxuwwi umu'llisinne Zakaaryaasa, Yidii'i'eela, Zabaadya, Yaatinii'eela, Eelaama, Yahohanaanaa Eelyaaho'eenaayaa yakkam keen hee'llo'o. Sadeenti goo'n ooso uwwimminne Waa'i maasse'aa hee'u Oobeedi'eedoom yakkam mulli manchim hee'ukko; ixxi oosim ixxuwwi umu'llisinne Shamaa'iya, Yihoozaabaada, Yoo'aha, Saakaara, Naatinaa'eela, Aamii'eela, Yisaakooraa Pha'ultaayaa yakkam keen hee'llo'o. Kukeen hundim Oobeedi'eedoomina shumo'o; ixxuwwii ixxuwwi oosii ee'isam ixxuwwi qarmannii baxo baxxeena xantam qoxxaalluwwi hee'llo'o. Oobeedi'eedoom shumo'i hundikim xig mat ihaa 62 hee'ukko. Masheleemiyina lachchi yoo kee'nnek 18 goo'n oosii abaroosii hee'ukko. Meeraar moolliinsi soor goo'n oos hee'u Hoosaa yakkam mat manchi hee'ukko; ixxi oosiinsim maham won ihubeeta'nnimii ixxi anni awwonsaanchi issaa hee'u Shiimiratte, la'mmek Hilqiyatte, saxxek Xabaalyattee soo'llek Zakaaryaasattee hee'llo'o. Hoos abaroosiinsi Keesammi Mine egattam egeraa'nnek xig 13 hee'ukko. Keesammi Mi'n waardiyyuwwi ixxuwwi abaroosisinne baxxamanta'a ixxuwwi abbaayyuwwi ikko'i mulli Leewi'i oosisam Keesammi Minenne bax uwwamaa hee'ukko. Woraadam ihukko lommanna annannissitoo'n ixxuwwi abaroosisinne hundem goocam egerimmina saamo issaqqantam hee'llo'o. Sheeleemyina eelliinchi firinne yoo ooxxi gooca egerona saam afukko; hundi ammanem er sogitano sogam hee'u ixxi beet Zakkaaryaasina odim hanaa'n qarinne yoo ooxxi gooca egerona saam afukko. Oobeedi'eedoominam woroo'n qarinne yoo ooxxi gooca egerona saam afukko; ixxi oosim mu'uta dissakkam minneewwa egettona saam afukko. Eelliinchi aagginne yoo ooxxi goocinaa hanaa'n gooqqi kollinne yoo Shaaleketa yakkam ooxxi goocina, Shuphphiiminaa Hoosinaa saam afukko; oo egechchim annanni annanni baxxanchanne baxxansamaakkoohan ihaa tara ege'llaakkoohan hee'ukko. Hundem ballam eelliinchi firinnee loh egeraan, hanaa'n qarinnee soor egeraan, ee'isam woroo'n qarinne odim soor egeraan egettam hee'llo'o; odim hundem ballam soor egeraan mu'uta dissakkam mine egettam hee'llo'o; ixxuwwiinsim lamii mat mu'uxxi mine, lamii odim mulli mu'uxxi mine egettam hee'llo'o. Eelliinchi aaggi googonne hincaa baxamu wixxixxi beyyi gadanonne soor egeraan egettam hee'llo'o; ee wixxixxi beyyo odim lam egeraan egettam hee'llo'o. Qoraahaanninaa Meeraar moollinaa uwwamaa hee'u waardiyyoo'm awwaad ee'is hee'ukko. Leewi'i oosiinsi Akiiy Keesammi Mi'n mu'uxxi mininaa Waa'ina annanni ihaa hincoo mu'uttuwwa dissakkam minneewwinaa gassaanchi hee'ukko. Laadaan Gershoon moolliinsetti ihukkuuyyi ixxim Yihii'eelina anni hee'ukko; ixxi shumo'iinsi lobakat keen ixxuwwi moollisinne abaroosa awwonsaan hee'llo'o. Zeetaamaa Yoo'eelaa yakkam Yihii'eel mulli lam oos Keesammi Mi'n dooninaa mu'uxxi mininaa gassaan hee'llo'o. Aamraamaannina, Yixihaaraannina, Keebiroonaanninaa Uzii'eel shumo'inaa baxik sharad uwwamaa hee'ukko. Muse'i beet hee'u Gershoom moolliinsetti ihoo Shaabu'eel Keesammi Mi'n mu'uxxi mi'n gassaanina awwonsaanchi hee'ukko. Shaabu'eel, Gershoom abbaayyi Eeli'eezar kollinne Shaloomiitina qarmanchi hee'ukko; Eeli'eezar Rahabiya qarukko; Rahabiy Yishaa'iya qarukko; Yishaa'iy Yooraama qarukko; Yooraam Ziikira qarukko; Ziikir Shaloomiita qarukko. Shalomiitii ixxi abaroosii Adil Daawiit, moollo awwonsaan, giichcho awwonsaanii gaadaa'n awwonsaanii Waa'ina keessa'a hincaa'llo'i mu'utina gassaan hee'llo'o. Ku awwonsaan oranne qeefadamu luwwiinsi hoffokam massita'a Keesammi Mi'n baxina annanni issitam hee'llo'o. Shaloomiitii ixxi abaroosii hiraagaanchi Saamu'eel, adil Saa'ool, Neer beet Abaaneerii Xaruy beet Yoo'aabii Keesammi Mi'n baxina annanni issita'a uwwito'i luwwi hundinam gassaan hee'llo'o. Yixihaar shumo'iinsi Kanaaniyii ixxi oosii Keesammi Miniinsi haxonne ihoo luwwanne gassaanoo daannuwwaa ikka'a Isra'eelanne doo'llanta'a hee'llo'o. Keebiroon shumo'iinsi Hashaabiyii ixxi qarmannii 1,700 ikkam qooxxaalli manni Waa'ikaa adi'llekaa baxo hundam baxxeena Yoordaanoosiinsi eelliinchi aagganne hee'oo Isra'eelanne doo'llanta'a hee'llo'o. Keebiroon shumo'i doonanne kitaabanta'a yo'isanne Yiriiy ixxuwwina awwonsaanchi hee'ukko. Daawiit adil ihu soo'l hiinchonne Gala'aaxxi uullanne Keebiroon shumo'iinsi qoxxaalli manni hee'llo'is aganni doonanne hasamaa siidamukko. Adil Daawiit ee qarmanniinsi doo'llanto'oo lam kumaa lamar xibbi manchoo abaroosina awwonsaan issaa doo'llukko; ixxuwwam Yoordaanoos daajjiinsi eelliinchi firinne hee'oo Roobeelaannonne, Gaadaannonnee Minaas kolli sulli gassi uullannee Waa'anee adi'llanee ihu quuxxuwwanne gassaan issukko. Isra'ee'l moolli awwonsaa'nnek, shaalaqquwwik, xibbi halaqquwwikii ixxuwwi ijaajaa'nnekii summi kanniinsi woroon yoohane. Baxxanchuwwina annannichchinam 24,000 manchi yoohan ihaa oo keen hiinchooma hundoomam agananne agananne adilina awwaaddam keeno. Luxxi aga'n luxxi baxxanchina awwonsaanchi Zaabdii'eel beet Yaashoobi'aamatti hee'ukko. Ixxi baxxanchannem lamiyyii soor kum manchi hee'ukko. Ixxim Yihuxxi sulliinsetti ihu Faarees moollan hee'ukko. Ixxim luxxi agananne gaadaa'n awwonsaan hundinam awwonsaanchi hee'ukko. La'm aga'n baxxanchina awwonsaanchi hee'ukkok Ahooh moolli Doodaayatte hee'ukko; ixxi baxxanchanne 24,000 manchi hee'ukko. Miiqlootim ixxeensi awwonaa la'm beyyi awwonsaanchi hee'ukko. Saxxi aganina saxxi baxxancha awwonsaanchi qeessichchi Yoodaah beet Baanaayatte hee'ukko; ixxi baxxanchanne 24,000 manchi hee'ukko. Baanaay sadem keeniinsim wodaam ihaa ee sadinam awwonsaanchi hee'ukko; ixxi beet Amiizaabaadim saxxi baxxanchina awwonsaanchi hee'ukko. Soo'l aga'n soo'l baxxancha awwonsaanchi Yoo'aab abbaayyi Asaaheelatte hee'ukko; ixxi beet Zebaadyim ixxo bikkaa ee baxxanchina awwonsaanchi ihukko; ixxi baxxanchannem 24,000 manchi hee'ukko. Onti aga'n onti baxxancha awwonsaanchi Yixihaar shumo'iinsette hee'u Shaamihutte hee'ukko; ixxi baxxanchanne 24,000 manchi hee'ukko. Loh aga'n loh baxxanchik awwonsaanchi Taqo'i shumo'iinsetti ihu Iiqeesh beet Iiratte hee'ukko; ixxi baxxanchanne 24,000 manchi hee'ukko. Lama'l aga'n lama'l baxxanchik awwonsaanchi Efireem sulliinsetti ihu Phaloona'i shumo'i Heeleexatte hee'ukko; ixxi baxxanchannem 24,000 manchi hee'ukko. Sadeenti aga'n sadeenti baxxanchik awwonsaanchi Huusha'i shumo'iinsetti ihu Siibakaayatte hee'ukko; ixxim Yihuxxi sullan ihu Zaara'i shumo'iinsette hee'ukko; ixxi baxxanchannem 24,000 manchi hee'ukko. Honsi aga'n honsi baxxanchik awwonsaanchi Biiniyaam sulliinsi Anaatoot shumo'an ihu Abi'eezeratte hee'ukko; ixxi baxxanchannem 24,000 manchi hee'ukko. Tommi aga'n tommi baxxanchik awwonsaanchi Zaarah moolliinsettiihu Naxoof shumo'an ihu Maahiraayatte hee'ukko; ixxi baxxanchanne 24,000 manchi hee'ukko. Tommikii mat aga'n tommikii mat baxxanchikii awwonsaanchi Efireem sulliinsi Jortoo'n shumo'an ihu Baanaayatte hee'ukko; ixxi baxxanchannem 24,000 manchi hee'ukko. Tommikii la'm aga'n tommikii la'm baxxanchikii awwonsaanchi Ootini'eel moollinsetti ihu Naaxoof shumo'i Heldaayatte hee'ukko; ixxi baxxanchannem 24,000 manchi hee'ukko. Isra'ee'l sulluwwi gassaa'nnek summi kanniinsi woroon yoohane; oohim Roobeel sulli gassaanchi Ziikir beet Eeli'eezaratte; Simi'oon sulli gassaanchi Maa'ik beet Shafaaxyatte. Leewi'i oos sulli gassaanchi Qamu'eel beet Hashaabiyatte; Aaroon moolli gassaanchi Saadooqatte. Yihuxxi sulli gassaanchi adil Daawiit abbaayyuwwiinsi mat ihu Eeliihutte; Yisaakoor sulli gassaanchi Mikaa'eel beet Omiiratte. Zaabiloon sulli gassaanchi Abdiy beet Yushimaa'iyatte; Niftaaleem sulli gassaanchi Aziri'eel beet Yaarmootatte. Efireem sulli gassaanchi Azaaziy beet Hose'atte; eelliinchi aagginne hee'oo kolli Minaas sulli gassaanchi Fadaay beet yoo'eelatte. Eelliinchi firinne hee'oo kolli Minaas sulli gassaanchi odim Zakaaryaas beet Yiddo'otte; Biiniyaam sulli gassaanchi Abaaneer beet Yaa'isii'eelatte. Daanni sulli gassaanchi Yirohaam beet Azaari'eelatte. Waa'i «Isra'ee'l minaadaba iima'n boollaanki qaxa fikkaannisoommo» yaa wocu neeyyaxxi saga'llisinne umur lamiyyee lamiyyiinsi woroonii yookkoka adil Daawiit minaadabinne edaa xigukkoyyi hee'ukko. Xaaruyyi beet Yoo'aab minaadaba xigimma asheerukkaarem guullukkoyyi hee'ukko; ee minaadaba xigimmi mashka'inne Waa'i quuqaa hee'u bikkina xigamu mannik xig adil Daawiit adilla'n aganni doonanne kitaabamukkoyyi hee'ukko. Adilla'n mi'n mu'uta anni ikka'a egettam kee'nnek summi kanniinsi woroon yoohane. Adilla'n mi'n mu'uta dissakkam minenne yoo mu'uta egeraanchi Adi'eel beet Azmaaweetatte. Hax uullanne, beero'uwwanne, hegeegguwwannee girbuwwannee yoo mu'uxxi minneewwa gassaanchi Uziyyi beet Yoonaataanatte. Isra'ee'l uulla abuullaano ijaajaanchi Kaaluub beet Eeziratte. Woyi'n kaashshi beyyuwwa gassaanchi Raama'i beero'i Shiimi'atte. Woyi'n diqaas mu'uxxi mi'n gassaanchi Shaafaa'm Zaabdii'atte. Eelliinchi aagginne yoo hoffi duunnuwwiinsi woroon hee'oo weerinaa oda'inaa gassaanchi Geedee'l Ba'aalhanaanatte. Saaroonanne allaa'lloo diinate gassaanchi Saaroo'n uulli Shiixraayatte. cebbanne allaa'lloo diinate gassaanchi Adilaay beet Shafaaxatte. Gaameela'a gassaanchi Isma'eel shumo'iinsetti ihu Obiilatte; halli gassaanchi Meeroo'n beero'i Yehidyatte. Gereebbaa fella'aa gassaanchi Aggaar shumo'iinsetti ihu Yaaziizatte hee'ukko. Adil Daawiitina annabbaayyi ihu Yoonaataan qoor sogaanchoo kitaabaanchoo hee'ukko. Hakmoon beet Yihii'eel adi'l ooso losisaanchi hee'ukko. Akxoofeel adilina sogaanchi ihukkuuyyi Arke'i uulli Hushaay odim adilina beshichchi hee'ukko. Akxoofeel lehaa lasage Abyaataarii Baanaay beet Yihooyaada'ii adi'l sogaan ikko'o. Yoo'aabim adi'l gogotina ijaajaanchi hee'ukko. Adil Daawiit Isra'ee'l minaadaphphi awwonsaan hundim Yerusaaleemanne wixxitona ijaajukko; ee bikkina hundem sulli awwonsaan, adilla'n minenne baxxam gassaan, shaalaqquwwii xibbalaqquwwii, adi'llekaa ixxi goo'n oosikaa amaxxaa fooraam diinatee egattam keen, adi'l gassaan, summanto'oo keenii la'anto'oo geedduwwii hundim Yerusaaleemanne wixxito'o. Hundim wixxita'a lasage adil Daawiit uullaa «I minaadaba, hino'o macceessehe; ni Moollanni lokkii Hidi'l Saga'l Saaxinii usheexxoo Keesammi Mine baxeena hasaa hee'ummo; ee Mi'n baxina ihoo mu'uta hundam gudisaammo. Ihukkaarem Waa'i ‹At o'l manchoo lobakat xiigam duntaattoohanee ihu bikkina I summi weeshamoo mine at baxxooyyo› yaakko. Isra'ee'l Moollanni Waa'i Isra'eelanne heer heerina adil ihona iyyanni miniinsi eese doo'llaakko; Yihud Isra'eelina awwonsaanchi ihona doo'llaakko. Yihuxxi sulliinsim iyyanni mine doo'llaakko; iyyanni miniinsim eese doo'llaa hundem Isra'eelannem adil isseena iittaakko. Iinam lobakat ooso ixxi uwwaakko; ihukkaarem iinniinsi lasage Isra'eelanne adil ihoo'isina i beeto Salamoona doo'llaakko. «Waa'i odim iina ‹I Keesammi Minee wixxixxi beyyuwwaa iina baxookkok ki beet Salamoonatte; an ixxo iina beet ihona doo'llaammo; anim ixxena anni ihoommo. Ixxi kaba issoo'isam hundi ammanem iikka ijaajoo seeraa qoxxaa egeroohan ihulas ixxeka adillano an heer heerina qoxxisoommo› yaakko. «Kabadem i minaadaba, Waa'i illagennee Waa'i Minaadab ihu ka hundem Isra'ee'l dummichchi illagennee ni Moollanni Waa'i ijaaj hundam qoxxitakka'a egettakkona yabo uwwaammo; eekkam issitakkolas ka er uulla heer heerina ki'nnuwwi gulummi issitakkamo; waaroo qaranchinam ki'nnuwwi oos oosina lago aa'issakkamo» yukko. Salamooninam «I beeto, kiyyanno'i Waa'a laqqonaa wo'm sawwittinnee tiirinnee awwaaddonaa yabo uwwoommo; ixxi niikka sawwitee mixanoo hundam la'oohane; at ixxi kollonne hincitlas ixxim ki kollonne hincookko. Ihukkaarem at ixxo uttilas ixxim keese heer heerina uraa urookko. Keesammi Mine ixxena baxxona Waa'i keese doo'llukkisa xadditte; kabadem qoxxitaa murte'aalli tiirinne baxe» yukko. Daawiit Keesammi Mi'n baxika qoodo'o oohim mu'uxxi minneewwika, uullika, fooqika, woro'l baxxanchuwwikaa baaxiil haafamoo keesammiinsi keesammi beyyikaa ixxi beet Salamoonina uwwukko. Odim Wixxixxi beyyuwwikaa ee kululleetanne hee'oo mi'n baxxanchuwwikaa Keesammi Mi'n mu'uttuwwaa kitima hincaa'immina awwaaxxakkam mu'uttuwwaa dissakkam minneewwina Keesammi Ayyaan tiissiisu qoodo'i hundam edaa uwwukko. Ee'isam Daawiit qeessuwwii Leewi'i oosii annanni annanni bax sharadikaa Waa'ina otossakkam ammane awwaaxxakkam mu'uttuwwa egerimmikaa qoodo'o Salamoonina edaa uwwukko. Annanni, annanni awwaadina ihoo mu'uttuwwa baximmina kin biraa worqaa keenaa uwwukko. Caakka dissakkam mu'utinaa kuraazzuwwinaa ihoo worqaa kin birinne baxakkam caakka dissakkam mu'uttuwwaa kuraazzuwwaa baximmina ihoo kin bira keenaa uwwukko. Waa'ina kitim ihaa hincoo dabbo'o dissakkam xaraphpheezzuwwa annannichchom baximmina hasisoo worqaa mulli xaraphpheezzuwwa baximmina hasisoo kin biraa keenaa uwwukko. Ee'isam qaphphuwwa, disxuwwaa maanqorqoro'uwwaa baximmina hasisoo muccur worqaa loqooqo'i saahinnuwwa baximmina hasisoo kin biraa keenaa uwwukko. Aduruusa wiriissakkam kiti'm beyyina ihoo muccur worqa keenaa uwwukko; ee'isam ixxuwwi lada Waa'i Hidi'l Saga'l Saaxiniinsi hanaan biddiqaa'lla'a iffiissam kiruubeel afuuroo faraxxi gaarre'i worqinne baxamaakkoo kobi'lla uwwukko. Adil Daawiitim «Ku hundim Waa'i ixxi gagim ixxi anginne kitaabaa an qoossona iina uwwu hundem bax qoodo'o» yukko. Adil Daawiitim ixxi beet Salamoonina «Murte'aallaa qoxaraa ihe; baxom qaqissaa asheere; gulliteebe'em mahim egedoone; i Moollanni Waa'i kiinninnette; ixxi awwaadina ihoo mine baxxaa guulliteebe'e ixxi kiinninsi annanni ihooyyo; keesem horo'em urooyyoo uunjooyyoo. Keesammi Mi'n awwaadduwwina qeessuwwii Leewi'i oosii yo'o; annanni annanni lachchi yoo baxaanim wo'm sawwitinne kiina hara'mmiteena gudo'ookko; minaadabii minaadaphphi awwonsaanii hundim kiina ijaajantamo» yukko. Adil Daawiit hundem dummichchinam «Waa'i doo'llukkok i beet Salamoonatte; ihukkaarem ixxi ooshshichchoo baxom losubee'anee. Baxamoo minim Moollanni Waa'inatte bagaan manninatti ihu bee'i bikkina baxamoo bax lobakata kee'mmaalla. An i malaayyi qaxa i Waa'ina Keesammi Mi'n baxina hasisoo mu'uttuwwa hundam gudisaammo. Oohim worqi baxina worqa, bi'l baxina bira, Naasaannina naasa, xaa'llaannina xaara, haqqaannina haqqa, aduu'n ille laboo kina, annanni annanni hagar yoo gurumbina ihoo kina, bito xee'aalli kinaa lobakat ibina baradaa wixxaa'aammo. Ee keen hundiinsim mulleka an Waa'i Keesammi Minina yoo iittiinsi ki'isaa i gaqqi amaxxi ihu lobakat biraa worqaa uwwaammo. Ee'isinne Xibbi kum kiilo'o ihoo Oofii'l worqaa lam xibbee sor kum kii'llo'oo ihoo muccur kin biraa Keesammi Mi'n gimba wereeggisimminaa angi baxo laqqam manni baxxam mu'ut hundinam awwaadonaa uwwaammo. Kaballa ki'nnuwwiinsi ixxena yoohaanniinsi ixxi gaqqi doo'llinne Waa'ina uwwookkok ayyette?» yukko. Ee lasage moolli awwonsaan, Isra'ee'l sulluwwa awwonsaan, shaalaqquwwi, xibbalaqquwwii adi'l gassaanii ixxuwwi gaqqi doo'llinne uwwito'o. 170,000 kiillo'iinsi lophphoo worqa, 340,000 kiillo'iinsi lophphoo kin bira, 620,000 kiillo'o ihoo qax naas xaaraa 3,400,000 kiillo'iinsi lophphoo xaaraa ixxuwwi gaqqi doo'llinne uwwito'o. Lobakata bito xee'aalli kin yoo keen hundim Leewi'i sulliinsetti ihoo Gershoon moolli Yihii'eel gassoo mu'uxxi minenne eebba'a uwwito'o. Minaadabim ixxuwwi qaqqi doo'llinnee mu'llaakkoo tiirinne Waa'ina uwwito'i bikkina lobakata liiranto'o. Adil Daawiitim lobakata liiramukko. Daawiitim ee hundem dummichchi illagennem Waa'a galaxxukko. Ixxim «Gaassi niyyanni Yaaqoobina Moollanni Waa'a! At heer heerina galaxxame. At hundiinsi lobanee malaayyaamoo; lombinne, nuurinnee hibbinnee wo'mmitaattoohane. Iimanennee uullannee yoo luwwi hundim kiihane. At hundem luwwiinsim hanaan ikkaahii hundem luwwannem daanni ikkaahii yoonti adila. Goddii lombii kiinniinsette. At hundam gassitootto. Wodii malaayyii kiihane. Iittittoka hundiinsi lobanee malaayyaamoo issiteena xantootto. Ni Waa'a! Kabadem neese keese galaxxinoommo; lombaam ki summam iimiimaa'nnoommo. «Ka uwwinoommi luwwa ni doo'llinne uwwineena xannoommisina an ayyette? I minaadabdu ayyette? Luwwi hundim at niina uwwittane. Oono'o, kiihan hee'ukkaanniinsi kiinam daballaa uwwinaammo. Waa'a gaassi niyyanno'isam neesem ki illagenne koyyaa waaraano; ka uullanne hee'nnoommi ni umu'l doollim neeyyat bee'i hafisa. Ni Moollanni Waa'a! Ki keesammi summi bikkina mine banxeena wixxaa'nnummi ammaxxi hundim siidamukkok kiinniinsette; hundim kiihane. At manni hundikam wodano saarayyitoo'isaa xabbeenoomam iittitoo'isaa la'oommo. Anim i woda'n xabbeenoominnee doo'llinnee ka hundam kiina hincaa'aammo. Kabadem ku keyye wixxu ki minaadab liiranchinne kiina uwwukkisa moo'aammo. Gaassi niyyanno'i Abrihaamina, Yisaaqinaa Yaaqoobinaa Moollanni Waa'a! Ku lophphaakkoo iitti ki minaadab Isra'ee'l wodanonne heer heerina qoxxaa hee'oo'isa isse. Hundi ammanem kiina amma'nnanto'oo keen ikkamisa isse. Ki ijaajo, gatti ogoraa seeraa egerona ka hundem gudishsham issummi ki mine baxona i beet Salamoonina murte'aalli wodano uwwe» yukko. Ee lasage Daawiit minaadabina «Ki'nnuwwi Moollanni Waa'a galaxxehe» yukko. Ixxuwwim ixxuwwi gaassi anno'ina Moollanni ihu Waa'a galaxxito'o. Uullanne ubba'ahim Waa'ina otossito'o. Adilinam lomba uwwito'o. Ee la'm balla daram lobakat diinate dutta'a Waa'ina kitima hincaa'llo'o. Odim mat kum moolluwwa, mat kum gereebbi lob ambulluwwaa mat kum gereebbi hoffi ambulcha'aa shokkiisakka'a Waa'ina hincaa'akkam kitim issita'a Waa'ina hincaa'llo'o; woyi'n diqaas kitimam hincaa'llo'o. Ee bikkina ee balla Waa'i illagenne ittu'uuyyii aggu'uuyyii lobakata liiranto'o. Salamoonim adil ihukkisa la'm korina la'isso'o. Waa'i summinnem labba'a adil issito'o. Saadooqam labba'a qeessichchi issito'o. Salamoonim ixxi anni Daawiitaannonne Waa'i shooho'aakkoo adillanonne afuurukko. Ixxim hundem luwwim taaphanaakkoo adil ihukko. Isra'ee'l minaadab hundim ixxena ijaajamukko. Gassaan, gaadaanii gatto'i Daawiit oos hundimii adil Salamoonina ama'nnanto'oo keen ikkeena sagara aggo'o. Uulli minaadaphphi illagenne hundannem Waa'i adil Salamoona iimiimaa'ukko. Illageen Isra'ee'l minaadaba gassito'i adilluwwiinsi hundiinsim lophphaakkoo lombaam ihoo'isa issukko. Issayyi beet Daawiit Isra'ee'l minaadaba hundam gassukko. Ixxi gassi doolli hundoomim sor hiinchi ihaa Keebiroonanne lamar hiincho Yerusaaleemanne sadee sas hiinchoo gassukko. Lobakat goddaa lombaa siidaa lobakat doollem hee'aa lasage lehukko. Ixxo bikkaahim ixxi beet Salamoon adil ihukko. Adil Daawiit adilla'n doolli aganni luxxi ammaniinsi ki'isaa lasaanchi afeebe'e Saamu'eel, Naataanii Gaadii sasem hiraagaanim kitaabbo'i aganni kitaabbuwwanne kitaabamaakko. Ee kitaabbuwwannem Daawiit hinkid gassuda'ee hinkaa'n malaayyi ixxena hee'uda'ee ixxonne, Isra'ee'l minaadabannee mulli uulli adilluwwannee afu luwwi hundim ee kitaabbuwwanne kitaabamaa siidamookko. Daawiit beet Salamoon Moollanni Waa'i ixxenne maqire hee'u bikkina ixxi adillano qoxxisukko. Ixxom lobakata la'amaakkoohan issukko. Salamoonim Isra'ee'l minaadab hundinam oohim shaalaqquwwina, xibbi halaquwwina, daannuwwina, hundem Isra'ee'l awwonsaaninaa moolli awwonsaaninaa «Waa'ina awwaadaanchi Muse'e udma'i uullanne baxu Keesammi Dukkaan Gaba'oo'n duunaam uullanne otossakkam beyyonne yoo bikkina neese hundim mallona» yukko. Ihukkaarem Hidi'l Saga'l Saaxin Daawiit Qiryaatyi'aariimiinsi woru ammane Yerusaaleemanne gudisaa hee'u dukkaa'n woronne hee'am hee'ukko. Huur beetik beet Uur beet Baasili'eel naas xaarinne baxu kit'm beyyi ee Gaba'oo'n uullanne yoo dukkaa'n illagenne hee'ukko. Ee bikkina Salamoonii oo minaadabii hundim eekka hasso'o. Salamoonim Keesammi Dukkaa'n gadanonne Waa'i illagenne yoo naas xaa'l kiti'm beyyonne firukko; ee beyyonnem shokkiisakka'a hincaa'akkam kiti'mmeka mat kuma hincaa'ukko. Ee hiimom Waa'i Salamoonina moo'amaa «An kiina uwwona hassoo luwwi hundam xa'mme» yukko. Salamoonim Waa'ina «At iyyanni Daawiitina lophphaakkoo eroomma issitaatto; anim ixxo awwonaa adil ihoommisa issitaatto. Kabadem i Moollanni Waa'a, at eese adil issittok xig dut ihaakkoo minaadabannetti ihu bikkina iyyanni Daawiitina aaggitti neeyyaxxi sagar wo'mmoo'isa isse. An ka minaadaba awwonseena xanoommi qooroomaa lachchaa iina uwwe; eebeelas ka lob ki minaadaba gasseena xanookkok ayyette?» yaa dabarukko. Waa'im Salamoonina «Ku er mixan ki woronne yoo bikkina at xa'mmittok goddaa amaxxaa te'im lomba te'im ki diina'ika leho te'im qeeraa'l umura ihoo'n an keese adil issummi ka i minaadaba gassiteena qooroomaa lachchaa xa'mmitti bikkina oono'o at eese xa'mmitti qoroomaa lachchaa kiina uwwoommo; odim kanniinsi illageen ayyi adilinam hee'ukkaanniinsii ka lasagem ayyim siideena xanoohaanniinsii lophphoo godda, amaxxaa lombaa an kiina uwwoommo» yaa dabarukko. Salamoon Gaba'oonanne otossakkam duunaam beyyiinsi Keesammi Dukkaa'n illagiinsi ki'aa Yerusaaleema marukko. Isra'eelannem adil ihukko. Salamoon 1,400 faraxxi gaarre'ee 12,000 faradoo wixxaa'ukko. Ee keenom faraxxi gaarre'i beero'uwwaannee ixxenne maqirem Yerusaaleemannee dissukko. Salamoonim kin birii worqii Yerusaaleemanne kinisa lophphoo'isa issukko. Digibim duu'n lugumonne mutoo oda'isa dutoo'isa issukko. Adilinam farad waarookkok Gibxiinsettee Qawwe'iinsettee hee'ukko. Adi'l daddaraanim Qawwe'iinsi bitaa'llam hee'llo'o. Gibxi faraxxi gaarre'ina matina 600 kin bira faradinam annannichchinam 150 kin bira miqqam hee'llo'o. Odim Hiite'aanninaa Sooriy uulli adilluwwinaa dabatta'a biteessam hee'llo'o. Salamoon Waa'i summina Keesammi Mine ixxi gaginam adilla'n mine baxeena sawwukko. Ee bikkina mu'uta gugguuroo lamarayyi kum manna ee'isam duunnuwwiinsi kina anoo sadeentayyi kum mannaa ee manna ijaajja'a baxissam sas kumaa loh xibbi mannaa doo'llukko. Ee lasage Salamoon Xiiroos adil Kiiraamina «Iyyanni Daawiitina ixxi adilla'n mine baxu ammane digiphphi haqqa asse'llittisam iinam asse'e. Kaba an i Moollanni Waa'i summina ihoo ixxena otossakkam mine baxeena sawwaammo. Oo minim enji Waa'a liiransoo aduruusa wiriissakkamanee keesamaakkoo daabbo'i hundi ammanem hincoohanee daraa maaro'oo usheexxaxxi ayyaamonee aga'n aaggannee ee'isam ni Moollanni Waa'ina qoodamaakkoo ugudduwwannee shokkiisakka'a hincaa'akkam kitim hincoo Keesammi Mine. Oohim Isra'eelina heer heerina uwwamaakkoo seera. Ni Moollanni mulli kora'i waa'uwwiinsi hundiinsim lophphoo Waa'i ihu bikkina an ixxena baxoommok lob geejji Keesammi Mine. Ihukkaarem iimaniinsi hanaan yoo iimanim ihuta'n ixxena iheena xanooyyo. Eehannah ixxena Keesammi Mine baxeena xanookkok ayyette? Ixxi illagenne aduruusa wiriissakkam beyyo bagaan Keesammi Mine ixxena baxeena an ayyette? Ee bikkina at worqinne, kin birinne, naasinnee xaarinnee ee'isam kuulinne, muulli kasharinnee shaano'i fatirinnee du'm eddechcha dadimmi lachchi yoo mancho asse'e; ixxim iyyanni Daawiit doo'llu lachchi manninne maqirem baxookko Yihudannee Yerusaaleemannee baxookko. Haqqa murimmi baxonne lachchaam manni Ki uullanne yo'isa an la'oommo. Ee bikkina Liibaanoosiinsi digiba, hoomaa araaraa asse'e. I mannim ki manninne maqirem baxxamo. Ku an baxeena sawwummi Keesammi Min haraaraa lobakata mishisoohanee ihu bikkina ixxuwwi lobakat saanquwwa iina gudissamo. Anim haqqa muttam baxaanina sinqina ihoo 2,000,000 kiilo'i aras qama, 2,000,000 kiilo'i so'i qamaa 400,000 liitir woyi'n diqaasaa 400,000 liitir wee'l zaytaa asse'oommo» yaa asse'ukko. Xiiroos adil Kiiraamim Salamoonina «Waa'i ixxi minaadaba iittoo bikkina keese ixxuwwina adil issaakko» yaa assi kitaaba dabaraa asse'ukko. Odim Kiiraam «Waa'ina Keesammi Mine ixxi gaginam adilla'n mine baxoo qoora, qoossoohanee lachchaamoo ihaakkoo beeto adil Daawiitina uwwu iimanee uullaa qooccu Isra'ee'l Moollanni Waa'i galaxxamona. «Ono'o, qooraa angi baxo erisa la'oohanee ihu Huuraam Abbii yakkam lachchaam mancho kiina asse'aammo. Huuraam Abbi'i ama Daan sullitane; ixxi annim Xiiroos uulli mancho. Ixxim worqinne, kin birinne, naasinne, xaarinne, kininnee haqqinnee baximmaa ee'isam kuulinne, shaano'innee baar kashar talbi danaam fatirinne dadimmaa la'oohane. Annanni, annanni haxara fissimmaa baxona kurakko'issinne hundem luwwam sheeqqarimmaa xanoohane. Ee bikkina ka mancho angi baxinne lachchi yoo ki manninnee kiyyannina baxxam hee'llo'i i manninnee maqire baxoo'isa isse. I moollanni kiyyannina baxxam hee'llo'i manninne maqirem baxoo'isa isse. Eehannata'i niina ki awwaadaanina asse'lleena aaggitti neeyyaxxi saga'llisanne arasa, so'o, woyi'n diqaasaa wee'l zaytaa asse'e. Neeseem kiina hasisoo haqqa Liibaanoosiinsi mullaa mat issinaa kallaa dambalaqanne chabbaa aad dillaa Yoophe'e afoo'isa issinoommo. Ee lasage at Yerusaaleem afeebe'e massiteena xantootto» yukko. Salamoon ixxi anni Daawiitisam Isra'ee'l uullanne hee'oo waaraano hundam xigukko. Ee kee'n xigim 153,600 ihukkis la'amukko. Ixxuwwiinsi 70,000 manni mu'uta gugguuraano; 80,000 odim duunnuwwanne kina antam keeno hee'llo'o. 3,600 odim ee keeno baxisaan hee'llo'o. Salamoonim Yerusaaleemanne Waa'i ixxi anni Daawiitina moo'amu Mooriy duunanne Iyyaabuus Oorin oodo'onne Daawiit gudisaa hee'u beyyonne Waa'ika Keesammi Mine baximma asheerukko. Salamoonim adil ihu soo'l hiinchaannonne la'm aga'n la'm ballanne Keesammi Mine baximma asheerukko. Salamoon baxiseena asheeru Keesammi Min gaassi keennaanchonne qeeraa'lloom lohayyi anga dufaachchi lammiyyi anga hee'ukko. Keesammi Mine aagakkam goocik qeeraa'lloom 20 anga uullichchim 20 angi hee'ukko; woro'l kollom muccur worqinne goolabukko. Keesammi Mi'nnaka lob mine hoominne baxaa muccur worqinne goolabaa ixxi hanennem dimbaabaa chimchimaa labo misilluwwa baxukko. Keesammi Minem bito xee'aalli kinninne wereeggisukko; awwaaxxu worqim Faarwaayaa yakkam uulliinsi waaraakkoohan hee'ukko. Keesammi mi'nneka farashshaancho, gooccuwwa, gorte'ee xuffuwwaa worqinne goolabukko. Gorte'uwwannem kiruubee'l misila baxukko. Ee'isam Keesammiinsi Keesammi beyyo baxukko. Ixxekim qeeraa'lloom Keesammi Mi'n qeeraa'lloomisam lamiyyi anga, haraaroomim lammiyyi anga hee'ukko. Ee Keesammiinsi keesammi mi'nnekam woro'l gorte'e 20,400 kiilo'i muccur worqinne goolabukko. Musmaara baxisimmina onti xibbee lamarayyi giraamaa ihoo qax worqa guullukko. Fooq baxxanchuwwi woro'l gortannam worqinne goolabukko. Keesammiinsi Keesammi beyyonne kiruubeelluwwi misi'lleka lamo baxisaa muccur worqinne goolabisukko. Tochchiinsi tochchi afeebe'e biddiqu kiruubbuwwik lad lamiyyi angi hee'ukko. Luxxi kiruubee'llek mat lad onti angi ihaa Keesam Mi'n gorte'e nakkookko; odim mulli lad onti angi ihaa mulli kiruubee'l lado nakkookko. Ee'isam la'm kiruubee'l ladim onti angi ihaa e kolli gorte'e nakkookko; la'm ladim e kiruubee'l lado nakkookko. Ee biddiqu kiruubbuwwi lad lamiyyi angi ihaa illi kolloom Keesammi Mi'n lob mi'n kolli daba'llaa hee'ukko. Keesammiinsi Keesammi beyyinam talbi danaam fatirinne baxamaakkoo du'm eddechchi hee'ukko. Ee du'm eddechchikim hagar shaano'oo kuulaa ihaa ixxi hanennem kiruubee'l misil baxamaakkoohan hee'ukko. Salamoon uullichchi sadee onti angaa ihoo lam utubbuwwa baxaa Keesammi Mi'n illagenne uullisuko. Ee utubbuwwi ludonne onti anga ihoo lam goobinaanchi annannichchonnem hee'ukko. Chimchima illaanchisa dadaa utubbuwwi ludonne issukko. Naas xaarinnem roomaana laboo mat xibbi misilluwwa baxaa ee chimchimmuwwanne issukko. Utubbuwwam Keesammi Mi'n illagenne lamem shiininnem uullisukko. Woroo'n qarinne uullu utuba Yaakiina hanaa'n qarinne uullu utuba Boo'eeza yakkaman hee'ukko. Salamoon qeeraa'lloom lamiyyi anga dufaachchoomim lamiyyi anga uullichchi tommi anga ihoo kit'm beyyo naas xaarinne baxukko. Ee'isam midaad tochchiinsi tochchi afeebe'e tommi anga uullichchi onti anga ihoo jaalo'o bukkamaa daadu xaarinne baxukko. Ixxekim kululleet sad anga hee'ukko. Ee jaalo'i suumiinsi woroon lam ogoranne baxamaakkoo tommi moolluwwi misil hee'ukko. Oo moolluwwi misilluwwim ee jaalo'inne mat ihaa baxamaakkoohan hee'ukko. Oo jaalo'i tommonnee lam moolluwwannee uullaakkoohan ihaa ee moolluwwikim sas hanaa'n qaranne sas eelliinchi aagganne sas woroo'n qaranne sas eelliinchi firanne ille dabaraakkoohan hee'ukko. Hundikim afaree'n kolli lambe'enne daba'llaakkoohan hee'ukko. Ee jaalo'ikim gumu'llaalloom mat taachcho'i ihaa suum odim kubbaayyi suume te'im suuf fiita laboohan hee'ukko. Oo jaalo'im 60,000 liitir wo'o amadoohan hee'ukko. Odim Salamoon aanshaqqakkam gabatika tommo baxisaa ontoo Keesammi Miniinsi hanaa'n qarinne ontoo woroo'n qarinne dissukko; oo gabattuwwim shokkiisakka'a hincaa'akkam kitimina ihoo luwwi hundim aanshamoo beyyi hee'ukko. Lob jaalo'onne yoo wo'im qeessuwwi aanshaqqoohan hee'ukko. Ixxim baxina uwwamu awwonsisanne tommi caakka dissakkam mu'uta worqinne baxisaa Keesammi Minenne onto hanaa'n qarinne onto odim woroo'n qarinne dissukko. Ee'isam tommi xaraphpheezzuwwa baxisaa Keesammi Minenne onto hanaa'n qarinne onto odim woroo'n qarinne dissukko. Odim edaa mat xibbi loqooqo'i saahinnuwwa worqinne baxisukko. Qeessuwwina wixxixxi beyyo baxukko; ee'isam lob wixxixxi beyyoo gooccuwwaa baxaa ee gooccuwwa naas xaarinne goolabukko. Jaalo'oomam Keesammi Miniinsi woroo'n qarinne eelliinchi firinne yoo lamejjanne makki kollinne dissukko. Huuraam odim qure'uwwa, giira hogoofakkam mu'uttuwwaa loqooqo'i saahinnuwwaa baxukko. Ee'isinnem Huuraam Keesammi Mi'n awwaadina ihoo mu'uttuwwa adil Salamoonina baxaa guullukko. Oo baxu mu'uttuwwim lam utubbuwwa, utubbuwwi ludonne yoo saahi'n kobi'llanne baxamaakkoo lam goominaanchoo lamem goominaanchom wereeggisimmina annannichchonnem baxamaakkoo lam chimchimmuwwa, goominaancho wereeggisimmina goominaanaanchuwwanne annannichchonnem lam ogoranne naas xaarinne baxamaakkoo oroomaa'n misha laboo wereeggika soor xibbe, aanshaqqakkam saahinnuwwa shafe'i'nnoo'i tululoo lokki yoo luwwinnem jaalo'oo eekka iyyoo tommoo lam moolluwwaa qure'uwwa, giira hogoofakkam mu'uttuwwa, qaphphuwwaa mulli ee keeno laboo mu'uttuwwaa angi lachchinne baxukko. Ku Huuraam Abbi'i adil Salamoon ijaajukkisinne Keesammi Mi'n awwaadina ihoo'isina ka mu'uta hundam baxukkok muccur naas xaarinnette hee'ukko. Adil Salamoon ka mu'uttuwwa hundam baxisukkok Yoordaanoos cebbanne Sukootannee Xareed lambe'ennee yoo nas xaara bukkakkam beyyonnette hee'ukko. Ee'isinne baxamu mu'uttuwwi lobakat ihu bikkina ixxuwwa baxiseena awwaaxxu naas xaar hinkaa'nna ihooda'e ayyim la'eena xanukkoyyo. Ee'isam adil Salamoon Keesammi Minina awwaadoo mu'uttuwwa oohim kiti'm beyyo, keesammi daabbo'o dissakkam xaraphpheeza, uwwamu awwonsisinne Keesammi Mi'n illagenne caakkisoo'isina caakka dissakkam mu'uta kuraazzuwwinne maqirem, fiit kobi'llanne baxamaakkoo wereeggi mu'uttuwwa, kuraazzuwwa, gii'l buchcha giggissakkam mu'uttuwwa, caakka xoo'isakkam mu'uta, loqooqo'i saahinnuwwa, cilfaa mude'uwwaa hundim muccur worqinne baxukko. Keesammiinsi Keesammi beyyi goocuwwii Keesammi mi'nnek lob gooccuwwii worqinne baxamaakkoohan hee'ukko. Adil Salamoon Waa'i Keesammi mi'n baxo hundam guullaa lasage ixxi anni Daawiit Waa'ina annanni issaa dissu biraa worqaa ee'isam mulli mu'uttuwwi hundam Keesammi Mi'n woronne yoo mu'uta dissakkam minenne dissukko. Ee lasage adil Salamoon Waa'ika Hidi'l Saga'l Saaxina Daawiit beero'i ihu Xiyooniinsi Keesammi Mine eebakkamisina Isra'ee'l lommannaa sullikaa moolli awwonsaanoo hundam Yerusaaleemanne wixxitamisina ijaajukko. Lama'l agananne lonsakkam daas uguxxi ayyaamonne hundim waatta'a Yerusaaleemanne wixxito'o. Awwonsaan hundim mateeyyoominne wixxito'i ammanenne Leewi'i oos Hidi'l Saga'l Saaxina iyyita'a Keesammi Mine eebbo'o. Ee'isam qeessuwwii Leewi'i oosii Waa'ina otossakkam dukkaanaa ixxi woronne hee'u keesammi mu'uttuwwaa hundam Keesammi Mine eebbo'o. Adil Salamoonii Hidi'l Saga'l Saaxi'n illagenne ixxenne maqire wixxito'i Isra'ee'l minaadabii hundim dutimmiinsi ki'ukkok xigakkeena xanakkambee'i lobakat gereebbaa baa'lluwwaa ee Hidi'l Saga'l Saaxi'n illagenne kitimto'o. Qeessuwwim Waa'ika ee Hidi'l Saga'l Saaxina Keesammi Mi'n woronne keesammiinsi keesammi beyyonne aagissa'a kiruubbuwwi laddeewwiinsi woroon dissito'o. Kiruubbuwwim Hidi'l Saga'l Saaxiniinsi hanaan yoo beyyonne ixxuwwi lado bakkaa'lla'a Hidi'l Saga'l Saaxinaa ee saaxina iyyakkam wonnannuwwaa ifiissa'a hee'llo'o. Wonnannuwwi qeeraa'lluwwi hee'u bikkina Keesammiinsi Keesammi beyyi illaginne uulloo ayyi manchim ee wonnannuwwi ludo moo'eena xanam hee'ukko. Ihukkaarem ee beyyiinsi biireen uulloo ayyi manchim moo'eena hore'em xanam hee'ukkoyyo. Oo wonnannuwwim kaballi afeebe'em ee beyyonne yookko. Isra'ee'l minaadab Gibxi uulliinsi fitto'isam Waa'i ixxuwwinne maqire hidi'l sagara aagu ammane Muse'e Siina'i duunanne Hidi'l Saga'l Saaxi'n woronne dissu lamem ki'n ba'lliinsi bagaan ee saaxxi'n woronne mulli luwwi hee'ukkoyyo. Ee beyyonne hee'llo'i qeessuwwi hundim ixxuwwi awwaaddeena qoodanto'isinnetti ihoo'n hundim mat ikka'a ixxuwwi gaga Waa'ina keessa'a hee'llo'o. Zammaaraan ikko'i Leewi'i oos hundim Asaaf Heemaanii Yiduutaanii ee'isam ixxuwwi goo'n oosii ixxuwwi qarimannii hundim talbi danaam fatirinne dadamaakkoo eddechcha edde'lla'a doola, diitta'aa maasinqo'oo lellitu'uuyyi eelliinchi firinne kiti'm beyyi gadanonne uullita'a hee'llo'o. Ixxuwwinne maqirem xurumba fuggam mat xibbii lamiyyi qeessuwwii hee'lo'o. Oo xurumba fuggam keenii zammaaraanii hundim sagara matissita'a Waa'ina lombaa galataa hincaa'llo'o. Xurumbinne doolinnee mulli mu'uttuwwinnee «Waa'i biijaallaa ixxi iittim heer heerina qoxxaa hee'oohanee ihu bikkina Waa'a galaxxehe» yitu'uuyyi sagara iimmaa'lla'a zammattam hee'llo'o. Ee ammanenne Waa'ik Keesammi Min duubinne wo'mmukko. Waa'ik lombi Keesammi Minenne wo'mmu bikkina duubiinsi ki'ukkok qeessuwwi ixxuwwi awwaado awwaaddeena xanto'oyyo. Ee lasage adil Salamoon «Waa'a ‹At tuunsi duuphphi woronne hee'oommo› yitaatto. Ono'o an heer heerina hee'lloo ka maalalsiisoo Keesammi Mine kiina baxaammo» yukko. Ee ammane Isra'ee'l minaadab ee beyyonne uullita'a hee'llo'o; adil Salamoonim ixxuwwi kolli daba'llaa Waa'ik maassi ixxuwwanne dilloo'isina «Isra'ee'l Moollanni Waa'i galaxxamona! Ixxim iyyanni Daawiitina uwwu neeyyaxxi sagara wonshaakko. Uwwu neeyyaxxi sagarim ‹I minaadaba Gibxi uulliinsi fissummi ammanniinsi ki'isaa kaballi afeebe'e i summinne Keesammi Min baxamoo beyyo Isra'ee'l sulli beero'uwwiinsi matom doo'llummoyyo. I minaadab ikko'i Isra'eelam awwonsoo manchom doo'llummoyyi hee'ukko. Ihukkaarem kaba i summi ixxonne weeshamona Yerusaaleema, i minaadaba awwonsitonam Daawiita doo'llaammo› yaa hee'ukko. «Iyyanni Daawiit Isra'ee'l Moollanni Waa'i summina Keesammi Mine baxeena sawwaa hee'ukko. Ihukkaarem Waa'i iyyanni Daawiitina ‹I summina Keesammi Mine baxxeena ki tiironne sawwimminne eroka issitaatto. Ihukkaarem i summina ihoo Keesammi Mine iina baxookkok ki gubeediinsi qaramoo ki beeto bagaan ateyyo› yukko. «Oono'o Waa'i aagu neeyyaxxi sagara wonshaakko. Waa'i uwwu neeyyaxxisinne an iyyanni beyyonne Isra'ee'l minaadaphphi adilla'n barcumanne afuuraammo. Isra'ee'l Moollanni Waa'i summinam Keesammi Mine baxaammo. Ee Keesammi Minennem Waa'i Isra'ee'l minaadabinne aagu Hidi'l Saga'l Saaxina dissaammo» yukko. Adil Salamoon qeeraa'lloom onti anga dufaachchoom onti anga uullichchi sas anga ihoo awwaadina uullakkam beyyo naas xaarinne baxisaa wixxixxi beyyi lambe'enne uullisaa hee'ukko. Salamoonim ee beyyonne firaa Waa'ina kitima hincaa'akkam beyyi illagenne uullukko. Ixxim Isra'ee'l minaadab hundi illagennem guruphphaa ixxi anga iim biddiqaa'aa «Isra'ee'l Moollanni Waa'a! Uullannem ihukko iimanenne kiinni'nnoo'i Waa'i hore'em bee'e. At ki minaadabinne aaggitti hidi'l sagara egettootto. Ixxuwwaanninne wo'm wodaninne ki googonne mattam keenina heer heerina hee'oo ki eroomma moo'issootto. Iyyanni Daawiitina uwwitti neeyyaxxi sagara egettaatto. At woccitti neeyyaxxi sagara hundam kaballa wo'nshitaatto. Isra'ee'l Moollanni Waa'a, iyyanni Daawiitina ‹At i seera qoxxitaa egettittisam ki oosim egerulas ki shumo'iinsi Isra'ee'l minaadaphphi adilla'n barcumanne i illagenne adil ihoo manchi hundi ammanem bee'ooyyo› yitaa aaggitti hidi'l sagara kaba qoxxissona an keese uunxoommo. Ee bikkina Isra'ee'l Waa'a, kiina awwaadaanchi ihu Daawiitina aaggitti neeyyaxxi sagar hundim wo'mmoo'isa isse. «Ihona bagaan hanqinam Waa'i ka uullanne manninne maqire hee'oonnihe? Oono'o iimanii iimaniinsi hanaan yoo iimanii keese iyyeena xanooyyo. Hore'oomam an kiina baxummi min hinkaa'nna hoffane? Ihona bagaan i Moollanni Waa'a! Kiina awwaadaanchi ihummi iikka uunxato macceese. Kiina awwaadaanchi ihummi an ki illagenne hincaa'oommi laachchaa uunxatoo erisa macceese. ‹Ka beyyonne I summi weeshamookko› yitti ki Keesammi Mi'n kolli ballaa hiimoo moo'e. An ki awwaadaanchim Keesamaakkoo ka ki Mi'n kolli uunxoommi uunxato macceese. An ki awwaadaanchi te'im ki minaadab ihu Isra'eel ille ka mi'n kollonne daballaa keese uunxinoommi ammane ni uunxato macceese; kiina heechchi beyyi ihu iimaniinsi macceese; macceessaahim haafihe. Mat manchi ixxi beshichcho hawwodu bikkina kasasamaa Keesammi Mi'n kit'm beyyo worakka'a ihukkisa issakkam ammane Waa'a iimanenne ikkaa at macceese; ki awwaadaaninam oogate; oohim hawwodu manchi hawwodukkisinnem guzumo'amoo'isa muccurimmi hawwodubee'an ihukkisa la'ise. Ki minaadab ihu Isra'eel baaxiilo baxaa keese hawwodu bikkina ixxuwwi diina'i illagenne kaa'antota'nnii saxxita'ahim ki kolli daba'llita'a keesammi ka mi'n kolli waattota'nnii kiinniinsi haafite siiddeena ixxuwwi gaga heeshaa'lla'a maashaalloominne keese uunxitota'nnii at iimanenne ikkaa ixxuwwika uunxato macceese; ki minaadaphphekam baaxiilo haafaammo yitaa ixxuwwi gaassi anno'inaa ixxuwwinaa uwwitti uulla dabattaa aagise. («Ki minaadab keese hawwodaa kichche'isimminne xeen uullanne ga'nnoobee'isa issitaa ammane at guzumo'l bikkina saxxita'a ixxuwwika ille ka keesammi mi'n kolli dabatta'a maashaalloominne keese uunxitota'n Waa'a! At iimanenne ikkaa ixxuwwika uunxato macceese. Kiina awwaadaan ikko'i Isra'ee'l minaadaphpheka baaxiilo uraammo yihe. Xabbee'n googom ixxuwwina moo'ise. At ki minaadabina gulummi issitaa uwwitti ka uullanne xeena ga'nnise. «Uullanne qaanne'i te'im booban aagoo ammane billi te'im waaggi te'im qawwaawwi te'im daquur uullanne aagoo ammane te'im ki minaadaba diina'i kibboo ammane te'im ki minaadabanne jabbi aagoo ammane te'im mah hawwim afoo ammane ki minaadab Isra'eeliinsi ayyi manchim u'nnii jabbii ixxonne afu bikkina ixxeka anga ka Keesammi Mi'n kolli biddiqaa'aa uunxoo ammane At iimanenne ki heechchi beyyonne ikkaa macceese; ixxuwwi hawwojjam uraammo yihe. Xale'i at manni oosika wodano saarayyitaa laqoohan ikki bikkina annichchi annichchinam ixxi baxisa miqe. Ee ammane niyyanno'ina at uwwitti uullanne hee'amoo doollenne hundannem keese baddimminne ki googonne maramoo'isinatte. «Ki minaadab ikko'i Isra'eeliinsette ihubee'i mat mulli uulli manchi kiihaannina lombaam summi bikkna, ki malaayyaam wod bikkinaa biddiqaakkoo ki angi bikkinaa macceesaa qee'l uulliinsi waaraa ka Keesammi Mi'n kollonne ihaa keese uunxoo ammane At iimanenne ki heechchi beyyonne ikkaa ixxi uunxato macceese. Uullanne hee'oo minaadab hundim kiina minaadab ikko'i Isra'ee'l minaadaphphisam laqqa'a keese badditona; oo mulli uulli manchi uunxoo uunxato hundam at macceese. Eehid ihoo ammane ku an baxummi Keesammi Min ki summi weeshamoo beyyi ihukkisa laqqamo. «Ki minaadab diina'inne qasanteena orina fittona ijaajjoo ammane ixxuwwi hannonnem ikka'a ka at doo'llitti beero'onne an kiina baxummi ka Keesammi Mi'n kolli ille dabatta'a uunxitam ammane at ixxuwwika uunxato iimannenne ikkaa macceese. Keese xa'mmitam luwwi hundam at ixxuwwina isse. «Baaxiilo baxoobee'i manchi ayyim bee'an ihu bikkna ki minaadab Isra'eel baaxiilo baxxa'a keese kichche'issam ammane atim ixxuwwanne quuqqaa diina'i kaa'lla'a qeefadda'a mulli qee'l te'im abbis uulla massitona at cawwitaa uttoo ammane Qeefadanta'a hee'llam uullannette ikka'a ‹baaxiilo banxaammo; Waa'a hawwondaammo; ijaajancham sambaammo› yita'a wodaninne baaxiilo biiraa yita'a saxxita'a daba'llitolas qeefadanta'a hee'llam uullanne ikka'a ixxuwwi wo'm wodaninnee wo'm tiirinnee ki kolli daba'llitolasii at ixxuwwi anno'ina uwwitti ka uulli kolli, at doo'llitti ka beero'i kollii an ki summi bikkina baxisummi ka Keesammi Mi'n kollii ille dabatta'a uunxitolas iimananne ki gatti beyyonnette ikkaa ixxuwwika uunxato macceese; keese hawwoddo'i ki minaadaphpheka baaxiilo hundam haafihe. «Kabadem i Moollanni Waa'a! Ka beyyonne hincoo uunxatina ki illi fooqaakkoohan ki maccim qoossaa macceesoohan ihona. Moollanni Waa'a! Kaba ki'llaa ki malaayyi Hidi'l Saga'l Saaxininne maqirem ki usheexxaxxi beyyo waare. Moollanni Waa'a ki qeessuwwi gatimma edde'llona! Kiina amma'nnanto'oo keenim ki eroomminne liirantona! Moollanni Waa'a at doo'llitti adila uunjititte! Kiina awwaadaanchi ihu Daawiitina eroomma issiteena aaggitti sagara sawwihe» yaa uunxukko. Adil Salamoon Waa'a unxato guullukkisam giir iimaniinsi dillaa shokkiisakka'a hicaa'akkam kitimaa mulli kitimaa itukko. Waa'i lombim ee Keesammi Minenne wo'mmukko. Waa'i lombi ee Keesammi Minenne wo'mmu bikkina qeessuwwi ee mine aaggeena xanto'oyyo. Isra'ee'l oos hundim giir iimaniinsi dillukkisaa Waa'i lombim Keesammi Miniinsi hanaan yoo'isaa moo'lla'a uullanne illillaachcha ubba'a «Waa'i biijaalla; ixxi iittim heer heerina qoxxaa hee'oohane» yita'a otossimminne Waa'a galaxxito'o. Ee lasage adil Salamoonii ee beyyonne hee'llo'i minaadabii hundim Waa'ina kitima hincaa'llo'o. Salamoonim 22,000 ba'aalluwwaa 120,000 gereebbaa fella'aa kitimukko. Ee'isinne adil Salamoonii minaadabii hundim ee Keesammi Mine Waa'ina keesso'o. Qeessuwwim ixxuwwina qoodamu beyyonne uullito'o. Leewi'i oosim «Ixxek iitti heer heerinatte» yoo Daawiit mazmuura zammattu'uuyyi adil Daawiit Waa'a galaxxeena baxu Waa'ika galaxxi mazmuu'l mu'uta amadda'a uullita'a hee'llo'o. Qeessuwwim ixxuwwi illagenne ikka'a xurumba fuggu'uuyyi Isra'ee'l minaadab hundim uullaa hee'ukko. Salamoon Keesammi Mi'n illaggenne yoo wixxixxi beyyika lambe'aanchi beyyo keesukko; ee beyyonnem shokkiisakka'a hicaa'akkam kitimaa mateeyyoo'm kiti'm di'iraa hundam ee beyyonne Waa'ina kitim issaa hincaa'ukko. Oohim naas xaarinne baxisu kiti'm beyyi shokkiisakka'a hincaa'akkam kitimaa hurbaaxxi kitimaa di'iraa aa'eena xanubee'i bikkinatte. Ee ammane Salamoonii Isra'ee'l minaadabii hundim lamar balla daas uguda lonsito'o. Hanaa'n qarinne Haamaata higakkam beyyiinsi ki'isaa woroo'n qarinne Gibxi uulli lete'i cebbi afeebe'e yoo ulli hundiinsim waaru minaadab lobakat hee'ukko. Kiti'm beyyo keesimminne lamar balla higisso'o; mulli lamar balla odim uguda lonsimminne higissa'a lasage sadeenti ballanne keesammi dummichcha dummito'o. Lama'l agan aagu lamiyyennee saxxi ballannee adil Salamoon ixxuwwi gaqqi minem daba'llita'a mattona minaadaba geegeesukko. Minaadabim Waa'i adil Daawiitina, Salamooninaa Isra'ee'l minaadabinaa issu er luwwi hundinam lobakata liirantu'uuyyi matto'o. Salamoon Keesammi Minee ixxi adilla'n minee baxaa guullukko; ee keesammi mininaa ixxi adilla'n mininaa isseena ixxi tiironne sawwukkoka hundam issukko. Waa'im ixxena hiimonne moo'amaa «An ki uunxato macceesaammo; ka beyyo kitima hincaa'akkam Keesammi Min issaa i gagina doo'llaammo. Xeen ga'nnoobee'isa iimane xufoommi ammane te'im uulla bi'isona qawwaawwa asse'oommi ammane te'im booban i minaadabanne dilloo'isa issoommi ammane I summinne weeshanto'i i minaadab ixxuwwi gaga heeshaa'lla'a eese uunxito'aare, eesem hasso'aaree ixxuwwi jor googiinsim daba'llito'aaree an iimanenne ihaa ixxuwwi uunxato macceesoommo; ixxuwwi baaxiilom haafoommo; ixxuwwi uullam fayyiisoommo. Kabadem ka beyyonne uunxakkam uunxato i illi moo'ookko; i maccim macceesookko. I summi ka beyyonne heer heerina hee'oo'isina ka Keesammi Mine doo'llaammo; keesaammome. I illii i tiirii hundi ammanem ee beyyonnette ihookko. Atim Kiyyanni Daawiitisam i illagenne er baxo baxxilas i ijaajo, seeraa ogoraa hundam egettilas an kiyyanni Daawiitina ‹Ki shumo'iinsi Isra'eelanne adil ihoo manchi bee'ooyyo› yaa aagummi neeyyaxxi saga'llisanne ki adillano an qoxxisoommo. «Ihukkaarem ki'nnuwwi eese awwonimma uttakka'a an uwwummi seeraa ijaajom egerimma sabbakka'ahii mulli waa'uwwina awwaaddakkolasii otossitakkolasii an ki'nnuwwi gaassi anno'ina uwwummi i uulliinsi xoqoloommo; i summi bikkina Keesummi ka Keesommi Minem uroommo; uulli minaadab hundinam naacanchinaa gadanchinaa ihoo'isa issoommo. Oono'o ku Keesammi Min kaba lobakata maalalsiisoohan ihukkaarem ee ammane ixxi gadaninne higoo manni hundim ‹Waa'i ka uullaa ka Keesammi Minee ka'isa issukkok mahinatte?› yukkuuyyi maalalookko. Mannim ‹Waa'i ka bichchi hundam ka mannanne ihoo'isa issukkok ixxuwwa Gibxi uulliinsi fissu gaassi ixxuwwi anno'i Moollanni Waa'a utta'a mulli waa'uwwam awwonta'a otossito'i bikknaa awwaaddo'i bikkinattee› yaa dabarookko» yukko. Salamoon Keesammi Minee ixxi adilla'n minee baxu lamiyyi hiinchi lasaanchonne Kiiraam ixxena uwwu beero'uwwam Salamoon haareechchisaa baxukko. Isra'ee'l minaadabim ee beero'uwwanne hee'oo'isa issukko. Ee lasage Haamaataannonnee Xooba'i uullannee gaadaa kaa'aa amadukko. Udma'i uullanne hee'oo Taaxmoor beero'oo Haamaatanne mu'uta dissimmina baxaa hee'u beero'uwwaa hundam qoxxisaa baxukko. Salamoon woroo'n Beetihooroonannee Hanaa'n Beetihooroonannee kininne baxamu oot, goocii laqqo'uwwii yoo girbam beero'uwwam dabaraa baxukko. Ee'isam Ba'ilaata, ixxi mu'uxxi beero'uwwa, ixxi faradinaa faraxxi gaarre'uwwinaa ihoo beero'uwwaa Yerusaaleemanne, Liibaanoosannee ixxi gassi uullannee hundannem baxeena sawwu luwwi hundam Salamoon baxukko. Hiite'aanniinsi, Amoore'aanniinsi, Ferize'aanniinsi, Iyyaabuus shumo'iinsii gataa hee'u Isra'eel ihubee'i mulli minaadaba hundam oohim Isra'ee'l oos bi'issoo'n Kana'aa'n uullanne gataa hee'u kee'n ooso Salamoon kaballi afeebe'em agid ikka'a baxxamisa issukko. Salamoon Isra'ee'l shumo'iinsi ayyem ixxena agid ikka'a baxxamisa issukkoyyo. Ihukkaarem ixxuwwi, gaaxxi awwonsaanoo faraxxi gaarre'e ushe'llam keeninaa faradaaninaa ijaajaanoo hee'llo'o. Kukeen adil Salamoonina gassaanoo baxaano ijaajaanoo hee'llo'o. Ixxuwwikim xig 250 hee'ukko. Salamoon «Waa'ik Hidi'l Saga'l Saaxin hee'oo beyyi hundim keesammi ihu bikkina i are Isra'ee'l adil Daawiit adilla'n minenne hee'immi hasisooyyo» yaa Faari'oon landichcho Daawiit beero'iinsi fissaa isena baxu mulli mine massukko. Salamoon Keesammi Mi'n illagenne Waa'ina kitima hincaa'immina baxu kiti'm beyyonne shokkiisakka'a hincaa'akkam kitima Waa'ina hincaa'ukko. Muse'e ijaajukkisannem uguxxi ayyaamonne annannichchonnem oohim Usheexxaxxi ayyaamonne, Aga'n aaggi ayyaamonnee hiinchi hundannem lonsakkam sasem ugudannee oohim Qorosho'i ugudanne, Saantuwwi ugudannee Daas Ugudannee kitima hincaa'am hee'ukko. Ixxi anni Daawiit fissu see'l awwonsa awwonimminne qeessuwwa ixxuwwi awwaaxxi baxxanchisinne Leewi'i oosim ee galaxxi uguda awwonsitamisaa balli hundam baxxam baxonne qeessuwwina hara'mmitamisaa issukko. Odim Waa'i manchi Daawiit ijaajukkisannem Keesammi Mine egettam keen annanni annanni gooccuwwanne egettamisina ixxuwwina afu baxxanchisanne dissukko. Ixxuwwim mu'uxxi mi'n bikkinaa mulliuwwinaa hundinam Daawiit qeessuwwinaa Leewaawe'uwwinaa uwwu awwonsissanne matim gatoo'n hundim laboo'isinne baxamoo'isa issito'o. Keesammi Min shooto'amu balliinsi ki'isaa beeddeebe'e Salamoon baxeena sawwaa hee'u sawwit hundim wo'mmukko; Keesammi Minim baxamaa beeddukko. Ee lasage Salamoon Eedoo'm uullanne dambalaq tochchonne hee'oo Eexiiyoon Gaabiira yakkam beyyoo Eelaata yakkam beyyoo marukko. Adil Kiiraam markaba ushe'llam lachchi yoo keeninnee ixxi gaqqi o'l gogotinnee awwonamoo markabbuwwa Salamoonina asse'aa hee'ukko. Ixxuwwim Salamoon o'l gogotinne maqirem Oofiira matta'a 15,000 kiilo'o ihoo worqa adil Salamoonina amadda'a waatto'o. Saaba'i adila Salamoonika er sado macceessa'a shitto'o, lobakat worqaa bito xee'aal kinaa gaameela'anne iyyiissa'a kee'mmaalli xa'mmichchinne Salamoona keenteena dut manninne maqirem Yerusaaleema waatto'o. Isem Salamoon beyyo affa'a lasage is sawwixxeka hundam atoorassito'o. Salamoonim ise xa'mmito'i xa'mmichchi hundinam dabachcha uwwukko. Ixxi dabarimma hoogaa ixxeensi daphphu luwwi mahim hee'ukkoyyo. Saaba'i uulli adilam qooroominne wo'mmaakkoo Salmoon woshsha macceesso'o. Ixxi baxisaa hee'u ixxi adilla'n minem moo'llo'o. Salamoonina hincoo hurbaaxxi maadda, daannuwwi afuuttam hee'llo'i ogora, adilla'n minenne baxxam baxaanii diqaasa danaanaanii edde'lla'a hee'llo'i eddechchaa Keesammi Minina hicaa'am hee'u shokkiisakka'a hincaa'akkam kitimaa hundam moo'lla'a lobakata maalalto'o. Adil Salamooninam «Ki baxxi bikkinaa lophphaakkoo ki qooroo'm bikkinaa i uullanne hee'ummuuyyi macceesummi luwwi hundim hanqa. Ihona bagaan ka beyyo waaraa hundem luwwam an i illinne moo'eembe'e iina kuramu luwwi hundam an amma'nnummoyyi hee'ukko. Hanqinam an macceesummok kaba an i illinne moo'ummaannika kollom ihooyyo. Kiikki qooroom iina kurakko'aanniinsi hore'em lobane. Hundi ammanem ki illagenne ikka'a qooroominne wo'mmaakkoo ki woshsha macceessam gassaanii ki awwaadaanii hinkido'i gada'aammuwwa. Adil ikkaa ixxi summinne gassitona keese Isra'ee'l minaadabanne adil isseena doo'llu ki Moollanni Waa'i galaxxamona; ixxi iittinnem Isra'ee'l minaadab heer heerina qoxxaa hee'ona hasu bikkina hanqii hanqo'i oogato'ii qoxxaa hee'oo'isa issitoo'isina keese doo'llaa adil issaakko» yito'o. Saaba'i uulli adila eebbo'i soor kum kiilo'iinsi lophphoo worqa, lobakat shitto'oo bito xee'aalli kinaa irifo'i issita'a Salamoonina uwwito'o. Ise Salamoonina uwwito'i shitto'i kanniinsi illageen hore'em moo'akka'a la'akkambee'an hee'ukko. Adil Kiiraamikii Salamoonikii manni Oofiira yakkam uulliinsi Salamoonina worqa eebbo'isam araaraa bito xee'aalli kinaa eebbo'o. Adil Salamoonim ee araa'l haqqinne Keesammi Mi'nnekaa ixxi adilla'n mi'nnekaa gardabbuwwaa ee'isam zammaaraan awwaaxxitam maasinqo'oo diitta'aa baxisukko. Ka mu'uta laboo mu'ut eehanniinsi illageen Yihuxxi uullanne hore'em hee'ukkoyyo. Adil Salamoon ise eebbo'i irifo'iinsi loboka Saaba'i uulli adila xa'mmito'i luwwi hundam uwwukko. Ee lasage Saaba'i uulli adila isenne maqire waaru manninne maqirem is gaqqi uullam daba'llita'a matto'o. Adil Salamoonina 23,000 kiilo'oo ihoo qax worqa hiinchonne hiinchonne manni uwwam hee'ukko. Oohim annanni daddaraan miqqam gibiriinsi mullan hee'ukko. Ee'isam Araphphi uulli adilluwwi hundimii Isra'ee'l uulli gassaanii Salamoonina worqaa kin biraa hincaa'llam hee'llo'o. Adil Salamoon annannichchim lamar kiilo'o ihoo qax muccur worqinne lam xibbi geejji agilluwwa baxukko. Ee'isam annannichchim sas kiilo'o ihoo qax muccur worqinne sas xibbi hoffi agilluwwa baxukko. Ee agilluwwam «Liibaanoos Dooma» yakkam adilla'n minenne dissukko. Ee lasage Salamoon daane'i inqinne wereeggisakka'a muccur worqinne goolabakko'oo mat geejji adilla'n barcuma baxukko. Ee barcumanne firakkam gardabbi loh ihaa worqinne baxamaa ixxenne amaxxamaakkoo hance'akkam beyyi yoohan hee'ukko. Ee barcu'm makkinnee qeddinnem anga bakkiisakkam luwwi yoohan ihaa gadanonnem mat mat hobbichchi misil uullaa hee'ukko. Ee'isam ee lohem gardabbi lamem midaadonne annannichchonnem mat mat hobbichchi uullaakkoohan ihaa hundoomim tommoo lamoo hee'ukko. Eehido'i adilla'n barcum hinka'i uullannem hannonnem baxamukkoyyo. Adil Salamoon aggi «Liibaanoos dooma» yakkam adilla'n minenne yoo mu'utii hundim muccur worqinne baxamaakkoohan hee'ukko. Salamoon adilla'n doollenne kin bir awwaad bee'aannisa ihaa xigamam hee'u bikkina birinne baxamu luwwi mahim hee'ukkoyyo. Adil Salamoonina Kiiraamina awwaadaan hee'llo'i markaphphi ushe'aaninne Tarisees uulla maroo markabbuwwi hee'ukko. Ee markabbuwwinnem saxxi hiinchonne mataagge worqa, bira, daane'i inqe, daageeraa qamaraa amadda'a waattam hee'llo'o. Adil Salamoon heer uullanne yoo adilluwwiinsi hundiinsim qooroominnee amaxxinnee loban hee'ukko. Heer uullanne yo'i adilluwwi hundim Waa'i uwwu qooroom wo'mmaakkoo woshsha macceesseena Salamooninne edanteena hassam hee'llo'o. Maarag hundam ixxi beyyo waattam hee'llo'i keen hundim kin bi'llekaa worqikaa annanni annanni mu'uta, eddechcha, o'l mu'uta, shitto'o, faradoo baqullaa irifo'i issita'a eebbam hee'llo'o. Adil Salamoon faraxxi gaarre'uwwinaa faradinaa soor kum gol hee'ukko. Ee'isam ixxena 12,000 faradaan hee'llo'o. Ee keenom ixxi hee'oo Yerusaaleemannee faraxxi gaarre'i beero'uwwannee dissukko. Salamoon Efiraaxiis daajjiinsi ki'isaa Filisxeemannee Gibxi uulli tochchi afeebe'ee hee'oo adilluwwa hundam gibissiisam hee'ukko. Salamoonik kin bir Yerusaaleemanne ayyi ki'nnisam hee'ukko; digiphphi haqqim duu'n lugumonne mutoo ayyi oda'isam hee'ukko. Salamoonina Gibxi uulliinsii mulli uulliinsii hundiinsim farado eebakkam hee'akko'o. Adil Salamoonik aganni luxxaanniinsi ki'isaa lasaanchi afeebe'e hiraagaanchi Naataan agannanne, Seelo'i uulliinsette ihoo hiraagaanchi Akiiy hiraagonnee Isra'ee'l adil hee'u Naabaax beet Yoorbi'aam adilla'n doollennem wocam hee'u hiraagaanchi Ido'i kaaltannee kitaabamaa yookko. Adil Salamoon ixxeka heechchi beyyo Yerusaaleemanne issaa Isra'ee'l uullanne hundannem sor hiincho adil ihukko. Ixxim ee lasage ixxi anno'isam lehukko. Ixxi anni Daawiit beero'onnem waammamukko. Ixxi beet Yoorbi'aamim ixxi beyyonne adil ihukko. Oroobi'aama adil issiteena hassam hanaa'n qaranne hee'llam Isra'ee'l minaadab Seekeemanne wixxita'a egetta'a hee'llo'i bikkina ixxi ee beyyo marukko. Adil Salamooniinsi gibaa Gibxa maraa hee'u Naabaax beet Yoorbi'aam ka woshsha macceesaa Gibxiinsi daba'llaa Isra'ee'l uulla waarukko. Ixxom hanaa'n qarinne hee'llam Isra'ee'l sulluwwi weeshisso'o. Ixxuwwim Yoorbi'aaminne maqirem Oroorbi'aam beyyo hincita'a «Kiyyanni neesenne kee'mmaalli gaanjaqqa iyyiisaakko; ee bikkina at ee kee'mmaalli gaanjaqqaa gassi ijaajoo niinniinsi sholliissilas neese kiina ijaajammoommo» yito'o. Oroobi'aamim «Sas balliinsi lasage daba'llitakka'a waallehe» yukko. Ee bikkina ixxuwwi daba'llita'a matto'o. Ee lasage adil Oroobi'aam «Ka mannina an mah dabachcha uwwona soggakkamo?» yaa ixxi anni Salamoon hee'u doollenne awwaaddam hee'llo'i lommanna a'llansukko. Lommannim «At ixxuwwina eroomma issittaa'lleensii ixxuwwi xa'mmichchinam laboo dabachcha dabattaa ixxuwwa liiransittaa'lleensii ixxuwwi kiina hundi ammanem ijaajantamo» yito'o. Ihukkaarem Oroobi'aam lommanni soggo'i woshsha uraa ixxi beshaa ixxena awwaadaan ikko'i harde'i woraadaa a'llansukko. Ixxuwwam «Kiyyanni neesenne iyyiisu gaanjaqqa sholliise» yitam ka manna maha issona eese soggakkamo?» yukko. Oo woraadim «Kiyyanni neesenne kee'mmaalli gaanjaqqa iyyiisaa hee'ukko. Ihukkaarem at kaba ni haniinsi sholliise yitam mannina ‹iikki hoffi maxxaachchi iyyanni lamadiinsi buuphphookko. Iyyanni kee'mmaalli gaanjaqqa ki'nnuwwanne iyyiisaakko. Ihukkaarem an lonsaa kee'mmisoommo; iyyanni ki'nnuwwa halanginne loodaakko; ihukkaarem an ginxi halanginne ki'nnuwwa loodoommo› yihe» yito'o. Adil «Sas balliinsi lasage daba'llitakka'a waallehe» yukkisannem Yoorbi'aamii oo mannii Oroobi'aam beyyo waatto'o. Adil Oroobi'aam lommanni uwwu sogitano gadaa minaadaba quuqisoo woshsha wocimma asheerukko. Ixxim woraadduwwi kutto'i sogitano aa'aa «Iyyanni ki'nnuwwanne kee'mmaalli gaanjaqqa iyyiisaa hee'ukko. An odim gaanjaqqi lobakata kee'mmoo'isa issoommo. Iyyanni ki'nnuwwa halanginne loodaa hee'ukko. Ihukkaarem an ginxi halangiinne loodoommo!» yukko. Eehid ihu mashka'im Seelo'iinsi waaru hiraagaanchi Akiiyinne Naabaax beet hee'u Yoorbi'aam bikkina Waa'i wocu sagar wo'mmoo'isinatte. Adil Oroobi'aamim minaadaphphi sawwite aa'imma sabukkok ee bikkinatti hee'ukko. Isra'ee'l minaadab adil Oroorbi'aam ixxuwwi xa'mmichcha aa'ubee'isa moo'llo'i ammanenne «Niina Daawiitinne maqire mah berechchi yookko? Issayyi beetinne maqirdu niina mah edanchi yookko? Isra'ee'l minaadaba, ki mine elle'e! Daawiita ki mine ege'lle!» yita'a dabatto'o. Ee bikkina Isra'ee'l minaadab ixxi gaqqi minem marukko. Oroobi'aamim xale'i Yihuxxi uullanne hee'llam Isra'ee'l minaadabina adil ihukko. Ee lasage adil Oroobi'aam malaayyi baxo baxxam keeno baxisaanchi hee'u Adooniiraama Isra'ee'l minaadaphphi beyyo asse'ukko. Ihukkaarem ixxuwwi kininne aphphissa'a shito'o. Ee ammanenne Oroobi'aam faraxxi gaarre'enne qaqqisaa saa'llaa Yesusaleema gibaa xorukko. Ee ammaniinsi ki'isaa hanaa'n qaranne hee'oo Isra'ee'l minaadab kaballi afeebe'e Daawiit shumo'onne bangujjukkuuyyi yookko. Adil Oroobi'aam Yerusaaleema afaa lasage Yihuxxi sulliinsii Biiniyaam sulliinsii mat xibbee sadeentayyi kum doo'llanto'oo gaadaanoo weeshaa wixxaa'ukko. Eehid issu mashka'im Isra'ee'l shumo'inne oramaa ixxuwwi uulla dabaraa ixxi anganne isseena sawwaa hee'u bikkinatte. Ihukkaarem Waa'ik sagar Waa'i manchi hee'u Shamaa'iyina Salamoon beetina «Yihuxxi adil Oroobi'aaminaa ee'isam Yihuxxaannonnee Biiniyaa'm uullannee hee'oo Isra'eel hundinamii Waa'i ‹Kuk iinniinsetti ihu bikkina ki'nnuwwina abbaayyuwwinne orantakkotte. Ki'nnuwwi annannichchim ki'nnuwwi minem daba'llitakka'a mallehe› yoolla» yoo sagar waarukko. Ee bikkina Waa'i sagarina ijaajanta'a Yoorbi'aaminne oranteena marimma utta'a ixxuwwi minem matto'o. Oroobi'aam ixxi heechchi beyyo Yerusaaleemanne issaa Yihuxxaannonnee Biiniyaam uullannee girbuwwa baxukko. Oo beero'uwwim Beetaliheema, Eexaama, Taqo'a, Beetxuura, Soka, Adulaama, Gaata, Maareesha, Ziifa, Adooraayima, Laakiisha, Aazeeqa, Xoo'aara, Ayaaloonaa Keebiroonaa yamantam keen hee'llo'o. Yoorbi'aam ee girbuwwa qoxxisaa girbukko. Ee girbuwwinam awwonsaano doo'llaa hurbaata, wee'l zaytaa woyi'n diqaasaa ee'isam agiraa bagadoo tuubukko. Ee beero'uwwam lobakata qoxxisukko; ee'isinne Yihudikaa Biiniyaam sullikaa uulla ixxi gulummi issukko. Qeessuwwii Leewi'i oosii Isra'ee'l uullanne hee'llam beyyi hundiinsim woroo'n qaranne yoo Yihuxxi uulla waatto'o. Yoorbi'aamii ixxi oosii qeessuwwi ikka'a Waa'ina awwaaddam Leewi'i ooso hollito'i bikkina Leewi'i oos ixxuwwika allaachchi biiraa ixxuwwi amaxxaa utta'a Yihuxxi uullaa Yerusaaleemaa waatto'o. Yoorbi'aamim duunnuwwanne otossakkam beyyuwwannee ee'isam habusinaa addichchi misi'l kobi'llanne baxu qophpha'n waa'uwwinaa awwaaddam ixxi gaqqi qeessuwwa doo'llukko. Ee bikkina Isra'ee'l Moollanni Waa'a ixxuwwi wo'm wodaninne hassam keen hundem Isra'ee'l sulliinsim feeranta'a ixxuwwi gaassi anno'ina Moollanni ihu Waa'ina kitima hincaa'lleena Leewi'i ooso awwonta'a Yerusaaleema waatto'o. Ee'isinne Daawiitikaa Salamoonikaa er kobi'lla awwonta'a sas hiincho hundoomam Yihuxxi adillano qoxxisso'o; Salamoon beet oroobi'aaminam har'mmito'o. Oroobi'aam Maahalaata yakkam meentichcho eebukko. Is annikim summi Yaariimoota yakkaman ihukkuuyyi ixxim Daawiit beet hee'ukko. Is amam Abiyaahile yakkamotan ikka'a Issayyena beet beet hee'u Eeli'aabina landichchotte hee'llo'o. Isem Oroobi'aamina Yi'uusha, Shamaariyaa Zaahaamaa yakkam sas goo'n ooso qatto'o. Hofqax ammaniinsi lasge odim Oroobi'aam Ma'ika yamantam Abeseloom landichcho eebaa Abiya, Ataaya, Ziizaa Saloomiitaa yamantam soor goo'n ooso qarukko. Oroobi'aamina tommii sadeenti meentii lohayyi bakki meentii hee'ukko. Ixxuwwiinsim lamiyyee sadeenti goo'n oosoo lohayyi landaa qarukko. Ixxi meentiinsii bakki meentiinsii hundiinsim lonsaa Abeseloom landichcho Ma'ika iittam hee'ukko. Oroobi'aam Ma'ik beeto Abiya adil isseena hasu bikkina ixxi oos hundinam awwonsaanchi issukko. Oroobi'aam qooroominne ixxi goo'n ooso hundam Yihuxxaannonnee Biiniyaa'm uulluwwannee ee'isam girbamaakkoo beero'uwwannee hundannem awwonsaan issukko. Ixxuwwina hasisoo luwwi hundam lonsaa uwwukko. Lobakat meentom ixxuwwina eebukko. Oroobi'aam ixxi adillano qoxxaallisa uullisaahii malaayye siidaahii lasage ixxii Isra'ee'l minaadabii hundim Waa'i seera egerimma utto'o. Ixxuwwim Waa'ina amma'nnantobee'i bikkina Oroobi'aam adil ihu onti hiinchonne Gibxi uulli adil Shiishaaq Yerusaaleemanne weerarukko. Ixxim Gibxiinsi 12,000 faraxxi gaarre'e, 60,000 faradaanoo ee'isam Liibiyika, Sukikaa Tophphe'ikaa dut gaadaanoo amadaa waarukko. Yihuxxekam girbamaakkoo beero'uwwa hundam amadukko. Yerusaaleem afeebe'em waarukko. Ee lasage hiraagaanchi Shamaa'iy Oroobi'aaminaa Shiishaaqa baddita'a Yerusaaleemanne wixxito'i Yihuxxi awwonisaaninaa Waa'i ‹Eese uttakko'i bikkina anim Shiishaaqina ki'nnuwwa higisaa uwwaammo› yoolla» yukko. Adil Yoorbi'aamii Yihuxxi manna awwonsaanii «Waa'i muccura» yita'a ixxuwwi gaga heeshaa'llo'o. Waa'im ixxuwwi gaga heeshaa'llo'isa moo'u ammanenne hiraagaanchi Shamaa'iyina «Ixxuwwi gaga heeshaa'llo'i bikkina an ixxuwwa gatisoommo bagaan bi'isoommoyyo. I quunqam Shiishaaqinne ihaa Yerusaaleemanne dilliisoommoyyo. Ihukkaarem iina ijaajanchannee uulli adilluwwina ijaajanchannee yoo annannaato annanni issita'a laqqeebe'e Shiishaaq ixxuwwa gassookko» yukko. Ee bikkina Gibxi adil Shiishaaq Yerusaaleemanne weeraraa Keesammi mi'nnekaa adi'lla'n mi'nnekaa amaxxaa ee'isam adil Salamoon worqinne baxisu agilluwwaa hundam bogaa massukko. Adil Oroobi'aam Shiishaaq massu agilluwwi bikkenne mulli agilluwwa naas xaarinne baxisaa adilla'n mi'n ooxxi gooca egettam waardiyyuwwi ijaajaanonne uwwukko. Adil Keesammi Mine waaroo ammane waardiyyuwwi ee agilluwwa amadda'a awwontam hee'llo'o. Adil maraa lasonnem dabatta'a waardiyyuwwi minenne dissitam hee'llo'o. Yoorbi'aam ixxi gaga heeshaa'u bikkina Waa'i quunqi ixxeensi daba'llukko; guullaahim bi'isukkoyyo. Yihudannem er luwwi hee'ukko. Adil Oroobi'aamik adillan Yerusaaleemanne qoxxukko; ixxi adil ihu ammane umur soree mat hiinchoo ihaa hee'ukko. Waa'i ixxak summi eehe'enne hee'oo'isina Isra'ee'l uulli hundiinsim doo'llu Yerusaaleemanne afuuraa tommoo lamar hiinchoo gassukko. Ixxi amakim summi Naa'imatti ihaa isem Amoo'n uullitane hee'llo'o. Oroobi'aam Waa'a ixxi wodaninne guullaa hasubee'i bikkina jor baxo baxukko. Adil Oroobi'aam ixxi adi'lla'n doollenne baxu luwwi hundim luxxaanniinsi ki'isaa lasaanchi afeebe'e hiraagaanchi Shamaa'iy kitaabu aganni doonannee hiraagaanchi Iido'i kitaabu shumo'i agannannee kitaabamaakko. Oroobi'aamii Yoorbi'aamii ixxuwwi doollenne amman hundam orantam hee'llo'o. Oroobi'aamim ixxi anno'isam lehukko. Daawiit beero'onnem waammamukko. Ixxi beyyonnem ixxi beet Abiy adil ihukko. Yoorbi'aam Isra'eelanne adil ihu tommonnee sadeenti hiinchonnee Abiyyi Yihuxxi uullanne adil ihukko. Ixxi heechchi beyyom Yerusaaleemanne issaa sas hiincho adil ihukko. Ixxi amam Miikaayaa yamantam ixxek qaranchi Giibiy beero'iinsette ihoo Uri'eel landichchotte hee'llo'o. Abiy lambe'ennee Yoorbi'aam lambe'ennee or hee'ukko. Abiy doo'llanto'oo 400,000 geedduwwinne gaadukko. Yoorbi'aamim 800,000 geedduwwinne gaadukko. Abiy duunaam Efiree'm uullanne yoo Xamaaraayim duunanne firaa ixxeka sagara iimaa'aa «Yoorbi'aamii Isra'eelii macceessehe! Daawiitii ixxi shumo'ii Isra'eelanne heer heerina adil ihamoohan ihukkisa gindamoobee'i sooqixxi hidiro aagukkisa laqqakkammoyyonnihe? Ihukkaarem Salamoonina awwaadaanchi hee'u Naabaax beet Yoorbi'aam ixxi moollannanne bangujjukko. Salamoon beet Oroobi'aam ooshshichchi ihaa maham isseenaa ixxuwwinne uullixxameenaa xanoobee'i ammanenne Yoorbi'aam boqquwwaa awwaad bee'i keenoo wixxaa'aa ixxonne ki'ukko. Kabadem ki'nnuwwi Waa'i Daawiit Shumo'ina uwwu Adillanonne bangujjitakkeena qooddakko'ookko. Eehanninam lobakat o'l gogotaa Yoorbi'aam ki'nnuwwina worqinne baxisu addichchi misilaa amaddakka'a waattakko'ookko. Qeessoomaninne Waa'ina awwaaddam Aaroon oosoo Leewi'i oosoo hollitakko'ookko. Ixxuwwi bikkennem mulli minaadab issitamisam ki'nnuwwi gagina qeessuwwa doo'llitakko'ookko. Mat labeenaa lamar gereebbi ambulluwwaa amadaa ixxi gaga keeseena ki'nnuwwi beyyo waaroo ayyem ki'nnuwwi qophpha'n waa'uwwina qeessechchi issitakkamuulla. Ihukkaarem niina ni Waa'i Moollanna! Neesem ixxo ullummoyyo. Waa'ina awwaadu'uuyyi yo'i qeessuwwi Aaroon ooso; ixxuwwina hara'mmitam keenim Leewi'i ooso. Hundi ammanem daraa maaro'oo Waa'ina shokkiisakka'a hicaa'akkam kitimaa er enji yoo aduruusaa kitim issita'a hincaa'llamuulla. Muccur xaraphpheezannem daabbo'o hincaa'llamuulla. Hundi ammanem worqinne baxamaakkoo caakka dissakkam beyyonne yoo kuraazzuwwa maaro'o maaro'o caakkissamuulla. Neesem ni Moollanni Waa'ika ijaajo egelloommo. Ihukkaarem ki'nnuwwi Waa'a uttakko'ookko. Waa'i niinninnette; niina awwonsaanchim ixxotte. Xurumba amaddo'i Waa'ik qeessuwwi ki'nnuwwanne o'l sagara macceesissammo. Isra'ee'l ooso! Hore'em kaa'llakkeena xantakkambee'i bikkina ki'nnuwwi anno'i Moollanni Waa'inne orantakkotte» yukko. Ihukkaarem Yoorbi'aam ixxi gogotiinsi kollo Yihuxxi manni gogotiinsi afaree'n kollinne dugga'a egettamisina asse'ukko. Kollo odim Yihuxxi manni gogoxxi illaginne orantamisa issukko. Yihuxxi gogotim ixxuwwi kululleeta moo'lla'a kibbanto'isa laqqa'a lasage Waa'i kollonne laatto'o. Qeessuwwim xurumba fuggo'o. Yihuxxi gogotim orina sha'llantu'uuyyi shuutto'o; Waa'im Yoorbi'aamaa Isra'ee'l gogotaa Abiyaannonnee Yihuxxi gogoxxi illagennee aphphisukko. Isra'ee'l gogotim Yihuxxi gogoxxi illagiinsi gibbo'o. Waa'im Isra'eela Yihudina higisaa uwwukko. Abiy ixxi gogotinne maqirem Isra'ee'l ooso kaa'aa kee'mmaa'llisa hawwodantamisa issukko. Ee oranne Isra'eeliinsi 500,000 la'anto'oo gaadaan leto'o. Yihuxxi minaadabim ixxuwwi anno'i Moollanni Waa'anne amma'nnanto'i bikkina kaa'llo'o; Is'raa'eelim sholle'llo'o. Abiy Yoorbi'aam gogota fiikkisukko; Beeti'eela, Yishaanaa Efiroonaa yakkam beero'uwwam ixxuwwi kululleetanne hee'oo hegeegguwwinne kaa'aa amadukko. Ee lasage Yoorbi'aam Abiy adilla'n doollenne od malaayye siideena xanukkoyyo. Lasaanchonnem Waa'i ixxo aphphisu bikkina lehukko. Ihukkaarem Abiy wodukkuuyyi marukko. Ixxim tommoo soor meentoo eebaa lamiyyee lam goo'n oosoo tommoo loh landaa qarukko. Adil Abiy mulli aganni, wocu sagarii baxu baxii hundim hiraagaanchi Iido'i aganni kitaabanne kitaabamaakko. Adil Abiy ixxi anno'isam lehukko. Daawiit beero'onnem waammamukko. Ixxi beet Asa'am ixxi bikkenne adil ihukko. Ixxi adilla'n doollennem tommi hiinchina uullanne xummi ihukko. Asa'am ixxi Moollanni Waa'i illagenne danaamoo xabbeenaa ihaakkoo luwwa issukko. Qophpha'n waa'uwwina kitimakkam beyyuwwaa duunnuwwanne otossakkam beyyuwwaa gindukko. Otossakkeena baxakko'i ki'n utubbuwwa iiqansukko. Asheera yakkam qophpha'n waa'i misilluwwam muransaa uunjukko. Asa'a Yihuxxi minaadab ixxuwwi anno'i Moollanni waa'i doo'lla issitonaa seeraa ijaajoo egettonaa ijaajukko. Duunnuwwanne hee'oo otossakkam beyyuwwaa aduruusa wiriissakkam kiti'm beyyuwwaa Yihuxxi beero'uwwiinsi hundiinsim bi'isu bikkina ixxi adilla'n doollenne xummi lophphaa hee'ukko. Uullanne xummi hee'u bikkina Yihuxxi uulli beero'uwwina girbuwwa baxukko. Waa'im xumma uwwaa hee'u bikkina ee doollenne or hee'ukkoyyo. Asa'am Yihuxxi minaadabina «Ka beero'uwwa banxona; kininnem oontaa qoto'akka'a egerakkam beyyuwwa, gooccuwwaa qirqire'uwwaa axinsona. Ni Moollanni Waa'ika doo'lla issinummi bikkina oono'o kaba ku uulli ni angannette. Neese ixxo hansummo; ixxim hundem koollinnem niina xumma uwwaakko» yukko. Ee bikkina baxxo'o; hundem luwwim taaphanukko. Asa'ana agirinnee bagadinnee orantam 300,000 Yihuxxi gogotii agira amadda'a xiyya chokkottam 28,000 Biiniyaam sulli gaadaanii hee'llo'o. Kukeen hundim qoxxaalli gaadaan hee'llo'o. Zeeraaha yakkam mat Tophphe'i manchi mat miliyoon gaadaanoo sas xibbi faraxxi gare'ee amadaa Yihuda qaseena Maareesh afeebe'e waarukko. Asa'am ixxenne orameena firukko. Maareesh gadanonne yoo Xaafaat cebbanne beyyi beyyo amadda'a orina guddo'o. Asa'am «Waa'a, at malaayyaam gogoxxi angiinsi hoogaano gatissoohane. Ni Moollanni Waa'a, neese keesenne amma'nnammummi bikkina niina hara'mme. Ka xigo dut ihu gogotinne orammeena ki summinne waallaammo. Moollanna, at niina Waa'a; kiinninne uullixxameena xanoo ayyim bee'e» yaa ixxi Moollanni Waa'a uunxukko. Waa'im Asa'aannonnee Yihuxxi illagennee Tophphe'i gogota aphphisukko. Tophphe'i gogotim gibukko. Asa'aa ixxi gogotii Geeraar afeebe'e hollito'o. Waa'i illagennee ixxi gogoxxi illagennee kaa'amu bikkina Tophphe'i gogot beeddukko. Yihuxxi gogotim lobakat qeefado'o boggo'o. Waa'i Geeraa'l hegeegonne hee'oo beero'uwwi manni baa'oo'isa issu bikkina ixxuwwi ee beero'uwwa hundam bi'isso'o. Ee beero'uwwam bogga'a lobakat luwwa massito'o. Ee'isam diinaxxeka oottuwwa gindito'o; lobakat gereebba, fella'aa gaameela'aa qeefaddo'o. Ee lasage Yerusaaleema daba'llito'o. Waa'ik Ayyaan Oodeed beet Azaariyaasanne dillukko. Azaariyaasim adil Asa'anne edameena maraa «Adil Asa'a, Yihuxxekii Biiniyaa'm minaadabii hundim macceessehe! Waa'i ki'nnuwwinnetti ihookkok ki'nnuwwi ixxenne ikkakko'aarette. Ixxom hassakkolas siiddakkamo. Ixxomdu uttakkolas ixxim ki'nnuwwa urookko. Isra'eel lobakat doollina hanqo'i Waa'i, Seerii losisoo qeessii bee'eka hee'am hee'ukko. Ihukkaarem ixxuwwanne hawwi afukkaare Isra'ee'l Moollanni Waa'i kollonne daba'llita'a ixxo hasso'o. Ixxom siiddo'o. Ee doollenne uullanne hee'oo manni hundannem dambaq hee'u bikkina firakka'a aagakkeena xummi hee'ukkoyyo. Waa'i annanni annanni hawwinne u'nnisam hee'u bikkina mat adil mulli adilinne mat beero'im mulli beero'inne oramam hee'ukko. Ihukkaarem ki'nnuwwi baxxakko'i baxika bito siixxitakkam bikkina qoxxehe. Ki'nnuwwi malaayyim qacoone» yukko. Asa'am hiraagaanchi Oodeed beet Azaariyaas wocu hiraaqqi sagara macceesaa qoxxukko. Yihuxxaannonnee Biiniyaam uullannee ee'isam Efireem duunaam uullanne ixxi qeefadaa amadu beero'uwwanne hee'u shigigaa'oo qophpha'n waa'uwwam bi'isukko. Keesammi Mi'n illagenne hee'u kiti'm beyyom areesukko. Asa'ak Moollanni Waa'i ixxennetti ihukkisa moo'lla'a Isra'eeliinsi lobakat manni ixxi beyyo waatto'o. Ixxim Yihuxxekaa Biiniyaamikaa ee'isam Efireemaannika, Minaasaannikaa Simi'oon sullikaa ixxuwwinne hee'llam lobakat manna wixxaa'ukko. Ixxuwwim Asa'a adil ihu tommaannonnee onti hiinchonnee saxxi agananne Yerusaaleemanne wixxito'o. Ixxuwwim qeefaddo'i qeefajjiinsi 700 ba'aalluwwaa 7,000 gereebbaa fella'aa Waa'ina kitimto'o. Ixxuwwi gaassi anno'ina Moollanni ihu Waa'a ixxuwwaanninne wo'm wodaninnee foorinnee hasseena sagara aaggo'o. Isra'ee'l Moollanni Waa'a hasoobee'i ooshshichchi te'im lommanchi goonchi te'im meentichcho ayyim lehona hide'anto'o. Eeham ilillaatinne, xurumbinnee buuxxi xurumbinnee sagara iimaa'lla'a Waa'ina hide'llo'o. Ee lasage xurumbinnee buuxxi xurumbinnee sagara iimaa'lla'a shuurimminnee ilil yimminnee ixxuwwika liirancha moo'isso'o. Wo'm wodaninne guullita'a hidi'lla'atii tiirinnem guullita'a hassa'atii lasage ixxim ixxuwwina siidamu bikkina Yihuxxi minaadab hundim ixxuwwi hiditanonne lobakata liiranto'o. Waa'im ixxuwwi kululleet hundim xummi ihoo'isa issukko. Adil Asa'am ixxi lob amatte hee'llo'i Maa'ika Asheera yakkam qophpha'n waa'i misila uullisso'i bikkina is adilla'n lombiinsi dilliisukko. Ee misilam iiqansaa liitukko. Ee iiqansukkokam Qeediroon cebbanne shokkiisukko. Ihukkaarem Asa'a duunnuwwanne otossakkam beyyuwwa Isra'eeliinsi bi'isubee'aarem ixxi heechchi doollenne hundannem Waa'ina amma'nnamaakkoohan hee'ukko. Ixxi annii ixxii lamim keesso'i worqa, kin biraa ee'isam annanni annanni mu'uttuwwaa Keesammi Minenne dissukko. Asa'am adillano amadu sadii onti hiinchii afeebe'e ee uullanne or hee'ukkoyyo. Asa'a adil ihu sadennee loh hiinchonnee Isra'ee'l adil Baa'iish Yihudanne weerarukko. Ayyim adil Asa'i uulliinsi aageenaa fireenaa xanoobee'isa Raama'a girbukko. Asa'am Keesammi Mi'nnaanniinsii ixxi adilla'n mu'uxxi miniinsii kin biraa worqaa fissaa Damaasqo'onne ihaa gassoo Sooriy adil Beenihaadaadina asse'ukko. Asa'am «Iyyannaannonnee kiyyanni lambe'ennee hee'u hidi'l saga'llisam anii atii hiraaqqi sagara aangona. Oono'o an kiina kin biraa worqaa asse'aammo. Ee bikkina Isra'ee'l adil Baa'iish ixxi gaadaano i uulliinsi fissona ixxenne yoo hidi'l sagara ginditoo'isina uunxoommo» yukko. Beenihaadaadim adil Asa'i sawwitenne iittamaa ixxi gaaxxi awwonsaano Isra'ee'l beero'uwwa qassona asse'ukko. Ixxuwwim Iiyoona, Daana, Abeelbeetmaa'ikaa Niftaalee'm uullanne mu'uta dissakkam beero'uwwaa hundam kaa'lla'a amaddo'o. Baa'iishim eekka macceesaa Raama'anne baxeena amadaa hee'u girba baximma uullisukko. Ee lasage adil Asa'a Yihuxxi manna wixxaa'ukko; Baa'iish Raama'anne girbeena amadu kinaa haqqaa gugguussiisaa Geeba'ikaa Misiphphi beero'uwwaa girbukko. Ee ammane hiraagaanchi Hanaan adil Asa'i beyyo waaraa «Ki Moollanni Waa'anne amma'nnancha uttaa Sooriy adilanne amma'nnantitti bikkina Sooriy gogot ki angiinsi xoraakko. Tophphe'i minaadabinaa Liibiy minaadabinaa lobakat faraxxi gaarre'ii faradaanii hee'ukkoyyonnihe? Ihona bagaan ee ammane Waa'anne amma'nnitti bikkina Waa'i ixxuwwa kaa'lloo'isa issukko. Ixxuwwaanninne wo'm wodaninne ixxonne amma'nnitam keeno hara'mmeena Waa'i heer uulla hundam moo'ookko. Ihukkaarem at qawwoo'm baxo baxxi bikkina or kiinniinsi qee'llooyyo» yukko. Ee bikkina Asa'a ee hiraagaanchonne lobakata quuqaa karaxxi mine aagisukko. Ee ammaniinsi ki'isaa adil Asa'a minaadaphpheka mat mat keeno monginne barche'e issukko. Asa'i adilla'n doollenne asheeroo'iinsi ki'isaa goollo'i afeebe'e baxamu luwwi hundim Yihuxxaannonnee Isra'ee'l adilluwwi aganni kitaabannee kitaabamaakko. Asa'a adil ihu sadennee honsi hiinchonnee ixxek lokki lobakata xissukko. Ee xissinam qaraa'l manna hasukko bagaan Waa'iinsi hara'mmato hasukkoyyo. Asa'am adil ihu sorennee mat hiinchonnee lehukko. Ixxi leeshannem annanni annanni enjaa shitto'oo labakka'a Daawiit beero'onne ixxi gagim lob kiniinsi fere'isaa baxisaakkoo waammanne waammakko'o. Ixxi lombi bikkinam lobakat haqqa tuubakka'a giirakku'uuyyi kee'mmaalli wi'llo wi'llakko'o. Asa'i beyyonne ixxi beet Yoosaafix adil ihukko. Isra'ee'l minaadaba qaseenam ixxi malaayye qoxxisukko. Girbamaakkoo Yihuxxi beero'uwwaa ixxi anni Aasa'a kaa'aa amadu Efireem uulli beero'uwwaa gaadaan egettamisa issukko. Ixxi adilla'n asheero'onne ixxi anni Daawiitika er kobi'lla awwonu bikkina Waa'i Yoosaafixinnetti hee'ukko. Ixxim Ba'aala yakkam qophpha'n waa'a awwonukkoyyo. Ihukkaarem ixxi annika Waa'a hasukko; ixxi ijaajom egerukko. Isra'eel baxam hee'u jor baxom baxukkoyyo. Waa'im adillano ixxena qoxxisukko; Yihuxxi minaadabim Yoosaafixina irifo'o eebukko; ixxim amaxxaamoo lombaamoo ihukko. Waa'am ixxi wodaninne guullaa awwonukko. Ee'isam duunnuwwanne otossakkam beyyuwwaa Asheera yakkam qophpha'n waa'i misilluwwaa Yihudiinsi bi'isukko. Yoosaafix adil ihu saxxi hiinchonne Beenhayila, Abdiya, Zakkaariyaasa, Naatinaa'eelaa Mikkiyaasa yakkam ixxi gassaanoo Yihuxxi beero'uwwanne losissona asse'ukko. Ixxuwwinne maqirem Shamaa'iya, Naataaniya, Zabaadiya, Asaaheela, Shamiraamoota, Yihoonaataana, Adooniya, Xoobbiyaa Xobaadooniyaa yamantam Leewi'i oosoo, Eeliishaamaa'aa, Yihooraamaa yamantam qeessuwwaa edaa asse'ukko. Ixxuwwim Waa'ika See'l Kitaaba amadda'a matta'a Yihuxxi uullanne losissam hee'llo'o; Yihuxxi uulli beero'uwwanne hundannem daba'llantu'uuyyi minaadaba losissam hee'llo'o. Yihuxxi uulli kululleetanne hee'oo adilluwwi hundim baa'oo'isa Waa'i issukko; ee bikkina Yoosaafiixinne oranto'oyyo. Filisxee'm manniinsi mat mat keen irifo'oo gibirina kin biraa Yoosaafiixina uwwitam hee'llo'o. Araphphi uulli mannim ixxuwwi diinaxxi allaachchiinsi 7,700 gereebbikaa 7,700 fella'ikaa ambulluwwa eebba'a uwwitam hee'llo'o. Yoosaafiixim malaayyaamoo hore'em lombaamoo ihukko. Yihudannem girbuwwaa mu'uttuwwa tuubakkam beero'uwwaa baxukko. Ixxi Yihuxxi uulli beero'uwwanne dut baxo baxukko; Yerusaaleemannem lachchi yoo gaadaano dissukko. Oo keenim ixxuwwi abaroos abaroosisinne kanniinsi woroon yo'i keeno. Yihuxxi shaalaqquwwi ijaajaanchi Adiinatti ihaa ixxennem 300,000 gaadaan hee'llo'o. Ixxeensi awwonaa yoo ijaajaanchi Yahoohaanaannatti ihaa ixxennem 280,000 gaadaan hee'llo'o. Yahoohanaaniinsi awwonaa ixxi gaqqi doo'llinne ixxi gaga Waa'ina annanni issu Ziikir beet Amaasiyatti ihaa ixxennem 200,000 gaadaan hee'llo'o. Biiniyaamiinsi malaayyaam gaadaanchi ihu Eeliyaada'atti ihaa ixxennem xiyyaa agiraa lade'llo'oo 200,000 gaadaan hee'llo'o. Ixxo awwonaa odim Yahoozaabaadatti ihaa ixxennem 180,000 orina guddo'oo gaadaan hee'llo'o. Ku keen girbamaakkoo Yihuxxi beero'uwwanne hundannem adil dissu keeniinsi mulli keen ikku'uuyyi adilina awwaaddam hee'llo'i keeno. Yihuxxi adil Yoosaafix amaxxinnee lombinnee la'amaakkoohan hee'ukko. Aki'aab abaroosinnem balluwwi moolloom hee'ukko. Hofqax hiinchiinsi lasage Yoosaafix Aki'aaba moo'eena Samaare'e marukko. Aki'aabim ixxenaa ixxenne maqire hee'u manninaa lobakat gereebbaa mirgo'uwwaa durukko. Raamoot Gala'aadanne maraa ixxenne maqire weerarona atoorassukko. Isra'ee'l adil Aki'aab Yihuxxi adil Yoosaafiixa «Raamoot Gala'aadanne iinninne maqire weerattoohonnihe?» yaa xa'mmukko. Yoosaafixim ixxena dabaraa «Anii atii mato; i minaadab ki minaadaphphisame; kiinninnem weeraroommo. Ihukkaarem Yoosaafix odim Isra'ee'l adilina gaassitaa Waa'ika doo'lla hase» yukko. Ee bikkina Isra'ee'l adil soor xibbi hiraagaano wixxaa'aa «Iraamoot Gala'aadanne weeraronnii uroo?» yaa xa'mmukko. Ixxuwwim «Waa'i ki anganne higisaa uwwoo bikkina mare» yita'a dabatto'o. Ihukkaarem Yoosaafix «Odim xa'mminoommi mulli hiraagaanchi ka beyyonne bee'ennihe?» yaa xa'mmukko. Isra'ee'l adilim Yoosaafixina «Waa'a xa'mminoommi mat mulli hiraagaanchi yookko. Ihukkaarem ixxi iina hinki ammanem joriinsi bagaan eroomma hiraagoobee'i bikkina an ixxo ha'yyoombee'ane. Ixxim Yimiil beet Mikkiyaasatte» yaa dabarukko. Yoosaafixim «Adil eehid yimmi hasisooyyo!» yukko. Ee bikkina Isra'ee'l adil ixxi gassaaniinsi mato weeshaa «Yimiil beet Mikkiyaasa qaqqissaa i beyyo wore» yaa ijaajukko. Ee ammane lamem adilluwwim adilla'n eddechcha edde'lla'a Samaare'i ooxxi gooc gadanonne biiree'n kollinne hee'oo oodo'onne annichchi annichchi adilla'n barcumannem afuutta'a hee'llo'o. Hiraagaan hundim ee adilluwwi illagennette ikka'a hiraago woccam hee'llo'o. Ee hiraagaaniinsim mat hee'u Kanaa'in beet Sedeeqiyaas xaarinne buudo baxaa adil Aki'aabina «Waa'i ‹Ka buudduwwinne Sooriy manni beedditeebe'e qassootto› yoolla» yukko. Mulli hiraagaanim ixxesam yito'o. Ixxenam «Waa'i ki anganne higisaa uwwoo bikkina Iraamoot Gala'aadanne weerare; kaa'llootto» yito'o. Mikkiyaasa weesheena maraa hee'u asse'amaanchi Mikkiyaasina «Mulli hiraagaan hundim adil Aki'aab kaa'eena xanoo'isa moo'isoo hiraaqqi sagara wocco'ookko. Ee bikkina atim ixxuwwisam adila liiransoo hiraago woccona uunxoommo» yukko. Ihukkaarem Mikkiyaas «Hee'oo Waa'i la'ona! I Moollanni yookkoka xale'e wocoommo» yaa dabarukko. Mikkiyaasim adil Aki'aab illagenne hincaa lasage Aki'aab «Mikkiyaasa, Iraamoot Gala'aadanne weerallonnii ullo?» yukko. Mikkiyaasim «Mare; kaa'llootto. Kaa'anta'ahim ki anganne ubbamo» yaa dabarukko. Aki'aabim «Hanqiinsi bagaan mulli luwwa iina woccoobee'isa Waa'i summinne keese hidiisoommok mee'i kore» yukko. Mikkiyaasim «Isra'eel hundim allaaraanchi bee'i gereebbisa duunnuwwanne binnaakkoo moo'ummo. Waa'im ‹Ka minaadabina annichchi bee'e. Ixxuwwi annannichchim ixxuwwi gaqqi mine xumminne daba'llitona› yaakko» yukko. Isra'ee'l adilim Iyoosaafixina «Ixxi iina xale'i joriinsi bagaan eroka hiraagoobee'ane yummoyyonnihe?» yukko. Mikkiyaasim odim «Ee bikkina Waa'ika sagara macceese Waa'i ixxi adillanonne afuuraa iima'n gogotim ixxi makkannee qeddannee uullaakkoo moo'ummo. Waa'im ‹Isra'ee'l adil Aki'aab Iraamoot Galaa'aada maraa ee beyyonne lehona huushiseena xanookkok ayyette?› yukko. Matii mato; mullekii odim mulli sawwite hincaa'ukko. Lasaanchonne mat ayyaan Waa'i illagenne hincaa uullaa ‹An ixxo huushisoommo› yukko. Waa'im ‹Hinkid issitaa?› yukko. Ixxim ‹Maraa Aki'aab hiraagaan hundim qophphano woccamisa issoommo› yaa dabaruko. Waa'im ‹Eehidetti ihulas at huushisseena xantoo bikkina mattaa huushise› yukko» yaa edaa wocukko. Mikkiyaasim «Waa'i ku ki hiraagaan qophpha'n ayyaaninne kiina hiraaggamisa issaakko; eehid issukkokim kiina bichcha qoodu bikkinatte» yukko. Kanaa'in beet Sedeeqiyaas Mikkiyaas kolli hincaa oobo'inne aphphisaa «Waa'i Ayyaan eese hinkeen higaate ku keese atoorassukkok?» yukko. Mikkiyaasim «Maaxamteena kosha aaggoo ammane laqqootto» yaa dabarukko. Ee ammanenne Isra'ee'l adil «Mikkiyaasa amaddakka'a ka beero'i gassaanchi Amoon beyyoo adi'l beet Yoo'aash beyyoo massitakka'a ‹An gaadiinsi xummanne daba'lleembe'e ka mancho karaxxi mine aagissakka'a xale'i kutub waasaa wo'oo uwwehe› yoolla yitakka'a i summinne kullehe» yaa ijaajukko. Mikkiyaasim «Atimdu gaadiinsi xumminne daba'llitlas Waa'i iinninnette ihaa wocukkoyyo yimma!» yukko. Minaadabinam «Minaadaba ki'nnuwwim ee woshsha macceessehe!» yukko. Ee lasage Isra'ee'l adil Aki'aabii Yihuxxi adil Yoosaafixii Raamoot Gala'aada matto'o. Isra'ee'l adilim Yoosaafixina «An orina mulli eddechcha edde'aa aagoommo; ihukkaarem at ki adilla'n eddechcha edde'e» yukko. Ee bikkina Isra'ee'l adil mulli edechcha edde'aa orina marukko. Sooriy adilim faraxxi gaarre'i awwonsaano «Isra'ee'l adiliinsi bagaan hoffaanninnem ihukko lobaanninne mulli manninne ayyennem orantakkotte» yaa ijaajukko. Oo faraxxi gaarre'i awwonsaanim Yoosaafixa moo'lla'a «Kuk Isra'ee'l adila» yaqqanto'o; ee bikkina ixxo qasseena kibbito'o. Ihukkaarem Yoosaafix laarukko. Waa'im ixxena hara'mmukko. Waa'im ixxi kolliinsi ixxuwwa qeessukko. Faraxxi gaarre'uwwa awwonsaanim Isra'ee'l adil ihubee'isa moo'lla'a ixxo hollansimma utto'o. Ihukkaarem gaadaaniinsi mat dangonnem chokaatisu xiyyi o'l qoobe'i lammejja higaa Isra'ee'l adila qasukko. Adilim ixxi faraxxi gaarre'i ushe'aanchina «Eese qasakko'ookko; ee bikkina faraxxi gaarre'e dabattaa ka o'l lambe'iinsi eese fisse» yukko. Orim ee balla hundoomam iibbukkisam hosukko. Isra'ee'l adilim Sooriy gogoxxi illagenne faraxxi gaarre'enne bakke'aa uulli hiimeebe'e afuuraa hee'ukko. Ixxim eelliinchi aagukkuuyyi lehukko. Yihuxxi adil Yoosaafix Yerusaaleemanne yoo ixxi adilla'n mine xummannem daba'llukko. Hanaan beet hiraagaanchi Iyyu'u adil Yoosaafix beyyo maraa ixxena «Baaxiilaano hara'mmimmii Waa'a sabbam keenom iittimmii eranennihe? Ee mashka'inne Waa'ik quunqi ki hanennette. Ihukkaarem Asheerina otossakkam misilluwwa ka uulliinsi bi'issaahii Waa'am guullitaa ki wodaninne hassaahii eroomma issitaatto» yukko. Yoosaafix ixxeka heechchi beyyo Yerusaaleemanne issaa afuurukko. Beersaabehiinsi ki'isaa duunaam Efireem uulli afeebe'e daba'llamukkuuyyi minaadaba ixxuwwi gaassi anno'i Moollanni Waa'i kollonne dabarukko. Girbamaakkoo Yihuxxi uulli beero'uwwanne hundannem gassaano doo'llukko. Ixxuwwinam «Ki'nnuwwi oogattakkamok Waa'inatte bagaan manni bikkinayyo; ee bikkina oogato'i hundannem Waa'i ki'nnuwwinne yoo bikkina oogattakkam ammane ki'nnuwwi gaga ege'llehe. Hanqa boqqisimmi, golo'immii maqanxa aa'immii ni Moollanni Waa'i beyyonne bee'an ihu bikkina kabadem Waa'a baddimminne ege'llitakku'uuyyi oogattehe» yukko. Yoosaafix ixxuwwika heechchi beyyo Yerusaaleemanne issita'a Waa'i summinne hanqa oogattonaa manni lambe'enne ki'oo fito daannoominne moo'llonaa Leewi'i ooso, qeesuwwaa moolli awwonsaanoo Yerusaaleemanne doo'llukko. Ixxuwwinam «Waa'a badditakku'uuyyi amma'nnanchinnee wo'm wodaninnee guullitakka'a awwaaddehe. Beero'onne hee'llam ki'nnuwwi abbaayyuwwiinsi xiiqqi woshsha, te'im seera, ijaajo, siyya'aa heechchi qaanqaa moo'oo'isinne ayyi woshshim ki'nnuwwi illagenne hincoo ammane Waa'a hawwoddambee'isa qoxxissakka'a kullehe. Oo beelas Waa'i quunqi ki'nnuwwannee ki'nnuwwi abbaayyuwwannee dillookko. Ee'isa issitakkolas Waa'a hawwoddakkamoyyo. Waa'an ihu luwwanne hundannem qeessuwwa awwonsaanchi Amaariyyi daanni ihukkuuyyi Yihuxxi uulli gassaanchi hee'u Isma'eel beet Zabaadiy odim adi'llan ihu woshshanne hundannem daanni ihaa doo'llamaakko. Leewi'i oosim ki'nnuwwina gassaan ikka'a awwaaddona. Qoxxitakka'a baxxehe. Waa'im er baxo baxoo keeninne maqir ihona!» yukko. Ee lasage Moo'aaphphekii Amoo'n uulli o'l googotii Ma'uu'n gogota edda'a Yoosaafixinne oranteena waatto'o. Mat mannim waaraa Yoosaafixina «Sooqixxi dambalaq eeqidiinsi Eedoo'm uulliinsi lobakat gogot waaraakko. Oono'o ixxuwwi kaba Eengaadannette» yukko. Yoosaafixim lobakata baddukko; Waa'am uunxukko; Yihuxxi uullanne hundannem soommano alallaatisukko. Yihuxxi minaadabim Waa'a uunxeena wixxukko; Yihuxxi beero'uwwiini hundiinsim Waa'a uunxeena waarukko. Yoosaafixim Keesammi Mi'n haareechchi wixxixxi beyyi illagenne Yihuxxaannonnee Yerusaalee'm dummichchi illagennee uullukko. Ixxim «Gaassi niyyanno'ina Moollanni Waa'a! Iimanenne hee'lloottok xale'i atette; uulli adilluwwa hundam gassitoottok atette. Wodii malaayyii hundim kiihane. Kiinninnem uullixameena xanookkok ayyim bee'e. Ni Moollanna! Ka uullanne hee'llo'i mulli minaadaba ki minaadab ikko'i Isra'ee'l illagiinsi yaayyitaa ki beshichchi ihu Abrihaam shumo'ina heer heerina uwwittok ateyyonnihe? Ixxuwwim ka uullanne affutta'a ka Keesammi Mine ki summi bikkina baxxa'a ‹Neesenne jor luwwi oohim or te'im booban te'im sibaar ihuta'n ka Mi'nnaannonnee ki illagennee uullinaa ee hawwi bikkina ki kollonne laalloommo. Atim macceessaa neese gatissootto› yito'o. Oono'o kaba «Gaassi niyyanno'i Gibxiinsi fitto'i ammane ixxuwwi uulla aaggambee'isaa ixxuwwam nakkitambee'isaa issitti Amoo'nnek, Moo'aaphphekii Eedoo'm mannii kaba neesenne weeratto'ookko. Ixxuwwi kaba niina miqqu'uuyyi yo'ok at niina gulummi issitaa uwwitti uulliinsi hollita'a neese fissimma. Ni Moollanna! At ixxuwwanne oogattooyyonnihe? Neesenne weeraru ka lobakat gogotinne uullixxammoommi malaayyi niina bee'i bikkina maha issinnoomda'e lanqoommoyyo. Ihukkaarem ni illi ki kollonnette» yaa uunxukko. Yihuxxi manni hundim ixxuwwi meentinnee oosinnee hundinnem ciilluwwam edda'a ee Keesammi Mi'n illagenne uullita'a hee'llo'o. Ee ammane Leewekkichchoo Asaaf shumo'anee ihu Zakkaaryaas beetonne Yaahazii'eelanne minaadabinne maqirem uullaakkoohaannonne Waa'ik Ayyaan dillukko. Ixxi annim Baanaay beeto, Baanaay Yi'ii'eel beeto, Yi'ii'eel Maataaniy beeto. Yaahazii'eelim «Adil Yoosaafiixa, ki'nnuwwi Yihudannee Yerusaaleemannee hee'llakkam minaadaba macceessehe; Waa'i ‹Ka xigo lobakat ihu gogotiinsi ki'aa ki'nnuwwi baa'llakkottee muggitakkottee. Or Waa'anne bagaan ki'nnuwwaneyyo. Ee bikkina soodo ixxuwwi Xiix gadanonne yoo daba'llamakkam beyyo iim waattu'uuyyi qassehe. Ixxuwwam Yiru'eel udma'i uullanne massoo cebbi tachchonne siiddakkamo. Ka oranne orantakkamok ki'nnuwwayyo; ki'nnuwwi xale'i beyyi beyyo amaddakka'a egallehe. Waa'i ki'nnuwwina uwwoo kaachcha moo'llakkamo. Yihudannee Yerusaaleemannee hee'llakkam minaadaba, Baa'llakkottee muggitakkottee. Soodo mattakka'a orammehe. Waa'im ki'nnuwwinne maqire ihookko› yoolla» yukko. Ee lasage adil Yoosaafixii ixxenne maqire Yihudannee Yerusaaleemannee hee'llam minaadabii hundim uullanne aad heeshita'a Waa'ina otossito'o. Odim Qa'aat moolliinsii Qoora'i moolliinsii ikko'i hofqax Leewi'i oosim uullita'a sagara lobakata iimaa'lla'a Isra'ee'l Moollanni Waa'a galaxxito'o. Minaadabim la'm balli daram ki'aa Taqo'aa yakkam beyyi gadanonne yoo udma'i uulla marukko. Ee uulla mareena ki'ukkisam Yoosaafix «Yihudannee Yerusaaleemannee hee'llakkam minaadaba, macceessehe; ki'nnuwwi Moollanni Waa'anne amma'nnehe; qoxxaalluwwam ikkakkammo. Ixxi hiraagaan kuttam luwwam amma'nnehe» yukko. Adil Yosaafiixim minaadabinne maqire atooraraa lasage zammaaraan Waa'i lombina edde'akkam eddechcha edde'lla'a «Waa'a galaxxehe; ixxi iitti heer heerina qoxxaa hee'oohane» yita'a zammattu'uuyyi o'l gogoxxi illaginne higgona ijaajukko. Zammaaraanim zammarimmaa Waa'a galaxximmaa asheeramukkisam Waa'i Yihuda qaseena waaru Amoo'nnaannonne, Moo'aaphphi gogotannee Seeyi'l duu'n mannannee la'amoobee'i ora ki'isaa ixxuwwi kaa'antamisa issukko. Ee bikkina Moo'aaphphi gogotii Amoo'n gogotii Eedoo'm gogotanne ki'lla'a guullita'a bi'isso'o; ee lasage ixxuwwina'i ixxuwwim beeddixxanto'o. Yihuxxi uulli mannim udma'i uulla aad moo'isoo qoffit beyyo affa'a ee lobakat diina'i gogota moo'llamaare oo diina'i hundim beeddaa leesh uullanne ubaa moo'llo'o. Mat manchim gibaa xorukkok hee'ukkoyyo. Ee lasage Yoosaafix ixxi gaadaaninne maqirem qeefado'o masseena marukko. Ixxuwwim fooraam diinatika lobakata, googonne itakkeena amadakkam luwwa, o'l mu'uta, eddechchaa mulli bito xee'aalli mu'uttuwwaa eekke'enne siiddo'o. Qeefado'im lophphimmiinsi ki'aa wixxaa'immi sas balla massukko. Soo'l ballanne kaballi afeebe'e «Barak cebba» yamamoo beyyonne wixxito'o. Waa'i issu luwwi hundinam ixxo galaxxito'o. Oo cebbim kaballi afeebe'e «Barak cebba» yamamukkok ee bikkinatte. Ee lasage Waa'i ixxuwwi diina'anne kaachcha uwwu bikkina Yihuxxekii Yerusaalee'm mannii hundim Yoosaafix awwonsatinne liiranchinne Yerusaaleema daba'llito'o. Yerusaaleema affa'ahim Diita'inne, Maasinqo'innee xurumbinnee kibbanta'a zammattu'uuyyi Keesammi Mine aago'o. Waa'i Isra'ee'l diina'a hinkid issaa kaa'uda'e macceesso'i mulli adilluwwi hundim baachchinne wo'mmito'o. Ee bikkina Yoosaafix uulla xumminne awwonsukko; Waa'im kolli hundinnem ixxina xumma uwwukko. Yoosaafix Yihuxxi uullanne adil ihukkok umur sadee onti hiinchoo ihaakkoohaannonnette. Ixxi heechchi beyyom Yerusaaleemanne issaa lamiyyee onti hiinchoo gassukko. Ixxi amama Azuubaa yamantaman ihaa Shiilha'ina landichchotte hee'llo'o. Yoosaafix ixxi anni Aasa'i googo awwonukko; ee googiinsim firukkoyyo. Waa'i illagennem er luwwa issukko. Ihukkaarem duunnuwwanne hee'oo otossakkam beyyuwwa bi'isukkoyyo; minaadabim ixxuwwi gaassi anno'ina Moollanni ihu Waa'i kolli wo'm wodaninne daba'llukkoyyom hee'ukko. Iyyoosaafix adil ihu luxxi ammanniinsi ki'isaa lasaanchi afeebe'e issu mulli luwwi hundim Hanaan beet Iyyu'i kitaabu Isra'ee'l oos adilluwwi aganni kitaabanne kitaabamaa yookko. Ee lasage Yihuxxi uulli adil Yoosaafix lobakat jor luwwa baxaa hee'u Isra'ee'l uulli adil Akaaziyaasina beshichchi ihukko. Lamim mat ikka'a Tariseesa maroo dadda'l markabbuwwa Exiyoongaabiranne baxisso'o. Ihukkaarem Maareesh uulliinsetti ihoo Doodaawaa'i beet Eelii'eezer Yoosaafixina «Akaaziyaasinne maqire mat ikkaa iittanti bikkina at baxxitti luwwi hundam Waa'i bi'isookko» yaa qoxxisaa kuraa hee'u bikkina markabbuwwi hundim iiqamukko; dambalaq hanennem matteena horem xanto'oyyo. Adil Yoosaafix lehukko. Daawiit beero'onne hee'u adilluwwi waammi beyyonne waammamukko. Ixxi beyyonnem ixxi beet Yihooraam adil ihukko. Yihuxxi adil Yoosaafix beet hee'u Yihooraamina loh abbaayyuwwi hee'llo'o. Ixxuwwim Azaaryaasatte, Yihii'eelatte, Zakkaariyaasatte, Ezaariyattee Mikaa'eelattee Shafaaxyattee hee'llo'o. Ixxuwwi annim lobakat biraa worqaa bito xee'aalli ihu annanni annanni mu'uttuwwaa hundam ixxuwwina uwwukko. Ee'isam Girbamaakkoo Yihuxxi beero'uwwanne annannichchom mat mat beero'onne daanni issukko. Ihukkaarem Yihooraam ixxena won beet ihu bikkina ixxi beyyonne adil ihoo'isa issukko. Yihooraam ixxi adillano qoxxisaa lasage ixxi abbaayyuwwa hundam mat mat Isra'ee'l awwonsaaninne maqirem bisa'inne shukko. Yihooraam adil ihukkok sadee lam hiinchi woraaddichchoo hee'ukkuuyyatte hee'ukko. Ixxim ixxi heechchi beyyo Yerusaaleemanne issaa sadeenti hiincho gassukko. Aki'aab landiinsi mato eebaa hee'u bikkina adil Aki'aabikaa Isra'ee'l mulli adilluwwikaa jor googo ixxim maraa Waa'i illagenne baaxiilo baxukko. Ihona bagaan Waa'i Daawiit shumo'iinsi adillano bi'iseena hasukkoyyo. Oohim ihukkok Waa'i gaassaahim adil Daawiitinne hidiro aagaa hee'u bikkinaa Daawiit shumo'iinsi adillan muramoobee'an ihukkisa qoxxaalli neeyyaxxi sagara uwwaa hee'u bikknatte. Yihooraam adilla'n doollenne Eedoo'm uulli manni Yihuxxi minaadabanne bangujjaa ixxi gaqqi adila uullisukko. Ee bikkina Yihooraam gaaxxi awwonsaanoo faraxxi gaarre'uwwaa amadaa gaadimminne Eedoo'm uulla qasukko. Ee beyyonnem Eedoo'm gogot ixxuwwa kibbito'o. Ihukkaarem Iiyooraamii ixxi gogotii hiimonne ixxuwwa kibbito'i gogotiinsi iiqqa'a xotto'o. Ee ammanniinsi ki'isaa kaballi afeebe'em Eedoo'm manni Yihuxxi mannanne bangujjito'isam yo'o. Adil Yihooraamim gaassi ixxi anno'ika Moollanni Waa'a uru bikkina Libi'n beero'i manni ee doollennem Yihuxxi mannanne ki'llo'o. Ixxim Yihuxxi uulli duunnuwwanne gatoo'n mulli minaadab otossitam beyyuwwa baxukko. Yihuxxi minaadabii Yerusaalee'm minaadabii baaxiilo baxxa'a Waa'a kichche'issamisam issukko. Ee lasage hiraagaanchi Eeliyaas «Kiyyanni Daawiitina Moollanni ihu Waa'i ‹Kiyyanni adil Yoosaafiixika te'im ki lob anni hee'u adil Aasa'aka er googo awwontittoyyo. Ihukkaarem at Isra'ee'l adilluwwi jor googo awwontaatto. Aki'aabii ixxi lasonne adil ikko'i adilluwwii Isra'ee'l minaadab baaxiilo baxxamisa issito'isam atim Yihuxxekii Yerusaalee'm minaadabii baaxiilo baxxamisa issitaatto. Ee'isam kiinniinsi e'llitam kiyyabbaayyuwwaa kiyyanni mi'n abaroosaa shitaatto. Ee bikkina Waa'i ki minaadaba, ki ooso, ki meentoo kiina yoo luwwaa hundam kee'mmaalli boobaninne aphphisookko. At ki gagim balliinsi ballanne baasukkuuyyi maroo hilleenni jabbinne jabbitootto. Lasaanchonnem oo jabbi ki hilleenna xoqolaa biiranne fissookko› yoolla» yoo assi kura Yooraamina asse'ukko. Dambalaq gammalanne wiiddanta'a hee'llam Tophphe'i manni gadanonne Filisxee'm uulli mannii Araphphi uulli mannii hee'llam hee'llo'o. Waa'im ixxuwwa Yihooraaminne orantamisa issukko. Ixxuwwim Yihuxxi uulli manna weeratta'a amaddo'o. Adilla'n mi'n mu'uta hundam boggo'o. Yooraam lasaanchi beet hee'u Akaaziyaasiinsi bagaan adi'l meentoo goo'n oosoo hundam qeefadda'a massito'o. Ee lasage Waa'i fayye'eena xanoobee'i kee'mmaalli hilleenni jabbi Yihooraamanne ihoo'isa issukko. Oo jabbim ixxo lobakata hawwisukkuuyyi hee'aa lasage la'm hiinchi beeddukkuuyyi ee jabbi mashka'inne ixxi hilleenni hundim biiranne firaa lobakatisa hawwaa lehukko. Minaadabim ixxuwwi anno'ina issitam hee'llo'isa ixxena waammi ballanne haqqa tuubba'a giira giitto'oyyo. Yihooraamik umur sadee lam hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa sadeenti hiincho gassukko. Lehu ammanennem ayyim ixxena kichchee'ukkoyyo. Daawiit beero'onne waammamukko bagaan adilluwwi waammi beyyonne waammamukkoyyo. Araphphi uulli mannii ixxuwwinne maqire hee'llo'i mannii Yihuxxi uulla qasso'i ammane hoffan hee'u Akaaziyaasiinsi bagaan adil Yooram goo'n ooso hundam shita'a hee'llo'i bikkina Yerusaalee'm minaadab Akaaziyaasa anni bikkenne adil issito'o. Ee bikkina Yihuxxi uulli adil Yihooraam beet Akaaziyaas Yihuxxi uullina adil ihukko. Akaaziyaasik umur lamiyyee lam hiinchoo ihaakkoohaannonne adil ihukko. Ixxi heechchi beyyom Yerusaaleemannette issaa mat hiincho gassukko. Ixxi ama adil Oomiirina beet hee'u Aki'aab landichchotte hee'llo'o. Isem jor sogitano soggam hee'llo'i bikkina ixxim adil Aki'aab jor googo awwonaa marukko. Ixxi anni lehaa lasage Aki'aab abaroos soggam hee'llo'i bikkina ixxim Aki'aab mi'n abaroos issukkisam Waa'i illagenne jor luwwa issukko. Ixxuwwikam jor sogitano aa'aa Isra'ee'l adil Aki'aab beet Yooraam Sooriy uulli adil Azaaheela qaseena Raamoot Gala'aada maru ammane ixxenne maqirem marukko. Sooriy uulli mannim Yooraama qassa'a madisso'o. Ixxim ee madiinsi fayye'eena Yizra'ee'l beero'o daba'llaa marukko. Akaaziyaasim Yooraama xa'mmeena ee beyyo marukko. Akaaziyaas Yooraama xa'mmeena marimma Waa'i Akaaziyaas ubimmina mashka'i ihoo'isa issukko. Akaaziyaas ee beyyo afukkisam Niimshii'i beeto Iyyu'u aa'eena Yooraaminne maqirem firukko. Iyyu'um Aki'aab mine bi'isona Waa'i doo'llaakkoo manchi hee'ukko. Iyyu'u Aki'aab minenne Waa'ika oogato'o oogatukkuuyyi yoohaannonne Akaaziyaasa awwonta'a ixxenne maqirem waatta'a hee'llo'i Yihuxxi manni awwonsaanoo Akaaziyaas qarmannaa eekke'enne siidaa hundam shukko. Akaaziyaasim Samaarya'i uullanne maaxamaakkoo beyyonne hassa'a siiddo'o. Iyyu'i beyyom wotta'a shito'o. Ihukkaarem «Waa'a muccur wodaninne hasam hee'u ixxi lob anni adil Yoosaafix lombi bikkina yita'a ixxi leesha waammito'o. Ee bikkina Akaaziyaas abaroos lambe'iinsi adillano aa'aa awwonseena xanoo manchi ayyim gatukkoyyo. Adil Akaaziyaas ama Ataaliya is beeto shakko'isa macceesso'isam Yihuxxi manni adilluwwi abaroos ikko'i keeno hundam shishiisso'o. Ihukkaarem adil Yihooraam landichcho Yihosheeba'a shakkam daannuwwi lambe'iinsi Yoo'aasa daphphaa'lla'a gatissa'a massita'a ixxoo ixxom li'issamotaa Keesammi Mi'n gadanonne yoo jagaranne maaxxo'o. Isem Akaaziyaasina aayyatte hee'llo'o. Is manchim Yihooyaada yakkam qeesichchi hee'ukko. Ixxim Ataalya adilla'n doollenne hundannem Keesammi Minenne loh hiincho hundam maaxamaa hee'ukko. Lama'l hiinchonne Qeessichchi Yoodaah xibbe awwonsaan hee'llo'i Yiroohaam beet Azaariyaasinne, Yihoonaan beet Isma'eelinne, Oobeed beet Azaariyaasinne, Adaay beet Maa'iseeyyinnee Ziikir beet Eel saafaaxinnee hidi'l sagara aageena xanoohan ihukkis ixxena la'amukko. Ixxuwwim Yihuxxi uullanne hee'oo hundem beero'uwwam matta'a Leewi'i oosoo moolli awwonsaanoo hundam ammadda'a Yerusaaleema waatto'o. Ixxuwwi hundim mat ikka'a Keesammi Minenne wixxita'a adi'l beet ihu Yoo'aasinne maqirem hidi'l sagara aago'o. Qeessichchi Yoodaahem «Waa'i Daawiit shumo'ina wocu neeyyaxxi saga'llisanne kaba adil ihimmi hasisookkok Iiyyoo'aasatte. Kaba neese issimmi hasisookkokim eehane usheexxaxxi ballanne awwaadina waattam qeessuwwiinsii Leewi'i oosiinsii saxxi suumoom Keesammi Mi'n ooxxi gooccuwwa egettona. Mat saxxi suum odim adila'n mine egettona. Lassaanchi saxxi suum odim «Shooho'i ooxxi gooca» yamamoo beyyo egettona. Gatto'i mulli manni hundim Keesammi Mi'n wixxixxi beyyonne wixxitona. Awwaadonne yo'i qeessuwwiinsii Leewi'i oosiinsii bagaan ayyi manchim Keesammi Mine aagoone. Qeessuwwii Leewi'i oosii Waa'ina annanni ikko'o keen ikko'i bikkina aaggona. Ihukkaarem mulli minaadab Waa'i ijaajo egatta'a Keesammi Miniinsi biireen ikkona. Leewi'i oos o'l mu'uta ixxuwwi anganne amadda'a adila kibbita'a egettona. Adil maroo beyyo hundam mattona. Keesammi Mine aageena hasoo ayyi manchim lehona» yukko. Leewi'i oosii Yihuxxi minaadabii qeessichchi Yoodaahe ijaaju ijaajo hundam wonshito'o. Yoodaahem usheexxaxxi ballanne baxiinsi usheexximmi hasisoo Leewei'i ooso geegeesukkoyyom hee'ukko. Ee bikkina gooca egettam keenii egerimmi ammane guullito'i keenii hundim eekke'enne hee'llo'i bikkina o'l awwonsatina ihoo qax manni hee'ukko. Yoodaahem Keesammi Minenne hee'oo Adil Daawiit bagadduwwaa agilluwwaa o'l awwonsaanina uwwukko. Minaadab annannichchim o'l mu'uta ammadda'a kitima hincaa'akkam beyyonne Keesammi Mi'n illagenne kululita'a uullita'a adila egettamisa issukko. Ee lasage Yoodahee ixxi oosii Yoo'aasa fissita'a ixxi horoorennem adilla'n mare'e issita'a adil ihona annanni issita'a doo'llito'o. Hidi'l kitaabam uwwita'a adil issito'o; minaadab hundim sagara iimaa'aa «Adil heer heerina hee'ona» yukkuuyyi shuurukko. Ataaliyam minaadab adilina geeramoo'isaa ilil yoo'isaa macceessa'a minaadab wixxaa yoo Keesammi Mi'n beyyo qaqqissa'a waatto'o. Isem eekke'e affo'isam adil losamaakkoo see'llisinne adilluwwina qoodamu Keesammi Mine aagakkam goocanne yoo utuphphi gadanonne o'l awwonsaaninnee xurumba fuggam keeninnee kibbamaa uullaakkoo moo'llo'o. Minaadabim liiranchinne wo'mmaa ilil yam hee'ukko. Xurumba fuggam keenim fuggam hee'llo'o. Zammaaraanim mazmuu'l mu'utinne galaxxi mazmuura zammattam hee'llo'o. Ataaliyam nadadda'a is eddechcha dereetta'a «Kuk bangujjaato! Kuk bangujjaato!» yita'a shuutto'o. Yoodaahem Ataaliya Keesammi Mi'n gadanonne letona hasubee'i bikkina o'l awwonsaanina «Makkinnee qeddinnee uullu waardiyyuwwi lambe'inne higissakka'a massehe. Ise lehiinsi gatiseena hasoo manchi yoohaarem shi'llehe» yaa ijaajukko. Ixxuwwim isse ammada'a adilla'n mine massito'o. Eekke'em «Farad aagoo gooca» yakkam beyyonne shito'o. Qeessichchi Yoodaahe ixxi gagim, adil Yoo'aasii minaadabii Waa'ina minaadab ikko'isa areesseena hidi'l sagara aaggamisa issukko. Ee lasage minaadab hundim mat ikka'a Ba'aala yakkam qophpha'n waa'ina otossakkam mine matta'a gindito'o. Kitima kitimakkam beyyoo misilluwwaa hundam xaansito'o. Ba'aalina awwaadoo Maataana yakkam qeessichchom kiti'm beyyuwwi illagenne shito'o. Yoodaahem qeessuwwaa Leewi'i oosoo Keesammi Mi'n bax awwonsaan issukko. Ixxuwwim adil Daawiit qoodu baxo baximmaa Muse'e See'llisinne Waa'ina hincoo kitimmuwwa shokkiissa'a hicaa'immaa hee'ukko. Ee'isam Daawiit ixxuwwa ijaajukkisinnem mazmuurinnee liiranchinnee issitam hee'llo'o. Odim see'llisinne muccurubee'i ayyi manchim Keesammi Mine aagoobee'isa egettam egeraano Keesammi Mi'n ooxxi gooccuwwanne egessiisukko. O'l awwonsaan, la'anto'oo lommanni, minaadaphphi awwonsaanii gatto'i mulli minaadabii hundim Yodaahenne maqirem Waa'i miniinsi ki'isaa adilla'n mi'n beyyi afeebe'e adila kibbita'a massitto'o. Adilla'n mi'n lob goocinnem aaggo'o. Adilim adilla'n barcumanne afuurukko. Minaadab hundim lobakat liiranchinne wo'mmukko. Ataaliya leto'i bikkina beero'oomanne xummi leeraa hee'ukko. Yoo'aas qaramu lama'l hiinchonne Ayihuxxi uullanne adil ihukko. Ixxi heechchi beyyom Yerusaaleemanne issaa sor hiincho gassukko. Ixxi amam Xiibiyaa yamantamotan ikka'a isem Beersaabe'i beero'itan hee'llo'o. Qeessichchi Yoodaahe foorinne hee'u doollenne hundannem Yoo'aas Waa'a liiransoo luwwi xale'e issam hee'ukko. Yoodaahe adil Yoo'aasina lam meento doo'llaa hee'ukko. Ixxuwwim goonaa landaa ixxena qatto'o. Yoo'aas adil ihu hofqax ammanniinsi lasage Keesammi Mine areeseena hasukko. Ee bikkina qeessuwwaa Leewi'i oosoo wixxaa'aa «Yihuxxi uulli beero'uwwa hundam mattakka'a Keesammi Mine hiinchonne hiinchonne areesimmina ihoo diinate Isra'ee'l minaadab hundiinsim qaqissakka'a wixxaa'llehe» yaa ijaajukko. Ihukkaarem Leewi'i oos innaannito'o. Ee bikkina adil Yoo'aas hundiinsi lob qeessichchi ihu Yoodaahe weeshaa «Waa'ina awwaadaanchi Muse'e Keesammi Dukkaananne ihoo awwaadina hasisoo gibiro Isra'ee'l oos miqqona ijaajukkoka Yihuxxi uullannee Yerusaaleemannee hee'llam minaadabiinsi Leewi'i oos wixxaa'llamisa issitbee'ek mahinatte?» yukko. Ee ammane ee joratte hee'llo'i Ataaliy oos Keesammi Mine iiqqa'a aagga'a keesamaakkoo Keesammi Mi'n mu'uttuwwi gatoo'n Ba'aala yamamoo qophpha'n waa'ina awwaadoo'isa issita'a hee'llo'o. Adil Yoo'aas «Diinate wixxaa'akkam saaxina baxxakka'a Keesammi Mi'n ooxxi gooc biiree'n kollinne dissehe» yaa Leewi'i ooso ijaajukko. Ee lasage Isra'ee'l oos udma'i uullanne hee'llo'i ammane Waa'ina awwaadaanchi hee'u Muse'e ijaaju gibiro Waa'ina uwwitona Yihudannee Yerusaaleemannee alallaatamukko. Oo alallaatim minaadabaa awwonsaanoo hundam liiransu bikkina diinate eebba'a saaxinanne wonshito'o. Leewi'i oosim balli hundam ee saaxina massita'a adi'l mi'n awwonsaanina uwwitam hee'llo'o. Saaxinim diinatinne wo'mmu amman hundam adilla'n mi'n kitaabaanchii hundiinsi lob qeessichchi doo'llu manchii saaxiniinsi diinate fissita'a lasage dabatta'a beyyonnem dissitam hee'llo'o. Eeham balli hundam issimminne lobakat diinate wixxaa'llo'o. Adilii qeessichchi Yoodaahee ee diinate Keesammi Mine areesisseena qoodanto'i mannina massita'a uwwitam hee'llo'o. Oo mannim ee diinatinne Keesammi Mine dabatta'a areesisseena xantam gimbaanoo angi bax qooroom yoo keenoo xaaraa naas xaaraa baxxeena xantam baxaanoo baxissam hee'llo'o. Oo baxaanim qoxatta'a baxxam keen hee'llo'i bikkina ee Keesammi Mine illagee'nsanem dabatta'a areesisso'o. Ixxuwwim ee baxo guullita'a lasage gatu diinate adil Yoo'aasinaa qeessichchi Yoodaahinaa uwwito'o. Ixxuwwim ee gatu diinaatinne Keesammi Mi'n awwaadinaa kitima hicaa'imminaa awwaadoo saahinnuwwaa mulli annanni annanni mu'uttuwwaa bitaa'llo'o. Yoodaahe foorinne hee'u doollenne hundannem Keesammi Minenne shokkiisakkam kitim uulloobee'isa hundi ammanem hincam hee'ukko. Yoodaahe lobakata lomma'nnaa lasage umur 130 hiinchoo ihaa lehukko. Ixxim Isra'ee'l minaadabina, Waa'inaa Keesammi Mininaa baxu er bax bikkina Daawiit beero'onne hee'oo adilluwwi waammi beyyonne waammamukko. Yoodaahe lehaa lasage Yihuxxi manni awwonsaan Adil Yoo'aas beyyo waatta'a ixxena ijaajantaman ihukkisa la'isso'o. Ixxim ixxuwwi yito'i woshsha aa'aa ee sawwitenne iittamukko. Ixxuwwim ixxuwwi anno'i Waa'a ihu Moollanni minenne otossimma utta'a Asheeraa yakkam qophpha'n waa'i misilluwwannee qophpha'n waa'uwwannee otossito'o. Ee baaxiilo baxxo'i bikkina Waa'i quunqi Yihudannee Yerusaaleemannee dillukko. Waa'im hiraagaano ixxuwwa ixxi kollonne dabattona asse'ukko. Hiraagaanim qoxxissa'a kutto'o. Ihukkaarem ixxuwwi macceesimma sabbo'o. Ee lasage odim Waa'ik ayyaan qeessichchi Yoodaahe beet Zakkaariyaasanne dillukko. Ixxim minaadab moo'lleena xantam qoffit beyyonne uullaa «Waa'i ‹I ijaajo mahina ginditakkamuulla? Ee bikkina ki'nnuwwina mahim taaphanooyyo. Ki'nnuwwi Waa'a uttakko'i bikkina ixxim ki'nnuwwa uraakko» yukko. Ihukkaarem ixxuwwi hiraagaanchi Zakkaariyaasanne dollotto'o. Ixxom adi'l ijaajinne Keesammi Mi'n wixxixxi beyyonne kininne aphphissa'a shito'o. Adil Yoo'aas Zakkaariyaas anni Yoodaah ixxena issu eroomma hundam xadaa uraa Zakkaariyaasa shishiisukko. Zakkaariyaasim lehukkuuyyi «Waa'i kaka moo'aa i xiiga kiinniinsi miqisona» yukko. Ee hiinchonnem hurbaata wixxaa'akkam agananne Sooriy gogot Yihudannee Yerusaaleemannee weeratta'a minaadaphphi awwonsaano hundam shito'o. Lobakat luwwam qeefadda'a Damaasqo'o daba'llito'o. Sooriy uulli gogot hofqaxam hee'ukko. Ihukkaarem xig lobakat ihu Yihuxxi gogot kaa'amoo'isa Waa'i issukko. Mashka'oomim minaadab ixxuwwi anno'ina Moollanni ihu Waa'a utta'a hee'llo'i bikkinatte. Adil Yoo'aasim ee'isinne guzumo'amukko. Ixxim ee oranne lobakata madaa hee'ukko. Diina'i gogot daba'llaa elle'aa lasage ixxi gassaa'n qeessichchi Yoodaah beet xiiga miqisseena adilanne dollotta'a ixxi ara'anne iinse'u beyyonnem shito'o. Ixxi leeshim Daawiit beero'onne waammamukko bagaan adilluwwi waammi beyyonne waammamukkoyyo. Shiteena a'llanto'i keenim Amoo'n uulliinsette ikko'i Shiimi'aat beet Zaabaadattee Moo'aaphphi uulliinsetti ikko'i Shiimiriit beet Yihoozaabaadettee hee'llo'o. Yoo'aas goo'n oos agannii ixxi bikkina wocamu lobakat hiraagii ixxim Keesammi Mine hinkid areesiisuda'e kuroo agannii adilluwwi aganni kitaabanne kitaabamaakko. Ixxi beyyonnem ixxi beet Ameesiyaas adil ihukko. Ameesiyaas ixxi umur lamiyyee onti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa lamiyyee honsi hiinchoo gassukko. Ixxi amam Yiho'aadiine yamantamotan ikka'a Yerusaalee'm beero'itan hee'llo. Ameesiyaas lobakat ammane Waa'a liiransoo luwwa issam hee'ukko. Ihukkaarem issoo luwwa wodaninne guullaa issam hee'ukkoyyo. Ixxi adillano qoxxoo'isa issaa lasagem adil hee'u ixxi anna shito'i gassaano hundam shukko. Ihukkaarem ixxuwwi ooso shukkoyyo. Mashka'oomim Waa'i Muse'ennetti ihaa «Oos baxu damiginne anno'i, anno'i baxu damiginnem oos lehinne guzumo'amooyyo. Mat manchi lehinne guzumo'anchi hasisookkok xale'i ixxi gag baxu damiginnette» yaa wocu woshsha wonshimminnette. Adil Ameesiyaas Yihuxxi sullikaa Biiniyaa'm sullikaa goo'n ooso hundam moolli moollinnem qoodaa baxxansukko. Hundem moollinam kum awwonsaanoo xibbi awwonsaanoo doo'llukko. Hundem tuutannem yoo mannik umur lamiyyi hiincho te'im eehanniinsi hanaan yoohan ihaa ixxuwwi xigim sas xibbi kum hee'ukko. Ixxuwwim bagadoo agiraa amadda'a oranteena xantam doo'llanto'oo gaadaan hee'llo'o. Odim Ameesiyaas 3,400 kilo'oo ihoo qax kin birinne 100,000 gaadaano Isra'eeliinsi qaxxarukko. Ihukkaarem mat hiraagaanchi adil Ameesiyaas beyyo waaraa «Ka Isra'ee'l gaadaano amaddaa mattitte. Mashka'oomim Waa'i Isra'eelinne te'im ayyi Efiree'm manninnem bee'e. At ka orantoo oranne Isra'ee'l gaadaan iina hara'mmaan ikkamo yitaa sawwiteena xantootto. Ihukkaarem at kaa'antoo'isa te'im kaa'lloo'isa isseena xanookkok xale'i Waa'a. Ixxi at kabadem ki diina'inne ka'antoo'isa issookko» yukko. Ameesiyaasim ee hiraagaancho «Eehannah Isra'elina gaassaa miqummi oo hundem diinatim hinkid ihona?» yaa xa'mmukko. Hiraagaanchim «Waa'i eehanniinsi lonsaa kiina uwweena xanookko!» yaa dabarukko. Ameesiyaasim birinne qaxxaru Isra'ee'l gaadaano hundam ixxuwwi uullam daba'llita'a mattona geegeesukko. Ixxuwwim Yihuxxi uulli minaadabanne lobakata quuqqa'a ixxuwwi uullam daba'llita'a matto'o. Ee lasage Ameesiyaas iggimminne ki'aa sooqixxi cebba yamamoo beyyo gaadaano awwonsaa marukko. Eekke'em ixxi gaadaan Eedoo'm gogota qassa'a 10,000 gaadaano shito'o. Mullekam 10,000 gaadaano qeefaddo'o. Ixxuwwam Seelaa'i yamamoo beero'i gadanonne yoo baalli gamma'l kinanne fissita'a aad baallenne gafe'llo'aare baalli woronne yoo sifo'i kinanne hundim iiqanta'a beeddito'o. Ee ammane Ameesiyaas ixxenne maqire orina mattambee'isa hooru Isra'ee'l gaadaan samaariy beero'iinsi ki'isaa Beetihooroonanne afeebe'e yoo Yihuxxi beero'uwwa qassa'a 3,000 manna shito'o. Lobakat luwwam qeefadda'a massito'o. Ameesiyaasim Eedoo'm uulli manna kaa'aa daba'llukkuuyyi ixxuwwi otossitam hee'llo'i qophpha'n waa'uwwa amadaa waarukko. Ixxim ixxi gagina waa'i issaa uullisukko. Ee keeninam otossukko. Aduruusam wiriissukko. Oohim Waa'a quuqisu bikkina Waa'i mat hiraagaancho Ameesiyaas beyyo asse'ukko. Oo asse'amu hiraagaanchim Ameesiyaasina «Ixxi gaqqi minaadabam ki angiinsi gatiseena xanubee'i qophpha'n waa'uwwina mahina otossitto?» yaa xa'mmukko. Oo hiraagaanchi wocukkuuyyi hee'onam Ameesiyaas «Keese adi'l sogaanchi issinaa doo'llinummok hinka'i ammanniinsi kidette? Suume amade; eebeelas shoommo!» yukko. Hiraagaanchim hofqax ammaninam sa'aa lasage «Eekka issimminnee i sogitanom macceesimma sabimminnee Waa'i keese bi'iseena murte'ukkisa kaba la'aammo» yukko. Ee lasage adil Ameesiyaas ixxi sogaaninne maqirem a'llamaa lasage Iyyu'i beetina beet ihu Yoo'aakaaz beet Isra'ee'l adil Yoo'aas beyyo asse'amaano asse'aa «Hino'o moo'aqqammona waare» yaa orina ki'isansukko. Ihukkaarem Isra'ee'l adil Yoo'aas Yihuxxi adil Ameesiyaasina «Mat Liibaanoos duu'n uullanne hee'oo hallutti Liibaanoos digibina ‹I beetina arette ikkona ki landichcho uwwe› yaa xa'mmukko. Ihukkaarem mat moochchichchi eeheen higukkuuyyi hancaacukkaare oo hallutti lehukko. Ameesiyaasa, ‹Eedoo'm uulli manna kaa'aqqitti bikkina ki wodan biranchinne wo'mmaakko. Heeshitaa ki minenne afuuttittaare e'llookko. Ki gagannee ki minaadabinnee bichcha eeboo hawwo xanqisseena mahina hassoolla?» yaa dabarukko. Ihukkaarem Ameesiyaas Yoo'aas sogitano mahannem edukkoyyo. Mashka'oomim Ameesiyaas Eedoo'm uulli qophpha'n waa'uwwina otossu bikkina ixxi kaa'amona Waa'i ixxuwwi diina'i anganne higisaa uwweena qoodaa hee'u bikkinatte. Ee bikkina Isra'ee'l adil Yoo'aas Yihuxxi adil Ameesiyaasanne weerarukko. Ixxuwwim Ayihuxxi uullanne hee'oo Beetisheemeeshanne oramto'o. Yihuxxi gogotim kaa'amukko. Gaadaanim gibba'a ixxuwwi gaqqi uullam elle'llo'o. Adil Yo'aasim Ameesiyaasa qeefadaa Yerusaaleema massukko. Ixxim Efree'm ooxxi goociinsi ki'isaa ooxxi lamejji gooc afeebe'e lam xibbi meetira ihoo qax Yerusaalee'm oota gindukko. Keesammi Minenne hee'oo worqaa biraa Obeedi'edoom shumo'i egattam hee'llo'i Keesammi Mi'n mu'uttuwwaa adilla'n mi'n amaxxaa qeefadaa amadu mannaa hundam Samaariy beero'o amadaa marukko. Isra'ee'l adil Yoo'aas lehaa lasage Yihuxxi adil Ameesiyaas tommoo onti hiinchoo hee'ukko. Ameesiyaas ixxi adilla'n doollenne luxxi ammaniinsi ki'isaa lasaanchi afeebe'e issu mulli luwwi hundim Yihuxxi uullaannonnee Isra'ee'l uulli adi'lluwwi aganni kitaabannee kitaabamaa yookko. Ameesiyaas Waa'a awwonimma uru ammanniinsi ki'isaa Yerusaalee'm woronne ixxo shimmina dollotakka'a hee'akko'o. Ee ammanenne ixxim gibaa Laakiish beero'o marukko. Ihukkaarem laseessam hee'llo'i ixxi maso'i manna asse'lla'a eekke'em shishiisso'o. Ixxi leesham farashshonne iyyiissa'a Yerusaaleem afeebe'e wotto'o. Daawiit beero'onne hee'oo adilluwwi Waammi beyyonnem waammito'o. Yihuxxi minaadab hundim umur tommoo loh hiinchoo ihaakkoo Ameesiyaas beeto Ooziy anni beyyonne adil issito'o. Ooziyim ixxi anni Ameesiyaas lehaa lasage Eelaat beero'o dabaraa amadaa areesaa baxukko. Ooziyik umur tommoo loh hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa ontayyee lam hiinchoo gassukko. Ixxi amam Yikolyaa yamantamotane ikka'a Yerusaalee'm beero'itan hee'llo'o. Ixxim ixxi anni Ameesiyaas issukisam Waa'ina liiransoo er luwwa issukko. Waa'a baddimmi sogitano uwwoo Zakkaariyaas hee'u doollenne ixxi Waa'a hasukko. Waa'a hasukkisam Waa'im ixxena luwwi hundam taaphansukko. Ooziyim Filisxee'm manna qasaa Gaatikaa Yaabine'ikaa Ashdooxxi beero'uwwikaa oota gindansukko. Ixxim Ashidooxxi gadanonnee gatu Filisxee'm uullannee girbamaakkoo beero'uwwa baxukko. Waa'im Filisxee'm minaadabaa Gurba'aala yakkam beyyonne Hee'llo'i Araphphi minaadabaa Ma'uu'n minaadabaa kaa'oo'isina hara'mmukko. Amoo'n uulli mannim Ooziyina gibitto'o. Ixxi lobakata malaayyukkuuyyi maru bikkina ixxek sad Gibxi uulli afeebe'e firukko. Ooziyim ooxxi tochchonne yoo gooc beyyonne Cebbi uulli Ooxxi goocannee ooxxi lamejjannee qeeraa'l egechchi beyyuwwa baxaa Yerusaaleema egerakkam girbuwwa qoxxisukko. Ee'isam eelliinchi aagginne duunnuwwi lokkagannee allaachchi beyyuwwannee lobakat allaachchi diinat hee'u bikkina hax uulluwwannem girbamaakkoo egachchi beyyuwwa baxukko. Lobakat wo'i barem hinukko. Abuulli baxom iittoo bikkina minaadab duu'n uullannee harish uulluwwannee ixxena woyi'n kaashsha kaassam abuullaan hee'llo'o. Ooziyina gaalchinne gaalchinne orina gudaakkoo lobakat gogot hee'ukko. Ee gogoxxekam summa adi'l kitaabaan hee'llo'i Yi'ii'eelii Maa'iseeyii kitaabbam hee'llo'o. Ixxuwwam hundiinsi hanaan ihaa awwonsam hee'ukkok adilla'n mi'n baxaaniinsi mat hee'u Hanaaniyatte hee'ukko. Ee gogotam awwonsitam lam kumii loh xibbi sullo awwonsaanii hee'llo'o. Ixxuwwi awwonsaxxi woronne adi'l diina'inne oranteena xantam 307,500 geedduwwi hee'llo'o. Ooziyim gogot hundinam agiraa bagadoo o'l qoobe'ee orina biqenne edde'akkam eddechcha, xiyya, yambarishaa darabakkam kinaa gudisaa hee'ukko. Adil Ooziyim Yerusaaleemanne angii bax lachchinne la'anto'oo manni egachchi beyyuwwannee beero'i ooxxi lamejjuwwannee xiyyuwwaa geejji kinnuwwaa darabakkam mu'uttuwwa baxxamisa issukko. Waa'im ixxena hara'mmu bikkina lobakata malaayyaam ihukko. Ixxekim sad uulli hundannem macceesamukko. Adil Ooziy ixxi adillano qoxxisaa lasage bolxukko. Oo bolxoomim ixxo ubbuusukko. Ixxim Keesammi Mine aduruusa wiriisseena iggimminne aagaa Waa'a kichche'isukko. Ee ammanem qeessichchi Azaariyaasii ixxenne murte'aalluwwi ikko'i sadeentayyi qeessuwwii ixxi baxoo baxo uullisiiseena adila awwonta'a Keesammi Mine aaggo'o. Adilinam «Ooziya, At Waa'ina aduruusa wiriissiteena labbooyyo. Eekka issiteena qoodanto'oo Waa'ina annanni ikko'oo Aaroon shumo'i qeessuwwi xale'e. Ee bikkina at ka keesamaakkoo beyyiinsi fire; Moollanni Waa'a kichche'issaatto. Eekka issitti bikkina Waa'i keese lonsooyyo» yita'a adilanne quuqqo'o. Aduruusa wiriisseena wiriissakkam mu'uta anganne amadaa Keesammi Minenne aduruusa wiriissakkam kiti'm beyyonne uullaa hee'u Ooziy qeessuwwanne lobabata quuqonam ixxi miinenne baddisoo jabbi moo'amukko. Hundiinsi lob qeessichchi Azaaryaasii ixxenne maqire hee'llo'i mulli qeessuwwii lobakata muggita'a adi'l miinne xuxxita'a moo'llo. Keesammi Miniinsi qaqqisaa firoo'isam issito'o. Ixxim Waa'i guzumo'ukkisa la'aa qaqqisaa firaa marukko. Adil Ooziyim leheebe'i afeebe'e see'llisinne muccur ihoo'nnim hee'ukko. Keesammi Minem od daba'llaa aageena xanukkoyyo. Bax hundiinsim annanni ihaa annanni minenne mullam hee'am hee'ukko. Ixxi beet Iyyoo'aataamim ixxi bikkenne uulla gassam hee'ukko. Adil Ooziy adilla'n doollenne baxamu luwwi hundam ee ammane hiraagaanchi hee'u Aamoox beet Issaayyaas kitaabaakko. Ooziyim ixxi anno'isam lehukko. Adilluwwi waammi gadanonne yoo beyyonnem waammamukko. Adilluwwi waammi beyyonne waammamubee'i mashka'im ixxaaonnonne oddomachchonne baddisoo jabbi hee'u bikkinatte. Ixxi beyyonnem ixxi beet Yoo'aataam adil ihukko. Yoo'aataam umur lamiyyee onti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa tommoo loh hiinchoo gassukko. Ixxi amam Yiruushatte ikka'a Saadooqina landichchotte hee'llo'o. Yoo'aataam ixxi annisam Waa'a liiransoo baxo baxukko. Ixxi anni Keesammi Mine aagaa aduruusa wiriisseena amadukkisa issukkoyyo. Ihukkaarem minaadab baaxiilo baximma urukkoyyi hee'ukko. Yoo'aataam Keesammi Mi'nneka hanaa'n qarinne yoo gooca areesaa baxukko. Odim Yerusaaleemanne yoo Oofee'l duu'n kollinne yoo ootam danaamisa areesaa baxukko. Ee'isam duunaam Yihuxxi uullanne beero'uwwa, doom lophphaa hee'oo beyyuwwannem girbuwwaa qoto'akka'a egerakkam beyyuwwaa baxaa hee'ukko. Ixxim Amoo'n uulli adilinne oramaa kaa'aa hee'ukko. Amoo'n uulli mannim hiincho hiinchonne sas hiinchina gudissa'a 3,400 kiilo'i biraa mat miliyoon kiilo'i arasaa mat miliyoon kiilo'i so'oo gibittamisa issukko. Yoo'aataam ixxi Moollanni Waa'i illagenne amma'nnatinne daba'llamu bikkina malaayyaam ihukkuuyyi marukko. Yoo'aataam adilla'n doollenne baxamu mulli bax oramu orii ixxi adilla'n awwonsatii hundim Isra'eelaannonnee Yihuxxi adilluwwi aganni kitaabbuwwannee kitaabamaakko. Yoo'aataam adil ihoo ammane ixxek umur lamiyyee onti hiinchoo ihaa hee'ukko. Ixxi heechchi beyyom Yerusaaleemanne issaa tommoo loh hiinchoo gassukko. Ixxim ee lasage lehaa Daawiit beero'onne waammamukko. Ixxi beet Akaazim ixxi beyyonne adil ihukko. Akaaz ixxek umur lamiyyi hiincho ihaakkoohaannonne adil ihukko. Ixxi heechchi beyyom Yerusaaleemanne issaa tommoo loh hiinchoo gassukko. Ixxim Waa'i illagenne eroomma issu ixxi anni Daawiitisa issukkoyyo. Isra'ee'l adilluwwi jor googo maraa Ba'aala yamamoo qophpha'n waa'ina otosseena misilluwwa bukkaa baxukko. Hiinoo'm cebbannem aduruusa wiriissukko. Isra'ee'l oos ee uulla aaggo'i ammane Waa'i ee uulliinsi yaayyaa hollu minaadaphphi shigigaa'oo losa'n googo awwonaa ixxi goo'n oosim gatoo'n shokkiisakkam kitim issaa qophpha'n waa'uwwina hincaa'ukko. Hoffi duunnuwwanne, lob duunnuwwannee haqqi lugummuwwannee otossakkam beyyuwwi hundannem kitima kitimukko; aduruusam wiriissukko. Ziikira yakkam mat Isra'ee'l gaadaanchi adil Akaaz beeto Maa'iseeya, adilla'n mi'n gassaanchi hee'u Aziriiqaamaa adilla'n mi'n daannoomanne adiliinsi la'm beyyonne yoo Hilqaanaa shukko. Ayihud ixxuwwina moolli ikko'aarem Isra'ee'l gaadaan 200,000 meentoo oosoo lobakat luwwinne maqirem qeefadda'a Samaare'i beero'o massito'o. Oodeeda yakkam mat Waa'i hiraagaanchi Samaariy beero'onne hee'am hee'ukko. Isra'ee'l gogot Yihuxxi manna qeefadda'a Samaare'i beero'o daba'llita'a waattu'uuyyi ixxuwwi beyyo maraa «Gaassi ki'nnuwwi anno'ina Moollanni ihu Waa'i Yihuxxi mannanne quuqu bikkina ixxuwwa ki'nnuwwi anganne higisaa uwwukko. Ihukkaarem ki'nnuwwi ixxuwwa monginne guullitakko'o. Monginne ki'nnuwwi ixxuwwanne issitakko'okam Waa'i moo'aakko. Oohim ihukkoyyo yitakka'a Yerusaalee'mmekaa Yihuxxekkaa goonaa landaa hundam ki'nnuwwi agid issitakkeena hassakkamuulla. Ki'nnuwdu baaxiilo baxxakka'a ki'nnuwwi Moollanni Waa'a hawwoddakko'oyyonnihe? Kabadem macceessehe; ku ki'nnuwwi qeefaddakko'i keen ki'nnuwwina abbaayyuwwaa aayyuwwaa. Ee bikkina ixxuwwi waatto'i beyyom mattona fataki'llehe. Eebeelas Waa'i quunqi ki'nnuwwanne dillookko» yukko. Efireem uulli awwonsaaniinsi soor la'antoo keen yimmim Yihoohanaan beet Azaariyaas, Mashiilemoot beet Bereekiy, Shaaluum beet Yihiizqiyii Hadilaay beet Amaasaa'ii oriinsi daba'llito'i gaadaanina «Ka qeefadanto'i keeno keyye wottakkotte; kanniinsi illageen baaxiilo banxaa Waa'a kichche'insummi bikkina ixxi quunqi ni hanenne dillaakko; kabadem hawwojjanne hanenne hawwojja endona hassakka'ahinnihe?» yita'a quuqqo'o. Ee bikkina gaadaan qeefaddo'i mannaa qeefaddo'i luwwaa hundam minaadabinaa awwonsaaninaa uwwitto'o. Ee lasage oo soorem manchim qeefadanto'i mannina qeefadamu luwwiinsi hasisoo luwwa hundam uwwitamisina oohim leexa'am yo'i keenina eddechcha, caamma'a, ittam hurbaataa wo'oo uwwiteena qoodanto'o. Ixxuwwim mad yoo keenonne qaraare labbo'o lokkinne matteena xantambee'i keenom hallanne saa'llisso'o. Ixxuwwam Ayihuxxi uullanne hee'oo dimbaaphphi haqqi lophphaa hee'oo Iyyaarko'i beero'o dabatta'a massito'o. Ee lasage odim Isra'ee'l manni ixxuwwi hee'llam Samaariy beero'o daba'llito'o. Ee ammane Filisxee'm manni eelliinchi aagoo kollinne hee'oo duunnuwwiinsi woroon yoo Yihuxxi uullanne woroo'n qarinne hee'oo hoffi beero'uwwa amaddo'o. Oohim Beetisheemeesha, Ayaaloona, Gaderoota, Sooka, Tiiminaa Giimzoo yakkam beero'uwwaa ixxuwwi kululleetanne hee'oo hegeegguwwaa edda'a kaa'lla'a amaddo'o. Ee beyyuwwam heechchi beyyi issita'a afuutto'o. Yihuxxi adil Akaaz Waa'a lagu bikkinaa Yihuxxi uullannem baaxiil lophphoo'isa issu bikkinaa Waa'i Yihuxxi minaadaba sholliisukko. Aasoo'l adil Tigilaat-Phaleeseer ixxi beyyo waaraa ixxo u'nnisukko bagaan ixxena hara'mmukkoyyo. Ee bikkina Akaaz Keesammi Miniinsi, adila'n miniinsii minaadaphphi awwonsaaniinsii lobakat worqa massaa Aasoo'l adilina uwwaa hee'ukko. Ihukkaarem maham hara'mmukkoyyo. Akaazanne hawwi lophphukkuuyyi maru ammanenne ixxi odim ayyi ammanniinsim loboka baaxiilo baximminne Waa'a kichche'isukko. Akaaz ixxi kaa'amoo'isa issito'i Sooriy uulli qophpha'n waa'uwwina kitima hincaa'ukko. Eekkam issu mashka'i «Sooriy uulli adilluwwina ixxuwwi waa'uwwi hara'mmito'ookko; iinam oo waa'uwwi hara'mmitona kitima hincaa'oommo» yaa sawwaatette; ixxo kaa'llo'i Damasqo'i uulli waa'uwwina kitima hincaa'ukko. Ihukkaarem ookki ixxenaa ixxi uullinaa bichcha eebukko. Odim Akaaz Keesammi Mi'n mu'uta hundam fissaa iiqansukko; Keesammi Minem xufukko; Yerusaaleemannem mulli waa'ina otossakkam beyyuwwa beyyi hundannem uullisukko. Yihuxxi uulli beero'uwwanne hundannem qophpha'n waa'uwwina aduruusa wiriissakkam duunnuwwanne hee'oo otossakkam beyyuwwa baxukko. Ee'isinne Akaaz gaassi ixxi anno'i Moollanni Waa'i quunqi ixxi gaganne ihoo'isa issukko. Akaaz adilla'n doollenne luxxi ammaniinsi ki'isaa lasaanchi afeebe'e ihu mulli luwwi hundim Yihuxxaannonnee Isra'ee'l adilluwwaannonnee aganni kitaabanne kitaabamaakko. Adil Akaazim lehukko. Yerusaaleemannem waammamukko. Ihukkaarem adilluwwa waammakkam beyyonne waammamukkoyyo. Ixxi beet Hizqiyaasim ixxo bikkaa adil ihukko. Hizqiyaas umur lammiyyee onti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa lamiyyee honsi hiinchoo gassukko. Ixxi amam Abiyaa yakkamotan ikka'a Zakkaariyaasina landichchotte hee'llo'o. Hizqiyaasina gaassi anni hee'u adil Daawiitika er kobi'lla awwonaa Waa'a liiransoo baxo baxukko. Hizqiyaas adil ihu hiinchi luxxi agananne Keesammi mi'nneka gooccuwwa hundam fooqaa'aa areesukko. Qeessuwwaa Leewi'i oosom Keesammi Miniinsi eelliinchi firinne yoo dummichchi beyyonne wixxaa'ukko. Ixxim «Leewi'i ooso macceessehe; ki'nnuwwi gaga keessehe; ki'nnuwwi anno'i Waa'ika Keesammi Minem muccussehe. Keesammi Mine haashaassoo luwwi hundam bi'issehe. Niyyanno'i ni Moollanni Waa'ina amma'nnanto'oyyo. Waa'am utta'a ixxena heechchi beyyi ihu ixxi gatti miniinsi ille dabatto'o. Keesammi mi'nneka gooccuwwa hundam xuffo'o. Caakkuwwam bi'isso'o. Isra'ee'l Moollanni Waa'ina Keesammi Minenne aduruusa wiriissimma te'im shokkiisakka'a hincaa'akkam kitima hincaa'imma utto'o. Ee mashka'innem Waa'ik quunqi Yihuxxi uullannee Yerusaaleemannee dillukko. Ki'nnuwwi kaba moo'llakkamisam ixxuwwanne baachchii mugimmii ihoo'isa issaakko. Ixxuwwannem naacanchi afoo'isa issaakko. Ee bikkina niyyanno'i oranne beeddito'ookko. Ni meentii ni oosii hundim qeefadanto'ookko. Hizqiyaasim «Kanniinsi eehid Waa'ik quunqi niinniinsi qee'lloo'isina oono'o an kaba Isra'ee'l Moollanni Waa'inne hidi'l sagara aageena murte'aammo. I ooso! Ixxi illagenne uullitakka'a ixxena awwaaddakkona, ixxi awwaadaanom ikkakkonaa kitimam ixxena hincaa'llakkonaa Waa'i ki'nnuwwa doo'llaakkoohan ihu bikkina jalaggakkotte» yukko. Ixxuwwim ixxuwwina abbaayyuwwi ikko'i mulli Leewi'i ooso wixxaa'lla'a lasage hundim Waa'i See'llisinne ixxuwwi gaga muccussitto'o. Ee lasage adil ixxuwwa ijaajukkisinne oo Leewi'i oos Waa'ika mine Waa'i See'llisanne muccussito'o. Qeessuwwim Keesammi Mine muccussiteena woro aaggo'o. Keesammi Mi'n woronne siiddo'i haashaarammi luwwa hundam Keesammi Mi'n wixxixxi beyyonne fissito'o. Leewi'i oosim ee beyyiinsi ki'issa'a Qeedroo'n cebbanne uunjito'o. Ee muccussimmi baxom luxxi agan aagu balliinsi ki'issa'a ee aga'n sadeenti ballina Keesammi Mine aagakkam gooca edda'a hundam guullito'o. Ee lasage Keesammi Mine Waa'ina otossakkam siyya'a gudisseena sadeenti balla edda'a ee aga'n tomii lohii afeebe'e baxxo'o. Leewi'i oosim adil Hizqiyaas beyyo aagga'a «Shokkiisakkam kitim hincoo beyyoo keesamaakkoo daabbo'o dissakkam xaraphpheezaa mulli mu'uttuwwaa hundam Keesammi Minee hundam see'llisinne muccussinaammo. Ee'isam adil Akaaz adil hee'u doollenne Waa'ina amma'nnancha hoogimminne massaa hee'u mu'uta hundam daballaa wollaa Waa'ina keesamaakkoo keen issinaammo. Oo hundem mu'utim Waa'ina kitim hincoo kiti'm beyyi illagenne yookko» yita'a kutto'o. La'm balli daram adil Hizqiyaas ee beero'i gassaano wixxaa'aa ixxuwwinne maqirem Keesammi Mine marukko. Ixxuwwim adi'l abaroosaanninaa Yihuxxi minaadaphphaanninaa baaxii'l haafitinaa ee'isam Keesammi Mine muccussimminaa kitim ihaa Waa'ina hincoo lamar moolluwwa, lamar gereebbi ambulluwwa, lamar gereebbi geexxuwwaa lamar fella'i ambulluwwaa eebbo'o. Adilim Aaroon shumo'i ikko'i qeessuwwi ee eebbo'i fooraam diinate Waa'i kiti'm beyyonne kitim issita'a hincaa'llona ijaajukko. Qeessuwwim gaassita'a moolluwwa ee lasage gereebbi ambulluwwa lasaanchonnem gereebbi geexxuwwa dutta'a hundem kiti'mmekam xiiga kiti'm beyyonne wixxo'o. Ee lasage fella'a adi'l beyyoo adilinne maqire wixxaa hee'u manni beyyoo hincaa'llo'o. Ixxuwwim ee fella'i hanenne ixxuwwi anga issito'o. Adil shokkoo kitimii baaxii'l kitimii Isra'ee'l minaadabina hundinam baaxii'l haafit ihona ijaajaa hee'u bikkina qeessuwwi ee ijaaccisinne fella'a dutta'a baaxii'l kitim issita'a xiiga kiti'm boyyi hanenne dunto'o. Adil Hizqiyaasim hiraagaan hee'llo'i Gaadinnee Naataaninnee ihaa Waa'i adil Daawiitina uwwu awwonsinnee Daawiitim baxonne hosisu ijaajo awwonimminnee diitta'a, doolaa maasiinqo'oo losso'oo Leewi'i ooso Keesammi Minenne uullisukko. Leewi'i oos ee Daawiit awwaaxxam hee'u mazmuu'l mu'uta amadda'a, qeessuwwim xurumba amadda'a gudda'a uullito'o. Adil Hizqiyaasim shokkiisakka'a hincaa'akkam kitima kiti'm beyyonne kitimtona ijaajukko. Kitimimma ashsheetto'isam Waa'ik mazmuur zammaramukko. Zammaaraanim xurumba fugimmaa Daawiit mazmuu'l mu'uttuwwinne zammarimmaa asheetto'o. Ee beyyonne hee'u minaadab hundim mateeyyoominne Waa'ina otossito'o. Shokkiisakka'a hincaa'akkam kitim shokkaa beeddeebe'i afeebe'e uullukkoyyo. Kitima hincaa'immi bax beeddu ammanenne adil Hizqiyaasii ee beyyonne hee'u mannii hundim guruphphaa Waa'ina otossukko. Adil Hizqiyaasii minaadaphphi awwonsaanii hundim Daawiitii hiraagaanchi Asaafii fissito'i galaxxi mazmuura Leewi'i oos Waa'i lombina zammattona ijaajjo'o. Ee bikkina hundim aad heeshita'a otossitu'uuyyi lobakat liiranchinne zammattam hee'llo'o. Ee lasage adil Hizqiyaas minaadabina «Kaba ki'nnuwwi gaga Waa'ina keessakko'oohan ihu bikkina Waa'ina galaxxi kitimaa mulli kitimaa hundam Keesammi Mine eebbehe» yukko. Ixxuwwim adil ijaajukkisam issito'o. Mat mat keenim ixxuwwi gaqqi doo'llinne shokkiisakkam kitimina ihoo fooraam diinate eebbo'o. Ee'isinne Waa'ina shokkiisakka'a hincaa'akkam kitim ihaa hincihona eebbo'i fooraam diinaxxek xig hundim lamarayyi moolluwwa, xibbi gereebbi ambulluwwaa lam xibbi gereebbi geexxuwwaa hee'ukko. Odim mateeyyoo'm kitimina annanni ihu diinaxxek xig loh xibbi moolluwwaa sas xibbi gereebbi ambulluwwaa hee'ukko. Ee diinate hundam dutta'a omachcho coo'llam qeessuwwik xig hoffan hee'u bikkina see'llisinne muccutto'i qeessuwwi guddeebe'i afeebe'e Leewi'i oos hara'mmitam hee'llo'o. Leewi'i oos qeessuwwiinsi loboka xabbeen wodaninne keesanteena guddo'oo keen hee'llo'o. Shokkoo kitiminne maqire hincoo mateeyyoo'm kiti'm di'irii aggi kitimii exxaa shokkiisakkam kitim hore'em lobakata hee'ukko. Ee'isinne Keesammi Minenne awwaadimmi ogor odim asheeramukko. Adil Hizqiyaasii minaadabii ku hundim qaqisaa ihoo'isina Waa'i hara'mmu bikkina lobakata liiranto'o. Adilii minaadabim ee woshshanne lobakata liiranto'o. Waa'i ijaaccisinne Isra'ee'l Moollanni Waa'ik higimmi ugud lobakat ammanina lobakat minaadabinne lonsamu bee'i bikkina adilii minaadabii hanaa'n qarinne Daaniinsi ki'isaa woroo'n qarinne Bersaabe'i afeebe'e hee'llam Isra'ee'l minaadab hundim Yerusaaleemanne wixxita'a higimmi uguda lonsitamisina alallaatamona qooddo'o. Adi'l ijaaccisinne ad'llekaa adi'l gassaan ikko'i gassaa'nnekaa kid yoo asso amadda'a asse'amaan Isra'ee'l uullaa Yihuxxi uullaa hundam matto'o. «Isra'ee'l minaadaba, Aasoo'l adilluwwi angiinsi xottakka'a gattakko'i ki'nnuwwi kolli daba'llona ki'nnuwwim Abrihaaminaa Yiisaaqinaa Yaaqoobinaa Moollanni ihu Waa'i kolli daba'llehe. Ki'nnuwwina Moollanni ihu Waa'ina amma'nnantobee'i ki'nnuwwi gaassi anno'isaa ki'nnuwwina abbaayyuwwi ikko'i Isra'ee'l minaadaphphisaa ikkakkotte. Ki'nnuwwi laqqakkamisam Waa'i ixxuwwa bichchina higisaa uwwaakko. Ki'nnuwwi Waa'ina ijaajammehe bagaan ixxuwwisa wodan duudaakkoo keen ikkakkotte. Ki'nnuwwi gaga Waa'ina uwwehe. Waa'i heer heerina keesu ixxi mine waallehe. Kanniinsi eehid Waa'ik qoxxaalli quunqi ki'nnuwwanne hanenne dilloobee'isa xale'i ixxena otossi'llehe. Ki'nnuwwi Waa'i kolli daba'llitakkolas ki'nnuwwi Moollanni Waa'i biijaallaa qishixoohanee ihu bikkina ki'nnuwwi abbaayyuwwii ki'nnuwwi oosii ixxuwwa qeefaddo'i kee'n illagenne qishixxato siiddamo. Ka uullam daba'llita'a waattamo. Ki'nnuwwi Waa'i kollonne daba'llitakkolas ixxi ille ki'nnuwwiinsi dabarooyyo.) Asse'amaanim Efireemaannonnee Minaas sulli uullannee hee'oo beero'uwwi hundam matta'a Zaabiloo'n sulli hanaa'n qar afeebe'e affo'o. Ihukkaarem oo minaadab gadda'a osatto'oo naacco'oo. Ihukkaarem Aseer sulliinsi, Minaas sulliinsii Zaabiloo'n sulliinsii hofqax mannim ixxuwwi gaga heeshaa'lla'a Yerusaaleema waatto'o. Ee'isam adilii minaadaphphi gassaanii Waa'i saga'llisanne ijaajjo'i luwwa wonshitona Yihuxxi mannina Waa'i mat wodano uwwam hee'ukko. La'm agananne qorosho'i uguda lonsiteena lobakat minaadab Yerusaaleemanne wixxito'o. Yerusaaleemanne hee'u mulli waa'uwwina kitima kitimakkam beyyoo aduruusa wiriissakkam beyyoo hundam ki'issa'a massita'a Qeedroo'n cebbanne uunjito'o. La'm agan aagu tommonnee soor ballannee higimmi ugudina gereebbi geexxuwwa kitim issita'a dutto'o. Ee ammane ixxuwwi gaga keessobee'i qeessuwwii Leewi'i oosii lobakata tuutto'o. Ee bikkina ixxuwwi gaga Waa'ina keesso'o. Ee lasage Keesammi Minenne shokkiisakka'a hincaa'akkam kitima hincaa'lleena xanto'o. Waa'i manchi hee'u Muse'e uwwu see'l awwonsisanne Keesammi Minenne ixxuwwina qoodamu beyyonne uullito'o. Leewi'i oosim kiti'm xiiga qeessuwwina uwwito'aare ixxuwwi odim kit'm hanenne wixxo'o. Minaadabiinsim lobakat keen ixxuwwi gaga keessobee'i keen hee'llo'i bikkina higimmi uguxxi gereebba dutteena xanto'oyyi hee'llo'o. Ee bikkina Leewi'i oos ixxuwwi bikkenne dutta'a Waa'ina kitim issita'a hincaa'llo'o. Ee'isam Efreem sulliinsi, Minaas sulliinsi, Zaabiloon sulliinsii Yisaakoor sulliinsii waatto'i lobakat manni ixxuwwi gaga keessobee'i keen ikko'i bikkina higimmi uguda laboo'isinne lonsito'oyyo. Adil Hizqiyaasim ixxuwwi bikkina «Ku manni see'llisinne muccuttobee'aarem ixxuwwi anno'ina Moollanni Waa'a keese haseena ixxi wodano ki kollonne dabaroo keen hundina biijaalli Waa'a at haafihe» yaa uunxukko. Waa'im Hizqiyaas uunxato macceesukko. Minaadabam fayyiisukko. Yerusaaleemanne wixxita'a hee'llo'i minaadabim qorosho'i uguda lamar balla hundam lobakat liiranchinne lonsito'o. Leewi'i oosii qeessuwwii hundem ballam mazmuura zammarakkam mu'utinne zammatu'uuyyi Waa'a galaxxitam hee'llo'o. Hizqiyaasim Waa'ina otossimmi siyya'a erisa awwonsimminne ixxuwwi lachcha moo'isso'i Leewi'i ooso galaxxukko. Minaadabim ixxuwwi gaassi anno'i Moollanni Waa'i lombina lamar balla mateeyyoo'm kitima hincaa'lla'ahii itta'ahii lasage Odim edda'a lamar balla ee uguda lonsiteena mat ikka'a iittanta'a lasage liiranchinne lonsito'o. Adil Hizqiyaas mat kum moolluwwaa lamar kum gereebbaa fella'aa dutta'a ittona minaadabina uwwukko. Minaadaphphi gassaan odim mat kum moolluwwaa tommi kum gereebbaa fella'aa uwwito'o. Xigo lobakat qeessuwwim ixxuwwi gaga Waa'ina keesso'o. Ee bikkina hundem Yihuxxi minaadab, Qeessuwwi, Leewi'i oosii hanaa'n qarinne yoo Isra'eeliinsi waatto'i mannii Isra'ee'l uullannee Ayihuxxi uullannee hee'llam waaraanii hundim lobakata liiranto'o. Daawiit beet Salamoon doolliinsi ki'isaa kaballi afeebe'e kido'i ugud Yerusaaleemanne ihaa la'oobee'i bikkina Yerusaalee'm beero'i manni lobakata liiranto'o. Qeessuwwii Leewi'i oosii uullita'a minaadaba maasse'llo'o. Waa'im keesammi ixxi minenne iimanenne ihaa ixxuwwi uunxato macceesukko. Ee lasage ee ugudanne hee'llo'i Isra'ee'l minaadab hundim hundem Yihuxxi beero'uwwam matta'a kininne baxamaakkoo otossakkam beyyuwwaa Asheera yakkam qophpha'n waa'uwwi misilluwwaa hundam iiqansito'o. Ee'isam Yihuxxaannonne, Biiniyaamaannonne, Efireemaannonnee Minaas uulluwwannee hee'u otossakkam beyyuwwaa kiti'm beyyuwwaa gindito'o. Isra'ee'l oos ee hundam bi'issa'a lasage ixxuwwi gaqqi beero'uwwaa uullaa daba'llito'o. Adil Hizqiyaas Keesammi Mi'n illagenne shokkiisakka'a hincaa'akkam kitimaa mateeyyoo'm kitimaa hincaa'llonaa, Waa'ina awwaaddona, ixxom galaxxitonaa mazmuurinne lonsitonaa qeessuwwaa leewe'i oosoo annannichchom laboo'isinne awwaaddona uullisukko. Waa'i see'llisinne hundi ammanem daraa maaro'oo shokkiisakkam kitiminaa usheexxaxxi ayyaammuwwannee aga'n aagguwwannee qoodamaa la'amaakkoo mulli ugudduwwannee hincoo kitiminaa ihoo gereebbaa mulli fooraam diinatee adil Hizqiyaas ixxi gaqqi amaxxiinsi uwwam hee'uko. Odim qeessuwwii Leewi'i oosii ixxuwwina yoo ammane hundam Waa'ika seeraa ijaajoo awwaadonne hosissona ixxuwwina uwwimmi hasisoo luwwi hundam Yerusaalee'm minaadab uwwitamisina adil ijaajukko. Isra'ee'l minaadabim ee adi'l ijaajo macceesso'isam woyi'n diqaasika, wee'l zayixxeka, maraphphekaa mulli hurbaaxxi mishikaa hundikam doo'llamaakkoo ludo aa'lla'a uwwito'o. Ixxuwwina yoo luwwi hundiinsim tommiinsi mato fissita'a uwwito'o. Yihuxxi beero'uwwanne hee'llam Isra'ee'llekii Yihuxxi minaadabii gereebbiinsi, fella'iinsi, mulli fooraam diinatiinsii ee'isam ixxuwwi Moollanni Waa'ina annanni issito'i luwwi hundiinsi tommiinsi mato eebba'a tuubbo'o. Uwwimmam asheetto'ok saxxi aganannette ihaa lama'l agananne eebba'a guullito'o. Adil Hizqiyaasii minaadaphphi gassaanii waatta'a uwwakko'i luwwi lobakata tuubamaakkoo moo'lla'a Waa'a galaxxito'o; Isra'ee'l minaadabam maasse'llo'o. Hizqiyaasim qeessuwwaa Leewi'i oosoo ee tuubbi bikkina xa'mmukko. Saadooq shumo'iinsette ihoo hundiinsi lob qeessichchi Azaariyaasim dabaraa «Minaadab tommiinsi mato Keesammi Mine eebimma asheetto'aanniinsi kid niina ihoo qax hurbaata siindaammo. Niinniisem ihaa gataakko; Waa'i Minaadaba maasse'u bikkina ka hundam lobakata siindaammo» yukko. Adil Hizqiyaasim Keesammi Minenne gootara baxxona ijaajukko; ixxuwwim baxxo'o. Tommiinsi mato, ludoo keesamaakkoo uwwanchuwwaa hundam ee gootaranne amma'nnanchinne dissito'o. Ee gootaram egarimmina Leewe'i shumo'iinsetti ihu Konaanyi doo'llamukko; ixxi abbaayyi Shiimi'im ixxo bikkoo egeraanchi ihukko. Ixxuwwi awwonsiinsi woroon ikka'a baxxam keen Leewi'i oosiinsi tommi doo'llanto'o. Ixxuwwi summim Yihii'eelatte, Azaaziyatte, Naahaatatte, Asaaheelatte Yiriimootatte, Yoozaabaadatte, Eeli'eelatte, Yusmaakiyatte, Maahatattee Baanaayattee hee'llo'o. Ixxuwwa hundam doo'llito'i keen adil Hizqiyaasattee qeessuwwa awwonsaanchi Azaariyaasattee hee'llo'o. Eelliinchi firoo kollinne Keesammi Mi'n gooca egaraa'n awwonsaanchi hee'u Leewi'i sulliinsette ihu Yumin beet Qore'ena odim Waa'ina hincoo gaqqi doo'llinne uwwamoo luwwa hundam aa'immikii baxxansimmikii dannoommi uwwamukko. Qeessuwwi hee'llam beero'uwwanne ixxuwwina abbaayyuwwi ikko'i keenina hooffaanninaa lobaanninaa hundinam amma'nnanchinne baxxansimminne Qore'ena hara'mmitam hee'llo'i keen Edenatte, Miiniyaamiinatte, Iyyaasutte, Shamaa'iyatte, Amaariyattee Shakaaniyattee hee'llo'o. Ee'isam ixxuwwik summi ixxuwwi moollisinne kitaabamukkisanne annanni annanni baxina Keesammi Mine balli hundam aaggam umur sas hiinchoo sas hiinchiinsi hanaanii ihu goo'n oosina hundinam uwwamu bax sharaxxisinne baxxansitam hee'llo'o. Ee'isam ixxuwwi moollisinne xiganto'i qeessuwwinaa umur lamiyyee eehanninsi hanaanii ihu Leewi'i oosinaa ixxuwwina uwwamu baxisinnee qoodo'isinnee baxxansito'o. Ku Qeessuwwii Leewi'i oosii ixxuwwi gaga keesso'oo keenoo amma'nnanto'oo keenoo hee'llo'i bikkina ixxuwwi meentinnee oosinnee ixxuwwi gassitam hee'llo'i manni hundinnee maqire kitaabantam hee'llo'o. Aaroon shumo'ina uwwamu beero'uwwanne te'im ee beero'i hegeegguwwanne hee'oo allaachchi biilluwwanne hee'llam qeessuwwiinsi qeessuwwi abaroosinaa ixxuwwi summi ixxuwwi moollisinne kitaabamukkisanne Leewi'i goo'n oosinaa baxxansiteena doo'llanto'i manni hee'llo'o. Adil Hizqiyaas Yihuxxi uulli hundannem Moollanni Waa'a liiransoo er baxo baxukko. Keesammi Mi'n awwaadina te'im seeraa ijaajoo egerimmina ixxi baxu bax hundim ixxi Moollanni Waa'a wo'm wodaninnee Keesammi Mi'n bikkina to'achchimminnettee hee'u bikkina ixxena hundem luwwim taaphanukko. Adil Hizqiyaas Waa'ina amma'nnamaa awwaadimminne lobakat luwwa issaa lasage Aasoo'l uulli adil Sanaakireem Yihuxxi uullanne weerarukko. Ixxim kaa'oo'isa amma'nnaa girbamaakkoo beero'uwwa kibbukko. Adil Hizqiyaasim Sanaakireem Yerusaaleema qaseena hasaa waarukkisa la'aa beero'iinsi haxonne yoo wo'i bu'uwwi hundam ifiisimmina ixxi gassaaninnee gaaxxi awwonsaaninnee a'llamukko; ixxuwwim hara'mmito'o. Lobakat mannim wixxita'a «Aasoo'l adilluwwi waatta'a mahina lobakat wo'o siiddamane?» yata'a bu'iwo'oo uulli worinne daadoo wo'uwwaa hundam ifiisso'o. Ee'isam adil Hizqiyaas gindamu oota hundam dabaraa qoxxisukko; egechchi beyyuwwam baxukko. Ee ootiinsi bii'l kollinnem mulli oota edaa ootimminne Daawiit beero'o qoxxisukko. Lobakat o'l mu'utaa agiraa baxukko. O'l gogoxxi awwonsaanom minaadab hundannem awwonsaan issaa lasage beero'o aagakkam gooc wixxixxi beyyonne wixxaa'aa «Wo'm wodaninne murte'llakko'oo keen ikkehe. Assoo'l adilaa ixxenne yoo lobakat gogotaa moo'llakka'a baa'llakkotte; muggitakkottem. Mashka'oomim niinninne maqire yookkok ixxenne maqire yoohaanniinsi lophphoohane. Ixxenne maqire yookkok maa'l malaayye. Ihukkaarem niinninne yookkok niina hara'mmoohanee ni bikkenne oramoohanee ihu ni Moollanni Waa'a» yaa qoxxisukko. Minaadabim Yihuxxi adil Hizqiyaas wocu sagaranne qoxxito'o. Ee lasage adil Sanaakireem ixxi googotinne maqirem Laakiishanne hee'ukkisam ixxi gaaxxi awwonsaan Yihuxxi adil Hizqiyaas beyyoo ixxenne hee'u Yihuxxi minaadaphphi beyyoo asse'aa «Aasoo'l adil Sanaakireem ‹I gogotinne kibbamaakkoo Yerusaaleemanne kabee'em yoontakke'ek ayyenne amma'nnantakka'atette?›. Hizqiyaas ki'nnuwwa ‹Ni Moollanni Waa'i Aasoo'l uulli adi'l angiinsi neese gatisookko› yukkuuyyi ki'nnuwwa sibaarinnee xeebinnee beedditakkona qawwiisoolla. Kanniinsi illageen Waa'ina otossakkam keesamaakkoo beyyuwwaa kitima hincaa'akkam beyyuwwaa gindukkok, Yihuxxekii Yerusaalee'm minaadabii mexxo'i mat kiti'm beyyonne aduruusa wiriissitu'uuyyi otossitamisa issukkok Hizqiyaasatte. Anii gaassi iyyanno'ii mulli minaadabanne maha issinumda'e laqqakkamoyyonnihe? Ee uulli minaadaphphi waa'uwwiinsi matim ixxuwwi uulla i angiinsi gatisseena xanaahinnihe? Iyyanno'i bi'isso'i ee minaadaphphi waa'uwwiinsi matim ixxuwwi uulla gatisu amman yoohonnihe? Eehannah ki'nnuwwi Waa'idu ki'nnuwwa i angiinsi hinkid issaa gatiseena xanookko? Ee bikkina Hizqiyaas ki'nnuwwa qawwiisaa huushanchi googonne massoone. Ixxo hore'em amma'nnitakkotte. Mashka'oomim ayyi minaadaphphi waa'im ixxi minaadaba i angiinsi te'im iyyanno'i angiinsi gatiseena xanu amman bee'e. Ki'nnuwwi Waa'im i angiinsi ki'nnuwwa gatiseena xanoobee'is hore'em la'amaakkoohane› yoolla» yoo asso asse'ukko. Sanaakireem gassaanim Moollanni Waa'annee Waa'ina awwaadaanchi ihu Hizqiyaasannee eehanniinsi lophphoo jor woshsha wocco'o. Adil odim Isra'ee'l Moollanni Waa'inne game'llamimminne «Mulli uulli minaadaphphi waa'uwwi ixxuwwi minaadaba i angiinsi gatisseena xantobee'isam Hizqiyaas Waa'im ixxi minaadaba i angiinsi gatiseena horem xanooyyo» yoo assi kitaaba kitaabukko. Ee lasage ixxuwwi ee beero'onne weeratteena hassa'a beero'i ootanne yo'i Yerusaalee'm manna sagara iimaa'imminne Ibro'isinne baa'isimmaa muggisimmaa asheetto'o. Manni anginne baxamaakkoo mulli minaadaphphi waa'uwwanne woccam hee'llo'isam Yerusaalee'm Waa'annem iggimminne wocco'o. Ee lasage adil Hizqiyaasii Amoox beet hiraagaanchi Issaayyaasii ee bikkina Waa'i kollonne laatto'o; uunxito'ome. Waa'im Aasoo'l adi'l wiiddananne yo'i geedduwwa, gaaxxi awwonsaanoo gassaanoo guullona ixxi asse'amaancho asse'ukko. Ee bikkina Aasoo'l adil sholle'nninne ixxi uullam daba'llaa elle'ukko. Ixxi waa'i minem aagaakkoohaannonne ixxi gaqqi oosim bisa'inne ixxo shito'o. Ee'isinne Waa'i adil Hizqiyaasaa Yerusaalee'm minaadabaa Aasoo'l adil Sanaakireemaanniinsii mulli kee'n angiinsii gatisukko. Ixxuwwi kululleetanne hee'oo keen hundiinsim ixxuwwa egerukko. Dut mannim Waa'ina irifo'o amadda'a Yerusaaleema waatto'o. Yihuxxi adil Hizqiyaasinam bito xee'aalli ihaakkoo luwwa uwwito'o; ixxim ee ammaniinsi ki'isaa hundem uulli minaadaphphi illagennem iimiimukko. Ee ammanem Hizqiyaas lehoo qaxa xissukko. Waa'am uunxukko; Waa'im ixxi uunxato macceesaa mare'e moo'isukko. Ihukkaarem adil Hizqiyaas bolxukko bagaan Waa'i ixxena issu biijoo'm bikkina galata hincaa'ukkoyyo. Ee bikkina ixxonne, Yihudannee Yerusaaleemannee Waa'ik quunqi dillukko. Ihukkaarem ixxi bolximmi bikkina Hizqiyaas Yerusaalee'm minaadabinne maqirem gaga heeshaa'ukko; ee bikkina Waa'i quunqi Hizqiyaas doollenne ihukkoyyo. Hizqiyaas lobakata goddaanchoo la'amaakkoohanee ihukko. Ixxim worqaa biraa, bito xee'aalli kinaa enjaa, agilluwwaa mulli bito xee'aalli mu'uttuwwaa dissoo dut mine baxukko. Ee'isam hurbaata, woyi'n diqaasaa wee'l zaytaa dissoo minneewwa baxukko. Ee'isam annanni annanni diinatina gaadira, gereebbinaa filla'inam oroda baxukko. Waa'i lobakat lamaxxa uwwaa hee'u bikkina beero'uwwa baxukko; lobakat gereebba, fella'aa laroo wixxaa'ukko. Hanaa'n Giyoo'nneka wo'i bu'o qoqqobaa Daawiit eelliinchi aagginne daadoo'isa issukkok ka Hizqiyaasatte. Ixxenem bax hundim taaphanukko. Ihukkaarem Baabiloo'n gassaan Hizqiyaas uullanne ihu maalalsiisoo aganni bikkina xa'mmitona asse'amaano asse'llo'i ammane Waa'i ixxo keeneenaa ixxi wodanonne yookkokam la'eenaa hasu bikkina cawwaa urukko. Hizqiyaas adilla'n doollenne ihu luwwii ixxi eroommii hundim Amoox beet hiraagaanchi Issaayyaas kaaltanne, Yihuxxaannonnee Isra'ee'l adilluwwi aganni kitaabannee kitaabamaakko. Hizqiyaasim ixxi anno'isam lehukko. Daawiit shumo'i waammi beyyonnem duunanne waammamukko. Yihuxxekii Yerusaalee'm minaadabii hundim fitta'a waammito'o. Ixxi beet Minaasim ixxi beyyonne adil ihukko. Minaasik umur tommoo lam hiinchoo ihaakkoohaannonne Ayihuxxi uullanne adil ihukko. Ixxi heechchi beyyom Yerusaaleemanne issaa ontayyee onti hiinchoo gassukko. Ixxim Waa'i Isra'ee'l oos illagiinsi bi'isu mulli minaadaphphisam haashaarammi luwwa issimminne Waa'i illagenne jor baxo baxukko. Duunanne otossakkam beyyuwwa ixxi anni Hizqiyaas gindukkaarem ixxi dabaraa baxukko. Ba'aalinam kitima hincaa'akkam beyyuwwa baxukko; Asheer misilluwwam uullisukko. Iima'n gogotinam otossukko. Waa'i «I summi heer heerina Yerusaaleemanne hee'ookko» yu ixxi Keesammi Minennem kiti'm beyyuwwa baxukko. Keesammi Mi'n lamem wixxixxi beyyuwwanne hundem iima'n gogotinam boollaankina kitima kitimakkam beyyuwwa baxukko. Ixxeka goo'n ooso Hiinoo'm cebbanne giirinne shokkiisaa kitimukko. Gennaancho, karo'aanchoo kiiraanchoo ihukko; wiidda weeshsham keenoo kiiraanom sogitano xa'mmam hee'ukko. Eehido'i jor luwwam baximminne Waa'a quuqisukko. Waa'i Daawiitinaa ixxi beet Salamooninaa «Isra'ee'l sulli hundiinsim doo'llum Yerusaaleemanne hee'oo ka Keesammi Minennem heer heerinam i summi weeshamoo'isa issoommo. Isra'ee'l oos i ijaajo egatto'aaree i awwaadaanchi an Muse'enne ihaa ijaajummi luwwi hundam oohim seera, siyya'aa oogato'oo qoxxita'a egettolas ixxuwwi anno'ina uwwummi ka uulliinsi Isra'eela qeessoommoyyo» yu Keesammi Minenne ixxi anginne baxaa axisu misila uullisukko. Minaas Isra'ee'l oos illagiinsi Waa'i bi'isu mulli minaadabiinsi lophphaa Yihuxxekii Yerusaalee'm minaadabii jor baxo baxxamisa issukko. Waa'i Minaasinaa ixxi minaadabinaa qoxxisaa kurukkaarem macceesso'oyyo. Ee bikkina Waa'i Aasoo'l uulli adi'l gogota ixxuwwanne eebukko. Minaasem amadda'a ixxi sanenne guma'a aagisso'o; chimchiminne katta'a Baabiloona massito'o. Minaasim ixxonne hawwi afukkaare ixxi Moollanni Waa'a hasukko; ixxi anno'i Moollanni Waa'i illagennem ixxi gaga heeshaa'ukko. Waa'am uunxukko; Waa'im ixxi uunxato macceesukko. Ixxim Yerusaaleemanne adillanonne daba'lloo'isa issukko. Minaasim Waa'i Moollanni ihukkisa la'ukko. Ee lasage Minaas Daawiit beero'iinsi biiree'n kollinne Giyooniinsi eelliinchi aagginne yoo cebbinne aa'aa Qurxumme'i ooxxi gooc afeebe'e dabaraa ootukko. Ee ootam Oofeel afeebe'e kululaa'aa qeeraa'llisaa ootukko. Girbamaakkoo Yihuxxi beero'uwwanne hundannem o'l gogoxxi ijaajaano dissukko. Odim koyyiinchi waa'uwwaa misilluwwaa Keesammi Miniinsi fissukko. Ee'isam Keesammi Min yoo duunannee Yerusaaleemannee ixxi gagim baxaa hee'u kiti'm beyyuwwa hundam gindaa beero'iinsi tochchonne fissaa uunjukko. Waa'ina kitima hincaa'akkam beyyom dabaraa baxaa mateeyyoo'm kitimaa galaxxi kitimaa ee beyyonne hincaa'ukko. Yihuxxi minaadabim Isra'ee'l Moollanni Waa'ina otossihona ijaajukko. Ihukkaarem minaadab duunnuwwanne kitima hincaa'am hee'ukkok xale'i Maoollanni Waa'inatte hee'ukko. Minaas baxu mulli bax hundim Waa'a uunxu uunxatii, hiraagaan Isra'ee'l Moollanni Waa'i summinne ixxena wocco'i sagarii, Isra'ee'l adilluwwi aganni kitaabanne kitaabamaakko. Minaas uunxu uunxat, Waa'im ixxi uunxatina dabaru dabachchi, ee'isam ixxi baaxiil, amma'nnamoobee'an ihukkis, ixxi heeshaa'eena illage duunnuwwanne otossakkam beyyuwwa baxukkis, Asheer misilluwwa uullisukkis, anginne baxu misilluwwa kaasukkisii hundim hiraagaa'n aganni kitaabanne kitaabamaakko. Minaas ixxi anno'isam lehukko; ixxi adilla'n mi'n gadanonne yoo beyyonne waammamukko. Ixxi beet Amoonim ixxi beyyonne adil ihukko. Amoon Ayihuxxi uullanne adil ihoo ammane ixxi umur lamiyyee lamoo hee'ukko. Ixxi heechchi beyyom Yerusaaleemanne issaa lam hiincho gassukko. Ixxim ixxi anni Minaasisam Waa'i illagenne jor baxo baxukko. Ixxi anni Minaas anginne baxaa hee'u qophpha'n waa'uwwina kitima hincaa'ukko; otossukkome. Ixxi Minaasisa Waa'i illagenne ixxi gaga heeshaa'ukkoyyo. Hore'em lonsaa baaxiilo baxukko. Ixxi gassaanim ixxonne bangujjita'a ixxi adilla'n minennem shito'o. Ihukkaarem Ayihuxxi minaadab adil Amoonanne bangujjito'i keeno hundam shito'o. Ixxi beyyonnem ixxi beeto Iyyoosiyaasa adil issito'o. Iyyoosiyaas umur sadeenti hiincho ihaakkoohaannonne Ayihuxxi uullanne adil ihukko. Ixxi heechchi beyyom Yerusaaleemanne issaa sadee mat hiinchoo gassukko. Iyyoosiyaas Waa'i illagenne er baxo baxukko. Ixxi anni Daawiitika er googo awwonukko; ee googiinsi makkannem qeddannem daba'llukkoyyo. Iyyoosiyaas adil ihu sadeenti hiinchonne woraadichchi hee'ukkuuyyam ixxi anni Daawiitika Waa'a hasukko. Tommonnee la'm hiinchonnem duunnuwwanne otossakkam beyyuwwa, Asheer misilluwwa, qophpha'n waa'uwwaa bukkakka'a anginne baxakko'i misilluwwaa Yihudiinsii Yerusaaleemiinsii bi'isimma asheerukko. Ixxi ijaajinnem Ba'aalina kitima hincaa'akkam beyyuwwa, gindansito'o; ixxim eekee'n hanenne hee'u aduruusa wiriissakkam beyyuwwa iiqansukko. Asheer misilluwwa, qophpha'n waa'uwwaa anginne baxamu misilluwwaa xaansukko; eehid issaa lasage eekka massaa ee keenina kitimtam hee'llo'i kee'n waammanne binnaa'ukko. Ee beyyuwwanne awwaaddam qeessuwwi miqem ixxuwwi kiti'm beyyuwwannem shokkiissukko. Yihudaa Yerusaaleemam ee'isinne muccussukko. Minaasika, Efreemikaa Simi'oonikaa ee'isam Niftaaleem beero'uwwaa eekee'n kululleetanne gindamaa beyyuwwaa hundam muccussukko. Kiti'm beyyuwwa gindukko; Asheer misilluwwaa, qophpha'n waa'uwwaa xaansukko; Isra'ee'l uullanne hundannem hee'u aduruusa wiriissakkam beyyuwwa bi'isukko. Ee lasage Yerusaaleema daba'llukko. Iyyoosiyaas adil ihu tommonnee sadeenti hiinchonnee ixxi uullaa Keesammi Minee muccussaa lasage Axaaliy beet Saafaana beero'i gassaanchi hee'u Maa'iseeya, Yoo'ahaaz beet kitaabaanchi Yo'aahinaa ixxi Moollanni Waa'ika Keesammi Mine areessa'a baxxona asse'ukko. Ixxuwwim hundiinsi lob qeessichchi hee'u Hilqiy beyyo matta'a Keesammi Minina wixxaa hee'u diinate uwwito'o. Ee diinatem Waardiyyuwwi hee'llo'i Leewi'i oos Minaasaanniinsi, Efreemaanniinsii mulli Isra'ee'l minaadabiinsii hundiinsim ee'isam Yihuxxaaniins, Biiniyaam minaadabiinsii Yerusaaleemanne hee'oo keeniinsii wixxaa'llo'oohan hee'ukko. Oo diinatim Keesammi Mine areesseena doo'llanto'i keenina uwwamukko; ixxuwwim ee diinatiinsi Keesammi Mine areessa'a baxxo'i keenina miqqo'o. Ee'isam Yihuxxi adilluwwi gindita'a hee'llo'i mine baximmina ihoo cabbarammi kina, farashshaanchoo lamejji haqqaa aa'llona kin cabbaraaninaa anga qoor keeninaa uwwito'o. Oo keenim ee baxo amma'nnamaakkoo'isinne baxxo'o. Ixxuwwam ijaajjamok Leewi'i shumo'i ihu Meeraar moolliinsi Yahaatattee, Abdiyattee, Qa'aat moolliinsim Zakkaaryaasattee Mashulaamattee hee'llo'o. Mazmuu'l mu'uta lellimma laqqam Leewi'i oos hundim mu'uta gugguuttam keeninaa annanni annanni baxo baxxam keeninaa awwonsaanoo ijaajaanoo hee'llo'o. Ee'isam mulli Leewi'i oos kitaabaano, gassaanoo waardiyyuwwaa hee'llo'o. Keesammi Minenne wixxaa hee'u diinate fissitu'uuyyi qeessichchi Hilqiy Waa'i Muse'enne ihaa uwwu See'l Kitaaba siidukko. Hilqiyim kitaabaanchi Saafaanina «See'l kitaaba Keesammi Minenne siidaammo» yukko. Ee kitaabam Saafaanina uwwukko. Saafaanim ee kitaaba adi'l beyyo massaa adilina «At neese ijaajji luwwi hundam issinoommuulla. Keesammi Minenne wixxaa hee'u diinatem massinaa awwonsaaninaa baxaaninaa uwwinaammo» yukko. Odim kitaabaanchi Saafaan adilina «Qeessichchi Hilqiyina mat kitaaba uwwaakko» yukko. Ee kitaabam adilina qananaa'ukko. Adilim ee See'l sagara macceesaa eddechcha deree'llukko. Adilim ee lasage Hilqiyina, Saafaan beet Ahiiqaamina, Mikkiyaas beet Abidoonina, Adilla'n mi'n kitaabaanchi Saafaaninaa adillina hincixxi awwaadaanchi hee'u Asaayinaa «Mattakka'a i bikkinaa Yihudannee Isra'eelannee gatu minaadaphphi bikkinaa Waa'a xa'mmehe. Ka kitaabanne yoo losa'n bikkina la'issehe. Gaassi niyyanno'i Waa'i sagarina ijaajancha hoogimminnee ku kitaab yookkoka wonshimma hoogimminnee Waa'i ixxi quunqa neesenne diilliisaakko» yoo ijaajo uwwukko. Hiilqiyii gatto'i mulli mannii adil ijaajukkisinne Yerusaaleemanne la'm baxxanchanne hee'llam Huldaa yamantam hiraagaanchi meentichchi beyyo ee asse'anto'i woshshi bikkina matta'a xa'mmito'o. Is manchim Tiiqiwaa'i beet Harhaas beet beet Shaaluumatte hee'ukko. Ixxim Keesammi Minenne hee'oo eddechchuwwa egeraanchi hee'ukko. Oo mannim ee hiraagaanchona woshshi hundam caakkissa'a kutto'o. Isem ixxuwwina dabatta'a «Ki'nnuwwa i beyyo asse'u adi'l beyyo daba'llitakka'a mattakka'a kanniinsi woroon yoo waa'i sagara kullehe» yito'o. Oo sagarim «An Waa'i Yihuxxi adilina qanannaatamu kitaab woronne yoo duunchinne Yerusaaleemaa ixxi woronne yoo minaadabaa hundam guzumo'oommo. Ixxuwwi eese utta'a mulli minaadab waa'uwwina kitima hincaa'llo'ookko. Oo ixxuwwi baxxo'i jor baxim an quuqoommisa issaakko. Yerusaaleemanne quuqummi i quunqi aphphookko bagaan Xoo'ooyyo. Waa'a xa'mmeena ki'nnuwwi asse'u Yihuxxi adilina ‹At macceessitti saga'l bikkina Isra'ee'l Moollanni Waa'i An Yerusaaleemaa ixxi minaadabaa hinkid guzumo'oomda'e macceessaa lasage ki gaga sholliissaa ki eddechcha dereettaahii wi'llitaahii baaxiilo biira yitti bikkina ki uunxato an macceesaammo. At foorinne hee'llittuuyyi Yerusaaleemanne bichchi ihoo'isa issoommoyyo. At xumminnem letoo'isa issoommo› yoolla» yoohan hee'ukko. Mannim ee asso amadda'a adil Iiyoosyaas beyyo daba'llito'o. Adil Iyyoosiyaas Yihudiinsii Yerusaaleemiinsii la'anto'oo lommanna wixxitamisa issukko. Adilim ixxuwwinne maqirem qeessuwwaa Leewi'i oosoo mulli minaadabam goddaanoo buxaa hundam edaa amadaa Keesammi Mine marukko. Adilim Keesammi Minenne siidamu Hidi'l Saga'l kitaabanne yoo sagara hundam minaadabina qananaa'ukko. Adilim ki'aa adilluwwi utuphphi gadanonne uullukko. Ixxim Waa'ina ijaajameenaa ixxi wo'm wodaninnee wo'm sawwitinnee Hidi'l Saga'l kitaab woronne yoo ijaajoo seeraa hundam egereenaa ijaajameenaa Waa'i illagenne hidi'l sagara aagukko. Ee lasage odim Biiniyaam uulli mannii Yerusaaleemanne hee'llo'i mannii hundim ee woshshanne sagara aaggamisa issukko. Ee'isinne Yerusaalee'm minaadab ixxuwwi gaassi anno'ina Moollanni ihu Waa'inne aaggo'i hidi'l sagar xa'mmoo luwwa hundam wonshito'o. Adil Iyyoosiyaasem Isra'ee'l uullanne hee'u haashaarammi waa'uwwa hundam bi'isukko. Isra'ee'l minaadab hundim ixxuwwi Moollanni Waa'ina awwaaddamisa issukko. Minaadabim ixxi adilla'n doollenne hundannem ixxuwwi gaassi anno'i Moollanni Waa'iinsi qee'llukkoyyo. Iyyoosiyaas Waa'i lombina higimmi uguda Yerusaaleemanne lonsukko. Luxxi agan aagu tommonnee soor ballannee Uguxxi gereechcho dutto'o. Qeessuwwi see'llisinne awwaaddamisa issukko; Keesammi Mi'n awwaadom qoxxita'a awwaaddamisa issukko. Ee'isam ixxuwwi gaga Waa'ina keessa'a hundem Isra'ee'l minaadabinam losisaan ikko'i Leewi'i oosina «Keesammi Hidi'l Saga'l Saaxina Daawiit beet adil Salamoon baxisu Keesammi Minenne dissehe. Kanniinsi eehid ki'nnuwwina Moollanni ihu Waa'aa ixxi minaadabaa awwaaddehe bagaan Hidi'l Saga'l Saaxina iyyitakka'a beyyiinsi beyyo massimmi hasisooyyo. Isra'ee'l adil Daawiitii ixxi beet Salamoonii kitaabbo'i awwonsinne ki'nnuwwi abaroosinne abaroosisinnee baxxanchisinnee guddehe. Leewi'i oos ikkobee'i ki'nnuwwi abbaayyuwwi illagenne ixxuwwi abaroosisinne keesammi beyyonne uullehe; abaroos qoodo'isinne annannichchinnem Leewi'i oos hee'llona. Ee lasage Shaashshiqqi uguxxi gereechcho dullehe. Ki'nnuwwi gagam keessehe. Waa'im Muse'enne ihaa ijaajukkisanne duttona ki'nnuwwi abbaayyuwwina gudissehe» yukko. Iyyoosiyaasim eekke'e hee'u minaadab hundinam Shaashshiqqi uguxxi kitimina ihona 30,000 gereebbaa fella'aa ee'isam 3,000 labeennuwwaa ixxi gaqqi horiinsi uwwukko. Gassaanim qeessuwwina, minaadabinaa Leewi'i oosinaa ixxuwwi gaqqi doo'llinne kiti'm diinate hincaa'llo'o. Keesammi Mi'n gassaan hee'llo'i Hilqiy, Zakaaryaasii Yihii'eelii ee uguxxi kitimina ihoo 2,600 gereebbaa fella'aa 300 labeennuwwaa qeessuwwina uwwito'o. Leewi'i oosina ijaajaan Konaaniy ixxi abbaayyuwwi ikko'i Shamaa'iyii Naatinaa'eelii ee'isam Hashaabiy, Yi'i'eelii Yoozaabaadii Shaashshiqqi uguxxi kitimina ihoo 5,000 gereebbaa fella'aa 500 labeennuwwaa Leewi'i oosina uwwito'o. Shaashshiqqi ugudina hasisoo luwwi hundim gudukko; qeessuwwii Leewi'i oosii adi'l ijaaccisanne ixxuwwina qoodamu beyyonne uullito'o. Shaashshiqqi ugudina duramu gereebbaa fellaa'aa Leewi'i oos coo'llo'o; qeessuwwim ee xiiga kiti'm beyyonne wixxo'o. Muse'e see'l kitaabanne kitaabamukkisannem Waa'ina kitim issita'a hincaa'llona shokkiisakka'a hincaa'akkam kitimina abaroosinne abaroosinnem annanni issito'o; labeennuwwam ee'isam issito'o. Leewi'i oosim see'llisinne uguxxi kitima giiranne satto'o. Keesammi kiti'm maaram qure'enne, fataatannannee disxannee satta'a minaadabina qaqqissa'a baxxansito'o. Ee lasage Leewi'i oos ixxuwwi gaginaa qeessuwwinaa gudisso'o. Mashka'oomim Aaroon shumo'i ikko'i qeessuwwi shokkiisakka'a hincaa'akkam kitimaa di'iraa hincaa'llu'uuyyi baqit afeebe'e baxxu'uuyyi affam hee'llo'i bikkinatte. Ee bikkina Leewi'i oos ixxuwwi gaginaa Aaroon shumo'i ikko'i qeessuwwinaa gudisso'o. Asaaf shumo'i ikko'i zammaaraan adil Daawiit, Asaaf, Heemaanii adilina hiraagaanchi hee'u Yiduutaanii ijaajjo'i ijaaccisanne ixxuwwina qoodamu beyyonne hee'llo'o. Leewi'i oosim shaashshiqqi uguxxi kitima ixxuwwina gudissam hee'llo'i bikkina Keesammi Mi'n gooccuwwa egettam hee'llo'i waardiyyuwwi egechchi beyyiinsi mattam hee'llo'oyyo. Ee'isinne shaashshiqqi uguda lonsimmii shokkiisakka'a hincaa'akkam kitima Waa'i kiti'm beyyonne hincaa'immii Waa'ik awwaad hundim adil Iyyoosiyaas ijaajukkisinne ee ballam gudukko. Eekke'enne hee'llo'i Isra'ee'l minaadab hundim shaashshiqqi uguda lonsito'o. Ee'isam lamar ballina Qorosho'i uguda lonsito'o. Hiraagaanchi Saamu'eel doolliinsi kid hooraa Isra'eelanne Shaashshiqqi uguda eehido'isa lonsakko'i amman bee'e. Iyyoosyaas qeessuwwinne, Leewi'i oosinne, Yihuxxi minaadabinne, Isra'ee'llaanninnee eekke'e hee'llo'i Yerusaalee'm minaadabinnee hundinnem Shaashshiqqi uguda lonsukkisa Isra'ee'l adilluwwik lonsukkok ayyim bee'e. Oo shaashshiqqi ugud lonsamukkok Iyyoosiyaas adil ihu tommonnee sadeenti hiinchonnettee hee'ukko. Adil Iyyoosiyaase ee hundam guullaa Keesammi minina baxaa lasage Gibxi uulli adil Niikaa'i Efiraaxiis daajji gadanonne hee'oo Karkaamiishanne orameena ixxi gogota amadaa firukko. Adil Iyyoosiyaasim ixxenne orameena ki'ukko. Ihukkaarem Niikaa'i Iyyoosiyaasina «Yihuxxi adil, eesee keesee wocansoo luwwi mahim bee'e. An waarummok i diina'inne orameenatte bagaan kiinninne orameenayyo. I diina'am qaqqisaa qasona Waa'i eese ijaajaakko. Waa'i iininne maqire ihu bikkina at iinninne uullixxantibeeta'n kiina eranne. Ihukkaarem Sabbittaa'lleensi Waa'i keese bi'isookko» yoo asso asse'ukko. Ihukkaarem Iyyoosiyaas ixxenne orameena murte'aa ki'ukko. Waa'i adil Niikaa'innette ihaa wocu woshsha macceeseena hasukkoyyo. Ixxim adilla'n eddechcha dabassaa mulli manna labaa Magiido'i biir beyyonne orameena marukko. Gibxi uulli gaadaanim adil Iyyoosiyaasa xiyyinne qasso'o. Ixxim ixxi awwaadaanina «Jorisa aphphixxaammoo bikkina ka lambe'iinsi eese fissehe» yaa ijaajukko. Ixxuwwim ixxi saa'llaa hee'u faraxxi gaarre'iinsi mulli ixxi gaqqi gaarre'enne saa'llissa'a Yerusaaleema massito'o. Ixxim eekke'enne lehukko. Adilluwwi waammi beyyonnem waammamukko. Yihuxxekii Yerusaalee'm minaadabii hundim wi'llito'o. Hiraagaanchi Ermiyaasim adil Iyyoosiyaasina wi'l gixo'o fissukko. Kaballi afeebe'em goonii meentii ee gixo'inne Iyyosiyaasa tiittamo. Oohim Isra'ee'l uullanne losamaakkoohan ihaa wi'l gixo'i kitaabanne kitaabamaakko. Iyyoosiyaas baxu mulli baxii Waa'ina hee'u ixxi lob iittii Waa'i seerina ijaajamam hee'ukkisii hundim luxxaanniinsi ki'isaa lasaanchi afeebe'e yoo ixxi aganni hundim Isra'ee'llaannonnee Yihuxxi adilluwwi aganni kitaabbuwwannee kitaabamaakko. Ayihuxxi minaadabim Iyyoosiyaas beeto Yoo'ahaaza doo'llita'a anni beyyonne Yerusaaleemanne adil ihoo'isa issito'o. Ixxim umur lamiyyee sas hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa sas agana gassukko. Gibxi uulli adil Niikaa'i ixxo qeefadaa massukko. Ayihuxxi mannim sas kumaa soor xibbi kiilo'oo ihoo xaa'l biraa sadee soor kiilo'oo ihoo worqaa gibitamisa issukko. Niikaa'im Yoo'aahaazina abbaayyi Eeliyaaqeema Yihuxxi uullannee Yerusaaleemannee adil issukko. Ixxi summam dabaraa Yoo'aaqeema yaa fissukko. Ihukkaarem Yoo'ahaaza qeefadaa Gibxi uulla massukko. Yoo'aaqeemik umur lamiyyee onti hiinchoo ihaakkoohaannonne Yihuxxi uullina adil ihukko. Ixxi heechchi beyyom Yerusaaleemanne issaa tommoo mat hiinchoo gassukko. Ixxi Moollanni Waa'i illagennem jor luwwa issukko. Baabiloo'n uulli adil Nabukadanaxoorim Ayihuxxi uullanne weeraraa amadaa lasage Yoo'aaqeema qeefadaa naas xaarinne baxakko'oo chimchiminne karaa Baabiloo'n uulla massukko. Nabukadanaxoorim Keesammi Mi'n mu'uta bogaa massa Baabiloo'n uullanne hee'oo ixxi adilla'n minenne dissukko. Adil Yoo'aaqeem baxu luwwi hundim ixxuwwik shigigaa'oo losanii baxu jor baxii exxaa Isra'ee'llaannonnee Yihuxxi adilluwwi aganni doonannee kitaabamaakko. Ixxi beyyonnem ixxi beet Ikooniyaan adil ihukko. Ikooniyaan umur tommoo sadeenti hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa sas aganaa tommi ballaa gassukko. Ixxim Waa'i illagenne jor luwwa issukko. Adil Nabukadanaxoorim fiitti agananne Ikooniyaana karaahii Keesammi Mi'n mu'uta bogaahii Baabiloo'n uulla massukko. Ee lasage odim Ayihuxxi uullannee Yerusaaleemannee Ikooniyaan abbaayyo Sedeeqiyaasa adil issukko. Sedeeqiyaas umur lamiyyee mat hiinchoo ihaakkoohaannonne adil ihukko. Ixxi heechchi beyyom Yerusaaleemanne issaa tommoo mat hiinchoo gassukko. Ixxim ixxi Moollanni Waa'i illagenne jor luwwa issukko. Waa'i sagara ixxena kuru hiraagaanchi Ermiyaas illagennem ixxi gaga aad heesha'ukkoyyo. Sedeeqiyaas ixxena amma'nnamaakkoohan ihoo'isina Waa'i summinne hidiisaa hee'u adil Nabukadanaxoorinam boqqukko. Saxximminnem Isra'ee'l Moollanni Waa'i kolli daba'llimma sabaa xiiqqamukko. Odim qeessuwwi awwonsaanii minaadabii hundim qophpha'n waa'uwwina otossitu'uuyyi ixxuwwi kululleetanne hee'llam hanqo'i Waa'a laqqambee'i minaadaphphi jor googonne matto'o. Waa'i ixxi gagim keesu Keesammi Minem bushisso'o. Ixxuwwi anno'ina Moollanni ihu Waa'im minaadabinaa ixxi mininaa qishixxu bikkina qoxxissa'a kuttamisina hiraagaano edaa, edaa asse'ukko. Ihukkaarem ixxuwwi Waa'i quunqi ixxuwwi hanenne iheebe'i afeebe'ee ixxi kee'mmaalli quunqiinsi gibba'a xotteena xantambee'i afeebe'ee Waa'i asse'ammaanonne naacanto'o. Ixxi sagaram gadda'a ixxi hiraagaano sholliissam hee'llo'o. Ee bikkina Waa'i ixxuwwi hanenne Baabiloo'n uulli adila eebukko. Ixxim Keesammi Minenne hee'llo'i keen gatoo'n Ayihuxxi uullanne hee'llam manna hundam bisa'inne shaa guullukko. Ixxim Keesammi Mi'n mu'utaa amaxxaa adi'l gassaa'n amaxxaa hundam bogaa Baabiloo'n uulla gugguurukko. Keesammi Minee Yerusaalee'm beero'om adila'n minneewwinnee woronnee yoo luwwi hundinnee shokkiisukko beero'i ootam gindansukko. Bisa'inne letoo'n gatto'i qaxam qeefadaa Baabiloo'n uulla massukko. Ixxuwwim ee uullanne agid ikka'a adil Nabukadanaxoorinaa ixxi shumo'inaa Faariis uulli adilluwwi adil ki'eebe'i afeebe'e awwaaddo'o. Ee'isinne Waa'i gaassaa hiraagaanchi Ermiyaasinne «Minaadab Usheexxaxxi balla lonsimma sabu bikkina ku uulli lamarayyi hiinchina udma'i ihaa gatoo bikkina usheexxaxxi balli usheexxato siidookko yamamaa wocamu sagar wo'mmukko. Waa'i hiraagaanchi Ermiyaasinnetti ihaa wocu ixxi sagar Qiiroos Faariis uulli adilluwwi adil ihu luxxi hiinchonne wo'mmukko. Waa'im kanniinsi woroon yoo alallaatto adil ixxi adilla'n uullanne hundannem alallaatisoo'isaa kitaabaa minaadab hundinam la'isoo'isaa issaa Qiiroosa ki'isukko. Alallaaxxi sagarim «Faariis uulli adilluwwi adil Qiiroosim ‹Eese iima'n Moollanni Waa'i uulli adilluwwi hundam iina uwwaakko. Yihuxxi uullanne yoo Yerusaalee'm beero'onnem ixxena Keesammi Mine baxona ijaajaakko. Ee bikkina ixxi minaadabiinsi ki'nnuwwi lambe'enne hee'ookkok ayyi manchim Yerusaaleema marona. Ixxena Moollanni ihu ixxi Waa'im ixxenne maqir ihona› yoolla» yoohan hee'ukko. Hiraagaanchi Ermiyaas wocu Waa'i sagar wo'mmoo'isina Qiiroos Faariis uulli adil ihu luxxi hiinchonne Qiiroosa Waa'i ixxi gagim ki'isukko. Ixxim ixxi adilla'n uullanne hundannem kanniinsi woroon yoo ijaaj kitaabamaa alallaatamoo'isa issukko. Oo adilim alallaatisu ijaaj «Iima'n Moollanni Waa'i eese heer uullanne hundannem adil issaakko. Yihuxxi uullanne hee'oo Yerusaaleemanne ixxena Keesammi Mine baxoommisina ijaajaakko. Ki'nnuwwinne maqire hee'oo ixxi minaadabinne ayyennem Waa'i maqir ihona. Ixxim Yihuxxi uullanne hee'oo Yerusaaleema maraa Yerusaaleemanne hee'oo Isra'ee'l Moollanni Waa'ika Keesammi Mine baxona. Ka beyyonne gatoo hinka'i uullannem hee'oo manni hundim Yerusaaleemanne Keesammi Mine Waa'ina baximmina gaqqi doo'llinne uwwamoohaannonne hanenne bira, worqa, mu'utaa fooraam diinatee uwwimminne hara'mmona» yoohane hee'ukko. Ee lasage Yihuxxekii Biiniyaam sulli awwonsaanii, ee'isam qeessuwwi, Leewi'i oosii Waa'i tiissiisu mannii hundim daba'llita'a matteenaa Yerusaaleemanne yoo Waa'ika Keesammi Mine dabatta'a baxxeenaa guddo'o. Ixxuwwi olla'i mannim gaqqi doo'llinne uwwito'aannonne edda'a kin birinnee worqinnee baxamu mu'uttuwwa, annanni annanni mu'uta, fooraam diinatee mulli awwaadoo luwwaa uwwimminne hara'mmito'o. Eehanniinsim mulleka adil Qiiroos Nabukadanaxoor Yerusaalee'm Keesammi Miniinsi bogaa massaa ixxi qophpha'n waa'uwwi minenne dissaa hee'u keesammi mu'uttuwwa hundam dabaraa uwwukko. Faariis uulli adil Qiiroosim ee mu'uta hundam adilla'n mi'n mu'uxxi mi'n gassaanchi hee'u Miitiradaatinne xigisaa Yihuxxi manni gassaanchi ihu Sheshbaazaarina uwwukko. Ee mu'uttuwwikim xig kanniinsi woroon yoohane. Worqi saahinnuwwi 30. Kin birinne baxamu saahinnuwwi 1,000. Mulli annanni annanni saahinnuwwi 29. Worqinne baxamu loqooqo'i saahinnuwwi 30. Kin birinne baxamu loqooqo'i saahinnuwwi 410. Ee'isam mulli annanni annanni mu'uttuwwi 1,000 hee'ukko. Qeefadanta'a hee'llam Baabiloo'n uulliinsi Yerusaaleema daba'llita'a waatto'i manninne maqirem Sheshbaazaar amadaa waaru birinnee worqinnee baxamu mu'uxxek hundoo'mmekim xig 5,400 hee'ukko. Baabiloo'n adil Nabukadanaxoor qeefadaa massaa hee'u manniinsi Yerusaaleemaa Yihuxxi uullanne yoo ixxuwwi gaqqi beero'uwwaa daba'llita'a waatto'i keen kaanniinsi woroon yo'i keeno. Waatto'i keeninam awwonsaan hee'llo'i manni Zarubaabeelatte, Iyyaasotte, Nahimatte, Saraayatte, Iraa'eelaayatte, Mardookiyoosatte, Biilshaanatte, Miisphaaratte, Bigwaayatte, Ireehuumattee Ba'aanattee hee'llo'o. Ixxuwwi uulla daba'llito'i Isra'ee'l mannik xig kanniinsi woroon yoohane. Phaari'oosh moolliinsi 2,172 Shafaaxiyik 372 Araah moolliinsi 775 Phahaatmoo'aab moolliinsette ikko'i Iyyaasikii Yoo'aab shumo'ii 2,812 Eelaam moolliinsi 1,254 Zaatu moolliinsi 945 Zaakaay moolliinsi 760 Baani'i moolliinsi 642 Beebaay moolliinsi 623 Aazgaad moolliinsi 1,222 Adooniiqaam moolliinsi 666 Bigwaay moolliinsi 2,056 Aadiin moolliinsi 454 Hizqiyaas kollinne ihoo Axeer moolliinsi 98 Beexaay moolliinsi 323 Yora'i moolliinsi 112 Hashuum moolliinsi 223 Gibaar moolliinsi 95 Beetalihee'mmek 123 Naaxoofik 56 Anaatootik 128 Aazmaaweetik 42 Qiiryaatyi'aariimik, Kaafiirikii Ba'eerootikii 743 Raama'ikii Geeba'ikii 621 Miikmaasik 122 Beetee'llekii Aayikii 223 Naabo'ik 52 Maagbiishik 156 Mulli Eelaa'm beero'uwwik 1,254 Haarii'mmek 320 Loodaa'nnek, Hadiidaa'nnekii Oonikii 725 Yaarko'ik 345 Sanaa'ik 3,630 hee'ukko. Qeessuwwi moolliinsi Iyyaas shumo'iinsi ihu Yidaa'iy abaroosiinsi 973 Iimeer abaroosiinsi 1,052 Phaashihuur abaroosiinsi 1,247 Haariim abaroosiinsi 1,017 hee'ukko. Leewi'i sulliinsi Hoodaayiw shumo'i ikko'i Iyyaasaanniinsii Qaadimi'eel abaroosiinsii 74 Asaaf shumo'i ikko'i Keesammi Mi'n zammaaraaniinsi 128 Keesammi Mi'n waardiyyuwwi ikko'i Shaaluumaanniinsi, Axeeraanniinsi, Xaalmoonaanniinsi, Aquubaanniinsi, Haxiixaanniinsii Shobaay abaroosiinsii 139 hee'ukko. Keesammi Mi'n awwaadina qoodanta'a hee'llo'i shumo'i Xiha'ane, Hasuufane, Xaaba'ootane, Qeeroosik, Sii'aahane, Faadoonane, Labaanane, Hagaabane, Aquubane, Hagaabane, Shaalmaayane, Hanaanane, Giideelane, Gaahaarane, Ira'aayyane, Iraaxiinane, Naqoodane, Gaazaamane, Uuza'ane, Phaaseehane, Beesaayane, Asnaahane, Ma'uuniimane, Nafiisiimane, Baaqbuqane, Haquufane, Harhuurane, Baaziluutane, Mahiidane, Harsha'ane, Baarqoosane, Siisaarane, Teemaahane Naxiihanee Haxiifanee hee'llo'o. Salamoon awwaadaa'n shumo'iinsi Sooxaayane, Hasoofeereetane, Pharuudane, Yaa'ilane, Daarqoonane, Giideelane, Shafaaxiyane, Haxiilane, Phookeereetane, Haxaabaayimanee Amii'i abaroosaa hee'llo'o. Keesammi Mi'n awwaadina doo'llanto'i kee'nnekii Salamoon awwaadaa'n shumo'ikii xig 392 hee'ukko. Odim Telimeelaha, Telharsha, Karuuba, Adaanaa Iimeeraa yakkam beero'uwwiinsi qeefajjo'iinsi daba'llita'a waatto'i keen hee'llo'o. Ihukkaarem oo keen ixxuwwi anno'i lugumo caakkissa'a kutteena xanto'oyyo. Dalaayik, Xoobbiyikii Naaqood moollikii xig 652 hee'ukko. Odim qeessuwwi shumo'iinsim Habaayik, Haqooxikii Baarzilaay shumo'ii hee'llo'o; Baarzilaay ka summinne weeshameena xanukkok Gala'aaxxi Barzilaay landichcho eebaa hee'u bikkinatte. Ixxuwwim qaranchi aganna kuroo doonanne anno'i summa hassa'a siiddeena xantobee'i bikkina muccuttobee'aannisa xigakka'a qeessoomaninne awwaaddeena hoorakko'o. Ayihuxxi manni gassaanchim Waa'ika doo'lla Uuriiminnee Tuumiiminnee xa'mmoo qeessichchi ki'eebe'e keesammi hurbaatiinsi ittambee'isa ijaajukko. Qeefadanta'a hee'llo'i uulliinsi daba'llito'i manni hundikim xig 42,360 hee'ukko. Oohim 7,337 ikkam goonaa landi awwaadaanoo edoo'nnette; odim 200 goonii landi zammaaraanii hee'ukko. Ee qeefajjo'iinsi daba'llito'i mannina 736 farad, 245 baqulli, 435 gaameela'ii 6,720 hallii hee'ukko. Ixxuwwim Yerusaaleemanne Keesammi Min hee'u beyyo affa'a lasage mat mat abaroosa awwonsaan Keesammi Min illageen hee'u beyyonnem daba'llaa baxamoo'isina hara'mmoo luwwa uwwito'o. Keesammi Mi'n baxina xanto'i qaxinne fissita'a uwwito'ok 500 kiilo'i worqaa 2,786 kiilo'i kin biraa hee'ukko. Odim qeessuwwina ihoo 100 qeessuwwi eddechcha uwwito'o. Qeessuwwi, Leewi'i oos, zammaaraan, Keesammi Mi'n waardiyyii Keesammi Mi'n awwaadaanii Yerusaaleemanne te'im ixxi kululleetanne afuutto'o. Gatto'i Isra'ee'l minaadabim ixxuwwi gaqqi beero'uwwannem afuutto'o. Lama'l agananne Isra'ee'l oos hundim ixxuwwi gaqqi beero'uwwanne hee'llo'i beyyuwwiinsi hundim mat ikka'a Yerusaaleemanne wixxito'o. Yooseedeeq beet Iyyaas ixxi moolli ikko'i qeessuwwinnee Salaatiyaal beet Zarubaabeelim ixxi qarmanninnee mat ikka'a Waa'i manchi ihu Muse'i See'l Kitaabanne kitaabamukkisanne shokiisakka'a hincaa'akkam kiti'm beyyo Isra'ee'l Moollanni Waa'ina dabatta'a baxxo'o. Ixxuwwi kululleetanne hee'llo'i mulli minaadaba luxxeka baddito'aarem kiti'm beyyo illageen baxamaa hee'u beyyonnem dabatta'a baxxa'a shokkiisakka'a hincaa'akkam kitima Waa'ina hiimoo daraa hincaa'imma asheetto'o. Ballina ballina qoodamukkisanne shokkiisakka'a hincaa'akkam kitima hincaa'imminne Daas Uguda see'llisanne lonsito'o. Ee lasagem amman hundam shokkiisakka'a hincaa'akkam kitima, aga'n aagganne hincoo kitima, keesamaakkoo Waa'i ugudduwwanne hincoo kitimmuwwaa liiranchinne Waa'ina uwwakkam luwwaa hincaa'llo'o. Ixxuwwi Keesammi Mine dabatta'a baximma asheettobee'aarem lama'l agan aagu luxxi ballanne shokkiisakka'a hincaa'akkam kitima Waa'ina hincaa'imma asheetto'o. Ixxuwwim angi diinate kina cabbatta'a axissam keeninaa anga qoor manninaa uwwito'o. Ee'isam Faariis adil Qiiroos ijaaju ijaaccisanne Xiiroosikii Siidoo'n beero'i mannii Liibaanoosiinsi digiphphi haqqa Dambalaqinne Yoophe'i tochcho asse'llamisina hurbaata, aggaa wee'l zaytaa ixxuwwina asse'llo'o. Ee bikkina Yerusaaleemanne hee'u Keesammi Mi'n beyyo affo'i la'm hiinchi la'm agananne Zarubaabeel, Iyyaas, mulli ixxuwwi abbaayyuwwi ikko'i qeessuwwi, Leewi'i oosii qeefado'iinsi Yerusaaleema daba'llita'a waatto'i keenii hundim baxo asheetto'o. Umur lamiyyi hiincho te'im eehanniinsi hanaan ihu Leewi'i oos hundim Keesammi Mi'n baxo baxisaan ikka'a doo'llanto'o. Iyyaas, ixxi goo'n oosii ixxi abbaayyuwwii, Yihud oos, Hoodaay shumo'i ikko'i Qaadimi'eelii ixxi goo'n oosii, Heenaadaad shumo'iinsetti ikko'i goo'n oosii Leewi'i oosii hundim mat ikka'a Keesammi Mine dabatta'a baxisseena doo'llanto'o. Baxaan Keesammi Mi'nneka shooto'o shooto'imma asheetto'i ammanenne qeessuwwi qeessooma'n eddechcha edde'lla, anganne xurumba amadda'ahii Asaaf abaroosiinsetti ikko'i Leewi'i oosim diitta'a amadda'ahii adil Daawiit uwwu awwonsisanne mazmuurinne Waa'a lonsiteena uullitto'o. Ixxuwwim «Waa'i danaamo; Isra'eelina yoo ixxi iittim heer heerinatte» yoo mazmuura Waa'i lombina zammatto'o. Keesammi Mi'n baxim asheeramu bikkina minaadab hundim sagara iimaa'lla'a ilil yitu'uuyyi Waa'a galaxxitam hee'llo'o. Illagee'n Keesammi Min baxamaa hee'ukkisa moo'llo'i lommanni qeessuwwii Leewi'i oosii ee'isam moolli awwonsaanii kaba baxamoo Keesammi mi'nnek shooto'i ashsheeramukkisa moo'lla'a lobakata wi'llito'o. Ihukkaarem eekke'e hee'llo'i mulli keen liiranchinne lobakata shuuttam hee'llo'o. Sagaroomim qee'l afeebe'e macceesamoo kee'mmaalli hee'u bikkina ayyi manchim liiranchanda'e te'im laachchanda'e annanni issaa la'eena xanam hee'ukkoyyo. Yihuxxaanninaa Biiniyaam minaadabinaa diina'i ikko'i manni qeefajjo'iinsi daba'llito'i manni Isra'ee'l Moollanni Waa'ina Keesammi Mine baxxu'uuyyi yo'isa macceesso'o. Ee bikkina ixxuwwi Zarubaabeel beyyoo moolli awwonsaa'n beyyoo waatta'a «Neesem ki'nnuwwisam ki'nnuwwi Waa'a hansoommane; Aasoo'l adil Asiraadoon neese ka uulla woru ammaniinsi ki'insaa Waa'ina kitima hincaa'nnoommuulla; ee bikkina ki'nnuwwinne maqirem banxona» yito'o. Ihukkaarem Zarubaabeel, Iyyaasii moolli awwonsaanii ee mannina «Neese ni Moollanni Waa'ina banxoommi mi'n baxina ki'nnuwwi hara'mmat hasisooyyo. Faariis adil Qiiroos ijaajukkisannem neese ni gagim banxoommo» yita'a dabatto'o. Ee lasage odim ee uullanne hee'llam manni Yihuxxi manna baddissa'a neeyyato mussiisimminne Keesammi Mine baxxambee'isa hootteena killo'o. Faariis adilla'n gassaaninam maqanxa uwwitu'uuyyi neeyyato mussiisseena ixxuwwi sawwitinne uullixxantam manna bitaa'llo'o. Eekkam Qiiroos adil ihu doolliinsi ki'isaa Daariyoos adil ihu doolli afeebe'e issitam hee'llo'o. Arxeeksis adil ihukkisam diina'i kissa kitaabinne gudissa'a Yihudannee Yerusaaleemannee hee'llam Isra'ee'l minaadaba kasasso'o. Arxeeksis Faariis adil ihu doollenne odim Biishilaam, Miitirdaat, Xaabi'eelii mulli ixxuwwinne yo'i keenii mat ikka'a kissa kitaabba'a adilina hincaa'llo'o. Oo kissim kitaabamukkok Aramaayki fidalinnettee Aramaayki suuminnettee hee'ukko. Ee'isam gassaanchi hee'u Rahuumii kitaabaanchi Shiimshaayyii Yerusaalee'm bikkina kanniinsi woroon yoo kissi kitaaba adil Arxeeksisina kitaabbo'o. Gassaanchi Rahuumiinsi, kitaabaanchi Shiimshaayiinsii ee'isam ixxuwwina hara'mmitam daannuwwiinsii Eelaa'm uulli Eereekanne, Baabiloonannee Suusa'annee hee'llam hee'llo'i gassaaniinsi hundiinsim lobanee malaayyaamoo hee'u adil Asanaafeer ixxuwwi uulliinsi dooyyisaa Samaare'i beero'onnee Efiraaxiisiinsi eelliinchi aagginne yoo uullannee hee'llamisa issu mulli minaadabiinsi kitaabamaakkoohane. Ee askitaaphphekim horoor woshshi «Efiraaxiisiinsi eelliinchi aagginne hee'llam awwaadaaniinsi adil Arxeekisisina asse'amaakkoohane. «Ki beyyiinsi ni beyyo daba'llita'a waatto'i Ayihuxxi manni ee jor boqqi Yerusaalee'm beero'o dabatta'a baxxamuulla. Ootam kininne dabatta'a oottamuulla. Keesammi Mi'nnekkam shooto'o uullissamuulla. Ee bikkina adila, oo beero'i daba'llaa baxamulasii ootim ootamaa beeddulasii minaadab gibiro miqimma sabookko; adilla'n mine aagoo diinatim hoffe'oohan ihukkis la'amaakkoohan ihona. Oohim neese adilla'n mi'n bikkina xa'mmammoomman ihu bikkinaa adilim sholle'ukkuuyyi moo'nneena hansoombee'i bikkinaa ka woshsha kiina la'insoommo. Kiyyanno'i aganni kitaab saarayyamaa moo'amona. Ixxonnem ku beero'i hundi ammanem boqqi beero'i ihukkisaa adilluwwaa uulli gassaanoo lobakata hawwisoohan ihukkisaa laqqootto. Gindamaa hee'ukkokim ee mashka'innette. Ee bikkina ku beero'i daba'llaa baxamulasii ixxi ootim daba'llaa ootamulasii Efiraaxiis daajji eeqidonne matem sharadim kiina hee'oobee'an ihukkisa la'e» yoohane. Adilim «Gassaanchi Rahuumina, kitaabaanchi Shiimshaayinaa ee'isam Samaare'ennee Efiraaxiisinsi eelliinchi aagginne hee'llam beshshuwwina hundinamii xummi ki'nnuwwina ihona. «Iina asse'llakko'i assi ni uulli suuminne tiramaa qanannaatamukkaare macceesaammo. Ee bikkina qooxxaallisa saarayyakkona ijaajaa hee'ummo. Saarayyamaa la'amukkokim Yerusaalee'm beero'i gaassi doolliinsim ki'isaa adilluwwanne boqqoomaa bangujjaatoo ki'isukkuuyyi hawwisoo beero'i ihukkis siidamukko. Ee beero'onnem Efiraaxiisiinsi eelliinchi aagginne yoo uulla hundam gassitu'uuyyi gibiroo qaraxaa wixxa'llam malaayyaam adilluwwi hee'llo'o. Ee bikkina an mulli ijaajo fisseembe'i afeebe'e oo beero'i daba'llaa baxamoobee'isa ee manna ijaajjehe. Ka woshshanne jalaggakkambee'isa qoxxehe; adilla'n mine aagoo diinat mahina hoffe'oohane?» yoo dabachcha asse'ukko. Adil Arxeekisis asse'u assi kitaab Rahuumina, Shiimshaayinaa ixxuwwi beshshuwwinaa qanannaatamukkisam Yerusaaleema Ayihuxxi beyyo qaqqissa'a matta'a malaayyinne baddissa'a dabatta'a baxxambee'isa issito'o. Ee bikkina Daariyoos Faariis uullanne adil ihu la'm hiinchi afeebe'e Yerusaaleemanne baxamoo Keesammi Mi'n bax asheero'onnem uullukko. Hiraagaanchi Hage'ee Iido'i beet hiraagaanchi Zakkaariyaasii Yihudannee Yerusaaleemannee hee'llam Ayihuxxi mannina Isra'ee'l Waa'i summinne hiraago kutto'o. Salaatiyaal beet Zarubaabeelii Yooseedeeq beet Iyyaasii ee hiraagaa'n sagara macceessa'a Keesammi Mine Yerusaaleemanne baximma odim asheetto'o. Lamem hiraagaanim ixxuwwina hara'mmitam hee'llo'o. Ee ammane Efiraaxiisiinsi eelliinchi aagginne yoo uulla gassaanchi hee'u Taatanaayii Shataarbooznaayii ixxuwwi gassaaninnem Yerusaaleema waatta'a «Ka Keesammi Mine baxxakkonaa ootam dabattakka'a oottakkonaa ki'nnuwwa baxxehe yukkok ayyette?» yita'a xa'mmito'o. Odim ka Keesammi Mine baxoo mannik summi ayyayyette? yita'a xa'mmito'o. Ihukkaarem Waa'i Ayihuxxi awwonsaano egeram hee'u bikkina Faariis adil Daariyoos beyyo oo woshshi afaa dabachchi kitaabamaa waareebe'e bax uullukkoyyo. Efiraaxiis daajji eeqixxi gassaanchi hee'u Taatanaay, Shataarbooznaay, ixxuwwi beshshuwwii Efiraaxiis daajji eeqidonne hee'llo'i gassaanii adil Daariyoosina asse'llo'i assi «Adil Daariyoosa, xummi kiina ihona. Neese Yihuxxi uulla mallaa lob Waa'ik Min kininnee cabbaramaakkoo haqqinnee baxamukkuuyyi moo'nnummis kiina la'amona. Baxoomam ixxuwwi awwonsatinne qoxxita'a baxxamuulli ihu bikkina qaqqissa'a baxxamuulla. «Neesem ee minaadaphphi awwonsaano ka Keesammi Mine dabattakka'a baxxehe ootam oottehe yukkok ayyette? yinaa xa'mminummo. Odim ee bax awwonsaa'nnekka summa kiina la'inseena xa'mminaammo. «Ixxuwwim niina ‹Neese uullaa iimanee qooccu lob Waa'ina awwaadaano. Ee bikkina lobakat doolliinsi illageen Isra'eelina lob adil baxaa guullaa hee'u Keesammi Minee ootaa daballaa banxoommuulla. Ihukkaarem gaassi niyyanno'i iima'n Waa'a quuqisso'i bikkina Baabiloo'n uulli adil hee'u Kalaadekkichchi Nabukadanaxoor anganne Waa'i higisaa uwwukko. Ixxim ka Keesammi Mine gindukko; minaadabam qeefadaa Baabiloo'n uulla massukko. Ee lasage Baabiloonanne Qiiroos adil ihu luxxi hiinchonne ka Keesammi Mine daballaa banxona ijaajukkok adil Qiiroos ixxi gagame. Adil Nabukadanaxoor illageen Yerusaaleemanne hee'u Keesammi Miniinsi qeefadaa massaa Baabiloo'n uullanne yoo otossakkam beyyuwwanne dissaa hee'u worqinnee kin birinnee baxamu Keesammi Mi'n mu'uttuwwa hundam adil Qiiroos dabaraa niina uwwaakko. Uwwukkokim Yihudanne gassaanchi issaa doo'llu Sheeshbaazaar kollinnetti hee'ukko. Ixxenam ka mu'uta amadaa waaraa Yerusaaleemanne hee'oo Keesammi Minennem dissona Keesammi Minem illageen hee'u beyyonnem dabaraa baxisona adil Qiiroos ijaajaakko. Ee bikkina Sheshbaazaar waaraa Waa'ika Yerusaaleemanne yoo Keesammi Mi'n baxo asheerukko. Ee balliinsi kid baxoom baxamoolla; ihukkaarem Keesammi Mi'n bax beeddukkoyyo› yito'o. «Adila, ki doo'l ihulas Waa'ik Keesammi Min Yerusaaleemanne daba'llaa baxamona adil Qiiroos ijaaju ijaaj yoo'isaa bee'isaa moo'immina Baabiloo'n adi'lla'n minenne yoo aganni doonnuwwi saarayyamaa la'amona. Atim ka bikkina maha sawwitda'e niina la'issoo'isina uunxinoommo» yoohane. Adil Daariyoosim Baabiloo'n adilla'n mi'n aganni doonnuwwi hundim saarayyamoo'isina ijaajukko. Ihukkaarem Baabiloo'n beero'onnette ihoo'n Meedoo'n uullanne «Ahimtaa» yakkam beero'onne mat xaacci omachchi siidamukko. Ixxonnem Qiiroos adil ihu luxxi hiinchonne Waa'aannina Yerusaaleemanne yoo Keesammi Mi'n bikkina fissu ijaaj «Waa'ina kitima hincaa'akkam beyyi ihoo'isina Waa'ik Keesammi Min daba'llaa baxamona! Shooto'im shooto'amona! Ixxekim uullichchi lamiyyee lamar meetira midaadim lamiyyee lamar meetira ihona. Ixxi ootim sas ogora geejji geejji kininne baxamaakkoohan ihaa eehanni horoor odim mat ogor haqqinne baxakka'a goollakko'oohan ihona. Ee baxinam hasisoo diinat adilla'n miniinsi uwwamona. Ee'isam adil Nabukadanaxoor illageen Yerusaaleemanne hee'u Keesammi Miniinsi qeefadaa eebu woriqinnee kin birinnee baxamaakkoo keesammi mu'uttuwwi hundim daba'llaa Yerusaaleemanne baxamoo Keesammi Minenne eraa'llisam afuurona» yoo sagar kitaabamaa siidamukko. Ee lasage Daariyoos «Efiraaxiisiinsi eelliinchi aagginne yoo uulla gassaanchi ikkitti Taatanaayina, Shataarbooznaayinaa ee uullanne hee'llam ki'nnuwwi beshshuwwinaa hundinam Keesammi Mi'n woshshanne aaggakkotte. Oo Keesammi Minim baxamoobee'isa qolat ihimmiinsi egaxxammehe; Yihuxxi uulli gassaanchii Ayihuxxi manni awwonsaanii Keesammi Min illageen hee'u beyyonnem dabatta'a baxxona. Ki'nnuwwim Waa'ika Keesammi Mine baxxam Ayihuxxi awwonsaano hara'mmitakkamisina ijaajaammo; ee bikkina baxina hasisoo diinat hundim Efiraaxiis daajjiinsi eelliinchi aagginne yoo uulliinsi wixxu adi'l gibiriinsi uwwamona; oo Waa'ik Keesammi Mi'n baxim uulloobee'isina ijaajaammo. Odim Yerusaaleemanne hee'llam qeessuwwi xa'mmitamisinne iimanenne hee'oo Waa'ina ballina ballina hincaa'llam kitimina hassam luwwa hundam labeennuwwa, gereebbi ambulluwwa, te'im geex ambulluwwa, ee'isam arasa, Sooqido, woyi'n diqaasaa wee'l zaytaa uwwehe. Oohim iima'n Waa'ina inje'oo kitima hincaa'imminne iinaa i oosinaa Waa'a uunxitonatte. Ka ijaajina ijaajamoobee'ek ayyim hee'ulas ee mancho ixxi mi'n utuba ubbuusakka'a ludo shobakka'a qasakkona. Ixxi minim gindamaa hacca uunjakkam beyyi ihona. Ka ijaajina ijaajancha sabaa Yerusaaleemanne yoo Keesammi Mine gindeena anga ki'isoo ayyi adilam te'im minaadaba ixxi summa eekke'enne dissu Waa'i bi'isona. An Daariyoos ee ijaajo ijaajaammo. Ixxim egeranchi hasisookko» yoo asso asse'ukko. Ee lasage Efiraaxiisiinsi eelliinchi aagginne yoo uulla gassaanchi hee'u Taatanaay, Shataarbooznaayii ixxuwwi beshshuwwii adil ijaaju luwwa hundam qoxxita'a issito'o. Yihuxxi minaadaphphi awwonsaan, hiraagaanchi Hage'ii Ido'i beet hiraagaanchi Zakkaariyaasii kuttam hiraaginne qoxxitu'uuyyi baxxo'o. Isra'ee'l Waa'i ijaaccisanne ee'isam Faariis uulli adilluwwi Qiiroos, Daariyoosii Arxeeksisii ijaajjo'i ijaaccisinne ee Keesammi Mi'n baxo baxxa'a guullitto'o. Ee Keesammi Mi'n baxom Daariyoos adil ihu loh hiinchonne Adaara yakkam agan aagu saxxi ballanne baxxa'a guullito'o. Ee lasage Isra'ee'l minaadab Qeessuwwii Leewi'i oosii ee'isam qeefadanta'a hee'llam uulliinsi daba'llito'i mannii hundim Waa'ika Keesammi Mi'n maassi uguda lobakat liiranchinne lonsito'o. Ee ugudinam mat xibbi labeennuwwa, lam xibbi gereebbi ambulluwwaa soor xibbi geex ambulluwwaa kitimina hincaa'llo'o. Hundem Isra'ee'l oos baaxii'l haafixxi bikkinam hincoo kitimina ihoo 12 Fella'i ambulluwwaa sulluanninne annannichchi summinnem hincaa'llo'o. Odim Yerusaaleemanne baxamu Keesammi Mi'n Waa'i awwaadina qeessuwwaa Leewi'i oosoo Muse'e kitaabu see'llisanne gaalchinne gaalchinne uullisso'o. Qeefadanta'a hee'llam uulliinsi daba'llito'i minaadab luxxi agan aagu 14 ballannee Shaashshiqqi uguda lonsito'o. Qeessuwwii Leewi'i oosii hundim see'llisinne ixxuwwi gaga muccussito'o. Leewi'i oosim shaashshiqqi gereechcho qeefajjo'iinsi waatto'i mannina, ixxuwwi abbaayyuwwi ikko'i qeessuwwinaa ixxuwwi gaginaa dutto'o. Eekkam qeefajjo'iinsi daba'llito'i manni, mulli minaadaphphi losaniinsii haashaaranchiinsii annanni ikka'a Isra'ee'l Moollanni Waa'a lonsitam keeninne hundinnem maqirem itto'o. Qorosho'i ugudam lamar balla hundam lobakat liiranchinne lonsito'o; mashka'oomim Waa'i Aasoo'l adi'lleka sawwite ixxuwwi kollonne dabaraa Isra'ee'l Moollanni Waa'ika mine baxxona hara'mmoo'isa issu bikkinatte. Ee lasage Arxeeksis Faariis uullanne adil ihu doollenne hundiinsi lob qeessichchi Aaroon shumo'ik Izira yakkam mat manchi hee'ukko. Ixxi qaranchi lugu'm anno'im Izir Saraayane, Saraay Azaariyasane, Azaariyaas Hilqiyane, Hilqiy Shaaluumane, Shaaluum Saadooqane, Saadooq Ahiixoobane, Ahiixoob Amaariyane, Amaariy Azaariyane, Azaariy Maraayootane, Maraayoot Zaraahiyane, Zaraahiy Uuzane, Uuz Buuqane, Buuq Abiishu'ane, Abiishu'i Finihaasane, Finihaas Ali'aazarane, Ali'aazar hundiinsi lob qeessichchi Aaroonina beet hee'ukko. Izir Baabilooniinsi Yerusaaleema waarukko. Ixxim Isra'ee'l Moollanni Waa'i Muse'ena uwwu see'l kitaaba erisa la'oo losisaanchi hee'ukko. Moollanni Waa'i ixxenne maqire hee'u bikkina xa'mmu luwwi hundam adil ixxena uwwam hee'ukko. Ee'isam Arxeeksis adil ihu lama'l hiinchonne ixxenne maqirem qeessuwwi, Leewi'i oos, zammaaraan, waardiyyii Keesammi Mi'n awwaadaanii Yerusaaleema waatto'o. Arxeeksis adil ihu lama'l hiinchi onti agananne Izir Yerusaaleema afukko. Waa'ik eroommi ixxuwwinne maqire hee'u bikkina ixxuwwi luxxi agan aagu luxxi ballanne Baabilooniinsi ki'lla'a onti agan aagu luxxi ballanne Yerusaaleema affo'o. Izirim Waa'i seera saarayyeenaa egereenaa ee'isam Isra'ee'l minaadab hundinam losiseenaa ixxi gaga hundoomam higisaa uwwaakkoohan hee'ukko. Waa'i Isra'ee'l minaadabina uwwu Seeraa ijaajoo erisa la'oo Qeessichchoo losisaanchoo ihu Izirina adil Arxeeksis uwwu assikitaab, «Adil Arxeeksisiinsi, iima'n Moollanni Waa'i Seera losisaanchi hee'u qeessichchi Izirina xummi kiina ihona. «An gassoommi adilla'n uullanne hee'llam Isra'eeliinsi, Qeessuwwiinsii Leewi'i oosiinsii kiinninne maqire Yerusaaleema daba'llaa mareena hasookkok hundim eexxaa marona an ijaajaammo. Odim an iinninne maqire yo'i lamarem sogaaninnem kiina uwwamu ki Waa'i Seerii ijaajii hanqo'isinne wo'mmoolda'e moo'llittuuyyi Yerusaaleemannee Yihudannee yoo duuha'a saarayyitona asse'aammo. Odim mattoo ammane Yerusaaleemanne Keesammi Min baxamu Isra'ee'l Moollanni Waa'ina anii i sogaanii liiranchinne uwwinummi biraa worqaa amaddaa mare. Ee hundinne maqirem at ki gagim Baabiloo'n uullanne wixxaa'llitti biraa worqaa odim Isra'ee'l minaadabii ixxuwwi qeessuwwii Yerusaaleemanne baxamu ixxuwwi Moollanni Waa'i Keesammi Minina uwwito'i luwwi hundam amaddaa mare. «Ee diinatinnem labeennuwwa, gereebbi ambulluwwaa geex ambulluwwaa ee'isam kitimina hincoo hurbaataa woyi'n diqaasaa bitaa'e; ee keenom Yerusaaleemanne yoo ki'nnuwwi Moollanni Waa'i Keesammi Minenne yoo kiti'm beyyonne hincaa'e. Eehanniinsi gatu birinnee worqinnee atii kiyyabbaayyuwwii Ayihuxxi minaadabii issitakkeena hassakkam luwwi hundam ki'nnuwwi Waa'i doo'llisanne issehe'e. Ki Waa'aannina Keesammi Mi'n awwaadina uwwamu keesammi mu'uttuwwa hundam Yerusaaleemanne Waa'i illagenne hincaa'e. Odim ki Waa'i Keesammi Mi'n awwaadina hasisookko yitoo luwwi hundam adilla'n minenne yoo mu'uxxi miniinsi amaddaa mare. «Efiraaxiisiinsi eelliinchi aagginne yoo uullanne hee'llakkam gassaan hundim, iima'n Moollanni Waa'i uwwu seeraa ijaajoo erisa la'oo qeessichchi Izir xa'mmoo luwwi hundam ginaagintakkoo'n uwwitakkamisina an adil Arxeeksis ijaajaammo. Oohim 3,400 kiilo'i kin bira, 10,000 kiilo'i arasa, 2,000 leetiro'i woyi'n diqaasa, 2,000 leetiro'i wee'l zaytaa hasisoo qax sooqidoo uwwehe. Adilannee adi'l oosonnee Waa'ik quunqi dilloobee'isa iima'n Waa'i ixxi Keesammi Minina ijaaju luwwi hundam ginaagintakkoo'n uwwehe. Ee'isam Qeessuwwiinsi, Leewi'i oosiinsi, zammaaraaniinsi, waardiyyuwwiinsii Keesammi Mi'n awwaadaaniinsii Gibiro miqisimmi hasisoobee'an ihukkisa laqqehe. «Atim Izir ki moollanni Waa'i kiina uwwu lachchisinne Efiraaxiisiinsi eelliinchi aagginne hee'oo minaadabina hundinam ki Moollanni Waa'i seera laqqam gassaanoo oogataanoo doo'lle. Laqqambee'i keenina Ki Waa'ika Seera losise. Ki Waa'i seerina te'im adi'l seerina ijaajamoobee'ek ayyim lehinne te'im uulliinsi yaayyanchinne te'im ixxena yoo luwwi hundim boganchinne te'im karanchinne guzumo'amona» yoohan hee'ukko. Izir «Yerusaaleemanne baxamoo Waa'i Keesammi Minina adil lomba uwwoo'isa issukkok ixxotte ihu bikkina niyyanno'i moollanni Waa'i galaxxamaakkohan ihona. Adi'llaannonne, ixxi sogaa'nnaannonnee mulli ixxi daannuwwaannonnee illagenne nuura siixxoommisa issukkok ixxotte. Isra'ee'l moolli awwonsaaniinsi dut keen iinninne maqire Yerusaaleema mattamisina amma'nniseenaa losiseenaa xanummokim Moollanni Waa'ik malaayyi iinninnetti ihu bikkinatte» yaa Waa'a galaxxukko. Adil Arxeeksis adilla'n doollenne Baabiloo'n uullanne qeefadanta'a hee'llam beyyiinsi iinninne maqire Yerusaaleema daba'llito'i moolli awwonsaan, Finhaas moolliinsi Gershoom, Itaamaar moolliinsi Daani'eel, Daawiit moolliinsi Shakaaniy beet Haxuush, Phaaroosh moolliinsi Zakkaariyaasii ixxi abaroosiinsi 150 goonii kitaabanto'o. Phahaat Moo'aab moolliinsi Zaraahiy beet Eel yaaho'enaay 200 gooninne maqirem, Zaatu moolliinsi Yaahazi'eel beet Shakaaniy 300 gooninne maqirem, Aadiin moolliinsi Yoonaataan beet Ebeed 50 gooninne maqirem, Eelaam moolliinsi Ataaliy beet Shaa'iy 70 gooninne maqirem, Shafaaxiy moolliinsi Mikaa'eel beet Zabaadiy 80 gooninne maqirem, Yoo'aab moolliinsi Yihii'eel beet Abdiy 218 gooninne maqirem, Baan moolliinsi Yoosifiy beet Shaloomiit 160 gooninne maqirem, Beebaay moolliinsi Beebaay beet Zakkaariyaas 28 gooninne maqirem, Azgaad moolliinsi Haaqaaxaan beet Yoohanaan 110 gooninne maqirem, Adooniiqaam moolliinsi Eelifeeleex, Yi'i'eelii Shamaa'iyii hofqaxam laso gatta'a 60 gooninne maqirem, Bigwaay moolliinsim Utaayii Zaakurii 70 gooninne maqirem daba'llito'o. Anim Ahaawa'i kolli daadoo daajji gammalanne minaadaba hundam wixxaa'ummo. Eekke'em sas balla wiiddannaa afuullummo; ee dummichchi woronnem minaadabaa qeessuwwaa wollisummaare Leewi'i oosik matim hee'ukkoyyo. Ee bikkina Eeli'eezera, Ari'eela, Shamaa'iya, Eelinaataana, Yaariiba, Eelinaataana, Naataana, Zakkaariyaasaa Mashulaamaa yakkam honsi awwonsaa'n beyyoo ee'isam Yooyaaribaa Eelinaataanaa yakkam lam losisaa'n beyyoo manna asse'ummo. Ixxuwwam Kaasiifiyanne hee'oo mannina awwonsaanchi hee'u Ido'i beyyo asse'aa ni moollanni Keesammi Minenne awwaaddam awwaadaano asse'llona Ido'onaa ixxenne maqire yo'i Keesammi Mi'n awwaadaaninaa kuttamisa issummo. Ixxuwwim ni Waa'ik er angi niinninne hee'u bikkina Maahiil moolliinsetti ihoo Sheereebiya yakkam lobakat lachchi yoo Leewekkichcho asse'llo'o. Ixxim ixxeka 18 goo'n oosoo ixxi abbaayyuwwaa amadaa ni beyyo waarukko. Ee'isam Meeraar moolliinsetti ikko'i Hashaabiyaa Shaa'iyaa yakkam manna lamiyye ikkam ixxuwwi qarmanninne maqirem asse'llo'o. Adil Daawiitii ixxi gassaanii Keesammi Mi'n awwaadina Leewi'i ooso hara'mmitamisa issita'a hee'llo'i manni shumo'iinsetti ikko'oo 220 manchoo eebbo'o. Ixxuwwim summi summinne kitaabanto'o. Waa'i ni googo taaphansoo'isinaa neese, ni oosoo ni amaxxaa hundam egeroo'isinaa ixxi illagenne ni gaga heeshaa'nnaa soommanimminne Ahawa'i daajji gadanonne Waa'a uunxinoommisina alallaatummo. Anim adil Arxeeksisina «Ni Moollanni Waa'ik eroommi ixxonne amma'nnitam keeninne hundinnem maqir ihookko. Ihukkaarem ixxo laggam keenonne malaayyaam ixxi quunqa dilliisookko» yaa wocaa hee'ummi bikkina ni googonne hee'oo ni diina'iinsi gatisoo gaadaanoo Faradaanoo uwwoo'isina adila xa'mmeena tuuraa hee'ummo. Ee bikkina neese ni Waa'i ixxi gagim egeroo'isina soommannaa uunxinummo; ixxim ni uunxato macceesukko. Awwonsaan ikko'i qeessuwwiinsi Sheereebiya, Hashaabiyaa ixxuwwi abbaayyuwwiinsim tommo edaa tommoo lam manchoo doo'llummo. Ee lasage adil, ixxi sogaan, mulli gaassaanii Isra'eelii hundim Keesammi Mi'n awwaadina uwwito'i bira, worqaa mulli keesammi mu'uttuwwaa hundam keenaa ee qeessuwwina uwwummo. Ixxuwwina uwwummi Keesammi Mi'n mu'uttuwwim 22,000 kiilo'i kin bira, 70 kiilo'i kin birinne baxamaakkoo mat xibbi mu'uttuwwa, 3,400 kiilo'i worqa, 8 kiilo'oo 400 giraamaa ihoo worqinne baxamaakkoo lamiyyi wocittuwwaa worqi'nnoo'i naas xaarinne baxamaakkoo lam wocittuwwaa hee'ukko. Anim ixxuwwina «Ki'nnuwwi gaassi niyyanno'i Moollanni Waa'ina keesantakko'oo keeno. Ku mu'uttuwwim keesamma; birii worqim niyyanno'i Moollanni Waa'ina gaqqi doo'llinne uwwamaakkoohane. Yerusaaleemanne hee'oo qeessuwwi awwonsaa'n illagenne, Leewi'i oos illagennee Isra'ee'l moolli awwonsaa'n illagennee keentakkeebe'i afeebe'e qoxxitakka'a egallehe» yummo. Ee lasage qeessuwwii Leewi'i oosii Yerusaaleemanne yoo Waa'i Keesammi Minenne massita'a dissiteena bira, worqaa mulli keesammi mu'uttuwwaa hundam keenta'a aa'llo'o. Neesem luxxi agan aagu tommonnee la'm ballannee Ahawa'i daajji gadaniinsi ki'nnaa Yerusaaleema mallummo. Ni Waa'i niinninne hee'u bikkina diina'iinsii googonne maaxamaa egeraa hawwodoo manniinsii egerukko. Yerusaaleemam amfaa lasage sas balla usheexxinummo. Ee lasage soo'l ballanne Keesammi Mine mallummo. Bira, worqaa keesammi mu'uttuwwaa hundam keennaa Uriy beet qeessichchi Mareemootina uwwinummo; Finihaas beet Ali'aazar, Leewi'i oos Iyyaas beet Yoozaabaadii Biinuy beet No'aadiyii ixxenne maqirem hee'llo'o. Hundem luwwim xigamaahii keenamaahii kitaabamukko. Qeefajjo'iinsi daba'llito'i keen Isra'ee'l Waa'ina shokkiisakka'a hincaa'akkam kitimina ihoo luwwa hundam hincaa'llo'o. Oohim hundem Isra'ee'l minaadaphphi summinnem tommoo lam labeennuwwa, honsayyee loh gereebbi ambulluwwaa lamarayyee lamar gereebbika geex ambulluwwaa hincaa'llo'o; ee'isam baaxii'l haafixxi kitimina tommoo lam fella'i ambulluwwaa hincaa'llo'o. Oo keen hundim shokkiisakka'a Waa'ina hincaa'akkam kitim hee'ukko. Adi'l ijaacci kitaabam Efiraaxiisiinsi eelliinchi aagginne hee'llam gassaanina hincaa'llo'o. Ixxuwwim minaadabaa Keesammi Mi'n baxoo hara'mmito'o. Ee lasage Isra'ee'l awwonsaaniinsi mat mat keen i beyyo waatta'a «Isra'ee'l minaadab, qeessuwwaa Leewi'i oosoo edaa ixxuwwi olla'anne hee'llam mulli minaadabinne oohim Kana'aa'nnaanninne, Hiite'aanninne, Farze'aanninne, Iyyaabuusaanninne, Amoo'nnaanninne, Moo'aaphphaanninne, Gibxaanninnee Amoore'i manninnee eebaqqanchinne haashaaranchiinsi ixxuwwi gaga ega'llito'oyyo. Ixxuwwi gaginaa ixxuwwi oosinam ee mannika landa eebbo'ookko; keesammi shumo'om mulli minaadabinne hamaatto'ookko. Ee bi'ishshinam illag ikko'i keen awwonsaanoo daannuwwaa» yita'a kutto'o. Anim ee woshsha macceesummi ammanenne lobakata kichche'aa eedde'ummi eddechchaa kaabbaa dereerummo. Horoo'l sarataa haareeddaa goxxummo. Lobakatam kichche'aa uullanne afuurummo. Anim kichche'aa maaro'i balli kitim hincoo amman afeebe'e afuurummo. Qeefajjo'iinsi daba'llita'a waatto'i minaadab baxxo'i baaxii'l bikkina Isra'ee'l Moollanni saga'llisinne baa'lla'a kichche'llo'i keen hundim i gadanonne wixxito'o. Maaro'i balli kitim hincoo ammanenne dereerammi eddechcha edde'ummisam kichche'aa afuurummi beyyiinsi ki'ummo. Anim uullanne guruphphaa i Moollanni Waa'i kolli anga biddiqaa'aa «I Moollanna, ni baaxiil lophphaakko; ni hawwojjim iimane afaakko. I Moollanna, anim i ille ki kollonne ki'iseena tuuraammo; lobakatam sholle'aammo. Gaassi niyyanno'i doolliinsi ki'isaa kaballi afeebe'e neese keese lobakata hawwondaammo. Ni baaxiil lophphimmiinsi ki'aa neese, ni adilluwwii qeessuwwii mulli minaadab adilluwwi anganne umbaammo. Bisa'ina, boganchina, qeefadanchinaa sholle'nninaa anga uwwinaammo. Ni Moollanni Waa'a! Ni ille caakkissaatto. Ki illagennem neese nuura siindaa niinniinsi hofqax mannim agiddaniinsi wolabbanonne fillaa ka keesammi uullanne xumminne hee'nnoommisina ki doo'l ihaakko. Agiddanonne umbummaarem oono'o kaba niina haareechchi heechcha uwwitaatto. Neese agid hee'nnummo. Ihukkaarem at neese agiddanonne uttittoyyo. Faariis uulli adilluwwi niina qishixxitamisinaa foorinnem wolabbanonne fillaa gaassi gindamaa hee'u ki Keesammi Mine daballaa banxonaa Yihudannee Yerusaaleemannee xumminne hee'nnonaa ki doo'l ihukko. «Ihukkaarem ni Moollanna, kaba neese mayyinoommo? Neese ki ijaajo gindinaammo. Sholliinsummokim ki awwaadaan ikko'i ‹Hiraagaaninne ki'nnuwwi lago aa'llakka'a aaggakkam uulli ee uulli minaadaphphi haashaaranchinne kolbamaakkoohane; tochchiinsi tochchi afeebe'e shigigaa'oo baxinnee haashaaranchinnee wo'mmaakkoohane. Ee bikkina ki'nnuwwi landa ixxuwwi oosina uwwitakkotte; ixxuwwi landam ki'nnuwwi oosina eebbakkotte. Qoxxaalluwwi ikkakkeena, ee uullikam er misha ittakkeenaa ki'nnuwwi oosinam heer hee'l amaxxa lago aa'issakkeenaa ee uulli manninne hore'em hidiro aaggakkotte› yitaa ijaajjaa hee'llitto. «Ni jor bax bikkinaa ni baaxii'l bikkinaa ku hawwi hundim neesenne afaakko; ihukkaarem neese keese hawwondummaanni qaxa guzumo'llittoyyo. Ee bikkenne baraara gatissaatto. Ee hanniinsi daba'llinaa hinkid ki ijaajo gindinaa ee jor manninne eebaqqammeena xannoommo? Atim neesenne quuqqaa matim gantoombee'isa bi'issooyyonnihe? Isra'ee'l Moollanni Waa'a! At hanqo'isanne oogattoohane. Ihukkaarem neese bichchiinsi baraara fissitaatto. Oono'o, neese ni baaxiilo iyyinaa ki illagenne hincineena lamboombeekeeno» yaa Waa'a uunxukko. Izir Waa'i Mi'n illagenne ubaa wi'llimminne baaxiilo biiraa yukkuuyyi Isra'ee'l oosiinsi lobakat goon, meentii ciilluwwii ixxi kululleetanne wixxaa qaraaraalli wi'llo ixxenne maqirem wi'llam hee'ukko. Ee lasage Eelaam moolliinsetti ihoo Yihii'eel beet Shakaaniy Izirina «Ni kululleetanne yo'i minaadabiinsi mulli minaadaphphi landa eebimminne ni Waa'a hawwondaammo. Ihukkaarem kabadem Isra'eelina neeyyat yookko. Kaba ee mulli minaadaphphi meento ixxuwwi oosinne maqirem hollineena Waa'i illagenne hide'nnona; at ni moollannii ni Waa'ika seera egettam keenii niina uwwitakkam sogitano hundam aa'nnoommo; ni Waa'ik seer ijaajookkoka hundam issinoommo. Oo hundim ki angannetti ihu bikkina ki'e; neesem hara'mminoommo; qoxxe» yukko. Ee bikkina Izir qeessuwwi awwonsaano, Leewi'i oosoo Isra'ee'l minaadabaa hundam hincu sawwite issitamisina hidiisukko; ixxuwwim hide'llo'o. Izir Keesammi Mi'n illagenne hee'u beyyiinsi ki'aa Eeliyaashshiib beet Yoohanaan hee'oo mine aagukko. Ixxim qeefado'iinsi daba'llito'i keen baxxo'i baaxii'l bikkina kichche'aa wi'llukko; eekke'em hurbaata itukkoyyo; wo'om agukkoyyo. Ee lasage qeefajjo'iinsi daba'llito'i manni hundim Yerusaaleemanne wixxitamisina Yihudannee Yerusaaleemannee alallaatakko'o. Oo alallaatim ka sas ballanne ee dummichcha waaroobee'ek ayyim hee'ulas ixxi amaxxi hundim bogamoo'isaa ixxim qeefajjo'iinsi daba'llito'i manni dummichchiinsi yaayyamoo'isaa ijaajoohan hee'ukko. Oohim minaadaphphi awwonsaanii lommannii a'llanchinnee ijaajinnee qooddo'oohan hee'ukko. Ee bikkina sas balli woronne Yihuxxekii Biiniyaam minaadabii hundim Yerusaaleemanne Keesammi Mi'n illagenne yoo wixxixxi beyyonne dummito'o. Oohim honsi agan aagu lamiyyi balli ihaa minaadab ee amma'n woshshanne kichche'llo'i bikkinaa kee'mmaalli xeenanne aashsho'i bikkina huxe'llu'uuyyi macceessam hee'llo'o. Qeessichchi Izirim minaadaphphi illagenne uullaa «Ki'nnuwwi mulli minaadaphphi meento eebimminne Isra'ee'l jollenne hanenne jolle eddakko'ookko. Ki'nnuwwim amma'nnantakkambee'i keen ikkakko'ookko. Kabadem ihukkaare ki'nnuwwi anno'ina Moollanni ihu Waa'i illagenne ki'nnuwwi baaxiilo hundam biira yi'llehe. Ixxim liiramoo luwwi hundam issehe. Ka uullanne hee'llam mulli minaadabiinsii ixxuwwiinsi eebbakko'i mulli minaadab meentiinsii annanni ikkehe» yukko. Minaadabim sagara immaa'aa «At yittok hanqa; yittoka hundam issinoommo. Ihukkaarem ka beyyonne wixxu minaadab lobakata; ammanim malaayyaam hagayye; ee bikkina biiranne uullineena xannummoyyo. Niinniinsi lobakat ee baaxiilonne aangaammoo bikkina ku woshshi mat ballanne te'im lam ballanne beeddoohaneyyo. Ee bikkina ni awwonsaan ni bikkenne Yerusaaleemanne afuutta'a ka woshsha moo'llona. Ni beero'onne yoo mannik mulli minaadabiinsi meento eebu manchi ayyim ixxena qoodamaa uwwamoo balli woronne ixxi hee'oo beero'i lommannaa daannuwwaa amadaa waarona; ee'isinne Waa'ik neesenne waaru kee'mmaalli quunqi daba'llookko» yukko. Ee woshsham Asaaheel beet Yoonaataanii Tiiqiw beet Yaahizaayii sabbo'o bagaan mullek ayyim sabukkoyyo. Leewi'i oosiinsi ee ixxuwwi sawwite bakkiisso'ok xale'i Mashulaamattee Shabataayattee. Hundem minaadabim ee sawwitenne iittanto'o. Qeessichchi Izirim abaroosiinsi annannichchiinsim mat mat awwonsaancho doo'llaa hundam summinne summinne kitaabukko. Ee lasage tommi agan aagu luxxi ballanne ee woshsha saarayyiteena dummito'o. Ixxuwwim luxxi agan aagu luxxi balli afeebe'e mulli minaadabiinsi meento eebu qax manna annanni issita'a laqqo'o. Mulli minaadabiinsi meento eebbo'i qeessuwwi moolli moollinne Yooseedeeq oos hee'llo'i Iyyaasiinsii ixxi abbaayyuwwi moolliinsii Maa'iseey, Eeli'eezar, Yaaribii Gadaaliyii ixxuwwi meento holliteena iittanta'a lasage baaxii'l haafixxi bikkina ihoo mat gereechchi ambula shokkiisakkam kitim issita'a hincaa'llo'o. Iimeer moolliinsi Hanaanii Zabaadiyii. Haariim moolliinsi Maa'iseey, Eeliyaas, Shamaa'iy, Yihii'eelii Uziiyii. Faashuur moolliinsi Eeliyo'enaay, Maa'iseey, Isma'eel, Naatinaa'eel, Yoozaabaadii Eeli'aasii. Leewi'i moolliinsi Yoozaabaad, Shiimi'i, Qaliixa yakkam Qeelaay, Faataahiy, Yihudii Eelii'eezerii. Zammaaraaniinsi Eeliyaashiib hee'ukko. Keesammi Mi'n ooxxi gooca egeraaniinsi Shaaluum, Xeeleemii Uurii. Mulli Isra'eeliinsi Phaaroosh moolliinsi Raamiy, Yiiziy, Malkiy, Miiyaamiin, Ali'aazar, Malkiyii Baanaayii. Eel aam moolliinsi Maataaniy, Zakaariyaas, Yihii'eel, Abdi'i, Yaremootii Eeliyii. Zaatu moolliinsi Eelyo'enaay, Eeliyaashiib, Maataaniy, Yaremoot, Zabaadii Aaziizii. Beebaay moolliinsi Yehohanaan, Hanaaniy, Zaabaayii Atilaayii. Baanii moolliinsi Mashulaam, Maaluk, Adaay, Yaashub, Sha'aalii Yaraamootii. Phaatmo'aab moolliinsi Aadin, Kalaal, Baanaay, Maa'iseey, Maataaniy, Baasili'eel, Biinuyii Minaasee. Haariim moolliinsi Eeli'eezar, Yishiiy, Maalkiiy, Shamaa'iy Simi'oon, Biiniyaam, Maaluukii Shamaariyii. Hashuum moolliinsi Maataanaay, Maataat, Zaabaad, Eelifeeleex, Yareemaay, Minaasee Shiimi'ii. Baanii'i moolliinsi Ma'idaay, Aamiraam, U'eel, Baanaay, Beediy, Kaaluh, Waaniy, Mareemoot, Eeliyaashiib, Maataaniyaa Matinaayii Yaa'isii. Biinuy moolliinsi Shiimi'i, Shelemiy, Naataan, Aadaay, Maakinaadabaay, Shaashshaay, Shaaraay, Azaari'eel, Shelimiy, Shamaariy, Shaaluum, Amaariyii Yooseefii. Nabo'i moolliinsi Ya'ii'eel, Maatiitiy, Zaabaad, Zabiin, Yaadaay, Iyyu'eelii Baanaayii. Ku keen hundim mulli minaadabiinsi meento eebba'a hee'llo'i keeno. Ixxuwwim ee meento oosinnem hollito'o. Hakaaliy beet Nahim wocu woshshi kanniinsi woroon yoohane. Arxeeksis Faariis uulli adilluwwi adil ihu lamiyyi hiinchonne Kisleew yakkam agananne an Nahim lob beero'onne Suusa'anne hee'ummo. Iyyabbaayyuwwiinsi mat hee'u Hanaan mulli manninne maqirem Yihuxxi uulliinsi i beyyo waarukko. Anim Yerusaalee'm bikkinaa qeefadanta'a Baabiloona mattoo'n gatto'i minaadaphphi bikkinaa xa'mmummo. Ixxuwwim «Qeefadanta'a Baabiloona mattoo'n gatto'i Ayihuxxi minaadab kee'mmaalli hawwonnee sholle'nnannee yo'o. Yerusaalee'm oottuwwim gindamaakko; ooxxi gooccuwwim shokkaakko» yita'a dabatto'o. Anim ee hundam macceesaa uullanne afuuraa wi'llummo; lobakat ballam soommaninnee kichchechchinnee higisummo. Waa'am. «Iimanenne hee'lloo Moollanni Waa'a! At lobane; neesem ki illagenne baachchinne uullinoommo. At keese iittitam keeninnee ijaajantam keeninnee ki hidi'l sagara qoxxissaa egettootto. Waa'a! Kiina awwaadaan ikko'i Isra'ee'l minaadaphphi gatimmi bikkina hiimoo ballaa keese uunxoommi uunxato macceese; eesem sawwihe. Neese Isra'ee'l minaadab banxummi baaxiilo biiraa yoommo; hanqinam anii niyyanno'ii keese hawwondaammo. Neese ki ijaajo gindinaa keese hawwondaammo; kiina awwaadaanchi ihu Muse'enne niina uwwitti seeraa gatti ogoraa egellummoyyo. «Moollanna, ku keen kiina awwaadaanoo ki gaqqi minaadabaa; kanniinsi illageenim ki malaayyinnee qoxxaalli ki wodinnee gatissaatto. Oono'o ki agishshi an uunxoommi uunxato macceese; ee'isam keese lonsitam mulli awwaadaa'nnekam macceese; kaballa an sawwoommi sawwit taaphanoo'isina adilluwwi adi'lleka wodano maashise» yaa uunxummo. Ee ammane an adi'l minenne woyi'n diqaasa danaanaanchi hee'ummo. Arxeeksis adil ihu lamiyyi hiinchonne «Niisaana» yakkam agananne mat ayyaamo adilina woyi'n diqaasa hincaa'ummo; ee balliinsi bagaan mulli balla an kichche'aa moo'u balli bee'e. Ee bikkina adil eese «Mahina lobakata kichche'llaate? Xissitoo'nnim ki illi kaa'nna heemachchukkok mahinatte?» yaa xa'mmukko. Anim lobakata baddummuuyyi «Adilluwwi adil heer heerina hee'ona; gaassi niyyanno'i waammi yoo beero'i gindamaahii ooxxi gooccuwwim giirinne shokkaahii i illi mahina heemachchooyyo» yaa dabarummo. Adilim «Eehannah at issiteena hassoo luwwi maha?» yaa xa'mmukko. Anim iima'n Waa'a uunxaa Adilina «Adila, keese liiransoolasii ki doo'l ihaakkoolasii Yihuxxi uullanne gaassi niyyanno'i waammuwwi yoo Yerusaalee'm beero'o maroommisaa ee beero'om dabaraa baxoommisaa isse» yaa uunxummo. Ee ammane adi'l mi'n ama adi'l gadanonne affuta'a hee'llo'o; adilim i sawwitte aa'aa «Goog hinkaa'n ammane massookko? Hinkaa'nnanne daba'lliteena xantootto?» yaa xa'mmukko. Anim masseena xanoo ammanee odim daba'lleena xanoommi ammanee kurummo. Odim adilina «Efiraaxiis daajjiinsi eeqidonne eelliinchi aaggi kolli uulla gassaanina Yihuxxi uulla marummuuyyi eese hawwissambee'isa assi kitaaba kitaabbaa uwwe» yaa uunxummo. Ee'isam Keesammi Mi'n ooxxi goocina, beero'i ooxxi gooccuwwinaa an usheexxoommi mi'n baxinaa ihoo haqqa murona ijaajoo assi kitaaba adilla'n haqqa egeroo Asaafina kitaabona xa'mmummo. Waa'ikim biijoom iinninne maqire hee'u bikkina adil an xa'mmummoka hundam uwwukko. Adilim hofqax gaaxxi awwonsaanoo faradaanoo iinninnem maroo'isa issukko; anim Efiraaxiis daajji eeqidinne, eelliinchi aaggi kollinne aa'aa marummo. Ee daajji eeqidom afaa lasage ee uulli gassaanina adi'l assi kitaabbuwwa uwwummo. Ihukkaarem Beetihooroo'n beero'iinsetti ihu Sanbalaxii Amoo'n uulli gassaanchi Xoobbiyii Isra'ee'l oos bikkina eroomma sawwoo manchi waarukkisa macceessa'a lobakata qacqacito'o. Anim Yerusaaleema afaa lasage sas balla ee beyyonne afuurummo. Ee lasage hofqax manninne maqirem ee beero'ina maha issoomda'e Waa'i iina caakkisu luwwa ayyenam kuroo'nnim hiimonne ki'aa marummo; iinninnem an saa'llaa hee'ummi hallichchiinsi bagaan mulli diinat mahim hee'ukkoyyo. Uulli soodoo'nnim Cebbi Ooxxi goocinne aa'aa Xarakkichchi Bu'o yakkam beyyinne higaa woroo'n qaranne ‹Hacca Uunji Gooca› yakkam beyyo afummo. Eeheen higummuuyyim gindamu Yerusaalee'm ootaa giirinne shokkaakkoo ooxxi gooccuwwaa do'aa moo'ummo. Ee lasage beero'iinsi eelliinchi firinne yoo «Bu'i firoo gooca» yakkam beyyinnee adi'l delbi gadaninnee higaa marummo; ihukkaarem an saa'llaa hee'ummi hallichcho higgseena xanoo goog horem hee'ukkoyyo. Anim ee hiimo Qeediroo'n cebbi gammalinne higaa gindamu oota hundam moo'aa lasonne ee marummi googinnem daba'llaa Cebbi goccinne beero'o aagummo. Ee ammane ee uullanne hee'llo'i gassaaniinsi matim an hanno marummida'ee mah issuma'ee la'ukkoyyo; ee'isam iinninne hee'llo'i Yihuxxi i beshshuwwina, qeessuwwina, awwonsaanina, gassaanina, maqire baxxam keeninaa mulli keeninaa maham kurummoyyo. Anim ixxuwwina «Neese kaba Yoommine'i adaraallano, Yerusaaleemim gindamukkisaa ooxxi gooccuwwim giirinne shokkukkisaa moo'llakkamuulla. Ee bikkina kaba waallehe ka lasage sholle'nnoombee'isa beero'i oota daballaa banxona» yummo. Waa'im iinninne hee'ukkisaa adilim iina hara'mmu hara'mmatoo hundam ixxuwwina kurummo. Ixxuwwim ki'nnaa banxona yito'o. Ixxuwwi angam ee danaam baxina qoxxisso'o. Ihukkaarem Sanbaalaax, Xoobbiyii Araphphi Geesheemii banxeena murte'nnaa ki'nnummisa macceessa'a neesenne osatto'o. Naacantu'uuyyim «Ku baxxakkam bax maha? Adilluwwi adilina ijaajancha sabbakkeena hassakka'ahinnihe?» yita'a xa'mmito'o. Anim «Niina iima'n Waa'i hara'mmookko; neesem ixxi awwaadaan ki'nnaa banxoommo. Ihukkaarem ki'nnuwwina Yerusaaleemanne sharad, hanqii niihane yitakkam luwwii te'im ki'nnuwwa tiirakkam aganni hee'ooyyo» yaa dabarummo. Yerusaalee'm beero'i oot daba'llaa ootamukkok kanniinsi woroon yoo'isannette. Hundiinsi lob qeessichchi Eelyaashiibii ixxena besh ikko'i qeessuwwii «Gereebbi Gooca» yakkam gooca baxxo'o; gooc xufa aagissa'a Waa'ina keesamaakkoohan issito'o. Ee ootam «Xibbe» yakkam godo'iinsi ki'isaa «Hanaani'eela» yakkam ki'n ooxxi godo'i afeebe'e Waa'ina keesamaakkoohan issito'o. Ee beyyiinsi ki'issa'a Yaarko'i manni baxxo'o; ixxuwwiinsi ki'isaa yookkoka odim Imiir beet Zaakur baxukko. Haasina'i oosim «Qurxumme'i Gooca» yakkam beyyi oota ootto'i utubbuwwam uullissa'a xuffeewwa aagisso'o; ee xuffeewwinam laqqo'uwwa, qirqire'uwwaa qulfuwwaa axisso'o. Ixxuwwi afissa'a uullisso'i beyyiinsi ki'isaa Haqoox beetina beet Uuriy beet Mareemoot baxukko. Ixxeensi ki'isaa Masheezaabeel beetina Baaraakiy beet Mashulaam baxukko. Eehanniinsi ki'isaa yookkoka odim Ba'aan beet Saadooq baxukko. Eehanniinsi ki'isaa yookkoka Taaqo'i beero'i manni baxxo'o; ihukkaarem ee beero'i daannuwwi ixxuwwina qoodamu baxxancha baximma sabbo'o. Yishaan ooxxi goocam Phaaseh beet Yoodaahee Baasoodiy beet Mashulaamii baxxo'o; utubbuwwam uullissa'a xuffeewwa aagisso'o; xuffeewwinam laqqo'uwwa, qirqire'ee qulfuwwaa axisso'o. Eehanniinsi ki'isaa yookkak Gaba'oo'n Malaaxiy, Meeronoot Yaadoonii Gaba'oo'nnekii Misiphphi beero'i mannii Efiraaxiis daajjiinsi eelliinchi aaggi uulli gassaanchi mi'n beyyi afeebe'e baxxo'o. Eehanniinsi ki'isaa yookkoka Worqa bukkaa baxoo Haarihay beet Uzi'eel baxxukko. Odim shitto'o gudisam hee'u Hanaaniy eehanniinsi ki'isaa yookkoka baxukko. Oohim «Haraar Oota» yakkam beyyi afeebe'e yoohan hee'ukko. Eehanniinsi ki'isaa yookkoka Yerusaalee'm gassi uullika kollo gassaanchi hee'u Huur beet Raafaay baxukko. Harumaf beet Yaadaay ixxi mi'n illagenne yoo beyyo baxukko. Ixxeensi ki'isaa odim Hashaabaaniy beet Haatush baxukko. Haara'm beet Malkiyii Phahaatmoo'aab beet Haashubii awwonaa yoo beyyo te'im «Gii'l midachcha» yakkam beyyi utuba baxxo'o. Ixxuwwiinsi ki'isaa yoo beyyo odim Yerusaalee'm gassi uullika kollo gassaanchi ihu Halooheesh beet Shaaluum baxukko. Ixxi landim ee baxo hara'mmitam hee'llo'o. Haanunannee Zanohaanannee hee'llam manni hara'mmanta'a «Cebbi Gooca» yakkam gooca baxxo'o; xuffeewwam aagisso'o; xuffeewwinam laqqo'uwwaa, qirqire'uwwaa qulfuwwaa axisso'o. Ee'isam Hacca Uunji Gooc afeebe'e yoo 1,000 anga ihoo oota dabatta'a ootto'o. Beetihakaaree'm uulla gassaanchi hee'u Reekab beet Maalkiy Hacca Uunji Gooca haareechchisaa baxukko; xuffeewwam aagisukko. Ee xuffeewwinam qulfuwwaa laqqo'uwwaa axisukko. Misiphphi uulla gassaanchi hee'u Kolhoozee'i beet Shaluum Bu'i Gooca dabaraa baxukko. Goocannem goobinaancho issaa xuffeewwa aagisukko. Xuffeewwinam laqqo'uwwa qirqire'uwwaa axisukko. Ee'isam adi'l duubbi kaashshi beyyi gadanonne yoo Sheela'i bu'i beyyiinsi ki'isaa Daawiit beero'i cebba dillakam gardabbi afeebe'e yoo baxxancha baxukko. Ee lasage odim Beetixuur zoo'n kolli uulla gassam hee'u Azibuuq beet Nahim Daawiit Waammi illagiinsi ki'isaa «Wo'i Delba» yakkam beyyoo «Geedduwwi Wiiddana» yakkam beyyoo afeebe'e yookkoka dabaraa baxukko. Eehanniinsi lasage yoo beyyo Baani'i beet Rahuum baxukko. Qa'ila'i zoo'nneka kollo gassam hee'u Hashaabiy ixxi zoona bikkaa baxukko. Ee beyyiinisi ki'isaa yoo baxxancha odim Qa'ila'i zoo'nneka kollo gassam hee'u Heenaadaad beet Baawaay ixxi abbaayyuwwinne maqirem baxukko. Misiphphi zoo'n gassaanchi hee'u Iyyaas beet Eezeer o'l mu'uta dissakkam mi'n illagenne yoo beyyo ooxxi tochchonne yoo higakkam beyyi afeebe'e ootukko. Ee lasage Zabaayyi beet Baaruuk ee lasaanchi tochchiinsi ki'isaa hundiinsi lob qeessichchi Eeliyaashiib mine aagakkam gooc afeebe'e yoo baxxancha qoxxaa baxukko. Haqoox beet beet ihu Uuriy beet Mareemoot qeessuwwa awwonsaanchi Eeliyaashiib mi'n lasaanchi afeebe'e yoo oota ootukko. Eehanniinsi lasonne yoo baxxancha odim Yerusaalee'm kululleetanne hee'llo'i qeessuwwi ootto'o. Ixxuwwiinsi ki'isaa Biiniyaamii Hashuubii ixxuwwi hee'llam minneewwi illagenne yoo beyyo ootto'o. Anaaniy beet beet Azaariyim ixxi hee'oo mi'n gadanonne yoo beyyo ootukko. Henaadaad beet Biinuy Azaariy mi'n beyyiinsi ki'isaa lasaanchi tochchi afeebe'e yoo beyyi oota ootukko. Ee lasage odim Taaqo'i manni waa'i mine egerakkam lob gimbi beyyi illagenne yoo beyyi ki'isaa Oofee'l ooxxi beyyi afeebe'e yoo oota ootto'o. Mulli qeessuwwi odim Faraxxi gooca yakkam ootiinsi hanaa'n qarinne yoo oota annannichchim ixxuwwi hee'llam mi'n illage amadda'a ootto'o. Ee lasage Imeer beet Saadooq ixxi hee'oo mi'n illagenne yoo beyyo ootukko. Eehanniinsi ki'isaa yookkokam eelliinchi firoo kolli gooca egeraanchi hee'u Shakaaniy beet Shamaa'iy ootukko. Shelemiy beet Hanaaniy Xalaafenina loh beyyi beet Hanuunii ixxuwwina la'm kore uwwamu baxxancha baxxo'o. Baraakiy beet Mashulaamim ixxi mi'n illagenne yoo oota ootukko. Ixxeensim ki'isaa yoo oota odim worqa baxookeeniinsi mat hee'u Malkiy lob gooc illagenne yoo keescommi Mi'n awwaadaanii daddaraanii hee'llam ooxxi tochchiinsi hanaa'n qa'l eelliinchi firinne yoo beyyi afeebe'e ootukko. Worqa bukkita'a baxxam keenii daddaraanii ooxxi lasaanchi tochchiinsi ki'isaa gereebbi ooxxi gooc afeebe'e lasaanchi baxxancha baxxo'o. Sanbaalaax neese ooxxi baxxo asheellummisa macceesaa lasage lobakata quuqukko. Qacqacaahim neesenne naacancha asheerukko. Ixxim ixxi beshshuwwi illagennee Samaare'i gaadaa'n illagennee «Ku hoogaan Ayihuxxi manni maha baxxeena sawwita'ate? Ka gindamu beero'o dabatta'a baxxeena hassa'atennihe? Waa'ina kitima kitimimminne mexxo'i mat ballanne baxamaa guullamoo labisamaahinnihe? Ooxxi gimbina ihoo kina eehid shokka gindamaa ki'aa tuubamu woriinsi fissameena xanamoo labisamaahinnihe?» yaa wocukko. Ee ammane ixxi gadanonne uullaa hee'ukkis Amoonekkichchi Xoobbiyim «Ixxuwwi hinkido'i oota ootteena hassa'atette? Ixxuwwi oottam oota wengereellichchi hanenne firuta'n gindooyyonnihe?» yaa gadaa wocukko. Nahimim «Ni Moollanni Waa'a! Neese hinkaa'nna gadammumda'e at moo'e. Ka ixxuwwi game'llato at ixxuwwi hanennem isse. Ixxuwwina yoo amaxxa ixxuwwi hundim boganta'a qeefadantamisa isse. Gindamu oota dabatta'a oottam kee'n illagenne keese quuqisam bikkina at ixxuwwi jolle hundam uraammo yititte. Ixxuwwi baaxiilom ki illagiinsi shiinshititte. Minaadabim baxina wodaninne murte'aa ki'u bikkina oota dabarakka'a ootimma qaqqisom kolli issito'o. Ihukkaarem Sanbaalaaxii Xoobbiyii ee'isam Araphphi uulli manna, Amoo'n mannaa Ashdooxxi mannaa exxita'a Yerusaalee'm ooxxi bax qaqqisaa baxamoolli ihukkisaa gindamaa hee'u beyyuwwi hundim baxamukkisaa macceessa'a lobakata quuqqo'o. Ee bikkina ixxuwwi hundim mat ikka'a Yerusaaleema waatta'a qasseenaa atanaachcha fissiteenaa a'llanto'o. Ihukkaarem neese ni Waa'i kolli uunxato hincaa'nnummo. Ixxuwwi jolli baxinnem uullixantam hiimoo ballaa egettamisa issinummo. Ee ammane Yihuxxi manni «Iyyi kee'mmaa lobakata hoogisoolla; gindamaa ubu ooxxi tuubbi lobakata; ee bikkina ka oota kaballa daballaa banxeena xannoommoyyo» yito'o. Ni diina'i odim «Ixxuwwi lambe'enne aangaa ixxuwwa shineembe'ee ixxuwwi baxxam baxom uullinseembe'ee maham laqqammoyyo te'im siiddamoyyo» yito'o. Ihukkaarem ixxuwwi gadanonne hee'llam Ayihuxxi manni tommi kore ni beyyo daba'llantu'uuyyi neense hawwoddeena a'llanto'i a'llancha hundam niina kutto'o. Ee bikkina ootiinsi biiree'n kollinne annannoomam ootamaa beeddubee'i kollinne bisa'a, bagadoo xiyyaa amadda'a egattam egeraano moolli moollinnem dissummo. Minaadabim lobakata kichche'ukkisa moo'aa lasonne gassaanina lommanninaa mulli gatu minaadabinaa «Ki'nnuwwi diina'i bikkina badditakkotte. Malaayyaam lombinnem baddisoo Waa'a sawwi'llehe. Ki'nnuwwi abbaayyuwwa, ooso, ki'nnuwwi meentoo amaxxaa sawwitakka'a iggitakka'a orammehe» yummo. Neese ni diina'ika moqqo'o lanqummisaa Ni Waa'im ixxuwwika a'llancha gindukkisaa laqqo'o. Neesem annannichchim oontoommi oota daba'llinaa oontummo. Ee balliinsi ki'isaa iinninne yo'i manniinsi kolli baxo baxxam hee'llo'o. Kolli odim agiraa bagadoo xiyyaa amadda'ahii o'l eddechcham edde'lla'ahii hee'llo'o. Ni gassaanim minaadabiinsi lasinne uullita'a, ooxxi baxo baxxam keeno hara'mmitam hee'llo'o. Mulli keen odim mat anginne mu'uta hincaa'llu'uuyyi matinne odim o'l mu'uta ammaddam hee'llo'o. Ee'isam gimba baxxam keen hundim bisa'a lamadonne lade'lla'a baxxam hee'llo'o. Ihona bagaan xurumba fugoo manchi iinniinsi annanni iham hee'ukkoyyo. Ee lasage an minaadaphphi awwonsaaninaa lommanninaa minaadab hundinamii «Ooxxi bax lobakata haraar ihu bikkina neese qee'llo qee'llonne yoommine. Xurumbi sagara macceessakkam ammane ni kollonne waallehe. Ni Waa'im ni bikkina oramookko» yummo. Ee bikkina soodaraar dariinsi ki'isaa boollaanki fireebe'i afeebe'e banxam hee'nnummo. Kolli mannim o'l mu'uta amadda'a egettam hee'llo'o. Ee ammane minaadabina «Hiimoo beero'o diina'iinsi egerimmina ballaa, baxo banxeena xannona ki'nnuwwi hundim ki'nnuwwi awwaadaaninne maqirem Yerusaalee'm beero'i woronne gallehe» yummo. An, Iyyabbaayyuwwi, iinninne maqire hee'llo'i egeraanii mulli baxaanii hundim edde'nnummi eddechcha sheelantam hee'nnummoyyo. Balli hundoomam wo'ina malloommi ammanem ihukkaare o'l mu'ut ni angiinsi annanni iham hee'ukkoyyo. Ee amanne minaadabiinsi lobakat goonii meentii Ayihuxxi awwonsaanonne mat ikka'a ki'llo'o. Ixxuwwim neesee ni abaroosii lobakat inkummi bikkina intaa hee'nnoommi hurbaata hansoommo» yito'o. Mulli keen odim «Uullanne ihu qoxxaalli sibaariinsi ki'aa ni foore gatinsoommi hurbaatina ihoo abuulli uullaa woyi'n mish haqqi beyyoo ni minee amadiinseembe'i afeebe'e amfaammo» yito'o. Mulli keenim «Faariis uulli adilina abuulli uullikaa woyi'n haqqi beyyikaa gibiro minqeena diinate liqaayye aa'nnaammo. Neesem niyyabbaayyuwwinnem maarinnee xiiginnee matome. Ni oosim ixxuwwi oosisame. Ihukkaarem neese ni ooso agiddanina higinsaa uwwinaammo. Ni landiinsim mat mat hore'oomam agidanina biteesanta'a kabadem yo'o. Abuulli uullii woyi'n mish haqqi beyyi niinniinsi massamu bikkina neese hoongaan inkaammo» yitam hee'llo. Anim ee ixxuwwi laachchi sagara macceesaa lobakata nadadummo. Anim ee bikkina lobakata sawwaa lasage minaadaphphi awwonsaanoo gassaanoo «Ki'nnuwwi hinkid ki'nnuwwi abbaayyuwwa hawwodakkamo? Mahina qaro'o aa'llakko'o» yaa quuqummo. Ee'lloo sawwitem atoorarimmina manni hundam wixxaa'ummo. Awwonsaanom «Hanqo'i Waa'a laqqambee'i mannina biteesanta'a hee'llo'i niyyabbaayyuwwa neese ni malaayyi qaxinne hundinnem bitaa'nnaa gatinsaammo. Kaba ki'nnuwwi odim ki'nnuwwi abbaayyuwwa biteessakkamonnihe? Ixxuwwi ki'nnuwwina agid ikka'a biteesantamisa issitakku'uuyyi Yoontakke'e» yaa shaaqummo. Ixxuwwim dabattam dabachcha hoogga'a cawwito'o. Odim edaamma «Ku baxxakkam bax danaamoyyo; hanqo'i Waa'a laqqambee'i ni diina'i game'llato; bi'issakkeena ni Waa'a baddimminne awwonim hasisam hee'ukkoyyonnihe? An, iyyabbaayyuwwii i awwaadaanii ixxuwwina diinatee hurbaataa liqaayyinsaammo. Ihona bagaan qaro'o miqisimma ullona. Ixxuwwiinsi massitakko'i abuulli uullaa woyi'nnekaa wee'l zayyixxi haqqi beyyoo minee daballehe. Ee'isam hurbaaxxeka, diinaxxeka, haareechchi woyi'n diqaasikaa zayixxekaa xibbiinsi mat suume kaballa daballehe. Ixxuwwim «Daballoommo, qaro'o maham aa'nnoommoyyo. At yittoka hundam issinoommo» yito'o. Anim qeessuwwa weeshaa minaadaphphi awwonsaan aaggo'i sagara egettona hidiisummo. Anim edde'ummi eddechchika kasa giggissaa «Aagu neeyyaxxi sagara egeroobee'i ayyi manchom Waa'i ixxi minee ixxi amaxxaa hundam ka'isa giggissona. Eehido'i manchim ka'isa giggironaa mahim bee'an ihona» yummo. Ee ammane ee beyyonne yoo manni hundim «Aameen» yaa Waa'a galaxxukko. Minaadaphphi awwonsaanim aaggo'i sagara egetto'o. Adil Arxeekisis adilluwwi adil ihu lamiyyi hiinchiinsi ki'isaa sadii lam adilla'n maaragii afeebe'e an Yihuxxi uullanne gassaanchi ihaa doo'llamummi tommonnee lam hiinchi woronnee anii i beshii gassaanina hasisoo hurbaata intummoyyo. Ihukkaarem iinniinsi illageen hee'llo'i gassaan minaadabanne iyyo ubbuussa'a ittam hurbaatiinsii woyi'n diqaasiinsii mulleka sor kin biraa massitam hee'llo'o. Ixxuwwi awwaadaanim ee'isam minaadaba hawwissam hee'llo'o. Ihukkaarem an eekka issummoyyo mashka'oomim an Waa'a baddoommi bikkinatte. Iina yoo qax malaayyinne hundinnem gindamu oota dabaraa ootummo bagaan i gaqqi uulli te'im amaxxi iina mahim hee'ukkoyyo. Odim hundem i awwaadaanim baxina wixxitam hee'llo'o. Ni kolli waattam hanqo'i Waa'a laqqambee'i ni heegeegonne hee'llam manniinsi mulleka mat xibbii ontayyi Ayihuxxi mannii ixxuwwi awwonsaanii iinninne maqire hurbaata ittam hee'llo'o. Balla ballanne mat mirgo'i, doo'llammi gereebbik loh, lobakat antabaa'ii ee'isam tommi ballanne mat kore lobakat woyi'n diqaasii iina gudam hee'ukko. Ihona bagaan mat uulli gassaanchina qoodamaa ihimmi hasisoo hurbaata hasummoyyo. Mashka'oomim mannanne iyyiisamaa hee'u iyyi kee'mmaalli ihukkisa la'oommi bikkinatte hee'ukko. I Moollanni Waa'a! Ka minaadabina issummoka moo'llaa eroomminne sawwihe. Sanbaalaax, Xoobbiy, Araphphi uulli Geesheemii mulli diina'ii oota oontaa guullinummisaa ootamoo'n gatu beyyim bee'isaa macceesso'o. Ihukkaarem ooxxi gooccuwwanne xufa aaginsummoyyom hee'ukko. Ee bikkina Sanbaalaaxii Geesheemii «Oono'o qaala'i biiranne yoo hegeegguwwiinsi matonne edammona» yita'a asse'llo'o. Oohim eese hawwoddeena sawwito'i bikkinatti hee'ukko. Anim «An lobakat baxinne matayyaammoo bikkina eekka uraa ki'nnuwwi beyyo waareena xanoommoyyo; ki'nnuwwinne edanchi bikkina bax uullona hasoommoyyo» yaa asse'ummo. Ee assom dabaransamaa soor kore asse'amukko; anim luxxeka dabarummisam soorem korem dabaraa asse'ummo. Ee lasagem Sanbaalaax ixxi awwaadaaniinsi matonne oonti kore asse'ukko. Asse'u assim «Atii Ayihuxxi minaadabii bangujjitakkeena hassakka'a oota dabattakka'a oottakku'uuyyi yoontakke'isaa atim ixxuwwina adil ekkeena hassittisaa ni hegeegonne hee'llam mulli minaadab hundim woccamuulla; oohim hanqi ihukkisa Geesheem kuraakko. Odim at ixxuwwina adil ikkittisaa Yerusaaleemanne alallaattam hiraagaano doo'llittisaa edaa kuraakko; oo woshshim adilluwwi adilina macceesammoo'is la'amaakkoohane. Ee bikkina atii anii edammaa ee woshshanne a'llammona waare» yoohane. Anim «Oo at yitoo woshshi hundim ki gaqqi sawwite bagaan qophphano» yaa dabarummo. Ixxuwwim ee'isinne ni malaayyi hoogaa baxo uullinsoommoka labissa'a neese baddissam hee'llo'o. Anim «I Moollanni Waa'a! Kabadem at i anga qoxxise» yaa uunxummo. Ee ammane miniinsi firoobee'isa ixxi hanenne gooc xufamaa hee'u Mahexaabi'eel beet beet hee'u Daalaay beet Shamaa'iy mine marummo. Ixxim «Dangonne mat hiimo waatta'a shiteena xantam bikkina atii anii Keesammi Mi'n woronne aangaa gooca xunfaa maaxammona» yukko. Ihukkaarem an «Iinni'nno'i manchi gibaa maaxamooyyo; Keesammi Mi'n woronne maaxamaa i foore gatiseena hasoommi mancho laboomonnihe? Eekka an hore'em issoommoyyo» yaa dabarummo. Anim ee woshsha qoossaa sawwoommaare Shaamaa'iy iina eehid yukkok Xoobbiyii Sanbaalaaxii diinatinne bitaa'llo'i bikkinatte bagaan Waa'iinsi asse'amubee'i hiraagaanchi ihukkisa la'ummo. Anim ee ixxuwwi sawwite aa'aa baa'oommisaa jora baxoommisaa issoohaare ixxuwwi i summa bi'isseenaa eesem sholliisseenaa birinne bitaa'llo'isa la'ummo. Anim «Waa'a! Xoobbiyii Sanbaalaaxii baxamu baxo hundam moo'ee; odim Noo'aadiya yakkam meentichcho hiraagaanchoo mulli qophpha'n hiraagaanii eese baddisameena issamukkoka hundam sawwihe» yummo. Ooxxi baxim asheeramu ontayyennee la'm ballannee Eeluulaa yakkam aga'n lamiyyennee onti ballannee beeddukko. Ni kululleetanne hee'llam niina diina'i ikko'i mulli minaadab bax maalalsiisoohan ihukkisaa Waa'i hara'mmatinne baxamukkisaa laqqa'a lobakata baddito'o. Ee ammane Yihuxxi awwonsaaniinsi lobakat xoobbiyinne assi xummaatto dabassaqantam hee'llo'o. Oohim Iirah beet Seekeen Xoobbiyina ballichchi ihu bikkinaa ixxi beet Yoohaanaanim Baaraakiy beet hee'u Maashulaam landichcho eebaa hee'u bikkinaa Ayihuxxi manniinsi lobakat ixxenne hidi'l sagara aagaa hee'ukko. Ee'isam Xoobbiy er manchi ihukkisa kuttu'uuyyi bittam hee'llo'o; an wocoommi luwwi hundam ixxena massita'a kuttam hee'llo'o. Ee bikkina ixxi odim eese baddiseena araq ammane assi kura kitaabam hee'ukko. Ootim ootamaa beeddukko; gooccuwwannem xuffeewwi aagaa hee'ukko; Keesammi Mine egettam waardiyyuwwi, zammaaraanii Leewi'i oosii annanni annanni baxina qoodanta'a hee'llo'o. Anim iyyabbaayyi Anaanaa girbina gassaanchi hee'u Hanaaniyaa Yerusaalee'm beero'o gassaan ikkona doo'llummo; Hanaaniy mulli keeniinsi lophphaa hanqo'anee Waa'a baddoohanee hee'ukko. Anim ixxuwwa «Da'l eelliinchi erisa fireebe'e Yerusaalee'm ooxxi gooccuwwi fooqoobee'isaa eelliinchi aagoo ammanem waardiyyuwwi uullita'a hee'llo'isam gooccuwwa qulfuwwinnee laqqo'uwwinnee qoxxissa'a xuffamisaa ijaajummo. Ee'isam Yerusaalee'm manniinsi waardiyyuwwa doo'llita'a egessiissamisaa annannichchim hee'oo mi'n hegeego qoxxaa egeroo'isaa issehe» yaa ijaajummo. Yerusaaleem haraar lob beero'i hee'ukko; ihukkaarem woronne hee'oo manni hoffan hee'ukko. Minneewwim lobakata baxamukkoyyi hee'ukko. Waa'im minaadabaa awwonsaanoo wixxaa'aa ixxuwwika qaranchi lugumo min mininnem xigoommisa issukko; qeefadanchiinsi uulliinsi gaassaa daba'llu mannika qaranchi lugumo moo'isoo doono'o siidummo. Ixxonnem Baabiloo'n adil Nabukadanaxoor qeefadaa massu manniinsi Yerusaaleemaa Yihudaa daba'llita'a annannichchim ixxuwwi gaqqi beero'uwwam aaggo'o. Daba'llito'okim ixxuwwi awwonsaan hee'llo'i Zarubaabeelinne, Iyyaasinne, Nahiminne, Azaaryinne, Ira'aamyinne, Nahaamaaninne, Mardookiyoosinne, Bilshaaninne, Mesapheereetinne, Bigwaayinne, Nahuuminnee Ba'aaninnettee. Qeefadanta'a hee'llam uulliinsi daba'llito'i Isra'ee'l minaadaphphek xig moolli moollinnee qaranchi lugu'mmisinnee kitaabamukkok Phaari'oosh moolliinsi 2,172 Shafaaxiy moolliinsi 372 Araah moolliinsi 652 Iyyaasaanniinsii Yoo'aab shumo'iinsii ihoo Pha'aat Moo'aab moolliinsi 2,818 Eelaam moolliinsi 1,254 Zaatu'i moolliinsi 845 Zakaay moolliinsi 760 Biinuy moolliinsi 648 Beebay moolliinsi 628 Azgaad moolliinsi 2,322 Adooniiqaam moolliinsi 667 Bigwaay moolliinsi 2,067 Aadiin moolliinsi 655 Hizqiyaasa yakkam Axeer moolliinsi 98 Hashum moolliinsi 328 Beexaay moolliinsi 324 Hariif moolliinsi 112 Gaba'oon moolliinsi 95 hee'ukko. Kanniinsi woroon yoo gaassi anno'i beero'uwwanne hee'llam hee'llo'i mulli keenim daba'llito'ookko. Beetaliheemiinsii Naaxoofiinsii 188 Anaatootiinsi 128 Beet Azmaawiitiinsi 42 Qiiriyaatyi'aariimiinsi, Kafiiriinsii Ba'eerootiinsii 743 Iraamiinsii Geeba'iinsii 621 Mikmasiinsi 122 Beeteeliinsii Aayiinsii 123 La'm Naabo'iinsi 52 La'm Eelaamiinsi 1,254 Haariimiinsi 320 Yaarko'iinsi 345 Loodiinsi, Hadiidiinsii Ooniinsii 721 Sana'iinsi 3,930 hee'ukko. Qeefadanta'a hee'llam uulliinsi daba'llito'i qeessuwwi moollik summi Iyyaas shumo'iinsetti ihu Yida'iy moolliinsi 973 Immeer moolliinsi 1,052 Phashihuur moolliinsi 1,247 Haariim moolliinsi 1,017 hee'ukko. Leewi'i oosiinsi Hoodaayiw shumo'iinsetti hee'llo'i Iyyaasaanniinsii Qadmi'eel moolliinsii 74 Asaaf shumo'iinsetti ikko'i zammaaraaniinsi 148 Shaluumina, Axeerina, Xaalmoonina, Aquubina, Haxiixinaa Shobaayinaa shumo'i ikko'i waardiyyuwwiinsi 138 hee'ukko. Waa'i Mi'n baxaa'n shumo'i moollinne moollinnem Xihatte, Hasuufatte, Xaaba'ootatte, Qeeroosatte, Sii'atte Faadoonatte, Labaanatte, Hagaabatte, Shalmaayatte, Hanaanatte, Giideelette, Gaaharatte, Ira'aayatte, Iraxiinatte, Naqoodatte, Gaazaamatte, Uuzatte, Phaaseehatte, Beesaayyatte; Ma'uuniimatte, Nafuushaasiimatte, Baqbuuqatte, Haquufatte, Harhuuratte, Baaxiliitatte, Mahiidatte, Harsha'atte, Baarqoosatte, Siisiratte, Teemaahatte, Naxiihattee Haxiifattee hee'llo'o. Salamoonina awwaaddam awwaadaa'n moollik summi Sooxaayatte, Soofeereetatte, Fariidatte, Yaa'ilatte, Darqoonatte, Giideelatte, Shafaaxiyatte, Haxiilatte, Fakereetatte, Haxabayimattee Amoonettee hee'ukko. Keesammi Minenne baxxam baxaa'nnekii Salamoon awwaadaa'n shumo'ikii xig mat ihaa 392 hee'ukko. Telemelaaha, Telharsha, Karuuba, Adoonaa Imeeraa yakkam beero'uwwiinsi daba'llito'ok Daalaayik, Xoobbiyikii Naaqood shumo'ikii xig mat ihaa 642 hee'ukko. Ihukkaarem oo keen ixxuwwi shumo'i Isra'eeliinsetti ihukkisa caakkissa'a kutteena xanto'oyyo. Ee'isam qeessuwwiinsi Hoobaayik, Haqooxikii Gala'aadiinsetti ihoo Baarzilaay moolliinsi landichcho eebu ixxi summinne weeshamu Baarzilaayikii moolli ixxuwwi gaassi anno'ika qaranchi lugumo laqqeena xanto'oyyo. Ee bikkina qeessoomaninne awwaaddeena xanto'oyyo. Yihuxxan ihu Hatersaatim Uriiminnee Tumiiminnee awwaadoo qeessichchi doo'llameebe'e Waa'ina kitim issakka'a hincaa'akkam keesammi hurbaatiinsi itteena xantambee'an ihukkisa kurukko. Qeessuwwi, Leewi'i oos, Keesammi Mine egettam waardiyyi, zammaaraan, minaadabiinsim lobakat, Keesammi Mi'n awwaadaanii Isra'ee'l minaadabii hundim Yihuxxi uulli beero'uwwanne afuutto'o. Isra'ee'l minaadab lama'l agananne ixxuwwi gaqqi beero'uwwanne guullita'a aaggo'o; ixxuwwim ee aga'n luxxi ballanne Yerusaaleemanne wo'i gooca yakkam wixxixxi beyyiinsi worinne minaadab hundim wixxukko. Waa'im Muse'enne Isra'ee'l minaadabina uwwu See'l kitaaba eebona kitaabaanchoo qeessichchoo ihu Izira xa'mmito'o. Izirim lama'l agan aagu luxxi ballanne goon, meentii qoor oosii wixxaa yoo dummichchi beyyo ee See'l kitaaba eebukko. Izirim ee wixxixxi beyyi gooc gadanonne uullaa dariinsi ki'isaa sammi gud balli afeebe'e ee See'l kitaaba sagara iimaa'aa qananaa'ukko; minaadabim erisa macceesukko. Izirim Eehannina makkoo'isa ihaa haqqinne baxamaakkoo beyyonne uullaa hee'ukko; ixxi makki kollinne Maatiitiy, Sheemaa'i, Aanaaniy, Uuryi, Hilqiyii Maa'iseeyii uullita'a hee'llo'o; qeddi kollinnem Fadaay, Miishaa'eel, Maalkiy, Hashum, Hashbaadaanaay, Zakkaaryaasii Mashulaamii uullita'a hee'llo'o. Izirim qoffaa baxamaakkoo beyyonne uullukkaare manni hundim qoxxisaa moo'ukkuuyyi ee See'l kitaaba fooqaa'u ammanenne manni hundim afuuru beyyiinsi ki'aa uullukko. Izirim hundiinsi lob Moollanni Waa'a galaxxukko; minaadabim anga iimaa'aa «Aameen! Aameen!» yukko. Uullanne heeshita'ahim Waa'ina otossito'o. Ee lasage minaadab ki'aa uullukko; Leewi'i oos Iyyaas, Baani'i, Sheereebiy, Yaamiin, Aquub, Shaabataay, Hoodiy, Maa'iseey, Qaliix, Azaariy, Yoozaabaad, Hanaanii Phalaayii See'l kitaaba minaadabina caakkissa'a kuttam hee'llo'o. Ixxuwwim mannina hundinam aageena xanoo'isinne Waa'i See'l kitaaba qananaa'lla'a caakkissa'a kuttam hee'llo'o. Minaadab ee kitaabika macceessa'a wi'llito'i bikkina gassaanchi Nahim, Seera losisaanchoo qeessichchoo hee'u Izirii Leewi'i oosii «Kaballi Moollanni Waa'ina keesammi balli ihu bikkina kichche'llakka'a willitakkotte» yito'o. Nahimim «Mallehe, doo'l hurbaata ittakka'a xee'oo agga aggehe bee'aanninam ki'nnuwwina yoohaanniinsi baxxansehe; kaballi ni Waa'ina keesamaakkoo balla; Waa'ik liiranchi ki'nnuwwina malaayyi ihu bikkina kichche'llakkotte» yukko. Leewi'i oosim ee keesammi ballanne kichche'immi hasisoobee'an ihukkisa kuttu'uuyyi minaadab sahoo'isa issito'o. Minaadabim ee See'lleka tirato erisa laqqo'i bikkina ixxuwwi min minem matta'a ittu'uuyyii aggu'uuyyii lobakata liiranto'o. Ixxuwwina yoohaanniinsim mulli keenina baxxansito'o. Ee la'm balli daram moolli awwonsaan qeessuwwinnee Leewe'uwwii See'l kitaabiinsi losseena Izir beyyo matto'o. Ee See'l kitaabannem Muse'enne ihaa Waa'i uwwu Seeranne lama'l agananne ihoo Daas uguxxi ammane Isra'ee'l oos Daasanne ikka'a lonsimmi hasisoohan ihukkisa laqqo'o. Ee bikkina minaadab Seer ijaajoo'isinne duuna matta'a wee'lleka, udma'i uulli wee'lleka, barsanaaxxeka, dimbaaphphekaa mulli haqquwwikaa caaffuwwa eebba'a godo'o baxxeena Yerusaaleemaa mulli ixxuwwi beero'uwwaa mattona ijaajjo'o. Ee bikkina minaadab hundim caafa eebbu'uuyyi annannichchim hee'oo ooxxi woronne, mi'n hanenne, Keesammi Mi'n wixxixxi beyyonne, «Wo'i gooca» yakkam wixxixxi beyyonnee Efireem wixxixxi beyyonne godo'o baxxo'o. Qeefadanta'a hee'llam uulliinsi daba'llita'a waatto'i manni hundim godo'o baxxa'a afuutto'o. Naawe'i beet Iyyaas doolliinsi kid Isra'ee'l oos ee ballisa ee uguda lonsita'a laqqambee'i bikkina lobakata liiranto'o. Oo ugud asheeramu balliinsi ki'isaa lasaanchi balli afeebe'e Izir Waa'i See'l kitaabiinsi hundem ballam qananaa'am hee'ukko. Minaadabim ee uguda lamar balli afeebe'e lonsito'o; sadeenti ballannem seer ijaajoo'isinne keesammi dummichchi issamukko. Ee aganannem lamiyyennee soo'l ballannee Isra'ee'l minaadab mat beyyonne wixxita'a xiddi eddechcha edde'lla'ahii ixxuwwi horoorennem dira issita'ahii soommanto'o. Ixxuwwi gagam mulli minaadab manniinsi hundiinsim annanni issito'o; hundim uullita'a ixxuwwii gaassi ixxuwwi anno'ii baxxo'i baaxiilo hundam biiraa yito'o. Uullito'isam Moollanni Waa'i See'l kitaabiinsi qananaa'akku'uuyyi sas sa'aata uullita'a macceesso'o; mulli sas sa'aatina odim baaxiilo biira yitu'uuyyi Moollanni Waa'ina otossito'o. Leewe'inam baxamaakkoo mikkiranne uullita'a Iyyaas, Baani'i, Qadimi'eelii Shabaaniyii uullita'a Moollanni Waa'a uunxito'o. Leewi'i oos Iyyaas, Qaadmii'eel, Baani'i, Hashabaaniy, Sheereebiy, Hoodiy, Shabaanyii Phataahiyii «Ki'llakka'a heer heerina hee'oo ki'nnuwwi Moollanni Waa'a galaxxehe; galatiinsii lombiinsii hundiinsim hanaan iimiimihona yito'o. Ee lasage odim Isra'ee'l oos «Waa'a! Waa'i xale'i atette; at iimanee iimaniinsi iimanenne yoo luwwaa hundam uullaa uullanne yoo luwwaa hundam dambalaqaa woronne yoo luwwaa hundam qooccitaatto. Hundinam foore uwwitto. Iima'n gogot hundim kiina otossookko. Baabiloo'n uulli Uuriinsi Abraama doo'llitaa wottittok ixxi summam ‹Abrihaama› yitti Moollanni Waa'i atette. Ixxim kiina amma'nnamaakkoohan ihukkisa moo'llaa ixxenne hidi'l sagara aaggitto. Kaani'aa'nneka, Hiite'ika, Amoore'ika, Farze'ika, Iyyaabuusikaa Gergeese'i mannikaa uulla ixxi shumo'ina uwwiteena sagara aaggitto. At amma'nnantaattoohan ikki bikkina aaggitti hidi'l sagara egattitto. «At gaassi niyyanno'i Gibxanne hee'llo'i ammane afu hawwo moo'llitto. Ertiira'i Dambalaq gammalanne hara'mmitona uunxito'i uunxato macceessitto. Ni lobanno'i wor amadanto'isa moo'llaa Gibxi adilanne, gassaanonnee ee uulli minaadabannee maalalsiisoo mare'e moo'issitto. Atim eekka issimminne kaballi afeebe'e ki sad uulli hundannem la'amaakko. Ixxuwwi illagenne dambalaqa lam issittaare ixxuwwi gogaalli uullinne higgo'o. Xillaalli wo'i woronne uboo ki'nnisam ixxuwwa hollitam hee'llo'i diina'i xuuxanta'a gattamisa issito'o. Ballaa duuphphi hafinne, hiimoo giirinne googo caakkissittuuyyi awwonsitto. Iimaniinsi dillitaa ki ooso Siina'i duunanne atoorassitto. Xabbeen awwonsaa hanqo'i seeraa, danaam gatti ogoraa ijaajoo uwwitto. Keesammi ki usheexxaxxi ballam la'issitto. Ki awwaadaanchi Muse'ennetti ikkaa ijaajo, ogoraa seeraa uwwitto. «Sibaatto'i ammane maanna'a iimaniinsi dilliissitto; xeebe'llo'i ammane sifo'i kiniinsi wo'o fissitto. Ixxuwwina uwwiteena sagar aggitti uulla matta'a lago aa'llamisa issitto. Ihukkaarem ni lob anno'i tobbe'llo'o; ixxuwwi wodanom duudisso'o. Ki ijaaccisannem marimma sabbo'o. Kiina ijaajancham sabbo'o. At ixxuwwina issitti maalalsiisoo mare'uwwa hundam xaddo'o. Ixxuwwi lambe'iinsim awwonsoo mancho doo'llita'a odim Gibxi uulli agiddanina awwonsoo'isa issito'o. Ihukkaarem at iittinne wo'mmitaattoohane, quunqina gaaggaabboobee'ane, haafitoohanee biijaalli Waa'aa ikki bikkina ixxuwwa uunjitaa uttittoyyo. Ixxuwwi addichcho laboo misila baxxa'a ‹neese Gibxi uulliinsi awwonsaa fissu Waa'i kane› yito'o. Waa'a! Ki summa hinkaa'na bi'isso'o! Ihukkaarem kiikki haafit lobakat ihukkaanniinsi ki'aa at ixxuwwi udma'i uullanne bi'llona cawwitaa uttittoyyo. Baallaa hiimoo ixxuwwa awwonsoo duubaa gii'l caakkaa ixxuwwiinsi qeessittoyyo. Issitam luchcho hundam losisoo kiikka biijaalli ayyaana uwwitto. Ittona maanna'aa aggam wo'oo uwwitto. Udma'i uullanne sor hiincho hundam taakke'llu'uuyyi ixxuwwina hasisoo luwwiinsi maham hoffiissittoyyo. Ixxuwwik eddechchi beeddukkoyyo; lokkim shuushe'ukkoyyo. «Keese laqqambee'i minaadaphpheka adilluwwa ixxuwwi minaadabinne maqirem kaa'lla'a ixxuwwi uulli tochchi gabala hundam amaddamisa issito'o. Adil Siihoon gassam hee'u uulla kaa'lla'a amaddo'o. Adil Oog gassam hee'u Baasaa'n uullam lago aa'llo'o. Ixxuwwinam iima'n boollaanki qax ooso uwwitto. Ixxuwwi lob anno'ina uwwiteena sagara aaggitti uulla kaa'lla'a amaddamisa issitto. Ixxuwwi oosim Kana'aa'n uulla kaa'lla'a amaddo'o. Ee uullanne hee'llo'i minaadabam at kaa'llitto. Ee uulli minaadabannee minaadaphphi adilluwwannee hasso'oka hundam issitona at ixxuwwina malaayye uwwitto. Ki minaadabim girbamaakkoo beero'uwwaa harish uullaa danaam mu'utinne wo'mmaakkoo minneewwaa hundam bariinsi firu wo'uwwaa wee'l zaytaa woyi'n haqqaa mulli mish haqquwwaa hundam amaddo'o. Goddita'a itto'aarem ixxuwwi orachchi geejjukko. Atim ki biijoominne ixxuwwina uwwitti danaam luwwanne hundannem liiranto'o. Ihukkaarem ixxuwwi kiina ijaajancha sabba'a keesenne boqqito'o. Ki ijaajom afareen uunjito'o. Ki kollonne daba'llitona qoxxissa'a kuttam hee'llo'i ki hiraagaanom shito'o. Ki summam amman hundam sholliisso'o. Ee bikkina diina'i ixxuwwa kaa'lla'a gassitona higissaa uwwitto. Ixxuwwi hawwita'a at hara'mmitona ki kollonne laatto'i ammane at iimaniinsi macceessitto. Ki urat lobakat ihukkaanniinsi ki'aa diina'i angiinsi gatisoo awwonsaano at asse'llitto. Ihukkaarem ixxuwwi xumma siidda'a lasage ki illagenne odim jora baxxo'o. Atim ixxuwwa odim diina'ina higissaa uwwitto. Ki kolli daba'llita'a at hara'mmitona latto'aare odim at iimanenne ikkaa macceessitto. Ki haafit lophphimmiinsi ki'aa at ixxuwwa amman hundam hara'mmitootto. Ki sagarina ijaajantamisa qoxxissaa kuttitto. Ki ijaajo egerimmi heechchi goog ihuta'nnim ixxuwwi tobbe'lla'a egerimma sabbo'o. Ixxuwwi wodanom duudissa'ahii afare dabatta'ahii ijaajancha sabbo'o. Atim lobakat doollina iyyaqqitto. Ki ayyaaninnem hiraagaano ki'issaa qoxxissa'a kuttamisa issitto. Ihukkaarem ixxuwwi macceesseena hassobee'i bikkina ixxuwwi kululleetanne hee'llam mulli minaadabina higissaa uwwitto. Ihukkaarem at biijaallaa haafitoo Waa'aa; ki haafitim lobakat ihu bikkina bi'isseena hassittoyyo. «Ni moollanni Waa'a! At hinkido'i lob Waa'a At hinkido'i malaayyaamoo baddissoo Waa'a; ki hidi'l sagaraa heer heerina hee'oo ki iittoo amma'nnamaakkoo'isinne at egettootto. Aasoo'l uulli adilluwwi doolliinsi kaballi afeebe'e neesenne issitti luwwi hundannem at hanqa; neese jora banxumta'nnim at amma'nnantaa hee'lloohane. Ni lob anno'i, Qeessuwwi, Adilluwwii awwonsaanii ki seera egatto'oyyo. Ixxuwwina uwwitti ijaajoo asse'llitti qoxxish sagaraa macceesso'oyyo. Ixxuwwi adilla'n doollennee ki biijoominne at uwwitti harish haraar uullannee hee'llo'i ammane kiina otossito'oyyo. Ixxuwwi jolli baxiinsim daba'llita'a keese awwaaddeena xanto'oyyo. Eehanniinsi kaa'aa oono'o kaballa neese agid inkaammo. At niyyanno'ina uwwutti mishaamoo maassaamoo ihu danaam ni uullannee neese agid inkaammo. Neese baaxiilo banxaa keese kichche'insummi bikkina ni hanenne gassaan issitaa ki'issitti adilluwwina ee uulli mish hundiinsem ludo gibillummuyyatte. Ixxuwwim neesennee ni foora am diinatennee hundannem ixxuwwina faare'isu luwwi hundam issitamuulla. Neesem eehanniinsi ki'aa kee'mmaalli hawwonne yommine'e» yita'a uunxito'o. Ka ihu luwwi bikkina hundinam amma'nnisoo hidi'l sgara kitaanboommo; Iittammaa kitaambummaannonnem ni awwonsaan, Leewi'i oosii qeessuwwii koobo'o koobbamo. Eekkam gassaanchi Hakaaliy beet hee'u gassaanchi Nahimii Sedeeqiyaasii koobbo'o. Ee lasage odim kanniinsi woroon yo'i manni koobbo'o. Gatto'i Isra'ee'l minaadab, Qeessuwwi, Leewi'i oos, Keesammi Mi'n oox gooca egeraan, zammaaraan, naataaniimmuwwi, Waa'a seera doo'llito'i mulli keen hundim, ixxuwwi meenti, goon, landii qoossita'a laqqeena xantam keenii hundim ixxuwwim ixxuwwi abbaayyuwwinnee awwonsaaninnee maqirem ixxena agishshi hee'u Muse'ennetti ihaa Waa'i uwwu Seera, ijaajo, oogato'oo gatti ogoraa hundam egatteenaa ijaajanteenaa iittanta'a mateeyyoominne hidi'l sagara aaggo'o. Ni uullanne hee'llam mulli minaadaphphi manninne eebaqqammoommoyyo. Ee'isam usheexxaxxi ballanne te'im mulli uguxxi ayyaammuwwanne mulli uulli manni dadda'l mu'uta te'im annanni annanni hurbaata biteesseena eebbota'nnim neese ixxuwwiinsi bitaa'nnoommoyyo. Lama'l hinqaayyinsummi liqaayyi diinatem miqinsoommoyyo. Hiinchonne hiinchonne Keesammi Mi'n awwaadina ihoo mat kin bi'l saxxi suume annannichchim eembaa uwwinoommo. Ee'isam Keesammi Minenne ihoo awwaaxxi ammane hincoo keesammi daabbo'oo hundi ballam hincoo hurbaaxxi kitimaa shokkiisakkam kitimina ihoo fooraam diinatee usheexxaxxi ayyaamonnee aga'n aaggannee la'amaakkoo uguxxi ayyaammuwwannee odim mulli keesammi kitimmuwwaa hundam Isra'ee'l minaadaphphi baaxiil shiinshamona hincookkokaa Keesammi Minina hasisoo mulli luwwaa hundam hincaa'nnoommo. See'l kitaabanne kitaabamukkisinnem hiincho hiinchonne ni Moollanni Waa'ina hincoo kitima shokkiisakkam haqqa hinki moolli hinki ammane hincaa'immi hasisooda'e neese minaadab, qeessuwwii Leewi'i oosii saaminne axinsoommo. Hurbaaxxaanniinsii hundem haqqi mishiinsii ludo hiincho hiinchonne Keesammi Mine eembaa uwwinoommo. See'l kitaabanne kitaabamukkisam ni goo'n oosika, la'lleka, gereebbikaa fella'ikaa wona Keesammi Minenne awwaadoo qeessichchina eembaa uwwinoommo. Hurbaata wixxaa'akkam agananne wixxaa'nnoommi hurbaaxxeka, woyi'n diqaasika, wee'l zaytikaa ee'isam mulli itakkam haqqi mish hundikamii ludo Keesammi Minenne awwaadoo qeessichchina uwwinoommo. Ni abuulli uulluwwiinsi gibiro wixxaa'llamok Leewi'i oos ikko'i bikkina neeso'i uulli mutisoo luwwi hundiinsim tommiinsi mato ixxuwwina uwwinoommo. Leewi'i oos tommiinsi mato wixxaa'llam ammane Aaroon shumo'iinsette ihu qeessichchi ixxuwwinne maqire hee'oona. Ee Leewi'i oos wixxaa'llam asiraatiinsi odim tommiinsi mato Keesammi Mi'n mu'uta dissakkam minenne eebba'a dissitona. Isra'ee'l oosii Leewi'i oosii hurbaatiinsi, woyi'n diqaasiinsii wee'l zaytiinsii wixxu kitima aa'lla'a tarinne awwaaddam qeessuwwi, ooxxi gooca egeraanii zammaaraanii hee'llam minee Keesammi Mi'n mu'uta dissakkam minee eebba'a dissitona. Neesem ni Keesammi Minenne hore'em innaanninoommoyyo. Minaadaphphi awwonsaan ixxuwwi heechchi beyyo Yerusaaleemanne issito'o. Ee'isam minaadabiinsi tommiinsi mat suume ihoo qax Yerusaalee'm beero'onne gatto'o. Honsi suum odim ixxuwwi gaqqi beero'uwwannee hegeegguwwannee hee'llona saaminne annanni issito'o. Minaadabim ixxuwwi gaqqi doo'llinne Yerusaaleemanne afuutteena hasso'i manna hundam maasse'llo'o. Ee ammane mulli beero'uwwannee hageegguwwannee hee'llam hee'llo'i hofqax Isra'ee'l minaadab, qeessuwwi, Leewi'i oos, Keesammi Mi'n awwaadaanii Salamoon awwaadaa'n shumo'ii hee'llam beero'uwwanne hee'u amaxxa ixxuwwi gaqqi amaxxi issita'a amaddo'isam hee'llo'o. Yerusaaleemanne hee'llam Yuhuxxi uulla awwonsaa'nnek summi kanniinsi woroon yoohane. Yihuxxi sulliinsi Zakkaariyaasina beet beet hee'u Uziy beet Ataayye mulli gaassi ixxi anno'iinsi Yihud beet ihu Faarees shumo'iinsette ikkam Amaariya, Shafaaxiyaa Maahalaali'eelaa edoohan hee'ukko. Odim Kolihooz beet beet hee'u Baaruuk beet Maa'iseey mulli gaassi ixxuwwi anno'i Yihud beet hee'u Sheela'i shumo'iinsette ikkam Hazaaya, Aadaaya, Yoyaariibaa Zakaariyaasaa edoohan hee'ukko. Faarees shumo'iinsi la'anto'oo 468 manchi Yerusaaleemanne afuutto'o. Biiniyaam sulliinsi Mashulaam beet Saalu'u Yoo'eed beet, Fadaay beet, Qolayaan beet, Maa'iseey beet, Iitii'eelin beet, Shaa'iyaan beet, Saalu'una abbis qarmanni ikko'i Gaabaayyee Saalaayyee edaa 928 Biiniyaam uulli mannii Yerusaaleemanne hee'llam hee'llo'o. Ixxuwwi hundinam awwonsaanchi Ziikir beet Yoo'eelatti ihaa Hasinu'i beet Yihud odim ee beero'ina la'm beyyi awwonsaanchi hee'ukko. Qeessuwwim Yoyaariibinaa Yaakiininaa beet ihu Yidaa'iy, Keesammi Mi'n awwonsaanchi hee'u Ahiixoob beet, Marayoot beet, Saadooq beet, Mashulaam beet, Hiilqiy beet Saaraayaa ee moolliinsi hundiinsim 822 manchi Keesammi Mi'n awwaadaan hee'llo'o. Yaroohoom beet hee'u Adaay, Phalaaliy beet, Amiixiin beet, Zakkaariyaas beet, Phaashuur beetoo Maalkiy beetoo hee'llo'o. Ee moolli hundiinsim 242 abaroos awwonsaan hee'llo'o. Azari'eel beet Amaashisaay, Ahizaay beet, Maashilmoot beet, Imiir beet, ixxuwwi moolliinsim 128 la'anto'oo gaadaan hee'llo'o. Ixxuwwi awwonsaanchim Zaabdii'eela yakkam Hagiidooliim beet hee'ukko. Leewi'i oos Hashuub bet Shamaa'iy, Azaariiqaam beet, Hashaabiy beet, Buniin beet, Shabtaayaa Yoozaabaadaa yakkam Leewi'i oos awwonsaan Keesammi Miniinsi biireen baxamoo baxina hundinam awwonsaan hee'llo'o. Miika'i beet Maataaniy, zammaraa'n awwonsaanchi Asaaf beet, ixxo bikkaanchi hee'u Baaqbuuqiy beet, Shaamu'i beet hee'u Abda'a Galaal beet, Yuuduutuun beet, Keesammi Yerusaalee'm beero'onne hee'llo'i Leewi'i oos hundim 284 mancho hee'ukko. Keesammi Mi'n gooca egeraa'nnek xig Aquuba, Xaalmoonaa ixxuwwi abbaayyuwwaa hundam edaa 172 mancho hee'ukko. Isra'ee'llek Gatto'i minaadab, Qeessuwwii Leewi'i oosii ixxuwwi gulummi issita'a a'llito'i Yihuxxi beero'uwwannee hegeegguwwannee hee'llo'o. Keesammi Mi'n awwaadaan Yerusaalee'm beero'aannonne Oofeela yakkam hoffi duunanne afuutto'o. Siihi'ii Gishiphphii ixxuwwi ijaajaan hee'llo'o. Yerusaaleemanne hee'llam Leewi'i oosina awwonsaanchi Hashaabiy beet beet hee'u Baani'i beet Uze'etti hee'ukko. Ixxi lob anno'im Maataaniyannee Miikaa'ana edoohanee ihaa ixxim Keesammi Minenne zammarakkam mazmuur hundinam awwonsaan hee'llo'i Asaaf oosiinsi mat hee'ukko. Hundem ballam zammarakkam mazmuu'l awwaaxxi ogor adil ijaaju ijaaccisinnetti hee'ukko. Yihuxxi sulliinsi Zaarah shumo'iinsette ihu Mashezaabeel beet Phataahiy Faariis uulli adi'l minenne Isra'ee'l minaadaba moo'oo quux hundinam bikkoohan hee'ukko. Yihuxxi sulliinsi lobakat manni abuulli uulli gadanonne annannannem Qiiryaat Arba'anne, Giiboonanne, Yaqabxi'eelanne, ee beero'uwwi hegeegonne, ee'isam Iyyaasonne, Moolaadanne, Beetiphaaleexanne, Haxaarshu'aalanne, Bersaabehanne, ixxi gada'n hegeegguwwanne, Xiqlaaqqi beero'onne, Makoonannee ixxi gada'n hegeegguwwannee, Enraamoonanne, Xari'anne, Yaarimuutanne, Zanoohanne, Aduulaamanne, ee beero'uwwi hegeegguwwanne, Laakiishanne, ixxi gada'n abuulli uulluwwanne, Azeeqannee ixxi gada'n hegeegguwwannee hundim hee'am hee'ukko. Ee bikkina Yihuxxi oosik uulli woroo'n qarinne Bersaabehiinsi kid hanaa'n qarinne odim Hiinoo'm cebbiinsi kid hooraa yoo uulli lambe'i hundim ixxuwwina heechchi uulli hee'ukko. Biiniyaam oosim Geeba'anne, Miikmaasanne, Aayanne, Beeteelannee ee gadanonne yoo heegeegguwwannee hee'llam hee'llo'o. Anaatoot, Noob, Anaaniy, Haaxoor, Iraamaa'i, Giitaayim, Hadiid, Xoboo'iim Naabalaax, Loodii Ono'ii ee'isam «Angi lachchi baxaa'n cebba» yakkam beyyii hundim ixxuwwina heechchi beyyi hee'ukko. Yihuxxi uullanne hee'llam Leewi'i oosiinsi kolli Biiniyaam oosinne maqirem hee'llamisa issamukko. Salaatiyaal beet Zarubaabeelinnee hundiinsi lob qeessichchi Iyyaasinnee maqire qeefadanta'a hee'llam uulliinsi daba'llita'a waatto'i qeessuwwikii Leewi'i oosikii summi, Leewi'i oosik Galaxxi mazmuurina awwonsaan hee'llo'i keen Iyyaasotte, Biinuyatte, Qaadimi'eelatte, Sherebiyatte, Yeshu'atte, Biinuyette, Qaadmi'eelatte, Sheereebiyatte, Yihudattee Maataaniyattee hee'llo'o. Zammaaraan zammattam ammane ixxuwwi midaadonne uullitam hee'llo'i ixxuwwi abbaayyuwwim Baqbuuqatte, Uno'ottee mulli keenoo hee'llo'o. Iyyaas Yooyaaqiima qarukko. Yooyaaqiim Eeliyaashiiba qarukko. Eeliyaashiibim Yooyaadaa'e qarukko. Yooyaadaa'e Yoonaataana qarukko. Yoonaataanim Yaadu'a qarukko. Hundiinsi lob qeessuwwi Eeliyaashiibatte, Yooyaadatte, Yoonaataanaa Yaadu'aa yakkam qeessuwwi awwonsaan hee'llo'i doollenne Leewi'i oosikii qeessuwwi abaroosa awwonsaa'nnekii annanni ikka'a la'antam doono'i gudaa hee'ukko. Oohim gudukkok Daaryoos Faariis uulli adil ihu doollennette. Ihona bagaan Leewi'i abaroosina awwonsaan lophphita'a la'anto'ok Eeliyaashiib beet beet Yoonaataan foorinne hee'u doolli xale'ennetti hee'ukko. Leewi'i oosina Awwonsaan ikko'i Hashaabiy, Sheereebiy, Iyyaas, Biinuyii Qaadmi'eelii ixxuwwi abbaayyuwwi illagenne ikka'a Waa'i manchi ihu adil Daawiit ijaaju ijaaccisinne mat matiinsi aa'aqqantu'uuyyi Waa'ina galataa lombaa hincaa'llam hee'llo'o. Keesammi Mi'n ooxxi gooc gadanonne yoo mu'uta dissakkam minneewwa egattam egeraan odim Mataanyatte, Baqbuuqiyatte, Abdiyutte, Mashulaamatte, Xalmoonattee Aquubattee hee'llo'o. Ixxuwwim Yooseedeeqina beet beet hee'u Iyyaas beet Yoo'aaqiim uulla gassaanchi hee'u Nahimii seera losisaanchoo qeessichchoo hee'u Izirii hee'llo'i doollenne awwaaddam awwaadaan hee'llo'o. Yerusaalee'm beero'i ooxxi maassi uguxxi balla Leewi'i oos hee'llam beyyi hundiinsim weeshanta'a waatto'o. Ixxuwwina doolinnee diitta'innee maasiinqo'innee galaxxi mazmuura hincaa'llu'uuyyi ee uguda liiranchinne lonsito'o. Ee ugudam lonsimmina Leewi'i abaroos ikko'i zammaaraan hundim wiiddanta'a hee'llam beyyi hundiinsim wixxito'o. Wixxita'a waatto'okim Yerusaalee'm kululleetiinsette, Naxoofannee ee hegeegguwwannee yoo beero'uwwiinsetee. Beetigilgaaliinsi, Geeba'iinsettee Azmaawiitiinsettee hee'ukko. Qeessuwwi Leewi'i ooii see'llisinne ixxuwwi gaga muccussita'a lasage minaadabaa ooxxi goocaa beero'i ootaa muccussito'o. An Nahimim Yihuxxi uulli manna awwonsaano gimbi ooxxi hanenne wixxa'aa zammaaraano lam lob geejji tuuttuwwanne baxxansaa Waa'a mazmuurinne galaxxitu'uuyyi fitta'a ee beero'o do'llamisa issummo. Luxxi tuutim ooxxi gimbi haninne hurura uunjakkam ooxxi gooca yakkam kollo marukko. Hoshaa'iyii Yihuxxi awwonsaanii ee zammaaraano awwonanita'a mattam hee'llo'o. Ixxi moolliinsetti ikko'i Shamaa'iy, Azaari'eel, Miilalaay, Giilalaay, Maa'aay, Naatinaa'eel, Yihudii Hanaanii Waa'i manchi Daawiit mazmuurina awwaaxxam hee'u mu'uta iyyita'a awwonta'a matto'o. Ixxuwwam awwonsam hee'ukkok kitaabaanchi Iziratte hee'ukko. Ixxuwwim Wo'i bu'i Gooca affo'isam Daawiit beero'inne aa'lla'a gimbi ootanne firakkam gardabinne fitta'a Daawiit adilla'n mine higga'a beero'iinsi eelliinchi firinne hee'oo Wo'i ooxxi Gooc kolli daba'llito'o. La'm finajjim ee gimbi ooxxi tochchiinsi ki'isaa yoo qeddi kollonne marukko. Anim kolli minaadabinne maqirem awwonam hee'ummo. Gimbi bu'anam hingaa haraar ooxxi gimba amfummo. Ee beyyiinsi hingaa Efireem ooxxi Gooc, Yishaan Ooxxi Goocaa Qurxumme'i ooxxi Gooca yakkam beyyoo Hanaani'eel Oota, Xibbuwwi Ootaa Gereebbi Ooxxi Gooca yakkam beyyuwwi afeebe'e waallummo. Ee finajja uullinsummok Keesammi Mi'n gadanonne yoo Waardiyyuwwi Ooxxi Gooca yakkam beyyonnette. Lamem kolli zammaaraanim mazmuurinne Waa'a galaxxitu'uuyyi Keesammi Mi'n gadano affo'o. Anim iinninne maqire hee'llo'i awwonsaaninne uullummo. An maqire marummi finajji lasinne xurumba fuggu'uuyyi awwontam hee'llo'i qeessuwwa, Eeliyaaqeema, Maa'iseeya, Miniyaamiina, Makaaya, Eeliyo'enaaya, Zakkaariyaasaa Hanaaniyaa edoohane. Ixxuwwam Maa'iseey, Shamaa'iy, Ali'aazar, Uuz, Yahoohaanaan, Maalkiiy, Eelaamii Eezeerii awwontam hee'llo'o. Neesem ee beyyonne uulliinummisam zammaaraan sagara iimaa'lla'a zammatto'o. Ixxuwwi awwonsaanchim Yizrahiyaa'atti hee'ukko. Minaadabim Waa'i liiransu bikkina lobakat liiranchinne ee ballam lobakat kitima hincaa'llo'o. Oosii meentim ee ugudanne hee'llo'i bikkina Yerusaaleemanne hee'u ilillaaxxi sagar qee'l beyyi afeebe'e macceesamam hee'ukko. Ee ballam Keesammi Mi'n awwaadina hincoo tommika mato, hurbaaxxi ludoo haqqi mishaa dissakkam mine egeraan doo'llamukko. Ixxuwwim seer ijaajo'isannem annanni annanni beero'uwwi hegeegonne hee'oo abuulli uulluwwiinsi Qeessuwwinaa Leewi'i oosinaa uwwamoo sharada Keesammi Mi'n mu'uxxi minenne wixaa'llam keeno. Yihuxxi minaadabim qeessuwwaannonnee Leewi'i oos awwaadonnee lobakata liiranta'a hee'llo'o. Mashka'oomim Waa'i ijaaccisinne issimmi hasisoo ogoraa muccussimmi seeraa guullita'a issito'i bikkinatte. Keesammi Minenne zammattam zammaaraanii egeraanim Daawiitii ixxi beet Salamoonii ijaajjo'i ijaaccisanne hasisoo awwaado guullita'a issito'o. Adil Daawiitaanniinsii Asaaf doolliinsii ki'isaa hee'ukkisam galaxxi mazmuuraa lombi mazmuuraa zammattam zammaaraanina awwonsitam keen hee'llo'o. Zarubaabeelii Nahimii hee'llo'i doollenne Isra'ee'l minaadab hundim zammaaraaninaa Keesammi Mine egattam keeninaa ballina ballina hasisoo sharada uwwitam hee'llo'o. Leewi'i oosinam ixxuwwi sharada uwwitam hee'llo'o; Leewi'i oosim Aaroon shumo'ina ihoo sharada uwwitam hee'llo'o. Ee balla Muse'i kitaabiinsi sagara iimaa'lla'a minaadabina macceesamoo'isa qananaa'llo'o; ixxonnem «Moo'aaphphekii Amoo'n mannii Keesammi Minaadaphphi dummichcha hore'em aaggoone» yookkok kitaabamaa hee'ukko. Mashka'oomim Isra'ee'l oos Gibxiinsi fitta'a ittam hurbaataa wo'oo hootto'aanniinsi loboka ixxuwwa duumona Baala'aama diinatinne bitaa'llo'i bikkinatti hee'ukko. Ihukkaarem Waa'i ee duuncha maassonne dabarukko. Isra'ee'l minaadabim ee see'l sagara macceessa'a lasage mulli minaadaba hundam ixxuwwi lambe'iinsi fissito'o. Keesammi Mi'n mu'uta dissakkam minneewwina gassaanchi hee'u qeessichchi Eeliyaashiib Xoobbiyina kobichchi hee'ukko. Ee bikkina hurbaatiinsi, aduruusiinsi, Keesammi Mi'n awwaadina ihoo mu'utiinsi, woyi'n diqaasiinsii wee'l zaytiinsii zammaaraanina, Keesammi Mi'n egeraaninaa Leewi'i oosinaa uwwakkam tommiinsi matoo qeessuwwina uwwakkamokaa dissimmina baxamu lob mine Xoobbiy awwaaxxona Eeliyaashiib uwwaa hee'ukko. Oo hundim ihoo ammane an Yerusaaleemanne hee'ummoyyo; mashka'oomim Arxeeksise Baabiloo'n uullanne adilluwwi adil ihu sadennee la'm hiinchonnee an Baabiloona daba'llaa maraa hee'ummo. Odim hofqax ammaniinsi lasage adila uunxaa Yerusaaleema daba'llaa waarummo. Ee ammanem Eeliyaashiib Xoobbiyina Keesammi Mi'n ooxxi worinne yoo mat mine awwaaxxona uwwukkisa macceesummo. Anim lobakat quunqinne ki'aa xoobbiy mu'uta hundam ee miniinsi fissummuuyyi biiranne uunjummo. Oo minneewwim see'llisinne muccuraa lasge Keesammi Mi'n mu'ut, hurbaatii aduruusii daba'llaa aagoo'isina ijaajummo. Ee'isam Keesammi Minenne awwaaddam Leewi'i oosinaa zammaaraaninaa uwwanchi hasisoo sharad uwwamubee'i bikkina Yerusaaleema utta'a ixxuwwi abuulli uulla matto'isa la'ummo. Keesammi Min ka'isa iheebee'e moo'lla'a cawwito'i bikkina gassaanonne quuqummo; Leewi'i oosoo zammaaraanom dabaraa woraa eraa'llisam Keesammi Minenne awwaaddamisa issummo. Odim Yihuxxi minaadab hundim hurbaatiinsi, woyi'n diqaasiinsii wee'l zaytiinsii tommiinsi mato fissitu'uuyyi mu'uta dissakkam mine eebbo'o. Qeessichchi Sheleemiya, Sera losisaanchi Saadooqa, Leewekkichchi Faadaaya, mu'uxxi minina gassaan issaa doo'llummo. Odim Maataaniyina beet beet ihu Zaakuur beet Hanaanim ixxuwwina hara'mmaanchi hee'ukko. Ku doo'llanto'i keenim ixxuwwi beshshuwwina sharada baxxansimmanne amma'nnantam keen hee'llo'o. I Moollanna! Ki mininaa ki awwaaxxi bikkinaa an amma'nnanchinne baxummi luwwi hundam ki eroomminne sawwihe. Ee ammane Yihuxxi uullanne Usheexxaxxi ayyaamonne woyina ciinsitam keeno, hurbaata, woyi'n misha, oda'i mishaa mulluwwaa hundam hallanne iyyiissa'a Yerusaaleema aagissamoka moo'ummo; ee hundam usheexxaxxi ballanne eebba'a biteessambee'isa hoorummo. Ee'isam Yerusaaleemanne hee'llam Xiiroos beero'i manni qurxume'ee annanni annanni dadda'l mu'utaa usheexxaxxi ayyaamonne Yerusaalee'm beero'o eebbu'uuyyi Yihuxxi mannina biteessam hee'llo'o. Anim Yihuxxi minaadaphphi awwonsaano «Ka Usheexxaxxi ayyaamo haashaassitakku'uuyyi baxxakkam jor baxo moo'llehe! Ni Moollanni Waa'i neesennee ka beero'onnee bichchi ihoo'isa issukkok ki'nnuwwi gaassi anno'i kido'i jolle baxxo'i bikkinayyonnihe? Ki'nnuwwim Usheexxaxxi ayyaamo haashaassimminne eehanniinsi baas Waa'i quunqa Isra'eelanne eebbakkeena ki'nnuwwi wodano duudissakko'ookko» yaa shaaqummo. Ee lasage Usheexxaxxi ayyaam aageena maaro'i eelliinchi haf Yerusaalee'm oox gooccuwwa afoo ammane oox gooccuwwi hundim xufamonaa usheexxaxxi ayyaa'm balli higeebe'em fooqoobee'isaa ijaajummo. Odim Usheexxaxxi ayyaamonne iyyi ma'llichchim aagoobee'isa egattam i awwaadaaniinsi mat mato gooccuwwanne egessiisummo. Annanni annanni dadda'l mu'uta biteessam daddaraan Yerusaalee'm ootiinsi biireen matiinsi lam kor afeebe'e gatto'o. Anim «Soodoohaare aagakkeena hassakka'a ootiinsi biireen garimmanne awwaad bee'e; la'mmaagge eehid issitakkaman ihulas an ki'nnuwwa i anga ki'nnuwwanne higisoomman ihukkisa laqqehe» yaa qoxxisaa kurummo. Ee lasge ixxuwwi od usheexxaxxi ayyaamonne Leewi'i oosim See'llisinne ixxuwwi gaga muccussita'a ooxxi gooccuwwa egettonaa Usheexxaxxi ayyaamom keessonaa ijaajummo. I Moollanna, ka bikkinam sawwihe; Ki iitti bikkinaa yitaahim qishixxe. Ee aganannem Ayihuxxi mannik lobakat Ashdoodiinsi, Amooniinsii Moo'aaphphi uulliinsii landa eebbo'oohan ihukkisa la'ummo. Ixxuwwi oosiinsim kolli Ashidood uulli manni suuminnee mulli uulli manni suuminnee woccam hee'llo'o bagaan Yihuxxi uulli manni suuminne wocca'a xantam hee'llo'oyyo. Anim ixxuwwanne lobakata quuqaamma duumummo. Ixxuwwiinsim mat mato aphphisummo; horo'lli oddam gosummo. Odim «Ki'nnuwwi landa mulli minaadaphphi oosina uwwitakkotte. Ixxuwwi landam ki'nnuwwi gaginaa ki'nnuwwi oosinaa eebbakkotte» yaamma Waa'i summinne hidiisisummo. Ixxuwwinam «Isra'eelina adil Salamoon baaxiilo baxukkok mulli minaadaphphi landa eebimminneyyonnihe? Adil Salamoon mulli uulli adilluwwiinsi hundiinsim lophphoo adil hee'ukko. Waa'im iittu bikkina Isra'ee'l minaadaphphi hundannem adil issukko. Ihukkaarem ixxo mulli minaadaphphi meenti huushisso'o. Ki'nnuwwim mulli minaadab meento eebimminnee eehido'i jor baxo baximminnee Waa'i ijaajo gindimmi hasisoohonnihe?» yummo. Hundiinsi lob qeessichchi Eelyaashiib beet hee'u Yooyaadaa'i oosiinsi mat Beethooroo'n beero'onne hee'oo Sanbaalaaxina ballichchi hee'ukko. Anim ee bikkina ixxo Yerusaaleemiinsi fissaa hollummo. I Moollanni Waa'a! Ku minaadab qeessooma'n lombaa Qeessuwwinnee Leew'i oosinnee aaggitti hidi'l sagaraa gindito'oo bikkina at sawwihe. Minaadabam allaggichchi luwwi hundiinsim muccusummo. Qeessuwwii Leewi'i oosii annannichchim ixxuwwi baxo baxxamisa issummo. Kitimina ammanenne ammanenne hincoo haqqaa hurbaaxxekaa haqqi mishikaa ludoo hinkid hincaa'immi hasisooda'ee kurummo. I Moollanna, ki biijoominne at eese sawwihe; ki eroommam iina isse. Adil Arxeeksis Hindiinsi ki'isaa Tophphe'i afeebe'e yoo mat xibbee lamiyyee lamar uullaa gassam hee'ukko. Ee ammane adil Arxeeksis Suusa'i beero'onne yoo ixxi adilla'n minenne hee'am hee'ukko. Ixxim adil ihu saxxi hiinchonne ixxi gassaan hee'llo'i daannuwwinaa gassaaninaa hundinam haraar maadda gudisukko; ee maaddannem Faariis uullik, Meedoo'n uulli gaadaano ijaajaan, uulla gassaanii woshaabbuwwii hee'llo'o. Ixxuwwinam ixxi adilla'n gassonne yoo lobakat godda, ixxi hibba, lombaa nuuraa mat xibbennee sadeentayyi ayyaamonnee moo'isukko. Ee lasage oo adil Suusa'i beero'onne hee'llam mannina buxinaa goddaaninaa hundinam odim mulli maadda gudisukko; oo maaddim adi'l mi'n hegeegonne kaasamu haqquwwi hafanne yoo wixxixxi beyyonne lamarayyi ayyaam afeebe'e hee'ukko. Oo wixxixxi beyyim qadaalli fuutto'inne baxamaakkoo shaano'i hagar yoo du'm eddechchinne wereeggisakko'oohan hee'ukko; du'm eddechchuwwim kuul hagar yoo fatirinne dadamaakkoohanee kin bi'l quba'uwwinne axisamaakkoohanee ihukkuuyyi ussuwwinne bito xee'aalli kininne baxamu utubbuwwanne calcalaa hee'ukko; qadaall, kashar, baarii shaano'i hagarii yoo bito xee'aalli kininne baxamaakkoo luwwi dahamu gaxanne worqinnee kin birinnee baxamaakkoo gundi ara'uwwi hee'ukko. Agakkam luwwam annanni hagar yoo kobi'llantambee'i humbulluwwanne danaanakkam hee'akko'o; ee aggam adil issu haraar biijoomiinsi ki'ukkok lobakata fafisakka'a uwwakkamisa issukko. Adilim ayyi manchinam ixxi gaqqi uulli losa'nnisa hasu qaxa agoo'isa danaantamisina adi'l mi'n danaanaanina ijaajo uwwaa hee'ukko. Ee'isam adi'l are Asxiina odim adil Arxeeksis adilla'n minenne meentina maadda gudissa'a hee'llo'o. Oo maaddi asheeramu lama'l ayyaamonne adil Arxeeksis woyi'n diqaasa agaa lobakata liiramu ammanenne ixxi awwaadaan hee'llo'i lamarem muleessa'uwwa Mahuumaana, Biizita, Harboona, Biigita, Abaagita, Zeetaaraa Karkaasaa ixxi beyyo weeshaa «Adila Asxiina adilla'n eddechcha edde'lla'atii adi'lla'n mare'e is horoorenne issaqqita'atii keeyye waattamisa issehe» yukko. Mashka'oomim adila Asxiina lobakata danaamotte hee'llo'i bikkina isek dan ee minaadabinaa ixxi gassaaninaa moo'amoo'isina hasu bikkinatte hee'ukko. Ihukkaarem adila Asxiina ixxi awwaadaanonne adil asse'u woshsha aa'llobee'i bikkina ixxi illagge marimma sabbo'o; ee bikkina adil lobakata quuqaa nadadukko. Seeraa gatti ogoraa moo'oo woshshanne qoor sogaano xa'mmimmi adi'l beyyonne losamaakkoohan hee'u bikkina eehido'i woshshi ihoo ammane maha issimmi hasisooda'e kuttamisina ixxi sogaano weeshisukko. Hundi ammanem illag ikka'a sogitanina adi'l illage hincitam hee'llo'i keen Kaarishanatte, Sheetaaratte, Adimaatatte, Taarshiishatte, Meereesatte, Maarsiisaanattee Mamukkaanattee hee'llo'o. Ku lamarem mannim adi'l gassi woronne shiqqeen beyyi uwwamaakkoo keen ikka'a Meedooninaa Faariisinaa daannuwwi hee'llo'o. Adilim ee sogaanina «An adil Arxeeksis i minenne awwaaddam muleessa'uwwa adila Asxiina i beyyo waattona asse'ummaare waarimma sabbo'o. Ee bikkina neese isenne issimmi hasisoo luwwi bikkina seer mayyookko?» yaa xa'mmukko. Ee lasage ixxi gassaaniinsi mat hee'u Mimukaan adi'l illagennee gassaa'n illagennee ihaa «Adila Asxiina sholliisso'ok xale'i adil ihoo'n adi'l gassaan ihu daannuwwaa adil gassoo uullanne hundannem yoo goonaa» yukko. Mashka'oomim tu adila baxxo'i bax mulli meenti beyyonne hundannem macceesamukkaa'lleensi issuwwi goona gaddamo; adil Arxeeksis adila Asxiina ixxi beyyo waattona ijaajukkaare ise ixxi beyyo marimma sabbo'oyyonnihe?» yitamo. Tu adila baxxo'i baxo macceesso'i Faariisikii Meedoo'n gassaa'nnekii meenti ka adi'l uulli gassaan hundinam ka ballam eelliinchi aagoo'nnim isesam yiteenayyonnihe? Eehid ihukkaa'lleensi beeddoobee'i gadanchii joranchii min hundannem ihookko. Adila, ki doo'l ihukkaa'lleensi adila Asxiina ka lasage ki beyyo hincitambee'isa issoo alallaato fisse; oo alallaatim hore'em dabassamoobee'an ihaa doolli hundinam qoxxaakkoohan ihoo'isina Faariisaannonnee Meedoo'n seerannee exxaa kitaabamona ijaaje. Adil Asxiinakam adilla'n lomba iseensi e'llitam mulli meentichchona uwwe. Ku at higissoo alallaat at gassitoo lob haraar ki adilla'n gassi uullanne hundannem erisa la'amaa lasage meenti hundim ixxuwwi goon buxichchi te'im goddaanchi ihuta'nnim lonsitu'uuyyi hee'llamo» yaa wocukko. Oo woshshim adilaa adi'l gassaanoo hundam liiransukko. Adilim Mamuukaan hincaa'u sawwit wo'mmoo'isa issukko. Ee bikkina adil «Ayyi manchim ixxi gaqqi minina lobanee ijaajaanchoo ihaa gassimmik hanqi egeramaakkoohan ihona» yaa ixxi gassonne yoo uulli suum hundinnem gatti losa'nnisinne kitaabamaa hundi beyyom afoo'isa issukko. Ee lasage adil Arxeeksisik quunqi billaa lasonne adila Asxiina ixxonne issito'i luwwaa isennem alallaatisu alallaatoo dabaransaa sawwam hee'ukko. Ee bikkina adi'l hincixxi sogaan adilina «Danaam mishisoo baajaam landa kiina hasakkona. Ee danaam mishisoo landam Suusa'i beero'onne yoo adi'l mine egeraanchi muleessakkichchi Heegaayyi beyyonne suusa'i giribanne wixxaa'akkona; adilim ixxi gassoo uullanne hundannem ekeenina gassaano doo'llona; ixxuwwinam laphphitam luwwii ixxuwwi dano ege'llitam luwwii hundim uwwamona. Ee keeniinsim adila liiransiteena xantam danaam baajaamo Asxiin beyyonne adilatte ikkona» yukko. Adilim ee sogitano aa'aa er sogitan ihukkisa moo'aa yamamukkisa issukko. Ee suusa'i beero'onne Yihuxxi uullik Mardookiyoos yakka'a weeshakkam mat manchi hee'ukko; ixxim Yaa'iir beet ihaa Biiniyaam sulliinsi Qiisinaa Shiimi'inaa moollan hee'ukko. Mardookiyoosim Baabiloo'n adil Nabukadanaxoor qeefadu Yihuxxi adil Ikooniyaaninne maqire Yerusaaleemiinsi qeefadamu keeniinsi mat hee'ukko. Ixxenam eeshimmi landichcho hee'llo'o; isenam annii amaa hee'llobee'i bikkina ixxi li'isam hee'ukko; is summim Asteeratte; landichchoomam uullichchinnee daninnee lobakata mishissam haataamotte hee'llo'o; isekim annii amaa lehakka'a lasage Mardookiyoos ixxi mine massaa ixxi qachchisa issaa abooyyaa heellisaa li'isukko. Adil alallaato fissu ammanenne suusa'i beero'o waatto'i lobakat landi lambe'enne e'llitamote Asteeratte hee'llo'o; isem adi'l mine massakka'a doo'l landa dissakkam mi'n gassaanchi Heegaayyina egeroo'isina uwwakko'o. Asteeram Heegaayye liiransitam landichchotte ikko'o; ixxi illagennem nuura siiddo'o; ee bikkina er hurbaata uwwakkamisina is orachchom cukkakka'a mishisoo'isa issimminne is dan bi'oobee'isa abooyyimminne egerantamisa issukko; doo'l meento egerakkam minennem hundiinsi e'lloo beyyo doo'llaa uwwimminne adi'l minenne do'llanto'oo lamar meento egettam awwaadaa'n anganne uwwanto'o. Mardookiyoos gaassaatim Asteera Yihudichchotte ikko'isa ayyenam kuttambee'isa kuraa hee'u bikkina maaxxa'a hee'llo'o. Mardookiyoosim Asteeranne ihoo luwwaa is fayya'oomaa la'eena hasu bikkina ballina, ballina ee meenti gatti mi'n nafaranne ekkidii kidii daba'llamam hee'ukko. Ee meento egerakkam minenne mat landichcho adil Arxeeksis beyyo aagimmina kor afeena illageen loh agana hundoomam karbe'ee yakkam enje'oo zaytinne odim lobakata enje'oo bito xee'aalli laphphakkam luwwa laphphimminnee illenne laphphakkam hagara dansoo luwwinnee dantu'uuyyi tommoo lam aganaa affamo. Ee doo'llanto'i meento egerakkam miniinsi fitta'a adi'l beyyo aaggam ammane hasso'i hagar eddechcha edde'lleenaa hasso'i luwwam amaddeenaa xantam hee'llo'o. Aaggam amman afu landichcho ee hiimo adilla'n mine massakkamo; ee beyyonnem adi'l meento egerachi woronne ikkamo; adi'l ellagenne nuura siiddolas ixxi is summa weeshaa la'mmeka ixxi beyyo waattamisa issubeelas la'mmaagge ixxi beyyo hincitamoyyo. Mardookiyoos ixxi qachchisa li'isuk Asteera egeranto'i miniinsi adi'l illage hincitam amman afukko; Asteeram Abihaayil beet ixxi qachchisa issaa li'isu Mardookiyoosina eeshimmi landichchotte hee'llo'o; isem moo'oo manni illagenne hundannem nuuraamotte hee'llo'o; isem adi'l beyyo aaggam kor isena afukkaare doo'l meento egeraanchi muleessakkichchi Heegaayye sogukkisanne edde'llo'o. Arxeekisis adillano aa'u lama'l hiinchonne Teebeet yakkam tommi agananne Asteera adi'l mine massakko'o. Adilim mulli landi hundiinsim lonsaa ise iittukko; mulli keeniinsi hundiinsim lophphoo iittoo nuuraa siiddo'o; ixxim adilla'n mare'e is horoorenne issaak Asxiin beyyonne adilatte issukko. Ee lasage adil Asteer lombi bikkina lobakat maadda issaa ixxi sogaanoo uulli gassaanoo hundam weeshukko; oo ballim adil gassoo uulli hundannem liiranchi ugud ihoo'isina alallaatukko; lobakat biijoom wo'mmaakkoo adilla'n irifo'om uwwukko. Baajaammuwwi la'm kore wixxito'oohaannonne Mardookiyoos gassimmi baxonne ihaa adi'l mi'n goocanne afuuraa hee'ukko. Mardookiyoos gaassaatim Asteerana hinka'i uulliinsetda'e te'im aymanchotda'e ikko'isa ayyenam kuttambee'isa sogaa hee'u bikkina maaxxa'a hee'llo'o; mashka'oomim ciilatte hee'llu'uuyyi Mardookiyoos li'isam hee'u ammane ixxena luwwi hundannem ijaajantam hee'llo'isam ka woshshannem ijaajanto'o. Mardookiyoos adi'l mi'n goocanne baxukkuuyyi hee'oonam adi'l mine aagakkam gooccuwwa egettam hee'llo'i muleessa'uwwi Bigitaanii Teereeshii lamim adil Arxeeksisanne quuqqa'a shiteena a'llanta'a hee'llo'o. Mardookiyoosim ee a'llancha macceesu ammanenne Asteerana kurukko; Asteeram Mardookiyoos ee woshsha kurukkisa maaxaqqanne adilina kutto'o. Ee lasage oo woshshi saarayyamu ammanenne hanqi ihaa siidamukko; ee bikkina ee lamem mannam haqqanne saqalakka'a shakko'o; adilim oo woshshi adi'l aganni kitaabanne kitaabamaa afuuroo'isa issukko. Ee lasage adil Arxeeksis Agaag shumo'iinsette hee'u Haamaadaat beet Haamaanina mulli daannuwwiinsi hundiinsim hanaan lomba uwwaa daanni issukko. Adilim adi'l mi'n goocanne yo'i daannuwwi hundim Haama'ana guruphphita'a otossitamisina ijaajukko; ixxuwwi hundim ijaajanto'isam issito'o; ihukkaarem xale'i Mardookiyoos guruphphaa heeshimma sabukko. Adi'l mi'n baxaan ikko'i mulli gassaan Mardookiyoosina «Adi'l ijaajo mahina sabbaate?» yitu'uuyyi ballina ballina ixxi sawwite dabassiteena yakitam hee'llo'o; ihukkaarem ixxi ee woshsha aa'eena hasukkoyyo; hore'oomam «An Yihudichchi ihummi bikkina Haamaanina heeshimmi iina labooyyo» yaa murte'aalli sawwite ixxuwwina kurukko; ee lasage «Ka Mardookiyoos bolxooma hinkaa'nna iyyaqqeena xanookko?» yita'a maalalimminne ee woshsha Haamaanina kutto'o. Haamaanim Mardookiyoos ixxena guruphphaa heeshubee'isaa lonsubee'isaa moo'u ammanenne lobakata quuqukko. Mardookiyoos Yihuxxi shumo'iinsette ihukkisa la'u ammanenne eraa'llaanniinsi loboka Haama'a quuqaa Mardookiyoos bi'ishshina xale'i ixxi guzumo'amim ihooyyo yaa sawwukko; ee bikkina Faariis adi'l gassi uulli hundannem yoo Ayihuxxi minaadab hundam bi'isoo googo hasukko. Arxeekisis adil ihu tommonnee la'm hiinchonnee Niisaanaa yakkam luxxi agananne Ayihuxxi minaadaba bi'isimmina makkoo aganii ballii annanni ihaa la'amoo'isina Puuriim yakkam saamo Haamaan illagenne issakko'o; oo saamim Adaara yakkam tommikii la'm aganii aagu tomminaa saxxi ballinaa ihoo'isina firukko. Ee bikkina Haamaan adil Arxeekisisina «At gassitoo ki adilla'n uullanne hundannem binnita'a hee'llam minaadab yo'o; oo minaadabim mulli minaadabiinsi annanni ihaakkoo seeraa gatti ogoraa fissita'a hee'llam minaadaba; ku minaadab adi'l seerinaa gatti awwonsinaa ijaajanto'oyyo; ee bikkina ka minaadaba cawwitaa uttittaa'lleensi kiina lobakata joraakkoo luwwi iheena xanookko; Adila, ku minaadab bi'oo'isina alallaat firona; ku woshshimdu ihoo'isa issititta'n an ki adilla'n gassina hara'mmoo'isina sas xibbee sor kum kilo'oo kee'mmoo kin bira adi'l diinate dissakkam minenne aagisoommo» yaa wocukko. Ee bikkina adil ixxi alallaato minaadabina fissimmina awwaaxxoo koobo'i yoo guma'a angiinsi fissaa Ayihuxxi minaadabina masokkichchi ihu Agaag shumo'iinsette hee'u Haamaadaat beet Haamaanina uwwukko. Adilim Haamaanina «Oono'o mannii ixxuwwi diinatii hundim kiihan ihu bikkina hassittisa issiteena xantootto» yukko. Ee bikkina luxxi aga'nnaannonne tommonnee saxxi ayyaamonnee Haamaan adi'l woshsha kitaabbam manna weeshaa oo alallaato annanni annanni suuminne tiramaa ee adi'l gassi woronne kitaabakkam see'llisinne hundinnem kitaabamaa gudaa uulla gassaaninaa daannuwwinaa hundinam afoo'isa issitamisina ijaajukko; oo alallaatim adil Arxeeksis summinne kitaabamaa adi'l angii koobo'aam guma'inne Koobamaa asse'amukko. Asse'amaanim ee alallaato adil qassoo uulli hundam afissamisina asse'anto'o; oo alallaatim Adaaraa yakkam tommaannonnee la'm aganannee tommaannonnee saxxi ballannee Ayihuxxi minaadaba hundam lommannaa meentoo goonaa ciilluwwam edaa matim gatoo'n shakka'a guullakkamisinaa bi'isakkamisinaa ixxuwwina yoo luwwi hundim bogamoo'isinaa issoohan hee'ukko. Ee ballina manni hundim gudaa egeroo'isina minaadabina qoxxaallisa alallaatamaa hee'ukko. Asse'ammaanim adi'l ijaaccisanne qaqqissa'a matto'i alallaatim Suusa'i beero'onne alallaatamukko; Suusa'i beero'i manni dambaqanne hee'onam adilii Haamaanii aggeena afuutto'o. Mardookiyoos ee issamu luwwi hundam la'u ammanenne lobakata kichche'u bikkina edde'u eddechcha dereerukko; ee lasage xiddi eddechcha edde'aa ixxi gaqqi horoorennem gii'l buchcha laphphaa sagara fissaa laarukkuuyyi qaraaraallisa wi'llimminne ee beero'i woronne daba'llamam hee'ukko. Ayyi manchim xiddi eddechcha edde'aa adi'l mine aagimmi xansiisoobee'i bikkina adi'l mi'n gooc afeebe'e hincukko bagaan woro aageena xanukkoyyo. Adi'l alallaat alallaatamu uulli hundannem Ayihuxxi manni lambe'enne kee'mmaalli kichchechchi ihukko; soommanto'o; wi'llito'o; laatto'om; lobakat keenim xiddi eddechchannee gii'l buchchannee iinse'llo'o. Asteerana awwaaddam landii ise egettam muleessa'uwwii Mardookiyoos issoo luwwa hundam isena kutto'i ammanenne ise lobakata kichche'llo'o; Mardookiyoosinam xiddi eddechchi bikkenne mulli eddechcha edde'oo'isina asse'llo'o; ihukkaarem ixxi eekka aa'ukkoyyo. Ee lasage Asteera adi'l mi'n muleessa'uwwiinsi annannannem isena awwaadona adil uwwu Hataaka yakkam mancho weeshsha'a Mardookiyoosenne mah hawwi afuda'e xa'mmoo'isina asse'llo'o. Hataakim adi'l mine aagakkam gooc gadanonne yoo beero'i wixxixxi beyyonne yoo Mardookiyoos beyyo marukko. Mardookiyoosim ixxonne afu luwwi hundam caakkisaa kurukko; Haamaanim Ayihuxxi minaadab hundam shakka'a guullakkaman ihulas adi'l diinate dissakkam minenne hinkaa'n diinate disseena sagara aaguda'e edaa kurukko. Ayihuxxi minaadaba guullisimmina Suusa'i beero'onne alallaatamu alallaaxxekam kitaaba Hataakina uwwukko; oo alallaat kitaabamu alallaaxxi kitaabam massaa Asteerana uwwoo'isinaa ihu woshshi hundam caakkisaa kuroo'isinaa ee'isam adi'l beyyo aagga'a is minaadaphphi bikkina qishixxato issona adila uunxitamisina kuroo'isnaa Hataaka uunxukko. Hataakim Mardookiyoos wocu woshsha hundam maraa Asteerana kurukko. Isem Hataak Mardookiyoos beyyo daba'llaa maraa «Adi'l mi'n sogaanii ixxi gassi uullanne hee'llam minaadabii hundim goon te'im meenti ayyi manchim weeshamoo'n adil yoo woro'l afuuchchi beyyo aagookkok hundim adilina xale'i matem seer yoo'isa la'ookko; oohim eehid issu manchi lehookko; mat manchi eehido'i lehiinsi gateena xanookkok adil ixxi doo'llinne worqi bicco ee manchi kollonne xabbaa'oohaarette; ihukkaarem an adi'l beyyo aagona weeshamummaaniinsi sad balli higaakko» yita'a asse'llo'o. Mardookiyoosim Asteera asse'llo'i asso aa'aa lasonne «Ayihuxxi minaadab hundim beedditu'uuyyi at adi'l minenne yoonti bikkina gatoommo yitaa ki wodanonne sawwititte. At kido'i ammanenne cawwitaa uttilas hara'mmatii gatimmii Ayihuxxi minaadabina mulli kollinnem ihookko; ihukkaarem atii kiyyanni minii bi'llakkamo; odim at adilatte ikkittok kido'i hawwi ammanenne agaagonnetda'e ayyi la'aate?» yaa asse'ukko. Asteeram Mardookiyoosina dabatta'a «Mattaa ki'llaa Suusa'anne yo'i Ayihuxxi minaadaba hundam wixxaa'e; i bikkinam soommannehe; sas ayyaamina hiimoo ballaa ittakkottee aggakkottemee; anii iina awwaaddam landii ee'isam soommannoommo; ee lasage see'llisanne hooramaakkoohan ihukkaarem adi'l beyyo aagoommo; eekka issaa bi'ummaarem bi'oommo» yitta'a asse'llo'o. Mardookiyoosim maraa ki'aa Asteera ijaajjo'i luwwi hundam issukko. Soommanimma amaddo'i saxxi ayyaamonne Asteera adilla'n eddechcha edde'lla'a adi'l mi'n miinsanne adi'l mi'n woro'l gaxanne uullito'o. Adilim mine aagakkam gooc miinsanne adi'l mi'n woronne adilla'n barcumanne afuuraa hee'ukko. Adilim adil Asteera gaxanne uullito'ookkoka moo'u ammanenne ixxena nuutta'a moo'anto'o. Adilim ixxi anganne hee'u worqi leega Asteer koollonne xabbaa'ukko. Asteeram hincita'a ee leeqqeka ludo nakkito'o. Adilim «Adil Asteera at iinniinsi siiddeena hassoo luwwi maha? I beyyo mahina waattitto? I adilla'n kollom ihuta'n kiina uwwamookko» yukko. Asteeram «Adila kiina eran ihaa moo'amulas kaballi maaro'o gudisummi maaddina Haama'anne maqirem waallehe» yito'o. Adilim «Asteera yito'isa issamoo'isina Haama'a qaqqisaa weeshshisaa lasage adilii Haama'aa Asteera gudisso'i maaddi beyyo waatto'o. Woyi'n diqaasa agamukkuuyyim adil Asteerana hassoo luwwi maruwwa? Kiina uwwamookko. I adilla'n kollom yakkota'n kiina uwweena gudaammo» yukko. Asteeram dabatta'a «An uunxoommokii hasoommi luwwii kane. Adi'l illagenne nuura siixxaa moo'oohan ihukkaa'lleensi soodo gudisoommi maaddanne Haama'anne maqirem siidantakkamisina odim lombinne weeshaammo. Ee ammane an hasoommi luwwa kuroommo» yito'o. Ee ayyaamo Haama'a liiramaa ixxi wodanonnem lobakata tashtashaa firukko. Ihukkaarem Mardookiyoos adi'l goocanne mikmikimma sabaa afuuraakkoohaannonne moo'u ammanenne Haama'a Mardookiyoosanne lobakata quuqukko. Ihukkaarem Haama'a xa'nnaa ki'aa ixxi mi'n kolli marukko. Ee lasage manna asse'aa ixxi kobaa ixxi meentichchi Zoosaaraa weeshukko. Haama'am ixxena yoo amaxxi haraarooma, ixxi oos fikkaannaa adil ixxena uwwu lombaam manchi ihukkisaa bolxukkuuyyi kurukko. Haama'a odim ka'isa yukko «Eehanniinsi hundiinsim hanaan adil Asteera gudisso'i maaddina iinniinsii adiliinsii bagaan ayyi manchom weeshsho'oyyo. Soodina gudisso'i maaddinam odim weeshammaammo. Ihukkaarem ee Ayihudichchi Mardookiyoosa ee adi'l mine aagakkam goocanne afuurukkoka moo'ummuuyyi ku lombi hundim iina ma'lluwam issooyyo» yukko. Ee bikkina ixxi meentichchoo ixxi kobii hundim «Qeeraa'lloom lamiyyee lam meetiraa ihoo haqqa gudissaa ki'llaa soodo daram Mardookiyoosa saqalteena adila xa'mmiteena xantootto. Ee lasage liirantittuuyyi weeshantitti beyyo maadda itteena mattootto» yitu'uuyyi sawwite hincaa'llo'o. Haamaanim ee woshsha danaamo yaa aa'aa ee saqalakkam haqqa gudisukko. Ee hiimo diriir adiliinsi bi'ukko; ee bikkina doolli aganna kuroo kitaaba eebakkamisina ijaajukko; ee kitaabam ixxi illagenne qananaa'akkamisina ijaajukko. Ee kitaabanne qananaa'akko'i beyyuwwiinsi matoom adil hee'oo mine egettam hee'llo'i Bigtaanii Teereeshii lamem muleessa'uwwim adila shiteena a'llanto'isa Mardookiyoos hinkid issaa afuda'e kuroohan hee'ukko. Adilim «Eehannah kaka issu bikkina Mardookiyoosina uwwinummi daannoom mah yookko?» yaa xa'mmukko. Ixxi awwaadaanim «Ixxena issammu luwwi mat luwwim bee'e» yita'a dabatto'o. Adilim «Ka adilla'n minenne an uwwummi daannuwwiinsi ayyi yookko?» yaa xa'mmukko; ee ammane gudisu haqqanne Mardookiyoosa saqaleena Haamaan adila xa'mmeena adilla'n mi'n wixxixxi beyyo aagam hee'ukko. Ee bikkina ixxi awwaadaan «Oono'o Haamaan keese atoorasseena xa'mmoolla» yito'o. adilim «Aagona» yukko. Haamaan aagu ammanenne adil «Adil lonseena hasu manchina maha issimmi hasisookko?» yaa xa'mmukko. Haamaanim «Adil ka lomba iinniinsi mulli mannina ayyena uwwookko?» yaa ixxi tiironne sawwukko. Ee bikkina Haamaan adilina dabaraa «Adil lonseena iittu manchina adil edde'u lombi eddechchii adilim saa'lloo farashshii waarona; adilla'n lombi mare'im ixxi horoorenne issamona. Oo eddechchii farashshim lobakat lombi yoo adi'l mi'n daannuwwiinsi mat anganne uwwamona; adil lonseena iittoo manchom eddeesakkona; ee lasage farashshonne saa'llisakka'a beero'i lambe'inne higisakkona; ixxi illagennem ‹Adil lonseena iittoo manchina ka'isa issamookko› yamamaa alallaat kuramona» yukko. Adilim Haamaanina «Qaqqissaa ki'llaa ee iina woccittisam eddechchaa farashshoo masse; adi'l goocanne Ayihudichchi ihu Mardookiyoosina ee'isa isse at kuttittaanniinsi ma'llichchim gatoone» yukko. Ee bikkina Haamaan eddechchaa farashshoo massukko; Mardookiyoosinam eddeesaa farashshonne saa'llisukko; beero'i dummichchi beyyi gadaninne higisukko; ixxi illagennem ‹Adil lonseena iittukkaannina ka'isa issamookko› yaa alallaata kurukko. Ee lasage Mardookiyoos adi'l mi'n gooca daba'llukko; ihukkaarem Haamaan kichche'aatii horoorenne gunguu'llaatii qaqqisaa ixxi mine marukko. Haamaanim ixxi meentichcho Zeereeshshenaa ixxi beshinaa ixxonne afu luwwi hundam kurukko; qoolluwwi keenii ixxi beshii ixxi meentichcho Zeereeshee ixxi illagenne ubimma asheettitti Mardookiyoos Ayihudiinsette ihaakkoolas ixxi illagenne hore'em ubbootto bagaan kaa'llooyyo» yito'o. Ixxuwwi woccu'uuyyi hee'llonam adi'l muleessa'uwwi waatto'o; ixxuwwim Asteera gudisso'i maaddina waaroo'isina Haama'a gaaggaabisso'o. Ee bikkina adilii Haamaanii la'mmekam Asteeranne maqire maadda itteena matto'o. Woyi'n diqaasa aggu'uuyyim adil «Adil Asteera, at iinniinsi uunxitoo luwwi maha? Kiina uwwamookko; kiina hasisoo luwwidu maha? I adilla'n kollom ihuta'n kiina uwwamookko» yaa la'mmaaggem xa'mmukko. Asteeram dabatta'a «Adila, an ki illagenne nuura siidaammoolasii keesem liiransaammoolasii an hasoommok anii i moollii foorinne hee'nneena xannoomisinatte. Oono'o anii i moollii bi'nnoommisina, shakkamisinaa guullakka'a bi'isakkamisinaa biteesammaammo; agid inkoommisina biteesammaammoota'nna'i cawwaa uram hee'ummo; mashka'oomim kido'i u'n adila hawwisoohaneyyo» yito'o. Ee lasage adil Arxeekisis «Kaka iggaa issukkok ayyette? Manchoom yookkok hannonnette?» yaa adil Asteera xa'mmukko. Asteeram «Ni diinakkichchii neessenne leho oogatukkokii Haamaan yakkam ka jor mancho!» yito'o. Haamaanim adi'l illagennee Asteer illagennee lobakata muggukko. Adilim lobakata quuqaa afuuru beyyiinsi ki'ukko; woyi'n diqaasa agookkokam uraa adi'l mi'n duubbi kaashshi woro marukko; ihukkaarem Haamaan ixxo adil bi'iseena murte'aa ki'ukkisa la'u bikkina ixxi foore gatissamisina adil Asteera uunxeena laso gatukko. Ixxim haafit ihoo'isina uunxeena hasaa adil Asteera afuutto'i gundi ara'anne illillaachcha ubukko; adilim adi'l mi'n duubbi kaashshi beyyiinsi daba'llaa woyi'n diqaasa agam hee'u beyyo aagu ammanenne kaka moo'aa hore'em lobakata quuqaa «Ku manchi i gaqqi adilla'n minenne i illi moo'ukkuuyyim ta adila iggeena hasoollannihe!» yaa shuuraa wocukko. Adil ee'isa wocukkisam ee ammanchom muleessa'uwwi Haamaanika ille katto'o. Ixxuwwiinsim mat Harboona yakkam muleessakkichchi «Adila, Haamaan ka hundiinsim loboka keese lehiinsi gatisu Mardookiyoosa saqaleena hasu bikkina kaasaakkoo haqqi ixxi minenne yookko; haqqoo'mmekim qeeraa'lloom ontayyi anga» yaa kurukko. Adilim «Haama'a massitakka'a ee haqqanne saqallehe!» yaa ijaajukko. Ee bikkina Haamaan Mardookiyoosa saqaleena gudisu haqqanne saqalamukko; ee lasge adi'llek quunqi billukko. Adil Arxeeksis Ayihuxxi manni diinakkichchi hee'u Haamaan amaxxa hundam ee ballam Asteerana uwwukko; Asteeram Mardookiyoos isena hincixxi qarmanchi ihukkisa adilina kutto'o; Mardookiyoosim ee balliinsi ki'isaa adi'l illage hinceena xanukko. Adilim ixxi koobo'i mare'i issamu Haamaan maxxaariinsi fissakko'i guma'a Mardookiyoosina uwwukko. Asteeram Mardookiyoosa Haama'i amaxxannee gattennee gassaanchi issito'o. Ee lasage Asteera adi'l lokkonne ubba'a wi'llitu'uuyyi odim adila uunxito'o. Agaag shumo'iinsette ihu Haamaan Ayihuxxi mannanne guddu jor a'llancha gindoo'isina uunxito'o. Adilim worqi bicco is kollonne xabbaa'ukko; isem iimita'a ixxi illagenne uullita'a Adila an keese liiransaammoolas ki illagennem nuura siidaammoolas ku woshshim ki illagenne eran ihaakkoolas anim ki beyyonne iittamaammoolas Agaag shumo'iinsette ihu Haamaadaat beet Haamaan adi'l uullanne yo'i Yihuxxi manna hundam bi'iseena gudu jor a'llanchaa kitaabaa asse'u assoo gindoo assi kitaabamona. Ku bichchi hundim i minaadabanne afukkuuyyii i qarmannam shakku'uuyyii an hinkid iyyaqqeena xanoommo?» yito'o. Ee lasage adil Arxeeksis adil Asteeranaa Yihudichchi Mardookiyoosinaa «Oono'o Haamaan Ayihuxxi manna bi'iseena sawwu bikkina ixxena hee'u amaxxaa goddaa hundam Asteerana uwwaammo; ixxom haqqanne saqalakko'ookko. Ihukkaarem adi'l summinne kitaabamukkokii adi'l koobo'innem koobamu woshshii dabassamooyyo; ee bikkina ki'nnuwwim ki'nnuwwina liiransoo woshsha Ayihuxxi manni bikkina kitaabbakka'a adi'l koobo'inne koobbehe» yukko. Kukim ihukkok Siwaanaa yakkam saxxi aga'nnaannonne lamiyyennee saxxi ayyaamonnettee hee'ukko. Mardookiyoosim adi'l woshsha kitaabbam manna hundam weeshaa Ayihuxxi manninaa Hindi uulliinsi Tophe'i uulli afeebe'e yoo xibbennee lamiyyennee lamar uullannee gassitam uulli gassaaninaa mulli daannuwwinaa asse'akkam assi kitaaba kitaabisukko; oo assi kitaabbuwwim annannichchi uulli suu'mmisannee kitaabakkam see'llisannee ee'isam Ayihuxxi manni wocoo suu'mmisannee kitaabakkam see'llisannee kitaabamukko. Mardookiyoos assi kitaabbuwwa hundam adil Arxeeksis summinne kitaabisaa adi'l mi'n koobo'inne koobukko; assi kitaabbuwwim adi'l mi'n golanne annannisa allaaramoo wixe'i faradonne saa'llitam asse'amaa'n anginne afoo'isina asse'amukko. Oo adi'l alallaatim Ayihuxxi manni hee'llam beero'uwwanne hundannem ixxuwwannee ixxuwwi oosonnee ixxuwwi meentonnee afoo hawwo uullixanteena mat ikka'a gaga gudissa'a ayyi uullannem o'l mu'uta lade'lla'a ki'llam diina'a hundam bi'isseennaa shita'a guulliteenaa ee'isam ixxuwwi diina'ika amaxxa hundam boggeenaa xantamisa moo'issoohan hee'ukko. Ku adi'l ijaajim Adaara yakkam tommikii la'm aganii aagu tommaannonnee saxxi ballannee oohim Yihuxxi manna shakkamisina qoodamu ballanne adil Arxeekisis gassi uullanne hundannem baxonne hosoo'isa issamukko. Ayihuxxi manni ixxuwwi diina'ika baado miqisseena ee balla ixxuwwi gaga gudissamisina assi kitaab see'llisa ihaa uulli hundannem yoo minaadabina alallaatamukko. Faradaanim adi'l ijaajinne adi'l mi'n faradonne saa'llita'a qaqqissa'a firiixissu'uuyyi fitto'o; ku adi'l ijaajim adil hee'oo Suusa'i beero'onne minaadabina caakkisa kuramukko. Mardookiyoosim shaano'ii qadaalli hagarii yoo adilla'n eddechcha edde'aa talbi danaam fatirinne dadamaakkoo kuul kaabba hanenne edaa edde'aa ixxi horoorennem geejji worqi adilla'n mare'e issaqqaa adi'l miniinsi firukko; Suusa'i beero'i mannim liiranchinne ilil yukko. Oo ammanim Ayihuxxi mannina caakkane, liiranchane, lobakat makkanee lombanee hee'ukko. Adi'llek ijaajii alallaatii afu uullannee beero'uwwannee hundannem Ayihuxxi mannina liiranichchii lobakat liiranchi maaddi ugudii ihoo ayyaam hee'ukko; Yihuxxi manna baddito'i bikkina mulli minaadaphphek lobakat manni Ayihuxxi manni amma'nnato aa'llo'o. Adaar Yakkam tommikii la'm aganii aagu tommonnee saxxi ayyaamonnee adi'l alallaatii ijaajii wo'mmoo ayyaam hee'ukko; ee ayyaamonne Ayihuxxi manni diina'i ixxuwwa guulliteena egetta'a hee'llo'o; ihukkaarem Ayihuxxi manni ixxuwwi diina'anne ki'llamisina woshshoom dabassamukko. Ee adi'l gassi uullanne yo'i beero'uwwanne hundannem Ayihuxxi manni hee'llam beyyonne hundannem hawwojja afiseena hasoo ayyi manchonnem hawwojja afisseena xantamisanne ixxuwwi gaga gudissa'a hee'llo'o; hannonnem hee'llam minaadab ixxuwwa baddito'i bikkina ayyim ixxuwwinne uullixxameena iggukkoyyo. Mardookiyoosa baddito'i bikkina uulli hundannem yo'i gassaanii awwonsaanii daannuwwii adila bikkita'a baxxam keen hundim Ayihuxxi mannina hara'mmito'o. Mardookiyoos oo adil gassoo uullanne hundannem shiqqeen daannoom uwwamaakkoo lob manchi ihukkisii ixxi malaayyim qoxxukkuuyyi marukkisii erisa la'amukko. Ee bikkina Ayihuxxi manni ixxuwwi diina'a bisa'inne aphphissu'uuyyi shita'a guullito'o; ixxuwwa sabbam keenom hasso'isa issito'o. Ayihuxxi manni adi'l beero'i hee'u xale'i Suusa'annem onti xibbi manna shito'o. Ee balla Suusa'i beero'onne lehu mannik xig hinkaa'nda'e adilina kuramukko. Adilim adil Asteerana «Oono'o adilla'n beero'i ihu xale'i Suusa'i beero'onnem Ayihuxxi manni shito'i mannik xig tommem Haamaan goo'n oosom edaa onti xibbe afaakko; uulli hundannem shito'ok kanniinsi lobakata lophphoo'n urooyyo; eehannah kaba kanniinsi mulleka maha hassootto? Oohim kiina issamookko; hassoo luwwa odim kure uwwamookko» yukko. Asteeram «Adila! Ki doo'l ihulas Suusa'i beero'onne hee'llam Ayihuxxi manni kaballa baxxo'i baxo soodom eddamsina kuramona; Tommem Haamaan oosikim leesh haqqanne saqalamoo'isina ijaaje» yita'a dabatto'o. Ookkim issamoo'isina adil ijaajukko; Suusa'i beero'onnem alallaat kuramukko; Haamaan tommem oosikim leesh mannina moo'amoo'isa issakka'a saqalakko'o. Adaara yamamoo aga'n tommonnee soo'l ballannee Suusa'i beero'onne hee'llam Ayihuxxi manni la'mmekam mat ikka'a odim sas xibbi manna shito'o; ihukkaarem ma'llichchom boggo'oyyo. Ee'isam oo adil gassoo uullanne hundannem hee'llam gatto'i Ayihuxxi manni yo'i beyyonne hundannem ixxuwwi mateeyyooma qoxxissa'a wixximminne ixxuwwi gaga ege'lliteena xanto'o; ixxuwwa sabbam hee'llo'i mannam lamarayyee onti kum mannaa shita'a ixxuwwi diina'i angiinsi ixxuwwi gaga gatisso'o; ihukkaarem matem amaxxam boggo'oyyo. Ku woshshim ihukkok Adaar yakkam agan aagu tommonnee saxxi ballannettee hee'ukko; ihukkaarem ee lasage tommonnee soo'l ballannee ma'lluwwam shitoo'nnim usheexxita'a liiranchi uguda issita'a hosso'o. Suusa'i beero'onne hee'llam Ayihuxxi manni ikko'aarem tommonnee saxxi ballannee tommonnee soo'l ballannee shitu'uuyyi hossa'a tommonnee onti ballannee uullisso'i bikkina ee tommonnee onti ayyaamonnee uguda issita'a liiranchinne hosso'o. Odim mat mat hoffi beero'uwwanne hee'llam Ayihuxxi manni Adaar yakkam aga'nneka tommikaa soo'l ayyaamoo uguxxi balli issimminne ittu'uuyyii aggu'uuyyii issena'i issem mat mullaannina hurbaata uwwitu'uuyyii hossamok ee bikkinatte. Mardookiyoosim ka issamu luwwi hundikam aganna kitaabaa Faariis adi'l uullanne hundannem abbisonnee qee'llonnee hee'llam Ayihuxxi minaadab hundinam asse'ukko. Maarag hundam Adaar yakkam agan aagu tommikaa soo'l ballaa tommikaa onti ballaa ugud issita'a lonsimminne egettamisina kurukko. Oo ayyaammuwwim Ayihuxxi minaadab ixxuwwi gaga ixxuwwi diina'i angiinsi gatissa'a usheexxato siiddo'i ayyaammuwwa; kichchechchiinsii neeyyata murimmiinsii liiranchannee usheexxatonnee higgo'ok ka aganannette hee'ukko. Ka ayyaammuwwanne uguda issita'a ittu'uuyyi, aggu'uuyyi, liirantu'uuyyii issena'i issem mat mullaannina hurbaaxxi maadda issitu'uuyyii buxinam hara'mmoo luwwa uwwitu'uuyyii egettamisina kuramukko. Ee bikkina Ayihuxxi manni Mardookiyoos uwwu ijaajo egetteenaa asheetto'i ugudam maarag hundam lonsiteenaa iittanto'o. Ayihuxxi mannina diinakkichchi hee'u Agaag shumo'ik Haamaadaat beet Haamaan Phuuriimaa yakkam saamo ubbuusimminne Ayihuxxi manna hundam uulliinsi fii'aa guulleena xanoo ayyaamo la'eena hasaa hee'ukko. Ihukkaarem Asteera adi'l kollonne hincito'o; adilim ixxi ijaajo kitaabaa higisukko; oo ijaajim siidisu mishinne Haamaan Ayihuxxi manna guulliseena gudisaa hee'u woshshi ixxi gagannem daba'llukko; ixxii tommem ixxi oosii haqqanne saqalanto'o. Ku uguxxi ayyaammuwwim «Phuuriima» Yamanta'a weeshantamok ka mashka'innette. Mardookiyoos asse'u assi mashka'inne illinne moo'llo'okaa ixxuwwanne afu luwwaa hundam tiirimminne Ayihuxxi manni ixxuwwi gagina ixxuwwi shumo'inaa ee'isam Ayihud iheena hasoo keen hundinaa gindamoobee'i seera issito'o; oohim maarag hundam oo yamamu amman afoohaare Mardookiyoos uwwoo ijaaccisanne lamem ayyaammuwwam uttambee'isa lonsiteena murte'llo'o. Ka Phuurii'm ayyaammuwwa qaranchi hundannem, abaroos hundannem, uulli hundannemii beero'uwwi hundannemii lonsimmi hasisoo'isa issakko'o; ka ayyaammuwwam lonsakkoo'n higimmi hasisooyyo; qaranchi lambe'iinsim eekka tirimma uranchi hasisooyyo. Ee lasage Abihaayil landichcho adila Asteera Mardookiyoosinne maqir ikka'a phuurii'm bikkina Mardookiyoos gaassaatim kitaabaa asse'u asso qoxxisimminne isena yoo daannooma la'isimminne is ijaaj exxaakkoo asso kitaabba'a asse'llo'o. Mardookiyoosim kitaabamu asso Arxeeksis gassoo xibbennee lamiyyennee lamar uullannee yo'i Ayihuxxi manni beyyo hanqii xummii yoo sagarinne asse'ukko. Odim eehanninne maqirem kanniinsi illageen soommanimminaa kichche'imminaa seera fissita'a hee'llo'isinne ka Phuurii'm ayyaammuwwa ixxuwwi gagim te'im ixxuwwi lasaqqi shumo'i maarag hundam egettamisina xa'mmoohan hee'ukko; oohim adila Asteeraa Ayihudichchi Mardookiyoosii mat sawwitinne iitanta'a lamim higisso'oo ijaaj hee'ukko. Phuurii'm see'l bikkinaa gaassi losa'n bikkinaa kuramukkoka qoxxisimmina adila Asteera kitaabba'a asse'llo'i assik ijaaj annanni ihaakkoo aganni doonanne kitaabamukko. Adil Arxeeksis ixxi adillaninne gassoo uulli hundannem tochiinsi tochchi afeebe'e garu minaadab hundim gibiro miqoo'isa issukko. Ixxi issu lob maalalsiisoo luwwii Mardookiyoosa iimiimaa'aa lonsukkisa moo'isoo agannii Meedoo'nnaannonnee Faariisaannonnee adilluwwi aganni kitaabanne kitaabamaakko. Ayihudichchi hee'u Mardookiyoos daannoo'm lombanne adil Arxeeksisiinsi la'm beyyonnette hee'ukko. Ixxim ixxi moolli hee'llo'i Ayihuxxi manni lambe'enne lobakata lophphaakoohanee iittamaakkoohanee hee'ukko. Mardookiyoos ixxi sullinaa shumo'inaa eroomma issimminnee ixxuwwi xummi bikkinam uullimminnee lobakata badaraakkoo manchi hee'ukko. Uuxa yakkam uullanne Iyyooba yakkam mat manchi hee'ukko; ixxim miiqakkam luwbee'ane, xabbeena, Waa'a baddoohanee joriinsi annanni ihaakkoohanee hee'ukko. Ixxenam lamar goo'n oosii sas landii hee'ukko. Ixxi horim lamar kum gereebbaa sas kum gaameela'aa onti xibbi qaash mirgo'uwwaa onti xibbi meenti hallaa hee'ukko; ee'isam lobakata dut awwaadaan hee'llo'o; ixxim eelliinchi firinne hee'llam manniinsi hundiinsim goddaanchoo la'amaakkoo manchoo hee'ukko. Iyyoobik goo'n oos kor kore annonnichchi minennem maadda gudissu'uuyyi mateeyyanne wixxita'a liirantam hee'llo'o; ixxuwwim sasem aayyuwwam weeshissu'uuyyi ixxuwwinne maqirem ittamii aggamii hee'llo'o. Oo maaddi ayyaam higaa lasage Iyyoob ixxi ooso weeshisaa woraa «Ayyi la'ukko i oos baaxiilo baxxeenaa wodanonnem Waa'a duunteenaa xantamo» yaa daram annannichchi bikkinam shokkiisakkam kitima kitimaa muccussam hee'ukko; Iyyoob hundi ammanem ee'isa issam hee'ukko. Ayyaamiinsi mat ayyaamo Waa'i asse'amaan Waa'i illagenne hincito'i ammanenne Sheexaanchim ixxuwwinne maqirem hincukko. Waa'im Sheexaanchina «Hanniinsi waattitto?» yaa xa'mmukko. Sheexaanchim «Uulli hundam do'aammo; ekkidii kidii daba'llamaammo» yaa dabarukko. Waa'im Sheexaanchina «I awwaadaanchi Iyyooba qoossitaa moo'llittonnihe? Uullanne ixxe'nnoo miqakkam luwwi bee'ek, xabbeen, eese baddookkokii joriinsim annannihaakko manchii bee'e» yukko. Sheexaanchim Waa'ina «Iyyoob keese baddookkok kora'attemennihe? Ixxi keese baddookkok ixxo, ixxi abaroosaa ixxi amaxxaa hundam xumminne egetti bikkina, baxoo bax hundam maasse'llitti bikkinaa lobakat horam ixxena uwwititti bikkinattee. Ihukkaarem kaba ixxena yoo luwwi hundam hoottita'n ki illagenne keese duumookko» yukko. Waa'im Sheexaanchina «Oono'o, xale'i Iyyoobanne ma'lluwwa issititte bagaan ixxena yoo luwwi hundam hassittisa issiteena xantootto» yukko. Ee lasage Sheexaanchi Waa'i illagiinsi marukko. Ayyaamiinsi mat ayyaamo Iyyoob oos goonii landii ixxuwwina lob abbaayyi minenne wixxita'a ittu'uuyyii woyi'n diqaasa aggu'uuyyii liirantam hee'llo'o. Mat asse'amaanchim geerukkuuyyi Iyyoob beyyo waaraa «Mirgo'uwwa qaanshaa abuullinam hee'nnummo; hallim ni gadanonne allaa'llam hee'ukko; Saaba'i uulli manni dangonnem waatta'a qasimminne hundam bogga'a massito'o; awwaadaano hundam bisa'inne shito'o; xale'i an fissaqqaa ihu luwwa hundam kiina kureena waarummo» yukko. Luxxi asse'amaanchi wocaa guulloo'nnim mulli asse'amaanchi geerukkuuyyi waaraa «Gereebbaa gereebbi allaaraanoo hundam iimanii banqi dillaa shukko; xale'i an goxxaa ihukkoka hundam kiina kureena waarummo» yukko. Oo asse'amaanchi wocaa guulloo'nnim mulli asse'amaanchi waaraa «Sas beyyonne baxxamamto'oo Baabiloo'n manni dangonnem qasso'o; gaameela'a hundam massito'o; ki awwaadaan hundam bisa'inne shito'o; xale'i an xoraa ihukkoka hundam kiina kureena waarummo» yukko. Oo asse'amaanchi wocaa guulloo'nnim mulli asse'amaanchi waaraa «Ki oos hundim goonii landii lob abbaayyi minenne wixxita'a ittu'uuyyii woyi'n diqaasa aggu'uuyyii liirantam hee'llo'o. Uulli udma'iinsi ki'u hambu'llam hafachchi dangonnem waaraa mi'nneka soorem kollom heekkeesansu ammanenne min ixxuwwi hanenne ubaa shukko; xale'i an goxxaa ihukkoka hundam kiina kureena waarummo» yukko. Eehanniinsi lasonne Iyyoob ki'aa kichchechchinne ixxi eddechcha dereerukko; horoorem hogoossaqqukko; uullannem heeshaa illillaachcha heeshaa «Iyyummi godabiinsi leexa'am qaramaammo; lehoommi ammanem amadaa maroommi luwwi mahim hee'ooyyo; Waa'i uwwaa hee'ukko; ixxim dabaraa massukko; Waa'ik summi galaxxamaakkoohan ihona» yukko. Iyyoobanne oo hawwi hundim afukkaarem hore'em baaxiilo baxukkoyyo; Waa'annem qaraaraalli sagara wocukkoyyo. Ayyaamiinsi mat ayyaamo Waa'i asse'amaan Waa'i illagenne hincito'i ammanenne Sheexaanchim ixxuwwinne maqirem hincukko. Waa'im Sheexaanchina «Hanniinsi waattitto?» yaa xa'mmukko; sheexaanchim «Uulli hundam do'ummo; ekkidii kidii daba'llamummo» yaa dabarukko. Waa'im Sheexaanchina «I awwaadaanchi Iyyooba qoossitaa moo'llittonnihe? Uullanne ixxe'nnoo miiqakkam luwwi bee'eki xabbeeni eese baddookkokii joriinsim annanni ihaakkoo manchii bee'e; at ixxo bi'issona cawwoommisina ki'isansitoottok kora'atteme; oono'o, Iyyoob kabad afeebe'em muccur ihukkisam yookko» yukko. Sheexaanchim dabaraa « ‹Omachchi bikkenne omachcho› yakkamisam manchi beet ixxi foore gatixxeena yookkoka hundam uwwookko» yukko. Ihukkaarem kaba at ki anga biddiqaa'llaa ixxi orachcho hawwoddilas hanqo'isam ki illagenne keese duumookko» yukko. Waa'im Sheexaanchina «Danaamo, shititte bagaan ixxonne hassitti luwwi hundam issiteena xantootto» yukko. Ee lasge Sheexaanchi Waa'i illagiinsi maraa Iyyoobika horoo'l saraatiinsi ki'isaa lokki xuranqi afeebe'e kee'mmaalli omarinne hawwoo'isa issukko. Iyyoobim ee lasage gii'llibuchchanne afuuraa orachcho gala'inne haarimma asheerukko. Ixxi meentichchom «Kabadem Waa'anne yoo ki amma'nnat qoxxukkisam yoohonnihe? Eehanniinsa'e Waa'a duuntaa lehe» yito'o. Ihukkaarem Iyyoob isena «Qawwi meentiinsi matesa woccitto; Waa'i angiinsi eroomma aa'nnummisam jor luwdu aa'nnoommoyyonnihe?» yukko. Iyyoobim oo hawwi hundim afukkaarem hore'em baaxiilo baxukkoyyo; Waa'annem qaraaraalli sagara wocukkoyyo. Teemaa'n Eelfaaz, Shuuha'i Biidaadii Naa'imaa'i Xoofaarii sasim Iyyoob beshshuwwi hee'llo'o. Ixxuwwi Iyyoobanne afu hawwo macceesso'i ammanenne kichche'lla'a qoxxisseena weeccanta'a mateeyyanne Iyyoob beyyo waatto'o. Ixxuwwim qee'llonne hee'llu'uuyyam moo'lla'a Iyyoobatte ihukkisa annanni issita'a laqqeena xanto'oyyo. Iehukkaarem ixxotte ihukkisa laqqa'a lasage kichchechchinne ixxuwwi eddechcha dereetto'o; diram iim hootta'a binnaa'llu'uuyyii ixxuwwi horoorennem laphphitu'uuyyii sagara iimaa'lla'a wi'llito'o. Ixxonne afu hawwi kee'mmaalli ihukkisa moo'llo'i bikkina Iyyoobinne maqirem lamar ballaa hiimoo uullanne afuutta'a ma'lluwwam woccoo'n higisso'o. Eehanniinsi lasonne Iyyoob wocimma asheerukko; qaramu ballam Oo balli tuunsona; iima'n Waa'im ee balla tiiroone; ee ayyaamo caakki hore'em caakkoone. Witiriichchinnee gambabbi tuunsinnee ifiisamaakkoohan ihona; ee ballika caakka duub ifiisaa tuunsona. Oo hiimim gambabbi tuunsinne ifiisamona; hiinchonne yoo ayyaammuwwiinsi matisa xigamoone; agannuwwiinsim matisa ihaa xigamoone; Oo hiim alceenni ihona; ilillaaxxi sagarim macceesamoone. Leewaataan yakkam xarakkichcho iimiimaa'llam keenii ayyaammuwwa duuntam gennaanii ee ayyaamo duuntona. Ee hiimo baqixxi boollaanki tuunsona; Caakki neeyyatim hee'oone; soodaraa'l caakkim caakkoone. Mashka'oomim oo hiim an iyyummi godabiinsi firaa hawwo moo'oombee'isa iyyummi godabo xufubee'i bikkinatte. «Iyyummi godabonne hee'ummuuyyim wo'i ihaa gataammoota'nnii qaramummisam lehaammoota'nnii eran hee'ukko. Iyyumma mahinam is gubeedonne qaaphphitoda'e? Mahinam is anuuna iicissoda'e? Kaba xummam iinse'am hee'ummo; diriiraatim usheexxam hee'ummo. Kaba gindamaa yoo luwwa ixxuwwi gagina baxxo'i ka uulli adilluwwinnee ixxuwwi sogaaninnee maqirem diriiraa usheexxam hee'ummo. Ixxuwwi mine birinnee worqinnee wonshito'i daannuwwinne maqire iinse'am hee'ummo. Te'im waammamu ka'llesa caakka hore'em moo'ubee'i ciilisa iham hee'ummo. Ee beyyonne boqquwwi keen ixxuwwika jor baxo uttamo; kee'mmaalli baxo baxxam keenim usheexxitamo. Qeefadanto'i keenim xumma siiddamo; ixxuwwa u'nnissam kee'n shuurom macceesimmiinsi gattamo. Eekke'enne hoffokii lobokii mateeyyam hee'ookko; agidim ixxuwwi moollanno'iinsi wolabbanonne fittamo. «Eehannah hawwonne hee'llam keenina caakki qaraaraalli heechcha hee'llam keenim foorinne hee'llamok mahinatte? Leho mixxam keeninaa maaxamaakkoo amaxxiinsi loboka hassa'a siiddambee'i keeninaa heechchi uwwamookkok mahinatte? Waammanteena hincitam ammane liirantam keenina heechchi uwwamookkok mahinate? Ixxi googi daphphukkaanninaa Waa'i googo xufu manchinaa caakki uwwamookkok mahinatte? Kichchechchi iina hurbaaxxisa ihaakko; u'nnim xoo'oobee'i wo'isa ihaakko. Baddummi luwwi i hanenne waaraakko; muggummi luwwim eesenne afaakko. I woronne xale'i hawwi yoo bikkina iina xummii usheexxatii gaaga'immii bee'e» yukko. Teemaan uulli Eel faazim dabaraa «Iyyooba, mat manchi iggaa kiinninne atooraruta'n iyyaqqimminne macceessoohonnihe? Ihukkaarem wocimma urookkok ayyim bee'e. At lobakat manna losissaatto; hoogu angiuwwam qaxxissaatto. Ki sagar qolamu keeno bakkiisam hee'ukko; tartaroo malaayyuwwam qoxxisam hee'ukko. Ihukkaarem kaba hawwi keesenne afu bikkina at neeyyat bee'i manchi ikkaatto; hawwi keesenne qoxxu bikkinam neeyyato muttaatto. Waa'a baddimmanne amma'nnantaattoohanee baxxootti xabbeen baxonne neeyyat issitaattoohanee hee'llittoyyonnihe? Hino'o, sawwihe; muccur manchonne hawwi afaa xabbeen manchim bi'aa moo'llaatennihe? An moo'ummisannetti ihulas jollika abuulla abuullita'a hantaarom sire'isa wixxam keen ee wixxo'okam wixxaa'llamo. Oo keen Waa'aanninne fooshshinne bi'llamo; ixxi quunqi iibbinnem beedditamo. Jor keen hobbichchisa toxxamo; sagara iimaa'lla'ahim shuuttamo; ihukkaarem Waa'i ixxuwwika inqe iiqookko. Hobbichchi hochchaa itoo luwwa hoogaa lehoohaannisa; ee hobbichchi wotallim binnoohaannisa; ixxuwwi oosim binnitamo. «Ayyaamiinsi mat ayyaamo mat assi maaxaqqanne i beyyo waarukko; ee assom hashaashshanchi sagarinne macceesummo; Manna kee'mmaalli diriichchi amadoo ammanee u'nnisoo baqixxi ajuutto'i ammanennee baachchii huxechchii eese amadaa iikka miqe huxiisukko. Hafachchi hafachchaa i illaginne higukko; muggiinsi ki'ukkokim i orachchik oddi uullukko. Eekke'ennem mat luwwi uullaakkoohaannonne moo'ummo; xiniinsaa moo'ummaarem mada'e ihukkisa la'eena xanummoyyo; eehanniinsi lasonne matem sagarim bee'i beyyinne ‹Waa'i illagenne muccur ihaa siidamoo manchi yoohonnihe? Te'im qooccaanchi illagenne muccur manchi siidamohonnihe? Waa'i ixxi awwaadaano amma'nnoobee'an ihulas ixxi asse'amaanonnem huushancha siidoohan ihulas Eehannah oor itoo'nnim gindamoohaannonnee ixxi shooho'im buchchi ihoo manchonnee buchchinne baxamu minenne hee'oo manchonne Waa'i hinkid amma'nnamookko? Darinne fayya'i hee'u manchi hiim afoo'nnim dangonnem lehookko; heer heerinam xadamaa gatookko. Xiribbi xoqolamu dukkaa'nnisa qoorooma siiddoo'nnim letamo. «Iyyooba, yee yoo manna siiddoolas hino'o, weeshe; hara'mmoo'isina Waa'i asse'amaaniinsi hinkanni kollonne daba'llitootto? Qawwi mancho ixxi quunqim shookko. Ceemmaalli manchom to'achchi bi'isookko. Ceemmaalli manchi makkixxaa xumminne hee'ukkuuyyi moo'ummo; ihukkaarem dangonnem ixxi mine duumummo. Ixxi oosinam heechchi lubbat bee'e; oogaxxi beyyonnem ixxuwwi bikkina fitamookkok bee'i bikkina ixxuwwanne hawwi afookko. Ixxi wixxaa'u hurbaata sibaaru manni itookko; utti woronnem ihuta'n mutu hurbaata gatissamoyyo; xeebaan keenim ixxo mixxamo. Hawwi buchchi woriinsi firooyyo; qeddim uulliinsi mutooyyo. Gii'llek xoxanqi iim firoohaannisam manchim hawwina qaramookko. «Anetti ihumta'n Waa'i illage hincaa i hawwi hundam ku'llam hee'ummo. Ixxi saarayyakka'a xanakkambee'i lob baxo baxookko; xigakka'a xanakkambee'i maalalsiisoo mare'em issookko. Uullanne xeena ga'nnisookko; abuulli uullam wo'inne qufisookko. Gadanto'i keeno lombinne iimaa'ookko; kichche'llo'i keenom qoxxisaa liiransookko. Hantaaraan kee'n sawwite gindookko; ixxuwwik angii baxim xabboobee'isa issookko. Qoolluwwi keeno ixxuwwi hantaarim qaash ihaa amadookko; hantaaraan kee'nneka a'llancha qaqqisom bi'isookko. Ixxuwwina balli tuunsookko; samgud ballanne hii'm tuunsonne yo'aannisa ikka'a timtimitamo. Bux keeno diina'i bisa'iinsi gatisookko; hawwaan keenom wor amadoo kee'n angiinsi wolabbanonne fissookko. Buxina neeyyata uwwookko; boqqooma uulliinsi bi'isookko. «Waa'i axeeroo manchi maasse'amaakkoohane; ee bikkina hundam xanoo Waa'ika axeerimma gadditte. Waa'i omassuta'nnim ixxim fayyiisookko; ixxi iiquta'nnim ixxim cacookko. Waa'i loh boobaniinsi keese gatisookko; lama'l boobanim keese afooyyo. Sibaa'l maarage lehiinsi bagaxxi ammanem bisa'iinsi gatisookko. Waa'i jora wocoo allabiinsi egerookko; bi'isoo luwwi ki hanenne waaruta'nnim badditooyyo. Bichchii sibaarii waaroohaare muggitooyyo; uulli moochcham badditooyyo. Abuullitoo uullanne kin hawwisooyyo; Doo'm woro'l moochchi maqirem shiinnaatantaa hee'llootto. Ki dukkaanannem xummi wo'mmukkisa laqqootto; ki gereebbi orodo moo'lloohaarem matim xa'ooyyo. Ki shumo'i fikkaannoo'isa laqqootto; qattoo qachchim hixisa dutookko. Aras hamaameebee'e wixakko'i abuullanne dasoohaannisa atim lomma'nniteebee'e hee'llootto. Iyyooba, neese ka hundam saarayyinaa hanqi ihukkisa lanqaammo; ee bikkina ka hanqa ki wodanonne qoossitaa aa'e» yukko. Eehanniinsi lasonne Iyyoob dabaraa «I hawwii kichchechchii keennaanchonne keenamuta'n Dambalaq gammalanne yoo shashshariinsi loboka kee'mmam hee'ukko; ee bikkina iyyaqqoo'n wocoommi woshshanne maalaltitte. Hundam xanoo Waa'i ixxi xiyyinne eese qasaakko; shoo qaraarim i woronne binnaakko; Waa'ik muggisoo booban eese kibbaakko. Bii'l hallichchi hixe siidulas mirgo'im kutura siidulas muunoohonnihe? Sooqido issakkobee'i xee'oobee'i hurbaata itakkamonnihe? quunqanne yoo wo'i xee'oohonnihe? Eehido'i hurbaata ha'yyoommoyyo; nakkeenam hasoommoyyo. «Waa'i an xa'mmoommi luwwa uwwoobee'ek mahinatte? I uunxatdu macceesoobee'ek mahinatte? Eehanniinsi hundiinsim ixxi doo'l ihaa eese shuta'n ixxi anga biddiqaa'aa eese bi'isuta'n eran hee'ukko. Maham eesenne hawwi lophphuta'nnim keesammi Waa'ika sagara lagumbee'i bikkina liiranchinne xopham hee'ummo. Foorinne hee'oommi malaayyi iina hanno hee'aate? Neeyyat bee'ulasdu i hee'immi mahina awwaadookko? Kini'nnoo'i qoxxaalli malaayyi iina yoohonnihe? I orachchim naas xaa'llisa qoxxaallannihe? Iina yoo malaayyi hundim beeddu bikkina i gaga gatiseena xanoommi malaayyi hore'em bee'e. «Ixxi beshichchina eroomma issoobee'i manchi hundam xanoo Waa'a baddimma uraakkoohane. Ihukkaarem i besh diris higaa lasage gogoohaannisaa ammanoomina wo'mmaa daadoo daajjisaa qawwiissam keeno. Barad shiiloo ammane daajji wo'i borqookko; hadaddi bukkamoo ammanem daajji wo'mmookko. Ihukkaarem billi agana xoo'ookko; daajjuwwim gogookko. Iyyiisakkam diinata ushe'llam daddaraan wo'o hassu'uuyyi udma'i uullanne bi'llamo; Teemaa'n uulli daddaraan wo'o hassamo; Saaba'i uulli googaanim wo'o siiddeena neeyyato issitamo. Ihukkaarem amma'nnito'i daajji gogaakkoo moo'lla'a neeyyat muttamo; eekke'e affa'atim gancattamo. Kaba ki'nnuwwi iina ee gogu daajjuwwisa ikkakko'ookko; eesenne afu hawwo moo'llakka'atim lasinne fuduuddakko'ookko. Ayla'ukko ‹I bikkenne ikkakka'a ma'lluwwa uwwehe; bada'n bikkina iinniinsi amaddakko'i luwwa ki'nnuwwi amaxxa miqqakka'a fatakissiissehe› yaatennihe? Te'im ‹Diina'i angiinsi gatissehe; wor amaddam kee'n angiinsim agaaggakka'a gatissehe› yaatennihe? «Ki'nnuwwi eese losissehe; ihushancham kullehe; anim cawwaa macceesoommo. Hanqo'i sagar hinkido'i malaayyaamo! Ihukkaarem ki'nnuwwi fit awwaad bee'ane. Neeyyat bee'i manchi wocoo woshshi hafachchisa ihu bikkina an wocoommi woshshika huushancha axissakkeena sawwitakkamuulla. Anni bee'i qachchonnem saamo fissaqqantakko'o; ki'nnuwwi besham biteessakkeena bitonne fitantakkamuulla. Kabada'i hino'o, i kollonne hoottakka'a moo'llehe; an ki'nnuwwi illagenne qaphphanoommonnihe? Kinnuwwina baaxiil ihoobee'isa an hanqo'i manchi ihummi bikkina kabadem daba'llehe. Hanqinam i woshshanne baaxiil yoohonnihe? I suumim hanqaa baaxiiloo annannissaa wocimma la'ooyyonnihe? «Ka uullanne manni hee'oo heechchi kee'mmaalli gubbanchinneyyonnihe? Ixxi umu'l doollim kee'mmaalli baxinne qaashamaa hosoo balli baxaanchisayyonnihe? Hafanne usheexxiteena hassam awwaadaa'nnisaa baxxo'i baxina miqakkam luwwa ege'llitam baxaa'nnisayyonnihe? Ee'isam iina kora'i agannuwwim uwwamukko; hiimiinsi hiim afeebe'e hawwiinsi bagaan siidoommi luwwi bee'e. Diriireena iinse'ummi ammane hiim qeeraa'llookko; ‹hiim hinki ammandu soodookko?› yummuuyyi midaadiinsi midaadonne daba'llummuuyyi garoommo. I orachchi hundim omaraa daquurinnee hobarinnee ifiisamaakko; omariinsim mar daadoolla. I umu'l doolli eddehchcha daddam kee'n fati'l xaacciinsi loboka qaqqisookko; mat neeyyat bee'em beeddookko. «Waa'a! I heechchi fooshshiinsi gundi ihukkisa sawwihe; i illim kanniinsi eehid eroomma moo'ooyyo. Kaba eese moo'ookkok la'mmaagge moo'ooyyo; hasuta'nnim eese siideena xanooyyo. Duub binnaa bi'oohaannisam lehaa waammanne aagu manchi daba'llaa waarooyyo. La'mmaagge ixxi mine daba'llooyyo; ixxo la'oo manni hundim xadookko. Kanniinsi eehid hore'em cawwoommoyyo; i tiir kichche'u bikkina wocoommo; i heechchi qaraaru bikkina qunquunoommuulla. «I hanenne egeraancho uullissoottok mahinatte? An dambalaqannihe? te'im dambalaq woro'l lob mochchichchonnihe? Ara'i eese qoxxisookko yaa iinsim iina hara'mmookko yaa sawwummo. Ihukkaarem at eese haqaawwinne baddissoolla; ajuuttinnem muggissoolla. Ee bikkina ka'isenne u'nnamummuuyyi hee'immiinsi xaga'llaa lehimmi e'llookko. An neeyyato muraammo; hee'eenam hasoommoyyo; i umu'l doolli gundi ihu bikkina eese uttaa ure. Iimiimmaa'llaa lonsitoo'isinaa sawwitam ixxonne issitoo'isinaa manchi beet maruwwi ihaate? Dar hundam saarayyiteenaa amman hundam keenteenaa ixxi maruchcho? Anja liciqeembee'e ammane uwwitoobee'ek mahinatte? Manni ihoo'isa hundam laseessoo Waa'a! An baaxiilo baximmi keese mahinne hawwodookko? Mahina eese xiniinsitoolla? Eekkaa'nnam kee'mmaalli iyyi ihummonnihee? I baaxiilo hore'em uttooyyonnihe? I hawwojdu shiinshitooyyonnihe? Waammi woronne aagoommi amman afaakko; kanniinsi eehid hassita'nnim hee'oommoyyo» yukko. Shuha'i uulliinsi Bildaad yakkam manchi dabaraa «Ki suumiinsi firoo sagar hambu'llam hafachchisa; kido'i woshsha woccoottok hinki balli afeebe'e? Waa'i oogato boqqisoohonnihe? Hundam xanoo Waa'i hanqa boqqisoohonnihe? Ki oos Waa'i illagenne baaxiilo baxxo'oohan ihulas eehannina laboo guzumo'o aa'llo'ookko. Ihukkaarem Waa'i kollonne daba'llitta'nnii hundam xanoo Waa'a uunxitta'nnii muccuraa xabbeenaa ikkilas Waa'i qaqqisaa kiina hara'mmookko; ki muccuroo'm heechcham xabbaa'ookko. Kiikki asheer hoffan ihaa moo'amuta'nnim kiikki lasaanchi erisa haraarookko. Illagee'n qarancha xa'mme; gaassi anno'i losanom saarayye. Mashka'oomim neese abbis balla qarammaammoo keen inkummi bikkina maham lanqoommooyyo; ni umurim hafisa higoohane. Ixxuwwi kiina losissamokii kuttamokii qoossita'a laqqo'aanniinseyyonnihe? «Leendi leephphees bee'i beyyonne mutoohonnihe? Qara'idu wo'i bee'i beyyonne latoohonnihe? Ee beelas li'aa murakkamisa ihoo'nnim mulli kaashshi hundiinsim gaassaa gogookko. Waa'a xaddam kee'nnek hundikim lasaanchi eehannisame; Waa'a laggam kee'nnekim neeyyat bi'ookko. Idooxxi do'nnisa muramoo luwwanne bakke'llamo; neeyyato issitam luwwim qaqqisom bi'ookko. Eehannah idooxxi do'nnanne bakke'akkota'n egedeena xanoohonnihe? angiinne amaxxakkota'ndu bakkiisaa uullisoohonnihe? «Dob eelliinchonne lataa kaashshi beyyonne dutoo'isam jor keen ee'isam fikkaannitamo. Oo dob xapha ki'n tuubbanne xaaxookko; lob ki'n lambe'ennem beyyo axixxookko. Ihukkaarem beyyiinsi manni xoqolamoo ammane illageen hee'u beyyo ayyim la'ooyyo. Doboomim ee'isinne gogookko; mulli kaashshim uulliinsi mutookko. «Waa'i er manna uunjooyyo; jora baxxam keeninam hara'mmooyyo. Odim keese dabaraa liiranchinne osattoo'isaa ililitoo'isaa issookko. Ihukkaarem keese sabbam keen sholle'llamisa issookko; baaxiilaan kee'nnekim min bi'ookko» yukko. Iyyoobim dabaraa «Eeyya, ku woshshi hanqi ihukkisa la'oommo; ihukkaarem Waa'i illagenne manchi beet hinkid muccur iheena xanookko? Waa'inne maqire ayyi fitameena xanookko? ixxi xa'mmoo kum xa'mmichchiinsi matichchom dabareena xanookkok hee'ooyyo. Waa'ik qooroom xillaalla; malaayyim lobane; ixxenne uullixxamaa kaa'amubee'ek ayyi yookko? La'akkoo'n dangonne duunnuwwa heekkeesookko; ixxi quunqinnem toroshansookko. Waa'i uulli huxe'oo'isa issookko. Uulla bakkiisaa iyyu utubbuwwam heekkeesookko. Eelliinchi firoobee'isa ijaajeena xanookko; boollaankim caakka uwwoobee'isa isseena xanookko. Ixxi ayyim hara'mmoo'n mullam iimane biddiqaa'ukko; dambalaq womoo'l hanennem taakke'ookko. Tibbe'ee Ooriyoonaa Philiyaadiisaa yakkam boollankaa ee'isam woroo'n qarinne wixxaa yoo boollaankaa iimanenne qooccukkok Waa'a. Ixxi saarayyakkeena xanakkambee'i maalalsiisoo luwwaa xigakka'a xanakkambee'i mare'ee issookko. «Waa'i i gadanonne hincuta'nnim moo'oommoyyo; i kollonne hincuta'nnim ixxotte ihukkisa annannissaa la'oommoyyo. Ixxi hasu luwwa massuta'n ayyim hoorookko? ‹Mahina ka'isa issitoolla?› yaa xa'mmookkokdu ayyette? Waa'i quuqulas daba'llooyyo; Ra'aaba yakkam dambalaq woro'l moochchichchina hara'mmitam keen hundim ixxena otossitamo. Eehannah an ixxena dabachcha uwweena hinkid xanoommo? Ixxenne maqire fitameendu sagara hinkid siidoommo? Muccur ihumta'nnim oogatoo Waa'i haafoo'isina uunxoommo bagaan dabachcha uwweena iggoommoyyo. Ixxi summa weeshoommaare dabachcha uwwuta'nnim i woshsha macceesookko yaa amma'nnoommoyyo. Hambu'llam hafachchinne eese iiqansaakko; mat mashka'i bee'ekam eesenne omara lonsaakko. Fooshsheexxonam ammane uwwukkoyyo; ihukkaarem i heechcha qaraaraalli kichchechchinne wonshaakko. Malaayyisinatte ihuta'n ixxi malaayyaamo; fitamaa neegaroommo yoombee'isam ixxo oogaxxi mine hincaa'eena xanookkok bee'e. An muccuraa miiqakkam luwwi bee'anee; ihukkaarem i woshshim eese baaxiilaanchi issookko. Wocoommi woshshim eesenne dabaraa oogatookko. Maham eesenne baaxiil bee'uta'nnim i heechcha shigigaammo; hundem luwwam gatona uraammo. Waa'i muccuraa baaxiilaanchoo mateeyyam bi'isoo bikkina ‹matem annannoomim bee'e› yummok eehanninatte. Dangonne booban ubaa manna guulloohaare muccur manni hawwonne ixxi osarookko. Uulli baaxiilaan kee'n anganne aagoohaare ixxi oogatoo kee'nneka ille ifiisookko; eehannah ka hundam issukkok Waa'a bagaan mullek ayyi hee'aate? «I umu'l dool geeroo manchiinsi loboka gaaggaaboolla; mat liirancham moo'oo'n higoolla. I heechchi doolli leendinne baxakko'i wongi'llisaa itoo luwwa hochcheena aad bararoo gaaqichchisaa gaaggaaboolla. ‹An kichchechcha xadoommo; quuqimma uraa liiramoommo› yumta'nnim Waa'i eese muccuroominne moo'oobee'isa la'ummi bikkina hawwii u'nnii eesenne afookko yaa baddoommo. An baaxiilaanchi ihaa xiganchi gatubee'i korenne kora'i beyyonne badaroommok mahinatte? I orachcho saamuninne aanshaqqumta'n i angam haanjinne muccussumta'nnim at eese haranne ubbuussootto; i eddechchim eese shigigookko. Ixxi i'isa manchi beet ihubee'i bikkina oogaxxi mine mallaa oogaxxammona yeena xanoommoyyo. Ihukkaarem neese lamom araassookkok ni lambe'ennem daannookkok hee'uta'n ixxek hibbi eese baddisoobee'isa Waa'i eese guzumo'imma uruta'n i woda'n muccurooma la'oommi bikkina maham baddoo'n wocam hee'ummo. «Hee'oommi heechchi sabisaakko; ee bikkina ki kollonne laaroommoka qaraaraalli kichchechchi sagara macceese. Waa'ina an ‹Iittammumbee'i luwwi mada'e kure bagaan at eesenne oogattitte. Baaxiilaan kee'n sawwitenne liirantittuuyyi ihukkaarem eese kaa'nna u'nnissituuyyii ki angi baxom sholliissituuyyii keese liiransoohonnihe? Ki illi mannaannisannihe? Te'im at moo'lloottok mannisannihe? Ki umurim mannaannisa gundannihe? Ki ayyaammuwdu mannaannisannihe? Eehannah i jolla hassoottokii i baaxiilom laseessoottokii mahinatte? Baaxiilaanchi ihumbee'isaa ki angiinsi ayyim eese gatiseena xanoobee'isaa at laqqootto. Eese axisaa baxukkok ki anga; eehannah kaba dabattaa atim bi'isseenannihe? Buchchi mu'uxxisa buchchiinsi eese baxxittisa sawwihe; eehannah kaba dabattaa di'llisa liitteenannihe? Eese axxisa duntittoyyonnihe? Gi'i'nnisam gi'insittoyyonnihe? I orachcho miqinnee bu'aninnee somansitaa baxxitto; miqennem maaraa omachchoo eddeessitto. Foore uwwitto; ki eroommam moo'issitto; ki abooyyimmim foorinne hee'oommisa issukko. Ihukkaarem ee ammane ka hundam ki wodanonne maaxxaa sawwittisa kabadu la'ummo. Baaxiilo baxoommisa moo'llootto; i baaxiilom guzumo'lloo'n higgooyyo. Baaxiilo baxumlas iina aayye! muccur ihumta'nnim galaxxamoommoyyo; mashka'oomim sholle'nna edde'aammo; howworonnem ubaammo. I gaaga iimiimaa'umta'n hobbichchisa hochchitaa amaddootto; baddisoo ki malaayyem eesenne dabaransitaa moo'issitto. Eesenne naqqasoo manna hundi ammanem siiddootto; i hanennem ki quunqa eddootto; eese hawwoddeena hundi ammanem haareechchi sawwite o'l gogoxxisa fissititto. «Waa'a! Mahina an qaramoommisa issitto? ayyim moo'oo'n lehaammoota'n eran hee'ukko. Qooccamoo'n gatumta'n; iyyummi godabiinsi ee googom waammoronne aagumta'n e'llam hee'ukko. I umu'l doolli gundayyonnihe? Ka gundi i umu'l doollenne hofqaxam liiramoommisina cawwitaa ure. Daba'llaa waaroombee'i beyyo gambabbi tuunsi yoo baddisoo beyyo maroommi amman afaakko. Maroommi beyyi tuunsi hafii hambalaachchii wo'mmaakkoo uulla; ee beyyonne yoo caakki gagoomim tuunsi'nnoohane» yukko. Naa'ima'i uulliinsi soofaar yakkam manchi «Ka kora'i woshshina hundinam dabachcha uwwookkok bee'ennihe? Mat manchi kaa'n hundam wocu bikkina hanqo'an iheena xanoohonnihe? Iyyooba, kiihaannina ka awwaad bee'i woshshina dabachcha uwwakkambee'eka labissatennihe? Kaa'nnam naacantoottok axeeroo manni bee'eka labissaatennihe? At Waa'ina ‹An hanqo'ane; ki illagennem muccura› yitootto. Waa'i wocaakkoota'nnii hanqo'i dabachcham kiina uwwaakkoota'nnii eran hee'ukko. Hanqo'i qooroo'mmek goog lobakata; Waa'i kiina qooroo'mmeka daphphu luwwa caakkisaakkoota'n Waa'i ki baaxiilina laboo bito miqisubee'isa laqqam hee'llitto. «Waa'ika xillaakkoo maaxaqqi woshsha saarayyitaa laqqeena xantoohonnihe? Te'im hundam xanoo Waa'a saarayyitaa xantoohonnihe? Ixxek qooroom iimaniinsi lobane; at maha issiteena xantootto? Xillaalloomim sii'ooliinsi woroonette; at maha laqqootto? Waa'i qooroo'mmek qeeraa'lloom uulliinsi lobane; dambalaq haraaroomiinsim erisa lobane. Waa'i waaraa keese karaxxi minenne aagisuta'n oogatinam hincaa'uta'n ayyi hoorookko? Waa'i awwaad bee'i manna la'ookko; ixxuwwika jor baxom annannissaa la'ookko. Qawwi manchi qoor ihoohaanniinsi bii'l hallichchi manchi ihaa qaramimmi sholle'ookko. «Ihukkaarem ki wodano xabbeen issitlas ki angam biddiqaa'llaa Waa'a uunxitlas Baaxiilo baximma uttilas jollim ki minenne hee'oobee'isa issitlas Ee ammane xabbitaa tuuttoo'n hundem luwwam moo'llootto; badditoo'nnim qoxxitaa uullitootto. Ki hawwi hundam xaddootto; higaa maru dirisisam sawwitootto. Ki heechchi samgud eelliinchiinsi loboka caakkookko; tuunsim soodaraa'l caakkisa ihookko. Neeyyat yoo bikkina makkixxitaa hee'llootto; Waa'im keese egeroo bikkina kichchechchi bee'eka usheexxitaa hee'llootto. Matem baa'isoo luwwi bee'ekam iinse'llootto. Lobakat mannim keese qooxxaqqookko. Ihukkaarem boqquwwi kee'nnek illi qooqookko; xottam googom siiddamoyyo; ixxuwwi lasaanchim leho» yukko. Iyyoobim dabaraa «Hanqo'i mannaa yimmi ki'nnuwwayyahe! Qooroomim ki'nnuwwinne maqirem leheenayyahe! Ihukkaarem iinam ki'nnuwwaanqax qoossimmi yookko; hore'em ki'nnuwwiinsi mahinnem hoffe'oommoyyo; ki'nnuwwi woccakko'oka manni hundim la'ookko. An Waa'a uunxaa dabachcha siidaammoo manchi ihumta'nnim i beshina osachchi ihaammo. Muccuraa miiqakkam luwwi bee'anee ihumta'nnim osarakkaman ihaammo. Makkixxito'i keen hawwi afu mannanne naaccamo; ubeena tartaru manchom gafe'llamo. Ixxuwwi malaayye Waa'isa issitta'a xiggam keenii boggam keenii Waa'a laggam mannii xumminne hee'llamo. «Ihukkaarem kaba fooraam diinate xa'mmitakkolas losano uwwookko; iima'n ammaram xa'mmehe; ki'nnuwwinam kuttamo. Te'im uullina woce ixxim kiina losano uwwookko, dambalaq woronne hee'oo qurxumme'im kiina kurookko. Waa'ik angi kaka baxukkisa kakeeniinsi hundiinsim la'oobee'ek ayyette? Qooccanchi hundikim heechchii mannik hundikim foorii Waa'i angannette. Allab hurbaaxxeka xee'nna annanni issaa la'oo'isam maccim woshshika duuha'a annanni issaa la'ookko. «Qooroom lommannanonne qoossimmim umur qeeraa'llimminne siidamookko. Ihukkaarem Waa'ina qooroomii malaayyii yookko. Qoossimmii sogitanii uwwamookkokim ixxeensette. Waa'i gindukkoka ayyim dabaraa baxeena xanooyyo; Waa'i karukkoka ayyim tireena xanooyyo. Waa'i xeena hooroo ammane uulli gogookko; xeena uwwoohaare odim uulli dirisinne wo'mmookko. Waa'i malaayyaamoo kaa'oohanee; qawwiisookkokii qawwiisamookkokii lamim ixxi daannoo'm woronnette. Ixxi sogoo keeniinsi qoorooma hoorookko; minaadaphphi awwonsaanom qawwuwwi issookko. Waa'i adilluwwa adilla'n barcumiinsi dilliisookko. Lamadonne gildima lade'lla'a karaxxi minenne karantamisa issookko. Qeessuwwiinsi qeessoomano hooraa hollookko; daannuwwiinsi daannoomano hoorookko. Sogimminne la'anto'oo manna woccam luwwa hooggamisa issookko; lommanniinsim qoossimma hoorookko. Daannuwwi tuuttamisa issookko; malaayyaam kee'nnekim malaayyi hoogoo'isa issookko. Tuunsonne maaxamaa hee'oo luwwa caakkanne fissookko. gambabbaakkoo tuunsom caakkanne dabarookko. Ixxi mulli minaadaba iimiimaa'ookko; odim dabaraa bi'isookko; minaadaba fikkaannisookko; odim dabaraa binnaa'ookko. Uulli minaadaphphi awwonsaano qawwuwwi issookko; goog bee'i udma'i uullannem karkaadisookko. Caakka hoogga'a tuunsonne taftafitamisaa dinbaanchisa tartaritamisaa issookko. Ka ki'nnuwwi yitakkamoka hundam kanniinsi illageenim macceesaammo; hundem luwwam do'ixxaa la'aammo. Ki'nnuwwi laqqakkam qaxa anim la'oommo; ki'nnuwwiinsi hore'em hoffe'oommoyyo. Ihukkaarem an atooraroommuullak Malaayyaam Waa'innette; ixxenne maqirem an fitameena hasoommo. Ihukkaarem ki'nnuwwi qophphaninne wo'mmitakko'oo keeno; ki'nnuwwi ayyem fayyiissakkeena xantakkambee'i qaraa'l manna. Eehanniinsa'i cawwitakka'a uttakko'oota'n qoolluwwa labbakkam hee'llakko'o. «An hincaa'oommi fito macceessehe; i hawwodancham ku'lloommi ammane cawwitakka'a macceessehe. Waa'i summinne mahina qophphano woccakkamuulla? Qawwiisimminnem Waa'a liiransitakkamoka labissakka'atennihe? Te'im ixxena golo'llakkeenannihe? Ixxi bikdu fitantakkeenannihe? Waa'i ki'nnuwwa saarayyuta'n ki'nnuwwanne er luwwa siidoohonnihe? Manna qawwiissakkamisam Waa'a qawwiissakkeena xantakkamoka labissakka'atennihe? Maaxaqqanne golo'llakkolas hanqo'isam Waa'i ki'nnuwwa axeerookko. Ixxi lombi ki'nnuwwa baddisooyyonnihe? Ixxi hibbim ki'nnuwwa muggisooyyonnihe? Ki'nnuwwi kobi'llishshinne woccakkam woshshi gii'lbuchchi'nnoo'i awwaad bee'ane. Ki'nnuwwi fitantakkam fitim buchchi mu'uxxisa iiqamaa uboohane. Hino'o, cawwi'llehe; an woconam kore uwwehe; eehanniinsi lasonne hasu luwwi waarona. «Inqe ga'mmaa hawwummuuyyi hee'oommok mahinatte? I heechchina idiidoommokdu hinki balli afeebe'e? Ee bikkina Waa'i eese shuta'nnim ixxonne neeyyato issoommo; ihukkaarem i meto'o ixxena kuroommo. Baaxiilaanchi manchi Waa'i illage hinceena xanoobee'i bikkina ayyi la'ukko ku i iggimmi i gatimmina mashka'i iheena xanookko. Hino'o, wocoommi woshsha qoossitakka'a macceessehe; an yoommi luwwam erisa macceessehe. Oono'o, i fito laboo'isinne hincaa'aammo. Iina hanqi siidamoo'isam la'oommo. I moollanna at eese baaxiilaanchi issitoohan ihukkaa'lleensi an cawwaa lehoommo bagaan kiinninne fitamoommoyyo. Waa'a! Ki illagiinsi maaxamoobee'isa ka lamem luwwam iina isse. Oohim eese guzumo'oo ki anga i haniinsi ki'ise; baddisoo ki hibbinnem eese muggissitte. «Waa'a! Gaassitaa at woce; an dabachcha uwwoommo. Te'im an wocoommaare at dabachcha uwwe. An haawwodummi luwwii baxummi baaxiilii hinkaa'nna? An gindummi ki seeraa baxummi baaxiiloo hino'o, iina moo'ise. Iinniinsi mahina daphphitoolla? Eese mahina diinakkichchisa xiggoolla? Hafachchi giggissoo buyyisaa gogu bura'isaa ihummisa laqqittuuyyim eese mahina baddissittuuyyi hollitoolla? «At iina qaraaraalli woshsha kitaabbaatto; oosoommanonne baxummi i baaxiilom uttittoyyo. I lokko xaarinne kattaatto; taakke'oommi taakkom laqqeena saarayyitoolla; an hance'ummi beyyom mareessoolla. Eehanniinsi ki'ukkok an shamu luwwisa ihaa gatoommo; bil itu eddechchisam bi'oommo. «Maara edde'aa qaramu manchik umur gunda; oohim hawwinne wo'mmaakkoohane. Fiitisa moo'amaa qaqqisom giggirookko; hafisam lobakata dasoo'n higookko. Eehannah kido'i mancho laseessoohonnihe? Ki illagennem oogatina hincaa'lloohonnihe? Haashaarammi luwwiinsi muccur luwwa siideena xanookkok ayyim bee'e. Mannik umur gaassim qoodamaakkoohane; Hee'oo aganim ki beyyonne xigamaakkoohane; at qoodditti umu'l gabalam higookkok bee'e. Balli baxaanchi ixxi baxo guullaa liiramoohaannisa manchim ixxi umu'l doollenne liiramona cawwihe. «Murakko'i haqqichchinam ihuta'n neeyyat yookko; mashka'oomim daba'llaa lateenaa caafa fisseenaa xanookko. Xaph uulli woronne ebeeruta'n lugumim buchchi woronne shamuta'n wo'o siidulas daba'llaa latookko; haareechcho kaasamu haqqichchisam caafa fissookko. Ihukkaarem manchi lehaa lasage bi'ookko; eehannah foorim maariinsi annannihaa lasonne hannonne siidamookko? Damba'l wo'i goolli ihaa beeddoohaannisa daajji wo'im gogoohaannisa Ee'isam manchi lehaa lasage daba'llooyyo; iiman higeebee'e baqooyyo; diriichchiinsim ki'ooyyo. «Waammi woronne maaxxita'n ki quunqim higeebee'e daphphaa'llita'n iina amadditti ammanem qooddaa eese sawwitta'n iittam hee'ummo. Manchi lehaa lasage daba'llaa foorinne hee'eena xanoohonnihe? an usheexxoommi amman waareebee'e ka gubbanchi doollika lasaancho iyyaqqimminne egeroommo. Ee ammane at eese weeshshootto; anim dabachcha uwwoommo; qooccititti eesem moo'lleena quluxxootto. Ee ammane i taakko hundam laseessootto; ihukkaarem i baaxiilo xiggooyyo. Hawwodummi luwwi hundam haafitootto; i baaxiil hundam shiinshitootto. Ihukkaarem ka uullanne duunnuwwi toroshamaa uboohaannisa geejji kinim beyyiinsi xoqolamoohannisa wo'i kina shiraashiroo'haannisa dirisim buchcha aanshaa massoohaannisa ee'isam at ka hoogaanchi manchi beetika neeyyato bi'issootto. Matemaaggem murte'llaa ki malaayyinne ixxonne ki'llootto; ixxim bi'ookko; ixxi hagaram dabassitaa ki illagiinsi hoottootto. Ixxi oos lomba siiddota'n la'ooyyo; sholle'llota'nnim moo'ooyyo. Xale'i ixxi orachchina xissi macceesamookko; xale'i ixxi hawwi bikkinam wi'llookko» yukko. Teemaa'n uulli Eelfaazim dabaraa «Hanqinam qoor manchi hafachchisa foocamoobee'i woshsha wocoohonnihe? Eelliinchi firoo kolli hafachchisam kora'i sawwit hee'immi hasisoohonnihe? Qoor manchi maham awwaad bee'i woshshannee dabaloobee'i luwwannee fitamoohonnihe? Ihukkaarem at Waa'a baddimma uttaatto; mulli keenim Waa'ina otossitambee'isina qolat ikkoolla. Baaxiilaanchi ikkittis woccoo woshshinnem la'isoolla; ihukkaarem qooroo'm woshshinne baaxiilooma ifiisseena yakitoolla. Keesenne oogatoollak ki allabome bagaan aneyyo; naqqasoollakim ki suumeme bagaan aneyyo. «At manniinsi hundiinsim gaassitaa qarantaatennihe? Te'im duunnuwwi qoocameena illageenim at qarantaatennihe? Hanqo'isam Waa'ika maaxaqqi woshsha macceessaahinnihe? qooroom uwwamukkok xale'i kiinattennihe? Neese lanqoommaanniinsi mullek at laqqoo luwwi maruwwa? Niinniinsi daphphaa kiina caakku qooroom mah yookko? Umuranne kiyyanniinsi lophphitam keen horoor abo'aakkoo lommannim sawwitenne niinninne yo'o. «Waa'i ni kollinnetti ihaa kiina kuroo luwwi ixxeensi kiina uwwoo sabiraatii hoffe'aatennihe? Ki wodano mahina duudissoolla? quunqinnem mahina leencitoolla? Waa'anne quuqqaa kido'i sagar ki suumiinsi firoo'isa issu luwwi maruwwa? Manchi muccur iheena xanoohonnihe? Waa'i illagenne hanqo'an iheena xanoo manchi yoohonnihe? Waa'i ixxi asse'amaanonnem ihuta'n bakke'ooyyo; iimanem ihuta'n ixxi illagenne muccurayyo. eehannah haashaarammaa shigigaa'oohanee ihaa baaxiilo wo'isa agoo manchi hinkaa'nna amma'nnamookko! «Iyyooba, hino'o, kuroommo macceese; an moo'ummoka hundam kuroommo. Qoolluwwi keen ixxuwwi anno'iinsi aa'llo'i hanqa maaxxoo'n wocco'oka kiina kuroommo. Uulli ixxuwwina xale'e uwwamaa hee'ukko; mulli uulli mannim ixxuwwi lambe'enne hamaaranto'oyyo. «Manna u'nnisukkuuyyi hee'oo boqqi manchiinsi umu'l doolli hundam hawwi annannihooyyo. Ixxi maccenne muggisoo sagar hundi ammanem macceesamookko; ‹xumminne hee'oommo› yaa sawwoo ammane fanguwwi ixxonne hawwo afissamo. Ixxek saam bisa'inne lehimmi ihu bikkina tuunsiinsi gibaa xoroo neeyyat bee'e. Ixxi maar ammarina hurbaat ihookko; oo manchi ixxena balli tuunseena hincukkisa la'ookko. U'nnii kichchechchii ixxo baddisookko; orina gudu adi'llisam malaayyookko. «Mashka'oomim ku manchi ixxeka woda Waa'anne hanenne ki'isaakko; hundam xanoo Waa'annem iggaakko. Geejji qoxxaalli agira amadaa Waa'inne uullixxameena firaakko. Illi kolli di'irinne ifiisamuta'nnim gubeedim geejjuta'nnim. «Ku manchi gindamaakkoo beero'uwwannee ubeena hincaakkoo diih minneewwannee hee'ookko. Ixxi kanniinsi eehid goddaanchi ihooyyo; horim ixxenne maqire hee'ooyyo; ixxi ammaxxim uullanne haraarooyyo. Tuunsiinsi xoreena xanooyyo; caaffuwwi giirinne shokkukkaannisaa fiitim hafachchinne giggiru haqqichchisaa ihookko. Ixxi gaga qawwiisukkuuyyi kora'i luwwanne bakke'u bikkina awwaad bee'an ihaa gatookko. Amman afoo'nnim lugum gogoo haqqichchisaa caaffuwwim la'mmaagge latoobee'aannisaa ihookko. Mishoo'nnim hamaraar giggiroo woyi'n xudisaa fiit giggiroo wee'l haqqichchisaa ihookko. «Waa'a baddoobee'i dummichchik shumo'i bi'ookko; maqanxinne baxamu minneewwim giirinne shokkookko. Eehido'i manni jor luwwa sawwitamo; hantaarom baxxamo; ixxuwwi wodan qawwiishshi sawwitinne wo'mmaakkoohane» yukko. Iyyoobim dabaraa «Kaka labookkoka lobakata dut woshsha macceesaammo. Ki'nnuwwi qoxxissakkam manna labbakku'uuyyi kichchechchanne hanenne kichchechcha eddakkam keeno. Ka awwaad bee'i ki'nnuwwi woshshina lasaanchi bee'anennihe? Iinninne kaa'nna fitantakkamisa issu mashka'i maruwwa? Ki'nnuwwi i beyyonne ikkakka'a an odim ki'nnuwwi beyyonne ihaammoota'n gadaa horoore heekkeesummuuyyi kaba ki'nnuwwi yitakkamoka hundam axisaa ki'nnuwwanne wocimma xanam hee'ummo. Ee'isam i sogitaninne kinnuwwa qoxxiseenaa qoxxitakkamisinam lobakata woceenaa xanam hee'ummo. «Ihukkaarem lobakata wocumta'nnim fayye'oommoyyo; iyyaqqaa cawwumta'nnim u'n iinniinsi annannihooyyo. Waa'a! Kabada'i hoogissaatto; i abaroosa hundam bi'issaatto. Diina'isa u'nnissaa amaddaatto; i orachchim nacaakko; manni ‹Ku hundim afukkok baxu baaxiilinnette› yoolla. Waa'i eesenne quuqaa i orachcho muransukko; eese sabaa u'nnisukko; nadadaatini inqiicukko; i diinakkichchim ixxi ille eesenne xuxxaa'aakko. Minaadab i kululleetanne wixxita'a eesenne naacanto'o; gadda'atim i xabano oobo'inne aphphisso'o. Waa'i jor mannina eese higisaa uwwukko; boqquwwi kee'n angannem ubbuusukko. Xummam hee'am hee'ummo; ihukkaarem Waa'i ixxi quunqinne iiqansaa urukko; i leella'am xagaraa deexukko; qasimma losakkeena uullisakko'i mare'isam issukko. Xiyya kolli hundinnem darabaa eese madisukko; murom qishixxat bee'eka qasaa muransukko; dambom uullanne dunukko. Edaa edaatim omassukko; malaayyaam o'l manchisam xophxophaa aphphisukko. Kichchechchi lophphimmiinsi ki'ukkok xiddi eddechcha edde'ummo; kaa'amaatim buchchanne ubummo. Lobakata wi'llummi bikkina illi kasharaakko; i illi kollim dashshaa heemachchaakko. Ihukkaarem an baxummi baaxiil bee'e; uunxatom Waa'i kollonne hincaa'oommok muccur wodaninnette. «Uulla, eesenne afu barche'e maaxxitte; hanqa siideena laaroommi laachchim ifiisamaa gatoo'isa issititte. Oono'o, i bikkina naqqasookkokii i bikkina fitamookkokii iimanenne yookko. I besh gadimminne moo'llota'nnim an Waa'i illagenne i indiidda dunoommo. Manni manna araassoohaannisam mannaa Waa'aa araassoo manni hee'uta'n erane. I umullek lasaanchi hincoolla; daba'lloombee'i beyyom mareenam hofqax amman gataakko. «I umu'l doolli beeddeena hincaakko; fooshshe'immam hoogaammo; waammanne di'llimmiinsi bagaan gatu luwwi bee'e. An naacantam keenina lelli ihaammo; eese sabbamisam moo'oommuulla. Waa'a! Kiinniinsi bagaan iina hara'mmaanchi bee'i bikkina at ki gagim lubbataanchi ihe. Qoossitambee'isa ixxuwwika wodano amaddaatto; ee bikkina ixxuwwina kaachcha uwwititte. Diinate siideenaa yaa ixxi beshichcho jorina higisaa uwwoo manchik barche'i ixxi oosonne afookko. Waa'i eesenne manni osaroo'isa issukko; manni ixxi illenne anja tufoo manchisam ihummo. Kichchechchiinsi ki'ukkok i illi jaamukko; i orachchim higoo hafisa ihaakko. Hanqo'i manni ka woshshanne muggito'ookko; muccur mannim boqquwwi keenonne quuqqo'ookko. Ihona bagaan muccur manni hanqo'i googiinsi fittamoyyo; ixxuwwi malaayyenne hanenne malaayye eddu'uuyyi mattamo. Ihukkaarem ki'nnuwwi hundim daballitakka'a waattakka'a iinninne fitantakkota'n ki'nnuwwi lambe'iinsi mat qooram siidoommoyyo. «I umu'l doolli beeddaakko; i sawwitii mixanii kora'am gataakko. Ku manni hiimo, balla yitamo; caakka odim tuunseenatte yitamo. Kannii eehid iina yoo gada'i waammamimma; eekke'ennem tuunsonne iinse'oommo. Waammam ‹Iyyanna› yaa weeshoommo; eese itoo daquuram ‹Iyyumma› te'im ‹Iyyaayya› yoommo. Eehannah iina ma neeyyat hee'aate? Iina neeyyat ihoo luwwam ayyi moo'ookko? An waammamummuuyyi i neeyyat iinninne maqirem waammoronne dilloohonnihe?» yukko. Shuha'i uulliinsi Bildaad yakkam manchi dabaraa «Iyyooba, mahina woshsha lonsitoolla? Hino'o, neese woncoommi woshsha erisa macceese. At neese mahina fooraam diinaxxisa xiggoolla? mahina qoossimbee'i gawwuwwisa issitaa moo'lloolla? At quuqqittaare ki gaga hawwoddootto bagaan ki quuqimminne uulli udma'i ihaa gatoohonnihe? geejji kinneewwim beyyiinsi xoqalamooyyo. «Baaxiilaanchik caakki xoo'ookko; gii'l labanim diffaa bi'ookko. Ixxi dukkaa'nnek caakki tuunsookko. Taakke'oo malaayyim hoogookko; ixxi sawwoo hantaarim ixxo ubbuusookko. Ixxi gaqqi lokkinnem maraa qaashanne amadamookko; shikkim lokkonne xaaxamookko. Qaash ixxeka sinxichcho amadookko; shikkim xammammaa'aa amadookko. Uulli baddimmi us ixxena biddiqaakko; taakke'oo googonnem qaash gudaakko. «Ixxi kululleetanne muggisoo luwwi ihookko; laseesaatim hollookko. Ixxi malaayyi hundim sibaarinne beeddaakko; boobanim bi'iseena gudaakko. Shoo jabbi ixxo amadaakko; angaa lokkoo hundam itaakko. Kichchechchi bee'eka amma'nnamaa hee'oo miniinsi hollamaakko; hundam baddisoo lehina ushe'amookko. Ixxi min giirinne shokkookko; ixxi minennem bukkamukkuuyyi aphphoo kin binnookko. Xaph luguminne gogoohaannisaa caaffuwwim giggiroo haqqichchisaa ihookko. Ixxek sad uullinsi bi'ookko; dummichchi beyyonnem ixxi summa tiirookkok hee'ooyyo. Caakkiinsi tuunsonne hollamookkoo; ka uulliinsim bi'ookkoo. Minaadaphphi lambe'enne ixxena qachchi te'im shumo'i hee'ooyyo; hee'u uullannem ixxi beyyo lago aa'ookkok siidamooyyo. Eelliinchi firoo beyyiinsi aagoo beyyi afeebe'e yoo manni ixxonne afu hawwo macceessa'a baddimminne huxe'llamo. Hinki ammanem jor manchikii Waa'a baddoobee'i manchikii lasaanchi saam kane» yukko. Iyyoobim dabaraa «Eese u'nnissakkamok hinki balli afeebe'e? Woccakkam woshshinne i malaayye hoogissakkamokdu hinki balli afeebe'e? Oono'o, tommi kore eese game'llitokko'o; sholliissakku'uuyyim hofqaxam tuuttakko'oyyo. Hanqo'isam huushamaammoohan ihulas i gaga hawwodamoommo bagaan ki'nnuwwa hawwodoommoyyo. Ihukkaarem ki'nnuwwi gaga iimiimaa'llakka'a i sholle'nna iinninne fitantakkeena awwaaxxitakkamuulla. Ihukkaarem ka hawwo hundam eesenne afisukkokii qashanne amadamoommisa issukkokii Waa'i ihukkisa laqqehe. ‹Hawwodamummo› yaa laarummaarem macceesookkoka siidummoyyo; sagara iimaa'aa laarumaarem hanqa siidoommoyyo. Waa'i i goog hundam xufu bikkina higoommi goog bee'e; maroommi kollom tuunsinne ifiisaakko. I adilla'n mare'e i horooriinsi massaakko; i lombam sheelataa hooraakko. I orachcho kolli hundinnem qocca gindaa guullukko; iina yoo neeyyatam xaph xoqolamaa uboo haqqichchisa issukko. Waa'i ixxi quunqika bala'a eesenne dilliisukko; malaayyaam diinakkichchisam xigukko. Eese bi'iseena ixxi gogota asse'ukko; ixxuwwim i dukkaa'n kululleetanne girba axissa'a eese kibbito'o. «Waa'i iyyabbaayyuwwi iinniinsi qee'llitamisa issukko; eese laqqam manni hundim eese allaggisso'o. I qarmanni iinniinsi qee'llukko; i beshim eese xadukko. I minenne koyyinano aa'ummi keen hundim eese xaddo'o; i minenne baxxam meenti awwaadaanim eese waaraanchisa issito'o; allaggichchisam moo'llo'o. I awwaadaanchim weeshoommaare dabachcha uwwooyyo; hara'mmoo'isina uunxoommaarem ha'yyooyyo. I meentichchonam i fooshshi sabisaakko; iyyabbaayyuwwim eese shigigito'ookko. Ciilluwwim eese gaddo'ookko; eese moo'lla'atim osatto'ookko. Hincee'n beshim eese shigigito'ookko; erisa iittoommi mannim diina'i ikka'a eesenne ki'llo'ookko. I maar beeddaa omachchi miqinne amaxxamaakko; lehiinsi gatummokim hofqaxinatte. «Iyyabbaayyuwwa, Waa'ik angi eese aphphisu bikkina Ki'nnuwwi iina kichche'llehee qishixxehee. Waa'i eese yaayyukkisam Ki'nnuwwi odim eese mahina yaayyitakkamuulla? Kabad afeebe'e u'nnissakko'i qax ihooyyonnihe? «Kabad afeebe'e wocummi sagara sawwookkokii kitaabannem kitaaboo manchii hee'uta'n hinkaa'nna liiramam hee'ummo? Heer heerina hee'oo'isina xaa'l qalaminnee irsaasinnee kinanne kitaabakkota'n hinkaa'nna eran hee'ukko. Ihukkaarem eese gatisaanchi hee'oohan ihukkisaa lasaanchi ammanennem eese gatiseena uullanne uulloo'isaa la'oommo. I omachchi itamaa beedduta'nnim i maariinsi annannihaa Waa'a moo'oommisa la'oommo. An i gagim ixxo moo'oommo; mullan ihoo'n i illi ixxo moo'ookko; ee bikkina i wodan ee ayyaamo erisa quluxaakko. «I besha, eese aceeqassakku'uuyyi u'nnissakkeena ‹Ixxonne afu hawwik mashka'i ixxi gagame› yitakku'uuyyi woccakkamuulla. Waa'ik quunqi bisa'inne guzumo'amakkamisa issoo bikkina bisa'inne bi'llakkambee'isa ege'llehe; Waa'ik oogat yoo'isam laqqehe» yukko. Naa'imaaxxi uulli Soofaarim dabaraa «Iyyooba, woccoo woshshi nadadiisu bikkina dasoo'nnim dabachcha uwweena hasaammo. Game'llaxxi sagara macceesummi bikkina dabachcha uwweena gaaggaabaammo. «Manni ka uullanne qooccamukkaanniinsi ki'isaa gaassiinsim ka'isa ihukkisa laqqootto. Baaxiilaan mannik sharimmi hoffi ammaninatte; Waa'a baddoo bee'i mannikim liiranchi illi cilimmaaxxi qaxanne bi'ookko. Boqqi manchi iimane afoo qaxa iimiimukkaarem horoorim duuba nakkuta'n Ixxi gaqqi shu'mmisa heer heerina bi'ookko; ixxo laqqam manni hundim ‹Hanno afukko?› yitamo. Haqaawwisa bi'oo bikkina siidamooyyo; hii'm ajuuttisam la'mmaagge moo'amooyyo. Hee'oo beyyiinsi bi'oo bikkina mataagge moo'u manchi la'mmaagge moo'ooyyo. Ixxi buxiinsi malaayyisaa massu amaxxa ixxi oos worwaatta'a miqqamo. Malaayyaam hee'u ixxek woradda'n orachchi hofqax ammaniinsi lasonne buchchi ihookko. «Jolli ixxi suumina hurbaaxxisa xee'uta'nnim ixxi allabinnem xee'ixxamuta'n beeddoobee'isa suumenne amadaa dabaransukkuuyyi hosuta'nnim hurbaatoom godaphphi woronne qaraarookko; hamashshi qubisam ihookko. Boqqi manchi itu hora goxxamookko; Waa'im dabaraa ixxi godaphphi woriinsi fissookko. Boqqi manchi itoo luwwi hundim shoo qaraa'llisa ihookko; hamashshi qubisa ihaatim shookko. Wee'l zayti dirisisa dillukkuuyyi marabii adii daajji wo'isa daadukkuuyyi moo'oo'nnim lehookko. Badaru luwwika misha dabaraa uwwookko bagaan itooyyo; daddaraa siidu luwannem liiramooyyo. Mashka'oomim bux keeno ciimaa maxaraakko; baxubee'i minem malaayyinne hooraakko. Ixxek jor mixanim ixxena usheexxato uwwooyyo; wixxaa'u hor hundim ixxo gatiseena xanooyyo. Ixxi amaxxi hundam beeddoo bikkina soodina itoo luwwa siidooyyo. Makkixxaa hee'onam ixxonne qeddi afookko; kee'mmaalli hawwonnem ubookko. ‹Itaa goddoommo› yukkuuyyim Waa'i ixxeka kee'mmaalli quunqa dilliisookko; bala'am ixxi hanenne ga'nnisookko. Xaa'l bisa'iinsi xoruta'nnim naas xiyyi qasookko. Xiyyim huruuraa afareen firookko; belelleesoo ludim afare muransaa firookko; kee'mmaalli baachchim ixxo amadookko. Wixxaa'u amaxxi hundim gambabbi tuunsonne bi'ookko; manni xanqisubee'i giirim shokkiisookko; minenne gatu amaxxi hundam giir itookko. Iiman ixxi baxu baaxiilo caakkisookko; uullim ixxena masokkichchi ihaa ki'ookko. Waa'i quuqoo ayyaamo ixxi minenne yoo amaxxi hundam diris aanshaa massookko. «Waa'i baaxiilaan keenina qoodu gada'ii ixxi beyyiinsim gudisu sharadii kane» yukko. Iyyoobim dabaraa «Hino'o, wocoommi woshsha erisa macceessehe; oohim eese qoxxissakko'aannisanne xigamookko. Mataagge wocoommi kore uwwehe; ee lasage hassakko'i qaxa eesenne osattakkeena xantakkamo. «Hanqinam an kichche'oommok mannannettennihe? iyyaqqimma hoogumta'ndu iina labooyyonnihe? Hino'o, i kolli moo'llehe; wocimma hooggakkam qaxa i duuha'i kinnuwwa hiriraa'ookko. An i gagim sawwoommaare muggisookko; i orachchim baddimminne huxe'ookko. «Boqqi mannik umur qeeraa'llaa amaxxim lophphaa uullanne hee'llamok mahinatte? Ixxuwwim oosoo oos oosoo lilla'atii makkixxita'atii hee'llu'uuyyi moo'llamo. Matem kichchechchi bee'em xumminne hee'llamo; Waa'ikim booban ixxuwwanne afukkoyyo. Fooraam diinat matem hawwi bee'em fikkaannookko; larim kara qarooyyo. Ixxuwwi oos gereebbi allaachchisa fatakitamo; ixxuwwi ciilluwwim daabbattamo. Dibbe'ee diitta'aa aphphissu'uuyyi xurumbam fuggu'uuyyi liiranchinne kaddamo. Ixxuwwi umura makkixxita'a higissamo; matem hawwom moo'lloo'n letamo. «Ee'isa ihaa hee'ukkuuyyim Waa'ina ‹Niinniinsi qee'lle; ki googom lanqeena hansoommoyyo› yitamo. Ee'isam ‹Ixxena awwaandoommisina hundam xanoo Waa'i ayyette? Ixxo uunxinummaardu maha siindoommo?› yitamo. Ka'isa yitamokim ixxuwwi anganne yoo amaxxi hundim ixxuwwi malaayyinne siidamukkoka labissam bikkinatte; ihukkaarem an baaxiilaan kee'n sogitano aa'oommoyyo. «Baaxiilaan kee'n caakki xoo'u amman yoohonnihe? Boobandu ixxuwwanne dillu amman yoohonnihe? Waa'i quuqaa ixxuwwa guzumo'u ammandu yoohonnihe? Hafachchi massoo bura'isa ikko'i amman hambu'llam massoo luunqisa fii'anto'i ammandu yoohonnihe? «Ki'nnuwwi ‹Anno'i baaxiilinne Waa'i ooso guzumo'ookko› yitakkamo; hino'o, Waa'i baaxiilaano ixxuwwi gagam guzumo'ona; eehid ihulas ixxuwwi baaxiilo laqqeena xantamo. Baaxiilaan keen ixxuwwi gagim baxxo'i baaxiilinne guzumo'antona; hundam xanoo Waa'im ixxi quunqa dilliisona. Manchi lehaa lasonne ixxi abaroos bikkina mah sawwookko? Lob keenonne oogatoo Waa'ina lachcha losiseena xanookkok yoohonnihe? Mat manchi xumminne usheexxaa afuurukkisam wo'm malaayyinne hee'ukkuuyyim lehookko. Orachchi geejjaa mishisukkuuyyim miqim qoxxukkisam lehookko. Mullek odim mat eroommam moo'oo'n heechchi qaraarukkisam lehookko. Hundim waammoronne dillita'a buchchi ikkamo; daquurim ixxuwwa itookko. «Oono'o, eese hawwoddakkeena a'llantakko'oka Ki'nnuwwi wodanonne sawwitakko'i hantaaro la'aammo. Ki'nnuwwim ‹Ee lob manchik min hannonnette? Ee baaxiilaanchi manchikdu gatti beyyi hannonno?› yitakkamo. Gooqqi araata xa'mmitakko'oyyonnihe? Kutto'i woshdu erisa macceessakko'oyyonnihe? Ixxuwwim ‹Boqqi manni booban waaroo ammane hawwodantamoyyo; Waa'ik quunqi waaroo ammanem gattamo› yita'a wocco'ookko. Boqqi mancho baxu jolli bikkina acceeqasookkok ayyette? Baxu jolli bikkinam guzumo'ookkok ayyette? Lehaa lasonne leesha iyyakka'a waammi beyyo massakkamo; waammim erisa egeramookko. Xigiinsi hanaan ihaakkoo minaadab waammakkam ammane hee'ookko; waammi buchchim ixxena makkookko. «Eehannah ki'nnuwwi kora'i woshshinne eese qoxxissakkeena mahina yakitakkamuulla? Dabattakkam dabachchim qophpha'nnane» yukko. Teemaan uulli Eelfaazim dabaraa «Manchi Waa'ina awwaadeena xanoohonnihe? Qooram ihuta'n awwaadookkok ixxi gaginatte bagaan Waa'ina awwaadooyyo. Ki muccuroom hundam xanoo Waa'ina maha awwaadookko? Te'im miiqakkam luwwi bee'i baxo baxxita'ndu ixxena maha awwaadookko? At Waa'a badditoohan ihuta'n ixxi keese axeereenaa keesennem oogateenaa hasam hee'ukkonnihe? Ki jolli lophphaakkoohaneyyonnihe? Ki baaxiilinam tungi bee'aneyyonnihe? Mat mashka'i bee'ekam kiyyabbaayyuwwiinsi dabbaa massitaatto; mulli manniinsim eddechcha maxattaa leexa'issaatto. Xeebe'ukkaannina wo'o hoottaatto; sibaarukkaaninam hurbaata hoottaatto; Malaayyee daannoomaa bakke'llaa mannika uulla hoottaa ki gaqqi amaxxa haraassitaatto. Goon lehu meentom leexa'i angam hollitaatto; adaraar oosikam amaxxa bi'issaatto. Ee mashka'inne oono'o at qaashinne kibbaantaatto; dangonne afoo hawwim keese dambaqisookko. Moo'lloobee'isa tuunsi ifiisaakko; dirisim keese xuuxaakko. Waa'i hanaan yoo iimanenne hee'oohaneyyonniyye? Boollaanki maham hanaan yoo beyyonne ihuta'nnim ixxi ee keeniinsi hanaan ihaa moo'ookko. Ihukkaarem at ‹Waa'i maha la'ookko? Gambabbaakkoo tuunsi woronne ihaa hinkid eesenne oogateena xanookko? Iimanenne daba'llamukkuuyyi gambabbaakkoo duub ifiisoo bikkina moo'eena xanooyyo› yitoolla. «Baaxiilaan daba'llantam hee'llo'i gaassi googonne taakke'lloollannihe? Ixxuwwi amman afoo'nnim leto'ookko; dirisinnem aanshanta'a ixxuwwik beyyi bi'aakko. Ixxuwwi hundam xanoo Waa'ina ‹Niinnii qee'lle; at niina maham issiteena xantooyyo› yito'o. Ihukkaarem ixxuwwi mine er luwwinne wonshukkok Waa'a; ee bikkina an baaxiilaan kee'nneka sawwite aa'oommoyyo. Baaxiilaan manni guzumo'antu'uuyyi moo'lla'a muccur manni liirantamo; miiqakkam luwwi bee'i mannim ka'isa yitu'uuyyi ixxuwwanne osattamo. ‹Hanqo'isam ni diina'i bi'llookko; ixxuwwi amaxxi hundim giirinne shokkaakko›. «Ee bikkina Iyyooba, at Waa'ina ho'llame; ixxe maqirem kiina xummi hee'ona eehid ikkittaare maasso siiddootto. Waa'i kiina uwwoo sogitano aa'e; ixxi sagaram ki wodanonne disse. Ki gaga heeshaa'llaa hundam xanoo Waa'i kollonne daba'llitilas baaxiilom ki miniinsi qeessittilas Worqam buchchanne ubbuussilas Oofii'l uulli worqam dajji woro'l ki'n lambe'enne darabbilas Hundam xanoo Waa'i kiina worqaa bito xee'aalli kin biraa ihookko. Ee ammane Hundam xanoo Waa'anne liirantootto; ixxonnem amma'nnitaa hee'llootto. Ixxi kollonne uunxitoo ammane uunxitti luwwa hundam uwwookko; atim uga'a uwwitootto. Sawwititti sawwit hundim wo'mmookko; mattoo goog hundim caakkookko. Waa'i bolxitam keeno sholliisookko; ihukkaarem gaga heeshaa'llam keeno gatisookko. Ki wodan muccur ihuta'n Waa'i keese jor hundiinsim egerookko; ki angim baaxiiliinsi muccur ihuta'n Waa'i keese gatisookko» yukko. Iyyoobim dabaraa «Kabadem i wodan qaraaraalli kichchechchinne wo'mmaakkoohane; mashka'oomim qitinummuuyyi laarumta'nnim Waa'ik angii eesenne kee'mmukkisam yookko. Ixxi yoo beyyo la'umta'n eran hee'ukko; hee'oo beyyom afumta'n liiramam hee'ummo. I meto'o ixxi illagenne hincaa'am hee'ummo; i gaginam uullaa fitamam hee'ummo. Iina uwwoo dabachcha la'am hee'ummo; iina mayyooda'em qoossaa la'am hee'ummo. Eehannah Waa'i ixxaanninne lob malaayyinne eesenne oogatoohonnihe? uunxoommoka hundam uwwookko bagaan eehid issooyyo. Muccur manchi ixxi meto'o Waa'i illagenne hincaa'ookko; iina oogatoo Waa'im eese wolabbanonne fissookko. «Ihukkaarem eelliinchi firoo kollonne marumta'nnim eekke'enne bee'e; eelliinchi aagoo kollo daba'llumta'nnim siideena xanummoyyo. Waa'i hanaa'n qarinne ixxi baxo baxoolla ihukkaarem an siideena xanummoyyo; woroo'n qaranne daba'llummaarem siideena xanummoyyo. Ixxi an taakke'oommi taakko hundam la'ookko; eese keenuta'nnim worqisa muccur ihaa firoommo. Ixxi iittoo googonne amma'nnanchinne daba'llamoommo; lam tiir ihaa makkannee qeddannee maroommoyyo. Hundi ammanem Waa'i ijaajo egeroommo; ixxi sagaram i wodanonne dissaammo. «Waa'i dabassamooyyo; ixxenne uullixxameena xanookkokim bee'e; ixxi iittukkoka hundam issookko. I bikkina sawwukkoka hundam issookko; eekka laboo lobakat sawwitim yookko. Ee bikkina ixxi illagenne uullimma iina lobakata baddisookko; eekka sawwoommi ammanem baa'oommo. Waa'i i wodan hoogoo'isa issukko. Hundam xanoo Waa'im eese muggisukko. Maham gambabbi tuunsi i ille ifiisuta'nnim tuunsik malaayyi woceena hoorukkoyyo» yukko. Hundam xanoo Waa'i oogato uwwoo ammane mahina amadooyyo? Ixxi awwaadaandu ixxi oogaxxi sagara hinki balli afeebe'e egettamo? «Boqqi manni uulla haraasaqqiteena gabala ginditamo; gereebbam malaayyissa'a hootta'a ixxuwwi allaachchinne eddamo. Adaraar oosika hallichcho malaayyissa'a hoottamo; goonchi bee'i meentichchokam mirgo'o amadda'a massitamo. Bux keeno shigigita'a googiinsi hollitamo; uullanne yo'i hawwaanim ixxuwwiinsi maaxamtamisa issitamo. «Bux keen udma'i uullanne hee'oo bii'l hallisa ixxuwwi oosinam hurbaata hassu'uuyyi qondooddamo. Balli baxaan ikka'atim mulli manni hurbaata wixxaa'llamo. baaxiilaan kee'n woyi'n woriinsim giggira feettamo. Hiimooma hundoomam leexa'am iinse'lla'a gattamo; qiidina edde'llam eddechchim bee'e. Duunanne ga'nnoo xeen ixxuwwi orachcho aashisookko; gattam beyyo hogga'atim geejji ki'n lugumonne gattamo. «Anni lehu ciila ixxuwwi baxaanchi issiteena am anuuniinsi hootta'a massitamo; hawwaa'n oosom badanina amadda'a massitamo. Bux keen eddechcha edde'lloo'n leexa'am baxina mattamo; hurbaata wixxaa'akkam agana farshimma iyyita'a gugguttu'uuyyim sibaattamo. Boqqi kee'n kaashshi beyyonne wee'l mishiinsi zayta ciinsitamo. woyi'n mishiinsim woyi'n diqaasa lubbamo; ihukkaarem ixxuwwi xeebe'llamo. Beero'uwwanne leteena wotta'llam manni diintamo; omatto'i mannim hara'mmato hassa'a laattamo; ihukkaarem Waa'i ixxuwwanne baxakko'i barche'e moo'ukkoyyo. «Caakka ha'yyitambee'i manni yo'o; caakki mada'ee laqqambee'i bikkina caakki googo awwontamoyyo. Manna shookkok soodoo'nnim daram ki'aa buxaa hawwaanoo shookko; hiimom gamina marookko. Saa'oo manchi uulli hiimoo'isa egerookko. ayyim moo'eena xanoobee'eka labisaa illi kollo ifiixxookko. Gamaan mine hinta'a gamina aaggamo; ihukkaarem caakka ha'yyitambee'i bikkina balla maaxamta'a hossamo. Gambabbaakkoo tuunsi ixxuwwina soodaraa'llisa; baddisoo tuunsim ixxuwwina beshichcho. «Ihukkaarem ixxuwwi wo'onne hanenne moo'amoo himbisa hofqax ammanina moo'antamo; ixxuwwi gaqqi uullim duumamaakkoohan ihookko. Ixxuwwi woyi'n kaashshi beyyom marookkok hee'ooyyo. Barad iibbinne bukkamaa wo'om billi gokkisoohaannisa baaxiilaan keenim leta'a bi'llamo. Ixxuwwa qaru ammo'im ixxuwwa xadookko; ixxuwwi maara daquur itookko; boqquwwi keen haqqisa ubba'a iiqantamo; ixxuwwa tiirookkokim hee'ooyyo. Ixxuwwi oos bee'i alceenni meento boggo'oo bikkina goon lehu meentina eroomma issitobee'i bikkinaa ku hawwi hundim ixxuwwanne afukko. Ihukkaarem Waa'i ixxi malaayyinne malaayyaammuwwa bi'isookko; makkixxitota'nnim ixxuwwina heechchi lubbat bee'e. Waa'i xumminne hee'llamisina cawwukkaarem ixxuwwi mattam googo hundam qoossaa moo'ookko. Baaxiilaan manni hofqax ammanina iimiimitamo; ihukkaarem qaqqisom bochchisa quubba'a bi'llamo; wix hurbaaxxisam murantamo. Eehid ihubeelas an qophphanaanchi ihummisaa wocummi sagarim hanqi ihubee'isaa la'isookkok ayyette?» yukko. Shuha'i uulliinsi Bildaad yakkam manchi dabaraa Daannoomii hibbii Waa'ane; hanaan ixxi adilla'n beyyonnem xumma qooccookko. Ixxi gogota xigakkeena xanakkamonnihe? Ixxi caakdu caakkoobee'ek ayyenatte? Manchi Waa'i illagenne hinkid muccur ihaa siidameena xanookko? Manchi beet ihaa qaramaa ‹An muccura› yeena xanoo manchi yoohonnihe? Waa'i illagenne aganam ihuta'n erisa caakkooyyo; boollaankim ixxi illagenne muccurayyo. Tushekkichchisaa daquuchchisaa ihaakkoo mancha'e Waa'i illagenne hinkaa'nna hoffe'ookko?» yukko. Iyyoobim dabaraa «Kaka wocci bikkina qacaalla hara'mmittoka labissaatennihe? Malaayyi hoogukkokam qoxxissittoka labissaatennihe? Qooroom hanqatukkaannina mah sogitano uwwitto? La'oo'isa issitti lachdu mah yookko? Ka sagara woccoo'isina hara'mmukkok ayyette? Ki allabo awwaaxxukkokdu ayyi ayyaana? Bildaadim «Lehu mannik foor uulliinsi woroon yoo wo'i woronne ihaa huxe'ookko. Leto'i manni hee'llam beyyi Waa'i illagenne caakka; matem luwwim ifisseena xanooyyo. Waa'i hanaa'n qarinne yoo iimane waaqaabuutanne biddiqaa'ukko; uullam mahim bee'i beyyonne calcaloo'isa issukko. Duubim wo'o iyyoo'isa issookko; duubim wo'o iyyimma hoogaa dereeramooyyo. Aga'nneka caakka duubinne ifiisookko. Caakkaa tuunsoo annannissoo'isina wo'onne uullika tochcho gabal issaa gudisookko. Waa'i axeeroo ammane iima'n utubbuwwi muggaa heekke'ookko. Ixxi malaayyinne dambalaqa cawwoo'isa issookko; ixxi qooroominnem Ra'aaba yakkam lob moochchichcho muransookko. Ixxi fooshshinne iimane muccussookko. ixxi anginnem bararoo hamashshichcho qasookko. Ku hundim Waa'i baxu baxiinsi hofqaxooma; ku macceensummok hofqaxooma; Waa'ika malaayyi guga ayyi qoosseena xanookko?» yukko. Iyyoobim wocukkuuyyi «Hanqo'i oogato hooraa i heechchi erisa qaraaroo'isa issu hundam xanoo hee'oo Waa'i summinne hide'oommo; Waa'i iina foore uwwaa fooshshe'ummuuyyi yoomqaxanne i suumiinsi hore'em jor sagar firooyyo; i allabim qophphano wocooyyo. Ki'nnuwwi woccakko'oka hundam hanqaa yaa hore'em amma'nnoommoyyo; leheembee'i afeebe'em i muccurooma fatakoommoyyo. I muccurooma fatakoombee'isa qoxxisaa amadoommo; i heechchi doollenne hundannem i itiir eese acceeqasooyyo. «I diina'ii eese sabbam keenii hundim baaxiilaanchisaa boqqi manchisaa guzumo'antona. Waa'i ixxuwwika foore maariinsi annannissaa ixxuwwika umura gundisoo ammane Waa'a laqqambee'i keenina mah neeyyat hee'ookko? Hawwi ixxuwwanne afoo ammane Waa'i ixxuwwi laachcha macceesoohonnihe? Ixxuwwi hundam xanoo Waa'anne liirantamonnihe? waadu hundi ammanem weeshshamonnihe? «Waa'ik malaayyi hinkaa'nna loban ihuda'e ki'nnuwwina losisoommo; hundam xanoo Waa'i sawwitem maaxoommoyyo. Ki'nnuwwim ka hundam laqqakkamo; eehannah ka awwaad bee'i woshsha mahina woccakkamuulla?» yukko. «Oono'o, hundam xanoo Waa'i boqqi manchoo damigaanchi manchoo guzumo'ookkok ka'isinnette. Ixxi oos dut ikkota'nnim oranne beedditamo; ixxi shumo'im hurbaat hoogga'a sibaattamo. Gatto'i qaxim jabbinne beedditamo; goon lehu meentim ixxuwwina wi'llitamoyyo. Boqqi manchi bira buchchisa wixxaa'eenaa eddechcham ha'llisa tuubeenaa xanookko. Ihukkaarem ixxi wixxaa'u eddechcha muccur keen edde'llamo; tuubu biram xummaan keen baxxantamo. ixxi baxoom minim idooxxi do'nnisaa hurbaata egeroo manchi daasisaa qaaqisom gindamookko. Boqqi manchi erisa goddaanchi ihaa iinse'ookko; ihukkaarem diriichchiinsi baqoohaare hor hee'ooyyo. Ixxonne muggi dirisisa dangonnem afookko; hiimonnem hambu'llam hafachchi amadaa marookko. Eelliinchi firoo kolli hafachchi ixxi hee'oo beyyiinsi fii'aa massookko. Hafachchiinsi gibaa xoreena geerookko; ihukkaarem mishan bee'eka ixxi hanenne dillookko. Hafachchim ixxonne anga aphphisukkuuyyi naacamookko; ixxi yoo beyyiinsim fiinqeesukkuuyyi fissaa darabookko» yukko. «Hanqo'isam kin bira hinakka'a fissakkam beyyii worqam giiranne muccussakkam beyyii yookko. Xaara uulliinsi hinakka'a siidakkamo; madaaba yakkam xaaram qoxxalli kina bukkakka'a fissakkamo. Manni tuunsi lasaanchi affeebee'e dillita'a mattamo; gambabbi tuunsiinsim bito xee'aalli kina siiddeena xillaalli baalli afeebe'e dillita'a hassamo. Manni hee'oo beyyiinsi qee'llita'a manni lokki hance'ubee'i beyyo affamo; eekke'ennem xillaalli bare hintamo; heechchinne calcalitu'uuyyi manniinsi annanni ikka'a mullam baxxamo. Uulli itakkam hurbaata mutisookko; ihukkaarem woror giirinne bukkamaa himbiriiqamukko. Cuquluusa laboo bito xee'aalli kin geejji ki'n woriinsi firookko; buchchi woronnem worqi siidamookko. Ee googooma cingiraallichchim la'ooyyo; ammachchim moo'ukkoyyo. Jor moochchi ee beyyo hance'ukkoyyo; hobbichchim ee kollinne higukkoyyo. «Manchi uulla hinaa ixxi angiinne sifo'i kina iiqookko; duunam luguminne toroshookko. Kina iiqaa higakkam googo axisookko; bito xee'aalli kinam siidookko. wo'im ee kollonne daadoobee'isa qoqqobookko; uulli woronne maaxamu luwwam caakkanne fissookko. Ihukkaarem qooroom hanniinsi siidamookko? Qoossidu siidamookkok hannonnette? «Qooroom foor yoo qooccanchi hee'oo uullanne siidamooyyo; hanqo'i bito la'oo manchim bee'e. Cambalaq ‹Qooroom i woronne bee'e› yookko; dambalaqim ‹Qooroom i beyyonne bee'e› yookko. Qooroom muccur worqinne bitaa'amooyyo; bitoomim kin birinne keenamooyyo. Qooroom Oofii'l uulli worqiinsii aduu'n illee cuquluusaa laboo bito xee'aalli kiniinsii lobane. Worqii burcuqo'ii ixxenne gudooyyo; danaam worqinne baxamu mu'utinnem dabassamooyyo. Qooroo'm bit mastaabooxxisa belelleesoo bito xee'aalli kiniinsii ‹inqu'u› yakkam kashar kiniinsii hundiinsim lobane. Diqaasa laboo bito xee'aalli Tophphe'i uulli kinim ixxenne gudooyyo; lobakata muccur worqinnem ixxek bit keenamooyyo. Eehannah qooroom hanniinsi waarookko? qoossimdu hanniinsi siidamookko? Qooroom foorinne hee'oo luwwi hundiinsim daphphaakkoohane; iima'n cii'iinsim maaxamaakkoohane. Bichchii lehii ‹Sadoom xale'e macceensummo bagaa'n hore'em ixxo moo'nnummoyyo› yitamo. «Qooroo'm kollonne massoo googoo hee'oo beyyoo la'ookkok xale'i Waa'a. Mashka'oomim Waa'i uulli tochchiinsi tochchi afeebe'e hundam moo'ookko; iimaniinsi woroon yoo luwwi hundam moo'ookko; Hafachchina malaayye uwwu ammane wo'om xuffinne keenu ammane xeen hannonne ga'nnooda'ee gugoo banqim hinke'enne dillooda'ee ogora amadiisu ammane. Waa'i qoorooma moo'aa lomba uwwukko; saarayyaatim qoxxisukko. Eehanniinsim mannina ‹Qooroomaa yimmi Waa'a baddimma; qoossimmaa yimmim joriinsi qee'llimma› yaakko» yukko. Iyyoobim ixxi woshsha wocukkuuyyi «Kaba hee'oommi heechchi illageen Waa'i egeram hee'u amma'nnisa ihuta'n hinkaa'nna liiramam hee'ummo? Ee ammane tuunsi woronne taakke'ummuuyyi Waa'i ixxi caakka iina caakkisukkuuyyi caakkanne taakke'am hee'ummo. Waa'i eesee i abaroosaa ixxi hara'mmatinne egeram hee'u bikkina iina hundem luwwim wo'mmaa makkixxaa hee'ummo. Hundam xanoo Waa'i iinninne maqire hee'u bikkina i oos hundim i gadanonne hee'llo'o. I googim buurinne qufaakkoohan hee'ukko; kinanne kaasamaakkoo weeriinsim lobakat zayti firam hee'ukko. Beero'onne manni wixxoo beyyo marummuuyyi dummichchanne afuuram hee'ummi ammane; Harde'i keen eese moo'lla'a lonsimminne i illagiinsi koratitam hee'llo'o; lommannim afuutto'i beyyiinsi iimita'a eese lonsitam hee'llo'o. Atoorattam hee'llo'i minaadaphphi awwonsaan eese moo'llam ammane ixxuwwi anga suumenne ifiissa'a sa'itam hee'llo'o. Daannuwwim i beyyo affam ammane sa'itamo; ixxuwwi allabim karamaa mat sagaram woccamoyyo. I bikkina macceesukkok hundim eese lonsam hee'ukko; eese moo'ukko hundim galaxxam hee'ukko. Mashka'oomim bux kee'n laachcha macceesaa ixxuwwa gatisam hee'ummo; anno'i lehu adaraar oosinam hara'mmam hee'ummo. Lehina hincita'a hee'llo'i mannim hara'mmam hee'ummi bikkina eese maasse'llam hee'llo'o; goon lehu meentinam hara'mmam hee'ummi bikkina liiranchinne zammattam hee'llo'o. Muccurooma eddechchisa edde'ummo; hanqo'i oogatom kaabbisa edde'am hee'ummo; horoo'l qoobe'isam issaqqam hee'ummo. Qooqquwwinam ille dimmeewwinam lokki hee'ummo. Buxina annaa la'oombee'i kee'n bikkinam fitamoommanee hee'ummo. Baaxiilaan kee'nneka gaangeera iiqummo; bogga'a massito'i luwwam ixxuwwi suumiinsi ubbuusisummo. «An ‹I umur shashsha'llisa dutaa i minenne makkixxummisam lehoommo› yaa hee'ummo. Hundi ammanem wo'o siidoo haqqichchi xaphisaa caaffuwwim taktakoo aashinne qufoo haqqichchisaa hee'ummo. Hundi ammanem eese lonsakku'uuyyi hee'am hee'ummo; i malaayyim hundi ammanem haareechchi iham hee'ukko. An wocoommi ammane manni sa'aa macceesimminne i sogitano aa'am hee'ukko. An wocaa lasonne wocoo manchi hee'ukkoyyo; mashka'oomim wocoommi woshshi ixxuwwika tiiro usheexxisam hee'ukko. Abuullaanchi qaraax aga'n xeena siideena mixoohaannisa ixxuwwim i woshsha macceesseena suume fooqaa'lla'a egettam hee'llo'o. An mishiqoommi ammane ixxuwwi liirantam hee'llo'o; i illi kolli caakkoo ammanem ixxuwwi illi kollim tiramam hee'ukko. An ixxuwwina awwonsaanchisa ihaa ixxuwwika googo doo'llam hee'ummo; adil ixxi gogota awwonsoo'isam awwonsam hee'ummo; kichche'llam ammane qoxxisam hee'ummo. «Ihukkaarem kaba iinniinsi umuranne hoffe'llam keen i gereebbika allaachcha egeroo wishinne maqire afuuttambee'isa gadam hee'ummi kee'n oos eesenne naacantamuulla. Ixxuwwik malaayyi hoogakkoohanee angii wodim qaccaallaa hee'u bikkina iina maham awwaaddam hee'llo'oyyo. Hawwii sibaarii lophphimmiinsi ki'ukkok nac keen hee'llo'o; tuunsonne ki'lla'atim manni hee'oobee'i udma'i uulla matta'a haqqi xapha feetta'a ittam hee'llo. Haqqi woriinsim sooqixxisa xee'oo buyya feettam hee'llo'o; xee'oobee'i kitikixxi haqqi xaphim ixxuwwina hurbaat hee'ukko. Manni gamaano laachchinne holloohaannisa ixxuwwam minaadaphphi lambe'iinsi hollakkam hee'akko'o. Ixxuwwi heellamokim daawwa'annee baallennee hinamu ba'l woronnette hee'ukko. Haqqi woronnem do'llu'uuyyi bii'l moochchisa shuttam hee'llo'o; dubbi lugumonnem wixxita'a hee'llam hee'llo'o. Jiraafinne ganakku'uuyyi uulliinsi hollanto'oo keen ikko'i bikkina ixxuwwi summi bi'aa tiiro bi'lloo'oo manni ikka'a hee'llam hee'llo'o. «Ihukkaarem kaba ixxuwwi oos kaddu'uuyyi eesenne naacantamuulla; ixxuwwinam an osachchi ihaammo. Eese shene'lla'atim iinniinsi qee'llitamo; mayyakka baddito'nnim i illagenne anja tufitamo. Waa'i i malaayye hoogisaa sholliisu bikkina ixxuwwi hakkamma hoorakko'i farashshisa i hanenne daabbattamuulla. I makki kollinne ijaajakka'a li'isakkoo'nnoo keen ki'llo'o; i lokkinam qaasha gudisso'o; i kululleetam kibbito'ookko. An higoommi googo ifiissa'a eese shiteena hassamuulla; eekka issimmiinsi ixxuwwa egedeena xanoo manni bee'e. Haraar afo'inne waaroo manchisa i hanenne waatto'o; ee gindamukkaanniinsi lambe'innem onkoroollitu'uuyyi affo'o. Kee'mmaalli muggi eese amadaakko; i lombim hafachchisa higaakko; i gatimmi neeyyatim duuphphisa binnaa bi'aakko. Hawwi eesenne lobakata lophphu bikkina i foor leh afeebe'e u'nnamaakko. «Hiimooma hundoomam iikki miq jabbinne u'nnamukko; xissoomim usheexxato uwwukkoyyo. Kee'mmaalli jabbi eesenne qoxximmiinsi ki'ukkok i eddechchi qumucce'aa bi'aakko; shamiiz kasim eese xagaraa amadaakko. Waa'i eese ha'l woronne ubbuusu bikkina diraa gii'l buchchaa laboommuulla. «Waa'a! An ki kollonne laarummo; ihukkaarem at iina dabachcha uwwittoyyo; ki illagenne uullaa keese uunxummo; ihukkaarem at i kollo daba'llimma sabbitto. At daba'llitaa iina mogaalli ikkitto; kee'mmaalli ki malaayyinnem eese u'nnissitto. At eese ki'issaa hafachchanne hanenne afuussitaa bararoommisa issito'o; hambu'llamim eese wonceesoo'isa issitto. Foorinne yo'i mannina hundinam qoodamaakkoo lehina higissaa uwwitoo'isa la'aammo. Hawwodamu manchi u'nnamaa agaag afona laaroo ammane hanqinam i hanenne woda ki'isookkok ayyim bee'e. Hawwonne yo'i mannina wi'llummoyyonnihe? Bux keenindu kichche'ummoyyonnihe? Eer luwwi ihookko yaa egerummo; ihukkaarem jor luwwi eesenne afukko; caakki firookko yaa egeronam iina balli tuunsukko. An maham xumma siideena xanumbee'i bikkina i wodan u'nnamukko; hawwi doollim iina waarukko. I orachchi eelliinchinnetti ihoo'n kichchechchinne heemachchukko; dummichchi lambe'enne uullaa hara'mmatina laaroommo. Manniinsi annanni ihaa haqqo'l wengereellinnee lokkaam ammarinnee hosummo. Iikki ha'n omachchi heemachchaa coo'amaakko; i miqim iibbi lophphimminne shokkukko; Maasiinqo'i kichchechchina lelloomman ihukko; xurumbam wi'llina fugoomman ihukko. «Baajaam landichcho mixaninne moo'oombee'isa i gaganne hidita'n sagara aagaammo. «Hanaan Waa'i kollinne manchi beetina qoodamu saam maruchcho? Iimanenne hee'oo hundam xanoo Waa'iinsi uwwamu sharad maruchcho? Baaxiilaan keenonne booban hawwoddam keenonnem bichchi afoo'is la'amaakkoohaneyyonnihe? Waa'i an baxoommi baxo hundam moo'ookko; an taakke'oommi taakkom la'ookko. «Qophphano wocaammoohan ihulasii i lokkim manna qawwiisakkam beyyina gaaggaabaakkoolasii Waa'i eese hanqo'i keenaanchonne keenona; miiqakkam luwwi bee'i manchi ihummisam la'ona. I taakki hanqo'i googiinsi korataakkoolas i illi moo'u luwwi hundam i wodan mixaakkoolas i angim baaxiilinne haashaaramaakkoolas An wixummoka mulli manni itona; iikkim mutoo luwwi hundim xoqolamaa bi'ona. I wodan mulli meentichchi iittinne qeefadamaakkoolas i beshichchi arenne edameena goocanne egeraammoolas i meentichcho mulli manchi hurbaata liittona; mulli mannim isenne maqire iinse'ona. Mashka'oomim kido'i tuussiisoo baaxiil oogatoo manni beyyonne guzumo'isoohane. Ku baaxiil gii'llisa shokkiisaa bi'isoohan ihu bikkina an kaka baxaammoohan ihuta'n iina yoo amaxxi hundam bi'isam hee'ukko. «I awwaadaan ikko'i goonii meentii ixxuwwi hawwo iina kutta'a ixxuwwika hanqa boqqisaammoolas Waa'i eesenne oogato uwweena ki'oo ammane an maha ihoommo? Xa'mmoo ammandu ma dabachcha uwwoommo? Godaphphi woronne eese qooccukkok eesee i awwaadaanoo qooccukkaneyyonnihe? Neese hundam godabonne qooccukkok ixxi gagameyyonnihe? «Bux uunxito'i luwwa hooraa la'oommoyyo; goon lehu meentom qoxxisimma urummoyyo. Adaraar oos sibaattu'uuyyi an mullam hurbaata itaa garummi balli bee'e. Hore'em ooshshichchi hee'ummaanniinsim ki'isaa adaraar oosina annisa ihaa li'isam hee'ummo; qaramummaanniinsim ki'isaa goon lehu meentina hara'mmam hee'ummo. Ayyim ihuta'n eddechcha hoogaa te'im maat buxichchi manchi leexa'ooma ifiisoo'n yoohaannonne moo'aa I gereebbi oddinne baxamu eddechcha edde'aatim eese maasse'oo'n yoolasii Dummichchi illagenne manni i woshsha macceesoo'isa la'ummi bikkina adaraar ooso hawwodeena i anga iimaa'aammoolasii i cekki beyyiinsi firona; i angim tunku'llonne iiqamona. Waa'ik quunqi eese muggisaakkoo bikkinaa ixxi baddisoo hibbiinsi ki'ukkok maham isseena xanummoyyo. «I neeyyato worqannetti issaammoolas te'im muccur worqannem bakke'aammoolas I angiinne siidummi amaxxannee goddi lophphimmannee liiramaammoohan ihulas Eelliinchika caakki lophphimma moo'aa te'im aga'n mikmikaaxxi nuura moo'aa I wodan maaxaqqanne qawwiisamaa eekeenina lomba uwweena i anga suunqaammoolas Eekkamdu issaammoolas hundii lob Waa'a lagimmi ihu bikkina eesenne kee'mmaalli qixaat oogatamam hee'ukko. «Eese sabbam kee'n ubimmanne liiramummoyyo; ixxuwwannem jor luwwi afu ammane lobakata liiramummoyyo. I diina'i bi'llamisina duumaa baaxiilo hore'em baaxiilo baxummoyyo. I abaroos ‹Iyyoob beyyonne hurbaata goddaa itubee'ek ayyette?› yita'a naqqassamo. I mine gooqqi araatina fooqaa'oommi bikkina biiranne garoo koyyiinchi hore'em hee'ukkoyyo. «Hawwodummi luwwa i woronne maaxummoyyo; mulli mannisam baaxiilo daphphaa'ummoyyo. Minaadab dutimmi baddisaatii i abaroos sabimmim eese muggisaatii minenne maaxamummi amman bee'e. «I woshsha macceesookkoka siixxumta'n i woshshi hanqi ihukkisina mare'e hincaa'oommo; hundam xanoo Waa'i iina dabachcha uwwona; eese kasasukkokim kasasu mashka'a kitaabaa hincaa'oohaare moo'umta'n erane. Hanqo'isam an eekka irifo'isa i gudumonne iyyam hee'ummo; lombi mare'isam i horoorenne issam hee'ummo. Daannoom yoo manchisa Waa'i illagenne iggimminne ullaa baxummoka hundam mat matinne kuram hee'ummo. «Manni uulla malaayyinne hooraa abuullaammoolas ixxuwwam wi'llishaammoolas ixxuwwi uulliinsi firu hurbaata ma'lluwwam miqoo'n itaa uulli anno'ika tiiro kichche'isaammoolas ee uullanne aras mutoo bikke utti so'i mutoo bikkennem bochchi mutona» yukko. Iyyoobik woshshi ka beyyonne beeddukko; Iyyoob ixxi gaga «An muccur mancho» yaa sawwitenne qoxxu bikkina oo sasem manchim Iyyoobinne woccam woshsha utto'o. Ihukkaarem Raam yakkam manchi abaroosiinsi Buuz uulliinsi Baaraakeel beet Eelih Iyyoob ixxi gaga waa'iinsi loboka muccuri issu bikkina lobakata quuqukko. Sasem Iyyoob beshim Iyyoobanne oogato uwwito'o bagaan woshshooma amma'nnisseena xantobee'i bikkina ixxuwwannem quuqukko. Eelihu'i umuranne mulli keeniinsi hoffan ihu bikkina hundim wocca'a guulliteebee'e korina Iyyoobinne woceena egeram hee'ukko. Sasem mannim Iyyoobina laboo dabachcha uwwiteena xantobee'isa moo'aa lobakata quuqukko. Buuz uulliinsi Baaraak beet Eelih «An umuranne ki'nnuwwiinsi hoffan ihummi bikkinaa ki'nnuwwim lommanni ikkakko'i bikkinaa baddaatii tuuraatii i sawwixxeka wocoo'nnim cawwaa egeraa hee'ummo. ‹Lommanni gaassaa wocona; ixxuwwi umu'l doollenne siiddo'i qooroomam losissona› yaa hee'ummo. Ihukkaarem qoorooma uwwookkok mannanne hee'oo hundam xanoo Waa'i ayyaana. Mannina qoorooma uwwookkok umuranne dasimmayyo; hanqo'i woshsham qoossakkamisina hara'mmookkok umuranne lophphimmayyo. Ee bikkina macceessehe; an la'oommoka ki'nnuwwina kuroommo. «Ki'nnuwwi woccakkam sagara iyyaqqimminne egeram hee'ummo; woccakkam sagaram doo'llitakkeebee'e woccakkamoka macceesam hee'ummo. Erisa macceesummo; ihukkaarem ki'nnuwwiinsi ayyim Iyyoob huushancha moo'iseena xanukkoyyo. Ki'nnuwwi lambe'iinsi ayyim ixxi woshshina laboo dabachcha uwwukkok bee'e. Ki'nnuwwi ‹Neese qoorooma siindaammo; neegareena xanookkok Waa'a bagaan mannayyo› yitakkotte. Iyyoob fitamukkok ki'nnuwwinnette bagaan iinninneyyo; anim ixxena ki'nnuwwaanni'nnoo dabachcha uwwoommoyyo. «Ixxuwwim muggita'a woccam woshshi hee'ubee'i bikkina maham wocceena xanto'oyyo. Oono'o, ixxuwwi woccam luwwa hoogga'a cawwita'a uullito'ookko; eehannah ixxuwwi cawwito'aare an iyyaqqaa egerimmi hasisoohonnihe? Eehideyyo, anim wocoommi woshshi yookko; la'ummokam kuroommo. Lobakata wocoommi woshshi yoo bikkina kanniinsi eehid cawweena xanoommoyyo. Wocoommisina kore uwwamoobee'an ihulas haareechchi woyi'n diqaasa wonshakko'i ca'nnisa xooqoommo. Wocaa fooshshe'immi hasisookko; i suume fooqaa'aatim dabachcha uwwimmi hasisookko. Ayyenam golo'oommoyyo; ayyi manchom qawwiisoommoyyo. Qawwiisimma la'oomman ihuta'n eese qooccaanchi qaqqisom bi'isam hee'ukko. «Kabadem Iyyooba, an wocoommi woshsha macceese; kiina kuroommi woshsha hundam erisa macceese. Kiina dabachcha uwweena gudaammo; i suumim woceena gudaakko. I sagar i woda'nneka xabbeenooma caakkisookko; i suumim hanqa wocookko. Waa'ik Ayyaan eese qooccukko; hundam xanoo Waa'ikim fooshshi iina foore uwwukko. «Xantoohan ihulas i woshshina dabachcha uwwe; fitantoo sagaram gudissaa i illagenne uulle. Oono'o, anii atii Waa'i illagenne gudaano; anim qooccamummok buchchiinsette. At eese baddimmi hasisooyyo; an keese wor amadeena xanoommoyyo. «Hanqo'isam an woccittoka hundam macceesaammo; ki suumiinsi firu sagaram macceesaammo. At woccittuuyyi ‹Eesenne hawwojjii miiqakkam luwwii bee'ane; baaxiiliinsim an muccura; Ihukkaarem Waa'i eese guzumo'eena mashka'a hasoolla; eesem ixxi diinakkichchisa xigaakko. I lokkom gudee'l lambe'enne aagisaa amadaakko; an maroommi googo hundam moo'oolla› yitaatto. «Iyyooba, ki woshshi huushanchi ihukkisa kureena hasoommo; Waa'i manniinsi hundiinsim lophphookko. Eehannah ‹Waa'i manni woshsha macceesooyyo› yitaa Waa'anne mahina qaraattoolla? Manni qoossooyyo bagaan Waa'i annanni annanni googinne wocookko. Manni hiimo ara'anne iinse'aa kee'mmaalli diriichcho diriiroo ammane haqaawwonnee kaaltannee wocookko. Ee ammane manni ixxi sagara macceeisa issookko; axeeraatim muggooisa issookko. Ee'isenne manna jor baxiinsi dabarookko; bolxoomiinsim egerookko. Ixxuwwi foore waammiinsi ixxuwwi heechcham bisa'inne bi'immiinsi egerookko. Te'im manchi jabbaa ara'anne iinse'aa hee'ukkisam ixxi miqenne uroobee'i jabbo asse'aa axeerookko. Ee ammane ixxena hurbaat sabisookko; xee'oo hurbaatam ihuta'n heele'isooyyo. Nacimmii ki'ukkok maar beeddaa ifiisamaa hee'u miq la'amookko. Ixxi foor barenne ixxi heechchim shoo kee'n kollonne hincaakko. «Ihukkaarem manchina hanqo'i googo moo'isoo'isina lambe'enne aagaatim araasseena kum Waa'i asse'amaaniinsi matoom siidamaakkoota'n manchoomina qishixxaa ‹Ixxo gatiseena miqoommi tisso siidaammoo bikkina waammanne aagoombee'isa gatise› yookko. Ee bikkina ixxi orachchi ciilluwwi orachchisa haareechchi ihookko; woraadda'n amma'nnesam ihookko. Ee ammane oo manchi Waa'i kollonne uunxookko; ixxi uunatom Waa'i macceesookko; Waa'ikam illi kollo moo'aa liiramookko. Waa'im ixxo muccuroo'm beyyonne dabarookko. Ixxim manni illagenne ‹Baaxiilo baxaammo; hanqo'i woshsham boqqisaammo; ihukkaarem Waa'i i jolle moo'ukkoyyo. Ixxi i foore waammanne dilloobee'isa gatisaakko; oono'o an kaba foorinne hee'aa caakka moo'oommuulla› yaa zammarookko. «Oono'o, Waa'i ka hundam dabaransaa mannina issookko. Oohim ixxi heechchanne caakka moo'oo'isina ixxi foore lehiinsi gatisookko. «Iyyooba, kuroommi luwwa erisa macceese; an wocoommo; at sa'ihe. Yitoo luwwi yoolas dabachcha uwwe; at hanqo'an ikkoo'isina hasoommi bikkina woce. Oobeelas an wocoommi woshsha cawwitaa macceese; anim kiina qoorooma losisoommo» yukko. Eelihim Ki'nnuwwi qoolluwwi keen an wocoommi woshsha macceessehe; Ki'nnuwwi lachchi mannim erisa macceessehe. Allab hurbaaxxeka xee'nna annannissoohannisa maccim woshshika duuha'a annannissaa la'ookko. Hanqo'i woshsha saarayyinona; e'llookkokam maqirem lanqona. Iyyoob ‹An muccura; ihukkaarem Waa'i iina hanqa hooraakko. An hanqo'an ihummisam qophphanaanchisa xiiqqamummo; hawwodummi luwwi bee'ekam fayye'oobee'i omarinne hawwoommuulla› yaakko. «Naacancha wo'isa agookkok Iyyoobi'nno'i manchi ayyi yookko? Ixxi jora baxoo keeninne maqir ihaakko; hosookkokim jora baxxam keeninnette. ‹Waa'a liiransakkeena yakimmi mannina maham awwaadooyyo› yaakko. «Ee bikkina ki'nnuwwi qoossitakkam keen macceessehe; jora baximmi Waa'iinsi hawwojja issimmim hundam xanoo Waa'iinsi qee'llona. Waa'i mannina baxukkisinne dabarookko; ixxi taakkisinnem miqookko. Hanqo'isam Waa'i jora baxooyyo; hundam xanoo Waa'im manni hanqa boqqisooyyo. Uulla gassoo'isina Waa'ina daannooma uwwukkok ayyette? Uullika hundikam yabo ixxena uwwukkok ayyette? Ixxi manchina uwwu tiiro dabaraa massuta'n foorem ixxi kollonne wixxaa'uta'n Manni shumo'i hundim bi'am hee'ukko; daba'llaatim buchchi iham hee'ukko. Kiina qoossimmi yoohan ihulas kaka macceese; an yoommi luwwam macceese. Hanqo'i oogato saboo manchi manna gasseena xanoohonnihe? At Hundam xanoo muccur Waa'a baaxiilaanchi issitoohonnihe? Adilina ‹At awwaad bee'ane› daannam ‹At boqqa› yookkok ayyette? Hundim ixxi angii bax ihu bikkina Waa'i daannuwwina golo'ooyyo; goddaancho buxichchiinsi lonsaa moo'ooyyo. Ixxuwwi luxxi baqitenne dangonnem letamo; huxe'llu'uuyyim ixxuwwi foor firookko; malaayyaammuwwim matim nakkoo'n bi'llamo. Waa'i mannika maroo googo moo'ookko; ixxi taakki hundam saarayyookko. Jora baxxam keen maaxamtam gambabbi tuunsi hore'em bee'e. Manchi oogatina ixxi illage hincoo'isina Waa'i jinna amadooyyo. Ixxi matem xa'mmichchim bee'eka gassaano daannoomiinsi dilliisaa beyyonne mulli keeno uwwookko. Ixxuwwi baxo hundam la'oo bikkina matem hiimonnem daannoomiinsi dilliisaa bi'isookko. Baxxo'i boqqoo'm bikkina baaxiilaan keeno manni illagenne hundannem guzumo'ookko. Mashka'oomim ixxo awwonimmiinsi laso daba'llito'ookko; ixxi ijaajom gaddo'ookko. Buxa ciinta'a Waa'i kollonne laattamisa issito'ookko; Waa'im bux kee'nneka laachchaa macceesaakko. «Waa'i cawwaa uruta'n ayyi aceeqaseena xanookko? Ixxi ille daphphaa'utandu ayyi moo'eena xanookko? Waa'i manniinsim minaadabiinsim lobane. Ee'isam minaadab hundim Waa'a badditambee'i mogalli daannuwwi ixxuwwi hanenne gassaan ikkambee'isa issiteena xantamoyyi hee'llo'o. «Mat manchi Waa'ina ‹An baaxiilaancho; ihukkaarem kanniinsi eehid baaxiilo baxoommoyyo; Baxummi baaxiilim hinkan ihuda'ee losise; baaxiilo baxaammoolasim od baxoommoyyo› yuta'n erane. Eehannah at baaxiilo biira yimma sabbittisam Waa'i ki mixa'nneka wonshoo'isina hassoohonnihe? Doo'llitoottok atette bagaan aneyyo; ee bikkina at laqqoottoka iina kure. «Qoossimmi yoo manni iina ka'isa yitamo; i woshsha macceessam qoor keenim ‹Iyyoob wocoo woshshanne lachchi bee'ane; ixxi sagarannem qoossimmi hanqataakkoohane› yitamo. Iyyoob boqqi mannaanni'nno'i dabachcha dabaraakkoo bikkina mahina lasaanchi afeebe'e keenanchanne aagooyyo? Ni lambe'enne seer bee'isa ihimminnee Waa'annem gadimma lonsimminnee Iyyoob ixxi baaxiilonne boqqooma edaakko» yukko. Eelihim «Iyyooba, ‹An Waa'i illagenne muccura› yitaa woccoo'is eranennihe? At ‹Baaxiilo baxumbee'i bikkna an maha siidaate? Tirfixxoommi luwwidu mah hee'aate?› yitaa xa'mmitaatto. Kaba an kiinaa kiinninne maqire yo'i beshinaa dabachcha uwwoommo. «Xabbitaa iimane moo'e; kiinnii hanaan moo'a'moo duuba erisa moo'e. Baaxiilo baxxittaare Waa'a mahinne hawwoddootto? Hawwojja lonsitaadu ixxo maha issitootto? Muccur ikkittaare Waa'ina maha uwwitootto? Ki angiinsidu ixxi maha aa'ookko? Ki boqqoom hawwodookkok xale'i kiinni'nnoo mancho; ki muccuroomim awwaadookkok xale'i manninatte. Manni ciimamimmi lophphimmiinsi ki'ukkok laarookko; malaayyaam kee'n angiinsim firimmina hara'mmato siiddeena laachcha hincaa'ookko. Ihukkaarem ixxuwwiinsi matim ‹Hiimonne egeroo qooccaanchi Waa'i hannonnette?› yaa xa'mmooyyo. Fooraam diinatiinsi loboka neese losisukkok cii'iinsim loboka qoolluwwi issukkok ixxotte. Ixxuwwi Waa'i kollonne laattamo; ihukkaarem ixxi ixxuwwi jolliinsii bolxoomiinsii ki'ukkok ixxuwwina dabachcha uwwooyyo. Hanqo'isam Waa'i wodaniinsi ihubee'i laachcha macceesooyyo; hundam xanoo Waa'im ee kollo moo'ooyyo. «Iyyooba, at maham Waa'a moo'oommoyyo yititta'nnim ki quux ixxi illagennetti ihu bikkina iyyaqqimminne ixxo egerimmi hasisookko. Ee'isam Waa'i ixxi quunqinne guzumo'oobee'eka mannikam jolle kora'isam higookkoka labissaatennihe? Iyyooba, at kora'i woshsha woccoolla; lachbee'i sagaram lonsitoolla» yukko. Odim Eeliihu'i «Waa'i bikkenne ihaa wocoommi luwwi yoo bikkina hofqaxam iyyaqqe. Waa'iinsi siidummi lachchinne eese qooccu Waa'i muccur ihukkisa kiina kuroommo. Hanqo'isam i woshshi qophphan bee'ane; kiinninne wocoommi iina wo'm lachchi yoo'isa la'e. Waa'i malaayyaamo; ayyem gadooyyo; ixxi qoossaa la'immanne malaayyaamo. Waa'i boqqi keeno foorinne hee'llamisa issooyyo; ihukkaarem wor amadanto'i keenina hanqa oogatookko. Waa'i muccur manna joriinsi egerookko; adilluwwinne maqirem adilla'n barcumanne afuussookko; heer heerinam iimiimaa'ookko. Ihukkaarem ixxuwwi chimchiminne karantota'n hawwi qaash woronnem amadantota'n ixxuwwi iggimminne baxxo'i baaxiilo caakkisaa moo'isookko. Ixxuwwika macce axeerimma macceessamisina fooqaa'ookko; jor baxiinsim daba'llitamisina ijaajookko. Waa'ina ijaajanto'aaree ixxenam awwaaddo'aaree gatu umu'l doolle makkinnee liiranchinnee higissamo. Ihukkaarem macceessobeelas bisa'inne bi'llamo; lachchi bee'ekam letamo. «Ixxuwwi wodanonne Waa'iinsi qee'llito'i keen hundi ammanem quuqqo'isam hee'llamo; guzumo'uta'nnim hara'mmoo'isina Waa'i kollonne laattamoyyo. Goon gooninne baxxam haashaaranchinne harde'oommanonnem letamo. Ihukkaarem Waa'i u'nnanne hee'llam keeno gatisookko; afu hawwi woronnem ixxuwwina losano uwwookko. «Kaba keese Waa'i hawwiinsi fissaa u'n bee'i haraar beyyonnee er hurbaatim wo'mmaakkoo maaddi yoo beyyonnee fissookko. Ihukkaarem kaba keesenne boqqi keenonne afoo oogat afu bikkina laboo qixaato aa'immanne yoonto. Keese goddi qawwiisoo bee'isa maqanxim keese huushisoobee'isa ege'lle. Kiina yoo goddii ki malaayyik wodii hundim at hawwonne aaggoobee'isa hara'mmeena xanoohonnihe? Minaadab ixxuwwi beyyiinsi bi'llam tuunsi amman waaroo'isina mixxitte. At hawwonne keenantoottok ka mashka'innetti ihu bikkina daba'llitaa jolla baxxoobee'isa ege'lle. Oono'o, Waa'i ixxi malaayyinne iimiimaakko; ixxe'nnoo losisaanchidu ayyette? Waa'ina ‹Kaka baxe› yaa ijaajookkok te'im ‹At jor baxo baxxaatto› yeena xanookkok ayyette? Manni hundi ammanem Waa'ika baxo mazmuurinne galaxxitamisam atim ixxi baxo mazmuurinne galaxxe. Manni hundim Waa'ika baxo moo'aakko; ihukkaarem moo'ookkokoom qee'llonnette. Waa'ika hundiinsi lobaannooma saarayyinaa lanqeena xannoommoyyo. ixxi umu'llekam xigo la'ookkok bee'e. «Waa'i wo'o iim hooraa goolle'oo'isa issookko; iimaniinsim dabaraa xeen ihaa ga'nnoo'isa issookko. Duubiinsi xeen ga'nnookko; manni hanennem lobakata dillookko. Waa'i duuba biddiqaa'oo'isaa ixxi gatti beyyonne ihaatim xee'n guqqi woronne hinkid wocooda'ee ayyi qoosseena xanookko? Oono'o, Waa'i ixxi kululleetanne banqa biddiqaa'ookko; dambalaqikam xillaallooma ifiisookko. Ee'isenne Waa'i minaadaba gassookko; hurbaatam lobakatisa uwwookko. Banqa ixxi anganne amadookko; aphphiseena gudisu xabbeena beyyo maroo'isinam ijaajookko. Gug malaayyaam xeen waarukkisa moo'isookko; fooraam diinatim wiisho'i waarukkisa la'ookko. «Ee wiisho'i malaayyinnem i wodan baa'ukko; baddimminnem batbatukko. Ixxi saga'lleka guga macceessehe; suumiinsi firoo toximmam macceessehe. Ixxi banqa iimaniinsi aad hundem beyyonnem belelleesookko; uulli tochchi afeebe'em asse'ookko. Eehanniinsi lasonne ixxeka malaayyaam sagara toxisookko; baddisoo sagaram guqqisa macceesisookko; banqikam belellaato edaa, edaa moo'isookko; hibbaam sagarinnem guga macceesisookko; ixxi sagara macceesisoo ammane banqa egedooyyo. Waa'i maalalsiisoo'isinne guga macceesisookko; neese lanqeena xannoombee'i lob luwwam issookko. Barad uullanne uboo'isa issookko; malaayyaam xeenim ga'nnoo'isina ijaajookko. Ixxi qooccu manni hundim ixxi baxo laqqamisina manni hundim baxo baxxambee'isa issookko. Ee ammane doo'm woro'l moochchi gibba'a maaxamtam ma'nnanne aaggamo; baalli woronnem maaxamtamo. Hambu'llam hafachchi woroo'n qarinne ki'ookko; qiidaam hafachchim hanaa'n qarinne waarookko. Waa'ik fooshshi wo'o hadaddi issookko; baradam issookko. Duub wo'o iyyoo'isa issookko; banqim woronne belelle'oo'isa issookko. Duub Waa'i ijaajo wonsheena ixxi awwonsinne uulli kululleetanne hundannem do'ookko. Waa'i xeena ga'nnisookkok uulla qufiseena te'im manna guzumo'eena te'im ixxi iitto moo'iseenatte. «Iyyooba, hino'o, kaka macceese; giphitaatim Waa'ika maalalsiisoo mare'e sawwihe. Waa'i duuba hinkid ijaajooda'e banqam hinkid belelleesooda'ee laqqoohonnihe? Duuba iimanenne chabbaa'ookkoka lachchanne muccur ihaakkoo Waa'ika maalalsiisoo mare'e laqqoohonnihe? Woroo'n qarinne yoo hafachchi uulla gokkisoohaare at malaayyaam iibbinne u'nnantootto bagaan hore'em kaka laqqooyyo. Iimane Waa'i bukkamaakkoo naas xaarinne baxamu mastaabooxxisa biddiqaa'oo ammane at ixxi gadanonne ikkaa hara'mmimma xantoohonnihe? Neese tuunsiinsi ki'ukkok seerinne wocimma lanqqoombee'i bikkina woncoommi luwwa losise. An woceena hasummisa Waa'ina kurimmi hasisoohonnihe? Bi'eena hasaa xa'mmoo manchi yoohonnihe? «Hafachchi iimanenne yoo duuba fii'aa hooraa lasage ayyim eelliinchi caakka moo'eena xanooyyo. Hanaa'n qarinne worqa loboo lombinne caakki firookko; Waa'i baddisoo hibbinne waarookko. Hundam xanoo Waa'i ni sawwitiinsi hanaanette; ixxi malaayyinnee oogatinnee lobane; ixxek muccuroom lobakata; ayyem wor amadooyyo. Ixxuwwi sawwitenne ‹Neese qoolluwwa› yitam keeno gadoo bikkina manni hundim ixxo baddookko» yukko. Ee lasage Waa'i hambu'llam hafachchi woronne ihaa Iyyoobina «Lachchi hanqataakkoo awwaad bee'i woshshinne i sogitano sholliisookkok ayyette? Hino'o, qoxar ikkaattoolas xabbitaa uullitaa an xa'mmoommi xa'mmichchina dabachcha uwwe. An uulluulla qooccummi ammane at hannonne hee'llitto? Laqqoo luwwi yoolas hino'o, iina kure. Laqqoohan ihulas uullika qaxooma qoodukkok ayyette? uulli hanennem keenakkam heechcho biddiqaa'ukkok ayyette? Uullika utubbuwwa qoxxisaa amadu malaayyi maruwwa? Lamejjika kina uullisukkodu ayyette? Soodaraa'l boollanki mateeyyanne zammattu'uuyyi i asse'amaan hundim ilil yitu'uuyyi at hannonne hee'llitto? «Dambalaq uulli woriinsi xooqaa firu ammane firu gooca xufukkok ayyette? Duuba dambalaqina eddechchisa issummok gambabbaakkoo tuunsinnem ifiisummok anette. Dambalaqina gabala qoodummok xufii laqqo'im hee'oo'isa issummok anette. ‹Ka beyyi afeebe'e waattootto; kanniinsim higgooyyo; kiikkim malaayyaam hambu'llam keyyenne uullona› yummok anette. Iyyooba, ki heechchi doollenne hundannem soodaraar dara ijaajjaa laqqoohonnihe? Soodaraa'l caakkinam beyyo gudissaatennihe? Soodanni uullanne hanenne caakkisoo'isina boqqi mannam maaxamto'i beyyonne moo'isoo'isina ijaajo uwwitaa laqqoohonnihe? Uullik hagar haranne koobakko'i luwwisa dabassamookko; hagaroomim qinxaa'akko'i eddechchisa caakkaa moo'amookko. Boqqi kee'n caakki hooramaakko; jora baxxeena iimaa'llo'i angim iiqamaakko. «Dambalaq lugumo dillitaatennihe? Te'im cambalaq xillaalloo'm lugumodu taakke'antaatennihe? Lehik gooccuwwi kiina moo'amaatennihe? Gambabbi tuunsika xufa moo'llaatennihe? Uullik haraaroom hinkaa'nda'ee laqqoohonnihe? Ka hundam laqqoolas iina kure. «Caakki hee'oo beyyo massoo goog hinkane? Tuunsi hee'oo beydu laqqoohonnihe? Ixxuwwi gattam beyyo massiteena xantoohonnihe? Ixxuwwika heechchi beyyo massoo googdu laqqoohonnihe? Ee ammane qarantaa hee'llitti bikkina ki umu'llekim xig lobakat ihu bikkina hanqo'isam at laqqoo'n uttooyyo. «Barad dissamoo beyyo aaggaatennihe? Te'im dissamu baraxxi tuubba moo'llaatennihe? Oohim hawwi ammanina awwaaxxeena orameenaa qaxxameenaa dissaammoohane. Caakki baxxamamoo beyyo massoo googii eelliinchi firoo kolli hafachchim binnoo beyyo massoo googii hinkane? «Xeenina dilloo googo gudisukkok guginam googo axisukkok ayyette? Ee'isam ayyim hee'oobee'i uullanne manni hee'oobee'i udma'i uullanne xeen ga'nnoo'isa issookkok ayyette? udma'i ihu gogaalli uullam qufisaa hix mutoo'isa issukkok ayyette? Xeenaa qiibataa uwwukkok ayyette? Baradii hadaddim hee'oo'isa issukkok ayyette? Hadaddi wo'o ki'nnesa qoxxisookko; dambalaqikim lugum baraxxesa gi'inoo'isa issookko. « ‹Philiyaadiis› yakkam boollaanka mat issitaa katteena xantoohonnihe? Te'im ‹Ooriyoon› yakkam boollaanki amaxxamu usa mutteena xantoohonnihe? ‹Maazaaroot› yakkam boollaanki wixxite ammaninne firoo'isa issiteena te'im ‹Dibba› yakkam boollaanka ixxi oosinne maqirem awwonsiteena xantoohonnihe? Iima'nneka gatti ogora laqqoohonnihe? Oo gatti ogor uullannem baxoo'isa issiteena xantoohonnihe? «Lobakat xeena kiina ga'nnisoo'isina sagara iimaa'llaa duuba ijaajjeena xantoohonnihe? Banqi kiina ‹Oono'o, an keyyenne yoommo› yoo'isina banqa beleloo'isa issiteena xantoohonnihe? Wodanina qoorooma horoorinam qoossimma uwwukkok ayyette? Qooraantik ciicoolli hurbaata hoogaa i kollonne laarukkuuyyi hurbaata uwwookkok ayyette? «Saaro'i qaroo ammane laqqoohonnihe? Gaallichdu foo'llaa qarukkuuyyi moo'llaatennihe? Gubannanonne mee'i agana afooda'ee hinki ammane qarooda'ee laqqoohonnihe? Wotara gii'mmaa qarookkokii u'nnisoo foo'llimmiinsim usheexxookkokii hinki ammanda'e laqqoohonnihe. Wotalli biir uullanne li'aa qoxxookko; annanni ihaatim marookko; la'mmaaggem am beyyo daba'llooyyo. Bii'l hallina wolabbano uwwukkok ayyette? karatiinsim tirukkok ayyette? Udma'i uulla ixxuwwina heechchi beyyi issaa sooqidaamm uullam gatti beyyi issaa uwwummo; Ixxuwwi corochchi lophphaakkoo beero'uwwiinsi qee'llita'a hee'llamo; ixxuwwi lasonne shuurukkuuyyi ushee'oo manni hee'ooyyo. Duunnuwwanne hundannem allaa'llitamo; latu luwwi hundam itteena hassamo. «Boobichchi kiina awwaadeena ijaajamoohonnihe? Ki gaadirandu gareena xanoohonnihe? Boobichcho abuulloo'isina qaashshoohonnihe? Te'im ki laso awwonukkuuydu abuulli woro'l dimara iiqoohonnihe? Ixxek malaayyi loban ihu bikkina ixxonne bakke'lloohonnihe? Kiikka kee'mmaalli baxdu ixxonne fatakitoohonnihe? Ki beyyo daba'llaa waaraa hurbaata wixxaa'aa oodo'onne eebaa aagisoo'isaa amma'nnitoohonnihe? Sagoon yakkam lokkaam ammachchi lado qaqqisaa biddiqaa'ookko; ihukkaarem qadaalli qeeraa'l ammachchisa bararooyyo. ‹Sagoon› yakkam ammachchi uullanne quunqa quunqe'ookko; buchchannem qaaphphaa iibboo'isa issookko. Eekkeen higoo manni lokkinne iiqoo'isaa udma'anne hee'oo moochchim hancaacoo'isaa sawwooyyo. Ciicoolli ixxan ihubee'aannisa issaa mogookko; badallat hundim kora'a gatuta'nnim mahannem xigooyyo. Ee'isa qooroom hee'oobee'isa issummokii lachcha hoorummokii anette. Ihukkaarem geereena lado iimaa'oo ammane farashshii farashshaanchii ixxenne xoreexxanteena yakitota'n ixxuwwanne osarookko. «Iyyooba, faradina malaayye uwwittok gaanjem qeeraa'l gamminne wereeggissittok atettennihe? Qawwaawwisa xophitu'uuyyi korooximminne manna muggissamisa issitoottok atettennihe? Faradoom o'l biira saa'llakka'a marakku'uuyyi ixxuwwi gaqqi malaayyenne bakke'lla'a cebbanne saggaattamo. Baddimma hore'em laqqamoyyo; ma'lluwwannem muggitamoyyo; bisa'inne xeephakkota'nnim laso daba'llitamoyyo. Ixxuwwa jigissam o'l manni amaddo'i o'l mu'ut eelliinchonne belelleesukkuuyyi chalchayye'ukkuuyyi macceessamo. Xurumbi sagara macceessam ammane u'nnanta'a mogaalloominnee quunqinnee o'l beyyo jiggamo. Xurumbi sagara macceessam ammane liiranchinne korooxxamo; qee'llonnem o'lleka fooshsha laqqamo; gaaxxi awwonsaa'n ijaajoo o'l gogoxxi sharoo macceessamo. Hanqo'isam cingiraallichchi bararookkok ladom woroo'n qaranne hooraa biddiqaa'ookkok ki qooroominnettennihe? Gaaqichchi iim firookkok do'nnam duu'n ludonne baxookkok ki ijaajinnettennihe? Gaaqichchi baalli gaanganne do'nna baxaa hee'ookko; ki'n farqaqim ixxena girbi ihookko. Eekke'enne ihaa itoo luwwa amadeena dugookko; ixxi illim qee'llonne yoo luwwa qoossaa la'ookko. Ee'isinne ixxi lehu luwwi yoo beyyonne hee'ookko; ixxi ciicoollim xiiga agookko» yukko. Odim Waa'i Iyyoobina «Iyyooba, hundam xanoo Waa'inne fitamaa neegaroo manchi hee'oonnihe? iinninne maqire fitantoollak atettem ikki bikkina hino'o, iina dabachcha uwwe» yukko. Iyyoobim dabaraa «I Moollanna, an mahinam awwaad bee'i mancho; kanniinsi eehid i anga suumenne ifiixxaa cawwoommo bagaan kiina dabaroommi dabachchi bee'e. Mat kore te'im lam kore wocaammo; eehannah kanniinsi eehid maham wocoommoyyo» yukko. Eehanniinsi lasonne Waa'i hambu'llam hafachchi woronne ihaa Iyyoobina. «Hino'o, kaba goonchisa ikkaa ki lamado lade'e; an xa'mmoommi xa'mmichchinam dabachcha uwwe. Hanqinam eese oogato boqqisummaannisanne issitaa ki gaga muccur issimminne eese huushammaanchi issiteena yakitoollannihe? Iihaanni'nnoo'i wod kiina yoohonnihe? ki sagardu iihaannisa gugoohanennihe? Eehidette ihulas ki gaga hibbinnee nuurinnee gunguusse; lombaa sadoo edde'e. Bolxitam keeno moo'llaa sholliise; ki quunqam ixxuwwanne isse. Ixxuwwa hundam qoossitaa moo'llaa tuussiise; boqquwwi keenom yo'i beyyonne bi'ise. Ixxuwwa hundam mat issitaa buchchanne waamme; ixxuwwam dillissaa waammi woronne kare. Anim ee ammane at ki malaayyinne ki gaga gatixxiteena xantoohaannooma naqqasoommo. «Oono'o, an keese qoocummisam loobichchom qooccaammo; loobichchim mirgo'isa hixe itookko. Ixxekim wod lamadonnette; malaayyikim bu'an godaphphi woronnette. Sheerimo hoo'm haqqichchisa heekkeesookko; gubeexxi bu'anim xaxamaakkoohane; Miq naas xaa'llisa; orachchim xaa'l biccisa qoxxaalla. «Ixxi an qooccummi luwwi hundiinsim malaayyaamo; ixxo iinniinsi bagaan kaa'eena xanookkok bee'e. Doo'm woro'l moochchi daabbaroo duunnuwwi ixxena itoo luwwa mutisookko. Wo'i gammalanne li'oo haqqi hafannee shophe'i woronne leendi lambe'ennee gii'mmookko. Haf yoo haqqim ixxo maaxookko; daajji gammalanne li'oo ‹Ahaaya› yakkam haqqim ixxo daphphaa'ookko. daajjik wo'i wo'mmuta'nnim ixxi hore'em muggooyyo; yoordaanoos daajji selelaa wo'mmuta'nnim baa'ooyyo. Loobichchika ille ifiissaa amaddeenaa qaashshaa sane luffeenaa xantoohonnihe? «Dambalaq woronne hee'oo Leewaataana yakkam mochchichcho qaashinne amaddaa fissiteena te'im ixxi allabo usinne katteena xantoohonnihe? Guma'a ixxi sanenne issiteena te'im ixxi xabano hookko'inne qassaa hixixaa'lleena xantoohonnihe? Oo moochchichchi qishixxitoo'isina keese uunxoohonnihe? Er sagaridu wocoohonnihe? Heer heerina ki awwaadaanchi iheena kiinni maqire hidi'l sagara aagoohonnihe? Cii'isa losissaa ixxenne maqire lelliteena xantoohonnihe? Te'im ki mi'n awwaadaan landi lelloo'isina kattoohonnihe? Qurxumme'i daddaraan bitaa'lleena fissiixxantamonnihe? Muransita'adu baxxansitamonnihe? Omachchonne bilxo'o kaasseenaa horoorem bagadinne qasseenaa xantoohonnihe? Hino'o, mataagge ixxo anginne nakke; ixxenne maqire gubbantoo gubbancha hore'em xaddooyyo; la'mmaagge ixxenne maqire gubbantooyyo. «Leewaataana yakkam moochchichchinne gubbamakka'a kaa'nnoommo yimmi barche'e; ixxo moo'ukkok hundim baddaa huxe'ookko. Ixxo gii'mmu beyyiinsi ki'isimmi eehaa'nna kee'mmaalli ihulas iinninne uullixxameena iggookkok ayyette? Iimaniinsi woroon yoo luwwi hundim iihane; eehannah dabaraa miqoommisina iina liqaayyisukkok ayyette. «Leewaataana yakkam moochchichchi lokki bikkinaa malaayyi bikkinaa mishisoo orachchi bikkinaa wocimma uroommoyyo. Gumu'llaalli ihaakkoo omachchom haniinsi coo'eena xanookkokii qafaam gaangee'l lambe'edu hakkamma isseena xanookkokii ayyette? Lobakata baddisoo inqi wo'mmaakkoo ixxi suume fooqaa'eena xanookkok ayyette? Afarenne yoo omachchi madadam gixamu agi'llesa; lobakata xammammaa amaxxamaakkoohan ihu bikkina xaari'nnoo'i qoxxaalla. Lobakata amaxxamaakkoohan ihu bikkina lambe'inne hafachchim ihuta'n higeena xanooyyo; Hundim mat mullaanninne ixxina'i ixxim amaxxamaakkoo bikkina hore'em mahim annanni isseena xanooyyo. Leewaataan haxirshuhoo ammane caakki belecce'ookko; ixxi illim soodaraa'l caakkisa caakkisookko. Ixxaanniinsi suumiinsi gii'l laban firookko; gii'l xoxanqim finxirukkuuyyi moo'amookko. Shomboqo'i giiranne kaasakko'i qure'iinsi firoo goollisa ixxi saniinsi wiriir firookko. Ixxi fooshshik iibbi gixillo'o xanqisookko; gii'llekim laban ixxi suumiinsi firookko. Ixxek malaayyi axonnette; illi kollonne yoo hibbim lobakata baddisoohane. Ixxek maar hananenne tuubamaa amaxxamaakkoohan ihu bikkina ixxek orachchi mikmikoobee'i qaxa qooxxaalla. Ixxek wodan kini'nnoo'i qoxxaalla; qoxxaalloomim liitimmi kini'nnoo'ane. Ku moochchichchi ki'oo ammane malaayyaammuwwam ikkota'n baddimminne batbatitamo. Bisa'ii bagadii xiyyii bilxo'ii qasuta'nnim hore'em kaa'amooyyo. Ixxi xaara maqisa iiqookko; naas xaaram buutumbuutu haqqisa iiqansookko. Ixxi xiyya baddaa gibooyyo; yanbarshe'inne darabakkam kinim ixxena bura'isa. Mugam bura'isa xigookko; ixxonne bagado darabakkota'nnim gadaa osarookko. Godaphphi kolli muroo gala'i'nnoohane; hurbaata ganakkam mu'uxxisam haranne hanenne haxara muraa higookko. Dambalaq lugumo qure'i woronne hufu wo'isa issookko; bilqaaxanne yoo shitto'isam issookko. Ixxi higoo googo caakkisookko; dambalaq wo'im himboo'isa issookko. Baddimmi bee'i qooccanchi ixxe'nnookkok uullanne hore'em bee'e. Lobakata lob qooccanchuwwam ihuta'n gadookko; ixxi mochchi hundinam adila» yukko. Ee lasage Iyyoob Waa'ina dabaraa «Waa'a! At hundi luwwam issiteena xantoohan ikkittisaa ki sawwitem laso dabareena xanookkok ayyim bee'an ihukkisaa la'ummo. ‹Lachchi bee'eka sogitano maaxeena xanookkok ayyette?› yitaa xa'mmitaa hee'lltto. hanqo'isam an iina aagubee'i woshsha la'oombee'ekaa qoosseena xanoombee'i maalalsiisoo woshshaa wocaammo. Atim eese ‹An xa'mmoommi xa'mmichcha macceessaa dabachcha uwwe› yitaatto. An kabee'i afeebe'e ki bikkina manni wocukkoka xale'e macceesaa hee'ummo; ihukkaarem kaba an i illinnem keese moo'ummo. Ee bikkina an i gaga gadaammo; gii'l buchchannee dirannee afuuraa baaxiilo biiraa yoommo» yukko. Waa'i Iyyoobinne maqire ka woshsha wocaa lasonne Teemaan uulli manchi Eel faazina «Ki'nnuwwi i awwaadaanchi Iyyoobisa i bikkina hanqo'i woshsha woccakkobee'i bikkina an keesennee lamem ki beshannee lobakata quuqaammo. Ee bikkina kaba lamar baa'l moolluwwaa lamar gereebbi ambulluwwaa amaddakka'a iina awwaadaanchi ihu Iyyoob beyyo mallehe; ki'nnuwwi baaxii'l bikkinam shokkiisakka'a hincaa'akkam kitima hincaa'llehe; ki'nnuwwaannina tuussiisoo bax bikkina an ki'nnuwwa guzumo'oombee'isa iina awwaadaanchi Iyyoob ki'nnuwwi bikkina eese uunxookko; anim ixxi uunxato macceesoommo; ki'nnuwwi iina awwaadaanchi Iyyoobisa i bikkina hanqo'i woshsha woccakko'oyyo» yukko. Ee lasage Teemaa'n uulliinsi Eel faazii Shuuha'i uulliinsi Bildaadii Naa'imaat uulliinsi Xoofaarii matta'a Waa'i ijaajukkisannem issito'o; Waa'im Iyyoobika uunxato macceesukko. Iyyoob sasem ixxi beshinam Waa'a uunxaa lasage Waa'i Iyyooba dabaraa goddaanchi issukko; illageen hee'ukkaanniinsi loboka lam suum issaa uwwukko. Ee ammanenne Iyyoob abbaayyuwwii aayyuwwii illageen ixxo laqqam hee'llo'i mannii hundim moo'lleena ixxi beyyo waatto'o; ixxi minennem ixxenne maqire hurbaata itto'o; kichche'lla'a hee'llo'isa moo'issu'uuyyi Waa'i ixxonne hanenne eebu hawwiinsi hundiinsim qoxxisso'o; annannichchim kin biraa worqinne baxamaakkoo guma'aa uwwito'o. Waa'i Iyyoobika heechcha illagee'nnaannii lonsaa lasagee'nneka maasse'ukko; ixxenam tommiinsi soor kum gereebbii loh kum gaameela'ii mat kum qaash mirgo'uwwii mat kum meent hallii hee'ukko. Ee'isam lamar goo'n oosoo sas landaa odim edaa qarukko. Luxxi landichchoka summa Yimiima, la'mmaanteka odim Qaxi'a saxxaantekam Qerenihafuk yaa fissukko. Iyyoob landi qaxa mishisoo danaam landi uulli hundannem hee'ukkoyyo; Iyyoobim ixxuwwi abbaayyuwwinne maqirem ixxena yoo amaxxiinsi baxxancha uwwukko. Ee lasage Iyyoob xibbee sor hiinchoo hee'ukko; oosoo oos oosoo soor qaranchi afeebe'e moo'ukko. Lobakat doolle hee'aa lasage lomma'nnaa lehukko. Jor kee'n sogitano aa'oobee'ek baaxiilaa'n googonnem maroobee'ek Waa'anne naaccam kee'n barcumanne afuuroobee'ek manchi maasse'amaakkoohane. Eehido'i manchi Waa'i seeranne liiramookko; ee seeram ballaa hiimoo dabaransaa sawwookko. Ixxi daajji gammalanne kaasamaa misham ammaninne mishoo buyyim giggiroobee'i haqqichchisa ihookko; eehido'i manchi baxoo bax taaphanookko. Ihukkaarem jor keen ee'isayyo; ixxuwwi hafachchi fii'aa massoo woraqisa. Ee bikkina Jor keen oogato'iinsi gattamoyyo; baaxiilaanim muccur kee'n wixxitenne exxitamoyyo. Mashka'oomim Waa'i muccur kee'n googo egerookko; ihukkaarem jor kee'n goog bi'ookko. Mulli minaadab mahina dollottamuulla? minaadabdu awwaad bee'i woshsha mahina a'llantamuulla? Heer uulli adilluwwim Waa'annee Waa'i doo'llukkaannonnee ki'llo'o; gassaanim ixxuwwinnem mat ikka'a ki'llo'o. Ixxuwwim «Neese ixxuwwi chimchima ni lokkiinsi muransinona; ni lokko katto'i xaaram tillaa uunjinona» yito'o. Iimanenne yoo Moollanni Waa'i ixxi adilla'n barcumanne afuuraa ixxuwwanne osarookko; ixxuwwannem naacookko. Ee lasage ixxi quunqinne ixxuwwa axeerookko; nadajjinnem bi'isookko. Odim ixxuwwina «Ihukkaarem an i keesammi Xiyyo'n duunanne i adila doo'llummo» yookko. Adilim «Waa'ika seera alallaatoommo; Ixxim iina ‹At i beeto; an keese kaballa qaraammo. At eese xa'mme; mulli minaadab hundim kiina ijaajantamisa issoommo; heer uulli hundam kiihan issoommo. Atim ixxuwwa xaa'l muginne iiqansitootto; buchchi mu'uxxisam xaamsitootto› yaakko» yukko. Ee bikkina Ki'nnuwwi adilluwwi qoossehe; uulla gassaanim la'aqqehe. Waa'a baddimminne awwaaddehe; huxe'llakku'uuyyim ijaajammehe. Ixxi ki'nnuwwanne quuqaa ixxi googiinsi bi'llakkambee'isa ixxi beetina otossillehe. Ixxek quunqi gaaggaabaalla; ixxonne yabo aaggam keen hundim maassaammuwwa. Waa'a! I diina'i hinkaa'nna duta! Dut keenim eesenne ki'llo'ookko. Dut manni iina «Waa'i ixxo gatisooyyo» yitamuulla. Ihukkaarem Waa'a, at iina agira; iina kaachcha uwwimminne eese lonsitoottok atette. Waa'i kolli sagara iimaa'aa laaroommo; ixxim keesammi ixxi duunanne ihaa iina dabachcha uwwookko. An iinse'ummo; diriirummom; Waa'i eese egeru bikkina xummam baqaa ki'ummo. Eese kolli hundinnem kibbu dut kum diina'a an baddoommoyyo. I Moollanna, at ki'e; i Waa'a, at eese gatise; i diina'ika gaangeera iiqe; ixxuwwi inqem xaamse. Gatisookkok Waa'a; ki maassim ki minaadabanne ihona. Hanqo'i Waa'a! An keese weeshoommi ammane iina dabachcha uwwe; u'nniisem eese usheexxise; iina qishixxe; i uunxatom macceese. Manna, hinkaa'n balli afeebe'e i lomba sholliissakkamo? Hinkaa'n balli afeebeedu awwaad bee'i luwwa iittitakkamo? Odim hinkaa'n balli afeebeedu qophphano hassakkamo? Waa'i ixxo baddoo mancho ixxi gagina doo'llukkisa laqqehe; an uunxoommi ammanem i uunxato macceesookko. Waa'a baddehe; baaxiilo baxxakkotte; iinse'llakkam ammanem ki'nnuwwika tiiro saarayyehe. Waa'ina hanqo'i kitima hincaa'llehe; Waa'annem amma'nnehe. Dut keen «Er luwwa niina ayyi moo'isookko» yitamuulla; Waa'a, ki caakka neesenne caakkise. At iina uwwitti liiranchi mulli keen arasikaa woy'nnekaa lobakat atoota siidda'a liirantam liiranchiinsi lophphookko. Waa'a, xale'i at eese xumminne egettoo bikkina an iinse'oommi ammane xummaanchi diriiro diriiroommo. Waa'a, i sagara macceese; i laachcham at qoosse. I Waa'aa i adilaa! Keese uunxoommuulli ihu bikkina i laachcha macceese. Waa'a! Daranne i sagara macceese; soodaraaronnem i uunxato ki illagenne hincaa'aa kiinniinsi dabachcha egeroommo. At baaxiilonne liirantoobee'i Waa'a; jora issitam keen kiinninne maqire hee'llamoyyo. Amaaddam keenim ki illagenne uullitamoyyo; jora issoo keenom hundam ha'yyitooyyo. Qophphano woccam keen hundam bi'issootto; manna shitam keenoo qawwiissam keenoo shigigitootto. Ihukkaarem an lophphaakkoo ki eroomminne ki mine aagoommo; keese baddimminnem ki Keesammi minnenne kiina otossoommo. Waa'a, i diina'i bikkina ki muccuroomminne eese awwonse; ki googom iina xabbaa'e. I diina'i suumenne hanqo'i woshshi hore'em bee'e; ixxuwwi wodanim jollinne wo'mmaakkoohane; ixxuwwi leella'im fooqu waammisa; ixxuwwi allabinnem manna qawwiissamo. Waa'a! At ixxuwwanne oogate; ixxuwwi dollot'm ixxuwwa bi'isona; ixxuwwi keesenne boqqito'i bikkinaa lobakat ixxuwwi baaxii'l bikkinaa ixxuwwa bi'ise. Ihukkaarem keesenne magannaato aaggam keen hundim liirantona; heer heerinam liiranchinne zammattona. Ki summa iittitam keen keesenne liirantamisina at ixxuwwa egere. Waa'a! At muccur keeno maasse'llootto; ki hibbinnem agi'llisa ikkaa egettootto. Waa'a! Ki quunqinne eese axeettitte; ki nadajjinnem eese guzumo'llitte. Waa'a! An hoogaanchi ihummi bikkina at iina qishixxe; i Mogole'i huxe'u bikkina fayyiise. Waa'a! An lobakat uu'nnannette; eehaare at iina hara'mmitoobee'ek hinkaa'n balli afeebe'e? Waa'a! At daba'llitaa iina agaage; ki eroommi bikkina gatise. Lehaa lasage keese sawwookkok bee'e; waammi woronne ihaadu keese galaxxookkok ayyette? Kichchechchi lophphimmiinsi ki'aa hoogaammo; hiimina hiimina indiidinne i dakka aashisoommuulla; bakke'oommi luwwam indiiddinne lukubisoommuulla. I illi indiiddi lophphimmiinsi ki'aa jaamaakko; i diina'i lophphu bikkinam moo'imma hoogaammo. Waa'i an wi'lloommi sagara macceesu bikkina jora baxxakkam keen hundim iinniinsi qee'llehe. Waa'i i uunxato macceesaakko; Waa'i i xa'mmichchinam dabachcha uwwaakko. I diina'i hundim tuuttamo; lobakatam muggitamo; dangonnem sholle'lla'a laso daba'llitamo. I Moollanni Waa'a! An yabo aagoommok keesennette; eese laseesoo keen hundiinsim eese gatise. Eebeelas hobbisa iiqansitamo; ayyim gatisoobee'i beyyonnem dareeransitamo. i diina'i eese hollaa amadona; ifoorem buchchanne edaa hance'ona, i lombam buchchanne edona. Waa'a! Eesenne nadadda'a ki'llo'i keenonne at ki quunqinne ki'e. I Waa'a! Ki'e; hanqo'i oogato'om ijaaje. Minaadab hundim ki kululleetanne wixxihona; atim hanaan ikkaa ixxuwwa gasse. Waa'i manni hundannem oogatookko; Waa'a! I muccuroo'mmisinne iina oogate; i xummisinnem iina oogate. Mannika sawwitee tiiroo saarayyitaa laqqoo muccur Waa'a! Boqqi kee'n hantaaro bi'ise; ihukkaarem muccur keen xumminne hee'llamisa isse. Xabbeen keeno gatisoo Waa'i iina agira. Waa'i hanqo'i oogataancho; jor keenonne hundi ammanem oogatookko. Manni baaxiilo biiraa yaa daba'lloobee'an ihulas; waa'i ixxi bisa'a qareesookko; xiyyam chokkorookko. Ixxim qasaa shoo mu'uta axisaakko; belecce'oo xiyyuwwam gudisaakko. Baaxiilaan jor luwwa godabonne amadda'a hantaaro siitta'a qophphano qattamo. Mulli keenina bare hinookkok ixxi gagim ee barenne ubookko. Ixxi hantaar ixxonnem daba'llookko; ixxi boqqoomim ixxi horoorennem ihookko. Waa'i hanqo'an ihu bikkina an galaxxoommo; Hundiinsi Lob Waa'i summam mazmuurinne heebbisoommo. Ni Moollanni Waa'a! Ki summi heer uullanne lobakata hibbaamo! Ki lombam iimannuwwiinsi hundiinsim hanaan issitaatto. Ki diina'uwwa, maso'oo baado amadaanoo suume amadiisseena hoffi oosiinsii anuu'n ciilluwwiinsii galata gudissitto. Ki anginne baxxitti iimannuwwa moo'oommi ammane, aganaa boollaankaa dissitti beyyom moo'oommi ammane, manchi beeto sawwitoo'isna ixxi maruchcho? Ixxo abooyteendu manchi beet maruchcho? Ki asse'amaaniinsi hoffokam hoffiissitto; lombikaa nuurikaa laakka ixxonne issitto. At qooccitti luwwi hundinam gassaanchi issitto; hundem luwwim ixxena ijaajamoo'isa issitto. Gereebbaa laroo bii'l moochchaa hundam; iima'n cii'aa dambalaq qurxumme'ee dambalaq woro'l qooccanchuwwa hundamii ixxena ijaajamoo'isa issitto. Ni Moollanni Waa'a! Ki summi uulli hundannem hinkido'i hibbaamo! Waa'a! I wodan hundinnem keese galaxxoommo; maalalsiisoo ki agganni hundam an kuroommo. An keesenne lobakata liiramoommo; Hundiinsi Lob Waa'a! Ki summi bikkina zammaroommo. I diina'i laso daba'llitam ammane qolantamo; ki illagiinsim bi'llamo. At adilla'n barcumanne afuuttaa hanqo'i oogato ogattoohane; i woshsha moo'llaa i hanqa egettaa hanqo'i oogato iina oogattootto. Mulli minaadaba axeettitto; jor keenom bi'issitto; ixxuwwi summam heer heerina shiinshitto. Diina'im heer heerina bi'ukko; ixxuwwi beero'uwwam at gindansitaatto; ixxuwwa tiirakkam luwwi hundim bi'aakko. Ihukkaarem Waa'i adil ihaa heer heerina hee'oohane; ixxi adilla'n barcumam oogato'ina gudisaakko. Ixxi heer uullanne hanqo'isinne oogatookko; minaadabam hanqinne gassookko. Waa'i wor amadanto'i keenina girba; hawwi ammanem ixxuwwi maaxantam girba. Waa'a! Ki summa laqqam keen hundim keesenne bakke'llamo; Waa'a! Keese hassam keenom uunjitooyyo. Xiyyoonanne hee'oo Waa'ina zammallehe; ixxi issu luwwam minaadab hundinam alallaattehe. Xiiga miqisoo Waa'i ixxuwwa sawwoo bikkina wor amadanto'i kee'n laachcha cawwaa urooyyo. Waa'a! At iina qishixxe; i diina'i eesenne afissam hawwo moo'e; lehiinsem eese gatise. Eehid issittoo ammane Xiiyoo'n gooccanne kiina galata alallaatoommo; eese gatissitti bikkinam lobakata liiramoommo. Mulli minaadab ixxuwwi hinto'i barennem ubbo'o; ixxuwwi lokkim maaxxa'a qaashsho'i qaashanne amadamukko. Waa'i hanqa oogatimminne la'amaakkoohane; baaxiilaan ixxiwwi jor baxinnem amadanto'o. Jor keen daba'llita'a Sii'oolanne dillitamo; Waa'a xaddam kee'nnek lasaanchi eehane. Hawwaan xadanto'isam hee'llamoyyo; bux kee'n neeyyatim heer heerina awwaad bee'an ihaa gatooyyo. Waa'a! Ki'e; manni malaayyoone; mulli minaadabanne at oogate. Waa'a! Baachchi ixxuwwa amadoo'isa isse; mulli minaadab maara edde'llo'oo manni ikko'isa laqqamisa isse. Waa'a! Mahina qe'llitaa uullitto? Hawwi ammandu ki gaga mahina maaxxitto? Jor manchi amaadinne buxa hawwisookko; mulli keenina qaashoo qaashannem ixxim amadamookko. Jor manchi ixxi mixanonne bakke'ookko; baashe'aanchi manchi Waa'a game'llokko; sholliisookkome. Jor manchi amaadimmiinsi ki'ukkok Waa'a hasooyyo; Ixxi sawwoo sawwit hundannem Waa'i bee'e. Ixxena maroo goog hundi ammanem makka; Waa'i oogatoo'isam qoossooyyo; ixxi diina'annem naacookko. Ixxi tiironne «An hore'em heekke'amoommoyyo; qaranchiinsi qaranchi afeebe'em eesenne hawwi afooyyo» yaa sawwookko. Ixxi suumenne duunchi, qophphanii sha'llanchii wo'mmaakkoohane; ixxi allabim qawwiishshinnee jollinnee wo'mmaakkoohane. Ixxi amba'uwwanne dugaa egerookko; muccur keeno daphphanne egeraa shookko; ixxik illi hoongaano jollinne daadeesookko. Daphphit beyyonne hobbichchisa dugaa egerookko; buxa amadeena daphphanne egerookko; ixxuwwam qaashinne amadaa gosaasookko. Ixxuwwa iiqansookko; ixxi angannem ubbamo; malaayyi bee'i keen ixxi anganne aaggamo. Ixxi tiironnem «Waa'i xadaakko; ixxi illem ifiisaakko; hore'em moo'ooyyo» yaa sawwookko. Moollanni Waa'a! Ki'e; ki woda iimaa'e; buxa at xadditte. Jor manchi keese sholliisookkok mahinatte? Ixxi tiironnem «Waa'i eese guzumo'ooyyo» yoo mahinatte? Ihukkaarem at hawwoo kichchaa moo'llaa ixxuwwa hawwiinsi fissitootto; hawwaan ixxi gaga kiina higisaa uwwookko; adaraara hara'mmitoottok atette. Baaxiilaan kee'nnekaa jor kee'nnekaa malaayye iiqe; jora baxxam keen od baxxambee'isa guzumo'e. Waa'i heer heerinam adila; mulli minaadab ixxi uulliinsi bi'llamo. Waa'a! At hawwaa'nneka uunxato macceessootto; ixxuwwi uunxato macceessaa ixxuwwa qoxxissootto. Buchchiinsi qooccamu manchi od ixxuwwa hawwisoobee'isa; at adaraarinaa hawwaaninaa fitantootto. Waa'anne amma'nnammoommo; eehaare eese mahina «Cii'isa duu'n kolli barare» yitakkamuulla? Jor keen muccur keeno shiteena tunsonne maaxanta'a xiyya chchokkotto'ookko; qasoo mu'utam gudisso'ookko. Seerii gatti ogorii gindamulas muccur manchi maha isseena xanookko? Waa'i ixxi Keesammi Minennette; ixxek adilla'n barcum iimanennette; ixxi manni hundam moo'ookko; ixxi illim manni ooso saarayyookko. Waa'i xummaanoo baaxiilaanoo saarayyookko; ihukkaarem boqqooma iittitam keeno ha'yyooyyo. Ixxi gii'l kasharaa diinaa jor keenonne ga'nnisookko; shokkiisoo hafachchim ixxuwwina lasaanchi saam ihookko. Waa'i muccur ihu bikkina hanqa iittookko; hanqa iittoo keenim ixxo moo'ookko. Waa'a! Keese baddoo manni bee'i bikkina at iina agaage; amma'nnamoo manchim manni lambe'enne bee'e. Ixxuwwina'i ixxuwwim qophphano woccamuulla. Ixxuwwi woro'llka maaxxa'a suuminne qawwiissamo. Qawwiishsha wocoo suumee amaada wocoo allaboo hundam Waa'i bi'sookko! Oo keen «Ni Woshshinne neegalloommo; woncoommi suum niihane; Ni moollanni hinkane?» yitamo. Ihukkaarem Waa'i «Bux kee'nnaanninaa wor amadanto'i kee'n laachchi bikkinaa kaba ki'oommo; ixxuwwam gatisoommo» yoolla. Waa'ik sagar xaliila; lamar kore giiranne bukkamaa muccuru kin bi'llisa. Waa'a! At neese egere; ka qaranchiinsim heer heerina gatise. Jolli manni lambe'enne halee'lloo ammane jor keen beyyi hundannem wo'mmitamo. Waa'a! Hinkaa'n balli afeebeedu eese xaddootto? Heer heernattemennihe? Hinkaa'n balli afeebeedu ki gaga iinniinsi maaxxootto? Hinkaa'n balli afeebeedu i tiirinne fitamummuuyyi hee'oommo? Hinkaa'n balli afeebeedu hiimoo ballaa i wodan kichche'ookko? Hinkaa'n balli afeebeedu i maso'i iinniinsi hanaan ihookko? I Moollanni Waa'a! I kolli moo'e; i uunxatom macceese; leh diriichcho diriiroombee'isa i ille fooqaa'e. I diina'i eese kaa'llamisa i maso'im i ubimmanne liirantamisa issititte. Ihukkaarem an ki eroommanne amma'nnamoommo; ki gatishshannem liiramoommo. Iina hara'mmu Waa'a an galaxxoommo; Hundiinsi Lob Waa'i summinam zammaroommo. Qawwi keen ixxuwwi wodanonne; «Waa'i bee'e» yitamo; oo keen awwaad bee'i keeno; ixxuwwi baxim shigigaa'oohane; ee keeniinsi er luwwa issookkok matim bee'e. Qoossookkok Waa'am hasoo manni yooda'e moo'eena; Waa'i iimanenne ihaa manni ooso aad moo'ukko. Ihukkaarem hundim baaxiilo baxaakko; mateeyyoominnem awwaad bee'an ihaakko; danaam baxo baxookkok matim bee'e; hore'em matim bee'e. Ku jora baxxam keen qoossitamoyyonnihe? ixxuwwi i minaadaba hurbaaxxisa ittamo; Waa'i summam weeshshamoyyo. Waa'i muccur keenninne yoo bikkina jora baxxam keeno baachchi amadookko. Oo keen bux kee'n sawwite ginditamo; ihukkaarem Waa'i buxina girba. Isra'eela gatisaanchi Xiiyooniinsi waarona! Waa'i ixxi minaadaphpheka qeefajjo'o dabroo ammane Yaaqoob liiramona; Isra'eelim lobakata liiramona. Waa'a! Ki minenne garookkok ayyette? Ki keesammi duunannem hee'ookkok ayyette? Ixxi heechchanne miiqakkam luwwi bee'ek, hundi ammanem hanqa baxookkok, ixxi wodaniinsim ki'isaa hanqa wocookkok, ixxi suumenne qophphan bee'ek ixxi beshichchonne jora issoobee'ek; ixxi ollakkichchom hamoobee'ek Jora baxoo keeno gadookkok; ihukkaarem Waa'a baddoo keeno lonsookkok; maham kee'mmalli ihukkarem hidee'u luwwa issookkok Ixxi bira qaro'ina uwwoobee'ek; muccur keeno hawwodeena maqanxa aa'oobee'ek, eehido'i luwwa issookkok hore'em heekke'amooyyo. Waa'a! Keesenne amma'nnummi bikkina at eese egere. Waa'ina «At iina Moollanna; kiinniinsi bagaan iina eroommi bee'e» yummo. Uullanne he'llam keesanto'oo keen hinkido'i lombaammuwwa! Anim ixxuwwanne liiramoommo. Mulli waa'uwwi kolli geettam keenonne hawwi lophphookko. Ihukkaare an kiti'm xiiga mulli waa'uwwina dunoommoyyo; ixxuwwi summam i suuminne weeshoommoyyo. Waa'a! At iina sharadaa bikkee; i saamim ki angannette. I saam er beyyonne ubaakko; hanqinam iina afu gulummi lobakata liiransoohane. Eese sogoo Waa'a an qalaxxoommo; hiimonnem ihukkaare i tiir eese sogookko. An hundi ammanem Waa'a illag issoommo; ixxi i makkannetti ihu bikkina heekke'oommoyyo. Ee bikkina i tiir liiramukko; i foorim liiranchinne wo'mmukko; i orachchim ishtiggaa usheexxukko. Eese waammi woronne uttooyyo; ki keesammam shamona cawwitaa uttooyyo. At iina heechchi googo moo'issootto; ki beyyonne wo'm liiranchi yookko; ki makkannem heer heerina hee'oo heelli hee'ookko. Waa'a! Hanqo'i oogatina uunxoommi uunxato maccese; i laachcham macceese; qophphan bee'i suumiinsi firoo i uunxato macceese. Hanqo'i oogato iina oogate; ki illim hanqa moo'ona. At i wodano saarayyitto; hiimonne waattaahim eese keentitto; keentittaarem eesenne maham siiddittoyyo; i suumim damiga wocoobee'isa ege'llaammo. Ki saga'llisinne mulli kee'n baxiinsii jor kee'n googiinsii i gaga ege'llaammo. An hundi ammanem ki googonne taakee'ummo; i lokkim ki googiinsi koratukkoyyo. Waa'a! I uunxato macceessoo bikkina an keese weeshoommo; ki maccem i kollonne dabattaa i uunxato macceese. Keesenne magannaato aagoo keeno ki makkinne ixxuwwi diina'iinsi gatissoo Waa'a, maalalsiisoo ki eroomma iina la'ise. Illi beetichcho egerakkamisa eesem egere; ki laxxi woronne eese maaxe. Eese bi'issena ki'llo'i jor manniinsii kibbito'i mogaalli diina'iinsii eese gatise. Ixxuwwi qishixxat bee'i mogaalluwwa; ixxuwwi suumim amaada wocoohane. Eese hollita'a affa'a maddeena kibbito'ookko; amadda'a uullanne ubbuusseenam eesenne ille kaasso'ookko. Ixxuwwi sibaaru hobbichchisa; dugaa egeroo hobbichchi geexisam eese egetto'ookko. Waa'a ki'e! Ixxuwwa uullanne ubbuuse; jor keeniinsi ki bisa'inne i foore gatise. Ixxuwwik sharad xale'i ka uulli heechchanne ihu manni angiinsi eese gatise; ihukkaarem ixxuwwa ixxuwwina dissitti hawwinne guzumo'e; oo hawwim ixxuwwiinsii ixxuwwi oosiinsii higaa oos oosina afoohan ihona. Ihukkaarem muccuroominne an keese moo'oommo; baqoommi ammanem an keese labimma moo'aa liiramoommo. Waa'a! At iina malaayyi ikki bikkina an keese lobakata iittoommo. Waa'i eesenne jor afoobee'isa egeraancho; ixxi iina qoxxalli girbaa gatisaanchoo. I Waa'i eesenne jor afoobee'isa egeroohane; ee bikkina an ixxonne yabo aagoommo; ixxim iina agira; ixxi eese gatisaanchoo girbaa. Galat hasisoo Waa'a an weeshoommo; ixxim eese i diina'iinsi gatisookko. Leh us eese xagarukko; bichchi dirisim eese xuuxukko. Leh qaash eese kolli hundinnem amadukko; leh qaashim amadukko. Eesenne u'n afu ammane, Waa'a weeshummo; hara'mmoo'isinam ixxo uunxummo; ixxim keesammi ixxi minenne ihaa i sagara macceesukko; i laachchim ixxena macceesamukko. Waa'i quuqu bikkina uulli heekke'ukkoo huxe'ukkoo; duu'n lugummuwwim sheephsheephukkoo heeke'ukkoo. Ixxi saniinsem wiriir firukko; ixxi suumiinsem itoo gii'l labanii shokkiisoo gii'l kasharii firukko. Ixxim iimane diqaa aad dillukko; ixxi lokkiinsim woroon tuunsaakkoo duub hee'ukko. Kirubeelanne afuuraa bararukko; hafachchi ladonnem afuuraa iim firukko. Ixxi gagoomim tuunso gunguu'llukko; xeenaam tuunsi duubim ixxo kibbaakko. Ixxi illagenne yoo belellaatiinsi ki'ukkok kini'nnoo baradii gii'l labanii tunsaakkoo duuphphi worinne firukko. Moollanni iimaninne banqisa gugukko; Hundam xanoo Waa'i sagarim macceesamukko. Ixxi xiyyuwwam tokkosukko; diina'uuma binnaa'ukko; banqi bellellaatinnem hollukko. Waa'a! Ki diina'a axeetti ammanee ki quunqi sagaram ixxuwwina macceesissi ammanee dambalaqik lugum moo'amukko; uullikim shooho'i la'amukko. Ixxim iimaniinsi ixxi anga aad asse'aa eese amadukko; lobakat xilli wo'i woriinsim eese fissukko. Iinniinsi lobakata malaayyaammuwwi hee'llo'i i diina'iinsii eese sabbam qoxalluwwiinsii Waa'i eese gatisukko. Eesenne hawwi affu ammane i diina'i eesenne ki'llo'o; ihukkaarem Waa'i iina hara'mmukko. Waa'i eesenne liiramu bikkina gatisukko; haraar beyyonnem fissukko. Waa'i i muccuroo'mmisinne iina miqukko; i angi muccuroo'mmisinnem iina dabarukko. Waa'ika googo an awwonaammo; ixxonne afare dabaraa jor baxo baxummoyyo. Waa'i seera hundam guullaa egeraammo; ixxi ijaajiinsim laso daba'llummoyyo. Ixxi eesenne miiqoo luwwi ma'lluchchim bee'e; jora baximmiinsi i gaga ege'llaammo. Waa'i i muccuroo'mmisinnee I angi muccuroo'mmisinnee iina miqukko. Waa'a! Kiina amma'nnamu keenina atim amma'nnantaattoohane; xabbeen keenina atim xabbeena. Muccur keenina atim muccura; ihukkaarem boqqi keenina atim boqqa. Maashaalli keeno at gatissootto; ihukkaarem bolxitam keeno sholliissootto. Waa'a! At iina caakka; i tuunsom caakkissootto. I diina'a kaa'ona iina malaayye uwwitootto; ki malaayyinnem ki'n qasha xophphoommo. Waa'ik goog hore'em muccura; ixxi sagarannem kurakkam luwbee'ane; ixxonne yabo aaggam keen hundinam agira. Waa'iinsi bagaan mulli Waa'i bee'e; ni Waa'iinsi bagaan neesenne jor afoobee'isa egerookkok bee'e. Eese qoxxisookkok Waa'a; i googom xabbaa'ookkok ixxotte. I lokkom saarokkichchi lokkisa qoxxisookko; duunnuwwannem baachchi bee'e uullisookko. Ixxim i angina qaxxancha losisookko. I wodam naas xiyya chokkoroommisina qoxxisukko. Waa'a! Eese gatisoo ki agira iina uwwitto; ki makki angim eese bakkiisookko; iina hara'mmiteena waattaa eese lonsitto. An taakke'oommi beyyo haraassitto; luxuunxim eese ubbuusooyyo. An i diina'a hollaa amadoommo; ixxuwwam guullaa bi'isoo'n laso daba'lloommoyyo. Ixxuwwi la'mmaagge ki'llambee'isa issaa aphphisoommo; ixxuwwim i lokkiinsi woroon ubbamo. Oramoommisinam iina malaayye uwwitootto; i diina'i kaa'antamisa issitootto. I diina'i iinniinsi laso daba'llita'a gibbamisa issitaatto; eese sabbam keenom guullaa bi'isoommo. Ixxuwwi hara'mmatina laattamo; ihukkaarem ixxuwwa gatisookkok ayyim hee'ooyyo; odim Waa'i kollonne laattamo; ixxim macceesooyyo. An ixxuwwa hafachchi fii'aa massoo di'llisa liitoommo; googonne hee'oo ha'llisam hance'amoommo. Ka boqqi minaadabiinsi eese gatissitto; mulli minaadabannem adil issitto; an la'oombee'i minaadabim iina ijaajamaakko. Allaggi minaadab eese shoobbookko; i sado macceesukkisam iina ijaajamookko. Ixxuwwim baddimminne tiiro bi'llamo; maaxanto'i girbi woriinsim huxe'llu'uuyyi fittamo. Waa'i hee'oohane; eese joriinsi egeru Waa'ina galat ihona; eese gatisu Waa'im iimiimihona; Ixxim i diina'iinsi baado miqisookko; minaadabbuwwim iina ijaajantamisa issookko. Ixxim i diina'iinsi eese gatisookko. Waa'a! I diina'a kaa'oommisa issitaa eese lonsitootto; hantaaraan kee'n angiinsem eese gatissootto. Ee bikkina Waa'a! Minaadaphphi lambe'enne keese galaxxoommo; ki summam mazmuurinne lonsoommo. Ixxi adil issukkaannina lob kaachcha uwwookko; ixxi doo'llukkaanninam ixxi eroomma moo'isookko; Daawiitinaa ixxi shumo'inaa heer heerina eekka issookko. Iimannuwwi Waa'ika lomba kurookko; iimanim ixxi angi baxo alallaatokko. Balli ballina kurookko; hiimim hiimina lachcha alallaatookko. Ixxuwwina woc te'im sagar bee'e; ixxuwwi sagarim macceesamooyyo. Ihukkaarem ixxuwwik woshshi uulli hundam ixxuwwi sagarim uulli tochchi hundam afookko. Waa'im iimanenne eeliinchina hee'oo beyyo gudisukko. Idaayyichchi du'm woriinsi firoohaannisa eelliinchim hee'oo beyyiinsi firookko; odim geellichchanne xoreexxameena gudu qoxar manchisa liiramookko. Ixxim iimanenne mat tochchinne firaa mulli tochchi afeebe'e haraassaa marookko; ixxi iibbiinsim maaxameena xanookkok ma'lluchchim bee'e. Waa'ik seer hore'em muccura; foorinam haarechchi heechcha uwwookko; Waa'ik ijaaj amma'nnamaakkoohane; ixxim qoossimbee'i keenina qoorooma uwwookko. Waa'i seer hanqo'ane; wodanom liiransoohane; Waa'ik ijaaj muccura; ille caakkisoohane. Waa'a baddimmi danaamo; heer heerinam qoxxaa hee'oohane; Waa'ik oogat hanqo'anee guullaahim muccuraa. Ixxi worqiinsii hore'em muccur worqiinsii lophphaa erane; odim marabiinsii maraphphi damaamiinsem lophphaa xee'oohane. Ixxim ki awwadaancho axeerookko; ee seera egerimmim irifo'aamo. Gaqqi huushancha la'ookkok ayyim bee'e; Waa'a! Daphphaakkoo baaxiiliinsi eese muccusse. Iggimminne baxakkam baaxiil eese ki awwaadaancho ijaajoobee'isa egere; ee ammane an miiqakkam luwwi bee'an ihoommo kee'mmaalli baaxiiliinsim muccuroommo. Waa'a! At eesenne jor afoobee'isa egeraanchoo gatisaanchoo; i suuminne wocoommi woshshii i woda'n sawwitii keese liiransoohan ihona. At hawwitaa uunxitoo ammane Waa'i macceesona; Yaaqoob Waa'i keese egerona. Keesammi ixxi miniinsi kiina hara'mmato asse'ona; Xiyoo'n Duunanne ihaatim keese bakkiisona. At uwwitti luwwi hundam ixxi aa'ona; at hincaa'lloo shokkiisakka'a hincaa'akkam kitimannem Waa'i liiramona. At ki wodanonne mixxitti luwwa uwwona; ki sawwit hundam Waa'i wonshona. Ki kaachchanne neese liirammaa ililinoommo; odim ni Waa'i summinne ni kaachchi mare'e iimiimaa'nnoommo; at uunxitti luwwi hundam Waa'i wonshona. Waa'i doo'llu adila gatisoo'isa kaba la'ummo; ixxi malaayyaam gatisimminnem keesamaakkoo iimanenne ihaa adilina dabachcha uwwookko. Mat mat keen o'l gaare'enne, mulli keen odim ixxuwwi fardonne bakke'llamo; ihukkaarem neese ni Moollanni Waa'anne bakke'nnoommo. Ixxuwwi qolanta'a ubbamo; ihukkaarem neese ki'nnaa qoxxinaa uullinoommo. Waa'a! Adila gatise; neese keese weenshoommi ammanem macceese. Waa'a! Adilina malaayye uwwitti bikkina liiramaakko; ixxena kaachcha uwwitti bikkinam lobakata liiramaakko. At ixxi mixa'nneka uwwitto; ixxi keese xa'mmu luwwam hoottittoyyo. At lobakat er maasso amaddaa ixxo taqeebaltitto; ixxi horoorennem muccur worqi adilla'n mare'e issitto. Ixxim heechcha uwwitoo'isina keese uunxukko; atim qeeraa'l umuraa heer heerina hee'oo heechchaa uwwitto. At ixxena kaachcha uwwitti bikkina ixxek lombi lophphaakkoohan ihukko; odim hibbaa nuuraa uwwitto. Eeyya, heer heerina ihoo maasso ixxena uwwitto; at ixxenne maqire ihimmi ixxo liiransookko. Adilim Waa'anne amma'nnu bikkina Hundam xanoo Waa'i eroommiinsi ki'ukkok hore'em heekke'amooyyo. Ki angi ki diina'a hundam amadookko; ki makki angim keese saboo keeno hundam qeefadookko. At moo'antoo ammane midachchi gii'riinsi firoo laba'nnisa shokkiissootto; Waa'im ixxi quunqinne bi'isookko; giirim ixxuwwa itookko. Ixxuwwi fikkaannam uulliinsi bi'issootto; ixxuwwi shumo'om minaadaphphi lambe'iinsi bi'issootto. Ixxuwwi keesenne jora baxxeena sawwitamoo dollottamoo ihukkaarem ixxuwwi sawwixxek wo'mmooyyo. Ki xiyya ixxuwwanne tokkosseena xabbaa'llootto; ixxuwwim laso daba'llita'a gibbamisa issitootto. Waa'a! Ki wodinne iimiimihe; hundiinsi lob ki malaayyi bikkinam galaxxi mazmuura zammalloommo. I Waa'a! I Waa'a! Eese mahina uttitto? Eese gatisimmiinsii i laachchi sagara macceesimmiinsii mahina qee'llitto? I Waa'a! Ballanne an ki kollonne laaroommo; ihukkaarem at macceessittoyyo; hiimom ihukkaare usheexxummoyyo. Ihukkaarem at Isra'eelanne galaxxantaattoohane; keesantaahim hee'lloo adila. Gaassi niyyanno'i keesenne amma'nnanto'o; keesenne amma'nnanto'aare at ixxuwwa gatissitto. Ixxuwwi ki kollonne laatto'aare at ixxuwwa gatissitto; keesenne amma'nnanta'ahim tuutto'oyyo. Ihukkaarem an daquuchcho bagaan manchoyyo; eesenne manni naacoolla minaadabim eese gadoolla. Moo'ookkok hundim eesenne naacoolla; eese gadda'a ixxuwwi horoore heekkeessu'uuyyi «Ixxi Waa'anna'i amma'nnamaakko hino'i ixxo gatisona; ixxomdu iittoohan ihulas hino'o gatisona» yitamuulla. Ihukkaarem at iyyummi godabiinsi xummam qaramoommisa issitto; iyyummi anuuna iicoommi ammaniinsim ki'isaa an keesenne amma'nnamummo. An iyyummaansi qaramummaanniinsi ki'isaatim eese abooyyittok atette; iyyummi godabonne uumamummaanniinsim ki'isaa at iina Waa'a. Hawwi eesenne afu bikkinaa iinam hara'mmookkok matim bee'i bikkinaa at iinniinsi qee'llititte. Eese dut diina'i qasoo moolluwwisa kibbito'ookko; Baasaa'n uulli malaayyaam moolluwwisam kolli hundinnem eese kibbito'ookko. Ixxuwwim itoo luwwa siidaa amadeena toxoo hobbichchisa ixxuwwi aqo eesenne fooqaa'llo'ookko. I malaayyi hoogaa wo'isa daadukko; i miqim edamu beyyi hundiinsim annanni ihaakko; i wodanim i woronnem buu'llisa bukkamaakko. I leella'i gala'isa gogukko; i allabim aqoronne amaxxamukko; eesem leeshisa buchchanne uunjitto. Wish eese kibbaakko; jor kee'n dummichchi eese kibbaakko; i angaa lokkoo qasaakko. I miq hundim xigamukko; i diina'im eese xuxxaa moo'ukko. I eddechcham ixxiwwi gagina baxxanto'o; i qambiisannem saamo issaqqanto'o. Waa'a! At iinniinsi qee'llititte; iina hara'mmiteena qaqqissaa afe. Eese bisa'iinsi gatise; i foorem ka wishiinsi gatise. Eese ka hobbi suumiinsi gatise; qasoo boobi'l buudiinsim eese gatise. Ki summa iyyabbaayyuwwina kuroommo; ixxuwwi wixxixxi lambe'ennem keese galaxxoommo. Waa'a badditakkam keen ixxo galaxxehe; ki'nnuwwi Yaaqoob shumo'i hundim ixxo lonsehe; Isra'ee'l oos hundim ixxo baddehe. Ixxi hawwaan keeno gadooyyo; ixxuwwi hawwonnem cawwaa urooyyo; ixxi illem ixxuwwiinsi daphphaa'ooyyo; ixxuwwi laachcham macceesookko. At issitti er baxina dut minaadab wixxu beyyonne keese galaxxoommo; keese baddoo kee'n illagennem kiina uga'a uwwoommo. Buxxi godditeebee'e ittamo; Waa'i kollonne waattam keen ixxo galaxxitamo; ixxuwwi wodan hee'llam doollenne hundannem liiramookko. Uulli hundannem hee'llam minaadab Waa'a tiittamo; ixxi kollonem daba'llitamo; minaadaphphi sulli hundim ixxena otossitamo. Adillan hundim Waa'ane; ixxim minaadab hundam gassookko. Uullanne hee'llam goddaan hundim ixxena otossitamo; lehiinsi gatteena xantambee'i manni buchchannem daba'llita'a aaggam keen hundim ixxena otossitamo. Ka lasaqqi qaranchim ixxena awwaadookko; manni hundim Waa'i bikkina lasaqqi qaranchina kurookko. Ixxuwwi ka lasage qaramoo minaadabina «Waa'i ixxi minaadaba gatisaakko» yitu'uuyi kuttamo. Waa'i eese allaaraancho; iina hanqatoo luwwi ma'lluchchim bee'e. Er danaam hix yoo allaachchi biiranne eese usheexxisookko; usheexxaxxi wo'i yoo beeyyom awwonsaa massookko. I foore dabaraa haarechchisookko; ixxi summi bikkinam eese muccuro'm googonne awwonsookko. Waa'a! At iinninne yoonti bikkina leh haforonne ganbabbi tunsonne taakke'umta'nnim; eesenne jor afookkoo yaa baddoommoyyo; ki biccii ki sikkii eese qoxxisookko. I diina'i moo'llu'uuyyim iina maadda gudissitto; i horoorennem zayta labbitto; i hunbullonnem wo'mmaa dunamoo'isa issitto. Ki iitii erommii i heechchi do'lli hundannem iinniins annanni ihoobee'isa erisa la'oommo; ee bikkina Waa'a! An hee'oommi doollenne hundannem ki minenne hee'oommo. Uullii uullanne yoo luwwii hundim Waa'ane; ku uullii ka uullanne hee'oo luwwii hundim ixxane. Ixxim xilli danbalaqquwwi hanenne uulla kaasukko; uulli lugumom xilli wo'onne qoxxisaa uullisukko. Waa'i duunanne ayyi fireena xanookko? Ixxaannonne keesammi beyyondu ayyi uulleena xanookko? Ixxi angii jor baxiinsi ixxi wodanii jor sawwitiinsi muccur ihukkok; Waa'i bikkenne mulli luwwanne otossoobee'ek te'im qophphanonne hide'oobee'ek. Eehido'nne'i manchi Waa'iinsi maasso aa'ookko; odim ixxo gatisaanchi Waa'iinsim hanqa siixxookko. Waa'a hassam qaranchii Yaaqoob Waa'i kollonnem hincitam keenii eehido'i keeno. Lombi adil aagoo'isina; ki'nuwwi gooccuwwii hinaxxi xuffeewwii fooqi'llehe. Ku lombi adil ayyette? ku lombi adil Waa'a; ixxim hundiinsi qoxaraa malaayyaamoo; orannem kaa'oo malaayyaam Waa'a. Lombi adil aagoo'isina ki'nnuwwi gooccuwwii hinaxxi xuffeewwii fooqi'llehe. Ku lombi adil ayyette? ku lombi adil gogoxxi Moollanni Waa'a. Waa'a! An i tii'lleka kiina kuroommo. I Waa'a! An keesenne amma'nnoommo; i diina'i eese kaa'llamisa issitaa tuussiissitte. Keesenne amma'nnantam keen hore'em tuuttamoyyo; ihukkaarem qawwiissu'uuyyi mashka'i bee'em hantaaro baxxam keen tuuttamo. Waa'a! Ki googo iina la'ise; ki googonnem an maroommisa losise. At eese gatisaanchi Waa'i ikki bikkina ki hanqanne hee'oommisina eese awwonsee losisee; an hundi ammanem bakke'oommok keesennette. Waa'a! Gaassiinsim ki'isaa hee'u ki qishixxatoo ki eroommaa tiire. Waa'a! I woraadda'n baaxiiloo hawwojjaa haafihe; heer heerina hee'oo ki eroomminnee ki qishixxatinnee eese tiire. Waa'i biijaallaa hanqqo'anee ihu bikkina baaxiilaanina marimmi hasisoo googo kurookko. Maashaalluwwa hanqi googonne awwonsookko; ixxuwwinam ixxi googo losisookko. Ixxeka hidi'l sagaraa ijaajoo egettam keenina Waa'i goog heer heerinam eroommaa hanqaa. Waa'a! Ki summi bikkinaa yitaa; iikka lophphaakkoo baaxiilo haafihe. Waa'a baddoo manchi ayyette? Oo manci marimmi hasisoo googom Waa'i losisookko. Oo manchi hundi ammanem amaxxaam ihaa ihookko; ixxi shumo'i uulla lagaa'ookko. Waa'i ixxo baddoo keenina beshichcho; ixxi hidi'l sagaram ixxuwwina la'isookko. I lokko qaashiinsi fissookkok Waa'i ihu bikkina i illi hundi ammanem ixxi kollonnette. An matayyichchoo hawwaanchoo ihummi bikkina Waa'a! I koollonne daba'llitaa at iina qishixxe. Eesenne hawwi lophphaakko; i u'nniinsim eese fisse. Eesenne afu u'nnaa hawwoo moo'e; i baaxiil hundam haafihe. I maso'i hinkaa'nna dutda'e moo'e; eesem hinkaa'nna sabboda'e moo'e. An keesenne yabo aagummi bikkina eese tuussiissitte; eesem egeree gatisee. An keesenne neeyyato issummi bikkina muccuroomii xabbeenoomii eese egerona. Waa'a! Isra'ee'l minaadaba ixxuwwanne afoo hawwi hundiinsim gatise. Waa'a! An muccur ihummi bikkinaa malamoo'n keesenne bakke'ummi bikkinaa iina oogate. Waa'a! Saarayyitaatii keentaatii eese moo'e; i wodanoo i tiiroo saarayye. Ki eroommi i illagennetti ihu bikkina ki hanqi googonne taakke'oommo. Awwaad bee'i manninne maqire afuuroommoyyo; labisaaninnem maham issoommoyyo. Jor issitam kee'n beshoommano hasoommoyyo; boqqi keeninnem maqire afuuroommoyyo. Waa'a! An jor issumbee'isa moo'iseena anga aanshaqqoommo; kiti'm beyyo do'ummuuyyim kiina otossoommo. Sagara iimaa'aa galaxxi mazmuura zammarummuuyyi at issitti maalalsiisoo bax hundam kuroommo. Waa'a! At hee'lloo mine iittoommo; ki lombi hee'oo beyyom iittoommo. Baaxiilaaninne maqire eese bi'issitte; manna shitam keeninne maqirem i foore bi'issitte. Ixxuwwi hundi ammanem hantaaro sawwitam keeno; odim hundi ammanem maqanxa aa'lleena guddo'oo keeno. Ihukkaarem an miiqakkam luwwi bee'i heechcha hee'oommo; at iina qishixxee eesem gatisee. Hawwodoo luwwi bee'i beyyonne eese uullissitto; ki minaadaphphi wixxixxi lambe'enne ihaa keese galaxxoommo. Waa'i iina caakkaa gatisaanchoo; ee bikkina an ayyem baddoommoyyo; Waa'i eesenne affoo jor hundiinsim egeraancho; ee bikkina eese ayyim baddisooyyo. Jor baxxam keen eesem u'nnissam i maso'i eese hawwoddeenaa shiteenaa yakitu'uuyyam ixxuwwi gagim qolanta'a ubbo'o. O'l gogot eese kibbuta'nnim an baddoommoyyo; or eesenne ki'uta'nnim an Waa'annemdu bakke'oommo. An mat luwwa Waa'a xa'mmummo; oohim an lobakata hasoommane; i heechchi doollenne hundannem Waa'i minenne hee'eena, Waa'i maalalsiisoohan ihukkisa moo'eenaa ixxi minenne ixxo uunxeenaa hasoommo. Eesenne hawwi afoo ballam ixxi iina daato'i ihookko; ixxi minennem eese maaxookko; geejji kinannem qoxxisaa uullisookko. Ee bikkina eese kibbito'i i diina'a kaa'oommo; liiranchinne «Ilil» yummuuyyi ixxi minenne ixxena kitima hincaa'oommo; anim Waa'a galaxxummuuyyi zammaroommo. Waa'a! An sagara iimaa'aa ki kollonne laaroommi ammane macceese; atim iina qishixxitaa dabachcha uwwe. I wodan «Waa'a hase» yukko. Waa'a, an keese hasoommo. Eese gatisaanchi Waa'a! Ki ille iinniinsi daphphaa'llitte; eesenne ki awwadaanchonne quuqqaa eese qeessititte; at iina hara'mmaancho; eese unjitittee xaddittee. Iyyannii iyyummaa eese xaddota'nnim Waa'i eese abooyyookko. Waa'a! Ki googo iina losise; i diina'i bikkinam er googonne awwonse. Qophphano naqqassam keen boqqoominne eesenne ki'llo'ookko; ee bikkina Waa'a! I diina'i eese hasso'isa issitona higissaa uwwititte. Foorinne yo'i keen hee'llam uullanne Waa'ika eroomma moo'oommisa amma'nnoommo. Waa'anne neeyyato isse; ki wodan baddoone, at qoxxe; Waa'anne neeyyato isse. Eesenne jor afoobee'isa egeraanchi Waa'a, an keese weeshoommaare at i weeshano macceese; atimdu i weeshano macceessibeelas waammi barenne aagoo keeniinsi matisa ihoommo. At hara'mmitona hasaa laaroommi laachcha macceese; ki keesammi mi'n kollonne i anga ki'isaa uunxoommi uunxatom macceese. Wodanonne jora sawwitu'uuyyi suuminne er sagara woccam baaxiilaanoo boqquwwaa bi'issoo ammane ixxuwwinne maqire eese bi'issitte. Ixxuwwi baxxo'i baxikaa issito'i jollikaa baado dabare; ixxuwwi angi baxisam ixxuwwina miqe; ixxuwwinam laboo luwwa dabare. Waa'i baxu baxo ixxuwwi mahannem xiggo'oyyo; ixxi angi baxom xaddo'ookko; ee bikkina ixxuwwi od hee'llambee'isa heer heerinam bi'isookko. I uunxato macceesu bikkina Waa'i galaxxamaakkoohan ihona. Waa'i iina malaayyee agiraa; ixxi iina hara'mmoo bikkinaa eese liiransoo bikkinaa an ixxonne amma'nnamoommo; mazmuurinnem ixxo galaxxoommo. Waa'i ixxi minaadabina mallaayye; ixxi doo'llu adilinam egeraanchoo gatisaanchoo. Waa'a! Ki minaadaba gatise; kiihan ihu keenom maasse'e; ixxuwwinam at allaaraanchi ihe; heer heerinam ixxuwwa abooyye. Ki'nnuwwi Waa'i oos Waa'a galaxxehe; lombaa galataa ixxena uwwehe. Waa'ika lombaam summa galaxxehe; keesamaakkoo lombaam Waa'ina otossi'llehe. Waa'ik sagar dambalaqquwwane macceesamukko; lombaam Waa'im banqisa gugukko; cambalaqquwwannem gugukko. Waa'ik sagar lobakata malaayyaamo; odim ixxi sagar hibbinne wo'mmaakkoohane. Waa'ik sagar digibbuwwa iiqoohane; Libaanoos uulli digibbuwwam ihuta'n iiqansoohane. Ixxim Libaanoos duuna waataannisa Siriyoo'n duunam boobi'l waataannisa xophxophaa'ookko. Waa'i sagariinsi gii'l laban firookko. Waa'ik sagar udma'i uulla heekkeesookko; Waa'i Qaadees udma'a huxiisookko. Waa'ik sagar saaro'i kara qaroo'isa issookko; doo'm haqqam bachchookko; ixxi minenne yoo keenim ixxi sagara macceesaa «Waa'ina lombi ihona» yookko. Waa'i xilli wo'uwwinam adila; ixxi adilla'n barcumannem afuuraa heer heerina adil ihaa hee'ookko. Waa'i ixxi minaadabina malaayye uwwookko; ixxuwwam xumma uwwimminne maasse'ookko. Waa'a! At eese gatissitti bikkinaa i maso'im eesenne liiramoo'isa issitbee'i bikkinaa an keese galaxxoommo. I Moollanni Waa'a! At iina hara'mmitoo'isina ki kollonne laarummo; at eese fayyiissitto. Waa'a! At eese waammanchiinsi gatissitto; xilli barenne aageena maram hee'ummo; ihukkaarem at i foore dabattitto. Ki'nnuwwi Waa'i minaadab hundim mazmuurinne Waa'a galaxxehe; ixxi keesammi summam galaxxehe. Ixxi quunqi hofqax ammaninatte; ihukkaarem ixxi bijjoom heechchi doolli hundoominatteme; hiimo wi'llakkota'nnim daranne liiranchi ihookko. Xumminne yoommi ammane «An hore'em heekke'oommoyyo» yummo. Waa'a! At iina nuura uwwitti ammane heekke'oobee'i duu'nnisa eese qoxxissitto; ihukkaarem at ki gaga iinniinsi maaxxitti ammane an muggummo. Waa'a! An ki kollonne laarummo; at hara'mmitonam uunxummo. I leh kiina maha awwaadookko? An waammamimdu kiina mah awwaadookko? An buchchi ihaa lasage keese galaxxeena xanoommonnihe? amma'nnantaattoohaannoomdu alallaateena xanoommonnihe? Waa'a! I uunxato macceese; iinam qishixxe; Waa'a! At iina hara'mme. Iikka kichchechcha liiranchanne dabattaa kadoommisa issitto; iinniinsi xiddi eddechcha sheelattaa liiranchi eddechcha eddeessitto. Ee bikkina an mazmuurinne keese galaxxoommo bagaan cawwoommoyyo; i Moollan Waa'a! An keese heer heerinam galaxxoommo. Waa'a! An keesenne yabo aageena waaraammo; ee bikkina eese tuussiissitte; at muccur ikki bikkina eese gatise. Ki macce i kollonne dabare; qaqqissaa eese gatise; at iina yabo aagoommi kinaa eese gatisseena qoxxaalli girbaa ihe. At eese joriinsi egettoo girba; ki summi bikkinaa yitaa at eese awwonse; maroommi googom moo'ise. An yabo aagummok keesennet ihu bikkina maaxaqqanne qaashakko'i qaashiinsi eese gatise. Hanqo'i Moollanni Waa'a! i foore ki anganne higisaa uwwaammoo bikkina at eese gatise. At qophpha'n waa'anne otossitam keeno hundam sabbootto; ihukkaarem an keesenne bakke'oommo. Ki eroommanne an liiramoommo; lobakatam liiramoommo; i hawwo moo'llaatto; i u'nnam laqqaatto. I diina'i anganne eese higissaa uwwittoyyo; eesem haraar beyyonne fissitto. Waa'a! An lobakat hawwonne yoommi bikkina at iina qishixxe; lobakata wi'llummi bikkina i illi jaamaakko; i maarii foorim hoogaakko. I heechchi doolli kichchechchinne i umurim wi'llimminne beeddukko; hawwi lophphimmiinsi ki'ukkok i malaayyi hoogukko; i miqim i woronnem fuuntukko. An i diina'ina osachcha i olla'ina naaco eese laqqam keeninam shigigaa'oomman ihaammo; googonnem eese moo'lla'a iinniinsi gibbamuulla. Lehu manchisa hundim eese xadukko; iiqamukkaare uunjakko'i buchchi mu'uxxisam ihummo. Dut manni hashashshantamoka an macceesummo; baa'isoo luwwi kolli hundinnem eese kibbukko; ixxuwwim eesenne ki'lleena a'llantamuulla; eese shiteenam sawwite gudissamuulla. Ihukkaarem Waa'a! An amma'nnamoommok keesennette; anim «At iina Waa'a» yoommo. I heechchi hundi ammanem ki angannette; i diina'i angiinsii eese holloo keeniinsii gatise. Ki awwaadaancho eese er illinne moo'e; ki eroomminnem eese gatise. Waa'a! Ki kollonne laaroommuulla ihu bikkina at eese tuussiissitte; ihukkaarem boqqi keen tuuttamisa isse; ixxuwwim suume duudda'a Si'oolanne dillitona. Muccur manchonne amaadinne, gado'innee biranchinnee qophphano woccam kee'n suum duudona. Keesenne yabo aagga'a keese lonsimminne badditam keenina manni illagenne uwwiteena ixxuwwina gudissitti eroommi hinkaa'nna lobakata. Dollottam keeniinsi at yoonti beyyonne maaxxootto; ixxuwwaanniinsi qasoo allabiinsim ki minenne daphphaa'llaa egettootto. Diina'inne kibbamaakkoo beero'onne hee'ummi ammane maalalsiisoo ixxi eroomma iina moo'isu Waa'i galaxxamona. An muggaa «Waa'i illagiinsi bi'aammo» yummo; ihukkaarem an keese weeshummaare at i laachcha macceessitto. Ki'nuwwi Waa'i minaadab hundim Waa'a iittehe; ixxena amma'nnantam keeno jor afoobee'isa Waa'i egerookko ihukkaarem amaadaano laboo'isinne guzumo'ookko. Ki'nnuwwi Waa'anne neeyyata issitakkam keen hundim qoxxehe; ki'nnuwwi wodanim baa'oone. Baxxo'i baaxii'lleka haafite siixxito'i keen ixxuwwi hawwojjim shiinshamu keen maassaammuwwa. Ixxi baaxiilo Waa'i xigoobee'i manchi ixxi woronnem jolbee'i manchi maasse'amaakkoohane. An baaxiilo biiraa yoo'n cawwaa urummi ammane balli hundoomam qitinummi bikkina hoogummo. Waa'a! Eese ballaa hiimoo guzumo'l bikkina aashaalli luwwi billi iibbanne gogoo'isam i malaayyim i woriinsi mullucaa beeddukko. Ee lasage i baaxiilo kiina biiraa yummo; an bi'isummi bi'ishsham kiinniinsi maaxummoyyo; hawodummi hawwojji hundam kiina biiraa yeena murte'ummo; atim i baaxil hundam haafitto. Ee bikkina kiina amma'nnanto'i ki minaadab hundim hawwi ammane keese uunxitamo; malaayyaam hawwi dirisisa afukkaarem ixxuwwa hore'em nakkooyyo. Waa'a! At iina maaxamoommi beyyo; odim eese hawwiinsi gatissootto; jor afoobee'isa oot ikki bikkina an kiina sagara iimaa'aa zammaroommo. Waa'im «At marimmi hasisoo googo an losisoommoo awonsoommoo; odim keese sogoommoo egeroommoo» yukko. Qoossimbee'i faraxxisaa baqullisaa ikkakkotte; ixxuwwi hakkamminnee fuulo'innee masakkantobeeilas ki'nnuwwina ijaajantamoyyo. Jor keen dut hawwonne aaggaamo; ihukkaarem ixxonne amma'nnantam keeno Waa'i ixxi eroomminne egerookko. Ki'nnuwwi muccur keen Waa'anne liirammehe; lobakatam liirammehe; woda'n xabbeenoominne Waa'ina ijaajantakkam keen hundim liiranchinne «Ilil» yi'llehe. Ki'nnuwwi muccur keen Waa'anne liirammehe; xabbeen keen Waa'a galaxximmi hasisookko. Maasiinqo'inne Waa'a galaxxehe; tommi muuncan yoo diitta'innem ixxena zammallehe. Haareechchi mazmuura ixxena zammallehe; diitta'a danaamisa axissakka'a lellehe; liiranchinnem «Ilil» yi'llehe. Waa'ik sagar hanqa; ixxi bax hundim amma'nnamaakkoohane. Waa'i muccuroomaa hanqqo'i oogatoo iittookko; uullim ixxi eroomminne wo'mmaakko. Waa'i iimannuwwa ixxi sagarinne iima'n gogotam ixxi ijaajinne qooccukko. Dambalaq wo'i hundam mat beyyonne wixxaa'ukko; xillaalli cambalaqquwwam mat beyyonne wixxaa'ukko. Uulli hundim Waa'a baddona; heer uulli minaadab hundim Waa'a lonsona. Waa'i wocukkaare uulli qooccamukko; ixxi ijaajukkarem hundem luwwim qoxxaa uullukko. Waa'i ixxo laqqambee'i minaadaphphi a'llancha awwaad bee'an issookko; ixxuwwi sawwitim wo'immoobee'isa issookko. Ihukkaarem Waa'ik sogitan heer heerinam qoxxaa hee'ookko; ixxi woda'n sawwitim qaranchi hundinam hee'ookko. Waa'i ixxuwwina Moollanni ihu minaadab Waa'i ixxi gagina doo'llu minaadabim maassaamo. Waa'i iimaniinsi aad moo'ookko; ixxim manni oos hundam moo'ookko. Ixxi adilla'n barcumanne afuuraa uullanne hee'oo luwwi hundam aad moo'ookko. Ixxuwwika hundikam wodano qooccukkok ixxuwwi baxxam bax hundam la'ookko. Adil ixxena yoo o'l gogot dut ihu bikkina gatooyyo; geedim ixxi qoxallaninne xorooyyo. O'l faradinne kaa'oommo yakka'a neeyyato issimmi awwadbee'ane; ee faraxxi qoxallanim ayyem gatisooyyo. Waa'ik illi ixxo badditam keenonnette; ixxi eroommim neeyyata issitam keenonnette. Ixxim ixxuwwa lehiinsi gatisookko; qaanne'i maaragem foorinne hee'isookko. Waa'i niina egeroohanee hara'mmoohanee ihu bikkina neese ixxonne neeyyato issinoommo. Ixxi keesammi summanne amma'nnammummi bikkina ni wodan ixxonne liiramookko. Waa'a! Keese neeyyato issinummi niina ki eroommi ihona. An hundi ammanem Waa'a galaxxoommo; i suumim ixxo galaxximma hore'em urooyyo. An wodaninnem Waa'anne bakke'oommo; maashaalluwwi eekka macceessa'a liirantamo. Waa'a iinninne maqirem lonsehe; mateeyyoominnem ixxi summa iimiimaa'nnona. An Waa'a uunxummo; ixxim i uunxato macceesaa dabarukko; baddummi luwwi hundiinsim eese gatisukko. Waa'i kollonne hincitam kee'nnek ilkolli caakkookko; ixxuwwi hore'em tuuttamoyyo. Ku hawwaanchi Waa'i kollonne laarukko; Waa'im macceesukko; ixxim hawwiinsi hundiinsim gatisuko. Waa'i asse'amaan Waa'a badditam kee'n kululleetanne ikka'a ixxuwwanne jor afoobee'isa egettamo. Waa'i danaam ihukkisa moo'llakka'a laqqehe; ixxonne yabo aagookkok maasse'amaakkoohane. Ki'nnuwwi keesantakko'oo Waa'i minaadab Waa'a baddehe; ixxo badditam keenina mahim hoffe'ooyyo. Hobbi itoo luwwa hoogaa sibaareena xanookko; ihukkaarem Waa'i kollonne hincitam keenina er luwwi mahim hoffe'ooyyo. I ooso, waallehe; i woshsha macceessehe; anim ki'nnuwwina Waa'a baddimma losisoommo; Heechcha mixookkok er luwwam lobakat doollina moo'eena hasookkok ayyette? Jora wocimmiinsi ki allabo, qophphano wocimmiinsim ki suume ege'lle. Joriinsi gibbaa er luwwa isse; xumma hase; hordoofeme. Waa'ik illi muccur kee'n kollonnette; ixxi maccim ixxuwwi laachcha macceesimmannette. Ihukkaarem ixxek illi jora issitam keeno sabookko; ixxuwwi tiirantambee'isa uulliinsi bi'llamo. Muccur keen Waa'i hara'mmoo'isina laattamo; ixxim ixxuwwi laachcha macceesookko; ixxuwwam afoo hawwi hundiinsim gatisookko. Kichchechchinne wodan iiqamu kee'n gadanonne Waa'i yookko; kichchechchinne tiirbi'u keenom gatisookko. Muccur manchonne dut hawwi afookko; ihukkaarem ee hawwiinsi hundiinsim Waa'i gatisookko. Waa'i ixxo erisa egeroo bikkina ixxi miqik matichchim iiqamooyyo. Baaxiilaano ixxuwwi gaqqi jollim shookko; muccur keeno sabbam keen guzumo'antamo. Waa'i ixxi awwaadaano gatisookko; ixxonne magannaato aaggam keenonnem jor afooyyo. Waa'a! Iinninne uullixxantam keeninne at ixxuwwinnem uullixxame; iinninne qasantam keeninne atim qasame. Agiraa mulli o'l mu'utaa amaddaa eese gatisseena ki'e. Eese hollitam keenonne ki bagadoo bisa'aa ki'ise; iinam «Keese gatisoommok anette» yihe. Eese shiteena hassam keen tuuttonaa sholle'llonaa; eesenne jor issiteena a'llantam keen hundim timtimita'a lasonne daba'llitona. Ixxuwwi hafachchi massoo bura'isa ikkona; Waa'i asse'amaanchi ixxuwwa hollona. Ixxuwwik goog tunsoo luxuunxaa ihona; Waa'i asse'amaanchim ixxuwwa hollona. Matem mashkabee'em maaxaqqanne iina qaasha qashsho'ookko; ee'isam eese ubbuusseena xilli bare hinto'ookko. Sawwitobee'i bichchi ixxuwwanne afona; ixxuwwi maaxxa'a qaashsho'i qaashim ixxuwwa amadona; hinto'i barennem ubba'a bi'llona. Ee lasage an Waa'anne liiramoommo; ixxi eese gatisu bikkinam lobakata liiramoommo. Anim i mannoomat hundinnem «Waa'a! Hoongaano qoxalluwwi angiinsi buxaa hawwaanom bogaa'n angiinsi gatisookkok kiinni'nnoo'ok ayyette?» yoommo. Jor manni eesenne ki'lla'a kasasso'o; an la'oombee'i luwwam eesenne naqqasso'o. Ixxuwwi eroommi bikkenne jora dabatto'o; ee bikkina an neeyyato murummo. Ihukkaarem ixxuwwi jabbito'i ammane an xiddi eddechcha edde'ummo. Soommanimminnem i gaga hoogisummo; ihukkaarem i uunxatina dabachchi bee'ukko. Eeham beshichchina te'im iyyabbaayyina issoommisa kichche'aa issummo; ama leto'aare wi'lloo manchisa i horoore heeshaa'aa wi'llummo. Ihukkaarem an hawwummi ammane ixxuwwi hundim wixxita'a liiranto'o; ixxuwwi eesenne osatteena i kululleetanne wixxito'o; an la'oombee'i mogaalli manni uttoo'n eese ganto'o Eese barche'e issita'a eesenne osatto'o; nadadda'ahim ixxuwwi inqe iicco'o. Waa'a! Hinkaa'n balli afeebeedu moo'llaa cawwitootto? Ixxuwwi hantaariinsi eese gatise; i foorem ka hobbiinsi gatise. Ee ammane minaadaphphi lob wixxitenne keese galaxxoommo; dut minaadaphphi lambe'ennem keese lonsoommo. Mashkabee'ekam eesenne ki'llo'i i diina'i liirantamisa issititte; mashkabee'em eese sabbam keen illinne qaqqaxxantamisa issititte. Ixxuwwi xumma woccambee'i keeno; xummaan keenonnem hantaaro sawwitam keeno. Ixxuwwim «Hashshu, hashshu, ki baxika ni illinnem moo'nnaammo» yita'a shuuttu'uuyyi eese kasassamo. Ihukkaarem Waa'a! At eekka moo'llaatto; ee bikkina at cawwitaa uttitte; Waa'a! At iinniinsi qee'llititte. I Moollanna! I Waa'a! At ki'llaa i bikkina fitame; i hanqa at woce. I Moollanni Waa'a! At ki muccuroo'mmisinne iina oogate; i diina'im eesenne liirantamisa issititte. Ixxuwwi wodanonne «Hashshu, neese ni woda'n mixano anfummo» yitambee'isa isse. Odim «Neese ixxo xuunxaammo» yitambee'isa isse. An hawwoommaare liirantam keen hundim tuuttonaa timtimitonaa; «Ixxeensi neese lophphinoommo» yitam keen hundim tuullaa sho'lle'nnaa edde'llona. I muccuroomanne liirantam keen «Ilil» yitu'uuyyi lobakata liirantona; «Ixxi awwaadaanchina makkoohaare liiramoo Waa'i iimiimihona» yitona. Ki muccuroo'm bikkina alallaatoommo; balli hundoomam keese galaxxoommo. Baaxiil jor manchi wodanonne ihaa wocisookko; Waa'a baddimmi ee manchi illagenne hore'em bee'e. Ee bikkina ixxi wodanonne ixxi gaga hundiinsi loban issaa sawwookko; ixxi baaxiilo sawweenaa sabeenaa hasooyyo. Ixxi woccim jollinnee qophphaninnee wo'mmaakkoohane; ixxim qoossimmaa eroka baximmaa uraakko. Ixxi dakkanne iinse'ukkisam jora isseena sawwookko; ixxi issoo luwwi hundim jora; ixxi jor luwwa hore'em sabooyyo. Waa'a! Ki eroommi iima'n libo'o afookko; amma'nnantaatoohaannoomim iima'n duuba afookko. Waa'a! Ki muccuroom hundiinsi lob duunnuwwisa; ki oogatimmim dambalaqi'nno xillaalla; mannii diinatii yookkok at egettittaarette Waa'a! Ki eroommi hinkka'nna danaamo! Manni hundim joriinsi egeramookkok ki laxxi woronnette. Ixxuwwim at uwwitoo ki mi'n lob maaddika itta'a godditamo; ixxuwwim kiihaanniinsi liiransoo daajjiinsi aggamo. Heechchina hundinam bu'i atette; ki caakkinnem neese caakka mo'nnoommo. Keese laqqam keenina ki eroomma wodano xabbeen keeninam ki muccurooma hoottitte. Amaadaan eese hawwoddona cawwitaa uttitte; jor keenim eese hollitona cawwitaa uttitte. Jora baxxam keen hinkid ubboda'e moo'e; ixxuwwi od ki'lleena xanatambee'isa ubbo'ookko. Jor kee'n mashka'inne ajaabantitte; jora baxxam keenonnem to'achchititte. Mashka'oomim ixxuwwi hixisa qaqqisom goggamo; buyyisam giggittamo. Waa'anne bakke'e; eroommam isse; uullannem xumminne hee'llootto. At Waa'anne liirame; ixxim ki wodanonne mixxittoka uwwookko. Ki gooqqeka yabo Waa'ina higissaa uwwe; ixxonnem bakke'e; ixxim kiina hara'mmookko. Ki muccurooma caakkisa ki hanqam balli eelliinchisa caakkisookko. Mulli manchina makkoohaaree ixxi jor sawwitim wo'mmoohaaree qacqacititte; at Waa'i illagenne iyyaqqimminne cawwitaa egere. Quuqimmiinsi daba'lle; nadajjam ure; keese jollenne massoo bikkina qacqacititte. Mashka'oomim jor keen bi'llamo; ihukkaarem Waa'anne neeyyato issitam keen uulla lago aa'llamo. Hofqaxinatte bagaan jor keen hee'llamoyyo; ixxuwwa hassittaarem hee'llo'i beyyoomam siiddooyyo. Ihukkaarem xummaan keen uulla lagaa'llamo; lophphaakkoo xumma siidda'a liirantamo. Jor manni muccur keenonne dollottamo; ixxuwwannem ki'lla'a inqiiccamo. Iuhkkaarem ixxuwwi bi'llam balli afukkisa la'oo bikkina Waa'i ee jor keenonne osarookko. Jor keen buxaa hawwaanoo shiteena xiyya chokkotto'o; muccur keenom dutteena bisa'a gudisso'o. Ihukkaarem ixxuwwi bisa'i ixxuwwam shookko; ixxuwwi xiyyim iiqamookko. Jor manchina yoo lobakat amaxxiinsi muccur manchina yoo hoffi amaxxi lophphookko. Mashka'oomim jor kee'n wod iiqamookko; ihukkaarem Waa'i muccur keenina hara'mmookko. Waa'i muccur keeno la'ookko; ixxuwwi gulummam mulli manni massooyyo. Jor doollennem ixxuwwanne hawwi afooyyo; qaane'i maaragem ixxuwwina amaxxi hoffe'ooyyo. Ihukkaarem jor keen bi'llamo; Waa'i diina'i udma'i fiitisa giggittamo; wirii'llisam binnitamo. Jor manchi liqaayyo aa'ookko bagaan dabaraa miqooyyo; ihukkaarem muccur manchi biijoominne uwwookko. Waa'i maasse'u keen uulla lagaa'llamo; ihukkaarem Waa'i duumu keen bi'llamo. Waa'i mat manchi taakkonne liiramulas ixxi taakki hanqo'an ihukkisa la'isookko. Waa'i ee mancho ixxi anginne bakkiisoo bikkina ixxi qolamuta'nnim ubooyyo. An oosoommaniinsi ki'isaa lommannan afeebe'e hee'aammo; Waa'i muccur mancho xadukkuuyyi te'im ixxi oos hurbaata uunxukkuuyyi moo'ummoyyo. Ixxi hundi ammanem biijoominne uwwookkoo liqaayyisookkoo; ixxi oosim maasse'anto'oo keen ikkamo. Jor luwwiinsi qee'lle; er lwwa isse; heer heerinam hee'llootto. Mashka'oomim Waa'i hanqa iittohane; ixxena amma'nnanto'i minaadabam urooyyo; ee keeno heer heerinam egerookko; ihukkaarem jor kee'n shumo'i bi'ookko. Muccur keen uulla lagaa'ookko; ee uullannem heer heerina hee'ookko. Er manchi suumiinsi qooroo'm woshshi firookko; ixxi allabinnem hanqa wocookko. Ixxi Waa'ikim seer ixxi wodanonnette; ixxim ee seeriinsi hore'em koratooyyo. Jor manchi muccur mancho dugaa egerookko; sheenam hasookko. Ihukkaarem Waa'i ixxi anganne higisaa uwwooyyo ogaxxi minenne fitamoo ammanem neegaramoo'isa issooyyo. Waa'anne neeyyato isse; ixxom egere; ixxim kiina uulla lagaa'isaa keese lonsookko; jor keen bi'llu'uuyyim at moo'llootto. Jor mogaalli manchi iimiimaa Liibaanoos digiphphisam lataakkoo moo'ummo. Ihukkaarem ee beyyinne daba'llaa higummuuyyi beyyonne hoogummo; hasummaarem ixxo siideena xanummoyyo. Miiqakkam luwwi bee'i mancho qoossitaa moo'e; xabbeen manchom ersa moo'e; xummaanchi manchik shumo'i fikkaannookko. Ihukkaarem baaxiilaan hundim bi'llamo; jor kee'n shumo'im bi'ookko. Waa'i muccur keeno gatisookko; hawwi ammanem yabo aaggamok ixxonnette. Waa'i ixxuwwa hara'mmookkoo gatisookkoo; ixxuwwi ixxonne yabo aago'i bikkina; jor kee'n angiinsi gatisookko. Waa'a! Ki quunqinne eese guzumo'llitte; te'im ki bala'inne eese axeettitte. Ki xiyyinne eese qassaatto; ki anginnem eese aphphissaatto. Ki quunqiinsi ki'ukkok i orachchonne fayya'oom bee'e; i baaxii'l mashka'inne i miqenne xummi bee'e. I baaxiil eese xuuxaakko; kee'mmaalli iyyi qaxam eesenne kee'mmaakko. I huushanchi mashka'inne i omar shamaa bobukko. An quutummo; lobakatam sholle'ummo; balli hundam kichchechchinne hosummo. I orachchonne shokki aphphoolla; iinam kee'mmaallisa xissaakko. An lobakata hoogaammo; iiqamaammome; i wodan u'nnanne yoo bikkina qitinoommuulla. Waa'a! I mixan hundam at laqqootto; i qitinimmim kiinniinsi daphphaakkoohaneyyo. I wodan lobakata aphphisoolla; i malaayyi hoogaakko; i illim jaamaakko. I oma'l mashka'inne i beshii i olla'ii iinniinsi gibbo'ookko; i qarmannim iinniinsi qee'llita'a uullito'ookko. Eese shiteena hassam keenim qaasha qaashsho'o; eese hawwoddeena hassam keenim eese bi'isseena a'llanto'o; eesenne dollotimma hore'em u'tto'oyyo. An gawwi manchisa ihummi bikkina macceeseena xanummoyyo; duud manchisa ihummi bikkinam woceena xanummoyyo. An macceseenaa woceenaa xanoobee'i manchisa ihaammo. Ihukkaarem i Waa'a! An an keese egeroommo; i Moollanni Waa'a atim iina dabachcha uwwitootto. I maso'i eesenne liirantamisa issititte; an uboommaarem eesenne bolxitamisa issititte. An ubeena ihaammo; i xissim wonja'a uwwukkoyyo. An i bi'ishsha biiraa yoommo; i baaxii'l bikkinam saxxoommo. Malaayyaammuwwi i maso'i duta; mashkabee'ekam ceese sabbam keenim araqa. An eroka issummi bikkina jora dabatto'o; an hanqa baxeena yakummi bikkina iinninne uullixxanto'o. Waa'a! At eese uttitte. I Moollanna! At iinniinsi annanni ikkitte. Eese gatisaanchi i Waa'a! At iina qaqqissaa hara'mme. An «Issoommi luwwi hundannem i gaga ega'lloommo; i allabim baaxiillonne massona cawwoommoyyo; jor keen yo'i beyyonne maham wocoombee'isa i suume ege'lloommo» yummo. Mat sagaram wocoombee'isa duudummo; er luwwi ihuta'nnim maham wocoombee'isa duudummo; ihukkaarem i asqachchi eraa'llaanniinsi baasukkuuyyi marukko. I wodan i woronnem shokkukko; sawwit lophphimmiinsi ki'ukkok eesenne giir aphphukko; ee lasage i suuminnem «I Waa'a, an ka lasage hee'oommok hinkaa'n balla? An lehoommokdu hinkaa'n ammane afaatette? An hinkaa'n balla hee'oomda'e la'ise» yummo. I heechchi doolle keentaa qooddaatto. I umurim ki illagenne mahim bee'aannisa; hanqinam manni hundim fooshshe'akko'i fooshshisa. Hanqinam manni hawwaankaannisa; ixxi badallat hundim awwaad bee'ane; amaxxa wixxaa'ookko; ihukkaarem ayyi itooda'e la'ooyyo. Waa'a! Kabadu i neeyyat ayyette? Atetteyyonnihe? Waa'a! I baaxiil hundiinsem eese gatise; eesenne qawwuwwi osattamisa issititte. Ka hundam eesenne issittok atette ikki bikkina mat sagaram woccoombee'isa duudaa cawwoommo. Ki anginne eese aphphissi bikkina leheena ihaammo; kaba eese od aphphisimma ure. Baaxii'l bikkina mancho axeettoottoo guzumo'lloottoo; ixxi iittoo luwwi hundam bil bi'isoo luwwisa issitootto; hanqinam manni hundim fooshshe'akko'i fooshshisa. I Waa'a! I uunxatoo i laachchaa macceese; an wi'lloommi ammane cawwitaa uttitte; an ki waaraancho; iyyanno'isam koyyiincho. Od daba'llaa waaroombee'i beyyo mareembe'i afeebe'e hofqax ammaninam liirancha siidoommisina uttaa ure. Waa'i hara'mmoo'isina iyyaqqimminne egerummo; ixxim ixxi macce i kollonne dabaraa i laachcha macceesukko. Ixxim xuuxoo xilli bariinsii leepho'iinsii eese fissukko; i lokkom kinanne uullisukko; i mogole'em qoxxisukko. Ixxim iina haareechchi mazmuura uwwukko; ee bikkina galaxxi mazmuura ni Waa'ina zammaroommo; dut keen eekka moo'lla'a badditamo; Waa'annem bakke'llamo. Xale'i Waa'anne bakke'llam keen, amaadaano awwontambee keenii qophphano shigigitam keenii maassaammuwwa. Ni Moollanni Waa'a! At niina maalalsiisoo dut luwwa issitaatto; at niina sawwitoo sawwite ayyim xigeena xanooyyo; ee kee'n bikkina kureenaa woceenaa yakumta'nnim xigiinsi lobane. At kitimaa kiina uwwakkam luwwaa hassooyyo; shokkiisakka'a hincaa'akkam kitimaa baaxii'l bikkina hincoo kitimaa hassooyyo; ihukkaarem orachcho iina gudissitto. Ee bikkina «See'l kitaabanne i bikkina kitaabamukkisannem oono'o an waaraammo. I Waa'a! An ki doo'lla wonsheena hasoommo; ki seerim i wodanonnette» yummo. Minaadaphphi dummichchanne hanqa alallaatoommo; Waa'a, at laqqoo'isam eekka wocoo'n cawwummoyyo. Ki hanqa i wodanonne maaxummoyyo; kiikka amma'nnantaattoohaannoomaa gatisaanchoomaa alallaatoommo; minaadaphphi dummichchiinsi ki eroommaa hanqaa daphphaa'ummoyyo. Waa'a! At ki qishixxato iinniinsi hoottitte; ki eroommii amma'nnantaattoohaannoomii eese hundi ammanem egerona. Xigakkeena xanakkambee'i hawwi eese kibbaakko; i baaxiil lophphaa eesenne gunguussamu bikkina moo'eena xanummoyyo; i baaxiil i horoo'l saraatiinsi lophphaakko; ee bikkina i wodan hoogaakko; Waa'a! Ki doo'l ihulas eese gatise; Waa'a! Qaqqissaa iina hara'mme. Eese shiteena hassam keen hundim tuuttonaa timtimitonaa; iina jolle mixxam keen hundim sholle'lla'a loso daba'llitona. An uboommaare «Hashshu! Hashshu!» yitam keen tuutta'a musmusitona. Ihukkaarem keese hassam keen hundim keesenne lobakata liirantona; ki gatisimma iittitam keen hundi ammanem «Waa'ina lombi ihoona» yitona. Waa'a! An hoongaanchoo buxichchoo; ihukkaarem at eese unjitooyyo; at haramaanchoo gatisaanchoo ikki bikkina qaqqissaa iina hara'mme. Buxina hara'mmitam keen maasse'anto'oo keeno; ixxuwwi hawwitam ayyaamom Waa'i ixxuwwina hara'mmookko. Waa'im ixxuwwa egerookko; foorinnem hee'isookko; uullannem ixxuwwa maasse'ookko; diina'inam ixxuwwa higisaa uwwooyyo. Xissita'a dakkanne iinse'llam ammanem Waa'i ixxuwwina hara'mmookko; ixxuwwam jabbiinsi fayyiisookko. Anim «Waa'a! An keese hawwodaammo; ee bikkina at iina haafihe; at iina qishshixxitaa eese fayyiise» yummo. I diina'i dut jor luwwa i bikkina woccamuulla; ixxuwwik mixxan an lehaa xadamoommisinatte. Eese moo'lleena waattamokim hanqo'i wodaninneyyo; ixxuwwi i bikkina jor woshsha wixxaa'llu'uuyya fitta'a lasagem beyyi hundannem i summa bi'issamuulla. Eese sabbam keen hundim ixxuwwina'i ixxuwwim hashaashshantamuulla; eesennem jor lawwi afona mixxa'a «Ixxo jor jabbi amadaakko; ixxi ka iinse'u beeyyiinsi ka lasage ki'ooyyo» yitamuulla. An hundiinsi lonsaa amma'nnoommi i beshichchi inninnem daayyamaa itukkok eesenne ki'ukko. I Waa'a! At eese fayyiise; baado miqisoommisinam eese ki'ise. I diina'imdu eese kaa'llobeelas at eese iittittisa eehanninne la'oommo. An hanqa egerummi bikkina eese uunjitooyyo; ki illagennem eese heer heerina hee'issootto. Isra'ee'l Moollanni Waa'i heer heerinam galaxxamaakkoohan ihona; eeya ihona. Gaallichchi wo'o quluxoo'isam; Waa'a! Anim keese quluxaammo. I foor hee'oo i Moollaanna Waa'a quluxaakko; hinkammane ixxi illage afaa ixxo moo'oommo? I diina'i hundammanem «Ki Waa'i hannonne yookko?» yitam bikkina indiiddi iina ballaa hiimoo hurbaat ihukko. Uguda lonsoo lobakat manna illage higaa awwonsummuuyyi galaxxi mazmuurinnee ilillaatinnee Keesammi Mine maram hee'ummisa sawwummaare i wodan kichchechchinne wo'mmookko. An kaa'nna kichche'oommok mahinatte? Kaa'nna u'nnamoommokdu mahinatte? I neeyyato Waa'anne issoommo; eese gatisaanchi i Waa'am galaxxoommo. I Moollanna neeyyata muraammo; ee bikkina Yoordaanoosaanniinsii Heermoo'n uulliinsii ee'isam Miizaar duuniinsii keese sawwoommo. Fo'i sagari'nnoo guginne xilli xillam weeshoolla; womoorii wo'i hambu'llamii eese xuuxaakko. Waa'i ballina ixxi eroomma ijaajaakko; hiimonnem ixxena galaxxi mazmuura zammaroommo; iina foore uwwu Waa'am uunxoommo. Eese egeraanchi Waa'ina, «At eese mahina xadditto? I diina'i hawwodu hawwojjiinsi ki'aa an mahina kichchechchanne hee'oommo?» yummo. Diina'i hundi ammanem «Ki Waa'i hannonne yookko?» yita'a naaccu'uuyyi i miqe iiqqamuulla. An kaa'nna kichche'oommok mahinatte? Kaa'nna u'nnamoommokdu mahinatte? I neeyyato Waa'anne issoommo; eese gatisaanchi i Waa'am galaxxoommo. Waa'a! Hanqa iina oogate; keese badditambee'i minaadabinne i bikkina fitame; qawwissam keeniinsii jor keeniinssii eese gatise. An yabo aagummok keesennette; ee bikkina at eese mahina utta uttitto? i diina'i eesenne affissam hawwiinsi ki'ukkok mahina kichchechchinne hee'oommo? Ki caakkaa ki hanqaa iina asse'e; ixxuwwim eese awwonsita'a Keesammi ki duunaa at hee'lloo ki minee afissona. Ee lasage Waa'ina kitima kitimakkam beyyo an maroommo; hundiinsi lob liiranchi yoo Waa'i beyyo maroommo; I Moollanni Waa'a! An diitta'a lellummuuyyi keese galaxxoommo. An kaa'nna kichche'oommok mahinatte? Kaa'nna u'nnamoommokdu mahinatte? I neeyyato Waa'anne issoommo; eese gatisaanchi i Waa'am galaxxoommo. Waa'a! Gaassi doollenne niyyanno'ina baxxitti maalalsiisoo luwwi hundam ixxuwwi niina kutto'aare neese ni maccinnem macceensaammo. At ki gagim mulli minaadaba ixxuwwi gaqqi uulliinsi hollitaa ee beyyonne niyyanno'o kaassitto; mulli minaadaba aphphissaa ki minaadaba wolabbanonne fissitto. Ixxuwwi ee uulla lagaa'llo'ok ixxuwwi bisa'inneyyo; kaa'llo'okim ixxuwwi malaayyinneyyo; ee hundam ixxuwwina issittok at ixxuwwa iittitti bikkina ki malaayyi, ki wodii ki lombi caakkii ixxuwwinne maqir ihu bikkinatte. At iina Waa'aa adilaa; ki minaadab ikko'i Yaaqoob shumo'ina kaachcha uwwitoottok atette; Ki mallaayyinne ni diina'a kaa'nnoommo; ni maso'om ki summinne hancaacammoommo. Eese gatisookkoo yaa i xiyyannee i bisa'annee bakke'oommoyyo. Ihukkaarem ni diina'iinsi neese gatissoottok atette; neese sabbam keenom sholliissootto. Ni Waa'a! Neese hundi ammanem keesenne bakke'nnoommo; ki summam heer heerina galaxxinoommo. Ihukkaarem kaba at neese sabbittoo sholliissittoo; ni gaadaaninnem maqire firimma sabbitto. Ni diina'iinsi gimbaa laso daba'llinoommisa issitto; ni diina'im ni amaxxa hundam bogga'a massito'o. Neese duramoo gereebbisa issitto; mulli minaadaphphi lambe'ennem binnaa'llitto. Ki minaadaba bushaalli bitina biteessitto; ee bitiinsem siidditti tirfi mahim bee'e. Ni olla'i neese game'llitamisa issitto; ni kululleetanne yo'i keeninam neese osachchaa lelloo issitto. Mulli minaadaphphi lambe'enne neese heessi issitto; manni neese gadaa horoore heekkeesoo'isa issitto. An balli hundam shollechchannette; tuullim eese ifiisaakko. Oohim eese gadoohii naaccam keenii yitam woshshiinsii i diina'iinsii baado miqisseena hassam keeniinsii ki'aatette. Ku hundim neesenne afukkok nees keese xandoo'nnette; kiinninne maqire aangiummi hidirom gindinoo'nnette. Ni wodanom kiinniinsi laso daballummoyyo; ki ijaajom gindinummoyyo. Ihukkaarem at neese iiqansitaa moochchi lambe'enne ubbuussitto; gambabbaakkoo tunsi woronnem neese uttaa uttitto. Ni Waa'ina neese otossimma ullaa ni anga iimaa'nnaa mulli waa'a uunxinaammoota'n Waa'i eekka la'ooyyonnihe? Ixxi ni wodanonne maaxamu luwwam la'oohaneyyonnihe? Ihukkaarem ballina ballina lenoommuullakii duramoo gereebbisa xigammoommokii ixxi bikkinatte. Waa'a! Baqihe, At mahina diriittaate? Ki'e! Heer heerinam neese uunjitaa uttitte. Ni hawwoo ni wor amadanchaa xaddaa ki ille niinniinsi mahina maaxxoolla? Neese ki'nnoombee'isa buchchanne umbaammo; ni orachchim buchcanne exxaakko. Ki eroommi bikkinaa yitaa ki'llaa waattaa neese hara'mmee gatisee. I wodaniinsi er woshsha fissummuuyyi adilina ka mazmuura zammaroommo; erisa kitaaboo manchi iskibirto'inne kitaabeena gudoo'isam i suumim mazmuura zammareena gudaakko. At manni hundiinsim danaamo; ki suumiinsim eroommi daadoohane; ee bikkina Waa'i keese heer heerinam masse'aakko. Lombinnee hibbinnee wo'mmitaattoo malaayyaam adila, ki lamadonne bisa'a lade'llaa gude. Ki hanqi bikkina, xummi bikkinaa muccuroo'm bikkinaa lomba edde'llaa kaachchina mare; ki makki angi maalalsiisoo luwwa moo'isona. Ki xiyyuwwi siifuwwa; ixxuwwim ki diina'ika wodano qassa'a aaggamo; minaadabim ki lokkiinsi woroon ubookko. Waa'a! Ki adillan heer heerina hee'oohane; ki adilla'n biccim hanqinne gassoohane. At hanqa iittitaa jolle sabboohane; ee bikkina ki Moollanni Waa'i keese doo'llaa ki besh hundiinsim loboka keesenne liiranchi zayta labukko. Ki eddechchi karbe'iinsi, geneeno'iinsii birgudiinsii baxamu shitto'inne enje'oohane; daane'i inqinne wereeggaakkoo ki adilla'n minenne diitta'ikii maasiinqo'i sagarii keese liiransookko. Ki adilla'n minenne yo'i landi lambe'enne adilluwwi landim yo'o; ki makki kollonne yo'i adila lobakata danaam worqinne wereeggaakkoo eddechcha edde'lla'a uullito'ookko. Taa i landichche, an kiina wocoommoka qoossitaa macceese; ki maccem i kollonne dabare; ki minaadabaa kiyyanni minee xade. Ki dan adil keese iittoo'isa issaakko; ihukkaarem ixxi kiina moollanni ihu bikkina ijaajame. Xiiroos uulli minadab kiina irifo'o eebookko; goddaanim keese qooxxaqqookko. Adi'l minenne yo'i adi'l landichcho lobakata wereeggito'ookko. Is eddechchim worqinne wereeggaa belecce'oohane. Isem wereeggi eddechcha eddeesakka'a adi'l beyyo hincaa'akkamo; baajaammuwwi is saawwuwwim ise kibbita'a waattamo. Lobakat liiranchinnee kajjinnee waatta'a; adi'l mine aaggamo. Kiyyanno'i bikkenne adilluwwi ihoo dut oos kiina hee'ookko; atim ixxuwwa uulli hundannem adilluwwi issitootto. Anim ki sado qaranchi hundim lonsoo'isa issoommo; ee bikkina minaadab hundim keese heer heerina galaxxookko. Waa'i neese egeraanchoo niina malaayyee; neesenne afoo hawwi hundannem ixxi niina hara'mmaancho. Ee bikkina uulli hee'kke'uta'nnim duunnuwwi dambalaq lugumonne dilluta'nnim dambalaq wo'i heekke'amaa guguta'nnim ixxuwwi heekkechchinne duunnuwwim heekke'amuta'nnim neese hore'em baddinoommoyyo. Waa'ika beero'oo Waa'i hee'oo ixxi Keesammi Minee liiransoo daajji yookko. Waa'i ee beero'i lambe'nne hee'oo bikkina oo beero'i bi'ooyyo; Waa'im soodaraar daram ee beero'ina hara'mmookko. Minaadab dambaqukko; adilluwwim ubbo'o; Waa'i ixxi sagara macceesisukkaare uulli bukkamukko. Gogoxxi Moollanni Waa'i niinninne maqire yookko; Yaaqoob Waa'im ni egeraancho. Waallehe, Waa'ika baxo moo'llehe; uullanne hinkido'i maalalsiisoo luwwa issuda'ee moo'llehe. Ixxi heer uulliinsi ora bi'isookko; ixxim xiyyuwwa iiqookko; bagadduwwam xaamsookko; agilluwwam giirinne shokkiisookko. Waa'im «Usheexxehe; an Waa'i ihummisam laqqehe; an minaadaphphi lambe'ennee uulli hundannee lobane» yukko. Gogoxxi Moollanni Waa'i niinninne maqire yookko; Yaaqoob Waa'i ni egeraancho. Minaadab hundichchim liiranchinne anga aphphissehe; sagara iimaa'llakka'a ilil yitakku'uuyyi Waa'ina zammallehe. Heer uulli hundam gassoo adil ihu hundam xanoo Waa'i hinkaa'nna hibbaamo. Ixxim minaadab niina ijaajantamisa issukko; heer uulli minaadabam ni lokkiinsi woroon issukko. Neese lago aa'nnoommi uulla ixxi doo'llukko; oo uullim ixxi iittoo Isra'ee'l minaadabina lomba. Waa'i ixxi adilla'n beyyo iim firukko; ee ammane illillaatii xurumbi sagarii hee'ukko. Waa'ina galaxxi mazmuura zammallehe; ni adilinam galaxxi mazmuura zammallehe; eddakka'atim mazmuurinne ixxo galaxxehe. Waa'i uulli hundinam adil ihu bikkina galaxxi mazmuura zammallehe. Waa'i keesamaakkoo ixxi adilla'n barcumanne afuuraa minaadab hundam gassookko. Minaadaphphi gassaanim Abrihaam Waa'i minaadaphphisa ikka'a wixxitamo; heer uulli adilluwwi hundim Waa'ane; ixxi hundiinsim hanaan ihaakkoohane. Waa'i hundiinsi loban ihu bikkina ni Waa'i beero'onne keesamaakkoo duunanne lombaam galat ixxena hasisookko. Hanaa'n qaranne hee'oo hundiinsi lobanee danaamoo ihu Xiyoo'n duun hundiinsi lob adi'l beero'o; ixxi uulli hundam liiransoohane. Ee qashamaakkoo beero'onne ihaa Waa'i ixxi gagim ixxo egeraanchi ihukkisa la'isaakko. Adilluwwi Xiyoo'n beero'o qasseena wixxita'a mateeyyoominne waatto'o. Ihukkaarem ixxo moo'lla'a muggito'o; baddita'ahim gibbo'o. Ee beyyonnem ixxuwwi baddita'a huxe'llo'o; xuuchchi amadu meentichchosam u'nnanto'o. Eelliinchi fi'l hafachchinne iiqamoo Tarsees uulli qoxxaalli markabbuwwisa ixxuwwa iiqansitto. Neese macceensummisam gogoxxi Moollanni Waa'i ixxi beero'onne issu luwwa kaba ni illinnem moo'nnummo; ixxi ee beero'i heer heerinam qoxxaa hee'oo'isa issookko. Waa'a! Keesammi ki minenne inkaa ki eroomma sawwinoommo. Waa'a! Heer uullanne hee'oo minaadab keese galaxxookko; ki sadim uulli tochchiinsi tochcho afookko; at gassitoottokim hanqinnette. Ki oogat hanqo'an ihu bikkina Xiyoo'n duunanne hee'llam minaadab liirantamo; Yihudanne hee'llam keenim lobakata liirantamo. Xiyoo'n beero'o kululitakka'a do'llakku'uuyyi moo'llehe; qoto'akka'a egerakkam beyyuwwam xiggehe. Qasha qoossitakka'a girbuwwam saarayyitakka'a moo'llehe; eeham lasaqqi qaranchina «Ku Waa'i heer heerinam ni Waa'a. Ixxi heer heerinam neese awwonsookko» yitakka'a kullehe. Minaadab hundim kaka macceessehe; uullanne hee'llakkam hundim kaka qoossitakka'a macceessehe. Lob keenii hoffi keenii, goddaanii buxii mateeyyoomanne kaka macceessehe. An qooroo'm woca wocoommo; i woda'n sawwitim qoossimma uwwoohane. I macce kobi'llishshi kollonne dabaroommo; i heessuwwi tiratom diitta'a lellummuuyyi caakkisoommo. Hawwi eesenne afoo ammanee jolli i sinxichcho kibboo ammanee an baddoommoyyo. Ixxuwwi malaayyenne bakke'llam keenoo ixxuwwi amaxxannem amaaddam keenoo an mahina baddoommo? Ayyim ixxi gagina tissa miqeena xanooyyo; te'im ixxi foo'l bikkina bito Waa'ina miqeena xanooyyo. Manni foor lobakata xee'aalli ihu bikkina hinkaa'n bitinnem siidameena xanooyyo. Ayyi manchim lehaa ba'l woronne aagoobee'isinaa heer heerinam hee'oo'isinaa maham miquta'n iheena xanooyyo. Mashka'oomim ayyim la'oo'isam qoor mannim qawwuwwisaa awwaadbeekee'nnisaa lehookko; ixxi amaxxam mulli keenina uraa marookko. Dut uulli ixxuwwi summinne weeshamuta'nnim ixxuwwi waammi ixxuwwina heer heerinam min ihookko; eekke'em heer heerina hee'llamo. Manchi maham goddaanchi ihuta'nnim lomba siidukkisinne hee'ooyyo; diinaxxisam lehookko. Kuk qawwuwwi keenonnee oo keen yito'oka awwontam keenonnee afoohane. Ixxuwwik lasaanchi durakkam gereechchisa leho; lehim allaaraanchisa ixxuwwa egerookko; ixxuwwi maarim ixxuwwi danaam miniinsi qee'llaa waammoronne shamookko; er keenim daram ki'lla'a daannooma aa'llamo. Ihukkaarem Waa'i i foore lehiinsi gatisookko; eesem taqeebalookko. Mat manchi goddaanchi ihoohaaree ixxi amaxxim exxukkuuyyi maroohaaree baddititte. Ixxi lehoo ammane maham massooyyo; ixxi amaxxik mahim ixxenne marooyyo. Manchi ixxi umu'l doollenne liiramuta'nnii ixxena luwwi hundim makkaa weeshamuta'nnim lehinne annannihaa la'mmaagge caakka moo'oobee'i beyyo gaassi ixxi anno'i beyyo marookko. Manchi maham goddaanchi ihuta'nnim qoossimmi beelas diinaxxisam ixxim lehookko. Hundam xanoo Moollanni Waa'i wocoolla; eelliinchi firoo kolliinsi aagoo kollonne afeebee yoo uulli minaadab hundam weeshoolla. Kurakkam luwwi bee'i danaam Xiyoo'n beero'iinsi Waa'i caakkisoolla. Ni Waa'i waarookko; cawwaa urooyyo; ixxi illagenne itoo giir yookko; ixxi kululleetannem malaayyaam hambu'llam yookko. Ixxi minaadabanne oogatukkuuyyi iimanii uullii naqqassamisina weeshukko. Ixxim «Kitima uwwimminne iinninne hidiro aaggo'i amma'nnanto'oo i minaadaba i beyyonne wixxaa'llehe» yoolla. Waa'i honqo'i oogataanchi ihukkisa iiman alallaatookko. Waa'im «I minaadaba, i woshsha macceessehe; Isra'eela, an keesenne naqqasoommo; ki Moollanni Waa'i anette. Ki kiti'm bikkinaa at hundi ammanem shokkiissaa hincaa'lloo kiti'm bikkinaa an keese acceeqasoommoyyo. An ki gaadiriinsi moolluwwa ki orodiinsim fella'a ambulluwwa masseena hasoommoyyo. Haqqo'l moochchii kum duunnuwwanne allaa'lloo diinatii hundim iihane. Iima'n cii'i hundam an la'oommo; ullanne mikmikoo fooraam luwwi hundim iihane. «Uullii ullanne yoo luwwii hundim iihan ihu bikkina an sibaarumta'nnim kiina kuroommoyyo. An moolluwwika maara itoommoyyo; fella'ikam xiiga agoommoyyo. Waa'ina galaxxi kitima uwwe; Hundiinsi lob Waa'inam aaggitti uga'a uwwe. Keesenne hawwi afoo ayyaamo eese weeshe; an kese gatisoommo; atim eese lonsitootto» yukko. Ihukkaarem Waa'i jor manchina «I seera qananaa'lleena i Hidi'l sagaram ki suuminne wocceena at marichcho? An kurummi woshsha aa'imma sabbaatto; i ijaajom gaddaa afareen uunjitaatto. Gamaancho moo'lloo ammane ixxennem gamina geettootto; saa'aanchinnem ginnooma amaddootto. «At jora wocceena hundi ammanem guddaattoohane; ki allabim qophphano woceena muxmuxoohane. Afuuttaatim kiyyaabbaayyo hamtootto; Kiyyumbeetikam summa bi'issootto. Ee keeno hundam issittuuyyi an cawwaa urummi bikkina anim ki'isa ihummoka labissaatennihe? Ihukkaarem an kaba woshshooma ki illagenne caakkisaa keese axeeroommo. «Eese xaddakkam keen hundim kaka macceessehe; ee bee'aare ki'nnwwa bi'isoommo; gatisookkokim hee'ooyyo. Iina galata kitim issaa uwwookkok eese lonsookko. Hanqi googonne mattam keen hundam gatisoommo» yukko. Waa'a! Ki eroommi bikkinaa yitaa haafihe; ki lob qishixxaxxi bikkinaa yitaatim i baaxiilo shiinshe. An hawwodummi hawwojji hundam aanshitaa hoore; i baaxiiliinsim eese muccusse. I bi'ishsham an la'oommo; i baaxiilim hundi ammanem i illagennette. An keese hawwodaammo; an hawwodummok xale'i keesette; ki illagennem jor luwwa issaammo; ee bikkina at eesenne oogattitit oogat hanqo'anee miiqakkam luwwi bee'anee. Iyyummi godabonne qooccamummaanniinsim ki'isaa baaxiilaancho; ee baaxiilinnem qaramummo. At xabbeenoomaa hanqaa hassoo bikkina iina xilli qoorooma la'oommisina losise. Hiisoophphi buyyinne kiffaa eese muccusse; anim muccuroommo; at eese aanshe; anim baradiinsi lophphaa qadaalloommo. Liiranchaa lobakat liiranchi sagaraa macceesise; at iiqqaa xaamsitti i miqqeewwim liiramona. I baaxiilo at xiggitte; keese hawwodummi hawwojji hundam shiinshitaa hoore. Waa'a! Eesenne muccur wodano qoocce; haareechchi xabbeen ayyaana i woronne isse. Ki gadaniinsi eese qeessititte; ki Keesammi Ayyaanam iinniinsi massititte. Ki gatisimmi liirancha iina dabattaa uwwe; anim kiina ijaajamoommi tiiro uwwe. Keese hawwoddam keenina ki gogo losisoommo; baaxiilaanim ki kollonne daba'llitamo. Eese gatisaanchi Waa'a! Xiiga dunimmiinsi eese gatise anim ki muccuroo'm biikkina ilil yummuuyyi zammaroommo. Waa'a! I suume fooqaa'e; anim ki galata alallaatoommo. At kitima iittitoohan ihuta'n uwwam hee'ummo; shookkiisakka'a hincaa'akkam kitimim keese liiransooyyo. Waa'a! At iittitoo kitim gaga heeshaa'aakkoo tiiro. Waa'a! Baaxiilo biiraa yoo maashaalli wodano gaddooyyo. Waa'a! At ki eroomminne Xiyoo'n beero'ina er luwwa isse. Yerusaalee'm beero'om kininne qashe. Ee lasage muccur kitimii shokkiisakka'a hincaa'akkam kitimii keese liiransookko. Kiina kitima hincaa'akkam beyyonnem moolluwwa kitimakkamo. Kaa malaayyaam mancho! Waa'i minaadabanne hundi ammanem jora issittuuyya mahina amaaddoolla? Waa'ik eroommi heer heerina hee'oo'isa laqqittuuyyim mulli keeno bi'isseena mahina dollottoolla? Ki allabim qare'aalli milaacisa; ki tiironnem hundi ammanem jora sawwitoolla. At eroommiinsi jolla hanqa wocimmiinsim qophphano lonsitaa iittitootto. Kaa hantaaraancho! At manna hawwodoo sagara wocimma iittitootto. Ee bikkina Waa'i heer heerinam keese bi'isookko; ki miniinsim fissa hollookko; foorinne yo'i keen hee'llam uulliinsim xoqolaa hoorookko. Muccur keenim eekka moo'lla'a badditamo; ee lasage keesenne osattu'uuyyi «Waa'anne bakke'oobee'i mancho moo'llehe; ihukkaarem ixxi bakke'ookkok ixxi gaqqi goddannette; jora baximminne malaayyaam ihaakkoo mancho moo'llehe» yitamo. Ihukkaarem an latukkuuyyi hee'oo wee'llisa Keesammi Waa'i Minenne hee'oommo; i heechchi doolli hundannem heer heerina hee'oo Waa'i eroommanne bakke'oommo. Waa'a! At iina issitti luwwi hundinam heer heerinam keese galaxxoommo; ki minaadaphphi illagenne danaam ihu bikkina ki summa alallaatoommo. Qawwuwwi keen ixxuwwi wodanonne «Waa'i bee'e» yitamo; ixxuwwi hundichchim awwaadbee'i keen ikko'o; ixxuwwi baxim shigigaa'oohane; ixxuwwiinsem er baxo baxookkok matim bee'e. Ixxo hassam qoor manni yoda'e moo'eena Waa'i manni oos hundam iimanenne ihaa aad moo'ukko. Ihukkaarem ixxuwwi hundichchim hushanto'ookko; mateeyyoomannem jotto'ookko. Ixxuwwiinsim eroomma issookkok hore'em matichchim bee'e. Waa'im «Jora issitam keen i minaadabam hurbaaxxisa ittam keen hore'em eese xa'mmitambee'i keen hundichchim lachbee'i keenonnihe?» yoolla. Waa'i ixxi minaadaphphi maso'ika miqqeewwa binnaa'oo bikkina kanniinsi illageen badditobee'i qaxa badditamo. Waa'im ixxuwwa sabu bikkina lobakata sholle'llamo. Isra'eelina gatimmi Xiyooniinsi waaruta'n Waa'i Isra'ee'l minaadabina eraa'l makka dabaroo ammane Yaaqoob shumo'i lobakata liirantamo; Isra'ee'l minaadabim lobakata liirantamo. Waa'a! Ki summinne eese gatise; ki malaayyinnem iina oogate. Waa'a! I uunxaxto macceese; i sagaram macceese. Allaggi keen eesenne ki'llo'ookko; Waa'a badditambee'i mogaalli keenim eese shiteena hassamuulla. Ihukkaarem i Moollanni Waa'i iina hara'mmaancho; ixxim eesenne jor afoobee'isa egeraancho. Waa'i i diina'a ixxuwwi jollinnem bi'isookko; ixxi amma'nnamaakkoohan ihu bikkina ixxuwwa guullaa bi'isookko. Waa'a! An liiranchinne kiina kitima hincaa'oommo; danaam ihu bikkina an ki summa galaxxoommo. At eese hawwi hundiinsim fissitaatto; i diina'im kaa'antu'uuyyi i illinne moo'aammo. Waa'a! I uunxato at macceese; i uunxatom macceesimma sabbitte. I uunxato at macceessaa dabare; eese u'nnisoo luwwiinsi ki'ukkok heekke'amaammoo wonciwoncaammoo. I diina'i sha'llanchiinsii leencanchiinsii ki'ukkok baddaammo; ixxuwwi maso'oominnee quunqinnee ki'lla'a eesenne hawwo afissamuulla. I wodan lobakat baachchinne u'nnamaakko; lehim eese baa'isaakko. Baachchii huxechchii ese amadaakko; eehanniinsi ki'ukkok i mannoom hundim heekke'amaakko. Iina handarekkichchisa lad hee'uta'n usheexxat yoo beyyo bararaa maram hee'ummo. Eeyya, qee'l uulla maraa udma'i uullannem hee'am hee'ummo. Ka hambu'llamiinsii wiisho'iinsii gibaa maaxameena qaqqisaa maram hee'ummo. Waa'a! Beero'onne damigimmaa hambalaachchaa moo'ummi bikkina ixxuwwika tiiro bi'ise; ixxuwwi suumem mat ihoobee'isa isse. Kininne baxamu beero'i qash hanenne hiimoo ballaa do'llamuulla; ee beero'i woronne jollii hantaarii wo'mmaakko. Bichchi ee beero'i woronne wo'mmaakko; manni wixxoo beyyi hundannem damigimmii hantaarii wo'mmaakko. Eese game'llookkok i diina'ayyo; i diina'i ihuta'nna'e an iyyaqqam hee'ummo; eesenne amaadookkok i masokkichchoyyo; eehid ihuta'nna'e ixxeensi maaxamam hee'ummo. Ihukkaarem ka hundam issitootti at i gaqqi mancho, i saawwoo i kobichchoo. Waa'i minenne minaadaphphi lambe'enne maqirem daba'llammummo; ni mateeyyoomannem liiransoo iitti hee'ukko. I maso'ina leh qaqqisona; ixxuwwi minennee tiironnee jolli wo'mmu bikkina foorinne hee'llu'uuyyim waammantona. Ihukkaarem an i Moollanni Waa'i kollonne laaroommo; ixxim eese gatisookko. An hiimoo daraa ballaa hundi ammanem ixxi kollonne laaroommo; ixxena kuroommo; ixxim i sagara macceesookko. Lobakata dut diina'inne oramoommi qasanchiinsi eese xummam dabaraa worookko. I diina'i jor googiinsi daba'llit'oibeei bikkina Waa'am badditobee'i bikkina heer heerina Moollanni Waa'i i uunxato macceesaa ixxuwwa sholliisookko. I beshichchi hee'u manchi ixxi besha hawwodukko; aagu hidi'l saqaram gindukko. Ixxek woc buuriinsi loboka lii'llaalla; ihukkaarem ixxi wodan jollinne wo'mmaakkoohane; ixxek sagar zayitiinsi loboka lii'llaalla; ihukkaarem qare'aalli bisa'isa muroohane. Ki hawwi hundam Waa'ina kure; ixxim keese bakkiisaa uullisookko; muccur keen ubbona moo'aa heer heerina cawwaa urooyyo. Ihukkaarem Waa'a! Manna shitam keenoo hantaaraanoo ixxuwwi umu'llekka kollom affoo'n xillaalli barenne waammitootto; ihukkaarem an Waa'anne amma'nnamoommo. Waa'a! Manni eese hance'amolli ihu bikkina i maso'im hundi ammanem wor amadaan iinninne qasamoolli ihu bikkina at iina qishixxe. I diina'i hundi ammanem eese hance'amoolla; eesenne amaadinne ki'aa iinninne qasamoo keenim duta. Waa'a! An baddumta'nnim keesenne bakke'oommo. An Waa'anne bakke'oommi bikkina baddoommoyyo; iina uwwu neeyyaxxi bikkinam qalaxxoommo; an Waa'anne bakke'oommi bikkina manni eese ma'issoo? I maso'i hundi ammanem eesenne hawwo afissamuulla; eese hawwoddeenam sawwitamo. Eesenne ki'lla'a daphphit beyyonne wixxitamuulla; eese shiteena hassa'o'i bikkinam laseessu'uuyyi egettamuulla. Waa'a! Ixxuwwi issito'i jollinnem ixxuwwa guzumo'e; ki quunqinnem mulli minaadaba sholliise. I karkaadimma at xiggaatto; i indiiddam mu'utanne cee'llaatto; ee hundikam xigo ki kitaabanne kitaabbaattoollayyonnihe? An keese weeshoommi balla i diina'i lasonne daba'llitamo; Waa'i iinninne maqire yoo'isa eehanninne la'oommo. Ku iinninne maqire yoo Moollanni Waa'i ixxi sagara galaxxoommanee lonsoommi Waa'aa. An ixxonne amma'nnoommi bikkina baddoommoyyo; manni eese maha isseena xanookko? Waa'a! An kiina aagummi uga'a uwwoommo; galaxxi kitimam hincaa'oommo. At i foore lehiinsi gatissaatto; i lokkom qolanchiinsi gatissaatto; ee bikkina an i Waa'i illagenne heechchi caakkanne daba'llamoommo. Waa'a! Iina haafihe; at iina haafihe; an keesenne yabo aagaammo; baddisoo bichchi higeebee'e ki laxxi woronne yabo aagoommo. Iina hasisoo luwwi hundam issoo hundam xanoo Waa'i kollonne laaroommo. Waa'i iimaniinsi heer heerina hee'oo ixxi eroommaa amma'nnamaakkoohaannoomaa asse'aa eese gatisookko; eese hawwissam keenom sholliisookko. I maso'i manna itoo hobbisa eese kibbito'ookko; ixxuwwi inqim baqaxxisaa xiyyisaa; ixxuwwi allabim qare'aalli bisa'i'nnoohane. Waa'a! At iimanenne iimiimihe; ki lombim uulli hundannem ihona. I maso'i eese amaddeena qaasha qaashsho'ookko; an kichchechchinne aad quutaammo; i googonne bare hinto'o; ihukkaarem ee barenne ixxuwwi gagim ubbo'o. I Waa'a! I wodan hundinnem an keesenne bakke'oommo; mazmuurinnem guullaa keese galaxxoommo. I foore, baqihe; odim i diitta'ii i maasiinqo'ii ki'llehe; anim soodaraar daram ki'oommo. I Moollanna! Keese minaadaphphi lambe'enne galaxxoommo; minaadaphphpi lambe'ennem kiina qalaxxi mazmuura zammaroommo. Ki eroommi iiman afeebe'e afaakkoohane; amma'nnantaattoohaannoomim duuba afaakkoohane. Waa'a! At iimanenne iimiimihe; ki lombim uulli hundannem ihona. Ki'nnuwwi gassaan, hanqo'i oogato oogattakkamuullannihe? Manni hundinam golo'llakkoo'n oogattakkamollanniyye? Hore'em eehid issitakka'a laqqakkamoyyo; ki'nnuwwi hundi ammanem jolle sawwitakkamo; uullanne issitakkam luwwi hundim boqqoo'm baxo. Jor keen ixxuwwi amo'i godabiinsim ki'isaa hanqo'i googiinsi fitto'ookko; qaranto'i balliinsim ki'isaa hushanto'oo keenoo qophphanaanoo. Ixxuwwi hamashshisa qubaammuwwa; macceesoobee'i woraqaallichchisam macce ifiissamo. Oo woroqallichchi macce ifiisookkok hamasha jallaa'llam kee'n sagara te'im gennoo kee'n sagara macceesoobee'isinatte. Waa'a! Ka hobbi inqe ixxuwwi suu'm woronnem iiqe; Moollaanna! Ixxuwwika gaangieera giggisse. Ixxuwwi qaqqisom higoo dirisisa bi'llona; xiyya chokkottota'nnim jungona. Ficiriiqamu qero'isa bukkanta'a bi'llona; lehaa qaramu ka'llisam caakka moo'lloone. Ixxuwwi laqqoo'nnim dangonnem shuqu'nnisa; xoqolanta'a uunjantamo. Waa'i ixxi malaayyaam quunqinne ixxuwwa binnaa'ookko. Baaxiilaan guzumo'antu'uuyyi muccur keen moo'lla'a liirantamo; jor kee'n xiigam hancaaccu'uuyyi taakke'llamo. Ee ammane minaadab «Muccur keen ixxuwwi baxika siixxito'o; uullannem hanqa oogatoo Waa'i yookko» yitamo. I Waa'a! I diina'iinsi eese gatise; eesenne ki'llo'i keeniinsim eese egere. Jora baxxam keeniinsi eese gatise; manni xiiga duntam keeniinsim eese egere. I Moollanna! Ixxuwwi eese shiteena maaxanta'a egetto'isa moo'e; an maham hawwodoo'nnim te'im baaxiilo baxoo'nnim mogaalluwwi eesenne wixxita'a ki'llo'ookko. An ixxuwwa maham hawwodoo'nnim; ixxuwwi eese hawwoddeena murte'lla'a geerantamuulla; ihukkaarem Waa'a! At iina hara'mmiteena ki'e; an yoommi duuha'am moo'e. Gogoxxi Moollanni ikkitti Isra'ee'l Waa'a; minaadaba hundam guzumo'lleena ki'e; hantaarinne jora baxxam keen hundinam qishixxititte. Ixxuwwi hiimo daba'llita'a waatta'a wishisa godooddu'uuyyi beero'onne do'llamo. Ixxuwwi suumiinsi firookkoka moo'e; ixxuwwik allab qare'aalli bisa'isa; ni woshsha ayyi macceesookko yitamo. Ihukkaarem Waa'a! At ixxuwwanne osattootto; minaadab hundam gaddootto. I Waa'a! At iina girbaa malaayyee; an keesenne neeyyato issoommo. I Waa'i ixxi eroomminne i illagenne higookko; i diina'im kaa'anto'isa moo'isookko. Niina agir ikkitti Waa'a! At baado miqissohaannooma i minaadab xadoobee'isa ee keeno shititte; ihukkaarem ki malaayyinne karkaaddamisa issee sholliisee. Ixxuwwi suumiinsi baaxiil bee'ooyyo; ixxuwwi wocanne hundannem baxiil wo'mmaakkoohane; ixxuwwi duu'mmantam keenoo qophphanaanoo ikko'i bikkina ixxuwwi amaad ixxuwwam amadona. Ixxuwwa ki quunqinne matichchim gatoobee'isa bi'issaa ure; ee ammane Isra'ee'l minaadabina Waa'i gassaanchi ikkittisaa uulli tochchii tochchi afeebe'e at gassitoo'isaa manni hundim la'ookko. Ixxuwwi hiimo daba'llita'a waatta'a wishisa godooddu'uuyyi beero'onne kululitamo. Ixxuwwi hurbaata siiddeena funaantamo; godditam qaxa siiddo beelasim wishisa godooddamo. Ihukkaarem at malaayyaam ikki bikkina zammaroommo; ki eroommi bikkina daram ki'aa sagara iimaa'aa zammarommo; mashka'oomim an hawwummi balla at iina girbaa yabo aagoommi beyyoo ikkaatto. Iina malaayyi ikki Waa'a! An kiina galaxxi mazmuura zammaroommo; Waa'a! At iina girbaa eroomma issitoo Waa'aa! Waa'a! At neese uunjitaa uttaatto; neese iiqqaatto; niinninne quuqqaatto; ihukkaarem kaba neese dabattaa areese. Uulla huxiissaa diqansitto; ee diqamu uulla dabattaa fayyiise. Ki minaadab lobakata hawwitamisa issitto; dimbisoo woyi'n diqaasa agissaa tartarinommisa issitto. Ihukkaarem keese badditam keen diina'i xiyyiinsi xottamisina mare'e uwwitto; At iittitoo ki minaadab gatoo'isina ki makki anginne neese gatise; ki malaayyinnem neese gatise; ni uunxatom macceese. Waa'i ixxi Keesammi Minenne ihaa «An kaa'ummi bikkina Seekee'm uulla baxxansoommo; Suukooxxi lete'em i minaadabina baxxansoommo. Gala'aadii Minaasii iihane; Efireem iina o'l qoobe'e; Yihud i adlla'n bicco. Moo'aab an aanshaqqoommi mu'uta; Eedoomanne i caamma'a daraboommo; Filisxeema kaa'ummi bikkina liiranchinne diraamoommo» yukko. Girbamu beero'o eese ayyi massookko? Eedoom afeebeedu eese awwonsaa ayyi massookko? Waa'a! Hanqinam at neese uunjitaa uttittonnihe? Ni gaadaan maqire orina fittittoyyo. Manni hara'mmat maham awwaadoobee'i bikkina at niina hara'mmitaa ni maso'inne orame. Waa'i niinninne maqiretti ihu bikkina nees kaa'nnoommo; ixxim ni maso'o hancaacamookko. Waa'a! I laachcha macceese; i uunxatom macceese. Waa'a! Neeyyata murummi bikkina qee'lli uullanne ihaa ki kollonne laaroommuulla; eese gatisoo lob ki'n beyyo awwonse. An yabo aagoommok keesennette; diina'iinsi daphphoommi qoxxaalli girbi atette. Ki minenne an heer heerinam hee'ane; ki laxxi woronnem aagaa maaxamane. Waa'a! An kiina uga'a aagummoka macceessaatto; keese baddoo keenina gudissitti gulumma uwwitto. Adi'lleka umura qeeraa'llise; ixxom qaranchi hundannem adil isse. Waa'a! Ixxo ki illagenne heer heerinam adil isse; ki eroomminnee amma'nnantaattoohaannoominnee ixxo egere. An hundi ammanem kiina galaxxi mazmuura zammaroommo; an kiina aagummi uga'am hundi ammanem uwwoommo. I foor usheexxato siidookkok Waa'iinsette; eese gatisookkokim ixxotte. Ixxeensi bagaan eesenne jor afoobee'isa egerookkokii gatisookkokii bee'e; iina girbi ixxotte ihu bikkina an hore'em heekke'amoommoyyo. Mat kollonne boqqu gortannisaa ubeena ihu qashisaa ihaakkoo mancho hawwodakkamokii gafe'akkamokii hinki balli afeebe'ette? Ixxuwwi hassakkamok ixxo lombiinsi dilliisimma; ixxuwwi ixxi bikkina qophphano wocimmanne iittitamo; suuminne ixxo maasse'llakkamo; ihukkaarem wodanonne ixxo duuntakkamo. An xale'i Waa'anne bakke'oommo; i neeyyatam xale'i ixxonne issoommo. Ixxeensi bagaan eesenne jor afoobee'isa egerookkokii gatisookkokii bee'e; iina girbi ixxotte ihu bikkina an hore'em heekke'amoommoyyo. Iina gatimmaa lombaa uwwukkok Waa'a; eesennem jor afoobee'isa egeraanchi qoxxaalli kinii girbii ixxotte. Minaadaba, hundi ammanem Waa'anne amma'nnehe; nees yabo aangoommok ixxonnetti ihu bikkina ki'nnwwi sawwit hundam ixxena kullehe. Manni hundim hafachchisa; hoffokii lobokii hundim awwaad bee'ane; keennaanchonne hundam mat issakka'a keenakkota'n hafachchiinsi sholle'aalla. Manniinsi malaayyinne hoottakka'a siiddakkam luwwanne bakke'llakkotte; bogimminne siiddakko'i luwwannem neeyyata issitakkotte; amaxxi lophphimmannem bakke'llakkotte. Waa'i mat woshsha wocukko; anim eekka lamaagge macceesummo; malaayyi Waa'ane! Waa'a! Eroommi kiihane; at ki gagim annannichchinam ixxi baxisanne miqqootto. Waa'a! At iina Moollanna; an keese wodaniisim ki'isaa hasaammo; wo'i bee'i gogaalli udma'i uullanne i foor keese xeebe'aakko; i maarim kees quluxaakko. Ee bikkina an ki Keesammi Minenne keese moo'aammo; ki malaayyee ki lombam moo'aammo. Ki eroommi fooriinsi lobane; ee bikkina an keese galaxxoommo. An foorinne hee'oommi doolli hundannem keese galaxxoommo; ki summinne i anga k'isoommo; Mat manchi er hurbaata itaa goddaa na'a mu'lloo'isam i foorim keesenne na'a mu'lloo'isam i suuminnem galaxxi mazmuura liiranchinne zammaroommo. Dakkanne iinse'ummisam keese tiiroommo; hiim hundoomam ki bikkina dabaransaa sawwoommo. At iina hara'mmaanchi ikki bikkina ki laxxi hafanne usheexxaa liiranchinne zammaroommo. An keesenne xaxamoommo; ki makki angim eese bakkiisaa amadookko. Ihukkaarem eese shiteena hassam keen leto'i manni hee'llam beyyo dillitamo. Ixxuwwi bisa'inne letamo; ixxuwwi leesham wengereelli itookko. Waa'i kaachcha uwwu bikkina adil Waa'anne liiramookko; Waa'i summanne hide'llam keen hundim liirantamo; ihukkaarem qophphanaa'nnek suum ifiisamookko. Waa'a! An hawwonne yoommi bikkina i uunxato macceese; i diina'i sha'llanchiinsim eese gatise. Jora baxxam keen maaxaqqanne dollottam dollotiinsi eese maaxe; boqqi kee'n dummichchiinsim eese daphphaa'e. Ixxuwwika allabo bisa'isa qareesso'ookko; ixxuww suumiinsi firoo jor wocam xiyyisa chokkotto'ookko. Maaxanta'a xummaanchi mancho qassamo; badditoo'nnim dangonne qassamo. Ee jora baxxam sawwite a'llantu'uuyyi qoxxixxantamo; ixxuwwim qaasha qaashshamisa a'llantamo; odim «Neese ayyim siidukkoyyo» yitamo. Ixxuwwim jor sawwite sawwita'a lasage «Nees issinummi hantaar ayyim la'oobee'ane» yitamo; oohim mannik wodanii tiirii hantaarinne wo'mmaakkoohan ihukkisa moo'isoohane. Ihukkaarem Waa'i ixxi xiyyinne ixxuwwa qasookko; ixxuwwim dangonnem qassantamo. Ixxuwwi wocco'i woshshinnem ixxuwwa bi'isookko; ixxuwwa moo'llo'i keen hundim maalalta'a horoore heekkeessamo. Ee lasage manni hundim baddookko; Waa'i issu luwwi hundam kurookko; Waa'i issu luwwi hundam sawwookko. Muccur manni Waa'i issu luwwanne liiramookko; ixxonnem yabo aagookko; xummaan hundim ixxo galaxxona. Waa'a! Kiina Xiyoo'n duunanne galat hasisookko; kiina aangummi uga'am wonshinoommo. At mannika uunxato macceessoo bikkina Manni hundim ki beyyo waarookko. Baaxiil neese xuuxaa hee'ukko; ihukkaarem at ni bi'ishshi hundam haafitto. At doo'llitaa ki minenne hee'llamisina ki kollonne hincaa'llitti keen maassaammuwwa; kiihaannonne Keesammi Minenne yoo er luwwiinsi neese goddinoommo. Neese gatisaanchi ni Waa'a! Muccur ihaakkoo maalalisiisoo ki baxinne ni uunxato dabare; at uulli hundinaa dambalaqinaa neeyyata. At duunnuwwa ki malaayyinne qooccitto; ki malaayyem lade'llitto. At dambalaqquwwi gugaa wo'i moo'l sagaraa sa'issitto; minaadaphphi corochcham cawwoo'isa issitto. Uullanne hee'oo minaadab hundim at issitti maalalsiisoo luwwa moo'aa keese baddookko; at daraa maaro'oo liiranchi mazmuura uwwitootto. Xeena ga'nnisimminne uulla abooyyitootto; misha uwwoo'isina harishissootto; daajjuwwam wo'inne wonshitootto; uulli hurbaata mannina uwwoo'isa issitootto; ee'isa ihoo'isina issittok atette. Abuullamu uullinam lobakat xeena uwwitootto; ga'nnoo xeeninnem aashissootto; xee'n kifinnem buchcha qufissootto; mutu luwwam maasse'lloo'tto. Maarage ki maaddinne wonshitootto; uulli hundam goddissootto. Udma'i uullim fooraam diinatinne wo'mmookko; duunnuwwim liirancha eddechchisa edde'ookko. Allaachchi biirim dut gereebbinne wo'mmookko; lete'i cebbim wix hurbaatinne wo'mmookko; ixxuwwim liiranta'a shuttu'uuyyi zammattamo; hundim liiranta'a ilillaatinne zammattamo. Uulli hundim Waa'ina ilil yihona. Ixxi summi lombina zammallehe; ixxenam lombaam galata uwwehe. Ki'nnuwwim Waa'ina «At baxxi bax hinkaa'nna maalalsiisoohane; ki malaayyi hundiinsi loban ihu bikkina ki diina'i ki illagenne musmusookko. Uullanne yoo minaadab hundim kiina otossookko; galaxxi mazmuuram zammarookko; ki summam lonsukkuuyyi zammarookko» yi'llehe. Waa'i baxu baxo hundam waattakka'a moo'llehe; ixxi manni lambe'enne maalalsiisoo baxo baxaakko. Ixxi dambalaqa gogaalli uulli issaakko; ixxuwwim daajje lokkinne fitto'o; neesem ixxi issu luwwanne liirammaammo. Ixxi malaayyinne heer heerinam gassookko; ixxi illi minaadab hundam moo'ookko; ee bikkina boqquwwi gaga iimiimaa'lloone. Minaadab hundichchim ni Waa'a lonsehe; Ki'nnuwwi sagaram iimaa'llakka'a galaxxehe. Neese foorinne hee'isookkok nees umboombee'isam egerookkok ixxotte. Waa'a! At neese keentaatto; bira giirinne muccussakkamisam neese muccussitaatto. Neese qaashanne aangissitto; kee'mmaalli iyyom neesenne iyyiissitto. Ni diina'i neese hancaacantamisa issitto; neesem gii'l lambe'innee wo'i lambe'innee hingummo; ihukkaarem ee beyyiinsi fissitaa kaba neese usheexxat yoo beyyo wottitto. Shokkiisakka'a hincaa'akkam kitima ki mine amadaa waaroommo; kiinam aagummi uga'a uwwoommo. An hawwonne aagummi ammane uwwoommo yaa i suuminne aagummi uga'a kiina uwwoommo. Shokkiisakka'a hincaa'akkam di'ir kitma kiina hincaa'oommo; gereebbi ambulluwwa kiina shi'nnoo kitim issaa hincaa'oommo; moolluwwaa fella'aa kiina kitim issaa uwwoommo; eehanni shi'nnim iimane firookko. Waa'i iina issu luwwi hundam kuroommo; Waa'a badditakkam keen hundim waattakka'a maccessehe. An ixxi kollonne laarummo; anim ixxo i suuminne galaxxoommo. I tiironne baaxiilo tashaa cawwaammoota'n I Moollanni i uunxato macceesam hee'ukkoyyo. Ihukkaarem Waa'i kaba hanqo'isam macceesaakko; i uunxaxxi sagaram macceesaakko. I uunxato sabubee'i bikkina ixxi eroommam iinniinsi qeessubee'i bikkina Waa'i galaxxamaakkoohan ihona. Waa'i niina qishixxona; neesem maasse'ona; ixxi er illinnem neese moo'ona. Heer uulli ki googo minaadabim at gatisaanchi ikkittisa la'ona. Waa'a! Minaadab keese galaxxona; minaadab hundim kiina galata hincaa'ona. At minaadab hundinam hanqo'i oogato oogattoo bikkinaa manni hundam awwonsitoohan bikkinaa minaadab liiramona; lobakat liiranchinnem zammarona. Waa'a! Minaadab keese galaxxona; minaadab hundim kiina galata hincaa'ona. Uulli atoota uwwookko; ni Moollanni Waa'im neese maasse'ookko. Waa'i neese maasse'ookko; heer uulli hundim ixxo baddookko. Waa'i ki'ona; ixxi diina'im binnihona; ixxo sabo keen ixxi illagiinsi gibona. Ixxuwwi wiriir binnoo'isa binnitona; maraphphi chuf giiranne bukkamoo'isam jor keen Waa'i illagiinsi bi'llona. Ihukkaarem muccur keen liirantona; Waa'i illagenne lobakata liirantona; lobakat liiranchinnem «Illil» yitona. Waa'ina zammallehe; ixxi summi bikkinam galaxxi mazmuura hincaa'llehe; duuphphi haninne marookkoka iimiimmaa'llehe; ixxi summim Waa'a! Ixxi illagennem lobakata liirammehe. Waa'i ixxi Keesammi Minenne ihaa; adaraar oosina anna; busar meentikam hanqa egeraancho. Mulli hee'oo keenina mine uwwookko; karanto'i keeno ixxi wodinne tirookko; ihukkaaren jor keen udma'anne hee'llamo. Waa'a! Ki minaadaba awwonsitti ammane udma'i uullanne ixxuwwinne maqire mattitti ammane Siina'i Moollanni Waa'i illagenne Isra'ee'l Moollanni Waa'i illagenne uulli huxe'ukko; iimaniinsim xeen ga'nnukko. Waa'a! Lobakat xeena ga'nnisitto; gogaakkoo ki ullam aashissitto. Oo beyyi ki allaachchi diinat hee'oohan ihukko; buxinam ki biijoominne hasisoo luwwa uwwitto. Waa'i ixxi ijaajo uwwukko; alallaatoo gogotim duta. Ixxuwwim «Gogoxxi adilluwwi gaaggaabba'a gibbamo; minenne gatu meentim qeefajja baxxamookko. Gereebba allaatteena laso gatto'i keenim; lad kin birinne baxamaa; belelleeso worqinnem goolabamu; handare'i laxxisa ikkakkamo. Hundam xanoo Waa'i adilluwwa binnaa'u ammane Xalmoo'n Duunanne ga'nnoo baraxxisa issukko. Ate qoxxaalli Duuna! Baasaa'n Duuna! dut aagammi firammi duuna; Baasaa'n duuna; ki'nnuwwi dut aagammi firammi duunnuwwa; Waa'i hee'eena hasaa doo'llu duuna Waa'i heer heerinam hee'oo duuna mahina to'achchimminne moo'llakkamuulla? Waa'ik faraxxi gaare'uwwi kumaa kaakumaa; Waa'i Siina'i Duuniinsi keesammi ixxi mine aagukko. At iimane fittitti ammane qeefadamu keeno amaddaa mattitto. Moollanni Waa'a! At hee'lloo beyyonne ikkaa jor keeniinsi gatoo'n manni hundiinsim gibiro aa'llitto. Balli hundam ni iyyo iyyookkok; ni gatisaanchi Moollanni Waa'i galaxxamona. Ni Waa'i gatisaanchi Waa'a; lehiinsi gatiseena xanookkokim xale'i Moollanni Waa'a. Hanqinam Waa'i ixxi diina'ika horoore baaxiilonne qoxxita'a hee'llam kee'nnekam sammo aphphisookko» yitamo. Waa'i «Ki diina'a Baasaa'n Duuniinsi dilliisoommo; xilli dambalaqiinsem fissaa woroommo. Atim ixxuwwika xiiga lokkinne hancaaccootto; hancaacciittuuyyi taakke'llootto; ki wishim ki diina'a itookko» yukko. Waa'a! Ki lombaam moo'amoolla; oohim i Moollanni i adil keesammi ixxi mine lombinne aagoohane. Zammaraan illaginne mazmuu'l mu'uta lellitam keenim lasinne ikka'a dibbe'e aphphissam landi odim lambe'enne hee'llo'o. Ixxuwwim «Minaadaphphi wixxixxi lambe'enne Waa'a galaxxehe; Isra'ee'l shumo'i hundim Waa'a galaxxehe» yitamo. Hoffan hee'u Biiniyaam sulli awwonsam hee'ukko; ee lasage xig dut Yihuxxi gassaan ixxuwwi gogotinnem hee'llo'o; lasaanchonne Zaabiloonikii sulli awwonsaanii Neeftaaleem sulli awwonsaanii awwonto'o. Waa'a! Ki woda moo'ise; Moollanna! Ka illageen niina issittisam kabadem ki malaayye moo'ise. Yerusaaleemanne yoo ki mi'n bikkina adilluwwi kiina irifo'o amadda'a waattamo. Shomboqo'i wo'l moochcha, minaadaphphi lambe'enne yoo moolluwwa gorba'innem axeere. Ixxuwwi hundim ijaajanta'a kiina gibittamisa isse; ora ki'isseena hassam minaadabam binnaa'e. Gassaan Gibxiinsi waarookko; Tophphe'i uulli minaadabim Waa'i kollonne anga biddiqaa'ookko. Uulli adilluwwi hundim Waa'ina zammallehe; Moollannina zammallehe. Hinaxxi doolliinsim ki'isaa yoo iima'n iima'n iimane firukkaanina wodaam sagarinne gugoohaannina zammallehe. Hibbi Isra'eelanne, malaayyim iimanennette ihu Waa'ina «At wodaammo» yi'llehe. Isra'ee'l Moollanni Waa'i ixxi Keesammi Minenne ihaakka ixxi miniinsi moo'amoo ammane lobakata baddisookko; Isra'ee'l Moollanni Waa'i ixxi minaadabina wodaa malaayyee uwwookko; Waa'i galaxxamaakkoohan ihona. Wo'i wo'mmaa i gaanje afu bikkina Waa'a! At eese gatise. Uulloommi beyyo hoogaamma xilli leepho'onne xuuxamaammo; xilli wo'onne aagaammo; wo'i moorim eese xuuxaakko. An laaraa laaraa hoogaammo; i leella'im gogaakko; i Waa'a egerimminne i illi jaamaakko. Mashka'i bee'em eese saboo keen i horoo'l saraatiinsi dutaakko; jollinne eese hollansoo diina'i ki'aakko; ee ammane an game'umbee'i luwwaa iinniinsi miqisso'o; odim an game'ummibee'i luwwam miqisseena giddissamuulla. I Waa'a! I qawwooma at laqqootto; i baaxiilim kiinniinsi daphphaakkoohaneyyo. Gogoxxi Moollanni Waa'a! Keesenne neeyyato issitam keen i mashka'inne tuuttoone; Isra'ee'l Moollanna! Keese hassam kee i mashka'inne sho'lloone. Ki mashka'inne game'llato iyyaqqaammo; Anim tuulle gunguu'llaammo. Iyyabbaayyuwwina allaggisa iyyummi oosinam waaraanchisa ihaammo. Ki mi'n to'achchi eese itaakko; keese game'llakko'i game'llatim eesenne ihaakko. Soommanimminne i gaga hawwodummi bikkina eese game'llakko'o. An xiddi eddechcha edde'ummaare eesenne osarakko'o. Wixxixxi beyyonne afuuroo mannina wossa dimbaanim lelli ihaammo. Waa'a! Ihukkaarem an at doo'llitti ammanenne keese uunxoommo; Mollanna, lophphaakkoo ki eroomminne; hanqo'i ki gatishshinnem macceese. Eese leepho'i xuuxoobee'isa gatise; i diina'iinsii xuuxoo xilli wo'iinsii eese gatise. Dirs eese agoone; xilli wo'im eese xuuxoone; bar tigaa eese lummaa'oone. Waa'a! Ki eroommi iina danaam ihu bikkina macceese; ki qishixxat lobakat ihu bikkina i kollonne daba'lle. Iinniinsi ki awwaadaanchiinsi ki gaga maaxxitte; an u'nnanne yoommi bikkina; qaqqissaa i uunxato macceese. I kollonne hincitaa iina at agaage; i diina'iinsim eese gatise. Eesenne afu game'llato, tuullaa sholle'nnaa at laqqootto; i diina'a annannichchom laqqootto. Ixxuwwi game'llat i wodano iiqu bikkina an neeyyato murummo; i kichchechcha baxxamoo mancho hasummo; ihukkaarem matom siidummoyyo; eese qoxxisookkokam hasummo; ihukkaarem matom hoogummo. Itoommi hurbaatanne qaraaroo luwwa hamaatto'o; xeebe'ummaarem shiishoo agga agisso'o. Ixxuwwi maaddi ixxuwwina qaasha, qolatoo bichchaa ihona. Moo'llambee'isa ixxuwwik illi qooqona; ixxuwwi afarim hundi ammanem quutona. Ki bala'a ixxuwwanne ubbuuse; ki quunqi boobanim ixxuwwanne dillona. Ixxuwwi gatti diihona; ixxuwwi minenneewwannem hee'oo manni siidamoone. At guzumo'l keeno ixxuwwi yaayyitamuulla; at omassiiti keenom ixxuwwi baasissamuulla. Ixxuwwi hawwojjanne hawwojja ede; kiinniinsi muccurooma siiddoone Heechchi kitaabiinsi ixxuwwi shiinshantona; muccur keeninnem kitaabantoone. Ihukkaarem an u'nnannee hawwonnettee; Waa'a! Ki gatisimmi eese bakkiisona. Waa'ika summa mazmuurinne galaxxoommo; galatinnem ixxo imiimaa'oommo. Ookkim moora te'im labeena; kitimimmiinsi loboka Waa'a liiransookko. Wor amadanto'i keenim eekka moo'lla'a liirantamo; Waa'a hassakkam kee'nnekim wodan liiramona. Waa'i hawwaan kee'nneka laachcha macceesaakko; karaxxi minenne yo'i ixxi minaadabam gadaa urukkoyyo. Iiman, uulli, dambalaqquwwii woronne mikmikoo luwwii hundim Waa'a galaxxona. Waa'i Xiyoona gatisookko; Yihuxxi beero'uwwam areesaa baxookko; ixxi minaadabim eekke'enne hee'ookko; lago aa'ookkome. Ixxena awwaadoo kee'n shumo'i lago aa'ookko; ixxo summa iittoo keenim eekke'enne hee'ookko. Waa'a! Gatisseena at eese moo'e; Moollanna, qaqqissaa iina hara'mme. Eese shiteena hassam keen tuuttona; duduqitoname; i hawwodancha mixxam keenim sholle'lla'a laso daba'llitona. «Hashshu! Hashshu!» yitam keen musmusita'a laso daba'llitona. Ihukkaarem keese hassam keen hundim liirantona, lobakatam liirantona; ki gatishsha iittitam keenim hundi ammanem «Waa'i lobane» yitona. An hawwaanchoo buxichchoo; Waa'a! Qaqqissaa iina hara'mme; iina hara'mmaanchii gatisaanchii atette ikki bikkina Waa'a! Dassitte. Waa'a! An keesenne yabo aagaammo; eese hore'em tuussiissitte. Ki muccuroominne eese agaagee gatisee; ki macce i kollonne dabare; eesem gatise. An hundi ammanem gibaa yabo aagoommi qoxxaalli kin ihe; at iina qoxxaalli kinaa girbaa ikki bikkina eese gatissoo'isina ki ijaaj firona. I Moollanna! Jor kee'n angiinsi eese gatise; mogaalluwwaanniinsii hantaaraa'n angiinsii eese gatise. I Moollanni Waa'a! An neeyyato issoommok keesennette; oosoommaniinsim ki'isaa amma'nnamoommok keesennette. Qaramummaanniisim ki'isaa an keesenne bakke'aammo; an qaramoommisa issittok atette; an hundi ammanem galaxxoommok keesette. An dut keenina maalallat ihummo; ihukkaarem at an yabo aagoommi qoxxaalli beyyo. An hundi ammanem ki lombaa hibbaa alallaatoommisina i suum galatinne wo'mmaakko. Lommanna'n doollenne at eese uunjititte; i malaayyi hoogoo ammanem eese uttitte. I diina'i a'llanto'ookko; eese shiteena hassam keenim mateeyyanne doollotto'ookko. Ixxuwwim «Waa'i ixxo uunjaakko; ixxo gatisookkok bee'i bikkina hollitakka'a amaddehe» yitamuulla. Moollanna! At iinniinsi qee'llititte; i Waa'a! Iina hara'mmiteena gaaggaabe. Iinninne uullixxantam keen tuuttona; bi'lloname; eese hawwoddeena hassam keenim gadanchaa sholle'nnaa gunguu'llitona. Ihukkaarem an hundi ammanem keesenne neeyyato issoommo; keesem edaa edaa galaxxoommo. I suum ki muccurooma, hundi ammanem ki gatisimma wocoolla; kuraa guulleenam xanoommoyyo. Waaraa i Moollanni Waa'ika malaayyaam baxo alallaatoommo; xale'i ixxi muccuroomam kuroommo. Moollanna! Oosoommaniinsi ki'issaa eese losissaatto; kabad afeebe'em ki maalalsiisoo baxo alallaatoommo. Moollanna! An lomma'nnaa abo'oommi ammane eese uttitte; ki woda waaroo qaranchina ki malaayyem hanenne waaroo minaadabina la'iseembee'e at iinninne maqir ihe. Waa'a! Ki muccuroom iima'n libo'o afookko; at hundiinsi lob baxo baxxaatto; Waa'a! Keese labookkok ayyim bee'e. Eesenne dut hawwii u'nnii afoo'isa issittaarem eese dabattaa foorinne hee'oommisa issitootto. Waammi woronne aagummaarem at eese bariinsi fissitootto. Iina eraa'llaanniinsi lomba eddaa uwwitootto; daba'llitaahim eese qoxxissootto. I Waa'a! At amma'nnantaattoohan ikki bikkina an diitta'inne keese galaxxoommo; Isra'ee'l keesamma, an maasiinqo'inne kiina zammaroommo. An kiina zammaroommi ammane i suum liiranchinne wo'mmookko; at gatissitti i foorim kiina ililookko. An hawwodamimma hassam keen tuutto'ookko; sholle'llo'ookkome; ki muccuroo'm bikkinam i suum hundi ammanem wocookko. Waa'a! Hanqo'i oogato adilina ki muccuroomam adi'l beetina uwwe. Ixxi ki minaadabina muccuroominne wor amadanto'i ki minaadabinam hanqinne oogatookko. Lob duunnuwwi godda hoffi duunnuwwim muccuroo'm misha ki minaadabina uwwookko. Ixxi wor amadamu minaadabina fitamookko; bux oosom gatisookko; wor amadaanom iiqansookko. Ixxi eelliinchisaa aga'nnisaa heer heerinam hee'ookko. Ixxi hixe murakko'i beyyonne ga'nnoo xee'nnisaa uullanne yiroo xee'nnisaa ihona. Ixxi doollenne muccuroom wo'mmaakkoohan ihookko; agan hee'oo'isa ixxek xummi hee'ookko. Ixxi dambalaqiinsi dambalaq afeebe'e Efiraaxis daajjiinsi ki'isaa uulli tochchi afeebe'em gassookko. Udima'anne hee'oo keen ixxena otossookko; ixxi diina'im buchcha itookko. Tarseesikii wo'inne kibbamu uulli adilluwwii gibiro eebbamo; Araphphekii Saaba'i uulli adilluwwim irfo'o uwwitamo. Adilluwwi hundim ixxena otossitamo; minaadab hundim ixxena ijaajantamo. Wor amadamaa laaroo keeno, hawwaanoo hara'mmoo manni beekeenoo ixxi gatisookko. Ixxi buxinaa hawwaaninaa qishixxookko; hoongaanom lehiinsi gatisookko. Ee keeno wor amadanchiinsii damgiinsii gatsookko; ee kee'n xiig ixxi illagenne kee'mmaalla. Ixxek umur qeeraa'llona; Araphphi uulli worqim ixxena waarona; hundi ammanem ixxena Waa'a uunxakkona; balli hundam ixxo maasse'akkona. Uullanne hurbaat atootona; duunnuwwannem hurbaat wo'mmona; mish liibaanoos uulli duunnuwwisa henxereellona; beero'uwwannem hixisa dutona. Ixxi summi heer heerinam qoxxaa hee'ona; ixxi sadim eelliinchisa doolli hundinam hee'ona; minaadab hundim ixxenne maasse'amona; minaadab hundim at «Maassaamo» yihona. Mullam maalalsiisoo aganna baxoo Isra'ee'l Moollanni Waa'ina lombi ihona. Ixxek lombaam summi heer heerina galaxxamaakkoohan ihona; ixxi lombim uulli hundannem wo'mmona; Ameen, Ameen! Isseyyi beet Daawiit uunxat ka beyyonne beeddukko. Wodan muccur ihu Israa're'l minaadabina Waa'i hinkido'i biijaalla. Ihukkaarem i lokki timtimukkuuyyi luxuunxaa ubeenaa iina hofqax gataakko. Oohim jor keenina makkukkisa moo'aahii amaadaanonnem to'achchaahii hee'ummi bikkinatte. Ixxuwwanne jabbi mahim bee'i bikkina ixxuwwi fayya'uwwaa makkixxito'oo keenoo. Mulli manni u'nnantamisa ixxuwwi u'nnantamoyyo; mulli kee'nnisam hawwitamoyyo. Ee bikkina ixxuwwi amaada gaanji wereeggisa boqqoomam eddechchisa edde'llo'ookko. Di'iraakkoo ixxuwwi illi qanqanqoohane; ixxuwwi wodan jor sawwitinne wo'mmaakkoohane. Ixxuwwi mannanne naaccamoo xale'i jolle woccamoo; gaga iimiimaa'llu'uuyyim mulli keeno hawwoddeena shattamo. Ixxuwwi Waa'anne ejjebbettamo; ixxuwwi allabinnem uulli hundam affamo. Ee bikkina Waa'i minaadab ixxuwwi kollonne tiiro dabarookko; ixxuwwi woshsha hundam cawwita'a aa'llamo. Ixxuwwim «Waa'i maha la'ookko? Hundam xanookkokdu lachchaamonnihe?» yitamo. Jor kee'nnek haalat eehane; ixxuwwi hundi ammanem do'ixbeekeeno; ixxuwwi amaxxim exxukkuuyyi maroo keeno. Eehaare an i wodano muccuroominne egerummok kora'atteme; i anga muccuroominne aanshaqqummokim kora'atteme. An balli hundam hawwummo; soodu soodanni hundam guzumo'amummo. An eehid wocaammoohan ihuta'n ki minaadabina amma'nnamaammoohan iham hee'ummoyyo. An eekka la'eena hasummo; ihukkaarem ookki lobakata kee'mmaalli ihaa moo'amukko. Oohim Waa'i mine aageembee'e hee'ukko; ihukkaarem Waa'i mine aagaa lasage ixxuwwika lasaancho la'ummo. Hanqinam at ixxuwwa luxuunxisoo beyyonne dissitto; ubba'a bi'llamisam issitto. Hinkid ilcilimmaaxxi qaxanne bi'llo'o! Dangonnem beeddito'o. Diriiriinsi baqakkam ammane bi'oo haqaawwisa Moollanna, at ki'lloo ammane ixxuwwa awwaadbee'i keen issitaa bi'issootto. Iina qaraaru ammane i tiir kichche'u ammane I Moollanna, an ki illagenne saayyiinsi ee'lloombee'i maham la'oombee'i qawwi ihummo. Ihukkaarem an hundi ammanem kiinninnette; atim i makki anga amaddaatto. Ki sogitaninne eese awwonsitto; lasaanchonnem ki lombanne aagissootto. Iimanenne iina kiinniinsi bagaan ayyi yookko? Ka uullannem kiinniinsi mulleka hasoommi luwwi bee'e. I maarii i sawwitii hoogeena xanookko; ihukkaarem Waa'i iina malaayye; heer heerinam ixxi iina sharada. Kiinniinsi qee'llitam keen bi'llamo; kiina amma'nnantambee'i keeno hundam at bi'issootto. Ihukkaarem iina Waa'i kolli hincimmi e'llookko. Ixxi bax bikkina hundinam alallaateena an yabo aagoommok Moollanni Waa'annette. Waa'a! Neese heer heerina uunjittok mahinatte? Ki allaachchi gereebbandu kaa'nna quuqqittok mahinatte? Gaassiinsim ki'issaa at doo'llitti ki minaadaba, tisso miqqaa ki gaqqan issitti ki sulloo at hee'lloo Xiyoo'n duunaa sawwihe. Ki minenne yoo luwwi hundam diina'i bi'isu bikkina ee gindamaa diihu luwwa hundam moo'e. Ki diina'i ki minenne diraantamuulla; ixxuwwi baandiram mare'i ihona ee beyyonne kaasso'ookko. Ixxuwwim doo'm woroonne heedinne haqqa bachchoo manna labbamuulla. Angi lachchi manninne wereeggu luwwi hundam heedinnee fanxiisinnee iiqansito'o. Ki mine giirinne shokkiisso'o; ki summi weeshamoo beyyom haashaassito'o. Ixxuwwim «Ixxuwwa wor amandoommo» yito'o. Ka uullanne Waa'ina otossakkam beyyuwwa hundam shokkiisso'o. Niina moo'amoo mare'i bee'e; ka lasage hiraagoo hiraagaan matim bee'e; kuk hinkaa'n ammanina ihooda'e la'ookkokim ni lambe'enne bee'e. Waa'a! Diina'i naacoo hinkaa'n ballinatte? Ki maso'i ki summa sholliissamok hundi ammanemennihe? At ixxuwwa mahina guzumo'llooyyo? Ki anga mahina wixxaa'llaa cawwitto? Waa'a! At gassiinsem ki'issaa iina adila; ki gatisimmim uullanne ihukko. Ki wodinne dambalaqa baxxansitto; dambalaq woro'l moochchika horoolluwwa iiqqitto. Leewaataan yakkam xarakkichchi horoolluwwa iiqqittok atette; ixxom udma'anne hee'oo qooccanchuwwinam hurbaat issitto. Bu'uuwwii wo'uuwwii firoo'isa issittok atette; xoo'oobee'i daajjuwwam gokkissitto. Ballii hiimii kiihane; eelliinchoo aganaa beeyyo beyyonnem dissittto. Uullika gabala qooddittok atette; at billee hagayyee qooccitto. Waa'a! Diina'i keesenne hinkaa'nna naacamoolda'e awwaadbee'i minaadabim ki summa hinkaa'nna sholliisoolda'e sawwihe. Ki minaadaba moochchina higissaa uwwititte; hawwonne yoo ki minaadaba heer heerinam xadditte. Lolli tunsi uullanne hundannem wo'mmaakkoo bikkina ki hidi'l sagara sawwihe. Wor amadanto'i keen tuutta'a laso daba'llitamisa issititte; buxii hawwaanii ki summa galaxxitona. Waa'a! Ki'e; ki baado fire; awwaadbee'i keen hundi ammanem keesenne naacco'okam sawwihe. Ki diina'ika diraanchaa hundi ammanem sha'llantam sha'llanchaa xadditte. Waa'a! Neese keese galaxxinoommo; at ni kolli hincitti bikkina ki summa galaxxinoommo; maalalsiisoo ki bax hundam alallaantoommo. At «An qoodummi ammanenne hanqo'isinne oogatoommo. Uullii uullanne yoo qooccanchii hundim huxe'oo ammane uullika utubbuwwa qoxxisoommok anette. Amaadaano, ‹amaaddakkotte› jor kenom ‹gaga iimiimaa'llakkotte› yoommo. Gaga iimiimaa'llakkotte; gaanje qeeraa'llissakka'ahim woccakkotte» yitto. Lombi eelliinchi firiinsi te'im eelliinchi aaggaiinsi te'im uulli udma'iinsi waarooyyo. Oogatookkok Waa'a; ixxi mato sholliisaa mato odim lonsoohane. Firaakkoo woyi'n diqaasi'nnoo Waa'i quunqinne wo'mmaakkoo humbulli Waa'i angannette; ixxi eekka uullanne dunukkaare uullanne hee'oo baaxiilaan hundim atal gatoo'n cuungaa agukko. Ihukkaarem an heer heerinam liiramoommo; Yaaqoob Waa'inam zammaroommo. Ixxi jor kee'n malaayye iiqookko; ihukkaarem muccur kee'n malaayyi exxukkuuyyi marookko. Yihuxxi uullanne Waa'i la'amaakkoohane; Isra'eelannem ixxi summi lombaamo. Ixxek dukkaan Saaleemanne heechchi beyyim Xiyoonannette. Eehe'em belecce'oo xiyyuwwa, agiraa bisa'aa bagadoo mulli o'l muuta hundamii xaansukko. Waa'a! At hinkaa'nna lombaamo! ki hibbim heer heerina hee'oo duunnuwwiinsi lobane. Geedduwwi boganto'ookko; ki'llambee'isam diriitto'ookko; ixxuwwi gaadaaniinsi matim anga mikimikaa'eena xanukkoyyo. Yaaqoob Waa'a! At axeettittaare faradii faradaanii ki'llambee'isa diriitto'ookko. Waa'a! Baddimmi hasisookkok xale'i keesette; at quuqqoohare ki illagenne uulleena xanookkok ayyette? At oogato iimaniinsi la'issitto; uullim baddaa sa'ukko. Oohim uullanne wor amadanta'a yo'i keen hundam gatisseena at Waa'i oogatina ki'llitti ammane. Manni quunqi ki lombina mashka'i ihookko; quunqiinsi gatto'i keenim egexxantamo. Baddimmi hasisoo ki'nnuwwi Moollanni Waa'ina uga'a aaggehe; ee uga'am ixxena uwwehe. Ixxi kululleetanne hee'llakkam keen hundim ixxena irfo'o eebbehe. Waa'i gassaa'nneka amaada sholliisookko; uulli adilluwwi hundim ixxo badditamo. An sagara iimaa'aa Waa'i kollonne laarummo; i laachchi sagaram Waa'ina macceesisummo. Eesenne hawwi afu balla Waa'a hasummo; hiimom usheexxoo'n i anga biddiqaa'ummo; ihukkaarem an kichchechchiinsi qoxxeena xanummoyyo. Waa'a, an keese sawwummo; i woronnem qitinummo; dabaransaahim sawwummo; i wodanim hoogukko. An diriiroombee'isa issitto; lobakata kichche'ummi bikkinam woceena xanummoyyo. An gaassi doolle sawwummo; hinaxxi doolluwwam dabaransaa sawwummo. Hiim hundoomam garoommok sawwummuuyyatte; dabaransaa sawwummuuyyim i woronne «Waa'i heer heerinam uunjoohonnihe? Ka lasagdu eroomma isseenayyonnihe? Heer heerina hee'oo ixxi eroommi beeddaahinnihe? wocu neeyyatdu hore'em gindamaahinnihe? Waa'i ixxeka hafite xadukkonnihe? Te'im ixxi quunqi mashka'inne qishixximma urukkonnihe?» yaa fitamummo. An «Hundam xanoohaanni gatisimmi makki angi dabassamukkaannisa sawwimmi ookki i qacine» yummo. Waa'i baxu baxo sawwoommo; gaassi agannuwwam sawwoommo. At baxxitti bax hundam sawwoommo; maalalsiisoo ki bax hundam dabaransaa sawwoommo. Waa'a! Ki goog keesamma; ni Waa'nnoo hundiinsi lob Waa'i bee'e. Aganna baxxoo Waa'i atette; at minaadaphphi lambee'enne ki malaayye moo'issootto. Yaaqoobikaa Yooseefikaa shumo'o ki minaadaba ki malaayyinne gatissaatto. Waa'a, wo'i keese moo'ukko; wo'i keese moo'aa baddukko; xilli dambalaqquwwim huxe'amukko. Duubim xeena ga'nnisukko; iimanim gugukko; ki xiyyuwwim belecce'ukko. Ki gug hambu'llaminne macceesamukko; banqi heer uullanne belecce'ukko; uulli heekke'amukko; huxe'ukkome. Dambalaq worinne kiina goog yookko; malaayyaam dambalaqam huruuttaa higgootto; ihukkaarem ki konte'i hore'em siidamooyyo. At Muse'ennee Aarooninnee ikkaa ki minaadaba gerebbisa awwonsitto. I minaadaba, i losano macceessehe; i saga'l kollonnem ki'nnuwwi macce daballehe. I suume kobi'llishsha wocimminne fooqaa'oommo; gaassiinsim ki'isaa yoo maaxammi luwwam wocoommo. Oohim neese macceensummanee lanqummanee; niyyanno'im niina kurukkane. Neesem eekka ni oosiinsi maanxoommoyyo; Waa'ika galata, wodaa ixxi issu malalsiisoo baxoo waaroo qaranchinam kulloommo. Ixxi Yaaqoobina ijaajo uwwukko; Isra'eelinam seera alallaatukko. Eeham ixxuwwi oosina losissona niyyanno'o ijaajukko. Oohim lasaqqi qaranchi la'oo'isinatte; odim ixxuwwi hanenne waaro qaranchina losissonatte. Ee'isinne ixxuwwim Waa'anne neeyyato issitamo; ixxi issu luwwam xaddamoyyo; ixxi ijaajom egettamo. Ixxuwwim gaassi ixxuwwi anno'isam boqquwwaa ijaajantambee'i keenoo, ixxuwwik wodan Waa'anne qoxxoo'nnookeenoo amma'ntambee'i qaranchaa ikkamoyyo. Efireem oos gaadaanoo xiyya tokkossam keenoo ikko'aarem o'l ayyaamonne laso daba'llita'a gibbo'o. Waa'inne aaggo'i hidirom egetto'oyyo; ixxi seerinam ijaajancha sabbo'o. Ixxuwwina baxu baxoo moo'isu maalalsiisoo agannaa xaddo'o. Gibxi uullanne Xoo'aananne ixxuwwi anno'i moo'llu'uuyyam aganna baxukko. Ixxi dambalaqa lam issa ixxuwwa higisukko; wo'om gortannisa uulloo'isa issukko. Ballaa duubinne hiimoo gii'l caakkinne awwonsukko. Udima'anne qoxxaalli kina diqukko; dambalaq qax wo'om fissa ixxuwwina agsukko. Ee kiniinsim wo'i firoo'isa issukko; wo'im daajjisa daadoo'isa issukko. Ihukkaarem ixxuwwi hundam xanoo Waa'ina boqqito'o; udma'i uullannem baaxiilo edda'a edda'a baxxo'o. Ixxuwwi lobakata mixxo'i hurbaata xa'mmimminne Waa'a keento'o. Ixxuwwim «Waa'i udma'anne maadda gudiseena xanoohonnihe? Qoxxaalli kina diqukkaare wo'i firaa daajjuwwi daadaakko; eehaare hurbaatam uwweena xanoohonnihe? Maardu ixxi minaadabina uwweena xanoohonnihe?» yitu'uuyyi Waa'anne qunquunto'o. Waa'im eekka macceesaa lobakata quuqukko; ixxi giir Yaaqoob shumo'onne ixxi quunqim Isra'ee'l minaadabanne aphphukko. Mashka'oomim ixxuwwi Waa'anne amma'nnito'oyyo; ixxi gatisimmannem neeyyata issito'oyyo. Ihukkaarem ixxi hanaan duubbuwwa ijaajukko; iima'n gooccuwwam fooqaa'ukko. Ittamisinam iimaniinsi maanna'a ga'nnisukko; iima'n hurbaatam ixxuwwina uwwukko. Ee'isinne manni iiam'n asse'amaa'n hurbaata itukko; itta'a goddita'a gatoo qax hurbaatam uwwukko. Waa'i eelliinchi firoo kolli hafachchi hafachchoo'isa issukko; ixxi malaayyinnem woroo'n qa'l hafachcha heekkeesukko. Maara uulli buchchi qaxa bararoo cii'am dambalaq shashsha'l qaxa ga'nnisukko. Eeham ixxuwwi wiiddanta'a yo'i dukkaannuwwi kululleetanne dilliisukko. Ixxuwwi lobakata mixxo'i luwwa uwwu bikkina itta'a goddito'o. Ihukkaarem mixxo'oka itta'a namu'llitoo'nnim hurbaat ixxuwwi suumenne hee'ukkuuyyim Waa'ik quunqi ixxuwwanne dillukko; ixxuwwiinsim la'antoo'oo geedduwwa shukko; Isra'ee'l woraaxxekam umura gundisukko. Oo hundim ihukkaarem minaadab baaxiilo baximma utto'oyyo; maalalsiisoo agannuwwa baxukkaarem amma'nnito'oyyo. Ee bikkina ixxuwwi doolli awwaad bee'isinne umurim baachchinne beeddoo'isa issukko. Ixxuwwika mat qaxa shoo ammane wodaninnem hassa'a Waa'i kolli daba'llitam hee'llo'o. Waa'i joriinsi egeroohaannoomaa hundam xanoo Waa'im ixxuwwina gatisaanchi ihukkisaa tiittam he'llo'o. Ihukkaarem ixxuwwi suum xale'inne qawwisso'o; ixxuwwi allabinnem Waa'anne qophphanto'o. Ixxuwwik wodan ixxonne qoxxaakkoohaneyyo; ixxenne aaggo'i hidirinam amma'nnanto'oyyo. Ihukkaarem Waa'i ixxuwwina qishixxukko; ixxuwwi baaxiil hundam haafukko; ixxuwwam bi'isukkoyyo; dut ammanem ixxi quunqa iyyaqqukko; ixxi quunqi bala'am ixxuwwanne dilliisukkoyyo. Ixxuwwi higoo hafachchisaa letam keenoo ikko'isam sawwukko. Udma'i uullanne hee'llu'uuyyi ixxonne bangujjito'o; dut ammanem ixxo kichche'isso'o. Ixxuwwi edda'a edda'a Waa'a keento'o; Isra'ee'l keesammam quuqisso'o. Ixxuwwa diina'iinsi gatisu ballaa ee ixxi wodaa tiitto'oyyo. Gibxi moo'isu agannaam mare'e Xoo'aananne baxu maalalsiisoo baxom xaddo'o. Ixxuwwika daajjuwwa xiiganne dabarukko; ee bikkina daajjuwwiinsi wo'o aggeena xanto'oyyo. Tikaayyi gogota asse'ukko; ixxuwwam qasukko. Lugam asse'aa manna guullukko. Hurbaaxxi muta kochcha'nnina atootam qawwaawwina uwwukko. Ixxuwwika woyi'n kaashsha baradinne, oda'i misham hadaddinne bi'isukko. Fooraam diinate baradinne; amaxxa hundam banqinne guullukko. Ixxeka malaayyaam quunqa, bala'a, kee'mmaalli hawwoo boobanaa ixxuwwanne dillisukko. Bi'isoo asse'amaa'n gogotam asse'ukko. Ixxi quunqina googo gudisukko; ixxuwwa lehiinsi gatisukkoyyo; ihukkaarem boobanina higisaa uwwukko. Gibxi uulli wona hundam shukko; Woraadda'n luxxi misha hundam Kaam dukkaananne guullukko. Ihukkaarem ixxi minaadaba gereebbisa allaarukko; udma'annem allaachchi diinaxxisa awwonsukko. Ixxuwwa xumminne awwonsukko; ee bikkina ixxuwwi baddito'oyyo; ihukkaarem ixxuwwi diina'a dambalaq xuuxukko. Ixxuwwam keesammi uulla malaayyinnem kaa'aa amadu ee duunaam uulla worukko. Mulli minaadaba ixxuwwi illagiinsi hollukko; ee ullam lagaa'llona baxxansukko; Isra'ee'l oosom ixxuwwi diina'i minneewwanne hee'llamisa issukko. Ihukkaarem ixxuwwi hundam xanoo Waa'a keento'o; ixxom quuqisso'o; ixxi seeram egetto'oyyo. Ixxuwwim ixxuwwi anno'isam laso daba'llita'a laggam keen ikko'o; boqqi xiyyisam inciicanto'o. Otossakkam beyyuwwa baximminne Waa'a quuqisso'o; anginne baxamu qophpha'n waa'uuwwinnem ixxo tu'achchisso'o. Waa'i eekka moo'aa lobakata quuqukko; Isra'eelam hore'em sabukko. Manni lambe'enne kaasu dukkaana ixxi heechchi beyyi ihu Seelo'om sabukko. Ixxi wodinaa lombinaa mare'i ihu Hidi'l Saga'l saaxina ixxi diina'i qeefadaa massoo'isa issukko. Ixxi minaadaba bisa'ina higisaa uwwukko; ixxi sharad/gulummi ihu Isra'eelannem/ luyyannem lobakata quuqukko. Ixxuwwika harde'i woraada giir itukko; baajaam landinam bollochcho'i kajja kadakko'oyyo. Ixxuwwi qeessuwwam bisa'inne shakko'o; ixxuwwi meentim wi'lliteena xanto'oyyo. Waa'im diriiriinsi baqoo manchisa ki'ukko; woyi'n diqaasa agaa dimbo billixxu malaayyaamisam shoottukko. Ixxi diina'a aphphisaa laso daba'llitamisa issukko; heer heerinam sholle'nna gunguu'llitamisa issukko. Ixxim Yooseef shum'o gadaa urukko; Efireem sullom doo'llukkoyyo. Ihukkaarem Yihuxxi sulloo lobakata iittoo Xiyoo'n duunaa doo'llukko. Ee beyyonnem iimanenne yoo ixxi mine labo Keesammi Mine baxukko; ee minem uullisa qoxxaa heer heerina hee'oohan issukko. Ixxena awwaadaanchi Daawiitam doo'llukko; gereebba allaaroo beyyiinsim massukko. Gereebba allaaroo beyyiinsi massaa ixxi minaadabina Yaaqoobina ixxi gulummi ihu Isra'eelinam allaaraanchi issukko. Daawiitim hanqo'i wodaninne ixxuwwa allaarukko; danaam qooroominnem awwonsukko. Waa'a! Mulli minaadab ki uullanne weeratto'ookko; ki Keesammi Minem haashaassito'ookko; Yerusaalee'm beero'om gindita'a bi'isso'ookko. Ki awwaadaa'nneka leesha iima'n ammarina keesammuwwikam maara uulli moochchina hurbaat issita'a uwwito'ookko. Ixxuwwika xiiga Yeerusaalee'm kululleetanne dirisisa daassito'o; ixxuwwa waammookkokim bee'e. Neesem ni olla'ina naac inkummo; ni kululleetanne yo'i keenim neesenne osattamisaa neese gaddamisaa inkummo. Waa'a, at neesenne quuqqoottok heer heerinattemennihe? Ki to'achchidu gii'llisa aphphukkuuyyi hee'oo'isamennihe? Keese laqqambee'i minaadabannee ki summa weeshshambee'i adilluwwannee ki bala'a dilliise. Mashka'oomim ixxuwwi Yaqooba shito'ookko; ixxi heechchi beyyom diihisso'ookko. Niyyanno'i baaxii'l bikkina neese guzumo'llitte; ki qishixxat qaqqisaa niina waarona; mashka'oomim neese kee'mmaalli hawwonnette. Neese gatisaanchi Waa'a! Ki lombaam summi bikkinaa yitaa niina hara'mme; ki summi bikkinam ni baaxiilo haafitaa neese gatise. Mulli minaadab mahina «Ixxuwwi Waa'i hannonnette?» yitamane? Ki awwaadaa'nneka dunamu xiiqqi baado miqissoo'isa neesem moo'nnummuuyyi mulli minaadabina la'ise. Karatonne yo'i kee'n laachcha at macceese; leh oogatamu keenom ki wodaam malaayyinne gatise. Waa'a! Ni olla'i keesenne naacantam naacancha lamar suum issitaa ixxuwwanne dabare. Ee ammane neese ki allaachchi gereebbi inkummi ki minaadab heer heerinam kiina galata uwwinoommo; qaranchiinsi qaranchi afeebe'em kiina galata alallaantoommo. Yooseefa gereebbi allaachchisa awwonsitoo Isra'ee'l allaaraancho, macceese; kirubeelanne afuutatoohaanno, ki caakkinne moo'ame. Efireemina, Biniyaaminaa Minaasinaa caakkitaa moo'ame; ki woda ki'ise; waattaahim neese gatise. Moollanna! Neese dabattaa areese; neese gantoommisinam ki ille niina caakkise. Gogoxxi Moollanni Waa'a! Ki minaadaphphi uunxatonne quuqqoottok hinki balli afeebe'e? Ixxuwwina kichchechchi hurbaata itissitto; wo'mmaakkoo indiiddam agissitto. Ni olla'i neesenne orantamisa issitto; ni diina'im neesenne osatto'o. Gogoxxi Moollanna! Neese dabattaa areese; neese gantoommisinam ki ille niina caakkise. Gibxiinsi woyina xoqoltaa wottitto; mulli minaadabam hollitaa ee woyina kaassitto. Ixxi hegeegom bachchitto; ixxim xapa issaa uulli hundannem wo'mmukko. Ixxi haf duunnuwwa caafim lob diggibbuwwa ambukko. Ixx caaffuwwim Medetereyaa'n dambalaqaa Efiraaxis daajjee afeebe'e dagaagukko. Eehaare eeheen higoo hundim misha feeroo'isina ootooma mahina ginditto? Ixxom doo'm wo'l boonke'i hancaacamookko; bii'l moochchi hundim itookko. Gogoxxi Moollanna! Ki ille ni kollonne dabare; iimaniinsim aad neese moo'e; ka woyi'n kaashsha at egere. Kuk at ki makki anginne kaassaa abooyyitaa ki gagina li'issitti kaashsha. Ookki muramaakko; giirinnem shokkaakko; ee bikkina atim ixxuwwi diina'a axeettaa bi'ise. Ki gagina qoxxissitti manchi beetonne ki makki angaannonne ki angi ihona. Ee lasage neese kiinniinsi annankoommoyyo; neese hee'nnoommi manni ise; neesem ki summa weenshoommo. Gogoxxi Moollanna! Neese dabattaa areese; neese gantoommisinam ki ille niina caakkise. Niina malaayyi ihu Waa'ina liiranchinne zammallehe; Yaaqoob Waa'inam ililillehe. Ki'llakka'a dibbe'e aphphissakku'uuyyi zammallehe; diitta'innee maasiinqo'innee liiransoo mazmuura macceesissehe. Aga'n aagganne ni lombi uguxxi ballanne xurumba fuggehe. Ookki Isra'eelina uwwamaakkoo seera; Yaaqoob Waa'im uwwaakkoo ijaajo. Gibxiinsi firu ammane ka seera Yooseefina uwukko; an la'oombee'i suuminnem «An ixxi gudumiinsi iyyo dilliisaammo; ixxi angam sananna iyyimmiinsi usheexxisaammo. At hawwonne hee'llitti ammane eese weeshshitto; anim keese gatisummo; guqqi woronne maaxammi beyyonne ihaa kiina dabachcha uwwummo; Mariib wo'i gadanonnem keese keenummo. I minaadaba, an ki'nnuwwina qoxxisaa kuroommoka macceessehe; Isra'eela, macceessakko'aare erane. Ki'nnwwina mulli waa'i hee'oone; mulli waa'ina otossitakkotte. Gibxi uulliinsi fissummok ki'nnuwwi Moollanni Waa'i anette; Ki'nnuwwi suume haraassitakka'a fooqaa'llehe anim wonshoommo. «Ihukkaarem i minaadab i woshsha macceesukkoyyo; Isra'eel iina ijaajamukkoyyo. Ee bikkina ixxuwwi tii'llisa ikkona duudaakkoo ixxuwwi woda'n sawwitina higisaa uwwummo. I minaadab i woshsha macceesaakkoota'n Isra'eelim iina ijaajamaakkoota'n ixxuwwika diina'a qaqqisom kaa'am hee'ummo; ixxuwwi maso'onnem i woda ki'isam hee'ummo. Waa'a sabbam keen hundim ixxi illagenne huxe'llamo; heer heerinam guzumo'antamo. Ihukkaarem an ki'nnuwwina muccur arasa itisoommo; qoxxaalli ki'n marabom goddisoommo» yoo maccesummo. Waa'i iima'n dummichchanne waa'uuwwi lambe'enne afuuraa oogatookko. Ixxuwwinam Hanqa oogattakkambee'ek hinki balli afeebe'e? Jor keenindu golo'llakkamok hinki balli afeebe'e? Hoongaaninaa adaraarinaa hanqa oogattehe; buxikaa wor amadanto'i kee'nnekaa hanqa egellehe. Hoongaaninaa hawwaaninaa agaaggehe; baaxiilaa'n angiinsim ubbuusissehe. «Ixxuwwi lachchbeekeeno; qoossimmim beekeeno; tuunsonne daba'llantamuulla; uulli lugumim heekke'ukko. Anim ‹Ki'nnuwwi waa'uuwwa; ki'nnuwwi hundim hundiinsi lob Waa'i ooso› yummo. Ihukkaarem ki'nnuwwi mannisam letakkamo; ayyi gassaanchisam ubbakkamo» yukko. Waa'a! Ki'e; uulli minaadab hundim kiihan ihu bikkina ka uullanne oogate. Waa'a! Cawwitaa uttitte; Waa'a! sa'ititte; moo'llaa cawwititte. Oono'o, ki diina'i keesenne sha'llantamulla; keese sabbam keen gaga iimiimaa'llo'ookko. Ixxuwwi ki minaadabanne maaxaqqanne dollotto'ookko; iittitoo ki oosonnem mat ikka'a ki'llo'ookko. Ixxuwwim «Waallehe, Isra'ee'llek summi od tiiramoobee'isa minaadabam ihoobee'isa bi'insona» yito'o. Hundim mat ikka'a a'llanto'ookko; keesenne ki'lleena hide'anto'o. Oo keenim Edoo'mmane, Ismaa'eelane, Moo'aaphphane Aggaarane, Geebaalane, Amoonane, Amaaleeqane, Filisxee'manee Xiiroos mannaa. Loox oosina hara'mmiteena Aasoo'l mannim ixxuwwinne mat ikko'o At Miidiyaa'm mannanne issittoka ixxuwwannem isse; ee'isam Siisaarannee Yaabinannee Qiishoo'n daajjenne issittoka kakeenonnem isse. Ixxuwwi Endooranne bi'llo'o; ixxuwwi leeshim biir uullanne shamukko. Ooreebannee Zaa'eebannee issittoka ixxuwwi daannuwwannem isse; Zeebaahannee Xalmuna'annee issittokam ixxuwwi gassaanonnem isse. Ixuwwim «Waa'ika allaachchi biira ni gaqqan issinona» yitam keeno. Ee bikkina Waa'a! Ixxuwwa hambu'llam dira binnaa'oo'isa binnaa'e; hafachchi massoo bura'isam isse. Giir dooma itoo'isam gii'l laban duunnuwwa shokkiisoo'isam ki wiisho'inne holle; ki hambu'llaminnem muggise. Waa'a! Ixxuwwi keese badditamisina ki diina'i tuuttamisa isse. Ixxuwwi heer heerinam tuuttona; hanshiba'llitona; sholle'lla'ahim bi'llona. Kiikki summi Waa'i ihu xale'i at uulli hundannem hundiinsi loban ikkittisa laqqona. Gogoxxi Moollanni Waa'a! Ki min hinkaa'nna mishsoohane. I foor Waa'i mine quluxukko; lobakatam mixukko; i maarii foorii hee'oo Waa'anne liiramukko. Iina adilaa Waa'aa ikkitti gogoxxi Moollanna! Kiina kitima hincaa'akkam beyyi gadanonne waaxiigena gatti beyyi maccogaar ciicoollinam do'n yookko. Ki minenne hee'llam keen hinkaa'nna maassaammuwwa! Ixxuwwi heer heerinam keese galaxxitamo. Waa'a, hara'mmat kiinniisetti ihu keen wodanonnem ki mine mareena liiramoo keen maassaammuwwa. Baakaa yakkam cebbinne higga'a lasage wo'i bu'i firoo beyyo affamo; qaraaxonne ga'nnoo xeenim ee beyyonne delbi ihookko. Ixxuwwinam malaayyenne malaayyi exxookko; waa'uwwi hundinam Waa'am Xiyoonanne moo'llamo. Gogoxxi Moollanni Waa'a! I uunxato macceese; Yaaqoob Waa'a, macceese. Waa'a! At doo'llitti ni agira moo'e. Mulli beyyonne kum ayyaamo hee'immiinsi ki minenne mat ayyaamo hosimmi iina e'llookko; baaxiilaan kee'n minenne hee'immiinsi Waa'i mi'n goocanne waardiyyichchi ihimmi e'llookko. Neese egeraanchii gassaanchii ni Moollanni Waa'i ihu bikkina nuuraa lombaa uwwookko; Waa'i xabbeen keenina er luwwa hoorooyyo. Gogoxxi Moollanna! Keesenne amma'nnamoo manchi maasse'amaakkoohane! Waa'a! Ki uulla erillinne moo'llaatto; Yaaqoobikam qeefajj'oo dabattaatto. Ki minaadaphphi hawwojja haafitto; ixxuwwi baaxiil hundam uttitto. At ixxuwwanne quuqqitti quunqiinsi daba'llitto; nadadditti nadajjam uttitto. Neese gatisaanchi Waa'a, neese dabattaa areese; neesenne quuqqitti ki quunqam ure. Neesenne quuqqoottok heer heerinattennihe? Ki quunqi qaranchi hundannem higoohanennihe? Ki minaadab keesenne liiramoo'isina at dabattaa foorinne hee'oo'isa isse. Waa'a! Ki eroomma niina moo'ise; neesem gatise. Moollanni Waa'i wocookkoka an macceesoommo; daba'llita'a huushanchi googonne mattobeelas ixxi minaadabinaa amma'nnanto'oo keeninaa xumma uwweena neeyyata aagaakko. Waa'ik lombi ni uullanne ihoo'isina hanqinam ixxek gatisimmi ixxo badditam keenonnette. Iittii hanqii edanto'o; muccuroomii xummii sunqanto'o. Hanqi uulliinsi mutukko; muccuroomim iimaniinsi aad moo'ukko. Waa'i er luwwa uwwookko; ni uullim atoota uwwookko. Muccuroom ixxi illaginne marookko; ixxenam googom gudisookko. Waa'a! An hoongaanchoo buxichchoo ihummi bikkina i uunxato macceessaa dabachcha uwwe. An i gaga kiina higisaa uwwaammoohan ihummi bikkina eese egere; i Waa'a keesenne amma'nnammoo ki agishsho gatise. Waa'a, an balli hundoomam ki kollonne laaroommuulli ihu bikkina iina haafihe. Waa'a! An keese uunxoommuulli ihu bikkina eese ki agishsho liiranse. Waa'a! At biijaallaa haafitoohanee; keese weeshoo keen hundinam ki eroommi lobakata. Waa'a! I uunxato at macceese; i uunxaxxekam laachcha macceese. At i uunxato macceessoo bikkina hawwi ammane keese weeshoommo. Waa'a! Keese laboo waa'i bee'e; ki baxxinnem akeekixxamoo bax bee'e. Waa'a! At qooccitti minaadab hundim watta'a kiina otossitamo; ki summam lonsitamo. At hundiinsi lobane; maalalsiisoo baxom baxxootto; Waa'im xale'i atette. Waa'a! Ki googo iina losise; anim ki hanqanne hee'oommo; ki summam baddoommisina iina mat tiiro uwwe. I Moollanni Waa'a! Wo'm wodaninne keese galaxoommo; ki summam heer heerina lonsoommo. Ki eroommi iina lobakata; eese Sii'ooliinsi gatissaatto. Waa'a! Hantaaraan eesenne ki'llo'ookko; keese badditambee'i mogaalli keen eese shiteena hassamuulla. Waa'a! Ihukkaarem at biijaallaa qishixxitoo Moollannaa; quuqimminam gaaggaabboobee'ane; ki eroommii amma'nnantaattoohaannoomii lobakata. I kollonne daba'lle; iina haafihe; iina ki agishshina malaayye uwwe; kiina agishshotti hee'llo'aanti beeto gatise. Waa'a! At iina ki biijoo'm mare'e moo'ise; at eese hara'mmitoo'isaa qoxxissoo'isaa moo'lla'a eese sabbam keen tuuttona. Waa'i ixxi beero'o keesammi duunanne baxukko. Waa'i Isra'ee'l heechchi beyyuwwiinsi hundiinsim lonsaa Xiyoona iittukko. Waa'i beero'o, maalalsiisoo woshshi ki bikkina wocamaakko. Eese laqqam minaadabinne Ri'aabaa Baabiloonaa edaa xigoommo; Filisxee'mmek, Xiiroosikii Tophphe'i minaadabim «Ixxuwwina'i ixxuwwim kukim keyyenne qaramaakkoohane» yaqqantamo. Hundiinsi lob Waa'i Xiyoo'n beero'o kaasoo bikkina minaadab hundim «Kukim okkim keyyenne qaramaakkoohane» yookko. Minaadaba Waa'i kitaabukkuuyyi «Kukim Xiiyoonanne qaramaakkoohane» yaa xaafookko. Mazmuu'l muuta lelloo keenii zammaaraanii «Niina heechchi bu'i hundim kiinniinsette» yukkuuyyi zammarookko. Eese gatisaanchi Moollanni Waa'a! An ballaa hiimoo ki illagenne laaroommuulla. I uunxato at macceese; ki maccem i laachchi kollonne dabare. Eesenne lobakat hawwi afu bikkina an leheena hincaammo. An lehaa barenne aagoo manchisa ihaammo; i malaayyim hoogaakko. An lehaa ubu mannisa, shakka'ahim waammakko'i kee'nnisaa at tiittoobee'isa ki angiinsi firaa bi'u mannisaa ihaammo. At eese tuunsonne leh haf woronne xillaalli barenne uunjitto. Ki quunqi eesenne kee'mmaakko; womoo'llisam eese xuuxaakko. I besh iinniinsi qee'lloo'isa issitto; ixxuwwim eese shigigitamisa issitto; an kibbamaammo; xoreenam xanoommoyyo. Kichchechchi lophphu bikkina i illi jaamaakko; Waa'a! An hundi ammanem keese weeshoommuulla; i angam ki kollonne biddiqaa'aammo. Leto'i keenina at aganna baxxoohonnihe? Leto'i keendu ki'lla'a keese galaxxitamonnihe? Ki eroommi waammi woronne amma'nnantaattoohaannoomim bichchi beyyonne kuramoohonnihe? Ki aganni tuunsi woronne; ki muccuroomim xadamu manni beyyonne la'amoohonnihe? Waa'a! Ihukkaarem iina hara'mmitona an ki kollonne laaroommo; daranne an keese uunxoommo. Waa'a! At eese mahina uunjitto? Ki gagam iinniinsi mahina daphphaa'llitto? An oosoommaniinsim ki'isaa hawwaanchoo lehina hincaammoohanee; ki hibbi eese u'nnisaakko; anim neeyyato muraammo. Ki quunqi eesenne tuubamukko; ki bala'im eese bi'isukko. Oo keen balli hundoomam eese dirisisa kibbito'o; kolli hundinnem mat ikka'a eese kibbita'a amaddo'o. Eese iittitam keenoo i beshaa iinniinsi qeessitto; xale'i tunsi iina beshichchi ihaakko. Waa'a! Ki eroommi bikkina heer heerinam an zammaroommo; amma'nnantaattoohaannoomam qaranchi hundinam kuroommo. Heer heerinam ki eroommi qoxxaa hee'oohan ihukkisaa amma'nnantaattoohaannoomim iimanenne shooho'amaa hee'oohan ihukkisaa an alallaatoommo. At «An doo'llummaanninne sagara aagaammo; iina awwaadaanchi Daawiitinam hide'aammo. Oohim <Ki shumo'i heer heerinam hee'oo'isa issoommo; ki adillanom qaranchiinsi qaranchi afeebe'e qoxxisoommo> yitaa» hee'llittane. Waa'a! Iimannuwwi kiikka maalalsiisoo baxoo amma'nnantaattoohaannoomaa keesammi kee'n dummichchi lambe'enne galaxxookko. Iimanenne Waa'inne akeekixxamoo hinkane? Iima'n qooccanchuwwiinsidu Waa'a laboo hinkane? Waa'i keesammi kee'n dummichchi lambe'enne lobakata baddisoohane; ixxi kululleetanne hee'oo keeniinsi hundiinsim hibbaamo. Gogoxxi Moollanni Waa'a! Kiinni'nnoo'ok ayyette? Waa'a! At wodaamo; at hundi luwwannem amma'nnantaattoohane. At malaayyaam dambalaqqam ki daannoominne ijaajjootto; womoo'l malaayyem sa'issiissootto. Ra'aaba yakkam lob moochchichchom xaansitaa shitto; ki malaayyaam wodinnem ki diina'a binnaa'llitto. Iiman kiihane; uullim kiihane; uullaa uullanne yoo luwwaa hundam at qooccitto. Hanaa'n qaraa woroo'n qaraa at qooccitto; Taaboo'l Duunii Armooni'ee'm Duunii liiranchinne kiina zammarookko. At hore'em malaayyaamo; ki wod malaayyaamo; ki makki angim iimiimaakkoohane. Ki adillan shoohamukkok muccuroomannettee hanqannettee; eroommii amma'nnantaattoohaannoomii ki illagennette. Waa'a! Keese galaxxitu'uuyyi zammattam keenii ki biijoo'm caakkanne hee'llam keenii maassaammuwwa. Oo keen balli hundoomam ki summanne liirantamo; ki muccuroomannem lobakata liirantamo. Ixxuwwi malaayyina lombi atette; ki biijoominnem ixxuwwi malaayyi qoxxukkuuyyi marookko. Waa'i niina agira; Isra'ee'l keesammim ni adila. Amma'nnamaakkoo ki minaadabina mat ammane kaaltanne «Mat geeda adil issaammo; i minaadabiinsi doo'llamukkokam iimiimaa'aammo. I awwaadaanchi Daawiita siidummo; i keesammi zaytam ixxonne labummo. Anim ixxenne ihoommo; i wodim ixxo qoxxisookko. Diina'i ixxo kaa'eena hore'em xanooyyo; jor manchim ixxo sholliisooyyo. Ixxi maso'o ixxi illagennem xaansoommo; ixxo sabbam keen hundam bi'isoommo. Amma'nnamaammoohaannoomii i eroommii hundi ammanem ixxenne ihookko; i summinnem ixxi malaayyi iimiimukkuuyyi marookko. Ixxeka anga dambalaqanne makki angam daajjuwwanne biddiqaa'ookko. Ixxim iina ‹At iina anna; i Waa'a, joriinis egeraanchoo eese gatisaanchoo› yookko. Anim ixxo i won qachchi issoommo; uulli adilluwwi hundiinsim iimiimaa'oommo. I eroommi ixxena heer heerinatteme; ixxenne aagummi hidi'l sagarim qoxxaa hee'ookko. Ixxi shumo'o heer heerinam ixxi adillanom iima'nnisa qoxxisoommo. «Ihukkaarem ixxi shumo'i i seera gindulas i ogoranne hee'ubeelas i gatti ogora haashaassulas i ijaajom egerubeelas ee baaxii'l mashka'inne ixxuwwa guzumo'oommo; ixxuwwi hawwojji mashka'innem ixxuwwanne hawwi afoo'isa issoommo. Ihukkaarem i eroomma ixxeensi qeessoommoyyo; amma'nnamaammoohaannoomam ixxena xa'isoommoyyo. Ixxenne aagummi hidi'l sagaram gindoommoyyo; an wocummi sagaram dabaroommoyyo. Mexxo'aaggem i keesammoominne hide'ummi bikkina Daawitina qophphanoommoyyo. Ixxi shumo'i heer heerinam ixxi adillanim i illagenne eelliinchisa qoxxaa hee'ookko. Iimanenne amma'nnamaakkoo naqaash ihaa hee'oo aga'nnisa ixxim heer heerinam qoxxaakkoohan ihookko» yitaatto. Ihukkaarem kaba at ixxo sabbaatto; uunjitaattome; at doo'llittaannonnem lobakata quuqqaatto. Ki awwaadaanchinne aaggitti hidi'l sagaram ginditaatto; lombi adilla'n mare'em buchchanne ubbuussaatto. Ixxi oottuwwa hundam ginditaatto; girbuwwam bi'issaattto. Gooqqi araat hundim ixxi amaxxa boggo'o; ixxi olla'i manni hundim ixxonne osatto'o. Ixxi maso'i ixxo kaa'llamisa issitto; ixxi diina'im liirantamisa issitto. Ixxeka bisa'a juujissitto; orannem ixxena hara'mmittoyyo. Ixxi Adillano ixxeensi hoottitto; ixxi adilla'n barcumam buchchanne ubbuussitto. Ixxo ammanbee'em lomma'nnoo'isa issitto; ixxonnem tuulla gunguussitto. Waa'a! Ki gaga maaxxoottok heer heerinattemennihe? ki quunqi gi'llisa aphphookkokdu hinkaa'n amman afeebe'e? I umur hinkaa'nna gundi ihuda'e sawwihe; manchi beeto qooccittok awwaad bee'an issitaatennihe? Lehoo'n hee'oo manchi yoohonnihe? waammamoo'n gateena xanookkokdu ayyette? Waa'a, Daawiitina hanqinne hide'llitti gaassi ki eroommi hannonnette? Waa'a, ki awwaadaanchonne hinkaa'nna naacakkoda'ee lobakat kee'n gado'om iyyaqqaa yoommisaa sawwihe. Waa'a! At doo'llitti adila ki diina'i game'llitamuulla; maroo beyyi hundannem ixxonne naaccamoka sawwihe. Waa'i heer heerinam maasse'amona! Ameen! Ameen! Waa'a, at doolli hundinam neese yabo aangoommi beyyi ikkaatto. Duunnuwwi kaasamoo'n illageenim uullaa heer uullaa qoocciteena illageenim heer heerinam at Waa'a. Manchi beet buchchanne exxoo'isa issitootto; <<Manchi beeto, daba'llitaa buchchi ihe>> yitootto. Kum hiinchi ki illagenne mat ballisa; higaa maru beeballisa; odim mat hii'm saxxi suu'mmisa. At dirsisa fii'llaa massitoo ammane haqaawwisa bi'llamo; ixxuwwi dara mutoo haareechchi hixisa. Hix dar dara lataa fiitookko; ihukkaarem maaro'inne quubaa gogookko. Neese ki quunqinne bi'nnaammo; ki nadajjinnem mugginaammo. Ni hawwojja ki illagenne maaxamaakkoo ni baaxiilom ki caakkanne dissitto. Ni doolli hundim ki quunqinne higaakko; ni umurim qitinimminne beeddoolla. Ni umur lamarayyi hiincho; lophphukkaarem sadeentayyi hiincho; eehanniinsi lophphulas xale'i hoongee hawwoo. Qaqqisaa higookko; neesim wijjinoommo. Ki quunqi malaayye ayyi la'ookko? ki nadajji ki hibbi qaxa baddisoohane. Neese qoor manni inkoommisina ni umur hinkaa'nna gunda'e niina losise. Waa'a, hay daba'lle; kuk hinkaa'n amman afeebe'inatte? Ki awwaadaanina at qishixxe. Neese ni umu'l doollenne hundannem liirammonaa ililinonaa ki eroomma darina darina niina moo'ise. Hawwinne higinsummi doolli bikkee joram moo'nnummi hincuwwi bikkee neese liiranse. Ki bax ki awwaadaanina ki lombim ixxuwwi oosina la'amona. Ni Moollanni Waa'ik nuur neesenne ihona. Ni bax hundim mishaam ihoo'sa isse; eeyya, mishaam isse. Hundiinsi lob Waa'anne daphphixxookkok hundam xanoo Moollanni hafanne usheexxookko. Waa'inam «At iina yabo aagoommi beyyo, girbaa amma'nnamoommi i Moollannaa» yoommo. Waa'i keese maaxamaakkoo qaashiinsii shoo jabbiinsii egerookko. Ixxi laxxi woronne keese maaxookko; abooyyoo bikkina xumminne hee'llootto; ixxek amma'nnamaakkoohaannoomim kiina agiraa daato'oo ihookko. At «Hii'mmeka tuunso ballikam darabamoo xiyya badditooyyo. Tuunsonne dugoo jabboo sammi gud balli boobanaa badditooyyo. Mat kum ki gadanonne tommi kumim ki makki kollonne ubookko; ihukkaarem ki kolli hincooyyo. Jor kee'n guzumo'ancha xale'i ki illinne moo'llootto. Mashka'oomim Waa'a joriinsi egeraanchoo hundiinsi lobokam yabo aagakkam beyyoo issitaatto. Ee bikkina jor luwwi keesenne afooyyo; boobanim ki minenne hincooyyo. Mashka'oomim at mattoo goog hundannem keese egettam asse'amaano ki bakkina ijaajookko. Ixxuwwim ki lokko kin qoloobee'isa ixxuwwi anginne keese ki'issamo. At hobbaa hamashshaa hancaaccootto; hobbichchi geexaa xara'aa hancaacantootto. Waa'i «Eese iittu bikkina diina'i angiinsi gatisoommo; i summam la'u bikkina joriinsi egeroommo. Eese weeshookko; anim dabaroommo; hawwi ammanem ixxennetti ihoommo; ixxom gatisoommo; lonsoommome. Qeeraa'l umuram uwwoommo; i gatisaanchoomam ixxena moo'isoommo» yoolla. Waa'a galaxximmi danaamo; Hundiinsi lob Waa'a! Ki summina zammarimmim erane. Dar dara ki eroomma hiim hiiimom kiikka amma'nnantaattoohaannooma wocimmi danaamo. Tommi muuncan yoo diitta'innee maasiinqo'i sagarinnee keese galaxximmi danaamo. Waa'a! Ki bax eese liiransu bikkina ki angi bax bikkina liiranchinne zammaroommo. Waa'a! Ki bax hinkido'i lobane; ki sawwitim hinkido'i xillaalla. Tiirbee'i manchi kaka la'ooyyo; qawwim qoossooyyo. Jor keen hixisa li'uta'nnim, boqqi keen latuta'nnim, oo keen heer heerinam bi'ookko. Waa'a! Ihukkaarem at heer heerinam hundiinsi lobane. Waa'a, ki diina'i bi'ookko; jora issoo keen hundim binnookko. Ihukkaarem at mat buud yoo boobichchi buuxxisa eese iimiimaa'llitto; danaam zaytam eesenne labbitto. I moso'i kaa'anto'isa i illinnem moo'ummo; jor i diina'i ubbo'isam i maccinne macceesummo. Muccur keen dinbaaphphisa dagaaggamo; Liibaanoos uulli digiphphisam li'llamo. Oo keen Waa'i minenne kaasanto'oo bikkina ni Moollanni wixxixxi beyyonne dagaaggamo. Lommanna'n doollennem misha mishshamo; hundi ammanem lataa hee'oo haqqisa ikkamo. Oo moo'isookkok Waa'i hanqo'ane, ixxi neese joriinsi egeraanchoo ixxonne miiqakkam luwwi bee'anee ihukkisa. Waa'i adila, hibbaa malaayyee edde'aakko; uulla mat issaa qoxxisukko; ayyim heekkeeseena xanooyyo. Waa'a! Ki adilla'n barcum gaassiinsim ki'isaa qoxxaalla; at heer heeriinsim ki'issaa hee'lloohane. Waa'a! Daajjiuwwi iimaa'ukko; daajjuwwi sagara iimiimaa'ukko; daajjuwwi gugoo womoorinne sagara iimaa'ukko. Lobakat wo'i sagariinsi loboka dambalaq womooriinsim loboka iimanenne yoo Waa'i malaayyaamo. Waa'a! Ki seer qoxxaalla; ki minim heer heerinam keesammoominne wereeggaakkoohane. Waa'a! At baado miqissoo Waa'a; ee bikkina ki quunqa moo'ise. Uulli hundannem oogattoo Waa'a! Ki'e; bolxitam keeninam laboo guzumo'o uwwe. Waa'a! Jor keen bolxitamok hinki balli afeebe'e? Hinki balli afeebeedu heellantamo? Amaaxxi sagara woccamuulla; jora baxxam keen hundim birantamuulla. Waa'a! Ixxuwwi ki minaadaba iiqqamuulla; ki gaqqi minaadabam wor amaddamuulla. Busar meentoo waaraanoo shitamuulla; adaraar oosom duttamuulla, Ixxuwwi ee hundam issitu'uuyyi «Waa'i neese moo'ooyyo; Isra'ee'l Waa'im qoossooyyo» yitamuulla. Minaadaphphi lambe'enne hee'llakkam keen qoossehe; qawwuwwi keenim qoolluwwi ikkakkamok hinki balla? Macce qooccu Waa'i macceesooyyonnihe? Ille qooccu Waa'idu moo'eena xanooyyonnihe? Minaadaba axeerookkok lachcham manni hundinam losisookkok guzumo'ooyyonnihe? Waa'i mannika sawwita hundam la'ookko; ixxuwwi sawwit awwaad bee'an ihukkisam la'ookko. Waa'a! At axeettoottokii ki seeram losissoo manchii hinkaa'nna maasse'amaakkoohane? Jor keen aaggam bar hinameebee'e ixxo hawwi ayyaamonne usheexxissootto. Waa'i ixxi minaadaba uunjooyyo; ixxan ikko'i keenom urooyyo. Oogat daba'llaa muccuroomanne uullookko; wodano xabbeen keenim eekka awwontamo. I bikkenne ihaa boqquwwi keeninne uullixxamookkok ayyette? Jora issitam keenidu i bikkenne fitamookkok ayyette? Waa'i iina hara'mmubeeta'n an qaqqisom lehaa waammamam hee'ummo. An «Ubeena ihaammo» yaa hee'ummo; ihukkaarem Waa'a! Heer heerina hee'oo ki eroommi eese bakkiisaa uullisukko. Eese sawwitii u'nnii amadu ammane at eese liiransitaa qoxxissitto. Seera boqqissa'a hanqa bi'issam keeninne kiina mateeyyoom yoohonnihe? Ixxuwwi mat ikka'a muccur keenonne ki'llamo; muccur keen letamisinam oogattamo. Ihukkaarem Waa'i iina qoxxaalli girba; i Waa'i iina yabo aagoommi kina. Ixxim ixxuwwi jolla ixxuwwannem dabarookko; baxxo'i baaxii'l bikkinam ixxuwwa bi'isookko; ni Moollanni Waa'im ixxuwwa bi'isookko. Waallehe, Waa'a galaxxinona; neese gatisaanchi Waa'inam liiranchinne zammallona. Ixxi illagenne hincinaatim ixxo galaxxinona; galaxxi mazmuuram liiranchinne zammallona. Mashka'oomim ixxi hundiinsi lob Waa'a; odim mulli Waa'uwwiinsi hundiinsim lob Adila. Uulli xilli hundim ixxi angannette; duunnuwwi ludim ixxane. Ixxi qooccu bikkina dambalaq ixxane; uullam ixxi angi baxukko. Waallehe, ixxi lokki lugumonne umbaa otossinona neese qoocu Waa'i illagennem guruphphinona; Ixxi niina Waa'a; neesim ixxi abooyyoo ixxi minaadabaa ixxenam allaachchi gereebbaa. Ee bikkina «Gaassi ki'nnuwwi anno'i Mariiba yakkam beyyonne ikko'isa ee ayyaamo Maasa'a yakkam udma'i uullanne issito'isa ki'nnuwwi wodano duudissakkotte. An ixxuwwina issummi maalalsiisoo luwwa moo'llo'aare ee beyyonne eese keento'o; iinninnem uullixxanto'o. Ee minaadaba sor hiinco hundoomam shigigummo; Ixxuwwinam ‹Hundi ammanem huushamoo i googo la'oobee'i minaadaba› yummo. Ee bikkina an quuqaa ‹Usheexxatonne hore'em aaggamoyyo› yaa hide'ummo» yoo sagara kaballa qoossitakka'a macceessehe. Waa'ina haareechchi mazmuura zammallehe; uullanne hee'llakkam minaadab hundim Waa'ina zammallehe. Waa'ina zammallehee ixxom galaxxehee; ixxi gatisaanchi ihukkisam balli hundam alallaattehe. Ixxi lombam minaadab hundinam la'issehe ixxeka maalalsiisoo baxom manni hundinam kullehe. Waa'i hundiinsi loban ihu bikkina ixxena lophphaakkoo galat hasisookko; mulli waa'uwwiinsi hundiinsim loboka ixxo baddimmi hasisookko. Mulli minaadab otossitam waa'uwwi hundim qophpha'n waa'uwwa; ihukkaarem Waa'i iimannuwwa hundam qooccukko. Lombii hibbii ixxi kululleetanne yookko; ixxi minennem malaayyii nuurii wo'mmaakko. Uullanne hee'llakkam minaadab hundim Waa'a galaxxehe; lombaa galataa Waa'ina uwwehe. Ixxi summina laboo lomba Waa'ina uwwehe; kitima amaddaakka'a ixxi mi'n wixxixxi beyyo aaggehe. Hibbaamoo keesammaa ihu Waa'ina otossi'llehe; uulli hundim ixxi illagenne huxe'ona. Minaadab hundinam «Waa'i adila; uulli qoxxaallisa kaaxxaakkoo bikkina heekke'ooyyo; minaadab hundinam ixxi hanqinne oogatoohane» yi'llehe. Uullii iimanii liirammehe; dambalaqii woronne yoontakke'i luwwii hundim ilili'llehe. Biir uullii ee uullanne yoontakke'i luwwii hundim liirammehe; doo'mmo'l haqqi hundim liiranchinne ilili'llehe. Mashka'oomim Waa'i uullanne oogateena waarookko; heer uullanne muccuroominne uullannem ixxi hanqinne oogatookko. Waa'i adila; uulla, at liirame; dambalaq lambe'enne yoontakke'i uulli hundim liirammehe. Duubii gambabbaakkoo tuunsii ixxi kululleeta kibbaakko; ixxi gassim muccuroomannee hanqo'i oogatonnee shoo'amaakkoohane. Giir ixxi illaginne marookko; ixxi kululleetanne hundannem yoo diina'i hundam itookko. Banqi belellaat heer uullanne caakkisookko; uullim eekka moo'aa huxe'ookko. Uulli hundinam Moollanni ihu Waa'i illagenne duunnuwwi leeyyisa bukkamookko. Iiman ixxi muccurooma alallaatookko; minaadab hundim ixxi lomba moo'ookko. Anginne baxakko'i misilanne otossitam keenii mulli waa'annem bakke'llam keenii hundim tuuttamo; mulli waa'uwwi hundim Waa'i illagenne ubba'a otossitamo. Waa'a! Ki oogaxxi bikkina Xiyoo'n minaadab macceesaa liiramookko; Yihuxxi beero'uwwim lobakata liiramookko. Waa'a! At uulli hundannem hundiinsi loban ikki bikkina mulli waa'uwiinsi hundiinsim hanaanette. Waa'a iittitakkam keen jolle sabbehe; Waa'a badditam kee'n foore ixxi egeroohane; jor kee'n angiinsim gatisoohane. Caakki muccur keenina firookko; liiranchim wodano xabbeen keenina ihookko. Muccur keen hundim Waa'anne liirammehe; keesamaakkoo ixxi summam galaxxehe. Waa'i maalalsiisoo baxo baxu bikkina ixxena haareechchi mazmuura zammallehe; ixxi malaayyinnee keesammi wodinnee gatisaakko. Waa'i ixxeka gatisimma la'isaakko; ixxi muccuroomam minaadab hundinam moo'isaakko. Isra'ee'l minaadabina aagu neeyyaxxi sagara heer heerina hee'oo ixxi eroomminnee amma'nnamaakkoohaannoominnee egeraakko; beyyi hundannem yoo minaadab hundim ni Waa'ika gatisimma moo'aakko. Uullanne hee'llakkam minaadab hundim liiranchinne Waa'ina ilili'llehe; zammallehe; liiranchinnee mazmuurinnee ixxo galaxxehe. Diitta'a lellimminne zammattakku'uuyyi Waa'ina galata hincaa'llehe. Xaa'l xurumbaa buuxxi xurumbaa fuggehe; adil Waa'i illagennem ilili'llehe. Dambalaqii woronne yoontakke'i qooccanchii heer uullii uullanne yontakke'i luwwii malaayyaam sagara macceesissehe. Daajjuwwi anga aphphissehe; duunnuwwim Waa'i illagenne ililitakku'uuyyi mateeyyoominne zammallehe. Mashka'oomim Waa'i uullanne oogateena waarookko; ixxi heer uullanne muccuroominnee hanqinnee oogatookko. Waa'i adil ihaakko; minaadab huxe'ona; ixxi adilla'n barcumanne kirubeelanne afuuraakko; uulli huxe'ona. Waa'i Xiyoonanne lobane; minaadab hundiinsim ixxi hanaanette. Ixxeka lobakata baddisookkokaa hibbaam summaa manni hundim galaxxona; ixxi keesamma. Hanqa iittitoo malaayyaam adila; at hanqa shooho'llitto; hanqii muccuroomii Yaaqoobanne moo'amoo'isa issitto. Ni Moollanni Waa'a iimiimaa'llehe; ixxi lokki lugumonnem ixxena otossillehe; ixxi keesamma. Muse'ee Aaroonii ixxena qeessuwwi hee'llo'o; Saamu'eelim ixxi summa weeshoo keeniinsi mat hee'ukko; Oo keen hundim Waa'i kollonne laatto'o; ixxim macceesukko. Waa'im duuphphi utuphphi woronne ihaa ixxuwwina wocukko; ixxuwwim ixxi uwwu seeraa ijaajoo egetto'o. Ni Moollanni Waa'a! At ixxuwwi uunxato macceessitto; ixxuwwi bi'isso'i bi'ishshina guzumo'llittaarem at ixxuwwina haafitoo Waa'a. Ni Moollanni Waa'a iimiimaa'llehe; keesamaakkoo ixxi duunannem ixxena otossillehe; ni Moollanni Waa'i keesamma. Uulanne hee'llkkam minaadab hundim Waa'ina ilili'llehe. Waa'ina liiranchinne awwaaddehe; liiranchi mazmuura zammattakku'uuyyim ixxi illagenne hinci'llehe. Waa'i Moollanni ihukkisa laqqehe; ixxi neese qooccukko; neesem ixxan issukko; ee bikkina neese ixxi minaadabaa ixxena allaachchi gereebbaa. Galaxxitakku'uuyyi ixxi mi'n gooccuwwinne aaggehe; galata uwwitakku'uuyyim ixxi mi'n wixxixxi beyyo mallehe; galaxxehee ixxi summam iimiimaa'llehee. Mashka'oomim Waa'i biijaalla; ixxi eroommim heer heerina hee'oohane; ixxek amma'nnamaakkoohaannoomim qaranchi hundinam hee'oohane. Waa'a! An ki eroommi bikkinaa hanqo'i ki oogaxxi bikkinaa zammaroommo; kiinam galata uwwummuuyyi zammaroommo. An miiqakkam luwwi bee'i heechcha hee'oommo; i beyyo waattoottokdu at hinki ammane? I minennem muccuroominne hee'oommo. Jor bax baxamukkuuyyi moo'aa cawwoommoyyo; Waa'a laggam kee'n baxo ha'yyoommoyyo; an ixxuwwinne hore'em mat ihoommoyyo. Boqqoom iinniinsi qee'llona; jollinam an beyyo uwwoommoyyo. Ixxi beshichcho daphphanne hamookkoka bi'isoommo; amaadaanoo boqqi mannaa moo'aa cawwoommoyyo. Iinninne maqire hee'llamisina i tiir uullanne amma'nnantoo'oo keeninnette; miiqakkam luwwi bee'i googonne moroo manchi ixxi iina awwaadaancho. Qawwiisaanchi manchi ayyim i minenne hee'ooyyo; qophphano wocoo manchim i illagenne uullooyyo. Uullanne hee'oo boqqi keeno hundam ballina ballina bi'isoommo; jora baxoo keenom Waa'i beero'iinsi guullaa bi'isoommo. Waa'a! I uunxato macceese; i laachchim kiina macceesamona. Eesenne hawwi afoo balla iinniinsi ki gaga maaxxitte; ki macce i kollonne dabare; weeshoommaarem qaqqissaa macceese. An hee'oommi doolli wirii'llisa binnaa beeddaakko; i miqim shokkoolla. I wodan gogaa iiqamu hixisa ihaakko; hurbaata itimmam xadaammo. Lobakata laaroommi laachchiinsi ki'ukkok i orachchi beeddaa miqoom gataakko. Udma'i uullanne hee'oo hummaantichcho labummo; diih minenne hee'oo mooqqaqqichchisam ihummo. Diriir bee'e garoommuulla; i mi'n shudaamanne mullam garoo cii'ichchisam ihaammo. I diina'i balli hundam eese gado'inne game'lloolla; eesenne naacoo keenim i summa duunchina awwaaxxoolla. Gii'lbuchcha hurbaaxxisa itaammo; agoommi aggim indiiddinne hamaaramaakko. Oohim ihukkok ki malaayyaam quunqinnette; at eese iimiimaa'llaa lasonne dabattaa ubbuussitto. An hee'oommi doolli maaro'i balli hawwaankannisa; anim hixisa gogaammo. Waa'a! Ihukkaarem at heer heerinam adila; ki summim qaranchiinsi qaranchi hundannem hee'ookko. At ki'llootto; Xiyooninam qishixxitootto; kuk Xiyoonina haafitoo ammane; oohim kabadette. Ki awwaadaan Xiyoo'n kina iittitamo; buchchoominam qishixxitamo. Mulli minaadab ki summa uulli adilluwwi hundim ki lomba badditamo. Waa'i Xiyoona dabaraa baxookko; ixxi lombinnem moo'amookko. Ixxi hawwaa'n uunxato macceesookko; ixxuwwi uunxatom gadooyyo. Ka lasage qarantam minaadab Waa'a galaxxitamisina ixxi issu maalalsiisoo luwwa waaroo qaranchina kitaabbehe. Waa'i hanaan yoo ixxi keesammi beyyonne ihaa moo'ukko; iimanenne ihaatim uulla moo'ukko. Oohim aranto'i kee'n laachcha macceeseenatte; leh oogatamu keenom gatiseenatte. Ee bikkina Waa'ik summi Xiyoonanne alallaatamookko; Yerusaaleemannem galaxxamookko. Oohim ihookkok mulli minaadabii adilluwwii mateeyyanne wixxita'a Waa'ina otossitam ammanennette. Harde'oominne hee'ummuuyyim Waa'i i malaayye iiqukko; i umuram gundisukko. Waa'a! An lomma'nnoo'n lambe'aanchi umuranne eese massititte. Waa'a! At heer heerinam hee'llootto. Gaassitaa uulla qooccitaatto; iimanim ki angi baxo. Oo keen bi'ookko; ihukkaarem at cawwitaa hee'llootto; ixxuwwi eddechchisa moositta'a beedditamo; at ixxuwwa eddechchisa dabassitootto; ixxuwwim ekkid uunjantamo. Ihukkaarem at heer heerinam atetteme; ki umu'l doollim hore'em beeddoobee'ane. Ki awwaadaa'n oos xumminne hee'ookko; ixxuwwi shumo'im ki illagenne qoxxaa hee'ookko. I foore, Waa'a galaxxe; i mannoomat hundim Waa'ika keesammi summa galaxxe. I foore Waa'a galaxxe; ixxi kiina issu eroommam xadditte; Ki baaxiil hundam uraammo yookkok, ki jabbo hundam fayyisookkok, keesem bichchiinsi gatisookkok, ixxi eroommaa qishixxatom eddeesookkok ki woraaddan gaaqichchisa haareechchoo'isina ki mixanom er luwwinne wonshookkok ixxotte. Waa'i wor amadanto'i keenina hanqo'i oogato oogatookko; ixxuwwi hanqa ixxuwwinam uwwookko. Ixxi googo Muse'ena ixxi baxom Isra'ee'l minaadabina la'isukko. Waa'i qishixxoohanee haafoohane; quuqimmina gaaggaaboobee'ane; ixxi eroommim lophphaakkoohanee. Ixxi hundi ammane ni hawwojja hollamooyyo; quuqukkisinnem heer heerina hee'ooyyo. Ni baaxii'llisa niina dabarukkoyyo; ni hawwojjisam niina miqukkoyyo. Iiman uulliinsi iim qee'lloohaanni qaxa Waa'a badditam keenina ixxi eroommi lobakata. Eelliinchi fir eelliinchi aaggiinsi qee'lloohaanni qaxa ni baaxiilo niinniinsi qeessaakko. Anni ixxi oosina qishixxoo'isa ee'isam Waa'i ixxo badditam keenina qishixxookko. Ixxi neese hinkid qooccammumda'e la'ookko; buchchi inkummisam sawwookko. Manchik umur hixisa; haqqi wo'l fiitisam fiitookko. Ihukkaarem hafachchi hafachchoo ammane beyyiinsi bi'ookko; mare'oomim ee beyyonne hee'ooyyo. Ihukkaarem Waa'ik eroommi ixxo badditam keenonne heer heerina ihookko; ixxi muccuroomim qaranchiinsi qaranchi afeebe'e ixxuwwanne ihookko. Oohim ihookkok ixxeka hidi'l sagara egetto'aarettee ixxi ijaajinam amma'nnanchinne ijaajanto'aarettee. Waa'i ixxi adilla'n barcuma iimanenne qoxxisaakko; ixxi adillanim hundam gassookko. Ixxi wocoo sagara macceessakkam Waa'i asse'amaan ixxi sagarinam ijaajantakkam malaayyaammuwwi ki'nnuwwi Waa'a galaxxehe. Ixxena awwaadaan ikkakko'i ixxi doo'lla issitakkam gogot hundim Waa'a galaxxehe. Ixxi gassi woronne hee'llakkam ixxi qooccanchi hundim Waa'a galaxxehe; i foore, Waa'a galaxxe. I foore, Waa'a galaxxe. I Moollanni Waa'a! At hore'em lobane; at lombaa hibbaa edde'llaatto. Caakka eddechchisa edde'llaatto; iimanem dukkaa'nnisa biddiqaa'llaatto. Ki mine iimanenne yoo wo'iinsi hanaan baxxitto; duubam faraxxi gaare'i issitto; hafachchi ladinnem mattootto. Ki asse'amaano ayyaan issitootto; ki awwaadaanom gii'l laban issitootto. Heer heerinam heekke'oobee'isa uullika lugumo qoxxissaa uullissitto. Cambalaqa eddechchisa eddeessitto; wo'om duunnuwwiinsi hanaan uullissitto. Ee wo'om at shaaqqoo ammane ki illagiinsi gibookko; ki banqi sagara macceesoo ammanem qaqqisaa marookko. At gudissitti beyyonne duunnuwwannee cebbuwwannee dillookko. La'mmaagge uulla wo'i itoobee'isaa higaa maroobeeisaa gabala uullissaatto. Wo'i bu'uwwi cebbi worinne daajjuwwim duunnuwwi lambe'inne daadoo'isa issitaatto. Doo'm moochchi ee wo'iinsi agookko; bii'l hallim xeebo mu'llookko. Iima'n cii'im ee daajjuuwwi gammalanne do'nna baxookko; caaffuwwannem afuuraa zammarookko. Iima'n xeeninne duunnuwwa aashissootto; uullim at uwwitoo mishinne wo'mmookko Diinatina hixe manninam annanni annanni misha mutissaa uulli hurbaata uwwoo'isa issitaatto. Ee'isinne manna liiransoo woyina illem lii'llisoo zayta malaayye qoxisoo hurbaata uwwitaatto. Waa'ik haqqi ixxi kaasu Liibaanoos digibbuwwim wo'o goddookko. Ee haqqanne cii'i do'nna baxookko; hoo'm haqqannem ammar gatti beyyo axixxookko. Qeeraa'l duunnuwwim gaallichchina gatti beyyi ihookko; ki'n farqaqannem wexeex garookko. Agana ammannuwwa annannissakka'a la'akkamisina issitaatto; eellinchim aagoo ammane la'oo'isa issitaatto. At tuunso ebbaa uulla hiimsitootto; ee tuunsonnem bii'l moochchi hundim firookko. Hobbi wotalli Waa'iinsi itoo luwwa hasaa muunookko. Eelliinchi firoo ammane daba'llita'a ixxuwwi ma'nnanne aagga'a iinse'llamo. Ee lasage manni baxo baxonne aagookko; hiimeebee'i baxukkuyyi hosookko. Waa'a! ki bax hinkaa'nna lobakata! Hundem luwwam ki qooroominne baxxaatto; uullim at qooccitti qooccanchinne wo'mmaakko. Ku lob haraar dambalaq xig dut ihaakkoo hoffaanninnee lob qooccanchinnee wommaakko. Ixxi hanenne markabbuwwi chabbookko; woronnem at qooccitti «Lewaatan» yakkam moochchichchi waachchookko. Ixxuwwina ammaninne hurbaata uwwitoo'isina oo keen hundim ki anga moo'ookko. At ixxuwwina uwwitoo ammane ittamo; ki anga biddiqaa'llootto; ixxuwwim er luwwiinsi hundiinsim itta'a godditamo. At ixxuwwiinsi ki gaga daphphaa'lloo ammane muggitamo; ixxuwwiinsem foore massitoo ammane letamo; qooccanto'i buchchannem daba'llitamo. Ki Ayyaana asse'llootto; ixxuwwim qooccantamo; uullam haareechchi issitootto. Waa'ik lombi heer heerinam qoxxaa hee'ona; Waa'i ixxi qooccu luwwi hundannem liiramona. Ixxi moo'oohaare uulli huxe'ookko; duunnuwwam nakkoohaare wiriirookko. An foorinne hee'ummuuyyi i Waa'ina zammaroommo; an hee'oommi doollenne hundannem Waa'ina galaxxi mazmuura hincaa'oommo. An Waa'anne liiramoommisam i woda'n sawwitim ixxo liiransona. Baaxiilaan uulliinsi bi'llona; jora issitam keenim beedditona; i foore Waa'a galaxxe; Waa'i galaxxamona! Waa'a galaxxehe; ixxi summam weeshshche; ixxi baxu baxom minaadabina kullehe. Waa'ina galaxxi mazmuura zammallehe; ixxi baxu maalalsiisoo luwwi hundam woccehe. Ixxeka keesammi summam lonsehe; Waa'a hassam kee'n wodan liiramanoa; Waa'iinsi hara'mmato siiddakkeena ixxo hassehe; uttakkoo'nnim ixxo hassehe. Oo Waa'i niina Moollanna; ixxi oogatim uulli hundannetteme. Ixxi aagu hidi'l sagar heer heerinam egerookko; ixxi ijaaju ijaacci sagaram kum qaranchi afeebe'e qoxxisookko. Abrahaaminne aagu hidi'l sagara egerookko; Yisaaqina aagu neeyyatom xadooyyo. Eekkam Yaaqoobina seer issaa Isra'eelinam heer heeraxxi hidi'l sagar issaa qoxxisukko. Oo hidi'l sagarim «Kaani'aa'n uulla kiina uwwoommo; kiina qoodamaakkoo gulummam ihookko» yoohane. Waa'ik minaadab xigonne hoffanee Kaani'aa'n uullannem waaraanoo hee'llo'o. Mat uulliinsi mulli uulla mat adi'l uulliinsim mulli adi'l uulla karkaaddo'o. Ihukkaarem Waa'i ayyim ixxuwwa wor amadona cawwukkoyyo; ixxuwwi bikknam adilluwa «Doo'llummi i awwaadaano nakkitakkotte; i hiraagaanonnem jora baxxakkotte» yaa shaaqukko. Waa'i ixxuwwi uullanne sibaaro asse'ukko; ixxuwwinam ittam hurbaat bee'ooisa issukko. Ihukkaarem agiddanina biteesamu Yooseefa ixxuwwiinsi gaassaa asse'ukko. Ixxi lokkim xaarinne karamaa hee'ukko; gaanjim sansalatinne karamaa hee'ukko. Oohim ihukkok ixxi gaassaa wocu sagar wo'mmeebee'e; Waa'i sagarim hanqo'an ihukkis la'amukko. Adil asse'aa tissiisukko; minaadaphphi gassaanchim; wolabbanonne fissukko. Ixxi adilla'n uullannem daanni issukko; uulli hundannem gassaanchi issukko. Oohim daannuwwa ixxi sawwixxisanne awwonsona adi'l suu'm manninam qoorooma losisonatte. Ee lasage Isra'eel Gibxi uulla aagukko; Yaaqoob Kaam uullanne waaraanchi ihukko. Waa'i ixxi minaadaba lobakata dutisukko; ixxuwwi diina'iinsem loboka malaayyaammuwwi issukko. Ihukkaarem Gibxi manni ee minaadaba sabbamisa ixxi awwaadaanonnem dollotimminne ki'llona mogaalluwwi issukko. Ixxim ixxena awwaadaanchi Muse'ee ixxi doo'llu Aaroonaa asse'ukko. Ixxuwwim maalalsiisoo mare'ee agannaa Kaam uullanne issito'o. Waa'i gambabbi tuunso asse'aa uulla tuunsiisukko; ihukkaarem Gibxi manni ixxi sagarina ijaajanto'oyyo. Ee uulli wo'o hundam xiiganne dabarukko; wo'i wo'l qurxumme'e hundam shaa guullukko. Adilluwwi gatti minim gatoo'n ixxuwwi uullanne hundannem lug wo'mmukko. Qasoo tikaayyii tushshe'ii uullanne wo'mmoo'isa issukko. Ixxuwwi uullanne xee'n bikkenne barada ga'nnisukko; banqam dilliisukko. Ixxuwwika woyi'n kaashshaa oda'aa bi'isukko; odim mulli haqquwwa hundam iiqansukko. Ixxi ijaajukkaare xigakka'a xanakkambee'i qawwaawwii qawwaawwi wotallii uullanne wo'mmukko. Ee uullanne latu luwwaa hurbaataa hundam guullaa bi'isoo'isa issukko. Odim Gibxi uullika hundam bi'isukko; ixxuwwi gurubikkam wona hundam aphphisukko. Isra'ee'l minaadab biraa worqaa iyyiissa'a fittamisa issukko; ixxuwwi sulliinsi matim laso gatukkok hee'ukkoyyo. Lobakata baddita'a hee'llo'i bikkina ixxuwwi fitta'a matto'aare Gibxi manni liiramukko. Ixxuwwinam duuba hafi issukko; giiram hiimonne caakkisukko. Uunxito'aare heedoora laboo cii'a asse'ukko; iima'n hurbaatinnem goddisukko. Geejji kina diqaa wo'o fissukko; udma'i uullannem daajjisa daadukko. Ixxena awwaadaanchi Abrahaamina aagu keesammi neeyyata sawwukko. Ixxi minaadaba liiranchinne doo'llanto'oo keenom ilillaatinne fissukko. Ixxuwwinam mulli minaadaphphi uulla uwwukko; mulli keen qondoodda'a baxxo'i luwwam lagaa'isukko. Ee hundam issukkok ixxi minaadab ixxi seera egettamisinaa ijaajom wonshitamisinattee hee'ukko. Waa'i galaxxamona! Waa'a galaxxehe; Waa'i biijaalla; ixxi eroommim heer heerinatte ihu bikkina Waa'a galaxxehe. Waa'ika malaayyaam baxo ayyi guullaa kureena xanookko? Ixxena hasisoo qax galata uwweena xanookkok ayyette? Hanqa egettam keenii hundi ammanem muccurooma hassam keenii maassaammuwwa. Waa'a! Ki minaadabina harammitoo ammane eesem sawwihe; ixxuwwa gatissoo ammane eesem xadditte. At doo'llitti keenina makkaa moo'oommisa ki minaadaphphi liiranchannem liiramoommisa ki gulum lobannem heellamoommisa isse. Neese gaassi niyyanno'isam baaxiilo banxaammo; boqquwwaa keese hawwondaammoo keenoo inkaammo. Gaassi niyyanno'i Gibxanne hee'llu'uuyyi at baxxitti maalalsiisoo baxo qoossito'ooyyo. Lobakat amma'n ki eroommam sawwito'oyyo; Ertira'i dambalaq gadanonnem kiina boqqito'o. Ihukkaarem malaayyaam ixxi woda moo'iseena ixxi summi bikkinaa yaa ixxuwwa gatisukko. Ixxi Ertira'i dambalaqa shaaqukkaare gogukko; xillaalli wo'o udama'i uullisa issaa ixxi minaadaba wo'i lambe'inne higisukko. Maso'i angiinsem ixxuwwa gatisukko; diina'ai angiinsem gatisukko. Ihukkaarem ixxuwwi diina'a wo'i xuuxukko; ixxuwwiinsem gatukkok matim hee'ukkoyyo. Ee lasage ixxi neeyyaxxi sagaranne amma'nnito'o; mazmurinnem galaxxito'o. Ihukkaarem ixxi baxu baxo hundam qaqqisom xaddo'o; ixxi sogita'n googonnem marimma sabbo'o. Udma'anne hee'llu'uuyyi lobakat luwwa mixxo'o; ee udima'annem Waa'a keento'o. Ixxim uunxito'i luwwa uwwukko; ihukkaarem ixxuwwa cissoo kee'mmaalli jabbo asse'ukko. Wiiddananne hee'llu'uuyyi Muse'ennee Waa'ina keesammi ihu Aaroonannee to'achchito'o. Uulli fooqaa Daataana xuxukko; Aaberoonaa ixxi abaroosam uulli itukko. Ixxuwwa awwontam keenonnem giir dillukko; gii'l labanim ee boqquwwa itaa guullukko. Kooreebanne addichchi misila baxxo'o; bukkita'a baxxo'i misilinam otossito'o. Ixxuwwina lombi ihukkokam hixe itoo diinaxxi kobi'llanne dabatto'o. Ee bikkina ixxuwwa boobaninne guulloobee'isa ixxi doo'llu Muse'e lambe'enne aagaa Waa'i illagenne uullubeeta'n minaadaba bi'isoo'isa wocaa hee'ukko. Ee lasagem er uulla gaddo'o; neeyyaxxi sagaram amma'nnito'oyyo. Ixxuwwi dukkaa'n woronnem ikka'a qunquunto'o, Waa'i sagaram macceesimma sabbo'o. Udma'anne ixxuwwa uunjoohan ihukkisa ixxeka anga ki'isaa hide'ukko. Ixxuwwi shumo'om mulli minaadaphphi lambe'enne uunjoo'isa uulli hundannem binnaa'oohan ihukkisam la'isukko. Ee'isam Bi'eel Feegoorina otossito'o; foorbee'i waa'uwwinam kitimakko'i kitima itto'o. Ixxuwwi jor baxinnem Waa'a quuqisso'o; ee mashka'innem booban ixxuwwanne ubukko. Ihukkaarem Fiinihas ki'aa jora baxxo'i keeno guzumo'u ammanenne oo booban uullukko. Oohim ixxena qaranchiinsi qaranchi afeebe'e heer heerinam muccuroom ihaa xigamukko. Odim Mariiphphi wo'i gadanonne minaadab Waa'a quuqisukko; Muse'em ixxuwwi mashka'inne hawwukko. Waa'ika ayyaana kichche'issa'a hee'u bikkina Muse'e laboobee'i sagara wocukko. Waa'i ixxuwwa ijaajukkisanne hanqo'i Waa'a laqqambee'i minaadaba bi'isso'oyyo. Hore'oomam ixxuwwinne maqire hamaaranta'a ixxuwika heechchi qaanqi hundam awwonto'o. Ixxuwwi waa'uwwinam otossito'o; ixxuwwinam ookki qaash ihukko. Goo'n oosoo landaa habusina kitinto'o. Ixxuwwi goo'n oosikaa landikaa xiiga Kana'aa'n uullanne yo'i qophpha'n waa'uwwina kitim issita'a muccur xiiga dunto'o; uullim xiiginne haashaaramukko. Ixxuwwi, ixxuwwi baxinnem haashaaranto'o; ee baxinnem saa'aan ikko'o. Ee bikkina Waa'i minaadabanne quuqukko; ixxuwwam lobakata shigigukko. Mulli minaadabina ixxuwwa higisaa uwwukko; ixxuwwi diina'im ixxuwwa ijaajjo'o. Ixxuwwi diina'i ixxuwwa wor amado'o; ixxuwwi ijaaccisannem gassito'o. Waa'i dut ammane ixxuwwa gatisukko; ihukkaarem ixxuwwi Waa'ina boqqito'o; ixxuwwi baaxiilinnem sholle'llo'o. Ihukkaarem ixxuwwi laachcha macceesoo ammane ixxuwwi hawwo moo'am hee'ukko. Ixxuwwi bikkina hidi'l sagara sawwukko; ixxi eroommim lobakat ihu bikkina ixxi quunqiinsi daba'llikko. Qeefaddo'i keen hundim ixxuwwina qishixxitamisa issukko. Ni Moollanni Waa'a! Neese gatise; keesammi ki summina galata hincaa'nnona keesem galaxxinummuuyyi liirammona mulli minaadaphphi lambe'iinsi neese wixxaa'llaa dabare. Isra'ee'l Moollanni Waa'i heer heerinam galaxxamona; minaadab hundim «Ameen!» yihona. Waa'i galaxxamona! Waa'i biijaalla; ixxi eroommim heer heerinatte ihu bikkina ixxo galaxxehe. Waa'i tissi issaa gatisu keen ixxi ki'nnuwwa diina'i angiinsi gatisaakko. Eelliinchi firoo kolliinsii aagoo kollinsii hana'n qariinsii woroo'n qariinsii uulli hundiinsim ki'nnuwwa wixxaa'aakko. Mat mat keen mahimbee'i udma'anne karkaaddo'o; ixxuwwi katamanne massoo googom huushsho'o. Sibaatta'o, xeebe'llo'ome; ee bikkina lobakata hooggo'o. Hawwito'i ammane Waa'i kollonne laatto'o; ixxim ixxuwwi hawwiinsi gatisukko. Hee'llam kata'm kollonnem hanqo'i googinne awwonsukko. Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona. Ixxi xeebe'u kee'nneka xeebo muraakko; sibaaru keenom er luwwinne goddisaakko. Mat mat keen xaa'l chimchiminne karanta'a hawwinne tuunsonne leh haforonne afuutto'oo keen hee'llo'o. Oohim ixxuwwi Waa'i ijaajonne bangujjita'a hundiinsi lobaanni sogitanom gaddo'i bikkinatte. Ee bikkina malaayyi baxinne qondooddamisa issukko; hoogga'a ubbo'o; hara'mmoohim hee'ukkoyyo. Hawwito'i ammane Waa'i kollonne laatto'o; ixxim ixxuwwi hawwiinsi gatisukko. Ixxuwwi honenne ihu gambabbi tunsiinsi fissukko; karanta'a hee'llo'i sansalatam muransukko. Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona. Ixxi naas xaarinne baxamaakkoo gooccuwwa iiqansaakko; xaa'l laqqo'uwwam muransaakko. Mat mat keen ixxuwwi boqqoo'm mashka'inne qawwuwwi ikko'o; ixxuwwi baaxii'l mashka'innem hawwonne aaggo'o. Hurbaat shene'isaa hee'u bikkina lehina hincita'a hee'llo'o. Hawwito'i ammane Waa'i kollonne laatto'o; ixxim ixxuwwi hawwiinsi gatisukko. Ixxi sagara asse'aa fayyiisukko; bichchiinsem ixxuwwa gatsukko. Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona. Galaxxi kitimom hincaa'llona; ixxi issu luwwam liiranchinne zammattu'uuyyi kuttona. Mat mat keen markabinne dambalaq hanenne mattam hee'llo'o; haraar wo'i woronnem baxo baxaqqitu'uuyyi hee'llam hee'llo'o. Ixxuwwim Waa'ika baxo ee beyyonne moo'llo'o; xillaalli dambalaq woronnem ixxi issu maalallato moo'llo'o. Ixxi ijaajukkaare hambu'llam ki'ukko; hafachchim womoora ki'isukko. Ixxuwwi markabbuwwim malaayyaam hambu'llaminne gafe'anta'a iim darabanto'o; odim daba'llita'a xillanne dillito'o; eehido'i hawwinsi ki'ukkok muggita'a neeyyato mutto'o. Dinbaa'nnisa ekkidii kidii tartarito'o; mal bi'aatim issitam luwwa hooggo'o. Hawwito'i ammane Waa'i kollonne laatto'o; ixxim ixxuwwa hawwiinsi gatisukko. Hambu'llamim cawwoo'isa issukko; hambu'llamim uroo'isa issukko. Oohim ixxuwwa liiransukko; ixxuwwi hasso'i dambalaq tochchom ixxi xumminne afisukko. Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona. Minaadaphphi dummichchi lambe'enne ixxeka lomba kuttona; gassaa'n dummichchannem galaxxitona. Waa'i daajjuwwa gogoo'isa bu'uwwim daadoobeeisa issukko. Ee beyyonne hee'llam manni jolliinsi ki'ukkok mishaam uulla soogidaam uullisa misha uwwoobee'an issukko. Udma'i uullam wo'i wo'mmoo delbi issukko; gogaalli uullam bu'i firoo beyyi issukko. Sibaatto'i mannim eekke'enne afuuttamisa issukko; ixxuwwim hee'llam beero'uwwa eekke'enne baxxo'o, Abuulli uullannem hurbaata wixxo'o; woyi'n haqqam kaasso'o; lobakat atootam wixxaa'llo'o. Minaadabam maasse'ukko; lobakat oosom qatto'o; ixxuwwi horem hoffe'oobee'isa issukko. U'nninne, hawwinnee kichchechinnee sholle'llo'o; ixxuwwi xigim hoffe'ukkuuyyi marukko. Ixxuwwi gassaanonne Waa'i sholle'nna gunguussukko; googbee'i udama'anne karkaaddamisa issukko. Hawwanom hawwiinsi fissukko; ixxuwwi abaroosam gereebbi allaachchisa fikkaannisukko. Er keen eekka moo'lla'a liirantamo; ihukkaarem jor keen tuutta'a suume amaxxitamo. Qoor manni hundim kaka qoossitona; Waa'i eroommam sawwitona. I Moollanna! An keesenne amma'nnamoommo; an zammaroommo; mazmuurinnem keese galaxxoommo. I diitta'ii maasinqo'ii ki'llehe; anim soodaraarom ki'oommo. Waa'a! Minaadaphphi lambe'enne keese galaxxoommo; mulli minaadaphphi lambe'ennem kiina zammaroommo. Ki eroommi iimaniinsi hanaan ihaakkoohane; amma'nnantaattoohaannoomim iima'n duuba afoohane. Waa'a! At iimaniinsi hanaan iimiimihe; ki lombim uulli hundannem ihona. Iittitoo ki minadab joriinsi gatoo'isina ki wodinne agaage; i uunxatom macceese. Waa'i ixxi keesammi minenne ihaa «Kaachchinne Seekee'm uulla keenoommo; Suukooxxi cebbam baxxansoommo. Gala'aadii Minaasee i keeno; Efireem i horoo'l qoobe'e; Yihudim i adilla'n bicco. Moo'aab an anshaqqoommi beyyo; Edoomanne i kobe'e dissoommo; filisxeemam kaa'aa sharoommo» yukko. Waa'a! Girbamaakkoo beero'o eese ayyi massookko? Edoom afeebedu eese ayyi awwonsookko? Waa'a! Neese uunjtok atetteyyonnihe? Moollanna, ni gogotinnem gadimma uttaatto. Mannik hara'mmat awwaadbee'ane; ee bikkina ni diina'a kaa'nnoommisina at hara'mme. Waa'i niinninne maqir ihulas kaa'nnoommo; ni diina'am ixxi lokkii woroon hance'ookkok ixxotte. An galaxxoommi Moollanna, he'i cawwititaa uttitte; Jor keenii qophphanaanii eese sabbo'ookko; i bikkina qophphano wocco'ookko. Mashkabee'ekam eese hawwoddoo'ookko; i bikkinam jora woccamuulla. An ixxuwwa iittummaarem ixxuwwi eese kasassamuulla; ihukkaarem an ixxuwwina Waa'a uunxoommo. Eroommi bikkenne jolla, iitti bikkennem jorancha dabattamuulla. I diinakkichchonne oogatoo daanna uullise; ixxi diina'iinsim mat ixxo kasasoo'isa isse. Fitamahim neegaramaa daba'llona; ixxi uunxatim baaxii'l ihaa xigamona. Ixxek umur gundona ixxi daannoomam mulli manni massona; Ixxi oos anni bee'i adaraar ihona; mi'n amam aro'i bee'etan ikkona. Ixxi oos karakaaddona; uunxataanom ikkona; gindammi ixxuwwi miniinsim hollantona. Ixxena yoo luwwi hundim badaninne amadamona; ixxi badaraa siidu luwwi hundam allaggi manni bogona. Ixxena qishixxoo manchi hore'em hee'oone; ixxeka adaraar oosom abooyyo manchi siidamoone. Ixxi summa weeshisookkok mat qachchim gatoone; mat qaranchiinsi lasonne ixxo tiirookkok hee'oone. Waa'i gaassi ixxi anno'ika baaxiilo tiirona; ixxi am baaxiilim haafamoone. Waa'i ixxuwwika baaxiilo hundi ammanem tiirona; ihukkaarem ixxuwwi hore'em xadanto'oo keen ikkona; Buxa, hawwaanoo hoongaanoo sheena hollansam hee'ukko bagaan ixxuwwina qishixxam hee'ukkoyyo. Duumimma iittam hee'u bikkina ixxim duumamukko; maasse'imma iittoobee'i bikkina ixxeensim maassi qee'llukko. Duuncha eddechchisa edda'ukko; oohim wo'isa ixxi orachchonne zayxesam miq afeebe'e aagukko. Oohimixxena edde'oo eddechchisa hundi ammanem lade'oo saqisa ihona. Waa'i eese sabbam keenina i bikkina jora woccam keenina miqoo bit eehan ihona. I Moollanni Waa'a! Ihukkaarem at ki summi bikkinaa yitaa iina hara'mme; ki eroommi eran ihu bikkina iina agaage. An hoongaanchoo buxichchoo; eesenne afu hawwim i wodano kichche'isaakko. Maaro'i balli hafisa higeena ihaammo; qawwaawwisam giggiraammo. Soommaninne i malaayyi hoogaakko; i orachchim lobakata nacaakko. An osachchina ihaammo; eese moo'lla'ahim horoore heekkeessamuulla. I Moollanni Waa'a! At iina har'mme; ki eroommi bikkina yitaatim eese gatise. Waa'a! Ki angi eekka issukkisa atim iina eekka issittisa i diina'i la'ona. Ixxiwwi eese duuntamo; ihukkaarem at eese maasse'llootto; ixxuwwi eesenne ki'llam ammane sholle'llamo; ihukkaarem ki awwaadaanchi eese liiranse. Eese sabbam keen shollello'nna; tuullem gunguu'llitona. I sagara iimaa'aa Waa'a galaxxoommo; minaadaphphi dummichchi lambe'ennem lonsoommo. Mashka'oomim ixxi buxichchi manchi hanqi bikkina fitamookko; shiteena guddo'i manni angiinsim gatisookko. Waa'i i Moollannina «Ki diina'a ki lokkiinsi woroon isseembee'e i makki kollonne afuure» yukko. Waa'i malaayyika bicco kiina Xiyooniinsi asse'ookko; atim ki diina'i lambe'enne ikkaa daannoominne gassitotto. Orina fittoo ayyaamo ki gogot ixxuwwi doo'llinnem ki midaadonne uullitamo; at qaranti ammane ki keesammoom belecce'am hee'ukko; kiyyummi godabiinsi fitti ammaniinsi ki'isaa harde'uwwi ki beyyo waattamo. Waa'im ixxena «Malkaxedeq see'llsannem heer heerina qeessichchi ikkootto» yaa hide'ukko; oo hiditanim shaaramoobee'ane. Waa'i ki makkannette; ixxi quuqoo balla adilluwwa kaa'aa iiqansookko. Minaadab hundannem oogatookko; o'l biiranne hundannem leesh wo'mmoo'isa issookko; uullanne hee'llam adilluwwi hundam guullaa bi'isookko. Adil gooqqi inqenne yoo bu'iinsi agaa lasage ixxeka malaayye haareechchi issaa kaachchinne qoxxaa uullookko. Haleluyya, xabbeen kee'n dummichchannee wixxixxi lambe'ennee an wo'm wodaninne Waa'a galaxxoommo. Waa'ik bax maalalsiisoohane; ee baxxonnem liirantam keen eekka dabaransita'a sawwitamo. Waa'ik bax lombinne hibbinee wo'mmaakko ohane; ixxi muccuroom heer heerina hee'oohane. Ixxek maalalsiisoo bax hund ammanem tiiramoo'isa issukko; Waa'i biijaalla; qishixxoohaneme. Ixxo badditam keenina hurbaata uwwookko; hidi'l sagaram hore'em xadooyyo. Mulli minaadaphphi uulla ixxi minaadabina uwwiminne ixxeka woda moo'isaakko. Ixxi bax hundim hanqo'anee xabbenaa; ixxi ijaaj hundim amma'nnamaakkoohane. Oo keen heer heerinam qoxxaa hee'oohane; hanqinnee xabbeenoominne baxamaakkoohanee. Ixxi minaadabina qaraare asse'ukko; heer heeraxxi hidi'l sagaram uwwukko; ixxi summim keesamaakkoohanee baddisoohanee; Waa'a baddimmi qooroomiinsi hundiinsim luxxane ixxi ijaajo egettam keeno qoossitam keeno. Waa'i heer heerina gaaxxamaakkoohan ihona. Waa'i galaxxamona; Waa'a baddookkokii ixxi ijaajam egerimmanne lobakata liiramook manchii hinkido'i maasse'amaakkoohane! Muccur manni shumo'i uullanne malaayyaammuwwi ikkamo; ixxuwwi oosim maase'anto'oo keen ikkamo. Ixxi minennem horii goddii wo'mmookko; ixxi muccuroomim heer heerina hee'ookko. Biijaalla, qishixxaallaa muccuraa ihu bikkina muccur manchina tuunsonne caakki firookko. Biijoominne liqaayyisookkokii ixxi baxo xabbeenoominne; baxoo manchi galaxxamaakkoohane. Er manchi hore'em ubooyyo; amman hundam tiiramukkuyyi hee'ookko. Ixxek amma'nnat qoxxaalli ihu bikkinaa Waa'anne amma'nnoo bikkinaa jor woshshi ixxo muggisooyyo. Ixxi amma'nnat ixxena iggimma uwwu bikkina hore'em baddooyyo. Hawwaan keenina biijoominne uwwookko; ixxi biijoomim heer heerina hee'ookko; lombinnee malaayyinnem iimiimookko. Jor manchi eekka moo'aa quuqookko; ixxi inqem iicookko; ihukkaarem bi'ookko; ixxi mixanim awwaad bee'an ihaa gatookko. Waa'i galaxxamona; Ki'nnuwwi Waa'ina awwaaddakkam keen Waa'ika summa galaxxehe. Kabadiinsi ki'isaa heer heerino Waa'ik summi galaxxamona Eelliinchi froo kolliinsi ki'isaa aagoo kolli afeebe'e Waa'ik summi galaxxamona Waa'i uulli minaadaba hundam gassoohane; Ixxekim lombi iimaniinsi hanaanette. Ni Moollanni Waa'i'n yookkok ayyim bee'e; ixxi hundiinsim hanaan hee'oohane. Ihukkaarem iimanennee uullannee yoo luwwa aad heeshaa moo'ookko. Bux keeno buchchiinsi ki'isookko; hawwaanom hawwiinsi gatisookko. Adilluwwinam besh issookko; uulli daannuwwinne maqirem afuussookko. Alceennam is minenne lombinne hee'isookko; ooso uwwaatim liiransookko. Waa'i galaxxamona! Isra'ee'l minaadab Gibxi Uulliinsi fitto'i ammane Yaaqoob shumo'im mulli uulla fatakito'i ammane Yihuxxi minaadab Waa'ina keesamaakkoo minaadab ihukko. Isra'eelim Waa'i minaadab ihukko. Ertira'i dambalaq kaka moo'aa gibukko. Yoordaanoos daajji wo'im daadimma uraa laso daba'llukko. Duunnuwwi geexxuwwisa daabbarukko; hoffi duunnuwwim gereebbi wotallisa yoo beyyonne xaphixophukko. Dambalaq gibbittok Yoordaanoos daajjim laso daba'llittok mahinatte? Duunnuwwa; ki'nnuwwi mahina geexxuwwisa daabbattakko'o? Hoffi duunnuwwim mahina gereebbi wotallisa yoontakke'i beyyonne xaphitakko'o? Uulla; Waa'i illagenne Yaaqoobinam Moollanni illagenne baddimminne huxe'e. Ixxi geejji kina delbi wo'isa wobilool kinam dadoo wo'i bu'isa issukko. Moollanni Waa'a! Ni bikkinatti ihoo'n heer heerina hee'oo ki iitti bikkinaa atim hanq'an ikkitti bikkinaa ki summa lonse. Hanqo'i Waa'a laqqambee'i manni «Ki'nnuwwik Waa'i hannonne yookko?» yitu'uuyyi Neesenne mahina naacantamane? Ni Waa'i iimanennette ixxena toshaa'oo luwwi hundam issookko. Ihukkaarem ixxuwwi otossitam waa'uwwi manni anginne birnee worqinnee baxanto'oo keeno Suum yookko ihukkaarem woccamoyyo; illi yookko ihukkaarem moo'llammoyyo. Macci yookko ihukkaarem macceessamoyyo; san yookko ihukkaarem enjeessamoyyo. Angi yookko ihukkaarem amaddamoyyo; lokki yookko ihukkaarem taake'llamoyyo; ixxuwwi sagaram macceesissammoyo. Ee keeno baxxo'i keenii ixxuwwannem bakke'llam keenii hundim ee qophpha'n waa'uwwisam ikkona. Ihukkaarem ki'nnuwwi Isra'ee'l minaadaba, ki'nnuwwina hara'mmoohii ki'nnuwwa egerookkokii Waa'i ihu bikkina ixxonne bakke'llehe. Ki'nnuwwi Aaroon shumo'im ki'nnuwwina hara'mmoohii ki'nnuwwam egerookkokii Waa'i ihu bikkina ixxonne bakke'llehe. Ki'nnuwwi Waa'a badditakkam keen hundim ki'nnuwwina hara'mmookii ki'nnuwwa egerookkokii Waa'i ihu bikkina ixxonne bakke'llehe. Waa'i neese sawwookkoo neesem maasse'ookkoo; ixxi Isra'ee'l minaadabaa Aaroon shumo'oo maasse'ookko. Waa'i ixxo badditam keen hundam hoffokaa lobokaa hundam maasse'ookko. Waa'i ki'nnuwwaa ki'nnuwwi oosoo fikkaannitakkamisa issona. Iimanee uullaa qooccu Waa'i ki'nnuwwa maasse'ona. Iimaniinsi iiman Waa'ane; ihukkaarem uulla mannina uwwaakko. Leto'i keen Waa'a galaxxitamoyyo; waammanto'i keenim Waa'a galaxxitamoyyo. Ihukkaarem nees foorinne yoommine keen kabadiinsi ki'insaa doolli hundinam Waa'a galaxxinoommo. Waa'i galaxxamona! I uunxaxxi sagara macceesu bikkina an Waa'a iittoommo. Ixxi macce i kollonne dabaru bikkina i heechchi doollenne hundannem an ixxo weeshoommo. Lehik qaash eese amadukko; baddisoo waammim eese u'nnisukko; u'nnii kichchechim eese kaa'ukko. Anim ee ammane «Waa'a, ha'i eese gatise» yaa ixxi kollonne laarummo. Waa'i biijaallaa uroohanee; ni Waa'i qishixxoohane. Waa'i maashaalli keeno egerookko; anim hawwummi ammane eese gatisaakko. I foore, Waa'i kiina eroomma issu bikkina ki usheexxaxxi kollonne daba'lle. Waa'i eese lehiinsi i illem indiiddiinsi i lokkom qolatiinsi gatisaakko. Anim forinne heellam manni ullanne ixxi illagenne daba'llamoommo. «An lobakata u'nnamummo» yummi ammanem ihuta'n i amma'nnato egeraammo. An hawwaa hee'ummi amman «Manni hundam qophphanaano» yummo. Waa'i iina issu eroommi hundinam an maha maqoommo? Waa'i eese gatisu bikkina ixxo galaxxoommo; woyi'n diqaasam kiti'mmisa issaa hincaa'oommo. Minaadaphphi dummichchi illagenne ihaa Waa'ina uwweena uga'a aagummi luwwa uwwoommo. Xummaan kee'n leh Waa'i illagenne lombaamo. Waa'a! An kiina awwaadaancho; iyyumma kiina awwaadaanchotte hee'llo'isam anim kiina awwaadoommo; iyyumma kiina awwaadaanchotte hee'llo'isam anim keena awwaadoommo; eese lehiinsi gatissittok atette. An kiina galaxxi kitima hincaa'oommo; ki summam weeshoommo. Minaadaphphi dummichchi illagenne ihaa Waa'ina uwweena uga'a aagummi luwwa uwwoommo. Eekkam Yerusaaleemanne yoo Waa'i Mi'n wixxixxi beyyonne hincaa'oommo. Waa'i galaxxamona! Minaadab hundim Waa'a galaxxehe! Manni hundim galatinne Waa'a iimiimaa'llehe! Waa'i niina issukki eroommi lobakata; Waa'ik amma'nnamaakkoohaannoom heer heerna qoxxaa hee'ookko. Waa'i galaxxamona! Waa'i biijaalli ihu bikkina ixxo galaxxehe; ixxi eroommim heer heerina hee'oohane. Isra'ee'l minaadab hundim «Waa'ik eroommi heer heerina hee'oohane» yihona. Aaroon shumo'i hundim «Waa'ik eroommi heer heerina hee'oohane» yihona. Waa'a baddoo keen hundim «Waa'ik eroommi heer heerina hee'oohane» yihona. An u'nnanne hee'ummi ammane Waa'i kollonne laarummo; ixxim i laachcha macceesaa eese u'nniinsi fissukko. Waa'i iininnetti ihu bikkina maham baddoommoyyo; manni eese mah issookko? Iina hara'mmeena Waa'i iinninne maqire yoo bikkina i diina'i ubbu'uuyyi kaachchinne moo'oommo. Mannanne bakke'immiinsi Waa'anne bakke'immi e'llookko. Gassaanonne bakke'immiinsi Waa'anne bakke'immi e'llookko. Minaadab hundim eese kibbukko; ihukkaarem an ixxuwwa Waa'i summinne bi'isummo. Kolli hundinnem eese kibbito'o; ihukkaarem Waa'i summinne bi'isummo. Diishshi dummoo'isa eesenne dummito'o; ihukkaarem utti giranne shokkoo'isa shokkito'o; Waa'i summinnem ixxuwwa bi'isummo. Gafe'amaa ubeena tartarummo; ihukkaarem Waa'i iina hara'mmukko. Waa'i iina malaayyee mazmuuraa; ixxi eese gatisaancho. Iilillaaxxekii kaachchi sagarii xummaan kee'n dukkaa'n woronne «Waa'i malaayyi wodaam baxo baxaakko. Waa'ik malaayyi iimiimaakko; Waa'ik wod malaayyaam baxo baxaakko» yoo sagar macceesamukko. Foorinne hee'oommo bagaan lehoommoyyo; Waa'ika baxo alallaatoommo. Axeerimma'i Waa'i eese lobakata axeeraakko; ihukkaarem eese lehina higisaa uwwukkoyyo. Muccuroo'm goccuwwa fooqaa'llehe; anim woro aagaa Waa'a galaxxoommo. Kuk Waa'i gooca; muccur keen ee goocinne aagookko. Waa'a! At i uunxato macceessaa eese gatissitti bikkina an keese galaxxoommo. Kininne mine baxxam keen awwaadooyyo yita'a uunjito'i kinchi hundiinsim lobakata lophphaa awwaadoo kinchi ihukko. Oohim Waa'i baxo; ni illinam malallato. Kuk Waa'i baxaakkoo kaachchi balla; ixxonne liirammona; lobakatam liirammona. Waa'a! He'i at neese gatise; Waa'a! He'i niina hundem luuwwam taaphanse. Waa'i summinne waarookkok maasse'amaakkoohane; Keesammi Waa'i Minenne inkaa neese ki'nnuwwa maasse'nnoommo. Waa'i Moollanna! Ixxeka caakka neesenne caakkisaakko; buyyaam haqqi caafa amaddakka'a uguda lonsehe; kiti'm beyyom do'llehe. At iina Waa'a an keese galaxxoommo; at iina Waa'a an keese lonsoommo. Waa'i biijaalli ihu bikkina ixxo galaxxehe; ixxi eroommim heer heerina hee'oohane. Ixxuwwi googonne miiqakkam luwwi bee'i keen Waa'i see'llisannem hee'llam keen maassaammuwwa. Waa'i ijaajo egettam keen wo'm tiirinnem ixxena awwaaddam keen maassaammuwwa. Oo keen ee googonne taakke'llamo bagaan boqqooma baxxamoyyo. Waa'a! At niina ki seera uwwitaatto; qoxxinaa ijaajammoommisinam kuttaatto. Ki seera egereena i goog xabboo'isina lobakata mixam hee'ummo. Ki seera hundam erisa qoossumlas hore'em tuuroommoyyo. Kiikka hanqo'i oogato losoommi ammane muccur wodaninne keese galaxxoommo. Ki seera egeroommo; at eese hore'em uunjititte. Harde'i manni ixxuwwi heechcha muccuroominne hee'lleena xantamok ki ijaajo egerimminnette. Keese wo'm wodaninne hasoommi bikkina ki ijaajiinsi qee'lloombee'isa egere. Keese hawwodoombee'isa ki sagara i wodanonne maaxaqqoommo. Waa'a! An keese galaxxoommo; ki seera iina losise. At ki suuminne woccitti seer hundam i suuminne wocoommo. Lobakat hor liiransoohaanniinsi loboka ki ijaajo egerimmi eese liiransookko. An ki seera dabaransaa sawwoommo; i tiirom ki googonne issoommo. An ki seeranne liiramoommo; ki sagaram an xadoommoyyo. An foorinne hee'onaa ki sagaram egeroonaa iina ki awwaadaanchina eroomma isse. Ki see'l woronne yoo maalalsiisoo hanqa moo'imma xanoommisina i ille fooqaa'e. An ka uullanne koyyiinchi ihummi bikkina ki ijaajo iinniinsi daphphaa'llitte. I foor hundi ammanem kiikka hanqo'i oogato la'eena quluxookko. Ki ijaajiinsi huushanto'i keeno, amaadaanoo duumanto'oo keenoo axeettootto. An ki seera egerummi bikkina ixxuwwika game'llatoo gado'oo iinniinsi qeesse. Awwonsaan mat ikka'a eesenne dollotto'aarem an ki awwaadaanchi ki seera dabaransaa sawwoommo. Ki seer liiransoohane; eesem sogoohane. An kaa'amaa buchchanne aageena ihaammo; iina uwwitti neeyyaxxi saga'llisinne foorinne hee'oommisa isse. An i duuha'a hundam kiina kuraammo; atim macceessitto; ki seera at iina losise. Ki seera qoossona at iina hara'mme; anim kiikka maalalsiisoo baxo dabaransaa sawwoommo. I foorenne kichchechchi lophphaakkoo bikkina ki saga'llisinne at eese qoxxise. Qophpha'n googiinsi eese egere; ki eroomminnem ki seera iina losise. Hanqo'i googo doo'llaammo; ki seeram amman hundam sawwoommo. Waa'a! Ki seera awwonaammo; ee bikkina at eese tuussiissitte; Iina at lobakat qoossimma uwwitti bikkina ki ijaajo qoxxaa egeroommo. Waa'a! Ki see'lleka tirato iina losise; anim hundi ammanem eekka egeroommo. Ki seera egeroommisina wo'm wodaninnem ijaajamoommisina iina tiiro uwwe. Ki ijaaj eese liiransoo bikkina ee googonne eese awwonse. Amaxxa siidimmina gollimmiinsi i tiiro ki see'l kollonne dabare. Awwaad bee'i luwwa moo'immiinsi i ille dabare; ki saga'llisanne eese hee'ise. Keese badditam keenina uwwitti neeyyaaxxi sagara iina ki awwaadaanchinam wonshe. Ki seer hanqo'an ihu bikkina an baddoommi sholle'nniinsi eese gatise. Ki ijaajo egereena mixoommo; ki muccuroominnem an foorinne hee'oommisa isse. Waa'a! Ki eroommi iina waarona; ki neeyyaxxi saga'llisannem eese gatise. Ki sagaranne amma'nnamummi bikkina eese game'llitam keen hundinam dabachcha uwwoommo. An neeyyato issoommok ki seerannetti ihu bikkina an hundi ammanem hanqa wocoommisina hara'mme. Ki seera heer heerinam egeroommo. Ki ijaajo egerimma iittoommi bikkina hanqo'i wolabbaninne hee'oommo. Ki ijaajo adilluwwi illagenne wocoommo; eehannonne hore'em tuuroommoyyo. Ki ijaajo iittoommi bikkina eehannonne an liiramoommo. Iittoommi ki ijaajo lonsoommo; ki seeram dabaransaa sawwoommo. An neeyyato issoommok ixxonnetti ihu bikkina iina ki awwaadaanchina uwwitti neeyyaxxi sagara sawwihe. Ki neeyyaxxi sagar foorinne hee'oommisa issu bikkina an hawwummi ammanennem ihuta'n qoxxoommo. Amaadaan hundi ammanem eesenne naaccantamuulla; ihukkaarem an ki seeriinsi qee'lloommoyyo. Waa'a! Gaassiinsim yoo ki seera sawwoommo; ixxim eese qoxxisookko. Jor keen ki seera ginditu'uuyyi moo'aa lobakata nadadummo. Ka uullanne hee'oommi koyyina'n doolli hundannem ki seer iina mazmuura. Waa'a hiim hundam ki summa tiiroommo; ki seeram egeroommo. Hundi ammanem ki ijaaccisanne hee'oommo; ookkim iina liirancha. Waa'a, at iina sharadame; anim ki seera egereena sagara aagaammo. Iihaanninne wo'm wodaninne keese hasoommo; ki saga'llisinnem iina ki biijooma moo'ise. An i taakko saarayyaa moo'aa i lokko ki ijaacci kollonne dabarummo. An dasoo'n ki ijaajo egereena gaaggaaboommo. Jor keen iina qaasha qaashsho'o; ihukkaarem an ki seera xadoommoyyo. Hanqo'i ki see'l bikkina keese galaxxeena luxxi baqitenne ki'oommo. Keese badditam keenoo ki seera egettam keenoo hundam iittoommo. Waa'a! Uulli ki eroomminne wo'mmaakkoohane; ki seeram iina losise. Waa'a! Ki saga'llisannem iina ki awwaadaanchina danaamo issitaatto. Ki ijaajonne amma'nnummi bikkina qoossimmaa lachchaa iina losise. At eese guzumo'lleena illageen huushamam hee'ummo; ihukkaarem kaba ki sagarina ijaajamoommo. Waa'a at danaamo; ki baxim danaamo; ki seeram iina losise. Amaadaan qophphaninne i summa bi'isso'o; ihukkaarem an ki ijaajo guullaa egeroommo. Ixxuwwik wodan duudaakkoohanee qoossimbee'i keenoo; ihukkaarem an ki seeranne liiramoommo. Ki seera losoommisina eese u'nnissittis iina danaakko. Xigiinsi hanaan ihaakkoo biriinsii worqiinsii ki suumiinsi firoo seer iina e'llookko. Ki angi eese baxukko; axisansukkome; ki ijaajo losoommisinam iina qoossimma uwwe. Ki sagaranne neeyyata issoommi bikkina keese badditam keen eese moo'lla'a liirantamo. Waa'a! Ki seer hanqo'an ihukkisa la'oommo; eese guzumo'llittokim amma'nnantaattoohan ikkitti bikkinatte. Iina ki awwaadaanchina aaggitti saga'llisanne ki eroommi eese qoxxisona. Ki seeranne liiramoommi bikkina foorinne hee'oommisina at iina qishixxe. Amaadaan mashkabee'em eese hawwodd'o bikkina tuuttona; ihukkaarem an ki ijaajo dabaransaa sawwoommo. Keese badditam keenii ki ijaajom laqqam keenii i beyyo waattona. An tuuroombee'isina i wodan ki seeranne miiqakkam luwwi bee'an ihona. Waa'a! I foor ki gatisimma lobakata quluxukko; ki sagarannem an neeyyato issoommo. «Hinki ammane eese qoxxissooda'e?» yummuuyyi ki neeyyaxxi sagara egerummuuyyii i illi jaamukko. Wiriira goddu cana labummaarem ki seera an xadummoyyo. Iikki ki awwaadaanchik umur hinkaa'nna? Eese hawwissam keenondu oogattoottok hinki balla? Ki seera egettambee'i amaadaan eese ubbuusseena bare hinto'ookko. Ki ijaaj hundim amma'nnamaakkoohane; mashkabee'em hawwissam bikkina iina hara'mme. Ixxuwwi eese uulliinsi bi'isseena hofqaxim gataakko; ihukkaarem an ki ijaajo urummoyyo. At eese ki eroomminne foorinne hee'oommisa isse; anim at woccitt ki seera egeroommo. Waa'a! Ki sagar heer heerina hee'oohane; iimanennem qoxxaa hee'ookko. Amma'nnantaattoohaannomim doolli hundinam hee'ookko; at uulla baxxitto; ixxim qoxxaa hee'ookko. Qooccanchi hundim kiina awwaadaan ihu bikkina ki ijaaccesanne kaballi afeebe'em qoxxaa yookko. Ki seer iina liiranchi ihoo'n yoota'n eesenne afu hawwonne lehaa hee'ummo. At eese foorinne hee'issoottok ki seerinnetti ihu bikkina an ki seera hore'em xadoommoyyo. An kiihan ihummi bikkina at eese gatise; anim ki ijaajo egereena mixaammo. Jor keen eese bi'isseena duggamuulla; ihukkaarem an ki seera dabaransaa sawwoommo. Hundem luwwinam gabal yoo'isa moo'ummo; ihukkaarem ki seerina gabal bee'ane. Waa'a! Ki seera lobakata iittoommo; ixxi bikkinam balli hundoomam sawwoommo. Ki ijaaj hundi ammanem iinninnetti ihu bikkina i diina'iinsi loboka eese qoor issukko. An ki seera dabaransaa sawwoommi bikkina i losisaan hundiinsim loboka lachchaam ihummo. Ki ijaajo egeroommi bikkina lommanniinsi loboka lachchaam ihummo. Ki sagara egereena hasoommi bikkina jor googiinsi i lokko ege'llummo. Eese losissittok atette ikki bikkina ki seeriinsi qee'llummoyyo. Ki sagar iina hinkido'i xee'aalla! Marabiinsim loboka xee'aalla. Ki seeriinsi qoorooma siixxaammo; ee bikkina qophpha'n googo hundam sabummo. Ki seer i lokkina sha'a; i googinam caakka. Kiikka hanqo'i seera egereena hide'ummi sagara qoxxisoommo. Waa'a! An lobakata hawwummi bikkina ki neeyyaxxi saga'llisanne eese foorinne hee'ise. Waa'a! An iittaa hincaa'oommi i suumiinsi firoo galaxxi kitima aa'e; ki seeram iina losise. I foor hundi ammanem u'nnannette; ihukkaarem an ki seera xadoommoyyo. Jor keen iina qaasha qaashsho'o; ihukkaarem an ki ijaajiinsi qee'llummoyyo. Ki seer iina heer heerina hee'oo amaxxa; i wodanim liiramookkok ixxonnette. Ki seera heer heerina lasaanchi afeebe'em egereena murte'aammo. Lam tiir yoo keeno sabummo; ihukkaarem ki seera iittummo. At iina an maaxamoommi girbaa agiraa ki sagaranne neeyyata issoommo. An Waa'i ijaajo egereena hasoommi bikkina jora baxxakkam keen iinniinsi qee'llehe. Ki neeyyaxxi saga'llisinne eese qoxxise anim foorinne hee'oommo; i neeyyat kora'am gatoobee'isa isse. Qulitbee'e hee'oommisina iina hara'mme; hundi ammanem ki seera egeroommo. Ixxuwwik sawwit hantaarinne wo'mmaakkoohan ihu bikkina ki seera egettambee'i keeno hundam at sabbootto. Jora baxxam keeno hundam haccisa uunjitootto; ee bikkina an ki seera iittummo. An keese baddimmiinsi ki'ukkok i orachchi huxe'ukko; ki oogatom lobakata baddoommo. Hanqo'i oogato'oo muccuroo'm baxoo baxaammo; ee bikkina eese wor amaddam diina'ina higissaa uwwititte. Eese ki awwaadaancho xumminne egere; amaadaan eese hawwoddamisa issititte. Kiikka gatisaanchoomaa hanqo'i sagaraa egerimminne i illi jaamukko. Eese ki awwaadaancho ki eroomminne moo'e; ki seeram iina losise. An kiina awwaadaancho; ki seera la'ona iina qoossimma uwwe. Waa'a! Manni ki seera gindu bikkina ki oogato moo'issoo amman kabadette. Ee bikkina ki ijaajo worqiinsi loboka hore'em muccur worqiinsim lonsaa iittoommo. Ki ijaaj hundim hanqi ihukkisa amma'nnummi bikkina qophpha'n googo hundam sabummo. Ki seer haabaamo; ee bikkina an wo'm wodaninne egeroommo. Ki saga'llek tirat caakka uwwookko; qawwuwwinam lachcha uwwookko. Ki seera lobakata quluxummi bikkina xeebe'aa i suume fooqaa'ummo. I kollonne daba'lle; keese iittitam keenina issitoo'isam iinam qishixxe. Ki neeyyaxxi saga'llisanne i googo xabbaa'e; baaxiil eese kaa'ona cawwitaa uttitte. Ki ijaajo egeroommisina eese wor amaddam kee'n angiinsi gatise. Iina ki awwaadaanchina ki ille caakkise; ki seeram iina losise. Manni ki seera egerubee'i bikkina i illiinsi indiiddi wo'isa daadukko. Waa'a! At muccura ki oogato'im hanqo'ane. Ki seera muccuroominne ijaajjitto; oohim hore'em amma'nnamaakkoohane. I diina'i ki sagara sholliisso'i bikkina to'achchi eese gii'llisa shokkiisukko. Ki sagar keenamaa hore'em muccuraakkoohane; an lobakata iittummo. An hoffanee gadamaammoohanee; ihukkaaerem ki seera xadummoyyo. Ki muccuroom heer heerina qoxxaa hee'ookko; ki seerim hundi ammanem hanqa. Lobakat hawwii u'nnii eesenne afaakko; ihukkaarem ki ijaajonne an lobakata liiramoommo. Ki seer heer heerinam muccura; foorinne hee'oommisina iina qoossimma uwwe. Waa'a! Wo'm wodaninne an ki kolloonne laaroommuulli ihu bikkina at macceese; anim ki seera egaroommo. Ki kollonne laaroommuulla; at eese gatise; anim ki seera egeroommo. Hara'mmitoo'isina soodaraaronne ki'aa ki kollonne laaroommo; ki sagarannem neeyyata issoommo. An ki sagara dabaransaa sawweena; hiim hundoomam diriiroo'n garummo. Waa'a! Ki eroommi bikkinaa yitaa i sagara macceese; ki muccur oogato'isannem eese foorinne hee'ise. Eese hawwissam mogaalli manni eesenne hincito'ookko; ixxuwwi ki seeriinsi hore'em qee'llito'oo keeno. Waa'a! Ihukkaarem at iina hincitaattoohane; ki ijaaj hundim hanqo'ane. At ki seera heer heerinam qoxxissittisa gaassiinsim hee'oo ki seeriinsi la'aammo. An ki seera xadummoyyo; ee bikkina i hawwo moo'llaa eese gatise. I bikkina at fitantaa eese gatise; ki neeyyaxxi saga'llisam foorinne hee'ise. Ki seera hassambee'i bikkina jor keenina gatimmi neeyyat bee'e. Waa'a! Kiikki qishixxat lobakata; ki muccur oogato'innem eese foorinne hee'ise. Eese hawwissam i diina'i duta ihukkaarem an ki seeriinsi qe'llummoyyo. Ki sagara egettambee'i bikkina amma'nnantambee'isa moo'aa shigigummo. Waa'a! An ki seera iittoomisa moo'llaa ki eroomminne eese foorinne hee'ise. Ki sagar hundim hanqa; muccur ihu ki seerim heer heerina hee'oohane. Gassaan mashka'i bee'em eese hawwissamuulla; ihukkaarem an ki sagarina baddimminne ijaajamoommo. Lobakat qeefajjo'o siidaa liiramoo manchisa ki neeyyaxxi sagaranne lobakata liiramoommo. An qophphano saboommoo shigigoommoo; ihukkaarem ki seera iittoommo. Hanqo'i ki oogaxxi bikkina ballanne lamar kore an keese galaxxoommo. Ki seera iittitam keenina lobakat xummi yookko. Ma'lluwwim ixxuwwa qoleena xanooyyo. Waa'a! An kiikka gatisimma neeyyatinne egeroommo; ki seerinam ijaajamoommo. An ki seera egeroommo; ixxom lobakata iittoommo. I taakki hundam at laqqoo bikkina an ki ijaajoo seeraa lonsoommo. Waa'a! I laachcha at macceese; ki saga'llisannem iina qoossimma uwwe. I uunxat ki beyyo afona; ki neeyyaxxi saga'llisinnem eese gatise. Ki seera losissi bikkina hundi ammanem keese galaxxoommo. Ki seer hundim muccur ihu bikkina ki saga'l bikkina an zammaroommo. Ki ijaajo doo'llummi bikkina ki angi iina hara'mmeena amman hundam gudaakkoohan ihona. Waa'a, kiikka gatisimma quluxaammo; ki seerannem an liiramoommo. An keese galaxxoommisina eese foorinne hee'ise; ki seerim iina hara'mmaanchi ihona. An bi'u gereechchisa timtimaammo; ihukkaarem an ki ijaajo xadumbee'i bikkina eese ki awwaadaancho at hase. Eesenne u'n afu ammane Waa'i kollonne laarummo; ixxim macceesukko. Waa'a! Qophphanaaniinsii huushisaaniinsii eese gatise. Ki'nnuwwi qophphanaano; Waa'i ki'nnuwwa mah issukkaare e'llookko? Ki'nnuwwa hinkid guzumo'uta'n e'llookko? Qareesamaakkoo gaadaa'n xiyyinne qasonannihe? Habulle'i gii'l kasharinne shokkiisonannihe? Meesheekanne hee'oommuulla; Qeedaa'l dukkaannuwwi lambe'ennem garoommuulla; ee bikkina iina aayye! Xumma sabbam minaadabinne maqire lobakat doolle hee'ummo. An xummi bikkina wocoommi ammane ixxuwwi o'l bikkina woccamo. An dunnuwwi kollonne moo'ummo eehannah iina hara'mmat hanniinsi waarookko? Iina hara'mmat waarookkok iimanee uullaa qooccu Waa'iinsette. Keese egeraanchi diriiroobee'i bikkina ki lokki shurukihona cawwooyyo. Isra'ee'l egeraanchi diriirooyyo; hore'em iinse'ooyyo Waa'i keese egeraancho; ki makki kollinne ihaatim kiina haf ihookko. Ballanne eelliinchi keese shokkiisooyyo; hiimonnem agan keese hawwodooyyo. Waa'i keese jor luwwiinsi hundiinsim egerookko; ki foorem egerookko. Waa'i kaballiinsi ki'isaa heer heerinam kiikka firimmaa aagimmaa egerookko. «Waa'i Mine mallona» yakko'i ammanenne lobakata liiramummo. Yerusaaleema, neese ki goocanne uullinaammo. Yerusaaleem lobakata hincihincaa matfir ihaa baxamaakkoo beero'o. Isra'eelina uwwamu see'llisanne Waa'a galaxximmina Waa'an ihu sulli hundim wixxookkok keyyette. Ee beyyonne adilluwwi oogateena afuuroo Daawiit mi'n adilla'n barcummuwwi gudaakko. Yerusaalee'm beero'onne xummi ihoo'isina «Keese iittoo keen hundim usheexxona. Ki qashoronne xummi ihona; ki adilla'n minennem xummi ihona» yitakka'a uunxehe. Iyyabbaayyuwwi bikkinaa i besh bikkinaa Yerusaaleema «Xummi kiina ihona» yoommo. Ni Moollanni Waa'i mi'n bikkina Yerusaaleemina eroommi ihoo'isina mixoommo. Waa'a! Ki adilla'n barcum iimanennetti ihu ki kolli moo'oommuulla. Ni Moollanni Waa'a! Agixxek illi ixxuwwi moollanni kollonne agisshokim is moollam kollonnetti ihukkisam neesem kiinniinsi haafite siindeembe'e xale'i ki kolli moo'nnoommuulla. Waa'a! Neese lobakata gadammaammoo bikkina hay niina haafihe. Bolxitam kee'n game'llat amaadaan kee'n gado'im neesenne lophphaakko. Isra'ee'l minaadab «Waa'i niinninne maqir ihubeeta'n manni neesenne ki'u ammane Waa'i ni kolli ihubeeta'n Ixxuwwi quunqi neesenne aphphu ammane neese foorinnem liqicitam hee'llo'o. Diris agam hee'ukko; wo'im xuuxam hee'ukko. Malaayyaam hambu'llamim xuuxam hee'ukko» yita'a dabattona. Ixxuwwi inqiinsi neese gatisu bikkina Waa'i galaxxamona. Neese kiyyo'iinsi xoraa gatu cii'isa ixxuwwi qaashiinsi xollaammo; qaash iiqamaakko; neesem xollaammo. Niina hara'mmat waarookkok iimanee uullaa qooccu Waa'iinsette. Waa'anne amma'nnantam keen heekke'amoo'n heer heerina hee'oo Xiyoo'n duu'nnisa. Duunnuwwi Yerusaalee'm kululleetanne ihukkisam kaballiinsi ki'isaa heer heerinam Waa'i ixxi minaadaphphi kululleetannette. Muccur keen ixxuwwika anga jollina ki'issambee'isa jor keen muccur keenina uwwamu uullanne daannitamoyyo. Waa'a! Ixxuwwi tiironne xabbeen ikko'i er mannina ki eroomma isse. Ihukkaarem jor googonne daba'llitam keeno Waa'i jor keeninne maqirem bi'isookko. Xummi Isra'ee'l minaadabina ihona! Waa'i neese qeefadanchiinsi Yerusaalee'm beero'o dabaraa woru ammane niina haqaawwo labam hee'ukko bagaan hanqa labam hee'ukkoyyo. Ee ammane neese lobakata liirammaa galaxxi mazmuura zammallummo; hanqo'i Waa'a laqqambee'i minaadabim kee'mmaallier luwwa issaakko» yito'o. Hanqinam Waa'i niina kee'mmaalli er luwwa issaakko; neesem liirammaammo. Waa'a! Negeebanne yoo daajjuwwisa ni qeefajjo'o dabare. Wi'llitu'uuyyi wixxam keen liiranchinne wixxaa'llamo. Sire'e iyyita'a wi'llitu'uuyyi matto'i keen farshimma iyyita'a liiranta'a ilillaatinne zammattu'uuyyi daba'llitamo. Waa'i Mine baxubeelas baxxam keen kora'am badattamo. Waa'i beero'o egerubeelas egettam keen kora'am yakitamo. Baqite ki'akku'uuyyii ammane higisakka'a iinse'akku'uuyyii heechchi bikkina badarim awwadbee'ane; mashka'oommim Waa'i ixxo iittoo keenina diriiro hoorooyyo. Ooso uwwookkok Waa'a; godaphphi mishim uwwamookkok Waa'i biijoominnette. Harde'oomanne qaramoo goo'n oos gaadaa'n anganne yoo xiyyisa. Lobakat oos yoo manchi maasse'amaakkoohane; ixxi diina'inne beero'i goocanne wocoo ammane hore'em tuurooyyo. Waa'a badditam keenii ixxi googonnem taakke'llam keenii maassaammuwwa. Badattittaannika misha ittootto; maasse'antoottoo kiinam makkookkoo. Ki meentichcho ki minenne erisa mishoo woyi'nnisatte; ki oosim ki maaddi kululleetanne wee'l kaashshi nadisa. Waa'a baddoo manchi eehid maasse'amaakkoohan ihookko. Waa'i keese Xiyooniinsi maasse'ona; Yerusaalee'mmeka makka ki heechchi doolli hundannem moo'lloo'isa issona. Ki oos oosom moo'lloo'isa issona. Xummi Isra'eelina Ihona! Isra'eel «Oosoommaniinsim ki'isaa diina'i eese u'nnisaakko. Hanqame oosoommaniinsim ki'isaa eese lobakata u'nnisaakko; ihukkaarem eese kaa'eena xanukkoyyo. I afarem jiraafinne coongalaa abuullakko'i uulla laboo'isa issukko. Ihukkaarem Waa'i hanqo'ane; jor kee'n karatiinsi tiraa fissaakko» yihona. Xiyoona saboo keen hundim tuurona; lasom daba'llona. Mi'n hanenne mutaa li'oo'nnim gaassaa gogoo hixisa ihona. Odim ixxuwwi muttam keenina anga wixxaa'llam keeninam qaaphpha wo'mmoobee'i hixisa ikkona. Gooqqi araat ixxuwwina «Waa'ik maassi ki'nnuwwanne ihona; neesem Waa'i summinne ki'nnuwwa maasse'nnoommo» yoone. Waa'a! Xillanne ihaa ki kollonne laaroommuulla. Waa'a! I laachcha macceese; ki maccim i uunxaxxi sagara macceesona. Waa'a! At baaxiilo xiggoohan ihuta'n Moollanna, ayyi uulleena xanam hee'ukko? Ihukkaarem at haafitoohane; ee bikkina keese baddimmi hasisookko. An Waa'a qulunxinne egeroommo; i foorim iyyaqqimminne ixxo egerookko; ixxi sagarannem neeyyato issoommo. Waardiyyuwwi uulli soodoo'isa egettamaanniinsi loboka an i Waa'a qulunxinne egeroommo. Isra'eela, Waa'i eroomma issoohanee ixxek gatisimmim lobakataa ihu bikkina ixxonne neeyyato isse. Waa'i Isra'ee'l minaadaba ixxuwwi baaxiil hundiinsim gatisookko. Waa'a! An amaadummoyyo; i gagam iimiimaa'ummoyyo; higimaanchi lombannee iinniinsi hanaan ihaakkoo luwwannee i tiiro issummoyyo. Ihukkaarem i gag heeshaa afuuroo'isa issummo; anuuna hoorakko'i ciil am anuuna koo'llaa afuuroo'isam anim i tiir koo'llaa afuuroo'isa issummo. Isra'eela, kaballiinsi ki'isaa heer heerinam Waa'anne neeyyato isse. Waa'a! Daawiita sawwihe; iyyaqqu hawwi hundam xadditte. Waa'ina ixxi hide'aa Yaaqoob malaayyaam Waa'inam «An i mine aagoommoyyo; i ara'annem iinse'oommoyyo. An hore'em diriiroommoyyo; illem cilimmaa'oommoyyo. Oohim Waa'ina beyyo Yaaqoob malaayyaam Waa'inam mine baxeembee'e» yaa aagu uga'aa sawwihe. Beeteliheemanne inkaa Hidi'l Saga'l Saaxi'n bikkina macceensummo; Ju'aarii'm biirannem siindummo. Neesem «Waallehe, Waa'i mine mallona; ixxi lokki lugumonnem otossinona» yinummo. Waa'a! Ki'e; ki malaayye moo'isoo Hidi'l Saaxininne maqirem ki mine aage. Ki qeessuwwi muccuroo'm baxo baxxona; ki keesammuwwim liiranchinne «Ilil» yitona. Ki awwaadaanchi Daawiit bikkina yitaa at doo'llittoka uttitte. Waa'i Daawiitina «Ki oosiinsi mato ki adilla'n barcumanne afuussoommo. Ki oos iikka hidi'l sagaraa ixxuwwina losisummi ijaajoo egettolas ixxuwwi oos kiinniinsi lasonne heer heerinam ki adilla'n barcumanne afuuttamo» yaa gindamoobee'i hanqo'i hidi'l sagara aagukko. Waa'i Xiyoona doo'llu bikkina ixxenam heechchi beyyi ihona hasu bikkina «Kuk iina heer heerina usheexxaxxi beyyo; an doo'llummi bikkina eekke'enne hee'oommo. An Xiyoona maasse'oommo; ixxi amaxxam lonsoommo; buxim hurbaata goddoo'isa issoommo. Ixxi qeessuwwina gatimmi eddechcha eddeesoommo Keesammuwwim liiranchinne lobakata ililitamo. Ee beyyonne Daawiit shumo'iinsi malaayyaam adila ki'isoommo; an doo'llummaanninam caakka gudsoommo. Ixxi diina'a sholliisoommo; ihukkaarem ixxi adilla'n mare'i belecce'aa moo'amookko» yukko. Abbaayyuwwi iittanta'a mateeyyanne hee'llamaare hinkido'i danaamoo hinkaa'nnam liiransoohanee! Oohim Aaroon horoorenne dunamaa haareeddiinsi eddechchi kas afeebe'e daadoo bito xee'aalli wee'l zaytisa. Odim Hermoo'n duuniinsi ki'isaa Xiyoo'n duunnuwwi afeebe'e dilloo qiibaxxisa. Waa'i ee beyyonne maassii heechchii heer heerinam ihoo'isina ijaajaakko. Waa'ina awwaadaan ikkakko'i keen hundim hiimo Waa'i minenne awwaaddakkam keen Waa'a galaxxehe. Keesammi Minenne ki'nnuwwi anga biddiqaa'llakka'a Waa'a galaxxehe. Uullaa iimanee qooccu Waa'i Xiyoonanne ihaa ki'nnuwwa maasse'ona. Waa'a galaxxehe; ixxekam summa lonsehe; Waa'i awwaadaano, Waa'a galaxxehe. Moollanni minenne ni Waa'i mi'nnaannonne wixxixxi beyyonne uullitakkam keen hundim Waa'a galaxxehe. Waa'i danaam ihu bikkina ixxo galaxxehe; ixxi eran ihu bikkina ixxi summina zammallehe. Waa'i Yaaqooba ixxi gagina Isra'ee'l minaadabam ixxi gaqqi gulummi issaa doo'llukko. Waa'i loban ihukkisa la'oommo; ni Waa'i qophpha'n waa'uwwiinsi hundiinsim lobane. Iimanennee uullannee xilluwwannee dambalaqquwwannee ixxi iittu luwwa hundam issookko. Duuba uulli tochchiinsi eebookko; xeeninne maqirem banqa dilliisookko; hafachcham wixxaa'aa dissu beyyiinsi fissookko. Gibxanne won ihaa qaramukkoka manniinsi ki'isaa diinatenne afeebe'e shukko. Eekke'ennem Gibxi adilaa ixxi awwaadaanoo hundam guzumo'eena maalalsiisoo luwwaa agannaa baxukko. Lobakat mulli minaadaba guullukko; malaayyaam adilluwwam shukko. Amoore'i adil Siihoona, Baasaa'n adil Oogaa Kana'aa'n adilluwwaa hundam shukko. Ixxuwwi uullam gulummi issaa ixxi minaadab Isra'eelina uwwukko. Waa'a! Ki summi heer heerinam hee'oohane; qaranchi hundim keese tiirookko. Waa'i ixxi minaadabina oogatookko; ixxi awwaadaaninam qishixxookko. Mulli minaadaphphi waa'uwwi birinnee worqinnee manni angi baxaakkoo keeno. Suum yoo keeno woccamoyyo; illi yoo keeno moo'llamoyyo. Macci yoo keeno macceessamoyyo; saninnem fooshshe'lleena xantamoyyo. Baxxo'i keenii ixxuwwannem amma'nnitam keenii hundim ee waa'uwwisam ikkona. Isra'ee'l minaadaba, Waa'a galaxxehe; Ki'nnuwwi Aaroon oosim Waa'a galaxxehe. Leewi'i ooso, Waa'a galaxxehe; Waa'a badditakkam keen hundim Waa'a galaxxehe. Waa'a Xiyoonanne ixxi hee'oo Yerusaaleemannem galaxxehe. Waa'a galaxxehe. Danaam ihu bikkina Waa'a galaxxehe; ixxi eroommi heer heerinatte. Waa'uwwiinsi hundiinsim lophphoo Waa'a galaxxehe; ixxi eroommi heer heerinatte. Moollanno'ina hundinam Moollanna galaxxehe; ixxi eroommi heer heerinatte. Mullam maalalsiisoo aganna issookkok ixxi eroommi heer heerinatte. Qooroominne iimannuwwa qooccukkok ixxi eroommi heer heerinatte. Uulla wo'i hanenne biddiqaa'ukkok ixxi eroommi heer heerinatte. Lob caakkuwwa qooccukok ixxi eroommi heer heerinatte. Eelliinchi ballanne caakkisoo'isa issukkok ixxi eroommi heer heerinatte. Aganii boollaankii hiimonne caakkisoo'isa issukkok ixxi eroommi heer heerinatte. Gibxika won hundam shukkok ixxi eroommi heer heerinatte. Isra'eela Gibxiinsi awwonsaa fissukkok ixxi eroommi heer heerinatte. Wodinnee malaayyinnee eekka issukkok ixxi eroommi heer heerinatte. Ertira'i dambalaqa lam beyyonne baxxansukkok ixxi eroommi heer heerinatte. Isra'eela lambe'inne higisukkok ixxi eroommi heer heerinatte. Gibxi adilaa ixxi gogotaa Ertira'i dambalaqanne xuuxantamisa issukkok ixxi eroommi heer heerinatte. Ixxi minaadaba udma'anne awwonsukkok ixxi eroommi heer heerinatte. Adilluwwa shukkok ixxi eroommi heer heerinatte. Malaayyaam adilluwwa shukkok ixxi eroommi heer heerinatte. Amoore'i adila Siihoona shukkok ixxi eroommi heer heerinatte. Baasaa'n adila Ooga shukkok ixxi eroommi heer heerinatte. Ee kee'n uulla ixxi minaadabina gulummi issaa uwwukkok ixxi eroommi heer heerinatte. Ixxi agid ikko'i Isra'eelina gulummi issaa uwwukkok ixxi eroommi heer heerinatte. Neesenne hawwi afu ammane neese tiirukkok ixxi eroommi heer heerinatte. Ni diina'i angiinsi neese gatisukkok ixxi eroommi heer heerinatte. Qooccanchi hundinam hurbaata uwwookkok ixxi eroommi heer heerinatte. Iima'n Waa'a galaxxehe; ixxi eroommi heer heerinatte. Neese Baabilloo'n uulli daajjuwwi gadanonne afuullaa Xiiyoona sawwinummi ammanenne wi'llinummo. Ee beyyonne ni diitta'uwwa haqqanne saqallummo. Neese qeefadda'a u'nnisam keen zammallummuuyyi ixxuwwa liiransinona «Xiyoo'n mazmuulluwwiinsi mato niina zammallehe» yito'o. Waa'ina zammarimmi hasisoo mazmuura allaggi uullanne hinkid zammalloommo? Yerusaaleema, an keese xadumlas i makki angi eese xadona! An keese xadumlas iina hundiinsi lophphoo liirancha Yerusaaleem issumbeelas i allab i aqonnem amaxxamona. Waa'a! Yerusaaleem amadamu balla Eedoo'm manni issito'i luwwa sawwihe; ixxuwwi «Gindehe; luguminnem xoqoltakka'a gindehe» yito'ookko. Ki'nnuwwi Baabiloo'n beero'i manna, neesenne issitakko'i luwwi hundam ki'nnuwwannem dabaraa issookkok maasse'amaakkoohane. Ki'nnuwwi ooso amadaa sifo'i kinanne xaamsookkok maasse'amaakkoohane. Waa'a! An wo'm wodaninne keese galaxxoommo. Asse'amaa'n illagenne kiina galaxxi mazmuura zammaroommo. Ki eroommi bikkinaa amma'nnannitaatoohaannoo'm bikkinaa ee'isam ki summaa ki neeyyaxxi sagaraa hundi luwwiinsim lonsitaa iimiimaa'l bikkinaa keesamaakkoo ki mi'n kollonne otossummuuyyi ki summa galaxxoommo. An keese weeshummi ammane macceessaatto; ki malaayyinnem eese qoxxissaatto. Waa'a! Ki sagara macceesso'i bikkina uulli adilluwwi hundim keese galaxxitamo. Moollanni lombi lophphaakkoohan ihu bikkina ixxi googonne zammattamo. Waa'i hundiinsim hanaanette; ihukkaarem hawwaano abooyyookko; amaadaano qee'llonnem la'ookko. An hawwi lambe'enne ihummita'nnim at i foore egettootto; quunqinne eesenne ki'llo'i i diina'innem uullixantootto; ki malaayyinnem eese gatissootto. Waa'i iina qoodu luwwa wonshookko; Waa'a! Ki eroommi heer heerinatte; Ki angi baxo xadditte. Waa'a! At eese saarayyitto; laqqittome. At an issoommi luwwi hundam laqqootto; i sawwite hundam qee'llonnem qoossitaa laqqootto. I taakkoo i iinsoo at qoositootto; i baxo hundam laqqootto. Waa'a, an woceena illageenim mayyeena sawwumda'e at laqqootto. I kululleeta hundam oottitto; ki anginnem eese egettitto. Kiikki lachchi lobakata maalalsiisoohane; an la'eena xanoommaanniinsim hanaanette. Ki Ayyaaniinsi hanno gibaa xoreena xanoommo? Ki illagiinsidu hanno giboommo? Iimanne firumta'n ee beyyonnem at yoonto; Sii'oolanne aagumta'nnim at ee beyyonnem hee'llootto. Eelliinchi firiinsi ekkeen bararaa marummita'n eelliinchi aaggi kollinnem qee'llaa hee'umta'n ee beyyonne eese ki anginne awwonsitoottoo; ki makki anginnem eese amaddootto. Anim «Eese tuunsi maaxookko» te'im caakkim «Tuunsookko» yumta'n tuunsi ki beyyonne bee'e; hiimim balli qaxa caakkisookko; ee bikkina ki illagenne hiimonnee ballannee annannoom bee'e. Iikka mannoomato hundam qooccittok atette; iyyummi godabonnem axisansitaa eese baxxitto. Maalalsiisoo'isaa agannaamisaa ihaa qooccamummi bikkina an keese galaxxoommo; ki bax maalalsiisoohane; anim eekka qoossaa la'oommo. An maaxaqqi beyyonne qooccamummi ammane xilli uulli woronne qooroominne baxamummi ammane i miqqeewwi kiinniinsi maaxamukkoyyo. An qarameena illageenim at eese moo'llitto; iina qoodamu doolle hee'imma asheeroo'nnim ki doonanne kitaabbitto. Waa'a! At iina sawwitoo sawwit hinkido'i lombaamo; xigdu hinkaa'nna duta! Ki sawwit xigakkota'n dambalaq shashshariinsi lobane; an diriichchiinsi baqoommi ammanem kiinninnette. Waa'a! Jor keeno guullitta'n maha ihookko! Xiiga duntakkeena hassakkam keeno, iinniinsi qee'llehe! Ki bikkina jor woshsha woccu'uuyyi ki diina'i keesenne kora'am ki'llo'ookko. Waa'a! Keese sabbam keeno an lobakata saboommo; keesenne ki'llam keenom shigigoommo. Ixxuwwa lobakata sabaammo; i diina'am issaa xigoommo. Waa'a! Eese saarayyitaa i sawwit hundam la'e; eese keentaahim i tii'lleka la'e. An hawwodummi luwwi yoolas moo'e; heer heeraxxi googonnem eese awwonse. Waa'a! Jor keeniinsi eese gatise; hantaaraaniinsim eese egere. Ixxuwwi jora baxxeena sawwitamo; hundi ammanem ora qooccitamo. Ixxuwwik allab qubaam hamashshisa qasoohane; ixxuwwi suumim woraqaallichchisa qubaamo. Waa'a! Jor kee'n angiinsi eese egere; eese digaadda'a ubbuusseena a'llantam hantaaraaniinsim gatise. Amaadaan eese amaddeena maaxaqqanne qaasha qaashsho'ookko; usam eese digaadoo'isa issita'a dissito'ookko; eese qolonam shikka guddito'ookko. An Waa'ina «At iina Moollana» yoommo. Waa'a! I uunxaxxi sagara macceese. Malaayyaam eese gatisaanchi ikkitti i Moollaanni Waa'a! O'l ayyaamo iina agir ikkitto. Waa'a! Jor kee'n mixan wo'mmoone; amaadda'a birantambee'isa ixxuwwi sawwit wo'mmoone. Eese kibbito'i i diina'i a'llancha ixxuwwannem dabare. Gii'l hiramax ixxuwwanne dillona; giiranne ubbona; od ki'llambee'isa leepho'aam barenne darabantona. Mulli keeno qophphaninne kasassam keen uullanne kaaxxixxita'a hee'lloone; hantaaraano jor luwwi laseesaa bi'isona. Waa'a! Buxina oogattoo'isa hawwaa'nnekam hanqa egettoo'isa la'oommo. Muccur keen hanqo'isam ki summa galaxxitamo; xabbeen keenim ki illagenne hee'llamo. Waa'a! An ki kollonne laroommo; qaqqissaa iina hara'mme; ki kollonne laaroommaarem macceese. I uunxat ki illagenne aduruusisa ihona; biddiqu i angim maaro'i balli kiti'mmisa ihona. Waa'a! I suumina egeraancho, i yaburinam waardiyya uullise. Jor keen baxxam jor baxo baxeena i wodan jor kollonne maroobee'isa egere; ixxuwwi maaddannem hamaaramoombee'isa eese egere. Muccur manchi eese guzumo'ona; ookki iina erane; eesem axeerona; ookki iina i horoorenne zayta dunimmisa; anim eekka saboommoyyo; Ihukkaarem i uunxat jor kee'n baxo sabimminnette. Ixxuwwik gassaan baalli wo'l kinanne darabantam ammane ixxuwwi minaadab i sagar hanqi ihukkisa laqqamo. Uulli abuullamoo'isaa dimar xaamoo'isaa ixxuwwik miq waammanne binnookko. I Moollanni Waa'a! An keesenne neeyyato issoommo; yabo aagummokim keesennette ihu bikkina an lehona cawwititte. Iina qaashsho'i qaashiinsi eese egere; jora baxxam kee'n shikkiinsim gatise. An ixxuwwi qaashiinsi xummam xoroommaare jor keen ixxuwwi qaashannem amadantona. An sagara iimaa'aa Waa'i kollonne laaroommo; iina hara'mmonam uunxoommo. I uunxato hundam ixxi illagenne hincaa'oommo; i hawwo hundam ixxena kuroommo. An neeyyato mureena hofqaxim gataakkoohaannonne an maha issimmi hasisooda'e at laqqootto; i diina'i an maroommi googonne maaxxa'a qaasha qaashsho'ookko. I kululleeta moo'ummo; ihukkaarem iina haraa'mmookkoka hoogummo; iina agaagookkok matim bee'e; iina qishixxookkokam siidummoyyo. Waa'a! Ki kollonne laaroommo; Waa'a! I egeraanchi atette; ka uullannem i sharad atette. Lobakata neeyyato murummi bikkina i laachcha macceese; eesenne lobakata malaayyito'oo bikkina i diina'iinsi eese gatise. Keese galaxxoommisina karatiinsi eese tire; at iina issititti biijooma moo'oo ammane muccur keen i kululleetanne wixxookko. Waa'a! I uunxato macceese; muccuraa amma'nnantaattoohanee ikki bikkinam i uunxato macceessaa dabachcha uwwe. Ki illagenne muccur matim bee'i bikkina eese ki agishsho oogatina hincaa'llitte. I diinakkichchi eese hochchoolla; eesem kaa'aa buchchanne edaakko; lobakat doolliinsi illageen lehu mannisa eese tuunsonne aagisaakko. Ee bikkina i tiir u'nnamaakko; i wodanim hoogaakko. Gaassi doolle sawwoommo; ki baxo hundam dabaransaa sawwoommo; ki angi baxom tiiroommo. I anga ki kollonne biddiqaa'oommo; i foorim udma'i uulli wo'o xeebe'oohannisa keese quluxukko. Waa'a! I tiir u'nnamu bikkina qaqqissaa macceese; waammi barenne aagoo mannisa ihoombee'isa ki gaga iinniinsi maaxxitte. Keesenne amma'nnamummi bikkina dar hundam ki eroomma iina macceesise; i uunxato ki kollonne hincaa'oommi bikkina maroommi googo iina moo'ise. Waa'a! An keesenne yabo aagummi bikkina i diina'iinsi eese gatise. At iina Waa'i ikki bikkina ki doo'lla issona eese losise; ki keesammi Ayyaanim eese xabbeen googonne awwonsona. Waa'a! Ki summi bikkina yitaa eese foorinne hee'ise; ki muccuroominnem eese hawwiinsi fisse. Iina yoo ki eroomminne i diina'a bi'ise; an kiina agishshi ihummi bikkina eese hawwissam keen hundam guullitaa bi'ise. I angina ora i maxxaarinam qaxxancha losisoo iina daphphixxi beyyi ihu Waa'i galaxxamona. Waa'i iina haafoohane, daphphixxi beyyoo eese gatisaanchoo; jor afoobee'isam egeroo agira; minaadab iina ijaajamoo'isa issookkokim ixxotte. Waa'a! Kaa'n hundam abooyyitoo'isina manchi maruchcho? Ka hundam ixxena sawwiteendu manchi beet maruchcho? Manchi beet mataa fooshshe'akko'i fooshshisa ixxi doollim qaqqisaa higoo hawwaankaannisa. Waa'a! Iimannuwwa diqqaa dille; duunnuwwam nakke; ixxuwwim wiriittona. Banqika belellaato asse'llaa ixxuwwa binnaa'e; ki xiyyuwwam tokkossaa holle. Ki anga aad dillissaa xillaalli wo'i woriinsim eese fisse; allaggi manni angiinsim eese gatise. Ixxuwwi suumim xale'i qophphaninne wo'mmaakkoohanee; ixxuwwi makki anga iimaa'lla'a hide'llamokim qophphanonnette. Moollanna! An kiina haareechchi mazmuura zammaroommo; tommi muuncan yoo diitta'a lellummuuyyim zammaroommo. At adilluwwina kaachcha uwwitoohane; ki agishshi Daawiitam jor bisa'iinsi gatissoohane. Ixxuwwi suum xale'i qophphaninne wo'mmaakkoo keeniinsi ixxuwwi makki anga iimaa'lla'a qophphanonne hide'llam keeniinsi eese gatise. Ni goo'n oos ixxuwwi woraadda'n ammanenne harishanne mutaa li'u haqqisa ikkona; ni landi adilla'n mine wereeggisimmina axisakka'a baxakka'a lamejjanne uullisakko'i utubbuwwisa ikkona. Ni gootalluwwim annanni annanni hurbaattuwwinne wo'mmaakkoohan ihona; ni gereebbi lobakat kum wotalla qarona; allaachchi biirannem tommi kum afeebe'e fikkaannona. Ni diinat di'irona; kara qaroo'nnim fikkaannona; neesem qeefadammoone; ni wixxixxi beyyonnem laachchi macceesamoone. Eehido'i minaadab maasse'amaakkoohane; Waa'i ixxuwwina Moollanni ihu minaadab maasee'amaakkoohane. I Moollannaa i Adilaa! an keese iimiimaa'oommo; heer heerinam ki summa lonsoommo. Balli hundam keese galaxxoommo; ki summam heer heerinam lonsoommo. Waa'i hundiinsi lobane; lobakat galatim hasisoohane; ixxek hundiinsi lobaannoomim manni la'eena xanoohaanniinsi hanaanette. Ki baxo mat qaranchi mulli qaranchina galaxxukkuuyyi higisookko; malaayyaam ki baxom alallaatookko. Hibbi yoo nuuraam ki lombi bikkina wocookko; maalalsiisoo ki bax bikkinam sawwookko. Maalalsiisoo ki bax bikkinam kurookko; anim kiikka lobaannooma alallaatoommo. Lophphaakkoo ki eroommi bikkina liiranchinne wocookko; ki muccuroo'm bikkinam ilillaatinne zammarookko. Waa'i qishixxoohanee haafoohanee; quunqinam gaaggaboobee'ane; ixxi eroommim lobakata. Waa'i manni hundinam danaamo; ixxi qooccanchi hundinam qishixxoohane. Waa'a! Ki; qooccanchi hundim keese galaxxookko; ki keesammuwwim keese lonsookko. Ki adilla'n lombi bikkina wocookko; ki wod bikkinam kurookko. Ee'isenne manni hundim ki wodaam baxo ki adilla'nnekam hibbaam lomba la'ookko. Ki adillan heer heerina hee'oohane; ki gassim qaranchiinsi qaranchi afeebe'e hee'oohane. Waa'i ixxi sagarina amma'nnamaakkoohane; ixxi issoo luwwanne hundannem eroommi yoohane. Waa'i tartaroo keeno bakkiisookko; ubu keenom ki'isookko. Hundikim illi ki anga moo'ookko; atim hasisoo amman hundam ixxuwwina hurbaata uwwitootto. At ki anga biddiqaa'llootto; fooraam luwwi hundam hasisoo luwwinne goddissootto. Waa'ik goog hundim muccura; issoo luwwi hundam eroomminne issookko. Waa'i ixxo weeshoo keen hundinam hanqo'isinne ixxo weeshoo keen hundinam abbiso. Waa'i ixxo baddoo keenina hasisoo luwwa hundam uwwookko; ixxuwwi laachcham macceesookko; gatisookkome. Waa'i ixxo iittoo keeno hundam egerookko; ihukkaarem jor keeno bi'isookko. An hundi ammanem Waa'a galaxxoommo; ixxi qooccu luwwi hundim keesamaakkoo ixxi summa heer heerinam galaxxona. Waa'i galaxxamona; I foore, Waa'a galaxxe. An hee'oommi doollenne hundannem Waa'a galaxxoommo; i heechchi doollenne hundannem i Moollannina zammaroommo. Gassaanonne amma'nnantakkotte; gatiseena xanoobee'i manchi beetonnem bakke'llakkotte. Ixxuwwi letam ammane buchchanne daba'llitamo; ee ammanem ixxuwwi sawwit hundim bi'ookko. Yaaqoob Waa'i hara'mmaanchi ihukkok ixxi Moollanni Waa'annem neeyyata issoo manchi maasse'amaakkoohane. Waa'i iimanee uullaa, dambalaqaa ee kee'n woronne yoo luwwaa hundam qooccaakkoohane; amma'nnamaakkoohaannoomam heer heerinam egeroohane. Ixxi wor amadamu keenina oogatoohane; sibaaru keenina hurbaata uwwoohane. Waa'i karamu keeno karatiinsi tiroohane. Waa'i qoqquwwika ille fooqaa'ookko; Waa'i ubu keeno ki'isookko; Waa'i muccur keeno iittookko. Waa'i waaraano egerookko; busar meentinaa adaraar oosinaa hara'mmookko; ihukkaarem jor kee'n sawwite gindookko. Waa'i heer heerinam adila; Xiyoona, ki Moollanni qaranchi hundinam adila. Waa'i galaxxamona. Waa'a galaxxehe; ni Waa'ina galaxxi mazmuura hincaa'immi danaamo; ixxo galaxximmi liiransoohanee hasisoohanee. Waa'i Yerusaaleema areesookko; Isra'eeliinsi qeefadamu keeno dabarookko. Ixxi wodan kichche'u keeno qoxxisookko; ixxuwwi omaram fayyiisookko. Boollaankika xigo la'ookko; ixxuwwam summinne summinnem weeshookko. Ni Moollanni hundiinsi lobane; lobakatam wodaamo; ixxi lachchinam gabal bee'ane. Waa'i maashaalli keeno iimmiimaa'ookko; ihukkaarem jor keeno buchchanne ubbuusaa sholliisookko. Waa'ina galaxxi mazmuura zammallehe; diitta'a lellitakku'uuyyim ni Moollannina zammallehe. Ixxi iimane duubinne ifiisookko; uullinam xeena uwwookko; duunnuwwannem hixe mutisookko. Fooraam diinatina itoo luwwa uwwookko; qooranti ciicoollinam laattamaare ittam luwwa uwwookko. Ixxi faraxxi malaayyenne liiramooyyo; qoxar kee'n geellichchannem liiramooyyo. Ihukkaarem Waa'i ixxo badditam keenonnee ixxi eroommanne neeyyato issitam keenonnee liiramookko. Yerusaaleema, Waa'a galaxxe; Xiyoona, ki Moollanna galaxxe. Ixxi ki gooccuwwika laqqo'uwwa qoxxisaakko; woronne hee'oo ki minaadabam maasse'aakko. Ixxi ki gabala xumminne egerookko; danaam arasinnem goddisookko. Uullina ijaajo uwwookko; oo sagarim qaqqisaa wo'mmookko. Barada fuutto'isa dahookko; hadadda gii'l buchchisa binnaa'ookko. Barada ki'nnisa darabookko; wiisho'i qiidandu ayyi uulleena xanoo? Sagara asse'aa bukkamoo'isa issookko; hafachcha hafachchisookko; wo'im daadoo'isa issookko. Ixxi sagara Yaaqoob shumo'ina ixxi ijaajoo seeram Isra'eelina uwwookko. Ka hundam mulli minaadabina issukkoyyo; mashka'oomim ixxuwwi ixxi seera laqqamoyyo. Waa'i galaxxamona. Waa'a galaxxehe! Iimannuwwanne Waa'a galaxxehe; hanaa'n iimannuwwannem ixxo galaxxehe. Waa'i asse'amaan hundim ixxo galaxxehe; ixxi gogot hundim ixxo galaxxehe. Eelliinchii aganii ixxo galaxxehe; caakkissakkam boollaanki hundim ixxo galaxxehe. Iimaniinsi iiman Waa'a galaxxehe; iimaniinsi hanaan yoontakke'i wo'uwwi ixxo galaxxehe. Ixxi ijaajukkaare qooccanto'i bikkina Waa'i summa galaxxitona. Ixxuwwi heer heerina qoxxita'a hee'llamisa issukko; gindamoobee'i seeram ixxuwwina uwwukko. Dambalaq wo'l geejji moochchuwwii xillaalli cambalaqquwwii hundim uulliinsi Waa'a galaxxehe. Banqii baradii, hadaddii umbu'llii, ixxi ijaajo egeroo hambu'llamii. lob duunnuwwii hoffi duunnuwwii mish mishshakkam haqquwwii doo'm haqquwwii hundim bii'l moochchii mi'n diinatii biqinne shuritakkam keenii ladinne barattakkam qooccanchii hundim. Uulli adilluwwii minaadabii gassaanii awwonsaanii hundim harde'i woraadii baajaam landii oosii lommannii hundim ixxi summi mullam iimiimaakkoohan ihu bikkina ixxi lombim uulliinsii iimaniinsii hanaanette ihu bikkina hundim Waa'i summa galaxxona. Ixxi minaadaba iimiimaa'aakko; ixxi keesammuwwi ixxo galaxxitamisam issaakko; ixxi iittoo minaadaba Isra'ee'l oosom iimiimaa'aakko. Waa'i galaxxehe. Waa'a galaxxehe! Waa'ina haareechchi mazmuura zammallehe; keesammuwwi kee'n dummichchannem galaxxehe. Isra'eel ixxuwwa qooccukkaannonne liiramona; Xiyoo'n oosim ixxuwwi adilanne lobakata liiramona. Ixxi summam shimmitu'uuyyi galaxxitona; dibbe'innee diitta'innee zammattona. Mashka'oomim Waa'i ixxi minaadabanne liiramaakko; maashaalli keeno ixxi gatisimminne lonsookko. Keesammuwwi kaachcha siiddo'i bikkina liirantona; iinse'llobeyyonnem liiranchinne zammattona. Waa'a galaxximmi ixxuwwi suumenne lamqar bisa'im ixxuwwi anganne ihona. Ee'isinne minadabbuwwika baado fittamo; manni hundam guzumo'llamo. Ee minaadaphphi adilluwwa chimchiminne daannuwwi lokkom xaarinne kattamo. Ee'isinne Waa'i minaadabanne oogateena qoodukkoka wonshitamo; Ookki Waa'i keesammi minaadaphphi kaachchi lomba. Waa'i galaxxamona. Waa'i galaxxamona! Waa'a keesammi ixxi minenne galaxxehe; ixxi malaayyi yoo beyyonne iimanenne galaxxehe. Ixxi baxu malaayyaam bax bikkina galaxxehe; hore'em loban ihu bikkina ixxo galaxxehe. Xurumbulla fuggakku'uuyyi ixxo galaxxehe; diitta'innee maasiinqo'innee ixxo galaxxehe Dibbe'e aphphissakku'uuyyii shimmitaku'uuyyii ixxo galaxxehe; tommi muuncan yoo mu'utinnee gambaabuyyinnee ixxo galaxxehe. Muunoo doolinne ixxo galaxxehe; danaam sagar yoo doolinnem ixxo galaxxehe. Fooraam qooccanchi hundim Waa'a galaxxona. Waa'i galaxxamona! Ku kobi'llishshuwwi Isra'ee'l adil hee'u Daawiit beet Salamoon wocu kobi'llishshuwwa. Kobi'llishshuwwim qooroomaa danaam sogitanoo, hindihakkamisinaa xillaalli lachchi yoo sagara qoossakkamisinaa hara'mmoo keeno. Amma'nnanchinnee xabbeenoominnee hanqo'i heechcha hee'akkam qooroomam mannina losisookko. Lachchi hoffe'u keeninaa harde'uwwinaa lachchaa gaga ege'llimmaa losisookko. Qoor manni ka kobi'llishsha macceesaa lachcha siixxookko; qoossimmi yoo manni odim danaam sogitano siixxookko. Odim kobi'llishsha, kobi'llishshi tirato, qoolluwwi kee'n sagaraa daphphaakkoo booyyaansaa la'immina hara'mmookko. Qooroomina illag Waa'a baddimma; ihukkaarem qawwuwwi keen qooroomaa er sogitanoo gaddamo. I beeto, at kiyyannika sogitano macceese; kiyyummakam losishsha gadditte. Kiyyannikii kiyyummakii sogitan ki horoorina adilla'n mare'isa; ki gaanjinam mishisoo worqinne baxamu co'llesa ihookko. I beeto, baaxiilaan keen ixxuwwinne maqire baaxiilo baxxoo'isina qawwiissota'n ha'yyititte. Ixxuwwim keese «Niinninnem maqire waare; googonne daphphinaa egellaa hawwoddo'i jolli beeta'nnim muccur kee'n xiiga dunnona. Lehu manna waammi xuuxoohaannisa neesem ixxuwwa foorinnem xuunxona; waammakkam leeshisam issinona. Bito xee'aalli lobakat mu'utam siixxinoommo; bongaa eembummi horinnem ni minneewwa wonshinoommo. Kiikka saamo niihaanninnem mat isse; game'imminnee bogimminnee siidamu hora hundam mateeyyam awwaaxxinoommo» yiteena xantamo. I beeto, ixxuwwinne maqire mattitte; ee manni googiinsem qee'lle. Ixxuwwi jor baxo baxxeena geettamo; manna shiteenam gaaggaabbamo. Ciikkichcho amaddeena qaashshootti kiyyo'o ciikkichchoom la'ulas oo kiyyo'i mat luwwam awwaadooyyo. Ihukkaarem jor baxo baxxam keen letam qaasha ixxuwwi anginnem qaaccitamo. Ee'isam ku goog bogoo kee'n heechcha bi'isoohane; damiga baxxam kee'nnekim gada'i eehane. Qooroom burannee wixxixxi beyyonnee sagara iimaa'aa weeshoolla. Manni wixxoo beyyonnee beero'i goocannee hundannem weeshoolla. «Ki'nnuwwi qawwuwwi keen qawwooma doo'llitakkamok hinki balli afeebe'e? Lachchanne gurubimmannem liirantakkamok hinki balli afeebe'e? Lachcha sabbakkamokim hinki balli afeebe'e? I sogitano macceessehe; danaam sogitanom uwwoommo; i lachchikam ki'nnuwwina baxxansoommo. I kollo daba'llitakkamisina anga biddiqaa'a weeshummaare sabbakko'o. I sogitanom gaddakko'o; i axeerimmam aa'llakkeena hassakko'oyyo. Ee bikkina hawwii bichchii ki'nnuwwanne afoo ammane osaroommo; muggisoo luwwi waaroo ammanem naacoommo. Muggisoo luwwim dirisisa waaroo ammane bichchim hambu'lla'm hafachchisa waaroo ammane u'nnisoo hawwim ki'nnuwwanne dilloo ammane naacoommo. Ee ammane eese weeshshakkamo; ihukkaarem an ki'nnuwwina dabachcha uwwoommoyyo; beyyi hundannem erisa hassakkamo; ihukkaarem eese siiddakkamoyyo. Lachcham sabbakko'o; waa'ina ijaajantakkeenam hassakko'oyyo. I sogitanom hassakko'oyyo; shaaqoommi shaaqimmam gaddakko'ookko. Ee bikkina Ki'nnuwwi baxxakko'i baxika misha ittakkamo; ki'nnuwwi baxxakko'i hantaa'llekam bikke a'llitakkamo. Lachchi hanqatu keeno lachchiinse qee'llimmi shookko; qawwuwwi keenom innaannimmi bi'isookko. Ihukkaarem i woshsha macceesookkok xumminne hee'ookko; joram baddoo'n matem kichchechchi bee'em hee'ookko» yukko. I beeto, i sagara aa'llitlas i ijaajom ki beyyonne maaxxaa amadditlas ki macci qoorooma macceesoo'isa issitootto; ki wodanom qoossimmanne dabattootto. Xillaalli lachcha weeshshilas qoossimmam sagara iimaa'llaa weeshshilas Biraa maaxamu amaxxaa siiddeena hassoohaanni qaxa qoorooma erisa hassilas ee ammane Waa'a baddimma laqqootto. Waa'a la'immam siixxitootto. Waa'i qoorooma uwwookko; ixxi suumiinsem lachchii qoossimmii firookko. Ixxim wodano xabbeen keenina gatimmi ihookko; amma'nnanchinne taakke'llam keeninam agi'llisa ihookko. Hawwodanto'i mannina hanqa oogattam keeno abooyyookko; amma'nnanchinne awwaaddam keenom egerookko. An yoommi luwwa macceessilas muccurooma, hanqa oogatimma, xabbeenoomaa danaam googoo hundam qoossitootto. Qooroom ki wodanonne aagoo bikkina lachchi ki foore liiransookko. Qeessitaa sawwimmi keese egerookko; jor luwwiinsim keese daphphaa'ookko. Qooroom boqqi woshsha woccam keeniinsii jor googiinsii keese gatisookko. Ixxuwwim tuunsi googonne taakke'lleena xabbeen googo uttam keeno. Ixxuwwi xabbeen luwwa boqqisimmannee hantaar wo'mmaakkoo jor baxo baximmannee liirantamo. Ixxuwwi amma'nnantambee'i keenoo boqquwwaa. An wocoommi woshsha macceessilas qawwiisoo sagara woccam saa'aancho meentichchoonsi fissaqqiteena xantootto. Eehido'i meentichcho baajoomma'n aro'o laggo'ookkotanee Waa'i illagenne aaggo'i hidirom xaddo'ookkotanee. Is mi'n kolli mattillas ki taakki leh kollonnetti ihookko; is beyyo marimmi lehakka'a waammamimmisa. Is mine aagoo keen hundim daba'llooyyo; heechchi googom moo'een xanooyyo. Ee bikkina at er manni googo awwonimmii muccur kee'n googonne taakke'immii hasisookko. Wodano xabbeen manni ka uullanne afuutteena xantamo; miiqakkam luwwi bee'i keenim ka uullanne hee'llamo. Ihukkaarem baaxiilaan manni ka uulliinsi bi'llamo; boqquwwi keenim uulliinsi xoqolantamo. I beeto, i seera xadditte; ki wodanim i ijaajo egerona. I seer lobakat doolluwwa, qeeraa'l umuraa xummaa edaa uwwookko. Amma'nnantaattoohaannoomii hanqii kiinniinsi qee'lloone; ki gaanjenne ka'lle; ki woda'n illichchonnem kitaaphphe. Eekka issitittaare Waa'i illagennee manni illagennee danaam nuuraa sadoo siiddootto. Ki wodaninne hundinnem Waa'anne amma'nne; ki lachchannem bakke'llitte. Ki googonne hundannem Waa'a la'e; ixxim ki googo xabbaa'ookko. Ki gaginnem «An qoora» yititte; Waa'a badde; jor baxiinsi qee'lle. Eehid ikkittaare ki orachchina fayya'ooma uwwookko; ki miqem qoxxisookko. Kiina yoo horinnee ki uullanne mishu hurbaaxxeka ludo uwwimminnee ki waa'a lonse. Eehid issittaare ki gootar hurbaatinne wo'mmookko; woyi'n misha ciinsitoo barennem diqaas wo'mmaa gatookko. I beeto, Waa'i keese sogoo ammane gadditte; axeeroo ammanem qaraaraalli ikkitte. Anni iittoo beeto shaaqoo'isam Waa'im iittoo mancho shaaqookko. Qoorooma siixxu manchii qoossimmam ixxi diinat issu manchii maasse'amaakkoohane. Ee bikkina qooroom biriinsi lophphoo tirfa siidisookko; worqiinsi e'lloo awwaadom uwwookko. Inqu yakkam bito xee'aalli luwwiinsim lophphookko; at siiddeena mixxoo luwwi hundim qooroominne gudeena xanooyyo. Qooroom qeeraa'l umura uwwookko; amaxxaa lombam edaa uwwookko. Hee'llootti heechcha hundam liiranchinnee xumminnee hee'lloo'isa issookko. Qoorooma amaxxito'i keen hanqo'i heechcha siixxitamo; qoorooma ixxuwwi gaqqan issito'i keen hundim massaammuwwa. Waa'i ixxi qooroominne uulla qooccukko; ixxi lachchinnem iimane qoxxisukko. Waa'i ixxi qooroominne uulliinsi wo'o fissukko; duubim uullina xeena uwwoo'isa issukko. I beeto, qooroomii qoossimmii kiinniinsi qee'lloone; ixxuwwam qoxxissaa amaxxe. Ki foorinam heechcha uwwookko; ki gaanjinam wereeggi ihookko. Ee ammane mattootti googo hundam baddimmi bee'eka amma'nnantaa mattootto; ki lokkim qolamooyyo. Iinse'lloo ammane badditooyyo; hiimooma hundoomam xee'oo diriichcha diriittootto. Dangonne afoo hawwoo baaxiilaanonne waaroo bichchaa badditooyyo. At Waa'anne amma'nnitoo bikkina ki lokkim qaashi woronne amadamoobee'isa egerookko. Hawwu manchina hara'mmiteena ki malaayyi xanukkuuyyi eroomma issimma uttitte. Hawwu ki ollakkichchina hara'mmiteena xantittuuyyi «Soodo daba'lle; soodo uwwoommo» yititte. Ki ollakkichchi keesenne amma'nnamaa hee'ukkuuyyi ixxonne jor baxo baxxeena sawwititte. Keese hawwodubee'i manchinne kora'am kasaxxantitte. Damigoo manchonne to'achchititte; baxoo jollam awwontitte. Waa'i jora baxoo keeno ha'yyooyyo; ihukkaarem wodano xabbeen keeno erisa iittookko. Waa'i jora baxoo kee'n minenne duuncha eebookko; ihukkaarem xummaan kee'n mine maase'ookko. Waa'i gadoo keeno gadookko; ihukkaarem maashaalli keenina nuura uwwookko. Qoolluwwi keen lomba a'llitamo; ihukkaarem qawwuwwi keen sholle'nna edde'llamo. I ooso ki'n annika sogitano macceessehe; erisa macceessakkolas qoossimma siixxitakkamo. An losisoommi losan eran ihu bikkina i losano uttakkotte. An iyyanni minenne iyyanninne maqirem hee'oommi hoffi beet hee'ummo; iyyummanam matem beet hee'ummo. Iyyannim iina «I sagara kiihaanninne wo'm wodaninne macceese; i ijaajom egere; foorinnem hee'llootto. Qooroomaa qoossimmaa siixxiteena qoxxe; i suumiinsi firoo sagara xadditte; ixxeensim qee'llititte. Qoorooma uttitte; ixxim keese egerookko; qoorooma iitte; hawwodoo luwwiinsem keese daphphaa'ookko. Qooroom hundiinsim hanaan ihu bikkina qoorooma siixxe; kiina yoo luwwa hundam miqisoota'nnim qoossimma siixxe. Qoorooma iitte; ixxim keese iimiimaa'ookko; xishshaa'llaa amaddittaare lomba uwwookko. Lombi laakka kiina uwwookko; mishisoo adilla'n mare'em ki horoorenne issookko» yaa losisam hee'ukko. I beeto, macceese; an kuroommi woshsham aa'e; ki umurim qeeraa'llookko. Qooroo'm googo moo'isummo; xabbeen googonnem keese awwonsummo. Qooroominne taakke'llilas qoloo luwwi hee'ooyyo; odim geettita'nnim qolantooyyo. I losishsha qoxxissaa amade; kiina heechcha uwwoo bikkina fatakitoobee'isa egere. Baaxiilaan kee'n googonne aaggitte; jor manni googonnem taakke'llitte. Eehido'i googiinsi qee'lle bagaan taakke'llitte; eehido'i googiinsi daba'llitaa ki gaqqi googonne mare. Boqquwwi keen jor baxo baxxobeelas iinse'llamoyyo; manna qoltobeelasim diriittamoyyo. Baaxii'l hurbaata ittamo; damiga baxxa'atim woyi'n diqaasa aggamo. Ihukkaarem muccur kee'n googo soodaraa'l caakki wo'm balli afeebe'e edukkuuyyi maroohaannisa ihookko. Baaxiilaan kee'n goog odim gambabbi tuunsisa ihu bikkina qolantamo; mah qoluda'em laqqeena xantamoyyo. I beeto, an kiina kuroommi woshsha qoossitaa macceese; i woshsham qoossitaa macceese. I sagara hundem ammanem sawwihe bagaan ki illagiinsi qeessititte; ki wodanonnem ege'lle. Mashka'oomim ee losano qoossoo keenina heechchaa ixxuwwi orachchinam fayya'oomaa uwwookko. Qoxxissaatta ki wodano ege'lle; mashka'oomim heechchi bu'i firookkok ixxeensette. Jor woshshi ki suumiinsi firoone; qophphanoo qawwiishshaa kiinniinsi qeesse. At moo'lloo'is xabbeen ihona; makkannee qeddannee daba'llitoobee'isa illage moo'e. Ki lokki maroo googo xabbaa'llilas ki sawwit wo'mmookko. Makki kollonnem qeddi kollonnem mattitte; ki lokkom jor kolliinsi dabare. I beeto, i qoorooma erisa macceese; ki maccem i losanonne dabare. Eehid issitlas danaam haalat kiina hee'ookko; at woccoo woshshim keesenne lachchi yoo'isa moo'isookko. Saa'aanchi meentichchi suumiinsi maraphphi damaam taktakookkoka labookko; woccam woshshim buuriinsi loboka lii'llaalla. Ihukkaarem isek lasaanchi geneeno'i'nnoo'i qaraaraalla; lam qar bisa'i qaxam qare'aalla. Isek goog lehonne afisoohane; taakke'llam googim Si'oo'l kolli massoohane. Ise kora'am ekkidii kidii ikkamo bagaan heechchi googonne mattamoyyo; bi'llo'isam laqqamoyyo. Kabadem i beeto, macceese; kiina kuroommi woshshiinsim qee'llititte. Saa'aanchi meentichchoonsi qee'lle; is mi'n goocannem ihuta'n hincititte. Eehid ihubeelas ki lomba mulli manni massookko; harde'oomannem mogaalli manni anganne letootto. Ki amaxxa allaggi manni elleesookko; badattitti luwwi hundim mulli mannina ihookko. Ki heechchi lasaanchonnem ki maarii ki mannoomii beeddoo ammane wi'llitootto. Atim «Losano aa'oombee'ekii manni axeeroohaare saboommokii mahinatte? I losisaa'n sagara macceesummoyyo; ixxuwwi sogitanom aa'ummoyyo. Ee bikkina manni wixxaakkoo dummichchanne bichchina hincummo» yitootto. Ki gaqqi bariinsii bu'iinsii firoo wo'o aggaa xeebo mu'llito'isa ki mi'n amana amma'nnanchinnee xale'i ise iittimminnee xeebo mu'lle. Ki wo'i bu'i kora'i biiranne, ki daajjim manni wixxoo beyyonne hundannem daadoo'isa issititte. Xale'i kiina awwaadona bagaan kiinninne maqire yoo koyyi manni baxxamoone. Kiikki bu'i maasse'amaakkoohan ihona; ki harde'oo'm meentichchonne maqirem liirame. Moo'akkeena quluxisoo gaallichchisaa mishsoo kukkussichchisaa ki mi'n amak dan hundi ammanem keese liiransona; isekim iitti ki xeebo murona. I beeto, saa'aanchi meentichcho mahina iittitoolla? Mulli manchi meentichchom mahina qaaphphitoolla? Waa'i manni baxoo baxo hundam moo'ookko; maroo beyyi hundam moo'ookko. Jor mancho ixxi gaqqi baaxiilim qaash ihaa amadookko; baaxii'l usinnem karamookko. Ixxim qaxiinsi hanaan ihaakkoo qawwoominne taakke'oo bikkina googo huushamookko; ixxi gaga ege'llimma hoogimminnem lehookko. I beeto, ki ollakkichchina lubbato aaglas mulli manchi bikkinam anga aphphissaa hide'llilas woccitti sagarinnem qaashantilas ki suumiinsi firu woshshinnem amadantilas i beeto, aagtitti lubbatiinsi ki gaga gatixxiteena hassilas lubbato aagtitti manchi beyyo qaqqissaa mattaa eddaa eddaa xa'mme; mashka'oomim at ki ollakkichchi anganne ubbaatto. Eekka issitoo'n iinse'llitte; usheexxatim kiina hee'oone. Kukkussichchi hochchaanchi angiinsi, ciikkichchim kiyyo'inne amadoohaanni angiinsi xoraa gatoohaannisa atim ki gaga gatixxe. Ate, ceemmaalli manch, cuunchiinsi losano masse; cuunchisam qoor manchi ihe. Cuunchina awwonsaanchi, ijaajaanchii daannii bee'e. Ihukkaarem itoo hurbaata billenne wixxaa'ookko; hurbaata wixxaa'akkam ammanenne itoo luwwa wixxaa'ookko. At ceemmaalli manchi diriittoottok hinki balli afeebe'e? Diriichchiinsem baqitoottok hinki balla? «Hofqaxam iinse'oommo; hofqaxam diriiroommo; i anga bakke'aa hofqaxam usheexxoommo» yitaa iinsonne hee'llonam buxoom fangichchisa, hawwi odim bisa'a lamadonne lade'u manchisa dangonne ki beyyo waarookko. Awwaadbee'ekii mogaalli manchii beyyi hundam do'llu'uuyyi qophphano woccamo. Ixxim qawwiiseena illinne qaqqasookko; lokkinnem mare'e uwwookko; maxxarinnem moo'isookko. Boqqoom wodanonne yoo bikkina hundi ammanem hantaaro sawwookko. Manni lambe'ennem wocancha fissookko. Ee bikkina bichchi dangonne ixxonne afookko; dangonnem iiqamookko; fayye'immi neeyyatim hee'ooyyo. Waa'i ha'yyoobee'i loh luwwi yookko; hore'em ixxi shigigookkok lamar ihukkuuyyi oo keenim bolxoominne moo'oo ille, qophphano wocoo allabo, muccur manni xiiga dunoo anga, jor sawwite sawwoo wodano, jor bax kollonne geeroo lokko, qophpha'n naqaashaa abbaayyuwwi lambe'enne wocancha qooccoo manchoo Waa'i erisa sabookko. I beeto, kiyyannika ijaajo egere; kiyyumma losissam losanom uttitte. Hundi ammanem ki wodanonne disse; ki gaanjennem kare. Oo keenim mattoo goog hundannem awwonsookko; iinse'lloohaarem egerookko; baqitoohaarem atoorassookko. Oo ijaajjuwwi shahisa, losanim caakkisa caakkisookko; sogitanim heechchi googonne awwonsookko. Jor meentichchoonsii manni moolli are qawwiisseena woccam woshshiinsii ege'llitoo'isa issookko. Iseka dano ki wodanonne mixxitte; isek illinne qaqqasimmim keese qeefadoone. Saa'aanchi meentichchok bit mat xeffo'i qorosho'i qaxa; ihukkaarem mulli manchi meentichchonne saa'immi fooroomam bi'isookko. Koofanne giira qaaphphaa eddechchi shokkoo'n gatookkok ayyette? Gii'l kasharanne taakke'ukkuuyyi lokki shokkoobee'edu ayyette? Manni moolli arenne iinse'oo manchim eehidette; ise tafookkok hundim guzumo'amoo'n gatooyyo. Gamaanchi sibaaru ammane hurbaata game'uta'n mannina maalalsiisoohaneyyo. Amadamuta'nnim lam lamar suume miqookko; minenne yoo luwwi hundam miqookko. Ihukkaarem meentinne maqire saa'ookkok tiir hanqataakkoohane; ixxi gaqqi foorem bi'ixxookko. Aphphisanchii sholle'nnii ixxonne afookko; hundem ammanem sholle'nninne hee'ookko. To'achchi mi'n annichchika quunqa ki'isookko; baado firoo ammanem qishixxooyyo. Guzumo'o miqakkota'nnim ixxi aa'ooyyo; lobakat luwwa uwwitota'nnim araaramooyyo. I beeto, iikka sagara egere; i ijaajom xadditte I ijaajo egere; foorinne hee'llootto; an losisoommi losanom ki ilbeetichchisa ege'lle. Ki maxxaarannem kare; ki woda'n illichchonnem kitaaphphe. Qoorooma kiyyaayyasa; qoossimmam ki iitti manchisa issitaa moo'e. Ixxuwwim saa'aanchi meentichchoonsii mulli manchi arem qawwiisseena woccam wociinsii keese egerookko. Balliinsi mat balla i mi'n maskootinne bii'l kolli moo'ummo. Lachchi bee'i manni lambe'enne harde'i ooso moo'ummo; ixxuwwi lambe'ennem tiir bee'i mat woraadichcho moo'ummo. Ixxim mat meentichchi mi'n gadaninne yoo googinne aa'aa higam hee'ukko; is mi'n kolli hooraatim maram hee'ukko. Oo ammanim uulli maaro'aa eelliinchi aageena hincaakkoo amman hee'ukko; hii'm tuunsim waaram hee'ukko. Ee lasage mat meentichcho saa'aan meenti edde'oo eddechcha edde'lla'a manna huushisseena quuxoo yita'a fitta'a ee beetinne edanto'o. Isem iggaallattee mayyakki bee'i meentichchottee hee'llo'o; ise minenne afuurimma liirantambee'i bikkina hundi ammanem do'imma iittitamo. Googguwwanne, lobakat manni wixxoo beyyuwwannee lamejjuwwannee hundannem egettamo. Ee woraadichchom amadda'a suunqito'o; tuulla uunjita'atim «An kitima hincaa'immi hasisoohan hee'ukko. Ee bikkina kaballa an sagara aagummi uga'a hincaa'aammo. Ee bikkinam kiinninne exxeenaa keese haseenaa firaammo; keesem siixxaammo. I ara'annem Gibxi uulliinsi eebakko'oo mishisoo eddechcha dahaammo. Ixxonnem karbe'e, almuuna, qarafaa yakkam enje'oo luwwinne baxamaakkoo shitto'oo kifaammo. Waare, hiimo hundoomam iittinne xeebo mu'llinona; qaaphphammaatim liirammona. Mashka'oomim i mi'n anni minenne bee'e; qee'l uulla maraakko. Gonoonanne lobakat kin bira amadaakkoo bikkina lam saanti afeebe'e daba'llooyyo» yito'o. Eehid yita'a lellishshu'uuyyi huushamoo'isa issito'o; danaamo woccu'uuyyam qawwiisso'o. Mirgo'i durakkona ushe'amoohaannisa gaallichchim gaaggaabaa maraa qaashanne aagoohaannisa ixxim gaaggaabaa ise laseesaa marukko. Ciikkichchi kiyyo'onne aageena gaaggaaboohaannisa ixxi foor bichchina maroo'isa la'oobee'i bikkina xiyyi afare diqeebee'e la'ukkoyyo. I beeto, macceese; an kiina kuroommi woshsha erisa macceese. Ki wodan ee meentichchi kollonne maroone; is googonne mattaatim huushantitte. Qassa'a ubbuusso'i keen lobakata; is mashka'inne lehu kee'nnekim xig duta. Is mi'n goog Si'oo'l kolli hooraa massoohane; gundannem lehonne afisoohane. Macceessehe; qooroom weeshoolla; qoossimmim sagara iimaa'aa macceesisoolla. Gooqqi gadanonne yoo duunnuwwannee gooqqi lamejjuwwannee uullookko. Beero'o aaggakkam gooccuwwi gadanonne sagara iimaa'aa «Manna, an ki'nnuwwa hundam weeshaammo; uullanne yoo manna hundam weeshaammo. Ki'nnuwwi lachchi bee'i keen lachcha bitaa'llakkeena lossehe; qawwuwwi keenim qoossimma ki'nnuwwi wodanonne dissehe. Awwaadoo woshsha wocoommi bikkina macceessehe; An xabbeen woshsha woceena i suume fooqaa'aammo. I suum hanqa wocookko; anim qophphano ha'yyoommoyyo. I suumiinsi firoo sagar hundim hanqa; matem boqqoomii huushansoo luwwii bee'ane. I woshshi qoossimmi yoo manni hundinam caakka; lachchi yoo manninam xabbeena. Biriinsi loboka i sogitano aa'llehe; muccur worqiinsem loboka lachcha doo'llehe.» «Mashka'oomim an qooroom kashar inqu'iinsi lophphoommi bikkina Ki'nnuwwi mixxakkam luwwi hundim iinninne gudooyyo. Eesenne qooroomanne qoossimmi yookko; lachchii xabbeen sawwitii iihane. Jor luwwa sabimmi Waa'a baddimma; an bolximmaa tobbe'immaa, odim jor googoo qophpha'n sagaraa ha'yyoommoyyo. Sogitanii er qooroomii iinniinsi siidamookko; qoossimmii malaayyii i keeno. Adilluwwi danaamisa gassitamisinaa daannuwwim gassitam er seera fissitamisnaa hara'mmoommok anette. Gassaanii oogataanii minaadaba awwonsitamok an hara'mmoommaarette. An eese iittitam keeno iittoommo; eese erisa hassam keenim siixxitamo. Goddii lombii i beyyonne yookko; lobakat horii makkii iinniinsi uwwamookko. Iinniinsi siiddakkam mishim muccur worqiinsii doo'llamaakkoo kin biriinsii e'llookko. An muccuroo'm googonnee hanqo'i googonnee taakke'oommo. Eese iittitam keenina godda uwwoommo; ixxuwwi minem amaxxinne wonshoommo. Waa'i eese hundem luwwiinsim gaassaa qooccukko; gaassiinsim ixxi baxina luxxan issukko. Uulli qooccamoo'nnim illageen heer heeriinsim gaassaa doo'llamummo. Cambalaq qooccamoo'nnii wo'i bu'uwwim fooqoo'nnii illageen an qaramummo. Duunnuwwiinsi illageen hoffi duunnuwwiinsim gaassaa qaramummo. Waa'i uullaa uullanne yoo luwwaa hundam qoocceena illageen te'im uullanne yoo buchcha qoocceena illageenim qaramummo. Waa'i iimane biddiqaa'u ammane cambalaq hanennem iima'n lugumo kaasu ammane an ee beyyonne maqirem hee'ummo. Duuba iimanenne hee'oo'isa issu ammane cambalaq bu'uwwam fooqaa'u ammane dambalaqinam tochchi hee'oo'isa issu ammane wo'im ixxi ijaajiinsi higoobee'isa uulli lugu'mmeka gabala axisu ammane an ee ammane ixxi beyyonne luxxi baxaanchi hee'ummo; ballina ballina ixxo liiransam hee'ummo; ixxi illagennem hundi ammanem liiramam hee'ummo. An Waa'i qooccu uullanne liiramoommo; manni shumo'onnem lobakata liiramoommo.» «Kabadem i ooso macceessehe; i googo egettam keen masse'anto'oo keeno. I losano macceessehe; qoolluwwi ikkehe bagaan innaannitakkotte. I woshsha macceesookkok maasse'amaakkoohane; I mi'n goocanne ballina ballina qoxxaa hee'ookkok I mi'n goocannem eese egerookkok maasse'amaakkoohane. Eese siixxukkok heechcha siixxookko; Waa'iinsim nuura siixxookko. Ihukkaarem eese siixxubee'ek ixxi gaga hawwodookko; eese sabbam keen hundim leho iittitamo» yaa laaroolla. Qooroom ixxi mine baxukko; lamarem utubbuwwam uullisukko. Baa'lmoora durukko; woyi'n diqaasam lubukko; itakkam maaddam gudisukko. Ixxeka baxaan meento asse'aa beero'aannonne qoffit beyyonne uullita'a «Ki'nnuwwi lachchi hanqatu keen hundim kid waallehe» yita'a weeshshamisa issukko; qawwi keeninam «Waallehe, gudisummi maadda ittehe; lubummi woyi'n diqaasam aggehe. Lachchi hoonga uttakka'a foorinne hee'llehe; qoossimmi yoo googonnem taakke'llehe» yookko. Bolxoo mancho sogookkok ixxi gagina game'llato eebaqqookko; baaxiilaanchi mancho sogookkokim sholle'nna siixxookko. Bolxoo mancho soggilas keese sabookko; ihukkaarem qoor mancho soggilas keese iittookko. Qoor mancho losise; qoorooma edaa siixxookko; muccur mancho losise lachcha edaa siixxookko. Qooroomina illag Waa'a baddimma; keesammam la'immim qoossimma. I mashka'inne ki umur qeeraa'llookko; ki heechchi doollennem hiinchuwwi exxookko. Qoor ikkilas oo qooroom kiina haraa'mmookko; bolxitoohan ikkilas ki gaga hawwoddootto. Lachchoongi meentichcho wocaamotte; ise eedim ti'llito'ookkotane ikko'i bikkina maham laqqamoyyo. Isem is mi'nnaannonne goocanne afuuttamo; ise beero'aannonnem qoffit beyyonne barcumanne afuuttamo. Googinne higoo keenoo ixxuwwi googom xabbita'a mattam keenoo weeshsha'a «Ki'nnuwwi lachchi hanqatu keen i beyyo waallehe» yitamo; qawwuwwi keeninam «Game'akka'a agakkam wo'i xee'ookko; maaxakka'a itakkam hurbaatim liiransookko» yitamo. Ihukkaarem ixxuwwi is mine matto'i keen hundim leto'isaa kabadem is mine aaggam keen Si'oola dillitamisaa laqqamoyyo. Ku keen Salamoon kobi'llishshuwwa; qoor beet anna liiransookko; ihukkaarem qawwi beet amana kichchechchi ihookko. Baaxiilinne siidamu hor awwaadooyyo; ihukkaarem muccuroom lehiinsi gatisookko. Waa'i muccur mancho sibaaroo'isa issooyyo; ihukkaarem baaxiilaan kee'n mixan wo'mmoobee'isa issookko. Ceemmi buxisookko; ihukkaarem qoxxakka'a baximmi goddisookko. Qoor manchi billenne hurbaata wixxaa'ookko; ihukkaarem hurbaata wixxaa'akkam agananne iinse'oo manchi sholle'ookko. Muccur manchi maasso aa'ookko; ihukkaarem baaxiilaanchi manchi er woshsha wocimminne baxu jolla maaxookko. Muccur manna tiirakkam luwwi maassina ihookko; ihukkaarem baaxiilaan kee'nnek summi qaqqisom xadamookko. Tiiro qoor manchi ijaajjuwwa aa'ookko; ihukkaarem qawwooma wocoo manchi hawwodamookko. Amma'nnamaakkoo manchi quloo'n hee'ookko; ihukkaarem boqqi manchik taakki maaxamooyyo. Illinne qaqqasookkok hawwo eebookko; ihukkaarem iggaa axeerookkok xummi ihoo'isa issookko. Muccur manchik woshshi heechchina bu'o; ihukkaarem baaxiilaanchi manchi woshsha baxu jolli daphphaa'iookko. Wocanchi fito ki'isookko; ihukkaarem iitti bi'ishsha uratinne higookko. Qooroom qoossimmi yoo manchi suumenne hee'ookko; ihukkaarem qawwuwwi kee'n afar biccinne aphphisamookko. Qoolluwwi keen qoorooma wixxaa'llamo; ihukkaarem qawwi manchi woshshi bichcha eebookko. Goddaanchi manchik amaxxi ixxena qoxxaalli girbisa; ihukkaarem buxichcho buxoomim bi'isookko. Muccur manchik er bax heechcha siidisookko; ihukkaarem jor manchik baaxiil guzumo'isiisookko. Sogitano egeroo manchi heechchi googonne taakke'ookko; ihukkaarem sogitano aa'oobee'i manchi hawwonne ubookko. Jorancha maaxoo manchi qophphanaancho; hamo taakkiisoo manchi odim qawwa. Lobakat woshshi woronne huushanchi hee'oo'n gatooyyo; ihukkaarem qoossimmi yoo manchi lobakata wocimmiinsi ixxi suume ege'llookko. Muccur manchi wocoo woshshi muccur kin bi'llesa; ihukkaarem jor manchi sawwit awwaad bee'ane. Muccur manchik woshshi lobakat mannina awwaadookko; ihukkaarem qawwuwwi keen qoossimma hoogimmiinsi ki'ukkok letamo. Waa'ik maassi kichchechchi bee'i godda uwwookko. Qawwi manchi jor baxonne liiramookko; ihukkaarem qoossimmi yoo manchi qooroomanne liiramookko. Baaxiilaanchi manchonne baddu luwwi afookko; ihukkaarem muccur manchina mixu luwwi uwwamookko. Hambu'llam ki'oo ammane baaxiilaano fii'aa massookko; ihukkaarem muccur keen hundi ammanem qoxxita'a hee'llamo. Shiishoo mish inqe, wiriirim ille hawwodoohaannisa ceemmaalli manchim asse'u mancho hawwodookko. Waa'a baddimmi umura qeeraa'llisookko; ihukkaarem baaxiilaan kee'nnek umur gundookko. Muccur kee'n neeyyat liiranchanne awwonsookko; ihukkaarem baaxiilaan kee'n neeyyat bi'ookko. Waa'i goog muccur keenina girbisa; ihukkaarem jora baxxam keenina bichchisa. Muccur keen heer heerinam heekke'llamoyyo; ihukkaarem baaxiilaan keen uullanne hee'llamoyyo. Muccur kee'n suum qoorooma wocookko; ihukkaarem boqqi woshsha wocoo allab muramookko. Muccur mannik wocoo woshshi manna liiransookko; ihukkaarem baaxiilaan mannik woshshi boqqoominne wo'mmaakkoohane. Qophpha'n keennanchinne keentam keeno Waa'i sabookko; ihukkaarem hanqo'i keennaanchinne keentam keenonne Waa'i liiramookko. Bolxoom waarulas sholle'n waarookko; ihukkaarem maashaalli kee'n beyyonne qooroom siidamookko. Xabbeen manna ixxuwwi hanqo'i baxim awwonsookko; ihukkaarem amma'nnantambee'i manna ixxuwwi boqqoomim bi'isookko. Quunqi waaroo balla amaxxi hara'mmooyyo; ihukkaarem muccuroom lehiinsi gatisookko. Muccur manchik muccuroom hee'oo heechcha xabbaa'ookko; ihukkaarem jor manchi ixxi jollannem ubookko. Xabbeen manna ixxuwwi muccuroomim gatisookko; ihukkaarem amma'nnantambee'i manna ixxuwwi jor mixanim qaashaa amadookko. Jor manchi lehoohaare ixxi neeyyat bi'ookko; ixxi malaayyenne bakke'u luwwi hundim ixxenne maqirem bi'ookko. Muccur manchi hawwiinsi gatookko; ihukkaarem baaxiilaanchi manchonne oo hawwi afookko. Waa'a la'oobee'i manchi wocoo woshshinne ixxi beshichcho bi'isookko; ihukkaarem muccur manni lachchinne gattamo. Muccur keenina makkoohaare beero'onne liiranchi ihookko; odim baaxiilaan bi'llamaare ilillaat ihookko. Hanqo'i manni maassinne beero'i li'ookko; ihukkaarem baaxiilaan kee'n jor woshshinne bi'ookko. Qoossimmi hoffe'u manchi ixxi beshichcho gadookko; ihukkaarem qoossimmi yoo manchi cawwaa urookko. Hamoo manchi maaxakko'i woshsha caakkisookko; ihukkaarem amma'nnamaakkoo manchi maaxakko'i woshsha egerookko. Er sogitan bee'ulas minaadab ubookko; ihukkaarem sogoo manni dutoohaare gatimmi ihookko. Laqqoobee'i manchina lubbato aaggilas hawwonne ubbootto; ihukkaarem lubbato aaggibeeta'n e'llookko. Nuuraam meentichcho lomba siiddamo; ihukkaarem mogaalli manchi godda siidookko. Er manchi ixxi gagina eroka baxookko; ihukkaarem mogaalli manchi ixxi gaga hawwodookko. Baaxiilaanchi manchi siidoo luwwi awwaad bee'ane; ihukkaarem muccuroo'm baxo baxoo manchi hanqo'i bito siixxookko. Muccuroominne qoxxaa hee'ookkok heechcha siixxookko; ihukkaarem jor baxonne qoxxaa hee'ookkok lehookko. Waa'i jor sawwit yoo manna shigigookko; ihukkaarem miiqakkam luwwi bee'i googonne mattam mannanne liiramookko. Hanqo'isam jor manni guzumo'antoo'n gattamoyyo; ihukkaarem muccur keen guzumo'anchiinsi gattamo. Qoossimbee'i qanane'i meentichchok dan boonkekkichchi sanenne yoo worqi guma'isa. Muccur kee'n mixanonne eroommi yoohane; ihukkaarem baaxiilaan kee'n mixan bichcha eebookko. Ixxena yoohaanniinsi biijoominne uwwoo manchi yookko; ihukkaarem ixxena yoo amaxxi exxukkuuyyi marookko; ee'isam qaxiinsi hanaan idiidoo manchi yookko; ihukkaarem ixxena buxoom exxukkuuyyi marookko. Biijaalli manchi goddaanchi ihookko; mullaannina hara'mmato issoo manchi ixxi gaginam hara'mmato siixxookko. Xee'nnanne biteeseena hurbaata wixxaa'aa dissoo mancho manni duumookko; ihukkaarem biteeseena meera fissoo mancho minaadab maasse'ookko. Eroomma erisa hasoo manchi er luwwa siixxookko; ihukkaarem jolla awwonoo manchonne jor luwwi afookko. Ixxi horanne bakke'oo manchi ubookko; ihukkaarem muccur manni er haqqi buyyisa lattamo. Ixxi abaroos lambe'enne atanaachcha fissoo manchi matem awwaadoo luwwam siidooyyo; qawwi manchim qoor manchina awwaadaanchi ihookko. Muccur manchi bax heechcha uwwookko; lobakat manna dabaroo manchi qoora. Oono'o, muccur manni ka uullanne hawwo aa'llaman ihulas jor kee'nnekii baaxiilaa'nnekii hinkaanna lophphaakkoohan ihookko? Lachcha iittoo manchi sogitano aa'ookko; ihukkaarem sogitano saboo manchi qawwa. Er manchi Waa'iinsi nuura siidookko; ihukkaarem hantaaraanchi manchonne Waa'i oogatookko. Manni boqqoomanne kaaxxixxaa qoxxeena xanooyyo; ihukkaarem muccur mannik lugum heekke'ooyyo. Er meentichcho is aro'ina adilla'n mare'isa; ihukkaarem is aro'o tuussiisam meentichcho ixxena miqiic jabbisa. Muccur kee'n sawwit xabbeena; ihukkaarem baaxiilaan kee'n sogtan hantaaro. Baaxiilaan kee'n woshshi xiig dunamoo'isa issookko; ihukkaarem xabbeen kee'n woshshi lehina gudoo'i keeno gatisookko. Baaxiilaan keen ubbamo; beyyonne gatoo shumo'im hee'ooyyo; ihukkaarem muccur kee'n shumo'i qoxxaa hee'ookko. Manchi ixxena yoo qooroominne galaxxamookko; ihukkaarem boqqi sawwit yoo manchi gadamookko. Goddaancho labukkuuyyi hawwonne hee'oo manchiinsi mahim bee'i mancho labukkuuyyi qoxxaa baxoo manchi e'llookko. Muccur manchi ixxi mi'n fooraam diinate abooyyookko; ihukkaarem baaxiilaanchi manchik qishixxat monga. Uulla abuulloo manchi hurbaata goddaa itookko; ihukkaarem awwaad bee'i luwwina geeramoo manchi tiir bee'ane. Baaxiilaan keen hundi ammanem jor baxo baxxeena mixxamo; ihukkaarem muccur keen er haqqichchisa er misha mishshamo. Jor mancho wocu ixxi jor woshshim qaashaa amadookko; ihukkaarem muccur manchi hawwiinsi xorookko. Manchi wocoo woshshi mishinne eroomma siixxookko; ixxi angi baxisam bito siixxookko. Qawwi manchi goog ixxena hanqo'i googo labaa moo'amookko; ihukkaarem qoor manchi er sogitano macceesookko. Qawwi manchik quunqi qaqqisom la'amookko; ihukkaarem qoor manchi game'llakko'i game'llato gadaa urookko. Hanqo'i naqaash hanqa naqqasookko; ihukkaarem qophpha'n naqaash qophphano wocookko. Ege'llakkoo'n wocakko'i sagar bisa'isa madisookko; ihukkaarem qooroominne wocakko'i woshshi manna fayyiisookko. Hanqi heer heerina hee'ookko; ihukkaarem qophphan qaqqisom bi'ookko. Jora sawwitam kee'n wodanonne hantaar hee'ookko; ihukkaarem xummi bikkina soggam keen liirancha siiddamo. Muccur mannanne matem hawwim afooyyo; ihukkaarem baaxiilaan keenonne hawwi lophphookko. Waa'i qophphano woccam keeno shigigookko; ihukkaarem hanqo'i baxo baxxam keenonne ixxi liiramookko. Qoor manni «Neese lachchaammuwwa yitu'uuyyi» birantamoyyo; ihukkaarem qawwuwwi keen «Neese qoolluwwa yitu'uuyyi» ixxuwwi qawwooma la'ixxitamo. Baxonne qoxaroo manchi daanni ihookko; ihukkaarem ceemmaalli manchi mannina agishshi ihookko. Sawwitenne u'nnanchi kichchechcha eebookko; ihukkaarem er sagar liiransookko. Muccur manchi ixxi beshichcho sogaa xabbeen googonne awwonsookko; ihukkaarem baaxiilaan kee'n goog hanqiinsi qeessookko. Ceemmaalli manchi ikkilas at mixxittoka siiddeena xantooyyo; ihukkaarem faare'llaa baxxilas lobakata godditootto. Muccuroo'm googonne heechchi yookko; ihukkaarem huushanchi goog lehonne awwonsookko. Qoor beet anni sogitano macceesookko; ihukkaarem woshsha gadookkok sogitano aa'ooyyo. Er manchi wocoo er woshshika misha itookko; ihukkaarem qawwiissam keen boqqooma baxxeena mixxamo. Suumiinsi jor woshshi firoobee'isa ege'lloo manchi ixxi foore ege'llookko; ihukkaarem afukkisa wocoo manchonne bichchi afookko. Ceemmaalli manchi lobakata mixookko bagaan ma'lluwwam siidooyyo; ihukkaarem faare'aa baxoo manchik mixan wo'mmookko. Muccur manchi qophphano ha'yyooyyo; ihukkaarem baaxiilaanchi manchik woshshi tuussiisoohanee sholliisoohanee. Muccuroom miiqakkam luwwi bee'i mancho egerookko; ihukkaarem jolli baaxiilaancho ubbuusookko. Ma'lluwwim bee'eka goddancho labeena yakoo manchi yookko; mullek odim lobakat amaxxi hee'onam buxichcho labaa hee'ookko. Goddaanchi ixxi foore amaxxinne gatiseena yakookko; ihukkaarem buxichchi ixxeensi elleesakkam amaxxi bee'i bikkina kichche'ooyyo. Muccur keenina caakki bololaa caakkookko; ihukkaarem baaxiilaan kee'n caakki xoo'ookko. Bolxoom atanaachcha ki'isookko; ihukkaarem qooroom sogitano aa'oo manni beyyonne hee'ookko. Laboobee'i googinne wixxoo amaxxi qaqqisom bi'ookko; ihukkaarem qaphphukkuuyyi wixxoo amaxxi li'ookko. Neeyyato issakko'i luwwi dasulas tiiro kichche'isookko; ihukkaarem mixakko'i luwwa siidimmi heechcha uwwoo haqqichchisa liiransookko. Sogitano aa'oobee'i manchonne hawwi afookko; ihukkaarem sogitano aa'oo manchi xumminne hee'ookko. Qoor manchi losisoo losan heechchina bu'o; leh qaash woriinsim manni xoroo'isa issookko. Er lachchi lomba uwwookko; ihukkaarem amma'nnancha hoogimmi bichchanne afisookko. Qoor manchi baxoo baxo hundam qooroominne baxookko; ihukkaarem qawwi manchi ixxi qawwooma caakkisookko. Jor asse'amaanchi hawwo eebookko; ihukkaarem amma'nnamaakkoo asse'amaanchi xumma eebookko. Sogitano aa'oobee'i mancho buxoomii sholle'nnii amadookko; ihukkaarem sogitano aa'oo manchi lomba siidookko. Mixakko'i luwwa siidimmi lobakata liiransookko; ihukkaarem qawwuwwi keen jolliinsi qee'lliteena hassamoyyo. Qoor keeninne hosookkok qoor ihookko; ihukkaarem qawwuwwi kee'n beshichchi jor hawwonne ubookko. Baaxiilaan keen matto'i beyyi hundam hawwi laseesookko; ihukkaarem muccur manni baxxo'i er baxika bito a'llitamo. Muccur manchik amaxxi beetiinsi beetina afookko; ihukkaarem baaxiilaanchi manchika amaxxa muccur manchi lagaa'ookko. Bux kee'n abuulli uullanne lobakat goddi yookko; ihukkaarem hanqa oogatoo manni bee'immiinsi ki'ukkok bi'ookko. Ixxi qachcho qaqinne aphphisimma qishixxoo manchi ixxi qachcho sabookko; ihukkaarem ixxi qachcho iittoo manchi guzumo'aa li'isookko. Muccur manchi goddeebee'e itookko; ihukkaarem baaxiilaan kee'n godab sibaarukkisam hee'ookko. Qoor meentichcho iseka mine danaamisa gassitamo; ihukkaarem qawwi meentichcho is anginnem is mine ginditamo. Xabbeen googonne taakke'oo manchi Waa'a baddookko; ihukkaarem boqqi googonne taakke'oo manchi Waa'a gadookko. Qawwi manchi wocoo woshshi ixxi afare biccinne aphphisiisookko; ihukkaarem qoor keen er woshsha wocimminne ixxuwwi gaga gatixxitamo. Abuulloo mirgo'uwwi bee'ulas gootaranne hurbaat hee'ooyyo; ihukkaarem abuulloo mirgo'uwwi hee'ulas gootaranne hurbaat wo'mmookko. Amma'nnamaakkoo naqaash qophphanooyyo; ihukkaarem qophphanaanchi naqaash qophphano wocookko. Bolxoo manchi qoorooma hasuta'nnim siidooyyo; ihukkaarem qoossimmi yoo manchi badaroo'nnim lachcha siidookko. Qawwi manchi gadaniinsi qee'lle; mashka'oomim ixxi suumiinsi lachcha siiddooyyo. Qoor manchik qooroom ixxi goog huushamoobee'isa issookko; ihukkaarem qawwi mancho ixxi qawwoomim googo huushamoo'isa issookko. Qawwuwwi keen baxxo'i baaxiilina gaabbitam bikkenne naacantamo; ihukkaarem xabbeen keen baxxo'i baaxiilina haafite siixxiteena hassamo. Woda'n kichchechchaa liiranchaa gag la'ookko; eekka mulli manni baxxamooyyo. Baaxiilaan kee'n min gindamookko; ihukkaarem muccur kee'n min qoxxaa hee'ookko. Mannina xabbeena laboo goog yookko; ihukkaarem lasaanchoom lehonne afisookko. Osachchi ammanennem ihuta'n wodanonne kichchechchi hee'eena xanookko; liiranchiinsi lasonne kichchechchi beyyo aa'ookko. Ixxi wodano muccuroomiinsi dabaroo manchi baxu baxika bito siidookko; ihukkaarem muccur manchi ixxi er baxika misha a'llookko. Qawwi manchi wocakko'i woshsha hundam hanqaa yaa aa'ookko; ihukkaarem qoor manchi maroo googo qoossaa la'ookko. Qoor manchi gaga ege'lloo bikkina joriinsi gibookko; ihukkaarem qawwi manchi gaaggabaallaa ixxi gaga ege'lloobee'anee. Quuqoo manchi qawwoo'm baxo baxookko; ihukkaarem qoossoo manchi xa'nnookko. Lachchi bee'i manni qawwoo'mmeka bikke a'llitamo; ihukkaarem qoolluwwi keen lachcha adilla'n mare'isa issaqqitamo. Jor keen er kee'n illagenne guruphphitamo; baaxiilaan keen odim muccur kee'n goocanne heeshtamo. Buxichcho ixxi beshichchim ha'yyooyyo; ihukkaarem goddaanchina dut iitti manni yookko. Ixxi beshichcho gadoo manchi baaxiilaancho; ihukkaarem buxichchina qishixxoo manchi maasse'amaakkoohane. Jor baxo baxxeena sawwitam keen huushanto'oollayyonnihe? ihukkaarem iittii amma'nnanchii eroomma sawwitam keeninatte. Qoxxakka'a baximmi godda siidisookko; ihukkaarem woshsha lonsoo manchi buxookko. Qoolluwwi kee'n qooroom adilla'n mare'e; ihukkaarem qawwuwwi kee'n wereeggi qawwooma. Hanqo'i naqaash foore gatisookko; ihukkaarem qophpha'n naqaash lagoohane. Waa'a baddoo manchina qoxxaalli amma'nnisoo lubbat yookko; ixxi oosinam daphphixxitam girbi hee'ookko. Waa'a baddimmi heechchina bu'o; Manna leh qaashiinsi gatisookko. Minaadab dutimmi gassoo adilina lomba; Ihukkaarem minaadaphphek xig hoffe'immi adilina bichcha. Xa'nnoo manchina lobakat do'ixximmi hee'ookko; ihukkaarem quuqoo manchi ixxi qawwooma la'ixxookko. Xummi yoo wodan orachchina fayya'ooma uwwookko; ihukkaarem to'achchim miqiic jabbisa hawwodookko. Buxichcho u'nnisookkok ixxo qooccu Waa'a gadookko; ihukkaarem buxichchina qishixxookkok qooccu Waa'a lonsookko. Baaxiilaanchi baxu jollinnem ubookko; ihukkaarem muccur manchi amma'nnamaakkoohan ihimminne egeramookko. Qooroom do'ixxoo manchi wodanonne hee'ookko; ihukkaarem qawwuwwi kee'n wodanonne qooroom hee'ooyyo. Muccuroom minaadaba lonsookko; ihukkaarem baaxiil minaadaba sholliisookko. Qoor awwaadaanchi adila liiransookko; ihukkaarem tuussiisoo baxo baxoo awwaadaanchonne adi'l quunqi dillookko. Er sagar quunqa billisookko; ihukkaarem Jor sagar quunqa iibbisookko. Qoor kee'n sagar lachcha wixookko; ihukkaarem qawwuwwi kee'n allab qawwooma wocookko. Waa'ik illi hundem beyyom moo'ookko; joraa danaamoo baxoo keeno moo'ookko. Danaamo wocoo allab heechcha siidisookko; ihukkaarem boqqooma wocoo allab foore hawwodookko. Qawwi beet annika sogitano gadookko; ihukkaarem do'ixxookkok sogitano macceesookko. Muccur kee'nnek min lobakat horinne wo'mmaakkoohane; ihukkaarem baaxiilaan siixxitam luwwi ixxuwwina hawwo eebookko. Qoor kee'n suum lachcha wocookko; odim qawwuwwi kee'n sawwitenne ookki bee'e. Baaxiilaan keen hincaa'llam kitima Waa'i shigigookko; ihukkaarem er manni uunxat ixxo liiransookko. Waa'i baaxiilaan kee'n googo shigigookko; ihukkaarem danaamo baxoo keeno iittookko. Hanqo'i googo utta'a jor googonne taakke'llam keenonne Waa'ik booban ubookko; Waa'ika sogitano sabbam keenim letamo. Si'oolii bichchi beyyii Waa'i illagenne caakkaakkoohane; ee'isam manni wodanim Waa'i illagenne la'amaakkoohane. Bolxookkok sogoo mancho ha'yyooyyo; qoolluwwi manni beyyom mareena hasooyyo. Manni wodan liiramulas illi kolli caakkookko; ihukkaarem Woda'n kichchechchi tiiro hoogisookko. Qoor manchi lachcha hasookko; ihukkaarem qawwi kee'n suum qawwooma wocookko. Ciimamaakkoo manchik heechchi amman hundam hawwaancho; ihukkaarem Woda'n liiranchi beeddoobee'i maadda. Waa'a baddimminne siidamoo gootto'i luwwi hambalaachchi yoo lobakat horiinsi e'llookko. Joranchi yoo beyyonne di'ir baa'l moora itimmiinsi; iitti yoo beyyonne shaaninne itimmi e'llookko. Quuqoo manchi jorancha ki'isookko; ihukkaarem xa'nnoo manchi jorancha siggisookko. Ceemmaalli manchik goog hawwinne ootamaakkoohane; ihukkaarem er manchik goog gudaakkoohane. Qoor beet anna liiransookko; ihukkaarem qawwi beet ama gadookko. Do'ixxi bee'i manchi ixxi qawwoomanne liiramookko; ihukkaarem do'ixxi yoo manchi baxoo baxo xabbaa'aa baxookko. Sogoo manni bee'ulas sawwakko'i sawwit wo'mmoo'nnim gatookko; Sogoo manni lophphaa yoo beyyonne ihukkaarem sawwit wo'mmookko. Manchi laboo dabachcha uwwimminne liiramookko; ammaninne uwwamoo sagarim hinkido'i danaamo! Qoolluwwi keen iima'n kolli hooraa awwonsoo heechchi googonne taakke'llamo bagaan, Aad dilliisoo leh googonne taakke'llamoyyo. Waa'i bolxoo kee'nneka mine bi'isookko; ihukkaarem aro'i lehu meentichchoka amaxxi hundam egerookko. Waa'i baaxiilaanchi manchika sawwite shigigookko; ihukkaarem danaam wocanne liiramookko. Qawwiishshinne tirfa siixxeena yakoo manchi ixxi abaroosanne hawwi afoo'isa issookko; ihukkaarem maqanxa aa'oo bee'i manchi lobakat doolle hee'ookko. Muccur manchi wocoo luwwa wodanonne sawwaa wocookko; ihukkaarem baaxiilaanchi manchi suum sawwoo'nnim jor woshsha wocookko. Waa'i baaxiilaan keeniinsi qee'llookko; ihukkaarem muccur kee'n uunxato macceesookko. Illi kolli caakkulas wodan liiramookko; danaam woshsha macceesimmi odim orachcho miqe haareechchi issookko. Heechcha uwwoo sogitano macceesookkok Qoolluwwi kee'n lambe'enne hosookko. Sogitano sabookkok ixxi gaga hawwodookko; ihukkaarem sogitano macceesoo manchi qoorooma siixxookko. Waa'a baddimmi qooroo'm uwwookko; losano maashaalloom lomba gaassookko. Manni ixxi tiironne sawwookko; ihukkaarem allaphphi dabachchi waa'i beyyiinsette. Manchi baxoo bax hundim ixxi gagina hanqa labookko; ihukkaarem Waa'i ixxi woda'n sawwite keenookko. Ki baxo hundam Waa'ina yabo uwwe; ki swwit hundim wo'mmookko. Waa'i qooccu luwwi hundinam mashka'i yoohane; ixxi jor keenom ihukkaare bichchi ballina qooccaakko. Waa'i bolxitam keeno hundam shigigookko; ixxuwwim guzumo'antoo'n gattambee'isa issookko. Iittinnee amma'nnanchinnee baaxiil shiinshamookko; Waa'a baddimminne manchi joriinsi daba'llookko. Mat manchi ixxi taakkonne Waa'a liiransulas Waa'im ee mancho ixxi diina'i lambe'ennem xumminne hee'oo'isa issookko. Muccuroominne siidamoo hoffi luwwi damiginne siidamoo lobakat amaxxiinsi e'llookko. Manni ixxi tiironne issoo luwwa sawwookko; ihukkaarem Waa'i oo sawwit wo'mmoo'isa issookko. Adil oogatookkok Waa'iinsi uwwamu daannoominnette; ee bikkina hundi ammanem hanqa oogatookko. Hanqo'i keennaanchii keenakkam mu'utii Waa'iinsette; gonoo'n woronne yoo keennaanchuwwim Waa'i baxo. Adillan qoxxookkok hanqinnette ihu bikkina jora baximmi adi'l beyyonne sabamaakkoohane. Adilluwwi hanqo'i wocanne liirantamo; hanqa wocookkokam iittitamo. Adi'llek quunqi shoo asse'amaanchisa; ihukkaarem qoor manchi quunqa billisookko. Adi'llek illi caakkoohaare heechchi siidamookko; ixxi illagenne nuura siidimmi qaraaxonne ga'nnoo xee'nnisa. Worqiinsi loboka qoorooma siixximmi biriinsem loboka qoossimma doo'llimmi lobakata erane. Xabbeen manni goog joriinsi qee'llimma; maroo googo ege'lloo manchi ixxi foore ege'llookko. Bolxoom bichchanne massookko; yoo luwwanne bakke'immim ubimmanne afisookko. Bolxoo keeninne maqire bogakko'i luwwa baxxamimmiinsi; maashaalli keeninne maqire buxoominne hee'immi e'llookko. Sogitano macceesoo manchi er luwwa siixxookko; Waa'anne bakke'oo manchim maase'amaakkoohane. Tiiro qoor manchi qoossoohane yamamookko; ixxi suumiinsim er losan firookko. Qoorooma ixxi gaqqan issaqqu manchina heechcha uwwookko; ihukkaarem qawwuwwi keen ixxuwwi qawwoominnem guzumo'antamo. Qoor manchi woceena gaassaatim sawwookko; ixxi wocoo woshshi hundim mulli keenina losano haraassookko. Er woshshi maraphphi damaa'mmisa xee'ookko; orachinam fayya'ooma uwwookko. Mannina xabbeena laboo goog yookko; ihukkaarem lasaanchoom lehina afisookko. Manni itoo hurbaata siideena qoxxaa baxookko; sibaarim manni baxoo'isa issookko. Awwaad bee'i manchi jor luwwa sawwookko; wocoo woshshim gii'llisa shokkiisoohane. Boqqi manchi manni lambe'enne jorancha wixookko; hamo taakkiisoo manchim besha annanni issookko. Baaxiilaanchi manchi ixxi beshichcho qawwiisookko; bichchi googonne hooraatim awwonsookko. Illinne qaqqasoo manchi jora sawwookko; inqe iicoo manchim jolla baxookko. Abo'i lombina mare'e; oohim muccuroo'm googonne siidamookko. Xa'nnoo manchi malaayyaam manchiinsi e'llookko; gaga ijaaccoo manchim dut beero'uwwa malaayyinne amadoo manchiinsi lophphookko. Manni Waa'ikka doo'lla la'mmina saamo ubbuusookko; ihukkaarem oo woshshi wo'mmoo'isa issookkok Waa'a. Joranchi yoo minenne er maadda itimmiinsi; xummi yoo minenne gogaalli tima itimmi e'llookko. Moollanni beet sholle'aalli ihulas qoor agishshi gassookko; moollanni beet abbaayyuwwinne maqirem uulla baxxamookko. Worqii birii gii'l woronne bukkamaa firoohaannisam Waa'i mannika wodano saarayyookko. Jor manni baaxiilaa'nneka woshsha macceessamo; qophphanaan mannim hantaaraa'nneka woshsha aa'llamo. Buxichcho gadookkok ixxo qooccu Waa'a duumukkaannisa xigamookko; mulli mannanne afu hawwonne liiramookkokim guzumo'amoo'n gatooyyo. Oos oos lob anno'ina adilla'n mare'isa; oosikim lombi anno'o. Qawwi manchi er woshsha wocooyyo; ee'isam manna gassoo manchina qophphano wocimmi hasisooyyo. Maqanxi uwwu manchina gennkko'i mu'uxxisa; maru beyyonne hundannem sawwita xabbaa'ookko. Iitto hasoo manchi ixxo hawwodu manchina haafookko; ihukkaarem hawwojja dabaransaa wocoo manchi iitti manna joransookko. Qawwi mancho xibbi kore aphphisakkamaare losoohaanniinsi qoossoo manchi mat amma'n sogitaninne losookkok lophphookko. Jor manchi xale'e boqqooma hasookko; ee bikkina mogaalli asse'amaanchi ixxena asse'amookko. Qawwoo'm baxo baxoo qawwi manchinne exximmiinsi wotalla hoorakko'i tibbekkichchinne edamimmi e'llookko. Eroommi bikkenne jora dabaroo manchi miniinsi jor luwwi qee'llooyyo. Jorancha asheerimmi qoqqobamu wo'o toroshimmisa; ee bikkina joranchi qoxxoo'n at fitancha ure. Baaxiilaancho muccuraa yimmii muccur manchom baaxiilaanchoo yimmii lamim Waa'i illagenne shigigaa'oohane. Qawwi manchi qoorooma bitaa'eena lachbee'i bikkina ixxi anganne bir hee'uta'nnim maham awwaadooyyo. Beshichchi hundi ammanem ixxi beshichcho iittookko; abbaayyim qaramookkok hawwi ammaninatte. Qoossimmi bee'i manchi mulli manchika badano miqeena hide'aa lubbato aagookko. Baaxiilo iittoo manchi fitancha iittookko; qeeraa'l goocisa ixxi gaga iimiimaa'oo manchi odim bichcha ixxi gaganne eebaqqookko. Boqqi wodan yoo manchina makkooyyo; wocu woshsha lagoo manchim joranne ubookko. Qawwa qaru manchi kichche'ookko; gawwi beet annim liiramooyyo. Liiramaakkoo wodan er qaraare; ihukkaarem tii'l kichchechchi miqe iiqookko. Baaxiilaanchi manchi oogato boqqiseena maaxaqqanne maqanxa aa'ookko. Qoossimmi yoo manchi baxoo baxo hundam qooroominne baxookko; ihukkaarem qawwi maanchi dut kollonne tiiro binnaa'ookko. Qawwi beet ixxi annina kichchechcha; ixxo qatto'i amanam qaraaraalli gaabbimma eebookko. Muccur mancho guzumo'immi danaamoyyo; er manchom ixxi eroommi bikkenne guzumo'immi danaamoyyo. Lachchi yoo manchi lobakata wocooyyo; qoossimmi yoo manchikim tiir gaaga'aakkoohane. Qawwi manchi cawwuta'n qoor mancho labookko; wocoo'n cawwukkaarem qoorisa xigamamookko. Annanni ihimma iittoo manchi ixxi mixa'nnisanne hee'ookko; hanqo'i oogatom ha'yyooyyo. Qawwi ixxi sawwit xale'e woceena hasookko bagaan lachcha mulli manniinsi a'lleena hasooyyo. Jolli waarulas gadanchi awwonookko; tuullim sholle'nninne maqire waarookko. Manni suumiinsi firoo qooroo'm sagar xillaalli wo'isa; daadoo bu'isam xee'aalla. Baaxiilaanchi manchina agaagakkeena muccur manchika hanqa boqqisimmi eraneyyo. Qawwi manchi wocoo woshshi jorancha ki'isookko; wocoo woshshim ixxo aphphisiisookko. Qawwi manchi wocoo woshshi ixxi gagoomam hawwodookko; suumiinsi firoo woshshim ixxo qashisa amadookko. Hamo taakkiisoo manchik sagar xee'oo hurbaaxxesa mishisukkuuyyi godaphphi wor afeebe'e dillookko. Baxo ceemmaalli manchi amaxxa binnaa'oo manchina abbaayyo. Waa'ik summi qoxxaalli girbisa; ee bikkina muccur manchi ixxi kollonne gibaa gatookko. Goddaanchi manchik hor ixxena girbamaakkoo beero'isa; ixxi tiironnem qeeraa'l ooxxisa ixxo egerookkoka labisookko. Manchi ubimmiinsi gaassaa ixxi wodanonne bolxookko; ihukkaarem maashaalloom lombiinsi gaassookko. Macceesoo'nnim woshshina dabachcha uwwoo manchi qawwaa gadamaakkoohanee ihookko. Qoxxaalli tiir jabbi ammane iyyaqqimmina hara'mmookko; ihukkaarem tiiro hoongaanchi mancho ayyim qoxxiseena xanooyyo. Qoossimmi yoo manchik wodan lachcha siixxookko; qoor kee'n maccim lachcha macceeseena hasookko. Mat manchina uwwakkam luwwi uwwoo manchina googo haraassookko; lob kee'n illagenne hincoo'isa issookko. Oogaxxi mine gaassaa aagaa woshsha ku'lloo manchi hanqo'i mancho labookko; ihukkaarem ixxenne fitamoo manchi waaroo ammane hanqoom la'amookko. Saamo issaqqanchi jorancha siggisookko; qoxxaallisa fitantam keenom araassookko. Kiyyabbaayyo hara'mme; ixxim beero'i kululleetanne yoo qoxxaalli ooxxisa egerookko; ihukkaarem ixxenne maqire wocanchi ixxi mi'n gooca xufookko. Manni wocoo danaam woshshi mishinne xeebo mu'llaa liiramaa hee'ookko. Lehii heechchii allabiinsi firoo woshshanne yookko; ee bikkina manni allabiinsi firoo woshshika misha siixxookko. Are siixxukkok maasso siixxaakkoohane; mashka'oomim ixxi Waa'iinsi nuura siixxookko. Buxichchi qooxxaqqukkuuyyi wocookko; ihukkaarem goddaanchi bolxoominne dabarookko. Dut besh yoo manchi bi'ookko; ihukkaarem abbaayyiinsi e'lloo beshichchi yookko. Qophphano wocoo qawwi manchiinsi miiqakkam luwwi bee'i buxichchi e'llookko. Lachchi bee'i qoxallan awwaadooyyo; gaaggaabaa taakke'oo manchi googo huushamookko. Manni ixxi qawwoominne hawwodamookko; ihukkaarem ixxi tiironne Waa'inne qaraarookko. Goddaan mannina iitti manni dutookko; ihukkaarem buxichchiinsi yoo iitti manchim qee'llookko. Qophphano naqqasoo manchi guzumo'amookko; qophphano wocoo manchim guzumo'amoo'n gatooyyo. Lobakat manni biijaalli manchina besh iheena hasookko; uwwoo manchina hundim beshichcho. Buxichchi mancho ixxi abbaayyuwwim ihuta'n sabookko; hore'oomam ixxi besh ixxeensi gibookko; laseesukkuuyyi atoorasseena yakuta'nnim besha siidooyyo. Qoorooma ixxi gaqqan issu manchi ixxi foore iittaakkoohane; qoossimma erisa iittoo manchim goddaanchi ihookko. Qophphano naqqasoo manchi guzumo'amookko; qophphano wocoo manchim bi'ookko. Qawwi heellamaa hee'immi hasisooyyo; agishshi moollanna ijaajimmi hore'oomam hasisooyyo. Manchonne qooroom hee'ulas quuqisoo woshsha iyyaqqoo'isa issookko; ixxo hawwodu manchina uraammoo yimmim ixxena lomba. Adi'llek quunqi hobbichchi muu'nnesa baddisoohane; ixxi illagenne hibba siidimmim hixe latisoo xee'nnesa. Qawwi beet annina kichchechcha; woshshaam arem uroobee'i xee'n cophphisa. Minee goddaa anno'iinsi siixxakkamo; ihukkaarem qoossimmi yoo are Waa'iinsi uwwantamo. Baxakkoo'n afuurimmi diriichcha eebookko; ceemmaalli manchikim godab sibaarookko. Waa'i ijaajo egeroo manchi ixxi gaqqi foore ege'llookko; ihukkaarem Waa'i sagara gadoo manchi bi'ookko. Buxichchina uwwoo manchi Waa'ina liqaayyisukkaannisa xigamookko; ixxi danaam baxikam bito Waa'i dabaraa miqookko. Daba'llimmi neeyyat hee'ukkuuyyi ki beeto axeere; axeetbeelas lehina higissaa uwwittaannisa xigamookko. Biijaalli manchi guzumo'amim hasisookko; uratinne higgita'nnim la'm kore eddoo'n gattooyyo. Sogitano macceessilasii losanom losseena hassilasii lasaanchonne qoorooma siiddootto. Manni lobakat luwwa sawwookko; ihukkaarem Waa'i sawwit xale'i wo'mmookko; Manniinsi egeramookkok amma'nnancha; qophphanaanchi manchiinsi buxichchi e'llookko. Waa'a baddimmi heechchi googonne awwonsookko; Waa'a baddoo manchina mahim hoffe'oo'n usheexxaa hee'ookko; jor luwwim ixxonne afooyyo. Ceemmaalli manchi wocitanne anga aagisookko; ihukkaarem suumenne duuqimma hoogookko. Bolxoo mancho guzumo'llilas lachchi bee'ek eekka moo'aa qoor ihookko; qoossimmi yoo mancho axeettilas odim lachcha siixxookko. Anna bogookkokii amam holloo beetii tuullee sholle'nnee eeboo beeto. I beeto i sogitano macceessaa lasonne lachchi yoo sagariinsi huushamimma ure. Qophpha'n naqaash hanqo'i oogatonne naacamookko; baaxiilaan kee'n suumim jor woshsha wocookko. Naacantam keenina guzumo'i ceemmaalli kee'n afarinam jiraaf gudaakko. Woyi'n diqaas awwaad bee'i manchi issookko; dimbisoo aggim wocamakkamisa issookko; eehannonne huushamoo manchim qoorayyo. Adi'llek quunqi hobbichchi muu'nnesa; ixxo quuqisoo manchim ixxi gaga hawwonne aagisookko. Fitiinsi gibimmi manna lonsookko; ihukkaarem qawwi manchi hundi ammanem wocameena gaaggaabookko. Ceemmaalli manchi uulla ammaninne baxooyyo; ee bikkina hurbaata wixxaa'akkam agananne uunxeena firookko; ihukkaarem maham siidooyyo. Sogitan manni wodanonne xillaalli barenne yoo wo'isa; ihukkaarem qoossimmi yoo manchi inkii'llookko. Manni hundim ixxi gaqqi eroommi bikkina wocookko; ihukkaarem amma'nnamaakkoo mancho ayyi siideena xanookko? Muccur manchi miiqakkam luwwi bee'eka hee'ookko; ixxi oosim ixxeensi lasonne maasse'anto'oo keen ikkamo. Adil oogaxxi barcumanne afuuroo ammane jor baxo hundam ixxi illinne annannissaa la'ookko. «I wodano muccuroominne egeraammo; eesennem baaxiil bee'e» yoo manchi ayyette? Waa'i qophpha'n keennaanchchoo hanqo'an ihubee'i qunnaa lamom shigigookko. Ciilichchi muccuraa xabbeenaa ihukkis baxoo baxinne la'amookko. Macceesoo maccee moo'oo illee lamom Waa'i qooccukko. Buxxoobee'isa diriichcha iittititte; ihukkaarem qoxxitaa baxxilas kiina ihoo hurbaata siiddootto. Meeriinsi mat mu'uta bitaa'oo manchi «Awwaadoobee'ane» yaa bushisookko; ihukkaarem bito aa'aa lasonne «Bushaallisa aa'aammo» yaa biramookko. Lachchinne wo'mmaakkoo woshshi worqiinsee kashar inqu'iinsee lophphookko. Koyyiinchi manchina lubbatamu manchika eddechcha dabe; la'oobee'i manchinam lubbatamu mancho gagoomam amade. Baaxiilinne siidamoo luwwi xee'oo hurbaaxxesa liiransookko; ihukkaarem eehanniinsi lasonne suumenne shashsha'llisa ihookko. Er sogitano aa'llilas ki sawwit xabbookko; ee bikkina er sogitano aa'lloo'n o'l beyyo mattitte. Hamoo manchi maaxakko'i woshsha caakkisookko; ee bikkina lobakata wocoo manchiinsi qee'lle. Anna te'im ama duumoo manchik caakki gambabbi tuunsonne xoo'ookko. Kichchannem qaqqisaa wixxoo amaxxi losaanchonne maasse'amooyyo. Kiina jora baxu manchina dabattaa jora baxxitte; Waa'anne amma'nname; ixxim kiina agaagookko. Waa'i lam hagar keennaancho shigigookko; qophpha'n qunnannem liiramooyyo. Manni taakke'oo googo Waa'i awwonsookko; eehaare manni ixxi googo hinkid la'eena xanookko? Lasonne gaabbitoobee'isa Waa'ina uga'a aaggeena gaassitaa qoossitaa sawwihe. Qoor adil boqquwwi keeno annannissaa la'ookko; qishixxat bee'ekam guzumo'ookko. Mannik woro'l sawwit Waa'i illagenne caakki ihu bikkina woro'l mannoomato hundam saarayyookko. Biijoomii amma'nnamaakkoohaannoomii adila egerookko; ixxi adillanim haqqinne qoxxaa hee'ookko. Harde'i kee'n lombi ixxuwwi woda; abo'im lommannina nuura. Omassoo guzumo'i jolliinsi dabarookko; qaqinne ganimmim woro'l mannoomato muccussookko. Adi'llek wodan daadoo wo'isa Waa'i angannette; Waa'im hasu kollonne dabarookko. Manchi maroo goog hundim ixxi illagenne xabbeena labookko; ihukkaarem Waa'i mannika sawwite keenookko. Kitimiinsi loboka muccuroomii xabbeen baxo baximmii Waa'a liiransookko. Boqquwwi kee'n mare'i bolxoomaa ixxuwwina yoo luwwanne bakkechchaa; oohim baaxiilo. Qoxxaa baxoo manchik sawwit goddaanchi issookko; ihukkaarem gaaggaabimmi buxoonsookko. Qophphaninne wixxoo amaxxi binnaa bi'oo umbu'llisaa lehonne afisoo qaashisaa. Baaxiilaan keen er luwwa issiteena iittitambee'i bikkina ixxuwwi boqqoomim ixxuwwa bi'isookko. Baaxiilaan kee'nnek goog boqqa; ihukkaarem muccur kee'n bax xabbeena. Woshshaam meentichchonne mat minenne hee'immiinsi biiranne hee'immi e'llookko. Baaxiilaan keen hundi ammanem jor baxo baximma iittitamo; ayyenam qishixxitamoyyo. Bolxoo manchi guzumo'amoo ammane lachchi bee'i manchi lachcha siixxookko; qoor manchina losano uwwakkam ammane lonsaa lachchaam ihookko. Muccur Waa'i baaxiilaan kee'n minenne baxamoo bax hundam moo'ookko; baaxiilaan keenom bi'isookko. Bux kee'nneka laachcha macceeseena hasoobee'i manchi ixxi gagim laaroo ammane hara'mmookkoka siidooyyo. Maaxakka'a uwwakkam luwwi quunqa billisookko; kikkilonne maaxakka'a uwwakkam maqanxim lobakat quunqa siggisookko. Hanqo'i oogat muccur keeno liiransookko; ihukkaarem baaxiilaan keeno dambaqisookko. Qoossimmi googiinsi huushamoo mancho leh egerookko. Heellamimma iittoo manchi buxookko; woyi'n diqaasaa zaytaa iittoo manchi goddaanchi ihooyyo. Baaxiilaan keen muccur keenonne afoo hawwo aa'llamo; amma'nnat bee'i keenim xabbeen keenonne afoo hawwo aa'llamo. Woshshaam nunnuraanchi meentichchonne maqire afuurimmiinsi udma'i uullanne hee'immi e'llookko. Qoor manchi lobakat amaxxaa bito xee'aalli luwwaa ixxi minenne wixxaa'ookko; ihukkaarem qoossimbee'i manchi yoo luwwa hundam abdaadookko. Muccuroomaa biijoomaa hasoo manchi heechcha, lombaa goddaa siixxookko. Qoor gaaxxi awwonsaanchi malaayyaam o'l gogotinne egessiisakko'oo beero'o kaa'aa aagookko; amma'nnamakko'i girbuwwam gindansookko. Ixxi suumee allaboo jora wocoobee'isa ege'lloo manchi ixxi gaga hawwiinsi ege'llookko. Bolxookkokii ixxena yoo luwwanne bakke'oo manchii birammaancho yamamookko; baxoo bax hundim bolxoominne wo'mmaakkoohane. Ixxi angiinne baxeena hasoobee'i bikkina ceemmaalli manchi ixxi mixaninnem lehookko. Baaxiilaanchi manchi hundi ammanem lobakat luwwa mixookko; ihukkaarem muccur manchi maham idiidoo'n uwwookko. Baaxiilaan keen hincaa'llam kitim Waa'i beyyonne sabamaakkoohane; annannannem jor sawwitinne ki'lla'a hincaa'llam kitima erisa sabookko. Qophpha'n naqaash bi'ookko; ihukkaarem erisa macceesaa wocoo manchik sagar wo'mmookko. Baaxiilaanchi manchi «An huushamummoyyo» yaa woshshanne gogookko; ihukkaarem hanqo'i manchi maroo googo qoossookko. Manchi beet ixxi qooroominne, qoossimminnee sogitaninnee Waa'inne uullixameena xanooyyo. Farashsho o'l ballina gudisakkeena xanakkamo; ihukkaarem kaachcha uwwookkok Waa'a. Danaam summi lobakat goddiinsi e'llookko; manni illagenne nuura siidimmim biriinsii worqiinsii e'llookko. Goddaanchoo buxichchoo qooccukkok Waa'i ihu bikkina lamim ixxi illagenne gudaano. Qoor manchi hawwi waaroo'isa moo'aa maaxamookko; ihukkaarem qawwi manchi hawwi woronne aagaa hawwodamookko. Maashaalloomii Waa'a baddimmii godda, lombaa heechchaa uwwookko. Jor manni googonne uttii qaashii yookko; ihukkaarem ixxi foore ege'lloo manchi ee googiinsi qee'llookko. Oosina hinkid hee'immi hasisooda'e losise; ixxuwwi umu'l doolli hundannem ee losaniinsi annanni ikkamoyyo. Buxichchi goddaanchi manchina awwaadaanchi ihookko; liqaayyo aa'u manchi odim uwwu manchina agishshi ihookko. Hanqa oogatoobee'i manchonne hawwi afookko; ixxi quuqoo quunqim ixxo hannom afisooyyo. Ixxi hurbaata buxichchinne maqire baxxamoo bikkina biijaalli manchi maasse'amaakkoohan ihookko. Bolxoo mancho fissitaa hootlas joranchi bee'ookko; fitanchii game'llanchim hee'ooyyo. Woda'n muccuroomaa er woshshaa iittoo manchi adi'l beshichchi ihookko. Waa'ik illi lachcha egerookko; ihukkaarem amma'nnatbee'i kee'n sawwite bi'isookko. Ceemmaalli manchi «Hobbichchi biiranne yoo bikkina biira firumlas shookko» yaa miniinsi firooyyo. Saa'aanchi meentichchi sagar xillaalli ba'llesa; Waa'i quuqu manchi isenne ubookko. Oos wodanonne qawwoom hee'ookko; ihukkaarem sogita'n bicci ixxuwwiinsi qeessookko. Hora wixxaa'eena buxichcho hawwodookkok te'im goddaanchina irifo'o uwwookkok buxookko. Ki macce dabattaa qoor mannika sagara macceese; ki wodanom i lachchi kollonne dabare. Ee keenom hundi ammanem tiittittaaree awwaaxxittaaree keese liiransookko. Kiikki amma'nnat Waa'annetti ihoo'isina oono'o, kaballa an kiina la'isaammo. Bux ikko'i bikkina buxiinsi malaayyinne boggitte; hawwaanom oogaxxi beyyonne barche'e issititte. Mashka'oomim Waa'i ixxuwwika hanqa gudisookko; malaayyinne bogoo keenom bogookko. Quuqoo manchinne beshichchi ikkitte; nadadoo manchinnem maqire taakke'llitte. Mashka'oomim ixxeka googo lossilas ki foorina qaash ihookko. Mulli mannika badano miqqeena lubbato aaggitte. Mashka'oomim miqimma hooggilas iinse'lloo ara'aa yoo amaxxaa hundam elleesakkamo. Gaassi kiyyanno'i kaasso'i gaba'l mare'e xoqoltitte. Baxo qooroominne baxoo mancho moo'llittonnihe? Eehido'i manchi kora'i manni illagennetti ihoo'n adi'l illagenne awwaadina uullookko. Gassaanchinne maqire itteena afuuttoo ammane kiinninne yookkok ayyedda'e ihukkisa qoossitaa la'e. Erisa sibaattaattoolasim lobakata itimmiinsi ki gaga ege'lle. Ayyi la'ukko keese keeneena uwwaakkoohan iheena xanoo bikkina xee'oo hurbaatam ihuta'n gollitoobee'isa ki gaga ege'llitaa ite. Goddaanchi ikkeena badattitte; eehido'i gagina gollimmiinsi qee'lliteena qoor ihe. Mashka'oomim eehido'i goddi moo'llittuuyyim bi'ookko; iima'n kolli xabbaa bararoo gaaqichchisam lado mutisaa bararookko. Idiidoo manchika hurbaata ittitte; ixxi hincaa'oo xee'oo hurbaatim kiina quluxisoone. Mashka'oomim hurbaatooma uttona hasu bikkina «Ite age» yookko bagaan wodaninneyyo. Ittittoka uwwe'llootto; ixxo bittaa woccitti woshshi qishirichchi ihookko. Qooroominne wo'mmaakkoo ki sogitano gadoo bikkina qawwi manchinne awwaadoo woshsha woccitte. Gaassi gaba'lleka mare'e gindititte; annii amaa bee'i oosikam uulla hoottitte. Mashka'oomim Waa'i ixxuwwina wodaam agaagaanchi ihu bikkina kiinninne fitamookko. Ki wodano sogitanina ki maccem lachchi yoo sagara macceesoo'isina fooqaa'e. Ooso guzumo'imma uttitte; qaqinne ganimmi shooyyo. Qaqinne gantootto; ihukkaarem ixxuwwi foore lehiinsi gatissootto. I beeto, at qoor ikkilas an erisa liiramoommo. Ki suumim hanqo'i woshsha wocoota'n i woro'l mannoomat hundim lobakata liiramookko. At baaxiilaan keenonne to'achchititte; ihukkaarem hundi ammanem Waa'a baddimminne hee'e. Eehid ikkilas soodina kiina hanqo'i lubbat yookko; ki neeyyatim kora'a bi'ooyyo. I beeto macceese; qooram ihe. Ki wodanom hanqo'i googonne awwonse. Lobakat woyi'n diqaasa agoo keeninnee iteena golloo keeninnee maqire hossitte. Mashka'oomim dimbaanii gollaanii buxxamo; diriichchi lophphimmim dereeramaakkoo suusa eddeesisookko. Keese qaru kiyyannika sogitano macceese; kiyyummam lomma'nnitam ammane gadditte. Hanqa bitaa'e bagaan biteessitte; qoorooma, sogitanoo qoossimmaa ki gaqqan isse. Muccur beetik anni lobakata liiramookko; qoor beeto qaru annim erisa liiramookko. Kiyyannii kiyyummaa keesenne liirantona; keese qatto'i kiyyummam keesenne lobakata liirantona. I beeto erisa macceese; i heechchim kiina kobi'llishshi ihona. Saa'aanchi meentichcho xillaalli ba'llisa; buubbeesaanchi meentichchom xuqqi bar'nno'otane. Gafannisa makka egetta'a manni lambe'enne salmaachchoo keeno dutissamo. Aayye yimmi ayyenatte? Kichchechchi ayyenatte? Joranchi ayyenatte? Laachchi ayyenatte? Mashka'i bee'em omarimmi ayyenatte? Ille kasharimmi ayyenatte? Woyi'n diqaasa agukkuuyyi dasoo keeninayyonnihe? Hamaaramaakkoo qoxxaalli agga laseessam keeninayyonnihe? Ee bikkina maham kasharaa birille'enne belelleesuta'nnimii agakkam ammane xee'uta'nnimii woyi'n diqaas kolli moo'llitte. Mashka'oomim lasaanchonne hamashichchisa qasookko; woraqaallichchisam shoo qaraare keesenne tuhookko. Ki illinam haareechchi luwwi moo'amukkoka labookko; ki tiironnem boqqoominne woccooyyo. Atim hanbu'llam heekkeesoo dambalaq woronne yoontokaa hafachchi heekkeesoo wongi'l utuphphi ludonne iinse'llittokaa labissootto. Ee'isam «Aphphisakko'aare hawwodamummoyyo; ganakko'aarem xissukkoyyo; eehannah mulli agga edaa ageena baqoommok hinki ammane?» yitootto. I beeto, jor mannanne to'achchititte; ixxuwwinam beshichchi ikkeena hassitte. Mashka'oomim ixxuwwi wodanonne hundi ammanem boqqooma sawwitamo; ixxuwwi suuminnem qawwiissamo. Qooroominne min baxamookko; qoossimminnem qoxxaa hee'ookko. Lachchi hee'ulas mi'n woronne bito xee'aalli mu'utii mishisoo mu'utii wo'mmookko. Qoor manchi malaayyaam manchiinsi e'llookko; lachchaam manchim wodaam manchiinsi e'llookko. Orina fitteena gaasitaa erisa sawwite gudise; lobakat sogoo manni hee'ulas kaachcha siiddootto. Qooroom qawwi manchiinsi lobakata qee'llaakkoohane; beero'onne manni wixxoo beyyonnem wocoo luwwi hee'ooyyo. Jora baxeena hasoo manchi «Hantaaraancho» yamamookko. Qawwi hundi ammanem sawwookkok baaxiilo baximma; bolxoo manchom manni shigigookko. Hawwi afoo balla qoxximma hooggilas ki malaayyi hoffane. Lehina ushe'antam keeno gatise; durantona oogatakko'i keenom dabare. Ayyi la'ukko at «Ka woshshi bikkina an la'oommi luwwi bee'e» yiteena xantootto; ihukkaarem wodano saarayyoo Waa'i la'ooyyonnihe? Ki heechcha egeroo Waa'i la'ooyyonnihe? Annannichchinam baxukkisa miqooyyonnihe? I beeto, danaam ihu bikkina marabo ite; maraphphi damaamim xee'oohane. Qooroomim ki foorina eran ihukkisa la'e; qoorooma siiddita'n kiikki lasaqqi heechchi xabbaakkoohan ihookko; ki neeyyatim bi'ooyyo. Boqqi manchisa muccur manchi mi'n amaxxa boggeena duggitte; ixxi gattennem weerattitte. Muccur manchi lamar kore ubuta'nnim ki'ookko; ihukkaarem baaxiilaanonne bichchi afookko. Ki diinakkichchi ubuta'n liirantitte; qolamoo ammanem wodanonne lobakata liirantitte. Eebeelas Waa'a kichche'issootto; Waa'im ki diinakkichchonne isseena sawwu quunqa urookko. Baaxiilaan baxxam bax bikkina u'nnantitte; ixxuwwannem to'achchititte. Baaxiilaanchina neeyyat bee'e; boqquwwi kee'n caakkim bi'ookko. I beeto, Waa'a badde; adilam lonse; ixxuwwina ijaajantambee'i keeninnem maqir ikkitte. Mashka'oomim eehido'i mannanne hawwi qaqqisom afookko. Waa'iinsii adiliinsii waaroo bichcha ayyim la'ooyyo. Qoolluwwi kanniinsi woroon yoo mulli qooroo'm sagara edda'a wocco'ookko. Oogato'onne golo'immi eraneyyo. Baaxiilaancho «At muccura» yoo mancho manni duumookko; minaadabim sabookko. Ihukkaarem baaxiilaancho hanqo'isinne guzumo'llam daannuwwi er sadoo lobakat maassoo siiddamo. Hanqo'i dabachcha dabarimmimmi er beshichchi xummaaxxisa. Gaassitaatim ki gaqqi uullanne ki heechchina hasisoo luwwa baxxaa gudise; eehanniinsi lasonnem ki mine baxe. Moo'llibee'i luwwa naqqassitte; manni sadom bi'issitte. Ayyenam «Ixxi eese issukkisam anim issoommo; baxu baxisam dabaroommo» yititte. Ceemmaalli manchi abuulli worinnee qoossoobee'i manchi kaasu woyi'n kaashshi beyyinnee higummo. Oono'o, uttii bochchii wo'mmaakko; kininne ootamu ootim gindamaakko. Moo'aa lasonne sawwummo; moo'ummi luwwiinsim losano aa'ummo. Hofqaxam iinse'llaa diriittootto; iinse'lleenam ki anga qinxaa'llootto. Ihukkaarem buxoom fangichchisa hawwim o'l mu'uta lade'u manchisa ihaa dangonnem waarookko. Ku kobi'llishshuwwi odim Salamoon mulli kobi'llishshuwwa; kobi'llishshuwwam dabatta'a kitaabbo'ok Yihuxxi adil hee'u Hizqiyaas adilla'n minenne hee'llo'i baxaano. Waa'ik lombi woshsha maaximma; ihukkaarem adilluwwik lombi woshsha saarayyita'a fissimma. Adi'llek sawwit iima'nnisa qee'llaa uullisam xillaalli ihu bikkina saarayyakkeena xanakkamoyyo. Kin biriinsi ci'llu xura hoore; ee lasage xaara tumoo manchi axisookko. Adi'l illagiinsi baaxiilaan keeno qeesse; ixxi adillanim hanqanne qoxxaa uullookko. Adi'l illagenne ki gaga iimiimaa'llitte; kiinniinsi lophphoo kee'n beyyonnem ikkeena hassitte. Kiinniinsi lophphoohaannina beyyo uwwitona xa'mmantaa daanni illagenne tuuttoohaanniinsi «Waare, iim shiqihe» yakkota'n e'llookko. Kiinninne maqire yoo beshichchi tuussiisoohaare saxxitoohaanniinsi moo'llitti luwwa oogaxxi beyyonne naqqasseena gaaggaabbitte. Ki quuxonne ki beshichchinne fitantoo ammane ixxenne maqire yoo woshsha guulle bagaan mulli mannika maaxaqqi woshsha caakkissitte. Eehid ihubeelas maaxaqqi woshsha maaxxeena xantoobee'isa la'u manni hundim keese sholliisookko; dabatteena xantoobee'i jor summam uwwookko. Ammaninne xabbaa'akka'a kurakko'i woshshi axisakka'a baxakko'i kin biranne lii'lle'aa firu worqisa mishisookko. Qoor manchi sogoo sogitan macceesoo manchina worqinne baxamu macci gutichchiinsi te'im danaam worqinne baxamaakkoo wereeggi mu'utiinsi lophphookko. Siggaalli wo'i hurbaata wixxaa'akkam agananne xeebo muroohaannisam amma'nnamaakkoo asse'amaanchi asse'u manchika tiiro usheexxisookko. Uwwoobee'i luwwam «Uwwoommo» yukkuuyyi bolxoo manchi xeenbee'i duuphphisaa hafachchisaa. Iyyaqqimminne gassaanchika sawwite dabarakkeena xanakkamo; maashaalli sagarim maag woshsha maashisookko. Lonsitaa ittilas goxxansoo bikkina marabo siiddoo ammane kiina ihoo qaxa ite. Keese ceemoobee'isaa saboobee'isaa ki beshichchi mine hundi ammane mattitte. Ixxi beshichchonne qophphano naqqasoo manchi bisa'isa, muqqisaa xiyyisaa hawwodookko. Hawwi ammane amma'nnamoobee'i manchonne bakke'immi heekke'u inqinne itimmisaa iiqamu lokkinne taakke'immisaa. Kichche'aakkoo manchina kadimmi qiidanne eddechcha maxarimmisaa omaranne shokkiisoo qaraare issimmisaa. Ki diinakkichchi sibaarulas hurbaata itise; xeebe'ulasim wo'o agise. Eehid issitlas tuullinne shokkoo'isa issitootto; Waa'im baxxitti er baxika bito miqookko. Hanaa'n qarinne hafachchoo hafachchi xeena eeboohannisam hamoo manchik woshshi quuqisookko. Woshshaam meentichchonne mat minenne hee'immiinsi biiranne hee'immi e'llookko. Siggaalli wo'i xeebe'u manchika xeebo muroohaannisam qee'l uulliinsi waaroo mishiraachchi sagarim liiransoohane. Baaxiilaanchi manchika woshsha aa'oo muccur manchi borqu bu'i wo'isa te'im bobu ba'l wo'isa. Lobakat marabo itimmi danaamooyyo; ee'isam gaqqi sawwitinne lomba hasimmi lonsooyyo. Ixxi gaga ijaajoobee'i manchi oot gindamu beero'isa. Barad billenne xeen odim hurbaat wixxaa'akkam agananne hasisoobee'aannisam qawwina lombi hasisooyyo. Ekkidii kidii bararoo cii'i hawwodeena xanoobee'aannisam kora'am duumakkam duunchi ayyennem afooyyo. Halangi farashshina hakkammi odim baquchchina hasisoo'isam qawwi manchi afarinam bicci hasisookko. At odim ixxesam ikkoobee'isa qawwi xa'mmoo xa'mmichchina ixxi qawwoo'mmisanne dabattitte. Qawwi manchi qoor ihukkoka labisoobee'isa qawwi xa'mmoo xa'mmichchina ixxi qawwoo'mmisinnem dabare. Qawwi manchonne asso asse'immi gaqqi lokko mu'llimminnee hawwo gagina eebaqqimminnee gudaancho. Qawwi manchi wocoo kobi'llishshi shiihu manchi dim lokkinne taakke'oohaannisa. Qawwina lomba uwwimmi kina yambarishanne karakka'a huushakkeena yakimmisa. Qawwi manchi wocoo kobi'llishshi dimbaanchi ixxi anganne kaaxxu utta fisseena yakoohaannisa. Qawwi mancho te'im googinne higoo dimbaancho diinate miqaa baxisoo manchi xiyya malinnem darabukkuuyyi manna madisoo o'l manchisa. Wishichchi uwwe'u uwwa iteena daba'lloo'isam qawwi manchi qawwooma dabaransaa wocookko. Ixxi gaga manni hundiinsim qoora labisoohaanniinsi qawwi manchina neeyyat hee'ookko. Ceemmaalli manchi «Googonne hobbichchi yookko; baddisoo hobbichchim buranne daba'llamoolla» yaa wocookko. U'llummi xuf karakko'i usanne muquqoohaannisam ceemmaalli manchi ara'anne afaree godaboo daba'llamookko. Ceemmaalli manchi wocitanne anga aagisookko; ihukkaarem suumenne massaa duuqimmim ixxena ceensiisookko. Qooroominne dabachcha uwwitam lamar manchiinsi loboka ceemmaalli manchi ixxi gaga qoor issaa xigookko. Mulli manni wocanchi lambe'enne aagoo manchi googinne higoo wishichchika macce amadimmisa. Haqqi beeddoo ammane giir xoo'oohaannisam hamo taakkiisoo manchi bee'ulas joranchi hee'ooyyo. Kiffe'i gii'l kashara haqqim giir lophphoo'isa issoo'isam woshshaam manchim joranchi lophphoo'isa issookko. Hamo taakkiisoo manchik sagar xee'oo hurbaaxxisa mishisukkuuyyi godaphphi wor afeebe'e dillookko. Ixxi wodanonne jolli hee'ukkisam suuminne maashaalli sagara wocoo manchi mishisoo xaa'l qalama hanenne labakko'i buchchi mu'uxxisa. Masokkichchi ixxi suuminne danaam sagara wocookko; ihukkaarem ixxi wodanonne hantaaro sawwookko. Ixxi wodan jollinne wo'mmaakkoohan ihu bikkina suuminne qawwiisaa er woshsha wocuta'nnim ixxo amma'nnititte. Ixxi masoo'ooma qawwiishshinne maaxuta'nnim ixxek jolli dummichchi lambe'enne la'amookko. Manni uboo'isina bare hinoo manchi ixxi gagim ubookko; mannanne kina onkoroollisoo manchonne ixxi hanennem daba'llaa kin ubookko. Qophphanaanchi manchi hawwodeena hasu manna sabookko; qawwiishshi sagarim bichcha eebookko. Balli eeboo luwwa laqqoobee'i bikkina soodo ihoo luwwanne bakke'llitte. Keese mulli manni galaxxona bagaan ki suuminne ki gaga galaxxititte; keese mulli manchi birona bagaan ki gaga bittitte. Kinii shashsharii kee'mmaalla; ihukkaarem qawwi manchik quunqi lamiinsim loboka kee'mmaalla. Quunqi mongaa nadajjaa eebookko; ihukkaarem to'achchi quunqiinsi lophphookko. La'amaakkoo axeerimmi maaxamaakkoo iittiinsi e'llookko. Iitti manchi aphphisimmi eroomminatte; ihukkaarem diinakkichchi suunqimmi hawwojjinatte. Goddu manchina maraphphi damaamim xee'ooyyo; ihukkaarem sibaaru manchina qaraaroo luwwim xee'ookko. Ixxi mine fataku manchi do'nna uraa qee'l beyyo bararu ciikkichchisa hawwookko. Shitto'ii enje'oo aduruusii manna liiransoo'isam beshichchi sogitanim wodano liiransookko. Ki beshichcho te'im kiyyannika beshichcho xadditte; keesenne hawwi afoo ammane kiyyabbaayyika hara'mmato xa'mmititte; qee'llonne yoo abbaayyiinsi abbisonne yoo ollakkichchi e'llookko. I beeto, qoor ikkilas an liiramoommo; eese gadoo keenina hundinam dabachcha uwweena xanoommo. Qoor manchi hawwi waaroo ammane moo'aa maaxamookko; ihukkaarem qoossimbee'i manchi hawwonne aaga lasonne saxxookko. La'oobee'i manchina lubbato aagu manchika eddechcha dabe; koyyiinchi manchinam lubbato aagu manchika amaxxa amade. Daranne sagara iimaa'aa ixxi beshichcho maasse'oo manchi duumukkaannisa xigamookko. Nunnuraanchi meentichcho xee'n ammane uroobee'i cophisa. Hafachcha uullisakkeenaa zayta anginne foocakka'a amadakkeenaa xanakkambee'isam ise woccambee'isam egedakkeena xanakkamoyyo. Xaar xaara qareesoo'isam manni manninne exxoo ammane losano siixxookko. Odakkichcho axisukkuuyyi egeroo manchi misha itookko; ixxi moollannika ijaajo egerookkokim lomba siidookko. Wo'i gagmoo'ixxisa illi kollo moo'isoo'isam manni wodanim gagmoo'ixxisa ihaa gaqqi woronne yoo haalata moo'isookko. Lehii Si'oolii goddaammoo yoo bee'isam mannik illi moo'aa goddooyyo. Birii worqii giirinne keenamoo'isam mannikim eroommi manni uwwoo galatinne keenamookko. Hurbaata mooyye'enne cuphinne tumakkamaannisam qawwa biccinne lehooqaxa gantita'nnim qawwoom ixxeensi laa'ooyyo. Ki gereebbika hagara qoossitaa la'e; kiikkam fooraam diinate abooyye. Mashka'oomim amaxxi heer heerina hee'ooyyo; adillanim qaranchiinsi qaranchanne afeebe'e qoxxaa hee'ooyyo. Gogaalli hixe murakka'a aashaalli hix mutoohaaree duu'n hixim wixxoohaaree ki gereebbi eddechchina ihoo odda uwwookko; ki fella'innem abuulli uulla aa'llootto. Gatu qax fella'i odim kiina, ki abaroosinaa ki mi'n baxaaninaa awwaadoo ado uwwookko. Baaxiilaanchi ayyim holloo'n gibookko; ihukkaarem muccur manchi hobbichchisa baddoo'n hee'ookko. Mat uulli minaadab boqqoo ammane gassaan dutookko; ihukkaarem lachchii qoossimmii yoo awwonsaan hee'ulas lobakat ammanina qoxxaalli minaadab ihookko. Buxa wor amadoo awwonsaanchi hurbaata bi'isoo malaayyaam xee'nnisa. Seera egettambee'i keen baaxiilaano galaxxitamo; ihukkaarem seera egettam keen baaxiilaaninne uullixantamo. Jor keen hanqo'i oogato'o qoossitamoyyo; ihukkaarem Waa'a hassam keen hanqo'i oogato'o hundam qoossitamo. Boqqi googonne maroo godaanchiinsi miiqakkam luwwi bee'i googonne maroo buxichchi e'llokko. Seera egeroo beet qoora; ihukkaarem awwaad bee'i mannina beshichchi ihoo beet anna tuussiisookko. Qaro'ina liqaayyisimminnee malaayyinne bogimminnee amaxxa wixxaa'oo manchi buxina qishixxoo mulli manchina wixxaa'ookko. Seera macceeseena hasoobee'i manchika uunxato Waa'i shigigookko. Xabbeen keeno jor googonne awwonsoo manchi ixxi hinu barenne ixxi gagim ubookko; ihukkaarem muccur keen er luwwa lago aa'llamo. Goddaanchi manchi hundi ammanem ixxi gaga qoor issaa xigookko; ihukkaarem qoossimmi yoo buxichchi eekka saarayyaa la'ookko. Muccur keen kaachcha siiddam ammane lobakat liiranchi ihookko; ihukkaarem baaxiilaan keen daannooma amaddam ammane minaadab maaxamookko. Baaxiilo maaxoo manchi latooyyo; ihukkaarem baaxiilo biiraa yookkokii la'mmaagge baxoobee'isa urookkokii haafite siixxookko. Hundem ammanem Waa'a baddoo manchi maasse'amaakkoohane; ihukkaarem wodano duudisoo manchi hawwonne ubookko. Bux minaadabanne monginne gassoo gassaanchi muunoo hobbichchisaa sibaaru tibbekkichchisaa. Qoossimbee'i gassaanchi mogaalli ihookko; ihukkaarem damiginne waaroo amaxxa saboo gassaanchik umur qeeraa'llookko. Manna shaakkoo manchi ixxi umu'l doolli hundannem gibukkuuyyi hee'ookko bagaan ayyim ixxo hincaa'ooyyo. Miiqakkam luwwi bee'i manchonne jor afooyyo; ihukkaarem boqqi googonne maroo manchi dangonnem ubookko. Ixxi uulla erisa baxoo manchi hurbaata goddaa itookko; ihukkaarem awwaad bee'i keeno awwonookkok buxukkisam hee'ookko. Amma'nnamaakkoo manchi lobakkata maasse'amookko; ihukkaarem goddaanchi iheena gaaggaaboo manchi guzumo'amoo'n gatooyyo. Golo'immi eraneyyo; ihukkaarem mat mat manni tim hurbaatinaa yaa mulleka hawwodookko. Idiidoo manchi goddaanchi iheena gaaggaabookko; buxoom qaqqisaa waaroo'isam qoossooyyo. Suuminne qawwiisoo manchiinsi axeeroo manchi lasonne galaxxamookko. Anniinsii amaansii game'aa «Baaxiilo baxummoyyo» yoo manchi bi'isoo kee'n beshichcho. Idiidoo manchi wocancha ki'isookko; ihukkaarem Waa'anne amma'nnamoo manchina makkookko. Ixxi gaganne bakke'oo manchi qawwa; ihukkaarem qooroominne daba'llamoo manchi joriinsi gatookko. Buxichchina uwwoo manchina hanqatooyyo; ihukkaarem buxichcho moo'ukkuuyyim moo'ubee'aannisa ihaa higoo manchi duumamaakkoohan ihookko. Baaxiilaan keen daannooma amaddoohaare manni maaxamookko; ihukkaarem ixxuwwi bi'llammaare muccur keen fikkaannitamo. Lobakat ammane axeerakka'a daba'lloobee'i manchi dangonne iiqamookko; hore'em fayye'ooyyo. Er manni gassina doo'llamoo ammane minaadab liiramookko; ihukkaarem boqquwwi keen gassina doo'llammoo ammane minaadab u'nnamookko. Qoorooma iittoo manchi anna liiransookko; ihukkaarem saa'aan meento awwonookkok ixxi amaxxa guullookko. Adil hanqi egeramoo'isa issoo ammane minaadab gaaga'ookko; ihukkaarem manniinsi maqanxa aa'eena hasookkok gindookko. Ixxi beshichcho suuminne qawwiisoo manchi ixxi gaqqi lokkina qaasha qaashookko. Jor manchik boqqoom ixxenam qaash ihookko; ihukkaarem muccur manchi liiranchinne zammarookko. Muccur manchi buxika hanqa egerookko; ihukkaarem baaxiilaanchi manchi ixxuwwi bikkina sawwooyyo. Bolxitam keen hee'llam beero'onne jorancha fissitamo; ihukkaarem qoolluwwi quunqa siggissamo. Qoor manchi qawwinne fitamoo ammane qawwi manchi quuqookko te'im osarookko; usheexxatim hee'ooyyo. Manna shiteena hassam keen miiqakkam luwwi bee'i mancho sabbamo; ixxuwwim ee mancho shiteena hassamo. Qawwi manchi woro'l quunqa hundam fissookko; ihukkaarem qoor manchi woronne maaxaa cawwookko. Mat awwonsaanchi qophphano macceesaa aa'ulas ixxi gassaan hundim damigaan ikkamo. Waa'i buxichchinaa buxichcho barche'e issoohaanninaa laminam gudaanchonne illina caakka uwwaakko. Buxichchina hanqa oogatoo adil qeeraa'l doolle gassookko. Sogimmii ganimmii oosina qoorooma uwwookko; ihukkaarem ijaajakka'a li'isakkobee'i qachchi ama tuussiisookko. Baaxiilaan gassitam ammane boqqoom lophphookko; ihukkaarem muccur keen ee kee'nneka ubimma moo'llamo. Ki beeto ijaajjilas kiina usheexxatoo xummaa uwwookko; ki wodanim liiramookko. Kaalti bee'ulas minaadab ti'llaakkoohan ihookko; ihukkaarem Seera egerookkok masse'amaakkoohane. Mat awwaadaancho sagarinne shaaqimmi xale'i dabarooyyo; la'uta'nnim daba'llooyyo. Sawwoo'n gaaggaabaa wocoo manchiinsi qoossoobee'i qawwina neeyyat yookko. Mat manchi ixxi mi'n baxaancho oosoommaninnem heellisaa li'isulas lasaanchonne ixxena yoo luwwa hundam a'lleena heele'ookko. Quuqoo manchi wocancha ki'isookko; qaqqiso quuqoo manchim lobakat baaxiilo baxookko. Mancho ixxi bolxoomim sholliisookko; ihukkaarem ixxi gaga hoffiisoo manchi lomba siidookko. Gamaanchina beshichchi ixxi gaginam diinakkichcho; hidiisakkota'nnim hanqa wocooyyo. Manna baddimmi hawwonne ubbuusookko; ihukkaarem Waa'anne bakke'ookkok xumminne hee'ookko. Lobakat manni gassaa'n hara'mmato hasookko; ihukkaarem manni hanqo'i oogato'o siidookkok Waa'iinsette. Muccur manchi baaxiilaancho shigigookko; baaxiilaanchim xabbeen googonne taakke'oo mancho shigigookko. Maasa'a yakkam uulli manchi Yaaqe'i beet Agur Iiti'eelinaa Ukaalinaa «An hanqo'isam manniinsi hundiinsim lachbee'i mancho; mannina yoo qoossimmim iina bee'ane. An qoorooma hore'em losummoyyo; Waa'i bikkinam la'oommi luwwi mahim bee'e. Iimane firaa dillukkok ayyette? Hafachcham anginne foocukkok ayyette? Wo'om eddechchanne guddaa amadukkokii uullikam tochcho qoxxisukkokii ayyette? Laqqoohan ihulas ixxeka summa kure? Ixxi beet sumdu ayyette? Waa'ik sagar hundim kurakkam luwbee'ane; ixxim bakke'llam keenina hundinam agira. Waa'i sagaranne ma'lluwwam edditte; eddilas keese axeerookko; qophphanaanchi ikkittisam caakkisookko» yukko. Waa'a! An kiinniinsi lam luwwa uunxoommo; leheembee'em uwwitoo'isina hasoommo. Manna qawwiisimmaa qophphano wocimmaa iinniinsi qeesse; buxoomaa goddaa uwwititte; ihukkaarem iina ammanina ihoo qax hurbaata uwwe. Mashka'oomim goddaa «Waa'i ayyette?» yaa keese lagoombee'isa; buxaammatim game'aa ki summinne qophphanonne hide'oombee'isa. Ixxi keese duumoobee'isaa hawwi keesenne afoobee'isaa awwaadaancho ixxi moollanni illagenne hamtitte. Anna duumookkokii amam maasse'oobee'i qaranchii yookko. Ixxi gagina muccura labukkuuyyi haashaaranchiinsi annanni ihoo'n yoo qaranchi yookko. Bolxoominne wo'mmaa manna gadoo qaranchi yookko. Buxaa uulliinsi, hawwaanom manni lambe'iinsi bi'iseena inqi bisa'isa gaangeerim billawwisa qare'aakkoo qaranchi yookko. Urullichchina «Uwwe, uwwe» yitu'uuyyi laattam lam landi yo'o. Ee'isam goddoobee'ek sas luwwi yookko; soo'llekim ihookko yimma la'oobee'ane. Ixxuwwim «Waamma, alceenni meentichchi goosa, xeena goddoobee'i gogaalli uullaa ihookko yoo bee'i giiraa». Anna leencoohaannikaa amaka ijaajo gadoohaannikaa ille baalli woro'l qooraanti hinaa fissookko; goolluunsim itookko. Eese sas woshshi maalalsiisookko; soo'l woshsham hore'em qoosseena xanoommoyyo. Ixxuwwim «Gaaqichchi goog iimanenne hamashshichchi googim ki'n hanenne wongi'l goog wo'i hanenne manni goog danaam meentichchonne maqire». Saa'aanchi meentichcho saa'lla'a lasage muccur mancho labba'a «Matem jollam baxummoyyo» yitamo. Sas woshshi mashka'inne uulli heekke'ookko; soo'l woshsham iyyeena xanooyyo. Oo keenim agishshi adil ihoo ammanee ceemmaalli hurbaata goddoo ammanee. Goonchi sabaakkoo meentichcho gooncho siiddam ammanee meentichchi agishsho moollama lago aa'llam ammanee. Uullanne soor winxiriilichcha'i qooccanchuwwi yo'o; ixxuwwim erisa qoolluwwi keeno. Cuum malaaybee'i qacaalla ihukkaarem itoo hurbaata billenne wixxaa'ookko. Wexeex malaaybee'ane; ihukkaarem garoo beyyo ki'n farqaqanne baxookko. Qawwaawwina adil bee'ane; ihukkaarem hundim ogoraamisa taakke'ookko. Maanxogannichchi anginne amadamookko; ihukkaarem adilla'n minenne hee'ookko. Danaam taakko taakke'llam sas qooccanchuwwi yo'o; soo'llek hore'em danaam taakko taakke'oohane. Oo keenim «Diinatiinsi hundiinsim malaayyaamoo ayyem baddoobee'i hobbichcho; antabaa'i lambe'enne iggimminne taakke'oo argucho, fellakkichchi ambulaa minaadaphphi illagenne daphphaa'oo'n wocoo adilaa». Ki qawwoom bolxitoo'isa issaakkoohaare te'im jor baxo baxxeena sawwitaattoohaare giphitaa sawwihe. Ado gimmiishakkamaare buur firookko; sane cukkakkamaare xiig firookko; ee'isam quuqisimmi wocancha ki'isookko. Kanniinsi woroon yoo losan Maasa'i uulli adil hee'u Limu'eelina ixxi ama losisso'i losan. «Uga'inne qarummi i beet Limu'eela, qoossitaa macceese. Adilluwwam sholliisoo bikkina ki malaayye saa'aan meentonne guullititte.» «Limu'eela, macceese; adilluwwina woyi'n diqaasa agimmi hasisooyyo; gassaanim qoxxaalli agga miximmi hasisooyyo. Mashka'oomim ixxuwwi agga'a dimbitolas seera xaddamo; hawwaan kee'nnekam hanqa bi'issamo.» «Leheena u'nnamoo keeninaa heechchi qaraaru keeninaa woyi'n diqaasaa qoxxaalli aggaa uwwehe. Ixxuwwi agga'a buxoomaa hawwoo xaddona. I beeto, gaqqi hawwo wocceena xantambee'i kee'n bikkina at woce; hanqa hoogaa hawwu kee'nnekam hanqa egessiise. Ixxuwwi bikkina woccaa hanqa oogate; buxikaa hawwaa'nnekaa hanqa egessiise» yoohane. Tiiraam meentichcho ayyi siideena xanookko? Ise inqu yakkam bito xee'aalli kashar kiniinsim lobotane. Is aro'ik tiir isenne usheexxookko; goddim ixxi miniinsi hanqatooyyo. Is umu'l doollenne hundannem ixxena er baxo baxxamo bagaan jor baxo hore'em baxxamoyyo. Gereebbi oddaa talbi hobaraa hassa'a liiranchinne eddechcha daddamo. Isem daddaraa'n wongi'llisa qee'l uulla matta'a hurbaata wixxaa'llamo. Soodannanne ki'lla'a is mi'n mannina hurbaata, baxaaninam baxo uwwitamo. E'lloo beyyo moo'lla'a abuulli uulla bitaa'llamo; baxxa'a siiddam diinatinnem woyina kaassamo. Ise lamado qoxxissa'a lade'llamo; hundi ammanem qoxxita'a baxxamo. Isek daddar danaam ihukkisa moo'llamo; hiimonnem isek caakki xoo'ooyyo. Isem fuutto'o muuncakkam mu'utinne fuutto'o muuncita'a eddechcha daddamo. Isekam anga biddiqaa'lla'a buxina hara'mmitamo; hawwaaninam uwwitamo. Mi'n abaroosina hundinam iibbisoo eddechchi yoo bikkina baradaam xeen ga'nnuta'nnim kichche'llamoyyo. Ara'anne dahakkam eddechcham daddamo; kashar fatirinne dadamaakkoo danaam eddechcham edde'llamo. Isek aro'i uulli lommanni wixxoo dummichchi lambe'enne la'amaakkoohan ihookko. Qambiisaa lade'akkam sabbataa dadda'a daddaraanina biteessamo. Ise qoxarattee lonsakkamotanee ikko'i bikkina lasaqqi doollenne liirantu'uuyyi hee'llamo. Qooroominne woccamo; qishixxatinnem manna soggamo. Is abaroosa abooyyiteena hundi ammanem qoxxita'a baxxamo. Isek oos iimaa ise galaxxookko; is aro'im. «Er baxo baxoo dut meenti yookko; ihukkaarem meentiinsi hundiinsim at lophphitootto» yaa galaxxookko. Dan awwaad bee'ane; wereeggim bi'ookko; ihukkaarem Waa'a badditam meentichcho maasse'anto'ookkotane. Baxxo'i bax hundinam ise galaxxehe; mashka'oomim baxxo'i er baxina manni illagenne hundannem isena lombi hasisookko. Yerusaaleemanne adil ihaa hee'u Daawiitik hayyo'i beet wocu woshshi kane. Oo hayyo'im luwwi hundim awwaad bee'ane; awwaad bee'immiinsim awwaad bee'ane; horem awwaad bee'ane. Manchi beet ka uullanne badaroo badachchi hundiinsim siidoo luwwi maruchcho? Mat qaranchi beeddoohaare mulli qaranchi waarookko; ihukkaarem ku uulli doolli hundinam hee'ookko. Eelliinchi firaa aagookko; odim firoo kollonne afeena qare'ookko. Hafachchi hanaa'n qarannem woroo'n qarannem hafachchookko; do'aa do'aa odim woddaa'i kollonnem daba'llookko. Daajjuwwi hundim dambalaq kollonne daadookko; ihukkaarem dambalaqoom hore'em wo'mmooyyo; wo'oom daba'llaa woddaa'i ki'u kollonnem marookko. Luwwi hundim mishisooyyo; mishisoobee'an ihukkisam manni sagarinne caakkisaa kureena xanooyyo; illim moo'aa goddooyyo; maccim macceesaa iina ihookko yaa xanooyyo. Gaassi ihu luwwi odim ihookko; kaba ihoo luwwi hundim gaassim ihukkane; ee bikkina heer uullanne hundannem haareechchi luwwi mahim bee'e. Ayyi manchim ‹Kuk haareechchi luwwa!› yuta'n oo luwwi neese qarammeena illageenim hee'ukkan ihaa siidamookko. Gaassi hee'u luwwi hundinam sawwixxi mare'e ihoo luwwi bee'e; odim lasonne hee'oo luwwikim ee lasagenne waaroo qaranchina sawwixxi mare'e ihoo luwwi siidamooyyo. An hayyo'i manchi Yerusaaleemanne Isra'ee'l minaadabina adil hee'ummo. Ka uullanne issamu luwwi hundam qooroominne saarayyeenaa soroobeenaa murte'ummo; Waa'i ka kee'mmaalli iyyo manni badaroo'isina uwwukko. Ka uullanne baxamu luwwi hundam moo'ummo; ihukkaarem hundem luwwim awwaad bee'anee hafachcham awwonimmaa. Boqqi luwwi xabbeena xanooyyo; bee'i luwwim xigamooyyo. Anim i wodanonne «Iinniinsi illageen Yerusaaleemanne hee'u manni hundiinsim loboka qooraammo; i wodanim lobakat qooroomaa lachchaa la'aakko» yummo. Ee bikkina lobakat qoorooma, machchaallee qawwoomaa annanni issaa la'eena i tiironne murte'oommo; ee lasage oohim hafachcha awwonimmi ihukkisa xassummo. Qooroom lophphu qaxanne kichchechchim lophphookko; lachchi lophphoohaarem u'n exxookko. Anim i wodanonne eran ihu luwwa la'eenaa i gagam liiranchinne keeneenaa sawwummo; ihukkaarem ookkim awwaad bee'an ihaa moo'ummo. Osachchi qawwooma; liiranchim awwaad bee'an ihukkisa qoossummo. Manchi beet ixxi heechchi doollenne ka uullanne baxoo er luwwi mada'e ihukkisa la'eembe'e i wodan qooroominne eese awwonusukkuuyyi i gaga woyi'n diqaasinne liiransoommisina i wodanonne qawwooma sawwummo. Odim eehanniinsi lophphaakkoo baxo baxummo; oohim minneewwa baxummo; woyi'n kaashsham kaasummo. Annanni annanni mish haqqina, fiittuwwinaa duubbi kaashshinaa beyyo gudisummo. Kaasummi haqqinam wo'o agiseena awwaadoo qoqqoba qoqqobummo. I minenne qaramaa hee'u agidduwwiinsi mulleka goonaa landi agidoo edaa bitaa'ummo; odim iinniinsi illageen Yerusaaleemanne hee'llo'i keenniinsi hundiinsim lophphoo fooraam diinate ho'llummo. I gaginam biraa worqaa adilla'n mi'nnekaa an gassoommi uullikaa amaxx hundam wixxaa'ummo; eese diraansoo goona, landaa ee'isam goona liiransoo lobakat meentom i gagina wixxaa'ummo. Anim iinniinsi illageen Yerusaaleemanne hee'llo'i keenniinsi hundiinsim lophphummo; i qooroomim iinninnem hee'ukko. I illi moo'ukkokaa i wodan mixukkokaa hoorummoyyo. I gag liirameena hasoo luwwam siixxeena hoorummoyyo; an yakaa baxummi luwwanne hundannem liiramimmi iina bikki hee'ukko. I angi baxu baxoo yakitee hundam moo'ummo; odim oo hundim awwaad bee'anee hafachcham awwonimmisaa hee'ukko; ee bikkina eelliinchiinsi woroon siidakkam luwwi mahim bee'isa moo'ummo. Anim qoorooma, machchaallee qawwoomaa saarayyaa la'eena hasummo; illageen baxamukkaanniinsi mulleka mat adi'l lasonne waaroo mulli adil maha baxeena xanookko? Odim tuunsiinsi caakki e'lloo'isam qawwoomiinsi qooroom e'lloo'isa moo'ummo. Qoor manchik illi ixxi horoorennette; ihukkaarem qawwi manchi tuunsonne taakke'ookko; ihona bagaan lamikim lasaanchi sharad mat ihukkisa moo'ummo. Ee bikkina i wodanonne «Qawwanne afookkok eesennem afookko; eehannah kaa'nna qoor ihimmi iina maha awwaadookko?» yummo. Ee ammanennem i wodanonne «Kuhim awwaad bee'ane» yummo. Qoorim qawwisam heer heerinam tiiramoobee'i bikkina waaroo doollenne lamim xadantamo. Mashka'oomim qoorim qawwisam lehimmi hosoobee'ane Ee bikkina uullanne baxamoo bax hundim kichche'isoohan ihu bikkina heechcha shigigummo; oohim qishirchoo hafachcham awwonimmisaa. An ka uullanne badarummi luwwi hundim iinniinsi lasonne waaroo manchan ihoo bikkina luwwi hundam an shigigummo. I lasonne waarookkok qoor manchida'e qawwi manchida'e la'isooyyo. Ihona bagaan an i qooroominne badaraa wixxaa'ummaannonne hundannem annichchi ihookko; oohim awwaad bee'ane. Ee bikkina uullanne badarummi luwwanne hundannem an neeyyato muraammo. Manchi beet qooroominne, lachchinnee malaayyinnee badaraa lasonne badarubee'i mullaannina uraa marookko. Ookki odim awwaad bee'anee kee'mmaalli hawwodanchaa. Eehan ihulas uullanne badaru badachchinaa tii'l kichchechchinaa manchi beet siidoo luwwi maha? Hee'oo doolli hundannem ixxi bax hawwoo kichchechchaa ihu bikkina ixxi tiirim hiimo diriirooyyo; oohim awwaad bee'ane. Manchi beetina itoohaanniinsi, agoohaanniinsii ixxi badachchannem liiramoohaaniinsii bagaan ixxena e'lloo luwwi bee'e; oohim odim Waa'i angiinsi uwwamukkisa moo'ummo. Waa'i doo'l ihubeelas ayyi iteenaa liirameenaa xanoo? Waa'i xale'i ixxo liiransoo manchina qoorooma, lachchaa liiranchaa uwwookko; ihukkaarem baaxiilaanchina wixxaa'oo badallato uwwookko. Ee bikkina ee ixxi wixxaa'u amaxxa hundam Waa'a liiransoo mulli manchina uraa marookko. Oo hundim awwaad bee'ane hafachcham awwonimmisaa. Ka uullanne ihoo luwwi hundinam qoodamaakkoo doollii ammanii yoohane. Ee qoodo'isannem, qaranchina amman yookko; lehinam amman yookko; kaasimmina amman yookko; xoqolimminam amman yookko. Shimmina amman yookko; gatisimminam amman yookko. Baximmina amman yookko; gindimminam amman yookko. Wi'llimmina amman yookko; osachchinam amman yookko. Kichchechchina amman yookko; kadimminam amman yookko. Kina binnaa'immina amman yookko; kina wixxaa'imminam amman yookko. Qaaphphanchina amman yookko; annanni ihimminam amman yookko. Hasimmina amman yookko; uunjimminam amman yookko. Wixxaa'aka'a amadimmina amman yookko; binnaa'imminam amman yookko. Dereerimmina amman yookko; gobimminam amman yookko. Sa'imminam amman yookko; wocimminam amman yookko. Iittimmina amman yookko; sabimminam amman yookko. Oranchina amman yookko; xumminam amman yookko. Baxaanchi ixxi badallatiinsi edaa siidoo luwwi maha? Anim manni badaroo'isina Waa'i issaakkoo kee'mmaalli bax iyyo moo'ummo. Waa'i luwwi hundinam ixxi ammanenne mishisoo'isa issaa baxaakko; odim heer heerina hee'oohaannoomam manchi beet wodanonne dissaakko. Ihukkaarem Waa'i issu luwwa luxxaanniinsi lasaanchi afeebe'e la'eena xanoo xanooyyo. Manchi beet foorinne hee'ukkuuyyi er baxo baximmiinsii liiramimmiinsii e'lloo luwwi bee'isa la'ummo Manchi beet yakaa badaraa siidu luwwa itaatii agaatii liiramimmi Waa'i manchina uwwu uwwancha. Waa'i baxu bax hundim heer heerinam hee'oohaannooma la'ummo; eehannonne edakkam luwwi te'm xa'isakkam luwwi bee'e. Waa'im eekka issukkok manni ixxo baddoo'isinatte. Kaba yoo luwwi gaassim hee'ukkane; ka lasage ihoo luwwim gaassim hee'ukkane. Waa'i higu luwwa daba'llaa ihoo'isa issookko. Odim an ka uullanne hanqo'i oogaxxaannonnee muccuroo'm bikkennee barche'e moo'ummo. Anim I wodanonne hundem luwwinaa baxinaa amman yoo bikkina Waa'i baaxiilaanonnem ihukko xummaanonne oogatoohan ihukkisa la'ummo. Odim manni fooraam diinatiinsi maham e'lloo bee'an ihukkisa la'oo'isina Waa'i keenookko yaa sawwummo. Hanqina manni oosikii fooraam diinaxxekii lasaanchi qood matome. Mat lehoo'isam mullekim lehookko; lamikim fooshshi haalat matome; ee bikkina lamim qishirichchi ikko'i bikkina manni fooraam diinatiinsi e'lloo luwwi bee'e. Mannim ihukko fooraam diinat hundim mat beyyo mattamo; hundim buchchiinsi baxanto'i bikkina buchchannem daba'llitamo. Ee bikkina manni foorii iim firoo'isa mulli diinaxxi foorii uullanne aad aagoo'isa la'ookkok ayyette? Manchi beetina uwwamu sharad kan ihu bikkina baxoo baxonne liiramoohaanniinsi bagaan mullek e'lloo luwwi bee'isa moo'ummo; lehaa lasonne ihoo luwwa ayyim la'eena xanooyyo. Odim ka uullanne mannanne issakkam barche'e moo'ummo. Barche'e issakko'i keenim ixxuwwina qishixxookkoka hoogga'a wi'llitam hee'llo'o; hasso'isa issimmi malaayyim ee gassaa'n angannette ihu bikkina ayyim agaagookok hee'ukkoyyo. Ee bikkina anim ka'isa ikku'uuyyi foorinne hee'llam keeniinsi gaassim leto'i keen e'llitamo yummo. Annannannem odim ka lamiinsim hore'em qarantobee'i keenii ka uullanne ihoo jolle moo'llobee'i keenii gada'aammuwwa. Odim manni mixu luwwa siideena qoxxaa baximmanne hinkaa'nna badattamda'e moo'ummo; eekkam issiookk ixxuwwi beshshuwwanne to'achchimmiinsi ki'ukkaanninnetti ihukkisa xassummo. Ku hundim odim awwaad bee'anee hafachcha foocimmina yakimmisaa. Anga xaaxaa afuuroo ceemmaalli manchi sibaarinne ixxi gaqqi orachchoomam itookko. Hafachcha foocimmisa issoo duuha'anne lobakata siidimmina badarimmiinsi horoore usheexxisakku'uuyyi baximminne hofqax luwwa siidimmi e'llookko. Odim ka uullanne yoo mulli awwaad bee'i luwwam moo'ummo. Mat mullam hee'oo manchi yookko; qachchi te'im abbaayyi ixxena bee'e; ihukkaarem ixxoom baxonne qondoodimmiinsi usheexxaa la'ooyyo; ixxi gag siixxu amaxxannem iina ihookko yimma la'ukkoyyo. Ixxim an baaroommok ayyenatte? I gagina liirancha hoogoommok mahinatte? yaa ixxi gaga xa'mmookko. Kuk hundim hore'oomam awwaad bee'anee kichchechchi heechchaa. Baxxo'i baxik mish danaam ihoo bikkina mat xale'i ihimmiinsi lam ihimmi e'llookko. Lamiinsi mat ubukaare mullek ki'isookko; ihukkaarem mullam hee'ookkok ubukkaare ki'soo hara'mmaanchi bee'i bikkina ixxena aayye! Qiixxi ammanem lamim maqirem iinse'llota'n iibbookko; ihukkaarem mulla iinse'oo manchina hinkid iibbeena xanookko? Mat manchi mullam dabareena xanoobee'i hawwo lam manchi dabatteena xantamo; hara'mmashinne dadakko'i us qaqqisaa muramooyyo. Sogitano aa'oobee'i qawwi lommanchi adiliinsi qoor buxichchi woraadichchi e'llookko. Maham mat manchi buxichchi beetoo karamaa hee'ukkanee ihuta'nnim adil iheena xanookko. Mat ammane uulli minaadab hundim adila bikkaa adillano aa'oo woraadichcho awwontu'uuyyi moo'ummo. Ixxi adil ihaa gassoo doollenne ixxena ijaajamoo minaadab hore'em lobakata; ihukkaarem adillaniinsi dilloo ammane illageen baxu bax bikkina galaxxookkok mat manchim hee'ooyyo. Kukim hafachcha foocakkeena yakimmisa xigamoo awwaad bee'i luwwa. Waa'i mine aaggoo ammane ki lokko ege'lle; eehe'enne danaamo joriinsi annanni issita'a laqqambee'i qawwuwwi kitima hincaa'llamaanniinsi sogita'n sagara macceesimmina gudimmi lophphookko. Wocceena illage gaassitaa sawwihe; gaaggaabbaa Waa'ina ma'lluwwa uwwiteena uga'a aaggitte. Waa'ii iimanenne atii uullannetti ihukkisa sawwitaa woccoo woshshi hofqax ihona. Ma'lluwwina sawwitoo ammane eehanni bikkina haqaawwe'llootto; lobakata wocimminne huushantootto. Ee bikkina Waa'i qawwuwwanne liiramooyyo; Waa'ina ma'lluwwa uwwiteena uga'a aaggoo ammane dassoo'n uwwe. Ihukkaarem uga'a aaggaa uwwitoobee'an ihulas gaassitaa uga'a aaggibeeta'n kiina eran hee'ukko. Keese baaxiilonne aagisoobee'isa ki suum afukkisa wocona uwwititte; ka'isinne kaka wocummok la'oo'nnetteme yitaa Waa'i awwaadaanchi illagenne haafite issona uunximmiinsi gattootto. Eebeelas ki badallato bi'isona Waa'i quunqa ki anginnem weeccimmisa ihookko. Lobakat haqaawwii lobakata wocimmii awwaad bee'ane; ihukkaarem at Waa'a badde. Mat adil awwonsoo uullanne buxa barche'e issukkuuyyaa hanqam hoorukkuuyyaa moo'llaa maala'llititte; annannichchi gassaanchinam ixxeensi hanaan ihaakkoo gassaanchi yookko; odim hundiinsem hanaan ihaakkoo lob gassaanchi yookko. Uullik atoot exximmi hundinam erane; adilim ee atootiinsi awwaaxxookko. Bira iittoo manchi bira goddooyyo; ee'isam goddaanchi iheena hasoo manchi edaa siiduta'nnim ihaakkoo yooyyo; kukim awwaad bee'ane. Amaxxi lophphoo ammane itoo keen lophphookko; eelas summina an goddaancho yooqaxxiinsi annichchoomina awwaadoo luwwi maha? Baxo iittoo manchi lobakatam ihukko hoffoka ituta'nnimii danaam diriiro diriiraa garookko; ihukkaarem goddaanchi ee ixxi amaxxi bikkina u'nnamimminne diriiro hoogookko. Ka uullanne mulli kichche'isoo jor luwwa odim moo'ummo; oohim ka uullanne wixxaa'u amaxxi annichchinam hawwo eebimma te'im ma'lluwwi mashka'inne oo amaxxi hundim beeddaa qachchina afoo'n gatimma. Manchi beet am godabiinsi leexa'i angam qaramukkisam leexa'i angam daba'llaa marookko; hinkaa'nna baxonne badaruta'nnim amadaa maroo luwwi mahim bee'e. Ka leexa'a qaramaa leexa'am daba'llaa marimmi lobakata kichche'isoo luwwa; ixxi yakitoom hundim hafachcha foocimmis ihulas uwwoo awwaad maha? Ixxi umuram guullookkok tuunsinne wo'mmaakkoo heechchanne, kichchechchanne, u'nnansoo sawwitenne, qacqacimminnee xissinnettee. Eehannah an moo'ummi er luwwi hee'uta'n manchi beet ka uullanne ixxena Waa'i uwwu gundi umu'l doollenne e'llookkok yakukkoka hundam itimminnee agimminnee liiramimma. Ixxena yoo sharad kan xale'e. Waa'i hundi manchinam amaxxaa goddaa uwwukkok badallaxxeka sharada itimminnee agimminnee liiramoo'isa issaatette; oohim Waa'i uwancha. Waa'i ka hundannem woda'n liirammato uwwu bikkina umu'l qeeraa'lloominam ihukko gundimmina lobakata kichche'ooyyo. Ka uullanne mannanne hundannem afoo hore'em jor luwwa moo'ummo. Waa'i manchi beetina ka uulli amaxxa, goddaa lombee hundam uwwookko; ixxena hasisoo luwwiinsi maham hoffiisooyyo. Ihukkaarem ixxena uwwoo amaxxi hundannem liiramooyyo; hore'oomam ixxi badaraa wixxaa'ukkaannonne mulli manni itookko; kukim awwaad bee'anee lobakata kichche'isoohanee. Ee'isam mat manchi xibbi ooso qaruta'nnii qeeraa'l umura siixxaa lobakat doolle hee'uta'nnii gaga liiranseena hasisoo luwwika sharada siidoo'n gataa er waamma siixxubeelas ixxi heechchi awwaad bee'ane; eehido'i manchiinsi am godabonnem lehaa qaramu kar e'llookko yummo. Ee karik qaranchi awwaad bee'ane; ixxi xadamaa gatoo tuunsonne aagookko. Ixxi summim tuunsinne ifiisamookko. Ixxi eelliinchi caakka moo'oo'n te'im heechchi bikkina maham la'oo'n matemaaggem usheexxaakko. Manchi beet lam kum hiincho hee'ukkaarem liiramubeelas ee kariinsi mahinne e'llookko. Manchi beet ihaakko yimma la'ubee'aarem baxonne badarookkok itoo luwwa siixxeenatte. Eehannah qoor manchi qawwiinsi mahinne e'lloo? Buxichidu ixxi heechcha awwonseena xanimmi ixxena maha awwaadoo? Mixaninne xeebe'immiinsi yoo luwwanne galaxxakka'a hee'immi e'llookko; kukim awwaad bee'anee hafachcha amadakkeena yakimmaa. Ka uullanne yoo luwwi hundim gaassim summ uwwamaakkoohane; manchi beetim ayyedda'i ihukkis la'amaakkoohane; ixxeensi hanaan ihukkaanninne uullixxameena xanooyyo. Woshshi lophphoo ammane huushanchi lophphookko; ee bikkina wocimmi lobakat maha awwaado? Qishirichchi ihaa hafisa higoo doollenne manchi beetina awwaadoo luwwa la'oo ayyette? Te'im manchi beet lehaa lasage ka uullanne mah ihoolda'e ixxena ayyi kureena xanookko? Bit xee'aalli ihaakkoo danaam shitto'iinsi danaam summi e'llookko; qaranchi balliinsim leh balli e'llookko. Leh mannanne hundannem afoohan ihukkisa tiissiisoo bikkina bollochcho'i mine marimmiinsi wi'l mine marimmi e'llookko. Kichchechchi tiirina eran ihu bikkina osachchiinsi kichchechchi e'llookko. Qoor manchi wodan wi'l minennette; ihukkaarem qawwi manchi wodan liiranchi minennette. Qawwi kee'n kajja macceesimmiinsi qoor kee'n shaaqimma macceesimmi ee'llookko. Qawwuwwi kee'n osachchi fiimaadiinsi woroon yoo utti gii'l xoxanqisa ihu bikkina maham awwaadoobee'i luwwa. Barche'e issimmi qoor manchom qawwi issookko; ee'isam maqanxa aa'immi er haalata bi'isookko. Ayyi luwwikim asheero'iinsi goollo'i e'llookko. Amaadaanchiinsi loboka xa'nnoo manchi e'llookko. Quuqimmi qawwuwwi keen baado firoo goog ihu bikkina at quuqimmina gaaggaabbitte. At ka doolliinsi gaassi doollenne baxamu luwwi hundim hinkaa'nna lobakata e'lloohan hee'ukko? yitaa xa'mmititte. Mashka'oomim kido'i xa'mmichchi qoor manchiinsi firoohaneyyo. Qoorooma gulummi'nnoo danaam ihu bikkina ka uullanne hee'oo manni hundim eekka hasimmi hasisookko. Qooroo'm daato'oom amaxxi daato'oo'mmisa; ee bikkina qooroom foore egeroo bikkina amaxxiinsi e'llookko. At hino'o Waa'i baxu baxo qoosse; ixxi boqqisukkoka ayyi haabeena xanookko? Luwwi hundim taaphanoo ammane liirame; hawwi afoo ammanem qoosse; hawwimii heellimii Waa'iinsetti ihu bikkina soodonne waaroo luwwa ayyim la'eena xanooyyo. Ka awwaad bee'i ihaakkoo i heechchi doollenne lam luwwi oohim boqqi ixxi jollinnem lobakat umura hee'ukkuuyyi, odim erok ixxi eroomminnem bi'ukkuuyyi moo'ummo. Ee bikkina qaqqisom bi'lloobee'isa hig qooraa lobakatam muccuraa ikkitte. Amman afoo'nnim letoobee'isa higimaancho joraa xiiqqammaanchoo ikkitte. Waa'a baddoo manchi hawwi hundiinsim fireena xanoo bikkina hawwiinsi ki gaga ege'lle. Mat beero'onne hee'llam tommi gassaaniinsi loboka qooroom qoor manchina qoxximma uwwookko. Mahannem huushamoo'n hundi ammanem danaam luwwa baxoo er manchi heer uullanne siidamooyyo. Ki awwaadaanchim keese duumukkuuyyi macceesseena xantoo bikkina manni wocoo woshsha hundam guddaa macceesseena hassitte. At ki gagoomim ikkita'n hundi ammanem mulli keeno duuntittuuyyi hee'lloo'isa xadditte. Iina yoo qooroominne hundinnem ka hundam saarayyaa la'eena awwaaxxummo; lobakata qoor iheenam murte'aa hee'ummo. Ihukkaarem an xanoommaanniinsi hanaanette ihukko. Hore'em xillaallaa kee'mmaallaa ihu bikkina qooroo'm woshsha saarayyaa la'eena xanookkok ayyette? Ihukkaarem an hundem luwwam saarayyaa soroobimminne afimmina i gagooma uwwummo; I xa'mmichchuwwina dabachchi ihoo luwwaa qooroomaa siidoommisina, macceesimma hoongim hinkaa'nna kichche'isoohanee qawwoomaa ihukkisa saarayyaa la'eena murte'ummo. An lehiinsi hanaan qaraaraalli ihaakkoo mulli luwwa siidummo; oohim meenti qaashshi ihukkisa. Mat meentichcho shikkisa ihaakkoo iittinne goona qaashshamo; lokko karakkam chimchi'mmisa ihaakkoo anginnem xaxamta'a amaddeena hassamo. Xale'i Waa'a baddoo manchi iseensi gibaa xoreena xanookko bagaan baaxiilaancho qaashsha'a amaddamo. Qoorachchi manchim Oono'o, ee lasage saarayyaa siidummi mulli woshshi odim kane. Oohim mulli dabachcha siideena hasaa hoogimma; mat kum goo'n lambe'enne xabbeen wodan yoohane yakkam mat gooncho siidummo. Ihukkaarem meentiinsi matom siideena xanummoyyo. Saarayyaa afummi mulli luwwi odim Waa'i manna xabbee'n wodan yoo keen issaa qooccaakko. Ihukkaarem ixxuwwi hundem hantaarom qooccito'o yukko. Qoor mancho labookkok ayyette? Woshshika tirato la'oo'oo ayyette? Qooroom mannika illi kollo caakkisookko. Kee'mmu illi kollom dabassookko. Adilina ijaajamoommo yitaa hide'imminne Waa'ina sagara aaggitti bikkina adilina amma'nnantaattoohan ihe. Adil ixxena mishisu luwwi hundam isseena xanoo bikkina jor woshsha amaddaa ixxi illagenne uullititte. Adil hundem luwwam isseena malaayyi yoo bikkina mahina kaka baxxitto? Yaa xa'mookok ayyette. Ixxi jaajo egettittaare hawwodantooyyo; ku hundim ihoo ammanee duuha'aa annanni issaa la'ookkok xale'i qoor mancho. Luwwi hundam issimmina hanqo'i ammanii wo'mmaakkoo duuha'ii hee'ookko; ihukkaarem ka hundam saarayyaa la'oo'isina manchi beetina uwwamu lachchi wo'mmayyo. Iheena yoo luwwa la'oobee'i bikkina kuk ihookko yaa kureena xanookok ayyette? Ayyi manchim foor firoobee'isa hooreena te'im lehoo balla dabareena xanooyyo; qasanchi lambe'ennem ayyim lasinne gibeena xanoobee'isam jollim jora baxichcho fatakooyyo. Ka uullanne ihoo luwwa saarayyaa xassummo; mat manchi mulleka hawwodeena daannooma siidookkok mahinatte? Ee'isam baaxiilaan keen lombinne waammamtu'uuyyi moo'ummo; Waammi lasage ihukkaarem ixxuwwi jolla issito'i ee beero'i manni wixxita'a ixxuwwa diraansitu'uuyyi moo'ummo. Oohim awwaad bee'ane. Jor baxoo keenonne qaqqiso oogatakkobee'i bikkina manni oosik wodan jora baximmina qoxxookko. Oohim baaxiilaan xibbaagge baaxiilo baxxota'nnim qeeraa'l umura siidda'a hee'llamo. Ihukkaarem Waa'a badditam keeninaa ixxom lonsitam keeninaa hundem luwwim makkoo'isa la'oommo. Ihukkaarem baaxiilaanina ma'lluwwim makkooyyo; Waa'a badditambee'i bikkina ixxuwwi umur hafisa higookko. Ka uullanne ihoo awwaad bee'i luwwi yookko. Mat mat ammane er manni jor keenina hasisoo guzumo'o aa'llammo; jor manni odim er mannina hasisoo luwwa siiddamo. Oo hundim awwaad bee'ane yummo. Ee bikkina manchi beet ka uullanne hee'ukkuuyyi uwwamu gada'i itimma, agimmaa ixxi gaga liiransimmaa ihukkisa la'ummo. Waa'i ka uullanne uwwu doollenne manni hundim baxaa siidu amaxxinne liiramookko. Qoor manchi iheenaa ka uullanne ihoo luwwa hundam saarayyaa la'eenaa yakummisinne manchi beet ballaa hiimoo usheexato hoogaa hee'oo'isa qoossummo. Manchi beet lobakata saarayyimminne Waa'i issoo luwwi hundam la'eena xanoobee'isa qoossummo; manchi beet lobakat luwwa saarayyaa la'eena yakukkaarem maham siideena xanooyyo. Eeyya qoor manni iggimminne kaka lanqoommo yeena xanookko. Ihona bagaan laqqam luwwi bee'e. Mucculluwwikii qoolluwwikii baxxo'i bax Waa'i angannette ihukkisa saarayyoommisina ka hundam i wodanonne sawwummo; iitti te'im woc illagenne yoo ammanenne hee'oo'isa manchi beet ixxi illagenne yoo ammanenne ixxo mah egerooda'e la'ooyyo. Muccurikii jora baxichchikii, jorikii eraannikii muccurikii haashaarammikii kitima hincaa'oohaannikii kitima hincaa'oobee'aannikii hundikim saam mato; er manchina baaxiilaanchaanniinsi e'lloo saam bee'e hiditano baddoo manchim hide'oohaanniinsi annanni ihaa moo'amooyyo. Hundikim saam mato; ixxim ka uullanne ihoo ayyi luwwisam hore'em jora; mannim heechchi doollenne ixxuwwi tii'l jollinnee machchaallinnee wo'mmaa lasaanchonne lehookko. Lehaakkoo hobbichchiinsi foorinne yoo wishichchi e'llookko; ee'isam foorinne yoo manchi hundinam neeyyat yookko. Foorinne yo'i manni mat balla letamisa laqqamo; ihukkaarem leto'i keen maham laqqamoyyo; horem xadanto'oo keen ikko'i bikkina matem awwaadim bee'e. Ixxuwwik iittanchi, wocanchii to'achchii hundim ixxuwwinne maqirem lehaakko; ee bikkina ka uullanne ihoo luwwi hundannem la'mmeka baxamimmi lasaanchi afeebe'e ixxuwwina hee'ooyyo. Waa'i gaassaatim ihona yaakkoo bikkina at mattaa ki hurbaata liirantittuuyyi ite; woyi'n diqaasam aggaa xeebo mu'lle. Hundi ammanem qadaalli eddechcha edde'llaa ki horoorenne lii'llisoo luwwa laphphe. Waa'i kiina ka uullanne uwwu ka qishirichchi heechchanne iittitoo ki mi'n amanne liirame; ki badallatinaa ki hawwinaa hundinam miqamu bit ka qax ihu bikkina ka awwaad bee'i ki heechchi doollenne balli hundam liirame. At leh manni kolli mattoo ammane ee beyyonne baximmi, sawwimmi, lachchii qooroomii bee'i bikkina kiina yoo qax malaayyinne hundinnem qoxxitaa baxe. Ka uullanne odim mulli luwwam moo'ummo; oohim geerako'i bikkina xoreexxo'o kaa'akambee'isa geedduwwim ora kaa'oobee'isa; qoolluwwi balli hurbaata lachchaammuwwim amaxxa siiddamoyyo; odim lachchaammuwwim lombiinsi lombanne higgamoyyo. Ihukkaarem hundi luwwinam amman yookko. Ihona bagaan annannichchi annannichchim ku jor saam hinki ammane amadooda'e la'ooyyo; Cii'ichchi bararaa kiyyo'onne amadamoo'isa, qurxumme'im sawwoo'nnim shikkanne aagoo'isa, ee'isam manchi beetim sawwoo'nnim dangonne afoo jor hawwonne aagookko. An ka uullanne moo'ummok mulli luwwim yookko; oohim qooroo'mmeka lophphaakkoo kobi'llatto. Hofqax mannim hee'oo mat gootto'i beero'i hee'ukko; mat malaayyaam adilim geejji girba axisaa ee beero'o qaseena ki'ukko. Ee beero'onne hee'oo mat qoor buxichchi manchi ee beero'o ixxi qooroominne gatisukko. Ihona bagaan ee buxichcho ayyim sawwukkoyyo. Qooroom malaayyiinsi lophphoo'isa wocaammo; ihukkaarem buxichchi qooroom gadamaakkoohane; ixxi wocoo woshsham ayyim macceesooyyo. Qawwi kee'n dummichchanne shuuroo adi'l sagariinsi qaphphaa wocoo qoor manchi woshshi e'llookko. O'l mu'utiinsi qooroom e'llookko; ihukkaarem mat baaxiilaanchi lobakat eroomma bi'isookko. Lehu biimbe'i axisakko'i enje'oo zayixxi shitto'o bobsoo'isa hofqax qawwoom qooroomaa lombaa bi'sookko. Qoor manchik wodan makki kollonne mashkollookko; ihukkaarem qawwi manchi wodan qeddi kollonne mashkollookko. Qawwi taakke'oo goog hundannem sawwitbee'e taakke'ookko; manni hundinam ixxi qawwooma la'isookko. Ki daanni keesenne quuqoo ammane ki bax beyyo fatakititte mashka'oomim sa'itaa egettittaare lobakat bi'ishshim yoota'n haafite siiddeena xantootto. Ka uullanne moo'ummi mulli jollim yookko; oohim ka uulli gassaan baxoo huushammato. Ceemmaalli keen lob beyyonne afuuttu'uuyyi goddaan hoffi beyyonne afuutto'o. Agid faradonne saa'llita'a ihukkaarem Moollanno'i agixxisa lokkinne matu'uuyyi moo'ummo. Bare hinookkok ixxi gagim ee barenne ubeena xanookko; qasha gindookkokam hamashshi qaseena xanookko. Kina anookkok anu kininnem ixxi gaga hawwodookko; haqqa anookkokim anu haqqinnem mada aa'ookko. Xaar juujoohaare qareesakkobeelas lobakat malaayye fissiisookko; ihukkaarem qooroominne baximmi er misha siidimmina hara'mmookko. Gennaanchi hamashshichchi qasaa lasage gennukkaare ixxi gagina siixxoo luwwi bee'e. Qoor manchi ixxi qooroominne lomba siixxookko; ihukkaarem qawwi manchi ixxi suu'm wocinnem bi'ookko. Qawwi woc qawwoominne asheeramaa lobakat machchaallinne goollamookko. Qawwi woshsha lonsookko. Manchi lehaa lasage ixxena mah ihoolda'e kureena xanookkok ayyim bee'e. Qawwi baxoo bax ixxi gaga hoogisoo bikkina beero'o marakkam googo qoossooyyo. Ooshshichchi adilii daram maadda ittu'uuyyi dimbitam gassaanii yoo uullina aayye. Wolabbaninne li'aakkoo adilii dimbimminatti ihoo'n xale'i malaayyee qoxximmaa siidimmina ihaakkoo ammane ittamii aggam gassaanii yoo uulli maasse'amaakkoohane. Manchi ixxi garoo mine qoxxisimma uraa innaannulas mi'n iiman laphookkoo cophookkomee. Itakkam hurbaatinnee woyi'n diqaasinnee makkii liiranchii siidamookko; ihona bagaan oo hundim diinat bee'e siidamooyyo. Macceesookkok bee'e yitaa maaxaqqannettem ihuta'n adila hamititte; ara'anne iinse'llaatim goddaancho game'llititte; maaxaqanne wocci woshsha macceessam keen ladaam cii'ichchisa baratta'a kutteena xantamo. Lobakat amma'n lasage dabattaa siiddoo bikkina at ittoo hurbaata wo'onne ubbuuse. Waaroo doollenne ka uullanne hinkido'i jolli ihooda'e laqqoobee'i bikkina kiina yoo amaxxa lamar te'im sadeenti beyyonne baxxansitaa disse. Duub lobakat wo'o amadaa lasage xeen uullanne ga'nnookko; haqqi woroo'n qarannem ihukko hanaa'n qaranne ubulas ee ubu beyyonnem dufaa hee'ookko. Hafachcha egerookkok wixooyyo; duuba moo'ookkokim murooyyo. Hafachchi hafachchoo'isaa manni foorim am godabonne hinkid asheeroda'ee laqqoobee'isam luwwi hundam qooccu Waa'i ixxi baxo hinkid baxooda'e laqqeena xantooyyo. Wixxittok hundim mutooda'e mutooyda'e,, hinki wix duuha'i e'llooda'ee annanni issitaa laqqoobee'i bikkina daram ihukko maaro'o sire'e wiximma uttitte. Caakki danaamo; eelliincho moo'immi illina mishisookko. Manchi beet lobakat umura foorinne hee'ulas umu'l doollenne ka uullanne ihoo luwwi hundim awwaad bee'an ihukkisaa lobakat tuunsim egeroo'isaa xadoone. Ate woraadichcho! Ki woraadda'n doollenne ki wodan liiramona; ki wodan mixukkokaa ki illim moo'ukkokaa hundam isse. Ihukkaarem issitti luwwi hundi bikkinam Waa'i keesenne oogatoo'isa la'e. Woraaddanii harde'oo'm qoxallanii qaqqisom higoo bikkina kichchechchaa u'nnaa ki wodaniinsi hoore. U'nnansoo balli waaroo'nnii eese liiransooyyo yitoo hiinchuwwi afoo'nnii ki woraadda'n doollenne keese qooccukkoka sawwihe. Eelliinchik, aganikii boollaankikii caakki tuunsoo balli waarookko. Ee ammanem xeeniinsi lasage duubbuwwi ixxuwwi beyyo fatakooyyo. Amma'nnantoo ki wod huxe'ookko; kaba qoxxaalli ihu ki lokki hoogookko. Ki inqi hurbaata iicimma hogookko; ki illim jaamu bikkina qoossaa moo'ooyyo. Ki macci dummichchi sagaram macceesooyyo; koronte'ika te'im kajji sagaram macceesooyyo. Ihukkaarem cii'i sagarim keese diriiriinsi baqaa'ookko. Beqera firimma badditootto; lokkinne taakke'immi kiina kee'mmookko; ki horoor aancisa qadaallookko; ki gagam xantaa taakke'imma xantoobee'i bikkina lomma'nnu kochcha'nnisa gosaasantootto. Ki mixan hundim bi'ookko. Manchi beet lehoohane; waammoo keenim googguwwanne wi'llukkuuyyi geegeesookko. Kin birinne baxamu corim muramookko; worqinne baxamu saahinim iiqamookko; wo'i harachcho karakko'i usim muramaa wo'i barennem iiqamookko. Maar buchchi ihu bikkina buchchannem daba'llookko; fooroom ixxo qooccu Waa'i beyyom marookko. Lachchi manchi «Awwaad bee'ane! Awwaad bee'ane! Hundem luwwim awwaad bee'ane!» yukko. Oo lachchi manchi qoor ihu bikkina minaadabinam lachcha losisaakko. Dut kob'llishshuwwam saarayyaa la'aa lasage ogoranne aagisaa gudisukko. Oo lachchi manchi xabbeen sagara siideena saarayyukko; oo kitaabu sagalluwwim hanqo'anee amma'nnamaakkoohanee hee'ukko. Qoor kee'n woc mirgo'uwwa abuullakkeena awwaaxxakkam loshisa; ookkim mat Allaaraanchiinsi uwwamu uullanne kaaxxu xiribbuwwisa. I beeto, at ege'llimmi hasisoo dut luwwi yookko. Lobakat kitaabbuwwa kitaabakka'a guullakkeena xanakkamoyyo; lonsakka'a saarayyimmim malaayye hoogisookko. Oono'o, hundem luwwim kuramaakko; hundem luwwikim lasaanchi kane. Waa'a badde; ixxi ijaajom egeere; mashka'oomam ookki manchi beetina horoor woshshame. Waa'i manchi beet baxu luwwi hundam maaxamu luwwik matim gatoo'n joram ihukko eroka oogatina worookko. Salamoon mazmuulluwwiinsi hundiinsim lophphaa mishisoo mazmuura. Ki Iitti woyi'n diqaasiinsi lophphaa eran ihu bikkina ki suum eese suunqona. At laphphitootti shitto'i danaamisa enje'oohane; ki summa weeshimmi shitto'o wiximmisa. Baajaam landi keese iittookkok ee bikkinatte. I anga amaddaa hixixaa'e; maqirem geellona. Adil eese ixxi mine aagisukko. Neesem keesenne liirammoommo; lobakatam liirammommo; woyi'n diqaasiinsi loboka ki iitto lonsinoommo. Ee bikkina baajaammuwwi hundim keese lobakata iittookko. Ki'nnuwwi Yerusaalee'm baajaammuwwa, macceessehe! An heemachchatte; ihukkaarem danaamotte; i heemachchoom Qeedaa'l uulli dukkaa'nnisa. Ihukkaarem i dan Salamoon adilla'n mi'n dummuwwisa. Eese heemachchisukkok eelliinchi iibba; an heemachchatte ihummi bikkina gaddakkotte; iyyummi oos iinninne wocanto'i bikkina woyi'n kaashshi haqqi beyyo egeraanchi issito'o. Ee bikkina i gaqqi woyi'n kaashshi haqqi beyyo egereena amman hee'ukkoyyo. I iitti mancho, huno'o, iina kure. Ki gereebba allaattoottok hannonnette? Sammi gud eelliinchi ammane hafixxamoo'isa issitoottok hannonnette? Keese hasummuuyyi ki beshika gereebbi allaachcha awwonummuuyyi ille gunguu'llita'a binni binnitam meentichchosa ihoommok mahinatte? At meenti hundiinsim lophphaa mishissoo danaame! Beyyo laqqoobee'an ihulas gereebba konte'e awwontaa mare; ki fella'i wotallam allaaraa'n dukkaannuwwi gadanonne feessiise. I iitti manche; Faari'oon faraxxi gaare'uwwa hixixaa'oo faraxxi lambe'enne hee'oo danaam gannichcho labboolla. Ki xaba'n dan bito xee'aalli ki'nnisa; ki gaanjim inqu'u yakkam kininne wereeggaakkoohane. Ihukkaarem neese bi'l gurmbi yoo worqa kiina wereeggina baxinsoommo. Adil gundi ara'anne daabaayyaa yoohaannonne i shitto'i enji minenne wo'mmaa qibibukko. I iitti manchi i anuunnuwwi lambe'enne usheexxoo karbe'e yakkam enje'oo luwwisa. I iiti manchi Engaadanne yoo woyi'n kaashshi beyyonne mutu udma'i uulli enje'oo fiitisa. I iitti manche, at hinkaa'nna danaamotte, odim hinkaa'nna mishissoottotane. Ki illi handare'aanni'nnoohane. I iitti mancho, atim lobakata danaamona'e; lobakatam liiransitoohanena'e. Niikki ara'im latu hixisa mishisoohane. Ni mi'n utub digiphphi haqqa; mi'n iiman dadamukkokim hoominnette. An Saaroo'n uulli xiggeeraxxisaa cebbanne mutoo suuf fiixxisaa. I iitti mancho baajaammuwwi lambe'enne utti lambe'enne yoo suuf fiixxisatte. I iitti manchi mulli woraadduwwi lambe'enne doo'm haqqoronne lophphaa mishisoo appi'l mishisa. Anim lobakata liiramaa ixxi hafanne usheexxummo; xee'oo misham itaa liiramummo. Ixxi hurbaata itakkam mine eese aagisukko, ixxi iittom baandi'llisa eesenne iimiimaa'ukko. Ixxi iitti amadaa xissummi bikkina Zabiiba itissakku'uuyyi eese qoxxissehe; appi'l mishinnem eese liiransehe. Qeddi anginne bakkiisaakko; makki anginnem eese qaaphphaakko. Yerusaalee'm baajaammuwwa, iitti ixxi gagim ki'eebe'e mikmikaa'llakka'a ki'isansitakkambee'isa geeroo kukkussichchi summinnee udma'i uulli gaallichchi summinnee uunxoommo. I iitti manchi duunnuwwi haninnee beqelluwwi haninnee xophukkuuyyii geerukkuuyyii waaroo ammane sagar macceesamookko. I iitti manchi gaallichchika te'im kukkussichchika wotara labookko; oono'o, ixxi kaba ni mi'n ooxxi gadanonne uullaakko; maskootinne daaphphaa moo'oolla; hoffi afo'innem game'aa moo'oolla. I iitti manchi iina kid yaa wocukko. I iitti mancho, ki'e; i danaame, waare; maqirem mallona. Oono'o, hagayyi higaakko; xeenim ga'nnimma uullisaakko. Fiit uullanne fiitimma asheeraakko; zammarakkam amman afaakko; handare'i sagarim uullanne macceesamoolla. Oda'i mishimma asheeraakko; woirinim fiitaakko; fiit enjim uullanne wo'mmaakko. Ee bikkina, iyyaayya, ki'e; i danaame, waare; maqirem mallona. At kolo'i baalli woronne maaxamu handarekkichchisatte. Hino'o, mataa'lle ki ille moo'ise; ki sagaram macceesise; ki sagar mishisoohane; illi kollom lobakata danaamotte. Ni woyin fiitaakko; ee bikkina niikka woyina bi'isoobee'isa wengereella, ee hoffi wengereellichcha'a qaashshakka'a amaddehe. I iitti manchi iihane; anim ixxane. Ixxi suuf fiixxi lambe'enne diinate allaarookko. Hii'm tuunsi beeddeebe'ee baqixxi hafachchim hafachcheebe'ee, i iitti mancho, gaallichchisa te'im kukkussichchi wota'llisa baalli yoo duunnuwwi haninne geettittuuyyi daba'lle. An hiimo hundoomam i ara'annette ihaa i tiir iittukkoka hasummo; hasummo; ihukkaarem siidummoyyo. Kaba ki'aa beero'i hegeegonne googguwwannee wixxixxi beyyuwwannee i tiir iittukkoka hasoommo; hasummo; ihukkaarem siidummoyyo. Do'llu'uuyyi beero'o egettam manni eese moo'llo'o; anim «I tiir iittookkoka moo'llakko'onnihe?» yaa xa'mmummo. Ixxuwwiinsi hoffokam higummisam i tiir iittookkoka siidummo; xoroobee'isam qoxxisaa amadummo. Iyyummi minem massummo; an qaramummi minem aagisummo. Yerusaalee'm baajaammuwwa, iitti ixxi gaginne ki'eebe'i afeebe'e mikmikaa'llakka'a ki'isansitakkambee'isa geeroo gaallichchi summinnee udma'i uulli kukkussichchi summinnee uunxoommo. Daddaraa'n enjisa er enji yookkote, aduruusisa, karbe'e yakkam enjisaa daddaraa'n er enjisaa enje'llu'uuyyi wirii'l utuphphisa ikka'a ku udma'i uulliinsi waattamote ayyette? Oono'o, Salamoon faraxxi gaare'i Isra'ee'l geedduwwiinsi doo'llanto'oo lohayyi waardiyyuwwinne kibbanta'a waattamuulla. Hundim bisa'a amadakkamisa losso'oohane; orannem keenanto'oo keeno. Hiimonne afoo hawwinne uullixxameena annannichchim bi'isa'a lade'ukkisam garoohane. Adil Salamoon faraxxi gaare'enne afuuroo adilla'n barcum Liibaanoos uulli haqqiinsi baxamaakkoohane. Adilla'n barcu'm lokkuwwi kin birinne goolabamaakkoohane; bakke'oo luwwim worqinne wereeggisakko'oohane; ixxi afuuroo beyyi baar fatirinne baxamaakkoohane, woror Yerusaalee'm baajaammuwwi iittinne axissa'a baxxo'i wereeggi luwwinne axisamaakkoohane. Xiyoo'n baajaammuwwa, adil Salamoona moo'llakkeena waallehe. Ixxi lobakata liiramu bollochcho'i balla ixxi ama ixxena horoorenne issito'i adilla'n mare'e issaakko. I iitti manche, at hinkido'i danaamotte! Oono'o, at hore'em mishissoottotane. Ki illi gunguu'llitoo shaashshi afo'inne moo'akkamaare handare'aanni'nnoohane. Ki horoor Gala'aaxxi duuniinsi dilloo fella'i allaachchisa. Inqi ixxuwwi lambe'enne lijji mahim hee'oo'n lam lamo qaroo odda hoorakka'a wo'inne aanshakko'i qadaalli gereebbi allaachchisa. Ki suum kashar haarri fati'llisa mishisoohane; manninne woccoo ammane lobakata mishisoohane. Lamem xabanim ille gunguu'llitoo shaashshi afo'inne moo'akkamaare lam beyyonne baxxansamu oroomaa'n mishisa. Ki gaanji geedduwwi kum agilluwwii o'l mu'uttuwwii calcalaa moo'amoo o'l girbina baxamu kin ootamu Daawiit qasha labookko. Kiikki lamem anuunim qaf ihaa qaramaakkoo fuutto'i fiixxi lambe'enne allaa'lloo kukkussi wotalla labookko. Uulli soodeebe'ee tuunsim higeebe'ee karbe'i yoo duunaa aduruus yoo duunaa maraa usheexxoommo. I iitti manche, at hundemisam danaamotte; kurakkam luchchi mahim bee'etane. I idaayyichche, Liibaanoos duuniinsi i beyyo waare; Liibaanoosiinsi i beyyo waare; Amaa'n duuniinsi dille; hobbii kabeerii hee'oo Saniir duuniinsii Armooni'ee'm duuniinsii dillitaa waare. Iyyaayya, i idaayyichche, ki illi moo'oo'isii gaanji worqii iikka tiiro agaakko. Iyyaayya, i idaayyichche, ki iitti hinkaa'nna liiransoohane; ki iitti woyi'n diqaasiinsi lophphaa liiransoohane; ki shitto'i enji ayyi shitto'iinsim lophphoohane. I idaayyichche, ki suuminne maraphphi damaam daadoohane; ki woc iina adoo marabo; ki eddechchi enjim Liibaanoos uulli shitto'isa. Iyyaayya, i idaayyichche, at iina ootamaakkoo duubbi kaashshi beyyisa, xufamaakkoo bu'isaa koobamaakkoo wo'isattee. At xee'oo mishinne wo'mmaakkoo oroomaana yakkam mish beyyisatte. Odim naardoos, seego'i, ixaanii qarafii ee'isam aduruusisa enje'oo enji yoo annanni annanni haqqi hee'ookkotane. Ee'isam karbe'i, geeneeno'i fiitii annanni annanni enjii mutookkotane. At duubbi kaashshi worinne daadoo bu'isatte; heechchi wo'i firoo barette; Liibaanoos duu'n luguminne daadoo daajjisatte. Hanaa'n qa'l hafachcha, baqihe; woroo'n qa'l hafachcha, kid waare; i duubbi kaashshi beyyonnem hafachche; hafachchim er enjinne wo'mmaakkoohan ihona. I iitti manchim duubbi kaashshi beyyo waarona; doo'llamaakkoo misham itona. Iyyaayya, idaayyichche, an i duubbi kaashshi beyyo aagummo; i karbe'ee enje'oo fiitaa feerummo; i maraphphi kaashsham damaaminne itummo; i woyi'n diqaasaa adom agummo. I qarmanna, iittika xeebo mu'llitakkeebe'i afeebe'e ittehee aggehee. An iinse'aammo, ihukkaarem i tiir baqaakko. I iitti manchi «Iyyaayya, i idaayyichche, miiqakkam luwwi bee'i handarekkichche, hay ka gooca fooqaa'e. I horoor xeeninne aashaakko; horoo'l oddim baqixxi yiritinne aashaakko» yukkuuyyi gooca qoccookkoka macceesummo. I eddechcha sheelaxxaammo. Eehannah odim dabaraa edde'onannihe? I lokkom aanshaqqaammo. Eehannah hinkid dabaraa xussoommo. I iitti manchi ixxi anga afo'inne aagisukko; i godabim ixxi bikkina iyyimma hoogukko. Ee bikkina ixxena gooca fooqaa'eena iimummo. U'llummi xufa fooqaa'eena amadummisam i angiinsi karbe'i taktakukko; angi maxxaarinnem daadukko. Anim i iitti manchina gooca fooqaa'ummo; ihukkaarem ixxi daba'llaa maraa hee'ukko. An ixxi sagara macceeseena lobakata mixaa hee'ummo. Lobakata hasummo, ihukkaarem siideena xanummoyyo. Weeshummo; ihukkaarem mah dabachcham dabarukkoyyo. Beero'i woronne daba'llantu'uuyyi egettam manni eese siidda'a ganta'a madisso'o. Beero'i ooxxi goocam egettam waardiyyuwwi iikka weyyakka sheelatta'a massito'o. Ki'nnuwwi Yerusaalee'm baajaammuwwi i iitti manchomdu siiddakko'an ihulas an ixxi iittinne xissumman ihukkisa ixxena kullehe. At meenti hundiinsem lophphitaa danaame, ki iitti manchi hanqoomam mulli keeniinsi annannihe? Ixxi bikkina kaa'nna neese hidiissoottok ixxi mulli keeniinsi annanni ihoo luwwi maruchcho? I iitti manchi lobakata liiransoohanee mishisoohanee; tommi kum goo'n oos lambe'enne ixxo labookkok bee'e. Ixxi horoor quunqisamaakkoo worqa labookko; horoo'l saraatim laaluuncaa waawure'nnoo heemachchaa. Illi daajji gadanonne hee'oo adinne aanshakko'o laboo handare'isa mishisoohane. Xaba'nnek dan er enji yoo annanni annanni enji hee'oo duubbi kaashshi beyyisa. Ixxek suum enji mishisoo karbe'e daassoo fiitisa. Angi gurumbi yoo worqi biccisa mishisoohane; orachchi sanpheera yakkam bito xee'aalli kininne wereeggu daane'i inqisa. Lokki worqanne shooho'amu ibinabarada yakkam qadaalli ki'n utubbuwwa labookko. Hagar Liibaanoos uulli haqqinne wereeggu Liibaanoos uulli duu'nnisa. Ixxek suum maraphphisa xee'oohane; ixxi gagoomim mishisoohane. Ki'nnuwwi Yerusaalee'm baajaammuwwa, oono'o, i iitti manchii i beshichchii eekka laboohane. At meenti hundiinsem lophphitoo danaame, ki iitti manchi hanno marukko? Neesem kiinninne maqirem hansona ixxi hanno maruda'e niina kure. I iitti manchi ixxi diinate allaareenaa danaam danaam fiita feereenaa enji yoo ixxi duubbi kaashshi beyyo maraakko. I iitti manchi iihane; anim ixxetane; ixxi fuutti fiixxi lambe'enne diinate allaarookko. I iitti manche! At Tirxa'i beero'i'nnoo danaamotte. Yerusaaleemi'nnoo'i lobakata mishissoottotane. O'l mare'e amadaa maroo gogoxxisa baddisoo hibbi yookkotane. Hay ki ille iinniinsi ki'ise; ki illi eese qeefadaa karaa amadaakko. Ki horoor Gala'aaxxi duuniinsi dilloo fella'i allaachchisa. Ki inqi lijji maham bee'i lam lamo qaroo wo'inne aanshakko'i qadaalli gereebbi allaachchisa liiransoohane. Lamem xabanim gunguu'llitti shaashshi afo'inne moo'akkamaare lam beyyonne baxxansamaakkoo oroomaa'n misha laboohane. Iina lohayyi meenti adilluwwi, sadeentayyi bakki meentii xigiinsi hanaan ihaakkoo baajaammuwwii yookko. Ihukkaarem an iittoommote xale'i matette; isem miiqakkam luwwi mahim bee'i handare'i'nnoo'i danaamotte. Ise amana mexxo'i matetteme; ama ise mahiinsim lonsita'a iittitamotane; baajaammuwwim ise moo'aa biroolla; meenti adilluwwii bakki meentii galaxxoolla. Tu caakkisa bulluqtamote, aganchisa beleltamote, eelliinchisa caakkissamote, o'l mare'e amadaa maroo gagoxxisa hibbi baddisookkote ise ayyette? Cebbanne kaasamaa latu haqqa, woyin latukkisaa oroomaan fiitukkisaa moo'eena lawuza yakkam baaqeela laboo kaashshi yoo beyyo dillummo. Dangonnem i mixan lombi faraxxi gaare'enne adi'llisa afuussukko. Taa Sulaa'm uulli idaayyichche, waare; daba'lle! Neese keese qoossinaa moo'nnona waare; daba'lle! Mahinaa'm uulli kajjisa Sulaa'm uulli idaayyichcho moo'llakkamok mahinatte? Taa adi'l landichche, ki lokki kobe'i woronne moo'akkamaare hinkaa'nna mishisoohane; gubeed angi bax lachchaaminne baxamu inqu'u yakkam bito xee'aalli kina labookko. Kiikki sur woyi'n diqaas wo'mmaakkoo birille'e labookko. Lamad danaam fiitinne karakko'i aras farshima labookko. Lamem anuunim gaallichchi wotallika qafa labookko. Gaanji daane'i inqinne wereeggisakko'i qoto'akka'a egerakkam godo'isa; illi ee lob beero'i Hisboo'n ooxxi gooc gadanonne hee'oo wo'i delbuwwa labookko. San Damaasqo'o moo'immina baxamu Liibaanoos ki'n godo'o labookko. Ki horoo'l qoom Qarmeeloos duu'nnisa; horoo'l saraat haarra yakkam fati'l xaacca laboohane. Adilim ki horoo'l danonne qeefadamaakko. I iitti manche, at hinkaa'nna mishissoottotane? Hinkaa'nnam danaamotte? Ki iitti hinkaa'nna liiransoohane? Ki uullichchi dimbaaphphi haqqisa; anuunim calcalu ixxi mishisa. Dimbaaphphi haqqanne firaa misha feerimma iittoommo. Ki anuun calcalu woyi'n mish qaaphphisa ihona; ki fooshshik enji appi'l mish enjisa. Ki suu'm fooshshi er woyi'n diqaasisa. Eehannata'i er woyi'n diqaas i iitti manchi suu'm lambe'innee inqi lambe'innee «Ga'i ga'a» yukkuuyyi qaphphaa dillona. An i iitti manchitane, ixxi mixanim iinninnette. I iitti mancho, waare; beero'iinsi fillaa hax uulla mallona; hiimooma hundam eekke'enne higinsona. Baqite ki'nnaa woyi'n kaashshi beyyo mallona; oo woyi'n kaashshim fiitaada'ee oroomaanim mishaada'ee moo'nnona. Anim eekke'enne kiina i iitto moo'isoommo. Inkoy yakkam haqqi mish enjii ee'isam lobakata mishisoo annanni annanni haqqi mishii ni u'llummanne wo'mmaakko. I iitti mancho, ka haqqi mishiinsi gomoraakkoo keenoo haareechchi haareechchoo kiina dissaammo. Maha ihoo, at iyyummi anuuna iicu iyyummi beetisa ikkita'n. An googonne kiinninne exxaa keese suunqumta'n ayyi manchim eese gadam hee'ukkoyyo. Iyyummi minem keese aagisam hee'ummo; atim eese eekke'enne iitti bikkina losissam hee'llitto. Oroomaa'n mishinne xee'u er woyi'n diqaasam agisam hee'ummo. Ixxi qeddi anginne bakkisookko; makki anginnem qaaphphookko. Ki'nnuwwi Yerusaalee'm baajaammuwwa, iitti ixxi gaginnem ki'eebe'i afeebe'e mikmikaa'llakka'a ki'isansitakkambee'isa hadara yoommo. Is iitti mancho bakke'lla'a udma'i uulliinsi waattamote tute ayyette? Eraa kiyyumma keese siitto'i xuu'lla'ahim qatto'i appi'l yakkam haqqichchi lugumiinsi baqaa'ummo. Hundi amma'n iittinne ki wodanonne eese koobo'isa koobe; ki angannem koobeo'isa xale'i eese amade. Iitti lehi'nnoo'i qoxxaalla; to'achchim waammi'nnoo'i mogaalla; ixxek gii'l laban Waa'i laba'nnisa. Wo'i lophphimmi iittika giira bi'iseena xanooyyo; dirisam ihukkaare aanshaa masseena xanooyyo. Manni ixxena hee'oo amaxxi hundinnem iitto bitaa'eena yakuta'n manni ixxonne naacamookko. Anuunam fissitoo'n yo'i gootto'i aayya niina yo'o; eebaqqanchina xa'mmakkota'n ka niyyaayyana neese maha issineena xannam hee'nnummo? Ise qash ikko'ita'n egerimmina kin bi'l godo'o banxam hee'nnummo. Ise ooxxi gooc ikko'oota'n Liibaanoos uulli haqqi saanqinne baxamaakkoo xufa banxam hee'nnummo. Oono'o, an qashatte; i anuunim qoto'akka'a egerakkam beyyisa; an i iitti manchinne maqire ihoommi ammane ixxi xummaa liiranchaa siidookko. Salamoonina Ba'aalhaamoonanne woyi'n kaashshi beyyi hee'ukko. Ee woyi'n beyyom baxaanina kera'a uwwukko; oo baxaan annannichchim mat mat kum bira ixxena eebbam hee'llo'o. Iina i gaqqi woyi'n kaashshi beyyi yookko; Salamoona, at mat kum bira woyi'n kaashshi beyyi baxaanim lam xibbi bira massitakkeena xantakkamo. Taa i idaayyichche, duubbi kaashshi beyyonnette ikkaa i besh kiikka sagara macceesseena hassam bikkina hino'o, iina ki sagara macceesise. I iitti mancho, qaqqissaa i beyyo waare; enji mutoo duunnuwwanne chubbi chubboo kukkussichcho te'im gaallichchi wotara kobi'lle. Ooziy, Iyyoo'ataam, Akaazii Hizqiyaasii Yihudanne adilluwwi hee'llo'i doollenne Amoox beet Issaayyaasinne ihaa Yihuxxi bikkinaa Yerusaalee'm bikkinaa Waa'i wocu sagar kane. Iimane, macceese; uullim macceese. Waa'i «An ooso qaraa li'isummo. Ihukkaarem ixxuwwi eesenne bangujjito'o. Mirgo'i annichcho la'ookko; hallichchim ixxi moollannika gola la'ookko. Ihukkaarem Isra'eel la'ukkoyyo; i minaadab hore'em qoossukkoyyo» yoolla. Ki'nnuwwi baaxiilaan keeno; hawwojji tuubamaakkoo minaadaba! Jora baxoo kee'n qarancha! Ki'nnuwwik heechchi bi'aakkoohane; Waa'a uttakka'ahii Isra'ee'l keesammam gaddakkahii ixxonne afare dabattakko'ookko. Boqqoomanne boqqooma eddakku'uuyyi odim guzumo'ancha hassakkamok mahinatte? Ki'nnuwwik horoor xissinne, wodanim hoonginne wo'mmaakko. Ee bikkina lokki xura'iinsi ki'isaa horoo'l saraat afeebe'e ki'nnuwwi orachchonne fayya'oom bee'e; ki'nnuwwik orachchi omarinne, dashshinnee marinnee wo'mmaakko. Oohim xooqukkoyyo, fayye'ukkoyyo te'im zaytinne cukkamukkoyyo. Oono'o, ki'nnuwwi uulli udma'i ihaakko; beero'uwwim giirinne shokkaakko; abuulli uulli ki'nnuwwi illi moo'ukkuuyyim diina'an ihookko; hundam luwwam bi'isaa udma'i issookko. Xiyoo'n landichcho woyi'n kaashshi woronne yoo godo'isa, dabaquu'l woronne yoo dondisaa kibbamu beero'isaa ikko'ookko. Gogoxxi Moollanni Waa'i neese baraara gatisubeeta'n Soddo'mmisa inkaa hee'nnummo; Gomo'llisam bi'nnaa hee'nnummo. Ki'nnuwwi Soddo'm gassaano, Waa'ika sagara macceessehe; Gomo'l minaadaba, ni Moollannika losano macceessehe. Waa'i «Ki'nnuwwik kiti'm dut iina maha issookko? Kabad afeebe'e iina shokkiissakka'a hincaa'llakko'i gereechchi ambu'l kitimii lijji di'irii iina ihaakko; labee'nnek, gereechchi geexikii fellakkichchi ambu'llekii xiig eese liiransooyyo. I illagenne hincitakka'a i Keesammi Mi'n wixxixxi beyyo hance'llakkona xa'mmukkok ayyette? Kido'i awwaad bee'i kitima ka lasage hincaa'llakkotte; wiriissitakkam aduruus i illagenne shigigaa'oohane; ki'nnuwwik aga'n aaggi, usheexxaxxi balluwwii keesammi dummichchuwwii baaxiilinne wo'mmaakkoohan ihu bikkina an iittummoyyo. Aga'n aaggikaa qoodamaakkoo ugudduwwaa an sabaammo; oo keen iina kee'mmaalli iyyisa ihu bikkina iyyaqqeena xanummoyyo. «Uunxatina ki'nnuwwika anga i kolli biddiqaa'llakko'aarem an ki'nnuwwi kolli moo'oommoyyo; ki'nnuwwi manni xiiga duntakko'oo bikkina uunxato lonsitakko'aarem macceesoommoyyo. Ee bikkina ki'nnuwwi gaga aanshaqqitakka'a muccullehe; ki'nnuwwi baxxakkam jor baxo i illagiinsi qeessehe; hawwodimmam ullehe. Eroka issimma lossehe; hanqi bi'oobee'isa issehe; wor amadantokeenina hara'mmehe; adaraar oosika hanqa egellehe; busar meenti laachcha macceessehe» yukko. Waa'i «Waallehe, gadixxamona; ki'nnuwwik baaxiil muulli kashar ihuta'n fuutto'isa qadaallookko; xiiqqisa kashar ihuta'nnim baraxxisa qadaallookko. Eeyya yitakkolasii iina ijaajantakkolasii uulli maasso ittakkamo. Ihukkaarem sabbakka'a iina boqqitakkolas bisa'i itookko. An Waa'i kaka wocaammo» yukko. Amma'nnamaakkoo beero'i sa'aanchi meentichchosa ihukkok hinkidette? Illageen hanqo'i oogat yoohanee xummaan hee'oo beyyoo hee'ukko. Ihukkaarem kaba manna shoo keen wo'mmaakkoo beyyi ihukko. Ki bir ci'llukko; doo'llammi woyi'n diqaasim wo'inne caraqukko. Ki awwonsaan boqquwwaa gamaanina beshshuwwaa ikko'o. Hundim maqanxa iittitamo; a'llakkam luwwinam geerantamo. Adaraar oosika hanqa egettamoyyo; busar meentika meto'o macceessamoyyo. Ee bikkina Isra'ee'l malaayyaam Waa'i gogoxxi Moollanni «I diina'anne i quunqa dilliisoommo; iinninne uullixxantam keeniinsim baado miqisoommo. Kee'mmaalli quunqinnem guzumo'oommo; ci'lliinsi muccussoommo; ki haashaarancham bi'isoommo. Illagee'nnaanni'nnoo'i oogataanoo sogaanoo kiina ki'isoommo; ee lasage ‹Hanqi siidamoo amma'nnamaakkoo beero'o› yamantootto» yukko. Waa'i hanqo'an ihu bikkina Xiyoona oogatimminne gatisookko; Xiyoonanne hee'oo keeniinsim baaxiilo biiraa yoo keeno gatisookko. Ihukkaarem boqquwwii baaxiilaanii matikka'a liitantamo; Waa'a uttam keen bi'llamo. Iittitakkam hujuphphi haqquwwanne tuuttakkamo; doo'llitakko'i duubbi kaashshi beyyuwwannem sholle'llakkamo. Lasaanchonne buyyi giggiru odakkichchisaa wo'i bee'i kaashshi beyyisaa ikkakkamo. Giir bubboo ammane bura'i shokkoo'isa «Neese malaayyaammuwwa» yitam manni bi'llamo; shokkisa ixxuwwanne waaroo bichcha uullisookkok bee'e. Yihuxxi uulli bikkinaa Yerusaalee'm beero'i bikkinaa Amoox beet Issaayyaasinne ihaa Waa'i wocu sagar kane. Lasaanchi doollenne Waa'ik Keesammi Min yoo duun mulli duunnuwwiinsi hundiinsim lophphaa moo'amookko. Hoffi duunnuwwiinsi hundiinsim lophphookko; uulli minaadab hundim ixxi kollonne waattamo. Ee bikkina mulli minaadab «Seer Xiyooniinsi, Waa'i sagarim Yerusaaleemiinsi firookko; ee bikkina waallehe, Waa'i duunanne fillona; Yaaqoob Waa'i Keesammi Minem mallona. Ixxi doo'lla issinonam neese losisookko; neesem ixxi googonne malloommo» yitamo. Waa'i uulli minaadabanne oogatookko; dut kee'n lambe'iinsi woca bi'isookko. Ee bikkina ixxuwwi bisa'a maarashanne, bagadom jajjaranne dabattamo; Mat minaadab mulli minaadabanne ora ki'isooyyo; ee lasage o'l losano losookkokim hee'ooyyo. Yaaqoob ooso, waallehe! Waa'i caakkanne daba'llammona! Waa'a! Yaaqoob shumo'i ihu ki minaadaba hore'oomam uttaatto; oohim ixxuwwi eelliinchi firanne yoo manni kiiratinnee Filisxee'm manni genno'innee wo'mmito'i bikkinatte. Ki minaadabim mulli minaadabinne hamaaramaakko. Ixxuwwik uulli birinnee worqinnee wo'mmu bikkina amaxxi qaxiinsi hanaan ihaakko. Ixxuwwi uullannem farad wo'mmaakko; faraxxi gaare'ikim xig dutaakko. Ee'isam ixxuwwi uullanne qophpha'n waa'uwwi wo'mmaakkoohane; anginne baxxo'i misilluwwinam otossitamuulla. Ee bikkina manni hundannem tuullii sholle'nnii afookko. Moollanna, ixxuwwika baaxiilo haafititte. Waa'i quunqiinsii baddisoo ixxi hibbiinsii gattakkeena daawwa'uwwannee barennee maaxammehe. Bolxitam keen sholle'llamo; birantam keen bi'llamo. Ee balla xale'i Waa'i lombinne iimiimookko. Gogoxxi Moollanni Waa'i bolxitam keenoo birantam keenoo sholliisoo balla qoodaakko. Ixxi Liibaanoos uulli qeeraa'l digibbuwwaa Baasaa'n uulli oda'uwwaa hundam bi'isookko. Lob duunnuwwaa hoffi duunnuwwaa, beero'i egerakkam qeeraa'l godo'uuwwaa o'l girbuwwaa hundam shiraashirookko. Lobakat mishisoo mu'utaa Tarsees wongiraa xuuxamoo'isa issookko. Waa'i uulla huxiiseena waaroo ammane quunqiinsii baddisoo hibbiinsii xorimmina ki'nnaannonne daawwa'i woronnee uulli ba'l woronnee maaxanteena yakitamo. Manni ee keenina otossiteena ixxuwwi anginne baxxo'i bi'llekaa worqi misilaa fuuxe'inaa garashshamminaa ubbussu'uuyyi mattamo. Uulla huxiiseena Waa'i ixxi quunqinnee ixxaanninne baddisoo hibbinne waaroo ammane eehanniinsi maaxanta'a xotteena ki'nnaannonne daawwa'annee ki'n beqeeqannee maaxantamo. Fooshshi sanenne yoo lehoo manchonne bakke'immi gatona; ixxi mahinam awwaadooyyo. Oono'o, Gogoxxi Moollanni Waa'i minaadab bakke'llam luwwi hundam Yerusaaleemiinsii Yihudiinsii bi'isookko. Ixxuwwika hurbaata, wo'o, geedduwwa, gaadaano, daannuwwa, hiraagaano, gennaano, lommanna, o'l awwonsaano, sogaano, kiiraanoo qoolluwwaa bi'isookko. Li'oo keenoo umuranne hoffi oosoo awwonsaan issookko. Mat mulleka wor amadookko; beshichchi beshichchonne ki'ookko. Woraadichchi lommancho lonsooyyo; gadamaa hee'oo manchim lombaam manchonne bolxookko. Mat abaroos ixxuwwi abbaayyuwwiinsi mato doo'llita'a «Kiina mulli luwwi bee'ukkaarem edde'lloo luwwi yoo bikkina niina awwonsaanchi ihe; gindamu luwwim ki gassi woronnette ihona» yitamo. Ihukkaarem ixxi sagara iimaa'aa ee balla «I minennem hurbaatii eddechchii bee'i bikkina ki'nnuwwina maham isseena xanoommoyyo; ee bikkina eese awwonsaanchi issitakkotte» yaa dabarookko. Yerusaaleem tartaroolla; Yihudim ubeena hincaakko; mashka'oomim ixxuwwi woccam wocinnee baxxam baxinnee Waa'a quuqissa'a ixxeka lomba sholliisso'ookko. Ixxuwwi illi kolli ixxuwwi bikkina naqqasookko; Soddo'm mannisa baaxiilo maaxxoo'n ilbiiroom woccamo. Ixxuwwi gaganne bichcha eebaqqito'oo bikkina aayye! Er baxika bito siixxitam bikkina muccur keenina «Maasse'antakko'oo keeno» yi'llehe. Ihukkaarem baaxiilaanina aayye! Ixxuwwi baxika bito siixxitam bikkina ixxuwwanne bichchi afookko. Woraad i minaadaba wor amaddamo; meentim gassitamo. I minaadaba, ki'nnuwwi awwonsaan ki'nnuwwa huushisso'ookko; mattakkam googiinsim dabatto'ookko. Waa'i oogato'ina ki'aakko; ixxi minaadabannem oogateena gudaakko. Ee bikkina minaadaphphi awwonsaanoo lommannaa oogaxxi beyyonne hincaa'aa «Woyi'n kaashshi beyyo bi'issakko'ookko; buxiinsi boggakko'i amaxxam ki'nnuwwi minenne wonshitakko'ookko. I minaadaphpheka malaayye iiqqakkeenaa buxa boggakkeenaa xantakkamoyyo. An gogoxxi Moollanni Waa'i kaka wocaammo» yukko. Waa'i «Yerusaalee'm meenti bolximma lonsito'ookko; gaanje qeeraa'llisamukkuuyyi illinne qaqqasamookko; taakko annanni issamaa lokki guma'a chilchiyyeesamukkuuyyi cenqellamaa taakke'amookko. Ee bikkina ixxuwwi horoor boronshoo'isa issoommo; ixxuwwi orachchim maxaramookko» yukko. Ee balla Waa'i Yerusaalee'm meentika lokki guma'a, horoo'l shaashsha, agana laboo gaanji wereegga, macci gutichcha, angi guma'a, illenne gunguu'llakkam shaashshaa, idaayyuwwi gunguu'lloo shaashsha, cora, sabbata, shitto'i xaarmuusa, kitaaba, angikaa sa'nnekaa guma'a, uguxxi eddechcha, lombi eddechcha, kaabba, angi borsa, gagmoo'ixxa, talbi danaam fati'l eddechcha, horoorenne ka'llakkam wereeggi luwwaa afo'aam shaashshuwwaa hundam bi'isookko. Ee bikkina ixxuwwanne shitto'i bikkenne bob, sabbaxxi bikkenne us, horoo'l haabbi bikkenne boronshi, qamis bikkenne xiddi eddechchi, da'n bikkenne mateenchi ihookko. Ki'nnuwwik woraad bisa'inne geedduwwim orinne beedditamo. Yerusaalee'm gooccuwwi kichchechchinne wi'llitu'uuyyi afuutto'i meentichchosa leexa'aa gatookko. Ee ammane lamar meenti mat mancho amadda'a «Ni gaqqi hurbaatam intoommo; ni gaqqi eddechcham edde'nnoommo. ‹Goon beekeeno› yamammaa sholle'nniinsi ‹Ixxi meento› yamammaa weeshammoommisa isse» yita'a uunxitamo. Ee balla haqqi caafik lat mishisoohanee lombi yoohanee ihoo'isa Waa'i issookko; uulliinsi siidamoo mishim bichchiinsi gatto'i Isra'ee'l minaadaphphi wereegginaa liiranchinaa ihookko. Bichchinsi gatta'a Yerusaaleemannne hee'llona Waa'i doo'llu keen «Keesammuwwa» yamantamo. Waa'i Yerusaalee'mmeka haashaarancha muccussookko; oogato'innee ixxi malaayyinnee xiig dunamoobee'isa issookko. Ee lasage Waa'i ee beero'onnee eekke'e wixxoo keenonnee hundannem kee'mmaalli duuba ballanne, aphphoo gii'l caakkam hiimonne asse'ookko; ixxi lombim ee beero'o lob dukkaa'nnisa ambaa egerookko. Oo lombim ee beero'o balli eelliinchi shokkiisoobee'isa haf ihookko; xeeniinsii umbu'llamiinsim egeroo girbi ihookko. An i beshichchi bikkinaa woyi'n kaashshi beyyi bikkinaa zammaroommo. I beshichchina duu'n harishanne woyi'n kaashshi beyyi hee'ukko. I beshichchi uulla abuullaa kina feeraa fissukko; doo'llam woyinam ee beyyonne kaasukko. Ee kaashshi lambe'ennem egerakkam godo'o baxukko; misha ciinsakkam barem hinukko; ee lasage er misha mishookkoo yaa egerukko. Ihukkaarem qaraaroo misha mishukko. Ee bikkina i beshichchi «Yerusaalee'm minaadabaa Yihuxxi minaadaba! Hino'o, i lambe'ennee i woyi'n kaashshi lambe'ennee yoo woshshi moo'llakka'a oogattehe. I woyi'n kaashshi beyyina issumbee'i luwwi yoohonnihe? Eehanniinsi mulleka issimmi hasisoo luwwi yoohonnihe? Eehaare er misha mishookkoo yaa egerummaare mahina qaraaraalla mishukko? «Kaba an i woyi'n beyyonne issoommi luwwi kane; kululleetanne yoo qasha gindoommo; moochchi allaa'lloohanee daabbaroo beyyoo issoommo. Ee lasage oo woyi'n beyyo shuqunamoobee'i udma'i uulli ihoo'isa issoommo. Uttinnee halluttinnee ifiisamoo'isa issoommo; xeenim ga'nnoobee'isa duuba ijaajoommo» yukko. Gogoxxi Moollanni Waa'ina woyi'n beyyoo yamamukkok Isra'ee'l minaadaba. Yihuxxi minaadab ixxi liiramoo kaashshisa; ixxuwwi er baxo baxxamo yaa neeyyato issaa hee'ukko; ihukkaarem manna shitam keen ikko'o. Hanqa oogattamo yaa neeyyato issaa hee'ukko; ihukkaarem hanqa bi'isso'i bikkina minaadaphphek laachchi lophphukko. Mulkee'nneka abuulli uulla hoo'lliteenaa uulla xale'i ixxuwwi gulummi issiteenaa minenne mine abuullannem abuulla eddam keenina aayye! An macceesummuuyyim gogoxxi Moollanni Waa'i «Mishisoo lob minneewwi hundim diihookko; ee minneewwannem hee'oo manni hee'ooyyo. Tommi qaash uullanne kaasakko'i woyiniinsi sadeenti liitir woyina ciinsakkamo; lam kontaal hurbaata wixakko'i uulliinsi xale'i tommoo sadeenti kiilo'oo siidakkamo» yukko. Dimbisoo agga hasseena daram ki'llam keeninaa woyi'n diqaas shokkiiseebe'e aggu'uuyyi soodissam keeninaa aayye! Ixxuwwi maaddanne maasinqo'inne, diitta'inne, dibbe'innee xurumbinnee kaddu'uuyyi woyi'n diqaasa aggamo; ihukkaarem Waa'ika er baxo qoossitamoyyo. Ee bikkina ixxi minaadab lachchoonginne qeefadamookko; awwonsaan sibaarinne beeddookko; minaadabim wo'o hoogaa xeebe'ookko. Ee bikkina Si'ool godabo haraassaahii suume fooqaa'aahii ixxuwwa egeraakko; minaadab, minaadaphphi awwonsaan, kaddam keenii hawwisaanii eehe'e dillitamo. Manni hundim sholle'ookkoo hawwookko; bolxoo keenim sholle'ookko. Ihukkaarem gogoxxi Moollanni Waa'i ixxi lobaannooma hanqo'i oogatinne la'isookko; ixxi keesammoomam hanqinne la'isookko. Gereebbi geexxuwwi illagee'n biirannem allaa'llookko; di'ir lijjuwwii fella'i geexxuwwii gindamu beyyuwwanne hixe itookko. Qawwiishshi usinne baaxiilo, faraxxi gaare'i usinnem hawwojja ixxuwwi gaganne gosaassam keenina aayye! «Neese ni illinne moo'nnoommisina Waa'i isseena qoodu luwwa qaqqisaa issona, Isra'ee'l keesammi qoodu luwwa lanqoommisinam ixxi sawwit wo'mmona» yitam keenina aayye! Jora erane erokam jora yitam keenina, tuunso caakka caakkam tuunso yitam keeninaa xee'aalla qaraaraalla qaraaraallam xee'aalli issitam keeninaa aayye! Ixxuwwi gaga hayyo'uuwwaa qoolluwwaa issita'a xiggam keenina aayye! Woyi'n diqaasa agimmina geedduwwa dimbisoo agga hamaarimminam malaayyaammuwwi ikko'i keenina aayye! Maqanxa aa'lla'a hawwodu mancho kora'am fatakita'a hawwodu manchi hanqa bi'issam keenina aayye! Ee bikkina giir bura'a itoo'isa hixim shokkaa bi'oo'isa ixxuwwik lugum shamaa bi'ookko; fitim di'llisa binnookko. Ixxuwwi gogoxxi Moollanni Waa'ika seera gaddo'ookko; Isra'ee'l keesammikam sagara sholliisso'ookko. Waa'i quunqi ixxi minaadabanne dillaakko; ixxi anga ki'isaahim aphphisaakko; duunnuwwi huxe'aakko; leesh goog hundannem haccisa ubaakko; oo hundim ihaa Waa'i quunqiinsi daba'llukkoyyome; ixxi angi guzumo'eena ki'ukkisam yookko. Waa'i mulli minaadaba qee'lliinsi weeshoo mare'e uullisookko; uulli tochchi hundiinsim weeshookko; ixxuwwim geettu'uuyyi qaqqissa'a waattamo. Ixxuwwi lambe'enne hoogaanchi dimii hee'ooyyo; iinse'oohii diriiroohim bee'e; ixxuwwi ladimim tiramooyyo; caamma'i fatirim muramooyyo. Xiyyi shobamaakkoohane; tokkaashshe'im chokkoramaakkoohane. Ixxuwwi faraxxi konte'im banci'nnoohane; faraxxi gaare'uuwwi shafe'im hambu'llami'nnoohane. Hobbisa toxxamo; hobbichchi geexisam muuntamo. Hochchita'a amaddo'oka quunquuntu'uuyyi massitamo; ubbuusiseena ayyim xanooyyo. Ee balla dambalaq hambu'llamisa guggu'uuyyi Isra'ee'l minaadabanne waattamo. Oono'o, ayyim uulla moo'ulas tuunsinnee hawwinnee kibbamukkisa la'ookko; duubim caakka tuunsiisookko. Adil Ooziy lehu hiinchonne Waa'i qeeraa'l lombi adilla'n barcumanne afuuraakkoo moo'ummo. Ixxek lombi eddechchim Keesammi Mine ifiisaa hee'ukko. Suraafeelluwwi ixxi kululleetanne uullita'a hee'llo'o; ixxuwwina annannichchinam loh lad hee'ukko; oo keen annannichchim lam ladinne ille, lam ladinne odim lokko ifiissam hee'llo'o; lam ladinnem barattam hee'llo'o. Oo asse'amaan ixxuwwina'i ixxuwwim aa'aqqantu'uuyyi «Keesamma, keesamma, keesamma! Gogoxxi Moollanni Waa'i keesamma! uulli hundim ixxi lombinne wo'mmaakko» yitam hee'llo'o. Ixxuwwi laachchi sagarim Keesammi Mi'n shooho'o heekkeesukko; oo minim wiriirinne wo'mmukko. Anim «Oono'o, i suum haashaaramma; hee'oommokim suum haashaaramaakkoo manninnette. I illinne gogoxxi Moollanni Waa'a adila moo'ummi bikkina bi'aammo, iina aayye!» yummo. Ee asse'amaaniinsim mat bararukkuuyyi i beyyo waarukko; ixxi angannem kiti'm beyyiinsi massaa amadu gii'l kashar yoo qaph hee'ukko. Ee gii'l kasharinnem i suume nakkaa «Oono'o, ku gii'l kashar ki suume nakku bikkina ki hawwojji shiinshamaakko; ki baaxiilim haafamaakko» yukko. Ee lasage Waa'i «Ayye asse'oommo? Iina asse'amoodu ayyette?» yukkuuyyi macceesummo; Anim «Oono'o, an maroommo; eese asse'e» yummo. Ixxim «Eehan ihulas ka minaadaphphi beyyo mattaa ‹Macceesimmina macceessakkamo; ihukkaarem qoossitakkamoyyo. Moo'immina moo'llakkamo; ihukkaarem hindihitakkamoyyo› yihe. Odim «Illinne moo'llambee'isa, maccinne macceessambee'isa, wodaninne qoossitambee'isaa i kollonnem daba'llita'a fayye'llambee'isaa ka minaadaphphek wodan duudoo'isa, macci gawwo'isaa illi moo'oobee'isaa isse» yukko. Anim «I Moollanna, kuk ihookkok hinki amman afeebe'e?» yaa xa'mmummo. Ixxim «Beero'uwwi gindamaa, minneewwim manna hoogaa diiheebe'ee uulli mahimbee'i udma'i iheebe'ee. An ka minaadaba qee'l uulla holloommo; uullam udma'i issoommo. Tommiinsi mat manchi ee uullanne gatuta'nnim ixxim bi'ookko; ihukkaarem qilxo'oo giraaraa murakka'a lasage gatoo gugu'mmisa keesammi shumo'im uullanne gugu'mmisa ihaa hee'ookko» yaa dabarukko. Ooziyaan beet beet Iyyoo'aataamina beet Akaaz Yihuxxi uullanne adil hee'u doollenne Sooriy adil Raaxiinii Isra'ee'l adil Ramaaliy beet Faaquhii orancha hassa'a Yerusaaleema waatto'o. Ihukkaarem kaa'lleena xanto'oyyo. Sooriy minaadab Isra'ee'l minaadabinne Yihuxxi minaadaba qasseena a'llanto'isa Yihuxxi adil macceesaa ixxii ixxi minaadabii muggita'a hafachchi heekkeesu haqqichchisa heekke'llo'o. Waa'i Issaayyaasina «Atii ki beet Sheeryaashuubii Adil Akaazinne edantakkeena mallehe. Ixxom hanaa'n delbiinsi wo'i waaroo eddechcha aanshoo kee'n uulli gadanonne siiddakkamo. Ixxi qaphphihonaa baa'oobee'isaa giiranne aphphaa wiriiroo gudee'llisa ikko'i Adil Raaxiina Raamaaliy beeto Adil Faaquhee baddoobee'isa kure. Sooriy minaadab Isra'ee'l minaadabinnee ixxuwwi adilinnee keesenne dollotto'ookko. Yihuxxi minaadaba qasseena, u'nnissa'a ixxuwwi kollonne issiteenaa Xabi'ee'l beeto adillanina doo'lliteenaa qooddo'ookkoo. «Ihukkaarem an Moollanni Waa'i oo ixxuwwi a'llanchi awwaad bee'anee hore'em ihoobee'anee ihukkisa la'isoommo. Mashka'oomim Sooriyik horoor Damaasqo'o; Damaasqo'ik horoor Raaxiina. Lohayyennee onti hiinchi woronnee Isra'ee'l minaadab binnaa adillaninne weeshanchi gatookko. Ee'isam Isra'ee'llek horoor Samaare'e; Samaare'ikim horoor adil Faaquhette. «Ee bikkina amma'nnatonne qoxxitakkobeelas uullitakkeena xantakkamoyyo» yukko. Waa'i Akaazina odim «Uulli xilliinsem ihukko iima'n libo'iinsi mat mare'e uwwona ki Moollanni Waa'a uunxe» yoo asso asse'ukko. Ihukkaarem Akaaz «Uunxoommoyyo; Waa'am keenoommoyyo» yukko. Issaayyaasim dabaraa «Adil Daawiit abaroosa, macceessehe! Manna keentakko'ok hoffe'ukkaare i Waa'am keentakkeenannihe? Ee bikkina Waa'i ixxi gagim mare'e uwwookko. Oon'o, baajaamo lamfoorette ikkamo; goonchi beetom qattamo; summam ‹Amaanu'eela› yita'a weeshshamo. Ixxim jora uraa er doo'llimma xanoo ammane marabo itookko; adom agookko. Ihukkaarem oo ciil jora uraa eroka doo'llimma asheeroo'n illage ee lamem adilluwwikim uulli gindamaa udma'i ihookko. «Oono'o, Isra'eel Yihudiinsi annannukkaanniinsi kid moo'amaa la'oobee'i ammane Waa'i keesenne, ki minaadabannee kiyyanni minennee eebookko. Eeboohim Aasoo'l adila. «Ee ammane Abbaay daajji qee'l tochchiinsi Gibxi minaadaba biimbe'isa, Asoo'l minaadabam diishshisa gugaa waarona Waa'i mare'e uwwookko. Ixxuwwim hishshita'a fitta'a udma'i uulli cebbanne, ki'n girbuwwanne, uttolluwwannee allaachchi biilluwwannee wiiddantamo. «Ee ammane Waa'i Efiraaxiis daajji eeqidiinsi aggiisu milaacinne oohim Aasoo'l adilluwwi adilinne ki'nnuwwi horoore, haareeddaa orachchi odda hundamii hogoossookko. «Ee ammane mat manchina xale'i mat addichchii lam gereechchii hee'ookko. Oo keen lobakat ado uwwoo bikkina oo manchi ixxena hasisoo hurbaata hundam siixxookko. Ee bikkina uullanne gatoo mannik hurbaat maraboo adoo ihookko. «Ee ammane kum bira ihoo mat kum woyi'n kaashshi kaasamu beyyi hundannem uttii halluttii mutookko. Uullim uttinnee halluttinnee wo'mmaakkoohan ihoo bikkina minaadab hochchina firookkok xiyyinnettee tokkaashshe'innettee. Uttaa halluttaa baddaa wonnanninne abuullakka'a hurbaata wixakkam duunnuwwi kolli ayyim marooyyo. Ihukkaarem diinatii gereebbi allaachchii hosoo beyyi ihookko» yukko. Waa'i iina «Lob kirbaasa gudissaa ‹Bi'isseenaa qeefaddeenaa gaaggaabe› yitaa qabar fidalluwwinne kitaabe. Amma'nnanto'oo lamem manchom oohim qeessichchi Ooriyoo Baraakiy beet Zakkaaryaasaa naqaashshuwwi issitaa disse» yukko. Hofqax ammaniinsi lasonne hiraagaanchotte hee'llo'i i meentichcho iina siitto'o; goonchi beetom qatto'o. Waa'im iina «Summa ‹Bi'isseenaa qeefaddeenaa› yitaa weeshe. Oo ciil ‹Abba, aadde› yaa weeshimma la'oo'n gaassaa Damaasqo'i amaxxii Samaare'i qeefado'ii Aasoo'l adilinne bogamaa marookko» yukko. Waa'i la'mmaaggem iina «Ku minaadab qaphphaa daadoo Saliihoo'm bu'i wo'o sabaa adil Raaxiinaa adil Faaquhee doo'llaakko. Ee bikkina an Aasoo'l adila malaayyaam ixxi gogotinne maqirem ka minaadabanne ki'oo'isa issoommo; oohim Efiraaxiis daajji aqqaa tochchiinsi tochcho afaa wo'mmoohaannisa. Dirisukkuuyyim Yihuxxi uulla afookko; aqqaa hundi luwwam ifiisoo bikkina gaanji afeebe'e afookko» yukko. Ihukkaarem Waa'i niinninnette! Biddiqu ixxi ladim ni uulla egerookko. Ka uulli minaadaba, sha'llammehe. Ihukkaarem baddehe; qee'l uullanne hee'llakkam keenim macceessehe; orina guddehe. Ihukkaarem baddehe. Orina guddehe; ihukkaarem baddehe. A'llammehe; ihukkaarem sawwitakko'isa ihooyyo. Qooddehe; ihukkaarem Waa'i niinninnetti ihu bikkina qooddakko'isa ihooyyo. Ka minaadaphpheka googo awwonaa maroombee'isa Waa'i ixxaanninne wodaam malaayyinne qoxxisaa kurukko. «Ixxuwwi dollotto'o yitamoka ki'nnuwwi yitakkotte; ixxuwwi badditamoka ki'nnuwwi badditakkotte; muggitakkotteme. An gogoxxi Moollanni keesammi ihummisa sawwi'llehe; xale'i eesem baddehe. Iikki keesammoo'm lombi Yihuxxaanninaa Isra'ee'l minaadabinaa qolanta'a ubbam kina ee'isam Yerusaalee'm minaadabina qaash ihookko. Ee bikkina lobakat keen qolantamo; ubba'atim iiqantamo; qaashannem amadantamo» yukko. Iikka losano egere; i seeram iina awwonaa'n wodanonne koobe. Waa'i Isra'ee'l minaadabiinsi ille dabarukkaarem i amma'nnato ixxonne issoommo. Oono'o, anii iina Waa'i uwwu i oosii Xiyoo'n duunanne hee'oo gogoxxi Moollanni Waa'iinsi Isra'ee'l minaadabina uwwammaammoo mare'ee maalallatoo. Manni ki'nnuwwa «Lobakata wocukkuuyyii hashaashshukkuuyyii kiiroo keenoo wiidda weeshoo keenoo xa'mmehe» yukkaare eehannah minaadab ixxi Waa'a xa'mmimmi hasisam hee'ukkoyyonnihe? Hee'oo kee'n bikkinne wiidda weeshimmi mahina hasisukko? Waa'i ki'nnuwwina uwwu seeraa ijaajoo moo'llehe; eehido'i sagaramdu woccobeelas caakki ixxuwwanne bee'e. Ixxuwwi sibaarinnee u'nninnee uullanne karkaaddamo; sibaa'l lobakatiinsi ki'aa gancattamo. Iimane moo'llu'uuyyi adilaa ixxuwwi waa'aa duuntamo. Uullam heeshta'a moo'llamo; ihukkaarem moo'llamok u'nna, tuunsoo baddisoo umbu'llaa. Ee kee'mmalli tuunsonnem uunjantamo. Ihukkaarem u'nnanne hee'u keen ka lasage neeyyat bee'an ihooyyo. Illagee'n doolle Zaabiloo'nnekii Niftaalee'm uullii sholle'nnanne hee'ukko. Ihukkaarem lasaanchi doollenne Yoordaanoosiinsi eeqidonne Dambalaq gooqqi gammalanne mulli minaadab hee'oo Galii'l uullim lomba siidookko. Tuunsonne hee'am hee'u minaadab oono'o, caakka moo'ukko. Tuunsi uullanne hee'oo keeninam caakki firukko. Waa'a, ki minaadaba dutissitto; liiranchinnem wo'mmitamisa issitto. Manni atoota wixxaa'oo ammane te'im qeefajja baxxamoo ammane liiramoo'isa ki minaadabim at issitti luwwanne liiramookko. Gaassi doolle Miidiyaa'm manna kaa'llittisam kabadem ki minaadabanne iyyiisamu gaanjaqqaa cekkonne yoo biccoo iiqansitto. Ki minaadaba wor amadimminne gassam hee'ukkokam kaa'llitto. O'l manni kobe'ii xiiginne bi'aakkoo ixxuwwi eddechchii hundim giiranne shokkookko. Gii'l haqqisam aphphookko. Oono'o, niina ciilichchi qaramaakko! Goonchi beetim uwwamaakko! Ixxi niina awwonsaanchi ihookko. Summim «Maalalsiisoo sogaancho, malaayyaam Waa'a, heer heeraxxi annaa xummina daannaa» yamamookko. Adilla'n daannoomina gabal bee'e; adillanim heer heeraxxi xummi leeraakkoohan ihookko. Kabadiinsi ki'isaa heer heerina hanqinnee golo'oombee'i oogato'innee wo'mmaakkoo adillan Daawiit adilla'n barcumanne qoxxoo'isa issookko. Gogoxxi Moollanni Waa'ik to'achchi kaka isseena qoodaakko. Waa'i Yaaqoob shumo'i ihu Isra'eelanne oogatoohan ihukkisa la'isaakko. Isra'ee'l minaadabii Samaare'i beero'onne hee'llam keenii kaka issukkok Waa'i ihukkisa laqqamo; ihukkaarem bolxitam keenoo xiiqqaammuwwaa ikka'a «Harinne baxakko'i minneewwi gindamaakko; ihukkaarem neese daballaa cabbaramaakkoo kininne banxoommo; oda'i utubbuwwi iiqamaakko; ihukkaarem neese doo'llamaakkoo liibaanoos haqqinne uullinsoommo» yitamo. Ee bikkina Waa'i ixxuwwinne uullixxantam keeno ki'isookko; diina'im ixxuwwanne ki'llamisa issookko. Eelliinchi firoo kollinne Sooriy manna eelliinchi aagoo kollinnem Filisxee'm manna asse'aa Isra'ee'l minaadaba qassamisa issookko; oo hundim ihaa Waa'ik quunqi billukkoyyome; ixxi angim guzumo'eena biddiqukkisame. Ihukkaarem Isra'ee'l minaadab ee guzumo'u Waa'i kollonne daba'llukkoyyo; gogoxxi Moollannam hasukkoyyo. Ee bikkina Waa'i mexxo'i mat ballanne Isra'eeliinsi horoo'llisaa sheeri'mmisaa, dimbaaphphi caafisaa shomboqo'isaa ikko'i keeno murookko. Horoor lommannaa la'anto'oo keenoo; sheerim odim qophphano losissam hiraagaano. Ka minaadaba awwonsitam keen huushissamuulla; minaadabim googiinsi firaa jaljalloolla. Ee bikkina Waa'i harde'i keenonne liiramooyyo; adaraalluwwinaa busar meentinaa qishixxooyyo; hundim Waa'a baddoobee'anee jora issoohanee ihaakko; hundim shigigaa'oo sagara wocoohane; oo hundim ihaa Waa'ik quunqi billukkoyyome; ixxi angim guzumo'eena biddiqukkisame. Ee bikkina ka minaadaphphek jolli uttaa halluttaa itoo gii'llsa; udma'anne dooma itoo gii'llisa wiriir xabbaa uullu utuphphisa. Gogoxxi Moollanni Waa'i quunqinne uulli shokkookko. Minaadabim gii'l haqqisa ihookko; abbaayyim abbaayyo gatiseena xanooyyo. Godditeebe'e ittamo; ihukkaarem sibaatto'isame. Ee'isam mulli kollinne fii'lla'a ittamo; ihukkaarem godditamoyyo. Lasaanchonne ixxuwwi oosom ittamo. Oohim Minaase Efireema Efireemim Minaase qasookko. Lamem sullim mat ikka'a Yihuxxi minaadabanne ki'llamo. Oo hundim ihaa Waa'ik quunqi billukkoyyome; ixxi angim guzumo'eena biddiqukkisame. I minaadaba wor amadoo hanqibee'i seera fissitam keenina aayye! Bux keen hanqa siiddambee'isa issitam keenina, wor amadanto'i i minaadaphpheka hanqa bi'issam keeninaa busar meentikaa adaraar oosikaa amaxxa boggam keeninaa aayye! Ee damiginne Waa'i ki'nnuwwa guzumo'oo ammanee bichchi qee'l uulliinsi waaroo ammanee maha ikkakkamo? Hara'mmatindu ayyi beyyo mattakkamo? Ki'nnuwwi amaxdu hannonne maaxxakkamo? Qeefadanchiinsii lehiinsii hinkid gattakkeena xantakkamo? Oo hundim ihaa Waa'ik quunqi billukkoyyome; ixxi angim guzumo'eena biddiqukkisame. Waa'i «I quunqina biccisa i axeellatinam mugisa ikkitti Aasoora, kiina aayye! Amaxxa bogaahii qeefaddahii minaadabooma gooqqi ha'llisa kade'llona eese quuqisu minaadabanne Aasoo'l minaadaba asse'oommo» yukko. Ihukkaarem ixxuwwik qoodo'i ee'isayyo. Oo sawwitim ixxuwwanne bee'e. Ixxuwwi sawwito'ok dut minaadaba guulliteenatti hee'ukko. Ee bikkina ixxuwwi adil «Iikki gaaxxi awwonsaan hundim adilluwwayyonnihe? Kaalnoona, Karkaamiisha, Haamaataa Arfaadaa ee'isam Samaare'ee Damaasqo'oo kaa'aammo. Yerusaalee'mmaanniinsii Samaare'aanniinsii lophphoo waa'uwwi yoo adilluwwa kanniinsi illageenim kaa'aammo. Samaare'ennee Samaare'i waa'uwwannee issummisam Yerusaaleemannee otossakkam Yerusaalee'm waa'uwwannee ee'isa issoommoyyonnihe?» yaa sharookko. Ihukkaarem Waa'i «Yerusaaleemannee Xiyoo'n duunannee issoommoka guullaa lasage ixxi bolxoo'm bikkinaa biranchi bikkinaa Aasoo'l adilluwwi adila guzumo'oommo» yukko. Mashka'oomim ixxi «Ka hundam issummok an gagame; an malaayyaamo, lachchaamoo qooraa. Adilluwwika gabala gindummo; ixxuwwi amaxxam bogummo. Ee adilluwwi uullanne hee'u minaadaba hundam geedoommaninne sholliisummo. Uulli minaadab hundim i illagenne cii'i do'nnis hee'ukko; quunqa wixxaa'akkamaannisa ixxuwwika amaxxa hundam wixxaa'aa massummo. Eekka issummi ammane cii'i laxxi qaxam mikmikukkok bee'e; suumem fooqaa'aa laarukok hee'ukkoyyo» yaa sharaakko. Heed haqqa mureena amadu manchiinsi lophphoohonnihe? Magaazdu muroo manchiinsi lophphoohonnihe? Biccim ixxo amadu manchonne malaayye moo'iseena xanooyyo. Ee bikkina gogoxxi Moollanni Waa'i ee geejjuwwi gaadaanonne ciissoo jabbo asse'ookko; ixxuwwannem gii'llisa shokkiisoo iibba fatakookko. Isra'ee'l minaadabina caakki ihukkok ixxi gagim ixxuwwina giir ihookko; Isra'ee'l keesammi ixxi gagim matem ballanne uttaa qarxaffaa gatisoo'n hundam itaa guulloo gii'l laba'nnisa ihookko. Jabbi mancho nacisaa shoo'isam ciimbamaakkoo doomaa abuulli beyyoo fooree maaram guullaa bi'isookko. Doo'm woronne gatoo haqqim xigonne hoffan ihu bikkina ciilam ihuta'n xigeena xanookko. Ee ammane bichchiinsi gatto'i Isra'eel ixxuwwa hawwoddo'i Aasoo'l minaadabanne amma'nnantamoyyo; ee bikkenne Isra'ee'l keesammanne, Waa'anne hanqo'isinne amma'nnantamo. Bichchiinsi gatto'i hofqax Isra'eelim malaayyaam ihu ixxuwwi Waa'i kollonne hanqo'isinne daba'llitamo. Isra'eela, ki minaadaphphek xig uulli shashsha'l qax ihukkaarem xale'i gattoqax daba'llitamo. Hanqinne wo'mmaakkoo bichchi qoodamaakko. Gogoxxi Moollanni Waa'i qoodamaa beeddaakkoo luwwa uullanne issookko. Ee bikkina gogoxxi Moollanni Waa'i «Xiyoonanne hee'llakkam i minaadabina, Gibxi manni wor amaddo'isam ki'nnuwwa wor amadda'a gassito'i Aasoo'l minaadaba badditakkotte. Ki'nnuwwanne quuqummi i quunqe hofqax ammaniinsi lasage uullisoommo; ee lasage ixxuwwa bi'isoommo» yoolla. Gogoxxi Moollanni Waa'i Ooreeb qoxxaalli kinanne Miidiyaa'm manna aphphisukkisam ixxuwwam jiraafinne aphphisookko. Gibxanne issukkisam ixxi biccinne dambalaqa aphphisookko. Ee ammane ixxuwwik iyyi ki'nnuwwi gudumiinsi, gaanjaqqim axiinsi ki'ookko. Geejjitakkam bikkinam oo gaanjaqqi iiqamookko. Diina'i gogot Aay beero'onne aagookko; Miigrooninne higukkuuyyim amadaa hee'u mu'uta Miikmaasanne dissookko. Daba'llamakkam beyyo higga'a Geeba'anne gatto'o. Raama'i beero'i mannim muggito'o; adil Saa'ool beero'onne Giibi'anne hee'llam keen hundim gibbo'o. Gaalii'm minaadaba, laallehe! Laayish minaadaba, macceessehe! Anaatooxxi minaadabim dabachcha uwwehe. Maadmeenaahannee Geebiimannee hee'oo minaadab ixxuwwi gaga gatixxiteena gibbamuulla. Kaballa diina'i Noob beero'onnette ihukkuuyyi Yerusaalee'm beero'i ihu Xiyoo'n duunanne ixxi woda baddiseena heekkeesansoolla. Oono'o, gogoxxi Moollanni Waa'i haqqichchiinsi muramu caafisa iiqukkuuyyi dilliisookko; ixxuwwiinsi birantam keenii hore'em bolxitam keenii sholle'llo'ookko. Doo'm woriinsi haqqa heedinne murakkamaare uboo'isa ixxuwwam Waa'i muransookko. Doo'llammi Liibaanoos haqqi muramaa uboo'isa ixxuwwim wodaam Waa'i anginne ubbamo. Issayyi lugumiinsi lat firookko; niggiinsem mat caaf misha mishookko. Waa'ik Ayyaan ixxonne ihookko; qooroo'mmekii qoossimmikii Ayyaan, sogimmikii malaayyikii Ayyaan, lachchikii Waa'a baddimmikii Ayyaan ixxonne usheexxookko. Waa'a baddimmanne liiramookko; xale'i moo'ukkisinne te'im macceesukkisinne oogatooyyo. Ihukkaarem buxina hanqinne oogatookko; hara'mmatbee'i kee'nnekam hanqa egerookko. Ixxi sagarinne minaadaba guzumo'amookko; jor keenim bi'ookko. Muccuroom lamaxxi saqqa amma'nnamaakkoohaannoomim midaaxxi sabbat ihookko. Oro'ii gereebbii mateeyyanne hee'ookko; kabeerim fella'i wotallinne gii'mmookko. Waataanni hobbi geexxuwwinne maqire hosookko; hoffi oosim allaarookko. Lar tibbe'inne allaa'llookko; wo'llii wotallii mateeyyanne gii'mmookko; hobbi baalluwwisa bura'a itookko. Anuuna iicoo ciil qubaam hamashshi ba'l gadanonne lellookko; anuuna uru ciilim woraqaallichchi barenne anga aagisookko. Waa'aannonne keesammi duunanne hawwodoo te'im jor luwwi hore'em hee'ooyyo. Dambalaq wo'inne wo'mmoo'isa uulli Waa'a la'imminne wo'mmaakkoohan ihookko. Ee ammane Issayyi shumo'i mannina mare'i ihaa uullookko; minaadab ixxo hasookko; lat firookko; ixxi heechchi beyyim lombi yoohan ihookko. Ee ammane Waa'i odim ixxi minaadabiinsi gatu keeno Asooriinsi, Gibxiinsi, Phaaxiroosiinsi, Tophphe'iinsi, Eelaamiinsi, Baabilooniinsii Haamaatiinsii ee'isam dambalaq tochchiinsii wo'inne kibbamu uulliinsii dabaraa worookko. Ee ammane Waa'i uulli hundannem binnita'a hee'llam Isra'ee'llekaa Yihuxxi minaadabaa uulli tochchi hundiinsim wixxaa'aa worukkisa uulli minaadab hundinam la'isoo mare'e iimaa'aa kaasookko. Ee lasage Isra'ee'l minaadab Yihuxxi minaadabanne yoo to'achchancha urookko; Yihuxxi minaadabim Isra'ee'l minaadabinne yoo diina'oomaa joranchaa urookko. Lamem minaadabim mat ikka'a eelliinchi aaggi Filisxee'm uulli mannanne ki'llamo; eelliinchi firanne yo'i minaadaphphekam amaxxa boggamo. Edoo'mmekaa Moo'aaphphi minaadabaa kaa'llamo; Amoo'n minaadabim ixxuwwina ijaajantamo. Waa'i gokkisoo hafachchinne Gibxi dambalaqika tochchuwwa gokkisookko; Efiraaxiis daajjem aphphisaa lamar hoffi dajjuwwanne baxxansoo bikkina manni caamma'innem fireena xanookko. Waa'i gaassi anno'i Gibxiinsi fitto'i ammane issukkisam kabadem bichchiinsi gatto'i Isra'ee'l minaadabam Aasooriinsi fittam googo taaphansookko. Ee ammane Minaadab «Moollanna, gaassi eesenne quuqqaa hee'llitto; ihukkaarem kaba quunqiinsi daba'llitaa eese qoxxissi bikkina galaxxoommo. At eese gatisaancho; an keesenne amma'nnamoommi bikkina maham baddoommoyyo; at iina malaayyee wodaa; eese gatissittokim atette. Muccur wo'i bu'i liiransoo'isam Waa'i gatisoo ammane Waa'i minaadabim liiramookko» yukkuuyyi zammarookko. Odim minaadab «Waa'a, galaxxehe! Hara'mmoo'isinam ixxi summa weeshshehe! Ixxi issu luwwi hundam mulli minaadabina alallaattehe! Ixxi lombam kullehe. Maalalsiisoo ixxi bax bikkina Waa'ina zammallehe; heer uullannem macceesamoo'isa issehe. Xiyoonanne hee'llakkam keen hundim ‹Ilil› yitakku'uuyyi zammallehe; ki'nnuwwi lambe'enne hee'oo Isra'ee'l keesammi Waa'i hundiinsi lobane» yukkuuyyi zammarookko. Amoox beet Issaayyaasina Waa'i moo'isukkaare Baabiloo'n bikkina wocu hiraaqqi sagar kane. Matem luwwim mutoobee'i duu'n ludonne o'l baandira kaassehe; ki'nnuwwi sagara iimaa'llakka'a laallehe; gassaa'n goocinnem aaggona anginne qaqqassehe. I quunqa wonshitamisina iina keesanto'oo keeno ijaajaammo; i kaachchanne liirantam malaayyaammuwwam weeshaammo. Duunnuwwanne laarakkam laachcha macceessehe; oohim dut uulliinsi wixxaakkoo minaadaphphi dambaqa. Gogoxxi Moollanni Waa'i ixxi gogota orina gudisoolla. Ixxuwwim uulli tochchonne yoo qee'l uulluwwiinsi waatto'oohane; Waa'i uulla hundoomam bi'iseena ixxi quunqina mu'ut ihu gogota gudisaakko. Bichchi balli hincu bikkina wi'llehe. Hundam xanoo Waa'iinsi bichchi waarookko. Ee bikkina manni hundikim angi hoogookko; wodanim baa'ookko. Qattam meentichcho xuuchchi u'nnisoo'isam ixxuwwim baachchinne u'nnantamo; baa'lla'a ixxuwwina'i ixxuwwim moo'aqqantamo. Oono'o, Waa'ik balli hincaakko; Waa'ik quunqii bala'ii ihoo bikkina oo balli baddisoohane. Ee balla uullanne hee'oo baaxiilaan bi'oo bikkina uulli udma'i ihookko. Iima'n boollaanki ixxi gogotinne maqirem caakka uwwooyyo; eelliinchi ekkeen firukkuuyyim tuunsookko; aganchim caakka uwwooyyo. Waa'i «Uulla jolli bikkina, boqquwwi keenom ixxuwwi baaxii'l bikkina guzumo'oommo; birantam keeno sholliisoommo; bolxitam kee'n mongam bi'isoommo. Bichchiinsi gatto'i keeno muccur worqiinsii Oofii'l uulli worqiinsii loboka haabaam issoommo. An gogoxxi Moollanni Waa'i i quunqi bala'a dilliisoommi balla iimannuwwa shaffeesoommo; uullim beyyiinsi heekke'oo'isa issoommo. «Hochchaaniinsi giboo kukkussichchisa te'im allaaraanchi bee'i gereebbi allaachchisa karakaadam hee'u minaadab ixxi minaadaphphi kolli daba'llookko; ixxi gaqqi uulli kollim gibookko. Qeefadamukkoka qasakkamo; amadamukkokam bisa'inne aphphisakka'a shakkamo. Ixxuwwika ciilluwwa ixxuwwi illagennem shakkamo; ixxuwwi minneewwa bogakkamo; ixxuwwi meentinnem mulli manni malaayyinne iinse'ookko. «Birina waaytambee'i, worqinam qawwiisantambee'i Meedoo'n minaadaba Baabiloo'n minaadabanne ki'isoommo. Ixxuwwik xiyyi harde'i ooso guullookko; ciilluwwinam mishshamoyyo; oosina qishixxitamoyyo. Baabiloo'n adillan mulli adillaniinsi hundiinsim lobakata mishisoohan hee'ukko; ixxi minaadabinam lombi hee'ukko. Ihukkaarem an Waa'i Baabiloona Soddo'mmisaa Gomo'llisaa himbiriiqa dabaroommo. La'mmaagge eehe ayyim hee'ooyyo; udma'anne darba'llam Arabim dukkaana kaassamoyyo; allaaraanim diinate allaattamoyyo. Udma'i uulli moochchi daabbaroo beyyi ihookko; mooqqaqqi do'nna baxookko; guchche'ina heechchi beyyi ihookko; habusina kajji beyyi ihookko. Got girbuwwanne, wengereellim wereeggisakko'oo adilla'n minneewwanne muunookko. Oono'o, ee'isinne Baabiloon bi'oo amman hincaakko» yukko. Waa'i ixxi minaadabina Isra'eelina odim qishixxookko; ixxi gaqqanem issaa doo'llookko; ixxuwwi gaqqi uullannem hee'isookko; waaraanim waattamo; ixxuwwinnem shiinnaatanta'a maqire hee'llamo. Dut mulli minaadaphphi adilluwwi Isra'ee'l minaadab Waa'i ixxuwwina uwwu uulla daba'llitona hara'mmitamo. Mulli minaadab ixxuwwina agiddaninne awwaaddamo; illageen Isra'eela qeefaddo'i keen kaba ixxuwwi anganne ubbamo; wor amaddo'i keenom ijaajjamo. Waa'i ki'nnuwwa u'nniinsi, hawwiinsii kee'mmaalli agiddaniinsii usheexxisoo ammane Baabiloo'n adilanne. «Oono'o, wor amadoo adil ubaakko! Ixxi ka lasage ayyem wor amadooyyo! Waa'i jor gassaa'nneka malaayyee daannoomaa bi'isaakko. Oo gassaan quunqinne minaadaba wor amaddu'uuyyi hee'llo'ookko; kaa'lla'a amaddo'i keenom lobakata u'nnissam hee'llo'o. Ihukkaarem kaba lasaanchonne uulli hundim xummaa usheexxatoo siidookko; hundim liiranchinne zammarookko. Liibaanoos hoomii digibii oo adil ubu bikkina liirantamo; mashka'oomim ka lasage ixxuwwa mureena meesaana ki'isookkok hee'ooyyo. «Baabiloo'n adila Si'ool aa'eena gudaakko; wiiddim ixxo weeshoolla; uullanne hee'llo'i malaayyaammuwwi ixxena anga ki'issamo; adilluwwi hee'llo'i keenim adilla'n barcumiinsi iimitamo. Ixxenam ‹Atim ni'isam hoongaanchi ikkittonnihe? Niinniinsim matisa ikkittonnihe? Ki lombi diitta'i sagarinnem Si'oola dillaakko'o; kiinniinsi woroon oor dahamaakko; ki eddechchim daquur ihaakko› yitakku'uuyyi» naacantakkamo. At caakkissoo soodaraa'l boollaankichcho, hinkid iimaniinsi ubbitto! Uulli minaadaba sholliissam hee'llittok hinkid iimaniinsi ubbitto! At ki tiironne «Iimane firaa i adillano Waa'i boollaankiinsi hanaan issoommo; keesammi duunanne yoo wixxixxi beyyonne adillanonne afuuroommo. Duubiinsem hanaan firoommo; Hundam xanoo Waa'innem kobi'llamoommo» yitaa hee'llitto. Ihukkaarem Si'oolanne xillaalli barenne dillitootto. Keese moo'llam keen hundim maalaltu'uuyyi «Hanqinam uulla heekkeesukkok, uulli adilluwwam huxiisukkok, heer uulla diihisukkok, beero'uwwa gindansukkokii qeefadanto'i keen ixxuwwi uulla daba'llitambee'isa issookkokii ka manchonnihe?» yitamo. Adilluwwi lehoo ammane lombinne waammamookko. Ihukkaarem at waamma hooggaa lokkinne kade'amakkam haqqi buyyisa uunjantaatto. Ki leeshim oranne beeddu manni leeshinne ifiisamaakko; ee kee'n leeshinnem kinaam barenne uunjamaa hance'amaakko. Mashka'oomim at ki uulla bi'issaa ki minaadaba guullitaatto; ee bikkina at mulli adilluwwisa waamma siiddoo gada'i hee'ooyyo; jor kee'nnek shumo'i hee'ooyyo. Ki'lla'a uulla lagaa'llambee'isaa heer uullam beero'uwwinne wonshitambee'isaa ixxuwwi anno'i baaxii'l bikkina goo'n ooso hundam durakkam beyyo gudissehe. Gogoxxi Moollanni Waa'i «Baabiloona orinne bi'isoommo; ma'lluwwam gatisoommoyyo; shumo'ik mahim gatooyyo. An Waa'i kaka wocaammo. Baabiloona leepho'i issoommi bikkina urulli fikkaannoo beyyi ihookko; maham gatisoo'n fii'oo fii'aanchinnem fii'oommo. An gogoxxi Moollanni Waa'i kaka wocaammo» yoolla. Gogoxxi Moollanni Waa'i «Hanqinam i qoodo'i hundim wo'mmookko; an sawwummisannem ihookko. Aasoo'l manna i uullanne iiqansoommo; i duunannem hancaacoommo; ixxuwwi gaanjaqqim i minaadabiinsi ki'ookko; iyyim ixxuwwi gudumiinsi dillookko. Heer uullina an qoodummi qoodo'i kane. Adilluwwam guzumo'eena i wod ki'aakko» yaa hide'aakko. Gogoxxi Moollanni Waa'i ka'isa qoodaakko; egedeena xanookok ayyette? Ixxi wodim guzumo'ina ki'aakko; dabareena xanookkokdu ayyette? Adil Akaaz lehu hiincho wocamu Waa'ik sagar kane. Filisxee'm minaadaba, oono'o, ki'nnuwwa aphphisu bicci iiqamaakko; ihukkaarem liirantakkotte. Mat hamashshichchi lehoo ammane ixxeensi baasoo mullek beyyonne qooccamookko; hamashshi quunqiinsim giiri'nnoo'i bararoo xarakkichchi qoccamookko. Bux allaachchi beyyo siixxitamo; hawwaanim xumminne hee'llamo. Ihukkaarem ki'nnuwwika shumo'o sibaarinne guullookko; gatto'i keenim beedditamo. Ki'nnuwwi Filisxee'm beero'uwwi hundim hara'mmatina laallehe; hundim baa'llehe; hanaa'n qarinne di'llek duub waaroolla; oohim ayyim gibaa xoreena xanoobee'i gogota. Filisxeemiinsi waattam asse'amaanina daballoommi dabachchi maha? Neesem «Waa'i Xiyoona dabaraa uullisaakko; hawwonne hee'u minaadabim eehe'enne daphphixxi beyyo siixxaakko» yinoommo. Moo'aaphphi bikkina wocamu sagar kane. Moo'aaphphi beero'uwwi Eerii Qiirii mexxo'i mat hiimonne bi'ukko. Uulloomim diihukko. Diiboo'n minaadab ixxuwwi waa'uwwi minenne wi'lliteena duunanne fittamo; Moo'aaphphi minaadab Naabo'inaa Meedaab beero'inaa kee'mmaalli kichchechchinne wi'llitamo. Kichche'llo'i bikkina horooree haareeddaa hogoossaqqitamo. Goog hundannem moo'amoo manni xiddi eddechcha edde'aakkoohane. Mi'n fooqquwwannee wixxixxi beyyuwwannee manni indiidde'ukkuuyyi wi'llookko. Haseeboo'nnekii Eel i'aal minaadabii laarookko; oo laachchim Yahaax beero'i afeebe'e macceesamookko. Moo'aaphphi gaadaa'nnekim wodan hoogaa baa'llamo. Moo'aaphphi bikkina wodaninne wi'lloommo; minaadabim Xoo'aaraa Eegilaat Shaliishiyaa gibbo'ookko; hofqaxim wi'llitu'uuyyi Luhiit beqeranne fitto'ookko. Mulli keenim ixxuwwanne afu bichchi bikkina sagara iimaa'lla'a wi'llitu'uuyyi Horoonaayim afeebe'e gibbeena yakitamo. Niimirii'm daajjuwwi xoo'aakko; aashaalli luwwi hundim gogaakko. Ee bikkina minaadab ixxuwwi amaxxa hundam wixxaa'lla'a Ahaaya yakkam haqqi yoo cebba higga'a mattamo. Moo'aaphphi uulli tochchuwwi hundannem laachchi macceesamookko; oo laachchim Eegilaayi'mmekaa Bi'eereelii'm beero'i afeebe'ee afookko. Diiboo'n beero'i daajjuwwi xiiginne wo'mmaakko; Waa'i eehanniinsi lophphaakkoo luwwa ee beero'onne issookko. Moo'aabiinsi gibba'a xottam keenoo eekke'ennem lehiinsi gatto'i keenoo hundam hobba asse'aa guullookko. Moo'aaphphi minaadaba, Xiyoo'n duunanne yoo ee uulli gassaanchina udma'i uullanne yoo Seela'iinsi gereebbi geexxuwwa maqanxa asse'llamo. Moo'aaphphi meenti Arinoo'n daajje fittu'uuyyi do'nniinsi hollokko'i cii'isa aaggam beyyo hoogga'a ekkidii kidii wurwuritamo. Moo'aaphphi asse'amaan Yihuxxi minaadabina «Maha issimmi hasisooda'e niina kullehe; samgud ballanne haqqi hafisa neese maaxxehe. Gibba'a ki'nnuwwi beyyonne maaxxehe bagaan higissakka'a uwwitakkotte. Moo'aabiinsi gibba'a waattam keen ki'nnuwwi uullanne hee'llona; ixxuwwa shiteena hassam keeniinsi gatissehe» yitamo. Wor amadaan ka lasage hee'llamoyyo; uulli bichchi uullookko; uulla bi'issam keenim bi'llamo. Ee ammane adillan iittinne shooho'amookko; ee adillanonnem Daawiit shumo'iinsi amma'nnamma, oogato boqqisoobee'anee hanqo'an ihu luwwina gaaggaabaallaa ihaakkoo mat adil afuurookko. Yihuxxi minaadabim «Moo'aaphphi minaadaphphi biranchi bikkina, tobbechchi bikkina bolximmi bikkinaa gado'i bikkinaa macceensaammo; ihukkaarem oo ixxuwwi sha'llanchi awwaad bee'ane» yitamo. Ee bikkina Moo'aaphphi minaadab ixxuwwanne afu hawwi bikkina wi'llookko; Qiiriheerees beero'onne ittam hee'llo'i er hurbaata tiittam ammane hundim qaraaraallisa wi'llitamo. Haseeboo'n abuulli uulluwwii Siibii'm woyi'n kaashshi beyyuwwii bi'aakko; ku woyi'n kaashshi beyyuwwi mulli minaadaphphi awwonsaanina dimbisoo woyi'n diqaasa gudisakkam beyyi hee'ukko. Illageen ee woyi'nnek xud Yaa'izeer beero'o afoohan hee'ukko; eelliinchi aagginnem Sooqixxi dambalaqiinsi eeqido ee'isam eelliinchi firinne udma'i uulla afoohan hee'ukko. Yaa'izeer bikkina wi'lloommisam Siibii'm woyi'n bikkinam wi'lloommo. Haaseeboonaa Eeli'aal bikkinam i indiiddi dunamoolla; mashka'oomim minaadaba liiransookkok bee'e. Oono'o, misha uwwoo er uullanne liiramookkok bee'e; woyi'n kaashshi beyyuwwanne ilillaaxxekii mazmuu'llekii sagar macceesamooyyo; woyi'n diqaasina misha ciinsookkokim bee'e. Waa'i liiranchik ilillaaxxi sagar bi'oo'isa issaakko. Ee bikkina i wodan Moo'aaphphi bikkina i godabim Qiiriheerees bikkina kichche'aakko. Moo'aaphphi minaadab ixxuwwi waa'uwwi minneewwaa otossakkam beyyuwwi baxamaa yoo duunnuwwaa daba'llantu'uuyyi ixxuwwi gaga hoogisso'ookko. Ihukkaarem oo hundim ixxuwwina maham awwaadoobee'ane. Waa'i Moo'aaphphi bikkina gaassim wocu sagar kane. Ihukkaarem kaba Waa'i «Mat baxaanchik bax amman beeddoohaannisa Moo'aaphphek lombii ixxi minaadaphphek dutii ka sas hiinchoronne sholle'ookko. Ixxuwwiinsi gatookkokim hore'em hofqax ihaa oo keenim xale'i hoogaan ihookko» yukko. Damaasqo'i bikkina Waa'i «Damaasqo'i kanniinsi eehid beero'i ihaa hee'immi bikkenne gindamaa diihookko. Sooriy beero'uwwi manni bee'i diih ihookko; gereebbii larii beyyonne allaa'llookko; holloohim hee'ooyyo. Isra'ee'l girbi bee'an ihookko; Damaasqo'im adil bee'an ihookko. Bichchiinsi gatu Sooriy manni Isra'ee'l minaadaphphisam sholle'ookko. An gogoxxi Moollanni Waa'i kaka wocaammo» yoolla. «Isra'ee'llek lombi sholle'nnanne goddim buxoomanne daba'lloo amman waarookko. Isra'eel hurbaata murakka'a farshimma wixxaa'akka'a lasage murugaa gatoo maasisa ihookko. Hurbaata wixxaa'akka'a lasage leexa'oo Raafaayi'm cebbisam ihookko. Ihukkaarem weera heekkeesakkam ammane lam te'im sas mish gatoo'isam soor te'im onti mishim mat caafanne hee'oo'isa Isra'eeliinsi hofqaxim gatookko. An Isra'ee'l Moollanni Waa'i kaka wocaammo» yoolla. Oo amman afoohaare minaadab hara'mmatina Isra'ee'l keesammi ihu ixxuwwi Qooccaanchi kollonne daba'llookko. Ee lasage anginne baxxo'i kiti'm beyyonne amma'nnanchi gatookko; ee'isam Asheer misilannee aduruusa wiriissiteena anginne baxxo'i kiti'm beyyuwwannee amma'nnancha uttamo. Oo amman afoohaare Isra'ee'l oosiinsi Hiiwe'ikii Amoore'i mannii gibbo'aare ixxuwwi beero'uwwi diihukkisam girbamaakkoo ki'nnuwwi beero'uwwim diihookko. Ki'nnuwwa gatisu Waa'a xaddakko'ookko; ki'nnuwwina daphphixxi kin ihukkokam tiittakko'oyyo. Ee bikkina er kaashsha kaassakko'aaree annanni sire'em wixxakko'aaree oohim ee kaassakko'i ballam mutoo'isaa wixxakko'i ballam fiitoo'isaa issitakko'aarem atootoom hawwi ballaa qaraarbee'i jabbi ballaa awwaad bee'an ihookko. Dambalaqanne hambu'llam gugoo'isa gugoo dut minaadabina, malaayyaam womoo'llisam gugoo minaadabina aayye! Uulli minaadab malaayyaam womoo'llisa gugukkaarem Waa'i axeeroo ammane duunanne hafachchi binnaa'oo bura'isaa hambu'llaminne binnoo di'llisaa binnitamo. Oono'o, uulli hiimoohaare dambaq ihookko; ihukkaarem uulli soodukkuuyyi ayyim hee'ooyyo. Neese boggam kee'nnekii hawwissam kee'nnekii saam eehane. Tophphe'i daajjuwwiinsi eeqidonne hee'oo ladaam markabbuwwi yoo uullina aayye! Oo uulli asse'amaano leendinne baxamaakkoo wongiranne Abbaay daajjinne asse'oohane. Ee uulli manni qeeraa'lluwwaa orachchi lubucce'oo keenoo. Ixxuwwi uullim wo'inne baxxansamaakkoohan ihaa mannim qoxallaa malaayyaammuwwaa ihu bikkina heer uulli manni baddoo ee minaadaphphi beyyo ki'nnuwwi qare'aalli asse'amaano, mallehe. Heer uulli minaadab hundim macceessehe! Duu'n ludonne baandir mare'oomina saqalamaa belelukkuuyyi moollakkam ammane qoossehe! Xurumbi fugamoo ammanem hindihi'llehe! Waa'i iina «Samgud ballanne caakkisoo eelliinchisaa hurbaata wixxaa'akkam agananne hiimonne dilloo hadaddisaa iima'n i heechchi beyyiinsi ishtiggaa moo'oommo. Woyi'n misha wixxaa'immiinsi illageen fiit gogaa woyin mishoohaare ee woyi'nnek xuda murakka'a uunjakkamisam an ee uullika minaadaba bi'isoommo. Ee uulli gaadaa'nnek leesh iima'n ammarinaa udma'i uulli moochchinaa hurbaat ihookko; billenne ammar hagayyenne odim moochchi itookko» yukko. Gogoxxi Moollanni Waa'i uullichcha qeeraa'lluwwa, orachchi lubucce'oo keeno, malaayyaammuwwa, qoxalla, heer uulli minaadab baddoo keenoo ixxuwwi uullim wo'inne baxxansamaakkoohanee ihu ee uulli minaadabiinsi kitima aa'oo amman waarookko. Oo minaadabim gogoxxi Moollanni Waa'ina otossakkam Xiyoo'n duuna waarookko. Gibxi uulli bikkina wocamu Waa'i sagar kane. Waa'i duubinne Gibxi uulla qaqqisaa waarookko. Gibxanne otossakkam waa'uwwim ixxi illagenne heekke'amookko. Gibxi minaadabim baa'aa huxe'ookko. Waa'i «Gibxi uulli manni ixxuwwina'i ixxuwwim guzumo'antamisa issoommo. Abbaayyi abbaayyonne olla'i olla'anne ee'isam mat beero'i mulli beero'onne mat adil mulli adilanne diina'oominne ki'aa oramookko. An Gibxi mannik sawwit bi'oo'isa issoommo. Ixxuwwi a'llancham gindoommo. Ee ammane ixxuwwi hara'mmatina ixxuwwi waa'uwwa, kiiraano, wiidda weeshsham keenoo gennaanoo xa'mmitamo. Gibxi minaadaba mogaalli adi'l anganne higisaa uwwoommo. Oo mogaalli adilim ijaajookko. An gogoxxi Moollanni Waa'i kaka wocaammo» yoolla. Abbaayyi daajji xa'ookko. Qaphphitinnem xoo'ookko. Daajjuwwi wo'i shamookko; boohe'uuwwi wo'im xa'ukkuuyyi gogookko. Shomboqo'ii leendii quubookko. Abbaayyi daajji gammalanne hee'oo kaashshi hundim gogookko; ee daajji gammalanne wixamu hurbaat hundim gogohaare hafachchi binnaa'ookko. Abbaayyi daajjiinsi qurxumme'e qaashinne amaddam keen kichche'llamo. Shikkinnee wongirinnee amaddam keenim wi'llitamo. Er fatirinne eddechcha daddam keen hundim neeyyato muttamo. Eddechcha daddam keenii angi bax lachchi yoo keenii hundim kichche'lla'a wi'llitamo. Xoo'aa'n gassaan hore'em qawwuwwa. Qoolluwwi ikko'i Fari'oon suu'm mannik sogitan awwaad bee'ane. Adilinam ‹Neese qoolluwwa; ni shumo'im gaassi adilluwwi shumo'iinsette› yito'ok hinkidette? Adila, oo qoolluwwi ki gassaan hannonne yo'o? Gogoxxi Moollanni Waa'i Gibxanne isseena sawwu luwwa hino'o kiina la'isona. Xoo'aa'n gassaan qawwuwwa; Meemfoos gassaanim huushanto'ookko. Gibxi uullik la'anto'oo gassaan Gibxa huushisso'ookko. Ixxuwwi hamaarammi sogitano uwwitamisa issukkok Waa'a. Ee bikkina Gibxi hundemisinnem huushamaa ixxi gaqqi uwwim luxuunxisaa ubbuusoo dimbaanchisa tartarookko. Gibxina goddaanchom ihukko buxichchi, la'amaakkoo te'im la'amubee'ek ayyim maham isseena xanooyyo. Gibxi minaadab baa'aa meentisa ihoo balli waarookko; gogoxxi Moollanni Waa'i ixxuwwa guzumo'eena woda ki'isoo ammane baachchinne huxe'llamo. Yihuxxi minaadab Gibxi minaadabina baddisoohan ihookko; Yihuxxek summi weeshamoo ammanem dambaqqamo. Oohim gogoxxi Moollanni Waa'i ixxuwwa guzumo'eena qoodukkisa laqqo'i bikkinatte. Ee ammane Gibxi uulli beero'uwwiinsi ontonne hee'oo manni Ibro'isinne woccamo; ee beero'uwwi manni gogoxxi Moollanni Waa'i summinne hide'llamo. Ee beero'uwwiinsim mat «Eelliinchi Beero'o» yamamookko. Ee ammane Gibxanne Waa'ina kitima hincaa'akkam beyyi baxamookko. Ee uulli tochchonnem Waa'ina annanni ihaakkoo ki'n utub uullookko. Oo keenim Gogoxxi Moollanni Waa'i Gibxi uullanne yoohan ihukkisina mare'ee naqaashaa ihookko. Ee uullanne hee'llam mannanne hawwi afoo ammane Waa'i hara'mmona uunxitam ammane Waa'i ixxuwwina agaagoo gatisaancho asse'ookko. Ixxim ixxuwwi diina'inne oramaa ixxuwwa gatisookko. Waa'i Gibxi uulli mannina ixxi gaga la'isookko. Ixxuwwim ee ammane ixxi hanqo'i Waa'i ihukkisa laqqa'a otossitamo. Kitimaa hurbaaxxi ludoo Waa'ina hincaa'llamo. Ixxenam uga'a aaggamo; aaggo'i uga'am uwwitamo. Waa'i Gibxi minaadaba guzumo'ookko. Ihukkaarem dabaraa fayyiisookko; ixxi kollonnem daba'llitamo; ixxim ixxuwwi uunxato macceesaa fayyiisookko. Ee ammane Gibxi uullinaa Aasoo'lli uullinaa lambe'enne lob bur firookko. Aasoo'l manni Gibxa mattamo; Gibxi mannim Aasoora mattamo. Lamem uulli mannim maqirem otossitamo. Ee ammane Isra'ee'l uulli Gibxi uullinnee Aasoo'l uullinnee mat ihaa saxxi uulli ihookko; oo sasem uulli minaadabim heer uulli hundinam maassi ihookko. Gogoxxi Moollanni Waa'im «Ki'nnuwwi Gibxanne hee'llakkam i minaadab, an qooccummi Aasoo'l minaadabii doo'llummi Isra'eelii masse'ammehe» yookko. Aasoo'l adil Saargoon ijaajjinne Aasoo'l gaaxxi awwonsaanchi hee'u Tartaan Filisxee'm beero'i ihu Ashdooda maraa qasukko. Ee ammanenne Waa'i Amoox beet Issaayyaasina «Caamma'aa kichchechchi eddechchaa sheelattaa leexa'am mare» yaa ijaajukko. Issaayyaasim Waa'ina ijaajamaa leexa'am taakke'am hee'ukko. Ee lasage Waa'i «I awwaadaanchi Issaayyaas leexa'am lokkonne caamma'a issaqqoo'n sas hiincho hundoomam daba'llamam hee'ukko. Oohim Gibxannee Tophphe'ennee ihoo luwwina mare'e. Ee'isam Aasoo'l adil Woraadaa lommannaa lamem uulliinsim qeefadaa ede'lloonnii lokkonne caamma'a issa'itoo'nnii massookko. Ixxuwwi orachchom maxaraa Gibxa sholliisookko Tophphe'enne amma'nnantam keenii Gibxanne bakke'llam keenii badditamo; sholle'llamome. Ee ammane dambalaq tochchuwwanne hee'llam minaadab ‹Aasoo'l adi'l angiinsi neese gatissamo yinaa neeyyato issinoommi minaadabanne ku sholle'n hundim afulas neese hinkid xolleena xannoommo› yitamo» yukko. Baabiloo'n bikkina wocamu Waa'i sagar kane. Woroo'n qariinsi ki'oo ambu'llam hundem luwwam fii'aa bi'isoo'isa baddisoo mat uulliinsi kee'mmaalli bichchi waarookko. Baddisoo kaalti iina moo'amaakko; lagookkok higisaa uwwookko; bogookkokim bogookko. Eelaa'm gogota, qassakkeena fillehe. Meedoo'n gogota, beero'uwwa kibbehe. Waa'i Baabiloo'n mashka'inne afu hawwo hundam bi'isookko. Ee bikkina i lamad xissukko; qattam meentichchosa xuuchchi amadukko; xissummi bikkina macceeseena xanummoyyo; muggummi bikkinam moo'eena xanummoyyo. Illi kululaa'oolla; baa'aa huxe'oommuulla. Uulli qaqqisaa hiimona mixummo. Neeyyata issummi luwwim muggisoohan ihukko. An moo'ummi kaaltannem maaddi gudaakko; koyyi afuuroo beyyim dahamaakko. Ixxuwwim ichchannee aggannee hee'llo'isam «Ki'nnuwwi o'l awwonsaano, agira shiinshitakka'a gudissehe» yoo ijaaj dangonnem higukko. Ee lasage Waa'i iina «Luwwi hundam qoto'aa moo'aa kiina kuroo mancho gudise. Faraxxi gaare'e, hallanne saa'llito'i keenoo gaameela'a jigissam keenoo moo'ona; qoossaa moo'ona» yukko. Oo qoto'aa mo'oo egeraanchim «I moollanna, an ee egechchi beyyonne ihaa hiimoo ballaa hundam egeroommuulla» yukko. Oono'o, mat manchi faraxxi gaare'inne waaraakko. Ixxim «Baabiloon ubukko; ubukko! Ixxuwwi otossitam waa'uwwi misilluwwim xaamaa ubukko» yukko. I minaadab Isra'eela, arasa oodo'onne ganakkamisa ki'nnuwwim ganantakka'a hee'llakko'o. Ihukkaarem kaba gogoxxi Moollanni ihu Isra'ee'l Waa'iinsi an macceesummi mishiraachchi sagara ki'nnuwwina kurummo. Eedoo'm bikkina wocamu sagar kane. Mat manchi Seeyriinsi eese weeshaa «Qoto'aancho, uulli soodeena ihaatennihe? Uulli soodeena hinkaa'n amman gataate?» yukko. Qoto'aanchim «Uulli soodeena hincaakko; ee'isam hiimookko. Dabattakka'a xa'mmitakkeena hassakkolas daba'llitakka'a waattakka'a xa'mmehe» yaa dabarummo. Araphphi uulli bikkina kuramu hiraag kane. Iyyiishshi gaameela'innem Araphphi uulli udma'anne wiiddantakkam Daadaa'n minaadaba, xeebe'lla'a ki'nnuwwi beyyo waattam keen hundinam wo'o uwwehe. Ki'nnuwwi Teema'i minaadabim gibba'a ki'nnuwwi beyyo waattam keenina ittam luwwa uwwehe. Minaadab hundim ixxuwwanne xabbu bisa'iinsi, chokkoramu xiyyiinsii qooxxaalli oriinsii xoreena giboolla. Ee lasage Waa'i iina «Mexxo'i mat hiinchi woronne Qeedaar sulluwwik lombi bi'ookko. Xiyya chokkottam keen Qeedaaranne la'anto'oo geedduwwa. Ihukkaarem hofqax xale'i gattamo. Isra'eelina Moollanni ihummi an Waa'i kaka wocaammo» yukko. Kaalti baalle yakkam beyyi bikkina wocamu hiraag kane. Ki'nnuwwi hundim fooqanne fittakko'ok mah hawwisukkaarette? Dambaqinnee laachchinnee wo'mmitaattoo beero'onne, dimbita'a googguwwanne ubbo'i keen bisa'inne shakko'oo te'im oranne leto'oo keenoyyo. Ee beero'i awwonsaan hundim matem xiyyam tokkossoo'nnim gibbu'uuyyi qeefadanto'o. Leto'i i minaadaphphi bikkina qaraaraallisa wi'lloommuulli ihu bikkina eese wocissakkotte; soggakkotteme. Kuk kaalti baallenne u'nnanne, kaa'anchannee hambalaachchi ammanee ihaakko; oo hundim neesenne ihoo'isina issukkok gogoxxi Moollanni Waa'a. Ni beero'i qashshuwwi gindamaa ubaakko. Hara'mmatina laarakkam laachchim duu'n lud afeebe'e macceesamoolla. Eelaa'm gaadaanim faradonne saa'llita'a xiyyaa tokkaashshe'ee amadda'a waatto'o. Qiir gaadaanim agira gudisso'ookko. Yihuxxi hixaam cebbuwwanne faraxxi gaare'uuwwi wo'mmaakko. Faradonne saa'llito'i gaadaan Yerusaalee'm ooxxi gooc illagenne uullito'ookko. Yihuxxi uulli girbuwwi hundim gindamaakko. Ee ammane o'l mu'uta dissakkam minenne hee'u mu'uta fissitakko'ookko. Daawiit beero'onne gindamaa tuubamu hacci lophphukkisa moo'llakko'ookko. Woroo'n delbannem wo'o wonshitakko'ookko. Yerusaaleemanne yoo minneewwa hundam doo'llakka'a xiggakko'ookko. Beero'i qasha dabattakka'a oottakkeena mat mat minneewwa ginditakko'ookko. Gaassi delbi beyyiinsi dilloo wo'o dabattakkeena beero'i woronne wo'o qoqqobbakko'o. Ihukkaarem ee hundam gaassaa baxukkok Waa'i ihukkisa qoossitakko'oyyo. Ee ammane gogoxxi Moollanni Waa'i horoore hogoossitakkahii xiddi eddechcha edde'llakkahii kichchi'llakkonaa wi'llitakkonaa weeshaa hee'ukko. Ihukkaarem ki'nnuwwi ee woshsha aa'imma sabbakka'a uguda gudissakko'o. Ittakkam gereebbaa mirgo'uwwaa duttakko'o. Woyi'n diqaasam aggakka'a «Soodo leneena xannoommi bikkina kaballa intonaa angonaa» yitakko'o. Gogoxxi Moollanni Waa'i «Ixxuwwi foorinne hee'llam doollenne ku hawwojji hanqoomam shiinshamooyyo. An gogoxxi Moollanni Waa'i kaka wocaammo» yaa iina kuraakko. Gogoxxi Moollanni ihu Waa'i adilla'n minenne gassaanchi ihu Sheebinaan beyyo mattaa «Sheebina, kabeyyonne maha issitoolla? Ki gagina waamma gudissoo'isina, duunanne at waammantoo beyyo gudissoo'isinaa ki leesh waammamoo kina cabbattoo'isa issukkok ayyette? At ki gaga ‹An wodaam mancho› yiteena xantootto. Ihukkaarem Waa'i keese gafe'aa ubbuusookko. Xorbe'isam huushaa haraar uullanne uunjookko. At bakke'lloo ki faraxxi gaare'uuwwi gadanonne letootto. Ki moollanni mininam sholle'n ikkootto. At baxxoo baxiinsi yaayyantootto; daannoomiinsim shaarantootto. «Ee balla iina awwaadaanchi Hilqiy beeto Eeliyaaqeema weeshsoommo. At edde'llam hee'llit lombi eddechcha ixxena eddeesoommo. At lade'llam hee'llitti sabbatam ixxena ladiisoommo. Daannoomam kiinniinsi hooraa ixxena uwwoommo. Ixxi Yihudannee Yerusaaleemannee hee'llam minaadabina anni ihookko. Daawiit mi'n fooqaa'aanchom ixxena uwwoommo. Ixxi xufookkoka fooqa'ookkok bee'e. Ixxi fooqaa'ukkokam xufookkok bee'e. Anim ixxo amma'nnamaakkoo beyyonne xiribbisa kaasoommo. Ixxi anni mininam lombi adillan ihookko. «Ihukkaarem ixxi qarmannii qee'llonne hee'oo shumo'ii hundim ixxena kee'mmaalli iyyisa ihookko; mi'n mu'uta hundam xirbanne saqalakkamisa ixxuwwi hundim ixxonne calcalitamo. Ihukkaarem oo hundem luwwim ihoo ammane oo qoxxaalli mu'uta saqalakkam xiribbi xoqolamaa ubookko. Ee xiribbanne saqalamaa hee'u mu'ut hundichchim iiqamaa ubookko» yukko. Kaka wocukkok Waa'a. Xiroos Bikkina kuramu hiraaqqi sagar kane. Tarsees markabbuwwa, wi'llehe. Xiiroos gindamaakko. Minneewwii markabbuwwi uulloo beyyuwwii hundim gindammaakko. Qophroosiinsi daba'llitakkam ammane macceessakkam woshshi eehane. Markabinne daddattam keen goddisso'oo dambalaq gammalanne hee'llakkam minaadabii Siidoo'n uulli daddaraanii kichchechchinne sai'i'llehe. Gibxi uulli hurbaat lob dambalaqinne waaraa Xiiroosina lobakat amaxxi iham hee'ukko; ee bikkina Xiiroos heer uullina meer ihukko. Siidoona, dambalaq girba tuure; dambalaq «An xuu'ummoyyo; qarummoyyo; goo'n oosoo landaa li'isummoyyo» yaakko. Xiroos bi'ukkisa macceesoo ammane Gibxi uulli minaadab u'nnamookko. Ki'nnuwwi dambalaq gammalanne hee'llakkam minaadaba, aayye yitakku'uuyyi wi'llehe. Tarseesam gibbehe. Ixxi minaadab qee'l uulla maaraa amadeena xanaa doollenne hundannem liiramaa hee'am hee'u beero'i ka'isa ihukkonnihe? Adilla'n mare'i issitam hee'llo'i beero'onne, gassaanoo heer uullanne summaammuwwa ikko'i daddaraan hee'u Xiiroosanne ku hundim qoodukkok ayyette? Kaka isseena sawwukkok Gogoxxi Waa'a; ixxi kaka qoodukkok ixxuwwi issito'i luwwanne bolximma uttamisa isseenaa lombaam manna sholliiseenattee. Tarsees minaadaba, ka lasage hoorookkok bee'i bikkina Abbaayyi daajji gamma'llisam ki'nnuwwi uullam abuullehe. Waa'i dambalaqanne anga biddiqaa'aa adilluwwa muggisukko. Kana'aa'n girbuwwi gindamoo'isna ijaajukko. Ixxim «Siidoo'n beero'o, ki liiranchi doolli beeddaakko; ki minaadabim wor amadamaakko; Qophphiroosa gibbaa xoruta'nnim ee beyyonnem xumma siidooyyo» yaakko. Oono'o Baabiloo'n uulla moo'llehe; ee uulli manni awwaad bee'an ihaakko; Aasoo'l uulli manni ee uulla bii'l moochchi daabbaroo beyyi issaakko; girbuwwa gindansamaa uullooma hacci tuubamoo beyyi issamaa ixxuwwika qoto'akka'a egerakkam beyyuwwa baxamaakko. Ki'nnuwwi Tarsees uulli markabbuwwi ki'nnuwwi girbi gindamu bikkina aayye yi'llehe. Xiiroos mat adi'l umu'l doolli qaxa lamarayyi hiinchina xadamookko; oo hiinchuwwi higaa lasage buubbeesaanchi meentichchosa Xiiroosina kadakko'ookko. At xadantaattoo bubbeesaanche, diitta'a aphphissittuuyyi beero'o do'e; keese tiirakkona er mazmuura macceesise; lobakat mazmuuram zammare. Lamarayyem hiinchim higaa lasage Waa'i Xiiroosa moo'ookko. Ise gaassi haashaaranchi baxonne daba'lta'a heer uulli adilluwwinne hundinnem daddarinne saa'llamo. Daddarinne siiddam diinatim Waa'ina annanni ihaakkoohan ihookko. Is gagina mahim wixxooyyo; dissamooyyo. Siiddam luwwi hundim Waa'ina awwaaddam keenina hurbaatinaa er eddechchinaa fafaakkoohan ihookko. Oono'o, Waa'i heer uulla bi'isaa diihisookko; himbiriiqansaahim uullanne hee'oo minaadaba binnaa'ookko. Oohim minaadabanne ihookkok qeessanne, baxaanonne ihookkok baxisaanonne, moollamanne ihookkok is baxaanchonne, bitaa'aanonne ihookkok biteesaanonne, liqaayyisaanonne ihookkok liqaayyo aa'aanonne, badano miqisaanonne ihookkokim badano miqaanonne ihookko. Uulli mahim bee'i udma'i ihookko. Hore'em bi'ookko. Waa'i kaka wocaakko. Uulli gogookkoo giggirookkoo; heer uullim juujookkoo giggirookkoo. Uullanne la'anto'oo kee'nnek malaayyi hoogookko. Uullanne hee'oo minaadaphphi mashka'inne uulli haashaaramaakko. Minaadab Waa'ika seera gindaakko; ixxi ijaajom iiqaakko. Heer heerina hee'oo hidi'l sagaram gindaakko. Ee bikkina duunchi uulla bi'isookko; uulli minaadabim guzumo'amookko. Ee bikkina uulli minaadab shokkookko; hofqax mannim gatookko. Woyi'n kaashshi gogaakko; woyi'n diqaasim beeddaakko. Ee bikkina illageen liirantam hee'llo'i keen kaba kichche'llo'ookko. Xarbe'e ganku'uuyyi liiranchi hosaakko; liiranchinne kaddam kee'n sagar bi'aakko; mishisoo diitta'i sagarim bee'aakko. Woyi'n diqaasa agakku'uuyyi liiranchi hee'ooyyo. Dimbisoo aggim qaraaraalli ihookko. Gindamu beero'i diihookko; ayyi manchim aagoobee'isa min hundikim gooc xufamookko. Woyi'n diqaas od hee'oobee'i bikkina wixxixxi beyyi hundannem laachchi ihookko; liiranchi heer heerinam bi'ookko. Lobakata liiranchim uullanne hee'ooyyo. Beero'oom hore'em gindamu bikkina gooccuwwi xaamaa ubaakko. Wee'llekaa woyi'nnekaa misha feerakka'a lasage murugoo'isa uullii uulli minaadabii murugookko. Bichchiinsi gatto'i keen liiranchinne ililitamo. Eelliinchi aagginne hee'llam keenim Waa'i loban ihukkisa kuttamo. Eelliinchi firinne hee'llam keenim Waa'ina lomba uwwitamo. Wo'inne kibbamaakkoo uullanne hee'llam keenim Isra'ee'l Moollanni Waa'ika summa lonsitamo. «Muccurina lombi ihona!» yoo mazmuur uulli tochchi hundiinsim macceesamookko. Ihukkaarem an lobakata nacaa jiirummi bikkina iina aayye! Laggam keen lagimmanne qoxxito'ookko; lagimmoomim baasaakko. Heer uulli minaadaba, macceessehe! Dambaq, barii qaashii ki'nnuwwa egeraakko. Dambaqiinsi gibookkok barenne ubookko. Bare caallaa xoreena yakoohim qaashanne amadamookko. Iima'n maskoottuwwi fooqaakko; uullikim shooho'i heekke'aakko. Uulli heekke'ookko, anamookkoo baxxansamookkoo. Uulli dimbaanchisa tartarookko; hafachchi heekkeesoo godo'isam wonciwoncookko. Heer uullanne baaxii'l iyyi kee'mmoo bikkina ubookko; la'mmeka od ki'ooyyo. Ee ammane Waa'i iima'n malaayyaammuwwaa uulli adilluwwaa guzumo'ookko. Barenne karanta'a hee'llam kee'nnisa mateeyyannem karantamo; karaxxi minim ixxuwwi hanenne xufamookko. Lobakat balliinsi lasagem ixxuwwanne oogatamookko. Gogoxxi Moollanni Waa'i adil ihoo bikkina agan tuunsookko; eelliinchim caakka uwwooyyo. Ixxim Xiyoo'n duunannee Yerusaaleemannee ihaa gassookko. Minaadaphphi awwonsaanim ixxi lombe moo'ookko. Waa'a, at iina Moollanna; an keese iimiimaa'oommo; ki summam galaxxoommo. At lobokata maalalsiisoo luwwaa hinaxxi doolliinsi ki'issaa qoodditti luwwaa hundam hore'em amma'nnamaakkoo'isinne issitaatto. Beero'uwwi gindamaa udma'i ihoo'isa issitaatto; ee beero'uwwika girbuwwa gindansitaatto. Ni diina'ik adilla'n minneewwi bi'aakko; heer heerinam hore'em baxamooyyo. Malaayyaam uulli minaadab keese lonsookko; mogaalli uulli beero'uwwanne hee'oo keenim keese baddookko. At buxina, waaraaninaa hawwaaninaa ixxuwwina hawwi ammanenne girbi ikkaatto; ambu'llamiinsi gattam minee eelliinchi iibbiinsi hafixxitam beyyoo ikkaatto. Mogaalli keen gorte'e gafe'oo hagayyi wiisho'isaa udma'i uulli iibbisaa minaadaba hawwoddamo. Waa'a, ihukkaarem at duub uullika hafura siggisoo'isa ni diina'ika sha'llancha sa'issiissaatto; mogaalli kee'n laachcham sa'issiissaatto. Gogoxxi Moollanni Waa'i ka Xiyoo'n duunanne heer uulli minaadab hundinam lob maadda gudisookko. Ee maaddannem doo'llammi woyi'n diqaasaa er hurbaataa gudisookko. Ka duunannettem ihaa minaadab hundannem haf ihu du'm eddechcha heer uulli minaadabannem biddiqu ifiishshaancho ki'isookko. Hundam xanoo Waa'i leho heer heerinam bi'isookko. Manni hundikam indiidda shiinshookko. Ixxi minaadaphphi tuullam heer uulliinsi bi'isookko. Waa'i ixxi gagim kaka wocaakko. Ee balla minaadab hundim «Oono'o, ni Moollanni kane. Ixxonne amma'nninummo ixxim neese gatisukko. Waa'i kane, ixxonne amma'nninummo; neese gatisu bikkinam lobakata liirammona; hore'em lobakata liirammona!» yookko. Waa'ik angi ka duunanne usheexxookko. Ihukkaarem bura'a haranne kade'akkamisam Moo'aabim kade'amookko. Wo'o waachchaa'nnisa ixxuwwika anga biddiqaa'llamo. Ihukkaarem ixxuwwi bolxoo'm mashka'inne Waa'i ixxuwwam sholliisoo bikkina ixxuwwi angi hoogookko. Moo'aaphphi uulli girbuwwa lob gimbuwwinne maqirem gindookko. Iiqansaahim dir issookko. Ee ammane Yihuxxi uullanne kanniinsi woroon yoo mazmuura manni zammarookko. «Niina qoxxaalli beero'i yookko; Waa'i ee beero'i oottuwwaa girbuwwaa niina daphphixxi beyyi issaakko. Amma'nnatonne qoxxaakkoo muccur minaadab aagona ee beero'i gooccuwwa fooqaa'llehe. Moollanna! Keesenne qoxxita'a amma'nnantam keenina at hanqo'i xumma uwwitootto. Ni Moollanni Waa'i niina heer heerina daphphixxi beyyi ihu bikkina heer heerinam ixxonne amma'nnammehe. Ixxi birantam keeno sholliisaakko; summamaakkoo ixxuwwi beero'om gindansaakko; ee beero'i oottuwwam iiqansaa buchchi issaakko. Wor amadanta'a hee'llam keen hancaacantamo; ixxuwwi lokkinnem taakke'antamo. Muccur kee'nnek goog xabbeena. Moollanna, at muccur kee'nneka googo taaphansitootto. Moollanna, neese ki see'llisanne hee'nnummuuyyi keesenne neeyyato issinoommo; ni mixanim ki summa lonsimma. An hiimonne keese hasoommo; i sawwitennem mixoommo. Ki oogato'i uullanne ihoo ammane heer uulli minaadab hanqa la'ookko. Boqqi keenina at ki eroomma issittaarem ixxuwwi er luwwa issimma laqqamoyyo. Ka muccur kee'n uullanne hee'llo'ita'nnim ixxuwwi jora baximmiinsi daba'llitammoyyo; at loban ikkittisam qoossitamoyyo. Waa'a, ki wod guzumo'eena ki'aakko; ihukkaarem ki diina'i laqqeena xanto'oyyo. At ki minaadabina hinkaa'nna to'achchitooda'e moo'lla'a tuuttona; ixxuwwina gudissitti giirim ixxuwwa itona. Waa'a, ni baxo hundam at baxxaatto; xummam niina uwwitootto. Ni Moollanni Waa'a, kiinniinsi mulli dut keen neese gassito'ookko; ihukkaarem niina Moollanni xale'i atette. Oo keen hundim leto'ookko; od daba'llita'ahim foorinne hee'llamoyyo. At guzumo'llittaare bi'llo'i bikkina od ki'llamoyyo; ixxuwwa tiirakkam luwwam bi'issaatto. Waa'a, minaadaba dutissaatto; minaadaba dutissaatto. Atim lomba siiddaatto; uullikam gabala haraassitaatto. Waa'a, ixxuwwi hawwi ammane keese hasso'o; ixxuwwanne quuqqittaarem uunxatinne keese hasso'o. Waa'a, xuuchchi amadu meentichcho u'nnanta'a neesem ki illagenne ee'isame. Xuuchchannee u'nnannee hee'nnummo; ihukkaarem qallummi luwwi bee'e. Ni uullinam kaachcha siidinsummoyyo; ni kolliinsi endummi luwwi mahim bee'e. Leto'i keen ki'lla'a fooraammuwwi ikkamo; waammanne hee'llakkam keen ki'llakka'a liiranchi mazmuura zammallehe. Belecce'oo qiibat uulla haareechchisoo'isa Waa'i leto'aanniinsi lobakat ammane ihaakkoo keeno ki'lla'a foorinne hee'llamisa issookko. I minaadaba, ki'nnuwwi minminenne aaggakka'a gooccuwwa ki'nnuwwi hanenne xuphphehe. Waa'ik quunqi higeebe'e hofqax ammaninam maaxammehe. Uullanne hee'llam minaadaba ixxuwwi jolli bikkina guzumo'eena Waa'i iimanenne hee'oo beyyiinsi waarookko. Ee ammane uulli ixxi hanenne daadu xiiga la'isookko. Leto'i keenom maaxeena xanooyyo. Ee balla Waa'i bararoo hamashshichcho Leewaataana xaaxamoo xarakkichcho Leewaataana lob qoxxaalli qare'aalli bisa'inne guzumo'ookko. Dambalaq woro'l lob moochchichchom muransookko. Ee ammane Waa'i «Doo'llamaakkoo i woyi'n beyyina zammallehe. An Waa'i ixxo egeraancho; hundi ammanem wo'o agisoommo; ee bikkina ayyim hawwodooyyo; ballaa hiimom egeroommo. Od i woyi'n beyyonne an quuqoommoyyo; uttii halluttii hee'uta'n an ee keeno xoqolansoommo; giirinne shokkiisaa bi'isoommo. Ee beelas ixxuwwi waatta'a i beyyonne maaxantona; iinninne xumma qooccitona; eeyya, iinninne xumma qooccitona» yoolla. Waaroo doollenne Yaaqoob nigga issookko; Isra'eelim latookko; fiitookkome; ixxuwwi mishim uulli hundannem wo'mmookko. Waa'i Isra'ee'l diina'a guzumo'ukkisa Isra'eela guzumo'ukkoyyo. Ixxuwwi diina'i beedduqaxa ixxuwwi beedditahinnehe? Waa'i ixxi minaadaba qeefadantamisa issaa guzumo'ukko; eelliinchi fi'l malaayyaam hambu'llamisam binnaa'ukko. Ee bikkina Isra'ee'l oos ixxuwwi baaxiilina haafite siiddeena xantamok mulli minaadaphphi kiti'm beyyuwwa boorjo'isa liitta'ahii aduruusa wiriissakkam beyyuwwaa Asheer misilluwwaa bi'issolasettee. Oohim ixxuwwina baaxiilo sabimmi mish ihookko. Girbamaakkoo beero'i gindamaakko; leexa'am gataa udma'i uulli ihaakko; diinat allaa'lloo beyyi ihu bikkina eekke'enne adduwwi haqqi buyya itukkuuyyi gii'mmookko. Haqqi caaffuwwi gogaa iiqamookko; meentim giirina wixxaa'ookko. Ixxi minaadab qoossubee'i bikkina Qooccukkok ixxuwwina qishixxooyyo. Baxukkokim haafooyyo. Ee balla Efiraaxiis daajjiinsi ki'isaa Gibxi uulli tochchi gogaalli daajji afeebe'e Waa'i hurbaata ganookko. Isra'ee'l oosom matim gatoo'n wixxaa'ookko. Ee ammane kee'mmaalli xurumbi fugamookko. Aasoo'l uullanne bi'lla'a hee'llo'i keenii Gibxi uulla gibba'a matta'a hee'llo'i keenii waatta'a keesammi duunanne Yerusaaleemanne Waa'ina otossitamo. Efiree'm dimbaanina bolxoo'm mare'i ihu, harish cebbiinsi hanaan hee'oo lombi wereeggi ihaa quubaakkoo fiitinaa woyi'n diqaasinaa kaa'amaakkoo kee'n beero'ina aayye. Oono'o, Waa'i wodaamoo malaayyaamoo ihaakkoo mat mancho gudisaakko. Oo manchim wiisho'aam baraxxisa, iiqansoo humbu'llamisaa malaayyaam dirisisaa ixxuwwa xoqolaa uullanne ubbuusookko. Efiree'm dimbaa'nneka bolxoo'm mare'e lokkinne hancaacamakkamo. Harish cebbiinsi hanaan yoohan ihaa lombi wereeggi fiit giggiraa gaassaa mishu oda'i mishisa ihookko. Eeham manni moo'aa feeraa itoohaannisa. Ee ammane Gogoxxi Moollanni Waa'i gatto'i ixxi minaadabina adilla'n lombi mare'ee wereeggi laakkaa ihookko. Ee ammane oogataanina hanqa oogattam qoorooma, diina'iinsi beero'i ooxxi gooca egettam keeninam malaayye uwwookko. Hiraagaanii qeessuwwii dimbita'a tartartamuulla; woyi'n diqaasaa dimbisoo mulli aggaa aggo'i bikkina tiiro huushsha'a qo'llitamuulla. Hiraagaan lobakata dimbito'i bikkina Waa'i ixxuwwina moo'isu kaalta qoossitamoyyo. Qeessuwwim lobakata dimbito'i bikkina ixxuwwi hincoo quuxxuwwanne hanqo'isinne oogatteena xantamoyyo. Hurbaata ittam leemaat hundim uwwinne wo'mmaakko; uwbee'i muccur beyyi hore'em bee'e. Ixxuwwim iina «Ku manchi ayye losiseena hasoolla? Ixxi asso la'isoollakdu ayyenatte? Ixxi losan awwaadookkok anuuna utto'i oos xale'inatte. Ijaajonne ijaajo, ijaajonne ijaajo. Seeranne seera, seeranne seera; hoffoka keyye hoffokam odim ekke'e» yitamuulla. Eehan ihulas Waa'i mulli uulli suuminnee la'akkambee'i sagarinnee ka minaadabina wocookko. Ixxi «Kuk usheexxaxxi beyyo; hoogukkok usheexxona. Kuk hore'em usheexxakkam beyyo» yaa hee'ukko. Ihukkaarem ixxuwwi ixxo macceesimma sabbo'o. Ee bikkina laso matta'a ubbona, iiqantona, qaashanne amadantonaa qeefadantonaa Waa'i sagar ixxuwwina ijaajonne ijaajo, ijaajonne ijaajo, seeranne seera, seeranne seera hofqax keyyenne hofqax odim ekke'enne ihookko. Yerusaaleemanne yoo minaadaba gassitakkam ka naacantakkam keeno, Waa'i sagara macceessehe. Ki'nnuwwi «Lehinne hidi'l sagara aangaammo; Si'oolinnem hide'ammaammo; ee'isam qophphano girbisa, qawwiishsham mi'nnisa issinummi bikkina kee'mmaalli booban waaroo ammane neese afoo'nnim higookko» yitakka'a neeyyato issitakko'ookko Ee bikkina Hundam xanoo Waa'i «Oono'o, shooho'ina ihoo qoxxaalli kina Xiyoonanne dissoommo. Oo kinim keenancha higaakkoohane; lamejjina ihoo lombi kina; ixxonne amma'nnookkok ayyim tuurooyyo. Ee ki'nnek keennanchi hanqa; tumbe'im muccurooma» yoolla. «Niina girba» yitakka'a amma'nnantakkam qophphano wiisho'aam barad agookko. Maaxantakkam beyyuwwam diris agookko. Lehinne aaggakko'i hidi'l sagar gindamookko. Si'oolinne hide'antakko'okim gatookko. Kee'mmaalli booban waaroo ammane bi'llakkamo. Oo booban waaru amman hundam aphphisookko; darina darinaa ballannee hiimonnee waaru amman hundam aphphisookko. Kaka qoossitakkam ammane ki'nnuwwi dambaqqakkamo. Kobi'llishshanne gundi ara'anne iinse'aa lokko fidiixximma hoogukko; weyyakki gundi ihu bikkinam orachcho ifiisimma hoogukko yamamoo manchisa ikkakkamo. Waa'i Pharaaxiim duunannee Gaba'oo'n cebbannee issukkisam ihaa la'oobee'i luwwaa hore'em koyyiinchi ihaakkoo luwwaa isseena odim ki'ookko. Kabadem Gogoxxi Moollanni Waa'i uulla hundoomam bi'seena qoodukkisa macceesaammo. Ee bikkina hawwi ki'nnuwwi hanenne qoxxoobee'isa an ki'nnuwwina kuroommi sagaranne naacancha ullehe. An ki'nnuwwina kuroommi luwwa macceessehe; i woshsham qoossehe. Abuullaanchi wixeena hundi ammanem abuulloohonnihe? Te'im hundi ammanem dimara iiqukkuuyyii wereeggukkuuyyii hee'oonnihe? Uulla axisaa abuullaa lasage heemachchi enjaa kosarataa, soo'oo arasaa mulli keeno hundamii beyyo beyyonnem wixooyyonnihe? Ee lachcham ixxi Waa'i ixxena losisookko; la'isookkome. Heemachchi enjam ihukko kosarata ganeena ganakkam luwwi hundamii faraxxi gaare'ee awwaaxxooyyo. Ee keeno hundam hoffi biccichcha'inne ganookko. Hundi ammanem ganukkuuyyi daabbo'i arasa bi'isooyyo. Hurbaata ganoo faraxxi gaare'inne hurbaat bi'oo'n ganimma la'ookko. Oo hundim ihookkok sogitaninnee maalalsiisoo qooroominnee la'amaakkoohan ihu Gogoxxi Moollanni Waa'iinsette. Daawiit wiiddanaa hee'u Ari'eela yamamoo Yerusaalee'm beero'ina aayye! Hiinchi hiinchonne exxona. Ugudduwwi hiincho hiinchonne lonsamona. Ihukkaarem an Waa'i Ari'eel beero'o u'nnisoommo. Eekke'enne kichchechchii laachchii ihookko. Beero'oomim xiiginne iffiisamu kiti'm beyyisa ihookko. Ixxi kululleetannem wiiddanoommo; qash kululleetam kibbaa u'nnisoommo. Qoto'akka'a egerakkam beyyuwwam baxoommo. Sholle'llootto; buchchanne afuuttaa woccootto. Buchchiinsi hoogaakkoo sagar macceesamookko. Ki sagar uulliinsi firoo wiiddi saga'llisa firookko. Buchchiinsi firaa ki sagar laarookko. Ihukkaarem dut ki diina'i silliqammi di'llisa, dut mogaalli keenim fii'amoo bura'isa ihookko. Gogoxxi Moollanni Waa'i gugitano, uulli huxechcha, kee'mmaalli sagara, humbu'llama, wo'i mooraa itoo giiraa dangonne ki diina'anne asse'aa keese gatiisookko. Ari'eela ixxi girbuwwinnem qasaa u'nnisoo mulli uulli dut minaadab haqaawwisaa diriironne mo'amoo kaaltisaa ihookko. Xiyoo'n duuna qasseena wixxitam adilluwwi hundim haqaawwonne itukkuuyyi garaa dara baqoohaare maham itubee'i sibaaraanchi ihukkisaa ee'isam hiimo haqaawwonne agukkuuyyi garaa dara baqoo ammane leella'i wo'i xeebe'u manchisaa ikkamo. Gawwuwwaa qooqquwwaa ikkehe. Woyi'n diqaasa maham aggakkoo'nnim dimbehe. Dimbisoo agga maham aggakkoo'nnim tartari'llehe. Waa'i kee'mmaalli diriichcha ki'nnuwwanne eddeesu bikkina ki'nnuwwi hiraagaan ille iffiissakko'ookko. Ki'nnuwwi kaalta moo'llakkam keenim horoore iffiissakko'ookko. Hundem hiraaqqi saga'llekim tirat ki'nnuwwiinsi daphphaa koobamu kitaabisa ihookko. Ki'nnuwwim ixxo qananaa'oo manchi beyyo massitakka'a «Kaka niina qananaa'e» yitakka'a xa'mmitakkota'n «Koobammi ihu bikkina qananaa'eena xanoommoyyo» yaa dabarookko. Odim qananaa'aa xanoobee'i manchi beyyo massitakka'a «Kaka niina qananaa'e» yitakkota'n ixxi ki'nnuwwina dabaraa «An qananaa'eena xanoombee'ane» yookko. Waa'i «Ku minaadab xale'i suuminne eese lonsoolla. Ihukkaarem wodanoom iinniinsi qee'llaakkoohane. Manni uullisaakkoo seeraa ogoraa losissu'uuyyi kora'am iina otossitamuulla. Ee bikkina maalalsiiso aganna hanem eebimminne ku minaadab maala'lloo'isa isoommo. Qoolluwwi kee'n qooroomim bi'ookko; qoossitam kee'n hindiyyaatim xadamookko» yoolla. Ixxuwwi sawwite Waa'iinsi daphphaa'lleena xillanne dillitam keenina, tuunsonne baxxo'okam «Ayyi moo'ookko? te'im ayyi la'ookko?» yitam keenina aayye! Ki'nnuwwi hundem luwwam dabaransitakkamuulla. Hara baxoo manchi hariinsi lophphooyyonnihe? Mat baxamu luwwi baxukkoka «At eese baxxittoyyo» yoohonnihe? Te'im ha'l mu'ut hara baxaanchina «At maha baxxooda'e laqqoobee'ane» yoohonnihe? Liibaanoos uulli hurbaata uwwoo harish uullanne daba'lleena, hurbaata uwwoo harish uullim doomanne daba'lleena hofqax ammanim gataakkoollayyonnihe? Ee balla gawwuwwi kitaab sagariinsi macceessamo. Tuunsonne hee'llam qooqquwwim illi fooqaa moo'llamo. Maashshaalli keenii hawwita'a hee'llam keenii Isra'ee'l keesammi Waa'anne odim liirantamo. Mogaalli keenii naacantam keenii bi'llamo; jora issitam keen hundim beedditamo. Manna woshshanne aagisimminne damigaan issitam keeno, kasasamu manchom oogaxxi dummichchanne hawwoddam keenoo qophpha'n naqaashinne muccur keen hanqo'i oogato siiddambee'isa qophphano naqqassam keenoo hundam Waa'i bi'isookko. Ee bikkina Abrihaama gatisu Waa'i Isra'ee'l minaadabina «I minaadaba, kanniinsi eehid sholle'nnii tuullii ki'nnuwwanne ihooyyo. I angi bax ihu ixxuwwi ooso ixxuwwi lambe'enne moo'lla'a i summa maasse'llamo. Isra'ee'l keesammi ihummi eese lonsitamo; i illagennem baddimminne uullitamo. Ee ammane qawwuwwi keen qoossimma siiddamo. Hundi ammanem quunquuntam keenim losano siiddamo» yoolla. Waa'i «Ijaajantambee'i oosina aayye! Iihan ihubee'i sawwite awwontamo; i doo'llinsetti ihubee'i hidi'l sagara aagimminnem baaxiilonne baaxiilo eddamo. Eese a'llansitoo'nnim Gibxa mattamo; Faari'oon digalalona, Gibxi uulli hafim daphphixxi beyyi ihona hassamo. Ihukkaarem Faari'oon digalaloom sholle'n ihookko; Gibxi uulli hafim tuulli ihookko. Ixxuwwi daannuwwi Xoo'aana asse'amaanim Haaneesa yamamoo Gibxi uulli beero'uwwa affota'nnim tuullee sholle'nnee bagaan hara'mmatoo awwaadoo luwwaa uwweena xanoobee'i minaadaphphi beyyo marimmi tuussiisookko» yoolla. Woroo'n qarinne yoo udma'i uullanne hee'oo bii'l moochchina wocamu Waa'i sagar kane. Oo asse'amaan hobbi, qubaam hamashshii bararoo xara'ii hee'oo baddisoo uullinne higga'a mattamo. Ixxuwwi hallannee gaameela'annee lobakata bito xee'aalli ihu mu'uta iyyiissa'a hara'mmato maham uwweena xanoobee'i uulla mattamo. Gibxiinsi egerakkam hara'mmat awwaad bee'ane; ee bikkina Gibxina ‹Qub bee'i Hamashshichcho› yaa summa fissaammo» yoolla. Waa'i iina «Kaba mattaa ku aganni waaroo doollenne heer heerina naqaash ihona ixxuwwi moo'llu'uuyyim kirbaasanne kitaabe; kitaabannem kitaabe» yukko. Ixxuwwi Waa'i ijaajo macceesseena hassambee'i boqquwwaa qawwiisaan keeno. Hiraagaaninam woccam bee'isa «Niina xabbee'n woshsha kuttakkotte; neese macceenseena hansoommi woshshi xale'e kullehe; qacaallaa woshsha xadisoohanee ihu luwwuwwi xale'e losissehe. Ni googiinsi ekkid laa'llehe; ni taakkinam qolat ikkakkotte; neese keesammi ihu Isra'ee'l Waa'i bikkina macceenseena hansoommoyyo» yitamuulla. Ee bikkina Isra'ee'l keesammi «I sagara gaddakka'a barche'enne amma'nnantakko'ookko; qawwiishshannem bakke'llakko'ookko. Ee bikkina ku ki'nnuwwi baaxiil diqamaa ubeena hincaa ubimmoomim qaqqisaa dangonne afoo qeeraa'l ootisa ihookko. Iiqamaa lasage giira eebakkeena te'im wo'o bariinsi inkiirakkeena ihoo gala'im hee'oobee'isa butbutaa iiqamaa uboo buchchi mu'uxxisa ikkakkamo» yoolla. Isra'ee'l keesammi Moollanni Waa'i «I kollonne daba'llitakkolasii usheexxitakkolasii gattakkamo; tiirsitakkolasii amma'nnantakkolasii malaayye siiddakkamo. Ihukkaarem ki'nnuwwi sabbakko'ookko. Ee bikkinne ‹Qare'aalli faradonne saa'llinaa xolloommo› yitakkamuulla. Ee bikkina gibbakkam. Ki'nnuwwi ‹Ni farad hore'em qare'aalla› yitakko'ookko. Ihukkaarem ki'nnuwwa hollansitam kee'nnek ki'nnuwwaanniinsi lophphaa qare'aalli ihookko. Diina'i gaadaaniinsi matik sha'llanchi ki'nnuwwik mat kum manni giboo'isa issookko; Duunanne kaasamu baandi'llisaa hoffi duunannem moo'amoo mare'isaa ikkakkeebe'e ki'nnuwwiinsi hofqaxim gateebe'e diina'i gaadaaniinsi xale'i onti ki'nnuwwa hundam hollookko» yoolla. Waa'i hanqa oogatoohan ihu bikkina ki'nnuwwina haafookko; qishixxeenam ki'ookko. Ixxo amma'nnanchinne egeroo keen hundim maassaammuwwa. Yerusaaleemina hee'llakkam Xiyoo'n minaadaba, kanniinsi eehid wi'llitakkamoyyo. Hara'mmatina ixxi kollonne laattakkam ammane qishixxookko; macceesukkisam qaqqisaa agaagookko. Waa'i lobakat hawwonne aaggakkamisa isseena xanookko; ihukkaarem ixxi gagoomim ki'nnuwwinne ihaa losisookko; ixxo hassakku'uuyyim od qondooddakkamoyyo. Googiinsi tochchonne makkanne te'im qeddanne fittakka'a jaljallitakku'uuyyi kinnuwwi lasinne «Hanqo'i goog kane; ka googinne mare!» yoo sagara macceessakkamo. Ee ammane birinne goolabamaakkoo ki'nnuwwi waa'uwwa worqinne wereeggaakkoo misilluwwaa sholliissakkamo. «Niinniinsi qee'lle» haashaarammi luwwisa uunjitakkamo. Hurbaata wixxakkam ammane muta li'aa er atoota siiddakkona Waa'i ki'nnuwwina xeena ga'nnisookko; ki'nnuwwi diinatim haraar allaachchi biiranne allaa'llookko. Ki'nnuwwi abuullitakkam mirgo'uuwwii hallii doo'llammi er hixe itookko. Uullanne hawwi ihoo ammane lob duunnuwwiinsii hoffi duunnuwwiinsii wo'i daadookko. Waa'i ixxi minaadaphpheka iiqancha caccoo balla, booban omassukkokam fayyiisoo balla agan eelliinchisa caakkisookko; eelliinchi caakkim gaassaanniinsi lamar anga lophphaakkoohan ihookko. Oono'o, Waa'ik malaayyii hibbii qee'llinnem moo'amookko; labanii wiriirii ixxi quunqi mare'uwwa; wocoohaarem ixxek sagar gii'llisa aphphookko. Ixxi fooshshi gaanji afeebe'e aqqoo dirisisa; minaadaba illaanchonne illaansakkam haccisa illaansaa bi'isookko. Aqonnem bichchi hakkamma issaa bi'isookko. Ihukkaarem Waa'i minaadaba, ki'nnuwwi liirantakkamo; keesammi uguxxi hiimonne zammattakkamaannisam zammattakkamo. Isra'ee'l allaaraanchi ihu Waa'i Keesammi Mine marukkuuyyi xurumba fuggu'uuyyi zammaroo mannisa liirantakkamo. Waa'i ixxeka malaayyaam sagara manni hundim macceesoo'isa issookko. Ixxi malaayyi dillukkisam aphphoo quunqinne, itoo giirinne, hambu'llaminne, wiisho'innee baradinnee la'isookko. Waa'ik sagar Aasoo'l minaadaba muggisookko; ixxi biccim ixxuwwa aphphisookko. Waa'i Aasoo'l minaadaba dabaransaa aphphisoo ammane ixxi minaadab xarbe'ikaa maasinqo'ikaa sagara macceesissamo. Aasoo'l minaadabinne oramookkok Waa'i ixxi gagame. Lobakat doolliinsi illageen Aasoo'l adilluwwi adil shokkoo beyyi gudaa hee'ukko. Oo beyyi haraaraa xillaallaa ihaa lobakat haqqi tuubamaakkoo beyyi hee'ukko; iimaniinsi dilloo gii'llisa Waa'ik fooshshi giira bubbaa'ookko. Isra'ee'l keesammi kolli moo'llambee'i keenina, Waa'iinsim hara'mmato siiddeena hassambee'i keenina, ihukkaarem hara'mmato siiddeenaa yita'a Gibxi uulla dillitam keenina, ixxuwwi faradonne amma'nnitam keeninaa ixxuwwi faraxxi gaare'uwwi dutimmannee faraxxi qoxxaalloomannee bakke'llam keeninaa aayye! Ihukkaarem ixxi qoora; boobana dilliisookko; ixxi yukkaanniinsi laso daba'llooyyo; jor baxxam keenoo hantaaraanina agaaggam keenoo guzumo'ookko. Gibxi uulli manni manname bagaan Waa'ayyo; ixxuwwi faradim maara edde'llo'ookeeno bagaan ayyaanayyo; Waa'i ixxi quunqinne ki'oo ammane mulli keenina hara'mmaanchi qolamookko; hara'mmam hee'ukkokim ubookko; lamim matikka'a bi'llamo. Waa'i iina «Hobbichchi diinate shoo ammane amadaa toxoohaare lobakat allaaraan weeccanta'a waattota'nnim ixxuwwik laachchi baddisoobee'isa ixxuwwi corochchinam u'nnamoobee'isa an gogoxxi Moollanni Waa'i Xiyoo'n duunannee qoffit beyyuwwannee orameena dilloommo. Cii'ichchi ixxi do'nnanne lado biddiqaa'aa ambimminne ixxi ciicoolla egeroo'isam an gogoxxi Moollanni Waa'i Yerusaaleema daphphaa'oommo; egeroommo; gatisoommo; hawwiinsim fissoommo. «Isra'ee'l minaadaba, hore'em laggakko'i i kollonne daba'llehe. Baaxiilaanchi ki'nnuwwi anginne birinnee worqinnee baxxakko'i qophpha'n waa'uwwa hundam ubbuussakka'a uttakkam balli waarookko. Aasoo'l minaadab manniinsetti ihubee'i bisa'inne beedditamo; mannan ihubee'i bisa'im ixxuwwa itookko; bisa'iinsi gibbamo; harde'uwwim agidda'n baxo baxxamo. Qoxxaalli ixxuwwi girbi dambaqinne gindamookko; gaaxxi awwonsaanim o'l mare'e moo'lla'a muggitamo» yukko. Ixxi giir Xiyoonanne gii'l midachchim Yerusaaleemanne ihu Waa'i kaka wocaakko. Oono'o, adil muccuroominne gassookko; gassaanim hanqo'isinne oogatookko. Ixxuwwi annaannichchim manni hundinam hafachchiinsi daphphakkam mi'nnisaa hambu'llamiinsim maaxamakkam girbisaa ikkamo; uulli udma'anne daadoo daajjuwwisaa iibbi uullanne lob geejji ki'n hafisaa ikkamo. Ka lasage moo'oo kee'nnek illi ximbiiphphooyyo; macceesoo keenim baqaa macceesookko. Gaaggaabbam keen iyyaaqqimminne qoossitam keen ikkamo; duda'llam keenim danaamisa woccam keen ikkamo; woccam woshshim mannina aagoo keen ikkamo. Ka lasage ceemmaalla lombaamo yakkamoyyo; idiidaanchom biijaalla yakkamoyyo. Ihukkaarem ceemmaalluwwi ceemmi woshsham woccamo; ixxuwwi sawwitim jollinne wo'mmaakkoohane. Summa bi'issu'uuyyi Waa'a lagimma losissamo; sibaarukkaannina hurbaata xeebe'ukkaanninam wo'o uwwitamoyyo. Adabee'i kee'nnek sawwit jora; hawwaa'nnek meto'i hanqi ihuta'nnim ixxuwwa qophphaninne bi'iseena jora sawwookko. Er manchik sawwitim erane; er baxonnem qoxxaa hee'ookko. Ki'nnuwwi makkixxitakka'a hee'llakkam meenti ki'llakka'a i sagara macceessehe; ki'nnuwwi heechchanne bakke'llakkam keenim i woshsha macceessehe. Kaba ki'nnuwwi heechchanne bakke'llakka'a hee'llakkam meenti ka mat hiinchi woronne neeyyato mussiisoo u'n ki'nnuwwanne afookko. Ki'nnuwwina woyi'nnanem ihukko mulli haqqanne misha siiddakkamoyyo. Ki'nnuwwi amaadaan meenti huxe'llehe; makkixxitakka'a hee'llakkam meentim, baachchinne batbati'llehe; eddechcha sheelaxxitakka'a leexa'llehe; xiddi eddechchinnem lamado lade'llehe. Liiransoo harish er uullii woyi'n kaashshii bi'u bikkina biqe aphphixxehe; kichche'lleheme. Uttii qarxaffii i minaadaphphi uullanne mutaakko; minaadab liiranchinne hee'llam hee'llo'i minneewwinaa liiranchinne wo'mmaa hee'u ka beero'inaa wi'llehe. Adi'lla'n min gatoo'n diihookko; adilla'n beero'oomim ogor bee'i uulli udma'i ihookko; minneewwii waardiyyi egereena afuuroo beyyuwwii hundim gindamookko; bii'l hallii kade'amoo allaachchi diinatim allaa'lloo beyyi ihookko. Ihukkaarem Waa'i ixxeka ayyaana ni hanenne dunoo amman waarookko; ee ammane uulli udma'i harish ihookko; harish uullim lobakat misha uwwookko. Ka lasage hanqo'i oogat uulli udma'anne hee'ookko; harish uullannem muccuroom hee'ookko. Muccuroo'mmek bax xumma; mishoomim xummaa heer heerina amma'nnanchaa ihookko. Waa'i minaadab qulitiinsii u'nniinsii usheexxookko; ixxuwwi minim xumminnee gatimminnee wo'mmaakkoohan ihookko. Baradaam xeeninne haqqi doomoom aphphisamuta'n beero'oomim hore'em bi'uta'nnim wo'i bu'i gadanonne ki'nnuwwika wixo wixxakkam bikkinaa ki'nnuwwi larinaa hallinaa ihoo allaachchi beyyo siiddakkam bikkinaa maassinne wo'mmitakko'oo keen ikkakkamo. At bi'lloo'nnim bi'issoottok, ate bi'isaancho, kiina aayye! Lagakkoo'nnim laggoohaanno, ate laggoohaanno kiina aayye! Bi'ishsha uttoo ammane atim bi'llootto! Lagimma uttoo ammanem lagantootto. Waa'a! Niina haafihe; keesenne neeyyato issinaammo. Balli hundam at neese egere; hawwi ammanennem at neese gatise. Ki sagar banqisa gugoo ammane minaadab gibookko; at hibbinne ki'lloo ammane adilluwwi binnookko. Qawwaawwi wixxoo'isa qeefajjo'i wixxookko; qawwaawwi wotalli xophxophoo'isa minaadab qeefajjo'o baqookko. Waa'i hundem luwwiinsem lobane! Hee'ookkokim iimanennette. Ixxi Xiyoo'n beero'o muccuroominnee hanqo'i oogatinnee wonshookko. Ixxi at hee'lloo doollina amma'nnisoo shooho'o; gatimmina, lachchinaa qooroominaa lugum ihookko. Waa'a baddimmi ka amaxxi hundinam gooca. Oono'o, maagguwwi goog hundannem laattamo; xummi asse'amaanim qaraaraalli wi'llo wi'llitamo. Lob googguwwi diihaakko; ee googonne taakke'oo manni bee'e; hidi'l sagalluwwi gindamaakko; sogoo keen gadamaakko; lombi yoo manchim bee'e. Uulli wi'llukko; wossukko. Liibaanoos tuurukko; quubukko. Saaroon uulli udma'isa ihaakko; Baasaanannee Qarmeeloosannee yoo haqquwwik buyyi giggiraakko. Waa'i «An kaba ki'oommo; iimiimoommo; lophphoommome. Gaaba siiraa luunqa qaroohaannisa ki'nnuwwa fooshshi ki'nnuwwam gii'llisa ihaa itookko. Minaadab boorjo'i ki'nnisaa murakko'i uttisaa giiranne shokkookko. Ki'nnuwwi qee'llonne yoontakke'i keen issummoka macceessehe; abbisonne yoontakke'i keenim i malaayye laqqehe» yukko. Xiyoonanne hee'llam baaxiilaan muggitamo; laggam keenim tuuttamo. Ixxuwwi «Niinniinsi ka itoo giirinne hee'eena xanookkok ayyette? Heer heerina aphphoo giirindu ayyi hee'eena xanookko?» yitamo. Muccuroominne hee'ookkok, hanqa wocookkok, qawwiishshinne siidamoo luwwa gadookkok, maqanxa aa'immiinsi ixxi anga ege'llookkok, manni xiiga dunimmi bikkina macceeseena hasoobee'ekii jor luwwa moo'immiinsi ege'llookkokii eehido'i manchi lombi beyyonne hee'ookko; duu'n girbi ixxena daphphixxi beyyi ihookko; itoo luwwa hoogooyyo; agoo wo'im xoo'ooyyo. Ki illi adila nuurinne moo'ookko; qee'llonne yoo haraar uullam moo'ookko. Gaassi hawwo tiittittuuyyi «Lob gassaanchi hannonne yookko? gibissiisaanchidu hannonne yookko? Qoto'akka'a egerakkam beyyi awwonsaanchi hannonne yookko?» yitaa xa'mmitootto. At qoossiteenaa laqqeenaa xantoobee'i suuminne woccam bolxitam allaggi minaadaba ka lasage moo'llakkamoyyo. La'anto'oo amma'nnaxxi ugudduwwa lonsinoommi Xiyoo'n beero'uwwa moo'e! Xumminne hee'llakkamisina makkaa yoo Yerusaalee'm beero'o moo'llehe! Ixxim xiribbuwwi hore'em gosamoobee'aannisa, usseewwim muramoobee'aannisaa beyyiinsim mikmikoobee'i dukkaa'nnisaa ihookko. Waa'i ee beyyonne niina malaayyi ihookko; laaydaam wongilluwwi higoobee'isaa lob markabbuwwim chabboobee'isaa haraar daajjuwwaa wo'uwwaa ihookko. Waa'i niina daanna; ixxi niina seera uwwoohanee adilaa; neese gatisookkokim ixxotte. Ihukkaarem at utuphphek us sho'ukkaannisa, utuboomim qoxxubee'aannisaa shara'i biddiqubee'i markaphphisaa; ee lasage fafaakkoo qeefajjo'i baxxansamookko; dimmeewwim gattoo'n aagga'a ee qeefajjo'iinsi massitamo. Xiyoonanne hee'oo manniinsi «Iina xissaakko» yoo mat manchim hee'ooyyo; eekke'e hee'llam keen hundikim baaxiil haafamookko. Minaadaba, waallehe macceessehe! Manna, qoossehe. Uullii uullanne yoo luwwii hundim heer uullii heer uullanne mutoo luwwii hundim macceesona! Waa'i uulli minaadabannee ixxuwwi gogotannee lobakata quuqaakko. Guullaahim bi'isookko; bisa'inne durantonam higisaa uwwookko. Ixxuwwi leeshim hannonnem ubaa shamookko bagaan waammamooyyo; duunnuwwim xiiga gunguu'llookko. Eelliinchi, aganii boollaankii bi'ookko; iimanim omachchisa xaaxamaa laa'ookko; boollaankim woyi'n buyyisaa oda'i buyyisaa giggirookko. Waa'i iimanenne bisa'a gudisaakko; bichchi ixxuwwanne afoo'isina ixxuwwanne oogatu Eedoo'm minaadabam oo bisa'i aphphisookko. Kitimina hincu gereebbikii fella'ikii ambulluwwi durantam ammane ixxuwwik xiigii di'irii billawwa gunguussoo'isam ixxi bisa'im Eedoo'm manni xiiginnee di'irinnee gunguussamookko. Waa'i ka kitima Booxir beero'onnee lophphaakkoo durancham Eedoo'm uullannee issookko. Boobir Eedoo'm minaadabinne maqire labeennuwwim moolluwwinne maqire ubbamo; ihukkaarem mulli keeninne maqirem letamo; ixxuwwi uulli xiiginne kolbamookko; di'irinnem harishookko. Waa'i Xiyoona gatiseenaa ixxi diina'iinsim baado miqiseenaa waaroo hiinchoo ballaa qoodaakko. Eedoo'm daajjuwwi reenjanne buchchim diinanne daba'llookko; uulloom hundoomim shokkookko. Ballaa hiimoo shokkookko; ixxeensim wiriir firimma heer heerinam urooyyo. Uulloomim doolli hundam awwaadoobee'i udma'i ihookko; la'mmaagge ee uullinne ayyim taakke'ooyyo. Ee uullanne cingiraallii gandaddii wo'mmookko; mooqqaqqii qooraantii do'nna baxookko. Waa'i Edoo'mmeka gindamoo beyyo keenoo usaa bi'oo beyyo keenoo tumbe'ee biddiqaa'ookko. Uulloomam gassoo adil hee'ooyyo; uulla awwonsaan hundim bi'ookko. Adilla'n minneewwannee girbamu beero'uwwannee hundannem uttii halluttii mutookko; wengereellii mooqqaqqim hee'oo beyyi ihookko. Udma'i uulli moochchi gotinne maqire hee'ookko; udma'i uulli fella'a laboo habusim ixxina'i ixxim weeccamookko; hii'm awkare'i ee beyyonne usheexxookko; ixxuwwim usheexxaxxi beyyo siiddamo. Mooqqaqqi do'nna baxaa quunqa qarookko; ciicoollam fissaa li'isookko; ammar lam lam iikka'a weeccanta'a fikkaanniteena ee beyyonne wixxitamo. Fooraam qooccanchuwwi bikkina Waa'i kitaabanne kitaabamukkoka hassakka'a qananaa'llehe; ka qooccanchuwwik matim bi'ooyyo; heechchi besha hoogaa mullam hee'ookkok hee'ooyyo; Waa'i ixxi gagoomim ookki ihoo'isina ijaaju bikkina mateeyyoominne hee'llamisa issookko. Waa'i ixxuwwi annannichchinam hannonne hee'im hasisooda'e qoodukko; oohim heer heerinam qaranchiinsi qaranchi afeebe'e ixxuwwina sharad ihaa hee'llamo. Udma'i uullii gogaalli uullii liira'mmookko; uulli udma'annem fiit fiitookko. Udma'i uullim liiranchi mazmuurinne ilil yookko; Liibaanoos duu'nnisam lombaam ihookko; Qarmeeloosisaa Saaroo'nnisaa hibbaam ihookko. Ayyim ni Moollannika hibbaa Waa'ikam lombaa moo'ookko. Hoogu wodduwwa qoxxissehe; qacu malaayyuwwam qoxxissehe. Baachchaaninam «Qoxxehe; badditakkotte! Ki'nnuwwi Waa'i waarookko; ixxi baado miqiseena waarookko; baado miqisaa ki'nnuwwa gatiseena waarookko» yi'llehe. Ee ammane qooqquwwi moo'llamo; gawwuwwim macceessamo. Dimmeewwi kukkussisa xophitamo; wocceena xantambee'i duudduwwi zammattamo; uulli udma'anne daajji wo'i daadookko. Shokkiisoo shashsharim delbi ihookko; gogaalli uullim bu'i wo'inne qufookko; wengereelli daabbaram hee'u beyyim er hixii qara'ii mutoo beyyi ihookko. Eekke'enne lob bobba'i yookko; ookkim «Keesamaakkoo googo» yamamookko; ee googinne haashaarammuwwi taakke'ooyyo; ihukkaarem Waa'i minaadab xale'i taakke'ookko; maashaalluwwi ee googo huushooyyo. Hobbi ee beyyonne hee'ooyyo; jor moochchim hance'ooyyo; eehido'i keen googonne siidamooyyo; Waa'i gatisu keen xale'i eekkeen daba'llamookko. Waa'i gatisu keen daba'llitamo; zammatu'uuyyim Xiyoona aaggamo; Heer heeraxxi liirancham laakkisa siixxitamo; liirammatoo heelloo siixxitamo; hawwii kichchechchii ixxuwwiinsi qee'llookko. Hizqiyaas Yihuxxi uullanne adil ihu tommonnee soo'l hiinchonnee Aasoo'l adil Sanaakireem girbamaakkoo Yihuxxi beero'uwwa qasaa kaa'aa amadukko. Adil Hizqiyaas anga uwwoo'isina Aasoo'l adil gaaxxi awwonsaancho lobakat gogotinne maqirem Laakiishiinsi adil Hizqiyaas beyyo Yerusaaleema asse'ukko. Oo gaaxxi awwonsaanchim eddechcha aanshaanchi abuulli uulla marakkam gooqqi hanaa'n delbi boohe'i gadano afaa uullukko. Adilla'n mi'n ijaajaanchi hee'u Hiilqiy beet Eeliyaaqeem, adi'lla'n mi'n kitaabaanchi hee'u Sheebinii aganna kitaabaanchi hee'u Asaaf beet Yoo'aahii Aasoo'l gaaxxi awwonsaanchinne edanteena fitto'o. Gaaxxi awwonsaanchi Raafaasqiisim ixxuwwina «Aasoo'l adil Hizqiyaasina ‹At kaa'nna ki wodano qoxxissittok ayyenne amma'nnantaate? O'l gaafa'oomii qoxxaalli gogotii iina yookko yitoolla; ihukkaarem ookki awwaad bee'i woshsha; at iina ijaajancha sabbittok ayye amma'nnantaatette? Ayyi la'ukko at Gibxi uulli adil iina hara'mmookko yitaa neeyyata issitaa hee'llootto; ihukkaarem ixxonne amma'nnamim iiqamaakkoo shomboqo'i sikkonne bakke'immi ihukkisa la'e; ixxi shiincaar ihaa ki anga qasimmiinsi bagaan mahinam awwaadooyyo› yoolla yitakka'a kullehe» yukko. Odim Aasoo'l gaaxxi awwonsaanchi «At ‹I Moollanni Waa'anne amma'nnamoommo› yitoolli ihulas Yihuxxekii Yerusaalee'm minaadabii xale'i matem kiti'm beyyonne otossimmi hasisookko yitaa Waa'ina otossakkam beyyuwwaa kiti'm beyyuwwaa gindansittok Hizqiyaas atetteyyonnihe? Ee bikkina Aasoor adi'l summinne ihaa kiina e'lloo luwwa kuroommo; saa'llita'a jigisimma iggitam manni yolas lam kum farado kiina uwwoommo. At Aasoo'l gaaxxi awwonsaaniinsi hundiinsi lasaanchikam ihuta'n uullixxanteena xantooyyo; eehannonnem Gibxi uulli manni faraxxi gaarre'uwwaa faradoo iina asse'llamo yitaa neeyyattoolla. Odim an ka uulla qaseena waarummok Waa'i doo'l ihoo'nnim ihukkoka labissaatennihe? Hore'oomam ka uulla qasaa bi'isoommisina ijaajukkok Waa'i ixxi gagoomame» yukko. Ee lasage Eeliyaaqeem, Sheebinaanii Yoo'ahii Aasoo'l uulli gaaxxi awwonsaanchina «Neese tirato lanqoomman ihu bikkina Sooriy uulli suuminne kuttoo'isina keese uunxinoommo; ka qash hanenne yo'i manni hundim macceessam Ibro'i manni suuminne kuttitte» yito'o. Aasoo'l gaaxxi awwonsaanchim «I moollanni adil ka hundam ki'nnuwwinaa ki'nnuwwi uulli adilinaa xale'e kuroommisina asse'ukkoka labissakka'attennihe? Ee'isayyo, ki'nnuwwisam ixxuwwi ciro itimmii shumam agimmii hasisookkok minaadabam edaatette ihu bikkina an kuroommok ka qash hanenne yo'i manni hundim macceessamisinatte» yukko. Oo gaaxxi awwonsaanchi odim afuuru beyyiinsi ki'aa uullukko; ixxi sagaram iimaa'aa Ibro'isinne «Ki'nnuwwina Aasoo'l lob adil kuroo woshsha macceessehe. Hizqiyaas ki'nnuwwa qawwiisoone; ixxi hore'em ki'nnuwwa gatiseena xanooyyo. Hizqiyaas ‹Waa'anne amma'nnammehe; ixxi neese gatisookko; ni beero'im Aasoo'l gogoxxi anganne aagoobee'isa hoorookko› yoo woshsha macceessakkotte. Hizqiyaas ki'nnuwwina kuroo woshsha macceessakkotte; Aasoo'l adil i beyyo waattakka'a iinninne iittammehe; ki'nnuwwi annannichchim eekka issitakkolas woyi'nnekaa oda'ikaa misha ittakkamo; hintakko'i balleewwiinsim wo'o aggakkamo. Kukim ihookkok adil ki'nnuwwi uulla laboo uulla massaa beyyo amadiiseebe'e; ee uullannem woyi'n diqaasina ihoo woyina kaasakkam beyyuwwii itakkam hurbaatina ihoo wix hurbaata wixakkam beyyuwwii yookko. Ee bikkina Hizqiyaas ‹Waa'i ki'nnuwwa gatisookko› yaa wocukkuuyyi ki'nnuwwa qawwiisoone. Ihona bagaan mulli minaadaphphi waa'uwwiinsi matim Aasoo'l adi'l angiinsi ixxi uulla gatiseena xanukkok yoohonnihe? Haamaatikii Arfaad waa'uwwii hannonne yo'o? Safaarwaa'm waa'uwdu hanno affo'o? Odim ixxuwwiinsi matim ihuta'n Samaare'e i angiinsi gatiseena xanaahinnihe? Ka uulli hundikim waa'uwwi i angiinsi ixxuwwi uullla gatisseena xanukkok hinkane? Eehannah ki'nnuwwi ‹Waa'i Yerusaaleema gatisookko› yitakka'a sawwitakkamok hinkidette?» yukko. Minaadabim illageen adil Hizqiyaas ijaajukkisanne mat luwwam woccambee'isa cawwita'a utto'o. Ee lasage adi'l mi'n gassaanchi hee'u Hilqiy beet Eeliyaaqeem, kitaabaanchi Sheebinaanii aganni kitaabaanchi hee'u Asaaf beet Yoo'ahii kichchechchinne ixxuwwi eddechcha dereetto'o; adil Hizqiyaas kollim hincita'a Aasoo'l gaaxxi awwonsaanchi wocukkoka hundam kutto'o. Adil Hizqiyaas ka hundam macceesaa kichchechchinne ixxi eddechcha dereerukko; xiddi eddechcham edde'aa Keesammi Mine marukko; Adilla'n mi'n gassaanchi Eeliyaaqeema, adi'l mi'n kitaabaanchi Sheebinaanaa qeessuwwiinsim la'anto'oo keenoo Aamoox beet hee'u hiraagaanchi Issaayyaas beyyo asse'ukko; ixxuwwim xiddi eddechcha edde'lla'a hee'llo'o. Issaayyaasina kuttona Hizqiyaas ixxuwwanne asse'u assi «Kaballi niina lophphaakkoo hawwi balla, guzumo'anchanee sholle'nnanee; qattam amman afaa xuu'lleena malaayyi bee'u meentichchosa inkaammo. Aasoo'l adil hee'oo Waa'a game'llona ixxeka gaaxxi awwonsaancho asse'aakko; ki Moollanni Waa'i ee game'llato macceesaa gamme'llukkoka guzumo'ookki ihookko; ee bikkina ni minaadabiinsi foorinne gatoo keenina ki Moollanni Waa'a uunxe» yukko. Issaayyaasim adil Hizqiyaas asse'u woshsha macceesaa «Waa'i ‹Aasoo'l awwaadaan eese game'llito'i game'llato macceessaa baddititte. Oono'o, ixxo hambalaachchisoommo; ixxi uullanne ihu woshsha macceesaa ee uullam daba'llaa maroo'isaa ee beyyonnem bisa'inne aphphisamaa lehoo'isaa issoommo› yoolla» yukko. Gaaxxi awwonsaanchim Asoo'l adil Laakiishiinsi uraa marukkisa macceesaa hee'u beyyiinsi daba'llukko; ixxim adil Libina'i beero'o qasukkuuyyi edamukko. Tophphe'i adil Tiirhaaq awwonsoo Gibxi uulli gogot ixxuwwa qaseena waaroolli ihukkisa Aasoo'l minaadab macceesukko. Asoo'l adilim Hizqiyaasina «Yihuxxi adil Hizqiyaasa, at amma'nnantoo Waa'i ‹Yerusaaleem Aasoo'l adi'l anganne ubooyyo› yoo neeyyatinne keese qawwiisoone. Aasoo'l adilluwwi mat uulla bi'isseena hassam amman hundam ee uulla hinkid bi'issamda'e macceessaatto; eehannah atdu eehanniinsi gattoo labissaatennihe? Gaassi iyyanno'i Goozaana, Kaaraanaa Reexeef beero'uwwaa bi'isso'ookko; Talaasaranne hee'oo Ede'n minaadabam shito'ookko; oo luwwi hundim ihukkuuyyi ixxuwwi waa'uwwiinsi matim gatiseena xanaahinnihe? Haamaatik, Arfaadik, Safaarwaayimik, Heenaa'ikii Iiwwa'i beero'uwwikii adilluwwi kaba hannonne yo'o?› yoo assi kitaaba asse'amaanonne» asse'ukko. Adil Hizqiyaas ee assikitaaba asse'amaa'n angiinsi aa'aa qananaa'ukko; ixxim ee assikitaaba Keesammi Mine massaa Waa'i illagenne biddiqaa'ukko. Hizqiyaasim «Kiruubeelanne afuuttoo Isra'ee'l Waa'i ikkitti gogoxxi Moollanna! Uullanne yoo adilluwwanne hundannem Waa'i xale'i atette; iimanee uullaa qooccittok atette. Kabadem Waa'a! Ki macce ni kolli dabattaa macceese; Waa'a ki ille fooqaa'e; moo'eme; Sanaakireem hee'oo Waa'a game'lleena asse'u sagara macceese. Waa'a! Aasoo'l adilluwwi lobakat adilluwwa guullito'isaa ixxuwwi uullam bi'isso'isaa macceensaammo. Manni anginne haqqaa kinaa cabbarakka'a baxakko'i qophpha'n waa'i misilluwwa shokkiissa'a bi'isso'ookko. Ni Moollanni Waa'a! Xale'i at hanqo'i Waa'i ikkittisa heer uulli minaadab hundim la'oo'isina kaba neese Aasoo'l manni angiinsi gatise» yaa uunxukko. Ee lasage Amoox beet Issaayyaas adil Hizqiyaasina «Isra'ee'l Moollanni Waa'i ‹Aasoo'l adil Sanaakireem sha'llanchi bikkina hincaa'llitti uunxato macceesaammo› yoolla. Ixxi bikkinam Waa'i ‹Sanaakireema, Yerusaalee'm minaadab keese gadaa naacamookko; at gibboo ammanem horoore heekkeesamookko. Game'llanchinne sholliissoottok ayye labissaate? Ki sagara iimiimaa'llittok amaadimminnem ille ki'issittok ayyennette? Isra'ee'l Keesammannettena'e!› yukko. Ki awwaadaano asse'llaa Waa'anne game'llaxxi sagara wocimminne ‹I faraxxi gaare'uwwi qoxallaninne iim shiqito'i Liibaanoos duunnuwwa amadaammo; Liibaanoosika qeeraa'l haqquwwaa mishissam hoommuwwaa muraammo; mishissam shiqqeen beyyuwwanne tuut haqqoro aagaammo. Allaggi manni uullanne balleewwa hinaa wo'o agaammo; i gogotik lokki dutimmiinsi ki'ukkok Abbaayyi daajje gokkisaakko› yitaa bolxitaatto. «Odim Waa'i ‹Lobakat ammaniinsi illageen ka hundam qoodummok an i gagoomam ihummisa macceessittoyyonnihe? Ka woshsha qoodaa tunga afoo'isa issummok anette; girbamu beero'uwwa ginditaa hacci tuubbi issitoo'isina malaayye uwwummok anette. Ee beyyonne hee'llo'i minaadaphphek malaayyi hoogaakko; muggito'ookko; sholle'llo'ookkome; biir uulli hixisa, wix hurbaaxxi mutisa, mi'n hanenne mutoo harafisaa hamaamoo'n waaggi aphphisu hurbaaxxisaa ikko'ookko. « ‹An ki bikkina hundem luwwam la'oommo; maha issitooda'ee hanno mattooda'ee moo'oommo; i hanennem quunqinne ki'llittisa qoossaammo. Eesenne quuqqittisaa ki wodanim bolxukkisaa kaba ki sanenne guma'a ki suumennem hakkamma aagisaa waatti googinnem dabaroommo› yoo asso asse'ukko» yukko. Ee lasage Issaayyaas adil Hizqiyaasina «Ku hundim wo'mmo'isina mare'oom kane; ka maaragee waaroo maaragee wixakkoo'n li'ukkokaa gobbe'i hurbaataa ittakkamo; ihukkaarem saxxi hiinchonne ki'nnuwwi gaqqi hurbaata wixxakka'a atootissakkamo; woyinam kaassakka'a misha ittakkamo. Yihuxxi uullanne bichchiinsi gatto'i keen hundim uullanne nigga massaa li'aa mishoo duubbi kaashshisa ikkamo. Yerusaaleemiinsii Xiyoo'n duuniinsii bichchiinsii gattam keen hee'llamo. Gogoxxi Moollanni Waa'ik to'achchi eekka issookko. «Ee bikkina Aasoo'l adi'l bikkina Waa'i ‹Sanaakireem ka beero'o hore'em aagooyyo; mat xiyyim ixxonne darabamooyyo; agira amadu gaadanchim ixxi kollonne hincooyyo; dichchirinnem kibbamooyyo. Ee bikkina ixxi ka beero'onne aagoo'nnim waaru googinnem daba'llaa elle'ookko; kaka wocummok an Waa'a. I gaqqi lombi bikkinaa i awwaadaanchi Daawiitina uwwummi neeyyaxxi saga'l bikkinaa ka beero'o an i gagoomim qasamaa gatisoommo› yoolla» yukko. Ee hiimom Waa'i asse'amaanchi Aasoo'l gaadaa'n wiiddananne aagaa mat xibbee sadeentayyee onti kum gaadaanoo shukko; soodaraar daranne manni diriiriinsi baqoo ammanenne hundim lehaa siidamukko. Ee lasage Aasoo'l adil Sanaakireem laso daba'llaa Naanaawe'e maraa afuurukko. Balliinsi mat balla Niisarook yakkam qophpha'n waa'ina otossakkam minenne otossukkuuyyim ixxi oosiinsi lam Adiraameeleekii Saari'eexerii bisa'inne shito'o; ixxuwwim xotta'a Araaraata gibbo'o; ixxi beyyonnem Asraadoona yakkam ixxi beet adil ihukko. Ee doollenne Adil Hizqiyaas kee'mmaallisa xissaa lehonne hincaa hee'ukko; Amoox beet hiraagaanchi Issaayyaas moo'eena ixxi beyyo maraa «Waa'i ‹Ka jabbiinsi at fayye'llooyyo; lehimmi kiina gatoobee'i bikkina ki mine axixxe› yoolla» yukko. Hizqiyaasim ixxi ille gortanni kollonne dabaraa «Waa'a! Ki illagenne ama'nnanchinnee wo'm wodaninnee an kiina awwaadummisaa keese liiransoo luwwam issummisaa sawwihe» yaa Waa'a uunxukko. Qaraaraallisam wi'llukko. Ee lasage Waa'i Issaayyaasina «Hizqiyaas beyyo mattaa ‹Kiyyanni Daawiitik Moollanni Waa'i an ki uunxato macceesaammo ki indiiddam moo'aammo; ee bikkina ki umuranne tommoo onti hiinchoo edaammo. Keesee ka Yerusaalee'm beero'oo Aasoo'l adi'l angiinsi gatisoommo; ka beero'inam oramaa egeroommo› yoolla yihe» yukko. Issaayyaasim Hizqiyaasina Waa'i uwwu neeyyaxxi sagara wonshoohan ihukkisina uwwamu mare'i kane. Adil Akaaz mi'n iimane firakkamisina baxisu gardabbanne usheexxoo hafa Waa'i la'mmaaggem tommi gardabbuwwa higaa laso daba'lloo'isa issookko» yaa dabarukko. Oo hafim tommi gardabbuwwa higaa laso daba'llukko. Hizqiyaas jabbiinsi fayye'ukkisam kanniinsi woroon yoo mazmuura kitaabukko. I umu'l kollonne iinniinsi hee'immi gada'i hooramaa Si'oola dilloommoka labisaa hee'ummo Fooraam luwwi hee'oo ka uullanne Waa'a, te'im ka heer uullanne hee'oo qooccanchinne maqirem manna la'mmeka moo'oommoyyo yaa hee'ummo. I heechchi dangonnem allaaraa'n dukkaa'nnisa gosamaakkoohanee xaaxamaakkoohanee baxamaa beeddoo'n eddechcha dadoo manni xaaxoo mu'utanne muramaa gatu eddechchisa ihaakko yaa sawwaa hee'ummo. Waa'i i umura gundisukkoka labisaa hee'ummo. Soodaraar afeebe'e laarummuuyyi garummo; hobbichchisa i miqqeewwa hundam iiqansitto; hiimoo ballaa eese u'nnissitto. Huummaantisa laaram hee'ummo; handarekkichchisam amman hundam qitinam hee'ummo; cawwaa iimane asi'mmimminne i illi hoogaa hee'ukko. Moollanna! Ka hawwi hundiinsim eese gatise. Ka hundam issukkok Waa'i ixxi gagam ihu bikkina an mayyeena xanoommo? I heechchi qaraaru bikkina iina diriir bee'e. Moollanna! Manni kiiinninne hee'ookko. I ayyaanim ee'isam ee keeninne fooraam ihookko; eese fayyiissitto; foorinnem hee'issitto. I qaraarim xummanne daba'llookko; dangisoo luwwi hundiinsim eese gatissootto; i baaxiilo hundam uttootto. Si'oolanne keese galaxxookkok matim bee'e; waammantam keenim amma'nnantaattoohaannoomanne neeyyato issitamoyyo; lehu mannim keese heebbisooyyo. An kaba keese galaxxoommisa galaxxiteena xantamok xale'i foorinne yo'i keeno; at amma'nnantaattoohan ikkittisa ixxuwwi anno'i ixxuwwi oosina kuttamo. Waa'i eese fayyiisookko; ee bikkina diitta'a aphphinsummuuyyi kiina galaxxi mazmuura hincaa'nnoommo. Ee bikkina ni umu'l doolli hundannem Waa'aannonne Keesammi Minenne muuncan yoo mu'utinne zammalloommo. Ee lasage Issaayyaas oda'i buyyika xeffo'o dashshanne issitakkolas fayye'ookko; yaa hee'ukko. Adil Hizqiyaasim «Fayye'aa Keesammi Mine mareena xanoommisa la'eena xanoommi mare'i maha?» yaa Issaayyaase xa'mmukko. Ee doollenne Baabiloo'n adil Baalaadaan beet Maroodaak Baalaadaan adil Hizqiyaas xissaa fayye'ukkisa macceesukko; ee bikkina angaachchaa assikitaabaa asse'ukko. Hizqiyaasim ee asse'amu manna liiranchinne aa'ukko; adilla'n mi'n mu'uxxi minenne yoo amaxxi hundam bira, worqa, annanni annanni enja, shitto'o, o'l mu'utaa mu'uxxi minenne yoo amaxxaa hundam ixxuwwina moo'isukko. Adilla'n mi'n mu'uxxi minennem ihukko adi'l gassi uullanne hannonnem yoo amaxxiinsi hundiinsim Hizqiyaas ixxuwwina moo'isoo'n uru luwwi mat luwwim hee'ukkoyyo. Ee ammanenne hiraagaanchi Issaayyaas adil Hizqiyaas beyyo maraa «Ku manni hanniinsi waatto'oo keeno; kiina maha kutto'ahe?» yaa xa'mmukko. Hizqiyaasim «Ixxuwwi waatto'ok qee'l uulliinsi Baabilooniinsette» yaa dabarukko. Issaayyaasim «Adilla'n minenne maha moo'llo'o?» yaa xa'mmukko. Hizqiyaasim «Hundam luwwam moo'llo'ookko; mu'uxxi minenne yoo amaxxiinsi ixxuwwina moo'isoo'n gatu luwwi mat luwwim bee'e» yukko. Issaayyaasim adilina «Gogoxxi Moollanni Waa'i ‹Gaassi kiyyanno'i ka balli afeebe'e adilla'n minenne wixxaa'llo'i amaxxi hundim qeefadamaa Baabiloona massamoo amman waarookko; ma'llichchim gatooyyo. Ki shumo'iinsim mat mat keen Baabiloo'n uulla qeefadanta'a marimminne Baabiloo'n uulli adi'l minenne muleessa'uwwi ikka'a awwaaddamisa issakkamo› yoolla» yukko. Adil Hizqiyaas ixxi gassi doollenne xumminne hee'immi xanamoo'isa la'u bikkina «Waa'iinsi asse'antaa iina kuttitti sagar erane» yukko. Ki'nnuwwi Moollanni Waa'i «Qoxxissehe! I minaadaba qoxxissehe! Yerusaalee'm minaadaba qoxxissehe; agidda'n doolli beeddaakko; baaxiilim haafamaakko; baaxii'l bikkina lam qinxite guzumo'amukkisa kullehe» yoolla. Alallaaxxi sagar «Udma'i uullanne ni Moollannina googo gudissehe; udma'anne Waa'ina googo bachchitakka'a axissehe. Baallii cebbii wo'mmona; lob duunii hoffi duunii toroshamaa shiraashiramona; aagammi firammi uulli gudona. Ee ammane Waa'ik lombi caakkaa la'amookko; manni hundim eekka mateeyyoominne moo'ookko; kaka wocukkok Waa'a» yoolla. Mat sagarim «Alallaaxxi sagara woce!» yukko. Anim «Mayyaa woco?» yummo. Oo sagarim «Manni hundim hixisa; ixxi lombim biir uulli fiitisa; Waa'ik hafachchi hafachchoo ammane; hix gogoo'isam fiitim giggiroo'isa mannim ee'isam giggiroohane. Hanqinam hix gogookko; fiitim giggirookko. Ihukkaarem ni Moollanni sagar heer heerinam qoxxaa hee'ookko» yukko. Xiyoona, iim shiqaakkoo duunanne fire; mishiraachchi sagaram alallaate Xiyoona, ki sagara iimaa'llaa woce; mishiraachchi sagaram alallaate; woce baddititte; Yihuxxi uullanne yo'i beero'uwwina «Oono'o, ki'nnuwwi Moollanni» yitaa kure. Moollanni Waa'i wodaam malaayyinne gasseena waarookko; miqo'im ixxi angannette; miqoo tissim ixxi beyyonnette. Allaachcham allaaraanchisa abooyyookko; wotallam matissaa wixxaa'ookko; ixxi anginnem qaaphphaa massookko; ixxuwwi ammo'om qishixxatinne awwonsookko. Cambalaqa ixxi oobo'onne iimanem ixxi taachcho'onne uulli buchcham qunuunchonne keeneena xanookkok ayyette? Lob duunnuwwaa hoffi duunnuwwaa keennaanchonne keenookkok ayyette? Waa'ina «Ka'isa isse» yaa ijaajookkok ayyette? Ixxo losiseenaa sogeenaa xanookkokdu ayyette? Lachcha siideena Waa'i ayye a'llansukko? Hanqo'i oogaxxi googdu ixxena ayyi losisukko? Lachcha losisukkokii qoossimmi googo moo'isukkokii ayyette hee'ukko? Mulli minaadab Waa'i illagenne jaalo'onne taku wo'isa; keennaanchonne yoo di'llisa; wo'inne kibbamu uulluwwim ixxi illagenne sho'lle'aalli di'llisa. Liibaanoosanne yoo diinat hundim kitimina Haqquwwim kiti'm giirina ihooyyo. Waa'i illagenne minaadab hundim mahayyome. Ixxuwwi ixxi illagenne mahannem xigantambee'i kora'i keeno. Waa'a ayyenne akeekansitakkamo? Ayyendu kobi'llansitakkamo? Ixxi haqqa cabbarakka'a baxakko'i misi'llisayyo; xaara bukkaan birinne baxxa'a worqinne goolabakko'aannisayyo; kin birinne baxakka'a uullisakko'i qophpha'n waa'isayyo. Eehid baxeena amaxxi bee'i buxichchi butumbuutoobee'i haqqa doo'llaa uboobee'isa anga qoor manchinne baxisookko. Kaka hore'em laqqakkamoyyonnihe? Macceessakko'oyyonnihe? Gaassi doolliinsidu ki'nnuwwina kuramukkoyyonnihe? ku uulli shooho'amukkaanniinsi ki'isaa qoossitakko'oyyonnihe? Waa'i uulliinsi hanaan adilla'n barcumanne afuuraakko; uulli minaadab ixxi illagenne qawwaawwisa; ixxi iimane du'm eddechchisa biddiqaa'aakko; dukkaa'nnisam heechchi beyyi issaa kaasaakko. Adilluwwa ixxi sholliisookko; heer uulli gassaanom hee'llobee'aannisa issookko. Ixxuwwi haareechcho wixakko'aannisaa kaasakko'aannisaa; uullannem nigga massubee'i kaashshisa; Waa'i hafachcha asse'oohaare qaqqisom goggamo; gaaphphisam binnita'a bi'llamo. Keesammi Waa'i «Eehaare eese ayyenne akeekansitakkamo? Ayyendu kobi'llansitakkamo?» yoolla. Xabbitakka'a iima'n kolli moo'llehe! Ka moo'llakkam boollaankuwwa qooccukkok ayyette? Ixxi o'l gogoxxisa awwonsookko; ixxuwwikim xig hinkaa'nda'e la'ookko; annannichchom ixxi gaqqi summinne weeshookko; ixxek malaayyii wodii hore'em lobane; ee bikkina ixxuwwiinsi matim bi'ooyyo. Yaaqoob shumo'i ikkakko'i Isra'eela! «Waa'i eese moo'imma uraakko; hanqo'i oogato hoogummaare cawwaa uraakko» yitaa qaraattoottok mahinatte? Hore'em laqqooyyonnihe? Hore'em macceessittoyyonnihe? Waa'i heer heerina hee'oo Moollanna; ka uulli hundam qooccukkok ixxotte; ixxi hore'em hoogooyyo te'im ceemooyyo; ixxi sawwitem saarayyaa la'ookkok matim bee'e. Ixxi hoogu keenina malaayye uwwookko; qacu keenom qoxxisookko. Woraadduwwam yakkota'n hooggamo; ceentamome; harde'uwwim qacca'a ubbamo. Ihukkaarem Waa'anne amma'nnanta'a hee'llam keen ixxuwwi malaayye haareechchissamo; gaaqichchisam ladinne barattamo; geettamo; ceentamoyyo; mattamo hooggamoyyo. Waa'i «Ki'nnuwwi wo'inne kibbamaakkoo uullanne hee'llakkam minaadaba, cawwitakka'a macceessehe! Minaadab malaayye qoxxisona; i illagennem hincaa wocona; oogaxxi dummichchanne edammona. «Kaa'ookkoka eelliinchi firiinsi ki'isaa eebukkok ixxena awwaadoo'isinam weeshukkok ayyette? Mulli minaadaba higisaa ixxena uwwukko; adilluwwam ixxi illagenne ubbuusukko; ixxi bisa'inne aphphisaa di'llisa binnaa'ukko; ixxi xiyyinnem hafachchanne binnu gaaphphisa issukko. Ixxuwwa hollansukko; matem hawwi bee'em illagenne higaa marukko; ixxi lokkim gaassi hance'aa la'oobee'i googo taakke'ukko. Kaka baxukkokii issukkokii agannika siyya'a qoodookkok ayyette? An Waa'i illageenim hee'ummo; ka lasagem hee'oommok anette. «Wo'inne kibbamaakkoo uullanne hee'llam minaadab an issummi luwwi hundam moo'llo'ookko; ixxuwwim baachchinne huxe'llo'ookko; wixxita'atim i beyyo waatto'ookko. Mat mullaannina hara'mmookko; abbaayyim abbaayyina ‹Qoxxe!› yookko. Angi bax qooroom yoo manhchi worqa muccussoo mancho qoxxisookko; qophpha'n waa'a heedinne cabbaraa lii'llisookkokim musmaarinne aphphisukkuuyyi amaxxansaa baxoohaannina ‹Qoxxe! yookko; qophpha'n waa'i mikmikoobee'isa issita'a mat beyyonne musmaarinne tollitamo. Ihukkaarem iina awwaadaanchi Isra'eela, I minaadab ikkoo'isina doo'llummi at i kobichchi Abrihaam shumo'o. An keese uulli tochchiinsi worummo; qee'l uulliinsim keese weeshummo; ‹At i awwaadaancho› yaa keese doo'llummo bagaan uunjummoyyo. An kiinninne maqirette ihummi bikkina baddititte; An kiina Moollanni ihummi bikkina muggititte. An keese qoxxisoommo hara'mmoommome; kaachcha uwwoo i wodinnem keese bakkiisoommo. Keesenne quuqqo'i keen hundim kaa'anta'a tuuttamo; kiinninne uullixxantam keen hundim bi'llammo; hore'em hee'llobee'aannisa ikkamo. Ki diina'a hassootto; ihukkaarem ixxuwwa siiddooyyo. Kiinninne orantam keenim hore'em hee'llobee'aannisa ikkamo. ‹Hore'em baddititte muggititte; kiikka makki anga amadaa hara'mmoommo› yaa keese qoxxisansoommok an ki Moollanni Waa'ana'e» yukko. Waa'i «Daquuchchi'nno'i qacaalli Isra'eela, an kiina hara'mmoommi bikkina baddititte. Keese gatisoommi Isra'ee'l keesammi anette. Oono'o, an keese haareechchi qare'aalli inqi yoo hurbaata ganakkam mu'uxxisa issoommo. Duunnuwwam hurbaaxxisa gantootto; hoffi duunnuwwam gantaa gaab issitootto. Iimanenne axuruunsitootto; hafachchim fii'aa massookko; hambu'llamim binnaa'ookko; ee ammane an kiina Waa'i ihummi bikkina liirantootto; Isra'ee'l keesammi ihummi eesennem nuura siiddootto. «Buxii hawwaanii wo'o hassamo; siiddamoyyo; ixxuwwi leella'im xeebinne gogoohaare an Waa'i ixxuwwi uunxato macceesoommo; an Isra'ee'l Waa'i hore'em ixxuwwa uunjoommoyyo. Gogaalli duunnuwwanne daajjuwwi daadoo'isa issoommo; cebbuwwannem dadoo bu'uwwa fooqaa'oommo; uulli udma'uwwam wo'i delbi issoommo; gogaalli uullim bu'i daadoo beyyi ihookko. Digiba, giraara, barsanaataa weeraa uulli udma'anne mutisoommo; gogaalli uullannem digib, hoom, saate'ii weerii wo'mmaakkoo doom issoommo. Iikki Waa'i angi ka hundam issukkisa anim Isra'ee'l Keesammi kaka qooccummisa hundim moo'aa xassoo'isinaa qoossaa la'oo'isinatte» yukko. Isra'ee'l adil Waa'i «Ki'nnuwwi mulli minaadaba, meto'o ku'llehe; naqaasham hincaa'llehe. Woshshoom ihoo ammane lanqoommisina hanenne ihoo luwwi hundam hino'o ki'nnuwwi waa'uwwa eebbehe niina kuttona; kanniinsi illageen ihu luwwi hundam hino'o niina kuttona; tiratoomam mat mat issita'a niina la'issona. Ki'nnuwwi waa'uwwi ikkakko'isa lanqoommisina hanenne ihoo luwwi hundam hino'o niina kullehe; ki'nnuwwina ha'yyoolas hino'o er luwwa issehe; te'im moo'nnaa ki'nnuwwa baddinaa hambalaachchammoommisina boobana dilliissehe. Ki'nnuwwii ki'nnuwwi baxii awwaad bee'ane. Ki'nnuwwina otossiteena hassam keenim shigigaa'llam keeno. «Mato awwonsaancho hanaa'n qariinsi ki'saammo; ixxim waarookko; eelliinchi firiinsi waarookkok i summa weeshoohane; buchchi mu'uta baxoo manchi mu'uta baxakkam hara hance'oo'isam ixxim gassaano ha'llisa hance'ookko. Neese lanqoommisinaa hanqame yinoommisinaa gaassiisiinsi ki'isaa kaka wocukkok ayyette hee'ukko? Ka quuxo caakkisaa kurukkok te'im alallaatukkok ki'nnuwwiinsi matem sagaram wocukkok bee'e. Luxxeka ka alallaato Xiyoonina kurummok anette; Yerusaaleeminam mishiraachcha kuroo asse'amaancho asse'aammo. Qophpha'n waa'uwwi kolli daba'llaa moo'ummi ammane ixxuwwiinsi mat sagaram wocookkok hee'ukkoyyo; matim i xa'mmichchina dabachcha uwwukkoyyo. Ee bikkina ku qophpha'n waa'uwwi hundim awwaad bee'i keeno; maham issiteena xantamoyyo; malaayyi bee'i keenoo hoogaanoo» yukko. Waa'i «An malaayye uwwoommok, doo'llummokii ixxonnem liiramoommok i awwaadaanchi kane. I Ayyaana ixxonne dilliisoommo; minaadab hundim ixxim hanqo'i oogato'o siidoo'isa issookko. Ixxi sagara iimaa'aa wocooyyo; te'im shuurooyyo; afu beyyi hundannem wocooyyo. Diqamu shomboqo'om ihuta'n iiqooyyo; wiriiroo fatiram xoo'isooyyo; ixxi amma'nnanchinne manni hanqo'i oogato'o siidoo'isa issookko. Uullanne hanqo'i oogat hee'oo'isa isseebe'e; ixxi ceemooyyo; neeyyatom murooyyo; wo'inne kibbamaakkoo uulluwwanne yo'i minaadab ixxi seeranne amma'nnantamo» yoolla. Iimane qooccukkok; tochchiinsi tochchi afeebe'e biddiqaa'ukkokii uullaa uullanne yoo luwwaa hundam qooccukkokii fooree fooshshaa ixxuwwina uwwu Moollanni Waa'i «An Waa'i muccuroominne keese weeshaammo; ki angam amadoommo; keesem egeroommo; keese i minaadabina hidi'l saga'llisa eese laqqambee'i minaadabinam caakkisa ikkoo'isa issaammo. Ee bikkina qooqquwwika ille fooqaa'llootto; tuunsonne karaxxi minenne; yo'i keenom fissitootto. «Waa'i anette; i summim eehaneme; i lomba mulli keenina galatam anginne baxamu misilluwwina higisaa uwwoommoyyo. An gaassaa wocummi woshshuwwi hundim wo'mmaakko; kaba odim haareechchi woshsha kuroommo; mutoo'n illageenim ki'nnuwwina la'isoommo» yukko. Waa'ina haareechchi mazmuura zammallehe; heer uulli minaadab hundim galaxxi mazmuura hincaa'llehe. Dambalaq woronne yo'i keen hundim tochchi uulluwwii ee beyyonne hee'llam keenii hundim galaxxitona. Udma'i uullii ee uulli beero'uwwii ee'isam Qeedaa'l minaadab hee'oo gattii sagara iimaa'ona. Seela'i beero'i manni liirammatinne zammarona; duu'n ludonnem firaa ilillaaxxi sagara macceesisona. Waa'inam lomba uwwona; Wo'inne kibbamu uulluwwannem galata alallaatona. Waa'i wodaam manchisa gaadookko; orina sagara iimaa'aa sha'llamookko; mat o'l manchisam quunqinne ki'ookko; ixxi diina'am kaa'ookko. Waa'i «Qeeraa'l doollina iyyaqqummo; cawwaa urummo i gagam egexxummo. Ihukkaarem kaba baxoommi amman afaakko; xuuchchi amadu meentichchosam laaroommo; nadajji fooshsham fooshshe'oommo. Lob duunnuwwaa hoffi duunnuwwaa bi'isoommo; ixxuwwanne mutu hixee haqqaa hundam gokkisoommo; daajjuwwam gogaalli uulli issoommo; wo'i delbuwwam gokkisoommo. «Illi qooqquwwa kanniinsi illageen matta'a laqqambee'i googonne awwonsoommo; gaassi laqqambee'i googinne massoommo; ixxuwwi illagenne ifiisamaakkoo tuunsom caakkanne dabaroommo; aagammi firammi ihu beyyom gudisoommo; ka hundam an issoommo; ixxuwwam uroommoyyo. Ihukkaarem qophpha'n waa'uwwanne amma'nnantam keen misilluwwinam ‹Ki'nnuwwi ni waa'uwwa› yitam keen hundim laso daba'llitamo; hore'em sholle'llamo. «Ki'nnuwwi macci gawwaakkoo keen hundichchim macceessehe; ki'nnuwwi qooqquwwim xishshaa'llakka'a moo'llehe. I awwaadaanchiinsi loboka qooqukkok ayyi yookko? An asse'ummi awwaadaanchiinsi loboka gawwukkokdu ayyette? Iina amma'nnamaakkoo manchisa qooq ayyi yookko? Waa'i awwaadaanchi'nno'i qooq ayyette? Isra'eela, at lobakat luwwa moo'llaatto. Ihukkaarem tiiro issitaa qoossittoyyo; kiikki maccuwwi fooqaakoo keeno ihukkaarem macceessooyyo» yoolla. Waa'i ixxi muccuroo'm bikkina ixxi seera iimiimaakkoohanee lombaamoo issimminne liiramukko. Ihukkaarem ku minaadab boganta'atii abdaadanta'atii ba'l woronne xufanta'a afuutto'ookko; karaxxi minennem aaggo'ookko; boganto'ookko; abdaadanto'ookkome; agaagaa ixxuwwa gatisukkokim bee'e. Ki'nnuwwiinsi ka woshsha xassaa waaroo amma'n bikkina qoossaa macceesookkok ayyette? Yaaqooba boganchina Isra'eelam qeefadanchina higisaa uwwukkok ayyette? kaka issukkok neese hawwondummi Waa'ayyonnihe? ixxi hasoo'isanne hee'lleena ixxi seerinam ijaajanteena hasso'oyyo. Ee bikkina ixxeka aphphoo quunqa o'llekam boobana ixxuwwanne dilliisukko; gii'l labaninnem kibbukko; ihukkaarem ixxuwwi qoossito'oyyo; shokkiisukko; ihukkaarem ixxuwwi hindihito'oyyo. Yaaqooba, Isra'eela, keese qooccukkokii baxu Waa'ii «An keese gatisoommo; baddititte; at iihane; an keese ki summinnem weeshaammo. At xillaalli wo'i worinne higgoo ammane an kiinninne maqir ihoommo; daajjuwwi worinne higgoo ammanem keese xuuxooyyo; gii'l worinne higgoo ammanem keese shokkiisooyyo; labanim itooyyo. An ki Moollanni Waa'i Keese gatisaanchi Isra'ee'l keesammi anette. An keese wolabbano fisseena Gibxa, Tophphe'ee Saaba'aa ki foo'l bikkina tissi issaa uwwoommo. At i illagenne bito xee'aalli luwwi'nnoo lombaamo; anim keese lobakata iittoommo; ee bikkina an ki foore gatiseena lobakat uulli minaadaba kiina tissi issaa uwwoommo. Ixxuwwi i summinne weeshanto'oo keeno; i lombinam qooccummi keeno; i anginnem axisummi keenoo anim baxummi i minaadabaa» yoolla. Waa'i «Illi hee'ukkuuyyim qooqqo'oo macci hee'ukkuuyyim gawwito'oo i minaadaba oogaxxi dummichchi beyyo weeshshehe. Minaadab hundim mateeyyanne wixxihona; ixxuwwi waa'uwwiinsi hanenne ihoo luwwa gaassaa kureena xanukkok hinkane? Kaba ihukkuuyyi yoo luwwa beeddaa ihoo'n illageen laqqa'a kutto'i keen ixxuwwiinsi hinka'i keeno? ku waa'uwwi hanqo'i keen ikko'isaa mulli keenim macceessa'a hanqame yitamisina woccam luwwi hanqo'an ihukkisaa qoossimmina hino'o, naqaashshuwwa ixxuwwi hincaa'llona. «Isra'ee'l minaadaba, ki'nnuwwi i naqaashshuwwana'e; iinam awwaadaan ikkakkamisina ki'nnuwwa doo'llaammo; ee bikkina eese laqqakkamo; eesennem amma'nnitakkamo; xale'i anim Moollanni Waa'i ihummisa qoossitakkamo; hanqinam iinniinsi bagaan mulli Waa'i bee'e; kanniinsi illageenim hee'ukkoyyo; ka lasagem hee'ooyyo. «Waa'i xale'i anette. Iinniinsi bagaan gatiseena xanookkok bee'e. Hanenne ihoo luwwa gaassaa wocummo; gatisaammo; qophpha'n waa'uwwiinsi matim kaka issukkoyyo; kanninam i naqaashshuwwi ki'nnuwwa. An Waa'i gaassiinsim ki'isaa anetteme; i malaayyiinsi ayyim xorooyyo; an issummokam egedeena xanookkok bee'e» yoolla. Isra'ee'l keesammi ki'nnuwwa gatisoo Waa'i «Ki'nnuwwi bikkina yaa Baabiloo'n minaadabanne gaadoo gogota asse'oommo. Ee beero'i ooxxi gooccuwwam iiqansoommo; Baabiloo'n manni sha'llanchim wi'llonne daba'llookko. An Waa'i ki'nnuwwi Keesammi Moollanna; Isra'ee'l minaadaba, ki'nnuwwa qooccummok anette. Ki'nnuwwi adilim anette» yoolla. Waa'i dambalaq lambe'enne googo Wo'i moo'l lambe'ennem higakkam googo gudisukko. Faraxxi gaare'uwwaa faradoo, gogotaa geedduwwaa bichchina awwonsukko; la'mmaagge ki'llambee'isa ikka'a illillaachcha ubbo'o; ufakkamaare xoo'oo caakkisa ikko'o. Waa'i «Kanniinsi illageen baxamu luwwa sawwitakkotte; gaassi woshsham tiittakkotte. Oono'o, an haareechchi luwwa issoommo; ixxim kaba mutookko. Qoossitakkamoyyonnihe? An uulli udma'anne googo fissoommo; ee beyyonnem wo'i bu'o uwwoommo. Doo'llanto'i i minaadabina wo'o uwweena daajjuwwi udma'i uullanne daadoo'isa issummi ammane uulli moochchim exxaa eese lonsookko; wengereellii guchche'ii eese galaxxookko. Ixxuwwi an i gagina baxummi minaadaba. Ee bikkina eese mazmuurinne galaxxookko» yoolla. Waa'i «Yaaqoob oos ikkakko'i Isra'eela, ki'nnuwwi i summa weeshimma uttakko'ookko; iina awwaaddakkeenam hassakko'oyyo. Shokkoo kitimina ihoo gereebbam hincaa'llakko'oyyo. Ki'nnuwwi kitiminnem eese lonsitakko'oyyo. Anim iina uwwitakkam hurbaaxxi ludo hincaa'llakkamisina xa'mmimminne ki'nnuwwina iyyi ihummoyyo. ‹Iina aduruusa hincaa'llehe› yaa ki'nnuwwa qondoodisummoyyo. Ee bikkina iina aduruusa bitaa'llakko'oyyo. Ki'nnuwwi kiti'm di'irinnem eese goddissakko'oyyo. Ee bikkenne lophphaakkoo baaxiilinne iina iyyi ikkakko'o. Lobakata hawwodimminnem eese qondoodissakko'o. Oo hundim ihukkuuyyi ki'nnuwwi baaxiilo haafoommi Waa'i anette; eekkam issoommok ki'nnuwwi bikkinatti ihoo'n i gaqqi bikkinatteme; ee bikkina ki'nnuwwika baaxiilo xigoommoyyo. «Oogaxxi dummichchanne fillona; meto'o ku'llehe; ki'nnuwwi woshshi hanqi ihukkisa amma'nnissakkeenam fitammehe. Gassi ki'nnuwwi anni baaxiilo baxukko; ki'nnuwwi losisaanim hawwodimminne eese kichche'isso'o. Ee bikkina ki'nnuwwika Keesammi Mi'n awwonsaano sholliisoommo; Yaaqooba bichchina, Isra'eelam game'llatina higisaa uwwoommo» yoolla. Waa'i «Ihukkaarem i awwaadaanchi Yaaqooba, an doo'llummi Isra'eela, macceese. Keese qooccummok, goosannem baxummokii haara'mmoommokii anette; i awwaadaanchi Yaaqooba, an doo'llummanee iittoommanee ikki bikkina baddititte. «Xeebe'u uullanne wo'i; gogu uullannem daajji daadoo'isa issoommo; i ayyaana ki shumo'onne i maassom ki oos oosonne dilliisoommo. Ixxuwwi Wo'o erisa agu hixisa daadoo bu'i gadanonne yoo Ahaayyi haqquwwisa amman hundam lattam keen ikkamo. «Mat ‹An Waa'ane› yookko; mullekim Yaaqoob summinne weeshamookko. Odim mullek ‹An Waa'ane› yaa ixxi gaqqi wodanne kitaabookko; ixxi gagam Isra'ee'l summinne weeshookko» yoolla. Gogoxxi Moollanni, Isra'ee'l minaadabina adilaa gatisaanchoo ihu Waa'i «Illaqqekii lasaqqekim anette; iinniinsi bagaan mulli Waa'i bee'e. Hino'o, iinni'nnoo'ok ayyette? yoolas wocona; hino'o, i illagenne naqaasha hincaa'ona. Gaassi i minaadaba uumummuuyyi mah hee'uda'e hanenne iheena yoo luwwi mada'e kurona; hanenne waaroo luwwi bikkinam gaassaa kurona. I minaadaba, badditakkotte; muggitakkotte; gaassi doolliinsi ki'isaa kaballi afeebe'e hanenne ihoo luwwa hundam gaassaa ki'nnuwwina kurummoyyonnihe? Te'im moo'isummoyyonnihe? ka woshshinam ki'nnuwwi iina naqaashshuwwa; Iinniinsi mullek Waa'i yoohonnihe? Hincakka'a maaxamakkam girbi ihoo iinniinsi mullek hore'em bee'e! Ayyem la'oommoyyo» yoolla. Qophpha'n waa'uwwa baxxam keen hundim awwaad bee'i keeno; oo waa'uwwi kora'i keenome; ixxuwwina woccam keenim qooqquwwa; ixxuwwim lachchi bee'i keen ikko'i bikkina tuuttamo. Mahinam awwaadoobee'i qophpha'n waa'a baxookkok eekkam axisookkok ayyette? Qophpha'n waa'a baxoohane bagaan mullaneyyo. Ixxii ixxo labbam keenii tuuttamo; hundim wixxita'a mateeyyanne uullitona; muggitamo; sholle'llamo. Misila baxeena xaara tumoo manchi xaara massaa giiranne bukkookko; ee xaaram axiseena qoxxaalli wodinne madooshinne aphphisookko; eekka baxoo ammanem sibaarookko, xeebe'ookkoo qondoodookkoo. Anga qoor manchi usinne keenookko; irisaasinne mare'e issaa hanenne haxara fissookko; huufakkam mu'utinnee mulli mu'utinnem huufaa axisaa mishisoo manni hagaranne dabarookko; ee lasage qophpha'n waa'ina otossakkam beyyonne dissookko. Eekka isseenam digiba murookko; oda'a te'im weddeeshsha doo'llaa haqqoronne yoo haqqinne maqirem li'ona urookko; te'im hooma kaasookko; eekkam xeen li'isookko. Manni mat haqqiinsi kolloo giirina kolloo qophpha'n waa'a baximmina awwaaxxookko; odim kollo giira giiraa iibbixxeenaa hurbaata sareenaa awwaaxxookko; gatu qaxam cabbaraa qophpha'n waa'i misila baxaa ixxi illagenne heeshaa otossookko. Gatu kollinne giira giiraa hurbaata sarookko; maaram saraa goddeebe'e itookko; iibbixxaa lasonnem «Hashshu iibboolla! Danaam giira!» yookko. Eehanniinsi gatu haqqam qophpha'n waa'i issaa baxaa eehanni illagenne heeshaa otossimminne «At iina moollanna; eese gatise» yaa uunxookko. Eehido'i manni matem luwwam la'ooyyo; qoossooyyo; moo'oobee'isam illi gunguussamaakko; qoossoobee'isam wodan ifiisamaakko. Ayyim hindihukkoyyo; lachchi te'im qoossimbee'i bikkina «Haqqa muraa kollooma giirummo; ee gii'l kasharannem hurbaata sarummo; maaram saraa itummo; eehannah gatu haqqinne hinkid shigigaa'oo luwwa baxoommo? Gudeerindu otossimmi hasisoohonnihe?» yeena xanukkoyyo. Eehido'i manchi gii'l buchcha itookko; qawwoo'm sawwit ixxo huushisaakko; ee bikkina ixxi gaga gatiseena xanooyyo. Ixxim «Ku i makki anganne yoo qophpha'n waa'i hanqo'i waa'ayyo» yeena xanooyyo. Waa'i «Isra'eela, at iina awwaadaancho; Yaaqooba, kaka sawwihe; an keese baxaammo; at i awwaadaancho; Isra'eela, an keese xadoommoyyo. Ki hawwojja duuphphisa, ki baaxiilom witriichchisa bi'isaammo. Keese gatisummi bikkina i kolli daba'lle» yoolla. Waa'i ixxi minaadab ihu Isra'eela gatisimminne ixxeka lomba moo'isaakko. Ee bikkina ki'nnuwwi iimannuwwi liiranchinne zammallehe. Uulli xillim ililihe; duunnuwwi, doommuwwii haqquwwii hundim liiranchinne buraaqqehe. Kiyyummi godabonne uumu keese gatisaanchi Waa'i «Hundem luwwam qooccummok, iimane mullam biddiqaa'ummokii uulla mullam dahummokii Waa'i anette; Qophpha'n hiraagaa'nneka mare'e bi'isoommo; gennaa'nneka kiirimma awwaad bee'an issoommo; qoolluwwi qooroomam himbiriiqoommo; ixxuwwi qooroomam qawwoom issoommo. Ihukkaarem i awwaadaa'nneka asso wonshoommo; i asse'amaa'nneka sogitano qoxxisoommo. Yerusaaleema, ‹Manni hee'oo beyyi ikkootto› yoommo. Yihuxxi beero'uwwim ‹Odim baxamookko; gindamu luwwam areesoommo› yoommo. Cambalaqina ‹An daajjuwwa gokkisoommi bikkina at goge› yoommo. Qiiroosinam ‹Ixxi i allaaraancho; i sawwite hundam wonshookko› yoommo. Yerusaaleemina ‹La'mmaagge baxamona› Keesammi Minim ‹Shooho'amona› yookko yoommo» yoolla. Minaadaba hundam gassoo'isa issummi, adilluwwika lomba sheelatoo'isa issummi, gooccuwwi xufamoobee'isa ixxi illagenne fooqaa'oommi, an ixxo doo'llaa makki anga amadummi Qiiroosinaa an Waa'i «An ki illaginne maroommo; duunnuwwam shiraashiroommo; naas xaa'l gooccuwwam iiqoommo; xaa'l qirqire'uwwam muransoommo. Tuunsonnee daphphi beyyonnee wixxaakkoo amaxxa kiina uwwoommo. Ee'isinne keese ki summinne weeshoommi Isra'ee'l Moollanni Waa'i ihummisa laqqootto. An doo'llummi Yaaqooba, Isra'eela hara'mmitoo'isina at eese laqqibee'aarem an keese ki summinne weeshaammo; Lombi summam kiina uwwaammo. «Waa'i xale'i anette; iinniinsim bagaan ayyim bee'e. Iinniinsi bagaan mulli Waa'i bee'e. At eese laqqibee'aarem an kiina malaayye uwwoommo. Kakam issoommok eelliinchi firiinsi ki'isaa eelliinchi aaggi afeebe'e; xale'i iinniinsi bagaan mulli Waa'i bee'isaa manni la'oo'isinatte. An Waa'a; iinniinsi mullek ayyim bee'e. An tuunsoo caakkaa qooccummo; goddaa buxoomaa eeboommo; an Waa'i ka hundam issoommo. Iimannuwwa, muccurooma xee'nnisa ga'nnissehe; duubbuwwim aad kiffehe; uulli fooqihona; xummim mutona; muccuroomim maqirem li'ona; an Waa'i qooccaammo» yoolla. Buchchi mu'utiinsi baxukkaanninne fitamoohaannina aayye! Dor buchchi mu'uta baxoohaannina «Maha baxxoolla?» yoohonnihe? At baxxoo baxdu «Kiina angi bee'e» yoohonnihe? Annina «At qattittok maha?» yoohaannina te'im amana «At xuu'llittok maha qatteenatte?» yoohaannina aayye! Isra'ee'l Keesammi, qooccaanchi ihu Waa'i, Waaroo luwwi bikkina «I oos bikkina eese xa'mmitakkammonnihe? I angi bax bikkindu eese ijaajjakkamonnihe? Uulla baxummok anette; mannam ixxi hanenne qooccaammo; i angi iimannuwwa biddiqaa'aakko; iima'n gogotam ijaajoommok anette. «Qiiroosa muccuroominne ki'isaammo; ixxi maroo googom an xabbaa'aammo; i beero'i odim baxookko; iikka qeefadanto'i keeno miqo'i bee'em wolabbanonne fissookko» yoolla. Kaka wocukkok gogoxxi Moollanni Waa'a. Waa'i «Gibxi amaxxii Tophphe'i dadda'l mu'utii kiihan ihookko; uullichcha qeeraa'l ihu Saaba'i mannim ki kolli waarookko; kiihanem ihookko; ki lasom awwonookko. Chimchiminne karamaa ki kolli waarimminne ki illagenne heeshaa ‹Hanqinam Waa'i kiinninnette; ixxeensi bagaan mulli Waa'i bee'e› yukkuuyyi uunxookko» yoolla. Gatisaanchi Isra'ee'l Waa'a, at hanqinam ki gaga daphphaa'lloo Waa'a. Qophpha'n waa'uwwa baxxam keen hundim tuuttamo; sholle'llamome; hundim mit ikka'a sholle'llamo. Ihukkaarem Isra'eel Waa'inne heer heeraxxi gatimma siixxookko; ki'nnuwwi heer heerinam tuuttakkamoyyo; sholle'llakkamoyyo. Iimane qooccukkok; ixxi Waa'a; uullam axisukkok, baxukkokii shooho'ukkokii heechchi beyyi ihonatte bagaan diih ihona qooccubee'i Waa'i «An Waa'a; iinniinsi bagaan mullek bee'e. An maaxaqqanne tuunsi beyyonne wocummoyyo; i sawwitem maaxummoyyo; Yaaqoob shumo'ina ‹Kora'am eese hassehe› yummoyyo. An Waa'a! Wocoommokim hanqa; hanqo'an ihu woshsha alallaatoommo. «Uulli hundiinsim mulli minaadabiinsi xottakka'a daba'llitakko'i keen hundim mateeyyoominne wixxitakka'a waallehe; i koollonnem hinci'llehe! Haqqinne baxamu misilluwwa iyyitam keenii gatiseena xanoobee'i waa'uwwa uunxitam keenii lachchi bee'i keeno. Waallehe; ki'nnuwwi meto'o ku'llehe; caakkissakka'a kullehe. Ki'nnuwwi bikkina fitantam keenim issena'i issem a'llantona kullehe; hanenne ihoo luwwi bikkina gaassaa hiraago wocukkok ayyette? An Waa'ayyonnihe? muccuraa gatisaanchoo ihu Waa'i iinniinsi bagaan ayyim bee'e; iinniinsi bagaan mulli Waa'i bee'e. «Uullanne hee'llakkam minaadab hundim gattakkamisina i kollonne daba'llehe; Waa'i xale'i anette. Iinniinsi bagaan mullek bee'e. Dabassamoobee'i hanqo'i neeyyato uwwummuuyyi i gaganne hide'aatette; hundim i beyyo waaraa i illagenne guruphphookko. I summinnem hide'ookko. « ‹Muccuroomii malaayyii uwwamookkok xale'i Waa'innette› yita'a i bikkina woccamo; eese sabbam keen hundim i beyyo waatta'a tuuttamo. Ihukkaarem Isra'ee'l shumo'i hundim iinninne Waa'inne muccuttamo; nuuram siiddamo. «Beel sholle'ukko; Neebo'i iiqamukko; ku Baabiloo'n qophpha'n waa'uwwi gammaamonne iyyiisamaakko. Oohim hoogaakkoo gammaamina kee'mmaalli iyyi ihaakko. Qophpha'n waa'uwwim ixxuwwi gaga gatisseena xantobee'i bikkina qeefadanta'a matto'ookko; oo gammaammi heeshito'o; qophpha'n waa'uwwim sholle'llo'o. «Ki'nnuwwi Yaaqoob shumo'i Isra'ee'llek gattakko'i keen hundim uumantakko'i ammaniinsi ki'isaa abooyyummi keen qarantakko'i ammaniinsi ki'isaa iyyummi keen macceessehe. Lomma'nnitakka'a ki'nnuwwi horoor abo'eebe'em ki'nnuwwa erisa egeroommok anette; anetteme. Ki'nnuwwa baxaammo; iyyoommo; ki'nnuwwina hara'mmoommo; gatisoommome. «Eehannah eese ayyenne akeekansitakkamuulla? Ayyendu gudissakkamuulla? Kobi'llammoommisina ayyenne moo'ixxansitakkamo?› Manni ixxuwwika cana fooqaa'lla'a worqa fissitamo; biram keennaanchonne keentamo; ixxuwwina waa'i issaa baxoo'isinam anga qoor mannina diinate miqqamo; baxamaa lasagem ixxena aad heeshta'a otossitamo. Ki'issa'atim ixxuwwi gudumonne iyyitamo; ixxena gudisso'i beyyonnem dissitamaare ee beyyonne uullookko; ee uullu beyyiinsim mikmikeena xanooyyo. Ayyi manchim ixxi kollonne laaruta'nnim dabachcha uwwooyyo; te'im ayyem hawwiinsi gatiseena xanooyyo. «Ki'nnuwwi baaxiilaan kaka tiillehe; sawwi'llehe; ki'nnuwwi tiironnem amaddehe. Gaassika eraa'l woshsha sawwi'llehe; an Waa'a, iinniinsi bagaan mullek bee'e; an Waa'a, iinni'nnoo'ok bee'e. Lasonne ihoo luwwa gaassaahim hanenne waaroo luwwam eraarem wocaammo. I sawwit dabassamoobee'ane; iina liiransoo luwwi hundam issoommo. Eelliinchi firiinsi gosoo ammachcho, qee'l uulliinsim i sawwixxeka wonshoo mancho weeshoommo; wocummoka issoommo; sawwummokam wonshoommo. «Ki'nnuwwi xiiqqantakkam keenii muccuroomiinsi qee'llitakko'oo keenii macceessehe. An muccurooma eeboommo; oo amman hore'em qee'lloyyo; i gatishshim dasooyyo; Xiyoonina gatimma Isra'eelinam i lomba eddeesoommo» yukko. Waa'i «Taa Baabiloo'n baajaam landichche, dillitaa buchchanne afuure. Taa Baabiloo'n landichche, adilla'n barcumiinsi dille; uullanne afuure; ka lasage at mishissoottotane te'im qacale'ette yamantaa weeshantooyyo. Ee bikkina kaba liitimmi ifichcho aa'llaa hurbaata liite; gunguu'llittoka hoore; kiikka qeeraa'l eddechcha gundissaa ki duufa maxare; tartarituyya daajje eeqidonne fire. Ki kallemaroom moo'amona; kiikki sho'lle'n la'amona. Baado miqisoommo; an ayyenam qishixxoommoyyo» yoolla. Neese gatisoo Isra'ee'l Keesammi ixxekim summi gogoxxi Moollanni Waa'a. Waa'i «Taa Baabiloo'n landichche, tuunsi woronne aage; cawwitaa afuure; ka lasage at ‹Adilluwwi adilatte› yamantaa weeshantooyyo. I minaadabinne quuqaa hee'ummo; uullam haashaassaa hee'ummo; ki angannem higisaa uwwaa hee'ummo; ihukkaarem at ixxuwwina qishixxittoyyo; lommannannem ihukkaare kee'mmaalli gaanjaqqa iyyiissitto. Atim ‹Lasaanchi afeebe'e heer heerina adil ihoommo› yitto. Ihukkaarem kakeeno qoossittoyyo; ixxuwwi lasaanchi maha ihooda'em sawwittoyyo. «Kabadem taa heellamma! Ki gaganne amma'nnantaa hee'lloohaante! Ki tiironnem ‹Anette; iinniinsi bagaan mullek bee'e; ka lasage busaratte ihoommoyyo qaraa qachchi bee'etan ihoommoyyo› yitoottote macceese. Ihukkaarem mat ayyaamo dangonnem oo lam woshshim keesenne ihookko; maham ki gennimmannee kiirimmannee amma'nnantittaarem busaroomii qattaa qachchi bee'aannoomii malaayyaamisa waarookko. «Ki jor baxonne amma'nnantaa ‹Eese ayyim siidooyyo!› yitto. Odim ‹Anette! Iinniinsi bagaan mullek bee'e› yittaare ki qooroomii lachchii keese huushisaakko. Bichchi keesenne waarookko; ki genno'im egedeena xanooyyo. Bito miqqaa dabatteena xantoobee'i hawwi keesenne afookko. Sawwittibee'i bichchi dangonnem keesenne afookko. Awwaaxxiteena xantoohan ihukkaa'lleensi ciiloommaniinsi ki'issaa awwaaxxitam hee'llitti gennimmaa kiirimmaa yakihe; ayyi la'ukko ki diina'a muggissootti ihookko. Lobakat sogitano siiddittaarem hoongiinsi fittittoyyo; aganiinsi agan afeebe'e boollaanka moo'llu'uuyyi hiraaggam keenii boollaanka xiggam keenii hino'o waattona; hino'o kaba waatta'a keesenne afoo hawwiinsi gatissona. «Oono'o, ixxuwwa gaaba; giirim itookko; ee gii'l labaniinsem ixxuwwi gaga gatisseena xantamoyyo; manni iibbixxoo gii'l kasharim hee'ooyyo; afuurakka'a iibbixxakkam giirim bee'e. Ki oosoomma'n doolliinsi ki'isaa maqire qondoodaa daddaru keen issiteena xantamok ee qaxame; annannichchim ixxi gaqqi huushanchinne marookko; ihukkaarem keese gatisookkok bee'e» yoolla. Yaaqoob ooso, ki'nnuwwi Isra'ee'l summinne weeshantakko'i keen, Yihuxxi shumo'i ikkakko'i keen Waa'i summinne hide'llakkam keen, hanqinne te'im muccuroominnetti ihoo'n Isra'ee'l Waa'a weeshshakkam keen, «Keesammi beero'onne hee'nnommi keeno; summi gogoxxi Moollanna yamamu Isra'ee'l Waa'anne bakke'nnommi keeno» yitakkam keen macceessehe. Waa'i «An ka illagee'n luwwa lobakat doolliinsi gassaa kuraammo; oohim i suumiinsi firaakko; eekkam laqqakkamisa issaammo. An dangonnem baxummo; oo keenim taaphanukko. Mashka'oomim at hinkaa'nna xiiqqammaanchida'e an la'oommo. Ki axik bu'an xaara; ki miinim naas xaara. Ee bikkina an ka woshsha hundam kiina gaassaa kurummo. Iheena illageenim la'isummo. Oohim ‹I waa'uwwi kaka issito'o. Haqqinnee xaarinnee baxanto'i misilluwwi kaka qooddo'ookko› yitoobee'isinatti hee'ukko. «Ka woshsha hundam macceessaatto; hundam moo'e; oohim hanqi ihukkisa naqqasooyyonnihe? Kabadiinsi ki'isaa haareechchi haareechchi luwwa, daphphu luwwaa laqqibee'i luwwaa kiina kuroommo. Ixxuwwi qooccanto'ok kabadette bagaan gaasseyyo; ixxuwwi bikkina kanniinsi illageen macceessittoyyo. Ee bikkina ‹Ixxuwwi bikkina kanniinsi illageenim la'oommo› yiteena xantooyyo. At macceessittoyyo; te'im laqqittoyyo; gaassi doolliinsim ki'isaa macceesseena hassoobee'an hee'ukko; at qawwiisaanchi hee'llittisa oosoommaniinsi ki'saa boqqa yamantittisa la'aammo. «I summi bikkina yaa i quunqa egexxoommo; galaxxameena yaa iyyaqqoommo. Oohim keese muransaa bi'isoombee'isinatte. Oono'o, an keese kin bi'llis ihubee'aarem bukkaa muccussaammo; hawwi midachchannem keenaammo. An i gaqqi bikkina; i gaqqi bikkina yaa issoommo. I gaga hinkid sholliisoommo? I lombam ayyenam uwwoommoyyo» yoolla. Waa'i «Yaaqooba, an weeshummi Isra'eela, macceessehe; an anetteme; luxxekim anette; lasaanchim anette. Uulla i angi shooto'aakko. I makki angim iimanenne biddiqaa'aakko; an weeshoommi ammane hundim mateeyyanne uullitamo. Waa'i «Hundim mateeyyoominne Wixxitakka'a macceessehe; waa'uwwiinsi gaassaa ka keeno wocukkok ayyette? An doo'llummi i kobichchi ixxi suwwixxeka Baabiloonanne issoo'isa issoommo. Ixxi wodim Baabiloona aphphisookko. An i gagim wocaammo; hanqo'isam an weeshaammo. An ixxo woroommo; ixxi baxim ixxena taaphanookko. I kollonne hinci'llehe; kaka macceessehe; gaassi doolliinsi ki'isaa maaxaqqanne wocummoyyo; oo luwwi hundim ihukkuuyyi an eehe'enne hee'ummo» yoolla. Kabadem eese Moollanni Waa'ii ixxi Ayyaanii asse'aakko. Keese gatisaanchi Isra'ee'l Keesammi Waa'i, «Kiina e'lloo luwwa hundam losisoommi at marimmi hasisoo googo awwonsoommi ki Moollanni Waa'i anette. «I ijaajo qoxxitaa macceessaattoota'n ki xummi daajjisa, ki muccuroomim dambalaq wo'i moo'llisa iham hee'ukko. Ki shumo'im shashsha'llisa, ki oosim uulli buchchisa iham hee'ukko. Ixxuwwi summim i illagiinsi shiinshamoo'n hee'am hee'ukko» yoolla. Baabilooniinsi fillehe; Baabiloo'n manni uulliinsi gibbehe. «Waa'i ixxena awwaadaanchi Yaaqooba gatisaakko» yoo mishiraachchi sagara lobakat liiranchinne uulli tochchi hundam afeebe'e alallaattehe. Waa'i ixxuwwa udma'anne awwonsu ammane wo'o xeebe'llo'oyyo. Wo'i kiniinsi firoo'isa issukko; kina foshokaa'aa wo'o malaayyaamisa daassukko. Waa'i «Boqqi keenina xummi bee'e» yoolla. Qee'l uulli tochchonnee wo'inne kibbamaakkoo uullannee hee'llakkam minaadab macceessehe. Iyyummi godabonne hee'ummuuyyam Waa'i eese weeshaakko; qaramoo'nnim gaassaa i summinne weeshaakko. I sagara qare'aalli bisa'isa issukko; ixxi angi haforonnem daphphaa'ukko. Aanshamaa shiinshamaakkoo xiyya'isa issukko; ixxi seejji woronnem maaxukko. Ixxim «Isra'eela, at iina awwaadaancho; an i lomba keesenne la'isoommo» yukko. Anim «Awwaad bee'i luwwanne lobakata qondoodummo; kora'i luwwannem i malaayye guullummo; ihukkaarem Waa'i i hanqa gudsookko; i bitom i Waa'i miqookko» yummo. Waa'i eese lonsaakko; i malaayyi hundim ixxotte. Ixxi awwaadaanchi ihoommisina iyyummi godabonne uumukkok, Yaaqooba ixxi kollonne dabaroommisina Isra'eela ixxi kollonne wixxaa'oommisina issu Waa'i kabadem «At i awwaadaanchi ihimmi, Yaaqoob shumo'o odim dabattaa an egerummi Isra'ee'l oosom dabattaa worimmi kiina sholle'aalla. An keese heer uulli hundinam qaraar ikkoo'isina, mulli minaadab hundinam keese caakki issaammo» yoolla. Gatisaanchi ihu Isra'ee'l Keesammi Waa'i lobakata gadamaahii minaadabim ceemaahii gassaaninam awwaadaanchoo ihukkaannina «Adilluwwi keese moo'lla'a uullitamo; adilluwwi oos otossitamo. Mashka'oomim keese doo'llu Isra'ee'l keesammi Waa'i ammi'nnamaakkohan ihu bikkinatte» yoolla. Waa'i «An doo'llamaakkoo ammanenne macceesummo; gatimmi ballannem hara'mmummo. An keese egeroommo; ka uulla baxxoo'isina, diihaakkoo uulla annannichchinam dabbattaa uwwitoo'isa issoommo. Anim qeefadanta'a hee'llam keeno ‹Waallehe fillehe› tuunsonne hee'llam keenom ‹Caakkanne fillehe› yitoo'isa issoommo. Ixxuwwim googonne hundannem ittamo; mahim bee'i duun hundannem fella'isa allaa'llitamo. Sibaarii xeebii ixxuwwa amadooyyo; udma'i uulli iibbi te'im eelliinchi ixxuwwa shokkiisooyyo. Ixxuwwina qishixxookkok awwonsookko; wo'i bu'i yoo kollonnem massookko. I duunnuwwa hundam goog issoommo; I bobba'uuwwim axisamookko. Oono'o, qee'l uulliinsi waattamo; mat mat keen hanaa'n qariinsi mulli keen eelliinchi aaggiinsi mulli keen odim Siinii'm uulliinsi waattamo» yoolla. Waa'i ixxi minaadaba qoxxisaakko; hawwaaninam qishixxaakko; ee bikkina iimannuwwi ilil yi'llehe; uulli liirame; duunnuwwim liiranchinne zammallehe. Ihukkaarem Xiyoon, «Waa'i eese uraakko; Moollannim eese xadaakko» yukko. Waa'i «Ama iicissam is ciila xaddamonnihe? Qatto'i ciilindu qishixxitamoyyonnihe? Ayyi la'ukko ise xadeena xantamo; Ihukkaarem an keese hore'em xadoommoyyo. Oono'o, an keese i angi oobbanne kitaabaammo; an ki qasha hundi ammanem egeroommo. Ki goo'n oos daba'llita'a waattamo; keese gindansito'i keenim kiinniinsi gibbamo. Ki gaanje iimmaa'llaa ki kululleeta moo'e; ki goo'n oos hundim wixxaa ki beyyo waarookko. Hanqinam an hee'oommi Waa'a; ‹ka keen hundam wereeggina idaayyuwwisam xuubaa'nnitootto› yoolla. «Gindantaa udma'i ikkittaarem ki uullim hore'em bi'ukkaarem, kaba ki minaadabina xuqqitootto. Keese xuuxxo'i keen hundim kiinniinsi qee'llitamo. Kichchechchinne hee'llitti doollenne qaranto'i ki oos, at macceessittuuyyim ‹Ku beyyi niina lobakata xuqqaakko; niina ihoo haraar beyyo uwwe› yitamo. Atim ki tiironne ‹Ka ooso iina ayyi qarukko? An kichche'aanchoo alceennaa hee'ummo; qeefadamaammoohanee gadamaammoohanee hee'ummo; ka oos hundam iina ayyi li'isukko? An mullam gataa hee'ummo; eehaare ku oos hundim hanniinsi waatto'o?› yitootto» yukko. Moollanni Waa'i «Oono'o, mulli minaadaba mare'inne weeshoommo. I mare'e dut mulli minaadabina iimmaa'oommo. Ixxuwwim kiikka goo'n ooso qaaphphita'a eebbamo; ki landam gudumonne iyyitamo. Adilluwwi keese li'issam anno'o; ixxuwwi meentim keese abooyyitam keen ikkamo. Ixxuwwi horoore aad heeshaa'lla'a kiina otossitamo. Ki lokki diram aallitamo. Atim ee ammane an Waa'i ihummisa laqqootto. Eese neeyyatinne egettam keen tuuttamoyyo» yoolla. Hanqinam wodaam gaadaanchiinsi maate'e ubbuusisimmi mogaalli manchiinsi qeefajjo'o gatisimmi xanamoohonnihe? Ihukkaarem Waa'i «Hanqame; wodaam gaadaaniinsi qeefajjo'o massakkamo. Mogaalli keeniinsim maate'e bogakkamo. An kiinninne wocantam keeninne wocamoommo. Ki oosom gatisoommo. Keese u'nnisam keen ixxuwwi gaqqi maara ittamisa issoommo; woyi'n diqaasinne dimbitamisa ixxuwwi gaqqi xiiginnem dimbitamo. Eehanniinsi ki'aa manni shumo'i hundim an Waa'i kiina qaraare; keese gatisaanchoo Isra'ee'l malaayyaamoo ihummisa la'ookko» yoolla. Waa'i «An ki'nnuwwi ama hollummi furim hannonne yookko? Te'im ki'nnuwwa biteesummok hinka'i bada'n manchinatte? Ki'nnuwwi baxxakko'i baaxii'l bikkina biteesantakko'ookko. Ki'nnuwwi hawwoddakko'i hawwojji bikkinam ki'nnuwwi ama hollanto'ookko. «An waarummi ammane ee beyyonne mahina manni matim hee'ukkoyyo? An weeshummi ammane yeehoo manchi mahina ee beyyonne bee'ukko? I angi ki'nnuwwina agaageena gundaahinnihe? te'im ki'nnuwwa gatiseena iina malaayyi bee'aahinnihe? An shaaqoommaare dambalaq gogookko; daajjuwwam udma'i uulli issoommo; ixxuwwi woronne hee'oo qurxumme'im wo'o hoogaa lehaa shamookko. Iimane tuunsinne ifiisoommo; xiddi eddechcham ifiishshaanchi issoommo. Hoogaan keeno hinkid qoxxisimmi hasisooda'e la'oommisina Moollanni Waa'i iina losisaanchi allabo uwwaakko. Losaa'nnisa macceesona i macce fooqaa'ookko; dar daram eese baqaa'ookko. Moollanni Waa'i i macce fooqaa'aakko. Anim boqqayyo; lasom daba'llummoyyo. Eese gantam keenina afare, i haareedda coggam keeninam i xabano uwwummo. Eesenne anja tuhitu'uuyyi eese sholliissam keeniinsim i ille maaxummoyyo. Moollanni Waa'i iina hara'mmoo bikkina, an tuuroommoyyo. Ee bikkina i illi kollo bancisa issaammo; tuuroombee'isam la'oommo. An muccur ihummisa naqqasookkok i gadanonnette; eehannah eese kasaseena xanookkok ayyette? Hino'o, mat inkaa uullinona; iinninne uullixxamookkok ayyette? Hino'o, i kolli waarona. Moollanni Waa'i iina hara'mmookko; eehannah eesenne oogatookkok ayyette? Ixxuwwi hundim eddechchisa ebeettamo; bilim ixxuwwa itookko. Ki'nnuwwiinsi Waa'a baddookkok, ixxi awwaadaanchi sagaram macceesookkok ayyette? Oo manchi taakke'ookkok tuunsonnetti ihukkaa'lleensii ixxenam caakki bee'ulasii Waa'anne amma'nnamona; Moollannannem bakke'ona. Ihukkaarem kaba giira giittakka'a ki'nnuwwi gaqqi aphphoo giira amaddakko'i keen hundim, ki'nnuwwi xanqissakko'i gii'l labaninnee xomboo'l gii'l caakkinnee mallehe. I angiinsi aa'llakkamok kane. Kichchechchinnem iinse'llakkamo. Ki'nnuwwi, muccurooma awwontakkam keen, Waa'am hassakkam keeno, macceessehe. Hinkido'i kiniinsi fittakkoda'ee hinantakko'i baree sawwi'llehe Ki'nnuwwina anni hee'u Abrihaamee, ki'nnuwwa qatto'i Saara'aa hino'o moo'llehe. An abrihaame weeshoommi ammane xale'i ixxi gag hee'ukko. Ihukkaarem an ixxo maasse'ummo, ixxi shumo'om fikkaannisummo. Waa'i «Hanqoomam Yerusaaleemaa gindamu Yerusaalee'm woronne hee'llam keenoo qoxxisookko, qishixxookkome. Udma'i uulla Eden gannattisa awjinni biiram Waa'i duubbi kaashshi beyyisa issookko. Ixxonnem liiranchii ilillaatii galatii mazmuu'l sagarii macceesamookko. «I minaadaba, macceessehe; an ki'nnuwwina yoommi luwwam macceessehe; seer iinniinsi firookko, i oogatim eese laqqam bee'i minaadab hundinam caakki ihookko; Iikki muccuroom qaqqisa hincaakko. I gatisimmim afukkuuyyatte. I wodim adilluwwi hundinam hanqo'i oogatto eebookko; wo'inne kibbamu uulluwwi i gatisimma neeyyatinne egettamo. Ille iimmaa'llakka'a iimane moo'llehe, uullam aad heeshtakka'a moo'llehe. Iimannuwwi wirii'llisa binnaa bi'ookko; uullim eddechchisa ebeerookko; uullanne hee'oo mannim sabuuttisa qaqqisaa bi'ookko. Ihukkaarem i gatisimmi heer heerinam hee'ookko; i muccuroominam lasaanchi bee'e. Ki'nnuwwi muccurooma laqqakkam keenii, i seerim ki'nnuwwi wodanonne yoo keenii macceessehe; manni ki'nnuwwa gadoohaaree game'lloohaaree ki'nnuwwi badditakkotte. Ixxuwwa bil eddechcha itoo'isa itookko. Ihukkaarem i gatisimmi heer heerinam hee'ookko. I muccuroomim qaranchiinsi qaranchi afeebe'e hee'ookko. Waa'i malaayye ki'e; ki'e malaayyem edde'e; gaassi hee'u doollenne, hee'u qaranchuwwanne hundannem, hee'ukkisam kabadem ki'e. Dambalaq woronne hee'oo, Ra'aaba yamamoo moochchichcho muransittok atette. At gatissitti keen higgona, lobakata xilli wo'o gokkissaa xilli worinne googo fissittok atette. At agaaggi keen hundim, lobakat liiranchinne zammattu'uuyyi Xiyoona daba'llita'a waattamo. Eekke'em kichchechchiissii wi'llimmiinsii gatta'a heerii heerina liiranchinne hee'llamo. Waa'i «Ki'nnuwwa qoxxisoommok mexxo'i anette; eehannah lehoo manni ooso, hixisa qaqqisaa gogoo manchi beeto, mahina badditakkamuulla? Uulla qooccukkokaa iimanem biddiqaa'u ki'nnuwwa qooccaanchi Waa'a xaddakka'ahinnihe? ki'nnuwwa bi'isseena guddo'i, wor amaddam kee'n quunqiinsi ki'aa hinkaa'n balli afeebe'e baachchinne hee'llakkamo? kanniinsi eehid ixxuwwi quunqi ki'nnuwwa horem nakkooyyo. Karanta'a hee'llam keen qaqqisonne tirantamo; karanta'a hee'llam barennem letamoyyo; ixxuwwina hasisoo hurbaatam hooggamoyyo. Wo'i moor gugona dambalaqa heekkeesoommok an ki Moollanni Waa'a; i summim gogoxxi Moollanni Waa'a. I sagara ki suumenne issummo; i angi hafannem daphphaa'ummo. Iimannuwwa biddiqaa'ummok, uullam shooho'ummok Xiyooninam ‹At i minaadaba› yummok anette» yoolla. Waa'i angiinsi quunqi agga aggittok chufim gatoobee'isa dimbisoo agga humbullo cuungitaa aggitti Yerusaaleema, ki'e, ki'e; ki'llaa uulle. Keese awwonsookkok ayyimbee'e; at qattaa li'issitti ki oosiinsi, kiikka anga amadaa awwonsookkok hore'em hee'ukkoyyo. Oono'o, hawwonne hawwi keesenne afaakko. Oohim gindanchaa bichchaa, sibaaroo oraa, eehannah keese ayyi qoxxisookko? Qaashanne amadamu kukkussichchisa ki oos gooqqi lambe'i hundannem ubaakko. Ixxuwwanne Waa'ik quunqi ki Moollannikim axeellat dillaakko. Ee bikkina woyi'n diqaasinnetti ihoo'n hawwinne dimbittaanno kaka macceese. Ixxi minaadabina agaagoo ki Moollanni Waa'i, «Ki'nnuwwa tartaraa'oo aggi humbullo i quunqi humbullom ki'nnuwwi angiinsi massoommo; ka lasage ee humbulliinsi i quunqa od aggooyyo. An ixxo ‹Ki hanenne taakke'nnona iinse'e› yitu'uuyyi keese hawwissam kee'n anganne higissaa uwwoommo. Atim ki afare uullisaa taakke'amantam gooqqisaa issitaa hee'llitto» yoolla. Xiyoona, ki'e; ki'e; ki malaayye edde'e. Keesammi Yerusaalee'm beero'o, ki lombi eddechcha edde'e. Ka lasage ballachchantobee'i keenii haashaarammi keenii aaggamoyyo. Yerusaaleema, ki dira giggisse; ki'e; adilla'n barcumannem afuure. Qeefadantakka'a hee'llakkam Xiyoo'n ooso, karantakko'i chimchima ki'nnuwwi gaanjiinsi sheelattakka'a uunjehe. Waa'i «Kora'am biteesantakka'a hee'llakko'o. Ee'isam kora'am wolabbanonne fittakkamo. Illageen Gibxanne hee'llakkeena mattakko'o; ee lasage Aassoo'l minaadabim mashka'i bee'em wor amadukko» yoolla. Waa'i «I minaadab kora'am maraakko; ixxuwwa ijaajjam keenim ixxuwwanne osatto'ookko. I summim hundi ballam game'llamoolla; eehannah kaba iina keyye mah hee'aate? Ee bikkina i minaadab i summa laqqamo. Eekkaa gaassaa wocoommok anetti ihummisa ee balla laqqamo. Eeyya anette» yoolla. Misraachchi sagara kurookkok, xumma alallaatookkok, er danaam woshsham wocookkok, gatimma alallaatookkok, Xiyooninam «Ki Waa'i adil ihaakko» yoohaanni lokki duunnuwwanne hinkaa'nna mishsoohane. Oono'o, Waa'i Xiyoona waaroo ammane ixxuwwi illinnem moo'llam bikkina beero'o egettam keen sagara iimaa'lla'a ilil yitu'uuyyi mat ikka'a zammattamo. Ki'nnuwwi Yerusaaleemanne gindantakko'i beyyuwwa, Waa'i ixxi minaadaba qoxxisaakko; Yerusaaleema gatisaakko. Ee bikkina liirammehe; mateeyyoominnem zammallehe. Waa'i keesammi ixxi woda hundem adilluwwi illagennem la'isookko; uulli tochchi hundannem hee'llam keen ni Waa'ika gatisimma moo'llamo. Ki'nnuwwi Waa'ika mu'uta iyyitakkam keen annanni ikkehe, annanni ikkehe; eebeyyiinsi fillehe. Haashaarammi luwwa nakkitakkotte; ee beyyiinsi fittakka'a mucculluwwii ikkehe. Ihukkaarem gaaggaabbakka'a fittakkamoyyo; xottakkamokim gibbakka'ateyyo. Waa'i ki'nnuwwi illaginne higookko; Isra'ee'l Moollannim lasinnetti ihaa egerookko. Waa'i «Oono'o, i awwaadaanchi qoossimminnette baxookkok; la'amaakkoohan ihookko; iimiimookko; lobakata lombaam ihookko. Lobakat keen muggiteebe'e ixxek hagar ayyi manchaanniinsim annanni ihaa manni hundiinsim lophphaa hawwodamaakkoohan ihookko. Ee bikkina dut minaadab ixxonne maala'llitamo; ixxi mashka'inne adilluwwi suume amaxxitamo. Illageen kurakkobee'i luwwa moo'llamo; macceessobee'i luwwam qoossitamo» yoolla. Minaadabim «Neese macceensummi luwwa ayyi amma'nnaate? Waa'i woddu ayyena la'amaate. Ixxi Waa'i illagenne gogaalli uullanne li'oo xaphisaa mutaa'nnisaa li'aakko. Mishisoo dan te'im hibbi ixxena bee'e; moo'nnaa iittinoommisa issoo haatim hee'ukkoyyo. Manni gadaa sabaakkoo xissii hawwii annanni ihoo'n yoo manchi hee'ukko. Manni shigigaa ille dabareebe'e gadamaakkoohan hee'ukko; neesem lonsinumbee'ane. Hanqinam ixxi ni bikke jabbukko; ni xissom iyyukko. Ihukkaarem neese aphphisamukkaannisa, Waa'i qasukkaannisaa hawwukkaannisaa issinaa xingummo. Ihukkaarem ixxi ni hawwojji bikkina madukko; ni baaxii'l bikkinam xaamukko. Ixxi guzumo'anchinne niina xummi ihukko; ixxi madinnem neese fayye'nnummo. Neese hundim gereebbisa binni binninaa bi'nnummo; neese annannichchim googgoogom mallummo. Ihukkaarem Waa'i niikka hundikam hawwojja ixxonne iyyiisukko. Ixxi u'nnamukkoo orba'ukko; ihukkaarem maham wocukkoyyo. Durakkeena massakkam gereechchi geexisaa odda muroo kee'n illagenne cawwoo gereechchisaa cawwukko bagaan maham wocukkoyyo. U'nnisimminnee oogatimminnee massakko'o; i minaadaphphi baaxii'l bikkina aphphisamaa manni hee'oo uulliinsi bi'ukkisa ixxi qaranchiinsi ayyi qoossaate? Ixxonne jolli mahim hee'oo'n ixxi suuminnem qophphano wocoo'n ixxi leh jor keeninne waammim goddaan keeninnetti ihukko» yookko. Waa'i «Ixxi jabbinne xaamukkok i doo'llinnette; ixxi gaga baaxiilina kitim issaa lasage shumo'o moo'ookko; ixxi umurim qeeraa'llookko; i doo'llim ixxenne wo'mmookko. Ixxi gag lobakata hawwaa lasage heechchika caakka moo'ookko; lobakatam liiramookko. Muccur i awwaadaanchi ixxi lachchinne lobakat keeno muccussookko; ixxuwwi baaxiilom iyyookko. Ee bikkina ixxena sharada la'anto'oo keeninne uwwoommo; qeefajjo'om wodaammuwwinne baxxamookko. Mashka'oomim ixxi gaga lehina higisaa uwwaakko; boqquwwi keeninnem xigamaakko; dut kee'nneka baaxiilo iyyaakko; boqqi kee'n bikkinam uunxaakko» yoolla. Waa'i «Ate ooso qatbee'i alceenni meentichche, zammare; xuu'llaa qattibee'aante, liiranchinne zammare; sagara iimaa'llaa ililihe. Mashka'oomim aro'i yoo meentichchaanniinsi hollakko'i meentichchi oos lophphaakko. Ee bikkina at hee'lloo dukkaa'n beyyo haraasse; du'm eddechchuwwam haraassitaa biddiqaa'e; hore'em hoffiissitte. Usseewwa qeeraa'llise; xiribbuwwam qoxxise. Makki kollonnee qeddi kollonnee haraattootto; ki shumo'im mulli minaadaba lago aa'ookko; diihu beero'uwwam heechchi beyyi issookko. Tuuttoobee'i bikkina baddititte; sholle'lloobee'i bikkina muggititte; woraadda'n ammane keesenne afu tuulle xaddootto; busar meentichchosa keese game'llakko'i doolle tiittooyyo. Mashka'oomim keese qooccukkok kiina aro'o; ixxi summim gogoxxi Moollanni Waa'a. Isra'ee'l Keesammi keese Gatisaancho; ixxim ‹Heer uullina Waa'a› yamamoohane. Oosoomma'n ammanenne gadanto'i meentichchosaa sabanta'a wodanonne kichche'llo'i meentichchosaa hee'llitto» yoolla. Ihukkaarem keese gatisaanchi ki Moollanni Waa'i odim keese ixxi kollonne weeshaa «An keese hofqax ammaninam uraa hee'ummo; ihukkaarem lobakat qishixxatinne i kollonne dabaroommo. An lobakata quuqummi bikkina hofqax ammaninam keese uraa hee'ummo; ihukkaarem heer heerina hee'oo i iittinne kiina qishixxoommo» yoolla. Kiina qishixxoo Waa'i «Nohe'i doolle ‹Uulla wo'inne od bi'soommoyyo› yaa sagara aagummisam oono'o, kaba odim ‹An keesenne od quuqoommoyyo› yaa sagara aagoommo. Ka lasage od keese axeeroombee'isam hide'aammo. Duunnuwwi heekke'ookko; hoffi duunnuwwim bi'ookko. Ihukkaarem heer heerina hee'oo i iitti kiinninne qoxxaa hee'ookko. I xummik hidi'l sagarim bi'ooyyo» yoolla. Waa'i «At hawwitittok hambu'llaminnem heekke'llittokii qoxximmam hooggittokii Yerusaalee'm beero'o, an keese bito xee'aalli kininne baxoommo; ki shooho'o qoxxisoommok cuquluusa laboo kininnette. Kininne ootamu ooxxi ludonne yoo goobinaanchom aduu'n ille laboo kininne ki qash goocam inqu yakkam belecce'oo kininne, ki kululleetanne yoo ootam bito xee'aalli kininne baxoommo. «Ki oos hundim iinniinsi Waa'iinsi losso'oo keen ikkamo ki oosinam lophphaakkoo xumma uwwoommo. Muccuroomanne qoxxitaa uullitootto; damigii wor amadanchii kiinniinsi qee'llookko. Keese baddisookkok hee'ooyyo; dambaq kiinniinsi qee'llookko; ki kollonnem hincooyyo. Keesenne hawwoo afisseena ki'llo'i keen hee'llota'nnim ixxuwwi i beyyiinsi asse'anto'i bee'i bikkina ubbamo. «Oono'o, caninne giira buufoo xaara tumaancho qooccummok anette; ixxi ee mu'uta baxookkok baxamu luwwina awwaadoo'isinatte; bi'isoo'isinam bi'isaancho qooccummok anette. Keesenne qaashakko'i mu'ut chokaatookko; keese kasasoo keen hundam neegattootto; an i awwaadaanina uwwoommi sharad kane; ixxuwwi eroommim iinniinsette» yoolla. Waa'i «Ki'nnuwwi xeebe'llakkokeen hundim wo'i kolli waallehe; diinat beekeenim waattakka'a bitaa'llakka'a ittehe; woyi'n diqaasaa adom diinatbee'em kora'am bitaa'llehe. Ki'nnuwwika diinate hurbaat ihoobee'i luwwanne mahina bi'issakkamuulla? Goddisoobee'i luwwindu mahina malaayye guullitakkamuulla? Macceessehe, i woshsha macceessehe; er hurbaata ittehe; ki'nnuwwim doo'llammi hurbaatinne liirammehe. «Macce i kolli daballehe; i kollonnem hinci'llehe; Macceessehe, foorinnem hee'llakkamo. Qooxxaalli i iittinne Daawiitina hide'ummisam ki'nnuwwinnem heer heerina hee'oo hidi'l sagara aagoommo. Oono'o, ixxi minaadabina naqaasha, awwonsaanchoo gassaanchoo ihoo'isa issaammo. Oono'o, laqqoobee'i minaadaba weeshshootto; keese la'oobee'i minaadabim qaqqisaa ki kolli waarookko. Oohim an Isra'ee'l keesammi ihummi ki Moollanni Waa'i i lombinne iimiimaa'ummi bikkinatte» yoolla. Waa'i siidamoo ammane hassehe; hincoo ammane weeshshehe. Jor manchi ixxi googo baaxiilaanchim ixxi sawwite urona. Waa'i kolli daba'llona; ixxim qishixxookko; ni Moollanni kolli daba'llona; ixxek haafit lobakata. Waa'i «I sawwit ki'nnuwwaannisayyo; i googim ki'nnuwwi gooqqisayyo. Iiman uulliinsi qee'lloo'isam i goog ki'nnuwwi googiinsi i sawwitim ki'nnuwwaanniinsi qee'llaakkoohane. «Xeenii baradii iimaniinsi ga'nnaa uulla aashisoo'isa mutisaa mishoo'isa issoohaannisa sire'e wixaa hurbaata itoohaannina uwwoo'n iimane daba'lloobee'isam i suumiinsi firoo sagarim ee'isam kora'a i beyyo daba'llooyyo. I sawwixxeka issookko; asse'ummokam wonshookko. «Ki'nnuwwim liiranchinne fittakkamo; xumminnem geegesantakkamo. Duunnuwwii hoffi duunnuwwii ki'nnuwwi illagenne zammattamo. Haqquwwim liiranchinne anga aphphissamo. Utti bikkenne hoom hallutti bikkennem baarsanaat yakkam haqqi mutookko. Oohim iina tiissiishshanee heer heerina bi'oobee'i mare'ee ihookko» yoolla. Waa'i ixxi minaadabina «Hanqa egellehe; er baxo baxxehe; iikki gatisimmi waareena, i muccuroomim la'ameena hincaakko. Usheexxaxxi balla haashaassoo'n lonsookkok, jora baximmiinsi qee'llaa gaga ege'llookkok maasse'amaakkoohane» yoolla. Waa'i kollonne hincu waaraanchi «Hanqinam Waa'i ixxi minaadabiinsi eese annanni issookko» yoone. Muleessa'im «An gogaalli haqqichcho» yoone. Waa'i «I Usheexxaxxi balla lonsaa, eese liiransoo luwwam doo'llaa i hidi'l sagaram egeroo muleessa'uuwwina i Keesammi Minennee i ooxxi woronnee goon oosina landi oosinaa yoohaanniinsi lophphoo tiissiishshi luwwaa summaa ixxuwwina uwwoommo. Heer heerinam bi'oobee'i summam uwwoommo» yoolla. Waa'ina awwaaddeenaa ixxi summam iittita'a otossiteenaa ixxi kolli hincitam waaraanina, Usheexxaxxi balla haashaassitoo'n lonsitam keeninaa ixxi hidi'l sagaram egettam keenina hundinamii Waa'i «I Keesammi duunanne woroommo; eese uunxakkam minennem liiransoommo; iina kitima hincaa'akkam beyyonne shokkiisakka'a hincaa'akkam kitimaa mulli kitimmuwwaa hincaa'llam ammanem aa'oommo. Oohim i min minaadab hundinam ‹Uunxaxxi mine› yamamoo bikkinatte» yoolla. Isra'eeliinsi binnito'i keeno wixxaa'oo Moollanni Waa'i «Wixxito'i kee'n beyyonne mulli keenom wixxaa'oommo» yoolla. Ki'nnuwwi udma'i uullanne yoontakke'i moochchi hundim ki'nnuwwim doo'm wo'l moochchi hundim ittakkeena hinci'llehe. Isra'ee'l awwonsaan qooqquwwa; hundim lachchi beekeeno; hundim duud wisha; muunta'ahim xantamoyyo; ixxuwwi diriiraammuwwa; iinse'lla'ahim haqaawwe'llamo. Itimma iittaalluwwa; itaa goddoobee'i wishisa. Qoossitambee'i allaaraano; hundim ixxuwwi gaqqi googonne matto'o; annannichchim ixxi gagina awwaadoo luwwa siixxeena geeramookko. Ixxuwwim «Waallehe; woyi'n diqaasa angona; dimbisoo agginnem xeebo mu'llinona; kaballa ihukkisam soodom ihookko; kaballaanniinsi sooxxek lophpookko» yitamo. Muccur manchi lehookko; ihukkaarem eekka ayyim qoossooyyo. Waa'ina gaga uwwito'i manni letamo; muccur keen joriinsi gattamisina lehinne massantamisa ayyim qoossooyyo. Xabbeen googonne mattam keen xumminne hoo'llamo; letam ammanem usheexxitamo. Ki'nnuwwi gennaa'n ooso, saa'aa'nnekii buubbeesaa'n shumo'ii, kid hinci'llehe. Ki'nnuwwi naacantakkamok, ki'nnuwwi suume fooqaa'llakkamokii allabo fissitakkamokkii ayyennette? Ki'nnuwwi boqquwwi kee'n oosoo qophphanaa'n shumo'oyyonnihe? Ki'nnuwwi hujuphphi haqqi lugummuwwannee latu haqqi lugummuwwannee saalmaachchinne shokkitakkam keenoo cebbuwwannee ki'n fonqooqquwwannee ki'nnuwwi ooso kitimtakkam keenoyyonnihe? Cebbi beyyi qacaalli ki'n waa'uwwi ki'nnuwwanne; oo keen ki'nnuwwina saamome. Aggikkaa hurbaaxxi kitimaa ee keenina hincaa'llakko'ookko; eehannah ookki eese quuqisooyyonnihe? Qeeraa'l duunnuwwi ludonne saa'immi beyyo dakkakko'o; kitimo hincaa'imminam eehe'enne fittakko'o. Qophpha'n waa'i misilluwwa u'llummi xufiinsii gooc gubaniinsii worinne saqaltakko'ookko; eese uttakka'a ki'nnuwwi ara'a saa'immina maxattakko'ookko. Ee ara'annem fittakka'a ixxo haraassitakko'ookko; ixxuwwi ara'a iittitakko'i bikkina ixxuwwinne hide'antakko'ookko; ixxuwwika kallemaroomam moo'llakko'ookko. Shitto'o duntakka'a buurom laphphitakka'a Mooleek yakkam waa'ina otossitakkeena mattakko'o; otossitakkam waa'uwwa hasimmina asse'amaano qee'l uulla Si'ool afeebe'e asse'llakko'o. Taakki lophphimminne qondoodditto. Mulli waa'uwwa hassakkeena lobakata qondooddakko'o; ceentaka'atim uttakko'oyyo; mulli waa'uwwi ki'nnuwwina malaayye uwwookkoka labissakka'a ee keeno ceentakkoo'n hassakko'o. Waa'i «Iina qophphantittok ayye badditaatette? Eese tiirimma sabbittok ki wodanonnem dissitbee'ek eesem baddimma sabbittok an sahaa cawwummaareyyonnihe? Kiikka muccuroomaa baxoo biir issoommo; oo keenim kiina awwaadooyyo. Hara'mmato siiddeena laattoo ammane hino'o oo wixxaa'llitti waa'uwwi keese gatisona; ixxuwwa hafachchi agookko; fooshshim binnaa'ookko. Ihukkaarem eesenne amma'nnamookkok uulla lagaa'ookko; keesamaakkoo i duunam i gaqqi amaxxi issookko» yukko. Waa'i «Axissehe, axissehe; googo gudissehe. I minaadaphphi googiinsi qoloo luwwa ki'issehe» yoolla. Hundiinsi hanaan ihaa adillan yookkok, summim keesammi ihaa heer heerina hee'ookkok «An sholle'llo'i kee'n tiiro iimiimaa'eena maashaalli keenom baqbaqaa'eena hundiinsi hanaan ihu keesamaakkoo beyyonne hee'oommo. An sholle'llo'i keeninnee maashaalluwwinnee maqire ihoommo. I minaadabina iinniinsi waaroo heechchi ayyaana uwwummo; ee bikkina ixxuwwanne an quuqummi quunqii kasasummokii heer heerina hee'oo'isina issoommoyyo. Ixxuwwi baaxii'l mashka'innee gaga iittimminnee ixxuwwanne quuqaa hee'ummo; hore'em ixxuwwa guzumo'aa annannihaa hee'ummo; ihukkaarem ixxuwwi xiiqqanta'a ixxuwwi googonne matta'a hee'llo'o. «An ixxuwwika baxo hundam moo'aammo; ihukkaarem ixxuwwa fayyiisoommo; ixxuwwam awwonsummuuyyi hara'mmoommo; kichche'llo'i keenom qoxxisoommo. Qee'llonnee abbisonnee yo'i keenina hundinam xumma uwwoommo; an i minaadaba fayyiisoommo. Ihukkaarem jor keen hambu'llam haraa shufuraa fissoo cawweena xanoobee'i heekke'oo dambalaqisa. Ee bikkina baaxiilaan keenina xummi bee'e» yaa Waa'i wocukko. Waa'i «Sagara iimaa'llaa laare; egedditte; ki sagara xurumbisa macceesise. I minaadabina ixxuwwi booqqooma, Yaaqoob mininam ixxuwwi baaxiilo kure. Ixxuwwi eese hundi ballam hassamo; i googom laqqeena hassamoka labbamo; hanqo'i baxo baxoohaannisaa iikka ixxuwwi Waa'ika seera urubee'i minaadaphphisaa hanqo'i oogato'ina eese uunxitamo; an Waa'i ixxuwwi kollonne hincihona hassamo» yoolla. Minaadabim «At moo'lloobeelas neese mahina soommannummo? At mahannem xiggoobeelas neese mahina gaga sholliinsummo?» yitamo. Waa'im «Ki'nnuwwi soommantakkam balla ki'nnuwwi tii'lleka issitakkamo; ki'nnuwwi baxissakkam keenom jawweessakkamo. Ki'nnuwwi soomma'nnek lasaanchi joranchaa fitanchaa ihu bikkina mogaallisinne aphphixxantakkamo; eehido'isinne soommantakkam soomman ki'nnuwwik uunxat iimanenne macceesamoo'isa issooyyo. An doo'llummi soomman kido'anennihe? Manni ixxi gaga sholliisookkok xale'i kido'i ballannennihe? Horoore shomboqo'isa heeshaa'immannihe? Te'im xiddi eddechcha edde'akka'a gii'l buchchanne biqqiiqqimmannihe? Eehannah ki'nnuwwi soommano yitakkamok kanennihe? An kido'i soommanonne liiramoommoka labissakka'atennihe? «An hasoommi soomman wor amadimmika chimchima muttakkona, gaanjaqqika usa tittakkona, wor amadanto'i keeno wolabbanonne fissitakkonaa gaanjaqqi hundam iiqqakkonayyonnihe. Ki'nnuwwi hurbaata sibaaraanchinne baxxantakkamisina, min bee'i buxuchcho ki'nnuwwi mine aagissakkamisina, habiillito'i keeninam eddeessakkamisinaa ki'nnuwwi qarmanninam ille jottakkabee'isinayyonnihe? «Ee ammane ki'nnuwwik caakki soodaraa'l laaqqisa bololookko; fayya'oomim qaqqisaa mutookko; ki'nnuwwi muccuroom illage higaa marookko; Waa'ikim lombi ki'nnuwwina agir ihookko. Ee ammane eese weeshshakkamo; anim macceesoommo. Hara'mmatinam laattakkamo; anim ‹An yoommo› yoommo. «Wor amadimmi gaanjaqqa, boqqoo'm woshshaa maxxaarinne moo'ishshaa qeessitakkolas sibaarukkaannina qishixxitakkolasii hawwaanina hasisoo luwwa uwwitakkolasii ki'nnuwwi caakki tuunsonne caakkookko; ki'nnuwwi tuunsim samgud ballisa ihookko. An hundi ammanem keese awwonsoommo; ki foorem er luwwinne goddisoommo; ki miqem qoxxisoommo; atim wo'inne qufu kaashshi beyyisaa xoo'oobee'i wo'i bu'isaa ikkootto. Gaassiinsi ki'isaa gindamu beyyuwwi baxamookko; lobakat qaranchik shooho'i areesamookko. Atim ‹Iiqamma cacoohane; heechchi googo haareechchisoohane› yamantootto» yoolla. Waa'i «Usheexxaxxi ballanne mattoo beyyiinsi ki lokko egeddilas, keesamaakkoo i ayyaamonnem ki tii'lleka issitbeelas, Usheexxaxxi ballam ‹Liirancha, Waa'ika keesamaakkoo ballam lonsamma› yitlas ki gaqqi googonne marimmiinsi, ki gaqqi doo'lla issimmiinsii awwaad bee'i woshsha wocimmiinsii egexxantaa lonsitlas ee ammane eesenne liirantootto; uullaannonne qoffittuwwanne fissoommo; kiyyannika Yaaqoob amaxxam godditaa ittoo'isa issoommo» yoolla. Kaka Waa'i wocaakko. Oono'o, Waa'ik angi gatisimmiinsi gundukkoyyo; maccim macceesimma hoogukkoyyo. Ihukkaarem ki'nnuwwik hawwojji ki'nnuwwaa Waa'aa baanaakko; ki'nnuwwik baaxiil ixxeka ille ifiisu bikkina ixxim macceesooyyo. Ki'nnuwwik angi xiiginne maxxaalluwwim hawwojjinne haashaaramaakko; ki'nnuwwi suumim qophphano wocaakko; allabim jor woshsha macceesisaakko; Muccuroominne weeshookkok hanqo'i oogatom oogatookkok bee'e; awwaadoobee'i luwwanne bakke'aakko; qophphano wocaakko; hambalaachcha siiraa jolla qaraakko. Hamashshika quunqa qaaphphito'ookko; idootichchi do'nna daddo'ookko; ee quunqa itookkok ayyim leheekko; quunqoom iiqamoohaarem woraqaallichchi firookko. Oo do'n ixxuwwina eddechchi ihooyyo; baxxo'i luwwinnem ixxuwwika orachcho ifiixxitamoyyo; ixxuwwik bax jora; angim damiginne wo'mmaakkoohane. Ixxuwwik lok baaxiilina geeroohane; muccur xiiga dunteenam gaaggaabamane; sawwitam sawwitim jora; bi'isimmii gindimmii ixxuwwi googina mare'e. Xummi googo laqqamoyyo; ixxuwwi googonnem hanqo'i oogat bee'e; ixxuwwika googo boqqisso'ookko; eekkeen marookkokim xumma siidooyyo. Ee bikkina minaadab «Hanqo'i oogat niinniinsi qee'llaakko; muccuroomam siindoommoyyo; neese caakka hansaa hee'nnummo; ihukkaarem hundim tuunso; caakkika laaga hansummo; ihukkaarem taakke'nnoommok gambabbi tuunsonnette. Qooqisa ootanne tu'm tu'mminummo; illi bee'i kee'nnisam taftafinummo; samgud ballanne tuunsonne taakke'oo manchisa qolammummo; malaayyaam kee'n lambe'enne lehu mannisa inkummo. Neese hundim tibbe'isa laalloommuulla; handare'isam qitinoommuulla; hanqo'i oogato egellaa hee'nnummo; ihukkaarem maham siindummoyyo; gatimmim niinniinsi qee'llaakko. «Ni boqqoom ki illagenne lophphaakko; ni baaxiilim neesenne naqqasaakko; ni boqqoom niinniinsi annanni ihukkoyyo; ni hawwojjam neese lanqoommo. Keesennem boqqinaammo; qophphanom woncaammo; ni Moollanna awwonimmiinsim laso daba'llinaammo; boqqoo'mmekaa damiqqi woshshaa woncaammo; qophphano siillaa ni wodaniinsi fissinaa woncaammo. Ee bikkina hanqo'i oogat laso daba'llaakko; muccuroomim qee'llonne uullaakko; hanqi wixxixxi beyyuwwanne ubaakko; xabbeenoomim aageena xanukkoyyo. Hanqi bi'aakko; jolliinsi gaga ege'lloo manchi bogamaakko» yoolla. Waa'im eekka moo'ukko; hanqi bi'u bikkinam kichche'ukko. Manni bee'ukkisa moo'ukko; mulli manna bikkaa ixxo uunxookkok hee'ubee'i bikkina maalalukko. Ee bikkina ixxi gaqqi wodim gatimma eebukko; ixxi muccuroomim bakkiisukko. Ixxi muccurooma o'l eddechchisa edde'ukko; gatisimmi qoobe'em horoorenne issukko; baado firimmi eddechcham edde'ukko; to'achcham wereeggi eddechchisa hanenne edaa edde'ukko. Ixxi maso'ina ixxi quunqe, ixxi diina'inam baado ixxuwwi baxisanne miqookko. Wo'inne kibbamaa yoo uulluwwinam ixxuwwi baxika uwwookko. Ixxi malaayyaam hambu'llam hafachchinne gafe'amukkuuyyi waaroo dirisisa ihoo bikkina eelliinchi aagginne hee'oo keen Waa'i summa, eelliinchi firinne hee'oo keenim ixxi lomba baddookko. Waa'i ixxi minaadabina «Gatisaanchi Xiyooninaa baaxiilo biira yito'i Yaaqoob mininaa waarookko. An ixxuwwinne aagoommi hidi'l sagarim ‹Kaballiinsi ki'isaa heer heerina ki'nnuwwanne yoo i Ayyaanaa ki'nnuwwina losisummi i sagaraa ki'nnuwwi oosinaa oos oosinaa losissehe› yoohane» yoolla. Kiina caakki waaraakko; ki'llaa caakkise; Waa'ikim lombi kiina firaakko. Oono'o, tuunsi uulla, gambabbi tuunsim mulli minaadaba ifiisookko. Ihukkaarem Waa'i kiina ki'aakkoo; ixxi lombam ki hanenne moo'isookko. Mulli minaadab ki caakki kolli; adilluwwim kiina firu soodaraa'l caakki kolli waarookko. Xabbitaa ki kululleeta moo'e; hundim wixxaa ki beyyo waarookko. Kiikki goo'n oos qee'l uulliinsi waarookko; ki landam iyyakka'a ki beyyo worakkamo. Ee ammane dambalaqanne hee'oo amaxxii mulli minaadaphphi goddii ki kolli waaroo bikkina moo'llaa liirantootto; atim maalaltootto; lobakatam liirantootto. Dut gaameela'i Miidiyaa'mmekaa Eefa'ikaa exxaa ki uullanne wo'mmookko. Hundim Saaba'iinsi worqaa aduruusaa amadda'a waattamo; Waa'am galaxxitamo. Qeedaa'l gereebbi ki kollonne wixxookko; Nabaayooxxi gereebbi ambulluwwam kitimina awwaaxxitootto; Oo keenim iina kitima hincaa'akkam beyyonne eese liiransoo kitimina ihookko; lombaam i minem lonsoommo. Iimanenne geeroo duuphphisaa do'nnanne aageena bararoo handare'isaa ku geeroo keen ayyaamo? Ixxi keese lonsu bikkina wo'inne kibbamaakkoo uulluwwi eese neeyyatinne egeroolla. Isra'ee'l keesammina lombaam ki Moollanni Waa'iina ki ooso ixxuwwi birinnee worqinnem qee'lliinsi woreena Tarsees markabbuwwi gudaa egeraakko. I quunqi bala'inne aphphisaa hee'ummo; ihukkaarem kaba i qishixxato iittinne moo'isoommo. Waaraan ki oota ootookko; ee minaadaphphi adilluwwim kiina awwaadookko. Mulli minaadaphpheka amaxxaa qeefadanto'i adilluwwaa ki beyyo worakkam bikkina ki gooc hundi ammanem fooqookko; hiimoo ballam xufamooyyo. Kiina awwaadoobee'i minaadabii adilii hore'oomam bi'ookko. Keesammi i mi'n beyyo wereeggiseena Liibaanoosina lombi ihu hoom, saate'ii digibii ki beyyo waarookko. I lokki usheexxoo beyyom an lonsoommo. Keese wor amaddam hee'llo'i kee'n oos waatta'a kiina heeshitamo; keese gaddo'i keen hundim ki lokkonne ubbamo. Keesem «Waa'ina Beero'o; Isra'eelina Keesammi ikkitti Xiyoona» yita'a weeshshamo. Ayyim ki worinne daba'llamoobee'i xadantaattoohanee sabantaattoohanee hee'llitto. Ihukkaarem kaba heer heerina manni keesenne bakke'oohanee qaranchi hundinam liiranchaa ikko'isa issoommo. Mulli minaadaphpheka ado aggootto; adilluwwikam anuuna iiccootto. Anim Yaaqoobina wod ihummi Moollanni kiinam qaraaree gatisaanchoo ihummisa laqqootto. An kiina naas bikkenne worqa, xaa'l bikkennem kin bira, haqqi bikkenne naasa, ki'n bikkennem xaara eeboommo. Xummi keese gassaancho muccuroomim kiina awwonsaanchi ihoo'isa issoommo. Ee lasage ki uullanne damiqqi laachchi macceesamooyyo; ki uulli tochchonnem bichchi te'im gindanchi hee'ooyyo. Ki qasha «Gatisaancho»; gooccuwwam «Galata» yitaa weeshshootto. Ee lasage ballina eelliinchi caakki hiiminam aga'n caakki kiina hasisooyyo. Waa'i kiina heer heeraxxi caakka; ki Moollannim kiina lombi ihookko. Waa'i kiina heer heeraxxi caakkaa ki wi'llimmi doollinam lasaanchoo ihoo bikkina ki eelliinchi hore'em aagooyyo; aganim ixxi caakka hoorooyyo. Ki minaadab hundim muccur ihookko; uullam heer heerina lagaa'llamo; i lombi moo'amoo'isina ixxuwwi an kaashshaa i angi baxoo. Ki'nnuwwiinsi hoffok kuma hore'em hoffokim wodaam minaadab ihookko. An Waa'i amman afoohaare kuk qaqqisaa ihoo'isa issoommo. Moollanni Waa'ik Ayyaan i hanennette; buxina mishiraachchi sagara alallaatona Waa'i eese doo'llaakko; wodan iiqamu keenom caccona qeefadanto'i keenina wolabbano karanto'i keeninam tirancha alallaatona eese asse'aakko. Ee'isam Waa'i niina eroomma issoo hiinchi bikkinaa ni Moollannim ni diina'iinsi baado miqisoo balli bikkinaa alallaatona wi'lloo keeno qoxxisona «Waa'i ixxi lombina kaasaakkoo muccuroo'm haqqa» yamantona Xiyoonanne wi'llitam keeno gii'lbuchchi bikkenne laakka, wi'l bikkenne liirancha zayta, kichchechchi bikkinne galaxxi eddechcha uwwona eese asse'aakko. Ixxuwwim gaassiinsem ki'isaa gindamu beyyuwwa dabatta'a baxxamo; illageen gindamu keenom dabatta'a baxxamo; lobakat qaranchiinsi illageen gindamaa diihu beero'uwwa dabatta'a baxxamo. Waaraan ki'nnuwwi gereebba allaattamo; mulli keen odim ki'nnuwwi uulla abuullaanoo woyi'n kaashshi beyyo egeraanoo ikkamo. Ihukkaarem ki'nnuwwi «Waa'ina qeessuwwa; ni Moollanninam awwaadaano» yamantakkamo. Mulli minaadaphphi amaxxa ittakkamo; ixxuwwi goddannem heellantakkamo. Ixxuwwi tuutto'i bikkenne lam suume aa'llitamo; sholle'llo'i bikkinnem ixxuwwi uullanne liirantamo. Ixxuwwi uullik sharad eraa'llaanniinsi lam suum ihookko; heer heerinam liirantamo. Waa'i «An Waa'i hanqo'i oogato iittoommo; gamoo hawwojjaa saboommo; ixxuwwi baxikam hanqo'isinne miqoommo; ixxuwwinnem heer heerina hee'oo sagara aagoommo. Ixxuwwi shumo'i mulli minaadaphphi lambe'enne ixxuwwi oosim manni lambe'enne la'amaakkoohan ihookko. Ixxuwwa moo'oo hundim an Waa'i maasse'aammoo shumo'i ikko'isa qoossookko» yoolla. An Waa'anne liiramoommo; i foorim i Moollannanne lobakata liiramookko. Mashka'oomim idaayya'n eddechcha edde'u idaayyichchisaa wereeggi eddechcha edde'llo'i idaayyichchosaa ixxi gatimmi eddechcha iina eddeesaakko; ixxi gatimmi eddechcha iina eddeesaakko; muccuruoo'm kaabbam i hanenne edaakko. Uulli mutaano mutisoo'isaa duubbi kaashshi beyyim fiishsho'o li'isoo'isaa Moollanni Waa'im muccuroomaa galataa hundem minaadaphphi illagennem mutisookko. Xiyoonik muccuroom da'l caa'mmisa bololeebe'e gatimmim belelle'oo caakkisa moo'ameebe'e Xiyoo'n bikkina sa'oommoyyo; Yerusaalee'm bikkinam cawwaa uroommoyyo. Mulli minaadab ki muccurooma adilluwwim ki lomba moo'ookko. Waa'i gagim fissoo haareechchi summinne weeshantootto. At Waa'i anganne lombi laakkisa ki Moollanni angannem adilla'n mare'isa ikkootto. Ka lasage «Uunjanto'oohane» yamantooyyo; ki uullim «Diiha» yamamooyyo. Waa'i keesenne liiramu bikkinaa ki uullinam aro'i ihoo bikkinaa ki summi «Waa'i liiramaakkookkotane» ki uullim «Aro'aamotte» yamamookko. Woraadichchi baajaamo eeboo'isa keese uumukkokim kiina aro'i ihookko. Idaayyichchi idaayyichchonne liiramoo'isam ki Waa'im keesenne liiramookko. Yerusaaleema, qoto'aa egeroo keeno ki ootanne uullisaammo; ixxuwwi hiimoo ballaa hore'em innaantambee'i keeno. Ki'nnuwwi Waa'a uunxitakkam keeno, hore'em usheexxitakkotte. Ixxi Yerusaaleema shooho'eebe'ee uullinam galat isseebe'ee usheexxato uwwitakkotte. Waa'i ixxi makki anginnee wodaam malaayyinnee «Ka lasage ki hurbaata ki diina'i itona uwwoommoyyo; at badattitti haareechchi woyi'n diqaasa od allaggi agooyyo. Ihukkaarem atoota wixxaa'llam keenim ittamo; Waa'am galaxxitamo. Woyi'n misha feettam keenim i keesammi wixxixxi beyyonne diqaasa aggamo. Higgehe; gooccuwwinne higgehe; googom minaadabina gudissehe; gudissehe; lob googo gudissehe; kinneewwa ki'issehe; mare'em mulli minaadabina moo'issehe» yaa hide'aakko. Oono'o, Waa'i heer uulli tochchi afeebe'e «Xiyoo'n landichchona ‹Ki gatisaanchi waarookko; irifo'im ixxi angannette; baxim hundim ixxi illagennette› yi'llehe» yaa alallaataakko. Ixxuwwi «Waa'i gatisaakkoo Keesammi Minaadaba» yamantamo. Atim «Uunjantobee'i Hasantam Beero'otte» yamantootto. Ku kashar eddechcha edde'aa Eedoomanne yoo Booxiriinsi waarookkok ayyette? Ku edde'ukkis mishsoo lophphaakkoo malaayyinne taakke'oo ayyette? Muccuroominne wocaa gatisimmi malaayyi yoo Waa'i anette. Woyi'n diqaasina misha ciinsoo manchaannisa ki eddechchi mahina kasharukko? Waa'i «An ciinsakkam beyyonne woyina mullam hancaacummo; ee ammane minaadabiinsi matim iinninne hee'ukkoyyo. An ixxuwwa i quunqinne hancaacummo; i bala'innem xaansummo; i eddechchim ixxuwwi xiiginne bi'aakko; hundem eddechcham xussaammo. Baado firoommi balla qoodaammo; gatisoommi hiinchim afaakko. Moo'ummo; ihukkaarem hara'mmoo ayyim hee'ukkoyyo. Hara'mmookkok hee'ubee'i bikkinam maalalummo. Ee bikkina i gaqqi wodim gatimma eebukko; i quunqim iina hara'mmukko. I quunqinne minaadaba hance'ummo; i bala'innem xaansummo. Ixxuwwi xiigam uullanne dunummo» yaa dabarookko. Waa'i niina issu luwwi hundinam, eroomminaa ixxo galaxxisoo baxinaa ixxi qishixxaxxisinnee biijoo'mmisinnee Isra'ee'l minaadabina issu eroommi hundam kuroommo. Waa'i «Hanqinam ixxuwwi i minaadaba; qophphantambee'i i ooso» yukko. Ixxuwwinam gatsaanchi ihukko. Ixxuwwi u'nnanne hundannem ixxim u'nnamukko; ixxi illagenne hee'oo asse'amaanchim ixxuwwa gatisukko. Ixxi iittinnee qishixxatinnem ixxuwwina tisso miqukko. Illagee'n doollenne hundannem ixxuwwa ki'isaa iyyukko. Ihukkaarem ixxuwwim boqqito'o; Keesammi Ayyaanam qaraassito'o. Ee bikkina ixxi ixxuwwina diinakkichchi ihukko; ixxi gagim ixxuwwinne oramukko. Ee ammane ixxena awwaadaanchi Muse'e hee'u gaassi doolle tiittamo; gereebba allaaraanchinne maqirem dambalaqiinsi fissukkok hannonnette? Ixxeka Keesammi Ayyaanam ixxuwwanne issukkokidu hannonnette? Ixxi lombaam malaayye Muse'i makki anganne issukkok, ixxi summi heer heerina weeshamoo'isina ixxuwwi illagenne wo'o baxxansukkok farashshi biir uullanne firiixoo'isa qo'llitoo'n xillorinne higisukkok hannonnette? cebbanne aad dilloo la'llisa Waa'ik Ayyaan ixxuwwa usheexxaxxi kolli awwonsukko. Ki minaadaba ee'isinne awwonsittok ki summi lophphoo'isinatte. Iimaniinsi aad moo'e; keesammaa lombaamoo ihu ki adilla'n miniinsi aad moo'e. Kiikki to'achchii wodii hannonnette? Ki biijoomii qishixxatii niinniinsi qee'llaakko. Abrihaam neese la'ubee'aarem, Isra'eelim qoossubee'aarem at niina Anna; Moollanna, at niina Anna. Ki summi gaassiinsim neese gatisaancho. Moollanna, ki googiinsi huushammoommisa issittok mahinatte? Keese baddinoombee'isam mahina ni wodano duudissitto? Kiina gulummi ihu ki sullinaa ki awwaadaa'n bikkinaa yitaa daba'lle. Kiikka keesammi beyyo hofqax ammanina ki minaadaba ixxi gaqqan issaa hee'ukko; ihukkaarem kaba ni diina'i ki mine hance'amaakko. Neese gaassi doolliinsim ijaajammumbee'aannisaa ki summinne weeshammumbee'aannisaa inkaammo. Iimane fooqaa'llaa dillitta'n! Duunnuwwim ki illagenne huxe'uta'n! Giir gogaalli haqqa shokkiisoohaare hiramax wo'o hufaa'oo'isa ki summi ki diina'i illagenne la'amaakkoohan ihoo'isaa minaadabim ki illagenne huxe'oo'isaa issiteena dille. Neese egellumbee'i maalalsiisoo luwwa issitti ammane at dillitto; duunnuwwim ki illagenne huxe'ukko. Neeyyatinne egeroo keenina gaassiinsim ki'isaa aganna baxoo kiinni'nnoo Waa'a illi moo'ukkoyyo; macci macceesukkoyyo; la'ukkokim bee'e. Muccuroo'm baxo liiranchinne baxxam keenoo ki googom tiittam keenoo hara'mmitootto. Ihukkaarem neese hundi ammane ixxuwwa hawwondummi bikkina oono'o, at neesenne quuqqitto. Eehannah neese hinkid ganteena xannoommo? Neese hundim baaxiilinne haashaarammaammo; ni muccuroomim xuraam suusisa. Hafachchi buyya fii'aa massoo'isa neesem ni baaxii'l mashka'inne fii'ammaammo. Ki summa weeshookkok, keesem hasookkok bee'e; ki ille niinniinsi daphphaa'llaatto. Ni baaxii'l mashka'innem neese uunjitaatto; ille niinniinsi daphphaa'llaatto. Ni baaxii'l mashka'innem neese uunjitaatto. Ihukkaarem kaba at niina Anna; neese buchcha; at neese baxxitto; neese hundim ki angi baxo. Ni Waa'a, neesenne lobakata quuqqitte; ni baaxiilom heer heerinam tiittitte. Oono'o, he'i neese moo'e; neese hundim ki minaadaba. Keesamaakkoo ki beero'uwwi udma'i ihaakko. Xiyoon udma'i uulla, Yerusaaleemim manni bee'i diih ihaakko. Gaassi niyyanno'i keese galaxxitam hee'llo'i keesammaa lombaamoo ihu ki min giirinne shokkaakko; niikki mishisoo beyyuwwi hundim gindamaakko. Moollanna, ee hundam moo'llaa daba'llitooyyonnihe? Sa'itaa cawwittonnihe? Qaxiinsi hanaan neese guzumo'lloohonnihe? Waa'i «Eese xa'mmubee'i keenin i gaga la'isummo; eese hasubee'i keeninam siidamummo. I summa weeshubee'i minaadabinam ‹Yee, yee› yummo. Jor googonne marukkuuyyi ixxi sawwixxisanne hee'oo boqqi minaadabina balli hundoomam i anga biddiqaa'ummo. Ku minaadab duubbi kaashshi beyyuwwanne i illagenne kitima kitimimminnee buchchi mu'utanne aduruusa wiriissimminnee hundi ammanem eese quuqisoohane. Waammuwwi lambe'enne afuuttam keeno; maaxammi beyyonne gattam keeno; boonke'i maaram ittam keeno. Haashaarammi maraq ixxuwwi harallanne amaddam keeno. Ixxuwwi ‹Laa'ihe, an kiinniinsi loboka keesammi ihummi bikkina eesenne hincititte› yitam keeno. Oo woshshi balli hundoomam i quunqi giira xanqisoo keeno. «Oono'o, i illagenne kitaabamaakko; ee bikkina cawwoommoyyo; ixxuwwi baxisa miqoommo; ixxuwwi angikam bito dabaroommo. Ki'nnuwwikaa ki'nnuwwi anno'ikaa baaxii'l baado firoommo. Ee'isam duunnuwwanne kitima hincaa'llo'i bikkinaa hoffi duunnuwwannem eese game'llito'i bikkinaa ixxuwwi keenaanchonne anim dabaraa keenoommo; gaassi ixxuwwi baxikam bito miqoommo» yoolla. Waa'i «Woyin shoganne hee'oo ammane ‹Maassi ixxonne yoo bikkina bi'issakkotte› yakkamisam anim i awwaadaa'n bikkina yaa minaadaba guullaa bi'isoommoyyo. Yaaqoobina shumo'o uwwoommo; Yihudim i duunnuwwa lagaa'oo'isa issoommo. An doo'llummi keen ee uulla lagaa'ookko. Iina awwaadaanim eehe'enne hee'ookko. Eese hasoo i minaadabina Saaroon gereebbi allaachchi beyyo, Akoo'l cebbim diinat usheexxoo beyyi ihookko. «Ihukkaarem ki'nnuwwi eese Waa'a uttakka'ahii i keesammi duunam xaddakka'ahii ‹Er saamo› yamamoo qophpha'n waa'ina maadda gudissakko'o; ‹Er gada'a› yamamoo qophpha'n waa'inam woyi'n diqaasa lubbakkamo. Ee bikkina an ki'nnuwwi saam bisa'ina ihoo'isa issoommo; hundim duroo keenina heeshtakkamo. An ki'nnuwwa weeshummi ammane yee yitakko'oyyo; wocummaarem macceessakko'oyyo. Ki'nnuwwi i illagenne jor luwwa issitakko'ookko; eese liiransoo bee'i luwwam doo'llitakko'ookko» yoolla. Ee bikkina Moollanni Waa'i «I awwaadaan ittamo; ihukkaarem ki'nnuwwi sibaattakkamo. I awwaadaan aggamo; ihukkaarem ki'nnuwwi xeebe'llakkamo. I awwaadaan liirantamo; ihukkaarem ki'nnuwwi tuuttakkamo. Lobakata liiranto'i bikkina i awwaadaan zammattamo; ihukkaarem ki'nnuwwi lobakata kichche'llakko'i bikkina wi'llitakkamo. U'nnantakko'i bikkinam ‹Aayye, aayye!› yitakkamo. Ki'nnuwwi summa an doo'llammi i minaadab duunchina awwaaxxookko. An Moollanni Waa'i ki'nnuwwa shoommo; i awwaadaanina mulli summa uwwoommo. Illagee'n hawwi xadamaa i illagiinsi bi'u bikkina uullanne maasse'amookkok iinninne hanqo'i Waa'inne maasse'amookko. Uullanne hiditano hide'ookkokim iinninne hanqo'i Waa'i summinne hide'ookko» yoolla. Waa'i «Oono'o, an haareechchi iimanee haareechchi uullaa qooccoommo. Illagee'n luwwi mahim tiiramooyyo; hore'em sawwamooyyo. Ihukkaarem an qooccoommi luwwanne liirammehe; heer heerinam lobakata liirammehe. Oono'o, an Yerusaaleema liiranchina, ixxonne hee'oo minaadabam lophphaakkoo liiranchina qooccoommo. An Yerusaaleemanne lobakata liiramoommo; i minaadabannem liiramoommo. Ee lasage wi'llikii laachchikii sagar eekke'enne macceesamooyyo. Ee lasage oosoommanonnem lehoo ciil te'im umura guulloobee'i lommanchi hee'ooyyo. Xibbi hiincho ihaa lehoo manchi harde'oommaninnem lehukkaannisa, xibbi hiincho ihoo'n lehoo manchim duumamukkaannisa xigamookko. I minaadab mine baxxa'a ee minneewwannem hee'llamo; woyinam kaassa'a misha ittamo. Mulli manni hee'ona ixxuwwi mine baxxamoyyo; mulli keen itonam kaassamoyyo. I minaadaphphek umur haqqi umu'llisa qeeraa'llookko. An doo'llummi keen ixxuwwi angi baxonne lobakat doolle liirantamo. Ixxuwwii oosii an Waa'i maasse'aammoo shumo'i ikko'i bikkina ixxuwwi bax kora'anem ihooyyo; oosom bichchina qattamoyyo. Ixxuwwi weeshshoo'nnim an yee yoommo; wocca'a guullitoo'nnim macceesoommo. Oro'ii gereebbii maqire allaa'llookko; hobbim mirgo'isa bura'a itookko; hamashshi hurbaatim buchchi ihookko. Keesamaakkoo i duunanne mahim hawwoddamoyyo; bi'issamoyyome» yoolla. Kaka wocukkok Waa'a. Waa'a «Iiman i adilla'n beyyo; uullim i lokkina usheexxaxxi beyyo. Eehannah iina baxxakkam min hinkido'ane? Usheexxoommi beydu hinkido'ane? Ka hundam i angi baxu bikkina ku hundim iihane. Ihukkaarem an maashaalli keeno, gaga heeshaa'u keenoo i sagara baddoo keenoo moo'oommo. «Iina mirgo'o duroo manchi manna shukkaannisa; gereechchi ambula kitimoohim wishichchi gaanje booqaaqukkaannisa; hurbaaxxi kitima hincaa'oohim boonke'i xiiga hincaa'ukkaannisa; aduruusa wiriissoohim qophpha'n waa'a maasse'ukkaannisa. Oo keen ixxuwwi gaqqi googom doo'liito'ookko; ixxuwwi gaqqi haashaaranchannem ixxuwwi liirantamane. An weeshummi ammane yee yito'oyyo; wocummi ammanem macceesso'ooyyo. I illagenne jor baxo baxxo'ookko; eese liiransoobee'i luwwam doo'llito'ookko. Ee bikkina anim ixxuwwanne naacamoo asse'oommo; baddito'i luwwim ixxuwwanne afoo'isa issoommo» yoolla. Waa'ika sagara badditakkam keeno, ixxi sagara macceessehe. Waa'i «Ki'nnuwwi abbaayyuwwi ki'nnuwwa sabba'a i summi bikkinam ki'nnuwwa yaayyito'i keen ‹Ki'nnuwwi liirancha moo'nnoommisina hino'o, Waa'i lophphona› yito'ookko; ihukkaarem ixxuwwi tuuttamo. Beero'iinsi laachchi sagara macceessehe; keesammi miniinsim corochcha macceessehe. Oohim i diina'ina ixxuwwi baxika miqoommi ammane macceesamoo i sagara» yukko. Xiyoon xuuchchi asheeroo'nnim qatto'aantesa; xuu'lloo'nnim qatto'i meentichchosatte. Kido'i woshsha ayyi macceesaate? Kido'i luwdu ayyi moo'aate? Hanqinam uulli mat ballanne xuu'oohonnihe? Te'im hofqax ammanenne minaadab qaramoohonnihe? Ihukkaarem Xiyoona xuuchchi asheerukkisam qaqqisom ooso qatto'ookko. Waa'i «Qattam ammane affamisa issummi an qassiisoombee'anennihe? Goosanne qachcho uumoommi an ee goosa xufoommonnihe? Yerusaaleema iittitakkam keen hundim isenne maqirem liirammehe; is bikkina lobakata liirammehe. Is bikkina wi'llitakko'i keen hundim isenne maqirem lobakata liirammehe. Liiransoo is anuuniinsi iiccakkamo; godditakkamome; ceentakkeebe'em iiccakkamo; qaxiinsi hanaan ihaakkoo is amaxxannem liirantakkamo» yoolla. Waa'i «An xumma isena daajji wo'isa mulli minaadaphphi amaxxam dirisisa daassoommo; ki'nnuwwim is anuuna iiccakkamo; is anganne qaaphphitamo; gubeedonne afuussita'a abooyyitamo. Ama is ciila liiransitamisa anim ki'nnuwwa liiransoommo; Yerusaaleemanne liirantakkamo. Oohim ihoo ammane moo'llakka'a lobakata liirantakkamo; ki'nnuwwi miqim hixisa latookko. I angim i awwaadaaninnetti ihukkis la'amookko; ihukkaarem i quunqi i diina'anne moo'amookko» yoolla. Oono'o, Waa'i gii'l labaninne waarookko; ixxek faraxxi gaare'uuwwim hambu'llam hafachchisa. Ixxi nadajja quunqinne axeellatom gii'l labaninne la'isookko. Waa'i ixxi bisa'innee giirinnee manni hundannem oogatookko; ixxi bisa'inne lehoo keenim dut ihookko. Waa'i «Ixxuwwi lambe'enne hee'oo keeniinsi mato awwonaa eekee'n duubbi kaashshi beyyo mareena ixxi gaga keesoohii muccussoohii boonke'i maaraa dabayyaa ee'isam mulli haashaarammi luwwaa itoohii hundim mat ihaa bi'ookko. Anim ixxuwwika baxoo sawwitee la'oommi bikkina annanni annanni suume wocoo manna hundam wixxaa'oommo; ixxuwwim waatta'a i lomba moo'llamo. Ixxuwwi lambe'ennem mare'e issoommo; ixxuwwiinsim baraare gatto'i keeno i bikkina macceessobee'i i lombam moo'llobee'i annanni annanni minaadaphphi uulla Tarseesa, Liibiya, xiyya tokkosimminne la'anto'oo manni uulla Liida, Tuubaala, Giriikaa qee'llonne wo'inne kibbamaa hee'oo uulluwwaa asse'oommo. Ixxuwwi mulli minaadaphphi lambe'enne i lomba la'issamo. Ixxuwwi ki'nnuwwi abbaayyuwwa hundam Yerusaaleemanne hee'oo i keesammi duuna faradonne, faraxxi gaare'enne, ara'anne, baqullannee gaameela'annee iyyiissa'a mulli minaadaphphi uulli hundiinsim kiti'mmisa i beyyo wottamo. Wottamohim Isra'ee'l oos hurbaaxxi kitima see'llisinne muccuraakkoo mu'utanne issita'a iina Waa'ina i Keesammi Minenne hincaa'llamaannisa issimminnette. Kaka an Waa'i wocaammo. Anim qeessuwwaa Leewaawe'ee ikkona ixxuwwiinsi mat mato doo'lloommo. «An qooccoommi haareechchi iimanii haareechchi uullii i illagenne qoxxaa hee'oo'isam ki'nnuwwikii ki'nnuwwi shumo'ikii summi qoxxaa hee'ookko. Aga'n aagguwwannee Usheexxaxxi ayyaammuwwannee manni hundim iina otosseena waarookko. Firaahim eesenne boqqu kee'nneka leesha moo'ookko; ee leesha itoo daquurim lehooyyo; shokkiisoo giirim xoo'ooyyo; moo'oo manni hundinam shigigaa'llamo» yoolla. Kaka Waa'i wocaakko. Biinyaam sulli yoo uullanne Anaatoota yakkam hegeegonne hee'oo qeessuwwiinsi mat ihu Hilqiy beet Ermiyaas wocu sagar kane. Amoon beet hee'u Iyyoosiyaas Yihuxxi uullanne adil ihu tommaannonnee saxxi hiinchonnee Waa'ik sagar Ermiyaas beyyo waarukko. Ee'isam Iyyoosiyaas beet hee'u Iyyoo'aaqeem adil ihu doollennee ee lasage odim Iyyoosiyaas beet hee'u Sedeeqiyaas adil ihaa tommoo mat hiinchoo iheebe'i afeebe'e oohim ee hiinchonne onti agananne Yerusaalee'm minaadab qeefadamaa maru amman afeebe'e Waa'i sagar Ermiyaasinnetti ihaa kuramukko. Waa'i iina «Keese kiyyummi godabonne baxoo'n illageenim la'aammo; qaranteena illageenim keesaammo; minaadabina hiraagaanchi ikkoo'isinam doo'llaammo» yukko. Anim dabaraa «Aayye! I Moollanni Waa'a! An ooshshichchi ihummi bikkina hinkid wocimmi hasisooda'e la'oommoyyo» yummo. Ihukkaarem Waa'i « ‹An ooshshichcho› yititte; an asse'ummi beyyi hundam mattaa ijaajummi luwwi hundam woccootto. Anim kiinninne maqir ihaa keese gatisoommi bikkina ixxuwwa hore'em baddititte; kaka wocummi Waa'i anette» yukko. Ee lasage Waa'i ixxi anga biddiqaa'aa i suume nakkaa «At woccoo sagara an kiina uwwaammo. Oono'o, xoqoltoo'isinaa ginditoo'isinaa, bi'issoo'isinaa hamaaransitoo'isinaa, baxxoo'isinaa kaassoo'isinaa an kaballa minaadabannee minaadaphphi adillanonnee kiina daannooma uwwaammo» yukko. Waa'im «Ermiyaasa, Moo'lloo luwwi maha?» yaa xa'mmukko. Anim «Lawuza yakkam haqqichchika caafa moo'oommuulla» yaa dabarummo. Ee lasage odim Waa'i iina «Hanqo'isa moo'llaatto; anim ee'isam i sagar hinkid baxonne hosooda'e erisa egeroommo» yukko. Odim Waa'i «Mullek moo'lloo luwwi maha?» yaa xa'mmukko. Anim «Fecfecoo qure'e moo'oommuulla; ixxim hanaa'n qariinsi ka kollonne hooraa ubeena boqqaakko» yaa dabarummo. Waa'im «Hanaa'n qariinsi ka uullanne hee'oo mannanne hundannem dangonnem bala'i dillookko. Mashka'oomim hanaa'n qaranne hee'llam minaadab hundim ka beyyo waattamisina weeshaammo; ixxuwwik adilluwwi Yerusaalee'm beero'i goocanne, ooxxi kululleetannee ee'isam uulli beero'uwwi kululleetannee adilla'n barcuma dissita'a afuuttamo. I minaadab baaxiilo baxxo'i bikkina guzumo'oommo; ixxuwwi eese utta'a qophpha'n waa'uwwina kitima hincaa'llamuulla; misilluwwam baxxa'a ee misilluwwina otossitamuulla. Ee bikkina Ermiyaasa, an keese ijaajoommoka hundam ixxuwwina kutteena ixxuwwi beyyo matteena gude; oono'o, at ixxuwwa hore'em baddititte; oobeelas ixxuwwi illagenne lobakata badditoo'isa issoommo. Oono'o, an kaballa keese uulli hundannem oohim uulli adilluwwanne, daannuwwanne, qeessuwwannee uulli minaadabannee hundannem girbamu beero'isa, xaa'l utuphphisaa naas xaarinne baxamu ooxxisaa keese qoxxaalli issaammo. Ixxuwwi kiinninne qaxxantamo; ihukkaarem an keese gatiseena kiinninne maqire yoommi bikkina kaa'llamoyyo; kaka wocummi Waa'i anette» yukko. Waa'i iina «Mattaa Yerusaaleemanne hee'oo mannina hundinam ‹Harde'oominne hee'llitti ammane hinkaa'nna amma'nnantaattoohan hee'llitda'ee eebaqqammummi ammanem hinkaa'nna iittammam hee'nnumda'ee lobakata tiiroommo; udma'i uullannem eese awwontitto; hurbaat mutoobee'i udma'annem iinniinsi annanni ikkittoyyo; Isra'ee'l minaadaba, at hurbaata wixxaa'akkam amma'n luxxi amma'n mishisa iina annannikkaattoohan hee'llitto; iinam keesantaattoohan hee'llitto; ee bikkina keese hawwoddeena hassam keenonne hundannem hawwoo boobanaa dilliisummo› kaka wocummokim Waa'i anette» yukko. Ki'nnuwwi Yaaqoob shumo'i, Ki'nnuwwi Isra'ee'l sulli hundim, Waa'i wocu sagara macceessehe. Oono'o, Waa'i «Gaassi ki'nnuwwi lobanno'i iinniinsi qee'llita'a matto'ok eesenne mah jolla siidda'ate? Awwaad bee'i qophpha'n waa'uwwanne otossimmiinsi ki'ukkok ixxuwwi gagim awwaad bee'i keen ihimminneyyonnihe? An ixxuwwa Gibxi uulliinsi fissummo; udma'i uullannem awwonsummo; taro'aam googinnee wo'i bee'i uullinnee tuunsi lophphaakkoo udma'innee ayyim hee'oobee'aanninnee daba'llamoobee'i uullinne ixxuwwa higisummo. Ihukkaarem ixxuwwi ‹Ka hundam niina issu Waa'i hannonnette?› yita'a xa'mmito'oyyo. An uulliinsi siidamoo hurbaataa mulli er luwwaa hundam siidda'a liirantamisina harshi uullanne aagisummo. Ihukkaarem ixxuwwi i uulla bi'isso'o; uwwummi uullam haashaassito'o. Qeessuwwim ‹Waa'i hannonnette?› yita'a xa'mmito'oyyo; i seera losisaanim eese laqqo'oyyo; minaadaphphi gassaanim iina boqqito'o; hiraagaanim «Ba'aala» yakkam qophpha'n waa'i summinne hiraago wocco'o; awwaad bee'i qophpha'n waa'uwwinam otossito'o. «Ee bikkina an Waa'i i minaadaba acceeqasoommo; ixxuwwi oosom acceeqasoommo. Kanniinsi illageen kido'i luwwi ihaada'ee laqqakkeena hino'o eelliinchi aagoo kollinne wo'i lambe'enne yoo «Qophphiroosa» yakkam beyyo mallehe; eelliinchi firoo kollinnem «Qeedaara» yakkam uulla asse'amaano asse'llakka'a saarayyehe. Mulli minaadab otossitam waa'uwwi maham hanqo'an ihubeeta'nnim ee waa'uwwa dabaransoo mulli minaadab bee'e. Ihukkaarem i minaadab ixxuwwina lombi ihummi ixxuwwina Waa'a eese awwaad bee'i qophpha'n waa'anne dabassito'ookko. Ee bikkina iimane mugge; lobakata baddimminnem huxe'e. I minaadab lam baaxiilo baxxo'ookko; oohim heechchi wo'i bu'i ihummi eese utto'ookko. Wo'o amadeena xanoobee'i beqeeqaakkoo dut bare ixxuwwi gagina hi'nnito'ookko. Isra'ee'l minaadab bit agidoyyo; te'im minenne qaramaakkoo agidoyyo; eehannah ixxuwwi diina'i hochchitamok mahinatte? Ixxuwwi diina'i hobbichchi geexisa ixxuwwanne muuntamuulla; ixxuwwi uullam udma'i uulli issito'ookko; beero'uwwim shokkaa manni hee'oobee'i diih ihaakko. Meemfoosikii Xaafinaas beero'i mannii Ki'nnuwwi horoo'lleka sammo hogoossitamo. Isra'ee'l minaadaba, ku hundim ki'nnuwwanne afukkok googonne awwonsoommi ki'nnuwwi Moollanni Waa'a eese uttakko'i bikkinatte. Gibxa mattakka'a «Abbaaya» yakkam Daajjiinsi wo'o agimma hassakko'ok ki'nnuwwina awwaadoo luwwika maha eddakka'a siiddakkeenatte? Aasoo'l uulla dillitakka'a Efiraaxiis daajjiinsi wo'o aggakkeena hassakko'ok maha eddakka'a siiddakkamoka labissakka'atette? Oono'o, ki'nnuwwi jolli mashka'inne guzumo'antakkamo. Ki'nnuwwi eese laggakko'i bikkinam axeerantakkamo; eese ki'nnuwwi Moollanni Waa'a urimmii eese baddimma hoogimmii hinkaa'nna kee'mmaalli qaraaraalli hawwojji ihuda'ee laqqakkamo. Kaka wocummok gogoxxi Moollanni Waa'i anette» yukko. Hundam xanoo Waa'i, «Hinatiinsim ki'isaa gaanjaqqa iiqummo; ki'nnuwwika karantakko'i usam muransummo. Ihukkaarem ki'nnuwwi ‹Keese awwaandoommoyyo› yitakko'ookko; iim shiqu duunnuwwi lugumonnee latu haqqi lugum hundannemii qophpha'n waa'uwwina otossimminne saa'llakko'ookko. An ki'nnuwwa doo'llamaakkoo woyi'n kaashshisa er sire'i issaa kaasaa hee'ummo; ihukkaarem ki'nnuwwi bi'aakkoo udma'i uulli woyi'n haqqichchisa ikkakko'o. Maham haanjinnee lobakat saamuninnee aansha'itakkota'nnim ki'nnuwwi baxxakko'i hawwojji iina caakkaa moo'amoolla. Eehannah ki'nnuwwi ‹Ni gaga hore'em haashaassinummoyyo; Ba'aala yakkam qophpha'n waa'inam hore'em otossinummoyyo› yitakkeena hinkid xantakkamo? Cebboronne baaxiilo baximminne issitakko'i haashaarancha hino'o moo'llehe; moora heele'aa udma'anne finxiriiqoo gaameelakkichchisa ikkakko'ookko. Udma'i uullanne hee'oo bii'l hallichcho moora heele'oo ammane ayyi uulliseena xanookko? Wodalluwwi yoo beyyo hasaa muunukkuuyyi afoo bikkina wodalluwwi ixxo hasukkuuyyi badarimmi hasisooyyo. Isra'ee'l minaadaba, qophpha'n waa'uwwinne maqire saa'llakkeena beyyi hundam do'llakku'uuyyi caamma'a guullitakkotte; ki'nnuwwikim leella'i wo'i xeebinne gogoone; ihukkaarem ki'nnuwwi ‹Neese qophpha'n waa'uwwa iittinummi bikkinaa ixxuwwa awwonneena murte'nnummi bikkinaa hore'em laso daba'llinoommoyyo› yitakko'ookko» yoolla. Waa'i «Gamaanchi amadamoo ammane tuuroo'isam ki'nnuwwi Isra'ee'l minaadaphphi adilluwwi, gassaan, qeessuwwii hiraagaanii hundim tuuttakkam amman waarookko. Haqqina ‹Niyyanna› kininam ‹Niyyumma› yitakkam keenonne hundannem tuulli afookko; mashka'oomim i kollonne daba'llitakkam bikkenne iinniinsi qee'llitakko'i bikkinatte. Ihukkaarem hawwi ki'nnuwwanne afoo ammane an waaraa ki'nnuwwa gatisona uunxitakkamo. «Ki'nnuwwi anginne baxxakko'i waa'uwwi hannonne yo'o? Xantaman ihulas ki'nnuwwanne hawwi afoo ammane ki'lla'a gatissonayyahe. Yihuxxi minaadaba, ki'nnuwwik beero'uwwi dutukkisam otossitakkam qophpha'n waa'uwwim dutaakko» yukko. Waa'i odim «Ki'nnuwwi hundim iina boqqitakko'ookko; eehannah iinninne maqire fitantakkamok mahinatte? Ki'nnuwwi ooso kora'am guzumo'ummo; ixxuwwim jolliinsi daba'llito'oyyo; sibaaru hobbichchisa ikkakka'a ki'nnuwwi hiraagaano bisa'inne shitakko'o. Ki'nnuwwi ka doollenne yoontakke'i Isra'ee'l minaadaba, an Waa'i ki'nnuwwina yoommoka macceessehe; an ki'nnuwwina udma'i uullisa te'im gambabbi tuunsinne wo'mmu uullisa ihummonnihe? Eehannah ‹Neese hansummi luwwa issinoommo bagaan hore'em ki kolli daba'llinoommoyyo› yitakkamok mahinatte? Baajaam landichcho wereeggi luwwa idaayyichchom bollochcho'i eddechcha xaddamonnihe? Ihukkaarem i minaadab lobakat xigiinsi hanaan ihaakkoo doolle eese xaddo'ookko. Taa, at ki iitti manni lasonne geetteena hinkido'i qooratte? Lokko qare'aalli jor meenti kiinniinsi lobakat jolla losookko. Gamonne amadditbee'i muccur kee'nnekii bux kee'nnekii xiig eddechchanne yookko; ee hundam issittisam ‹An muccuratte; hanqo'isam Waa'i eesenne quuqooyyo› yitto. Ihukkaarem ‹Baaxiilo baxummoyyo› yitaa laggitti bikkina an Waa'i keesenne oogatoommo. Mulli allaggichchi minaadaphphi waa'uwwi kollonne daba'llittaa ki gaga sholliissaatto; kanniinsi illageen Aasoo'l mashka'inne tuulli keesenne afukkisam kaba odim Gibxi mashka'inne keesenne tuulli afookko. Anga ki horoore amaxxitaa tuullinne ee beyyiinsi mattootto; an Waa'i at bakke'lloo luwwa hundam sholliisummi bikkina ixxuwwiinsi siiddoo luwwi matem luwwim hee'ooyyo» yukko. Waa'i «Mat manchi ixxi meentichco holluta'n isem ixxeensi fitta'a mulli goonchonne affa'a lasonne la'mmaagge dabaraa ise eebeena xanoohonnihe? Eehid issulasa'e hore'oomam uulla haashaassoo bax ihookko. Ihukkaarem Isra'eela, ki'nnuwwi lobakat qophpha'n waa'uwwa iittitakko'ookko; eehannah kaba odim ki'nnuwwi i kollonne daba'llitakkeena hassakkamuullannihe? Hino'o, gaanje xabbaa'llakka'a duunnuwwi kolli moo'llehe; ki'nnuwwi qophpha'n waa'uwwina otossitakkobee'i beyyi hee'oonnihe? Uulli udma'anne hee'oo darba'oo Araphphi uulli mannisa goog hundannem afuuttakka'a ki'nnuwwi besha egettakkamo; saa'imminnee jollinnem uulla haashaassitakkamo. Ee bikkina qaraaxonne ga'nnoo xeenii hagayyenne ga'nnoo xeenii bee'ukko; ihukkaarem ki'nnuwwi kabadem saa'aanchi meentichchi qooccanne yoontakke'e; ki'nnuwwikim illi tuuroobee'ane. «Kabadem ‹Iyyanna, oosoomma'n i beshichcho› yitaa weeshshittoyyonnihe? Ki'nnuwwi iina hundi ammanem quuqqoohonnihe? At quuqqoottodu heer heerinattemennihe?» yitakko'ookko. Ihukkaarem Isra'eela, eehid yitakkamuulla bagaan ki'nnuwwi malaayyi xanuqax hundinnem jora baxxakkamuulla» yukko. Iyyoosiyaas adil ihu ammane Waa'i iina «Amma'nnamoobee'i Isra'ee'l minaadab maha baxuda'e moo'llittonnihe? Ixxuwwi qeeraa'l duunnuwwannee latu haqqi lugumonnee hundannem iinniinsi annanni ikka'a matta'a qophpha'n waa'uwwina otossimminne saa'llo'ookko. Ee hundam ixxuwwi baxxa'a lasonne odim i kollonne daba'llitamoka labisaa hee'ummo. Ihukkaarem ixxuwwi daba'llito'oyyo. Amma'nnantam bee'i Yihuxxi minaadabim eekka moo'llo'ookko. Amma'nnamoobee'i Isra'ee'l minaadab iinniinsi annanni ikka'a qophpha'n waa'uwwina otossito'i bikkina ixxuwwa hollummisa Yihuxxi minaadab moo'llo'ookko. Amma'nnitambee'i Yihuxxi minaadabim eekka moo'lla'a baddito'oyyo. Ixxuwwim matta'a qophpha'n waa'uwwina otossito'o. Ixxuwwim hore'em tuutto'oyyo; baasam kinannee haqqannee otossimminne uulla haashaassito'o. Ixxuwwi ee hundam baxxa'a lasonne amma'nnantambee'i Isra'ee'l minaadabina abbaayyuwwi ikko'i Yihuxxi minaadabim i kollonne daba'llitamoka labbo'ok wodaninnette ihoo'n gaanjiinsi iimette hee'ukko› yaa wocaakko» yukko. Isra'ee'l minaadab iinniinsi annanni ikkota'nnim amma'nnantambee'i Yihuxxi minaadabiinsi e'llitamisa Waa'i iina kurukko. Ee bikkina Waa'i an hanaa'n qara maraa «Amma'nnantakkambee'i Isra'eela, i kollonne daba'llehe; iikki qishixxat lobakkat ihu bikkina quuqoommoyyo; ki'nnuwwannem quuqoommok heer heerinayyo. Ki'nnuwwi baaxiilaan ikkakko'isaa ki'nnuwwi Moollanni Waa'anne boqqitakko'isaa xale'e amma'nnehe; odim qophpha'n waa'uwwinne maqire latu haqqi lugumonne hundannem saa'llakko'isaa i seerinam ijaajantakkobee'isaa biiraa yi'llehe; an Waa'i kaka wocaammo. «Ki'nnuwwi amma'nnantakkambee'i minaadaba, i oos ikkakko'i bikkina daba'llehe; ki'nnuwwi lambe'iinsim hundem beero'iinsim mat mat mancho ee'isam hundem mi'n abaroosiinsim lam lam mancho doo'llaa Xiyoo'n duunanne woroommo. Lachchinnee do'ixximminnee i woda'nnisa ikko'oo awwonsitam allaaraano ki'nnuwwina uwwoommo. Ki'nnuwwik xig ee uullanne lobakata dutoo ammane i Hidi'l Saga'l Saaxi'n bikkina wocoo manni hee'ooyyo; eehanniinsi lasonne ixxi bikkina sawwitamoyyo; qoossiteenam xantamoyyo; ixxek awwaad mah ihuda'em ixxuwwina moo'amubee'i bikkina la'mmaagge mulleka baxxeenam hassamoyyo. Ee doollenne Yerusaaleem ‹Waa'i adilla'n beyyo yamamookko; minaadab hundim iina otossiteena eekke'enne wixxitamo; eehanniinsi lasonne xiiqqamoo jor woda'n sawwitem awwontamoyyo. Isra'ee'l minaadabii Yihuxxi minaadabii mat ikkamo; lamim mat ikka'a hanaa'n qaranne yoo uulliinsi qeefadanto'i beyyiinsi daba'llitamo; gaassi ixxuwwi anno'ina gulummi issaa uwwummi uullam daba'llita'a aaggamo» yaa kuroommisina ijaajukko. Waa'i «Isra'eela, an keese i beet issaa aa'imminne ka uullanne lobakata mishisookkokaa harish uullaa kiina uwweena hasummo. Oohim ‹Iyyanna› yitakka'a eese weeshshakkonaa la'mmaagge iinniinsi qee'llitakkambee'isaa sawwaa hee'ummo. Ihukkaarem ki'nnuwwi is aro'ina amma'nnantambee'i meentichchosa ki'nnuwwi iina amma'nnantakkambee'i keen ikkakko'ookko; an Waa'i kaka wocaammo» yoolla. Latu luwwi bee'i duunnuwwanne sagar macceesamoolla; oo sagarim Isra'ee'l minaadab ixxuwwi Moollanni Waa'a xadimminne baaxiilo baxxu'uuyyi hee'lla'a kaba odim saxxita'a macceesissam uunxaxxi sagaraa wi'llimmi sagaraa. Ki'nnuwwi Waa'iinsi qee'llitakka'a hee'llakko'i keen hundim daba'llehe; ixxi ki'nnuwwa fayyiisookko; amma'nnantakko'oo keenom issookko. Ki'nnuwwim «Eeyya, Waa'i niina Moollanni ihu bikkina ixxi kollonne daba'llinoommo. Hoffi duunnuwwannee lob duunnuwwannee fillaa qophpha'n waa'uwwina otossimmi awwaad bee'ane; Isra'eelina hara'mmat uwwamookkok xale'i ni Moollanni Waa'iinsette. Ihukkaarem tuussisoo qophpha'n waa'uwwina otossinaa gereebbikaa mulli fooraam diinaxxi allaachchaa hundam odim goo'n oosoo landaa hundam niyyanno'im gaassiinsim ki'issa'a badatta'a afisso'i amaxxa hundam hoongoommisa issaakko. Neesee gaassi niyyanno'ii endaa endaa baaxiilo baximminne ni Moollanni Waa'a kichche'insaammo; ixxi ijaajom egellummoyyo; ee bikkina sholle'nnanne ubimmii tuulle edde'immii labookko» yitakko'ookko. Waa'i «Isra'ee'l minaadaba, daba'llitakkamlas i kollonne daba'llehe; an saboommi qophpha'n waa'uwwa bi'issakka'a heekke'antakkoo'n uullitakkolas hanqinne, xabbeenoominnee muccuroominnee ‹Hee'oo Waa'anne› yitakka'a hide'llakkolas minaadab hundim maasse'antammo; eehannonnem bakke'llamo» yukko. Waa'i Yihuxxi minaadabinaa Yerusaalee'm minaadabinaa «Baadulli uulla abuullehe; ki'nnuwwi sire'em utti lambe'enne wixxakkotte. Ki'nnuwwi Yihuxxi minaadabii Yerusaaleemanne hee'llakkam mannii ki'nnuwwika woda'n jolla ballachchitakka'a ki'nnuwwika tiiro muccussitakka'a ki'nnuwwi gaga Waa'ina hincaa'llehe; eehid ikkakkobeelas ki'nnuwwi jor bax mashka'inne iikki quunqi gii'llisa aphphookko; iikki quunqi aphphaa lasonne ayyim uulliseena xanooyyo» yoolla. Uullanne hundannem xurumba fuggehe; Ki'nnuwwi sagaram iimaa'llakka'a laallehe; Yihuxxekii Yerusaalee'm minaadabii girbamaakkoo beero'uwwi kollonne gibbamisina kullehe. Xiyoonina googo moo'issehe! qaqissakka'a ki'n gaga gatixxitakkam beyyo gibbakka'a xollehe; mashka'oomim hanaa'n qarinne boobanaa kee'mmaalli bichchaa Waa'i asse'eenatte. Hobbichchi maaxamu doo'm woriinsi firoohaannisa minaadaba hundam bi'isookkok ki'ookko; ixxim Yihuxxi minaadaba bi'iseena waarookko; Yihuxxi beero'uwwim gindamookko; ee beero'uwwannem hee'oo manni siidamooyyo. Waa'ik malaayyaam quunqi Yihudiinsi annanni ihubee'i bikkina xiddi eddechcha edde'llakka'a «Aayye!» yitakku'uuyyi wi'llehe. Waa'i «Ee balla adilii ixxi suu'm mannii tiiro bi'llamo; qeessuwwim huxe'llamo; hiraagaanim muggitamo» yoolla. Anim «I Moollanni Waa'a! Yerusaaleemanne hee'llam minaadaba qawwiissittoka labooyyonnihe? ‹Ki'nnuwwina xummi ihookko› yitaa hee'llitto; oono'o, kaba bisa'i ixxuwwi gaanjenne xabbaakko» yummo. Ee ammane ka Yerusaalee'm «I minaadabanne shokkiisoo hafachchi udma'i uulli duunnuwwiinsi ki'aa hafachchookko; oohim ufeesoo te'im muccussoo hafachchayyo. Waa'i ijaajinne waaroo hafachchi ihu bikkina hundem luwwiinsim malaayyaamo; ka oogato ixxi minaadabanne issookkok Waa'i ixxi gagame» yamamaa kuramookko. Oono'o, diina'ik gogot duuphphisa beyyi hundam ifiisaakko; o'l faraxxi gaare'uwwim hambu'llam hafachchisa qaqqisoohane; faradim gaaqichchi bararoohaanniinsi loboka firiixoohane; aayye, neese bi'nnaammo. Yerusaaleema, gatimmamdu hassakkolas ki'nnuwwi jolli hundam ki'nnuwwi wodaniinsi aanshehe; baaxii'l sawwit ki'nnuwwi horooriinsi bi'oobee'ek hinki balli afeebe'e? Daan beero'iinsii Efiree'm duunnuwwiinsii waatto'i asse'amaan jor alallaaxxi sagara macceesissamo. Yihuxxi uulli beero'muwwina ora alallaattu'uuyyi weerattam manni qee'l uulliinsi waattamulli ihukkisa minaadabina la'issehe; Yerusaalee'm minaadabinam kullehe. Ee beyyonne hee'llam minaadab Waa'anne boqqito'i bikkina hurbaata wixxaa'akkam aga'n hurbaata egeraanchisa Yerusaaleema diina'i kibbookko; kaka wocukkok Waa'a. Yihuxxi minaadaba, ki'nnuwwanne kuk hundim afukkok taakke'llakkam googii baxxakkam baxii jor ihu bikkinatte; kuhim hinkido'i qaraaraalli guzumo'oo wodano iiqoohanee! Aayye i hawwo! Aayye i hawwo! Hawwonne hanenne hawwi exxukko; aayye i woda'n u'nna! I wodan tiqtiqoolla; an cawwaa iyyaqqeena xanummoyyo; mashka'oomim xurumbulli sagaraa o'l sagaraa macceesaammo. Bichchanne hanenne mulli bichchim exxookko; uulli hundim diih ihookko; ni dukkaannuwwi dangonnem gindamukko; du'm eddechchuwwim illi cilimmaaxqaxanne dereeramukko. O'l baandira moo'oommok hinki balli afeebe'e? xurumbi sagardu macceesoommok hinki balli afeebe'e? Waa'i «I minaadab eese laqqambee'i qawwuwwi ikko'ookko; qoossimmi hanqataakkoo keen ikko'i bikkina ciilluwwisa qawwiisantam keeno; jor baxo baxxeenam lobakata qoolluwwa; ihukkaarem er baxo baximma laqqambee'i keeno» yukko. An uulla moo'ummo; hagar bee'anee diihaa hee'ukko; iimanem moo'ummo; caakki moo'amam hee'ukkoyyo. Duunnuwwa moo'ummo; ixxuwwim huxe'llam hee'llo'o; hoffi duunnuwwam moo'ummo; ekkidii kidii heekke'antam hee'llo'o. Manni bee'isa moo'ummo; iima'n cii'i hundim baratta'a bi'llo'ookko. Misha uwwoo uulli, udma'i uulli ihukkisa moo'ummo; Waa'aanniinsi malaayyaam quunqiinsi ki'ukkok, ka uulli beero'uwwi hundim gindamaakko. Oono'o, Waa'i uulli hundim udma'i ihoo'i'isa, ihukkaarem guullaa bi'isoobee'isa wocaakko. Ee bikkina uulli wi'llookko; iimanim tuunsinne ifiisamookko; kaka Waa'i wocaakko; ixxi sawwitim dabassamooyyo; ee woshshannem murte'aakko; lasom daba'llooyyo. Faradaaniinsii xiyya darabbam kee'n shuuriinsii ki'ukkok, beero'i manni hundim gibbamo; mat mat keen haqqi woro gibbamo; gatto'i qax geejji kinanne fittamo. Beero'i hundim manni hee'oobee'i diih ihookko; hee'ookkokim siidamooyyo. Yerusaaleema, kiina aayye! Kashar eddechcha edde'llitti mashka'i maha? Worqinne wereeggittodu mahinatte? Deemmadu qalama laphphittok mahinatte? Ki axixxanchi awwaad bee'ane; ki besh keese sabba'a shiteena hassamuulla. Xuuchchi amadu meentichcho macceesissamaanni'nnoo'i sagara macceesummo; won beeto qattam waanjiba macceesissamaanni'nnoo'i sagara macceesummo. Oo sagarim Xiyoonanne yo'i meentichcho fooshshi hoffe'aa is angam biddiqaa'lla'a «Aayye bi'ummo; oono'o, eese shakkeena waarakko'o!» yitu'uuyyi laattam laachchi sagar hee'ukko. Yerusaalee'm minaadaba, hino'o Yerusaalee'm googguwwanne hundannem do'llakku'uuyyi moo'llehe; hanqo'i oogato oogatookkokii hanqa hasookkokii mat manchom ihuta'n siiddakkeena xantakkaman ihulas hino'o manni wixxoo beyyonne hassehe; eehid ihuta'n Yerusaaleemina qishixxam hee'ummo. Ki'nnuwwi «Hee'oo Waa'i la'e!» yitakka'a i summinne hide'llakkamo; ihukkaarem hide'llakkamok wodaniinsi ki'issakka'ateyyo. Waa'a, ki illi hanqa moo'oohaneyyonnihe? At ixxuwwa boobaninne aphphissitto; ihukkaarem ixxuwwi eekka mahannem eddo'oyyo. At ixxuwwa iiqansitto; ihukkaarem ixxuwwi ee huushanchiinsi losseena hasso'oyyo. Ixxuwwi wodano duudisso'o bagaan ixxuwwi baaxiiliinsi daba'lliteena hasso'oyyo. Ee lasonne an i wodanonne «Ku keen buxaa qawwuwwa; mashka'oomim ixxuwwi Moollanni Waa'ika seera laqqambee'i keeno; ixxi googonnem awwontambee'i keeno. Eehannah kanniinsi eehid daannoomanne yo'i gassaa'n beyyo maraa ixxuwwinne maqire wocoommo; hanqo'isam ixxuwwi Moollanni Waa'ika seera laqqamo; ixxi googonnem awwontamo» yummo. Ihukkaarem hundim mat ikka'a Waa'ina boqqito'ookko; ixxenam ijaajancha sabbo'ookko. Ee bikkina hobbi doomiinsi firaa ixxuwwa iiqansookko; udma'i uulli oro'im ixxuwwa dereeransookko; beero'iinsi tochchonne firukkoka hundam diqanseena kabeer beero'i kululleetanne do'oolla; mashka'oomim ixxuwwi baaxiil duta; Waa'a lagimmim ixxuwwik lophphaakkoohane. Waa'i «I minaadab eese utta'a qophpha'n waa'uwwanne otossitamuulla; eehannah an ixxuwwika baaxiilo haafoommok mahinatte? An i minaadabina hasisoo hurbaat hundam uwwaa godditamisa issummo. Ihukkaarem ixxuwwi saalmaachchitam keen ikko'o; saa'aan meenti minennem gatto'o. Ixxuwwim soorammi faraxxisa saalmaachchimmina muxmuxito'oo keen ikko'i bikkina annannichchim ixxuwwi besh meentinne maqire balale'lleena hasso'o. Eehannah ka woshshuwwi bikkina ixxuwwa an guzumo'immi hasisooyyonnihe? kido'i xiiqqaam minaadaphpheka baado firimdu hasisooyyonnihe? I minaadaphpheka woyi'n kaashsha muraa bi'isoo diina'a asse'oommo; ihukkaarem hunda guullita'a bi'issamisa issoommoyyo; caaffuwwi iihan ihubee'i bikkina diina'i muraa ubbuusoo'isina ijaajoommo. Isra'ee'llekii Yihuxxi minaadabii hundim eese hore'oomam laggo'ookko; kaka wocummok Waa'i anette» yukko. Waa'i minaadab Waa'anne hanenne qophphano woccu'uuyyi «Waa'i neese maham issooyyo; jor luwwim neesenne afooyyo; oram ihukko sibaar neesenne afooyyo. Waa'ik sagar uwwamubee'i hiraagaan woccam luwwi hundim hafachchi'nnoohan ihu bikkina wocco'i luwwi hundim ixxuwwanne afookko» yito'o. Ee bikkina gogoxxi Moollanni Waa'i iina «Ermiyaase, ku minaadab ka'isa wocco'i bikkina i sagar ki suumenne gii'llisa ihookko; minaadabim haqqisa ikkamaare giiroom itookko» yukko. Isra'ee'l minaadaba, ki'nnuwwa bi'issam minaadaba Waa'i qee'l uulliinsi ki'nnuwwanne hanenne eebookko; oo minaadabim ki'nnuwwi ixxuwwi suume laqqakkambee'anee woccam woshsham qoossitakkambee'anee; Ixxuwwim hinatiinsim ki'issa'a hee'llo'i malaayyaam manna. Ixxuwwiinsim xiyya darabbam keen mishan bee'eka shitam malaayyaam o'l manna. Ixxuwwim ki'nnuwwika qaquulli hurbaataa li'aalli hurbaataa hundam shiinshita'a ittamo; goo'n oosoo landaa hundam shitamo; gereebbikaa lalleewwi allaachchaa duttamo; woyi'n kaashshuwwaa oda'aa hundam bi'issamo; oo gogotim ki'nnuwwi bakke'llakkam girbamaakkoo beero'uwwa hundam bi'issamo. Waa'i «Ihukkaarem ku hundim ihukkuuyyi ee ayyaammuwwanne an i minaadaba guullaa bi'isoommoyyo. Ermiyaasa, minaadaboom ‹Waa'i ka hundam neesenne afoo'isa issukkok mahinatte?› yita'a keese xa'mmitam ammane iinniinsi annanni ikka'a ixxuwwi gaqqi uullanne qophpha'n waa'uwwanne otossito'isam ixxuwwi odim ixxuwwan ihubee'i uullanne allaggi mannina awwaadaan ihimmiinsi gattambee'an ihukkisa kure» yoolla. Waa'i «Yaaqoob shumo'ina kaka macceesissehe; Yihuxxi minaadabinam kaka alallaattehe. Ki'nnuwwi illi hee'ukkuuyyi moo'llakkambee'i keen, macci hee'ukkuuyyam macceessakkam bee'i keen, ki'nnuwwi qawwuwwaa ceemmaalluwwaa ikkakko'oo minaadaba! Kaka macceessehe. An Waa'a; eehannah eese mahina lonsitakkamoyyo? I illagendu mahina huxe'llakkamoyyo? Wo'i higaa maroobee'isa dambalaq tochchonne heer heerinam shashshara gabal issummok anette; dambalaq maham heekke'amuta'nnim hambu'llamii womoorii ki'uta'nnim ee gabala higeena xanooyyo. Ihukkaarem ki'nnuwwi xiiqqaammuwwaa boqquwwi minaadabaa ikkakko'i bikkina eese uttakka'a gibbakko'ookko. Illaqqi xeenaa lasaqqi xeenaa ammaninne ki'nnuwwina uwwoommok, hurbaata wixxaa'llakkam agannuwwam hiinchina hiinchina dabaransaa uwwoommok anette. Ihukkaarem ki'nnuwwi eese lonsimma uttakko'ookko. Ki'nnuwwi jolli maasse'antakkambee'isa issaakko; ki'nnuwwi baaxiil lophphimmim er luwwa hooggakkamisa issaakko. «I minaadaphphi lambe'enne jor baxo baxxam manni yo'o; ixxuwwi cii'a kiyyo'inne qaashoo manchi'nnoo'i keeno; ee bikkina manna amaddeena qaasha qaashsha'a duggamo. Cii'a kiyyo'inne amadoo manchi do'nnanne cii'a wonshoohaannisa ixxuwwi bogga'a eebbo'i mu'utinne ixxuwwika mine wonshitamo; malaayyaammuwwaa goddaanoo ikko'okim eehanninnette. Ixxuwwi xiikkakko'i mirgo'isa geejjito'ookko; ixxuwwik jor bax gabal bee'an ihaakko; adaraar oosikam hanqa egessiissamoyyo; wor amadanto'i keeninam hanqo'i oogato oogattamoyyo. «Eehannah an Waa'i ka woshshi bikkina ixxuwwa guzumo'immi labooyyonnihe? Kido'i minaadabikdu baado firimmi hasisooyyonnihe? U'nnisookkokii muggisoo luwwii ka uullanne baxamaakko. Neese hiraagaano yitam keen qophpha'n hiraago woccamo; qeessuwwim hiraagaa'n sogitaninne gassitamo; minaadabim ka hundam uttamoyyo; eehannah kannik hundikim lasaanchi afoo ammane maha issitakkamo?» yukko. Ki'nnuwwi Biiniyaam minaadaba, ki'nnuwwi foore gatixxitakkeena gibbehe; Yerusaalee'm beero'iinsi fillehe; Teeqo'annem xurumba fuggehe; Beetihakaariimanne mare'ina giira giillehe; mashka'oomim boobanii bichchii hanaa'n qarinne waareenatte. Mishisoohanee liiransoohanee ihu Yerusaalee'm beero'o an bi'isoommo. Allaaraan allaachchinne maqirem eekke'enne widdantamo; ixxuwwi dukkaanam beero'i kululleetanne uullissamo; annannichchim ixxena mishisu beyyonne allaachcha allaarookko. Biiniyaam minaadaphphek diina'i «Yerusaalee'm beero'o qanseena gundona; ki'llehe, samgud ballanne qansona; hore'em dansaammo; uulli hiimeena hincaakko; eelliinchi aageenam haf do'aakko. Ee bikkina ki'llehe; hiimonne kee'mmaalli hawwo afinsaa beero'ika girbuwwa gindinona» yito'o. Ee bikkina gogoxxi Moollanni Waa'i «Haqqa mullehe; Yerusaalee'm beero'i kululleetanne girbisa ihaa awwaadoo buchcham kaaphphehe; ku beero'i damiginne wo'mmaakkoohan ihu bikkina guzumo'anchi hasisookko. Bariinsi wo'i firoohaannisam Yerusaalee'm beero'im jolli firoo beyyo; ee beyyiinsim xale'i damiqqekii bichchi laachchii macceesamookko; hundem ammanem moo'amookkok xissoo omaraa. Ki'nnuwwi Yerusaalee'm minaadaba, ku hawwi hundim ege'llitakkamisina qoxxisoohan ihona; oobeelas i illagiinsi ki'nnuwwa hooroommo; ki'nnuwwika beero'o udma'i uulli issaa ayyim hee'oobee'isa issoommo» yukko. Gogoxxi Moollanni Waa'i «Isra'ee'l minaadabiinsi gatto'i keeno woyi'n misha feeroo manchisa feellehe; dabaransitakka'atim woyi'n misha feeroo manchisa ki'nnuwwi anga caaffuwwanne massehe» yoolla. Anim dabaraa «An kurumta'nnii qoxxisumta'nnii i woshsha ayyi macceesaa ha'yyookko? Ixxuwwi xiiqqaammuwwi ikko'i bikkina ki sagara macceesseena hasso'oyyo; ki sagara kuroommaare gadda'a eesenne osattamo. Waa'a! At ixxuwwanne quuqqittaanqaxa i woronnem quunqi aphphoolla; hore'em iyyaqqeena xanoommoyyo» yummo. Waa'im «I quunqa googonne yo'i ciilluwwannee wixxito'i harde'i oosonnee fince; manchii meentichchom xoramooyyo; lommanninam qishixxat hee'ooyyo» yukko. An ka uulli minaadaba guzumo'oommi ammane ixxuwwik minneewwi, abuullii meentii hundim mulli mannina uwwamookko. Mashka'oomim hoffokii lobokii hundim seerbee'i googinne diinate wixxaa'oolla; hiraagaanii qeessuwwii gattoo'n minaadaba qawwiissamuulla. I minaadaphpheka iiqanto'i omara hokookanchanne xigga'a hasisoo'isa issita'a fayyiissamoyyo; ee'isam xummi bee'ekam ‹Xumma! Xumma!› yitamo. Kido'i haashaarammi baxo baxxa'adu tuutta'atennihe? Tuulli gataa illim aad heeshukkoyyo; ee bikkina ubbam keeninne maqirem ixxuwwim ubbamo; an ixxuwwa guzumo'oommi ammane ixxuwwina lasaanchi ihookko; an Waa'i eekka wocaammo» yoolla. Waa'i ixxi minaadabina «Gooqqi buranne uullitakka'a moo'llehe; gaassikii e'lloo googii hinkanda'e xa'mmitakka'a laqqehe; laqqakko'i ammanem ee googonne taakke'llehe; ki'n foorinam usheexxato siiddakkamo» yukko. Ihukkaarem minaadab «Ee googonne malloommoyyo» yito'o. Eehanniinsi lasonne Waa'i qoxxishshi xurumbi sagara macceesissam egeraano uullisukko; ihukkaarem ixxuwwi «Macceensoommoyyo» yito'o. Ee bikkina Waa'i «Ki'nnuwwi uulli minaadab hundim macceessehe; i minaadabanne issoommi luwwa hundam qoossehe. Uulla, atim macceese; ixxuwwaannina jor sawwixxi bikkina guzumo'eena minaadabanne bichcha eeboommo; mashka'oomim ixxuwwi an losisummi losa'nneka seera sabba'a i sagarina ijaajanto'oyyo. Saaba'a yakkam uulliinsi eebbam aduruusii qee'l uulliinsem eebbam annanni annanni enjii iina maha issookko? Ixxuwwika shokkiissa'a hincaa'llam kitimam aa'oommoyyo; mulli kitimim eese liiransooyyo. Ee bikkina ku minaadab qolamaa uboo'isa issoommo; anno'ii oosii, beshshuwwii olla'ii mateeyyannem letamo» yukko. Waa'i «Hanaa'n qarinne yoo uulliinsi weeraroo diina'i waarookko; qee'l uullanne yoo lobakat minaadab orina gudaakko. Ixxuwwika xiyyaa bisa'aa ki'isso'ookko; ixxuwwim mishan bee'i mogaalli manna; faraxxi konte'ikim sagar dambalaq womoo'llesa yoohane; oono'o ixxuwwi Yerusaaleema qasseena guddo'ookko» yukko. Yerusaaleem beero'i minaadabim «Ee woshsha macceensummi bikkina ni malaayyi hoogaakko; xuuchchi amadu meentichchosam u'n amadaakko. Ni diina'i bisa'a lade'llo'ookko; dambaqim ni kululleetanne lophphaakko; ee bikkina beero'iinsi fillaa hax uulla malleena te'im googonne fillaa daba'llammeena igginoommoyyo» yito'o. Waa'i ixxi minaadabina «Diina'i bi'isseena waatto'ok dangonne qasseenatte ihu bikkina kichchechchi eddechcha edde'llakka'a gii'llibuchchanne biqqiiqqehe; yoo matem beet lehoohaare mushshaa wi'lloo manchisa wi'llehe. Ermiyaase, xaa'lleka qoxxaallooma keenakkamaannisa i minaadab hinkido'anda'ee keentaa moo'e. Hundim naasisaa xaa'llisaa qoxxito'oo keenoo xiiqqinne beddanto'oo boqquwwi keenoo; hundim bi'llo'oo hamimmi losan yoo keenoo. Can buufamukko; midachchi giirim baddisoo'isa ihaa kasharoolla; ihukkaarem xaaroom jor ihu bikkina bukkamaa lebecukkoyyo; ee'isam i minaadaphphi lambe'iins jor manni laa'itobee'i bikkina ixxuwwa muccussimmina yakimmi awwaad bee'ane. An Waa'i ixxuwwa uunjaammoo bikkina ‹Muccur ihubee'i bikkina ubaakkoo bira› yakka'a weeshakkamo» yukko. ‹Kuk Keesammi Mine! Kuk Keesammi Mine! Kuk Keesammi Mine! neesem xummanne hee'nnoommo!› yitakkam awwaad bee'i sagaranne amma'nnantakkotte. «Hanqo'isam ki'nnuwwi hee'llakkam heechchaa baxxakkam baxoo dabassehe; ki'nnuwwina'i ki'nnuwwim xabbeenoom wo'mmaakkoo iittinne mat ikkakka'a hee'llehe. Yaayyanto'i keeno, adaraar oosoo busar meentoo wor amaddakka'a boggakkotte; ka uullanne hee'llam muccur manna damigimminne shitakkotte; ki'nnuwwim bi'llakkambee'isa qophpha'n waa'uwwina otossitakkotte. Ee'isinne ki'nnuwwi dabassantakkolas gaassi ki'nnuwwi anno'ina heer heerina gaqqi uulli issaa uwwummi ka uullanne hee'llakkamisa issoommo. «Ki'nnuwwi oono'o, qophpha'n sagaranne bakke'llakkamuulla. Eehanniinsi ki'ukkok game'llakkamuulla, manna shitakkamuulla, saa'llakkamuullaa hide'llakka'atim qophphano naqqassakkamuullaa; odim ‹Ba'aal› yakkam qophpha'n waa'inam kitima kitimtakkamuulla; illageen laqqakkambee'i qophpha'n waa'inam otossitakkamuulla. An saboommi ee baxo hundam baxxakka'a lasonne i mine waattakka'a i illagenne uullitakka'a ‹Neese bichchiinsi gantaammo› yitakkamuulla. I min gamaan maaxamoo daawwa'a labissakka'atennihe? Ki'nnuwwi baxxakkam baxo hundam oono'o an gagim moo'aammo. An iina otossitakkamisina gaassi doollenne doo'llummi ‹Seelo'o› yakkam beyyo mallehe; i minaadab ikko'i Isra'ee'l manni baxxo'i baaxii'l mashka'inne ee beyyo issummisa moo'llehe. Ki'nnuwwi ka kee'mmaalli hawwojji hundam baxxakko'o; edaa edaa ki'nnuwwina kurumta'nnim ‹Macceensoommoyyo› yitakko'o; weeshummi ammanem dabachcha uwwitakko'oyyo. Ee bikkina Seelo'onne issummisa ka ki'nnuwwi bakke'llakko'i i minennem issoommo; gaassi ki'nnuwwi anno'inaa ki'nnuwwinaa uwwummi beyyonne Seelo'onne issummoka edaatim issoommo. Ki'nnuwwina abbaayyuwwi ikko'i Isra'ee'l minaadaba beyyiinsi hoorummisam ki'nnuwwam i illagiinsi hooroommo; an Waa'i kaka wocaammo» yukko. Waa'i «Ermiyaase, an macceeseena hasoombee'i bikkina ka minaadaphphi bikkina uunxititte; ixxuwwi bikkinam uunxitittuuyya laattitte; magannaato aa'oombee'i bikkina ixxuwwika magannaato amaddaa waattitte. Ixxuwwi beero'uwwannee Yerusaalee'm googguwwannee baxxam baxo moo'llooyyonnihe? ‹Iima'n adila› yamanto'i qophpha'n waa'ina hurbaata sarimmina meenti buko'o cukkitamo; oos haqqa feerookko; anno'i giira giirookko; eese quuqisseenam qophpha'n waa'uwwina woyi'n diqaasa kitim issita'a hincaa'llamo. Waa'im ‹Eehanninne eese quuqissamoka labissa'atennihe? Baasam ixxuwwi gaga hawwodantamo; tuullam ixxuwwi gaganne eebaqqitamo› yukko. Ee bikkina an Moollanni Waa'i i min baxamu ka beyyonne iikka qoxxaalli quunqa dilliisoommo; mannanne, diinatenne, haqqannee wix hurbaatannee hundannem i quunqa dilliisoommo; i quunqi ayyim xoo'iseena xanoobee'i gii'llisa ihookko. «An Isra'eelina Moollanni ihummi gogoxxi Moollanni Waa'i ‹Kitima kitimakkam beyyonne hincaa'llakkam ki'nnuwwi itimmi hasisoobee'i shokkiisakkam kitimaa mulli kitimaa wixxaa'llakka'a maarooma ki'nnuwwi gagina ittehe› yummo. Gibxi uulliinsi ki'nnuwwi anno'o fissummi ammane shokkiisakkam kiti'm bikkinaa mulli kiti'm bikkinaa ixxuwwa ijaajummoyyo. Ihukkaarem an ixxuwwina Moollanni ihaa ixxuwwim i minaadab ikkamisina iina ijaajanchi hasisoo'is xale'e kurummo; hundem luwwim ixxuwwina makkona hassoolasim an ixxuwwina uwwummi see'llisanne hee'llamisina ijaajoommo. Ihukkaarem ixxuwwi qoossita'a macceesseena hasso'oyyo; ee bikkenne xiiqqinnee jollinnee wo'mmaakkoo ixxuwwi wodan iittukkoka hundam issito'o; illage marimmi bikkenne laso daba'llito'o. Gaassi ki'nnuwwi anno'i Gibxiinsi fitto'i balliinsi ki'isaa kaballi afeebe'e iina awwaadaan ikko'i hiraagaano ballina ballina asse'ummo. Ihukkaarem ixxuwwika wodano duudisso'o bagaan i woshsha macceesseena i kollonne daba'llito'oyyo; ki'nnuwwim ki'nnuwwi gaassi anno'iinsi baassakka'a xiiqqaammuwwaa boqquwwaa ikkakko'ookko. «Ee'isam Ermiyaase, ka sagara hundam i minaadabina kuttootto; ihukkaaremdu macceessamoyyo; at ixxuwwa weeshshootto; ihukkaarem kiina dabachcha uwwitamoyyo. Ku minaadab iina ixxuwwi Waa'ina ijaajantambee'anee guzumo'anto'oohaannonnem losano massiteena hassambee'anee ikko'ookko; ee mashka'inne hanqi guullaa bi'aakko; hanqi bikkinam ki'isaa suuminne wocookkok bee'e. «Yerusaalee'm minaadaba, ki'nnuwwika horoore hogoossitakka'a kichche'llehe; haqqi bee'i duunnuwwi lud hundannem fittakka'a wi'llo fissehe; mashka'oomim an Waa'i quuqaammo; i minaadabam i illagiinsi ubbuusaa uraammo. «Minaadab jor luwwa baxxo'ookko; oohim an saboommi qophpha'n waa'uwwa keesamaakkoo i mine aagissa'a haashaassito'ookko. Ixxuwwika goon oosoo landaa shokkiissu'uuyyi kitim issita'a hincaa'lleena Hiinoo'm cebbanne ‹Tofeet› yakkam kiti'm beyyo baxxo'ookko; oohim an ijaajumbee'anee hore'em sawwubee'i luwwaa hee'ukko. Ee bikkina ee beyyik summi Been-Hiinoo'm cebba te'im Toofeta yimmi gataa Duranchi cebba yamamoo amman waarookko; mulli waammi beyyi hee'oobee'i bikkina oo cebbi gagim minaadaphphi waammi beyyi ihookko. Ixxuwwi leeshim iima'n cii'inaa uulli moochchinaa hurbaat ihookko; baddisaa hollokkokim hee'ooyyo. Uullim udma'i ihookko; Yerusaalee'm googguwwannee Yihuxxi beero'uwwannee hundannem bollochcho'i kajji, liiranchikii lobakat liiranchi sagarii hore'oomam macceesamoobee'isa issoommo» yukko. Ee ammane adilluwwik, daannuwwik, qeessuwwik, hiraagaa'nnekii Yerusaaleemanne hee'llam mulli minaadaphphekii hundikim miq waammi hundiinsim feeramaa firookko. Ixxuwwikim miq wixxaa'akka'a waammakkam bikkenne uunjakko'i haccisa beyyi hundannem binnookko; oo miqim minaadab otossimminnee sogitano xa'mmimminnee iittinne awwaaddam hee'llo'i eelliinchaannonnee aga'nnaannonnee boollaankaannonnee illagenne binnookko. Ka jor qaranchiinsi gatto'i qaxii an binnaa'ummi beyyonne hee'llam minaadabii hee'immiinsi leho doo'llitamo» yukko. Waa'i minaadabina «Ubu manchi la'mmaage ki'ooyyonnihe? Googo huushamaa bi'u manchidu daba'llooyyonnihe? Eehannah i minaadab i kollonne daba'llitakkam bikkenne qee'llitakko'isam hee'llakkamok mahinatte? Yerusaalee'm minaadab hundi ammanem laso daba'lloo mahinatte? I kollonne daba'llimma sabbakka'a qophpha'n waa'ina otossitakkamuulla. An ki'nnuwwi woshsha qoossaa macceesummo; ihukkaarem ki'nnuwwi hanqa woccakko'oyyo; ki'nnuwwi lambe'iinsi baxu jolla biiraa yukkok matim bee'e; ‹Baxummi jolli maha?› Yaa xa'mmukkokim bee'e; annannichchim o'l beyyo jigoo farashshisa doo'llitakko'i kollonne geettakko'o. Qadaalli qeeraa'l ammarim daba'llitam ammane laqqamo; handare'i, waaxiigee wo'agaagaanii daba'llitam ammane laqqamo. Ihukkaarem ki'nnuwwi i minaadab i seera laqqakko'oyyo. Eehannah ki'nnuwwi ‹Neese qoolluwwa; Waa'i seeram lanqoommo› yitakkamok mahinatte? Qophphano kitaabbam keen i seera boqqisso'isa moo'llakkamoyyonnihe? Qoolluwwi keen tuuttamo; sholle'llamome; qaashannem amadantamo; ixxuwwi i sagara utto'ookko; eehannah ixxuwwina hinkido'i qooroom hee'eena xanookkahe? Ee bikkina ixxuwwika abuulli uulla hundam mulli keenina gaqqi uulli issaa uwwoommo; ixxuwwi meentom mulli goonina higisaa uwwoommo; mashka'oomim hoffokii lobokii hundim manna qawwiissa'a diinate wixxaa'llamuulla, hiraagaanii qeessuwwii gattoo'n minaadaba qawwiissamuulla. I minaadaphpheka iiqanto'i omara hokookanchanne xigga'a hasisoo'isa issita'a fayyiissamoyyo; ee'isam xummi bee'ekam ‹Xumma! Xumma!› yitamo. I minaadaba, kaa'n haashaarammi luwwa hundam baxxakku'uuyyi tuuttakko'i luwwi yoohonnihe? Tuurimmi gataa illem limmaa'llakko'oyyo; ee bikkina mulli keen ubbo'isam ki'nnuwwim ubbakkamo; an ki'nnuwwa guzumo'oommi ammane sholle'llakkamo; an Waa'i kaka wocaammo. Abuullaanchi atoota wixxaa'oohaannisam i minaadaba wixxaa'eena hasummo; ihukkaarem ixxuwwi mishbee'i woyi'n kaashshisa, oda'isaa buyyi giggiru kaashshisaa ikko'o; ee mashka'inne ixxuwwina uwwummi uulla allaggi manni ixxuwwi gulummi issita'a a'llitamisa issummo» yukko. Waa'i minaadabim «Cawwinaa afuulloommok mahinatte? Waallehe, hundim wixxinaa girbamaakkoo beero'i kollonne gimbona; eekke'em lenona; mashka'oomim ni Moollanni Waa'i ixxo hawwondummi bikkina bi'nnoommisa issaakko; shoo qaraar yoo wo'om angoommisa issaakko. Xummaa fayya'oomaa siindoommi amman waarookko yinaa minxaa hee'nnummo; ee bikkenne dambaq ihu bikkina ni mixan kora'an ihaa gataakko. Diina'ik farad korooxoo sagar Daan beero'onne macceesamookko; soorakko'i faraxxi muunim uulli hundam huxiisookko; diina'i waatto'i mashka'im ni minaadabaa ni beero'oo ee'isam woronne yoo luwwaa hundam guullita'a bi'isseenatte» yito'o. Waa'i «Oono'o, ki'nnuwwi lambe'enne gennaan dabareena xanoobee'i quphaam hamashshaa qasoo woraqaallaa asse'oommo; ixxuwwim ki'nnuwwa qassamo» yukko. Qoxxeena xanoombee'i qoxxaalli kichchechchi eesenne afaakko; i wodanim lobakata hoogaakko. Hino'o macceessehe; «Waa'i la'mmaagge Xiyoonanne hee'ooyyonnihe? Xiyoo'n adildu la'mmaagge ka beyyonne hee'ooyyonnihe?» yitu'uuyyi i minaadab uullanne hundannem laattu'uuyyi macceesoommuulla. Ixxuwwina adil ihu Waa'im shobakka'a baxakko'i misilluwwannee awwaad bee'i qophpha'n waa'uwwannee otossitakku'uuyyi eese quuqissakkamok mahinatte?» yaa ixxuwwina dabarookko. Minaadabim «Oono'o, hurbaata wixxaa'akkam agan higaakko; billim beeddaakko; ihukkaarem neese gantummoyyo» yita'a laattamo. I minaadab iiqanchinne i wodanim iiqamaakko; anim baddaa wi'lloommo. Gaala'aadanne laphphakkam qaraar bee'ennihe? Qaraa'l mandu eekke'enne hee'ooyyonnihe? Eehannah i minaadab fayye'llambee'ek mahinatte? Shakko'i i minaadabina ballaa hiimoo wi'lloommisina i horoor wo'i bar ihuta'n i illim indiiddina bu'i ihuta'n hinkaa'nna iittam hee'ummo! I minaadab amma'nnat hanqataakkoo laggo'oo kee'n wixxit ikko'i bikkina ixxuwwiinsi annanni ihaa udma'i uullanne gooqqi araat garoo beyyo siidumta'n hinkaa'nna liiramam hee'ummo! Ixxuwwik allab qophphano woceena hundi ammanem gudaakkoohane; ee bikkina uullanne hanqi bikkenne qophphan beyyo aa'aakko. Waa'i «I minaadab jolla edda'a edda'a baxxamuulla; an Waa'i ihummisam laqqo'oyyo» yukko. Annichchi annichchim ixxi gaqqi beshichchi hantaariinsi ege'llona; ixxi gaqqi abbaayyom ihuta'n amma'nnimmi hasisooyyo; mashka'oomim abbaayyo yakko'ok hundim Yaaqoobisa ihaakko; beshichcho yakkamok hundim ixxi beshichchika summa bi'isoolla. Hundim ixxi gaqqi beshichcho qawwiisaa huushisoolla; hanqa wocookkok bee'e; ixxuwwika allabo qophphano wocimma losisso'ookko; baaxiilo baximma urimma sabba'a ixxuwwi gaga hoogissamuulla. Ixxuwwi damiganne hanenne damigaa qawwiishshanne hanenne qawwiishshaa eddu'uuyyi mattamuulla; ee qawwiishshiinsim ki'ukkok Waa'i «An ixxuwwina Moollanni ihummisam la'imma sabbo'ookko» yoolla. Eehanniinsi ki'ukkok gogoxxi Moollanni Waa'i «I minaadaba muccusseena xaa'llisa keenoommo; i minaadab jor luwwa issito'i bikkina ee'isa issimmiinsi mulli doo'l bee'e. Ixxuwwik allab hundi ammanem hantaaro wocoo bikkina hawwodoo xiyyisa; annannichchim ixxi gaqqi beshichcho iitti sagarinne wocisookko; ihukkaarem daphphanne qaasha qaashookko. Eehannah, ka hundem luwwannem ixxuwwa guzumo'eenaa kido'i minaadaphphekdu baado fireenaa labooyyonnihe? An Waa'i kaka wocaammo» yoolla. Anim dabaraa «Hundim diih ihu bikkinaa eekke'ennem daba'llamookkok bee'i bikkinaa duunnuwwi bikkina kichche'oommo; biir uulli bikkinam wi'lloommo. Diinaxxi sagarim od macceesamooyyo; iima'n cii'ii uulli moochchii hundim gibaa bi'aakko» yummo. Waa'i «Yerusaaleema gindamoo'isa issoommo; wengereelli hosoo beyyom issoommo; Yihuxxi uulli beero'uwwam manni hee'oobee'i diih ihoo'isa issoommo» yoolla. Anim dabaraa «Uulloom ayyim daba'llameena xanoobee'i udma'aa diihaa ihukkok mahinatte? Kakoomdu qoossaa la'oo qoor manchi ayyette? Mulli mannina losiseena xanoo'isindu caakkissitti manchi ayyette?» yummo. Waa'im dabaraa «Ku hundim ihukkok i minaadab an uwwummi seera utto'i bikkinatte; ixxuwwi iina ijaajanto'oyyo; an ixxuwwina kurummoka hundam wonshito'oyyo. Eekka issitam bikkenne xiiqqaammuwwi ikko'o; ixxuwwik anno'i losisso'isannem Ba'aal yakkam misilina otossito'o. Ee bikkina Isra'ee'l Waa'i ihummi gogoxxi Moollanni Waa'i issoommi luwwa ki'nnuwwina kuroommo; ka minaadabina qaraaroo hurbaata itisoommo; shoo qaraar exxaakkoo wo'om agisoommo. Ixxuwwii ixxuwwi anno'imii laqqambee'i mulli minaadaphphi lambe'enne ixxuwwa binnaa'oommo; an ixxuwwa bi'iseembee'i afeebe'e bisa'inne holloommo» yukko. Gogoxxi Moollanni Waa'i «Mah waareena hincaada'ee sawwi'llehe; wi'lloo keenom wixxaa'llehe; soroo meentom weeshshehe» yukko. Minaadabim dabatta'a «Ni illenne indiiddi wo'mmaa dunamoo'isina ni xabaninnem indiiddi daadona soroo meentina qaqqissakka'a kullehe» yito'o. Xiyoonanne «Aayye, neese bi'nneenatte; hore'oomam shoolle'nnaammo; ni minneewwi gindamu bikkina ni uulla fatakinaa malleenatte» yakku'uuyyi wi'llakkam sagara macceessehe. Anim «Meento, ki'nnuwwi Waa'i wocoo luwwa macceessehe; ixxi sagara macceessakkeena guddehe. Hinkid wi'llim hasisooda'ee ki'nnuwwi oosina losissehe; sorakkamisam ki'nnuwwi beshina losissehe; Leh ni maskoot hundinnem aagaakko; adi'l minneewwam aagaakko; ooso goog hundannem harde'i keenom wixxixxi beyyuwwannem shaakko. Mannik leesh uunjakkam haccisa beyyi hundannem binnaakko; hurbaata muttam keen mutta'a ubbuusso'aannisaa ayyim wixxaa'oobee'i qarme'isaa ihaakko. An wocoommisina Waa'i ijaajukkok kane» yukko. Waa'i «Qoor manchi ixxi qooroomanne bolxoone; malaayyaamim ixxi malaayyenne bakke'oone; goddaanchim ixxi goddanne bolxoone. Bakke'eena hasookkok hee'ulas an Waa'i ihummisa la'imminne i iittim heer heerina hee'oohan ihu bikkina hanqo'i oogatoo muccuroomaa uullanne ihoo'isa issoommok anette ihummisa qoossimmanne bakke'ona; eese liiransookkok eehane; an Waa'i kaka wocaammo» yukko. Isra'ee'l minaadaba, oono'o, Waa'i ki'nnuwwina wocoo sagara macceessehe. Waa'i «Mulli minaadaphpheka googo awwontakkotte; ixxuwwi iimanenne mulli mare'e moo'llo'i ammane dambaqqamo; ihukkaarem ki'nnuwwi eehannonne dambaqqakkotte. Ee mulli minaadaphphek losa'n amma'nnat awwaad bee'ane; haqqichcho doo'm woriinsi murakkamo; anga lachchi manchim heedinne cabbarookko. Birinnee worqinnee wereeggisakkamo; uboobee'isam musmaarinnee madooshinnee aphphisakka'a mat issakkamo. Oo misilluwwi dabaqu'l kaashshi lambe'enne cii'a baddisona kaasakko'i luwwisa; wocimma xantamoyyo; taakke'immam xantambee'i bikkina manni iyyookko; hawwodoo luwwam ihukko awwaadoo luwwa baximma xantambee'i bikkina hore'em badditakkotte» yukko. Waa'a! Keese labookkok ayyim bee'e; at malaayyaamo. Ki summi lophphaakkoohanee baddisoohanee. Uulli minaadabina hundinam Adil ikki bikkina keese baddoobee'ek ayyette? uulli minaadaphphi qoolluwwi lambe'ennee adilluwwi lambe'ennee keese labookkok ayyim bee'i bikkina kiina lombi hasisookko. Ixxuwwi hundim qawwuwwaa ceemmaalluwwaa ikko'i bikkinatte bagaan eraadu haqqinne baxakko'i misiliinsi mah losano siiddam luwwi hee'aate? Misilluwwoom Tarseesiinsi eebakko'i kin birinnee Uufaaziinsi eebakko'i worqinnee goolabamakkoohane; anga lachchi mannim wereeggisso'ookko; eddechcha daddam anga qoor manni daddo'i diqaasa laboohaanninnee kashar eddechchinnee ifiisamaakko. Ihukkaarem Waa'a, at hanqo'i Waa'a; at hee'lloo Waa'aa heer heeraxxi adila; at quuqqoo ammane uulli heekke'ookko; uulli minaadabim ki quunqa iyyaqqaa xanooyyo. Qophpha'n waa'uwwina otossitam minaadabina hundinam «Uullaa iimanee qooccitobee'i qophpha'n waa'uwwi uulliinsi bi'llona» yitakka'a kullehe. Waa'i ixxi malaayyinne uulla baxukko; ixxi qooroominnem uulla qooccukko; ixxi qoossimminnem iimane biddiqaa'ukko. Ixxi saga'llek gug macceesamoohaare iimanenne yoo wo'i heekke'ookko; ixxi duuba uulli tochchiinsi iim firoo'isa issookko; xee'n ammanem banqi gugoo'isa issookko; hafachcham dissoo miniinsi firoo'isa issookko. Eekka moo'llota'nnim qawwuwwaa lachchi hanqataakkoo keenoo ikkamo; worqa bukkookkok baxu misilannem otossitamo; foor bee'i qophphanaanchi ihu bikkinam baxamu misilanne tuuttamo. Ku qophpha'n waa'uwwi awwaad bee'i keenoo lelli mu'uttuwwaa; Waa'i ixxuwwa guzumo'eena waaroo ammane ixxuwwi bi'llamo. Ihukkaarem Yaaqoob Waa'i eekee'nnisayyo; ixxi hundem luwwinam qooccaancho; Isra'eela ixxi minaadab ihoo'isina doo'llaakko; ixxi summim gogoxxi Moollanni Waa'a. Yerusaalee'm minaadaba, oono'o, ki'nnuwwi diina'inne kibbantakko'oo bikkina yoo beyyiinsi ki'nnuwwi amaxxa qaqqissakka'a wixxaa'llehe. Waa'i «Ka uullanne hee'llam manna xoqolaa fissoommo; ixxuwwam u'nnisaa qeefadantamisa issoommo» yoolla. Yerusaalee'm minaadab laattu'uuyyi «Lobakata iiqammummi bikkina aayye! ni omar fayye'oobee'ane; ihukkaarem neese ka hawwo hundam iyyaqqina xannoommoka labinsaa hee'nnummo. Ni dukkaannuwwi gindamaakko; tollakkam usseewwim muramaakko. Ni oos hundim qeefadamaa maru bikkina ni dukkaannuwwa dabaraa kaasookkokii du'm eddechcham saqalookkokii matim gatukkoyyo» yitamo. Anim dabaraa «Ni awwonsaan qawwuwwi ihimmiinsi ki'isaa Waa'iinsi hara'mmato xa'mmito'oyyo; ee bikkina ixxuwwi ubbo'o; minaadabim binnito'o. Wi'llo macceessehe; hanaa'n qarinne yoo uulliinsi malaayyaam dambaq waaroolla; Yihuxxi uulli beero'uwwam udma'aa wengereelli garoo beyyoo issookko» yummo. Waa'a! Mannik foor ixxi angannette ihubee'isaa maroo googom ixxi gaginne xabbaa'aa awwonseenaa xanoobee'isaa la'oommo. Waa'a! Ee bikkina neese ki minaadaba guzumo'e; ihukkaaremdu ki quunqinne beeddinaa bi'nnoommisina moggitte. Ki quunqa keese laqqambee'i minaadabannee ki summa weeshshambee'i keenonnee dilliise; ixxuwwi ki minaadaba guullito'ookko; neese hundam guullita'a bi'issa'a ni uullam bi'isso'ookko. Waa'i beyyiinsi Ermiyaas beyyo waaru sagar «Ka hidi'l sagara qoossitaa macceessaa Yihuxxi minaadabinaa Yerusaalee'm beero'onne hee'llam manninaa kure. Ka hidi'l sagarina ijaajamoobee'ek hundim duumamaakkoohan ihona. Ku ijaajim gaassi ki'nnuwwi anno'o xaara bukkoo gii'l midachchi'nnooi Gibxi uulliinsi fiissummi ammane ixxuwwina uwwummane; iina ijaajantamisinaa ixxuwwina kuroommi luwwa issitamisinaa kurummo; ijaajantolasim ixxuwwi i minaadab ikkamisaa anim ixxuwwina Waa'i ihoommisaa caakkisaa kurummo. Eehid ihulas kaba yo'i adii marabii wo'mmaakkoo harish uulla gaassi ixxuwwi anno'i lago aa'llamisina issummi ammane ixxuwwina uwwummi neeyyaxxi sagara wonshoommo» yoohane hee'ukko. Anim «Ihona Moollanna!» yummo. Ee lasage Waa'i iina «Beero'uwwaa Yerusaalee'm googguwwaa mattaa i hidi'l sagara macceessamisinaa i ijaajo egettamisinaa tiissiissittuuyyi i sagara alallaate. Gaassi ixxuwwi anno'o Gibxi uulliinsi fissummi ammane iina ijaajantamisina edaa edaa qoxxisummo; minaadabam kaballi afeebe'em ihuta'n qoxxisimma urummoyyo. Ihukkaarem ixxuwwi iina ijaajanteenaa i woshsham macceesseenaa hasso'oyyo; ee bikkenne annannichchim hinki ammaniinsim loboka xiiqqaammuwwaa jor keenoo ikko'o; i hidi'l sagara wonshitamisina ijaajummo; ihukkaarem ixxuwwi sabbo'o; ee bikkina i hidi'l sagaranne kitaabamu boobana hundam ixxuwwanne eebummo» yukko. Eehanniinsi lasonne odim Waa'i iina «Yihuxxekii Yerusaalee'm minaadabii eesenne jorinne a'llanto'ookko. I sagara macceesimma sabbo'i ixxuwwi anno'i baxxo'i baaxiilo baxxamuulla; qophpha'n waa'uwwinam otossitamuulla; Yihuxxekii Yerusaalee'm minaadabii gaassi ixxuwwi anno'inne aagummi hidi'l sagara gindito'ookko. Ee bikkina oono'o, an Waa'i ixxuwwanne xotteena xantambee'i bichcha eeboommo; iinniinsi hara'mmato hassa'a laattota'nnim an macceesoommoyyo. Ee ammane Yihuxxekii Yerusaalee'm minaadabii kitima hincaa'llam qophpha'n waa'uwwi kolli matta'a hara'mmitona laattamo; ihukkaarem qophpha'n waa'uwwi ku bichchi waaroo ammane ixxuwwa gatisseena xantamoyyo. Minaadabina ixxuwwi beero'i qaxam lobakat qophpha'n waa'uwwi yookko; Yerusaalee'm minaadabim beero'i woronne yoo googguwwi qaxam Ba'aal yakkam shigigaa'oo qophpha'n waa'ina beero'i hincaa'akkam lobakat beyyuwwa baxxo'ookko. Ermiyaase, ka minaadabina lambe'i manchi ikkaa eese uunxititte; ixxuwwi hawwita'a hara'mmato siiddeena i kollonne laattam ammane an macceesoommoyyo» yukko. Waa'i «Ku an iittoommi minaadab jor baxo baxxamuulla; eehannah ixxuwwi keesamaakkoo i minenne siidanchi hasisoohonnihe? Awwaad bee'i neeyyato uwwimminnee fooraam diinaxxi kitima hincaa'imminnee bichchi ixxuwwanne afoobee'isa issimma xantamoka labissa'atennihe? Eehid issimmi ixxuwwa hinkid liiranseena xanookko? Ki'nnuwwi mat ammane mishisoo er mish yoo wee'l haqqichchisa hee'llakko'o; ihukkaarem abbis ammanenne banqisa gugoo sagara macceesisimminne buyyooma giirinne shokkiisoommo; caaffuwwam iiqansoommo. «An gogoxxi Moollanni Waa'a; ki'nnuwwi Isra'ee'l minaadabii Yihuxxi minaadabii an kaasummi haqqichchisa; ihukkaarem Ba'aala yakkam qophpha'n waa'ina kitima hincaa'imminne eese quuqissakko'i bikkina kaba an ki'nnuwwanne bichcha eeboommo› yaakko yitaa kure» yaa ijaajukko. I maso'i eesenne hanenne jora a'llantamisa Waa'i iina moo'isaakko. Anim durakkeena ushe'akkam gereechchisa ihaa hee'ummo; ixxuwwim «Ixxi summi la'mmeka tiiramoobee'isa ka haqqichcho mishinne maqirem mullona; foorinne hee'oo manni uulliinsim bi'insona» yita'a eesenne jor a'llancha a'llanto'isa la'ummoyyo hee'ukko. Anim «Gogoxxi Moollanni Waa'a! Mannika wodanoo tiiroo saarayyitoo hanqo'i oogataancho; oono'o, i hawwo kiina kuroommo; ee bikkina ka minaadabanne dabattoo baado mo'oommisa isse» yaa Waa'a uunxummo. Anaatootanne yo'i manni eese shiteena hasso'o; hore'em «Waa'i summinne hiraago wocimma uttoobee'an ihulas neese gagim shinoommo» yito'ookko. Ee bikkina gogoxxi Moollanni Waa'i «An gagim ixxuwwa guzumo'oommo; harde'i keen bisa'inne beedditamo; ixxuwwik goonii landii sibaarinne letamo. Anaatoot minaadabanne boobana eeboommi ammane qoodaammo; oo doolli afoo ammane ixxuwwi lambe'iinsi matem manchim gatooyyo» yukko. Waa'a! An kiinninne fitamumta'n at hundi ammanem hanqo'an ikkaa siidantootto; ihukkaarem hanqo'i oogaxxi bikkina keese xa'mmimmi hasisookko; baaxiilaan kee'n heechchi xabbookkok mahinatte? Qawwiissam keenindu hundem luwwim xabbookkok mahinatte? At ixxuwwa kaassi bikkina xapha kaasso'ookko; li'lla'atim misha mishshamuulla; keese suuminne lonsitamo; ihukkaarem ixxuwwik wodan kiinniinsi qee'llaakkoohane. I Moollanni Waa'a! Ihukkaarem at eese laqqootto; maha baxoomda'ee i wodaniinsim ki'isaa keese hinkaa'nna iittoomda'ee moo'llaatto; ku baaxiilaan manni durakkam gereebbisa gosaasantamisa isse; durakkam balli afeebe'em ixxuwwa annanni issitaa disse. «Neese banxoommoka hundam Waa'i moo'ooyyo» yitam ni minaadaphphi jolliinsi ki'ukkok ni uulla billi aphphisukkisa hee'ookkokii allaachchi biir hundannem yoo hix gogukkisa hee'ookkokii hinki balli afeebe'e? Ee mashka'inne fooraam diinatii ammarii hundim beeddita'a bi'llo'o. Waa'i iina «Ermiyaase, lokkinne geettam keeninne xoreexxancha hooggoohan ihulas faradaaninne maqire xoreexxantaa hinkid xantootto? Biir uullanne qoxxitaa uullimma xantibeelas Yoordaanoos doo'm woronne hinkid uullitaa xantootto? Kiyyabbaayyuwwii kiina hincixxi qarmannii keese laggo'ookko; ixxuwwim kiinninne uullixxanteena ki'llo'ookko; ee bikkina ki illagenne ki bikkina eroomma woccota'nnim amma'nnititte» yukko. Waa'i «Isra'eela uraammo; an doo'llummi i minaadabam ixxuwwi diina'ina higisaa uwwaammo. An doo'llummi i minaadab eesenne diina'i ikka'a ki'llo'o; doo'm wo'l hobbichchisam eesenne korooxxa'a ki'llo'i bikkina an ixxuwwa sabaammo. An doo'llummi i minaadab hundem kollinnem cingiraallinne kibbamu ciikkichchisa ikko'ookko; ee bikkina bii'l moochchi waaraa ixxuwwika maara itaa liiramoo'isina weeshshehe. Lobakat awwonsaan i woyi'n kaashshi beyyo bi'isso'ookko; i abuulli beyyuwwam hancaacansito'ookko; mishisoo i uullam udma'i uulli issito'ookko. Udma'i uulli issito'i bikkinam i illagenne diih ihaakko; uulli hundim udma'i uullanne daba'llaakko; eehanni bikkinam sawwoo manchi matim bee'e. Udma'i ihu mahim bee'i duunnuwwiinsi bi'issam manni waattamo; iikki bisa'i uullooma tochchiinsi tochchi afeebe'e bi'isoo bikkina ayyim xumminne hee'eena xanooyyo. I minaadab arasa wixxa'a hallutta wixxaa'llo'o; baxonne lobakata qondoodda'a matem tirfam siiddo'oyyo; i malaayyaam quunqiinsi ki'ukkok ixxuwwik atoot hundim bi'ukko» yukko. Waa'i «I minaadab ikko'i Isra'eelina uwwummi uulla bi'isso'i Isra'ee'l olla'ina wocoommi luwwi yookko; ee boqqi minaadaba ixxuwwi uulliinsi hundiinsim xoqolaa massoommo; Yihuxxi minaadabam ixxuwwi angiinsi gatisoommo. Ihukkaarem ixxuwwa uulliinsi fissaa lasonne dabaraa ixxuwwina qishixxato issoommo; minaadaba annannichchom ixxi gaqqi uullaa ixxi gaqqi gulummi uulli yoo beyyoo dabaraa woroommo. I minaadaphpheka amma'nnato wo'm wodaninne aa'lla'a ixxuwwi kanniinsi illageen i minaadaba Ba'aal yakkam qophpha'n waa'i summinne hide'llamisa losisso'isam ‹‹Hee'oo Waa'i›› summinne› yita'a hide'llaman ihulas i minaadaphphi lambe'enne hee'llamisa issoommo. Ixxuwwi lambe'enne iina ijaajamoobee'ek hee'ulas xoqolaa bi'issoommo; an Waa'i kaka wocaammo» yukko. Waa'i iina «Talbi fatirinne dadamaakkoo sabbata bitaa'llaa lade'e; ihukkaarem ixxonne wo'i afoone» yukko. Ee bikkina Waa'i ijaajukkisannem sabbata bitaa'aa lade'ummo. Waa'i edaatim iina «Efiraaxiis daajji kolli mattaa sabbatooma ki'n bonqoq woronne maaxe» yukko. Ee bikkina Waa'i ijaajukkisannem maraa Efiraaxiis daajji gammalanne ee sabbata maaxummo. Lobakat balliinsi lasonne Waa'i «Efiraaxiis daajje daba'llitaa mattaa ee sabbata maaxxitti beyyiinsi aa'e» yukko. Anim maraa sabbata maaxummi beyyo siidummo; sabbata siidaa lasonne sabbatoom bi'aa awwaadoobee'isa ihaa hee'ukko. Ee lasage Waa'i iina «Yihuxxi manni bolxoomaa Yerusaalee'm manni biranchaa ka'isa issaa bi'isoommo. Ku jollinne wo'mmito'oo minaadab iina ijaajancha sabbo'ookko; hinki ammaniinsim lobokata xiiqqaammuwwi ikko'ookko; qophpha'n waa'uwwina otossitu'uuyyi awwaaddamuulla; eehanniinsi ki'ukkok ixxuwwi awwaad bee'an ihaa gatu ka bi'u sabbaxxisa ikkamo. Sabbat lamadonne xishshaa xaaxamaa hee'oo'isam Yihuxxi minaadabii Isra'ee'l minaadabii iinninne maqire xembeqita'a hee'llamisina sawwaa hee'ummo; kakam issummok i minaadab ikkamisinaa iina galataa lombaa uwwitamisinattee hee'ukko; ihukkaarem ixxuwwi iina ijaajanto'oyyo» yukko. Moollanni Waa'i iina «Ermiyaase, ‹Jaalo'onne hundannem woyi'n diqaas wo'mmookko› yitaa Isra'ee'l minaadabina kure; ee ammane ixxuwwi Jaalo'i woyi'n diqaasinne wo'mmoo'isa neese lanqoombee'eka labissaatennihe?» yitamo. Ee lasage an Waa'i ka uullanne hee'llam manna hundim dimbiteebe'i afeebe'e woyi'n diqaasa aggamisa isseena sawwummisa kure; ee ammane Daawiit adilla'n barcumanne afuuttam adilluwwa, qeessuwwa, hiraagaanoo Yerusaaleemanne hee'llam mannaa hundim woyi'n diqaasinne dimbitamisa issoommo. Ee ammane anno'oo ixxuwwi oosoo hundam jaalo'isa ixxuwwana'i ixxuwwam qoccansoommo; matem mishan, qishixxatii biijoomii bee'ekam ixxuwwa bi'isoommo» yukko. Isra'ee'l minaadaba, Waa'i wocaakkoo bikkina ki'nnuwwika bolxooma uttakka'a ixxi woshsha macceessehe; qoossitakka'a macceessehe. Ixxi tuunso eeboo'n ee tuunsoo duunnuwwannem ki'nnuwwi lokki qolamoo'n illageen neeyyato issitakko'i caakkim gambabbi tuunsonne daba'lloo'n ki'nnuwwi Moollanni Waa'ina lomba uwwehe. Ihukkaarem macceensoommoyyomdu yitakkolas Ki'nnuwwi bolxoo'm bikkina maaxamaa wi'lloomo; Waa'i minaadab qeefadanta'a marimmanne mushmushaa wi'lloommo; i indiiddim uroobee'isa daadookko. Waa'i iina «Lombi yoo adilla'n mare'i ixxuwwi horooriinsi ubu bikkina adilii adi'l amaa adilla'n barcumiinsi dillitamisina kure. Woroo'n qarinne yoo beero'uwwi diina'inne kibbamu bikkina ayyim ee beyyo mareena xanooyyo; minaadab hundim qeefadanta'a matto'ookko» yukko. Yerusaaleema, hanaa'n qarinne waaroo ki diina'a moo'e; abooyyittuuyyi hee'llittokii kiina bakki ihaa hee'u minaadabii hannonne yookkahe? Iina beshshuwwa yitoo keen hundim keesenne weerattam keenoo keese gassitam gassaanoo ikka'a moo'antu'uuyyi at mayyitoottahe? Qattam meentichchosa keese xuuchchi amadooyyonnihe? «Ku hundim eesenne afukkok mahinatte? I eddechchi dereeramaa maxaramummok mahinatte?» yitaa xa'mmitta'n ku hundim keesenne afukkok ki baaxiil lophphimmiinsi ki'ukkan ihukkisa la'e. Tophphe'i uulli manchi ixxeka hagara kabeechchim ixxi gadarooma dabasseena xanooyyo; ee'isam ki'nnuwwim jor baxo baximma lossakko'oo bikkina er baxo baxxakka'a xantakkamoyyo. Ihukkaarem kaba udma'i uulli hafachchi fii'aa massoo bura'isa Waa'i ki'nnuwwa binnaa'ookko. Ki'nnuwwik sharad kan ihoo'isa Waa'i wocaakko; ixxo xaddakka'a qophpha'n waa'uwwanne amma'nnantakko'i bikkina ki'nnuwwanne kaka isseena murte'aakko. Waa'i ixxi gagim ki'nnuwwika eddechcha maxaraa ki'nnuwwik tuulli orachchi moo'amoo'isa issookko. Mashka'oomim ixxi saboo luwwa baxxakku'uuyyi moo'aakko; ixxi beshichchi mi'n amanne saa'eena mixoo manchisaa gannichchonne maagula'eena hasoo farashshisaa ki'nnuwwi hanqo'i Waa'a laqqambee'i manni waa'uwwa laseessakka'a duunnuwwi ludonnee biir uullannee hundannem jallitakku'uuyyi moo'aakko; Yerusaalee'm minaadaba, aayye! Muccuttakkeena xantakkamok hinki balla? Hanenne waaroo qaanne'i bikkina Waa'i «Yihuxxi minaadab kichchechchannette; beero'i mannim leheena wotta'amoolla; minaadabim kichchechchi mashka'inne uullanne afuutta'a wi'llitamuulla; Yerusaalee'm mannim hara'mmato siiddeena laattamuulla. Goddaan wo'o siiddeena ixxuwwi baxaano asse'llamo; ixxuwwim wo'i bare mattamo; ihukkaarem wo'ika ma'lluwwam siiddambee'i bikkina harachcho iyyita'a kora'am daba'llitamo; neeyyato mutta'a duduqitam bikkina tuullinne ixxuwwika horoore gunguu'llitamo. Xeen bee'immiinsi ki'ukkok uulli gogookko; abuullaanim neeyyato mutta'a tuullinne ixxuwwika horoore gunguu'llitamo. Hix bee'immiinsi ki'ukkok gaallichchi qarukkisam wotarooma biir uullanne uunjaa marookko. Bii'l hallim wo'i xeebiinsi ki'ukkok duu'n lud hundannem uullita'a wengereellisa enjeessu'uuyyi hassamo; ittam luwwa siiddambee'i bikkinam illi jaamookko. I minaadab ‹Maham ni baaxiil neesenne dutaa naqqasuta'nnim Waa'a, ki neeyyaxxi saga'llisanne niina at hara'mme; lobakat ammane kiinniinsi qee'llinaammo; keesem hawwondaammo. Isra'ee'llek neeyyat xale'i atette; boobaniinsi neese gatissoottokim atette; eehannah ni uullanne koyyiinchisaa mat balla garoo araatichchisaa ikkittok mahinatte? Muggaa agaagimma hoogu o'l manchisa ikkittok mahinatte? Waa'a, at niinninne yoonto; neesem ki summinne weeshammaammoo minaadaba; ee bikkina at neese uttitte› yita'a i kolli laattamo» yukko. Waa'i ka minaadaphphi bikkina «Iinniinsi qee'llita'a gibimma iittitamo; ixxuwwi gaga ege'llitamoyyo; ee bikkina an ixxuwwanne liiramoommoyyo; baxxo'i baaxiil hundam sawwaa ixxuwwi baaxii'l bikkina guzumo'oommo» yukko. Waa'i iina «Ka minaadaba hara'mmoommisina eese uunxititte. Hara'mmoommisina soommantu'uuyyi uunxitota'nnim macceesoommoyyo; shokkiisakkam kitimaa hurbaaxxi kitimaa hincaa'llota'nnim ee keenonne an liiramoommoyyo; hore'oomam orinne, sibaarinnee weeraroo jabbinnee beedditamisa issoommo» yukko. Anim «I Moollanni Waa'a! hiraagaan ‹Orii sibaarii hee'ooyyo› yitu'uuyyi minaadabina woccamuulla; ‹Ni uullanne xale'i xummi ihoo'isa Waa'i wocaakko› yitamuulla» yummo. Waa'im dabaraa «Hiraagaan i summinne qophphano woccamuulla; an ixxuwwa asse'ummoyyo; ijaajom uwwummoyyo; matem sagaram ihuta'n ixxuwwina kurummoyyo; ‹Moo'nnaammo› yitam kaalti hundim iinniinsi ihaakkoohaneyyo; ixxuwwik hiraag hundim qophpha'n kaalta, gennimma, qophpha'n waa'uwwina otossimmaa ixxuwwi sawwitiinsi ki'aakkoo awwaad bee'i woshshisaa. An asse'oo'nnim ‹Ni uullanne sibaarim ihuta'n bagad waarooyyo› yitu'uuyyi i summinne hiraago woccam ka hiraagaano an Waa'i ixxuwwa orinnee sibaarinnee letamisa issoommo. Ku hiraag wocamu minaadab hundim orinnee sibaarinnee letamo; ixxuwwi leeshim Yerusaalee'm googguwwanne hundannem ubookko. Ixxuwwa waammookkokim hee'ooyyo; oohim ixxuwwi meentonne, goo'n oosonnee landannee hundannem ihookko; ixxuwwi hawwojjisinnem laboo guzumo'o uwwoommo» yukko. Ee bikkina Waa'i ixxi minaadabina «‹I minaadab lobakata omaraakko; jorisam hawwodamaakko; ee bikkina hiimoo ballaa i illiinsi indiiddi dunamoolla; uroo'nnim wi'lloommuulla. Hax uulla firumta'n oranne leto'i mannik leesh ubaa moo'oommo; beero'i lambe'e aagumta'n sibaarinne leheena hincaakkoo manna moo'oommo. Hiraagaanii qeessuwwii ixxuwwi quuxo laseessamuulla; ihukkaarem issitam luwwa laqqamoyyo› yihe» yaa ijaajukko. Waa'a, Yihuxxi minaadaba hore'oomam uunjiteenannihe? Xiyoo'n minaadabdu sabbittisam utteenannihe? Fayye'nnoombee'i qaxa kaa'nna hawwodammoommisa issittok mahinatte? Xumma siindoommo yinaa neeyyato issinaa hee'nnummo; ihukkaarem matem er luwwim ihukkoyyo; fayya'ooma siindoommo yinaa neeyyato issinaa hee'nnummo; ihukkaarem dambaq exxukkuuyyi marukko. Waa'a! Neese keese hawwondaammo; ee bikkina ni gaqqekaa gaassi niyyanno'ikkaa baaxiilo ki illagenne biiraa yinoommo. Ki neeyyaxxi sagara sawwitaa neese gadditte; ki nuur moo'amoo ki lombi adilla'n barcum hee'oo Yerusaaleema sholle'nnanne uunjititte; niinninne maqire aaggitti hidi'l sagara gindititte. Waa'a laqqambee'i minaadaphphi waa'uwwiinsi matim xeena ga'nniseena xanooyyo; iimanim ixxi doo'llinne xeen kifoo'isa issooyyo; Ni Moollanni Waa'a! Ka hundam issitoottok atette ikki bikkina neese neeyyato issinoommok keesennette. Ee lasage Waa'i «Muse'ee Saamu'eelii i illagenne uullita'a uunxitota'nnim ka minaadabina qishixxoommoyyo; ee bikkina i illagiinsi ekkid mattamisa isse. ‹Eehannah hanno mallonatte?› yita'a keese xa'mmitolas kanniinsi illageen ‹Jabbinne letamisina oogatanto'i keen jabbinnem letamo; orinne letamisina oogatanto'i keen orinne letamo; sibaarinne letamisina oogatanto'i keen sibaarinne letamo; qeefadanta'a karantamisina oogatanto'i keen qeefadantamo› yaa kiina kurummoka tiissiise. An Waa'i soor jor luwwi ixxuwwanne afoo'isina murte'aammo; ee bikkina oranne letamo; ixxuwwi leesham wish gosaasookko; ammarim ixxuwwika maara itookko; gatu qaxa moochchi kankanookko. Hizqiyaas beet Minaase Yihudanne adil ihu ammane Yerusaaleemanne baxu jolli bikkina hundinam ixxuwwanne afoo luwwiinsi ki'ukkok uulli minaadab girgiroo'isa issoommo» yukko. Waa'i «Yerusaalee'm minaadaba, ki'nnuwwina ayyi qishixxookko? Ki'nnuwwina kichche'ookkokdu ayyette? Hofqax ammancho giphaa ki'nnuwwi duuha'a xa'mmookkok ayyette? Ki'nnuwwi eese uttakko'ookko; Ki'nnuwwi iinniinsi laso daba'llitakko'ookko; ka lasage an ki'nnuwwina qishixxoommoyyo; i angiinnem ki'nnuwwa xaansoommo. Bura'i hafachchanne binnoo'isam uullanne yoo beero'uwwi hundannem ki'nnuwwa binnaa'ummo; jor baxiinsi daba'llimma hoggakko'i bikkina i minaadab ikkakko'i ki'nnuwwa bi'isummo; ki'nnuwwikam ooso shakkamisa issummo. Ki'nnuwwi uullanne yo'i busar meentik xig uulli shashshariinsi hanaan ihaakko; harde'i oos umur afoo'nnim letamisinaa ixxuwwi ammo'onnem kee'mmaalli hawwi afoo'isinaa issoommo; dangonne afoo kichchechchinnee dambaqinnee ixxuwwa aphphisoommo. Lamar ooso hooggo'i ama lobakata neeyyato murimminne fooshshe'imma hoogga'a muddantamuulla; isena ballik caakki tuunsonne daba'llaakko; sholle'nnii tuullii isenne afaakko; foorinne yoontakke'i keenom diina'i shoo'isa issoommo; an Waa'i kaka wocaammo» yukko. An hinkido'i gada'a jora! Iyyumma eese qatto'i balli bi'e; uullanne yoo manninne hundinnem nunnuroommokii wocamoommokii mahinatte? An i diinate mannina liqaayyisummoyyo; te'im ayyeensim liqaayyo aa'ummoyyo; eehannah manni hundim eese mahina duumoolla? Ee lasage Waa'i «Hanqoomam an keesenne er baxo baxeena keese gatisoommo; hawwi ammanee u'n ammanee ki diina'i keese qooxxaqqoo'isa issoommo. Minaadaba, naasinne hamaaramaakkoo xaara iiqqakkeena xantakkambee'isam hanaa'n qarinne ki'nnuwwanne xabbu diina'i ora kaa'llakkeena xantakkamoyyo» yukko. Odim Waa'i iina «Ki'nnuwwi uullanne hundannem baxxakko'i baaxii'l mashka'inne ki'nnuwwi horaa amaxxaa matem miqo'i bee'ekam massitamisina diina'ina higisaa uwwoommo. I quunqi xoo'oobee'i gii'llisa; ee bikkina manni uullanne ki'nnuwwi diina'ina awwaadaan ikkakkamisa issoommo. Anim ee lasage «Waa'a! At laqqootto; ha'i at sawwihee hara'mmee; eese hollitam kee'nneka baado fire bagaan iyyaqqitaa cawwimminne an bi'ona uttitte; ku game'llat eesenne afukkok ki mashka'innette. Gogoxxi Moollanni Waa'a! An ki summinne weeshamaammo; ki sagar i beyyo waaru ammane hundam aa'aammo; i wodanim liiranchinnee lobakat liiranchinnee wo'mmaakko. An daabbaroo manninne maqirem osarummuuyyii liiramummuuyyii iina yoo ammane kora'isanne bi'isummoyyo; ki quunqi eesenne ihu bikkina mullam afuurummo. Jabbi eesenne qoxxukkok mahinatte? Omar fayye'oo'n hee'oommokdu mahinatte? Billenne gogoo bu'isa neeyyato mussiisseenannihe?» yummo. Ee bikkina Waa'i dabaraa «I kollonne daba'llitlas keese iina awwaadaanchi ikkoo'isina dabaraatim uullisoommo; awwaad bee'i luwwa wocimma uttaa awwaad yoo woshsha kuttilas odim iina hiraagaanchi ikkootto; minaadab ki kollonne daba'llitamo bagaan at ixxuwwi kolli mattooyyo. At ixxuwwinne uullixxanteena xantoo'isina an keese naasinne ootamu ooxxisa qoxxisoommo; kiina agaageenaa keese gatiseenaa kiinninne maqir ihummi bikkina kiinninne orantota'nnim kaa'lleena xantamoyyo. Jor kee'n angiinsi keese gatisoommo; mogaalli kee'n angiinsem keese gatisoommo; an Waa'i kaka wocaammo» yukko. Hundim jor jabbinne letamo; ixxuwwina wi'llookkokii ixxuwwa waammookkokii hee'ooyyo; ixxuwwik leesh beyyi hundannem haccisa ubookko; orinnee sibaarinnee beedditamo; ixxuwwik leesh iima'n ammarinaa uulli moochchinaa hurbaat ihookko. «Kannii eehid xummaa heer heerina hee'oo i iittoo qishixxatoo i minaadabiinsi ki'isaammoo bikkina at wi'l mine aaggitte; ayyenam at kichche'llittisa kuttitte. Ka uullanne yo'i goddaanii buxii hundim letamo; wi'llaakkah waammookkokam siiddamoyyo; ixxuwwi bikkina kichche'aa illi kollo kotooxxookkokii horoore hogoossaqqookkokii hee'ooyyo. Ixxi beshichcho wossooreena wo'agishsha massaa maqire itookkokii agookkokii hee'ooyyo; mullek gataa annii amaa leto'aanninam sabiraata uwwookkok hee'ooyyo. «Manni liiranchinne maadda iteenaa ageenaa maroo mine aaggitte; itteenaa aggeenaa ixxuwwinne maqire afuuttitte. An gogoxxi Moollanni ihummi Isra'ee'l Waa'i kuroommi woshsha macceese; liiranchi, lobakat liiranchii bollochcho'i sagarii macceesamoobee'isa issoommo; ee hundam at yoonti doollenne minaadab gagim ixxuwwi illinnem moo'llamo. Ee hundam minaadabina kuttoo ammane ‹Waa'i kaa'nna mogookkok mahinatte? Waa'a hawwondummi luwwii banxummi baaxiilii maha?› yita'a keese xa'mmitamo. Ee ammane Waa'i ki'nnuwwina ‹Gaassi ki'nnuwwi anno'i eese utta'a qophpha'n waa'uwwanne otossita'a awwaaddo'ookko; eesem utto'ookko; i ijaajom egetto'oyyo. Ki'nnuwwi odim ki'nnuwwi anno'iinsi loboka jor baxo baxxakko'ookko; hundichchim xiiqqaammuwwaa boqqquwwaa ikkakka'a iina ijaajantakko'oyyo. Ee bikkina ka uulliinsi fissaa ki'nnuwwii ki'nnuwwi anno'ii laqqakkambee'i uullanne uunjoommo; eekke'enne qophpha'n waa'uwwina hiimoo ballaa otossitakkamo; hore'em qishixxoommoyyo› yihe» yukko. Waa'i «Isra'ee'l minaadab ‹Gibxi uulliinsi fissu hee'oo Waa'i la'e› yita'a hide'llambee'i amman waarookko. Eehanni bikkenne ‹Isra'ee'l minaadaba hanaa'n qarinne yoo uulliinsii ixxuwwa binnaa'u mulli uulliinsii hundiinsim fissu hee'oo Waa'i la'e› yita'a hide'llamo; anim ixxuwwi gaqqi uullaa gaassi ixxuwwi anno'ina uwwummi uullaa dabaraa woroommo; an Waa'i eekka wocaammo» yoolla. Waa'i «Ka minaadaba qurxumme'isa qaashaa amadookkokaa moochchisa hochchoo dut mannaa asse'oommo; duunnuwwanne, hoffi duunnuwwannee ki'n bonqoqquwwannee hochchitu'uuyyi amaddamo. Iinniinsi daphphoo luwwi mahim bee'i bikkina baxxam baxo hundam la'oommo; ixxuwwi baaxiil hundim i illagenne caakkaa la'amaakkoohane. Leeshisa foor bee'i qophpha'n waa'uwwinne i uulla bushisso'oo bikkinaa qophpha'n waa'uwwinne wonshito'oo bikkinaa baxxo'i baaxii'l bikkinaa jolli bikkinaa lam suume edaa guzumo'oommo» yukko. Waa'a! Eese egettoottokii iinam malaayye uwwitoottokii atette; hawwi ammanem hincoommi daphphit atette; mulli minaadab uulli tochchiinsi hundiinsim ki beyyo waatta'a «Gaassi niyyanno'ina qophpha'n waa'uwwiinsi bagaan mullek mahim hee'ukkoyyo; ixxuwwi qophpha'n waa'uwwim awwaad bee'an hee'llo'o. Hanqinam manni ixxi gagina qophpha'n waa'uwwa baxeena xanoohonnihe? Eeyya, xanookko; ihukkaarem oo keen hanqo'i waa'uwwayyo» yitamo. «Ee bikkina mulli minaadab hundim i malaayyee lombaa laqqamisa issoommo; an Waa'i ihummisam qoossita'a laqqamo» yukko. Waa'i «Yihuxxi minaadaba, ki'nnuwwi baaxiil xaa'l mu'utinne kitaabamaakko; almaaza yakkam bito xee'aalli mutur kininnem ki'nnuwwi wodanonnee kitimo hincaa'llakkam mu'uxxi buudonnee kitaabamaakko. Ki'nnuwwi oosim latu haqqi lugummuwwannee qeeraa'l duunnuwwi ludonnee yoo ixxuwwi kiti'm beyyuwwaa Asheer misilluwwaa sawwitamuulla. Moo'amoo duunnuwwanne kido'i baaxiilo baxxakkamuulla; uulli hundannem baxxakko'i jolli mashka'inne ki'nnuwwika horaa amaxxaa hundam ki'nnuwwi diina'i massitamisa issoommo; ee'isam kitima hincaa'llakkam mu'uttuwwa hundam ki'nnuwwi diina'i qeefadda'a massitamisa issoommo. Ki'nnuwwina uwwummi uulla fatakitakka'a mattakkamo; i quunqi heer heerinam gii'llisa aphphoo bikkina laqqakkambee'i uullanne ki'nnuwwi diina'ina awwaadaan ikkakkamisina issoommo» yukko. Waa'i «Eese uraa mannanne amma'nnookkok maara edde'u manchom ‹Iina malaayye› yaa bakke'ookkok duumamaakkoohan ihona. Eehido'i manchi ayyim hee'eena xanoobee'i sooqixxi uullannee gogaalli udma'i uullannee mutoo haqqichchisa ihookko. Ixxi hee'oo doollenne hundannem er luwwa moo'eena xanooyyo. «Ihukkaarem xale'i eesenne amma'nnaa hee'oo manchi maasse'amaakkoohane. Ixxi daadoo daajji gadanonne kaasamukkaannisa, wo'i woronnem xapha kaasukkaannisaa shokkiisoo eelliinchonnem quuboobee'aannisa, buyyim latoohaannisa, billi maaragem gogoobee'aannisa, hundi ammanem misha uwwoo haqqichchisaa ihookko» yukko. «Mannika sawwite ayyi la'eena xanookko? Mannik wodan hundi luwwiinsim loboka hantaaraanchoo boqqaa. Ihukkaarem an Waa'i mannika tiiroo woda'n sawwitee saarayyoommo; annannichchom baxu baxisinnee ixxi taakkisinnee guzumo'oommo» yukko. Damiginne amaxxa wixxaa'oo manchi quunqe'ubee'i quunqam qaaphphaa bacoo heedoochchi'nnoohane; harde'oo'm doo'llenne hora hundam hoogookko; lasaanchonne ixxek qawwoom la'amookko. Ni Waa'i min baxamu beyyi gaassiinsim ki'isaa lombinne yoo adilla'n barcu'mmisa. Waa'a! Isra'eelina neeyyat atette; keese uttam keen hundim tuuttamo; heechchina wo'i bu'i ikkitti keese Waa'a utto'i bikkina ixxuwwik summi uullanne kitaabamookko. Waa'a! At eese fayyiise; anim fayye'oommo; at eese gatise; anim xumminne hee'oommo; hundi ammanem an keese galaxxoommo. Minaadab eese «Ermiyaase, Waa'i wocaakko yittoka niina kuttaa hee'llitto; eehannah kaba ihubee'ek mahinatte?» yita'a xa'mmitamo. Ihukkaarem Waa'a! An ixxuwwanne boobana dilliissona keese uunxummi amman bee'e; ixxuwwanne hawwi doolli afoo'isinam mixummoyyo; Waa'a! At kakaa an wocummokaa hundam laqqootto. At iina hawwi ammane maaxamoommi beyyi ikki bikkina muggissitte. Waa'a! Eese hollitam keenonne sholle'nna eebe; ihukkaarem at eese tuussiissitte; ixxuwwi dambaqqamisa isse bagaan eese muggissitte; iiqanta'a xaamteebee'e eddaa eddaa ixxuwwa bi'ise. Waa'i iina «Yihuxxi uulli adilluwwi beero'iinsi fitta'a aaggam minaadaphphi goocannee ee'isam Yerusaaleemanne yoo mulli gooccuwwannee mattaa uulle. An kiina kuroommokam ‹adilluwwii minaadabii ee'isam ka ooxxi gooccuwwinne aaggakkam Yerusaalee'm mannii Waa'ika sagara macceessehe. Ki'nnuwwika foore gatixxitakkeena usheexxaxxi ballanne maham iyyitakka'a Yerusaalee'm gooccuwwinne aaggakkambee'isa ege'llehe. Gaassi ki'nnuwwika anno'o ijaajummisam usheexxaxxi balla keessakka'a egellehe bagaan iyyo iyyitakka'a ki'nnuwwi miniinsi fittakkotte; usheexxaxxi ballanne maham baxxakkotte. Gaassi ki'nnuwwi anno'i i sagara macceesso'oyyo; i ijaajom egetto'oyyo; hore'em xiiqqanta'a iina ijaajanta'a iinniinsi losano aa'imma sabbo'ookko. «Eehannah i woshsha macceessamanemdu ihulas ku minaadab i ijaajo egettamisina kure; usheexxaxxi ballanne matem luwwam iyyita'a beero'i goocinne aaggoone; usheexxaxxi balla keesamaakkoohan issita'a lonsitona bagaan matem baxom baxxoone. «Daawiit adilla'n barcumanne afuutto'i adilluwwi maqi'l daannuwwinne maqirem Yerusaaleem gooccuwwinne aaggamo; ixxuwwim Yihuxxaanninnee Yerusaalee'm minaadabinnee maqire faradonnee faraxxi gaare'ennee saa'llitamo; Yerusaalee'm beero'im hundi ammanem manni wo'mmaa hee'oohan ihookko. Minaadab Yihuxxi beero'uwwiinsi, Yerusaalee'm kululleetanne yoo hoffi beero'uwwiinsi, Biiniyaam uulliinsi, qaala'iinsi, hansawwiinsii woroo'n qariinsii wixxaa waarookko. Ee lasage shokkiisakka'a hincaa'akkam kitimaa mulli kitima, hurbaaxxi kitimaa aduruusaa galaxxi kitiminne maqirem Keesammi i mine eebbamo. Ihukkaarem iina ijaajanchii usheexxaxxi balla keessa'a egerimmii hasisookko; usheexxaxxi ballanne ma'lluwwam iyyita'a Yerusaalee'm ooxxi goocinne aagimmi hasisooyyo; ihukkaarem i ijaajo aa'imma sabba'a kaka issitolas Yerusaalee'm ooxxi gooccuwwii adi'l minneewwii giirinne shookkoo'isa issoommo; giirooma xoo'iseena xanookkok ayyim hee'ooyyo› yitaa kure» yukko. Waa'i iina «Ki'llaa buchchi mu'uta baxoo manchi mine dille; eekke'enne an kiina i asso kuroommo» yukko. Anim ee beyyo maraa buchchi mu'uta baxoo manchi shafe'e laboo luwwanne dora issaa baxukkuuyyi moo'ummo. Buchchi mu'utim ixxi anganne bi'u ammanenne harooma dabaraa qufisaa ixxi hasukkisanne issaa mulli mu'uta baxukko. Ee ammane Waa'i iina «Isra'ee'l minaadaba, buchchi mu'uta baxoo manchi hara hasukkisa issaa baxoohaannisam anim ki'nnuwwanne hasummi luwwa isseena xanoommoyyonnihe? Har buchchi mu'uta baxoo manchi anganne hee'oohaannisam ki'nnuwwim i angannette. An mat uulli minaadaba te'im mat adi'l uulla ‹Xoqoloommo; te'im iiqaa bi'isoommo› yaa wocummi ammane ee uulli minaadab saxxita'a jolliinsi daba'llitolas eeboommoo yaa sawwummi jor luwwa ixxuwwanne issoommoyyo. Mullisinne odim an mat uulli minaadaba te'im mat adi'l uulla ‹Baxoommo; te'im kaasoommo› yaa wocummaa'lleensi oo minaadab iina ijaajantambee'anee jor baxo baxxamanee ikka'a siidantolas issoommo yaa sawwummi eroomma issoommoyyo. Ee bikkina an ixxuwwa guzumo'eenaa ixxuwwanne jor luwwa isseenaa sawwummisa Yihuxxaanninaa Yerusaalee'm minaadabinaa kure; ixxuwwi baaxiilo baximma uttamisinaa ixxuwwi taakkoo ixxuwwi baxoo hundam xabbaa'llamisinaa soge. Ihukkaarem ixxuwwi ‹Mahina neese eekka issinoommo? Hore'em xiiqqinnee boqqoominnee ni sawwixxesanne taakke'nnoommo› yita'a dabattamo» yukko. Ee bikkina Waa'i «Kido'i luwwi kanniinsi illageen ihaada'e mulli minaadaba xa'mmehe; hanqo'isam baajaamotte hee'llo'i Isra'eela shigigaa'oo baxo baxxo'ookko. Liibaanoos kinaam duun baradinne ifiisamubee'i amman yoohonnihe? Duuniinsi dilloo siggaalli wo'i bu'uwwi gogaa la'oohonnihe? Ihukkaarem i minaadab eese xaddo'ookko; awwaad bee'i waa'uwwinam aduruusa wiriistamuulla; oo awwaad bee'i waa'uwwim i minaadab laqqambee'i googonne mattamisa issito'ookko; qolanta'atim gaassi googo utto'ookko. Ixxuwwi uulli heer heerina gadamaakkoohanee udma'aa ihookko; gadaninne higookkok hundim gadimminne horoore heekkeesookko; maalalaatim horoore heekkeesookko. Dir eelliinchi firoo kolli hafachchinne binnoohaannisa i minaadaba ixxuwwi diina'i illagenne binnaa'oommo; iikkam illi kollo ixxuwwiinsi dabaraa afare daba'lloommo; bichchi ixxuwwanne afoo ammanem hore'em hara'mmoommoyyo» yoolla. Minaadabim «Ermiyaasanne mat luwwa issinona; seera losissam qeessuwwi, sogitano uwwitam qoolluwwii hiraago woccam hiraagaanii hundi ammanem ni lambe'enne yo'i bikkina Ermiyaasika woshsha macceesimmiinsi ixxi wocoo woshshinne ixxom kasansona» yito'o. Ee bikkina an «Waa'a! I uunxato macceese; i maso'i eesenne woccam jor a'llancha macceese. Eehannah er baxik bitoom jor luwwa issimmannihe? At ixxuwwanne quuqqoobee'isa an ki illagenne uullaa ixxuwwi bikkina keese uunxummisa sawwihe; ihukkaarem oono'o, ixxuwwi an uboommi bare hinto'ookko. Ihukkaarem kaba Waa'a! Ixxuwwik oos sibaarinne beedditamisaa ixxuwwi gagim bisa'inne ubbamisaa isse; ixxuwwik meenti goonaa oosoo hooggona; goon jabbinne lettona; harde'uwwim oranne beedditona. Ixxuwwanne weeraroo manna dangonne asse'e; ixxuwwi minenne laachchi macceesamona; ixxuwwi iina uboommi bare hinto'ookko; an amadamoommi qaashsham gudisso'ookko. Waa'a! Ixxuwwi eese shiteena a'llanto'isa laqqootto; ee bikkina ixxuwwika jolla uraammo yititte; ixxuwwi baaxiilim shiinshamoo'isa issititte; malaayyaam ki quunqinne kaa'anta'a ubbamisa isse» yaa Waa'a uunxummo. Waa'i iina «Minaadaphphi lambe'iinsii qeessuwwi lambe'iinsii lob keeno doo'llitaa kiinninne maqirem amaddaa mattaa buchchi mu'uta baxoo manchi miniinsi harachcho bitaa'e. Buchchi mu'uxxeka gala'a uunjakkam Gooc kollinne aa'llaa Hiinoo'm beet Cebba mare; eekke'ennem an kuroommi luwwa «Adilluwwii Yerusaalee'm minaadabii hundim Isra'ee'l Waa'i ihummi gogoxxi Moollanni Waa'i ki'nnuwwina kuroommi woshsha macceessehe; macceesoo manni maccina shigigaa'oo jor boobana ka beyyonne eeboommo. Mashka'oomim ku minaadab eese uraa qophpha'n waa'uwwina kitima hincaa'imminne ka beyyo haashaassito'i bikkinatte; ixxuwwi, ixxuwwi anno'ii Yihuxxi adilluwwii ee waa'uwwi bikkina laqqam luwwi bee'e; odim ixxuwwi ka beyyonne muccur mannik xiig dunamoo'isa issito'ookko. Ixxuwwi oosom kitim issita'a shokkiisseena Baa'aala yakkam qophpha'n waa'ina kiti'm beyyo baxxo'ookko; eehid issitamisina an ijaajummoyyo; hore'em ka woshshi bikkina sawwummoyyo. Ee bikkina ku beyyi Toofeeta te'im Heenoo'm Cebba yimmi gataa Duranchi Cebba yakkam amman waarookko. Yihuxxekii Yerusaalee'm minaadabii sawwito'i luwwi hundim ka beyyonne wo'mmoobee'isa issoommo; ixxuwwi diina'i illagenne kaa'antamisaa ixxuwwi foore shiteena hassam kee'n angannem ubbamisaa issoommo; ixxuwwi leesham iima'n ammarii uulli moochchii itoo'isa issoommo. Ka beero'onne kee'mmaalli hawwo asse'aa bi'isoommo; ee bikkina higookkok hundim afu bichchanne maalalaa hoola ixxena yookko. Diina'i beero'ooma kibbita'a minaadaba shiteena u'nnissamo; beero'oom lobakatisa kibbamaakkoo bikkina woronne yo'i manni hundim ixxuwwina'i ixxuwwim itantamo; ixxuwwi gaqqi oosom ihuta'n ittamo» yukko. Ee lasage iinninne maqire matto'i manni illagenne ee harachcho iiqoommisina ijaajukko. Gogoxxi Moollanni Waa'i ixxuwwina kuroommisina «Ku iiqamu harachchi daba'llaa somameena xanamoobee'isam ku minaadabii ku beero'ii ee'isam iiqamookko; manni lehu leesha waammitam beyyo hoogga'a Toofeeta yakkam beyyonne waammitamo. Ka beero'oo ka beero'i woronne hee'llam mannaa hundam Toofeetanne issummisam issoommo. Yerusaalee'm minaadabii adilluwwii hee'llam minneewwi ee'isam mi'n illichchonne iima'n qooccanchuwwina aduruusa wiriissakkam beyyoo qophpha'n waa'uwwina woyi'n diqaasa dunakkam minneewwaa hundam Toofeetisa haashaarammi beyyi ihoo'isa issoommo› yoolla yitaa kure» yaa ijaajukko. Ee lasage Waa'i ixxi sagara kuroommisina ijaaju Toofeeta yakkam beyyiinsi daba'llaa waarummo; Keesammi Minenne manni wixxoo beyyonne uullaa minaadab hundinam «Gogoxxi Moollanni, Isra'ee'l Waa'i ‹Ka beero'annee kululleetanne yoo gattuwwannee hundannem waarookko yaa kurummi boobana eeboommo; mashka'oomim ixxuwwi xiiqqanta'a i sagarina ijaajanto'oyyo› yoolla» yaa kurummo. Keesammi mi'n gassaanchi hee'u Iimeer beet Phaashihuur ka an wocummi woshsha macceesaa eese aphphisukko. Keesammi Minenne hanaa'n kollinne yoo Biiniyaam Gooca yakkam beyyonne i lokko gudeeranne aagisaa karukko. Daram Phaashihuur eese karatiinsi tirukko; ee lasage an ixxena «Kanniinsi eehid Waa'i ki summa Phaashihuur yaa weeshooyyo; kaba kiina fissu summi ‹Beyyi hundim Dambaqa› yoohane. Waa'i gagim ‹An keese ki gaginaa ki beshinaa dambaqa qooccitoohan isseenatte; ki illi moo'onam ki besh diina'i bisa'inne letamo; minaadaba hundam Baabiloo'n adi'l anganne higsaa uwwoommo; Baabiloo'n adilim kolli manna qeefadaa massookko; kolli manna odim keyyem shookko. Ee'isam ka beero'ika hora hundam diina'i bogga'a massitamisina, wixxaa'llakko'i horaa amaxxaa adilluwwika bito xee'aalli mu'utaa hundam guullita'a Baabiloona massitamisa issoommo. Phaashihuura, atii ki abaroosii hundim qeefadantakka'a Baabiloona mattakkamo; atii kiinninne maqire qophpha'n hiraago wocco'i ki beshii eekke'em letakka'a waammantakkamo› yoolla» yummo. Waa'a! At eese qawwiissitto; anim qawwiisamummo; at iinniinsi malaayyaamo; ki malaayyim eesenne lobakata lophphaakkoohane; manni hundim ballina ballina eesenne osarukkuuyyi naacukko. An wocoommi amman hundam «Dambaqaa! Bichchaa!» yummuuyyi laaroommo. Waa'a! At ijaajjitti hiraaqqi sagara wocummi bikkina game'llakkamanee gadakkamanee ihaammo. Ihukkaarem «Kanniinsi eehid Waa'ika summa ki'isoommoyyo; ixxi summinnem wocoommoyyo» yummita'n ki sagar i woronne gii'llisa aphphukko; i miq woronnem gii'l kasha'llisa ihukko; i woronne maaxoommo yumta'n ifiisaa caawweena xanoommoyyo. Lobakat manni baddita'a hashaashshitu'uuyyi ‹Kaba Ermiyaase kasasimmina danaam ammane› yitu'uuyyi macceesaammo; iina hincee'n beshim ikkota'n ‹Ermiyaas huushameena xanookko; eehidette ihulas neese ixxo amandaa baado miqinsoommo› yita'a an huushamoommisa egettamuulla. Ihukkaarem wodaamoo malaayyaamoo ikkaattoo Waa'a! At iinninne maqire yoonto; ee bikkina eese hollitam keen hundim qolantamo; ixxuwwi sawwito'okim wo'mmooyyo; hundem luwwim wo'mmeena xanoobee'i bikkina heer heerinam sholle'llamo; ixxuwwikim sholle'n xadamoobee'an ihookko. Hundam xantoo Waa'a! Ihukkaarem at hundem luwwam xabbi saarayyitootto; ixxuwwi wodanonnee tiironnee maaxamu luwwa hundam laqqootto; i meto'om kiina kuraammoo bikkina i maso'ika baado fittittuuyyi i illinne moo'oommisa isse. Waa'ina zammallehe; Moollannam galaxxehe; ixxi u'nnanto'i keeno jor kee'n wodiinsi gatisookko. An qaramummi balli duumamaakkoohan ihona; iyyumma eese qatto'i balli maasse'amaakkoohan ihoone. Iyyannina «Kiina goonchi beet qaramaakko; liirame» yaa mishiraachcha kuru manchi duumamaakkoohan ihona. Oo manchi Waa'i qishixxoo'n bi'isu beero'uwwisa ihona; darinne jabbika laachcha macceesona; ballanne odim o'l dambaqa macceesona. Mashka'oomim ixxi eese an qaramoo'nnim shukkoyyo; iyyummi godabim iina waammi beyyi ihukkoyyo. Hawwoo kichchechchaa moo'eena i umu'l doollem sholle'nninne guulleena mahinam iyyummi godabiinsi firumda'e? Adil Sedeeqiyaas Malkiy beet Phaashihuuraa Ma'iseey beet hee'u qeessichchi Safooniyaasaa i beyyo asse'aa «Baabiloo'n uulli adil Nabukadanaxoor ixxi gogotinne maqirem ni beero'o weeraraa amadeenatti ihu bikkina Waa'i illagee'nnisam aganna baxaa or waaroobee'isa issoo'isina qaqqissaa Waa'a uunxe» yaa xa'mmisukko. Ee ammane wocoommi sagara Waa'i kuraakkoo bikkina i beyyo asse'anta'a waatto'i manni Sedeeqiyaasina «Isra'ee'l Moollanni Waa'i, ‹Sedeeqiyaasa› ki beero'i ootiinsi biireen keese kibbito'i Baabiloo'n adilinnee ixxi gogotinnee orantootti o'l mu'ut hundim keesenne daba'llaa keesem qasoo'isa issoommo; oo o'l mu'utim beero'i lambe'enne tuubamoo'isa issommo. I malaayyee kee'mmaalli i quunqaa bala'aa moo'amoo'isa issaa an gagim kiinninne oramoommo. Ka beero'onne hee'oo mannaa fooraam diinatee aphphisoommo; kee'mmaalli jabbinnem letamo. Keesee ki gassaanoo sibaariinsi, oriinsii jabbiinsii gattam minaadabaa hundam adil Nabukadanaxooraannonnee keese shiteena hassam diina'i angannee higisaa uwwoommo; ixxim qishixxoo'n te'im mishoo'n shookko bagaan matom urooyyo; an Waa'i kaka wocaammo› yoolla yitakka'a kullehe» yummo. Ee lasage Waa'i ixxi minaadabina «Oono'o, macceessehe; an Waa'i heechchi kollonnnee leh kollonnee massoo googo ki'nnuwwi illagenne dissaammo; lamiinsim matooma doo'llehe Kaba ka beero'onne gatookkok hundim oriinsi gatukkaarem sibaarinne lehookko; sibaariinsi gatukkaarem jabbinne lehimma gatooyyo; ihukkaarem ka beero'o kibbita'a yo'i Baabiloo'n manni beyyo maraa anga uwwoo manchi ixxi lehooyyo; mulleka hoogukkaarem ixxi foochchooma gatixxookko. Ku beero'i bi'oo'isina murte'aammo; hore'em qishixxoommoyyo; Baabiloo'n uulli adilina higisaa uwwoommo; ixxim giirinne shokkiisookko; An Waa'i kaka wocaammo» yaa kuroommisina ijaajukko. Yerusaaleema, biir uullanne yoo geejji ki'nnesa cebbuwwiinsi hanaanim fittaa siidantoolla, ihukkaarem an kiinninne oramoommo; ayyim keese iggookkokaa girbam gindaa aagookkokaa labissittoyyo. Ihukkaarem at hawwodditti hawwojji hundinam an keese guzumo'oommo; ki adilla'n min giirinne shokkoo'isa issoommo; oo giirim ee kululleetanne hee'oo luwwa hundam itookko; an Waa'i kaka wocaammo» yoohane hee'ukko. «An Waa'i hanqo'i oogato'o oogattakkamisinaa hanqo'i baxo baxxakkamisinaa ijaajaammo; mat manchi mullaannika malaayyinne hooraa damigoobee'isa egellehe; waaraanoo annaa amaa hooggo'i adaraar oosoo busar meentoo wor amaddakka'a barche'e baxxakkotte; ka keesamaakkoo beyyonnem muccur manchika xiiga duntakkotte. An ijaajummisamdu issitakkolas Daawiit shumo'i adilla'n barcumiinsi dillitamoyyo; gaassisam daannuwwinnee minaadabinnee maqirem faraxxi gaare'ennee faradonnee saa'llitakka'a ka adilla'n mi'n ooxxi gooccuwwinne aaggakkeena xantakkamo. Ihukkaarem i ijaajo egettakkobeelas ku adilla'n min gindamaa uboo'isa i gagannem hide'aa ki'nnuwwina la'isoommo. An Waa'i kaka wocaamo. «Yihuxxi adilluwwik adilla'n min Gala'aaxxi uullisaa Liibaanoos duunnuwwisaa mishisoohane; ihukkaarem ayyim hee'oobee'i udma'i issoommo. Ee mine ginditam manni heedduwwa amadda'a waattamisa issoommo; mishisoo Liibaanoos uulli digibinne baxamaakkoo utubbuwwam mutta'a giiranne eddamo. «Ee lasage eekkeen higoo mulli uulli manni ‹Ka lob beero'uwwonne Waa'i ka bichcha eebukkok mahinatte?› yaqqantamo. Ki'nnuwwi iinninne ki'nnuwwi Waa'inne maqire aaggakko'i hidi'l sagara ginditakka'a qophpha'n waa'uwwanne otossitakko'i bikkinaa awwaaddakko'i bikkinaa ihukkisa laqqamo» yoolla yummo. Yihuxxi minaadaba, adil Iyyoosiyaas bikkina wi'llitakkotte; ixxi lehonnem kichche'llakkotte; ihukkaarem Iyyoosiyaas beet Shaaluuma la'mmaagge daba'lloobee'i beyyo massakkam bikkina qaramu uullam la'mmaagge moo'oobee'i bikkina ixxena qaraaraalli wi'llo wi'llehe. Ixxi anni beyyonne Yihudanne adil ihu Iyyoosiyaas beet Shaaluum bikkina Waa'i «La'mmaagge daba'lloobee'i qee'l uulla marookko. Ee qeefadamaa maru uullannem lehoo bikkina la'mmaagge daba'llaa ka uulla moo'ooyyo» yukko. Damiginne ixxi mine baxoohaannina, boqqoominnem ixxi mi'n fooqa baxoohaannina, ixxi besham kora'am baxisoohaanninaa ixxuwwi malaayyikam miqoo'n baxisoo manchinaa aayye! Ku manchi «I gagina haraar fooqinne maqirem lob mine baxoommo; ee'isam haraar maskoottuwwa fissoommo; minoomam Liibaanoos digiphphi qabar ca'llinne wereeggisoommo; baar kashar qalamam laboommo» yookko. Mulli mannaanniinsi loboka digiphphi haqqinne ki mine baxxitti bikkina er adila labixxitaatennihe? kiyyanni hanqo'anee xabbeenaa ihu bikkina ixxi umu'l doolli hundim liiranchinne wo'mmaakkoohan hee'ukko; ixxi baxoo bax hundim xabbam hee'ukko. Buxinaa hawwaaninaa hanqa oogatoo bikkina hundem luwwim xabbam hee'ukko; Waa'a la'imma yimmi eehaneyyonnihe? Ihukkaarem at ki gagina awwaadoo luwwi xale'e laseessoolla; ee bikkina muccur manna shitoolla; ki minaadabam damiginne wor amaddoolla; Waa'i kaka wocaakko. Ee bikkina Waa'i Yihuxxi adil ihu Iyyoosiyaas beet Iyyoo'aaqeem bikkina wocoo luwwi «Ixxi lehoo ammane ‹Aayye! Aayye! Iyyabbichcho› yakku'uuyyi wi'llakkamoyyo; hore'oomam ‹I moollanna, adila, Aayye!› yukkuuyyi wi'lloo manchi hee'ooyyo. Leeshoomim lomba hoogaa gosaasakku'uuyyi Yerusaaleem ooxxi goociinsi tochchonne halla waammakkamaannisa waammamookko» yoohan hee'ukko. Yerusaalee'm minaadaba, ki'nnuwwi o'l besh hundim kaa'anto'i bikkina Liibaanoos uulla mattakka'a laallehe; Baasaa'n uulla mattakka'atim wi'llehe. Moo'aaphphi uulli duunnuwwanne fittakka'atim weeshshehe. Godditakka'a hee'llakko'i ammane Waa'i ki'nnuwwina wocukko; ihukkaarem ki'nnuwwi macceesimma sabbakko'o; Ki'nnuwwi umu'l doolli hundannem xiiqqaammuwwi ikkakko'o; Waa'inam ijaajancha sabbakko'o. Ki'nnuwwi baxxakko'i jolli bikkina hafachchi bura'a fii'aa massoohaannisa ki'nnuwwi awwonsaan fii'antamo. Ki'nnuwwi bakke'llakko'i o'l beshim qeefadanta'a mulli uulla mattamo; ki'nnuwwannem sholle'nnii tuullii afookko. Kabadoomina'i Liibaanoosiinsi eebakka'a digibinne baxakko'i mi'n woronne xumminne usheexxitakka'a hee'llakkamo; ihukkaarem qattam meentichchosa xuuchchi ki'nnuwwa amadoohaare maha ikkakkamahe? Iyyoo'aaqeem beetina Ikkooniyaanina Waa'i «Hanqinam an hee'oommi Waa'a; at iihaannonne makki anganne yoo qubakkichchi koobo'isa ikkita'nnim keese fissaa ubbuusoommo. Keese shiteena hassam keeninaa at lobakata badditoo Baabiloo'n adil Nabukadanaxoorinaa ixxi gogotinaa higisaa uwwoommo. Keesee kiyyummaa qarantakkobee'i uullanne qeefadantakka'a eekke'em letakkamisa issoommo. Ka uulla la'mmaagge moo'lleena quluxxootto; ihukkaarem la'mmaage daba'llitooyyo» yukko. Anim «Ku adil Ikkooniyaana uunjakka'a lasage ayyim hasoobee'i iiqamu harachchisa ihukkonnihe? Ixxii ixxi oosii laqqambee'i uulla qeefadanta'a matto'ok mahinatte?» yummo. Uulla, uulla, uulla, oono'o, Waa'ika sagara macceese; Waa'i «Kaka kitaabe; ku manchi ixxeka ooso hundam hoogaa hee'oo heechchim xabboobee'isina oogatamaakko; Daawiitikam adillano lagaa'eena ixxi shumo'iinsi Yihudanne adil ihoo ixxi shumo'iinsi hee'ooyyo; an Waa'i kaka wocaammo» yukko. Waa'ina allaachchi ihu ixxi minaadaba binnaa'llam keeninaa bi'issam awwonsaaninaa aayye! Isra'ee'l Moollanni Waa'i ixxi minaadaba egettam awwonsaanina «I minaadaba laboo'isinne egettakko'oyyo; baasam hollitakka'a binnaa'llakko'o; ee bikkina baxxakko'i jollina hundinam ki'nnuwwa guzumo'oommo. Gatto'i i minaadaba binnaa'ummi uulliinsi hundiinsim wixxaa'aa ixxuwwi gaqqi uulla dabaroommo; eekke'em lobakat ooso qattam bikkinam fikkaannita'a dut ikkamo. Ixxuwwa egettam awwonsaano doo'lloommo; i minaadab kanniinsi eehid baddimmii muggimmii bee'eka hee'llamo; anim la'mmaagge ixxuwwa guzumo'oommoyyo; ixxuwwiinsi matim xa'ooyyo; an Waa'i kaka wocaammo» yoolla. Waa'im «Oono'o, Daawiit shumo'iinsi muccur ihaakkookkoka adillanina doo'lloommi amman waarookko; oo adilim qooroominne gassookko; uullanne hundannem hanqo'i oogatoo xabbee'n baxoo baxookko. Ixxi adilla'n doollenne minaadab gatimma siixxitamo; Isra'ee'l minaadabim xummanne hee'llamo; ixxi summim ‹Waa'i niina muccurooma› yamamookko. «Ee bikkina manni ‹Isra'ee'l minaadaba Gibxi uulliinsi fissu Waa'i la'e› yaa hide'oobee'i amman waarookko. Ihukkaarem eehanni bikkenne ‹Isra'ee'l minaadaba hanaa'n qarinne yoo uulliinsee binnita'a hee'llam mulli uulluwwiinsee fissu hee'oo Waa'i la'e› yita'a i summinne hide'llamo; ee lasage ixxuwwi gaqqi uullanne hee'llamo» yukko. Hiraagaa'n bikkina sawwoommi ammane i wodan kichche'ookko; i miqim huxe'ookko; Waa'i bikkinaa ixxi keesammi saga'l bikkinaa woyi'n diqaasa agaa dimbu manchisa ihaammo. Uulloom Waa'a laggo'oo saalmaachchitam keeninne wo'mmaakko; hiraagaanim ixxuwwika malaayye seerbee'isa awwaaxxitamo; jolli googom awwontamo; Waa'i duunchiinsi ki'ukkok uulli wi'llokko; allaachchi biirim gogaakko. Waa'i «Hiraagaa'nnekii qeessuwwikii heechchi muccuroo'm googiinsi firaakko; mullek gataa keesamaakkoo I Minenne ixxuwwika jor baxo moo'aammo. Ee bikkina ixxuwwik goog luxuunxisoo uullisa ihookko; tuunsonne taakke'llam ammane googo huushanta'a ubbamo; guzumo'antam ammane jor luwwa ixxuwwanne eeboommo; an Waa'i kaka wocaammo. Samaare'i hiraagaan baxxo'oo shigigaa'oo luwwa moo'aammo; ixxuwwi Baa'ool summinne woccu'uuyyi i minaadab Isra'eela huushissamuulla. Ihukkaarem Yerusaaleemanne yo'i hiraagaanim kanniinsi baas jollem baxxu'uuyyi moo'aammo; ixxuwwi saa'llamo; qophphanom woccamo; manna jor baxina bootaassitamo; eehanniinsi ki'ukkok minaadab jor baxiinsi daba'llitamoyyo; ee bikkina ixxuwwi i illagenne Soddo'm minaadabiinsii Gomo'l minaadabiinsii loboka jor keeno. «Eehannah an gogoxxi Moollanni Waa'i Yerusaalee'm hiraagaanina; ‹Uullanne hundannem lagimmi lophphoo'isa issito'i bikkina qaraaroo buyya ittamisinaa shoo qaraare aggamisinaa issoommo› yoolla» yukko. Gogoxxi Moollanni Waa'i Yerusaalee'm minaadabina «Ku hiraagaan woccam woshsha macceessakkotte; ixxuwwi qophpha'n neeyyaxxi sagarinne ki'nnuwwina woccamo; woccamokim ixxuwwi sawwixxane bagaan an wocummaneyyo. I sagara macceesseena hassobee'i minaadabina ‹Hawwi bee'e; ki'nnuwwina xummi ihookko› yitamo; xiiqqamoohaannina hundinam ‹Hawwi bee'e; booban keesenne afooyyo› yitamo» yukko. Ixxuwwi lambe'iinsi Waa'i illagenne uullaa ixxi sagara macceesukkokii ee sagarinam beyyo uwwaa ijaajamukkokii ayyette? Oono'o, Waa'ik quunqi boqquwwi kee'n horoorenne wiisho'aam xee'nnisaa qoxxaalli hambu'llamisaa dillukkuuyyi moo'e. Waa'ik quunqi Waa'i sawwixxeka hundam wonshoo'n hore'em daba'llooyyo; minaadabim ee hundam ka lasage erisa laqqamo. Waa'i «Ku hiraagaan ixxuwwi doo'llinnem qaqqissa'a matto'o bagaan an asse'ummoyyo; ihukkaarem ixxuwwi woccamisina an uwwumbee'i hiraaqqi sagaram i summinne woccamuulla. I sogitano aa'llo'oota'n i sagara minaadabina kuttam hee'llo'o; boqqi googiinsii ixxuwwi jor baxiinsii daba'llitamisina issimma xantam hee'llo'o. «An hundem beyyonnem hee'oommi abbis Waa'a bagaan qee'l Waa'ayyo. An iimanennee uullannee yoommaneyyonnihe? manni daphphanne maaxamuta'n an moo'oommoyyonnihe? I summinne qophphano woccam hiraagaan yitam luwwa macceesummo; ixxuwwim ‹haqaawwo haqaawwe'aammo; haqaawwo haqaawwe'aammo› yitu'uuyyi laattamo. Oo hiraagaan ixxuwwi gagim qooccito'i qophpha'n sagarinne i minaadaba huushissamok hinki balli afeebe'e? Ixxuwwi anno'i eese xaddo'isaa Ba'aala yakkam qophpha'n waa'ina otossito'isaa ixxuwwi kuttam haqaawwinne i minaadab eese xadoo'isa issitamoka labisso'ookko. Haqaawwo haqaawwe'u hiraagaanchi yoolas xale'i ee haqaawwooma kurona; ihukkaarem i sagara macceesu hiraagaanchi amma'nnanchinne xale'i ee sagara kurona; bura'ina arasinne maqire mah mateeyyoom hee'aate? I sagar gii'llisaa kina iiqoo fanxiisisaa yoohane. Ee bikkina mat mullaanniinsi sagara game'aa ‹Kuk Waa'i sagara› yikkuuyyi wocoo hiraagaano an saboommo. Ee'isam ixxuwwi sawwitiinsi ki'issa'a ‹Kuk Waa'i sagara› yitu'uuyyi woccam hiraagaano saboommo. Oono'o, an Waa'i wocoommi woshsha macceessehe; ixxuwwika qophpha'n haqaawwo an saboommo; ee haqaawwo woccu'uuyyii qophphaninne birantu'uuyyii i minaadaba hanqo'i googiinsi huushissamo; an ‹Mallehe› yaa asse'ummoyyo; minaadabinam awwaadoo luwwa uwwito'oyyo. An Waa'i kaka wocaammo» yoolla. Waa'i iina «Ermiyaasa, hiraagaanchi te'im qeessichchi te'im i minaadabiinsi matoom ‹Waa'ik iyyi maruwwa?› yaa keese xa'mmuta'n ‹Waa'ik iyyi ki'nnuwwa; ee bikkina ki'nnuwwa ixxi illagiinsi hooreenatte› yitaa kure. Hiraagaanchi te'im qeessichchi te'im i minaadabiinsi matoom ‹Kuk Waa'i iyyo› yaa woculas ixxoo ixxi abaroosaa guzumo'oommo. Ee bikkenne annannichchim ‹Waa'ik dabachchi maruwwa? Waa'i wocukkok maha?› yaa ixxi beshaa ixxi qarmannaa xa'mmimmi hasisookko. Ihukkaarem kanniinsi eehid ayyi manchim ‹Kuk Waa'i iyyo› yaa wocimmi hasisooyyo; Waa'ik sagar hinkid iyyi iheena xanookko? Ihukkaarem ki'nnuwwi gogoxxi Moollanni Waa'ika hee'oo sagara boqqissakkamuulla. Ermiyaasa, hiraagaanchina ‹Waa'i kiina mah dabachcha uwwukko? madu wocukko?› yitaa xa'mme. Ihukkaarem i ijaajo gindita'a ‹Kuk Waa'i iyyo› yita'a woccaman ihulas ‹Kuk Waa'i iyyo yitakkotte› yaa asse'ummaarem ixxuwwi ‹Kuk Waa'i iyyo› yito'i bikkina ixxuwwaa ixxuwwi anno'ina uwwummi beero'oo uunjoommisaa i illagiinsi bi'isoommisaa kure. Hore'em xadamoobee'i heer heeraxxi tuullaa sholle'nnaa ixxuwwanne eeboommo» yukko. Baabiloo'n adil Nabukadanaxoor Iyoo'aaqeem beet hee'u Yihuxxi adila Ikkooniyaana, Yihuxxi minaadaphphi awwonsaano, ee'isam anga lachchi mannaa woqqaaccaa Yerusaaleemiinsi qeefadaa Baabiloona massaa lasonne oda'i mishika lam sananna Keesammi Mi'n illagenne Waa'i moo'isukko. Luxxi sananni mulli keeniinsi gaassaa mishu danaam oda'i misha amadaakkoohane; la'm sananni odim itisoobee'i bi'aakkoo oda'i mish yoohane. Waa'im «Ermiyaasa, ku moo'lloo luwwi maruwwa?» yukko. Anim «Oono'o, oda'i misha moo'oommuulla; danaam mish lobakata mishisoohane; ihukkaarem bi'u mish lobakat jor ihu bikkina itakkeena awwaadoobee'ane» yummo. Ee bikkina Waa'i «Isra'ee'l Moollanni ihummi Waa'i Baabiloo'n uulla mattamisa issummi minaadaba ka danaam oda'i mishisa moo'oommo; eroomminnem sawwoommo. Ixxuwwi heechchi bikkinam sawwaa ka uulla daba'llitamisa issoommo; an ixxuwwa baxoommo bagaan gindoommoyyo; kaasoommo bagaan xoqoloommoyyo. An Waa'i ihummisam laqqamisa issoommo; ee lasage wo'm wodaninne i kollonne daba'llitam bikkina ixxuwwi i minaadab ikkamo; anim ixxuwwina Waa'i ihoommo. «Ihukkaarem Yihuxxi adila Sedeeqiyaasaa ixxi kululleetanne yo'i ixxi gassaanoo, ee'isam ka uullanne gatto'i Yerusaalee'm mannaa Gibxi uulla matto'i mannaa hundam itakkambee'isa ihaa lobakata bi'u jor oda'i mishisa sawwoommo. Qeefadanta'a binnitamisa issummi uulli minaadaphphi illagenne hundannem sabanto'oohane, game'llakkamane, ixxuwwi bikkina wocakkamane, gadakkamanee duumanto'oohanee ikkamisa issoommo. Ixxuwwinaa gaassi ixxuwwi anno'inaa uwwummi ka uullanne matem manchim gatoobee'isa orinne, sibaarinnee jabbinnee beedditamisa issoommo» yukko. Yihuxxi adil hee'u Iyyoosiyaas beet Iyyoo'aaqeem adil ihu soo'l hiinchonnee Nabukadanaxoor Baabiloo'n uullanne adil ihu luxxi hiinchonnee Yihuxxi minaadabina hundinam Waa'ik sagar i beyyo waarukko. Ee bikkina Yihuxxi minaadabinaa Yerusaaleem beero'i manninaa «Amoon beet Iyyoosiyaas adil ihu tommiinsii sas hiinchiinsii ki'isaa kaballi afeebe'e lamiyyinaa sas hiinchinaa Waa'ik sagar i beyyo waaram hee'ukko; ixxi sagaram ki'nnuwwina edaa edaa wocimma urummoyyo; ihukkaarem ki'nnuwwi qoossitakka'a macceessakko'oyyo. Waa'i ixxena awwaaddam hiraagaano edaa edaa ki'nnuwwi beyyo asse'uta'nnim ki'nnuwwi qoossitakka'a macceessakko'oyyo. Ixxuwwim ‹Waa'i ki'nnuwwinaa ki'nnuwwi anno'inaa uwwu ka uullanne heer heerina hee'llakkeena xantakkamisina jor googiinsii jor baxiinsii daba'llehe. Qophpha'n waa'uwwam laseessakkotte; ixxuwwinam awwaaddakkottee otossitakkottee; ki'nnuwwi anginne baxxakko'i qophpha'n waa'uwwina otossitakka'atim Waa'a quuqissakkotte; ka ijaajom egettakkolas ixxi ki'nnuwwa guzumo'ooyyo› yito'o. Waa'im ‹I woshsha macceessakko'oyyo; ki'nnuwwi angiinne baxxakko'i qophpha'n waa'uwwinnem eese quuqissakko'ookko› yoolla. «Ixxi sagarina ijaajancha sabbakko'i bikkina gogoxxi Moollanni Waa'i ‹Oono'o, hanaa'n qarinne yo'i minaadabaa i awwaadaanchi ihu Baabiloo'n adil Nabukadanaxooraa weeshoommo; Yihuxxi minaadabaa woronne hee'llam keenoo ee'isam gabalanne gatto'i minaadabaa bi'issamisina ixxuwwa woroommo; ka uulla gaba'l uullinne maqirem moo'akkeena baddisoohanee manni osaroohanee iheebe'i afeebe'e heer heerinam gindamaakkoo uulli ihoo'isa issoommo; an Waa'i kaka wocaammo. Liiranchik, ilillaaxxekii bollochcho'i kajji sagarii hee'oobee'isa issoommo; ayyi manchim hurbaata liitoobee'isa te'im hiimonne caakka caakkisoobee'isa issoommo. Uulloom hundim gindamaakkoohanee udma'aa ihookko. Ku minaadabii ixxuwwi kululleetanne yo'i mulli minaadabii Baabiloo'n uulli adilina lamarayyi hiincho awwaadaan ikkamo. Ee lasage lamarayyi hiinchi beeddoohaare Baabiloo'n uulla, minaadabaa ixxuwwi adilaa ixxuwwi baaxii'l mashka'inne guzumo'oommo; Baabiloo'n uullim heer heerinam gindamaakkoohan ihoo'isa issoommo. An Ermiyaas kollinne ihaa minaadab hundannem eeboommo yummi ka kitaabanne kitaabamu booban hundam Baabiloo'n uullanne dilliisimminne guzumo'oommo. Baabiloo'n minaadab baxxo'i jollina hundinam guzumo'antamisa issoommo; dut minaadabii lob adilluwwii agiddano gassitamo› yoolla» yummo. Isra'ee'l Moollanni Waa'i iina «I quunqinne wo'mmaakkoo woyi'n diqaasika humbullo i angiinsi aa'e; an asse'oommi minaadaphphi beyyi hundam mattaa aggamisa isse. Ixxuwwi hanenne asse'oommi oriinsi ki'ukkok ka humbulliinsi aggam ammane ixxuwwi gaga huushsha'a tartaritamo» yukko. Ee bikkina humbullooma Waa'i angiinsi aa'aa ixxi asse'u minaadaphphi beyyo hundam maraa aggamisa issummo. Yerusaalee'mmekii Yihuxxi beero'ikii minaadab adilluwwinnee gassaaninnee maqire ka humbulliinsi aggamisa issakko'o; ee bikkina oo beyyuwwi kaballam moo'akkeena lobakata baddisoo'isam udma'a manni naacoohanee duunchi beyyoo ihukko. Gibxi uulli adil Faari'oona, ixxi gassaano, daannuwwa, minaadabii hundim, eekke'enne hee'llam hamaarammi minaadaba, Oox uulli adilluwwa, Asqaloonanne, Gaaza'anne, Eeqiroonannee Ashdoodannee gatto'i Filisxee'm adilluwwa, Eedooma, Moo'aaba, Amoona, Xiiroos adilluwwaa Siidoo'n adilluwwaa, hundam Meedeteraaniyaa'n dambalaq kululleetanne hee'oo uulli adilluwwaa Daadaa'nnekaa, Teemaa'nnekaa Buuzikaa horoo'l saraata gundissa'a muttam minaadaba, Araphphi uulli adilluwwaa uulli udma'anne hee'llam hamaarammi minaadaphphi adilluwwaa, Zamiirika, Eelaa'mmekaa Meedoo'n adilluwwaa hundam Qee'llonnee abbisonnee yo'i hanaa'n qarinne yo'i adilluwwa hundam tarinne tarinne uullanne yo'i minaadab hundinam ka humbulliinsi agisummo; lasaanchonnem Baabiloo'n uulli adil ka humbulliinsi agookko. Ee lasage Waa'i iina «Isra'ee'l Waa'i ihummi gogoxxi Moollanni Waa'i ixxuwwanne eeboommi oriinsi ki'ukkok dimbita'a uwwe'lleebe'ee ubba'atim ki'imma hooggeebe'ee aggona ijaajoommisa minaadabina kure. Humbullooma ki angiinsi aa'lla'a agimma sabbolas ‹Gogoxxi Moollanni Waa'i ka humbulliinsi aggakkamisina ijaajaakko› yitaa kure. Bi'isimmooma i summinne weeshamu beero'inne asheeroommo; eehannah guzumo'anchiinsi xottamoka labissa'atennihe? An uullanne hee'llam minaadabanne hundannem ora eeboommi bikkina guzumo'anchiinsi gatookkok hore'em hee'ooyyo; an gogoxxi Moollanni Waa'i kaka wocaammo. «Ermiyaasa, atim an kiina kurummi sagar hundam alallaatimmi hasisookko; ka minaadabina ‹Waa'i iimaninne lob sagara macceesisoolla; ixxaanniinsi keesammi heechchi beyyiinsi guga macceesisoolla; uullannem lob sagara macceesisoolla; woyi'n misha ciinsitam kee'nnisam lob sagarinne wocoolla; uullanne hee'llam keen hundannem lob sagara macceesisoolla. Ixxi sagarim uulli tochchi afeebe'e afookko; Waa'i minaadaba hundam kasasookko; oogaxxi beyyom ixxuwwa worookko; jor keenom lehinne guzumo'ookko. Waa'i kaka wocaakko› yihe» yukko. Gogoxxi Moollanni Waa'i «Oono'o, uulli minaadab hundannem kor korinne booban waarookko; malaayyaam hambu'llam hafachchim uulli tochchiinsi ki'ookko. Ee ammane Waa'i lehinne guzumo'oo mannik leesh uulli tochchiinsi tochchi afeebe'e binnookko; wi'llookkokii ki'isaa waammookkokii hee'ooyyo; ee bikkina haccisa uunjantamo. «Ki'nnuwwi, awwonsaan wi'llehe; ki'nnuwwi minaadaphphi egeraan sagara iimaa'llakka'a ‹Aayye! Aayye!› yi'llehe. Gii'l buchchanne biqqiiqqitakku'uuyyi kichche'llehe; hundim durantakkam amman afaakko; bito xee'aalli buchchi mu'ut ubaa iiqamaa lasonne binnoohaannisa ki'nnuwwim binnitakkamo. Awwonsaanina gibbam beyyi bee'e; minaadaphphi egeraanim xotteena xantamoyyo. Allaaraanim laattamo; Waa'i allaachchi beyyo bi'isu bikkina diinaxxi anno'i qaraaraalli wi'llo wi'llitamo. Malaayyaam Waa'i quunqiinsi ki'ukkok ixxuwwi xumminne hee'llam beyyi gindamaakko. Wor amaddam kee'n bisa'innee malaayyaam Waa'i quunqinnee uulli diihoo ammane hobbichchi geex garoo beyyo uraa giboohaannisa ixxuwwim gibbamo» yoolla. Iyyoosiyaas beet Iyyoo'aaqeem Yihuxxi uullanne adil ihukkisam Waa'i iina «Keesamaakkoo i Mi'nnaannonne manni wixxoo beyyonne uullitaa Yihuxxi beero'uwwiinsi otossiteena i mine waatto'i Yihuxxi minaadabina an ijaajummi sagariinsi matim gatoobee'isa hundam kure. Ayyi la'ukko minaadaboom ee sagara macceessa'a jor googiinsi daba'lliteena xantamo; daba'llitolas baxxo'i jolliinsi ki'ukkok bi'iseena sawwummi sawwitiinsi daba'lloommo» yukko. Waa'i minaadabina kuroommisina «Macceessakkobeelasii an uwwummi seera egettakkobeelasii edaa edaa ki'nnuwwi beyyo asse'ummi iina awwaaddam hiraagaa'n sagara macceessakkobeelasii ijaajantakkambee'an ihulasii Seelo'onne issummoka hundam ka keesamaakkoo Minennem issoommo; ka uulli minaadaphphi illagenne ka beero'o duumamaakkoohan issoommo» yukko. Qeessuwwi, hiraagaanii minaadabii hundim Keesammi Minenne ee sagara wocummuuyyi macceesso'ookko. Ihukkaarem wocoommisina ijaajukkoka hundam wocaa guullummisam qeessuwwi, hiraagaanii minaadabii hundim eese amadda'a «At lehimmi hasisookko. ‹Ku Waa'ik Min Seelo'isa ihookko› yitaa Waa'i summinne hiraago woccittok mahinatte? Odim ‹Ku beero'im bi'ookko; woronnem hee'ookkok siidamooyyo› yittok mahinatte?» yita'a shuutto'o; eehanniinsi lasonne minaadab hundim wixxita'a kibbito'o. Yihuxxi awwonsaan ee woshsha macceesso'i ammanenne adi'l miniinsi fitta'a Waa'i Mi'n kolli waatto'o; Waa'i Mi'nnaannonne ‹Haareechchi gooca› yakkam goocanne afuutto'o. Qeessuwwii hiraagaanii awwonsaaninaa minaadabinaa «Ku manchi wocu woshsha hundam ki'nnuwwi hundim macceessakko'ookko; Ni beero'onne jor hiraaqqi sagara wocu bikkina leh hasisookko» yito'o. An Ermiyaasim awwonsaaninaa minaadabinaa hundinam «Ka beero'onnee ka Waa'i Minennee ki'nnuwwi macceessakko'i sagara alallaatoommisina eese asse'ukkok Waa'a. Kabadem ki'nnuwwi hee'llakkam heechchaa baxxakkam baxoo axissakka'a Moollanni Waa'ina ijaajammehe; eehid issitakkolas Waa'i ki'nnuwwanne eebeena sawwu bichcha dabarookko. I bikkinatte ihulas oono'llehe ki'nnuwwi angannem yoommi bikkina ki'nnuwwina danaamoo erokaa labu luwwa hundam issehe. Ihukkaarem ka macceessakko'i sagara hundam ki'nnuwwina wocoommisina asse'ukkok hanqo'isam Waa'i ihu bikkina eese shitakko'aare muccur manchi xiiga duntakka'a ki'nnuwwi gagaa ka beero'oo woronne hee'llam mannaa baaxiilaan issitakkambee'isa egexxammehe» yaa qoxxisaa kurummo. Eehanniinsi lasonne awwonsaanii minaadabii «Ku manchi wocukkok ni Moollanni Waa'i summinnette ihu bikkina lehimmi hasisooyo» yita'a qeessuwwinaa hiraagaaninaa wocco'o. Odim lommanniinsi mat mat iimita'a wixxito'i minaadabina «Hizqiyaas Yihuxxi adil hee'u doollenne Mooresheexxi hiraagaanchi Mikkiyaas gogoxxi Moollanni Waa'i wocu hiraaqqi sagara minaadabina ‹Xiyoona abuulli uullisa abuullakkamo; Yerusaaleemim gindamu luwwina tuubbi ihookko; Keesammi min baxamu duunim haqqor ihookko› yaa alallaataa hee'ukko. Eehannah adil Hizqiyaasii Yihuxxi minaadabii Mikkiyaasa shito'onni'i Shito'oyyo? Hore'em adil Hizqiyaas Waa'a baddaa qishixxato issoo'isina Waa'a uunxukkoyyonnihe? Waa'im ixxuwwanne eebeena sawwu boobana urukkoyyonnihe? Ihukkaarem kaba neese kee'mmaalli hawwo ni gaganne eebaqqineena gundaammo» yita'a wocco'o. Odim Qiiriyaatiyi'aariimanne hee'oo Shamaa'iy beet Uuriya yakkam mulli manchim hee'ukko; oo manchi Ermiyaasisam ka beero'onnee ka uullannee bichchi waaroo'isa Waa'i summinne hiraago wocaa hee'ukko. Adil Iyyoo'aaqeemii maqi'l daannuwwii gaaxxi awwonsaanii hundim Uuriy wocukkoka macceesso'i ammane Uuriya sheena adil hasukko; ihukkaarem Uuriy eekka macceesaa lobakata baddaa Gibxi uulla gibaa xorukko. Ihukkaarem adil Iyyoo'aaqeem Akboor beet Eelanaataanii mulli mannii Gibxa dillita'a Uuriya wottamisina ijaajukko. Ixxuwwim Uuriya Gibxiinsi wotta'a adil Iyyoo'aaqeem beyyo massito'o; ixxim bisa'inne shaa leeshooma kora'i manni waammamoo beyyonne uunjamoo'isa issukko. Ihukkaarem Saafaan beet Ahiiqaam iina hara'mmaa i midaadinne uullaa hee'u bikkina eese shakkamisina minaadabina higisakka'a uwwakko'oyyo. Iyyoosiyaas beet Sedeeqiyaas Yihuxxi uullanne adil ihukkisam Waa'i iina «Haqqinne gaanjaqqa baxxaa qirqire'enne usa kattaa ki axonne iyye. Yerusaaleemanne hee'oo Yihuxxi adil Sedeeqiyaasa xa'mmiteena waatto'i asse'amaanonne Eedoo'm uullaa Moo'aaphphi uullaa Amoo'n uullaa ee'isam Xiiroosaa siidoonaa gassitam adilluwwi beyyoo asso asse'ukko. Ixxuwwi moollanno'ina afissamisina gogoxxi Moollanni ihummi Isra'ee'l Waa'ika asso kure. ‹Iihaanninne lob malaayyinnee qoxxaalli wodinnee uullaa manni shumo'oo uullanne mikmikoo soko'oo hundam qooccummo; uulla gassimmikam daannooma an iittummaannina uwwoommo. Kabadem ka uulli minaadab hundam i awwaadaanchi Baabiloo'n adil Nabukadanaxoorina higisaa uwwaammo; doo'm wo'l moochchim ixxena ijaajamookko. Minaadab hundim ixxena awwaaddamo; ee'isam Baabiloo'n minaadab ixxi adillaniinsi dilleebe'e Nabukadanaxoor oosinaa oos oosinaa awwaadaan ikkamo; ee lasage ixxi minaadab odim korina mulli malaayyaam minaadabinaa adilluwwinaa awwaadaan ikkamo›. Ihukkaarem adil Nabukadanaxoorina ijaajamoobee'ek gaanjem heeshaa'aa ixxi gaanjaqqoronne aagoobee'ek hinki minaadabim te'im adil Nabukadanaxoor angiinne bi'iseembee'e orinne, sibaarinnee jabbinnee guzumo'antamisa issoommo. Ee bikkina ki'nnuwwi Baabiloo'n adilina ijaajantakkambee'isa soggam hiraagaano, gennaanoo haqaawwo moo'llam keeno, leto'i manna weeshsham keenoo karo'aanoo macceessakkotte. Ki'nnuwwika uulla fatakitakkona an holloommisinaa bi'isoommisinaa qophpha'n hiraago qawwiissu'uuyyi woccamo. Ihukkaarem Baabiloo'n adi'l axaqqiinsi woroon ijaajamaa awwaadoo minaadab ixxi gaqqi uullanne abuullukkuuyyi hee'oo'isa issoommo; eekka an Waa'i gagim wocaammo» yukko. Yihuxxi adil Sedeeqiyaasina ee sagara «Baabiloo'n adilina gibittittaaree ixxenaa ixxi minaadabinaa awwaaddittaare foorinne hee'llootto. Atii ki minaadabii jabbinnee sibaarinnee orinnee mahina beedditakkamo? Baabiloo'n adilina ijaajamoobee'i ayyi minaadabannem afookko yaa Waa'i wocukkok eehaneme. ‹Baabiloo'n adilina ijaajantakkotte› yitam qophpha'n hiraagaa'n sagara macceessakkotte; ixxuwwi woccamok qophpha'n hiraago. Ixxi asse'oo'nnim qophpha'n hiraago Waa'i summinne woccamisa Waa'i gagim ki'nnuwwina kuraakko; ee bikkina ki'nnuwwa ixxi hollookko; ki'nnuwwii qophphano wocco'i hiraagaanii bi'llakkamo» yaa kurummo. Ee lasage Waa'i ijaajukkoka hundam qeessuwwinaa minaadabinaa «‹Waa'i Mi'n mu'ut hundim Baabiloo'n uulliinsi qaqqisom daba'llaa waarookko› yitu'uuyyi ki'nnuwwa qawwiisseena woccam qophphanaan hiraagaa'n woshsha macceessakkotte. Ee bikkina ixxuwwi woccam woshsha macceesimma uttakka'a Baabiloo'n adilina ijaajantakkolas foorinne hee'llakkamo; ijaajancha hoonginne ku beero'i gindamookkok mahinatte? Ixxuwwi hanqo'i hiraagaan ikko'oolasii an uwwummi hiraaqqi sagarim ixxuwwi beyyonne yoolasii qeefadamaa marubee'i Waa'i Mi'n mu'utaa adi'l mu'utaa hundam Baabiloona maroo'isa issoombee'isa hundam xanoommi Waa'a eese uunxitona» yaa kurummo. «Yerusaaleemannee Keesammi Minennee adi'l minennee gatu mu'uttuwwina hundinam Isra'ee'l Waa'i ihummi gogoxxi Moollanni Waa'i wocoommi sagara macceessehe. I sawwite ixxuwwi kollonne dabaraa do'eembe'e ku mu'uttuwwi hundim Baabiloo'n uulla qeefadamaa marookko; ee lasage odim dabaraa ka beyyo woroommo; an Waa'i kaka wocaammo» yoolla. Ee maarage Yihuxxi adil Sedeeqiyaas adil ihu soo'l hiinchi onti agananne Gaaba'oo'n beero'iinsetti ihu Aazuur beet hiraagaanchi Hanaaniy Waa'i Mi'n qeessuwwaannonnee minaadaphphaannonnee illagenne «Isra'ee'l Waa'i ihu gogoxxi Moollanni Baabiloo'n adi'lleka gaanjaqqa iiqoommo. Adil Nabukadanaxoor ka beyyiinsi Baabiloo'n uulla massu Keesammi mi'n mu'uta hundam lam hiinchi woronne dabaraa ka beyyo woroommo. Ee'isam Yihuxxi uulli adil Iyyoo'aaqeem beet adil Ikkooniyaanaa ixxenne maqirem qeefadanta'a Baabiloo'n uulla matto'i Yihuxxi minaadabaa dabaraa woroommo; Baabiloo'n adil iyyiisu gaanjaqqam iiqoommo› yaa an Waa'i kaka wocaammo» yaa iina kurukko. Anim qeessuwwi illagennee Keesammi Minenne uullita'a hee'llo'i minaadaphphi illagennee Hanaaniyina «Eeyya ihona; Waa'i at yittisam issona; Waa'i Mi'n mu'utaa qeefadanto'i minaadabaa ka uulla dabaraa at woccitti hiraaqqi sagara Waa'i wonshona. Ihukkaarem kiinaa ka minaadabinaa wocoommi sagara macceese. Gaassi doolle iinniinsii kiinniinsii illageen ki'llo'i hiraagaan lobakat minaadabannee la'anto'oo adilluwwannee or, sibaarii jabbii waaroo'isa hiraago wocco'ookko. Ihukkaarem xummi bikkina wocu hiraagaanchi hee'uta'n Waa'i hanqo'isinne asse'u hiraagaanchi ihukkis la'amookkok oo wocu sagar hanqi ihaa siidamoohaarette» yummo. Eehanniinsi lasonne hiraagaanchi Hanaaniy i gudumonne hee'u gaanjaqqa massaa iiqansukko. Odim hundem minaadaphphi illagennem «Lam hiinchi woronne Baabiloo'n adil Nabukadanaxoorik gassi gaanjaqqa minaadaphphi gudumiinsi dilliisaa ka'isa iiqansoohan ihukkisa Waa'i wocaakko» yaa wocukko; anim eekke'iinsi ki'aa marummo. Hiraagaanchi Hanaaniy ee gaanjaqqa hiraagaanchi Ermiyaas axiinsi dilliisaa iiqansaa lasage Waa'ik sagar Ermiyaas beyyo «Mattaa Hanaaniyina ‹Oono'o, at haqqinne baxamu gaanjaqqa iiqqaatto; ihukkaarem an eehanni bikkenne xaa'l gaanjaqqa baxoommo. Baabiloo'n adil Nabukadanaxoorina awwaaddamisina ka minaadaphphi hanenne xaa'l gaanjaqqa iyyiisoommo; mullek gataa doo'm wo'l moochchannem daannooma uwwaammo› yitaa kure; an Isra'ee'l gogoxxi Moollanni Waa'i kaka wocaammo» yaa waarukko. Anim ee sagara Hanaaniyina «Hanaaniya, macceese; keese Waa'i asse'oo'nnim ku minaadab hundim qophpha'n woshshanne amma'nnoo'isa issitaatto. Ee bikkina Waa'i ‹Keese ka uulliinsi bi'isoommo; ku minaadab eesenne ixxuwwi Moollannanne boqqoo'isa issitaattoo bikkina ku hiinchi beeddeena iillageen letootto› yoolla» yummo. Hiraagaanchi Hanaaniy ee maaragem lama'l agananne lehukko. Nabukadanaxoor Yerusaaleemiinsi Baabiloo'n uulla qeefadaa massu qeessuwwinaa hiraagaaninaa minaadaphphi daannuwwinaa mulli minaadabinaa hundinam Yerusaaleemiinsi assi kitaaba kitaabummo. Assi kitaaba kitaabummok adil Ikkooniyaanii adi'l amaa adilina hincixxi awwaadaanii Yihuxxekii Yerusaalee'm awwonsaanii angi baxik lachchi yoo keenii annanni lachchi yoo keenii hundim qeefadanta'a matta'a lasonnette. Ee assi kitaabom Yihuxxi uulli adil Sedeeqiyaas Baabiloo'n uulli adil Nabukadanaxoor beyyo asse'u Shaafaan beet Eeli'aasannee Hilqiy beet Gamaariyannee asse'ummo; assi kitaaboo'mmek horoor woshshi. «Isra'ee'l Waa'i ihu gogoxxi Moollanni Yerusaaleemiinsi Baabiloo'n uulla qeefadanta'a mattamisa issu minaadabina hundinam ‹Minneewwa baxxakka'a eekke'ennem hee'llehe; duubbi kaashshuwwam kaassakka'a eehannika misha ittehe. Eebaqqantakka'atim ooso qallehe; ki'nnuwwi oosim eebaqqanta'a ooso qattona; ki'nnuwwik fikkaanni ee uullanne dutona bagaan hoffe'oone. Qeefadantakka'a mattakka'a hee'llakkamisa issummi beero'uwwi lichchina eroomma sawwi'llehe; ee beero'uwwi bikkinam i kollonne uunxehe; mashka'oomim ee beero'uwwi manni er heechcha hee'llolas ki'nnuwwim er heechchanne hee'llakkamo. An Isra'ee'l Waa'i ihummi gogoxxi Moollanni ki'nnuwwi lambe'enne yo'i hiraagaanii kiiraanii ki'nnuwwa qawwiissambee'isa qoxxisaammo; ixxuwwi haqaawwinam beyyo uwwitakkotte. I summinne ki'nnuwwina qophpha'n hiraago woccamo bagaan an hore'em asse'ummoyyo; an eekka wocaammo› yoolla» yoohane. Waa'i «Baabiloonanne hee'llakkam lamarayyi hiinchi wo'mmaa lasonne ki'nnuwwa odim qishixxatinne do'oommo; ki'nnuwwi uullam dabareena aagummi hidi'l sagara wonshoommo. Ki'nnuwwi bikkina sawwoommi sawwite an la'oommo; oo sawwitim jolli sawwit ihoo'n xumma siidisimminne ki'nnuwwi neeyyatinne egettakkam er luwwi wo'mmoo sawwite. Ee lasage ki'nnuwwi eese weeshshakkamo; i kollonnem hincitakka'a eese uunxitakkamo; anim macceesoommo. Ki'nnuwwi eese lobakata hassakkamo; hassakkamokim wo'm tiirinnetti ihulas eese siiddakkamo. Anim ki'nnuwwina siidamoommo; ki'nnuwwi uullam daba'llitakka'a waattakkamisa issoommo; ki'nnuwwa binnaa'ummi uulliinsi hundiinsim wixxaa'oommo; ki'nnuwwi qeefadantakka'a uttakka'a mattakkamisa issummi ki'n gaqqi uulla dabaraa woroommo; an Waa'i kaka wocaammo. «‹Waa'i Baabiloo'n uullanne niina hiraagaano ki'isaakko› yitakka'a woccakko'ookko. Daawiitika adilla'n barcuma lago aa'aa gassaanchi ihu adi'l bikkinaa ki'nnuwwisa qeefadanta'a mattoo'n ka beero'onne yo'i ki'nnuwwi qarmanninaa Waa'i wocoo sagara macceessehe. Gogoxxi Moollanni Waa'i ‹An ixxuwwanne ora, sibaaroo jabboo eeboommo; ixxuwwam bi'immiinsi ki'ukkok itakkeena xanakkambee'i oda'i mishisa issoommo. Orinne, sibaarinnee jabbinnee ixxuwwa holloommo; uulli minaadab hundim ixxuwwanne ihoo luwwa moo'lla'a muggitamo; binnita'a mattamisa issoommi beyyonne hundannem ixxuwwanne issoommi luwwa moo'llam minaadab hundim muggimminne dambaqqamo; minaadab hundim ixxuwwanne osattamisaa gaddamisaa issoommo; Oo hundim ixxuwwanne afoo mashka'i iina awwaaddam hiraagaanonne edaa edaa asse'ummaare i sagara macceesimmaa ijaajanchaa sabbo'i bikkinatte. Ee bikkina ki'nnuwwi Yerusaaleemiinsi qeefadantakka'a Baabiloo'n uulla mattakkamisina issummi keen hundim an Waa'i wocoommi sagara macceessehe› yukko. «Waa'i summinne qophphano woccam Qolaay beet Aki'aab bikkinaa Maa'iseey beet Sedeeqiyaas bikkinaa Isra'ee'l Waa'i ihu gogoxxi Moollanni ‹Ixxuwwa Baabiloo'n adil Nabukadanaxoorina higisaa uwwoommo; ixxim ki'nnuwwa illi moo'onam shookko. Yerusaaleemiinsi Baabiloo'n uulla qeefadanta'a matto'i minaadab hundim mat manchonne duunchi sagara wocceena hassam ammane ‹Waa'i keese foorinne hee'llonam Baabiloo'n adil giirinne babisoo Sedeeqiyaasisaa Aki'aabisaa issona› yita'a duuntamo. Ixxuwwik gada'i eehid ihoo mashka'i jor baaxiilo baxxo'ookko; oohim ixxuwwina besh ikko'i kee'n meentinne saalmaachchito'ookko; an ijaajumbee'i qophpha'n hiraagom i summinne wocco'ookko; eekkam an la'oommi bikkina ixxuwwanne naqqasoommo; an Waa'i kaka wocaammo› yoolla» yukko. «Qeessichchi Yoodaah bikkenne qeessichchi ikkoo'isina Waa'i keese doo'llaakko; oono'o, Keesammi mi'nnekim awwonsaanchi atette; ee bikkina hiraagaano labba'a woccam mat mat machchaaraano chimchiminne gaanje karimmii lokkom gudeeranne aagissaa karimmii ki baxo. Eehannah ‹An hiraagaancho› yukkuuyyi minaadabina wocoo Anaatooxxi uulli Ermiyaasa axeettibee'ek mahinatte? Ixxi wocoobee'isa hoorimmi hasisookko; mashka'oomim qeefadanta'a Baabiloo'n uulla matto'i minaadab lobakat doolle ee uullanne hee'llamaannisa issaa ‹Mine baxxakka'a makkixxitakka'a hee'llehe; duubbi kaashsham kaassakka'a mishooma ittehe› yukkuuyyi minaadabina wocaakko» yoohan hee'ukko. Safooniyaas assi kitaabooma iina Ermiyaasina qananaa'ukko; Ee lasage Waa'ii ina «Oono'o, qeefadanta'a Baabiloonanne hee'llam keenina hundinam Shimaa'iy bikkina kuramu ka hiraaqqi sagara ‹Shimaa'iy an asse'oo'nnim hiraaqqi sagara wocimminne qophphanonne amma'nnitakkamisa issaakko. Ee bikkinam an Waa'i ixxoo ixxi shumo'oo guzumo'oommo; kanniinsi eehid ka manchina ki'nnuwwi lambe'enne gatoo shumo'i hee'ooyyo; i minaadabina issoommi eroommi hundam moo'eena hee'immik neeyyat bee'e; mashka'oomim ixxi ki'nnuwwi iina ijaajantakkambee'isa issaakko; an Waa'i kaka wocaammo› yitaa asse'e» yukko. Ermiyaas beyyo waaru Isra'ee'l Moollanni Waa'i sagar kane; Isra'ee'l Moollanni Waa'i «An kiina kurummi sagara hundam kitaabanne kitaabe. I minaadab ikko'i Isra'ee'l minaadabaa Yihuxxi minaadabaa qeefadanto'i uulliinsi dabaroommi amman hincaakko; gaassi ixxuwwi anno'ina uwwummi uulla dabaroommaare ixxuwwi gaqqan issitamo; an Waa'i kaka wocaammo» yoolla. Waa'i Isra'ee'l minaadabinaa Yihuxxi minaadabinaa «Xumman ihoo'n baddisookkokii dambaqisoo sagarii macceesamoolla. Hino'o, xa'mmehe; goon qareena xanooda'em qoossehe. Eehannah goon hundim qaroo meentisa anginne lamado amaxxaakkoo moo'oommok mahinatte? manni hundikim illi kolli heemachchaakkoo mahinatte? Aayye! U'nnisoo ayyaam waaraakko; ee ayyaami'nnoo'i balli hore'em bee'e. Oohim Yaaqoob shumo'ina hawwi doolli ihookko. Ihukkaarem ixxuwwi ee u'nniinsi hundiinsim gattamo» yoohane. Gogoxxi Moollanni Waa'i «Ee ayyaamo i minaadaphphi axonne iyyiisamu gassika gaanjaqqa iiqoommo; ixxuwwi karanto'i chimchimam muroommo; eehanniinsi lasonne allaggichchi minaadabina awwaadaan ikkamoyyo. Ee bikkenne iina ixxuwwi Waa'ina otossitamo; an adilla'n barcumanne afuussoommi Daawiit shumo'i ihu adilina ijaajantamo. Ee bikkina iina awwaaddakkam i minaadab badditakkotte; Ki'nnuwwi Isra'ee'l minaadab baa'llakkotte; ee qee'l uulliinsi ki'nnuwwaa ki'nnuwwi oosoo fissoommo; karantakka'a hee'llakko'i ee uulliinsi fittakka'a Ki'nnuwwi uulla daba'llitakka'atim xumminne hee'llakkamo; matem baddisoo luwwi bee'ekam xumminne usheexxitakkamo. An gagim ki'nnuwwinnetti ihaa gatisoommo. Ki'nnuwwi binnitakkamisa issummi uulli manna bi'isoommo; ihukkaaremdu ki'nnuwwa bi'isoommoyyo; eehaarem guzumo'oo'n uroommoyyo; guzumo'oommokim ki'nnuwwi bi'ishshi qaxinnette. an Waa'i kaka wocaammo» yoolla. Waa'i ixxi minaadabina «Ki'nnuwwik iiqantakko'i beyyi fayye'oobee'ane; omarim e'lloobee'ane. Ki'nnuwwina hara'mmaa fitamookkok omar fayye'oo'isinam ki'nnuwwa abooyyookkok matim bee'i bikkina fayye'llakkamoyyo. Ki'nnuwwik besh hundim ki'nnuwwa xaddo'ookko; ixxuwwi ki'nnuwwa hassamoyyo. Ki'nnuwwik jolli lobakata baaxiilim dut ihu bikkina an ki'nnuwwa diina'isa aphphisummo; qishixxat bee'ekam guzumo'ummo. Fayye'oobee'i ki'nnuwwi oma'l bikkina quunquuntakkotte; an ee'isa issaa ki'nnuwwa guzumo'oommo; mashka'oomim ki'nnuwwik baaxiil lobakata. Ki'nnuwwi jollim lobakata lophphaakkoohane. Ihukkaarem ki'nnuwwa kankanta'a itto'i keen hundim ixxuwwim kankananta'a itantamo. Ki'nnuwwi diina'im qeefadanta'a mattamo; ki'nnuwwa wor amadda'a hee'llo'i keen hundim wor amadantamo; ki'nnuwwa boggam hee'llo'i keen hundim korina bogantamo. Ki'nnuwwi diina'i ‹Xiyoon ubukkisam gatukko; egeraanchom hoogukko› yitota'nnim an ki'nnuwwika fayya'ooma odim dabaroommo; ki'nnuwwika omaram fayyiisoommo; an Waa'i kaka wocaammo» yoolla. Waa'i «Oono'o, Isra'ee'l oosika mine dabaraa baxoommo; abaroosina hundinam qishixxato issoommo; Yerusaaleem gindamu beyyonnem daba'llaa baxamookko; adi'l minim gaassi beyyonne baxamookko. Eekke'enne hee'llam manni hundim galaxxi mazmuura zammattamo; liiranchinnem ilil yitamo; an ixxuwwa fikkaannisoommo bagaan ixxuwwik xig hoffe'ooyyo; i lomba siiddamisa issoommo; ee lasage gadantamoyyo. Ixxuwwik oos gaassi ixxuwwi anno'isam baddanta'a hee'llamo; oo mateeyyoo'm heechchim i illagenne qoxxaakkoohan ihookko; ixxuwwa wor amadda'a hee'llo'i keenom guzumo'oommo. Ixxuwwa gassoo gassaanchi ixxuwwi lambe'iinsim doo'llamookko; ixxuwwa awwonsookkokim ixxuwwi moolliinsetti ihookko; an ixxo i kollonne hincaa'oommo; ixxim i kollonne hincookko; oobeelas iggaa i kollonne hincookkok ayyette? Ixxuwwi iina minaadab ikkamo; anim ixxuwwina Waa'i ihoommo; an Waa'i kaka wocaammo» yoolla. Oono'o, hambu'llam hafachchi'nnoo'i Waa'i quunqi malaayyaam hafachchisa kululukkuuyyi boqquwwi kee'n sammonne dillookko. Malaayyaam ihu Waa'ik quunqi Isseena sawwu luwwa wonshoo'n daba'llooyyo; amman afoohaare minaadab ixxuwwi gagim kaka erisa laqqamo. Waa'i «An Isra'ee'l sullina hundinam Waa'i ihoommokii ixxuwwim iina minaadab ikkam ammanii waarookko. Isra'ee'l minaadab usheexxato siiddeena waatto'i ammanenne oriinsi gatto'i keen uulli udma'anne iinniinsi nuura siiddamo. An ixxuwwina qee'llonnem moo'amummo; Isra'ee'l minaadaba, oono'o an ki'nnuwwa heer heerina iittaammo; ee bikkina heer heeraxxi i biijoomim ki'nnuwwina qoxxaa hee'ookko. I minaadab ikkakko'i Isra'eela an ki'nnuwwa dabaraa baxoommo; ki'nnuwwim baxantakkamo; la'mmekam dibbe'e amaddakkamo; liirantam keeninne maqirem fittakka'a kaddakkamo. Odim Samaare'i duu'n hanenne woyi'n kaashsha kaassakkamo; eehanni misham badatto'i keen liiranchinne ittamo. Ee ammane diina'a egettam keen Efiree'm duunanne fitta'a ‹Waallehe, ni Moollanni Waa'i yoo Xiyoona mallona› yitam amman waarookko» yoolla. Waa'i «Minaadabiinsi hundiinsim lophphoo Isra'ee'l bikkina liiranchinne zammallehe; ‹Waa'i ixxi minaadaba gatisaakko; Isra'ee'l uullanne gatto'i keeno hundam gatisaakko› yitakku'uuyyi galaxxi mazmuura hincaa'llehe. An hanaa'n qariinsi ixxuwwa woroommo; uulli tochchiinsim ixxuwwa wixxaa'oommo; qooqquwwii dimmeewwii lamfoor meentii xuuchchi amadu meentii hundim ixxuwwinne maqirem waattamo; lob minaadab ikka'atim ixxuwwi gaqqi uulla daba'llitamo. An ixxuwwa uulla daba'llitamisa awwonsummuuyyi i minaadab liiranchinne wi'lltu'uuyyii Waa'a uunxitu'uuyyii daba'llitamo; qoloo luwwi bee'i er googinne er wo'ik bu'i yoo kollonne awwonsoommo; an Isra'eelina anna; Efireemim iina won beeto» yukko. Waa'i «Minaadaba, macceessehe; qee'llonne yoo tochchi uullinam i sagara alallaattehe; an i minaadaba binnaa'aa hee'ummo; ihukkaarem kaba wixxaa'oommo; allaaraanchi fooraam diinate egeroohaannisam egeroommo. An Isra'ee'l minaadaba wolabbanonne fissaammo; malaayyaam adi'l angiinsim fissaa gatisaammo; Ee bikkina daba'llita'a waatta'a Xiyoo'n duunanne liiranchinne zammattamo; an ixxuwwina uwwoommi hurbaaxxaanninne, woyi'n diqaasinne, wee'l zaytinne, gereebbaanninnee la'l maassinnee hundinnem makkixxita'a liirantamo. Er wo'i yoo gannattisa ikkamo; ixxuwwina hasisoo luwwa hundam siidda'a hawwiinsii u'nniinsii gattamo. Ixxuwwik landi liiranchinne kadookko; harde'i woraadii lommannii liirantamo; an ixxuwwa qoxxisoommo; ixxuwwikam wi'llo liiranchanne kichchechcham lobakat liiranchanne dabassoommo. Qeessuwwa uulli maassinne goddisoommo; minaadaphphekam qulunxa i biijoominne xeebo muroommo; an Waa'i kaka wocaammo» yoolla. Waa'i «Laachchii qaraaraalli wi'llii Rama'anne macceesamukko; Raaheelem is oos bikkina wi'llitamuulla; isek oos lehu bikkina qoxximma hooggo'o. Ki'nnuwwi wi'llimma uttakka'a indiidda shiinshaqqehe. Ki'nnuwwi oosina issitakko'ok hundim kora'a gatoohaneyyo; ixxuwwi diina'i uulliinsi daba'llita'a waattamo. Ki'nnuwwik oos ixxuwwi uulla daba'llita'a waattam bikkina ka lasage ki'nnuwwina neeyyat yookko; an Waa'i kaka wocaammo. «Isra'ee'l minaadab kichchechchinne ‹Waa'a! Neese leejjisakkobee'i labee'nnisa hee'nnummo; ihukkaarem at niina ijaajancha losissitto; at niina Moollanni ikkitti bikkina kabadem ni Waa'i ikkitti ki kollonne dabare; neesem daba'llinoommo. Kiinniinsi qee'llinaa mallaa hee'nnummo; ihukkaarem kaba ni baaxiilo biiraa yinaammo; tuullinnee saxximminnee ni gaga heeshaa'nnaa ni biqe aphphixxinoommuulla; harde'oo'm doolle banxummi baaxii'l bikkina ni gaga acceeqansoommuulla› yitu'uuyyi macceesummo. Isra'ee'l minaadaba, Ki'nnuwwi iittantakko'oo i ooso; ki'nnuwwa hundiinsim lonsaa iittoommaneyyonnihe? Ki'nnuwwina qishixxato isseena i kollonne hincaa'eena hasoommo; an Waa'i kaka wocaammo. Googo huushantakkambee'isa mare'e issehe; googo moo'isoo utubbuwwa kaassehe; mattakko'i lob googom qoossitakka'a moo'llehe; i minaadab ikkakko'i Isra'eela, ka ki'nnuwwi beero'uwwa daba'llehe. Ki'nnuwwi amma'nnat hanqataakkoo minaadaba, malantakkamok hinki balli afeebe'e? An Waa'i uullanne haareechchi luwwa qooccaammo; oohim meentichcho gooncho egettamo ›› yukko. Isra'eelina Waa'i ihu gogoxxi Moollanni Waa'i «Minaadaba ixxuwwi uulla dabaroommi ammane Yihudannee Yihuxxi uulli beero'uwwannee odim ‹At hanqina gatti min ikkitti keesammi duuna, keese Waa'i maasse'ona› yitamo. Yihuxxi uullii ee uulli beero'uwwii hundim minaadab hee'oo beyyi ihookko; uulla abuullitam abuullaanii fooraam diinaxxi allaaraanii eekke'enne mateeyyam hee'llamo. Hooggo'i kee'nneka malaayye qoxxisoommo; sibaaraa tuude'u keeninam hurbaata uwwaa goddisoommo. Ee ammane minaadab ‹Diriichchiinsi baqinoommaare ni malaayyi haareechchi ihaa hee'ukko› yitamo. Oono'o, an Waa'i Isra'ee'l uullaa Yihuxxi uullaa manninnee fooraam diinatinnee wonshoommi amman waarookko. Ixxuwwa beyyiinsi xoqoleena, gindeena, ikkid kid isseena, bi'iseenaa hawwitamisa isseenaa murte'ummi qaxa dabaraa beyyonne kaaseenaa baxeenam murte'oommo. Ee ammane ‹Anno'i itto'i hamaraar woyi'n mish oosika inqe sigillaa'ukko› yukkuuyyi manni wocam hee'u heessi gatookko. Eehid ihimmi gataa hamaraar woyi'n misha itu manchik ixxi gaqqi inqim sigillookko; annannichchim ixxi gaqqi baaxiilinnem lehookko» yukko. Waa'i «Isra'ee'l minaadabinnee Yihuxxi minaadabinnee maqire haareechchi hidi'l sagara aagoommi amman waarookko. Oo hidi'l sagarim ixxuwwa Gibxi uulliinsi fisseena anga amadaa awwonsummi ammane ixxuwwi anno'inne aagummi hidi'l sagari'nnoohaneyyo; an ixxuwwina Moollanni ihaa hee'ummisam ixxuwwi i hidi'l sagara egettobee'i bikkina uraa urummo. Ihukkaarem eehanniinsi lasonne Isra'ee'l minaadabinne maqire aagoommi hidi'l sagar kane; i seera ixxuwwi wodanonne dissoommo; ixxuwwi wodanonnem kitaaboommo; anim ixxuwwina Waa'i ihoommo; ixxuwwim i minaadab ikkamo. Kanniinsi eehid ayyi manchim ixxi beshichcho te'im ixxi abbaayyo ‹Waa'a la'e› yaa losisooyyo; mashka'oomim lobaanniinsi ki'isaa hoffaannonne afeebe'e hundim eese la'ookko; ixxuwwi hawwoddo'i hawwojjam haafoommo; ixxuwwi baaxiilom la'mmaagge sawwoommoyyo; an Waa'i kaka wocaammo» yukko. Waa'i ballanne eelliinchi caakkisoo'isa hiimonne odim aganii boollaankii caakkisoo'isa issookko; dambalaqa heekkeesaa hambu'llam shuuroo'isa issookko; ixxi summim gogoxxi Moollanni Waa'a. Ku qooccanchi seer qoxxaa hee'oo qax ammanenne Isra'ee'l minaadab ixxi illagenne minaadab ikka'a hee'llaman ihukkisa moo'isoo neeyyat uwwamookko. Waa'i ixxi minaadab ikko'i Isra'eela baxxo'i hawwojji mashka'inne uunjookko yimmi xanamookkok iima'nnek haraaroom keenamaa uullikim lugum fooqaa la'imma xanakkolasette; Waa'i kaka wocaakko. Waa'i «Hanaani'eel gimbiinsi ki'isaa ooxxi gooc lamejjanne afeebe'e Yerusaaleem i beero'i ihaa baxamoo amman waarookko. Gaba'llekim xabbeen ooxxi lamejji goociinsi ki'isaa Gaareeb duun afeebe'e afaa Goo'a'anne kululoohan ihookko. Lehu luwwaa gii'lbuchaa uunjakkam cebbi hundim eelliinchi firoo kollinne Qeediroo'n cebba edaa ‹Faraxxi gooca› yakkam beyyi afeebe'e iina keesamaakkoohan ihookko; kanniinsi eehid beero'oom la'mmaagge hore'em gindamooyyo te'im bi'ooyyo» yukko. Adil Sedeeqiyaas adil ihu tommi hiinchonne Baabiloo'n adil Nabukadanaxoor odim adil ihu tommaannonnee sadeenti hiinchonnee Waa'i iina wocukko. Ee ammane Baabiloo'n adil Nabukadanaxoorek o'l gogot Yerusaalee'm beero'o kibbita'a hee'llo'o anim ee amman adil mi'n beyyonne yo'i waardiyya egettam kee'n minenne karamaa hee'ummo. Adil Sedeeqiyaasim eese kassiisu mashka'i Waa'i wocu hiraaqqi sagara ixxena wocummaarette; oohim «Yerusaaleem beero'o Baabiloo'n adil anganne higisaa uwwoommo. Adil Sedeeqiyaasam xoraa xanoobee'i bikkina an Waa'i higisaa uwwoommo; adil Nabukadanaxooram illinne moo'ookko; annannannem atoorassookko. Sedeeqiyaasa Baabiloona massakkamo; i oogaxxi amman afeebe'e eekke'enne hee'ookko; Baabiloo'n uulli manninne orantakkeena yakitakkota'nnim xantakkamoyyo; an Waa'i kaka wocaammo» yummaarette hee'ukko. Odim Waa'i iina «Kiyyannabbaayyi Shaaloom beet Hanaami'eel Biiniyaam baxxanchi hee'u Anaatootanne yoo ixxi uulla bitaa'lloo'isina xa'mmeena ki beyyo waarookko; mashka'oomim ee uulla bitaa'im labookkok atette» yukko. Waa'i iina wocukkisannem Hanaami'eel karamaa yoommi beyyo waardiyyuwwi mine waaraa uulla bitaa'oommisina xa'mmukko; ee bikkina Waa'i iina wocukkisa la'ummo. Anaatootanne yoo abuulli uulla iyyanni abbaayyi beet Anaami'eeliinsi bitaa'eena diinate xufummo; bitim tommoo lamar kin biraa ihukko. Bitina iittamummi iittom naqaashshuwwi yo'i beyyonne farramaa ifiisummo; diinatem keenaanchonne xufaa uwwummo. Ifiisamukkokaa ifiisamubee'ekaa uulla bitaa'ummi furma'a massaa Maahisey beet beetina Neeriy beet Baarookina uwwummo; ee furma'uwwam uwwummok iyyannabbaayyi Hanaami'eel bitinne iittammummisa naqaash ikka'a farranto'i manni illagennettee i karaxxi mi'n beyyonne wixxita'a hee'llo'i manni illagennettee hee'ukko. Ixxuwwi illagenne Baarookina «Isra'ee'l Waa'i ihu gogoxxi Moollanni Waa'i ifiisamukkokaa ifiisamubee'i furma'aa lamom bi'oo'n lobakat ammane hee'oo'isina massitaa buchchi mu'uxxi woronne dissitoo'isina ijaajaakko. Isra'ee'l Waa'i ihu gogoxxi Moollanni Waa'i odim «‹Ka uullanne minee abuulli uullaa duubbi kaashsha kaasakkam beyyoo bitaa'akkam amman waarookko› yaakko» yaa ijaajummo. Uulla bitaa'ummi furma'a Baarookina uwwaa lasonne «Hundam xantoo i Moollanni Waa'a! Ki lob daannoominnee malaayyinnee iimanee uullaa qooccitaatto; keese kaa'oo luwwi hore'em bee'e. Xigiinsi hanaan ihaakkoo minaadabina heer heerina hee'oo ki iitto moo'issaatto; ihukkaarem ixxuwwik anno'i baxxo'i baaxii'l mashka'inne minaadaba guzumo'lloo amman yookko; at hundiinsi lobanee malaayyaam Waa'aa! At hundam xantoo gogoxxi Moollanna. Qooroom wo'mmaakkoo sawwitinne lob maalalsiisoo baxo baxxootto; minaadab baxoo baxo hundam moo'llootto; annannichchim baxukkisinne bito miqqootto. Gaassi doolle Gibxi uullanne agannakkam maalalsiisoo luwwa baxxaatto; kaballi afeebe'em maalalakkam baxxeewwa Isra'ee'l minaadaphphi lambe'ennee mulli manni lambe'ennee baximminne beyyi hundannem ki sad weeshamaakko. Ki minaadab ikko'i Isra'eela Gibxi uulliinsi wolabbanonne fissiteena ni diina'a huxe'llamisa issitti ee maalalsiisoo agannaam baxxeewwinne ki malaayyee lombaa mo'issaatto. Gaassi ixxuwwi anno'ina woccitti neeyyaxxi Saga'llisannem ka hee'akkeena makki uulla uwwitto. Ihukkaarem ka uulla waatta'a lago aa'lla'a lasage ijaajantamisina uwwitti sagarina ijaajanto'oyyo; ki seeram egetto'oyyo; ee bikkina kaa'n hawwodanchi hundim ixxuwwanne afukko. «Oono'o, Baabiloo'n uulli manni Yerusaalee'm beero'o amaddeena dichchitta'a kibbito'ookko; orii sibaarii jabbii beero'i manna Baabiloo'n manni anganne ubbamisa isseenatte; at moo'lloo'isam woccittok hundim wo'mmoolla. Hundam xantoo Waa'a! beero'oom Baabiloo'n manni anganne higaa uwwameena hincaakkoohaannonne naqaashshuwwi yo'i illagenne uulla bitaa'oommisina ijaajjittok atette» yaa Waa'a uunxummo. Eehannii lasonne Waa'i iina «Manni shumo'i hundinam Moollanni Waa'i anette; eese kaa'oo luwwi hore'em bee'e. Ee bikkina oono'o ka beero'o Baabiloo'n adilinaa ixxi gogotinaa higisaa uwwoommo; ixxuwwim beero'ooma amaddamo. Giirinnem shokkiissamo; qophpha'n waa'uwwina woyi'n diqaasa kitim issita'a duntu'uuyyi Ba'aal yakkam qophpha'n waa'ina mi'n illichchonne aduruusa wiriissitu'uuyyi eese quuqissam hee'llo'i mannika gatti minneewwa hundam shokkiissamo. Isra'ee'llekii Yihuxxekii minaadaphphi aganni asheeru ammaniinsi ki'isaa baxxo'i jollinne hundinnem eese quuqisso'o bagaan matem eroommam baxxo'oyyo. Ku beero'i baxamukkaanniinsim ki'isaa woronne hee'llam manni eese quuqisso'i bikkina beero'ooma bi'iseena murte'aammo. Mashka'oomim Isra'ee'llekii Yihuxxekii Yerusaalee'm minaadabanne, adilluwwinne, daannuwwinne, qeessuwwinnee hiraagaaninnee maqirem mat ikka'a baxxo'i jollinatte. Ixxuwwi eese utta'a matto'ookko; edaa edaatim losano uwwummaarem i woshsha macceesso'oyyo; i sogitanom aa'llo'oyyo. Hore'oomam i summi weeshamoo keesamaakkoo minenne shigigaa'oo qophpha'n waa'uwwa uullissa'a i mine haashaassito'ookko. Moolook yakkam qophpha'n waa'ina ixxuwwika goo'n oosoo landaa kitimteena Heenoo'm cebbanne Ba'aala yakkam mulli Waa'i summinne kiti'm beyyo baxxo'ookko; ee baxo baxxamisina an ijaajummoyyo; minaadab baaxiilo baxxoo'isa issitamo yaa hore'em sawwummoyyo» yukko. Isra'ee'l Moollanni Waa'i iina «Ermiyaasa, oono'o minaadab ‹Ku beero'i bagadinne, sibaarinnee jabbinnee Baabiloo'n adi'l anganne ubookko› yitamo; oono'o odim an yoommi mulli luwwam macceese. Lobakat quunqinnee boobaninnee binnaa'ummi minaadaba matto'i uulliinsi hundiinsim wixxaa'oommo; ka beyyonne dabaraa woraa xumminne hee'llamisa issoommo. Ixxuwwim i minaadab ikkamo; anim ixxuwwina Waa'i ihoommo. Ixxuwwinaa ixxuwwi oosinaa makkoo'isina hundi ammanem eese lonsitona mat wodanoo mat tiiroo uwwoommo. Ixxuwwinne maqire heer heeraxxi hidi'l sagara aagoommo; ixxuwwinam er luwwa issimma uroommoyyo; hanqo'isam eese badditamisa issoommo; eehanniinsi lasonne ixxuwwika sawwite i kolliinsi bagaan mulli kollonne dabattamoyyo. Ixxuwwina eroomma isseena liiramoommo wo'm wodaninnee tiirinnee hundinnem lobakat liiranchinne hanqo'isam ka uullanne kaaxxixxita'a hee'llamisa issoommo. Ka minaadabanne kaa'n kaa'n kee'mmaalli hawwo eebumqaxam uwwoommo yaa sagara aagummi danaam luwwa hundam uwwoommo. Minaadabim ‹Ku uulli mannii diinatii hee'oobee'i udma'i uulli ihookko; Baabiloo'n uulli manni angannem higaa uwwamookko› yitamo; ihukkaarem ka uullanne abuulli beyyo bitaa'akkam amman odim waarookko. Qeefadanto'i uulliinsi dabaroommi bikkina Biiniyaa'm uullannee Yerusaalee'm kululleetanne yoo beyyuwwannee beero'uwwannee hansawwannee qaala'annee yoo beero'uwwannee woroo'n qarinne yoo beero'uwwannee yo'i manni abuulli uulla bitaa'llamo; iittanto'i furma'am naqaash illagenne farrantamo; an Waa'i kaka wocaammo» yukko. Adi'l mi'n ooxxi woronne yoo waardiyyuwwi mi'n woronne karamaa hee'ummisam Waa'ik hiraaqqi sagar i beyyo odim waarukko. Uulla qooccukkok, gudisukkokii baxukkokii summim «Waa'a» yamamaa weeshamoo Moollanni «I kollonne laare; anim kiina dabachcha uwwoommo; atim laqqoobee'i malaayyaam luwwa kiina issoommo. Yerusaalee'mmekii Yihuxxi adilluwwi minneewwii kibbamaa orinne gindamoo'isa an Isra'ee'l Moollanni Waa'i kuroommo. Baabiloo'n manni orina waatto'ookko. Minaadaphphi jolli mashka'inne i ille ka beero'iinsi mulli kollonne dabaroommo bikkina ku beero'uwwi an i quunqinnee bala'innee shoommi manni leeshinne wo'mmookko. Ihukkaarem ka beero'oo ka beero'i minaadabaa dabaraa fayyiisoommo; yaayya'oomam uwwoommo; lobakat xumminne usheexxita'a hee'llamisa issoommo. Yihuxxekaa Isra'ee'l minaadabaa qeefadanta'a matto'i uulliinsi dabaroommo; gaassi hee'llo'isanne issaa axisoommo. Eese hawwoddo'i baaxiiliinsi hundiinsim muccussoommo; ixxuwwika baaxiiloo boqqoomaa hundam haafoommo. Yerusaaleem beero'ina issummi eroomma macceesso'i uulli minaadaphphi illagenne hundannem danaam sadii liiranchii galatii lombii iina ihookko; Yerusaalee'm minaadabina uwwoommi lobakat goddaa xummaa moo'llo'i minaadab eese baddimminne huxe'llamo» yukko. Waa'i «Minaadab ‹Ku beyyi mannii diinatii hee'oobee'i udma'i ihookko› yitamo; woshshoom hanqame; mashka'oomim beero'uwwii Yerusaalee'm googguwwii mannii diinatii hee'oobee'i bikkina diih ihaakko. Ihukkaarem ee beyyuwwanne hundannem odim liiranchikii ilillaaxxekii bollochcho'i sagarii macceesamookko; minaadab galaxxi kitima amadda'a keesamaakkoo mine waattam ammane ‹Gogoxxi Moollanni Waa'a galaxxehe; mashka'oomim ixxi biijaalla; ixxi iittim heer heerina hee'oohane› yitu'uuyyi zammattamoka macceessootto. Ka uulla gaassisam goddaanchi issoommo; an Waa'i kaka wocaammo» yukko. Gogoxxi Moollanni Waa'i «Mannii diinatii hee'oobee'isa udma'i ihu ka beyyonnee ka beero'uwwannee hundannem allaaraan allaachcha usheexxissam beyyo siiddamo. Duu'n uullanne duunnuwwi gabonnee uullanne woroo'n qarinne yoo beero'uwwannee Biiniyaam uullannee Yerusaaleem kululleetanne yoo hoffi beero'uwwannee hundannem allaaraan odim gereebba xiggamo; an Waa'i kaka wocaammo» yukko. Waa'i «Isra'ee'llaanninaa Yihuxxi minaadabinaa aagummi neeyyaxxi sagara wonshoommi amman hincaakko. Oo ayyaam afoo ammane Daawiit shumo'iinsi mat caaf ihaakkoo muccur adila doo'lloommo. Ixxim hanqo'i oogatii muccuroomii uullanne hee'oo'isa issookko. Yihuxxekii Yerusaaleem minaadabii diina'i angiinsi gatta'a xummanne hee'llamo; beero'oomim ‹Waa'i niina muccurooma› yamamookko. Daawiit shumo'iinsi Isra'ee'l minaadabanne adil ihookkok hore'em bee'oobee'isa an wocaamo. Ee'isam shokkiisakkam kitima, hurbaaxxi kitimaa mulli kitimaa hincaa'imminne iina awwaaddam qeessuwwi Leewe'i moolliinsi hore'em bee'llamoyyo» yukko. ee ammane i awwaadaanchi Daawiitinnee i illagenne qeessoomaninne awwaaddam Leewe'i oosinnee aagummi hidi'l sagara gindimmi xansiisookko; Daawiitinam kanniinsi eehid ixxi adilla'n barcumanne afuuroo shumo'i hee'ooyyo. I awwaadaanchi Daawiit shumo'ikaa Leewe'i moolli ikko'i qeessuwwikaa xigo fikkaannisoommo; ixxuwwim xigakkeena xanakkambee'i iima'n boollaankisaa wo'i shashsha'llisaa ikkamo» yukko. Waa'i iina «Ku minaadab ‹Waa'i doo'llu Isra'ee'llekaa Yihuxxi minaadabaa lamem adilla'n uulluwwam uraakko› yoolli ihukkisa qoossittoyyonnihe? I minaadaba gaddo'ookko; mat minaadaphphisam xiggo'oyyo» yukko. Odim Waa'i «Hiiminaa ballinaa ee'isam iimaninaa uullinaa ihoo seera uwwumman ihukkisa la'isoo hidi'l sagara egeroombee'an ihulas Yaaqoobikaa iina awwaadaanchi ihu Daawiitikaa shumo'o uraammoo yimma. Oohim iina awwaadaanchi Daawiitina Abrihaamaanniinsi, Yisaaqaanniinsii Yaaqoob shumo'iinsii adila doo'lloommoyyoo yimma. Ihukkaarem an ixxuwwina haafoommo; ixxuwwi amaxxam dabaroommoo» yukko. Baabiloo'n adil Nabukadanaxoorii ixxi gogotii ixxi gassi woronne yo'i uulli adilluwwinnee minaadabinnee hundinnem hara'mmamaa Yerusaaleemannee kululleexxi beero'uwwannee ora ki'isu ammane Waa'i iina wocukko. Isra'ee'l Moollanni Waa'i an adil Sedeeqiyaas beyyo maraa «Waa'i ka beero'o Baabiloo'n adilina higisaa uwwoommo; ixxim beero'ooma giirinne shokkiisookko. Atim xotteena xantoobee'i bikkina qeefadantootto; ixxi angannem higisantaa uwwantootto; ixxi ille moo'llittuuyyim keese atoorassookko; ee lasage Baabiloona mattootto. Sedeeqiyaasa, an ki bikkina yoommi luwwa macceese; oranne letooyyo. Xumminnem letootto; kiinniinsi illage adilluwwi hee'llo'i kiyyanno'i leto'i ammane minaadab ee kee'n lombi bikkina giira giittam hee'llo'isam kiinam giira giittamo; ‹Aayye ni adila!› yiti'uuyyim ki bikkina wi'llitamo; an Waa'i kaka wocaammo» yaa wocoommisina ijaajukko. Ee sagara Sedeeqiyaasina Yerusaaleemanne yoo beyyonne kurummaare Baabiloo'n adi'llek gogot Yerusaalee'm beero'onne ora ki'isaa hee'ukko; oo gogot ee beyyiinsi higaa Yihudanne gataa hee'u girbamaakkoo Laakiishaa Azeeqaa yakkam lasaanchi beero'uwwa qasukko. Adil Sedeeqiyaasii Yerusaaleem minaadabii agiddanonne hee'llam keen wolabbanonne fittamisa iittanto'o. Oohim Ibro'i manni ixxuwwina awwaaddam manna goonaa meentoo hundam wolabbanonne fiissimminatte hee'ukko; Isra'ee'llek ayyim agishshi ihaa hee'oobee'isa iittanto'o. Minaadabii awwonsaanii hundim ixxuwwina awwaaddam agido wolabbanonne fissiteenaa la'mmaagge agid issitambee'isinaa iittanto'o; iittanto'isinnem wolabbanonne fissito'o. Ihukkaarem eehanniinsi lasonne ixxuwwi sawwite dabatta'a wolabbanonne fissito'i manna odim agid issita'a gaassito'o. Eehanniinsi lasonne Isra'ee'l Moollanni Waa'i iina «Gaassi ki'nnuwwi anno'o Gibxi uulli agiddaninsi wolabbanonne fissummi ammane ixxuwwinne maqire hidi'l sagara aagaa hee'ummo. ‹Ixxi gaga agiddanina biteesu Ibro'ik agishshi ki'nnuwwina hee'ulas loh hiincho awwaadaa lasage lama'l hiinchonne wolabbanonne firona fatakitakkamo› yaa gaassi ki'nnuwwi anno'o ijaajaa hee'ummo; ihukkaarem ixxuwwi iina ijaajanteenaa i woshsham macceesseenaa hasso'oyyo. Oono'o, ki'nnuwwim baaxiilo biiraa yitakka'a eese liiransoo hanqo'i baxo baxxakka'a hee'llakko'o; hundim Isra'ee'l moolliinsette ihu ki'nnuwwi awwaadaano wolabbanonne fissitakkeena iittantakko'o; i summi weeshamu Keesammi Minennem i illagenne hidi'l sagara aaggakko'o. Ihukkaarem sawwite dabattakka'a i summa bushissakko'o; oohim hasso'i beyyo mattona fatakitakko'i goonaa meenti awwaadaanoo odim agid issitakka'a gassitakko'o. Oono'o, an Waa'a ki'nnuwwina yoommi luwwi kane; ‹Ki'nnuwwina an ijaajamoommoyyo; ki'nnuwwi moolli ikko'i Isra'ee'l minaadabinam wolabbano uwwoommoyyo.› Ee'isam an ki'nnuwwina uwwoommi wolabban yookko; oohim oranne, sibaaronnee Jabbonnee letakkam wolabbano uwwoommo. Ki'nnuwwanne issoommi luwwanne uulli minaadab hundim hiriroo'isa issoommo. I hidi'l sagara gindito'i keenoo i illagennem aaggo'i sagara wonshitobee'i keeno hundam lam beyyonne diqakka'a lambe'inne higakko'i baa'l moo'llisa issoommo. Yihuxxekaa Yerusaalee'm awwonsaanoo, adi'l mi'n daannuwwa, qeessuwwaa lam beyyonne diqakko'i baa'l moo'l lambe'inne higgo'i uulli minaadabaa hundam bi'isseena hassam ixxuwwi diina'i anganne higisaa uwwoommo; ixxuwwi leesham iima'n ammarii uulli moochchii itookko. «Adil Sedeeqiyaasaa ixxi gassaanoo hundam ixxuwwika foore bi'isseena hassam diina'i anganne higisaa uwwoommo; higisaa uwwoommokim ki'nnuwwa qasseena waatta'a ammanoomina daba'llito'i Baabiloo'n gogoxxi angannette. «Anim ixxuwwa ijaajoommo; ixxuwwim ka beero'o daba'llitamo; waatta'atim qassamo; beero'oomam shokkiissamo; beero'uwwanne hundam ayyim hee'oobee'i udma'i issoommo; an Waa'i kaka wocaammo» yoommisina ijaajukko. Iyyoosiyaas beet Iyyoo'aaqeem Yihudanne adil ihu ammane Waa'i iina «Reekaab abaroos beyyo mattaa Keesammi Mine wore; Keesammi mi'nnaannonnem mat baxxanchanne aagissaa aggamisina woyi'n diqaasa uwwe» yukko. Anim Reekaab mannika abaroosa hundam weeshummo; oohim Habaadiin beetina beet hee'u mulli Ermiyaas beeto Ya'aazaniya, ixxi abbaayyuwwaa oosoo edaa Keesammi Mine worummo; Agdaaliy beet hee'u hiraagaanchi Hanaaniy losaan hee'llo'i minenne aagisummo; oo minim gassaa'nnaanniinsi awwonaa gooca egeraanchi hee'u Shaaluum beet Ma'iseeyaanniinsi hanaan hee'oohane. Reekaab oos illagenne woyi'n diqaas wo'mmaakkoo haralla hincaa'ummo; agakkam humbulluwwam uwwaa «Oono'o, aggehe» yummo. Ihukkaarem ixxuwwi dabatta'a «Neese woyi'n diqaasa angoommoyyo; mashka'oomim Reekaabina beet hee'u niyyanni Iyyoonaadaab neesee ni shumo'ii hundim woyi'n diqaasa angoombee'isina ijaajaakko. Ee'isam gatti mine baximmi, uulla abuullimmii woyi'n kaashsha kaasimmii hasisoobee'isa kuraakko; waaraan inkaa lobakat doolle dukkaa'n woronne hee'nnoommisina ijaajaakko. Neesem niyyanni Iyyoonaadaab losisu losano baxonne hasinsaammo; neesee ni meentii ni goo'n oosii landii woyi'n diqaasa angoommoyyo. Ihukkaarem Baabiloo'n adil Nabukadanaxoor waaraa uullanne ora ki'isu ammane Baabiloo'n uulli manniinsii Sooriy uulli gogotiinsii gimbaa Yerusaaleema waalleena murte'nnummo; kabadem Yerusaaleemanne yoommine'i mashka'i eehane» yito'o. Reekaab beet hee'u Iyyoonaadaab oosina woyi'n diqaasa aggambee'isa ixxuwwi anni ijaaju ijaajo egetta'a kaballi afeebe'e woyi'n diqaasa hore'em aggamoyyo; ihukkaarem ki'nnuwwi an edaa edaa kuroommoka ijaajantakkeena hassakko'oyyo. Iina awwaaddam hiraagaano ki'nnuwwi beyyo asse'imma urummoyyo; Ixxuwwim jor googiinsi ki'nnuwwi daba'llitakka'a er baxo baxxakkamisina kutto'o; qophpha'n waa'uwwina otossitakkambee'isaa awwaaddakkambee'isaa qoxxisso'o; gaassi ki'nnuwwi anno'ina uwwummi uullanne hee'llakkamisina ee hundam ijaajaa hee'ummo. Ihukkaarem ki'nnuwwi i woshsha macceessakkeena hassakko'oyyo. Reekaabina beet hee'u Iyyoonaadaab oos ixxuwwi anni ijaaju ijaajo hundam egetto'ookko; ihukkaarem ki'nnuwwi i minaadab iina ijaajantakko'oyyo. Ee bikkina Isra'ee'l Waa'i ihummi gogoxxi Moollanni Waa'i Yihuxxi uullannee Yerusaaleemannee hee'llam mannanne hundannem eeboommisina wocummi bichcha eeboommo; mashka'oomim kuroommi woshsha macceesimma sabbakko'i bikkinattee weeshoommaarem dabachcha uwwitobee'i bikkinattee» yaa kuroommisina asse'ukko. Ee lasage Isra'ee'l Waa'i ihu gogoxxi Moollanni Waa'i Reekaab abaroosina wocu sagara «Gaassi ki'nnuwwi anni Iyyoonaadaab uwwu ijaajo hundam egettakko'ookko; losisu losa'nnisannem awwontakko'ookko; ijaaju ijaajo hundam ijaajantakko'ookko. Ee bikkina an Isra'ee'l Waa'i ihummi gogoxxi Moollanni Waa'i ‹Reekaab beet Iyyoonaadaab shumo'iinsi iina awwaadoo manchi hinkammanem bee'ooyyo› yoolla» yaa kurummo. Iyyoosiyaas beet Iyyoo'aaqeem Yihuxxi uullanne adil ihu soo'l hiinchonne Waa'i iina Ermiyaasena «An kiina wocummi balliinsi ki'issaa oohim Iyyoosiyaas adilla'n doolliinsi kaballi afeebe'e Isra'ee'l minaadaphphi bikkina, Yihuxxi minaadaphphi bikkinaa mulli minaadaphphi bikkinaa kurummi sagar hundam kitaabanne kitaabe. Ayyi la'ukko minaadab ixxuwwanne eebeena sawwummi bichcha macceessa'a jor googiinsi daba'lliteena xantamo; anim ixxuwwika boqqoomaa baaxiiloo haafoommo» yukko. Ee bikkina Neeriy beet Baarooka weeshaa Waa'i iina kuru sagar hundam kurummuuyyi ixxi odim xaaxamaakkoo omachchonne kitaabukko. Odim Baarookina «An Keesammi Mine mareena hoorakko'oo bikkina xanoommoyyo. Ihukkaarem minaadab soommanonne hee'llu'uuyyi at ee beyyo mare; Waa'i iina kuru sagara hundam kiina kurummuuyyi xaaxamaakkoo omachchonne kitaabbittoka sagara iimaa'llaa qananaa'e; beero'uwwiinsi waatto'i Yihuxxi minaadabina qananaa'e. Waa'i baddisoo quunqaa boobanaa minaadabanne eeboo'isa kuraakkoo bikkina ayyi la'ukko jor baxiinsi daba'llita'a Waa'a uunxiteena xantamo» yaa asse'ummo. Odim Neeriy beet Baarook ee an kurummoka hundam omachchonne kitaabamu Waa'i sagara Keesammi Minenne qananaa'ukko. Iyyoosiyaas beet Iyyoo'aaqeem Yihuxxi uullanne adil ihu onti hiinchonne honsi agananne Yerusaalee'mmekii Yihuxxi beero'uwwiinsi waatto'i mannii hundim Waa'iinsi haafite siiddeena soommanteena alallaatto'o. Minaadab macceesseena guddo'oohaannonne an kurummuuyyi Baarook omachchonne kitaabu Waa'ika sagara hundam qananaa'ukko. Keesammi Minenne eekka issukkok dummichchina kitaabaanchi hee'u Saafaan beet Gamaariy mi'n beyyinne huruuraa aagaatette hee'ukko; mi'n beyyim Keesammi Mine aagakkam haareechchi ooxxi gooc gadanonne hanaa'n qarinne manni wixxoo beyyiinsi ekkeenette hee'ukko. Saafaan beetina beet hee'u Gamaariy beet Miikay Waa'i wocu sagara hundam xaaxamu omachchiinsi Baarook qananaa'ukkuuyyi macceesukko. Ixxim adi'l mi'n beyyonne yoo daannuwwi yo'i dummichchi sawwite kitaaboo manchi mine marukko; dummichchika sawwite kitaaboo Elsham, Shamaa'iy beet Dalaay, Akboor beet Elnaataan, Safaan beet Gamaariy, Hanaaniy beet Sedeeqiyaasii mulli keenii eekke'enne afuutta'a hee'llo'o. Mikkiyaasim Baarook minaadabina qananaa'ukkuuyyi macceesu sagara hundam ixxuwwina kurukko. Ee lasage minaadabina Baarook qananaa'u xaaxamaakkoo omachchonne kitaabamukkoka amadaa waarona kurona daannuwwi Yihudiina asse'llo'o; Yihudiin Naataaniy beet ihukkuuyyi Naataaniy odim Sheleemiy beeto; Sheleemiyim Kuush beeto; Baarook xaaxamaakkoo omachchonne kitaabamukkoka amadaa ixxuwwi beyyo waarukko. Daannuwwim Baarookina «Hino'o afuuttaa xaaxamaakkoo omachchonne kitaabamukkoka qananaa'e» yito'o. Baarookim qananaa'ukko. Baarook qananaa'aa guullaa lasage muggito'i bikkina illi ille moo'aqqanta'a ixxena ‹‹Ka woshsha adilina la'isimmi hasisookko›› yito'o. Ee lasage odim «Ka hundam hinkid kitaabbida'e kure; kaka kitaabbittok Ermiyaas kurukkuuyyattennihe?» yita'a xa'mmito'o. Baarookim «Eeyya hanqame; ka omachchonne qalaminne kitaabummok Ermiyaas kurukkuuyyatte» yukko. Daannuwwim «Atii Ermiyaasii mat beyyo mattakka'a maaxammehe; yoontakke'i beyyom ayyim la'oone» yito'o. Daannuwwim omachchonne kitaabamu Waa'ika sagara dummichchika sawwite kitaaboo Eelsaam minenne dissito'o; adi'l beyyom matta'a ihu luwwi hundam kutto'o. Adilim omachchonne kitaabamu Waa'ika sagara eeboo'isina Yihudiina yakkam mancho asse'ukko; ixxim omachchonne kitaabamu Waa'ika sagara Eelshaam miniinsi eebaa adilinaa gadanonne uullita'a hee'llo'i daannuwwina hundinamii qananaa'ukko. Ammanoom hagayyi hee'u bikkina adil hagayyi agana higisoo minenne gii'l midachchi gadanonne afuuraa hee'ukko. Yihudinam sas ogora te'im soor ogora qananaa'aa lasonne omachchonne kitaabamu Waa'i sagara adil bisa'inne muransaa giiranne uunjukko; ee'isinnem omachchonne kitaabamaa hee'u Waa'i sagara hundam giiranne shokkiisukko. Adilii maqi'l daannuwwii ee sagara macceesso'i ammane maham baddito'oyyo; kichche'lla'atim ixxuwwika eddechcha dereetto'oyyo. Elnaataan, Dalaayii Gamaariyii xaaxamaakkoo omachchonne kitaabamu sagara adil shokkiisoobee'isa uunxito'aarem ixxi maham macceeseena hasukkoyyo. Ee lasage eesee Baarookaa amadda'a kattamisina adi'l beet hee'u Yiraahimi'eela, Aziri'eel beet Saraayaa Abdi'eel beet Sheleemiyaa ijaajukko; ihukkaarem neese Waa'i maaxukko. Adilinam «Oono'o, at xaaxamaakkoo omachchonne kitaabamu Waa'i sagara shokkiissaatto; odim ‹Baabiloo'n adil waaraa ka uullaa ka uullanne hee'oo mannaa diinatee hundam bi'isoo'isa hiraago woccittok mahinatte?› yitaa Ermiyaasa xa'mmitaatto. Adil Iyyoo'aaqeema, Waa'i kiina ‹Daawiit adilla'n barcumanne afuuroo manchi ki shumo'iinsi hee'ooyyo; ki leeshim biiranne uunjamaa balli eelliinchinaa hii'm hadaddinaa ihookko. Baxxakko'i baaxii'l bikkina keese, ki shumo'oo maqi'l daannuwwa hundamii guzumo'oommo; i sagara macceessakkobee'i bikkina ki'nnuwwanne, Yerusaalee'mmaannonnee Yihuxxi minaadabannee eeboommo yaa wocummi jor luwwa hundam eeboommo› yoolla» yaa kuroommisina ijaajukko. Ee bikkina xaaxamaakkoo omachcho massaa kitaabam hee'u Neeriy beet Baarookina massaa uwwummo; ixxim sagarinne kurummaka hundam kitaabukko; Yihuxxi adil Iyyoo'aaqeem shokkiisu omachchonne yoohaanni'nnookkokaa anim kurummoka laboo mulli sagaraa hundam kitaabukko. Baabiloo'n adil Nabukadanaxoore Iyyoosiyaas beet Sedeeqiyaasa adil Iyyoo'aaqeem beet hee'u Ikkooniyaan beyyonne adil issukko. Ihukkaarem Sedeeqiyaas, ixxi gassaanii minaadabii hiraagaanchi Ermiyaasinne Waa'i wocu sagarina ijaajanto'oyyo. Adil Sedeeqiyaas «Ni Moollanni Waa'a ni bikkina uunxe» yaa Sheleemiy beet Yahukaalaa Ma'eesaay beet qeessichchi Safooniyaasaa i beyyo asse'ukko. Ee ammane an karaxxi mine aagoo'n hee'ummi bikkina minaadaphphi Lambe'enne hasummisa daba'llamam hee'ummo. Gibxi uulli o'l gogot gabala higga'a waatto'oo bikkina Yerusaaleema kibbita'a hee'llo'i Baabiloo'n o'l gogot laso daba'llito'o. Odim Baabiloo'n uulli manni daba'llita'a waatta'a ka beero'o qassamo; kaa'lla'atim giirinne shokkiissamo. ‹Baabiloo'n uulli manni daba'llita'a waattamoyyo› yitakka'a sawwitakkotte; elle'llambee'i bikkina ki'nnuwwi gaga qawwiissakkotte. Baabiloo'n o'l googota kaa'llakkota'nnim madaa'lla'a dukkaa'n woronne afuutto'i keenim qoxxita'a ki'lla'a beero'o giirinne shokkiissamo» yaa asse'amaano asse'aa kurona eese ijaajukko. Gibxi uulli o'l gogot hincukkisa macceesaa Baabiloo'n o'l gogot Yerusaalee'm beero'o fatakaa laso gibaa hee'ukko. Anim i abaroosinne maqire afoo uulli baxxancha a'lleena Yerusaaleemiinse Biiniyaam uulla mareena ki'ummo. Ihukkaarem Biiniyaam ooxxi Gooca afummisam waardiyyuwwa ijaajaanchi hee'u Hanaaniyina beet beet hee'u Sheleemiyina beet Yiiriy «Ka uulla laggaa Baabiloona matteenatte» yaa amadukko. Anim «Yitoo woshshi qophphano; an ka uulla lagaa Baabiloo'n uulla mareenayyo» yaa dabachcha uwwummo; ihukkaarem Yiiriy i woshsha macceeseena hasubee'i bikkina karaa daannuwwi beyyo massukko. Daannuwwim lobakata quuqqa'a eese gansiisso'o; ee lasage karaxxi min ihoo'isina issakka'a hee'u dummichchi sawwite kitaaboo Yoonaataan mine aagisakka'a karakko'o. Eekke'ennem uulli woronne yoo karaxxi minenne lobakat ammane afuurummo. Eehanniinsi lasonne adil Sedeeqiyaas asse'amaano asse'aa adi'l mine maroommisa issaa annannam «Waa'i wocu hiraaqqi sagar yoohonnihe?» yaa xa'mmukko. Anim «Eeyya yookko; oohim at Baabiloo'n adilina higisantaa uwwantootto» yummo. Ee lasage adil Sedeeqiyaasena «Eese kassiissakko'ok keesenne, ki gassaanonnee ka minaadabannee baxummi jolli maruwwa? Kiina ‹Baabiloo'n adil keesennee ka uullannee hawwo afisooyyo› yita'a wocco'i hiraagaan hannonne yo'o? Ee bikkina adila, i woshsha macceessoo'isinaa xa'mmoommi xa'mmichchinam dabachcha uwwitoo'isinaa uunxoommo. Oohim karaxxi min issitakko'i kitaabaanchi Yoonaataan mine dabattitte; eekke'e daba'llaa aagumlas lehoommo» yaa xaa'mmummo. Ee bikkina adil Sedeeqiyaas adi'l mi'n ooxxi woronne yoo waardiyyuwwi minenne karamoommisina ijaajukko; anim eekke'enne hee'ummo; beero'iinsi hurbaat beeddeebe'e hurbaata sarookee'n angiinsi mat mat xeffo'i qorosho'o ballina ballina uwwakkam hee'ukko. Anim Waa'ika sagara minaadabina losisummisa Maataan beet Shafaaxiy, Phaashihuur beet Gadaaliy, Sheleemiy beet Yahukaalii Malkiy beet Phaashihuurii macceesso'o. Wocummi sagarim «Yerusaalee'm beero'onne gatookkok hundim orinne, sibaarinne, te'im jabbinne lehookko; ihukkaarem Baabiloo'n gogoxxi beyyo maraa anga uwwookkok lehooyyo; ixxi gagam xossiixxaa foorinne hee'ookko» yoohane hee'ukko. Odim kuroommisina Waa'i kuru sagar «An ka beero'o Baabiloo'n uulli o'l gogotina higisaa uwwoommo; ixxuwwim ixxuwwi gassoronne issita'a amaddamo» yoohane hee'ukko. Ee lasage gassaan adilina «Ku manchi wocoo woshshinne ka beero'onne gataa yoo gaadaanii minaadabii neeyyata muroolli ihu bikkina ixxi lehimmi hasisookko; ku manchi minaadaphphi bichcha sawwoohane bagaan eroomma sawwoobee'ane» yito'o. Adil Sedeeqiyaasim «Oono'o, ixxi ki'nnuwwi angannem yoo bikkina hassakko'isa issitakko'aare an hooroommoyyo» yaa dabachcha uwwukko. Ee bikkina eese amadda'a waardiyya egeraa'n wixxixxi beyyonne yoo adi'l beet Malkiy wo'i barenne heechchinne aad hoorakka'a dilliisakko'o; Ba'l woronnem hariinsi bagaan wo'i hee'ubee'i bikkina ha'l woronne xuuxamummo. Adi'l minenne daanni hee'u Tophphe'i uulli Abemeeleeka yakkam muleessakkichchi eese barenne ubbuusakko'isa macceesukko; ee ammane adil Biiniyaa'm ooxxi goocanne dummichchanne afuuraa hee'ukko. Ee bikkina Abemeeleek adi'l beyyo maraa «Adila, ku manni hiraagaanchi Ermiyaase barenne ubbuussa'a kee'mmaalli hawwojja hawwoddo'ookko. Beero'onne hurbaat bee'i bikkina sibaarinne leheenatte» yukko. Ee lasage adil Abemeeleekina «Ka beyyiinsi sas mancho amaddaa mattaa hiraagaanchi Ermiyaase lehoo'n illage wo'i bariinsi fissehe» yaa ijaajukko. Abemeeleekim manna awwonsaa marukko; Adi'l mi'nnek mu'ut afuuroo mine aagaatim beeddaa dereeramaakkoo suusa aa'aa usanne karaa ba'l woronne yoommi beyyonne aad dilliisukko. Us muroobee'isa suusooma kikkilonne karoommisa kurukko; anim yukkisanne issummo. Oo mannim usinne gosaassu'uuyyi ba'l woriinsi fissita'a adi'l mi'n ooxxi woronne yoo waardiyya egeraa'n minenne aagissa'a katto'o. Adil Sedeeqiyaase eese Keesammi Mi'n saxxi gooca weeshisaa «An keese mat luwwa xa'mmoommo; maham maaxxitte» yukko. Anim «Hanqa wocummita'nnim shitootto; sogumta'nnim macceesseena hassooyyo» yummo. Ee ammane adil Sedeeqiyaas «An keese shoommoyyo; shoo manninam higisaa uwwoombee'an ihukkisa foore uwwu hee'oo Waa'i summinne hide'oommo» yaa ayyim la'oobee'isa hide'ukko. Ee lasage Isra'ee'l Waa'i ihu gogoxxi Moollanni Waa'i Sedeeqiyaas bikkina kurukkoka hundam «Baabiloo'n uulli o'l daannuwwina anga uwwittaare letoo'n gattootto; ku beero'im giirinne shokkimmiinsi gatookko; atii ki abaroosii foorinne hee'llakkamo. Ihukkaarem ixxuwwinamdu anga uwwitbeelas ku beero'i uwwamookko; Ixxuwwim shokkiissamo; atim ixxuwwi angiinsi goxxitaa xantooyyo» yaa kurummo. Adilim «An baddoommok ni uulliinsi lagga'a Baabiloo'n uulla matto'i manna; oo manni eese ixxuwwina higissa'a uwwitolas Baabiloo'n manni barche'e afissamo» yaa dabachcha uwwukko. Anim «Hawwi bee'e; ixxuwwina higisakka'a uwwakkamoyyo; Waa'i wocu sagarina ijaajantilas kiina makkookko; atim lehiinsi gattootto. Ihukkaarem anga uwwimma sabbilas Waa'i iina moo'isu kaalti yookko. Oohim Yihuxxi adilla'n minenne gatu meenti hundam Baabiloo'n uulli daannuwwi beyyo massitamo; oo meentim ‹Amma'nnantaa hee'llitti ki beshshuwwi keese huushisso'o; ixxuwwim keese kaa'llo'o; ki lokkim shophe'i woronne aagu bikkina ki beshshuwwi utta'a matto'o› yitamo» yummo. Odim «Ki meentoo oosoo hundam Baabiloo'n uulla massakkamo; atim ixxuwwi angiinsi goxxitooyyo; Baabiloo'n adilim keese amadaa karookko; ku beero'im giirinne shokkookko. Sedeeqiyaasim «Ka woncummi woshsha ayyim la'oone; la'ulas keese shookko. Daannuwwi an kiinninne maqire haasaawwummisa macceessolas waatta'a maha woncumda'ee xa'mmitamo; woncummi woshsha maaxxoo'n kuttilas shitambee'isa sagara aaggamo. Ee bikkina ‹Karaxxi min hee'u Yoonaataan mine dabattaa aagsitlas lehoommi bikkina aagissitte› yaa uunxam hee'ummo yihe» yukko. Eehanniinsi lasonne daannuwwi hundim i beyyo waatta'a xa'mmito'o; anim adil Sedeeqiyaas ijaajukkisa xale'e kurummo; anii adilii haasaawwinummuuyyi ayyim macceeubee'i bikkina maham issiteena xanto'oyyo. An Yerusaaleem beero'o diina'i amadeebe'e adi'l mi'n ooxxi woronne yoo waardiyyi egeraa'n minenne karamaa afuurummo. Sedeeqiyaas minaadabanne adil ihu honsi hiinchonne tommi agananne Baabiloo'n uulli adil Nabukadanaxoor o'l gogotinne hundinnem waaraa Yerusaaleem beero'o kibbukko. Sedeeqiyaas adil ihu tommaannonnee mat hiinchonnee soo'l aganannee honsi ballannee Yerusaaleem beero'ika qasha diina'i iiqaa aagukko. Baabiloo'n adi'l maqi'l daannuwwi hundim Samigaar neebo'i, Nergaalshaareex, lob ijaajaanchi Sarsaakiimii lob daanni Nergaalshaareexii hundim Yerusaaleem beero'i woro aagga'a lambe'i beyyi ooxxi goocanne afuutto'o. Adil Sedeeqiyaasii o'l gaadaanii hundim ihu luwwi hundam moo'lla'a hiimonne beero'iinsi fitta'a xotteena yakito'o; adilla'n mi'n duubbi kaashshi kollinne aa'lla'a lamem ooxxi lamejjannem yoo goocinne Yoordaanoos cebbi kollonne hootta'a xotto'o. Ihukkaarem Baabiloo'n uulli o'l gogot hollitu'uuyyi Laseessa'a Iyaarko'i gadanonne yoo biir uullanne Sedeeqiyaase affa'a qeefaddo'o; eehanniinsi lasonne Haamaaxxi uullanne Riibila yakkam beero'o adil Nabukadanaxoor yoo beyyo amadda'a wotto'o; Ixxim eekke'em Sedeeqiyaasenne oogatukko. Baabiloo'n adil Riibila yakkam beero'onne Sedeeqiyaas ooso ixxi illi moo'onam dussiisukko; daannuwwa hundam shukko. Eehanniinsi lasonne Sedeeqiyaasika lamem illem qooqisaa xaarinne karaa Baabiloona massukko. Baabiloo'n uulli manni adi'l minee minaadaphphi gatti minee giirinneshokkisso'o ootam gindito'o. Lasaanchonne odim Baabiloo'n adi'l o'l ijaajaanchi Nabuzaardaan Yerusaaleem beero'onne gatu minaadabaa luxxeka ixxi beyyo gibba'a matto'i mannaa hundam qeefadaa Baabiloo'n uulla massukko. Ihukkaarem amaxxi bee'i bux keeno uullanne urukko; Ixxuwwinam duubbi kaashsha kaaxxitam beyyoo abuullaqqitam beyyoo uwwukko. Adil Nabukadanaxoor waardiyyuwwa ijaajaanchi hee'u Nabuzaardaanina «Ermiyaas beyyo mattaa hasisoo hara'mmat hundam isse bagaan matem luwwannem hawwodditte» yaa ijaajukko. Ee bikkina waardiyyuwwa ijaajaanchi Nabuzaardaan, Nabuushaazbaan, Nergaalshaareexeerinnee Baabiloo'n uulli mulli daannuwwinnee maqirem karamaa hee'ummi adi'l mi'n ooxxi woronne yoo waardiyya egeraa'n miniinsi firoommisa issukko. Eesem Saafaan beetina beet hee'u Ahiqaam beet Gadaliyaas beyyonne abooyyakku'uuyyi mine uwwakka'a hee'oommisa issakko'o; anim i minaadaphphi lambe'enne ihaa eekke'enne hee'ummo. An waardiyya egeraa'n beyyonne karamaa hee'ummi ammane Isra'ee'l Waa'i ihu gogoxxi Moollanni Waa'i Abemeeleeka yakkam Tophphe'i uulli manchina «Ka beero'onnee goddi ihoo'n bichcha eebaa wocummi sagara wonshoommo ee ammane ookki ihukkuuyyi ki illinne moo'llootto. Ihukkaarem ee balla an keese egeroommo; badditoo diina'i angannem qeefadantooyyo. An xumminne egeroommi bikkina letooyyo; eesenne amma'nnantaattoo bikkina foorinne hee'llootto; an Waa'i eekka wocaammo» yaa kuroommisina ijaajukko. Waardiyyuwwa ijaajaanchi Nabuzaardaan eese Yerusaaleem beero'iinsii yihuxxiuulliinsi qeefadanta'a Baabiloo'n uullaa mattam manninne maqirem eese Raama'a yakkam beero'onne xaa'l chimchiminne karamaammoohaannone moo'aa tissiisukko; eehanniinsi lasonne Waa'i iina wocukko. Waardiyyuwwa ijaajaanchi eese annannam tochchonne fissaa «Ki Moollanni Waa'i ka'uulla bi'isoo'isa gaassaahim wocaa hee'ukko. Issoommo yaa sawwukkoka hundam oono'o kaba wonshaakko; kuk hundim ihukkok ki minaadab baaxiilo baximminnee Waa'ina ijaajancha hoogimminnettee. Oono'o, an kaba ki anganne yoo xaa'l chimchima tiraammo; iinninne maqirem Baabiloo'n uullaa matteena hassilas waare; an keese abooyyoommo; matteena hassibeelasim gatteena xantootto; doo'llititti beyyo hundam matteena uulli hundim ki illagennette» yukko. An dabachcha uwwoo'nnim Nabuzaardaan odim «Baabiloo'n adil Nabukadanaxoor Yihuxxi uulli beero'uwwanne gassaanchi issaa doo'llu Saafaan beet ihu Ahiiqaam beet Gadaliy beyyo mare; ixxenne maqirem minaadaphphi lambe'enne hee'lleena xantootto; te'im kiina liiransoo uulla hundam mare» yukko. Ee lasage annanni ihaakkoo irifo'oo amaxxaa maroommi hurbaataa uwwaa geegeesukko. Anim Gadaaliyinne maqire hee'eena Misiphpha yakkam beyyo marummo; eekke'enne uullanne gataa yoo manninne maqirem ixxuwwi lambe'enne hee'ummo. Minaadabina gaaxxi awwonsaanii gaadaanii Baabiloo'n adilina anga uwwito'oyyo hee'llo'o; ixxuwwim Baabiloo'n adil Gadaaliya uulli gassaanchi issaa doo'llukkisaa Baabiloo'n uulla qeefadanta'a mattobee'i minaadabina daanni issukkisa macceesso'o. Ee bikkina Naataaniy beet Isma'eel, Qaareeh oos Yoohanaanii Yoonaataanii, Taanihuumet beet Saaraay, Naxoof beero'i Eefaay oosii Ma'ika'i uulli Ya'aazanii ixxuwwi minaadabinne maqirem Misiphphanne yoo Gadaaliy beyyo waatto'o. Akiqam beet Godoliyim ka'isa yaa hide'ukko; «Baabiloo'n uulli mannina anga uwwimma badditakkotte; ka uullanne afuuttakka'a Baabiloo'n adilina gibillehe; ki'nnuwwina hundem luwwim makkookko. Anim ki'nnuwwinne maqirem ka Misiphphanne hee'oommi bikkina Baabiloo'n uulli manni waattam ammane ki'nnuwwa bikkaa uulloommo. Ihukkaarem ki'nnuwwi hee'llakkam hegeegonne woyi'n misha, wee'l zaytaa mulli haqqi mishaa wixxa'llakka'a tuubbehe. Moo'aaphphi uullannee Amoo'n uullannee Eedoo'm uullannee mulli uullannee hee'llam Isra'ee'l minaadab Baabiloo'n adil Yihuxxi uullanne hofqax Isra'ee'l minaadabim hee'lleena xantamisaa ixxuwwannem Gadaaliy daanni ihoo'isaa issaa doo'llukkisa macceesso'o. Ee bikkina binnita'a hee'llam beyyiinsi hundiinsim wixxita'a Yihuxxi uulla daba'llito'o. Misiphphanne yoo Gadaaliy beyyo waatta'a lobakat woyi'n mishaa mulli haqqi mishaa wixxaa'lla'a tuubbo'o. Eehanniinsi lasonne Yoohaanaanii illageen anga uwwitobee'i gaaxxi awwonsaanii hundim Misiphphanne yoo Gadaaliy beyyo waatta'a «Naataaniyaan beet Isma'eela keese shoo'isina Amoo'n adil Baa'aaliis ki beyyo asse'ukkisa laqqittoyonihe?» yita'a xa'mmito'o; ihukkaarem Gadaaliy ee woshsha amma'nnukkoyyo. Qareey beet Yoohaanaan Misiphphanne annannam «Naataaniy beet Isma'eela ayyim la'oo'n maraa shoommo. Ki beyyo gibba'a waatto'i minaadab binnituuyyi beyyonne gatto'i minaadab bi'llonaa keese mahina shookko?» yukko. Ihukkaarem Gadaaliy Qareey beet Yoohaanaanina «Isma'eel bikkina woccootti woshshi hundim hanqi ihubee'i bikkina eekka hore'em issititte» yukko. Ee hiinchaannonne lama'l agananne adi'l mi'n lob gassaaniinsi matoom adi'l abaroosiinsi ihu Eelshaama'i beetina beet hee'u Naataaniy beet Isma'eel tommi manchinne maqirem ulla minaadaba gassaanchi Gadaaliya do'eena Misiphpha marukko; Hundim hurbaata itteena afuutta'a hee'llu'uuyyim Naataaniy beet Isma'eelii maqi'l tommem mannii Baabiloo'n adil gassaanchi issaa doo'llu Gadaaliya bisa'inne aphphissa'a shito'o. Odim Isma'eel Gadaaliyinne maqirem Misiphphanne hee'llo'i Isra'ee'l oosoo Baabiloo'n gaadaanoo edaa shukko. Soodaraar daram gadaliy lehukkisa ayyim la'oo'n Seekeemiinsii Seelo'iinsii Samaare'iinsii waatto'o; ixxuwwim kichche'lla'a haareedda hogoossita'a, eddechcha dereetta'atii illi kollo xargita'atii hee'llo'o. Keesammi Minenne kitima hincaa'llam hurbaataa aduruusaa amadda'a hee'llo'o. Odim Naataaniy beet Isma'eel Misiphphiinsi wi'llukkuuyyi ee manna aa'eena waarukko; Ixxuwwi beyyo waaraa lasonne «Ahiiqaam beet Gadaaliy beyyo waallehe» yukko. Oo manni beero'o aaggo'isam Naataaliyyi beet Isima'eelii ixxi awwonaanii shita'a barenne uunjito'o. Sadeentayyi manniinsem tommoom «Ha'i neese shititte; Neese abuulli woronne maanxaammo lobakat aras, so'i, wee'l zaytii marabii yookko» yita'a Isma'eela uunxito'o; ixxim qishixxato issukko. Ee manna shaa ubbuusu wo'i bar adil Aasa'i Isra'ee'l adil Baa'oosh hawwo afisoobee'isa baddu bikkina hinsiisaakkoohane hee'ukko; Isma'eelim ee barenne leesha wonshukko. Eehanniinsi lasonne Isma'eel adil Sedeeqiyaas mi'n landaa gatu minaadabaa Misiphphanne karukko; ixxuwwim Baabiloo'n adilina bagaxxi ijaajaanchi Nabuzaraadaan Gadaaliy anganne yabo uwwukeen hee'llo'o. Ihukkaarem Isma'eel ixxuwwa qeefadaa Amoo'n uulli kolli gibeena ki'ukko. Qareey beet Yoohaanaanii ixxenne maqirem hee'llo'i o'l daannuwwii hundim Naataaniy beet Isma'eel baxu damiga macceesso'o. Ee bikkina Naataaniy beet Isma'eela qasseena maqi'l manninnem matta'a; Gaaba'oonaa yakkam uullanne matto'o; Gaaba'oonaa yakkam uullanne yoo lob qoqqophphi gadano affo'o. Isma'eela qeefadaa massu manni hundim Yoohaanaanaa maqi'l o'l awwonsaanoo mo'llo'i ammanenne liiranto'o. Isma'eel Misiphphiinsi qeefadaa massu manni hundim goxxita'a Qareey beet Yoohaanaan maqire hee'llo'i mannanne exxito'o. Ihukkaarem Naataaniy beet Isma'eel ixxenne hee'llo'i Sadeentem manninne maqirem Yoohaanaan angiinsi goxxaa Amoo'n uulla gibukko. Qareey beet Yoohaanaanii ixxenne maqirem hee'llo'i gaaxxi awwonsaanii hundim Naataaniy beet Isma'eel Akkiq beet Gadaaliya shaa lasage qeefadanto'i manna dabatta'a amadda'a matto'o; oo keenim gaadaanoo meentoo ciilluwwaa hee'llo'o. O'l gogoxxi gassaan, Qaareeh beet Yoohaanaanii Hooshaay beet Azaariyaasii minaadabii hundim hoffokii lobokii i beyyo waatta'a «Gaassi lobakat manni hee'nnummo; ihukkaarem kaba at moo'lloo'isam gantum qax hoffi manna; ee bikkina ha'i ni uunxato macceese. Qeefajjiinsi gantummi minaadaphphi bikkina Waa'a uunxe. Ki Moollanni Waa'i neese malloommi beyyoo banxoommi baxoo caakkisoo'isina uunxe» yito'o. Anim «Danaamo yitakko'isam Moollanni Waa'a ki'nnuwwi bikkina uunxoommo; ixxi kuru luwwi hundam ki'nnuwwiinsi maham maaxoo'n kuroommo» yummo. Eehanniinsi lasonne ixxuwwi odim «Moollanni Waa'i ki kollinne uwwoo ijaaj hundam ijaajammumbeelas Waa'i ixxi gagim neesenne hanqo'anee amma'nnamaakkoo naqaashaa ihona. Iittinummom sambummom ni Moollanni Waa'i sagarina ijaajammoommo; keese ixxi beyyo asse'nnoommuullakim neese ixxena ijaajammumlas niina hundem luwwim makkoo bikkinatte» yito'o. Tommi balliinsi lasonne Waa'i iina wocukko. Ee bikkina Yoohaanaana, ixxenne maqire hee'llo'i gaaxxi awwonsaanoo minaadaba hoffokaa lobokaa hundamii i beyyo weeshaa «Ki'nnuwwi bikkina uunxoommisina asse'llakko'i Isra'ee'l Moollanni Waa'i ‹Ki'nnuwwanne afoo'isina issummi bichchanne kichche'aammo; ee bikkina ka uullannemdu afuuttakkolas an ki'nnuwwa dabaraa axisoommo bagaan bi'isoommoyyo; kaasoommo bagaan xoqoloommoyyo. Kaba ki'nnuwwa baddisoo Baabiloo'n adila badditakkotte; ki'nnuwwa ixxi angiinsi ubbuusisaa gatiseena an ki'nnuwwinne yoommo. An qishixxoommisam Baabiloo'n adilim ki'nnuwwina qishixxoo'isaa ki'nnuwwi uulla daba'llitakkamisa issoo'isaa issoommo; an Waa'im eekka wocaammo› yukko. «Ihukkaarem ki'nnuwwi Yihuxxi uullanne gattakko'i minaadab ki'nnuwwi Moollanni Waa'ina ijaajammoommoyyo yitakka'a ka uullanne afuurimma sabbakkolas odim ‹Neese orii xurumbulli sagarii macceesamoobee'i uulla sibaarim bee'i Gibxi uulla mallaa eekke'enne hee'nnoommo› yitakkolas Waa'i ki'nnuwwi bikkina wocoo luwwa macceessehe; Isra'ee'l Waa'i ihu gogoxxi Moollanni ‹Gibxi uullaa dillitakka'a eekke'enne hee'nnoommo yitakkolas oo badditakko'i or ki'nnuwwi beyyo afookko; Badditakkam sibaarim ki'nnuwwa laseesookko; ee Gibxi uullannem letakkamo. Gibxi uulla matta'a hee'lleena murte'llo'i keen hundim orinnee sibaarinnee jabbinnee beedditamo; ixxuwwanne eebeena sawwummi bichchiinsi matim goxxaa gatooyyo› yoolla. «Isra'ee'l Waa'i ihu gogoxxi Moollanni ‹Gibxi uullamdu mattakkolas kanniinsi illageen Yerusaalee'm mannanne dillu i quunqii boobanii ki'nnuwwannem dillookko. Ki'nnuwwi moo'oo manni beyyonne hundannem sabantakko'oohane, maalalakamane, duumakkamanee naac sagara wocakkamanee ikkakkamisa issoommo; ka beyyom la'mmaagge moo'llakkamoyyo› yoolla» yummo. Oono'o, anim dabachchooma caakkisaa kuraammo; ihukkaarem ki'nnuwwi Moollanni Waa'i asse'ukkaare kurummi sagarina kabadem ijaajantakko'oyyo. Kaba mattakka'a hee'llakkeena hassakko'i beyyonne bisa'inne, sibaarinnee jabbinnee letakkamisa laqqehe» yummo. An ixxuwwi Moollanni Waa'i kuroommisina asse'u minaadabina kuraa guullummo. Ee lasage Hosheey beet Sariyaas, Qaareeh beet Yoohaanaanii bolxitam mulli mannii hundim eese «At qophphano woccaatto; ni Moollanni Waa'i ‹Eekke'enne hee'llakkeena Gibxa mattakkotte yitaa kure› yaa keese asse'ukkoyyo. Ihukkaarem Baabiloo'n uulli manni neese shitamisina te'im qeefadda'a massitamisina ixxuwwi anganne higissaa uwwitoo'isina keese ki'isansukkok Neeriy beet Baarookatte» yito'o. Ee bikkina Qaareey beet Yoohaanaanii gaaxxi awwonsaanii ee'isam minaadabii hundim uullanne hee'llamisina ijaaju Waa'ika sagara macceesseena hasso'oyyo. Ee lasage Qareey beet Yoohaanaanii gaaxxi awwonsaanii mulli minaadaphphi lambe'enne binnito'i beyyiinsi uullanne hee'llamisina daba'llito'i manna hundam amadda'a Gibxi uulla matto'o. Odim goonaa meentoo ciilluwwaa Baabiloo'n gaaxxi ijaajaanchi Nabuzaardaan Akkiqaam beet Gadaaliyaas anganne dissu adi'l mi'n landa ee'isam eesee Baarookaa massito'o. Waa'i sagarina ijaajancha sabba'a Gibxa matta'a Xaafinaas beero'i afeebe'e aaggo'o. Ee Xaafinaas Beero'onne Waa'i iina «Lob kinneewwa massitaa Xaafinaasanne yoo adil Faari'oon mine aagakkam goocanne minaadab moo'llu'uuyyim kininne baxakko'i gaxanne waamme. Odim Isra'ee'l Waa'i ihummi gogoxxi Moollanni Waa'i iina awwaadaanchi ihu Baabiloo'n adil Nabukadanaxoora waaroo'isa issommo; Adilla'n barcumam at kina waammititti beyyonne dissaa adilla'n dukkaanam kaasoo'isa kure. Nabukadanaxoorem waaraa Gibxa qasookko; jabbinne letamisina qoodanto'i keen jabbinne letamo; qeefadanta'a mattamisina qoodanto'i keen qeefadantamo; oranne letamisina qoodanto'i keen odim orannem letamo. Nabukadanaxoor Gibxi uullanne yoo qophpha'n waa'uwwi minenne giira xanqisaa shokkiisookko; qophpha'n waa'uwwam qeefadaa massookko; Allaaraanchi eddechchanne hanenne labasa edaa edde'oo'isam Gibxi uulla ixxi gassonne edaa xumminne elle'ookko. Gibxi uullanne Oona yakkam beero'onne yoo kininne baxakko'oo soodduwwa iiqansookko; Gibxanne yoo qophpha'n waa'uwwika minneewwa giirinne shokkiisookko» yukko. Gibxi uullanne hanaa'n qarinne Migdoola, Xaafinaasaa Meemfoosaa yakkam beero'uwwannee uullaannonnee woroo'n qarinne birinne binnita'a hee'llam minaadabina Waa'ik sagar i beyyo waarukko. Gogoxxi Moollanni Isra'ee'l Waa'i «Yerusaaleemannee beero'uwwannee hundannem eebummi bichcha ki'nnuwwi moo'llakko'ookko; oono'o kabad afeebe'em gindamaa matim hee'oobee'isa ihaa yookko. Mashka'oomim ee beero'uwwanne hee'llo'i minaadab jor baxo baxxa'a eese quuqisso'aarette; ixxuwwi qophpha'n waa'uwwina kitima hincaa'llo'o; ixxuwwam ki'nnuwwi te'im ki'nnuwwi anno'i otossitobee'i mulli waa'uwwina otossitto'o Anim ka ha'yyoombee'i shigigaa'oo baxo baxxakkam bee'isa qoxxissona iina awwaaddam hiraagaano ki'nnuwwi beyyo edaa edaa asse'ummo. Ki'nnuwwi ihukkaarem ixxuwwi woccam woshsha macceessakkeena hassakko'oyyo. Jor googiinsem daba'llitakka'a qophpha'n waa'uwwina kitima hincaa'imma uttakko'oyyo. Ee bikkina beero'uwwannee Yerusaaleem googguwwannee i quunqii bala'ii dillaa gii'llisa aphphoo'isa issummo; kaballa moo'llakkamisam gindamaa ayyim hee'oobee'an ihaa diihaakko. «Kabadem an Isra'ee'l Waa'i ihummi gogoxxi Moollanni Waa'i ki'nnuwwa xa'mmoommo; manni shumo'i gatoo'n goonii meentii, oosii Ciilluwwii uulliinsi bi'llamisina ka kee'mmaalli bichcha ki'nnuwwi gaganne mahina eebaqqitakkamuulla? Hee'llakkeena waattakko'i Gibxi uullanne anginne baxxakko'i qophpha'n waa'uwwina kitima hincaa'imminnee otossimminnee eese mahina quuqissakkamuulla? Te'im uullanne yoo minaadab hundim naacoo'isinaa ki'nnuwwi summim duumamoo'isinaa ki'nnuwwi gaga bi'ixxitakkamonnihe? Uullannee Yerusaalee'm googguwwannee ki'nnuwwi anno'ii adilluwwii ixxuwwi meentii baxxakko'i jolla xaddakko'onnihe? Kaballi afeebe'e horoore heeshaa'llakka'a iina lomba uwwitakko'oyyo; ki'nnuwwinaa ki'nnuwwi anno'inaa uwwummi seeraa gatti ogoraa egettakkeena hassakko'oyyo. «Ee bikkina Isra'ee'l Waa'i ihummi Gogoxxi Moollanni Waa'i uulla hundam bi'iseena iikka ille jollinne ki'nnuwwi hanenne issoommo. Gibxa matta'a hee'lleena murte'llo'i qeefajjiinsi gatto'i manna hundam bi'llamisa issoommo. Hoffaanniinsi lobaannonne afeebe'e bagadinnee sibaarinnee Gibxi uullanne letamo; ki'nnuwwi ceemanchina, muggisoo guzumo'ina, duumanchinaa naacanchinaa mare'i ikkakkamo. Yerusaalee'm beero'i manna bagadinne, sibaarinnee jabbinnee bi'isummisam Gibxanne hee'llam keenom bi'isoommo. Uullanne qeefajjiinsi gatta'a Gibxi uulla matto'i keenyihuxxi uulla daba'lliteena mixxota'nnim hofqaxiinsi bagaan matim goxxaa te'im gataayihuxxi uulla mat manchim daba'llooyyo» yukko. Ee lasage Ixxuwwi meenti qophpha'n waa'uwwina kitima hincaa'oo'isa la'oo gooniimeentii hundim Gibxi uullanne woroo'n qarinne hee'llam Isra'ee'l minaadabii ee beyyonne uullita'a hee'llo'i meentii hundim mateeyyanne wixxita'a eese. «At Waa'i summinne kuttootti woshsha hundam macceensoommoyyo. Neese banxoommoo yinaa sawwinummi luwwi hundam issinoommo. Iima'n waa'atte yakkam Astaarotina aduruusa wiriissinoommo; niyyanno'ii ni adilluwwii awwonsaanii uullannee Yerusaalee'm googguwwannee issitam hee'llo'isam neesem kaba woyi'n diqaasa kitim issinaa ni waa'na hincaa'nnoommo; eekka issinam hee'nnummi ammane lobakat goddi hee'ukko; Goddaan inkaa makkixxinaa hee'nnummo bagaan jor luwwi gambahukkoyyo. Ihukkaarem iima'n adilina aduruusa wiriissimmaa woyi'n diqaasa kitim issinaa hincaa'immaa ullummi ammaniinsi ki'isaa hundem luwwam hoongaammo; Ni minaadabim bagadinnee sibaarinnee beeddoolla» yito'o. Odim meentim «Iima'n waa'atte yakkamaantena ise laboo ongochcho'o sallummuuyyii isenam aduruusa wiriissinummuuyyii woyi'n diqaasam kitim issinaa hincaa'nnummuuyyii issinummi luwwa ni goon la'ukkoyyonnihe?» yito'o. Anim eehid yaa dabachcha uwwu goonina, meentinaa minaadabinaa hundinam «Ki'nnuwwi, gaassi ki'nnuwwi anno'i, ki'nnuwwi adilluwwi, daannuwwii uullanne hee'oo minaadabii hundim beero'uwwannee Yerusaalee'm googguwwanee aduruusa wiriissitakkam hee'llakko'isa la'ubee'ekaa xadukkokaa labissakka'atenheni? Waa'i kanniinsi eehid ki'nnuwwi baxxakkam jollaa haashaaranchaa iyyaqqeena xanukkoyyo; ee bikkina ki'nnuwwi uulli duumanchina mare'e, manni hee'oobee'i diihaa udma'aa ihaakko. Mulli waa'uwwina aduruusa wiriissimminne Waa'a kichche'issakko'i bikkinaa ixxi sagaram egettakkobee'i bikkinaa gatti ogoraa ijaajoo lonsitakkobee'i bikkinaa ku moo'llakkam bichchi hundim afukko» yummo. Anim minaadabinaa ixxuwwi meentinaa hundinam Waa'ika sagara macceessamisina kurummo. Isra'ee'l Waa'i ihu Gogoxxi Moollanni Waa'i «Ki'nnuwwii ki'nnuwwi meentii ki'nnuwwi suuminnem iima'n adilina aduruusa wiriissitakkeena woyi'n diqaasa kitim issitakka'a hincaa'llakkeena aaggakko'i sagara wonshitakko'ookko; eehannah aaggakko'i sagara egellehee wonshehee. Gibxi uullanne hee'llakkam Ayihuxxi minaadab hundim i sagara macceessehe; kanniinsi eehid Gibxanne hee'oo minaadabiinsi mat manchim ihuta'n ‹hee'oo Waa'i summinne› yaa i summa weeshoobee'isaa hide'oobee'isaa iihaanninne malaayyaam summinne hide'aammo. Kanniinsi eehid ki'nnuwwina jolla bagaan eroomma isseena sawwoommoyyo; ki'nnuwwiinsi matim gatoo'n hundim bagadinnee sibaarinnee beeditakkamo. Ihukkaarem hofqax mannim lehiinsi gatta'a Gibxi uulliinsi uulla daba'llitamo. Ee ammane Gibxi uulla matta'a hee'llo'i manni i sagar te'im ki'nnuwwi sagar ayyek hanqi ihuda'ee laqqamo. Ki'nnuwwa ka beyyonne guzumo'oommi ammane ‹Ki'nnuwwanne bichcha eeboommo› yaa wocummi sagar hanqi ihukkisa an ki'nnuwwi Waa'i mare'isa issoommo. An Ayihuxxi adil Sedeeqiyaas sheena hasam hee'u diinakkichchi Baabiloo'n adil Nabukadanaxoorena higisaa uwwummisam Gibxi adil Faari'oon Hoofira sheena hasoo diina'ina higisaa uwwoommo» yukko. Iyyoosiyaas beet Iyyoo'aaqeem minaadabanne adil ihu soo'l hiinchonne an Ermiyaas sagarinne kurummuuyyi Neeriy beet Baarook xaaxamaakkoo omachchonne kitaabukko. Eehanniinsi lasonne Isra'ee'l Moollanni Waa'i Baarook bikkina at «‹Waa'i i hawwonne hanenne kichchechcha edu bikkina neeyyata muraammo. Kichchechchi lophphimminnem hoogaammo; usheexxatim bee'e› yitaatto. «Ihukkaarem Waa'i an baxummoka gindoommo; kaasummoka xoqoloommo; uullanne hundannem kaka issoommo. Eehannah at ki gagina annannam eroomma issoommisina hassoohonnihe? Eekka hassitte An boobana manni shumo'onne hundannem eeboommo; ihona bagaan mattoo beyyonne hundannem kiikki fooroom gatoo'isa issoommo yoolla» yummo. «Gibxi uulli gaaxxi awwonsaan ‹Agira gudissehe; orinam fillehe; Faradonne hakkamma issitakka'a saa'llehe; horoo'l qoobe'e issitakka'atim orina guddehe. Ki'nnuwwika bagado qareessehe; o'l eddechcham edde'llehe› yita'a shattamuulla. «Ihukkaarem ku moo'oommi luwwi maha? Baddimmiinsi ki'ukkok laso daba'llitamuulla; Gaadaan kaa'anto'ookko; baddita'a dambaqimminne lasonne gibbo'ookko. Laso daba'llita'a moo'lloo'nnim ixxuwwi malaayqaxa geetto'o. Ihukkaarem qaqqissa'a geettam keeninam makkukkoyyo; gaadaanim xotteena xanto'oyyo; Efiraaxiisiinsi hanaa'n qarinne qo'llita'a ubbo'o. Ku Abbaaya yakkam daajjisa ki'ookkokii wo'mmaa dirisoom tochchi hundam ifiisoo daajjisa ihukkokii ayyette? Abbaaya yakkam daajjisa ki'ukkokii wo'mmaa dirisoom tochchi hundam ifiisoo daajjisa ihukkokii Gibxa; Gibxi «An ki'aa uulli hundam wo'mmoommo; beero'uwwaa eekke'enne hee'llam minaadabaa hundam bi'isoommo. Farad illagenne hooraa maroo'isina faraxxi gaare'uwwim tululihona ijaajjehe; Tophphe'iinsii Liiba'iinsii agira amadda'a waatto'i manninnee Liidiy uulliinsi waatto'i xiyya tokkossam malaayyaam manninne maqirem qoxxaalli gaadaano asse'llehe» yaakko. Ku balli Hundam Xanoo Waa'i doo'llaakkoo balla; ixxi diina'a guzumo'oo guzumo'i balla; Ixxek bisa'i ixxuwwa goddeeqaxina itookko; xeebo mu'lleeqxinam ixxuwwika xiiga agookko. Hundam Xanoo Waa'i Efiraaxiis daajjiinsi hanaa'n qarinne qeefadanta'a yo'i keeno kitim issookko. Gibxi minaadaba, Gaala'aada mattakka'a qaraare hassehe. Ki'nnuwwik qaraar hundim awwaad bee'ane; fayyiiseena xanoo luwwim bee'ane. Mulli minaadab hundim ki'nnuwwi tuuttakko'isa macceesso'ookko; uulli minaadab hundim ki'nnuwwika lachcha macceesso'ookko. Mat gaadaanchi mulleka qolukkuuyyi amaxxamaa uullanne ubookko. Baabiloo'n adil Nabukadanaxoor Gibxi uulla qaseena waaru ammane Waa'i iina «Gibxi uulli beero'uwwanne Migdoolanne, Meemfoosannee Xaafinaasannee ‹Ki'nnuwwi gaga diina'iinsi gatixxitakkeena guddehe; wixxaa'llakko'i luwwi hundim orinne bi'ookko. Ki'nnuwwik ‹Aphphiis› yakkam malaayyaam waa'i ubukkok mahinatte? Waa'i aphphisukkaareyyonnihe? yitaa alallaate. Ki'nnuwwik gaadaan qolanta'a ubbo'ookko; ixxina'i ixxim mat mullaannina ‹Diina'i bisa'iinsi xollaa ni uulli minaadabanne exxinoommisina qaqqinsona› yookko. «Gibxi uulli adilina ‹Ixxeka gada'a awwaaxxoobee'i woshsham qophphanaancho› yakkam haareechchi summinne weeshakkamo. Summi gogoxxi Moollanni Waa'a yamamoo adil ‹Hanqinam an hee'oommi Waa'a; Taaboo'l duun duunnuwwiinsi hundiinsim lobane. Qarmeeloos duunim dambalaqiinsi hanaan ihaa moo'amoo'isam ee'isam ki'nnuwwanne hawwo afisookkokim malaayyaamo› yoolla. Gibxi minaadaba, qeefadantakka'a mattakkeena guddehe. Meemfoos beero'i gindamaa manni hee'oobee'i udma'i ihookko. Gibxi makkixxu addichchisa; ixxi hanaa'n qarinne waaroo qasoo tikaayyichchinne qasamookko. Qaxxaramaa baxoo Gibxi uulli gaadaanim Di'iru baa'l moolluwwi'nnoohane; qoxxita'a orancha xantobee'i bikkina hundim laso daba'llita'a geetto'o. Oogaxxekii bichchi ayyaamii ixxuwwina afaakko. Gibxi minaadab hanaa'n qarinne yoo'i minaadabina kaa'anta'a tuuttamo. An Waa'i kaka wocaammo» yukko. Isra'ee'l Waa'i ihu gogoxxi Moollanni Waa'i «Gibxaa ixxuwwi waa'aa adilluwwaa edaa Teesiib Waa'i ihu Amoonaa guzumo'oommo. Gibxi uulli adila ixxonne amma'nnoo keeninne maqirem massaa Sheena hasoo Baabiloo'n adil Nabukadanaxoorinaa ixxi gogotinaa higisaa uwwoommo; ihukkaarem kanniinsi illageen dasaa ihukkaannisam Gibxanne hee'oo manni bee'ooyyo; an Waa'i kaka wocaammo» yukko. «I minaadaba, badditakkotte; Isra'ee'l minaadaba, dambaqqakkotte. ki'nnuwwa qeefadantakka'a a mattakko'i qee'l uulliinsi gatisoommo. Ki'nnuwwi uulla daba'llitakka'a waattakka'atim xumminne hee'llakkam; ayyim baddisoo'n xumminne hee'llakkamisa issoommo. I minaadaba, badditakkotte; an ki'nnuwwinnette; an ki'nnuwwi bintakkamisa issummi uulli manna bi'isoommo; ihukkaarem ki'nnuwwa hore'em bi'isoommoyyo. Eehid yummi bikkinam guzumo'oo'n uroommoyyo. Ihukkaarem guzumo'oommok googaamisinnette. An Waa'i kaka wocaammo» yukko. Gibxi uulli adil Gaaza'anne hawwo afiseena illageen Waa'i Filisxee'm bikkina eesenne «Kaka moo'e; wo'i hanaa'n qariinsi ki'aa dirisinne wo'mmu daajjisa daadoolla; uullaa uullanne yoo luwwaa hundam beero'uwwaa woronne hee'oo minaadabaa hundam ifiisookko. Minaadab hundim hara'mmato siideena laarookko; uullanne yo'i manni hundim mushmushita'a wi'llitamo. Mashka'oomim faraxxi konte'e, faraxxi gaare'ikaa shafe'uwwikaa sagara macceessamo. Anno'i uunjita'a matto'i ooso wixxaa'lleena daba'llitamoyyo; ixxuwwik angi yoo beyyonnem shiihaa gatookko. Filisxeem bi'oo amman afaakko; lehiinsi gatta'a Xiiroosinaa Siidooninaa hara'mmitam keen hundim muranta'a gattam amman hincaakko. An Waa'i lehiinsi gatta'a dambalaq tochchonne yo'i Kaaftoor shumo'i ikko'i Filisxee'm manna hundam bi'isoommo. Gaaza'i minaadabanne kee'mmaalli kichchechchi afaakko; Asqaaloo'n minaadab hundim cawwitamo; Filisxeemanne bichchiinsi gatto'i keendu ixxuwwika orachcho diqqu'uuyyi kichche'llamok hinki balli afeebe'e? Ki'nnuwwi ‹Waa'i bisa'a, muttittuuyyi hee'lloottok hinki balli afeebe'e? ha'i daba'llitaa seejjanne aaggaa usheexxe› yitakku'uuyyi laattakkamo. Ihukkaarem an uwwummi baxo guulloo'n hinkid usheexxeena xanookko? An Asqaaloonannee tochchi uullannee hee'llam minaadabanne hanenne hawwo afisoo'isina ijaajaammo» yukko. Gogoxxi Moollanni Waa'i Moo'aaphphi bikkina «Ixxuwwik beero'i bi'oo bikkina Nabo'i minaadabina aayye! Qiiriyaataayim diina'i anganne ubookko; qoxxaalli girbuwwim gindamookko; minaadabim tuullanne ubookko. Moo'aaphphek hibbii danii bi'ookko; diina'i Haaseeboona amadaa Moo'aaphphi adillano bi'iseena sawwaakko. Diina'ik bisa'i manna muransukkuuyyi higoo ammane Maadmeen yakkam beero'i sahookko. Hornaayi'm minaadabanne ‹Bichchii gindanchii afukko› yitu'uuyyi laattamo. «Moo'aab bi'aakko; wi'lloo oosika laachcha macceessehe. Afu hawwonne Luhiit beqeranne fittu'uuyyi Hornaayiim sagadanne dillitu'uuyyii u'nnanta'a hiqqita'a wi'llitu'uuyyi macceessehe. Ixxuwwina'i ixxuwwim ‹Ki'n foore gatixxitakkeena erisa geellehe; udma'anne hee'oo bii'l hallichchisa barallehe› yaqqantamo. «Moo'aaba, ki wodannee ki amaxxannee amma'nnantaa hee'llitto. Ihukkaarem kaba at ki gagim kaa'antootto. Kaamoosh yakkam qophpha'n waa'im adi'l oosinnee qeessuwwinnee maqirem qeefadamaa marookko. Bichchiinsi xoroo beero'i hore'em hee'ooyyo; cebbii biir uullii hundim bi'ookko; an Waa'i kaka wocaammo. Moo'aab qaqqisaa bi'oo amman afaakkoo bikkina bararaa xoroo lada uwwehe; Moo'aaphphek beero'uwwi hundim gindamookko; hee'oo mannim siidamooyyo» yukko. Waa'ika baxo innaannukkuuyyi baxoo manchi duumamaakkoohan ihona; Waa'i ijaajoo ammane bisa'a ee manchi xiigiinsi hooroo manchi duumamaakkoohan ihona. Waa'i «Moo'aab shooho'amukkaanniinsi kid yaayyanchi hore'em afoo'n xumminne hee'am hee'ukko; Moo'aab mat jaalo'onne mulli dabaransakkoo'nnii borqoo'nnii xee'nnim bi'oo'nii illagee'nnisam xaliilaa yoo woyi'n diqaasisa. Mat manchi woyi'n diqaasa mat mu'utiinsi mullaannonne dabaraa lasage ee mu'utooma iiqoohaannisam anim Moo'aaphphi uulla bi'isaa minaadabooma binnaa'oo mancho asse'oommi amman hanqinam afaakko. Isra'ee'l minaadab bakke'llam hee'llo'i Bete'eela yakkam qophpha'n waa'anne tuutto'isam Moo'aaphphi minaadabim Kaamoosha yakkam qophpha'n waa'anne tuuttamo. «Moo'aaphphi manna, ‹Neese o'l gitannuwwaa oranne qoxalluwwaa› yitakka'a bakke'llakkamok mahinatte? Moo'aabii Moo'aaphphi beero'uwwii bi'aakko; doo'llanto'oo harde'i keenim duranto'ookko; kaka wocummok gogoxxi Moollanni Waa'i anette. Moo'aab bi'oo amman hincaakko; gindamoo ammanim qaqqisaa afaakko. «Moo'aaphpheka sado laqqakkam keenii gadanonne hee'llakkam minaadabii hundim ‹Malaayyaam hee'u adilla'nnek daannoom shaaramaakko; kanniinsi eehid lombik hibbi ixxuwwina hee'ooyyo› yitakku'uuyyi kichche'llehe. Diiboonanne hee'llakkam keen hundim lombi beyyiinsi dillitakka'a uullanne buchchanne afuullehe. Moo'aaba bi'isookkok oono'o keyyenne yookko; girbuwwam gindamaa gatoo'isa issaakko. Aaro'eeranne hee'llakkam keen hundim gooqqi tochchonne uullitakka'a gibbam keeno xa'mmitakka'a ihu luwwa hundam laqqehe. Ixxuwwim ‹Oono'o, Moo'aab ubaakko; sholle'u bikkinam wi'llehe; Moo'aaphphi bichcham Arnoo'n daajji kululleetanne kullehe› » yita'a dabachcha uwwitamo. Hansawwanne baxakko'oo Hooloona, Yaahixa, Meefaa'aata, Diiboona, Nabo'o, Betdiibilaataayima, Qiiriyaataayima, Beetgaamula, Betma'oona, Qariyootimaa Booxiraa yakkam beero'uwwannee qee'llonnee abbisonnee yoo Moo'aaphphi beero'uwwannee hundannem guzumo'i oogat waaraakko. Moo'aaphphek malaayyaam buud iiqamaakko; malaayyim hoogaakko; an Waa'i kaka wocaammo» yukko. Waa'i «Eesenne boqqu bikkina Moo'aabina agissakka'a dimbissehe; uwwe'u uwwannem biqqiiqqona; minaadabim ixxonne osarona Moo'aaba, ki horoore heekkeessittuuyyi Isra'ee'l minaadabanne hinkaa'nna naacantida'ee sawwihe; at ixxuwwa fanguwwi anganne ubbo'aannisanne moo'llaa hee'llitto. «Ki'nnuwwi Moo'aabanne hee'llakkam minaadaba, ki'nnuwwika beero'uwwa fatakitakka'a fillehe; ki'nnuwwika heechchi beyyom baallor issehe; baalli gadanonne do'nna baxoo handarekkichchisam ikkehe. Moo'aab lobakata bolxaakko; minaadabim hinkaa'nna bolxoohanee xiiqqaamoo gaganne bakke'oohanee ihukkisaa ixxuwwi gaqqi bikkinam hinkaa'n lob sawwit yooda'ee la'oommo. An Waa'i ixxuwwika xiiqqo la'oommo; ixxuwwina yoo luwwanne bakkechchim awwaad bee'ane; baxxam luwwim sood bee'ane. Ee bikkina Qiiriheereesanne hee'llam minaadaphphi bikkinaa Moo'aabanne yo'i kee'n bikkinaa hundinam an wi'lloommo. Yaa'izee'l minaadabina wi'lloommaanniinsi loboka Siibi'm minaadabina laarummuuyyi wi'lloommo; Siibi'm beero'o, at caaffuwwi Sooqixxi dambalaqa higaa Yaazeer afeebe'e afoo woyi'n kaashshisa; ihukkaarem billi aga'n mishii woyi'n mishii hundim bi'aakko. Liiranchii lobakat liiranchii hanceetaam Moo'aaphphi uulliinsi ki'aakko; woyi'n misha ciinsakkam beyyiinsim woyi'n diqaas daadoobee'isa issaammo; woyi'n diqaasa lubaa liiranchinne ililookkok hee'ooyyo. «Haaseeboo'nnekii Eeli'aa'llekii minaadab sagara iimaa'lla'a laattamo; ixxuwwi laachchim Yaahix afeebe'e macceesamaakko; Xoo'aaranne hee'llam minaadabim macceesso'ookko; Hoornaayimaa Eglaat shiliishiiy afeebe'e macceesamaakko. Niimirii'm bu'om ihuta'n gogaakko. An Moo'aaphphi minaadab otossitam beyyonne shokkiisakkam kitima gudissambee'isaa ixxuwwi Waa'inam aduruusa wiriissitambee'isaa issoommo; an Waa'i kaka wocaammo. «Moo'aabannee Qiiriheereesannee hee'llam minaadab ixxuwwina yoo luwwi hundam hooggo'i bikkina gambaabiyya fuggu'uuyyi araddam wi'llishaa'nnisa ihaa wodaninnem kichche'oommo. Ixxuwwi hundim horooree haareeddaa hogoossito'ookko; ixxuwwi angam mu'llita'a omassito'ookko; annannichchim xiddi eddechcha edde'llo'ookko. An Moo'aaba ayyim hasoobee'i iiqammi jaalo'isa issummi bikkina Moo'aaphphi minneewwi hanennee minaadaphphi dummichchi beyyuwwannee kichchechchiinsi bagaan mulluwwi hee'ooyyo. Moo'aaphphi minaadab kichchechchinne iiqamaa laarookko; Moo'aab sholle'aakko; gindanchannem gabalanne yoo mulli minaadab hundim gadaakko; an Waa'i kaka wocaammo» yukko. Lado biddiqaa'aa aad darabamoo gaaqichchisa Moo'aaphphi hanenne kululoo minaadab waarukkisa Waa'i wocaakko. Beero'uwwii girbuwwii hundim amadamookko; ee ammane Moo'aaphphi gaadaan xuuchchi amadu qattam meentichchosa baddimminne u'nnantamo. Moo'aaphphi minaadab iina boqqito'i bikkina bi'llamo; kanniinsi eehid adilla'n uulli ikka'a la'antamoyyo. Moo'aaphphi minaadaba dambaqii qoloo barii qaashii egerookko; Waa'i kaka wocaakko. Dambaqiinsi xorookkok barenne aagookko; bariinsi xophaa firookkok hundim qaashanne amadamookko; mashka'oomim Moo'aab bi'oo ammane Waa'i qoodaakko. Malaayye qacaalluwwi ikko'i keen gibba'a Siihoo'n adilina beero'i hee'u Haaseeboonanne hafa siixxiteena hassamo; ihukkaarem oo beyyim shokkaalla; Moo'aaphphi tochchi uullii o'l manni ikko'i Moo'aaphphi minaadabii hee'llam duunnuwwaa hundam giir shokkiisookko. Moo'aaphphi minaadabina aayye! Kaamoosh yakkam qophpha'n waa'anne otossitam minaadab bi'llo'ookko; goo'n oosii landii qeefadanta'a matto'ookko. Ihukkaarem Waa'i Moo'aaphphi minaadaphpheka qeefajja dabarookko; an Waa'i kaka wocaammo. Waa'i Amoo'n bikkina «Isra'eelina goo'n oos bee'ennihe? Lagaa'llam keendu bee'ennihe? Eehannah Milkoome yakkam qophpha'n waa'ina otossitam keen Gaad sullo hollita'a beero'uwwanne yo'ok mahinatte? Ee bikkina Amoo'n beero'i ihu Raaba'anne o'l dambaqika sagara macceesisoommi amman waarookko; oo beero'im gindamaa diih ihookko; hoffi beero'uwwim giirinne shokkookko; ee lasage Isra'ee'l oos illageen ixxuwwa boggo'i keeno dabatta'a boggamo. Haseeboo'n minaadaba, Aay beero'i gindamu bikkina wi'llehe; Raaba'i beero'i hegeeqqi hoffi beero'uwwi minaadab hundim sagara iimaa'llakka'a wi'llehe; Miilkoom ixxi qeessuwwinnee gassaaninnee maqirem qeefadamaa maru bikkina xiddi eddechcha edde'llakka'a ooxxi lambe'enne ekkidii kidii daba'llantakku'uuyyi wi'llehe. Hoogukkuuyyi maroo ki'nnuwwi malaayyenne bakke'llakkamok mahinatte? Ki'nnuwwi amma'nnantakkambee'i minaadaba, ‹Iinninne oramookkok ayyette? yitakka'a lobakat ki'nnuwwi amaxxanne bakke'llakko'ookko. An hundem kollinnem dambaqa eeboommo; ki'nnuwwi hundim gibbokkamo; hundim goog googinnem binnaa giboo bikkina gibbo'i keeno wixxa'ookkok hee'ooyyo. «Ihukkaarem ammaniinsi lasonne Amoo'n mannika qeefajja dabaroommo; an Waa'i kaka wocaammo» yukko. Gogoxxi Moollanni Waa'i Eedoo'm bikkina «Teemaa'n beero'i minaadab kanniinsi illageen ixxuwwina yoo qoorooma hoogga'atennihe? Soggam keendu sogitano uwwimma hooggatennihe? Ixxuwwina hee'u qooroomdu hanno afukko? Eesa'i shumo'o guzumo'oommi ammane ixxuwwanne hawwo eeboommi bikkina Daadaa'n beero'i minaadaba, laso daba'llitakka'a geellehe; baallennem maaxammehe. Manni woyi'n misha feeroo ammane woyi'n haqqichchonne hofqax misham urookko; gafannim hiimonne waaroo ammane hasuqax xale'e massookko. Ihukkaarem an Eesa'i shumo'o hore'oomam maxaroommo; maaxantam beyyom biir issoommo; ee bikkina kanniinsi eehid maaxantam beyyo siiddamoyyo; ixxuwwi oosii qarmannii olla'ii bi'llamo; ixxuwwim hee'llamoyyo. Ki'nnuwwi lambe'enne yo'i adaraar ooso ullehe; an foorinne hee'llamisa issoommo; busar meenti eesenne bakke'llona. «Eehannata'e guzumo'anchi hasisoobee'i mannim guzumo'amoohan ihulas ki'nnuwwi guzumo'anchiinsi gattakkamoka lobissakkatennihe? Gattakkamoyyo; ki'nnuwwim ee guzumo'i humbulliinsi agimmi hasisookko. Booxir beero'i baddisoo udma'i ihaa gatoo'isa an i gaganne hide'aammo; minaadab hundim naac issaa urookko; summam duumamaakkoohan issitamo; gadanonne yoo hoffi beero'uwwi hundim heer heerinam gindamaa gatookko; an Waa'i kaka wocaammo» yukko. Mat asso Waa'iinsi macceesaammo; oohim «Eedoo'm minaadaba qassakkeena wixxi'llehe; orinam ki'llehe» yaa wocoo asse'amaanchi minaadaphphi beyyo asse'amaakko. «Oono'o, kaba an keese uulli minaadaphphi lambe'enne hoffiisoommo; manni lambe'ennem gadantaattoohan issoommo. Kinaam baallenne hee'llootti duu'n lud afeebe'em affoottok, kiikki baddissoohaannoomii ki woda'n bolxoomii keese qawwiisaakko; maha kiikka gatti beyyo gaaqichchi do'nnisa issititta'nnim an Waa'i ee iimaniinsi dilliisoommo» yoolla. Waa'i «Edoom muggisoohan ihookko; eekkeen higukkuuyyi moo'oo hundim muggookko; afu bichchannem maalalookko. Soddomii Gomorii kululleetanne yoo beero'uwwinne maqirem bi'u ammane afu bichchi ee'isam Eedoomanne afookko; la'mmaagge eekke'enne afuuraa hee'ookkok hore'em siidamooyyo. Hobbichchi tiiwwi ihaakkoo Yoordaanoos doo'm woriinsi firaa aad yoo gereebbi allaa'lloo beyyo waaroo'isam an dangionne waaraa Eedoo'm awwonsaano holloommo; ee lasage iittummoka doo'lloommo; iinni'nnookkok ayyette? Eese xa'mmeena iggookkodu ayyette? I illagenne uullaa uullixxamoo awwonsaanchi ayyette? Ee bikkina Eedoo'm minaadabanne isseena sawwummokaa Teema'n beero'i minaadabanne isseena hasummokaa macceessehe; ixxuwwika ooso gereebbi wotallisa gosaasakku'uuyyi massakkamo; ixxuwwi mashka'inne moo'oo hundim muggookko. Eedoo'm ubimmik woshshi macceesamoo ammane uulli heekke'ookko; muggimmikim laachchi eekke'iinsi higaa Ertiira'i dambalaq afeebe'e macceesamookko. Lado haraassaa biddiqaa'aa aad dilloo gaaqichchisa diina'i Booxiranne dillookko; ee ammane Eedoo'm gaadaan xuuchchi amadaa baddimminne u'nnantam qattam meentichchosa ikkamo» yukko. «Haamaatikii Arfaad beero'ikii manni Damaasqo'i beero'ika bichcha macceesso'i bikkina muggito'o; iimii aadii heekke'oo dambalaqisa ixxuwwik wodan dambaqukko. Damaasqo'i minaadab hajjito'o gibbeenam laso daba'llito'o; baddimmim ixxuwwanne ihukko; xuuchchi amadu meentichchosam u'nnanto'o; Oo summaam mishisoo beero'i hinkid diihaa gatukko? Ee ayyaamo ee beero'i harde'uwwi beero'i googguwwanne shakkamo; gaadaanim beedditamo. Damaasqo'i beero'i qasha hundam giirinne shokkiisoommo; adil Beenihadaad adilla'n minem giirinne shokkiisoommo; an gogoxxi Moollanni Waa'i kaka wocaammo» yukko. Baabiloo'n adil Nabukadanaxoor kaa'u bikkina Haxoor beero'i bikkinaa Qeedaar adilla'n bikkina Waa'i «Ki'llehe; Qeedaar minaadabanne gaaddehe; eelliinchi fi'l minaadabam bi'issehe. Ixxuwwi dukkaannuwwa, fooraam diinaxxi allaachcha, du'm eddechchuwwaa mu'uttuwwa hundamii massehe; ixxuwwika gaameela'uuwwa ki'nnuwwi gagina massehe; ‹Kululleetanne dambaq ki'aakko› yita'a laattamo» yukko. Haxoo'l minaadaba, ki'nnuwwina Waa'i «Baabiloo'n adil Nabukadanaxoor ki'nnuwwanne jor a'llancha a'llamaakkoo bikkinaa jora sawwaakkoo bikkinaa qee'llitakka'a gibbehe; xillaalli baallennem maaxammehe» yaakko. Waa'i «Ki'llehe, xufii laqqo'ii bee'eka mullam usheexxaa xumminne afuuru minaadabanne gaaddehe. Ixxuwwik gaameela'uwwii diinatii qeefadamookko; ixxuwwi horoo'lleka makkaa qeddaa hogoossito'i minaadaba hundam kolli hundannem binnaa'oommo; kolli hundinnem hawwo ixxuwwanne eeboommo» yukko. Ee bikkina Haxoor heer heerinam xale'i wengereelli hee'oo udma'i uulli ihaa gatookko; la'mmaagge eekke'enne afuuraa hee'oo minaadab hore'em hee'ooyyo. Sedeeqiyaas Yihuxxi uullanne adil ihukkisam gogoxxi Moollanni Waa'i Eelaa'm uulli bikkina «Eelaa'm uulla kaa'n malaayyaammuwwi ikkamisina issitakko'i Eelaa'm o'l malaayye iiqoommo. Kolli hundinnem aphphisoo hafachcha Eelaamanne ki'isoommo; minaadabam beyyi hundannem binnaa'oommo; ee'isnne Eelaamiinsi yaayyanto'i manni hee'llambee'i uulli hee'ooyyo. Eelaa'm minaadab ixxuwwika foore shiteena hassam diina'a badditamisa issoommo; ixxuwwanne afoo bichchina mashka'i ihoo malaayyaam i quunqa ixxuwwanne issoommo; beedditeebee'e orinne hollantamisa issoommo; Ixxuwwika adilaa awwonsaanoo bi'isoommo; i adilla'n barcumam eekke'enne issoommo. Ihukkaarem Eelaa'm minaadaphphi qeefajja dabaroommi amman waarookko; an Waa'i kaka wocaammo» yukko. Baabiloo'n bikkinaa minaadaphphi bikkinaa hiraagaanchi Ermiyaas kollinnetti ihaa Waa'i wocu sagar kane. «Uulli minaadabina hundinam alallaattakku'uuyyi woshsha kullehe; mare'em iimaa'llakka'atim ee woshsha la'issehe; woccehe bagaan maaxxakkotte. Oono'o, Baabiloon amadamaakko. Beel yakkam qophpha'n waa'i tuuraakko; Maarduuk yakkam qophpha'n waa'im iiqamaakko. Baabiloo'n qophpha'n waa'uwwi tuutto'ookko; shigigaa'oo misilluwwim iiqamaakko. «Baabiloona qasaa udma'i uulli issoo minaadab hanaa'n qarinne ki'aakko; mannii diinatii uunjaa gibookko; eekke'enne hee'ookkok siidamooyyo» yukko. Waa'i «Doollii ammanii afoohaare Isra'ee'llekii Yihuxxekii minaadab mateeyyanne ikka'a eese ixxuwwi Waa'a hasseena wi'llitu'uuyyi waattamo. Xiyoo'n beero'o afisoo googo xa'mmitamo; gooqqi xabbeena amadda'a mattamo; iinninne maqirem heer heer hidi'l sagara aaggamo; hore'em ginditamoyyo. «I minaadab bi'u gereebbisa ihaakko; allaaraanim huushisso'o; duunneewwanne jalli jallitamisa issito'o; lob duuniinsi hoffi duuna karkaadoo gereebbisa karkaaddo'o; ixxuwwi gatti beyyom xaddo'o. Gereebbi moochchanne itamoo'isam ixxuwwa siidukkok hundim hawwodukko; diina'im ‹Neese maham hawwondummoyyo; ku hawwi hundim ixxuwwanne afukkok gaassi ixxuwwi anno'i neeyyata issita'a hee'llo'i Waa'ina boqqito'i bikkinatte; ixxuwwi anno'isam Waa'ina amma'nnanta'a hee'immi hasisam hee'ukko› yito'o. «Isra'ee'l minaadaba, Baabilooniinsi gibbakka'a fillehe; uullooma fatakitakka'a mallehe; fella'a awwonsoo ambu'llisa ikkehe. An hanaa'n qarinne mat ihaakkoo minaadab Baabiloonanne gaadoo'isa ki'isoommo; ixxuwwam qassamo; ee lasagem amaddamo; ixxuwwikim xiyyi tokkosamaa beyyo huushoobee'i qoor gaadaanchi xiyyi'nnoohane. Baabiloo'n uulli bogamookko; boggam keenim ixxuwwina ihoo qaxa siiddo'i luwwi hundam massitamo; an Waa'i kaka wocaammo» yukko. Waa'i «Baabiloo'n minaadaba, i minaadaba boggakka'a liirantakka'ahii lobakatam liirantakka'ahii hee'llakko'o; allaachchi biiranne daabbaroo addichchisa heellantakka'ahii soorammi faraxxisam finxiriiqqakkahii hee'llakko'o. Ihukkaarem kaba ki'nnuwwik lob beero'i lobakata tuurookko; ki'nnuwwi gaqqi uullim sholle'ookko; minaadaphphi uulluwwiinsi hundinam hoffan ihookko; wo'i bee'an ihaa udma'oomanne daba'llookko. I quunqi mashka'inne Baabiloonanne ayyim hee'eena xanooyyo; Baabiloon gindamookko. Ixxi gadaninne higoo hundam muggii baachchii amadookko. «Ki'nnuwwi xiyya tokkossakkam keen Baabiloona qassakkeena ixxi kululleeta kibbehe; Waa'i ihummi i illagenne baaxiilo baxxo'i bikkina ki'nnuwwika xiyya hundam Baabiloonanne tokkossehe; xiyyuwwina idiiddakkotte. Beero'i kululleetanne shattakku'uuyyi shuullehe; oono'o Baabiloon anga uwwaakko; gimbuwwim toroshamaakko; qashshuwwim gindamaakko; Baabiloo'n mannika baado firoommo; ki'nnuwwim baado fillehe; mulli keenonne issito'i monga ixxuwwannem issehe. Wixookkokaa hurbaata wixxaa'ookkokaa Baabilooniinsi bi'issehe; ee uullanne hee'oo mulli uulli manni gasso o'l gogota baddita'a ixxuwwi moolli kolli daba'llitamo; ixxuwwi uullam gibbamo» yukko. Waa'i «Isra'ee'l minaadab hobbichchi hollaa binnaa'u gereebbisa ikko'ookko; luxxeka moochchichchi siidukkoka hundam muransaa itoohaannisa Aasoo'l adil ixxuwwa hawwodukko; eehanniinsi lasonne hobbichchi miqe iiqansoohaannisa Baabiloo'n adil Nabukadanaxoor ixxuwwa xaamsukko. Ee bikkina an Isra'ee'l Waa'i gogoxxi Moollanni Aasoo'l adilluwwi adila guzumo'ummisam Nabukadanaxooraa ixxi uullaa edaa guzumo'oommo. Isra'ee'l minaadaba ixxuwwi uullam dabaroommo; Qarmeeloos duunannee Baasaa'n uullannee mutoo luwwa hundam ittamo; Efiree'm uullannee Gala'aaxxi uullannee mutoo hurbaaxxeka hasso'i qaxa ittamo. Ee ammane Isra'ee'llaanniinsii Yihuxxi minaadabiinsii gattamisa issummi mannika baaxiilo an haafaammo yoommi bikkina ixxuwwanne baaxiilii hawwojjii hassakkota'nnim siidamooyyo» yukko. Waa'i «Miraataayi'mmaannonnee Faqood minaadabannee hawwo afissehe; shitakka'atim bi'issehe; an ki'nnuwwa ijaajoommoka hundam issehe; an Waa'i kaka wocaammo. Uullannem o'l sagar macceesamaakko; lobakat bichchim ihaakko. Uulli minaadaba fanxiisisa xaansam hee'u Baabiloon gagim xaamaakko; ee uullanne afu luwwi heer uulli minaadabina hinkido'i muggisoohane? Baabiloona, ki gaganne qaashshitti qaashanne laqqoo'nnim amadantitto; amadantaatim moo'antittok at Waa'anne iggitti bikkinatte. Waa'i o'l mu'uxxeka mine fooqaa'aa ixxi quunqika o'l mu'uta fissukko; kakam issukkok gogoxxi Moollanni Waa'i Baabiloo'n uullanne baxoo bax yoo bikkinatte. Kolli hundinnem gaaddehe; hurbaat wixxu gootara hundam fooqaa'llehe; qeefajjam hurbaaxxi atooxxisa wixxaa'llehe; ma'lluwwam gatissakkoo'n uullooma bi'issehe. Ixxuwwika gaadaano du'l beyyo massakka'a durakkam moolluwwisa massitakka'a shi'llehe; guzumo'antam amman afu bikkina Baabiloo'n minaadabina aayye! «Qeefado'onne Baabiloonanne hee'llo'i keenii waaraanii Yerusaaleema waatto'o; ni Moollanni Waa'i ixxi mi'nneka baado Baabiloo'n uulli manniinsi miqisoo bikkina ixxuwwi Xiyoonanne woccamoka macceessehe» yukko. Waa'i «Xiyya tokkosseena xantam keeno Baabiloonanne gaaddamisina weeshshehe; beero'oomam kibbitona; ayyim xoroobee'isa egellehe; ixxuwwi jor baxika bito miqqehe; mulli keenonne ixxuwwi baxxo'i damiga ixxuwwannem issehe; ixxuwwi Isra'ee'l keesammi Waa'anne eesenne iggito'ookko. Ee bikkina ixxuwwik harde'i oos beero'i googguwwanne letamo; gaadaanim ee ballam beedditamo; an Waa'i kaka wocaammo. «Bolxitoo Baabiloona, an gogoxxi Moollanni Waa'i keesenne ki'oommo; keese guzumo'oommi ammanim afaakko. At qolantaa ubbootto; keese bakkiisaa ki'isookkok hee'ooyyo; ki beero'uwwa giirinne shokkiisoommo; ki kululleetanne yoo luwwi hundim bi'ookko» yukko. Gogoxxi Moollanni Waa'i «Isra'ee'llekii Yihuxxi minaadabii wor amadanto'ookko; qeefadda'a massito'i keen hundim qoxxissa'a amaddo'ookko; fatakiteenam hasso'oyyo. Ihukkaarem ixxuwwa gatisaanchi malaayyaamo; ixxi summim gogoxxi Moollanna yakkamane xummam uullanne dilliisookko; Baabiloo'n uullanne hawwo eebookko» yukko. Waa'i «Baabiloonannee Baabiloo'n minaadabannee, awwonsaanonnee qoolluwwannee bisa'i ki'ona. Gennaan qawwuwwi ikkamisina ixxuwwik gaadaan baddita'a batbatitamisina bisa'i ixxuwwanne ki'ona. Ixxuwwi faradonne, faraxxi gaare'ennee birinne bitaa'llo'i gaadaanonnee bisa'i ki'ona; ixxuwwi meentisa ikkona; goddaan keenonne bisa'inne xeephitakka'a ixxuwwika hora hundam boggehe. Baabiloon shigigaa'oohanee manna machchaassoo qophpha'n waa'uwwinne wo'mmaakkoohanee ihu bikkina daajjuwwi hundim gogona. «Ee bikkina Baabiloon udma'i uulli wengereellii shigigaa'oo ammarii hee'oo beyyi ihookko; ee'isam qaranchiinsi qaranchi afeebe'e heer heerinam manni hee'oo beyyi ihooyyo. Soddomaa Gomoraa gadanonne yoo beero'uwwinne maqirem bi'isummi ammane ihukkaannisam Baabiloonannem ayyim la'mmaagge afuuraa hee'eena xanooyyo; an Waa'i kaka wocaammo. Oono'o, minaadab hanaa'n qarinne waaroolla; malaayyaam minaadabii dut adilluwwii uulli tochchiinsi mikmikukkuuyyi xiyyaa bisa'aa amadaakko. Oo keen mishano laqqambee'i mogaalluwwa; faradim firiixxo ammane saggaaroo dambalaqisa; Baabiloona, ixxuwwi ki'nnuwwa qasseena gaadina gudda'a waattam mannisa ki'nnuwwi beyyo waattamuulla. Baabiloo'n adil ka baa'yyaato macceesaa lasonne ixxek angi shiihaa calcalookko; xuuchchinne amadanto'i meentichchosam u'nnamookko. «Yoordaanoos daajji tochchonne yoo doo'm woriinsi aad yoo biir uulla firoo hobbichchisa an Waa'i waaraa Baabiloo'n manni dangonnem beero'iinsi fitta'a barattamisa issoommo. Ee lasage an hasummoka doo'lloommo; eehannah iinni'nnookkok ayyette? Eese xa'mmaa iggoodu ayyette? Iinninne uullixxamoo awwonsaanchidu ayyette? Eehannah kaba Waa'i Baabiloon minaadabanne sawwu luwwa macceessehe; Ixxuwwika ooso gereebbi wotallisa gosaasakka'a massakkamo; ixxuwwi mashka'inne allaachchi biir muggisoohan ihookko. Baabiloo'n uulli diina'inne amadamukkisa macceesamoo ammane uulli huxe'ookko; ixxuwwi laachchim minaadaphphi lambe'enne macceesamookko» yukko. Waa'i «Baabiloonaa minaadabaa fii'aa massoo hafachcha ki'isoommo. Hafachchi bura'a fii'aa massoo'isam Baabiloonam bi'isoo allaggi diina'a asse'oommo; oo bichchi amman afoo ammane kolli hundinnem uulla hawwodda'a diih issitamo. Gaadaanim xiyya tokkosseebe'e te'im o'l eddechcha edde'lleebe'e cawwitakkotte; harde'i keeninam qishixxitakka'a eroomma issitakkotte. Ixxuwwi beero'uwwi googonne omatta'a letamo. An gogoxxi Moollanni Waa'i Isra'ee'l keesammi ihummi eese maham hawwoddota'nnim Isra'eelaa Yihuxxi minaadabaa urummoyyo. Baabilooniinsi gibbehe; ki'n foore gatixxitakkeena xollehe; Baabiloo'n baaxii'l mashka'inne kore'a fatakitakkotte; an ixxuwwika baado fireena guzumo'eena gudaammoo ammane. Uulli hundam dimbisso'i Baabiloon i anganne yoo worqi injaffisatte; uulli minaadab hundim Baabiloo'n woyi'n diqaasa agaakko; ee bikkina minaadab gaga huushaakko. Baabiloon dangonnem ubaa bi'aakkoo bikkina kichche'llehe; ayyi la'ukko fayye'oolas omaroomina qaraare hassehe. Eekke'enne hee'llam allaggi ‹Baabiloo'n uullina hara'mmineena hansaa hee'nnummo; ihukkaarem fayye'lleenayyo. Waa'i ixxi malaayyinne hundinnem Baabiloona guzumo'aa hore'oomam bi'iseena hincu bikkina ixxuwwa ullaa ni uulla daba'llinona› yito'o» yukko. Waa'i «I minaadaba, ‹Waa'i niina oogataakko; Yerusaaleema mallaa ni Moollanni Waa'i issu luwwi hundam minaadabina kullona› yitakka'a laallehe» yukko. Baabiloo'n uulla bi'iseena sawwu bikkina Waa'i Meedoo'n adilluwwa orina ki'isaakko; Keesammi mi'n gindanchikam baado firookkok ee'isinnette. Hawwo afissam ijaajaan ka'isa yita'a ijaajjona; «Ki'nnuwwika xiyya qareessehe; agiram gudissehe. Baabiloo'n ootanne hawwo afissakkam mare'e uwwehe; egechcham qoxxissehe; qoto'aanom uullissehe; gafanna egetta'a orantam keenom gudissehe; kaka issitakkamok Waa'i Baabiloo'n minaadabanne sawwukkokaa wocukkokaa wonshoo bikkinatte. At lob daajjuwwi gadanonne hee'lloo goddaanchi Baabiloona, kiina qoodamu bichchi doolli afaakko. Gogoxxi Moollanni Waa'i Baabiloonanne qawwaawwi'nnoo xigo dut gogota eeboo'isa ixxi summinne hide'aakko; oo gogotim kaa'aa sharookko. Waa'i ixxi malaayyinne uulla ixxi qooroominne odim uullanne yoo luwwa qooccukko; ixxi qooroominnem iimane biddiqaa'ukko. Iimanenne yoo wo'i ixxi ijaajinne heekke'ookko; duub uulli tochchiinsi waaroo'isa issookko. Xeenaam banqi belecce'oo'isa issookko; dissu beyyiinsi fissaatim hafachchi hafachchoo'isa issookko. Manni hundim qawwuwwaa lachchi bee'i keenoo ikko'o; baxxo'i misilluwwi tuussisoohanee foor bee'i keenoo ihu bikkina bukkaa misilluwwa baxookkok baxu qophpha'n waa'uwwanne tuuraakko. Ku qophpha'n waa'uwwi awwaad bee'i keenoo naacakkam mu'utaa ihaakko; Waa'i oogateena waaroo ammane bi'llamo. Ihukkaarem Yaaqoob Waa'i ixxuwwisayyo; ixxi hundem luwwinam qooccaancho; ixxi gagina annanni minaadab ihoo'isina Isra'ee'l minaadaba doo'llaakko; ixxi summim gogoxxi Moollanni Waa'a. Waa'i «Baabiloona; At iina fanxiisaa o'l mu'utaa hee'llitto; keese mulli minaadaba aphphiseena awwaaxxaa hee'ummo. Faradoo faradaanoo faraxxi gaare'ee faraxxi gaare'enne afuuttam keenoo iiqanseena keese awwaaxxummo. Kiinninne meentoo goonaa, lommanchoo harde'ee, woraadaa landaa iiqansaammo. Allaaraanchoo allaachchaa abuullaanchoo ixxeka qaash mirgo'uwwaa gassaanoo lob daannuwwaa bi'iseena mu'ut issaa awwaaxxummo» yukko. Waa'i «Baabiloonii Baabiloo'n minaadabii Yerusaaleemanne baxxo'i jor bax bikkina hundinam baado firaa liqaayyo miqummuuyyi moo'llakkamo. Baabiloona, uulli hundam gojjoo gojaanchi duuna, an keese iittoombee'ane; an keesenne i anga biddiqaa'aa baalli gaangiinsi onkoroollisoommo; shokku duu'nnisam issoommo. Lamejjina te'im uullanne dahimmina ihoo kin kiinniinsi siidamooyyo; at heer heerinam udma'i uulli ikkootto; an Waa'i kaka wocaammo. «Hawwo afisimmina xansiisoo mare'e uwwehe; minaadab hundim macceesimma xantamisina xurumba fuggehe. Baabiloona qassamisina minaadaba gudissehe; Araaraaxxek, Miini'ikii Ashkeenaaz adilluwwii qassona kullehe. Gaaxxi awwonsaanchi ihoo mancho uwwehe; xigoom qawwaawwisa ihaakkoo farado eebbehe. Baabiloona qassamisina minaadaba gudissehe; mannam qooddehe; meedoo'n adilluwwi beyyo, awwonsaa'n beyyo, o'l ijaajaa'n beyyoo ee'isam ixxuwwi daannoo'm woronne yo'i uullanne hee'llam gogoxxi beyyoo hundam asse'amaano asse'llehe. Baabiloonanne ayyim hee'oobee'i udma'i ihoo'isina Waa'i sawwukkoka wonshoo amman ihu bikkina uulli heekke'amaa huxe'oolla. Baabiloo'n gaadaan ora uullissa'a girbanne maaxanto'o qoxalla'n tiir bee'aa meentisa ikko'o; beero'oo'mmek ooxxi gooc laqqo'uwwi iiqamaakko; minneewwim giirinne shokkaakko. Ixxek beero'i tochchiinsi tochchi afeebe'e amadamukkisa Baabiloo'n adilina kureena mat geerookkok muulli geeroohaannina mat asse'amaanchi mulli asse'amaanchina assoo kureena geerookko. Diina'ik gogot daajje higakkam beyyo amadaa waardiyya egerakkam beyyuwwa shokkiisukko; Baabiloo'n gaadaan dambaqqa'a batbatito'o. Baabiloon hurbaata ganakkam oodo'isa ihookko; minaadabam ganakkam hurbaaxxesa diina'i ganookko; an gogoxxi Moollanni Waa'i kaka wocaammo» yukko. Baabiloo'n adil Nabukadanaxoor Yerusaaleema bogukko; silliqukkome, diih mu'uxxisam issukko; xarakkichchisa minaadaba xuuxukko; danaam danaamooma massaa gatukkoka tufakko'i hurbaaxxisa uunjukko. Ee bikkina Xiyoo'n beero'i minaadab «Neesenne afu hawwi Baabiloonanne afona» yitamo; Yerusaalee'm minaadab «Ni xiig dunamukkisam Baabiloo'n mannikim dunamona» yitamo. Ee bikkina Waa'i Yerusaalee'm minaadabina «An ki'nnuwwina hara'mmoommo; Baabiloo'n mannikam baado firoommo; Baabiloo'n wo'i bu'uwwii daajjuwwii gogoo'isa issoommo. Oo uulli gindamu luwwi tuubbaa wengereelli daabbaroo beyyoo ihookko; ayyim eekke'enne hee'ooyyo; moo'ukkok hundim gadookko. Baabiloo'n manni hundim hobbichchisa muuntamo; hobbichchi geexisam quunquuntamo. Agginne ixxuwwik orachchi iibboo ammane aggika maadda gudisoommo; dimbiteebee'em agisoommo; ee lasage heer heerina diriittamo; hore'em baqitamoyyo. Waa'i «Ixxuwwa gereebbi geexxuwwisaa fella'i ambulluwwisaa durantam beyyo mattamisa issoommo; an Waa'i kaka wocaammo» yukko. Waa'i «Baabiloo'n beero'i hinkid amadamukko! Oo heer uulli hundim bakke'am hee'u beero'i hinkid qeefadamukko! Baabiloon hinkid uulli minaadab hundinam maalallatina ihukko! Baabiloo'n diina'i cambalaq hambu'llamisa fitta'a beero'onne wo'mmito'o. Beero'oom wo'i bee'anee ayyim hee'eenaa eeheen higeenaa xanoobee'i udma'aa ihaakko. Baabiloonina qophpha'n waa'i ihu Beela guzumo'oommo; game'amu mu'uttuwwam ixxi angiinsi ubbuusisoommo; kanniinsi eehid mulli minaadab ixxonne otossitamoyyo. «Baabiloo'n oottuwwi ubaakko. «I minaadaba, eekke'iinsi gibbakka'a fillehe; baddisoo i quunqiinsim ki'nnuwwi gaga gatixxitakkeena xollehe. Macceessakkam kushkushshaaxxi sagariinsi ki'ukkok badditakka'a qoxallan siggoone; hiinchina hiinchina annanni annanni kushkushshaaxxi woshshi wocamookko; uullanne mat adil mulleka qasoo'isa kuroo boqqoo'm kushkushshat macceesamookko. Ee bikkina Baabiloo'n qophpha'n waa'uwwa hooroommi amman waarookko; uulli hundannem tuulli ihookko; shakko'i oos hundim beero'i woronne ubbamo. Baabiloon hanaa'n qariinsi waatto'i bi'issam kee'n anganne ubu ammane iimanennee uullannee yoo gogot hundim ilil yitamo. Baabiloon uulli minaadab hundim beeddoo'isina mashka'i ihaakko; dut Isra'ee'l manni beeddoo'isina mashka'i ihimminne oono'o, Baabiloon gagim ubimmi hasisookko; an Waa'i kaka wocaammo» yukko. Waa'i Baabiloonanne yoo minaadabina «Ki'nnuwwi lehiinsi gattakko'i i minaadaba, dassakkoo'n mallehe; qee'l uullanne ikkakka'a eese Waa'a tiillehe; Yerusaaleemam ki'nnuwwi wodanonne sawwi'llehe. ‹Duumammummi bikkina tuullaammo; Waa'i Keesammi Minenne keesamaakkoo beyyuwwanne allaggi manni aaggo'i bikkina sholle'nnaa horoore heeshaa'nnummo› yi'llehe. An Waa'i yoommok kane; «Baabiloo'n qophpha'n waa'uwwanne oogatoommokii uullanne yo'i omatto'i keen u'n sagara macceesissam ammanii waarookko. Baabiloon iimane afuta'nnim iim firaakkoo girbam qoxxisuta'n bi'isookkoka asse'oommo; an Waa'i kaka wocaammo» yukko. Waa'i «Baabiloo'n laachchiinsi Kalaadaawe'i uulliinsi lobakat bichchik sagar macceesamoolla. Dambalaq womoo'llisa gugoo gogot dangonnem Baabiloonanne afookko; Sharukkuuyyi hawwo afisookko; ee'isenne an ixxuwwa bi'isoommo; sa'itamisam issoommo. Bi'issam keen Baabiloonanne gaaddamo; Baabiloo'n gaadaanim qeefadantamo; ixxuwwikim xiyyi iiqamukko; an hundinam bito miqoommi Waa'i ihummi bikkina Baabilooninam baxu jollika barche'e miqoommo. Gassaan, qoolluwwi, awwonsaan, o'l ijaajaanii gaadaanii agga'a dimbitamisa issoommo; ee lasage iinse'llamo; heer heerinam baqitamoyyo. Kaka wocummok an adila; i summim gogoxxi Moollanni Waa'a! Haraar Baabiloo'n oot ubaa buchchanne hamaaramookko; qeeraa'llaa baxamu ooxxi gooccuwwim giirinne shokkookko; minaadaphphi qondoojjim awwaad bee'an ihookko; minaadab baxu luwwi hundim giirinne shokkookko. An gogoxxi Moollanni Waa'i kaka wocaammo» yukko. Maahisey beetina beet ihu Neeriy beet Saaraay adil Sedeeqiyaasina hincee'n awwaadaanchi hee'ukko; Sedeeqiyaas Yihuxxi uullanne adil ihu soo'l hiinchonne Saaraay ixxenne maqirem Baabiloona marukko. An Ermiyaasim ee ammane ijaajo uwwummo. Baabiloonanne iheena yoo bichchaa ee'isam ixxuwwi bikkina wocamu sagaraa kitaabanne kitaabummo. Saaraayinam «Baabiloona affittisam ka kitaabanne kitaabamukkoka hundam ki sagara iimaa'llaa minaadabina qananaa'e. Ee lasage ‹Waa'a! At ka beyyo bi'issoo'isa woccaatto; ee bikkina foor yoo mikmikoo soko'i hee'ooyyo; mannii diinatii bi'oo bikkina heer heerinam udma'i ihaa gatookko› yihe. Saaraayya, ka kitaaba minaadabina qananaa'llaa lasonne kitaabooma kinanne kattaa Efiraaxiis daajjenne uunje. Ee'isam ‹Baabiloonem Waa'i ixxuwwanne eeboommi bichchiinsi ki'ukkok ubba'a gattamo bagaan la'mmaagge ki'lleena xantamoyyo› yihe» yummo. Ermiyaas hiraag ka beyyonne beeddookko. Sedeeqiyaas Yihudanne adil ihoo ammane ixxek umur lamiyyee matoo hee'ukko; ixxim Yerusaaleemanne tommoo mat hiinchoo gassukko; ixxi amakim summi Hamuuxaalatte hee'ukko; isem Libina'i uulli Ermiyaas landichchotte hee'llo'o. Kanniinsi illageen adil Iyyoo'aaqeem issukkisam adil Sedeeqiyaasim Waa'a kichche'isukko. Ee bikkina Waa'i Yerusaalee'mmaannonnee Yihuxxi minaadabannee quuqaa ixxi illagiinsi bi'isukko. Sedeeqiyaas Baabiloo'n adil Nabukadanaxooranne bangujjukko. Sedeeqiyaas adil ihu honsi hiinchonne tommi agan aagu tommi ballanne Baabiloo'n adil Nabukadanaxoor ixxeka o'l gogota awwonsaa waaraa Yerusaaleema qaseena kibbisukko. O'l gogotim beero'i kululleetanne widdanukko; ooxxi kululleetannem buchcha tuubbo'o. Sedeeqiyaas adil ihaa hee'u tommoo mat hiinchoo afeebe'e kibbito'o. Ee hiinchonnem soo'l aga'n honsi ballanne minaadab ittam luwwa hoogga'a sibaar lophphukko. Beero'i qashshuwwi iiqamukko; Baabiloo'n manni beero'o kibbita'a hee'llo'isam gaadaan hiimonne xotta'a hee'llo'o; adi'l duubbi kaashshi kollonne massoo googinne higga'a qash lamejjanne yoo goocinne fitta'a Yoordaanoos cebbi kolli gibbo'o. Ihukkaarem Baabiloo'n o'l googot Sedeeqiyaasa hollita'a Iyyaarko'i gadanonne yoo biir uullanne qeefaddo'o; gaadaan hundim ixxo lagga'a binnito'o. Sedeeqiyaasa adil Nabukadanaxoor beyyo massakko'o; ee ammane Nabukadanaxoor Haamaaxxi uullanne Riibila yakkam beero'onne hee'ukko; eekke'ennem Nabukadanaxoor Sedeeqiyaasanne oogatukko. Oohim Riibilanne Sedeeqiyaasik illi moo'onam ixxi ooso shukko; ee'isam daannuwwam shisiisukko. Ee lasage Sedeeqiyaasika ille fissaa xaarinne lokko karaa Baabiloona massukko; lehoo amman afeeqaxina Baabiloonanne karukko. Nabukadanaxoor Baabiloonanne adil ihu tommonnee honsi hiinchonnee onti agananne tommi ballanne adi'l lombi waardiyyuwwi ijaajaanchi ihu Nabuzaardaan Yerusaaleema aagukko. Keesammi Mine, adilla'n mine, Yerusaaleemanne hee'llam la'antto'oo kee'nnekaa ee'isam geejji geejji minneewwaa shokkiisukko. Lombaam waardiyyi ijaajaanchi awwonsam hee'u gogotim Yerusaalee'mmeka qasha hundam gindukko. Waardiyyuwwi ijaajaanchi Nabuzaardaan minaadaphphi lambe'enne lobakata bux ikko'i keenoo beero'i woronne gatta'a hee'llo'i keenoo lagga'a Baabiloo'n gogotina anga uwwita'a yo'i keenoo angi baxo baximma laqqam keenoo hundam qeefadaa Baabiloona massukko. Ihukkaarem Yerusaaleemanne lasaanchi bux hee'llo'i minaadaba urukko; ixxuwwi woyi'n kaashsha shuquntam keenoo abuullitam keenoo ikkamisa issukko. Baabiloo'n manni Keesammi Minenne hee'u naas xaarinne baxamaakkoo utubbuwwaa mu'uta dissakkam tululoo luwwaa Naas xaarinne baxamaakkoo wo'o amadakkam loqooqo'uwwaa iiqansito'o; naas xaara hundam Baabiloona massito'o. Disxuwwa, giira hogoofaancho, gii'l buchcha wixxaa'akkam loqooqo'i saahinnuwwa, xiiga qolakkam gabattuwwa, aduruusa dissakkam mu'uttuwwa, cilfuwwaa Keesammi mi'n awwaadina naas xaarinne baxakko'i mulli keesammi mu'uttuwwaa massito'o. Waardiyyuwwa ijaajaanchim loqooqo'i saahinnuwwa, mude'uwwa, wocittuwwa, disxuwwa, caakka dissakkam mu'uttuwwa, cilfuwwa, aggi mu'uttuwwaa worqinnee kin birinnee baxamu mu'uttuwwaa hundam massukko. Ee'isam lamem utubbuwwa, gaanda'uuwwa, moor hagaranne naas xaarinne baxamaakkoo tommoo lam mu'uttuwwaa adil Salamoon Keesammi Minenne awwaadoo'isina baxisaa hee'u mu'uta dissakkam tululoo luwwuwwaa hundam massukko. Ku mu'uttuwwi baxamu naas xaar kee'mmaalli ihu bikkina keenakkeena xanakko'oyyo. Lamem utubbuwwim matem hagar yoohan ihaa annannichchinam sadeenti meetir uullichchii onti meetir haraaroomiiyoohan hee'ukko; wororoom fooqaakkoohan hee'ukko; xaaroom lamarayyee onti milii meetir geejjoomyoohan hee'ukko. Lamem utuphphi shudaamannem issakkam mu'ut naas xaarinne baxamaakkoohan ihukkuuyyi lam meetir uullichchi yoohanee illaanchisa ihaakkoohaanninnee roomaa'n misha laboohaanninnee wereeggisamaakkoohanee hee'ukko. Bii'l idinne honsayyee loh roomaa'n misha laboo hagar yoohan ihukkuuyyi illaancho laboohaanni kululleetanne odim xibbi roomaa'n misha labookkok hee'ukko. Eehanninne hundinnem maqire gogoxxi ijaajaanchi Nabuzaardaan hundiinsi lob qeessichchi Saraaya, la'm beyyonne yoo qeessichchi Safooniyaasaa Keesammi mi'n gooca egettam sas mulli waardiyyuwwaa karaa massukko. Ee beero'iinsim gaadaa'n ijaajaanchi ihu mat daanna, ee amman afeebe'e ee beero'onne hee'llo'i lamar adi'l gassaano, gaaxxi quuxina kitaabaanchi hee'u gaaxxi awwonsaanchina hara'mmaancho, mulli keenoo lohayyi mulli mannaa edaa massukko. Nabuzaardaan ee keeno hundam Haamaaxxi gassonne Riibil beero'onne hee'u Baabiloo'n adi'l beyyo massukko. Adil eekke'enne gansiisaahii hawwisaahii lasage lehinne guzumo'ukko. Ee'isinne Yihuxxi minaadab ixxuwwi gaqqi uulliinsi qeefadanta'a matto'o. Nabukadanaxoor qeefadaa massu mannik xig kane; adil ihu lama'l hiinchonne 3,023 manchoo Yihudiinsi massukko. Adil ihu tommonnee sadeenti hiinchonnee odim 832 manchoo Yerusaaleemiinsi ee'isam adil ihu lamiyyennee sas hiinchonnee 745 manchoo Yihudiinsi Nabuzaardaan qeefadaa massukko; qeefadanta'a matto'i mannik hundikim xig 4,600 hee'ukko. Adil Ikkooniyaan qeefadamu sadennee lamar hiinchonnee tommonnee la'm aganannee aga'nnaannonnem lamiyyennee onti ballannee Baabiloo'n Adil Eeweel Maroodaak adil ihu hiinchonne Yihuxxi adil hee'u Ikkooniyaana karatiinsi tirukko. Eeweel maroodaak Ikkooniyaana eroomminne atoorassukko; ixxesam Baabiloonanne qeefadanta'a afuutto'i adilluwwi hundiinsim loboka lombi beyyo uwwukko. Ee bikkinam Ikkooniyaan karaxxi minenne edde'aa hee'u eddechcha dabassaa umu'l lasaanchi afeebe'e adi'l hurbaatiinsi hundi ammanem itoo'isa issukko. Hee'oo doolli hundannem uroo'n hundi ammanem itoo hurbaata uwwam hee'ukko. Minaadabinne wo'mmaa hee'u Yerusaalee'm beero'i hinkid mullam gatukko! Uulli minaadab hundim lonsam hee'ukkok busar meentichchosa hinkid mullam gatukko! Uulli hundannem lombaam hee'u beero'i oono'o, kaba agiddanonne ubaakko. Hiimo hundam lobakata wi'lloolla; indiiddi xabaninne daadoolla; illagee'n balale'i manniinsi hundiinsim ixxo qoxxisookkok matim bee'e; kob hee'llo'i keen hundim ixxo laggo'ookko; diina'oominnem ki'llo'ookko. Yihuxxi minaadab u'nnii agiddanii lophphimminne qeefadamaakko. Mulli minaadaphphi lambe'enne afuuraakko; usheexxatom siidukkoyyo. U'nnanne hee'ukkuuyyim diina'i kibbaakko. Ayyi manchim ugudduwwa lonseena waaroobee'i bikkina Xiyoo'n googguwwi diihaakko. Gooccuwwi hundim gindamaakko; qeessuwwim qitinoolla; baajaam landi kichchechchinne u'nnamoolla; Xiyoo'nnek lasaanchi qaraaraalla. Xiyoo'nnek baaxiil lophphu bikkina Waa'i ixxo u'nnisaakko; ixxi diina'im ixxena gassaan ihaakko. Ixxi diina'ina hundi luwwim makkaakko; ixxi oosom diina'i qeefadaa massaakko. Yerusaalee'mmek lombi bi'aakko; awwonsaanim a'llaa'lloo beyyo hoogu gaallisa ihaakko; diina'i hollu ammane malaayyi hoogeebe'e gibbo'o. Yerusaalee'm minaadab ixxuwwika gaassi lomba hawwii u'nnii afoo balla tiittamo; diina'i anganne ubbo'i ammane hara'mmookkok bee'u ammane ixxuwwi beero'im gindamukkisa moo'aa diina'i osarukko. Yerusaaleem kee'mmaalli baaxiilo baxaakko; ee bikkina haashaaramaakko. Ixxeka leexa'ooma moo'u bikkina lonsam hee'u keen hundim gadaakko; ixxi gagim qitinukkuuyyi ille maaxaakko. Ixxek haashaaranchi biir ihaa moo'amaakko; hanenne ixxonne afoo luwwi bikkina sawwukkoyyo. Ubimmoomim hiriraa'oohane; qoxxisookkok hore'em bee'e; diina'i kaa'u bikkina ixxi hawwo moo'ona Waa'i kollonne laaroolla. Yerusaalee'm minaadaphphi diina'i ixxuwwika bito xee'aalli amaxxa hundam bogukko. Waa'i minaadaphphi dummichchanne aaggambee'isa Waa'i hooraa hee'u mulli minaadab ixxuwwika Keesammi Mine aagukkuuyyi moo'amaakko. Yerusaalee'm minaadab hurbaata hasaa qitinoolla; amma'n hurbaatina ixxuwwika amaxxa hundam biteesoolla; Yerusaalee'm minaadab «Waa'a! At neese moo'e; ni sholle'nnam moo'e» yikkuuyyi laaroolla. Waa'i ixxeka kee'mmaalli quunqa neesenne dilliisu balla neesenne afu eehido'i hawwi afu manchi yoolas hino'o araat hundim qoossitakka'a moo'llehe. Eehaare ookki hoffanennihe? Ixxi iimaniinsi giira asse'ukko; oo giirim ni miq afeebe'e shokkiisukko; ni lokkina qaasha qaashukko; neesem laso dabarukko; balla hundoomam neese hoogisaa ni tiiro huushisukko. Ni baaxiil ni axonne iyyiisamaakko; lobakata kee'mmaalli ihu bikkina neese hoogisaakko; Waa'i uullixxammeena xannoombee'i ni diina'ina neese higisaa uwwaakko. Waa'i ni gaadaano ni lambe'iinsi guullaakko; harde'uwwa guulloo gogotam weeshaakko. Waa'i Yihuxxeka baajaam Landichcho woyina ciinsakkam barenne woyina hance'akkamisa hance'aakko. Diina'i kaa'u bikkina ni oos mullam gataakko; qoxxisaa tiiro uullisookkok niinniinsi qee'llu bikkina indiidde'nnummuuyyi wi'llinoommuulla. Xiyoon is anga biddiqaa'llamo; ihukkaarem ise qoxxisoo ayyim hee'ooyyo. Is olla'i hundim Yaaqoob shumo'ina diina'i ihoo'isa Waa'i issaakko; Yerusaaleemim ixxuwwi lambe'enne haashaarammi luwwisa ihaakko. Ixxena ijaajamumbee'i bikkina Waa'i eesenne issu luwwanne hanqo'ane. Minaadab hundim macceessehe; eesenne afu hawwom moo'llehe; iikki harde'i oos goonii landii qeefadamaakko. I besha weeshummo; ihukkaarem ixxuwwi eese qawwiisso'o. Iikki qeessuwwii awwonsaanii ixxuwwina ihoo hurbaata hassu'uuyyi beero'i googguwwanne leto'o. Waa'a, i u'nnaa hawwoo moo'e; an keese lobakata hawwodummi bikkina i wodan hoogaakko; googonnem ihukko minenne i minaadab beeddoolla. Eese qoxxisoo ayyim bee'isaa an u'nnamummisaa minaadab macceesaakko. I diina'i hundim i hawwo macceesaakko; ee at issitti luwwannem liiramaakko. Ee bikkina ixxuwwanne oogatteena qoodditti balli waarona; ixxuwwim i'isam u'nnantona. Ixxuwwika jor baxo moo'e; eese i baaxiilina guzumo'llittisam ixxuwwam guzumo'e. An lobakata qitinoommuulli ihu bikkina i wodanim hoogoolla. Waa'i quuqu bikkina Xiyoo'n Landichcho tuunsinne ifiisukko; Isra'ee'l wereeggaalli lombam iimaniinsi uullanne ubbuusukko; ixxeka lokko usheexisoo beyyi ihukkisam ee quunqi ayyaamonne tiireena hasukkoyyo. Waa'i Isra'ee'l minaadab hee'oo beyyi hundam qishixxat bee'eka bi'isukko; Yihuxxi minaadaphphi girbuwwam ixxi quunqinne gindukko; Yihuxxeka adillanoo gassaanoo uullanne ubbuusaa sholliisukko. Ixxi malaayyaam quunqinne Isra'ee'lleka malaayye hoogisukko; diina'i moo'onam ixxuwwina hara'mmimma sabukko. Yaaqoob shumo'onnem aphphoo gii'llisa ixxeka quunqa dilliisukko; oo quunqim olla'uwwam edaa bi'isukko. Diina'isa xiyya chokkorukko; ixxi makki angam neesenne ki'isukko. Yerusaalee'm beero'onne neese bakke'nnoommi keeno hundam shukko; ixxi quunqam gii'llisa aphphoo'isa issukko. Waa'i diina'isa ihaa Isra'eela bi'isukko; ixxuwwika adilla'n minneewwa bi'sukko girbuwwam gindansukko. Yihuxxi minaadabinam wi'lloo kichchechchaa lonsukko. Keesammi Mine duubbi kaashshi beyyonne yoo godo'isa gindukko; Xiyoonanne ihoo ugudduwwii usheexxaxxi ayyaammuwwii xadamoo'isa issukko; ixxaanninne malaayyaam quunqinne adilaa qeessichchoo sholliisukko. Ixxena kitima hincaa'akkam beyyo gadukko; Keesammi Minem urukko; is adilla'n mi'n qashshuwwam diina'ina higisaa uwwukko; uguxxi ayyaammuwwanne ihoohaannisa Keesammi Minenne diina'i lobakata shuurukko. Waa'i Xiyoo'n Landichchoka qasha gindeena sawwukko; keennaanchi heechchom qeeraa'llisukko; angam bi'isimmiinsi dabarukkoyyo. Girbii ootii gindamukko; mateeyyam bi'ukko. Ooxxi gooccuwwi uulli woronne waammamukko; xufakkam laqqo'uwwim iiqamaa ubukko; adilii gassaanii mulli minaadaphphi lambe'enne qeefadanta'a yo'o; Waa'i see'l losanim kanniinsi eehid uwwamooyyo; hiraagaaninam Waa'iinsi kaalti moo'amooyyo. Xiyoo'n lommanni sa'aa uullanne afuuraakko; horoorenne gii'l buchcha issaa xiddi eddechcha edde'aakko. Yerusaalee'm baajaam landim gaanje aad heeshaa'aakko. Wi'llimmi lophphu bikkina i illi jaamukko; anim u'nnannette; i wodan kichchechchinne hoogukko; i minaadab beeddaakko; oosii ciilluwwii beero'i goog hundannem hoogaakko. Sibaatta'atii xeebe'lla'atii ixxuwwi ammo'i kolli laattamo; oranne madu manchisa hoogga'a goog hundannem ubbamo; ixxuwwi ammo'i anganne hee'llo'isam letamo. An ki'nnuwwina mayyo? Ki'nnuwwa mahinne akeekiso? Doo'llantakko'oo Yerusaalee'm beero'i minaadaba! Ki'nnuwwa qoxxisoo'isina mahinne kobi'lliso? Annannam Yerusaalee'm minaadaba! Ki'nnuwwanne afoo hawwi dambalaqi'nnoo'i haraar ihu bikkina ayyi fayyiiseena xanookko? Ki'nnuwwi hiraagaa'nnek kaalti qophphanoo awwaad bee'ane; qeefadanchiinsi gattakkamisina ki'nnuwwi baaxiilo caakkisso'oyyo. Qophphanoo awwaad bee'i woshshaa ki'nnuwwina kutto'ookko. Araat hundim keesenne anga aphphisookko; «Hanqinam hore'em danaamoo uulli hundinam liiranchaa hee'u beero'i kanennihe?» yikkuuyyi ixxuwwi horoore heekkeesookko; Yerusaalee'm Landichchonne naacookko. Ki diina'i hundim keese game'llitamo; fiinqeessu'uuyyii inqe iiccu'uuyyii «Egellummi amman kane! Oono'o, ise bi'insummo; eeham ni illinne moo'nnummo» yitamo. Waa'i sawwukkoka issukko; lobakat ammaniinsi illageen wocu sagaram wonshukko; keesem qishixxoo'n bi'isukko. Ki diina'i keesenne liiramoo'isa issukko; ki diina'i malaayyem qoxxisukko. Minaadab Waa'i kollonne laarukko. Xiyoo'n Landichchi qasha, ballaa hiimoo indiidda dirisisa daasse. Usheexxato uwwititte; ki illem usheexxissitte. Ki'llaa luxxi baqitenne laare; ki sawwixxeka Waa'i illagenne hincaa'e; ki oos goog hundannem sibaarinne hoogu bikkina ki anga Waa'i kollonne biddiqaa'e. Moollanna, qoossitaa moo'e; kanniinsi illageen at ka'isa moggitti minaadab hannonne yookko? meenti iittitam ixxuwwi gaqqi ooso ittonannihe! Qeessuwwaa hiraagaanoo ki minenne shakkonannihe! Ee'isam harde'ii lommannii goog hundannem leta'a ubbo'ookko; iikki woraadii baajaam landii diina'i bisa'inne beeddito'ookko; ki quunqi ballanne shitto; Qishixxitoo'nnim halaalissitto. Uguxxi ayyaamo maaddina weeshshoohaannisa kolli hundinnem eesenne dambaqa weeshshitto; Waa'i quunqi ballanne bichchiinsi ayyim xorukkoyyo te'im gatukkoyyo; an abooyyaa li'isummi i ooso i diina'i guullukko. Waa'i quunqi biccinne hawwo aa'ummi manchi anette. Ixxi eese caakki bee'i tuunsonne maroommisa issukko. Hanqo'isam ballooma hundoomam edaa edaa ixxeka anga i kollonne dabarukko. I orachcho ebeessukko; i miqem iiqansukko. Eese qaraaraalli kichchechchinnee hawwinnee ootukko. Lobakat ammaniinsi illageen leto'i mannisa gambabbaakkoo tuunsonne hee'oommisa issukko. Xoreena xanoommi bee'isa iikka kululleeta ootukko; kee'mmaalli chimchiminnem karukko. Hara'mmato siideena weeshaa laarummaarem i uunxato macceeseena hasukkoyyo. I googo cabbaramaakkoo kininne xufukko; taakke'amoommi googom boqqisukko. Ixxi iina dugaa egeru tibbekkichchisaa maaxamu hobbichchisaa. Googiinsi gosaasaa fissukko; muransaatim hara'mmoo bee'i beyyonne uunjukko. Eesenne xiyya chokkorukko; tokkaashshe'inam elel issukko. Xiyya chokkoraa i orachcho huruuraa aagoo'isa issukko. I minaadab eesenne osarukko; kajjinnem ballooma hundam eesenne naacanto'o. Qaraaroo luwwa iina itisukko; dambom goddisukko. Uullanne ubbuusaa eese hance'ukko; i inqem kinanne iiqukko. I foor xumma hoogukko; liiranchi mah ihuda'em xadummo. Ee bikkina «I lombi bi'aakko; Waa'anne issummi neeyyat hundim qee'llaakko» yummo. Iikka hawwoo karkaadimmaa sawwimmi iina geneeno'isaa dambisaa ihukko. Eekka sawwoommi amman hundam i tiirim u'nnamookko. Ihukkaarem an mat luwwa sawwoommo; neeyyatom issoommo. Bi'nnummi bee'ek tungibee'i Waa'i qishixxatiinsii heer heerina hee'oo ixxi iittiinsii ki'ukkaanninnette. Oo keenim darina darina haareechcho; kiikki amma'nnantaattoohaannoomim lobakata. Waa'i iina sharada; ee bikkina an xale'i ixxo neeyyato issoommo. Waa'i ixxo hassam keeninaa ixxonnem neeyyat issitam keeninaa hundinam biijaalla. Manni Waa'ika gatisimma cawwaa neeyyatinne egeruta'n erane. Manchi harde'oominne iyyaqqimminne gaanjaqqa iyyuta'n erane. Waa'i iyyiisaakkoo bikkina iyyaqqimminne cawwaa mullam afuurona. Odim neeyyat hee'eena xanoo bikkina ixxi gaga heeshaa'aa hee'ona. Shiine aphphisoohaannina uwwona; sholle'nnam aa'ona. Waa'i manna heer heerina uunjooyyo. Hawwi afoo'isa issukkaarem qishixxookko; lophphaakkoo ixxi iittim dabassamoobee'ane. Ixxi hasaa mannanne hawwo te'im qedda eebooyyo. Uulli minaadaba karaxxi minenne hance'amakkam ammane Hundam xanoohaanni illagenne mannik hanqi bi'oo ammane mat manchi hanqa hoogoo ammane hanqinam Waa'i eekka moo'ooyyonnihe? Waa'i ijaajubeelas wocaa wonsheena xanookkok ayyette? Joram ihukko erok hundam xanoo Waa'i suumiinsi firoohaneyyonnihe? Eehannah baaxii'l mashka'inne guzumo'amoo ammane manchi beet qunquunoo mahinatte? Ni googo saarayyinaa moo'nnona; ni Waa'i kollonnem daba'llinona. Ni wodano ni anginne maqirem iimanenne yoo ni Waa'i kollonne iimaa'nnona «Ni Waa'a! Neese baaxiilo banxaammo; keesennem boqqinaammo; atim haafitittoyyo. «At neese quunqinne wo'mmitaa hollitto; qishixxat bee'ekam shitto. Uunxat ki beyyo afoobee'isa ki gaga duuphphi woronne maaxxitto. Mulli minaadaphphi illagenne neese haccaa hururaa issitto. «Ni diina'i hundim neesenne suume fooqaa'llo'o. Baachchii gindanchii ee'isam hawwii dambaqii neesenne afaakko. I minaadab beeddu bikkina i illiinsi indiiddi dirisisa daadoolla. «I indiiddim uroo'n cawwaa daadoolla. Oohim Waa'i iimaniinsi aad moo'eebe'inatte. I beero'i meentonne hundannem afu sholle'nna moo'aa lobakata kichche'ummo. «Mashka'i bee'ekam eese sabbam diina'i cii'isa hochchito'o. Foorinne hee'ummuuyyim ba'l woronne darabba'a barooma kininne ifiisso'o. Wo'i wo'mmaa i samminne dunamukkaare lehoommi amman afukkoka labisummo. «Waa'a, xilli barenne ihaa ki summa weeshummo. I laachcha macceese; iina agaaggaa eese usheexxise» yoommi i uunxato macceessaatto. Keese weeshummi ammane i kollonne hincitto; ee'isam ‹‹Baddititte›› yitto. «Waa'a! I bikkina fitantaa i foore gatissitto. Waa'a! Eesenne issakko'i damiga moo'llaatto; iina oogate. I diina'i eesenne baado fitteena sawwito'isaa jora issiteena a'llanto'isaa moo'llaatto. «Waa'a! Ixxuwwi eese game'llito'isaa eesennem jora issiteena sawwita'a a'llanto'isaa macceessaatto. Ixxuwwi balla hundoomam i hanenne hashaashshantamuullaa quunquuntamuullaa. Afuutta'atim ihukko uullita'a kaddu'uuyyi eesenne naacantamisa moo'e. «Waa'a! Ixxuwwi baxxo'i hawwojjina ixxuwwina laboo luwwa uwwe. Ki duunchi ixxuwwanne ihona! Neeyyato muttamisam isse! Ki quunqinne ixxuwwa hochchitaa amade; uulliinsim bi'llamisa isse» yummo. Worqi hinkid xurukko! Muccur worqim hinkid dabassamukko! Keesammi min baxamu bito xee'aalli kin goog hundannem binnaakko. Lombaam Xiyoo'n oos muccur worqisa xee'aalluwwi hee'llo'o; ihukkaarem kaba buchchi mu'uta baxxam keen baxxo'i buchchi mu'uxxisa ikko'ookko. Wengereellim ihuta'n wotallina anuuna iicisaa li'isookko; ihukkaarem i minaadab udma'anne hee'oo guchchekkichchisa mogaalluwwi ikko'ookko. Wo'o xeebe'immiinsi ki'ukkok ixxuwwi ciilluwwik allab aqoronne amaxxamaakko; ixxuwwik oos hurbaata uunxookko; ihukkaarem ixxuwwina maham uwwookkok bee'e. Xee'oo er hurbaata ittam hee'llo'i minaadab hawwita'a goog hundannem karkaaddo'o; baar kashar eddechcha edde'lla'a li'llo'i keen kaba gii'l buchchi tuubbanne iinse'llo'o. I minaadabanne afu guzumo'i ayyi angim hara'mmoo'n dangonnem himbiriiqamu soddomanne afu guzumo'iinsi lobane. Adi'l mi'n daannuwwi haashaaranchi bee'i baradiinsi loboka muccutto'oohanee adiinsim loboka qadaallito'oohanee hee'llo'o. Ixxuwwi hagarim sanpheera yakkam kiniinsi loboka mishisoohane hee'ukko. Ihukkaarem kaba ixxuwwik illi kolli shiinshisa heemachchu bikkina goog hundannem ubbo'i beyyonne ixxuwwa la'ookkok bee'e; haqqisa gogaakkoo ixxuwwi omachchi miqenne amaxxamaakko. Bisa'inne leto'i keen sibaarinne leto'i keeniinsi e'llitamo; ku keen uullanne hurbaata hoogga'a beeddito'ookko. I minaadab beeddito'i ammane ixxuwwina hurbaat ihoo'isina qishixxaalli meenti angi ixxuwwi gaqqi ooso sarukko. Waa'i ixxeka malaayyaam quunqa moo'isukko; Xiyoo'n shooho'o itoo'isinam aphphoo giiri'nnoo'i boobana dilliisukko. Uulli adilluwwii heer uulli minaadabii hundim Yerusaalee'm ooxxi gooccuwwinne diina'i aagookko yita'a amma'nnito'oyyo. Kukim ihukkok ixxuwwi lambe'enne muccur xiiga dunto'i qeessuwwi hawwojjinnettee hiraagaa'n baaxiilinnettee. Ixxuwwi xiiginne haashaaranto'oo keen ikko'i bikkina manni ixxuwwika eddechcham ihuta'n nakkaa iggooyyo; ihukkaarem ixxuwwi qooqquwwisa googonne timtimitamo. Ee bikkina minaadab «Ekkid mallehe; haashaarantakko'oo bikkina neese nakkitakkotte» yitu'uuyyi ixxuwwanne shuuttamo. Ee bikkina ixxuwwi yaayyanto'oo keenoo karkaadaanoo ikko'o; mulli minaadabim «Kannii eehid ni lambe'enne hee'llamoyyo» yito'o. Waa'i ixxi gagim binnaa'aakkoo keen ikko'i bikkina kanniinsi eehid ixxuwwi bikkina sawwooyyo. Qeessuwwinam lomba uwwooyyo; lommanninam annanni hamannaat hee'ooyyo. Kora'am hara'mmaancho egerimminne ni illi hoogukko; gatiseena xanoobee'i mulli minaadabiinsim hara'mmato qulunxinne egellummo. Diina'im googguwwanne taakke'ammoombee'isa malloommi beyyi hundam egetto'o; ni doolli hincaakko; ni doollim beeddaakko; lasaanchim afaakko. Neese hollitam keen iimaninne bararoo gaaqiinsi loboka qare'llamane; neese duunnuwwanne hollito'o; udma'i uullannem maaxanta'a egetto'o. Mulli minaadaphphi lambe'enne ixxi haf lugumonne hee'nnoommo yinaa sawwinaammoo Waa'i doo'llaakkoo ni foo'l lubbato qaashanne amaddo'o. Ki'nnuwwi Uuxanne hee'llakkam Eedoo'm minaadaba, liirammehe; lobakatam liirammehe. Ihukkaarem ki'nnuwwanne hawwi humbulli Kore egeraa waaroolla; ki'nnuwwim dimbitakka'a maxarantakkamo. Yerusaalee'm minaadaba, ki'nnuwwi hawwojjik guzumo'i beeddaakko; kanniinsi eehid yaayyanchinne hee'llakkamisa issooyyo. Ihukkaarem Eedoo'm minaadaba, ki'nnuwwika hawwojja guzumo'ookko; ki'nnuwwi baaxiilom caakkanne fissookko. Waa'a, neesenne afukkoka sawwihe; ni sholle'nnam moo'e. Ni gaqqi uulli allaggi keenina uwwamaakko; ni minneewwi hundim allaggi hee'oo beyyi ihaakko. Niyyanno'i diina'i anginne leto'o; ee bikkina neese anni bee'an inkaammo; niyyummo'im aro'i bee'i keen ikko'ookko. Angoommi wo'o bitaa'nnoommuulla; gii'l haqqam birinne aa'nnoommuulla. Axaqqa issakko'i diinaxxisa ushe'ammummuuyyi lobakata hoongaammo; usheexxinonam uwwakkamoyyo. Ichchi hurbaatina Gibxinaa Asoorinaa anga uwwinaammo. Niyyanno'i baaxiilo baxxa'a higgo'o; ihukkaarem neese ixxuwwi baaxiilo iyyinaammo. Agid neese gassukko; ixxuwwi angiinsim neese gatiseena xanookkok bee'e. Udma'i uullanne manna shoo manni yoo bikkina neese hurbaata siindeena xannoommok ni gaga lehina higinsaatette. Sibaar lophphimmiinsi ki'ukkok ni orachchi shiinshisa heemachchukko. Diina'i ni meento Xiyoonanne hoo'llukko; Yihuxxi beero'uwwannem baajaammuwwi sholle'ukko. Awwonsaa'nneka anga karakka'a saqalakko'o; ni lommannam sholliisakko'o. Ni harde'uwwinne hurbaata liitisakko'o; goo'n oosim haqqa iyyita'a tartarito'o. Lommanni beero'i dummichchanne bee'llo'o; harde'i keenim kajja utto'o. Liiranchi ni wodaniinsi bi'aakko; ni kajjim wi'llonne daba'llaakko. Ni lombi sheelatamaakko; neesem baaxiilo banxummi bikkina niina aayye! Ee bikkina ni wodan hoogaakko; ni illim jaamaakko. Xiyoo'n duun diihu bikkina wengereelli daba'llamoolla. Waa'a! At heer heerinam adila; ki adillanim qaranchiinsi qaranchi afeebe'e. Eehannah neese mahina hore'em xadditto? Kaa'n ammane neese mahina uttitto? Waa'a! Ki kollonne neese dabare; neesem daba'llinoommo; ni doollem gaassisam haareechchise. Eekka issittibeelas at neese hore'em uttaatto; qaxiinsi hanaanim neesenne quuqqaattoo yimma. Sad hiinchaannonne soo'l aga'n onti ayyaamonne Baabiloo'n uulli Keebaar daajji gadanonne Yihudiinsi qeefadamu manninne hee'ummuuyyim iiman fooqukko. Anim Waa'ika kaalta moo'ummo. Ee ammane adil Ikkooniyaan qeefadamukkaanniinsi onti hiinchoo onti ballaa ihaa hee'ukko. Baabiloo'n uullanne Keebaar daajji gadanonne Waa'ik sagar Buuz beet ihummi qeessichchi Hizqi'eel beyyo waarukko; Waa'i malaayyim i hanenne hee'ukko. Iim xabbaa moo'ummaare malaayyaam hambu'llam hafachchi hanaa'n qariinsi waarukkuuyyi moo'ummo; kee'mmaalli duubiinsi banqik belellaat moo'amam hee'ukko. Belellaaxxi kululleetannem yoo iiman kasharukko. Banqi gugoo beyyonnem mat luwwi naas xaa'llisa caakkisukko. Hambu'llam hafachchi lambe'ennem manna laboo soor fooraam qooccanchuwwa moo'ummo. Ee qooccanchuwwina annannichchinam soor soor ilkollii soor soor ladii hee'ukko. Ixxuwwikim lokki xabbaakkoohan ihukkuuyyi lokki shuku'llim moo'l shuku'lli'nnoo'an hee'ukko. Ee lokki shuku'lluwwikim hagar shiinshakko'i naas xaa'llisa belecce'am hee'ukko. Ee soorem illi kolluwwiinsii soorem ladduwwiinsii mullek annannichchinam ixxuwwi ladduwwiinsi woroon soor mannaanni'nnoo'i angi hee'ukko. Ee qooccanchuwwik annannichchikim lam lad makkannee qeddannee biddiqaa lud edamam hee'ukko. Ee bikkina ixxuwwi ekkidii kidii ikkoo'n xabbita'a mateeyyoominne mattam hee'llo'o. Ee qooccanchuwwina annannichchinam soor annanni annanni ilkolli hee'ukko. Oohim illaqqi kollik mannika, makki kollik hobbichchika, qeddi kollik mirgo'ika, lasaqqi kollikim gaaqichchika laboohan hee'ukko. Ee diinaxxek annannichchikim lam lad iim biddiqaa awwonaa yoo qooccanchi laxxi ludo nakkam hee'ukko. Ihukkaarem gatu lam lad qinxaa ixxuwwi gaqqi orachchom ifiisam hee'ukko. Oo qooccanchuwwi annannichchim soor kollinne moo'lleena xantam hee'llo'i bikkina matteena hassam kollonne ekkidii kidii daba'llitoo'n hundim mateeyyoominne barattam hee'llo'o. Ee fooraam qooccanchuwwi lambe'enne aphphoo gii'l kashara laboo luwwi hee'ukko. Oohim ee qooccanchuwwi lambe'enne ekkidii kidii mikmikoo xombora labam hee'ukko; oo giirim lobakata caakkaakkoohan hee'ukko; banqim ee giiriinsi firam hee'ukko. Oo qooccanchuwwim banqi belellaaxxisa ekkidii kidii darabamam hee'ukko. Ee soorem qooccanchuwwa moo'ummuuyyim, soor shafe'isa kululoo luwwi uullanne kululaa dillukkuuyyii fooraam qooccanchuwwi gadanonne midaad midaadinne ogorinne afuurukkuuyyii moo'ummo. Oo soorem shafe'uwwisa kululoo luwwim hagar kobi'llamoohan hee'ukko. Annannichchim inqu yakkam bito xee'aalli ki'nnisa belecce'oohan hee'ukko. Ee'isam annannichchim mat shafe'isa kululoo luwwi mulli shafe'isa kululoo luwworonne higoo labam hee'ukko. Ixxuwwim soorem kolliinsim hasso'i kollonne mulli kollonne do'lloo'n xabbita'a mattam hee'llo'o. Ee shafe'isa kululoo luwwikim tochchi gumu'llaallaa baddisoohanee hee'ukko. Soorem shafe'isa kululoo luwwanne tochchi kululleetoomanne hundoomannem illi yoohan hee'ukko. Oo qooccanchuwwi mikmikoo amman hundam oo shafe'isa kululoo luwwim maqirem mikmikam hee'ukko. Oo qooccanchuwwi uulliinsi ki'lla'a iim shiqitam ammane oo shafe'isa kululoo luwwim maqirem iim shiqam hee'ukko. Oo qooccanchuwwim Ayyaan maroo kolli hundam barattam ammane oo shafe'isa kululoo luwwim maqirem bararam hee'ukko. Oohim ee qooccanchuwwik ayyaan ee shafe'isa kululoo luwwi woronnetti ihu bikkinatte. Ee qooccanchuwwik ayyaan ee shafe'e laboo luwwi woronne yoo bikkina oo qooccanchuwwi maroo ammane hundam maqirem maram hee'ukko. Uulloo ammanem maqirem uullam hee'ukko. Uulliinsi iimane firoo ammanem maqirem firam hee'ukko. Fooraam qooccanchuwwi horooriinsi hanaan gagmoo'ixxisa belecce'oo bito xee'aalli kiniinsi baxamaakkoo iimane laboo luwwi biddiqaa hee'ukko. Ee iimane laboo luwwiinsi woroonim fooraam diinat annannichchim ixxi midaadinne yoo qooccanchi moo'oo'isanne lam lado biddiqaa'aa gatu lamem ladinnem orachcho ifiisaa uullaa hee'ukko. Ee iimaniinsim hanaan sanpheera yakkam inqu'iinsi baxamaakkoo adilla'n barcuma laboo luwwi biddiqaa hee'ukko. Mancho labookkokim adilla'n barcumanne afuuraa hee'ukko. Ixxi lamado laboo beyyiinsi hanaan gii'l woronne aagaa iibbu xaara laboo luwwi ixxi lamadiinsim woroon giira laboo luwwa moo'ummo. Belecce'oo caakkim ixxi kululleetanne aagaa hee'ukko. Ixxi kululleetanne yoo caakkim xee'n ammane duuphphi woronne moo'amoo waadamuunchisa hee'ukko. Oohim Waa'i lombika caakka labookko. Ixxo moo'ummi ammanennem anim miininne uulla nakkaa otossummo. Ee lasagem wocakkam sagara macceesummo. Ee lasage «Manchi beeto, ki'llaa lokkinne uulle; an kiinninne woceena hasoommo» yukko. Iina eekka wocukkisam Waa'ik Ayyaan eesenne dillaa iimaa'aa i lokkinne uullisukko. Iina wocoo luwwam macceesummo. Waa'im iina «Manchi beeto, iina boqqito'i Isra'ee'l minaadaphphi beyyo keese asse'oommo. Ixxuwwii ixxuwwi anno'ii kaballi afeebe'em iina boqqito'isam yo'o. Ku minaadab xiiqqamoohanee wodan duudaakkoohanee. Ee bikkina an yoommi luwwa Moollanni Waa'i ka'isa yoolla yitaa ixxuwwina kuttoo'isina keese asse'oommo. Ixxuwwi boqquwwi keen ikko'i bikkina macceesso'om macceesso'oyyom hiraagaanchi ixxuwwi lambe'enne yoo'isa laqqamo. «Manchi beeto, ihukkaarem ixxuwwaa woccam woshshaa baddititte. Uttii halluttii kibbukkokaa ginxaa yakkam daquu'l lambe'enne yoontokaa labukkaarem ee boqquwwi kee'nneka quunqee woccam woshshaa hore'em baddititte. Ixxuwwi boqqi minaadab ikko'i bikkina ki woshsha macceesso'om macceesso'oyyom an kiina kuroommi woshsha ixxuwwina kure. «Manchi beeto, an kiina kuroommi woshsha macceese; atim ixxuwwisam boqqi ikkitte; ki suume fooqaa'e; an kiina uwwoommokam ite» yukko. Ee lasage mat kitaabamaakkoo xaaxammi omachcho amadaakkoo angi i kollonne biddiqaakkoo moo'ummo. Oo angim ee kitaabamu xaaxammi omachcho i illagenne tiraa biddiqaa'ukko. Ee omachchonne lamem kollonnem wi'llik, kichchechchikii laachchi sagarii kitaabamaa hee'ukko. Waa'im iina «Manchi beeto, kiina hincukkoka ite; ka kitaabamu xaaxammi omachcho ite; Isra'ee'l minaadabinam mattaa kure» yukko. Ee bikkina i suume fooqaa'ummo; ee kitaabamu xaaxammi omachchom itona uwwukko. Ixxim iina «Manchi beeto, ka kiina uwwummoka xaaxamu kitaabammi omachcho ite! Ki godabom ixxenne wonshe!» yukko. Anim itummaare maraphphisa xee'ukko. Ee lasage Waa'i iina «Manchi beeto, Isra'ee'l minaadaphphi beyyo mattaa an kiina kuroommi sagara kure. An keese asse'oommok Isra'ee'l minaadaphphi beyyo bagaan ixxuwwika suume la'akkambee'i mulli uulli manni beyyoyyo. Woccam woshshi aagoobee'i ixxuwwi suumim la'amoobee'i ixxuwwi woccam saga'l tiratom qoossiteena xantoobee'i lob minaadaphphi beyyo keese asse'ummita'n ki woshsha macceessam hee'llo'o. Ihukkaarem Isra'ee'l minaadab hundim wodan duudaakkoo keenoo xiiqqantam keenoo ikko'i bikkina i woshsha macceesseena hasso'oyyo. Ki woshsham macceessamoyyo. An keese ixxuwwi illagenne kaa'antoobee'anee qoxxaallaa issoommo. Mahim keese egedeena xanoobee'i qaxa i asso kutteena murte'aalli ikkootto. An keese lobakata qoxxaalli issummi bikkina ixxuwwi boqquwwi ikko'aarem badditoo matem mashka'im bee'e» yukko. Odim iina «Manchi beeto, an kiina kuroommi woshshi hundam erisa macceessaa sawwihe. Qeefadanta'a yo'i ki minaadaphphi beyyo mattaa ki woshsha macceesso'om macceesso'oyyom an Moollanni Waa'i kuroommi luwwi hundam ixxuwwina kure» yukko. Ee lasage eese Waa'i Ayyaan iim fissukko. I lasinnem «Iimanenne hee'oo Waa'ina galatii lombii ihona» yoo guqqi sagara macceesummo. Ee fooraam qooccanchuwwikim lad ixxina'i ixxim aphphixxamukkuuyyii ee shafe'isa kululoo luwwikam gugoo sagaraa macceesummo. Eese Waa'i Ayyaan iim fissu ammane iikki tiir qaraarimminnee quunqinnee wo'mmaa hee'ukko. Waa'ikim malaayyi eesenne qoxxaa hee'ukko. Ee lasage Keebaar daajji gadanonne yoo Teeli'aabiibanne qeefadanta'a hee'llam manni beyyo waarummo. Anim ee moo'ummaannonnee macceesummi luwwanne hundannemii muggimminne duduqaa ixxuwwinne lamar balla afuurummo. Lamarem balliinsi lasage Waa'i iina «Manchi beeto, an keese Isra'ee'l minaadabina allaaraanchi issaammo. Ee bikkina an wocoommi woshsha macceesaa ixxuwwina qoxxissaa kure. An mat baaxiilaanchina ‹Ki baaxii'l mashka'inne at hanqinam letootto› yumta'nnii atim oo manchi baaxiiliinsi daba'llaa gatoo'isina qoxxissaa kuttibeelasii oo manchi ixxi baaxiilinnem lehookko. Ee manchikam xiiga kiinniinsi miqisoommo. Ee baaxiilaanchina qoxxissaa kuttoohaare ixxi baaxiiliinsi daba'llubeelas ixxi baaxiilinnem lehookko. Atim ixxi xiigina xa'mmanchiinsi ki gaga gatissootto. «Muccur manchi muccuroo'm baxiinsi daba'llaa baaxiilo baximma asheeruta'nnii anim ixxo hawwoo'isa issumta'nnii at ee manchina qoxxissaa kuttibeelas ixxi baaxiilinnem lehookko. Ixxekim illagee'n muccuroo'm bax hundim sawwamooyyo. Ixxi xiiginam an keese xa'mmoommo. Ihukkaarem muccur mancho baaxiilo baximmiinsi ixxi gaga egeroo'isina qoxxissaa kuttita'nnii at kuttitti woshsha aa'aa baaxiilo baximmiinsi ixxi gaga ege'llulasii oo manchi hanqinam lehooyyo. Atim ixxi bikkina xa'mmanchiinsi ki gaga gatissootto» yukko. Ee lasage Waa'ik malaayyi eesenne dillukko. Ixxim «Ki'e, cebba dille; ee beyyonne an kiina wocoommo» yukko. Ee bikkina an ki'aa cebba dillummo. Ee beyyonnem Waa'ik lombi Keebaar daajji gadanonne caakkukkisam iina caakkukko; anim miininne uulla nakkaa otossummo. Ihukkaarem Waa'ik Ayyaan eesenne dillaa iimmaa'aa eese lokkinne uullisukko. Waa'im iina «Ki mine mattaa u'llumma xuffaa afuure. Manchi beeto! Usinne karantoo bikkina minaadaphphi lambe'enne fitteena xantooyyo. Ka boqqi minaadaba axeetteena xantoobee'isa ki allab karamoo'isa issoommo; atim duuddootto. Ihukkaarem an kiina wocoommi ammane ki suume fooqaa'oommo; atim ixxuwwina ‹Moollanni Waa'i «Ixxuwwi boqqi minaadab ikko'i bikkina macceesookkok macceesona; macceeseena hasubee'ekim macceesoone» yoolla› yitootto» yukko. Waa'i «Manchi beeto, cukkamaakkoo dora eebbaa ki illagenne disse; ixxonnem Yerusaalee'm beero'o moo'isoo kaarta'a baxe. Mat beero'isa issitaa kobi'llisimminne ee cukkamu dora aphphisseena gude. Lud afeebe'e buchcha tuubbaa eehannonne iim firakkamisa issitaa baxxaa ee xuuba diina'i gaadaaninne kibbamoohaannisa kobi'llissaa kibbe. Hundem kollinnem haqqi utuba baxxaa ee beero'ika ooxxi gooca ginditoohaannisa isse. Xaa'l mixaada ki lambe'ennee beero'i lambe'ennee ooxxisa uullise; ki illem beero'i kollonne dabare; beero'oomim kibbamukkoka labona; kibbitoottokim atetteme; ookkim Isra'ee'l minaadabina mare'i ihookko. «Ee lasage Isra'ee'l minaadaphphi baaxii'l bikkina qeddi midaadonne iinse'e; ee midaadinne iinse'lloo ayyaammuwwi xigonne ixxuwwi baaxiilo at iyyitootto. Isra'ee'l minaadab baaxiilo baxxo'i qax hiinchi xigonne ayyaammuwwa kiina qoodaammo; oohim mat balli mat hiincho bikkoo'isa issaatette. Ee bikkina 390 ballaa Isra'ee'l baaxiilo iyyitootto. Eekka guullitaa lasage Yihuxxi minaadaphphi baaxii'l bikkina makki midaadonne sor balla iinse'llootto. Oohim an ixxuwwa guzumo'oommi hiinchuwwa bikkoohane. «Yerusaalee'm kibbancha xishshitaa moo'e; ki angam ki'issaa hiraago woce. Oo kibbanchi beeddeebe'i afeebe'e mulli midaadonne daba'llitoobee'isa keese usinne karoommo. «Kabadem arasaa so'oo, baaqeelaa mishiraa, sarataa gardaammaa eebbaa hundam mateeyyoominne hamaattaa qorosho'o sare. Oohim qeddi midaadonne iinse'lloo sas xibbennee honsayyi balli woronnee ittoohane. Ballina ballina mat kiilo'i soo'l suume ihoo hurbaata ittootto. Oohim waaroo ballinam ihoo'isa issimminne qoodamu ammanenne ittootto. At aggoo wo'im keenamaakkoohan ihimmi hasisoo bikkina mat ballanne xale'i lam kubbaayyi wo'o aggootto. Manni hundim keese moo'oo beyyonne mannika gogaalli qoxxaalli shuma giirina awwaaxxitaa ee qama so'i qorosho'isa sattaa ittootto» yukko. Waa'im «Oohim Isra'ee'l minaadaba allaggi uullanne hundannem binnaa'oommaare seeranne hooramu haashaarammi hurbaattuwwa ittaman ihukkisa moo'isookko» yukko. Anim «I Moollanni Waa'a! Ookki hore'em ihoone! An hore'em haashaaramaa la'oommoyyo; ciiloommaniinsi ki'isaa baytukkoka te'im moochchi shu diinaxxi maara itummi amman bee'e; haashaarammi maaram itummoyyo» yaa dabarummo. Waa'im «Erane, eehid ihukkaa'lleensi manni shu'm bikkenne koboota feettaa giittaa hurbaata sare» yukko. Ee lasage odim «Manchi beeto, Yerusaaleemina hincoo hurbaat hundim gatoo'isa issoommo. Ee beyyonne hee'llam minaadab baddimminnee baa'imminnee wo'mmita'a ittam hurbaataa aggam wo'oo keentu'uuyyi ittamisaa aggamisaa issoommo. Ittam luwwii aggam luwwii bee'immiinsi ki'ukkok ixxuwwina'i ixxuwwim neeyyato mutta'a illi ille moo'aqqantamo. Ixxuwwi baaxiiliinsi ki'ukkok jiitta'a letamo. Waa'i «Manchi beeto, qare'aalli bisa'inne kiikka haareeddaa horooree hogoossaqqe; ee hogoossitti horoo'l saraatam keennaanchonne keentaa sas beyyonne baxxanse. Beero'oom kibbamaa lasage ee saraaxxi saxxi suume beero'i kaarta'a baxxitti xuub lambe'enne shokkiise; saxxi suume odim muransitaa beero'i kaarta'i baxamu xuub kululleetanne disse. Gatu saxxi suume odim hafachchanne binnaa'e; anim eekeeno bisa'inne hollansoommo. Beero'i kululleetanne bisa'inne muranse; odim eehanniinsi hofqax horoo'l saraatam ki eddechchi ludonne gudde. Eehanniinsim odim hofqaxam qoncitaa giiranne eddaa shokkoo'isa isse; eehanniinsi ki'oo giirim Isra'ee'l minaadaphphi beyyi hundam afookko» yukko. Moollanni Waa'i «Oono'o, Yerusaaleema moo'e! Mulli uulli hundim ixxi kululleetanne ihaa minaadaphphi lambe'enne ihoo'isa issaammo. Ihukkaarem Yerusaaleem i seeraa heechchi qaanqaa gindimminne mulli minaadabiinsi loboka joraakkoohan ihukkisaa ixxi kululleetanne yoo uulli hundiinsim sabichchi ihukkisaa moo'isaakko. Yerusaaleem i seeraa heechchi qaanqaa gadaakko; iinam ijaajancha sabaakko» yoolla. Ee bikkina Moollanni Waa'i «Yerusaalee'm manna! Ki'nnuwwi kululleetanne yo'i minaadabiinsi loboka adabi'llakko'ookko. I seeraa ijaajoo egettakko'oyyo. Ki'nnuwwi olla'anne yoo minaadaphphi heechchi qaanqannem hee'llakko'oyyo. Ee mashka'inne an Moollanni Waa'i keesenne Yerusaaleemanne quunqinne ki'aammoohan ihummisa kuroommo. Minaadab hundim moo'ukkuuyyi keese guzumo'oommo. Ki haashaaranchi mashka'inne hundinnem kanniinsi illageen issumbee'isaa ka lasagem issoombee'isaa keese guzumo'oommo. Ee bikkina Yerusaaleemanne yo'i anno'ii amo'ii hanqo'isam ixxuwwi ooso ittamo. Oosim ixxuwwi anno'oo amo'oo ittamo. Ee'isinne an ki'nnuwwa hundam guzumo'oommo. Eehanniinsi gatu qaxam soorem qarannem binnaa'oommo. «Hanqinam an hee'oommi Waa'i wocoommok kane. Jollii haashaaranchii wo'mmaakkoo luwwi hundam issimminne iikka Keesammi Mine haashaassitakko'i bikkina anim ki'nnuwwa qishixxoo'n sholliisoommo. Ki'n minaadabiinsi saxxi suum sibaarinnee jabbinnee beeddookko. Saxxi suum beero'iinsi tochchonne bisa'inne lehookko. Mulli saxxi suume odim soorem qarannem hafachchinne binnoo'isa issaa lasaanchonne odim bisa'inne hollansoommo. Ee lasage i quunqi siggookko. Ixxuwwanne dillu boobanim daba'llookko. Malaayyaam i quunqam ixxuwwanne dilliisaa xeebo mu'lloommo. Ka i quunqam ixxuwwanne dilliisoommi ammane an Waa'i to'achchimminne wocummisa laqqamo. Ee'isam ki'nnuwwika uulla udma'aa ki'nnuwwi hegeegonne hee'oo minaadabina osachchi beyyoo issoommo. Kakam issoommok googinne higoo manni hundim moo'ukkuuyyatte. Malaayyaam quunqinne ki'nnuwwa guzumo'oommi ammane ki'nnuwwi hegeegonne hee'llam minaadabina osachchinaa qaqqaxxanchinaa, baddimminaa muggimminaa mashka'i ikkakkamo. Eekka wocummi Waa'i anette. Shoo manchi xiyyisa ihaakkoo sibaaro ki'nnuwwanne eeboommok ki'nnuwwa bi'isoo'isinatte. Edaa edaa sibaaro ki'nnuwwanne eeboommo. Hurbaatam siiddakkambee'isa issoommo. Sibaaroo haqqo'l moochchaa ki'nnuwwanne fatakoommo. Oo keenim ki'nnuwwi ooso shitamo. Or, boobanii lehii ki'nnuwwanne lophphoo'isa issummo. An Waa'i kaka wocaammo» yukko. Waa'i iina «Manchi beeto! Isra'ee'l duunnuwwi kolli daba'llitaa ixxuwwanne hiraage. Isra'ee'l duunnuwwi Moollanni Waa'ika sagara macceessona kure. An Moollanni Waa'i wocoommoka duunnuwwi, hoffi duunnuwwii baallaam cebbuwwii hundim macceessona. Duunnuwwanne yoo otossitakkam beyyuwwa hundam bi'isoo bisa'a asse'oommo. Kiti'm beyyuwwi hundim gindamookko. Aduruusa hincaa'akkam luwwi hundim iiqamookko. Shakko'i manni hundim ixxuwwi waa'uwwi illagennem uunjantamo. Isra'ee'l oosik leesh qophpha'n waa'uwwi illagennem uboo'isa issoommo. Ixxuwwi miqem kitima hincaa'llam beyyuwwi kululleetanne binnaa'oommo. Ki'nnuwwi hee'llakkam beero'uwwi hundim udma'i ihookko. Otossitam beyyuwwim gindamookko. Kitima hincaa'llakkam beyyuwwim gindamaa udma'i ihookko. Ki'nnuwwi waa'uwwim iiqamaa ubookko. Aduruusa wiriissakkam mu'utim iiqamookko; baxxakko'i luwwi hundim bi'ookko. Shakko'i manni ki'nnuwwi hegeegonne ubookko. Ee lasage ki'nnuwwi an Waa'a ihummisa laqqakkamo. Ihukkaarem ki'nnuwwiinsi hofqaxim oriinsi gattakkamisaa mulli minaadaphphi lambe'enne binnitakka'a hee'llakkamisaa issoommo. Lehiinsi gattakko'i keen ki'nnuwwa qeefadaa massu minaadaphphi lambe'enne eese tiittakkamo. Eese sawwitakkamokim iinniinsi qee'llaakkoo boqqi wodaninnee saa'aanchi qophpha'n waa'uwwina otossimminne eese kichche'issakko'i bikkinattee. Ki'nnuwwaanninne haashaarammi baxinne baxxakko'i jor luwwina ki'nnuwwi gaga shigigitakkamo. An Waa'i ihummisa, ixxuwwanne bichcha eeboomman ihukkisaa qoxxisaa kurummi woshshi hundim awwaad bee'i kora'i sha'llancha ihubee'isaa laqqamo» yukko. Moollanni Waa'i «Isra'ee'l minaadab baxxo'i jolliinsii haashaaranchiinsii ki'aa or, qaanne'ii boobanii ixxuwwanne ihoo bikkina anga aphphissittuuyyi, lokkinne uulla kade'llittuuyyii ‹aayye!› yittuuyyii laare! Qee'llonne yo'i keen xissita'a letamo. Abbisonne yo'i keenim oranne letamo. Eehanniinsi gatto'i keenim sibaarinne beedditamo. Ee'isinne malaayyaam i quunqa ixxuwwanne issoommo. Qophpha'n waa'uwwaannonnee kiti'm beyyuwwi kululleetannee, hoffi duunnuwwannee lob duunnuwwi ludonnee, ee'isam haqqi lugumonnee lob qilxo'i lugumonnee ixxuwwi qophpha'n waa'uwwina er enji yoo luwwa wiriissitakko'i beyyuwwi hundannee ixxuwwik leesh ubookko. Ee ammane manni hundim an Waa'a ihummisa la'ookko. Hanqo'isam i anga biddiqaa'aa ixxuwwika uulla bi'isoommo. Woroo'n qaranne yoo udma'i uulliinsi ki'isaa hanaa'n qaranne yoo Riibil beero'i afeebe'e udma'i uulli issoommo. Isra'ee'l minaadab hee'oo beyyi hundam matim gatoobee'isa bi'isoommo. Ee ammane an Waa'i ihummisa manni hundim la'ookko» yukko. Waa'i iina «Manchi beeto, An Moollanni Waa'i Isra'ee'l minaadabina ‹Hundem kollinnem ki'nnuwwi uullik lasaanchi bichchi afaakko. «Isra'ee'l minaadaba, kaba ki'nnuwwina bi'llakkam amman afaakko. I quunqa ki'nnuwwanne dilliisoommo; ki'nnuwwi baxisam oogatoommo; ki'nnuwwi haashaaranchi bikkinam guzumo'oommo. Hore'em an ki'nnuwwina qishixxoommoyyoo haafoommoyyoo. Haashaarantakko'i bikkina an ki'nnuwwa taakkisannem guzumo'oommo. Ee ammane an Waa'a ihummisa laqqakkamo yoolla› yihe» yukko. Moollanni Waa'i «Ki'nnuwwannne hawwonne exxaa hawwi waarookko. Lasaanchi waaraakko; lasaanchi afaakko; ki'nnuwwanne ki'aakko; oono'o, waaraakko. Ka uullanne hee'llakkam manni hundinam ki'nnuwwina bichchi amman afaakko; amman afaakko; ballim hincaakko. Oohim hambalaachchanchi balla bagaan duunnuwwanne firakka'a daabbarakkam ballayyo. Kaba an abbis ammanenne i quunqaa bala'aa ki'nnuwwanne dilliisoommo; ki'nnuwwi baxisinnem ki'nnuwwanne oogatoommo; ki'nnuwwi shigigaa'oo bax mashka'innem ki'nnuwwa guzumo'oommo. An hore'em ki'nnuwwina qishixxoommoyyoo haafoommoyyoo; haashaaranchanne yoontakke'i bikkina ki'nnuwwi baxisinnem guzumo'oommo; ee ammane ki'nnuwwa guzumo'oommi Waa'i anetti ihummisa laqqakkamo» yoolla. Oono'o, bichchi balli Isra'ee'l minaadabanne waareena hincaakko; damig, boqqoomii bolximmii lophphaakko. Boqqoomiinsi ki'ukkok jor bax lophphaakko; ixxuwwiinsi mat manchim gatooyyo. Ixxuwwina yoo goddiinsii amaxxiinsi mat luwwim gatooyyo. Oono'o, amman afaakko; ballim hincaakko; i quunqi hundannem waaroo bikkina bitaa'oo manchi liiramoone; biteesoohim kichche'oone. Biteesaanchii bitaa'aanchii foorinne hee'llu'uuyyim biteesaanchi biteesu mu'uta dabaraa siideena xanoobee'isam hiraagoom wocamukkok hundi bikkinattem ihu bikkina ihoo'n gatooyyo. Hundim baaxiilo baxxo'i bikkina matim gattamoyyo. Xurumbi fugamookko; hundem luwwim gudookko; ihukkaarem Waa'ik quunqi mannanne hundannem dilloo bikkina ayyi manchim orina marooyyo. Biiranne or, min hundannem jabbii sibaarii yookko. Beero'iinsi tochchonne hee'ookkok hundim oranne lehookko. Beero'onne yookkokim jabbinnee sibaarinnee beeddookko. Cebbanne hee'llam handare'i ixxuwwi gaga gatixxiteena duunanne fittamisam lehiinsi gatto'i keenim duunanne ikka'a ixxuwwi baaxii'l bikkina kichche'lla'a wi'llitamo. Angi hundim hoogookko; malaayyi hundim wo'i ihookko. Kichchechchi eddechcha edde'llamo; muggitamo; tuuttamo; ixxuwwi horoorem hogoossaqqitamo. Ixxuwwika kin bira goog hundannem uunjitamo. Ixxuwwi worqim haashaarammi luwwisa ihookko; oo birii worqii Waa'i quunqi ayyaamonne gatisooyyo; sibaarom hoorooyyo; te'im godabo wonshooyyo; baaxiilonne ubbakkamisina mashka'i ihukkok ee keeno. Bakke'llam hee'llo'i mishisoo wereeggi mu'utiinsi shigigaa'oo qophpha'n waa'uwwa baxxo'o; ee bikkina ee wereeggi mu'uttuwwa ixxuwwi beyyonnem haashaaramoo'isa issoommo. Waa'im «Ki'nnuwwika wereeggi mu'uta allaggi qeefadona, uulli baaxiilaammuwwim boggona higisaa uwwoommo. Ixxuwwim haashaassitamo. Fanguwwi i Keesammi Minenne aagga'a haashaassitamo. Haashaassitu'uuyyim ixxuwwa hooroommoyyo. Isra'ee'l uulli manna shimminne, beero'oomim boqqoominne wo'mmu bikkina chimchima gudise. Boqqi minaadaba woraa ki'nnuwwi minneewwa lago aa'llamisa issoommo; malaayyaammuwwika bolxooma bi'isoommo; ki'nnuwwi keesammi beyyuwwam haashaassitamo. U'n waaroo ammane xumma hassakkamo; ihukkaarem siiddakkamoyyo. Boobananne booban exxookko; mat woshsham mulli woshshi awwonaa waarookko. Hiraagaan mo'llo'i kaalta ki'nnuwwina kuttamisina uunxitakkamo; qeessuwwi minaadabina losissam seera, lommannim soggam woshsha hooggamo. Adil wi'llookko; gassaanchim neeyyato murookko; minaadab baachchinne huxe'ookko; ki'nnuwwi baxisannem guzumo'oommo. Mulli mannanne oogattakko'aannisanne anim oogatoommo; eehanninnem Waa'i anette ihummisa laqqakkamo» yoolla. Qeefadammummi loh hiinchaannonne, loh agan aagu onti ballannee Yihuxxi uulliinsi qeefadanto'i minaadaphphi awwonsaan i minenne iinninne maqirem afuutta'a yo'aannonne, Moollanni Waa'ik malaayyi dangonnem eesenne dillukko. Iim moo'ummi ammanenne ixxek hagar gii'l laba'nnisa caakkisoo manchi kobi'lla moo'ummo. Oo manchi laboohim lamadii aad giira, lamadii iim odim belecce'oo naas xaa'llis hee'ukko. Ixxim anga laboo luwwa i kollonne biddiqaa'aa i horoo'l saraata amadukko. Waa'ik Ayyaan eese iim uulli lambe'ennee iima'n lambe'ennee ki'isaa Waa'i kaaltanne Yerusaaleema massukko. Hanaa'n qarinne woro'l wixxixxi beyyo aagakkam ooxxi goocinne higisaa Waa'i to'achchoo'isa issoo qophpha'n waa'i misil yoo beyyo afisukko. Ee beyyonnem Isra'ee'l Waa'ik lombi hee'ukko. Oohim Keebaar daajji gadanonne moo'ummaanni'nnoo'i kaalti hee'ukko. Waa'im «Manchi beeto, hanaa'n qarinne yoo kollo moo'e» yukko. Eekka moo'ummi ammanennem ee ooxxi gooc illaginne yoo kiti'm beyyi gadanonne Waa'i to'achchoo'isa issoo misil hee'ukko. Waa'i odim iina «Manchi beeto, ka issamoo luwwa moo'llaahinnihe? Isra'ee'l minaadab ka keesammi beyyonne baxxam shigigaa'oo luwwa moo'e; ixxuwwi ka jor baxinne eese ka keesammi beyyiinsi qee'lloommisa issito'ookko. Kanniinsim lophphoo mulli shigigaa'oo luwwa odim moo'llootto» yukko. Ixxim eese biiree'n kollinne hee'oo wixxixxi beyyo aagakkam gooc kolli massukko. Anim ee beyyonne kininne ootamaakkoo ootanne mat afo'o moo'ummo. Waa'im iina «Manchi beeto, ka ootanne afo'o fisse» yukko. Anim fissaa lasage mat gooca moo'ummo. Ixxim «Woronne aaggaa ee beyyonne baxakkam shigigaa'oo jor luwwa moo'e» yukko. Anim ee woronne aagaa gorte'enne hundannem biqinne shuroo qooccanchuwwik, muccuroom bee'i moochchikii Isra'ee'l minaadaphphi qophpha'n waa'uwwikii misil kitaabamaakkoo moo'ummo. Shaafaan beet Azaaniyii Isra'ee'l awwonsaa'nnek lamarayyii ee beyyonne uullita'a hee'llo'o. Annannichchim aduruusa wiriissakkam mu'uta amadda'a hee'llo'o. Ee mu'utiinsim erisa enje'oo aduruus wiriir firam hee'ukko. Waa'im iina «Isra'ee'l awwonsaan ixxuwwi gaqqi qophpha'n waa'uwwi minenne tuunsonne aagga'a ‹Waa'i neese moo'ooyyo! Ni uullam uraakko› yitu'uuyyi issitam luwwa moo'lloollannihe?» yukko. Odim ixxi iina «Kanniinsim lophphoo shigigaa'oo luwwa issitu'uuyyi moo'llootto» yukko. Ee lasage hanaa'n qarinne Keesammi Mine aagakkam ooxxi gooc kolli massukko. Ee beyyonnem Tamuuza yakkam qophpha'n waa'ina meenti wi'llookkoka moo'isukko. Ixxim «Manchi beeto, kaka moo'llaahinnihe? Kanniinsi lophphoo shigigaa'oo luwwam moo'llootto» yukko. Odim Waa'i Mi'n woronne yoo wixxixxi beyyo eese massukko. Ee beyyonnem Keesammi Mine aagakkam gooc gadanonne kitima hincaa'akkam beyyinaa daba'llamakkam beyyinaa lambe'enne lamiyyee ontoo ihoo qax manni hee'ukko. Ixxuwwim afaree Waa'i mi'n kolli illee eelliinchi firoo kollonne daba'llita'a guruphphita'a eelliinchina otossitam hee'llo'o. Waa'im iina «Manchi beeto, kaka moo'llaahinnihe? Ku Yihuxxi manni ka beyyonne moo'llitti shigigaa'oo luwwi hundam baximminnee uullanne boqqoom lophphoo'isa issimminnee eese quuqissamuulla. Ee'isinne eese hinkid game'llitoda'ee quuqissoda'ee moo'e! Ee bikkina an ixxuwwanne iikka quunqa dilliisoommo. Ixxuwwinam qishixxoommoyyoo haafoommoyyoo; ixxuwwi laachcham macceesoommoyyo» yukko. Ee lasage Waa'i «Ka beero'o bi'issakkeena doo'llantakko'i keen o'l mu'uta amaddakka'a hinci'llehe!» yaa sagara iimaa'aa wocukkuuyyi macceesummo. O'l mu'uta amaddo'oo loh manchi hanaa'n qarinne yoo goocinne waatto'o. Ixxuwwiinsim mat talbiinsi dadamaakkoo wereeggi eddechcha edde'aa kitaabakkam mu'uta amadakkam gonoona midaadonne amadaa hee'ukko. Ixxuwwim aagga'a naas xaarinne baxamu kiti'm beyyi gadanonne uullito'o. Ee lasage Isra'ee'l Waa'ik lombi kiruubeelluwwiinsi hanaan yoo beyyiinsi ki'aa Keesammi Minenne awwaadina uullakkam beyyo marukko. Waa'im ee talbiinsi dadamaakkoo wereeggi eddechcha edde'aa kitaabakkam mu'uta amadakkam gonoona midaadonne amadaa hee'u mancho weeshaa «Yerusaalee'm beero'o mattaa ee beero'onne baxamu shigigaa'oo jolli bikkina kichche'lla'a wi'llitam manni miinenne mare'e isse!» yukko. Odim Waa'i gatto'i keenina «Ki'nnuwwim ixxo awwontakka'a mallehe; ayyenam qishixxitakkoo'n hundam shi'llehe. Lommanna, woraada, ciilluwwaa meentoo hundam shi'llehe. Ihukkaarem miinenne mare'i yoo mancho ayyem nakkitakkotte. Eeham ka i miniinsi asheellehe» yaa wocukkuuyyi macceesummo. Ee bikkina ee beyyonne Keesammi Minenne uullito'i awwonsaaniinsi ki'isaa shimma asheetto'o. Waa'i odim ee keenina «Mallehe, Keesammi Mine haashaassehe! Wixxixxi beyyuwwannem leesh wo'mmaakkoohan issehe!» yukko. Ixxuwwim fitta'a ee beero'onne yoo manna shito'o. Shitu'uuyyim an mullam gataa miininne uullanne aad heeshaa «Moollanni Waa'a! Aayye! Isra'ee'lleka baraara guulliteebe'i afeebe'e Yerusaaleemanne kaa'nna quuqqoohonnihe?» yaa laarummo. Waa'im iina «Isra'ee'llekii Yihuxxekii minaadab kee'mmaalli baaxiilo baxxo'ookko. Uulloomannem lobakat xiiga dunto'ookko. Beero'oomim hantaarinne wo'mmaakko. ‹Waa'i ni uulla uraakko; neesem moo'ooyyo› yitamuulla. Ee bikkina an ixxuwwina qishixxaa haafoommoyyo. Ixxuwwi baxxo'i baxo hundam anim ixxuwwanne dabaraa issoommo» yukko. Ee lasage talbinne dadamu wereeggi eddechcha edde'aa kitaabakkam mu'uta dissakkam gonoona midaadonne amadu manchi daba'llaa waaraa Waa'ina «Eese ijaajjittoka hundam an issaa guullaammo» yukko. Kiruubeel horoolluwwiinsi hanaan yoo iimane moo'ummo; kiruubeel hanennem sanpheer yakkam bito xee'aal kininne baxamaakkoo adillani'nnoo'i luwwa moo'ummo. Waa'im talbiinsi dadamaakkoo wereeggi eddechcha edde'u manchina «Fooraam qooccanchuwwiinsi woroon yo'i shafe'e laboo luwwi lambe'inne higgaa mare; ee fooraam qooccanchuwwi lambe'enne yoo gii'l kashariinsi ki anginne fooccaa massitaa ka beero'onne binnaa'e!» yukko. An ixxo moo'ummuuyyim aagukko. Ixxim woro aagoo ammanenne kiruubeelluwwi Keesammi miniinsi woroo'n qarinne yoo kollinne uullaa hee'ukko; woro'l kollinne yoo wixxixxi beyyonnem umbu'l wo'mmukko. Waa'i lombi kiruubeeliinsi ki'aa Waa'i mi'n wororonne awwaadina uullakkam beyyo marukko. Umbu'llim ee minenne wo'mmukko. Wixxixxi beyyim Waa'i lombi belellaatinne wo'mmukko. Kiruubeelluwwim ixxuwwi ladinne macceesissam sagar bii'l kollinne yoo wixxixxi beyyonne macceesamam hee'ukko. Oo sagarim hundam xanoo Waa'i sagara labam hee'ukko. Waa'i ee talbiinsi dadamu wereeggi eddechcha edde'u mancho kiruubee'l koofanne shafe'e laboo luwwi lambe'iinsi giira aa'oo'isina ijaaju ammanenne qaqqisaa woro aagaa ee shafe'e laboo luwwaannonne mat gadanonne uullukko. Ee kiruubeelluwwiinsim mat ixxuwwi lambe'enne yoo giiranne anga aagisaa hofqax gii'l kasharam ki'isaa talbiinsi dadamaakkoo wereeggi eddechcha edde'u manchi anganne issukko; oo manchim ee gii'l kashara amadaa marukko. Kiruubeelina annannichchinam manni anga laboo luwwi ladiinsi woroon yoo'isa moo'ummo. Ee kiruubeelluwwaannonne annannichchi gadanonnem soor shafe'e laboo luwwi yookkoka moo'ummo. Ee shafe'e laboo luwwikim hagar belecce'oo inqu yakkam kina laboohan hee'ukko. Ee soorem shafe'uwwa laboo luwwikim hagar kobi'llamoohan hee'ukko; mat shafe'e laboo luwwik mulli shafe'e laboo luwworinne higoo laboohan hee'ukko. Oo shafe'e laboo luwwi illaqqi kolli maroo ammane hinka'i kollonnem daba'lloo'n xabbaa marookko. Illagenne yoo shafe'e laboo luwwi hassu kolli hundannem maruta'n mulli keen hinka'i kollonnam daba'llitoo'n awwo'nnanta'a mattamhee'no'o. Kiruubeelluwwika afare, ladaa angaa edaa ixxuwwi orachchi hundoomannem ee shafe'uwwa laboo luwwannem gatoo'n illi wo'mmaakkoohan hee'ukko. Oo shafe'uwwa laboo luwwim an macceesummuuyyim tululitam shafe'uwwa yamanto'o. Kiruubeelluwwina annannichchinam soor ilkolli hee'ukko. Luxxek mirgo'ika la'mmek mannika saxxek hobbichchika soo'llekim gaaqichchika laboohan hee'ukko. Kiruubeelluwwim iim ki'llo'o; ixxuwwim Keebaar daajji gadanonne moo'ummi fooraam qooccanchuwwa. Kiruubeelluwwi mikmikoohaare ixxuwwi midaadinne yoo shafe'e laboo luwwim maqirem mikmikam hee'ukko; kiruubeelluwwi iim ki'lleena ixxuwwi lado biddiqaa'llamaare ixxuwwi midaadinne yoo shafe'e laboo luwwim ixxuwwiinsi annanni iham hee'ukkoyyo. Ee fooraam qooccanchuwwikim ayyaan ee shafe'e laboo luwwi woronne yoo bikkina oo qooccanchuwwi uulloohaare shafe'e laboo luwwim uullam hee'ukko; kiruubeelluwwi ki'llamaare shafe'e laboo luwwim maqirem ki'am hee'ukko. Ee lasage Waa'ik lombi Keesammi mi'n mikkiriinsi ki'aa kiruubeeliinsi hanaan yoo beyyonne firaa uullukko. An eekka moo'ummuuyyim kiruubeelluwwi ixxuwwi lado biddiqaa'lla'a uulliinsi iim ki'llam ammane ixxuwwi midaadonne hee'u shafe'e laboo luwwim maqirem ki'am hee'ukko. Ixxuwwim Keesammi Mi'nneka eelliinchi firinne yoo gooca affa'a uullito'o; Isra'ee'l Waa'ikim lombi ixxuwwi hanenne hee'ukko. Oo keenim Keebaar daajji gadanonne Isra'ee'l Waa'iinsi woroon moo'ummi fooraam qooccanchuwwa; anim oo keen kiruubeelluwwi ikko'isa la'ummo. Ixxuwwina annannichchinam soor ilkollii soor ladii hee'ukko; ladduwwaannonne annannichchi lugumonnem manni anga laboo luwwi hee'ukko. Ixxuwwikim ilkolli ee Keebaar daajji gadanonne moo'ummi ilkolluwwa laboohan hee'ukko; kiruubeel annannichchim xabbaa illagenne maram hee'ukko. Waa'ik Ayyaan uulliinsi iim ki'isaa eelliinchi fi'l kollinne yoo Keesammi Minenne yoo eelliinchi fi'l gooc kolli eese worukko. Ee beyyonnem ooxxi gooc gadanonne lamiyyee onti manchoo moo'ummo. Ixxuwwi lambe'ennem minaadaphphi awwonsaan ikko'i Aazuur beet Azaaniyaa Baanaay beet Falaaxiyaa moo'ummo. Waa'i iina «Manchi beeto, ku manni jor luwwa qooddamuulla; ka beero'onnem jor woshsha a'llantamuulla. ‹La'mmaaggem daballaa minneewwa banxoommi amman qee'l ihooyyo; ku beero'i maara sarakkam harachchisa ihukkuuyya neese odim giir itoobee'isa harachchi hooroo maa'llisa inkaammo› yito'ookko. Ee bikkina manchi beeto, ixxuwwi hanenne hiraago woce; hiraago woce» yukko. Ee lasage Waa'i Ayyaan i hanenne dillukko. Iinam «Waa'i ka'isa yoolla yitaa woce. ‹Isra'ee'l minaadaba, ka woshsha woccakko'ookko. Anim ki'nnuwwi sawwitenne yoo woshsha la'oommo. Ka beero'onne lobakat manna shitakko'ookko. Beero'oo'm googom leeshinne wonshitakko'ookko› yitaa woce. Ee bikkina an Moollanni Waa'i ki'nnuwwina kuroommi woshshi kane. Harachchi woronne yoo maar ki'nnuwwi shitakko'i manna. Ku beero'im ee harachcho. Ihukkaarem ki'nnuwwi ka beero'iinsi hoorantakkamo. Ki'nnuwwi ora badditakko'ookko. Ihukkaarem an ki'nnuwwanne ora eeboommo. An Moollanni Waa'i kaka wocaammo. Ki'nnuwwa ka beero'iinsi fissaa mulli uulli mannina higisaa uwwaa ki'nnuwwanne oogatoommo. Ee bikkina ki'nnuwwi uulli gabalanne orinne letakkamo. Isra'ee'l gabalannem ki'nnuwwanne oogatoommo. Ee ammane an Waa'i ihummisa laqqakkamo. Ku beero'i ki'nnuwwina harachcho ihooyyo. Ki'nnuwwim ka beero'i woronne maa'llisa ikkakkamoyyo. Isra'ee'l gabalanne ki'nnuwwanne oogatoommo. Iikka seeraa gatti ogoraa uttakka'a ki'nnuwwi olla'anne yoo manni gatti ogora egettakko'i bikkina ki'nnuwwanne oogatummok an Waa'a ihummisa laqqakkamo› yoolla» yukko. An hiraago wocummi ammanenne Baanaay beet Falaaxiy ubaa lehukko. Anim miininne uulla nakkaa laarummuuyyi «I Moollanni Waa'a! Isra'ee'l minaadaphpheka gatu qaxichchoomam guulliteenannihe?» yummo. Waa'i «Manchi beeto! Yerusaaleemanne hee'llam manni ki qarimmanni bikkina, yaayyanto'i manni bikkinaa hore'oomam hundem Isra'ee'l minaadaphphi bikkinaa ‹Ixxuwwi Waa'iinsi qee'llita'a matto'i bikkina Waa'i ka uulla niina gulummi issaa uwwaakko› yita'a woccamuulla» yukko. Ee bikkina Moollanni Waa'i «Qee'l uullanne hee'llam manni lambe'enne hee'llamisa issummaaree te'im annanni uulluwwanne binnaa'ummita'nnim hofqax ammanina ixxuwwi edantam Keesammi min ihoommo. «Ee bikkina an Waa'i kuroommi luwwi hundam ixxuwwina kure. Oono'o, minaadaphphi lambe'iinsi binnitakko'i uulli hundiinsii ki'nnuwwa wixaa'oommo. Isra'ee'l uulla odim ki'nnuwwina uwwoommo. Ixxuwwim daba'llitam ammane siiddam shigigaa'ookkokaa haashaarammi ikko'oo qophpha'n waa'uwwaa ekkid hoottamo. An ixxuwwina mat wodanoo mat sawwitee uwwoommo; ixxuwwiinsim ki'nnisa qoxxaakkoo wodano fissaa ijaajamoo maashaalli wodano uwwoommo. Ee ammane i seera wonshitamo; i siyya'a hundam lonsitamo; ixxuwwim i minaadab ikkamo; anim ixxuwwina Waa'i ihoommo. Ihukkaarem ixxuwwi wodan haashaarammaa shigigaa'oohanee ikko'oo qophpha'n waa'uwwa awwontam keenina ixxuwwi baxisam miqoommo» yukko. Ee ammanenne kiruubeelluwwi lado biddiqaa'lla'a bararimma asheetto'o. Shafe'uwwim ixxuwwi midaadinne hee'llo'o. Isra'ee'l Waa'ik belecce'oo lombi ixxuwwi hanenne hee'ukko. Waa'ik belecce'oo lombi ee beero'i woriinsi ki'aa beero'iinsi eelliinchi fi'l kollonne yoo duu'n hanenne uullukko. Kaaltannem Waa'ik Ayyaan uulliinsi iim ki'isaa Baabiloo'n uullanne yo'i yaayyanto'i manni kolli worukko. Ee lasage oo kaalti iinniinsi annanni ihukko. Anim Waa'i iina moo'isukkoka hundam yaayyanto'i keenina kurummo. Waa'im iina «Manchi beeto, at hee'lloottok boqqi ikko'oo minaadaphphi lambe'ennette; ixxuwwim boqquwwi ikko'aanniinsi ki'ukkok illi hee'ukkuuyyi moo'llamoyyo; macci hee'ukkuuyyim macceessamoyyo. Ee bikkina manchi beeto, kiikka yaayyanchi mu'uta kattaa gudise; ixxuwwi moo'llu'uuyyim yaayyanchi dooyya ballanne asheere; yaayyamu mannisa ka beyyiinsi ki'llaa mulli beyyo mare; boqqi keen ikkota'nnim qoossitam hee'llo'o. Yaayyamu mannisa ixxuwwi moo'llu'uuyya kiikka dooyyi mu'uta ballanne gudissootto; yaayyanto'i keen issitamisam ixxuwwi moo'llu'uuyyim maaro'onne fittaa mare. Keese moo'akkam ammane ki mi'nneka gortanna huruuttaa afo'o axise; ki mu'utam ee afo'inne shullaa'llaa fisse. At mattoo beyyo moo'lloobee'isa ki mu'uta iyyitaa ki illi kollom gunguu'llitaa tuunsonne mattittuuyya keese moo'akkona; anim keese Isra'ee'l minaadabina mare'i issaammo» yukko. Anim Waa'i eese ijaajukkoka hundam issummo. Ee ballam yaayyamu mannisa i mu'uta ka'llummo. Balli hiimaa lasonne gortanna i anginne huruuraa afo'o axisaa ee kollinne i mu'uta fissummo. Manni hundim eese moo'ukkuuyyi iikka karamu mu'uta gudumonne iyyaa tuunsonne marummo. La'm balla daram Waa'i iina «Manchi beeto! Oo boqqi Isra'ee'l minaadab ‹Oono'o, ku issitoo luwwi hundim maruwwa?› yita'a keese xa'mmito'oyyonnihe? Ee bikkina an Moollanni Waa'i wocoommi woshsha kure. Ku hiraaqqi sagar Yerusaaleemanne ihaa gassoo gassaanchinaa eehe'enne hee'oo minaadabina hundinattemee. Ku at issitti luwwi hundim ixxuwwanne hanenne iheena hincu luwwina mare'i ihukkisa ixxuwwina la'isoommo; ixxuwwim yaayyanto'oo keenoo qeefadanto'oo keenoo ikkamo. Ixxuwwa gassoo gassaanchi ixxi mu'uta ka'llaa gudumonne iyyimminne ixxuwwi gortanna gindita'a fissitam afo'inne luxuunxaa tuunsonne hollamookko. Ixxeka ilkollo ifiisoo bikkina ka uulla moo'ooyyo. Ihukkaarem an iikka shikka biddiqaa'aa ixxo qaashoommo. Ixxi illinne moo'oo'n lehoo Baabiloo'n beero'i kolli ixxo woroommo. Ixxi sogaanoo lombe egettam waardiyyuwwaa hundam kolli hundannem binnaa'oommo. Ixxuwwi lasonnem ihaa bisa'inne hollansoommo. Ixxuwwam ‹mulli uulli minaadaphphi lambe'enne binnaa'oommi ammane an Waa'a ihummisa laqqamo. Ihukkaarem ixxuwwiinsi hofqaxam oriinsi, sibaariinsii boobaniinsii gattamisa issoommo. Ka'isinne minaadaphphi lambe'enne hee'llu'uuyyi ixxuwwik bax hinkaa'nna shigigaa'oohan hee'uda'e tiittamo; anim Waa'a ihummisa laqqamo» yukko. Waa'i «Manchi beeto! Ittoo ammane baddimminne ite. Aggoo ammanem baddimminnee huxechchinnee age. Uullanne hee'llam minaadabina Moollanni Waa'i Isra'ee'l uullanne Yerusaaleemanne hee'llam minaadabina ‹Ka uullanne hee'llam manni boqqoo'm mashka'inne ku uulli hundoomim maxaramoo bikkina ixxuwwi hurbaata ittamok baddimminnette. Wo'o aggamokim neeyyato murimminnette. Kaba minaadabinne wo'mmita'a moo'antam beero'uwwi bi'llamo; uulloomim udma'i ihookko. Ee ammane an Waa'i ihummisa laqqamo› yaa kuraakko» yukko. Waa'im iina «Manchi beeto! Kaaltoom hundoomim baxonne hosoo'n ayyaammuwwi qeeraa'llukko yamamaa Isra'ee'l uulli bikkina kuramoo ku kobi'llishshi maruwwa? An adil Waa'i ka quuxina wocoommoka ixxuwwina kure; ku kobi'llishshi ka beyyonnem uulloo'isa issoommo. La'mmeka Isra'eelanne kuramooyyo; eehanni bikkenne ‹Oono'o, amman afaakko; hiraaqqi sagar hundim wo'mmeenatte!› yitaa ixxuwwina kure. Isra'ee'l minaadaphphi lambe'enne qophpha'n kaalti te'im gennimmi kanniinsi eehid hooraa hore'em kuramooyyo. An Waa'i xabbaa'aa wocoommo; wocoommi woshshi hundim wo'mmookko. Ka lasage hore'em dasooyyo. Ki'nnuwwi boqquwwa, ‹Ki'nnuwwi hanenne woroommo› yaa qoxxisaa wocummi luwwi hundam ki'nnuwwi hee'llakkam doollenne wo'mmoo'isa issoommo. Kaka wocummok an adil Waa'a» yukko. Waa'im iina «Manchi beeto! Isra'ee'l minaadab ki kaaltii hiraagii ‹Lobakat doolliinsi lasonne wo'mmoohane› yita'a woccamuulla. Ee bikkina an Waa'i kuroommi woshsha ixxuwwina kure. An wocummok hundim wo'mmookko; hore'em dasooyyo. Kaka wocummok an adil Waa'a» yukko. Waa'im iina «Manchi beeto! Ixxuwwi sawwitiinsi fissita'a hiraago woccam Isra'ee'l hiraagaanonne hiraago woce. Hore'oomam Waa'i sagara macceessona ixxuwwina kure» yukko. Moollanni Waa'i «Ixxuwwi sawwitiinsi fissita'a hiraago woccam keeninaa hiraago moo'lloo'nnim ‹Hiraago moo'nnaammo› yitam ka qawwi hiraagaaninaa aayye! Isra'ee'l minaadaba! Ki'nnuwwi hiraagaan gindamu beyyuwwi lambe'enne hee'llam wengereellisa. Waa'i ballanne ixxeka ora uullixantakkeena ee gindamu luwwi beyyo fittakko'oyyo; te'im Isra'ee'lleka oota dabattakka'a oottakko'oyyo. Ki'nnuwwik kaalti qophphano; gennimmim qophphano. Waa'i ixxuwwa asse'oo'nnim Waa'i ka'isa yoolla yitamuulla. ‹Kukim ihaa lasonne ixxuwwik sagar wo'mmookko› yita'a sawwitamo. An wocumbee'ekam ‹Waa'i ka'isa yoolla› yitakka'a woccakkam ammane kaalta moo'llakka'a qophpha'n hiraago moo'llakko'oyyonnihe?» yukko. Ee bikkina Moollanni Waa'i «Qophphano woccakko'i bikkinaa ki'nnuwwi kaaltim qophphan ihu bikkinaa an ki'nnuwwi hanenne ki'oommo. Kaka wocummok an Moollanni Waa'a. Qophpha'n kaalta moo'oo keenonnee qophpha'n hiraagaanonnee i anga ki'isoommo; ixxuwwi i minaadaphphi mateeyyoo'm woronne siidantamoyyo. Hore'em Isra'ee'l minaadaphphi summa kitaabakkam doonanne kitaabantamoyyo. Isra'ee'l uullam aaggamoyyo. Ee ammane an Moollanni Waa'i ihummisa laqqakkamo. Ku hiraagaan amma'nnantambee'i keen ikko'ookko. Xummi bee'ekam «Xummi yookko» yita'a i minaadabina kuttamo. Ubeena mat kollonne dufu gortanna qalama labimminne haareechchisso'oka labissam baxaano labbamo. Dirisaam xeen ga'nnookko; geejji baraxxi ki'nnuwwi ubookko. Hafachchik hambu'llam ki'ookko. Ee bikkina gortannanne qalama labbo'i mannina ‹Gortanni ubookko› yihe. Oo gortanni gindamoo ammane ‹ Labbakko'i qalam hannonne yookko?› yaa manni xa'mmooyyonnihe?» yukko. Ee bikkina Moollanni Waa'i «Yerusaalee'mmeka qasha gindimmina i quunqinne hambu'llam hafachchi ki'oo'isa issoommo. Dirisaam xeenii malaayyaam baradii dillookko. Shooho'i moo'amaa uulli gaxinne maqire gudeebe'i afeebe'e qalama labbakko'i gortanna gindaa uullanne ubbuusoommo; oo gortanni uboo ammane ki'nnuwwim ixxi woronne bi'llakkamo. Ee ammane an Waa'i ihummisa laqqakkamo. Ee ooxxi hanennee ootanne qalama labbo'i mannannee iikka malaayyaam quunqa dilliisoommo. Ee lasage ootim ihukko ootanne qalama labbo'i keen hee'llamoyyo. Ixxuwwim Yerusaalee'm bikkina hiraago wocco'i keenoo kaalta moo'llo'i keenoo; xummi hee'oo'nnim ‹Xummi yookko› yito'i; Isra'ee'l hiraagaano; kaka wocummi Waa'i anette» yukko. Waa'i «Kabadem manchi beeto! Ki minaadaphphi lambe'enne ixxuwwi sawwitiinsi fissita'a hiraago woccam meentonne xishshaa'llaa hiraago woce. Moollanni Waa'i ka'isa yoolla yitaa ixxuwwina kure. «Wodanne karakkam ashan kitaaba gobbam, mannikam heechcha qaashimmina annanni annanni uullichchinne, horoorenne ka'llakkam shaashsha gudissam meentina aayye. I minaadaphphi lambe'iinsi manna qaashshakka'a ki'nnuwwi foorinne hee'llakkamonnihe? Foocci so'inaa gootto'i injeerinaa yitakka'a qophphano macceessam i minaadabina qophphano woccakku'uuyyi lehimmi hasisoobee'i manna shitakku'uuyyii hee'immi hasisoobee'i manna hee'llamisa issitakku'uuyyii i summi i minaadaphphi beyyonne game'llamoo'isa issitakko'ookko» yukko. Ee bikkina Moollanni Waa'i «Manna qaashshakkam ashan kitaabbuwwa uunjoommo. Ki'nnuwwi ashan kitaabbuwwa ki'nnuwwi wodiinsi muraa uunjimminne cii'isa qaashshakkam foolluwwa wolabbanonne fissoommo. Gunguu'llitakkam shaashsha dereeransaa i minaadaba ki'nnuwwi angiinsi gatisoommo. La'mmaagge ki'nnuwwi anganne ubbamoyyo. Ki'nnuwwim Waa'i anette ihummisa laqqakkamo. An neeyyato mussiisumbee'i mucculluwwa qophphano wocimminne neeyyato mussiissakko'ookko. Jor keen ixxuwwi gaga gatixxiteena baaxiiliinsi daba'llitambee'isa iggissakko'ookko. Ee bikkina kanniinsi eehid hooraa qophpha'n kaalta moo'llakkamoyyo. Gennimmi baxom baxxakkamoyyo; i minaadaba ki'nnuwwi angiinsi gatisoommo. Ee ammane an Waa'i ihummisa laqqakkamo» yoolla. Isra'ee'l awwonsaaniinsi eese sogitano xa'mmiteena waatta'a i illagenne afuutto'o. Ee ammane Waa'i iina «Manchi beeto! Ku manni ixxuwwi wodano qophpha'n waa'uwwina uwwito'ookko; ixxuwwik hawwojji ixxuwwi illagenne qolat ihoo'isina issito'ookko; ku hundim ihaa lasonne iikka doo'lla xa'mmito'is hanqannihe?» yukko. Ee bikkina Moollanni Waa'i «Isra'ee'l minaadabiinsi ixxuwwi wodano qophpha'n waa'ina uwwito'i keenii qophpha'n waa'anne otossimmi ixxuwwi illagenne qolat ihoo'isa issito'i keenii yo'o. Ku manni hiraagaanchi beyyo waattaman ihulas an Waa'i qophpha'n waa'uwwi dutukkisinnem laboo dabachcha uwwoommo. Kaka issoommok eese utta'a ixxuwwi qophpha'n waa'uwwi beyyo marimminne iinniinsi annanni ikka'a hee'llo'i Isra'ee'l minaadaba hundikam wodano dabarimminatte. «Ee bikkina Isra'ee'l oosina ‹Moollanni Waa'i «Ki'nnuwwika qophpha'n waa'uwwa uttakka'a joriinsi daba'llehe; shigigaa'oo baxiinsi hundiinsim daba'llehe!» yoolla› yihe. «Isra'ee'l minaadabiinsi mat te'im ixxuwwi lambe'enne hee'oo mulli uulli manniinsi mat iinniinsi annanni qophpha'n waa'uwwina otossi yimminne baaxiilo baxoohan ihuta'n, oo ixxi hawwojji ixxi illagenne qolat ihoo'isa issuta'nnii odim la'mmeka sogitano xa'mmeena hiraagaa'n beyyo waaroohan ihuta'nnii an Waa'i i gagoomim dabachcha uwwoommo! Anim ixxi hanenne xishshaa guzumo'oomm'isaa ixxonne osarakkamisaa issoommo; i minaadaphphi lambe'iinsim ixxo hooroommo. Ee lasage an Waa'i ihummisa laqqakkamo. «Mat hiraagaanchi xa'mmamaa qophpha'n dabachcha uwweena ki'uta'n an Waa'i eekka issona cawwaa uroommo. Eehamdu issulas Waa'i minaadaphphi lambe'iinsi ixxo bi'isoommo. Hiraagaanchii ixxeensi sogitano xa'mmeena waarookkokii lamim gudaanchom guzumo'antamo. Kakam issoommok Isra'ee'l minaadab i beyyo afisoo googo ka lasage huushantambee'isaa hawwojjinne hundinnem ka lasage ixxuwwi gaga huushissambee'isaa. Kannonnemdu qoxxito'aa'lleensi an ixxuwwina Waa'i ihoommo; ixxuwwim i minaadaba ikkamo› yoolla Moollanni Waa'i» yukko. Waa'i iina «Manchi beeto, Mat uulli minaadab eesenne amma'nnamoobee'an ihaa baaxiilo baxuta'n hurbaaxxeka atoota hooraa sibaarinne guzumo'oommo; mannaa diinatee guulloommo. Oo sasem manchim Nohe'i, Iyyoobii Daani'eelii ixxuwwi woronne siidantota'nnim ixxuwwi eroomminne gatisseena xantamok xale'i ixxuwwi gaga. Kaka wocukkok Moollanni Waa'a. «Ee uullanne moochcha asse'aa manni bee'an iheebe'ee ayyi manchim eeheen higeena xanoobee'i qaxa afeebe'ee ee uulla udma'isoommo. Hanqinam an hee'oommi Waa'a; oo sasem mannim ee beyyonne hee'llota'nnim ixxuwwi gagiinsi bagaan ixxuwwi oosom gatisseena xantamoyyo. Oo uullim diihookko. «Te'im ee uullanne ora eebaa mannii diinatii ee orinne bi'oo'isa issumta'n Hanqinam an hee'oommi Waa'a; oo sasem mannim ee beyyonne hee'llota'n ixxuwwi gagiinsi bagaan ixxuwwi oosom ihuta'n gatisseena xantamoyyo. Kaka wocukkok Moollanni Waa'a. «Te'im ee uullanne boobana asse'aa i quunqinne lobakat mannaa diinatee guulloommo. Hanqinam an hee'oommi Waa'a; Nohe'i, Daani'eelii Iyyoobii ee beyyonne hee'llota'nnim ixxuwwi muccuroominne xale'i ixxuwwi gaga gatixxitamo bagaan ixxuwwi gaqqi oosom ihuta'n gatisseena xantamoyyo» yukko. Kaka wocukkok Moollanni Waa'a. «Moollanni Waa'i ‹Minaadabaa diinatee mateeyyoominne guulleena ora, sibaaro, moochchaa jabboo ka soorem kee'mmaalli boobanam Yerusaaleemanne eeboommo. Waa'i iina «Manchi beeto, Woyi'n kaashshi mulli haqqiinsi caaffuwwim mulli haqqi caaffuwwiinsi mahinne lophphookko? Ixxenne maha baxakkamo? Mu'uta saqalakkam sinxirdu ixxeensi fissakkamonnihe? Giir aphphoo'isa issimmiinsi bagaan mulli awwaad bee'e; caaffuwwii amii shokkaa shiinshihaa lasage eehanninne mat baxom baximmi xansiisoohonnihe? Shokkeena illageenim awwaad bee'an ihukkaa'lleensi kaba giir shokkiisaa shiinshi issaa lasonne hore'oomam awwaad bee'an ihookko» yukko. Ee bikkina Moollanni Waa'i «Doo'm haqqiinsi woyi'n kaashsha annannissaa giiranne shokkoo'isa issummisam Yerusaalee'm minaadabam ee'isa issoommo. Ixxuwwannem quuqoommo. Ammanina giiriinsi xotto'aarem oo giir ixxuwwa itookko. An ixxuwwa guzumo'oommi ammane an Waa'i ihummisa laqqakkamo. Ixxuwwi iina amma'nnantambee'i keen ikko'i bikkina anim ixxuwwik uulli udma'i ihoo'isa issoommo» yoolla. Kaka wocukkok Moollanni Waa'a. Waa'i iina «Manchi beeto, Yerusaalee'mmeka shigigaa'oo baxo la'ise. Moollanni Waa'i is bikkina kanniinsi woroon yookkoka Yerusaaleemina kure. «At qarantittok Kana'aa'n uullannette hee'ukko. Kiyyanni Amoorekkichchi ihukkuuyyi kiyyummam Hiitekkichchotte hee'llo'o. At qarantitti ammane ki suro ayyim murukkoyyo. Keese muccusseenam ayyim wo'inne aanshukkoyyo; te'im sooqidinne cukkaa carqinne xaaxukkoyyo. Kiina qishixxaa ka keeniinsi matom ayyim issukkoyyo. At qarantitti ammane sabantaattoohan ikkitti bikkina uulli udma'anne uunjantaa hee'llitto. Anim eeheen higummuuyyi ki xiigannem lubantaa fitfitittuuyyi moo'ummo; xiiganne iinse'llaa hee'llittisam ‹Foorinne hee'e› yummo. Keesem harish beyyonne kaasamu haqqichchisa li'lloo'isa issummo. Atim li'llaa mishissoo baajaamotte ikkitto. Anuunam eebbaa ki horoo'l saraatim qeeraa'llukko; ihukkaarem kallemaram hee'llitto. «Odim an ki gadaninne higummuuyyi baajaamotti ikkaattoo moo'ummo. Ki leexa'oomam i weyyakkinne ifiisaa kiinninne hide'aa sagara aagummo; i gaqqetanem issummo› yoolla» yukko. Kaka wocukkok Moollanni Waa'a. Waa'im «Ee lasage xiiginne bi'aakkoo ki orachcho wo'inne aanshaa wee'l zaytam labummo. Mishisoo wereeggi eddechcham kiina eddeesummo; doo'l omachchinne baxamaakkoo caamma'am issummo; haarrinne baxamaakkoo shaashsham ki horoorenne karummo; bito xee'aalli kaabbam eddeesummo. Wereeggi mu'utinne wereeggisummo. Angannem guma'a ganummo. Gaanjennem worqa (cora) karummo. Ki sanina guma'a; ki maccinam gutichcho ee'isam ki horoorina mishisoo adilla'n mare'e uwwummo. Birinnee worqinnee baxamaakkoo wereeggi mu'ut kiina hee'ukko. Annanni annanni haarriinsi dadamaa anginne gobamaakkoo wereeggi eddechchi kiina hee'ukko. Doo'l qamiinsi saramaakkoo daabbo'o, maraboo wee'l zaytaa ittam hee'llitto. Kiikki dan lobakata mishisukkuuyyi maru bikkina at adilatte ikkitto. Iikka nuura kiina uwwaa hee'ummi bikkina kurakkam luwwi bee'i daniinsi ki'ukkok ki sad uulli hundannem la'amukko» yukko. Kaka wocukkok adil Waa'a. Waa'i «Ihukkaarem ki danonnee sadonnee bakke'llaa araat hundinnem saa'llito. Ki eddechchiinsi mat mato massitaa saa'immina otossitoo beyyuwwa axissitto. Eehido'i bax kanniinsi illageen hee'ukkoyyo; ka lasagem hore'em hee'ooyyo. An kiina uwwummi birinnee worqinnee baxamu doo'llamaakkoo wereeggi mu'uttuwwinne gooncho laboo misila baxxaa ee keeninne maqire saa'llitto. An kiina uwwummi wereeggisakka'a dadakko'oo eddechcham massitaa misilluwwanne eddeessitto. An kiina uwwummi wee'l zaytaa aduruusaa ee misilluwwina uwwitto. Doo'l qama wee'l zaytaa maraboo kiina ittona uwwaa hee'ummo. Ihukkaarem at qophpha'n waa'uwwa liiransiteena danaam enje'oo kitim issitaa hincaa'llito» yukko. Oohim ihaakko. Kaka wocukkok adil Waa'a. Waa'i «Saa'llittaanniinsim loboka iina qattitti goonaa landaa massitaa qophpha'n waa'uwwina kitim issitaa hincaa'llito. I ooso duttaa qophpha'n waa'uwwina kitima issitaa hincaa'llito. Lobakata shigigaa'oo ki saa'immi heechchanne ki oosoomma'n duuha'a tiittittoyyo. Oohim leexa'am xiiganne biqqiiqqittuuyyi hee'llitti amman hore'em kiina tiiramukkoyyo» yukko. Moollanni Waa'i Yerusaaleemina «Aayye! Aayye!» yoolla. Ee hundem jor luwwam issitaa lasonne saa'lloo beyyuwwa wixxixxi beyyi qoffit hundannem baxxitto. Ee'isam lob bu'l gammalluwwanne hundannem qophpha'n waa'uwwina otossakkam beyyuwwa baxxaa ki dano bi'issitto; araat hundinam ki orachcho uwwittuuyyi balli hundam saa'imma lonsitto. Saa'aan ikko'i Gibxi uulli manninne maqire saa'llitto; saa'imma lonsimminnem eese quuqissitto. «Ihukkaarem kaba keese guzumo'eenaa ki sharad ihu maasso kiinniinsi hoffiiseenaa i anga biddiqaa'aammo; ki jor baxonne tuuttam kiina diina'i ikko'i Filisxee'm manninaa keese higisaa uwwaammo. «Mulli keeninne saa'llittok kiina ihimma hoogu bikkina Aasoo'l uulli manninnem saa'llito; ihukkaarem ixxuwwim xeebo mutto'oyyo. Daddaraan ikko'i Baabiloo'n uulli manninnem saa'llitto; ihukkaarem ixxuwwim ki xeebo mutto'oyyo» yukko. Moollanni Waa'i «Tuuttambee'i saa'aanchi meentichchosa ka hundam issittok hinkaa'nna hoogaanchi sawwit keesenne hee'ukkaarette? Saa'lloo beyyuwwa gooqqi gamal hundannem gudissitto; qophpha'n waa'uwwina otossitoo beyyuwwam wixxixxi beyyi qoffittuwwanne baxxitto. Ihukkaarem awwaad bee'i saa'aanchi meentichchosa diinate miqissittoyyo. At aro'o utta'a ayyennem saa'llam meentichchosa ikkaatto. Saa'aan meentina diinate miqakkamo; ihukkaarem at diinate miqisimmi bikkenne ki kobina irifo'o uwwitto; kiinninne kolli hundinnem manni waaraa saa'ona maqanxa uwwitto. Ee bikkina at annanni ikkaattoo saa'aanchotte. Ihukkaarem ka'isa ikkoo'isina keese qawwiisukkok bee'e; at diinate miqqootto bagaan kiina miqookkok bee'e. Ee bikkina hanqinam ki saa'immi mulli saa'aaniinsi annanna» yukko. Saa'aanchi Yerusaaleema, Waa'i kiina yoo woshsha macceese! Moollanni Waa'i «Saa'immi mixaninne muxmuxitaatto. Ki kobina kiikka orachcho higissaa uwwitaatto; shigigaa'oo qophpha'n waa'uwwi hundannem otossitaatto; ki oosikam xiiga duntaa ee qophpha'n waa'uwwina kitim issitaa hincaa'llaatto. Ee bikkina at ixxuwwinne maqire liirantitti ki koba iittittokaa sabbittokaa hundam kolli hundiinsim wixxaa'oommo; anim keese ixxuwwi illagenne maxaroommo; ixxuwwim kiikka tuulli orachcho moo'llamo. An keesenne, saa'llo'i meentonnee manna shito'i meentonnee oogatakkam oogato oogatoommo. Keesem i to'achchinnee quunqinnee bi'isoommo. Anim keese ixxuwwina higisaa uwwoommo; ixxuwwim kiikka saa'lloo beyyuwwaa qophpha'n waa'uwwina otossitoo beyyuwwaa ginditamo; kiikka eddechchaa wereeggi mu'utaa massita'a leexa'am gattoo'isa issitamo. Ixxuwwi «Kininne aphphisaa bisa'inne muransaa shoo minaadab keesenne ki'isansitamo. Ki minneewwa giirinne shokkiissamo; lobakat meenti illagenne guzumo'antoo'isa issitamo. Ee'isinne kiikka saa'immaa kiinninne saa'u ki kobina diinate miqimmaa uttoo'isa issoommo. Ee ammane keesenne quuqummi quunqi uullookko; i to'achchim kiinniinsi qee'llookko; i quunqim siggookko; ee lasage od quuqoommoyyo. Kiina oosoomma'n doollenne issummi luwwi hundam xadditto; at baxxitti jor baxinne eese quuqissitto. Ee bikkina anim at baxxitti baaxii'llisinne bito a'llitoo'isa issummo. At baxxitti shigigaa'oo bax hundiinsm mulleka saa'llittok mahinatte?» yoolla. Kaka wocukkok Moollanni Waa'a. Waa'i «Yerusaaleema, Manni keese ‹Landichchom amasam ikko'o!› yukkuuyyi heesse'ookko. Hanqinam at is aro'oo oosoo shigigita'a utto'i kiyyummatane. Odim at aro'uwwaa oosoo shigigamaa uru kiyyaayyuwwisame; ki'nnuwwik amaa Hiitekkichchotte annii Amoorekkichcho. «Ki lob aayya is olla'inne maqirem hanaa'n qaranne hee'llam Samaare'ette. Kiikki hoffi aayyam is olla'inne maqirem woroo'n qaranne hee'llam Soddomatte. Ixxuwwi googo awwontaa ixxuwwika shigigaa'oo baxo baximmi xale'i ihoo'n ki taakkinne hundinnem gundi ammanenne ixxuwwaaniinsi lophphaakkoo jor baxo baxxitto. «Hanqinam an hee'oommi Waa'a; kiyyaayya Soddomaa is hegeegguwwii atii ki kululleetanne yoo hegeegguwwii baxxakko'i jor baxiinsi loboka ixxuwwi baxxo'oyyo. Kaka wocukkok Moollanni Waa'a. Kiyyaayyi Soddom hawwojji kane. Isee is olla'ii bolxita'a hee'llo'o. Ihaa gataakkoo hurbaatii makkaakkoo heechchii ixxuwwina hee'ukkaaremii hawwaaninaa buxinaa hara'mtambee'i keen hee'llo'o. Ixxuwwi bolxitam keen ikka'a an saboommi luwwa hundam issito'uuyyi moo'ummi bikkina at laqqoo'isam ixxuwwa bi'isummo. «At baxxitti baaxii'lleka kollom Samaare'i baxxo'oyyo. Iseensi loboka at shigigaa'oo baaxiilo baxxaatto. Ki haashaaranchi kiyyaayyuwwaanninne akeekixxamuta'n ixxuwwi mucculluwwi ikko'oka labsiisookko. Oono'o, kaba ki sholle'nna iyyaqqe; ki baaxiil lobakata joraakkoohan ihimmiinsi ki'ukkok kiyyaayyuwwa mucculluwwi issitti bikkina sholle'nna iyyaqqe; ki baaxiil ixxuwwi baaxiiliinsi lophphaakkoohan ihu bikkina kiyyaayyuwwi kiinninne akeekixxantam ammane matem jollim bee'i mucculluwwa labba'a moo'antamo. Kabadem kiyyaayyuwwa matem hawwojjim bee'i mucculluwwa labba'a moo'antamisa issitti bikkina at sholle'e; tuullem eddechchisa gunguu'llitaa afuure» yukko. Waa'i Yerusaalee'm bikkina «Soddo'mmekaa ixxi hegeeqqekaa ee'isam Samaare'ikaa ixxi hegeeqqekaa qeefadamaa maru amaxxa dabaroommisam kiinniinsi qeefadamu amaxxam dabaroommo. Atim ki sholle'nna gunguu'llitaa baxxi luwwi hundannem tuuttootto. Soddomii Samaare'ii ka ki duuha'a moo'llam ammane ki qaxa baaxiilaammuwwi ikkobee'i bikkina qoxxita'a hee'llamo. Kiyyaayyuwwi ikko'i Soddomii is landii Samaare'ii is landii gaassi hee'llo'isannem daba'llitamo. Ee'isam atii ki landii gaassi hee'llakko'isannem daba'llitakkamo. At bolxitam hee'llitti doolle kiyyaayya Soddoma kiina osachchatte hee'llo'oyyonnihe? Oohim ki hawwojji la'ameena illageenetti hee'ukko. Ihukkaarem kaba ki kululleetanne ikka'a keese gaddam Eedoo'm landinaa olla'uwwinaa ee'isam Filisxee'm landinaa osachchi ikkaatto. Saa'aanchotti ikkaa shigigaa'oo baxo baxxoo bikkina Guzumo'antootto» yukko. Moollanni Waa'i «Iikka hidi'l sagara gaddaa ginditti bikkina kiina laboo guzumo'o aa'llootto. Ihukkaarem ki oosoomma'n doollenne kiinninne aagummi hidi'l sagara tiiroommo. Heer heerina hee'oo hidi'l sagara kiinninne qoxxisoommo. Kiikka lob aayyuwwaa hoffi aayyuwwaa aa'lloo ammane ki taakki bikkina sawwitootto; tuuttoottome. Kiina landi oos ikkona ixxuwwa kiina uwwoommo; ihukkaarem ookki kiinninne aagummi hidi'l saga'llisinneyyo. Ee bikkina kiinninne hidi'l sagara haareechchisoommo. Ee ammane an Waa'i ihummisa laqqootto. At issitti hawwojji hundinam haafoommi ammane ki hawwojja tiittaa tuuttootto; ki sholle'nniinsim ki'ukkok ki suume hore'em fooqaa'llooyyo» yaa kaka wocukkok adil Waa'a. Waa'i «Manchi beeto, Isra'ee'l oosina booyyaansa kure; kobi'llishshinnem caakkissaa ‹Moollanni Waa'i, lob qeeraa'l bararoo lad yookkok ee'isam ixxi orachchi hundoomim ladinne eddeesamaakkoo gadar geejji gaaqichchi Liibaanoosa waaraa digiphphi caafanne afuurukko. Ee Liibaanoosika hanaan yoo caaf ludo muraa daddaraan yoo uulla massukko. Eekkam mu'uta daddarakkam beero'onne kaasukko. Ee lasage Isra'ee'l uulliinsi sire'e massaa xoo'oobee'i wo'o agukkuuyyi li'oo mat harish beyyonne kaasukko. Oo kaashshim uulliinsi lobakata iim li'oo'nnim haraarisa baaqaakkoo woyi'n kaashshi ihukko. Ixxi caaffuwwim ee gaaqichchi kollonne iim li'ukko. Ixxi nigguwwim uullanne aad aagukko. Oo woyi'n kaashshim caaffuwwaa buyyuwwaa danaamisa eebaa hee'ukko. Odim «Lob lad yookkok ixxi orachchi hundoomim lado edde'aakkoo mulli geejji gaaqichchi hee'ukko. Oo woyi'n kaashshim kaasamu beyyiinsi nigga wo'o siixxeena ee gaaqichchi kolli massukko. Caaffuwwam ixxi kolli biddiqaa'ukko. Caaffuwwa li'isaa misha mishoo'isinaa mishisoo woyi'n kaashshi ihoo'isinaa gadanonne lobakat wo'i yoo harish uullanne kaasamaa hee'ukko. Adi'l Waa'i ‹Ku kaasamu woyi'n kaashshi li'oohonnihe? Luxxi amma'n gaaqichchi ixxeka nigga xoqolaa mishoom shamoo'isaa gogoo'isaa ee'isam lataakkoo buyyi quuboo'isaa issooyyonnihe? Ixxi nigga xoqolimmina qoxxaalli o'l mu'ut te'im malaayyaam gogot hasisooyyo. Mulli beyyonne kaasakkota'n li'oohonnihe? Eelliinchi firinne waaroo udma'i hafachchi aphphisoo ammane ixxi li'u beyyonnem hore'em gogooyyonnihe?› yitaa woce» yukko. Waa'i iina «Ka boqqi minaadabina ‹Ka woshshuwwik tiratoom mada'e ihukkisa laqqakkamoyyonnih? Baabiloo'n adil Yerusaaleema maraa adilaa gassaanoo qeefadukko; ixxuwwam Baabiloona massukko. Ee adi'l abaroosiinsi mato massaa ixxenne iittamukkisa moo'isoo hidi'l sagara aagukko. Ee uullikam la'amaakkoo manna qeefadaa massukko. Kakam issukkok Yihuxxi adil maashaalloominnee ijaajanchinnee hidi'l sagaranne qoxxaa hee'oo'isa issimminatte. Ihukkaarem Yihuxxi adil bangujjaa faradoo lobakat gogotaa ixxena eebakkona Gibxi uulla manna asse'ukko. Eehannah ku ixxi qoodo'i makkoohonnihe? Kannindu xoreena xanoohonnihe? Hidiro gindulas guzumo'anchiinsi xoreena xanoohonnihe? Moollanni Waa'i «Hanqinam an hee'oommi Waa'a; ku adil ixxi adilla'n barcumanne dissu Baabiloo'n adilinne hide'aa iittamu hidi'l sagara gindu bikkina Baabiloonanne lehookko. Baabiloo'n manni lobakat manna shiteena beero'i kululleetanne kireeta hinta'a buchcha shiraashittu'uuyyi girba baxxam ammane Fari'oon ixxi malaayyaam gogotinnee lobakat o'l manninnee waaraa oramaa hara'mmeena xanooyyo. Ixxim hidiro gadimminne hidi'l sagara gindu bikkinaa ixxi anga uwwaa lasagem ka keeno hundam issu bikkinaa guzumo'anchiinsi xorooyyo» yukko. Ee bikkina Moollanni Waa'i «Hanqinam an hee'oommi Waa'a; i summinne hide'u hidiro gadaa hidi'l sagara gindu bikkina ee hidiro ixxi gagannem eeboommo. Iikka shikka ixxi hanenne qaashaa qaashinne amadamoo'isa issoommo. Eese lagu bikkina Baabiloona eebaa ixxonne oogatoommo. Ixxek doo'llanto'oo gaadaan o'l beyyonne letamo. Ee lehiinsi xottam keenim kolli hundannem binnitamo. Ee ammane eekka wocummi Waa'i anette ihummisa laqqakkamo» yoolla. Moollanni Waa'i «Liibaanoos haqqi hammiinsi mat caafa massoommo; eehanni quuxxuwwiinsi mato qomboommo. An i gagoomim lob duunanne kaasoommo. Kaasoommokim Isra'ee'l uullanne yoo lob duunannette. Eekkam issoommok caaffuwwi li'aa moo'amoo'isa issaa misha mishimminne mishisoo Liibaanoos haqqi ihoo'isinatte. Ixxi lugumonnem annanni annanni haqquwwi hee'ookko; ixxi haf lugumonnem lad yoo qooccanchi hundim do'nna baxookko. Ee uullanne yoo haqqi hundim an Waa'i ihummisa la'ookko. An qeeraa'l haqquwwa gundisoommo. Gundi haqquwwam iim shiqaa li'oo'isa issoommo. An buyyaam haqquwwa gokkisoommo; gogaalli haqquwwam latisoommo. An Waa'i kaka wocaammo; ‹Issoommo› yummoka hundam issoommo» yoolla. Waa'i iina «Isra'ee'l uullanne lobakat ammane minaadab ‹Anno'i hamaraar woyi'n misha itto'o; ihukkaarem ookki ixxuwwi oosika inqe sigillaa'ukko› yukkuuyyi wocoo kobi'llishshi mahane?. «Hanqinam an hee'oommi Waa'a; ka kobi'llishsha Isra'ee'l uullanne manni od wocooyyo. Kaka wocummok an Moollanni Waa'a. Oono'o, foor hundim iihane. Anno'anem ihukko oosik foor iihane; baaxiilo baxoo foor ixxi gagoomim lehookko. «Manchi muccura, hanqa egeroohanee hanqo'anee ihuta'n Isra'eel qophpha'n waa'uwwina otossooyyo; te'im hooramaakkoo otossakkam beyyuwwanne kitimakko'i maara itooyyo. Mulli manni meentinne, te'im aga'n xur moo'amu meentichchonne maqire saa'ooyyo. Ayyem wor amadooyyo; ihukkaarem dabaa amadu luwwa annichchinam dabarookko, bogooyyo. Sibaarukkaannina hurbaata itisookko; habiillukkaannina eddeesookko. Ixxi diinate qaro'ina liqaayyisooyyo; jor baxo baximmiinsi ixxi gaga ege'llookko. Joramu manna iittanseena hanqo'i oogato oogatookko. Kido'i manchi i seera egerookko; i siyya'am lonsookko; oo manchi muccur ihu bikkina heechchanne hee'ookko. Kaka wocummok Moollanni Waa'i anette. «Ihukkaarem ka muccur manchina boqqaa manna shoohanee ihaa te'im kanniinsi woroon yoo keeniinsi mato issoo beet hee'uta'n oo beet ixxi anni baxubee'i jor baxo hundam baxuta'n, duunanne qophpha'n waa'uwwina otossakkam beyyuwwanne durakko'oka ituta'n, manni meentonnem igguta'n, buxaa hawwaanoo u'nnisuta'n, boguta'n, diinate liqaayyo massu manniinsi dabaa amadu luwwa ixxi gagina gatixxuta'n, qophpha'n waa'uwwina otossuta'n, shigigaa'oo luwwa hundam issoohan ihuta'nnii ixxi diinate kee'mmaalli qaro'o edaa miqiseena liqaayyisoohan ihuta'nnii eehannah eehido'i manchi hee'immi hasisoohonnihe? Hore'em hee'immi hasisooyyo. Ka shigigaa'oo luwwa hundam issu bikkina hanqo'isam lehookko. Ee lehinam xa'mmamookkok ixxi gagame. «Ihukkaarem ka baaxiilo baxoo beetina goonchi beet hee'uta'n, ixxim anni baxoo baaxiilo hundam moo'aa ixxi anni googo awwonubeelas Isra'ee'l qophpha'n waa'uwwina otossubeelas, ee waa'uwwinam kitimakko'i ayyi luwwam itubeelas, mulli manni meentinne saa'ubeelas ayyem woramadubeelas, te'im manni amaxxa bogubeelas, diinate liqaayyisoo ammane dabaa aa'u luwwa gatisubeelas sibaarukkaannina hurbaata uwwuta'n, leexa'ukkaannina eddeesuta'n, bux keeno barche'e issubeelas, diinate qaro'inne liqaayyisubeelas shiqqeen diinate edaa miqisubeelas, i seera egerulasii i siyya'a awwonulasii hanqinam eehido'i manchi foorinne hee'ookko bagaan ixxi anni baxu baaxii'l mashka'inne lehooyyo. Ihukkaarem ixxi anni mulli keeno qawwiisu bikkina, ixxi abbaayyo bogu bikkinaa minaadabina jor baxo baxu bikkinaa ixxi baaxii'l mashka'inne ixxi lehookko. «‹Eehaare beet anni baaxii'l mashka'inne guzumo'amubee'ek mahinatte?› yitakkeena xantakkamo. Beet eroomma issaa hanqaa i seeraa egeraakko. Ee bikkina ixxi hanqo'isam foorinne hee'ookko. Baaxiilo baxookkok ayyim lehookko; beet anni baaxii'l bikkina guzumo'amooyyo; annim beet baaxii'l bikkina guzumo'amooyyo. Er manchi ixxi eroomminnem er bito siixxookko; jor manchim ixxi jollinnem guzumo'amookko. «Baaxiilaanchi baaxiilo baximma uraa i seera egerulas, hanqaa eroommaa issulas hanqinam ixxi foorinne hee'ookko bagaan lehooyyo. Hanqi ihaakkoo baxo baxu bikkinam ixxi baaxiil hundim haafamaa foorinne hee'ookko. Hanqinam an baaxiilaanchi manchi lehonne liiramoommonnihe? Ee'isayyo, an liiramoommok manni baaxii'l googiinsi daba'llaa foorinne hee'immannette. Kaka wocukkok Moollanni Waa'a. «Ihukkaarem er manchi er luwwa issimma uraa baaxiilaan issitam jor luwwaa shigigaa'oo luwwaa issimma asheeruta'n foorinne hee'eena xanookkoka labissakka'attennihe? Ee'isayyo! Hore'oomam issu eroommi bax hundim sawwamooyyo; amma'nnancha hoogu bikkinaa baaxiilaanchom ihu bikkinaa lehookko. Ki'nnuwwim ‹Eehid ihulas Waa'i goog xabbeenayyo› yitakkeena xantakkamo. Isra'ee'l minaadaba, macceessehe. Hanqinam i goog xabbeenayyonnihe? Xabbeen ihubee'eka'i ki'nnuwwi googo. Muccur manchi muccuroo'm baxo baximma uraa baaxiilo baxuta'n lehookko; lehookkokim ee baaxii'l mashka'innette. Ee'isam baaxiilaanchi baaxiilo biiraa yaa hanqi ihaakkookkokaa er baxoo baxulas ixxi foore gatixxookko. Mashka'oomim oo manchi ixxi baaxiilo xassaa la'aa baaxiiliinsi daba'llu bikkina hanqinam foorinne hee'ookko bagaan lehooyyo. Ihukkaarem Isra'ee'l minaadab ‹Waa'ik goog xabbeenayyo› yitakkamuulla. Hanqinam i goog xabbeenayyonnihe? Xabbeen ihubee'eka'i ki'nnuwwi googo. «Kabadem an Moollanni Waa'i, Isra'ee'l minaadabina ‹Ki'nnuwwi jor baxinne ki'nnuwwa hundam guzumo'oommo. Ee bikkina baxxakkam jolliinsi daba'llehe. Ee bikkina baaxiilo biiraa yi'llehe; eebeelas ki'nnuwwi baaxiilim ki'nnuwwa bi'isookko. Isra'ee'l minaadaba, mahina letakkamane? Ki'nnuwwika baaxiilo biiraa yi'llehe; haareechchi tiirii haareechchi sawwitii ki'nnuwwanne hee'ona. An ayyi manchim lehona hasoommoyyo. Ee bikkina ki'nnuwwi hundichchim baaxiilo biiraa yitakka'a foorinne hee'llehe› yoolla» yukko. Moollanni Waa'i kaka wocaakko. Waa'i ka kichchechchi wi'llo Isra'ee'l gassaanina wi'llona kurukko. Kiyyumma hobbi lambe'enne hee'oo meentichchi hobbichchisa hee'llo'o! Hobbi geexxuwwi lambe'enne heellantu'uuyyi is wotalla li'isso'o. Isem ee wotalliinsi mato abooyyita'a li'isso'o; ixxim geexukko; hochchimmam losaa manna itimma asheerukko. Minaadab ixxonne laachchinne firukko; hinto'i barennem amaddo'o; xaa'l hookko'innem sane huruutta'a gosaassu'uuyyi Gibxa massito'o. Oo meentichchi hobbichchim ixxi sawwit wo'mmubee'isa moo'aa neeyyato murimminne ixxi wotalliinsi mato massaa abooyyaa li'isimminne geex hobbichchi issukko. Ixxim mulli hobbinne do'imma asheerukko. Geex hobbichchom ihukko; hochchimma losukko; mannam itimma asheerukko. Ixxuwwika girba iiqansukko; beero'uwwam gindansukko. Ixxi toxoo amman hundam oo uullii ee uullanne hee'llam mannii hambalaachchantamo. Minaadab hundim ixxonne ki'llo'o; hundim yo'i beyyi hundiinsim waatto'o; ixxuwwi shikkam qaashsho'o; hinto'i barennem amadamukko. Xaa'l hookko'inne amadda'a woshaadina baxxo'i jagaranne dissito'o; Baabiloo'n adi'l beyyom massito'o; ixxi sagar od Isra'ee'l hoffi duunnuwwanne macceesamoobee'isa karaxxi minenne aagisso'o. Kiyyumma wo'i gadanonne kaasamu woyi'n kaashshisa hee'llo'o; isem wo'i lophphimmiinsi ki'ukkok erisa mishaa caaf haraar ihaakkoo woyi'n kaashshisa ikko'o. Ee woyi'n kaashshik caaffuwwi qoxxaalluwwi hee'u bikkina adilla'n bicci iheebe'e li'ukko. Woyi'n kaashshoomim tiiwwi haqqiinsi lophphaa li'ukko; ixxekim qeeraa'lloom lobakat caaffuwwinne maqirem iim shiqaa moo'amukko. Ihukkaarem quunqinne nigginnem xoqolamaa uullanne ubukko; uulli udma'iinsi ki'oo eelliinchi fi'l hafachchi gokkisukko; mishshuwwim giggirukko; qoxxaalli caaffuwwim gogukko; giirim itukko. Kaba odim uulli udma'anne wo'i bee'i gogaalli uullanne kaasamukko. Ixxi lob caafiinsi giir firukko; caaffuwwaa mishaa hundam itukko; ixxek caaffuwwi la'mmaagge qoxxeena xanoobee'i bikkina adilla'n bicci iheena xanooyyo. Kuk ododim kichchechchinne sorakkamane; Ixxim wi'llina awwaadookko. Neese qeefadammummi lama'l hiinchonne, onti agan aagu tommi ayyaamonne Isra'ee'l awwonsaaniinsi hofqaxim Waa'i doo'l bikkina xa'mmiteena i beyyo waatta'a i illagenne afuutto'o. Ee ammanenne Waa'i iina «Manchi beeto, an Moollanni Waa'i ‹Waattakko'ok i doo'lla laqqakkeenannihe? Hanqinam an hee'oommi Waa'a; eese maham xa'mmitakkona hasoommoyyo; an Moollanni Waa'i kaka wocaammo› yoolla yitaa ka mannina kure. «Manchi beeto, ka mannanne oogattoohonnihe? Hanqinam oogattoohonnihe? Eehidette ihulas ixxuwwi anno'i baxxo'i shigigaa'oo luwwa tiittamisa isse. Ee'isam Moollanni Waa'i «Isra'ee'l minaadaba doo'llummi ammane Yaaqoob shumo'ina Gibxanne i gaga la'isaa ‹An Waa'i ki'nnuwwina Moollanna› yaa ixxuwwinne hidi'l sagara aagummo. Ee balla ixxuwwa Gibxiinsi fissaa adii marabii daadoo heer uulliinsi hundiinsim lobakata danaam uulla uwweena hide'ummo. Ixxuwwinam ‹Ki'nnuwwi annannichchim ille ubbussakko'i shigigaa'oo misilluwwa bi'issehe. Gibxi uulli qophpha'n waa'uwwinnem ki'nnuwwi gaga haashaassitakkotte. Kaka wocummok an ki'nnuwwi Moollanni Waa'a› yummo. Ihukkaarem ixxuwwi eesenne boqqito'o bagaan i woshsha macceesso'oyyo; ille ubbusso'i shigigaa'oo misilluwwam ixxuwwi illagiinsi hootto'oyyo. Gibxi uulli qophpha'n waa'uwwinam otossimma utto'oyyo. Ee bikkina Gibxanne hee'llo'i ammane ixxuwwanne i quunqa dilliiseena sawwaa hee'ummo. Ihukkaarem ixxuwwinne hee'llo'i mulli minaadaphphi illagenne Isra'ee'l minaadaba Gibxiinsi fisseena sagara aagaa hee'ummo; ee bikkina i summi haashaaramoobee'isa eekka issummo. «Ee bikkina ixxuwwa Gibxiinsi fissaa udma'i uullanne awwonsummo. Ijaajamookkok hundim foorinne hee'eena xanoo'isina iikka seeraa ijaajoo losisummo. Ixxuwwa keesoommok anette ihummisa laqqamisina ihaannonnee ixxuwwi lambe'ennee mare'i ihoo'isina i Usheexxaxxi Ayyaamo uwwummo. Ihukkaarem Isra'ee'l minaadab uulli udma'anne hee'llu'uuyyi eesenne boqqito'o; ijaajamookkok hundim foorinne hee'eena xanoo i seeraa ijaajoo egetto'oyyo; Usheexxaxxi Ayyaamo hore'oomam haashaassito'o. Ee bikkina udma'i uullannem i quunqa ixxuwwanne dilliisaa bi'iseena sawwaa hee'ummo. Ihukkaarem Isra'ee'l minaadaba Gibxiinsi awwonsaa fissummuuyyi moo'llo'i mulli minaadaphphi illagenne i summi haashaaramoobee'isa ee hundam iyyaqqummo. Odim heer uulliinsi hundiinsim lobakata danaam ihaakkoo adii marabii daadoo uulla ixxuwwina uwweena hide'aa hee'ummo. Ihukkaarem ee lasage ixxuwwi uulli udma'anne hee'llu'uuyyim ee uulla ixxuwwi aaggambee'isa hide'ummo. Mashka'oomam ixxuwwi wodano qophpha'n waa'uwwina uwwito'ookko; i seeraa ijaajoo gindito'ookko; Usheexxaxxi Ayyaamom bushisso'ookko. «Ihukkaarem an qishixxummi bikkina ixxuwwa bi'isummoyyo; uulli udma'annem ixxuwwa guullaa bi'isummoyyo. Ixxuwwi oosinam ‹Gaassi ki'nnuwwi anno'ika heechqaanqaa jor googoo awwontakkotte; ixxuwwi qophpha'n waa'uwwinnem haashaarantakkotte. An ki'nnuwwina Moollanni Waa'a. I see'llisanne hee'llehe; i ijaajom qoxxitakka'a egellehe. An ki'nnuwwinne aagummi hidi'l sagarina mare'i ihoo'isinaa ee'isam an Waa'i ki'nnuwwina Moollanni ihummisa tiittakkamisinaa Usheexxaxxi Ayyaamo keesamaakkoohan issehe› yummo. «Ihukkaarem ixxuwwik oos eesenne boqqito'o; Ijaajamookkok hundim foorinne hee'eena xanoo'isina uwwummi i seeraa ijaajjoo egetto'oyyo. Usheexxaxxi Ayyaamom bushisso'o anim uulli udma'anne hee'llu'uuyyim ixxuwwanne i quunqaa boobanaa dilliisaa bi'iseena sawwaa hee'ummo. Ihukkaarem Isra'ee'l minaadaba Gibxiinsi fissummisa moo'llo'i mulli minaadaphphi illagenne i summi gadamoobee'isa eekka issoombee'isa iyyaqqummo. Odim annanni annanni uullanne mulli minaadaphphi lambe'enne binnaa'oommisa uulli udma'anne hee'llu'uuyyim qoxxisaa kuraammo. Mashka'oomim i seerina ijaajjanto'oyyo; Usheexxaxxi Ayyaamom haashaassito'ookko; ixxuwwi wodanom gaassi anno'i qophpha'n waa'uwwina uwwito'ookko. «Anim ixxuwwa eran ihubee'i heechqaanqinaa hee'llambee'i seerinaa higisaa uwwummo. An Waa'i ihummisa laqqonaa muggitonaa ixxuwwika won ooso shokkoo kitim issita'a hincaa'imminne haashaarantamisa issummo. «Eebikkina manchi beeto, an Moollanni Waa'i yoommi luwwa Isra'ee'l minaadabina kure. Ixxuwwi anno'i eese laggo'ookkoo sholliisso'ookkoo. Ixxuwwina uwweena hide'ummi uulla uwwummo. Ihukkaarem ixxuwwi qoffit beyyuwwaa buyyaam haqquwwaa moo'lla'a ee beyyuwwanne kitima hincaa'llo'o. Ixxuwwim shokkoo kitiminne, enje'oo aduruusinnee kitimina duntam agginnee eese quuqisso'o. Anim ‹Ku ki'nnuwwi otossitakkeena mattakkam duunnuwwi mahane?› yaa xa'mmummo. Oo beyyuwwim kaballi afeebe'em ‹Qoffit beyyuwwa› yamamookko. Kabadem an Moollanni Waa'i Isra'ee'l minaadabina ‹Ki'nnuwwi anno'isam ki'nnuwwi gaga haashaassimminnee ixxuwwaannina haashaarammi qophpha'n waa'uwwina otossimminnee mahina huushantakkammuulla? Kabadem ee qophpha'n waa'uwwina kitima hincaa'imminnee ki'nnuwwi ooso giiranne kitim issitakka'a hincaa'imminnee ki'nnuwwi gaga ee waa'uwwinne haashaassitakkamuulla. Ee hundam issitakka'a lasage i doo'lla xa'mmitakkeena i beyyo waattakkamo. An Moollanni Waa'i hanqinam hee'oommi Waa'i ihummi bikkina ma'lluwwam eese xa'mmitakkona hasoommoyyo! Haqqinaa kininaa otossitam mulli minaadaphphisaa heer uulli minaadaphphisaa ikkakkeena hassakko'ookko. Ihukkaarem ki'nnuwwi sawwitakkam sawwit hore'em iheena xanooyyo› yoommoka kure» yukko. Moollanni Waa'i «Hanqinam an hee'oommi Waa'a; i malaayyinne, wodinnee quunqinnee ki'nnuwwa gassoommo. Binnitakka'a hee'llakkam uulluwwiinsii mulli minaadaphphi lambe'iinsii wixxaa'oommo. Ki'nnuwwa wixxaa'oommokim i malaayyinnee wodinnee dilliisoommi quunqinnette. Ki'nnuwwam ‹Mulli minaadaphphi Udma'a› yakkam beyyo woraa ki'nnuwwi illi moo'ukkuuyyim ki'nnuwwanne oogatoommo. Gibxi uulli udma'anne ki'nnuwwi anno'onne oogatummisam ki'nnuwwannem oogatoommo. Kaka wocummok an Waa'a. «I ijaajonne gassoommo; i hidi'l sagarinnem karoommo. Boqquwwaa eese hawwodu keenoo ki'nnuwwiinsi annanni issoommo. Hee'llam uulliinsim fissoommo. Ihukkaarem Isra'ee'l uulla hore'em aaggamoyyo. Ee ammane an Waa'i ihummisa laqqakkamo» yoolla. Isra'ee'l minaadaba, Moollanni Waa'i ki'nnuwwi bikkina «I woshsha macceessakkambeelas annannichchim mattakka'a ki'nnuwwi qophpha'n waa'uwwina otossi'llehe! Ihukkaarem iikka keesammi summa ka lasage ki'nnuwwi qophpha'n waa'innee uwwitakkam luwwinnee haashaassitakkamoyyo. Keesammi i duunanne Isra'ee'l lob duunanne ee uullanne Isra'ee'l minaadab hundim iina otossookko. Ee beyyonnem ixxuwwa aa'oommo. Ee'isam ee beyyonne iina uwwitakkam doo'l luwwa, wonaa keesammi kitimaa ki'nnuwwiinsi hasoommo. Binnitakka'a mulli minaadaphphi lambe'enne hee'llakko'i uulliinsi fissaa wixxaa'oommi ammane erisa enje'oo aduruusisa ki'nnuwwa aa'oommo. Mulli minaadab moo'llu'uuyyim ki'nnuwwina i keesammooma la'isoommo. Gaassi ki'nnuwwi anno'ina uwweena hide'ummi Isra'ee'l uullanne ki'nnuwwa dabaraa woroommi ammane an Waa'i ihummisa laqqakkamo. Ki'nnuwwi baxxakko'i tuussiisoo luwwaa haashaarantakko'isaa tiittakkamo. Baxxakko'i jor luwwiinsi ki'ukkok ki'nnuwwi gaga shigigitakkamo. Isra'ee'l minaadaba, ki'nnuwwi jor taakkisaa jor baxisaa ihoo'n i summi lombi bikkina ki'nnuwwina issoommi luwwinne an Waa'i ihummisa laqqakkamo» yoolla. Waa'i iina «Manchi beeto, Woroo'n qaranne daba'llitaa ee qaranne woce; woroo'n qaranne yoo haqqi doomina qooxxaalli hiraago woce. Woroo'n qaranne yoo haqqi doomina an Moollanni Waa'i ‹Moo'e! Oono'o, an keesenne giira xanqisoommuulla. Oo giirim aashaallaa gogaallaa annanni issoo'n haqqi hundam shokkiisookko; giiram xoo'iseena xanookkok hee'ooyyo. Woroo'n qariinsi hanaa'n qar afeebe'em maham gatisoo'n shokkiisookko. Ee giiram an Waa'i xanqisumman ihukkisaa ayyim xoo'iseena xanoobee'an ihukkisaa manni hundim moo'ookko› yoommoka macceese yitaa kure» yukko. Ihukkaarem an «I Moollanni Waa'a! Hundim ‹Amman hundam ixxi losisookkok kobi'llishshinnette› yitu'uuyyi quunquuntamuulla; ee bikkina iina mah ee'llookko?» yummo. Waa'i iina «Manchi beeto, Yerusaalee'm kolli daba'llitaa minaadab otossoo beyyuwwinaa Isra'ee'l uullinaa hiraago woce. Isra'eelina ‹An keesenne ki'aammo; bisa'am seejjiinsi fissaa baaxiilaanchoo muccuraa ki woriinsi bi'isoommo. Ki woriinsi Baaxiilaanchoo muccuraa woroo'n qariinsi hanaa'n qar afeebe'e bi'iseena i bisa'i seejjiinsi firookko. Bisa'a seejjiinsi fissummok an Waa'i ihummisa manni hundim la'ookko; ixxim kora'am daba'llooyyo› yihe. «Ee bikkina manchi beeto, wi'lle! Ixxuwwi illagenne kichchechchinne qaraaraallisa wi'lle! Ixxuwwim ‹Mahina wi'llitoolla?› yita'a xa'mmitota'n ‹Hanenne waaroo jor woshshi bikkinatte› yihe. Ee woshshanne manni hundikim wodan baa'ookko; wod hundim hoogookko; manni hundim neeyyato murookko; malaayyi hundim qacookko. Oono'o, oo balli waaroolla; ookki hanqinam ihoohane» yoolla. Moollanni Waa'i kaka wocaakko. Waa'i iina «Manchi beeto, hiraago woce! An Waa'i i minaadabina ‹Bisa'i, qareesamaa shiinshamaakkoo bisa'a! Sheena qareesamaakko; banqisa belecce'eena shiinshamaakko. I minaadab kuramu woshshaa guzumo'oo hundam gaddo'i bikkina ka lasage liiranchi ixxuwwina hee'ooyyo. Bisa'i shiinshamaa gudaakko; Shoo manchinam uwwamaakko. Manchi beeto, kichchechchinne laare; ku bisa'i gudukkok i minaadabaa ixxuwwi awwonsaanoo bi'iseenatte. Ixxuwwim gatto'i i minaadabinne maqirem letamo. Ee bikkina kichchechchinne ki biqe aphphixxe. I minaadab keenamoo amman afaakko; eese hawwodimmamdu uttobeelas ku hundim ixxuwwanne afookko› yoommoka kure. An Moollanni Waa'i kaka wocaammo. «Kabadem Manchi beeto, hiraago woce! Ki angam qashayyeese; bisa'i lam koree sas koree shoohane, dambaqisoohanee duroohanee. Ee bikkina i minaadaphphek wodan hoogookko; lobakat keenim qolanta'a ubbamo; ixxuwwa shoo bisa'a gooc hundannem dissaammo. Aayye! Oo bisa'i banqisa belecce'oohane; sheenam qareesamaa gudaakkoohane. Qare'aalli bisa'a, at iittitti kollinne qeddinnem makkinnem mure! Anim i anga qashayyeesoommo; i quunqim billookko. An Waa'i kaka wocaammo» yukko. Waa'i iina «Manchi beeto, Baabiloo'n adil bisa'a makkisaa amadaa waaroo lamem googonnem mare'e isse; lamem gooqqekim kichchi uulli mato; ee googguwwi lamejjanne beero'o moo'isoo beyyonne mare'e kaase. Ora Amoo'n beero'o Raaba'aa girbamaakkoo Yihuxxi beero'o Yerusaaleemaa massoo googguwwanne mare'e isse. Baabiloo'n adil lamem googguwwi lamejjannem uullookko. Hinka'i googinne marimmi hasisooda'e la'eena saamo fissookko. Qophpha'n waa'uwwam sogitano xa'mmookko. Kitimina durakko'i diinaxxekam afare saarayyookko. Oono'o, ixxek makki angi ‹Yerusaaleema!› yoo saamo ki'isookko. Oo saamim ixxi maraa girbuwwa gindakkam mu'uta gudisaa ooxxi goocanne hincaa'ona, orina ki'isanseena sha'llamona, buchcha tuubaa shiraashironaa kibbakkam girba baxonaa kurookko. Yerusaalee'm minaadab hundim Baabiloonina ijaajanteena hide'llo'oo bikkina ku woshshi ixxuwwanne afookko yita'a sawwito'oyyo. Ihukkaarem Baabiloo'n adil qeefadoo ammane ixxuwwika baaxiilo tiissiisookko. Ee bikkina an Moollanni Waa'i ixxuwwina yoommok kane. Ki'nnuwwik baaxiil la'amaakko; baaxiilaan ikkakko'isam manni hundim la'ookko; baaxiilaan ikkakko'isam baxxakkam baxinne la'issakkamuulla. Ee bikkina qeefadantakka'a mattakkamo. «At jollinnee haashaaranchinnee wo'mmitaattoo Isra'ee'l awwonsaancho! At guzumo'antoo lasaanchi amman kaba afaakko. An Moollanni Waa'i kaka wocaammo. Ki adilla'n mare'e ubbuuse! Shaashsham tire! Woshshuwwi hee'ukkisa hee'ooyyo. Woroon yo'i keeno ki daannoomminne iimaa'llaa kaba gassaan ikko'i keeno sholliise! Bichcha, bichcha! Eeyya, hanqinam oo beero'i bi'oo'isa issoommo. Ihukkaarem beero'o guzumo'oo'isina doo'llummok waareebe'i kuk ihooyyo; ee ammane ixxena higisaa uwwoommo. «Manchi beeto, hiraago woce! Amoo'n minaadaphphi bikkinaa ixxuwwi game'llanchi bikkinaa an Moollanni Waa'i ixxuwwina ‹Bisa'i bi'iseena gudaakko; shaa guulleenaa banqisam belecce'eenaa qareesamaakko› yoommoka kure. Moo'llakkam kaalti qophpha'nnane; hiraaggakkam hiraagim qophphano. Jollii haashaaranchii ki'nnuwwanne wo'mmaakko. Lasaanchi guzumo'o guzumo'antakkam balli afaakko. Ki'nnuwwi gaanjennem bisa'i xabbaakko. «Ki'nnuwwika bisa'a seejjanne aagissehe! Qooccantakko'i beyyonnee qarantakko'i uullannem ki'nnuwwanne oogatoommo. I quunqik malaayyi xanqu gii'llisa ki'nnuwwanne dillookko. Bi'isimmik losan yoo mogaalli mannina higisaa uwwoommo. Giirinne bi'llakkamo; ki'nnuwwik xiig ki'nnuwwi gaqqi uullannem dunamookko. La'mmaagge ki'nnuwwa tiirookkok hee'ooyyo» yukko. Waa'i kaka wocaakko. Waa'i iina «Manchi beeto, mannika xiiga dunoo ka beero'onne oogatteena guddaahinnihe? Ixxi issu shigigaa'oo luwwi hundam caakkissaa ixxena kure. An Moollanni Waa'i Yerusaalee'm beero'ina ‹Lobakat kee'nneka xiiga dunti bikkinaa qophpha'n waa'uwwanne otossimminne ki gaga haashaassitti bikkinaa bi'lloo'isina qoodamu amman hincaakko. Mannika xiiga dunti bikkina hantaaraanchi ikkaatto; baxxitti qophpha'n waa'uwwinnem haashaarantaatto. Ee bikkina bi'lloo ammane gaaggaabissaatto! Ki umuram gundissaatto. Ee bikkina mulli minaadab keesenne naacamoo'isaa osaroo'isaa issoommo. Sholle'nnii dambaqii wo'mmaakkoo beero'o, abbisonnee qee'llonnee yoo uulluwwi keesenne naacamookko. Ki woronne yo'i Isra'ee'l awwonsaan hundim ixxuwwina uwwamu daannooma mannika xiiga dunimmina awwaaxxitamuulla. Ki woronne annii amaa sholle'llo'ookko. Waaraan wor amadanto'ookko; adaraarii busar meentii hawwodanto'ookko. Iina keesamu luwwa sholliissakko'ookko. I Usheexxaxxi Ayyaamom haashaassitakko'ookko. Ki'nnuwwiinsi mat mat keen mulli keeno shishiisseena qophphano woccamuulla. Mat mat keen qophpha'n waa'ina hincu kitima ittamuulla; Mat mat keen odim hundi ammanem saa'immina gaaggaabbamuulla. Mat mat keen ixxuwwi anno'i meentinne iinse'imminne ixxuwwi anno'ika ara'a iggitamuulla. Mat mat keen aga'n xur waaru meento malaayyissa'a iinse'imminne sholliissamuulla. Mat mat keen ixxuwwi olla'i meentinne saa'llamuulla. Mulli keen odim ixxuwwi oos meentinne saa'llamuulla. Ee'isam ixxuwwi anno'i qaru aayyuwwa haashaassitamuulla. Ki minaadabiinsi mat mat keen diinatina bitaa'anta'a manni xiiga duntamuulla. Mat mat keen ixxuwwina moolli ikko'i Isra'eelina qaro'inne diinate liqaayyissamuulla. Ixxuwwam boggu'uuyyi laboobee'i amaxxa wixxaa'llamuulla. Eesem guullita'a xaddo'ookko» yukko. Moollanni Waa'i kaka wocaakko. «Ki bogimmi bikkinaa xiiga dunti bikkinaa i anga keesenne ki'isoommo. An keese guzumo'oommi ammane iggimminne uulliteena xantoohonnihe? Ki wodu qoxxeena xanoohonnihe? An Waa'i kaka wocaammo. Ee'isam issoommo. Ki minaadaba uulli hundannee mulli minaadaphphi woronnee binnaa'oommo. Ki jor baxim uulloo'isa issoommo. Mulli minaadab keese sholliissamo. Ee ammane at an Waa'i ihummisa laqqootto» yukko. Waa'i iina «Manchi beeto, Isra'ee'l minaadab iina maham awwaaddambee'i keen ikko'ookko; ixxuwwi kin bir giiranne bukkamaa gatoo xurisa; madaaphphaannisa, qorqoro'aannisa, xaa'llaannisaa irisaas ata'llisaa ikko'ookko. Ixxuwwi xaa'l xur ikko'i bikkina hundam Yerusaaleemanne wixxaa'oommo. Bira, madaaba, xaara, irisaasaa qorqoro'oo bukkimmina giiranne wixxaa'akkamaannisa an ki'nnuwwa i quunqinnee bala'innee wixxaa'oommo; eekke'em wixxaa'aa bukkoommo. Eeyya, Yerusaaleemanne wixxaa'oommo; giiram xanqisaa i quunqinne bukkoommo. Bir midachchanne bukkamoo'isa ixxuwwim ee beyyonne bukkantamo. Ee ammane an Waa'i iikka malaayyaam quunqa ixxuwwanne dilliisummisa laqqamo» yukko. Waa'i odim iina «Manchi beeto, ixxuwwik uulli haashaaramu bikkina i quunqinne xeen ga'nneena hooraa guzumo'eena gudummisa Isra'ee'l minaadabina kure. Shu diinaxxi gadanonne hobbichchi toxoohaannisa Isra'ee'l awwonsaan minaadaba monginne shitamo; diinatem ihukko mulli amaxxa boggamo; goona shita'a lobakat meento busar issitamo. Qeessuwwi i seera gindito'ookko. Keesammi mu'utam keessamoyyo; haashaarammam keesammiinsi annanni issitamoyyo. Muccur luwwikaa muccur ihubee'i luwwikaa annannaato losissamoyyo; Usheexxaxxi Ayyaamom lonsitamoyyo. Ee bikkina Isra'ee'l minaadab eese sholliisso'ookko. Oro'i amadu luwwa baqansaa itoo'isa Isra'ee'l awwonsaan hanqibee'i googinne amaxxa wixxaa'lleena manna shitamuulla. Hiraagaanim gortannanne boorjo'o laboo manchisa baaxiilo hundam daphphaa'llamuulla; qophpha'n kaaltam ‹moo'nnaammo› yitamuulla; qophpha'n hiraago wocco'uuyyi kuk ‹Moollanni Waa'i sagara› yitamuulla. Ihukkaarem an Waa'i ixxuwwina ma'lluwwam kurummoyyo. Ee uulli manni boggamuullaa angiinsi gossamuullaa; hawwaano, buxaa waaraanoo hanqa hoorimminne hawwoddamuulla. Uulla bi'isoombee'isa gindamu oota dabaraa ootookkoka, gindamu kollinne i illagenne uulloo mancho ixxuwwiinsi hasummo; ihukkaarem matom siidummoyyo. Ee bikkina i quunqe ixxuwwanne dilliisoommo; gii'llisa shokkiisoo i quunqinnem bi'isoommo; ixxuwwi jolle ixxuwwi gagannem dabaroommo» yukko. Kaka wocukkok Moollanni Waa'a. Waa'i iina «Manchi beeto, mat amaansi qaranto'oo lam aayyuwwi hee'llo'o. Ixxuwwim landoomaninne Gibxanne hee'llo'i ammane baajoomma'n lomba hoogga'a saa'aan ikko'o. Ixxuwwikim summi lobaantek Ohoolatte; hoffaantekim Ohooliibatte; anim lamom eebummo; issuwwim iina ooso qaramukko; Ohoola Samaare'ette; Ohooliiba Yerusaaleematte. Ohoola an eebaa lasagem saa'imma baassu'uuyyi matto'o; Aasoo'l manninnem saa'lleena muxmuxito'o. Oo Aasoo'l manni muulli kashar eddechcha edde'llo'oo gassaano, awwonsaanoo lobakata mishissam woraadaa ikka'a hundim faradaan hee'llo'o. Isem Aasoo'l gassaan hundim awwaaxxoo saa'aanchotte hee'llo'o; is saa'aanchoomim Aasoo'l manni qophpha'n waa'uwwina otossita'a is gaga haashaassitamisa issukko. Baajoommano hooggo'i Gibxanne asheetto'i saa'imma utto'oyyo; landooma'n ammaniinsi asheeraa goon hundim ise saa'aanchotte issaa xigimminne isenne saa'am hee'ukko. Ee bikkina ise lobakata hassam Aasoo'l kobina higisaa uwwummo. Ixxuwwim iseka eddechcha maxatta'a kallemaratte issito'o; iseka ooso hundam qeefaddo'o; isem bisa'inne shito'o. Oogato'im isenne ihukko; meenti hundim isenne afu luwwi bikkina ekkaa kakaa wocimma asheerukko. «Is aayya Ohooliiba eekka moo'lla'a hore'em saa'aanchotte ikko'o bagaan Ohoolaansi e'llito'oyyo. Isem Aasoo'l gassaaninne, gaaxxi awwonsaaninne, wereeggi eddechcha edde'llam gaadaaninnee faradaan mishissam woraadinnee saa'llo'o. Tu Ohoolam haashaatto'o; lamikim haalat mat hee'ukko. Ee misilluwwa moo'lla'a saa'lleena muxmuxito'i bikkina oo keen hee'llam Baabiloona manna asse'llo'o. Baabiloo'n mannim isenne saa'lleena waatto'o; ixxuwwim ise haashaassito'i bikkina lasaanchonne hundam shigigita'a sabbo'o. Kallemaram wixxixxi beyyuwwanne fitta'a iseka saa'aanchooma manni hundim la'oo'isa issito'o; anim is aayya shigigummisam isem shigigummo. Isem landooma'n ammane Gibxanne saa'llam hee'llo'isam saa'imma lonsito'o. Goo'n orachchi hallaannisa qansi odim maagula'oo faraxxaannisa ihaa saa'imminne muxmuxoo gooninne qeefadanto'o. Ohooliiba, landooma'n ammane goon ki anuunanne lellitu'uuyyi kiikka baajoomma'n lomba hooggitti ammane baxxam hee'llitti haashaarancha eddaa baxxeena hassaatto» yukko. Kabadem Ohooliiba, Moollanni Waa'i kiina «Ee keese iittitam keeno shigigitaatto; ihukkaarem ixxuwwa keesenne ki'isoommo. Keese kibbitonam ki kollonne woroommo. Woraaddan yoo mishisoo gassaano, gaaxxi awwonsaano, daannuwwaa gaadaanoo Baabiloo'nnekaa Kalaade'i manna hundamii, Faqoodika, Sho'aanika, Qo'aanikaa Aasoo'l minaadabaa hundam faradonne saa'llaa waaroo'isa issoommo. Ixxuwwim lobakat faraxxi gaare'innee sinqi iyyiisamaakkoo gaare'uwwinnee qoxxaalli gogotinne waatta'a hundem kollinnem kibbita'a qassamo. Agirinnee o'l qoobe'innee ixxuwwi gaga ege'llitu'uuyyi keese kibbitamo. Ixxuwwi see'llisannem keesenne oogattona keese higisaa ixxuwwina uwwoommo. An keesenne quuqummi bikkina ixxuwwi quunqinne keese hasso'isa issitona cawwoommo; kiikka sanee maccee muttamo; eehanniinsi gatto'i keenom bisa'inne shitamo. Kiikka ooso kiinniinsi hootta'a massitamo; gatto'i keenom giirinne shokkiissamo. Ki eddechcha hundam maxattamo; wereeggi luwwi hundam massitamo. Kiikka saa'immi baxoo Gibxi uullanne hee'llittaanniinsi asheeraa at issitoo tuusiisoo luwwaa hundam uttoo'isa issoommo. La'mmeka od qophpha'n waa'uwwi kolli moo'llooyyo; Gibxa od sawwitooyyo» yoolla. Moollanni Waa'i «Sabbaa shigigitoo minaadabina keese higisaa uwwoommo. Kiyyaayyi googom awwontitti bikkina ise aggo'i guzumo'i humbullo atim aggootto» yoolla. Moollanni Waa'i «Oono'o, kiyyaayyi humbulliinsi aggootto; ixxim geejjaa xillaallaa. Manni hundim keese gadaa osarookko; humbulloomim lobakata amadoohane. Atim dimbitoottoo kichche'lloottoo; kiyyaayyi Samaare'isam bichchikaa gindanchikaa humbullo aggootto. Maham gatissoo'n cuungitaa aggootto. Ee humbullom iiqansitaa gala'inne ki anuuna muransitootto. An Moollanni Waa'i kaka wocaammo» yoolla. Kabadem Moollanni Waa'i «Eese xadditti bikkina, afarem eesenne dabattitti bikkina, balale'antitti bikkinaa saa'l bikkinaa hawwo aa'llootto» yoolla. Waa'i iina «Manchi beeto, Ohoolannee Ohooliibannee oogatteena guddaahinnihe? Ixxuwwika shigigaa'oo baxo caakkissaa kure. Ixxuwwi lamem saa'llo'ookkoo manna shito'ookkoo; saa'llo'okim ixxuwwi qophpha'n waa'uwwinnette ihukkuuyyi shito'ok odim iina qatto'i ooso; iikka goo'n ooso ixxuwwi qophpha'n waa'uwwina kitimto'ookko. Ixxuwwi hawwojji xale'i eeqaxayyo; ee ammane iikka Keesammi Mine haashaassito'ookko; i Usheexxaxxi Ayyaamom gindito'ookko. Qophpha'n waa'uwwina kitimteena i ooso shito'i balla i Keesammi Mine waatta'a haashaassito'o. Oono'o, i Minenne issito'ok eehane. «Qee'l uulliinsi goona weeshshona manna asse'llo'o; hasso'i goonim waatto'o; lamem aayyuwwim ixxuwwi orachcho aanshaqqito'o; deemmannem qalama laphphito'o; wereeggi luwwam issaqqito'o. Mishisoo gundi ara'uwwanne illagee'n kollinne afuutto'o; an ixxuwwina uwwummi aduruusii wee'l zaytii gatoo'n lobakat er luwwa xaraphpheezanne dissito'o. Lobakat corochchi ixxuwwi hegeegonne hee'ukko. Ixxuwwinne maqirem udma'iinsi waatto'oo dimbaan hee'llo'o. Oo dimbaanim ee meenti anganne guma'a horoorennem mishisoo adilla'n mare'e issito'o. Anim i tiironne ‹Ku goon saa'llamuullak isek orachchi saa'imminne beeddaakkoo ebeer meentichchosa ikko'i keeninnette› yummo. Goon saa'aan meenti beyyo maroo'isam oo udma'i uulliinsi waatto'i goon Ohoolaa Ohooliibaa yamantam ee haashaarammi meentinne maqirem saa'llo'o. Saa'imma losso'i bikkinaa ixxuwwi angim xiiginne kolbamu bikkinaa ee saa'aanonnee manna shitam meentonnee muccur keen oogattamo» yukko. Moollanni Waa'i «Ixxuwwanne minaadaba wixxaa'e; ixxuwwam boganchinaa hambalaachchinaa higissaa uwwe. Oo minaadabim kininne aphphissona; bisa'innem muransitona; ixxuwwika ooso shitona. Minneewwam giirinne shokkiissona. Ki'nnuwwi lamem aayyuwwim saa'llakko'isa ka lasage mulli meenti saa'oobee'isa guzumo'antakko'isa moo'aa xassaqqona ka uulliinsi hundiinsim saa'immina muxmuximmi bi'oo'isa issoommo. Ki'nnuwwi, lamem aayyuwwim saa'imminnee qophpha'n waa'uwwina otossimminnee baxxakko'i baaxii'l bikkina guzumo'antakkamo. Ee ammane an Moollanni Waa'i ihummisa laqqakkamo» yoolla. Neese qeefadammummi honsi hiinchonnee tommi aga'n tommi ballannee Waa'i iina «Manchi beeto, Baabiloo'n adil Yerusaaleema kibbeena asheeru balli ihu bikkina kaballi ayyaamo doonanne kitaabe. An Moollanni Waa'i ee boqqi i minaadabina kobi'llishshinne ‹Disxa giiranne kaassaa wo'o isse. Gubeedoo shulluudaa eddaa danaam danaam maara muransitaahii doo'l miqqeewwam iiqansitaahii ee disxanne isse. Allaachchiinsi doo'l gereechcho massitaa dure; ee kaassitti disxannem giira giire; maaraa miqem li'eebe'e sare› yitaa kure» yukko. Moollanni Waa'i «Manna shoo kee'n beero'ina aayye! Oo beero'i ci'llimmiinsi muccurubee'aannisaa hore'em muccuroobee'i xaa'l disxisaa ihaakko. Ixxi woronne yoo murammi maaram doo'llitoo'n guullitaa fisse. Ka beero'i woronne manna shakko'ookko; xiigoomim dunamukkok dir ifiisoo uullanneyyo. Ihukkaarem oo xiig dunamukkok ma'llichchim ifiisoobee'i kinannette. Oo xiig ifiisamoobee'isa kinanne dunamoo'isa issiisummok iikka lophphaakkoo quunqa ki'isaa baado miqisoo'isinatte» yukko. Ee bikkina Moollanni Waa'i «Manna shoo kee'n beero'ina aayye! Aphphoo haqqa an i gagoomim shiqaa'aa edoommo. Lobakat haqqa eebe! Giiram xanqise; maaram sare! Maa'l wo'ooma enja issitaa xee'ise! Miqoomim shokkona! Yerusaaleema, saa'immi keese haashaassaakko; an keese muccusseena hasummaarem at ki haashaaranchiinsi muccuttittoyyo. I quunqik malaayyi keesenne moo'ameebe'i afeebe'e od muccuttooyyo. An Moollanni Waa'i ‹Mat luwwa issoommi amman afaakko; eekka issimma uroommoyyo; haafoommoyyo. I sawwitem dabassoommoyyo; ki taakkisaa ki baxisaa keesenne oogatoommo› yaa kuraammo» yoolla. Waa'i iina «Manchi beeto, at iittitoo ki illinam liiranchi ikko'i ki mi'n ama dangonnem qasanta'a letamo; kannonne kichche'llitte; ki indiiddam dunimminne wi'llititte! Kichche'imminne hiqqitoo'isa manni macceesoone; leto'aantena wi'llititte. Ka'llitoo shaashsham ki horoorenne isse; ki caamma'am lokkonne isse; ki suume ifiissitte; hala ittitte» yaa kurukko. Soodaraar daranne eekka mannina kurummo. Ee maaro'onne i meentichcho leto'o; la'm ballanne an ijaajamummisannem issummo. Mannim «Ku issitoo luwwi niina uwwoo losan mada'e kuttooyyonnihe» yita'a eese xa'mmito'o. Anim ixxuwwina «Waa'i iina ‹Moollanni Waa'i Isra'ee'l minaadabina «Ki'nnuwwik lombi bakkechcha, illi neeyyatoo woda'n liiranchaa ihu i Keesammi Mine haashaassoommo. Yerusaaleemanne gatto'i goo'n oosii landii oranne letamo. Ee ammane an issummi luwwi hundam issitakkamo. Ki'nnuwwi suume ifiissakkamoyyo; halam ittakkamoyyo. Ki'nnuwwi shaashsham ti'llitakkamoyyo; caamma'am fissaqqitakka'a leexa'i lokkinne mattakkamoyyo; wi'llo amaddakkamoyyo; te'im wi'llitakkamoyyo. Ki'nnuwwi baaxiiliinsi ki'ukkokim naccakkamo. Ki'nnuwwina'i ki'nnuwwim atoorattakku'uuyyi qitintakkamo. Ka'isinne Hizqi'eel ki'nnuwwina mare'i ihookko. Ixxi issukkisam ki'nnuwwim issitakkamo. Ku woshshi wo'mmoohaare an Moollanni Waa'a ihummisa laqqakkamo» yihe› yaakko» yaa dabarummo. Waa'i iina «Manchi beeto, kaba an ixxuwwi hundi ammanem moo'lleenaa do'lleenaa hassamoka ee'isam bakke'llamanee liirantamanee ihu qoxxaalli Keesammi i Mine ixxuwwiinsi hooroommo; ixxuwwika goo'n oosoo landam hooraa massoommo. An kaka issoommi balla bichchiinsi gatu manchi waaraa ee issummi luwwi hundi bikkinam kiina kurookko. Ee balla kiikki suum fooqaa at ee manchinne woccootto; ee lasage od duuddooyyo; minaadabinam mare'i ikkootto. Ixxuwwim an Waa'i ihummisa laqqamo» yukko. Waa'i iina «Manchi beeto, Amoo'n kolli daba'llitaa ee uulli minaadaphphi bikkina hiraago woce. Moollanni Waa'i Amoo'n minaadabina ‹I Keesammi Min haashaaramu ammane, Isra'ee'l uullim udma'i ihu ammanee Yihuxxi minaadab qeefadamaa maru ammanee liirantakko'ookko. Ee bikkina eelliinchi firiinsi waaroo sulli ki'nnuwwanne weeraroo'isa issoommo; ki'nnuwwi uullannem wiiddanta'a hee'llamo. Ki'nnuwwina ihimmi hasisoo misha ixxuwwi ittamo; adom aggamo. Raaba'i beero'onne gaameela'i Amoo'n uulli hundannem gereebbi allaa'lloo'isa issoommo. Ee ammane an Waa'i ihummisa laqqakkamo› yoolla yihe. «Moollanni Waa'i ‹Isra'eela gaddakka'a ixxi ubimmanne liirantakka'a ki'nnuwwi anga aphphissakko'ookko; xophxophitakku'uuyyim kaddakko'ookko. Ee bikkina i woda ki'nnuwwanne ki'isoommo; mulli minaadab qeefadoo'isa issoommo; od minaadab ikkakka'a la'antakkambee'isa guullaa bi'isoommo. Ee ammane an Waa'i ihummisa laqqakkamo› yoolla» yukko. Moollanni Waa'i «Moo'aaphphekii Eedoo'm minaadabii ‹Yihuxxi minaadab mulli minaadaphphisam ihaakko› yito'i bikkina Beetiyaashimoota, Ba'aalma'oonaa Qiiriyaataayima yakkam la'anto'oo beero'uwwi gatoo'n Moo'aaphphi uulli tochcho egerakkam beero'uwwi hundam diina'i aphphisoo'isa issoommo. Ee bikkina Amoon minaadaphphisa xigamoo'bee'isa eelliinchi firiinsi waaroo sulli Moo'aabaa Amoonaa weeraraa qasoo'isa issoommo. An Moo'aaba guzumo'oommo; ee ammane an Waa'i ihummisa laqqamo» yukko. Moollanni Waa'i «Eedoo'm minaadab Yihuxxi minaadabiinsi monginne baado miqisso'i bikkina baaxiilaan ikko'ookko. Ee bikkina kaba Edooma guzumo'oommisaa ee uulli mannaa fooraam diinatee hundam bi'isoommisaa la'isoommo. Teemaa'n beero'iinsi ki'isaa Didaa'n beero'i afeebe'e udma'i ihoo'isa issoommo; minaadabim oranne beeddookko. Iina minaadab ihu Isra'eelinne Eedooma guzumo'oommo; malaayyaam i quunqinne Isra'eel Eedoomiinsi baado miqisookko. Eedoo'm mannim an ixxuwwiinsi baado miqisumman ihukkisa laqqamo» yukko. Moollanni Waa'i kaka wocaakko. Moollanni Waa'i «Filisxee'm minaadab Yihuxxi minaadabiinsi monginne baado miqisso'ookko; beeddoobee'i diina'oominnem bi'isseena hasso'ookko. Ee bikkina an Filisxee'm minaadabanne i malaayye moo'isoommo; Kaarte'i mannam guulloommo; Dambalaq gammalanne gatto'i keenom bi'isoommo. Quunqinne wo'mmaa guzumo'inne lophphaakkoo baado miqisoommo. Ee ammane an Waa'i ihummisa laqqamo» yukko. Neese qeefadammummi tommonnee mat hiinchi aga'n aaggannee Waa'i iina «Manchi beeto, Xiiroos beero'i manni ‹Yerusaaleem gindamaakko; dadda'l malaayyim hoogaakko; kanniinsi eehid niinninne akeekixxameena hore'em xanoobee'i bikkina neese goddaan inkoommo› yita'a liirantamuulla. «Ee bikkina Moollanni Waa'i ‹Xiiroosa, an keesenne ki'aammo; dambalaqanne wo'i moor ki'oo'isa keesenne dut minaadab ki'oo'isa issoommo. Ixxuwwim ki qashaa waardiyyuwwi egettam godo'uwwaa gindansitamo. Buchchoomam fii'aa bi'isimminne xale'i kin maxaramaa gatoo'isa issoommo. Dambalaq lambe'enne qurxumme'e qaashsham keen shikka gokkissam beyyi issoommo. An Moollanni Waa'i kaka wocaammo. Mulli minaadab Xiiroosa bogookko. Lambe'i uulli hegeegguwwanne hee'oo mannim bisa'inne beeddookko. Ee ammane Xiiroos minaadab an Waa'i ihummisa la'ookko› yoolla» yukko. Moollanni Waa'i «Xiiroosa qasona adilluwwina adil ihu Baabiloo'n adil Nabukadanaxoora hanaa'n qariinsi waaroo'isa issoommo. Ixxim lobakat gogotinne, faradaaninnee faraxxi gaare'innee waarookko. Ee lambe'i uulli hegeegguwwanne hee'oo ki minaadab hundim orinne beeddookko. Diina'i kiinninne uullixamoo girbam ki kululleetanne baxookko; ki qash lud afeebe'e buchcha tuubookko; agirinnem makkixxamukkuuyyi keese hawwodookko. Girba gindakkam mu'utinne ki qasha aphphisookko; waardiyyi egeroo godo'om mu'utinne gindookko. Ixxuwwi faraxxi konte'iinsi ki'oo dir duuphphisa ihaa ifiisookko. Ixxi ki ooxxi gooccuwwa aagoo ammane faradaaniinsi, faraxxi gaare'iinsii shafe'i yoo tululoo luwwiinsii macceesamoo sagar gindakka'a aagakkam beero'isa ki ootam heekkeesookko. Gogot faraxxi konte'inne ki googguwwa kade'amookko. Ki minaadaba bisa'inne shookko. Kiikki qoxxaalli utubbuwwim uullanne ubookko. Ki amaxxi qeefadamookko. Kiikki dadda'l mu'utim bogamookko. Qashim gindamookko. Mishisoo ki minneewwim gindamookko. Kiikki kinneewwi, saanquwwi gindamaa ubu luwwii hundim dambalaqanne uunjamookko. Ki kajjaa diitta'inne macceesissoo kajji sagaraa hundam sahaa'oommo. Qurxumme'e qaashsham keen shikka fitiissam xale'i kin maxaramaa gatookko. Beero'oomim la'mmaagge areesamooyyo. Oohim ihookkok an Moollanni Waa'i wocummi bikkinatte» yukko. Moollanni Waa'i Xiiroos beero'ina «Madu keen qitinukkuuyyii ki woronne manna shakku'uuyyii ubboohaare uullik tochchi heekke'ooyyonnihe? Dambalaq lallabonne hee'oo uulli adilluwwi hundim adilla'n barcumiinsi dillitamo; ixxuwwika adilla'n eddechchuwwaa anginne wereeggisakka'a baxakko'oo mulli eddechchuwwaa sheelaxxita'a baa'lla'a huxe'llu'uuyyi buchchanne afuuttamo. Keesenne afu hiriraa'oo duuha'anne muggita'a dambaqqamo. Kiinam ‹Dambalaq lallabonne hee'oo uulluwwa baa'oo'isa issittok dambalaqquwwanne malaayyaam hee'llitti la'antaattoo beero'o! Dambalaqiinsi hinkid bi'llito? Oono'o, kaba at ubbitti ballanne wo'inne kibbamaa hee'oo uulluwwi huxe'ukko. Ee uulluwwanne hee'oo mannim ki bichchanne muggukko› yitu'uuyyi wi'llitamo» yoolla. Moollanni Waa'i Xiiroosina «Ayyim hee'eena xanoobee'i gindamu beero'uwwisa udma'i issoommo; xilli cambalaq wo'innem ifiisoommo. Illagee'n doolli manni aagu barenne aagoo keeninne atim aaggoo'isa issoommo; ee keeninne maqirem gindamu uulliinsi woroon hee'lloo'isa issoommo; ee bikkina od manni ki woronne hee'ooyyo. Ka uullannem kiina beyyi hee'ooyyo. Kiikki lasaanchi kichche'isoo'isa issoommo; ee lasage at hee'llooyyo; keese manni hasuta'nnim hore'em siidooyyo» yoolla. Moollanni Waa'i kaka wocaakko. Waa'i iina «Manchi beeto, Xiiroosina wi'lle. Dambalaqa massoo googonne hee'imminne dambalaq tochchonne hee'oo beero'uwwiinsi waaroo daddaraanina edanchi beyyi ihu Xiiroosina Moollanni Waa'i ‹Xiiroosa, ki danonne at bakke'llaatto. Ki heechchi beyyim dambalaqa; keese baxxo'i keenim wereeggissa'a baxxo'ookko. Saanquwwi gudukkok Heermoo'n Duu'n hoominnette; utubbuwwi uullukkokim Liibaanoos haqqiinnette. Markaba ushe'akkam laahidi'nnoo'i luwwi baxamukkok Baasaa'n uulli oda'innette. Gax axisamukkokim Qoophphiroos uulli hoo'm saanqinnette; ixxi kululleetim goolabamukkok daane'i inqinnette. Mare'i ihaa qee'llonnem moo'amona kiikki markaphphi shara'i baxamukkok wereeggisakka'a axisakko'oo Gibxi uulli er fatirinnette; Du'm eddechchi baxamukkok wo'inne kibbamaakkoo Qoophphiroos uulli lobakata mishisoo shaano'innee muulli kashar fatirinnettee. Kiikka markabbuwwa ushe'llam keen Siidooniinsii Arwaadiinsii waatto'oo keeno; Xiiroosa, kiikki lachchi manni markaba ijaajaan hee'llo'o. Iiqamu markaba dabatta'a baxxam keen Geebaa'l uulli lachchaammuwwa; dambalaq markabbuwwii markaba ushe'llam keenii kiinninne meera uulliteena waattam hee'llo'o› yoolla yihe. «Faariisik, Liidikii Liibiykii gaadaan ki gogoxxi woronnette; ixxuwwika agiraa o'l qoobe'ee orina wiiddantitti beyyonne saqalimminne nuutto'isa issito'o. Arwaadik gaadaan kiikka qasha hundi kollinnem egettam hee'llo'o; Gamaaxxi mannim girbuwwa egettam hee'llo'o. Ixxuwwi agiram kininne baxamu minneewwanne saqalta'a keese nuussito'o. «Ki amaxxi lophphu bikkina Tarsees manninne daddattam hee'llitto; kin bira, xaara, qorqoro'oo irisaasaa eebba'a ki mu'uttuwwinne dabassitam hee'llito. Giriikinne, Tuubaalinnee Meesheekinnem daddattam hee'llito; ixxuwwim agidoo naas xaarinne baxamaakkoo mu'utaa eebba'a ki mu'uttuwwinne dabassitam hee'llo'o. Ee'isam ki mu'uta Beeti-Toogaarii'm faradinne, o'l faradinnee baqullinnee dabassansitam hee'llitto. Rooda yakkam uulli manninne daddattam hee'llitto; dambalaq lallabonne hee'oo mulli minaadabim daane'i inqee zoopha yakkam haqqaa eebba'a ki mu'uttuwwinne dabassitam hee'llo'o. Sooriy minaadab shaano'i kininne, muulli kasharinnee anginne wereeggisakka'a dadakko'oo eddechchinnee, talbi fatirinne, ereerinne wereeggisakko'oo mu'utinnee inqu yakkam bito xee'aalli kashar kininnee annanni annanni mu'uta kiinniinsi bitaa'llam hee'llo'o. Yihuxxekii Isra'ee'l daddaraanii Miiniixxi uulli arasinne, saratinne, marabinne, wee'l zaytinnee annanni annanni enjinnee kiinniinsi mu'uttuwwa dabassitam hee'llo'o. Annanni annanni mu'utinne at goddaanchi ikkitti bikkina Damaasqo'i manni Helboo'n woyi'n diqaasinnee Saahoor gereebbi oddinnee kiinniinsi mu'uta dabassitam hee'llo'o. Uuzaalanne hee'llam Daanikii Aawwaan minaadabii waatta'a bukkamaakkoo xaarinne, annanni annanni enjinnee ixaaninnee kiinniinsi mu'uta dabassitam hee'llo'o. Diidaa'n minaadab gilaasinne kiinniinsi mu'uta dabassitam hee'llo'o. Araphphekii Qeedaa'l uulli gassaanii geexxuwwa, gereebbaa fella'aa eebba'a ki mu'uttuwwinne dabassitam hee'llo'o. Saaba'ikii Raama'i daddaraanii bito xee'aalli kina, worqaa doo'llammi annanni annanni enjaa eebba'a ki mu'uttuwwinne dabassitam hee'llo'o. Kaaraa'nnek, Kaanehikii Ede'n beero'uwwikii ee'isam Saaba'i uulliinsi Ashuurikii Kilmaad beero'uwwikii daddaraan mishisoo eddechcha, muulli kashar carquwwa, angi baxinne wereeggisakko'oo eddechchuwwa, daqqakkam danaam jibbuwwa, erisa muuncamaakkoo muuncannuwwaa usseewwaa qoxxissa'a katta'a kiina biteessam hee'llo'o. Tarsees uulli markabbuwwa kiikka mu'uttuwwa iyyiisseena at awwaaxxitam hee'llitto. «Ee bikkina at dambalaq lambe'enne iyyinne kee'mmixxu markaphphisa hee'llitto. Markaba ushe'aan keese xillaalli dambalaq kolli massito'o; eelliinchi fi'l malaayyaam hafachchim ee dambalaq woronne keese iiqansukko. Kiikki annanni annanni dadda'l mu'ut, markaba ushe'aan, markaphphi woronne awwaaddam keen, iiqamu markaba dabatta'a baxxam keen, daddaraanii markaphphi woronne hee'llam gaadaanii hundim ki markabbuwwi iiqamoo ammane hundim dambalaq xillanne xuuxamookko. Markaba ushe'aan dambalaqanne xuuxantu'uuyyi laattam laachchi dambalaq kululleetanne yoo uulluwwa heekkeesookko. «Ee ammane mulli markabbuwwaa wongilluwwaa ushe'aanii markaphphi ijaajaanii hundim gibba'a dambalaq gammalanne uullitamo. Hundim ixxuwwi horoorenne dira laphphita'a gii'l buchchanne biqqiiqqitu'uuyyi sagara iimaa'lla'a ki bikkina qaraaraallisa wi'llitamo. Ki bikkina kichche'lla'a horoore hogoossaqqita'a xiddi eddechcha edde'llamo; wodaninne kichche'lla'ahim qaraaraallisa wi'llitamo. Kichchechchinne ki summa weeshshu'uuyyi wi'llitamo. ‹Dambalaq lambe'enne xuuxamu Xiiroosisa bi'ukkok ayyette? Kiikki dadda'l mu'ut uulli hundam afukkuuyyi hundem minaadaphphekam mixano wonsham hee'ukko. Lophphaakkoo amaxxii dadda'l mu'utii uulli adilluwwa goddaan issitaatto. Ihukkaarem kaba at dambalaq xillanne iiqantaa xuuxantitto; dadda'l mu'utii kiina awwaaddam hee'llo'i keenii kiinninne maqirem bi'ukko› yitu'uuyyi kiina sottamo. «Dambalaq gammalanne hee'oo manni hundim keesenne afu luwwanne muggaakko; adilluwwim lobakata baa'llo'i bikkina hambalaachchanto'ookko. Oono'o, kiikki lasaanchi muggisoohan ihu bikkina mulli minaadaphphi daddaraan keesenne osarookko; heer heerinam bi'llootto» yukko. Waa'i iina «Manchi beeto, Moollanni Waa'i Xiiroos adilina ‹Ki tiironne an waa'a yitaa bolxitaatto; dambalaq lambe'enne qophpha'n waa'uwwi adilla'n barcumannem afuuroommo yitaatto. An waa'a yittaarem at mancho bagaan waa'ayyo. Daani'eeliinsi loboka qoor ikkittoka labissaatto; kiinniinsi mat luwwim daphphaa gatoobee'eka labissaatto. Hanqinam at ki qooroominnee lachchinnee lobakat amaxxa wixxaa'llaatto; ki mu'uxxi minennem lobakat worqaa biraa tuubbaatto. Qoor daddaraanchi ikkitti bikkina kiikki amaxxi lophphaakko; ki amaxxi lophphu bikkinam bolxitaatto› yoolla yihe. «Ee bikkina an Moollanni Waa'i ixxena ‹Anim waa'i'nnoo'i qoora yitaa sawwitti bikkina keesenne hawwo afissam mogaalli diina'a eeboommo; ixxuwwim ki qooroominnee lachchinnee siiddaa wixxaa'llitti mishisoo luwwi hundam bi'issamo. Keesem xillaalli barenne ubbussamo; dambalaq woronnem jor leho letootto. Oo manni keese shiteena waattam ammanem ki gaga waa'isa issitaa xiggooda'e? Keese shoo manni anganne ubboo ammane at mancho bagaan Waa'i ikkibee'is la'amaakko. Allaggi uulli manni anganne Waa'anne amma'nnoobee'i manni leho letootto. An Waa'i kaka wocaammo› yoolla» yukko. Waa'i iina «Manchi beeto, Xiiroos adilanne afoo hawwi bikkina sottittuuyyi wi'lle; an Moollanni Waa'i ixxena ‹Qooroominne wo'mmitaattoohanee hore'em danaamoo ikkaa muccuroominam tungi hee'llitto. Waa'ina duubbi kaashshi beyyi ihu Edenanne hee'llam hee'llitto. Saardiyoona, almaaza, birille'e, margiida, Iyyaasaaphphiida, sanpheeraa baaluuraa yakkam bito xee'aalli kinneewwii worqii kiina eddechchi hee'ukko; ku keen hundim at qooccantittaanniinsim ki'isaa kiina gudaakkoohan hee'ukko. At egetteena doo'llantaattoo kiruub hee'llito; keesammi i duun kiina heechchi beyyi hee'ukko. Bito xee'aalli belecce'oo kinneewwi lambe'enne daba'llantam hee'llitto. Qooccantitti balliinsi ki'isaa jor baxo baximma asheettitti balli afeebe'e keesenne miiqakkam luwwi hee'ukkoyyo. Kiikki daddar iibbu bikkina jollinne wo'mmitaa baaxiilo baxxitto; ee bikkina haashaarammi luwwisa i duuniinsi an keese darabummo. Egeraanchi hee'llitti kiruuba, ee belecce'oo kinneewwi lambe'iinsi keese fissaa hollummo. Ki da'n mashka'inne bolxitaa hee'llitto; lomba hasimminnem ki qoorooma haashaassitto. Ee bikkina an keese uullanne aad darabummo; mulli adilluwwinam maalallat ikkoo'isa issummo. Kiikki daddar iibbaa baaxiilo baxxitti bikkina ki otossaaxxi beyyuwwi haashaaramukko; ee bikkina giir kiinniinsi firaa keesem itoo'isa issummo. Uullanne keese moo'oo kee'n illagenne hundannem keese gii'l buchchi issaammo. Keese la'oo minaadab hundim ki bikkina maalalookko; kiikki lasaanchi muggisoohane; heer heerinam bi'llootto› yitaa kure» yukko. Waa'i iina «Manchi beeto, kiikka ille Siidoonanne dabattaa hiraago woce. Moollanni Waa'i Siidoonina ‹Siidoona, an ki'nnuwwi hanenne ki'aammo. Ki'nnuwwanne issoommi luwwinne minaadab eese galaxxitamo. I oogatom baxonne hosisoommaannonnee i keesammoomaa la'isoommi ammanennee an Waa'a ihummisa laqqamo. Iikka boobana ki'nnuwwi hanenne eeboommo. Goog hundannem xiig dunamoo'isa issoommo. Kolli hundinnem ki'nnuwwanne ki'oo o'l mashka'inne ki'nnuwwi lambe'enne manni lehookko. Minaadabim an Waa'a ihummisa la'ookko» yukko. Waa'i «Ixxo gadimminne moo'oo keeniinsi ixxi kululleetanne yoo uulli hundiinsim uttisaa halluttisaa ihimminne Isra'eela hawwodookkok ka lasage ayyim hee'ooyyo. Anim Moollanni Waa'i ihummisa la'ookko» yoolla. Moollanni Waa'i «Isra'ee'l minaadab binta'a yo'i annanni annanni minaadaphphi lambe'iinsi wixxaa'oommi ammanee mulli minaadab moo'ukkuuyyim iikka keesammooma i minaadaphphi lambe'enne moo'isoommi ammanee ixxuwwi daba'llita'a i awwaadaanchi Yaaqoobina uwwummi ixxuwwi gaqqi uullanne hee'llamo. Ee beyyonne matem qulitim bee'eka hee'llamo. Minneewwa baxxamo; woyi'n kaashsha kaassamo. Ixxuwwa gado'inne moo'llam hee'llo'i ixxuwwi olla'a hundam guzumo'oommo. Ihukkaarem Isra'ee'l minaadab matem qulit bee'em amma'nnanchinne hee'llamo. Ee ammane an Waa'i ixxuwwina Moollanna ihummisa laqqamo» yoolla. Neese qeefadammummi tommi hiinchonne, tommi aganannee aga'nnaannonne tommonnee lamonnee Waa'i iina «Manchi beeto, ki ille Gibxi kolli dabattaa Gibxi adilinaa Gibxi uulli minaadabinaa hiraago woce. Moollanni Waa'i Gibxi adilina ‹Wo'i woronne dufitaa hee'lloo lob moochchicchcho, Gibxi adil Faari'oona! Oono'o, an keesenne ki'aammo. At «Abbaayyi daajji ihane; ixxo qooccummok anette» yitaatto. Ki gaangeeranne xaa'l hookko'o aagisoommo; ki daajji woronne yoo qurxumme'uwwam ki orachchonne amaxxamoo'isa issoommo. Qurxumme'uwwi ki hanenne amaxxamukkisam Abbaayyi daajjiinsi gosaasaa fissoommo. Keesee ki daajji qurxumme'e hundamii udma'anne uujoommo; ki leesham wixxaa'aa waammoo hee'oo bee'e bikkina uulli moochchinaa ammarinaa hurbaat ihona uullanne ubaa gatoo'isa issoommo. Ee ammane Gibxanne hee'oo hundim an Waa'i ihummisa la'ookko. Ki'nnuwwi Isra'ee'l minaadabina shomboqo'i biccisa ikkakko'ookko. Ixxuwwi anginne ki'nnuwwa amaddo'aare diqantakka'a ixxuwwika gudumo qassakko'o; ki'nnuwwanne bakke'llo'aarem iiqantakko'i bikkina ixxuwwik lamad lephlephukko. Ee bikkina an Moollanni Waa'i ki'nnuwwaa ki'nnuwwi fooraam diinatee bisa'inne guullaa bi'isoo gogota asse'oommo. Gibxi udma'aa mahimbee'e diihaa ihookko. Ee ammane an Waa'i ihummisa laqqakkamo. Mashka'oomim at «Abbaayyi daajji iihane; ixxo qooccummok anette» yitaatto. Ee bikkina an keesennee ki daajjennee quunqinne ki'aammo; hanaa'n qaranne yoo Migdooliinsi ki'isaa woroo'n qaranne yoo Asiwaa'n beero'i afeebe'ee Tophphe'i uulli tochchi afeebe'ee Gibxa udma'aa mahimbee'i diihaa issoommo. Mannii diinatii ee uullanne taakke'amooyyo; sor hiinchi afeebe'e mahim ee uullanne hee'ooyyo. Gibxi heer uullanne gindamu uulluwwiinsi hundiinsim diihoo'isa issoommo; Gibxi beero'uwwi hundim sor hiinchi afeebe'e gindamaa gatookko. Gibxi uulli mannam mulli minaadaphphi lambe'enne binnita'a hee'llamisa issoommo› yoolla yihe» yukko. Moollanni Waa'i «Sor hiinchiinsi lasage Gibxi uulli manna binnaa'ummi uulli hundiinsim dabaraa woroommo. Gibxanne ixxuwwina gaassi heechchi beyyi hee'u woroo'n qaranne yoo Phaaxiroosanne hee'llamisa issoommo; ee beyyonnem hoogaanchi adillaninne hee'llamo. Mulli adilluwwiinsi hundiinsem hoogaanchi adillan ihoo bikkina ee lasage mulli adilluwwa gasseena xanooyyo; hundiinsim hoffan issoommi bikkina mulli adi'l uulla gibissiiseenam xanooyyo. Hore'oomam Isra'eel hara'mmatina Gibxi marimminne hawwodukkisa sawwookko bagaan hara'mmatina od Gibxanne bakke'ooyyo. Ee ammane Isra'ee'l minaadab an Moollanni Waa'i ihummisa la'ookko» yoolla. Neese qeefadammummi lamiyyennee lama'l hiinchonnee luxxi agananne aga'nnaannonnem luxxi ballanne Waa'i iina «Manchi beeto, Baabiloo'n adil Nabukadanaxoor Xiiroosa qaseena ki'aakko; ixxi gaadaa'nnek horoor murugeebe'ee gudum omareebe'ee kee'mmaalli iyyo iyyitamisa issaakko. Ihukkaarem ixxii ixxi gogotii eehid badatto'aarem maham siiddo'oyyo. Ee bikkina Moollanni Waa'i ‹Adil Nabukadanaxoorina Gibxa higisaa uwwoommo; ee uulliinsi bogga'a massitam amaxxa hundam ixxi gogotina miqo'i issaa uwwookko. Ixxi gogot iina awwaadu bikkina Gibxa ixxena miqo'i issaa uwwoommo. An Waa'i kaka wocaammo› yoolla. «Ee ammane Isra'ee'l minaadaba qoxxisoommo; manni macceeseena xanoo beyyo hundannem kiikka sagara iimaa'llaa woccoo'isa issoommo. Ee'isinne an Waa'i ihummisa laqqamo» yukko. Waa'i iina odim «Manchi beeto, an Moollanni Waa'i kiina kuroommi ka hiraago woce. ‹Ee balli bikkina aayye!› yitaa wi'lle. Balli hincaakko; Waa'i balli hincaakko. Oo balli duuphphi balla; Mulli minaadabinam hawwi balla. Gibxanne or ihookko; Tophphe'ennem u'nnisoo hawwi ihookko. Lobakat kee'nnek leesh Gibxanne ubookko; ee uulli amaxxi hundim bogamookko; ee uulli shooho'uuwwim heekke'ookko. «Oo orim Tophphe'iinsi, Liibiyiinsi, Liidi'iinsi, Araphphi uulliinsi, Kuubiinsii iinninne hidi'l sagara aagu i minaadabiinsii miqo'ina waaru gaadaanom edaa guullookko» yukko. Waa'i «Migdooliinsi ki'isaa Asiwaan afeebe'e Gibxina hara'mmitam keen hundim oranne beedditamo; Gibxi bolxoo malaayyim hoogookko. An Moollanni Waa'i kaka wocaammo. Gibxi udma'a ihu uulli hundiinsim lophphaa udma'i ihookko; ixxi beero'uwwim gindamu beero'uwwi hundiinsim lophphaa gindamookko. Gibxanne itoo giira xanqisoommi ammanee ixxena hara'mmoo kee'n malaayyi hoogoo ammanee an Waa'i ihummisa ixxuwwi laqqamo. Ee ammane ‹Neesenne mahim afooyyo› yita'a qulitbee'e hee'llam Tophphe'i minaadaba baa'issam asse'amaano ijaajoommo. Ixxuwwim Gibxanne afoo bichchi mashka'inne hanqo'isam u'nnantamo» yoolla. Moollanni Waa'i «Gibxika lobakat minaadaba guullona Baabiloo'n adila Nabukadanaxoora asse'oommo. Ixxim mishoobee'i mogaalli gogota awwonsaa uulla bi'iseena waarookko. Ixxuwwim Gibxa bisa'inne aphphissamo. Uulloomim leeshinne wo'mmaakkoohan ihookko. Abbaayyi daajje gokkisoommo; Gibxim mogaalli manni anganne uboo'isa issoommo. Ee bikkina allaggi manni Gibxa bi'issamo. An Waa'i kaka wocaammo» yoolla. Moollanni Waa'i «Meemfoosanne yo'i qophpha'n waa'uwwaa misilluwwaa bi'isoommo; Gibxanne gassaan ka lasage hee'ooyyo; minaadabannem baachcha dilliisoommo. Phaaxroos beero'o udma'i issoommo; Xoo'aa'n beero'onnem giira xanqisoommo; Teebis beero'om guzumo'oommo. Gibxina qoxxaalli girbi ihu Pheeluusiya'm beero'onne i quunqi bala'i dillookko; Teebisikam lobakat minaadaba bi'isoommo. Gibxanne giira xanqisoommo; Pheeluusiyaamim kee'mmaallisa u'nnamookko; Teebis beero'i gindamookko; Meemfoosannem beeddoobee'i hawwi afookko. Oonikii Buubaastiis beero'ikii woraad oranne beeddookko; ee beero'uwwi mannim qeefadamookko. Gibxika malaayye iiqansimminne ixxuwwi bakke'llam qoxallano ixxuwwiinsi hooroommaare Xaafinaasa tuunsi ifiisookko; Gibxa duub ifiisookko. Ixxi beero'uwwi mannim qeefadamookko. Ee'isinne Gibxa guzumo'oommi ammane an Waa'i ihummisa laqqamo» yoolla. Neese qeefadammummi tommonnee mat hiinchonnee luxxi agan aagu lama'l ballanne Waa'i iina «Manchi beeto, an Gibxi adilika woda iiqaammo; ixxom shomboqo'innee carqinnee cacaa fayyiisoo cireessi hee'ooyyo. Ee bikkina ka lasage bisa'a ki'isoo malaayyi hee'ooyyo. Ee bikkina an Moollanni Waa'i Gibxi adilanne quunqinne ki'aammo; ixxeka kanniinsi illageen iiqamaa hee'ukkokaa fayya'i angaa lamom iiqeena gudaammo; bisa'im angiinsi uboo'isa issoommo. Gibxi minaadaba mulli minaadaphphi lambe'ennee annanni annanni uullannee binnaa'oommo. Ee'isinne Baabiloo'n adi'lleka malaayye qoxxisaa i bisa'a ixxi anganne amadiisoommo. Ihukkaarem Gibxi adi'lleka malaayye iiqoommaare ixxi diinakkichchi illagenne lehoo madaanchisa qitinookko. Gibxi adila hoogisaa Baabiloo'n adila qoxxisoommo; an Baabiloo'n adilina uwwoommi bisa'inne Gibxinne orameena ki'oo ammane manni hundim an Waa'i ihummisa la'ookko. Gibxi minaadaba mulli minaadaphphi lambe'ennee annanni annanni uullannee binnaa'oommo. Ee lasage an Waa'i ihummisa laqqamo» yukko. Qeefadammummi tommonnee mat hiinchonnee saxxi agan aagu luxxi ballanne Waa'i iina «Manchi beeto, Gibxi adilinaa xigo dut ihu ixxi minaadabinaa ‹At hinkaa'nna malaayyaamo! Kiinninne ayyi akeekameena xanam hee'ukko? At haf mishisoo caaffuwwi yoohaannisaa qeeraa'lloomim iim'n duuba afoo Liibaanoos digiphphisaa. Wo'i ee haqqichcho mutisukko; uulli wo'l wo'im li'isukko; daajjuwwi ee haqqichchi luguminne daadukko; biir uulli haqqannem daadoo'isa issukko. Ee bikkina oo haqqichchi mulli haqqi hundiinsim lobakata qeeraa'llukko; ixxi caaffuwwim geejjuwwaa qeeraa'lluwwaa ihukko. Ee haqqichchi caafannem dut cii'i do'nna baxukko; uulli moochchim hafanne wotalla qarukko. Uulli minaadab hundim ixxi hafanne usheexxam hee'ukko. Ixxek xaph lobakat wo'i yoo beyyonne kaaxxaa hee'u bikkina geejjaahii caaffuwwi haraaraahii ixxo wereeggisaa hee'ukko. Eden gannattanne hee'u digibbuwwi ixxenne akeekamooyyo; hoo'm haqqi ixxeka caaffuwwa ihooyyo; giraa'l caaffuwwi ixxi caafinne akeekixxamoohaare mahannem xigamooyyo. Eden gannatti haqquwwiinsi matinam ixxaanni'nnoo'i dan bee'e. An ixxo lobakat caaffuwwinne mishisoohan issummo; ixxi an Waa'i kaasummi Eden gannattanne yoo haqqi hundam to'achchisoohan hee'ukko› yitaa kure. «Oo haqqichchi li'aa duub afimminne bolxu bikkina an Moollanni Waa'i ixxo fissaa uunjoommo; ixxi bi'ishshisanne ixxi baxika miqisona mulli minaadaphphi gassaanchina higisaa uwwoommo. Lobakata mogaalli ikko'i mulli minaadab ee haqqichcho mutta'a ubbuussamo; ixxekim quuxxuwwi duunnuwwannee cebbuwwannee ubookko; hammuwwi iiqamaa daadoo wo'onne dufookko. Ixxi hafanne usheexxita'a hee'llam uulli minaadab hundim utta'a mattamo. Ee ubu haqqichchonne iima'n cii'i usheexxookko; caaffuwwim uulli moochchina heechchi beyyi ihookko. Ee bikkina kanniinsi eehid hinkaa'n wo'om aguta'nnim ka haqqichchisa uullichchi qeeraa'llaa iima'n duuba afoo haqqi hore'em hee'ooyyo; manni lehaa waammamoo'isa ixxuwwim lehina qoodanto'ookko. Si'oolam dillitamo» yukko. Moollanni Waa'i «Oo haqqichchi muramaa Si'oolanne dilloo ammane xilli wo'o ifiisoommaare wi'llinne waammakkamo; daajjuwwam gokkisoommo; lob daajjuwwam xoo'isoommo. Ee bikkina Liibaanoos duunnuwwanne tuunso gunguussoommo; doo'm haqqam gokkisoommo. An ee haqqichcho Si'oolanne dilloo'isa issoommi ammane ubukkuuyyi gugoo sagara macceesoo minaadab hundim huxe'ookko. Ede'nnekii Liibaanoos doo'llammi er haqqii oo haqqichchi Si'oolanne ixxuwwanne exxu bikkina liirantamo. Ee haqqichchi hafanne hee'llo'i keenii ixxena kob hee'llo'i mulli minaadabii bisa'inne beeddita'a Si'oolanne hee'llam keenonne exxiteena ixxennem dillitamo. «Oo haqqichchi Gibxi adilaa ixxi minaadaba hundamii kobi'lloohane; Edenanne hee'u haqqiinsi hundiinsim uullichchinnee daninnee ixxe'nnoo'ok hee'ukkoyyo. Ihukkaarem kaba Edenanne hee'u haqquwwisam Si'oolanne dillookko; eekke'em eesenne Waa'anne amma'nnitoo'n oranne beeddito'i keenonne exxookko» yukko. Moollanni Waa'i kaka wocaakko. Neese qeefadammummi tommonnee la'm hiinchonnee tommikii la'm aganii aagu luxxi ballanne Waa'i iina «Manchi beeto, Gibxi adilina ‹At mulli minaadaphphi lambe'enne hobbichchisa hee'llitto; ihukkaarem at dambalaq woronne hee'oo baddisoo moochchichchisa; wo'om ki lokkinne hambaaccittuuyyi borqissaatto. Lobakat minaadab wixxoo ammane kiina i shikka qaashoommo; ixxuwwim ee shikkinne keese gosaassa'a fissitamo. Keesem biir uullanne buchchanne biddiqaa'oommo; ki maaram iima'n ammarii uulli moochchii itoo'isa issoommo. Duunii cebbii shamu ki leeshinne wo'mmoo'isa issoommo. Ki xiigim duunannee boohe'uuwwannee wo'mmaa daadoo'isa issoommo. An keese bi'isoommi ammane iimane ifiisoommo; boollaankam tuunsiisoommo; eelliincho duubinne ifiisoommo; aganim caakka uwwooyyo. Ki hanennem belecce'oo iima'n caakkuwwa tuunsiisoommo; ki uullim tuunsoo'isa issoommo. An Moollanni Waa'i kaka wocaammo› yitaa sottittuuyyi kure. «At laqqoobee'i minaadaphphi lambe'enne kiikka bichchi alallaatoommi ammane lobakat minaadab u'nnamookko. Lobakat minaadab keesenne ihu luwwa moo'aa muggoo'isa issoommo; i bisa'a ixxuwwi illagenne ki'isoommi ammane ixxuwwi adilluwwi ki mashka'inne baachchinne huxe'llamo. At ubboo balla annannichchim amman hundam ixxuwwi gagina baddimminne batbatitamo» yukko. Moollanni Waa'i Gibxi adilina «Baabiloo'n adi'llek bisa'i ki hanenne waarookko. Uulli minaadab hundiinsim lobakata mogaalli ihu malaayyaam kee'nnek bisa'i ki minaadaphpheka duta guullookko; Gibxikam bolxooma sholle'nnanne dabarookko; xigo dut ihu ixxi minaadab bi'ookko. Lobakat wo'i hee'oo gadanonne allaa'lloo diinat hundam bi'isoommo; ee lasage Gibxika wo'o borqisoo minaadab te'im diinat hore'em hee'ooyyo. Ee'isam wo'uwwa xaliilsoommo; daajjuwwim zayixxisa cagagaa daadoo'isa issoommo. An Moollanni Waa'i kaka wocaammo. An Gibxa diihaa udma'aa issoommi ammanee Gibxanne hee'oo luwwi hundam bi'isoommi ammanee atii ki minaadabii an Waa'i ihummisa laqqakkamo. Kuk Gibxi bikkina sorakkam wi'llo. Mulli uulli minaadaphphi meenti Gibxinaa xigo dut ihu Gibxi minaadabinaa sottu'uuyyi wi'llitamo. An Moollanni Waa'i kaka wocaammo» yoolla. Qeefadammummi tommonnee la'm hiinchonnee luxxi agan aagu tommonnee onti ballannee Waa'i iina «Manchi beeto, Gibxi minaadaba mulli malaayyaam minaadabinne maqirem sottittuuyyi Si'oolanne geegeese» yukko. Ixxuwwinam «Ki'nnuwwi mulli keeniinsi danonne lophphitakkamonnihe? Xillanne aad dillitakka'a eesenne Waa'anne amma'nnitobee'i keeninne maqirem daabaayyehe. «Gibxina bisa'i gudaakko; xigo dut ihu Gibxi minaadab bisa'inne beeddu kee'n lambe'enne ubookko. Gibxi minaadab Si'oolanne dillitam ammane ee beyyonne hee'llam geedduwwi aa'llamo; aa'lla'a lasagem ‹Ki'nnuwwi beshinnem waallehe, dillehe! Bisa'inne beeddito'i Waa'anne amma'nnitobee'i keeninne maqirem daabaayyehe!› yitamo. «Aasoor bisa'inne beeddu ixxi gogoxxi waamminne kibbamaa ee beyyonne yookko. Waammoomim Si'ooliinsi woroon xillannette. Uullanne minaadaba dambaqissam hee'llo'i oranne beeddito'i gaadaa'n waammim ixxuwwi kululleetannette. «Xig dut ihu Eelaa'm gaadaa'nnekim waammi ee beyyonne hee'ukko; uullanne minaadaba dambaqissu'uuyyi hee'llo'i ixxuwwim bisa'inne beeddita'a eesenne Waa'anne amma'nnito'nnim Si'oolanne dillito'ookko; sholle'nne gunguu'lta'ahim waammanto'ookko. Eelaa'm gaadaaninaa xig dut ihu ixxi minaadabinaa bisa'inne beeddu kee'n lambe'enne beyyi gudaakko; ixxuwwi waammim ee kee'n kululleetannette. Hundim eesenne Waa'anne amma'nnitobee'i keenoo bisa'inne beeddito'i keenoo; ixxuwwim uullanne minaadaba dambaqissam hee'llo'i bisa'inne beeddito'i keeno; ihukkaarem kaba sholle'nne gunguu'llita'a waammanne dillitam keeninne maqirem Si'oolanne daabaayyitamo. «Meesheekikii Tuubaal minaadabii ixxuwwi gaadaa'n waamminne kibbanta'a ee beyyonne yo'o; ixxuwwim bisa'inne beeddita'a eesenne Waa'anne amma'nnito'nnim leto'i keeno; uullannem minaadaba dambaqissam hee'llo'o. Uullanne minaadaba dambaqissam hee'llo'i bikkina ixxuwwi o'l mu'utinne maqirem oohim ixxuwwi bisa'i horoo'l kollinne ixxuwwi agiraa orachchonne issakka'a waammakkam gaassi geedduwwi waammi siyya'isa waammakko'oyyo. «Ee'isam Gibxi iiqamookko; eesenne Waa'anne amma'nnoo'nnim bisa'inne beeddu keeninne maqirem daabaayyookko. «Eedoo'm adilluwwikii awwonsaa'nnekii waammi ee beyyonnette; ixxuwwik malaayyaammuwwi eesenne Waa'anne amma'nnoo'nnim bisa'inne beeddu keeninne maqirem Si'oolanne daabaayyito'ookko. «Hanaa'n qaranne gassitam keenii Siidoo'n mannii ee beyyonnette; daannoomanne bakke'lla'a dambaqa qooccitota'nnim sholle'nne gunguu'llita'a ee beyyonne daabayyito'ookko. Sholle'nne gunguu'llita'a eesenne Waa'anne amma'nnoo'nnim bisa'inne beeddita'a Si'oola dillito'i keeninne maqirem daabaayyito'ookko. «Bisa'inne leto'i Gibxi adilii ixxi gogotii ee keeno moo'lla'a Si'oolanne dillito'i kee'nnek xig dut ihu ixxi minaadabanne sabiraaxxookko» yihe yoolla Moollanni Waa'i. Odim «Gibxi adil uullanne hee'oo minaadabanne dambaqa qooccoo'isa issaa hee'ummo; ihukkaarem ixxii ixxi gogotii eesenne Waa'nne amma'nnitoo'nnim oranne beeddito'i keeninne maqirem leta'a daabaayyitamo» yihe yukko. Moollanni Waa'i kaka wocaakko. Waa'i iina «Manchi beeto, ki minaadabina ‹Mat uullanne or ki'oo'isa issummita'n ee uulli minaadabim ixxuwwiinsi mat mancho qoto'aa egerona doo'llitota'n oo manchim diina'i waarukkuuyyi moo'aa minaadab gaga ege'llona o'l xurumba fugaa lasonne ayyi manchim ee sagara macceesaa gaga ege'llimma hoogimminne diina'i daafa ubbuusaa lehuta'n bi'ishshi ixxi gaqqaneme. Ege'llimma hoogimminne lehukkok ixxi gaqqi huushanchinnetteme; ee xurumbi sagara macceesaa ege'lluta'n bichchiinsi xoram hee'ukko. Ihukkaarem oo egeraanchi diina'i waarukkuuyyi moo'aa minaadab gaga ege'llona xurumba fugubeeta'nii ee minaadabiinsim mat manchi ee oranne lehuta'nnii oo manchi ixxi baaxiilinnem lehookko. Ihukkaarem ee lehu manchi xiigina ee qoto'aa egeroo mancho an xa'mmoommo› yitaa kure. «Manchi beeto, oono'o, an keese Isra'ee'l minaadabina egeraanchi issaammo; ee bikkina an kiina kuroommi woshsha macceessaa ixxuwwina qoxxissaa kure. Baaxiilaanchina ‹Baaxiilaancho, hanqo'isam at letootto› yumta'n oo baaxiilaanchi baaxiiliinsi daba'llona qoxxissaa kuttitbeelas ixxi baaxiilinnem lehookko; ixxi xiiginam an keese xa'mmoommo. Ihukkaarem oo baaxiilaanchi baaxiiliinsi daba'llona kuttaa lasage daba'llubeelas ixxi baaxiilinnem lehookko; atim ixxi xiiqqi bikkina xa'mmantooyyo» yukko. Manchi beeto, Isra'ee'l minaadabina «Ki'nnuwwi ‹Ni hawwojjii baaxiilii niina kee'mmaakko; e bikkina neese bi'nneenatte; hinkid hee'nneena xannoommo› yitakko'ookko. ‹Hanqinam an hee'oommi Waa'a; baaxiilaanchi baaxiilo baximma uraa foorinne hee'onatte bagaan ixxi lehonne an liiramoommoyyo. Ee bikkina Isra'ee'l minaadaba, ki'nnuwwi jor baxo ullehe; mahina lehimma hassakkamuulla?› yitaa kure. «Kabadem manchi beeto, muccur manchi baaxiilo baximma asheerulas illagee'n er bax ixxo gatisooyyo; baaxiilaanchim baaxii'l googiinsi daba'llulas illagee'n baaxiil ixxena qolat ihooyyo. Muccur manchim baaxiilo baximma asheerulas illagee'n muccuroom ixxo gatiseena xanooyyo. Muccur manchi hanqo'isam heechcha siixxoo'isa wocumta'nnim ixxi ‹Illagee'n muccuroom iina ihookko› yaa baaxiilo baximma asheerulas ixxeka illagee'n er baxiinsi matom sawwoommoyyo. Ee bikkina ixxim ixxi baaxii'l mashka'innem lehookko. Ee'isam mat baaxiilaanchi hanqo'isam lehoo'isa wocumta'nnim oo manchi baaxiilo baximma uraa hanqo'i oogato'o oogatulasii xabbeen ihaakkoo luwwa issulasii oohim bada'n bikkina dabaa amadu luwwaa game'u luwwaa dabarulasii baaxiilo baximma uraa heechcha uwwoo seera egerulasii hanqo'isam heechcha siixxookko bagaan lehooyyo. Ixxi baaxiiliinsi matom sawwoommoyyo; hanqo'i oogato'o oogatulasii xabbeen ihaakkoo luwwa issulasii hanqo'isam heechcha siixxookko. «Ihukkaarem ki minaadab ‹Waa'ik goog hanqo'aneyyo› yoolla. Hanqoomam hanqo'an ihubee'ek ixxuwwi googo. Muccur manchi ixxeka muccuroo'm baxo uraa baaxiilo baximma asheerulas ixxi bax bikkina lehookko. Baaxiilaanchim baaxiilo baximma uraa hanqo'i oogato'o oogatulasii xabbeen ihaakkoo luwwa issulasii heechcha siixxookko. Ihukkaarem ki'nnuwwi Isra'ee'l minaadab ‹Waa'ik goog hanqo'aneyyo› yitakko'ookko. Ee bikkina ki'nnuwwanne annannichchonnem baxis baxisam oogatoommo» yukko. Neese qeefadammummi tommonnee la'm hiinchonnee tommi agan aagu onti ballanne Yerusaaleemiinsi xoraa waaraakkoo mat manchi Yerusaaleem qeefadamukkisa kurukko. Xoraa waaru manchi i beyyo afeena mat balli hee'ukkuuyyi ee hiimo Waa'ik malaayyi i beyyo waarukko. La'm balli dara oo manchi i beyyo afoo'nnim Waa'i i suume fooqaa'ukko; ee bikkina ee ammaniinsi ki'isaa an wocimma xanummo. Waa'i iina «Manchi beeto, Isra'ee'l uullanne gindamaakkoo beero'uwwanne hee'llam minaadab ‹Abrihaam mexxo'i mat manchi ihaa hee'ukkisam uulla lagaa'ukko; ihukkaarem neese dut inkummi bikkina hanqo'isam ku uulli ni gulumma› yitamo. «Ee bikkina ixxuwwina ‹Maara xiiginnem ittakkamuulla; qophpha'n waa'ina otossitakkamuulla; manna shitakkamuulla. Eebikkima ku uulli ni gulumma yitakkeena hinkid xantakkamo? Ki'nnuwwi bisa'anne amma'nnitakkamuulla; shigigaa'oo baxo baxxakkamuulla; mat mullaanni meentichchonne saa'oolla. Eebikkina ku uulli ni gullumma yitakkeena hinkid xantakkamo?› yitaa kure. «Hanqinam an hee'oommi Waa'a; gindamu beero'uwwanne hee'llam minaadab hundim hanqinam oranne beedditaman ihukkisa qoxxissaa kure. Hax uulli minaadab bii'l moochchina hurbaat ihookko; duunnuwwannee girbuwwannee maaxanto'i keenim boobaninne beedditamo. Uulloomam udma'aa diihaa issoommo; ixxuwwi bakke'llam malaayyim beeddookko. Isra'ee'l duunnuwwim ayyim eeheen higoobee'i diih ihookko. Ixxuwwi issito'i shigigaa'oo luwwi hundem mashka'innem ka uulla udma'aa diihaa issoommi ammane an Waa'i ihummisa laqqamo» yukko. Waa'i iina «Manchi beeto, ki minaadab beero'i ooxxi gadanonnee ixxuwwi mi'n nafarannee atooraroollak ki bikkinatte; ixxuwwina'i ixxuwwim ‹Waallehe, Waa'iinsi mah assi waaruda'e macceensona› yaqqantamuulla. Ee bikkina mulli minaadab issoo'isam i minaadabim at woccoo sagara macceeseena wixxookko; ihukkaarem at kuttoo woshsha baxonne hosissamoyyo. Ki woshsha iittoo labookko; ihukkaarem gagina gollimma urooyyo. Oono'o, at ixxuwwina iittakkam er mazmuu'llisaa diitta'a erisa lelloo manchisaa ikkaatto; ki woshsha macceessamo bagaan baxonne hosissamoyyo. Ihukkaarem ki woshshi hanqo'isam wo'mmookko; hanqi ihaa wo'mmoo ammanem ixxuwwi lambe'enne hiraagaanchi yoo'isa laqqamo» yukko. Waa'i iina «Manchi beeto, Isra'ee'l allaaraanonne hiraago woce. An Moollanni Waa'i ixxuwwina yoommi luwwi hundam ‹Allaachcha abooyyimmaa egerimmaa uttakka'a ki'nnuwwi gaga abooyyaqqitakkam Isra'ee'l allaaraanina aayye! Di'iru keeno ittakkamo; ixxuwwi oddinne baxamu eddechcham edde'llakkamo. Geejju keeno duttakka'a ittakkamo. Ihukkaarem allaachchooma er hix yoo beyyonne allaattakkamoyyo. Hoogu keeno qoxxissakko'oyyo; xissu keenina qaraare agissakko'oyyo; iiqamu keeno caccakko'oyyo. Huushamu keeno dabattakko'oyyo; bi'u keenom hassakko'oyyo. Eekka issitakkam bikkenne wor amajjinnee monginnee gassitakko'o. Gereebbi allaaraancho hoogaa binnu bikkina bii'l moochchina hurbaat ihaakko. Ee bikkina i gereebbi duunnuwwanne hundannem karkaadaakko; uulli hundannem binnaakko. Hasaa wixxaa'oohim bee'e› yitaa hiraage. «Kabadem allaaraano, an Waa'i ki'nnuwwina wocoommi woshsha macceessehe. An heer heerina hee'oommi Moollanni Waa'a! I allaaraan i gereebba allaarimmaa egerimmaa utta'a xale'i ixxuwwi gaga abooyyaqqitam bikkina bi'u i gereebba hasaa egeroo allaaraanchi bee'u bikkina bii'l moochchina hurbaat ihaakko. Ee bikkina allaaraano, macceessehe. An Moollanni Waa'i i gereebbi allaaraano guzumo'oommo; i gereebba od hore'em allaattambee'isa issoommo. Ee lasage oo allaaraan ixxuwwi gaga abooyyaqqitamoyyo; i gereebbim ixxuwwina hurbaat ihoobee'isa ixxuwwi suumiinsi ubbuusisoommo. «Moollanni Waa'i ‹An i gagim i gereebba hasoommo; ixxuwwam erisa allaaroommo. Gereebba allaaraan ixxuwwi gereebba binnu beyyiinsi wixxaa'aa woroo'isam anim i gereebba hasoommo; duubannee gambabbaakkoo tuunsi ballannee binnu beyyi hundiinsim wixxaa'oommo. Mulli minaadaphphi lambe'iinsii uulli hundiinsii wixxaa'aa ixxuwwi uulla woroommo; wo'i yoohanee heechchina danaamoo ihu Isra'ee'l uulli er duunnuwwanne allaaroommo. Er allaachchi biiranne allaaroommo; allaachchi biirim Isra'ee'l duunnuwwannetti ihookko. Ee duunnuwwannem allaa'llaa er beyyonne gii'mmookko. An gagoomim i gereebbina allaaraanchi ihoommo; usheexxoo'isam issoommo. An Moollanni Waa'i kaka wocaammo› yoolla. «Bi'u keeno hasoommo; huushamu keeno dabaraa woroommo; iiqamu keeno caccoommo; hoogu keeno qoxxisoommo. An hanqo'i allaaraanchi ihummi bikkina mulli keeno hawwodimminne di'iru keenoo malaayyaammuwwaa bi'isoommo. «Moollanni Waa'i ‹I gereebba, an ki'nnuwwanne oogatoommo; er gereebbannee jor gereebbannee fella'annee mulli gereebbannee oogatoommo. Er allaachchi biiriinsi ittakko'ok hoffe'ukkaarennihe gatukkoka hancaacantakko'ok? Lintaalli wo'om aggakka'a lasonne mulleka borqisimmi hasisoohonnihe? Ee bikkina mulli i gereebbi ki'nnuwwi hancaacantakko'i hixe itoollaa borqissakko'i wo'o agoollaa› yoolla. Ee bikkina an Moollanni Waa'i di'irukkaannonnee nacu gereebbannee oogatoommo. Ki'nnuwwi hoogu gereebba midaadinnee guduminnee gafe'llakkamo; buudinne qassakkaahim hollitakkamo. Ihukkaarem an i gereebba gatisoommo; ka lasage ayyim bogaa massooyyo. Er gereebbannee jor gereebbannee oogatoommo. Iina awwaadaanchi Daawiiti'nnoo'i adila allaaraanchi issaa ki'isoommo; ixxim abooyyukkuuyyi allaarookko. An Waa'im ixxuwwina Moollanni ihoommo; iina awwaadaanchi ihu Daawiiti'nnoo'i adilim ixxuwwa awwonsookko. An Waa'i kaka wocaammo. Xumminne hee'llam hidi'l sagara ixxuwwinne aagoommo; ee uulliinsim bii'l moochcha holloommo. Ee bikkina i gereebbi xumminne allaa'llaa hee'oo'isaa haqqor hundanne gareenaa xanookko. «Ixxuwwaa i duu'n kululleetanne yoo uulluwwaa maasse'oommo; xeenam ixxuwwina ammaninne ga'nnisoommo; oohim maassi xeen ihookko. Haqqi mishookko; abuulli uullim danaam atoota uwwookko. Annannichchim ixxi gaqqi uullanne xumminne hee'ookko; i minaadaphpheka gaanjaqqa iiqaa agiddaninne gassitam kee'n angiinsi gatisoommi ammane an Waa'i ihummisa laqqamo. Ee lasage mulli minaadab bogooyyo; moochchi shaa gosaasooyyo; xumminne hee'llamo bagaan ma'lluwwim baddisooyyo. Ee'isam od sibaaraan ikkambee'isa danaam atoota wixxaa'llam harish uulla ixxuwwina uwwoommo; mulli minaadabim gadooyyo. Ee ammane an ixxuwwina Moollanni Waa'i ixxuwwinnetti ihummisaa Isra'eel iina minaadab ihukkisaa manni hundim la'ookko. An Moollanni Waa'i kaka wocaammo. «Kinnuwwi i gereebba; i allaachchi gereebba yummi Isra'ee'l minaadaba; an ki'nnuwwina Moollanna» yoolla Moollanni Waa'i. Waa'i iina «Manchi beeto, Eedoo'm duu'n kolli daba'llitaa minaadabina hiraago woce. An Moollanni Waa'i ‹Eedoo'm minaadaba, oono'o, an ki'nnuwwanne ki'aammo; ki'nnuwwi uullam udma'aa diihaa issoommo. Beero'uwwam gindansoommo; uullam diihisoommo. Ee lasage an Waa'i ihummisa laqqakkamo› yoommoka kure. «Isra'eel baaxii'l mashka'inne guzumo'amu ammane gaassi baado amaddakka'a ixxuwwa bisa'ina higissakka'a uwwitakko'ookko. Ee bikkina Hanqinam an hee'oommi Waa'a; an ki'nnuwwa lehina higisaa uwwoommo; shoo keenim hollansookko. Xiiga dunimma sabbakkobee'i bikkina ki'nnuwwa shoo keen hollansookko. Edoo'mmeka duunaam uulla udma'aa diihaa issoommo; ayyim eeheen higoobee'isam issoommo. Duunnuwwa hundam leeshinne ifiisoommo; oranne beeddu manni leeshim duunnuwwanne, cebbuwwannee daajjuwwannee wo'mmookko. An ki'nnuwwika uulla heer heerinam udma'i issoommo; od ki'nnuwwi beero'uwwanne ayyim hee'ooyyo. Ee ammane an Waa'i ihummisa laqqakkamo. «An Moollanni eehe'enne hee'ummuuyyim ki'nnuwwi Yihuxxekaa Isra'ee'l minaadabaa ixxuwwi uullinne maqirem ni gaqqane yitakka'a lago aa'llakkeena sawwitakko'ookko. Ee bikkina hanqinam an hee'oommi Waa'a; I minaadaphpheka baado amaddakka'a ixxuwwanne quuqqakko'i quunqisinnee to'achchisinnee ki'nnuwwa guzumo'oommo. Ixxuwwim ki'nnuwwa guzumo'oommi ammane an Waa'i ihummisa laqqamo. Ki'nnuwwi ‹Isra'ee'l duunnuwwi tigaakko; niinam hurbaat ihaa uwwamaakko› yitakka'a gado'inne woccakko'oka an Waa'i macceesummisa ee ammane laqqakkamo. Eesenne tobbe'llakko'ookko; iggimminnem woccakko'ookko; anim eekka macceesaammo» yukko. Ee bikkina an Moollanni Waa'i «Heer uulli hundim liiramukkuuyyi ki'nnuwwi uulli udma'i ihoo'isa issoommo. Isra'ee'l uulli udma'i ihu ammane liirantakko'isam anim See'iir duunaa Eedoo'm uullaa hundam udma'i issoommo. Ee lasage an Waa'i ihummisa ayyim la'ookko» yukko. Waa'i iina «Manchi beeto, Isra'ee'l duunnuwwina hiraago woce. An Moollanni Waa'i ixxuwwina kuroommi woshsha macceessona kure. Isra'ee'l diina'i ‹Oono'o, oo gaassi duunnuwwi niihan ihaakko!› yitamuulla. «Ee bikkina an Moollanni Waa'i Isra'ee'l duunnuwwina ‹Allaggi minaadab kolli hundinnem ki'nnuwwi uulla gindita'a udma'i issito'i bikkina ki'nnuwwi uulli mulli minaadaphphan ihaakko. Ki'nnuwwannem manni osaroo'isaa naacoo'isaa ikkakko'ookko› yoommoka hiraago woce. Ee bikkina Isra'ee'l duunnuwwa, i sagara macceessehe; ki'nnuwwi lob duunnuwwii hoffi duunnuwwii, daajjuwwii cebbuwwii udma'aa diihaa ihaa mulli minaadab boganchinaa osachchinaa ikkakko'i beero'uwwim macceessehe. «Kaba an Moollanni Waa'i Eedoomanne hundannemii mulli minaadabannee malaayyaamisa quuqaa wocaammo; ixxuwwi lobakat liiranchinnee gado'innee i uulla ixxuwwi gulummi issito'ookko. «Ee bikkina Isra'ee'l duunnuwwina, hoffi duunnuwwina, daajjuwwinaa cebbuwwinaa hiraago woce; mulli minaadab ixxuwwa game'llito'i bikkina an malaayyaam quunqinne ixxuwwanne ki'aammo. Ee bikkina ki'nnuwwi kululleetanne hee'llam mulli minaadab hundim sholle'llaman ihukkisa an Moollanni Waa'i hide'aa kuroommo. Ihukkaarem Isra'ee'l duunnuwwa, i minaadab Isra'eel daba'lloo amman afaakkoo bikkina ki'nnuwwi lattakkamo; misham ixxuwwina uwwitakkamo. Oono'o, an ki'nnuwwinnette; ki'nnuwwam er illinne moo'oommo. Ki'nnuwwi uulli abuullamaa wix wixamookko. An Isra'ee'l minaadaba fikkaannisoommo; diihaa hee'u beero'uwwi hundim daba'llaa baxamoohaare ki'nnuwwi hee'llakkamo. Mannaa diinatee fikkaannisoommo; dut ooso qattakkamo. Eekke'em gaassi hee'llakko'aanniinsi loboka hee'llakkamo; eraa'llaanniinsi loboka goddaan ikkakkamisa issoommo. Ee ammane an Waa'i ihummisa laqqakkamo. I minaadab Isra'eela, odim ki'nnuwwi gulummanne hee'llakkona ki'nnuwwa dabaraa woroommo. Uullim daba'llaa ki'nnuwwan ihookko; od manni bee'an ihooyyo. «An Moollanni Waa'i yoommok kane. Minaadab ‹Ku uulli manna itoohane; minaadabam qachchi bee'i gatisoohane› yam hee'ukkok hanqame. Ihukkaarem ka lasage ku uulli manna itoohane ihooyyo; minaadabam qachchibee'an issooyyo. An Moollanni Waa'i kaka wocaammo. Od mulli minaadab keesenne naacooyyo; gado'innem keese ayyim moo'ooyyo. Ki minaadabinam od qolat ikkooyyo. An Moollanni Waa'i kaka wocaammo» yukko. Waa'i iina «Manchi beeto, Isra'ee'l minaadab ka uullanne hee'llu'uuyyi awwaad bee'i heechchinnee jor baxinnee uullooma haashaassito'o; i illagennem ixxuwwik taakki mat meentichchok aga'n xur waaraa haashaaranto'aannis hee'ukko. Ixxuwwi ka uullanne xiiga dunto'i bikkinaa qophpha'n waa'uwwina otossito'uuyyi haashaassito'i bikkinaa iikka malaayyaam quunqa ixxuwwanne dilliisummo. Ixxuwwik heechchi ogorii baxii jor ihu bikkina ixxuwwanne oogatummo; allaggi manni uullannem binnitamisa issummo. Oo allaggi uulli minaadabim ‹Ku keen Waa'ina minaadaba ikko'aarem ixxuwwina uwwu uulliinsi fitto'ookko› yita'a iikka keesammi summa haashaassito'ookko. Ihukkaarem Isra'ee'l minaadab matto'i minaadaphphi lambe'enne iikka keesammi summa haashaassiisso'is eese kichche'isoolla. «Oono'o, an Moollanni Waa'i ixxuwwi bikkina yoommi luwwi hundam ‹Ka lasage ki'nnuwwina issoommi luwwi, ki'nnuwwi mattakko'i beyyi hundannem haashaassiissakko'i i keesammi summi bikkinatte bagaan ki'nnuwwina Isra'eelinayyo. Mulli minaadaphphi lambe'enne haashaaramaa hee'ukkoka ki'nnuwwi haashaassiissakka'a hee'llakko'i i lob summi keesammooma moo'isoommo. Ee lasage ki'nnuwwinne ixxuwwi illagenne iikka keesammooma la'isoommi ammane ixxuwwi an Waa'a ihummisa laqqamo. Adilla'n gassi uulli hundiinsim fissaa wixxaa'imminne ki'nnuwwi uulla dabaraa woroommo. Ki'nnuwwanne muccur wo'o wiximminne qophpha'n waa'ina otossimmiinsii haashaaranchiinsii hundiinsim muccuttakkamisa issoommo. Ki'nnuwwina haareechchi wodano uwwoommo; haareechchi ayyaanam ki'nnuwwi woronne dissoommo. Ki'nnuwwiinsi ki'nnisa qoxxaakkoo wodano fissaa maa'llisa qacaakkoo wodano uwwoommo. I Ayyaana ki'nnuwwanne gassoommo. Ki'nnuwwina uwwummi seeraa siyya'aa hundam qoxxitakka'a egettakkamisa issoommo. Ee lasage gaassi ki'nnuwwi anno'ina uwwummi uullanne hee'llakkamo. Ki'nnuwwi i minaadaba ikkakkamo; anim ki'nnuwwina Moollanna ihoommo. Haashaassoo luwwi hundiinsim gatisoommo. Kanniinsi eehid sibaar ki'nnuwwanne afoobee'isa hurbaat ki'nnuwwina lophphoo'isa issoommo. Sibaa'l mashka'inne mulli minaadab ki'nnuwwa game'llitambee'isa haqqi mishii hurbaaxxi atootii lophphoo'isa issoommo. Ki'nnuwwika jor haalataa jor baxoo hundam sawwitakkamo; ki'nnuwwi baaxii'l bikkinaa haashaarammi bax bikkinaa ki'nnuwwi gaga shigigitakkamo. An ka hundam issoommok ki'nnuwwi bikkinatti ihubee'isa laqqehe. Isra'eela, ki'nnuwwi bax bikkina tuullehee sholle'llehee› yihe» yukko. Kaka Moollanni Waa'i wocaakko. Moollanni Waa'i «An ki'nnuwwa baaxiil hundiinsim muccussoommi ammane gindamu beero'uwwi hundam dabattakka'a baximminne ki'nnuwwi beero'uwwi hundannem hee'llakkamisa issoommo. Ki'nnuwwi uullinne higoo manni moo'am hee'u udma'i uulli abuullamookko. Moo'oo manni hundim ‹Udma'i ihaa hee'u ku uulli hinkid Ede'nnisa ihukko! Illageen udma'a, gindammaa diihaa hee'u beero'uwdu hinkid manni hee'oohanee girbamaakkoohanee iheena xanukko?› yookko. Ee ammane bichchiinsi gatta'a ki'nnuwwi kululleetanne hee'llam mulli minaadab gindamu beero'uwwa dabaraa baxummohii udma'i uulluwwam latoo'isa issummohii an Waa'i ihummisa laqqamo. An Waa'i ka hundam issoommisa wocaammo; eekkam issoommo» yukko. Moollanni Waa'i «Mat ammane Isra'eel odim eese uunxitamisa issoommo; ixxuwwi xigom gereebbi allaachchisa fikkaannisoommo. Ugudduwwanne kitimina hincoo gereebbi Yerusaaleemanne wo'mmoo'isam gindamaa hee'u beero'uwwannem manni wo'mmaakkoohan ihookko. Ee ammane an Waa'i ihummisa laqqamo» yoolla. Waa'ik malaayyi eesenne ihukko; ixxi Ayyaanim eese massaa miq tuubamaakkoo cebbanne dissukko. Ixxim ee miqqeewwa iina moo'isukko; anim lobakata gogaakkoo dut miqqeewwa moo'ummo. Ixxim eese «Manchi beeto, ku miqqeewwi daba'llaa fooraam iheena xanoohonnihe?» yaa xa'mmukko. Anim «I Moollanni Waa'a! Kaka laqqoottok xale'i atette» yaa dabarummo. Waa'im «Ka miqqeewwina ‹Ki'nnuwwi gogaalli miqqeewwa, Waa'ika sagara macceessehe› yitaa hiraago woce. An Moollanni Waa'i ‹Ki'nnuwwina foore uwwaa fooraammuwwi ikkakkamisa issoommo. Bu'anaa maaraa eddeesaa omachchinne eddesoommo; foorem uwwaa fooraammuwwi ikkakkamisa issoommo. Ee ammane an Waa'i ihummisa laqqakkamo› yitaa kure» yukko. An ijaajamummisam hiraago wocummo; hiraago wocimma asheerummisam hashaashshanchi sagar macceesamukko; miqqeewwim wixxaa ixxina'i ixxim beyyi beyyo amadukkuuyyi amaxxamimma asheerukko. Moo'ummuuyyim oo miqqeewwi bu'aninne, maarinnee omachchinnee ifiisamukko. Ihukkaarem foor hee'ukkoyyo. Ee lasage Waa'i iina «Manchi beeto, hafachchina hiraago woce; hafachchi soorem qariinsim waaraa ku shakko'i keen fooraam ihona ixxuwwanne hafachchona kure» yukko. Anim ijaajamummisam hiraago wocummo; ixxuwwannem foor aagukko; hundim fooraammuwwi ikka'a uullito'o; lobakat gogotam ikko'o. Waa'i iina «Manchi beeto, Isra'ee'l minaadab ka miqqeewwisa; ixxuwwi ‹Oono'o, ni miq gogaakko; niina ka lasage od neeyyat bee'e; ni woshshim beeddaakko› yito'ookko. Ee bikkina i minaadabina Isra'eelina hiraago woce. An Moollanni Waa'i ixxuwwika waammuwwa fooqaa'aa ixxuwwa fissaa Isra'ee'l uulla dabaraa woroommisa kure. I minaadab waammanto'i waammi hundam fooqaa'aa fissoommi ammane an Waa'i ihummisa laqqamo. Foore ixxuwwina uwwaa fooraammuwwi ikkamisa issoommo; ixxuwwi gaqqi uullannem hee'llamisa issoommo. Ee lasage kaka wocummokii issoommokii an Waa'i ihummisa laqqamo. Kaka an Waa'i wocaammo» yukko. Waa'i iina «Manchi beeto, mat bicco massitaa ixxonne ‹Yihuxxanee ixxenne maqir ihu Isra'ee'llanee› yitaa kitaabe. Ee'isam mulli bicco massitaa ixxonne ‹Yooseefane oohim Efireemanee ixxenne maqir ihu Isra'ee'llanee› yitaa kitaabe. Ee lasage mat biccisa ikkona lamom edansitaa ki anganne amade. Ki minaadabim kuk mah ihukkisda'e kuttona keese xa'mmitam ammane an Moollanni Waa'i Efireem anganne yoo Yooseefikaa ixxuwwinne maqir ikko'i Isra'ee'l oosikaa bicco massaa Yihuxxi biccinne edansaa mat issaa i anganne amadoomman ihukkisa kure. «Kitaabbitti lamem biccuwwam ki anganne amaddaa minaadab moo'oo'isa isse. An Moollanni Waa'i iina minaadab ihu Isra'eela mulli minaadaphphi lambe'enne binnu beyyi hundiinsim wixxaa'aa ixxuwwi gaqqi uulla dabaraa woroommisa kure. Isra'ee'l uullannee duunnuwwannee mexxo'i mat adi'l minaadab ikkamisa issoommo. Hundam mat issaa gassoo xale'i mat adil hee'ookko. La'mmaagge lam minaadab ikkamoyyo; ixxuwwi adillanim lam beyyonne baxxansamooyyo. Ixxuwwi od qophpha'n waa'uwwinne, shigigaa'oo luwwuwwinnee annanni annanni baaxiilinnee ixxuwwi gaga haashaassitamoyyo; boqqoominne baxxo'i baaxiil hundiinsim gatisaa muccussoommo. Ee ammane ixxuwwi i minaadab ikkamo; anim ixxuwwina Moollanna ihoommo. I awwaadaanchi Daawiiti'nnoo'i adil ixxuwwanne adil ihookko; hundinam mat allaaraanchi hee'ookko. Iikka seeraa siyya'am amma'nnanchinne egettamo. I awwaadaanchi Yaaqoobina uwwummaannonnee ixxuwwi gaassi anno'im hee'llo'i uullannee hee'llamo. Ee uullanne ixxuwwi, ixxuwwi oosii ixxuwwi shumo'ii heer heerinam hee'llamo. Iina awwaadaanchi Daawiiti'nnoo'i adilim heer heerinam ixxuwwanne adil ihookko. Ixxuwwinnem xummi hidi'l sagara aagoommo; oohim heer heeran ihookko. Ixxuwwa maasse'oommo; fikkaannisoommome. Keesammi i Minim heer heerina ixxuwwi lambe'enne qoxxaa hee'oo'isa issoommo. Anim ee beyyonne ixxuwwinne hee'oommo; ixxuwwinam Moollanni ihoommo; ixxuwwim iina minaadab ikkamo. Keesammi i Min ixxuwwi lambe'enne heer heerina hee'oo'isa issoommi ammane an Waa'i Isra'eela iihan issaa doo'lloomman ihukkisa mulli minaadab la'ookko» yukko. Waa'i iina «Manchi beeto, Maagoog uullanne hee'oo Meesheekikaa Tuubaal minaadabaa awwonsaanchi ihu Googanne hiraago woce. An Moollanni Waa'i ixxonne diina'oominne ki'oomman ihukkisa kure. An ixxi aqonne hookko'o aagisaa ixxoo ixxi gogotaa hundam laso dabaroommo. Ixxek gogot faradinnee o'l eddechcha edde'llo'oo faradaaninnee dut hee'llo'o; ee'isam gaadaan annannichchim hoffokaa lob agiraa amadda'a bisa'a lade'llo'oo keen hee'llo'o. Agira amadda'a o'l qoobe'e horoorenne issito'oo Faariisika, Tophphe'ikaa Liibiyikaa gaadaano hundam, Goomeeraa ixxi gogotaa hundam, hanaa'n qaranne qee'llonne hee'oo Beet-Toogaarii'm minee ixxi gogota hundamii ee'isam lobakat minaadabaa kiinninne maqirem fissoommo. Ee bikkina ixxii ixxi ijaacci woronne yo'i gogotii hundim guddona. Ixxim ixxuwwina awwonsaanchi ihona kure. Gudoohim udma'i ihaa hee'u Isra'ee'l uulla lobakat ammaniinsi lasonne qasona ijaajoommi bikkinatte; uulloomim lobakat ammanina udma'i ihaa hee'ukko; minaadabim mulli uullanne hee'oo beyyiinsi waaraa Isra'ee'l uullanne yoo duunnuwwanne xumminnem yookko. Ixxii ixxi gogotii ee'isam ixxenne yo'i dut minaadabii womoo'llisa gugga'a waattamo; duuphphisam uulla ifiissamo» yukko. Moollanni Waa'i Googina «Oo doolli afoo ammane at sawwitaa jor qoodo'o qooddootto. At ‹Oot bee'i olla'uwwa amadoommo; oot, laqqo'ii goocii bee'em quloo'n xumminne hee'oo minaadabam qasoommo. Mulli minaadaphphi lambe'iinsi daba'llita'a waatto'oo mannim uulli lambe'enne yo'o; ixxuwwinam fooraam diinaxxekii annanni annanni mu'uxxekii amaxxi yoohane. Udma'i hee'u uullim kaba manni hee'oohan ihaakko; ee bikkina qeefado'o qeefadeenaa amaxxa bogeenaa ee minaadabam qaseenaa sawwaammo› yitootto. Saaba'ikii Deedaanikii ee'isam Tarsees daddaraanii harde'i gaadaanii ‹Qeefado'o massiteena waattittonnihe? Biraa worqaa, fooraam diinatee annanni annanni mu'utaa oohim lobakat qeefado'o gugguttam manna wixxaa'llittonnihe? yitamo» yoolla. Ee bikkina manchi beeto, Googina «Moollanni Waa'i ‹Ee ammane i minaadab Isra'eel xumminne hee'oo'isa moo'llaa ki'llootto. Hanaa'n qaranne qee'llonne hee'lloo beyyiinsi hundim faradonne saa'llaakkoo dut minaadaphpheka malaayyaam gogota awwonsitaa waattootto. I minaadab Isra'eelanne uulla ifiisoo duuphphisa ikkaa waattootto. Googa, lasaanchi doollenne i uullanne waattoo'isa issoommok ixxuwwi illagenne iikka keesammooma la'isoommi ammane uulli minaadab hundim la'onatte› yoolla yitaa hiraago woce» yukko. Moollanni Waa'i «I minaadabanne Isra'eelanne at ki'lloo'isa issoomman ihukkisa iina awwaadaan ikko'i Isra'ee'l hiraagaaninne gaassi doollenne dut ammane hiraago wocaammo» yoolla. Moollanni Waa'i «Goog Isra'eela qaseena ki'oo ammane iikka malaayyaam quunqa ixxonne dilliisoommo. Ee ammane Isra'eelanne kee'mmaalli uulli huxechchi ihoo'isa i to'achchinnee gii'llisa aphphoo quunqinnee alallaatoommo. Danbalaq qurxumme'i, iima'n cii'i, uulli moochchi, annanni annanni diinatii uullanne hee'oo mannii i illagenne huxe'ookko. Duunnuwwi tigookko; baalluwwi toroshamookko; kininne ootamu oottuwwi gindamookko. I duunnuwwanne hundannem Googanne bisa'i ki'oo'isa issoommo; ixxi gogotik annannichchikim bisa'i ixxi beshichchom qasookko. Boobaninnee lehinnee guzumo'oommo; ixxonne, ixxi gaadaanonnee maqire hee'llo'i mulli minaadabannee malaayyaam xeena, baradaa gii'l hiramaxaa ga'nnisoommo. Ee'isinne an lobanee keesammaa ihummisa la'isoommo; lobakat mulli minaadabinam i gaga la'isoommo. Ee lasage ixxuwwi an Waa'i ihummisa laqqamo» yoolla. Moollanni Waa'i «Manchi beeto, Meesheekaannonnee Tuubaal minaadabinaa gassaanchi ihu Googanne hiraago woce. Ixxonne ki'ummisam kure. Ixxo laso dabaraa gosaasoommo; qee'l ihu hanaa'n qariinsi woraa Isra'ee'l duunnuwwanne gaadoo'isa issoommo. Ee lasage ixxo aphphisaa ixxeka tokkaashshe'e qeddi angiinsi xiyyam makki angiinsi ubbuusisoommo. Googii ixxi gogotii ee'isam ixxenne maqir ikko'i o'l beshii hundim leta'a Isra'ee'l duunnuwwanne ubbamo. Ixxuwwi leesham iima'n ammarinaa uulli moochchinaa hurbaat ihoo'isa issoommo. Biir uullanne ubba'a gattamo. An Moollanni Waa'i kaka wocaammo. Maagoogannee dambalaq tochchonnee qulit bee'em hee'oo manni uulluwwanne hundannem giira xanqisoommo. Ee ammane hundim an Waa'i ihummisa laqqamo. I keesammi summi i minaadab ikko'i Isra'ee'l beyyonne la'amoo'isa issoommo. Ka lasage i summi duumamona cawwoommoyyo. Ee lasage minaadab hundim an Waa'i Isra'ee'l keesammi ihummisa laqqamo» yukko. Moollanni Waa'i «Gaassi doolle ‹Waaroolla; hanqo'isam wo'mmookko› yaa hee'ummi balli kane. Isra'ee'l beero'uwwanne hee'llam minaadab hundim fitta'a ubu o'l mu'ut hundam giirina wixxaa'llamo. Agira, xiyya, tokkaashshe'e, bagadoo mugaa hundam wixxaa'lla'a shokkiissamo. Ixxuwwinam lamar hiinchina ihoo gii'l haqqi ihookko. Ee bikkina beyyi hundiinsim gii'l haqqa wixxaa'immam ihukko haqqor hundiinsim haqqa murimmi hasisooyyo. Mashka'oomim ubaa gatu o'l mu'ut hundam wixxaa'lla'a giittam bikkinatte. Gaassi ixxuwwiinsi boggo'i keeniinsii baqqo'i keeniinsii kaba korina boggeenaa baqqeenaa xantamo» yoolla. Kaka wocukkok Moollanni Waa'a. Odim Waa'i «Ku hundim ihoo ammanenne Isra'ee'l uullanne yoo Sooqixxi Dambalaqiinsi eelliinchi firanne hee'oo araaxxi cebbi woronne Googina waammi beyyo uwwoommo. Ixxim dut ihoo bikkina daba'llamakkam googo ifiisookko. Googii ixxi gogotii hundim ee beyyonne waammantamo. Ee bikkina oo cebbi ‹Goog gogoxxi cebba› yamamookko. Ee lasage Isra'ee'l minaadab ee leesha hundam waammita'a uulla eraa'llisanne muccussiteebe'e lamar agan hasisookko. Ee uulli minaadabim leesha waammaa hara'mmookko; i lombi caakkaa la'amoo balla ixxuwwinam lombi ihookko. An Waa'i kaka wocaammo. Lamor aganiinsi lasonne uullanne gatu leesha beyyi hundannem hassu'uuyyi waammimminne uullooma muccussitam manni doo'llantamo. Ee uullanne do'llu'uuyyi mannika miqe siiddam ammane midaadonne mare'e issita'a higgamo. Waammi bare hintam keenim waatta'a Hamoon Goog cebbanne waammitamo. Ee waammi gadanonnem Hamoona yakkam beero'i hee'ookko. Ee'isinnem uulli odim muccurookko» yukko. Moollanni Waa'i iina «Kaa manchi beeto, annanni annanni ammarinaa moochchinaa hundinam ‹Isra'ee'l duunnuwwanne ki'nnuwwina gudisoommi lob kiti'm ugudanne maara ittakkeenaa xiiga aggakkeenaa kolli hundinnem wixxitakka'a waallehe› yihe. Akkamu Baasaa'n gereebbi ambulluwwisaa geexxuwwisa, fella'i ambu'lluwwisaa moo'lluwwisaa ikko'i malaayyaam manni maara ittakkamo. Uulli adilluwwikam xiiga aggakkamo. An gudisoommi kiti'm ugudanne godditakkeebe'i afeebe'e di'ira ittakkamo. Dimbitakkeebe'i afeebe'em xiiga aggakkamo. An gudisoommi maaddiinsi faraxxanem ihukko faradaa'nneka, gaadaa'nnanem ihukko mulli o'l mannika maara godditeebe'e ittamo» yukko. Kaka wocukkok Moollanni Waa'a. Odim Waa'i «I lomba mulli minaadaphphi lambe'enne la'isoommo. Minaadab hundim eekka baxonne hosisummi i oogatoo ixxuwwa guzumo'ummi i malaayyee moo'llamo. Isra'ee'l minaadabim ee ammaniinsi ki'issa'a an Waa'i ixxuwwina Moollanni ihummisa laqqamo. Isra'ee'l minaadab qeefadanta'a matto'okim eese hawwoddo'i bikkinatte ihukkisa mulli minaadab hundim laqqamo. An ixxuwwa uraa urummaare ixxuwwi diina'i orinne kaa'lla'a hundam shito'ookko. Ixxuwwi haashaaranchisaa ixxuwwi baaxii'llisaa ixxuwwanne issummo. Ixxuwwinam hara'mmato issummoyyo» yukko. Moollanni Waa'i «Ihukkaarem kaba Yaaqoob oos ikko'i Isra'ee'l minaadabina haafoommo. Odim ixxuwwa goddaan issoommo. Iikki keesammi summim duumamoobee'isa hooroommo. Ixxuwwa baddisoo luwwi hee'oo'n ixxuwwi gaqqi uullanne xumminne hee'llam hee'llo'i ammane issito'i tuusiisoo baxoo iina amma'nnancha hooggo'isaa hundam xaddamo. Ixxuwwa mulli minaadaphphi lambe'iinsi dabaroommaaree ixxuwwi diina'i uulliinsim lobakat minaadab moo'llu'uuyyi wixxaa'oommaaree ixxuwwanne ihaa an keesammi ihummisa la'isoommo. Qeefadanta'a yaayyantamisa issummok anette ihummaarem kaba ixxuwwiinsi mat manchim laso gatoo'n ixxuwwi gaqqi uulla daba'llitamisa issaammo. Ee bikkina i minaadab an Waa'i Moollanna ihummisa laqqamo. I Ayyaana Isra'ee'l minaadaphphi hanenne dunoommo. Od ixxuwwa uroommoyyo» yoolla. Kaka wocukkok Moollanni Waa'a. Qeefadammummi lamiyyennee onti hiinchonnee Yerusaaleemim diina'i anganne ubu tommonnee soo'l hiinchi luxxi aganannee ee aga'nnaannonnem tommi ballanne Waa'ik malaayyi eesenne dillukko. Oo malaayyim eese ki'isaa Yerusaaleema massukko. Oo malaayyim Waa'i kaaltinne eese Isra'ee'l uulla massaa mat qeeraa'l duunanne dissukko. Eehe'em lobakat min yoo beero'o labookkoka ee duuniinsi woroo'n qarinne moo'ummo. Odim kaaltinne ee beyyi kolli hincaa'ukkaare naas xaa'llisa belecce'oo mat mancho moo'ummo; oo manchim talbi fatirinne dadamaakkoo usaa mat anganne keenimmina ihoo leegaa mulli anganne amadaa mat gooc gadanonne uullaa hee'ukko. Oo manchim iina «Manchi beeto, keyye waattittok an kiina moo'isoommi luwwi hundam laqqonatte ihu bikkina qoossitaa moo'ee macceesee; moo'lloo luwwi hundam Isra'ee'l minaadabina kure» yukko. Keesammi Mi'n kululleetanne oot hee'ukko; oo manchi amadaa hee'u keenakkam leeqqek qeeraa'lloom ee manchi anganne loh anga. Oo manchim ee qasha keenukkaare haraaroom mat leega uullichchim mat leega ihukko. Ihukkaarem ixxek angi mulli manni anganne mat angaa taachcho'oo ihoohane. Ee lasage eelliinchi firinne yoo ooxxi gooc kolli marukko; gardabbam firaa guba'nneka gaxa tochchiinsi ki'isaa keenukkaare mat leega ihukko. Ee gooc lamem shiinennem yoo waardiyyuwwi minneewwik uullichchi mat leeg ihaa dufaachchim mat leeg hee'ukko; ee waardiyyuwwi minneewwi lambe'uwwanne yoo qee'lloom oonti anga hee'ukko. Ee goocanne yoo gubanim Keesammi Mine aagakkeena daba'llamakkam beyyi tochchi afeebe'e mat leeg hee'ukko. Oo waardiyyuwwi minneewwi sas sas ihaa hundikim haraaroom gudaanchi hee'ukko. Oo minneewwim daba'llamakkam beyyi lamem midaadinnette hee'ukko; ee minneewwi lanbe'enne yoo hundem utubbuwwi geejjoomim gudaanchi hee'ukko. Ee lasage oo manchi ee goocika daba'llamakkam beyyo keenukkaare qeeraa'lloom tommoo sas anga midaadim tommi anga ihukko. Ee minneewwi illagenne annannichchonnem uullichchi mat anga geejjoomim mat anga ihoo gundi utubbuwwi hee'ukko. Ee minneewwina hundinam soor lamejji yoohan ihaa lamejjuwwik annannichchi qeeraa'lloom loh angi hee'ukko. Ee lasage oo manchi daba'llamakkam beyyo waardiyyuwwi miniinsi afaree'n kollo mat mi'n gorte'iinsi la'm mi'n gorte'i afeebe'e keenukkaare lamiyyee onti angaa ihukko. Ee daba'llamakkam beyyi tochchonne yoo min wixxixxi beyyi kolli moo'isoohan hee'ukko; ee minem keenukkaare lamiyyi anga ihukko. Aagakkam goociinsi firakkam gooc afeebe'e yoo daba'llamakkam beyyi qeeraa'lloom ontayyi angi hee'ukko. Waardiyyuwwi minneewwiinsii utubbuwwiinsii worinne kululaahim maskoottuwwii hoffi afo'uuwwii hee'ukko. Lasaanchi minneewwannem worinne kululleetannem maskoottuwwi hee'ukko. Utubbuwwannem dimbaaphphi hagaranne baxamaakkoo misilluwwi hee'ukko. Ee lasage oo manchi biiree'n kollinne yoo wixxixxi beyyo eese worukko; ee wixxixxi beyyi kululleetanne mu'uta dissakkam minneewwii kina dahamaakkoo gaxii hee'ukko; ee gaxannem mu'uta dissakkam sad min hee'ukko. Woroo'n gax mine aagakkam gooca afoohan hee'ukko; gaxoo'm qeeraa'lloomim gooccuwwi qaxam qeeraa'lloohan hee'ukko. Ee woroo'n goociinsi ki'isaa woro'l wixxixxi beyyi illag afeebe'e yoo dufaachcha keenukkaare mat xibbi anga ihukko. Oo manchi hanaa'n qaranne biiree'n wixxixxi beyyi illagenne yoo ooxxi gooca keenukko. Ee beyyonne qeddinnee makkinnee yoo waardiyyi usheexxoo sas sas min, ee minneewwi lambe'enne yoo utubbuwwii daba'llamakkam beyyi tochchonne yoo goocii eelliinchi fi'l ooxxi goocanne yoo kee'nnaanninne gudaancho. Ee ooxxi goocik qeeraa'lloom ontayyi anga, dufaachchoomim lamiyyee onti angaa hee'ukko. Daba'llamakkam beyyi, maskoottuwwii dimbaaphphi hagaranne baxamu misilluwwii eelliinchi firinne yoo ooxxi goocaanninne kobi'llamoohane; ee goocannem lamar gardabbuwwi hee'ukko. Ee daba'llamakkam beyyi worinne yoo kolli wixxixxi beyyi gardabbuwwi illaginnette hee'ukko. Eelliinchi fi'l goocanne yoohaannisam hanaa'n qarinne yoo goocannem worinne yoo wixxixxi beyyo aagakkam gooc hee'ukko; oo manchim mat goociinsi mulli gooc afeebe'e keenukkaare mat xibbi anga ihukko. Ee lasage oo manchi eese woroo'n qaranne massukko; eehe'em mat gooc hee'ukko. Oo manchim ee goocika gortanni utubbuwwaa daba'llamakkam beyyi tochchonne yoo goocaa keenukko; haraaroomim mulli gooccuwwaannisam hee'ukko. Qeeraa'lloom ontayyi anga dufaachchim lamiyyee onti angaa ihoo gooc daba'llamakkam beyyinnem mulli beyyuwwaannisam maskoottuwwi yoohan hee'ukko. Ee goocinam lamar gardabbuwwi yoohan ihaa ee gardabbuwwi illaginnem daba'llamakkam beyyi heeukkoo; eekke'em lamem kollinnem yoo utubbuwwanne dimbaaphphi hagaranne wereeggisakka'a axisakko'oo misil hee'ukko. Ka beyyonnem woro'l wixxixxi beyyo massoo gooc hee'ukko; illagenne mulli goocim hee'ukko; oo goocim worinne yoo wixxixxi beyyo massoohan hee'ukko. Oo manchim lamem gooc lambe'ennem yoo beyyo keenukkaare mat xibbi anga ihukko. Oo manchi woroo'n qarinne yoo ooxxi goociinsi worinne yoo wixxixxi beyyo eese massukko. Ixxim ee qa'l gooca keenukkaare haraaroom mulli gooccuwwinne gudaanchi hee'ukko. Waardiyyuwwi minneewwik, gortanni utubbuwwikii daba'llamakkam beyyikii haraaroom mulli gooccuwwaannisam hee'ukko. Goocikii ee daba'llamakkam beyyikii qeeraa'lloom ontayyi anga dufaachchoomim lamiyyee onti anga hee'ukko. Ee daba'llamakkam beyyi kululleetanne hundannem maskoottuwwi hee'ukko. Ee goocanne yoo daba'llamakkam beyyuwwik qeeraa'lloom lamiyyee onti angaa ihaa dufaachchoom odim onti angi hee'ukko. Oo gooc biiree'n wixxixxi beyyi illagenne yoohane; utubbuwwannem dimbaaphphi hagaranne baxamaakkoo misilluwwi hee'ukko; gooc kolli massoo gardabbuwwim sadeenti hee'ukko. Oo manchim eelliinchi fi'l goocinne woro'l wixxixxi beyyo massukko; Ixxim ee qa'l gooca keenukkaare haraaroom mulli gooccuwwinne gudaanchi hee'ukko. Waardiyyuwwi minneewwik, gortanni utubbuwwikii daba'llamakkam beyyikii haraaroom mulli kee'nnaannisame. Goocikii ee daba'llamakkam beyyikii qeeraa'lloom ontayyi anga dufaachchoomim lamiyyee onti anga hee'ukko. Ee daba'llamakkam beyyi kululleet hundannem maskoottuwwi hee'ukko. Oo gooc biiree'n wixxixxi beyyiinsi illagenne yoohan hee'ukko; gortanni utubbuwwanne lamem kollinnem dimbaaphphi hagaranne baxamaakkoo misilluwwi hee'ukko. Ee gooc kolli massoo garadabbuwwim sadeenti hee'ukko. Oo manchi eese hanaa'n qa'l gooc kolli massukko; ee gooc haraaroomam keenukkaare mulli kee'nnaannisam ihukko. Waardiyyuwwi minneewwik, gortanni utubbuwwikii daba'llamakkam beyyikii haraaroom mulli kee'nnaannisame. Ee daba'llamakkam beyyik qeeraa'lloom ontayyi anga; dufaachchoomim lamiyyee onti angaa hee'ukko. Ee daba'llamakkam beyyi kululleet hundannem maskoottuwwi hee'ukko. Oo gooc biiree'n wixxixxi beyyi illagenne yoohane; gortanni utubbuwwanne lamem kollinnem dimbaaphphi hagaranne baxamaakkoo misilluwwi hee'ukko. Ee gooc kolli massoo garadabbuwwim sadeenti hee'ukko. Biiree'n wixxixxi beyyiinsi hanaa'n qarinne woro'l goocinne edansamaa baxamaakkoo mat mu'uxxi min hee'ukko; oo minim wixxixxi beyyi illagenne yoo mine aagakkam mulli goocim yoohane. Shokkiisakka'a hincaa'akkam kiti'm diinaxxi maara aanshakkamokim ee minennette. Aagakkam goocanne yoo daba'llamakkam beyyi makkinnee qeddinnee shokkiisakka'a hincaa'akkamaanninaa baaxii'l bikkinaa hawwojji bikkinaa hincoo kiti'm diinate durakkam lam lam xaraphpheez hee'ukko. Ee aagakkam goocanne daba'llamakkam beyyiinsi biireen hanaa'n qarinne yoo ooxxi gooc gadanonne makki kollinnee qeddi kollinnee lam lam xaraphpheez hee'ukko. Ee bikkina kitimina hincoo diinate durakkam xaraphpheezzuwwi sadeenti ihaa soor worinne soor biirinne hee'ukko. Ee'isam shokkiisakka'a hincaa'akkam kiti'm awwaadina kina cabbarakka'a axisakko'oo soor xaraphpheez hee'ukko; ee kee'n qeeraa'lloomim mat angaa kolloo; dufaachchim mat angaa kolloo ihaa uullichchi odim mat anga hee'ukko. Oo xaraphpheezzuwwi shokkiisakkam kiti'mmekaa mulli kiti'mmekaa diinate durakkam mu'uttuwwa dissakkam keen hee'ukko. Ee'isam mat mat mu'uta dissimmina awwaaxxakkam mat taachcho'o ihoo lam qaf yoo sinxilluwwi gorte'i kululleetanne woro'l kollinne kaaxxaa hee'ukko. Xaraphpheezzuwwim kiti'm maara dissimmina awwaadoohan hee'ukko. Ee lasage oo manchi eese woro'l wixxixxi beyyo massukko. Ee beyyonnem lam min hee'ukko. Ee keeniinsi mat hanaa'n qarinne yoo ooxxi gooc gadanonnetti ihaa gooc woroo'n qaranne daba'llaakkoohane. La'mmekim woroo'n qaranne yoo ooxxi gooc gadanonnette ihaagooc hanaa'n qaranne daba'llaakkoohane. Oo manchim iina «Woroo'n qaranne gooc daba'llaa yoo min Keesammi Minenne awwaaddam qeessuwwane. Hanaa'n qaranne gooc daba'llaa yoo min kiti'm beyyonne awwaaddam qeessuwwane. Oo keen hundim Waa'i illagenne uullita'a awwaaddam Leewe'i shumo'i ikka'a Saadooq oos hee'llo'o» yukko. Oo manchi woro'l wixxixxi beyyo keenukkaare qeeraa'lloom xibbi anga dufaachchim xibbi anga ihukko; Keesammi Mi'n illagennem mat kiti'm beyyi hee'ukko. Ee lasage eese Keesammi Mine aagakkam gooc kolli massukko; ee goocanne yoo utubbuwwa keenukkaare lamem midaadduwwim onti onti anga ihukko. Ee goocik dufaachchi tommoo soor anga; utubbuwwi gumu'llaalloomim sas sas anga. Ee daba'llamakkam beyyikim qeeraa'lloom lamiyyi anga; dufaachchim tommoo lam angaa ihukko; Keesammi Mi'n kolli massoo gardabbuwwim tommi hee'ukko. Ee gardabbuwwi midaadduwwannem utubbuwwi hee'ukko. Ee lasage oo manchi Keesammi Minenne yoo Keesammi beyyo eese massukko; ee Keesammi beyyo aagakkam illagenne yoo daba'llamakkam beyyom keenukkaare lamem midaaxxekim qeeraa'lloom loh loh angi ihukko. Dufaachchim tommi anga hee'ukko; makkinnee qeddinnee yoo gortannik gumu'llaalloom annannichchikim onti anga hee'ukko. Ee Keesammi beyyom keenukkaare qeeraa'lloom sor anga dufaachchoomim lamiyyi anga ihukko. Ee beyyiinsim higaa woro'l mi'n baxxancha aagukko. Ee mi'n goocanne yoo daba'llamakkam beyyo keenukkaare qeeraa'lloom lam anga dufaachchim loh anga ihukko. Makkinnee qeddinnee yoo gortannik gumu'llaalloom annannichchikim lamar anga ihukko. Ee lambe'i mi'n baxxanchiinsi ekkeen yoo woro'l mi'n baxxancha lamejjiinsi lamejji afeebe'e keenukkaare qeeraa'lloom lamiyyi anga dufaachchim lamiyyi anga ihukko. Ee lasage «Kuk Keesammiinsi Keesammi beyyo» yukko. Oo manchi ee Keesammi Mi'n worinne yoo gortanna keenukkaare gumu'llaalloom loh anga ihukko. Ee gortannanne hincaa Keesammi Mi'n kululleetanne baxamaakkoo minneewwik annannichchikim dufaachchi soor anga ihoo lobakat minneewwi hee'ukko. Oo minneewwi sas fooq yoohan ihaa annannichchonnem sad baxxanchuwwi yoohan hee'ukko. Ee Keesammi Mi'n biiree'n kolli gortanni woroo'n fooqanne yoo gortanniinsi loboka caraq hee'ukko. Oohim Keesammi Mi'n gortannannetti ihoo'n fooqquwwi uullukkok lob gortannannetti ihu bikkinatte. Woroo'n gortanni hanaa'nnaanniinsi gumu'llaalla. Ihukkaarem biiree'n kollinne moo'akkamaare ludiinsi lugum afeebe'e gumu'llaalloom gudaancho labookko. Oo gortannuwwim worooniim caraqukkuuyyi maroo bikkina hanaa'n fooqik baxxanchuwwi haraarukkuuyyi marookko. Hanaa'n fooqanne firakkamokim lambe'e fooq gardabbinnette. Keesammi mi'nnek shooto'i loh anga iim qoffaa baxamaakkoohan hee'ukko; biiree'n kollinne yoo minneewwikim qoffit eehannisam hee'ukko. Keesammi Mi'n midaadonne yoo minneewwik gooccuwwi ee biir ihaa yoo beyyi kolli daba'llaakkoohan ihaa mat hanaa'n qaranne mat woroo'n qaranne fooqoohane. Oo bon beyyi kululaahim onti angi hee'ukko. Ee bon beyyi tochchonne eelliinchi aagginne mat min hee'ukko; ee mi'n gortannik gumu'llaalloom onti anga; dufaachchi lamarayyi anga; qeeraa'lloomim honsayyi anga hee'ukko. Oo manchi Keesammi Mine keenukkaare mat xibbi anga ihukko; ee'isam Keesammi Miniinsi afareen bon ihaa yoo biir beyyiinsi illagenne eelliinchi aagginne yoo mi'n tochchi afeebe'e keenukkaare qeeraa'lloom mat xibbi anga ihukko. Odim Keesammi Miniinsi eelliinchi firinne yoo beyyik qeeraa'lloom lamem kollinnem kora'am yoo biir beyyuwwa edaa xibbi anga ihukko. Keesammi miniinsi eelliinchi aagginne yoo mi'nneka qeeraa'llooma keenukkaare lamem kollinnem yoo daba'llamakkam beyyuwwam edaa mat xibbi anga ihukko. Keesammi Mi'n goocanne yoo daba'llamakkam beyyi, Keesammi beyyii Keesammiinsim Keesammi beyyii sasim woronne aagaakkoohan ihaa ixxuwwi kululleetannem goolabamaakkoo maskoottuwwi yoohan hee'ukko. Ixxuwwi gortannuwwim gaxiinsi ki'isaa maskoottuwwanne afeebe'e haqqinne goolabamaakoohane. Ee maskoottuwwikim xuffuwwi goolabamaakkoohan hee'ukko. Ee'isam bii'l kollinne Keesammi Mi'n woro'l baxxancha aagakkam goociinsi hanaan yoo beyyim goolabamaakkoohan hee'ukko. Woro'llaannonnee lambe'i baxxanchi kululleetannee yoo gortannuwwi haxar yoo goolabaanchinne goolabamaakkoohan hee'ukko. Ee goolabaanchonne yoo haxar dimbaabaa kiruubeelaa laboohan hee'ukko. Ee baxxanchi kululleetannem dimbaaphphekii kiruubeel misilluwwii hamaaramaa baxamaakkoohan hee'ukko. Oo kiruubbuwwi annannichchim lam illi kolli yoohan hee'ukko. Kiruubik manni illi kollo labookkok mat dimbaaphphi kolli moo'ukkuuyyi hobbichchi illi kollo labookkok odim mulli dimbaaba moo'am hee'ukko. Oo misilluwwi Keesammi Mi'n kululleetanne hundannem baxamaa hee'ukko. Gaxiinsi ki'isaa gooccuwwiinsi hanaan yoo beyyi afeebe'e ee gortannuwwi hanenne kuruubeelekii dimbaaphphekii misil baxamaa hee'ukko. Keesammi Mi'n goocikim gubannuwwi hundim gudaanchi ihaa soor ejjo'i yoohan hee'ukko. Keesammiinsi keesammi beyyo aagakkam illagenne haqqinne baxamaakkoo kiti'm beyyi hee'ukko. Oohim gudaanchi ihaakkoo soor midaad yoohan ihaa oo midaadduwwi annannichchim lam angi hee'ukko. Uullichchim sas anga hee'ukko; midaado bakkiisoo utubbuwwi, shooho'ii midaadduwwii hundim haqqiinsi baxamaakkoohan hee'ukko. Oo manchim iina «Kuk Waa'i illagenne yoo xaraphpheeza» yukko. Keesammi beyyikii Keesammiinsi Keesammi beyyikii gooc mat ihaa baxamaakkoo lam gooc hee'ukko. Gooccuwwina annannichchinam lam xuffuwwi hee'ukko. Oohim gooccuwwa annannichchom goocam gafe'imminne te'im hixixaa'imminne lam kollonne fooqoo lam xuffuwwi yoohan hee'ukko. Gortannanne baxamukkaannisam ee Keesammi beyyi goocannem kiruubeelikii dimbaaphphekii misil baxamaa hee'ukko. Aagakkam mi'n illagennem biiree'n kollinne haqqiinsi baxamaakkoo dum hee'ukko. Aagakkam mi'n baxxanchi gortannanne lamem kollonnem yoo maskoottuwwanne dimbaaphphi misil hee'ukko. Ee lasage oo manchi hanaa'n qarinne biiree'n kollinne yoo wixxixxi beyyo eese massaa Keesammi Mi'n wixxixxi beyyi illagennee biir beyyi illagennee yoo minneewwa iina moo'isukko. Ee hanaa'n qarinne yoo mi'nnek qeeraa'lloom xibbi anga; dufaachchim ontayyi angi hee'ukko. Lamiyyi anga ihoo woro'l wixxixxi beyyiinsi ekkeen biiree'n wixxixxi beyyi illagenne baxamu minneewwi fooqiinsi fooqanne saxxi fooq afeebe'e baxamaakkoohan hee'ukko. Ee minneewwiinsi illagenne woro'l kollinne dufaachchi tommi angi qeeraa'lloomim xibbi anga ihoo mat daba'llamakkam beyyi hee'ukko; ee minneewwikim gooccuwwi hanaa'n qarinnetti hee'ukko. Saxxi fooqik minneewwi la'mmaanniinsii luxxaanniinsii xuqqi hee'ukko; oohim fooqquwwi iim qeeraa'llu qaxanne daba'llamakkam beyyi haraaraa baxxanchuwwa xuqqisoo bikkinatte. Oo minneewwi sas fooq ihaa bii'l wixxixxi beyyi minneewwisa utubbuwwi yoohan hee'ukkoyyo; ee bikkina saxxi fooqik baxxanchuwwi la'mmaanniinsii luxxi fooq baxxanchuwwiinsii lophphaa xuqqi hee'ukko. Ee minneewwinaa bii'l wixxixxi beyyinaa illagenne qeeraa'lloom ontayyi anga ihoo oot hee'ukko. Bii'l wixxixxi beyyinne ogoranne yoo minneewwik qeeraa'lloom ontayyi angi ihaa Keesammi Mi'n illagenne yoo minneewwik odim xibbi angi hee'ukko. Biiree'n wixxixxi beyyiinsi woroo'n minneewwa aagakkam gooc eelliinchi firinne hee'ukko. Odim woroo'n qarinne bii'l wixxixxi beyyi midaadinne yoo bon beyyinaa Keesammi Mininaa illagenne minneewwi hee'ukko. Ee minneewwiinsim illagenne daba'llamakkam beyyi hee'ukko; ee minneewwik qeeraa'lloom, dufaachchi, gooccuwwii nafarii baxamukkis hanaa'n qaranne hee'u minneewwaannisam hee'ukko. Ee bikkina woroo'n qarinne yoo minneewwa aagakkamok eelliinchi firinne yoo ooxxi tochchonne yoo daba'llamakkam beyyinnette hee'ukko. Oo manchim iina «Keesammi Mi'n gadanonne bon beyyiinsi illagenne hanaa'n qarinnee woroo'n qarinnee yoo minneewwi keesamaakkoo keeno; oo minneewwi Waa'i illagenne hincitam qeessuwwi lobakata keesamaakkoo hurbaata ittam minneewwa. Oo minneewwi keesammi ihu bikkina qeessuwwi ee minneewwanne hurbaaxxekaa baaxii'l bikkinaa hawwojji bikkinaa hincoo kitimaa dissitaman hee'ukko. Qeessuwwi ee keesammi beyyo awwaadina aagga'a awwaaxxi eddechcha edde'lla'a lasage ee eddechcha sheelaxxitoo'n biireen yoo wixxixxi beyyo fitteena xantamoyyo. Oo eddechchuwwi keesamaakkoohan ihu bikkina ee keesammi minneewwiinsi fitta'a minaadabanne exxiteena gaassita'a mulli eddechcha edde'immi hasisookko» yukko. Oo manchi Keesammi Mi'nneka woro'l baxxancha keenaa guullaa lasage eelliinchi firanne yoo ooxxi gooc kollinne eese biira fissukko. Ee lasage bii'l kollo keenukko. Ee leeginnem eelliinchi firanne yoo kollo keenukkaare onti xibbi anga ihukko. Ee lasage hanaa'n qaranne yoo kollo ee leeginne keenukkaare onti xibbi anga ihukko. Woroo'n qarinnem ee onti xibbi angam ihukko. Eelliinchi aaggi kollinnem keenukkaare onti xibbi anga ihukko. Keesammi beyyoo mulli beyyoo annanni issimmina Keesammi Mine baanoo kininne baxamu gortannik qeeraa'lloom onti xibbi anga; dufaachchoomim onti xibbi anga ihukko. Oo manchi eese eelliinchi firanne yoo ooxxi gooca massukko. Ee beyyonnem Isra'ee'l Waa'ik lombi eelliinchi firoo kollinne waarukkuuyyi moo'ummo. Sagaroomim malaayyaam womoo'llis hee'ukko. Ixxi lombikim belellaat uullanne caakkukko. Ku kaalti illageen Waa'i Yerusaaleema bi'iseena waaru ammane moo'ummoka laboohan hee'ukko. Keebaa'l daajji gadanonne moo'ummi kaaltinne kobi'llamoohane. Ee ammanenne miininne uullanne aad otossummo. Waa'ik lombi eelliinchi firinne yoo ooxxi gooc kollinne higaa Keesammi Mine aagukko. Waa'i Ayyaan eese iim ki'isukko. Massaakkatim woro'l wixxixxi beyyo afisukko. Keesammi Minim Waa'i lombinne wo'mmaa hee'ukko. Ee beyyonnem oo manchi i gadanonne uullaa hee'ukko. Waa'im ixxi Keesammi Minennetti ihaa iina «Manchi beeto, kuk Isra'ee'l minaadaphphi lambe'enne heer heerina hee'oommi adilla'n barcumaa i lokko usheexxisoommi beyyo. Isra'ee'l minaadabii ixxuwwi adilluwwii ka lasage qophpha'n waa'uwwina otossimminnee ixxuwwi adilluwwi lehoo ammane issitam luwwinnee iikka keesammi summa duunsiissamoyyo. Adilluwwi ixxuwwi adilla'n mi'n goocaa gubannuwwaa i Keesammi Mi'n goocannee gubanannee hincaa'lla'a baxxo'i bikkina i minee ixxuwwi minee annanna issookkok xale'i mat ki'n oot ihaakko. Ixxuwwi shigigaa'oo luwwi hundinnem iikka keesammi summa duunsiisso'ookko. Ee bikkina i quunqinne ixxuwwa bi'isummo. Ihukkaarem kanniinsi eehid qophpha'n waa'uwwina otossimma uullisimmii ixxuwwi adilluwwi leesha i illagiinsi qeessimmii hasisookko. Eehidemdu issitolas an ixxuwwi lambe'enne heer heerinam hee'oommo» yaa wocookkoka macceesummo. Waa'i odim iina «Manchi beeto, ixxuwwi baaxii'l bikkina tuuttona Isra'ee'l minaadabina Keesammi Mine moo'ise; baxamu duuha'am qoossita'a laqqona. Baxxo'i bax hundannem tuuttaman ihulas Keesammi Min hinkid baxamuda'e oohim gooccuwwi bikkina, see'l bikkinaa ogolluwwi bikkinaa ixxuwwina la'isseenaa awwonatami ixxuwwi illagenne kitaabe. Keesammi Mi'n seer kane. Duu'n ludonne yoo Keesammi Mi'n kululleet hundim hore'em keesammi ihookko. Eeyya, kuk Keesammi Mi'n won seera» yukko. Kiti'm beyyi qeeraa'l angi keennaanchonne qeeraa'lloom mat anga; dufaachchoomim mat angi ihaa suu'm kululleetim taachcho'i hee'ukko. Oo qeeraa'l angi mulli anganne mat angaa oobbaa ihoohane; kiti'm beyyik uullichchi eehane. Ee kiti'm beyyik uullichchi uulliinsi ki'isaa lanbe'enne yoo qooxo'onne afeebe'e lam anga; dufaachchim mat anga hee'ukko. Hoffi qooxo'iinsi lob qooxo'onne afeebe'e yoo uullichchi soor anga; dufaachchim mat anga hee'ukko. Kitima shokkiisakkam oo hanaan yoo lasaanchi midachchik uullichchi soor anga hee'ukko. Ee kiti'm beyyi soorem ejjo'onnem yoo buudduwwi kiti'm beyyi ludonne yoo goominaanchiinsi iim shiqaakkoohane. Ee midachchina soor midaad yoohan ihaa midaaxxek annannichchikim qeeraa'lloom tommoo lam angaa hee'ukko. Hanaa'n qooxo'im mulli qooxo'uuwwaannisam gudaanchi ihaakkoo soor midaad yoohan hee'ukko. Ee midaadduwwikim qeeraa'lloom tommoo soor anga; dufaachchim tommoo soor angaa ihaa kululleetanne yoo gamma'llek haraaroom taachcho'i hee'ukko. Oo kiti'm beyyi yoo kululleetik haraaroom mat anga hee'ukko; kiti'm beyyo firakkam gardabbim eelliinchi firinnette hee'ukko. Oo manchim iina «Manchi beeto, Moollanni Waa'i ‹Shokkiisakka'a hincaa'akkam kitima hincaa'imminaa ixxonnem xiiga kifimminaa ku kiti'm beyyi baxamaa lasage ka kiti'm beyyonne ihimmi hasisoo seer kanniinsi woroon yoohane. Iina awwaaddeena i illagenne hincitam Leewe'i sulliinsi ikko'i Saadooq shumo'ina mat labeena baaxii'l haafitina kitim issita'a hincaa'llona uwwe. Ee labee'n xiigiinsi hoffokam aa'llaa kiti'm beyyi ludonne soorem lamejjannem yoo buudduwwanne, soorem midaadonnem yoo qooxo'uwwannee gammalluwwannee hundannem labe. Ee'isinne kiti'm beyyo muccussitaa keessootto. Baaxii'l haafitina kitim ihaa hincu labeena massitaa Keesammi Mi'n gadanonne bii'l koollinne annanni ihaa qoodamu beyyonne shokkiise. La'm balla miiqakkam luwwi mahim bee'i mat fella'ichchi ambula baaxii'l haafitina kitim issitaa hincaa'e; labee'n xiiginne issittisam fella'ichchi xiiginnem kiti'm beyyo muccusse. Ee'isinne muccussitaa lasage miiqakkam luwwi mahim bee'i mat labeenaa gereechchi ambulaa allaachchiinsi massitaa lamom iina Waa'ina hincaa'e. Qeessuwwi lamonnem sooqido binnaa'lla'a lasage shokkiisakka'a hincaa'akkam kitim issita'a iina Waa'ina hincaa'llona. Lamar balla ballina ballina miiqakkam luwwi mahim bee'i mat fella'ichchi ambula, mat labeenaa mat gereechchi ambulaa baaxii'l haafitina kitim issitaa hincaa'e. Lamar ballina qeessuwwi kiti'm beyyo muccussita'a keesamaakkoohan issitona. Ee lasage qeessuwwi sadeenti balliinsi asheetta'a ki'nnuwwi eebbakko'i shokkiisakka'a hincaa'akkam kitimaa gatimmi bikkina hincoo kitimaa hincaa'llona; anim ee ki'nnuwwi kitima aa'oommo› yoolla» yukko. Oo manchi eelliinchi firanne yoo Keesammi Mi'n bii'l gooc kolli eese massukko. Oo goocim xufamaa hee'ukko. Waa'im iina «Ku gooc xufamukkisam hee'ookko bagaan hore'em fooqooyyo; an Isra'ee'l Moollanni Waa'i aagummi gooc ihu bikkina ayyim ka goocinne aageena xanooyyo. Ee bikkina xufamukkisam hee'ookko. Ihukkaarem gassaanchi keesammi daabbo'o i illagenne iteena ee beyyonne afuureena xanookko. Ixxim daba'llamakkam beyyi goocinne aagaa eeheenim firona» yukko. Ee lasage oo manchi eese hanaa'n qaranne yoo ooxxi goocinne Keesammi Mi'n nafaranne massukko. Anim ee nafaranne ihaa Keesammi Min lombinne wo'mmaakkoo moo'aa miininne uulla nakkaa otossummo. Waa'im iina «Manchi beeto, moo'lloottokaa macceessoottokaa hundam erisa qoosse. Oono'o, Keesammi Mi'n seeraa ogoraa hundam kiina kuroommo. Ee mine aageenaa fireenaa xanookkok hinkido'i manda'i ihukkisa qoosse. «Ee boqqi Isra'ee'l minaadabina ‹Isra'ee'l minaadaba, ki'nnuwwika shigigaa'oo baxo hundam ullehe. An Moollanni Waa'i kaka wocaammo. Di'iraa xiigaa hurbaaxxi kitim issitakka'a iina hincaa'llakkam hee'llakko'i ammane iina ijaajamoobee'i ballachchamoo'n yoo allaggi manna Keesammi beyyo aagissakka'a Keesammi i mine haashaassitakko'ookko. Haashaaramaakkoo ki'nnuwwi bax hundinnem iikka hidi'l sagara ginditakko'ookko. Iina keesamaa kitim ihu luwwa ki'nnuwwi egerimmi bikkenne allaggi manninne egessissakko'o› yihe» yukko. Ee bikkina Moollanni Waa'i «Isra'ee'l minaadaphphi lambe'enne hee'oo keenom edaa iina ijaajamoobee'i ballachchamubee'i allaggi hundim Keesammi i Mine aagoone» yoolla. Waa'i iina «Iinniinsi qee'llita'a huushanto'i Isra'ee'l oosinnem qophpha'n waa'uwwina otossito'i Leewe'i ooso guzumo'oommo. Ihukkaarem ixxuwwi Keesammi Mi'n waardiyyuwwi ihimminne, shokkoo kitiminaa mulli kitiminaa hincoo diinate durimminnee manni illagenne uullita'a ee mannina awwaaddeena xantamo. Ixxuwwi i minaadab qophpha'n waa'uwwina otossaa baaxiilo baxoo'isa issito'i bikkina guzumo'antaman ihukkisa an Moollanni Waa'i i gaganne hide'oommo. Qeessoomaninne awwaaddeena i kolli hincitamoyyo; hore'em keesammi ihu kiti'm kollim hincitamoyyo. Ixxuwwi baxxo'i shigigaa'oo bax bikkinam xa'mmantamo. Ee bikkina qeessoomaninnette ihoo'n Keesammi Minenne mulli baxo hundam baxxamisa issoommo» yukko. Moollanni Waa'i «Isra'ee'l oos iinniinsi qee'llita'a huushanto'i ammane Keesammi i minenne amma'nnanchinne qoxxita'a iina awwaaddo'i qeessuwwi Leewe'i sulliinsetti ihu Saadooq shumo'i qeessuwwa. Ee bikkina di'iraa xiigaa kitim issita'a hincaa'imminne i illagenne uullita'a awwaaddeena xantamok ixxuwwa. Iina awwaaddeena Keesammi Mine aaggamok, iina kitim hincoo xaraphpheezanne hinciteena xantamokii otossaxxi seera awwonsitamokii xale'i ixxuwwa. Wixxixxi beyyi goocinne aaggam ammane talbi fatirinne baxamaakkoo eddechcha edde'llona; woro'l wixxixxi beyyonnee Keesammi Minennee awwaaddam ammane gereebbi oddinne dadamu ayyi luwwam edde'lloone. Ixxuwwi horoorennem talbi fatirinne dadamaakko shaashsha xaaxxona; talbi fati'l sure'em lade'llona. Biince'isoo eddechcha maham edde'lloone. Minaadab yoo bii'l wixxixxi beyyo fitteena illage awwaadina edde'llo'i eddechcha sheelaxxita'a mu'uta dissakkam keesammi minneewwanne dissita'a mulli eddechcha edde'immi hasisookko. Eehid issitamokim minaadabina uwwamubee'i ixxuwwika keesammi eddechcha manni nakkaa hawwodamoobee'isinatte. «Qeessuwwi ixxuwwika horoore gudaanchisanne axisiissona bagaan hogoossiisimmi te'm qeeraa'llisimmi hasisooyyo. Qeessuwwi woro'l wixxixxi beyyo aaggam ammane woyi'n diqaasa maham aggoone. Qeessuwwi buubbeesaano te'im aro'i lehu meento eebimmi hasisooyyo; ihukkaarem Isra'eeliinsi baajaam landa te'im lehu qeessuwwika meento eebbeena xantamo. «I minaadab keesammaa keesamubee'ekaa haashaarammaa haashaaramubee'eka annanni issita'a laqqona qeessiwwi losissona. I minaadaphphi lambe'enne wocanchi hee'oo ammane i see'llisanne oogattona; annanni annanni i ugudduwwaa Usheexxaxxi Ayyaamoo i see'llisannee ogo'llisannee keesimminne egettona. «Ixxi annane, amane, ixxi oosan, abbaayyane te'im mine issitobee'i ixxi aayyan ihubeelas mulli leesha hinkam nakkaa mat qeessichchi ixxi gaga haashaassimmi hasisooyyo. Leeshamdu nakkulas mat qeessichchi ixxi gaga muccussukkaanniinsi ki'isaa lamar balli afeebe'e egerimmi hasisookko. Oo qeessichchi awwaadina woro'l wixxixxi beyyoo Keesammi Minee aagoo balla ixxi baaxiilina kitima hincaa'ona. An Moollanni Waa'i kaka wocaammo. «An gagim ixxuwwina gulummi ihummi bikkina Isra'eelanne ixxuwwina uulla uwwitakkotte; an ixxuwwina gulumma. Hurbaaxxi kitimii baaxii'l bikkinaa hawwojji bikkinaa hincoo kitimii ixxuwwina hurbaat ihona; Isra'eelanne iina annanni ihaa keesamu ayyi kitimim ixxuwwane. Atoot hundiinsim ludoo iina annanni issakka'a uwwakkam luwwaa qeessuwwi a'llitona; minaadabim hurbaata liittam ammane doo'llammi qamiinsi ludo qeessuwwina annanni issita'a uwwitona. Anim eehid issitam minaadaphpheka mine maassinne wonshoommo. Bii'l moochchi shukkoka te'im baytu mikmikoo soko'ika maara qeessuwwi ittoone» yukko. Uulla sulli sullinne ki'nnuwwi gulummi issitakka'a baxxantakkam ammane mat sharada Waa'ina annanni issehe; ee uullik qeeraa'lloom 25,000 anga dufaachchoomim 20,000 angi ihona; beyyoomim keesammi ihona. Ee keesammi beyyi lambe'enne soorem midaadim gudaanchi ihaakkoo annannichchikim qeeraa'lloom onti xibbi anga ihoo beyyo Keesammi minina annanni issehe; ee beyyi kululleetannem haraaroom ontayyi anga ihoo bon beyyo gatissehe. Waa'ina annanni issitakka'a gatissakko'i beyyi lambe'enne qeeraa'lloom 25,000 anga dufaachchoomim 10,000 anga ihoo beyyo Keesammi Minina oohim Keesammiinsi Keesammi Mine baximmina gatissehe. Oo beyyi Isra'ee'l uullanne lophphaa keesamaakkoo beyyi ihaa Keesammi Minenne Waa'i illagenne awwaaddam qeessuwwina qoodamaakkoohane; ixxuwwi hee'llam minii Keesammi minii baxamoohim ee beyyonnette. Qeeraa'lloom 25,000 anga, dufaachchim 10,000 ihoo beyyi odim Keesammi Minenne awwaaddam Leewe'i oos hee'llam beero'o baximmina ihoo ixxuwwi gulumma. Waa'ina annanni ihaa keesamu baxxanchiinsi ki'isaa qeeraa'lloom 25,000 anga dufaachchim 5,000 anga ihoo uulli Isra'ee'l sulli hundinam ihoo beero'ina hee'ona. Isra'ee'l gassaanchina keesammi beyyiinsii beero'i beyyi gabaliinsii ki'isaa eelliinchi aagginnee eelliinchi firinnee Isra'ee'l uulli tochchi afeebe'e sharad ihaa uwwamookko. Ee sharaxxi qeeraa'lloomim mat sullina afoo uulli berechchi qax ihookko. Oo uulli Isra'eelanne doo'llamoo gassaanchina berechchi ihona; ee bikkina gassaan minaadaba wor amadimmi hasisooyyo. Ihukkaarem odo'i qax uulla hundam Isra'ee'l sulluwwina fatakimmi hasisookko. Hundam xanoo Waa'i «Isra'ee'l gassaano, oono'o, ki'nnuwwi lobakat ammane baaxiilo baxxakko'ookko. Ihukkaarem kaba damigoo wor amadimmaa uullehe! Xabbeenaa hanqo'anee ihu baxo baxxehe; i minaadab od ixxi gaqqi uulla fatakaa dooyyoo'isa issitakkotte! Kaka wocummok an Moollanni Waa'a. «Ki'nnuwwina annannichchinam hanqo'anee gudaanchoo ihaakkoo keennaanchi hee'ona. «Ki'nnuwwi hundikim keennaanchi gomor ihona. Gogaalli luwwa keentakkam if daadoo luwwa keenakkam baatinne gudaanci ihona. Ee'isinne mat gomor tommi ifinnee tommi baatinnee gudaanchi ihookko. Ki'nnuwwi keennaanchim, lamiyyi geeraah mat saqila lohayyi saqil mat minaana ihona. «Ki'nnuwwi hincaa'llakkam kitim mat gomor arasiinsi lohiinsi mat suum ifa, eeiisam annannichchiinsim gomor so'iinsi lohiinsi mat suum if ihona. Zaytiinsi qoodamukkokim qooroosiinsi annannichchiinsim tommiinsi mat suum baata. (Mat qooroos mat gomora te'im tommi baata). Ee'isam Isra'ee'l gereebbi allaachchiinsi lam xibbiinsi mato uwwitakkamo. Oohim ixxuwwina baaxii'l haafitina ihona hurbaaxxi kitiminnem shookkiisakka'a hincaa'akkamanee gatimmi kitimaa ihaa hincoohane. An Moollanni Waa'i kaka wocaammo. Ka uullanne hee'oo manni hundim Isra'eelanne gassaanchi ihoo manchina uwwookko. Gassaanchim shokkiisakkam kitimina, hurbaaxxi kitiminaa aggi kitiminaa aga'n aagganne, Usheexxaxxi Ayyaamonnee qoodamaakkoo Isra'ee'l minaadaphphi ugudduwwannee hincimmi hasisoo luwwa gudisimmi hasisookko. Ee'isam Isra'ee'l minaadaphphi baaxii'l haafitina ihoo baaxii'l bikkina hincoo kitima, hurbaaxxi kitima, shokkiisakka'a hincaa'akkam kitimaa gatimmi kitimaa gudisimmi hasisookko» yukko. Moollanni Waa'i «Luxxi agan aagu luxxi ballanne miiqakkam luwwi mahim bee'i mat labeena kitimtaa Keesammi Mine muccusse. Qeessichchi baaxii'l haafitina hincu kiti'm xiigiinsi hofqaxam aa'aa Keesammi Mi'n gubannuwwanne, kiti'm beyyi qooxo'uwwi soorem ejjo'onnee woro'l wixxixxi beyyo aagakkam ooxxi gooc gubannawwannee labona. Ayyim sawwoo'n te'im la'oo'n baxu baaxiil hundinam lama'l ballanne ee'isa isse. Ee'isinnem Keesammi Mine keese. «Luxxi agan aagu tommonnee soo'l ballannee Shaashshiqqi Uguda lonsehe. Ee ugudanne lamar balli afeebe'e xale'i qorosho'o ittehe. Ee uguxxi ballanne minaadaphphi gassaanchi ixxi gaqqaanninaa minaadaphphi baaxii'l haafitinaa mat moora gudisona. Ee Uguda lonsakkam lamarem ballannem miiqakkam luwwi mahim bee'i lamar mooraa lamar gereebbi ambulluwwaa shokkiisakka'a iina hincaa'akkam kitimina gudisona. Ee'isam lamarem ballannem baaxii'l haafitina kitim ihaa hincoo fella'i ambulluwwika mat mato gudisookko. Annannichchinnem Moorinnee gereebbi ambulluwwinnee maqire hurbaatik mat mat Eefii wee'l zaytik sas sas liitirii hincihona. «Ee'isam lam'l agan aagu tommonnee ontonnee asheeroo Godo'i Uguxxi lamarem ballannem gassaanchi baaxii'l haafitinaa hundoomam shokkiisakka'a hincaa'akkamaanninaa kitima gudisona. Hurbaaxxekaa zayxekam kitima hanaa'nnannisam hincaa'ona» yukko. Moollanni Waa'i «Woro'l wixxixxi beyyo aagakkam eelliinchi firinne yoo gooc lohem bax ballannem xufamona. Ihukkaarem Usheexxaxxi Ayyaamonnee Aga'n Aaggannee fooqihona. Gassaanchi biiree'n koollinne mine aagakkam nafarinne aagaa ooxxi gooc gadanonne uullona. Qeessuwwim ixxi gudisu shokkiisakkamokaa gatimmikaa kitima hincaa'llona. Gassaanchi ee goocannem iina otossihona. Ee lasage ixxi firona. Ihukkaarem oo gooc hiimeebe'e xufamooyyo. Hundem Usheexxaxxi Ayyaammuwwannee Aga'n Aagguwwannee minaadab hundim eelliinchi fi'l goocanne ikka'a iina Waa'ina otossitona. «Gassaanchim Usheexxaxxi Ayyaamonne hundoomam shokkiisakka'a hincaa'akkam kitimina miiqakkam luwwi mahim bee'i gereebbika loh ambullichcha'aa mat gereechchi ambulaa iina hincaa'ona. Ee gereechchi ambulinne mat if xuffi hurbaata edaa eebona. Ee'isam hoffi ambulcha'inne annanchinnem xanu qax hurbaata edaa hincaa'ona. If xuffi hurbaaxxi kitiminne annannichchinnem hincoo sas liitir wee'l zayta eebona. Ee'isam Aga'n Aagganne annannichchonnem miiqakkam luwwi mahim bee'i mat labeena, loh gereebbi ambulcha'aa mat gereechchi ambulaa hincaa'ona. Labeeninnee gereechchi ambulinnee maqire mat mat if xuffi hurbaata hincaa'ona. Ee'isam ambulcha'inne annannichchinnem gassaanchi hincaa'eena xa'u qaxa uwwona. If xuffinne annanchinnem sas liitir wee'l zaya hincaa'ona. Oo gassaanchi aagoo ammane nafarinne aagaa eeheenim firona. «Ayyi ugudannem minaadab iina otosseena waaroo ammane hanaa'n qa'l ooxxi goocinne aagu keen woroo'n qa'l goocinne firona. Woroo'n qa'l ooxxi goocinne aagu keenim hanaa'n qa'l goocinne firona. Ayyi manchim aagu goocinne firoone. Ihukkaarem illaginne yoo mulli goocinne firona. Gassaanchim minaadab aagoo ammane aagaa firoo ammane ixxuwwinnem firona. Lobaannonnee hoffi uguxxi ayyaammuwwannee, moorinnee gereechchi ambulinnee annanchinnem hincoo hurbaaxxi kitim mat if xuffi ihona. Iina otossoo manchi gereebbi ambulcha'inne annannichchinnem uwweena hasu qaxa hincaa'ona. If xuffi hurbaatinne annanchinnem sas liitir wee'l zayti exxaa hincihona. «Gassaanchi hundoomam shokkiisakka'a hincaa'akkamoka te'im gatimmina hincoo kitima ixxi gaqqi doo'llinne iina hincaa'eena hasulas woro'l wixxixxi beyyo aagakkam eelliinchi fi'l gooc fooqihona. Ee kitimam Usheexxaxxi balla hincaa'oohaannisam hincaa'ona. Ixxi firaa maraa lasagem oo gooc xufamona» yoolla. Waa'i «Gassaanchi balli hundam shokkiisakka'a iina hincaa'akkam miiqakkam luwwi mahim bee'i mat hiinchi gereechchi ambula hincaa'ona. Eeham dar dara hincaa'ona. Ixxenne maqirem dar dara lam kiilo'o ihoo qaxa hurbaaxxi kitimaa doo'l qama qufisimmina ihoo mat liitir wee'l zaytaa gudisona. Oohim hundi ammanem iina hincoo kiti'm seer ihookko. Gereechchi ambulchi, hurbaaxxi kitimii wee'l zaytii hundi ammanem dar dara iina shokkoo kitim ihaa hincihona» yoolla. Moollanni Waa'i «Gassaanchi ixxi gaqqi uulliinsi qoroshaa ixxi oosiinsi matina sharad issaa uwwulas oo uulli ee beetinaa ixxi abaroosinaa gulummi ihookko. Ihukkaarem oo gassaanchi ixxena sharad ihu uulliinsi qoroshaa ixxi awwaadaaniinsi matina uwwulas ontayyi hiinchonne mataagge ihoo wolabba'n hiinchi ugudanne ee gassaanchinam daba'llona. Amaxxoom ixxan ihu bikkina oo uulli heer heerinam xale'i ixxanee ixxi oosanee ihimmi hasisookko. Gassaanchi minaadaphpheka uulla hooraa ixxi gagina aa'immi hasisooyyo. Ixxi oosina baxxansaa uwweena xanookkok xale'i ixxena qoodamu uulliinsette. Ixxuwwi uulla hoorimminne i minaadaba wor amadoone» yoolla. Ee lasage oo manchi gooc gadaninne aagakkam beyyi hanaa'n qarinne yoo qeessuwwan ihu keesammi minneewwi kolli massukko. Eelliinchi aagginne ee minneewwi lasaanchonne mat beyyo moo'ummo. Ixxim iina «Ku beyyi baaxiilinaa hawwojji haafitinaa kitim ihaa hincu maaraa hurbaaxxi kitimaa qeessuwwi saroohane. Ee'isinne minaadabanne hawwodanchi afoobee'isa keesammi kitimiinsi mahim bii'l wixxixxi beyyo firooyyo» yukko. Ee lasage oo manchi bii'l wixxixxi beyyo eese massaa soorem lamejjam do'isaa moo'isukko. Lamejjuwwanne annannichchonnem mat wixxixxi beyyi hee'ukko. Soorem lamejjuwwannem yoo hoffi wixxixxi beyyuwwi hundim gudaanchi hee'ukko. Annannichchikim qeeraa'lloom sor anga; dufaachchim sad angi hee'ukko. Ee soorem wixxixxi beyyi kululleetannem woro'l kollinne gundi ki'n gorte'i hee'ukko. Ee gorte'uwwi lugumonnem midachchuwwi hee'ukko. Oo manchim «Ku keen Keesammi Mi'n awwaadaan minaadab hincaa'oo kiti'm maara saroo beyyuwwa» yukko. Ee lasage eese Keesammi Mine aagakkam gooc kolli massukko. Ee beyyonnem Keesammi Mi'n lugumiinsi wo'i eelliinchi firoo kollonne daadam hee'ukko. Oohim Keesammi Mi'nnek gooc eelliinchi fi'l kollonne daba'llaa hee'u bikkinatte. Oo wo'i Keesammi Miniinsi woroo'n qarinne yoo luguminnetti ihaa kiti'm beyyiinsi woroo'n qaranne daadam hee'ukko. Oo manchim hanaa'n qa'l ooxxi goocinne Keesammi Miniinsi eese fissaa massukko. Eelliinchi firanne yoo ooxxi gooc kollim dabarukko. Ee ooxxi goociinsi woroo'n qarinnem wo'i eelliinchi firanne daadam hee'ukko. Oo manchim amadaa hee'u usinne eelliinchi firanne daadoo wo'o awwonaa maraa 1,000 anga keenukko. Ee wo'i worinnem taakke'aa higoommisa issukko. Oo wo'im iikka moqonta afukko. Odim 1,000 anga keenaa taakke'oommisa issukko. Oo wo'im i gurubbo afukko. Odim 1,000 anga keenaa wo'i woronne taakke'oommisa issukko. Oo wo'im i lamado afukko. Odim higaa 1,000 anga keenukko. Wo'oom xillaalli ihu bikkina higeena xanoombee'i daajji ihukko; waachchimminnetti ihubeelas lokkinne higakkeena xanakkambee'an hee'ukko. Oo manchim iina «Manchi beeto, ka hundam qoossitaa moo'llaahinnihe?» yukko. Ee lasage oo manchi ee daajji gammala eese dabaraa massukko. Ee beyyo afummisam ee daajji makkinnee qeddinnee lobakat haqqi yookkoka moo'ummo. Oo manchim iina «Ku wo'i ka uullanne eelliinchi firanne, Yoordaanoos cebbannee Sooqixxi Dambalaqannee daadookko. Oo wo'i Sooqixxi Dambalaq kolli daadoo ammane oo wo'i fayye'ookko. Oo wo'i daadaa afoo beyyi hundannem annanni annanni soko'ii qurxumme'ii dutookko. Ku wo'i daadaa afoo bikkina Sooqixxi Dambalaq wo'im fayye'ookko; oo wo'i daadaa afoo beyyi luwwi hundim foorinne hee'ookko. Engadiinsi ki'aa Eni'eegilaayim afeebe'e manni qurxumme'e qaashookko; shikkuwwam fitiisookko. Meedeteraaniyaa'n dambalaqaannisam dut shumo'i qurxumme'im fikkaannookko. Ihukkaarem leepho'ii leerii sooqid wo'mmaakkoohan ihookko bagaan xaliil wo'i ihooyyo. Ee daajji lamem gammalinnem misha itakkam haqquwwi hee'ookko. Buyyim giggirooyyo; mishimmam uullisooyyo. Keesammi Mi'n lugumiinsi daadoo daajji wo'o siidoo bikkina agan hundannem haareechchi haareechchi misha mishookko. Ee haqquwwik mish hurbaatina buyyim jabbina qaraar ihookko» yukko. Moollanni Waa'i «Tomminaa lamem Isra'ee'l sullinam gulummi issitaa baxxansitoo uulli gabal kanniinsi woroon yoohane. Yooseef sullina lam suum ihona. An gaassi ki'nnuwwi anno'ina ka uulla ixxuwwi gulummi issaa uwweena hide'aa sagara aagaammo. Ee bikkina ki'nnuwwi hundim gudaanchonne baxxammehe. Ku uulli ki'nnuwwi gulummi ihookko. «Uulloo'mmek gabal kanniinsi woroon yoohane. Hanaa'n qa'l gabal Meedeteraaniyaa'n dambalaqiinsi ki'isaa Heetlooninne aa'aa Haamaata daba'llamakkam googo, Xeedaadiima, Damaasqo'inaa Haamaatinaa lambe'enne yoo Beerootikaa Siibiraayi'm beero'uwwaa Hawuraa'n tochchonne yoo Tiikoo'n beero'oo higaa eelliinchi firanne afeebe'e marookko. Ee'isinne hanaa'n qa'l gabal Meedeteraaniyaa'n dambalaqiinsi Haxaari'eenaana oohim Damaasqo'inaa Haamaatinaa gabalanne hanaa'n qarinne yoo beyyi afeebe'e afookko. «Eelliinchi fi'l gabalim Damaasqo'aanniinsii Hawuraa'n lambe'iinsi ki'isaa Yoordaanoosinne Gala'aadinaa Isra'eelinaa lambe'e higaa Sooqixxi Dambalaqaa Taamaar beero'oo afookko. Ookki eelliinchi fi'l gabala. «Woroo'n qa'l gabal Taamaariinsi ki'isaa Mariib Qaadeesinne aa'aa Gibxi cebbinne higaa Meedeteraaniyaa'n dambalaqa afookko. Ookki woro'n qa'l gabala. «Eelliinchi aaggi gabalim Meedeteraaniyaa'n dambalaq ihaa Haamaata aagakkam illagenne afookko. Ookki eelliinchi aaggi gabala. «Ka uulla Isra'ee'l sulli hundim baxxammehe. Ookki ki'nnuwwinaa ooso qatta'a ki'nnuwwi lambe'enne hee'llam allaggi keeninaa heer heerina gulummi ihona. Oo allaggi ayyi Isra'eelchisam ee uulla baxxantam Isra'ee'l sulluwwinne maqire saaminne baxxamim hasisookko. Isra'ee'l uullanne hee'oo allaggina ayyenam maqire hee'oo Isra'ee'l sullinnem ixxi gaqqi sharad hee'ona. An Moollanni Waa'i kaka wocaammo» yoolla. Uulla baxxanto'i sulluwwi kanniinsi woroon yo'i keeno. Daan sulli sharad hanaa'n qarinne yoohane. Oohim Heetlooniinsi Haamaata aagakkam googinne aa'aa Haxaari'eenaaniinsii Damaasqo'iinsii hanaa'n qarinne eelliinchi firiinsi eelliinchi aaggi afeebe'e Daan gabal ihookko. Aseer sullik sharad mat ihaa Daan sulli gabaliinsi ki'isaa eelliinchi firiinsi eelliinchi aaggi afeebe'e afoohane. Niftaaleem sullik sharad mat ihaa Aseer sulli gabaliinsi ki'isaa eelliinchi firiinsi eelliinchi aaggi afeebe'e afoohane. Minaas sullik sharad mat ihaa Niftaaleem sulli gabaliinsi ki'isaa eelliinchi firiinsi eelliinchi aaggi afeebe'e afoohane. Efireem sullik sharad mat ihaa Minaas sulli gabaliinsi ki'isaa eelliinchi firiinsi eelliinchi aaggi afeebe'e afoohane. Roobeel sullik sharad mat ihaa Efireem sulli gabaliinsi ki'isaa eelliinchi firiinsi eelliinchi aaggi afeebe'e afoohane. Yihud sullik sharad mat ihaa Roobeel sulli gabaliinsi ki'isaa eelliinchi firiinsi eelliinchi aaggi afeebe'e afoohane. Yihuxxi sulli uullinne gaba'llamoo annanni beyyo eelliinchi firiinsi eelliinchi aaggi afeebe'e annanni issitakka'a dissehe. Ee beyyikim dufaachchi 25,000 anga; qeeraa'lloomim mulli sulluwwaannisam eelliinchi firiinsii eelliinchi aagga afoohane. Keesammi Min ihookkokim ee beyyi lambe'ennette. Ee beyyi lambe'ennem qeeraa'lloom 25,000 anga; dufaachchim 20,000 anga ihoo beyyo Waa'ina annanni issehe. Ee keesammi beyyiinsi qoodamaakkoo qax qeessuwwan ihona. Oohim qeeraa'lloom eelliinchi firiinsi eelliinchi aaggi afeebe'e 25,000 anga; dufaachchim hanaa'n qariinsi woroo'n qar afeebe'e 10,000 angi ihona. Keesammi Minim ihookkok ee lambe'ennette. Oo beyyi Saadooq shumo'iinsetti ikko'i keesanto'oo qeessuwwina ihona. Isra'ee'l oosii Leewe'i oosiinsi gatu qaxii hundim eese lagu ammane Saadooq oos i ijaajjuwwa egetto'oo keen hee'llo'o. Ee keesammi beyyiinsi ixxuwwi sharad eehane; oohim hore'em keesammi ihaa Leewe'i oosaanninne gaba'llamaakkoohane. Qeessuwwi baxxanchi midaadonne qeeraa'lloom 25,000 anga, dufaachchim 10,000 anga ihoo beyyi Leewe'i oosane. Qeessuwwi sharadam edaa hundoomikim qeeraa'lloom 25,000 anga dufaachchim 20,000 angi hee'ukko. Waa'ina annanni ihoo beyyi ee uullanne yoo beyyi hundiinsim e'lloo doo'l beyyo. Ee beyyiinsi maham biteesimmi, dabassimmii te'im ayyenam lagaa'isimmii xansiisooyyo. Oo beyyi Waa'ina annanni ihaa keesamaakkoo beyyo. Annanni ihaa gatu beyyi illagenne yoo beyyik qeeraa'lloom 25,000 anga; dufaachchim 5,000 anga. Ee beyyo minaadab annanni annanni luwwina awwaaxxeena xanookko. Mine baxeenaa diinate allaareenaa xanookko. Beero'im ee lambe'enne ihookko. Ee beero'ikim qeeraa'lloom gudaanchi ihaakkoo soor midaad yoohan ihaa midaaxxek annannichchikim qeeraa'lloom 4,500 angaa ihookko. Ee beero'i soorem qarannem allaachchi beyyi hee'ookko. Soorem qaranne annannichchonnem yoo allaachchi beyyik haraaroom hundem kollim gudaanchi ihaa lam xibbee ontayyi angaa ihookko. Ee keesammi beyyiinsi eelliinchi firinne 10,000 anga, eelliinchi aagginnem 10,000 anga haraaroo beyyonne beero'i baxamaa lasonne gatoo beyyi ee beero'onne hee'oo minaadabina abuulli uulli ihookko. Ee beero'onne hee'oo hinka'i sulliinsem ihu ayyim ee uulla abuulleena xanookko. Ee bikkina ee uulli lambe'iinsi annanni ihaa keesamu beyyikii beero'i baxamu beyyikii hundikim qeeraa'lloom gudaanchi ihaa 25,000 angaa ihookko. Ee keesammi beyyiinsii beero'i beyyiinsii eelliinchi firinnee eelliinchi aagginnee gatu beyyi gassaanchina sharad ihookko. Ee beyyik annannichchikim qeeraa'lloom eelliinchi firinnee aagginnee keesammi beyyinne gaba'llamoohan ihaa ee uulli tochchi afeebe'e 25,000 angaa ihookko. Gassaanchi berechchik qeeraa'lloom mulli sulluwwi berechchinne gudaanchome. Ee'isinne keesammi beyyii Keesammi Minii lambe'ennette ihookko. Ee'isam Leewe'i oosikii beero'ikii beyyi eelliinchi firinnee eelliinchi aagginnee gassaanchi berechchi ihu beyyuwwi lambe'ennette. Ee'isam hanaa'n qarinne Yihuxxi berechchinne woroo'n qarinnem Biiniyaam berechchinne gaba'llamookko. Gatu sulluwwinam uulli kanniinsi woroon yoo'isanne baxxansamaakko. Biiniyaam sullik sharad mat ihaa eelliinchi firiinsi eelliinchi aaggi afeebe'e yoohane. Simi'oon sullik sharad mat ihaa eelliinchi firiinsi eelliinchi aaggi afeebe'i ihaa Biiniyaam berechchinne gaba'llamoohane. Yisaakoor sharad mat ihaa eelliinchi firiinsi eelliinchi aaggi afeebe'i ihaa Simi'oon sharadinne gaba'llamoohane. Zaabiloon sharad mat ihaa eelliinchi firiinsi eelliinchi aaggi afeebe'i ihaa Yisaakoor sharadinne gaba'llamoone. Gaad sharad mat ihaa eelliinchi firiinsi eelliinchi aaggi afeebe'i ihaa Zaabiloon sharadinne gaba'llamoohane. Gaad sullik woroo'n qarinne yoo gabal Taamaar beero'i woroo'n qariinsi ki'isaa Mariiphphi Qaadeesanne yoo wo'i bu'onne afookko. Ee beyyiinsim Gibxi uullina gabal ihu daajje awwonaa Meedeteraaniyaa'n dambalaqa afookko. Moollanni Waa'i «Ee'isinne Isra'ee'l sulli hundinam sharad issitakka'a baxxansitakkam uulli kane» yukko. Eelliinchi fi'l kolli ooxxi qeeraa'lloom 4,500 angaa. Ee kolli sasem goocim Yooseefaanninne, Biiniyaamaanninnee Daan sulli summinnee weeshamaakko. Woroo'n qa'l kolli ooxxi qeeraa'lloom soor kumaa onti xibbi angaa. Ee kolli sasem goocim Simi'oonaanninne, Yisaakkooraanninnee Zaabiloon sulli summinnee weeshamaakko. Eelliinchi aaggoo kolli ooxxi qeeraa'lloomim 4,500 angaa. Ee kolli sasem goocim Gaadaanninne, Aaseeraanninnee Niftaaleem sulli summinnee weeshamaakko. Soorem qarinnem yoo ee beero'ik ki'n ooxxi qeeraa'lloom hundim 18,000 angaa ihookko. Ee lasage ee beero'ik summi «Waa'i eekke'e yookko» yoohan ihookko. Iyyoo'aaqeem Yihuxxi adil ihu saxxi hiinchonne Baabiloo'n uulli adil Nabukadanaxoor Yerusaalee'm beero'o waaraa kibbukko. Waa'im Yihuxxi adila lyyoo'aaqeemaa Keesammi Mi'n mu'uxxeka kolloo Nabukadanaxoorna higisaa uwwukko; Nabukadanaxoorim ee mu'uta Baabiloonanne hee'oo ixxi waa'uwwi mine massaa mu'uxxi minenne dissukko. Ee lasage adil Nabukadanaxoor Isra'eeliinsi qeefadanto'i keeniinsi adilluwwi abaroosaa gassaa'n shumo'oo ikko'i harde'i oosiinsi hofqaxam doo'llaa eebona ixxi mi'n gassaanina ijaajaanchi ihu Ashifaanaaza ijaajukko. Doo'llantam oosim adilla'n minenne awwaaddeena xantamisina dan, qooroomii lachchii yoo keen ikka'a luwwi hundam qaqqissa'a qoossitam miiqakkam luwwi bee'i keen ihimmi hasisookko. Baabiloo'n uulli suumee losanom losisoo'isina ijaajukko. Adilim hurbaataa woyi'n diqaasaa ixxi maaddiinsi ittu'uuyyii aggu'uuyyii sas hiinchi afeebe'e lossa'a lasage ixxi adilla'n minenne baxo asheettamisina qoodukko. Ee doo'llanto'i keeninne maqirem Yihuxxi sulliinsi Daani'eel, Hanaaniy, Miisaa'eelii Azaariyii hee'llo'o. Adi'l mi'n baxaa'n ijaajaanchim ixxuwwika summa dabaraa Daani'eelika Bilxaasoora, Hanaaniyika Sidiraaqa, Miisaa'eelika Miisaaqa, Azaaryikam Abdinaagoo yaa fissukko. Ihukkaarem Daani'eel adi'l mi'n hurbaata itimminnee woyi'n diqaasa agimminnee ixxi gag haashaaramoobee'isina ixxi tiironne qoodukko. Adi'l mi'n gassaa'n ijaajaanchim ee sawwitenne iittamona uunxukko. Waa'im Daani'eelina ee ijaajaanchi illagenne nuura uwwaa ixxena qishixxoo'isa issukko. Ihukkaarem adi'l mi'n gassaa'n ijaajaanchi Daani'eelina «Ittakkam hurbaataa aggakkam aggaa ki'nnuwwina ijaajukkok adil gagame; ki'nnuwwi darabiinsi naccakka'a i moollanni adil moo'ulas eese shoo bikkina baddoommo» yukko. Ee lasage Daani'eel adi'l mi'n gassaa'n ijaajaanchi Daani'eela, Hanaaniya, Miisaa'eelaa Azaariyaa egeroo'isa issu manchina «Niina ki awwaadaanina xale'i wix hurbaataa wo'oo uwwitaa tommi ayyaamina keentaa moo'e. Ee tommi ayyaamiinsi lasage neesee ee adi'l hurbaata ittam keenoo moo'e; moo'llittisinne hundinnem neesenne ki awwaadaanonne iittitti luwwi hundam isse» yukko. Ee ixxuwwi yito'isanne iittamaatem tommi ayyaam afeebe'e keenukko. Tommi ayyaamiinsi lasonne adi'l hurbaata itto'i keeniinsi hundiinsim loboka ixxuwwi danto'ookkokaa geejjito'ookkokaa moo'ukko. Ixxuwwi egeraanchim adi'l hurbaataa aggamisina ijaajamu woyi'n diqaasaa uraa wix hurbaata uwwukko. Waa'i ka soorem oosinam losanonnee kitaabannee hundannem lachchaa qoossimmaa uwwukko; Daani'eelim kaaltannee haqaawwo tirimmannee hundannem lachchi yoohan hee'ukko. Adil qoodu sasem hiinchim beeddaa lasonne Ashifaanaaz ee woraadduwwa hundam woraa adil Nabukadanaxoor illagenne hincaa'ukko. Adilim hundam atoorassu ammanenne Daani'eelinne, Hanaaniyinne, Miisaa'eelinnee Azaariyinnee akeekamookkok hee'ukkoyyo. Ee bikkina ixxuwwi adilina awwaaddeena doo'llanto'o. Adil lachchi bikkinaa qooroo'm bikkinaa xa'mmu xa'mmichchi hundannem ixxi gassi uullanne yo'i kiiraaniinsii gennaaniinsii hundiinsim ixxuwwi tommi suume lophphito'o. Daani'eelim adil Qiiroos adil ihu luxxi hiinchi afeebe'e adilla'n minenne awwaadam hee'ukko. Nabukadanaxoor adil ihu la'm hiinchonne haqaawwe'ukko; tiironnem lobakata u'nnamu bikkina diriireena xanukkoyyo. Ee bikkina haqaawwe'u haqaawwo kuttamisina kiiraano, falaano, gennaanoo qoolluwwi keenoo weeshakkamisina ijaajukko; weeshanto'i keenim waatta'a adi'l illagenne uullito'o. Adilim «An haqaawwo haqaawwe'aammo; haqaawwooma la'eembee'e i tiironne lobakata u'nnamaammo» yukko. Oo qoolluwwi keenim adilina Sooriy uullisinne «Adila, heer heerina adil ihe; ki haqaawwo niina ki awwaadaanina kure; neesem eehannika tirato kiina kulloommo» yita'a dabatto'o. Adilim dabaraa «Haqaawwoo haqaawwi tiratoo iina kuttakkobeelas an ki'nnuwwa muransoommo; ki'nnuwwi minneewwim gindamaa hacca uunjakkam beyyi ihookko. Ihukkaarem haqaawwoo tiratoo kuttakkolas irifo'o, an uwwoommi luwwaa lobakat lombaa a'llitakkamo; ee bikkina haqaawwoo tiratoo kullehe» yukko. Ixxuwwi odim dabatta'a «Adila, niina ki awwaadaanina at haqaawwe'llitti haqaawwo kure; tiratooma neese kulloommo» yito'o. Adilim dabaraa «An qoodummi qoodo'o laqqakko'i bikkina ammane higissakkeena hassakko'isa la'aammo. Haqaawwo kuttakkeena xantakkoobeelas hundim guzumo'antakkamo; i qoodo'i gatoo labissakka'a qophpha'nnekaa hantaa'l sagaraa gudissakko'ookko; ee bikkina haqaawwooma kullehe; tiratom kuttakkeena xantakkamisa la'oommo» yukko. Oo qoolluwwim «Adila, ka at xa'mmitoo luchcho kiina kureena xanoo manchi ka uullanne hore'em hee'ooyyo; mat adil hore'em la'amaakkoohanee malaayyaamoo ihuta'nnim kido'i woshsha haqaawwo tiraano, kiiraanoo gennaanoo xa'mmu balli bee'e. Adi'l xa'mmichchi kee'mmaalli ihu bikkina manni lambe'enne hee'oobee'i waa'uwwiinsi bagaan adi'lleka kido'i xa'mmichcha dabareena xanookkok ayyim bee'e» yito'o. Ee bikkina adil lobakata quuqaa Baabiloonanne yo'i qoolluwwi keeno hundam shakkona ijaajukko. Ee bikkina lachchi manna shimmina ijaaj firukko; Daani'eelaa ixxi besham shakkeena hasakko'o. Ee ammane Daani'eel Baabiloo'n qoolluwwa sheena firu adi'l waardiyyuwwi ijaajaanchi ihu Ariyooka qooroominne qaphphaa atoorassukko. Ixxom «Adil kido'i kee'mmaalli ijaajo fissukkok mahinatte?» yaa xa'mmukko. Ariyookim Daani'eelina ee woshshooma caakkisaa kurukko. Daani'eelim adi'l illagenne hincaa haqaawwika tirato kuroo'isina amman uwwamona adila uunxukko. Ee ammanem Daani'eel ixxi mine maraa ee woshsha ixxi beshina Hanaaniyina, Misaa'eelinaa Azaariyinaa kurukko. Ixxuwwam Baabiloo'n uulli qoolluwwinne maqirem shakkambee'isa iima'n Waa'i qishixxoo'isinaa eehanni tiratom caakkisoo'isinaa uunxitona kurukko. Ee hiimom eehanni tirat Daani'eelina kaaltanne caakkukko; ee bikkina Daani'eel «Qooroomii malaayyii ixxan ihu bikkina heer heerinam Waa'i summi galaxxamona. Doollee maaragee dabaransookko; adilluwwa adilla'n barcumanne afuussookko; odim adilla'n barcumiinsem dilliisookko; lachchi yoo keenina lachcha uwwookkok qoolluwwinam qoorooma uwwookkok ixxotte. Waa'i xillanne maaxamu luwwa caakkisookko; ixxi beyyonne caakki hundi ammanem yoo bikkina tuunsonne yoo luwwam la'ookko. Gaassi niyyanno'ina Waa'a, an keese galaxxoommo; lonsoommome. At qooroomaa malaayyee iina uwwitaatto; ni uunxatom macceessaa adi'lleka haqaawwo niina caakkissaatto» yaa iima'n Waa'a galaxxukko. Ee lasage Daani'eel Baabiloo'n qoolluwwa shihona adil ijaajaa hee'u Ariyook beyyo maraa «Baabiloo'n qoolluwwa shititte; eese adi'l illagenne hincaa'e; anim ixxi haqaawwika tirato kuroommo» yukko. Ee ammanem Ariyook Daani'eela adi'l beyyo massaa «Adila, ki haqaawwika tirato kiina kureena xanoo mat mancho Yihuxxi minaadabiinsi qeefadanto'i keeniinsi siidaammo» yukko. Adilim Bilxaasoora yamamu Daani'eelena «An moo'ummi haqaawwo tiratinnem iina kutteena xantoohonnihe?» yaa xa'mmukko. Daani'eelim adilina «Adila, at xa'mmitti maaxammi woshsha qoolluwwi, kiiraan, gennaanii falaanii kiina kutteena xantamoyyo. Ihukkaarem maaxammi woshsha hundam caakkisoo Waa'i iimanenne yookko; ixxi hanenne waaroo doollenne ihoo luwwi hundam kiina Nabukadanaxoorina la'isaakko. At ki ara'anne iinse'llaa moo'llitti haqaawwii ki kaaltii kane. «Adila, at ki ara'anne iinse'llaa waaroo doollenne ihoo luwwi bikkina dabaransitaa sawwitam hee'llitto; ee bikkina maaxamu luwwa caakkisoo Waa'i ka lasage ihoo luwwa kiina la'isaakko. Ihukkaarem ku maaxamu luwwi iina caakkukkok tiratoom adilina la'amoo'isinattee ki tiironnem dabaransitaa sawwitam hee'llittoka laqqoo'isinattee bagaan an ka uullanne yo'i qoolluwwi keeniinsi qooroomanne lophphummi bikkinayyo. «Adila, at lobakata belecce'oo moo'akkeena baddisoo geejji misila ki illagenne uullaakkoo moo'llitto. Ee misi'llek horoor muccur worqa; biqii angii kin bira; godabii gubeedii naasa; xumxuummi xaara; moqontiinsi aad yoo lokkik kolli xaara kolli odim buchchi hee'ukko. Eekka moo'llittuuyyim angi nakkoo'nnim mat kin duuniinsi toroshamaa ee misi'lleka xaaraa buchchaa ihu lokko aphphisaa xaansukkuuyyi moo'llitto. Ee ammanem xaarii buchchii, naas, kin birii worqii mateeyyam xaamukko; hurbaata ganakkam agana oodo'onne yoo luunqisam ihukko; hafachchim massukko; afu beyyim la'amukkoyyo. Ihukkaarem misilooma aphphisu kin lob duun ihukko; uulli hundannem wo'mmukko. «Haqaawwoom eehan hee'ukko; kabadem ee haqaawwika tirato adilina kulloommo. Adila, kiina iima'n Waa'i adillano, malaayye, wodaa lombaa uwwaakkoo adilluwwina adil atette. Uullanne hundannem yoo manna, diinatee cii'aa gassitoo'isina ki anganne higisaa uwwaakko; keese hundi luwwannem gassaanchi issaakko; ee bikkina horoo'l worqi atette. Kiinniinsi lasonne ki adillaniinsi hoffe'oo mulli adillan waarookko; eehanniinsi lasonne uulli hundam gassoo naasinne kobi'llamoo saxxi adillan waarookko. Ee kee'n lasaanchonne hundem luwwam iiqansaa xaansoo xaari'nnooi qoxxaalli soo'l adillan waarookko; xaar hundem luwwam iiqansaa xaansoo'isa oo adillan odim ixxeensi illageen hee'u adillano hundam iiqansaa xaansookko. Lokkikii maxxaalluwwikii kolli buchcha kolli odim xaar ihaa moo'llittisam ee'isam baxxamamaakkoo adillan ihookko; xaar buchchinne hamaaramaakkoo moo'llittisam ee adilla'nnek kolloom xaa'llisa qoxxaakkoohan ihookko. Lokkikii maxxaalluwwikii kollii xaara kollii buchcha ihukkisam ee'isam ee adilla'nnek kollii qooxxaalla kollii qacaalli ihookko. Xaar buchchinne hamaaramaa moo'llittisam ee'isam lamem adillanim hamaaramookko; ihukkaarem xaar buchchinne mat ihoobee'isam ixxuwwim mat ikkamoyyo. Ee adilluwwi doollenne iima'n Waa'i heer heerina gindamoobee'i adillano ki'isookko; oo adillanim mulli minaadabina uwwamoobee'an ihookko. Oo adillanim mulli adillano hundam liitaa guullaa bi'isookko; ihukkaarem oo adillan heer heerinam qoxxaa hee'ookko. Kin angi nakkoo'n duuniinsi toroshamaa xaara, naasa, buchcha, kin biraa worqaa xaansukkuuyyi moo'llittisam hanenne waaroo doollenne ihoo luwwa hundiinsi lob Waa'i kiina adilina moo'isaakko. Haqaawwoom hanqo'ane; tiratim amma'nnamaakkoohane» yukko. Ee ammanenne adil Nabukadanaxoore Daani'eelina uullanne heeshaa otossukko; hurbaaxxi kitimaa aduruusam hincaa'akkona ijaajukko. Adilim Daani'eelina «Ki'nnuwwik Waa'i mulli waa'uwwiinsi hundiinsim lobane, adilluwwina hundinam Moollannaa maaxamu luwwi hundam caakkiseena xanoohanee; ee bikkina ka maaxammi luwwa at caakkisseena xantaatto» yukko. Ee lasage Daani'eela adil iimiimaa'ukko; lobakat irifo'om uwwukko. Baabiloo'n uullanne hundannem daannooma uwwukko; ee uulli qoolluwwi keen hundinam ijaajaanchi issukko. Daani'eel tiissiisukkaare adil Sidiraaqa, Miisaaqaa Abdinaagoo Baabiloo'n uullanne hundannem gassaan issukko; ihukkaarem Daani'eel adilla'n minenne hee'ukko. Adil Nabukadanaxoor uullichcha lohayyi anga dufaachcham lohayyi anga ihoo misila worqinne baxisukko; Baabiloonanne Duuraa yakkam biir beyyonnem uullisukko. Ee misi'l maassi ugudina gassaano, suu'm manna, woshaabbuwwa, lommanna, mu'uxxi mi'n gassaano, daannuwwa, ixxi sogaanoo goo'n gassaanoo weeshisukko. Oo keen hundim maassi ugudina wixxita'a ee misi'l illagenne uullito'o. Ee lasage mat alallaataanchi sagara iimaa'aa «Ki'nnuwwi annanni annanni giichchi, minaadabii annanni annanni suume woccakkam keenii hundim, xurumbullika, maasinqo'ika, kiraa'lleka, diitta'ika, gambaabiyyikaa kajji mu'uxxekaa sagara macceessakkam ammane uullanne aad heeshitakka'a adil Nabukadanaxoor uullisu worqi misilina otossi'llehe. Uullannem aad heeshaa otossoobee'i manchi hee'ulas ee ammanem aphphoo giiranne uunjamookko» yukko. Ee bikkina annanni annanni giichchiinsi, minaadabiinsii annanni annanni suume wocakkam uulliinsii waatto'i manni hundim buuxxi xurumbika, maasinqo'ika, kiraa'lleka, diitta'ikaa kajji mu'uxxekaa sagara macceessa'a uullanne heeshta'a adil Nabukadanaxoor uullisu worqi misilina otossito'o. Ee ammanem Baabiloo'n uulli qoolluwwi hincita'a Yihuxxi uulli manna kasasso'o. Adil Nabukadanaxoorinam «Adila, at heer heerina adil ihe. Adila, at xurumbullika, maasinqo'ika, kiraa'lleka, diitta'ika, gambaabiyyikaa kajji mu'uxxekaa hundikam sagara macceesoo ammane ayyim uullanne aad heeshaa worqi misilina otossinona. Heeshaa otossoobee'i ayyim aphphoo giiranne uunjamona ijaajjaatto. Baabiloo'n awuraajjuwwanne at gassaan issitti Sidiraaqa, Misaaqaa Abdinaagoo yakkam Yihuxxi manni yo'o; adila, oo keen ki ijaajo sabbo'ookko; ki waa'uwwa awwaaddamoyyo; at uullissitti misilinam otossimma sabbo'ookko» yito'o. Nabukadanaxoorim ee woshsha macceesu ammanenne lobakata nadadaa Sidiraaqa, Miisaaqaa Abdinaagoo ixxi beyyo worakkona ijaajukko; ixxuwwim waatta'a adi'l illagenne uullito'o. Adilim ixxuwwina «Sidiraaqa, Miisaaqaa Abdinaago! I waa'uwwina awwaadimmaa an uullisummi worqi misilinam otossimmaa sabbakko'is hanqamennihe? Kabadem xurumbika, maasinqo'ika, kiraa'lleka, diitta'ika, gambaabiyyikaa kajji mu'uxxekaa hundikam sagara macceessakkam ammane an uullisummi misilina uullanne heeshtakka'a otossitakko'aare e'llookko. Ihukkaarem otossitakkobeelas ee ammanem aphphoo giiranne darabantakkamo; i angiinsi ki'nnuwwa gatisoo waa'i hinkane?» yukko. Sidiraaq, Miisaaqii Abdinaagii adilina «Adila, ni gaga gatixxineena ka woshshina dabachcha uwwimmi niina hasisoohaneyyo. Neese otossinoommi ni Waa'i ka aphphoo giiriinsi gatiseena xanookko; ki angiinsem gatisookko. Ihukkaarem adila, ni Waa'i gatisoobeeta'nnim ki waa'uwwina awwaandoombee'an ihukkisaa at uullissitti worqi misilinam otossinoombee'an ihukkisaa la'e» yito'o. Ee ammane Nabukadanaxoor Sidiraaqanne, Miisaaqannee Abdinaagonnee lobakata nadadukko; ixxi illim heemachchukko. Ixxim Aphpham hee'u giir illagee'nnaanniinsi lamar suume eexxaa aphphoo'isa issakkona ijaajukko. Sidiraaqa, Misaaqaa Abdinaagaa katta'a aphphoo giiranne darabbona ixxi gogotiinsi malaayyaammuwwa ijaajukko. Ee bikkina qambiisa, sure'e, horoo'l shaashshaa mulli eddechchaa edde'llo'isam katta'a aphphoo giiranne darabbo'o. Adi'l ijaajim lobakata u'nnansoohan hee'u bikkina giir lobakatisa aphpham hee'ukko. Ee bikkina Sidiraaqa, Misaaqaa Abdinaagaa giiranne darabbo'i manna gii'llek laban shukko. Ihukkaarem sasem mannim qooxxaallisa karanto'isam giiranne darabanto'o. Ee lasage adil Nabukadanaxoor maalalukkuuyyi afuuru beyyiinsi qaqqisaa shoottukko. Ixxi sogaaninam «Kallaa giiranne darambummok xale'i sas manchoyyonnihe?» yukko. Ixxuwwim «Adila, hanqame» yito'o. Adilim «Oono'o, tiranta'a gii'l lambe'enne daba'llantam soor mancho moo'oommuulla; giirim maham hawwodukkoyyo; soo'llaannikim hagar Waa'i beeto laboohane» yukko. Ee ammanem Nabukadanaxoor aphphoo gii'l nafanne hincaa «Hundam xanoo Waa'ina awwaadaan ikkakko'i Sidiraaqa, Misaaqaa Abdinaagoo, gii'l woriinsi fittakka'a keyyaallehe!» yukko. Ixxuwwim gii'l woriinsi fitto'o. Ee lasage gassaan, lommanni, ijaajaanii adi'l sogaanii hundim ee kee'n kululleetanne wixxita'a giir ee mannika orachcho hawwodubee'isa, horoo'l saraatim shokkubee'isa, edde'llo'i eddechchamgiir nakkubee'isaa mullek gataa gii'l fooshshim ixxuwwa nakkubee'isaa moo'llo. Nabukadanaxoorim dabaraa «Ixxi asse'amaancho asse'aa ixxi awwaadaano gatisu Sidiraaqik, Misaaqikii Abdinaagikii Waa'i galaxxamaakkoohan ihona. Ixxonne amma'nnanta'a adi'l ijaajo sabimminne ixxuwwi otossitam Waa'iinsi bagaan mulli waa'ina awwaadimmaa otossimmaa sabba'a ixxuwwika foore higissa'a uwwita'a hee'llo'o. «Ee bikkina ka'isa gatisoo Waa'i mullek bee'e; Sidiraaqaannonne, Misaaqaannonnee Abdinaag Waa'annee game'llaxxi sagara wocoo giichchi, minaadabii annanni annanni suume wocoo mannii hundim muramona. Ixxuwwi minneewwim gindamaa hacca uunjakkam beyyi ihona yaa ijaajaammo» yukko. Ee lasage Sidiraaqa, Misaaqaa Abdinaagoo adil Baabiloo'n uullanne daannuwwi issukko. Adil Nabukadanaxoor heer uullanne hee'oo annanni annanni giichchina, minaadabinaa annanni annanni suume wocoo keenina hundinamii «Xummi ki'nnuwwina ihona! Hundam xanoo Waa'i iina issu agannaa maalalsiisoo luwwaa ki'nnuwwina kureena hasoommo. «Waa'i moo'isoo aganni hinkido'i maalalsiisoohane! Ixxi baxoo baxim hinkido'i wodaamo! Waa'ik adillan heer heerinam hee'oohane; ixxi adillaninam tungi bee'ane. «An Nabukadanaxoor i adilla'n minenne lobakat goddinne makkixxaa hee'am hee'ummo. Mat balla ara'anne iinse'aammoohaannonne lobakata baddisoo haqaawwoo muggisoo kaaltaa moo'ummo; Ee bikkina haqaawwoo'mmeka tirato kuttona Baabiloo'n uullanne yo'i qoollowwi hundim i beyyo waattamisina ijaajummo. Ee lasage kiiraan, gennaan, falaanii qoolluwwi keenii i beyyo waatto'o. I haqaawwom ixxuwwina kurummo. Ihukkaarem ixxuwwi i haqaawwika tirato kutteena xanto'oyyo. Ee lasage i waa'i summanne Bilxaasoora yamamoo Daani'eel i beyyo aagukko; keesamaakkoo waa'uwwikim ayyaan ixxonne hee'ukko; anim haqaawwo ixxena kurummo. Ixxenam ‹Qoor kee'n awwonsaanchi ikkitti Bilxaasoora, keesamaakkoo waa'uwwik ayyaan keesenne yoo bikkina maaxamu luwwi hundim kiinniinsi daphphoobee'isa an la'oommo. Oono'o, an haqaawwe'ummi haqaawwo kuroommaare tiratooma iina kure. «An ara'anne iinse'aa mat geejji haqqichcho uulli lambe'enne uullaakkoo kaaltanne moo'ummo. Ku haqqichchi geejjaa malaayyaamoo ihukko; qeeraa'lloomim iimane afukko; uulli tochchi afeebe'em moo'amam hee'ukko. Buyyim mishisoohan; mishim lobakat hee'ukko; mishim hundinam ihoo hurbaat hee'ukko; ixxi hafannem uulli moochchi hundim usheexxam hee'ukko; iima'n cii'im caaffuwwanne hee'am hee'ukko; foorinne yoo qooccanchi hundim ee haqqichchi mishiinsi itam hee'ukko. «I ara'anne iinse'aa moo'ummi kaaltanne mat keesammi asse'amaanchi iimaniinsi dillukkuuyyi moo'ummo. Ixxim sagara iimaa'aa «Haqqichcho mullehe; caaffuwwam kirimmehe; buyyuwwam giggissehe; misham binnaa'llehe; lugumonne yoo moochchii caafanne yoo cii'im gibona. Ihukkaarem gugumooma biir beyyonne xaarinnee naasinnee kattakka'a uullanne hee'ona ullehe. «Iima'n hadaddi ixxonne dillona; ixxi heechchim haqqoro'l moochchinnette ihona. Ixxek mannoomaxxi tiir dabassamaa lamar hiinchi afeebe'e moochchi tiir ihona. Ku woshshi asse'amaaninne kuramaakko; oogato'im keesammuwwinne bayyanamaakko. Oohim hundam xanoo Waa'i manni adillan hundannem daanni ihukkisa, ee adillanom ixxi hasukkaannina hundinam uwwoohan ihukkisaa gadanto'oo keeninam ee adillano uwwoohan ihukkisaa foorinne hee'oo manni hundim la'oo'isinatte» yukko. «An adil Nabukadanaxoor moo'ummi haqaawwi kane; Bilxaasoora, at iina tiratooma kure; i adilla'n woronne yo'i qoolluwwi keen eehanni tiratooma kutteena xanto'oyyo. Ihukkaarem keesenne keesamaakkoo waa'uwwik ayyaan yoo bikkina at titteena xantootto› yummo» yukko. Bilxaasoora yamamu Daani'eel eekka macceesu ammane lobakata muggu bikkinaa kichche'u bikkinaa hofqax ammaninam maham woceena xanukkoyyo. Ee bikkina adil «Bilxaasoora, haqaawwom ihukko tirat keese u'nnisoone» yukko. Bilxaasoorim dabaraa «Adila, haqaawwom ki diina'ina tiratim keese sabbam keenina ihona. Qeeraa'lloom iimane afaa uullanne yoo mannina hundinam moo'amoo mat geejji malaayyaam haqqichcho kaaltanne moo'llitto. Ee haqqichchik buyyi mishisoohane; mishim lobakata; mishim hundinam ihoo hurbaat hee'ukko; moochchi ee haqqichchi hafanne usheexxam hee'ukko; iima'n cii'im caafanne do'nna baxaa hee'am hee'ukko. Adila, oo haqqichchi atette! At lobanee malaayyaamo; at lombinne iimiimitaa iimane affaatto. Ki gassim uulli tochchi afeebe'e. Adila, at moo'llonam mat keesammi asse'amaanchi iimaniinsi dillaa ‹Haqqichchooma mullehe; bi'isseheme. Ihukkaarem gugumooma xaarinnee naasinnee kattakka'a biir beyyonne uullanne hee'ona uullehe. Iimaniinsi dilloo hadaddim aashisona; ixxekim heechchi beyyi lamar hiinchi afeebe'e bii'l moochchinnettei ihona› yukkuuyyi macceessitto. «Adila, haqaawwoo'mmek tirat kane; ku woshshi Hundam xanoo Waa'i keesenne i moollannanne ihoo'isina oogataakkoohane. Hundam xanoo Waa'i manni adillanina daanni ihukkisaa eeham ixxi hasukkaannina uwwoohan ihukkisaa laqqeebe'e lamar hiinchina manniinsi annanni ikkaa bii'l moochchinne hee'llootto; mirgo'isam hixe ittootto; iima'n hadaddinnem aashshootto. Haqqichchoo'mmek gugum uullanne gatoo'isina ijaajamukkok heer uullanne Waa'i daanni ihukkisa laqqoo ammane odim daba'llitaa adil ikkeena xantoo'isa moo'isoohane. Ee bikkina adila, an keese sogoommi sogitano macceese; baaxiilo baximma uttaa er baxo baxe; jolle uttaa wor amadanto'i keenina qishixxe; eehid issitlas kiikki xummi doolli qeeraa'lleena xanookko» yukko. Ku hundim adil Nabukadanaxooranne afukko. Tommiinsii lam aganiinsii lasonne adil Nabukadanaxoor Baabiloonanne yoo adilla'n mi'n fooqanne daba'llamam hee'ukko. Adilim «Kuk i malaayyinnee wodinnee i lombii hibbii la'amoo'isinaa adilluwwinam heechchi beyyi ihonaa an baxisummi lob Baabiloonayyonnihe?» yukko. Adil wocaa guulloo'nnim iimaniinsi «Adil Nabukadanaxoora! Kiina qoodamukkoka macceese! Adillan kiinniinsi hooramaakko. Hundam xanoo Waa'i manni adillan hundinam daanni ihukkisaa ixxi hasukkaanninam uwweena xanoo'isaa laqqeebe'e lamar hiinchina manniinsi annanni ikkaa bii'l moochchinne hee'llootto; mirgo'isam hixe ittootto» yoo sagar waarukko. Oo woshshim ee ammanem Nabukadanaxooranne ihukko; manniinsim annanni ihaa mirgo'isam hixe itukko. Ixxi orachchim iimaniinsi dilloo hadaddinne aashukko; oddim gaaqichchaannisa, xuranqim iima'n cii'aannisa qeeraa'llukko. Adil Nabukadanaxoor «An Nabukadanaxoor oo lamarem hiinchim higaa lasage iima'n kolli moo'ummo; i tiirim daba'llukko. Hundam xanoo Waa'am galaxxummo; heer heerina hee'oo Waa'inam lombaa galataa uwwummo. «Waa'ik gassi heer heerinatte; ixxi adillaninam tungi bee'ane. Uullanne hee'oo minaadab hundim ixxi illagenne mahayyome. Iima'n gogotannee uulli minaadabannee ixxi doo'llukkoka issookko. Ixxeka doo'lla hooreena xanookkok te'im ‹Mahina issitoolla?› yookkok ayyim bee'e. «I tiir daba'llukkisam ee ammanem i adilla'nnek lombi, hibbii nuurii hundim iina daba'llaa uwwamukko; i sogaanii suu'm manni eese hasso'o; i adillanonnem daba'llummo; illagee'nnaanniisem loboka lombi exxukko. «Kabadem an Nabukadanaxoor iima'n adilina galataa lombaa uwwoommo; lonsoommome. Ixxi bax hundim hanqo'ane; ixxi oogatim golo'oom bee'ane; bolxoominne taakke'llam keeno hundam sholliiseena xanoohane» yukko. Mat balla adil Belshaazar kuma ihoo suu'm mannana lobakat maadda gudisukko; ixxuwwinne maqirem woyi'n diqaasa agam hee'ukko. Woyi'n diqaasa aggu'uuyyim adil Belshaazar ixxi anni Nabukadanaxoor Yerusaaleemanne hee'u keesammi miniinsi eebu worqinnee kin birinnee baxamu mu'uttuwwa eebbona awwaadaano ijaajukko. Eebisu mashka'im ixxii suu'm mannii, ixxi meentii bakki meentii ee worqi mu'utanne agimminatte. Awwaadaanim Yerusaaleemanne hee'u keesammi miniinsi waaru worqikaa kin bi'llekaa mu'uta ee ammanem eebbo'o; adilii suu'm mannii ixxi meentii bakki meentii ee mu'uttuwwanne woyi'n diqaasa aggo'o. Woyi'n diqaasa aggu'uuyyim worqinne, birinne, naasinne, xaarinne, haqqinnee kininnee baxamu qophpha'n waa'uwwa galaxxito'o. Ee ammanem angi maxxaalluwwi dangonnem moo'amaa caakka dissakkam mu'uxxi illagenne yoo danaamisa nannamaakkoo adilla'n mi'n gortannanne kitaabukko; adilim ee kitaaboo anga moo'ukko. Ee ammanem adi'llek illi heemachchukko; lobakatam muggukko; ixxek angii lokkim hoogukko; mogole'im huxe'ukko. Adilim gennaano, kiiraanoo qoolluwwi keenoo ixxi beyyo worakkona sagara iimaa'a ijaajukko; weeshanta'a waatto'isam adil ixxuwwina «Ka gortannanne kitaabamukkoka qananaa'aa tiratooma iina kureena xanoo manchi adilla'nneka kashar eddechcha edde'ookko; worqi coram gaanjenne issaqqookko; i adillanonnem saxxi beyyi gassaanchi ihookko» yukko. Ee lasage oo qoolluwwi hundim adi'l beyyo hincito'o; ihukkaarem kitaabamukkoka qananaa'eenaa tiratooma adilina kureenaa xanukkok ayyim hee'ukkoyyo. Adil Belshaazarim lobakata baddukko; illim illagee'nnaanniinsi loboka heemachchukko; ixxi suu'm mannim mal bi'aa muggito'o. Illageen adilatte hee'llo'i adi'l ama adi'llekaa adi'l suu'm mannikaa corochcha macceessa'a maadda itakkam mine aagga'a adilina «Adila, at heer heerina adil ihe; ka woshshanne u'nnantitte; illim heemachchoone. Keesammi waa'uwwik ayyaan yoo mat manchi ki adilla'n woronne yookko; kiyyanni adilla'n doollennem waa'uwwisa ixxonne qooroom, lachchii qoossimmii wo'mmaakkoohan ihaa siidamaakko; kiyyanni Nabukadanaxoorim kiiraanina, gennaanina, qoolluwwinaa falaaninaa hundinam daanni issaa hee'ukko. Adil summa Bilxaasoora yu oo Daani'eel er tiir, qooroomii qoossimmii yoohan ihaa haqaawwo tirimma, daphphu luwwa caakkisimmaa guddamu luwwa tirimmaa xanoo manchi hee'ukko. Ee bikkina Daani'eela weeshise; ixxi kiina tirato kurookko» yito'o. Ee lasage Daani'eel adi'l illagenne hincukko; adilim «Iyyanni adil Nabukadanaxoor Yihuxxi uulliinsi qeefadaa woru keeniinsette ikkitti Daani'eel atettennihe? Waa'uuwwik ayyaan keesenne yoo'isa, lachchi, qoossimmii annanni qooroomii kiina yoo'isa an macceesaammo. Ka kitaabamukkoka qananaa'lla'a tiratooma iina kutteena qoolluwwi keenii gennaanii i illagenne hincita'a hee'llo'o. Ihukkaarem eehanni tirato kutteena xanto'oyyo. Ihukkaarem at tirato kutteenaa hawwisoo luwwam titteenaa xantoo'isa macceesaammo; kabadem ka kitaabamukkoka qananaa'lleenaa tiratom kutteenaa xantilas adilla'nneka kashar eddechcha edde'llootto; worqi coram gaanjenne issaqqitootto; i adillanonnem saxxi beyyi gassaanchi ikkootto» yukko. Daani'eelim adilina «Uwwitoo luwwi kiinam gatona; irifo'om mulli mannina uwwe. Ihukkaarem kitaabamukkoka adilina qananaa'oommo; eehanni tiratom kiina kuroommo. «Adila, hundam xanoo Waa'i kiyyannina Nabukadanaxoorina adillano, malaayye, lombaa hibbaa uwwukko. Ee malaayyiinsi ki'aa annanni annanni giichchi, minaadabii annanni annanni suume wocoo keenii hundim ixxo baddaa huxe'am hee'ukko. Ixxi hasukkoka sheena hasukkokam gatiseena, hasukkokam li'iseena hasukkokam sholliiseena xanam hee'ukko. Ihukkaarem ixxi amaadoohanee wodan duudaakkoohanee ihu bikkina adillaniinsi dillukko; lombim ixxeensi sheelatamukko. Hundam xanoo Waa'i manni adillan hundinam daanni ihukkisaa ee adillanom ixxi hasukkaannina uwwoo'isaa la'eebe'e manniinsi annanni ihaa tiir dabassamaa mochchaannisa ihukko; ixxi heechchi beyyim udma'i uulli hallinnette ihukko; mirgo'isam hixe itukko; orachchim iima'n hadaddinne aashukko. «Belshaazara, at ixxi beet ikkaa ka hundam laqqittuuyyim iima'n Moollannanne bolxitto bagaan ki gaga heeshaa'llittoyyo. Keesammi Miniinsi bogamu mu'utam ki beyyo eebissaa at, ki mokaaninti, ki meentii bakki meentii woyi'n diqaasa aggakko'o; birinne, worqinne, naasinne, xaarinne, haqqinnee kininnee baxamu moo'eena, macceeseenaa la'eenaa xanoobee'i waa'uwwa galaxxitto. Ihukkaarem ki fooree ki googoo ixxi anganne amadu Waa'a lonsittoyyo. Ee bikkina ku angi maxxaalluwwi ixxi beyyiinsi asse'amaa ka gortannanne yookkok kitaabaakko. «Kitaabamu luwwim ‹Maanee, Maanee, Teeqeel, Faariis› yoohane. «Tiratim ‹Maanee yimmi Waa'i ki adilla'n doolle xigaa beeddoo'isa issukko› yimma. «Teeqeel yimmi ‹Keennaanchonne keenantaa sholle'llaatto› yimma. «Faariis yimmi ‹Ki adillan baxxansamaa Meedoo'nnaanninaa Faarees uulli minaadabinaa uwwamukko› yimma» yukko. Ee ammanem Belshaazar Daani'eelina adilla'n kashar eddechcha eddeesakkonaa worqi coram gaanjenne issakkonaa ijaajukko; ixxi adillanonnem saxxi beyyi gassaanchi ihona alallaatisukko. Ee hiimom Baabiloo'n adil Belshaazar shakko'o. Meedoo'n uulli Daariyoosim adillano aa'ukko; ixxekim umur lohayyee lam hiinchoo hee'ukko. Daariyoos ixxi adilla'n uulli hundannem 120 gassaano doo'lleena hasukko. Odim oo gassaan adi'l diinate xa'issa'a adil hawwodamoobee'isa egettam sas mancho ijaajaan issaa doo'llukko. Ee sasiinsim mat Daani'eelatte hee'ukko. Daani'eel ee ijaajaaniinsii daannuwwiinsii lachchinne lophphaa siidamu bikkina adil ixxi adilla'n uulli hundannem gassaanchi isseena hasukko. Ee lasage oo gassaanii ijaajaanii Daani'eelannee ixxi baxoo adilla'n baxonnee hantaaro qoocciteena sawwitam hee'llo'o. Ihukkaarem Daani'eel amma'nnamaakkoohanee lobakata gaga ege'llaakkoohanee ihu bikkina huushancha te'im hawwojja siiddeena xanto'oyyo. Ee bikkina ixxuwwi «Ixxi Waa'i see'l quuxiinsi bagaan Daani'eela kasansoommi hawwojja maham siindeena xannummoyyo» yaqqanto'o. Ee bikkina oo gassaanii ijaajaanii wixxita'a adi'l beyyo matta'a «Adil Daariyoosa, heer heerina adil ihe. Adila, neese ki adilla'n gassaan, daannuwwi, woshaabbuwwi, sogaanii ijaajaanii hundim ayyim sad balli afeebe'e kiinniinsi bagaan manna te'im mulli waa'a uunxulas hobbi barenne darabamona at alallaatissonaa qoxxaalli ijaajo fissitonaa iittammaammo. Kabadem adila, Meedoo'nnaannisaa Faariis see'llisaa dabassamoobee'i ijaajo fisse; kitaabbaahim la'ise» yito'o. Adil Daariyoosim alallaat kitaabamaa firoo'isa issukko. Daani'eelim ijaajoom kitaabamaa firukkisa la'ukkaarem ixxi mine aagukko; ixxi mi'n fooqik maskoottuwwi Yerusaalee'm kollonne fooqaakkoohan hee'ukko; illageen issam hee'ukkisam ballanne sas kore guruphphaa ixxi Waa'a uunxukko; galaxxukkome. Oo dollottam keenim wixxita'a matta'a Daani'eel ixxi Waa'i uunxukkuuyyii galaxxukkuuyyii moo'llo'o. Ee ixxuwwi adi'l illagennem hincita'a «Adila, kiinniinsi bagaan sad balli afeebe'e manni kolli te'im waa'i uunxoo ayyi manchim hobbi barenne darabamoo'isina alallaatissaa hee'llittoyyonnihe?» yito'o. Adilim dabaraa «Hanqame, Meedoo'nnisaa Faarees see'llisaa dabassamoobee'i qoxxaali ijaaj firaakko» yukko. Ixxuwwim dabatta'a «Adila Yihuxxi uulliinsi qeefadanta'a waatto'i manniinsi mat ihu Daani'eel ballanne sas kore ixxi Waa'a uunxoolla bagaan keesee kitaabbitti ijaajoo lonsukkoyyo» yito'o. Adilim eekka macceesaa lobakata kichche'ukko; Daani'eelam gatiseena murte'ukko; eelliinchi ageebe'e hundam Daani'eela gatisoo googo siideena yakukko. Ee lasage oo keen adi'l beyyo hincita'a «Adila, Meedoo'nnaannisannee Faariis see'llisannee mat adi'llek alallaat te'im ijaaj dabassamoobee'an ihukkisa la'e» yito'o. Ee bikkina Daani'eela amadakka'a hobbi barenne darabakkona adil ijaajukko. Daani'eelinam adil «Hundi ammanem otossitoo ki Waa'i keese gatisona» yukko. Hobbi ba'l suumennem kina eebakka'a ifiisakko'o; Daani'eelanne issakko'i luwwi dabassamoobee'isina adil ixxi koobo'innee ixxi sogaa'n koobo'uwwinnee koobukko. Adilim ixxi adilla'n mine elle'ukko; hurbaatam itukkoyyo; liiransoo luwwim ixxena hincoo'n diriiroo'n garukko. Adilim soodaraar daram ki'ukko; qaqqisaahim hobbi baryoo bexxo marukko. Hobbi ba'l beyyo hincaatim kichchechchi sagarinne «Hee'oo Waa'ina awwaadaanchi ikkitti Daani'eela, hundi ammanem otossitoo ki Waa'i hobbiinsi keese gatisimma xanukkonnihe?» yaa weeshukko. Daani'eelim adilina «Adila, heer heerina adil ihe. Waa'i illagenne muccur ihummi bikkinaa ki illagennem hawwodummi luwwi siidamubee'i bikkinaa i Waa'i ixxi asse'amaancho asse'aa hobbika suume ifiisukko; hobbim hawwodukkoyyo» yukko. Adilim lobakata liiramukko; Daani'eelam hobbi bariinsi fissakkamisina ijaajukko; Daani'eelem hobbi bariinsi firukko; Waa'annem amma'nnamaakkoo bikkina maham hawwodamukkoyyo. Ee lasage Daani'eela kasasso'i keen amadanta'a waattamisina adil ijaajukko; ixxuwwa, ixxuwwi oosoo ixxuwwi meentoo amadakka'a worakka'a hobbi barenne darabakkamisa issukko. Ixxuwwim ba'l lugumo afoo'nnim hobbi dereeransukko; miqqeewwam iiqansukko. Ee ammanem adil Daariyoos uullanne hundannem hee'oo annanni annanni giichchina, minaadabinaa annanni annanni suume wocoo keeninaa «Xummi ki'nnuwwina ihona. I adillanonne yoo minaadab hundim Daani'eel Waa'a lonsoo'isinaa baddoo'isinaa ka alallaato alallaataammo. «Ixxi heer heerina hee'oo Waa'a; ixxi adillanim bi'oobee'ane; ixxi gassinam tungi bee'ane. Ixxi gatisookko; agaagookkome; ixxi uullannee iimanennee maalallatoo agannaa baxookko. Ixxi Daani'eela hobbi suumiinsi gatisaakko» yaa alallaato fissukko. Daani'eelim Daariyoosaannonnee Faariis uulli Qiiroos adilla'n doollennee hundannem lombaam ihaa hee'ukko. Baabiloo'n adil Belshaazar adil ihu luxxi hiinchonne an Daani'eel ara'anne iinse'aa haqaawwoo kaaltaa moo'ummo; moo'ummi haqaawwom kitaabummo. Oohim soorem qarinnem ki'u hafachchi lob dambalaqa heekkeesukkuuyyi hiimonne kaalta moo'ummo. Soor geejji moochchi dambalaqiinsi firukko; ixxuwwim annanni annanni moochchi hee'llo'o. Luxxi moochchichchi hobbichcho laboohan hee'ukko; ixxenam gaaqichchaanni'nnoo'i lad hee'ukko. An moo'onam oo laddeewwi xoqolamukko; moochchichchoomim iimaa mannisa lam lokkinne uullukko; manchi beetisam sawwoo tiir uwwamukko. Oono'o, la'm moochchichchim tibbe'e laboohane; mat kolli lokkom iimaa'aa uullaakko; midaaxxi miqqeewwikim sas ixxi suumenne inquwwi lambe'enne hee'ukko; ixxenam «Ki'e, godditeebe'e maara ite» yamamukko. Ee lasage kabeechcho laboo mulli moochchichcho moo'ummo; ixxi afarennem cii'i lada laboo soor lad hee'ukko. Soor horoorim hee'ukko; gassimmi daannoomim uwwamukko. Ee lasage odim hiimonne mulli kaalta moo'ummo; i illagennem mat malaayyaamo, baddisoohanee huxiisoohanee ihu soo'l moochchichchi hee'ukko. Ixxenam xaa'l inquwwik geejji geejji hee'ukko; oo moochchichchi iiqansam hee'ukkoo itam hee'ukko; gatukkokam lokkinne hancaacansam hee'ukko; illageen moo'ummi moochchiinsi hundiinsim annanni ihaa tommi buud yoohan hee'ukko. Anim ee buudduwwi bikkina sawwihonam buudduwwi lambe'enne mulli hoffi buud mutaa illagee'n buudduwwiinsi sasooma xoqolansaa ubbuusukkuuyyi moo'ummo; ee buudoominam mannaanni'nnoo illii bolxoominne wocoo suumii hee'ukko. An moo'ummuuyyi hee'onam adilla'n barcummuwwi biddiqukko; oo hinaxxi doollikim afuurukko; ixxi eddechchim baraxxisa qadaalli hee'ukko; horoo'l saraatim fuutto'i'nnoo'i qadaalli hee'ukko; adilla'n barcumim gii'l labana adilla'n barcu'm shafe'im aphphoo giir hee'ukko. Gii'llekim daajji ee adilla'n barcumiinsi firaa daadam hee'ukko; kum amma'n kum awwaadaanim ixxena awwaaddam hee'llo'o; kaakum amma'n kaakumim ixxi illagenne uullita'a hee'llo'o; oogato'im asheeramukko; kitaabbuwwim fooqukko. An moo'ummuuyyi hee'onam hoffi buud bolxoominne wocukkuuyyi macceesummo; moochchichchoom duramaa miqii maarii xaamaa ee giiranne darabamukkuuyyi moo'ummo. Mulli moochchuwwiinsim daannoom hooramukko; ihukkaarem hofqax ammaninam foorinne hee'llamisina cawwamukko. Hiimo moo'ummi kaaltanne manchi beeto labookkok iima'n duubinne waarukkuuyyi moo'ummo; ixxim hinaxxi doollaanni beyyo waarukko; eehanni illagennem hincaa'akko'o. Annanni annanni giichchuwwi, minaadabii annanni annanni suuminne woccam keenii ixxena awwaaddamisina daannoom, lombii malaayyii uwwamukko; ixxi gassina heer heeraxxan ihu bikkina ixxi adillaninam tungi be'ane. An Daani'eel moo'ummi kaaltanne lobakata u'nnamaa tiironne kichche'ummo. Ee beyyonne uullito'i keeniinsi mataanni beyyo hincaa moo'ummi kaaltika hanqo'i tirato kurona xa'mmummo; ixxim eehanni tirato hundam iina kurukko. Ixxim iina «Ku soorem lob moochchuwwim uullanne ki'llam soorem adillannuwwame. Ihukkaarem hundam xanoo Waa'ik keesammuwwi ee adillano hootta'a heer heerna ixxuwwi gaqqan issitamo» yukko. Ee lasage ee keeniinsi annanni ihoo lobakata baddisoohan, inquwwi xaara, xuranquwwim naas ihaa iiqansoohane, itoohanee gatukkokam lokkinne hancaacamoohanee ihu soo'l moochchichchi bikkina hanqo'i tirato la'eena hasummo. Odim ka moochchichchi horoorenne hee'u tommem buudduwwi bikkinaa ee tommem buuxxi lambe'enne mutaa sas buudduwwa xoqolaa ubbuusu buuxxi bikkinaa hanqo'i tirato la'eena hasummo. Oo buudim mannaanni'nnoo'i illii bolxoominne wocoo suumii yoohaan ihaa hagar mulli keeniinsi annanni hee'ukko. Oo buud keesanto'oo keeninne oramaa kaa'ukko. Oohim hinaxxi doollik waareebe'e, oogato'om hundam xanoo Waa'i keesammuwwina uwweebe'ee oo keesammuwwim adillano aa'llam doolli afeebe'ettee. Ixxim iina «Ku soo'l moochchichchi heer uullanne adil ihoo soo'l adillano; ixxi mulli adillannuwwiinsi hundiinsim annanni ihaakkoohan ihookko; heer uulli hundam hancaacansukkuuyyii xaansukkuuyyii itookko. Tommem buudduwwim ee adillaniinsi ki'oo tommem adilluwwame; ee lasage illagee'n adilluwwiinsi annanni ihaakkoo mulli adil ki'aa sasooma sholliisookko. Hundam xanoo Waa'anne bolxoominne wocookko; ixxeka keesaanto'oo keenom u'nnisookko; ammannuwwaa seeraa dabasseena qoodookko; oo keesanto'oo keenim sas hiinchinaa kollinaa ixxi anganne ubbamo. Ihukkaarem iimanenne oogato'i ihookko; ixxi adillanim hooramookko; hore'oomam heer heerina bi'ookko. Adillan, gassii iimaniinsi woroon yoo adilla'n lombii hundim hundam xanoohaanni minaadab ihu ixxi keesammuwwina uwwaamookko. Ixxi adillanim heer heerina hee'ookko; uulli gassaan hundim ixxena awwaaddamoo ijaajantamoo» yaa tiratooma iina caakkisukko. Kaaltik tirat ka beyyonne beeddukko; an Daani'eelem i tiironne lobakata u'nnamummo; i illim heemachchukko. Ihukkaarem woshshooma i woronne amadummo. Belshaazar adil ihu saxxi hiinchina an Daani'eel illageen moo'ummaanniinsi mulli kaalta odim moo'ummo. Eelaa'm goonanne kininne ootamaakkoo Suusa'i beero'onne ihaa kaaltanne i gaga moo'ummo; ee ammane Uubaal daajji gadanonne uullaa hee'ummo. Ee daajji gammalannem lam qeeraa'l buudduwwi yoo mat gereechchi ambul uullaa hee'ukko; lamem buudduwwiinsim matoom lasonne mutaakkoohan ihukkaarem luxxaanniinsi higaa qeeraa'l hee'ukko. Oo ambulim eelliinchi aagganne, hanaa'n qarannee woroo'n qarannee daba'llamukkuuyyi qasoo moo'ummo; ayyi moochchim ixxenne uullixxameena xanukkoyyo. Ixxi angiinsi gatiseena xanoohim hee'ukkoyyo; doo'llukkoka hundam issam hee'ukko; ixxi gagam iimiimaa'ukko. Ee kaalta dabaransaa sawwihonam lamem illi lambe'ennem mat geejji buud yoo fellakkichchi ambul lokkinne uulla nakkoo'nnim eelliinchi aagginne uulli hundam higaa dangonne waarukko. Ixxim daajji gadanonne uullaakkoohaannonne moo'ummi lam buud yoo gereechchi ambu'l beyyo malaayyaam quunqinne weeraraa waaroo moo'ummo. An moo'onam fellakkichchi ambul gereechchi ambula hawwodukko; mogaallisa qasimmiinsi ki'ukkok lamem buudim iiqamukko; gereechchi ambulinam kaa'oo malaayyi hee'ukkoyyo; ee bikkina fellakkichchi ambul uullanne ubbuusaa hance'ukko; ixxi malaayyiinsim ee gereechchi ambula gatisookkok hee'ukkoyyo. Fellakkichchi ambul ixxi gaga iimiimaa'ukko; ixxi malaayyim lobakata wodukkuuyyi maru ammanenne lob buud iiqamukko. Ee iiqamukkaanni lugumonnem soorem qaram moo'oo kollinne mulli soor buudduwwi mutukko. Ee soorem buudduwwiinsim matiinsi mat hoffi buud mutukko; ee hoffi buuxxekim malaayyi woroo'n qaranne, eelliinchi firannee mishisoo uulli kollonnee haraarukko. Iima'n gogotanne afeebe'em iimiimaa malaayyaam ihukko; iima'n gogotiinsii boollaankiinsim lobakata uullanne ubbuusaa hance'amukko. Iima'n gogoxxi awwonsaanchinnem ixxi gaga gudiseebe'e iimiimukko; hundam xanoohannina amman hundam hincoo kitimim gatoo'isa issukko; Keesammi Minem haashaassukko. Baaxii'l mashka'inne keesammi gogot ballina ballina hincoo kitiminne maqirem ixxi anganne ubukko; hanqam uullanne ubbuusukko; issoo luwwi hundim ixxena taaphanukko. Ee lasage keesammuwwiinsi mat wocukkuuyyi macceesummo; mulli keesammim dabaraa «Ballina ballina hincoo kiti'm bikkina, bichchina mashkooi ihu boqqoo'm bikkinaa Keesammi Minii gogotii lokkinne hancaacanchi bikkinaa moo'amu kaalti wo'mmookkok hinki balla?» yukko. Ixxim «Lam kumaa sas xibbi hiimoo daraa afeebe'e; ee lasage Keesammi Min muccurookko» yaa dabarukko. An Daani'eel ee kaaltika tiratooma la'eena dabaransaa sawwihonam manchi beeto labookkok dangonne i illagenne uullukko. Uubaal daajji eeqidinne «Gabureela, ka kaalti tirato ku manchi la'oo'isa isse» yoo manchi sagara macceesummo. Gabureelim an uullummi beyyo hincukkuuyyi waaru ammanenne baddaa uullanne ubummo. Ixxim «Manchi beeto, kaaltoom moo'isookkok lasaanchi doolli bikkinatte ihukkisa qoossitaa la'e» yukko. Ixxi wocukkuuyyam tuude'aa uullanne illillaachcha ubummo; ihukkaarem ixxi eese amadaa i lokkinne uullisukko. Iinam «Ku kaalti moo'isookkok qoodamaakkoo lasaanchi doolli bikkinatti ihu bikkina Waa'i quuqoo doollenne mah ihooda'e kiina kuroommo. «Moo'llitti gereechchci ambulanne yoo lamem buudim Meedoo'nnekaa Faariis adilluwwaa moo'isoohane. Fellakkichchi ambul moo'isookkok Giriik adila; lamem illi lambe'ennem yoo lob buud odim luxxi amma'n Giriik adila moo'isookko. Oo buud iiqamaa lasonne mutu soorem buudim Giriik adillan soor beyyonne baxxansamoo'isa moo'isoohane; ihukkaarem oo keen illagee'n adilinne malaayyenne akeekantamoyyo. «Ixxuwwi adilla'n lasaanchonne boqquwwi hore'em boqqitu'uuyyi mattam ammane illi kolli baddisoo qawwiisoo adil ki'ookko. Oo adil hore'em malaayyaam ihookko; ihukkaarem ixxi gaginneyyo; hiriraa'oo bichchi ihoo'isa issookko; baxoo bax hundim taapanookko. Malaayyaammuwwaa Waa'i minaadabaa bi'isookko. Lobakata qawwiisimminne goddaanchi ihookko; ixxi gagam hundiinsi hanaan ihukkaannisa xigookko; hundi luwwim xumma yaa afuuru kee'nneka duta bi'isookko. Hundam xanoo Waa'inne uullixxamookko; lasaanchonnem bi'ookko; ihukkaarem manni anginneyyo. At moo'llitti hii'mmekii da'llekii kaalti hanqo'ane; ihukkaarem lobakat doolliinsi lasonne ihoohan ihu bikkina xufe» yukko. An Daani'eel hoogaahii xissaahii lobakat balla iinse'ummo; ee lasage ki'aa adi'l baxo baxeena marummo; ee kaaltoo'm bikkinam u'nnamummo; ihukkaarem qoosseena xanummoyyo. Meedoo'n shumo'iinsi ihoo Arxeeksis beet Daariyoos Baabiloo'n uullanne adil ihukko. Ixxi adilla'n luxxi hiinchonne an Daani'eel Yerusaaleem gindamukkisinnem lamarayyi hiinchi higoohan ihukkisa Waa'i hiraagaanchi Ermiyaasanne ihaa wocukkoka keesammi kitaabbuwwanne qoossummo. Ee bikkina xiddi eddechcha edde'aahii gii'lbuchchanne afuuraahii soommanummuuyyi i uunxato Waa'ina hincaa'een i Moollanni Waa'i kolli daba'llummo. Baaxiilo biiraa yummuuyyi i Moollanni Waa'a «Moollanna, at keese iittoo keeninnee ki ijaajo egeroo keeninnee ki hidi'l sagaraa heer heerina hee'oo ki ittoo egettoo lombaamoo baddanteena labboo Moollanni Waa'a. Neese baaxiilo banxaammo; keesem hawwondaammo; neese jollaammo; keesennem boqqinaammo. Ki ijaajiinsee seeriinsee qee'llinaammo. Ki summinne ni adilluwwina, gassaanina, niyyanno'inaa minaadabina hundinamii wocco'i kiina awwaadaan ikko'i hiraagaano macceensummoyyo. «Moollanna, at issitoo luwwi hundim hanqo'ane. Ihukkaarem neese kiina amma'nnammumbee'i bikkina neese binnaa'llitti uulli hundannem qee'llonnee abbisonnee yoommine'i Yihuxxek, Yerusaalee'mmekii hundem Isra'ee'l minaadabii kaballa sholle'nnaammo. Moollanna, neese, ni adilluwwi, gassaanii niyyanno'ii keese hawwondummi bikkina sholle'nnaammo. Ni Moollanni Waa'a, maham neese kiina boqqinumta'nnim at haafitoohanee qishixxitoohanee. Ni Moollanni Waa'a, kiina awwaadaan ikko'i hiraagaaninne uwwitti seera egellummoyyo; kiinam ijaajammummoyyo. Isra'ee'l minaadab hundim ki seera gindito'ookko; ki sagaram macceesimma sabbo'ookko; keese hawwondummi bikkina kiina awwaadaanchi ihu Muse'i seeranne kitaabamu duunchaa hidiroo neesenne eebbaatto. Neesennee ni awwonsaanonnee kee'mmaalli hawwo eebboo'isa woccittoka hundam wonshitto; ee bikkina uullanne hundannem Yerusaalee'm beero'i qaxa guzumo'amukkok hore'em bee'e. Muse'e seeranne kitaabamukkisannem ku hawwi hundim neesenne afoo'isa issitto. Moollanni Waa'a, ku hundim neesenne afukkisam ni baaxiiliinsi daba'llinaatii hanqo'i googo awwonnaatii kiinniinsi haafite siindeena keese uunxinummoyyo. Ni Moollanni Waa'a! Ki bax hundim hanqo'ane; ihukkaarem neese kiina ijaajammumbee'i bikkina ka hawwo hundam neesenne eebbitto. «Ni Moollanni Waa'a! Kanniinsi illageen ki minaadaba qoxxaalli wodinne Gibxi uulli agiddaniinsi fissitaa ki summi kaballi afeebe'e la'amoo'isa issitaatto; ihukkaarem neese baaxiilo banxaammo; keesem hawwondaammo. Moollanna, ni baaxiilinnee niyyanno'i boqqoo'm mashka'innee Yerusaaleemii ki minaadabii ni kululleetanne yo'i minaadabina osachchi ikko'ookko; illageen baxxitti muccuroo'm baxisinnem ki beero'i ihu Yerusaaleemiinsii ki keesammi duuniinsii ki quunqa dabattoo'isina uunxoommo. Kabadem ni Waa'a, ki awwaadaanchika uunxatoo laachchaa macceese. Moollanna, ki summi bikkinaa yitaahim ka gindamu ki mine moo'e. Waa'a, ki macce ni kollonne dabare; ki illem fooqaa'llaa ni hawwoo ki summi weeshamu beero'i gindanchaa moo'e; ni uunxatom kiina hincaa'nnoommok ki haafitenne amma'nnammaatette bagaan ni muccuroominneyyo. Waa'a, macceese; Waa'a, haafihe; Waa'a, macceesee agaage. Ki summi ki beero'onnee ki minaadabannee weeshamaakkoo bikkina Moollanna, ki summi bikkinamee yitaa dassitte» yaa uunxummo. I gaqqekaa iina moolli ihu Isra'ee'llekaa baaxiilo biiraa yimminnee keesamaakkoo ixxi mi'n bikkinam Waa'a uunxummuuyyimii luxxeka kaaltanne moo'ummi Gabureel qaqqisaa bararukkuuyyi i beyyo waarukko; oo ammanim maaro'i kitima hincaa'akkam amman hee'ukko. Ixxim iina «Daani'eela, kaba kiina qooroomaa qoossimmaa uwweena waaraammo. At lobakata iittantaattoohane; uunxato asheettittisam dabachchi uwwamaakko; anim kiina kureena waaraammo; ee bikkina an kiina kuroommoka qoossitaa macceese; kaaltoo'm tiratom qoosse. «Boqqooma uulliseena, baaxiilo shiinsheena, hawwojja haafissiiseena, heer hee'l muccurooma uwweena, kaaltaa hiraagoo koobeenaa keesammiinsi keesammi beyyo keesamaakkoohan isseenaa ki minaadabinaa ki keesammi beero'i bikkinaa lamar ko'l lamarayyi saanti qoodamaakko. Kaka qoossitaa la'e; Yerusaaleema areesimminaa dabarakka'a baximminaa ijaaj firu ammaniinsi ki'isaa Masih gassaanchi waareebe'i afeebe'e lamar saanti higookko. Ee'isam lohayyennee lam saanti woronnea Yerusaaleem, ixxi googguwwii girbuwwii baxamookko; oo hundim u'n doollenne ihookko. Oo lohayyii lam saantii beeddukkisam maham issoo'n Masiha shakkamo. Ee lasage ki'oo awwonsaanchi minaadabii ee beero'oo Keesammi Minee bi'issamo. Lasaanchim dirisisa waarookko; lasaanchi afeebe'em or ihookko; gindanchim alallaatamaakko. Oo awwonsaanchim lobakat minaadabinne mat saantina qoxxaalli hidiro aagookko; ee saanti kollonnem kitimii hurbaaxxi kitimii hincoobee'isa bi'isookko; ee bikkenne bichchina mashka'i ihoo haashaarammi luwwa uullisookko; oohim ihookkok ee bi'isoo awwonsaanchonne alallaatamu guzumo'i wo'mmeebe'inatte» yaa caakkisukko. Faariis uulli adil Qiiroos adil ihu saxxi hiinchonne «Bilxaasoora» yamamu Daani'eelena mulli kaalti moo'amukko; kaaltannem kuramu sagar hanqo'ane; ihukkaarem qoossimmina lobakata kee'mmaalli ihu bikkina tirat kaaltinnem caakkukko. Ee ammane an Daani'eel sas saantina kichchechchanne hee'ummo. Maara te'im er hurbaata maham itummoyyo; woyi'n diqaasam agummoyyo; sasem saantim higeebe'e an maham laphphummoyyo. Luxxi agan aagu lamiyyennee soo'l ballannee ee lob Xeegroos daajji gadanonne uullaa hee'ummo. Oono'o, haarrinne baxamaakkoo eddechcha edde'aa lamadom worqi sabbatinne lade'aakkoo mat mancho moo'ummo. Ee manchikim orachchi inqu'isa; illi kollim belecce'oo banqisa; illim aphphoo gii'llisa; angii lokkii odim giiranne kasharu naasisa; sagarim lobakat minaadaphphi saga'llisa hee'ukko. Kaaltooma moo'ummok xale'i anette; iinninne hee'llo'i mannim maham moo'llo'oyyo; ihukkaarem lobakata muggito'i bikkina gibba'a maaxanto'o. An ka maalalsiisoo kaalta moo'ummuuyyi mullam gatummo; i malaayyim hoogaa hee'ukko; i hagarim dabassamukko; mogole'im hoogukko. Anim ee manchika sagara macceesummo; eekka macceesummisam muggaa uullanne illillaachcha ubaa tuude'ummo. Ee lasage mat angi eese nakkaa huxe'am hee'ummi bikkina angiinnee gurubbinnee iimoommisa issukko. Ixxim «Lobakata iittantaattoo Daani'eela, oono'o, an ki beyyo asse'amaa waaraammo; xabbitaa uulle; an kiina kuroommokam erisa qoosse» yukko. Ixxi eehid yukkaare huxe'ummuuyyi uullummo. Odim «Daani'eela, baddititte; qoossitaa laqqeenaa ki Waa'i illagenne gaga heeshaa'lleenaa qoodditti luxxi balliinsi ki'isaa ki uunxat macceesamaakko; anim ki uunxaxxeka dabachcha amadaa waaraammo. Ihukkaarem Faariis uulli adilla'n gassaanchi lamiyyee mat ballaa iinninne uullixxamukko; an Faariisanne mullatte ihummisa moo'aa asse'amaa'n awwonsaaniinsi mat ihu Mika'eel iina hara'mmeena waarukko. Ku kaalti lobakat doolliinsi lasage ihoohane; ee bikkina lasaanchi doollenne ki minaadabanne ihoo luwwa an kiina kaba la'iseena waaraammo» yukko. Eehid yu ammanenne uullanne aad heeshummo; wocimmam hoogummo. Oono'o, manchi beeto labookkok i suume nakkukko; anim suume fooqaa'aa wocummo. I illagenne uullaa hee'ukkaanninam «I moollanna, ka kaalti mashka'inne xissaammo; i malaayyim hoogaakko. I moollanna, an kiina awwaadaanchi ihaa kiinninne hinkid woceena xanoommo? I malaayyi hoogaakko; fooshshe'eenam xanummoyyo» yummo. Odim oo manchi beeto labookkok eese nakkukko; anim qoxxummo. Ixxim «Lobakata iittantaattoo mancho, baddititte; xummi kiina ihona; heekke'antitte; qoxxe» yukko. Ixxim iina eehid yukkaare an qoxxaa «I moollanna, i malaayye qoxxissaattoo bikkina woce» yummo. Odim ixxi «An ki beyyo waarummok mahinda'e laqqaahinnihe? Kaba an Faariis uulli adilla'n gassaanchinne orameena maroommo; an marummisam Giriik uulli adilla'n gassaanchi waarookko. Ihukkaarem Hanqi Kitaabanne kitaabamukkoka gaassaa kiina kureena waaraammo. Ka woshshanne ki'nnuwwina gassaanchi ihu Mika'eeliinsi bagaan iina hara'mmookkok bee'e. «Anim Meedoo'n shumo'iinsetti ihu Daariyoos adilla'n luxxi hiinchonne ixxena hara'mmeenaa ixxo qoxxiseenaa gadanone uullaa hee'ummo. «An kabadem kiina kuroommi woshshi hanqo'ane. Mulli sas adilluwwi Faariis uullanne adilluwwi ikkamo; ee sasiinsim lasonne ki'oo soo'l adil mulli keeniinsi hundiinsim amaxxanne lophphaakkoohan ihookko. Amaxxinne ixxi malaayyaam ihoo ammane mulli keeno mat issaa Giriik adillanonne ki'ookko. Ee lasage malaayyaam adil ki'ookko; ixxi adillanim la'amaakkoohan ihookko; hasu luwwi hundam issookko. Ihukkaarem malaayyinne la'amukkuuyyi maraa lasage ixxi adillan gindamaa soorem qarannem baxxansamookko; adillanim hooramaa mulli keenina uwwamoo bikkina ixxi shumo'ina od uwwamooyyo. Ihona bagaan ixxuwwiinsi matim ixxesa malaayyaam ikkamoyyo; oohim oo adillan gindamaa mulli keenina baxxansamoo bikkinatte. «Woroo'n qa'l adil lobakata malaayyaam ihookko; ihukkaarem ixxi gaaxxi awwonsaaniinsi mat ixxeensi loboka malaayyaam ihookko; ixxi gassim la'amaakkoohan ihookko. Hofqax hiinchiinsi lasage oo adil hanaa'n qa'l adilinne hide'amaa mateeyyooma qooccookko; ixxi landichchom ee adilina ladiisookko; ihukkaarem iseka malaayye qoxxisseena xantambee'i bikkina ixxekim malaayyi qoxxeena xanooyyo; ee ayyaammuwwanne isee isena hara'mmitam keenoo, is annaa is awwaadaanoo higisakka'a uwwakkamo. «Ihukkaarem is abaroosiinsi mat ise bikkaa adil ihookko; hanaa'n qa'l adi'llekam girba iiqaa aagookko; ee adi'l gogotinnem oramookko. Ixxuwwinnem oramaa kaa'ookko. Ixxuwwi waa'uwwa, xaarinne baxamu misilluwwaa kin birinnee worqinnee baxamu lombi mu'uttuwwaa qeefadaa Gibxa massookko. Hofqax hiinchuwwinam hanaa'n qa'l adilinne oramooyyo. Ee lasage hanaa'n qa'l adil woroo'n qa'l adilinne orameena waarookko; ihukkaarem waarukkisinnem laso daba'llaa elle'ookko. «Ixxi goo'n oosim lobakat gogota wixxaa'lla'a orina gudamo; diina'i girbi afeebe'e maraa oramoo uullisakkeena xanakkambee'i dirisisam aanshoo kee'mmaalli gogota wixxaa'llamo. Ee ammanenne woroo'n qa'l adil lobakata quuqaa hanaa'n qa'l adilinne orameena ki'ookko; hanaa'n qa'l adil lobakat gogota wixxaa'ukkaarem kaa'amookko. Woroo'n qa'l adil lobakat gogota qeefadu bikkina tobbe'ookko; lobakat kumam shookko; ihukkaarem kaachchoom ixxan ihukkisam qoxxaa hee'ooyyo. «Hanaa'n qa'l adil illagee'nnaanniinsi lophphoo mulli gogotam gudisookko; lobakat hiinchuwwiinsi lasage dut gogotinnee o'l mu'utinnee waarookko. Ee ammane dut keen woroo'n qa'l adilanne ki'llamo; ki minaadabiinsim lobakat keen ku kaalti wo'mmoo'isina bangujjitamo. Ihukkaarem ixxuwwi sawwito'isa ihooyyo. Ee lasage hanaa'n qa'l adil waaraa girbamaakkoo beero'o kibbaa amadookko; woroo'n qa'l googotim ixxenne uullixxameena xanooyyo; ee gogotiinsi doo'llanto'oo keenim ixxenne uullixxanteena xantam malaayyi hee'ooyyo. Oo weeraraa waaroohim ixxi tii'lleka issookko; ayyim ixxenne uullixxameena xanooyyo; mishisoo uullam malaayyinne ixxi anganne issookko. «Ixxi adilla'n malaayyinne hundinnem gaadeena qoodookko; adillano bi'iseena ixxi landichcho ladiisimminne woroo'n qa'l adilinne iittamookko. Ihukkaarem ixxi sawwixxek wo'mmooyyo te'im oo sawwit ixxena hara'mmooyyo. Ee lasage dambalaq gammalanne hee'oo uulluwwanne weeraraa lobakata amadookko; ihukkaarem mat gogoxxi awwonsaanchi kaa'oo bikkina ixxi bolxoomina lasaanchi ihookko. Bolxoominne wocu game'llat hundim ixxonnem ihookko. Ee lasage oo adil ixxi gaqqi uullanne yoo girbuwwi kollim daba'llookko; ihukkaarem qolamaa ubookko; od siidamooyyo. «Ixxo beyyonne adil ihookkokim ixxi adilla'n lombe egessiiseena gibissiisookkoka asse'ookko; ihukkaarem hofqax ammanenne quunqinne te'im orinnetti ihoo'n ka'isam lehookko. «Ixxi beyyonnem mat gadamaakkoo manchi ki'ookko; ihukkaarem adilla'n lomba siidooyyo. Qaphphaa waaraa adillano qawwiishinne amadookko. Ixxim dirisi'nnoo'i gogotaa hidi'l saga'l ijaajaanchoo bi'isookko. Beshoommano qooccimminne mulli keeno qawwiisookko; hofqax minaadabinnetti ihukkaarem malaayyukkuuyyi marookko. Amaxxinne la'amaakkoo xumminne hee'oo uulluwwa dangonne amadookko; ixxi anno'i te'im lob anno'i baxubee'i baxo baxookko. Oranne bogukkoka, qeefadu luwwaa amaxxaa hundam ixxi gogotina baxxansookko; girbuwwam bi'iseena sawwookko; ihukkaarem hofqax ammaninatte. «Lobakat gogotinne woroo'n qa'l adilanne malaayyinne ki'ookko; woroo'n qa'l adilim malaayyaamoo xigo dutaa ihu ixxi gogota amadaa oramookko. Ihukkaarem ixxonne dollotakkam bikkina uullixxameena xanooyyo. Ixxenne maqire ittam ixxi beshim ixxo bi'issamo; ixxi gogotim beeddookko; dut keenim oranne beedditamo. Ku lamem adilluwwim wodanonne jolle amaddo'isam matem leemaatiinsim itteena afuuttamo; ixxuwwina'i ixxuwwim qophphano woccamo; ihukkaarem qoodamu amman afubee'i bikkina ixxuwwi sawwixxek wo'mmooyyo. Hanaa'n qa'l adil lobakat amaxxinne ixxi uullam daba'llookko; ihukkaarem ixxi sawwitenne keesammi hidi'l sagarinne uullixxamookko; ixxi doo'llikam issookko; ixxi gaqqi uullam daba'llookko. «Qoodamaakkoo ammanenne woroo'n qara daba'llaa waarookko; ihukkaarem lasaqqek luxxaannisa ihooyyo. Kiitii'm uulli manni markabinne waatta'a uullixxantam bikkina muggaa laso daba'llookko; keesammi hidi'l sagarannem quuqookko; ixxi doo'llikam issookko. Laso daba'llaahim keesammi hidi'l sagara laggo'i keenina beshichchi ihookko. «Ixxi gogotim Keesammi Minee girbaa haashaassookko; hundi ammane hincoo kitimim gatoo'isa issookko; ee beyyonnem bichchina mashka'i ihoo haashaarammi luwwa uullisookko. Adilim hidi'l sagara gindito'i keeno qawwiisaa huushisookko; ihukkaarem Waa'a hanqo'isinne la'oo minaadab qoxxookko; ixxi woshsham sabookko. «Minaadaphphi lambe'enne yo'i qoolluwwi dut keenina losano uwwitamo; ihukkaarem giirinne, bisa'inne, qeefadanchinnee boganchinnee hofqax ammaninam hawwitamo. Oo hawwi afu ammane hofqax hara'mmatom siiddamo; dut keenim labishshinne ixxuwwinne mateeyyooma qooccitamo. Ee qoolluwwiinsi mat mat qolantamo; oohim lasaanchi doolli afeebe'e keenantona, muccuttonaa miiqakkam luwwi bee'i keen ikkonatte. Oohim qoodamu amman afeeqaxinatte. «Oo adil ixxena mishisu luwwi hundam issookko; ixxi gagam iimiimaa'ookko; waa'uwwiinsi hundiinsim ixxi gaga lonsookko. Hundam xanoo Waa'annem bolxoominne wocookko; Waa'ik quunqi amman afeebe'em ixxi sawwixxek wo'mmookko; oohim qoodamukkok ihimmi hasisoo bikkinatte. Oo adil gaassi ixxi anno'i waa'uwwa te'im meenti iittoo waa'uwwa gadookko; ayyi waa'am gadoo bikkina ixxi gaga ee keeniinsi lonsaa iimiimaa'ookko. Ee kee'n bikkenne girbuwwi waa'a lonsookko; gaassi ixxi anno'i laqqambee'i waa'a worqinne, birinne, inqu'innee bito xee'aal luwwinnee lonsookko. Qoxxaalli girbuwwa allaggichchi waa'i hara'mmatinne gindookko; ixxena ijaajantam keenom lonsaa iimiimaa'ookko; minaadaphphi awwonsaanom issookko; baxxo'i baxikam anga dabareena uulla baxxansookko. «Lasaanchi doollenne woroo'n qa'l adil hanaa'n qa'l adilinne oramookko; ihukkaarem hanaa'n qa'l adil faradaaninne, faraxxi gaare'innee dut markabinnee hambu'llamisa ihaa waarookko. Lobakat uullannem weerarookko; dirisisam aanshukkuuyyi ee uulluwwinne higookko. Mishisoo neeyyaxxi uullannem weerarookko; lobakat uulli minaadabim ixxi anganne ubookko. Ihukkaarem Edoo'mmek, Moo'aaphphekii Amoo'n minaadabii ixxi angiinsi gattamo. Ixxi angam lobakat uulluwwanne biddiqaa'ookko; Gibximuullim xorooyyo. Gibxika worqa, biraa bito xee'aalli luwwaa hundam bogookko; Liibi'ikii Tophphe'i minaadabii ixxena ijaajantamo. Ihukkaarem eelliinchi firinnee hanaa'n qarinnee waaroo woshshi muggisookko; kee'mmaalli quunqinnem dut minaadaba guullaa bi'iseena ki'ookko. Adilla'n dukkaanam dambalaqinaa mishisoo keesammi duuninaa lambe'enne kaasookko; ihukkaarem ixxena lasaanchi ihookko; hara'mmoohim hee'ooyyo. «Ee doollenne ki minaadaphphi bikkina uullixxamoo lob awwonsaanchi ihu Mika'eel ki'ookko; manni shumo'i qooccamukkaanniinsi ki'isaa moo'akka'a la'akkobee'i kee'mmaalli hawwi doolli ihookko. Ihukkaarem ee ammane summi Kitaabanne kitaabamu ki minaadab hundim gattamo. Lehaa waammamu keeniinsim dut ki'ookko; ee keeniinsi kolli heer heeraxxi heechchina, kolli odim sholle'nninaa heer heeraxxi hawwinaa ki'ookko. Qoolluwwi iima'n laaqqisa dut keeno muccuroo'm googonne dabattam keenim iima'n boollaankisa heer heerina belelitamo. «Ihukkaarem Daani'eela, doolli beeddichchi afeebe'e ka woshsha maaxe; kitaabam koobe. Manni ekkidii kidii geeramookko; lachchim lophphookko» yukko. Ee lasage mulli lam manchi daajji eeqidinnee ka'idinnee uullito'oo moo'ummo. Ee keeniinsim mat haarrinne baxamaakkoo eddechcha edde'aa daajji wo'iinsi hanaan yoohaannina «Ka maalalsiisoo luwwik lasaanchi hinka'i ammane?» yaa xa'mmukko. Haarrinne baxamaakkoo eddechcha edde'aa daajji wo'iinsi hanaan uullaa hee'u manchi ixxeka makki angaa qeddi angaa lamom iimaa'aa «Sas hiinchinaa kollinatte; Keesammi minaadaphphi hawwi beeddoo ammane ku hundim wo'mmookko» yaa heer heerina hee'oohaanninne hide'ukkuuyyi macceesummo. An macceesummo; ihukkaarem qoossummoyyo. Ee bikkina «I moollanna, ka hundikim lasaanchi maha?» yaa xa'mmummo. Ixxim iina dabaraa «Daani'eela, doolli beeddichchi afeebe'e ku woshshi maaxammaa koobammaa ihu bikkina mare. Dut keen keenantamo, muccuttamoo miiqakkam luwwi bee'i keenoo ikkamo; ihukkaarem boqquwwi keen boqqooma lonsito'uuyyi mattamo. Boqquwwi maham qoossitamoyyo; ihukkaarem qoolluwwi qoossitamo. «Hundi ammanem hincoo kitim gatukkaanniinsii bichchina mashka'i ihoo haashaarammi luwwim uullukkaanniinsii ki'isaa mat kumaa lam xibbee honsayyi ballaa ihookko. Mat kumaa sas xibbee sadee onti ballaa afeebe'e iyyaqqoohim maasse'amaakkoohane. «Ihukkaarem at lasaanchi afeebe'e mare; at usheexxitootto; doolli lasaanchonnem kiina qoodamu sharada a'lliteena ki'llootto» yukko. Ooziy, Iyyo'aataam, Akaazii Hizqiyaasii Yihuxxi uullanne awwonanta'a adilluwwi ikko'i doolluwwannee ee'isam Yoo'aas beet Yoorbi'aam Isra'eelanne adil ihaa hee'u doollennee Waa'i Bi'eer beetina Hoose'ena caakkisaa moo'isu hiraaqqi sagar kane. Waa'i Hoose'ennette ihaa Isra'ee'l minaadabina ixxi sagara higisimma asheerukkuuyyi Hoose'ena «I minaadab iinniinsi annanni ihaa shigigaa'oo'isa saa'l bikkina atim mattaa buubbeesaanchi meentichcho eebe; iseensim saa'aan ooso qare» yukko. Ee bikkina Hoose'i maraa Diiblaayim landichcho Gomeera eebukko. Isem lamfoorette ikka'a goonchi beeto ixxena qatto'o. Ee lasage Waa'i Hoose'ena «Iyyu'uu ixxi shumo'ii Yizra'eelanne shito'i manni mashka'inne Iyyu'i abaroosa guzumo'oommi amman qee'lloyyo. Isra'ee'l adillanim lasaanchoo'isa issoommo. Ee ammane Yizra'ee'l cebbanne Isra'ee'l gogota guulloommo. Ee bikkina ki beetika summa ‹Yizra'eela› yitaa weeshe» yukko. Gomeera odim lamfoorette ikka'a landichcho qatto'o. Waa'im Hoose'ena «Kanniinsi eehid Isra'ee'l minaadabina i iitto moo'isoommoyyo; uratom issoommoyyo. Ee bikkina ki landichchoka summa ‹Looruhaama› yitaa weeshe. Ihukkaarem Yihuxxi minaadabina an i iitto moo'isoommo. An ixxuwwina Moollanni ihummi Waa'i ixxuwwa gatisoommo; gatisoommokim bisa'inne, xiyyinnee orinneyyo te'im faradinnee faradaaninneyyo» yukko. Gomeera Looruhaamina anuuna hootta'a lasage odim goonchi beeto qatto'o. Waa'im Hoose'ena «Kanniinsi eehid Isra'ee'l minaadab i minaadab ihubee'i bikkinaa anim ixxuwwina Waa'i ihumbee'i bikkinaa ki beetika summa ‹Loo'aamii› yitaa weeshe» yukko. Isra'ee'l minaadab xigakkeena te'im keenakkeena xanakkambee'i dambalaq shashsha'llisa ihookko. Kaba Waa'i ixxuwwina «I minaadabayyo» yuta'nnimii mat balla ka beyyonnem «Hee'oo Waa'ina ooso» yakkam balli waarookko. Ee ammane Yihuxxekii Isra'ee'llekii minaadab mat ikkamo. Lamem minaadabam gassoo mat awwonsaancho doo'llitamo. Odim daba'llita'a ixxuwwi gaqqi uullanne makkixxita'ahii goddita'atii hee'llamo. Yizra'ee'l ballim lob balli ihookko. Ee bikkina ki'nnuwwina abbaayyuwwi ikko'i Isra'ee'l ooso «Amii» aayyuwwa «Ruhaamaa» yitakka'a weeshshehe. Waa'i «I ooso, kanniinsi eehid ki'nnuwwi ama i meentichchotte ikkobee'i bikkinaa anim is manchi ihumbee'i bikkinaa saa'lleena mixxam mixanoo saa'immaa uttona ise acceeqassehe. Ihukkaarem isemdu daba'llitambee'an ihulas qaranto'i ballisa kallemaram gattamisa issoommo. Gogaakkoo mahim bee'i kora'i uullisam ikkamisa issoommo; wo'i xeebinnem shoommo. Saa'aanchi meentichchoonsi qaranto'oohan ihu bikkina an is oosina qishixxoommoyyo. Ixxuwwi ama saa'aanchotte ikko'i bikkina ixxuwwa qatto'ok tuussiisoo'isinnette. Isem eekka issito'ok ‹Iina wo'oo waasaa, suufinnee talbi fatirinnee baxamaakkoo eddechchaa, zaytaa agoommi luwwaa uwwamoo bikkina i iitti manna awwonaa maroommo› yita'atette. Ee bikkina an iseka googo uttinne ootoommo; fittam gooca siiddambee'isam kululleeta hundam kininne ootoommo. Isem is iitti manni lasonne geettu'uuyyi mattamo; ihukkaarem ixxuwwa affeena xantamoyyo. Hassamo; ihukkaarem siiddamoyyo. Ee lasage odim ‹Ka heechchiinsi eraa'llek e'llookko; ee bikkina gaassi i aro'i beyyo maroommo› yitamo. Isena hurbaata, woyi'n diqaasaa wee'l zaytaa uwwummok anette ihummisa hore'em laqqo'oyyo. Isena lonsaa uwwummi biraa worqaa Ba'aala yakkam qophpha'n waa'ina uwwito'o. An hurbaaxxekaa woyi'nnekaa atoota, wixxaa'akkam agananne iseensi hooroommo. Iseka orachcho ifiixxitam suufinnee talbi fatirinnee baxamu i eddechcham maxaroommo. Is iitti manni illagennem kallemaram gattamisa issoommo. Isem i angiinsi gatisookkok hee'ooyyo. Ise liirantam ugudduwwaa Usheexxaxxi Balluwwaa hiinchonnee agananne aganannee lonsitam ugudduwwaa bi'isoommo. Ee'isam annanni annanni ugudduwwa lonsitambee'isa issoommo. Is iitti manniinsi siiddo'i woyi'n kaashshaa oda'aa xoqoloommo. Woyi'nnekaa misha mishoo haqqi beyyoo doo'm wor ihoo'isa issoommo. Ee keenom bii'l moochchi itookko. Ise «Ba'aala» yakkam qophpha'n waa'ina aduruusa wiriissiteenaa is gaga wereeggissa'a is iitti manna awwonteenaa eese utto'i bikkina an ise guzumo'oommo» yoolla. Odim Waa'i «Ee bikkina an kabadem ise udma'i uulla massoommo. Eehe'em iitti sagarinne qawwiisoommo. Gaassi woyi'n kaashshi beyyo isena dabaroommo; hawwi cebbam neeyyaxxi gooc ihoo'isa issoommo. Eehe'em Gibxi uulliinsi fitto'i ammane woraadda'n doollenne hee'llo'i amma'nnisa liiranchinne zammattamo. Ee balla ise «Iina i aro'o» yitamo bagaan «Ba'aala» yakkam qophpha'n waa'a weeshshamisa «I moollanna» yita'a weeshshamoyyo. «Ba'aala» yakkam qophpha'n waa'uwwika summa iseensi bi'isoommo; ee summim od tiiramooyyo. Ee ammane an ki'nnuwwi bikkina moochchinne, iima'n cii'innee uullanne biqinne shuroo qooccanchi hundinnee hidi'l sagara aagoommo. Uulliinsim xiyya, bisa'aa oraa bi'isoommo. Ki'nnuwwim xumminne usheexxitakkamisa issoommo. Isra'eela! An keese heer heerinam i mi'n amasa issoommo; muccuroominne, hanqinne, heer heerina hee'oo iittinnee qishixxatinnee i arette ikkoo'isa issoommo. I hidi'l sagara egerimminne an keese i arette issoommo. Atim an Waa'i ihummisa laqqootto. Ee balla dabachchi uwwamoo'isa issoommo; iimanina dabachcha uwwoommo; iimanim uullina dabachcha uwwookko. Uullim hurbaata, woyi'n mishaa wee'l zaytaa uwwimminne Yizra'eelina dabachcha uwwookko. I minaadaba dabaraa ixxuwwi uullanne hee'llamisa issoommo. Amaxxinne godditamisam issoommo. ‹Haafit ihooyyo› yamanto'i ixxuwwina an haafoommo; ‹i minaadabayyo› yamantakko'i keenina an ‹i minaadaba› yoommo. Ixxuwwim iina ‹At niina Moollanna› yitamo» yoolla. Waa'i iina «Isra'ee'l oos mulli waa'uwwi beyyo matta'a xexxefammi zabiiba hincaa'lleena hassota'nnimii Waa'i ixxuwwa eehanninnem iittookko. Atim iitti manchi yoo saa'aanchi meentichcho mattaa iitte» yukko. Ee bikkina an ise tomminnee onti kin birinnee mat xibbinnee ontayyi kiilo'o ihoo so'innee bitaa'ummo. Anim isena ‹Saa'lloo'nnii ki orachcho ayyi goonchinam uwwitoo'nnii eese egettittuuyyi lobakat ammane afimmi hasisookko. Anim kiina ee'isam issoommo› yummo. Ee'isinne Isra'ee'l minaadab adil te'im awwonsaanchi, kitim te'im sooddi, qeessuwwi eddechchi te'im qophpha'n waa'ina otossakkam misil bee'ekam lobakat doollina hee'llamo. Ee lasage Isra'ee'l oos ixxuwwi Moollanni Waa'i kollii adil Daawiit kollii daba'llitamo. Lasaanchi doollenne baachchinne Waa'i kolli waattamo; maassom aa'llamo» yukko. Ka uullanne hee'oo manni hundam Waa'i acceeqasoo luwwi yookko. Ee bikkina Isra'ee'l minaadaba! Ixxi «Uullanne amma'nnanchi, iittii Waa'a la'immii bee'e. Hide'lla'a aaggo'i sagara gindita'a qophphantamo; shitamo; game'llamo; saa'llamo; barche'e issimmii shimmii lophphukkuuyyi maraakko. Ee mashka'inne uullanne billi lophphookko; uullanne hee'oo luwwi hundim hoogookko. Bii'l moochchi, cii'ii wo'i wo'l qurxumme'ii hundim beeddookko» yookkoka macceessehe. Waa'i «An acceeqasoommok qeessuwwi ikkakko'i ki'nnuwwi ihu bikkina minaadaba kasasoo te'im acceeqasoo hee'oone. Qeessuwwa, ki'nnuwwi balli caakkanne bobattakkamo; hiraagaanim hii'm tuunsonne ki'nnuwwinnem bobattamo. Ee bikkina an ki'nnuwwi ama bi'isoommo. I minaadab eese erisa la'imma hoogimmiinsi ki'aa bi'aakko. Ki'nnuwwi eese laqqakkeena hassakkobee'i bikkina anim iina qeessuwwi ikkakka'a awwaaddakkona hasoommoyyo. I Seeram sholliissakko'i bikkinaa xaddakko'i bikkinaa ki'nnuwwi oosim i illagenne xadamaakkoohan ihookko. «Qeessuwwa, ki'nnuwwik xig lophphukkuuyyi maru qaxanne ki'nnuwwik baaxiil i illagenne lophphukkuuyyi maraakko. Ee bikkina an ki'nnuwwika lomba sholliisoommo. I minaadaphphek baaxiil amaxxinne ki'nnuwwi li'llakkeena mashka'i ihu bikkina minaadab baaxiilo lonsaa baxona hassakkamo. Qeessuwwa, ki'nnuwwi minaadaphphisam ikkakko'ookko. Ee bikkina minaadab guzumo'amoo'isam ki'nnuwwim guzumo'antakkamo. Ki'nnuwwi baxisam miqoommo. I minaadab eese Waa'a utto'i bikkina ixxuwwi ittamo; ihukkaarem godditamoyyo. Hanqo'i Waa'a laqqambee'i minaadab otossitam beyyuwwanne saa'llamo; ihukkaarem ooso qattamoyyo» yukko. Waa'i «Saa'immii haareechchoo eraa'l woyi'n diqaasa agimmii i minaadaphpheka tiiro bi'isaakko. Ee bikkina haqqinne baxamaakkoo qophpha'n waa'a sogitano xa'mmitamo; kiittam biccim ixxuwwi xa'mmichchina dabachcha uwwookkoka labissamo. Ixxuwwi tiirim saa'mminne wo'mmaakkoo bikkina iinniinsi ixxuwwi Moollanniinsi qee'llito'ookko. Duunnuwwi hundanne kitima hincaa'llamo. Hoffi duunnuwwanne, qeeraa'l caaf yoo qilxo'onne, oda'aannonnee hoo'm hafannee aduruusa wiriissitamo. Ee mashka'inne ki'nnuwwi landi saa'aan ihookko; oos meentim saa'ookko. Ki'nnuwwik landi saa'oohaare oos meentim saa'aan ihoohaare guzumo'oommoyyo. Mashka'oomim goon ki'nnuwwi gagim otossakkam minneewwanne saa'oo meento awwontakka'a qophpha'n waa'ina otossitakkamuulla. Ee bikkina qoossoobee'i minaadab bi'ookko. Isra'ee'l minaadaba, ki'nnuwwi saa'aan ikkakko'aarem Yihuxxi minaadab baaxiilaan ikkamisa issitakkotte. Gelgela te'im Beeti'aawe'e mattakkotte. ‹Hee'oo Waa'i la'ona› yitakka'a hide'llakkotte. Isra'ee'l minaadab bobaru addichchisa fiikkaakko. Eehannah Waa'i ixxuwwa gereebbi geexxuwwisa er beyyonne hinkid allaarookko? Isra'ee'l minaadab qophpha'n waa'inne losanto'oo bikkina hasso'oka issitona cawwitaa ure. Lobakat woyi'n diqaasa agga'a lasage saa'llamo; ixxuwwi awwonsaanim tuussiisoo luwwa issimma lonsita'a iittitamo. Ixxuwwim hafachchi fii'aa massoo luwwi qaxa qee'llita'a mattamo; qophpha'n waa'ina kitima hincaa'llo'i bikkinam tuuttamo» yukko. Waa'i «Qeessuwwa, kaka macceessehe! Ki'nnuwwi Isra'ee'l minaadabim qoossehe; adi'l mi'n abaroosim kaka macceessehe. Oono'o, oogat ki'nnuwwanne waaraakko; ki'nnuwwi Misiphphanne qaashisa Taaboorannem biddiqu shikkisa ikkakko'ookko. Boqquwwi keen manna shimma lonsitamuulla; ee bikkina an hundam guzumo'oommo. «An kiikka Isra'ee'lleka duuha'a la'oommo; at iinniinsi daphphiteena xantooyyo. Qophpha'n waa'ina otossitaa saa'imminne haashaarantaatto» yukko. Saa'immi mixan Isra'ee'l oos lambe'enne yoo bikkinaa Waa'am laqqambee'i bikkinaa Waa'i kollonne daba'llitona ixxuwwi bax uwwooyyo. Ixxuwwi bolxoom ixxuwwannem naqqasookko. Ixxuwwi baaxiilim ixxuwwina qolat ihaa ubbuusookko. Yihuxxi minaadabim ixxuwwinne maqire qolanta'a ubbamo. Kitima hincaa'lleena gereebbaa laroo ushe'lla'a Waa'a hasseena mattamo. Ihukkaarem Waa'i ixxuwwiinsi annanni ihu bikkina siiddamoyyo. Ixxuwwi gagoomim qophpha'n waa'uwwina otossitaman ihu bikkina Waa'ina amma'nnanto'oo keen hee'llo'oyyo. Ixxuwwi oosim qophpha'n waa'uwwi oos ikko'ookko. Ee bikkina ka aga'n aagganne ixxuwwi uullinne maqirem bi'llamo. Minaadab orina firona Gaba'oonanne buuxxi xurumba Iraama'annem xaa'l xurumba fuggehe. Beeti'aawe'ennem «Biiniyaam sullo, neese kiinninnette» yitakku'uuyyi laallehe. Guzumo'amanchi balla Isra'eel udma'i ihookko; oo gindanchim Isra'ee'l sulli hundannem afoo'isna hanqoomam an qoodaammoohane. Waa'i «Yihuxxi awwonsaan Isra'ee'lleka gabala gindoo mannisa ikko'ookko. Ee bikkina an i quunqa ixxuwwanne daadoo dirisisa fatakoommo. Isra'eel awwaad bee'i luwwa awwonu bikkina wor amadanchii hanqa hoogimmii afukko. Ee bikkina an Efireemina buutumbuutisa, Yihudinam wonatisa ihaammo. Isra'eel jabbukkisa Yihudim madukkisa la'u ammanenne Isra'eel ixxi ille Aasoo'l kolli dabarukko. Hara'mmatinam lob adi'l beyyo maanna asse'ukko. Ihukkaarem ixxi gatiseena te'im ixxuwwi mada fayyiiseena xanukkoyyo. Eehanniinsi ki'aa Isra'eela hobbichchisa, Yihudam hobbichchi geexisa ihaa iiqansaa maroommo; malaayyinnem massoommo; ayyim i angiinsi gatiseena xanooyyo. Ixxuwwanne hawwi lophphoo ammane eese hassamo. Ee bikkina baxxo'i baaxiilo qoossita'a i kollonne daba'lliteebe'e an ixxuwwiinsi qee'lloommo» yukko. Minaadab «Waallehe, ni Waa'i kollonne daba'llinona. Ixxi neese iiqaakko; ihukkaarem fayyiisookko. Ixxi madisaakko; ihukkaarem ni mada fayyiisookko. Ixxi illagenne foorinne hee'nnona lam balli lasage neese areesookko; saxxi ballannem ki'isookko. Waallehe; ni Waa'a lanqona; lonsinaa lanqeenam hansona. Ixxi soodaraa'l caakkisaa uulla aashisoo qaraaxonne ga'nnoo xee'nnisaa hanqo'isam ni kolli waarookko» yoolla. Waa'i «Isra'eelaa Yihuxxi minaadabaa! An ki'nnuwwa maha isso? Ki'nnuwwi eese iittitakkam iitti soodaraa'l umbu'llisaa da'l qiibaxxisaa qaqqisaa bi'ookko. I hiraagaaninnette ihaa bi'isoommisaa i sagarinnem shoomman ihukkisaa qoxxisaa kuraammo. Ee bikkina i oogat soodaraa'l caakkisa caakkisookko. An kitimiinsi lophphaa daba'llamoobee'i iitto iittoommo. Shokkiisakka'a hincaa'akkam kitimiinsim eese la'imma doo'lloommo. «Ixxuwwi Addaam yakkam uulla aaggo'i ammane iinninne aaggo'i hidi'l sagara gindito'ookko. Iina amma'nnantambee'an ikko'isam la'isso'ookko. Gala'aad boqqi mannii manna shoo mannii wo'mmaakkoo beero'i ihaakko. Gafanni manna shiteena duggamisa qeessuwwim ee'isa issitamuulla. Seekeema marakkam googonne duggu'uuyyi manna shitamuulla; tuussiisoo damigom issitamuulla. Lobakata hiriraa'oo luwwa Isra'ee'l minaadabanne moo'aammo. Oohim minaadab qophpha'n waa'ina otossimminne haashaatto'ookko. «Yihuxxi minaadaba, ki'nnuwwanne an oogaxxi balla qoodaammo. «I minaadaba Isra'eela fayyiiseenaa odim daba'llita'a amaxxinne godditamisa isseenaa hasummi ammanenne i minaadaphphi hawwojjii Samaare'i manni boqqoomii caakkaa la'amookko. Ixxuwwina'i ixxuwwim qophphano woccamo; mine iiqqu'uuyyi game'llamo. Gaalchi ikka'atim goog hundannem boggamo. Ihukkaarem an ka ixxuwwi jolle hundam la'oomman ihukkisa hore'em qoossitamoyyo. Eehanniinsi ki'aa ixxuwwi gaqqi baaxiilinnem kibbanto'ookko. Ixxuwwik jor bax hundim iinniinsi daphphaakkoohaneyyo» yoolla. Waa'i «Ixxuwwi adilaa ixxuwwi jollinne, daannuwwaa qophphaninne liiransitamuulla. Ixxuwwi hundim saa'aano. Ixxuwwi buko'i hufeebe'e daabbo'o saroo manchi giira giirimmi hasisoobee'i iibbu midachchisa. Gassaan ixxuwwi adi'l uguxxi ballanne lobakat woyi'n diqaasa agga'a dimbita'a xissito'o. Saroo manchim ixxenne naacantam mannina mare'e uwweena ixxi anga biddiqaa'ukko. Ixxuwwik wodan dollottimmina midachchisa iibbaakkoohane. Ixxuwwi quunqi hiimooma hundam wiriirukkuuyyi garookko; ihukkaarem soodoohaare aphphoo gii'llisa bubbookko. Ixxuwwi hundim quunqinne midachchisa iibbita'a gassaano bi'isso'o; adilluwwam korinne korinne guullito'o. Ku hundim ihukkuuyyi ixxuwwiinsi matim iinniinsi hara'mmito xa'mmukkok bee'e» yoolla. Waa'i «Isra'ee'l minaadab mulli minaadabinne hamaaranto'o. Ee bikkina ixxuwwi dabaramubee'i qorosho'isa awwaad bee'i keen ikko'ookko. Allaggi manni ixxuwwi malaayye guullito'o; ihukkaarem ixxuwwi qoossito'oyyo. Abo'i bexbexximma asheeraakko; ihukkaarem ixxuwwi qoossito'oyyo. Isra'ee'l minaadaphphi bolxoom ixxuwwi gagannem naqqasoolla. Oo hundim ihaa ixxuwwina Moollanni ihummi i kollonne daba'llito'oyyo; eesem hore'em hasso'oyyo. Isra'ee'l minaadab handarekkichchisa maashaallaa horoor bee'i minaadabaa ikko'ookko. Ee bikkina agaagina mataa'lle Gibxi kolli laattamo; mataa'lle odim Aasoo'l kolli barattamo. Ixxuwwi daba'llantam beyyi hundannem an i shikka qaashaa cii'isa amadoommo; baxxo'i jollisinnem ixxuwwa guzumo'oommo. Iinniinsi qee'llita'a matto'oo bikkina ixxuwwina aayye! Eesenne boqqito'i bikkina ixxuwwanne bichchi waarona. An ixxuwwa gatiseena hasaa hee'ummo; ihukkaarem ixxuwwi i hanenne qophphano woccamuulla. Ara'anne dufamaa laaramookko bagaan wodaninne eese uunxamooyyo. Itamoo hurbaataa woyi'n diqaasaa siidameena orachcho dereeransamookko; eesennem ki'amookko. Ixxuwwa losisummokii malaayyi qoxxoo'isa issummokii anette. Ihukkaarem ixxuwwi i hanenne dollottamo. Iinniinsi qee'llita'a qophpha'n waa'ina otossiteena matto'o. Elela huushu boqqi xiyyisa ikko'ookko. Ixxuwwi gassaanim jor woshsha woccamaanniinsi ki'aa bisa'inne letamo. Gibxi uulli manni illagennem naacanchina ikkamo» yoolla. Waa'i «I hidi'l sagaraa Seeraa gindito'i bikkinaa i minenne diina'i goolluunsichchisa do'u bikkinaa qoxxishshi xurumba fuggehe» yoolla. Ixxuwwim «Moollanna, neese ki minaadab keese lanqoommo» yitu'uuyyi i kolli laattamo. Ihukkaarem Isra'ee'l minaadab er luwwa sabbo'i bikkina diina'i hollookko. Ixxuwwi i doo'l bee'ekam adilluwwa doo'llito'ookko; eese xa'mmitoo'nnim daannuwwa doo'llita'a daannooma uwwito'ookko. Kin birinnee worqinnee ixxuwwi gaqqi bichchina ihoo qophpha'n waa'uwwa baxxo'o. Samaare'i minaadaba, addichchi misilanne baxamu ki'nnuwwi qophpha'n waa'a an sabaammo. I quunqi ixxuwwanne gii'llisa aphphookko. Ixxuwwi jolliinsi muccuttambee'ek hinki balli afeebe'e? Oohim Isra'eelanne ihukkane; angi lachchi manni baxukkok Waa'ayyo. Ee bikkina addichchi hagaranne baxamu Samaare'i uulli waa'i iiqamaa ubookko. Ixxuwwi hafachcha wixaa hambu'llama muroohaannisa ikkamo. Shog bee'i agad hurbaat iheena xanooyyo. Mish hee'uta'nnimii itoo keen allaggi ihookko. Isra'ee'l minaadab hanqo'i Waa'a laqqambee'i manni lambe'enne xuuxamaa gataakko. Awwaad bee'i mu'uxxisam ihaakko. Mullam karkaadoo udma'i uulli hallichchisa Aasoo'l uulla matto'o; ixxuwwa egettonam bito miqqa'a adilluwwa qooxxaqqito'o. Adilluwwa qooxxaqqiteena bito miqqota'nnimii an mat issaa wixxaa'oommo. Adilluwwii daannuwwii ixxuwwa wor amaddam bikkina ciittu'uuyyi mattamo. Isra'ee'l minaadab lobakat kiti'm beyyuwwa baaxiilo haafixxi bikkina yita'a baxxo'ookko. Ihukkaarem oo kiti'm beyyuwwi baaxiilo baxakkam beyyuwwi ihaakko. An ixxuwwina Seeriinsi lobakata kitaabaa uwwummo. Ihukkaarem ixxuwwi eekka haareechchi luwwisa xiggo'o. Ixxuwwi iina doo'llamaakkoo kitima hincaa'llo'aaree kiti'm maara itto'ta'nnimii an Waa'i eekka aa'oommoyyo. An kaba ixxuwwika hawwojja sawwaa ixxuwwi baaxiilinne ixxuwwam guzumo'oommo. Gibxi uullam daba'llitamo. Isra'ee'l minaadab ixxuwwi gagina geejji geejji adilla'n minneewwa baxxo'ookko. Ihukkaarem eese ixxuwwi qooccaancho xaddo'ookko. Yihuxxi minaadabim girbamaakkoo lobakat beero'uwwa baxxo'ookko. Ee bikkina ixxuwwika beero'uwwaa girbuwwaa shokkiisoo giira an asse'oommo» yoolla. Isra'ee'l minaadaba! Oodo'i hundannem hee'oo saa'immika bito Ba'aal uwwoo maasso labissakka'a iittitakkamo. Ki'nnuwwim eekka issimminne ki'nnuwwi Moollannina amma'nnanchi bee'i keen ikkakko'ookko. Ee bikkina ki'nnuwwim mulli minaadabisam liiramimmaa lobakata liiramimmaa ullehe. Ee bikkina kanniinsi eehid ki'nnuwwi oodo'iinsi hurbaata, ciinsakkam beyyiinsim woyi'n diqaasa hore'em siiddakkamoyyo. Haareechchi woyi'n diqaasim hee'ooyyo. Isra'ee'l minaadab Waa'i ixxuwwina uwwu uullanne hee'llamoyyo. Ihukkaarem giddinne odim Gibxa daba'llita'a mattamo; Aasoo'l uullam matta'a see'llisinne muccurubee'i hurbaata ittamo. Waa'inam eekke'enne woyi'n diqaasa kitim issita'a hincaa'lleena xantamoyyo. Hincaa'llam kitimim Waa'a liiransoobee'ane. Ixxuwwik hurbaat sibaattam ammane ittamane bagaan Waa'i mi'n kitim ihaa hincoohaneyyo. Ee bikkina ixxuwwina see'l waasisa ihookko; itookkok hundim haashaaramookko. Eehannah Waa'i ugudduwwannee ki'nnuwwi hiinchi ugudduwwannee maha issitakkamo? Oono'o, bichchiinsi xotteena gibbam ammane Gibxi wixxaa'ookko. Meemfoosim waammookko; wixxaa'llo'i kin bi'l amaxxanne doobbi mutookko; ixxuwwi dukkaanneewwannem utti mutookko. Bichchi balli afaakko; Isra'ee'l oosim baado miqisimmi balli afukkisa laqqona; ki'nnuwwi hawwojjinnee wocanchi mashka'innee hiraagaancho qawwisa, Waa'i Ayyaan yoo manchom machchaaraanchisa xiggakkamo. Waa'i Isra'ee'l minaadabina hiraagaanchi egeraanchi ihoo'isa issaakko. Ihukkaarem goog hundannem qaash qaashamaakko; ixxi Keesammi Minennem wocanchi egeraakko. Isra'ee'l minaadab Gaba'oon doollenne hee'llo'i mannisam lobakata haashaatto'ookko. Waa'im ixxuwwika hawwojja sawwaa baaxii'l bikkina guzumo'ookko. Waa'i «Isra'eela siidummi ammane woyi'n misha udma'i uullanne siidummaannis hee'ukko. Ki'nnuwwi gaassi anno'o moo'ummi ammane odakkichchika mishiraachchi misha moo'ummaannis hee'ukko. Ihukkaarem ixxuwwi Ba'aal Phee'oora affa'a lasage ixxuwwi gaga ee tuussiisoo qophpha'n waa'ina annanni issita'a hincaa'llo'o. Ixxuwwi gagim ee iittitam qophpha'n waa'isam haashaaranto'oo keen ikko'o. Isra'ee'l minaadaphphi lobaannoom cii'isa bararaa bi'ookko. Kanniinsi eehid ixxuwwina lamfoor ihimmii qarimmii hee'ooyyo. Ooso qatta'a li'issota'nnim ixxuwwa hundam shoommi bikkina oos bee'an ikkamo. An ixxuwwiinsi qee'lloommi ammane ixxuwwina aayye» yoolla. Isra'eela harish uullanne kaasamu dimbaaphphi haqqisa ihaa moo'ummo. Ihukkaarem ixxuwwi ixxuwwi ooso durina hincaa'llo'o. Moollanna, ka minaadabina qachchi umuu'mmoobee'i goosaa gogaalli anuunaa uwwe! Waa'i «Gelgelanne hee'llu'uuyyim baxxo'i jor bax mashka'inne an eekke'ennem ixxuwwa sabummo. Baxxo'i jor bax bikkinam i miniinsi fissoommo. Kanniinsi eehid ixxuwwina i iitto moo'isoommoyyo. Ixxuwwi awwonsaan hundim boqquwwi ikko'ookko. Isra'ee'l minaadab hafachchi aphphisukkaannisa, xaph gogukkaannisaa misha mishoobee'i haqqichchisaa kora'am gattamo. Ooso qattota'nnim lobakata iittitam ixxuwwi ooso an shoommo» yoolla. Ixxena ijaajantobee'i bikkina i Moollanni ixxuwwa uunjookko. Ixxuwwi mulli minaadaphphi lambe'enne karkaaddu'uuyyi hee'llamo. Isra'ee'l minaadab lobakat shoga amadu woyi'n kaashshisa. Ixxuwwik mish lophphu qaxanne lobakat qophpha'n waa'ina kitimo hincaa'akkam beyyuwwa baxxo'o. Ixxuwwi uullim mishaam ihaa goddisu qaxanne qophpha'n waa'ina otossakkam beyyi utubbuwwa wereeggissa'a baxxo'o. Ixxuwwik wodan qophphaninne wo'mmaakkoohane. Ixxuwwi hawwojjikam sharada siixxitamo. Waa'i ixxuwwika kitima hincaa'llam beyyuwwa hundam iiqansookko; qophpha'n waa'ina otossitam beyyi utubbuwwam gindansookko. Minaadab «Waa'a baddimma uullummi bikkina adil bee'i keen inkaammo. Adil hee'ukkaardu niina ma'issookko?» yitamo. Qophphaninne hide'lla'a sagara aagimminne awwaad bee'i woshsha woccamuulla. Ee bikkina ixxuwwi abuulli uullanne marzi yoo bochchi mutoo'isa ixxuwwi lambe'ennem fitanchi lophphookko. Samaare'i beero'onne hee'llam manni Beeti'aawe'enne hee'oo addichchi kobi'llanne baxamaakkoo qophpha'n waa'a kee'mmaallis baddita'a huxe'llamo. Lombi sheelatamu bikkina wi'llitamo; ixxena awwaaddam qeessuwwim qaraaraallisa wi'llitamo. Ee waa'am Aasoo'l uulla massakka'a lob adilina maqanxi ihaa hincookko. Isra'eel awwonu jor sogitaniinsi ki'aa tuullii sholle'nnii ixxuwwanne afookko. Samaare'i adil wo'i ha'n hmbisa ihaa gatookko. Isra'ee'l minaadab Aweena yakkam beero'onne qophpha'n waa'ina otossimminne baaxiilo baxxam duu'n beyyuwwi gindamookko. Kiti'm beyyuwwannem halli uttii uttii mutookko. Ee ammane ixxuwwi duunnuwwa «Maaxxehe!» hoffi duunnuwwam «Daphphaa'llehe!» yitamo. Waa'i «Isra'ee'l minaadab Gibi'anne baaxiilo baxxo'i ammaniinsi ki'isaa kaballi afeebe'e eese kichche'isimma utto'oyyo. Ee bikkina Gaba'oonanne or ixxuwwanne ki'ookko. An ka boqqi keeno guzumo'oommo. Mulli minaadab hundim wixxita'a ixxuwwanne ki'llamo; ixxuwwi lam qinxit baaxii'l bikkinam guzumo'antamo. «Isra'eel hurbaata ganimma iittitam addichchisatte hee'llo'o. Ihukkaarem mishisoo is axonne gaanjaqqa iyyiisoommo. Ee'isinne Yihud abuullookko. Yaaqoob oos hundim uulla abuullita'a gudissamo. Anim ‹Kaba duud uulla abuullehe; muccurooma ki'nnuwwi gagina wixxehe; daba'llamoobee'i iitto wixxaa'llehe. Oono'o, ki'nnuwwina Moollanni ihummi i kollonne daba'llitakkam amman kabadette. Anim waaraa hanqi gudoo'isa issoommo› yummo. «Ihukkaarem ki'nnuwwi gaqqi malaayynnee geedduwwi dutoomannee amma'nnanchinne jolle wixxakka'a damigo wixxaa'llakko'o; qophphaninne siiddakkam misha ittakko'o. Ki'nnuwwi minaadabanne kee'mmaalli or ihookko; ki'nnuwwik girbuwwi hundim gindamookko. Oohim adil Shalmaan Beeti'arbeel beero'o orinne gindansukkisaa amo'o oosinne maqirem uullanne xexxefaa guullu amma'nnisaa ihookko. Beeti'eel beero'i manna, ki'nnuwwi baxxakko'i kee'mmaalli baaxii'l mashka'inne ki'nnuwwannem eekkam laboo bichchi afookko; or ki'u balli daram Isra'ee'l adil ee ammanem lehookko» yoolla. Waa'i «Isra'eela ciil hee'ukkuuyyim iittummo; i beetom Gibxi uulliinsi weeshummo. Ihukkaarem Isra'ee'l minaadaba lophphita'a i kollonne hincitona weeshummi qaxa ixxuwwi odim iinniinsi lophphita'a qee'llitu'uuyyi matto'o. Ba'aala yakkam qophpha'n waa'ina kitima hincaa'immaa misilluwwinam aduruusa wiriissimmaa utto'oyyome. Ixxuwwi lokkinne taakke'llamisa losisummok anette hee'ummo; an ixxuwwa qaaphphaa amadaa hee'ummo. Ihukkaarem an ixxuwwa abooyyoommisa laqqo'oyyo. Qishixxatinnee iittinnee karaa awwonsummo; gaanjaqqa axiinsi ki'isaa an i gagim aad heeshaa ixxuwwina itisummo. Ihukkaarem ixxuwwi i kolli daba'llimma sabbo'i bikkina Gibxa daba'llita'a mattamo. Aasoo'l uulli adilinam ijaajanta'a gattamo. Diina'i or ixxuwwi beero'uwwa aphphisookko; beero'i gooccuwwam iiqansookko. Ixxuwwi jor sogitanom bi'isookko. I minaadab iinniinsi qee'llimma hasso'o. Hara'mmatinam hundiinsi hanaan yoohaanni kolli laattamo. Ihukkaarem ayyim ixxuwwa hawwiinsi gatisooyyo. Isra'eela! An keese hinkid uroommo? Hinkid keese higisaa uwwoommo? Adaamannee Xabooyimannee issummoka od hinkid issoommo? Kiina yoo i iitti lobakat ihu bikkina ka hundam keesenne issena hasoommoyyo. An ki'nnuwwi lambe'enne hee'oommi keesammi Waa'a bagaan manchoyyo. Ee bikkina i quunqi boobana eeboommoyyo; Isra'eelam la'mmeka bi'isoommoyyo; i quunqinnem ki'nnuwwi beyyo waaroommoyyo. An Waa'i ixxuwwa gatiseena muunoo hobbichchisa sagara macceesisoommi ammane eese awwontamo. I oosim huxe'llo'uuyyi eelliinchi aaggi kollinne waattamo. Cii'isa Gibxiinsi, handarekkichchisa odim Asooriinsi barattu'uuyyi waattamo. Anim ixxuwwi gaqqi heechchi beyyonne dabaroommo. An Waa'i kaka wocaammo» yukko. Waa'i «Isra'ee'l minaadab qophphaninnee qawwiishinnee eese kibbito'ookko. Ihukkaarem Yihuxxi minaadab kabadem an Waa'i awwonsoommi googonne maroolla; iina keesamminam amma'nnamaakkoohane. «Isra'ee'l minaadab hafachcha amadeena yakimminnee ballooma hundam eelliinchi firoo kolli hafachcha hollitu'uuyyi hosimminnee kora'anem ihaakko. Qophphanoo boqqoomaa lonsito'ookko; Aasoo'l manninne sagara aaggo'ookko. Wee'l zaytam Gibxa uulla asse'llamuulla» yoolla. Waa'i Yihuxxi minaadaba acceeqasoo woshshi yookko. Yaaqoob oosim ixxuwwi taakkisanne guzumo'ookko; issito'i jollisannem bito miqookko. Yaaqoob am godabonne hee'ukkisam qaf hee'u ixxi abbaayyika sinxichcho amadukko; li'aa lasagem ixxi Moollanninne gubbamukko. Asse'amaanchinne gubbamaa kaa'ukko; wi'llaahim uratina uunxukko. Mulli ammane odim Beeteelanne moo'amu Waa'i ixxo atoorassukko. Gogoxxi Moollanni Waa'ik la'amoo summi Waa'a. Ee bikkina ki'nnuwwi ki'nnuwwi Moollanni kolli daba'llehe. Iittoo hanqo'i oogatoo qoxxissakka'a amaddehe; ki'nnuwwi Moollanna iyyaqqimminne egellehe. Waa'i «Isra'ee'l oos qophpha'n keennaanchinne keentam Kana'aa'n daddaraa'nnisa ikko'ookko; ixxenne qawwiisimmam iittitamo. ‹Isra'eel an goddaanchi ihaammo. I goddinne ayyi manchim eesenne hawwojja te'im baaxiilo siidooyyo› yaa biramoolla. Ihukkaarem Gibxi uulliinsi awwonsaa fissummok an ki'nnuwwi Moollanni Waa'a. Godo'i Uguxxi ammane dukkaananne hee'llakkamisa odim daba'llitakka'a dukkaananne hee'llakkamisa issoommo. «An gaassaa hiraagaaninne wocaammo; lobakat kaaltam moo'isaammo; hiraagaaninnem kobi'llishshinne wocaammo. Oo hundim ihaa lasage ixxuwwi Gali'aadanne qophpha'n waa'ina otossitamuulla. Ihukkaarem qophpha'n waa'ina otossitam keen kora'i keenom ikkamo. Gelgelanne kitimina labeennuwwa hincaa'llamo. Ihukkaarem kiti'm beyyuwwi iiqamaa abuulli uulli lambe'enne ki'n tuubbi ihaa gatookko» yoolla. Gaassi niyyanni Yaaqoob Maspheexoome'e gibaa marukko. Eekke'em mi'n ama siideena yaa gereebba allaaraanchi ihukko. Waa'i asse'u hiraagaanchinnette ihaa Isra'eela Gibxi uulliinsi awwonsaa fissukko; ee hiraagaanchinnettem ihaa abooyyukko. Ihukkaarem Isra'ee'l minaadab Waa'a lobakata quuqisso'o; ixxuwwi hawwojji bikkinnem xa'mmantamo. Ixxi summam duunto'i bikkina ixxuwwanne oogatookko. Efireem sulli Isra'ee'l minaadabiinsi hanaan ihaa hee'u doollenne wocukkuuyyi macceesoo keen hundim huxe'am hee'ukko. Ihukkaarem lasonne Ba'aala yakkam qophpha'n waa'ina otossaa baaxiilo baxu bikkina lehinne guzumo'amukko. Kabadem qooroominne bukkamaa baxamaakkoo misilaa kin birinne baxamaakkoo qophpha'n waa'uwwaa baximminne baaxiilonne baaxiilo eddamuulla. Oo keen hundim manni angi baxo. Ee keenina «Kitima hincaa'llehe» yitamo. Mannim addichchi hagaranne baxamu qophpha'n waa'uwwa suunqitamuulla. Ee mashka'inne soodaraa'l unbu'llisa ikka'a bi'llamo; da'l qiibaxxisam giggittamo. Oodo'iinsi hafachchinne fii'amaa maroo luunqisaa te'im afo'inne firaa beeddoo wirii'llisaa ikkamo. Waa'i «Gibxi uulliinsi fissummi Moollanni Waa'i anette. Ki'nnuwwina iinniinsi bagaan mulli Waa'i bee'e. Gatisaanchim xale'i anette. Udma'anne lobakata gogaalli i uullanne ki'nnuwwa abooyyummok anette. Ihukkaarem er uulla aaggakka'a godditakkeebe'e ittakka'a lasage lobakata bolxitakko'o; eesem xaddakko'o. Ee bikkina an hobbichchisaa dugaa egeroo kabeechchisaa ihoommo. Wotalli game'amu tibbekkichchisa anim ixxuwwa daafoommo; dereeransoommome; itoo hobbichchisam ihoommo; dereeransoo mogaalli moochchisa muransoommo. «Isra'ee'l minaadaba, ki'nnuwwina hara'mmoommi eesenne ki'llakko'i bikkina an ki'nnuwwa bi'isoommo. Ki'nnuwwi adilaa awwonsaanoo ki'nnuwwina uwwamona xa'mmitakka'a hee'ukko. Eehannah kaba ki'nnuwwa gatisoo adilii awwonsaanii hannonne yoo? An quunqinne adilluwwa ki'nnuwwina uwwaa hee'ummo; ihukkaarem kee'mmaalli quunqinne bi'isummo. «Isra'ee'llek hawwojji tuubamaakko; baaxiilim doonanne kitaabamaakko. Isra'eela xuuchchi amadoo meentichchosa u'n amadookko; qaramoo amman afaa am goosiinsi fireena hasoobee'i ciilisa qawwi ihaakko. Si'oo'l malaayyiinsi an ixxuwwa gatisoommonnihe? Lehiidu gatisoommonnihe? Leho, kiikki booban hannonnennette? Si'oola, ki bi'ishshidu hannonnette? An ixxuwwina qishixxoommoyyo. Abbaayyuwwi lambe'enne ixxi mishaam ihuta'nnim Waa'i quunqi ihu eelliinchi firoo kolli hafachchi udma'i uulliinsi ki'aa waarookko. Bu'i xoo'ookko; daajjim gogookko; oo hafachchim bito xee'aalli mu'uta hundam sheelataa massookko. Samaare'i iina boqqito'i bikkina baxxo'i bax mashka'inne xa'mmantamo. Minaadabim orinne beedditamo; ciilluwwi uullanne xaantamo; lamfoor meentikim godab dereeramookko» yoolla. Isra'ee'l minaadaba, baaxii'l mashka'inne qolantakko'oo bikkina ki'nnuwwi Moollanni Waa'i kolli daba'llehe. Baaxiilo biiraa yimmi sagara amaddakka'a Waa'i kolli daba'llitakka'a «Ni hawwojja hundam ‹Uraammo› yihe. Uttaahim neese aa'e. Neesem ni suu'm er mish ihu galata kiina hincaa'nnoommo. Aasoor neese gatisooyyo; o'l faradonnem amma'nnammoommoyyo. Kanniinsi eehid ni anginne banxummi qophpha'n waa'uwwa hundam ‹Ni Waa'a› yinaa weenshoommoyyo. Moollanna! Anno'i lehu oosim kiinniinsi qishixxato siixxitamo» yi'llehe. Waa'i «I minaadaphphi amma'nnanchi hoonge fayyiisaa i kolli dabaroommo. I quunqi ixxuwwiinsi daba'llu bikkina an i gaqqi doo'lliinsi ki'isaa ixxuwwa iittoommo. Isra'eelina aad dilloo hadaddisa ihoommo. Ixxuwwi fiitisa fiittamo; Liibaanoos uulli haqqisam xapha asse'llamo. Ixxuwwik caaf li'ookko. Wee'l haqqisam mishissamo; Liibaanoos uulli doo'm haqqisam er enja enje'llamo. Daba'llita'ahim i hafanne ikkamo. Mut hurbaaxxisam lattamo; woyi'n haqqisam fiittamo. Enjim Liibaanoos uulli woyi'n diqaasisa la'amaakkoohan ihookko. Isra'ee'l minaadaba! Qophpha'n waa'uwwinne iina mah edanchi hee'aate? Ki'nnuwwi uunxatina dabachcha uwwoommokii ki'nnuwwa abooyyoommokii anette. An hundi ammanem lataa hee'oo hoo'm haqqisa; mishaam ikkakkamokim iinninnette» yoolla. Qooroom yoo keen ka woshsha qoossitamo; qoossitam keenim laqqamo. Waa'i goog hanqo'i googo; muccur keen ixxenne mattamo. Ihukkaarem baaxiilaan keen qo'llita'a ubbamo. Baatu'eel beet Iyyoo'eel beyyo waaru Waa'i sagar kane. Lommanni kaka macceessehe; Yihuxxi uullanne hee'llakkam keen hundim qoossehe. Ayyi la'ukko ki'nnuwwi doollenne te'im ki'nnuwwi anno'i doollenne kuk ihaa la'oohonnihe? Ka woshsha ki'nnuwwi oosina kullehe. Ki'nnuwwi oosim ixxuwwi oosina kuttona ixxuwwim ixxuwwi lasaqqi qaranchina kuttona. Daquuriinsi gatu wix hurbaata hishshoo qawwaawwi itukko; daquuriinsi gatu wix hurbaata wiisho'isa dilloo qawwaawwi itukko. Eehanniinsi gatukkoka odim guullaa bi'isoo qawwaawwi itukko. Kanniinsi eehid haareechchi woyi'n diqaasa ki'nnuwwi suumenne nakkitakkambee'i bikkina dimbaano, baqitakka'a wi'llehe; woyi'n diqaasa aggakkam keen hundim aayye yi'llehe. Xigakka'a xanakkambee'i malaayyaam manni ni uullanne firaakko. Inqim hobbi inqi'nnoo'i qare'aalla. Gaangeerim meentichchi hobbichchi gaangee'llisa. Oo manni niikka woyi'n kaashsha hundam bi'isukko; oda'am muransukko; caaffuwwi qadaalleebe'i afeebe'em hobara coo'aa bi'isukko. Ee bikkina Woraadda'n amma'n beet lehu idaayyichchosa xiddi eddechcha edde'llakka'a wi'llehe. Keesammi Minenne kitim ihaa hincoo hurbaatii woyi'n diqaasii bee'u bikkina Waa'ina awwaadaan ikko'i qeessuwwi wi'llitamuulla. Abuulli uulli udma'i uullisa ihaakko; hurbaat bi'aakko; woyi'n kaashshim gogaakko; zaytim beeddaakko; ee bikkina uulli wi'lloolla. Aras, so'ii mulli hurbaatii hundim bi'u bikkina abuullaan kichche'llehe; woyi'n kaashshi yoo keenim aayye, yi'llehe. Woyi'n kaashshi, oda'ii itakkam mulli haqqi mishii hundim gogaakko; liiranchim manni oosiinsi qee'llaakko. Ki'nnuwwi Waa'ina kitim issitakka'a hincaa'llakkam hurbaatii woyi'n diqaasii bee'i bikkina kiti'm beyyonne Waa'ina awwaaddakkam qeessuwwi xiddi eddechcha edde'llakka'a hiimooma hundam wi'llehe. Soommano alallaattehe; minaadaba dummichchina weeshshehe; lommannaa Yihuxxi uullanne hee'llam minaadab hundamii ki'nnuwwi Moollanni Waa'i mine weeshshehe; ixxi kollonnem laallehe. Moollan balli hincaakko; Hundam xanoo Waa'iinsi bichchi balli waarookko; ee balli bikkina aayye! Hurbaat ni illagiinsi bi'aakko; ni Waa'i miniinsim liiranchii ilillaatii bee'aakko. Wixamu hurbaat uullanne shamaa gataakko; atoot bee'i bikkinam sechchuwwi diihaakko; gootalluwwim gindamaakko. Allaa'lloo hixe hoogu bikkina diinat laaroolla; gereebbim sibaarinne u'nnamoolla. Waa'a, allaachchi uulli hixee doo'm haqqaa giir itaa bi'u bikkina an ki kollonne laaroommo. Wo'ii hixii gogu bikkina moochchi hundim ki kollonne laaroolla. Keesammi Waa'i duunanne Xiyoonanne ikkakka'a xurumba fuggehe; laachchi sagaram macceesissehe. Moollanni balli hincu bikkina Yihuxxi minaadab hundim huxe'ona. Oo balli tuunsi ballaa witriichchi ballaa; gambabbi tuunsi ballaa duubaam ballaa. Xigo lobakataa malaayyaamoo ihaakkoo qawwaawwi gogot duunnuwwa ifiisoo tuunsisa ihaa waaraakko. Eehido'i luwwi illaggee'n doollenne hee'ukkoyyo; waaroo doollennem od hee'ooyyo. Ee gogoxxi illaginne gii'llisa aphphookko; lasim laba'nnisa shokkiisookko. Ixxuwwi illagenne yoo uulli Eden gannattisa. Ihukkaarem ixxuwwi las udma'i uullisa; ixxuwwiinsi gatoo luwwi mahim hee'ooyyo. Ixxuwwi hagar faraxxi haga'llisa; geellichchim o'l faraxxisa. Duunnuwwi ludonne xophxophukkuuyyi faraxxi gaare'isa gugookko. Bura'a itoo gii'llisa hundi luwwam shokkiisookko; orina gudu malaayyaam gogoxxisa marookko. Ixxuwwi illagenne manni hundim huxe'ookko. Illi hundim heemachchookko. Geedduwwisa dangissa'a qassamo; gaadaa'nnisa oottuwwa caallitamo. Annannichchim ixxi googo amadaa marookko; ekkidii kidii daba'llamooyyo. Mat mullaanninne gafe'amooyyo; annannichchim googo amadaa marookko; diina'i ora iiqaa higookko; ihukkaarem ixxuwwa mahim hawwodooyyo. Beero'i lambe'enne geerantamo; oottuwwa caallitamo. Minneewwanne fittamo; gamaa'nnisa maskoottuwwinne aaggamo. Ixxuwwi illagenne uulli huxe'ookko; Iimannuwwi shafshafookko. Eelliinchii aganii tuunsookko; Boollaanki caakkim bi'ookko. Waa'i baddisoo sagarinne ixxi gogota ijaajookko; ixxena ijaajantam gogoxxek xig lobakataa malaayyaammuwwaa. Waa'i balli hanqinam lob ballaa baddisoohanee! Ee balla ayyi qoxxaa uulleena xanookko? Ee bikkina Waa'i «Kabadem soommanimminne, wi'llimminnee kichchechchinnee ki'nnuwwi wo'm wodaninne i kollonne daba'llehe. Ki'nnuwwi wo'm wodaninne i kollonne daba'llehe bagaan eddechcha dereettakkotte» yoolla. Ki'nnuwwi Moollanni Waa'i kolli daba'llehe; ixxi biijaallaa haafoohanee; Iittim heer heerinattee quunqinam gaaggaaboobee'annee; ixxi iyyaqqoohane bagaan jor luwwa isseena gaaggaaboobee'ane. Ayla'ukko quunqiinsi daba'llaa Moollan Waa'i lobakat maasso ki'nnuwwina uwweena xanookko; ee ammane hurbaaxxekkaa woyi'n diqaasikaa kitima ixxena hincaa'llakkammo. Xiyoo'n duunanne xurumba fuggehe; soommanina alallaattehe; minaadaba keesammi dummichchina weeshshehe. Minaadaba wixxaa'llehe; dummichcham keessehe; lommannam weeshshehe; anuuna iicoo oos gatoo'n ciilluwwa hundam wixxaa'llehe; idaayyuwwim dumiinsi firona. Waa'i illagenne awwaaddam qeessuwwi kiti'm beyyinaa Keesammi Mine aagakkam goocinaa lambe'enne ikka'a wi'llitu'uuyyi uunxitona. Ixxuwwim «Moollanna, ki minaadabina qishixxe. Keese laqqambee'i minaadab ‹Ki'nnuwwi Waa'i hannonnette?› yitu'uuyyi neesenne naacantamisaa osattamisaa issititte» yitona. Waa'i ixxi uullina to'achchu bikkina ixxi minaadabina qishixxukko. Ee bikkina «Oono'o, hurbaata, woyi'n diqaasaa wee'l zaytaa godditakkeebe'e uwwoommo. Kanniinsi eehid eese la'obee'i minaadab gadoo'isa issoommoyyo. Hanaa'n qarinne waaroo qawwaawwi gogota ki'nnuwwiinsi qeessoommo; udma'i uullanne aad qaala'anne holloommo. Illaqqi kollo Sooqixxi Dambalaq kolli lasaqqi kollo odim Meedeteraaniyaa'n dambalaq kolli holloommo; eekke'enne ixxuwwik leesh boboo'isa issoommo. Ixxuwwi ki'nnuwwanne kee'mmaalli hawwo afisso'i bikkina ixxuwwa guullaa bi'isoommo» yukko. «Uullanne hee'llakkam minaadaba, badditakkotte; Waa'i kee'mmaalli luwwa issu bikkina liirammehe; lobakata liirammehe. Uullanne hee'llakkam fooraam luwwi hundim baa'llakkotte. Ki'nnuwwi allaa'llittakkam beyyuwwi hixaakko; haqquwwim mishaakko; oda'ii woyinii erisa mishaakko. «Xiyoo'n minaadaba, ki'nnuwwi Moollanni Waa'anne liirammehe; lobakatam liirammehe. Ixxi illagee'n xeena muccuroominne ga'nnisaakko; gaassisam illagee'nnekaa lasaanchikaa xeena goddisaa ga'nnisaakko. Oodo'uwwi hurbaaxxi atootinne wo'mmookko; woyi'n diqaasii wee'l zaytii ciinsakkam beyyonne wo'mmaa daadookko». An illagee'n doollenne ki'nnuwwanne asse'ummaare o'l gogoti'nnoo'i hishshoo qawwaawwi, dut qawwaawwii daquurii itaa bi'isu luwwi hundam ki'nnuwwina dabaroommo. Godditakkeebe'e ittakkam lobakat hurbaata uwwoommo; lobakata maalalsiisoo luwwa ki'nnuwwina issummi eese ki'nnuwwi Moollanni Waa'a galaxxitakkamo; ka lasage i minaadabanne sholle'n afooyyo. Isra'eela, an ki'nnuwwi lambe'enne yoommisa, ki'nnuwwinam Moollanni ihummisaa iinniinsi bagaan mulli Waa'i bee'an ihukkisaa laqqakkamo; ka lasage i minaadabanne sholle'n afooyyo. Waa'i «Ee lasage iikka Keesammi Ayyaana mannanne hundannem ga'nnisoommo; ki'nnuwwik goo'n oosii landii hiraago wocookko; lommannim haqaawwo haqaawwe'ookko; woraadim kaalta mo'ookko. Odim ee doollenne iina awwaaddam goo'n oosonnee landannee Keesammi Ayyaana ga'nnisoommo. «Maalalsiisoo aganni iimanennee uullannee ihoo'isa issoommo; xiigii giirii, utuphphisa uullaakkoo wiriirii ihookko. Lob baddisoo Waa'ik balli waaroo'n gaassaa eelliinchi tuunsookko; aganchim xiiganne daba'llookko. Waa'ika summa weeshookkok hundim gatookko; Waa'i wocukkisannem Xiyoo'n duunannee Yerusaaleemannee qaraar siidamookko; cuungi kee'n lambe'ennem Waa'i weeshu keen hee'llamo» yoolla. Waa'i «Ee ammane Yihuxxekaa Yerusaalee'mmekaa qeefadanta'a hee'llam minaadaba dabaroommo. Eese laqqambee'i minaadab iina sharad ihu Isra'ee'l minaadaba mulli minaadaphphi lambe'enne binnaa'llo'ookko; i uullam baxxanto'ookko; ee bikkina ixxuwwa wixxaa'aa Yoosaafiix cebbanne dilliisoommo; eekke'em ixxuwwanne oogatoommo. I minaadabam baxxanteena saammo issaqqanto'ookko; goo'n ooso bushaallooma baxoo meentinne dabassito'ookko; landam woyi'n diqaasa aggeena agiddanina biteesso'ookko. «Ki'nnuwwi Xiiroosanne, Siidoonannee Filisxee'm uullannee hee'llakkam minaadaba, ki'nnuwwinne maqire iina mah hee'aate? Baado miqissakkeena hanqoomam hassakka'ahinnihe? Eekka sawwitakko'oohan ihulas an ki'nnuwwa gaassaa issoommo. Iikka bira, worqaa bito xee'aalli mu'uttuwwaa ki'nnuwwi waa'uwwi minneewwanne massitakka'a dissitakko'ookko. Yihuxxekaa Yerusaalee'm minaadabaa ixxuwwi uulliinsi qeessitakkeena Giriik uulli mannina biteessakko'ookko. Oono'o, kaba an ixxuwwa biteessakko'i beyyi hundiinsim dabaroommo; ixxuwwanne issitakko'i barche'e hundam ki'nnuwwannem issoommo. Ki'nnuwwika goo'n oosoo landaa Yihuxxi minaadabina higisaa uwwoommo. Ixxuwwim qee'l uullanne hee'llam Saaba'i mannina biteessamo. Kaka wocummok an Waa'a. «Ka woshsha mulli minaadabina alallaattehe; orina guddehe; geedduwwam ki'isansehe; o'l manni wixxita'a orina fittona. Ki'nnuwwika maarasha bisa'i issitakka'a jajjaram bagad issitakka'a baxxehe; hoogaanchim ‹An qoxara› yihona. Ki'nnuwwi ee kululleetanne yoontakke'i mulli minaadab hundim qaqqissakka'a fillehe; ee cebbannem wixxi'llehe. Waa'a, kiikka o'l gogota eekke'e asse'e. «Mulli minaadab hundim gudda'a Yoosaafiix cebba dillitona; an Waa'i ee kululleetanne hee'llam mulli minaadab hundannem oogateena ee beyyonne afuuroommo. Ixxuwwik jolli hore'em lophphaakko; ee bikkina hurbaata jajjarinne murakkamisa mullehe; woyina ciinsakkam beyyiinsi wo'mmoohaare hance'akkamisa hancaacammehe» yoolla. Moollannik balli oogato'i cebbanne ihoo balli afu bikkina lobakata dut minaadab ee beyyonne dummaakko. Ee balla eelliinchii aganchii tuunsookko; boollaanki caakkim hee'ooyyo. Waa'i Xiyoo'n duunanne ihaa gugookko; Yerusaaleemiinsim baddisoo sagara macceesisookko. Uullii iimanii heekke'ookko. Ihukkaarem Waa'i Isra'ee'l minaadabina girbi ihookko. Waa'i «Isra'eela, ee ammane an ki'nnuwwina Moollanni Waa'i ihummisaa keesamaakkoo Xiyoo'n duunanne hee'oommisaa laqqakkamo. Yerusaaleemim keesamaakkoo beero'i ihookko; kanniinsi eehid allaggi manni hancaacamooyyo. «Ee ammane duunnuwwi hundiinsim haareechchi woyi'n diqaas daadookko; hoffi duunnuwwiinsim ad daadookko. Yihuxxi uulli cebbuwwinne hundinnem wo'i daadookko; Keesammi miniinsim bu'i firookko; Shiixii'm cebbam aacisookko. «Gibxi uulli udma'i uulli ihookko; Edoomim manni hee'oobee'i uulli ihookko. Mashka'oomim Yihuxxi minaadaba barche'e issito'ookko; ixxuwwi uullannem muccur xiiga daassito'ookko. Ooziy Yihudanne, Yoo'aas beet Yoorbi'aamim Isra'eelanne adilluwwi ikka'a hee'llo'i doollenne Taqo'anne hee'llam allaaraaniinsi mat hee'u Amoox uulli huxe'eena lam hiinchi hee'ukkuuyyi Isra'ee'l bikkina wocu hiraaqqi sagar «Waa'i Xiyoo'n duunanne ihaa hobbichchisa baddisoo sagara macceesisoolla; Yerusaaleemanne ihaatim gugoolla. Allaachchi beyyi hix gogookko; Qarmeeloos duu'n ludonne yoo lat hundim gogookko» yukko. Waa'i «Damaasqo'i beero'i minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwi Gala'aaxxi minaadaba xaa'l shafe'inne barche'e issito'ookko. Adil Hazaaheel adilla'n minenne giira xanqisoommo; oo giirim adil Benhadaad baxisu girbuwwa shokkiisookko. Damaasqo'i beero'i ooxxi gooccuwwa iiqoommo; Awee'n cebbanne hee'llam minaadabaa Beeti'eede'n gassaanchoo bi'isoommo; Sooriy minaadabim qeefadamaa Qiira maroo'isa issoommo» yoolla. Waa'i «Gaaza'i beero'i minaadab edaa edaa baxu baaxii'l bikkina hanqo'isam guzumo'oommo; mashka'oomim minaadaba hundam qeefadda'a Eedoo'm mannina higissa'a uwwito'ookko. Ee bikkina Gaaza'i beero'i qashanne giira xanqisoommo; oo giirim ee beero'i girbuwwa shokkiisookko. Ashdooxxi minaadabaa Asqaloo'n gassaanchoo bi'isoommo; Eeqiroo'n beero'i minaadaba guzumo'oommo; gatto'i Filisxee'm minaadabim letamo» yoolla. Waa'i «Xiiroos beero'i minaadab edaa edaa baxu baaxii'l bikkina hanqo'isam guzumo'oommo; mashka'oomim aaggo'i abbaayyoo'm hidi'l sagara gindita'a qeefaddo'i minaadaba Eedoo'm mannina higissa'a uwwito'ookko. Ee bikkina Xiiroos beero'i qashanne giira xanqisoommo; oo giirim ee beero'i girbuwwa shokkiisookko» yoolla. Waa'i «Eedoo'm minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwina abbaayyuwwi ikko'i Isra'ee'l ooso amadda'a lasagem qishixxito'oyyo; bisa'innem hollito'ookko; ixxuwwi quunqim billeena xanukkoyyo. Ee bikkina Teemaa'n beero'onne giira xanqisoommo; oo giirim Booxir beero'i girbuwwa shokkiisookko» yoolla. Waa'i «Amoo'n minaadab edaa edaa baxu baaxii'l bikkina hanqo'isam guzumo'oommo; ixxuwwi uullika gasso haraassiteena Gala'aaxxi uulli lamfoor meentika godabo dereetto'ookko. Ee bikkina Raaba'i beero'i qashika goocaa girbuwwaa giirinne shokkiisoommo; ee lasage or ihoo balla laachchii dambaqii ihookko; orim hambu'llam hafachchisa ihookko. Ixxuwwi adilii ixxi suu'm mannii qeefadantamo» yoolla. Waa'i «Moo'aaphphi minaadab edaa edaa baxu baaxii'l bikkina hanqo'isam guzumo'oommo; ixxuwwi Eedoo'm uulli adi'lleka miqe gii'lbuchchi iheebe'e shokkiisso'ookko. Ee bikkina Moo'aaphphi uullanne giira xanqisoommo; Qiiriyoot girbuwwam shokkiisookko; gaadaa'n sha'llanchiinsi, shuuriinsii xurumbulli sagariinsii ki'ukkok Moo'aaphphi manni beedtamo. Moo'aaphphi uulli gassaano adilinne maqirem shoommo» yoolla. Waa'i «Yihuxxi minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwi i seera gindito'ookko; i ijaajom egetto'oyyo; ixxuwwi anno'i otossitam hee'llo'i qophpha'n waa'uwwanne ixxuwwim huushanto'ookko. Ee bikkina Yihuxxi uullanne giira xanqisoommo; oo giirim Yerusaalee'm beero'i girbuwwam shokkiisookko» yoolla. Waa'i «Isra'ee'l minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwi muccur keeno birina, buxa kobe'ina biteesso'ookko. Buxika horoore buchchanne edda'a hance'llamuulla; hoogaa'nneka hanqa bi'issamuulla; annii beetii mat meentichchonne iinse'llamuulla; ee'isinne keesamaakkoo i summa haashaassitamuulla. Badano miqqa'a xantobee'i manniinsi dabba'a amaddo'i eddechchanne kitima hincaa'akkam beyyi hundannem iinse'llamuulla; bada'n manniinsi dabba'a massito'i woyi'n diqaasa ixxuwwi waa'uwwi minenne aggamuulla. «Ihukkaarem an uullichchi Liibaanoos digiphphisa, malaayyim wee'l haqqisa qoxxaakkoo Amoore'i manna luguminnem xoqolaa bi'isaammo. Amoore'i manni uulla ki'nnuwwina uwweena Gibxi uulliinsi ki'nnuwwa fissummo; uulli udma'annem sor hiincho awwonsummo. Ki'nnuwwi goo'n oosiinsi hiraagaano, harde'uwwiinsim Naaziraawe'e ki'isummo; Isra'ee'l minaadaba, kuk hanqayyonnihe? An Waa'i kaka wocaammo. Ihukkaarem ki'nnuwwi Naaziraawe'uwwina woyi'n diqaasa agissakka'a huushissakko'o; hiraagaanom hiraago woccambee'isa hoottakko'o. Ee bikkina kee'mmaalli hurbaata iyyiisakko'i faraxxi gaare'i hance'u luwwa iiqansoohaannisa ki'nnuwwam iiqansoommo. Erisa geettam keenim gibba'a xottamoyyo; malaayyaam kee'nnekim wod hoogookko; gaadaanim ixxuwwi gaga gatixxiteena xantamoyyo. Xiyya darabbam keenim beyyonne qoxxita'a uulliteena xantamoyyo; erisa geettam mannim gibba'a xotteena xantamoyyo; faradaanim ixxuwwi gaga gatixxiteena xantamoyyo. Ee balla qoxar gaadaan o'l mu'uta ubbussu'uuyyi gibbamo» yoolla. Kaka wocukkok Waa'a. Isra'ee'l minaadaba, Gibxiinsi fissu Waa'i minaadab hundinam «Heer uulli minaadab hundiinsim xale'i ki'nnuwwa doo'llummo; ee bikkina ki'nnuwwi baaxiilina hundinam ki'nnuwwa guzumo'oommo» yoolla. Hanqinam lam manchi shiinnaatantoo'n maqire taakke'lleena xantamonnihe? Hobbichchi itoo luwwa siidoo'n doo'm woronne muunoohonnihe? Hobbichchi geexdu ma'lluwwa amadoo'n yoo beyyonne muunoohonnihe? Cii'ichchi qaashakkobee'i kiyyo'onne amadamoohonnihe? Kiyyodu mat luwwa amadoo'nnim chokaatoohonnihe? Orina xurumbi beero'onne fugamoo ammane baa'oobee'i manni hee'oohonnihe? Waa'i bi'isoo'n beero'i bi'oohonnihe? Hanqinam Moollanni Waa'i issoo luwwa ixxi awwaadaan ikko'i hiraagaanina caakkisoo'n maaxaa maham issooyyo. Hobbichchi muunoohaare baddoobee'i manchi ayyette? Moollanni Waa'i wocoohaare hiraago wocoobee'ek ayyette? Ashdoodannee Gibxannee yoo girbuwwanne hee'oo keenina hundinam «Samaare'i duunnuwwanne wixxitakka'a ee beero'i woronne yoo damigoo hambalaachchanchaa moo'llehe» yitakka'a alallaattehe. Waa'i «Ku minaadab er baxo baximma la'ukkoyyo; malaayyinnee damiginnee wixxaa'u amaxxa minenne wonshaakko. Ee bikkina diina'i ixxuwwi uulla kibbookko; girbuwwam gindaa minneewwa bogookko» yoolla. Waa'i «Samaare'i uullanne hee'oo Isra'ee'l minaadab iiqamu ara'ik lokkii hoffi iiqammi ara'i kollii xale'i gatoo'isa ihookko; oohim allaaraanchi hobbichchi suumiinsi lam lokki shuku'llaa macci ludoo xale'e ubbuusisoohaannisa» yoolla. Gogoxxi Moollanni Waa'i «Oono'o, kaka macceessehe; Yaaqoob shumo'inam naqqassehe. Isra'ee'l minaadaba ixxuwwi baaxii'l bikkina guzumo'oommi balla Beeteelanne yoo kiti'm beyyuwwa gindansoommo; kiti'm beyyi buudduwwim iiqamaa uullanne ubookko. Hagayyee billee afuutta'a higissam minneewwa hundam gindoommo; daane'i inqinne wereeggisakka'a baxakko'i minneewwi hundim gindamookko; lob minneewwim gindamookko» yoolla. Ki'nnuwwi buxa wor amaddakkam keen, hawwaano u'nnissakkam keenii dimbisoo agga eebona ki'nnuwwi aro'uwwa xa'mmitakkam Baasaa'n uulli xiikkakko'i lari'nnoo'i Samaare'i geejji meento, macceessehe! Moollanni Waa'i ixxi keesammoominne «Ki'nnuwwi hookko'inne amadakka'a gosaasakkam luwwisa gosaasantakkam balli waarookko; ki'nnuwwiinsi ayyim gatoobee'isa hookko'inne amadakka'a qurxumme'isa massakkamo. Ki'nnuwwa annannichchom ki'nnuwwi gadaninne gindamaa yoo ooxxi afo'inne gosaasakka'a fissakka'a Harmoonanne uunjakkamo» yaa hide'aakko. Moollanni Waa'i «Isra'ee'l minaadaba, Beeteela mattakka'a baaxiilo baxxehe; Gelgelam mattakka'a hassakko'i baaxiilo hundam baxxehe! Darina darina kitima hincaa'llehe; saxxi ballanne saxxi ballannem tommiinsi mato uwwehe. Mattakka'a galaxxi kitimina ihoo daabbo'o hincaa'llehe; ki'nnuwwi doo'llinne hincaa'llakkam kitiminam alallaattehe. Ookki ki'nnuwwi issitakkeena hassakkamaneme» yoolla. Odim «Ittakkam luwwa hooggakka'a godab kokeebe'i afeebe'e ki'nnuwwi beero'uwwannee hegeegguwwannee qaanne'e fatakummo; ihukkaarem ki'nnuwwi i kollonne daba'llitakko'oyyo. Ki'nnuwwik hurbaat afeena sas agan hee'ukkuuyyim xeen ga'nnoobee'isa issummo; mat beero'onne ga'nnaa mullaannonne ga'nnoobee'isam issummo; mat kollonne ga'nnukko; mulli kolli odim xeena hoogaa gogukko. Manni wo'o ageena hasaa mat beero'iinsi mulli beero'o marukko; ihukkaarem xeebo mureena xanoo wo'o siideena xanukkoyyo. Ki'nnuwwim i kollonne daba'llitakko'oyyo. «Hurbaata gokkisoo hafachcha hafachchisummo; ki'nnuwwika duubbi kaashsha, woyi'n kaashsha, oda'aa weeraa hundam qawwaawwi itukko. Ihukkaarem kinnuwwi i kollonne daba'llitakko'oyyo. «An Gibxi uullanne issummisam ki'nnuwwannem booban uboo'isa issummo; ki'nnuwwik woraad oranne beeddoo'isa, farad qeefadamoo'isaa ki'nnuwwi hegeeg leesh bobinne wo'mmoo'isaa issummo. Ihukkaarem ki'nnuwwi i kollonne daba'llitakko'oyyo. «Soddomaa Gomoraa bi'isummisam ki'nnuwwiinsi lobakata bi'summo; ki'nnuwwim gattakko'ok shokkiinsi gatu guxxisa. Oo hundim ihukkaarem ki'nnuwwi i kollonne daba'llitakko'oyyo. Ee bikkina Isra'ee'l minaadaba, yummisam guzumo'oommi bikkina ki Waa'inne edanteena gude!» yoolla. Duunnuwwa baxukkok hafachcha qooccukkok ixxi tii'lleka mannina caakkisookkok balli caakka tuunsonne dabarookkok duunnuwwanne taakke'ookkok ixxi summim gogoxxi Moollanni Waa'a! Isra'ee'l minaadaba, ki'nnuwwina soroommisa macceessehe; Oono'o, baajaamotte hee'llo'i Isra'eela ubbo'o; la'mmaagge ki'lleena xantamoyyo; hara'mmaa ki'isoo hoogga'a is gaqqi uullannem uunjanto'ookkotan ikko'o. Moollanni Waa'i «Mat Isra'ee'l beero'iinsi mat kum gaadaan orina marookko. Ihukkaarem xale'i mat xibbi gaadaan gatookko; mat xibbi gaadaan gaadina firukkaanniinsim xale'i tommi daba'llookko» yukko. Waa'i «Isra'ee'l minaadaba, i kollonne daba'llehe; foorinne hee'llakkamo. Otossitakkeena Bersaabe'e mattakkotte; Beeteelam hassakkotte; Gelgelam mattakkotte; mashka'oomim Beeteel gindamaa bi'ookko; Gelgelanne hee'oo minaadabim qeefadamaa marookko» yukko. Isra'ee'l minaadaba, Waa'i kollonne daba'llehe; foorinnem hee'llakkamo; eebeelas Waa'i ki'nnuwwa gii'llisa ihaa shokkiisookko; Beetee'l mannam giir itookko; ee giiram xoo'isookkok hee'ooyyo. Oogato boqqissakkam keeninaa minaadaphpheka hanqa bi'issakkam keeninaa aayye! Oogaxxi beyyonne axeeroo mancho sabbakkamo; hanqa wocoo manchom shigigitakkamo. Buxa wor amaddakk'aahii ixxuwwi wixxo'i hurbaatam boggakk'aahii cabbaramaa axisamaakkoo kininne mine baxxakko'aarem ee minenne hee'llakkamoyyo; er beyyonne woyina kaassakko'aarem woyi'nneka diqaasa aggakkamoyyo. Ki'nnuwwik boqqoom hinkaa'nna lophphaakkooda'e, baaxiilim hinkaa'n kee'mmaalli ihuda'e an la'oommo; muccur manna hawwissakko'ookko; maqanxa aa'llakku'uuyyim buxika hanqa oogaxxi beyyi hundannem bi'issakko'ookko. Eehanniinsi ki'ukkok doolli joraakko; ee bikkina tiiraam manchi sa'ookko. Foorinne hee'llakkeena er baxo baxxehe bagaan jor baxo baxxakkotte; eehamdu issitakkolas ki'nnuwwi yitakko'isam gogoxxi Moollanni Waa'i ki'nnuwwinne maqir ihookko. Jor luwwa sabbehe; er luwwam iittehe; oogaxxi minenne hanqi boqqoobee'isa issehe; ayyi la'ukko gogoxxi Moollanni Waa'i gatto'i Isra'ee'l minaadabina qishixxeena xanookko. Ee bikkina gogoxxi Moollanni Waa'i «Goog hundannee wixxixxi beyyuwwannee aayyee yimmii wi'llii macceesamookko; abuullaanim weeshanta'a sottam keeninne maqirem wi'llitamo. Woyi'n kaashshi beyyi hundannem wi'l ihookko; mashka'oomim an ki'nnuwwa guzumo'eena ki'nnuwwi lambe'inne higoommi bikkinatte» yoolla. Kaka wocukkok Waa'a. Waa'ik balli waaroo'isa egettakkam keenina aayye! Oo balli tuunsi balla bagaan caakki balli ihubee'i bikkina mahina ee balla egettakkamuulla? Oo balli mat manchi hobbichchiinsi gibaa tibbekkichchinne gambayoohaannisa; tibbekkichchiinsim gibaa mine aagaa lasonne anga gortannanne bakkiisu beyyonne hamashshichchi qasu manchisa ihookko. Waa'i oogatoo balla ki'nnuwwina tuunsookko bagaan caakkooyyo; oo balli matem caakkim moo'amoobee'i gambabbi tuunsi balli ihookko. Waa'i «Ki'nnuwwika hiinchi ugudduwwa sabaammo; shigigaammome; otossitakkeena wixxitakkam wixxittuwwim eese liiransukkoyyo. Shokkiisakka'a hincaa'akkam kitimaa hurbaaxxi kitimaa hincaa'llakkota'nnim aa'oommoyyo; galaxxi kitimina hincaa'llakkam di'ir diinaxxi kitimam aa'oommoyyo. Zammattakkam mazmuu'lleka corochcha iinniinsi qeessehe; diitta'i sagaram an macceeseena hasoommoyyo. Ee bikkenne hanqo'i oogat daajjisa muccuroomim xoo'oobee'i bu'isa daadona. «Isra'ee'l minaadaba, hanqinam sor hiincho hundam udma'i uullanne ki'nnuwwa awwonsummuuyyi iina uwwakkam annanni annanni luwwaa kitimaa hincaa'llakko'i amman yoohonnihe? Ihukkaarem ki'nnuwwi gagina baxxakko'i ‹Adila› yitakkam Saakuutaa ‹Keewaana› yitakkam boollaanki waa'aa iyyitakkamo. Ee bikkina ki'nnuwwi Damaasqo'i beero'iinsi eeqido qeefadantakka'a mattakkamisa issoommo» yoolla. Kaka wocukkok gogoxxi Moollanni Waa'a. Isra'ee'l minaadab hara'mmatina ixxuwwi awwonsaa'n beyyo waattamo; ihukkaarem ixxuwwi Xiyoonanne makkixxita'a afuuttam bikkinaa Samaare'ennem baachchi bee'e hee'llam bikkinaa ee la'anto'oo awwonsaanina aayye! Hino'o, Kaalne'i beero'o mattakka'a moo'llehe; eeheenim lob Haamaat beero'oo Filisxee'm Gaataa mallehe; ixxuwwi ki'nnuwwiinsi lophphitamonnihe? Ee kee'n uuldu ki'nnuwwi uulliinsi lophphoohonnihe? Ki'nnuwwi «Bichchi balli gundanne ihooyyo» yitakka'a sawwimminne ki'nnuwwi gassonne damiga gaaggaabissakkamuulla. Daane'i inqinne baxamaakkoo ara'uwwanne iinse'llakkamo; gereebbi geexxuwwaa lariinsi wo'llaa ittakku'uuyyi gundi ara'uwwanne daabaayyitakkamo. Maasinqo'inne coro'llakkam keenina, Daawiitisam mazmuu'l mu'uta gudissakkam keenina, woyi'n diqaasa harachchinne aggakkam keenina, bito xee'aalli shitto'o laphphitakkam keeninaa ihukkaarem Yooseef hawwi bikkina kichche'llakkambee'i keeninaa aayye! Ee bikkina ki'nnuwwi luxxaaggennem qeefadantakka'a mattakkamo; ki'nnuwwikim faare'llakko'isa hee'llakkam liiranchi bi'ookko. Gogoxxi Moollanni Waa'i «Isra'ee'l minaadaphpheka bolxooma sabaammo; wereeggissa'a baxxo'i adilla'n minneewwam shigigaammo. Ee bikkina ixxuwwi beero'oo beero'onne hee'oo luwwaa hundam diina'ina higisaa uwwoommo» yaa ixxi gaganne hide'aakko. Tommi manchi mat minenne gatuta'nnim lehookko. Leto'i keeno ee miniinsi fissaa waammeena waaru qarmanchi ee minenne gatu manchina ‹Kiinninne maqire mulli manni yoohonnihe?› yaa xa'mmookko. Ixxim «Bee'e» yookko. Ee lasage «Sa'ihe, Waa'i summa weeshimmi hasisooyyo» yookko. Waa'i ijaajoohaare lob minneewwii hoffi minneewwii hundim gindamookko. Farad kinanne firiixoohonnihe? Dambalaqdu mirgo'inne abuullakkamonnihe? Ihukkaarem ki'nnuwwi oogatto'o shoo qaraa'llisa hanqam geneeno'isa qaraaraalli issitakko'o. Loodaabaar beero'o kaa'llakko'i bikkina liirantakko'ookko. Qaarinaayim beero'om ni malaayyinne amandaammo yitakka'a birantakkamuulla. Gogoxxi Moollanni Waa'i «Isra'ee'l minaadaba, ki'nnuwwanne mulli minaadaba ki'isoommo; oo minaadabim hanaa'n qarinne Haamaata aagakkam goociinsi ki'isaa woroo'n qarinne Araba'i cebbi afeebe'e afaa u'nnisookko» yoolla. Moollanni Waa'i ka kaalta iina moo'isukko; adi'l hurbaata murakka'a wixxaa'akka'a lasonne gobbe'i ihaa mutu hurbaatanne qawwaawwi haga'oo'isa Waa'i issukko. Oo qawwaawwim uullanne latu luwwi hundam itaa guullukkisa moo'aa «I Moollanni Waa'a! Ki minaadaphphi baaxiilo haafihe; ki minaadab ihu Isra'ee'llek malaayyi hoffan ihu bikkina hinkid ihaa hee'eena xanookko?» yaa uunxummo. Waa'im ixxuwwina qishixxaa «Ku moo'llitti luwwi ihooyyo» yukko. Moollanni Waa'i moo'isu mulli kaalti kane; Moollanni Waa'i ixxi minaadaba giirinne guzumo'eena gudukkisa moo'ummo; giiroomim xillaalli dambalaqa itaa odim uullam itukko. Ee ammanenne an «Moollanni Waa'a! Ku giir xoo'oo'isa isse; ki minaadab ihu Isra'ee'llek malaayyi hoffan ihu bikkina hinkid ihaa hee'eena xanookko?» yaa uunxummo. Waa'im ixxuwwina qishixxaa «Ku moo'llitti luwwim ihooyyo» yukko. Waa'i mulli kaaltam moo'isukko; ixxim tumbe'inne keenakka'a baxakko'oo ooxxi gadanonne tumbe'e amadaa uullaakkoo moo'ummo. Waa'im «Amooxa, ku moo'lloo luwwi maha?» yaa xa'mmukko. Anim «Tumbe'e» yummo. Waa'im iina «I minaadab ikko'i Isra'eel tumbe'inne keenakka'a baxakkobee'i ooxxisa boqqito'i bikkina ku tumbe'i ixxuwwi boqqooma moo'isoohane; ee bikkina ixxuwwa guzumo'oo'n uroommoyyo. Yisaaq shumo'i otossitam duunnuwwanne yoo beyyuwwi gindamookko; Isra'ee'l minaadaphphekim keesamaakkoo beyyuwwi gindamaa diihookko; Yoorbi'aam adillanom guullaa bi'isoommo» yukko. Ee lasage Beetee'l qeessichchi Ameesiyaas Isra'ee'l adil Yoorbi'aamina «Oono'o, Amoox Isra'ee'l minaadaba keesenne dollotisoolla; ixxi wocoo woshsha ku uullim iyyaa xanooyyo. Ixxim ‹Yoorbi'aam oranne lehookko; Isra'ee'l minaadabim ixxuwwi uulliinsi qeefadanta'a mattamo› yoolla» yaa asse'ukko. Ameesiyaasim Amooxina «Kaalta moo'lloohaanno, Yihuxxi uulla daba'llitaa mare; ee uullannem hiraago woccittuuyyi ki heechchina ihoo hurbaata uwwakkamaare ite. Ihukkaarem Beeteel adil otossoohanee minaadabinam keesamaakkoo beyyoo ihu bikkina ka beyyonne la'mmeka hiraago woccoobee'isa» yukko. Amooxim «An gereebba allaaroommanee oda'i misha fee'lloommanee bagaan hiraagaancho te'im hiraagaanchi beetoyyo. Ihukkaarem Waa'i gereebba allaaroommi beyyiinsi weeshaa ‹Mare, i minaadab ikko'i Isra'eelina hiraago woce› yaa ixxi gagoomim ijaajukko. Kabadem Waa'ika sagara macceese; at ‹Isra'eelina hiraago woccitte; Yisaaq shumo'inam alallaattitte› yitaa hoottaatto. Ee bikkina Ameesiyaasa, Waa'i kiina ‹Ki meentichcho ka beero'onne saa'aanchotte ikkamo; kiikki goo'n oosii landii oranne lehookko; ki uullam usinne keenaa allaggi baxxamookko; atim mulli minaadaphphi uullanne letootto; Isra'ee'l minaadabim ixxuwwi uulliinsi qeefadanta'a mulli uulla mattamo› yoolla» yaa dabarukko. Moollanni Waa'i mulli kaalta moo'isukko; oohim mish wo'mmaakkoo sananni hee'ukko. Waa'im «Amooxa, ku mo'lloo luwwi maha?» yaa xa'mmukko; Anim «Mish wo'mmaakkoo sananna» yummo. Waa'im «I minaadab ikko'i Isra'ee'llek lasaanchi balli afaakko; kanniinsi eehid ixxuwwina qishixxoommoyyo. Ee balla otossaaxxi minenne zammattam mazmuur wi'llonne daba'llookko; lobakat mannik leesh beyyi hundannem ubookko; wi'llakkoo'nnim uunjakkamo» yukko. Ki'nnuwwi hawwaano u'nnissakkam keenii buxam uulliinsi bi'issakkam keenii macceessehe. Ki'nnuwwi «Hurbaata keenakkam keenaancho hoffiinsaa, bitom xee'insaah, qophpha'n keennaanchinnem minaadaba qawwiinsaahii hurbaata biteexxineena uguxxi ayyaammuwwi qaqqisaa higuta'nnii arasa biteenseenam ku Usheexxaxxi ayyaam higuta'nnii arasika qonxo'om biteensoommo; buxichcho birinne hawwaanchom kobe'inne bitaa'nnoommo» yitakkamo. Yaaqoobina lombi ihu Waa'i «Ixxuwwi baxxo'i jor baxo an hore'em xadoommoyyo. Hanqinam ka mashka'inne uulli huxe'ookko; uullanne yoo manni hundim wi'llookko; Abbaayyi daajji aqqaa humburuqqe'oo'isa uulli hundim shaffeesamookko» yaa ixxi gaganne hide'ukko. Moollanni Waa'i «Ee balla samgud ballanne eelliinchi aagoo'isa laa'wwa'i ballannem uulli tuunsoo'isa issoommo. Hiinchi ugudanne liirantakkam ayyaamo kichchechchanne dabaroommo; kaddakkam kajjam wi'llonne dabaroommo; yoo matem beet lehu annii amaa wi'llitamaannisaa horoore hogoossita'a kichchechchi eddechcha edde'llamaannisaa issoommo; ee ballik lasaanchi qaraaraalli ihookko. «Oono'o, an uullanne sibaaro eeboommi balli hincaakko; ee ammane manni sibaarookkokii xeebe'ookkokii Waa'i sagara macceesimma bagaan itakkam hurbaataa agakkam wo'oo hoogimmayyo. An gogoxxi Moollanni Waa'i kaka wocaammo. Minaadab hundim hanaa'n qariinsi woroo'n qaranne afeebe'e, eelliinchi firiinsi eelliinchi aaggi afeebe'e Waa'i sagara hasimminne badattamo; ihukkaarem siiddeena xantamoyyo. Ee ammane baajaam landii qoxxaalli woraadii hundim xeebe'immiinsi ki'ukkok hoogookko. Ee ammane ‹Daan waa'i la'e!› te'im ‹Beersaabee'i waa'i la'e› yitu'uuyyi hide'llam keenii Samaare'enne yoo ‹Aashiima› yamantam Samaare'i meentichchi waa'anne hide'llam keenii hundim ubbamo; ubbo'i beyyiinsim ki'lleena xantamoyyo» yoolla. Waa'i kitima hincaa'akkam beyyi gadanonne uullaakkoo moo'ummo. Ixxim «I mi'nnek shooho'i heekke'eebe'i afeebe'e utubbuwwa aphphise; iiqansitaatim manni hanenne uboo'isa isse; eehanniinsi gatu keeno an bisa'inne guulloommo; gibukkok xorooyyo; xorukkokim gatooyyo. Si'oolanne dillitota'nnim eekke'iinsi i angi fissookko; iimane fittota'nnim eekke'iinsim dilliisoommo. Qarmeeloos duunanne fitta'a maaxantota'nnim eekke'iinsi hasaa fissoommo; xilli dambalaq woronne iinniinsi maaxanteena yakitota'nnim eekke'ennem ixxuwwa qasona dambalaq wo'l xara'a ijaajoommo. Diina'i anganne qeefadanta'a mattota'nnim eekke'em bisa'inne shakkamisa issoommo; ee'isenne an ixxuwwina hara'mmeenatti ihoo'n bi'iseena qoodaammo» yaa ijaajukko. Gogoxxi Moollanni Waa'i uulla nakkoohaare bukkamookko; uullanne hee'oo luwwi hundim wi'llookko. Abbaayyi daajjim aqqaa humburuqqe'oo'isa uulli shafshafookko. Ixxi heechchi beyyo iimanenne issukkaannik, iima'n lugumom uullanne kaasukkaannik, dambalaq wo'om uullanne daadoo'isa issukkaannik summi Waa'a. Waa'i «Isra'ee'l minaadaba, ki'nnuwwi iina Tophphe'i minaadaphphisayyonnihe? Ki'nnuwwa Gibxiinsi fissummisam Filisxee'm minaadaba Qarxeesiinsi, Sooriy minaadabam Qiiriinsi fissummoyyonnihe? An Moollanni Waa'i boqquwwi ikko'i Isra'ee'l gassaano moo'oommuulla; ixxuwwam uulliinsi bi'isoommo; ihukkaarem Yaaqoob shumo'o guullaa bi'isoommoyyo. Kaka wocummok an Waa'a. «Isra'ee'l minaadab illaanchonne hurbaata illaansakkamaannisa mulli minaadaphphi lambe'enne binnitamisa issoommo; ihukkaarem bura'iinsi bagaan hurbaatiinsi matim ubooyyo. ‹Matem jollim afooyyo te'im neese siidooyyo› yitu'uuyyi i minaadaphphi lambe'enne hee'llam baaxiilaan keen hundim oranne beedditamo» yoolla. Waa'i «Gindamaa ubu mini'nnoo'i Daawiit adillano dabaraa uullisoommo; tigu ootam qoxxisoommo; gindamukkokam areesoommo; odim dabaraa illagee'nnisam baxoommo. Ee'isinne Isra'ee'l minaadab Eedoo'm uulliinsi gatto'i qaxaa mulli uulliinsi i summinne weeshanto'i minaadabaa hundam lago aa'llamo» yoolla kaka issoo Waa'i. Waa'i «Oono'o, hurbaata muroo manchi muraa guulloo'nnim abuulli agan afookko; woyi'n misha ciinsoo manchi ciinsaa guulloo'nnim woyina kaasakkam amman afookko; eehido'i amman waarookko. Ee ammane duunnuwwiinsi xee'oo woyi'n diqaas firookko; hoffi duunnuwwiinsim woyi'n diqaas daadookko. I minaadab Isra'eela ixxuwwi gaqqi uulla dabaraa woroommo; gindamu beero'uwwam dabatta'a baxxa'a eekke'enne hee'llamo; woyi'n kaashsha kaassa'atim diqaasa aggamo. Annanni annanni duubbi kaashsha kaassa'atim mishsha ittamo. I minaadab Isra'eela ixxuwwina uwwummi uullanne hee'llamisa issoommo; ee uulla od fatakita'a mattamoyyo» yoolla. Kaka wocukkok ki'nnuwwina Moollanni Waa'a. Moollanni Waa'i Eedoo'm bikkina Abdiyina moo'isu kaaltanne Waa'i Abdiya asse'aa «Eedoo'm uulla qassona minaadaphphi beyyo asse'amaancho asse'aammo» yoo asso macceensummo. Waa'i Edoom ina «Oono'o, an keese mulli minaadaphphi lambe'enne hoogaanchi issoommo; lobakata gadantaattoohanem ikkootto. Qoxxaalli kininne girbamaakkoo beero'onne hee'lloohaanno, ki heechchi beyyom duunnuwwanne issitaa ‹Ka beyyiinsi eese ayyi dilliiseena xanookko?› yitaa ki wodanonne bolxitaatto. Ihukkaarem gaaqichchisa iim barattittaare ki heechchi beyyom boollaanki lambe'enne issittaare an keese ee beyyiinsi dilliisoommo. Kaka wocummok an Waa'a. «Gamaan te'im bogaan hiimonne waaruta'n ixxuwwina ihoo qax xale'e massookko; woyi'n mishsha feeroo keenim hofqax misham gatisookko; ihukkaarem ki diina'i keese guullaa bi'isookko. Eesa'a hinkaa'nna bogamukko; maaxu amaxdu hinkaa'nna maxaramukko! Hidi'l sagara aaggo'i ki besh keese laggo'o; ki uulliinsim fissita'a hollito'o; ki kobim kiina diina'i ikko'o. Ki hurbaata maqire itto'i ki besh kiina shikka guddito'o; ihukkaarem oo hundim keesenne ihukkuuyyi at laqqittoyyo. «Ee balla Eedoomiinsi qoolluwwa Eesa'i duuniinsim qoorooma bi'isoommo. Eedoomanne hee'llam manni hundim letamo; Teemaa'n geedduwwim baachchinne huxe'llamo. «Yaaqoobina shumo'i hee'llo'i kiyyabbaayyuwwa barche'e issitaa shitti bikkina sholle'llootto; heer heerinam bi'llootto. Ixxuwwi diina'i gooccuwwa iiqansita'a ixxuwwika amaxxa hundam boggo'i balla at haxonne uullitaa moo'llam hee'llitto. Yerusaaleema saamo issaqqanta'a baxxanto'i manniinsi mahinnem e'llitooyyo. Yihuxxi uullanne hee'llam kiyyabbaayyuwwanne afu hawwonne at liiramimmi hasisam hee'ukkoyyo; ixxuwwina bichchi ballanne liiranteenaa ixxuwwi u'n ballannem ixxuwwanne osatteenaa hasisam hee'ukkoyyo. Ixxuwwi hawwi ballanne i minaadaphphi beero'o aagimmi u'n ballannem ixxuwwi bichchanne liiramimmi bichchi ballannem ixxuwwi amaxxa bogimmi kiina hasisam hee'ukkoyyo. Giboo keeno shiteena lamejjanne duggaa egerimmi gatto'i qaxam ixxuwwi hawwi ballanne diina'ina higissaa uuwwimmi hasisam hee'ukkoyyo. «An Waa'i mulli minaadab hundannem oogatoommi balli afaakko; Eedooma! At baxxitti baxika bito siixxitootto; baxxoo jor bax keesennem daba'llaa ihookko. I minaadab Keesamaakkoo duunanne hawwi humbullo agaakko; ihukkaarem ee kululleetanne yo'i mulli minaadab hundim eehanniinsi lophphoo hawwi humbullo aggamo; aggo'i keen hundim bi'llamo. «Xiyoo'n duunanne bichchiinsi xotta'a gattam kee'nnek mat mat hee'llamo; Xiyoonim keesamaakkoohan ihookko; Yaaqoob shumo'im ixxuwwi gaqqi uulla lagaa'llamo. Yaaqoob shumo'i gii'llisa, Yooseef shumo'i laba'nnisa, Eesa'i shumo'i bura'isa ikkamo; giir bura'a itoo'isa Yaaqoob shumo'ii Yooseef shumo'ii Eesa'i shumo'o bi'issamo. Kaka wocummok an Waa'a. «Woroo'n qarinne yoo Yihuxxi minaadab Eedoo'm uulla lagaa'llamo; eelliinchi aagginne yoo duunnuwwi lugu'm qaala'i mannim Filisxee'm uulla, Efireem uullaa Samaare'i uullaa lagaa'llamo; Biiniyaam sullim Gala'aaxxi uulla lagaa'llamo. Qeefadanta'a hee'llam hanaa'n qa'l Isra'eel Hoola yakkam uulliinsi daba'llita'a Kaani'aa'n uulla Saraphphitanne afeebe'e lagaa'llamo; Qeefadanta'a Safaaraadiimanne hee'llam Yerusaalee'm minaadabim woroo'n qarinne yoo beero'uwwa lagaa'llamo. Gatto'i Yerusaalee'm minaadab Xiyoo'n duunanne ikka'a Eedooma gassitamo; Adillanim Waa'an ihookko» yoolla. Waa'i Amiitaay beet Yoonaasina «Qaqqissaa lob beero'o Naanaawe'e mare; mattaa an ee beero'ika jolla moo'ummi bikkina kiina kuroommi sagara alallaate» yukko. Ihukkaarem Yoonaas Waa'i illagiinsi gibeena sawwaa Tarseesa mareena ki'ukko; Iyyoophe'em dillaa eekke'iinsi Tarseesa maroo markaba siidukko; mareenam bito miqaa markabanne aagukko; ixxekim sawwit Waa'iinsi gibimmi hee'ukko. Ihukkaarem Waa'i dambalaqanne kee'mmaalli hambu'llam ki'isukko; dambalaqannem ki'u hambu'llam malaayyaam ihu bikkina markaboom iiqameena ihukko. Markaphphi woronne hee'llo'i mannim lobakata baa'llo'i bikkina annannichchim ixxi waa'i kollonne laarukko. Markaphphi woronne kee'mmu luwwa sholliisseena sawwita'a woronne yoo mu'uta fissita'a dambalaqanne uunjito'o. Ihukkaarem Yoonaas markaphphaannonne woroo'n baxxanchanne dillaa lobakata diriiraa hee'ukko. Ee markaphphi awwonsaanchi Yoonaas beyyo maraa «Mahina diriittaate? Ki'llaa ki waa'a uunxe; ayyi la'ukko qishixxaa ni foore gatiseena xanookko» yukko. Markaphphi woronne hee'llo'i manni hundim ixxuwwina'i ixxuwwim «Ku u'nnisoo hawwi ayyi mashka'inne waaruda'e lanqoommisina waallehe saamo issaqqammona» yito'o. Saamo issaqqanto'aarem saam Yoonaasina firukko. Ee bikkina ixxuwwi Yoonaasina «Hino'o kure! Ku u'nnisoo hawwi neesenne afukkok ayyi mashka'innette? Ki bax maruchcho? Waattittok hanniinsette? Ki uulli hanno? At ayyi mancho?» yita'a xa'mmito'o. Yoonaasim ixxuwwina «An uullaa dambalaqaa qooccu iima'n Waa'ina otossoommi Ibrokkichcho» yaa dabarukko. Yoonaasim Waa'iinsi maaxameena gibukkisa ixxuwwina gaassaatim kuraa hee'u bikkina lobakata baddita'a «Kido'i luchcho mahina issitto?» yito'o. Ixxuwwim hambu'llam lophphukkuuyyi maru bikkina baa'lla'a «Ku hambu'llam uroo'isina neese keese ma'issino?» yita'a Yoonaasa xa'mmito'o. Yoonaasim ixxuwwina «Ku malaayyaam hambu'llam ki'ukkok i mashka'innette ihukkisa an la'aammo; ee bikkina eese dambalaqanne darabbakko'aare ku hambu'llam urookko» yukko. Ihukkaarem ixxuwwi markabooma tochcho afisseena lobakata yakito'o; ihona bagaan hambu'llam lobakata malaayyukkuuyyi maru bikkina xanto'oyyo. Ee bikkina ixxuwwi «Moollanni Waa'a! Ka manchi foo'l mashka'inne neese bi'issitte; ka muccur manchik xiig neesenne ihoone. Waa'a, at doo'llittoka issitaatto» yita'a Waa'a uunxito'o. Ee lasage Yoonaasa ki'issa'a dambalaqanne darabbo'aare oo hambu'llam ki'isu dambalaq wo'i moor urukko. Ee bikkina oo manni Waa'a lobakata baddita'a Waa'ina kitima hincaa'llo'o; uga'am uwwiteena sagara aaggo'o. Waa'i mat geejji qurxummekkichcho Yoonaasa liqicoo'isina gudisukko; qurxummekkichchim Yoonaasa liqicukko; Yoonaasim sas ballaa sas hiimoo qurxummekkichchi godabonne hee'ukko. Yoonaasim qurxummekkichchi godabonne hee'ukkisam ixxi Moollanni Waa'a «Waa'a! U'nnanne hee'ummuuyyi ki kollonne laarummo; atim dabattitto; kiinniinsi hara'mmato siideena si'oolanne ihaa ki kollonne laarummo; atim macceessitto. Dambalaqaannonne xillaalli lugumonne uunjitto; i kululleetam wo'i kibbukko; kiikki hambu'llamii womoorii i haninne higukko. An ki illagiinsi bi'aammoohane; ihukkaarem keesammi ki mine la'mmaaggem moo'oommo. Wo'im eese xuuxaakko; dambalaq wo'im eese kibbaakko; dambalaq woro'l hixim i horoorenne xaxamaakko. Duunnuwwi lugumonne aad xuuxamummo; eehanniinsi woroon yoo uulli woronnem heer heerina xufameenatte hee'ukko. I Moollanni Waa'a, ihukkaarem at eese ee xillaalli bariinsi fissitto. I Waa'a, i foor fireena ihu ammanenne an keese uunxummo; atim ki Keesammi Minenne ikkaa i uunxato macceessitto. Qophpha'n waa'uwwa awwontam keen hundim ki eroommiinsi annanni ikko'ookko. Gatisookkok Waa'a; ee bikkina galaxxi mazmuurinnem kitima kiina hincaa'oommo; uwwoommo yummi uga'am kiina uwwoommo» yaa uunxukko. Ee lasage Waa'i qurxummekkichcho ijaajukko; Yoonaasem gogaalli uullanne tufukko. La'mmaaggem Waa'i Yoonaasina «Qaqqissaa ee lob beero'o Naanaawe'e mare; an kiina kuroommi sagaram minaadabina alallaate» yukko. Yoonaasim Waa'i ijaajukkisinnem ijaajamaa Naanaawe'e marukko; Naanaawe'im lobakata haraar beero'i ihu bikkina ee beero'o hundoomam afimmina sas balla guullam hee'ukko. Yoonaasim beero'i woro aagaa taakke'imma asheerukko; mat balli googo taakke'ukkisam «Naanaawe'i beero'i sor balli woronne bi'ookko» yaa alallaatukko. Naanaawe'i minaadabim Waa'i sagara amma'nnito'o; soommanom alallaatto'o; hoffaanniinsi ki'isaa lobaannonne afeebe'em baxxo'i jollina saxxita'a xiddi eddechcha edde'llo'o. Naanaawe'i adilim ka woshsha macceesu ammanenne adilla'n barcumiinsi dillukko; adilla'n eddechcham sheelaxxaa xiddi eddechcha edde'aa gii'l buchchanne afuurukko. Ixxim «Adilii ixxeensi woroon gassitam gassaanii ‹Manni te'im diinat, larii gereebbii ma'lluwwam itoone; wo'om agoone. Mannii diinatii xiddi eddechcha edde'ona; manni hundim qoxxisaa Waa'i kollonne laarona; boqqoomiinsii jor baxiinsii daba'llona. Ayyi la'ukko neese bi'nnoombee'isa Waa'i ixxi malaayyaam quunqiinsi qishixxaa daba'llookko› yita'a ijaajjo'ookko» yaa alallaatisukko. Waa'i Naanaawe'i minaadab issito'okaa jor baxiinsim daba'llito'isaa moo'ukko; ee bikkina qishixxaa ixxuwwanne eebeena sawwu guzumo'o urukko. Yoonaas ee woshshanne liiramubee'i bikkina gancarukko. Ixxim «Waa'a! At kaka issitoo'isa i uullanne hee'ummuuyyim wocaa hee'ummoyyonnihe? Ki illagiinsi gibaa Tarseesa mareena sawwummokim ee bikkinatte. At biijaallaa haafitoohanee, iyyaqqaa qishixxitoohane, heer heerina hee'oo ki iittinnem wo'mmitaattoohanee ki quunqiinsi daba'llitaa haafitoo Waa'aa ikkittisa la'oommi bikkinatte hee'ukko. Kabadem Moollanna, he'i eese shihe; hee'immiinsi iina lehimmi e'llookko» yaa uunxukko. Waa'im «Kaa'nna gancatteena kiina laboohonnihe?» yukko. Ee ammane Yoonaasim beero'i woriinsi firaa beero'iinsi eelliinchi firoo kollinne daasa baxaa hafanne afuuraa hee'ukko; eekke'ennem ihaa Naanaawe'enne ihoo luwwa egeraa hee'ukko. Yoonaasina haf ihaa eelliinchi iibbiinsi gatisona Moollanni Waa'i mat qoomcho mutisaa buyyoom Yoonaas horooriinsi hanaan ihoo'isa issukko; Yoonaasim ee hafa siixxu bikkina lobakata liiramukko. Ihukkaarem la'm balli daram ee qoomcho qasaa gokkisoo'isina Waa'i daquuchcho gudisukko. Oo daquuchchim ee qoomcho itukko; oo qoomchim gogukko. Eelliinchi firaa lasage shokkiisoo hafachcha eelliinchi firoo kolliinsi Waa'i asse'ukko; eelliinchikim iibbi Yoonaas horoore shokkiisu bikkina lobakata hoogaa «Ka heechchiinsi leh erane» yaa mixukko. Ihukkaarem Waa'i Yoonaasina «At ka qoomchi bikkina gancarimmi hasisoohonnihe?» yukko. Yoonaasim dabaraa «Gancarimmiinsim lehoomqaxa gancarimmi hasisookko» yukko. Waa'im «Mat ballanne mutaa mat ballanne gogu at kaassibee'aanninaa li'issibee'i qoomchinaa kaa'nna kichche'llaatto. Eehaara'i an joraa erokaa annanni issita'a laqqambee'i xibbiinsii lamiyyi kumiinsii hanaan ikkam mannii lobakat fooraam diinatii yoo lob Naanaawe'i beero'ina qishixximmi hasisooyyonnihe?» yukko. Iyyoo'ataam, Akaazii Hizqiyaasii korinne korinne Yihuxxi adilluwwi ikko'i doollenne Waa'i Mooreete'iinsetti ihu Mikkiyaasina Samaare'i bikkinaa Yerusaalee'm bikkinaa kaaltinne caakkisu woshshi «Ki'nnuwwi minaadab hundim kaka macceessehe! Uullanne hee'llakkam keen hundim kaka qoossitakka'a macceessehe! Moollanni Waa'i Keesamaakkoo Ixxi minennetti ihaa ki'nnuwwanne naqqasookko. Oono'o, Waa'i ixxi heechchi beyyiinsi waarookko; waaraahim duunnuwwanne taakke'ookko. Ee ammane leeyyi giiranne bukkamoo'isaa wo'i duuniinsi aad daadoo'isaa duunnuwwi ixxi lokkiinsi woroon bukkamookko; cebbuwwim diqamookko. Ku hundim ihukkok Isra'ee'l oos baxxo'i baaxii'l mashka'innette; Isra'ee'l oos boqqitamisina mashka'i ayyette? Samaare'i beero'oyyonnihe? Yihuxxi minaadab qophpha'n waa'ina otossimminne baaxiilo baxxamisina mashka'i ayyette? Yerusaaleemayyonnihe? Ee bikkina Waa'i «Samaare'i beero'o gindaa biir uullanne tuubamu m'nnisaa woyina kaasakkam beyyisaa issoommo; gindamu mi'n kinneewwam cebbanne onkoroollisoommo; shooho'i kinneewwam ma'llichchim bee'i beyyisa issoommo. Ee beero'ik qophpha'n waa'uwwi hundim iiqamookko; ee qophpha'n waa'uwwina otossakkam minenne yoo saa'aanina miqakko'i luwwi hundim giirinne shokkookko. Samaare'e ka misilluwwa wixxaa'llo'ok saa'immi bito aa'imminnette hee'ukko. Kabadem is diina'i ee keeno saa'immina awwaaxxoohan ihookko» yoolla. Ee lasage Mikkiyaas «Ka mashka'inne ‹Aayyee! Aayye!› yummuuyyi wi'lloommo; edde'oo'nnii kobe'e issoo'nnii taakke'oommo; wengereellisa muunoommo; mooqqaqqichchisam laachchi sagara macceesisoommo. Samaare'i mad fayye'oobee'ane; oo u'n Yihudam afaakko; i minaadab wixxoo Yerusaalee'm dummichchi beyyi afeebe'em afaakko» yukko. Gaatanne yo'i ni diina'ina neesenne afu hawwo kutakkotte; ee beyyonne hore'em wi'llitakkotte. Ihukkaarem Beeti'oofiranne yoo ni moolli lambe'enne diranne biqqiiqqitakku'uuyyi wi'llehe. Shaafii'l minaadaba, qeefadantakka'a leexa'am tuullinne higgehe; Xa'inaa'n beero'i manni firimma badditamo; Beeti'eexeel wi'llonnetti ihu bikkina ki'nnuwwina girbi iheena xanooyyo. Maaroot minaadab ‹Er luwwi niina waarookko› yita'a egetta'a hee'llo'o. Ihukkaarem Waa'i Yerusaaleema bi'isaakko. Isra'ee'l hawwojjinaa Yerusaalee'm baaxiilinaa luxxi mashka'i ikkakko'i bikkina ki'nnuwwi Laakiish minaadaba, gaare'i faradonne hakkamma issehe. Yihuxxi minaadaba, Mooreesheet Gaat minaadabina geegeeshshi luwwa uwwitakkamo; Akiiziib minaadabim Isra'ee'l adilluwwa qawwiissamo. Maariis minaadaba, Waa'i ki'nnuwwa diina'ina higisaa uwwookko; weeraroo diina'a ki'nnuwwanne eeboommo. Isra'ee'llek lombaam awwonsaan Adulaa'm daawwa'anne maaxantamo. Yihuxxi minaadaba, ki'nnuwwi ooso qeefadakka'a massakkam bikkina iititakkam ki'nnuwwi oosina kichche'llakka'a horoore hogoossaqqehe; ki'nnuwwi horoorim goolluunsichchaannisa murugona. Jora baxxeena qooddam keeninaa iinsonne hee'llu'uuyyim hantaaro sawwitam keeninaa aayye! Eekka issitam malaayyi ixxuwwi anganne yoo bikkina soodoohaare baxonne hosissamo. Abuulli uullaa minneewwaa mixxa'a hootta'a massitamo; mannika hanqa bi'issa'a amaxxa boggamo. Ee bikkina Waa'i «Oono'o, an ki'nnuwwa bi'isoommo; eehanniinsi xottakkeena hore'em xantakkamoyyo; oo amman ki'nnuwwina hawwi amman ihu bikkina bolximminne daba'llantakkeena xantakkamoyyo. Ee ammane manni ki'nnuwwanne naacookko; ee'isam. ‹Neese hore'em bi'nnaammo; Waa'i ni minaadaphpheka amaxxa hooraa massaakko; neese qeefaddo'i keeninam ni uulla baxxansaakko› yitu'uuyyi kichchechchi habbaarinne sottamo» yoolla. Uulloom daba'llaa Waa'i minaadabina uwwamoo ammane ki'nnuwwina sharad hee'ooyyo. Ixxuwwi hiraagaan «Niina hiraaggitte; kido'i sholle'n neesenne afoobee'i bikkina kido'i hiraago hiraaggitte. Ee'isam Yaaqoob ooso, ka'isa yimmi hasisoohonnihe? Waa'i iyyaqqoobee'anennihe? Kido'i luwdu issoohonnihe? Er baxo baxxam keenina hundinam Waa'i er luwwa issooyyonnihe?» yitamo. Waa'im ixxuwwina «I minaadabanne diina'oommaninne ki'llakko'ookko; oriinsi daba'llita'a amma'nnatinne ki'nnuwwi uullinne higgam xummaan mannika eddechcha maxattakko'ookko. I minaadaphpheka meento ixxuwwaaniinsi danaam minneewwiinsii amaxxiinsii hollitakko'ookko; ixxuwwi oosim i maassiinsii lombiinsii heer heerina annankamisa issitakko'ookko. Haashaaranchiinsi ki'ukkok kee'mmaalli bichchi afoo bikkina ka beyyonne usheexxitakkeena xantakkamoyyo. Ee bikkina ki'llakka'a mallehe. «Ku minaadab hasoo hiraagaanchi ‹Woyi'n diqaasii mulli dimbisoo aggii ki'nnuwwina daadookko› yukkuuyyi qophphano wocimminne qawwiisoohane. «Isra'ee'l minaadaba, gereebbi orodonne, gereebbi allaachchim kuturanne wixxoo'isa hanqinam an bichchiinsi gattakkoqaxa mat issaa wixxaa'oommo; ki'nnuwwi uullim minaadabinne wo'mmaakkoohan ihookko» yaa dabarookko. Ixxuwwi googo haraassaa fooqaa'oo awwonsaanchinne haraaraa fooqaakkoo goocinne awwonanta'a fittamo; ixxuwwina Moollanni Waa'im ixxuwwi illagenne higaa awwonsookko. Ee lasage an «Isra'ee'l awwonsaanii minaadaphphi gassaanii kaka macceessehe; hanqo'i oogato la'immi ki'nnuwwina hasisam hee'ukkoyyonnihe? Ihukkaarem ki'nnuwwi eroka sabbakka'a jora iittitakko'o. I minaadab uullukkisam ixxuwwika omachcho coo'llakko'o; maaraa miqem annanni issitakko'o. I minaadaphpheka omachcho coo'llakka'a miqe iiqansitakko'o; harachchonne sarakkam maa'llisam issitakko'o; maaram muttakka'a ittakko'o. Ki'nnuwwi u'nnantakka'a Waa'i kollonne laattakkam amman waarookko. Ihukkaarem ixxi ki'nnuwwina dabachcha dabarooyyo. Ki'nnuwwim jora baxxakko'i bikkina ixxi ki'nnuwwi uunxato macceesooyyo» yummo. Waa'i qophpha'n hiraagaa'n bikkina «Ittam luwwa siiddamaare ‹Xummi dillookko› yitu'uuyyi alallaattamo. Ittam luwwa siiddambee'i ammane ‹Or waarookko› yita'a alallaatu'uuyyi minaadaba huushissamo. Ee bikkina kaalta moo'llambee'i hiim waarookko; caakki moo'amoobee'i tuunsom ihookko. Ka lasage kaalta moo'llamoyyo; hiraagom woccamoyyo. ‹Kaalta moo'nnoommo; hiraagom woncoommo› yitam keen hundim sholle'llamo. Waa'iinsi matem dabachcham siiddambee'i bikkina tuutta'a ixxuwwi suume amaxxitamo» yoolla. Ihukkaarem Waa'i eese ixxaanninne Ayyaaninnee malaayyinnee wonshaakko. Yaaqoobika hawwojja Isra'ee'llekam baaxiilo kuroommisinaa hanqo'i oogato oogatoommisinaa malaayye uwwaakko. Ki'nnuwwi hanqa shigigitakka'a boqqissakkam Yaaqoob oos awwonsaanii Isra'ee'l minaadaphphi gassaanii kaka macceessehe. Ki'nnuwwi xiiga dunimminne Xiyoona, boqqoominnem Yerusaaleema baxxakkam keeno. Ka beero'i awwonsaan oogatookkok maqanxinnette. Qeessuwwim diinate miqakkoo'n losissamoyyo. Hiraagaanim hiraaggamok diinate miqakkamaarette. Oo hundim ihaa hee'ukkuuyyi «Waa'i niinninnetti ihu bikkina neesenne mahim afooyyo» yitu'uuyyi Waa'anne bakke'llamo. Ee bikkina ki'nnuwwi mashka'inne Xiyoon abuullamookko; Yerusaaleem gindakka'a tuubakko'i luwwisa ihookko. Waa'i Mi'n beyyim haqqor ihookko. Doolli beeddichchi afoohaare Waa'i min baxamu duun mulli duunnuwwi hundiinsim lophphaa moo'amookko; hoffi duunnuwwiinsi hundiinsim hore'em lophphaa moo'amookko. Lobakat minaadabim ee duu'n kollonne waarookko. Ee bikkina lobakat minaadab «Seer Xiyoonanne Waa'i sagarim Yerusaaleemanne hee'oo bikkina waallehe; Waa'i duunanne fillona; Yaaqoob Waa'i minem mallona. Ixxi googom losisookko; ixxi doo'lla issinoommisam niina losisookko neesem ixxi googonne malloommo» yitamo. Ixxi lobakat minaadaphphi lambe'enne oogatookko; qee'llonnee abbisonnee yoo malaayyaam adilluwwi lambe'enne yoo woca araassookko. Ee bikkina ixxuwwika bisa'a maarashanne bagado jajjaranne dabattamo. Adil adilanne bagado ki'isooyyo; ee lasage o'l losano losookkok ayyim hee'ooyyo. Manni annannichchim kaasu woyi'n kaashshaannonnee oda'aannonnee hafanne xumminne afuurookko; ixxuwwa baddisoo luwwim hee'ooyyo. Gogoxxi Moollanni Waa'i kaka wocaakko. Hanqo'i Waa'a laqqambee'i minaadab annannichchim ixxuwwi waa'uwwina otossitamo. Ihukkaarem neese ni Moollanni Waa'ina heer heerinam otossinoommo. Waa'i «Ee balla shiihuwwaa an guzumo'ummaare yaayyanta'a hawwito'i i minaadabaa wixxaa'oommo. Shiihuwwa gatisaa hee'isoommo; uunjanta'a hee'llo'i keenom qoxar minaadab issoommo. Anim ee ammanniinsi ki'isaa Xiyoo'n duunanne heer heerina ixxuwwina adil ihoommo» yoolla. Waa'i ixxi minaadaba gereebbisa allaaroo duun ikkitti Yerusaaleema, kiina uwwamu neeyyat wo'mmookko. Odim adi'l beero'i ikkootto. Ka'isa sagara iimmaa'llaa laattoottokii xuuchchi amadu meentichchosa u'nnantoottokii mahinatte? Kiina adil bee'u bikkinatennihe? Te'im keese sogoo keen hundim bi'u bikkinannihe? Yerusaalee'm minaadaba, xuuchchi amadu meentichchosa qitintakku'uuyyi u'nnammehe; beero'iinsi hollakkamaare biir uullanne wiiddantakkamo; qeefadantakkahim Baabiloona mattakkamo; ihona bagaan ee beyyonne Waa'i ki'nnuwwa egerookko; ki'nnuwwam ki'nnuwwi diina'i angiinsi gatisookko. Ihukkaarem kaba lobakat manni ki'nnuwwanne wixxita'a «Yerusaaleem haashaaramona; ixxekam gindancha moo'nnona» yitamo. Ihukkaarem oo minaadab Waa'ika sawwite laqqo'oyyo; ganakkam hurbaaxxi farshim oodo'onne wixxoo'isa Waa'i ixxuwwa wixxaa'ukkok guzumo'inatti ihukkisa laqqo'oyyo. Waa'i «Yerusaalee'm minaadaba, mattakka'a ki'nnuwwi diina'a hurbaaxxisa gannehe; buudii xaara, shuku'llii naas xaar ihu mirgo'isa ki'nnuwwa qoxassoommo; lobakat adilluwwa bi'issakkamo; damiginne ixxuwwi wixxaa'llo'i amaxxa hundam uulli hundinam Moollanni ihummi iina Waa'ina eebbakka'a uwwitakkamo» yoolla. Yerusaalee'm minaadaba, ki gogota wixxaa'e! Neese diina'inne kibbammaammo; Isra'ee'l awwonsaanchikam xabano biccinne aphphissamo. Waa'i «Efiraat uulli Beeteliheema, Yihuxxi uullanne yoo hoffi beero'uwwiinsi mat ikkittaarem kiinniinsi Isra'ee'l minaadaba awwonsoo adila doo'lloommo. Ixxi adillanim gaassiinsim ki'isaa heer heerinatte» yoolla. Ee bikkina ama ixxo qatteebe'i afeebe'e Waa'i ixxi minaadaba diina'ina higisaa uwwookko. Ee lasage qeefadanta'a mulli uullanne hee'llam ixxi abbaayyuwwi ee beyyiinsi daba'llita'a ixxuwwi moollonne exxitamo. Ixxi Waa'i malaayyinne ki'aa gereebba allaarookko; eekkam issookkok hibbaam Moollanni Waa'i summinnette; ixxi kaba uulli tochchi afeebe'e loban ihoo bikkina ixxuwwi usheexxita'a hee'llamo. Ixxim xumma uwwookko; Aasoo'l manni ni uullanne weerattamaaree girbuwwam gindita'a aaggamaaree lamar egeraanoo sadeenti awwonsaanoo ixxuwwanne ki'llamisa issinoommo. Aasoora bisa'inne kaa'lla'a Naamiruuda amaddamo; Aasoo'l manni weerattolasii ni uullika gabala higgolasii ixxuwwi angiinsi neese ixxi gatisookko. Lehiinsi gatto'i Isra'ee'l minaadabim mulli minaadaphphi lambe'enne Waa'i ga'nnisoo qiibaxxisaa hixenne kiifoo xee'nnisaa ikkamo; ixxuwwim mannannetti ihoo'n xale'i Waa'anne amma'nnanta'a hee'llamo. Hobbichchi bii'l moochchi lambe'enne, hobbichchi geexim gereebbi allaachchi lambe'enne xophxophukkuuyyii dereeransukkuuyyii maroo ammane ee diinatina hara'mmoo ayyim hee'oobee'isam oo lehiinsi gatto'i gatto'i Isra'ee'l minaadabim lobakat minaadaphphi lambe'enne ee'isa issitamo. Isra'ee'llek wod ixxuwwi diina'anne ki'ookko; ixxuwwi diina'i hundim bi'ookko. Waa'i ‹‹Ihukkaarem gaassaa ki'nnuwwi farado ki'nnuwwi lambe'iinsi bi'soommo; faraxxi gaare'uwwam guullaa bi'isoommo. Ki'nnuwwi uullanne yoo beero'uwwa bi'isoommo; girbuwwa hundam gindansoommo. Ki'nnuwwika kiirimma bi'isoommo; gennaanim ka lasage ki'nnuwwi lambe'enne hee'ooyyo. Qophpha'n waa'uwwaa otossitakkam utubbuwwaa ki'nnuwwi lambe'iinsi bi'isoommo; anginne baxxakko'i luwwannem ka lasage otossitakkamoyyo. Aasheera yakkam misila ki'nnuwwi uulliinsi xoqoloommo; ki'nnuwwi beero'uwwam gindansoommo. Iina ijaajjantambee'i minaadaba hundam quunqinne baado firoommo» yoolla. Waa'i Isra'ee'l minaadabina yookkoka macceessehe. Ki'llehe, ki'nnuwwi meto'o duunnuwwina kullehe; hoffi duunnuwwim ki'nnuwwi yitakkamoka macceessona. Duunnuwwa, Waa'i ixxi minaadaba acceeqasoo woshsha macceessehe! Uullik qoxxaalli shooho'uwwim macceessehe; Waa'i ixxi minaadabinne fitamoollaa oogaxxamoollaa. Waa'i «I minaadaba, maha issummo? Keesenne kee'mmisummi luwwi maruchcho? Hino'o dabachcha uwwe. Gibxiinsi fissummo; agidda'n uulliinsim gatisummo; Muse'e, Aaroonaa Maaraamee kiina awwonsaan issaa uwwummo. I Minaadaba, Moo'aaphphi adil Baalaaq keesenne maha isseena sawwuda'ee Bii'oor beet Baala'aam mah dabachcha uwwuda'ee sawwihe; Shiixiimiinsi ki'llaa Gelgela mattittuuyyi googonne ihukkoka hundam sawwihe; ee hundam sawwitlas an keese gatiseena issummoka hundam laqqootto» yoolla. Hundam xanoo Moollanni Waa'ina maha amadaa waaraa otossiho? Shokkiisakka'a hincaa'akkam kitimina ihoo mat hiinchi adduwwa amadaa waaronnihe? Kum gereebbi ambulluwwa te'im tommi kum daajjuwwa ihoo zayta hincaa'ummita'n liiramoohonnihe? I hawwojji bikkina i won qachcho, i baaxii'l bikkinam i godaphphi misha hincaa'onnihe? Manchi beeto, Waa'i kiinniinsi hasoo er luwwa kiina kuraakko; oohim hanqa egettona, dabassamoobee'i iitto moo'issonaa ki Waa'i illagenne maashaalloominne daba'llantonayyonnihe?. Waa'a baddimmi qoorooma; Waa'i Yerusaaleemina «Yerusaalee'm beero'onne wixxitakko'i minaadab macceessehe! Baaxiilaanchi ixxi minenne jollinne wixxaa'u amaxxaa duumamaakkoo baaxii'l keennaanchoo xadoommonnihe? Qophpha'n keennaanchonnee canannee keentam keeno iyyaqqaa cawwihonnihe? Ki'nnuwwik goddaan manni damiginne wo'mmito'oo keeno; ka beero'onne hee'llam keenim qophphano woccamo; ixxuwwi allabinnem qawwiissamo. Ee bikkina ki'nnuwwi baaxii'l mashka'inne ki'nnuwwa bi'iseenaa gindeenaa ki'aammo. Ittakkamo; ihukkaarem godditakkamoyyo; sibaarim ki'nnuwwa fatakooyyo; wixxaa'llakkeena yakitakkamo bagaan wixxaa ha'yyooyyo; wixxaa'llakko'i amaxxi hee'uta'nnim orinne bi'isoommo. Hurbaata wixxakka'a atoota wixxa'llakkamoyyo; wee'l misha ciinsitakkamo; ihukkaarem ee zaytiinsi awwaaxxitakkamoyyo; woyi'n misha ciinsitakkamo; ihukkaarem diqaasa aggakkamoyyo. Ku hundim ki'nnuwwanne afookkok adil Oomir seera egettakko'i bikkinattee adil Aki'aab googom awwontakko'i bikkinattee. Ixxuwwi heechchi qaanqisanne mattakko'i bikkina ki'nnuwwa bi'isoommo; ee beero'onne hee'llam mannanne manni osaroo'isa issoommo; i minaadabanne ihu gado'o iyyitakkamisa issoommo» yoolla. Haqqikaa Woyi'nnekaa misha feerakka'a lasage iteena hasaa misha siidoobee'i manchisa ihummi bikkina aayye! An mixoommi gaassaa mishu oda'i mishim bee'e. Amma'nnamoo manchi uullanne bee'e; hanqi manchi matim bee'e; hundim manna sheena dugoolla; annannichchim mat mulleka amadeena qaasha qaashoolla. Ixxuwwik angi jor luwwa issimma losaakkoohane; gassaanchii daannii maqanxa xa'mmitamo; malaayyaam manchi ixxi sawwixxeka malaayyinne issiisookko; ee'isinne hundim oogato'o boqqissamo. Ixxuwwi lambe'iinsi lobakata e'llookko yakkamok halluttisa; lobakata hanqi mancho yakkamokim qarxaffisa. Hiraagaaninne qoxxisaa kurukkisannem Waa'i ixxi minaadaba guzumo'oo balli waarookko; kabadem ihuta'n oono'o ixxuwwi hambalaachchantamuulla. Mannanne amma'nnato issititte; kiina abbis qarmanchonnem amma'nnantitte; maqire hee'lloo ki meentichchonam kuttoo woshsha erisa ege'lle. Ee doollenne beet anna gadookko; landichcho amanne, beetare ballonne ki'llamo; mannina diina'i ixxi gaqqi abaroosam ihookko. Ihukkaarem an Waa'anne neeyyato issoommo; eese gatisaanchi ihu Moollannam egeroommo; ixxim macceesookko. I diinakkichcho, an ubumta'nnim ki'oommi bikkina liirantitte; tuunsonnetti ihumta'nnim Waa'i iina caakkisookko. Waa'a hawwodaammo; ee bikkina iina hincu kissa moo'aa iina oogateebe'e ixxeka quunqa iyyaqqimmi hasisookko; lasaanchonnem eese ixxi caakkanne fissookko; iina hanqa oogatookko; caakkannem fissookko; anim ixxeka gatisimma moo'oommo. I diinakkichchim ee hundam mo'ookko; «Ki Moollanni Waa'i hannonne yookko?» yukkok tuulle ede'ookko; anim ixxeka ubimma i illinne moo'oommo; gooqqi inqenne yoo ha'llisa hance'amamukkuuyyim moo'oommo. Yerusaalee'm minaadaba, beero'i oottuwwi ootamoo amman waarookko; ee ammane ki'nnuwwik uulli haraarookko. Ee ammane ki'nnuwwi minaadab ki'nnuwwi kollonne daba'llookko; oohim Asooriinsi, Gibxiinsi, Efiraaxiis daajji hegeegiinsii ee'isam dambalaqquwwaa duunnuwwaa higaa qee'l uulliinsii waarookko. Ihukkaarem uulloom ee uullanne yoo manni jolliinsi ki'ukkok udma'i ihookko. Waa'a! Ki allaachchi ihu minaadaba at egere; ixxuwwim lataakkoo haqqi woronne mullam hee'llam keeno; gaassisam Baasaanannee Gala'aadannee ittam luwwa uwwe. Gibxiinsi neese fissitti amma'nnisam aganna moo'ise. Mulli minaadab malaayyaammuwwi ikkota'nnim eekka moo'lla'a tuuttamo; ixxuwwi suumem amaxxitamo; maccem ifiixxitamo. Hamashshisaa biqinne shuroo mulli qooccanchuwwisaa buchcha ittamo; ixxuwwi girbuwwiinsi fitta'a huxe'llu'uuyyi waattamo. Baachchinnem ni Moollanni Waa'i kolli daba'llitamo; keesem badditu'uuyyi hee'llamo. Baaxiilo haafookkokii gatu ixxi minaadaphphekam hawwojja xigoobee'ekii kiinni'nnoo'i Waa'i ayyette? Haafimmi keese liiransoo bikkina ki quunqi heer heerina hee'oohaneyyo. Niina odim qishixxitootto; ni hawwojjam ki lokkinne kade'antootto; niikka baaxiilo hundam xillaalli dambalqanne uunjitootto. Gaassi niyyanno'ina hide'llaa aaggitti saga'llisannem Abrihaamaanninaa Yaaqoob shumo'inaa kiikka amma'nnantaattoohaannoomaa heer heerina hee'oo iittoo moo'issootto. Naanaawe'i bichchi bikkina Eelqooshiinsetti ihoo Naahoom wocu sagarii moo'u kaaltii kane. Waa'i to'achchoohanee baado firoo Moollanna; Waa'i baado firoohanee bala'inne wo'mmaakkoohane. Waa'i ixxenne uullixxantam keenonne baado firoohane; ixxi diina'annem ixxi quunqa dilliisookko. Waa'i quuqeena gaaggaaboobee'anee wodaamoo; baaxiilaanchom guzumo'oo'n urooyyo; hambu'llamannee womoorannee ixxena goog yookko; duubim ixxi lokkina dira. Waa'i ijaajinne dambalaqii daajjuwwii gogookko. Baasaanannee qarmeeloosannee yoo hix gogookko; Liibaanoos fiitim giggirookko. Waa'i illagenne duunnuwwi huxe'ookko; hoffi duunnuwwim bukkamookko; Waa'i illagenne uullii uullanne yoo luwwii hundim huxe'ookko. Waa'i quuqoo ammane ixxi illagenne uulleena xanookkok ayyette? Ixxi quunqim gii'llisa aphphpoo ammane iyyaqqeena xanookkok ayyette? Gii'llisa shokkiisoo quunqi dilloo ammane lob kinnuwwi anamaa binnookko. Waa'i biijaalla; hawwi ammaninam qoxxaalli girba; ixxonne amma'nnoo keeno hundam egerookko Ixxo saboo keeno dirisinne bi'isookko; ixxi diina'am gambabbi tuunsonne hollookko. Waa'anne dollottakkamok mahinatte? Ixxi ki'nnuwwa lasaanchi afeebe'e bi'isookko; la'mmaagge ixxonne ki'llakkeena xantakkamoyyo. Dimbaano! Ixxina'i ixxim amaxxamu uttii bura'ii giirinne shokkaa bi'oo'isam ki'nnuwwim bi'llakkamo. Naanaawe'i manna, Waa'anne jora sawwookkokii jollam sogoo manchii ki'nnuwwi lambe'enne ki'aakko. Waa'i ixxi minaadab ikko'i Isra'ee'lina «Aasoo'l manni malaayyaammuwwaa lobakataa ikko'aarem bi'llamo; i minaadaba, kanniinsi illageen ki'nnuwwanne hawwo lonsummaarem ka lasage hawwi lophphooyyo. Aasoo'l manni ki'nnuwwanne iyyiisso'i ciimo'i gaanjaqqa iiqansoommo; ki'nnuwwi karantakko'i chimchimam muransaa uunjoommo» yukko. Waa'i Aasoo'l minaadabina «Kanniinsi eehid ki'nnuwwika summa weeshisoo shumo'i hee'ooyyo; ki'nnuwwi waa'uwwi minenne yoo anginne baxamu misilluwwaa bukkakka'a baxakko'i waa'uwwaa bi'isoommo; at jottitti bikkina kiina waammi bare hinoommo» yukko. Oono'o, mishiraachchi sagara wocoo manchi, xummam alallaatoo asse'amaanchi duuninne waaroolla. Yihuxxi minaadaba, keese bi'isookkok horo'em bi'aakko; kanniinsi eehid ki beyyo waaroobee'i bikkina ki ugudduwwa liiranchinne lonse. Waa'ina uwwoommo yitaa sagara aaggitti ki uga'am uwwe! Naanaawe'e, iiqansaa bi'isoo diina'i keesenne waaraakko; ee bikkina girbuwwa qoxxise; googguwwam egere; lamadom lade'e; malaayyem erisa qoxxise. Maham diina'i ixxuwwa boguta'nnim woyi'n kaashsham bi'isuta'nnim Waa'i Yaaqoobika lomba Isra'ee'llaannisam dabarookko. Diina'ik gaadaan kashar agilluwwa amadaakko; kashar eddechcham edde'aakko; faraxxi gaare'im gii'l laba'nnisa bubboolla; faradaanim wo'llaanamoolla. Faraxxi gaare'uuwwi googguwwanne xoreexxantamo; manni wixxoo beyyonnem ekkidii kidii daba'llantamo. Aphphoo xomboora labbamo; banqisam darabantamo. Gaaxxi awwonsaano weeshookko; ixxuwwim ubbu'uuyyii ki'llu'uuyyii waattamo; Diina'ik gaadaan geettu'uuyyi beero'i ootanne fittamo; ixxuwwanne darabakkam xiyya agirinne dabattamo. Daajji kollinne yoo beero'i gooccuwwim mengelecaa fooqukko; adilla'n minim dambaqinne wo'mmukko. Naanaawe'i lombi maxaramukko; Adilam qeefadanta'a matto'ookko; isek awwaadaan landim handare'i saga'llisa kichchechchi sagara macceesissamo; biqe aphphixxitu'uuyyim wi'llitamo. Naanaawe'i qoqqob toroshamaa daadoo wo'isa; «Uulle! Uulle!» yakka'a laarakkota'nnim laso daba'llaa moo'ookkok bee'e. Ee beero'ik amaxxi tungibee'ane; bito xee'aalli kinim lobakata; ee bikkina mattakka'a biraa worqaa boggehe. Naanaawe'i beero'i gindamaakko, bogamaakkoo maxaramaakkoo. Manni hundim baachchinne luqucaakko; malaayyim hoogaakko; manni hundim huxe'aakko; illi heemachchaakko. Hobbi hee'oo beyyo, hobbi geexxuwwim allaa'lloo beyyoo goonchii meentichchi hobbichchii wotallinne maqirem baachchi bee'em makkixxaa hee'oo beyyoo labam hee'u oo beero'i kaba hannonne yookko? Hobbichchi hochchaa wotallina ihoo maara eebukko. Meentichchi hobbichchinam itookkoka shaa eebukko. Hee'oo ma'nna shu moochchinne barem maarinne wonshukko. Gogoxxi Moollanni Waa'i «Naanaawe'e, an diina'oominne keesenne ki'aammo. Kiikka faraxxi gaare'uwwa giirinne shokkiisoommo; hobbi geexxuwwam bisa'i bi'isookko. Mulli keeniinsi hoottaa wixxaa'llittoka hundam uulliinsi bi'isoommo; ki ijaacci sagarim kanniinsi eehid hore'em macceesamooyyo. Lobakat kee'n xiiga dunaakkoo qophphaninnem wo'mmaakkoo bogimminnee qeefadimminnee la'amaakkoo Naanaawe'i beero'ina aayye! Jiraafikii tululoo gaare'i gugii faraxxi konte'ikii faraxxi gaare'ikii gug macceesamookko. Farashshaanchi firiixookko; bisa'im beleccee'ookko; bagadim belelle'ookko; lobakat mannim lehookko; leesh hananenne ubookko. Xigakkammaanniinsim hanaan ihookko; daba'llamakkam googim bee'ookko. Oo hundim ihukkok adabbi'llo'oo gennaanchottee huushisaanchottee ikko'i saa'aanchi mashka'innette. Isem saa'imminne mulli minaadaba kiirimminnem minaadaba qeefaddo'ookkotane. Gogoxxi Moollanni Waa'i «Naanaawe'i, oono'o, an keesenne diina'oominne ki'aammo; ki qexxam maxaroommo; ki kallemarooma minaadab ki tuulli orachchom adilluwwi moo'oo'isa issoommo. Hacca keesenne uunjoommo; keesem gadoommo; mannim keesenne osaroo'isa issoommo. Moo'ookkok hundim kiinniinsi gibaa ‹Oono'o, Naanaawe'i gindamaa diihaakko; kichche'ookkokdu ayyette?› yookko. Ise qoxxiseena xanoodu hannonne siidoommokko?» yukko. Naanaawe'e, at Abbaayyi daajji gadanonne yoo wo'inne kibbamaakkoo Teebisiinsi lophphitoohonnihe? Ixxek oot daajje; girbim wo'o. Tophphe'ii Gibxii ee beero'ina gabal bee'i malaayyi hee'amukko; Fuuxii Liiba'ii hara'mmitam keen hee'lloo. Ihukkaarem Teebis beero'onne diina'i weeraraa minaadab qeefadamaakko; is ciilluwwim kinanne ficiriiqamaa goog hundannem ubaakko; adi'l ooso saaminne baxxamakko'ookko. Awwonsaanom chimchimminne karakko'ookko. Naanaawe'i, at dimbaa'nnisa tartaritoottokii diina'i illagiinsi gibbaa maaxantoo beyyo hassoo ammanii waarookko. Ki girbuwwi hundim gaassaa mishu misha iyyu oda'isa ihookko; ee haqqichcho heekkeesakka'a giggissakkamaare mishoom itoo manchi suumenne ubookko. Ki gaadaan hundim meentisa baachchaan ihookko; ki uulli gaba'l gooccuwwim diina'ina fooqaakko; gooca xufakkam laqqo'uwwam giir itaakko. Diina'i kibbaa u'nnisoo ammanina aggoo wo'o inkiittaa guduse; girbuwwa qoxxise; mu'uta baxakkam hara hassaa kade'e; xuubam baxe. Erisa ege'llitta'nnim giirinne shokkimmii bisa'inne muranchii gatooyyo; qawwaawwi itu hurbaaxxisa bi'llootto; qawwaawwisaa kochcha'nnisaa fikkaanne. Ki daddaraan iima'n boollaankiinsi lophphaakko; ihukkaarem qawwaawwisa ki uulla murugisaa guullaa bararaa marookko. Adilluwwii daannuwwii qiixxi ayyaamo ooxxi lugumonne sutamoo qawwaawwa labookko; eelliinchi firoohaare baratta'a bi'llamo; ihukkaarem hanno affoda'e ayyim la'ooyyo. Aasoo'l adila, ki egeraan baqoobee'isa diriiraakko; ki gassaan lehaakko; ki minaadab wixxaa'ookkoka hoogaa duunanne binnaakko. Kee'mmaallisa iiqantitti bikkina ki mada fayyiiseena xanoo luwwi bee'e; ki jolliinsii mongiinsii xorukkok ayyim bee'i bikkina ki bichcha macceesukkok hundim liiramaa anga aphphisookko. Waa'i hiraagaanchi Inbaaqoomina kaaltinne uwwu hiraaqqi sagar kanniinsi woroon yoohane. Waa'a, hara'mmitoo'isina ki kollonne laaroommaare macceessoobee'ek hinki balli afeebe'e? Damgi lophphaa laarummaare at gatissoobee'ek hinki balli afeebe'e? Ka hawwojji hundam moo'oommisa issittok mahinatte? Ku barche'i hundim ihukkuuyyi cawwitaa moo'lloottok hinkidette? Bichchii barche'ii i illagenne yookko. Wocii hambalaachchii lophphaakko. Ee bikkina seer sho'aakko; hanqi bi'aakko; oogata boqqisseena baaxiilaan er manna kibbito'ookko. Ee lasage ixxi Waa'i minaadabina «Ki'nnuwwi kululleetanne yoo minaadaba moo'llehe; Moo'llakkam luwwi hundannem lobakata maalallitakkamo. Ayyi manchim kuruta'n amma'nnitakkeena xantakkambee'i maalalsiisoo luwwa ki'nnuwwi doollenne baxoommo. Oono'o, ee mogaalluwwaa gaaggaaballuwwaa ikko'i Baabiloo'n manna ki'nnuwwanne ki'isoommo; ixxuwwi gaqqan ihubee'i uulli hundam orinne ammaddeena weerattamo. Ixxuwwi baddissamanee muggissam keenoo; ixxuwwi gaqqi lomba egessiissam seeram fissitamo. «Ixxuwwik farad kabeeriinsi loboka qare'aalla; hii'm oro'iinsim loboka mogaalluwwa; ixxuwwik faradaan jigissu'uuyyi qee'lliinsi waattamo; hootta'a itteenam hishshammachchisa barattamo. «Ixxuwwik gogot barche'e issiteena waattamo; ixxuwwi illim eelliinchi fi'l hafachchisa shokkiisookko. Qeefado'om shashsha'llisa wixxaa'llamo. Adilluwwam gaddamo; awwonsaanonnem naaccamo; girbuwwa gadda'a osattu'uuyyi buchcha tuubba'a amaddamo. Ee lasage hundim hafachchisa fii'anta'a mattamo; oohim ixxuwwi ixxuwwika malaayye ixxuwwi waa'isa xiggo'oo baaxiilan keeno» yukko. Keesantaattoo i Moollanni Waa'a! At heer heeriinsim hee'llittane; at neese egettoo bikkina lenoommoyyo. Neese bakke'nnoommi Waa'a! Baabiloo'n manni neese guzumo'llamisina neesenne ki'issaa ixxuwwina malaayye uwwittok atette. Ki illi hore'em muccur ihu bikkina jor luwwi moo'llaa iyyaqqitooyyo; eehannah ku boqquwwi keen ixxuwwiinsi muccuroominne e'lloo manna bi'isseena ki'llamaare mahina cawwitto? Manna dambalaq qurxumme'isaa awwonsaanchi bee'i biqinne shurukkuuyyi maroo qooccanchuwwisaa issitoottok mahinatte? Baabiloo'n manni qurxumme'isa minaadaba hundam qaashinne amaddamo; shikkinnem gosaassa'a wixxaa'llamo; ee bikkina ililitu'uuyyi liirantamo. Ichchi hurbaata godditamisaa makkixxita'a hee'llamisaa issoo bikkina qurxumme'i qaashsham shikkina kitima hincaa'llamo; wixxaa'llam mu'utinam aduruusa wiriissitamo. Eehannah ixxuwwi hundi ammanem shikkinne qaashshu'uuyyi qishixxitoo'n minaadaba guullitonannihe? I egechchi beyyonne ihaa uulloommo; girbi ooxxi hananne firaa egeroommo; ee beyyonne ihaa Waa'i iina yookkokaa i fitina uwwoo dabachchaa egeroommo. Waa'im iina «Kiina caakkisoommi kaalta kitaabe; qananaa'ookkok qaqqisaa qananaa'ona moo'amoo beyyonne kirbaasanne kitaabe. Kaaltoom qoodamu amman afeebe'e egerookko; lasaanchi doolli bikkina kurookko; ixxim qophphanooyyo. Dasoo labuta'nnim egere; hanqo'isam waarookko; hore'em dasooyyo. Amaadaano moo'e; eroomma sawwitamoyyo; ihukkaarem mucculluwwi amma'nnatinne hee'llamo» yaa dabarukko. Amaxxi huushisoohane; amaadaanchim iyyaqqooyyo. Si'ooli'nnoo'i gollaancho; Lehi'nnoo'i mogaalla. Mulli minaadaba ixxi gagina wixxaa'ookko; manna hundam qeefadookko. Manni hundim eehido'i mannanne naacimminne «Kiihan ihubee'i amaxxa wixxaa'lloohaanno aayye! Badano miqimma hoogu kee'n amaxxa wixxaa'llittuuyyi goddaanchi ikkoottok hinki balli afeebe'ette?» yookko. Badanaammuwwi issitakko'i keen ki'nnuwwanne dangonne ki'llamoyyonnihe? Ki'lladu ki'nnuwwa batbataa'llammoyyonnihe? Ki'nnuwwim ixxuwwi anganne qeefadantakkamo. Ki'nnuwwi lobakat minaadaphpheka amaxxa boggakka'a hee'llakko'o; ihukkaarem foorinne gatto'i keen korina ki'nnuwwa boggamo. Mashka'oomim ki'nnuwwi lobakat minaadaphpheka xiiga duntakko'ookko. Uullanne yoo beero'uwwanne hundannem hee'llam minaadabanne barche'e baxxakko'ookko. Hanqi bee'i googinne wixxaa'llakko'i amaxxinne mine baxxakko'i keeninaa jor luwwi afoobee'isa mine duunanne baxxakko'i keeninaa aayye! Lobakat minaadaba hantaarinne shitakka'a ki'nnuwwi abaroosina sholle'nna eebbakko'ookko; ki'nnuwwi gaginam bichcha eebaqqitakko'ookko. Gimbi kinneewwim gorte'i worinne laarookko; gorte'i haqqim eehannina wororinne dabachcha uwwookko. Beero'o baaxiilinne shooto'llam keeninaa manni xiiginne baxxam keeninaa ayye! Gogoxxi Moollanni Waa'i minaadab baxxamok hundim giirinne bi'oo'isina, adilluwwi yakitim kora'am gatoo'isina qoodaakko. Dambalaq wo'inne wo'mmaakkoohan ihukkisam uullim Waa'ika lomba la'imminne wo'mmaakkoohane ihookko. Tuulli orachcho moo'eena ixxi beshichchina dimbeebe'e inkiirukkuuyyi dimbisoo agga agisoohaannina aayye! Atim korina lombi bikkenne sholle'llootto; aggaa dimbitaahim tartaritootto; Waa'i qoxxaalli guzumo'i humbullo agisookko. Ki lombam sholle'nnanne dabarookko. Liibaanoosika digibbuwwa muttittisa atim murantootto; moochcha guullitaa hee'llitto; ixxuwwim keese u'nnissamo; oo hundim keesenne afookkok lobakat minaadaphpheka xiiga dunti bikkinattee uulluwwaa beero'uwwaa bi'issitti bikkinatte. Qophpha'n waa'uwwik awwaad marcho? Ixxi manni anginne shobamaa baxamaakkoohane; qophphaniinsi bagaan ixxeensi ma'llichchim siidamooyyo; eehannah ixxo shobaa baxu manchi maham woceena xanoobee'aannonne amma'nnim maha awwaadookko? Haqqiinsi cabbaramaa baxamu luwwina «Baqihe», kiniinsi shobamaa baxamu luwwinam «Ki'e» yitoo kiina ayye! Ayla'ukko oo qophpha'n waa'i mat maaxaqqi luchcho kiina caakkiseena xanoohonnihe? Qophpha'n waa'i worqinnee birinnee goolabamaa baxamaakkohane; ihukkaarem foor bee'ane. Waa'i keesamaakkoo minennette; ee bikkina uullanne yoo minaadab hundim sa'ihona. Mazmuurinne hiraagaanchi Inbaaqoom uunxat kane. Waa'a! At baxxitti maalalsisoo bax hundam macceesaa lobakata baddummo. Ka illageen issitti maalalsisoo bax hundam ka ni doollennem eddaa isse; maarag hundannem ki bax la'amoo'isa isse; quuqqoo ammanem haafihe. Waa'i Teemaaniinsi, Keesammim Faaraa'n duuniinsi waaraakko; Ixxek lombi iimane ifiisaakko; galatim uullanne wo'mmaakko. Ixxek dan eelliinchisa caakkisoohane; ixxi angiinsi caakki firookko; ixxi malaayyi ee beyyonne maaxamaakko. Booban ixxi illagenne higaa marookko; jabbim laso awwonookko. Ixxi uullukkaare uulli heekke'ukko; ixxi moo'ukkaare uulli minaadab huxe'ukko; heer heerinam hee'u duunnuwwi toroshamukko; Illagee'n doollenne hee'u hoffi duunnuwwim shiraashiramukko; ixxek googim heer heerina hee'oohane. Tophphe'i dukkaannuwwi u'nnamukkuuyyi, Miidiyaa'm mannim huxe'ukkuuyyi moo'ummo. Waa'a! Ki faradonnee ki kaachchi faraxxi gaare'ennee afuutaa jigissoottok daajjuwwii dambalaqquwwii quuqisu bikkinattennihe? Ki xiyyam gonooniinsi fissitto; tokkaashshe'e chokkottitto; uulla diqqaahim wo'o fissitto. Duunnuwwi keese moo'lla'a huxe'llo'o; xee'n dirisim uulla agaa marukko; cambalaqim gugukko; wo'i moorim humburuqqe'aa uullukko. Tokkaashshe'isa darabamaa bagaxxisa belecce'oo banqiinsi ki'ukkok eelliinchii aganii yoo'i beyyonnem uullito'o. Uullanne bala'inne daba'llantitto; minaadabam quunqinne hancaacantitto. Ki minaadaba gatisseena doo'llitti adilam xossiisseena fittitto; bichchi uulli awwonsaancho liittitto; ixxi awwonaanom bi'issaa ixxo leexa'issitto. Gogoxxi awwonsaancho ixxi xiyyinnem qassitto; ixxi gogot waatto'ok hambu'llamisa neese binnaa'imminatte hee'ukko; hoongaan keenom duussita'a woramadimminne liiranteenatte hee'ukko. At faradinne dambalaqa hance'antoo ammane xillaalli dambalaq shafshafookko. Ee hundam macceesaa muggummo; ixxi sagarim i suume huxiisookko; i miqim heekke'ukko; i lokkim digiiramukko. Waa'i neese hawwisoo keeno guzumo'eebe'i afeebe'e; iyyaqqimminne egeroommo. Oda'i mishubeeta'nnim, woyi'n kaashshannem mish bee'uta'n, wee'l haqqi mishubeeta'n, uullim hurbaata hooruta'n, gereebbi orodonne hee'ubeeta'n, gaadirannem lar bee'uta'n ihukkaarem an Waa'anne liiramoommo. Eese gatisaanchi Waa'annem lobakata liiramoommo. Moollanni Waa'i iina malaayye. I lokkom gaallichchi lokkisa qoxxisookko; duunnuwwannem daba'llamoommisa issookko. Amoon beet Iyyoosiyaas Yihuxxi adil hee'u doollenne Safooniyaas beyyo Waa'ik sagar waarukko. Safooniyaas Kuush beeto; Kuush Gadaaliy beeto; Gadaaliy Amaariy beeto; Amaariy odim adil Hizqiyaas beeto. Waa'i «Hundem luwwam uulliinsi guullaa bi'isoommo. Manna, diinate, iima'n cii'aa dambalaq qurxumme'ee bi'isoommo; boqquwwi keenom onkoroollisoommo; manni shumo'o uulliinsi bi'isoommo; an Waa'i kaka wocaammo. «Yerusaalee'mmekaa Yihuxxi minaadabaa hundam guzumo'oommo; ee beyyiinsim Ba'aala yakkam qophpha'n waa'aa ixxenam awwaaddam qeessuwwaa guullaa bi'isoommo. Mi'n iimanenne fitta'a eelliinchina, aganinaa boollaankinaa otossitam keenoo iina otossitu'uuyyii i summinne hide'llu'uuyyii odim Milkooma yakkam qophpha'n waa'i summinne hide'llam keeno bi'isoommo. Iinniinsi qee'llita'a eese hassobee'i keenoo an awwonsona eese xa'mmitobee'i keenoo bi'isoommo» yoolla. Waa'i oogatoo balli hincu bikkina ixxi illagenne sa'i'llehe; Waa'i ixxi minaadaba kitimina hincoo diinaxxisa higisaa uwweena gudaakko; bogoo diina'am weeshaakko. Waa'i «I minaadaba higisaa uwwoommi balla gassaano, adilluwwi oosoo allaggi manni qaanqa awwonoo keenoo guzumo'oommo. Odim qophpha'n waa'ina mikkiranne xophitu'uuyyi otossitam keenoo bogga'ahii qawwiissa'ahii eebbo'i mu'uta ixxuwwi qophpha'n waa'i minenne wonshitam keenoo guzumo'oommo» yoolla. Waa'i «Ee balla Yerusaalee'm ootiinsi Qurxumme'i Gooca yakkam kollinne laachchik, haareechchi wixxixxi beyyinnem wi'llik sagar macceesamookko; duunnuwwannem kee'mmaalli dambaq ihookko. Beero'oomiinsi woroo'n kollonne hee'llakkam keen hundim ka sagara macceessakkam ammane ‹Aayye! Aayye!› yitakku'uuyyi wi'llehe. Mashka'oomim eekke'enne daddaraanii kin bira dabassitam keenii hundim letamo. «Ee balla sha'a amadaa Yerusaalee'm beero'o saarayyoommo; hasso'isa ikku'uuyyi hee'llam keenoo bolxoomminne ‹Waa'i danaamoom joram issooyyo› yitam keenoo guzumo'oommo. Ixxuwwik amaxxi hundim bogamookko; ixxuwwi minim gindamookko; ee ammane mine baxxamo ihukkaarem hee'llamoyyo; Woyi'na kaassamo; ihukkaarem woyi'n diqaasa aggamoyyo» yoolla. Waa'ik hundiinsi lob balli hincaakko; qaqqisaahim waarookko; oo baalli lobakata baddisoohane; ee balla macceesamoo sagar qaraaraalla; ee balla gaadaan lobakata laattamo. Oo balli quunqane, hawwane, u'nnane, bichchane, gindanchane, tuunsane, witiriichchane, duuphphanee gambabbi tuunsanee ihookko. Ee balla girbamu beero'uwwannee kininne ootamu qeeraa'l oottuwwannee o'l xurumbii laachchii macceesamookko. Waa'i «Baaxiilo baximminne eese hawwoddo'i bikkina qooqisa tartariteebe'e manni hundannem kee'mmaalli hawwo eeboommo; ixxuwwi xiigim wo'isa dunamookko; ixxuwwi leeshim haccisa ubookko» yoolla. Waa'i ixxi quunqinne mannanne oogatoo balla birii worqii gatiseena xanooyyo; ixxi quunqi giirinnem uulli bi'ookko; mashka'oomim uullanne yoo manni hundim dangonnem beeddoo bikkinatte. Ki'nnuwwi tuuttakkambee'i minaadaba, qaqqissakka'a Waa'i kollonne daba'llehe. Eebeelas hafachchi fii'aa massoo bura'isa ikkakkamo; Waa'ik gii'llisa aphphoo quunqi kinnuwwanne waarookko; bala'im ki'nnuwwanne dillookko. Waa'ika ijaajo egettakkam keen uullanne hee'llakkam maashaalluwwi hundim Waa'i kollonne daba'llehe; muccuroomam hassehe; Waa'i illagenne gaga heeshaa'llehe; ayyi la'ukko Waa'i quuqoo ayyaamo baraara fittakkeena xantakkamo. Gaaza'i beero'i manni hee'oobee'i udma'i ihookko; Asqaloo'n beero'im gindamookko. Ashdoodanne hee'llam mannim samgud ballanne ixxuwwi gattiinsi hollantamo; Eeqiroo'n mannim beero'iinsi yaayyanta'a fittamo. Dambalaq tochchonne hee'llakkam Kaarte'i manna, ki'nnuwwina aayye! Waa'i ki'nnuwwanne oogateenatte; Filisxee'm uulli Kana'aana, ayyim hee'eena xanoobee'isa issaa keese bi'soommo. Dambalaq tochchonne yoo ki'nnuwwi uulli hundim diinat allaa'lloo beyyoo allaaraanii diinatii hee'oo beyyoo ihookko. Qeefadanchiinsi gatto'i Yihuxxi manni ki'nnuwwi uulla lago aa'lla'a allaachchi beyyi issitamo; Asqaloonanne yoo minneewwannem gattamo. Moollanni Waa'im ixxuwwa abooyyookko; qeefadamaa maru ixxuwwi amaxxam dabarookko. Gogoxxi Moollanni Waa'i «I minaadaba Moo'aaphphi minaadab naacco'isaa Amoo'n minaadab game'llito'isaa macceesaammo; gadda'a naacco'isaa uulla hootteena sha'llanto'isaa la'aammo. An Isra'ee'l Waa'i gogoxxi Moollanni hee'oomman ihummisinnem hanqinam Moo'aabii Amoonii Soddo'mmisaa Gomo'llisaa bi'llamo; bochchi xuuxu beyyisaa sooqixxi ba'llisaa heer heerina udma'i ihookko; qeefajjiinsi gatto'i i minaadab ixxuwwika amaxxa boggamo; ixxuwwi uullam lago aa'llamo» yoolla. Moo'aaphphaannonnee Amoo'n minaadabannee ku hawwi hundim afookkok Gogoxxi Moollanni Waa'i minaadabanne bolximminne naacantu'uuyyi sha'llanto'i bikkinatte. Waa'i ixxuwwi uullanne yoo qophpha'n waa'uwwa hundam bi'isoo bikkina Waa'a badditamo. Dambalaq tochchonnee wo'inne kibbamaakkoo uulli hundannee hee'llam minaadab hundim yo'i beyyonne hundannem Waa'ina otossitamo. Ki'nnuwwi Tophphe'i manni i bisa'inne letakkamo. Waa'i hanaa'n qarinne yoo Asoora bi'isookko; Naanaawe'i beero'om udma'i issookko; uulli udma'isam gokkisookko. Gereebbi, fella'i, larii moochchii hosoo beyyi ihookko; mooqqaqqi gindamu mi'n woronne garookko; maskoottuwwannem firaa muunookko. Gooc hundannem gindamu minneewwi hacci tuubamookko. Digibinne baxakko'i minneewwik haqqi maxaramookko. Ee beero'i manni «Niinniinsi bagaan manni bee'e» yimminne bolxita'a hee'llam hee'llo'o; ihukkaarem kaba oo beero'i moochchi garoo udma'i ihaa gatookko; eeheen higoo hundim maalalaa anginne moo'isukkuuyyi fiinqeesookko. Boqqa, haashaarammaa amadoohanee ihu Yerusaalee'm beero'ina ayye! Oo beero'i ayyenam ijaajamoobee'ane; sogitanom aa'oobee'ane; Waa'annem amma'nnamoobee'ane; ixxi kollim hincoobee'ane. Awwonsaan muunoo hobbisa; daannuwwim soodina gatisoo'n siidukkoka hundam itoo sibaaru maaroballi oro'isa. Ee beero'i hiraagaan bolxitam keenoo qawwiisaanoo; qeessuwwim keesamma haashaassitam keeno; seerinam ijaajantambee'i keeno. Ee beero'onne huushamoobee'i muccur Waa'i yookko; ixxi balli hundam hanqa oogatookko; darina darinam eehid issimma urooyyo; ihukkaarem ee beero'i boqqi minaadab tuuroobee'ane. Waa'i «An mulli minaadaba bi'isummo; girbuwwam gindansummo; ixxuwwi googinne ayyim higoobee'i diih issaammo; beero'uwwam diihisummo. An ‹I minaadab eese lonsookko; i sogitanom aa'ookko; issummokam xadooyyo› yaa hee'ummo. Ihukkaarem i minaadab edaa edaa jora baximminne haashaaramaakko» yoolla. Waa'i «Hofqaxam iyyaqqehe; ixxuwwanne oogatoommi amman waarookko; mulli minaadabaa ixxuwwi adilluwwaa wixxaa'aa iikka malaayyaam quunqa ixxuwwanne dilliisoommo; i malaayyaam quunqinne ku uulli hundim bi'ookko. «Ee ammane oo minaadab muccur woshsha wocoo'isa issoommo. Eeham issoommok hundim i summa weeshonattee mateeyyoomminne iina awwaadonattee. Binnaa hee'oo i minaadab Tophphe'i daajjuwwi eeqidiinsi kitima amadaa iina otosseena waarookko. Eesenne baxxakko'i baaxii'l bikkina ee ammane tuuttakkamoyyo; mashka'oomim bolxoo keenoo amaadaanoo ki'nnuwwi lambe'iinsi hooroommo; ka lasage keesamaakkoo i duunanne iina boqqitakkamoyyo. Ki'nnuwwi lambe'iinsi gaga heeshaa'llo'oo maashaalli minaadaba gatisoommo; ixxuwwim eesenne bakke'llamanee i hara'mmatom hassamanee ikkamo. Qeefajjiinsi gatto'i Isra'ee'l minaadab ayyennem jor issitamoyyo; qophphanom woccamoyyo; ixxuwwi suuminnem qawwiissamoyyo; ee bikkina makkixxita'a xumminne hee'llamo; baddisoo luwwim hee'ooyyo» yoolla. Xiyoo'n landichche, zammare; Isra'ee'l minaadaba, ililittuuyyi zammare; Yerusaalee'm minaadaba, wo'm wodaninne liirammehe; lobakatam liirammehe. Waa'i ki'nnuwwanne oogataa hee'u guzumo'o haafaakko; ki'nnuwwi diina'am bi'saakko. Isra'ee'l Moollanni Waa'i ki'nnuwwi lambe'ennette; «Ka lasage neesenne jor bichchi afookko» yitakka'a badditakkotte. Ee ammane Yerusaalee'm bikkina «Xiyoo'n beero'o baddititte! Ki wodim hoogoone. Moollanni Waa'i kiinninnette; ixxi wodinnem kaachcha uwwookko. Waa'i keesenne liiramookko; ixxi iittinnem ki heechcha haareechchisookko. Minaadab uguxxi ayyaamo zammarukkuuyyi liiramoo'isa ixxi keesenne liiramookko» yakkamo. Waa'i «Uguxxi balla liiramakkamisa at liirantoo'isa issoommo; ka lasage hore'em tuuttooyyo. Keese hawwisoo keeno hundam ee ammane guzumo'oommo; dimoo keenom gatisoommo. Binnito'i keenom dabaraa wixxaa'oommo; sholle'nnam lombanne dabaroommo; ee bikkina uullanne yoo minaadab hundim keese lonsookko» yoolla. Waa'i «Kinnuwwa hundam wixxaa'aa ki'nnuwwi uulla woroommo; ki'nnuwwi amaxxa ki'nnuwwi iilli moo'ukkuuyyim ki'nnuwwina dabaroommaare uulli minaadaphphi lambe'enne la'antakko'oo lombaamuwwi ikkakkamo» yoolla. Daariyoos adil ihu la'm hiinchonne loh agan aagu luxxi ballanne Waa'i ixxi hiraagaanchi Hage'ennetti ihaa wocukko; wocukkokim Yihuxxi uulla gassaanchi hee'u Salaatiyaal beetina Zarubaabeelinaa hundiinsi lob qeessichchi hee'u Iyyooseedeeq beet Iyyaasinattee hee'ukko. Gogoxxi Moollanni Waa'i «Ku minaadab ‹Waa'i min daba'llaa baxamoo amman afukkoyyo› yitamuulla» yukko. Ee bikkina Waa'i hiraagaanchi Hage'innetti ihaa ixxi minaadabina «I minaadaba, i min gindamaa hee'ukkisam ki'nnuwwi er minneewwanne gattakkeena ammanennihe? Yoontakke'isa hino'o sawwi'llehe. Oono'o, lobakata wixxakko'o, ihukkaarem hoffoka wixxaa'llakko'o. Ittakko'o; ihukkaarem godditakko'oyyo. Aggakko'o; ihukkaarem xeebo mu'llitakko'oyyo. Hananenne edde'llakko'o; ihukkaarem iibbisukkoyyo. Baxxakka'a siiddakko'i diinat barkatoobee'i bikkina dereerammi kiisanne dissakko'aannisa ihukko. Kuk mahina ihuda'e qoossitakkamoyyonnihe? Ihukkaarem kaba duunnuwwanne fittakka'a haqqa muttakka'a eebbehe; minem dabattakka'a baxxehe. Anim eehannonne liiramoommoo galaxxamoommoo. «Ki'nnuwwi lobakat atoota wixxa'llakkeena neeyyattakka'a hee'llakko'o; ihukkaarem hoffan ihukko. Eekkoomam mine aagissakka'a lasonne ufummaare bee'ukko. Eekka issummok mahina labissakka'ate? Mashka'oomim ki'nnuwwi annannichchim ki'nnuwwi gaqqi mine wereeggissakku'uuyyi i min gindamaa gatu bikkinatte. Xeen ga'nnoobee'ekii mahim mutoobee'ekii ee mashka'innette. Ee bikkina duunnuwwannee uullanne mutoo luwwi hundannemii oohim hurbaatanne, woyi'n kaashshanne, zaytannee mannannee fooraam diinatannee badattakko'i luwwi hundannemii bille asse'ummo» yukko. Salaatiyaal beet Zarubaabeelii hundiinsi lob qeessichchi Iyyooseedeeq beet Iyyaasii qeefadanta'a hee'llam uulliinsi waatto'i minaadabinne maqirem ixxuwwi Moollanni Waa'i sagarinaa hiraagaanchi Hage'ennetti ihaa Waa'i asse'u assinaa ijaajanto'o; Waa'am baddito'o. Waa'ina asse'amaanchi ihu Hage'i «‹An ki'nnuwwinnette› yoolla Waa'i» yaa Waa'ika asso minaadabina higisukko. Ee lasage Waa'i Yihuxxi uulli gassaanchi hee'u Salaatiyaal beet Zarubaabeel, hundiinsi lob qeessichchi hee'u Iyyooseedeeq beet Iyyaasii qeefadanta'a hee'llam uulliinsi daba'llita'a waatto'i minaadabii hundim murte'lla'a ki'llamisa issukko. Ixxuwwim gogoxxi Moollanni Waa'ika mine baximma asheetto'o. Oohim ihukkok Daariyoos adil ihu la'm hiinchonne loh agan aagu lamiyyennee soo'l ballannettee hee'ukko. Daariyoos adil ihu la'm hiinchonne lama'l agan aagu lamiyyennee mat ballannee hiraagaanchi Hage'enne ihaa Waa'i odim wocukko. Waa'i «Yihuxxi uulli gassaanchi hee'u Salaatiyaal beet Zarubaabeelina, hundiinsi lob qeessichchi hee'u Iyyooseedeeq beet Iyyaasinaa qeefadanta'a hee'llam uulliinsi daba'llita'a waatto'i minaadabinaa ‹Gaassi ku Waa'i min hinkido'i lombi yoohan ihuda'e moo'u manchi ki'nnuwwi lambe'enne yoohonnihe? Kaba moo'llakkamaare hinkidette? Kuk mahannem xigamoobee'aneyyonnihe? Ihukkaarem kaba Zarubaabeela, qoxxe; hundiinsi lob qeessichchi Iyyooseedeeq beet Iyyaaso, qoxxe; ka uulli minaadaba, qoxxitakka'a baxxehe. An gogoxxi Moollanni Waa'i ki'nnuwwinnette. Gibxi uulliinsi fittakko'i ammane ‹An ki'nnuwwinne maqir ihoommo› yaa aagummi neeyyaxxi saga'llisannem kabadem i Ayyaan ki'nnuwwinne maqir ihu bikkina qoxxehe» yaa wocukko. Gogoxxi Moollanni Waa'i «Gundi ammanenne odim iimanee uullaa, dambalaqaa uullaa heekkeesoommo. Mulli minaadab hundam heekkeesoommo; ixxuwwi amaxxi hundim keyye waaroo'isa issoommo; ku minim amaxxinne wo'mmoo'isa issoommo. Uullanne yoo worqii birii hundim iihane. Ku haareechchi ihaa baxamu i min illagee'nnaanniinsi lophphaa nuur yoohan ihookko. Anim i minaadabina eekke'enne wo'm xumma uwwoommo» yoolla. Kaka wocukkok gogoxxi Moollanni Waa'a. Daariyoos adil ihu la'm hiinchonne honsi agan aagu lamiyyennee soo'l ballannee gogoxxi Moollanni Waa'i hiraagaanchi Hage'enne «Muse'e see'l bikkina qeessuwwa xa'mme. Mat manchi keesamaakkoo maara kiti'm beyyiinsi massaa ixxi eddechchanne xaaxaa amaduta'n eddechcham injeerii woxii, woyi'n diqaasii zaytii te'im mulli hurbaata hinkam nakkuta'n hurbaat hundim ee manchi mashka'inne keesamaakkoohan iheena xanoohonnihe?» yukko. Ee'isinne hiraagaanchi xa'mmaa lasonne qeessuwwim «Keesamaakkoohan iheena xanooyyo» yita'a dabatto'o. Hage'i odim dabaraa «Leesha nakkaa haashaaramu manchi ka hurbaaxxeka matooma nakkuta'n oo nakkamu hurbaat hanqo'isam haashaaramooyyonnihe?» yaa xa'mmukko. Qeessuwwim «Eeyya, haashaaramookko» yita'a dabatto'o. Hage'im «Ku minaadab hundim ee'isame. Ee bikkina ixxuwwi baxii hincaa'llam kitimii haashaaramaakkoohane» yoolla Waa'i yukko. Waa'i «Ki'nnuwwanne mah afuda'e qoossitakkamoyyonnihe? Gindamu i mine dabattakka'a baximma asheettakkeen illageen ki'nnuwwi lamiyyi qunna siindoommo yitakko'i beyyonne xale'i tommi qunna siiddakko'o. Odim ontayyi hubur diqaasa inkiittakkeena sawwitakka'a woyina ciinsakkam beyyo mattakko'o; ihukkaarem xale'i lamiyyi hubur diqaasa inkiittakko'o. An ki'nnuwwi badattakko'i luwwi hundam cinnakkinne, baradinnee hadaddinnee bi'isummo; ihukkaarem ki'nnuwwi i kollonne daba'llitakko'oyyo. Oono'o, kaballi honsi agan aagu lamiyyee sooro; i mine dabattakka'a baximma asheettakko'aanniinsi ki'issakka'a mareessehe. Sire'i hurbaat bee'uta'nnim woyin, oda'i, roomaanii weerii mishubeeta'nnimii an kaballiinsi ki'isaa ki'nnuwwa maasse'oommo» yoolla. Oo honsi agan aagu lamiyyennee soo'l ballannee odim Waa'i hiraagaanchi Hage'ena «Yihuxxi uulla gassaanchi hee'u Zarubaabeelina ‹An iimanee uullaa heekkeesoommi amman waarookko. Ee ammane adilluwwika adilla'n barcuma qubbaa'oommo; ixxuwwi malaayyem hoogisoommo; o'l faraxxi gaare'uwwaa ushe'llam keenoo ubbuusoommo. Faradim beeddookko; faradaanim ixxuwwina'i ixxuwwim shaqqantamo. Iina awwaadaanchi Salaatiyaal beet Zarubaabeela, an keese doo'llaammo. Mat balla gassaanchi ikkoo'isina doo'llaa i quba'i koobo'isa issoommo› yitaa kure» yukko. Kaka wocukkok gogoxxi Moollanni Waa'a. Daariyoos Faariis uulli adil ihu la'm hiinchaannonne sadeenti agananne Iido'i beet beet hee'u Baraakiy beet Zakkaaryaasina kidyoo sagar Waa'iinsi waarukko. Gogoxxi Moollanni Waa'i Zakkaaryaasa minaadabina «An Waa'i illagee'n ki'nnuwwi anno'onne lobakata quuqaa hee'ummo. Ihukkaarem kaba ki'nnuwwina yoommok i kollonne daba'llehe; anim ki'nnuwwi kollonne daba'lloommo. Illagee'n ki'nnuwwi anno'isa ikkakkotte; ixxuwwina illagee'n hiraagaan ‹Jor googiinsii jor baxiinsii daba'llehe› yita'a qoxxissa'a kutta'a hee'llo'o; ihukkaarem ki'nnuwwi anno'i i sagara macceesso'oyyo; i ijaajom egetto'oyyo. Illagee'n ki'nnuwwi anno'i hannonne yo'o? Hiraagaandu heer heerina hee'llamonnihe? Ihukkaarem i awwaadaan ikko'i hiraagaaninne illagee'n ki'nnuwwi anno'ina an kurummi Seeraa ijaajoo egettobee'i bikkina kee'mmaalli hawwi ixxuwwanne afukko. Ee bikkina gaabbita'a ‹Gogoxxi Moollanni Waa'i ni gooqqisaa ni baxisaa ixxi qoodukkisannem laboo guzumo'o uwwukkisa qoossaqqinaammo› yito'o» yitaa kure yukko. Daariyoos adil ihu la'm hiinchonne Sheebaaxa yakkam tommikii mat aganii aagu lamiyyennee soo'l ballannee Waa'ik sagar Iido'ona beet beet ihu Baaraakiy beet hiraagaanchi Zakkaaryaas beyyo waarukko. «Mat manchi kashar farashshonne saa'llaakkoo hiimonne kaaltanne moo'ummo. Ixxim cebbi woronne yoo baarsanaat haqqi lambe'enne uullaa hee'ukko. Ixxi lasonnem kashar, daama'ii qadaalli farashshii awwonam hee'ukko. ‹Anim I moollanna, ku farad mah kobi'lla?› yaa xa'mmummo. Ixxim ‹Ka faraxxek kobi'l mada'e ihukkisa kuroommo. Ku farad uulli hundannem daba'llantamisina Waa'i asse'aakkoo keeno› yukko. Faradim «Uulli hundam do'nnaa moo'nnaammo; uulli hundim usheexxaa xummam yookko» yita'a Waa'i asse'amaanchina kutto'o. Waa'i asse'amaanchim «Gogoxxi Moollanni Waa'a! Yerusaaleemannee Yihuxxi beero'uwwannee hundannem quuqqittaanniinsi lamarayyi hiincho ihaakko; at ee beero'uwwina haafitoobee'ek hinkaa'n balli afeebe'e?» yukko. Ee lasage Waa'i iinninne wocam hee'u ixxi asse'amaanchina liiransoohaanninnee qoxxisoo sagarinnee wocukko. Ee bikkina Waa'i asse'amaanchi «Gogoxxi Moollanni Waa'i ‹An Yerusaalee'm bikkinaa Xiyoo'n bikkinaa lobakata to'achchaammo. Xummanne hee'llam eese laqqambee'i minaadabanne lobakata quuqaammo; mashka'oomim an i minaadabanne hoffokam quuqaa hee'ummuuyyim ixxuwwi i minaadaba lobakata hawwoddo'o. Ee bikkina Yerusaaleemina haafeena daba'lloommo; i minii Yerusaalee'm beero'im daba'llaa baxamookko. Odim «Gogoxxi Moollanni Waa'i ‹I beero'uwwi odim daba'llaa amaxxaam ihookko. Waa'i Xiyoona qoxxisookko; Yerusaaleemam doo'llookko› yoolla» yitaa alallaate yukko. Odim Mulli kaaltanne soor buudduwwa moo'ummo. Iinninne wocam hee'u Waa'i asse'amaanchom «Ku buudduwwi maha kobi'lda'ee iina kure» yummo. Waa'i asse'amaanchim «Oo buudduwwi Yihuxxeka, Isra'ee'llekaa Yerusaalee'm minaadabaa binnitamisa issito'i adilluwwa» yukko. Ee lasage soor angi qoor manna Waa'i iina moo'isukko. Anim «Ku manni waatto'ok maha baxxeenatte?» yaa xa'mmummo. Ixxim «Ku budduwwi ayyim mikmikeena xanoobee'isa issita'a Yihuxxi minaadaba binnaa'llo'i keeno. Ihukaarem ku angi qoolluwwi waatto'ok ee keeno baddisseena, minaadaba binnaa'lleenaa Yihuxxi uullanne buudo iimiimaa'llo'i ee mulli minaadaphphi budduwwa iiqansita'a ubbusseenatte» yukko. Odim mulli kaaltanne keenakkam usa amadaakkoo mat mancho moo'ummo. Anim «Hanno mattoolla?» yaa xa'mmummo; ixxim «Yerusaalee'm qeeraa'lloomii haraaroomii hinkaa'nda'e keeneena maroommuulla» yukko. Ee lasage iinninne wocam hee'u Waa'i asse'amaanchi marukko; mulli asse'amaanchim ixxenne exxeena marukko. Ixxim «Geettaa mattaa ee woraadichchina ‹Yerusaaleemanne lobakat minaadabii fooraam diinatii yoo bikkina oot bee'i beero'i ihookko› yitaa kure. Waa'i ixxi gagoomim ee beero'i kululleetanne gii'l ooxxisa ihaa beero'ooma egeroo'isaa ixxi lombim ee beero'onne hee'oo'isaa neeyyato uwwaakko» yukko. Waa'i ixxi minaadabina «An Ki'nnuwwa soorem qarannem binnaa'aa hee'ummo; ihukkaarem kaba hanaa'n qaranne yoo uullinsi gibbehe. Baabiloonanne qeefadanta'kka'a hee'llakkam manni Yerusaaleema gibbehe. Ki'nnuwwa nakkookkok ixxi gaqqi ilbeetichcho nakkukkaannisa» yoolla. Lombaam Waa'i ixxi minaadaba boggo'i mulli minaadabina ka sagara wocoommisina eese asse'aa «Waa'i ixxi gagim ki'nnuwwinne oramookko; ki'nnuwwina awwaadaan hee'llo'i minaadabim dabatta'a ki'nnuwwa boggamo. Ee ammane eese asse'ukkok gogoxxi Moollanni Waa'i ihukkisa laqqakkamo. Waa'im «Yerusaalee'm minaadaba, an waaraa ki'nnuwwi lambe'enne hee'oommi bikkina liiranchinne zammallehe» yoolla. Ee ammane dut mulli minaadab Waa'i kollonne waatta'a ixxi minaadab ikkamo; Waa'im ki''nnuwwi lambe'enne hee'ookko; eesem ki'nnuwwi beyyo asse'ukkok ixxotte ihukkisa laqqakkamo. Waa'i Yihuxxi minaadaba keesamaakkoo uullanne ixxi gaqqi gullummi issookko; Yerusaaleemam odim doo'llookko. Waa'i keesamaakkoo ixxi heechchi beyyiinsi waareena ki'u bikkina maara edde'llakko keen hundim ixxi illagenne sa'i'llehe. Ee lasage Waa'i hundiinsi lob qeessichchi Iyyaaso Waa'i asse'amaanchi illagenne uullaakkoo kaaltanne moo'isukko. Sheexaanchim Iyyaaso kasaseena ixxi makki kollinne uullaa hee'ukko. Waa'im Sheexaanchina «Sheexaancho, keese Waa'i axeere! Yerusaaleema doo'llu Waa'i keese axeere! Ku manchi shokkiinsi baraara firaakkoohaneyyonnihe?» yukko. Iyyaasim xuraakkoo eddechcha edde'aa Waa'i asse'amaanchi illagenne uullaa hee'ukko. Waa'i asse'amaanchim ixxi illagenne uullita'a awwaaddam keenina «Ka xuraam eddechcha ixxeensi sheelattehe!» yaa ijaajaajukko. Iyyaas kollim daba'llaa «Oono'o, ki baaxiilo kiinniinsi qeessaammo; haareechchi lombi eddechcham eddeesoommo» yukko. Waa'i asse'amaanchim awwaadaanina «Muccur gufuta ixxi horoonenne xaaxxehe» yaa ijaajukko; ixxuwwim ijaajanto'isannem issito'o; Waa'i asse'amaanchi eekke'enne uullaa hee'onam awwaadaan Iyyaasina haareechchi eddechchca eddeesso'o. Ee lasage Waa'i asse'amaanchi Iyyaasina «Gogoxxi Moollanni Waa'i ‹I illagenne ki taakki xabbeen ihulasii i seeram egettilasii i minenne gassaancho, i wixxixxi beyyuwwannem daanni ikkootto. Ka beyyonne uullito'i iina asse'amaaninne maqirem i illagenne aaggaa fittoo daannooma uwwoommo. Hundiinsi lob qeessichchi Iyyaaso, kaka macceese; ixxenne maqire awwaaddakkam qeessuwwii ka lasage ihoo eroommina mare'i ikkakko'i keenii kaka macceessehe. ‹‹Caafa›› yamamoo i awwaadaancho an asse'oommo. Oono'o, Iyyaas illagenne lamar illi yoo mat kincho dissaammo; eehanni hanennem kitaaboommo; ka uulli baaxiilom mexxo'i mat ballanne bi'isoommo. Oo balli afoo ammane ki'nnuwwiinsi annannichchim woyi'n kaashshaannonnee oda'i hafannee maadda gudisaa ixxi olla'a weeshaa liiramookko› yoolla» yukko. Iinninne wocam hee'u Waa'i asse'amaanchi odim waaraa diriichchiinsi ki'oo manchisa eese baqaa'ukko. Ixxim «Ku moo'lloottok maha?» yaa xa'mmukko. Anim dabaraa «Lamar qaf yoo caakka dissakkam worqinne baxamaakkoo mu'uta moo'oommuulla; hanennem zayixxi qure'i yookko; lamarem caakka dissakkam qafannem fatir aagoo afo'i yookko. Caakka dissakkam mu'uxxi gadanonnem lam wee'l haqqi mat ee qure'i makki kollinne mat odim ee qure'i qeddi kollinne hee'ukko» yummo. Anim iinninne wocam hee'u Waa'i asse'amaanchina «I moollanna! Kuk mah kobi'lla?» yaa xa'mmummo. Ixxim «Ku keen mada'e laqqooyyonnihe?» yukko. Anim «I moollanna! An la'oommoyyo» yummo. Oo Waa'i asse'amaanchim an Zarubaabeelina la'isona kuru gogoxxi Moollanni Waa'ik sagar «Kaachchi i Ayyaaninnette bagaan wodinnee malaayyinneyyo. Duu'nnisa ki illagenne uullu luwwi hundim shiraashramookko; Keesammi Minem dabattaa baxxootto; goollimmi kinam dabattaa beyyonne dissitoo ammane minaadab ‹Hinkido'i nuuraamo! Nuuraamo!› yitu'uuyyi liiranchi sagara macceesissamo» yoohane yukko. Odim Waa'i iina «Zarubaabeel angi ka keesammi mi'nneka shooho'i kina uullisaakko; ixxi angim baxaa guullookko; ee ammane gogoxxi Moollanni Waa'i eese ki'nnuwwi beyyo asse'ukkisa laqqakkamo. Hoffi luwwi ihoo ayyaamo gadookkok ayyette? Manni Zarubaabeel anganne tumbe'e moo'aa liiramookko. Ku lamarim heer uulla moo'oo Waa'i ille» yukko. Anim ixxo «Ku caakka dissakkam mu'uxxi makki kollinnee qeeddi kollinnee yoo wee'l haqqi mahane? Odim worqinne baxamu ka lamem boombi gadanonne ihaa wee'l zayti daadoo ku lamem wee'l caaffuwwim mahane?» yaa xa'mmummo. Ixxim «Ku keen mada'e laqqooyyonnihe?» yukko. Anim «I moollanna, la'oommoyyo» yummo. Ixxim «Ku lamim heer uullina Moollanna awwaaddeena doo'llanto'oo keeno» yukko. Odim mat xaaxamaakkoo kitaab hafachchanne bararukkuuyyi moo'ummo. Waa'i asse'amaanchim «Maha moo'lloolla?» yaa xa'mmukko. Anim «Qeeraa'lloom lamiyyi anga haraaroom tommi anga ihoo xaaxamaakkoo mat omachchi kitaaba hafachchanne bararukkuuyyi moo'oommuulla» yummo. Ixxim «Ee xaaxamu kitaabanne heer uullanne afoo duunchi kitaabamaakkoohane; game'oo hundim ee kitaab mat kollonne kitaabamukkisinnem bi'ookko; qophphanonne hide'oo hundim mulli kollonne kitaabamukkisinnem bi'ookko. Gogoxxi Moollanni Waa'i ‹Ka duuncha game'oohaanni minee qophphanonne i summinne hide'oohaanni minee asse'oommo; aagaahim ee kee'n minenne afuuraa ixxuwwi minneewwa gindansookko› yoolla» yukko. Odim oo asse'amaanchim i beyyo waaraa «Iim daba'llitaa ku waaroo luwwi mada'e ihukkisa moo'e!» yukko. Anim «Kuk maruwwa?» yummo. Ixxim «Kuk heer uullanne baxamoo baaxiilo moo'isoo sananna» yukko. Ee sananninam irisaasinne baxamaakkoo ifiishshaanchi hee'ukko; an moo'onam ifichchi fooqukko; ixxi woronnem mat meentichcho afuutta'a hee'llo'o. Waa'i asse'amaanchim «Oono'o, tu meentichcho boqqoo'm kobi'llatte» yaa ise aad xiibaa sananni woronne aagisukko; ifiishshaanchom hanenne ifiisukko. Anim iim daba'llaa moo'ummuuyyi lam meenti barattu'uuyyi i koolli waatto'o; ixxuwwim ladinne hafachchanne barattam hee'llo'o. Ixxuwwi ladim hummaantaanni'nnoohan hee'ukko; ixxuwwim ee sananna uulliinsi ki'issa'a amadda'a iimane baratto'o. Anim iinniinne wocam hee'u ee Waa'i asse'amaancho «Ka sananna hanno massamoolla?» yaa xa'mmummo. Waa'i asse'amaanchim «Baabiloo'n uulla massita'a ixxena mine baximminatte; minim baxamaa beeddoohaare sanannooma ee minenne dissiteenatte» yukko. Odim iimooraa moo'ummo; soor faraxxi gaare'uwwim lam naas duu'n lambe'iinsi firukkuuyyi moo'ummo. Luxxi gaare'e gosaasookkok daama'i farad ihukkuuyyi la'mmeka odim heemaddi farad gosaasam hee'ukko. Saxxi gaare'e gosaasookkok qadaalli farad ihukkuuyyi soo'lleka hamacar farad gosaasam hee'ukko; hundem faradim malaayyaammuwwi hee'llo'o. Anim «I moollanna, ku faraxxi gaare'uwwi ma kobi'lla» yaa Waa'i asse'amaancho xa'mmummo. Ixxim «Ku keen uulli hundinam Moollanni illagenne uullita'a awwaaddam beyyiinsi fitto'oo soorem hafachchuwwame» yukko. Heemaddi farad gosaasam hee'u gaare'i hanaa'n qaranne, qadaalli farad gosaasam hee'u gaare'i eelliinchi aagganne, hamacar farad gosaasam hee'u gaare'i woroo'n qaranne yoo uulli kollonne maram hee'ukko. Malaayyaam hee'llo'i farad fitto'i ammanenne matta'a uulla hundam daba'llanta'a moo'lleena gaaggaabbam hee'llo'o. Waa'i asse'amaanchim «Mattakka'a uulli hundam moo'llehe» yukko. Oo keenim uulli hundam moo'llo'o. Ee lasage Waa'i asse'amaanchi «Hanaa'n qaranne matto'i farad Waa'ik quunqi siggoo'isa issito'ookko» yaa i kollonne shuurukko. Waa'im iina «Baabiloo'n uullanne qeefadanto'i beyyiinsi waatto'i Heeldaayiinsi, Xoobyiinsii Yidaa'iyiinsii biraa worqaa amaddaa dassoo'n kabadoomam Safooniyaas beet Iyyoosiyaas mine mare. Ixxuwwi uwwito'i birinnee worqinnee adilla'n mare'e baxxaa Lob qeessichchi ihu Iyyooxeedeeq beet Iyyaas horoorenne isse. Gogoxxi Moollanni Waa'i ‹Summi Caafa› yamamu manchi kane; ixxi yoo beyyonnem dagaagookko; keesamaakkoo Waa'i minem baxookko. Keesamaakkoo Waa'i mine baxookkok ixxotte; lombam aa'ookko; adilla'n barcumanne afuuraatim minaadaba gassookko; adilla'n barcumannem qeessichchi ihookko. Lamim shiinnaatantamo› yoolla. Oo adilla'n mare'im Heeleemina, Xoobyina, Yidaa'iyinaa Safooniyaas beet hee'u Heeninaa tiissiishshi ihaa Keesammi Minenne afuurookko» yukko. Ee ammane qee'l uullanne hee'llam manni Waa'ik keesamaakkoo min baxamukkuuyyi hara'mmiteena waattamo; ki'nnuwwim gogoxxi Moollanni Waa'i ki'nnuwwi beyyo eese asse'ukkisa laqqakkamo; ki'nnuwwim ki'nnuwwi Moollanni Waa'ina guullitakka'a ijaajantakkolas ku hundim ihookko. Daariyoos adil ihu soo'l hiinchonne Kisleew yakkam honsi agan aagu soo'l ayyaamonne Zakkaaryaasina Waa'i wocu sagar kane. Beetee'l manni Saari'eexeeraa Reegemeleekaa ixxuwwinne hee'llo'i manninne maqirem keesammi Waa'i mine asse'llo'o; asse'llo'okim Waa'a uunxitonaa Keesamaakkoo Waa'i mi'n qeessuwwaa hiraagaanoo «Kaballi afeebe'e lobakat hiinchuwwanne issinam hee'nnummisam onti agananne onti agananne Waa'i mi'n gindanchi bikkina kichche'nnummuuyyii soommannummuuyyii hee'nnonnihe?» yita'a xa'mmitamisinattee hee'ukko. Ee Lasage i kollonne waaru Waa'i sagar kane. Ee uulli minaadab hundinaa qeessuwwinaa «Higu lamarayyem hiinchom onti aganannee lama'l aganannee soommantakku'uuyyi kichche'llakko'ok hanqinam iinattennihe? Ittakkamohii aggakkam hee'llakko'okii ki'nnuwwi gaginatteme. «Yerusaaleemii kululleetanne yoo beero'uwwii amaxxinne makkixxita'a hee'llu'uuyyi woroo'n qarannee eelliinchi aaggi lugumonnee hee'llo'i manni xumminne hee'llo'i ammane Waa'i gaassi hiraagaaninne ihaa wocu sagar kaneyyonnihe?» yukko. Waa'i Zakkaaryaasina «An gogoxxi Moollanni i minaadabina uwwummi ijaaj ‹Hanqo'i oogato oogattehe; ki'nnena'i ki'nnem haafammehee qishixxammehee. Ki'nnuwwi lambe'enne hee'oo busar meento, adaraar ooso, waaraanoo buxaa hawwoddakkotte; ki'nnuwwina'i ki'nnuwwim mat matonne jora issimmina ki'nnuwwi wodanonne sawwitakkotte› yoohane. «Ihukkaarem i minaadab xiiqqanta'a macceesimma sabimminne afare dabatto'o; maccem ifiixxito'o. Ixxuwwi wodanom ki'nnisa qoxxisso'o. An gogoxxi Moollanni Waa'i illagee'n hiraagaanonne i Ayyaaninne asse'ummi i ijaajo te'im sagaram macceesso'oyyo. Ee bikkina an gogoxxi Moollanni Waa'i ixxuwwanne lobakata quuqummo. Gogoxxi Moollanni Waa'i ‹An wocummaare macceessobee'i bikkina anim ixxuwwi uunxito macceesoommoyyo› yoolla. Hambu'llaminne fii'aa massaa ixxuwwi laqqambee'i mulli allaggi uullanne hee'llamisa issummo. Ku uullim udma'i ihukko; ku danaam uullim udma'i ihaa gatoo'isa issito'o» yukko. Gogoxxi Moollanni Waa'i sagar odim i beyyo waarukko. Gogoxxi Moollanni Waa'i «An Xiyoo'n bikkina lobakata to'achchaammo; ixxi bikkinam to'achchinne shokkaammo» yoolla. Waa'i «An Xiyoo'n kolli daba'lloommo; Yerusaaleemannem hee'oommo. Ee ammane Yerusaaleemim Hanqi Beero'o yamamookko; gogoxxi Moollanni Waa'i Duunim Keesammi Duuna yamamookko» yukko. Gogoxxi Moollanni Waa'i «Goo'nnekii meentikii lommanni Yerusaalee'm wixxixxi beyyonne gaassisam afuurookko; umura goddita'atim sikkinne mattamo. Beero'oo'mmek wixxixxi beyyi hundim lelloo oosinnee odim wo'mmaakkoohan ihookko» yoolla. Gogoxxi Moollanni Waa'i «Kuk gatto'i Isra'ee'l minaadabina xanamoobee'eka labukkaarem hanqinem iina xanamoobee'i luwwi yoohonnihe?» yoolla. Gogoxxi Moollanni Waa'i «An i minaadaba eelliinchi fi'llaanniinsii eelliinchi aaggi uulliinsii gatisoommo. Dabaraa woraa Yerusaaleemanne hee'llamisa issoommo; ixxuwwim i minaadab ikkamo; anim ixxuwwina hanqinnee muccuroominnee Waa'i ihoommo» yoolla. Gogoxxi Moollanni Waa'i «Keesammi Mine odim baximmina shooho'amu ammaniinsi ki'isaa hee'llo'i hiraagaan wocco'i ka sagara macceessakko'i keen hundim qoxxehe. Kanniinsi illageen manninaa diinatinaa malaayyi bit miqamam hee'ukkoyyo; manni hundam diina'oominne ixxi olla'anne ki'oo'isa issummi bikkina ayyi manchim xumminne aagaa firam hee'ukkoyyo. Ihukkaarem kaba ka gatto'i minaadabanne illageen issummisa issoommoyyo. An xumma wixoommo; woyinim misha mishookko. Uullanne hurbaat mutookko; iimaniinsi xeen ga'nnookko. Gatu ka minaadabina ka hundam an uwwoommo. Yihuxxi minaadabaa Isra'ee'l minaadabaa! Mulli minaadabina duunchisa xigantakka'a hee'llakko'i qaxam kaba ki'nnuwwa gatisoommo; maassom ikkakkamo; badditakkotte; qoxxehe» yukko. Gogoxxi Moollanni Waa'i «Gaassi ki'nnuwwi anno'i eese quuqisso'i ammane qishixxoo'n ixxuwwa bi'iseena murte'ummo. Ihukkaarem kaba Yerusaaleemikaa Yihuxxi minaadabaa maasse'eena murte'aammo; ee bikkina badditakkotte. Ki'nnuwwi issimmi hasisoo luwwi kane; ki'nnuwwina'i ki'nnuwwim hanqa woccehe; oogaxxi beyyonnem xumma uwwoo hanqo'i oogato oogattehe. Ki'nnuwwiinsi mat mulleka hawwodeena sawwoone; qophphanonne hide'antakkotte; ee hundam an shigigoommane» yoolla gogoxxi Moollanni Waa'i. Gogoxxi Moollanni Waa'i sagar i beyyo waarukko. Gogoxxi Moollanni Waa'i «Soo'llaannonne, ontaannonne, lama'llaannonnee tommi aganannee soommantakkam hee'llakko'i soomman Yihuxxi minaadabina makkanee liiranchi ugudaa ihookko; ee bikkina ki'nnuwwi hanqaa xummaa iittehe» yoolla. Gogoxxi Moollanni Waa'i «Mulli minaadabii lobakat beero'uwwanne hee'llam mannii Yerusaaleema waattam balli waarookko. Mat beero'i manni mulli beero'o matta'a ‹Waallehe, gogoxxi Moollanni Waa'iinsi eroomma uunxinona; neesem eehe'e malloommuulla› yitamo. Ee'isinne gogoxxi Moollanni Waa'ina otossiteenaa maasse'oo'isinam uunxiteenaa dut mannii malaayyaam minaadabii Yerusaaleema waattamo. Ee ayyaammuwwanne mulli uulli mannik tommi manchi mat Yihuxxi manchi beyyo hincita'a eddechchi kasa amadda'a ‹Waa'i ki'nnuwwinne yoo'isa macceensummi bikkina ki'nnuwwinne maqire mallona› yitamo» yukko. Isra'ee'l sulluwwikii mannikii illi Waa'anne usheexxaakkoo bikkina Hadiraak uullii Damaasqo'i beero'ii bi'oo'isa Waa'i wocu oogaxxi sagar kane. Oo oogaxxi sagarim Hadiraak uullinne gaba'llamoo Haamaataa lobakat qooroominne wo'mmaakkoo Xiiroosikaa Siidoo'n beero'uwwaa afookko. Xiiroos beero'i manni ixxuwwi gagina lobakat girbuwwa baxxo'ookko; gooqqi buchchisam biraa worqaa tuubbo'ookko. Ihukkaarem wixxaa'llo'oka hundam Waa'i elleesookko; ixxuwwi amaxxam dambalaqanne uunjookko; beero'im girinne shokkaa gii'lbuchchi ihookko. Asqaloo'n beero'i manni kaka moo'lla'a badditamo; Gaaza'i beero'i mannim kaka moo'imminne lobakata u'nnantamo; Eeqiroo'n beero'i mannim ee'isam orba'llamo; neeyyatom muttamo; Gaaza'i manni adila hooggamo; Asqaloonim udma'i ihaa gatookko. Ashdoodanne hamaaramaakkoo minaadab hee'ookko; bolxitam Fllisxee'm mannam sholliisoommo. Xiiga ittambee'isa ixxuwwi suumiinsi hooroommo; hooramu hurbaatam ittamoyyo; ixxuwwiinsi gatto'i keen i minaadabinne hamaaranta'a Yihuxxi sulliinsi mat moollisa ikkamo. Eeqiroo'n minaadab Iyyaabuus minaadaphphisam i minaadabinne hamaarantamo. Ihukkaarem an i mine bogaaniinsi egeroommo; wor amadaanim i minaadaba lagaa'llamoyyo; kaba qoto'aa egeroommo. Xiyoo'n landichche, erisa liirame; Yerusaalee'm landichche, ililihe! Oono'o, ki adil muccuraa gatisaanchoo. Maashaalli ihaa hallichchonne saa'llaa hallichchi geexanne, hallichchi wotaranne saa'llaa ki beyyo waarookko. Faraxxi gaare'e Efireemiinsi o'l faradom Yerusaaleemiinsi bi'isoommo; o'l xiyyuwwim iiqamookko. Ixxi minaadabina xumma alallaatookko; ixxi gassim dambalaqiinsi dambalaqa Efiraaxiis daajjiinsi ki'isaa uulli tochcho afookko. Odim kiinninne aagummi xiiqqi Hidi'l Saga'l bikkina yaa wo'i bee'i barenne karanto'i keeno wolabbanonne fissoommo. Karatonne neeyyatinne hee'llakkam keeno, qoxxaalli ki'nnuwwi girbanne daba'llehe. Illageen hee'ukkaanniinsi lonsaa lam suume uwwoommisa kuroommo. Yihuxxi minaadaba tokkaashshe'isa, Efireemam tokkosamoo xiyyisa awwaaxxoommo. Giriik uulli goo'n ooso qaseena Xiyoo'n goo'n ooso bisa'isa issaa asse'oommo. Waa'i ixxi minaadabiinsi hanaan ihaa caakkaa moo'amookko; ixxi xiyyuwwim banqisa darabamookko. Moollanni Waa'i xurumbi sagara macceesisookko; woroo'n qa'l hambu'llam hafachchisam marookko. Gogoxxi Moollanni Waa'i ixxi minaadaba egerookko; ixxuwwi ixxuwwi diina'a bi'issamo; diina'ika kiyyo'i kina hancaacantamo; woyi'n diqaasa agaa dimbu manchisa shuuttamo. Ixxuwwi diina'ik xiig kiti'm xiig saahinanne wo'mmaa kiti'm beyyonne dunamoohannisa dunamookko. Ee balla allaaraanchi ixxi gereebba hawwodoo joriinsi gatisoohaannisa ixxuwwi Moollanni Waa'im ixxi minaadaba gatisookko. Adilla'n mare'enne hee'oo wereeggi belecce'oo'isa ixxuwwim Waa'i uullanne belecce'llamo. Ixxuwwi danaammuwwaa mishissam keenoo ikkamo; hurbaat woraadduwwa haareechchi woyi'n diqaasim baajaammuwwa dansookko. Waa'i qaraax agannuwwanne xeena uwwoo'isina uunxehe; mashka'oomim xeenaam duuba asse'aa xeenam ga'nnisaa uulliinsi mutoo luwwa manni oosina uwwookkok ixxotte. Qophpha'n waa'i huushisoo woshsha kurookko; kiiraanim qophpha'n kaalta moo'ookko; qophpha'n haqaawwom haqaawwe'ookko. Awwaad bee'i qoxxishsham qoxxissamo; ee bikkina minaadab bi'u gereebbisa batbatitamo; awwonsaanbee'i bikkinam u'nnantamo. Waa'i «I quunqi allaraanonne aphphaakko; awwonsaanom guzumo'oommo; gogoxxi Moollanni Waa'i an i gagim i allaachchi ikko'i Yihuxxi minaadaba egeroommo; ixxuwwim iina malaayyaam o'l faraxxisa ikkamo. Ixxuwwi lambe'iinsim lamejji ki'nnisa ihaa i minaadaba gassoo awwonsaanchi firookko. Ixxuwwi lambe'iinsim dukkaa'n xiribbi'nnoo'i gassaanii o'l beyyi xiyyisa ikko'oo gaaxxi awwonsaanii ki'llamo. Yihuxxi minaadab ixxuwwi diina'a hancaacca'a gooqqi haranne eddam malaayyaam gaadaa'nnesa ikkamo; Waa'i ixxuwwinne maqir ihu bikkina oranta'a faradaanom kaa'llamo. «An Yihuxxi minaadaba malaayyaammuwwi issoommo; Yooseef minaadabam gatisoommo; ixxuwwina qishixxoommi bikkina hundam ixxuwwi uulla dabaroommo. Kanniinsi illageen uunjantobee'aannisa ikkamo; an ixxuwwi Moollanni Waa'i ihummi bikkina ixxuwwika uunxato macceesoommo. Efireem minaadab malaayyaam gaadaa'nnisa ikkamo; woyi'n diqaasa agu manchisam liirantamo; ixxuwwi shumo'i hundim ee kaachcha sawwimminne liirantamo; ixxuwwi wodanim Waa'anne liiramookko. «I minaadaba qaqqasaa weeshaa mateeyyanne wixxaa'oommo; hanqo'isam gatisoommo; kanniinsi illageen hee'llo'isam ixxuwwika xigo fikkaannisoommo. Mulli minaadaphphi lambe'enne binnaa'umta'nnim hee'llam qee'l uullanne ikka'a eese sawwitamo; ixxuwwii ixxuwwi oosii gatta'a ixxuwwi uulla daba'llitamo. Gibxi uulliinsi ixxuwwa dabaroommo; Aasoo'l uulliinsim wixxaa'oommo; uulloomim manninne wo'mmookko; Gala'aadannee Liibaanoos uullannee edda'a gattamisa issoommo. Ixxuwwi hawwi dambalaq worinne higgu'uuyyi an Waa'i hambu'lla'mmeka malaayye aphphisoommo; xillaalli Abbaayyi daajjim gogookko; bolxitam Aasoo'l mannim sholle'llamo; Gibxi adillanim bi'ookko. An Waa'i i minaadaba qoxxisoommo; ixxuwwim i sagarina ijaajantu'uuyyi eese lonsitamo» yukko. Waa'i kaka wocaakko. Liibaanoosa, giir ki digibbuwwa shokkiisoo'isina kiikka gooccuwwa fooqaa'e. Hoommuwwa, digibbuwwi ubu bikkina hibbaam haqqim bi'u bikkina «Aayye!» yitakku'uuyyi wi'llehe. Baasaa'n qilxo'uwwa, tiiwwi doom bachchamaakkoo bikkina «Aayye!» yitakku'uuyyi wi'llehe. Hixaam allaachchi beyyi bi'u bikkina allaaraan «Aayye!» yitu'uuyyi wi'llitamo. Yoordaanoos daajji gada'n tiiwwi doom bi'u bikkina hobbika muunoo kichchechchi sagara macceessehe. I Moollanni Waa'i «Durina gudu gereebba allaare. Bito aa'llo'i manni gereebba dutto'i bikkina guzumantamoyyo; biteesso'i mannim ‹Waa'i galaxxamona; amaxxaammuwwi inkaammo› yitamo; allaaraanom ihuta'n ee gereebbina qishixxitamoyyo» yukko. Waa'i «Anim kanniinsi eehid uullanne hee'oo minaadabina ayyenam qishixxoommoyyo; manni hundam ixxi beshichchinaa adilinaa higisaa uwwoommo; ixxuwwim uullooma bi'issamo; anim ixxuwwi angiinsi gatisoommoyyo» yukko. Ee bikkina durina gudisakko'i gereebba annannam u'nnanto'i keeno allaaroommo; allaachchooma allaarummuuyyi lam bicco massummo; mat bicci summa «Nuura» yummo; la'm bicci summam «Mateeyyooma» yummo. Mexxo'i mat agananne sasem allaaraanom bi'isummo. Gereebbim eese sabukko; anim ixxuwwa ceemummo. Ee lasage allaachchina «An kanniinsi eehid ki'nnuwwina allaaraanchi ihoommoyyo; letam keenim letona; bi'llam keenim bi'llona; gatto'i keenim ixxuwwina ixxuwwim itanta'a beedditona» yummo. Ee'isam hundem minaadabinnem aagummi hidi'l sagara gindeena «Nuura» yaa weeshummi i bicco iiqummo. Ee ballam hidi'l sagar gindamukko; eehid issummuuyyim moo'llam hee'llo'i u'nnanne hee'llo'i gereebbim Waa'i sagar ihukkisa laqqo'o. Anim «Iittitakkolas iina miqakkam bito miqqehe; sabbakkolasim ullehe» yummo; ee bikkina ixxuwwi sad kin bira miqqo'o. Waa'im iina «Uwwakkeena iittamakko'i danaam bito diinata dissakkam minenne disse» yookko; anim sadem kin biram massaa Keesammi Minenne yoo diinate dissakkam minenne dissummo. Ee lasage «Mateeyyooma» yaa weeshummi la'm bicco iiqummo; oohim Yihuxxaannonnee Isra'ee'l minaadaphphi lambe'ennee yoo abbaayyoom bi'ukkisa moo'iseenatte. Ee'isam Waa'i iina «Odim qawwi allaaraanchi mu'uta masse. Oono'o, uullanne i allaachcha egeroo mat allaaraancho ki'isoommo; ihukkaarem ixxi bi'ukkoka sawwooyyo; allaachchiinsi annanni ihu keenoom hasooyyo; iiqamukkokam caccooyyo; fayya'i keeninam itoo luwwa uwwooyyo. Eehid issoo bikkenne geejju keeno duraa itookko; shuku'lluwwam muransookko. Ixxi allaachcha lagoo awwaad bee'i allaraanchina aayye! Ixxi angii makkolli illii bisa'inne aphphisamona; angim hore'oomam shiihona; makkolli illim hore'em qooqona» yukko. Iimane biddiqaa'ukkok uullam qooccukkok manninam foore uwwu Waa'i Isra'eelina «Yerusaaleema ixxi kululleetanne yoo minaadabina agakkamaare tartaraa'oo woyi'n diqaas humbullisa issoommo; ixxuwwi Yerusaaleema ammaddam ammane gatu Yihuxxi beero'uwwim kibbamookko. Ihukkaarem oo balli afoohaare Yerusaaleema mulli minaadabina hundinam kee'mmoo ki'nnisa issoommo; Yerusaaleema ki'iseena yakoo hundim ixxi gaga hawwodookko; uulli minaadab hundim Yerusaalee'm minaadaba hawwodimmina mat ihaa waarookko. Ee ammane ee kee'n farado u'nnisoommo; faraadaanom machchaassoommo; diina'i farado qooqisoommo; ihukkaarem Yihuxxi minaadaba i illinne moo'ummuuyyi egeroommo. Ee ammane Yihuxxi awwonsaan ixxuwwi wodanonne ‹Gogoxxi Moollanni ixxuwwina Waa'i ihu bikkina Yerusaaleemanne hee'llam ixxi minaadab ixxeensi malaayye siiddamo› yitamo. «Ee ammane Yihuxxi minaadaphphi awwonsaano tuubamu haqqi woronne yoo gii'l midachchisaa farshimmuwwi lambe'enne aphphoo gii'llisaa issoommo; ee kululleetanne yoo mulli minaadaba bi'issamo; ihukkaarem Yerusaalee'm minaadab beero'i woronne xumminne hee'llamo. «An Waa'i Daawiit shumo'ikii Yerusaalee'm mannikii lombi Yihuxxi minaadaphphi lombiinsi lophphoobee'isa gaassaa Yihuxxi minaadabina kaachcha uwwoommo. Ee ammane an Waa'i Yerusaaleem mannina agir ihoommo; ixxuwwiinsim hore'em hoogaancho yakko'ok Daawiit qaxa qoxar ihookko; Daawiit shumo'im Waa'isa te'im Waa'i asse'amaa'nnisa ikka'a minaadaba awwonsitamo. Ee ammane Yerusaaleemanne diina'i ikka'a ki'llam mulli minaadab hundam bi'iseena ki'oommo. «Ee ammane Daawiit shumo'ii Yerusaalee'm minaadabii qishixxatinnee uunxaxxi ayyaaninnee wo'mmitamisa issoommo; qasso'i eesem moo'llamo; mexxo'i mat beetina wi'lloo manchi qaxa wi'llitamo; won beetina iranaa wi'lloo manchi qaxam iranta'a wi'llitamo. Ee ammane Yerusaaleemanne macceesamoo wi'l Maagido'i biir uullanne Hadaadiriimoonina wi'llakko'i wi'llinnoo'an ihookko. Uullanne hundannem wi'l ihookko; manni hundim moolli moollinnem wi'llookko; ixxuwwi meentim ixxuwwi gagina wi'llookko; ee'isinne Daawiit shumo'ik abaroos ixxuwwi meentinne maqirem Naataan shumo'ik abaroos ixxuwwi meentinne maqirem Leewe'i shumo'ik abaroos ixxuwwi meentinne maqirem, Shiimi'i shumo'ik abaroos ixxuwwi meentinne maqirem moolli moollinne ikka'a wi'llitamo. Gatu manni shumo'im abaroosisinne baxxamanta'a wi'llitamo; ixxuwwi meentim mullam annannikka'a kichchechchinne wi'llitamo» yukko. Gogoxxi Moollanni Waa'i «Ee ayyaamo Daawiit shumo'oo Yerusaalee'm minaadabaa baaxiiliinsii haashaaranchiinsii muccussoo wo'i bu'i fooqookko. Ee ammane qophpha'n waa'uwwika summa uulliinsi bi'isoommo; od ixxuwwa sawwoo hee'ooyyo; qophpha'n hiraagaanoo jor ayyaannuwwam uulliinsi bi'isoommo. Odim ayyim hiraago wocuta'n ixxi annii amaa «At Waa'i summinne qophphano woccaattoo bikkina leh hasisookko› yitamo; hiraago wocuta'nnim ixxi annii amaa qassa'a shitamo. Ee doollenne ‹An hiraagaancho› yoo hundim moo'u kaaltanne tuurookko; manna huushiseenam hiraagaan edde'oo oddaam eddechcha edde'ooyyo. Ixxim ‹An oosoommaniinsim ki'isaa uulla abuullaancho bagaan hiraagaanchoyyo› yookko. Mat manchi ‹Eehannah ku ki orachchonne yoo mateenchi mahane?› yaa xa'mmoohaare ‹I beshichchi minenne omaraammoohane› yaa dabarookko» yukko. Gogoxxi Moollanni Waa'i «Bisa'a, iina gassaanchi ihu allaaraanchonne ki'e! Gereebbi binnihona allaaraanchooma aphphise; anim hofkeenonne i woda ki'isoommo. Uullanne yoo minaadabiinsi sas suumiinsi lam suumoom aphphisamaa lehookko; ihukkaarem sas suumiinsi mat suum gatookko. Ee saxxi suumooma giiranne edoommo; kin bir giiranne muccuroohaannisa worqim hawweenamoohaannisa muccussoommoo hawweenoommoo; eehanniinsi lasonne ixxuwwi eese uunxitamo; anim ixxuwwina dabachcha uwwoommo; ixxuwwam ‹I minaadaba› yaa weeshoommo; eesem ‹Ni Moollanni Waa'a› yitamo» yukko. Waa'ik oogaxxi ayyaam afaakko; ee ammane Yerusaaleem beero'i bogamookko; ki'nnuwwi illi moo'ukkuuyyi bogaan massito'i luwwa baxxantamo. Waa'i Yerusaalee'm beero'o qasoo'isina mulli minaadab hundam wixxaa'aa worookko; beero'oomim diina'inne amadamookko; minneewwim bogamookko; meentonnem malaayyinne bushaalli baxo baxakkamo; minaadaphphekim kolli qeefadamookko; ihukkaarem gatto'i qaxim beero'i woriinsi fittamoyyo. Ee lasage Waa'i oranne qasamoo'isam ee mulli minaadaba qaseena ki'ookko. Ee balla Waa'i Yerusaaleemiinsi eelliinchi firoo kollinne yoo wee'l duunanne uullookko. Wee'l duunim eelliinchi firoo kolliinsi aagoo kolli afeebe'e lam beyyonne baxxamamaa lambe'enne haraar cebbi qooccamookko; ee bikkina duunoo'mmek kollii hanaa'n qaranne kollii woroo'n qaranne shiqookko. Ki'nnuwwim ee duuna lam beyyonne baxxansaa Axaal afeebe'e afoo cebbi worinne higgakka'a gibbakkamo. Yihuxxi adil hee'u Ooziyaan doollenne uulli huxe'u ammane gaassi ki'nnuwwi anno'i gibbo'aannisa gibbakkamo; i Moollanni Waa'i keesanto'oo keeno awwonsaa waarookko. Ee ammane barad, hadaddii tuunsii hore'em hee'ooyyo. Ballim caakkam ihukko tuunsi bee'i annanni balli ihookko; oo ballim Waa'i illagenne la'amaakkoo balli ihookko. Hiimim caakki ihookko. Ee ammane Yerusaaleemiinsi heechcha uwwoo wo'i firookko; ee wo'ik kollii Sooqixxi dambalaqanne kollii Meedeteraaniyaa'n dambalaqanne hooraa daadookko; billee hagayyee hundam daadukkuuyyi hee'ookko. Ee ammane Waa'i heer uullanne adil ihookko; mannim xale'i ixxi Waa'i ihukkisa amma'nnookko; ixxi summi xale'em weeshookko. Hanaa'n qarinne Geebaa'iinsi ki'isaa Yerusaaleemiinsi woroo'n qarinne higaa Riimoon afeebe'e yoo uulli shiraashiramaakkoohan ihookko. Yerusaaleem kululleetanne yoo uulliinsi hanaan qoffookko; beero'oomim Biiniyaam goociinsi ki'isaa gaassi gooc kollinne lamejji gooc afeebe'ee ee'isam Hanaani'eel gimbiinsi ki'isaa adi'l mi'n woyina ciinsakkam beyyi afeebe'ee iim qoffaa qoxxaa hee'ookko. Yerusaaleem lobakat manni hee'oo beero'i ihookko; kanniinsi eehid bichchi ixxuwwanne afooyyo; oo minaadabim kichchechchi bee'eka xumminne hee'ookko. Yerusaaleeminne orantam minaadaba Waa'i boobaninne aphphisookko; foorinne hee'llu'uuyyim ixxuwwik orachchi shamookko; illi ilbarennem shamookko; allabim aqoronnem shamookko. Ee ammane Waa'i mannanne dambaqaa baachchaa asse'ookko; ee bikkina manni annannichchim gadanonne yoo mancho amadaa ixxuwwina'i ixxuwwim qaxxantamo. Yihuxxi mannim Yerusaaleemannette ihaa qasamookko. Ixxuwwi kululleetanne yo'i mulli minaadaphphi amaxxi hundam bogga'a massitamo; bogga'a massitam luwwim worqa, kin biraa eddechchaa ihukkuuyyi xigiinsi hanaan ihaakkoohan ihookko. Odim eehido'i booban diina'i wiiddananne yoo faradonne, baqullanne, gaameela'anne, hallannee mulli fooraam diinatannee ubookko. Ee lasage Yerusaaleema qasso'i mulli minaadaphphek lehiinsi gatto'i qax adil ihu gogoxxi Moollanni Waa'ina otossiteenaa daas uguda lonsiteenaa hiinchina hiinchina Yerusaaleema mattamo. Adil ihu gogoxxi Moollanni Waa'ina otossiteena Yerusaaleema waattambee'i minaadab hee'ulas ixxuwwi uullanne xeen ga'nnooyyo. Gibxi uulli mannim ugudaoma lonsiteena Yerusaaleema waatta'a Waa'i illagenne hincimma hassobeelas «Yerusaaleema mallaa daas uguda lonsinoommoyyo» yitam mulli minaadabanne afoo booban ixxuwwannem ubookko. Daas uguda lonsitambee'i Gibxi uulli mannannee mulli minaadabannee afoo guzumo'i kane. Ee ammane faraxxi doolanne hundannem «Waa'ina Keesamaakkoohane» yoo mare'i kitaabamookko; Keesammi Minenne yoo sarakkam qure'uwwim kiti'm beyyonne yoo saahi'nnesam keesamaakkoohan ihookko. Yerusaaleemannee Yihuxxi uullannee yoo qure'uwwi hundim gogoxxi Moollanni Waa'ina keesamaakkoohan ihookko. Kitima hincaa'llam manni hundim qure'uwwika hofqaxam massita'a kiti'm maara sattamo; ee ammane gogoxxi Moollanni Waa'i minenne kanniinsi eehid Kana'aa'n manni ayyim hee'ooyyo. Waa'i hiraagaanchi Milkiyaasanne Isra'ee'l minaadabina wocu hiraaqqi sagar Kane. Waa'i ixxi minaadabina «An ki'nnuwwa iittaammo» yoolla. Ihukkaarem ixxi minaadab «At neese iittitoo'isa mahinne lanqoommo?» yitamuulla. Waa'im «Eesa'aa Yaaqoobii abbaayyuwwi hee'llo'o; ihukkaarem an Yaaqoobaa ixxi shumo'oo iittummo. Eesa'aa ixxi shumo'oo sabummo; Eesa'aka duunaam uulla udma'i uulli issaa dabassummo; uulloomam wengereelli daabbaroo beyyi issummo» yaa dabarukko. Eedoo'm manna yamantam Eesa'i shumo'i «Ni beero'uwwa gindito'ookko; ihukkaarem neese daballaa banxoommo» yito'aare odim Waa'i «Ixxuwwi baxxamo; ihukkaarem an gindoommo; minaadab hundim ee uulla ‹damiqqi uulla› ee uullanne hee'oo mannam ‹Waa'i heer heerinam quuqaakkoo minaadaba› yita'a weeshshamo» yoolla. Ki'nnuwwim kaka ki'nnuwwi illinne moo'llakka'a «Waa'i Isra'ee'l uulliinsi haxonnem malaayyaamo!» yitakkamo. Gogoxxi Moollanni Waa'i qeessuwwina «Qachchi anna, awwaadaanchim ixxo gassoo moollanna lonsookko; oono'o an ki'nnuwwina anna; eehannah mahina eese lonsitakkamoyyo? ki'nnuwwinam an Moollanna; mahindu iina lomba uwwitakkamoyyo? Ki'nnuwwi eese gaddakko'oollayyonnihe; ihukkaarem ‹Neese keese gandummok Mahinnette?› yitakka'a eese xa'mmitakkamuulla. Oono'o, iina kitima hincaa'akkam beyyonne haashaaramaakkoo hurbaaxxi kitima hincaa'llakku'uuyyi ‹Kiina kitima hincaa'akkam beyyo haashaassinummok hinkidette?› yitakka'a xa'mmitakkamuulla; ki'nnuwwi haashaassitakk'ook iina kitima hincaa'akkam beyyo ‹Gadamaakkoohane› yitakka'a sawwimminnette. Ee'isinne qooqa, jabbaanchoo dim diinatee kitimina hincaa'llakkamaare matem hawwojjam issitakko'oka labooyyonnihe? eehido'i diinate ki'nnuwwi moollanno'ina irfo'i issitakka'a hincaa'llakkota'n liiramaa aa'ookkokaa galaxxookkokaa laboohonnihe?» yoolla. Gogoxxi Moollanni Waa'i «Qeessuwwa! Ka hundam issitakka'a lasage Waa'i ki'nnuwwina biijooma issoo'isina uunxitakkota'n ki'nnuwwi uunxato aa'oo laboohonnihe? Oohim ki'nnuwwi huushammato» yoolla. Gogoxxi Moollanni Waa'i «Iina kitima hincaa'akkam beyyonne awwaad bee'i giira giittakkamaanniinsi Waa'i mi'nneka gooca xufookkok ki'nnuwwiinsi mat manchim siidamaakkoohan yakkota'n, An ki'nnuwwanne liiramoombee'i bikkina iina hincaa'llakkam hurbaaxxi kitima aa'oommoyyo. Oono'o, ka uulli minaadab hundim tochchiinsi tochchi afeebe'e iina lomba uwwitamo; hannonnem iina aduruusa wiriissitu'uuyyi muccur kitima hincaa'llamo; minaadab hundim eese lonsitamo. Ihukkaarem ki'nnuwwi ‹Waa'ina kitima hicaa'akkam beyyi haashaaramaakkoohane› yitakka'a gadamaakkoo kitima hincaa'llakko'i ammane haashaassitakko'ookko. Oono'o, ki'nnuwwi naacantakku'uuyyi ‹Ku hundim hoogisoohane› yitakkamo; ga'mmeka, dima te'im jabbaanchi diinate kitimina hincaa'llakkamo; an eekka aa'oommoka labissakka'ahennihe? Ixxena yoo diinatiinsi iina uwweena aagu saga'llisanne uwweena laboo muccur diinat hee'ukkuuyyi miiqisoo diinate iina kitim issaa hincaa'oo manchi duumamaakkoohan ihona; mashka'oomam an lombaam adila. I summim minaadaphphi beyyonne hundannem baddamaakkoohane» yoolla. Gogoxxi Moollanni Waa'i Qeessuwwa «Kabadem ku ijaaj uwwamukkok ki'nnuwwinatte. Ki'nnuwwi baxxakkam baxinne hundinnem eese lonsimmi hasisookko; ihukkaarem i sagarina ijaajantakobeelas ki'nnuwwi hanenne duuncha asse'oommo; ki'nnuwwi maassom duunchanne dabaroommo; eekkam issoommok i ijaajo ki'nnuwwi tiironne sawwitakkobee'i bikkinatte. Oono'o, ki'nnuwwi mashka'inne an ki'nnuwwi ooso guzumo'oommo; kitimina hincaa'llakko'i diinaxxi oreetam ki'nnuwwi illenne binnaa'oommo; hacca uunjakkam beyyonnem uunjantakkamo. Ee ammane ka ijaajo hundam uwwummok anette ihummisa laqqakkamo; ee mashka'inne qeessuwwi ikko'i Leewe'innee ixxi shumo'innee aagummi hidi'l sagar qoxxaakkoohan ihaa hee'ookko» yukko. «An ixxuwwina uwwummi saga'l sagar heechchanee xummanee; eekka ixxuwwina uwwummok eese lonsitamisinatte hee'ukko; eeyya ee ammane hanqo'isam eese baddimminne i summa lonsitu'uuyyi hee'llo'ookko. Ixxuwwi huushammat ihoo'n hanqa losissam hee'llo'o; iinninne maqirem shiinnaatanta'a hee'llo'ookko; ixxuwwi er baxo baximmi xale'i ihoo'n mulli keenim jor baxiinsi daba'llitamisa issitam hee'llo'o. Ee bikkina ixxuwwi issitam hee'llo'isanne Waa'ika hanqo'i lachcha losisimmi qeessuwwi baxo. Qeessuwwi gogoxxi Moollanni Waa'ina asse'amaan ikko'i bikkina i doo'l mada'e ihukkisa losimmina minaadab qeessuwwi beyyo marimmi hasisookko. «Ihukkaarem ki'nnuwwi hanqo'i googiinsi qee'llitakko'ookko; ki'nnuwwi losishshinnem lobakat keeno huushissakko'ookko; ki'nnuwwinne maqire aagummi hidi'l sagaram ginditakko'ookko. Iina ijaajantakkobee'i bikkinaa losissaku'uuyyim manna gudaanchoominne moo'llakkobee'i bikkinaa anim hundem minaadaphphi illagenne gadantakko'oo keenoo sholle'llakko'oo keenoo issoommo» yoolla. Neese hundim mat anni oosoyyonnihe? Neese hundam qooccukkokdu matem Waa'ayyonnihe? Eehannah gaassi niyyanno'inne hidi'l sagara gindinummuuyyi neesena'i neesem amma'nnammoombee'k mahinatte? Yihuxxi minaadab Waa'ina aaggo'i hidi'l sagara gindita'a Yerusaaleemannee uulloom hundoomannemii shigigaa'oo haashaarammi luwwa baxxo'ookko; Waa'i iittoo ixxi mine haashaassito'ookko; ixxuwwim qophpha'n waa'ina otossoo meento eebbo'o. Kaka issookkoka hundam Waa'i Isra'ee'l minaadaphphi mateeyyoomiinsi hoorona! Ni minaadab gogoxxi Moollanni Waa'ina hincaa'oo kitimanne exxoobee'isa firukkisam gatona! Odim Ki'nnuwwi «Indiiddinne, wi'llinnee kichchechchinnee Waa'ina kitima hincaa'akkam beyyo ifiissakkamo; mashka'oomim Waa'i ki'nnuwwika kitima aa'oobee'i bikkinatte. «Mahina ni kitima aa'ooyyo?» yitakka'a xa'mmitakko'ookko. Mashka'oomim woraaddaninne eebbakko'i hidi'l saga'l meentina aaggakko'i hidi'l sagara ginditakko'ookko. Waa'im ki'nnuwwi lambe'enne naqaash hee'ukko. Waa'i ki'nnuwwinaa ki'nnuwwi meentinaa mat orachchii mat sawwitii hee'oo'isa issaa hee'ukkoyyonnihe? Ka'isindu ixxek sawwit mah hee'ukko? Ixxek horoor sawwit Waa'ina minaadab ikko'oo ooso qattakkamisinatte hee'ukko. Ee bikkina ki'nnuwwi annannichchim ki'nnuwwi meentina aaggakko'i hidi'l sagara qooxxitakka'a ege'llehe. Isra'ee'l Moollanni Waa'i «An manchikaa meentichchokaa annanni ihimma saboommo; eddechcha oogato boqqissimminne ifiissimmam saboommo; ixxi orachcho eddechchinne ifiisoo'isa damiga baxaa ifiisoo manchom saboommo. Ee bikkina amma'nnancha hoogimmiinsi ege'llehe» yoolla. Waa'a! Ki'nnuwwaanninne awwaad bee'i woshshinne hoogissakko'ookko; ihukkaarem hoognisummok mahinnette?» yitakka'a xa'mmitakkamuulla; ixxo hoogissakko'ok «Jor luwwa issitam keen hundim gogoxxi Moollanni Waa'i illagenne xabbeen keeno; hore'oomam ixxuwwanne liiramookko» odim «Hanqo'i oogato oogatoo Waa'i hannonne yookko?» yitakka'a xa'mmimminnette. Gogoxxi Moollanni Waa'i «I googo axisoo'isina i asse'amaancho gaassaa asse'oommo; ‹Ka lasage waarookko› yitakka'a egettakkam Waa'i mi'n beyyo Moollanni dangonne waarookko. Moo'llakkeena quluxxakkam I hidi'l saga'l aasse'amaanchi hanqinam waarookko» yukko. Ihukkaarem ixxi, aanshakkam saamu'nnisaa xaara bukkoo woqqaacci gii'llisaa malaayyaamo; ixxi moo'amoo ammane ixxi illagenne uulleena xanookkok bee'i bikkina ixxi waaroo balla uulleena xanookkok ayyim bee'e. Ixxi bira bukkaa muccussoo manchisa oogato muccusseena afuurookko; xaara bukkoo manchi biraa worqaa bukkaa muccussoo'isam Moollanni asse'amaanchim ixxi qeessuwwa muccussookko; ixxuwwim ee lasage Waa'ina hanqo'i kitima hincaa'llam keen ikkamo. Yihuxxekii Yerusaalee'm minaadabii hundim gaassi issitam hee'llo'isam ixxuwwi hincaa'llam kitimim Waa'a liiransoohan ihookko. Gogoxxi Moollanni Waa'i «Oogateena an ki'nnuwwina beyyo waaroommo. Anim gennaanonne, saa'aanonne, qophphano naqqassam keenonne, manna baxissa'a malaayyi bito qawwiissa'a hoottam keenonne, busar meento, adaraar oosoo waaraanoo u'nnisam keenonnee eese badditambee'i keenonnee an qaqqisaa oogatoommo. Gogoxxi Moollanni Waa'i «An Waa'i hore'em dabassamoommoyyo; ee bikkina Yaaqoob shumo'o! Kabad afeebe'em guullitakka'a bi'llakko'oyyo. Gaassi ki'nnuwwi anno'i doolliinsi ki'isaa i Seeriinsi qee'llitakko'ookko; i Seeram egettakko'oyyo. ‹I kollonne daba'llehe; anim ki'nnuwwi kollonne daba'lloommo› yummo. Ihukkaarem ki'nnuwwi ‹Ki kollonne daba'llimmina maha issimmi hasisookko?› yitakkamuulla. Anim ‹Manni Waa'iinsi game'eena xanoohonnihe? Hanqinam labooyyo; ihukkaarem ki'nnuwwi iinniinsi game'llakko'ookko. Ki'nnuwwi «Neese kiinniinsi game'nnummok maruwwa?» yitakko'ookko. Iinniinsi game'llakko'oka'i tommiinsi matoo ludoo miqimma sabimminnette› yummo. Ki'nnuwwi, Isra'ee'l minaadab hundim iinniinsi game'llakko'i bikkina duumantakko'ookko. I minenne itakkam hurbaat hee'oo'isina, eesem eehanninne keentakkeena tommiinsi mato i gootaranne aagissehe; ki'nnuwwi eekka issitakkolas an odim iima'n gooca fooqaa'aa er maasso hundam lonsaa ki'nnuwwina uwwumbeelas eehanninne eese keentakkeena xantakkamo. Ki'nnuwwik hurbaat wonatinne bi'oo'isa issoommoyyo; woyi'n kaashshim cinnakkooyyo. Ee ammane uulli minaadab hundim ki'nnuwwina ‹Maasse'amaakkoo minaadaba!› yita'a woccamo; mashka'oomim ki'nnuwwi uulli hee'immina makkaakkoohan ihookko» yoolla. Waa'im «I hanenne iggimmi sagara woccakkamuulla; odim ‹Neese ki hanenne mah jor woshsha woncummo?› yitakka'a xa'mmitakkamuulla; ki'nnuwwi ‹Waa'ina awwaadimmanne mah awwaad yookko? Ixxi ijaajo egerimmii gogoxxi Moollanni Waa'i illagenne kichche'aan iihimmii maha awwaadookko? Moo'nnoommis ihukkaa'lleensi oono'o, bolxitam keen liiranchinne hee'llamo; eehannah jora baxxam keen goddaan ikka'a Waa'a keenimmi maha hawwodanto'o› yitakku'uuyyi woccakkamuulla» yukko. Ee ammane Waa'a badditam manni issena'i issem atooratto'o; Waa'im ixxuwwi woshsha erisa macceesukko; Waa'a badditam kee'nnekii ixxi summam lonsitam keennekii summi xadantambee'isa ixxi illagenne yoo kitaabanne kitaabamaakko. Gogoxxi Moollanni Waa'i «Ixxuwwi i keen ikkamo; an baxoommi ammane ixxuwwi xale'i iina annanni minaadab ikkamo; anni ixxena awwaadoo qachchina urimma issoo'isam anim ixxuwwina urimma issoommo. Iina awwaadoo er manchina issamoo er luwwaa iina awwaadoobee'i boqqi manchi hanenne afoo jor luwwaa i minaadab la'mmaagem moo'llamo» yoolla. Gogoxxi Moollanni Waa'i «Oono'o, bolxitam keenii jora issitam keenii gaaphphisa giiranne shokkitam balli hincaakko; ee ammane ixxuwwiinsi niggam ihukko caafa gatisoo'n shokkiisookko. Ihukkaarem iina ijaajaantakkam ki'nnuwwina muccuroo'm eelliinchi firookko; ki'nnuwwinam fayya'ooma uwwookko; wolabbanom fitta'kka'a karamu beyyiinsi fatakamaa liiranchinne daabbaroo wee'ichchisa ikkakkamo. An baxoommi ee ayyaamonne boqqi keen hundam kaa'llakkamo; ki'nnuwwi lokki caamma'i lugumonnem di'llisa ikkamo» yoolla. «Isra'ee'l minaadab hundim eekka awwontamisina i awwaadaanchi Muse'ena siina'i duunanne uwwummi seeraa ijaajoo sawwi'llehe. «Ihukkaarem lophphaakkoo baddisoo Moollanni balli waareena illageen hiraagaanchi Eeliyaasa ki'nnuwwi beyyo asse'oommo. Ixxim waaraa ki'nnuwwi uulla bi'isoombee'isa annanni ikka'a hee'llo'i anno'ii oosii mat tiir ikka'a hara'mmantamisa issookko» yoolla. Abrihaamiinsii Daawiitiinsii qaramu Yesuus Kiristoos qaranchi shumo'i lugum kane. Abrihaam Yisaaqa qarukko; Yisaaqim Yaaqooba qarukko; Yaaqoobim Yihudaa ixxi abbaayyuwwaa qarukko. Yihudim Faareesaa Zaaraanaa lamem oosom Ti'imaarenne qarukko. Faareesim Heesroona qarukko; Heesroonim Araama qarukko. Araamim Aaminaadaaba qarukko; Aaminaadaabim Na'aasoona qarukko; Na'aasoonim Salmoona qarukko. Salmoonim Ra'aabenne Boo'eeza qarukko; Boo'eezim Ruutanne Iyyoobeeda qarukko; Iyyoobeedim Issayye qarukko. Issayyem adil Daawiita qarukko; Adil Daawiitim Ooriyotanne hee'llo'i meentichchonne Salamoona qarukko. Salamoonim Roobi'aama qarukko; Roobi'aamim qarukko; Abiiyim Asaafa qarukko. Asaafim Yoosaafixa qarukko; Yoosaafixim Iyyooraama qarukko; Iyyooraamim Ooziya qarukko. Ooziyim Iyyo'aataama qarukko; Iyyo'aataamim Akaaza qarukko; Akaazim Hizqiyaasa qarukko. Hizqiyaasim Minaasa qarukko; Minaasim Amooxa qarukko; Amooxim Iyyoosiyaasa qarukko. Isra'ee'l minaadab qeefadanta'a Baabiloo'n uulla matto'i doollenne Iyyoosiyaas Ikkooniyaanaa ixxi abbaayyuwwaa qarukko. Qeefadanta'a Baabiloona matta'a lasage Ikkooniyaanim Saalaataala qarukko; Saalaataalim Zarubaabeela qarukko. Zarubaabeelim Abiyooda qarukko; Abiyoodim Eliyaaqeema qarukko; Eliyaaqeem Azaara qarukko. Azaarim Saadooqa qarukko; Saadooqim Akiima qarukko; Akiimim Eliyooda qarukko. Eliyoodim Ali'aazara qarukko; Ali'aazarim Maataana qarukko; Maataanim Yaaqooba qarukko. Yaaqoobim Yooseefa qarukko; Yooseefim Maaraame xeehaa hee'ukko. Isem Kiristoosa yamamu Yesuusa qatto'o. Abrihaamiinsi ki'isaa Daawiitanne afeebe'e tommoo soor qarancha; Daawiitiinsi ki'isaa Baabiloo'n uulli manni qeefaddo'i doollenne afeebe'e tommoo soor qarancha. Baabiloo'n uulli manni qeefaddo'i doolliinsi ki'isaa Kiristoos qaranchanne afeebe'e tommoo soor qarancha. Yesuus Kiristoos qaramukkis kidette; ixxi ama Maaraame Yooseefina xeehanta'a hee'llu'uuyyim ladiisantoo'nnim Keesammi Ayyaaniinsi lamfoorette ikka'a siidanto'o. Yooseefim er manchi hee'u bikkina manni illagenne ise tuussiiseena hasukkoyyo. Ee bikkina maaxaqqanne ureena sawwukko. Ee woshsha sawwukkuuyyi hee'onam Moollanni asse'amaanchi haqaawwonne moo'amaa «Daawiit beet Yooseefa, at xeekkitti Maaraame lamfoorette ikko'ok Keesammi Ayyaaniinsette ihu bikkina ise eebbeena baddititte. Isem goonchi beeto qattamo. Ixxim ixxi minaadaba baaxiiliinsi gatisoo bikkina ixxeka summa Yesuusa yitaa weeshshootto» yukko. Oo hundim ihukkok hiraagaanchinne ihaa Waa'i «Oono'o, baajaam landichcho lamfoorette ikkamo; goonchi beetom qattamo. Summam Amaanu'eela yakka'a weeshakkamo» yaa wocukkok wo'mmoo'isinatte. Amaanu'eela yimmim «Waa'i niinninnette» yimma. Yooseefim diriiriinsi baqu ammanenne Waa'i asse'amaanchi kurukkisam ixxi xeehu Maaraame ixxi arette issaa eebukko. Ihukkaarem won beeto qatteebe'i afeebe'e eebaqqanchi edancha edamukkoyyo. Yooseef ee qaramu ciilichchika summa «Yesuusa» yaa weeshukko. Heeroodis adilla'n doollenne Yihuxxi uullanne Beeteelihee'm beero'onne Yesuus qaramukko. Ee ammane boollaanka moo'lla'a luwwa laqqam mareesaanim eelliinchi firiinsi Yerusaaleema waatto'o. Oo mannim «Qaramu Ayihuxxi adil hannonnette? Eelliinchi firinne ixxi boollaankichcho moo'nnaa ee adilina otossineena waallaammo» yita'a xa'mmito'o. Adil Heeroodisim ee woshsha macceesaa lobakata muggukko. Yerusaalee'm beero'onne hee'llam manni hundim ixxesam muggito'o. Ee bikkina qeessa awwonsaanoo seera losisaanoo Heeroodis wixxaa'aa «Waa'i doo'llaakkoo Kiristoos qaramookkok hannonnette?» yaa xa'mmukko. Ixxuwwim «Kiristoos qaramookkok Yihuxxi uullanne Beeteelihee'm beero'onnette. Mashka'oomim hiraagaanchi ‹Yihuxxi uullanne siidantoo Beeteeliheema, i minaadab Isra'eela gassoo awwonsaanchi kiinniinsi firoo bikkina Yihuxxi uullanne la'amu beero'uwwiinsi hore'em hoffe'llooyyo› yaa kitaabaakko» yita'a dabatto'o. Heeroodisim eelliinchi firiinsi waatto'i qoor manna ayyim la'oobee'isa weeshisaa boollaankichchi ixxuwwina moo'amu ammane xa'mmaa qoossukko. Ixxim ee mannina «Mattakka'a ciilichchooma qoxxitakka'a hassehe; hassakka'a siiddakkam ammane anim maraa ixxena otossoommisina iinam kullehe» yaa Beeteelihee'm beero'o asse'ukko. Ixxuwwim mine aagga'a ciilichchi ixxi am Maaraamenne maqirem yoo'isa moo'lla'a guruphphita'a ciilichchina otossito'o. Ixxuwwi saaxinnuwwam fooqaa'lla'a worqa, aduruusaa karbe'e yakkam enjaa iriffo'o. Ixxuwwim la'mmaagge Heeroodis beyyo daba'llitambee'isa haqaawwonne Waa'i kurukkaare mulli googinne ixxuwwi uulla daba'llita'a matto'o. Oo qoor manni matta'a lasage Waa'i asse'amaanchi haqaawwonne Yooseefina moo'amaa «Ciila sheena Heeroodis hasoo bikkina ka beyyiinsi ki'llaa ciilaa amaa amaddaa Gibxi uulla gibbaa an kureembe'i afeebe'e eekke'enne afuure» yukko. Ee bikkina Yooseef hiimonne ki'aa ciilaa amaa amadaa Gibxi uulla maraa Heeroodis leheebe'i afeebe'e ee beyyonne afuurukko. Eehid ihukkokim hiraagaanchinne Waa'i «I beeto Gibxi uulliinsi weeshummo» yukkok wo'mmoo'isinatte. Heeroodisim oo qoor manni qawwiisso'isa qoossaa la'u ammanenne lobakata nadadukko. Ee bikkina gaadaano asse'aa Beeteeliheemannee Beeteelihee'm kululleetannee yoo gattuwwi hundannem qaramukkaanniinsi lam hiincho ihu ciilluwwikaa lam hiinchiinsi woroon yoo ciilluwwikaa goo'n ooso hundam shisiisukko. Eeham isseena xanukkok boollaanka moo'lla'a luwwa laqqam mareesaano xa'mmaa ammane qoossukkisinnette. Hiraagaanchi Ermiyaas «Wi'llikii lobakat laachchikii sagar Raama'i beero'onne macceesamukko; Raaheelem is oos bikkina wi'llito'o; ee lehu oos kichchechcham iyyaqqiteena xanto'oyyo» yaa wocu woshshi wo'mmukko. Heeroodis lehaa lasage Waa'i asse'amaanchi Yooseefina Gibxanne haqaawwonne moo'amaa «Ciila shiteena hassam manni leto'i bikkina ki'llaa ciilaa amaa amaddaa Isra'ee'l uulla daba'lle» yukko. Yooseefim diriiriinsi baqaa ciilaa amaa amadaa Isra'ee'l uulla daba'llukko. Ihukkaarem adil Heeroodis lehaa lasage Heeroodis beet Arkeeliwoos Yihuxxi uullina adil ihukkisa Yooseef macceesu ammanenne ee kollo marimma baddukko. Odim Waa'iinsi haareechchi sawwit Yooseefina haqaawwonne uwwamu bikkina Galiila marukko. Ee uulla maraa Naazireeta yakkam beero'onne afuurukko; oohim ihukkok hiraagaan «Naaziraawekkichcho yamamaa weeshamookko» yito'ok wo'mmoo'isinatte. Ee ammane Xammaqaanchi Yohaannis Yihuxxi uullanne yoo udma'anne alallaatukkuuyyi waarukko. Ixxim «Waa'ik adillan hincu bikkina baaxiilo biiraa yitakka'a daba'llehe» yaa alallaatimma asheerukko. Oohim Waa'i hiraagaanchi Issaayyaasinne Yohaannis bikkina « ‹Moollannina googo gudissehe; googguwwam shiraashillehe› yukkuuyyi udma'anne laaroo manchi sagara» yaa wocukkane. Yohaannisim edde'am hee'u eddechchi gaameela'i oddiinsi baxamaakkoohan hee'ukko. Ixxi lamadom omachchiinsi baxamu saqqinne lade'am hee'ukko. Itam hee'u hurbaatim qawwaawwaa udma'i uulli maraboo hee'ukko. Ee ammane Yerusaalee'm beero'iinsi, Yihuxxi uulliinsii Yoordaanoos daajji gadanonne yoo uulliinsii hundiinsim manni ixxi beyyo waaram hee'ukko. Ixxuwwim baaxiilo biiraa yito'aare Yoordaanoos daajjenne Yohaannis xammaqukko. Lobakat Farisaawe'ii Saduuqaawe'ii xammaqanteena ixxi kollonne waattamisa Yohaannis moo'u ammanenne ixxuwwina «Ki'nnuwwi hamashshi ooso! Waaroo Waa'i quunqiinsi gibbakkamisina ki'nnuwwina ayyi kurukko? Baaxiiliinsi daba'llitakko'isa moo'isoo danaam baxo baxxehe. ‹Neese Abrihaamina ooso› yitakku'uuyyi huushantakkotte. An ki'nnuwwina kuroommo; Waa'i ka kiniinsim Abrihaamina ooso ki'iseena xanookko. Oono'o! Meesaan haqqi lugumonne gudaakko. Kabadem danaam misha mishoobee'i haqqi hundim muramaa giiranne edamookko. Baaxiiliinsi daba'llitakko'isina mare'i ihona an ki'nnuwwa wo'inne xammaqoommo. Ihukkaarem iinniinsi lasage waarookkok Keesammi Ayyaaninnee giirinnee xammaqookko. Ixxim iinniinsi hore'em lobane; an ixxeka caamma'oomam iyyeena laboombee'ane. Hurbaata muccusseena axuruunsoo maanshim ixxi angannette; hurbaatooma annanni issaa muccussaa lasage gootaranne issookko. Ihukkaarem bura'ooma xoo'oobee'i giiranne shokkiisookko» yukko. Ee ammane Yohaannis ixxo xammaqoo'isina Galiiliinsi Yohaannis beyyo Yoordaanoos daajje Yesuus waarukko. Ihukkaarem Yohaannis «At eese xammaqimmi hasisookko bagaan at hinkid i beyyo waattitto?» yaa hooreena hasukko. Ihukkaarem Yesuus Yohaannisina «Muccuroo'm baxo hundam neese baximmi hasisoo bikkina kaba ure» yaa dabarukko. Yohaannisim Yesuus wocu woshshanne iittamu bikkina Yesuusa xammaqukko. Yesuus xammaqamaa wo'i woriinsi firukkisam iiman fooqukko. Waa'ik Keesammi Ayyaanim handarekkichchi kobi'llanne dillaa Yesuusanne afuurukkuuyyi moo'ukko. Ee ammanem «An iittoommi eese liiransoo i beet kane» yoo sagar iimaniinsi waarukko. Ee lasage Sheexaanchi keenoo'isina Keesammi Ayyaan Yesuusa udma'i uulla massukko. Yesuusim sor ballaa sor hiimoo soommanaa lasage sibaarukko. Sheexaanchim ixxi kollonne hincaa «At Waa'ina Beet ikkaattoolas huno'o, ku kin hurbaat ihoo'isina ijaaje» yukko. Ihukkaarem Yesuus ixxena dabaraa «Keesammi Kitaabanne ‹Manni hee'ookkok Waa'i suumiinsi firoo sagarinnette bagaan xale'i hurbaata itimminneyyo› yamamaa kitaabamaakko» yukko. Odim Sheexaanchi Yesuusa keesammi Yerusaalee'm beero'o massaa Keesammi mi'n ludonne fissaa uullisaa Yesuusina «At Waa'ina Beet ikkaattoolas huno'o, aad ube. Mashka'oomim Keesammi Kitaabanne ‹Keese egettona Waa'i ixxi asse'amaano ijaajookko; ixxuwwim kinanne ki lokki qolamoobee'isa ixxuwwi anginne qoltamo› yamamaa kitaabamaakko» yukko. Yesuusim Sheexaanchina «Odim Keesammi Kitaabanne ‹Ki Moollanni Waa'a keentitte!› yamamaa kitaabamaakko» yaa dabarukko. Ee lasage odim Sheexaanchi Yesuusa lob duunanne fissaa heer uulli adillanoo ixxuwwi lombaa hundam moo'isaa «At iina uullanne aad heeshtaa otossitlas ka hundam kiina uwwoommo» yukko. Yesuusim «Sheexaancho, iinniinsi qee'lle! Keesammi Kitaabanne ‹Ki Moollanni Waa'ina otossihe; xale'i ixxenam awwaade!› yamamaa kitaabamaakko» yaa dabarukko. Ee lasage Sheexaanchi Yesuusiinsi annanni ihaa marukko. Waa'i asse'amaanim Yesuus beyyo waatta'a ixxena awwaaddo'o. Yohaannis amadamaa karaxxi minenne aagukkisa Yesuus macceesu ammanenne Galiila marukko. Naazireetam uraa Galii'l Dambalaq gadanonne yoo Qifirinnaahoom beero'onne afuureena marukko. Qifirinnaahoomim hee'oo Niftaalee'mmaannonnee Zaabiloo'n uullannettee. Oohim ihukkok hiraagaanchi Issaayyaas «Zaabiloo'n uullanne, Niftaalee'm uullannee Yoordaanoos daajji eeqidonne dambalaq kollonne massoo gooqqi gadanonne yo'i mulli minaadaphphi Galiilannee tuunsonne hee'oo minaadab lophphaakkoo caakka moo'ukko. Leh haf woronne hee'u keeninam caakki firukko» yu sagar wo'mmoo'isinatte. Ee lasage Yesuus «Waa'ik adillan hincu bikkina baaxiilo biiraa yitakka'a daba'llehe» yukkuuyyi alallaatimma asheerukko. Galii'l Dambalaq gadaninne Yesuus higukkuuyyim lam abbaayyuwwa moo'ukko. Ixxuwwim Pheexiroosa yamamu Simi'oonattee ixxi abbaayyi Indiraasattee hee'llo'o. Pheexiroosii Indiraasii qurxumme'e qaashsham keen hee'llo'i bikkina dambalaqanne shikka ubbuussam hee'llo'o. Yesuusim ixxuwwina «Waallehe, eese awwonnehe. Qurxumme'e qaashshakkamisam mannam qaashshakkamisam issoommo» yukko. Ixxuwwim ee ammanem qurxumme'e amaddam shikka utta'a ixxo awwonto'o. Yesuus ee beyyiinsi hofqaxam shiqukkisam mulli keenom lam abbaayyuwwa Zabdiwoos oos Yaaqoobaa Yohaannisaa ixxuwwi anninne maqirem wongiranne afuutta'a shikka axissu'uuyyi moo'aa weeshukko. Ixxuwwim ee ammanem wongiraa ixxuwwi annaa utta'a Yesuusa awwonto'o. Yesuus Ayihuxxi manni wixxixxi minneewwanne losisukkuuyyii Waa'i adilla'nneka mishiraachchi sagara alallaatukkuuyyii Galii'l uulli hundam marukko. Ee beyyuwwannem annanni annanni ihaakkoo hoongiinsii jabbiinsii hundiinsim manna fayyiisukko. Ee bikkina Yesuusik sad Sooriy uulli hundannem macceesamukkaare annanni annanni jabbinne hawwoo manni hundam ixxi beyyo eebakko'o. Ee jabbaa'n lambe'ennem habus amadu keen, xafanni amadu keenii shiihuwwii hee'llo'o; ixxim fayyiisukko. Galii'l uulliinsi, Tommi Beero'o yamamoo uulliinsi, Yerusaalee'm beero'iinsi, Yihuxxi uulliinsii Yoordaanoos daajji eeqidonne yoo uulliinsii waatto'oo lobakat manni Yesuusa awwonto'o. Yesuusim lobakat minaadaba moo'u ammanenne duunanne firaa afuurukko. Ixxi losaanim ixxi kollonne hincito'o. Ixxuwwinam kanniinsi woroon yoo losano losisimma asheerukko. Yesuus «Hanqo'i wodaninne ixxuwwi gaga heeshaa'llam keen Waa'ik adillan ixxuwwan ihu bikkina maassaammuwwa. Kichche'llam keen Waa'i ixxuwwina qoxximma uwwoo bikkina maassaammuwwa. Maashaalluwwi keen uulla lago aa'llam bikkina maassaammuwwa. Muccurooma mixxam keenii xeebe'llam keenii godditam bikkina maassaammuwwa. Mannina haafitam keen Waa'im ixxuwwina haafoo bikkina maassaammuwwa. Wodano muccur keen Waa'a moo'llam bikkina maassaammuwwa. Manna iittansitam keen Waa'i ooso yamantam bikkina maassaammuwwa. Muccuroo'm bikkina hawwo aa'llam keen Waa'ik adillan ixxuwwan ihu bikkina maassaammuwwa. I mashka'inne manni ki'nnuwwa game'lloohaare, hawwisoohaaree qophphanonnem jora wocukkuuyyi ki'nnuwwika summa bi'isoohaaree maassaammuwwa. Waa'i adillanonne siixxitakkam irifo'i lobakat ihu bikkina liirammehe; lobakat liiranchinnem heellammehe. Mashka'oomim ki'nnuwwiinsi gaassakka'a hiraagaanom hawwisakko'ookko» yukko. Odim Yesuus «Manni hundinam ki'nnuwwi sooqixxisa. Ihukkaarem sooqixxek xee'n bi'uta'n hinkid issakka'a xee'oo'isa issakkamo? Biiranne fissakka'a uunjakkamaare manni hancaacamookko bagaan mahinam awwaadooyyo. Ki'nnuwwim uullina caakkuwwa. Duu'n hanenne yoo beero'i maaxameena xanooyyo. Caakka caakkisaa sanfi woronne dissookkok ayyim bee'e. Ihukkaarem minenne yoo manni hundinam caakkisoo'isina qoffit beyyonne dissakkamo. Ee'isam manni ki'nnuwwika er baxo moo'aa iimanenne yoo ki'nnuwwina Anna galaxxoo'isina ki'nnuwwik caakki manni illagenne caakkona» yukko. Odim Yesuus «Seeraa hiraagaa'n losishshaa gindeena waarummoka labissakkotte; an guulleena waarummo bagaan gindeena waarummoyyo. Hanqinam an ki'nnuwwina kuroommo; iimanii uullii higeebe'i afeebe'e Seer hundim wo'mmookko bagaan Seeriinsi winxo'im te'im tako'im bi'ooyyo. Ee bikkina ka ijaacceka hundiinsi hoffe'ookkoka matichchom gindookkokii mulli keeninam losisookkokii Waa'i adillanonne hoffan ihookko. Ihukkaarem ijaajo hundam wonshookkokii mulli keeninam losisookkokii Waa'i adillanonne loban ihookko. Ki'nnuwwik er bax Seera losisaa'nnaanniinsii Farisaawe'uwwaanniinsii lophphubeelas Waa'i adillano hore'em aaggakkamoyyo» yukko. Odim Yesuus «Gaassi doollenne hee'u mannina ‹Shititte, shookkok ayyim oogatamookko› yukkisa macceessakko'ookko. Ihukkaarem an ki'nnuwwina kuroommo; ixxi abbaayyonne kora'am quuqoohaannonne ayyennem oogatamookko. Ixxi abbaayyo game'llookkok ayyim lommanni dummichchanne oogatamookko. Odim ixxi abbaayyo ‹Ka awwaad bee'i gawwa!› yaa game'llookkok ayyim gaanna'm giirinne oogatamookko. Ee bikkina at Waa'ina kitima hincaa'lloo ammane kiyyabbaayyo hawwodditti luwwi yoo'isa tiittilas Waa'ina kitim issitaa uwwiteena eebbittoka ee beyyonnem uttaa gaassitaa ee kiyyabbaayyinne iittame. Ee lasage waattaa Waa'ina kitima hincaa'e. Keese kasasu ki masokkichchinne maqire oogaxxi mine mattittuuyyi googonne hee'llittuuyyim ixxenne iittame. Ee'isamdu issitbeelas ki masokkichchi keese daannuwwina higisaa uwwookko; daannuwwim fooliisina higisaa uwwoohaare karaxxi minenne aaggootto. Hanqinam an kiina kuroommo; guzumo'ika lasaanchi saantiba guullitaa miqqeebe'e ee karaxxi miniinsi fittooyyo» yukko. Odim Yesuus « ‹Saa'llitte› yamamukkisa macceessakko'ookko. Ihukkaarem an ki'nnuwwina kuroommo; mat meentichcho moo'aa mixookkok hundim ee ammane ixxi wodanonne isenne saa'aakko. Ee bikkina kiikki makki illi baaxiilina mashka'i ihulas fissitaa uunje. Mashka'oomim ki orachchi hundim xoo'oobee'i giiranne darabamoohaanniinsi ki orachchika matooma hooggittaare e'llookko. Kiikki makki angi baaxiilina mashka'i ihulas muttaa uunje. Mashka'oomim ki orachchi hundim xoo'oobee'i giiranne aagoohaanniinsi ki orachchika matooma hooggita'n kiina e'llookko» yukko. Odim Yesuus « ‹Ixxi meentichcho hollookkok ayyim furma uwwona› yamamaakko. Ihukkaarem an ki'nnuwwina kuroommo; saa'immi mashka'innette ihoo'n ixxi mi'n ama hollookkok ayyim ise saa'aanchotte issookko. Hollanto'i meentichcho eebookkokim saa'aancho» yukko. Odim Yesuus «Gaassi doollenne hee'u mannina ‹ «Waa'ina uwwoommo» yitaa hide'llitti sagara wonshe bagaan woccitti sagara gindititte› yamamukkisa macceessakko'ookko. Ihukkaarem an ki'nnuwwina kuroommo; hore'em hide'llakkotte. Iimanennem hide'llakkotte; mashka'oomim iiman Waa'ina adilla'n barcuma. Uullannem ihukkaare hide'llakkotte; mashka'oomim Waa'ik lokki hancaacoohane. Yerusaaleemannem ihukkaare hide'llakkotte; mashka'oomim Yerusaaleem lob adi'l beero'o. Ki gagannem hide'llitte; mashka'oomim ki horoo'l saraaxxeka matom qadaallisseena te'im heemachchisseena xantooyyo. Ee bikkina hanqi ihulas ‹hanqa› yi'llehe. Qophphan ihulas ‹qophphano› yi'llehe. Eehanniinsi lophphookkok joriinsette» yukko. Odim Yesuus «Illi bikkina ille; inqi bikkinam inqe» yamamukkisa macceessakko'ookko. Ihukkaarem an ki'nnuwwina kuroommo; ki'nnuwwina jora issoo manchina jora issitakkotte. Ihukkaarem makki kolli xabano aphphisoohaannina odim qeddi kolli xabanom uwwe. Mat manchi ki shamiisa masseena hasaa kasasulas ki kootam eddaa uwwe. Mat manchi « ‹Iinninne maqire hofqax googo mallona› yaa ijaajuta'n ixxi yukkaanniinsi lam suume eddaa mare. Mat manchi kiinniinsi mat luwwa uunxulas uwwe. Liqaayyo aa'eena hasoohaanninam hoottitte» yukko. Odim Yesuus « ‹Ki beshichcho iitte; ki masokkichchom sabe› yamamukkisa macceessakko'ookko. Ihukkaarem an ki'nnuwwina kuroommo; ki'nnuwwi maso'o iittehe. Ki'nnuwwa hawwisoo keeninam Waa'a uunxehe. Ee'isa issitakko'aare iimanenne yoo ki'nnuwwi Annina oos ikkakko'isa moo'issakkamo. Mashka'oomim ixxi jora issoo keeninaa eroka issoo keeninaa ixxeka eelliincho fissookko. Ee'isam xummaaninaa baaxiilaaninaa xeena ga'nnisookko. Ki'nnuwwa iittoo keeno iittitakko'aare Waa'iinsi maha siiddakkamo? Ee'isa'i qaraxaanim issitamuullayyonnihe? Ki'nnuwwika abbaayyuwwi xale'e xummaatissakko'aare mulli keeniinsi mahinne e'llitakkamo? Ee'isa'i Waa'a laqqambee'i minaadabim issitamuullayyonnihe? Ee bikkina iimanenne yoo ki'nnuwwik anni muccur ihukkisam ki'nnuwwim mucculluwwi ikkehe» yukko. Odim Yesuus «Manni moo'ona yitakka'a er baxo manni illagenne issimmiinsi ege'llehe. Ege'llitakkobeelas iimanenne yoo ki'nnuwwina anni beyyiinsi matem irifo'om siiddakkamoyyo. Ee bikkina at buxina tasbo'o uwwitoo ammane birantam keen manniinsi galata siidimminaa yita'a wixxixxi minneewwannee googguwwannee issitamisa mannina moo'anteena issititte. Hanqinam an ki'nnuwwina kuroommo; birantam keen ixxuwwika irifo'o a'llito'ookko. Odim Yesuus «Waa'a uunxitakkam ammane birantam kee'nnisa ikkakkotte. Mashka'oomim manni moo'ona yita'a wixxixxi minneewwannee gooqqi inqennee uullita'a Waa'a uunximma iittitamo. Hanqinam an ki'nnuwwina kuroommo; ixxuwwika irifo'o gaassita'ahim a'llito'ookko. Ihukkaarem at Waa'a uunxitoo ammane ki mine aaggaa u'llumma xuffaa daphphanne yoo kiyyanna uunxe. Daphphanne baxamukkoka moo'oo kiyyannim kiina irifo'o uwwookko» yukko. Odim Yesuus «Waa'a uunxitakkam ammane mulli minaadab awwaad bee'i sagara dabaransita'a wocimminne ixxuwwi uunxat macceesamoo labissamisa uunxato qeeraa'llissakkotte. Ihukkaarem ki'nnuwwi ixxuwwisa ikkakkotte; mashka'oomim ki'nnuwwik anni ki'nnuwwina mah hasisooda'e xa'mmitakkoo'nnim gaassaahim la'ookko. Ee bikkina ki'nnuwwi ‹Iimanenne hee'lloo Niyyanna, ki summi keesamaakkoohan ihona. Ki adillan waarona; ki doo'l iimanenne ihukkisam uullannem ihona. Niina kaballina hasisoo hurbaata uwwe. Neese hawwodu kee'n jolle haafinummisam ni jollem haafihe. Neese joriinsi gatise bagaan keenanchanne aagissitte. Adillan, malaayyii lombii doolli hundinam kiina ihona! Aameen › yitakka'a uunxehe. «Mannika jolle haafitakkolas ki'nnuwwi jollem iimanenne yoo ki'nnuwwik anni haafookko. Mannika jolle haafitakkobeelas ki'nnuwwi annim ki'nnuwwi jolle haafooyyo» yukko. Odim Yesuus «Soommantakkam ammane birantam keen issitamisa xiddaano labbakkotte. Soommanaan ikko'isa manni la'ona xiddaano labbamo. Hanqinam an ki'nnuwwina kuroommo; ixxuwwi irifo'o a'llito'ookko. Ihukkaarem at soommantoo ammane ille aanshaqqe; horoorennem lii'llisoo luwwa laphphe. At soommantittisa maaxaqqanne moo'oo Waa'iinsi bagaan mulli manni ayyim moo'oone. Maaxaqqanne moo'oo Waa'im kiina irifo'o uwwookko» yukko. Odim Yesuus «Ki'nnuwwi gagina ka uullanne amaxxa wixxaa'llakkotte. Mashka'oomim ka uullanne bil itaatii ci'llaatii bi'ookko; gamaanim game'ookko. Ihukkaarem bil itaa te'im ci'llaa bi'oobee'i beyyonnee gamaanim game'eena xanoobee'i beyyonnee iimanenne ki'nnuwwi gagina amaxxa wixxaa'llehe. Mashka'oomim ki amaxxi yoo beyyonne ki wodanim eekke'enne ihookko» yukko. Odim Yesuus «Illi orachchina caakka; ee bikkina ki illi fayya'i ihulas ki orachchi hundim caakkaakkoohan ihookko. Ihukkaarem ki illi fayya'i ihubeelas ki orachchi hundim tuunsaakkoohan ihookko. Keesenne yoo caakki tuunsaakkoohan ihulas tuunsoom hinkaa'nna lophphaakkoohan ihookko» yukko. Odim Yesuus «Mat manchi lam moollanno'ina ijaajameena xanooyyo. Mato sabaa mato iittookko; mato lonsaa mato gadookko. Ee'isam ki'nnuwwim Waa'inaa amaxxinaa laminam ijaajantakkeena xantakkamoyyo. Ee bikkina ki'nnuwwi ‹Maha intoommo? Maha angoommo? Maha edde'nnoommo?› yitakku'uuyyi ki'nnuwwi heechchina hasisoo luwwi bikkina kichche'llakkotte. Hurbaatiinsi foor eddechchiinsim orachchi lophphooyyonnihe? Huno'o, bararoo cii'a moo'llehe! Hurbaata wixxamoyyo; muttamoyyo; gootarannem wixxaa'llamoyyo. Ihukkaarem iimanenne yoo Waa'i ittam luwwa uwwookko. Cii'iinsi ki'nnuwwi lobakata e'llitakkamoyyonnihe? Ki'nnuwwiinsi u'nnanchinne ixxi heechchi doollenne mat balla exxeena xanookkok ayyette? Odim eddechchi bikkina mahina kichche'llakkamuulla? Haqqo'l fiit hinkid li'ooda'e moo'llehe! Badarooyyo; te'im ixxi gagina eddechcha dadooyyo. Ihukkaarem an ki'nnuwwina kuroommo; adil Salamoonim ixxi lombinne hundinnem ee fiitiinsi matisam mishisoo eddechcha edde'ukkoyyo. Kaballa moo'amaa soodina giiranne darabamoo hixe Waa'i ka'isa wereeggisaa eddeesoohan ihukkaa'lleensi ki'nnuwwina hinkid lonsaa eddeesooyyo? Ki'nnuwwik amma'nnat hinkaa'nna gootto'o? Ee bikkina ki'nnuwwi ‹Maha intoommo? Maha angoommo? Maha edde'nnoommo?› yitakku'uuyyi u'nnantakkotte. Mulli minaadab ee keen hundinam u'nnantamo. Ki'nnuwwina oo hundim hasisoohan ihukkisa iimanenne yoo ki'nnuwwi anni Waa'i la'ookko. Ihukkaarem gaassitakka'a Waa'ika adillanoo muccuroomaa hassehe; mulli luwwi hundim ki'nnuwwina uwwamookko. Soodina sooxxi kichchechchim ihoo bikkina soodina sawwitakku'uuyyi u'nnantakkotte. Ballina ballina ee balli u'nnim ihookko» yukko. Odim Yesuus «Ki'nnuwwannem oogatamoobee'isa ayyennem oogattakkotte. Mashka'oomim ki'nnuwwi mulli keenonne oogattakko'isam ki'nnuwwannem oogatamookko. Mulli keenina keentakkam keennaanchonne ki'nnuwwinam keenamookko. Ki illenne yoo gudeera laqqoo'nnim mahina kiyyabbaayyi illenne yoo haccichcho moo'lloolla? Ki illenne gudeer hee'ukkuuyyim kiyyabbaayyina ‹Huno'o, ki illiinsi haccichcho fissoommo› yiteena hinkid xantootto? Ate, ka birammaancho! Gaassitaa ki illenne yoo gudeera fisse. Ee lasage kiyyabbaayyi illenne yoo haccichcho fissiteena danaamisa moo'llootto. Keesammi luwwa wishina uwwitakkotte; ki'nnuwwika worqam boonke'i illagenne darabbakkotte. Darabbakkolas boonke'i ki'nnuwwika worqa lokkinne hance'ookko; wishim ki'nnuwwa daba'llaa ga'mmookko» yukko. Odim Yesuus «Xa'mmehe, ki'nnuwwina uwwamookko. Hassehe, siiddakkamo. Goocanne uullitakka'a weeshshehe, ki'nnuwwinam fooqookko. Mashka'oomim xa'mmukkaannina ayyenam uwwamookko; hasookkokim siixxookko; u'llummanne uullaa weeshoohaanninam fooqookko. Ki'nnuwwiinsi mat manchi ixxek beet qorosho'o xa'mmuta'n kina uwwoohonnihe? Te'im maara xa'mmuta'n hamashsha uwwoohonnihe? Eehaara'i ki'nnuwwi jor keen ikkakko'isam ki'nnuwwi oosina er luchcho uwwimma laqqakkolas iimanenne yoo Waa'i ixxo uunxoo keenina hinkid lonsaa er luwwa uwwooyyo? Manni ki'nnuwwina issona hassakkam luwwi hundam ki'nnuwwim mulli keenina issehe. Seerii hiraagaa'n losishshii kurookkok eehane» yukko. Odim Yesuus «Xuqqi goocinne aaggehe. Mashka'oomim bichchina massoo gooc haraara; googoomim hawwisoobee'ane. Ee googinne aagoo keenim duta. Ihukkaarem heechchi kollonne massoo gooc xuqqa; taakke'imminam googoom hawwisoohane. Ee bikkina ee googo siixxoo keenim hofqaxa» yukko. Odim Yesuus «Qophpha'n hiraagaaniinsi ege'llehe. Haninne gereebba labba'a ki'nnuwwi beyyo waattamo. Ihukkaarem ixxuwwik wor sibaaru oro'isa. Ixxuwwam laqqakkamok baxxam baxinnette; uttiinsi woyi'n misha feerakkeena xanakkamonnihe? Te'im qaccabbiinsi oda'i misha feerakkamonnihe? Er haqqi hundim er misham mishookko; ihukkaarem jor haqqi jor misham mishookko. Er haqqi jor misha misheena xanooyyo; jor haqqim er misha misheena xanooyyo. Er misha mishoobee'i haqqi hundim muramaa giiranne edamookko. Ee bikkina qophpha'n hiraagaano baxxam baxinne laqqakkamo. ‹Moollanna! Moollanna!› yaa weeshoo hundim Waa'i adillanonne aagooyyo. Ihukkaarem Waa'i adillanonne aagookkok iima'n iyyanni yu luwwa wonshoo keen xale'e. Oogaxxi balla lobakat keen ‹Moollanna, Moollanna, ki summinne hiraangummoyyonnihe? Ki summindu habusa fissinummoyyonnihe? Ki summinne lobakata maalalsiisoo luwwa banxummoyyonnihe?› yitamo. Anim ixxuwwina ‹Ki'nnuwwa hore'em la'oommoyyo. Ki'nnuwwi boqqi keeno; iinniinsi qee'llehe!› yoommo» yukko. Odim Yesuus «Ayyi manchim an yummi luwwa macceesaa baxonne hosisookkok ixxi mine kinanne baxu qoor mancho labookko. Xeen ga'nnaa, diris dirisaahii hafachchi hafachchaahii ee mine malaayyaamisa gafe'ukko. Ihukkaarem ki'n hanenne baxamu bikkina oo min ubukkoyyo. Ayyi manchim an yummi luwwa macceesaa baxonne hosisoobee'ek ixxi mine shashsharanne baxu qawwi mancho labookko. Xeen ga'nnaa, diris dirisaahii hafachchi hafachchaahii ee mine malaayyaamisa gafe'ukko; oo minim ee ammanem ubukko. Ee mi'nnek ubimmim jorisa» yukko. Yesuus ka woshsha wocaa guullukkisam ixxi losisu losishshanne lobakat minaadab maalalto'o. Mashka'oomim ixxi losisukkok lobakat lachchinnetti hee'ukko bagaan Seera losissam hee'llo'i kee'nnisayyi hee'ukko. Yesuus duuniinsi dillu ammanenne lobakat minaadab ixxo awwonto'o. Oddomachchonne baddisoo jabbi firaakkoo mat manchim Yesuus beyyo waaraa ixxi illagenne uullanne aad heeshaa «Moollanna! Iittittaa'lleensi eese fayyiissaa muccussiteena xantootto» yukko. Yesuusim ixxi anga biddiqaa'aa ee mancho nakkaa «Iittoommo; fayye'llaa muccure!» yukko. Ixxim oddomachchonne firu baddisoo jabbiinsi ee ammanem fayye'aa muccurukko. Ee lasage Yesuus ixxena «At macceese, kaka ayyenam kuttoobee'isa. Ihukkaarem mattaa ki gaga qeessichchina moo'ise. Odim at fayye'llaa muccuttittisa manni la'oo'isina Muse'e ijaaju kitima hincaa'e» yukko. Yesuus Qifirinnaahooma yakkam beero'o aagu ammanenne Oroo'm uulliinsette hee'u xibbi halaqichchi Yesuus beyyo hincaa «Moollanna, i awwaadaanchi shiihaa lobakat hawwi woronne ihaa minenne iinse'aakko» yaa fayyiisoo'isina uunxukko. Yesuusim «An waaraa fayyiisoommo» yukko. Ihukkaarem xibbi halaqichchi «Moollanna, at i mine waatteena an laboombee'i mancho. Ihukkaarem ki suuminne mat luwwa woce; i awwaadaanchim fayye'ookko. An i gagim mulli keenina ijaajamoomman ihummuuyyi odim iinniinsi woroon an ijaajoommi gaadaan yo'o. Ixxuwwiinsim mato ‹Mare› yoommaare marookko. Odim mullaanninam ‹Waare› yoommaare waarookko. I awwaadaanchom ‹Kaka isse› yoommaare issookko» yukko. Yesuusim eekka macceesu ammanenne maalalaa ixxo awwonu minaadabina «Hanqinam an ki'nnuwwina kuroommo; kido'i qoxxaalli amma'nnat yoo mancho Isra'ee'l minaadabannem siidummoyyo. An ki'nnuwwina kuroommo; lobakat keen eelliinchi firiinsii eelliinchi aaggiinsii waattamo. Ixxuwwim Abrihaaminne, Yisaaqinnee Yaaqoobinnee maqirem Waa'i adilla'n maaddanne afuuttamo. Ihukkaarem Waa'i adillanonne aagimmi hasisoo keen biiranne yoo tuunsonne uunjantamo. Eekke'em wi'llitamoo inqe iiccamoo» yukko. Ee xibbi halaqichchinam «At mine elle'e; ki amma'nnaxxisa ihona» yukko. Oo awwaadaanchim ee ammanem fayye'ukko. Yesuusim Pheexiroos mine maraa Pheexiroosik ballo xissita'a iinse'llo'ookkoka moo'ukko. Ixxim iseka anga nakkukkaare ee ammanem fayye'llo'o. Isem iimita'a ixxo koyyinano aa'llo'o. Habus amadaakkoo lobakat manna uulli hiimukkisam Yesuus beyyo eebakko'o. Ixxim xale'i sagarinne habusa fissukko; jabbu manni hundam fayyiisukko. Eekkam issukkok hiraagaanchi Issaayyaas «Ni hoonga ixxi massukko; ni jabbom ixxi fayyiisukko» yukkok wo'mmoo'isinatte. Lobakat minaadab ixxi kululleetanne wixxito'isa moo'aa Yesuus dambalaq eeqidonne higgamisina ixxi losaano ijaajukko. Seera losisaa'nnek mat manchi Yesuus beyyo waaraa «Losisaancho! At mattoo beyyi hundam keese awwonaa maroommo» yukko. Yesuusim ixxena dabaraa «Wengereellina bar yookko; iimaninne bararoo cii'inam do'n yookko. Ihukkaarem Manchi Beetina aagaa usheexxoo beyyim bee'e» yukko. Odim ixxi awwonaa'nnek mat «Moollanna! Gaassaa maraa iyyanna waammoommo» yukko. Ihukkaarem Yesuus ixxena «Lehu keeno lehu keenim waammona; at uttaa eese awwone» yukko. Ee lasage Yesuus ixxi losaaninne maqirem wongiranne aagaa marukko. Dangonnem malaayyaam hambu'llam dambalaqanne ki'ukkaare wongir xuuxameena ihukko. Ee ammane Yesuus diriiraa hee'ukko. Losaanim Yesuus beyyo matta'a diriiriinsi baqaa'lla'a «Moollanna! Neese beeddinummo; gatise!» yito'o. Yesuusim «Mahina badditakkamuulla? Ki'nnuwwik amma'nnat hanqataakkoo keeno» yukko. Ee lasage Yesuus ki'aa hambu'llamii womoorii uulloo'isina ijaajukko; ee ammanem hundem luwwim cawwukko. Losaanim lobakata maalalta'a «Hambu'llamii dambalaqii ijaajamookkok kuk hinkido'i mancho?» yito'o. Yesuusim Galii'l Dambalaq eeqidonne yoo Geeraaseena yakkam uulla waaru ammanenne habus amadaakkoo lam manchi waammi woriinsi waatta'a ixxenne edanto'o. Ixxuwwim lobakata malaayyaammuwwi ikko'i bikkina ayyi manchim ee googinne higeena xanam hee'ukkoyyo. Ixxuwwim ee ammanem «Waa'i Beeto, ni woshshanne keese mah aagisaate? Amman afoo'nnim neese barche'e issiteena waattittonnihe?» yitu'uuyyi laatto'o. Ixxuwwiinsi hofqaxam qee'l beyyonne lobakat boonke'i allaachchi hee'ukko. Habusim Yesuusina «Atimdu neese ka manniinsi fissitoohan ihulas ee boonke'i allaachchi beyyo malloommisa isse» yita'a uunxito'o. Yesuusim «Mallehe» yukko; ee bikkina ixxuwwim fitta'a boonke'i allaachchanne aaggo'o. Boonke'i allaachchi hundim didiyaa maraa baalli woronne yoo dambalaqanne ubaa itamukko. Boonke'i allaaraanim gibba'a beero'o matta'a habus amadaa hee'u manni woshshaa ee ammane ihu woshshaa hundam kutto'o. Ee lasage ee beero'onne hee'llam manni hundim Yesuusa moo'lleena waatto'o. Ixxom moo'llo'i ammanenne ixxuwwi uulliinsi maroo'isina uunxito'o. Yesuusim wongiranne aagaa dambalaqa firaa ixxi hee'am hee'u beero'o marukko. Eekke'em mat shiihaakkoo mancho hallaqqanne iyyaa manni ixxi beyyo waarukko. Yesuusim ixxuwwika amma'nnato moo'aa ee shiihu manchina «I beeto, baddititte; ki baaxiil haafamaakko» yukko. Eehid yu ammanenne Seera losisaa'nnek mat mat «Ku manchi Waa'inne game'llamoolla» yita'a ixxuwwi wodanonne quunquunto'o. Yesuusim ixxuwwika sawwite la'aa «Mahina ki'nnuwwi wodanonne ka jor luwwa sawwitakkamuulla? ‹Ki baaxiil haafamaakko› yimmiinsii ‹Iimitaa mare› yimmiinsii hinki sholle'ookko? Ihukkaarem uullanne baaxiilo haafeena Manchi Beetina malaayyi yoohan ihukkisa laqqehe» yaa ee shiihaa hee'u manchina «Iimitaa ki hallaqqa iyyitaa mine elle'e» yukko. Oo shiihu manchim iimaa mine elle'ukko. Ixxenne hee'llo'i mannim eekka moo'llo'i ammanenne baddito'o. Kido'i malaayye mannina uwwu Waa'am galaxxito'o. Yesuus ee beyyo uraa marukkuuyyi Maatiwoosa yakkam qaraxaanchi qaraxo aa'oo beyyonne afuuraakkoo moo'aa «Eese awwone» yukko. Maatiwoosim ki'aa Yesuusa awwonukko. Yesuusim Maatiwoos minenne hurbaata iteena afuuraakkoohaannonne lobakat qaraxaanii baaxiilaanii ixxi beyyo waatta'a ixxennee ixxi losaaninnee maqirem maaddanne afuutto'o. Farisaawe'uwwi eekka moo'lla'a Yesuus losaanina «Ki'nnuwwik losisaanchi qaraxaaninnee baaxiilaaninnee maqire itookkok mahinatte?» yito'o. Ihukkaarem Yesuus ixxuwwi wocco'i woshsha macceesaa «Qaraa'l manchi hasisookkok jabbaaninatte bagaan fayya'i manninayyo. Keesammi Kitaabanne ‹An hasoommok qishixximma bagaan kitimayyo› yamamaa kitaabamukkok mayyimda'e ihukkisa mattakka'a lossehe. An waarummok baaxiilaano weesheenatte bagaan muccur keeno weesheenayyo» yaa dabarukko. Ee lasage Yohaannis losaan Yesuus beyyo waatta'a «Neesee Farisaawe'uwwii soommannoommo. Ihukkaarem ki losaan soommantam bee'ek mahinatte?» yita'a xa'mmito'o. Yesuusim ixxuwwina «Idaayyichchi ixxuwwinne maqire hee'ukkuuyyi bollochcho'i manni kichche'immi hasisoohonnihe? Ihukkaarem idaayyichcho ixxuwwiinsi annanni issakka'a massakkam ayyaam waarookko; ee ammane soommantamo. Beeddu eddechchanne haareechchi qaafunta edaa gobookkok ayyim bee'e. Mashka'oomim oo haareechchi qaafunti beeddu eddechcha baasisaa dereerookko. Te'im ebeer cananne haareechchi woyi'n diqaasa issookkok bee'e. Issookkokimdu hee'ulas can dereeramaa awwaad bee'an ihookko; diqaasim dunamookko. Ihukkaarem haareechchi woyi'n diqaasa haareechchi cananne issakkolas canim dereeramooyyo; diqaasim dunamooyyo» yukko. Yesuus eekka Yohaannis losaanina woconam wixxixxi mi'n awwonsaanchi waaraa Yesuus illagenne guruphphaa «I landichcho kaba leto'ookko. Ihukkaarem at waattaa ki anga is hanenne issittaare isek foor daba'llookko» yukko. Yesuusim ki'aa ixxi losaaninne maqirem ee mancho awwonaa marukko. Ee ammane tommoo lam hiinchoo xiig dunamukkuuyyi hawwita'a hee'llo'oo mat meentichcho lasinne waatta'a Yesuus eddechchika kasa nakkito'o. Mashka'oomim is wodanonne «Ixxeka eddechcham nakkumta'n fayye'oommo» yita'a sawwita'a hee'llo'o. Yesuusim is kollonne daba'llaa ise moo'u ammanenne «I landichche, baddititte! Ki amma'nnat keese fayyiisaakko» yukko. Ee ammanem oo meentichcho fayye'llo'o. Ee lasage odim Yesuus ee wixxixxi mi'n awwonsaanchi mine marukko. Eekke'em wi'llishoo keenoo diddoo keenoo lobakat manna wi'llukkuuyyi moo'ukko. Yesuusim ixxuwwina «Hundim fillehe! Landichcho diriitto'ookko bagaan leto'oyyo» yukko. Ixxuwwim ixxonne osatto'o. Ihukkaarem Yesuus oo manni firukkisam landichcho iinse'llo'i beyyo maraa landichchoka anga amadukkaare ki'llo'o. Oo woshshim ee uulli hundannem macceesamukko. Yesuus ee beyyiinsi uraa marukkuuyyim lam qooqquwwi ixxo awwonta'a «Daawiit Beeto, niina qishixxe!» yitu'uuyyi laattam hee'llo'o. Yesuusim mine aagu ammanenne lamem qooqquwwim ixxi kollonne hincito'aare «An ki'nnuwwa fayyiiseena xanoommisa amma'nnitakkamonnihe?» yukko. Ixxuwwim «Eeyya, Moollanna!» yita'a dabatto'o. Ee lasage Yesuus ixxuwwika ille nakkaa «Ki'nnuwwi amma'nnaxxisa ihona» yukko. Ixxuwwi illim fooqukko. Yesuusim «Ayyi manchinam kaka kuttakkambee'isa» yaa qoxxisaa ijaajukko. Ihukkaarem ixxuwwi matta'a Yesuus baxu baxo uulli hundinam afisso'o. Habus amadaakkoo duud mancho oo manni matto'isam Yesuus beyyo eebakko'o. Habus ee manchiinsi firukkisam oo duud manchi wocimma asheerukko. Eekke'e wixxita'a hee'llo'i manni eekka moo'llo'i ammanenne «Kido'i luwwi Isra'eelanne hore'em moo'amaa la'ooyyo» yita'a maalalto'o. Ihukkaarem Farisaawe'uwwi «Habusa fissookkok habus adil Sheexaanchi uwwu malaayyinnette» yito'o. Wixxixxi minneewwanne Yesuus losisukkuuyyi, Waa'i adilla'n mishiraachcha kurukkuuyyii lobakat minaadaba jabbi hundiinsii hoongi hundiinsii fayyiisukkuuyyii beero'uwwaa gattuwwaa hundam do'am hee'ukko. Ixxim minaadab kichche'lla'atii hara'mmaancho hoogga'atii allaaraanchi bee'i gereebbisa ikka'a moo'u ammanenne ixxuwwi bikkina lobakata qishixxukko. Ee bikkina ixxi losaanina «Murakkam hurbaat lobakata. Ihukkaarem muroo keen hoffane. Ee bikkina hurbaata muraxxi beyyo baxaano asse'oo'isina hurbaaxxi annichcho uunxehe» yukko. Yesuus ixxeka tommoo lamem losaanoo ixxi beyyo weeshaa habusa fissitamisinaa annanni annanni jabbiinsii hoongiinsii hundiinsim manna fayyiissamisinaa malaayye uwwukko. Tommikii lamem asse'amaa'nnekim summi kane. Ixxuwwim Pheexiroosa yakkam Simi'oonatte, ixxi abbaayyi Indiraasatte, Zabdiwoos oos Yaaqoobattee Yohaannisattee, Filiphphoosatte, Bartoloomoosatte, Toomaasatte, qaraxaanchi hee'u Maatiwoosatte, Ilfiyoos beet Yaaqoobatte, Taadiwoosatte, uullina to'achchaanchi Simi'oonattee Yesuusa lehina higisaa uwwu Asqorotokkichchi Yihudattee. Yesuus ee tommoo lamem asse'amaanom «Mulli minaadaphphi uulla mattakkotte. Samaare'i beero'om aaggakkotte. Ihukkaarem gereebbisa bi'llo'i Isra'ee'l minaadaphphi beyyo mallehe. Mattakka'a ‹Waa'ik adillan hincaakko› yitakka'a alallaattehe. Xissu keeno fayyiissehe; lehu keenom lehiinsi ki'issehe; oddomachchonne firoo baddisoo jabbi yoo keenom fayyiissakka'a muccussehe; habusam manniinsi fissehe. Kora'a aa'llakko'oka kora'am uwwehe. Worqam ihukko te'im biram ihukko te'im naasam ihukko mah diinatem ki'nnuwwi ladimonne amaddakkotte. Googinam sinqa te'im lago'i eddechcha te'im lago'i caamma'a te'im bicco amaddakkotte. Mashka'oomim baxoo manchina itoo luwwa uwwimmi hasisookko» yukko. Odim Yesuus «Aaggakkam beero'onne te'im gattenne hundannem ki'nnuwwa aa'eena hasoo mancho xa'mmitakka'a ee beyyo uttakka'a mattakkeebe'e ee manchinne maqire afuullehe. Manni mine aaggakkam ammane xummaatissehe. Ee mi'n mannimdu ki'nnuwwa aa'ulas ki'nnuwwik xummi ixxuwwina ihona; ihukkaarem ki'nnuwwa aa'ubeelas ki'nnuwwik xummi ki'nnuwwinam daba'llona. Ayyi manchim ki'nnuwwa aa'ubeelas te'im ki'nnuwwika sagara macceesubeelas ee miniinsi te'im ee beero'iinsi fittakkam ammane ki'nnuwwi lokkiinsi dira giggissehe. Hanqinam an ki'nnuwwina kuroommo; oogaxxi ayyaamonne ee beero'onne afoo guzumo'iinsi Soddomanne Gomoranne afoo sholle'ookko» yukko. Odim Yesuus «Oono'o! An ki'nnuwwa oro'i lambe'enne gereebbisa issaa asse'oommo. Ee bikkina ki'nnuwwi hamashshisa qoolluwwi ikkehe; handare'isam maashaalluwwi ikkehe. Daannuwwinam ki'nnuwwa higisakka'a uwwakkamo; wixxixxi minneewwannem ganakkamo. Ee bikkina manna ege'llehe. I mashka'inne kasasantakka'a gassaa'n illagennee adilluwwi illagennee oogato'ina hincitakkamo. Ee'isinne ixxuwwinaa mulli minaadabinaa i bikkina kuttakkamo. Oogato'ina hincaa'akkam ammane woccakkam woshshi ki'nnuwwina uwwamoo bikkina ‹Hinkid te'im maha woncoommo?› yitakka'a hawwitakkotte. Mashka'oomim ee ammane ki'nnuwwi woronne ihaa wocookkok Waa'ik Keesammi Ayyaana bagaan ki'nnuwwayyo. Abbaayyim abbaayyo, annim beeto lehina higisaa uwwookko. Oosim amannee annannee ki'lla'a shisiissamo. I mashka'inne manni hundim ki'nnuwwa sabookko. Ihukkaarem lasaanchi afeebe'e qoxxaa iyyaqqookkok gatookko. Mat beero'onne hawwisakkam ammane mulli beero'o gibbehe. Hanqinam an ki'nnuwwina kuroommo; Manchi Beet waareebe'i afeebe'e Isra'ee'l beero'i hundam affakka'a guullitakkamoyyo. Losookkok losisaanchiinsi lophphooyyo. Agishshim ixxi moollanniinsi lophphooyyo. Losookkok ixxi losisaanchisa, awwaadaanchim ixxi moollannisa ihukkaa'lleensi ihookko. Mi'n annichcho ‹Bi'eelzeebula› yakkolas ixxi mi'n abaroosa hinkaa'nna lonsakka'a jor summinne weeshakkamo?» yukko. Odim Yesuus «Manna badditakkotte! Caakkoobee'isa ifiisamu luwwi te'im la'amoobee'isa maaxamu luwwi ma'lluchchim bee'e. Ee bikkina tuunsonne ki'nnuwwina kurummoka caakkanne kullehe. Mulla macceessakko'okam meeranne fittakka'a alallaattehe. Maara shito'aarem foore shiteena xantambee'i keeno badditakkotte. Ihukkaarem fooree maaraa xoo'oobee'i giiranne shokkiisaa bi'iseena xanoo Waa'a baddehe. Lam waaxiige mexxo'i saantibinne bitaa'llakkamuullayyonnihe? Waa'i yubeelas ixxuwwiinsi mat waaxiigem lehooyyo. Ki'nnuwwika'i horoo'l saraatim xigamaakkoohane. Ee bikkina badditakkotte! Lobakat waaxiiggeewwiinsi ki'nnuwwi hore'em lophphitakkamo» yukko. Odim Yesuus «Manni illagenne eese lagoobee'eka hundam anim iimanenne yoo Iyyanni illagenne lagoommoyyo. Ihukkaarem manni illagenne eese lagookkoka hundam anim iimanenne yoo Iyyanni illagenne lagoommo. Uullanne xumma eebeena waarummoka labissakkotte. An waarummok ora eebeenatte bagaan xumma eebeena waarummoyyo. An waarummok annanne beeto, amanne landichcho, ballonne beetare ki'iseenatte. Ee bikkina manchina ixxi mi'n abaroos maso'i ihookko» yukko. Odim Yesuus «Ayyi manchim iinniinsi lonsaa ixxi anna te'im ixxi ama iittookkok iihan iheena xanooyyo. Odim ayyi manchim iinniinsi lonsaa ixxi beeto te'im ixxi landichcho iittookkok iihan iheena xanooyyo. Ayyi manchim ixxo lehonne afisoo hawwo iyyaa eese awwonoobee'ek iihan iheena xanooyyo. Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok hundim ixxi foore gatisookko» yukko. Odim Yesuus «Ki'nnuwwa aa'ookkok eese aa'ookko; eese aa'ookkokim eese asse'ukkoka aa'ookko. Hiraagaanchom hiraagaanchi ihu bikkina aa'ookkok hiraagaanchika irifo'o a'llookko. Muccur manchom muccur manchi summinne aa'ookkok oo muccur manchi aa'oo irifo'o ixxim a'llookko. Hanqinam an ki'nnuwwina kuroommo; ayyi manchim ka hoffi kee'nnaannina matina eese awwonaanchi ihu bikkina mat kubbaayyi siggaalli wo'o uwwookkok irifo'o siixxookko» yukko. Tomminaa lam losaaninaa awwontam ijaajo Yesuus uwwaa guullaa lasage ee beyyo uraa ee gadanonne yoo beero'uwwanne alallaateenaa losiseenaa marukko. Yesuusim dabaraa «Moo'llakko'okaa macceessakko'i luwwaa mattakka'a Yohaannisina kullehe. Oono'o! Qooqquwwi moo'llamuulla; dimmuwwim xabbita'a taakke'llamuulla; oddomachchonne firoo baddisoo jabbiinsim manni fayye'aa muccuroolla. Gawwuwwi macceessamuulla; leto'i keen lehiinsi ki'llamuulla; buxina mishiraachchi sagar kuramoolla. Eesenne malamaa qolamoobee'ek maasse'amaakkoohane» yukko. Yohaannis losaan mattu'uuyyim Yohaannis bikkina Yesuus ka'isa yaa minaadabina kurimma asheerukko. «Udma'a mattakko'ok maha moo'llakkeenatte? Hafachchi heekkeesoo shasha moo'llakkeenattennihe? Te'im mahina mattakko'o? Danaam eddechcha edde'u mancho moo'llakkeenannihe? Danaam eddechcha edde'oo keen adilluwwi minenne siidamookko. Eehannaha mahina mattakko'o? Hiraagaancho moo'llakkeenattennihe? Eeyya, an ki'nnuwwina kuroommo; hiraagaanchiinsim lophphookkoka moo'llakkeenatte. Keesammi Kitaabanne ‹Oono'o! Kiina googo gudisoo i asse'amaancho ki illagenne asse'oommo› yamamaa kitaabamukkok Yohaannis bikkinatte. Hanqinam an ki'nnuwwina kuroommo; qaramu mannanne hundannem Xammaqaanchi Yohaannisiinsi lophphookkok hore'em bee'e. Ihukkaarem hundiinsim hoffe'ookkok Waa'i adillanonne ixxeensi lophphookko. Xammaqaanchi Yohaannis doolliinsi ki'isaa kaballi afeebe'e Waa'ik adillan lobakata gafe'amoolla; malaayyaam keenim angi issiteena yakitamuulla. Hanenne waaroo woshshi bikkina hiraagaanii Seerii hundim Xammaqaanchi Yohaannisanne afeebe'e kutto'ookko. Ki'nnuwwi amma'nnitakkolas ‹Eeliyaas waarookko› yamamukkok Yohaannisinatte. Qoossaa macceesoo macci yookkok macceesona» yukko. Odim Yesuus «Ka doolli manna mahinne akeekisoommo? Meeranne afuutta'a ixxuwwi dara'mmanna weeshshu'uuyyi ‹Dibbe'e aphphinsummo, kaddakko'oyyo; sollummo, wi'llitakko'oyyo› yitam oosinne kobi'llitamo. Xammaqaanchi Yohaannis soommanukkuuyyii woyi'n diqaasa agoo'nnii waarukkaare ‹Kuka'i habus amadaakkoohane› yakko'o. Manchi Beet itukkuuyyii agukkuuyyii waarukkaare ‹Moo'llehe; kuk itaahii agaahii hoogoobee'i gollaancho! Qaraxaaninaa baaxiilaaninaa beshichcho› yakko'o. Ihukkaarem Waa'ik qooroom hanqo'an ihukkis baxinne moo'amaakko» yukko. Ee lasage Yesuus maalalsiisoo agannuwwa issu beero'uwwi jora issimma uttobee'i bikkina ka'isa yukkuuyyi acceeqasimma asheerukko. «Aayye Koraazeena! Aayye Beetasaayda! Ki'nnuwwanne issamu aganni Xiiroosannee Siidoonannee issamaakkoota'n xiddi eddechcha edde'lla'a gii'l buchcham ixxuwwi gaganne laphphita'a gaassim baaxiilo biiraa yitam hee'llo'o. Ee bikkina an ki'nnuwwina kuroommo; Waa'i oogatoo ayyaamo ki'nnuwwiinsi Xiiroosinaa Siidooninaa sholle'ookko. Qifirinnaahooma, at iimane affaattoollayyonnihe? Ihukkaarem at Si'oolanne dillitootto. Keesenne issamu maalalsiisoo agannuwwi Soddomanne issamaakkoohan ihuta'n oo beero'i kaballi afeebe'em bi'am hee'ukkoyyo. Ee bikkina an ki'nnuwwina kuroommo; oogaxxi ayyaamo kiinniinsi Soddomina sholle'ookko» yukko. Ee ammane Yesuus «Iimaninaa uullinaa Moollanni Iyyanna! Kaka qoolluwwiinsii lachchaammuwwiinsii daphphaa'llaa lachbee'i keenina caakkissitti bikkina keese galaxxoommo. Eeyya, Iyyanna! Kuk ki doo'lla. Hundi luwwam Iyyanni iina uwwaakko. Anniinsi bagaan Beeto la'ookkok matim bee'e. Ee'isam Beetiinsi bagaan Anna la'ookkok matim bee'e; Beet la'iseena doo'llukkaanniinsi bagaan ayyim Anna la'eena xanooyyo. Iyyi kee'mmu hoongaan keen hundim i kollonne waallehe; an usheexxisoommo. Ki'nnuwwi iikka gaanjaqqa massitakka'a iyyehe; iinniinsim lossehe. Mashka'oomim an qishixxoommanee maashaallaa; ki'nnuwwi foorinam usheexxato siiddakkamo. Iikki axaqqim kee'mmoobee'ane. I iyyim sholle'aalla» yukko. Ee ammane Yesuus Usheexxaxxi Ayyaamonne hurbaaxxi worinne higam hee'ukko. Ixxi losaanim sibaatta'a hee'llo'i bikkina hamaamika quxxa'a cukkita'a itimma asheetto'o. Farisaawe'uwwi eekka moo'llo'i ammanenne Yesuusina «Ki losaan Usheexxaxxi Ayyaamonne issimmina laboobee'i luwwa issitamisa moo'e!» yito'o. Yesuusim ixxuwwina dabaraa «Daawiitii ixxenne maqire hee'llo'i mannii sibaatto'i ammane Daawiit maha issuda'e qananaa'llakko'oyyonnihe? Ixxi Keesammi Mine aagaa qeessuwwiinsi bagaan ixxi te'im ixxenne maqire hee'llo'i manni itimmi hasisoobee'i keesammi qorosho'o itukko. Odim Usheexxaxxi Ayyaamonne Keesammi Minenne qeessuwwi ee Usheexxaxxi Ayyaa'm seera gindito'aarem baaxiil ihoobee'isa Seeranne qananaa'llakko'oyyonnihe? An ki'nnuwwina kuroommo; Keesammi miniinsi lophphookkok keyye yookko. ‹Diinate kitimimmi ihoo'n qishixximma iittoommo› yookkok mayyimda'e ihukkisa qoossitakko'oohan ihuta'n bi'ishshibee'i mannanne oogattakkam hee'llakko'oyyo. Manchi Beet Usheexxaxxi Ayyaaminam annichchomena'e» yukko. Yesuus ee beyyiinsi maraa Ayihuxxi manni wixxixxi mine aagukko. Eekke'em angi shiihaakkoo mat manchi hee'ukko. Ee ammane Yesuusa kasasseena hassam manni «Seeranne ‹Usheexxaxxi Ayyaamonne manna fayyiissehe› yoohonnihe?» yita'a xa'mmito'o. Yesuusim ixxuwwina «Ki'nnuwwiinsi matina gereechchi yookkok oo gereechchi Usheexxaxxi Ayyaamonne xilli barenne ubuta'n bariinsi fissoobee'ek ayyette? Eehannata'i gereechchiinsi manchi hinkaa'nna lophphoohane? Ee bikkina Usheexxaxxi Ayyaamonne er luwwa issimma Seer hoorooyyo» yukko. Ee lasage Yesuus ee anga shiihu mancho «Ki anga biddiqaa'e!» yukko. Ixxim biddiqaa'u ammanenne ee la'm angisam fayya'i ihukko. Ihukkaarem Farisaawe'uwwi ee beyyiinsi fitta'a Yesuusa shitam googo a'llanto'o. Yesuusim eekka la'u ammanenne ee beyyiinsi ille hoo'llukko. Lobakat minaadabim ixxo awwonto'aare hundam fayyiisukko. Oo fayyiisu manni ixxi bikkina mulli keenina kuttambee'isa Yesuus ijaajukko. Oohim ihukkok hiraagaanchi Issaayyaas «An doo'llummi i awwaadaanchi kane; an iittoommokii eese liiransookkokii ixxotte. I Keesammi Ayyaanam ixxonne issoommo. Ixxim minaadabina iikka hanqo'i oogato'o alallaatookko. Ayyennem fitamooyyo te'im laarooyyo; googonnem ixxi sagara ayyim macceesooyyo. Hoongaan keeninam qishixxookko; hara'mmaanchibee'i keenom abooyyookko. Eekkam issookkok hanqo'i oogato'ina beyyi siidameebe'i afeebe'e. Minaadab hundim ixxonne neeyyato issitamo» yaa wocu hiraag wo'mmoo'isinatte. Habus asheeru bikkina moo'eenaa woceenaa xanoobee'i mancho Yesuus beyyo eebakko'aare Yesuus fayyiisukko. Ee lasage oo manchim moo'eenaa woceenaa xanukko. Minaadab hundim maalalta'a «Ku manchi Daawiit Beet ihoo'n urooyyo» yito'o. Farisaawe'uwwim eekka macceesso'i ammanenne «Ku manchi habusa fissookkok habus adil Bi'eelzeebul uwwu malaayyinnette» yito'o. Ihukkaarem Yesuus ixxuwwika sawwite la'aa «Mat adil gassoo uulli manni ixxuwwina'i ixxuwwim qasantaman ihulas oo adillan bi'ookko. Odim mat beero'i te'im mat mi'n abaroos ixxuwwina'i ixxuwwim annanni ikkolas qoxxita'a uulliteena xantamoyyo. Sheexaanim Sheexaana fissoohan ihukkaa'lleensi ixxina'i ixxim annanni ihookko. Eehaare ixxek adillan hinkid qoxxaa uulleena xanookko? Bi'eelzeebul uwwu malaayyinne an habusa fissoomman ihulas ki'nnuwwik awwonaan ayyi malaayyinne fissitamo? Ee bikkina ki'nnuwwi huushanchanne ixxuwwi oogattamo. Ihukkaarem an habusa fissoommok Waa'i Ayyaaninnette ihu bikkina Waa'ik adillan ki'nnuwwi beyyo waaraakko. Mat malaayyaam manchika mine aagaa gaassaa manchooma karoo'n ixxi mu'uta bogeena ayyim xanooyyo. Ihukkaarem manchooma karaa lasage mu'uta bogeena xanookko. Iinninne mateeyyoom bee'ek iinninne uullixxamookko. Iinninne maqire wixxaa'oobee'ekim binnaa'ookko. Ee bikkina an ki'nnuwwina kuroommo; mannik baaxiilii Waa'inne game'llamoo game'llanchii hundim haafamookko. Ihukkaarem Keesammi Ayyaaninne game'llamoohaannina haafamooyyo. Ayyi manchim Manchi Beetonne jora wocukkaare haafamookko. Ihukkaarem Keesammi Ayyaananne jora wocukkaannina ayyi manchinam ka doollennem ihukko te'im waaroo doollenne haafamooyyo» yukko. Odim Yesuus «Haqqichchi danaam ihulas ixxi mishim danaam ihookko. Haqqichchimdu jor ihulas ixxi mishim jor ihookko. Haqqichcho la'akkamok ixxi mishinnette. Ki'nnuwwi hamashshi ooso; ki'nnuwwi jor keen ikkakko'i bikkina er woshsha woccakkeena hinkid xantakkamo? Mashka'oomim manni suuminne fissaa wocookkok wodanonne wo'mmaa gatukkane. Er manchi ixxi wodanonne wixxaa'u er luwwiinsi erokam fissookko. Jor manchim ixxi wodanonne wixxaa'u jor luwwiinsi joram fissookko. An ki'nnuwwina kuroommo; manni wocu awwaad bee'i woshshi hundinam oogaxxi ayyaamonne xa'mmamookko. At muccur ikkoottok te'im keesenne oogatamookkok at woccitti woshshinnette» yukko. Ee lasage Seera losisaanii Farisaawe'uwwii «Losisaancho! Kiinniinsi maalalsiisoo mare'e moo'nneena hansoommo» yito'o. Ixxim dabaraa «Amma'nnatbee'i ka doolli jor manni maalalsiisoo mare'e moo'eena hasookko. Ihukkaarem hiraagaanchi Yoonaasanne ihu mare'iinsi bagaan mulli mare'i uwwamooyyo. Geejji qurxummekkichchi godaphphi woronne Yoonaas sas ballaa sas hiimoo hee'ukkisam ee'isam Manchi Beetim sas ballaa sas hiimoo uulli woronne hee'ookko. Naanaawe'i uulli manni Yoonaas kuru woshsha macceessa'a baaxiilo biiraa yita'a daba'llito'i bikkina oogato'i ammane ka doolli manninne maqirem ki'lla'a ka doolli mannanne oogattamo. Ihukkaarem Yoonaasiinsi lophphookkok keyye yookko. Woroo'n qarinne yoo uullina adil hee'llo'i Saaba'am Salamoonika qoorooma moo'lleena uulli tochchiinsi waatto'i bikkina oogato'i ammane ka doolli manninne maqirem ki'lla'a ka doolli mannanne oogattamo. Ihukkaarem Salamooniinsi lophphookkok keyye yookko» yukko. Odim Yesuus «Jor ayyaan manniinsi firoo ammane usheexxoo beyyo hasukkuuyyi wobee'i udma'anne kululookko. Ihukkaarem usheexxoo beyyo siidooyyo. Ee bikkina oo habus ‹Firaa waarummi i mi'n beyyom daba'llaa maroommo› yookko. Daba'llaa maroo ammane oo min fii'amaa ma'lluwwimbee'i muccur ihaa gudaakkoo siidookko. Ee lasage maraa ixxeensi baassam habussuwwika lamara ixxenne maqire massookko. Ixxuwwim aagga'a eekke'e hee'llamo. Ee manchik duuha'i eraa'llaanniinsi lasaqqek jorookko. Ka doolli jor mannannem ee'isa ihookko» yukko. Minaadabina Yesuus wocukkuuyyi hee'onam ixxi amaa ixxi abbaayyuwwii atoorassiteena hassa'a biiranne uullita'a hee'llo'o. Eekke'e hee'u minaadabiinsi mat manchi Yesuusina «Kiyyummaa kiyyabbaayyuwwii keese atoorassiteena hassa'a u'llummanne uullito'ookko» yukko. Yesuusim dabaraa ixxena «Iyyumma ayyette? Iyyabbaayyuwwim ayyayyaamo?» yukko. Ee lasage ixxi losaa'n kollonne anga biddiqaa'aa «Iyyummaa iyyabbaayyuwwii ka keeno. Mashka'oomim iimanenne yoo Iyyanni yukkoka wonshookkok ayyim iyyabbaayyo, iyyaayyattee iyyummattee» yukko. Yesuus ee ballam miniinsi firaa maraa dambalaq gammalanne yoohaannonne lobakat minaadabim ixxi beyyo waatta'a wixxito'i bikkina wongiranne firaa afuurukko. Minaadab hundim dambalaq gammalanne uullita'a hee'llo'o. Ee lasage dut luwwa kobi'llishshinne «Mat ayyaamo mat manchi sire'e wixeena firukko. Wixukkuuyyim mat mat sire'i googonne ubukko. Cii'im waaraa feeraa itukko. Odim mat mat sire'i lobakat buchchi bee'i kinaam uullanne ubukko. Lobakat buchchi bee'i bikkina qaqqisom mutukko. Ihukkaarem eelliinchi firu ammanenne xaph aad aagubee'i bikkina quubaa gogukko. Odim mat mat sire'i utti lambe'enne ubukko. Ihukkaarem utti li'aa ee muta xagarukko. Odim mat mat sire'i harish uullanne ubukko. Oo sire'im mutaa matii xibbe, matim lohayye, matim sade mishukko. Qoossaa macceesoo macci yookkok macceesona» yaa kurukko. Ee lasage losaan Yesuus beyyo hincita'a «Mahina ixxuwwina kobi'llishshinne kuttoolla?» yita'a xa'mmito'o. Yesuusim ixxuwwina «Waa'i adilla'n bikkina manniinsi daphphukkoka laqqakkamisina ki'nnuwwina lachchi uwwamaakko. Ihukkaarem ixxuwwina uwwamukkoyyo. Mashka'oomim yoohaannina edamaa uwwamookko; lophphookkome. Ihukkaarem bee'aanniinsi oo yoo qaxichchim hooramookko. An ixxuwwina kobi'llishshinne wocummok moo'llu'uuyyim moo'llambee'i bikkinattee macceessu'uuyyim qoossitambee'i bikkinattee. Hiraagaanchi Issaayyaas ixxuwwi bikkina ‹Hanqinam ki'nnuwwi macceesimmina macceessakkamo; ihukkaarem qoossitakkamoyyo. Moo'imminam moo'llakkamo; ihukkaarem hindihitakkamoyyo. Mashka'oomim ka mannik wodan duudaakko; maccim macceesoobee'isa gawwaakko. Ixxuwwik illim ifiisamaakko. Eehid ihubeeta'n an ixxuwwa fayyiisoommisina illinne moo'lla'a maccinnem macceessa'a wodaninnem qoossita'a i kollonne daba'llitam hee'llo'o› yaa wocukkok wo'mmoo'isinatte. «Ihukkaarem ki'nnuwwik illi moo'oo bikkinaa maccim macceesoo bikkinaa maasse'antakko'oo keeno. Hanqinam an ki'nnuwwina kuroommo; hiraagaa'nnek dut keenii lobakat xummaan keenii ki'nnuwwi moo'llakko'oka moo'immina mixxa'a hee'llo'o; ihukkaarem moo'llo'oyyo. Ki'nnuwwi macceessakko'okam macceesseena mixxa'a hee'llo'o; ihukkaarem macceesso'oyyo» yaa dabarukko. Odim Yesuus «Sire'e wixu manchi kobi'llishshi maruchda'e ihukkisa kaba macceessehe. Waa'i adilla'n bikkina macceesaa qoossoobee'ek ayyi manchim hee'ulas oo jor waaraa ixxi wodanonne wixamukkoka feeraa massookko. Googonne wixamu sire'ik kobi'llishshi moo'isookkok eehane. «Kinaam uullanne wixamu sire'i moo'isookkok ka sagara macceessa'a ee ammanem liiranchinne aa'llam manna. Ihukkaarem ammanoominatte bagaan ixxuwwik xaph aad aagubee'i bikkina ka saga'l mashka'inne ixxuwwanne hawwi te'im yaayyanchi afoo ammane qaqqisom amma'nnatiinsi ubbamo. Odim utti lambe'enne wixamu sire'i moo'isookkok Waa'ika sagara macceessam manna. Ihukkaarem ka uulli heechchina kichchechchii godda iittii ee macceesso'i Waa'i sagara xagaraa amadoo bikkina mishbee'i keen ikkamo. Danaam uullanne wixamu sire'i moo'isookkok ka sagara qoossita'a macceessam manna. Oo manni hanqinam misha mishshamo. Ixxuwwikim matii xibbe, mullekim lohayye, mullekim sade mishookko» yukko. Odim Yesuus ixxuwwina mulli kobi'llishshinne «Waa'ik adillan danaam sire'e ixxi uullanne wixu mancho labookko. Ihukkaarem manni diriiraakkoohaannonne diinakkichchi waaraa aras lambe'enne sinnaara wixaa marukko. Aras mutaa mishu ammanenne sinnaarim moo'amukko. Ee bikkina mi'n annichchik awwaadaan annichchi beyyo waatta'a ‹Moollanna, ki uullanne danaam sire'e wixxaa hee'llittoyyonnihe? Eehannah sinnaar hanniinsi waarukko?› yito'o. Ixxim ‹Kaka issukkok diinakkichcho› yaa dabarukko. Ixxi awwaadaanim ‹Moollanna, sinnaarooma shuqunnona hassoohonnihe?› yito'o. Ixxim ‹Eehideyyo; sinnaara shuquntakkam ammane arasam gossakkam bikkina muraxxi amman afeebe'e lamim maqirem li'llona. Muraxxi ammane muroo keenina sinnaarooma gaassitakka'a feettakka'a hoollehe; giirannem shokkoo'isina wixxaa'llakka'a kallehe. Ihukkaarem hurbaatooma wixxaa'llakka'a i sechchonne issehe!› yoommo» yukko. Yesuus odim mulli kobi'llishsham «Waa'i adillan mat manchi massaa ixxi uullanne wixu shaa'n sire'i'nnoo'i sire'e labookko. Oo sire'i mulli sire'i hundiinsim gootto'o. Ihukkaarem li'oo ammane duubbonne wixakkam luwwi hundiinsim lophphaa haqqichchisa ihookko. Ee lasage cii'i waaraa caaffuwwanne do'nna baxaa usheexxookko» yukko. Odim Yesuus mulli kobi'llishshinne «Waa'i adillan mat meentichcho sas qunni qamanne edda'a qufisso'i ursho'o labookko. Oo ursho'i qufisso'i qam hundoomam hufaa'ukko» yukko. Yesuus ka woshshi hundam minaadabina kobi'llishshinne kurukko. Kobi'llishshi bee'eka maham wocukkoyyo. Oohim hiraagaanchinne «Kobi'llishsha wocimminne i suume fooqaa'oommo. Uulli qooccamukkaanniinsi ki'isaa maaxamukkokam wocoommo» yukkok wo'mmoo'isinatte. Yesuus ee lasage minaadaba uraa mine aagukko. Ixxi losaanim ixxi beyyo waatta'a «Aras woronne wixamu sinnaa'l kobi'llishsha niina tittaa kure» yito'o. Yesuusim «Danaam sire'e wixukkok Manchi Beeto. Abuulloom ka uulla; danaam sire'im Waa'i adilla'n ooso. Sinnaaroom Sheexaa'n ooso; sinnaara wixu diinakkichchim Sheexaancho. Hurbaata murimmi ammanoom doolli beeddichcha; muroo keenim Waa'i asse'amaano. Sinnaarooma feerakka'a giiranne shokkiisakkamisa doolli beeddichchannem ee'isa ihookko. Manchi Beet ixxi asse'amaano asse'ookko. Ixxuwwim baaxiilina mashka'i ikko'i keenoo jora baxxam keenoo hundam Waa'i adilla'n woriinsi wixxaa'lla'a fissita'a xoo'oobee'i giiranne eddamo. Eekke'em wi'llitamoo inqe iiccamoo. Ihukkaarem xummaan keen Waa'i adillanonne eelliinchisa caakkissamo. Qoossaa macceesoo macci yookkok macceesona» yukko. Odim «Waa'i adillan abuulli woronne maaxamu diinate labookko. Mat manchi ee diinate siidu ammanenne dabaraa waammukko. Oo manchi liiramu bikkina maraa ixxena yoo luwwa hundam biteesaa ee uulla bitaa'ukko» yukko. Odim «Yesuus Waa'i adillan worqa siideena mixoo daddaraancho labookko. Danaam worqa siidu ammanenne ixxena yoo luwwi hundam biteesaa ee worqa bitaa'ukko» yukko. Odim Yesuus «Waa'i adillan dambalaqanne darabamaa hundem hagar qurxumme'iinsim wixxaa'u shikka labookko. Shikkanne qurxumme'i wo'mmu ammanenne gosaasakka'a dambalaq tochchonne fissakko'o. Ee lasage afuurakka'a danaam danaam qurxumme'e sanannanne wixxaa'akko'o. Ihukkaarem jor jora uunjakko'o. «Ee'isam lasaanchi doollenne Waa'i asse'amaan waatta'a xummaan kee'n lambe'iinsi jor keeno annanni issita'a xoo'oobee'i giiranne darabbamo. Ee beyyonnem ixxuwwi wi'llitamoo inqe iiccamoo» yukko. «Ka woshsha hundam qoossitakka'atennihe?» yukko. Ixxuwwim «Eeyya!» yita'a dabatto'o. Odim Yesuus «Ee bikkina Seera losisaa'nnek ayyim Waa'i adilla'n bikkina losoo ammane ixxi mu'uta dissu beyyiinsi haareechchi mu'utaa moosir mu'utaa hundam fissoo mi'n annichcho labookko» yukko. Yesuusim ee kobi'llishsha wocaa guullukkisam ee beyyiinsi marukko. Ixxim ixxi uulla daba'llaa waaraa wixxixxi minenne manna losisimma asheerukko. Ee bikkina manni maalalaa «Ku manchi ka lachchaa aganna issoo malaayyee hanniinsi siidukko? Kuk haqqa cabbaraanchina beetoyyonnihe? Ixxi amdu Maaraametteyyonnihe? Ixxi abbaayyuwdu Yaaqoobatte, Yoosa'atte, Simi'oonattee Yihudatteyyonnihe? Odim ixxi aayyuwwi hundim niinninne maqire yo'i keenoyyonnihe? Eehaara'i ku manchi ka luwwi hundam hanniinsi siidukko?» yito'o. Ee mashka'inne ixxo sabbo'o. Ihukkaarem Yesuus ixxuwwina «Hiraagaanchi lomba siixxoobee'ek xale'i ixxi uullannettee ixxi minennettee bagaan mulli beyyonne hannonnem lomba siixxookko» yukko. Amma'nnitobee'i bikkina ee beyyonne maalalsiisoo baxika lobakata Yesuus baxukkoyyo. Ee doollenne Galii'l uullina gassaanchi hee'u Heeroodis Yesuus bikkina manni er sado wocukkuuyyi macceesaa ixxena awwaaddam keenina «Kuk Xammaqaanchi Yohaannisatte; lehiinsi ki'aakko. Ka aganna baxoollak ee bikkinatte» yukko. Heeroodis ixxi abbaayyi Filiphphoosina arette hee'llo'i Heeroodiyaad mashka'inne Yohaannisa amadiisaa karaxxi minenne kassiisaa hee'ukko. Kassiisu mashka'im «Kiyyabbaayyi are at eebbona Seer uwwooyyo» yaa Heeroodisina Yohaannis wocam hee'u bikkinatte. Ee bikkina Yohaannisa sheena Heeroodis hasam hee'ukko. Ihukkaarem minaadab ixxo hiraagaanchi issaa moo'am hee'u bikkina minaadaba baddukko. Heeroodis qaramu ayyaamo lonsakkam balla weeshamu manni illagenne Heeroodiyaad landichcho kajja kadda'a Heeroodisa liiransito'o. Ee bikkina xa'mmito'i luwwi hundam uwweena hide'ukko. Landichchom is ama soggo'isinne «Xammaqaanchi Yohaannisika gaanjiinsi iim yooqaxa qunuunchonne issitaa kaba uwwe» yito'o. Ee woshshanne adil kichche'ukko. Ihukkaarem koyyi illagenne hide'aa hee'u bikkina isena uwwakkamisina ijaajukko. Ee bikkina manna asse'aa Yohaannisika gaanje karaxxi minenne mussiisukko. Muramu horoorem qunuunchonne issakka'a eebakka'a landichchona uwwakko'o. Isem amana massita'a uwwito'o. Yohaannis losaanim waatta'a leeshooma massita'a waammito'o. Ee woshsham matta'a Yesuusina kutto'o. Yesuusim Yohaannis lehukkisa macceesu ammanenne wongiranne aagaa ee beyyiinsi manni bee'i beyyo mullam marukko. Minaadabim eekka macceesso'i ammanenne beero'uwwiinsi lokkinne ixxo awwonto'o. Yesuusim wongiriinsi firu ammanenne lobakat minaadaba moo'aa qishixxukko. Jabbaano fayyiisukko. Uulli hiimu ammanenne Yesuusik losaan ixxi kollonne hincita'a «Ku beyyi manni gatti bee'i beyyo. Ammanim hiimaakko. Ee bikkina gattuwwa matta'a ixxuwwi gagina hurbaata bito a'llitamisina ka minaadaba geegeese» yito'o. Yesuusim «Ittam luwwa ki'nnuwwi uwwehe bagaan marimmi hasisooyyo» yukko. Ixxuwwim «Niina'i yookkok xale'i onti xeffo'i qorosho'oo lam qurxumme'ee» yita'a dabatto'o. Ixxim «Eeqaxam i beyyo eebbehe!» yukko. Minaadabim hixenne afuuroo'isina ijaajukko. Ee lasage ontem xeffo'i qorosho'oo lamem qurxumme'ee amadaa iimane moo'aa Waa'a galaxxaa qorosho'o iiqansaa ixxi losaanina uwwukko. Ixxi losaanim minaadabina uwwito'o. Minaadab hundim itta'a goddita'a gatu giggira tommonnee lam sanfonnee wonshita'a ki'isso'o. Itu minaadabim meentii oosii xigamoo'n xale'i goon onti kuma ihooqax hee'ukko. Ee lasage minaadaba geegeesukkuuyyi ixxi losaan wongiranne aagga'a dambalaq eeqidonne ixxeensi gaassita'a fittamisina Yesuus ijaajukko. Minaadaba geegeesaa lasage Waa'a uunxeena mullam duunanne firukko. Uulli hiimaa lasagem ixxi ee beyyonne mullam hee'ukko. Ee ammane wongir dambalaq tochchiinsi qee'llaa hee'ukko. Malaayyaam hafachchi ki'aa hee'u bikkina ixxi losaan hambu'llaminne hawwitam hee'llo'o. Luxxi antabaa'i muuneena ihaakkoohaannonne Yesuusim dambalaq hanenne taakke'ukkuuyyi ixxi losaa'n kollonne waarukko. Ixxi losaanim dambalaqanne taakke'ukkuuyyi maroo'isa moo'llo'i ammanenne «Kuk wiidda» yita'a lobakata baddita'a laatto'o. Ihukkaarem Yesuus ee ammanem «Anette; badditakkotte» yaa wocukko. Pheexiroosim ixxena dabaraa «Moollanna! Atette ikkilas wo'i hanenne taakke'aa ki beyyo waaroommisina ijaaje!» yukko. Yesuusim «Waare» yukko. Ee bikkina Pheexiroos wongiriinsi firaa Yesuus beyyo afeena dambalaq hanenne taakke'ukkuuyyi marukko. Ihukkaarem ee malaayyaam hafachcha moo'u ammanenne baddukko. Wo'onnem xuuxamukkuuyyi maru ammanenne «Moollanna! Eese gatise!» yaa laarukko. Yesuusim qaqqisaa Pheexiroosika anga amadaa «Kiikki amma'nnat gootto'o. Mahina maltitto?» yukko. Ixxuwwim wongiranne aaggo'i ammanenne hafachchi uullukko. Wongi'l woronne hee'llo'i losaanim «Hanqinam at Waa'i Beeto!» yita'a otossito'o. Ixxuwwim dambalaqa fitta'a Gensereexa yakkam uulla waatto'o. Ee uullanne hee'llo'i mannim Yesuusatte ihukkisa inkiinnito'i ammanenne gadanonne yoo uulli hundam asse'lla'a jabbaano ixxi beyyo eebbo'o. Jabbaanim ixxi eddechchika kasoomam nakkimmina uunxitam hee'llo'o. Nakkito'i keen hundim fayye'llo'o. Ee lasage Farisaawe'uwwii Seera losisaanii Yerusaaleemiinsi Yesuus beyyo waatta'a «Ki losaan anno'i losano mahina ginditamuulla? Mashka'oomim hurbaata ittam ammane losa'nnisa anga aanshaqqitamoyyo» yita'a xa'mmito'o. Yesuusim ixxuwwina «Ki'nnuwwim ki'nnuwwi losa'n bikkina Waa'i ijaajo mahina ginditakkamuulla? Mashka'oomim Waa'i ‹Kiyyannaa kiyyummaa lonse. Ayyim ixxi annanne te'im ixxi amanne jor sagara wocookkok lehona› yaakko. Ihukkaarem ki'nnuwwi mat manchi anninaa amanaa ‹Iinniinsi siiddakkam hara'mmato Waa'ina kitim issaa hincaa'aammo› yulas ‹Oo manchi anna te'im ama lonsimmi hasisooyyo› yitakkamo. Ki'nnuwwika losano qoxxisimminaa yitakka'a Waa'ika ijaajo ginditakkamo. Birantakkam keeno, Issaayyaas ki'nnuwwi bikkina ‹Ku minaadab eese lonsookkok xale'i suuminnette bagaan ixxuwwik wodan iinniinsi qee'llaakkoohane. Manni losanoo heechchi qaanqaa See'llisa issita'a losissu'uuyyi kora'am iina otossitamo› yaa wocu hiraag hanqo'ane» yukko. Odim Yesuus minaadaba ixxi beyyo weeshaa «Qoossitakka'a macceessehe. Mancho haashaassookkok suumiinsi firoohane bagaan suuminne aagoohaneyyo» yukko. Ee ammane losaan Yesuus beyyo hincita'a «Kaba at woccitti woshshanne Farisaawe'uwwi qolanto'isa laqqittonnihe?» yito'o. Yesuusim dabaraa «Iimanenne yoo Iyyanni kaasubee'i haqqi hundim xoqolamookko. Ixxuwwik illi qooqaakkoo awwonsaan ikko'i bikkina ixxuwwa uttakka'a ullehe. Qooq qooqa awwonsulas lamim baallenne ubbamo» yukko. Ihukkaarem Pheexiroos Yesuusina «Kobi'llishshoom mayyimda'e niina caakkissaa kure» yukko. Yesuusim ixxuwwina dabaraa «Ki'nnuwwi kabad afeebe'em qoossitakkamoyyonnihe? Manchi suuminne aagookkok hundim godabonne dillaa ee lasage ixxi orachchiinsi shum ihaa firoo'isa qoossitakkamoyyonnihe? Ihukkaarem suumiinsi firookkok wodaniinsi firoo bikkina manna haashaassookkokim ixxotte. Mashka'oomim jor sawwit, manna shimmi, mine issakkoo'n saa'immi, mine issakka'a saa'immi, game'immi, qophphanonne naqqasimmii mannika summa bi'isimmii hundim wodaniinsi firookko. Manna haashaassookkok ee keeno bagaan losa'nnisanne anga aanshaqqakkoo'n itimmi manna haashaassooyyo» yukko. Yesuus ee beyyo uraa Xiiroosikaa Siidoo'n beero'oo marukko. Ee uullanne hee'llam Kaana'aa'n uulli mat meentichcho ixxi beyyo waatta'a «Daawiit Beet i Moollanna, iina qishixxe! I landichcho malaayyaam habus amadaa jorisa hawwitamuulla» yitu'uuyyi laatto'o. Ihukkaarem Yesuus isena matem sagaram dabarukkoyyo. Ee ammane Yesuusik losaan ixxi kollonne hincita'a «Tu meentichcho neese awwontu'uuyyi laatta'a hawwisso'i bikkina ise geegeese» yita'a uunxito'o. Ixxim «An asse'amummok gereebbisa bi'llo'i xale'i Isra'ee'l minaadabinatte» yaa dabarukko. Ihukkaarem oo meentichcho waatta'a Yesuus lokkonne ubba'a «I Moollanna, iina hara'mme!» yito'o. Yesuusim isena dabaraa «Oosika hurbaata ki'isakka'a wishina uwwimmi hasisooyyo» yukko. Isem dabatta'a «Moollanna! Hanqame; ihukkaarem wishim moollanni leemaatiinsi ubu furfuro'o itookko» yito'o. Yesuusim dabaraa «Taa meentichche, ki amma'nnat lophphaakkoohane. Ee bikkina at hassitti luwwi ihona» yukko. Is landichchom ee ammanem fayye'llo'o. Yesuus ee beyyiinsi uraa Galii'l Dambalaq gadano waaraa duunanne firaa afuurukko. Lobakat minaadabim dimmuwwa, qooqquwwa, shiihuwwaa duudduwwaa mulli dut jabbaanom Yesuus beyyo eebba'a ixxi gadanonne dissito'aare Yesuus fayyiisukko. Ee bikkina minaadabim duudduwwi woccu'uuyyi, shiihuwwi fayye'llu'uuyyi, dimmuwwim taakke'llu'uuyyii illi qooqquwwim moo'llu'uuyyii moo'llo'i ammanenne maalalta'a Isra'ee'l Waa'a galaxxito'o. Yesuus ixxi losaano weeshaa «Ku minaadab iinninne maqire sas balla afuutto'i bikkina ittam luwwi ma'lluchchim bee'e. Ee bikkina an ixxuwwina lobakata qishixxaammo. Elle'llam ammane googonne hoogga'a ubbambee'isina hurbaata ittoo'n geegeeseena hasoommoyyo» yukko. Losaanim «Ka minaadab hundinam ihoo hurbaata neese ka udma'anne hanniinsi siindoommo?» yito'o. Yesuusim «Ki'nnuwwina hinkaa'n qorosho'i yookko?» yaa xa'mmukko. Ixxuwwim «Lamar xeffo'i qorosho'ii gootto'i qurxummekkichcha'ik hoffokimii yookko» yito'o. Ee lasage minaadab uullanne afuuroo'isina Yesuus ijaajaa lamarem xeffo'i qorosho'oo qurxumme'ee ki'isaa Waa'a galaxxukko. Iiqaahim ixxi losaanina uwwukkaare losaan minaadabina uwwito'o. Hundim itaa goddaa lasage gatu giggira losaan wixxaa'lla'a lamar sanfonne wonshita'a ki'isso'o. Itu minaadabim meentii oosii exxaa xigamoo'n soor kum hee'ukko. Yesuusim minaadaba geegeesaa lasage wongiranne aagaa Magdoona yakkam uulla marukko. Mat mat Farisaawe'uwwii Saduuqaawe'uwwii Yesuus beyyo waatta'a Yesuusa keenteena hasso'i bikkina iimaniinsi maalalsiisoo mare'e moo'isoo'isina xa'mmito'o. Ihukkaarem Yesuus ixxuwwina «Eelliinchi aagoo ammane ‹Iiman kasharaakko; ee bikkina xeen ga'nnooyyo› yitakkamo. Odim soodaraar dara ‹Uulli duubaakko; kaballa xeen ga'nneenatte› yitakkamo. Iima'nneka saarayyitakka'a laqqakkamo. Ihukkaarem doollika mare'e annanni issitakka'a hiraaggakkeena xantakkamoyyo. Amma'nnat bee'i ka doollik jor manni maalalsiisoo mare'e hasookko. Ihukkaarem hiraagaanchi Yoonaasanne ihu mare'iinsi bagaan mulli mare'i uwwamooyyo» yukko. Ee lasage Yesuus ixxuwwa uraa marukko. Losaanim dambalaq eeqido qorosho'ika maham amaddoo'n xadda'a waatto'isa tiitto'o. Yesuusim ixxuwwina «Farisaawe'uwwaanniinsii Saduuqaawe'uwwi ursho'iinsii qoxxitakka'a ege'llehe» yukko. Ixxuwwim «Kid yu mashka'i neese qorosho'o amandoo'n waallummi bikkinatti ihoo'n urooyyo» yaqqanto'o. Ihukkaarem Yesuus ixxuwwi sawwixxeka la'aa «Ki'nnuwwi ka amma'nnat bee'i keeno; qorosho'o amaddakkobee'i bikkina ki'nnuwwina'i ki'nnuwwim mahina woccakkamuulla? Kabad afeebe'em qoossitakkamoyyonnihe? Onti xeffo'i qorosho'i onti kum mannina ihaa gatukkaare manni itaa gatu giggira mee'i sanfonne wonshitakka'a ki'issakkoda'e tiittakkamoyyonnihe? Odim lamar xeffo'i qorosho'i soor kum mannina ihaa gatukkaare mee'i sanfonne wonshitakka'a ki'issakkoda'e sawwitakkamoyyonnihe? Eehaara'i an ki'nnuwwina ‹Farisaawe'uwwaanniinsii Saduuqaawe'i ursho'iinsii ege'llehe!› yaa wocummok qorosho'i bikkinatte ihubee'isa hinkid qoossitakkamoyyo?» yukko. Ee lasage losaan Yesuus wocukkok Farisaawe'ii Saduuqaawe'ii losissam losishshiinsi ege'llitamisinatte bagaan ursho'i bikkinatte ihubee'isa qoossita'a laqqo'o. Filiphphoos Qiisaariya yakkam uulla Yesuus afu ammanenne ixxi losaanina «Manchi Beeto manni ayyette yoolla?» yaa xa'mmukko. Ixxuwwim dabatta'a «Mat mat manni ‹Xammaqaanchi Yohaannisatte› yitamuulla. Mulli keenim ‹Eeliyaasatte› yitamuulla. Mulli keen odim ‹Ermiyaasatte› te'im ‹Hiraagaaniinsi mato› yitamuulla» yito'o. Odim Yesuus «Eehaare ki'nnuwdu eese ayyette yitakkamuulla?» yaa xa'mmukko. Ee ammanenne Simi'oon Pheexiroos «At hee'oo Waa'i Beet Kiristoosatte» yaa dabarukko. Yesuusim dabaraa «Yoona'i beet Simi'oona, at maasse'antaattoohane. Mashka'oomim kaka kiina la'isukkok iimanenne yoo Iyyanna bagaan ki mannoomayyo. Ee bikkina an kuroommo; at Pheexiroosatte. Ka ki'n hanenne amma'nnaa'n wixxite baxoommo. Leh malaayyim ixxo kaa'eena xanooyyo. An kiina Waa'i adilla'n fooqaa'aancho uwwoommo. Uullanne kattittok iimanennem karamaakkoohane; uullanne tittittok iimanennem tiramaakkoohane» yukko. Ee lasage Yesuus ixxi losaanina «An Kiristoosatte ihummisa ayyenam kuttakkotte» yaa ijaajukko. Ee ammaniinsi ki'isaa Yesuus ixxi losaanina «Lommanniinsi, qeessa awwonsaaniinsii Seera losisaaniinsii lobakat hawwo aa'aa leheenaa lehiinsim saxxi ballanne ki'eenaa an Yerusaaleema marimmi hasisookko» yaa kurimma asheerukko. Ihukkaarem Pheexiroos Yesuusa mullam haxonne fissaa «Moollanna, eekka Waa'i eeboone; kuk keesenne hore'em afoone!» yaa hooreena yakukko. Ihukkaarem Pheexiroos kollonne Yesuus daba'llaa «Sheexaancho, iinniinsi qee'lle! At iina qolaanchi ikkaatto. Mashka'oomim at sawwitoottok mannisa bagaan Waa'isayyo» yukko. Ee lasage Yesuus ixxi losaanina «Ayyim eese awwoneena hasulas ixxi gaga lagona. Lehinam gudaa eese awwonona. Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok ixxi foore siixxookko. Mat manchi ka uulli amaxxa hundam siixxaa ixxeka foore bi'isuta'n ixxena maha awwaadoo? Te'im mat manchi ixxeka foore mahinne bitaa'eena xanoo? Manchi Beet ixxi anni lombinnee iima'n asse'amaaninnee maqirem waarookko. Ee ammane manni hundinam annannichchi baxisam miqookko. Hanqinam an ki'nnuwwina kuroommo; Manchi Beet ixxi adillaninne waarukkuuyyi moo'lleebe'i afeebe'e ka beyyonne yo'i mannik mat mat keen letamoyyo» yukko. Loh balliinsi lasage Yesuus Pheexiroosa, Yaaqoobaa Yaaqoob abbaayyi Yohaannisaa mulli keeniinsi annanni issaa awwonsaa mat lob duunanne firukko. Eekke'em ixxuwwi moo'llu'uuyyim Yesuus mulli hagaranne daba'llukko. Ixxek illi kollim eelliinchisa caakkisukko. Eddechchim belecce'oo qadaalli ihukko. Ee lasage Muse'ennee Eeliyaasinnee Yesuus atoorarukkuuyyi sasem losaanim moo'llo'o. Pheexiroosim Yesuusina «Moollanna! Neese ka beyyonne hee'nnumta'n danaamo; at hassittaare sas daasa matoo kiina matoo Muse'ena matoo Eeliyaasina baxoommo» yukko. Pheexiroos eekka wocukkuuyyim lobakata belecce'oo umbu'l waaraa ixxuwwa ifiisukko. Umbu'l woriinsim «An iittoommi i beet, ixxonnem an liiramoommok kane; ixxeensi macceessehe!» yoo sagar waarukko. Losaanim ee sagara macceesso'i ammanenne lobakata muggito'i bikkina illillaachcha ubbo'o. Ihukkaarem Yesuus ixxuwwi kollonne hincaa ixxuwwa nakkaa «Badditakkotte; ki'llehe» yukko. Ixxuwwim iimita'a moo'llo'i ammanenne Yesuusiinsi bagaan matom moo'llo'oyyo. Duuniinsi dillitu'uuyyi Yesuus ixxuwwina «Manchi Beet lehiinsi ki'eebe'i afeebe'e ki'nnuwwi moo'llakko'oka ayyenam kuttakkotte» yaa ijaajukko. Losaanim «Eehaare Seera losisaan ‹Gaassaa Eeliyaas waarimmi hasisookko› yitamok mahinatte?» yita'a Yesuusa xa'mmito'o. Yesuusim dabaraa «Eeliyaas gaassaa waarookko. Ixxim hundem luwwam gudisookko. Ihukkaarem an ki'nnuwwina kuroommo; Eeliyaas gaassim waaraakko. Waarukkaarem minaadab ixxo laqqo'oyyo. Ee bikkina ixxo hasso'is hundam issito'o. Ee'isam Manchi Beetim ixxuwwi angiinsi hawwo aa'ookko» yukko. Losaanim ixxi wocam hee'ukkok Xammaqaanchi Yohaannis bikkinatte ihukkisa laqqo'o. Ixxuwwim minaadaphphi beyyo waatto'i ammanenne mat manchi Yesuus beyyo hincaa ixxi illagenne guruphphaa «Moollanna! I beetina qishixxe! Xafanni amadaa jorisa hawwoolla. Lobakat ammanem giirannee wo'onnee ubbuusoolla. An ixxo ki losaa'n beyyo eebaa hee'ummo. Ihukkaarem ixxuwwi fayyiisseena xanto'oyyo» yukko. Yesuusim «Ki'nnuwwi hinkido'i amma'nnat bee'i boqqi qarancha! An hinkaa'n amman afeebe'e ki'nnuwwinne hee'oommo? Hinkaa'n amman afeebedu ki'nnuwwika iyyaqqoommo? Hino'o, beetooma i beyyo eebbehe» yukko. Yesuusim habusa ijaaju ammanenne beetiinsi habus firukkaare ee ammanem fayye'ukko. Ee lasage ixxi losaan Yesuus beyyo hincita'a «Neese habusa fissineena xannumbee'ek mahinatte?» yita'a mulli manni macceesoobee'isa xa'mmito'o. Yesuusim «Ki'nnuwwik amma'nnat hoffan ihu bikkinatte. Hanqinam an ki'nnuwwina kuroommo; winxo'i shaa'n sireqax amma'nnat ki'nnuwwina hee'uta'n ka duuna ‹Ka beyyiinsi ki'llaa eekke'e mare› yitakko'aare marookko. Ki'nnuwwa kaa'oo luwwim ma'lluchchim hee'ooyyo. Ihukkaarem kido'i habus soommanakka'a Waa'a uunxakkobeelas hore'em firooyyo» yaa dabarukko. Losaan hundim Galiilanne mat ikka'a wixxito'i ammanenne Yesuus ixxuwwina «Manchi Beeto manni anganne higisakka'a uwwakkamo. Ixxuwwim ixxo shitamo. Ihukkaarem saxxi ballanne lehiinsi ki'ookko» yukko. Ee bikkina losaan lobakata kichche'llo'o. Yesuusii ixxi losaanii Qifirinnaahoom beero'o waatto'i ammanenne Keesammi Mi'n gibiro miqisaan Pheexiroos beyyo waatta'a «Ki'nnuwwik losisaanchi Keesammi Mi'n gibiro miqooyyonnihe?» yita'a xa'mmito'o. Pheexiroosim «Eeyya, miqookko» yaa dabarukko. Pheexiroosim mine aagu ammanenne gaassaahim Yesuus «Simi'oona, kiina maha labookko? Ka uullik adilluwwi qaraxo te'im gibiro aa'llamok ayyeensette? Ixxuwwi oosiinsettennii te'im mulli manniinsette?» yaa xa'mmukko. Pheexiroosim «Mulli manniinsette» yaa dabarukko. Yesuusim «Eehidette ihulas ixxuwwik oos gibiro miqimmiinsi gatto'oo keenoo yimmayyonnihe? Ihukkaarem ixxuwwi qolantambee'isina dambalaqa mattaa shikka ubbuussaa luxxeka amaddoo qurxummekkichchika suume fooqaa'lloo ammane lam kin bira siiddootto; eeham massitaa iinaa kiinaa miqe» yukko. Ee ammane losaan Yesuus beyyo hincita'a «Waa'i adillanonne hundiinsi lophphookkok ayyette?» yita'a xa'mmito'o. Yesuusim mat ciilichcho weeshaa ixxuwwi lambe'enne uullisaa «Hanqinam an ki'nnuwwina kuroommo; daba'llitakka'a ciilluwwisa ikkakkobeelas Waa'i adillanonne hore'em aaggakkamoyyo. Ka ciilichchisa ixxi gaga hoffiisookkok ayyim Waa'i adillanonne hundiinsim lophphookko. Ka ciilichchi'nnoo'i kee'nneka mato i summinne aa'ookkokim eesem aa'ookko» yukko. Odim Yesuus «Eesenne amma'nnito'i ka hoffi kee'nneka mato amma'nnatiinsi huushansoo manchi ixxi gaanjenne kee'mmaalli liitimma ka'llaa xilli dambalaqanne ubuta'n e'llookko. Baaxiilina mashka'i ihoo luwwinne wo'mmu uullina aayye! Baaxiil ihoo'n hore'em gatooyyo. Ihukkaarem baaxiilina mashka'i ihoo manchina aayye! Ki angi te'im ki lokki at baaxiilo baxxona keese huushisoohan ihulas muttaa uunje. Mashka'oomim lam angi te'im lam lokki hee'aa heer heerinam xoo'oobee'i giiranne darabantoohaanniinsi anga murammi ikkaa te'im dim ikkaa heer heerina hee'oo heechcha siixximmi e'llookko. Ki illim at baaxiilo baxxona keese huushisoohan ihulas fissitaa uunje. Mashka'oomim lam illi hee'aa heer heerinam xoo'oobee'i giiranne darabantoohaanniinsi mat illi hee'aa heer heerina hee'oo heechcha siixximmi kiina e'llookko» yukko. Odim Yesuus «An ki'nnuwwina kuroommo; ka hoffi keeno egettam Waa'i asse'amaan iimanenne yoo Iyyanni illagenne hundi ammanem hee'llam bikkina ixxuwwika matom gaddakkotte. Manchi Beet waarukkok bi'u keeno gatisimminatte. Ki'nnuwwina maha labookko? Mat manchina xibbi gereebbi hee'uta'n ee gereebbiinsim mat annanni ihaa bi'uta'n gatu honsayyee honsi gereebbaa duunanne uraa ee bi'u gereechcho haseena marooyyonnihe? Hanqinam an ki'nnuwwina kuroommo; ixxi siidu ammane ee bi'ubee'i honsayyiinsii honsiinsii lonsaa bi'aa siidamu gereechchonne liiramooyyonnihe? Ee'isam iimanenne yoo ki'nnuwwik Waa'i ka hoffi kee'nnek matim bi'ona hasooyyo» yukko. Odim Yesuus «Kiyyabbaayyi keese hawwoduta'n at mullam ixxi beyyo mattaa keese hawwodu luwwa kure. Ki woshshamdu macceesulas ixxo kiyyabbaayyi issitootto. Ihukkaarem ixxi ki woshsha macceesubeelas Keesammi Kitaabanne ‹Lam manchi te'im sas manchi kuttolas woshshi hundim beeddookko› yoo bikkina kiinninne maqire mulli mannika mat mancho te'im lam mancho amaddaa ixxi beyyo mare. Ixximdu ixxuwwi woshsha macceesubeelas ee lasage amma'nnaa'n wixxitina kure. Amma'nnaa'n wixxixxi woshshamdu macceesubeelas ee mancho mulli minaadaphphisa te'im jor kee'nnisa xige. Hanqinam an ki'nnuwwina kuroommo; ka uullanne kattakko'i luwwi hundim iimanennem karamaakkoohane. Ka uullanne tittakko'i luwwi hundim iimanennem tiramaakkoohane. Odim an ki'nnuwwina kuroommo; ki'nnuwwiinsi lam manchi ayyi luwwam uunxiteena iittantolas iimanenne yoo Iyyanni ee uunxito'i luwwa uwwookko. Mashka'oomim lam te'im sas ikka'a i summinne wixxitam beyyonne an ixxuwwinnetti ihoommo» yukko. Ee ammane Pheexiroos Yesuus kollonne hincaa «Moollanna! Iyyabbaayyi eese hawwoduta'n mee'i kore haafiho? Lamar kor afeebe'e haafihonnihe?» yaa xa'mmukko. Yesuusim dabaraa « ‹Lamaraagge› yoommoyyo. Ihukkaarem lamarayyi ko'l lamaraagge haafihe. Ee bikkina Waa'i adillan ixxi awwaadaaninne maqire shallaqqameena hasu adila labookko. Adilim shallaqqancha asheeru ammanenne lohayyi miliyoon diinaa'l badan yoo mat awwaadaancho worakko'o. Oo awwaadaanchi ixxonne hee'u badano miqeena xanoobee'i bikkina oo awwaadaanchi, ixxi are, ixxi oosii ixxena yoo luwwii hundim biteesamaa badan miqamoo'isina adil ijaajukko. Ihukkaarem oo awwaadaanchi adi'l lokkonne ubaa ‹I moollanna, kiikka hundi luwwam miqoommo; hofqax ammanem iyyaqqe!› yaa uunxukko. Adilim ee awwaadaanchina lobakata qishixxu bikkina ee badano miqisoobee'isa uraa fatakukko. Ihukkaarem oo awwaadaanchi ee beyyiinsi firaa marukkuuyyim mat xibbi diinaara ixxeensi liqaayyo aa'aakkoo ixxi beshichchinne edamaa ‹Iinniinsi liqaayyo aa'llittoka miqe› yaa leella'a xagaraa amadukko. Ixxi beshichchim ixxi lokkonne ubaa ‹An kiina miqoommo; hofqax ammanem iyyaqqe› yaa uunxukko. Ihukkaarem oo awwaadaanchi ‹Ihooyyo› yaa ixxi badano miqeebe'i afeebe'e karaxxi minenne kassiisukko. Mulli ixxi beshim eekka moo'llo'i ammanenne lobakata kichche'llo'o. Ixxuwwim adi'l beyyo matta'a ixxi issu luwwa hundam kutto'o. Adilim ee awwaadaancho weeshisaa ‹At jor boqqi awwaadaancho! At eese uunxitti bikkina an ee luwwi badano hundam urummo. An kiina urummisam ki beshichchonne yoo badano at urimmi hasisooyyonnihe?› yaa lobakata quuqaa ixxonne hee'u badano hundam miqeebe'i afeebe'e hawwisoo keenina higisaa uwwukko. Ki'nnuwwim ki'nnuwwi abbaayyina wodaninne haafitakkobeelas iimanenne yoo Iyyanni ki'nnuwwinam haafooyyo» yukko. Yesuusim ka woshsha wocaa guullaa lasage Galiiliinsi ki'aa Yoordaanoos daajji eeqidonne yoo Yihuxxi uulla marukko. Lobakat minaadabim ixxo awwonto'aare eekke'em ixxuwwa fayyiisukko. Mat mat Farisaawe'i ixxi beyyo waatta'a ixxo keenteena hassa'a «Mat manchi ayyi mashka'innem ixxi are hollona seer uwwoohonnihe?» yita'a xa'mmito'o. Yesuusim dabaraa «Qooccaanchi gaassaatim goonaa meentoo issaa qooccukko. ‹Ee bikkina manchi annaa amaa uraa ixxi arenne mat ihookko. Lamim mat xiigaa mat maaraa ikkamo› yookkoka Keesammi Kitaabanne qananaa'llakko'oyyonnihe? Lamim mat orachchi ikkamo bagaan lamoyyo. Waa'i mat issukkoka manni annanni issoone» yukko. Farisaawe'uwwim «Eehannata'i Muse'e ‹Mat manchi are holloo ammane furma uwwaa hollona› yaa ijaajukkok mahinatte?» yito'o. Yesuusim dabaraa «Meento hollitakkona Muse'e kuru mashka'i ki'nnuwwik wodan qoxxaalli ihu bikkinatte bagaan luxxeka ee'isayyo. Ihukkaarem an ki'nnuwwina kuroommo; mat manchi ixxi are saa'immi mashka'innette ihoo'n mulli mashka'inne hollaa mulleta eebulas saa'aakko. Is aro'i hollukkota eebookkokim saa'aakko » yukko. Ixxi losaanim «Goonchikii meentichchokii duuha'i ka'isa ihulas meento eebakkoo'n hee'immi erane» yito'o. Ihukkaarem Yesuus ixxuwwina «Mine issakkoo'n hee'immi xanamookkok xale'i uwwamu keeninatte bagaan hundina ihoobee'ane. Mashka'oomim muleessa'i ikka'a qaranto'i keen yo'o; manni muleessa'i issu keenim yo'o. Waa'i adillanonne aagimmina yita'a ixxuwwi gaga muleessa'i issito'i keenim yo'o. Ee bikkina kaka aa'eena xanookkok aa'ona» yukko. Yesuus ixxi anga hanenne issaa maasse'oo'isina ciilluwwa ixxi beyyo eebakko'aare ciilluwwa eebu manna ixxi losaan wocanto'o. Ihukkaarem Yesuus «Waa'i adillanonne hee'llam keen kido'i keen ikko'i bikkina ciilluwwi i beyyo waatteena hoottakkotte» yukko. Ixxi angam ciilluwwi hanenne issaa maasse'aa lasage ee beyyiinsi marukko. Mat ayyaamo mat woraadichchi Yesuus beyyo waaraa «Losisaancho! Heer hee'l heechcha siixxeena er luwwa maha isso?» yaa xa'mmukko. Yesuusim «Er luwwi bikkina mahina eese xa'mmitoolla? Erok mexxo'i Waa'a. Ihukkaarem heer heerina hee'oo heechcha siiddeena hassilas ijaajo egere» yukko. Oo woraadichchim «Hinki ijaajo?» yukko. Yesuusim «Shititte, saa'llitte, game'llitte, qophphano naqqassitte, annaa amaa lonsee ki beshichcho ki gaqqisa iittee» yukko. Woraadichchim «Ka ijaaja'i egeraammo. Mullek xa'oo luwwi maha?» yukko. Yesuusim «Muccur ihimma hassilas iimanenne godda siixxiteena mattaa kiina yoo luwwa biteessaa diinatooma buxina uwwitaa waattaa eese awwone» yukko. Ihukkaarem oo woraadichchi ixxena lobakat amaxxi hee'u bikkina eekka macceesu ammanenne kichche'ukkuuyyi marukko. Ee lasage Yesuus ixxi losaanina «Hanqinam an ki'nnuwwina kuroommo; goddaanchi manchina Waa'i adillanonne aagimmi kee'mmaalla. Odim an ki'nnuwwina kuroommo; goddaanchi manchi Waa'i adillanonne aagimmiinsi gaameelakkichchi marfi afo'inne firimmi sholle'ookko» yukko. Ixxi losaanim eekka macceesso'i ammanenne lobakata maalalta'a «Eehannata'i ayyi gateena xanookko?» yito'o. Yesuusim ixxuwwa moo'ukkuuyyi «Kaka manni xanooyyo. Ihukkaarem Waa'i hundi luwwam isseena xanookko» yukko. Ee ammanenne Pheexiroos «Oono'o! Neese hundi luwwam ullaa keese awwonnaammo. Eehannata'i maha siindoommo?» yukko. Yesuusim ixxuwwina «Hanqinam an ki'nnuwwina kuroommo; haareechchi uullanne Manchi Beet lombinne adilla'n barcumanne afuuroo ammane i losaan ikkakko'i ki'nnuwwim tommonnee lam adilla'n barcumannee afuuttakkamo. Tommonnee lamem Isra'ee'l sullonnem oogattakkamo. Ayyi manchim i summi mashka'inne ixxeka mine, abbaayyuwwa, aayyuwwa, anna, ama, oosoo uullaa urookkok xibbi qinxite a'llookko; heer heerina hee'oo heechcham siixxookko. Ihukkaarem illag hee'llo'i kee'nnek lobakat keen lasaanchi ikkamo. Lasaanchi hee'llo'i kee'nnekim lobakat keen illag ikkamo» yukko. Odim Yesuus «Iima'n adillan ixxi woyi'n kaashshi beyyonne baxoo baxaano qaxxareena soodaraar daram firu mancho labookko. Ixxim annannichchinam ballanne mat diinaara miqeena iittamaa baxaano woyi'n kaashshi beyyo asse'ukko. Sas sa'aaxxi lambe'enne firaa mulli keenim baxo hoogga'a meeranne uullito'oo moo'aa ‹Ki'nnuwwim i woyi'n kaashshi beyyonne mattakka'a baxxehe. Baxxakko'i malaayyika miqoommo› yukko. Ixxuwwim woyi'n kaashshi beyyo matto'o. Odim loh sa'aaxxi lambe'ennee honsi sa'aaxxi lambe'ennee firaa illagee'nnisam qaxxarukko. Odim tommonnee mat sa'aatannee firaa mulli keenim baxo hoogga'a uullito'oo moo'aa ‹Balli hundoomam baxo hooggakka'a keyye uullitakko'ok mahinatte?› yaa xa'mmukko. Ixxuwwim ‹Baxisoo manna hoongaatette› yito'o. Ixxim ‹Eelas ki'nnuwwim mattakka'a i woyi'n kaashshi beyyonne baxxehe› yukko. «Maaro'i ballanne woyi'n kaashshi annichchi waaraa diinate miqaanchina ‹Baxaano weeshshaa lasaanchonne qaxxaranto'i keeniinsi ki'issaa luxxeka qaxxaranto'i keenonne afeebe'e baxxo'i malaayyika miqe› yukko. Ee bikkina tommonnee mat sa'aatannee qaxxaranto'i keen hincita'a annannichchim mat mat diinaara a'llito'o. Luxxeka qaxxaranto'i keenim hincito'i ammanenne ee keeniinsi lobakata siiddamoka labisso'o. Ihukkaarem ixxuwwim annannichchim mat mat diinaara a'llito'o. Bira a'llita'a lasage ee woyi'n kaashshi annichchina ‹Ku keen lasaanchonne waatta'a xale'i mat sa'aata baxxo'o. Ihukkaarem balli hundoomam eelliinchonne shokkinummuuyyi baxonne hoongaa honsummi niinninne maqire gudissaa miqqaatto› yita'a quunquunto'o. «Woyi'n kaashshi annichchim awwaadaaniinsi matina ‹I beshichcho, an keese maham hawwodummoyyo. At iinninne iittantittok ballanne mat diinaara miqoommisinayyonnihe? Ee bikkina kiikka amaxxitaa mare. Kiina uwwummi qaxa lasaanchonne qaxxarummaanninam uwweena hasoommo. An i luwwa hasummisa isseena xanoommoyyonnihe? Te'im i gaqqi diinatenne biijaalli ihummi bikkina to'achchitaatennihe?› yukko. Ee'isam illagee'n keen lasaanchi ikkamo. Lasaanchi keenim illag ikkamo» yukko. Ee lasage Yesuus Yerusaaleema maram hee'ukko. Marukkuuyyim tommoo lam ixxi losaanoo mullam ixxi kollonne hincaa'aa «Oono'o! Kaba Yerusaaleema maalloommuulla. Eekke'em Manchi Beeto amadakka'a qeessi awwonsaaninaa Seera losisaaninaa higisakka'a uwwakkamo. Ixxuwwim ixxonne leh oogato'o oogattamo. Ixxom mulli minaadab game'llitamisina, gantamisinaa saqaltamisinaa higissa'a uwwitamo. Ixxim saxxi ballina lehiinsi ki'ookko» yukko. Ee lasage Zabdiwoos oosik ama is oosinne maqirem Yesuus beyyo hincita'a ixxi illagenne guruphphita'a mat luwwa uunxito'o. Ixxim «Maha hassootto?» yukko. Isem «Ku lamem i oosim ki adillanonne matii ki makki kollinne matii ki qeddi kollinne afuuttamisa isse» yito'o. Ihukkaarem Yesuus dabaraa «Uunxitakkam luwwa laqqakkamoyyo. An aa'oommi hawwo aa'llakkeena xantakkamonnihe?» yukko. Ixxuwwim «Eeyya, xannoommo» yito'o. Ixxim «An aa'oommi hawwo aa'llakkamo. Ihukkaarem i makki kollonnee qeddi kollonnee afuurimmi uwwamookkok Iyyanni gudisu keeninatte bagaan uwwoommok aneyyo» yukko. Tommem losaanim eekka macceesso'i ammanenne lamem abbaayyuwwannem quuqqo'o. Ihukkaarem Yesuus hundam ixxi beyyo weeshaa «Ka uulli minaadaba gassitam keen minaadabina moollanno'i ikko'isa laqqakkamo. Minaadaphphi awwonsaanim minaadaba hasso'isa issitamo. Ihukkaarem ki'nnuwwi eehid ihimmi hasisooyyo. Ki'nnuwwiinsi lophpheena hasookkok ayyim ki'nnuwwina awwaadaanchi ihona. Ki'nnuwwiinsi awwonsaanchi iheena hasookkok ayyi manchim ki'nnuwwina awwaadaanchi ihona. Manchi Beetim awwaadeenaa ixxi foore lobakat mannina tissi issaa higisaa uwweenaa waarukko bagaan ixxena awwaadakkona waarukkoyyo» yukko. Yesuusim ixxi losaaninne maqirem Iyyaarko'i beero'iinsi firaa marukkuuyyi lobakat minaadab ixxo awwonukko. Gooqqi inqennem afuutto'oo lam qooqquwwi Yesuus ee googinne higoo'isa macceesso'i ammanenne «Daawiit Beeto, niina qishixxe!» yitu'uuyyi laatto'o. Minaadabim ee qooqquwwa «Sa'i'llehe!» yita'a wocanto'o. Ihukkaarem ixxuwwi «Daawiit Beet Moollanna! Niina qishixxe!» yita'a lonsita'a laatto'o. Yesuusim uullaa ixxuwwa weeshaa «An ki'nnuwwina maha issona hassakkamo?» yukko. Ixxuwwim «Moollanna! Niikka ille fooqaa'e» yito'o. Yesuusim qishixxaa ixxuwwika ille nakkukko. Ee ammanem ixxuwwik illi fooqukkaare ixxo awwonto'o. Yesuusii ixxi losaanii Yerusaalee'm beero'onne hincita'a lasage Wee'l Duu'n gadanonne yoo Beetafaage yakkam gatte affo'isam Yesuus ixxi losaa'nneka lamo «Ki'nnuwwi illagenne yoo gatte mallehe. Mattakka'a affakko'isam mat karamaakkoo hallichcho wotarinnem siiddakkamo. Ee hallichcho tittakka'a wotarinnem i beyyo eebbehe. Ayyim maham woculas ‹Moollanni ixxuwwa hasaakko› yi'llehe. Eehid yitakkam ammane ixxim wottakkona cawwookko» yaa asse'ukko. Oohim hiraagaanchi «Yerusaaleemina ‹Oono'o! Ki adil ixxi gaga hoffiisaa hallichchonne oohim hallichchi wotaranne saa'llaa ki beyyo waarookko› yitakka'a kullehe» yaa wocukkok wo'mmoo'isinatte. Losaan matta'a Yesuus «Issehe» yaa ijaajukkisam issito'o. Ixxuwwim hallichcho wotarinnem eebba'a ixxuwwika eddechcha ee halli hanenne issito'aare Yesuus saa'llukko. Minaadaphphekim lophphoo kolli ixxo lonsimmina ixxuwwika eddechcha googonne dakko'o. Mulli keenim haqqi buyya iiqqa'a googonne dakkam hee'llo'o. Ixxi illagenne mattam hee'llo'i keenii lasonne ikka'a awwontam hee'llo'i keenii «Daawiit Beetina lombi ihona! Moollanni summinne waarookkok maasse'amaakkoohane. Waa'ina iimanenne galat ihona» yitu'uuyyi sagara iimaa'lla'a wocco'o. Yesuus Yerusaaleema aagu ammanenne ee beero'i manni hundim «Kuk ayyette?» yaa maalalukko. Minaadabim «Kuk Galii'l uullanne yoo Naazireexxi beero'iinsi waaru hiraagaanchi Yesuusatte» yukko. Keesammi Mine Yesuus aagaa ee beyyonne biteessam keenoo bitaa'llam keenoo hundam fissaa hollukko. Odim diinate dabassitam hee'llo'i kee'n xaraphpheezaa handare'e biteessam hee'llo'i kee'n barcummuwwaa qubbaa'ukko. Odim ixxuwwina «Keesammi Kitaabanne Waa'i ‹I min eese uunxakkam min ihookko› yaakko yamamaa kitaabamaakko. Ihukkaarem ki'nnuwwi gamaa'n ma'n issitakko'o» yukko. Keesammi Minenne Yesuus hee'ukkisam illi qooqquwwii shiihuwwii ixxi beyyo waatto'aare Yesuusim ixxuwwa fayyiisukko. Ihukkaarem qeessa awwonsaanii Seera losisaanii Yesuus baxu maalalsiisoo luwwa moo'llo'i bikkinaa oosim Keesammi Minenne «Daawiit Beetina lombi ihona» yita'a sagara iimaa'lla'a woccu'uuyyi macceesso'i bikkinaa quuqqo'o. Ixxuwwim Yesuusina «Ku keen yitam luwwa macceessaatennihe?» yita'a xa'mmito'o. Ixxim «Eeyya, macceesoommuulla. Keesammi Kitaabanne ‹Oos suumiinsii anuuna iicoo ciilluwwi suumiinsii galata gudissootto› yookkoka hore'em qananaa'llakko'oyyonnihe?» yukko. Yesuusim ixxuwwa uraa beero'iinsi firaa Biitaana yakkam gatte maraa ee hiimo eekke'e garukko. Yesuus daram beero'o daba'llaa waarukkuuyyi sibaaraa hee'u bikkina gooqqi inqenne mat odakkichchi moo'aa ee haqqichchi beyyo marukko. Ihukkaarem buyyiinsi bagaan mishika maham siidukkoyyo. Ee bikkina «At hore'em od misha mishshitte» yukko. Ee ammanem oo odakkichchi gogukko. Losaanim ee odakkichcho moo'llo'i ammanenne «Ku odakkichchi matemaaggem hinkid gogukko?» yita'a maalalto'o. Yesuusim ixxuwwina dabaraa «Hanqinam an ki'nnuwwina kuroommo; ki'nnuwwina amma'nnat hee'uta'nnii hore'em malantakkobeeta'nnii an ka odakkichchonne issummis xale'e ihoo'n ka duunam ‹Ka beyyiinsi xoqolantaa dambalaqanne darabame› yitakkota'nnim darabamookko. Amma'nnatinne maham Waa'a uunxitakko'aare siixxitakkamo» yukko. Yesuus Keesammi Minenne aagaa losisam hee'ukko. Losisukkuuyyim qeessa awwonsaanii minaadaphphi lommannii ixxi beyyo waatta'a «Ka hundam issitoottok mah malaayyinnette? Ka malaayye kiina uwwukkok ayyette?» yita'a xa'mmito'o. Yesuusim dabaraa «Anim ki'nnuwwa mat xa'mmichcha xa'mmoommo. Ki'nnuwwimdu ee xa'mmichcha dabattakkolas anim ka keeno maha malaayyinne issoommuulda'e ki'nnuwwina kuroommo. Yohaannis xammaqoo'isa issukkok Waa'annii manna?» yukko. Ee bikkina ixxuwwina'i ixxuwwim «Mayyino? ‹Waa'a› yinumlas ‹Eehaare ixxi yukkoka mahina amma'nnitakko'oyyo?› yookko. ‹Manna› yinumlas minaadab hundim hiraagaanchi issita'a Yohaannisa aa'llo'i bikkina baddinoommo» yita'a fitanto'o. Ee ikkina «Neese lanqoommoyyo» yita'a dabatto'o. Yesuusim ixxuwwina «Anim ka keeno mah malaayyinne issoommuulda'e kuroommoyyo» yaa dabarukko. Ee lasage Yesuus «Mat manchina lam oos hee'ukko. Annim lob beet beyyo maraa ‹I beeto, kaballa woyi'n kaashshi beyyo mattaa baxe› yukko. Beetim ‹Sabummo; maroommoyyo› yukko. Ihukkaarem lasonne saxxaa maraa baxukko. Odim la'm beet beyyo maraa illaqqaannisam baxoo'isina ijaajukko. Ixxim annina ‹Ihona, iyyanna; maroommo› yukko. Ihukkaarem marukkoyyo. Ee lamem oosiinsim anni yukkoka issukkok hinkane?» yukko. Ixxuwwim «Lob beeto» yita'a dabatto'o. Yesuusim ixxuwwina «Hanqinam an ki'nnuwwina kuroommo; qaraxaanii saa'aanii ki'nnuwwiinsi gaassita'a Waa'i adillanonne aaggamo. Mashka'oomim Xammaqaanchi Yohaannis xabbee'n googo ki'nnuwwina moo'iseena waarukkaare qaraxaanii saa'aanii amma'nnito'o bagaan ki'nnuwwi amma'nnitakko'oyyo. Ki'nnuwwi eekka moo'llakkaahim baaxiilo biiraa'a yitakka'a amma'nnitakko'oyyo» yukko. Odim Yesuus «Mulli kobi'llishsham macceessehe. Mat uullanne mat manchina uulli hee'ukko. Ixxim woyi'n kaashsha kaasaa ootukko. Ee woyi'n kaashshi misha ciinsakkam barem hinukko. Woyina egerakkam godo'om baxukko. Ee lasage ee woyi'n kaashshi beyyo abuullaanina uwwaa mulli uulla marukko. Misha feerakkam amman afukkaare ixxi qooda eebbona ee abuullaa'n beyyo ixxi awwaadaano asse'ukko. Ihukkaarem oo abuullaan ixxi awwaadaano amadda'a matooma ganto'o. Mullekam shito'o. Odim mullekam kininne aphphisso'o. Oo manchi odim luxxaanniinsi lonsaa dut awwaadaano asse'ukko. Abuullaanim ixxuwwam luxxi kee'nnisam issito'o. Lasaanchonne ‹I beeto hayditamo› yaa ixxi beeto asse'ukko. Ihukkaarem abuullaan beeto moo'lla'a ixxuwwina'i ixxuwwim ‹Lagaanchi kanena'e; waallehe! Ixxom shinaa ixxi aa'oo lago a'llinona!› yito'o. Ee bikkina ixxo amadda'a woyi'n kaashshi beyyiinsi biiranne fissita'a shito'o. «Eehaare woyi'n kaashshi annichchi waaroo ammane ee abuullaano maha issookko?» yaa xa'mmukko. Ixxuwwim Yesuusina «Ee jor manna jorisa issaa shookko; sharada laboo'isinne dabaroo mulli abuullaaninam ee woyi'n kaashshi beyyo uwwookko» yito'o. Yesuus ixxuwwina «Keesammi Kitaabanne ‹Kininne mine baxxam keen awwaadooyyo› yita'a uunjito'i kinchi hundiinsim lobakata lophphaa awwaadoo kinchi ihukko. Oohim Waa'i baxo. ‹Neesem ni illinnem moo'nnaa maalallummo› yamamaa kitaabamukkoka qananaa'llakko'oyyonnihe? «Ee bikkina an ki'nnuwwina kuroommo; Waa'ik adillan ki'nnuwwiinsi hooramaa Waa'i adilla'n misha mishoo minaadabina uwwamookko. Ka kinanne ubukkok hundim xaamookko; ihukkaarem ku kin ixxonne ubookkok liitamookko» yukko. Qeessa awwonsaanii Farisaawe'uwwii Yesuus wocu kobi'llishshuwwa macceesso'i ammanenne ixxuwwi bikkina wocukkisa qoossito'o. Ee bikkina ixxo amaddeena hasso'o. Ihukkaarem minaadab hiraagaanchi issita'a Yesuusa moo'llo'i bikkina minaadaba baddito'o. Odim Yesuus kobi'llishshinne ixxuwwina «Iima'n adillan ixxi beetina bollochcho'i maadda gudisu adila kobi'llookko. Oo adilim weeshanto'i keen bollochcho'ina waattona kuttam awwaadaano asse'ukko. Ihukkaarem ixxuwwi waatteena hasso'oyyo. «Oo adil odim mulli awwaadaanom ‹Weeshanto'i keenina «Oono'o, bollochcho'i maadda gudisaammo. Iikki xiikkamu mirgo'uwwii lijjuwwii duramaakko; hundem luwwim gudaakko. Ee bikkina bollochcho'o waallehe» yitakka'a kullehe› yaa asse'ukko. «Ihukkaarem weeshanto'i keen ee woshsha gadda'a mat abuulli beyyo, mullekim dadda'l beyyo marukko. Gatto'i keenim ee awwaadaano amadda'a lobakata barche'e issita'a lasage ganta'a shito'o. Ee bikkina adil lobakata quuqaa ixxi gaadaano asse'aa ee shito'i keeno bi'isukko. Ixxuwwi beero'om shokkiisukko. «Ee lasage ixxi awwaadaanina ‹Oono'o, bollochcho'i maaddi gudaakko. Ihukkaarem weeshanto'i keen labbambee'i keeno. Ee bikkina bur hundam mattakka'a siiddakko'oka ayyem bollochcho'i maaddina weeshshehe› yukko. «Oo awwaadaanim bur hundannem siiddo'oka ayyem jor keenom ihukko er keenom wixxaa'llo'o. Ee'isinne bollochcho'i minenne manni wo'mmukko. «Adilim weeshanto'i keeno moo'eena mine aagu ammanenne bollochcho'i eddechcha edde'ubee'i mat mancho moo'ukko. Ixxenam ‹Iyyabbaayyo, bollochcho'i eddechcha edde'lloo'n hinkid ka beyyo aaggitto?› yukko. Ihukkaarem oo manchi maham wocukkoyyo. «Adilim awwaadaanina ‹Angaa lokkoo kattakka'a biiranne tuunsonne uunjehe. Eekke'em wi'llimmaa inqe iicimmaa ihookko› yukko. Weeshanto'i keen duta; ihukkaarem doo'llanto'i keen hofqaxa» yukko. Ee lasage Farisaawe'uwwi matta'a Yesuusa wocoo woshshinne digaadda'a amaddeena a'llanto'o. Ee bikkina ixxuwwika losaano Heeroodis manninne maqirem Yesuusa «Losisaancho! At hanqo'ane, Waa'i googom hanqo'isinne losissoohane; ayyenam golo'lloo'n gudaanchoominnem moo'lloo'isa lanqoommo. Hino'o kure, kiina malabookko? Oroo'm adilina gibiro miqimmi hasisoohonnii hasisooyyo?» yita'a xa'mmitona asse'llo'o. Ihukkaarem Yesuus ixxuwwika jor sawwite la'u bikkina «Ki'nnuwwi birammaano, mahina eese keentakkamuulla? Huno'o, gibiro miqakkam diinate iina moo'issehe» yukko. Ixxuwwim mat diinaara eebbo'o. Yesuusim ixxuwwina «Ka diinatenne yoo misilii kitaabii ayyane?» yaa xa'mmukko. Ixxuwwim «Adi'llane» yito'o. Yesuusim dabaraa «Eehaara'i adi'llan ihu luwwa adilinam uwwehe. Waa'an ihu luwwa Waa'inam uwwehe» yukko. Ixxuwwim ee wocu woshsha macceessa'a maalalto'o; ixxi beyyiinsim matto'o. Ee ballam «Manni lehaa lasage ki'ooyyo» yitam Saduuqaawe'uwwi Yesuus beyyo waatta'a «Losisaancho! Muse'e ‹Mat manchi ooso qaroo'n lehuta'n ixxi abbaayyi ixxi meentichcho laggassaa lehukkaannina shumo'o fissona› yaakko. Niinninne lamar abbaayyuwwi hee'llo'o. Ixxuwwiinsim won meento eebaa ooso qaroo'n lehu bikkina wona awwonaanchi ee lehu manchi meentichcho laggassukko. Ee'isinne la'mmekim saxxekim lama'llaannonne afeebe'e kor korinne lago gassamaa lehamukko. Hundiinsi lasaanchonne meentichchom leto'o. Eehaare hundima'i ee meentichcho eebaakko kichchi ayyaamo hinkannina arette ikkamo?» yita'a xa'mmito'o. Ihukkaarem Yesuus ixxuwwina «Ki'nnuwwi Keesammi Kitaabaa Waa'i malaayyee laqqakkambee'i bikkina huushantakko'ookko. Mashka'oomim lehiinsi kichchi ayyaamo iimanenne Waa'i asse'amaa'nnisa ihookko bagaan eebooyyoo ladiisooyyoo. Ihukkaarem lehiinsi kichchi bikkina Waa'i ki'nnuwwina yukkoka qananaa'llakko'oyyonnihe? Ixxi ‹An Abrihaam Waa'a, Yisaaq Waa'aa Yaaqoob Waa'aa› yaakko. Waa'i hee'oo kee'n Waa'a bagaan lehu kee'n Waa'ayyo» yaa dabarukko. Mannim eekka macceesaa ee losanonne maalalukko. Saduuqaawe'uwwim Yesuusina dabattam luwwa hooggo'isa Farisaawe'uwwi macceessa'a wixxito'o. Ee Farisaawe'uwwiinsim Seera erisa la'oo mat Yesuusa keeneena hasaa «Losisaancho! Ijaaj hundiinsim lophphookkok hinkane?» yaa xa'mmukko. Eekka laboo la'm ijaajim ‹Ki beshichcho ki gaqqisa iitte› yoohane. Seerii hiraagaa'n losishshii hundim shooho'amukkok ee lamem ijaajonnette» yaa dabarukko. Farisaawe'uwwi wixxita'a hee'llo'isam Yesuus «Waa'i doo'llaakkoo Kiristoos bikkina maha sawwitakkamo? Ixxi ayyi beeto?» yaa xa'mmukko. Ixxuwwim «Daawiit Beeto» yita'a dabatto'o. Yesuusim «Eehaare Daawiit Keesammi Ayyaa'n malaayyinne ‹I Moollanna› yukkok mahinatte? Ee'isam ‹Waa'i i Moollannina Ki diina'a ki lokkiinsi woroon isseembe'e i makkanne afuure› yaakko. Daawiit ‹I Moollanna!› yaa weeshulas eehaare Kiristoos hinkid Daawiitina beet iheena xanookko?» yaa xa'mmukko. Ee lasage ayyi manchim Yesuusina matem sagaram dabareena xanukkoyyo. Ee balliinsi ki'isaa ayyim ixxo od mulli xa'mmichcha xa'mmeena iggukkoyyo. Yesuus ee lasage minaadabinaa ixxi losaaninaa «Seera losisaanii Farisaawe'uwwii Muse'i beyyonne afuutto'ookko. Ee bikkina ixxuwwi kuttam luwwi hundam issehe; egelleheme. Ihukkaarem ixxuwwi woccamoka baxonne hosissambee'i bikkina ixxuwwisa ikkakkotte. Manni iyyeena xanoobee'i kee'mmaalli iyyo katta'a manni gudumonne iyyiissamo. Ihukkaarem ixxuwwaanninne maxxaarinnem nakkitamoyyo. «Ixxuwwi baxxam bax hundam manni moo'ona yita'a baxxamo. Irza geejjissa'a gobbamo; qambiisikam kasa qeeraa'llissamo. Odim maaddi beyyonnee wixxixxi minennee hundiinsi e'lloo beyyonne afuurimma iittitamo. Meerannem manni xummaatisonaa ‹Losisaancho!› yaa weeshonaa hassamo. «Ihukkaarem ki'nnuwwik losisaanchi xale'i mat ihu bikkinaa ki'nnuwwi hundim abbaayyuwwi ikkakko'i bikkinaa ‹Losisaancho› yamantakka'a weeshantakkotte. Ki'nnuwwik Anni iimanenne yoo matem Waa'i ihu bikkina ka uullanne ayyem ‹Niyyanna› yitakka'a weeshshakkotte. Odim ki'nnuwwik Moollanni matem Kiristoosatte ihu bikkina ‹Moollanna!› yamantakka'a weeshantakkotte. Ki'nnuwwi lambe'enne hundiinsi lophphookkok ki'nnuwwina hundinam awwaadaanchi ihona. Ixxi gaga iimiimaa'ookkok hoffe'ookko; odim ixxi gaga hoffiisookkok iimiimookko» yukko. Odim Yesuus «Birammaan Seera losisaaninaa Farisaawe'uwwinaa ki'nnuwwina aayye! Manni Waa'i adillanonne aagoobee'isa u'llumma issitakkamo. Ki'nnuwwi gagim aaggakkamoyyo; aageena hasoo keenom hoottakkamo. Birammaan Seera losisaaninaa Farisaawe'uwwinaa ki'nnuwwina aayye! Qeeraa'llissakka'a Waa'a uunxitakkam xummaano labbakku'uuyyi busar meentika amaxxa boggakkamo. Ee bikkina ki'nnuwwanne afoo oogato'i kee'mmaalla. «Birammaan Seera losisaaninaa Farisaawe'uwwinaa ki'nnuwwina aayye! Mat mancho ki'nnuwwi amma'nnatonne dabattakkeena dambalaqa fittakka'a uulli hundam mattakkamo. Ki'nnuwwi amma'nnatonne daba'lloo ammane ki'nnuwwiinsim baasaa xoo'oobee'i giirina gudaakkoohan issitakkamo. «Qooq awwonsaanina ki'nnuwwina aayye! ‹Manchi Keesammi Minenne hide'ukkaare mahayyome. Ihukkaarem Keesammi Minenne yoo worqanne hide'ulas ee hidiro gindeena xanooyyo› yitakkamo. Ki'nnuwwi qawwuwwaa qooqquwwaa; lophphookkok worqannii ee worqa muccussoo Keesammi Mine? Odim ‹Ayyim kiti'm beyyonne hide'ukkaare mahayyome. Ihukkaarem kiti'm beyyonne yoo kitimanne hide'ulas ee hidiro gindeena xanooyyo› yitakkamo. Ki'nnuwwi qooqquwwa! Lophphookkok kitimannii kitima muccussoo kitimakkam beyyo? Ee bikkina kiti'm beyyonne hide'oo manchi kiti'm beyyonnee kiti'm beyyi hanenne yoo luwwannee hundannem hide'ookko. Ee'isam Keesammi Minenne hide'ookkok ee Keesammi Minennee eekke'e hee'oo Waa'annee hide'ookko. Odim ayyim iimanenne hide'ookkok Waa'aannonne adilla'n barcumannee ee adilla'n barcumanne afuuroo Waa'annee hide'ookko. «Birammaan Seera losisaaninaa Farisaawe'uwwinaa ki'nnuwwina aayye! Kosaratiinsi, gimmenjiinsii kamuniinsii tommiinsi mato Waa'ina uwwitakkamo. Ihukkaarem Seeranne yoo horoor woshsha eeham hanqo'i oogato'o, haafimmaa amma'nnanchaa uttakko'ookko. Ee keeno uttakkoo'nnim mulli keenom issimmi hasisam hee'ukko. Ki'nnuwwi ka qooq awwonsaano; aggakkam luwwiinsi cimbe'i'nnoo'i hoffi luwwa marattakka'a hoottakkamo. Ihukkaarem gaameela'i'nnoo'i geejji luwwa liqicitakkamo. «Birammaan Seera losisaaninaa Farisaawe'uwwinaa ki'nnuwwina aayye! Mashka'oomim bixxi'llekaa humbullikaa hanooma aanshitakkamo. Ihukkaarem ki'nnuwwi wor bogimminnee gaga iittimminnee wo'mmaakkoohane. Kaa qooq Farisaawekkichcho! Gaassitaa bixxi'llekaa humbullikaa woro aanshe. Ee lasage hanim muccur ihookko. «Birammaan Seera losisaanoo Farisaawe'uwwa, boorjo'inne nannakka'a wereeggisakko'i ihukkaarem woroom lehu manni miqinnee haashaarammi luwwinnee wo'mmu waamma labbakkam bikkina ki'nnuwwina aayye! Ee'isam ki'nnuwwim mannina xummaano labbakka'a moo'antakkamo. Ihukkaarem ki'nnuwwi woronne biranchii jollii wo'mmaakko. «Birammaan Seera losisaaninaa Farisaawe'uwwinaa ki'nnuwwina aayye! Hiraagaa'nneka waamma kininne baxxakkamo; xummaan kee'n misilam wereeggissakkamo. Odim ‹Niyyanno'i doollenne hee'nnaammoota'n hiraagaano shimmanne exxinam hee'nnummoyyo› yitakkamo. Ee'isinne hiraagaano shu ki'nnuwwi anno'ina oos ikkakko'isa ki'nnuwwi gagim naqqassakkamuulla. Eehaare ki'nnuwwi anno'i asheetto'oka ki'nnuwwi guullehe. «Ki'nnuwwi qubaam hamashshi ooso! Gaannamanne guzumo'anchiinsi hinkid xottakka'a gattakkeena xantakkamo? Ee bikkina an ki'nnuwwi beyyo hiraagaano, qoor mannaa losisaanoo asse'oommo. Ixxuwwiinsim mat mato shitakkamo; mat mat keenom saqaltakkamo. Mulli keeno odim ki'nnuwwi wixxixxi minneewwanne gantakkamo. Beero'iinsi beero'onnem hollitakku'uuyyi hawwissakkamo. Ee mashka'innem muccur Aabeel xiigiinsi ki'isaa Keesammi mininaa kiti'm beyyinaa lambe'enne shitakko'i Baaraakiy beet Zakkaaryaas xiig afeebe'e uullanne dunamu muccur kee'n xiigina hundinam xa'mmantakkamo. Hanqinam an ki'nnuwwina kuroommo; ee luwwi hundinam ku qaranchi xa'mmamookko» yukko. Odim Yesuus «Yerusaaleema! Yerusaaleema! Hiraagaano shitoohaannoo ki beyyo asse'anto'i keenom kininne aphphissaa shitoohaanno! Antabaakkichchi ixxi ciicoolla laxxi woronne wixxaa'oo'isam anim ki ooso wixxaa'eena lobakat ammane hasummo. Ihukkaarem ki'nnuwwi sabbakko'o. Oono'o, ki'nnuwwi min diihaa gatookko. An ki'nnuwwina kuroommo; ‹Moollanni summinne waarookkok maasse'amaakkoohane› yitakkeebe'e od eese moo'llakkamoyyo» yukko. Yesuus Keesammi Miniinsi firaa marukkuuyyim ixxi losaan Keesammi Min baxamukkisa moo'isseena Yesuus beyyo waatto'o. Ihukkaarem Yesuus «Ka hundam moo'llakka'ahinnihe? Hanqinam an ki'nnuwwina kuroommo; ka moo'llakkam kin ki'n hanenne tuubamukkisam gindamoo'n hee'ooyyo» yukko. Wee'l duunanne Yesuus afuuraakkoohaannonne ixxi losaan mullam ixxi beyyo hincita'a «Niina kure; kuk hundim ihookkok hinki ammane? Ki waarimmikii lasaanchi doollikii mare'i maha?» yita'a xa'mmito'o. Yesuusim ixxuwwina dabaraa «Ayyim ki'nnuwwa huushisoobee'isa qoxxitakka'a ege'llehe. Dut keen ‹Waa'i doo'llaakkoo Kiristoos anette› yitu'uuyyi i summinne waattamo; dut keenom huushissamo. Oraa o'l xamboo macceessakkamo; oo luwwi hundim ihimmi hasisoohaneme. Ihukkaarem lasaanchi afubee'i bikkina badditakkotte. «Minaadab minaadabanne adilim adilanne ki'ookko. Qaanne'ii uulli huxechchii annanni annanni beyyonne ihookko. Oo hundim xuuchchina asheero'o. «Ee ammane manni ki'nnuwwa hawwina higisaa uwwookko. Shakkamome. I mashka'inne minaadab hundim ki'nnuwwa sabookko. Ee ammane dut keen amma'nnatiinsi ubbamo. Ixxuwwina'i ixxuwwim wocanta'a mat mato higisaa uwwookko. Dut qophpha'n hiraagaan ki'llamo; dut keenom huushissamo. Jolli lophphimmiinsi ki'ukkok lobakat mannik iitti siggookko. Ihukkaarem lasaanchi afeebe'e xa'nnookkok gatookko. Minaadab hundinam naqaash ihoo'isina ku iima'n adilla'n mishiraachchi sagarim uulli hundannem alallaatamookko. Ee lasage doolli lasaanchi ihookko. «Ee bikkina hiraagaanchi Daani'eelinne kuramu haashaarammi luwwi keesammi beyyonne uullaa moo'llakkamo. Eekka qananaa'ookkok qoossona. Ee ammane Yihuxxi uullanne yoo keen duunnuwwanne gibona. Iima'n fooqanne yookkokim uullanne yoo luwwa aa'eena dilloone. Abuulli beyyonne yoo manchim eddechcha masseena laso daba'lloone. Ee ammane lamfoor meentinaa iicisaaninaa aayye! Ihukkaarem ki'nnuwwik gibimmi hagayyenne te'im Usheexxaxxi Ayyaamonne ihoobee'isina Waa'a uunxehe. Ee ammane uulli qooccamukkaanniinsi ki'isaa kabad afeebe'e ihubee'ek odim ee lasagem hore'em ihoobee'i kee'mmaalli hawwi ihookko. Oo ayyaammuwwi gundubeeta'n ayyim gatam hee'ukkoyyo. Ihukkaarem doo'llanto'i kee'n bikkina oo ayyaammuwwi gundookko. «Ee ammane ayyim ki'nnuwwina ‹Oono'o, Kiristoos keyye yookko› te'im ‹Eekke'e yookko› yuta'n ee woshsha amma'nnitakkotte. Mashka'oomim ‹Kiristoos anette› yitam keenii qophpha'n hiraagaanii ki'llamo. Ixxuwwim xantota'n doo'llanto'oo keenom huushisseebe'e maalalsiisoo mare'uwwaa agannuwwaa issitamo. Oono'o, an ka hundam ki'nnuwwina gaassaahim kuraammo. «Ee bikkina manni ki'nnuwwina ‹Oono'o, udma'anne yookko› yuta'nnim mattakkotte. Te'im ‹Oono'o, jagaranne yookko› yulasim ee woshsha amma'nnitakkotte. Banqi elliinchi firiinsi ki'isaa eelliinchi aaggi afeebe'e beleloo'isam Manchi Beetikim waar ee'isa ihookko. Leesh yoo beyyonne ammar dummookko» yukko. Odim Yesuus «Oo hawwi ayyaammuwwi higukkisam eelliinchi tuunsookko. Aganim caakkisooyyo. Boollaankim iimaniinsi ubookko. Iima'n gogotim heekke'ookko. Ee ammane Manchi Beetik mare'i iimanenne moo'amookko. Uulli minaadab hundim aayye yookko. Manchi Beetim duubinne malaayyinnee lophphaakkoo lombinnee waarukkuuyyi moo'ookko. Ixxi asse'amaanom kee'mmaalli xurumbi sagarinne asse'ookko. Ixxuwwim uulli tochchiinsi tochchi afeebe'e soorem qariinsim doo'llanto'i keeno wixxaa'llamo» yukko. Odim Yesuus «Odakkichchi ki'nnuwwina kobi'llishshi ihona. Ee haqqichchik caaffuwwi li'aa buyyi latoo ammane billi hincukkisa laqqakkamo. Ee'isam ki'nnuwwim ee hundam moo'llakkam ammane Manchi Beetik waar u'llummanne hincukkisa laqqehe. Hanqinam an ki'nnuwwina kuroommo; ku hundim iheebe'e ku qaranchi higooyyo. Iimanii uullii higookko; ihukkaarem i sagar hore'em higooyyo» yukko. Odim Yesuus «Ihukkaarem ee balli bikkinaa amma'n bikkinaa Anniinsi bagaan iima'n asse'amaanom ihukko, beetom ihukko ayyim la'ooyyo. Nohe'i doollenne ihukkisam Manchi Beet waa'l ammanem ee'isam ihookko. Wo'i bi'iseena illageen Nohe'i markabanne aageebe'i afeebe'e manni itukkuuyyii agukkuuyyii, eebukkuuyyii ladiisukkuuyyii hee'ukkisam bichchi wo'i waaraa hundi luwwam bi'iseebe'e la'ubee'isam Manchi Beet waarim ee'isam ihookko. Ee ammane lam manchi maqire abuullitu'uuyyi mat massamookko la'mmekim gatookko. Lam meenti maqire liittu'uuyyim mate massantamo la'mmetem gattamo. «Ee'isam ki'nnuwwik Moollanni hinki ammane waarooda'e laqqakkambee'i bikkina guddakka'a egellehe. Ihukkaarem kaka laqqehe; mi'n annichchi gamaan ixxi mine hiimonne hinki ammane waarooda'e la'uta'n baqaa egerookko bagaan ixxi mine hinona cawwaa urooyyo. Ee'isam Manchi Beetim sawwitakkobee'i ammanenne waaroo bikkina guddakka'a ege'llehe!» yukko. Odim Yesuus «Eehan ihulas ixxi mi'n abaroosina ammaninne hurbaata uwwona mi'n annichchi doo'llu amma'nnamaakkoo qoor awwaadaanchi ayyette? Moollanni waaroo ammane eehid issukkuuyyi siidamoo awwaadaanchi maasse'amaakkoohane. Hanqinam an ki'nnuwwina kuroommo; ee mancho ixxi moollanni ixxena yoo luwwi hundannem gassaanchi issookko. Ihukkaarem oo jor awwaadaanchi ixxi tiironne ‹I moollanni qaqqiso waarooyyo› yaa ixxenne maqire baxxam besha ganimma, dimbaaninne maqirem itimmaa agimmaa asheerookko. Ee awwaadaanchik moollannim ixxi egerubee'i ayyaamonnee la'ubee'i ammanennee waaraa guzumo'ookko; ixxi saamom birantam keeninnette issookko. Ee beyyonnem wi'llookkoo inqe iicookkoo» yukko. Odim Yesuus «Ee ammane iima'n adillan kuraaza amadda'a idaayyichcho aa'lleena fitto'i tommi baajaammuwwa labookko. Ixxuwwiinsim ontii qawwuwwa ontii odim qoolluwwi hee'llo'o. Oo qawwuwwi kuraaza amadda'a hee'llo'o bagaan kuraazina gaaza edda'a amaddo'oyyi hee'llo'o. Ihukkaarem qoolluwwi kuraazinne maqirem gaaza edda'a amadda'a hee'llo'o. Idaayyichchi dasu ammanenne hundam diriir amadu bikkina iinse'llo'o. «Ihukkaarem luxxi baqitenne ‹Oono'o, idaayyichchi waaraakko! Fittakka'a aa'llehe!› yakkam corochchi macceesamukko. Ee ammanenne oo baajaammuwwi hundim ki'lla'a ixxuwwi gaqqi kuraazzuwwa caakkisso'o. Oo qawwuwwi qoolluwwina ‹Ni kuraaz xoo'eenatte. Ki'nnuwwi gaaziinsi niina uwwehe› yita'a uunxito'o. «Ihukkaarem oo qoolluwwi dabatta'a ‹Niinaa ki'nnuwwinaa ihoo zayti bee'e. Ee'isiinsi daddaraa'n beyyo mattakka'a ki'nnuwwi gagina bitaa'llehe› yito'o. Ee bikkina oo qawwuwwi gaaza bitaa'lleena matto'o. Ixxuwwi bitaa'lleena matto'isam idaayyichchi afukkaare guddo'i ontem qoolluwwim ixxenne maqirem bollochcho'i mine aagga'a lasage u'llummi xufamukko. «Ee lasage oo qawwuwwi waatta'a ‹Moollanna, moollanna, niina fooqaa'e!› yita'a uunxito'o. Ihukkaarem idaayyichchi dabaraa ‹Hanqinam an ki'nnuwwina kuroommo; an ki'nnuwwa la'oommoyyo› yukko. «Ee bikkina ki'nnuwwim balla te'im ammane laqqakkambee'i bikkina qoxxitakka'a egellehe» yukko. Odim Yesuus «Iima'n adillan mat manchi ixxi awwaadaano weeshaa ixxena yoo amaxxa hundam yabo uwwaa mulli uulla mareena gudu mancho labookko. Oo manchi annanchinam ixxuwwi malaayyisanne matina onto, matinam lamo, matina odim mat makiliita uwwaa marukko. Onti makiliita aa'ukkok ee ammanem maraa daddaraa lasage mulli onti makiliita tirfisukko. Lamo aa'ukkokim ee'isam lamo tirfisukko. Ihukkaarem mato aa'ukkok maraa bare hinaa ixxi moollannika diinate waammukko. «Lobakat ammaniinsi lasage ee awwaadaa'nnek moollanni waaraa ixxuwwina uwwu diinate shallagukko. Onti makiliita aa'u awwaadaanchi mulli onto edaa amadaa ‹Moollanna, onti makiliita iina yabo uwwitaa hee'llitto. Oono'o, mulli onto edaa tirfisaammo› yukko. Ixxi moollannim ‹Erane, at amma'nnantaattoo er awwaadaancho. Hoffi luwwanne amma'nnantaattoohan ikkitti bikkina lob luwwanne gassaanchi issoommo. Waare, ki moollanninnem liirame› yukko. Lam makiliita aa'ukkokim hincaa ‹Moollanna, lam makiliita iina yabo uwwitaa hee'llitto. Oono'o, lamo edaa tirfisaammo› yukko. Ixxi moollannim ‹Erane, at amma'nnantaattoo er awwaadaancho. Hoffi luwwanne amma'nnantaattoohan ikkitti bikkina lob luwwanne gassaanchi issoommo. Waare, ki moollanninnem liirame› yukko. Mat makiliita aa'ukkokim hincaa ‹Moollanna, at wixxitbee'i luwwa muttoo, binnaa'llibee'i hurbaatam wixxaa'lloo mogaalli manchi ikkittisa la'oommo. Ee bikkina an keese baddummo; maraahim bare hinaa waammummi ki diinat kuno'o› yukko. «Ixxi moollannim dabaraa ‹At jor ceemmaalli awwaadaancho! Wixumbee'i beyyiinsi muroommisaa binnaa'umbee'i beyyiinsim wixxaa'oommisaa laqqoohonnihe? Eehaare an waaraa i diinate tirfinnem a'llona daddaraanina uwwiteenahe? Kaba ee diinate ixxeensi aa'llakka'a tommi makiliit yoo manchina uwwehe. Yoohaannina ayyenam edakka'a uwwakkamaare eraa'llaanniinsim ixxena lobakata lophphookko. Ihukkaarem bee'aanniinsi ayyeensim ixxena yooqaxoomam massakkamo. Ka awwaad bee'i awwaadaancho biiranne yoo tuunsonne fissitakka'a uunjehe. Eekke'em wi'llookkoo inqe iicookkoo› yukko» yaa kurukko. Odim Yesuus «Manchi Beet iima'n asse'amaaninne hundinnem kibbamaa lombinne waaroo ammane adilla'n barcumanne afuurookko. Minaadab hundim ixxi illagenne wixxookko; ixxim allaaraanchi gereebba fella'iinsi annanni issoo'isa mat minaadaba mullaanniinsi annanni issookko. Gereebba ixxi makkanne fella'am qeddanne uullisookko. «Ee ammane adilim ixxi makkanne yo'i keenina ‹Iyyanni maassaammuwwa, waallehe! Heer uulli qooccamukkaanniinsi ki'isaa ki'nnuwwina gudu adillano lago aa'llehe. Mashka'oomim an sibaarummaare itissakko'ookko; xeebe'ummaarem agissakko'ookko; koyyiinchi ihaa waarummaare koyyinano aa'llakko'ookko. Habiillummaare eddeessakko'ookko; xissummaare moo'llakko'ookko; karamummaarem xa'mmitakko'ookko› yookko. «Xummaanim ixxena dabatta'a ‹Ni Moollanna! Hinki balla sibaattaa moo'nnaa itinsummo? Hinki balla xeebe'llaa moo'nnaa aginsummo? Hinki balla koyyiinchi ikkaa moo'nnaa koyyinano aa'nnummo? Hinki balla habiillitaattoo moo'nnaa eddeensummo? Ee'isam xissitaa te'im karantaa moo'nnaa hinkammane xa'mminummo?› yitamo. Adilim dabaraa ‹Hanqinam an ki'nnuwwina kuroommo; ka hoffi iyyabbaayyuwwiinsi matina issitakko'ok iinam issitakko'aannisa› yookko. «Ee lasage odim qeddi kollonne yo'i keenina ‹Ki'nnuwwi duumantakko'oo keeno, i illagiinsi qee'llehe! Sheexaanchinaa ixxi asse'amaaninaa gudu heer heerinam xoo'oobee'i giiranne mallehe! Mashka'oomim an sibaaraa itissakko'oyyo. Xeebe'aahim agissakko'oyyo. Koyyiinchi ihaa koyyinano aa'llakko'oyyo. Habiillaahim eddeessakko'oyyo. Xissaatii karamaatii xa'mmitakko'oyyo› yookko. «Ixxuwwim dabatta'a ‹Ni Moollanna! Neese at sibaattaa te'im xeebe'llaa te'im koyyinano waattaa te'im habiillitaa te'im xissitaa te'im karantaa moo'nnaa hinki balla hara'mmimma sambummo› yitamo. Adilim dabaraa ‹Hanqinam an ki'nnuwwina kuroommo; ka hoffi iyyabbaayyuwwiinsi matina issitakkobee'ek iinam issitakkobee'aannisa› yookko. Ee lasage oo keen heer heerinam hee'oo bichchina mattamo. Ihukkaarem xummaan keen heer heerina hee'oo heechchina mattamo» yukko. Yesuus ee hundam losisaa guullaa lasage ixxi losaanina «Lam balliinsi lasage Shaashshiqqi ugud yoo'isa laqqakkamo. Manchi Beetom saqalamoo'isina higisakka'a uwwakkamo» yukko. Ee ammane qeessa awwonsaanii lommannii hundiinsi lob qeessichchi ihu Qayyaaf minenne dummita'a hee'llo'o. Hantaarinne Yesuusa amadiisseenaa shisiisseena a'llanto'o. Ihukkaarem «Minaadab hambalaachchamoobee'isa uguxxi woronne ihoone» yito'o. Yesuus Biitaana yakkam gattenne oddomachchonne firoo baddisoo jabbi amadaakkoo Simi'oon minenne hee'ukko. Ee minenne hurbaata itonam lobakata bito xee'aalli ihaakkoo shitto'i yoo albaasxiroos bilqaaxa amadda'a ixxi beyyo waatto'o. Ee shitto'om ixxi horoorenne dunto'o. Ihukkaarem ixxi losaan eekka moo'llo'i ammanenne nadadda'a «Kuk qishirchoyyonnihe? Ku shitto'i lobakat birina biteesamaa diinatooma buxina uwwimmi xansiisam hee'ukko» yito'o. Eekka la'u bikkina Yesuus ixxuwwina «Ki'nnuwwi ka meentichcho mahina hawwissakkamuulla? Ise iina er luwwa issito'ookko. Bux hundi ammanem ki'nnuwwinnette; ihukkaarem an ki'nnuwwinne hundi ammane hee'oommoyyo. Ise i orachchonne ka shitto'o dunto'ok eese waammina gudisimminatte. Hanqinam an ki'nnuwwina kuroommo; ku mishiraachchi sagar heer uullanne alallaatamoo beyyi hundannem ku ise issito'ok ise tiirimmina kuramookko» yukko. Ee lasage tommiinsii lam losaaniinsii mat hee'u Asqoroto'i uulli Yihud qeessa awwonsaa'n beyyo maraa «An Yesuusa ki'nnuwwina higisaa uwwumta'n iina maha uwwitakkamo?» yukko. Ixxuwwim sad kin bira uwwito'o. Ee ammaniinsi ki'isaa Yihud Yesuusa higisaa uwweena makkoo ammane hasam hee'ukko. Qorosho'i uguxxi luxxi ballanne ixxi losaan Yesuus beyyo waatta'a «Shaashshiqqi Uguxxi maadda kiina hannonne gudinsona hassootto?» yita'a xa'mmito'o. Ixxim losaanina «Beero'o aaggakko'isam edantakkam manchi mine mattakka'a ‹Losisaanchi «Iina amman afu bikkina i losaaninne maqirem Shaashshiqqi Uguxxi hurbaata ki minenne iteenatte» yoolla› yitakka'a kullehe» yukko. Losaanim Yesuus ijaajukkisannem uguxxi hurbaata gudisso'o. Uulli hiimu ammanenne Yesuus tomminnee lamem losaaninnee maqirem maadda iteena afuurukko. Ixxuwwim hurbaata ittu'uuyyi Yesuus «Hanqinam an ki'nnuwwina kuroommo. Ki'nnuwwiinsi mat eese higisaa uwwookko» yukko. Ixxuwwim ee woshshanne lobakata kichche'lla'a annannichchim «Moollanna! Anedda'e?» yito'o. Yesuusim dabaraa «Iinninne maqirem bixxiranne anga aagisookkok eese higisaa uwwookko. Manchi Beeta'i ixxi bikkina Keesammi Kitaabanne kitaabamukkisam lehookko. Ihukkaarem Manchi Beeto higisaa uwwoo manchina aayye! Oo manchi qaramubeeta'n e'llam hee'ukko» yukko. Yesuusa higisaa uwwoo Yihudim «Losisaancho! Anetda'e?» yukko. Yesuusim «At yittisame!» yukko. Hurbaata ittu'uuyyim Yesuus qorosho'o ki'isaa Waa'a galaxxukko. Iiqaatim ixxi losaanina «Hii'nnehe; kuk i maara, ittehe» yaa uwwukko. Odim humbullonne yoo woyi'n diqaasam ki'isaa Waa'a galaxxaa lasage «Hundim ka humbulliinsi aggehe. Lobakat kee'n baaxii'l haafitina dunamoo haareechchi hidi'l i xiig kane. An ki'nnuwwina kuroommo; Iyyanni adillanonne ki'nnuwwinne maqire haareechchi woyi'n diqaasa agoommi ayyaam afeebe'e ka woyi'n diqaasiinsi od agoommoyyo» yukko. Ee lasage mazmuura zammatta'a Wee'l duunanne fitto'o. Odim Yesuus ixxi losaanina «Ki'nnuwwi hundim i mashka'inne qolantakkamo; oohim Keesammi kitaabanne ‹Allaaraancho aphphisoommo; allaachchi gereebbim binnookko› yamamu bikkinatte. Ihukkaarem an lehiinsi ki'aa lasage ki'nnuwwiinsi gaassaa Galiila afoommo» yukko. Pheexiroosim Yesuusina «Mulli keen hundim ki mashka'inne qolamuta'nnim an hore'em qolamoommoyyo» yukko. Yesuusim «Hanqinam an kiina kuroommo; at kaballi hiimo antabaa'i muunoo'n illageen sas kore eese laggootto» yukko. Ihukkaarem Pheexiroos «Kiinninne maqire lehoomta'nnim keese hore'em lagoommoyyo» yukko. Gatto'i losaan hundim ixxi yukkisam yito'o. Ee lasage Yesuus ixxi losaaninnem Geeteseemaana marukko. Ixxuwwinam «An ee beyyo maraa Waa'a uunxeembe'e keyye afuullehe» yukko. Ixxenne maqire Pheexiroosaa Zabdiwoos lamem oosoo amadaa maraa kichche'immaa u'nnamimmaa asheerukkoo. Ixxuwwinam «An lehoomqaxa kichche'aammo. Ki'nnuwwi ka beyyonne egellehe; iinninne maqirem qoxxehe» yukko. Ixxuwwiinsim hofqaxam qee'llaa uullanne illillaachcha ubaa «Iyyanna, xanamoohan ihulas ku hawwi humbulli iinniinsi higona. Ihukkaarem an doo'llummis ihoo'n at doo'llittisa ihona» yaa Waa'a uunxukko. Ee lasage sasem ixxi losaa'n beyyo waaraa diriitto'ookkoka moo'ukko; Pheexiroosinam «Iinninne maqire hofqax ammanem qoxximma hooggakko'onnihe? Keenanchanne aaggakkambee'isa qoxxitakka'a Waa'a uunxehe. Tiir hundi ammanem gudaakkoohane. Ihukkaarem maar hoongaancho» yukko. Odim la'mmaagge ixxuwwiinsi annanni ihaa maraa «Iyyanna! Ka hawwi humbulliinsi agoo'n higimmi xanamoobee'an ihulas ki doo'l ihona» yaa uunxukko. Odim losaa'n beyyo daba'llaa waaru ammanenne diriir ixxuwwa amadaa hee'u bikkina diriitto'oo moo'ukko. Odim ixxuwwa uraa maraa illagee'nnisam saxxaaggem uunxukko. Ee lasage ixxi losaa'n beyyo daba'llaa waaraa «Kabad afeebe'em usheexxitakka'a iinse'llakko'oollannihe? Oono'o! Amman afaakko. Manchi Beeto baaxiilaa'n anganne higisakka'a uwwakkamo. Ki'llehe, mallona. Oono'o, eese higisaa uwwookkok hincaakko» yukko. Yesuus eekka wocukkuuyyim tommiinsii lamiinsii mat hee'u Yihud waarukko. Ixxenne maqirem bisa'aa mugaa amaddo'oo lobakat manni hee'llo'o. Oo keenim qeessa awwonsaaniinsii minaadaphphi lommanniinsii asse'anto'oo keen hee'llo'o. Yihudim ixxenne waaru mannina «An suunqoommi manchi ixxotte; ixxo amaddehe» yaa mare'e kuraa hee'ukko. Yihud ee ammanem Yesuus beyyo waaraa «Losisaancho! Xummannihe?» yaa suunqukko. Yesuusim ixxena «I beshichcho, mahina waattitto?» yukko. Ee lasage oo manni hincita'a Yesuusa amaddo'o; katto'ome. Yesuusinne hee'llo'i keeniinsim mat seejjiinsi bisa'a fissaa hundiinsi lob qeessichchi awwaadaanchika macce murukko. Yesuusim «Ki bisa'a ki seejjannem dabare. Bisa'a ki'isoo keeno bisa'im guullookko. Hasisoohan ihuta'n an iyyanna xa'mmaa 12,000 gogotiinsi lophphoo iima'n asse'amaano asse'eena xanoobee'eka labissaatennihe? Eehid ihuta'n Keesammi Kitaabanne ‹Ihookko› yamamukkok hinkid wo'mmeena xanookko?» yukko. Ee ammanenne Yesuus eehe'e wixxaa hee'u mannina «Fanga amadakkamisa eese amaddakkeena bisa'aa mugaa amaddakka'a waattakko'onnihe? An ballina ballina Keesammi minenne afuuraa losisummuuyyi amaddakko'oyyo. Ihukkaarem ku hundim ihukkok hiraagaan kitaabbo'ok wo'mmoo'isinatte» yukko. Ee ammanenne losaan hundim ixxo utta'a gibbo'o. Yesuusa amaddo'i mannim hundiinsi lob qeessichchi hee'u Qayyaaf beyyo massito'o. Ee beyyonnem Seera losisaanii minaadaphphi lommannii wixxita'a hee'llo'o. Ihukkaarem Pheexiroos hundiinsi lob qeessichchi qash wor afeebe'e qee'llonnette ihaa Yesuusa awwonam hee'ukko. Woshshika lasaancho moo'eena qash wororo aagaa egeraaninne maqirem afuurukko. Qeessa awwonsaanii Ayihuxxi daannuwwii hundim Yesuusa shisiisseena qophpha'n naqaasha hassam hee'llo'o. Dut qophpha'n naqaash hincukkaarem lehoo'isa issoo naqaasha siiddo'oyyo. Lasaanchonne lam manchi hincita'a «Ku manchi ‹Waa'ika Keesammi Mine gindaa sas ballanne dabaraa baxeena xanoommo› yaakko» yito'o. Hundiinsi lob qeessichchim ki'aa Yesuusina «Ku manni keesenne naqqassoo'i luwwi hundinam maham dabattooyyonnihe?» yaa xa'mmukko. Ihukkaarem Yesuus cawwaaurukko. hundiinsi lob qeessichchi odim Yesuusina «Hee'oo Waa'i summinne an keese xa'mmoommo; at Waa'i Beet Kiristoosatte ikkaattoolas niina kure» yukko. Yesuusim dabaraa «At yittisame. An ki'nnuwwina kuroommo; kanniinsi eehid Manchi Beet hundam xanoo Waa'aannonne makkanne afuuraahii iima'n duubinnem waarukkuuyyii moo'llakkamo» yukko. Ee ammanenne oo qeessichchi ixxi eddechcha dereeraa «Oono'o, Waa'inne game'llamoolla! Kanniinsi mulli naqaash niina maha issookko? Waa'inne game'llamukkuuyyi ki'nnuwwi gagim macceessakko'ookko. Kaba ki'nnuwwina maha labookko?» yukko. Ixxuwwim «Ixxena leh hasisookko!» yita'a dabatto'o. Ee lasage ixxi illenne anja tuhito'o; tomtoomminnem aphphisso'o. Mat mat keenim oobo'inne aphphissu'uuyyi «Kiristoosa, keese aphphisukkok ayyette? Huno'o niina hiraago kure!» yitam hee'llo'o. Pheexiroosim ee qeessichchi qash woronne afuuraakkoohaannonne mat baxaancho ixxi beyyo waatta'a «Atim Galii'l Yesuusinne maqirem hee'llitto» yito'o. Ihukkaarem Pheexiroos «At yitoottoka an la'oommoyyo» yaa hundi illagennem lagukko. Ixxim fireena ooxxi gooc kollonne marukkuuyyi odim mulli baxaanchom moo'lla'a ee beyyonne hee'u mannina «Ku manchim Naazireexxi Yesuusinne maqirem hee'ukko» yito'o. Pheexiroosim «Ka at yitoo mancho an la'oommoyyo» yaa hide'aa la'mmaaggem lagukko. Hofqax ammaniinsi lasage ee beyyonne uullita'a hee'llo'i manni Pheexiroos kollonne hincita'a «At woccoo'isim la'isoolla; hanqinam atim ixxuwwiinsi mato» yito'o. Ee ammanenne Pheexiroos «An ka mancho la'oommoyyo!» yaa ixxi gaga duu'mmimmaa hide'immaa asheerukko. Ee ammanem antabaa'i muunukko. Pheexiroosim «Antabaa'i muunoo'n illageen eese sasaagge laggootto» yaa Yesuus wocu sagara tiiraa biiranne firaa shikkaa wi'llukko. Soodaraar daram qeessa awwonsaanii minaadaphphi lommannii hundim Yesuusanne leho oogatisseena a'llanto'o. Ee lasage Yesuusa katta'a massita'a gassaanchi Philaaxoosina higissa'a uwwito'o. Higisaa uwwu Yihudim Yesuusanne oogatamukkisa moo'aa saxxukko; massaa hee'u sadem kin biram qeessa awwonsaaninaa lommanninaa dabaraa uwwaa «Muccur mancho higisaa uwwimminne an hawwodaammo» yukko. Ihukkaarem ixxuwwi «Neese mah hawwisaate; ookki ki quuxo» yito'o. Ixxim sadem kin biram Keesammi Mininne darabaa firukko; maraahim xaga'llaa lehukko. Qeessa awwonsaanim ee bira ki'issa'a «Xiiqqi diinat ihu bikkina Keesammi Mi'n diinatenne edimmi hasisooyyo» yito'o. Ee bikkina a'llanta'a lasage mulli uulli manni waammamoo beyyo mat buchchi mu'uta baxaanchiinsi bitaa'llo'o. Ee bikkina oo uulli kaballi afeebe'em Xiiqqi Uulla yamamookko. Ee'isinne hiraagaanchi Ermiyaasinne «Isra'ee'l oos ixxena miqqeena iittanto'i sadem kin biram massito'o. Waa'i eese ijaajukkisannem buchchi mu'uta baxaanchi uullina miqqo'o» yukkok wo'mmukko. Yesuusim gassaanchi illagenne hincukko. Gassaanchim ixxena «At Ayihuxxi adilannihe?» yaa xa'mmukko. Yesuusim «At yittisame» yaa dabarukko. Ihukkaarem qeessa awwonsaanii lommannii kasasso'i woshshina maham dabarukkoyyo. Odim Philaaxoos «Keesenne mee'i luwwinne keese kasasakkamulda'e macceessooyyonnihe?» yukko. Ihukkaarem gassaanchi lobakata maalaleebe'e Yesuus matem sagaram dabarukkoyyo. Gassaanchi Shaashshiqqi Ugudanne karatiinsi tiramona minaadab xa'mmoo mat mancho tirimmi losamaakkoohan hee'ukko. Ee ammane boqqoominne la'amaakkoo Barbaana yakkam mat manchi karamaa hee'ukko. Minaadab wixxukkaare Philaaxoos «Barbaanannii Kiristoosa yamamoo Yesuusa fatakihona hassakkamo?» yaa xa'mmukko. Eehid yukkokim Yesuusa to'achchinne higissa'a uwwito'isa la'oo bikkinatte. Oogaxxi barcumanne Philaaxoos afuuraakkoohaannonne ixxi mi'n ama «Ee manchi mashka'inne hii'mmo'o haqaawwonne lobakata hawwummuuyyi garummi bikkina ee muccur manchonne maham issitoobee'isa» yita'a asse'llo'o. Ihukkaarem ee ammane qeessa awwonsaanii lommannii «Barbaan tiramaa Yesuus lehona!» yita'a Philaaxoosa xa'mmitona minaadab soggo'o. Gassaanchi la'mmaaggem «Lamiinsim ayye fatakihona hassakkamo?» yaa minaadaba xa'mmukko. Ixxuwwim «Barbaana!» yito'o. Philaaxoosim ixxuwwina «Eehaare Kiristoosa yamamoo Yesuusa maha isso?» yaa xa'mmukko. Hundim «Saqalamona!» yito'o. Gassaanchim «Mahinatte? Ku manchi hawwodu luwwi maha?» yaa xa'mmukko. Ihukkaarem ixxuwwi «Ixxi saqalamona!» yita'a lobakata shuutto'o. Philaaxoosim oo woshshi dambaqa qooccimmiinsi bagaan awwaad bee'an ihukkisa la'aa «Ki'nnuwwi quuxo; an ka manchi xiigiinsi muccura» yaa wo'o eebisaa minaadaphphi illagenne anga aanshaqqukko. Minaadab hundim «Ixxi xiiga niinniinsii ni oosiinsii Waa'i miqisona» yito'o. Ee ammanem Philaaxoos Barbaana ixxuwwina fatakukko. Ihukkaarem Yesuusa gansiisaa lasage saqalamoo'isina ixxuwwina higisaa uwwukko. Ee lasage gassaanchik gaadaan Yesuusa ee gassaanchi qashoro massito'o. Dut gogotam Yesuus kululleetanne wixxaa'llo'o. Yesuusika eddechcha sheelatta'a kashar eddechcha eddeesso'o. Adilla'n mare'e uttinne baxxa'a ixxi horoorenne issito'o. Ixxi makki angannem shomboqo'i bicco amadiisso'o. Ixxi illagennem heeshtu'uuyyi «Ayihuxxi adila, xummi kiina ihona!» yitu'uuyyi naacanto'o. Anjam tuhito'o; shomboqo'i biccom ixxi angiinsi aa'lla'a horoore aphphisso'o. Ixxonne naacca'a lasage kashar eddechcha sheelatta'a ixxi eddechcha eddeessa'a saqalteena massito'o. Ee qash woriinsi fittu'uuyyim Qaaree'n uulli Simi'ooninne edanto'o; masqalam iyyona giddisso'o. Ee lasage «Horoo'l Qooma» yamamoo Golgota affo'o. Ee beyyonnem Yesuusina dambi hamaaramaakkoo woyi'n diqaasa agona uwwito'o. Ihukkaarem suuminne gubbukko bagaan ageena hasukkoyyo. Yesuusa saqalta'a lasage saamo fissita'a ixxeka eddechcha baxxanto'o. Eekke'ennem afuutta'a egettam hee'llo'o. Ixxo kasasso'i woshsham «Kuk Ayihuxxi manni adil Yesuusatte» yita'a kitaabba'a Yesuus horoo'l aganne masqalanne issito'o. Ee ammane Yesuusinne maqirem lam fanguwwa matoo makkinne matoo qeddi kollinne saqalto'o. Eeheen higoo araatim ixxo gadda'a horoore heekkeessu'uuyyi «Ku Keesammi Mine ginditaa sas ballanne baxxoo at huno'o, ki gaga gatise! Waa'i Beet ikkaattoolas huno'o, masqaliinsi dille!» yitam hee'llo'o. Odim qeessa awwonsaan, Seera losisaanii lommannii «Ixxi mulli keeno gatisukko; ihukkaarem ixxi gaga gatiseena xanukkoyyo. Ixxi Isra'ee'l adil ihulas kaba masqaliinsi dillona; neesem ixxonne amma'nninoommo. Waa'anne amma'nnamaakko. Odim ‹An Waa'i Beeto› yam hee'u bikkina, huno'o, Waa'i ixxo iittoohan ihulas kaba gatisona» yita'a naaccam hee'llo'o. Ixxenne maqire saqalanto'i fanguwwim game'llitam hee'llo'o. Loh sa'aatiinsi ki'isaa honsi sa'aat afeebe'e hundem uullim tuunsukko. Honsi sa'aata ihoo ammanenne Yesuus «Eeloohee! Eeloohee! Lamaa Sabaqtaanii?» yaa laarukko. Ee'isa yimmim «I Waa'a! I Waa'a! Eese mahina uttitto?» yimma. Ee beyyonne uullita'a hee'llo'i mannik mat mat keen eekka macceessa'a «Ku manchi Eeliyaasa weeshoolla» yito'o. Ee ammanem ixxuwwiinsi mat geeraa maraa hallaammi'nnoo'i luwwa eebaa shiishaakkoo woyi'n diqaasanne cefaa shomboqo'i bicconne issaa Yesuusina agisukko. Ihukkaarem mulli keen «Huno'o, ure! Eeliyaas waaraa gatisooda'e moo'nnoommo» yito'o. Odim Yesuus sagara iimaa'aa laaraa lasage ixxi foore higisaa uwwukko. Keesammi Minenne hee'u du'm eddechchim ludiinsi lugum afeebe'e lam beyyonne dereeramukko. Uullim huxe'ukko. Kinneewwim anamukko. Waammuwwim fooqukko. Leto'i xummaan kee'nnekim dut lehiinsi ki'llo'o. Waammuwwiinsim fitta'a Yesuus lehiinsi ki'aa lasage keesammi beero'o Yerusaaleema aagga'a dut mannina moo'anto'o. Xibbi halaqichchii ixxenne maqirem Yesuusa egettam hee'llo'i gaadaanii uulli huxechchaa ee ammane ihu luwwaa moo'llo'i ammanenne lobakata baddita'a «Hanqinam kuk Waa'i Beet hee'ukko!» yito'o. Eekke'em qee'llonne ikka'a dut meenti moo'llam hee'llo'o. Ixxuwwim Galiiliinsi ki'issa'a Yesuusina hara'mmitu'uuyyi awwontam keen hee'llo'o. Ixxuwwi lambe'enne Magdala yakkam beero'i Maaraame, Yaaqoobinaa Yooseefinaa ama hee'llo'i Maaraamee Zabdiwoos oos amaa hee'amukko. Uulli hiimu ammanenne Armaate'i beero'ik Yooseefa yakkam goddaanchi ee beyyo waarukko. Ixxim Yesuusa awwonaanchi hee'ukko. Yooseefim Philaaxoos beyyo maraa Yesuusika leesha uunxukko. Philaaxoosim uwwakkona ijaajukko. Yooseefim leesha massaa talbiinsi dadamaakkoo muccur eddechchinne keefanukko. Ixxi gagina kininne fere'aa gudisaakkoo haareechchi barenne waammaa geejji kina onkoroollisaa ifiisaa marukko. Magda'l Maaraamee mulli Maaraamee ee beyyonne waammi illagenne afuuramaa hee'ukko. La'm balla daram Usheexxaxxi Ballanne qeessa awwonsaanii Farisaawe'uwwii mat ikka'a Philaaxoos beyyo matta'a «Moollanna, oo huushisaanchi leheena illageen ‹Saxxi ballanne lehiinsi ki'oommo› yukkoka tiillaammo. Ee bikkina ixxi losaan hiimonne matta'a leesha game'lla'a minaadabina ‹Oono'o! Lehiinsi ki'aakko› yitambee'isina ixxek waammi sas balli afeebe'e egeramoo'isina ijaaje. Eehid ihubeelas lasaqqi huushanchi luxxaanniinsi baasaakkoohan ihookko» yito'o. Philaaxoosim ixxuwwina «Ki'nnuwwinam egeraan yookko; laqqakkamisinne mattakka'a egessiissehe» yukko. Ee bikkina matta'a waamma koobo'inne ifiissa'a egeraaninne egessiisso'o. Usheexxaxxi Ayyaam higaa lasage saantina luxxi balli soodukkuuyyim Magda'l Maaraamee mulli Maaraamee waamma moo'ameena maramukko. Dangonnem malaayyaam uulli huxechchi ihukko; Waa'i asse'amaanchim iimaniinsi dillaa waammanne ifiisamu kina onkoroollisaa hanenne afuurukko. Ee asse'amaanchikim hagar banqisa belecce'oohan hee'ukko. Ixxi eddechchim baraxxisa qadaalli hee'ukko. Egeraanim ee asse'amaancho baddito'i bikkina huxe'llo'o; tuude'llo'ome. Oo asse'amaanchim ee meentina «Ki'nnuwwi badditakkotte! Saqalamu Yesuusa hassakkamisa la'oommo. Ixxi keyye bee'e; yukkisam lehiinsi ki'aakko. Ixxo waammakko'i beyyo waattakka'a moo'llehe. Qaqqissakka'a mattakka'a ixxi losaanina ‹Lehiinsi ki'aakko. Ki'nnuwwiinsi gaassaa Galiila maroolla; eekke'em ixxo moo'llakkamo› yitakka'a kullehe. Oono'o! An ki'nnuwwina kuraammo» yukko. Ee bikkina oo meenti baddimminnee lobakat liiranchinnee waammi beyyiinsi qaqqissa'a ixxi losaanina kutteena geettu'uuyyi matto'o. Mattu'uuyyim Yesuus dangonnem ixxuwwinne edamaa «Xummi ki'nnuwwina ihona!» yukko. Ixxuwwim ixxi lokko amadda'a otossito'o. Ee ammanenne Yesuus ixxuwwina «Badditakkotte! Mattakka'a iyyabbaayyuwwina Galiila mattona kullehe; eekke'enne eese moo'llamo» yukko. Oo meenti mattu'uuyyim waamma egetta'a hee'llo'i egeraa'nnek mat qax beero'o matta'a qeessa awwonsaanina ee ihu luwwa hundam kutto'o. Qeessa awwonsaanim lommanninne maqirem wixxita'a a'llanta'a lasage ee egeraanina lobakat diinate uwwita'a «Mannina ‹Neese diriillaammoohaannonne ixxi losaan hiimonne waatta'a ixxi leesha game'lla'a matto'o› yitakka'a kullehe. Ka woshsham gassaanchi macceesulas ki'nnuwwanne matem hawwim afoobee'isa neese axinsoommo» yito'o. Ee bikkina oo egeraan diinate a'llita'a ixxuwwina kurakko'isa issito'o. Oo woshshi kaballi afeebe'em Ayihuxxi manni lambe'enne binnukko. Tommii mat losaanim Yesuus mattamisina kuraa hee'u Galiilanne yoo duuna matto'o. Ixxuwwim ixxo moo'llo'i ammanenne ixxena otossito'o. Ihukkaarem mat mat keen malanto'o. Yesuusim ixxuwwi kollonne hincaa «Iima'nnekii uullikii hundikim gassimmi malaayyi iina uwwamaakko. Ee bikkina uulli hundam mattakka'a minaadab hundam Anni summinne, Beet summinnee Keesammi Ayyaa'n summinnee xammaqqakku'uuyyi i losaan issehe. An ki'nnuwwa ijaajummi ijaaj hundam egettamisinam losissehe. Oono'o! An doolli beeddichchi afeebe'e hundi ammanem ki'nnuwwinne maqire yoommo» yukko. 4 Kuk Waa'i Beet Yesuus Kiristoos mishiraachchi asheera. Ee bikkina Xammaqaanchi Yohaannis udma'anne «Baaxiil haafamoo'isina baaxiilo biiraa yitakka'a xammaqammehe» yaa alallaatukkuuyyi waarukko. Ee bikkina Yihuxxi uullikii Yerusaalee'm beero'ikii dut manni ixxi beyyo maraa baaxiilo biiraa yukkuuyyi Yoordaanoos daajjenne Yohaannis anganne xammaqamukko. Yohaannis edde'am hee'u eddechchi gaameela'i oddiinsi baxamaakkoohan hee'ukko. Ixxi lamadom omachchiinsi baxamu saqqinne lade'am hee'ukko. Itam hee'u hurbaatim qawwaawwaa udma'i uulli maraboo hee'ukko. Ixxi alallaatim «An ixxeka caamma'i fatiram heeshaa tireena laboombee'ek iinniinsi hore'em lophphookkok i lasonne waaroolla. An ki'nnuwwa wo'inne xammaqoommuulla; ihukkaarem ixxi Keesammi Ayyaaninne xammaqookko» yoohan hee'ukko. Ee ammane Galii'l uullanne yoo Naazireetiinsi Yesuus waarukkaare Yoordaanoos daajjenne Yohaannis ixxo xammaqukko. Yesuusim wo'i woriinsi firukkisam iiman fooqaa Keesammi Ayyaan handarekkichchi kobi'llanne ihaa ixxi hanenne afuurukkuuyyi Yoohannis moo'ukko. Ee ammanem «An iittoommi i Beet atette; anim keesenne liiramoommo» yoo sagar iimaniinsi waarukko. Ee ammanem Keesammi Ayyaan Yesuusa udma'i uulli kolli awwonsukko. Ee udma'annem Sheexaanchi ixxo sor ballina keenukko. Ixxennem bii'l moochchi hee'ukko; Waa'i asse'amaanim ixxena awwaaddo'o. Yohaannis karamaa lasage Yesuus Waa'ika mishiraachchi sagara alallaatukkuuyyi Galiila waarukko. Ixxim «Amman afaakko; Waa'i adillanim waaraakko; baaxiilo biiraa yi'llehe; mishiraachchi sagarannem amma'nnehe!» yam hee'ukko. Yesuus Galii'l Dambalaq gadaninne higukkuuyyi Simi'oonii ixxi abbaayyi Indiraasii qurxumme'e qaashsham hee'llo'i bikkina dambalaqanne shikka ubbussu'uuyyi moo'ukko. Ixxuwwinam «Eese awwonnehe! Manna qaashaan ikkakkamisa issoommo» yukko. Ixxuwwim ee ammanem shikka utta'a ixxo awwonto'o. Ixxim ee beyyiinsi hofqaxam maraa Zabdiwoos ooso Yaaqoobaa Yohaannisaa moo'ukko. Ixxuwwim wongiranne afuutta'a shikka axissam hee'llo'o. Ee ammanem ixxuwwa weeshukko. Ixxuwwim ixxuwwika anna Zabdiwoosa ixxi baxaaninne maqirem wongiranne utta'a Yesuusa awwonto'o. Yesuusii ixxenne maqire hee'llo'i keenii Qifirinnaahooma matto'o. Yesuusim Usheexxaxxi Ayyaam aagukkisam Ayihuxxi manni wixxixxi mine aagaa losisimma asheerukko. Ixxi losisam hee'ukkok seera losisaa'nnis ihoo'n gassaa'nnis ihu bikkina macceesso'i keen ee losanonne maalalto'o. Habus amadaakkoo mat manchi ee ammane ee wixxixxi minenne hee'ukko. Ixxim «Naazireexxi Yesuusa! Niina kiinninne mah hee'aate? Neese bi'isseenattennihe? At ayyetda'e ikkittisa an la'oommo; at Waa'i keesamma» yaa laarukko. Yesuusim habusina «Sa'itaa ka manchiinsi fire!» yaa ijaajukko. Habusim mancho fitifitaa'aa lasage laaraa firukko. Ee beyyonne hee'llo'i manni hundim maalalta'a «Kuka'i aganna; kuk haareechchi losishshayyonnihe? Malaayyinne habusa ijaajoolla; ixxuwwim ixxena ijaajantamuulla» yita'a ixxuwwina'i ixxuwwim wocco'o. Ee ammanem Yesuusik sad Galii'l kululleetanne yoo uulli hundannem macceesamukko. Ayihuxxi manni wixxixxi miniinsi firukkisam Yaaqoobinnee Yohaannisinnee maqirem Simi'oonii Indiraasii hee'llam mine aaggo'o. Eekke'em Simi'oonik ballo xissita'a iinse'lla'a hee'llo'o. Ixxuwwim is bikkina Yesuusina kutto'o. Ee bikkina iinse'llo'i beyyo maraa is anga amadaa ki'isukko; xissim ise fatakukko. Ki'lla'atim ixxuwwina koyyinano issito'o. Eelliinchi aagukkisam hiimonne Yesuus beyyo jabbaanoo habus amadaakkoo keenoo eebakko'o. Ee beero'i manni hundim u'llummanne wixxaa hee'ukko. Ixxim annanni annanni xissinne jabbu dut manna fayyiisukko; dut habusam fissukko. Ixxi ayyetda'e ihukkisa habus la'aa hee'u bikkina ixxi bikkina woccambee'isa Yesuus hoorukko. Uulli soodeena ihaakkoohaannonne Yesuus ki'aa Waa'a uunxeena manni bee'i beyyo marukko. Simi'oonii ixxenne hee'llo'i keenii ixxo hasimma asheetto'o. Ixxuwwim ixxo siiddo'i ammanenne «Manni hundim keese hasoolla» yito'o. Yesuusim ixxuwwina «Massehe; ka kululleetanne yoo gattuwwa mallona. Eehe'enne alallaatoommo; an waarummokim eehanninatte» yukko. Ee bikkina Ayihuxxi manni wixxixxi minneewwanne Waa'i sagara alallaatukkuuyyii habusa fissukkuuyyii Galii'l uulli hundannem do'am hee'ukko. Oddomachchonne baddisoo jabbi firaakkoo mat manchi ee ammane Yesuus beyyo waaraa ixxi illagenne guruphphaa «At iittittaare eese fayyiisseena xantootto» yaa uunxukko. Yesuusim qishixxaa ixxi anga biddiqaa'aa ee mancho nakkaa «Iittoommo; muccure» yukko. Ixxim ee ammanchom oddomachchonne yoo baddisoo jabbiinsi fayye'aa muccurukko. Ee lasage Yesuus ixxena «Macceese; at kaka ayyenam kuttoobee'isa. Ihukkaarem mattaa ki orachcho qeessichchina moo'ise. Odim at muccuttittisa hundim la'ona Muse'e ijaaju kitimam kitime» yaa qoxxisaa ijaajaa geegeesukko. Ihukkaarem manchoom maraa ee woshsha beyyi hundam afisukko. Ee bikkina Yesuus hinki beero'om la'amaakkoo'isinne aageena xanukkoyyo. Ihona bagaan beero'iinsi tochchonne manni bee'i daphphit beyyuwwanne hee'am hee'ukko. Ihukkaarem manni beyyi hundiinsim ixxi beyyo waaram hee'ukko. Hofqax balliinsi lasage Yesuus Qifirinnaahooma daba'llukko. Minenne Yesuus yoo'isa manni macceesukko. Ee bikkina miniinsi higaa nafar xuqqeebe'e dut manni wixxukko. Waa'i sagaram ixxuwwina losisukko. Soor manchim mat shiihaakkoo mancho iyyita'a Yesuus beyyo eebbo'o. Ihukkaarem manni lophphu bikkina ee mancho Yesuus beyyo hincaa'immina xanto'oyyo. Ee bikkina Yesuus hee'u mi'n iimane fitta'a ixxi yoo kollinne fooqaa'lla'a hallaqqinnem aad dilliisso'o. Yesuusim ixxuwwika amma'nnato moo'aa shiihu manchina «I beeto, ki baaxiil haafamaakko» yukko. Ee ammane Seera losisaa'nnek mat mat keen eekke'e afuutta'a hee'llo'o. Ixxuwwim ixxuwwi wodanonne «Ku manchi Waa'a mahina game'lloolla? Matem Waa'iinsi bagaan baaxiilo haafeena ayyi xanookko?» yita'a sawwito'o. Ee ammanem Yesuus ixxuwwi sawwito'oka la'aa «Ki'nnuwwi kid mahina sawwitakkamuulla? Ka shiihu mancho ‹Ki baaxiil haafamaakko› yimminnii ‹Iimitaa ki hallaqqa iyyitaa mare› yimmi sholle'ookko? Ihukkaarem ka uullanne baaxiilo haafeena Manchi Beetina malaayyi yoohan ihukkisa laqqehe» yaa shiihu manchina «Ki'e, ki hallaqqa iyyitaa ki mine elle'e» yukko. Ixxim ee ammanem iimaa hallaqqa amadaa ixxuwwi hundim moo'llu'uuyyi firaa marukko. Ee bikkina hundim maalalta'a «Kido'i luchcho hore'em moo'nnummoyyo» yita'a Waa'a galaxxito'o. Yesuus odim Galii'l Dambalaq gadano marukko; lobakat mannim ixxi beyyo waarukkaare losisukko. Ixxim ee beyyinne higukkuuyyi Ilfiyoos beet Leewi'i qaraxo miqisoo beyyonne afuuraakkoo moo'aa ixxena «Eese awwone» yukko; ixxim ki'aa awwonukko. Ee lasage Yesuus Leewi'i minenne hurbaata iteena afuuraakkoohaannonne ixxo awwontam hee'llo'i dut manni ixxennee ixxi losaaninnee maqirem itto'o. Ixxuwwiinsem dut keen qaraxaanoo baaxiilaanoo hee'llo'o. Farisaawe'uwwiinsi mat mat Seera losisaan qaraxaaninnee baaxiilaaninnee itukkuuyyi moo'lla'a ixxi losaanina «Qaraxaaninnee baaxiilaaninnee mahina itoollaa agoollaa?» yita'a xa'mmito'o. Yesuusim eekka macceesu ammanenne ixxuwwina «Qaraa'l manchi hasisookkok jabbaaninatte bagaan fayya'i manninayyo. An waarummok baaxiilaano weesheenatte bagaan muccur keeno weesheenayyo» yukko. Yohaannis losaanii Farisaawe'uwwii soommantam hee'llo'o. Ee bikkina mat mat manni Yesuus beyyo waatta'a «Yohaannis losaanii Farisaawe'uwwii soommantu'uuyyi ki losaan soommantambee'ek mahinatte?» yita'a xa'mmito'o. Yesuusim ixxuwwina «Idaayyichchi ixxuwwinne hee'ukkuuyyi saawwuwwi soommanimmi hasisoohonnihe? Idaayyichchi ixxuwwinne maqire hee'ukkuuyyi soommantamoyyo. Ihukkaarem idaayyichcho ixxuwwiinsi annanni issakka'a massakkam ayyaam waarookko. Ee ayyaamo ixxuwwim soommantamo. «Beeddu eddechchanne haareechchi qaafunta edaa gobookkok ayyim bee'e. Mashka'oomim ee'isa issaa gobulas oo haareechchi qaafunti beeddu eddechcha baasisaa dereerookko. Ee'isam ebeer cananne haareechchi woyi'n diqaasa issookkok ayyim bee'e. Issookkokimdu hee'ulas can xooqaa awwaad bee'an ihookko; diqaasoomim dunamookko. Ee bikkina haareechchi woyi'n diqaasina haareechchi can hasisookko» yukko. Ee lasage Yesuusii ixxi losaanii Usheexxaxxi Ayyaamonne hurbaaxxi worinne higgam hee'llo'o. Higgu'uuyyim ixxi losaan hamaama quxxo'o. Ee beyyonne hee'llo'i Farisaawe'uwwim Yesuusina «Kaka moo'e! Ku ki losaan Usheexxaxxi Ayyaamonne issakkambee'i luwwa mahina issitamuulla?» yito'o. Yesuusim «Daawiit ixxo awwontam keeninne maqire sibaaraahii hawwaahii hee'u ammane maha issuda'e qananaa'llakko'oyyonnihe? Abiyaataar hundiinsi lob qeessichchi hee'u doollenne Keesammi Mine aagaa qeessuwwiinsi bagaan mulli keen itimmi hasisoobee'i keesammi qorosho'o itukko. Ixxenne hee'llo'i manninam uwwukko» yaa dabarukko. Odim Yesuus «Usheexxaxxi Ayyaam qooccamukkok manninatte bagaan manni Usheexxaxxi Ayyaamina qooccamukkoyyo. Ee bikkina Manchi Beet Usheexxaxxi Ayyaaminam annichchome» yukko. Odim Yesuus Ayihuxxi manni wixxixxi mine aagukko. Eekke'em angi shiihaakkoo mat manchi hee'ukko. Ee lasage Yesuus «Usheexxaxxi Ayyaamonne baximmi xanamookkok danaamonnii jora? Te'im foore gatisimmannii shimma?» yaa xa'mmukko. Ihukkaarem ixxuwwi maham dabatto'oyyo. Ixxuwwi woda'n duudoomanne kichche'aa quuqimminne ixxi kululleetanne yoo manna moo'ukko. Ee angi shiihu manchom «Ki anga biddiqaa'e» yukko. Manchim anga biddiqaa'ukko; ixxi angim fayye'ukko. Ee ammanem Farisaawe'uwwi ee beyyiinsi fitta'a Heeroodis kolliinsette ikko'i manninne maqirem Yesuusa shitam googo a'llanto'o. Eehe'e wixxaa hee'u manni tu'mmansoobee'isa hoffi wongiram gudissona ixxi awwonaano ijaajukko. Ixxim dut manna fayyiisaa hee'u bikkina jabbinne hawwitam keen hundim ixxo nakkiteena xiibantam hee'llo'o. Habusim ixxo moo'llo'i ammanenne ixxi illagenne ubba'a «At Waa'i Beeto» yitu'uuyyi laattam hee'llo'o. Ihukkaarem Yesuus ixxi ayyetda'e ihukkisa la'issambee'isa qoxxisaa ijaajukko. Yesuusim duunanne firaa ixxi hasu keeno ixxi beyyo weeshukkaare ixxuwwim ixxi beyyo waatto'o. Ixxenne maqir ikkamisinaa losissonam asse'eenaa ixxuwwiinsi tommoo lam manchoo doo'llaa «Asse'amaano» yaa summa fissukko. Ixxuwwinam habusa fissitamisina malaayye uwwukko. Doo'llanto'i tommii lamem asse'amaanim ka keeno; ixxuwwim Pheexiroosa yu Simi'oonatte, Bo'anergaasa yu Zabdiwoos lamem oosim Yaaqoobattee Yohaannisatte, Indiraasatte, Filiphphoosatte, Bartoloomoosatte, Maatiwoosatte, Toomaasatte, Ilfiyoos beet Yaaqoobatte, Taadiwoosatte, to'achchaanchi Simi'oonattee Yesuusa lehina higisaa uwwu Asqorotokkichchi Yihudattee. Yesuus ee lasage mine marukko. Odim dut manni wixxu bikkina Yesuusii ixxi losaanii hurbaatam itteena ammane hooggo'o. «Yesuus machchaaraakko» yaa manni wocukkuuyyi macceesso'i bikkina ixxi qarmanni Yesuusa amaddeena waatto'o. Yerusaaleemiinsi waatto'i Seera losisaanim «Ixxonne Bi'eelzeebul yoohane. Habusa fissookkokim habus adil Bi'eelzeebul uwwoo malaayyinnette» yito'o. Yesuusim ixxuwwa ixxi beyyo weeshaa kobi'llishshinne «Sheexaan Sheexaana fisseena hinkid xanoo? Mat adil ixxina'i ixxim baxxansamulas qoxxaa uulleena xanooyyo. Ee'isam mat mi'n abaroosanne annannaat yoohan ihulas qoxxaa hee'ooyyo. Ee bikkina Sheexaanim ixxina'i ixxim wocanchinne annanni ihoohan ihulas bi'ookko bagaan hee'eena xanooyyo. Ee'isam ayyim mat malaayyaam mancho gaassaa karoo'n mine aageenaa mu'uta bogeenaa xanooyyo. Ixxi mine bogeena xanookkok ee malaayyaamo karaa lasage. «Hanqinam an ki'nnuwwina kuroommo, manni baxoo baaxiilii game'llamoo game'llatii hundim haafamookko. Ihukkaarem Keesammi Ayyaana game'lloohaannina ayyenam heer heerina baaxii'l badan ihookko bagaan haafamooyyo» yukko. Yesuus kaka wocukkok «Ixxonne habus yoohane» yito'i bikkinatte. Yesuusik amaa ixxi abbaayyuwwii ixxi beyyo waatta'a u'llummanne uullita'a manna asse'lla'a weeshisso'o. Ixxi kululleetanne afuutta'a hee'llo'i mannim «Kiyyummaa kiyyabbaayyuwwii u'llummanne uullita'a keese hassamuulla» yito'o. Yesuusim ee mannina dabaraa «Iyyumma ayyette? Iyyabbaayyuwdu ayyayyaamo?» yukko. Odim ixxi kululleetanne afuutta'a hee'llo'i manni kollonne moo'ukkuuyyi «Iyyummaa iyyabbaayyuwwii ka keeno. Waa'ika doo'lla wonshookkok ayyim iyyabbaayyo, iyyaayyattee iyyummattee» yukko. Ee'isam Yesuus Galii'l Dambalaq gadanonne losisimma asheerukko. Lobakat mannim ixxi beyyonne wixxu bikkina dambalaq hanenne hee'u wongiranne firaa afuurukko. Manni hundim dambalaq lallabonne hee'ukko. Ixxuwwinam dut luwwa kobi'llishshinne losisukko. Oo losanim «Macceessehe! Mat ayyaamo mat manchi sire'e wixeena firukko. Wixukkuuyyim mat mat sire'i googonne ubukko. Cii'im waaraa feeraa itukko. Odim mat mat sire'i lobakat buchchi bee'i kinaam uullanne ubukko. Lobakat buchchi bee'i bikkinam qaqqisom mutukko. Ihukkaarem eelliinchi firu ammanenne xaph aad aagubee'i bikkina quubaa gogukko. Odim mat mat sire'i utti lambe'enne ubukko. Ihukkaarem utti li'aa ee muta xagaru bikkina misha uwwukkoyyo. Odim mat mat sire'i harish uullanne ubukko. Oo sire'i mutaa li'aa mat sade, mat lohayye, mat xibbe mishukko. Qoossaa macceesoo macci yookkok macceesona» yukko. Yesuus mullam yoohaannonne tommii lamem losaanii ixxuwwinnem maqire hee'llo'i keenii «Ku kobi'llishshi mayyimma?» yita'a xa'mmito'o. Ixxim «Waa'i adilla'n bikkina daphphaakkoo luwwa la'immi ki'nnuwwina uwwamaakko. Ihukkaarem haxonne yo'i keenina luwwi hundim kuramookkok kobi'llishshinnette. Oohim hiraagaanchi Issaayyaas ‹Ku minaadab Waa'i kollonne daba'llitambee'isinaa ixxuwwik baaxiil haafamoobee'isinaa moo'imma moo'llamo; qoossitamoyyo; macceesimmina macceessamo; hindihitamoyyo› yukkok wo'mmoo'isinatte» yukko. Odim Yesuus ixxuwwa «Ku kobi'llishshi ki'nnuwwina aagubee'an ihulas mulli kobi'llishsha hinkid laqqakkeena xantakkamo? Abuullaanchi wixu sire'i moo'isookkok Waa'i sagar kobi'llishsha. Mat mat manni googonne ubu sire'e kobi'llookko. Eehido'i manni Waa'i sagara macceesukkisam Sheexaanchi wixamu sagara ixxuwwi woriinsi feeraa massookko. Ee'isam mulli keen kinaam uullanne ubu sire'e kobi'llookko; oo keenim sagara macceesoo ammane liiranchinne aa'oo keeno. Ihukkaarem oo keen xaph bee'i keen ikko'i bikkina lobakata hee'llamoyyo. Ee saga'l mashka'inne hawwi te'im yaayyanchi afoo ammane qaqqisom qolantamo. Mulli keenim uttanne ubu sire'e kobi'llookko; Waa'i sagara macceesimmina macceessamo. Ihukkaarem ka uulli bikkina sawwimmi, amaxxa iittimmii ee'isam mulli luwwi mixanii Waa'i sagara xagarookko; meshbee'em gatoo'isa issookko. Mulli keenim harish uullanne ubu sire'inne kobi'llookko; oo keen Waa'i sagara macceessa'a aa'imminne mat sade, mat lohayye, mat xibbi misha mishoo keeno» yukko. Odim Yesuus ixxuwwina «Manni caakka caakkisaa sanfi woronne te'im ara'i woronne dissoohonnihe? Caakkooma dissookkok qoffit beyyonnetteyyonnihe? Ee bikkina maaxamaa moo'amoo'n daphphaahim caakkoo'n hee'oo luwwi bee'e. Macceesoo macci yookkok macceesona» yukko. Odim ixxuwwina «Macceessakkamoka qoossehe! Keentakkam keennaanchonne ki'nnuwwinam keenamookko. Hore'em eehanniinsim lophphaa exxookko. Yoohaannina exxookko. Ihukkaarem bee'aanniinsi oo yooqaxichchim massamookko» yukko. Odim Yesuus ixxuwwina «Waa'i adillan uullanne sire'e wixoo manchinne kobi'llamookko. Ixxim hiimo iinse'ookko; soodoohaarem ki'ookko. Ihukkaarem wixu sire'i ma'ihuda'e la'oo'nnim sire'oom mutaa li'ookko. Uulli ixxi gagim gaassaa muta mutisookko. Ee lasage oo mut fiitaa er misha mishookko. Oo mishim afoo ammane oo manchi jajjara gudisaa murimma asheerookko» yukko. Odim Yesuus «Waa'i adillano mahinne akeekansoommo? Te'im mah kobi'llishshinne ixxi bikkina tillaa kullo? Waa'i adillan mat manchi massaa uullanne wixu shaa'n sire'i'nnoo'i gootto'i sire'e labookko. Wixamoo ammane uullanne yoo sire'i hundiinsim hoffane. Ihukkaarem li'oo ammane duubbonne wixakkam luwwi hundiinsim lophphaa geejji geejji caaffuwwa fissookko. Cii'im ixxi caafanne do'nna baxaa usheexxookko» yukko. Manni ixxi woshsha qoosseena xanoo lobakat kobi'llishshinne Yesuus kurukko. Kobi'llishshi bee'eka ixxuwwina maham kurukkoyyo. Ihukkaarem manni maraa lasage ixxi losaanina hundem luchchom caakkisaa kurukko. Ee balla uulli hiimaakkoohaannonne ixxi losaanina «Massehe; dambalaq eeqido fillona» yukko. Ixxuwwim manniinsi annanni ikka'a Yesuus afuuraa hee'u wongiranne aagga'a Yesuusinne maqirem matto'o. Mulli wongilluwwim ee beyyonne hee'ukko. Ee lasage dangonnem malaayyaam hambu'llam dambalaqanne ki'aa wongiranne wo'i aagoo'isa issukko. Wongirannem wo'i wo'mmukkuuyyi marukko. Ee ammane Yesuus barkuma bakke'aa wongi'l afaree'n kollinne iinse'aa hee'ukko. Ixxi losaanim baqaa'lla'a «Losisaancho! Neese beeddinummuuyyi at qishixxitooyyonnihe?» yito'o. Ixxim baqaa hambu'llama ijaajukko. Dambalaqam «Sa'ihe!» yukko. Hambu'llamim ijaajamukko; lophphaakkoo sa'itim ihukko. Ee lasage Yesuus ixxi losaanina «Mahina badditakkamuulla? Mahindu amma'nnat bee'aate?» yukko. Ixxuwwim lobakata baddita'a ixxuwwina'i ixxuwwim «Hambu'llamii dambalaqii ixxena ijaajamookkok kuk hinkido'i mancho?» yito'o. Yesuusii ixxi losaanii dambalaqa fitta'a Geeraaseena yakkam uulla affo'o. Yesuusim wongiriinsi firukkisam habus amadaakkoo manchi Yesuusinne edameena waammi beyyiinsi firukko. Ixxim hee'am hee'ukkok waammuwwi beyyonnette hee'ukko. Ayyi manchim ixxo chimchiminne karaa egedeena xanam hee'ukkoyyo. Dut ammane xaarinnee chimchiminnee karakkam hee'akko'o. Ihukkaarem chimchimmuwwa muransamii xaaram iiqansamii hee'u bikkina ayyim ixxo egedeena xanam hee'ukkoyyo. Ixxim ballaa hiimoo hundi ammanem waammi beyyuwwannee duunnuwwannee ihaa laarukkuuyyi ixxi orachcho kininne muransam hee'ukko. Ixxim Yesuusa qee'llonnem asi'mmaa moo'aa geeraa waaraa Yesuus lokkonne ubukko. Yesuusim ixxena «Ki summi ayyette?» yaa xa'mmukko. «Neese dut keen inkummi bikkina i summi Gogototte» yukko. Ixxim Yesuus ixxuwwa ee uulliinsi holloobee'isa worwaatukko. Yesuusim «Mattakka'a aaggehe» yukko. Habusim ee manchiinsi fitta'a boonke'enne aaggo'o. Lam kuma ihoo boonke'im didiyaa maraa dambalaqanne ubaa xuuxamukko. Boonke'e allaaraanim gibba'a matta'a ee woshsha beero'onnee ee gattennee kutto'o. Ee beyyi mannim oo woshshi maruchda'e moo'immina matto'o. Ixxuwwim Yesuus beyyo matta'a habusik gogot amadaa hee'u manchi fayye'aa eddechcham edde'aa eekke'e afuuraakkoo moo'lla'a Yesuusa baddito'o. Habusik gogot amadu manchonnee boonke'i allaachchennee ihu luwwa gaassita'a moo'llo'i keenim ixxuwwina kutto'o. Oo mannim ixxuwwi uulliinsi Yesuus maroo'isina uunximma asheetto'o. Oo habus amadaa hee'u manchim wongiranne Yesuus aagukkuuyyi moo'aa «Kiinninnem maroommo» yaa uunxukko. Oo manchi ixxenne marona Yesuus hasukkoyyo. Ihukkaarem «Ki mine mare; ki qarmanninam Waa'i kiina issu maalalsiisoo luwwaa eroommaa kure» yukko. Oo manchim maraa Yesuus ixxena issu luwwa «Tommi Beero'o» yakkam uullanne alallaatimma asheerukko; macceesu manni hundim maalalukko. Yesuus odim dambalaq eeqido wongirinne firu ammanenne dut manni ixxi kululleetanne wixxito'o. Dambalaq gadanonnem yoohaannonne Ayihuxxi manni wixxixxi mi'n awwonsaaniinsi mat hee'u Iyyaa'iiroos Yesuusa moo'aa ixxi lokkonne ubaa «Iikki hoffi landichcho leteena hooggo'ookko. Fayye'lla'a lehiinsi gattona waattaa ki anga is hanenne isse» yaa qoxxisaa uunxukko. Yesuusim ixxenne maqirem marukko. Dut mannim ixxenne maqire taakke'llu'uuyyi kolli hundinnem gafe'antam hee'llo'o. Tommoo lam hiinchoo hundam xiig dunamukkuuyyi hawwito'oo mat meentichchom eekke'e hee'llo'o. Isem qaraa'l manni beyyi hundannem badattu'uuyyi isena yoo diinat hundam guullita'a hee'llo'o. Ihukkaarem xissoom baasukkuuyyi marukko bagaan maham e'llukkoyyo. Isem Yesuus bikkina macceessa'a ee manni lambe'inne higga'a ixxeka eddechcha nakkito'o. Mashka'oomim «An ixxeka eddechcham nakkumta'n fayye'oommo» yitam amma'nnat hee'u bikkinatte. Ixxeka eddechcha nakkito'isam dunamam hee'u is xiig ee ammanem uullukko. Isem jabbiinsi fayye'llo'isa laqqo'o. Ee ammanem Yesuus ixxeensi malaayyi firukkisa la'u bikkina manni kollonne daba'llaa «I eddechcha nakkukkok ayyette?» yaa xa'mmukko. Ixxi losaanim «Ku minaadab kiinninne gafe'amukkuuyyi moo'llittuuyyim ‹Eese nakkukkok ayyette?› yitoohonnihe?» yita'a dabatto'o. Ihukkaarem Yesuus ixxo nakkukkok ayyetda'e ihukkisa moo'eena laso qerephukko. Oo meentichcho ee ammane isenne ihu luchcho laqqo'i bikkina baddita'a huxe'llu'uuyyi ixxi lokkonne ubba'a ihu hanqi woshshi hundam ixxena kutto'o. Yesuusim isena «Taa meentichche, ki amma'nnat keese fayyiisaakko. Xumminne mare; ki hawwiinsim usheexxe» yukko. Yesuus eehid woconam Iyyaa'iiroos miniinsi waatto'i manni «Ki landichcho leto'ookko; kaba losisaancho mahina hawwissoolla?» yito'o. Ihukkaarem Yesuus ixxuwwi kutto'oka gadaa Iyyaa'iiroosina «At amma'nne bagaan baddititte!» yukko. Ixxim xale'i Pheexiroosiinsi, Yaaqoobiinsii Yaaqoob abbaayyi Yohaannisiinsii bagaan ayyim ixxo awwonona hasukkoyyo. Ixxuwwim Iyyaa'iiroos mine affo'i ammane manni sorukkuuyyii laarukkuuyyii wi'llookkoka Yesuus moo'ukko. Ixxim mine aagaa ixxuwwina «Coro'llakkamokii laattakkamokii mahinatte? Landichcho diriitto'ookko bagaan leto'oyyo» yukko. Ixxuwwim ixxonne osatto'o. Ihukkaarem Yesuus manna hundam miniinsi fissaa landichchoka ama, annaa ixxenne maqire waatto'i ixxi losaanoo amadaa oo landichcho yo'i beyyo aagukko. Ixxim landichchoka anga amadaa «Xaaliitaa, quumii!» yukko. Ee'isa yimmim « ‹Taa hoffi landichche, iimihe!› yoommuulla» yimma. Ee ammanem landichchooma ki'lla'a taakke'llo'o. Isem qaranto'aanniinsi tommoo lam hiinchoo ihaa hee'ukko. Mannim eekka moo'aa lobakata maalalukko. Eekka mat manchim la'oobee'isa Yesuus qoxxisaa ijaajaa lasage «Ittam luchcho uwwehe» yukko. Ee lasage Yesuus ee beyyo uraa ixxi uulla daba'llukko. Ixxi losaanim ixxo awwonta'a matto'o. Ixxim Usheexxaxxi Ayyaamonnem Ayihuxxi manni wixxixxi minenne losisimma asheerukko. Ee ixxi losishsha macceesso'i dut manni maalalta'a «Ku manchi ka lachcha hundam hanniinsi siixxukko? Ku ixxena uwwamu qooroom hinkido'ane? Odim ka aganna issookkok hinkidette? Ixxek ama Maaraametteyyonnihe? Ixdu haqqa cabbaraanchoyyonnihe? Odim ixxi abbaayyuwdu Yaaqoobatte, Yoosa'atte, Yihudattee Simi'oonatteyyonnihe? Ixxi aayyuwdu keyye niinninne maqire yo'i keenoyyonnihe?» yito'o. Ee'isinnem qolanto'o. Yesuusim «Hiraagaanchi lomba siixxoobee'ek xale'i ixxi uullanne, qarmanni lambe'ennee ixxi abaroosannettee» yukko. Yesuus ee beyyonne hofqax jabbaa'n hanennem ixxi anga issaa fayyiisukko bagaan lobakat aganna isseena xanukkoyyo. Ixxuwwi amma'nnitobee'i bikkinam lobakata maalalukko. Ee lasage gatti hundam marukkuuyyi losisam hee'ukko. Tommoo lamem losaanoo Yesuus weeshaa lam lam issaa asse'ukko. Ixxuwwinam habusa fissiteena xantam malaayye uwwukko. Odim ixxuwwina «Googina bicciinsi bagaan hurbaatam ihukko te'im canam ihukko te'im ladimonne diinatem ihukko amaddakkambee'isa. Ihukkaarem caamma'a issaqqehe. Lago'i eddechcham amaddakkotte. Hannonnem manni mine koyyinano aaggakkam ammane ee beyyo fittakkeebe'e ee minenne afuullehe. Ayyi beyyonnem manni ki'nnuwwa aa'ubeelasii ki'nnuwwi losishsham macceesubeelasii fittakkam ammane ki'nnuwwi lokkiinsi dira giggissehe. Oohim ki'nnuwwi quuxo yimmi mare'e» yukko. Losaanim matta'a manni baaxiilo biiraa yihona alallaatto'o. Dut manniinsim habusa fissito'o. Dut jabbaanom zayta labbu'uuyyi fayyiisso'o. Yesuus bikkina manni wocam hee'u er sado adil Heeroodis macceesukko. Mat mat mannim «Xammaqaanchi Yohaannis lehiinsi ki'aakko. Ee bikkina ka aganna issoolla» yito'o. Odim mulli keen «Kuk Eeliyaasatte» yito'o. Mulli keenim «Kuk gaassi doolli hiraagaaniinsi matisam hiraagaancho» yito'o. Ihukkaarem Heeroodis eekka hundam macceesu ammanenne «Kuk gaanje mussiisummi Xammaqaanchi Yohaannisatte. Ixxi lehiinsi ki'aakko» yukko. Heeroodiyaadem nadadda'a Yohaannisa shisiisseena hasso'o; ihukkaarem xanto'oyyo. Mashka'oomim Yohaannis xummaanchoo keesammaa ihukkisa Heeroodis la'am hee'u bikkina ixxo baddam hee'ukko. Odim ixxom hawwodoo luchchiinsi egeram hee'ukko. Ixxim Yohaannis wocoo woshsha macceeseena hasam hee'ukko. Ihona bagaan Yohaannis wocoo woshsha macceesu amman hundam u'nnamam hee'ukko. Heeroodis ixxi qaramu ayyaamo lonsimmina ixxi adillanonne yoo gassaano, gaaxxi awwonsaanoo Galii'l uullanne hee'llam geejji geejji mannaa maadda gudisaa weeshukko. Oo amman Heeroodiyaade Yohaannisa shisiisseena makki amman ihu bikkina is landichcho weeshamu koyyi beyyo aagga'a kajja kaddo'o. Is kajjannem Heeroodisii ixxi koyyii liiranto'o. Ee bikkina landichchona Heeroodis «At hassoo luwwi hundam xa'mme; an kiina uwwoommo. Hore'em i adilla'n kollom ihuta'n at xa'mmittoka uwwoommo» yaa hide'ukko. Isem am beyyo matta'a «Maha xa'mmo?» yita'a xa'mmito'o. Amam « ‹Xammaqaanchi Yohaannis horoore› yihe» yito'o. Landichchom qaqqissa'a adi'l beyyo daba'llita'a matta'a «Xammaqaanchi Yohaannisika gaanje made'enne issitaa uwwitona hasoommo» yito'o. Adilim ee woshshanne lobakata kichche'ukko. Ihukkaarem weeshu koyyi illagenne hide'aa hee'u bikkina wocu sagara lageena xanukkoyyo. Ee bikkina ee ammanem Xammaqaanchi Yohaannisika gaanje muraa amadaa waarona gaadaancho ijaajukko. Gaadaanchim maraa karaxxi minenne Yohaannisika gaanje murukko. Made'enne issaa eebaa ee landichchona uwwukko. Landichchom amana uwwito'o. Yohaannis losaanim eekka macceesso'isam waatta'a ixxi leesha massita'a waammito'o. Asse'amaan matto'i beyyi hundiinsim waatta'a Yesuus gadanonne wixxita'a baxxo'okaa losisso'i luwwaa hundam ixxena kutto'o. Waaroohii maroohii dut hee'u bikkina ixxuwwina hurbaata ittam ammanim hee'ukkoyyo; ee bikkina Yesuus ixxi losaanina «Xale'i ki'nnuwwi iinninne maqirem manni bee'i beyyo mallona waallehe; eehe'em gootto'o usheexxehe» yukko. Ee bikkina Yesuusii ixxi losaanii wongiranne aagga'a manni bee'i beyyo matto'o. Ihukkaarem ixxuwwi mattu'uuyyi dut manni moo'lla'a ayyayyaamda'e ikko'isa laqqo'i bikkina beero'i hundiinsim fitta'a geettu'uuyyi Yesuusaa ixxi losaanoo gaassita'a ee beyyo affo'o. Yesuusim wongiriinsi firu ammanenne wixxaakkoo dut manna moo'ukko. Ixxuwwim allaaraanchi bee'i gereebbisa ikka'a hee'llo'i bikkina qishixxukko. Ixxuwwinam dut luwwa losisimma asheerukko. Uulli hiimeena ihaakkoohaannonne ixxi losaan ixxi beyyo hincita'a «Ku beyyi udma'a; uullim hiimaakko. Itoo hurbaat bee'i bikkina ku manni ka kululleetanne yoo hegeegguwwa maraa itoo luwwa bita'llona geegeese» yito'o. Ihukkaarem Yesuus «Ixxuwwi ittam luwwa ki'nnuwwi uwwehe» yaa dabarukko. Ixxuwwim dabatta'a «Ka mannina ihoo hurbaata mallaa lam xibbi diinaarinne bito aa'nnonannihe?» yito'o. Yesuusim «Ki'nnuwwina hinkaa'n qorosho'i hee'aate? Huno'o, mattakka'a moo'llehe» yukko. Ixxuwwim moo'lla'a «Onti xeffo'i qorosho'ii lam qurxumme'ii yookko» yito'o. Ee lasage manna muratinne muratinne hixenne afuussitamisina Yesuus ixxi losaano ijaajukko. Ee bikkina mannik mat mat murat xibbi xibbi ikka'a mat mat murat odim ontayyi ontayyi ikka'a ogoranne afuutto'o. Ee lasage Yesuus ee ontem xeffo'i qorosho'oo lamem qurxumme'ee ki'isaa iimane moo'ukkuuyyi Waa'a galaxxukko. Qorosho'om iiqansaa mannina baxxansiton ixxi losaanina uwwukko. Ee'isam qurxumme'em hundinam baxxansukko. Manni hundim itaa goddukko. Losaanim manni itukkuuyyi gatu qorosho'ikaa qurxumme'ikaa giggira tommoo lam sanfo ki'isso'o. Ee hurbaata itu keeniinsi goo'nnek xig onti kum hee'ukko. Yesuus ee manna geegeesukkuuyyim ixxi losaan wongiranne aagga'a dambalaq eeqido Beetasaayda yakkam beyyo ixxeensi gaassita'a mattona ijaajukko. Ixxim manna geegeesaa lasage Waa'a uunxeena duunanne firukko. Uulli hiimu ammanenne wongiroom dambalaq lambe'ennette hee'ukko. Ihukkaarem Yesuus mullam uullanne hee'ukko. Ixxuwwi illagenne malaayyaam hafachchi hafachcham hee'u bikkina ixxi losaan wongira ushe'lleena yakitu'uuyyi Yesuus moo'ukko. Ixxim luxxi antabaa'i muuneena ihaakkoohaannonne dambalaq haninne taakke'ukkuuyyi ixxuwwi gadaninne higeena waarukko. Ihukkaarem dambalaqanne Yesuus taakke'ukkuuyyi moo'lla'a wiidda labissa'a laatto'o. Ixxo moo'llo'i ammanenne hundim baddito'o. Ee ammanem Yesuus «Anette; badditakkotte!» yukko. Wongi'l woronnem aagaa ixxuwwinne maqire ihu ammanenne hafachchi uullukko. Losaanim lobakata maalalto'o. Mashka'oomim ixxuwwik wodan duudaa hee'u bikkina onti kum manni itu hurbaaxxeka maalalsiisoo aganna qoossito'oyyi hee'ukko. Yesuusii ixxi losaanii dambalaqa fitta'a Gensereexa affa'a dillito'o. Wongiram eehe'enne katto'o. Ixxuwwi dillito'isam manni Yesuusa inkiinnukko. Ee bikkina ixxuwwi ee uulli bakkonne yoo gattuwwi hundiinsim geetta'a matta'a jabbaano hallaqqanne iyyita'a «Yesuus yookko» yakko'i beyyi hundam eebbam hee'llo'o. Yesuus maru gattuwwanne, lob beero'uwwannee hoffi beero'uwwannee hundannem jabbaan ixxi eddechchika kasa nakkitona Yesuusa uunxiteena jabbaano meer hundam massitam hee'llo'o. Nakkito'i keen hundim fayye'llo'o. Mat ayyaamo Farisaawe'uwwii Yerusaaleemiinsi waatto'oo Seera losisaanii Yesuus gadanonne wixxito'o. Ixxuwwim Yesuus losaa'nnek mat mat ixxuwwi losa'nnisanne anga aanshaqqitoo'n hurbaata ittu'uuyyi moo'llo'o. Farisaawe'uwwii Ayihuxxi mannii ixxuwwi anno'i losa'nnisanne ixxuwwi anga see'llisanne aanshaqqitoo'n hurbaata ittamoyyi hee'llo'o. Ee'isam meeriinsi daba'llitam ammane aanshaqqita'a muccuttoo'n hurbaata ittamoyyo. Odim humbullo, harachcho, saahinaa ara'aa aanshitam dut losan hee'ukko. Farisaawe'uwwii Seera losisaanii «Ki losaan anga aanshaqqitoo'n hurbaata itimminne anno'i losano ginditamok mahinatte?» yita'a xa'mmito'o. Ihukkaarem Yesuus «Ki'nnuwwi labisaano! Issaayyaas ki'nnuwwi bikkina ‹Ku minaadab eese lonsookkok xale'i suuminnette; ihukkaarem ixxuwwik wodan iinniinsi qee'llaakkoohane. Mannika losano losissu'uuyyi kora'am iina otossitamo› yukkok hanqame. «Waa'ika ijaajo sabbakka'a manni losanina ijaajantakkamuulla» yukko. Odim «Ki'nnuwwi losano egerimmina Waa'ika ijaajo lobakata sabbakkamuulla. Muse'i ‹Kiyyannaa kiyyummaa lonse. Anna te'im ixxi ama game'lloo ayyim lehona› yaakko. Ihukkaarem ki'nnuwwi mat manchi ixxi annina te'im amana ‹Iinniinsi siidimmi hasisoo hara'mmato hundam Waa'ina kitim issaa hincaa'aammo› yulas ki'nnuwwim oo manchi ixxi anninaa amanaa ee lasage maham hara'mmoobee'isa issitakkamo. Ki'nnuwwi ee'isinne mulli qaranchina losissakkam losishshinne Waa'i sagara ginditakko'ookko. Eehido'i dut luwwam issitakkamo» yukko. Odim Yesuus manna ixxi kolli weeshaa «Ki'nnuwwi an wocoommi woshsha macceessehe; qoosseheme. Yesuusim manna uraa mine aagaa lasage ixxi losaan ee kobi'llishshi bikkina xa'mmito'o. Ixxim «Ki'nnuwwim qoossitakkamoyyonnihe? Manni godabonne aagaa haashaassoo luwwi mahim bee'e. Manni godabonne aagoo luwwi shum ihaa firookko bagaan wodanonne aagooyyo» yukko. Yesuus eehid yimminne hurbaat hundim muccur ihukkisa la'isukko. Ee'isam «Manniinsi firoo luwwi manna haashaassookko. Oohim jor sawwit, mine issakkoo'n saa'immi, game'immi, manna shimmi, mine issakka'a saa'immi, gollimmi, boqqimmi, qawwiisimmi, ijaajancha sabimmi, maso'immi, manni summa bi'isimmi, bolximmii la'akku'uuyyi er luwwa issimma sabimmii manni wodaniinsi firoo bikkina manna haashaassookkok ee keeno. Oo keen hundim manni wodaniinsi firoo bikkina manna haashaassookko» yukko. Ee lasage Yesuus ee beyyiinsi ki'aa Xiiroosikaa Siidoo'n beero'oo marukko. Eekke'em mat mine aagaa ixxi eekke'e yoo'isa ayyi manchim la'ona hasukkoyyo. Ihukkaarem maaxameena xanukkoyyo. Ee ammanem iseka landichcho habus amadaakkoo mat meentichcho Yesuus bikkina macceessa'a waatta'a ixxi lokkonne ubbo'o. Meentichchooma Sirofiniiq moollitan ikka'a Giriikichchotte hee'llo'o bagaan Yihuxxi uullitane hee'llo'oyyo. Isem is landichchoonsi habusa fissona Yesuusa uunxito'o. Ihukkaarem isena «Oosika hurbaata ki'isakka'a wishina uwwimmi hasisooyyo. Gaassaa oos goddona» yukko. Ihukkaarem ise «Moollanna! Hanqame; wishim oos illagiinsi ubu furfuro'o leemaaxxi lugumiinsi feeraa itookko» yita'a dabatto'o. Yesuusim isena «At kid yitti bikkina ki landichcho habus fatakaakko; kaba mine elle'e» yukko. Isem mine daba'llito'i ammanenne landichcho habus fatakukkaare fayye'lla'a ara'anne iinse'llo'ookkoka moo'llo'o. Ee lasage Yesuus Xiiroosiinsi ki'aa Siidoona higaa Tommi Beero'o yakkam uullinne Galii'l dambalaq gadano waarukko. Eekke'em mat gawwaa duudaa hee'u mat mancho manni ixxi beyyo eebukko; ixxi hanennem anga issona uunxito'o. Yesuusim ee mancho manniinsi annanni issaa massaa ixxi angika maxxaalluwwa ee manchi maccenne aagisukko. Anjam tuhaa manchika allabo nakkukko. Iimane moo'aahim qitinimminne «Efitaah» yukko. Oohim «Fooqihe» yimma. Ee ammanem manchik macci macceesukko; ixxi allabim tiramaa danaamisa wocukko. Yesuusim ixxuwwina «Kaka ayyenam kuttakkambee'isa» yaa ixxuwwa ijaajukkoka utta'a ee woshsha lonsita'a alallaatto'o. Ee woshsha macceesso'i keen hundim lobakata maalalta'a «Ixxi issu luwwi hundim danaamo; oohim gawwi macceesoo'isa issaakko; duudim wocoo'isa issaakko» yito'o. Mulli ammane odim dut manni wixxukko. Ixxuwwinam ittam luwwi ma'lluchchim hee'ukkoyyo. Ee bikkina Yesuus ixxi losaano ixxi beyyo weeshaa «Ku manni iinninne sas balla afuuraakkoo bikkina itoo luwwi bee'e. Ee bikkina an ixxuwwina qishixxoommo. Ixxuwwik mat mat keen waatto'ok qee'l beyyiinsette ihu bikkina ka'isa sibaatto'isam ixxuwwi mine elle'llona geegeesummaare googonne hooggamo» yukko. Ixxi losaanim «Ka udma'anne ka hundem manninam ihoo hurbaat hannonne hee'ookko?» yito'o. Yesuusim ixxuwwina «Hinkaa'n qorosho'i yookko?» yaa xa'mmukkaare «Lamar xeffo'i qorosho'i yookko» yito'o. Yesuusim minaadab uullanne afuuroo'isa ijaajaa lamarem xeffo'om amadaa Waa'a galaxxukko. Ixxom iiqansaa mannina baxxansitona ixxi losaanina uwwukko. Ixxuwwim hundinam afisso'o. Odim goottokkichcha'i qurxumme'ikim hofqaxim hee'ukko. Waa'am galaxxaa mannina baxxansitona ijaajukko. Mannim itaa goddukko; gatu giggiram wixxaa'lla'a lamar sanfonne wo'mmaakkoo ki'isso'o. Hurbaata itu mannikim xig soor kum hee'ukko. Ee lasage ee manna geegeesukko. Ixxim losaaninne maqirem wongiranne aagaa Daalmaanuuta yakkam uulla marukko. Ee lasage mat mat Farisaawe'uwwi Yesuus beyyo waatta'a ixxenne fitancha asheetto'o. Keenteenam hassa'a iimaniinsi maalalsiisoo mare'e moo'isona xa'mmito'o. Ihukkaarem Yesuus ixxi tiironne lobakata kichche'aa «Ku qaranchi mare'e moo'eena hasookkok mahinatte? Hanqinam an ki'nnuwwina kuroommo; ka qaranchina mah mare'im uwwamooyyo!» yukko. Ee lasage Yesuus ixxuwwiinsi annanni ihaa odim wongiranne aagaa dambalaq eeqido marukko. Ee ammane Yesuusik losaan ixxuwwina ihooqax qorosho'o amadimma xaddo'i bikkina wongi'l woronne xale'i mat xeffo'i qorosho'iinsi bagaan mullek mahim hee'ukkoyyo. Yesuus ixxuwwina «Farisaawe'uwwaanniinsii Heeroodis ursho'iinsii qoxxitakka'a ege'llehe» yaa ijaajukko. Ixxuwwina'i ixxuwwim «Ayyi la'ukko ka'isa yukkok qorosho'o amandumbee'i bikkinatte ihookko» yito'o. Yesuusim ixxuwwi sawwixxeka la'aa «Mahina qorosho'o amandumbee'i bikkinatte yitakkamuulla? Kabadem qoossitakko'oyyonnihe? Hindihitakkamoyyonnihe? Te'im ki'nnuwwik wodan duudaahinnihe? Ki'nnuwwina'i illi yookko; moo'llakkamoyyonnihe? Maccima'i yookko; macceessakkamoyyonnihe? Hinkid sawwitakkamoyyo? Onti xeffo'i qorosho'o onti kum mannina baxxansitakkona iiqansaa uwwummi ammane manniinsi gatu giggira ki'issakko'ok mee'i sanfo?» yukko. Ixxuwwim «Tommoo lam sanfo» yito'o. Odim «Lamar xeffo'i qorosho'o soor kum mannina baxxansitakkona uwwummi ammane manniinsi gatu giggira ki'issakko'ok mee'i sanfo?» yukkaare ixxuwwim «Lamar sanfo» yita'a dabatto'o. Ixxim ixxuwwina «Eehannah kabad afeebe'em qoossitakkamoyyonnihe?» yukko. Ixxuwwi Beetasaayda affo'isam hofqax mannim mat illi qooqa Yesuus beyyo eebba'a anginne nakkona uunxito'o. Yesuusim ee qooq manchika anga amadaa masakkukkuuyyi ee gattiinsi tochchonne fissukko. Manchi illennem anja tuhaa ixxi anga manchi hanenne issaa «Kiina moo'amoo luwwi yoohonnihe?» yaa xa'mmukko. Oo manchim moo'aa «Manni haqqisa mikmikukkuuyyi moo'oommuulla» yukko. Odim Yesuus ee manchi illenne ixxi anga la'mmaaggem issukko. Ee ammanenne manchi qoossaa moo'ukko. Ixxi illim fayye'aa hundem luchchom danaamisa moo'eena xanukko. Ee lasage Yesuus «Ka gatte aaggitte; ka gattenne kaka ayyenam kuttitte» yaa mine elle'ona geegeesukko. Yesuus ixxi losaaninnem Filiphphoos Qiisaariya yakkam uullanne yoo gattuwwa marukko. Mattu'uuyyim Yesuus «Manni eese ayyette yoolla?» yaa ixxi losaano xa'mmukko. Ixxuwwim «Mat mat keen ‹Xammaqaanchi Yohaannisatte› yitamuulla. Mat mat keen odim ‹Eeliyaasatte› yitamuulla. Mat mat keen odim ‹Hiraagaaniinsi mato› yitamuulla» yita'a dabatto'o. Yesuusim ixxuwwina «Eehaare ki'nnuwdu eese ayyette yitakkamuulla?» yaa xa'mmukko. Ee ammanenne Pheexiroos «At Kiristoosatte» yaa dabarukko. Yesuusim ayyenam i bikkina kuttakkambee'isa yaa ijaajukko. Ee lasage Yesuus ixxi losaanina «Manchi Beet lobakata hawwimmi hasisookko. Ixxom lommanni, qeessa awwonsaanii Seera losisaanii sabbamo; lehinam higissa'a uwwitamo. Ixxim sas balliinsi lasage lehiinsi ki'ookko» yaa losisimma asheerukko. Ee woshsham ixxuwwina caakkisaa kurukko. Ee ammane Pheexiroos Yesuusa mullam haxonne fissaa «Ka'isa woccitte» yukko. Ihukkaarem Yesuus ixxi losaa'n kollonne daba'llaa moo'ukkuuyyi Pheexiroosena «Sheexaancho, iinniinsi qee'lle! At mannane bagaan Waa'ika laqqooyyo!» yaa axeerukko. Ee lasage Yesuus ixxi losaanoo mannaa ixxi beyyo weeshaa «Ayyim eese awwoneena hasulas ixxi gaga lagona. Masiqalam iyyaa eese awwonona. Mashka'oomim ixxi foore gatiseena hasookkok ayyim bi'isookko. Ihukkaarem i bikkinaa mishiraachchi saga'l bikkinaa ixxi foore bi'isookkok ayyim gatisookko. Mat manchi ka uulli amaxxa hundam siixxaa ixxeka foore bi'isuta'n ixxena maha awwaadookko? Te'im mat manchi ixxeka foore mahinne bito aa'eena xanookko? Waa'a lagimminnee baaxiilo baximminnee la'amaakkoo ka qaranchi illagenne eesennee i sagarannee tuuroohaannonne ayyennem Manchi Beet ixxi anni lombinnee keesammi asse'amaaninnee maqirem waaroo ammane ixxonnem tuurookko» yukko. Odim Yesuus ixxuwwina «Hanqinam an ki'nnuwwina kuroommo; ka beyyonne yo'i keeniinsi mat mat manni lobakat malaayyinne Waa'i adillan waarukkuuyyi moo'lleebee'i afeebee'e letambee'i keen yo'o» yukko. Loh balliinsi lasage Yesuus xale'i Pheexiroosa, Yaaqoobaa Yohaannisaa awwonsaa mat lob duunanne firukko. Ixxuwwi moo'llu'uuyyim ixxek hagar dabassamukko. Ixxi eddechchim belecce'ukko; ka uullanne ayyim aanshaa qadaalliseena xanoobeeqaxam qadaallukko. Eeliyaasii Muse'ee Yesuusinne atoorattu'uuyyim caakkita'a moo'anto'o. Pheexiroosim Yesuusina «Losisaancho! Ka beyyonne hee'immi niina danaamo. Ee bikkina sas daasa matoo kiina, matoo Muse'ena, matoo Eeliyaasina banxona» yukko. Ixxuwwi lobakata baddita'a hee'llo'i bikkina Pheexiroos maha wocooda'e la'am hee'ukkoyyo. Umbu'llim ixxuwwa ifiisukko. Ee umbu'l woriinsim «An iittoommi i Beet kane; ixxeensi macceessehe!» yoo sagar macceesamukko. Ixxuwwim ee ammanem qerephita'a moo'llo'o. Ihukkaarem xale'i Yesuusiinsi bagaan matom moo'llo'oyyo. Ee duuniinsim dillitu'uuyyi Yesuus ixxuwwina Manchi Beet lehiinsi ki'eebe'e moo'llakko'oka ayyenam kuttakkambee'isa yaa ijaajukko. Ixxuwwim Yesuus kuru sagara ixxuwwi ixxuwwi wodanonne amaddo'o. Ihukkaarem ixxuwwina'i ixxuwwim «Ku lehiinsi ki'imma yimmi mayyimma?» yaqqanto'o. Ixxuwwim Yesuusina «Seera losisaan ‹Gaassaa Eeliyaas waarimmi hasisookko› yitamok mahinatte?» yita'a xa'mmito'o. Ixxim ixxuwwina «Hanqo'isam Eeliyaas gaassaa waaraa hundem luwwam gudisookko. Ihona bagaan Manchi Beet lobakata hawwoo'isaa gadamoo'isaa ixxi bikkina kitaabamukkok mahinatte? An ki'nnuwwina kuroommo; Eeliyaas waaraakko. Keesammi Kitaabanne ixxi bikkina kitaabamukkisam ixxo hasso'isa hundam issito'ookko» yukko. Yesuusii sasem losaanii daba'llita'a losaa'n beyyo waatto'i ammanenne ee losaa'n kululleetanne dut manna moo'llo'o. Seera losisaanim ixxuwwinne fitantam hee'llo'o. Oo mannim Yesuusa moo'llo'i ammanenne muggito'o; ixxi beyyom geetta'a matta'a xummaatisso'o. Yesuusim ixxi losaanina «Ixxuwwinne fitantakkamuullak mahannette?» yukko. Ee manniinsim mat manchi Yesuusina «Losisaancho! I beeto habus suume duussaa amadu bikkina ki beyyo eebaammo. Oo xissi ki'oo ammane hannonnem ubbuusaa suuminne himba eebookko. Ixxi inqem iicookko. Orachchim haqqisa gogookko. Ki losaan eekka fissitona xa'mmummaare fissiteena xanto'oyyo» yukko. Yesuusim ixxuwwina «Ki'nnuwwi amma'nnatbee'i qarancha! An hinkaa'n amman afeebe'e ki'nnuwwinne hee'oommo? Hinkaa'n amman afeebe'e an ki'nnuwwa iyyaqqoommo? Huno'o, beetooma i beyyo eebbehe» yukko. Ixxuwwim beeto ixxi beyyo eebbo'o. Habusim Yesuusa moo'u ammanenne beeto fitfitaa'ukko. Beetim uullanne ubaa suuminne himba eebukkuuyyi biqqiiqqukko. Yesuusim ee beet annina «Kuk ka beeto amadukkaanniinsi hinkaa'n ammane» yaa xa'mmukko. Annim «Ciiloommanonnetteme. Dut ammane sheena hasaa giirannee wo'onnee ubbuusookko. Ihukkaarem at xantilas niina qishixxitaa hara'mme» yaa dabarukko. Yesuusim ixxena « ‹Xantilas› yitoollannihe? Amma'nnoohaannina hundem luwwim xanamookko» yukko. Ee ammanem beet anni «Amma'nnoommo, i amma'nnaxxi hoonge at iinniinsi hoore!» yaa laarukko. Yesuusim manni gafe'amukkuuyyi waaroo moo'u ammanenne habusina «Ka duudissaa gawwissoo habusa! Ka beeto fatakitoo'isinaa od la'mmaagge ixxonne daba'llitaa aaggoobee'isinaa keese ijaajoommuulla!» yaa shaaqukko. Habusim laaraa beeto lobakata fitfitaa'aa lasage firukko. Beet tuude'aa hee'u bikkina dut keen «Lehaakko» yitam hee'llo'o. Ihukkaarem beetika anga amadaa Yesuus uullisukko. Ixxim ki'aa uullukko. Yesuusim mine aagu ammanenne ixxi losaan «Neese ka habusa fissineena xannumbee'ek mahinatte?» yita'a mulli manni macceesoobee'isa xa'mmito'o. Ixxim ixxuwwina «Kido'i habusa fissakkamok soommanakka'a Waa'a uunximminnette bagaan mullisinne ma'isinnem fissakkamoyyo» yaa dabarukko. Ihona bagaan Yesuus yukkoka ixxuwwi qoossito'oyyo. Xa'mmiteenam baddito'o. Yesuusii ixxi losaanii Qifirinnaahooma affo'o. Affa'a mine aagga'a lasage Yesuus ixxuwwina «Googonne fitantakkam hee'llakko'ok maruchchonnette?» yaa xa'mmukko. Googonne «Ni lambe'iinsi lophphookkok ayyette?» yitu'uuyyi fitanta'a hee'llo'i bikkina ixxena maham dabatto'oyyo. Yesuus afuuraa lasage tommoo lamem losaanoo weeshaa «Hundiinsim lophpheena hasookkok ayyim ixxi gaga hoffiisaa hundinam awwaadoohan ihimmi hasisookko» yukko. Odim mat ciilichcho ixxuwwi lambe'enne uullisaa qaaphphaa «Kido'i ciilluwwiinsi mato i summinne aa'ookkok ayyim eesem aa'aakko. Eese aa'ookkok hundim aa'ookkok eesette ihoo'n eese asse'ukkaneme» yukko. Yohaannisim Yesuusina «Losisaancho! Mat manchi ki summinne habusa fissukkuuyyi moo'nnaa niinninne keese awwonoobee'i bikkinam hoollummo» yukko. Hanqinam an ki'nnuwwina kuroommo; Kiristoosan ikkakko'i bikkina i summinne mat kubbaayyi wo'o aggakkona uwwookkok ayyim irifo'o siixxookko» yukko. Odim Yesuus «Eesenne amma'nnita'a gaga hoffiissam keeniinsi mato huushansookkok ayyim ixxi gaanjenne kee'mmaalli liitimma ka'llaa dambalaqanne ubuta'n e'llookko. Ki illim at baaxiilo baxxona keese huushisoohan ihulas fissitaa uunje. Lam illi hee'aa giir xoo'oobee'i daquurim lehoobee'i Gaahaannamanne uunjantoohaanniinsi mat ille hooggaa Waa'i adillanonne hee'immi e'llookko. Gaannamanne ixxuwwa itoo daquur hore'em lehoobee'ane. Aphphoo giirim hore'em xoo'oobee'ane. Kitim hundim sooqidinne muccuroo'isam ayyi manchim giirinne muccurookko. Sooqid xee'oohane. Ihukkaarem sooqixxek xee'n bi'uta'n hinkid issitakka'a xee'oo'isa issitakkamo? Ki'nnuwwi lambe'enne sooqixxisa xee'oo iitti hee'ona. Ki'nnuwwina'i ki'nnuwwim iittinne hee'llehe» yukko. Ee lasage Yesuus ee beyyiinsi ki'aa Yoordaanoos daajje higaa Yihuxxi uulla marukko. Dut mannim odim ixxi beyyo waarukko; ixxi losa'nnisam losisukko. Farisaawe'uwwiinsi hofqaxim ixxo keenteena hasso'i bikkina ixxi beyyo waatta'a «Mat manchi ixxi mi'n ama hollona seer uwwoohonnihe?» yita'a xa'mmito'o. Yesuusim ixxuwwina «Muse'e mayyaa ijaajaate?» yaa dabarukko. Ixxuwwim «Muse'e ‹Mat manchi furma uwwaa ixxi mi'n ama hollona› yaakko» yita'a dabatto'o. Yesuusim ixxuwwina «Muse'e ka seera ki'nnuwwina kitaabukkok ki'nnuwwik wodan duud ihu bikkinatte. Ihukkaarem manna Waa'i qooccu ammane goonchoo meentichchoo issaa qooccaakko. Ee bikkina manchi annaa amaa uraa ixxi arenne mat ihookko. Lamim mat xiigaa mat maaraa ikkamo. Ee lasage lamim mat orachchi ikkamo bagaan lamoyyo. Ee bikkina Waa'i mat issukkoka manni annanni issoone» yukko. Mine aagga'a lasage ixxi losaan ee woshsha dabatta'a xa'mmito'o. Ixxim ixxuwwina «Ixxi are hollaa mulli meentichcho eebookkok ayyim saa'aanchi ihookko. Ee'isam is aro'iinsi fitta'a mulli goonchonne affam meentichchom saa'aanchotte ikkamo» yukko. Mat mat manni Yesuus ixxi anginne nakkaa maasse'ona ciilluwwa ixxi beyyo eebbo'o. Ihukkaarem ixxi losaan eebu keeno quuqqo'o. Ee ammane Yesuus ixxi losaan issito'oka moo'aa quuqukko. Ixxim ixxuwwina «Ciilluwwi i beyyo waatteena hoottakkotte. Waa'i adillan kido'i kee'nnane. Hanqinam an ki'nnuwwina kuroommo; ayyim ciilluwwisa ihaa Waa'i adillano aa'oobee'ek Waa'i adillanonne hore'em aagooyyo» yukko. Ee lasage ciilluwwa qaaphphaa annannichchonnem ixxi anga issaa maasse'ukko. Yesuus ee beyyiinsi ki'aa odim googo mareena gudukkisam mat manchi geeraa Yesuus illagenne guruphphaa «Er losisaancho! Heer hee'l heechcha siixxeena maha issimmi hasisookko?» yaa xa'mmukko. Yesuusim ixxena «Mahina eese ‹er losisaancho› yitoolla? Matem Waa'iinsi bagaan erok mahim bee'e. Waa'i ijaajo laqqootto; oohim ‹Shititte, saa'llitte, game'llitte, qophphano naqqassitte, manna qawwiissittee annaa amaa lonsee› yoo keeno» yukko. Oo manchim «Losisaancho! Ee hundam oosoommaniinsim ki'isaa egeraammo» yukko. Yesuusim ee mancho moo'aa iittukko. Ixxenam «Eehaare kiina mat luwwi gataakko. Iimanenne godda siixxiteena mattaa kiina yoo luwwa hundam biteessaa diinatooma buxina uwwitaa waattaa eese awwone» yukko. Ihukkaarem oo manchi lobakata goddaanchi hee'u bikkina eekka macceesu ammanenne ixxi illi heemachchukko. Lobakatam kichche'aa ixxi mine elle'ukko. Ee ammane Yesuus ixxi losaa'n kollonne moo'aa «Goddaan Waa'i adillanonne aagimmi hinkaa'nna kee'mmaalla?» yukko. Losaanim ixxi wocanne maalalto'o. Ihukkaarem Yesuus la'mmaaggem ixxuwwina «I ooso, Waa'i adillanonne aagimmi hinkaa'nna kee'mmaalla? Goddaanchi Waa'i adillanonne aagimmiinsi gaameelakkichchi marfi afo'inne firimmi sholle'ookko» yukko. Ixxuwwim lobakata maalalta'a ixxuwwina'i ixxuwwim «Eehaara'i ayyi gateena xanookko?» yito'o. Yesuusim ixxuwwa moo'ukkuuyyi «Kuk xanamookkok Waa'inatte bagaan mannina xanamoobee'ane. Waa'i hundem luchchom isseena xanookko» yukko. Pheexiroosim Yesuusina «Oono'o! Neese hundi luwwam ullaa keese awwonnaammo» yukko. Yesuusim «Hanqinam an ki'nnuwwina kuroommo; i bikkinaa mishiraachchi saga'l bikkinaa ixxeka mine, abbaayyuwwa, aayyuwwa, ama, anna, oosoo uullaa urookkok ayyim ka doollenne hawwinne maqirem minneewwa, abbaayyuwwa, aayyuwwa, amo'o, oosoo uullaa xibbi qinxite siixxookko. Waaroo doollennem heer heerina ihoo heechcha siixxookko. Illag hee'llo'i kee'nnek lobakat keen lasaanchi ikkamo. Lasaanchi hee'llo'i keenim illag ikkamo» yukko. Ee ammane Yesuusii ixxi losaanii Yerusaaleema mattu'uuyyi Yesuus ixxi losaa'n illagenne higaa taakke'ukko. Ixxi losaanim maalalto'o. Ixxi losaa'n lasonne ikka'a Yesuusa awwontam hee'llo'i mannim baddito'o. Yesuusim tommoo lamem losaano ixxi gadanonne hincaa'aa «Oono'o! Kaba Yerusaaleema malloommuulla. Eekke'em Manchi Beeto qeessa awwonsaaninaa Seera losisaaninaa higisakka'a uwwakkamo. Ixxuwwim ixxonne leh oogato'o oogattamo. Mulli minaadaphphi angannem higissa'a uwwitamo. Oo keenim ixxo game'llitamo; anjam ixxonne tuhitamo; ixxom gantamo; shitamome. Ihukkaarem sas balliinsi lasage lehiinsi ki'ookko» yaa ixxonne afoo luwwi bikkina kurukko. Zabdiwoos oos Yaaqoobii Yohaannisii Yesuus beyyo waatta'a «Losisaancho! At niina issitona hansoommi luwwi yookko» yito'o. Yesuusim «An ki'nnuwwina maha issona hassakkamo?» yukko. Ixxuwwim «At adilla'n lombi barcumanne afuuttoo ammane matii ki makkanne matii ki qeddanne kiinninne maqirem afuulloommisa isse» yito'o. Ihukkaarem Yesuus ixxuwwina «Uunxitakkam luwwa laqqakkamoyyo. An agoommi humbullo ki'nnuwwi aggakkeena xantakkamonnihe? Te'im xammaqamoommi xammaqancha xammaqantakkeena xantakkamonnihe?» yukko. Ixxuwwim «Eeyya, xannoommo» yito'o. Yesuusim ixxuwwina «Hanqame; an agoommi humbullo aggakkamo. An xammaqamoommi xammaqancha xammaqantakkamo. Ihukkaarem i makkannee qeddannee afuurimmi uwwamookkok Waa'i gudisu keeninatte bagaan aneyyo» yukko. Tommem losaanim eekka macceesso'i ammanenne Yaaqoobannee Yohaannisannee quuqqo'o. Yesuusim hundam ixxi beyyo weeshaa «Ka uulli minaadaphphi gassaan minaadabanne moollanno'o yamanta'a weeshantamisa laqqakkamo. Minaadaphphi awwonsaanim minaadaba hasso'isa issitamo. Ihukkaarem ki'nnuwwi lambe'enne eehid ihimmi hasisooyyo. Ki'nnuwwi lambe'iinsi lophpheena hasookkok ayyim ki'nnuwwina awwaadaanchi ihona. Ee'isam ki'nnuwwi lambe'iinsi awwonsaanchi iheena hasookkok ayyim hundinam awwaadaanchi ihona. Mashka'oomim Manchi Beet ixxi gagim waarukkok manni ixxena awwaadonatte ihoo'n mannina awwaadeenattee ixxi foore mannina tissi issaa higisaa uwweenattee» yukko. Yesuusii ixxi losaanii Iyyaarko'i beero'o matto'o. Ixxuwwim dut manninne maqirem Iyyaarko'iinsi fitto'i ammanenne Xeemoosa yakkam manchik illi qooq beet gooqqi inqenne afuuraa uunxam hee'ukko. Ixxekim summi Barxeemoosa yakkaman hee'ukko. Ixxim ee beyyinne Naazireexxi Yesuus higukkuuyyi macceesaa «Daawiit Beet Yesuusa, at iina qishixxe!» yukkuuyyi laarukko. Ee ammanenne dut manni «Sa'ihe!» yita'a wocanto'o. Ihukkaarem ixxi «Daawiit Beet Yesuusa, at iina qishixxe!» yukkuuyyi lonsaa laarukko. Yesuusim uullaa «Weeshshehe!» yukko. Ixxuwwim ille qooqina «Kaa ki'ee liirame; Yesuus keese weeshoolla» yito'o. Illi qooqim hanenne edde'u weyyakka uunjaa xophaa ki'aa Yesuus beyyo marukko. Yesuusim «An kiina maha issona hassootto?» yukkaare «Losisaancho! I ille fooqaa'llaa moo'oommisa isse» yukko. Yesuusim ixxena «Mare; ki amma'nnat keese fayyiisaakko» yukko. Ee ammanem ixxek illi fooqukko. Yesuusam awwonaa marukko. Yesuusii ixxi losaanii Yerusaaleemanne hincita'a Wee'l Duu'n gadanonne yoo Beetafaagaa Biitaanaa affo'o. Ee lasage Yesuus ixxi losaa'nneka lamo «Ki'nnuwwi higgakka'a illagenne yoo gatte mallehe. Eekke'e affakko'isam ayyim saa'llubee'i hallichchi wotar karamaakkoo siiddakkamo. Ee wotaram tittakka'a amaddakka'a waallehe. Ayyim ‹Mahina tittakkamuulla?› yulas ‹Moollannina hasisu bikkinatte; ixxim qaqqisom dabaraa asse'ookko› yi'llehe» yaa asse'ukko. Ixxuwwim matta'a mi'n nafaranne gooqqi inqenne karamaakkoo wotara moo'lla'a titto'o. Ee ammane ee beyyonne uullito'i kee'nnek mat mat «Ka wotara mahina tittakkamuulla?» yito'o. Ixxuwwim Yesuus yukkoka ee mannina kutto'o. Oo mannim massitona cawwito'o. Losaanim Yesuus beyyo wotara eebba'a ixxuwwi eddechcha wota'l afarenne issito'aare Yesuus ee wotaranne saa'llukko. Dut mannim ixxuwwi gaqqi eddechcha googonne dakko'o. Mulli keenim haqqi buyya iiqqu'uuyyi googonne dakkam hee'llo'o. Ixxi illaginnee lasinnee yo'i keenim «Hosaana! Moollanni summinne waarookkok maasse'amaakkoohane! Moollanni summinne waaroo niyyanni Daawiit adillan maasse'amaakkoohane. Hosaana, iimaniinsi iimanenne!» yitu'uuyyi shuuttam hee'llo'o. Yesuusim Yerusaaleema afaa Keesammi Mine aagukko; kululleetanne yoo luwwi hundam moo'aa lasage uulli hiimaa hee'u bikkina tomminnee lamem losaaninnee maqirem Biitaana marukko. La'm balla Biitaaniinsi daba'llitu'uuyyim Yesuus sibaarukko. Ixxim buyyi lataakkoo oda'a qee'llonne moo'aa «Ayyi la'ukko mish hee'ooda'e» yaa ee haqqichchi beyyo marukko. Ihukkaarem hincu ammanenne ammanoom oda'i mishoobee'i amman ihu bikkina xale'i buyyiinsi bagaan misha maham siidukkoyyo. Ee bikkina ee haqqichchina «Kanniinsi eehid heer heerinam kiinniinsi ayyim misha itoone!» yukko. Ixxi losaanim eekka ixxi wocukkuuyyi macceesso'o. Ixxuwwim Yerusaaleema affo'i ammanenne Yesuus Keesammi Mine aagaa Keesammi Minenne biteessam keenoo bitaa'llam keenoo fissaa hollukko. Diinate dabassitam hee'llo'i kee'n xaraphpheeza, handare'e biteessam hee'llo'i kee'n barcumam qubbaa'ukko. Odim Keesammi mi'n qash worinne ayyi manchim ayyi luwwam iyyaa daba'llamoobee'isa hoorukko. Ixxuwwinam « ‹I min minaadab hundinam uunxaxxi mine yamamookko› yoo sagar kitaabamukkoyyonnihe? Ihukkaarem ki'nnuwwi gamaa'n ma'n issitakko'o» yaa losisukko. Qeessa awwonsaanii Seera losisaanii eekka macceesso'i bikkina ixxo shitam googo hasso'o. Ihukkaarem dut manni ixxi losishshanne maalalam hee'u bikkina baddito'o. Yesuus ixxi losaaninnem uulli hiimukkisam beero'iinsi firukko. La'm balla daram googinne higgu'uuyyi oo odakkichchi xaph afeebe'e gogaakkoo moo'llo'o. Pheexiroosim Yesuus wocu woshsha tiiraa «Losisaancho! Moo'e; at duuntitti ku odakkichchi gogaakko!» yukko. Yesuusim ixxuwwina dabaraa «Waa'anne amma'nnehe! Hanqinam an ki'nnuwwina kuroommo; ayyi manchim ixxi wodanonne maloo'n yukkok ihoo'isa amma'nnimminne ka duunam ‹Ka beyyiinsi ki'llaa dambalaqanne darabame› yuta'nnim darabamookko. Ee bikkina an ki'nnuwwina kuroommo; mat luwwina Waa'a uunxitakkam ammane ee luwwa aa'llakko'aannisa issitakka'a amma'nnitakkolas Waa'i eekka ki'nnuwwina uwwookko. Odim Waa'a uunxitakkeena Waa'i illage hincitakkam ammane mannanne amaddakko'i jolle ‹Haafaammo› yi'llehe. Ee'isamdu issitakkolas iimanenne yoo ki'nnuwwi annim ki'nnuwwi baaxiilom haafookko. Ihukkaarem ki'nnuwwimdu haafitakkobeelas iimanenne yoo ki'nnuwwi annim haafooyyo. Yesuusii ixxi losaanii odim Yerusaaleema waatto'o. Keesammi Minennem Yesuus taakke'amukkuuyyi yoohaannonne qeessa awwonsaan, Seera losisaanii lommannii ixxi beyyo waatta'a «At ka keeno issitoottok ayyi malaayyinnette? Te'im ka keeno issitona ka malaayye kiina uwwukkok ayyette?» yita'a xa'mmito'o. Yesuusim ixxuwwina «Anim ki'nnuwwa mat xa'mmichcha xa'mmoommo. Ki'nnuwwi i xa'mmichcha dabattakkolas anim ka keeno issoommok ayyi malaayyinnetda'e ihukkisa ki'nnuwwina kuroommo. Huno'o kullehe, Yohaannis xammaqoo'isa issukkok Waa'annii manna?» yukko. Ee ammanenne ixxuwwina'i ixxuwwim « ‹Mayyino?› yita'a ‹Waa'a› yinumlas ‹Eehannah ixxi yukkoka mahina amma'nnitakko'oyyo?› yookko. Eehaare ‹ «Manna» yinonnihe?› yita'a» fitanto'o. Ihukkaarem manni hundim Yohaannisa «Hanqo'i hiraagaancho» yitam bikkina manna baddito'o. Ee bikkina «Neese lanqoommoyyo» yita'a dabatto'o. Yesuusim ixxuwwina «Anim ka keeno mah malaayyinne issoommuulda'e ki'nnuwwina kuroommoyyo» yaa dabarukko. Odim Yesuus qeessa awwonsaanina, Seera losisaaninaa lommanninaa kobi'llishshinne kurukkuuyyi «Mat ammane mat manchi woyi'n kaashsha kaasukko. Ee woyi'n kaashshi kululleetam ootaa woyina ciinsakkam bare hinukko. Woyi'n kaashsha egerimminam godo'o baxukko. Ee lasage ee woyi'n kaashshi beyyo abuullaanina uwwaa mulli uulla marukko. Oo woyi'n kaashshi annichchi woyi'n misha feerakkam amman afukkaare woyi'n mishika eebona abuullaa'n beyyo awwaadaaniinsi mato asse'ukko. Ihukkaarem abuullaan ee awwaadaancho amadda'a ganta'a kora'i angam daba'lloo'isa issito'o. Woyi'n kaashshi annichchim la'mmekam mulli awwaadaancho asse'ukko. Abuullaan ixxom kininne qokkito'o; sholliisso'ome. Odim mulli awwaadaanchom asse'ukko; eeham shito'o. Ee'isam mulli keenom asse'ukkaare mat mat keeno ganto'o; mat mat keenom shito'o. Kaba gatukkok iittoo ixxi beeto asse'imma. Ixxim ‹I beeta'i hayditamo› yaa lasaanchonne asse'ukko. Ihukkaarem oo abuullaan ixxuwwina'i ixxuwwim ‹Lagaanchi kane; waallehe, lag niihan ihoo'isina ixxom shinona!› yaqqanto'o. Beetom amadda'a shita'a leeshooma woyi'n kaashshi beyyiinsi biiranne fissita'a uunjito'o. Eehaara'i woyi'n kaashshi annichchi maha issookko? Ixxi gagim waaraa ee abuullaano shookko. Woyi'n kaashshoomam mulli keenina uwwookko. Hanqinam Keesammi Kitaabanne ‹Kininne mine baxxam keen «Awwaadooyyo» yita'a uunjito'i kinchi lophphaa awwaadoo lamejji kinchi ihukko. Oohim Waa'i baxo; ni illinnem moo'nnaa maalallummo› yamamu sagara qananaa'llakko'oyyonnihe?» yukko. Ka kobi'llishsha wocukkok ixxuwwinatte ihukkisa laqqo'i bikkina ixxo amaddeena hasso'o. Ihukkaarem minaadaba baddito'i bikkina utta'a matto'o. Ee lasage Farisaawe'uwwiinsii Heeroodis manniinsii matqaxa woshshinne Yesuusa digaaddona asse'llo'o. Asse'anto'i keenim ixxi beyyo matta'a «Losisaancho! At hanqo'ane, mannika miine moo'lloobee'ane, Waa'i googo hanqo'isa losissoohanee manninam golo'lloobee'anee ikkittisa lanqoommo. Oroo'm adilina gibiro miqimmi hasisoohonnii hasisooyyo?» yito'o. Ihukkaarem ixxuwwi labisaan ikko'isa la'aa «Mahina eese keentakkamuulla? Huno'o, moo'oommo mat diinaara eebbehe» yukko. Ixxuwwim mat diinaara eebbo'o. Yesuusim ixxuwwina «Ka diinaaranne yoo misilii kitaabii ayyane?» yaa xa'mmukko. Ixxuwwim «Qeesaarane» yita'a dabatto'o. Yesuusim ixxuwwina «Eehaara'i Qeesaaran ihu luwwa Qeesaarinam uwwehe. Waa'an ihu luwwa Waa'inam uwwehe» yukko. Ixxuwwim ixxonne lobakata maalalto'o. Odim «Manni lehaa lasage ki'ooyyo» yitam Saduuqaawe'uwwi Yesuus beyyo waatta'a «Losisaancho! Muse'e niina ‹Mat manchi meentichcho eebaa ooso qaroo'n lehulas ixxi abbaayyi ee meentichcho laggassaa ee lehukkaannina shumo'i ihoo ooso qarimmi hasisookko› yaa kitaabaakko. Mat ammane lamar abbaayyuwwi hee'llo'o. Ee abbaayyuwwiinsi won meentichcho eebaa ooso qaroo'nnim lehukko. Ee lasage wona awwonaanchi ee meentichcho laggassukko. Ixxim ooso qaroo'nnim lehukko. Odim saxxekim laggassukko. Ixxim ooso qaroo'nnim lehukko. Ee'isinne lamarim ee meentichcho eebbo'ookko; ihukkaarem ixxuwwi ooso qattoo'nnim leto'o. Lasaanchonne oo meentichchom leto'o. Eehaare isa'i lamarim eebbo'ookko leto'i keen lehiinsi ki'llam ayyaamo hinkannina arette ikkamo?» yito'o. Yesuusim ixxuwwina «Ki'nnuwwi huushantakkamok Keesammi Kitaab yookkokaa Waa'i malaayyee laqqakkambee'i bikkinatte. Leto'i keen lehiinsi ki'llam ammane Waa'i asse'amaa'nnisa ikkamo bagaan eebbamoyyoo ladiissamoyyoo. Ihukkaarem giir aphpham hee'u shif aganna kuroo Muse'i kitaabanne leto'i keen lehiinsi ki'llamisa kitaabamukkoka qananaa'llakko'oyyonnihe? Waa'i Muse'ena ‹An Abrihaam Waa'a; Yisaaq Waa'a; Yaaqoob Waa'a› yaakko. Waa'i hee'oo kee'n Waa'a bagaan lehu kee'n Waa'ayyo. Ee bikkina ki'nnuwwi lobakata huushantakko'ookko» yukko. Seera losisaa'nnek mat ee beyyo waaraa Saduuqaawe'uwwi fitantam woshsha macceesam hee'ukko. Ixxim Yesuus ixxuwwina danaamisa dabarukkisa macceesaa «Hundiinsim lophphoo ijaaj hinkane?» yaa Yesuusa xa'mmukko. Yesuusim ixxena «Hundiinsi lophphoo ijaaj ‹Isra'eela, macceese; ni Moollanni Waa'i mexxo'i Waa'a. Ki Moollanni Waa'a wo'm wodaninne, wo'm tiirinne, wo'm sawwitinnee wo'm malaayyinnee iitte› yoohane. La'mmekim ‹Ki beshichcho ki gaqqisa iitte› yoohane. Ka keeniinsi lophphoo mulli ijaaj bee'e» yukko. Seera losisaanchim Yesuusina «Losisaancho hanqame! ‹Waa'i mato; ixxeensi bagaan mulli Waa'i bee'e› yitaa woccittokim hanqa. Odim wo'm wodaninne, wo'm tiirinne, wo'm sawwitinnee wo'm malaayyinne Waa'a iittimmii beshichchom gaqqisa iittimmii shokkiisakka'a hincaa'akkam kitimiinsii mulli kitimiinsii hundiinsim lophphoohane» yukko. Yesuusim oo manchi qooroominne dabarukkisa moo'aa «At Waa'i adillaniinsi qee'llitaattoohaneyyo» yukko. Ee lasage ayyim Yesuusa maham xa'mmeena iggukkoyyo. Keesammi Minenne Yesuus losisukkuuyyi «Seera losisaan ‹Kiristoos Daawiit beeto› yitamok mahinatte? Daawiit ixxi gagim Keesammi Ayyaaninne ‹Waa'i i Moollannina Ki diina'a ki lokkiinsi woroon isseembe'e i makkanne afuure› yaakko. Eehaara'i Daawiit ixxi gagim Waa'i doo'llaakkoo Kiristoosa ‹Moollanna!› yaa weeshulas Kiristoos hinka'isinne Daawiitina beet ihookko?» yukko. Ee beyyonne hee'u dut manni Yesuus wocu woshsha liiranchinne macceesam hee'ukko. Yesuusim losisukkuuyyi «Seera losisaano ege'llehe. Ixxuwwi qeeraa'l eddechcha edde'lla'a do'immaa meerannem manni ixxuwwa xummaatisonaa hassam keeno. Odim wixxixxi minneewwannem hundiinsi e'lloo beyyonne afuuchchaa maadda itteena afuuttam ammanem lombi beyyonne afuurimmaa hassam keeno. Qeeraa'llissa'a Waa'a uunxitu'uuyyi xummaan keeno labbamo. Aro'i lehu kee'n amaxxam boggamo. Ee bikkina ixxuwwanne afoo oogato'i kee'mmaalla» yukko. Keesammi Minenne diinate uwwakkam mu'uxxi gadanonne Yesuus afuuraakkoohaannonne dut manni ee mu'utanne diinate issookkoka moo'ukko. Dut goddaanim lobakat diinate issito'o. Aro'i lehaakkoo mat buxichchom waatta'a mat saantima ihoo lam meenzo'o issito'o. Yesuusim ixxi losaano ixxi beyyo weeshaa «Hanqinam an ki'nnuwwina kuroommo; aro'i lehaakkoo tu buxichcho ka mu'utanne issito'i diinat mulli keen hundim issito'aanniinsi lobane. Mashka'oomim mulli keen hundim uwwito'ok ixxuwwina ihaa gatukkaanniinsette. Ihukkaarem ise ma'lluchchimbee'i buxichchotte ikka'a isena yooqaxichchi hundichchom uwwito'ookko» yukko. Keesammi miniinsi Yesuus firukkisam ixxi losaa'nnek mat ixxena «Losisaancho, moo'e; ku Keesammi min baxamukkisii baxamu kinneewwii hinkaa'nna mishisoohane!» yukko. Yesuusim ixxena «Kininne baxamaakkoo ka geejji minneewwa moo'lloollannihe? Ku keennuwwi mat mullaanni hanenne ihaa baxamukkisam gindamoo'n hee'ooyyo» yukko. Keesammi mi'n illagenne yoo Wee'l duunanne Yesuus afuuraakkoohaannonne xale'i Pheexiroos, Yaaqoob, Yohaannisii Indiraasii ixxena «Hino'o niina kure; kuk ihookkok hinki ammane? Ku hundim ihoo'isa moo'isoo mare'i maruchcho?» yita'a xa'mmito'o. Yesuusim dabaraa «Ayyim ki'nnuwwa huushansoobee'isa ege'llehe. Mashka'oomim dut keen ‹An Kiristoosatte› yitu'uuyyi i summinne waattamo. Ixxuwwim dut keeno huushansitamo. Odim or waaroo ammane te'im o'l xambo macceessakkam ammane badditakkotte. Mashka'oomim oo luwwi hundim ihimmi hasisoohane. Ihukkaarem doolli beeddichchi afukkoyyome. Minaadab minaadabanne adilim adilanne ki'ookko. Annanni annanni beyyonnem uulli huxechchii qaanne'ii ihookko. Oo hundim xuuchchina luxxane. «Ki'nnuwwi gaga ege'llehe! Oogato'ina ki'nnuwwa higisakka'a uwwakkamo. Wixxixxi minneewwannem ganakkamo. I mashka'inne gassaa'n illagennee adilluwwi illagennee oogato'ina uullitakkam ammane i bikkina kuttakkamo. Ihukkaarem mishiraachchi sagar heer uulli hundinnem alallaatanchi hasisookko. Ki'nnuwwa amadakka'a oogato'ina higisakka'a uwwakkam ammane gaassitakka'a ‹Mayyinoommo› yitakka'a u'nnantakkotte. Ihukkaarem ee ammane ki'nnuwwi bikkina wocookkok Keesammi Ayyaan ihu bikkina ki'nnuwwina ixxi uwwookkoka woccehe. Abbaayyi abbaayyo annim beeto lehina higisaa uwwookko. Oosim amannee annannee ki'ookko; shookkome. I mashka'inne manni hundim ki'nnuwwa sabookko. Ihukkaarem lasaanchi afeebe'e xa'nnookkok gatookko. «Ihukkaarem hiraagaanchi Daani'eelinne kuramu haashaarammi luwwi uullimmi hasisoobee'i beyyonne uullaa moo'llakkam ammane qananaa'oo qoossona; ee ammane Yihuxxi uullanne yo'i keenim duunnuwwi kolli gibbona. Mi'n iimanenne yookkokim uulla dillaa miniinsi mu'uta fisseena mine aagoone. Abuulli beyyonne baxookkokim eddechcha masseena daba'lloone. «Ee ammane lamfoor meentinaa iicisaaninaa aayye! Ihukkaarem ki'nnuwwik gibimmi hagayyenne ihoobee'isa Waa'a uunxehe. Oohim luxxeka Waa'i luwwi hundam qooccu ammaniinsi ki'isaa kabad afeebe'em ee'isam ka lasagem ihaa la'oobee'i kee'mmaalli hawwi ihookko. Ee ayyaammuwwa Waa'i gundisubeeta'n ayyim gatam hee'ukkoyyo. Ihukkaarem Waa'i ixxi doo'llu kee'n bikkina ee ayyaammuwwa gundisaakko. «Ee ammane ayyim ki'nnuwwina ‹Oono'o, Kiristoos keyyookko› te'im ‹Oono'o, eekke'e yookko› yuta'nnim amma'nnitakkotte. Mashka'oomim ‹Kiristoos anette› yitam qophphanaanii qophpha'n hiraagaanii ki'llamo. Ixxuwwim xantota'n doo'llanto'i keenom huushisseebe'e mare'ee maalalsiisoo luwwaa issitamo. Ihukkaarem an ki'nnuwwina hundi luwwam gaassaahim kurummi bikkina qoxxitakka'a ege'llehe. «Ee ammane ee u'nniinsi lasage eelliinchi tuunsookko. Aganim caakkisooyyo. Boollaankim iimaniinsi ubookko. Iima'n malaayyuwwim heekke'ookko. Ee ammane Manchi Beet lobakat malaayyinnee lombinnee duubinne waarukkuuyyi manni moo'ookko. Ixxi asse'amaanom asse'ookko; soorem qariinsem uulli tochchiinsi tochchi afeebe'e ixxeka doo'llanto'oo keeno wixxaa'ookko. «Kobi'llishsha oda'iinsi lossehe. Oda'ik caaffuwwi lataa buyya eeboohaare ee ammane billi hincukkisa laqqakkamo. Ee'isam ee mare'uwwa moo'llakkam ammane ixxek waarimmi u'llummanne hincukkisa laqqakkamo. Hanqinam an ki'nnuwwina kuroommo; ku luwwi hundim iheebe'e ku qaranchi higooyyo. Iimanii uullii higookko. Ihukkaarem i sagar higooyyo. «Ihukkaarem ee balli bikkina te'im sa'aaxxi bikkina Anniinsi bagaan Beetom ihukko iima'n asse'amaan ayyim la'ooyyo. Ammanoom hinki ammanda'e laqqakkambee'i bikkina ege'llehe; qoxxehe. Waa'am uunxehe. Oohim ixxi mine uraa qee'l uulla maru manchisa. Oo manchim ixxi awwaadaanina annannichchinam baxika sharada baxxansaa gooca egeraanchom qoxxaa egerona ijaajukko. Eehaare ku mi'n annichchi hiimonne te'im baqitenne, antabaa'i muunanne te'im daranne waarooda'e laqqakkambee'i bikkina ege'llehe. Dangonne waaraa diriittakka'a siidoobee'isa guddehe. Ki'nnuwwina kuroommoka manni hundinam kuroommo; ege'llehe!» yukko. Shaashshiqqi Ugudinaa Qorosho'i Ugudinaa lam balli gataakkoohaannonne qeessa awwonsaanii Seera losisaanii hantaarinne Yesuusa amadda'a shitam googo hassam hee'llo'o. Ihukkaarem «Minaadab hambalaachcha ki'isoobee'isa Ugudanne ihoone» yaqqanto'o. Yesuusim Biitaananne oddomachchonne firoo baddisoo jabbi yoo Simi'oon minenne maaddanne afuuraakkoohaannonne mat meentichcho lobakata bito xee'aalli Naardoos shitto'i yoo albaasxiroos bilqaaxa amadda'a waatto'o. Isem ee bilqaaxa iiqqa'a shitto'ooma Yesuus horoorenne dunto'o. Ee ammane ee beyyonne hee'llo'i keeniinsi mat mat oo meentichcho issito'i luwwanne nadadda'a «Ku shitto'i mahina korabeyyonne bi'oohane? Sas xibbi diinaariinsi hanaan biteesamaa diinate buxina uwwimmi xansiisam hee'ukko» yaqqanto'o. Ee meentichchom gaddo'o. Ihukkaarem Yesuus ixxuwwina «Ullehe; ise mahina hawwissakkamuulla? Ise iina danaamisa issito'ookko. Bux hundi ammanem ki'nnuwwinnette; hassakko'i ammane ixxuwwa hara'mmitakkeena xantakkamo. Ihukkaarem an hundi ammane ki'nnuwwinne hee'oommoyyo. Ise issiteena xantamqaxa issito'ookko. An waammina gudona i orachchonne gaassita'ahim shitto'o labbo'ookko. Hanqinam an ki'nnuwwina kuroommo; heer uullanne mishiraachchi sagar alallaattamoo beyyi hundannem ku ise issito'i luwwi isena tiissiishshi ihoo'isina kuramookko» yukko. Ee lasage tommiinsii lamem losaaniinsim mat hee'u Asqorotokkichchi Yihud Yesuusa higisaa uwweena qeessa awwonsaa'n beyyo marukko. Ixxuwwim ee woshsha macceesso'i ammanenne liiranta'a ixxena diinate uwwiteena sagara aaggo'o. Yihudim ee ammaniinsi ki'isaa Yesuusa higisaa uwweena makki ammane hasam hee'ukko. Shaashshiqqi Uguxxi geex ambula durakkam Qorosho'i Uguxxi luxxi ayyaamonne Yesuusik losaan «Uguxxi hurbaata kiina hannonne gudinsona hassootto?» yita'a xa'mmito'o. Yesuusim ixxi losaa'nneka lamo «Beero'o mallehe. Eekke'em wo'i harachcho iyyaakkoo manchinne edantakkamo; ixxom awwonnehe. Ixxi aagoo mine aaggakka'a mi'n annichchina ‹Losisaanchi «I losaaninnem uguxxi hurbaata itoommi koyyi min hannonnette?» yoolla› yi'llehe. Ixxim hundem luwwim gudaakkoo geejji fooq mine moo'isookko. Eekke'e gudissehe» yukko. Lamem losaanim beero'o matta'a hundem luchchom Yesuus kurukkisam ihaa siiddo'o. Eekke'em uguxxi hurbaata gudisso'o. Uulli hiimu ammanenne Yesuusim tomminnee lamem losaaninnee maqirem waarukko. Hurbaata ittu'uuyyim Yesuus ixxuwwina «Hanqinam an ki'nnuwwina kuroommo; iinninne maqire ittakkam ki'nnuwwiinsi mat eese higisaa uwwookko» yukko. Ixxuwwim ee woshshanne lobakata kichche'lla'a annannichchim «Anettennihe?» yitu'uuyyi xa'mmito'o. Yesuusim ixxuwwina «Iinninne maqire bixxiranne anga aagissakkam tommiinsii lamiinsii mat eese higisaa uwwookko. Manchi Beeta'i ixxi bikkina Keesammi Kitaabanne kitaabamukkisam lehookko. Ihukkaarem Manchi Beeto higisaa uwwoo manchina aayye! Oo manchi qaramubeeta'n e'llam hee'ukko» yukko. Ixxuwwi ittu'uuyyim Yesuus qorosho'o ki'isaa Waa'a galaxxukko. Iiqaatim «Hii'nnehe; kuk i maara» yaa ixxuwwina uwwukko. Odim humbullonne yoo woyi'n diqaasam ki'isaa Waa'a galaxxukko. Diqaasam uwwukkaare hundim aggo'o. Yesuusim ixxuwwina «Dut keenina dunamoo haareechchi hidi'l i xiig kane. Hanqinam an ki'nnuwwina kuroommo; Waa'i adillanonne haareechchi woyi'n diqaasa agoommi ayyaam afeebe'e ka woyi'n diqaasa od agoommoyyo» yukko. Ee lasage mazmuura zammatta'a Wee'l duuna matto'o. Yesuus ixxi losaanina «Keesammi Kitaabanne ‹Allaaraancho aphphisoommo; allaachchi gereebbim binnookko› yamamaa kitaabamu bikkina ki'nnuwwi hundim eese laggakkamo. Ihukkaarem an lehiinsi ki'aa lasage ki'nnuwwiinsi gaassaa Galiila afoommo» yukko. Pheexiroos ee ammane Yesuusina «Mulli keen hundim keese laggota'nnim an hore'em lagoommoyyo» yukko. Yesuusim Pheexiroosina «Hanqinam an kiina kuroommo; kaballi hiimo antabaa'i lam kore muunoo'n gaassitaa eese sas kore laggootto» yukko. Ihukkaarem Pheexiroos «Kiinninne maqire lehoomta'nnim keese hore'em lagoommoyyo» yukko. Gatto'i losaan hundim ixxi yukkisam yito'o. Ee lasage Yesuusii ixxi losaanii Geeteseemaana yakkam beyyo matto'o. Yesuusim ixxuwwina «An Waa'a uunxeembe'e keyye afuullehe» yukko. Ixxim Pheexiroosa, Yaaqoobaa Yohaannisaa ixxenne maqire amadaa marukko. Eekke'em Yesuus lobakata kichche'ukko; u'nnamukkome. Ixxuwwinam «An lehoomqaxa kichche'aammo; ki'nnuwwi keyyenne egellehe; qoxxehe» yukko. Ee lasage sasem losaa'n beyyo daba'llaa waaraa diriitto'ookkoka moo'aa Pheexiroosina «Simi'oona, diriittaatennihe? Hofqax ammanem baqitaa egetteena xantooyyonnihe? Kabadem keenanchanne aaggakkambee'isa baqitakka'a Waa'a uunxehe. Tiir hundi ammanem gudaakkoohane. Ihukkaarem maar hoongaancho» yukko. Odim maraa illagee'n sagaram wocukkuuyyi Waa'a uunxukko. Ee lasage losaa'n beyyo daba'llaa waarukko. Diriir ixxuwwa amadaa hee'u bikkina diriitto'oo moo'ukko. Ixxuwwim ixxena woccam luchcho laqqo'oyyo. Saxxaaggem ixxuwwi beyyo waaraa «Kabad afeebe'em iinse'llakka'a usheexxitakka'atennihe? Kaba ihookko. Manchi Beet baaxiilaa'n anganne higaa uwwamoo amman afaakko. Ki'llehe! Mallona. Eese higisaa uwwookkok kuno'o afaakko» yukko. Yesuus wocukkuuyyim tommiinsii lamiinsii mat hee'u Yihud waarukko. Bisa'aa mugaa amaddo'oo dut mannim ixxenne maqire hee'llo'o. Ixxuwwim qeessa awwonsaaniinsi, Seera losisaaniinsii lommanniinsii asse'anto'oo keen hee'llo'o. Higisaa uwwoo Yihudim ixxuwwina «Ki'nnuwwi hassakkam manchi an suunqoommane. Ixxo qoxxissakka'a amaddakka'a massehe» yaa mare'e uwwaa hee'ukko. Ixxim ee ammanem Yesuus beyyo maraa «Losisaancho!» yaa suunqukko. Oo waatto'i mannim Yesuusa qoxxissa'a amaddo'o. Ee ammane Yesuusinne hee'llo'i kee'nnek mat seejjiinsi bisa'a fissaa hundiinsi lob qeessichchina awwaadaancho aphphisaa macce murukko. Yesuusim ixxuwwina «Fanga amadakkamisa eese amaddakkeena bisa'aa mugaa amaddakka'a waattakko'onnihe? Ballina ballina Keesammi Minennee ki'nnuwwi lambe'ennee ihaa losisummuuyyi amaddakko'oyyo. Ihukkaarem kuk ihukkok Keesammi Kitaabanne kitaabamukkok wo'mmoo'isinatte» yukko. Ixxi losaan hundim ixxo utta'a gibbo'o. Ee ammane xale'i weyyakka edde'aakkoo mat woraadichchi Yesuusa laseesaa maram hee'ukko. Ixxom amaddeena yakito'o. Ihukkaarem weyyakka uraa umba'adam gibukko. Ee lasage hundiinsi lob qeessichchi mine Yesuusa massito'o. Eekke'em qeessa awwonsaan, lommannii Seera losisaanii wixxita'a hee'llo'o. Pheexiroosim qee'llonnette ihaa hundiinsi lob qeessichchi qash wor afeebe'e laseesukkuuyyi maraa egeraaninne maqirem afuuraa giira iibbixxam hee'ukko. Ee ammane qeessi awwonsaanii daannuwwii Yesuusa shisiisseena naqaasha hassam hee'llo'o. Ihukkaarem siiddeena xanto'oyyo. Dut keen Yesuusanne qophphaninne naqqassam hee'llo'o. Ihukkaarem hundik woc mat ihukkoyyo. Ee'isa naqqasso'aarem kabadem ixxuwwi woc mat ihukkoyyo. Hundiinsi lob qeessichchim ixxuwwi lambe'enne uullaa Yesuusa «At maham dabattooyyonnihe? Ku manni keesenne naqqassam luwwi maruchcho?» yaa xa'mmukko. Ihukkaarem Yesuus maham dabaroo'n cawwaa urukko. La'mmaaggem hundiinsi lob qeessichchi Yesuusina «Maasse'amaakkoo Waa'i Beet Kiristoos atettennihe?» yaa xa'mmukko. Yesuusim ixxena «Eeyya, anette. Manchi Beet hundam xanoo Waa'aannonne makkanne afuuraakkoo moo'llakkamo. Iima'n duubinnem waarukkuuyyi moo'llakkamo» yukko. Ee ammanenne hundiinsi lob qeessichchi nadadaa edde'u eddechcha dereeraa «Od mulli naqaash niina maha hasisookko? Waa'inne game'llamukkuuyyi macceessakko'ookko. Ki'nnuwwi sawwit maruchcho?» yukko. Hundim mat ikka'a «Ixxi lehona!» yita'a oogatto'o. Mat mat keenim ixxonne anja tuhito'o. Ixxi illem katta'a «At hiraagaanchi ikkilas keese aphphisukkok ayyetda'e huno'o, la'e» yitu'uuyyi aphphissam hee'llo'o. Egeraanim oobo'inne aphphissu'uuyyi massito'o. Hundiinsi lob qeessichchi qash woronne woroo'n kollinne Pheexiroos hee'ukkisam ee qeessichchi awwaadaaniinsi mate waatto'o. Isem Pheexiroos giira iibbixxukkuuyyi qoxxissa'a moo'lla'a «At Naazireexxi Yesuusinne maqire hee'llittoyyonnihe?» yito'o. Ihukkaarem Pheexiroos «An la'oommoyyo; at yitoo woshshim iina aagukkoyyo» yaa lagukko. Ee'isa yaa gooc kollonne marukkisam antabaa'i muunukko. Odim oo awwaadaancho Pheexiroosa moo'lla'a ee beyyonne uullito'i keenina «Ku manchi ixxuwwi kollane» yita'a kutto'o. Ihukkaarem Pheexiroos la'mmaaggem lagukko. Hofqax ammaniinsi lasage ee beyyonne uullito'i keen Pheexiroosa «At Galiiliinsette ikkitti bikkina hanqinam at ixxuwwi kolli mancho» yito'o. Ihukkaarem Pheexiroos «Ka ixxi bikkina woccakkam mancho an la'oommoyyo» yaa ixxi gaga duu'mmimmaa hide'immaa asheerukko. Ee ammanem antabaa'i la'mmaaggem muunukko. Pheexiroosim «Antabaa'i la'mmaagge muunoo'n sas kore eese laggootto» yaa Yesuus wocukkoka sawwaa lobakata shikkaa wi'llukko. Soodaraar daram qeessa awwonsaan lommanninne, Seera losisaaninnee dummichchi daannuwwinnee hundinnem a'llanta'a lasage Yesuusa katta'a massita'a gassaanchi Philaaxoosina higissa'a uwwito'o. Philaaxoosim Yesuusa «At Ayihuxxi adilannihe?» yaa xa'mmukko. Yesuusim «At yittisame» yukko. Qeessa awwonsaanim dut luwwa woccu'uuyyi ixxo kasassam hee'llo'o. Odim Philaaxoos Yesuusina «Mee'i luwwanne keese kasassamulda'e macceese. At maham dabattooyyonnihe?» yaa xa'mmukko. Ihukkaarem Yesuus maham dabarukkoyyo. Ee bikkina Philaaxoos lobakata maalalukko. Shaashshiqqi Ugudanne karatiinsi tiramona minaadab xa'mmitam mat mancho tirimmi losamaakkoohan hee'ukko. Ee ammane Oroo'm adilanne bangujjita'a Oroo'm uulli mannika shita'a karanto'oo fanguwwi hee'llo'o. Ixxuwwiinsim mat Barbaana yakkam manchi hee'ukko. Mannim Philaaxoos beyyo matta'a ixxuwwina issam hee'u losano issoo'isina xa'mmito'o. Ihukkaarem qeessa awwonsaan «Yesuusayyo; Barbaan fatakamona!» yita'a xa'mmitamisina manna soggo'o. Philaaxoos ixxuwwa «Eehaare ka Ayihuxxi adila yitakkam Yesuusa maha isso?» yaa la'mmaaggem xa'mmukko. Ixxuwwim «Saqalamona!» yitu'uuyyi shuutto'o. Ihukkaarem Philaaxoos «Mahinatte? Ku manchi maha bi'isaate?» yaa xa'mmukko. Ixxuwwim «Saqalamona!» yita'a odim shuutto'o. Philaaxoosim manna liiranseena Barbaana ixxuwwina fatakukko. Ihukkaarem Yesuusa gansiisaa saqalakkamisina higisaa uwwukko. Ee lasage gaadaan Yesuusa gassaanchi mine aagisso'o. Odim gatto'i gaadaano hundam weeshsho'o. Yesuusinam adilluwwisam kashar eddechcha eddeessa'atii uttinne adilla'n mare'e baxxa'a ixxi horoorenne issita'atii «Ayihuxxi adila, kiina hechcho!» yitu'uuyyi game'llitam hee'llo'o. Odim shomboqo'inne ixxeka horoore aphphissu'uuyyii anja tuhitu'uuyyii guruphphita'a otossito'o. Naacanta'a lasage eddeesso'i kashar eddechcha sheelatta'a ixxi gaqqi eddechcham eddeessa'a saqalteena massito'o. Ixxuwwi mattu'uuyyim googonne Iskindirinaa Ruufoosinaa anni hee'u Qaaree'n uulli Simi'oona beero'o waarukkuuyyi edanto'o. Ixxim Yesuusika masqala iyyona giddisso'o. Ee lasage Yesuusa Golgota yakkam beyyo massito'o. Golgota yimmim Horoo'l Qooma yimma. Eekke'em ixxena karbe'e yakkam qaraar hamaaramaakkoo woyi'n diqaasa agona uwwito'o. Ihukkaarem ixxi agukkoyyo. Ee lasage Yesuusa saqalta'a ixxi eddechchi ayyayyena afooda'e moo'lleena saamo fissita'a baxxanto'o. Ixxom saqalto'i amman da'l sas sa'aatannette hee'ukko. Ixxo kasasso'i woshsham «Kuk Ayihuxxi adila» yita'a kitaabba'a masqalanne issito'o. Ixxi gadaninne higgam keenim ixxo gadda'a horoore heekkeessu'uuyyi «Ku Keesammi Mine ginditaa sas ballanne baxxoo at huno'o, ka masqaliinsi dillitaa ki gaga gatixxe» yitu'uuyyi naaccam hee'llo'o. Odim qeessa awwonsaanii Seera losisaanii ixxuwwina'i ixxuwwim naaccu'uuyyi «Ixxi mulli keeno gatisookko. Ihukkaarem ixxi gaga gatiseena xanukkoyyo. Isra'ee'l adil Kiristoos ixxotte ihulas huno'o, kaba masqaliinsi dillona. Neesem moo'nnaa amma'nninoommo» yito'o. Odim Yesuusinne maqire saqalanto'i keenim game'llitam hee'llo'o. Balli loh sa'aatiinsi ki'isaa honsi sa'aat afeebe'e uulli hundim tuunsukko. Honsi sa'aatanne Yesuus «Eeloohee! Eeloohee! Lamaa sabaqtaanii?» yaa laarukko. Ee'isa yimmim «I Waa'aa! I Waa'aa! Eese mahina uttitto?» yimma. Ee beyyonne uullita'a hee'llo'i mannik mat mat keen ee sagara macceessa'a «Macceessehe! Eeliyaasa weeshoolla» yito'o. Ixxuwwiinsim mat geeraa maraa shiishaakkoo woyi'n diqaasanne hallaammi'nnoo'i luwwa cefaa shomboqo'i bicconne issaa Yesuusina agona uwwaa «Huno'o, Eeliyaas waaraa ixxo dilliisoo'isa moo'nnona uttakka'a ullehe!» yukko. Ee lasage Yesuus laaraa lehukko. Lehukkisam Keesammi Minenne hee'u du'm eddechchi ludiinsi lugumonne afeebe'e lam ihaa dereeramukko. Yesuus saqalamu masqa'l illagenne uullaa hee'u xibbi halaqichchi Yesuus hinkid lehuda'e moo'aa «Hanqinam ku manchi Waa'i Beet hee'ukko» yukko. Eekke'em qee'llonne ikka'a moo'llam meenti hee'llo'o. Ixxuwwinne maqirem Magdala yakkam beero'i Maaraame, hoffi Yaaqoobinaa Yoosa'inaa ama Maaraamee Saloomee hee'llo'o. Yesuus Galiilanne hee'u ammane oo meenti ixxo hara'mmitu'uuyyi awwontam hee'llo'o. Yesuusinne maqire Yerusaaleema waatto'oo dut meentim hee'llo'o. Ihukkaarem «Hinkid kaqaxannem lehukko?» yaa Philaaxoos maalalaa xibbi halaqichcho weeshaa «Yesuus lehaatennihe?» yaa xa'mmukko. Yesuus lehukkisa xibbi halaqichchiinsi macceesaa lasage Yesuusika leesha Yooseef massoo'isa issukko. Yooseefim talbiinsi baxamaakkoo danaam keefa'n eddechcha bito aa'aa Yesuusika leesha masqaliinsi dilliisaa keefanaa kina feere'akka'a axisakko'oo waammanne waammukko. Geejji kinam onkoroollisaa ee waammanne ifiisukko. Ee ammane Magda'l Maaraamee Yoosa'i ama Maaraamee Yesuus hannonne waammamuda'e moo'llam hee'llo'o. Usheexxaxxi Ayyaam higaa lasage Magda'l Maaraame, Yaaqoob ama Maaraamee Saloomee matta'a Yesuus leeshanne labbeena shitto'o bitaa'llo'o. Ixxuwwim Abba'i balla soodaraar daram eelliinchi firukkuuyyi waammi beyyo matto'o. Mattu'uuyyim ixxuwwina'i ixxuwwim «Waammi suumiinsi kina niina ayyi onkoroollisookko?» yito'o. Ee'isa yito'i mashka'i oo kin lobakata geejji hee'u bikkinatte. Ihukkaarem daaphphita'a moo'llo'i ammanenne kin onkoroollaa hee'ukko. Ixxuwwim waammi woro aaggo'i ammanenne qadaalli eddechcha edde'aakkoo mat woraadichchi ee waammi woronne makki kollinne afuuraakkoo moo'lla'a muggito'o. Ixxim ixxuwwina «Muggitakkotte! Saqalamaa hee'u Naazireexxi Yesuusa hassakkamisa la'oommo. Ixxi ka beyyonne bee'e; ixxi lehiinsi ki'aakko. Waammamu beyyim ka beyyo; moo'llehe. Kabadem mattakka'a ixxi losaaninaa Pheexiroosinaa ‹Ixxi ki'nnuwwa gaassaa Galiila afookko; ki'nnuwwina kurukkisam eekke'enne ixxo moo'llakkamo› yi'llehe» yukko. Ixxuwwi baddita'a huxe'llam hee'llo'i bikkina waammi beyyiinsi gibba'a fitta'a matto'o. Lobakata baddita'a hee'llo'i bikkina ayyenam matem luchchom kutto'oyyo. Saantiinsi luxxi balli soodukkuuyyi Yesuus lehiinsi ki'aa lasage gaassaa lamar habusa fissaa hee'u Magda'l Maaraamena moo'amukko. Isem matta'a Yesuusinne maqire hee'llo'i keen kichche'llu'uuyyii wi'llitu'uuyyii hee'llonam ka woshsha kutto'o. Ihukkaarem ise «Yesuus lehiinsi ki'aakko; anim moo'aammo» yita'a kutto'oka macceesso'i ammanenne ixxuwwi amma'nnito'oyyo. Ee lasage Yesuus ixxuwwi uulla mattu'uuyyi hee'llo'i lam losaanina annannisinne moo'amukko. Ixxuwwim daba'llita'a gatto'i losaanina kutto'o. Ihukkaarem oo keen kutto'okam amma'nnito'oyyo. Ee lasage odim ixxi losaa'nnek tommii matii hurbaata itteena afuutto'oohaannonne moo'amukko. Moo'amaa ixxi lehiinsi ki'aa lasage moo'llo'i keen kutto'i woshsha ixxuwwik wodan duudaa amma'nnitobee'i bikkina ixxuwwa acceeqasukko. Ee lasage ixxuwwina «Uulli hundam mattakka'a mishiraachchi sagara qooccanchi hundinam alallaattehe. Amma'nnukkokii xammaqamukkokii hundim gatookko. Ihukkaarem amma'nnubee'aannonne oogatamookko. Eesenne amma'nnito'i keen hundim ka mare'uwwa issiteena xantamo. I summinne habusa fissitamo. Laqqambee'i suuminnem woccamo. Hamashsham amaddota'n te'im shoo qaraarem aggota'n ixxuwwa hawwodooyyo. Jabbu keenonnem ixxuwwi anga issitamaare jabbaan fayye'ookko» yukko. Moollanni Yesuus ixxuwwina kaka wocaa lasage iimane maraa Waa'i makkanne afuurukko. Ixxi losaanim matta'a beyyi hundannem mishiraachchi sagara alallaatto'o. Moollannim ixxuwwinne maqire baxam hee'ukko. Ixxuwwi losissam losishshi hanqi ihukkisam ixxuwwi kollinne issam hee'u mare'inne la'isam hee'ukko. Lophphitaattoo Teewoofiloosa, ni lambe'enne ihu woshsha kanniinsi illageen lobakat keen kitaabbo'ookko. Ixxuwwi kitaabbo'okim luxxaanniinsi ki'issa'a illinne moo'llo'i keenii mishiraachchi sagara alallaattam hee'llo'i keenii niina afisso'i woshsha. Ee'isam anim luxxaanniinsi ki'isaa hundem luwwam danaamisa saarayyaa moo'aa lasage woshshooma kiina ogorinne kitaabimmi danaam ihaa iina moo'amaakko. An eekka kitaaboommok at lossitti woshshika hanqa qoossitaa laqqoo'isinatte. Heeroodais Yihuxxi uullina adil hee'u doollenne Abiya'i qeessooma'n baxxanchiinsetti ihoo Zakkaaryaasa yakkam qeessichchi hee'ukko. Ixxi mi'n ama Eelsaabeexem Aaroon moollitan hee'llo'o. Lamim Waa'i ijaajo hundam egerimminne Waa'i illagenne miiqakkam luwwi bee'i muccur keen hee'llo'o. Ihukkaarem Eelsaabeexe alceennatte hee'llo'i bikkina ixxuwwina oos hee'ukkoyyo. Ixxuwwim lomma'nnamaa hee'amukko. Mat ayyaamo ixxi baxxanchina tar afukkaare Zakkaaryaas Waa'i illagenne qeessoo'm baxo baxam hee'ukko. Qeessuwwi eraare issitam losa'nnisam Zakkaaryaasim Keesammi Mine aagaa aduruusa wiriissoo'isina saam ixxena afukko. Zakkaaryaas aduruusa wiriissam hee'u ammane minaadab hundim miniinsi biireen Waa'a uunxonam Waa'i asse'amaanchi aduruusa wiriissimmina worqiinsi baxamu mu'uxxi makki kollonne uullaa Zakkaaryaasina moo'amukko. Ixxim ee asse'amaancho moo'u ammanenne muggaa lobakata baddukko. Ihukkaarem oo Waa'i asse'amaanchi «Zakkaaryaasa, baddititte! Ki uunxato Waa'i macceesu bikkina ki are Eelsaabeexe goonchi beeto qattamo. Ixxekam summa Yohaannisa yitaa weeshshootto. Atim lobakata liirantootto. Dut keenim ixxi qaranchanne liiramookko. Oo beetim Waa'i illagenne loban ihookko. Ixxim woyi'n diqaasaa mulli dimbisoo aggaa agooyyo. Ixxi am godabonne hee'ukkuuyyim Keesammi Ayyaaninne wo'mmaakkoohan ihookko. Lobakat Isra'ee'l oosom ixxuwwina Moollanni ihu Waa'i kollonne dabarookko. Anno'i tiiro oosaannonne dabareena, ijaajamoobee'i keenom ijaajamoo kee'n tiironne dabareenaa ee'isinne gudu minaadaba Moollannina gudiseenaa Waa'i Eeliyaasina uwwu malaayyinnee Keesammi Ayyaaninnee Moollanni illagenne marookko» yukko. Zakkaaryaasim Waa'i asse'amaanchina «Anii i mi'n amaa lomma'nninummi bikkina ku woshshi hinkid iheena xanookko?» yukko. Waa'i asse'amaanchim dabaraa «An ka mishiraachcha kiina kuroommisina asse'amaammo; an Waa'i illagenne uulloommi Gabri'eelatte. Amman afoohaare wo'mmoo woshsha an kurummaare at amma'nnitbee'i bikkina ku woshshi iheebe'e woccaa xantoobee'isina ki suum duudookko» yukko. Keesammi Minenne Zakkaaryaas dasu bikkina biiranne egeraa hee'u manni maalalukko. Ixxim firu ammanenne ixxuwwinne woceena xanubee'i bikkina angi mare'inne moo'isukkaare Keesammi Minenne mat luwwa kaaltanne moo'ukkisa laqqo'o. Duud ihaatem hee'ukko. Zakkaaryaasim awwaadoo amman beeddaa lasage mine elle'ukko. Eelsaabeexe lamfoorette ikko'i loh aganina Waa'i asse'amaanchi Gabri'eel Galiilanne yoo Naazireexxi beero'o Waa'i beyyiinsi asse'amukko. Ixxim asse'amukkok Daawiit moolliinsi qaramaakkoo Yooseefa yakkam manchina xeehanto'oo baajaam landichchi beyyi hee'ukko. Ee landichchokim summi Maaraamette. Waa'i asse'amaanchim is beyyo waaraa «Taa xummattennihe? Waa'i kiinninnette. At Waa'i maasse'aakkookkotane» yukko. Ihukkaarem Maaraame ixxi wocu woshshanne lobakata muggita'a «Ku hinkido'i xummaato?» yita'a is wodanonne sawwito'o. Waa'i asse'amaanchim Maaraamena «Waa'i keese iittoo bikkina baddititte! At lamfoorette ikkaa goonchi beeto qattootto. Ixxi summam Yesuusa yitootto. Ixxim loban ihaa hundam xanoo Waa'i Beeto yamamaa weeshamookko. Moollanni Waa'im ixxena anni Daawiitika adilla'n barcuma uwwookko. Ixxim Yaaqoob shumo'onne heer heerinam adil ihookko. Ixxi adillaninam tungi bee'ane» yukko. Maaraamem Waa'i asse'amaanchina «An baajaamotte ihummi bikkina ku woshshi hinkid iheena xanookko?» yito'o. Waa'i asse'amaanchim isena dabaraa «Keesammi Ayyaan keesenne dillookko. Waa'i malaayyim keesenne usheexxoo bikkina oo qaramoo keesammi beet Waa'i Beeto yamamookko. Oono'o, ki qarmancho Eelsaabeexem alceennatte yakku'uuyyi hee'lla'a kaba lommannanonne lamfoorette ikko'aanniinsi kuk loh agana. Mashka'oomim Waa'a kaa'oo luwwi mahim bee'e» yukko. Odim Maaraame dabatta'a «Oono'o, an Waa'ina awwaadaanchotte; at yittisam ihona» yito'o. Waa'i asse'amaanchim iseensi annanni ihukko. Hofqax ammaniinsi lasage Maaraame Eelsaabeexe moo'lleena duunaam Yihuxxi uullanne yoo beero'o qaqqissa'a matto'o. Maaraamem Zakkaaryaas mine aagga'a Eelsaabeexe xummaatisso'o. Maaraame Eelsaabeexe xummaatisso'i ammanenne Eelsaabeex godabonne ciilichchi xophukko. Eelsaabeexennem Keesammi Ayyaan dillukkaare sagara iimaa'lla'a «At meenti lambe'enne maasse'antaattookkotane; kiinniinsi qaramoo ciilim maasse'amaakkoohane! I Moollannina ama at eese moo'lleena waarimmi hinkid labookko? Mashka'oomim at eese xummaatissitti ammanenne i godabonne ciilichchi liiranchinne xophukko. Moollanni kiina wocu woshshi wo'mmoohan ihukkisa amma'nnitti bikkina maasse'antaattookkotane» yita'a wocco'o. Ixxo lonsitam keenina qaranchiinsi qaranchanne afeebe'em qishixxookko. Ixxi wodinnem malaayyaam baxo baxookko. Bolxitam keenom ixxuwwi sawwitinnem binnaa'ookko. Malaayyaam adilluwwam ixxuwwi adilla'n barcumiinsi dilliisaakko. Woroon yoo keenom iimiimaa'aakko. Sibaatto'i keeno er luwwinne goddisaakko. Ihukkaarem goddaan keeno kora'i angam mattamisa issaakko. Maaraame Eelsaabeexenne maqire sas agana afuutta'a lasage is mine daba'llita'a matto'o. Eelsaabeexe qattam amman afukkaare goonchi beeto qatto'o. Is olla'ii qarmannii moollanni isena lobakata qishixxukkisa macceessa'a hundim isenne maqire liiranto'o. Ciilichchi qaramu sadeenti ayyaamonnem ballachchisseena waatto'o. Ixxuwwim ee ciilichchika summa anni summanne Zakkaaryaasa yita'a fissiteena hassa'a hee'llo'o. Ihukkaarem ciilichchi ama dabatta'a «Ihooyyo! Ixxek summi Yohaannisatte yamamona» yito'o. Ixxuwwim Eelsaabeexena «Ki'nnuwwi qarmanniinsi ka summanne weeshamukkok matim bee'e» yito'o. Ixxuwwim ixxi annina «Ki beetika summa ayyee yitaa fissimma iittitootto?» yita'a mare'inne xa'mmito'o. Zakkaaryaasim kitaabaa kuroo luwwa xa'mmaa «Ixxi summi Yohaannisatte» yaa kitaabukkaare hundim maalalto'o. Ee ammanchom ixxek suum fooqukko. Allabim tiramukko. Ixxim Waa'a galaxxukkuuyyi wocimma asheerukkaare olla'i manni hundim baddito'o. Oo woshshim duunaam Yihuxxi uullanne hundannem afukko. Ee ciilichchinne maqirem Waa'ik malaayyi hee'u bikkina ee woshsha macceesso'i manni hundim «Ku ciilichchi hinkido'an iheenatte?» yita'a ixxuwwi wodanonne sawwito'o. Ee ciilichchi anni Zakkaaryaasanne Keesammi Ayyaan dillukkaare hiraago wocukkuuyyi «Ixxi minaadaba hara'mmeena waaru bikkinaa gatisu bikkinaa Isra'ee'l Moollanni Waa'i galaxxamaakkoohan ihona. Ixxi aagu hidirim neese diina'i angiinsi wolabbanonne fillaa baddinoo'n ixxena awwaandoommisinatte. Ee'isam ni heechchi doollenne hundannem Waa'i illagenne miiqakkam luwwi bee'i mucculluwwi inkaa hee'nnoommisinatte. Kaa i beeto, at Moollannina googo gudisseena ixxi illagenne higgaa mattoo bikkina at ‹Hundam xanoo Waa'i hiraagaancho› yamantootto. Waa'i ixxuwwi baaxiilo haafaa gatisoo'isa ixxi minaadabina la'issootto. Oohim iheena xanookkok Waa'i kollinne niina eelliinchisa firookkok waaroo ammane Niyyanni Waa'i biijoominnee qishixxatinnettee. Ixxim tuunsonnee leh haf woronnee yo'i keenina caakka caakkisookko. Neesem xummi googonne awwonsookko» yukko. Ciilichchim uullichchaa tiiroo li'ukko. Ixxim Isra'ee'l minaadabina ixxi baxinne la'amoo balli afeebe'e udma'i uullanne hee'ukko. Yohaannis qaramu doollenne Oroo'm uulli adil Agusxoos Qeesaar heer uulli manni hundim kitaabamoo'isina ijaajo fissukko. Ee luxxi xigina manni kitaabamu ammane Qeereniwoosa yakkam manchi Sooriy uullina gassaanchi hee'ukko. Manni hundim summa kitaabiseena qaramu uulla marukko. Yooseefim Daawiit moolliinsette ihu bikkina Galiilanne yoo Naazireexxi beero'iinsi ki'aa Yihuxxi uullanne yoo Daawiit beero'o Beeteeliheema summa kitaabixxeena xeehaa hee'u Maaraamennem marukko. Ixxuwwi Beeteeliheemanne hee'amonam Maaraame ee ammane lamfoorette hee'llo'i bikkina qattam amman afukkaare won beeto qatto'o. Ixxuwwina koyyi garoo minenne gattam beyyi bee'u bikkina ciilichchooma eddechchinne xaaxxa'a larina itoo luwwa uwwakkam wongiranne iinsiisso'o. Ee uullanne ixxuwwika diinate allaattu'uuyyi hiimo biiranne gattam allaaraan hee'llo'o. Waa'i asse'amaanchi ee allaaraanina moo'amukkaare Waa'ik lombi ixxuwwina caakkukko. Ixxuwwim lobakata baddito'o. Ihukkaarem Waa'i asse'amaanchi ixxuwwina «Oono'o! Manni hundam lobakata liiransoo danaam mishiraachcha ki'nnuwwina eebummi bikkina badditakkotte. Kaballa Daawiit beero'onne Gatisaanchi ixxim Moollanni Kiristoos ki'nnuwwina qaramaakko. Ki'nnuwwina mare'i kane; larina itoo luwwa uwwakkam wongiranne ee ciilichcho eddechchinne xaaxakka'a iinsiisakko'oo moo'llakkamo» yukko. Waa'i asse'amaan ixxuwwiinsi annanni ikka'a iimane daba'llita'a matto'i ammanenne oo allaaraan ixxuwwina'i ixxuwwim «Ki'llehe; Beeteeliheema mallaa Waa'i niina kuru luwwa moo'nnona» yaqqanto'o. Allaaraanim qaqqissa'a matta'a Maaraame, Yooseefaa larina itoo luwwa uwwakkam wongiranne iinse'aakkoo ciilichchoo moo'llo'o. Allaaraanim ciilichcho moo'llo'i ammanenne ciilichchi bikkina Waa'i asse'amaanchi kuru woshsha kutto'o. Allaaraan kutto'i woshsha macceesso'i keen hundim maalalto'o. Ihukkaarem Maaraame ee woshsha hundam is wodanonne amadda'a sawwitam hee'llo'o. Allaaraan ixxuwwina kuramukkisam ihaa macceesso'i bikkinaa moo'llo'i bikkinaa Waa'a lonsitu'uuyyii galaxxitu'uuyyii daba'llito'o. Am godabonne uumameena illageenim Waa'i asse'amaanchi kurukkisam qaramu sadeenti ayyaamina ballachchamu balla ee ciilichchik summi Yesuusa yama mukko. Muse'i See'llisinne Yooseefii Maaraamee muccuttam amman afukkaare ciilichcho Waa'ina uwwiteena Yerusaaleema massito'o. Oohim «Luxxeka qaramu won beet Waa'ina keesammi ihaakkoohan ihona» yamamaa Seeranne kitaabamukkane. Odim Seer «Lam geex handare'e kitim issitakka'a hincaa'llehe» yaa ijaajukkisam hincaa'lleena matto'o. Ee ammane Yerusaaleemanne Simi'oona yakkam manchi hee'ukko. Ixxim Waa'ina garaakkoo er manchi hee'ukko. Keesammi Ayyaan ixxonne hee'ukko. Ixxim Isra'ee'l minaadaba Waa'i gatisoo ayyaamo egeram hee'ukko. Moollanna, Kiristoosa moo'oo'n lehoobee'isam Keesammi Ayyaan ixxena kuraa hee'ukko. Ixxom Keesammi Ayyaan ki'isukkaare Keesammi Mine marukko. Yooseefii Maaraamee ciilichchina issitona Seer ijaajoo luwwa issiteena Keesammi Mine aaggo'i ammanenne Simi'oon ciilichcho ixxi anganne aa'aa qaaphphaa «Waa'a! At yittisam kaba ki awwaadaancho eese xumminne aa'e. Ixxim keese laqqambee'i minaadabina ki woshsha la'isoo caakka. Ki minaadab Isra'eelinam lomba» yaa Waa'a galaxxukko. Ciilichchi annii amaa ciilichchi bikkina Simi'oon wocu woshshanne maalalto'o. Simi'oonim ixxuwwa maasse'aa lasage ciilichchi amana Maaraamena «Ku ciilichchi lobakat Isra'ee'l minaadabina gatimminaa bi'imminaa doo'llamaakkoohane. Odim ixxo sabbam keeninam mare'i ihookko. Ee'isinne lobakat mannik maaxammi sawwit la'amookko. Kichchechchim ki wodano bisa'isa dereeraa higookko» yukko. Ee ammane Aseer moollitan ikkam Faanu'eel landichcho Haanna'a hiraagaanchotte hee'llo'o. Isem baajoommaninne mine issito'i lama'l hiinchina isek aro'i lehukkaare mulli goonanne affoo'n sadeentayyee soor hiinchoo hee'llo'ookkotan hee'llo'o. Haanna'a soommanimminnee Waa'a uunximminnee ballaa hiimoo Waa'ina otossitu'uuyyi Keesammi Miniinsi annanni ikkamoyyi hee'llo'o. Isem ee ammanchom ixxuwwi beyyo waatta'a Waa'a galaxxito'o. Odim Isra'ee'l minaadaba gatisoo'isa egettam hee'llo'i keenina hundinam Yesuus bikkina kutto'o. Yooseefii Maaraamee Waa'i ijaaju luwwi hundam issita'a guullita'a lasage ixxuwwi hee'llam hee'llo'i beyyo Galiilanne yoo Naazireexxi beero'o daba'llito'o. Ciilichchim li'ukkuuyyii qoxxukkuuyyii marukko. Lobakat qoor beetom ihukko. Waa'ik maassim ixxonne hee'ukko. Yooseefii Maaraamee Shaashshiqqi Ugudina Yerusaaleema hiinchina hiinchina mattam hee'llo'o. Yesuus qaramukkaanniinsi tommoo lam hiinchoo ihaakkoohaannonne losa'nnisam ugudina Yerusaaleema matto'o. Oo ugud beeddaa lasage mine daba'llita'a waattonam Yesuus Yerusaaleemanne gatukko. Yerusaaleemanne gatukkisa ixxi annii amaa laqqo'oyyi hee'llo'o. Ihukkaarem ixxuwwi «Manninne maqire yookko» yita'a sawwito'i bikkina mat balli goog hundoomam taakke'llo'o. Ee lasage qarmannaannonnee ixxuwwi laqqam manni lambe'ennee hasso'o. Siidimma hooggo'i ammanenne hassu'uuyyi laso daba'llita'a Yerusaaleema matto'o. Sas balliinsi lasage losisaaninne maqirem Keesammi Minenne afuuraa macceesukkuuyyii xa'mmichcha xa'mmukkuuyyii siiddo'o. Ee ixxi woshsha macceesso'i keen hundim ixxi lachchannee dabaru dabachchannee maalalto'o. Yooseefii Maaraamee Yesuusa moo'llo'i ammanenne maalalto'o. Ixxi ama Maaraame ixxena «I beeto, mahina neese kid issitto? Anii kiyyannii batbatinummuuyyi keese hansam hee'nnummo» yito'o. Yesuusim ixxuwwina dabaraa «Eese mahina hassakkamuulla? An Iyyanni minenne ihimmi hasisoohan ihukkisa laqqakko'oyyonnihe?» yukko. Ihukkaarem Yesuus ixxuwwina wocu luwwa ixxuwwi qoossito'oyyo. Ee lasage Yesuus ixxuwwinnem Naazireexxi beero'o daba'llaa marukko. Ixxuwwinam ijaajamam hee'ukko. Ixxi ama ee woshshi hundam is wodanonne amadda'a hee'llo'o. Yesuusim Waa'i illagennee manni illagennee nuuraam ihaa uullichchinnee lachchinnee li'ukko. Xibaaroos Qeesaar adil ihukkaanniinsi tommoo onti hiinchoo ihaakkoohaannonne Pheenxeenaawekkichchi Philaaxoos Yihuxxi uulla gassam hee'ukko. Odim Heeroodis Galii'l uulla gassam hee'ukko. Ee'isam Heeroodis abbaayyi Filiphphoos Iixuriyaasaa Xiraakondoosaa yakkam uulla gassam hee'ukko. Lisaanoosim Abiliina yakkam uulla gassam hee'ukko. Odim Haanna'aa Qayyaafii hundiinsi lob qeessuwwi hee'llo'o. Ee doollenne udma'anne yoo Yohaannisina Zakkaaryaas beetina Waa'i sagar waarukko. Ee bikkina Yohaannis «Waa'i ki'nnuwwika baaxiilo haafihona baaxiilo biira yitakka'a xammaqammehe» yaa alallaatukkuuyyi Yoordaanoos daajji kululleetanne yoo uulli hundam marukko. Oohim hiraagaanchi Issaayyaas Kitaabanne «Udma'anne ‹Moollannina googo gudissehe. Googguwwam shiraashillehe. Cebbi beyyi hundim gudona. Lob duunii hoffi duunii hundim shiraashiramona. Boqqu googim xabbeen ihona. Gargante'aam googim lii'llaalli ihona. Maara edde'u hundim Waa'ika gatishsha moo'ookko› yaa laaroo manchi sagara» yamamaa kitaabamukkane. Yohaannisim xammaqameena waaru minaadabina «Ki'nnuwwi hamashshi ooso, waaroo Waa'i quunqiinsi gibbakkamisina ki'nnuwwina ayyi kurukko? Kabadem ‹Neese Abrihaam ooso› yimma uttakka'a baaxiilo biira yitakko'isa moo'isoo danaam baxo baxxehe. Mashka'oomim Waa'i Abrihaamina ooso ka kiniinsi ki'iseena xanoo'isa an ki'nnuwwina kuroommo. Oono'o! Meesaan haqqi lugumonne gudaakko. Kabadem danaam misha mishoobee'i haqqi hundim muramaa giiranne edamookko» yukko. Minaadabim «Eehaare maha issino?» yita'a Yohaannisa xa'mmito'o. Yohaannisim dabaraa «Lam eddechchi yookkok matooma bee'aannina uwwona. Hurbaat yookkokim ee'isam issona» yukko. Qaraxaanim xammaqanteena waatta'a Yohaannisina «Losisaancho, maha issino?» yita'a xa'mmito'o. Yohaannisim dabaraa «Ki'nnuwwim ijaajantakko'aanniinsi lonsitakka'a aa'llakkotte» yukko. Gaadaanim ixxi beyyo waatta'a «Neesdu maha issino?» yita'a xa'mmito'o. Ixxim dabaraa «Ki'nnuwwi baxxakka'a siiddakkam diinat ihookko. Ayyem malaayyinne te'im qophphanonne kasasimminne boggakkotte» yukko. Manni hundim Kiristoos waaroo'isa egettam hee'llo'i bikkina «Kuk Gatisaanchi Kiristoosatda'e?» yita'a ixxuwwi wodanonne Yohaannis bikkina sawwito'o. Yohaannisim dabaraa «An ki'nnuwwa wo'inne xammaqoommo. Ihukkaarem an ixxeka caamma'i fatira tireena laboombee'ek iinniinsi lophphoo malaayyaam waaroolla. Ixxi Keesammi Ayyaaninnee giirinnee ki'nnuwwa xammaqookko. Hurbaata muccusseena axuruunsoo maanshim ixxi angannette. Muccussaa lasagem arasooma sechchonne aagisookko. Ihukkaarem bura'ooma xoo'oobee'i giiranne shokkiisookko» yukko. Yohaannisim dutisinne sogukkuuyyi minaadabina mishiraachchi sagara kurukko. Galii'l uulla gassam hee'u Heeroodisam Filiphphoos are Heeroodiyaada gassu bikkinaa mulli dut jor baxom baxu bikkinaa acceeqasukko. Filiphphoos Heeroodisina abbaayyi hee'ukko. Ee bikkina Heeroodis Yohaannisam karaxxi minenne kassiisimminne eraa baxu jollennem edaa jora baxukko. Manni hundim xammaqamaa lasage Yesuusim xammaqamukko. Xammaqamaa ki'aa Waa'a uunxukkuuyyi hee'onam iiman fooqukko. Keesammi Ayyaanim handarekkichchi kobi'llanne ihaa ixxonne dillukko. Iimaniinsim «An iittoommi i beet eesem liiransitoottok atette» yoo sagar waarukko. Yesuus losisimma asheeru ammane qaramukkaanniinsi sad hiincho ihaa hee'ukko. Manni Yesuusa Yooseef beeto labisam hee'ukko. Yooseef Eeli'i beeto; Eeli'i Maati'i beeto; Maati'i Leewi'i beeto; Leewi'i Milke'i beeto; Milke'i Yoona'i beeto; Yoona'i Yooseef beeto. Yooseef Mataatiy beeto; Mataatiy Amoox beeto; Amoox Naahoom beeto; Naahoom Eesiliim beeto; Eesiliim Naage'i beeto. Naage'i Maa'at beeto; Maa'at Mataatiy beeto; Mataatiy Semeey beeto; Semeey Yooseef beeto; Yooseef Yooda'i beeto. Yooda'i Yoonaan beeto; Yoonaan Erees beeto; Erees Zarubaabeel beeto; Zarubaabeel Saalaatiyaal beeto; Saalaatiyaal Neer beeto. Neer Milki'i beeto; Milki'i Hade'i beeto; Hade'i Qoossam beeto; Qoossam Elmoodaam beeto; Elmoodaam Eer beeto. Eer Yoose'i beeto; Yoose'i Eli'eezar beeto; Eli'eezar Yooraam beeto; Yooraam Maaxaat beeto; Maaxaat Leewi'i beeto. Leewi'i Simi'oon beeto; Simi'oon Yihud beeto; Yihud Yooseef beeto; Yooseef Yoonaan beeto; Yoonaan Eeliyaaqeem beeto. Eeliyaaqeem Meeliy beeto; Meeliy Maynaan beeto; Maynaan Maaxaat beeto; Maaxaat Naataan beeto; Naataan Daawiit beeto. Daawiit Issayyi beeto; Issayyi Iyyoobeed beeto; Iyyoobeed Boo'eez beeto; Boo'eez Saalimoon beeto; Saalimoon Na'aasoon beeto. Na'aasoon Aminaadaab beeto; Aminaadaab Raam beeto; Raam Aariin beeto; Aariin Heexroon beeto; Heexroon Faarees beeto; Faarees Yihud beeto; Yihud Yaaqoob beeto. Yaaqoob Yisaaq beeto; Yisaaq Abrihaam beeto; Abrihaam Taara'i beeto; Taara'i Naakoor beeto; Naakoor Saruug beeto. Saruug Ra'u beeto; Ra'u Feleg beeto; Feleg Eebeer beeto; Eebeer Sheela'i beeto. Sheela'i Qaayinaam beeto; Qaayinaam Arfaakisaad beeto; Arfaakisaad Seem beeto; Seem Nohe'i beeto; Nohe'i Laameek beeto. Laameek Maatusaal beeto; Maatusaal Heenook beeto; Heenook Yaareed beeto; Yaareed Malaali'eel beeto; Malaali'eel Qaayinaan beeto. Qaayinaan Heenoos beeto; Heenoos Seet beeto; Seet Addaam beeto; Addaam Waa'i beeto. Keesammi Ayyaaninne wo'mmaa Yoordaanoos daajjiinsi Yesuus daba'llukko. Keesammi Ayyaanim udma'i uulla massukko. Eekke'em Sheexaanchi Yesuusa sor balla keenukko. Ee sorem ballam Yesuus maham itubee'i bikkina sorem ayyaamim beeddaa lasage sibaarukko. Sheexaanchim Yesuusina «At Waa'ina Beet ikkaattoolas huno'o, ku kin hurbaat ihoo'isina ijaaje» yukko. Yesuusim Sheexaanchina dabaraa «Keesammi Kitaabanne ‹Manni xale'i hurbaatinne hee'ooyyo› yamamaa kitaabamaakko» yukko. Ee lasage Sheexaanchi qeeraa'l duunanne Yesuusa fissaa heer uulli adillan hundam winxo'i ammanchonnem moo'isukko. Moo'isaa «Ka gassimmi malaayyee ixxuwwi lombaa hundam kiina uwwoommo. Mashka'oomim hundim iina uwwamu bikkina anim hasummaannina uwweena xanoommo. Ee bikkina uullanne aad heeshitaa iina otossitlas ku luwwi hundim kiihan ihookko» yukko. Yesuusim ixxena dabaraa «Keesammi Kitaabanne ‹Ki Moollanni Waa'ina otossihe; xale'i ixxenam awwaade!› yamamaa kitaabamaakko» yukko. Yesuusim Sheexaanchina dabaraa «Keesammi Kitaabanne ‹Ki Moollanni Waa'a keentitte!› yamamaa kitaabamaakko» yukko. Ee lasage Sheexaanchi keenu keenat hundam guullaa ammanoomina Yesuusiinsi annanni ihukko. Keesammi Ayyaa'n malaayyinne Yesuus Galiila daba'llukko. Ixxi sadim kululleetanne yoo uulli hundannem macceesamukko. Ayihuxxi manni wixxixxi minneewwannem losisam hee'ukko. Manni hundim Yesuusa galaxxukko. Ee lasage Yesuus li'u uulla Naazireeta waarukko. Ixxi losa'nnisam Usheexxaxxi Ayyaamonne wixxixxi mine marukko. Ixxi qananaa'eena uullukkaare hiraagaanchi Issaayyaas Kitaaba uwwakko'o. Ixxim kitaaba biddiqaa'u ammanenne Ixxim kitaabooma xaaxaa awwaadaanchina dabaraa uwwaa afuurukko. Ee minennem hee'llo'i manni hundim ixxo xuxxita'a moo'llam hee'llo'o. Ixxim ixxuwwina «Ku qanannaatamukkaare macceessakko'i kitaabik sagar kaballa wo'mmaakko» yimma asheerukko. Ixxi bikkina hundim eroomma wocco'o. Ixxi suumiinsi firoo danaam woshshanne maalalta'a «Kuk Yooseef beetoyyonnihe?» yito'o. Yesuus ixxuwwina dabaraa «Qifirinnaahoomanne issittisaa macceensummokaa ka ki gaqqi uullannem isse. Odim ‹Kaa akiincho, ki gaga fayyiixxe› yoo kobi'llishsha iina woccakkamisa an qoossaa la'aammo» yukko. Odim «Hanqinam an ki'nnuwwina kuroommo. Hiraagaanchi ixxi gaqqi uullanne lomba siixxooyyo. Hanqinam an ki'nnuwwina kuroommo; Eeliyaas hee'u doollenne Isra'ee'l uullanne dut busar meenti hee'ukko. Ee doollenne sas hiinchoo kolloo xeen ga'nnubee'i bikkina uulli hundannem kee'mmaalli qaanne'i hee'ukko. Ihukkaarem Eeliyaas Siidoo'n uullanne Saraphphita yakkam gattenne hee'llam hee'llo'i mat busar meentichchi beyyo asse'amukko bagaan Isra'ee'l meenti beyyo mat beyyom asse'amukkoyyo. Odim hiraagaanchi Elsa'i doollennem oddomachchonne firoo baddisoo jabbinne hawwoo dut manni hee'ukko. Ihukkaarem Sooriy uullanne hee'u Ni'imaana yakkam manchiinsi bagaan ee Isra'ee'l mannik matim fayye'ukkoyyo» yukko. Eekka macceesso'i ammanenne wixxixxi minenne hee'llo'i manni hundim lobakata nadaddo'o. Ee lasage ki'lla'a beero'iinsi tochchonne Yesuusa fissito'o. Ixxuwwim «Baallenne daramboommo» yita'a ixxuwwi beero'i baxamu duu'n ludonne fissito'o. Ihukkaarem Yesuus ixxuwwi lambe'inne higaa uraa marukko. Ee lasage Yesuus Qifirinnaahooma yakkam Galii'l beero'o dillukko. Yesuusim Usheexxaxxi Ayyaamonne manna losisam hee'ukko. Losisam hee'ukkokim lobakat lachchinnette hee'u bikkina ixxi losishshanne maalaltam hee'llo'o. Ee ammane habus amadaakkoo mat manchi Ayihuxxi manni wixxixxi minenne hee'ukko. Oo manchim lobakat sagarinne «Naazireexxi Yesuusa! Ni woshshanne keese mah aagisaate? Ka beyyo waattittok neese bi'isseenattennihe? At Waa'i keesammi ikkittisa an la'oommo» yaa laarukko. Ihukkaarem Yesuus ee mancho amadu habusina «Sa'itaa ka manchiinsi fire!» yaa ijaajukko. Ee ammanem habus ee mancho manni lambe'enne ubbuusaa hawwodoo'nnim fatakaa firukko. Ixxuwwi hundim maalalta'a ixxuwwina'i ixxuwwim «Ku hinkido'i luwwa? Malaayyinnee lachchinnee habusa ijaajoolla. Ixxuwwim ixxena ijaajanta'a fittamuulla» yito'o. Yesuusikim sad ee kululleetanne yoo uulli hundannem macceesamukko. Yesuus Ayihuxxi manni wixxixxi miniinsi firaa Simi'oon mine aagukko. Ee ammane Simi'oon ballo xissita'a iinse'lla'a hee'llo'i bikkina ise fayyiisona manni Yesuusa uunxukko. Ixxim is gadanonne uullaa xissi fatakoo'isina ijaajukkaare xissim fatakukko. Ee ammanem iimita'a ixxuwwina koyyinano issito'o. Annanni annanni jabbinne jabbito'i keen hundam eelliinchi aagukkisam Yesuus beyyo eebakko'o. Yesuusim annannichchonnem ixxi anga issaa hundam fayyiisukko. Odim habusim «At Waa'i Beeto!» yaa laarukkuuyyi lobakat keeniinsi firukko. Ihukkaarem ixxi Kiristoosatte ihukkisa laqqa'a hee'llo'i bikkina Yesuus ixxi bikkina woccambee'isa hoorukko. Uulli soodukkuuyyi ee beyyiinsi ki'aa manni bee'i beyyo marukko. Mannim ixxo hassu'uuyyi ixxi beyyo waatta'a ixxuwwiinsi annanni ihaa maroobee'isa hootto'o. Ihukkaarem Yesuus ixxuwwina dabaraa «An asse'amummi mashka'i Waa'i adilla'n mishiraachchi sagara kurimminatte ihu bikkina mulli beero'uwwannem kurimmi hasisookko» yukko. Ixxim Yihuxxi uullanne yoo wixxixxi minneewwanne Waa'i sagara kuram hee'ukko. Mat ayyaamo Gensereex Dambalaq gadanonne Yesuus uullaakkoohaannonne manni Waa'i sagara ixxeensi macceeseena gafe'amam hee'ukko. Yesuus ee dambalaq gadanonne lam wongilluwwa moo'ukko. Ihukkaarem qurxumme'e qaashoo manni woriinsi firaa ixxuwwi shikka aansham hee'ukko. Yesuusim Simi'oonan hee'u wongiranne aagaa Simi'oonina «Huno'o, ka wongira uulliinsi dambalaq woronne hoffokam shiqaa'e» yukko. Yesuusim ee wongiranne afuuraa manna losisukko. Ixxim wocaa guullaa lasage Simi'oonina «Wongira xilli dambalaq kollonne massitaa qurxumme'e qaashshakkeena ki'nnuwwi shikka dambalaqanne ubbuussehe» yukko. Simi'oonim dabaraa «Moollanna, hiim hundoomam badallaa maham amandummoyyo. Ihukkaarem at yitlas shikka ubbuunsoommo» yukko. Ixxuwwim Yesuus yukkisa issito'i ammanenne lobakat qurxumme'e amaddo'aare shikki muramimma asheerukko. Ee bikkina mulli wongiranne hee'llo'i beshshuwwi waatta'a hara'mmitamisina anginne ganto'o. Ixxuwwi beshshuwwim waatto'aare lamem wongilluwwim aad xuuxamoo qaxa qurxumme'e wonshito'o. Ihukkaarem Pheexiroosa yakkam Simi'oon eekka moo'aa Yesuus lokkonne ubaa «Moollanna, an baaxiilaanchi ihummi bikkina at iinniinsi annanni ihe!» yukko. Eehid yu mashka'im ixxii ixxenne maqire hee'llo'i keenii hundim amaddo'i qurxumme'i bikkina maalalta'a hee'llo'i bikkinatte. Odim Simi'oon beshshuwwi hee'llo'i Zabdiwoos oos Yaaqoobii Yohaannisii maalalto'o. Yesuusim Simi'oonina «Baddititte! Ka lasage at qurxumme'e qaashshittisam mannam qaashshootto» yukko. Ixxuwwim ixxuwwi wongilluwwa dambalaq tochchonne fissita'a lasage luwwi hundam utta'a Yesuusa awwonto'o. Yesuus mat beero'onne hee'onam oddomachchi hundannem baddisoo jabbi firaakkoo mat manchi waarukko. Ixxim Yesuusa moo'u ammanenne illillaachcha ubaa «Moollanna, iittittaa'lleensi eese fayyiissaa muccussiteena xantootto!» yaa uunxukko. Yesuusim anga biddiqaa'aa ee mancho nakkaa «Iittoommo, fayye'llaa muccure!» yukkaare ee ammanem oo jabbi fatakukko. Odim Yesuus ee mancho «Ayyenam kuttitte. Ihukkaarem at fayye'llittisa manni la'oo'isina Muse'e ijaajukkisam mattaa ki gaga qeessichchina moo'issaa ki'llaa kitima hincaa'e» yukko. Ihukkaarem Yesuusik sad eraa'llaanniinsi lophphaa beyyi hundannem afukko. Lobakat mannim macceeseenaa jabbiinsim fayye'eenaa wixxam hee'ukko. Ihukkaarem ixxi manni bee'i beyyo maraa Waa'a uunxam hee'ukko. Mat ayyaamo Yesuus losisonam Galii'llaannonnee Yihuxxi uullannee yoo gatti hundiinsii Yerusaalee'm beero'iinsii waatto'i Farisaawe'uwwii Seera losisaanii eekke'e afuutta'a hee'llo'o. Jabbaano fayyiisoo Waa'i malaayyim Yesuusanne hee'ukko. Oono'o! Mat shiihaakkoo mancho manni hallaqqanne iyyaa Yesuus beyyo eebukko. Ixxuwwim ee mancho mine aagissa'a Yesuus illagenne dissiteena hasso'o. Ihukkaarem manni lophphu bikkina Yesuus beyyo hincaa'lleena googo siiddo'oyyo. Ee bikkina biddiqaa baxamaakkoo mi'n iimane fitta'a gindita'a manchooma hallaqqinne aad dilliissa'a manni lambe'enne Yesuus illagenne dissito'o. Yesuusim ee mannika amma'nnato moo'aa «Mancho! Ki baaxiil haafamaakko» yukko. Seera losisaanii Farisaawe'uwwii «Ku Waa'inne game'llamoollak ayyette? Matem Waa'iinsi bagaan baaxiilo haafeena ayyi xanookko?» yimma asheetto'o. Yesuus ixxuwwi sawwite la'aa «Kaka ki'nnuwwi wodanonne mahina sawwitakkamuulla? ‹Ki baaxiil haafamaakko› yimminnii ‹Ki'llaa mare› yimmi sholle'ookko? Ihukkaarem Manchi Beetina uullanne baaxiilo haafeena malaayyi yoo'isa laqqehe» yaa shiihu manchina «Kaa mancho! Iimitaa ki hallaqqa iyyitaa mine elle'e» yukko. Ixxim ee ammanem ixxuwwi illagenne iimaa iinse'u hallaqqa iyyaa Waa'a galaxxukkuuyyi mine elle'ukko. Manni hundim lobakat baddimminnee maalalimminnee «Kaballa maalalsiisoo luwwa moo'nnummo» yaa Waa'a galaxxukko. Ee lasage Yesuus ee beyyiinsi firaa maraa mat Leewi'i yakkam qaraxaanchi qaraxo aa'oo beyyonne afuuraakkoo moo'ukko. Yesuusim ixxena «Eese awwone» yukko. Ixxim ki'aa hundem luwwam uraa Yesuusa awwonukko. Oo Leewi'm ixxi minenne Yesuusina lobakat maadda issukko. Ee maaddannem lobakat qaraxaanii mulli mannii ixxuwwinne maqirem afuutta'a hee'llo'o. Odim Farisaawe'uwwii Seera losisaanii Yesuus losaanina «Qaraxaaninnee baaxiilaaninnee maqire ittakkamokii aggakkamokii mahinatte?» yita'a quunquunto'o. Yesuus ixxuwwina dabaraa «Qaraa'l manchi hasisookkok jabbaaninatte bagaan fayya'i manninayyo. An waarummok muccur keeno weesheenatte ihoo'n baaxiilaano baaxiiliinsi dabareenatte» yukko. Ixxuwwim Yesuusina «Yohaannis losaanii Farisaawe'i losaanii hundi ammanem soommantamoo Waa'a uunxitamoo. Ihukkaarem ki losaan ittamuullaa aggamuullaa» yito'o. Yesuus ixxuwwina dabaraa «Idaayyichchi ixxuwwinne hee'ukkuuyyi bollochcho'i manna soommano amadiissakkeena xantakkamonnihe? Idaayyichcho ixxuwwiinsi annanni issakka'a massakkam ayyaam waarookko. Ee ayyaamo ixxuwwim soommantamo» yukko. Odim ixxuwwina mulli kobi'llishshinnem haareechchi eddechchiinsi qaafunta dereeraa beeddu eddechchanne edaa gobookkok ayyimbee'e. Ee'isa issuta'nnim haareechcho kora'am dereeraa bi'isookko bagaan oo haareechchi qaafunti ebeer eddechchanne taaphanooyyo. Odim haareechchi woyi'n diqaasa ebeer cananne issookkok ayyimbee'e. Issookkokimdu hee'ulas woyi'n diqaas cana xooqisaa dunamookko; canoomim awwaadooyyo. Ee bikkina haareechchi woyi'n diqaasa haareechchi cananne issimmi hasisookko. Ayyim « ‹Afuuru woyi'n diqaas danaamo› yoo bikkina afuuru woyi'n diqaasa agaa ki'aa haareechchi woyi'n diqaasa heele'ookkok bee'e» yukko. Yesuus Usheexxaxxi Ayyaamonne hurbaaxxi worinne higonam ixxi losaan hamaamika quxxa'a anginne cukkita'a ittam hee'llo'o. Ee bikkina Farisaawe'uwwiinsi mat mat keen Yesuus losaanina «Usheexxaxxi Ayyaamonne issimmina laboobee'i luwwa mahina issitakkamuulla?» yita'a xa'mmito'o. Ihukkaarem Yesuus ixxuwwina «Daawiitii ixxenne maqire hee'llo'i mannii sibaatto'i ammane Daawiit maha issuda'e qananaa'llakko'oyyonnihe? Ixxim Keesammi Mine aagaa keesammi qorosho'o oohim xale'i qeessuwwiinsi bagaan mulli manni itimmi hasisoobee'eka aa'aa itukko. Ixxenne maqire hee'llo'i keeninam uwwukko» yaa dabarukko. Odim Yesuus ixxuwwina «Manchi Beet Usheexxaxxi Ayyaaminam annichchome» yukko. Odim Yesuus mulli Usheexxaxxi Ayyaamonne Ayihuxxi manni wixxixxi mine aagaa losisam hee'ukko. Ee beyyonnem makki angi shiihaakkoo mat manchi hee'ukko. Seera losisaanii Farisaawe'uwwii Yesuusa kasassam mashka'a hassam hee'llo'i bikkina Usheexxaxxi Ayyaamonne fayyiisooda'e moo'lleena egetto'o. Ihukkaarem Yesuus ixxuwwi sawwite la'aa ee angi shiihu manchina «Waattaa ka beyyonne uulle» yukkaare oo manchi ki'aa maraa ee beyyonne uullukko. Yesuusim «Hino'o an ki'nnuwwa xa'mmoommo. Usheexxaxxi Ayyaamonne erokannii jora issimmi hasisookko? Te'im manni foore gatisimminnii shimmi hasisookko?» yaa xa'mmukko. Yesuusim ixxi kululleetanne hee'llo'i manni hundam moo'aa angi shiihu manchina «Ki anga biddiqaa'e» yukko. Manchim ixxi anga biddiqaa'ukkaare ixxi angi daba'llaa fayye'ukko. Ihukkaarem ixxuwwi lobakata nadadda'a Yesuusa maha issitamda'e ixxuwwina'i ixxuwwim a'llanto'o. Mat ayyaamo Yesuus Waa'a uunxeena duuna firukko. Eekke'em hiimo hundoomam Waa'a uunxukkuuyyi garukko. Uulli soodu ammanenne ixxi losaano weeshaa ixxuwwiinsim tommoo lam losaanoo doo'llukko. Ixxuwwam «Asse'amaano» yaa weeshukko. Asse'amaaninne maqirem Yesuus duuniinsi dillaa lete'i beyyonne uullukko. Eekke'em lobakat ixxi losaanii ixxeensi losseenaa ixxuwwanne yoo jabbiinsi fayye'lleenaa Yihuxxi uulli hundiinsi, Yerusaalee'm beero'iinsi, dambalaq tochchonne yoo Xiiroosaanniinsii Siidoo'n beero'iinsii waatto'oo lobakat mannii hee'llo'o. Habus amadaa hawwitam hee'llo'i keenim fayye'llo'o. Ixxeensi malaayyi firaa hundam fayyiisam hee'u bikkina manni hundim ixxo nakkeena hasam hee'ukko. Yesuusim ixxi losaano moo'ukkuuyyi «Ki'nnuwwi bux keen Waa'i adillan ki'nnuwwan ihu bikkina maassaammuwwa. Kaba sibaattakkam keen godditakkam bikkina maassaammuwwa. Odim wi'llitakkam keenim osattakkam bikkina maassaammuwwa. «Manchi Beet bikkina manni ki'nnuwwa saboohaare, yaayyoohaare, game'lloohaaree ki'nnuwwi summam jorinne amadoohaaree ki'nnuwwi maassaammuwwa. Iimanenne ki'nnuwwik irifo'i lobakat ihu bikkina oo hundim ki'nnuwwanne afoo ammane liirammehe. Liiranchinnem xophxophi'llehe! Mashka'oomim ixxuwwi anno'im hiraagaano eehid issito'ookko. «Ihukkaarem ki'nnuwwi goddaan keen danaam heechcha hee'llakko'i bikkina ki'nnuwwina aayye! Ki'nnuwwi kaba godditakko'i keen sibaattakkam bikkina aayye! Ki'nnuwwi kaba osattakkam keen kichche'llakkam bikkinaa wi'llitakkam bikkinaa aayye! «Manni hundim ki'nnuwwa biroo ammane ki'nnuwwina aayye! Ixxuwwi anno'im ‹Neese hiraagaano› yitam qophphanaano eehid issito'ookko. Odim Yesuus «Ihukkaarem an ki'nnuwwina macceessakkam keenina kuroommo; ki'nnuwwi maso'o iittehe. Ki'nnuwwa sabbam keeninam eroomma issehe. Ki'nnuwwa duuntam keenom maasse'llehe. Ki'nnuwwa hawwodu keeninam Waa'a uunxehe. Kiikka mat xabano aphphisukkaannina la'm xabanom uwwe. Ki gaabe'e masseena hasoohaannina ki qambiisam hoottitte. Keese uunxukkaannina hundinam uwwe. Kiinniinsi luwwa massu manchi dabaraa uwwonam xa'mmititte. Manni ki'nnuwwina issona hassakkam luwwa ki'nnuwwim mannina issehe. «Ki'nnuwwa iittitam keen xale'e iittitakko'aare maha awwaadookko? Eehid ihukkaa'lleensi baaxiilaammuwwim ixxuwwa iittitam keeno iittitamo. Ki'nnuwwina danaamo issu keenina danaamo issitakko'aa'lleensi ki'nnuwwina maha awwaadookko? Eekka'i baaxiilaammuwwim issitamo. Liqaayyo dabatta'a ‹Uwwitamo› yitakka'a neeyyato issitakkam keenina liqaayyissakko'aalleensi maha awwaadookko? Dabatta'a aa'lleena'i baaxiilaammuwwim liqaayyissamo. Ki'nnuwwi ihukkaarem ki'nnuwwi maso'o iittehe. Maso'uwwinam eroomma issehe. Dabaraa ‹Uwwookko› yitakka'a egettakkambee'isam liqaayyissehe. Ee'isamdu issitakkolas ki'nnuwwina uwwamoo irifo'i lobakat ihookko. Odim hundam xanoo Waa'inam oos ikkakkamo. Mashka'oomim Waa'i ixxo galaxxitambee'i keeninaa jor keeninam biijaalla. Iimanenne yoo ki'nnuwwi anni haafoohan ihukkisam ki'nnuwwim haafitakkam keen ikkehe. Odim Yesuus «Ayyi manchonnem oogattakkotte; Waa'im ki'nnuwwanne oogatooyyo. Ayyi manchom ‹Jora issaakkoohane› yitakka'a higissakka'a uwwitakkotte; Waa'im ki'nnuwwa jorina higisaa uwwooyyo. Haafi'llehe; ki'nnuwwinam haafamookko. Uwwehe; ki'nnuwwinam uwwamookko. Ki'nnuwwi keentakka'a uwwitakko'i keennaanchonne dabattakka'a a'llitakkam bikkina ki'nnuwwim uwwehe. Ki'nnuwwinam er keennaanchonne xishshaa'akka'ahii xiibakka'ahii keenakka'a keennaanchiinsi higaakkookkoka qaaphphisakkamo» yukko. Odim Yesuus mat kobi'llishsha kurukkuuyyi «Qooq qooqa awwonseena xanoohonnihe? Awwonsulas lamim baallenne ubbamoyyonnihe? Losookkok ixxi losisaanchiinsi lophphooyyo. Ihukkaarem ayyim guullaa losaa lasage ixxi losisaanchisam ihookko. Ki illenne yoo gudeera laqqoo'nnim kiyyabbaayyi illenne yoo haccichcho moo'lloottok mahinatte? Te'im ki illenne yoo gudeeram siiddoo'n kiyyabbaayyina ‹Huno'o, iyyabbaayyo, ki illenne yoo haccichcho fissoommo› yiteena hinkid xantootto? Kaa labsaancho, gaassitaa ki illenne yoo gudeera fisse. Ee lasage kiyyabbaayyi illenne yoo haccichcho fissiteena qoossitaa moo'llootto. Odim Yesuus «Danaam haqqichchi jor misha mishooyyo. Jor haqqichchim danaam misha mishooyyo. Haqqi hundim mishoo mishinne la'amookko. Uttiinsi oda'i misha feerakkamoyyo. Seego'iinsi woyi'n misha feerakkamoyyo. Er manchi ixxi wodanonne wixxaa'u er luwwiinsi erokam fissookko. Jor manchim ixxi wodanonne wixxaa'u jor luwwiinsi joram fissookko. Mashka'oomim suum wocookkok wodanonne wo'mmaa gatu luwwa. Odim Yesuus «An ki'nnuwwa issehe yummi luwwa'i issitakkamoyyo. Eese ‹Moollanna! Moollanna!› yitakkamok mahinatte? I beyyo waaraa an yummi luwwa macceesaa baxonne hosisookkok hundim maha kobi'llooda'e an ki'nnuwwina kuroommo. Oo manchi ixxi mine baxeena shooto'o xillisaa hinaa gortanna kinanne uullisu mancho kobi'lloohane. Diris dirisaa ee mine gafe'ukko. Ihukkaarem danaamisa baxamu bikkina heekkeeseena xanukkoyyo. Ihukkaarem an yummi luwwa macceesaa baxonne hosisoobee'ek shooto'o muroo'nnim mine baxu mancho labookko. Oo min diris gafe'ukkaare ee ammanchom ubukko. Ee mi'nnek ubimmim jorisa» yukko. Yesuus wocam hee'u woshshi hundam mannina wocaa guullaa lasage Qifirinnaahoom beero'o aagukko. Mat Oroomekkichchi xibbi halaqichchina lobakata iittoo awwaadaanchi hee'ukko. Oo awwaadaanchim xissaa leheena ihaa hee'ukko. Oo xibbi halaqichchi Yesuus bikkina macceesu ammanenne ixxi awwaadaancho waaraa fayyiisoo'isina Ayihuxxi manni lommanna Yesuus beyyo asse'ukko. Ee bikkina Yesuus ixxuwwinne maqirem marukko. Maraa xibbi halaqichchi minenne hincu ammanenne xibbi halaqichchi Yesuus beyyo manna asse'aa «Moollanna, at i mine aaggeena an laboombee'an ihummi bikkina waatteena hawwititte! Anim ki beyyo waareena laboomman ihaa i gaga xigoommoyyo. Ee bikkina ki suuminne mat luwwa woce; i awwaadaanchi fayye'ookko. An i gagim mulli keenina ijaajamoomman ihummuuyyi odim iinniinsi woroon an ijaajoommi gaadaan yo'o. Ixxuwwiinsim mato ‹Mare› yoommaare marookko. Odim mullaanninam ‹Waare› yoommaare waarookko. I awwaadaanchom ‹Kaka isse› yoommaare ixxim issookko» yukko. Yesuus eekka macceesu ammanenne ee xibbi halaqichchonne maalalaa ixxo awwonu minaadaphphi kollonne daba'llaa «An ki'nnuwwina kuroommo; kido'i qoxxaalli amma'nnat yoo mancho Isra'ee'l minaadabannem siidummoyyo» yukko. Oo asse'anto'i keenim mine daba'llita'a waatto'i ammanenne awwaadaanchi fayye'aakkoo moo'llo'o. Hoffi ammaniinsi lasage Naayina yakkam beero'o Yesuus marukko. Ixxenne maqirem losaanii lobakat minaadabii matto'o. Yesuus ee beero'ika gooca afeena ihaakkoohaannonne leesha iyyaakkoo manni beero'iinsi firukko. Oo lehu manchim amana mexxokkichchom hee'ukko. Isem busar meentichchotte hee'llo'o. Ee beero'ik lobakat minaadab isenne maqire hee'ukko. Moollanni ee meentichcho moo'u ammanenne isena qishixxaa «Wi'llititte!» yukko. Ee lasage maraa hallaqqa nakkukkaare leesha iyyu manni uullukko. Yesuusim «Kaa woraadichcho, an keese ‹Iimihe› yoommuulla; iimihe!» yukko. Lehu manchim afuuraa wocimma asheerukko. Yesuus ee mancho amana dabaraa uwwukko. Ixxuwwi hundim baa'llo'o. Ixxuwwim «Ni lambe'enne hiraagaanchik malaayyaam ki'aakko. Waa'i ixxi minaadaba gatiseena waaraakko» yitu'uuyyi Waa'a galaxxito'o. Ixxi sadim Yihuxxaannonnee ee kululleetanne yoo uulli hundannee macceesamukko. Yohaannis losaan ee woshsha hundam Yohaannisina kutto'o. Yohaannisim ixxi losaaniinsi lamo weeshaa « ‹Waarookko› yakko'i Kiristoos atettennii te'im mulleka egelloo?» yaa Moollanni beyyo asse'ukko. Oo asse'anto'i mannim Yesuus beyyo waatta'a «Xammaqaanchi Yohaannis ‹ «Waarookko» yakko'ok atettennii te'im mulleka egello?› yaa asse'aakko» yito'o. Yesuus ee ammanchom manna xissiinsii jabbiinsii fayyiisukko. Habusam fissukko. Lobakat qooqquwwam fooqaa'ukko. Ixxim asse'anto'i keenina «Mattakka'a Yohaannisina moo'llakko'okaa macceessakko'i luwwaa oohim ‹Qooqquwwi moo'llamuulla. Shiihuwwim taakke'llamuulla. Oddomachchonne firoo baddisoo jabbiinsim manni fayye'aa muccuroolla. Gawwuwwi macceessamuulla. Leto'i keen lehiinsi ki'llamuulla. Bux keenina mishiraachchi sagar kuramoolla. Eesenne malamoobee'ek maasse'amaakkoohane› yaakko yitakka'a kullehe» yaa dabarukko. Oo asse'anto'i manni elle'lla'a lasage Yohaannis bikkina Yesuus minaadabina «Udma'a mattakko'ok maha moo'llakkeenatte? Hafachchi heekkeesoo shasha moo'llakkeenattennihe? Eehaara'i maha moo'llakkeena mattakko'o? Danaam eddechcha edde'u mancho moo'llakkeenattennihe? Oono'o! Wereeggi eddechcha edde'lla'a heellantu'uuyyi hee'llam keen adilluwwi minenne yo'o. Eehaara'i maha moo'llakkeena mattakko'o? Hiraagaanchonnihe? Eeyya, an ki'nnuwwina kuroommo; hiraagaanchiinsim lophphookkoka moo'llakkeenatte. Keesammi Kitaabanne ‹Oono'o! Kiina googo gudisoo i asse'amaancho ki illagenne asse'oommo› yamamaa kitaabamukkok Yohaannis bikkinatte. An ki'nnuwwina kuroommo; qaramu mannanne Yohaannisiinsi lophphookkok matim bee'e. Ihukkaarem hundiinsim hoffe'ookkok Waa'i adillanonne ixxeensi lophphookko» yukko. Yohaannis xammaqam hee'u xammaqanchanne xammaqanta'a hee'llo'i bikkina eekka macceesso'i manni hundim qaraxaanim gattoo'n Waa'i bax hanqo'an ihukkisa qoossito'o. Ihukkaarem Farisaawe'uwwii Seera losisaanii Yohaannis xammaqoo xammaqanchanne xammaqantobee'i bikkina Waa'i sawwu sawwite sabbo'o. Odim Yesuus «Ka doollenne yoo manna mahinne kobi'llisoommo? Ixxuwwi hinkido'i manna? Ixxuwwi kobi'llitamok meeranne afuutta'a ixxuwwina'i ixxuwwim ‹Dibbe'e aphphinsummo, kaddakko'oyyo; sollummo, wi'llitakko'oyyo› yaqqanta'a weeccantam ooso kobi'llitamo. Xammaqaanchi Yohaannis soommanukkuuyyii woyi'n diqaasa agoo'nnii waarukkaare ‹Habus amadaakkoohane› yitakko'o. Manchi Beeto itukkuuyyii agukkuuyyii waarukkaare ‹Moo'llehe; kuk itaahii agaahii hoogoobee'i gollaancho! Qaraxaaninaa baaxiilaaninaa beshichcho› yitakko'o. Ihukkaarem Waa'ik qooroom hanqo'isa la'amookkok qoolluwwi beyyonnette» yukko. Farisaawe'uwwiinsi mat manchi Yesuus ixxenne hurbaata itoo'isina weeshukkaare Yesuusim ee Farisaawekkichchi mine aagaa maadda iteena afuurukko. Oono'o! Ee beero'onne mat baaxiilaancho meentichcho Farisaawekkichchi minenne Yesuus hurbaata iteena afuurukkisa macceessa'a albaasxiroos bilqaaxanne wo'mmaakkoo shitto'o eebbo'o. Isem afaree'n kollinne waatta'a wi'llitu'uuyyi indiiddinne ixxi lokko aashisimma asheetto'o. Ee indiiddam is horoo'l saraatinne shiinshita'a lokko suunqito'o. Ixxi lokkonnem shitto'o labbo'o. Hurbaata itiseena Yesuusa massu Farisaawekkichchi ee ammane eekka moo'aa ixxi wodanonne «Tu ixxo nakkitam meentichcho baaxiilaanchotte ikko'i bikkina ku manchi hiraagaanchi ihuta'n ise ayyetda'ee hinkido'i meentichchotda'ee ikko'isa la'am hee'ukko» yaa sawwukko. Yesuusim ixxena dabaraa «Simi'oona, an kiina kuroommi luwwi yookko» yukko. Simi'oonim dabaraa «Losisaancho! Maruwwa?» yukko. Odim Yesuus «Mat manchiinsi liqaayyo aa'llo'oo lam manchi hee'llo'o. Ixxuwwim aa'llo'ok matii onti xibbi diinaara, la'mmekim ontayyi diinaar hee'ukko. Oo liqaayyo aa'llo'i lamem mannim miqimma hooggo'aare liqaayyisu manchi lamikam urukko. Ee lasage ee lamem manniinsim lonsaa iittookkok hinkane?» yukko. Simi'oonim «Iina laboo'isina lonsaa iittookkok lobakat badanchi uramukkane» yaa dabarukko. Yesuusim ixxena «Hanqa oogattaatto» yukko. Yesuusim ee meentichchi kollonne ille dabaraa Simi'oonina «At ka meentichcho moo'lloollannihe? An ki mine aagummaare at i lokkina wo'om uwwittoyyo. Ihukkaarem ise indiiddinne i lokko aashissa'a is horoo'l saraatinne shiinshito'o. At eese suunqittoyyo. Ihukkaarem ise ka mine aagummaanniinsim ki'issa'a i lokko suunqimma utto'oyyo. At i horoorenne zaytam labbittoyyo. Ihukkaarem ise i lokkonne shitto'o labbo'ookko. Ee bikkina an kiina kuroommo; ise eese lobakata iittito'ok isek lobakat baaxiil haafamu bikkinatte. Ihukkaarem hoffi baaxiil haafamukkok hoffokam iittookko» yukko. Yesuusim ee meentichchona «Ki baaxiil haafamaakko» yukko. Ee bikkina ixxenne maqire hurbaata itteena afuutto'i keen «Ku ‹Ki baaxiil haafamaakko› yookkok ayyette?» yita'a ixxuwwi wodanonne sawwito'o. Ihukkaarem Yesuus ee meentichchona dabaraa «Ki amma'nnat keese gatisaakko. Xumminne mare» yukko. Yesuus hofqax ammaniinsi lasage Waa'i adilla'n bikkina mishiraachchi sagara beero'uwwannee gattuwwannee alallaatukkuuyyi maram hee'ukko. Tommii lamem losaanim ixxenne maqire hee'llo'o. Odim habusiinsii mulli jabbiinsii fayye'llo'i meentiinsi mat matim ixxenne hee'llo'o; oo keenim lamar habus firaa fayye'llo'i Magda'l Maaraame, Heeroodis mine gassaanchi hee'u Kuza'i are Yoohaana, Soosinaa lobakat mulli meentii ixxuwwi diinatinne Yesuusina hara'mmitam hee'llo'o. Lobakat minaadab annanni annanni beero'uwwiinsi waatta'a wixxito'aare kobi'llishshinne Yesuus «Mat ayyaamo mat manchi sire'e wixeena firukko. Wixukkuuyyim sire'ik mat mat googonne ubukkaare lokkinne hance'akko'o. Eekkam cii'i itukko. Odim mat qax sire'i lobakat buchchi bee'i kinaam uullanne ubukko. Mutaa lasage aash bee'i bikkina gogukko. Odim mat qax utti lambe'enne ubukko. Oo utti ixxenne maqirem li'aa xagarukko. Odim mat qax harish uullanne ubaa mutaa li'aa xibbi ko'l xibbe mishukko» yukko. Yesuus eekka yaa «Qoossaa macceesoo macci yookkok macceesona» yaa sagara iimaa'aa wocukko. Ixxi losaan oo kobi'llishshi mayyimda'e ihukkisa xa'mmito'aare Yesuus dabaraa «Waa'i adilla'n bikkina manniinsi daphphukkoka laqqakkamisina ki'nnuwwina lachchi uwwamaakko. Ihukkaarem mulli keenina moo'llu'uuyyim hindihitambee'isina, macceessu'uuyyim qoossitambee'isina kobi'llishshinnette» yukko. Odim Yesuus «Kobi'llishshik tirat kane; sire'oom Waa'i sagara. Gooqqi inqenne ubu sire'i moo'isookkok Waa'i sagara macceesso'i keeno. Macceessa'a lasage Sheexaanchi waaraa ixxuwwi amma'nnita'a gattambee'isa sagarooma wodaniinsi elleexxaa urookko. Kinanne ubu sire'i moo'isookkok Waa'i sagara macceessam ammane liiranchinne aa'llam keeno. Ihukkaarem ixxuwwi xaph bee'i keeno. Oo keen amma'nnito'ok ammanoominatte bagaan keenanchi afoo ammane ubbamo. Utti lambe'enne ubu sire'i moo'isookkok Waa'i sagara macceessam keeno. Ihukkaarem macceessa'a hee'llu'uuyyim ka uulli heechchi sawwit, goddii heellii ixxuwwa xagarukkaare ixxuwwik mish waaggaa bi'ukko. Harish uullanne ubu sire'i moo'isookkok macceesso'i Waa'i sagara amma'nnamaakkoo er wodanonne qoxxissa'a amaxximminne iyyaqqita'a misha mishsham keeno. Odim Yesuus «Ayyim caakka caakkisaa aagoo manni caakka moo'oo'isina qoffit beyyonne dissookko bagaan caakki hanenne sanfo ifiisooyyo; te'im ara'i woronne dissooyyo. Ee bikkina caakkoo'n daphphaa te'im la'amoo'n maaxamaa gatoo luwwi ma'lluchchim bee'e. Kabadem ki'nnuwwi hinkid macceessakkamda'e la'aqqehe. Mashka'oomim yoohaannina edamaa uwwamookko; bee'aanniinsi ‹Iina yookko› yaa sawwoo qaxichchom massakkamo» yukko. Yesuus amaa ixxi abbaayyuwwii Yesuus beyyo waarammukko. Ihukkaarem manni lophphu bikkina ixxi beyyo affeena xanto'oyyo. Ee bikkina «Kiyyummaa kiyyabbaayyuwwii keese hassa'a u'llummanne uullito'ookko» yakka'a Yesuusina kurakko'o. Ihukkaarem Yesuus ixxuwwina dabaraa «Iyyummaa iyyabbaayyuwwii Waa'i sagara macceessa'a egettam keeno» yukko. Mat ayyaamo Yesuus ixxi losaaninnem wongiranne aagaa «Ki'llehe; ka dambalaq eeqidonne fillona» yukko. Ixxuwwim matteena ki'llo'o. Wongiranne aagga'a mattonam Yesuus diriirukko. Ee dambalaqannem malaayyaam hambu'llam ki'aa wongiranne wo'i wo'mmeena ihu bikkina u'nnantam hee'llo'o. Ixxuwwim Yesuus beyyo matta'a diriiriinsi baqaa'lla'a «Moollanna! Moollanna! Neese beeddinummo!» yito'o. Yesuusim baqaa hambu'llamaa womooraa ijaajukko. Oo hambu'llamii womoorii uullukkaare lophphaakkoo cawwimmi ihukko. Ixxim ixxuwwina «Ki'nnuwwik amma'nnat hannonnette?» yukko. Ixxuwwina'i ixxuwwim «Hore'em hambu'llamaa womooraa ijaajukkaare ixxuwwim ijaajantamuullak kuk ayyette?» yita'a baddito'o; maalalto'ome. Ee lasage ixxuwwi Galii'l eeqidonne yoo Geeraaseena yakkam uulla affo'o. Dambalaqiinsi Yesuus firukkisam habus amadaakkoo mat manchi ee beero'iinsi firaa Yesuusinne edamukko. Oo manchim lobakat ammaniinsi ki'isaa eddechcha edde'oo'n waammuwwi beyyonne hee'am hee'ukko bagaan minenne hee'am hee'ukkoyyo. Ixxim Yesuusa moo'u ammanenne Yesuus illagenne ubaa yooqax sagar hundinnem «Hundam xanoo Waa'i Beet Yesuusa! I woshshanne keese mah aagisaate? Eese barche'e issitoobee'isina an keese uunxoommo!» yaa laarukko. Eehid yu mashka'im oo habus ee manchiinsi firoo'isina Yesuus ijaaju bikkinatte. Ee mancho oo habus amadukkaanniinsi lobakat amman ihaa hee'u bikkina chimchiminnee xaarinnee karakka'a egeraan egeram hee'ukko. Ihukkaarem ee karakko'i chimchimmuwwa muransaa xaaram iiqansaa habus ee mancho agaa udma'a massam hee'ukko. Yesuusim «Ki summi ayyette?» yaa xa'mmukko. Ixxom dut habus amadaa hee'u bikkina «I summi Gogototte» yaa dabarukko. Oo habusim «Neese tungibee'i baallenne aagissitte» yita'a Yesuusa uunxito'o. Ee ammane ee beyyonne yoo duu'n gabonne lobakat boonke'i allaachchi allaa'llam hee'ukko. Ixxuwwim «Ee boonke'i allaachchenne aangonnihe?» yita'a uunxito'aare Yesuus «Mattakka'a aaggehe» yukko. Ee lasage manchiinsi habus firaa ee boonke'i allaachchenne aagukko. Oo boonke'i allaachchim sagadanne aad didiyaa maraa dambalaq woronne ubaa xuuxamukko. Boonke'i allaaraan ee ihu luwwa moo'llo'i ammanenne gibba'a matta'a beero'onnee gattennee ee woshsha kutto'o. Ee lasage manni ee ihu luwwa moo'eena Yesuus beyyo waarukko. Ixxuwwim habus firu manchi fayye'aa eddechcha edde'aa Yesuus lokki beyyonne afuuraakkoo moo'lla'a baddito'o. Ihukkaarem eekka moo'lla'a hee'llo'i manni habus amadaa hee'u manchi hinkid fayye'uda'e kutto'o. Geeraaseenannee Geeraasee'n uulli kululleetannee hee'llam manni hundim lobakata baddito'i bikkina ixxuwwiinsi annanni ihaa maroo'isina uunxito'aare wongiranne aagaa Yesuus uraa marukko. Habus firu manchim Yesuusina «An kiinninne maqirem maroommo» yaa uunxukko. Ihukkaarem Yesuus ixxena «At ki mine daba'llitaa mattaa Waa'i kiina issu luwwa kure» yukko. Ixxim Yesuus ixxena issu luwwa beero'oom hundannem alallaatukkuuyyi marukko. Yesuusa egeraa hee'u manni daba'llu ammanenne ixxo aa'ukko. Odim tommoo lam hiinchi hundam xiig dunamukkuuyyi hawwito'oo mat meentichcho hee'llo'o. Isem isena yoo amaxxa hundam qaraa'l mannina guullita'a fayye'lleena xanto'oyyo. Isem afaree'n kollinne waatta'a Yesuus eddechchika kasa nakkito'o. Iseensi dunamam hee'u xiig ee ammanchom uullukko. Ee lasage Yesuus «Eese nakkukkok ayyette?» yukkaare hundim neese nakkinummoyyo yito'o. Ihukkaarem Pheexiroos «Moollanna! Manni hundima'i keese kibbaa gafe'oolla. Hinkid ‹Eese nakkukkok ayyette?› yitoolla?» yukko. Ihukkaarem Yesuus «Iinniinsi malaayyi firukkisa la'aammo; eese ayyetda'e nakkaakko» yukko. Oo meentichcho maaxanteena xantobee'isa laqqo'i ammanenne huxe'llu'uuyyi waatta'a ixxi lokkonne ubba'a manni hundi illagennem ixxo mahina nakkitoda'ee nakkito'i ammanchom fayye'llo'isaa kutto'o. Ixxim isena dabaraa «I landichche, ki amma'nnat keese fayyiisaakko. Xumminne mare» yukko. Yesuus wocukkuuyyim ee Ayihuxxi manni wixxixxi mi'n awwonsaanchi hee'u Iyyaaroos miniinsi asse'amaakkoo manchi waaraa «Ki landichcho leto'ookko; losisaancho hawwissitte» yukko. Ihukkaarem Yesuus eekka macceesaa «At amma'nne bagaan baddititte! Isem fayye'llamo» yaa dabarukko. Iyyaaroos mine Yesuus afaa Pheexiroosiinsi, Yohaannisiinsi, Yaaqoobiinsi, landichchi anniinsii amaansii bagaan ayyim ixxenne maqire mine aagoobee'isa hoorukko. Manni hundim ee landichchona «Aayye! Aayye!» yukkuuyyi wi'llam hee'ukko. Ihukkaarem Yesuus ee mannina «Wi'llitakkotte; landichcho diriitto'ookko bagaan leto'oyyo» yukko. Oo manni hundim landichcho leto'isa la'aa hee'u bikkina Yesuusanne osarukko. Ihukkaarem Yesuus ee landichchoka anga amadaa «Landichche, iimihe!» yukko. Ee lasage isek foor daba'llaa ee ammanem iimito'o. Yesuusim «Ittam luwwa uwwehe» yukko. Ee landichchok amaa annii maalalto'o. Ixxuwwim ee ihu luwwa ayyenam kuttambee'isa Yesuus ijaajukko. Tommoo lamem losaano Yesuus ixxi beyyo mat issaa weeshaa habusa fissitamisinaa jabbi hundiinsim fayyiissamisinaa malaayye uwwukko. Ixxuwwim mannina Waa'i adilla'n bikkina alallaattamisinaa jabbaanom fayyiissamisinaa asse'ukko. Ixxim ixxuwwina «Ki'nnuwwi googina bicci ihukko te'im can ihukko te'im hurbaat ihukko te'im diinat ihukko te'im lago'i eddechchi ihukko maham amaddakkotte. Ayyi minem koyyinano aaggakkolas ee gattiinsi fittakkeebe'e ee minenne afuullehe. Ayyi beyyonnem ki'nnuwwa aa'akkobeelas ee beyyo uttakka'a fittakkam ammane ki'nnuwwi lokkiinsi dira giggissehe. Oohim ‹Ki'nnuwwi quuxo› yimmi mare'e» yukko. Ee bikkina ixxuwwi fitta'a mishiraachchi sagara gatti hundannem kuttu'uuyyii beyyi hundannem jabbaano fayyiissu'uuyyii matto'o. Ee iham hee'u luwwa hundam Galii'l uulla gassaanchi hee'u Heeroodis macceesu ammanenne ixxek mal bi'ukko. Mashka'oomim mat mat manni «Yohaannis lehiinsi ki'aakko» yitam hee'llo'o. Mulli keenim «Eeliyaas waaraakko» yitam hee'llo'o. Odim mulli keenim «Eraa'l hiraagaaniinsi mat ki'aakko» yitam hee'llo'o. Ee bikkina Heeroodis «Yohaannisika gaanje mussiisummo. Eehaare ku ixxi bikkina wocakku'uuyyi macceesummok ayyette?» yaa Yesuusa moo'eena mixukko. Awwonaanim asse'anto'i beyyiinsi daba'llita'a waatta'a issito'i luwwi hundam Yesuusina kutto'o. Yesuusim ixxuwwa annanni issaa Beetesaayid beero'o amadaa marukko. Eekka laqqo'i ammanenne lobakat manni ixxo laseesso'o. Ixxim ixxuwwa aa'aa Waa'i adilla'n bikkina kurukko. Fayye'immi hasisoo keenom fayyiisukko. Uulli hiimeena ihaa hee'u bikkina tommii lamem losaanim ixxi beyyo waatta'a «Neese yoommine'ek udma'annetti ihu bikkina ku manni ka kululleetanne yoo gattuwwanne matta'a gattamisinaa ittam luwwa siixxitamisinaa geegeese» yito'o. Ihukkaarem Yesuus ixxuwwina «Ka mannina ittam luwwa ki'nnuwwi uwwehe» yukko. Ixxuwwim dabatta'a «Ka manni hundinam ihoo hurbaata beero'o mallaa bito aa'nnumbeelas niina onti xeffo'i qorosho'iinsii lam qurxumme'iinsii bagaan bee'e» yito'o. Ee beyyonne onti kuma ikkamqax manni hee'llo'o. Yesuusim ixxi losaanina «Ontayyi ontayyi issitakka'a afuussehe» yukko. Ixxuwwim ixxi yukkisa issita'a hundam afuussito'o. Yesuusim ontem xeffo'i qorosho'oo lamem qurxumme'ee aa'aa iimane moo'aa Waa'a galaxxukko. Ee lasage mannina uwwitamisina iiqaa losaanina uwwukko. Manni hundim itaa goddaa gatu giggira tommonnee lam sanfonnee wonshita'a ki'isso'o. Mat ayyaamo Yesuus mullam Waa'a uunxukkuuyyi ixxi losaan ixxi beyyo waatto'o. Yesuus ixxuwwina «Manni eese ayyette yoolla?» yaa xa'mmukko. Ixxuwwim dabatta'a «Mat mat keen ‹Xammaqaanchi Yohaannisatte› yitamuulla. Odim mulli keen ‹Eeliyaasatte› yitamuulla. Mulli keenim ‹Eraa'l hiraagaaniinsi mat ki'aakko› yitamuulla» yito'o. Yesuusim ixxuwwina «Eehaare ki'nnuwdu eese ayyette yitakkamuulla?» yukkaare Pheexiroos dabaraa «At Kiristoosatte» yukko. Ihukkaarem Yesuus eekka ayyenam kuttambee'isa qoxxisaa ijaajukko. Odim Yesuus ixxuwwina «Manchi Beet lobakata hawwimmi hasisookko. Ixxom lommanni, qeessa awwonsaanii Seera losisaanii sabbamoo shitamomee. Ihona bagaan saxxi ballanne lehiinsi ki'ookko» yukko. Odim Yesuus hundinam «Ayyim eese awwoneena hasulas ixxi gaga lagona. Ixxim ballina ballina lehina gudaa eese awwonona. Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok hundim ixxi foore gatisookko. Mat manchi ka uulli amaxxa hundam siixxaa ixxeka foore bi'isuta'n ixxena maha awwaadookko? Ayyim eesennee i sagarannee tuurulas Manchi Beet ixxi lombinne, Anni lombinnee keesammi asse'amaa'n lombinnee waaroo ammane ixxonnem tuurookko. Hanqinam an ki'nnuwwina kuroommo; ka beyyonne yo'i keeniinsi Waa'ika adillano moo'lloo'n gaassita'a letambee'i keen yo'o» yukko. Yesuus eehid yukkaanniinsi sadeenti balla ihooqaxa ihaakkoohaannonne ixxenne maqirem Pheexiroosa, Yohaannisaa Yaaqoobaa amadaa Waa'a uunxeena duuna firukko. Waa'a uunxukkuuyyim ixxek illi kolli mulli hagaranne daba'llukko. Ixxi eddechchim belecce'oo qadaalli ihukko. Oono'o! Lam manni ixxenne maqire atoorattam hee'llo'o. Ixxuwwim Muse'ettee Eeliyaasattee hee'llo'o. Oo lombinne moo'anta'a atoorattam hee'llo'i woshshim Yerusaalee'm beero'onne Yesuus lehimminne Waa'ika sawwite hinkid wonshooda'ette hee'ukko. Ihukkaarem Pheexiroosaa Pheexiroosinne maqire hee'llo'i keenoo kee'mmaalli diriichchi amadaa hee'ukko. Ixxuwwim baqito'i ammanenne ixxi lombaa ixxenne maqire uullita'a hee'llo'i lamem manchoo moo'llo'o. Oo mannim Yesuusiinsi annanni ikku'uuyyi Pheexiroos Yesuusina «Moollanna! Ka beyyonne hee'immi niina danaam ihu bikkina sas daasa kiina mato, Muse'ina mato, Eeliyaasina mato banxona» yaa mayyuda'e la'oo'nnim wocukko. Pheexiroos eekka woconam umbu'l waaraa ixxuwwa ifiisukko. Ixxuwwim umbu'l ifiisu ammanenne baddito'o. Ee umbu'l woriinsim «An doo'llummi i Beet kane; ixxeensim macceessehe!» yoo sagar waarukko. Oo sagar macceesamaa lasage xale'i Yesuusa moo'llo'o. Ee ammane ixxuwwi ee moo'llo'i luwwa ayyenam maham kuttoo'n cawwita'a utto'o. La'm balla duuniinsi ixxuwwi dillito'i ammanenne lobakat minaadab Yesuusinne edanto'o. Yesuus dabaraa «Ka amma'nnatbee'i boqqi qarancha? An hinkaa'n amman afeebe'e ki'nnuwwinne hee'oommo? Hinkaa'n amman afeebedu ki'nnuwwika iyyaqqoommo?» yaa «Huno'o, ki beeto keyye eebe» yukko. Oo beet waaronam habus uullanne ubbuusaa ga'nnansukko. Ihukkaarem Yesuus ee habusa ijaajaa beetooma fayyiisaa ixxi annina dabaraa uwwukko. Ixxuwwi hundim Waa'ika lob malaayye moo'lla'a maalalto'o. Yesuus issu luwwi hundannem manni hundim maalaltonam Yesuus ixxi losaanina «An ki'nnuwwina kuroommoka qoossitakka'a macceessehe. Manchi Beeto manni anganne higisakka'a uwwakkamo» yukko. Ihukkaarem oo woshshi ixxuwwiinsi daphphaa hee'u bikkina mayyimda'e qoossiteena xanto'oyyo. Ee woshsham ixxo xa'mmiteena baddito'o. Losaan «Ni lambe'iinsi lophphookkok ayyette?» yita'a fitancha asheetto'o. Yesuusim ixxuwwi woda'nneka la'aa ciilichcho massaa ixxi gadanonne uullisukko. Uullisaa ixxi losaanina «Ki'nnuwwi lambe'iinsi hundiinsi hoffok hundiinsim lobane. Ee bikkina ayyim ka ciilichcho i summinne aa'ookkok eesem aa'ookko. Odim eese aa'ookkok ayyim eese asse'ukkokam aa'ookko» yukko. Yohaannis Yesuusina «Moollanna! Mat manchi ki summinne habusa fissukkuuyyi moo'nnaa niinninne maqire keese awwonoobee'i bikkina fisseena hoollummo» yukko. Ihukkaarem Yesuus ixxena dabaraa «Ki'nnuwwa saboobee'ek ki'nnuwwan ihu bikkina hoottakkotte» yukko. Yesuus iimane maroo amman hincu ammanenne Yerusaaleema mareena murte'aa ki'ukko. Ixxim ixxeensi gaassita'a mattamisina asse'amaano asse'ukko. Oo asse'amaanim hundi luwwam gudisseena Samaare'i gatte matta'a aaggo'o. Ihukkaarem Yerusaaleema Yesuus maram hee'u bikkina ee beyyi manni ixxo aa'llo'oyyo. Ixxi losaan hee'llo'i Yaaqoobii Yohaannisii eekka moo'llo'i ammanenne «Moollanna! Iimaniinsi giir dillaa ixxuwwa itoo'isa issinona hassoohonnihe?» yito'o. Ihukkaarem Yesuus ixxuwwi kollonne daba'llaa «Manchi Beet waarukkok manni foore gatiseenatte bagaan bi'iseenayyo» yukko. Ixxuwwim mulli gatte matto'o. Mattu'uuyyim googonne hee'llonam mat manchi Yesuusina «At mattoo beyyi hundam keese awwonaa maroommo» yukko. Yesuusim ixxena dabaraa «Wengereellina bar yookko. Iimaninne bararoo cii'inam do'n yookko. Ihukkaarem Manchi Beetina aagaa usheexxoo beyyim bee'e» yukko. Yesuusim mulli manchina «Eese awwone» yukko. Ihukkaarem oo manchi dabaraa «Moollanna! Gaassaa maraa iyyanna waammoommo» yukko. Yesuusim ixxena «Lehu keeno lehu keenim waammona; at uttaa mattaa Waa'i adilla'n woshsha alallaate!» yukko. Odim mullekim «Moollanna! An keese awwonoommo. Ihukkaarem gaassaa maraa i mi'n manna ‹Xumma hee'llehe› yoommo» yukko. Yesuusim dabaraa «Ayyim abuulleena kado'o amadaa laso daba'llaa moo'ookkok Waa'i adillanonne hee'eena labooyyo» yukko. Ee lasage Moollanni Yesuus mulli keenom lamarayyee lam manna doo'llukko. Ixxuwwam lam lam issaa ixxi maroo beyyoo beero'uwwaa hundam ixxeensi higga'a mattona asse'ukko. Ixxim ixxuwwina «Murakkam hurbaat lobakata. Ihukkaarem muroo keen hoffane. Ee bikkina hurbaaxxi annichchi baxaano hurbaaxxi muratina asse'oo'isina uunxehe. Mallehe; an ki'nnuwwa oro'i lambe'enne gereebbisa issaa asse'oommo. Ki'nnuwwim gonoon ihukko te'im can ihukko te'im caamma'i ihukko amaddakkotte. Ayyem googonne xummaatissakkotte. Ayyi minem aaggakkam ammane gaassitakka'a ‹Xummi ka minina ihona› yi'llehe. Ee beyyonne xumma iittoo manchi hee'ulas ki'nnuwwi xummi ixxonne usheexxookko. Xumma iittoo manchimdu ee beyyonne bee'ulas oo xummi ki'nnuwwinam daba'llookko. Baxaanchina diinat hasisoo bikkina ee minenne ki'nnuwwina uwwakko'i luwwa ittakku'uuyyii aggakku'uuyyii afuullehe bagaan miniinsi mine mattakkotte. Ayyi beero'om aaggakkam ammane ki'nnuwwa aa'akkolas hincu luwwa ittehe. Ee beero'onne yoo jabbaanom fayyiissehe. Ee beero'i manninam ‹Waa'i adillan hincaakko› yi'llehe. Ihukkaarem ayyi ammanem mat beero'o aaggakkam ammane ki'nnuwwamdu aa'akkobeelas ee beero'i bobba'anne fittakka'a ‹Ki'nnuwwi beero'iinsi ni lokkonne amaxxamu dira ki'nnuwwina xuur ihona giggissinaammo. Ihukkaarem Waa'i adillan hincukkisa qoossitakka'a laqqehe› yi'llehe. An ki'nnuwwina kuroommo; Waa'i oogatoo ayyaamo ee beero'iinsi Soddo'm beero'ina sholle'ookko» yukko. «Aayye Koraazeena! Aayye Beetasaayda! Ki'nnuwwanne issamu aganni Xiiroosannee Siidoonannee issamaakkoota'n xiddi eddechcha edde'lla'a gii'l buchchanne afuutta'a gaassim baaxiilo biiraa yitam hee'llo'o. Ee bikkina Waa'i oogatoo ayyaamo ki'nnuwwiinsi Xiiroosinaa Siidooninaa sholle'ookko. Qifirinnaahooma, at iimane affaattoollayyonnihe? Si'oolanne dillitootto» yukko. Odim Yesuus ixxi losaanina «Ki'nnuwwi woshsha macceesookkok iikkam macceesookko. Ki'nnuwwa sabookkok eesem sabaakkoohane. Eese sabookkokim eese asse'ukkoka sabaakkoohane» yukko. Lamarayyii lamem losaanim «Moollanna! Habusim ki summinne niina kaa'amaakko» yitu'uuyyi liiranchinne daba'llito'o. Yesuusim ixxuwwina dabaraa «Sheexaan iimaniinsi banqisa ubukkuuyyi moo'aammo. Oono'o! Hamashshaa ginxa yakkam daquuraa hancaaccakkona malaayye uwwaammo. Odim ki'nnuwwi diina'i hundam kaa'llakkamisina malaayye uwwaammo. Mahim ki'nnuwwa hawwodooyyo. Ihona bagaan habus ki'nnuwwina kaa'amu bikkina liirantakkotte. Ihukkaarem ki'nnuwwik summi iimanenne kitaabamu bikkina liirammehe» yukko. Ee ammanchom Yesuus Keesammi Ayyaaninne liiramaa «Iimaninaa uullinaa Moollanni Iyyanna! Kaka lachchaammuwwiinsii qoolluwwiinsii daphphaa'llaa ciilluwwina caakkissittaannina keese galaxxoommo. Eeyya Iyyanna, kuk ki doo'lla. Hundi luwwam Iyyanni iina uwwookko. Beet ayyetda'e ihukkisa iinniinsi bagaan ayyim la'ooyyo. Te'im Annam ayyetda'e ihukkisa Beetiinsii Beet la'iseena doo'llukkaanniinsii bagaan la'ookkok ayyim bee'e» yukko. Ee lasage Yesuus ixxi losaa'n kollonne daba'llaa xale'i ixxuwwina «Ki'nnuwwi moo'llakkamoka moo'ookkok maasse'amaakkoohane. An ki'nnuwwina kuroommo; hiraagaa'nnek dutii adilluwwii ki'nnuwwi moo'llakko'oka moo'lleena mixxo'o; ihukkaarem moo'llo'oyyo. Ki'nnuwwi macceessakkamokam macceesseena mixxo'o; ihukkaarem macceesso'oyyo» yukko. Seera erisa la'oo mat manchi Yesuusa keeneena «Losisaancho, heer heerina hee'oo heechcha siixxeena maha isso?» yaa xa'mmukko. Yesuusim ixxena dabaraa «Seeranne kitaabamukkok maruwwa? Qananaa'llaa qoossittodu hinkidette?» yukko. Oo manchim dabaraa « ‹Ki Moollanni Waa'a wo'm wodaninne, wo'm foorinne, wo'm malaayyinnee wo'm tiirinnee iitte. Odim ki beshichcho ki gaqqisa iitte› yoohane» yukko. Yesuusim dabaraa «Danaamisa dabattaatto; heer heerina hee'lleena eekka isse» yukko. Ihukkaarem oo Seera la'oo manchi ixxi gaga eran issaqqeena hasu bikkina «I ollakkichchi ayyette?» yukko. Yesuusim dabaraa «Mat ayyaamo mat manchi Yerusaaleemiinsi Iyyaarko'i beero'o dillukkuuyyim fanguwwi ixxo amadda'a bogga'atii aphphissa'atii lehinaa heechchinaa lambe'enne ubbuussa'a matto'o. Eehid ihaakkoohaannonne mat qeessichchi ee googinne dillukkuuyyi oo manchi ubukkisa moo'u ammanenne shiininne uraa higukko. Ee'isam odim Leewi'i moollik mat manchi ee beyyo waaraa eekka moo'u ammanenne shiininne uraa higukko. Ihukkaarem mat Samaarekkichchi ee googinne marukkuuyyim oo manchi ubu beyyo afaa ixxo moo'u ammanenne qishixxukko. Ixxim ee manchi beyyo maraa madanne zaytaa woyi'n diqaasaa issaa karukko. Ee lasage ixxi hallichchonne saa'llisaa koyyi garoo mine massaa jabbisukko. Oo Samaarekkichchim la'm balla ee koyyi mi'n annichchina lam diinaara fissaa uwwaa ‹Ka mancho jabbise. At kannonne eddaa ixxena fissitti luwwi hundam daba'llaa waaroommi ammane an kiina miqoommo› yukko. Fanguwwi anganne ubu manchina ee sasem manchiinsim ollakkichchi ihukkisa moo'isukkok kiina hinka labookko?» yukko. Ixxim dabaraa «Ixxena qishixxato moo'isu mancho» yukko. Yesuusim ixxena «Atim mattaa ee'isa isse» yukko. Ixxuwwi mattu'uuyyim Yesuus mat gatte aagukko. Ee gattennem Maarta'a yakkam meentichcho is minenne ixxo aa'llo'o. Isenam Maaraame yakkam aayya hee'llo'o. Isem Moollanni lokki gadanonne afuutta'a losisoo losishsha macceessam hee'llo'o. Ihukkaarem Maarta'a lobakat baxinne matayyitam hee'llo'i bikkina ixxi beyyo matta'a «Moollanna! An mullam hawwona iyyaayya cawwita'a utto'is kiina kichche'isooyyonnihe? Kabadem ise iina hara'mmitona kure» yito'o. Ihukkaarem Moollanni isena dabaraa «Maartaa! Maartaa! At lobakat luwwina hawwitoollaa u'nnantoollaa. Ihukkaarem hasisookkok mat luchcho. Maaraame isena e'llookkoka doo'llito'ookko. Oohim iseensi hooramooyyo» yukko. Mat ayyaamo Yesuus mat beyyonne Waa'a uunxam hee'ukko. Waa'a uunximma guullu ammanenne ixxi losaaniinsi mat «Moollanna! Yohaannis ixxi losaanina Waa'a uunxato losisukkisam atim neese losise» yukko. Ixxim ixxuwwina dabaraa «Waa'a uunxitakkam ammane ‹Niyyanna! Ki summi keesamaakkoohan ihona. Ki adillan waarona. Ballina ballina hasisoo hurbaata niina uwwe. Neese hawwodu keenina hundinam neese haafinoommisam ni baaxiilom haafihe. Keenanchanne aagissitte› yitakka'a uunxehe » yukko. oo ixxi beshichchi mi'n worinne ihaa ‹Eese hawwissitte! U'llummi xufamaakko; i oosim iinninne ara'anne iinse'aakko. An ki'aa maham uwweena xanoommoyyo› yuta'n oo manchi ixxena beshichchi ihu bikkina ki'aa uwweena hasubee'aarem hawwisu bikkina hasu luwwi hundam ki'aa uwwookko. «Odim an ki'nnuwwina kuroommo; xa'mmehe, ki'nnuwwina uwwamookko. Hassehe, siidamookko. U'llummanne uullitakka'a weeshshehe, ki'nnuwwina fooqookko. Mashka'oomim xa'mmukkaannina ayyenam uwwamookko. Hasookkokim siixxookko. U'llummanne uullaa weeshoohaanninam fooqookko. Ki'nnuwwi lambe'iinsi ixxi beet qurxumme'e xa'mmukkaare qurxumme'i bikkenne hamashsha uwwookkok te'im quunqa xa'mmukkaare ginxa yakkam daquura uwwookkok ayyette? Eehaara'i ki'nnuwwi jor keen ikkakko'isam ki'nnuwwi oosina er luwwa uwwimma laqqakkolas iimanenne yoo Waa'i ixxo uunxoo keenina Keesammi Ayyaana eehanniinsi lobakata lonsaa uwwooyyonnihe?» yukko. Mat ayyaamo Yesuus mat manchiinsi suume duussaa amadaakkoo habusichcho fissam hee'ukko. Habusichchim firu ammanenne oo suume duudaa hee'u manchi wocimma asheerukkaare manni maalalukko. Ihukkaarem manniinsi mat mat keen «Ixxi habusa fissookkok habus adil Bi'eelzeebul uwwu malaayyinnette» yito'o. Odim mulli keenim ixxo keenteena Waa'i beyyiinsi maalalsiisoo mare'e moo'isoo'isina hassam hee'llo'o. Ihukkaarem Yesuus ixxuwwi woda'nneka la'aa «Mat adil gassoo uulli manni ixxuwwina'i ixxuwwim orantaman ihulas oo adillan bi'ookko. Ee'isam ixxina'i ixxim annanni ihoo abaroosim ubookko. Ki'nnuwwi eese ‹Ixxi habusa fissookkok habus adil Bi'eelzeebul uwwu malaayyinnette› yitakkolas Sheexaan gassoo habus issena'i issem orantaman ihulas Sheexaa'n adillan hinkid qoxxaa uulleena xanookko? Bi'eelzeebul uwwu malaayyinne an habusa fissoomman ihulas ki'nnuwwi awwonaan ayyi malaayyinne fissitamo? Ee bikkina ki'nnuwwi huushanchanne ixxuwwi oogattamo. Ihukkaarem an habusa fissoommok Waa'i malaayyinnette ihu bikkina Waa'i adillan ki'nnuwwi beyyo waaraakko. «Mat malaayyaam manchi o'l mu'uta amadaa ixxi mine egerulas ixxi mu'ut nakkamooyyo. Ihukkaarem ixxeensi lophphoo mulli qoxar ixxenne oramaa kaa'ulas ixxi amma'nnaa hee'u o'l mu'uta hundam ixxeensi hooraa massookko. Ee lasage ixxeensi bogaa massu luwwa baxxansookko. Iinninne mateeyyoom bee'ek iinninne uullixxamookko. Iinninne wixxaa'oobee'ekim binnaa'ookko. «Jor ayyaan mat manchiinsi firoo ammane usheexxoo beyyo hasukkuuyyi wobee'i udma'anne kululookko. Usheexxoo beyyomdu siidubeelas ‹Firaa waarummi i mi'n beyyom daba'llaa maroommo› yookko. Daba'llaa maroo ammane oo ixxi firu min fii'amaa gudaakkookkoka siidookko. Ee lasage maraa ixxeensi baassam jor ayyaannuwwika lamara amadaa waarookko. Ixxuwwim aagga'a eekke'e hee'llamo. Ee manchik duuha'i eraa'llaanniinsi lasaqqek lobakata jorookko» yukko. Yesuus eekka wocukkisam ee minaadaphphi lambe'iinsi mat meentichcho sagara iimaa'lla'a «Keese qaru godabii iiccitti anuunii maasse'amaakkoohane» yito'o. Ihukkaarem Yesuus dabaraa «Maasse'anto'i keena'i Waa'i sagara macceessa'a egettam keeno» yukko. Minaadab exxukkuuyyi maru ammanenne Yesuus «Ka doolli manni jor manna. Ixxuwwi maalalsiisoo mare'e moo'lleena hassam keeno. Ihukkaarem hiraagaanchi Yoonaasanne ihu mare'iinsi bagaan mulli mare'i ixxuwwina uwwamooyyo. Naanaawe'i mannina Yoonaas mare'i ihukkisam Manchi Beetim ka doolli mannina mare'i ihookko. Woroo'n qarinne yoo uullina adil hee'llo'i Saaba'am Salamoonika qoorooma moo'lleena uulli tochchiinsi waatto'i bikkina Waa'i oogatoo ayyaamo ka doolli manninne maqirem ki'lla'a ka doolli mannanne oogattamo. Ihukkaarem Salamooniinsi lophphookkok ka beyyonne yookko. Ee'isam odim Naanaawe'i uulli manni Yoonaas kuru woshsha macceessa'a baaxiilo biiraa yita'a daba'llito'i bikkina Waa'i oogatoo ayyaamo ka doolli manninne maqirem ki'lla'a ka doolli mannanne oogattamo. Ihukkaarem Yoonaasiinsi lophphookkok ka beyyonne yookko. «Ayyim caakka caakkisaa lasage daphphit beyyonne te'im sanfi woronne dissooyyo. Ihukkaarem aagu manni caakka moo'oo'isina qoffit beyyonne dissookko. Ki'nnuwwik illi ki'nnuwwi orachchina caakka. Ki'nnuwwik illi fayya'i ihoo ammane ki'nnuwwi orachchi hundim caakka. Ihukkaarem ki'nnuwwik illi fayya'i ihubee'i ammane ki'nnuwwi orachchi hundim tuunsaakkoohane. Ee bikkina keesenne yoo caakki tuunsoobee'isa ege'lle. Ki orachchonne tuunsi mat beyyonnem hee'oobee'isa hundem beyyim caakkaakkoohan ihulas ki orachchi hundim danaamisa caakkisoo caakkisa caakkaakkoohan ihookko» yukko. Yesuus wocaa gullukkisam mat Farisaawekkichchi ixxi minenne balli hurbaata itoo'isina xa'mmukko. Ee bikkina ee Farisaawekkichchi mine maraa maaddanne afuurukko. Balli hurbaata iteena Yesuus gaassaa anga aanshaqqubee'isa moo'u ammanenne oo Farisaawekkichchi maalalukko. Moollannim ixxena dabaraa «Ki'nnuwwi Farisaawe'uwwi humbullikaa made'ikaa hane aanshitakkamo. Ihukkaarem ki'nnuwwi woronne bogimmii jollii wo'mmaakkoo keeno. Ki'nnuwwi ka qawwuwwa! Hane qooccu Waa'i woro qooccukkoyyonnihe? Ihukkaarem woronne yookkoka buxina uwwehe; hundem luwwim ki'nnuwwina muccur ihookko. «Ihukkaarem ki'nnuwwina Farisaawe'uwwina aayye! Ki'nnuwwi kosaratiinsi, qantalaamiinsii duubbi enji hundiinsii tommiinsi mato Waa'ina uwwitakkamo. Ihukkaarem hanqaa Waa'i iittimmaa uttakko'ookko. Ee keeno uttakkota'nnim mulli keenom issimmi hasisam hee'ukko. Ki'nnuwwi Farisaawe'uwwa, wixxixxi minneewwanne hundiinsi e'lloo beyyonne afuuchchaa meerannem manni ki'nnuwwa xummaatisonaa iittitakkam bikkina aayye! Odim manni la'oo'n haninne taakke'oo mare'i bee'i waamma labbakkam keen ikkakko'i bikkina aayye!» yukko. Seera la'oo keeniinsim mat Yesuusina «Losisaancho, at ka'isa wocimminne neese game'llitoolla» yukko. Yesuusim dabaraa «Ki'nnuwwi kee'mmaalli iyyo mannanne iyyiissakka'a ki'nnuwwaanninne angi maxxaarinnem nakkitakkambee'i bikkina Seera laqqakkam keenina aayye! Ki'nnuwwi anno'i hiraagaano shito'ookko. Ee kee'n waamma wereeggissakkam bikkina ki'nnuwwina aayye! Ki'nnuwwi anno'i shito'i kee'n waamma wereeggissakkam bikkina ixxuwwi jor baxonne iittantakko'isa moo'issakkamuulla. Ee bikkina Waa'ik qooroom ‹An ixxuwwina hiraagaanoo asse'amaanoo asse'oommo. Ee keeniinsim kollo shitamo. Mulli keenom hawwissamo› yoolla. Ee bikkina uulli qooccamukkaanniinsi ki'isaa dunamu hiraagaa'n xiigina ka doolli manni xa'mmamookko. Oohim Aabeel xiigiinsi ki'isaa Keesammi mi'n lambe'ennee Waa'ina kitima kitimakkam mu'uxxi lambe'ennee dunamu Zakkaaryaas xiiganne afeebe'ette. Eeyya, an ki'nnuwwina kuroommo; ixxuwwi xiig ka doolli manniinsi miqisamookko. Ki'nnuwwi Seera laqqakkam keen lachchika gooca fooqaa'aancho amaddakko'i bikkina ki'nnuwwina aayye! Ki'nnuwwi gagim aaggakko'oyyo. Aagoo keenom qoltakko'ookko» yukko. Yesuus ee beyyiinsi mareena ki'ukkaare Seera losisaanii Farisaawe'uwwii ixxi wocoo woshsha sabimmaa kee'mmaalli xa'mmichcha xa'mmimmaa asheetto'o. Eekkam issitam hee'llo'ok ixxi wocoo woshshinne ixxo digaaddeena hasso'i bikkinatte. Ee ammanenne dut kum manni wixxito'o. Manni lophphimmiinsi ki'ukkok ixxuwwina'i ixxuwwim hancaacantam hee'llo'o. Yesuusim gaassaa ixxi losaanina «Farisaawe'uwwi ursho'iinsi oohim ixxuwwi labishshiinsi ege'llehe. Caakkoobee'isa ifiisamu luwwi te'im la'amoobee'isa maaxamu luwwi ma'lluchchim bee'e. Ee bikkina tuunsonne wocakko'i luwwi hundim caakkanne macceesamookko. Odim du'm woronne hashaashshakka'a woccakko'i luwwi hundam meeranne alallaatakkamo. Odim Yesuus «I beshshuwwa, an ki'nnuwwina kuroommo; maara shimmiinsi higga'a mulleka maham issiteena xantambee'i keeno badditakkotte. Ihukkaarem ki'nnuwwi ayye badditakkamda'e an ki'nnuwwina kuroommo; shaa ki'aa xoo'oobee'i giiranne darabeena malaayyi yoo Waa'a baddehe. Eeyya, ixxo baddehe! «Onti waaxiiggeewwi lam saantibina biteesantamuullayyonnihe? Waa'i illagenne ixxuwwiinsi matim xadamooyyo. Ki'nnuwwik horoo'l saraatam ihuta'n hundim xigamaakkoohane. Ee bikkina ki'nnuwwi badditakkotte! Ki'nnuwwi dut waaxiigeensi lophphitakkamo. «An ki'nnuwwina kuroommo; manni illagenne eese lagoobee'eka hundam an Manchi Beetim Waa'i asse'amaa'n illagenne lagoommoyyo. Ihukkaarem manni illagenne eese lagookkoka Waa'i asse'amaa'n illagenne anim lagoommo. Odim Manchi Beetonne jora wocukkaannina ayyenam haafamookko. Ihukkaarem Keesammi Ayyaaninne game'llamoohaannina haafamooyyo. Ixxuwwim ki'nnuwwa wixxixxi minneewwa, daannuwwi beyyoo gassaa'n beyyoo massitam ammane ‹Mayyinaa daballoommo?› Te'im ‹Hinkid yinaa woncoommo?› yitakka'a hawwitakkotte. Mashka'oomim ki'nnuwwi woccakkam luwwa Keesammi Ayyaan ee ammanchom losisookko» yukko. Minaadaphphi lambe'iinsi mat manchi Yesuusina «Losisaancho! Niyyanni niina lago'o uwwu amaxxa iyyabbaayyi iina baxxansoo'isina kure» yukko. Ihukkaarem Yesuus ixxena «Mancho, ki'nnuwwi lambe'enne eese daanni te'im baxxansaanchi issukkok ayyette?» yukko. Odim Yesuus hundinam «Mixan hundiinsim ki'nnuwwi qoxxitakka'a ege'llehe; mashka'oomim manchi foor amaxxi lobakatinaambee'e» yukko. Ixxim ixxuwwina kobi'llishshinne «Mat goddaanchi manchik uulli lobakat atoota uwwukko. Oo manchim ixxi wodanonne ‹Hurbaata wixxaa'oommi beyyi bee'u bikkina maha isso? Ka'isa issoommo; i gootalluwwa gindaa mulli geejji gootalluwwa baxoommo. Ee gootalluwwannem i hurbaataa mu'utaa hundam wixxaa'oommo. Ee lasage i foorina «Foore, lobakat hiinchina ihoo luwwi kiina wixxaakko. Usheexxe! Ite, agee liiramee» yoommo› yukko. Ihukkaarem Waa'i ixxena ‹Ate ka qawwa! Kaballi maaro'o ki foor kiinniinsi hasamaakko. At wixxaa'l luwwi hundim ayyan ihookko?› yukko. Ee bikkina ixxi gagina ka uulli amaxxa wixxaa'ukkok, ihukkaarem Waa'i illagenne buxichchi ihukkok ee manchisa» yukko. Yesuusim ixxi losaanina «Ee bikkina an ki'nnuwwina kuroommo; ‹Neese maha intoommo?› te'im ‹Maha edde'nnoommo?› yitakka'a kichche'llakkotte. Mashka'oomim hurbaatiinsi foor; eddechchiinsim orachchi lophphookko. Huno'llehe, iima'n qooraanta moo'llehe! Ixxuwwi wixxamoyyo te'im muttamoyyo te'im hurbaata aagissam gootalluwwi bee'e. Ihukkaarem Waa'i ixxuwwina ittam luwwa uwwookko. Cii'iinsi ki'nnuwwi lobakata e'llitakkamoyyonnihe? Ki'nnuwwiinsi kichche'aa ixxi heechchi doollenne mat balla exxeena xanookkok ayyette? Eehaara'i ki'nnuwwi ka hoffi luwwam issitakkeena xantakkambee'i keen ikkakkolas mulli luwwina mahina kichche'llakkamuulla? «Odim fiit hinkid li'ooda'e moo'llehe! Fiit baxooyyo te'im eddechcha dadooyyo. Ihukkaarem an ki'nnuwwina kuroommo; adil Salamoonim ixxi lombinne hundinnem ee fiitiinsi matisam mishisoo eddechcha edde'ukkoyyo. Ki'nnuwwi ka amma'nnat hoffe'aakkoo keeno! Kaballa moo'amaa soodo giiranne darabamoo hixe Waa'i ka'isa wereeggisaa eddeesoohan ihulas ki'nnuwwina hundiinsim lonsaa eddeesooyyonnihe? Ee bikkina ki'nnuwwi ‹Neese maha intoommo?› te'im ‹Neese maha angoommo?› yitakka'a sawwitakku'uuyyi kichche'llakkotte. Ka uulli minaadab hundim eehanni bikkina sawwitamo. Ookki ki'nnuwwina hasisoo'isa ki'nnuwwina Anni Waa'i la'ookko. Ee'isiinsi Waa'i ki'nnuwwina adil ihoo'isina hassehe; oo hundim ki'nnuwwina uwwamookko. «Ki'nnuwwik Anni Waa'i ki'nnuwwina adillano uwweena liiramu bikkina hoffi allaachchisa ikkakko'i keen badditakkotte. Ki'nnuwwina yoo luwwa biteessakka'a buxina uwwehe. Gamaan afoobee'i beyyonne bilim itoobee'i beyyonne iimanenne beeddoobee'i amaxxa ebeeroobee'i saaxinanne dissaqqehe. Mashka'oomim ki'nnuwwi amaxxi yoo beyyonne ki'nnuwwi wodanim ihookko. Odim Yesuus ixxuwwina «Ki'nnuwwika lamado lade'llakka'a guddehe. Caakkim caakkaakkoohan ihona. Ki'nnuwwi odim bollochcho'iinsi daba'llaa waaraa xufa qoccoo ammane qaqqissa'a fooqaa'lleena ixxuwwi moollanna egettam manna labbehe. Oo moollanni waaraa baqita'a egetto'oohaannonne afoo awwaadaan maassaammuwwa. Hanqinam an ki'nnuwwina kuroommo; oo moollanni gundanne lade'aa maaddanne ixxuwwa afuussaa ixxuwwina danaanookko. La'm baqitenne te'im saxxi baqitenne moollanni waaraa baqita'a egetto'oohaannonne afoo awwaadaan maassaammuwwa. Ihukkaarem ki'nnuwwi kaka laqqehe. Mi'n annichchi ixxi mine gamaan hinkammane waarooda'e la'uta'n ixxi mine hinaa aagona uwwam hee'ukkoyyo. Ki'nnuwwim Manchi Beet sawwitakkobee'i ammanenne waaroo bikkina guddakka'a ege'llehe» yukko. Pheexiroosim Yesuusina «Moollanna! Ka kobi'llishsha kuttoottok niinannii te'im hundinatteme» yaa xa'mmukko. Moollannim dabaraa «Moollanni ixxi mi'n abaroosina ammaninne hurbaata uwwoo'isina daanni issu amma'nnamaakkoo qoor gassaanchi ayyette? Moollanni waaroo ammane eehid issukkuuyyi siidamoo gassaanchi maasse'amaakkoohane. Hanqinam an ki'nnuwwina kuroommo; ee mancho oo moollanni ixxena yoo luwwanne hundannem gassaanchi issookko. Ihukkaarem oo gassaanchi ixxi tiironne ‹I moollanni qaqqiso waarooyyo› yaa goo'nnekaa meentikaa awwaadaano ganimmaa ee'isam hasukkisa itimma, agimmaa dimbimmaa asheerookko. Ihukkaarem ixxi moollanni ixxi egerubee'i ayyaamonnee la'ubee'i ammanennee waaraa ee gassaancho fillifillaa'aa muransaa ixxeka saamo amma'nnamoobee'i keeninne mat issookko. «Ixxi moollanni yu luwwa la'ukkuuyyi gudubee'i te'im issubee'i awwaadaanchi jorisa ganamookko. Ihukkaarem moollanni yu luwwa la'ubee'ek ixxo gansiisoo luwwa baxukkaarem sholle'aallisa ganamookko. Mashka'oomim lobakat luwwa uwwakko'i manchiinsi lobakatam hasakkamo. Lobakat yabo uwwakko'i manchiinsim lobakat luwwi hasamookko. «Oono'o! An waarummok uullanne giira xanqiseenatte. Oo giirim qaqqisaa aphphuta'n danaam hee'ukko. Ihukkaarem eesenne afoo hawwi yookko. Ookki iheebe'e usheexxat iina bee'e. Uullanne xumma eebeena waarummoka labissakka'atennihe? Eehideyyo! An ki'nnuwwina kuroommo; an waarummok annannooma eebeenatte. Kabadiinsi ki'isaa mat minenne hee'llam onti manchi lambe'enne annannoom ihookko. Ixxuwwiinsim sas manchi lam manchonne ki'llamo; lam manchi odim sas manchonne ki'llamo. Ixxuwwim anni beetonne, beetim annanne, ama landichchonne, landichchom amanne, ballo beetarenne, beetarem ballonne ki'lla'a annanni ikkamo» yukko. Odim Yesuus minaadabina «Oono'o, eelliinchi aagoo kollinne duuba moo'llakko'isam ‹Xeen ga'nneenatte› yitakkamo; yitakko'isam ihookko. Woroo'n qa'l hafachchi hafachchoohaare ‹Malaayyaam iibbi waareenatte › yitakkamo; yitakko'isam ihookko. Ki'nnuwwi ka labisaano! Uullikaa iima'nnekaa saarayyitakka'a laqqakkamo. Ihukkaarem ka doolle saarayyitakka'a laqqakkambee'ek mahinatte?. «Hanqa oogattakkambee'ek mahinatte? Ki diinakkichchi kasasaa daanni beyyo massoohaare daanni illage afisoo'n gaassitaa googonne hee'llittuuyyi iittanteena yakihe. Daanni illage afisulas daanni fooliisina higisaa uwwookko. Fooliisim karaxxi minenne aagisookko. An kiina kuroommo; guzumo'ika lasaanchi saantiba guullitaa miqqeebe'i afeebe'e ee karaxxi miniinsi fittooyyo» yukko. Ee ammane mat qax manni Yesuus beyyo waatta'a «Galii'l manni Waa'ina kitima hincaa'llonam Philaaxoos ee manna shukko. Ee manni xiigim ee kitiminne maqirem hamaaramukko» yita'a kutto'o. Yesuus ixxuwwina dabaraa «Ee Galii'l uulli mannanne eehido'i leh afukkok mulli Galii'l uulli manni hundiinsim lonsita'a jora baxxo'i bikkina labissakka'atennihe? Ee'isayyo; an ki'nnuwwina kuroommo; baaxiilo biira yitakka'a daba'llitakkobeelas ki'nnuwwim ixxuwwisam bi'llakkamo. Te'im Saalooma yakkam beyyonne kininne baxamu qeeraa'l min hanenne ubaa shu tomminaa sadeenti manchi bikkinaa maha sawwitakkamuulla? Oo manni Yerusaaleemanne hee'llam manni hundiinsim lonsita'a jora baxxo'oka labissakka'atennihe? Ee'isayyo, an ki'nnuwwina kuroommo; baaxiilo biira yitakka'a daba'llitakkobeelas ki'nnuwwim ixxuwwisam bi'llakkamo» yukko. Odim Yesuus mat kobi'llishshinne «Mat manchina woyi'n kaashshi woronne kaasaakkoo mat odakkichchi hee'ukko. Oo manchim ee odakkichchika misha hasaa waaraa maham siidukkoyyo. Ee bikkina oo woyi'n kaashshi annichchi woyi'n kaashshi beyyo baxaanchina ‹Oono'o! An ka odakkichchiinsi misha hasaa sas hiinchi hundoomam daba'llamummo. Ihukkaarem maham siidummoyyo. Ku oda'i mahina kora'am uulla gokkisoolla? Ee bikkina mure› yukko. Ihukkaarem oo woyi'n kaashshi beyyo baxaanchi ‹Moollanna, ixxeka lugumo shuqunaa fiindaa oreetaa issoommo. Ka maaragoomina ure; waaroo hiinchina mishukkaare danaamo; mishubeelas muramookko› yukko» yaa kurukko. Usheexxaxxi Ayyaamonne Ayihuxxi manni wixxixxi minenne Yesuus losisam hee'ukko. Ee beyyonnem jor ayyaan jabbisaa amadukkaanniinsi tommoo sadeenti hiinchoo ihaakkoo mat meentichcho hee'llo'o. Isem quutatte hee'llo'i bikkina xabbita'a uulliteena hore'em xantam hee'llo'oyyo. Ihukkaarem ee wixxixxi mi'n awwonsaanchi Yesuus ee meentichcho Usheexxaxxi Ayyaamonne fayyiisu bikkina quuqaa minaadabina «Baxo baximmina hasisoo loh balli yookko. Ee lohem ballannem waattakka'a fayye'llehe bagaan Usheexxaxxi Ayyaamonne waattakkotte» yukko. Moollanni Yesuus ixxena dabaraa «Ki'nnuwwi ka labisaano! Ki'nnuwwiinsi ayyim Usheexxaxxi Ayyaamonne ixxeka mirgo'o te'im hallichcho gaadiriinsi tiraa wo'o agiseena massooyyonnihe? Tu meentichcho Abrihaam landichchotte ikka'a hee'llu'uuyyi tommoo sadeenti hiinchoo Sheexaanchi karaa hee'llo'ookkote Usheexxaxxi Ayyaamonne fayye'immi labooyyonnihe?» yukko. Yesuus eekka wocukkaare ixxi maso'i hundim tuutto'o. Manni hundim Yesuus baxu maalalsiisoo luwwi hundannem liiramukko. Yesuusim ixxuwwina «Waa'i adillan maha labookko? Mahindu akeekisoommo? Waa'i adillan mat manchi ixxi uullanne massaa wixu shaa'n sire'i'nnoo'i gootto'i sire'e labookko. Oo sire'i li'aa haqqichchi ihoohaare cii'i ixxi caafanne do'nna baxookko. Odim Yesuus «Waa'i adillano mahinne akeekisoommo? Waa'i adillan mat meentichcho sas qunni qamanne edda'a qufisso'i ursho'o labookko. Oo ursho'i qufisso'i qama hundoomam hufaa'ookko» yukko. Yerusaaleema Yesuus marukkuuyyi beero'uwwannee gattuwwannee losisukkuuyyi higam hee'ukko. Mat manchi Yesuusina «Moollanna! Gatoo keen hofqaxannihe?» yaa xa'mmukko. Yesuusim ixxuwwina «Xuqqi goocinne aaggakkeena yaki'llehe. An ki'nnuwwina kuroommo; dut keen aaggeena mixxamo; ihukkaarem xantamoyyo. Mi'n annichchi iimaa gooca xufaa lasage u'llummanne uullitakka'a gooca qoccitakku'uuyyi ‹Moollanna! Niina fooqaa'e› yitakkamo. Mi'n annichchim dabaraa ‹Hanniinsi waattakko'ookeenda'e an la'oommoyyo› yookko. Ee ammane ki'nnuwwi ‹Neese kiinninne maqirem intaammoo angaammoo. Ni gatti googguwwannem losissaatto› yitakkamo. Ihukkaarem oo mi'n annichchi ‹An ki'nnuwwina kuroommo; hanniinsi waattakko'ookeenda'e an la'oommoyyo. Ki'nnuwwi ku jora baxxakkam keen hundim iinniinsi qee'llehe› yookko. Abrihaama, Yisaaqa, Yaaqoobaa hiraagaan hundaa Waa'i adillanonne moo'llakkamo. Ihukkaarem ki'nnuwwi ee ammane biiranne gattakkamaare ee beyyonne ki'nnuwwina wi'llimmii inqe iicimmii ihookko. Odim uulli hundiinsim waatto'i lobakat minaadab Waa'i adillanonne maaddanne afuuttamo. Oono'o! Illag lasag ihookko. Lasagim illag ihookko» yukko. Ee ammanem Farisaawe'uwwiinsi mat mat keen Yesuus beyyo waatta'a «Heeroodis keese sheena hasu bikkina ka beyyiinsi fittaa mare» yito'o. Yesuusim ixxuwwina dabaraa «Mattakka'a ee hantaaraanchina ‹ «Oono'o! Kaballaa soodoo Sheexaana fissoommo; jabbaanom fayyiisoommo; Saxxi ballannem i baxo guulloommo» yoolla› yitakka'a kullehe. Ihona bagaan kaballa, soodoo insoodoo an Yerusaaleema marimmi hasisookko. Mashka'oomim hiraagaanchi Yerusaaleemanne lehimmi hasisookko bagaan mulli beyyonne hannonnem lehimmi hasisooyyo. Yerusaaleemaa! Yerusaaleemaa! Hiraagaano shitoohaanno. Waa'i beyyiinsi ki beyyo asse'anto'i asse'amaanom kininne aphphissaa shitoohaanno; antabaakkichchi ixxi ciicoolla laxxi woronne wixxaa'oo'isam anim ki'nnuwwa wixxaa'eena hasummo. Ihukkaarem at sabbitto. Ee bikkina ki'nnuwwik min diihookko. An ki'nnuwwina kuroommo; ‹Moollanni summinne waarookkok maasse'amaakkoohane› yitakkeebe'e eese moo'llakkamoyyo» yukko. Usheexxaxxi Ayyaamonne Farisaawe'uwwiinsi mat awwonsaanchi mine hurbaata iteena Yesuus aagukko. Ixxuwwim ixxi maha issooda'e egettam hee'llo'o. Eekke'em angii lokkii dashshaakkoo mat manchi Yesuus beyyo waarukko. Yesuusim Seera losisaaninaa Farisaawe'uwwinaa «Usheexxaxxi Ayyaamonne jabbaano fayyiisimmi hasisoohonnii hasisooyyo?» yaa xa'mmukko. Ihukkaarem ixxuwwi maham dabatto'oyyo. Yesuusim ee jabbu mancho amadaa fayyiisaa geegeesukko. Yesuusim ixxuwwina «Ki'nnuwwiinsi ixxek beet te'im mirgo'i Usheexxaxxi Ayyaamonne barenne ubuta'n qaqqisaa fissoobee'ek ayyette?» yukko. Ihukkaarem ixxuwwi ee woshshina maham dabatteena xanto'oyyo. Maaddina weeshanta'a waatto'i keen lob beyyonne afuutteena xoreexxantamisa Yesuus moo'ukko. Ee bikkina weeshanta'a waatto'i keenina kobi'llishshinne «Ayyim bollochcho'ina ki'nnuwwa weeshuta'n hundiinsi e'lloo beyyonne afuuttakkotte. Ayla'ukko ki'nnuwwiinsi lophphoo manni weeshamaakkoohan iheena xanookko. Lamom weeshu manchi waaraa ‹Ka beyyo ixxena fatakihe› yeena xanookko. Ee ammane tuuttaa hoffi beyyonne afuuttootto. Ihukkaarem bollochcho'ina weeshantakkam ammane ki'nnuwwa weeshu manchi waaraa ‹I beshichcho, hanaan higgaa afuure!› yeebe'e hoffi beyyonne afuullehe. Ee ammane ki'nnuwwinne maqire maadda itteena afuutto'i keen hundim ki'nnuwwa lonsitamo. Mashka'oomim ixxi gaga iimiimaa'ookkok hundim sholle'ookko; ixxi gaga hoffiisookkok hundim lomba siixxookko» yukko. Odim Yesuus maaddina ixxo weeshu manchina «At ballanne te'im hiimonne maadda gudissoo ammane at ixxuwwina issitti luwwa korina dabatta'a miqqam bikkina ki beshshuwwa te'im kiyyabbaayyuwwa te'im ki qarmanna te'im goddaan ki olla'i manna weeshshitte. Ihukkaarem at maadda gudissoo ammane buxa, angi te'im lokki muramu keeno, shiihuwwaa qooqquwwaa weeshe. Ixxuwwi eekka kiina dabatta'a miqqeena xantambee'i bikkina at maasse'antootto. Eekka xummaan keen lehiinsi ki'llam ayyaamo Waa'i kiina miqookko» yukko. Yesuusinne maqire hurbaata itteena afuutto'i keeniinsi mat Yesuus wocukkoka macceesaa «Waa'i adillanonne maadda itookkok maasse'amaakkoohane» yukko. Ihukkaarem Yesuus ee manchina «Mat ammane mat manchi lobakat maadda gudisaa dut manna weeshukko. Oo maaddi gudu ammanenne ee weeshanto'i kee'n beyyo ‹ «Waallehe! Hundem luwwim gudaakko» yitaa kure› yaa ixxi awwaadaancho asse'ukko. Ihukkaarem oo weeshanto'i manni ee maaddiinsi gatteena mashka'a qooccimma asheetto'o. Ee keeniinsim luxxek ‹An uulla bita'llummi bikkina moo'eena marimmi hasisoohane. Ee bikkina iina urimma issitoo'isina an keese uunxoommo› yukko. Odim mullekim ‹Onti kado'i mirgo'uwwa bito a'llummi bikkina abuullaa moo'eena hasaammo. Ee bikkina iina urimma issitoo'isina an keese uunxoommo› yukko. Odim mullekim ‹An idaayyichcho eebummi bikkina mareena xanoommoyyo› yukko. Ee lasage oo awwaadaanchi waaraa ee woshsha moollannina kurukko. Moollanni eekka macceesu ammanenne lobakata nadadaa ixxi awwaadaanchina ‹Qaqqissaa beero'i bobba'uwwannee googguwwannee fittaa buxa, angii lokkii muramu keeno, qooqquwwaa shiihuwwaa wore› yukko. Oo awwaadaanchim woraa ‹Moollanna, at ijaajjittisam issaammo. Kabadem manni afuuroo beyyi yookko› yukko. Moollannim awwaadaanchina dabaraa ‹Bobba'uuwwannee googguwwannee fittaa i minenne manni wo'mmoo'isa isse. An kiina kuroommo; ee luxxeka weeshanto'i manniinsi matim i maaddika suumennem amadooyyo› yukko» yaa kurukko. Lobakat minaadab Yesuusinne maqire mattonam ixxuwwi kollonne daba'llaa «Ayyim i beyyo waarookkok ixxi anniinsi, ixxi amaansi, ixxi areensi, ixxi oosiinsi, ixxi abbaayyuwwiinsi, ixxi aayyuwwiinsii ixxi gagiinsii lonsaa eese iittubeelas eese awwoneena xanooyyo. Odim ayyi manchim ixxo lehonne afisoo hawwo iyyaa ballina ballina eese awwonoobee'ek i awwonaanchi iheena xanooyyo. Ki'nnuwwiinsi mat manchi kininne qeeraa'l mine baxeena hasuta'n hinkaa'n diinat ee minina hasisooda'e gaassaa shallagoobee'ek ayyette? Eehid issubeelas minooma baxeena amadaa lasage guullimma hoogoohaare moo'u manni hundim ‹Ku manchi mine baxeena asheerukko. Ihukkaarem baxaa guulleena xanukkoyyo› yukkuuyyi gadookko. Te'im tommi kum gogot yoo adil lamiyyi kum gogota amadaa waaroo adilinne orameena xanooda'e gaassaa afuuraa sawwoobee'ek ayyette? Ixximdu xanoobee'an ihulas ixxenne orameena waaroo adil qee'llonne hee'onam manna asse'aa iittamookko. Ee'isam ki'nnuwwiinsi ayyim ixxena yoo luwwi hundam urubeelas eese awwoneena xanooyyo. Odim Yesuus ixxuwwina «Sooqid xee'oohane; ihukkaarem sooqixxek xee'n bi'uta'n hinkid issitakka'a xee'oo'isa issitakkamo? Eehido'i sooqid uulla harshiseenam awwaadoobee'i bikkina manni uunjookko. Qoossaa macceesoo macci yookkok macceesona» yukko. Ee ammane qaraxaanii baaxiilaanii hundim Yesuus wocoo luwwa macceesseena waatto'o. Farisaawe'uwwii Seera losisaanii «Ku manchi baaxiilaano aa'oolla; ixxuwwinne maqirem itoolla» yita'a quunquunto'o. Ee bikkina Yesuus ixxuwwina kobi'llishshinne «Ki'nnuwwiinsi matina xibbi gereebbi hee'uta'n ee gereebbiinsi mat gereechchi bi'uta'n honsayyee honsi gereebbaa udma'anne uraa ee bi'u gereechcho siideebe'e haseena maroobee'ek ayyette? Siidaa lasage liiramaa qo'llonne iyyookko. Mine afaa lasagem ixxi beshshuwwaa olla'aa weeshaa ‹Bi'aa hee'u i gereechcho siixxummi bikkina iinninne maqirem liirammehe› yookko. Ee'isam an ki'nnuwwina kuroommo; baaxiilo biira yimmi hasisoobee'i honsayyiinsii honsi xummaaniinsii baaxiilo biira yaa daba'lloo mat baaxiilaanchi bikkina lophphaakkoo liiranchi iimanenne ihookko. «Te'im mat meentichchona tommi diinaar hee'aa ee diinaariinsi matoom bi'uta'n ee bi'u diinaara siiddeebe'e caakka caakkissa'a mine fii'llu'uuyyi hassambee'i meentichcho hintannette? Isem siidda'a lasage is beshshuwwaa olla'aa weeshsha'a ‹Bi'u diinaara siixxummi bikkina iinninne maqirem liirammehe› yitamo. An ki'nnuwwina kuroommo; ee'isam baaxiilo biira yaa daba'lloo mat baaxiilaanchi mashka'inne Waa'i asse'amaan liiramookko. Odim Yesuus «Mat manchina lam oos hee'ukko. Ee oosiinsim hoffi beet ixxi annina ‹Iyyanna, ki amaxxiinsi iina afoo luwwa baxxansitaa uwwe› yukko. Annim yoo diinate baxxansaa uwwukko. Hofqax balliinsi lasage hoffi beet ixxena yoo luwwi hundam amadaa qee'l uulla marukko. Ee diinatem awwaad bee'i luwwanne bi'isukko. Ee lasage ee uullanne jor qaanne'i aagukko. Ihukkaarem ixxena ma'lluchchim hee'ukkoyyo. Ee bikkina ixxi ee uullanne hee'oo mat manchina fo'annano aagukko. Oo manchim ixxo boonke'e allaarona boonke'e allaarakkam beyyo asse'ukko. Oo beetim boonke'i itoo hurbaatiinsi itaa goddeena hasam hee'ukko. Ihukkaarem ixxena eeham uwwookkok hee'ukkoyyo. Oo beet tiiro issu ammanenne ‹Iyyanni minenne baxxam fo'anni hassoqaxa ittamo; an ka beyyonne sibaarinne lehoommuulla. An ka beyyiinsi ki'aa maraa iyyannina «Iyyanna, Waa'aa keesee hawwodaammo. Ka lasage an ki beeto yamameena laboommoyyo. Eesem ki baxaaniinsi matisa issitaa xige» yoommo› yaa ixxi wodanonne sawwukko. Ee bikkina ki'aa ixxi anni beyyo marukko. Ihukkaarem oo beet qee'llonne hee'onam ixxi anni moo'aa qishixxaa geeraa waaraa qaaphphaa suunqukko. Beetim annina dabaraa ‹Iyyanna, Waa'aa keesee hawwodaammo. An ka lasage ki beeto yamameena laboommoyyo› yukko. Ihukkaarem beetina anni ixxi awwaadaanina ‹Qaqqissakka'a hundiinsim doo'l eddechcha eebbakka'a eddeessehe. Angannem quba'a, lokkonnem caamma'a issehe. Intaa liirammonam hundiinsi doo'l di'ir baa'l moora eebbakka'a dullehe. Mashka'oomim ku i beet lehaa hee'ukko; ihukkaarem kaba ixxi foor daba'llaakko. Bi'aahim hee'ukko; ihukkaarem kaba siidamaakko› yukko. Ee bikkina ixxuwwim liiramimma asheetto'o. «Ee ammane ixxek lob beet bax beyyonne hee'ukko. Ixxim abuulli beyyiinsi waarukkuuyyi mine afeena hincu ammanenne dibbe'ikaa kajjikaa sagara macceesaa ixxi anni awwaadaa'nneka mato weeshaa ‹Ku sagar mahane?› yaa xa'mmukko. Awwaadaanchim ixxena dabaraa ‹Kiyyabbaayyi waaraakko. Ixxi maham ihoo'n xumminne daba'llaa waaru bikkina kiyyanni hundiinsi doo'l di'ir baa'l moora duraakko› yukko. Ihukkaarem oo lob beet nadadaa mine aagimma sabukko. Ixxi annim miniinsi firaa mine aagoo'isina uunxukko. Ihukkaarem lob beet annina dabaraa ‹An kiina lobakat hiincho awwaadaammo. Kiina ijaajancham sabummoyyo. Ihukkaarem an i dara'mmanninne maqire liiramona mat wotaram uwwittoyyo. Ki amaxxa saa'aanina baqaa bi'isu ku ki beet waarukkaare hundiinsi doo'l di'ir baa'l moora duttaatto!› yukko. Annim beetina dabaraa ‹I beeto, at hundi ammanem iinninne maqire yoonto. Iina yoo luwwi hundim kiihane. Ku kiyyabbaayyi lehaa hee'ukko; kaba ixxek foor daba'llaakko; bi'aahim hee'ukko; kaba siidamaakko. Ee bikkina neese lobakata liiramimmi hasisookko› yaa dabarukko» yukko. Odim Yesuus ixxi losaanina «Mat goddaanchi manchina ixxi mi'n amaxxa egeroo gassaanchi hee'ukko. Manni ‹Ku gassaanchi ki amaxxa binnaa'oolla› yaa ixxi moollannina kurukko. Ixxi moollannim ixxo weeshaa ‹Ku ki bikkina macceesummi luwwi maruwwa? Ka lasage at i luwwa egeraanchi ikkeena xantoobee'i bikkina egeraanchi ikkaa hee'llitti ammane issitti luwwa kure› yukko. Oo gassaanchim ixxi wodanonne ‹I moollanni eese baxiinsi fissoo bikkina maha isso? Uulla abuulleena xanoommi malaaybee'e; uunxeenam tuuroommo. Ee bikkina i moollanni eese baxiinsi fissoohaare manni ixxuwwi minenne eese aa'oo'isina an issoommi luwwa la'oommo› yukko. «Ixxim moollanniinsi diinate liqaayye aa'llo'i manna annannichchom weeshaa luxxi manchina ‹I moollanniinsi liqaayye aa'llitti diinat hinkaa'nna?› yaa xa'mmukko. Oo manchim dabaraa ‹mat xibbi jaalo'i zayta› yukko. Ixxim dabaraa ‹Qaqqisonne afuuttaa ki badanchi kitaabamu woraqatanne «Ontayyi jaalo'o» yitaa kitaabe› yukko. Ee lasage mullaannina ‹Keesenne yoo badanchi hinkaa'nna?› yaa xa'mmukko. Oo manchim dabaraa ‹sor kum kiilogiraam arasa› yukko. Ixxim dabaraa ‹Ki badanchi kitaabamu woraqatanne «Sadee lam kum kiilogiraama» yitaa kitaabe› yukko. Oo amma'nnamubee'i gassaanchi ixxi gagina issu qooroomina ixxi moollanni galaxxukko. Ka uulli manni ixxuwwina'i ixxuwwi issaqqantam luwwina Waa'i oosiinsi lophphita'a qoolluwwa. «An ki'nnuwwina kuroommo; ki'nnuwwik diinat beeddoohaare heer heerinam hee'llakkam beyyonne Waa'i ki'nnuwwa aa'oo'isina ka bi'oo diinatinne ka uullanne ki'nnuwwi gagina koba amaddehe. Hoffi luwwanne amma'nnamukkok lob luwwannem amma'nnamaakkoohane. Hoffi luwwanne amma'nnamubee'ek lob luwwannem amma'nnamooyyo. Ka uulli diinatenne amma'nnantakkobeelas hanqo'i diinatina ki'nnuwwa ayyi amma'nnookko? Mulli manni diinatenne ki'nnuwwi amma'nnantakkobeelas ki'nnuwwi luwwa ki'nnuwwina ayyi uwwookko. «Mat agishshi lam moollannina ijaajameena xanooyyo. Mato sabaa mato iittookko. Te'im mato lonsaa mato gadookko. Ki'nnuwwim diinatinaa Waa'inaa laminam ijaajantakkeena xantakkamoyyo» yukko. Farisaawe'uwwi diinate iittitam bikkina ee hundam macceessa'a Yesuusanne naacco'o. Ihukkaarem Yesuus ee Farisaawe'uwwina «Ki'nnuwwi manni illagenne ki'nnuwwi gaga xummaan issitakkam keeno. Ihukkaarem ki'nnuwwi woda'nneka Waa'i la'ookko. Manni illagenne danaamo labookkok Waa'i illagenne sabamaakkoohane. Odim Yesuus «Seerii hiraagaa'n losishshii Xammaqaanchi Yohaannisanne afeebe'e kuramaakko. Yohaannisiinsi kid Waa'i adilla'nnek mishiraachchi sagar kuramoolla. Manni hundim ee Waa'i adillanonne aageena yakoolla. Ihukkaarem Seeriinsi matichchim bi'ukkaanniinsi iimanii uullii higuta'n sholle'ookko. Ixxi are hollaa mulleta eebookkok hundim saa'aancho. Is aro'iinsi fitto'ota eebookkokim saa'aancho. Odim Yesuus «Mat goddaanchi manchi hee'ukko. Ixxim lobakata bito xee'aalli eddechcha edde'ukkuuyyi balli hundam makki heechcha hee'am hee'ukko. Odim orachchi hundim omaraakkoo Ali'aazara yakkam buxichchim ee goddaanchi manchi u'llummanne ubaa hee'ukko. Ixxim oo goddaanchi manchi itukkuuyyi leemaatiinsi ubu giggira iteena mixam hee'ukko. Wishim waaraa ixxeka omara aallam hee'ukko. Oo buxichchim lehukkaare Waa'i asse'amaan Abrihaaminne maqirem iimanenne afuussito'o. Odim oo goddaanchim lehaa waammamukko. Ixxim Si'oolanne hawwonne ihaa qee'llonne yoo Abrihaaminne maqire afuuru Ali'aazara daaphphaa moo'ukko. Ixxim Abrihaama weeshaa ‹Iyyanni Abrihaama, iina qishixxe! An gii'l laba'n woronne hawwummuuyyi yoommi bikkina Ali'aazar ixxi maxxaara wo'onne cefaa i allabo siggisona asse'e› yukko. «Ihukkaarem Abrihaam dabaraa ‹I beeto, at leteena illageen danaam luwwa siixxittisa sawwihe. Ali'aazar odim jor heechchanne hee'ukko. Ihukkaarem kaba ixxi danaam heechchannette; at hee'lloottok kee'mmaalli hawwonnette. Eehanniinsi hundiinsim higaa ni beyyiinsi ki'nnuwwi beyyo ki'nnuwwi beyyiinsim ayyim ni beyyo higoobee'isina ni lambe'ennee ki'nnuwwi lambe'ennee malaayyaam baalli yookko› yukko. Ihukkaarem Abrihaam ixxena dabaraa ‹Ixxuwwina Muse'e kitaabu kitaabii hiraagaan kitaabbo'i kitaabii yookko. Eehanniinsi macceessona› yukko. Oo manchim dabaraa ‹Iyyanni Abrihaama, ee'isayyo; mat manchi lehiinsi ki'aa maruta'n baaxiiliinsi daba'llitamo› yukko. Abrihaamim ‹Muse'ekaa hiraagaa'nnekaa kitaaba macceessobee'aa'lleensi mat manchi lehiinsi ki'aa maruta'nnim amma'nnitamoyyo› yaa dabarukko» yukko. Yesuus ixxi losaanina «Manna baaxiilonne aagisoo luwwi waaroo'n gatooyyo. Ihukkaarem baaxiilina mashka'i ihoo manchi bikkina aayye! Ayyim ka hoffi keeniinsi mato baaxiilonne aagisoohaanniinsi ixxi gaanjenne liitimma ka'llaa dambalaqanne ubuta'n e'llookko. Ee bikkina ki'nnuwwi gaga ege'llehe; kiyyabbaayyi baaxiilonne aagulas wocame. Ixximdu baaxiiliinsi saxxaa daba'llulas atim ixxi bi'ishsha haafihe. Ixxi mat ballanne keese lamar kore hawwodaa lamarem korem ‹Bi'isaammo› yulas lamarem korem haafihe» yukko. Awwonaan Moollannina «Niina amma'nnato ede» yito'o. Moollannim dabaraa «Winxo'i shaa'n sireqax amma'nnat ki'nnuwwina hee'uta'n ka oda'a ‹Ka beyyiinsi xoqolantaa dambalaqanne kaasame› yitakko'aare ki'nnuwwina ijaajamookko» yukko. Odim Yesuus «Ki'nnuwwiinsi matina uulla abuulloo te'im gereebba allaaroo awwaadaanchi yookkok oo awwaadaanchi baxiinsi te'im allaachchiinsi waaroohaare ‹Hurbaata itteena waattaa qaqqissaa afuure› yoohonnihe? Ee'isa yimma uraa ‹Iina hurbaata gudissaa an itaahii agaahii ki'eembe'e uullitaa iina itisee agisee; ee lasage atim ittoottoo aggoottoo› yookko. Ijaajamu luwwa issu bikkina ee awwaadaancho galaxxooyyo. Ee bikkina ki'nnuwwim ijaajantakko'i luwwi hundam issitakkam ammane ‹Neese awwaad bee'i awwaadaano; niina uwwamu bax xale'e banxaammo› yi'llehe» yukko. Yerusaaleema Yesuus marukkuuyyi Samaare'aanninnee Galii'l uulli lambe'innee higam hee'ukko. Higukkuuyyim mat gatte aagukkisam oddomachchonne firoo baddisoo jabbi amadaakkoo tommi manninne edamukko. Ixxuwwim waatta'a qee'llonne uullito'o. Oo mannim sagara iimaa'lla'a «Moollanni Yesuusa, niina qishixxe!» yito'o. Ixxuwwa Yesuus moo'u ammanenne ixxuwwina «Mattakka'a ki'nnuwwi gaga qeessichchina moo'issehe» yukko. Oo mannim mattu'uuyyim fayye'lla'a muccutto'o. Ee lasage ee manniinsi mat fayye'ukkisa moo'aqqu ammanenne sagara iimaa'aa Waa'a galaxxukkuuyyi laso daba'llukko. Yesuusam galaxxukkuuyyi lokkonne ubukko. Oo manchim Samaarekkichchi hee'ukko. Yesuusim «Muccutto'ok tommi manchoyyonnihe? Honsoom hannikko'o? Xale'i ka mulli uulli manchiinsi bagaan daba'llaa waaraa Waa'a galaxxookkok matim bee'ukkonnihe?» yukko. Yesuusim ee manchina «Ki'llaa mare; ki amma'nnat keese fayyiisaakko» yukko. Farisaawe'uwwi «Waa'i adillan waarookkok hinki ammane?» yita'a Yesuusa xa'mmito'aare Yesuusim ixxuwwina dabaraa «Waa'ik adillan waarookkok manni egeroo'isinneyyo. Odim ‹Keyye yookko› te'im ‹Eekke'e yookko› yakkambee'ane. Mashka'oomim adil Waa'i ki'nnuwwi lambe'ennette» yukko. Odim Yesuus ixxi losaanina «Manchi Beet ayyaammuwwiinsi matichchom moo'nnumta'n yitakka'a mixxakkam amman waarookko. Ihukkaarem moo'llakkamoyyo. Mat mat keen ki'nnuwwina ‹Waa'ik adillan keyyette te'im eekke'ette› yitamo. Ihukkaarem ki'nnuwwi mattakkotte. Ixxuwwam awwontakkotte. Mashka'oomim banqi belecce'oohaare iiman tochchiinsi tochchonne afeebe'e caakkoo'isam Manchi Beetik waarimmi ballim eehidette. Ihukkaarem ixxi gaassaa lobakat hawwo aa'immii ku qaranchi ixxo sabimmii hasisookko. Nohe'i doollenne ihukkisam Manchi Beet waaroo doollennem ee'isam ihookko. Nohe'i markabanne aagaa wo'i hundam bi'iseebe'i afeebe'e manni itukkuuyyii agukkuuyyii, eebukkuuyyii ladiisukkuuyyii hee'ukko. Ee'isam Loox doollennem manni itukkuuyyii agukkuuyyii, bito aa'ukkuuyyii biteesukkuuyyii, kaasukkuuyyii mine baxukkuuyyii hee'ukko. Ihukkaarem Soddomiinsi Loox firu ayyaamo giirii diina yakkam luwwii iimaniinsi ga'nnaa manna hundam bi'isukko. Manchi Beet waaroo ayyaamom ee'isam ihookko. «Ee ayyaamo mi'n iimanenne yoo manchi minenne yoo mu'uta fissaa masseena aagoone. Abuulli beyyonne yoo manchim abuulli beyyiinsi mine daba'lloone. Loox are sawwi'llehe. Ixxi foore gatixxeena hasookkok ayyim bi'isookko. Ihukkaarem ixxi foore bi'isookkok gatixxookko. An ki'nnuwwina kuroommo; ee hiimo mat ara'anne lam manchi iinse'ookko. Ee keeniinsi mat massamookko. Mat gatookko. Ixxuwwim «Moollanna! Hanno massakkamok?» yita'a xa'mmito'aare Yesuusim ixxuwwina dabaraa «Leesh yoo beyyonne ammar dummookko» yukko. Hundem ammanem hooggoo'n Waa'a uunxitamisina kobi'llishsha Yesuus ixxi losaanina kurukko. Ixxim «Mat beero'onne Waa'a baddoobee'ekii mannam hamannoobee'ekii mat daanni hee'ukko. Ee beero'onnem busar meentichcho balli hundam ee daanni beyyo waattu'uuyyi ‹I lambe'ennee i masokkichchi lambe'ennee yoo woshshanne oogate› yitam hee'llo'o. Oo daannim oogatimma sabaa lobakat ammane afukko. Ixxim lasaanchonne ‹An maham Waa'a baddumbee'aaree manna hamannumbee'aarem tu busar meentichcho eese hawwisso'i bikkina isena hanqa oogatoommo. Eehid issumbeelas i beyyo hundi ammanem waatta'a hawwissamo› yaa sawwukko» yukko. Odim Moollanni Yesuus «Oo boqqi daanni wocu luwwa sawwi'llehe. Ee'isam ballaa hiimoo ixxi kollonne laattam ixxi minaadabina Waa'i oogatooyyonnihe? Ixxuwwina dasoohonnihe? An ki'nnuwwina kuroommo; ixxuwwina qaqqisaa oogatookko. Ihona bagaan Manchi Beet waaroo ammane uullanne amma'nnato siidoohonnihe?» yukko. Odim Yesuus ixxuwwi gaga xummaan issita'a mulli keeno gaddam keenina kobi'llishshinne «Lam manchi Waa'a uunxiteena Keesammi Mine matto'o. Ixxuwwiinsim mat Farisaawekkichchi hee'ukko. La'mmekim qaraxaanchi hee'ukko. Farisaawekkichchi uullaa ixxi wodanonne ‹Waa'a! An mulli mannisa bogaanchi ihumbee'i bikkina, jora baxichchi ihumbee'i bikkina, saa'aanchi ihumbee'i bikkinaa te'im ka qaraxaanchisa ihumbee'i bikkinaa keese galaxxoommo. Anim saantanne lamaagge soommanoommo. Siixxummi luwwi hundiinsim tommiinsi mato kiina uwwoommo› yukko. Ihukkaarem oo qaraxaanchi qee'llonne uullaa iim moo'eenam baddaa biqe aphphixxukkuuyyi ‹Waa'a! An baaxiilaanchi ihummi bikkina iina haafihe› yukko. An ki'nnuwwina kuroommo; ee Farisaawekkichchiinsi qaraxaanchi muccuraa ixxi mine elle'ukko. Mashka'oomim ixxi gaga iimiimaa'ookkok hundim sholle'ookko. Ixxi gaga hoffiisookkok hundim lophphookko» yukko. Mat mat manni Yesuus ixxi anginne nakkoo'isina ciilluwwa ixxi beyyo eebbo'aare ixxi losaan eekka moo'llo'i ammanenne manna wocanto'o. Ihukkaarem ciilluwwa Yesuus ixxi beyyo weeshaa «Waa'i adillanonne hee'llam keen kido'i keen ikko'i bikkina ciilluwwi i beyyo waatteena hoottakkotte. Hanqinam an ki'nnuwwina kuroommo; ayyi manchim ciilluwwisa ihaa Waa'i adillano aa'oobee'ek Waa'i adillanonne aageena xanooyyo» yukko. Mat gassaanchi manchi Yesuusina «Er losisaancho! Heer heerina hee'oo heechcha siixxeena maha isso?» yaa xa'mmukko. Yesuusim ixxena «Mahina eese ‹er losisaancho› yitoolla? Matem Waa'iinsi bagaan erok bee'e. Ihukkaarem Waa'ik ijaaj ‹Saa'llitte, shititte, game'llitte, qophphano naqqassittee kiyyannaa kiyyummaa lonsee› yoo'isa laqqootto» yukko. Oo manchim «Ee hundam oosoommaniinsim ki'isaa egeraammo» yukko. Yesuusim eekka macceesu ammanenne ixxena «Kabadem kiina mat luwwi gataakko. Iimanenne godda siixxiteena kiina yoo luwwa hundam biteessaa diinatooma buxina baxxansitaa waattaa eese awwone» yukko. Ihukkaarem oo manchi lobakata goddaanchi hee'u bikkina Yesuus eekka wocukkaare kichche'ukko. Yesuusim ee mancho moo'aa «Goddaan manni Waa'i adillanonne aagimmi hinkaa'nna kee'mmaalla? Goddaanchi manchi Waa'i adillanonne aagimmiinsi gaameelakkichchi marfe'i afo'inne firimmi sholle'ookko» yukko. Eekka macceesso'i keen «Eehaara'i ayyi gateena xanookko?» yito'o. Ihukkaarem Yesuus «Mannina xanamoobee'i luwwi Waa'ina xanamookko» yukko. Pheexiroos «Oono'o! Neese ni mine ullaa keese awwonnaammo» yukko. Yesuusim ixxuwwina «Hanqinam an ki'nnuwwina kuroommo; Waa'i adilla'n bikkinaa yaa ixxeka mine, are, abbaayyuwwa, annaa amaa te'im ooso urookkok ka doollennem ee uru luwwika lam suume siixxookko. Waaroo doollennem heer heerina hee'oo heechcha siixxookko» yukko. Tommoo lamem losaanoo Yesuus annanni issaa massaa «Oono'o! Kaba Yerusaaleema malloommuulla. Manchi Beet bikkina hiraagaan kitaabbo'i woshshi hundim wo'mmookko. Manchi Beeto mulli minaadabina higisakka'a uwwakkamo. Oo keenim ixxo naaccamoo sholliissamoo. Ixxi hanennem anja tuhitamo. Ixxom gantamo; shitamome. Ihukkaarem sas balliinsi lasage lehiinsi ki'ookko» yaa kurukko. Ihona bagaan Yesuus kuru woshshi ixxuwwiinsi daphphaa hee'u bikkina mayyuda'e qoossita'a laqqo'oyyo. Iyyaarko'i beero'onne Yesuus hincaakkoohaannonne mat qooq manchi gooqqi inqenne afuuraa uunxam hee'ukko. Oo manchi lobakat minaadaphpheka sagara macceesaa «Ku maruwwa?» yaa xa'mmukkaare ixxuwwim ee qooq manchina «Naazireexxi Yesuus higoolla» yita'a kutto'o. Oo qooqim «Daawiit Beet Yesuusa, at iina qishixxe!» yaa laarukko. Illagenne higga'a mattam hee'llo'i keenim «Sa'ihe!» yita'a wocanto'o. Ihukkaarem ixxi «Daawiit Beet Yesuusa, at iina qishixxe!» yaa lonsaa laarukko. Yesuusim uullaa ixxi beyyo eebakkamisina ijaajukko. Ixxim Yesuus beyyo hincu ammanenne «An kiina maha issona hassootto?» yaa xa'mmukko. Ixxim dabaraa «Moollanna! An moo'eena hasoommo» yukko. Yesuusim ee manchina «Ki amma'nnat keese fayyiisaakko; ki illi fooqihona» yukko. Ee ammanenne ixxi illi fooqukkaare Waa'a galaxxukkuuyyi Yesuusa awwonukko. Manni hundim eekka moo'aa Waa'a galaxxukko. Iyyaarko'i beero'o Yesuus aagaa eeheenim higam hee'ukko. Eehe'em qaraxaanina awwonsaanchi ihu mat Zakkiwoosa yakkam goddaanchi hee'ukko. Zakkiwoosim Yesuus hinkanda'e ihukkisa moo'eena hasaa hee'ukko. Ihukkaarem ixxek uullichchi gundi ihu bikkina manni lophphimmiinsi ki'ukkok moo'eena xanukkoyyo. Yesuus ee googinne higam hee'u bikkina illageen higaa moo'eena geeraa mat odakkichchonne firukko. Ee lasage Yesuus ee beyyo afu ammanenne iim moo'aa ixxena «Zakkiwoosa, an kaballa ki minenne hoseena hasummi bikkina iimaniinsi qaqqissaa dille» yukko. Zakkiwoosim qaqqisaa dillaa liiranchinne aa'ukko. Mannim eekka moo'llo'i ammanenne «Baaxiilaanchi manchi mine koyyinano marukko» yita'a hundim quunquunto'o. Zakkiwoosim uullaa Moollannina «Oono'o, Moollanna! Iina yoo luwwiinsi buxina kollo uwwoommo. Ayyeensim aphphisansaa aa'aammoo luwwi yoolas soor suum issaa dabaroommo» yukko. Yesuusim ixxena «Ku manchi Abrihaam beet ihu bikkina kaballa ka mi'n manni gataakko. Mashka'oomim Manchi Beet waarukkok bi'llo'i keeno haseenattee gatiseenattee» yukko. Mannim Yesuus kobi'llishshinne wocam hee'ukkoka macceesso'o. Ee ammane Yerusaaleema Yesuus afeena ihaa hee'u bikkina Waa'i ixxuwwanne adil ihoo amman afukkoka labissa'a hee'llo'o. Ee bikkina kobi'llishshinne Yesuus «Mat geejji manchi adillano aa'aa daba'lleena qee'l uulla marukko. Oo manchim ixxi awwaadaaniinsi tommo weeshaa annannichchinam mat mat xibbi diinaara uwwaa ‹An waareembe'e ka diinatinne daddallehe› yukko. Ihukkaarem ixxi uulli manni ixxo sabbam hee'llo'i bikkina ‹Ku manchi waaraa neesenne adil ihona hansoommoyyo› yita'a ixxi lasonne asse'amaano asse'llo'o. Oo manchi adillano aa'aa daba'llu ammanenne woddaa'i daddattamisina diinate uwwu awwaadaan daddatta'a hinkaa'nna qassiissoda'e xa'mmeena ixxi beyyo weeshisukko. Ee lasage luxxi awwaadaanchi waaraa ‹Moollanna, ki diinat tommi suume qaraakko› yukko. Moollannim ixxena ‹At amma'nnantaattoo er awwaadaancho, danaamisa issitaatto. Hoffi luwwanne amma'nnantaattoohan ikkitti bikkina tommi beero'ina gassaanchi issoommo› yukko. La'mmekim waaraa ‹Moollanna, ki diinat onti suume qaraakko› yukko. Moollannim ‹Atim onti beero'uwwa gassitona daannooma uwwaammo› yukko. Ixxi moollannim dabaraa ‹Kaa jor awwaadaancho, an ki suumiinsi firu woshshinnem keesenne oogatoommo. An dissumbee'ekamii massoommi, wixumbee'ekamii muroommi mogaalli manchi ihummisa laqqoo'isa kuttaatto. Eehaare an daba'llaa waaraa i diinate qarukkaanninnem a'lloommisina mahina daddaraanina uwwittoyyo?› yaa ixxi gadanonne uullito'i keenina ‹Diinatooma ixxeensi aa'llakka'a mat xibbi diinaar yoohaannina uwwehe› yukko. Ixxuwwim ixxena ‹Moollanna, ixxena eraarem kum diinaar yookko› yito'o. Ixxim dabaraa ‹An ki'nnuwwina kuroommo; yoohaannina ayyenam edakka'a uwwakkamo. Bee'aanniinsi ayyeensim ee yooqaxam massakkamo. Ihukkaarem an ixxuwwina adil ihoombee'isa sabbo'i i maso'uwwa keyye eebbakka'a i illagenne shi'llehe!› yukko» yaa kurukko. Yesuus ee woshsha wocaa guullaa illageen higaa Yerusaaleema marukko. Marukkuuyyim Wee'l Duu'n gadanonne yo'i Beetafaagee Biitaanaa yakkam gatte afu ammanenne ixxi losaa'nneka lamo weeshaa «Ki'nnuwwi illagenne yoo gatte mallehe. Ee gatte aaggakkam ammane ayyi manchim saa'llubee'i wotar karamaakkoo siiddakkamo. Ee wotara tittakka'a keyye eebbehe. Ayyi la'ukko ayyim ‹Mahina tittakkamuulla?› yaa xa'mmuta'n ‹Moollanni hasu bikkinatte› yi'llehe» yaa asse'ukko. Ixxuwwim matta'a hundi luchchim Yesuus yukkisam ihaa siiddo'o. Ixxuwwim ee wotara tittonam ee wota'l anno'i «Mahina tittakkamuulla?» yita'a xa'mmito'o. Ixxuwwim dabatta'a «Moollanni hasu bikkinatte» yito'o. Ee wotara eebba'a ixxuwwika eddechcha ee wota'l hanenne issita'a Yesuusa saa'llisso'o. Ixxim saa'llaa maronam manni liiramaa ixxuwwi eddechcha ixxi illagenne daham hee'ukko. Yesuusim Yerusaaleema afeena hincaakkoohaannonne Wee'l duuninne aad dillukkuuyyi lobakat ixxo awwontam hee'llo'i minaadab sagara iimaa'lla'a ixxi issukkuuyyi moo'llo'i maalalsiisoo luwwi hundinam liiranta'a Waa'a galaxximma asheetto'o. Ixxuwwim «Waa'i summinne waaroo adil maasse'amaakkoohane! Xummi iimanenne ihona, lombim Waa'ina ihona» yitam hee'llo'o. Ee minaadaphphi lambe'iinsi mat mat Farisaawe'uwwi Yesuusina «Losisaancho! Ka ki losaano ‹Sa'i'llehe!› yitooyyonnihe?» yito'o. Ixxim ixxuwwina dabaraa «An ki'nnuwwina kuroommo; ixxuwwi sa'itota'nnim ku kinneewwi shuuraa galaxxookko» yukko. Yerusaalee'm beero'o Yesuus afeena ihaakkoohaannonne beero'ooma moo'aa «Kaballa kiina xumma eeboo luwwi mada'e ihukkisa qoossitaattoota'n danaam hee'ukko. Ihukkaarem at eekka qoossittoyyo. Ki maso'i ki kululleeta ootta'atii fittoo beyyi hundam ifiissa'atii keese kibbita'a u'nnansitam ayyaam waarookko. Waa'i keese gatiseena waarukkisa at laqqibee'i bikkina oo maso'i keesee ki woronne yoo minaadabaa hundam bi'isookko. Odim ka ki woronne baxamu minneewwikii ootikii mat kinchim beyyonne gatoobee'isa gindookko» yaa wi'llukko. Yesuusim ballina ballina Keesammi Minenne losisam hee'ukko. Qeessa awwonsaan, Seera losisaanii minaadaphphi awwonsaanii ixxo shiteena hasso'o. Ihukkaarem lobakat manni ixxi losishsha ma'lluchchim gatoobee'isa macceessam hee'llo'i bikkina shitam googo siiddeena xanto'oyyo. Mat ayyaamo Keesammi Minenne manna Yesuus losisukkuuyyii mishiraachchi sagara kurukkuuyyii hee'onam qeessa awwonsaan, seera losisaanii lommannii mat ikka'a waatta'a Yesuusina «At kaka issitoo'isa issukkok ayyette? Te'im kaka issitona kiina malaayye uwwukkok ayyette?» yita'a xa'mmito'o. Yesuusim ixxuwwina «Huno'o anim ki'nnuwwa mat xa'mmichcha xa'mmoommo; kullehe. Manna Yohaannis xammaqoo'isa issukkok Waa'annii manna?» yukko. Ee ammanenne ixxuwwina'i ixxuwwim «Mayyino? Waa'a yinumlas ‹Eehannah ixxi yukkoka mahina amma'nnitakko'oyyo› yookko. Manna yinumlas manni hundim hiraagaanchi issaa Yohaannisa amma'nnoo bikkina neese kininne aphphissa'a shitamo» yita'a a'llanta'a «Ayyeensetda'e ihukkisa lanqoommoyyo» yita'a dabatto'o. Yesuusim ixxuwwina «Anim ka keeno mah malaayyinne issoommuulda'e ki'nnuwwina kuroommoyyo» yaa dabarukko. Minaadabina ka kobi'llishsha Yesuus kurukko. Ixxim «Mat manchi woyina kaasukko. Ee kaasu woyi'n kaashsham abuullaanina uwwaa lobakat ammanina mulli uulla marukko. Oo woyi'n kaashshi annichchim woyi'n misha feerakkam amman afukkaare woyi'n mishika uwwitamisina abuullaa'n beyyo awwaadaancho asse'ukko. Ihukkaarem abuullaan ee awwaadaancho ganta'a kora'i angam daba'lloo'isa issito'o. Odim la'mmekam mulli awwaadaancho asse'ukko. Ihukkaarem oo abuullaan ee awwaadaanchom ganta'atii sholliissa'atii kora'i angam dabatta'a hollito'o. Saxxi korem mulli awwaadaancho asse'ukko. Abuullaanim madissa'a woyi'n kaashshi woriinsi fissita'a uunjito'o. Ee lasagem oo woyi'n kaashshi annichchi ‹Maha issumta'n e'llookko? Hanqinam iikka lobakata iittoommi beeto asse'ummaare hayditamo› yaa ixxuwwi beyyo asse'ukko. Ihukkaarem oo abuullaan ee beeto moo'lla'a ixxuwwina'i ixxuwwim ‹Lagaanchi kanena'e; lag niihan ihoo'isina ixxo shinona!› yito'o. Ee bikkina ee beeto amadda'a woyi'n kaashshi beyyiinsi biiranne fissita'a shito'o. Eehaara'i oo woyi'n kaashshi annichchi ee abuullaano maha issookko? Ixxim waaraa ee abuullaano shookko. Woyi'n kaashshoomam mulli keenina uwwookko» yukko. Ixxuwwim eekka macceesso'i ammanenne «Eehido'i luwwa Waa'i eeboone» yito'o. Ixxim ixxuwwa moo'aa «Keesammi Kitaabanne ‹Kininne mine baxxam keen awwaadooyyo» yita'a uunjito'i kinchi hundiinsim lobakata lophphaa awwaadoo kinchi ihukko› yamamaa kitaabamukkok mayyimma? Ayyim ee kinanne ubookkok xaamookko. Ihukkaarem oo kin hanenne ubookkok liitamookko» yukko. Seera losisaanii qeessa awwonsaanii kobi'llishshinne Yesuus ixxuwwa acceeqasukkisa laqqo'i bikkina ee ammanem ixxo amaddeena hasso'o. Ihukkaarem minaadaba baddito'i bikkina utto'o. Ee lasage gassimmi malaayyii daannoomii yoo Oroo'm uulli gassaanchina higissa'a uwwimmina makka hassam hee'llo'o. Ee bikkina er manna labbu'uuyyi Yesuus wocoo wocanne huushancha siiddeena egettam manna Yesuus beyyo asse'llo'o. Oo asse'anto'i keenim Yesuus beyyo matta'a «Losisaancho! At woccoo woshshii losissoo losishshii hanqo'an ihukkisa lanqoommo. Odim Waa'i googo hanqo'isinne losisimmiinsi bagaan mannika miine moo'lloobee'isa lanqoommo. Ni See'llisanne Oroo'm uulli adilina gibiro minqonnii minqoone?» yito'o. Ihukkaarem Yesuus ixxuwwika hantaaro la'aa «Huno'o, diinaarooma moo'oommo keyye eebbehe» yukko. Ixxim ixxuwwina «Ka diinaaranne yoo misilii kitaabii ayyane?» yaa xa'mmukko. Ixxuwwim «Qeesaarane» yita'a dabatto'o. Yesuusim ixxuwwina «Eehaara'i Qeesaarinam ihu luwwa Qeesaarinam uwwehe. Waa'an ihu luwwa Waa'inam uwwehe» yukko. Ixxuwwim ixxi dabaru dabachchanne maalalta'a cawwita'a utto'o bagaan Yesuus wocu wocanne minaadaphphi illagenne huushancha siiddeena xanto'oyyo. «Manni lehaa lasage ki'ooyyo» yitam Saduuqaawe'uwwiinsi mat qax manni Yesuus beyyo waatta'a «Losisaancho! Muse'e niina ‹Mat manchi meentichcho eebaa ooso qaroo'nnim lehulas ixxi abbaayyi ee meentichcho lago gassaa ee lehukkaannina shumo'i ihoo ooso qarimmi hasisookko› yaa kitaabaakko. Mat ammane lamar abbaayyuwwi hee'llo'o. Ee abbaayyuwwiinsim won beet meentichcho eebaa ooso qaroo'nnim lehukko. Ee lasage wona awwonaanchi ee meentichcho laggassukko. Ee lasage odim saxxekim laggassukko. Ee'isinne lamarem abbaayyuwwim ee meentichcho gassita'a ooso qattoo'nnim leto'o. Ee lasage isem leto'o. Eehaare isa'i lamarannem affo'ookko leto'i keen lehiinsi ki'llam ayyaamo hinkannitan ikkamo?» yita'a xa'mmito'o. Yesuusim ixxuwwina dabaraa «Uullanne yo'i manni eebbamoo ladiissamoo. Ihukkaarem lehiinsi ki'imminaa lehiinsi ki'akka'a lasage hee'akkam doollenne hee'imminaa labbam keen eebbamoyyoo ladiissamoyyoo. Lehiinsi ixxuwwi ki'llo'i bikkina Waa'i asse'amaa'nnisa ikkamo bagaan letamoyyo. Oo lehiinsi ki'llo'i keen Waa'i ooso. Odim giir aphpham hee'u shif aganna Muse'e kitaabu ammane Moollanni Waa'ina ‹Abrihaam Waa'a, Yisaaq Waa'aa Yaaqoob Waa'aa› yimminne Waa'i lehu keeno lehiinsi ki'isoo'isa caakkisaa kuraakko. Waa'ina hundim fooraam ihaa hee'oohan ihu bikkina Waa'i hee'oo kee'n Waa'a bagaan lehu kee'n Waa'ayyo» yaa dabarukko. Seera losisaa'nnek mat mat keen «Losisaancho! Danaam dabachcha dabattaatto» yito'o. Ee lasage ixxuwwi mulli xa'mmichcha xa'mmiteena iggito'oyyo. Yesuus ixxuwwina «Manni ‹Kiristoosa Daawiit beeto› yookkok mahinatte? Daawiit ixxi gagim Mazmuu'l Kitaabanne ‹Waa'i i Moollannina «Ki diina'a ki lokkiinsi woroon isseembe'e I makkanne afuure» yaakko› yukko. Eehaara'i Daawiit ixxi gagim Kiristoosa ‹Moollanna!› yaa weeshulas Kiristoos hinka'isinne Daawiitina beet ihookko?» yaa xa'mmukko. Minaadab hundim macceesonam Yesuus ixxi losaanina «Seera losisaano ege'llehe. Ixxuwwi qeeraa'l eddechcha edde'lla'a do'imma, meeranne manni ixxuwwa xummaatisona, wixxixxi minneewwannem hundiinsim e'lloo beyyonne afuuchchaa maadda itteena afuuttam ammanem lombi beyyonne afuurimmaa iittitam keeno. Odim ixxuwwi qeeraa'llissa'a Waa'a uunxitu'uuyyi xummaan keeno labbamo. Aro'i lehu kee'n amaxxam boggam keeno. Ee bikkina ixxuwwanne afoo oogato'i kee'mmaalla» yukko. Keesammi Minenne diinate uwwakkam mu'utanne goddaan diinate issukkuuyyi Yesuus asi'mmaa moo'ukko. Mat buxichchi busara lam saantiba ee mu'utanne issito'o. Yesuusim «Hanqinam an ki'nnuwwina kuroommo; tu buxichchi busara ka mu'utanne issito'i diinat mulli keen hundim issito'aanniinsi lobane. Mashka'oomim mulli keen hundim uwwito'ok ixxuwwina ihaa gatukkaanniinsette. Ihukkaarem ise ma'lluchchim bee'i buxichchotte ikka'a isena yoo qaxichcho hundichchom uwwito'o» yukko. Mat mat manni «Ka Keesammi Mine mishisoo kininnee Waa'ina uwwakko'i mu'utinnee wereeggisakka'a baxakko'is hinkaa'nna mishisoolla?» yita'a wocco'o. Yesuusim ixxuwwina dabaraa «Ka moo'llakkam mi'nnek kin ki'n hanenne ihaa baxamukkok mat kinchim gatoo'n gindamaa uboo balli waarookko» yukko. Ixxuwwim Yesuusina «Losisaancho! Kuk ihookkok hinki ammane? Iheena hincukkisa moo'isoo mare'i maruchcho?» yita'a xa'mmito'o. Yesuusim ixxuwwina dabaraa «Ayyim ki'nnuwwa huushansoobee'isa ege'llehe! Lobakat keen ‹Kiristoos anette; doollim afaakko› yitu'uuyyi waattamo. Ee keeno awwontakkotte. Odim orii hambalaachchii gaassaa ihimmi hasisoohan ihu bikkina eekka macceessakkam ammane baa'llakkotte. Ihukkaarem lasaanchi afukkoyyome. Yesuus odim ixxuwwina «Minaadab minaadabanne adilim adilanne ki'ookko. Malaayyaam uulli huxechchi, annanni annanni beyyonne qaanne'ii boobanii ihookko. Iimaniinsim baddisoo luwwii maalalsiisoo mare'ii moo'amookko. Ihukkaarem oo woshshi iheena illageen i summi bikkina ki'nnuwwa amadakka'a hawwisakkamo. Dummichchinaa karatinaa higisakka'a uwwakkamo. Odim adilluwwi illagennee gassaa'n illagennee hincaa'akkamo. Oohim i bikkina kuttakkamisina danaam amman ihookko. Ee bikkina xa'mmantakkam xa'mmichchina ‹Maha daballoommo› yitakka'a hawwitakkotte. Anim ki'nnuwwi maso'uwwik ayyim ki'nnuwwinne uullixxameena te'im gafe'ameena xanoobee'i woccakkam sagaraa qooroomaa uwwoommo. Ki'nnuwwik anno'i, amo'i, abbaayyuwwi, qarmannii beshshuwwii gattoo'n ki'nnuwwa higissa'a uwwitamo. Ki'nnuwwiinsim mat mat keeno shitamo. I mashka'inne manni hundim ki'nnuwwa sabookko. Ihukkaarem ki'nnuwwi horoo'l saraatik matichchim bi'ooyyo. Ki'nnuwwim xa'nnimminne ki'nnuwwi foore gatixxitakkamo. «Yerusaalee'm beero'i diina'inne kibbamaa moo'llakkam ammane bichchina hincukkisa laqqehe. Ee ammane Yihuxxi uullanne yo'i keen duunnuwwanne gibbona. Ee beero'onnem yo'i keen beero'iinsi fitta'a gibbona. Odim beero'iinsi tochchi uullanne yo'i keenim beero'o aaggoone. Mashka'oomim Keesammi Kitaabanne kitaabamukkok wo'mmoo'isina oo ayyaam Waa'i baado miqisoo ayyaamo. Ka uullanne kee'mmaalli hawwi ihoo bikkinaa ka minaadabanne Waa'i quunqi dilloo bikkinaa ee ammane lamfoor meentinaa iicisaaninaa aayye! Ixxuwwiinsim mat qax bisa'inne beedditamo. Qeefadanta'atim mulli minaadaphphi lambe'ennem binnitamo. Ixxuwwina uwwamu doolli beeddeebe'i afeebe'e mulli minaadab Yerusaalee'm beero'o hance'lla'a gassitamo. «Eelliinchonne, aganannee boollaankannee maalalsiisoo mare'i ihookko. Uulli minaadab hundim dambalaqikaa womoo'llekaa baddisoo guga macceessa'a u'nnantamo. Iima'n malaayyuwwi heekke'oo bikkina uullanne ihoo luwwa moo'imminne baa'aa mannik tiir bi'ookko. Ee lasage Manchi Beet malaayyinnee lobakat lombinnee ihaa duubinne waarukkuuyyi moo'llamo. Oo luwwi hundim ihukkuuyyi moo'llakkam ammane Waa'i ki'nnuwwa gatisoo ayyaam hincu bikkina xabbitakka'a iim moo'llehe» yukko. Yesuusim ixxuwwina kobi'llishshinne «Oda'aa mulli haqqaa moo'llehe. Oo oda'ii mulli haqqii lataa moo'llakkam ammane billi hincukkisa laqqakkamo. Ee'isam oo luwwi ihukkuuyyi moo'llakkam ammane Waa'i adillan hincukkisa laqqakkamo. Hanqinam an ki'nnuwwina kuroommo; ku luwwi hundim iheebe'i afeebe'e ku qaranchi higooyyo. Iimanii uullii higookko. Ihukkaarem i sagar hore'em higooyyo. «Oo balli dangonnem qaashisa amadoobee'isa hundi luwwam abdaadakku'uuyyi hasakko'isa hee'imminne, dimbimminnee ka uulli heechchina hawwimminnee ki'nnuwwi wodan hoogoobee'isa qoxxitakka'a ki'nnuwwi gaga ege'llehe. Mashka'oomim oo balli uullanne hee'oo minaadab hundam qaashisa amadookko. Ihukkaarem ee afoo luwwi hundam qoxxitakka'a higimminaa Manchi Beet illagenne uullimminaa hundi ammanem Waa'a uunxatonne qoxxehe» yukko. Yesuusim ballina ballina Keesammi Minenne losisam hee'ukko. Ihukkaarem hiim hiimo Wee'l duunanne firaa garam hee'ukko. Minaadab hundim ixxi losisoo losishsha macceesseena soodaraarom Keesammi Mine waattam hee'llo'o. Shaashshiqqi Uguda yakkam Qorosho'i Uguxxi balli hincaa hee'ukko. Qeessa awwonsaanii Seera losisaanii Yesuusa shiteena manna baddito'i bikkina hinkid issita'a shitamda'e e'lloo googo hassam hee'llo'o. Ee lasage tommiinsii lam losaaniinsii mat hee'u Asqorotokkichchi Yihudanne Sheexaanchi aagukko. Ixxim qeessa awwonsaaninnee Keesammi Mine egettam keeninnee Yesuusa ixxuwwina hinkid issaa uwwooda'e a'llamukko. Ixxuwwim liiranta'a diinate uwwiteena iittanto'o. Yihudim ee woshshanne iittamaa manni bee'i beyyonne higisaa uwweena makki ammane hasam hee'ukko. Shaashshiqqi Ugudina geex ambula durakkam Qorosho'i Uguxxi balli afukko. Ee bikkina Yesuusim Pheexiroosaa Yohaannisaa «Mattakka'a uguxxi hurbaata intona gudissehe» yaa asse'ukko. Ixxuwwim ixxena dabatta'a «Uguxxi hurbaata hannonne gudinso?» yita'a xa'mmito'o. Yesuusim ixxuwwina dabaraa «Oono'o! Mattakka'a beero'o aaggakkam ammane wo'i harachcho iyyaakkoo mat manchinne edantakkamo. Oo manchi aagoo mine awwontakka'a aaggehe. Ee mi'n annichchinam ‹Losisaanchi «I losaaninne maqirem uguxxi hurbaata itoommi koyyi min hannonnette?» yoolla› yi'llehe. Oo mi'n annichchim hundem luwwim gudaakkoo haraar mine fooqanne moo'isookko; eekke'enne gudissehe» yukko. Ixxuwwim Yesuus kurukkisam luwwi hundim ihaa siiddo'o; Shaashshiqqi Uguxxi maaddi hurbaatam ee beyyonne gudisso'o. Hurbaata itakkam amman afukkaare Yesuus ixxi asse'amaaninne maqirem hurbaata iteena afuurukko. Yesuusim ixxuwwina «An hawwonne aageena illageen ki'nnuwwinne maqire ka uguxxi hurbaata iteena lobakata mixam hee'ummo. An ki'nnuwwina kuroommo; ka uguxxi hurbaaxxek tirat Waa'i adillanonne caakkaa la'ameebe'e ka lasage uguxxi hurbaata hore'em itoommoyyo» yukko. Ee lasage Yesuus humbullonne yoo woyi'n diqaasa ki'isaa amadaa Waa'a galaxxukko. Ixxim «Hii'nnehe; kaka ki'nnuwwi baxxammehe. An ki'nnuwwina kuroommo; kabadiinsi ki'isaa Waa'i adillan waareebe'e woyi'n mishiinsi ciinsamu diqaasa agoommoyyo» yukko. Odim qorosho'om ki'isaa amadaa Waa'a galaxxukko. Ee qorosho'om iiqaa ixxi losaanina «Kuk ki'nnuwwina uwwamu i maara; ki'nnuwwi kaka eese tiirimmina issehe» yaa uwwukko. Ee'isam hii'm hurbaata itta'a lasage humbullonne yoo woyi'n diqaasam ki'isaa amadaa «Kuk ki'nnuwwi bikkina dunamoo i xiiginne wo'mmoo haareechchi hidiro. «Oono'o! Eese higisaa uwwoo manchi ka maaddanne iinninne maqirem itoolla. Manchi Beeta'i yamamukkisam lehookko; ihukkaarem ixxo higisaa uwwoohaannina aayye!» yukko. Ee bikkina ixxuwwina'i ixxuwwim «Ni woriinsi kaka issookkok ayyette?» yita'a xa'mmaqancha asheetto'o. Losaanim issena'i issem «Niinniinsi lophphookkok ayyette?» yita'a fitanto'o. Yesuusim ixxuwwina «Mulli minaadaphphi adilluwwi minaadabanne moollannooma moo'ixxitamo. Ee minaadaphphi gassaanim minaadabina eroomma issitam keeno yamantamo. Ihukkaarem ki'nnuwwi ee'isa ikkakkotte. Ki'nnuwwi lambe'iinsi loban ihookkok hoffan ihona. Moollanni ihookkokim awwaadaanchi ihona. Afuuraa itoohaanniinsii uullaa itisoohaanniinsii hinki lobane? Lophphookkok afuuraa itoohaneyyonnihe? Ee'isam an ki'nnuwwi lambe'enne awwaadaanchisa. «Eesenne afu hawwonne hundannem ki'nnuwwi iinninne maqirem qoxxitakka'a uullitakko'ookko. Iyyanni iina gassimmi malaayye uwwukkisam anim ki'nnuwwina gassimmi malaayye uwwoommo. Ki'nnuwwim i adillanonne maaddiinsi ittakkamoo aggakkamoo. Odim adilla'n barcumanne afuuttakka'a tommonnee lamem Isra'ee'l sullonnee oogattakkamo» yukko. Moollannim «Simi'oona, Simi'oona! Oono'o! Sheexaanchi ki'nnuwwa arasisa ufeeseena xa'mmaakko. Ihukkaarem at ki amma'nnatiinsi ubboobee'isa an ki bikkina Waa'a uunxaammo. At saxxitaa daba'llitti ammane kiyyabbaayyuwwa qoxxise» yukko. Pheexiroosim Yesuusina «Moollanna! An kiinninne maqire karameenaa leheenaa gudaammo» yukko. Yesuusim ixxena «Pheexiroosa, an kiina kuroommo; at ‹Ixxo la'oommoyyo› yitaa eese sas kore laggeebe'e ka hiimo antabaa'i muunooyyo» yukko. Ee lasage Yesuus ixxi losaanina «An ki'nnuwwa gonoona, canaa caamma'aa amaddakkoo'nnim asse'ummi ammane ki'nnuwwina mah hanqatukko?» yaa xa'mmukko. Ixxuwwim «Mahim hanqatukkoyyo» yita'a dabatto'o. Yesuusim ixxuwwina dabaraa «Ihukkaarem kaba gonoon yookkok gonoonam amaxxona. Can yookkokim cana amaxxona. Bisa'i bee'ekim eddechcha biteesaa mat bisa'a bita'llona. An ki'nnuwwina kuroommo; ‹Boqqi keeninne xigamukko› yamamaa kitaabamu woshshi eesenne wo'mmimmi hasisookko. Mashka'oomim i bikkina kitaabamu woshshi hundim wo'mmoo'isinatte» yukko. Ixxuwwim «Moollanna! Moo'e; kuno'o, lam bisa'i keyye yookko» yito'o. Yesuusim ixxuwwina dabaraa «Ihookko» yukko. Yesuusim beero'iinsi firaa eraare losukkisam Wee'l duuna firukko. Ixxi losaanim ixxo awwonta'a matto'o. Wee'l duuna afaa ixxi losaanina «Keennaanchonne aaggakkambee'isa Waa'a uunxehe» yukko. Ixxim ixxuwwiinsi kina huushakka'a afisakkamqax beyyo qee'llaa maraa guruphphaa «Iyyanna! Ki doo'l ihulas ka hawwi humbullo at iinniinsi higise. Ihukkaarem i doo'llisa ihoo'n ki doo'llisa ihona» yaa Waa'a uunxukko. Ee ammanem Waa'i asse'amaanchi iimaniinsi waaraa ixxo qoxxisukkuuyyi ixxena moo'amukko. Ixxim u'nnanne hee'u bikkina qoxxaa Waa'a uunxukko. Ixxeensi firoo biincim xiiqqisa uullanne daadam hee'ukko. Waa'a uunxatiinsi ki'aa losaa'n beyyo maru ammanenne losaan kichchechchiinsi ki'ukkok diriitta'a hee'llo'o. Ixxim dabaraa «Mahina diriittakkamuulla? Keenanchanne aaggakkambee'isa baqitakka'a Waa'a uunxehe» yukko. Yesuus woconam ixxi losaa'nnek tommiinsii lamiinsii mat hee'u Yihud awwonsaakkoo dut manni waarukko. Ixxim Yesuusa suunqeena hincukko. Ihukkaarem Yesuus ixxena «Yihuda, Manchi Beeto suunqimminne higissaa uwwitoohonnihe?» yukko. Woshshika duuha'a ixxi losaan moo'llo'i ammanenne «Moollanna! Ka manna bisa'inne aphphinsonnihe?» yito'o. Ixxuwwiinsim mat manchi hundiinsi lob qeessichchina awwaadaanchika makki kolli macce aphphisaa murukko. Ihukkaarem Yesuus «Od la'mmeka eddoobee'isa» yaa ee awwaadaanchika macce amadaa fayyiisukko. Ee lasage ixxo amaddeena waatto'i qeessa awwonsaano, Keesammi Mine egettam keeno, ijaajaanoo lommannaa «Fanga amadakkamisa eese amaddakkeena bisa'aa mugaa amaddakka'a waattakko'onnihe? An ballina ballina Keesammi Minenne ki'nnuwwinne hee'ummuuyyi amaddakko'oyyo. Ihukkaarem ku amman ki'nnuwwanee tuunsi gassaanchanee» yukko. Ee lasage oo manni Yesuusa amadda'a hundiinsi lob qeessichchi mine massito'o. Pheexiroosim qee'llonne ihaa awwonam hee'ukko. Ixxuwwim qash woro'l lambe'enne giira giitta'a iibbixxiteena wixxita'a afuutto'aare Pheexiroosim ixxuwwinnem afuurukko. Ee lasage ixxim gii'l caakkanne afuuraakkoohaannonne mat awwaadaancho ixxo qoossita'a moo'lla'a «Ku manchim ixxenne maqire hee'ukko» yito'o. Pheexiroosim «Meentichche, an ixxo la'oommoyyo» yaa lagukko. Odim hofqax ammaniinsi lasonne mat manchi «At ixxuwwiinsi mato» yukko. Ihukkaarem Pheexiroos «Mancho, aneyyo» yaa dabarukko. Mat sa'aata ihooqax ammaniinsi lasage mulli manchim «Hanqinam ku manchi Galiiliinsette ihu bikkina ixxenne maqire yoohane» yaa qoxxisaa wocukko. Ihukkaarem Pheexiroos «Mancho, at yitoottoka an la'oommoyyo» yukko. Ee ammanchom Pheexiroos woconam antabaa'i muunukko. Moollanni Yesuusim Pheexiroosa daba'llaa moo'ukko. Pheexiroosim «Kaballi hiimo antabaa'i muuneebe'e sas kore eese laggootto» yaa Moollanni kuru woshsha tiirukko. Ee lasage ixxim ee beyyiinsi firaa shikkaa wi'llukko. Ee ammane Yesuusa amadda'a hee'llo'i manni ganimmaa ixxonne naacimmaa asheetto'o. Odim ixxeka ille katta'a aphphissu'uuyyi «Keese aphphisukkok ayyetda'e huno'o, la'e?» yita'a xa'mmitam hee'llo'o. Lobakat mulli game'llaxxi sagalluwwam woccam hee'llo'o. Uulli soodaa lasage minaadaphphi lommanni, qeessa awwonsaanii Seera losisaanii mat ikka'a Yesuusa ixxuwwi dummichchi beyyo massita'a «At Kiristoosatte ikkaattoolas niina kure» yita'a xa'mmito'o. Ihukkaarem ixxi ixxuwwina dabaraa «Ki'nnuwwina kurummaarem eese amma'nnitakkamoyyo. An ki'nnuwwa xa'mmumta'nnim dabattakkamoyyo. Ihukkaarem kabadiinsi ki'isaa Manchi Beet hundam xanoo Waa'i makkanne afuurookko» yukko. Ixxuwwi hundim dabatta'a «Eehaare at Waa'i Beetonnihe?» yito'o. Ixxim ixxuwwina dabaraa «Eeyya, ki'nnuwwi yitakko'isame» yukko. Ixxuwwim «Neese ni gagima'i ixxi suumiinsi macceensummo; kanniinsi lophphoo naqaash niina mahina hasisookko?» yito'o. Eehe'e wixxaa hee'u manni hundim ki'aa Yesuusa Philaaxoos beyyo massaa «Ku manchi ni minaadabina boqqooma losisukkuuyyi, ‹Oroo'm uulli adilina gibiro uwwitakkotte› yukkuuyyii ‹An adil Kiristoosatte› yukkuuyyii siindaammo» yita'a kasasso'o. Ee lasage Philaaxoos «At Ayihuxxi manni adilannihe?» yaa xa'mmukkaare Yesuus «At yittisame» yaa dabarukko. Odim Philaaxoos qeessa awwonsaaninaa minaadabinaa «An ka manchonne matem bi'ishsham siidummoyyo» yukko. Ihukkaarem ixxuwwi qoxxissa'a «Ku manchi Galiiliinsi ki'isaa ka beyyonne afeebe'e manna losisukkuuyyi Yihuxxi uulli manni hundam adilanne ki'isoolla» yito'o. Galiila yoo sagara Philaaxoos macceesu ammanenne «Ku manchi Galii'l uulli manchonnihe?» yaa xa'mmukko. Ixxim Yesuus Heeroodis gassoo uullan ihukkisa la'u ammanenne Heeroodis beyyo Yesuusa asse'ukko. Heeroodis ee ammane Yerusaaleemanne hee'ukko. Heeroodisim Yesuusa moo'eena lobakata mixam hee'u bikkina moo'u ammanenne lobakata liiramukko. Mashka'oomim Yesuus bikkina macceesaa mat mat mare'e issukkuuyyi moo'eena neeyyato issaa hee'u bikkinatte. Ee bikkina Heeroodis dut xa'mmichcha Yesuusa xa'mmukko. Ihukkaarem Yesuus maham dabarukkoyyo. Qeessa awwonsaanii Seera losisaanii Heeroodis illagenne uullita'a qoxxissa'a kasassam hee'llo'o. Ee lasage Heeroodis ixxi gaadaaninnem mat ihaa sholliisaatii ixxonne naacaatii wereeggisakka'a baxakko'oo mishisoo eddechcha eddeesaa Philaaxoos beyyo dabaraa asse'ukko. Heeroodisii Philaaxoosii ee ayyaamom beshshuwwi ikko'o. Eehanniinsi illageen ixxuwwi lambe'enne maso'oom hee'ukko. Ee lasage Philaaxoos qeessa awwonsaano, uulli gassaanoo minaadabaa mat issaa weeshaa «Ki'nnuwwi ka mancho ‹Minaadabina boqqooma losisoohane› yitakka'a i beyyo eebbakko'ookko. Oono'o! Ki'nnuwwi ixxo kasassakko'i woshshina ki'nnuwwi illagenne saarayyaa moo'aa ixxonne mat bi'ishsham siidummoyyo. Heeroodisim ixxonne maham siidubee'i bikkina woddaa'i ni beyyom asse'aakko. Oono'o! Shisiisoo luwwa maham issukkoyyo. Ee bikkina an ixxo ganaa tiroommo» yukko. Shaashshiqqi Ugudanne Philaaxoos ixxuwwina mat mancho tirimmi hasisoohanem hee'ukko. Ihukkaarem ixxuwwi hundim «Ka mancho hoore! Niina Barbaana tire!» yita'a shuutto'o. Barbaan beero'i woronne adilanne manna ki'isimminnee manna shimminnee karamaakkoohan hee'ukko. Philaaxoos Yesuusa tireena hasaa la'm korem minaadabina wocukko. Ihukkaarem ixxuwwi «Ixxo saqale! Saqale!» yita'a shuutto'o. Saxxaaggem Philaaxoos «Mahinatte? Ku manchi maha bi'isaate? An ixxo shisiisoo bi'ishsha ixxonne siidummoyyo. Ee bikkina an ka mancho ganaa tiroommo» yukko. Ihukkaarem ixxuwwi saqalamoo'isina shuurimminne qoxxissa'a xa'mmito'o. Ixxuwwi shuurimmim wodukko. Ee bikkina Philaaxoos ixxuwwi xa'mmito'i woshshi ihoo'isina oogatukko. Manna shaatii adilanne manna ki'isaatii karamaa hee'u mancho tiramoo'isina xa'mmito'isinnem tirukko. Ihukkaarem ixxuwwi hasso'isa issitona Yesuusa ixxuwwina higisaa uwwukko. Yesuusa massitonam Qaareena yakkam uullik mat Simi'oona yakkam manchi uulliinsi beero'o waaronam amadda'a masqala iyyiissa'a Yesuusa awwonoo'isa issito'o. Odim lobakat minaadabim Yesuusa awwontam hee'llo'o. Ee minaadaphphi lambe'iinsi meenti lobakata kichche'lla'a biqe aphphixxitu'uuyyi wi'llitam hee'llo'o. Ihukkaarem Yesuus ee meenti kollonne daba'llaa «Yerusaalee'm meento, ki'nnuwwi ki'nnuwwi gaginaa ki'nnuwwi oosinaa wi'llehe bagaan iina wi'llitakkotte. Mashka'oomim ‹Alceennuwwi, qarubee'i godabbuwwii iicisubee'i anuunnuwwii maassaammuwwa› yakkam balli waaroolla. Ee ammane manni duunnuwwa ‹Ni hanenne ubbehe› hoffi duunnuwwa ‹Neese maaxxehe› yookko. Aashaalli haqqichcho ka'isa issitolas gogaalli haqqichchi maha ihookko?» yukko. Odim jora baxxo'oo lam mulli mannam Yesuusinne edda'a shiteena massito'o. Ixxuwwim Horoo'l Qooma yakkam beyyo affa'a lasage Yesuusa saqalto'o. Jora baxxo'i keenom matoo makkinne matoo qeddinne saqalto'o. Yesuusim «Iyyanna! Ixxuwwi issitamoka laqqambee'i bikkina ixxuwwina haafihe» yukko. Ixxuwwim Yesuusika eddechcha baxxanteena saamo fissito'o. Odim minaadab uullita'a moo'llu'uuyyi ixxuwwi gassaan «Waa'i doo'llaakkoo Kiristoosatte ihulas mulli keena'i gatisukko. Huno'o, ixxi gagam gatixxona» yita'a naaccam hee'llo'o. Odim gaadaanim hincita'a shiishaakkoo woyi'n diqaasa uwwitu'uuyyi «At Ayihuxxi adil ikkaattoolas ki gaga gatixxe» yita'a naaccam hee'llo'o. Odim ixxi horoo'l aganne «Kuk Ayihuxxi adila» yoo sagar kitaabamaa hee'ukko. Jora baxxa'a ixxenne saqalanto'i keeniinsi mat «At Kiristoosatteyyonnihe? Oono'o! Ki gagaa neesee gatise» yaa game'llukko. Ihukkaarem saqalanto'i keeniinsi la'mmek «Atim ixxesam oogato'o aa'llitti bikkina Waa'a badditooyyonnihe? Neese issinummi baxina hasisookkoka aa'nnoommuulli ihu bikkina niikka'i hanqo'i oogato'o. Ihukkaarem ku manchi maham bi'isubee'i mancho» yaa quuqukko. Ixxim Yesuusina «Yesuusa! At ki adillanonne eese xadditte!» yukko. Yesuusim ixxena «Hanqinam an kaballa kiina kuroommo; at iinninne maqire Gannattanne ikkootto» yukko. Oo amman loh sa'aata ihooqax ammane hee'ukko. Ee ammaniinsi ki'isaa honsi sa'aat afeebe'e uulli hundim tuunsukko. Eelliinchi tuunsukkisam Waa'i mi'nnek du'm eddechchi lam ihaa dereeramukko. Yesuusim sagara iimaa'aa «Iyyanna! I foore ki anganne higisaa uwwaammo!» yaa laaraa lehukko. Xibbi halaqichchi ee ihu luwwa moo'u ammanenne «Hanqinam ku manchi muccura» yaa Waa'a lonsukko. Odim eekka moo'lleena wixxito'i minaadab hundim ihu luwwa moo'lla'a biqe aphphixxitu'uuyyi mine daba'llito'o. Ihukkaarem Yesuusinne la'antam keenii Galiiliinsi Yesuusa awwonta'a waatto'i meentii qee'llonne ikka'a eekka moo'llam hee'llo'o. Ee ammane Ayihuxxi dummichchi daannuwwiinsi mat hee'u Yooseefa yakkam xummaanchi er manchi hee'ukko. Oo manchi Ayihuxxi manni a'llanchannee baxonnee iittamubee'an hee'ukko. Ixxim Yihuxxi uullanne yoo Armaatiyaas beero'an ihaa Waa'i adillano egeroohan hee'ukko. Yooseefim Philaaxoos beyyo maraa Yesuusika leesha uwwona uunxukko. Ee lasage leeshooma dilliisaa talbiinsi baxamaakkoo danaam eddechchinne Keefanaa kina fere'akka'a axisakko'oohaannonne ayyim waammamoo'n yoo barenne waammukko. Oo ballim Usheexxaxxi Ayyaam aageena ihaa hee'u bikkina gudakkam balli hee'ukko. Galiiliinsi Yesuusinne maqire waatta'a hee'llo'i meenti Yooseefa awwonta'a Yesuusika waammaa waammamukkisaa moo'llo'o. Ee lasage oo meenti ee beyyiinsi daba'llita'a Yesuus leeshanne labbeena enje'oo luwwaa shitto'oo gudisso'o. Ixxuwwim ijaaccisannem Usheexxaxxi Ayyaamonne usheexxito'o. Ihukkaarem saantiinsi luxxi ballanne soodaraar daram oo meenti gudisso'i shitto'o amadda'a Yesuusa waammakko'i beyyo matto'o. Ixxuwwim waammanne ifiisakko'i kin onkoroollaakkoo moo'llo'o. Ihukkaarem waammakko'i ba'l woro aagga'a moo'llo'i ammanenne Moollanni Yesuusika leesha siiddo'oyyo. Ee woshshanne ixxuwwina mal bi'aakkoohaannonne belecce'oo qadaalli eddechcha edde'llo'oo lam manchi waatta'a dangonnem illagenne uullito'o. Oo meenti baddita'a uullanne qubbita'a hee'llo'isam oo lamem manchim «Foorinne yookkoka lehu kee'n lambe'enne mahina hassakkamuulla? Ixxi ki'aakko, ka beyyonne bee'e. Meentim ixxi wocu woshsha sawwito'o. Ixxuwwim waammi beyyiinsi daba'llita'a ee woshshi hundam tomminaa mat losaaninaa gatto'i keen hundinaa kutto'o. Ee woshsha asse'amaanina kuramu keen Magda'l Maaraamette, Yoona'atte, Yaaqoob ama Maaraamettee ixxuwwinne maqire hee'llo'i meentoo. Ihukkaarem ixxuwwina woshshoom haqaawwo labaa moo'amu bikkina ee meentika woshsha amma'nnito'oyyo. Ihukkaarem Pheexiroos ee beyyiinsi ki'aa waammi beyyo geerukkuuyyi marukko. Eehe'em afaa heeshaa moo'u ammanenne talbiinsi baxamu keefa'n eddechchi xale'e moo'ukko. Ixxim ee ihu woshshanne maalalukkuuyyi mine marukko. Ee ayyaamom Yesuus losaaniinsi lam losaan Yerusaaleemiinsi tommoo mat kiilomeetiraa massoo Eema'oosa yakkam gatte mattam hee'llo'o. Ixxuwwina'i ixxuwwim ee ihaa hee'u luwwi hundi bikkinam woccam hee'llo'o. Ixxuwwim mat ikka'a lobakata sawwita'a atoorattonam Yesuus hincaa ixxuwwinne marukko. Ihukkaarem ixxotte ihukkisa qoossitambee'isa ixxuwwik illi amadamaa hee'ukko. Yesuusim ixxuwwina dabaraa «Ku ki'nnuwwina'i ki'nnuwwim atoorattakku'uuyyi mattakkam luwwi maruwwa?» yukko. Ixxuwwim kichche'lla'a cawwita'a uullito'o. Ee lasage ixxuwwiinsi mat Qalayoophpha yakkamok dabaraa «Ka saanti woronne ihu luwwa laqqibee'ek Yerusaaleemina koyyiinchi xale'i atettennihe?» yukko. Ixxim ixxuwwina dabaraa «Maruwwa?» yukkaare ixxuwwim dabatta'a «Hiraagaanchi Naazireexxi Yesuus bikkinatte. Ixxi manni hundi illagennee Waa'i illagennee baxinnee wocimminnee malaayyaam hee'ukko. Ee ixxo qeessa awwonsaanii ni gassaanii leh oogato'ina higissa'a uwwita'a saqalto'o. Ihukkaarem neese ‹Isra'eela wolabbanonne fissookko› yinaa neeyyato issinaa hee'nnummo. Odim eehannonnem exxaa oo luwwi hundim ihukkaanniinsi kaballi saxxi balla. Niinninne maqire yo'i meentiinsi mat mat keen neese maalalsiisso'o. Oo meentim daram ki'lla'a waammi beyyo matta'a ixxeka leesha siiddo'oyyo. Ixxuwwim ‹ «Ixxi lehiinsi ki'aakko» yitam asse'amaano kaaltanne moo'nnaammo› yitu'uuyyi waatto'o. Niinninne maqire hee'llo'i keeniinsi mat mat keen waammi beyyo matta'a meenti yukkisam ihaakkoo moo'llo'o. Ihukkaarem ixxooma moo'llo'oyyo» yito'o. Ee lasage Yesuusim ixxuwwina dabaraa «Hiraagaan kuru woshshi hundam qaqqisonne amma'nnitakkambee'i hinkido'i qawwuwwa, Kiristoos ka hawwi hundam aa'aa ixxi lombanne aagimmi hasisooyyonnihe?» yukko. Ee lasage Muse'aanniinsii hiraagaa'n kitaabbuwwiinsii asheeraa keesammi kitaabbuwwanne hundannem ixxi bikkina kuramu luwwi hundam tiraa kurukko. Ixxuwwim mattam hee'llo'i gatte affeena hincito'oohaannonne Yesuus qee'llo maroohaannisa ihukko. Ihukkaarem ixxuwwi «Kaba eelliinchi aageena ihaa uulli hiimu bikkina niinninne maqire gare» yita'a lobakata uunxito'o. Ee bikkina ixxuwwinne maqirem gareena aagukko. Ixxim ixxuwwinne maqire hurbaata iteena afuuraa qorosho'o ki'isaa Waa'a galaxxaa iiqaa ixxuwwina uwwukko. Ee lasage ixxuwwik illi fooqukkaare ixxotte ihukkisa qoossita'a laqqo'o. Ihukkaarem Yesuus ixxuwwi illiinsi willukko. Ixxuwwina'i ixxuwwim «Ixxi niina googonne wocukkuuyyii Keesammi Kitaabiinsi tiraa kurukkuuyyii ni wodan lobakata liiramam hee'ukkoyyonnihe?» yaqqanto'o. Ixxuwwi ee ammanchom ki'lla'a Yerusaaleema daba'llita'a matto'o. Tommii mat losaanii ee losaaninne maqire yo'i keenii mat ikka'a wixxita'a «Hanqinam Moollanni ki'aakko. Simi'ooninam moo'amaakko» yitonam affo'o. Ee lasage oo lamem mannim googonne ihu luwwaa qorosho'o iiqaa uwwukkuuyyi ixxuwwina la'amukkisaa kutto'o. Ixxuwwim eekka wocconam Yesuus ixxi gagim ixxuwwi lambe'enne uullaa «Xummi ki'nnuwwina ihona» yukko. Ixxuwwim wiidda moo'llo'oka labissa'a muggita'a jallito'o. Ihukkaarem Yesuus ixxuwwina «Ki'nnuwwi badditakkamokii ki'nnuwwi wodanonne malantakkamokii mahinatte? An anette ihummisa i angaa i lokkoo moo'llehe. Eesenne moo'llakkam maarii miqii wiiddanne bee'an ihu bikkina eese amaddakka'a moo'llehe» yukko. Yesuusim eehid yaa lasage ixxeka angaa lokkoo ixxuwwina moo'isukko. Ixxuwwim liiranchiinsii maalallatiinsii ki'ukkok amma'nnitoo'n hee'llonam «Ka beyyonne ki'nnuwwina ittakkam luwwi yoohonnihe?» yaa xa'mmukko. Ixxuwwim saramaakkoo qurxumme'ika hoffokam uwwito'o. Ixxim eekka aa'aa ixxuwwi illagennem itukko. Ee lasage ixxim ixxuwwina «An ki'nnuwwinne maqire hee'ummuuyyi ‹Muse'i Seeranne, hiraagaa'nnaannonnee Mazmuu'l Kitaabbuwwannee i bikkina kitaabamu woshshi hundim wo'mmimmi hasisookko› yaa kurummi woshshi kane» yukko. Ee lasage odim Keesammi Kitaaba qoossitamisina ixxuwwika wodano fooqaa'ukko. Ixxim ixxuwwina «Kiristoos hawwo aa'oo'isinaa saxxi ballannem lehiinsi ki'oo'isinaa kitaabamaakko. Ee'isam ‹Ixxi summinnem baaxiilo biiraa yimmikii baaxiilo Waa'i haafoo'isii Yerusaaleemiinsi ki'isaa minaadab hundinam kuramookko› yamamaakko. Ka woshshinam ki'nnuwwi naqaashshuwwa. Oono'o! Iyyanni ‹Asse'oommo› yukkoka an ki'nnuwwina asse'oommo. Ihukkaarem malaayyi iimaniinsi ki'nnuwwanne dilleebe'e ka beero'onne afuullehe» yukko. Ee lasage ixxi losaano Biitaan afeebe'e massaa ixxi anga iim ki'isaa maasse'ukko. Maasse'ukkuuyyim ixxuwwiinsi annanni ihaa iimane marukko. Ixxuwwim ixxena otossita'a lobakat liiranchinne Yerusaaleema daba'llito'o. Daba'llita'ahim hundi ammanem Waa'a galaxxitu'uuyyi Keesammi Miniinsi annanni ikkam hee'llo'oyyo. Mahim qooccamoo'n illageen sagar hee'ukko. Oo sagarim Waa'inne maqire hee'ukko. Oo sagarim Waa'i hee'ukko. Mahim qooccamoo'n illageenim ixxi Waa'inne maqire hee'ukko. Luwwi hundim qooccamukkok ixxennette. Qooccamu luwwiinsi ma'lluchchim ixxi bee'eka qooccamukkoyyo. Ixxi foorina bu'o. Oo foorim mannina caakki hee'ukko. Oo caakkim caakkisookkok tuunsonnette. Tuunsim ixxo kaa'ukkoyyo. Waa'iinsi asse'amaakkoo Yohaannisa yakkam mat manchi hee'ukko. Manni hundim ixxenne ihaa amma'nnoo'isina caakki bikkina kureena naqaash ihaa waarukko. Ixxi caakki bikkina kureena waarukko bagaan ixxi gagoom caakki hee'ukkoyyo. Manni hundinam caakkisoo hanqo'i caakki ka uulla waaram hee'ukko. Ixxi ka uullanne hee'ukko. Ka uullam qooccukkok ixxotte. Ihukkaarem ka uulli manni ixxo la'ukkoyyo. Ixxi gaqqi uulla waarukkaare ixxi minaadab ixxo aa'imma sabbo'o. Ihukkaarem ixxo aa'lla'a ixxonne amma'nnito'i keen hundam Waa'i oos issukko. Ixxuwwim Waa'i oos ikko'ok manni sawwixxisinne te'im maarinnee xiiginnee qaramimminnette ihoo'n Waa'i ixxi oos issu bikkinatte. Sagarim manchi ihukko. Ixxonnem eroommii hanqii wo'mmaa ni lambe'enne hee'ukko. Ixxim Anni Waa'ina mexxo'i Beet ihukkisa ixxeka lomba moo'nnummo. Yohaannisim ixxi bikkina «An ‹Iinniinsi lasonne waarookkok iinniinsi gaassaatim hee'u bikkina iinniinsi lobane› yam hee'ummok ixxotte» yaa sagara iimaa'aa wocukko. Eroommanne eroomma edaa ixxaanninne wo'm eroomminne neese hundam maasse'ukko. Waa'i Muse'enne ihaa Seera uwwaakko. Ihukkaarem hanqii eroommii Yesuus Kiristoosinne uwwamukko. Waa'inne maqire hee'u matem Waa'i Beet mannina la'isukko bagaan Waa'a matim moo'ukkoyyo. Ayihuxxi minaadaba gassaan Yerusaaleemiinsi qeessuwwaa Keesammi Minenne awwaaddam keenoo Yohaannis ayyetda'e ihukkisa xa'mmitamisina asse'llo'aare Yohaannis «An Kiristoosatteyyo» yaa kurukko bagaan lagukkoyyo. Oo asse'anto'i keen «At ayyette? At hiraagaanchi Eeliyaasattennihe?» yita'a xa'mmito'o. Ixxim dabaraa «An Eeliyaasatteyyo» yukko. Odim dabatta'a «At neese egellummi hiraagaanchonnihe?» yito'o. Ixxim dabaraa «An ixxoyyo» yukko. Ee lasage «Eehaara'i ki beyyo neese asse'llo'i keenina daballaa kulloommisina at ki gaga ayyette yitoolla?» yita'a xa'mmito'o. Yohaannisim ixxuwwina dabaraa hiraagaanchi Issaayyaas kitaabanne « ‹Udma'anne Moollannina googo gudissehe› yaa laaroo manchi sagar anette» yukko. Farisaawe'uwwi asse'llo'i keen Yohaannisina odim «Ata'i Waa'i doo'llaakkoo Kiristoosatteyyo te'im Eeliyaasatteyyo te'im hiraagaanchoyyo. Eehaara'i at manna mahina xammaqqoolla?» yita'a xa'mmito'o. Yohaannis ixxuwwina dabaraa «An wo'inne xammaqoommuulla; ihukkaarem ki'nnuwwi laqqakkambee'ek ki'nnuwwi lambe'enne uullaakko. An ixxeka caamma'i fatiram tireena hore'em laboombee'ek ixxi i lasonne waaroolla» yukko. Ookki hundim ihukkok Yohaannis xammaqam hee'u Yoordaanoos daajji eeqidonne yoo Biitaanannette hee'ukko. La'm balla Yesuus ixxi beyyo waarukkuuyyi Yohaannis moo'aa «Oono'o! Mannika baaxiilo shiinshoo Waa'i Gereechchi kane. An ‹Ixxi iinniinsi gaassaatim hee'u bikkina iinniinsi lobane› yummok ixxotte. Isra'ee'l minaadab ixxo laqqamisina wo'inne xammaqummuuyyi waarummo bagaan an i gagim ixxo la'am hee'ummoyyo» yukko. Odim Yohaannis «Keesammi Ayyaan handarekkichchisa iimaniinsi dillaa ixxi hanenne afuurukkuuyyi moo'ummo. An i gagim ixxo la'am hee'ummoyyo. Ihukkaarem eese ‹Wo'inne xammaqe› yaa asse'ukkok iina ‹Keesammi Ayyaan iimaniinsi dillaa ixxonne afuurukkuuyyi moo'lloottokii Keesammi Ayyaaninne xammaqookkokii ixxotte› yukko. Anim eekka moo'aa lasage ixxi Waa'i Beet ihukkisa kurummo» yaa Yesuus bikkina naqqasukko. Odim eehanni la'm balla Yohaannis ixxi losaaniinsi laminne maqirem uullaakkoohaannonne Yesuus higonam Yohaannis moo'aa «Waa'i Gereechchi oono'o!» yukko. Yohaannis ee'isa yukkuuyyi macceessa'a lamem losaanim Yesuusa awwonto'o. Yesuus oo lamem losaanim ixxo awwontamisa laso qerephaa moo'aa «Maha hassakkamuulla?» yaa xa'mmukko. Ixxuwwim dabatta'a «Losisaancho! At hee'lloo beyyi hannonnette?» yita'a xa'mmito'o. Yesuusim ixxuwwina dabaraa «Waattakka'a moo'llehe!» yukko. Ee lasage ixxuwwi matta'a ixxi hee'oo beyyo moo'lla'a ee balla ixxenne maqirem hosso'o. Oo ammanim tommi sa'aata iheena ihaakkoo amman hee'ukko. Yohaannis yu luwwa macceessa'a Yesuusa awwonta'a matto'i lamem keeniinsim mat Simi'oon abbaayyi Indiraasatte hee'ukko. Indiraas gaassaatim ixxi abbaayyi Simi'oona siidaa «Simi'oona, Waa'i doo'llaakkoo Kiristoosa neese siindaammo» yukko. Simi'oonam Yesuus beyyo worukko. Yesuus Simi'oona moo'aa «At Yoona'i beet Simi'oonatte; at Keefa yamantootto» yukko. Keefa yimmi «Kina» yimma. Odim eehanni la'm balla Yesuus Galiila mareena hasukko. Ixxim Filiphphoosa siidaa «Filiphphoosa, at eese awwone» yukko. Filiphphoos hee'ookkok Indiraasii Pheexiroosii hee'llam Beetasaayda yakkam beero'onnetti hee'ukko. Filiphphoosim Naatinaa'eela siidaa «Muse'e kitaabu See'l kitaabannee hiraagaan kitaabbo'i kitaabbuwwannee ixxi bikkina kitaabbo'i Naazireexxi Yesuusa Yooseef beeto siindaammo» yukko. Naatinaa'eelim ixxena dabaraa «Naazireetiinsi danaam luwwi fireena xanoohonnihe?» yukko. Filiphphoos ixxena dabaraa «Waattaa moo'e» yukko. Naatinaa'eel ixxi beyyo waaronam Yesuus moo'aa «Jolbee'i hanqo'i Isra'ee'l manchi kuno'o!» yukko. Naatinaa'eel ixxena dabaraa «At eese hinkid laqqitto?» yaa xa'mmukko. Odim Yesuus Naatinaa'eelina «Filiphphoos keese weeshoo'n illageenim an keese odakkichchi lugumonne hee'llittuuyyim moo'aammo» yaa dabarukko. Naatinaa'eelim Yesuusina dabaraa «Losisaancho! At Waa'i Beeto! At Isra'eelina adila!» yukko. Yesuusim ixxena «An keese odakkichchi lugumonne moo'aammo yummi bikkina at eese amma'nnitoohonnihe? Eehanniinsi lophphoo luwwam moo'llootto. Hanqinam an ki'nnuwwina kuroommo; iiman fooqoohaare Waa'i asse'amaan Manchi Beet hanenne iim fittu'uuyyii aad dillitu'uuyyii moo'llakkamo» yukko. Eehanni saxxi ballina Galii'l uullanne yoo Qaana'a yakkam beero'onne bollochcho'i hee'ukko. Yesuusina ama Maaraamem eekke'e hee'llo'o. Yesuusim ixxi losaaninne maqirem ee bollochcho'o weeshamaa hee'ukko. Bollochcho'i mannina woyi'n diqaas beeddukkaare Maaraame Yesuusina «Woyi'n diqaas beeddaakko» yito'o. Yesuus isena «Iyyumma, an issoommi luwwa at kuttitte. Iina amman afukkoyyome» yukko. Yesuus ama awwaadaanina «Ixxi kuroo luwwa maham issehe» yito'o. Ayihuxxi mannina muccurimmi losan hee'u bikkina aanshaqqakkam wo'o issimmina kiniinsi baxamaakkoo loh jaalo'uwwi eekke'e hee'ukko. Oo jaalo'uwwi annannichchim tommi wo'i harachcho amadoohan hee'ukko. Yesuus ee awwaadaanina «Jaalo'uwwanne wo'o wonshehe» yukko. Ixxuwwim jaalo'uwwanne wo'o ciffaa'lla'a wonshito'o. Ixxi ee awwaadaanina «Huno'llehe, hoffokam inkiittakka'a bollochcho'i maadda egeraanchina massitakka'a uwwehe» yukkaare ixxuwwim massita'a uwwito'o. Oo bollochcho'i maadda egeraanchim gubbaa moo'u ammanenne woyi'n diqaasanne daba'llaa hee'ukko. Ixxim oo woyi'n diqaas hanniinsi waaruda'e la'ukkoyyo. Ihukkaarem wo'o inkiitto'i keen laqqa'a hee'llo'o. Bollochcho'i maadda egeraanchi bollochcho'i annichcho weeshaa «Ayyi manchim gaassaa illichchi woyi'n diqaasa uwwaa manni agaa goddaa lasage qiraare'e uwwookko. Ihukkaarem at illichchom kabad afeebe'e uwwittoyyo» yukko. Yesuus Galiilanne Qaana'a yakkam beero'onne ka luxxi maalalsiisoo mare'e issaa ixxi lomba moo'isukko. Ixxi losaanim ixxonne amma'nnito'o. Ee lasage Yesuus ixxi amanne, abbaayyuwwinnee ixxi losaaninnee maqirem Qifirinnaahoom beero'o dillaa ee beyyonne hofqax ballam afuurukko. Ayihuxxi mannik Shaashshiqqi Ugud hincaakkoohaannonne Yesuus Yerusaaleema marukko. Ixxim Keesammi Minenne diinate dabassitam keenii labeennuwwa, gereebbaa handare'ee biteessam keenii daddattu'uuyyi moo'aa jiraafa dadaa ee jiraafinne gereebbaa labeennuwwaa hundam Keesammi Miniinsi fissukko. Diinate dabassitam kee'n xaraphpheezam qubbaa'aa ixxuwwi diinate fincukko. Odim handare'e biteessam keeninam «Kaka ka beyyiinsi fissitakka'a hoollehe! Iyyanni mine dadda'l min issitakkotte» yukko. Ee ammane ixxi losaan Keesammi Kitaabanne «Ki mi'n to'achchi eese gii'llisa shokkiisukko» yamamaa kitaabamukkoka sawwito'o. Ee lasage Ayihuxxi manni ixxena «Kaka issitoo malaayyi kiina yoo'isa moo'isoo mare'i maruwwa?» yito'o. Yesuus ixxuwwina dabaraa «Ka Keesammi Mine ginditakkolas an sas ballanne dabaraa baxoommo» yukko. Ayihuxxi mannim dabatta'a «Ku Keesammi Min baxamaa beeddukkok sorennee loh hiinchonnette. At sas ballanne dabattaa baxxoohonnihe?» yito'o. Ihukkaarem Yesuus «Keesammi Mine» yaa wocukkok ixxi gaqqi bikkinatte hee'ukko. Yesuus lehiinsi ki'aa lasage ixxi losaan eekka sawwita'a Keesammi Kitaabanne kitaabamukkokaa Yesuus wocukkokaa amma'nnito'o. Ee ugudanne Yesuus Yerusaaleemanne hee'ukkuuyyi maalalsiisoo mare'uwwa issukkoka moo'lla'a lobakat keen ixxonne amma'nnito'o. Ihukkaarem Yesuus manni hundam la'am hee'u bikkina ixxuwwa amma'nnukkoyyo. Ixxi manni wodanonne yoo luwwa la'am hee'u bikkina ayyi manchim manni bikkina ixxena kurona hasam hee'ukkoyyo. Ayihuxxi manna awwonsaanchi mat Niqoodimoosa yakkam Farisaawekkichchi hee'ukko. Oo Niqoodimoos hiimonne Yesuus beyyo waaraa «Losisaancho! Ayyim ka at issitoo maalalsiisoo mare'uwwa Waa'i ixxennette ihubeelas isseena xanoobee'i bikkina at Waa'i beyyiinsi waattaattoo losisaanchi ikkittisa lanqoommo» yukko. Yesuusim Niqoodimoosina dabaraa «Hanqinam an kiina kuroommo; ayyim la'mmaagge qaramubeelas Waa'i adillano moo'eenam xanooyyo» yukko. Niqoodimoos Yesuusina dabaraa «Manchi lomma'nnaa lasage la'mmaagge hinkid ihaa qarameena xanookko? La'mmaagge ixxi am godabonne aagaa qarameena xanoohonnihe?» yukko. Yesuusim dabaraa «Hanqinam an kiina kuroommo; ayyim wo'innee Keesammi Ayyaaninnee qaramubeelas Waa'i adillanonne aageena xanooyyo. Maariinsi qaramukkok maarame. Odim Keesammi Ayyaaniinsi qaramukkok Keesammi Ayyaa'nnaneme. La'mmaagge qaramimmi hasisookko yummi bikkina maalaltitte. Hafachchi hasu kolli hundannem hafachchookko. Ixxeka sagara macceessakkamo bagaan hanniinsi waaruda'e te'im hanno marooda'e laqqakkamoyyo. Keesammi Ayyaaniinsi qaramukkok hundim ee'isame» yukko. Niqoodimoos ixxena dabaraa «Kuk hinkid iheena xanookko?» yukko. Odim Yesuus dabaraa «At Isra'ee'l minaadabina losisaanchi ikkittuuyyi kaka hinkid laqqittoyyo? Hanqinam an kiina kuroommo; neese lanqoommoka woncoommo; ni illinne moo'nnummokam kulloommo. Ihukkaarem ki'nnuwwi neese kulloommoka aa'llakkamoyyo. An ka uulli luwwa kurummaarem amma'nnitakkobee'ek iima'nneka kurumta'n hinkid amma'nnitakkeena xantakkamo? Iimaniinsi dillu Manchi Beetiinsi bagaan iimane firukkok matim bee'e. Muse'e udma'anne naas xaariinsi hamashshichcho baxaa saqalukkisam Manchi Beetim ixxonne amma'nnookkok hundim heer heerina hee'oo heechcha siixxoo'isina saqalamimmi hasisookko. Mashka'oomim Waa'i ka uulla iittaa ixxeka mexxo'i Beeto uwwukkok ixxonne amma'nnookkok ayyim heer heerina hee'oo heechcha siixxoo'isinatte bagaan bi'oo'isinayyo. Waa'i ixxi Beeto ka uulla asse'ukkok ixxi Beet ka uulli minaadaba hundam gatisonatte bagaan ixxuwwanne oogatonayyo. Ixxonne amma'nnoohaannonne ayyennem Waa'i oogatooyyo. Ihukkaarem ixxonne amma'nnubee'ek mexxo'i Waa'i Beetonne amma'nnubee'i bikkina eraarem oogatamaakko. Waa'i ixxuwwanne oogatukkokim caakki ka uulla waarukkaare mannik bax jor ihu bikkina caakka sabba'a tuunso iittito'aarette. Jora baxookkok ayyim caakkanne firukkaare ixxek bax la'amoo bikkina caakkanne firaa ha'yyooyyo. Ihukkaarem hanqa baxookkok ixxek bax Waa'i yukkisinne baxamaakkoohan ihukkis la'amoo'isina caakkanne firookko» yukko. Ee lasage Yesuusii ixxi losaanii Yihuxxi uulla matta'a ee beyyonne xammaqukkuuyyi ixxuwwinne maqirem afuurukko. Yohaannisim Heenoona yakkam beyyina gadanonne yoo Saaleemanne lobakat wo'i hee'u bikkina manna xammaqam hee'ukko. Mannim waaraa xammaqamam hee'ukko. Yohaannis ee ammane karaxxi minenne aagukkoyyi hee'ukko. Ee ammane Yohaannis losaanii mat Ayihuxxi uulli manchii muccurimmi see'l bikkina fitantam hee'llo'o. Yohaannis losaan waatta'a «Losisaancho! Kiinninne maqire Yoordaanoos daajji eeqidonne hee'ukkok atim ixxi bikkina kuttam hee'llittok eekke'e xammaqoolla. Manni hundim ixxi beyyo maroolla» yita'a Yohaannisina kutto'o. Yohaannis ixxuwwina dabaraa «Ayyi manchim iimaniinsi ixxena uwwamu luwwiinsi bagaan maham isseena xanooyyo. ‹An ixxeensi gaassaa asse'amaammo bagaan Kiristoosatteyyo› yummisa ki'nnuwwi gagim laqqakkamo. Idaayyichcho eebukkok ixxim idaayyichcho. Idaayyichchi wocoo woshsha uullaa macceesoo saawwim ixxi sagara macceesaa lobakata liiramookko. Ee'isam anim kaba lobakata liiramaammo. Ixxi lophphukkuuyyi marona an hoffe'ummuuyyi marimmi hasisookko» yukko. Hanaan iimaniinsi waarookkok hundiinsim lobane. Ka uulliinsette ihookkok ka uullan ihu bikkina wocoo woshshim ka uulli woshsha. Iimaniinsi waarookkok hundiinsim lobane. Ixxi moo'ukkokaa macceesukkokaa kurookko. Ihukkaarem ixxi kuroo woshsha aa'ookkok bee'e. Ee ixxi kuru woshsha aa'ookkok Waa'i hanqo'an ihukkisa moo'isookko. Waa'i asse'oo keenina ixxeka Keesammi Ayyaana keenaa uwwoobee'i bikkina Waa'iinsi asse'amukkok Waa'i sagaram wocookko. Waa'i ixxi Beeto iittaa ixxena yoo luwwa hundam Beetina uwwaakko. Beetonne amma'nnoohaannina heer heerina ihoo heechchi yookko. Ihukkaarem Beetina ijaajamoobee'aannonne Waa'i quunqi ixxi hanenne yookko bagaan heechchi ixxena bee'e. Yohaannisiinsi loboka Yesuus lobakat keeno losaan issoo'isaa xammaqoo'isaa Farisaawe'uwwi macceesso'isa la'u ammanenne Ee Galiila marukkuuyyi Samaare'inne higimmi hasisoohan ihu bikkina Yaaqoob ixxi beet Yooseefina uwwu beyyina gadan ihoo Sikaara yakkam Samaare'i uulli beero'o marukko. Ee beyyonnem Yaaqoob hinaa wo'o fissu bar hee'ukko. Yesuus taakke'aa hoogaa hee'u bikkina balli loh sa'aaxxi qunxe ihaakkoo ammanenne ee wo'i ba'l gadanonne afuurukko. Mat Samaare'i uulli meentichcho wo'o inkiitteena ee beyyo waatto'o. Yesuus ee meentichchona «Iina wo'ika agise» yukko. Ee ammane ixxi losaan hurbaata bitaa'lleena beero'o matta'a hee'llo'o. Oo meentichcho Yesuusina dabatta'a «At Yihuxxi uulliinsette ikkittuuyyi eese Samaare'i uulli meentichcho hinkid wo'o xa'mmitoolla?» yito'o. Ayihuxxi mannii Samaare'i mannii hore'em edantam hee'llo'oyyo. Yesuus ee meentichchona dabaraa «Waa'i uwwu uwwanchaa ka keese ‹Wo'o agise› yookkok ayyetda'e ihukkisaa laqqita'n at ixxo uunxitam hee'llitto. Ixxim kiina heechcha uwwoo wo'o uwwam hee'ukko» yukko. Oo meentichchom ixxena dabatta'a «Moollanna! Kiina wo'o inkiittoo mu'ut bee'e; barim xilla. Eehaare heechcha uwwoo wo'o hanniinsi siiddootto? Niina ka wo'o inkiilloommi bare uwwu niyyanni Yaaqoobiinsi at lophphitoohonnihe? Yaaqoob ixxi gagim, ixxi oosii ixxi diinatii ka ba'l wo'iinsi aggo'oohane» yito'o. Yesuus isena dabaraa «Ka wo'iinsi agookkok ayyim daba'llaa xeebe'ookko. Ihukkaarem an uwwoommi wo'iinsi agookkok hore'em xeebe'ooyyo. An uwwoommi wo'i ixxi woronne daadoo wo'i bu'isa ihookko. Oo daadoo bu'im ixxena heer heerina hee'oo heechcha uwwookko» yukko. Oo meentichcho ixxena dabatta'a «Moollanna! An xeebe'aa ka wo'iinsi inkiireena waaroombee'isina ee wo'o iina uwwe» yito'o. Yesuus isena dabaraa «Mattaa ki aro'o amaddaa keyye waare» yukko. Meentichchom dabatta'a «Iina aro'i bee'e» yito'o. Ixxim isena «At ‹Iina aro'i bee'e› yimminne hanqa woccaatto. Kiina onti aro'uwwi hee'llo'o. Kiinninne yookkokim kiina aro'oyyo. Eekka wocimminne hanqa woccaatto» yukko. Oo meentichchom dabatta'a «Moollanna! At hiraagaanchi ikkittisa an do'ixxaa la'aammo. Niyyanno'i ka duunanne Waa'ina otossito'o; ki'nnuwwi ihukkaarem Waa'ina manni otossimmi hasisookkok Yerusaaleemannette yitakkamuulla» yito'o. Yesuusim isena dabaraa «Taa meentichche, an yummi woshsha amma'nne; ka duunannettem ihukko te'im Yerusaaleemanne Anni Waa'ina ki'nnuwwi otossitakkambee'i amman waarookko. Ki'nnuwwi Samaare'i manni laqqakkambee'i luwwina otossitakkamo. Ihukkaarem neese lanqoommaannina otossinoommo. Mashka'oomim Gatisaanchi waarookkok Ayihuxxi minaadabiinsette. Waa'ina wodaninne otossitam keen Ayyaaninnee hanqo'isinnee otossitam amman waarookko. Ammanoomim kabadette; ee'isinne ixxena otossitam keeno Waa'i hasookko. Waa'i ixxi gagoomim Ayyaana; ixxena otossitam keenim Ayyaaninnee hanqo'isinnee otossimmi hasisookko» yukko. Oo meentichchom ixxena dabatta'a «Kiristoos waaroo'isa la'oommo. Ixxi waaroo ammane hundem luchchom niina kurookko» yito'o. Yesuusim isena dabaraa «Oo at yitoottok keese atoorassoommok anetteme» yukko. Ee ammanem Yesuusik losaan daba'llita'a waatta'a meentichchonne atooraroo'isa moo'lla'a lobakata maalalto'o. Ihukkaarem «Maha hassaate?» te'im «Isenne mahina atoorattoolla?» yukkok matichchim hee'ukkoyyo. Ee lasage oo meentichcho iseka wo'i harachcho utta'a beero'o matta'a mannina «An issummi luwwi hundam kuraakkoo mancho waattakka'a moo'llehe; ixxi Kiristoosatte ihoo'n urooyyo» yito'o. Ixxuwwim beero'iinsi fitta'a ixxi beyyo waatto'o. Ee ammanem ixxi losaan «Losisaancho! Hurbaata ite» yita'a xa'mmito'o. Ihukkaarem Yesuus ixxuwwina «An itoommok ki'nnuwwi laqqakkambee'i hurbaat yookko» yukko. Eehid yukkaare ixxi losaan ixxuwwina'i ixxuwwim «Ayyi la'ukko ixxena hurbaata eebu manchi yoohonnihe?» yito'o. Yesuusim ixxuwwina «I hurbaat eese asse'ukkaanni ijaajo issimma; ixxi baxom guullimma; ki'nnuwwi ‹Kaba hurbaaxxi muratina soor agan gataakko› yitakkamuullayyonnihe? An ki'nnuwwina kuroommo; ki'nnuwwi daaphphitakka'a hurbaata murakkamisa ihaa ajaaraakkoo'isa moo'llehe. Hurbaata murookkok ixxi malaayyika a'llookko. Heer heerinam hee'oo heechchina misha wixxaa'ookko. Ee bikkina wixukkokii murukkokii maqirem liirantamo. ‹Matii wixookko, mullekii murookko› yakkamok hanqame. Ee'isam ki'nnuwwi badattakkobee'i hurbaata muttakkamisina asse'aammo. Mulli keen badarukkaare ixxuwwi badallatonne ki'nnuwwi aaggakko'ookko» yukko. Oo meentichcho «An issummi luwwi hundam ixxi kuraakko» yita'a kutto'i bikkina ee beero'iinsi dut Samaare'i Yesuusanne amma'nnito'o. Ee bikkina Samaare'i ixxi beyyo waatta'a ixxuwwinne maqire afuuroo'isina uunxito'aare ee beyyonne lam balla hosukko. Yesuus wocu woshshi mashka'inne lobakat mulli keenim exxaa amma'nnukko. Ixxuwwim ee meentichchona «Kaba neese amma'nninummok at kuttitti woshshi bikkinatte ihoo'n neese ni gagim ixxeensi macceensummi bikkinatte. Hanqinam minaadaba Gatisaanchi ihukkisa lanqaammo» yito'o. Yesuus lam balla ee beyyonne hosaa lasage Galiila marukko. Yesuus ixxi gagim «Hiraagaanchi ixxi gaqqi uullanne lomba siixxooyyo» yaa kuraa hee'ukko. Ihukkaarem Shaashshiqqi Ugudina Galii'l manni Yerusaaleema matta'a hee'llo'i ammane Yesuus issu luwwi hundam moo'lla'a hee'llo'i bikkina Yesuus ixxuwwi uulla maru ammanenne liiranchinne aa'llo'o. Ee lasage wo'o woyi'n diqaasanne dabaru beyyo Galiilanne yoo Qaana'i beero'o daba'llaa marukko. Ee ammane Qifirinnaahoomanne ixxek beet xissaakkoo mat gassaanchi hee'ukko. Yesuus Yihuxxi uulliinsi Galiila waarukkisa oo gassaanchi macceesu ammanenne ixxek beet foo'l manchi hee'u bikkina Qifirinnaahooma Yesuus dillaa fayyiisoo'isina uunxukko. Ee bikkina Yesuus ixxena dabaraa «Mare'ee maalalsiisoo luwwaa moo'llakkobeelas ki'nnuwwi amma'nnitakkamoyyo» yukko. Oo gassaanchim «Moollanna! I beet lehoo'n mallona» yukko. Yesuus ixxena dabaraa «Ki beet lehooyyo; mare» yukko. Oo manchim Yesuus wocu sagara amma'nnaa marukko. Oo manchi daba'llaa maronam ixxek awwaadaan ixxenne edanta'a beetina e'llukkisa kutto'o. Ixxim beetina e'llu amman hinki ammanda'e ihukkisa xa'mmukko. Ixxuwwim ixxena «Beeballa lamar sa'aatanne ixxek iibbi urukko» yito'o. Ee xissu beet annim Yesuus «Ki beet lehooyyo» yu amman ee amman ihukkisa la'ukko. Ee bikkina ixxii ixxi mi'n abaroosii hundim Yesuusanne amma'nnito'o. Yesuus Yihuxxi uulliinsi Galiila waaraa issu maalalsiisoo mare'ina ku mare'i la'mmane. Ee lasage Ayihuxxi mannik ugud hee'u bikkina Yesuus Yerusaaleema marukko. Yerusaaleemanne Gereebbi Gooca yakkam beyyonne leeraakkoo delbi wo'i hee'ukko. Ee wo'ikim summi Ibro'isinne Beetasaayda yakkaman hee'ukko. Ee beyyonne odim daba'llamakkam onti gooc hee'ukko. Sadee sadeenti hiinchoo jabbaakkoo mat manchim ee beyyonne hee'ukko. Yesuus ee mancho moo'aa ee beyyonne lobakat ammane iinse'aa hee'ukkisa la'aa «Mancho, fayye'lleena hassoohonnihe?» yukko. Oo jabbaanchim dabaraa «Moollanna! Wo'i heekke'oo ammane eese wo'onne aagisoo manni bee'e. An aageena maronam mullek iinniinsi gaassaa aagookko» yukko. Yesuus ixxena «Iimitaa kiikka dakka iyyitaa taakke'llaa mare» yukko. Ee ammanem oo manchi fayye'aa ixxeka dakka iyyaa taakke'aa marukko. Oo ballim Usheexxaxxi Ayyaam hee'ukko. Ee bikkina Ayihuxxi manna awwonsaan ee fayye'u manchina «Kaballi Usheexxaxxi Ayyaamo. Usheexxaxxi Ayyaamonne dakka iyyitona Seer uwwooyyo» yito'o. Ihukkaarem oo manchi ixxuwwina dabaraa «Eese fayyiisu manchi ‹Kiikka dakka iyyitaa mare› yaakko» yukko. Ixxuwwim ee manchina «Keese ‹Dakka iyyitaa mare› yu manchi ayyette?» yito'o. Ee beyyonne lobakat minaadab hee'ukko. Yesuus ee minaadaphphi lambe'enne aagaa daphphaa xa'u bikkina oo fayye'u manchi fayyiisukkok ayyetda'e ihukkisa la'ukkoyyi hee'ukko. Eehanniinsi lasage Yesuus ee mancho Keesammi Minenne siidaa ixxena «Oono'o! At fayye'llaatto; kanniinsi lophphookkok keesenne afoobee'isa ka lasage baaxiilo baxxitte» yukko. Oo manchim maraa ixxo fayyiisukkok Yesuusatte ihukkisa Ayihuxxi manni awwonsaanina kurukko. Ayihuxxi manni awwonsaanim Usheexxaxxi Ayyaamonne ee mancho fayyiisu bikkina Yesuusa hawwisso'o. Ihukkaarem Yesuus ixxuwwina «Iyyanni kabad afeebe'em baxoolli ihu bikkina anim baxoommuulla» yukko. Ayihuxxi manni awwonsaan Yesuusa shiteena murte'lla'a ki'llo'ok Usheexxaxxi Ayyaa'm seera gindu bikkina xale'i ihoo'n ixxi gaga Waa'ina Beet issaa Waa'inne gudaanchi ihu bikkinatte. Yesuus ixxuwwina dabaraa «Hanqinam an ki'nnuwwina kuroommo; anni issukkuuyyi moo'ukkan xale'e bagaan beet ixxi gaginne maham isseena xanooyyo. Anni issookkoka hundam beetim issookko. Anni beeto iittoo bikkina baxoo luwwi hundam ixxena moo'isookko. Ki'nnuwwi maalaltakkamisina ka keeniinsim lophphoo baxo moo'isookko. Waa'i leto'i keeno lehiinsi ki'isaa heechcha uwwoo'isam Beetim hasukkaannina heechcha uwwookko. Anni ayyennem oogatooyyo. Oogatimmi malaayye hundam Beetina uwwaakko. Ee'isa issukkokim manni hundim anna lonsoo'isam Beetom lonsoo'isinatte. Beeto lonsoobee'ek ayyim ixxi Beeto asse'u Waa'am lonsoobee'ane. Hanqinam an ki'nnuwwina kuroommo; an wocoommi woshsha macceesookkokii eese asse'ukkaannonne amma'nnookkokii heer heerina hee'oo heechcha siixxaakko. Ixxi lehiinsi heechchanne higaakko bagaan ixxonne oogatoommoyyo» yukko. Odim Yesuus «Hanqinam an ki'nnuwwina kuroommo; leto'i keen Waa'i beetika sagara macceessam amman waarookko. Oohim kabadette. Macceessam keenim heechcha siixxitamo. Waa'i heechchina bu'i ihukkisam ixxi beetom heechchina bu'i issaakko. Ixxi Manchi Beet ihu bikkina oogatoo malaayye anni ixxena uwwaakko. Kannonne maalaltakkotte! Waammi woronne yo'i keen hundim ixxi sagara macceessa'a waammi woriinsi fittam amman waarookko. Eroka baxxo'i keen lehiinsi heechchina ki'llamo. Odim jora baxxo'i keen oogato'o aa'lleena lehiinsi ki'llamo» yukko. Odim Yesuus «An eese asse'ukkaanni doo'lla ixxeensi macceesummisinne isseena hasoommo bagaan i doo'lla issoombee'i bikkina an oogatoommi oogato'i hanqo'ane. An i malaayyinne maham isseena xanoommoyyo. An i gaqqi bikkina kurumta'n i woshsha ayyim hanqi issaa aa'ooyyo. Ihukkaarem i bikkina kurookkok mullekim yookko. Ixxi i bikkina kuru woshshi hanqi ihukkisa la'oommo. Ki'nnuwwi Yohaannis beyyo manna asse'llakko'aare hanqi bikkina ixxi kuraakko. Eekka yummok ki'nnuwwi gattakkona hasaatette bagaan i bikkina manni naqqasona hasaateyyo. Ixxim gii'llisa aphphoohanee caakkisoohanee hee'ukko. Ki'nnuwwi hoffi ammanina ee caakkanne liirantakkeena doo'llitakko'o. Ihukkaarem i bikkina Yohaannis kurukkaanniinsi lonsaa kurookkok yookko. Oohim an baxaa guullona Iyyanni uwwu baxo. Oo an baxoommi bax ixxi gagim Iyyanni eese asse'ukkisa kurookko. Eese asse'u Iyyanni ixxi gagim i bikkina kuroolla. Ixxeka sagara ki'nnuwwi hore'em macceessakko'oyyo. Ixxeka hagaram hore'em moo'llakko'oyyo. Ixxi asse'ukkoka amma'nnitakkambee'i bikkina ki'nnuwwi woronne ixxek sagar bee'e. Keesammi Kitaabanne heer heerina hee'oo heechchi ki'nnuwwina yookkoka labissakka'a saarayyitakkamo. Oo kitaabim i bikkina kuroohane. Ihona bagaan heechcha siixxitakkeena i beyyo waarimma sabbakko'ookko. Manni eese lonsona hasoommoyyo. Ki'nnuwwi woronne Waa'ik iitti bee'isa an la'oommo. An Iyyanni summinne waarummaare ki'nnuwwi eese aa'llakko'oyyo. Mullek ixxi gaqqi summinne waaruta'n aa'llakkamo. Odim ki'nnuwwi matem Waa'iinsi waaroo lomba sabbakka'a ki'nnuwwina'i ki'nnuwwim lonsaqqantakkam keen hinkid amma'nnitakkeena xantakkamo? An ki'nnuwwa Iyyannanne kasasoommoka labissakkotte. Ki'nnuwwa kasasookkok ki'nnuwwi neeyyato issitakkam Muse'ette. Muse'e amma'nnitakko'oohan yakkota'n eesem amma'nnitakkam hee'llakko'o. Mashka'oomim Muse'e kitaabukkok i bikkinatteme. Ihukkaarem ixxi kitaabu luwwa amma'nnitakkobeelas hinkid i sagara amma'nnitakkamo?» yukko. Ee lasage Yesuus Galii'l Dambalaq eeqido firukko. Oohim Xibiriyaadoos Dambalaq hee'ukko. Yesuus jabbaano fayyiisimminne issu maalalsiisoo mare'e moo'llo'i bikkina lobakat manni ixxo awwonto'o. Duunanne firaa ixxi losaaninne maqirem Yesuus afuurukko. Ee ammane Ayihuxxi minaadaphphi Shaashshiqqi Ugud hincaa hee'ukko. Lobakat minaadab ixxi beyyo waarukkuuyyi moo'u ammanenne Filiphphoosina Yesuus «Ku manni itona qorosho'o hanniinsi bito aa'nnoommo?» yukko. Yesuus eehid yukkok Filiphphoosa keeneenatte bagaan issoo luwwa ixxi gagim la'am hee'ukko. Filiphphoos ixxena dabaraa «Annannichchinam gootto'o gootto'o afisimminam lam xibbi diinaa'l qorosho'im ihooyyo» yukko. Ixxi losaaniinsi mat hee'u Indiraas ixxim Pheexiroosa yakkam Simi'oonina abbaayyi Yesuusina «Onti xeffo'i so'i qorosho'oo lam qurxumme'ee amadaakkoo mat beet keyye yookko. Ihukkaarem ka manni hundinam kuqaxichchi hinkid iheena xanookko?» yukko. Yesuus dabaraa «Manna afuussehe» yukkaare afuussito'o. Ee beyyonne manni afuuroo'isina lobakat hix hee'ukko. Ee mannikim goo'nnek xig onti kuma ihooqax hee'ukko. Manni afuuraa lasage Yesuus ee qorosho'o aa'aa Waa'a galaxxaa ee afuuru mannina baxxansukko. Ee'isam qurxumme'em ixxuwwi hassoqaxa baxxansukko. Ixxuwwi itta'a goddita'a lasage ixxi losaanina «Beyyonne gatu giggiriinsi mahim gatoobee'isa ki'issehe» yukko. Ee bikkina ixxuwwi ee ontem xeffo'i qorosho'iinsim itakka'a gatu giggira wixxaa'lla'a tommonnee lam sanfonnee wonshita'a ki'isso'o. Oo manni ixxi issu mare'e moo'lla'a «Kuk hanqinam ‹Ka uulla waarookko› yakko'i hiraagaancho!» yito'o. Mannim waatta'a ixxo amadda'a malaayyinne adil issiteena hasso'isa Yesuus la'aa annanni ihaa mullam odim duunanne firukko. Uulli hiimukkaare ixxi losaan dambalaqa dillita'a wongirannem aagga'a dambalaq eeqidonne yoo Qifirinnaahooma matto'o. Oo ammanim tuunsi hee'ukko. Ee ammane Yesuus ixxuwwi beyyo waaroo'nnim hee'ukko. Mattonam malaayyaam hafachchi ki'u bikkina dambalaqanne womoor ki'ukko. Ixxuwwi onto te'im loh kiilomeetira ihooqaxa matto'isam dambalaq hanenne Yesuus taakke'ukkuuyyi wongi'l kollonne hincukkuuyyi moo'lla'a baddito'o. Ihukkaarem Yesuus ixxuwwina «Anette; badditakkotte!» yukko. Ee lasage ixxo liiranchinne aa'lla'a wongiranne aagisso'isam mattam hee'llo'i uulla affo'o. La'm balla dambalaq eeqidonne gatta'a hee'llo'i minaadab eekke'e uullaa hee'ukkok mexxo'i wongir ihukkisaa Yesuus ee wongiranne aagoo'nnim ixxi losaan mullam utta'a matto'isaa laqqo'o. Ee ammanem Moollanni Yesuus Waa'a galaxxaa lasage qorosho'o itto'i beyyina gadano Xibiriyaadoosiinsi wongilluwwi waarukko. Manni Yesuusii ixxi losaanii ee beyyonne bee'llo'isa moo'llo'i ammanenne ixxuwwim wongilluwwanne aagga'a Yesuusa hassu'uuyyi Qifirinnaahooma matto'o. Ixxuwwim dambalaq eeqidonne Yesuusa siidda'a lasage ixxena «Losisaancho! Ka beyyo hinki ammane waattitto?» yito'o. Yesuusim ixxuwwina dabaraa «Hanqinam an ki'nnuwwina kuroommo; eese hassakkamuullak qorosho'o godditakka'a ittakko'i bikkinatte bagaan mare'e moo'llakko'i bikkinayyo. Bi'oo hurbaatina baxxakkotte; ihukkaarem Manchi Beet uwwoo heer heerina hee'oo hurbaatina baxxehe. Mashka'oomim anni Waa'i ixxonne koobo'o koobaakko» yukko. Ixxuwwim ixxena «Waa'ika baxo banxeena neese maha issino?» yito'o. Yesuus ixxuwwina dabaraa «Waa'i ki'nnuwwi issitakkona hasoo bax ixxi asse'ukkaannonne amma'nnitakkonatte» yukko. Ee bikkina ixxuwwi odim «Eehaare neese moo'nnaa keesenne amma'nninoommisina maalalsiisoo mare'e maha issitootto? Madu baxxootto? Keesammi Kitaabanne ‹Ittamisina iimaniinsi hurbaata uwwukko› yamamaa kitaabamukkisanne niyyanno'i udma'anne maanna'a itto'o» yito'o. Odim Yesuus ixxuwwina «Hanqinam an ki'nnuwwina kuroommo; ki'nnuwwina iimaniinsi hurbaata uwwukkok Muse'eyyo. Iimaniinsi hanqo'i hurbaata uwwookkok Iyyanna. Mashka'oomim Waa'i uwwu hurbaat mannina heechcha uwwookkok iimaniinsi dillukkane» yukko. Ixxuwwim ixxena «Moollanna! Ee hurbaata niina hundi ammanem uwwe» yito'o. Yesuus ixxuwwina «An heechcha uwwoommi hurbaata. I beyyo waarookkokim sibaarooyyo. Eesenne amma'nnookkokim hore'em xeebe'ooyyo. Ihukkaarem ki'nnuwwi eese moo'llakko'aarem amma'nnitakkobee'isa kuraammo. Iyyanni iina uwwukkok hundim i beyyo waarookko. Ee i beyyo waarookkokam an biiranne holloommoyyo. Mashka'oomim an iimaniinsi dillummok eese asse'ukkaanni doo'lla isseenatte bagaan i doo'lla isseenayyo. Eese asse'ukkaannik doo'l iina uwwu keeniinsi matichchim bi'oo'n lasaanchi ayyaamonne hundam lehiinsi ki'isoommisinatte. Iyyanni hasookkok Beeto moo'aa ixxonne amma'nnookkok hundim heer heerina hee'oo heechcha siixxoo'isinatte. Anim ixxo lasaanchi ayyaamonne lehiinsi ki'isoommo» yukko. Yesuus ixxuwwina «Iimaniinsi dillu hurbaat anette» yu bikkina wixxito'i Ayihuxxi minaadab ixxonne quunquunto'o. Ixxuwwim «Ku Yesuus Yooseef beetoyyonnihe? Ixxeka annaa amaa neese lanqoommaneyyonnihe? Ixxi kaba hinkid ‹Iimaniinsi dillaammo› yoolla?» yito'o. Yesuus ixxuwwina dabaraa «Ki'nnuwwina'i ki'nnuwwim quunquuntakkotte. Eese asse'u Iyyanni i beyyo worubeelas ayyim i beyyo waareena xanooyyo. Ixxom lasaanchi ayyaamonne lehiinsi ki'isoommo. Hiraagaan ‹Hundim Waa'iinsi lossam keen ikkamo› yita'a kitaabbo'ookko. Iyyanniinsi macceesukkokii losukkokii hundim i beyyo waarookko. An eehid yoommok manni Waa'a moo'aakko yimminayyo. Waa'i beyyiinsi waarukkaanniinsi bagaan Waa'a moo'ukkok matim bee'e. Hanqinam an ki'nnuwwina kuroommo; eesenne amma'nnoohaannina ayyenam heer heerina hee'oo heechchi yookko. An heechcha uwwoommi hurbaata. Ki'nnuwwi anno'i maanna'a udma'anne itto'aarem leto'o. Manni ixxeensi itaa lehoobee'isina kaba iimaniinsi dillu hurbaat kane. Iimaniinsi dillu heechcha uwwoo hurbaat anette. Ayyim ka hurbaatiinsi itulas heer heerinam hee'ookko. Ka uulli minaadabina heechcha uwwoo'isina an uwwoommi hurbaat i maara» yukko. Ee lasage Ayihuxxi minaadab ixxuwwina'i ixxuwwim «Ku manchi neese intoommisina ixxeka maara hinkid issaa uwweena xanookko?» yita'a fitanto'o. Ee bikkina Yesuus ixxuwwina «Hanqinam an ki'nnuwwina kuroommo; Manchi Beetika maara ittakkobeelas ixxeka xiigam aggakkobeelas ki'nnuwwina heechchi bee'e. I maara itoohaannina i xiigam agoohaannina heer heerina hee'oo heechchi yookko. Ixxo an lasaanchi ayyaamonne lehiinsi ki'isoommo. Iikki maar hanqo'i hurbaata. I xiigim hanqo'i agga. I maara itookkok odim i xiigam agookkok iinninne hee'ookko. Anim ixxenne hee'oommo. Hee'oo Iyyanni eese asse'u bikkinaa iyyanni hee'oo'isam anim hee'oommi bikkinaa an hee'oommisam i maara itookkokim hee'ookko. Iimaniinsi dillu hurbaat kane; ki'nnuwwi anno'i maanna'a itto'aarem leto'o. Ihukkaarem ka hurbaata itookkok heer heerinam hee'ookko» yukko. Yesuus kaka kurukkok Qifirinnaahoomanne Ayihuxxi manni wixxixxi minenne losisukkuuyyette hee'ukko. Ixxi losaa'nnek lobakat keen ee Yesuus wocu woshsha macceesso'i ammanenne «Kuk kee'mmaalli woshsha; kaka ayyi aa'eena xanookko?» yito'o. Ihukkaarem Yesuus losaan ee woshshanne quunquunto'isa la'aa «Ka woshshanne ki'nnuwwi qolantakkamuullannihe? Manchi Beet eraare hee'u beyyo daba'llaa firukkuuyyi moo'llakkota'n maha ikkakkamo? Heechcha uwwookkok Keesammi Ayyaana bagaan maar maham awwaadooyyo. An ki'nnuwwina wocummi sagar heechchaa ayyaanaa» yukko. Ihukkaarem Yesuus ixxonne amma'nnitambee'i keenoo ixxom higisaa uwwookkok ayyetda'e ihukkisaa luxxaanniinsim ki'isaa la'am hee'u bikkina «Ki'nnuwwiinsi mat mat amma'nnitakkambee'i keen yoontakke'e» yukko. Odim Yesuus «I beyyo waaroo'isa Iyyanni issubee'ek ayyim waareena xanooyyo yummok eehanninatteme» yukko. Ee mashka'inne lobakat ixxi losaan ixxo awwonimma utta'a laso daba'llito'o. Ee lasage ixxenne maqire od matto'oyyo. Yesuus tomminaa lamem losaaninam «Ki'nnuwwim uttakka'a mattakkeena hassakkamonnihe?» yukko. Pheexiroosa yakkam Simi'oonim ixxena dabaraa «Moollanna! Neese ayyi beyyo malloommo? Ki sagar heer heerina hee'oo heechcha uwwoohane. At keesantaattoo Waa'i Beet ikkittisa neese amma'nninaammoo lanqaammoo» yukko. Yesuusim ixxuwwina dabaraa «An ki'nnuwwa tommoo lamoo doo'llummoyyonnihe? Ki'nnuwwiinsi matom Sheexaancho» yukko. Yesuus eekka wocukkok ixxo higisaa uwwoo Asqorotokkichchi hee'u Simi'oon beet Yihud bikkinatte. Oo Yihud tommiinsii lam losaaniinsii mat hee'ukko. Ee lasage Yesuus Galiilanne daba'llamam hee'ukko. Mashka'oomim Ayihuxxi manni gassaan ixxo shiteena hasso'i bikkina Yihuxxi uullanne daba'llameena hasukkoyyi hee'ukko. Ee ammane Ayihuxxi manni daasanne ikka'a lonsitam ugud hincaa hee'ukko. Ee bikkina Yesuusik abbaayyuwwi ixxena «At baxxoo baxo ki losaan moo'llamisina ka beyyo uttaa Yihuxxi uulla mare. Mashka'oomim mannina la'ameena hasoo ayyim maaxaqqanne baxooyyo. At kido'i baxo baxxoolli ihu bikkina ki gaga ka manni hundinam la'ise» yito'o. Ixxi abbaayyuwwim ixxonne amma'nnito'oyyi hee'llo'o. Yesuus ixxuwwina «Iina amman afukkoyyome; ihukkaarem ki'nnuwwina hundi ammanim danaamo. Ka uulli minaadab ki'nnuwwa sabbeena xantamoyyo. Ihukkaarem an ixxuwwik bax jor ihukkisa kuroommi bikkina eese sabbamo. Ugudina ki'nnuwwi mallehe; iina amman afubee'i bikkina ee ugudina maroommoyyo» yukko. Eekka ixxuwwina kuraa Galiilanne gatukko. Ihukkaarem ugudina ixxi abbaayyuwwi matta'a lasage Yesuusim manni la'oobee'isa maaxamaa ee beyyo marukko. Ayihuxxi manni ixxo uguxxi beyyonne «Hanno afukko?» yitu'uuyyi hassam hee'llo'o. Odim minaadabiinsi kolli «Ixxi er mancho» yitu'uuyyi, kolli odim «Ee'isayyo; manna huushansoolla» yitu'uuyyi ixxi bikkina lobakata hashaashshantam hee'llo'o. Ayihuxxi awwonsaano baddu bikkina ayyim ixxi bikkina fissaa wocukkoyyo. Ugud beeddeena kolli ihaakkoohaannonne Yesuus maraa Keesammi Minenne losisam hee'ukko. Ayihuxxi mannim «Ku manchi lobakata losoo'n yoo manchi ihaa hinkid kaa'nna la'eena xanukko?» yita'a maalalto'o. Ee bikkina Yesuus ixxuwwina dabaraa «An losisoommi losan i gaqqan ihoo'n eese asse'ukkaannane. Waa'i yu luwwa isseena hasoo manchi ku losan Waa'iinsette ihukkisa te'im an i malaayyinne wocoomman ihukkisa la'ookko. Ixxi gaqqi malaayyinne wocookkok ixxi gaqqi lomba hasookko. Ihukkaarem asse'ukkaanni lomba hosookkok ixxi hanqo'ane bagaan qophphanaanchoyyo. Muse'e ki'nnuwwina Seera uwwukkoyyonnihe? Ihukkaarem ki'nnuwwiinsi matim ee Seera egettakko'oyyo. Eese mahina shitakkeena hassakkamuulla?» yukko. Minaadab ixxena dabatta'a «Keese habus amadaakko! Keese sheena hasukkok ayyette?» yito'o. Yesuus ixxuwwina dabaraa «An mat luwwa baxummaare eehannonne ki'nnuwwi hundim maalaltakko'o. Muse'e ki'nnuwwina goo'n ooso ballachchitakkamisina ijaajaa hee'ukko. Oo ballachchanchi losan waarukkok Muse'eensette ihoo'n ki'nnuwwi anno'iinsetteme. Ki'nnuwwi Usheexxaxxi Ayyaamonne mancho ballachchitakkamo. Ee Usheexxaxxi Ayyaamonne ballachchitakkam ammane Muse'i Seer gindamubee'aa'lleensi an Usheexxaxxi Ayyaamonne mat manchika orachchi hundoomam fayyiisummaare mahina eesenne quuqqakkamuulla? Hanqo'i oogato'o oogattehe bagaan ki'nnuwwina labukkisa oogattakkotte» yukko. Ee bikkina mat mat Yerusaalee'm manni «Gassaan shiteena hassam manchi kaneyyonnihe? Moo'llehe; maaxamoo'nnim manni illagenne wocoolla; ixxuwwi maham wocco'oyyo. Ayyi la'ukko ixxi Kiristoosatte ihukkisa gassaan hanqinam laqqa'atennihe? Kiristoos waaroo ammane ixxi hanniinsi waaruda'e ayyim la'ooyyo. Ihukkaarem ku manchi hanniinsi waaruda'e neese lanqoommo» yito'o. Ee bikkina Keesammi Minenne Yesuus losisukkuuyyi «Ki'nnuwwi eesee an waarummi beyyoo laqqakkamo? An i gaginne waarummoyyo. Eese asse'ukkok amma'nnamaakkoohane; ixxom ki'nnuwwi laqqakkamoyyo. An ixxi beyyiinsi waarummi bikkina ixxo la'oommo. Eese asse'ukkokim ixxotte» yaa sagara iimaa'aa wocukko. Ee bikkina ixxo amaddeena hasso'o. Ihukkaarem ixxena amman afubee'i bikkina ayyim ixxo amadukkoyyo. Ihona bagaan ee minaadabiinsi lobakat keen ixxonne amma'nnito'o. Ixxuwwim «Kiristoos waaroo ammane ku manchi baxu mare'iinsi lonsaa baxoohonnihe?» yito'o. Minaadab eehid yita'a ixxi bikkina hashaashshantu'uuyyi Farisaawe'uwwi macceessa'a Yesuusa amaddamisina qeessa awwonsaanii Farisaawe'uwwii gaadaano asse'llo'o. Ee ammane Yesuus «An hofqax ammanem ki'nnuwwinne afuuraa lasage eese asse'ukkaanni beyyo maroommo. Ki'nnuwwi eese hassakkamo; ihukkaarem siiddakkamoyyo. An yoommi beyyo ki'nnuwwi waattakkeena xantakkamoyyo» yukko. Ayihuxxi manni ixxuwwina'i ixxuwwim «Ku manchi neese siindoombee'i beyyo hanno mareena hasaate? Ayyi la'ukko Giriik uullanne binnito'i Ayihuxxi manni beyyo maraa Giriik uulli manna losiseenattennihe? ‹Eese hassakkamo; ihukkaarem siiddakkamoyyo. An yoommi beyyom waattakkeena xantakkamoyyo› yaa wocukkok mayyeena hasaate?» yito'o. Ugud beeddeena lasaanchi lob ayyaamonne Yesuus uullaa «Xeebe'ukkok ayyim yoolas i beyyo waaraa agona! Keesammi Kitaab yoo'isam eesenne amma'nnoohaanni wodaniinsi heechcha uwwoo wo'i daadookko!» yaa sagara iimaa'aa wocukko. Ixxi eekka wocookkok ixxonne amma'nnito'i keen aa'lleena yoo Keesammi Ayyaa'n bikkinatte hee'ukko. Mashka'oomim ixxi lomba siixxoo'n hee'u bikkina ixxuwwanne Keesammi Ayyaan dilloo'nnim hee'ukko. Ixxuwwi eekka macceesso'i ammanenne mat mat keen «Hanqinam kuk hiraagaancho» yito'o. Mulli keenim «Kuk Waa'i doo'llaakkoo Kiristoosatte» yito'o. Ihukkaarem mulli keen «Kiristoos Galiiliinsi waaroohonnihe? Kiristoos waarookkok Daawiit shumo'iinsi Daawiit hee'u Beeteelihee'm beero'iinsette ihukkisa Keesammi Kitaab kuraakkoollayyonnihe?» yito'o. Ee bikkina ixxi mashka'inne manni lambe'enne annannaatoom ihukko. Mat mat keen ixxo amaddeena hasso'o. Ihukkaarem ixxo ayyim amadukkoyyo. Ee lasage gaadaan qeessa awwonsaa'n beyyoo Farisaawe'uwwi beyyoo daba'llita'a matto'aare «Mahina ixxo amaddakka'a eebbakko'oyyo?» yito'o. Gaadaanim ixxuwwina dabatta'a «Ka manchisa wocookkok ayyim bee'e» yito'o. Farisaawe'uwwi ixxuwwina dabatta'a «Ki'nnuwwam huushisukkonnihe? Gassaaniinsi te'im Farisaawe'uwwiinsi ixxonne amma'nnukkok yoohonnihe? Seera la'oobee'i ku minaadab duumamaakkoohane» yito'o. Ixxuwwiinsi mat hee'ukkok gaassaatim Yesuus beyyo maraa hee'u Niqoodimoos ixxuwwina «Ni seer mat manchi issu luwwa macceessakkoo'nnii laqqakkoo'nnii oogattehe yoohonnihe?» yukko. Ixxuwwim ixxena dabatta'a «Atim Galii'l uulli manchonnihe? Galiiliinsi hiraagaanchi ki'oobee'isa Keesammi Kitaaba saarayyitaa moo'e» yito'o. Ee lasage hundim ixxuwwi mine elle'llo'o. Ihukkaarem Yesuus Wee'l duunanne firukko. Yesuus la'm balla soodaraar daram Keesammi Mine daba'llaa marukko. Manni hundim ixxi beyyo waarukkaare ixxi afuuraa losisukko. Saa'llu'uuyyi amadanto'oo mat meentichcho seera losisaanii Farisaawe'uwwii wotta'a ixxuwwi lambe'enne uullissa'a Yesuusina «Losisaancho! Tu meentichcho saa'llu'uuyyi amadanto'ookkotane. Ni Seeranne Muse'e kido'i meento kininne aphphinsaa shinoommisina ijaajaakko. Kaba at mayyitootto?» yito'o. Ixxuwwi eekka yito'ok ixxo kasassam googo siidda'a woshshinne digaaddeena hassa'atette hee'ukko. Ihukkaarem ixxi qubbaa maxxaarinne uullanne kitaabam hee'ukko. Ixxo dabaransita'a xa'mmito'i ammanenne uullaa ixxuwwina «Ki'nnuwwi lambe'iinsi baaxiil bee'ek gaassaa kina huushaa ise aphphisona» yukko. Eehid yaa odim qubbaa maxxaarinne uullanne kitaabukko. Ixxuwwi eekka macceesso'i ammanenne lommanniinsi ki'issa'a mat mat ikku'uuyyi utta'a matto'o. Yesuus ixxi illagenne uullita'a hee'llo'i meentichchonne maqirem mullam gatukko. Yesuus ee meentichcho xabbaa moo'aa isena «Taa meentichche, kabaxxi manni hanno affo'o? Ayyim keesenne oogatukkoyyonnihe?» yukko. Isem «Moollanna! Matim eesenne oogatukkoyyo» yito'o. Yesuusim «Anim keesenne oogatoommoyyo, mare! Od baaxiilo baxxitte» yukko. Odim Yesuus «An ka uullina caakka. Eese awwonookkok ayyim heechcha uwwoo caakka siixxookko bagaan tuunsonne hee'ooyyo» yukko. Ee bikkina Farisaawe'uwwi «At ki gagina ku'llitoolli ihu bikkina woccoo woshshi hanqayyo» yito'o. Yesuus dabaraa «An i gagina ku'llummaare waarummi beyyoo maroommi beyyoo la'oommi bikkina an kuroommok hanqa. Ihukkaarem ki'nnuwwi an hanniinsi waarumda'e te'im hanno maroomda'e laqqakkamoyyo. Ki'nnuwwi oogattakkamok manni sawwixxisa. Ihukkaarem an ayyennem oogatoommoyyo. Ihona bagaan an oogatummaarem oogatoommok mullatte ihoo'n eese asse'u Iyyanninne maqirette ihu bikkina an oogatoommi oogato'i hanqo'ane. Ki'nnuwwi seeranne lam manchi naqqassolas oo naqqasso'i woshshi hanqi ihukkisa kitaabamaakko. An i gaqqi bikkina kuroommo; eese asse'u Iyyannim i bikkina kurookko» yukko. Ee bikkina ixxuwwi ixxena «Kiyyanni hannonnette?» yito'o. Yesuus dabaraa «Ki'nnuwwi eesem Iyyannam laqqakkamoyyo. Eese laqqakko'oohan ihuta'n Iyyannam laqqakkam hee'llakko'o» yukko. Yesuus kaka wocukkok Keesammi Minenne losisukkuuyyi Waa'ina diinate uwwakkam mu'uxxi gadanonnette hee'ukko. Ihukkaarem ixxena amman afubee'i bikkina ayyim ixxo amadukkoyyo. Odim Yesuus Ayihuxxi mannina «An uraa maroommaare ki'nnuwwi eese hassakkamo; ihukkaarem ki'nnuwwi baaxiilinnem letakkamo. An maroommi beyyo mattakkeena xantakkamoyyo» yukko. Ee bikkina Ayihuxxi manni «Ku ixxi ‹An maroommi beyyo mattakkeena xantakkamoyyo› yukkok ixxi gaga sheena hasaatennihe?» yito'o. Yesuus ixxuwwina «Ki'nnuwwi ka uulliinsette. Ihukkaarem an iimaniinsette. Ki'nnuwwi ka uulliinsette. Ihukkaarem an ka uulliinseyyo. An ki'nnuwwina ki'nnuwwi baaxiilinnem letakkamo yoommok ee bikkinatte. An anette ihummisa amma'nnitakkobeelas baaxiilinnem letakkamo» yukko. Ixxuwwi ixxena «At ayyette?» yito'o. Yesuus ixxuwwina «An luxxaanniinsim ki'isaa ki'nnuwwina kuraammo. An ki'nnuwwi bikkina wocoommokii oogatoommi luwwii lobakat luwwi yookko. Ihukkaarem eese asse'ukkok hanqo'an ihu bikkina ixxeensi macceesummi luwwa ka uulli minaadabina kuroommo» yukko. Yesuus wocukkok Waa'i bikkinatte ihukkisa ixxuwwi qoossito'oyyi hee'ukko. Ee bikkina Yesuus «An anette ihummisaa Iyyanni losisukkisaa wocoommo bagaan i malaayyinne maham issoombee'isa Manchi Beeto saqaltakkam ammane laqqakkamo. Eese asse'ukkok iinninne maqirem yookko. An hundem ammanem ixxo liiransoo luwwa issoommi bikkina eese mulla urooyyo» yukko. Ixxi eekka wocukkisam lobakat keen ixxonne amma'nnito'o. Yesuus ixxonne amma'nnita'a hee'llo'i Ayihuxxi mannina «An yummisa hee'llakkolas ki'nnuwwi hanqo'i i losaano. Ki'nnuwwi hanqa laqqakkamo. Hanqim ki'nnuwwa wolabbanonne fissookko» yukko. Ixxuwwi dabatta'a «Neese Abrihaam shumo'o! Ayyenam agiddano galloommoyyo. At neese hinkid ‹Wolabbanonne fittakkamo› yitoolla?» yito'o. Yesuus ixxuwwina dabaraa «Hanqinam an ki'nnuwwina kuroommo; ayyim baaxiilo baxookkok baaxiilina agishsho. Ihu ammanem agishshi gaqqi qachchisa ihaa minenne hee'ooyyo. Ihukkaarem Beet heer heerinam gaqqi qachchi ihaa minenne hee'ookko. Ee bikkina Beet ki'nnuwwa wolabbanonne fissulas hanqinam wolabbanonne fittakkamo. Ki'nnuwwi Abrihaam shumo'i ikkakko'isa la'oommo. Ihukkaarem an wocoommi woshsha aa'llakkobee'i bikkina eese shitakkeena hassakkamuulla. An wocoommok iina Iyyanni moo'isu luwwa. Ihukkaarem ki'nnuwwi issitakkamok ki'nnuwwi anniinsi macceessakko'i luwwa» yukko. Ixxuwwim dabatta'a «Niina anni Abrihaamatte» yito'o. Yesuus ixxuwwina «Ki'nnuwwi Abrihaam oos ikkakkota'n Abrihaam issu luwwa issitakkam hee'llakko'o. Ihukkaarem kaba ki'nnuwwi Waa'iinsi macceesummi hanqa kurummi eese shitakkeena hassakkamuulla. Abrihaam ee'isa issukkoyyo. Ki'nnuwwi issitakkamok ki'nnuwwi anni issu luwwa» yukko. Ixxuwwi ixxena «Neese hincarabe'uwwayyo. Niina anni mexxo'i Waa'a» yito'o. Yesuus ixxuwwina «Waa'i ki'nnuwwina anni ihuta'n Anni Waa'i beyyiinsi waarummi bikkina eese iittitakkam hee'llakko'o. An waarummok ixxi asse'ukkaarette bagaan i tii'llisayyo. An wocoommoka qoossitakkambee'ek mahinatte? An wocoommoka qoossitakkambee'ek i woshsha macceessakkeena hassakkambee'i bikkinatte. Ki'nnuwwik anni Sheexaancho; ki'nnuwwi issitakkeena hassakkamokim ki'nnuwwi anni mixano. Ixxi gaassiinsim ki'isaa foore shoohane. Ixxonne hanqibee'i bikkina hanqanne uullooyyo. Ixxi qophphanaanchoo qophphaninam annaa ihu bikkina ixxena qophphano wocimmi aalo'ome. Ihukkaarem an hanqa wocoommi bikkina ki'nnuwwi eese amma'nnitakkamoyyo. Ki'nnuwwiinsi eese ‹baaxiilaancho› yaa acceeqasookkok ayyette? An ki'nnuwwina hanqa kuroommuulli ihulas eese mahina amma'nnitakkamoyyo? Waa'iinsette ihukkok Waa'i sagara macceesookko. Waa'i sagara ki'nnuwwi macceessakkambee'i mashka'i Waa'iinsette ikkakkobee'i bikkinatte» yukko. Ayihuxxi manni ixxena dabatta'a «Neese ‹At Samaarekkichcho; keese habus amadaakko› yinummok hanqayyonnihe?» yito'o. Yesuusim ixxuwwina dabaraa «An Iyyanna lonsoommuulla bagaan eese habus amadukkoyyo. Ihukkaarem ki'nnuwwi eese sholliissakkamuulla. An i gagina lomba hasoommoyyo. Ihukkaarem iina lomba hasookkokii oogatookkokii mat yookko. Hanqinam an ki'nnuwwina kuroommo; ayyim an yummi woshsha macceesaa ijaajamookkok ixxi hore'em lehooyyo!» yukko. Ayihuxxi mannim ixxena «Keese habus amadukkisa kaba lanqummo. Abrihaam lehukko, hiraagaanim leto'o. Ihukkaarem at ‹An yummi woshsha macceesaa ijaajamookkok ayyim hore'em lehooyyo› yitoolla. At lehu niyyanni Abrihaamiinsi lophphitoohonnihe? Hiraagaanim leto'o. Eehaara'i at ki gaga ayyette yitoolla?» yito'o. Yesuus dabaraa «An i gaga lonsaqqumta'n i lombi maham awwaadooyyo. Eese lonsookkok ki'nnuwwi niina Waa'a yitakkam Iyyanna. Ihukkaarem ki'nnuwwi ixxo laqqakko'oyyo. An ixxo la'oommo. ‹An ixxo la'oommoyyo› yumta'n anim ki'nnuwwisam qophphanaancho. Ihukkaarem an ixxo la'oommo; ixxi sagarinam ijaajamoommo. Ki'nnuwwina anni Abrihaam an waaroommi balla moo'eena mixukko. Moo'aatim liiramukko» yukko. Ee bikkina Ayihuxxi manni ixxena «At qarantittaanniinsi ontayyi hiinchom ihoo'n hinkid Abrihaama moo'lleena xantitto?» yito'o. Yesuus ixxuwwina «Hanqinam an ki'nnuwwina kuroommo; an Abrihaamiinsim gaassaa hee'ummo» yukko. Ee bikkina ixxo aphphisseena kina ki'isso'o. Ihona bagaan Yesuus maaxamaa Keesammi Miniinsi firaa marukko. Yesuus googinne higukkuuyyim qaramukkaanniinsim qooqaakkoo mat mancho moo'ukko. Ixxi losaan Yesuusina «Losisaancho! Ku manchi qooq ihaa qaramoo'isa issukkok ixxi baaxiilonnii ixxi amaa annii baxxo'i baaxiilo?» yita'a xa'mmito'o. Yesuusim dabaraa «Waa'ik malaayyi ixxonne la'amoo'isinatte bagaan ixxi te'im ixxi amaa annii baaxiilo baxxo'oyyo. Eese asse'ukkaanni baxo caakki hee'ukkuuyyi neese baximmi hasisookko. Ayyim baxeena xanoobee'i tuunsi waaroolla. An ka uullanne hee'ummuuyyi ka uullina caakka» yukko. Eehid yaa uullanne anja tuhaa ee anjinne buchcha qufisaa har issaa ee hara ee manchi illenne labaa «Mattaa Saalooma yakkam leeraakkoo delbanne aanshaqqe» yukko. Saalooma yimmi «Asse'amaakkoohane» yimma. Ee bikkina oo manchi maraa aanshaqqaa lasage moo'ukkuuyyi waarukko. Ixxek olla'ii eraare uunxukkuuyyi moo'llo'i mannii «Ku manchi afuuraa uunxam hee'u manchoyyonnihe?» yito'o. Mat mat keen «Ixxotte» yito'o. Mulli keen odim «Ixxo laboo mancho bagaan ixxotteyyo» yito'o. Ixxim dabaraa «Oo yitakkam manchi anetteme» yukko. Ixxuwwi ixxena «Eehaare ki illi hinkid ihaa fooqukko?» yito'o. Ixxim «Yesuusa yakkam manchi buchcha qufisaa har issaa ee hara i illenne labaa ‹Mattaa Saaloo'm Delbanne aanshaqqe› yukkaare maraa aanshaqqummaare i illi fooqukko» yukko. Ixxuwwim ixxena «Ixxi hannonnette?» yito'o. Ixxim «An la'oommoyyo» yukko. Ixxuwwim ee qooq hee'u mancho Farisaawe'uwwi beyyo massito'o. Yesuus ee qooq manchi illenne hara issaa fayyiisukkok Usheexxaxxi Ayyaamonnette hee'ukko. Farisaawe'uwwim ixxek illi hinkid ihaa moo'uda'e xa'mmito'o. Ixxim ixxuwwina «Ixxi i illenne hara issaa lasage an aanshaqqummaare i illi moo'ukko» yukko. Mat mat Farisaawe'uwwi «Ku manchi Usheexxaxxi Ayyaamo egeroobee'ek Waa'iinsi waaroo'n yoohane» yito'o. Ihukkaarem mulli keen «Baaxiilaanchi manchi kido'i maalalsiisoo mare'e hinkid isseena xanookko?» yito'o. Ixxuwwi lambe'ennem annannoom ihukko. Odim ixxuwwi ee qooq hee'u manchina «Ki ille fooqaa'u manchi bikkina at mayyitoolla?» yito'o. Ixxim dabaraa «Hiraagaancho» yukko. Ayihuxxi manni gassaan ee manchika amaa annaa weeshsheebe'i afeebe'e oo manchi qooq hee'ukkisaa illi fooqukkaare moo'ukkisaa amma'nnito'oyyi hee'llo'o. Ixxuwwim ee qooq hee'u manchika amaa annaa «Qooq qaramaakko yitakkam ki'nnuwwik beet kanennihe? Ixxi kaba hinkid moo'eena xanukko?» yita'a xa'mmito'o. Ixxi amaa annii dabatta'a «Kuk ni beet ihukkisaa qooq ihaa qaramukkisaa neese lanqoommo. Ihukkaarem kaba ixxi hinkid moo'eena xanuda'e te'im ixxi ille ayyi fooqaa'uda'e lanqoommoyyo. Ciilichchi ihubee'i bikkina ixxi gaqqi bikkina ku'lleena xanookko; ixxom xa'mmehe» yito'o. Ixxuwwi eehid yito'ok Yesuus Kiristoosatte ihukkisa wocookkok ayyim wixxixxi miniinsi yaayyamoo'isina Ayihuxxi manni gassaan iittanta'a hee'llo'i bikkina baddita'atette hee'ukko. Ee bikkina ixxi amaa annii «Ciilichchi ihubee'i bikkina ixxom xa'mmehe» yito'o. Ixxuwwi la'mmaaggem ee qooq hee'u mancho weeshsha'a «Waa'ina lomba uwwe. Ku keese fayyiisu manchi baaxiilaanchi ihukkisa neese lanqoommo» yito'o. Ixxim dabaraa «Ixxi baaxiilaanchida'e te'im baaxiilaanchoyda'e an la'oommi luwwi mahim bee'e. An mat luwwa la'oommo; oohim an qooq hee'ummo. Ihukkaarem kaba moo'oommuulla» yukko. Ixxuwwi ixxena «Ixxi keese hinkid issukko? Ki ille fooqaa'ukkok hinkid issaatette?» yito'o. Ixxim dabaraa «Ki'nnuwwi macceessakkeena hassakko'oyyo bagaan an gaassaatim ki'nnuwwina kuraammo. Odim la'mmaagge macceessakkeena mahina hassakko'o? Ki'nnuwwim ixxi losaan ikkakkeena hassakka'atennihe?» yukko. Ixxuwwim ixxena «At ixxi losaancho. Ihukkaarem neese Muse'i losaano. Waa'i Muse'ena wocukkisam lanqoommo. Ihukkaarem ku manchi hanniinsi waaruda'e neese lanqoommoyyo» yita'a game'llito'o. Oo manchim dabaraa «I ille fooqaa'ukkisa moo'llakku'uuyyim ixxi hanniinsetda'e ihukkisa ki'nnuwwi lachcha hoogimmi kuk maalalsiisoo woshsha. Waa'i ixxena otossoo kee'nnekaa ixxi yu luwwa issoo kee'nnekaa macceesookko bagaan baaxiilaa'nneka macceesoobee'isa lanqoommo. Qooq ihaa qaramu manchika ille mat manchim fooqaa'ona uulli qooccamukkaanniinsi ki'isaa macceensummi balli bee'e. Ku manchi Waa'iinsette ihubeeta'n maham isseena xanam hee'ukkoyyo» yukko. Ixxuwwim ixxena dabatta'a «Keesenne baaxiil wo'mmaa qarantaattoottok at neese losisseenattennihe?» yita'a wixxixxi miniinsi fissito'o. Ee mancho wixxixxi miniinsi fissito'isa Yesuus macceesaa lasage ixxenne edamaa «At Manchi Beetonne amma'nnitoohonnihe?» yukko. Oo manchim dabaraa «Moollanna! An ixxonne amma'nnoommisina Manchi Beet ayyette?» yukko. Yesuus ixxena «At ixxo moo'llaatto; ixxi kaba kiinninne wocoohane» yukko. Ixxim «Moollanna! Eeyya amma'nnoommo» yaa ixxena otossukko. Yesuusim «An ka uulla waarummok moo'llambee'i keen moo'llamisa; odim moo'llam keenim qooqqo'isa annanni issaa oogateenatte» yukko. Farisaawe'uwwiinsi ixxi gadanonne hee'llo'i keen eekka macceessa'a «Neese qooqquwwannihe?» yito'o. Yesuus ixxuwwina «Ki'nnuwwi qooqquwwi ikkakkota'n ki'nnuwwina baaxiil iham hee'ukkoyyo. Ihukkaarem kaba ki'nnuwwi ‹Moo'nnoommuulla› yitakkam bikkina baaxiilaammuwwi ikkakko'isam hee'llakkamo» yukko. Odim Yesuus «Hanqinam an ki'nnuwwina kuroommo; gereebbi garoo mine goocinne aagimma uraa mulli googinne iiqaa aagoo manchi gamaanchoo bogaanchoo. Ihukkaarem goocinne aagookkok gereebba allaaraancho. Gooca egeraanchim ixxena gooca fooqaa'ookko. Oo gereebbim ixxeka sagara macceesookko. Ixxim ixxi gereebbika summa weeshaa fissookko. Ixxan ihu gereebbi hundam fissaa lasage ixxuwwi illageen higaa awwonsookko. Ixxuwwim ixxeka sagara laqqam bikkina ixxo awwontamo. Ihukkaarem mulli mannika sagara laqqambee'i bikkina ixxuwwiinsi gibbamo bagaan awwontamoyyo» yukko. Yesuus ka kobi'llishsha ixxuwwina kurukkaarem ixxi kurukkok maruchda'e ihukkisa ixxuwwi qoossito'oyyo. Ee bikkina Yesuus ixxuwwina «Hanqinam an ki'nnuwwina kuroommo; an gereebbi garoo minina gooca. Iinniinsi gaassita'a waatto'i keen hundim gamaanoo bogaanoo. Ihukkaarem gereebbi ixxuwwika sagara macceesooyyo. An gooca; iinninne aagookkok ayyim gatookko. Ixxim aagookkomee firookkomee. Itoo luwwam siixxookko. Gamaanchi waarookkok game'eenatte, sheenattee bi'iseenattee. Ihukkaarem an waarummok ki'nnuwwi heechcha siixxitakkamisinatte. Oo siixxitakkam heechchim wo'm heechcha. «An er allaaraancho. Er allaaraanchi gereebbi bikkina yaa ixxi foore higisaa uwwookko. Ihukkaarem mannika gereebba allaaroo fo'annichchi gereebbina annichchoo allaaraanchoo ihubee'i bikkina oro'i waaroo ammane gereebba uraa gibookko. Oo oro'im gereebba hiddibbaa'aa massookko. Gereebbim binnaa xa'ookko. Oo fo'annichchi giboo mashka'im diinate siixxeena allaaroohane bagaan gereebbina hore'em kichche'oobee'i bikkinatte. Ka gereebbinne maqire bee'i mulli gereebbim iina yookko. An ixxuwwa worimmi hasisoohane. Ixxuwwim i sagara macceessamo. Mat allaachcham ikkamo. Allaaraanchim mat ihookko. An i foore dabaraa aa'eena higisaa uwwoommi bikkina Iyyanni eese iittookko. An i doo'llinne i foore higisaa uwwoommo bagaan iinniinsi ayyim masseena xanooyyo. An i foore higisaa uwweenaa dabaraa aa'eenaa malaayyi yookko. An ee ijaajo aa'ummok Iyyanniinsette» yukko. Ee woshshinne ki'ukkok Ayihuxxi manni lambe'enne odim annannoom ihukko. Ixxuwwiinsim dut keen «Ixxo habus amadaakko; ixxi machchaaraakko. Ixxi woshsha mahina macceessakkamuulla?» yito'o. Odim mulli keen «Habus amadu manchi ka'isa wocooyyo. Habus qooq manchika ille fooqaa'eena xanoohonnihe?» yito'o. Yerusaaleemanne Keesammi Mine muccussakko'isa tiirakkam ugud hee'ukko. Ammanoom hagayyi hee'ukko. Yesuusim Keesammi Minenne daba'llamakkam Salamoon Goocanne taakke'amam hee'ukko. Ayihuxxi manni ixxo kululaa'lla'a kibbita'a «Neese hinkaa'n amman afeebe'e malansitootto? At Kiristoosatte ikkaattoolas caakkissaa kure» yito'o. Yesuus ixxuwwina dabaraa «An ki'nnuwwina kuraammo; ihukkaarem ki'nnuwwi amma'nnitakko'oyyo. An Iyyanni summinne issoommi luwwi i bikkina naqqasookko. Ihukkaarem ki'nnuwwi i gereebbi ikkakkobee'i bikkina amma'nnitakkamoyyo. I gereebbi i sagara macceesookko. Anim ixxuwwa la'oommo. Ixxuwwim eese awwontamo. An ixxuwwina heer heerina hee'oo heechcha uwwoommo. Ixxuwwi hore'em bi'llamoyyo. Ayyim ixxuwwa i angiinsi fissaa massooyyo. Iina ixxuwwa uwwu Iyyanni hundiinsim lobane. Ayyim Iyyanni angiinsi ixxuwwa fissaa masseena xanooyyo. Anii Iyyannii matome» yukko. Ayihuxxi manni odim ixxo aphphisseena kina ki'isso'o. Yesuus ixxuwwina dabaraa «An Iyyanniinsi lobakat danaam baxo moo'isummo. Ee baxummi baxiinsi eese kininne aphphissakkamok hinkanninatte?» yukko. Ayihuxxi manni ixxena dabatta'a «Neese keese kininne aphphinsoommok at baxxitti danaam baxinatte ihoo'n manchi ikkaa hee'llittuuyyim ki gaga Waa'i issitaa Waa'a game'llitoo bikkinatte» yito'o. Yesuus ixxuwwina dabaraa «Ki'nnuwwi See'l kitaabanne ‹An ki'nnuwwa waa'uwwa yaammo› yamamaa kitaabamaakkoollayyonnihe? Keesammi Kitaabanne kitaabamukkok gindamooyyo. Waa'i sagar uwwamu keeno Waa'i ixxi gagim ‹waa'uwwa› yulas Waa'i annanni issaa ka uulla asse'u eese ‹An Waa'i Beeto› yummaare ‹Waa'inne game'llamoolla› yitakkamonnihe? An Iyyannika baxo baxumbeelas eese amma'nnitakkotte. Eese amma'nnitakkobee'aarem an Iyyannika baxo baxoommuulla ihulas Iyyanni iinninne anim Iyyanninne mat inkummisa qoossitakka'a laqqakkamisina an baxoommi baxonne amma'nnehe» yukko. Ixxuwwim Yesuusa odim amaddeena hasso'aare ixxuwwi angiinsi xorukko. Yesuus odim Yoordaanoos daajji eeqidonne Yohaannis luxxeka xammaqam hee'u beyyo maraa ee beyyonne afuurukko. Dut mannim ixxi beyyo waatta'a «Yohaannis maalalsiisoo mare'e maham issukkoyyo. Ihukkaarem Yohaannis ka manchi bikkina kuru woshshi hundim hanqa» yito'o. Ee beyyonne lobakat keen ixxonne amma'nnito'o. Biitaana yakkam gattenne hee'oo Ali'aazara yakkam manchi xissaa hee'ukko. Oo Biitaa'n gattim Maaraamee Maaraam aayya Maarta'aa hee'llam gatti hee'ukko. Oo Maaraame Moollanni lokkonne shitto'o labba'a isaanninne horoo'l saraatinne shiinshito'otan hee'llo'o. Xissu Ali'aazarim isena abbaayyi hee'ukko. Ee bikkina ixxi aayyuwwi «Moollanna! At iittitoo Ali'aazar xissaakko» yita'a Yesuus beyyo asse'llo'o. Ihukkaarem Yesuus eekka macceesu ammanenne «Ixxi xissukkok Waa'i Beet ixxonne lomba siixxoo'isinattee Waa'ikim lombi moo'amoo'isinatte bagaan ixxek xissi shoobee'ane» yukko. Maarta'a, Maarta'i aayyaa Ali'aazaraa Yesuus iittam hee'ukko. Ali'aazar xissukkisa macceesukkaarem Yesuus ee beyyonne lam balla hosukko. Ee lasage ixxi losaanina «Yihuxxi uulla daba'llinaa mallona» yukko. Ixxi losaanim «Losisaancho! Ayihuxxi manni hofqax ammaniinsi illageen keese kininne aphphisseena hassam hee'llo'oyyonnihe? Odim ee beyyo daba'llitaa matteenannihe?» yito'o. Yesuus ixxuwwina dabaraa «Mat balli tommoo lam sa'aatayyonnihe? Ayyim ballanne taakke'ookkok ka uulli caakka moo'oo bikkina ee caakka moo'ukkuuyyi qo'llooyyo. Ihukkaarem tuunsonne taakke'ookkok caakki ixxenne bee'i bikkina qo'llookko» yukko. Yesuus eekka wocaa lasage ixxuwwina «Ni beshichchi Ali'aazar diriiraakko. An ixxo maraa diriiriinsi ki'isoommo» yukko. Ixxi losaan ixxena «Diriiraakkoohan ihulas fayye'ookko» yito'o. Yesuus «Ali'aazar diriiraakko» yukkok lehaakko yeenatte hee'ukko. Ihukkaarem ixxi losaan eekka wocukkaare hanqo'i diriichcham labissa'a hee'llo'o. Ee lasage Yesuus «Ali'aazar lehaakko. Ki'nnuwwi eesenne amma'nnitakkamisina an ee beyyonne hee'umbee'isanne liiramoommo; ihukkaarem kaba ixxi beyyo mallona» yukko. Qafa yakkam Toomaas ixxi besh hee'llo'i losaanina «Neesem ixxenne maqirem leneena mallona» yukko. Yesuus Biitaana afu ammane Ali'aazar waammamukkaanniinsi soor balla ihaa hee'ukko. Biitaan Yerusaalee'm beero'iinsi sas kiilomeetira ihooqaxa taakkiisoo abbis beyyi hee'ukko. Maarta'anaa Maaraamenaa abbaayyi hee'u Ali'aazar lehu bikkina lobakat Ayihuxxi manni bakkaatteena waatta'a hee'llo'o. Maaraame minenne afuutta'a hee'llo'isam Maarta'a Yesuus waaroo'isa macceesso'i ammanenne ixxo aa'lleena fitto'o. Maarta'a Yesuusina «Moollanna! At ka beyyonne hee'llitta'n iyyabbaayyi leham hee'ukkoyyo. Kabadettem ihukkaare at xa'mmitti luwwi hundam Waa'i kiina uwwoo'isa an la'oommo» yito'o. Yesuus Maarta'ana «Kiyyabbaayyi lehiinsi ki'ookko» yukko. Maarta'am «Ixxi lasaanchi ayyaamonne lehiinsi kichchi ammane ki'oo'isa la'oommo» yito'o. Yesuus isena dabaraa «An lehiinsi ki'isoommanee heechcha uwwoommanee. Eesenne amma'nnookkok lehukkaarem hee'ookko. Foorinne yookkokim eesenne amma'nnookkok hore'em lehooyyo. At eekka amma'nnitoohonnihe?» yukko. Maarta'am ixxena dabatta'a «Eeyya, Moollanna! At ka uulla waaroo doo'llantaattoo Kiristoosatte ikkittisa an amma'nnoommo; at Waa'i Beeto» yito'o. Ee'isa yita'a lasage matta'a is aayyi Maaraamena «Losisaanchi waaraa keese weeshoolla» yita'a manni la'oobee'isa kutto'o. Maaraame eekka macceesso'i ammanenne qaqqissa'a ki'lla'a ixxi beyyo matto'o. Yesuus ee ammane Maarta'a ixxenne edanto'i beyyonne hee'ukko bagaan ee gatte afukkoyyi hee'ukko. Ee ammane Maaraam minenne bakkaatta'a hee'llo'i Ayihuxxi manni Maaraame qaqqissa'a shoottita'a fitto'isa moo'llo'i ammanenne waammi beyyo matta'a wi'lliteena fitto'oka labissa'a laseessa'a fitto'o. Ee lasage Yesuus yoo beyyo Maaraame affa'a ixxo moo'llo'i ammanenne ixxi illagenne ubba'a «Moollanna! At ka beyyonne hee'llitta'n iyyabbaayyi leham hee'ukkoyyo» yito'o. Maaraamee isenne maqire hee'llo'i Ayihuxxi mannii wi'llitamisa Yesuus moo'u ammanenne ixxi wodanonne lobakata kichche'aa «Waammitakko'ok hannonnette?» yaa xa'mmukko. Ixxuwwim dabatta'a «Moollanna! Waattaa moo'e» yito'o. Yesuusim wi'llukko. Ee bikkina Ayihuxxi manni «Ixxi Ali'aazara hinkaa'nna iittooda'e moo'llehe» yito'o. Mat mat keen odim «Qooqu manchikam ille fooqaa'ukkok Ali'aazar lehoobee'isa hooreena xanam hee'ukkoyyonnihe?» yito'o. Ee lasage Yesuus lobakata kichche'aa waammi beyyo marukko. Oo waammim ki'n kolo'i ihaa suumenne kin ifiisamaakkoohan hee'ukko. Yesuus ixxuwwina «Ka kina ki'issakka'a hoollehe» yukkaare ee lehu manchina aayyatte hee'llo'i Maarta'a dabatta'a «Moollanna! Ixxi lehukkaanniinsi soor balla ihu bikkina boboo'n hee'ooyyo?» yito'o. Yesuus isena dabaraa « ‹At amma'nnitlas Waa'ika lomba moo'llootto› yaa hee'ummoyyonnihe?» yukko. Ee lasage waammiinsi manni kina ki'isaa hoorukko. Yesuus iim moo'ukkuuyyi «Iyyanna! I uunxato macceessitti bikkina keese galaxxoommo. An eehid yummok ku ka beyyonne uullito'i manni at eese asse'llittisa amma'nnitamisinatte bagaan i uunxato hundi ammanem macceessoo'isa an la'oommo» yukko. Ee'isa yaa lasage sagara iimaa'aa «Ali'aazara, fire!» yukko. Ee bikkina oo lehaa hee'u Ali'aazarim ixxek angii lokkii karamukkisam illi kollim keefa'n eddechchinne xaaxamukkisam waammi woriinsi firukkaare Yesuus ixxuwwina «Marona; tillehe» yukko. Maaraam beyyo waatta'a hee'llo'i dut Ayihuxxi manni Yesuus issu luwwa moo'lla'a ixxonne amma'nnito'o. Ihukkaarem ixxuwwiinsi mat mat keen Farisaawe'uwwi beyyo matta'a issu luwwa ixxuwwina kutto'o. Ee bikkina qeessa awwonsaanii Farisaawe'uwwii dummichchi daannuwwa wixxaa'lla'a «Ku manchi lobakat maalalsiisoo mare'e issoolli ihu bikkina ixxo maha issino? Ka'isa ihona cawwinaa ullummaare manni hundim ixxonne amma'nnoohaare Oroo'm manni waatta'a niikka keesammi beyyoo ni minaadabaa bi'issa'a utteenatte» yito'o. Ixxuwwiinsi mat hee'u Qayyaaf ee maarage hundiinsi lob qeessichchi hee'ukkok ixxuwwina «Ki'nnuwwi hore'em maham laqqakkambee'i qawwi manna! Minaadab hundi bi'oohaanniinsi mat manchi minaadabina lehimmi eran ihukkisa laqqakkamoyyonnihe?» yukko. Ixxi ee maarage hundiinsi lob qeessichchi hee'u bikkina Yesuus Ayihuxxi minaadabina lehoo'isa hiraago wocukko bagaan eekka ixxi gagiinsi wocukkoyyo. Yesuus lehookkok xale'i Ayihuxxi minaadabinatte ihoo'n binnita'a yo'i Waa'i ooso hundam mat issaa wixxaa'eenatte. Ee ammaniinsi ki'issa'a Ayihuxxi gassaan Yesuusa Shiteena a'llanto'o. Ee bikkina Yesuus ee beyyo uraa udma'i gadanonne yoo Efireema yakkam beero'o maraa ixxi losaaninnem afuurukko bagaan Ayihuxxi manni lambe'enne hasukkisa daba'llamukkoyyo. Ee ammane Shaashshiqqi Ugud Ayihuxxi minaadabina hincaa hee'ukko. Ee ugudina lobakat manni ixxuwwi gaga muccussaqqiteena beyyi hundiinsim gaassita'a Yerusaaleema waatta'a hee'llo'o. Ixxuwwim Keesammi Minenne waatta'a wixxito'i ammanenne Yesuusa hassu'uuyyi ixxuwwina'i ixxuwwim «Ki'nnuwwina maha laboolla? Ixxi ka ugudina waarooyyonnihe?» yaqqanto'o. Qeessa awwonsaanii Farisaawe'uwwii Yesuusa amaddeenaa yita'a Yesuus yoo beyyo la'u manchi hee'ulas kuroo'isina ijaajja'a hee'llo'o. Shaashshiqqi Ugudina loh balli gataakkoohaannonne Yesuus Biitaana yakkam gatte ixxi lehiinsi ki'isu Ali'aazar hee'oo beyyo marukko. Ixxuwwi ee beyyonne Yesuusina hurbaata gudisso'aare Maarta'a ixxuwwina hincaa'llo'o. Ixxenne maqire hurbaata ittam hee'llo'i keeniinsi mat Ali'aazaratte hee'ukko. Naardoosa yakkam bito xee'aalli shitto'ika mat xaarmuus kollo ihooqaxa Maaraame eebba'a Yesuus lokkonne labba'a isaanninne horoo'l saraatinne shiinshitam hee'llo'o. Ee minennem shitto'ik enji wo'mmaa qibibukko. Ihukkaarem Yesuus losaaniinsi mat hee'u Asqorotokkichchi Yihud ixxim Yesuusa higisaa uwwookkok «Ku shitto'i sas xibbi diinaarina biteesamaa mahina buxina uwwamooyyo?» yukko. Ixxi eehid yukkok buxina qishixxaatette ihoo'n gamaanchi hee'u bikkinatte. Mashka'oomim diinaxxi karaxiita amadookkok ixxotte ihu bikkina karaxiitanne dissakko'i diinaxxeka ixxi gagina a'llam hee'ukko. Yesuus ixxuwwina «An waammamoommi ammanina gudissamulli ihu bikkina ise hawwissakkotte; ullehe. Bux hundi ammanem ki'nnuwwinne maqire hee'ookko. Ihukkaarem an ki'nnuwwinne maqire hundi ammane hee'oommoyyo» yukko. Ayihuxxi mannik dut keen Yesuus Biitaan gattenne yoo'isa laqqo'i ammanenne waatto'o. Waatto'okim xale'i Yesuusa moo'lleenatte ihoo'n Yesuus lehiinsi ki'isu Ali'aazaram moo'lleenatte hee'ukko. La'm balla ugudina waatta'a hee'llo'i dut minaadab Yesuus Yerusaaleema waaroo'isa macceesso'o. Ee bikkina dimbaaphphi buyya amadda'a «Waa'ina lombi ihona! Waa'i summinne waaroo Isra'ee'l adil maasse'amaakkoohane!» yita'a shuuttu'uuyyi fitto'o. Ixxek losaan luxxeka eekka qoossito'oyyi hee'llo'o. Ihukkaarem Yesuus lomba siixxaa lasage Keesammi Kitaabanne kitaabamukkok ixxi bikkinatte ihukkisaa eekka ixxena issito'isaa sawwito'o. Yesuus Ali'aazara «Waammi woriinsi fire!» yaa lehiinsi ki'isu ammane ixxenne maqire hee'llo'i manni Yesuus bikkina kutto'o. Manni ixxenne edanteena matto'i mashka'im ixxi ee mare'e issukkisa macceesso'i bikkinatte hee'ukko. Farisaawe'uwwi ixxuwwina'i ixxuwwim «Neese maham issineena xannummoyyo. Moo'llehe; manni hundim ixxo awwonoolla» yaqqanto'o. Ee ugudanne Waa'ina otossiteena matto'i keeniinsi mat qax manni Giriik manni hee'llo'o. Ixxuwwim Galiilanne yoo Beetasaayda yakkam beero'onne hee'oo Filiphphoos beyyo waatta'a «Moollanna, Yesuusa moo'nneena hansoommo» yito'o. Filiphphoos Indiraas beyyo maraa Indiraasina kurukkaare lamim maqirem matta'a Yesuusina ee woshsha kutto'o. Yesuus ixxuwwina dabaraa «Manchi Beet lobakat lomba siixxoo amman afaakko. Hanqinam an ki'nnuwwina kuroommo; mat arasichchi uullanne ubaa shamubeelas mexxokkichchim hee'ookko. Ihukkaarem shamulas lobakat misha mishookko. Ixxi foorina qishixxookkok bi'ixxookko. Ihukkaarem ka uullanne ixxi foore sabukkok heer heerina hee'oo heechchina gudixxookko. Ayyim iina awwaadookkok eese awwonimmi hasisookko. Iina awwaadookkok an yoommi beyyonne iinninne maqire hee'ookko. Iina awwaadookkoka ayyem Iyyanni lonsookko» yukko. Odim Yesuus «Kaba an i woronne lobakata kichche'aammo. An kaba mayyoommo? ‹Iyyanna! At eese kanniinsi gatise› yihonnihe? Eehid yoommoyyo. Mashka'oomim an waarummok ka hawwo aa'eenatte. Iyyanna! At ki summa lonse» yukko. Ee ammanenne «An i summa lonsaammo; odim lonsoommo» yoo sagar iimaniinsi waarukko. Ee beyyonne uullita'a hee'llo'i manni eekka macceesso'i ammanenne «Kuk banqa» yito'o. Mulli keen odim «Ixxena wocukkok Waa'i asse'amaancho» yito'o. Yesuus ixxuwwina dabaraa «Ku sagar waarukkok ki'nnuwwi bikkinatte bagaan i bikkinayyo. Kaba ka uullanne Waa'i oogatoo amman afaakko. Ka uulli gassaanchim biiranne uunjamoo amman afaakko. Eese uulliinsi iim ki'isakka'a saqalakkam ammane manni hundam i kollonne woroommo» yukko. Ixxi eekka wocukkok hinkido'i leho lehooda'e moo'iseenatte hee'ukko. Minaadab ixxena dabatta'a «Waa'i doo'llaakkoo Kiristoos heer heerinam hee'oo'isa Seeranne kitaabamukkoka macceensaammo. Eehaare at hinkid ‹Manchi Beet iim ki'immi hasisookko› yitoolla? Ku at Manchi Beeto yitoottok ayyette?» yito'o. Yesuus ixxuwwina dabaraa «Caakki ki'nnuwwinne maqire hoffi ammaninam yookko. Tuunsi ki'nnuwwa amadoo'n gaassitakka'a caakki hee'ukkuuyyi taakke'llehe; tuunsonne taakke'ookkok hanno marooda'e la'ooyyo. Ki'nnuwwi caakki oos ikkakkeena caakki hee'ukkuuyyi caakkanne amma'nnehe» yukko. Yesuus eekka wocaa lasage annanni ihaa maraa ixxuwwiinsi maaxamukko. Yesuus ixxuwwi illagenne lobakat mare'e issukkaarem ixxonne amma'nnito'oyyo. Oohim hiraagaanchi Issaayyaas «Moollanna! Neese kullummoka ayyi amma'nnukko; Moollannik malaaydu ayyena moo'amukko?» yukkok wo'mmoo'isinatte. Ee bikkina ixxuwwi ixxonne amma'nniteena xanto'oyyo. Odim Issaayyaas «Ixxuwwa fayyiisoo'isina ixxi kollonne daba'llitambee'isa Waa'i ixxuwwika ille moo'oobee'isa qooqisaakko. Odim qoossitambee'isam ixxuwwika wodanooma duudisaakko» yaakko. Issaayyaas eehid yaa ixxi bikkina wocukkok ixxeka lomba moo'u bikkinatte. Ee'isa ihukkaarem Ayihuxxi manni gassaaniinsim dut keen Yesuusanne amma'nnito'o. Ihukkaarem wixxixxi miniinsi Farisaawe'uwwi yaayyitam bikkina baddita'a ixxi bikkina fissita'a wocco'oyyo. Mashka'oomim Waa'iinsi siixxitam lombiinsi manniinsi siixxitam lomba iittito'i bikkinatte. Yesuus sagara iimaa'aa odim «Eesenne amma'nnukkok eese asse'ukkaannonnem amma'nnaakko bagaan xale'i eesenne amma'nnukkoyyo. Eese moo'ookkok eese asse'ukkokam moo'ookko. Eesenne amma'nnookkok ayyim tuunsonne hee'oobee'isina an ka uullina caakki ihaa waaraammo. Ayyim an yummoka macceesaa issubeelas ixxonne oogatoommok aneyyo. An waarummok ka uulla gatiseenatte bagaan ka uullanne oogateenayyo. Eese sabaa an yummoka aa'oobee'aannonne oogatookkok yookko. An wocoommi sagar lasaanchonne ixxonne oogatookko. Mashka'oomim an wocoommok eese asse'u Iyyanni ixxi gagim mayyaa wocoomda'e ijaajukkisa bagaan i malaayyinneyyo. Ixxek ijaaj heer heerina hee'oo heechcha uwwoohan ihukkisa la'oommi bikkina an wocoommok Iyyanni ‹Woce› yukkane» yukko. Yesuus ka uulliinsi Anni beyyo maroo amman afukkisa la'u ammanenne Shaashshiqqi Ugudiinsi gaassaa ixxeka ka uullanne yo'i iittoo keeno lasaanchi afeebe'em iittookko. Yesuusii ixxi losaanii hii'm hurbaata ittam hee'llo'o. Sheexaanchim Simi'oon beet Asqorotokkichchi Yihud Yesuusa higisaa uwwoo'isina ixxonne sawwite aagisukko. Yesuus ee ammanenne Waa'i luwwi hundam ixxi anganne uwwukkisa, Waa'i beyyiinsi waarukkisaa Waa'i beyyom maroo'isaa la'u bikkina hanenne edde'u eddechcha dissaa fooxam lamadonne xaaxaa hurbaata uraa ki'ukko. Ee lasage angaa'llaanchonne wo'o issaa ixxi losaa'nneka lokko aanshaa lade'u fooxinne shiinshukkuuyyi gokkisimma asheerukko. Pheexiroosa yakkam Simi'oonikam aansheena waarukkaare «Moollanna! At i lokko aanshiteenannihe?» yukko. Yesuus ixxena dabaraa «An issoommi luwwa at kaba laqqooyyo. Ihukkaarem lasonne laqqootto» yukko. Pheexiroosim Yesuusina «At i lokko hore'em aanshitooyyo!» yukko. Yesuus ixxena «An ki lokko aanshumbeelas iinaa kiinaa mateeyyoom bee'e» yukko. Pheexiroosa yakkam Simi'oonim dabaraa «Moollanna! Eehaara'i iikka xale'i lokki ihoo'n angaa horooree eddaa aanshe» yukko. Yesuus dabaraa «Orachcho aanshaqqukkaannik lokkiinsi bagaan ixxek orachchi muccur ihu bikkina od aanshaqqimmi hasisooyyo. Ki'nnuwwiinsi matiinsi bagaan ki'nnuwwi hundim mucculluwwa» yukko. Yesuus ixxo higisaa uwwookkok ayyetda'e ihukkisa la'am hee'u bikkina «Matiinsi bagaan ki'nnuwwi hundim mucculluwwa» yukko. Yesuus ixxuwwika lokko aanshaa eddechcha edde'aa ixxi beyyonne daba'llaa afuuraa ixxuwwina «An kaba ki'nnuwwina issummi luwwa laqqakka'atennihe? An losisaanchoo Moollannaa ihummi bikkina ki'nnuwwi eese ‹Losisaanchoo Moollannaa› yitakkamok hanqame. Eehannata'i an losisaanchoo Moollannaa ihaa hee'ummuuyyi ki'nnuwwika lokko aanshummisam ki'nnuwwina'i ki'nnuwwim lokko aanshaqqamimmi hasisookko. An ki'nnuwwina issaa moo'isummisam ki'nnuwwim ee an issummisam issehe. Hanqinam an ki'nnuwwina kuroommo; awwaadaanchi ixxi moollanniinsi lophphooyyo. Asse'amaanchim ixxo asse'ukkaanniinsi lophphooyyo. Ki'nnuwwi eekka laqqakka'a issitakkolas maassaammuwwa. An doo'llummi keeno la'oommi bikkina an wocoommok ki'nnuwwi hundi bikkinayyo. Keesammi Kitaabanne ‹Iinninne maqire hurbaata daayyamaa itukkok eesenne ki'ukko› yamamukkok wo'mmoo'isinatte. Oo woshshi ihoo'n gaassaa an ki'nnuwwina kuroommuullak woshshoom ihoo ammane ‹An anette› ihummisa amma'nnitakkamisinatte. Hanqinam an ki'nnuwwina kuroommo; an asse'ummoka ayyem aa'ookkok eesem aa'ookko. Eese aa'ookkok odim eese asse'ukkokam aa'ookko» yukko. Yesuus eekka wocaa lasage ixxi wodanonne lobakata kichche'aa ixxuwwina «Hanqinam an ki'nnuwwina kuroommo; ki'nnuwwiinsi mat eese higisaa uwwookko» yaa caakkisaa kurukko. Ixxi losaanim ixxuwwik mal bi'aa «Wocookkok ayyenatte» yimminne mat matika ille moo'aqqanto'o. Ixxi losaaniinsi Yesuus iittam hee'ukkok Yesuus gadanonne hee'ukko. Pheexiroosa yakkam Simi'oon ixxo qaqqisaa «Wocookkok ayyi bikkinda'e ihukkisa xa'mme» yukko. Ee bikkina oo Yesuus gadanonne afuuraa hee'ukkok «Moollanna! Ixxi ayyette?» yaa xa'mmukko. Yesuusim dabaraa «An qorosho'o iiqaa cefo'onne qasaa uwwoommi mancho» yaa qorosho'o iiqaa cefo'onne qasaa Asqorotokkichchi Simi'oon beet Yihudina uwwukko. Yihud ee qorosho'o aa'aa duuqukkisam Sheexaanchi ixxonne aagukko. Ee lasage Yesuus ixxena «Issitoo luwwa qaqqissaa isse» yukko. Eekka Yihudina mahina wocuda'e hurbaata itteena afuutta'a hee'llo'i keeniinsi matim la'ukkoyyo. Ihukkaarem mat mat keen diinaxxi karaxiita Yihud amadam hee'u bikkina ugudina mat luwwa maraa bito aa'oo'isina te'im buxina mat luwwa uwwoo'isina wocukkoka labissa'a hee'llo'o. Yihudim Yesuus iiqaa uwwu qorosho'o aa'aa lasage ee ammanem firukko. Oo ammanim hiim hee'ukko. Yihud firaa lasage Yesuus ixxuwwina «Manchi Beet kaba lomba siixxaakko; ixxi mashka'innem Waa'i lophphaakko. Waa'im Manchi Beet kollinne lomba siixxulas Manchi Beetom matemaaggem lonsookko. I ooso, an hofqax ammanina ki'nnuwwinne maqire hee'oommo. Eesem hassakkamo. Ihukkaarem an Ayihuxxi mannina ‹An maroommi beyyo ki'nnuwwi mattakkeena xantakkamoyyo› yummisam kaba ki'nnuwwina yoommo. An ki'nnuwwina haareechchi ijaajo uwwoommo. An ki'nnuwwa iittummisam ki'nnuwwina'i ki'nnuwwim iittammehe. Ki'nnuwwina'i ki'nnuwwi iittantakkolas i losaan ikkakko'isa manni hundim eehanninne la'ookko» yukko. Pheexiroosa yakkam Simi'oon Yesuusina «Moollanna! Hanno matteenatte?» yaa xa'mmukko. Yesuus dabaraa «An maroommi beyyo kaba at awwonteena xantooyyo. Ihukkaarem lasonne awwontootto» yukko. Pheexiroosim dabaraa «Kaba an keese awwoneena xanoombee'ek mahinatte? An i foorem ki bikkina higisaa uwwoommo» yukko. Yesuusim ixxena dabaraa «Ki foore i bikkina higissaa uwwitoohonnihe? Hanqinam an kiina kuroommo; sas kore eese lageebe'e antabaa'i muunooyyo» yukko. Odim Yesuus «Ki'nnuwwik wodan baa'oone. Waa'anne amma'nnehe; odim eesennem amma'nnehe. Iyyanni minenne lobakat beyyi yookko. An maraa ki'nnuwwina beyyo gudisoommo. Iyyanni minenne lobakat beyyi bee'an yakkota'n an ki'nnuwwina ‹Beyyo gudiseena maroommo› yam hee'ummonnihe? An maraa ki'nnuwwina beyyo gudisaa lasage daba'llaa waaraa iinninne maqire hee'llakkamisina ki'nnuwwam i beyyo massoommo. An maroommi beyyo massoo googom laqqakkamo» yukko. Toomaasim Yesuusina «Moollanna! At mattoo beyyi handa'e ihukkisa lanqoombee'i bikkina googo hinkid lanqeena xannoommo?» yukko. Yesuusim Toomaasina «An googo, hanqaa heechchaa. I kollinnette ihubeelas ayyim Iyyanni beyyo waareena xanooyyo. Eese laqqakko'oota'n Iyyannam laqqakkam hee'llakko'o. Kabadiinsi ki'issakka'a ixxo laqqakkamo. Ixxom moo'llakko'ookko» yukko. Filiphphoosim Yesuusina «Moollanna! Niina Waa'a moo'ise. Ixxo moo'issittaa'lleensi niina ihookko» yukko. Yesuusim Filiphphoosina dabaraa «An lobakat ammaniinsi ki'isaa ki'nnuwwinne hee'ummuuyyi eese laqqooyyonnihe? Eese moo'ukkok Waa'am moo'aakko. At eese hinkid ‹Waa'a moo'ise› yitoolla? Filiphphoosa, an Waa'inne yoommisa Waa'im iinninne yoo'isa amma'nnitooyyonnihe? Iinninne yoo Waa'i ixxeka baxo baxoolla bagaan an wocoommi luwwi i gagiinseyyo. An Waa'inne yoommisa Waa'im iinninne yoo'isa kuroommoka amma'nnehe. Eebeelas an baxoommi bax bikkina amma'nnehe. Hanqinam an ki'nnuwwina kuroommo; eesenne amma'nnookkok an baxoommi baxo baxookko. An Waa'i beyyo maroommi bikkina an baxoommi baxiinsim lophphoo baxo baxookko. Ayyi luchchom i summinne xa'mmitakkolas Waa'i i kollinne lomba siixxoo'isina an issoommo. Ayyi luchchom i summinne xa'mmitakkolas an issoommo» yukko. Odim Yesuus «Eese iittitakkolas i ijaajo egettakkamo. An Waa'a uunxoommaare ki'nnuwwinne maqire doolli hundinam hee'oo'isina mulli Qoxxisaancho Waa'i asse'ookko. Oohim ka uulli manni moo'oobee'anee la'oobee'anee ihu bikkina aa'eena xanoobee'i hanqo'i Keesammi Ayyaana. Ihukkaarem oo Keesammi Ayyaan ki'nnuwwi woronne hee'oo bikkina laqqakkamo. An ki'nnuwwi beyyo daba'llaa waaroommo bagaan adaraa'llisa ki'nnuwwa uraa uroommoyyo. Hofqax ammaniinsi lasage ka uulli manni eese moo'ooyyo. Ihukkaarem ki'nnuwwi eese moo'llakkamo. Mashka'oomim an hee'oommane; ki'nnuwwim hee'llakkamo. An Iyyanninne yoommisa ki'nnuwwim iinninne yoontakke'isa anim ki'nnuwwinne yoommisa ee ammane laqqakkamo. Eese iittookkok i ijaajo aa'aa egeroohane. Eese iittookkoka Iyyannim iittookko. Anim ixxo iittaa i gaga ixxena la'isoommo» yukko. Yihud Yesuusina «Moollanna! At ki gaga ka uulli manninatte ihoo'n niina hinkid issitaate la'issoottok?» yukko. Ku Yihud Asqorotokkichchi Yihudatteyyo. Yesuus ixxena dabaraa «Ayyi manchim eese iittulas an yummi luwwa egerookko. Iyyannim ixxo iittookko. Iyyannii anii ixxi beyyom waallaa ixxenne maqire hee'nnoommo. Eese iittoobee'ek an yummi luwwam egerooyyo. An wocoommi woshshi eese asse'u Iyyanni woshsha bagaan iihaneyyo. An ka woshsha ki'nnuwwinne maqire hee'ummuuyyim kaba kuraammo. Ihukkaarem Iyyanni i summinne asse'oo Qoxxisaanchi Keesammi Ayyaan ki'nnuwwina luwwi hundam losisookko. An ki'nnuwwina kuroommi luwwi hundam tiissiisookko. An ki'nnuwwina xumma uwwoommo. Oo uwwoommi xummim i xumma. An uwwoommi xummi ka uulli manni uwwoo xummi'nnoo'aneyyo. Ki'nnuwwik wodan baa'aa baddoone. An ‹Uraa maraa daba'llaa ki'nnuwwi beyyo waaroommo› yummoka macceessakko'ookko. Eese iittitakkota'n an Waa'i beyyo maroommi bikkina liirantakkam hee'llakko'o. Mashka'oomim Waa'i iinniinsi lobane. Ku woshshi ihoo ammane amma'nnitakkamisina an gaassaatim ki'nnuwwina kuraammo. Ka uullik gassaanchi waaroolli ihu bikkina ka lasage an ki'nnuwwinne lobakata atooraroommoyyo. Ihukkaarem eese kaa'oo malaayyi ixxena bee'e. An Waa'a iittoommisa ka uulli manni la'oo'isina Waa'i eese ‹Isse› yaa ijaajukkisa issoommo» yaa «Ki'llehe; ka beyyiinsi mallona» yukko. Odim Yesuus «An hanqinam woyina yakkam xuda laboo haqqichchisa; kaasukkokim Iyyanna. Eesenne yoo caaffuwwiinsi misha mishoobee'eka hundam Iyyanni muraa hoorookko. Ihukkaarem misha mishoo caafa hundam edaa mishoo'isina ballachchaa axisookko. An ki'nnuwwina wocummi sagar ki'nnuwwa muccussaakko. Ki'nnuwwi iinninne mat ikkehe; anim ki'nnuwwinne mat ihoommo. Caaf aminne mat ihubeelas ixxi gaginne misha misheena xanoobee'isam ki'nnuwwim iinninne mat ikkakkobeelas misha mishshakkeena xantakkamoyyo. «An woyi'n xudina ama. Ki'nnuwwim caaffuwwa. Iinninne mat ihookkok anim ixxenne mat ihoommok ixxi lobakat misha mishookko. Iinniinsi annanni ikkakka'a maham issitakkeena xantakkamoyyo. Ayyi manchim iinninne mat ihubeelas amiinsi annanni ihu caafisa uunjamaa gogookko. Gogaa lasage wixxaa'akka'a giiranne edakkamaare shokkookko. Ki'nnuwwi iinninne mat ikkakkolas i sagarim ki'nnuwwinne mat ihulas hassakko'i luwwi hundam xa'mmehe; siixxitakkamo. Ki'nnuwwi lobakat misha mishshakkam ammane Iyyanni lomba siixxookko. I losaan ikkakko'isam eehanninne la'issakkamo. Iyyanni eese iittukkisam anim ki'nnuwwa iittaammo. Ki'nnuwwi i iittonne hee'llehe. An Iyyannika ijaajo egeraa ixxi iittonne hee'oommisam ki'nnuwwim i ijaajo egettakkolas i iittonne hee'llakkamo. «An ka woshsha ki'nnuwwina wocummok i liiranchi ki'nnuwwanne ihoo'isinatte; ki'nnuwwannem liiranchi wo'mmoo'isinatte. I ijaaj kane; An ki'nnuwwa iittummisam ki'nnuwwina'i ki'nnuwwim iittammehe. Mat manchi ixxi beshina ixxi foore higisaa uwwimmiinsi lophphoo iitti bee'e. An ki'nnuwwa ijaajummi luwwa issitakkolas ki'nnuwwi iina beshshuwwa. An ki'nnuwwa ka lasage ‹awwaadaano› yoommoyyo. Mashka'oomim moollanni issoo luwwa awwaadaanchi la'ooyyo. Ihukkaarem an Iyyanniinsi macceesummi luwwi hundam ki'nnuwwina la'isummi bikkina ki'nnuwwa ‹i beshshuwwa› yaammo. An ki'nnuwwa doo'llummo bagaan ki'nnuwwi eese doo'llitakko'oyyo. Doo'llummokim i summinne xa'mmitakko'i luwwi hundam Iyyanni uwwoo'isina ki'nnuwwi mattakka'a hee'oo misha mishshakkamisinatte. Ki'nnuwwina'i ki'nnuwwim iittantakkamisina kaba an ki'nnuwwa ijaajaammo. «Ka uulli manni ki'nnuwwa sabulas ki'nnuwwiinsi illageenim eese sabukkisa laqqehe. Ki'nnuwwi ka uulli manni ikkakkota'n ka uulli manni ixxi keeno iittoo'isam ki'nnuwwam iittam hee'ukko. Ihukkaarem an ki'nnuwwa ka uulliinsi doo'llaammo. Ka uulli manni ki'nnuwwa saboo mashka'im ki'nnuwwi ka uulli manni ikkakkobee'i bikkinatte. An ki'nnuwwina ‹Awwaadaanchi ixxi moollanniinsi lophphooyyo› yummoka sawwi'llehe. Eese hawwissolas ki'nnuwwam hawwissamo. I woshsha macceessolas ki'nnuwwi woshsham macceessamo. Ihukkaarem ixxuwwi eese asse'ukkoka laqqambee'i bikkina i mashka'inne ki'nnuwwam hawwissamo. An waaraa ixxuwwina kuroo'n yoomta'n ixxuwwina baaxiil iham hee'ukkoyyo. Ihukkaarem kaba ixxuwwi baaxii'l bikkina dabaabuttam luwwi bee'e. Eese sabookkok Iyyannam sabaakkoohane. Ayyim issubee'i luwwa ixxuwwi lambe'enne issoo'n yoomta'n ixxuwwina baaxiil iham hee'ukkoyyo. Ihukkaarem kaba ixxuwwi an baxoommi baxo moo'lla'atim eesee Iyyannaa sabbo'ookko. Sabbo'okim ‹Mashka'i bee'em eese sabbo'o› yamamaa ixxuwwi Seeranne kitaabamu sagar wo'mmoo'isinatte. «An Iyyanni beyyiinsi ki'nnuwwina asse'oommi Qoxxisaanchi ixxim Iyyanni beyyiinsi firaa waaroo hanqo'i Keesammi Ayyaan waaroo ammane i bikkina kurookko. Ki'nnuwwim luxxaanniinsi ki'issakka'a iinninne maqire hee'llakko'i bikkina i bikkina kuttakkamo. Odim Yesuus «Amma'nnatiinsi ubbakkambee'isina an ka hundam ki'nnuwwina kuraammo. Wixxixxi minneewwiinsim ki'nnuwwa yaayyakkamo. Ki'nnuwwa shitam keen ixxuwwi gaga Waa'ina awwaaddam kee'nnisa issitam amman waarookko. Ixxuwwi eekka issitamok eesee Iyyannaa laqqambee'i bikkinatte. Ihukkaarem ku woshshi ki'nnuwwanne afoo ammane an kurummisa tiittakkamisina ka woshsha ki'nnuwwina kuraammo. «An ki'nnuwwinne maqire hee'ummi bikkina kanniinsi illageen ka woshsha ki'nnuwwina kurummoyyo. Ihukkaarem an kaba eese asse'ukkaanni beyyo maroommuulla. Ki'nnuwwiinsi matim eese ‹At hanno matteenatte?› yaa xa'mmookkok bee'e. An kaba ka woshsha ki'nnuwwina kurummi bikkina lobakata kichche'llakko'ookko. Ihona bagaan an marimmi ki'nnuwwina eran ihukkisa hanqinam kuroommo. Mashka'oomim an marumbeelas Qoxxisaanchi ki'nnuwwina waarooyyo. Ihukkaarem an marumlas ki'nnuwwina ixxo asse'oommo. Ixxi waaroo ammane baaxii'l bikkina, xabbeenoo'm bikkinaa oogaxxi bikkinaa manni la'oo'isa issookko. Baaxii'l bikkina manni la'oo'isa issookkok ixxuwwi eesenne amma'nnimma hoogimmi baaxiil ihu bikkinatte. Xabbeenoo'm bikkina manni la'oo'isa issookkok an Iyyanni beyyo maroommi bikkina od eese moo'llakkambee'i bikkinatte. Oogaxxi bikkina manni la'oo'isa issookkok ka uulli gassaanchonne Waa'i oogatu bikkinatte. «Kaba ki'nnuwwi aa'llakkeena xantakkamoyyo bagaan an ki'nnuwwina kuroommi lobakat luwwi yookko. Ihukkaarem hanqo'i Keesammi Ayyaan waaroo ammane hanqi kollonne ki'nnuwwa awwonsookko. Ixxi macceesukkoka wocookko bagaan ixxi gagiinsi wocooyyo. Hanenne waaroo woshsham ki'nnuwwina baa'yyaatookko. Ixxi iinniinsi macceesu woshsha massaa ki'nnuwwina kuroo bikkina eese lonsookko. ‹Iinniinsi macceesu woshsha massaa ki'nnuwwina kurookko› yummok Iyyannina yoo luwwi hundim iihan ihu bikkinatte. «Hofqax ammaniinsi lasage ki'nnuwwi eese moo'llakkamoyyo. Ee lasage odim hofqax ammanina moo'llakkamo» yukko. Ixxi losaa'nnek mat mat keen ixxuwwina'i ixxuwwim «Ku ixxi niina ‹An Iyyanni beyyo maroommi bikkina hofqax ammaniinsi lasage eese moo'llakkamoyyo. Odim hofqax ammanina moo'llakkamo› yukkok maruchcho? Hofqax ammane yookkok mayyeena hassaatette? Ixxi wocoo woshshi mayyimda'e niina aagukkoyyo» yaqqanto'o. Ixxuwwi ixxo xa'mmiteena hasso'isa la'u bikkina Yesuus «Ki'nnuwwina'i ki'nnuwwim xa'mmantakkamok ‹Hofqax ammaniinsi lasage eese moo'llakkamoyyo. Odim hofqax ammanina eese moo'llakkamo› yummok mayyeenatda'e ihukkisannihe? Hanqinam an ki'nnuwwina kuroommo; ki'nnuwwi sottakku'uuyyi wi'llitakkamo. Ihukkaarem ka uulli manni liiramookko. Ki'nnuwwi kichche'llakkamo. Ihukkaarem ki'nnuwwik kichchechchi liiranchanne daba'llookko. Mat meentichcho qattam amman afoohaare xuuchchi amman afu bikkina kichche'llamo. Ihukkaarem qatta'a lasage ciilichcho qatto'i bikkina liiranta'a ee hawwo xaddamo. Ee'isam ki'nnuwwim kaba kichche'llakko'ookko. Ihukkaarem an daba'llaa ki'nnuwwa moo'oommaare liirantakkamo. Ee liirancham ki'nnuwwiinsi hoorookkok matim bee'e. Ee ammane ki'nnuwwi eese maham xa'mmitakkamoyyo. Hanqinam an ki'nnuwwina kuroommo; i summinne ihu luwwam iyyanna xa'mmitakkolas ki'nnuwwina uwwookko. Kaballi afeebe'e i summinne maham xa'mmitakko'oyyo. Kaba xa'mmehe; ki'nnuwwik liiranchi wo'mmoo'isina xa'mmitakko'i luwwa siixxitakkamo. «Ka woshsha an ki'nnuwwina kobi'llishshinne kuraammo. Ihukkaarem ki'nnuwwina kobi'llishshinnette ihoo'n Iyyanni bikkina caakkisaa wocoommi amman waarookko. Ee ammane i summinne Iyyanna xa'mmitakkamo. ‹An ki'nnuwwi bikkina Iyyanna uunxoommo› yoommoyyo. Mashka'oomim ki'nnuwwi eese iittitakka'a Iyyanni beyyiinsi waarummisa amma'nnitakko'i bikkina Iyyanni ixxi gagim ki'nnuwwa iittookko. An Iyyanni beyyiinsi ka uulla waaraammo. Kaba odim ka uulla uraa Iyyanni beyyo mareenatte» yukko. Ixxi losaanim «Oono'o! Kaba kobi'llishshinnette ihoo'n caakkissaa woccoolla. At hundi luwwam laqqoo'isaa keese ayyim xa'mmona hassoobee'isaa kaba lanqaammo. At Waa'i beyyiinsi waattittisa eehanninne amma'nninoommo» yito'o. Yesuusim ixxuwwina dabaraa «Kabadu amma'nnitakkamuullannihe? Ki'nnuwwi hundim eese mullam uttakka'a annannichchi minem binnitakkam amman waaroolla. Ammanoomim kaba afaakko. Ihukkaarem Iyyanni iinninne maqire yoo bikkina an mullatteyyo. Ki'nnuwwi iinninne mat ihimminne xumma siixxitakkamisina an ki'nnuwwina kaka kuraammo. Ka uullanne hee'llakku'uuyyi ki'nnuwwina hawwi yookko. Ihukkaarem an ka uulla kaa'ummi bikkina lobakata liirammehe» yukko. Yesuus ee woshsha wocaa ki'aa iimane moo'ukkuuyyi «Iyyanna! Kaba amman afaakko. Ki Beet keese lonsoo'isina atim ki Beeto lonse. Mashka'oomim at ixxena uwwitti keenina hundinam heer heerina hee'oo heechcha uwwoo'isina manni hundannem at ixxena malaayye uwwitaatto. Oo heer heerina hee'oo heechchim at xale'i hanqo'i Waa'i ikkittisa la'immaa at asse'llitti Yesuus Kiristoosa la'imma. An baxoommisina at uwwitti baxo baxaa guullaa keese ka uullanne lonsaammo. Iyyanna! Uulli qooccamoo'n illageen kiinninne maqire iina hee'u lombinne kaba eese ki beyyonne lonse. «At ka uulliinsi fissitaa iina uwwitti mannina ki summa la'isaammo. Ixxuwwi ki keen hee'llo'o. At ixxuwwa iina uwwitto. Ixxuwwim ki sagara egetto'o. At iina uwwitti luwwi hundim kiinniinsette ihukkisa kaba ixxuwwi laqqo'ookko. At iina uwwitti sagara anim ixxuwwina uwwummaare aa'lla'a an ki beyyiinsi waarummisa hanqinam laqqo'ookko. At eese asse'llittisam amma'nnito'ookko. An ixxuwwi bikkina keese uunxoommuulla. An keese uunxoommuullak ixxuwwi kiihan ikko'i bikkina at iina uwwitti keeninatte bagaan mulli manni bikkina keese uunxoommoyyo. I keen hundim kiihane; ki keenim iihane. Anim ixxuwwanne lomba siixxaammo. Kaba an ki beyyo waaroommuulla. Ka lasage ixxuwwi ka uullanne hee'llamo bagaan an ka uullanne hee'oommoyyo. Keesantaattoo Iyyanna! Anii atii mat inkummisam ixxuwwim mat ikkamisina at iina uwwitti keeno ki summinne egere. An ixxuwwinne maqire hee'ummuuyyi at iina uwwitti ki summinne ixxuwwa egeraammo. Keesammi Kitaabanne kitaabamukkok wo'mmoo'isina bichchi beetiinsi bagaan ixxuwwiinsi matim bi'ukkoyyo. Ihukkaarem kaba an ki beyyo waaroommuulla. I liiranchi ixxuwwanne wo'mmoo'isina an ka uullanne hee'ummuuyyi ka woshsha wocaammo. An ixxuwwina ki sagara uwwaammo. An ka uullan ihumbee'isam ixxuwwim ka uullan ikkobee'i bikkina ka uulli manni ixxuwwa sabukko. An keese uunxoommok ixxuwwa joriinsi egettonatte bagaan ka uulliinsi fissitoo'isinayyo. An ka uullan ihumbee'isam ixxuwwim ka uulli keenoyyo. Hanqinam ixxuwwa ki gagina annanni isse. Ki sagarim hanqa. At eese ka uulla asse'llittisam anim ixxuwwa ka uulla asse'aammo. Ixxuwwim hanqina ixxuwwi gaga annanni issita'a kiina hincaa'llamisina an i gaga kiina annanni issaa hincaa'aammo. Atii anii mat inkummisa ixxuwwim mat ikkamisina at iina uwwitti lomba anim ixxuwwina uwwaammo. Oo uunxoommokim at eese asse'llittisaa eese iittittisam ixxuwwam iittittisaa ka uulli manni la'oo'isina ixxuwwi guullita'a mat ikkamisina an ixxuwwinne ixxuwwim iinninne mat inkoommisinatte. Iyyanna! Oo at iina uwwitti keen uulli qooccamoo'n illageenim at eese iittitaa iina uwwitti lomba moo'lleena an yoommi beyyonne ixxuwwim ikkamisina hasoommo. Hanqo'i muccur Iyyanna! Ka uulli manni keese la'ukkoyyo. Ihukkaarem an keese la'ummo. Ku keenim at eese asse'llittisa laqqo'ookko. Anim ixxuwwina ki summa la'isaammo. At eese iittitti iitti ixxuwwi woronne ihoo'isinaa anim ixxuwwinne mat ihoommisinaa ki summa odim la'isoommo» yukko. Yesuus eehid yaa Waa'a uunxaa lasage ixxi losaaninnem Qeediroona yakkam dirifina eeqidonne kaasakko'oo haqqi woro maraa aagukko. Yesuus ixxi losaaninne maqire ee beyyonne dut ammane edamam hee'u bikkina Yesuusa higisaa uwwoo Yihud ee beyyo la'am hee'ukko. Ee bikkina Yihud gaadaa'nnekaa qeessa awwonsaaniinsii Farisaawe'uwwiinsii asse'anto'oo Keesammi Mine egeraa'nnekaa matqaxa awwonsaa waarukko. Ixxuwwim faanoossuwwa, sha'uwwaa bagadduwwaa amadda'a hee'llo'o. Yesuus ixxonne afoo luwwi hundam la'aa hee'u bikkina ixxuwwi illagenne firaa «Ayye hassakkamuulla?» yukko. Ixxuwwim dabatta'a «Naazireexxi Yesuusa hansoommuulla» yito'o. Yesuusim ixxuwwina «Naazireexxi Yesuus anette» yukko. Yesuusa higisaa uwwu Yihudim ixxuwwinne maqirem uullaa hee'ukko. Yesuus ixxuwwina «Naazireexxi Yesuus anette» yu ammanenne afa'llaachcha matta'a uullanne ubbo'o. Odim Yesuus «Ayye hassakkamuulla?» yukko. Ixxuwwim «Naazireexxi Yesuusatte» yito'o. Yesuusim dabaraa «Naazireexxi Yesuus anette ihummisa ki'nnuwwina kuraammo. Hassakkamok eesette ihulas ku keen mattona» yukko. Eehid yukkokim «Iina uwwitti kee'nneka matom uunjummoyyo» yaa wocu woshshi wo'mmoo'isinatte. Ee ammane Pheexiroosa yakkam Simi'oonina bisa'i hee'u bikkina seejjiinsi fissaa hundiinsi lob qeessichchina awwaadaanchika makki kolli macce aphphisaa murukko. Ee awwaadaanchikim summi Malkoosa yakkaman hee'ukko. Yesuusim Pheexiroosina «Ki bisa'a seejjanne aagise. Iyyanni iina uwwu hawwo an aa'immi hasisooyyonnihe?» yukko. Ee lasage gaadaan, gaadaa'n awwonsaanchi Ayihuxxi waardiyyii Yesuusa amadda'a katto'o. Katta'a ki'lla'a Haanna'a yakkam manchi beyyo gaassita'a massito'o. Haanna'a ee maarage hundiinsi lob qeessichchi hee'u Qayyaafina ballo hee'ukko. Oo Qayyaaf «Minaadaphphi bikkina mat manchi lehuta'n erane» yaa Ayihuxxi manni gassaano sogukkane. Oo gooca egetto'i awwaadaancho Pheexiroosina «At ee manchi losaaniinsi matoyyonnihe?» yito'o. Pheexiroosim dabaraa «An ixxi losaanchoyyo» yukko. Ee ammane uulli qiidam hee'u bikkina hundiinsi lob qeessichchina awwaadaanii Keesammi Mine egeraanii giira giitta'a uullita'a iibbixxitam hee'llo'o. Pheexiroosim ixxuwwinne maqirem uullaa iibbixxam hee'ukko. Ee lasage losaa'n bikkinaa losisu losishshi bikkinaa hundiinsi lob qeessichchi Yesuusa xa'mmukko. Yesuusim dabaraa «An maaxaa wocummoyyo. Ayihuxxi minaadab wixxitam minneewwannee Keesammi Minennee hundi ammanem losisummo bagaan maham maaxaqqanne wocummoyyo. Iinniinsi macceesso'i keen an yummi luwwa laqqam bikkina mayyumda'e kuttona ixxuwwa xa'mme bagaan eese mahina xa'mmitoolla?» yukko. Eekke'enne uullaa hee'u mat gaadaanchi Yesuus eehid yukkaare «Lob qeessichchina kuttoottok ee'isannihe?» yaa oobo'inne Yesuusa aphphisukko. Yesuusim dabaraa «An jora wocaammoolas wocummi jora kure. Hanqa wocaammoolas eese mahina aphphissoolla?» yukko. Ee lasage Haanna'a Yesuusa karukkisam hundiinsi lob qeessichchi hee'u Qayyaaf beyyo asse'ukko. Ee ammane Pheexiroosa yakkam Simi'oon uullaa giira iibbixxam hee'ukko. Manni odim Pheexiroosina «Atim ixxi losaaniinsi matoyyonnihe?» yita'a xa'mmito'aare Pheexiroosim «An ixxi losaanchoyyo» yaa lagukko. Ee hundiinsi lob qeessichchina awwaadaa'nnek mat Pheexiroosina «Kaasakko'i haqqi woronne ixxenne maqirem an keese moo'ummoyyonnihe?» yukko. Ixxim macce Pheexiroos muru manchina qarmanchi hee'ukko. Yesuusinne maqire hee'ukkisa Pheexiroos odim lagukko. Ee ammanchom antabaa'i muunukko. Ee lasage soodaraar daram Qayyaaf miniinsi gassaanchi qash woro Yesuusa massakko'o. Ayihuxxi minaadab Shaashshiqqi Uguxxi hurbaata ittam bikkina haashaarantambee'isina gassaanchi qash woro aaggo'oyyo. Ee bikkina Philaaxoos firaa «Ka mancho kasassakko'ok mahinatte?» yukko. Ixxuwwim «Ku manchi jora issoo'n yoohan yakkota'n kiina higinsaa uwwinam hee'nnummoyyo» yito'o. Philaaxoosim ixxuwwina «Massitakka'a ki'nnuwwi See'llisanne ixxonne oogattehe» yukko. Ayihuxxi mannim ixxena «Neese ayyem shinona seer uwwooyyo» yito'o. Oohim ihukkok Yesuus hinkido'i leho lehooda'e wocu woshshi wo'mmoo'isinatte. Philaaxoosim qash woro daba'llaa aagaa Yesuusa weeshaa «At Ayihuxxi manni adilannihe?» yukko. Yesuusim ixxena dabaraa «At kid yittok ki sawwitiinsettennii mulli manni i bikkina kurukkaarette?» yukko. Philaaxoosim dabaraa «An Ayihudichchonnihe? Keese iina higissa'a uwwito'ok ki shumo'oo ki shumo'i qeessa awwonsaano. At issitti luwwi maruwwa?» yukko. Yesuusim ixxena dabaraa «Iikki adillan ka uullanneyyo. Iikki adillan ka uullannette yakkota'n an Ayihuxxi anganne aagoombee'isa i awwaadaan i bikkina qasantam hee'llo'o. Ihukkaarem i adillan ka uullanneyyo» yukko. Philaaxoosim ixxena «Eehaare at adilannihe?» yukkaare Yesuus dabaraa «At yittisam an adila. An qaramummokii ka uulla waarummokii hanqi bikkina kureenatte. Hanqi manchi ayyim i woshsha macceesookko» yukko. Philaaxoosim ixxena «Hanqi maruwwa?» yukko. Eehid yaa lasage Philaaxoos odim Ayihuxxi manni beyyo firaa «An ka manchonne matem bi'ishsham siidummoyyo. Karanto'i mannika mat mancho kido'i ugudanne fatakoommisina ki'nnuwwina losan yoo bikkina ka Ayihuxxi adila fatakihona hassakkamonnihe?» yukko. Ixxuwwim «Ka manchoyyo! Niina Barbaana fatakihe» yita'a shuutto'o. Barbaan fangichchi hee'ukko. Ee lasage Philaaxoos Yesuusa massaa gansiisukko. Gaadaanim uttiinsi adilla'n mare'e baxxa'a ixxi horoorenne issita'a adilluwwisam kashar eddechcha eddeessa'a «Ayihuxxi manni adila, kiina hechcho!» yitu'uuyyi ixxi beyyo waatta'a oobo'inne aphphisso'o. Odim Philaaxoos ixxuwwi beyyo firaa «Oono'llehe! An ixxonne bi'ishsha siidumbee'isa laqqakkamisina ki'nnuwwi beyyo fissaa woroommuulla» yukko. Yesuusim uttiinsi baxamaakkoo adilla'n mare'e horoorenne issakko'isamii kashar eddechcham eddeesakko'isamii firukko. Philaaxoosim «Manchoom oono'llehe!» yukko. Qeessa awwonsaanii Keesammi Mine egeraanii Yesuusa moo'llo'i ammanenne «Ixxo saqale! Saqale!» yitu'uuyyi shuutto'o. Philaaxoosim ixxuwwina «An ixxonne bi'ishsha siidumbee'i bikkina ki'nnuwwim massitakka'a saqallehe» yukko. Ayihuxxi minaadabim dabatta'a «Niina Seer yookko; ixxi gaga Waa'ina Beet issu bikkina ee ni see'llisanne ixxi lehimmi hasisookko» yito'o. Philaaxoos ee woshsha macceesu ammanenne lobakata baddukko. Philaaxoos odim qash woro aagaa Yesuusina «At waattittok hanniinsette?» yukko. Ihukkaarem Yesuus maham dabarukkoyyo. Ee bikkina Philaaxoos ixxena «Woccooyyonnihe? Keese fatakeenaa saqaleenaa iina malaayyi yoo'isa laqqooyyonnihe?» yukko. Yesuusim dabaraa «Iimaniinsi uwwamubeeta'n eesenne kiina malaayyi hee'am hee'ukkoyyo. Ee bikkina eese kiina higisaa uwwukkaannik baaxiil lobane» yukko. Philaaxoos ee woshsha macceesu ammanenne Yesuusa fatakeena hasukko. Ihukkaarem Ayihuxxi manni «Ka mancho fatakitlas at Oroo'm uulli adilina beshichchoyyo. Ixxi horoore adil issaqqookkok ayyim adilanne ki'oohane» yita'a shuutto'o. Philaaxoos ee woshsha macceesu ammanenne Yesuusa fissaa kina dahakka'a baxakko'oohaannonne oogatakkeena afuurakkam beyyonne afuurukko. Eehido'i beyyik summi Ibro'isinne Gabata yamamookko. Ee beyyonne afuuraa Ayihuxxi minaadabina «Ki'nnuwwik adil oono'llehe!» yukko. Oo ballim Usheexxaxxi Ayyaamina gudakkam balli hee'ukko. Oo ammanim balli loh sa'aata ihooqax amman hee'ukko. Ayihuxxi minaadabim «Ixxo bi'ise! Ixxo bi'ise! Ixxo saqale!» yita'a shuutto'o. Philaaxoosim ixxuwwina «Ki'nnuwwika adila saqalonnihe?» yukko. Qeessa awwonsaanim dabatta'a «Niina Oroo'm adiliinsi bagaan mulli adil bee'e» yito'o. Ee ammanenne Philaaxoosim Yesuus saqalamoo'isina ixxuwwi anganne higisaa uwwukkaare ixxuwwim Yesuusa aa'llo'o. Yesuus ixxom saqalakkam masqala iyyaa Horoo'l Qooma yakkam beyyo marukko. Ee beyyik summi Ibro'isinne Golgota yamamookko. Ee beyyonne Yesuusa saqalto'o. Yesuus qeddinnee makkinnem lam mancho saqalto'o. Philaaxoosim «Kuk Ayihuxxi manni adil Naazireexxi Yesuusatte» yoo woraqata kitaabaa Yesuus saqalamu masqalanne amaxxansukko. Oo Yesuus saqalamu beyyi Yerusaalee'm beero'ina abbis hee'u bikkina lobakat Ayihuxxi manni waatta'a ee kitaabamukkoka qananaa'llo'o. Kitaabamaa hee'ukkokim Ibro'isinnette, Laatii'nnisinnettee Giriikisinnettee hee'ukko. Ayihuxxi minaadaphphek qeessa awwonsaanim Philaaxoosina «Ixxena ‹Ayihuxxi manni adila› yitaa kitaabbitte. Ihukkaarem ‹Ku manchi «An Ayihuxxi mannina adila» yaakkoohane› yitaa kitaabe» yito'o. Philaaxoosim dabaraa «An kitaabummoka matemaaggem kitaabaammo» yukko. Gaadaanim Yesuusa saqalta'a lasage ixxeka eddechcha massita'a soor beyyi issita'a soor gaadaan baxxanto'o. Hanenne edde'oo qeeraa'l qambiisam massito'o. Oo qambiis hundoomim dadamaakkoohane bagaan gobamoo'n yoohan hee'u bikkina ixxuwwina'i ixxuwwim «Ayyena afooda'e moo'nneena saamo fissinona bagaan kaka dereelloone» yaqqanto'o. Ixxuwwi eehid issito'ok Keesammi Kitaabanne «Iikka eddechcha baxxanto'o. I qambiisinam saamo issaqqanto'o» yamamaa kitaabamukkok wo'mmoo'isinatte. Yesuus saqalamu masqa'l gadanonne ixxi ama, ixxi amaayya, Qalophphaasa yakkam manchina are Maaraamee Magdala yakkam beero'i Maaraamee uullita'a hee'llo'o. Yesuus ixxi amaa ixxi iittoo losaanchoo ixxi gadanonne uullito'ookkoka moo'aa ixxi amana «Taa meentichche, ki beet oono'o!» yukko. Ee losaanchinam «Kiyyumma ootto'o!» yukko. Ee ammaniinsi ki'isaa oo losaanchi Yesuusika ama ixxi mine massukko. Yesuusim hundi luchchim beeddukkisa la'aa Keesammi Kitaabanne kitaabamukkok wo'mmoo'isina «Xeebe'aammo» yukko. Ee ammanenne shiishaakkoo woyi'n diqaas wo'mmaakkoo humbulli eekke'enne hee'u bikkina ee beyyonne hee'llo'i keen hallaammi'nnoo'i luwwa ee woyi'n diqaasanne ceffa'a hiisoophpha yakkam luwwaannonne agadanne issita'a ixxi suumenne hincaa'llo'o. Yesuus ee shiishu woyi'n diqaasika agu ammanenne «Beeddaakko» yaa horoore qubbaa'aa ixxeka foore uwwaa lehukko. Yesuus saqalamu balli Usheexxaxxi Ayyaamina gudakkam balli hee'ukko. Oo Usheexxaxxi Ayyaam lobakata lonsakkam balli hee'u bikkina leesh masqalanne hosoobee'isa saqalanto'i kee'nneka lokko iiqqa'a leesha dilliisseena Ayihuxxi manni Philaaxoosa xa'mmito'o. Ee bikkina gaadaan matta'a Yesuusinne maqire saqalanto'i lamem manchikam lokko iiqqo'o. Ihukkaarem Yesuus beyyo matto'i ammanenne lehaakkoo moo'llo'i bikkina ixxeka lokko iiqqo'oyyo. Ihona bagaan ee gaadaaniinsi mat Yesuusika midaado bagadinne qasukkaare xiigii wo'ii firukko. Eekka moo'ukkok ki'nnuwwi amma'nnitakkamisina ee woshsha kuraakko. Ixxi kuru woshshim hanqa. Ixxi kuru woshshi hanqi ihukkisa ixxi gagim la'ookko. Oo woshshim ihukkok Keesammi Kitaabanne «Ixxi miqik matichchim iiqamooyyo» yamamaa kitaabamukkok wo'mmoo'isinatte. Odim Keesammi Kitaabaannonne mulli beyyonnem «Ixxuwwim qasso'oka moo'llamo» yamamaa kitaabamaakko. Ee lasage Armaate'i beero'i Yooseef Yesuusika leesha masseena Philaaxoosa uunxaa Philaaxoos uwwukkaare massukko. Yooseefim Yesuusa awwonaanchi hee'ukko. Ihukkaarem Ayihuxxi manni awwonsaano baddu bikkina Yesuus awwonaanchi hee'ukkok maaxaqqannette hee'ukko. Kanniinsi illageen hiimonne Yesuus beyyo waaraa hee'u Niqoodimoosim sadee mat kiilo'oo ihooqax karbe'e yakkam enja geneeno'inne hamaaramaakkookkoka amadaa waarukko. Oo lamem manchim Yesuusika leesha massita'a talbiinsi baxamaakkoo danaam eddechchinne Ayihuxxi manni losa'nnisam enja edda'a keefanto'o. Yesuusa saqalakko'i beyyonne kaasakko'oo haqqi hee'ukko. Ee haqqi woronnem ayyim waammamoo'n yoo haareechcho hinakko'oo bar hee'ukko. Oo balli Usheexxaxxi Ayyaamina gudakkam balli hee'u bikkinaa oo waammi barim abbis beyyonne hee'u bikkinaa Yesuusa ee barenne waammito'o. Abba'i balla baqitem uulli tuunsukkisa hee'onam Magda'l Maaraame waammi beyyo waattam ammanenne waammanne ifiisakko'i kin hooramaakkookkoka moo'llo'o. Ee bikkina ise geetta'a Pheexiroos beyyoo Yesuus iittoo mulli losaanchi beyyoo matta'a «Moollanna waammiinsi fissakka'a massakko'ookko; hanno massakkoda'e neese lanqummoyyo» yito'o. Eehid yito'i ammanenne Pheexiroosii oo mulli losaanchii lamim waammi beyyo matto'o. Lamim geettu'uuyyi matto'aarem oo mulli losaanchi Pheexiroosiinsi higaa waammi beyyo gaassaa afukko. Afaa heeshaa waammi woro moo'u ammanenne talbiinsi baxamaakkoo keefa'n eddechchi ubaakkoo moo'ukko bagaan waammi woro aagukkoyyo. Pheexiroosa yakkam Simi'oonim ixxo awwonaa afaa waammi woro aagaa talbiinsi dadamaakkoo talbi fati'l eddechchaa. Yesuus horoorenne xaaxakko'i eddechchaa moo'ukko. Oo horoorenne xaaxakko'i eddechchi hee'ukkok talbiinsi baxamu danaam eddechchinne maqirette ihoo'n annanni beyyonne xaaxamukkisam hee'ukko. Ee lasage oo waammi beyyo gaassaa afu losaanchim waammi woro aagaa moo'aa amma'nnukko. Yesuus lehiinsi ki'oo'isa Keesammi Kitaab kurukkoka oo amman afeebe'e qoossito'oyyi hee'llo'o. Ee lasage oo lamem losaanim ixxuwwi mine elle'llo'o. Ihukkaarem Maaraame waammi tochchonne uullita'a wi'llitam hee'llo'o. Wi'llitu'uuyyim heeshta'a waammi woro moo'llo'i ammanenne Waa'i asse'amaa'nnek lam asse'amaan qadaalli eddechcha edde'lla'a Yesuusik leesh hee'u beyyonne matii lokki aganne matii horoo'l aganne afuutto'ookkoka moo'llo'o. Oo Waa'i asse'amaanim Maaraamena «Taa meentichche, mahina wi'llitoolla?» yito'o. Isem ixxuwwina «I Moollanna massakko'ookko. Hanno massakkoda'e an la'ummoyyo» yito'o. Eehid yita'a afaree'n kollonne daba'llito'i ammanenne Yesuus uullaakkoo moo'llo'o. Ihukkaarem Yesuusatte ihukkisa laqqo'oyyo. Yesuusim isena «Meentichche, mahina wi'llitoolla? At ayye hassoolla?» yukko. Isem Yesuusina ee beyyonne kaasakko'i haqqa egeraancho labissa'a «Moollanna, at ixxo massitaattoolas an elleexxoommo. Hinki beyyonne dissitda'e kure» yito'o. Yesuusim isena «Maaraame» yukkaare ixxi kollonne daba'llita'a Ibro'isinne «Irabbuuni!» yito'o. Irabbuuni yimmi «Losisaancho» yimma. Yesuusim isena «Iyyanni beyyo iimane marumbee'i bikkina eese nakkititte. Ihukkaarem iyyabbaayyuwwi beyyo mattaa ‹ «An Iyyanni beyyoo ki'nnuwwinam anni beyyoo oohim i Waa'i beyyoo ki'nnuwwinam Waa'i beyyoo iimane maroommuulla» yaakko› yitaa kure» yukko. Oo Magda'l Maaraame matta'a Yesuus losaanina Moollanna moo'llo'isaa isena ixxi kuru woshshaa kutto'o. Ee ayyaanchom Abba'i balli hiimo Yesuusik losaan Ayihuxxi manna baddita'a u'llumma xuffo'isa hee'llonam Yesuus waaraa ixxuwwi lambe'enne uullaa «Xummi ki'nnuwwina ihona!» yukko. Eehid yaa ixxeka angaa midaadoo ixxuwwina moo'isukko. Losaanim Moollanna moo'llo'i ammanenne liiranto'o. Odim Yesuus ixxuwwina «Xummi ki'nnuwwina ihona; Iyyanni eese asse'ukkisam anim ki'nnuwwa asse'oommo» yukko. Eehid yaa ixxuwwi hanenne fooshshe'aa «Keesammi Ayyaana aa'llehe. Ayyekam baaxiilo haafitakkolas ixxuwwik baaxiil haafamookko. Ayyekam baaxiilo haafitakkobeelas ixxuwwik baaxiil haafamooyyo» yukko. Tommiinsii lam losaaniinsii mat hee'u Qafa yakkam Toomaas ixxi losaa'n beyyo Yesuus waaru ammane ixxuwwinne maqire hee'ukkoyyo. Ee bikkina oo mulli losaan Toomaasina «Moollanna moo'nnaammo» yita'a kutto'o. Ihukkaarem Toomaas ixxuwwina «Musmaarinne qasakko'i qoonca ixxi anganne moo'aa ee qoonca i anginne amadumbeelasii midaadonne yoo qooncam i anginne amadaa moo'umbeelasii an amma'nnoommoyyo» yukko. Saantiinsi lasage Yesuusik losaan odim ee minenne hee'llo'o. Toomaasim ixxuwwinne maqirem hee'ukko. Oo ixxuwwi hee'llo'i mi'n goocim xufamaa hee'ukko. Gooc xufamukkisa hee'onam Yesuus waaraa ixxuwwi lambe'enne uullaa «Xummi ki'nnuwwina ihona!» yukko. Ee lasage Yesuus Toomaasina «Ki anginne amaddaa i angika qoonca moo'e! Ki angam eebbaa i midaado amaddaa moo'e. Amma'nne bagaan maltitte!» yukko. Toomaasim dabaraa «I Moollanna! I Waa'a!» yukko. Yesuusim ixxena «At eese moo'llitti bikkina amma'nnitaatto; eese moo'lloo'n amma'nnitam keen maasse'anto'oo keeno» yukko. Ka kitaabanne kitaabamubee'eka maalalsiisoo lobakat mare'e Yesuus ixxi losaa'n illagenne issaakko. Ihukkaarem kuk kitaabamukkok Yesuus Waa'i Beet ihukkisaa Waa'i doo'llaakkoo Kiristoosatte ihukkisaa amma'nnitakkamisinatte. Amma'nnitakka'ahim ixxi summinne heechcha siixxitakkamisinatte. Ee lasage Yesuus Xibiriyaadoosa yakkam dambalaq gadanonne ixxi losaanina odim moo'amukko. Moo'amukkokim ka'isinnette. Pheexiroosa yakkam Simi'oon, Qafa yamamoo Toomaas, Galiila yakkam uullanne yoo Qaana'a yakkam beero'i Naatinaa'eel, Zabdiwoosa yakkam manchi oosii Yesuus losaa'nnek lam mulli keenii maqirem hee'llo'o. Pheexiroosa yakkam Simi'oon ixxuwwina «An qurxumme'e qaasheena mareenatte» yukko. Ixxuwwim «Neesem kiinninne maqirem malloommo» yita'a matta'a wongiranne aaggo'o. Ihukkaarem ee hiimo qurxumme'ika maham amaddo'oyyo. Uulli soodukkuuyyim Yesuus dambalaq tochchonne uullukko. Ihukkaarem Yesuusatte ihukkisa losaan laqqo'oyyo. Yesuusim ixxuwwina «I ooso, qurxumme'ika maham amaddakko'oyyonnihe?» yukko. Ixxuwwim «Amandummoyyo» yito'o. Yesuusim ixxuwwina «Wongi'l makki kollonne shikka darabbehe siiddakkamo» yukko. Ee bikkina ixxuwwim darabbo'i ammanenne shikkanne qurxumme'i wo'mmu bikkina gosaasimma hooggo'o. Yesuus iittoo losaanchi Pheexiroosina «Kuk Moollannatte» yukko. Pheexiroosa yakkam Simi'oonim Moollanni ihukkisa macceesu ammanenne baxina sheelataa hee'u eddechcha edde'aa Yesuus beyyo mareena wo'onne xophukko. Ihukkaarem mulli losaan shikkanne wo'mmu qurxumme'e gosaassu'uuyyi wongirinne waatto'o. Mashka'oomim uulliinsi honsayyi meetira ihooqaxa qee'llita'a wo'i woronne hee'llo'o bagaan eehaa'nnam qee'lto'oyyi hee'llo'o. Wo'i woriinsi tochchonne fitto'i ammanenne giira, ee giiranne issamaakkoo qurxumme'ee qorosho'oo moo'llo'o. Yesuusim ixxuwwina «Kaba amaddakko'i qurxumme'ika eebbehe» yukko. Ee bikkina Pheexiroosa yakkam Simi'oon wongiranne firaa shikkanne wo'mmaakkoo geejji qurxumme'e mat xibbee ontayyee sasoo wo'i woriinsi tochchonne gosaasukko. Qurxumme'i lobakat ihukkaarem shikkoom dereeramukkoyyo. Yesuusim ixxuwwina «Waallehe, ginjira ittehe!» yukko. Moollanni ihukkisa laqqa'a hee'llo'i bikkina matim ixxo «At ayyette?» yaa xa'mmeena iggukkoyyo. Yesuusim waaraa qorosho'o aa'aa ixxuwwina uwwukko. Ee'isam qurxumme'ikam uwwukko. Yesuus lehiinsi ki'aa lasage losaanina moo'amimmina kuk saxxi kore. Ginjira itta'a lasage Pheexiroosa yakkam Simi'oonina Yesuus «Yoona'i beet Simi'oona, at eese ka keeniinsi lonsitaa iittitoohonnihe?» yukko. Simi'oonim Yesuusina «Eeyya, Moollanna! An keese iittoommisa atim laqqootto» yukko. Yesuusim ixxena «Iikka geex gereebba abooyye» yukko. La'm korem «Yoona'i beet Simi'oona, eese iittitoohonnihe?» yukko. Simi'oonim «Eeyya, Moollanna! An keese iittoommisa atim laqqootto» yukko. Yesuusim «Iikka gereebba allaare» yukko. Odim saxxi korem «Yoona'i beet Simi'oona, eese iittitoohonnihe?» yukko. Saxxi korem «Eese iittitoohonnihe?» yu bikkina Simi'oon kichche'aa «Moollanna! At hundi luwwam laqqootto; an keese iittoommisam atim laqqootto» yukko. Yesuusim ixxena «Iikka gereebba abooyye. Hanqinam an kiina kuroommo; at harde'i hee'llittuuyyi ki anginnem lade'llaa hassitti beyyo taakke'llaatto. Ihukkaarem at lomma'nnitoo ammane ki anga biddiqaa'lloohaare mulli manni keese ladiisaa at matteena iittitoobee'i beyyo massookko» yaa «Eese awwone» yukko. Eehid yukkok Pheexiroos hinkido'i leho lehimminne Waa'ina lomba uwwooda'e moo'iseenatte hee'ukko. Yesuusa awwonukkuuyyim Pheexiroos laso qerephaa Yesuus iittoo losaanchi ixxuwwa awwonukkuuyyi moo'ukko. Oo losaanchim hii'm hurbaata itukkuuyyi Yesuusaannonne gadanonne afuuraa «Moollanna! Keese higisaa uwwookkok ayyette?» yukkane. Pheexiroosim ixxo moo'aa «Moollanna! Ku manchahe?» yaa Yesuusa xa'mmukko. Yesuusim dabaraa «An waareembe'e ixxi hee'ona hasumta'nnim keese mah aagisaate? At eese awwone» yukko. Ee bikkina oo Yesuus iittoo losaanchi «Lehooyyo» yakkam woshshi amma'nnaan abbaayyuwwi lambe'enne hundannem binnukko. Ihukkaarem Yesuus «An waareembe'e ixxi hee'ona hasumta'nnim keese mah aagisaate? At eese awwone» yukko bagaan «Oo losaanchi lehooyyo» yukkoyyo. Ka woshshi bikkina kurookkokim ee losaancho. Odim ka woshsha kitaabukkokim ixxotte. Ixxi kuru woshshi hanqi ihukkisam neese lanqoommo. Yesuus issukkok lobakat mulli luwwim yookko. Ixxi issu luwwi hundim kitaabamaakkoohan yakkota'n ee kitaabamu kitaabbuwwa dissimmina uulli hundim ihookkoka labisoommoyyo. Iittantaattoo Teewoofiloosa, an luxxeka kitaabummi kitaabanne Yesuus Kiristoos luxxaanniinsi ki'isaa iimane massamoo balli afeebe'e issu luwwaa losisu luwwaa hundam kitaabaammo. Iimane marukkokim ixxi doo'llu asse'amaanina Keesammi Ayyaa'n kollinne ijaajo uwwaa lasage. Ixxim lehiinsi ki'aa lasage sor balla lobakat googinne lehiinsi ki'ukkisa ixxuwwina moo'isukko. Waa'i adilla'n bikkinam kurukko. Odim Waa'i aagu neeyyata egerimmiinsi bagaan Yerusaaleemiinsi fittambee'isa ixxuwwinne maqire hee'u ammanem qoxxisaa kurukko. Oohim «Yohaannis wo'inne xammaqaakko. Ihukkaarem hofqax ammaniinsi lasage ki'nnuwwanne Keesammi Ayyaan hee'oo'isa issimminne xammaqoommo» yaa ixxuwwina kuru luwwa. Awwonaan Yesuusinne maqire mat ikka'a wixxito'i ammanenne Yesuusina «Moollanna! Kaba Isra'ee'l adillano dabattaa uullissoohonnihe?» yita'a xa'mmito'o. Yesuusim ixxuwwina «Iyyanni Waa'i ixxi malaayyinne issu doollee ammanee laqqakkamisina ki'nnuwwina uwwamukkoyyo. Ihukkaarem Keesammi Ayyaan ki'nnuwwanne dilloohaare malaayye aa'llakka'a Yerusaaleemanne, Yihuxxi uulli hundanne, Samaare'i uullannee uulli hundannemii i bikkina kuttakkam keen ikkakkamo» yukko. Eekka wocukkisam ixxuwwi moo'llu'uuyyim iim ki'ukko. Duubim ixxuwwi illiinsi daphphaa'ukko. Yesuus iimane marukkaare awwonaan iim xuxxita'a moo'llonam qadaalli eddechcha edde'llo'oo lam manchi ixxuwwi gadanonne uullito'o. Ixxuwwim awwonaanina «Galii'l uulli manna, iimane moo'llakku'uuyyi mahina uullitakka'ate? Ku ki'nnuwwiinsi iimane massamu Yesuus moo'llakku'uuyyi iimane marukkisam ee'isam daba'llaa waarookko» yito'o. Ee lasage asse'amaan Wee'l duuniinsi Yerusaalee'm beero'o daba'llito'o. Oo Wee'l duun Yerusaalee'm beero'iinsi honsi xibbi meetira ihooqax goog hee'ukko. Ixxuwwim Yerusaalee'm beero'o aagga'a eraare usheexxitam beyyo oohim biddiqaa baxamaakkoo mi'n iimane fitto'o. Fitto'i keenim Pheexiroosatte, Yohaannisatte, Yaaqoobatte, Indiraasatte, Filiphphoosatte, Toomaasatte, Bartoloomoosatte, Maatiwoosatte, Ilfiyoos beet Yaaqoobatte, to'achchaanchi Simi'oonattee Yaaqoob beet Yihudattee hee'llo'o. Oo keen hundim mat ikka'a Yesuus ama Maaraame, Yesuus abbaayyuwwaa mulli meentoo edda'a Waa'a uunxatonne guruphphanto'o. Mat ayyaamo Pheexiroos mat xibbee lamiyyee ikkam amma'nnaan abbaayyuwwi lambe'enne uullaa «Iyyabbaayyuwwa, Keesammi Kitaabanne Yesuusa amadiisu Yihud bikkina Daawiit kollinne ihaa Keesammi Ayyaan gaassaatim wocu woshshi wo'mmimmi hasisookko. Yihud niinninne maqirem doo'llamaa ka awwaadonnem ixxena qood hee'ukko. Oo Yihud hantaarinne siidu diinatinne uulla bitaa'ukko. Eekke'em illillaachcha ubaa diqamukkaare godaphphi mu'ut daadukko. Ee woshsham Yerusaaleemanne hee'llam manni hundim laqqo'o. Ee bikkina oo uulli ixxuwwi suuminne Akeldaama yamamaa weeshamukko. Eehid yimmim ‹xiiqqi uulla› yimma. Oohim Daawiit kitaabu kitaabanne ‹Ixxi hee'u beyyi udma'i ihona. Ee uullanne ayyim hee'oone› yamamukkane. Odim ‹Ixxi awwonsimmi baxom mulli manni aa'ona› yamamaa kitaabamukkane. Ee lasage Yoosxoosa te'im Baarsabaasa yakkam Yooseefaa Maatiyaasaa lam mancho amma'nnaan hincaa'llo'o. Ee lasage laminam saamo issito'aare saam Maatiyaasina afukko. Maatiyaasim tomminnee mat asse'amaaninnee exxaa xigamukko. Shaashshiqqi Ugud afu ammanenne awwonaan hundim mateeyyoominne mat beyyonne wixxita'a hee'llo'o. Dangonnem malaayyaam hambu'llamisa gugoo sagar waaraa ixxuwwi afuutto'i mine hundoomannem wo'mmukko. Allabo laboo gii'l labannuwwim waaraa ixxuwwanne annannichchonnem baxxansamaa afuurukkuuyyi moo'llo'o. Keesammi Ayyaan hundannem dillukkaare oo Ayyaan wocisukkisa mulli suuminne wocimma asheetto'o. Yihuxxek Waa'ina gatto'oo keen uulli hundiinsim waatta'a Yerusaaleemanne hee'llo'o. Ixxuwwim ee sagara macceessa'a wixxito'o. Annannichchim ixxi gaqqi suuminne amma'nnaan woccu'uuyyi macceessa'a maalalto'o. Ixxuwwim lobakata maalalta'a «Ku woccam keen hundim Galii'l uulli mannayyonnihe? Neese annannichchim woncoommi ni gaqqi suuminne woccu'uuyyi macceensoommok kuk hinkido'i woshsha? Neese Phaarte'enne, Meede'enne, Ilaame'enne, Maspheexoome'enne, Yihuxxi uullanne, Qaphaadooqe'enne, Phaanxoosanne, Issiyanne, Firge'enne, Phimfiliyanne, Gibxannee Qaareena yakkam beero'i gadanonne yoo Liibiyannee hee'nnoommi keen yoommine. Odim Oroo'm beero'onne hee'nnoommi Ayihuxxi mannii Ayihuxxi manni amma'nnatonne daba'llinummi keenii yoommine. Qarxeesa yakkam uullannee Arabannee hee'nnoommi keenim yoommine. Neese annannichchim Waa'ika malaayyaam baxo niihaanninne annannichchi suuminnem kuttu'uuyyi macceensoommuulla» yito'o. Ee bikkina ixxuwwi hundim maalalta'a mal bi'ukkaare ixxuwwina'i ixxuwwim «Kuk maruwwa?» yaqqanto'o. Ihukkaarem mulli keen «Woyi'n diqaasa agga'a dimbita'atette» yita'a naacco'o. Ihukkaarem Pheexiroos tomminnee mat asse'amaaninnee maqirem uullaa sagara iimaa'aa minaadabina «Yihuxxi uulli mannii Yerusaaleemanne hee'llakkam mannii hundim an wocoommi woshsha qoossitakka'a macceessehe. Ku woshshi ki'nnuwwina la'amaakkoohan ihona. Ki'nnuwwina laboo'isanne ku manni agaa dimbukkoyyo; mashka'oomim kaba uulli soodukkaanniinsi xale'e sas sa'aata. Ihukkaarem kuk Waa'i hiraagaanchi Yoo'eelinne ihaa ‹Lasaanchi doollenne kid issoommo. Maara edde'u keenonne hundannem iikka Keesammi Ayyaana dilliisoommo. Ki'nnuwwik goo'n oosii landi oosii hiraago woccamo. Ki'nnuwwik harde'i keenim kaalta moo'llamo. Ki'nnuwwik lommannim haqaawwe'ookko. Eeyya, hanqinam ee ammane iina awwaaddam keenonne, goonannee meentonnee iikka Keesammi Ayyaana dilliisoommo. Ixxuwwim hiraago woccamo. Moollannika summa weeshoo keen hundim gatookko› yaa wocu woshsha. Isra'ee'l minaadaba, ka woshsha macceessehe. Waa'i malaayyaam baxo, maalalsiisoo luwwaa mare'ee ki'nnuwwi lambe'enne ixxi kollinne issaa ki'nnuwwina la'isu mancho, ixxom Naazireexxi Yesuusa ki'nnuwwi gagim laqqakkamo. Ee Yesuusa Waa'i sawwaa gudisu sawwitinnee gaassim ixxena yoo lachchinnee ki'nnuwwina uwwukkaare ixxo jor manni anganne saqalamaa lehoo'isa issitakko'o. Ihukkaarem ixxo leh kaa'eena xanoobee'i bikkina lehika malaayye Waa'i ixxeensi hooraa lehiinsi ki'isukko. Daawiitim Yesuus bikkina ‹An i Waa'a hundi ammanem i illagenne moo'oommuulla. Ixxim iinninne maqire yoo bikkina kaa'amoommoyyo. Ee bikkina an lobakata liiramoommo. Wocummuuyyim liiranchinne wocoommo. Ee hanniinsim lophphaa an sooxxi eroomma neeyyato issummuuyyi hee'oommo. Mashka'oomim at i foore Si'oolanne uttooyyo. Kiina keesamukkokam shamona uttooyyo. At iina heechchanne massoo googo moo'issaatto. Odim at iinninne maqir ihimmi eese lobakata liiransookko› yukko. Iyyabbaayyuwwa, niyyanni Daawiit lehukkisa, waammamukkisaa ixxi waammim kaballi afeebe'e ni beyyonne yoo'isaa an ki'nnuwwina caakkisaa kuroommo. Daawiit hiraagaanchi hee'u bikkina Waa'i ixxi shumo'iinsi mat mancho ixxi adilla'n barcumanne afuusseena ixxena hide'ukkisa la'aa hee'ukko. Ee bikkina Waa'i doo'llaakkoo Kiristoos Si'oolanne gatoobee'isaa ixxi maarim shamoobee'isaa gaassaatim la'aa lehiinsi ki'oo'isa kurukko. Ee Yesuusa Waa'i lehiinsi ki'isaakko. Ee woshshinam neese hundim naqaashshuwwa. Ee bikkina Yesuus Waa'i makkanne lombinne afuurimminnee Waa'i ‹Uwwoommo› yu Keesammi Ayyaana aa'imminnee ka moo'llakkamokaa macceessakkamokaa issoolla. Ee bikkina ka ki'nnuwwi saqaltakko'i Yesuusa Waa'i Moollannaa ixxi doo'llaakkoo Kiristoosattee issukkisa Isra'ee'l minaadab hundim qoossitakka'a laqqehe» yukko. Mannim eekka macceesso'i ammanenne ixxuwwik wodan nakkamukkaare Pheexiroosinaa Yesuus asse'u mulli keeninaa «Niyyabbaayyuwwa, maha issino?» yito'o. Pheexiroosim ixxuwwina dabaraa «Ki'nnuwwik baaxiil haafamoo'isina annannichchim baaxiilo biiraa yitakka'a Yesuus Kiristoos summinne xammaqammehe. Keesammi Ayyaa'n uwwancham aa'llakkamo. Mashka'oomim Waa'i ‹Uwwoommo› yu neeyyat ixxi kollonne weeshu keenina ayyenam ki'nnuwwina, ki'nnuwwi oosinaa Waa'i eroommiinsi qee'llito'i keeninaa hundinatteme» yukko. Odim lobakat mulli woshshinnem qoxxisaa kuraa «Ka boqqi qaranchiinsi ki'nnuwwi gaga gatixxehe» yaa sogukko. Ee bikkina ee balla sas kuma ikkamqax manni ixxi woshsha aa'lla'a xammaqanta'a amma'nnaa'n xigonne exxito'o. Oo exxito'i keenim Yesuus asse'u keen losissam losishshina, mateeyyoomina, mateeyyoo'm ichchinaa Waa'a uunximminaa ixxuwwi gaga higissa'a uwwito'o. Lobakat maalalsiisoo luwwii agannii Yesuus asse'u kee'n kollinne iham hee'u bikkina manni hundim baddukko. Amma'nnito'i keen hundim mateeyyoominne hee'llam hee'llo'o. Ixxuwwina yoo luwwi hundim maqi'llan hee'ukko. Ixxuwwina yoo luwwa hundam biteessu'uuyyi ayyenam hasisoo'isinne baxxansitam hee'llo'o. Odim balli hundam mat ikka'a Keesammi Mine mattam hee'llo'o. Ixxuwwi minneewwannem hurbaata danaam wodaninne liirantu'uuyyi mat ikka'a ittam hee'llo'o. Waa'am galaxxitam hee'llo'o. Odim manni hundim ixxuwwi er manni ikko'isa wocam hee'ukko. Moollannim amma'nnaa gatu keeno ballina ballina ixxuwwanne edam hee'ukko. Mat balla Pheexiroosii Yohaannisii honsi sa'aatanne Waa'a uunxakkam ammanenne Keesammi Mine mattam hee'llo'o. Ee beyyonnem Danaam Gooca yakkam gooc hee'ukko. Qaramukkaanniinsi ki'isaa shiihaakkoo mat mancho Keesammi Mine aagoo manniinsi tasbo'o uunxaqqoo'isina ballina ballina iyyakka'a eebakka'a eekke'e dissakkam hee'akko'o. Oo manchim Pheexiroosii Yohaannisii Keesammi Mine aaggeena waattu'uuyyi moo'aa tasbo'o uwwitamisina uunxukko. Pheexiroosim Yohaannisinne maqirem ixxo xuxxaa moo'aa «Neese moo'e!» yukkaare oo shiihu manchim «Ihu luwwa uwwitamo» yaa ixxuwwa xuxxaa moo'ukko. Ihukkaarem Pheexiroos «Iina worqii birii bee'e. Iina yoo luwwa kiina uwwoommo. Naazireexxi Yesuus Kiristoos summinne ki'llaa taakke'e» yaa makki anga amadaa ki'isukkaare ee ammanchom ee manchik lokkii mogole'ii qoxxukko. Ixxim shoottaa uullaa taakke'ukkuuyyi, xophxophukkuuyyii Waa'a galaxxukkuuyyii ixxuwwinne maqirem Keesammi Mine aagukko. Manni hundim oo shiihaa hee'am hee'u manchi taakke'ukkuuyyii Waa'a galaxxukkuuyyii moo'lla'a tasbo'o uunxaqqeena Waa'i mi'nnaannonne Danaam Gooca yakkam beyyonne afuuraa hee'u manchi ihukkisa laqqa'a ee ixxonne ihu woshshanne lobakata maalalto'o. Oo fayye'u manchi Pheexiroosiinsii Yohaannisiinsii «Annanni ihoommoyyo» yaa hee'ukkuuyyim manni hundim mat ihaa maalalukkuuyyi Daba'llamakkam Salamoon Gooca yakkam beyyo ixxuwwi beyyo geerukko. Pheexiroos eekka moo'u ammanenne minaadabina «Isra'ee'l minaadaba, kannonne mahina maalaltakkamuulla? Ni malaayyinne ka mancho taakkiinsummaannisa te'im Waa'i illagenne er manni inkummi bikkina ka mancho taakke'oo'isa issinummaannisa mahina neese moo'llakkamuulla? Waa'ina awwaadaanchi Yesuusa Philaaxoosina ki'nnuwwi higissakka'a uwwitakko'aare Philaaxoos fatakeena ihu ammanenne ixxi illagennem laggakko'oka Abrihaamina, Yisaaqina, Yaaqoobinaa niyyanno'inaa Waa'i lonsukko. Ihukkaarem ki'nnuwwi Waa'ina annanni ihaakkoo muccura laggakka'a manna shu mancho fatakoo'isina Philaaxoosa xa'mmitakko'o. Heechcha uwwookkoka shitakko'aare Waa'i ixxo lehiinsi ki'isukkisina neese naqaashshuwwa. Ka shiihu mancho ki'nnuwwi moo'llakkamokaa laqqakkamokaa Yesuusanne amma'nnimmi qoxxisaakko. Ka mancho ki'nnuwwi hundi illagennem tollaa'aa fayyiisukkok Yesuusanne amma'nnimma» yukko. Odim Pheexiroos «Kabadem iyyabbaayyuwwa, ki'nnuwwim ki'nnuwwi gassaa'nnisam Yesuusanne issitakko'i luwwa lachchoonginne issitakko'isa an la'oommo. Ihukkaarem Waa'i hiraagaan hundinnem ihaa ixxi doo'llu Yesuus hawwimmi hasisoo'isa gaassaatim kuru woshsha wonshaakko. Ee bikkina ki'nnuwwika baaxiilo Waa'i haafoo'isina baaxiilo biiraa yitakka'a daba'llehe. Baaxiiliinsi daba'llitakkolas Waa'i ki'nnuwwa guullaa maasse'oo balli waarookko. Ki'nnuwwina Yesuus Kiristoosam asse'ookko. Waa'i hiraaggona annanni issu kee'n kollinne ihaa gaassaatim wocukkisam hundem luchchom haareechchi isseebe'i afeebe'e iimanenne Yesuus afuurimmi hasisookko. Muse'em ‹Moollanni Waa'i ki'nnuwwi abbaayyuwwi lambe'iinsi hiraagaancho eese ki'isukkisam ki'nnuwwina ki'isookko. Ixxi wocoo luwwi hundam macceessehe. Oo hiraagaanchi wocoo woshsha macceesoobee'ek ayyim minaadaphphi lambe'iinsi bi'ona› yukko. Odim Saamu'eelii Saamu'eeliinsi lasage ki'llo'i keenii hiraagaan hundim ka doolli bikkina wocco'ookko. Ki'nnuwwi hundim Waa'i Abrihaamina ‹Ki shumo'iinsi qaramoohaanninne uullanne yoo minaadab hundam maasse'oommo› yaa ki'nnuwwi anno'inne aagu hidi'l oosoo hiraagaa'n oosoo. Waa'i ki'nnuwwi hundam mulli keeniinsi gaassaa boqqoomiinsi dabaraa maasse'eena doo'llamaakkoo ixxi Awwaadaancho ki'isaa ki'nnuwwi beyyo asse'aakko» yukko. Pheexiroosii Yohaannisii mannina wocconam qeessuwwi, Keesammi Mi'n egeraano ijaajaanchii Saduuqaawe'uwwii nadadda'a waatta'a Pheexiroosii Yohaannisii manna losisso'i bikkinaa Yesuus lehiinsi ki'ukkisa kurimminne lehiinsi kichchi yoo'isa alallaatto'i bikkinaa quuqqo'o. Ixxuwwim lamom amadda'a ki'lla'a hiimaa hee'u bikkina uulli soodeebe'e karaxxi minenne aagisso'o. Ihukkaarem Pheexiroosii Yohaannisii kutto'i woshsha macceesso'i kee'nnek lobakat keen amma'nnito'o. Amma'nnu manni xale'i goon onti kuma ihukko. Lam ballina Ayihuxxi manni gassaan, lommannii Seera losisaanii hundiinsi lob qeessichchi hee'u Haanna'innee Qayyaafinnee ee hundiinsi lob qeessichchi moolliinsi Yohaannisinne, Alaksaandiroosinnee gatto'i abaroos hundinnee mat ikka'a Yerusaaleemanne wixxito'o. Ixxuwwim Pheexiroosaa Yohaannisaa ixxuwwi lambe'enne uullissa'a «Kaka issitakkamok mah malaayyinnette te'im ayyi uwwu malaayyinnette?» yita'a xa'mmito'o. Ee lasage Pheexiroosanne Keesammi Ayyaan dillukkaare ixxuwwina «Minaadaphphi gassaano, macceessehe; odim lommannim macceessehe. Ka shiihu manchonne ihu er luwwi bikkina ku manchi mahinne fayye'uda'e kaballa neese xa'mmitakko'aa'lleensi ku woshshi ki'nnuwwinaa Isra'ee'l minaadabinaa hundinam la'amaakkoohan ihona. Ku manchi fayye'aa ki'nnuwwi illagenne uullukkok ki'nnuwwi saqaltakka'a shitakko'aare Waa'i lehiinsi ki'isu Naazireexxi Yesuus summinnette. Ixxi fayye'aa ki'nnuwwi illagenne uullukkok ixxennette. Keesammi Kitaabanne ‹Mine baxxam keen «Awwaadooyyo» yita'a uunjito'i kinchi hundiinsim lobakata awwaadoo kinchi ihukko› yamamaa kitaabamukkok ee Yesuus bikkinatte. Ixxi summinne gantoommisina niina Waa'i uwwukkok xale'i Yesuusatte. Hanqinam neese gatisoo'isina ka uullanne manni lambe'iinsi uwwamukkok ixxeensi bagaan matim bee'e» yukko. Pheexiroosii Yohaannisii iggita'a wocco'isa ixxuwwi moo'llo'i ammanenne lobakata lossobee'i kora'i manni ikko'isa laqqa'a maalalto'o. Yesuusinne maqire hee'llo'isam qoossito'o. Ihukkaarem oo fayye'u manchi Pheexiroosinnee Yohaannisinnee maqirem uullaakkoo moo'lla'a ixxuwwanne bido'o fissita'a woccam luchcho hooggo'o. Ee bikkina Pheexiroosii Yohaannisii dummichchi lambe'iinsi laa'itamisina ijaajja'a ki'lla'a issena'i issem «Ka manna maha issino? Mashka'oomim ixxuwwi kollinne issamu maalalsiisoo aganni Yerusaaleemanne hee'oo manni hundinam la'amu bikkina langeena xannoommoyyo. Ihukkaarem ku woshshi kanniinsi lophphaa mannina la'amoobee'isina Yesuus summinne la'mmaagge woccambee'isa qoxxinsaa ijaanjona» yita'a atooratto'o. Ee bikkina Pheexiroosaa Yohaannisaa ixxuwwi beyyo weeshsha'a Yesuus summinne hore'em woccambee'isa te'im losissambee'isa ijaajjo'o. Ihukkaarem Pheexiroosii Yohaannisii dabatta'a «Waa'ika macceesimmiinsi ki'nnuwwika macceesimmi hanqida'e, huno'o, Waa'i illagenne oogattehe. Neese moo'nnummokaa macceensummokaa woncoommo bagaan cawwineena xannoommoyyo» yito'o. Pheexiroosii Yohaannisii tiranto'i ammanenne ixxuwwi beshshuwwi beyyo matta'a qeessa awwonsaanii lommannii ixxuwwina yito'i luwwa kutto'o. Ixxuwwi beshshuwwim eekka macceesso'i ammanenne mat ikka'a sagara iimaa'lla'a «Iimane, uulla, wo'oo ixxuwwanne yoo luwwaa qooccitaattoo hundam xantoo Moollanni Waa'a! Keesammi Ayyaa'n kollinne ikkaa kiina awwaadaanchi niyyanni Daawiit summinne ‹Hanqo'i Waa'a laqqambee'i minaadab mahina quuqqo'o? Minaadabim awwaad bee'i luwwa mahina sawwito'o? Uulli adilluwwii gassaanii mat ikka'a Waa'annee Waa'i doo'llukkaannonnee ki'llo'ookko› yittaanno, hanqinam ka beero'onne adil Heeroodisii gassaanchi Pheenxeenaawekkichchi Philaaxoosii hanqo'i Waa'a laqqambee'i minaadabinnee Isra'ee'l minaadabinnee maqirem mat ikka'a at doo'llittaannonne oohim kiina annanni ihu awwaadaanchi Yesuusanne ki'llo'ookko. Ki'llo'okim at gaassitaahim ki malaayyinnee ki sawwitinnee gudissitti sawwite issiteenatte. Kabadem Waa'a! Ixxuwwi sha'llanto'isa moo'llaa ki awwaadaan badditoo'n iggita'a ki sagara woccamisa isse. Odim kiina annanni ihu ki awwaadaanchi Yesuus summinne fayyiisseenaa maalalsiisoo aganna issiteenaa ki anga biddiqaa'e» yita'a uunxito'o. Eehid yita'a Waa'a uunxita'a lasage ixxuwwi mat ikka'a wixxita'a hee'llo'i min heekke'ukko. Hundannem Keesammi Ayyaan dillukkaare badditoo'n iggimminne Waa'i sagara kurimma asheetto'o. Amma'nnu keenina hundinam ee ammane mat tiirii mat wodanii hee'ukko. Ixxuwwina yoo luwwi hundim maqi'llan hee'ukko bagaan «Iihane» yakkam luwwi ma'lluchchim hee'ukkoyyo. Yesuus asse'u keenim Moollanni lehiinsi ki'ukkisa lophphaakkoo malaayyinne naqqassam hee'llo'o. Waa'ik lobakat eroommim ixxuwwanne hee'ukko. Mat Hanaaniya yakkam manchim Saphphiira yamantam ixxi arenne maqirem uulla biteesukko. Ixxi arenne a'llamaa ee biteesu diinaxxeka matqaxa gatisaa matqaxooma eebaa Yesuus asse'u keenina uwwukko. Ihukkaarem Pheexiroos «Hanaaniya, uulla biteessitti diinaxxeka matqaxa gatissaa Keesammi Ayyaananne qophphantoo'isina ki wodanonne Sheexaancho mahina aagissitto? Biteesameena illageen ki gaqqan hee'ukkoyyonnihe? Biteesamaa lasagdu diinatoom kiihan hee'ukkoyyonnihe? Kido'i woshsha ki wodanonne mahina sawwititto? At qophphantittok Waa'annette bagaan mannanneyyo» yukko. Sas sa'aatiinsi lasage ee ihu woshsha laqqobee'i Hanaaniy are waatto'o. Pheexiroos isenam «Taa huno'o kure; uulla biteessakko'ok kaqax diinatinattennihe?» yukko. Isem dabatta'a «Eeyya, kaqaxinatte» yito'o. Ihukkaarem Pheexiroos isena «Waa'i Ayyaana keentakkeena hinkid iittantakko'o? Oono'o! Ki aro'o waammito'i keen u'llummannette. Ki leesham iyyita'a massitamo» yukko. Ee ammanchom Saphphiira Pheexiroos lokki gadanonne ubba'a leto'aare is aro'o waammito'i woraadduwwi aagga'a leto'isa moo'lla'a iyyita'a massita'a is aro'i gadanonnem waammito'o. Amma'nnaanii eekka macceesso'i keenii hundim lobakata baddito'o. Ee ammane Yesuus asse'u keen minaadaphphi lambe'enne lobakat agannaa maalalsiisoo luwwaa issito'o. Ixxuwwi hundim mat ikka'a Daba'llamakkam Salamoon Gooca yakkam beyyonne hee'llo'o. Minaadab ixxuwwa lobakata lonsam hee'ukko bagaan ixxuwwinne mat iheena iggam hee'ukkoyyo. Ihona bagaan Moollannanne amma'nnu meentikii goo'nnekii xig eraa'llaanniinsi lophphaa exxukkuuyyi marukko. Ee iham hee'u luwwi bikkina Pheexiroos higukkuuyyi ixxek hawwaankaannim ubaa fayyiisoo'isina jabbaano iyyakka'a eebakka'a googonne ara'uwwannee jibbuwwannee iinsiisakkam hee'akko'o. Odim Yerusaalee'm kululleetanne yoo beero'uwwiinsi jabbaanoo habus amadaa hawwoo keenoo manni amadaa waaraa wixxam hee'ukko. Oo keen hundim fayye'am hee'ukko. Hundiinsi lob qeessichchii ixxenne maqire mat ikka'a hee'llo'i Saduuqaawe'uwwii Yesuus asse'u keenonne to'achchita'a ki'llo'o. Ee bikkina Yesuus asse'u keeno amadda'a karaxxi mine aagisso'o. Ihukkaarem Waa'i asse'amaanchi hiimonne karaxxi mi'nneka gooca fooqaa'aa ixxuwwa fissukko. Fissaa «Mallehe, Keesammi Minenne uullitakka'a minaadabina heechchi sagara kullehe» yukko. Ixxuwwim eekka macceessa'a daram Keesammi Mine aagga'a losisso'o. Ee ammanenne hundiinsi lob qeessichchii ixxenne maqire hee'llo'i keenii waatta'a Isra'ee'l lommannika dummichchi daannuwwa weeshsha'a Yesuus asse'u keeno karaxxi miniinsi wottamisina manna asse'llo'o. Ihukkaarem waatteena matto'i gaadaan karaxxi mine affa'a ixxuwwa hooggo'o. Daba'llita'a waatta'a «Karaxxi mi'n gooc qoxxaallisa xufamaakkookkokaa egeraanim goocanne uullito'ookkokaa moo'nnummo. Ihukkaarem u'llumma fooqaa'nnummi ammanenne mi'n woronne matim hee'ukkoyyo» yita'a kutto'o. Keesammi Mine egeroo keeno ijaajaanchii qeessa awwonsaanii ee woshsha macceesso'i ammanenne «Kuk maruwwa?» yita'a Yesuus asse'u kee'n bikkina maalalta'a mal bi'ukko. Mal bi'aa hee'llonam mat manchi waaraa «Karaxxi minenne kattakko'i manni Keesammi Minenne uullita'a minaadaba losissamuulla» yaa kurukko. Kuru ammanenne Keesammi Mi'n egeraano ijaajaanchi ixxi gaadaaninnem maraa worukko. Ihukkaarem manni ixxuwwa kininne aphphisoohaannina baddito'i bikkina Yesuus asse'u keeno wotto'ok malaayyinneyyo. Wotta'a dummichchi daannuwwi illagenne uullisso'aare hundiinsi lob qeessichchi «Yesuus summinne woccakkambee'isa qoxxinsaa kullaa hee'nnummoyyonnihe? Ihukkaarem ki'nnuwwi Yerusaaleemanne yoo manni hundam losisakko'ookko. Ixxi xiiga neesenne eebbakkeenatteyyonnihe?» yaa xa'mmukko. Ihukkaarem Pheexiroosii ixxenne maqire asse'anto'i keenii «Neese mannina ijaajanchiinsi Waa'ina ijaajanchi hasisookko. Ki'nnuwwi Yesuusa haqqanne saqaltakka'a shitakko'aare niyyanno'i Waa'i lehiinsi ki'isaakko. Odim Isra'eela baaxiiliinsi dabaroo'isinaa ixxuwwi baaxiilo haafoo'isinaa Awwonsaanchoo Gatisaanchoo issaa lonsaa ixxi makki kollonne afuussaakko. Ka woshshinam neesee Waa'i ixxena ijaajantam keenina uwwu Keesammi Ayyaanii naqaashshuwwa» yito'o. Dummichchi daannuwwi eekka macceesso'i ammanenne nadadda'a Yesuus asse'u keeno shiteena hasso'o. Ihukkaarem ee dummichchi woronne manni hundim lonsoo Gamaaliyaala yakkam manchi seera losisoo Farisaawekkichchi hee'ukko. Ixxim uullaa hofqax ammanina asse'amaano biira fissakkamisina ijaajukko. Fitto'aare ee daannuwwina «Isra'ee'l minaadaba, ka mannanne issitakkam luwwiinsi ege'llehe. Kanniinsi illageenim Tewodaasa yakkam manchi ‹An lobane› yaa ki'ukkaare soor xibbe ikkamqax manni awwonto'o. Ihukkaarem ixxo shakko'aare ixxo awwonto'i keenim binnita'a bi'llo'o. Ee lasage odim manni summa kitaabakko'i doollenne Galii'l uullik Yihuda yakkam manchi ki'aa lobakat manni ixxo awwonoo'isa issaa hee'ukko. Ixxom shakko'aare ixxo awwonu keen hundim binnukko. Ka woshshi bikkinam an ki'nnuwwina kuroommok ka manna nakkitakkambee'isa uttakka'a ullehe. Mashka'oomim ku sawwit te'im bax manniinsette ihaakkoolas bi'ookko. Ihukkaarem ku woshshi Waa'iinsette ihaakkoolas bi'issakkeena xantakkamoyyo. ‹Bi'insoommo› yitakku'uuyyi ayyi la'ukko Waa'inne wocantakka'a siidantakkambee'isa» yukko. Ee bikkina oo dummito'i keen Gamaaliyaal sogu sogitano aa'lla'a Yesuus asse'u keeno mine weeshsha'a ganta'a ki'lla'a Yesuus summinne od woccambee'isa qoxxissa'a kutta'a elle'llona fatakito'o. Yesuus asse'u keenim Yesuus bikkina sholle'immi ixxuwwina laboohan ihaa moo'amu bikkina dummichchi daannuwwi beyyiinsi liirantu'uuyyi matto'o. Odim balli hundam Keesammi Minennee ixxuwwi minennee Yesuus Gatisaanchi Kiristoosatte ihukkisa losisimmaa alallaatimmaa utto'oyyo. Hofqax ammaniinsi lasage amma'nnaa'nnek xig exxukkuuyyi maru ammanenne Giriik suuminne woccam Yihuxxek busar meenti ballina ballina baxxansakka'a uwwakkam hara'mmatonne hawwodanto'i bikkina ixxuwwi gaqqi suuminne woccam Ayihuxxi mannanne quunquunto'o. Ee bikkina amma'nnaano hundam tommii lamem asse'amaanim weeshsha'a «Neese hurbaata baxxansimminaa yinaa Waa'i sagara alallaatimma urimmi hanqayyo. Niyyabbaayyuwwa, ki'nnuwwi lambe'iinsi danaam sad yoo kee'nneka Keesammi Ayyaanii qooroomii wo'mmaakkoo keeno lamar mancho doo'llehe. Ihukkaarem neese Waa'a uunxatonnee Waa'i sagara kurimmi awwaadonnee guruphphammoommo» yito'o. Ixxuwwi yito'i woshshanne manni hundim liiramukko. Ee bikkina amma'nnatii Keesammi Ayyaanii wo'mmaakkoo Isxifaanoosa, Filiphphoosa, Firikiraasa, Nikaanora, Ximoona, Farminaasaa Anxooke'e yakkam uullika Ayihuxxi manni amma'nnatonne daba'llaakkoo Niqoolaasaa doo'llito'o. Ee keeno asse'amaa'n illagenne amma'nnaan uullisso'aare asse'amaanim ixxuwwi hanenne anga issita'a Waa'a uunxito'o. Waa'i sagarim haraarukkuuyyi marukko. Amma'nnaa'n xigim Yerusaaleemanne lobakata li'ukkuuyyi marukko. Lobakat qeessuwwim mishiraachchi sagara aa'lla'a amma'nnito'o. Waa'ik uwwanchii malaayyii Isxifaanoosanne wo'mmukko. Ixxim manni lambe'enne lobakata maalalsiisoo luwwaa agannaa issam hee'ukko. Ihukkaarem «Wolabbanonne fitto'oo kee'n wixxixxi mine» yakkam wixxixxi mi'n mannik Qaareena yakkam uulliinsi, Alaksaandira yakkam beero'iinsi, Kilqe'ee Issiya yakkam uulliinsii waatto'i mannik mat mat keen Isxifaanoosinne fitantam hee'llo'o. Ihukkaarem Isxifaanoos wocoo'isina Keesammi Ayyaan uwwu qooroominne uullixxanteena xanto'oyyo. Ee bikkina oo keen «Waa'aa Muse'ee Isxifaanoos game'llukkuuyyi macceensaammo» yitam manna worinne ki'isso'o. Ee'isinne minaadaba, lommannaa seera losisaanoo Isxifaanoosanne ki'isso'o. Ixxuwwim Isxifaanoos beyyo matta'a ixxo amadda'a dummichchi daannuwwi illagenne hincaa'llo'o. Dummichchanne afuutto'i manni hundim ixxo wixxita'a moo'llu'uuyyi ixxek illi kolli Waa'i asse'amaanchi illi kollisa ihaakkookkoka moo'llo'o. Hundiinsi lob qeessichchim Isxifaanoosina «Ku woshshi hanqannihe?» yukko. Isxifaanoosim dabaraa «Iyyanno'oo iyyabbaayyuwwaa, an kuroommi woshsha macceessehe. Niyyanni Abrihaam Haaraananne hee'eena maroo'n illageen Maspheexoome'enne hee'ukkuuyyim lombaam Waa'i ixxena moo'amukko. Moo'amaa ‹Ki uulliinsii ki qarmanniinsii annanni ikkaa an kiina moo'isoommi uulla mare› yukko. Ee bikkina Abrihaam Kalaade'i uulliinsi annanni ihaa maraa Haaraananne hee'ukko. Ixxi anni lehaa lasage Waa'i Abrihaama ee beyyiinsi fissaa kaba ki'nnuwwi hee'llakkam ka uulla worukko. Waa'i Abrihaamina mat taachcho'o ihooqax uullam ixxi gulummi issaa uwwoo'nnim ‹Kiinaa kiinniinsi lasage ki shumo'inaa ki'nnuwwi gulummi issaa ka uulla uwwoommo› yukko. Waa'i eekka wocu ammane Abrihaamina oos ma'lluchchim hee'ukkoyyo. Odim Waa'i Abrihaamina ‹Ki oos mulli manni uullanne waaraan ikka'a hee'llamo; ee uulli mannim ixxuwwa soor xibbi hiinchi afeebe'e hawwissu'uuyyi agiddano gassitamo. Odim ixxuwwa agiddano gassu mannanne oogatoommo. Ee lasage ee uulliinsi fitta'a waatta'a ka uullanne iina otossitamo› yaa kurukko. Waa'im Abrihaamina hidi'l mare'i ihoo'isina ballachchancha uwwu bikkina Abrihaam Yisaaqa qaramu sadeenti ayyaamonne ballachchukko. Yisaaqim ixxi beeto Yaaqooba ballachchukko. Yaaqoobim ixxi tommoo lamem oosom ballachchukko. Oo tommii lamem oosim tomminaa lamem Isra'ee'l moollinaa anno'o. «Oo niyyanno'im ixxuwwi abbaayyi Yooseefanne to'achchita'a Gibxi uulli mannina biteesso'aarem Waa'i ixxenne maqire hee'ukko. Waa'i ixxo hawwi hundichchiinsim gatisaa Faari'oon illagenne nuuraa qooroomaa uwwaa Faari'oon ixxo iittoo'isa issukko. Oo adilim Yooseefa Gibxi uullannee ixxi mi'n abaroos hundannee gassaanchi issukko. Ee doollenne Gibxi uullannee Kaana'aa'n uullannee hundannem qaanne'i aagaa hee'u bikkina lobakat hawwi ihaa niyyanno'im hurbaata siixxiteena xanto'oyyo. Ihukkaarem Yaaqoob Gibxi uullanne hurbaat yoo'isa macceesu ammanenne niyyanno'o luxxaagge ee uulla asse'ukko. Odim la'm korem Gibxi uulla matto'aare Yooseef ixxi gaga ixxi abbaayyuwwina la'isukko. Faari'oonim Yooseef sullo la'ukko. Yooseefim manna asse'aa ixxi anni Yaaqoobaa ixxi qarmannaa hundam lamarayyee onti manchoo ixxi beyyo weeshisukkaare Yaaqoob Gibxi uulla marukko. Ee uullannem ixxii niyyanno'ii leto'o. Ixxuwwi leesham dabarakka'a eebakka'a Abrihaam Hamoor moolliinsi diinatinne bitaa'u uullanne Seekeemanne waammakko'o. «Waa'i Abrihaamina ‹Uwwoommo› yu luwwa uwwoo amman hincukkuuyyi waarukkaare Isra'ee'l minaadab Gibxi uullanne lophphaa fikkaannukkuuyyi marukko. Fikkaannukkuuyyi marukkokim Yooseefa la'oobee'i mulli adil Gibxi uullanne ki'eebe'e hee'ukko. Oo ki'u haareechchi adil ni shumo'ina hantaaro baxaa ciilluwwa lehona biiranne uunjakkamisa issukko. Ee doollennem Muse'e qaramukko. Waa'i illagenne ixxi mishisoo danaam hee'u bikkina qaramu saxxi agan afeebe'e ixxi anni minenne li'ukko. Ixxo uunjakko'aare Faari'oon landichcho massita'a is qachchisa issita'a li'isso'o. Muse'em Gibxi uulli qooroom hundam losaa wocoo woshshannee baxoo baxonnee malaayyaam hee'ukko. «Muse'e qaramukkaanniinsi sor hiincho ihu ammanenne ixxi abbaayyuwwi ikko'i Isra'ee'l ooso moo'eena sawwukko. Ee Isra'ee'l oosika mato Gibxi uulli manchi hawwodukkuuyyi Muse'e moo'aa Isra'ee'l manchina agaagaa ee Gibxi uulli mancho aphphisaa shaa baado miqisukko. Waa'i ixxi kollinne ihaa ixxuwwa wolabbanonne fissoo'isa ixxi abbaayyuwwi laqqo'oka labisukkaarem ixxuwwi eekka qoossita'a laqqo'oyyi hee'ukko. Odim la'm balla Isra'ee'llek lam manchi wocantu'uuyyi moo'aa iittanseena hasaa ‹Manna, ki'nnuwwi lamim abbaayyuwwa; mahina wocantakkamuulla?› yukko. Ixxi beshichcho hawwodam hee'u manchi dabaraa ‹Keese ni hanenne gassaanchoo oogataanchoo issukkok ayyette? Beeballa Gibxi uulli mancho shittisam eesem shiteena hassaatennihe?› yaa Muse'e gafe'ukko. Muse'e oo manchi wocu woshsha macceesu ammanenne Gibxi uulliinsi gibaa Miidiyaa'm uulla marukko. Eekke'em lam ooso qarukko. «Muse'e Miidiyaa'm uulla marukkaanniinsi sor hiincho ihaa lasage Waa'i asse'amaanchi Muse'ena Siina'i duu'n udma'i shif lambe'enne gii'l laba'nnisa ihaa moo'amukko. Waa'im Muse'ena ‹At uullitti beyyi keesamaakkoohan ihu bikkina ki lokkiinsi caamma'a fisse. Gibxi uullanne yo'i i minaadabanne afu hawwo hanqinam moo'aammo. Ixxuwwi laachcham macceesaa an ixxuwwa ee hawwiinsi fisseena waaraammo. Kaba waare; an keese Gibxi uulla asse'oommo› yukko. «Isra'ee'l minaadab ‹Keese ni hanenne gassaanchoo oogataanchoo issukkok ayyette?› yita'a sabbo'i Muse'e, Waa'i gassaanchoo wolabbanonne fissaanchoo issaa udma'anne shif woronne moo'amu ixxi asse'amaanchi kollinne asse'ukko. Muse'em Gibxi uullanne, Ertiira'i Dambalaqannee uulli udma'annee maalalsiisoo luwwaa agannaa issukkuuyyi sor hiincho awwonsukko. Isra'ee'l minaadabina ‹Ki'nnuwwi abbaayyuwwiinsi Hiraagaanchi eese Waa'i ki'isukkisam ki'nnuwwina ki'isookko› yukkok ka Muse'etteme. Siina'i duunanne ixxena wocu Waa'i asse'amaanchinne, niyyanno'innee udma'anne wixxu minaadabinnee hee'ukkok ka Muse'etteme. Ixxim niina afiseena heechchi sagara Waa'iinsi aa'ukko. Niyyanno'i ixxo gafe'llo'o bagaan ixxena ijaajanto'oyyo. Ixxuwwim ixxuwwi wodanonne Gibxi uulla daba'lliteena mixxa'a Aaroonina ‹Ku neese Gibxi uulliinsi fissu Muse'e maha ihuda'e lanqummoyyo. Ni illagenne maroo waa'uwwa baxe› yito'o. Ee ammanem wee'ichchi misila baxxa'a ee misilina kitima hincaa'lla'a ixxuwwi angi baxukkaannonne liiranto'o. Ihukkaarem Waa'i ixxuwwiinsi annanni ihaa iima'n boollaanki gogotina otossitamisina higisaa uwwukko. Oohim hiraagaan kitaabbo'i kitaabbuwwanne ‹Isra'ee'l minaadaba, sor hiinchi afeebe'e udma'anne hee'llakko'i ammane duramoo diinatee kitimaa iina hincaa'llakko'oyyo. Moolooka yakkam qophpha'n waa'ika dukkaana iyyitakko'o. Otossitakkeena baxxakko'i boollaanki misilam Erefaana yakkam qophpha'n waa'ika iyyitakko'o. Ee bikkina an ki'nnuwwa Baabiloo'n uulla qeessoommo› yamamaa kitaabamukkane. «Niyyanno'i udma'anne hee'llu'uuyyi Waa'inne edantam dukkaan hee'ukko. Oo dukkaanim baxamukkok Waa'i Muse'ena kurukkisinnettee moo'isu duuha'innettee. Niyyanno'im ixxuwwi anno'iinsi ee dukkaana aa'lla'a Waa'i hollu minaadaphphi uulla aaggu'uuyyi Iyyaasinne maqirem ee dukkaana iyyita'a matto'o. Oo dukkaan Daawiit doolli afeebe'e ee beyyonnem hee'ukko. Daawiitim Waa'i illagenne nuura siixxaa Yaaqoobik Waa'i hee'oo mine baxeena Waa'a uunxukko. Ihukkaarem Waa'ina mine baxukkok Salamoonatte. Salamoon mine baxona bagaan manni angi baxu minenne hundam xanoo Waa'i garooyyo. Oohim hiraagaanchi ‹Waa'i «Iiman Iina adilla'n barcuma. Uullim an hance'oommane. Ki'nnuwwi iina baxxakkam min hinkido'ane? Te'im an hee'oommi beyyi hinkido'ane? Oo luwwi hundim i angi baxukkaneyyonnihe?» yoolla› yukkane. «Ki'nnuwwi xiiqqantakkam keeno, ki'nnuwwi wodanim ifiisamaakkoo keeno, ki'nnuwwi maccim macceesoobee'i keenoo odim ki'nnuwwi anno'isam amman hundam Keesammi Ayyaan kuroo luwwa sabbakkam keenoo! Hiraagaaniinsi ki'nnuwwi anno'i hawwissa'a yaayyitoo'n utto'ok ayyi yookko? Muccur awwaadaanchi waaroo'isa gaassita'a kutto'i keeno ki'nnuwwi anno'i shito'isam ki'nnuwwim ee muccur awwaadaancho higissakka'a uwwitakka'a shitakko'o. Ki'nnuwwi odim Waa'i asse'amaaninne uwwamu Waa'i ijaajo aa'llakka'a egettakko'oyyo» yukko. Oo manni eekka macceesso'i ammanenne Isxifaanoosinne nadadda'a inqe iicco'o. Ihukkaarem Isxifaanoosanne Keesammi Ayyaan dillukkaare xuxxaa iimane moo'ukko. Iimanennem Waa'ika lombaa Yesuus Waa'i makkanne uullaakkookkokaa moo'ukko. Ixxim «Moo'llehe! Iiman fooqaa Manchi Beetim Waa'aannonne makkanne uullaakkookkoka moo'oommuulla» yukko. Ihukkaarem ixxuwwi sagara iimaa'lla'a shuutta'a wocoo woshsha macceessambee'isa macce ifiixxita'a mat ikka'a Isxifaanoos hanenne geetto'o. Ee ammanem beero'iinsi tochchonne fissita'a kininne aphphisso'o. Woddaa'i naqaashshuwwim ixxuwwika eddechcha Saawula yakkam woraadichchi egeroo'isina ixxi lokki beyyonne dissito'o. Ixxo aphphissonam Isxifaanoos «Moollanni Yesuusa, i foore at aa'e!» yukko. Odim guruphphaa sagara iimaa'aa «Moollanna! Ixxuwwika baaxiilo haafihe» yaa Waa'a uunxukko. Eehid yaa Waa'a uunxaa lasage lehukko. Saawulim Isxifaanoos lehoo'isina iittamaa hee'ukko. Ee balla Yerusaaleemanne hee'llo'i amma'nnaanonne kee'mmaalli hawwii yaayyanchii afukko. Yesuus asse'u keeniinsi bagaan mulli keen hundim Yihudannee Samaare'ennee binnito'o. Isxifaanoosam Waa'ina gatto'oo manni waammito'o. Lobakatam wi'llito'o. Ihukkaarem Saawul min hundam aagukkuuyyi goonaa meentoo gosaasaa karaxxi minenne aagisimminne amma'nnaano bi'isam hee'ukko. Oo binnito'i amma'nnaanim matto'i beyyi hundannem Waa'i sagara kutto'o. Filiphphoosim Samaare'enne yoo beero'o maraa Kiristoos bikkina ee beero'i mannina alallaatukko. Ee bikkina ee beero'onne lobakat liiranchi ihukko. Ihukkaarem ee beero'onne lobakat ammaniinsi ki'isaa kiiroo mat Simi'oona yakkam kiiraanchi hee'ukko. Ixxim kiirimminne Samaare'enne yoo minaadaba maalalsiisam hee'ukko. Odim ixxi gagam «An lobane» yam hee'ukko. Hoffaanniinsi ki'isaa lobaannonne afeebe'e manni hundim «Ku manchi Lob Malaayye yamamaa weeshamoo Waa'i malaayye» yaa ixxi woshsha danaamisa qoossaa macceesam hee'ukko. Lobakat ammaniinsi ki'isaa Simi'oon kiirimminne minaadaba maalalsiisam hee'u bikkina ixxi wocoo woshsha danaamisa qoossaa macceesam hee'ukko. Ihukkaarem Filiphphoos Waa'i adilla'n bikkinaa Yesuus Kiristoos bikkinaa mishiraachchi sagara kurukkaare macceesaa amma'nnimminne goonii meentii xammaqamukko. Simi'oon ixxi gagim amma'nnaa xammaqamaa lasage Filiphphoos exxukko. Ixxim dut mare'ii lobakat agannii ihookkoka moo'aa maalalukko. Yerusaaleemanne hee'llo'i Yesuus asse'u keen Samaare'i uulli manni Waa'i sagara aa'llo'isa macceesso'i ammanenne Pheexiroosaa Yohaannisaa ee manni beyyo asse'llo'o. Lamim ee manni hanenne anga issita'a Waa'a uunxito'i ammanenne oo manni Keesammi Ayyaana aa'llo'o. Ihukkaarem Pheexiroos ixxena dabaraa «Waa'i uwwoo uwwancha at diinatinne aa'lleena sawwitti bikkina ki diinat kiinninne maqirem bi'ona. Kiikki wodan Waa'i illagenne xabbeen ihubee'i bikkina ka woshshanne kiina qood te'im saam bee'e. Simi'oonim dabaraa «Ki'nnuwwi yitakko'i luwwik ma'lluchchim eesenne afoobee'isa Waa'a uunxehe» yukko. Pheexiroosii Yohaannisii Waa'i sagara alallaatta'atii kutta'atii lasage Samaare'i uulli lobakat gattenne mishiraachchi sagara kuttu'uuyyi Yerusaaleema daba'llito'o. Moollanni asse'amaanchim Filiphphoosina «Ka beyyiinsi ki'llaa Yerusaaleemiinsi Gaaza yakkam beyyi afeebe'e massoo googinne woroo'n qaranne yoo uulli kolli mare» yukko. Oo googim udma'i uulli goog hee'ukko. Filiphphoosim ki'aa marukko. Maraa Hindaake yakkam Tophphe'i adilaka amaxxa hundam egeraanchi ihu Tophphe'i uulli mat muleessa'i manchinne edamukko. Ixxim Yerusaaleema Waa'ina otosseena waaraa faraxxi gaare'enne saa'llaa daba'llaa elle'ukkuuyyi hiraagaanchi Issaayyaas kitaabu kitaaba qananaa'am hee'ukko. Keesammi Ayyaanim Filiphphoosina «Mattaa ee gaare'enne hincihe» yukko. Ee bikkina Filiphphoos ee manchi beyyo geeraa maraa hiraagaanchi Issaayyaas kitaabu kitaaba qananaa'ookkoka macceesaa «Qananaa'lloo woshsha qoossitaatennihe?» yaa xa'mmukko. Ixxim Filiphphoosina dabaraa «Kurookkok bee'eka hinkid qoossaa la'eena xanoommo?» yaa gaare'enne firaa ixxenne maqirem afuuroo'isina Filiphphoosa xa'mmukko. Kitaabiinsi oo muleessa'i qananaa'am hee'u beyyim «Durakkeena massakkam gereechchisa te'im odda muroo manchi illagenne duudaa cawwaa uroo gereechchisa ixxi suume fooqaa'ukkoyyo. Ixxi gagam hoffiisukko. Hanqo'i oogato'om siixxukkoyyo. Ixxim ka uullanne hee'oobee'isa shakka'a hoorakko'i bikkina ixxeka shumo'o ayyi kureena xanookko?» yoohan hee'ukko. Oo muleessa'im Filiphphoosina «Hay kure! Ku hiraagaanchi kid yookkok ixxi gaginattennii mulli manchinatte?» yukko. Filiphphoosim ee kitaabiinsi ki'isaa Yesuusika mishiraachchi sagara ixxena kurimma asheerukko. Eehid yaa faraxxi gaare'e uullisiisukko. Ee lasage muleessa'ii Filiphphoosii lamim wo'i woro dillita'a Filiphphoos muleessa'a xammaqukko. Xammaqaa lasage lamim wo'i woriinsi fitto'aare Keesammi Ayyaan Filiphphoosa agaa massaa lasage oo muleessa'i la'mmaagge Filiphphoosa moo'ukkoyyo. Muleessa'im liiramukkuuyyi marukko. Ihukkaarem Azaaxoosa yakkam beyyonne Filiphphoos siidamukko. Ixxim Qiisaariya yakkam beero'o marukkuuyyi beero'uwwi hundinam mishiraachchi sagara alallaatukko. Ee ammane odim Saawul amma'nnaano sheena sha'llamukkuuyyi hundiinsi lob qeessichchi beyyo marukko. Maraa Moollannanne amma'nnito'i keeno goonaa meentoo siidukkoka ayyem amadaa Yerusaaleema eeboo'isina Damaasqo'o yakkam beero'onne yoo Ayihuxxi manni wixxixxi minneewwina assi kitaaba kitaabaa uwwoo'isina hundiinsi lob qeessichcho xa'mmukko. Assi kitaaba amadaa marukkuuyyi Damaasqo'o afeena ihaakkoohaannonne dangonnem iimaniinsi caakki ixxi kululleetanne belelukko. Belelu ammanenne Saawul uullanne ubukko. Ee ammanenne «Saawula! Saawula! Eese mahina hawwissoolla?» yoo sagara macceesukko. Saawulim dabaraa «Moollanna! At ayyette?» yukkaare «An at hawwissoo Yesuusatte. At ki'llaa beero'o mare. Issitoo luwwa kiina eekke'enne kurakkamo» yukko. Saawulinne maqire mattam hee'llo'i keen cawwita'a uullita'a sagara macceessam hee'llo'o bagaan ixxuwwi illinne mat manchom siiddo'oyyo. Saawulim ubu beyyiinsi ki'aa ixxi ille boloqaa'u ammanenne maham moo'eena xanukkoyyo. Ee bikkina ixxenne maqire hee'llo'i keen masakkita'a Damaasqo'i beero'o massito'o. Ixxek illi sas balli afeebe'e moo'eena xanukkoyyo. Saawulim ee sasem ballannem itukkoyyoo agukkoyyoo. Ee ammane Damaasqo'onne Hanaaniya yakkam amma'nnaanchi manchi hee'ukko. Moollanni ixxena kaaltanne «Hanaaniya» yukkaare ixxim «Moollanna! An keyyenne yoommo» yukko. Moollannim ixxena «Ki'llaa Xabbeena yakkam bobba'a mattaa Yihuda yakkam manchi minenne Saawula yakkam manchi Xarsees beero'ik Waa'a uunxoolla; mattaa xa'mme. Odim ixxek illi fayye'aa moo'oo'isina Hanaaniya yakkam manchi aagaa ixxi anga hanenne issukkuuyyi kaaltinne moo'aakko» yukko. Hanaaniyim Moollannina «Moollanna! Ku manchi Yerusaalee'm beero'onne hee'llam at doo'llitti ki minaadabanne hinkaa'n jor luwwa issuda'e lobakat manniinsi ka manchi bikkina macceesaammo. Odim ki summa weeshsham keeno hundam ka beyyiinsi amadaa karoo'isina qeessa awwonsaaniinsi malaayye siixxaakko» yaa dabarukko. Ihukkaarem Moollanni Hanaaniyina «Isra'ee'l minaadabina, mulli minaadabinaa, adilluwwinaa eese la'isoo'isina an ixxo doo'llaammoo mu'ut ihu bikkina mare. I summi bikkina ixxi hinkaa'nna hawwooda'e an ixxena moo'isoommo» yukko. Ee bikkina Hanaaniy annanni ihaa maraa Saawul yoo mine aagaa Saawul hanenne anga issaa «Iyyabbaayyi Saawula, at waattitti googonne kiina moo'amu Moollanni Yesuus keesenne Keesammi Ayyaan dilloo'isinaa ki illi fayye'aa moo'oo'isinaa eese ki beyyo asse'aakko» yukko. Ee ammanem Saawul illiinsi hobara laboo luwwi ubukkaare ixxi illi fayye'aa moo'ukko. Ee lasage xammaqamaa hurbaata itaa qoxxukko. Amma'nnaaninne maqirem Saawul Damaasqo'onne mat qax balla afuurukko. Ee ammanem Ayihuxxi manni wixxixxi minneewwanne «Yesuus Waa'i Beeto» yukkuuyyi alallaatukko. Eekka macceesso'i keen hundim maalalta'a «Ku manchi ka Yesuusa yakkam summa weeshsham keeno Yerusaaleemanne lobakata hawwisam hee'ukkoyyonnihe? Keyye waarukkokim ee summa weeshsham keeno amadaa karaa qeessa awwonsaa'n beyyo masseenatteyyonnihe?» yito'o. Ihukkaarem Saawul amma'nnatonne lobakata qoxxukkuuyyi marukko. Odim Yesuus Gatisaanchi Kiristoosatte ihukkisa kurukkuuyyi Damaasqo'onne hee'llam Ayihuxxi manni maalaltamisa issukko. Lobakat ammaniinsi lasage Ayihuxxi manni Saawula shitam googo a'llanto'o. Ee a'llanto'i woshsham Saawul la'ukko. Ixxuwwim kininne ootakko'oo beero'i goocanne ballaa hiimoo ixxo shiteena egettam hee'llo'o. Ihukkaarem amma'nnaan ixxo hiimonne massita'a sanannanne issita'a beero'o kululaa'akka'a kininne ootakko'i ooxxi haninne aad dilliisso'o. Saawul Yerusaaleema maraa amma'nnaaninne edameena hasukko. Ihukkaarem ixxuwwi Saawul amma'nnaanchi ihukkisa amma'nnitobee'i bikkina hundim baddito'o. Ee lasage Baarnabaasa yakkam manchi Saawula Yesuus asse'u kee'n beyyo amadaa maraa Saawul googonne Moollanna moo'ukkisa, Moollannim ixxenne wocukkisaa Saawulim Damaasqo'onne baddoo'n Yesuus summa haraassaa alallaatukkisaa kurukko. Shiteena hasso'isa amma'nnaan laqqo'i ammanenne Qiisaariya yakkam beero'o wotta'a Xarses beero'o maroo'isa issito'o. Yihuxxi uullanne, Galiilannee Samaare'ennee hee'llam amma'nnaan hundim xumma siixxito'o. Amma'nnaanim Keesammi Ayyaa'n hara'mmatinne Waa'a badditu'uuyyi, qoxxitu'uuyyii xigonnem fikkaannitu'uuyyii matto'o. Ee ammane Pheexiroos beyyi hundam marukkuuyyi Liida yakkam beero'onne hee'llam Waa'i doo'llaakkoo minaadaba moo'eena marukko. Ee beyyonnem sadeenti hiincho dees manchi ihaa shiihaakkoo Eeniyaasa yakkam manchinne edamukko. Pheexiroosim ixxena «Eeniyaasa, Yesuus Kiristoos keese fayyiisaakko; ki'llaa dakka ki'ixxe» yukkaare Eeniyaas ee ammanchom ki'ukko. Liidannee Saaroonannee hee'llam manni hundim ee fayye'u mancho moo'llo'i ammanenne Moollannanne amma'nnito'o. Xaabbiita yakkam mat amma'nnaanchi meentichcho Iyyoophe'e yakkam beero'onne hee'llo'o. Isek summi Giriikisinne Doorqa'atte hee'ukko. Isem danaam baxo baximminnee buxina eroomma issimminnee la'anto'ookkotan hee'llo'o. Ee ammane oo meentichcho jabbita'a leto'aare iseka leesha aanshakka'a fooqanne dissakko'o. Oo Liida yakkam beero'i Iyyoophe'ina abbis hee'u bikkina Pheexiroos Liidanne yoo'isa amma'nnaan macceessa'a Pheexiroos beyyo «Hay qaqqissaa ni beyyo waare» yita'a lam mancho asse'llo'o. Pheexiroosim ki'aa ixxuwwinne maqirem Iyyoophe'e maraa afu ammanenne fooqanne fissakko'o. Eekke'em busar meenti hundim ixxi gadanonne uullita'a wi'llitu'uuyyi Dorqa'a ixxuwwinne maqire hee'llo'i ammane baxxo'i qambiissuwwaa mulli eddechchaa moo'issam hee'llo'o. Ihukkaarem Pheexiroos manni hundam biira fissaa guruphphaa Waa'a uunxukko. Ee lasage leesh kollonne daba'llaa «Xaabbiita, ki'e!» yukko. Isem ille fooqaa'lla'a Pheexiroosa moo'llo'i ammanenne ki'lla'a afuutto'o. Pheexiroosim iseka anga amadaa iimaa'aa ki'isaa lasage Waa'i doo'llu minaadabaa busar meentoo weeshaa isek foor daba'llukkaare ixxuwwina uwwukko. Oo woshshi Iyyoophe'enne yoo manni hundinam macceesamukkaare lobakat manni Moollannanne amma'nnukko. Pheexiroosim omachcho duugoo Simi'oona yakkam manchinne maqirem Iyyoophe'enne lobakat balla afuurukko. Qiisaariy beero'onne Qorneeliwoosa yakkam mat manchi hee'ukko. Ixxim Xaaliyaa'n gaaxxi manna awwonsoo xibbi halaqichchi hee'ukko. Qorneeliwoos ixxi mi'n abaroos hundinnem Waa'ina garaakkoo manchi hee'ukko. Ixxim buxina tasbo'o uwwoohanee hundi ammanem Waa'a uunxoohanee hee'ukko. Ballaannonne honsi sa'aata ihooqax ammanenne Waa'i asse'amaanchi ixxi beyyo aagaa «Qorneeliwoosa» yukkuuyyi kaaltanne qoossaa moo'ukko. Qorneeliwoosim baa'aa Waa'i asse'amaancho xuxxaa moo'ukkuuyyi «Moollanna! Ma'isso?» yukko. Oo Waa'i asse'amaanchim dabaraa «Waa'i ki uunxatonnee buxina uwwitti tasbo'onnee liiramaakko. Kaba at manna Iyyoophe'e asse'llaa Pheexiroosa yamamoo Simi'oona weeshise. Oo Pheexiroosim dambalaq gadanonne min yoo omachcho duugaanchi Simi'oon beyyonne koyyinano afuuraakko» yukko. Ixxenne wocu Waa'i asse'amaanchi ixxeensi annanni ihaa lasage Qorneeliwoos ixxi awwaadaa'nneka lamoo ixxo egeroo gaadaaniinsi Waa'ina garaakkoo mat gaadaanchoo weeshaa Waa'i asse'amaanchi yu luwwi hundam ixxuwwina kuraa Pheexiroosa weeshshona ixxuwwa Iyyoophe'e asse'ukko. Qorneeliwoos asse'u la'm ballina matta'a ee beero'o affeena ikko'oohaannonne balli loh sa'aata ihoo qunxina Pheexiroos Waa'a uunxeena fooqanne firukko. Ixxim sibaaraa itoo luwwa heele'aakkoohaannonne gudisakkonam Pheexiroos jallaa cawwaakkoohaannonne kaalti moo'amukko. Ixxim iiman fooqaa soorem kasim amadamaakkoo mat geejji weyyakki'nnoo'i luwwi calcalaa uullanne dillukkuuyyi moo'ukko. Ee weyyakki'nnoo'i luwwanne mi'n diinatii moochchii hundim odim biqinne maroo luwwii iima'n cii'ii hee'ukko. Pheexiroosina «Pheexiroosa, ki'llaa duttaa ite!» yoo sagar waarukko. Ihukkaarem Pheexiroos dabaraa «Moollanna! An itakkambee'i luwwa te'im haashaassoo luwwa itummi balbee'i bikkina itoommoyyo» yukko. Odim la'm korem «Waa'i muccussu luwwa at haashaassititte» yukko. Sas kore eehid yaa lasage oo weyyakki'nnoo'i luwwi mexxo'aa'llem iimane massamukko. Ee ammane Pheexiroos «Ku kaaltanne moo'ummi luwwi maruwwa?» yaa sawwukkuuyyi mal bi'aa hee'onam oo Qorneeliwoos asse'u manni Simi'oon mine xa'mmitu'uuyyi nafaranne uullita'a «Koyyinano afuuru Pheexiroosa yamamoo Simi'oon ka beyyonne yoohonnihe?» yita'a weeshsha'a xa'mmito'o. Pheexiroos ee moo'u kaalti bikkina lobakata sawwukkuuyyi hee'onam Keesammi Ayyaan «Oono'o! Keese sas manchi hassamuulla. Ixxuwwa asse'ummok anette ihummi bikkina maltoo'n ixxuwwinne maqirem mare» yukko. Pheexiroosim dillaa ee manni beyyo maraa «Hassakkam manchi anette; waattakko'ok mahinatte?» yukko. Ixxuwwim dabatta'a «Neese waallummok xibbi halaqichchi Qorneeliwoos ki beyyo asse'ukkaarette. Ixxi Waa'ina garaakkoo hanqo'i er mancho. Odim ixxo Ayihuxxi minaadab hundim lobakata lonsitamane. Keesammi asse'amaanchi ee Qorneeliwoosina ‹Pheexiroosa ki mine weeshissaa ixxi wocoo luwwa macceese› yaa kuraakko» yito'o. Ee bikkina Pheexiroos ee manna mine aagisaa koyyinano aa'ukko. La'm ballina Pheexiroos ixxuwwinne maqirem ki'aa marukkuuyyi mat qax amma'nnaan abbaayyuwwi Iyyoophe'iinsi ixxenne maqirem matto'o. Matto'i la'm ballina Qiisaariya yakkam beero'o affo'o. Qorneeliwoosim ixxi qarmannaa ixxena hincoo beshshuwwaa mat issaa weeshaa egeraa hee'ukko. Pheexiroos aagu ammanenne Qorneeliwoos Pheexiroosina ubaa otossukko. Ihukkaarem Pheexiroos «Anim ki'isam manchi ihummi bikkina iimihe» yaa ki'isukko. Pheexiroos Qorneeliwoosinne atoorarukkuuyyi mine aagu ammanenne lobakat manni wixxaakkoo moo'ukko. Ixxim ee mannina «Ayihuxxi manni mulli minaadabinne edamimmi te'im mulli manna maraa moo'immi hooramaakkoohan ihukkisa ki'nnuwwim laqqakkamo. Ihukkaarem an ayyi manchom ‹haashaaramma› te'im ‹muccurayyo› yoombee'isa Waa'i iina moo'isu bikkina manni eese weeshoo'isina asse'llakko'aare saboo'n waaraammo. Eese weeshshakko'ok mahinda'i ihukkisa kaba kullehe» yaa xa'mmukko. Qorneeliwoosim dabaraa «Soor balliinsi illageen kido'i ammanchonnem honsi sa'aatanne Waa'a uunxakkam ammanenne anim i minenne Waa'a uunxam hee'ummo. Uunxummuuyyi hee'onam belecce'oo qadaalli eddechcha edde'aakkoo mat manchi ‹Qorneeliwoosa, ki uunxato Waa'i macceesaakko; buxina issitti tasbo'om tiiraakko. Pheexiroosa yamamoo Simi'oon beyyo Iyyoophe'e manna asse'llaa weeshise. Ixxim omachcho duugoo Simi'oona yakkam manchi minenne dambalaq gadanonne koyyinano afuuraakko› yukko. Ee bikkina ee ammanchom ki beyyo manna asse'ummo. Atim iittitaa waattittis danaamo. Kaba neese hundim Waa'i keese ijaaju luwwa woccoohaare macceenseena Waa'i illagenne ka beyyonne yoommine» yukko. Pheexiroosim «Hanqinam Waa'i illagenne manni hundim gudaanchi ihukkisa an la'aammo. Ayyi minaadaphphanem ihukkaare ixxo baddookkokaa hanqa baxookkokaa Waa'i iittookko. Yesuus Kiristoos kollinne xummika mishiraachchi sagara Isra'ee'l minaadabina asse'aa alallaatukkisa ki'nnuwwi laqqakkamo. Yesuus Kiristoos hundinam Moollanna. Yohaannis manni xammaqamoo'isina alallaataa lasage Galiiliinsi ki'isaa Yihuxxi uulli hundannem ihu woshsham laqqakkamo. Naazireexxi Yesuusa Waa'i doo'llaa Keesammi Ayyaanaa malaayyee dilliisaa Waa'i ixxenne maqire ihimminne danaam luwwa issukkuuyyii Sheexaan wor amadu keeno fayyiisukkuuyyii beyyo hundam marukkisa laqqakkamo. Yesuus Yihuxxi uullannee Yerusaalee'm beero'onnee issu luwwi hundam neese moo'nnaammo. Ayihuxxi manni ixxo haqqanne saqalta'a shito'o. Ihukkaarem Waa'i ixxo saxxi ballanne lehiinsi ki'isaa mannina moo'amoo'isa issukko. Moo'isukkokim minaadabina hundinatte ihoo'n naqaashshuwwi inkoommisina Waa'i doo'llu niina Yesuus lehiinsi ki'aa lasage ixxenne maqire intummi keeninattee angummi keeninattee. Ixxim minaadabina mishiraachchi sagara alallaantoommisinaa ixxo lehu keenonnee yoo keenonnee Waa'i oogataanchi issaa doo'llukkisa kulloommisinaa ijaajaakko. Yesuusanne amma'nnito'i keen hundim baaxii'l urimma siixxitamok ixxi summinnette ihukkisa hiraagaan hundim kutto'ookko» yaa kurukko. Pheexiroos eehid yaa woconam ixxi wocam hee'u woshsha macceesso'i keenonne hundannem Keesammi Ayyaan dillukko. «Ku manni ni'isam Keesammi Ayyaana aa'llolas wo'onne xammaqanteena ayyi hoorookko?» yaa Yesuus Kiristoos summinne xammaqantamisina ijaajukko. Ee lasage Pheexiroos ixxuwwinne maqire mat qax ammane afuuroo'isina xa'mmito'o. Ee ammane Yihuxxi uullanne hee'llo'i Yesuus asse'u keenii mulli amma'nnaanii mulli minaadab Waa'i woshsha aa'llo'isa macceesso'o. Pheexiroos Yerusaaleema maru ammanenne Ayihuxxi manni amma'nnaa'nnek ballachchanchi seera egettam keen «Ballachchamubee'i manni beyyo mattaa ixxuwwinne maqire mahina hurbaata ittitto?» yita'a Pheexiroosinne fitanto'o. Eekka hincaa moo'ummi ammanenne diinate, moochcha, biqinne maroo luwwaa iima'n cii'aa ee weyyakki'nnoo'i luwwanne moo'ummo. Odim mat sagar iina ‹Pheexiroosa, ki'llaa duttaa ite!› yukkuuyyi macceesummo. «Ihukkaarem an ‹Moollanna! Itakkambee'i luwwa te'im haashaassoo luwwa suumennem amadummi balbee'i bikkina itoommoyyo!› yummo. Odim oo sagar la'm korem iimaniinsi ‹Waa'i muccussu luwwa at haashaassititte!› yukko. Sas kore eehid ihaa lasage oo luwwi hundim iimane massamukko. Ee ammanchom Qiisaariy beero'iinsi i beyyo asse'anto'oo sas manchi neese yoommine'i mine affo'o. Keesammi Ayyaanim malamoo'n ee manninne maqirem maroommisina iina kurukko. Ku lohem amma'nnaan abbaayyuwwim iinninne maqirem matto'o. Mallaa weeshisu manchi mine amfaa aangummaare oo weeshisu manchim Waa'i asse'amaanchi ixxi minenne uullaa ‹Iyyoophe'i beero'o manna asse'llaa Pheexiroosa yamamoo Simi'oona weeshise. Atii ki mi'n abaroosii hundim gattakkam asso kurookko› yukkuuyyi moo'ukkisa kurukko. «An woceena amadummisam Keesammi Ayyaan luxxeka neesenne dillukkisam ixxuwwannem dillukko. Ee ammanenne Moollanni ‹Yohaannis wo'inne xammaqaakko; ihukkaarem ki'nnuwwi Keesammi Ayyaaninne xammaqantakkamo› yu woshsha an tiirummo. Eehaare neese Moollanni Yesuus Kiristoosanne amma'nninummi ammane Waa'i niina uwwu Keesammi Ayyaana ixxuwwinam uwwukkaa'lleensi Waa'i uwwoobee'isa hooreena an ayyette?» yaa ogorinne caakkisaa kurukko. Ixxuwwim eekka macceesso'i ammanenne fitancha utta'a «Mulli minaadabim baaxiilo biira yita'a heechcha siixxitamisa Waa'i issaakko» yita'a Waa'a galaxxito'o. Isxifaanoosa shakko'i ammane afu hawwinne ki'ukkok binnito'i amma'nnaan mishiraachchi sagara xale'i Ayihuxxi minaadabina kuttu'uuyyi Fiinqe'e, Qoophphiroosaa Anxooke'i afeebe'ee matto'o. Ihukkaarem ee kee'nnek Qaareena yakkam beero'i mannikii Qoophphiroosa yakkam uulli mannikii mat qax manni Anxooke'i beero'o matta'a mulli minaadabina Yesuus Kiristoosika mishiraachcha alallaatto'o. Waa'i malaayyim ixxuwwinne maqire hee'ukko. Lobakat mannim amma'nnita'a Moollanni kollonne daba'llito'o. Ee woshsha Yerusaaleemanne yo'i amma'nnaan macceessa'a Baarnabaasa Anxooke'e asse'llo'o. Ee lasage Baarnabaas Saawula haseena Xarses beero'o marukko. Ixxim Saawula siidu ammanenne Anxooke'e worukko. Eekke'em mat hiincho hundoomam amma'nnaaninne maqirem lamim afuutta'a lobakat manna losisso'o. Ee Anxooke'enne amma'nnaan luxxi amma'n «Kiristoosa awwonaano» yamanta'a weeshanto'o. Ee ammane hiraagaan Yerusaaleemiinsi Anxooke'e dillito'o. Ee keeniinsim mat Agaaboosa yakkam mancho Keesammi Ayyaan wocisukkaare uulli hundannem malaayyaam sibaar ihoo'isa gaassaahim hiraagukko. Oo ixxi kuru woshshi Qalaawdiwoosa yakkam adi'l doollenne ihukko. Ee bikkina amma'nnaan annannichchim xantoqaxa fissita'a Yihuxxi uullanne hee'llam amma'nnaanina hara'mmato asse'llamisina woshsha mutto'o. Hara'mmatom amma'nnaa'n awwonsaa'n beyyo Baarnabaasannee Saawulannee asse'llo'o. Ee doollenne Heeroodisa yakkam adil mat qax amma'nnaanonne kee'mmaalli hawwo afisukko. Ixxim Yohaannis abbaayyi hee'u Yaaqooba bisa'inne shisiisukko. Oo woshshi Ayihuxxi manna liiransukkisa moo'u ammanenne Pheexiroosam edaa amadiisukko. Oo amman odim Shaashshiqqi Uguxxi amman hee'ukko. Pheexiroosa amadiisaa ugud higaa lasage minaadabina hincaa'eena karaxxi mine aagisaa soor soor manchi ikka'a egettam tomminaa loh gaadaaninaa egettamisina uwwukko. Ee bikkina karaxxi minenne Pheexiroosa aagisakka'a egerakkam hee'akko'o. Ihukkaarem Pheexiroos bikkina amma'nnaan qoxxaallisa Waa'a uunxitam hee'llo'o. Heeroodis soodi'n Pheexiroosa minaadaphphi illagenne hincaa'oo hiimo Pheexiroos lam gaadaaninne quraannamaa lam chimchiminne karamaa ee gaadaa'n lambe'enne diriiraa hee'ukko. Mulli gaadaanim karaxxi mi'n goocanne uullita'a egetta'a hee'llo'o. Dangonnem Waa'i asse'amaanchi waarukkaare ixxuwwi hee'llo'i karaxxi minenne caakki caakkukko. Oo asse'amaanchim Pheexiroosika midaado aphphisaa diriichchiinsi baqaa'aa «Qaqqissaa iimihe!» yukko. Pheexiroosa karakko'i chimchimim angiinsi tiramaa ubukko. Oo asse'amaanchim Pheexiroosina «Lade'llaa caamma'a issaqqe» yukkaare Pheexiroosim ee'isam issukko. Odim oo asse'amaanchi «Weyyakkam edde'llaa eese awwone» yukko. Ixxim firaa Waa'i asse'amaancho awwonukko. Ixxim kaalta moo'ookkoka labisam hee'ukko bagaan Waa'i asse'amaanchi issu luwwi hanqi ihukkisa la'ukkoyyo. Luxxi waardiyyaa la'm waardiyyaa higga'a beero'onne fissoo googonne yoo xaa'l gooca affo'aare oo gooc ayyim nakkoo'n ixxi anginnem fooqukko. Ixxuwwim fitta'a bobba'inne mattonam Waa'i asse'amaanchi dangonnem Pheexiroosiinsi annanni ihukko. Pheexiroos ixxonne iham hee'u luwwa la'u ammanenne «Heeroodis angiinsii Ayihuxxi minaadab eesenne afookko yita'a egetta'a hee'llo'i luwwi hundiinsii Waa'i ixxi asse'amaancho asse'aa eese gatisukkisa kaba qoossaa la'aammo» yukko. Ee woshsha qoossu ammanenne Yohaannisa yakkam Maarqoosina amatte hee'llo'i Maaraam mine marukko. Ee minenne dut manni mat ikka'a wixxita'a Waa'a uunxitam hee'llo'o. Ee mi'n qash gooca Pheexiroos qoccu ammanenne Orooda yakkam fo'annichcho macceessa'a ayyetda'e ihukkisa xa'mmiteena waatto'o. Isem Pheexiroosatte ihukkisa sagara qoossito'i ammanenne liiranchinne ki'ukkok gooca fooqaa'imma utta'a mine geetta'a goocanne Pheexiroos uullukkisa kutto'o. Ixxuwwim isena dabatta'a «Taa at machchaattaatto!» yito'o. Ihukkaarem ise «Hanqinam Pheexiroosatte» yita'a dabaransita'a kutto'o. Ixxuwwim dabatta'a «Pheexiroosa egeroo Waa'i asse'amaancho» yito'o. Ee amman hundam Pheexiroos gooca cawwaa qoccam hee'ukko. Ixxuwwim fooqaa'lla'a ixxo moo'llo'i ammanenne maalalto'o. Ihukkaarem Pheexiroos sa'itamisina anginne kuraa Moollanni karaxxi miniinsi hinkid issaa fissuda'e kurukko. Ee lasage «Ka woshsha Yaaqoobinaa mulli amma'nnaaninaa kullehe» yaa ixxuwwiinsi annanni ihaa mulli beyyo marukko. Uulli soodu ammanenne gaadaan «Pheexiroos maha ihukko» yita'a ikkamisa hoogga'a ixxuwwik mal bi'ukko. Adil Heeroodisim Pheexiroosa hasisaa hoogu ammanenne karaxxi mine egetto'i gaadaano saarayyaa xa'mmaa ee gaadaano shakkamisina ijaajukko. Ee lasage Heeroodis Yihuxxi uulliinsi dillaa maraa Qiisaariy beero'onne afuurukko. Ee ammane Heeroodis Xiiroosaanninnee Siidoo'n beero'i manninnee wocamaa hee'ukko. Oo Xiiroosii Siidoonii hurbaata siixxitamok adil Heeroodis uulliinsette hee'ukko. Ee bikkina lamem beero'i mannim mat ikka'a waatta'a adilina suu'm manchi hee'u Bilaasxoosa yakkamok Heeroodisinne iittansoo'isina a'llansito'o. Jinna amadakko'i ayyaamonne Heeroodis adilla'n eddechcha edde'aa adilla'n barcumanne afuuraa minaadabina wocukko. Minaadabim «Ku sagar Waa'i sagara bagaan manni sagarayyo» yita'a shuutto'o. Heeroodis Waa'ina lomba uwwubee'i bikkina ee ammanchom Waa'i asse'amaanchi malaayyaam jabbinne aphphisukkaare daquurinne itamaa lehukko. Ee ammane Waa'i sagar haraarukkuuyyii li'ukkuuyyii marukko. Baarnabaasii Saawulii asse'anto'i asso afissa'a lasage Yohaannisa yakkam Maarqoosa amadda'a Yerusaaleemiinsi daba'llita'a waatto'o. Ee ammane Anxooke'enne hee'llo'i amma'nnaa'n woronne hiraagaanii losisaanii hee'llo'o. Ixxuwwim Baarnabaasatte, Heemachcha yakkam Simi'oonatte, Qaaree'nnek Lusiyoosatte, Heeroodisa yakkam gassaanchina dara'mmanchi hee'u Minaheenattee Saawulattee hee'llo'o. Ixxuwwi soommantu'uuyyii Waa'ina otossitu'uuyyii hee'llonam Keesammi Ayyaan «Baarnabaasaa Saawulaa an weeshummi baxo baxxamisina iina annanni issehe» yukko. Ixxuwwim soommanta'a lasage Baarnabaasaannonnee Saawulaannonnee hanenne ixxuwwi anga issita'a Waa'a uunxita'a geegeesso'o. Baarnabaasaa Saawulaa Keesammi Ayyaan asse'ukkaare Seleqe'e matta'a ee Seleqe'iinsim markabanne aagga'a Qoophphiroosa matto'o. Ixxuwwim matta'a Saalaamusa affo'i ammanenne Ayihuxxi manni wixxixxi minneewwanne wixxaa hee'u mannina Waa'i sagara kutto'o. Yohaannisa yakkam Maarqoosim ixxuwwina hara'mmam hee'ukko. Ixxuwwim wo'inne kibbamaakkoo uulla tochchiinsi tochchonne afeebe'e matta'a Phaafoosa yakkam beyyo affo'i ammanenne mat Baaryesuusa yakkam kiiraanchinne edanto'o. Oo Baaryesuus Ayihuxxi manchi hee'ukko. Ixxim «An hiraagaancho» yoo qophphanaanchi hee'ukko. Ixxi hee'am hee'ukkokim Sargiyoos Phaawuloosa yakkam qoor gassaanchinne maqirette hee'ukko. Sargiyoos Phaawuloosim Waa'i woshsha macceeseena hasaa Baarnabaasaa Saawulaa weeshisukko. Ihukkaarem Ilaamaasa yamamoo oo kiiraanchi Sargiyoos Phaawuloos amma'nnoobee'isa hooreena Baarnabaasinnee Saawulinnee uullixxamukko. Ilaamaasa yimmi kiiraancho yimma. Ihukkaarem Phaawuloosa yakkam Saawulanne Keesammi Ayyaaninne wo'mmukkaare ee kiiraancho xuxxaa moo'aa «Kaa Sheexaanchi beeto, er luwwi hundinam masokkichcho, huushansimmii jollii hundim wo'mmaakkoohaanno! Moollannika xabbeen googo boqqisimma uttooyyonnihe? Oono'o! Kaba Waa'i angi keese aphphisoohaare ammanoomina caakka moo'lloobee'isa ki illi qooqookko» yukko. Ee ammanchom witiriichchii tuunsii ixxi ille ifiisukkaare manni ixxi anga amadaa masakkoo'isina hasukko. Oo gassaanchim Moollanni bikkina macceesu woshshanne maalalaa hee'u bikkina eekka moo'u ammanenne amma'nnukko. Ee lasage Phaawuloosii ixxenne hee'llo'i ixxi beshii Phaafoosiinsi markabanne aagga'a Phimfiliyanne yoo Pherge'e matto'o. Ee beyyiinsim Yohaannisa yakkam Maarqoos ixxuwwa uraa Yerusaaleema daba'llukko. Ihukkaarem Phaawuloosii Baarnabaasii Pherge'iinsi Phisidiya yakkam uullanne yoo Anxooke'e matto'o. Eekke'em Usheexxaxxi Ayyaamonne Ayihuxxi manni wixxixxi mine aagga'a afuutto'o. Muse'e kitaabu See'l kitaabiinsii hiraagaan kitaabbo'i kitaabiinsii qananaa'akka'a lasage wixxixxi mi'n awwonsaan Phaawuloos beyyoo Baarnabaas beyyoo «Niyyabbaayyuwwa, ayyi la'ukko minaadaba soggakka'a qoxxissakkam luwwi yoolas woccehe» yita'a manna asse'llo'o. Ee bikkina Phaawuloos iimaa uullaa manni sa'aa ixxi woshsha macceesoo'isina anginne kuraa «Isra'ee'l minaadabii Isra'ee'l Waa'ina otossitakkam mulli minaadabii macceessehe! Ka Isra'ee'l minaadaphphi Waa'i niyyanno'o doo'llaa Gibxanne hee'llu'uuyyi lobakat minaadab issukko. Ee Gibxiinsim ixxaanninne malaayyaam wodinne fissaa udma'anne sor hiincho ixxuwwi jottu'uuyyim iyyaqqimminne abooyyukko. Kaana'aa'n uullanne hee'llo'i lamarem shumo'o bi'isaa ee bi'isu kee'n uullam ixxuwwi gaqqan issaa uwwukko. Oo woshshi hundim ihukkuuyyi soor xibbee ontayyi hiinchoo ihukko. Eehanniinsi lasage hiraagaanchi Saamu'eelanne afeebe'e awwonsitam gassaano uwwukko. Isra'ee'l minaadab adila uullisoo'isina Waa'a xa'mmito'aare Waa'im Biiniyaam moolliinsi Qiis beet Saa'oola sor hiincho adil ihaa gassoo'isa issukko. Saa'oola adillaniinsi dilliisaa lasage Waa'i ixxuwwina Daawiit adil ihoo'isina ki'isukko. Waa'i Daawiitina ‹An yummi luwwi hundam issukkuuyyi i tii'llisa hee'oo Issayyi beeto Daawiita siixxaammo› yaa wocukko. Waa'i ‹Uwwoommo› yukkisinnem ka manchi shumo'iinsi Isra'ee'l Gatisaancho Yesuusa asse'ukko. «Yesuus ixxi baxinne la'amoo'n illageen Isra'ee'l minaadab hundim baaxiiliinsi daba'llito'isa moo'isoo xammaqanchi bikkina Yohaannis alallaatukko. Yohaannisim ixxena uwwamu baxo guulleena ihaakkoohaannonne ‹Eese ayyette?› yitakkamuulla ‹An ki'nnuwwi egettakkam Kiristoosatteyyo. An ixxeka caamma'i fatiram tireena laboombee'ek iinniinsi lasage waaroolla› yam hee'ukko. «Iyyabbaayyuwwi Abrihaam oosii Isra'ee'l Waa'ina otossitakkam mulli minaadabii! Ku neese kulloommi woshshi Waa'i niina Gatisaanchi issaa asse'ukkaanni bikkinatte. Yerusaaleemanne hee'llam keenii ixxuwwa gassaanii Yesuus Gatisaanchi ihukkisa laqqo'oyyo. Hiraagaan kutto'i woshsha Usheexxaxxi Ayyaam hundam qananaa'llo'aarem qoossita'a la'imma hoogimminne ixxonne oogatta'a hiraagaan kutto'i woshshi wo'mmoo'isa issito'o. Yesuusa shisiisoo luwwa maham siidoo'nnim ixxo shoo'isina Philaaxoosa uunxito'o. Ixxi bikkina kitaabamu woshshi hundichchom issita'a guullita'a lasage saqalto'i haqqiinsi dilliissa'a waammito'o. Ihukkaarem Waa'i ixxo lehiinsi ki'isukko. Lehiinsi ki'aa lasage ixxenne maqirem Galiiliinsi Yerusaaleema waatto'i keenina dut ayyaamo moo'amukkaare lehiinsi ki'ukkisa kaba minaadabina kuttamuulla. Neesem Waa'i niyyanno'ina ‹Uwwoommo› yu mishiraachchi sagara ki'nnuwwina eembaammo. Oohim ixxuwwi oos inkummi niina Yesuusa lehiinsi ki'isimminne Waa'i wonshukkane. Ee'isam Mazmuu'l Kitaabanne la'm mazmuuranne ‹At iina Beeto; keese qarummok kaballa› yamamaa kitaabamukkane. Odim waammanne ixxi shamaa gatoobee'isa Waa'i lehiinsi ixxo ki'isimmi hanqi ihukkisa kureena ‹Hanqinam an Daawiitina uwwummi neeyyato keesamaakkoo maasso kiina uwwoommo› yaa wocukko. Ee'isam mulli beyyonnem ‹Waa'i ixxena keesamaakkoo awwaadaancho waammanne shamaa gatona urooyyo› yaakko. Waa'i ‹Isse› yu luwwa Daawiit ixxi doollenne issaa guullaa lasage lehaa ixxi anno'innem waammamaa shamukko. Ihukkaarem Waa'i lehiinsi ki'isukkok shamukkoyyo. Ee bikkina niyyabbaayyuwwa, Waa'i Yesuus kollinne baaxiilo haafoo'isa ki'nnuwwina alallaantummisa qoossitakka'a laqqehe. Muse'i Seera egerimminne muccuttakkeena xantakkobee'i luwwi hundiinsim Yesuusanne amma'nnimminne muccuttakkeena xantakkamo. Ee wixxixxi miniinsi Phaawuloosii Baarnabaasii fitto'i ammanenne waaroo Usheexxaxxi Ayyaamom ee woshsha edda'a kuttamisina uunxito'o. Ee wixxixxi miniinsi manni binnu ammanenne Ayihuxxi minaadaphphek lobakat mannii Ayihuxxi manni amma'nnatonne daba'llito'i kee'nnek Waa'ina gatto'i keenii Phaawuloosaa Baarnabaasaa awwonto'o. Phaawuloosii Baarnabaasii ee manna losissa'a Waa'i eroommiinsi annanni ikkambee'isa qoxxissa'a soggo'o. Ee Usheexxaxxi Ayyaamonnem ee beero'ik hofqax manniinsi bagaan manni hundim Waa'i sagara macceesseena mat ikka'a wixxukko. Ihukkaarem Ayihuxxi manni ee wixxu minaadaba moo'llo'i ammanenne lobakata to'achchita'a Phaawuloos wocu woshsha sabba'a ixxo game'llito'o. Ee bikkina Phaawuloosii Baarnabaasii eraa'llaanniinsim lobakat iggimminne «Waa'i sagar gaassaa ki'nnuwwina kuraanchi hasisookko. Ihukkaarem ki'nnuwwi ‹Heer heerina hee'oo heechcha hansoommoyyo› yitakka'a ki'nnuwwi gaganne oogattakko'aa'lleensi, oono'o, neese mulli minaadabina kulleena malloommo. Oohim Waa'i ‹At uullanne yoo minaadab hundam an gatisoommisa kuttaa mulli minaadabina caakki ikkoo'isa issaammo› yaa ijaajukkane» yito'o. Mulli minaadab eekka macceesso'i ammanenne liiranta'a Waa'i sagara lonsito'o. Heer heerina hee'oo heechchina doo'llanto'i keenim amma'nnito'o. Moollanni sagarim ee uulli hundam afukko. Ihona bagaan Ayihuxxi manni Waa'ina gatto'oo goddaan meentoo ee beero'o gassitam geejji geejji mannaa Phaawuloosannee Baarnabaasannee ki'issa'a ee uulliinsi fissita'a hollito'o. Phaawuloosii Baarnabaasii lokkiinsi dira giggissita'a utta'a Iqooniyooma matto'o. Amma'nnaanonnem liiranchii Keesammi Ayyaanii wo'mmukko. Phaawuloosii Baarnabaasii Iqooniyooma aagga'a eekke'em Ayihuxxi manni wixxixxi minenne eraa'llisam Waa'i sagara mannina danaamisa issita'a kutto'aare Yihuxxekii Yihud ikkobee'i minaadaphphekii lobakat Yesuusanne amma'nnito'o. Ihukkaarem amma'nnitobee'i Ayihuxxi manni mulli minaadab Phaawuloosannee Baarnabaasannee manna ki'issa'a sabbamisa issito'o. Ihona bagaan Phaawuloosii Baarnabaasii Yesuus bikkina lobakat iggimminne kuttu'uuyyi ee beyyonne lobakata ayyaamo afuutto'o. Yesuusim ixxuwwi kollinne maalalsiisoo agannaa mare'ee issaa Waa'i issu eroommi hanqo'an ihukkisa moo'isukko. Ihukkaarem ee beero'i mannik kollii Ayihuxxi minaadabinne, kollii asse'amaaninne ikko'o. Ee lasage Yihuxxekii mulli minaadaphphi mannii ixxuwwi awwonsaaninne maqirem mat ikka'a Phaawuloosaa Baarnabaasaa kininne aphphisseenaa barche'e issiteenaa heele'llo'aare ixxuwwi eekka laqqo'i ammanenne Liqooniya yakkam uullanne yoo beero'uwwa Lisxiraa Darbe'ee ee beero'uwwi kululleetanne yoo uullaa gibbo'o. Ee beyyuwwannem mishiraachchi sagara kutto'o. Ee Lisxirannem qaramukkaanniinsi ki'isaa hore'em taakke'aa xanoobee'i lokki shiihaakkoo mat manchi hee'ukko. Oo manchim Phaawuloos wocukkuuyyi afuuraa macceesam hee'ukko. Oo manchi amma'nnaa fayye'eena xanoohan ihukkisa Phaawuloos la'u ammanenne xuxxaa moo'aa «Ki lokkinne xabbitaa uulle!» yaa sagara iimaa'aa wocukkaare oo manchi shoottaa uullaa taakke'ukko. Minaadab Phaawuloos issu luwwa moo'llo'i ammanenne ixxuwwi suuminne sagara iimaa'lla'a «Waa'i manni hagaranne daba'llaa ni beyyo waaraakko» yito'o. Ixxuwwi «Waa'a» yita'a otossitam kee'n summanne Baarnabaasika summa «Ziyoosa» yita'a weeshsho'o. Odim Phaawuloosikam ixxi lobakata wocam hee'u bikkina «Heermaasa» yita'a weeshsho'o. Ee Ziyoosik fado'i minim beero'o aagakkam goocanne hee'ukko. Ziyoosina qeessichchii minaadabii Baarnabaasinaa Phaawuloosinaa kitima hincaa'lleena hasso'i bikkina moolluwwaa fiitaa beero'i gooca eebbo'o. Phaawuloosii Baarnabaasii eekka macceesso'i ammanenne eddechcha deree'llita'a «Manna, kaka mahina issitakkamuulla? Neese ki'nnuwwi'nnoo'i manname. Ki'nnuwwi ka awwaad bee'i luwwa issimma uttakka'a iimane, uulla, dambalaqaa ixxuwwanne yoo luwwaa hundam qooccu hee'oo Waa'i kollonne daba'llitakkamisina ka mishiraachcha ki'nnuwwina kulleena waallaammo. Waa'i ka illagee'n doollenne manni hundim gaqqi sawwixxisa hee'ona uraakko. Ihukkaarem Waa'i ki'nnuwwina danaam luwwa issimminne, oohim iimaniinsi xeena uwwimminne, misham ammaninne uwwimminnee itakkam luwwa uwwaa ki'nnuwwi wodano lobakata liiransimminnee ixxi yoo'isa caakkisaa kuraakko» yita'a shuuttu'uuyyi minaadaphphi lambe'enne geetta'a aaggo'o. Eehid yita'a wocca'a minaadab ixxuwwina kitima kitimtambee'isa lobakat hawwinne hootto'o. Ee lasage Phisidiyanne yoo Anxooke'iinsii Iqooniyoomiinsii mat qax Ayihuxxi manni waatta'a Phaawuloosanne manna ki'issa'a kininne aphphissa'a «Lehaakko» yita'a beero'iinsi gosaassa'a fissita'a uunjito'o. Ihukkaarem amma'nnaan ixxi gadanonne wixxito'i ammanenne Phaawuloos uunjakko'i beyyiinsi ki'aa maraa beero'o aagukko. La'm ballina Baarnabaasinne maqirem Darbe'e yakkam beero'o marukko. Ee Darbe'ennem mishiraachchi sagara kutta'a lobakat manna amma'nnissa'a ki'lla'a daba'llita'a Lisxira, Iqooniyoomaa Phisidiyanne yoo Anxooke'ee matto'o. Ixxuwwim ee beyyi hundannem amma'nnaanina «Neese Waa'i adillanonne aagimmina lobakat hawwo aa'immi hasisookko» yitu'uuyyi amma'nnatonne qoxxaalluwwi ikka'a hee'llamisa qoxxissa'a soggo'o. Ee lasage Phaawuloosii Baarnabaasii amma'nnaa'n wixxittuwwanne hundannem lommanna doo'llita'a lasage soommanta'a Waa'a uunxita'a ixxuwwi amma'nnito'i Moollannina yabo uwwito'o. Ee lasage Phaawuloosii Baarnabaasii Phisidiyinne aa'lla'a Phimfiliya matto'o. Pherge'ennem Waa'i sagara kutta'a ki'lla'a Axaale'e matto'o. Ee Axaale'iinsi odim markabanne aagga'a matta'a lamim baxxona uwwamu baxo guullita'a lasage amma'nnaan ixxuwwa eroomma issoo Waa'ina yabo uwwito'i beyyo Anxooke'e daba'llito'o. Anxooke'e aagga'a lasage amma'nnaano wixxaa'lla'a Waa'i ixxuwwinne ihaa baxu bax hundaa mulli minaadab amma'nnitamisina Waa'i googo fooqaa'ukkisaa kutto'o. Ee Anxooke'enne amma'nnaaninne maqirem lobakat ammane afuutto'o. Mat mat manni Yihuxxi uulliinsi Anxooke'e dillita'a amma'nnito'i keenina «Muse'i See'llisanne ballachchantakkobeelas gattakkeena xantakkamoyyo» yita'a losissam hee'llo'o. Phaawuloosii Baarnabaasii ee keeninne malaayyaamisa fitanto'o. Ee lasage Anxooke'enne hee'llo'i amma'nnaan Phaawuloosaa Baarnabaasaa ixxuwwi lambe'iinsi mat qax mannaa doo'llita'a oo keen Yerusaaleema fitta'a matta'a Yesuus asse'amaaninnee lommanninnee ka woshshi bikkina a'llantona qooddo'o. Amma'nnaanim ixxuwwa geegeesso'aare Fiinqe'innee Samaare'innee aa'lla'a higgu'uuyyi mulli minaadabiinsi Waa'i kollonne daba'llito'isa kutto'aare oo woshshi amma'nnaan hundam lobakata liiransukko. Yerusaaleema affo'i ammanenne Yesuus asse'amaan, lommannii amma'nnaanii hundim ixxuwwa aa'llo'o. Ixxuwwim Waa'i ixxuwwinne ihaa baxu bax hundam kutto'o. Ihukkaarem Farisaawe'uwwiinsi amma'nnito'i kee'nnek mat mat ki'lla'a «Mulli minaadabiinsi amma'nnito'i keeno ballachchimmii Muse'i Seera egettamisa issimmii hasisookko» yito'o. Yesuus asse'amaanii lommannii ee woshsha a'llanta'a mutteena dummito'o. Ixxuwwim lobakata fitanta'a lasage Pheexiroos ki'aa «Iyyabbaayyuwwa, mulli minaadab iinniinsi mishiraachchi sagara macceessa'a amma'nnita'a gattamisina Waa'i gaassaatim ki'nnuwwi lambe'iinsi eese doo'llukkisa laqqakkamo. Mannika wodano la'oo Waa'i niina uwwu Keesammi Ayyaana ixxuwwinam uwwimminne ixxuwwam aa'ukkisa caakkisaa la'isaakko. Ixxim ixxuwwi Yesuusanne amma'nnito'i bikkina ixxuwwika wodano muccussukko bagaan ni lambe'ennee ixxuwwi lambe'ennee annannooma issukkoyyo. Ee bikkina niyyanno'ii neesee iyyineena xannumbee'i iyyo amma'nnaa'n gudumonne iyyiisimminne kaba Waa'a mahina keentakkamuulla? Ihona bagaan neesem ixxuwwisam Moollanni Yesuus eroommanne amma'nnimminne gantummisa amma'nninoommo» yukko. Ee ammanenne Baarnabaasii Phaawuloosii Waa'i ixxuwwinne ihaa mulli minaadaphphi lambe'enne issu maalalsiisoo dut mare'ee agannaa kuttu'uuyyi dummito'i manni hundim cawwita'a macceesso'o. Ixxuwwi kutta'a guullita'a lasage Yaaqoobim «Iyyabbaayyuwwa, anim wocoommi woshsha macceessehe. Waa'i gaassaatim mulli minaadabiinsi ixxi lombina ihoo manna doo'llimminne hinkido'i eroomminne ixxuwwa moo'uda'e Simi'oon kuraakko. Hiraagaan ka woshshinne kobi'lloo woshsha Ee bikkina i sawwit mulli minaadabiinsi Waa'i kollonne daba'llito'i keeno hawwinsoombee'isinatte. Ihona bagaan qophpha'n waa'ina kitimamaa haashaaramu maara itimma, saa'immaa baytu diinaxxi maaraa xiigaa itimmaa uttamisina kitaambaa asse'nnona. Mashka'oomim Muse'i Seera Usheexxaxxi Ayyaamonne wixxixxi minneewwannee beero'uwwi hundannee gaassiinsim ki'issa'a qananaa'llu'uuyyii kuttu'uuyyii yo'o» yukko. Ee lasage Yesuus asse'amaan, lommannii Yerusaaleemanne hee'llo'i amma'nnaanii hundim mat ikka'a Phaawuloosinnee Baarnabaasinnee maqire mattamisina mat qax manna doo'llita'a Anxooke'e asse'immi eran ihukkisa sawwito'o. Ee bikkina amma'nnaa'n lambe'iinsi la'anto'oo keeno Baarsabaasa yakkam Yihudaa Sillaasaa doo'llita'a asse'llo'o. Asse'llo'i assim, «Neese ki'nnuwwi abbaayyuwwi Yesuus asse'amaan, lommannii ka beyyonne yo'i amma'nnaanii hundim Anxooke'enne, Sooriyannee Kilqe'ennee hee'llakkam mulli minaadabiinsi Yesuusanne amma'nnitakko'i niyyabbaayyuwwina xummaato hincaa'nnoommuulla. Mat mat keen ni lambe'iinsi ki'nnuwwi beyyo matta'a asse'nnumbee'i luwwa kuttu'uuyyi ki'nnuwwa hawwisso'isaa tiiro bi'issoo'isaa neese macceensaammo. Neese woshsha mullaa kitaambaa asse'nnummi asso suuminnem edda'a kuttamisina Yihudaa Sillaasaa endaa asse'nnaammo. Kanniinsi woroon yoo hasisoo ijaajiinsi bagaan mulli iyyo endaa iyyiinsoombee'isina neesee Keesammi Ayyaanii iittammaammo. Oo ijaajim qophpha'n waa'ina kitimakko'i luwwa itimmiinsi, xiigaa bayitaa itimmiinsii saa'immiinsii ki'nnuwwi gaga ege'llehe. Ee keeniinsimdu ki'nnuwwi gaga ege'llitakkolas hore'em danaamo. Xummanne hee'llehe» yita'atette. Oo asse'anto'i keenim geegeesanta'a lasage Anxooke'e dillita'a amma'nnaan hundam wixxaa'lla'a ee kitaabamu asso uwwito'o. Amma'nnaanim ee kitaabamu asso qananaa'lla'a lobakata liiranto'o. Odim Yihudii Sillaasii hiraagaan hee'llo'i bikkina amma'nnaano qoxxisoo dut luwwa soggo'o. Ihukkaarem Phaawuloosii Baarnabaasii dut mulli keeninne maqirem ee Anxooke'enne Moollanni sagara losissamii kuttamii hee'llo'o. Hofqax ayyaamiinsi lasage Phaawuloos Baarnabaasina «Moollanni sagara kullummi beero'uwwanne hundannem yo'i amma'nnaan hinkid yoda'e moo'nneena daba'llinaa mallona» yukko. Baarnabaasim Maarqoosa yakkam Yohaannisa ixxuwwinne maqire maroo'isina hasukko. Ihukkaarem Phaawuloos oo Maarqoos baxina ixxuwwinne maqire maroo'n sabaa Phimfiliya yakkam uullanne ixxuwwiinsi annanni ihaa gatu bikkina ixxuwwinne edamaa marona hasukkoyyo. Maarqoos mashka'inne ixxuwwi lambe'enne malaayyaam wocanchi firukkaare annanni ikka'a Baarnabaas Maarqoosa amadaa markabanne aagaa Qoophphiroosa yakkam uulla marukko. Phaawuloosim Sillaasa amadaa mareena doo'llukkaare amma'nnaan Waa'ik eroommi ixxenne maqire ihoo'isina Waa'ina yabo uwwita'a lasage Sooriyannee Kilqe'ennee do'ukkuuyyi amma'nnaano qoxxisam hee'ukko. Ee lasage Phaawuloos Darbe'ee Lisxiraa yakkam beero'uwwa afukko. Ee Lisxirannem Yesuusanne amma'nnito'oo Ayihudichchona Ximootoosa yakkam mat amma'nnaanchi beet hee'ukko. Ihukkaarem ixxek anni Giriikichchi hee'ukko. Ee Lisxirannee Iqooniyoomannee hee'llam amma'nnaan Ximootoos bikkina eran ihukkisa woccam hee'llo'o. Phaawuloos ixxenne maqire Ximootoos marona hasu bikkina massaa ballachchukko. Ballachchu mashka'im ee beyyonne hee'llam Ayihuxxi manni Ximootoos anni Giriikichchi ihukkisa laqqam bikkinatte. Phaawuloosii Sillaasii mattu'uuyyi affo'i beero'i hundannem Yerusaaleemanne hee'llo'i Yesuus asse'amaanii lommannii qooddo'i woshsha amma'nnaan egettamisina kuttam hee'llo'o. Ee lasage amma'nnaan amma'nnatonne qoxxitu'uuyyii ixxuwwi xigim ballina ballina exxukkuuyyii maram hee'ukko. Phaawuloosaa Sillaasaa Issiya yakkam uullanne Waa'i sagara kuttambee'isa Keesammi Ayyaan hooru bikkina Firge'ee Galatiyaa yakkam uullinne higga'a matto'o. Misiyya yakkam uulla aaggeena gabala affo'i ammanenne Biitaana matteena hassa'a hee'llo'o; ihukkaarem Keesammi Ayyaan matteena hoorukko. Ee bikkina ee Misiyyi gadaninnem higga'a Xiiroo'aad beero'o dillito'o. Ee beyyonne hee'llonam hiimonne Maqeedoo'n uulli manchi «Keyye Maqeedoona fittakka'a neese hara'mmehe» yaa uullaa uunxukkuuyyi Phaawuloos kaaltanne moo'ukko. Maqeedoo'n uulli mannina mishiraachchi sagara kulloommisina Waa'i weeshukkisa lanqummi bikkina Phaawuloos ee kaalta moo'ukkisam ee uulla malleena gundummo. Xiroo'aadiinsi ki'nnaa markabanne aangaa xabbinaa Samootiraasa yakkam uulla mallummo. Ee beyyiinsim la'm balla Naphul beero'o mallummo. Ee beero'iinsim ki'nnaa Oroo'm uulli manni hee'llamii gassitamii hee'llo'i Filiphphisiyus beero'o amfummo. Oo beero'im Maqeedoo'n uullanne yoo beero'uwwi hundiinsim lob beero'i hee'ukko. Ee beero'onnem mat qax balla afuullummo. Usheexxaxxi Ayyaamonnem «Waa'a uunxakkam beyyi yookko» yinaa sawwinummi bikkina beero'iinsi fillaa daajji gammala mallummo. Eekke'em afuullaa wixxu meentina Waa'i sagara kullummo. Ee meenti lambe'ennem Tiyaaxira yakkam beero'iinsi waatto'oo Liidiya yakkam mat Waa'ina gatto'oo meentichcho macceessam hee'llo'o. Isem kashar fatira daddaraanchotte hee'llo'o. Phaawuloos wocookkoka qoossita'a macceessamisina Waa'i iseka wodano fooqaa'ukko. Liidiyam is mi'n abaroosinnem xammaqanta'a lasage «An hanqo'isa Moollannanne amma'nnummisa laqqakkolas i minenne waattakka'a afuullehe» yita'a lobakata qoxxissa'a uunxito'aare kaa'ammummo. Mat ayyaamo ee Waa'a uunxakkam beyyo mallummuuyyi mat kiittam awwaadaancho niinninne edanto'o. Oo landichchom kiittu'uuyyi is moollanno'ina lobakat diinate siidissam hee'llo'o. Isem «Ku keen manni gatoo googo alallaattam hundam xanoo Waa'ina awwaadaano!» yita'a shuuttu'uuyyi Phaawuloosaa neesee awwontam hee'llo'o. Isem lobakat ayyaamo eehid yitam hee'llo'o. Ihukkaarem Phaawuloos nadadaa qerephaa moo'aa ee habusichchina «Yesuus Kiristoos summinne iseensi fire!» yaa ijaajukko. Habusichchim ee ammanchom iseensi firukko. Ee ammanenne is moollanno'i diinate siiddam neeyyat bee'ukkisa laqqa'a Phaawuloosaa Sillaasaa amadda'a gosaassu'uuyyi daannuwwi beyyo meera massito'o. Ixxuwwim daannuwwi beyyo afissa'a lasage «Ku Ayihuxxi manni neese Oroo'm uulli manni aa'nneenaa issineenaa ni seer uwwoobee'i losano niina losisimminne ni beero'o hambalaachchitamuulla» yito'o. Minaadab hundim mat ikka'a ixxuwwanne ki'llo'o. Ee lasage daannuwwim Phaawuloosikaa Sillaasikaa eddechcha sheelatta'a biccinne gantamisina ijaajjo'o. Jorisa ganta'a lasage karaxxi minenne aagissa'a ee karaxxi mi'n egeraancho «Qoxxitaa egere» yita'a ijaajjo'o. Ixxim ee ijaajo aa'aa lasage ee karaxxi mi'nnaannonne kosh woronne aagisaa ixxuwwika lokko gudeeranne edaa ganqaa'aa karukko. Hii'mmaannonne luxxi baqitenne Phaawuloosii Sillaasii Waa'a uunxitu'uuyyii mazmuura zammattu'uuyyii karanto'i manni macceessam hee'llo'o. Dangonnem karaxxi min heekke'ooqaxa malaayyaamisa uulli huxe'ukkaare ee ammanchom gooccuwwi hundim fooqukko. Odim annannichchom karakko'i xaar tiramukko. Karaxxi mi'n egeraanchim diriiriinsi baqu ammanenne gooccuwwi fooqaakkoo moo'aa karanto'i manni fitta'a matto'oka labisaa bisa'inne ixxi gaga sheena xeephukko. Ihukkaarem Phaawuloos «Neese hundichchim keyye yoommine; ki gaganne matem joram afissitte» yaa shuuraa wocukko. Ixxim sha'a eebisaa geeraa aagaa lobakata baddaa huxe'ukkuuyyi Phaawuloosinaa Sillaasinaa otossukko. Ee lasage ixxim ixxuwwa biiranne fissaa «I moollanno'o, an gatoommisina maha issimmi hasisookko?» yaa xa'mmukko. Ixxuwwim «Moollanni Yesuusanne amma'nne! Atii ki mi'n abaroosii gattakkamo» yito'o. Ee lasage ixxenaa ixxi mi'n abaroosinaa hundinam Moollanni sagara kutto'o. Ee ammanchom ee hiimonne oo egeraanchi ixxuwwa amadaa maraa ixxuwwika omara aanshaa lasage ixxii ixxi mi'n abaroosii xammaqanto'o. Ixxuwwa ixxi mine massaa hurbaata hincaa'aa lasage ixxii ixxi abaroosii maqirem Waa'anne amma'nnito'i bikkina lobakata liiranto'o. Uulli soodaa lasage daannuwwi «Ee manna mattona fataki'llehe» yita'a gaadaano asse'llo'o. Oo karaxxi mi'n egeraanchim «Fatakantakkamisina daannuwwi manna asse'llo'ookko; kaba fittakka'a xumminne mallehe» yaa Phaawuloosina kurukko. Ihukkaarem Phaawuloos «Oroo'm uulli mannina yoo hanqi niina hee'ukkuuyyi neese seer yoobee'isinne oogatta'atii ganta'atii karaxxi minenne darabba'a kaba odim maaxaqqanne hinkid ‹Tirantakka'a mallehe› yitamuulla? Kabadem ixxuwwi waatta'a tittona bagaan malloommoyyo!» yito'o. Oo asse'anto'i gaadaanim ee woshsha daannuwwina kutto'aare daannuwwim Phaawuloosii Sillaasii Oroo'm uulli manni ikko'isa laqqo'i ammanenne lobakata baddito'o. Ee bikkina oo daannuwwi waatta'a karaxxi miniinsi fissita'a «Urimma issehe» yita'a beero'iinsi fittamisina uunxito'o. Ee lasage karaxxi miniinsi fitta'a Liidiy mine matto'o. Eekke'em amma'nnaano moo'llo'i ammanenne qoxxissa'a sogga'a ixxuwwiinsi annanni ikka'a matto'o. Phaawuloosii Sillaasii Anfiphoolaa Aphpholooniyaa yakkam beero'oo higga'a matta'a Tasalonqe'i beero'o affo'o. Ee beero'onnem Ayihuxxi manni wixxixxi min hee'ukko. Ixxuwwiinsim Ayihuxxi mannik mat mat keen, Waa'ina gatto'oo Giriik mannikii la'anto'oo meentik lobakat keenii amma'nnita'a Phaawuloosinnee Sillaasinnee mat ikko'o. Ihukkaarem Ayihuxxi manni Phaawuloosannee Sillaasannee to'achchita'a meeranne manniinsi boggam jor manna wixxaa'lla'a ee beero'onne hambalaachcha ki'issamisina soggo'o. Ee lasage beero'i manni hundam wixxaa'lla'a Phaawuloosaa Sillaasaa mannina fissita'a uwwiteena Iyyaasoona yakkam manchi mine kibbito'o. Kibbito'aarem ixxuwwa siiddeena xantobee'i bikkina Iyyaasoonaa mat qax amma'nnaanoo amadda'a gosaassu'uuyyi daannuwwi beyyo massito'o. Oo amaddo'i keenim «Uulli hundam iimii aadii hambaaccam hee'llo'i keen ka uullam waatto'ookko. Iyyaasoonim ixxuwwa aa'aa gassoohane. Ixxuwwim ‹Yesuusa yakkam adil yookko› yita'a Oroo'm adi'l seera sabbam keeno» yitu'uuyyi shuuttam hee'llo'o. Minaadabii gassaanii ee woshsha macceesso'i ammanenne hambalaachchanto'o. Ee lasage ixxuwwi Iyyaasoonaa mulli keenoo lubbato weeshissa'a mattona utto'o. Amma'nnaan ee ammanchom Phaawuloosaa Sillaasaa hiimonne Beeriy beero'o mattamisa issito'aare ixxuwwim matta'a affa'a lasage Ayihuxxi manni wixxixxi mine matto'o. Oo Beeriy beero'onne hee'llo'i Ayihuxxi manni Tasalonqe'i manniinsi haraar sawwit yoo manni hee'llo'i bikkina Phaawuloos losisam hee'u losishsha lobakat qulunxinne macceessam hee'llo'o. Oo Phaawuloos losisam hee'u losishshi hanqida'e ihukkisa laqqeena ballina ballina Keesammi Kitaaba saarayyitu'uuyyi qananaa'llam hee'llo'o. Ixxuwwiinsim Ayihuxxi mannik dut keenii Giriik manniinsi la'anto'oo meentikii goo'nnekii lobakat mannii amma'nnito'o. Ihukkaarem Tasalonqe'enne hee'llo'i Ayihuxxi manni Phaawuloos odim Beeriy beero'onnem Waa'i sagara alallaatukkisa laqqo'i ammanenne ee beero'om waatta'a hambalaachchita'a Phaawuloosaamonne manna ki'isso'o. Phaawuloos Atee'n beero'onne Sillaasaa Ximootoosaa egerukkuuyyim Ateenanne hee'llam manni Waa'i bikkenne otossitam luwwi wo'mmukkisa moo'aa ixxi tiironne lobakata kichche'ukko. Kichche'u bikkina wixxixxi minenne Ayihuxxi manninnee Waa'ina gatto'i mulli manninnee odim ballina ballina meeranne edamu keen hundinnem lobakata wocam hee'ukko. Ephiikoroosa yakkam kolli manniinsii Istooka yakkam kolli manniinsii lachchaammuwwi hee'llo'i mat mat keen Phaawuloos beyyo waatta'a «Ku wocaa hoogoobee'i manchi mayyoolla?» yito'o. Odim mulli keenim Phaawuloos Yesuus bikkinaa kichchi bikkinaa losisu bikkina «Neese lanqoombee'i dut waa'i bikkina kurookkoka laboolla» yito'o. Eehid yito'okim Atee'n mannii mulli uulliinsi waatta'a Atee'n beero'onne hee'llam mannii hundim haareechchi woshsha wocimminnee macceesimminnee ammane higissam hee'llo'o bagaan hore'em mulluwwinne ammane higisimma iittitam hee'llo'oyyo. Ee ammane Phaawuloos Arfaagoosanne wixxu manni lambe'enne uullaa «Atee'n manna, ki'nnuwwi lobakat luwwanne amma'nnitakkam keen ikkakko'isa an qoossaa la'aammo. Eehid yeena xanummok an ki'nnuwwi beero'onne daba'llamummuuyyi Waa'i bikkenne ki'nnuwwi otossitakkam luwwaa ee keeninam diinate kitimtakkam beyyuwwaa moo'ummo. Ee kitimtakkam beyyuwwaannonne matonne ‹La'akkambee'i waa'inatte› yoo luwwi kitaabamaakkoo moo'ummo. Kaba an ki'nnuwwina alallaatoommok laqqakkoo'n otossitakkam Waa'i bikkinatte. Uullaa uullanne yoo luwwaa hundam qooccu iimaninaa uullinaa Moollanni Waa'i manni baxu minenne hee'ooyyo. Mannina fooree fooshshaa odim hasisoo luwwi hundam uwwukkok ixxotte ihu bikkina ixxena hanqatoo luwwi mahim bee'e. Manni hara'mmatim ixxena hasisooyyo. Ixxim minaadab hundam mexxo'i manchiinsi qooccaa uulli hundannem wo'mmitamisa issukko. Odim ixxuwwi hee'llam doollee hee'llam beyyoo gaassaahim gabala issukko. Waa'i ee hundam issukkok manni ixxuwwi tiirinnem ki'lla'a ixxo hassamisinaa hassa'atim siiddamisinaa hasu bikkinatte. Ihukkaarem Waa'i niinniinsi annannichchiinsim qee'lloo'n yoohane. Ki'nnuwwiinsi mat manchi ‹Neese foore siindummok, mikmiknoommokii yoommine'ekii ixxennette› yaakko. Odim ki'nnuwwiinsi mat mat hayyo'uwwi ‹Neese hundichchim Waa'i ooso› yito'ookko. Eehaara'i ‹Neese Waa'i ooso› yinoomman ihulas manni qooroominne worqiinsi, biriinsii kiniinsii baxamu luwwa ‹Waa'i kaka labookko› yinaa sawwimmi hasisooyyo. Ixxuwwim lehiinsi kichchi woshsha macceesso'i ammanenne mat mat keen ixxonne naacimma asheetto'o. Ihukkaarem mat mat keen «Ka woshsha kiinniinsi endaa macceenseena hansoommo» yito'o. Ee lasage Phaawuloos ixxuwwi lambe'iinsi uraa firukko. Ee keeniinsi mat mat keen amma'nnita'a Phaawuloosinne mat ikko'o. Amma'nnito'i keeniinsim Arfaagoos dummichchi daannuwwiinsi mat hee'u Diyyoonaasiyoosii Damaarse yakkam meentichchoo mulli keenii ixxuwwinne maqirem hee'llo'o. Ee lasage Atee'n beero'iinsi firaa Qorontoos beero'o marukko. Ee Qorontoos beero'onnem Phaanxoos uullan ihoo mat Aqila yakkam Ayihuxxi manchi hee'ukko. Ixxim Phirisqile yamantam ixxi arennem ee beyyo maraa hee'ukkok Qalaawdiwoosa yakkam Oroo'm adil Ayihuxxi manni hundim Oroo'm beero'iinsi firoo'isina ijaajaa hee'u bikkinatte. Phaawuloosim ixxuwwinne edamukko. Phaawuloosik bax ee Aqilisam dukkaana gobimmi hee'u bikkina ixxuwwinne maqirem afuuraa dukkaana gobam hee'ukko. Ixxim Usheexxaxxi Ayyaamonne saantina saantina ee Ayihuxxi manni wixxixxi mine maraa Ayihuxxi manninaa Waa'ina gatto'i Giriik uulli manninaa Kiristoos bikkina caakkisaa kurukkuuyyi amma'nniseena yakam hee'ukko. Sillaasii Ximootoosii Maqeedoo'n uulliinsi waatta'a lasage Yesuus Gatisaanchi Kiristoosatte ihukkisa Ayihuxxi mannina hundi ammanem Phaawuloos losisamii kuramii hee'ukko. Ixxuwwim ixxo sabba'a game'llato lonsito'i bikkina «Ki'nnuwwi ki'nnuwwi gaginnem bi'llakkeena hassakkolas ki'nnuwwi quuxo! Anette ihummaare ki'nnuwwi xiigiinsi muccura; kabadiinsi ki'isaa an mulli minaadaphphi beyyo maroommo» yaa ixxeka eddechcha giggissukko. Ee bikkina Phaawuloos ixxuwwiinsi annanni ihaa Waa'ina garaakkoo Tiitoos Yoosxoosa yakkam manchi mine marukko. Ixxekim min Ayihuxxi manni wixxixxi mi'n gadanonnette hee'ukko. Ee wixxixxi mi'n awwonsaanchi hee'u Qarisphoosa yakkam manchi ixxi mi'n abaroosinnem Moollannanne amma'nnukko. Ee'isam Qorontoos beero'i mannik Phaawuloosiinsi macceessa'a dut keen amma'nnita'a xammaqanto'o. Ee beyyonne Phaawuloos Waa'i sagara losisukkuuyyi mat hiinchoo loh aganaa ixxuwwinne maqirem afuurukko. Gaaliyoosa yakkam manchi Akaaya yakkam uulla gassam hee'u ammane Ayihuxxi manni mat ikka'a Phaawuloosanne ki'lla'a amadda'a gassaanchi oogatoo beyyo massita'a «Ku manchi Seer yoobee'isanne manni Waa'ina otossoo'isa issoolla» yito'o. Phaawuloos woceena ihonam Gaaliyoos Ayihuxxi mannina «Ki'nnuwwi Ayihuxxi manni, macceessehe! Ixxi ki'nnuwwa hawwodaakkoohan te'im ki'nnuwwanne damigaakkoohan yakkota'n ki'nnuwwi ixxo kasassakko'oka macceesam hee'ummo. Ixxuwwi hundim ee ammane wixxixxi mi'n awwonsaanchi hee'u Soostinoosa yakkam mancho amadda'a gassaanchi Gaaliyoos illagenne ganto'aarem Gaaliyoos ee woshsha mahannem xigukkoyyo. Phaawuloos Qorontoosanne lobakat balla afuuraa lasage Sooriy uulla mareena amma'nnaano «Xummanne hee'llehe» yaa Phirisqilennee Aqilinnee maqirem maraa Kinkiroos beero'i afukkisam uga'a aagaa hee'u bikkina ixxi horoore hogoossaqqukko. Ixxuwwim markabanne aagga'a matta'a Efeesoo'n beero'o affa'a lasage Phirisqilee Aqilaa uraa Phaawuloos mullam Ayihuxxi manni wixxixxi mine maraa Ayihuxxi mannina caakkisaa losisam hee'ukko. Ixxuwwim ee beyyonne mat qax balla afuuroo'isina uunxito'aare afuurimma sabaa ixxuwwina «Waa'i yukkaare ki'nnuwwi beyyo mulli ammane daba'llaa waaroommo» yaa Efeesooniinsi markabanne aagaa ixxuwwiinsi annanni ihaa marukko. Qiisaariya afaa markabiinsi dillaa amma'nnaano xummaatiseena iim Yerusaaleema maraa ee beyyiinsim Anxooke'e dillukko. Ee beyyonnem matqaxa afuuraa lasage Galatiyaa Firge'ee yakkam uullanne beyyi hundam marukkuuyyi amma'nnaan hundam qoxxisam hee'ukko. Alaksaandir beero'onne qaramaakkoo Aphphuloosa yakkam Ayihuxxi manchi Efeesoona waarukko. Ixxi Keesammi Kitaaba lobakata la'oohanee danaamisa gudisaa wocoohanee hee'ukko. Ixxim Waa'i googo losaakkoohan hee'u bikkina malaayyi hundinnem Yesuus woshsha hanqo'isa wocamii losisamii hee'ukko. Ihona bagaan ixxi la'am hee'ukkok xale'i Yohaannis xammaqam hee'u xammaqancha hee'ukko. Ixxim Ayihuxxi manni wixxixxi minenne iggimminne wocimma asheerukko. Ihukkaarem Aqilii Phirisqilee ixxeensi macceessa'a lasage ixxo mine massita'a Waa'i googo edda'a danaamisa caakkissa'a kutto'o. Aphphuloos Akaaya yakkam uulla firaa mareena hasukkisa amma'nnaanina kurukkaare ixxuwwim ixxi sawwite aa'llo'o. Oo Akaayanne hee'llo'i amma'nnaanim ixxo aa'llamisina assi kitaaba kitaabba'a uwwito'o. Ixxim ee beyyo afaa lasage oo Waa'i eroomminne amma'nnito'i keen amma'nnatonne qoxxitamisina lobakata hara'mmukko. Yesuus Gatisaanchi Kiristoosatte ihukkisa Keesammi Kitaabiinsi qananaa'aa kurukkuuyyi Ayihuxxi manninne qoxxaallisa fitamaa neegaram hee'ukko. Aphphuloos Qorontoos beero'onne hee'onam Phaawuloos hanaa'n kollonne yoo uullinne higaa Efeesoo'n beero'o waarukko. Eekke'em mat qax amma'nnaano siidukko. Ixxim ixxuwwina «Ki'nnuwwi amma'nnitakko'i ammane Keesammi Ayyaana aa'llakko'onnihe?» yaa xa'mmukko. Ixxuwwim «Neese aa'nnummoyyo; hore'em Keesammi Ayyaan yoo'isam macceensummoyyo» yito'o. Ixxim «Eehaara'i ki'nnuwwi hinkido'i xammaqancha xammaqantakko'ok?» yaa xa'mmukko. Ixxuwwim «Yohaannis xammaqam hee'u xammaqanchannette» yita'a dabatto'o. Odim Phaawuloos «Yohaannis xammaqam hee'ukkok ‹Iinniinsi lasonne waaroohaannonne oohim Yesuusanne amma'nnehe› yaa kurukkuuyyi baaxiilo biira yimma moo'isoo xammaqancha» yukko. Ixxuwwim eekka macceessa'a Moollanni Yesuus summinne xammaqanto'o. Ee lasage Phaawuloos ixxi anga ixxuwwi hanenne issukkaare Keesammi Ayyaan ixxuwwanne dillukko. Ixxuwwim mulli suuminne wocimmaa hiraago wocimmaa asheetto'o. Ixxuwwi hundim tommoo lam manchoo ikkamqax hee'llo'o. Phaawuloos Ayihuxxi manni wixxixxi minenne sas agan afeebe'e Waa'i adilla'n bikkina iggimminne caakkisaa kurukkuuyyi amma'nniseena yakam hee'ukko. Ihukkaarem mat mat keen wodano kin issita'atii amma'nnimma sabba'atii manni illagenne Moollannika Googo jor issita'a game'llitu'uuyyi woccam hee'llo'i bikkina Phaawuloos amma'nnaano ixxuwwiinsi annanni issaa massaa Xiraanos haraar minenne ballina ballina losisam hee'ukko. Ee'isinne Phaawuloos lam hiincho ihooqaxa muroo'n losisu bikkina Issiya yakkam uullanne hee'llam Ayihuxxi mannii mulli minaadabii hundim Moollanni sagara macceesso'o. Waa'i Phaawuloosinne ihaa annanni ihaakkoo maalalsiisoo aganna issam hee'ukko. Phaawuloosika sabbatam ihukko edde'u eddechcham ihukko massakka'a xissu mannanne issakkamaare oo xissu manni fayye'am hee'ukko. Odim habus amadu mannannem issakkamaare ee manniinsi habus firam hee'ukko. Ee ammane Ayihuxxi mannik mat mat keen habusa fissitu'uuyyi do'llam hee'llo'i kee'nnek «Phaawuloos kuroo Yesuus summinne fittakkamisina neese ijaanjoommuulla» yitu'uuyyi Moollanni Yesuus summinne manniinsi habusa fissiteena yakitam hee'llo'o. Ayihuxxi mannina hundiinsi lob qeessichchi hee'u Asqeewwik lamar oos ee'isa issitam hee'llo'o. Ihukkaarem oo habus ixxuwwina «An Yesuusam la'oommo, Phaawuloosam la'oommo; ihukkaarem ki'nnuwwi ayyayyaamo?» yukko. Oo habus amadaa hee'u manchi ixxuwwanne xophaa ixxuwwi hundam malaayyisaa kaa'aa ixxi miniinsi umba'ad issaatii omassaatii hollukko. Efeesoo'n beero'onne hee'llam Ayihuxxi mannii Yihud ikkobee'i mulli mannii hundim ee woshsha macceesso'i ammanenne baa'lla'a Moollanni Yesuus summa lobakata lonsito'o. Ee ammane amma'nnita'a hee'llo'i kee'nnek dut keen baxxo'i jor baxo biiraa yitu'uuyyi waattam hee'llo'o. Gennimmi baxo baxxam hee'llo'i kee'nnekim dut keen kitaabbuwwa wixxaa'lla'a eebba'a manni illagenne shokkiisso'o. Ee shokkiisso'i kitaabbuwwikam bito shallagakko'aare ontayyi kum diinaar ihukko. Ee'isinne Moollanni sagar ee uullanne lobakata haraarukkuuyyii qoxxukkuuyyii marukko. Oo luwwi ihaa higaa lasage Keesammi Ayyaan tiissiisukkaare Phaawuloos «An Maqeedoonaa Akaayaa afaa lasage Yerusaaleema maraa ee beyyiinsim Oroo'm uulla maraa moo'immi hasisookko» yaa qoodukko. Ee bikkina ixxena hara'mmitam hee'llo'i keeniinsi Ximootoosaa Eraasxoosaa lamom Maqeedoo'n uulla asse'aa ixxi hoffi ammaninam Issiyanne afuurukko. Ee ammane Moollanni gooqqi mashka'inne malaayyaam hambalaachchi ki'ukko. Ee hambalaachcha ki'isukkok kin biriinsi mu'uta baxoo Dimeexiroosa yakkam manchi hee'ukko. Ee Arxeemeese mi'n misila kin birinne baxxu'uuyyi Dimeexiroosii mulli keenii lobakat diinate siiddam hee'llo'o. Ee bikkina Dimeexiroos ee Arxeemeese mi'n misila baxxam keenoo eehido'i baxo baxxam mulli keenoo hundam mat issaa wixxaa'aa «Manna, neese goddinummok ka baxinnette ihukkisa laqqakkamo. Ku Phaawuloos ‹Manni baxu misilluwwi Waa'ayyo› yaa xale'i Efeesoo'n beero'onnette ihoo'n hofqax uulliinsi bagaan Issiyanne yoo minaadab hundam huushansaa dabarukkisa ki'nnuwwi gagim moo'llakko'ookkoo macceessakko'ookkoo. Kabadem ihukkaare ee woshshinne ki'ukkok neese banxoommi bax gadanchi xale'i ihoo'n lob waa'ik Arxeemeese min awwaad bee'an ihaa gateenatte. Odim Issiya'i uullannee uulli hundannemii manni otossoo lob Arxeemeese mi'n lombii nuurii gadamaakkoohan ihimmayyonnihe?» yukko. Ixxuwwi eekka macceesso'i ammanenne lobakata nadajjinne «Efeesoo'n Arxeemeese hundiinsi lobotane!» yita'a shuutto'o. Ee bikkina beero'i hundoomim dambaqukkaare Phaawuloosinne maqirem Maqeedooniinsi waatto'i beshshuwwa Gaayoosaa Arsixikoosaa lamom amadda'a manni wixxaa lello moo'oo beyyo geetto'o. Amma'nnaan maroobee'isa hootto'o bagaan Phaawuloosim ee manni beyyo mareena hasaa hee'ukko. Issiy uulli daannuwwiinsi Phaawuloosina beshshuwwi hee'llo'i mat mat keen manna asse'lla'a «Lello moo'lleena manni wixxoo beyyo mattoobee'isa» yita'a Phaawuloosa uunxito'o. Ee ammanenne manni hundim hambalaachchamam hee'u bikkina kolli mannii mat luwwa yukkuuyyi kollii odim mulli luwwam yukkuuyyi shuuram hee'ukko bagaan mahina wixxuda'em laqqam hee'llo'oyyo. Ee wixxu minaadaphphi lambe'enne hee'llo'i mat mat Ayihuxxi manni Alaksaandiroosa yakkam manchi wocoo'isina gafe'ansita'a manni illagenne fissito'o. Alaksaandiroosim manni sa'oo'isina anginne kuraa Ayihuxxi bikkina fitameena asheerukko. Ihukkaarem Alaksaandiroos Ayihudichchi ihukkisa laqqo'i ammanenne «Efeesoo'n Arxeemeese hundiinsi lobotane!» yitu'uuyyi lam sa'aata ihooqax ammane hundim mat ikka'a shuuttam hee'llo'o. Lasaanchonne Efeesoo'n beero'i gassaanchi manna sa'issiisaa «Efeesoon beero'i minaadaba, lob Arxeemeese minee iimaniinsi ubu Arxeemeese misilaa Efeesoo'n beero'i egeraanchi ihukkisa la'oobee'ek ayyi hee'aate? Eekka lagookkok ayyim bee'i bikkina ki'nnuwwi qoossitakkoo'n gaaggaabimminne matem luwwam issitakkotte. Ki'nnuwwi Arxeemees mi'n mu'uta game'ubee'i manna te'im ni waa'i Arxeemeese game'llubee'i manna amaddakka'a keyye eebbakko'ookko. Dimeexiroosii Dimeexiroosinne maqire baxxam keenii ayyem kasasseena hassolas niina daannuwwii uulli gassaanii oogattam ayyaam yoo bikkina eekke'e matta'a fitantona. Ki'nnuwwimdu eehanniinsi lophphoo luwwa hassakkolas dummichchi moo'ookko. Kaballa firu hambalaachchina ‹Ku hambalaachchi mahane?› yakka'a neesenne woshsha eebbakkota'n neese daballoommi dabachchi bee'i bikkina ku woshshi neese hawwisookko» yaa wixxu manna binnaa'ukko. Hambalaachchi uullaa lasage Phaawuloos manna asse'aa amma'nnaano mat issaa weeshisaa ixxuwwa qoxxisaa sogukko. Ee lasage «Xummanne hee'llehe» yaa ixxuwwiinsi annanni ihaa Maqeedoona marukko. Ee Maqeedoonanne yoo amma'nnaanom lobakata qoxxisaa sogaa lasage Giriika marukko. Ixxim ee uullanne sas agana afuuraa lasage Sooriya markabinne mareena sawwaakkoohaannonne Ayihuxxi manni ixxonne manna ki'isiisso'i bikkina Maqeedoo'n uullinne aa'aa daba'lleena murte'ukko. Ixxo geegeesso'i keenim Beeriy beero'i Phaaroos beet Suphaaxiroos, Tasalonqe'i beero'i manniinsi Arisxirookoosii Sikondoosii, Darbe'i beero'i Gaayoos, Issiya uulliinsim Ximootoos, Tiikiiqoosii Xarfimoosii hee'llo'o. Oo keenim higga'a matta'a Xiiroo'aadanne neese egetto'o. Ihukkaarem neese Qorosho'i uguxxi lasage Filiphphisiyusiinsi ki'nnaa markabinne onti balla taakke'nnaa lasage ixxuwwi hee'llo'i Xiiroo'aada amfaa ee beyyonne lamar balla afuullummo. Saantina luxxi ayyaa'm hiimonne Moollanni hurbaata inteena wixxinaammoohaannonne Phaawuloos sooxxi dari'n mareena sawwaa hee'u bikkina luxxi baqit afeebe'e lobakata qeeraa'l woshsha ixxuwwina wocukko. Ee neese wixxinaa hee'nnummi saxxi fooqanne dut sha'uwwi aphpham hee'ukko. Ee ammane Eewxeekiisa yakkam mat woraadichchi maskootanne afuuraa hee'ukko. Ixxim Phaawuloos woshsha qeeraa'llisu bikkina ee afuuru beyyonnem qallaa diriiraa hee'ukko. Ee bikkina ee afuuraa hee'u saxxi fooqiinsi aad ubukkaare manni geeraa maraa ki'isaa moo'oohaare lehaa hee'ukko. Ihukkaarem Phaawuloos dillaa maraa heeshaa ki'isaa qaaphphaa «Ixxek foor yookko! Muggitakkotte» yukko. Ee lasage Phaawuloos daba'llaa fooqa firaa amma'nnaaninne maqirem Moollanni hurbaataa mateeyyoo'm hurbaataa itaa uulli soodeebe'e qeeraa'l atoorachcha atooraraa ixxuwwiinsi annanni ihaa marukko. Ixxuwwim ee lehiinsi gatu woraadichcho mine amadda'a matta'a lobakata liiranto'o. Phaawuloos lokkinne mareena hasaa «Ki'nnuwwi higgakka'a mallehe» yaa neese ijaajaa hee'u bikkina «Ixxo aa'nnoommo» yinaa markabanne aangaa Asoos beero'o hingaa mallummo. Phaawuloos Miiliixiinsi manna asse'aa Efeesoonanne yo'i amma'nnaa'n lommanna ixxi beyyo waattamisina weeshisukko. Oo lommannim ixxi beyyo waatta'a lasage Phaawuloos «An ka Issiya yakkam uulla i lokkinne luxxeka hancaacummi ayyaamiinsi ki'isaa kaballi afeebe'e ki'nnuwwi lambe'enne hinkid hee'umda'e ki'nnuwwi gagim laqqakkamo. Ayihuxxi manni eesenne ki'lla'a afisso'i hawwi hundannem lobakata hawwummuuyyii indiidda dunummuuyyii Moollannina maashaalloominne awwaadummisa ki'nnuwwi laqqakkamo. An ki'nnuwwi wixxitakkam beyyuwwannee ki'nnuwwi minneewwannee ki'nnuwwina awwaadoo luwwa losisummoo kurummoo bagaan ki'nnuwwina awwaadoo luwwika maham gatisummoyyo. Oohim Ayihudii mulli minaadabii baaxiilo biira yimminne Waa'i kollonne daba'llita'a Moollanni Yesuus Kiristoosanne amma'nnitamisina kuraammo. Oono'o, kabadem an Keesammi Ayyaan ki'isukkaare Yerusaaleema maroommuulla. Ee beyyonnem eesenne mah afooda'e la'oommoyyo. Ihona bagaan karatii hawwii eesenne afoo'isa Keesammi Ayyaan afummi beero'i hundannem iina kuroolla. Ihukkaarem an hasoommok Waa'i issu eroommi mishiraachchi sagara kurimminne iina Moollanni Yesuus uwwu baxo guulleenatte ihu bikkina i gaga mahannem xigoommoyyo. «Kaballi afeebe'e ki'nnuwwi lambe'enne daba'llamummuuyyii Waa'i adilla'n bikkina kurummuuyyii hee'ummi eese ka lasage ki'nnuwwiinsi matim hore'em moo'oobee'isa an la'oommo. Waa'i ixxi Beet xiiginne ixxi gagina bitaa'u amma'nnaano allaattakkamisina Keesammi Ayyaan allaaraan issaa ki'nnuwwa doo'llu bikkina ee allaachchaa ki'nnuwwi gagaa qoxxitakka'a egellehe. An annanni ihaa maraa lasage ee allaachchina qishixxitambee'i oro'i'nnoo'i mogaalluwwi keen ki'nnuwwi lambe'enne aaggamisa an la'oommo. Ee'isam mat mat keen ki'nnuwwi lambe'iinsi ki'lla'a hanqa boqqissu'uuyyi dut amma'nnaano ixxuwwi kollonne dabattamo. Ee bikkina an ki'nnuwwa annannichchom sas hiincho hiimoo ballaa muroo'n indiidda dunummuuyyi sogummisa sawwitakku'uuyyi qoxxehe. «Kabadem an ki'nnuwwa qoxxiseenaa ixxi doo'llu keen hundinam uwwoo gulumma ki'nnuwwinam uwweenaa xanoo Waa'inaa ixxi eroommi sagarinaa yabo uwwaammo. An ki'nnuwwiinsi ayyeensim bir ihukko te'im worqi ihukko te'im eddechchi ihukko maham heele'ummoyyo. I gaginatte ihukko iinninne yo'i i beshina hasisoo luwwi hundam i anginne baxummuuyyi hara'mmam hee'ummisa ki'nnuwwim laqqakkamo. ‹Aa'oohaanniinsi uwwookkok maasse'amaakkoohane› yoo Moollanni Yesuus sagara sawwitakku'uuyyi anginne baxxakka'a hoogu keeno hara'mmitakkamisa an dut googinne ki'nnuwwina moo'isaammo» yukko. Phaawuloos eekka wocaa guullaa ixxuwwi hundinnem guruphphaa Waa'a uunxaa lasage hundim wi'llitu'uuyyi Phaawuloosa qaaphphita'a suunqito'o. Lophphita'ahim kichche'llo'ok ixxuwwi od ixxo moo'lleena xantambee'isa kuru bikkinatte. Ee lasage ixxo markabanne aagoo beyyi afeebe'e geegeesso'o. Efeesoo'n amma'nnaa'n lommanna «Xummanne hee'llehe» yinaa ixxuwwiinsi annanninkaa markabanne aangaa mallaa Qosa amfummo. Ee beyyiinsim la'm ballina Oroodoosa mallummo. Odim ee beyyiinsim Phaaxir beero'o mallaa amfummo. Ee Phaaxiriinsi Finqe'e maroo markaba siindaa ee markabanne aangaa mallummo. Qoophphiroosa amfeena hincinaa lasage ee Qoophphiroosa qeddi kollonne gatinsaa Sooriyanne yoo Xiiroos beero'onne markabanne iyyiisakko'i mu'uta dilliisakkam bikkina ee Xiiroosanne dillinummo. Ee beyyonnem amma'nnaano hansaa siindaa ixxuwwinne maqirem lamar balla afuullummo. Ixxuwwa Keesammi Ayyaan wocisukkaare Phaawuloosina «Yerusaaleema mattitte» yito'o. Ihukkaarem neese ixxuwwiinsi annanni inkaa malloommi ayyaam afukkaare ixxuwwi, ixxuwwi meentii ixxuwwi oosii hundim beero'iinsi fissita'a dambalaq tochchi afeebe'e geegeesso'aare ee beyyonnem hundim guruphphinaa Waa'a uunxinaa lasage hundichchim «Xumma hee'llehe» yaqqammaa markabanne aangaa mallummo. Ixxuwwim ixxuwwi mine daba'llita'a elle'llo'o. Ee Xiiroosiinsi ki'nnaa dambalaq googo guullinaa lasage Pheexeleemaayisa yakkam beero'o amfaa ee beyyonnem amma'nnaano xummaatinsaa ixxuwwinne maqirem mat ayyaamo honsummo. Ee beyyiinsim la'm balla ki'nnaa Qiisaariya mallummo. Ee beyyonnem amma'nnaanina awwaaddamisina doo'llanto'i lamarem manniinsim mat hee'u Filiphphoos ee Qiisaariyanne hee'ukko. Neesem ixxi minenne usheexxinummo. Ixxim mishiraachchi sagara kuraanchi hee'ukko. Hiraago kuttam soor baajaam landim ixxena hee'llo'o. Ee beyyonne mat qax balla afuullaammoohaannonne Agaaboosa yakkam manchi Yihuxxi uulliinsi waarukko. Ixxim hiraagaanchi hee'ukko. Ixxi ni beyyo waaraa Phaawuloos lade'oo sabbata aa'aa angaa lokkoo ka'llaa «Keesammi Ayyaan ‹Ka sabbaxxi annichcho Yerusaaleemanne hee'llam Ayihuxxi manni ka'isa katta'a mulli minaadabina higissa'a uwwitamo› yoolla» yukko. Eekka macceensummi ammanenne neesee ee beyyonne hee'llo'i mulli mannii Phaawuloos iim Yerusaaleema maroobee'isina uunxinummo. Ihukkaarem Phaawuloos «Mahina ikkakkamisa? Wi'llitakku'uuyyi i wodano mahina hoogissakkamuulla? Anette ihummaara'i Yerusaaleemanne i Moollanni Yesuus bikkina karanchi xale'i ihoo'n leheenam gudaammoohane» yukko. Ixxi ni sogitano aa'imma sabukkaare neesem «Waa'i yukkok ihona» yinaa ullummo. Mat qax balliinsi lasage mu'uta gudixxinaa Yerusaaleema malleena ki'nnummo. Yerusaaleema amfummi ammanenne Qiisaariyanne hee'llo'i amma'nnaa'nnek niinninne maqire matto'i keen Qoophphiroosanne luxxeka amma'nnito'i keeniinsi mat hee'u Minaasoon minenne usheexxinona massito'o. Yerusaaleemanne hee'llo'i amma'nnaanim neese liiranchinne aa'llo'o. La'm balla Phaawuloos niinninnem Yaaqooba moo'eena maraakkoohaannonne amma'nnaa'n lommanni hundim eekke'e hee'llo'o. Phaawuloos ixxuwwa xummaatisaa lasage Waa'i ixxenne ihaa mulli minaadaphphi lambe'enne issu luwwi hundam ogorinne kurukko. Ixxuwwim eekka ixxeensi macceesso'i ammanenne Waa'a galaxxito'o. Ee lasage Phaawuloosina «Niyyabbaayyo, Ayihuxxi manniinsi mee'i kum amma'nnitoda'e ixxuwwi hundim ixxuwwi Seerina hinkaa'nna to'achchitamda'e at laqqootto. Ixxuwwinam ‹Phaawuloos «Mulli minaadaphphi uullanne yo'i Ayihuxxi manni hundim Muse'i Seera egerimmi, ooso ballachchimmii anno'i losanom egerimmii hasisooyyo» yaa losisoolla› yakka'a kurakko'ookko. Hanqinam at waattittisa ixxuwwi ma'isinnem macceessoo'n gattambee'i bikkina maha issimmi erane? Ee bikkina kaba at ka'isa isse. Uga'a aaggo'oo soor manchi niinninne yo'o. At ee manninne mattaa ixxuwwinne maqirem ki gaga muccusse; ixxuwwi kitimina miqqam luwwam at miqe. Ee lasage ixxuwwi horoore hogoossaqqitamo. Ki gagim seera egettoohan ikkittisaa ixxuwwi kutto'i woshshi hundim qophphan ihukkisaa eehanninne laqqamo. Ihukkaarem mulli minaadabiinsi amma'nnito'i keenina qophpha'n waa'ina kitimamu diinaxxi maara itimma, xiiga itimma, bayita itimmaa saa'immaa uttamisina woshsha mullaa assi kitaaba asse'nnaammo» yito'o. Ee lasage Phaawuloos la'm ballina ee manninne maqirem ixxi gaga muccussaqqaa hinkaa'n balli afeebe'e muccurakkamda'ee annannichchim kitima hinki balla hincaa'llamda'ee qeessichchina kureena Keesammi Mine marukko. Ixxuwwim muccuttam lamarem ballim beeddeena ihaakkoohaannonne Issiyiinsi waatto'oo Ayihuxxi manni Phaawuloos Keesammi Minenne yoo'isa moo'lla'a manni hundam ixxonne ki'issa'a ixxo amadda'a «Isra'ee'l minaadaba, niina hara'mmehe! Beyyi hundannem ni minaadaba, ni Seeraa ka keesammi beyyoo manni saboo'isa losisookkok ka mancho. Odim eehanniinsim higaa kaba ka keesammi beyyo Giriik manna amadaa aagaa Keesammi Mine haashaassaakko» yita'a laatto'o. Eehid yito'i mashka'im kanniinsi illageen Xarfimoosa yakkam Efeesoo'n mancho ixxenne maqire beero'onne moo'lla'a hee'llo'i bikkina Phaawuloos Xarfimoosa amadaa Keesammi Mine waarukkoka labissa'atetti hee'ukko. Ee lasage beero'i minaadab hundim mat ikka'a geetta'a matta'a Phaawuloosa amadda'a gosaassu'uuyyi Keesammi Miniinsi fissita'a ee ammanem gooccuwwa xuffo'o. Ixxom shiteena amaddo'i ammanenne «Yerusaalee'm beero'i hundannem hambalaachchi firaakko» yakkam woshshi Oroo'm gaadaa'n ijaajaanchina afukko. Ixxim gaadaanoo xibbi halaqquwwaa amadaa ee hambalaachcha ki'isu kee'n beyyo qaqqisaa geerukkuuyyi dillukko. Ixxuwwim ee ijaajaanchoo gaadaanoo moo'llo'i ammanenne Phaawuloosa aphphisimma utto'o. Oo ijaajaanchim afukkisam Phaawuloosa amadaa lam chimchiminne karakkamisina ijaajukko. Odim ee lasage «Ku manchi ayyette? Issu luwdu maruchcho?» yaa minaadaba xa'mmukko. Ee beyyonne wixxu mannik kollii mat luwwa kolli odim mullekam kuttu'uuyyi hambalaachchitam hee'llo'i bikkina hanqo'i woshsha la'eena xanukkoyyo. Ee bikkina gaadaan garoo beyyo Phaawuloosa massakkamisina ijaajukko. Minaadab lobakat quunqinne ki'aa hee'u bikkina gaadaan garoo beyyi gardabba affo'i ammanenne gaadaan Phaawuloosa iyyito'o. Ixxonne ki'aa hee'u mannim «Ixxo shi'llehe!» yaa shuurukkuuyyi awwonam hee'ukko. Gaadaan Wiidda'n beyyo Phaawuloosa agisseena ikko'i ammanenne Phaawuloos ee ijaajaanchina «An kiina mat luchcho woconnihe?» yaa xa'mmukko. Oo ijaajaanchim «Giriik suume laqqoohanennihe? At ka abbis ammanenne bangujjaata ki'issaa manna shu kee'nneka soor kum manna amaddaa udma'a aagti Gibxi uulli manchoyyonnihe?» yaa xa'mmukko. Phaawuloosim «An Kilqe'enne yoo hundiinsi lob Xarsees beero'onne qaramaa ee beero'onnem hee'oommi Ayihudichcho. Hay ka mannina mat luwwa wocoommo» yaa uunxukko. Oo ijaajaanchim «Woce» yaa lasage Phaawuloos gardabbanne uullaa manni cawwoo'isina anginne kurukkaare manni cawwukko. Phaawuloosim Ibro'isinne «Iyyanno'oo iyyabbaayyuwwa, kaba eese kasassakko'i woshshisina an dabaroommi woshsha macceessehe» yaa wocimma asheerukko. Phaawuloos Ibro'isinne wocukkuuyyi macceesso'i ammanenne hore'em cawwito'o. Phaawuloosim ixxuwwina «An Kilqe'enne yoo Xarsees beero'onne qaramaammoo Ayihudichcho; ihona bagaan li'ummok ka Yerusaalee'm beero'onnette ihaa eese losisukkokim Gamaaliyaalatte hee'ukko. Odim niyyanno'i seeram mahim gatoobee'isa qoxxaa losaa kaballa ki'nnuwwi hundim to'achchitakkamisam Waa'ina to'achchoomman hee'ummo. Moollanni googo awwontam goonaa meentoo amadaa karaxxi minenne aagisaa sheena hawwisam hee'ummo. Ku an wocoommi woshshi qophphan ihubee'isa hundiinsi lob qeessichchii dummichchi daannuwwii hundim kutteena xantamo. Eehanniinsim Damaasqo'i beero'o maraa ee beero'onne yo'i amma'nnaano amadaa woroommaare Yerusaaleemanne karantamisinaa guzumo'antamisinaa kitaabamu assi kitaaba aa'ummok ka ixxuwwiinsetteme. «An Damaasqo'i beero'o marummuuyyi afeena ihaammoohaannonne balli kolli ammanenne dangonnem iimaniinsi malaayyaam caakki i kululleetanne caakkukko. An uullanne ubaa yoommaannonne ‹Saawula! Saawula! Eese mahina hawwissoolla?› yoo sagara macceesummo. Anim ‹I Moollanna! At ayyette?› yaa xa'mmummo. Ixxim iina ‹An at hawwissoo Naazireexxi Yesuusatte› yukko. Iinninne maqire hee'llo'i keen caakka moo'llo'o bagaan iinninne mayyaa wocoolda'e macceesso'oyyo. Anim ixxena ‹I Moollanna! An maha isso?› yaa xa'mmummo. Ixxim iina ‹Ki'llaa Damaasqo'i beero'o mare. At issitona gudisummi luwwi hundam eekke'e kurakkamo› yukko. Ee caakki belellaaxxi lophphimmiinsi ki'ukkok i illi qooqu bikkina iinninne maqire hee'llo'i keen masakkita'a Damaasqo'o afisso'o. «Ee beero'onnem Waa'ina garaakkoo seeram erisa egeroo Hanaaniya yakkam manchi hee'ukko. Ixxom ee beero'onne hee'llam Ayihuxxi manni hundim lobakata lonsitam hee'llo'o. Ixxim waaraa i gadanonne uullaa ‹Iyyabbaayyi Saawula, ki illi fooqihona!› yukkaare ee ammanchom i illi fooqaa ixxo moo'ummo. Ixxim iina ‹At ixxi doo'lla laqqoo'isina, ixxeka Xummaanchi awwaadaancho moo'lloo'isinaa ixxi wocoo woshsha macceessoo'isinaa niyyanno'i Waa'i keese doo'llaakko. Doo'llukkokim at ixxi bikkina moo'llittokaa macceessittokaa manni hundinam kuttoo'isinatte. Kaba at maha egettaate? Ki'llaa ixxi summa weeshshittuuyyi xammaqantaa ki baaxiiliinsi muccure› yaa kurukko» yukko. «An Yerusaaleema daba'llaa maraa Keesammi Minenne Waa'a uunxummuuyyi hee'onam kaalti moo'amukko. Ee kaaltannem Moollanni iina ‹At i bikkina kuttoottoka ixxuwwi macceessambee'i bikkina Yerusaaleemiinsi qaqqissaa fire› yukkuuyyi moo'ummo. Anim ixxena ‹Moollanna! An keese amma'nnu keeno wixxixxi minneewwa maraa amadaa karummisaa ganummisaa ixxuwwi gagim laqqamo. Kiina naqqasaanchi hee'u Isxifaanoosa shakko'i ammane an i gagim ixxo shimmanne iittamaa hee'ummi bikkina ee beyyonne uullaa ixxo shoo kee'nneka eddechcha egeraa hee'ummo› yaa dabarummo. Ixxim iina ‹An keese mulli minaadaphphi beyyo asse'eenatte ihu bikkina Yerusaaleemiinsi fittaa mare› yaa kurukko» yukko. Eehid yaa woceebe'i afeebe'e Phaawuloos woshsha ixxuwwi macceessam hee'llo'o. Ihukkaarem eekka macceessa'a lasage «Ixxi ka uullanne hee'eena laboobee'i mancho; shitakka'a hoollehe!» yitu'uuyyi sagara iimaa'lla'a shuutto'o. Ixxuwwim nadadda'a shuuttu'uuyyi edde'llo'i eddechcha binbinnaa'llu'uuyyi darabbamii diram hafachchanne binnaa'llamii hee'llo'o. Ijaajaanchim gaadaan gattam beyyo Phaawuloosa massita'a ixxo manni sabaa shuuroo mashka'a gantu'uuyyi saarayyita'a laqqamisina gaadaano ijaajukko. Ihukkaarem ixxuwwi usinne katta'a ganteena guddo'oohaannonne Phaawuloos ixxi gadanonne uullaa hee'u xibbi halaqichchina «Mat Oroomekkichcho oogatamoo'nnim ka'isam karimmii ganimmii hanqannihe?» yukko. Oo xibbi halaqichchim eekka Phaawuloosiinsi macceesu ammanenne ijaajaanchi beyyo maraa «Ku manchi Oroomekkichchi ihu bikkina at ixxo maha issiteenatte?» yaa xa'mmukko. Ee bikkina oo ijaajaanchim Phaawuloos beyyo maraa «Hino'o kure, at Oroomekkichchonnihe?» yaa xa'mmukko. Phaawuloosim «Eeyya» yaa dabarukko. Oo ijaajaanchim «An Oroomekkichchi iheena xanummok lobakat diinate miqaatette» yukkaare Phaawuloos «An siixxummok qaranchinnetteme» yukko. Ee bikkina ixxo saarayyita'a xa'mmiteena gudda'a hee'llo'i keen ee ammanchom Phaawuloosiinsi annanni ikka'a matto'o. Oo ijaajaanchi Phaawuloosa kassiisaa hee'u bikkina Phaawuloos Oroomekkichchi ihukkisa la'u ammanenne lobakata baddukko. Oo ijaajaanchim Ayihuxxi manni Phaawuloosa kasasso'i luwwika hanqi woshsha la'eena hasu bikkina la'm balla daram qeessa awwonsaanii dummichchi daannuwwii hundim wixxitamisina ijaajaa Phaawuloosa tiraa woraa ixxuwwi illagenne uullisukko. Phaawuloos dummichchi daannuwwa xuxxaa moo'aa «Iyyabbaayyuwwa, an Waa'i illagenne kaballi afeebe'em muccura» yukkaare ee ammane hundiinsi lob qeessichchi hee'u Hanaaniy ixxi gadanonne uullu keenina «Kannika suume aphphissehe!» yaa ijaajukko. Phaawuloosim ee hundiinsi lob qeessichchina «At ka boorjo'o labakko'i gortanna labboohaanno! Waa'i keese aphphisookko! At Seer yoo'isanne oogatteena afuuttaa hee'llittuuyyi Seera ginditaa eese ‹Aphphissehe› yitoohonnihe?» yukko. Phaawuloos gadanonne uullita'a hee'llo'i keen «Waa'i doo'llaakkoo hundiinsi lob qeessichcho duuntoohonnihe?» yito'o. Phaawuloosim «Iyyabbaayyuwwa, hundiinsi lob qeessichchi ihukkisa an la'ummoyyo. Waa'i sagarim ‹Minaadaba gassaanchonne jora woccitte› yaakko» yukko. Phaawuloos ee dummichchanne hee'llo'i mannik kollii Saduuqaawe'i kollii odim Farisaawe'i ikko'isa la'u ammanenne «Iyyabbaayyuwwa, an Farisaawe'iinsi qaramaammoo Farisaawekkichcho. Kaba an oogato'ina hincummok ‹Lehiinsi kichchi yookko› yaa amma'nnummi bikkinatte» yaa shuuraa wocukko. Ixxi eekka wocukkisam Farisaawe'uwwaannonnee Saduuqaawe'i lambe'ennee woc ki'aa dummichchi lam ihukko. Mashka'oomim Saduuqaawe'i «Lehiinsi ki'immi, Waa'i asse'amaanii ayyaanii bee'e» yitam hee'llo'o. Ihukkaarem Farisaawe'i oo hundim yoo'isa amma'nnitam keen hee'llo'o. Ee ammanenne malaayyaam woc firaa Farisaawe'i kolli manniinsi Seera losisaa'nnek mat mat keen shoottita'a uullita'a «Ka manchonne matem bi'ishsham siindummoyyo. Ixxena ayyaan te'im Waa'i asse'amaan kuraatette ihookko» yita'a qoxxaallisa fitanto'o. Woc lophphukkuuyyi maru ammanenne Phaawuloosa aphphissa'a shitamaannina gaadaa'n ijaajaanchi baddaa gaadaanina «Mattakka'a Phaawuloosa ixxuwwi lambe'iinsi malaayyinne fissitakka'a gaadaa'n qash woro massehe» yaa ijaajukko. La'm balli hiimonne Phaawuloos gadanonne Moollanni Yesuus uullaa «Phaawuloosa, baddititte! Ka Yerusaalee'm beero'onne i bikkina woccittisam Oroo'm beero'onnem i bikkina woccootto» yukko. Uulli soodaa lasage Ayihuxxi mannik mat qax wixxita'a «Phaawuloosa shinoo'n maham intoommoyyoo angoommoyyoo» yita'a hide'anto'o. Ee woshshanne mat ikka'a iittanto'i keen soriinsi lophphitam manni hee'llo'o. Ixxuwwim qeessi awwonsaa'n beyyoo lommanni beyyoo matta'a «Neese ‹Phaawuloosa shinoo'n hurbaata suumennem amandoommoyyo› yinaa hide'nnaammo. Ee bikkina dummichchi lommanninne maqirem ixxi woshsha lobakata saarayyitakka'a laqqakkeena hassakko'an issitakka'a Phaawuloosa ki'nnuwwi beyyo asse'oo'isina ijaajaanchi beyyo asse'llehe. Oo ijaajaanchi asse'oo ammane Phaawuloos ki'nnuwwi beyyo affoo'nnim neese googonnem shineena gundaammo» yita'a kutto'o. Ee woshsha Phaawuloosina aayyi beet macceesaa gaadaa'n qash woro maraa Phaawuloosina kurukko. Kuraa lasage Phaawuloosim xibbi halaqquwwiinsi mato weeshaa «Ku beet ijaajaanchina kuroo woshshi yoo bikkina ixxi beyyo hincaa'e» yukko. Ee bikkina oo xibbi halaqichchi ee beeto ijaajaanchi beyyo awwonsaa massaa «Karamaa yoo Phaawuloos eese ixxi beyyo weeshaa ‹Ku beet ijaajaanchina kuroo luwwi yoo bikkina ixxi beyyo masse› yaakko» yaa kurukko. Oo ijaajaanchim ee beetika anga amadaa tochchonne fissaa «At iina kutteena hassitti luwwi maruchcho?» yaa xa'mmukko. Ee lasage oo ijaajaanchim «Ka woshsha eesenne kuttittisa ayyenam kuttitte» yaa ee beeto maroo'isa issukko. Oo beet maraa lasage ijaajaanchi xibbi halaqquwwika lamo weeshaa «Hii'mmaannonne sas sa'aatanne Qiisaariya mattamisina gaadaanika bisa'a lade'u kee'nneka lam xibbee lamarayyi faradaanoo lam xibbi bagadaanoo gudissehe. Odim Phaawuloos saa'llaa gassaanchi Filiksi beyyo maroo gammaamo gudissakka'a xumminne massitakka'a afissehe» yukko. Oo ijaajaanchim «Lombi yoo gassaanchi Filiksina an Qalaawdiwoos Lusiyoos xummaato hincaa'oommuulla. Ka mancho Ayihuxxi manni shiteena amadda'a hee'llo'o. Ihukkaarem an gaadaaninne maqirem afaa ixxi Oroomekkichchi ihukkisa la'aa ixxuwwiinsi gatisaammo. Ixxo mahina kasassoda'e la'eena hasaa hee'ummi bikkina ixxuwwi dummichchi daannuwwi beyyo massaa hee'ummo. Ixxuwwi see'l bikkina ixxo kasasso'isa siidummo bagaan ixxo shisiisoo te'im kassiisoo luwwika ixxonne maham siidummoyyo. Ixxo shiteena ki'llo'isa macceesummi ammanenne kasassam keenim ki'nnenne kasassamisina an ixxuwwina kuraa ki'n beyyo asse'aammo» yoo assi kitaaba kitaabaa asse'ukko. Oo gaadaanim ijaajaanchi kurukkisinne Phaawuloosa hiimonne massita'a Antiphaaxira yakkam beyyo afisso'o. La'm balla Phaawuloosa faradaan massitona lokkaan utta'a gattam beyyo daba'llito'o. Oo faradaanim Qiisaariya affa'a lasage gassaanchina assi kitaaba uwwita'a Phaawuloosa ixxi illagenne hincaa'llo'o. Gassaanchim assi kitaaba qananaa'aa lasage Phaawuloosa «At hinka'i uulli mancho?» yaa xa'mmaa Kilqe'i uulli manchi ihukkisa la'u ammanenne «Keese kasassam keen waatta'a affa'a lasage ki woshsha moo'oommo» yaa adil Heeroodis baxisu minenne Phaawuloosa egettamisina gaadaano ijaajukko. Onti balliinsi lasage hundiinsi lob qeessichchi Hanaaniy mat qax lommannaa Xarxuloosa yakkam hayyo'i manchoo amadaa Qiisaariya dillukko. Ixxuwwim gassaanchi Filiksi beyyo hincita'a waatto'i woshsha kutto'o. Filiksim Phaawuloosa weeshisaa woraa lasage Xarxuloos «Lophphitakko'oo Filiksa, ki'n gassi doollenne neese lobakat xummaa danaam luwwaa siixxinaammo. Ee ki'n issitakko'i eroommi hundam neese yoommine'i beyyi hundannem duuha'i hundinnem aa'nnoommuullak lobakat liiranchinnette. Ki'nne hawwisoobee'i hoffi woshshichchom wocummuuyyi erisa macceessakkamisina an uunxoommo. Kuk uulli hundannem yoo Ayihuxxi minaadaba hambalaachchukkuuyyii ee huushisaanchi Naazireexxi Yesuusa awwontam keeno awwonsukkuuyyii siindaammoo jor mancho. Eehanniinsi odim Keesammi Mine haashaasseena ihonam siindaa amandaa ni see'llisanne ooganteena hansaa hee'nnummo. Ihukkaarem gaadaa'n ijaajaanchi Lusiyoos lobakat malaayyinne waaraa niinniinsi hooraa massaa waallaa ki'nnenne kasansoommisina ijaajukko. Neese kasansummi woshshi hanqo'an ihukkisa laqqakkeena hassakkolas ixxo qoxxissakka'a saarayyimminne luwwi hundam laqqakkeena xantakkamo» yaa kasasimma asheerukko. Ayihuxxi manni hundim «Oo Xarxuloos wocu woshshi hundim hanqame» yita'a bakkiisso'o. Ee lasage Phaawuloos wocoo'isina gassaanchi anginne moo'isukkaare Phaawuloosim «Ki'n ka minaadabina lobakat hiinchiinsi ki'isaa gassaanchi ikkakko'isa la'ummi bikkina ixxuwwi eese kasasso'i woshshina liiranchinne dabaroommo. An Waa'ina otosseena Yerusaaleema marummaanniinsi tommiinsii lam balliinsii lophphoobee'an ihukkisa laqqakkeena xantakkamo. Ixxuwwim an Keesammi Minennettem ihukko, wixxixxi minneewwannettem ihukko, beero'onnettem ihukko mat manchinnem wocamummuuyyi te'im manna hambalaachchummuuyyi eese amaddo'oyyo. Kabadem ixxuwwi eese kasasso'i luwwanne mahannem neegatteena xantamoyyo. Ihukkaarem an ka ixxuwwi ‹Qophpha'n googo› yitamoka Seerii hiraagaa'n kitaabbuwwii yookkoka hundam amma'nnaa niyyanno'i Waa'ina otossoomman ihummisa ki'nnena caakkisaa kureena hasoommo. Odim ixxuwwi amma'nnitamisam er keenoo jor keenoo Waa'i lehiinsi ki'isoo'isa anim amma'nnoommo. Ee bikkina an hundi ammanem Waa'i illagennee manni illagennee i tiir acceeqasoobee'i heechcha hee'eena yakoommo. «An Yerusaaleemiinsi firummaanniinsi lobakat hiinchiinsi lasage kiti'm diinatee i shumo'ina tasbo'oo amadaa Yerusaaleema daba'llaa waarummo. Ixxuwwi eese amaddo'ok an Seer ijaajoo'isinne Keesammi Minenne i gaga muccussaqqaa amadaa waarummi luwwa uwwonatteme bagaan manna hambalaachchummaareyyoo Seera gindummaareyyo. Ihukkaarem Keesammi Minenne an hee'onam Issiyiinsi waatta'a eekke'enne hee'llo'i mat mat Ayihuxxi manni eese kasassam luwwi yoolas keyye waatta'a ki'n illagenne kasassona. Filiksi Moollanni Yesuusika googo erisa qoossaa la'am hee'u bikkina Phaawuloosa kasasso'i keenina «Gaadaa'n ijaajaanchi Lusiyoos aad waaroo ammane ki'nnuwwi fitantakkam woshsha oogatoommo» yaa mattamisa issaa mat xibbi halaqichchina «Phaawuloosa qoxxitaa egere. Ixxi qarmanni ixxena hasisoo mat mat luwwa uwwiteena waattam ammane hoottitte» yaa Phaawuloosina hofqax wolabbanom uwwukko. Mat qax ammaniinsi lasage Filiksi Ayihudichchotte hee'llo'i Diruusiile yakkam ixxi arenne maqirem waaraa Phaawuloosa weeshisaa woraa Yesuus Kiristoosanne amma'nnimmi bikkina Phaawuloosiinsi macceesukko. Phaawuloosim xabbeenoo'm bikkina, gaga ege'llimmi bikkinaa lasaanchonne mannanne Waa'i oogatoo oogaxxi bikkinaa kuru ammanenne Filiksi baddaa «Iina makku ammane weeshisoommo; kaba ihookko mare» yukko. Eehid yukkaarem Phaawuloos maqanxa uwwona hasaa hee'u bikkina dut ammane weeshisaa atoorassam hee'ukko. Lam hiinchiinsi lasage Filiksi beyyonne Barqiyoos Fisxoos gassaanchi ihukko. Filiksi Ayihuxxi manna liiranseena yaa Phaawuloos karamukkisam hee'ona urukko. Fisxoos ixxi gassoo uulla Qiisaariya yakkam beero'o maraa lasage ee beyyonne sas balla hosaa iim Yerusaaleema marukko. Ee beyyonnem qeessa awwonsaanii Ayihuxxi manna awwonsaanii Phaawuloosanne jolle eebba'a kasasso'o. Ixxuwwim kasassu'uuyyi Fisxoos ixxuwwina hara'mmoo'isina xa'mmita'a Phaawuloosa googonne egetta'a shiteena yita'a Fisxoos ixxuwwi beyyo Yerusaaleema asse'ona uunxito'o. Ihukkaarem Fisxoos ixxuwwina «Phaawuloos Qiisaariyanne karamaa yoo bikkina an abbis ammanenne Qiisaariya daba'llaa maroommi ammane ki'nnuwwi awwonsaa'nnek iinninne maqirem matta'a ixxi bi'isu bi'ishshi yoolas ee beyyonne eesenne kasassona» yaa dabarukko. Fisxoos ee Yerusaaleemanne ixxuwwinne maqirem sadeenti balliinsi te'im tommi balliinsi lophphoobeeqax balla afuuraa lasage Qiisaariya marukko. Maru la'm ballam oogaxxi minenne afuuraa Phaawuloosa worakkamisina ijaajukko. Phaawuloos waaraa afu ammanenne Yerusaaleemiinsi waatto'i Ayihuxxi manni awwonsaan Phaawuloosa kibbita'a uullita'a neegatteena xantambee'i dut kee'mmaalli woshsha kuttu'uuyyi kasasimma asheetto'o. Ihukkaarem Phaawuloos «An Ayihuxxi manni Seerannette ihukko te'im Keesammi Minennette ihukko te'im Oroo'm adilanne matem joram issummoyyo» yaa fitamonam Fisxoos Ayihuxxi manna liiranseena hasu bikkina Phaawuloosina «At Yerusaaleema mattaa i illagenne ka woshshina fitanteena hassoohonnihe?» yaa xa'mmukko. Ihukkaarem Phaawuloos «An fitameena laboo beyyonne oohim Oroo'm adi'l daannooma uwwu gassaanchi illagenne oogaxxameena uullaammo. Odim ki'nne guullitakka'a laqqakkamisam an Ayihuxxi manna mahannem hawwodummoyyo. Eese shisiisoo luwwika gootto'i luchchom issaammoohan ihuta'n ‹Iina leh laboobee'ane› yaa fitamam hee'ummoyyo. Ihukkaarem ixxuwwi eese kasasso'ok kora'i hanqi bee'i luwwannette ihu bikkina ayyim eese ixxuwwi anganne higisaa uwwoobee'isina i woshshi Oroo'm adil Qeesaar beyyo higoo'isina ki'nnenne laaraammo» yukko. Ee lasage Fisxoos ixxi sogaaninne maqirem atooraraa Phaawuloosina «Ki woshshi Oroo'm adil Qeesaar beyyo higoo'isina laattitti bikkina adi'l beyyo mattootto» yaa kurukko. Adil Agriiphphii Baarniiqee mat qax ayyaamiinsi lasage Fisxoosa xummaatisseena Qiisaariya matto'o. Ee beyyonnem lobakat ayyaamo afuutta'a lasage Fisxoos adil Agriiphphina «Filiksi karaa maraakkoo mat manchi keyye yookko. Yerusaaleemanne an hee'ummi ammane qeessa awwonsaanii Ayihuxxi lommannii ixxonne oogatoommisina kasassa'a hee'llo'o. Ihukkaarem an ixxuwwina ‹Kasasamu manchi kasasu kee'n illagenne uullaa oogaxxamoo'n ee'isam ixxonne oogatimmi Oroo'm mannina losanoyyo› yaa dabarummo. Ixxo kasasso'i keen mat ikka'a keyye waatta'a lasage dassoo'nnim la'm balla an oogaxxi mine aagaa afuuraa i beyyo Phaawuloosa woroo'isina mat mancho ijaajummo. Ixxo kasassam hee'llo'i keen keyye i illagenne uullito'i ammanenne ixxonne hinkaa'n bi'ishsha kutteenatte yaa egeraa hee'ummo. Ihukkaarem an egerummisinne kutteena xanto'oyyo. Ixxuwwi hundim ixxenne fitantam hee'llo'ok ixxuwwi gaqqi amma'nnaxxi duuha'inattee ‹Lehiinsi ki'aakko› yaa Phaawuloos fitamoo mat lehaakkoo Yesuusa yakkam manchi bikkinattee. An ee woshsha macceesaa lasage ee woshshika duuha'a qoossaa la'eena hawwisu bikkina ‹Yerusaaleema mattaa eekke'enne ka woshshisina fitanteena hassoohonnihe?› yaa xa'mmaa hee'ummo. Ihukkaarem Phaawuloos ixxi woshsha Oroo'm adil Qeesaar moo'aa muroo'isina hasu bikkina anim ixxo adil Qeesaar beyyo asse'eembe'i afeebe'e karaxxi minenne egerakkamisina issummo» yaa Phaawuloosika duuha'a kurukko. Agriiphphim Fisxoosina «An i gagim oo manchi wocoo woshsha macceeseena hasam hee'ummo» yukkaare Fisxoosim «Soodo ixxi wocukkuuyyi macceesseena xantootto» yukko. Ee bikkina la'm balla Agriiphphii Baarniiqee gaadaa'n ijaajaaninnee beero'i geejjuwwinnee kibbanta'a lobakat nuurinne manni wixxoo haraar minenne aagga'a afuutto'aare Phaawuloosa worakkamisina Fisxoos ijaajukkaare worakko'o. Worakka'a lasage Fisxoos «Adil Agriiphphii ka beyyonnem niinninne maqire yoontakke'i minaadabii hundim ka woshsha macceessehe. Yerusaaleemannee ka beyyonnee yo'i Ayihuxxi manni hundim ‹Ku manchi lehona!› yita'a laatto'o. Ihukkaarem an ka manchonne leho oogatisoo luwwika matem bi'ishsham siidummoyyo. Odim ixxi gagim ‹I woshshi adilluwwi adil Qeesaar beyyo Orooma higona› yaa laaru bikkina anim ixxo higiseena murte'aammo. Ihona bagaan ixxi woshshina an i moollannina adilina kitaaboommi la'amaakkoo caakki luwwi bee'i bikkina ki'nnuwwi illagenne woraammo. Lonsaahim adil Agriiphphi illagenne hincaa'aammo. Oohim ixxi woshsha saarayyinaa moo'nnaa lasage ‹Ixxi bikkina kitaaboommi sawwite siidoommo› yaatette. Mat karamu manchika woshsha caakkisakka'a kitaabakkoo'n daannoominne hanaan yoohaannina higisimmi laboobee'ane» yukko. Adil Agriiphphi Phaawuloosina «Ki gaqqi bikkina wocceena xantootto» yukko. Ee lasage Phaawuloos ixxi anga biddiqaa'aa ixxo kasasakko'i luwwina «Adil Agriiphpha, Ayihuxxi manni eese kasasso'i woshshi hundinam ka balla ki'n illagenne uullaa dabaroommisina gada'a siixxummi bikkina lobakata liiramaammo. Annannam ki'nne Ayihuxxi manni losanoo fitantam fitanchaa hundam qoossitakka'a laqqakkam bikkina an wocoommi woshsha iyyaqqimminne macceessakkamisina gaassaa ki'nne uunxoommuulla. An oosoommaniinsim ki'isaa qaramummi uullannee Yerusaaleemannee hinkido'i heechcha hee'umda'e Ayihuxxi manni hundim erisa laqqamo. Ha'yyitolas neese amma'nninoommi luwwi bikkinatte yakkota'n an Seera qoxxaallisa egettam Farisaawe'i kolliinsette ihummisa lobakat ammaniinsim ki'issa'a laqqam bikkina hasso'aare kutteena xantamo. Kaba an ka beyyonne oogaxxameena hincummok Waa'i niyyanno'ina ‹Issoommo› yu neeyyato issoo'isa amma'nnummi bikkinatte. Ee Waa'i ‹Issoommo› yu neeyyatom niikki tommii lamem Isra'ee'l sullim ‹Siixxinoommo› yita'a hiimoo ballaa Waa'ina qoxxita'a otossitamuulla. Adila, eese kaba Ayihuxxi manni kasasso'ok eehanni bikkinatte. Lehu keeno Waa'i lehiinsi ki'isoohan ihukkisa ka beyyonne yoontakke'i keen mahina amma'nnimma hooggakka'ate? An i gagim Naazireexxi Yesuus summa sabaa ‹Dut jor luwwa issimmi hasisookko› yaa sawwam hee'ummo. Ee bikkina an qeessa awwonsaaniinsi aa'ummi malaayyinne Yesuusanne amma'nnito'i kee'nneka dut keeno karaxxi minenne aagisaa kassiisimmi xale'i ihoo'n ixxuwwa shakku'uuyyim shimmanne iittamaa Yerusaaleemanne ee jor luwwa issummo. Odim dut ammane wixxixxi minneewwanne hundannem ganummuuyyi ixxuwwi amma'nnito'i Yesuusa game'llitamisa isseena yakam hee'ummo. Eehanniinsim ixxuwwanne lobakata nadadaa mulli uulli beero'uwwi afeebe'em laseesummuuyyi maraa jorisa hawwisam hee'ummo. «Adil Agriiphpha, ee woshshi bikkina eese qeessa awwonsaan ijaajjo'aare malaayye siixxaa Damaasqo'i beero'o marummuuyyi googonne hee'onam ballaannonne sammi gudonne i kululleetannee iinninne maqire mattam hee'llo'i kee'n kululleetannee eelliinchi caakkiinsi lophphoo caakki iimaniinsi belelaa iina moo'amukko. Neesem ee caakka moo'nnummi ammanenne hundim uullanne umbaa yoommine'aannonne iina Ibro'i manni suuminne ‹Saawula! Saawula! At eese mahina hawwissoolla? Qasoo xaara kade'llittaare hawwodantootto!› yoo sagara macceesummo. Anim ‹Moollanna! At ayyette?› yaa xa'mmummo. Moollannim ‹An at hawwissoo Yesuusatte. Kaba at ki'llaa uulle; an kiina moo'amummok iina awwaadaanchi issaa keese doo'lleenatte. At ka balla moo'llitti luwwaa ka lasagem an kiina moo'isoommi luwwaa mulli keenina kuttoo'isina iina awwaadaanchi issaa keese doo'lleenatte. «Adil Agriiphpha, iimaniinsi kaaltanne iina moo'amu woshshina an ijaajancha sabummoyyo. An gaassaatim Damaasqo'onne hee'llam mannina kuraa lasage Yerusaaleemanne, Yihuxxi uulli hundannee mulli uullannee hee'llam minaadab hundim baaxiilo biira yita'a Waa'i kollonne daba'llitamisinaa baaxiiliinsi daba'llito'isa moo'isoo baxo baxxamisinaa wocummaare Ayihuxxi manni eese Keesammi Minenne siidda'a amadda'a shiteena hasso'o. Phaawuloos ixxi gaqqi bikkina eehid yaa wocu ammanenne Fisxoos «Phaawuloosa, at machchaattaatto! Lobakat lachchi keese machchaassaakko» yaa shuuraa wocukko. Ihukkaarem Phaawuloos «Lombaam Fisxoosa, an ishittiggaa hanqo'i woshsha wocoommuulla bagaan machchaarummoyyo. Adil Agriiphpha, ka woshsha hundam ki'nne qoossitakka'a laqqakkam bikkina an lobakata iggaa ki'nnena woceena xanoommo. Odim ku woshshi maaxaqqanne ihoo'n yoohan ihu bikkina ki'nne ka woshsha hundichchom guullitakka'a laqqakko'isa an qoossaa la'aammo. Adil Agriiphpha, hiraagaan kutto'i woshsha amma'nnitakkamoyyonnihe? Amma'nnitakkamisam an la'oommo» yukko. Adil Agriiphphim Phaawuloosina «Ka gundi ammanenne eese Kiristoosanne amma'nnisseena yakitoollannihe?» yukko. Phaawuloosim dabaraa «Gundi ammanennette ihukko qeeraa'l ammanenne xale'i ki'nnette ikkakkoo'n kaballa iinniinsi macceesukkok hundim ka eesenne afu karatiinsi bagaan i'isa ihoo'isina Waa'a uunxoommuulla» yukko. Ee lasage adil, gassaanchi, Baarniiqee ixxuwwinne maqire afuutta'a hee'llo'i keenii afuuchchiinsi ki'llo'o. Ee beyyiinsi ki'lla'a matqaxa matta'a ixxuwwina'i ixxuwwim «Ku manchi ixxo shisiisoo te'im kassiisoo luwwa maham issukkoyyo» yitam hee'llo'o. Agriiphphim Fisxoosina «Ku manchi ‹I woshshi adilluwwi adil Qeesaarina higona› yubeeta'n tiramoohan hee'ukko» yukko. Neese markabinne Xaaliyaa'n uulla malloommisina woshshi qoodamu ammanenne Phaawuloosaa karanta'a hee'llo'i mannika matqaxaa adilluwwi adi'l gogota yamamoo gaadaaniinsi mat hee'u Yuuliyaasa yakkam xibbi halaqichchina higissa'a uwwito'o. Neesem Adraamiixiisa yakkam beero'i markab Issiya'i uulli markabbuwwi uulloo beyyo mareena gudaakkoo siindaa aangaa mallummo. Maqeedoonanne yoo Tasalonqe'i beero'onne hee'oo Arsixirookoosa yakkam manchim niinninne maqirem hee'ukko. La'm ballina Siidoo'n beero'o amfaa lasage Yuuliyaas Phaawuloosina qishixxam hee'u bikkina Phaawuloos amma'nnaa'n beyyo maraa ixxena hasisoo hara'mmato siixxona cawwam hee'ukko. Ee beyyiinsim markabanne aangaa ni illagenne malaayyaam hafachchi hee'u bikkina ee hafachchiinsi Qoophphiroosa yakkam uullanne daphphinaa mallummo. Mallaa Kilqe'aanninaa Phimfiliy uullinaa gadanonne yoo dambalaqa fillaa lasage Liiqiy uullanne yoo Mur beero'o amfummo. Ee beyyonnem Alaksaandir beero'iinsi Xaaliyaa'n uulla maroo markaba xibbi halaqichchi siidaa ee markabanne neese aagisukko. Ee markabinne qaphphinaa dut balla mallaa lasage lobakat hawwinne Kindoos beero'o amfummo. Ee beyyiinsi malloombee'isa hafachchi malaayyisaa hooru bikkina wo'i kibbaakkoo Qarxees uullanne daphphinaa mallaa Salmoona yakkam beyyi gadano amfummo. Ee beyyiinsim gammal gammala amandaa mallaa lobakat hawwinne Laasiy beero'ina abbisonne yoo Doo'lla yakkam beyyo amfummo. Googonne lobakat ammane higinsaa baaxii'l haafite siixxakkam ayyaam higaa hagayyi afaa hee'u bikkina markabinne marimmina amman jor ihukkisa la'aa Phaawuloos ixxuwwina «Manna, macceessehe; kanniinsi lasage malloommi googonne lobakat hawwi yoo bikkina mu'utannee markabannee xale'i ihoo'n manni foorennem lobakat bichchi afoo'isa iina moo'amoolla» yaa sogukko. Ihukkaarem xibbi halaqichchi Yuuliyaas ee Phaawuloos sogu sogitan ihoo'n markaba ushe'aanchikaa markaphphi annichchikaa woshsha lonsaa macceesam hee'ukko. Oo markab uulloo beyyi hagayye higisimmina makkoobee'i beyyi ihu bikkina lophphooqax manni «Xansiisukkaare neese Qarxeesanne yoo Fiinqe'enne markabbuwwi uulloo'isina lam kollinne hafachcha egedoo beyyo amfaa hagayye ee beyyonne higinsona» yita'a matteena sawwite hincaa'llo'o. Ee lasage danaam hafachchi hafachchu ammanenne markaphphi woronne hee'llo'i manni ixxuwwi sawwito'ok wo'mmukkoka labissa'a markaba uullisoo luwwa hootta'a Qarxees uullika gammal gammala amadda'a matto'o. Ihona bagaan hoffi ammaniinsi lasage malaayyaam hambu'llam dangonnem ee wo'i kibbu Qarxeesiinsi ki'aa dambalaqanne hee'u markaba aphphisukko. Oo hambu'llam woddaa'i markaba gafe'aa amadaa marukkaare egendeena xannumbee'i bikkina massu kollo massona cawwinaa ullummo. Kawuda yakkam wo'i kibbaakkoo uullanne hofqaxam hambu'llamiinsi daphphinaa lasage markaphphi woronne hee'llo'i manni markab gosaasam hee'u wongira hawwinne yakita'a markaphphi hanenne fissita'a uboobee'isa usinne markabanne edda'a qoxxissa'a katto'o. Odim Liibiy gabonne hee'u shashsharanne aangoomda'e yita'a baddita'a hee'llo'i bikkina hafachchi gafe'ukkuuyyi markaba ushe'oo'isina hanenne biddiqaa'llo'i haraar abujada dilliissa'a hambu'llam massu kollo massona cawwita'a utto'o. La'm ballina hambu'llam wodukkuuyyi maru bikkina markabanne iyyiisamu mu'uxxeka dambalaqanne darambummo. Odim saxxi ballina ee markabina hasisoo mat mat mu'uta endaa ni anginnem dambalaq woronne darambummo. Lobakat ballina eelliinchoo boollaankaa moo'nnoombee'isa oo hambu'llam hooraa kee'mmaalli hawwonne hee'nnummi bikkina «Gantoommo» yinoommi neeyyato koo'llinaa hee'nnummo. Neese hundim hurbaata intoo'n lobakat balla amfaa lasage Phaawuloos ni lambe'enne uullaa «An yummoka aa'llakka'a Qarxeesiinsi waattakkoo'n yoohan yakkota'n kaa'n hawwodanchannee hawwonnee amfam hee'nnummoyyo. Kabadem an ki'nnuwwa uunxoommok ku markab bi'ookko bagaan niinniinsi matichchim lehoobee'i bikkina baa'llakkotte. Mashka'oomim an otossoommi i Waa'i hii'mmo'o ixxi asse'amaancho asse'ukkaare oo asse'amaanchi i gadanonne uullaa ‹Phaawuloosa, baddititte! At Oroo'm uulli adil Qeesaar illagennem uullimmi hasisoo bikkina keesee kiinninne maqire mattam keenoo hundam letakkambee'isa Waa'i egerookko› yaa kuraakko. Ee bikkina badditakkotte! Waa'i iina kurukkisam ee kuru luwwa issoo'isa an amma'nnoommo. Markaboom wo'i kibbu uullaannonne matonne darabamookko» yukko. Meedeteraaniyaa'n dambalaqanne hafachchi barche'e issukkuuyyi mallonam tommaannonnee soo'l hii'mmaannonnee gudaanchi ammanenne markaba ushe'llam hee'llo'i keen «Markab uullanne hincoo'n urooyyo» yita'a sawwito'o. Ee bikkina dambalaqika xillooma usinne keenakko'aare sadee loh meetiraa ihukko. Odim hofqax ammaniinsi lasage keenakko'aare lamiyyee lamar meetiraa ihukko. Tochchonne yoo kinneewwanne markab qo'lloohaannina baddinaa markaba uullisoo soor kee'mmaalli luwwa markaphphi afaree'n kollonne kallaa wo'onne aad darambaa uulli soodoo'isina Waa'a uunxinummo. Markaba ushe'aan markaba uullisoo luwwa markaphphi illagee'n kollinne katta'a darabbaman ikka'a gibbeenaa yita'a wongira dambalaqanne darabbo'aare Phaawuloos xibbi halaqichchinaa gaadaaninaa «Ku manni markabanne cawwita'a afuuttobeelas matichchim gattakkamoyyo» yukko. Ee lasage gaadaan wongir karamu usseewwa mutta'a marona fatakito'o. Uulli soodeena ihaakkoohaannonne hundichchim hurbaata ittamisina Phaawuloos «Ki'nnuwwi qulitakku'uuyyi hurbaaxxeka maham suumenne amadimma uttakko'aanniinsi tommoo soor ballaa ihu bikkina hundichchim hurbaata ittehe. Ki'nnuwwik matichchikim horoo'l saraatim nakkamooyyo. Qoxxitakkeena hurbaata ittakkona an ki'nnuwwa uunxaammo» yaa qoxxisaa xa'mmukko. Ixxim eehid yaa hundi illagennem hurbaaxxeka aa'aa Waa'a galaxxaa iiqaa itukko. Ee lasage hundichchim baa'imma utta'a annannichchim hurbaaxxeka massita'a itto'o. Uulli soodu ammanenne hinki uulla affoda'e laqqeena xanto'oyyo. Ihukkaarem lam uullina lambe'enne aagaakkoo dambalaqaannonne shashsharaam beyyonne markab uulloo beyyo asi'mmita'a moo'lla'a xansiisuta'n markaba ee beyyo afisseena sawwito'o. Ee bikkina markab maroobee'isa uullisoo kee'mmaalli luwwa titta'a fatakita'a markaba dabarakkam laaydi'nnoo'i luwwa karakko'i usam titta'a utto'o. Ee lasage markaba hafachchi gafe'aa tochchonne fissoo'isina haraar abujada iim fissita'a biddiqaa'lla'a katta'a yakito'o. Ihukkaarem oo markab dambalaq xillubee'i beyyinne maraa illagee'n kolli uullanne qo'llaa maroobee'isa uullu bikkina hambu'llam afaree'n kollinne iiqansimma asheerukko. Ee ammanenne karanto'i manni waachchita'a fitta'a xottambee'isina gaadaan shiteena hasso'o. Ihukkaarem gaadaa'n xibbi halaqichchi Phaawuloosa gatiseena hasaa hee'u bikkina shitambee'isa hooraa waachchimma xantam keen hundichchim wo'onne xophita'a waachchita'a gaassita'a fittamisina ijaajukko. Odim gatto'i qaxim saanquwwinnee ee markabiinsi iiqamu ba'lluwwinnee waachchita'a fittamisina ijaajukko. Ee'isinne neese hundichchim xumminnem dambalaq woriinsi tochchonne fillummo. Neese dambalaq woriinsi xummam fillaa lasage oo amfummi uulli wo'inne kibbamaakkoo Maalta'i ihukkisa lanqummo. Ee ammane xeen ga'nneena asheeraa hee'u bikkinaa uullim qiidam hee'u bikkinaa neese iibbixxinoommisina ee uullanne hee'llam manni giira giitta'a maalalsiisoo eroomma issita'a neese aa'llo'o. Phaawuloosim mat qaaphphi haqqa feeraa giiranne edukkaare gii'l iibbi mashka'inne hamashshichchi firaa Phaawuloosika anga qasukko. Ee uullanne hee'llam hee'llo'i manni oo hamashshichchi Phaawuloos anga ga'mmaa calcalaakkoo moo'lla'a «Ku manchi manna shaakkoohan ihoo'n urooyyo! Mashka'oomim dambalaqiinsi xummam firukkaarem hanqinam ixxi baxu baxim ixxo amadaakko» yaqqanto'o. Ihukkaarem Phaawuloos hamashshichchooma angiinsi giggissaa giiranne darabukko bagaan maham ihukkoyyo. Ixxuwwim Phaawuloosik orachchi dashshoo'isa te'im ixxi dangonnem lehaa uboo'isa lobakat ammane egetta'a ixxi eraa'llisiinsi maham ihubee'isa moo'llo'i ammanenne sawwite dabatta'a «Ku manchi Waa'a!» yito'o. Ee uulla gassoo Phuphiloosina neese hee'nnummi beyyina gadanonne uulli hee'ukko. Oo Phuphiloos ee woshsha macceesu ammanenne neese ixxi mine massaa sas balla koyyinano aa'ukko. Ee ammanenne ee Phuphiloosik anni lobakat iibbii aaditii amadaa iinse'aa hee'ukko. Phaawuloosim ee xissaa iinse'u manchi beyyo maraa ixxi anga ee manchi hanenne issaa Waa'a uunxaa fayyiisukko. Ee lasage odim ee uullanne hee'llo'i jabbaan hundim waatto'aare fayyiisukko. Sirkaasa yakkam beero'o amfaa lasage ee beero'onnem sas ayyaamo afuullummo. Ee beyyiinsim markabanne aangaa mallaa odim Ireegiyoom beero'o amfummo. Odim ee beyyiinsim mat balla taakke'nnaa lasage danaam hafachchi hafachchukkaare ki'nnummi saxxi ballina Baatool beero'o amfummo. Ee Baatoo'l beero'onne amma'nnaan niinninne edanta'a ixxuwwinne maqire mat saanta afuulloommisina xa'mmito'aare neesem afuullaa Oroo'm beero'o mallummo. Mallummuuyyim Oroomanne hee'llo'i amma'nnaan ni bikkina macceesso'i ammanenne niinninne edanteena Aphphiyoos beero'i meera higga'a Sas Gatti Beyyo yakkam beyyi afeebe'e waatto'o. Phaawuloosim ixxuwwa moo'u ammanenne lobakata liiramaa Waa'a galaxxukko. Neese Oroo'm uulla amfaa lasage Phaawuloos ixxo egeroo mat gaadaanchinne maqirem mullam afuuroo'isa issakko'o. Sas balliinsi lasage Phaawuloos ee uullanne hee'llam Ayihuxxi manni awwonsaano weeshisukkaare waatta'a wixxito'i ammanenne «Iyyabbaayyuwwa, an Isra'ee'l minaadaba hawwodoo'nnim te'im niyyanno'iinsi aa'nnummi losa'nneka maham gindoo'nnim Yerusaaleemanne yo'i ni minaadab eese katta'a Oroo'm mannina higissa'a uwwito'o. Ihukkaarem Oroo'm manni i woshsha lobakata saarayyita'a moo'lla'a lasage eese shisiisoo luwwika maham siiddobee'i bikkina titteena hassa'a hee'llo'o. Titteena hasso'aarem Ayihuxxi manni i tirancha sabbo'i ammanenne hawwinam ‹I woshshi Oroo'm adil Qeesaarina higona› yummo bagaan i minaadaba kasasoommi mashka'i ma'lluchchim bee'e. Ki'nnuwwa weeshisaa edamaa ki'nnuwwinne maqire woceena hasummok ee bikkinatte. Kaba an chimchiminne karamaa yoommok Waa'i Isra'ee'l minaadabina ‹Issoommo› yu eroommi bikkinatte» yukko. Ixxuwwim Phaawuloosina «Neese Ayihuxxi uullanne hee'llam manniinsi ki bikkina kitaabamu assi kitaaba siindummoyyo. Odim ee beyyiinsi waatto'i niyyabbaayyuwwiinsim ki bikkina matem jor luwwam te'im matem jor sadom macceensummoyyo. Ihukkaarem ka at amma'nnitti amma'nnato amma'nnitam keeno manni beyyi hundannem sabukkisa macceensummi bikkina at woccoo woshsha kiinniinsi macceenseena hansoommo» yita'a jinna amaddo'o. Phaawuloosinne jinna amaddo'i ayyaamonne dut manni Phaawuloos hee'am hee'u mine waatto'aare dariinsi ki'isaa hiim afeebe'e Waa'i adilla'n bikkina Muse'i See'l kitaabiinsii hiraagaan kitaabbo'i kitaabbuwwiinsii qananaa'aa ixxi sawwixxeka caakkisaa kurimminne ixxuwwa Yesuus bikkina amma'nniseena yakam hee'ukko. Mat mat keen ixxi wocu woshsha amma'nnito'aarem mulli keen amma'nnito'oyyo. Ixxuwwina'i ixxuwwim iittantoo'nnim annanni ikka'a matteena ki'llo'aare Phaawuloos ixxuwwina mat woshsha «Keesammi Ayyaan hiraagaanchi Issaayyaasinne niyyanno'ina ‹At ka minaadaphphi beyyo mattaa «Ki'nnuwwi macceesimmoomina macceessakkamo; ihukkaarem qoossitakkamoyyo. Moo'immoominam moo'llakkamo; ihukkaarem xoossitakkamoyyo» yitaa kure. Mashka'oomim «Ka mannik wodan duudaakko. Maccim macceesoobee'isa gawwaakko; illim moo'oobee'isa qooqaakko. Eehid ihubeeta'n i kollonne daba'llitamaare an ixxuwwa fayyiisoommisina ixxuwwi illim moo'am hee'ukko; maccim macceesam hee'ukko; tiirim qoossam hee'ukko» yaa Waa'i wocaakko› yu woshshi hanqa» yukko. Odim Phaawuloos «Waa'i manna gatisoo'isa mulli minaadabina afinsoommisina neese asse'ukkisa laqqehe! Ixxuwwim macceessamo» yukko. Phaawuloos eekka wocaa lasage Ayihuxxi manni ixxuwwina'i ixxuwwim fitantu'uuyyi matto'o. Phaawuloos kera'a miqukkuuyyi garoo minenne ixxo xa'mmeena waaru manni hundam aa'ukkuuyyi lam hiinchi hundoomam Waa'i adilla'n bikkinaa Moollanni Yesuus Kiristoos bikkinaa ayyem baddoo'n iggimminne kurukkuuyyi losisam hee'ukko. Yesuus Kiristoosina awwaadaanchi ihummok, asse'amaanchi ihoommisinam weeshamummokii Waa'ika mishiraachchi sagara kuroommisina Waa'i annanni issukkokii an Phaawuloos kaka kitaabaammo. Oo mishiraachchi sagarim gaassaatim hiraagaaninne Keesammi Kitaabanne Waa'i aagu neeyyata. Mishiraachchi sagarim kurookkok maara edde'aa Daawiit shumo'iinsi qaramu Waa'i Beet bikkinatte. Ee'isam Waa'iinsette ihukkisa Keesammi Ayyaaninne lehiinsi ki'imminne la'isu malaayyaam Waa'i Beet ni Moollanni Yesuus Kiristoos bikkinatte. Minaadab hundim Kiristoosanne amma'nnaa ixxena ijaajamoohaare lomba siixxoo'isina manna ixxi kollonne wolleena neesem ixxeensi eroommaa asse'amaan ihimmaa siixxinaammo. Ki'nnuwwim ixxuwwinne maqirem Yesuus Kiristoosan ikkakkamisina weeshantakko'ookko. Ixxi minaadab ikkakkamisina Waa'i weeshu ki'nnuwwina Oroomanne hee'llakkam Waa'i iittoo keenina hundinam niyyanni Waa'iinsii Moollanni Yesuus Kiristoosiinsii eroommii xummii ihona. Ki'nnuwwik amma'nnat uulli hundinam la'amu bikkina gaassaa Yesuus Kiristoosinne ihaa ki'nnuwwi hundi bikkinam Waa'a galaxxoommo. An ki'nnuwwi bikkina hundi ammanem Waa'a uunxoommisa ixxi Beetika mishiraachchi sagara kurummuuyyi i wodaninne guullaa awwaadoommi Waa'i la'ookko. Kabadem ihukkaare xanumlas Waa'i yukkaare ki'nnuwwi beyyo waareena Waa'a uunxoommuulla. Mashka'oomim ki'nnuwwi qoxxitakkamisina Keesammi Ayyaa'n uwwancha ki'nnuwwina baxxanseenaa ki'nnuwwa moo'eenaa quluxoommo. Oohim neesena'i neesem niina annannichchinam yoo amma'nnatinne mateeyyoomannem qoxxixxammoommisinatte. Iyyabbaayyuwwa, mulli minaadaphphi lambe'enne issummisam ki'nnuwwi beyyonnem manna amma'nnatonne dabaroommisina ki'nnuwwi beyyo waareena lobakat ammane mixaa hee'ummisa laqqakkona hasoommo. Ihukkaarem waaroombee'isa mada'e hoorukko. An lachchi yoo keeninaa lachchi bee'i keenina, losu keeninaa tunneewwinaa mishiraachchi sagara kuroommisina eesenne badanchi yookko. Ee bikkina Oroomanne hee'llakkam ki'nnuwwinam mishiraachchi sagara alallaateena gudaammo. Gaassaa Ayihuxxi minaadaba odim mulli minaadaba, amma'nnu keen hundam gatiseena mishiraachchi sagar Waa'i malaayyi ihu bikkina kureena tuuroommoyyo. Mashka'oomim Keesammi Kitaabanne «Amma'nnatinne muccurukkok amma'nnatinnem hee'ookko» yamamaa kitaabamukkisam asheero'iinsi ki'isaa goollo'onne afeebe'em Waa'i manna muccussookkok amma'nnatinnette ihukkisa mishiraachchi sagaranne caakkaakko. Ixxuwwi boqqoominne Waa'ika hanqa wor amadda'a Waa'a badditambee'i keenonnee boqqi keenonnee hundannem Waa'ik quunqi iimaniinsi dillookko. Mashka'oomim Waa'i ixxi bikkina la'immi hasisoo luwwa ixxuwwina caakkisu bikkina Waa'i bikkina la'immi hasisoo luwwi caakka. Waa'ik moo'amoobee'i qoocci oohim heer heerina hee'oo malaayyii Waa'oomii hundi luwwim qooccamukkaanniinsi ki'isaa qooccamu luwwinne caakkaa la'amu bikkina ixxuwwi baaxiilina dabaabuttam luwwi bee'e. Waa'a laqqo'aarem ixxena laboo lombaa galataa uwwito'oyyo. Ihukkaarem ixxuwwik sawwit awwaad bee'an ihukko. Oo awwaad bee'i sawwitim tuunsukko. Ixxuwwi gaga qoolluwwa yaqqitu'uuyyim qawwuwwi ikko'o. Hee'oo Waa'ikam lomba lehoo manni misilanne te'im cii'i misilanne te'im diinaxxi misilanne te'im maanxogannisa biqinne maroo luwwi misilanne dabatto'o. Ee bikkina ixxuwwina'i ixxuwwim ixxuwwi orachcho haashaassoo luwwa issitamisina Waa'i ixxuwwi woda'n jor mixa'n fokko'ina higisaa uwwukko. Eehid issukkokim Waa'ika hanqa qophphanonne dabatto'i bikkinattee qooccukkaanni bikkenne qooccamu luwwina otossita'a awwaaddo'i bikkinattee. Waa'i heer heerinam maasse'amaakkoohane; eeyya maasse'amaakkoohane. Ee bikkina Waa'i ixxuwwa tuussiisoo mixanina higisaa uwwukko. Ixxuwwik meenti gooninne laboo edancha edamimma utta'a laboobee'isa ikko'o. Goonim meentinne laboo edancha edamimma utta'a saa'immi mixaninne muxmuxitu'uuyyi ixxuwwina'i ixxuwwim edanto'o. Ee'isa ihimminne goon ixxuwwi huushanchina laboo hawwo ixxuwwi gaganne eebaqqito'o. Odim Waa'a laqqeena hassobee'i bikkina issimmina laboobee'i luwwa issitamisina awwaad bee'i sawwitina Waa'i higisaa uwwukko. Ixxuwwik heechchi boqqoominne, jollinne, mixaninne, jor sawwitinne, to'achchimminne, manna shimminne, wocanchinne, qawwiishshinnee janninnee hundinnem wo'mmaakkoohane. Ixxuwwim hamaano, game'llantam keeno, Waa'a sabbam keeno, manna sholliissam keeno, bolxitam keeno, amaaddam keeno, jora issakkam googo qooccitam keeno, amo'inaa anno'inaa ijaajantambee'i keeno, qawwuwwa, amma'nnanchi bee'i keeno, tiir bee'i keenoo qishixxat bee'i keenoo. Eehido'i luwwa issukkaannina «Leh hasisookko» yaa Waa'i wocukkisa laqqu'uuyyim eekka issitamo. Issimmi xale'em ihoo'n mulli keenim eekka issitamisina gafe'ansitamo. Mulli mannanne oogattoo manchi ayyettem ikkittaare mannanne oogattittuuyyi ki gagannem oogattoolli ikkitti bikkina dabaabuttoo luwwi bee'e. Mashka'oomim mannanne oogattoo atim oo manni issoo luwwa issitoolla. Eehido'i luwwa issoo mannanne Waa'i oogatookkok hanqi ihukkisa lanqoommo. At eekka issu mannanne oogattittuuyyi atim eekka issitittuuyyi Waa'i oogato'iinsi gattoottoka labissaatennihe? Te'im Waa'ika lophphaakkoo biijooma, iyyaqqimmaa xa'nnimmaa gaddaatennihe? Waa'ik biijoom baaxiilo biiraa yitaa daba'llitoo'isinatte ihukkisa laqqooyyonnihe? Ihukkaarem wodano duudisimminnee baaxiilo biiraa yimma sabimmi mashka'innee Waa'i hanqo'isinne oogatoo oogaxxi ayyaamina ki gaganne quunqa wixxaa'lloolla. Mashka'oomim manni hundinam baxu baxisam Waa'i uwwookko. Eroka issitu'uuyyi iyyaqqimminne galata, lombaa heechchaa hassam keenina Waa'i heer heerina hee'oo heechcha uwwookko. Ihukkaarem jora issimmina yita'a hanqina ijaajancha sabbam boqqi keenonne Waa'ik malaayyaam quunqi waarookko. Gaassaa Yihudanne ee lasage odim mulli minaadabanne jora issitam keen hundannem kee'mmaalli hawwi waarookko. Ihukkaarem eroka issoo keenina ayyenam gaassaa Ayihuxxi mannina odim mulli mannina galat, lombii xummii uwwamookko. Mashka'oomim Waa'i ayyenam golo'ooyyo. Seer bee'eka baaxiilo baxxo'i keen seer bee'ekam bi'llamo. Seer hee'ukkuuyyi baaxiilo baxxo'i keen seerinnem oogato'o aa'llamo. Waa'i illagenne muccur iheena xanookkok seera macceesukkan ihoo'n seera egeroohane. Mulli minaadabina Seer bee'ukkaarem Seer hasoo luwwa ixxuwwi tiirinnem issitolas ixxuwwina Seer bee'ukkaarem ixxuwwi gagim Seera. Mashka'oomim ixxuwwik tiir kurukkuuyyi, ixxuwwi sawwitim acceeqasukkuuyyii te'im dabaaburukkuuyyii Seer hasoo luwwi ixxuwwi wodanonne kitaabamaa yoo'isa moo'issamuulla. An kurummi mishiraachchi saga'llisam manni wodanonne maaxamu woshshi hundannem Waa'i oogatoo ayyaamo Yesuus Kiristoos kollinne oogatookko. Ihukkaarem ki'nnuwwi gaga «Neese Ayihuxxi manna» yitakka'a weeshshakkamo; Waa'i Seerannem bakke'llakkamo; ki'nnuwwina Waa'inne yoo mateeyyoomannem birantakkamo. Seera lossakko'i bikkina Waa'i hasoo xabbeen luwwam annanni issitakka'a laqqakkamo. Odim qooq keenina awwonsaan ikkakko'isa, tuunsonne yoo keenina caakki ikkakko'isa, huushamu keeno dabattakkam keen ikkakko'isa, oosina losisaan ikkakko'isaa Waa'i Seeraa hanqaa guullitakka'a laqqakkam keen ikkakko'isaa ki'nnuwwi gaga xiggakkamo. Eehannata'i mulli keeno losissakkam keen ki'nnuwwi gaga losissakkamoyyonnihe? Mulli mannina «Game'llakkotte» yitakka'a kuttakku'uuyyim ki'nnuwwim game'llakkamo. Mulli mannina «Saa'llakkotte» yitakku'uuyyim ki'nnuwwim saa'llakkamo. Waa'i bikkenne otossakkam luwwa sabbakku'uuyyim Keesammi Mine boggakkamo. Seera laqqakko'i bikkina birantakku'uuyyim Seera ginditakka'a Waa'a sholliissakkamo. Oohim Keesammi Kitaabanne «Mulli minaadaphphi lambe'enne Waa'ik summi ki'nnuwwi mashka'inne duumamukko» yamamaa kitaabamukkane. Ballachchanchi awwaadookkok seera egettakkolasette bagaan seera egettakkobeelas ki'nnuwwik ballachchanchi ballachchantakkobee'aannisa. Ee bikkina ballachchamoo'n yoo mat manchi Seer ijaaju luwwa egerulas ixxeka ballachchamoo'n hee'immi ballachchamukkaannisa xigamooyyonnihe? Eehannata'i ixxuwwi ballachchantoo'nnim Seera egettamuulli ikkolas kitaabamu Seer hee'ukkuuyyimii ballachchantakko'isamii Seera ginditakkam ki'nnuwwanne oogattamo. Yihudiinsi qaranchi xale'i hanqo'i Ayihudichchi issooyyo. Ee'isam haninne moo'amoo maa'l ballachchanchi hanqo'i ballachchanchayyo. Hanqo'i Ayihudichcho yimmi woro'l mannoominne Ayihudichchi ihukkane. Hanqo'i ballachchanchim Keesammi Ayyaaninne ihoo woda'n ballachchancha bagaan See'llisanne ha'n orachcho ballachchanchayyo. Eehido'i manchi galata siixxookkok Waa'iinsette bagaan manniinseyyo. Eehannata'i Ayihudichchi ihimmi maha awwaadoo? Te'im ballachchanchidu maha awwaadookko? Hanqinam kolli hundinnem lobakata awwaadookko. Luxxeka Waa'i ixxeka Seera uwwukkok Ayihuxxi manninatte. Mat mat keen amma'nnancha hooggota'nnahe? Ixxuwwik amma'nnancha hoogimmi Waa'am amma'nnamoobee'an issoohonnihe? Hore'em ee'isayyo! Keesammi Kitaabanne «At woccitti woshshi hanqa; fitantoo fitanchannem at neegattootto» yamamaa kitaabamukkisam manni hundim huushamukkaarem Waa'i yu woshshi hanqi ihona. Ihukkaarem niikki boqqoom Waa'i xabbeenooma moo'iseena awwaadoohan ihukkaa'lleensi neese mayyinoommo? An mannisam wocoommo; neese banxummi baaxiilina Waa'i ixxeka quunqa neesenne eeboohaare huushamaakko yimmannihe? Hore'em ee'isayyo; ee'isa ihulas uullanne Waa'i oogateena hinkid xanoo? Ihukkaarem i huushanchinne Waa'ik hanqi ixxi lombina la'amulas an kabad afeebe'em baaxiilaanchi ihaa xigamoommok mahinatte? Eehannata'i er luchcho siixxineena mahina jora issinoommoyyo? Mat mat manni eehid yito'ookko yita'a neese game'llitamuulla. Ee keenonne Waa'i oogatoo oogato'i hanqo'ane. Eehannata'i mayyinoommo? Neese Ayihuxxi manni mulli manniinsi e'llinoommonnihe? Hore'em e'llinoommoyyo. An gaassaahim «Ayihuxxi minaadab ihukko te'im mulli minaadab hundim baaxiilina agido» yaa kuraammo. Oohim Keesammi Kitaabanne «Muccur hore'em mat manchim bee'e. Qoossookkok te'im Waa'ina otossoo manchi matim bee'e. Manni hundim Waa'iinsi qee'llaakko. Hundim mat ihaa huushamaakko. Eroka issookkok matim bee'e. Hore'em matichchim bee'e. Ixxuwwi suumiinsi firoo woshshim fooqu waammisa; ixxuwwi allabinnem qawwiissamo. Ixxuwwi suumennem hamashshi qub yoohane. Ixxuwwi suumiinsi firookkok xale'i duunchaa jor woshshaa. Ixxuwwik lokkim mannika xiiga duneena qare'aalla. Ixxuwwi mattam googonne bi'ishshii hawwii yoohane. Xummi googom laqqamoyyo. Ixxuwwi beyyonne Waa'a baddimmi bee'e» yamamaa kitaabamaakko. Seer kuroo luwwi hundim Seerina ijaajanteena hassam keeninatte. Oohim manni hundim dabaaburoo luwwi bee'aa uullanne yoo manni hundim Waa'i oogato'iinsi woroon ihoo'isinatte. Ee bikkina Seer baaxiilo la'isookko bagaan maara edde'u manni Seera egerimminne Waa'i illagenne muccur iheena xanooyyo. Muse'i Seerii hiraagaanii kutto'i Waa'ik muccuroom kaba la'amaakko; oohim seera egerimminne hore'em exxoobee'ene. Waa'i Gatisaanchi issaa uwwu Yesuus Kiristoos eroomminne manni hundim kora'am muccuraakko. Manni ixxonne amma'nnoohaare ixxi xiiginne baaxiilo shiinshoo'isina Waa'i Yesuusa uwwukko. Waa'i eekka issukkokim eraa'l baaxiilo ixxi iyyaqqimminne haafu bikkina ixxeka hanqo'i oogato'o moo'iseenatte. Odim Waa'i ixxi gagim muccur ihukkisaa Yesuusanne amma'nnoo keenom muccussoo'isaa kaba ka doollenne la'iseenatte. Eehannata'i niikki bakkechchi maha awwaadookko? Bakkechchi gataakko. Mahina gatukko? Seera egelloommi bikkinattennihe? Ee bikkinayyo; amma'nnatinnette bagaan seera egerimminneyyo. Mashka'oomim manni muccurookkok amma'nnatinnette bagaan Seera egerimminnette ihubee'isa lanqoommo. Eehannah amma'nnaxxi bikkina Seera uunjinonnihe? Hore'em ee'isayyo! Seera qoxxinsoommo bagaan uunjinoommoyyo. Eehannata'i maa'llisinne niyyanni Abrihaam bikkina mayyinoommo? Abrihaam eroka baximminne muccuraakkoohan ihulas bakke'oo luwwi yookko. Ihukkaarem Waa'i illagenneyyo. Keesammi Kitaab mayyookko? «Abrihaam Waa'anne amma'nnukko; oo amma'nnatim ixxena muccuroom ihaa xigamukko» yookko. Mat manchi baxu malaayyina miqakkam diinat ixxi baxu malaayyika miqakko'o bagaan kora'a uwwakko'aannisa ihaa xigamooyyo. Ihukkaarem mat manchi gateena er baxo baxubee'aarem baaxiilaano muccussoo Waa'anne amma'nnulas oo ixxi amma'nnat muccuroom ihaa xigamookko. Eroka baximminnette ihoo'n Waa'i kora'am muccussu manchi maasse'amaakkoohan ihukkisa Daawiit «Waa'i ixxuwwika bi'ishsha uru keenii ixxuwwi baaxiil haafamu keenii maassaammuwwa. Waa'i ixxeka baaxiilo tiiroobee'isa uru manchi maasse'amaakkoohane» yaakko. Oo maassi uwwamukkok xale'i ballachchamu keeninattennii te'im ballachchamubee'i keeninatteme? Abrihaamina amma'nnat muccuroom ihaa xigamukkisa woncaammo. Abrihaamina ixxek amma'nnat muccuroom ihaa xigamukkok hinkidette? Ballachchameena illageenettennii ballachchamaa lasage? Ballachchamaa lasag ihoo'n ballachchameena illageenetteme. Abrihaam ballachchamukkok ballachchameena illageenim amma'nnatinne muccurukkisa moo'iseena mare'i ihoo'isinatte. Eehid ihukkokim ballachchantoo'nnim Waa'anne amma'nnita'a muccutto'i keen hundinam anni ihoo'isinatte. Ee'isam ballachchanto'i keeninam anna. Anni ihukkokim ballachchanto'i bikkina xale'i ihoo'n ballachchameena illageenim Abrihaamina hee'u amma'nnaxxeka kobi'llishsha awwontam bikkinatte. Abrihaaminaa Abrihaam shumo'inaa uulli hundam neeyyatukkoka a'llitamok Seera egerimminnette ihoo'n amma'nnatinne uwwamoo muccuroominnette. Neeyyaxxi luwwa a'llitamok Seera egetto'i keen ikko'oolas eehannata'i amma'nnat maha awwaadookko? Neeyyatim awwaad bee'an ihaa gataakko. Seer Waa'i quunqa eebookko; Seerbee'i beyyonne Seera gindimmim bee'e. Waa'ik neeyyat amma'nnatinnette ihimmi hasisookkokim Waa'i eroomminnette ihaa Abrihaam shumo'i hundinam ihoo'isinatte. Oo neeyyatim Seera egeroo keenina xale'e ihoo'n Abrihaamisam amma'nnoo keeninatte. Abrihaam niina hundinam anna. Mashka'oomim Keesammi Kitaabanne «An keese lobakat minaadabina anni issaammo» yamamaakko. Anna yamamaa weeshamukkokim ixxi amma'nnu Waa'i illagenne oohim lehu keenom fooraam isseenaa bee'i luwwam yoohan isseenaa xanoo Waa'i illagennette. Odim Abrihaam «Ki shumo'o xigakkeena xanakkambee'i qax ihookko» yamamukkoka anni iheena xanoobee'i ammanenne lobakat minaadabina «Anni ihoommo» yaa amma'nnukko. Abrihaam qaramukkaanniinsi xibbi hiincho ihaakkoo lommanchi ihu bikkina ixxeka hoogaakkoo orachchoo Saara'akam qaroobee'isa gogaakkoo goosaa moo'ukkaarem ixxek amma'nnat hoogukkoyyo. Ixxek amma'nnat ixxena muccuroom ihaa xigamukkok ee bikkinatte. Ihukkaarem «Muccuroom ihaa xigamukko» yoo sagar Keesammi Kitaabanne kitaabamukkok xale'i ixxi bikkinatte ihoo'n ni bikkinatteme. Ni Moollanni Yesuusa lehiinsi ki'isu Waa'anne amma'nninummi niinam amma'nnat muccuroom ihaa xigamookko. Oo ni Moollanni Yesuus ni baaxii'l bikkina lehaa neese muccusseena lehiinsi ki'ukkane. Neese amma'nnatinne muccullummi bikkina ni Moollanni Yesuus Kiristoosinne Waa'inne iittammaammo. Kaba niina yoo eroomma siixxinummok Yesuus Kiristoosinnette ihu bikkina neeyyatinne Waa'ika lomba baxxammoommi bikkinam liirammoommo. Niina uwwamu Keesammi Ayyaaninne Waa'ik iitti ni wodanonne wo'mmu bikkina eekka neeyyato issimminne egerimmi neese tuussiisooyyo. Neese hoongaan hee'nnummuuyyim Waa'i yu ammanenne niina jor keenina Kiristoos lehukko. Muccur manchina lehoo mancho siidimmi hawwisoohane. Ayyi la'ukko er manchina leheena iggoo manchi siidameena xanookko. Ihukkaarem neese baaxiilaan inkummisam Kiristoos ni bikkina lehimminne Waa'i neese iittoo'isa moo'isukko. Ee bikkina neese kaba baaxiiliinsi ixxi xiiginne muccullummi bikkina hanqinam Waa'i quunqiinsi gantoommo. Neese Waa'ina maso'i inkaa hee'nnummuuyyim ixxi Beet lehinne iittammummo. Kaba Waa'inne iittammummaa'lleensi ixxi Beet heechchinne hanqinam gantoommo. Xale'i eeqaxam ihoo'n Waa'inne neese iittansu ni Moollanni Yesuus Kiristoosinne Waa'anne liirammaammo. Mat manchi kollinne baaxiil ka uulla waarukko. Ee baaxiilinnem leh waarukko. Ee'isinne manni hundim baaxiilo baxu bikkina manni hundannem leh afukko. Seer uwwameena illageenim baaxiil uullanne hee'ukko. Ihukkaarem Seerbee'i ammanenne baaxiil ihaa xigamukkoyyo. Baaxiil ihaa xigamubee'aarem Seera Addaam gindukkisa ginditobee'i keenonnem Addaamiinsi ki'isaa Muse'enne afeebe'e yoo keenonne leh naanukko. Hanenne waaroohaannina oo Addaam kobi'lla. Waa'i uwwu uwwanchi manni baxu jollisayyo. Mashka'oomim mat manchi baxu jollinne lobakat manni lehukko. Ihukkaarem mat manchi kollinne Waa'i kora'am uwwu eroommi lobakat mannina lophphukko. Oo uwwanchim Yesuus Kiristoosatte. Oo kora'am uwwamu Waa'i uwwanchi ee Addaam baaxii'l xooxisayyo. Mexxo'i jollinne waaru xoox oogato'o eebukko. Ihukkaarem lobakat jolliinsi lasage waaru uwwanchi muccurooma eebukko. Ee mexxo'i manchi jollinne ki'ukkok leh naanukkaa'lleensi lophphaakkoo eroommaa kora'am uwwamu muccuroomaa aa'llo'i mannanne mexxo'i manchi Yesuus Kiristoosinne heechchi naanookko. Mat manchik jolli manni hundam oogato'onne aagisukkisam mat manchi issu muccuroom manni hundam oogato'iinsi gatisaa heechcha uwwookko. Mashka'oomim mat manchi ijaajamimma hoogimminne ki'ukkok lobakat manni baaxiilonne aagukkisam mat manchi ijaajanchinne ki'ukkok lobakat manni muccurookko. Seer uwwamukkok jolli exxoo'isinatte. Ihukkaarem baaxiil exxukkuuyyi maru beyyonne Waa'ik eroommi lobakata lophphukko. Baaxiil lehinne naanukkisam Waa'ik eroommi muccuroominne heer heerina hee'oo heechchina naanoo'isinatte. Oohim ihookkok ni Moollanni Yesuus Kiristoos kollinnette. Eehannata'i mayyinoommo? Waa'ik eroommi lophphoo'isina baaxiilo banxummuuyyi hee'nnonnihe? Hore'em ee'isayyo! Neese baaxiilina lenaammoo keen hinkid inkaa baaxiilo banxummuuyyi hee'nnoommo? Neese Yesuus Kiristoosinne mat inkeena xammaqammummi keen hundim ixxi lehinnem mat inkeena xammaqamummisa laqqakkamoyyonnihe? Yesuus Kiristoos Waa'i lombinne lehiinsi ki'ukkisam neesem haareechchi heechchanne hee'nnoommisina ixxi lehinne mat inkeena xammaqanchinne ixxenne maqirem waammammaammo. Ixxi lehu lehinne mat inkummaa'lleensi hanqinam ixxi lehiinsi kichchinnem ixxenne maqire mat inkoommo. Neese la'mmeka baaxiilina agid inkoombee'isa baaxiilaanchi maar bi'oo'isina niikki moosir maar Yesuusinne maqirem saqalamukkisa lanqoommo. Mashka'oomim lehukkok baaxii'l agiddaniinsi wolabbanonne firaakko. Kiristoosinne maqire lenummaa'lleensi ixxenne maqirem hee'nnoommisa amma'nninoommo. Mashka'oomim Kiristoos lehiinsi ki'u bikkina od lehoobee'isa lanqoommo; od ixxo leh kaa'eena xanooyyo. Ixxi baaxiilina lehimma mexxo'aa'llem lehaakko. Ihukkaarem ixxi hee'oo heechchi Waa'inatte. Ee'isam ki'nnuwwim baaxiilina letakko'aannisaa Yesuus Kiristoosinne Waa'ina hee'llakkamaannisaa ki'nnuwwi gaga xiggehe. Baaxiil ki'nnuwwaannonne lehoo maaranne naanoobee'isa ki'nnuwwi maa'l jor mixanina kaa'antakkotte. Ki'nnuwwika orachcho hundoomam jor luwwa issoo'isina baaxiilina mu'ut issitakka'a uwwitakkotte. Ihukkaarem lehiinsi ki'u mannisa ikkakka'a ki'nnuwwika orachcho muccuroomina mu'ut issitakka'a Waa'ina uwwehe. Ki'nnuwwi Waa'i eroommiinsi woroonette bagaan Seeriinsi woroonetti ikkakkobee'i bikkina baaxiil ki'nnuwwa ijaajeena xanooyyo. Eehannata'i mayyinoommo? Neese Waa'i eroommiinsi woroonette bagaan Seeriinsi woroonette inkumbee'i bikkina baaxiilo banxonnihe? Hore'em ee'isayyo. Ki'nnuwwi gaga ijaajamoo'isina agishshi issitakka'a uwwitakko'aannina ayyenam agid ikkakko'isa laqqakkamoyyonnihe? Ee'isam lehina massoo baaxiilina te'im muccurooma uwwoo Waa'ina ki'nnuwwi gaga uwwitakkolas matina agid ikkakko'isa laqqehe. Ihukkaarem ki'nnuwwi eraare baaxiilina agid hee'llakko'i keen kaba ki'nnuwwi gaga higissakka'a uwwitakko'i losa'n amaxxina ki'nnuwwi wodanonne ijaajantakko'i bikkina Waa'ina galat afona. Baaxii'l agiddaniinsi wolabbanonne fittakka'a muccuroomina agid ikkakko'ookko. Ki'nnuwwik maar hoongaanchi ihu bikkina an mannisam wocoommo. Ka illageen ki'nnuwwi gaga fokko'o baximminaa baasaakkoo jolle issimminaa higissakka'a uwwitakko'isam kaba keesantakko'oo keen ikkakkamisina muccuroomina higissakka'a uwwehe. Baaxiilina agid ikkakka'a hee'llakko'i ammane muccuroomina agid hee'llakko'oyyo. Ihukkaarem ki'nnuwwi kaba issimmina tuuttakkam luwwa issitakkam hee'llakko'i ammane maha siiddakkam hee'llakko'o. Ee keeno issimmik lasaanchi leho. Kaba baaxiiliinsi wolabbanonne fittakka'a Waa'ina agid ikkakko'ookko. Waa'ina agid ikkakko'i bikkina siiddakkamokim keesantakko'oo keen ihimma. Eehannikim lasaanchi heer heerina hee'oo heechcha. Mashka'oomim baaxii'llek lasaanchi leho; ihukkaarem Waa'i kora'am uwwu uwwanchik lasaanchi ni Moollanni Yesuus Kiristoos kollinne heer heerina hee'oo heechcha. Iyyabbaayyuwwa, Seera laqqakkam keenina kuroommok Seer mat mancho ijaajeena xanookkok manchi foorinne yooqax amman xale'i ihukkisa laqqakkamoyyonnihe? Kobi'llishshina mat meentichcho isek aro'i foorinne hee'ukkuuyyi is aro'inne eebaqqanchi seer karaa amadaakko. Ihukkaarem isek aro'i lehaa lasage ee eebaqqanchi seeriinsi fitto'ookko. Is aro'i foorinne hee'ukkuuyyi mulli goonchonne affolas saa'aanchotte yamantamo. Ihukkaarem isek aro'i lehulas is aro'inne yoo eebaqqanchi seeriinsi fitto'ookko. Mulli goonchonne affo'aarem saa'aanchotteyyo. Iyyabbaayyuwwa, ee'isam ki'nnuwwim Waa'ina misha mishshakkamisina lehiinsi ki'u Yesuusan ikkakkeena Yesuus Kiristoos lehinne Seerina letakko'ookko. Neese maarinne hee'nnummi ammane baaxiil wo'mmaakkoo mixano seer ki'isoohaare oo baaxii'l mixan ni orachchonne lehina misha misheena baxam hee'ukko. Ihukkaarem neese karaa amadaa hee'u seeriinsi lenaa kaba fillaammo. Ee bikkina eraare kitaabamu seerina ijaajanchinnette ihoo'n Keesammi Ayyaan uwwu haareechchi heechchanne inkaa awwaandoommo. Kaba neese mayyinoommo? Seer baaxiilonnihe? Hore'em ee'isayyo! Seerbee'an yakkota'n baaxiil mada'e ihukkisa la'am hee'ummoyyo. Seer «Manni luwwa mixxitte» yubeeta'n mixan mada'e ihukkisa la'am hee'ummoyyo. Ihukkaarem mixan See'l kollinne makka siixxu ammanenne annanni annanni mixano i woronne qooccukko. Seerbee'an yakkota'n baaxiilina malaay bee'e. Seer bee'i ammane an lehoombee'an hee'ummo. Ihukkaarem Seer waaru ammanenne baaxiil malaayye siixxukkaare an lehummo. «Heechcha uwwookko» yamamu oo Seer iina leho eebukko. Mashka'oomim baaxiil Seerinne makka siixxu ammanenne eese qawwiisaa shukko. Ee bikkina Seer keesamaakkoohane; ijaajim keesamaakkoohane; xabbeenaa danaamoomee. Eehannata'i eesenne leho eebukkok ee danaam luwwannihe? Hore'em ee'isayyo! Baaxiil mada'e ihukkis la'amoo'isinaa See'l kollinne baaxiil lobakata baasoo'isinaa danaam see'l kollinne eesenne leho eebukkok baaxiilo bagaan seerayyo. Seer Waa'iinsette ihukkisa lanqoommo. Ihukkaarem an baaxiilina agishshi ihoommisina biteesamaammoohane. Edde'ummokim maara. Ee bikkina an issoommok saboommi luwwa bagaan isseena hasoommi luwwayyo. An i gagim issoommi luwwi mada'e ihukkisa la'oommoyyo. Kaba an isseena hasoombee'i luwwa issoomman ihulas seer danaam ihukkisa moo'isoommuulla. Ee bikkina baaxiilo baxisookkok i woronne yoo baaxiilo bagaan aneyyo. Ee'isinne i woronne oohim i maaranne er luwwi ma'lluchchim siidamoobee'isa la'oommo. Eroka isseena mixoommo; ihukkaarem issaa xanoommoyyo. Mashka'oomim an issoommok isseena hasoommi er luwwi ihoo'n isseena hasoombee'i jor luwwa. An issoommok isseena hasoombee'i luwwi ihukkaa'lleensi eekka issookkok i woronne yoo baaxiilo bagaan aneyyo. Ee bikkina seer baxoo'isa moo'oommuulla. An eroka isseena hasummuuyyim hundi ammanem jora issaa siidamoommo. Waa'ika Seera i wodaninnem guullaa iittoommo. Ihukkaarem i wodanonne yoo seerinne oramaa qeefadoo mulli seer i orachchi hundannem yookkoka siidoommuulla. Oohim baaxii'l seera. An hinkido'i hawwaancho! Ka lehonne massoo maariinsi eese ayyi gatisookko? Moollanni Yesuus Kiristoosinne gatisu Waa'ina lombi ihona; i wodaninne Waa'i Seerina ijaajamoommo. Ihukkaarem i maarinne baaxii'l seerina ijaajamoommo. Mashka'oomim maar hoongaanchi ihu bikkina seer isseena xanubee'i luwwa Waa'i ixxi Beeto baaxii'l bikkina baaxiilaanchi maa'l kobi'llanne asse'aa Yesuus maarinne baaxiilo bi'isaakko. Eekka issukkokim Keesammi Ayyaan yukkisiinsi bagaan ni maar iittukkisa inkoombee'i neesenne seer hasoo muccuroom wo'mmoo'isinatte. Maar iittukkisa hee'llam keen ixxuwwika sawwitem maar hasoo luwwanne issitamo. Ihukkaarem Keesammi Ayyaan yukkisa hee'llam keen ixxuwwika sawwitem Keesammi Ayyaan hasoo luwwanne issitamo. Maa'l sawwite wonshimmik lasaanchi leho. Ihukkaarem Keesammi Ayyaa'n sawwite wonshimmik lasaanchi heechchaa xummaa. Maa'l sawwixxisa hee'immi Waa'ina maso'ooma. Mashka'oomim maa'l sawwit Waa'i Seerina ijaajamooyyo; ijaajameenam hore'em xanooyyo. Maa'l sawwixxisanne hee'llam keen Waa'a liiransiteena xantamoyyo. Hanqinam Waa'ik Keesammi Ayyaan ki'nnuwwanne hee'ulas ki'nnuwwi hee'llakkamok Keesammi Ayyaan hasoo'isa bagaan maar hasoo'isayyo. Kiristoosik Keesammi Ayyaan bee'ek ayyim Kiristoosaneyyo. Ihukkaarem Kiristoos ki'nnuwwi woronne hee'ulas ki'nnuwwik maar baaxiilina lehaakkoohane. Ki'nnuwwi ayyaanim muccuroo'm bikkina hee'oohane. Yesuusa Lehiinsi ki'isu Waa'ik Keesammi Ayyaan ki'nnuwwi woronne hee'ulas ee Yesuus Kiristoosa lehiinsi ki'isu Keesammi Ayyaa'n kollinne Waa'i ki'nnuwwaannina lehoo maarina heechcha uwwookko. Oo Keesammi Ayyaanim ki'nnuwwi woronne yoohane. Ee bikkina iyyabbaayyuwwa, niina giddi yookko. Ihukkaarem oo giddi maar iittukkisa hee'nnoommisinayyo. Mashka'oomim maar iittukkisa hee'llakkolas letakkamo. Ihukkaarem Keesammi Ayyaaninne maa'l baxo shitakkolas hee'llakkamo. Waa'ik Keesammi Ayyaan awwonsoo'isanne hee'llam keen hundim Waa'ina ooso. Neese Waa'ina oos inkaa «Abba, niyyanna!» yinaa weenshoommisina Keesammi Ayyaana aa'nnummo bagaan eraa'llisam baddinoommisina agidda'n ayyaana aa'nnummoyyo. Neese Waa'ina oos inkummisa Keesammi Ayyaan ixxi gagim ni ayyaaninne maqirem kuroolla. Neese Waa'ina oos inkummaa'lleensi Waa'i uwwoo luwwa lago'o a'llinoommo. Kiristoosinne maqirem lomba siixxineena Kiristoosinne maqire hawwo aa'nnummaa'lleensi ixxenne maqirem lago'o a'llinoommo. Kaba neesenne afoo hawwo niina moo'amoo lombinne keenaa moo'oommaare lobakata sholle'aalli issaa xigoommo. Qooccanchi hundim Waa'i oosika moo'ancha lobakat qulunxinne egeroolla. Mashka'oomim qooccanchi hundim awwaad bee'i luwwina ijaajamaakko. Ijaajamukkokim iittaatette ihoo'n neeyyatinne egerukkuuyyi ijaajamoo'isa Waa'i issu bikkinatte. Ihukkaarem qooccanchi hundim bichchi agiddaniinsi firaa Waa'i oosika lombi yoo wolabbano siixxoo neeyyat yookko. Qooccanchi hundim mat ihaa kabad afeebe'em xuuchchinne qitinukkuuyyi yoo'isa lanqoommo. Xale'i qooccanchi ihoo'n Keesammi Ayyaana neeyyatina amaxxi issaa Waa'i uwwukkaare aa'nnummi keen neesem Waa'ina oos ihimmaa ni orachchika gatimmaa ege'llinummuuyyi ni woronne qitinoommuulla. Neese gantummok ee neeyyatinnette. Kaba moo'amoo luwwi neeyyatayyo. Moo'amoo luwwa ayyi neeyyato issookko? Neese moo'nnumbee'i luwwa neeyyato issinummaa'lleensi eekka iyyaqqimminne egelloommo. Oo Keesammi Ayyaanim neese hoongoommaare hara'mmookko. Keesammi Ayyaan ixxi gagim suuminne kurakkeena xanakkambee'isinne ni bikkina qoxxisaa Waa'a uunxookko bagaan Waa'a uunxakkamisa neese lanqoommoyyo. Waa'i doo'llu minaadabina Keesammi Ayyaan Waa'a uunxookkok Waa'i sawwixxis ihu bikkina manni woda'nneka saarayyaa la'oo Waa'i Keesammi Ayyaa'nnekam sawwite la'ookko. Waa'a iittitam keeninaa ixxi sawwixxisanne weeshanto'i keeninaa Waa'i hundi luwwam eroommina issoo'isa lanqoommo. Waa'i gaassaatim doo'llu keeno ixxi Beet hagaranne daba'llitamisa issukko. Ee'isa issukkokim lobakat abbaayyuwwi lambe'enne Yesuus won ihoo'isinatte. Ixxi Beet hagaranne daba'llitamisa issu keenom weeshukko; weeshu keenom muccussukko; muccussu keenom lonsukko. Eehannata'i ka woshshi bikkina mayyinoommo? Waa'i niinninne maqir ihukkaa'lleensi niinninne uullixxameena ayyi xanookko? Ixxi Beetina qishixxoo'n niina hundinam higisaa uwwu Waa'i ixxi Beetinne maqire hundi luchchom uwwooyyonnihe? Waa'i doo'llu keeno kasasookkok ayyette? Waa'i muccussu keenonne oogatookkok ayyette? Ayyim oogatooyyo. Ni bikkina lehukkok, lehiinsim ki'ukkok, Waa'aannonnem makki kollonne afuurukkokii ni bikkinam Waa'a uunxookkokii Yesuus Kiristoosatte. Kiristoos iittiinsi neese annanni issookkok ayyette? Hawwonnihe? Te'im kichchechchannihe? Te'im yaayyanchannihe? Te'im sibaaronnihe? Te'im umba'adoomannihe? Te'im malaayyaam hawwonnihe? Te'im bisa'annihe? Keesammi Kitaabanne «Ki bikkina balli hundam lenoommo; durakkam gereebbisa inkaa xigammummo» yamamaa kitaabamukkane. Neese iittu Yesuus Kiristoosinne ee luwwi hundam kaa'nnoommo. Lehom ihuta'n te'im heechcham ihuta'n te'im Waa'i asse'amaanom ihuta'n te'im gassaanoom ihuta'n te'im kaba yoo luwwam ihuta'n te'im hanenne waaroo luwwam ihuta'n te'im malaayyaammuwwam ihuta'n te'im duunam ihuta'n te'im cebbam ihuta'n te'im qooccamu luwwi hundam ihuta'n mahim ni Moollanni Yesuus Kiristoosinne Waa'i neese iittu iittiinsi annanni isseena xanoobee'isa an la'aammo. An Kiristoosan ihummi bikkina hanqa wocoommo bagaan qophphanoommoyyo. An qophphanumbee'isa i wodanonne yoo Keesammi Ayyaanim kurookko. Ixxuwwi Isra'ee'l ooso. Waa'ina oos ihimmi, Waa'i uwwu lombi, hidi'l sagar, See'l uwwanchi, Waa'ina otossimmi, neeyyatii maalda'uwwii ixxuwwane. Kiristoos maa'llisinne qaramukkok ixxuwwi shumo'iinsette. Hundi luwwiinsim hanaan yoo Waa'i heer heerinam maasse'amaakkoohan ihona! Aameen. Ihukkaarem Waa'ik sagar gataakko yimmayyo. Isra'eeliinsi qaranto'i keen hundim Isra'eelayyo. Abrihaam shumo'iinsi qaranto'i keen hundim Abrihaam oosoyyo. Ihukkaarem «Ki shumo'i Yisaaqinne weeshamookko» yamamukko. Eehid yimmim Waa'ina ooso yamantamokim Waa'i neeyyaxxisinne ixxi oos ikka'a xiganto'i keeno bagaan maarinne oos ikko'i keenoyyo. Oo Waa'i neeyyatim «La'mmaarage kido'i ammanenne daba'llaa waaroommo. Saara'am beeto qattamo» yamamukkane. Xale'i eehaneyyo; Irbiqam niyyanni Yisaaqina lamfoorette ikko'i ammane Oohim Keesammi Kitaabanne «Yaaqooba iittaammo; ihukkaarem Eesa'a sabaammo» yamamukkane. Eehannata'i mayyinoommo? Waa'i beyyonne golo'immi yoohonnihe? Hore'em ee'isayyo. Waa'i Muse'enam «Haafeena hasummaannina haafoommo; qishixxeena hasummaanninam qishixxoommo» yaakko. Ee bikkina haafit manni hasukkisinnette te'im yakukkisinnette ihoo'n Waa'i haafukkisinnette. Waa'i Faari'oonina «An keese ki'isummok uulli hundannem i summi weeshamoo'isina i malaayye keesenne moo'iseenatte» yaakko. Ee bikkina Waa'i hasukkaannina haafookko. Hasukkaannikam wodano duudisookko. Ayyi la'ukko ki'nnuwwi iina «Eehannata'i Waa'i manna mahina jottakko'ookko yoolla? Ixxi yukkoka ayyi sabeena xanookko?» yitakkamo. Ihukkaarem at Waa'ina eehid yitoottok ayyette? Buchchi mu'ut «Eese mahina ka'isa issitaa baxxitto?» yaa baxu mancho xa'mmoohonnihe? Buchchiinsi mu'uta baxoo manchi matoo wereeggina matoo kora'i awwaadinam baxeena xanooyyonnihe? Waa'a quuqisimminne bichchina guddo'i keenonne Waa'i ixxeka quunqa la'iseenaa malaayye moo'iseenaa lobakata iyyaqqukkaa'lleensi mayyitakkeenatte? Ee'isa issukkokim gaassaatim lombina baxu keenina haafaa ixxeka lophphaakkoo lomba la'iseenatte. Oo haafu keenim xale'i Ayihuxxi minaadabiinsette ihoo'n mulli minaadabiinsim weeshammummi neeseme edaatette. Oohim Hoose'i Kitaabanne «I minaadab ikkobee'i keeno ‹I minaadaba› yaa weeshoommo. Iittantobee'i keenom ‹Iittanto'oo keeno› yaa weeshoommo» yamamukkane. Odim « ‹I minaadabayyo› yamanta'a weeshanto'i uullannem ‹Hee'oo Waa'ina ooso› yamanta'a weeshantamo» yamamukkane. Issaayyaasim Isra'ee'l bikkina «Isra'ee'l oosik xig maham dambalaq shashsha'llisa dut ihukkaarem hofqaxichchi gatookko. Mashka'oomim Moollanni ixxeka oogato'o malaayyaam quunqinne qaqqisaa uullanne eebookko» yaa alallaataakko. Odim Issaayyaas «Gogoxxi Moollanni Waa'i niina shumo'o gatisubeeta'n Soddo'mmisaa Gomo'llisaa inkaa hee'nnummo» yaa gaassaahim kuraakko. Eehannata'i neese mayyinoommo? Muccurooma siiddeena yakitambee'i mulli minaadab muccurooma siiddo'o. Oo muccuroomim amma'nnatinne siidamoo muccurooma. Ihukkaarem seera egerimminne muccurooma siiddeena yakitam Isra'eel siiddeena xanto'oyyo. Eehid ihukkok mahinatte? Muccurooma amma'nnatinne hasimma utta'a baxinne siiddeena hasso'i bikkinatte. Ee'isinne qoloo kinanne qolanto'o. Oohim Keesammi Kitaabanne «Manna qoloo kina Yerusaaleemanne dissoommo. Oohim manna ubbuusoo kina. Ixxonne amma'nnookkok tuurooyyo» yamamukkane. Iyyabbaayyuwwa, i mixanii Waa'a uunxoommi uunxatii Isra'ee'l minaadab gatoo'isinatte. Hanqo'i lachchinnette ihubee'aarem Waa'i woshshina to'achchitamisa an la'oommo. Waa'i beyyiinsi waaru muccurooma sabba'a ixxuwwi gaqqi muccurooma qoxxisseena hassu'uuyyim Waa'i gudisu muccurooma aa'llo'oyyo. Ixxonne amma'nnukkok hundim muccuroo'isina Seera Kiristoos guullaakko. Muse'em seera egerimminne siidamoo muccuroo'm bikkina «Seera egerookkok gatookko» yaa kitaabaakko. Ihukkaarem amma'nnatinne siidamoo muccuroo'm bikkina Keesammi Kitaab «Ki wodanonne ‹Ayyi iimane firookko?› yitaa sawwititte» yaakko. Eehid yukkokim Kiristoosa aad dilliiseenatte. Te'im «Ki wodanonne ‹Si'oolanne ayyi dillookko?› yitaa sawwititte» yaakko. Oohim Yesuusa lehiinsi ki'iseenatte. Odim Keesammi Kitaabanne «Waa'i sagar yookkok ki gadanonnette, ki suumennettee ki wodanonnettee» yamamaakko. Oo sagarim neese kulloommi amma'nnaxxi sagara. Yesuus Moollanni ihukkisa ki suuminne kuttittaaree Waa'im ixxo lehiinsi ki'isukkisa ki wodaninne amma'nnittaaree gattootto. Mashka'oomim manni wodaninne amma'nnaa muccurookko; amma'nnukkisam suuminnem kuraa gatookko. Keesammi Kitaabim «Ixxonne amma'nnookkok ayyim tuurooyyo» yaakko. Kaba Ayihuxxi minaadaphphaannonnee mulli minaadaphphi lambe'ennee annannoom bee'e. Hundikim Moollanni mexxo'i Waa'a. Ixxi summa weeshoo keen hundinam ixxeka lophphaakkoo maasso uwwookko. Mashka'oomim Keesammi Kitaabanne «Waa'ika summa weeshookkok ayyim gatookko» yamamaakko. Ihukkaarem manni amma'nnubee'eka hinkid weeshookko? Ixxi bikkina macceesubee'ekdu hinkid amma'nnookko? Kurookkok bee'ekdu hinkid macceeseena xanookko? Asse'amubee'i mandu hinkid kureena xanookko? Keesammi Kitaabanne «Mishiraachchi sagara kuroo kee'nnek lokki hinkido'i shaamaamo» yamamaa kitaabamaakko. Ihukkaarem Issaayyaas Kitaabanne «Moollanna! Neese kullummi woshsha ayyi amma'nnukko?» yamamaa kitaabamukkisam mishiraachchi sagara hundi amma'nnukkoyyo. Ee bikkina amma'nnat waarookkok macceesakko'i luwwiinsette. Macceesakkamokim Kiristoos bikkina kuramu luwwa. An xa'mmoommok ixxuwwi macceesso'oyyonnihe? Hanqinam macceesso'ookko. Mashka'oomim Keesammi Kitaab «Ixxuwwik sagar uulli hundam afaakko. Ixxuwwi kutto'i woshshim uulli tochchi hundam afaakko» yamamaa kitaabamaakko. Odim an xa'mmoommok Isra'ee'l minaadab qoossito'oyyonnihe? Muse'e gaassaatim «Mulli minaadabinne ki'nnuwwa to'achchisoommo. Qoossoobee'i minaadabinnem ki'nnuwwa nadadiisoommo» yaakko. Ee'isam Issaayyaasim «Eese hassobee'i keenina siidamummo; ‹Hannonne yookko?› yita'a xa'mmitobee'i keeninam la'amummo» yaa caakkisaa wocaakko. Ihukkaarem Isra'ee'l minaadaphphi bikkina «Ijaajamoobee'i boqqi minaadabina balli hundam i anga biddiqaa'ummo» yaakko. Eehannata'i an xa'mmoommok Waa'i ixxi minaadaba sabaatennihe? Hore'em ee'isayyo. An i gagim Abrihaam shumo'iinsi Biiniyaam moolliinsi qaramaammoo Isra'eelcho. Waa'i gaassaatim doo'llu ixxi minaadaba sabukkoyyo. Eeliyaas Isra'ee'l minaadaba Waa'anne kasasu ammane Waa'i mayyuda'e Keesammi Kitaab yookkoka laqqakkamoyyonnihe? «Moollanna! Hiraagaano shito'ookko. Kiina kitimakkam beyyuwwam gindito'ookko. Kaba mexxo'i an gataammo. Eesem shiteena hassamuulla» yukkaare Waa'i mayyaa dabarukko? «Ba'aalina guruphphita'a otossitobee'i kee'nneka lamar kum manna i gagina gatixxaammo» yukko. Ee bikkina kabadem Waa'i eroomminne doo'llanto'i kee'nnek baraar yookko. Gatimmi Waa'i eroomminnette ihulas eehannata'i bax maham awwaadooyyo. Eehid ihubeelas Waa'ik eroommi eroomma yamameena xanamooyyo. Eehannata'i mah erane? Isra'ee'l minaadab hassam luwwa siiddoo'n gatto'ookko. Ihukkaarem doo'llanto'i keen siiddo'ookko. Gattoqax ixxuwwika wodano duudisso'ookko. Oohim Keesammi Kitaabanne «Waa'i ixxuwwika tiiro jallaa'ukko. Kaballi afeebe'em ixxuwwina moo'oobee'i illee macceesoobee'i maccee uwwukko» yamamukkane. Daawiitim «Ixxuwwik maaddi ixxuwwina qaasha, shikkaa, woshaadaa ihaa ixxuwwa hawwisona. Moo'llambee'isa ixxuwwik illi qooqona. Ixxuwwik afar heer heerinam quutona» yaakko. An xa'mmoommok Isra'eel qolanto'ok ki'llambee'isa ubbeenannihe? Hore'em ee'isayyo. Ixxuwwi ijaajancha sabimminne mulli minaadabina gatimmi waarukko. Oohim ihukkok Isra'eela to'achchisimminatte. Kaba ixxuwwik ijaajancha sabimmii ubimmii mulli minaadabina maasso eebukkaa'lleensi Ayihuxxi minaadab hundim daba'llitota'n maassi hinkaa'nna lophphookko. Ixxuwwik mogodo'oom mulli minaadaba Waa'inne iittansukkaa'lleensi ixxuwwik daba'llimmi hinkid ihookkoka labissakka'ate? Hore'em lehiinsi ki'immisa. Buko'iinsi sarakka'a uwwakko'i lud keesamaakkoohan ihulas buko'i hundoomim keesamaakkoohane. Xaph keesamaakkoohan ihulas caaffuwwim keesamaakkoohane. Ihukkaarem caafik mat qax iiqamukkaare at udma'i uulli weer Waa'i maassika baxxantoo'isina caaffuwwi iiqamu beyyonne sikitantaatto. Ee bikkina ee iiqamu caaffuwwa gadditte. Gaddilas keese iyyukkok xapha bagaan at xapha iyyitbee'isa sawwihe. Ayyi la'ukko at «Ixxuwwi beyyonne an sikitamoommisina caaffuwwi iiqamukko» yitootto. Ookki hanqame. Ixxuwwi iiqanto'ok amma'nnato hoogimminnette. Ihukkaarem at amma'nnatonne qoxximminne uullitaatto. Ee bikkina badde bagaan bolxititte. Mashka'oomim siram aminne hee'u caaffuwwinam qishixxubee'i Waa'i kiinam qishixxooyyo. Waa'ika qishixxatoo muraasoomaa qoosse. Muraasoom ubbo'i keeninatte; ihukkaarem at ee qishixxatonne hee'llilas Waa'ik qishixxat kiinatte. Eehid ihubeelas atim murantootto. Ayihuxxi minaadabim amma'nnimma sabimmiinsi daba'llitolas eraa'l beyyonnem daba'llitamo. Mashka'oomim Waa'i eraa'l beyyonne dabareena xanookko. At siranne hee'llitti udma'i uulli weeriinsi murantaa sira kiihan ihubee'i kaasamaakkoo weeranne sikitantittaa'lleensi kaasamu weerina siram caaf hee'llo'i keen eraa'l ixxuwwi weerannem daba'llimmi hinkaa'nna sholle'aalla. Iyyabbaayyuwwa, ki'nnuwwi wodanonne qoor manni ikkakko'isa sawwitakkambee'isina mat maaxamaakkoo woshsha ki'nnuwwina kuroommo. Mulli minaadaphphek doo'llantoqax hundim Waa'i beyyo waatteebe'e kolli Isra'ee'llek wodan duudaakko. Ee bikkina Isra'eel hundim gatookko. Keesammi Kitaabannem «Gatisaanchi Xiyooniinsi waarookko. Waaraa Yaaqoob shumo'iinsi baaxiilo shiinshaa hoorookko. Ixxuwwika baaxiilo shiinshaa hooreena aagoommi hidiro ee'isinne wonshoommo» yamamaakko. Isra'ee'l minaadab mishiraachchi sagara sabbo'i bikkina Waa'ina maso'o. Ookki ki'nnuwwina danaamo. Ihukkaarem doo'llanchisanne ixxuwwi anno'i bikkina Waa'i iittoo keeno. Mashka'oomim Waa'i uwwu uwwanchinaa weeshu weeshanchinaa saxxooyyo. Ki'nnuwwi eraare Waa'ina ijaajantakkambee'i keen hee'llakko'o. Ihukkaarem kaba Isra'eel ijaajancha sabimminne haafite siixxitakko'ookko. Waa'i ki'nnuwwina moo'isu haafite Isra'eelim siixxitamisina kaba ijaajanto'oyyo. Waa'i manni hundinam haafoo'isina manni hundam ijaajancha sabimmanne ixxi quraannaakko. Waa'aannina lophphaakkoo eroommina, qooroominaa lachchinaa hoola! Ixxeka oogato'o ayyim saarayyeena xanooyyo. Ixxeka googo ayyim la'ooyyo. Keesammi Kitaabannem «Waa'ika sawwite ayyi la'ookko? Te'im ixxo sogookkodu ayyette? Te'im Waa'i dabaraa miqoo'isina ixxena liqaayyisookkodu ayyette?» yamamaa kitaabamaakko. Hundi luwwim siidamukkok ixxeensette; ixxi kollinnettee ixxennettee. Ixxena heer heerinam lombi ihona! Aameen. Iyyabbaayyuwwa, ki'nnuwwika orachcho Waa'a liiransoo'isina keesamaakkoo hee'oo kiti'mmisa issitakka'a Waa'ina hincaa'llakkamisina Waa'i qishixxatinne an ki'nnuwwa uunxoommo. Oohim Waa'ina garakka'a otossimma. Ka lasage ki'nnuwwik tiir haareechchi ihona bagaan ka uulli manni jor sawwite awwontakkotte. Oohim Waa'a liiransoo danaam muccur sawwit mada'e ihukkisa moo'llakka'a laqqakkamisinatte. Waa'i ki'nnuwwina uwwu amma'nnaxxisa tiirinne sawwi'llehe bagaan sawwimmi hasisoohaanniinsi hanaan sawwitakkambee'isina iina uwwamu eroomminne an ki'nnuwwina hundinam kuroommo. Niihaannonne orachchonne lobakat qaamafeet hee'ukkaarem ee qaamafeettuwwik bax matoyyo. Ee'isam neesem dut keen inkummaarem Kiristoosinne mat orachcho. Neese hundim mat manchonne yoo qaamafeettuwwisa. Waa'i ixxi eroomminne niina uwwu annanni annanni uwwancha awwaaxxinona. Niina uwwamukkok hiraagimmi ihulas niina yoo amma'nnaxxisinne hiraangona. Niina uwwamukkok awwaadimmi ihulas awwaandona. Niina uwwamukkok losisimmi ihulas losinsona. Qoxxisookkokim qoxxisona. Tasbo'o uwwookkokim liiranchinne uwwona. Gassookkokim qoxxaa gassona. Haafookkok liiranchinne haafihona. Ki'nnuwwik iitti hanqo'an ihona. Jora sabbehe; danaam luwwa qoxxissakka'a amaddehe. Ki'nnuwwina'i ki'nnuwwim abbaayyuwwisa iittammehe. Ki'nnuwwina'i ki'nnuwwim lonsaqqammehe. Keesammi Ayyaaninne iibbitakka'a Moollannina awwaaddehe bagaan ceentakkotte. Neeyyatonne liirammehe. Hawwo iyyaqqitakkam keen ikkehe. Hundi ammanem Waa'a uunxehe. Hawwu amma'nnaanina hara'mmehe. Koyya aa'llehe. Ki'nnuwwa hawwisoo keeno maasse'llehe bagaan duuntakkotte. Liiramoo keeninne maqirem liirammehe; wi'lloo keeninnem wi'llehe. Ki'nnuwwina'i ki'nnuwwim mateeyyoominne hee'llehe. Ki'nnuwwi gaga hoffiissehe bagaan birantakkotte. Iinniinsi manbee'e yitakkotte. Manni hundinam liiransoo luwwa issehe bagaan jora issu manchina dabattakka'a jora issitakkotte. Ki'nnuwwina xanamoohan ihulas manni hundinnem iittantakka'a hee'llehe. Iittantakko'oo iyyabbaayyuwwa, Keesammi Kitaabanne «Waa'i ‹Baado miqisimmi iihane; an baado miqisoommo› yoolla» yamamaa kitaabamu bikkina Waa'i oogatona ullehe bagaan ki'nnuwwi anginne baado miqissakkotte. Ee bikkina «Ki diinakkichchi sibaarukkaare itise; xeebe'ukkaarem agise. Ee'isa issitlas ixxaannonne horoorenne gii'l kashara tuubbootto» yamamaakko. Eroka issimminne jolle kaa'llehe bagaan jolli ki'nnuwwa kaa'oone. Manni hundim gassaanina ijaajamona. Mashka'oomim ixxuwwa gassaan issukkok Waa'a. Waa'i gassaanchi issubeelas ayyim gassaanchi iheena xanooyyo. Gassaaninne uullixxamookkok Waa'i gassaan issu keeninne uullixxamoolli ihu bikkina oogato'onne aagookko. Ee bikkina mat manchi Waa'i quunqiinsi gateena xale'i ihoo'n ixxi tiir acceeqasoo bikkinam gassaanina ijaajaanchi hasisookko. Gibiro miqqakkamok ee bikkinatte. Mashka'oomim gassaan ee baxo baxxam ammane Waa'ina awwaaddamuulla. Ee bikkina hundinam hasisoo luwwa uwwehe. Gibir hasisoohaanninam gibiro uwwehe; qarax hasisoohaanninam qaraxo uwwehe; haydimmi hasisookkokam haydehe; lombi hasisoohaanninam lomba uwwehe. Ki'nnuwwina'i ki'nnuwwim iittammehe bagaan ayyekim badanchi ki'nnuwwanne hee'oone. Ixxi beshichcho iittookkok seera wonshaakko. Mashka'oomim «Saa'llitte; shititte; game'llittee mixxittee» yoo ijaajii mulli ijaajii hundim mat ihaa «Ki beshichcho ki gaqqisa iitte» yoo ijaajinne wo'mmaakko. Beshichcho iittookkok ixxonne jora issooyyo. Ee bikkina manna iittookkok seer hundam wonshaakko. Ku amman diriichchiinsi ki'llakkam amman ihukkisa laqqehe. Amma'nninummi ammaniinsim lophphaa kaba niikki gatimmi hincukkisa laqqehe. Hiim higaakko; balli hincaakko. Ee bikkina tuunsika baxo fissinaa caakkika o'l mu'uta edde'nnona. Caakkanne hee'oo mannisa inkaa laboo'isa hee'nnona. Oohim kajjinneyyo; dimbimminneyyo; adabi'imminneyyo; saa'imminneyyo; wocanchinneyyoo to'achchimminneyyoo. Moollanni Yesuus Kiristoosa edde'llehe bagaan maar mixukkisa ihoobee'isa hasu luwwa issona uwwitakkotte. Amma'nnatonne hoogukkoka aa'llehe bagaan ixxi sawwitenne oogattakkotte. Hundem luchchom amma'nnatinne itookkok yookko. Ihukkaarem amma'nnatonne hoongaanchi manchi maara itooyyo. Hundi luwwam itookkok itoobee'eka gadoone. Itoobee'ekim itoohaannonne oogatoone. Mashka'oomim Waa'i ixxom aa'aakko. Mullaannina awwaadoohaannonne oogatteena at maruchcho? Uullukkaarem ubukkaarem ixxi Moollanninatte. Moollanni uulliseena xanoo bikkina ubukkaarem uullisookko. Mat balli mulli balliinsi lophphoohan issaa sawwoo manchi yookko. Odim balli hundim mat ihukkisa sawwoo manchi yookko. Manni hundim ixxi wodanonne guullaa qoossona. Balla lonsookkok Moollanni lombina lonsoolla. Hundi luwwam itookkokim Waa'a galaxxoo bikkina Moollanni lombina itoolla; itimma sabookkokim Moollanni lombina sabaa Waa'a galaxxookko. Niinniinsi ixxi gagina hee'ookkok te'im ixxi gagina lehookkok matim bee'e. Hee'nnummaarem hee'nnoommok Moollanninatte; lenummaarem lenoommok Moollanninatte. Ee bikkina neese hee'nnummaarem lenummaarem Moollanni keeno. Yesuusim lehaa odim lehiinsi ki'aa hee'oohan ihukkok lehu keeninaa foorinne yoo keeninaa laminam Moollanni iheenatte. Kiyyabbaayyonne oogattoottok mahinatte? Te'im kiyyabbaayyo gaddoottok mahinatte? Mashka'oomim neese hundim Waa'i illagenne oogato'ina uullinoommane. Oohim Keesammi Kitaabanne «Moollanni Waa'i ‹An hee'oommi Waa'a. Manni hundim iina guruphphaa otossookko. Allab hundim eese galaxxookko› yoolla» yamamaa kitaabamukkisam neese hundim banxummi baxina Waa'i illagenne hincinaa xa'mmammoommo. Ka lasage mat mullaannonne oogatimma ullona. Niyyabbaayyo qoloo luwwa te'im qoccoo luwwa hore'em issinoombee'isa murte'nnona. Hundi luwwim ixxi gaginne haashaaramubee'an ihukkisa Moollanni Yesuusinne ihaa la'aammo. Ihukkaarem «Haashaaramma» yaa sawwoo manchina oo luwwi haashaaramma. At ittoo luwwinne kiyyabbaayyo kichche'issitlas kiyyabbaayyik iitti keesenne bee'e. Ixxi bikkina Kiristoos lehu mancho at ittoo luwwinne bi'oo'isa issititte. Ee bikkina ki'nnuwwina eran ihu luwwi jor ihaa xigamoo'isa issitakkotte. Mashka'oomim Waa'ik adillan Keesammi Ayyaan uwwoo muccurooma, xummaa liiranchaa bagaan ichchayyoo aggayyoo. Ee'isinne Kiristoosina awwaadookkok Waa'a liiransoohanee manni beyyonnem galaxxamaakkoohanee. Ee bikkina xumma eeboo luwwaa neese hundam qoxxisoo luwwaa hansona. Hurbaatina yitakka'a Waa'ika baxo ginditakkotte. Hurbaat hundim muccura; ihukkaarem mat manchi itoo luwwinne mulli manna amma'nnatiinsi ubbuusimmi hanqinam jora. Kiyyabbaayyo qoloohan ihulas maara ittibee'aare, woyi'n diqaasam aggibee'aare te'im ihu luwwi hundam issitbee'aare erane. Kiina yoo amma'nnat kiihaannonnee Waa'i lambe'ennee hee'ona. Issoo luchchonne ixxi tiir qannaxoobee'i manchi maasse'amaakkoohane. Ihukkaarem malamoo manchi amma'nnatinne itubee'i bikkina oogatamookko. Mashka'oomim amma'nnatinne issakkambee'i luwwi hundim baaxiilo. Neese amma'nnatonne qoxxaalluwwi keen amma'nnatonne hoogu keeno hara'mmimmi hasisookko bagaan ni gaga liiransaqqimmi hasisooyyo. Neese hundim ni beshichcho qoxxinseena ixxo liiransoo er luwwa issinona. Keesammi Kitaabanne «Keese game'llito'i kee'nnek game'llat eesenne afukko» yamamaa kitaabamukkisam Kiristoosim ixxi gaga liiransukkoyyo. Keesammi Kitaabanne gaassiinsim kitaabamu luwwi hundim soodonne ihoo eroomma qoxximminnee iyyaqqimminnee ege'llinoommisina neese sogeena kitaabamaakko. Qoxximmaa iyyaqqimmaa uwwoo Waa'i ki'nnuwwina'i ki'nnuwwim Yesuus Kiristoosisam mateeyyoominne hee'llakkamisa issona. Oohim ki'nnuwwi hundim mat sagarinnee mat tiirinnee ni Moollanni Yesuus Kiristoosika anni Waa'a lonsitakkamisinatte. Kiristoos Waa'i lombina ki'nnuwwa aa'ukkisam ki'nnuwwina'i ki'nnuwwim aa'aqqammehe. An ki'nnuwwina kuroommok Kiristoos Ayihuxxi minaadabina awwaadaanchi ihukkok Waa'i ixxuwwi gaassi anno'ina aagu neeyyaxxi sagara wonsheena amma'nnamaakkoohan ihukkisa moo'iseenatte. Ee'isa issukkokim mulli minaadab Waa'i ixxuwwina haafu bikkina ixxo lonsitamisinatte. Oohim Keesammi Kitaabanne «Mulli minaadaphphi lambe'enne an keese lonsoommo. Ki summinam zammaroommo» yamamukkane. Odim «Mulli minaadabim Waa'i minaadabinne maqirem liirammehe» yamamaakko. Odim «Mulli minaadab hundim Waa'a lonsehe. Minaadab hundim Waa'a lonsona» yamamaakko. Odim Issaayyaasim «Mulli minaadaba gassookkok Issayyi shumo'iinsi waarookko. Ixxuwwim ixxo neeyyato issita'a hee'llamo» yaakko. Waa'i ki'nnuwwina uwwoo neeyyat Keesammi Ayyaa'n malaayyinne lophphoo'isina amma'nnatinne siidamoo liiranchaa xummaa hundam neeyyato uwwoo Waa'i ki'nnuwwinam lonsaa uwwona. Iyyabbaayyuwwa, ki'nnuwwi lobakat er luwwa issitakkamisa, lachchi hundim wo'mmaakkoo keen ikkakko'isaa ki'nnuwwina'i ki'nnuwwim soqqantakkeena xantakkamisaa la'aa an i gagim liiramaammo. Ee bikkina an Waa'ina awwaadoommi awwaadonne Yesuus Kiristoosinne ihaa bakke'oommi mashka'i yookko. Mulli manni baxukkaannonne an edaa baxeena hasoombee'i bikkina eraare Kiristoos bikkina kuramubee'i beyyonne mishiraachchi sagara alallaateena i mixano. Oohim Keesammi Kitaabanne «Ixxi bikkina hore'em kuramubee'i keen ixxo moo'llamo. Ixxi bikkina hore'em macceessobee'i keenim qoossitamo» yamamaa kitaabamukkane. Eese lobakat ammane ki'nnuwwi beyyo waareena hoorukkok eehane. Ihukkaarem kaba ka uullanne an baxoommi baxbee'i bikkinaa ki'nnuwwi beyyom waareena lobakat hiinchiinsi ki'isaa mixummi bikkinaa Ispheena marummuuyyi Waa'i yukkaare ki'nnuwwa moo'eena qoodaammo. Hofqax ammanina ki'nnuwwinne edamaa liiramaa lasage googina ihoo luwwa hara'mmitakka'a ki'nnuwwim eese geegeessakkamisa neeyyato issoommo. Kaba an Waa'i minaadabina hara'mmato amadaa Yerusaaleema maroommuulla. Mashka'oomim Maqeedoonannee Akaayannee yo'i amma'nnaan Yerusaaleemanne yo'i bux amma'nnaanina hara'mmato uwwiteena liiranto'ookko. Eekkam issiteena liiranto'ookko. Hanqinam issimmi hasisoohane. Mashka'oomim mulli minaadab Waa'i woshsha Ayihuxxi minaadabinne baxxanto'aa'lleensi ixxuwwina yoo luwwinne Ayihuxxi mannina hara'mmimmi hasisookko. Ee bikkina ixxuwwi uwwito'i luwwa massaa uwwaa lasage ki'nnuwwi beyyinne aa'aa Ispheena maroommo. An ki'nnuwwi beyyom waaroommi ammane Yesuus Kiristoos maassinne wo'mmaa waaroommisa la'oommo. Oohim Waa'i yukkaare liiranchinne ki'nnuwwi beyyo waaraa ki'nnuwwinne edamaa qoxxoommisinatte. Xumma uwwoo Waa'i ki'nnuwwinne hundinnem maqire ihona! Aameen. Kinkiroosanne yoo amma'nnaa'n wixxitina awwaadaanchi niyyaayyi Feeben bikkina laqqakkona hasoommo. Waa'i minaadabina laboo'isa issitakka'a Moollanni kollinne ise aa'llehe; ki'nnuwwiinsi hassam luwwi hundinnem ise hara'mmehe. Mashka'oomim eesem edda'a lobakat keeno hara'mmito'ookkotane. Yesuus Kiristoosika awwaado iinninne maqirem baxxam Phirisqilenaa Aqilinaa xummaato kullehe. Eese gatisseena yita'a ixxuwwi foore higissa'a uwwito'ookko. Ixxuwwa galaxxoommok xale'i anette ihoo'n mulli amma'nnaa'n wixxit hundame. Ixxuwwi minenne yoo amma'nnaa'n wixxitinam xummaato kullehe. Issiyanne luxxeka gaassaa Kiristoosanne amma'nnu an iittoommi Ephpheeneexoosinam xummaato kullehe. Ki'nnuwwina lobakata badatto'i Maaraamena xummaato kullehe. Iinninne maqire karanto'i i qarmanni Andirooniiqoosinaa Yuuniyaasinaa xummaato kullehe. Ixxuwwi iinniinsi illageenim Kiristoosanne amma'nnito'oo keenoo asse'amaa'n beyyonnem la'anto'oo keenoo. An Moollanninne ihaa iittoommi Amphiliyaatoosina xummaato kullehe. Kiristoosika awwaado niinninne maqire baxxam Urbaanoosinaa an iittoommi Istaaqenaa xummaato kullehe. Kiristoosan ihukkisa keenamaa la'amaakkoo Aphphiliisinaa Arisxoobuloos abaroosinaa xummaato kullehe. I qarmanchi Heeroodiyooninaa Moollannanne amma'nnito'i Naarsiisaas abaroosinaa xummaato kullehe. Moollannina baxxam Tirfaaninaa Tirufoosinaa xummaato kullehe. Moollannina badatto'i iittanto'oo Pheersiisenam xummaato kullehe. Moollannanne amma'nnatinne la'amaakkoo Ruufoosinaa ixxenam iinam amanaa xummaato kullehe. Asinkirtoosina, Fileegoonina, Herimeesina, Phaatiroobaasina, Heerimaasinaa ixxuwwinne maqire yo'i abbaayyuwwinaa xummaato kullehe. Filooloogoosina, Yuuliyina, Neeriyyinaa ixxi aayyanaa, Olomphaasinaa ixxuwwinne maqire yo'i amma'nnaan hundinamii xummaato kullehe. Ki'nnuwwina'i ki'nnuwwim danaamisa suunqantakka'a xummaatixxammehe. Kiristoosanne amma'nnito'i keen hundim xummaato asse'llo'ookko. Iyyabbaayyuwwa, ki'nnuwwina losinsummi losano sabba'a atanaachchaa hawwoo eebbam keeno laqqakka'a ee keeniinsi ege'llitakkamisina uunxoommo. Mashka'oomim oo keen awwaadamookkok ixxuwwi gaga bagaan ni Moollanni Kiristoosayyo. Mishisoo woshsha buuro labba'a woccu'uuyyi qacaalli mannika wodano bi'issa'a huushissamo. Ki'nnuwwik ijaajanchi manni hundinam la'amu bikkina liirammaammo. Kabadem er luwwina qoor keen ikkakkamisinaa jor luwwiinsi gibbakkamisinaa hasoommo. Xumma uwwoo Waa'i Sheexaancho qaqqisaa ki'nnuwwi lokkiinsi woroon iiqookko. Ni Moollanni Yesuus Kiristoosik eroommi ki'nnuwwinne ihona. Iinninne maqire baxoo Ximootoos, i qarmanni Luqyoos, Iyyaasoonii Soosphaaxroosii ki'nnuwwina xummaato asse'llo'ookko. Ka assi kitaaba kitaabummi an Xarxiyoosim Moollanninne ihaa xummaato hincaa'oommuulla. An Yesuus Kiristoos bikkina alallaatummi mishiraachchi saga'llisinnee lobakat doollina daphphaa hee'u hanqisinnee ki'nnuwwa qoxxiseena xanoo Waa'ina kaba lombi ihona. Oo daphphaa hee'ukkok kaba caakkaakko. Caakkukkokim hee'oo hiraagaan kitaabbo'i Keesammi Kitaab kollinnette. Oohim manni hundim amma'nnatina ijaajamoo'isina heer heerina hee'oo Waa'i ijaajukkane. Matem qoor Waa'ina Yesuus Kiristoosinne heer heerinam lombi ihona! Aameen. Waa'i doo'llinne Yesuus Kiristoosina asse'amaanchi ihoommisina weeshamummi Phaawuloosiinsii niyyabbaayyi Soostinoosiinsii ixxuwwinaa niinaa Moollanni ihu ni Moollanni Yesuus Kiristoosika summa beyyi hundannem weeshsham keeninne hundinnem maqire Yesuus Kiristoosinne annanni ikkakka'a Waa'i minaadab ikkakkeena weeshantakko'i Qorontoos beero'i amma'nnaanina. Niyyanni Waa'ikii Moollanni Yesuus Kiristoosikii eroommii xummii ki'nnuwwina ihona. Yesuus Kiristoosinne ihaa Waa'i ki'nnuwwina uwwu eroommi bikkina hundi ammanem Waa'a galaxxoommo. Hundisinnem oohim woc hundinnee lachchinnee ixxenne goddaan ikkakko'ookko. Kiristoos bikkina kullummi woshshannem ki'nnuwwi qoxxitakko'ookko. Ee bikkina ni Moollanni Yesuus Kiristoosika waarimma egettakku'uuyyi ki'nnuwwina Ayyaa'n uwwanchik mahim hanqatooyyo. Ni Moollanni Yesuus Kiristoos waaroo ayyaamonne miiqakkam luwwi bee'i keen ikkakka'a hee'llakkamisina lasaanchi afeebe'e Waa'i ki'nnuwwa qoxxisookko. Ixxi Beet ni Moollanni Yesuus Kiristoos mateeyyoomina ki'nnuwwa weeshu Waa'i amma'nnamaakkoohane. Iyyabbaayyuwwa, ki'nnuwwi hundim mexxo'i wodaninnee tiirinnee iittantakka'a mat ikkehe bagaan ki'nnuwwi lambe'enne annannaatoom ihoobee'isina ni Moollanni Yesuus Kiristoos summinne uunxoommo. Iyyabbaayyuwwa, ki'nnuwwi lambe'enne wocanchi yoo'isa Qalo'i mi'n abaroosiinsi macceesaammo. Oohim ki'nnuwwi annannichchim «An Phaawuloosane» te'im «An Aphphuloosane» te'im «An Keefa'ane» te'im «An Kiristoosane» yitakkamuulla. Kiristoos baxxansamaatennihe? Te'im Phaawuloos ki'nnuwwi bikkina saqalamaatennihe? Te'im Phaawuloos summinne xammaqantakka'attennihe? Qarisphoosiinsii Gaayoosiinsii bagaan ki'nnuwwiinsi an matom xammaqumbee'i bikkina Waa'a galaxxoommo. Ee bikkina ayyim ki'nnuwwa «Phaawuloos summinne xammaqantakko'ookko» yeena xanooyyo. Odim Isxifaanoos mi'n abaroosam xammaqaammo. Eehanniinsi mulleka ayye xammaqumda'e sawwoommoyyo. Kiristoos eese asse'ukkok mishiraachchi sagara kuronatte bagaan xammaqonayyo. Kiristoos saqalamaa lehu leh awwaad bee'an ihoobee'isina manni lachchinne wocoommoyyo. Kiristoos saqalamaa lehukkisa kurimmi bi'llam keenina qawwooma. Ihukkaarem niina gantummi keenina Waa'i malaayye. Keesammi Kitaabanne «Qoor kee'nneka qoorooma bi'isoommo. Lachchaam kee'nnekam lachcha awwaad bee'an issoommo» yamamaa kitaabamaakko. Qoor manchi hannonne yookko? Lobakat lachchi yookkok hannonne yookko? Odim ka uulli luwwa saarayyaa moo'ookkokdu hannonne yookko? Waa'i ka uullika qoorooma qawwoom issukkoyyonnihe? Ka uulli manni ixxuwwi gaqqi lachchinne Waa'a laqqambee'isa Waa'i ixxi qooroominne xufaakko. Ihukkaarem ka uulli mannina qawwoom ihaa xigamoo ka neese losinsoommi mishiraachchi sagaranne amma'nnitam keeno gatiseena Waa'i iittaakko. Ayihuxxi manni mare'e hassamo. Giriik mannim qoorooma hassamo. Ihukkaarem neese alallaantoommok Ayihuxxi manninaa qolancha, mulli manninaa qawwoom ihu saqalamaa lehu Kiristoosatte. Weeshanto'i keenina Ayihuxxi manninaa mulli manninaa Kiristoos Waa'i malaayyee qooroomaa. Waa'ik qawwoom manni qooroomiinsi odim Waa'ik hoongim manni qoxallaniinsi lobane. Iyyabbaayyuwwa, weeshantakko'isa sawwi'llehe. Maa'llisinne sawwakkamaare dut keen qoolluwwi hee'llakko'oyyo. Odim dut keenim malaayyaammuwwi hee'llakko'oyyo. Dut keenim geejji shumo'iinsi qarantakko'oo keen hee'llakko'oyyo. Ihukkaarem qoolluwwi keeno tuussiiseena Waa'i ka uulli qawwuwwa doo'llukko. Odim qoxalluwwa tuussiiseenam ka uulli qacaalluwwa doo'llukko. Waa'i ka uulli manni «Lob luwwa» yaa sawwoo luwwa bi'iseena ka uullanne ceemamu luwwa, gadamu luwwaa mahannem xigamoobee'i luwwaa doo'llukko. Eeham issukkok ayyi manchim Waa'i illagenne biramoobee'isinatte. Yesuus Kiristoosinne Waa'i ki'nnuwwina heechcha uwwaakko. Waa'i niina qoorooma, muccurooma, eroommaa Gatisaanchoo issaa Yesuus Kiristoosa uwwaakko. Ee bikkina Keesammi Kitaabanne «Bakke'ookkok ayyim Moollannanne bakke'ona» yamamaa kitaabamaakko. Iyyabbaayyuwwa, Waa'ika mishiraachchi sagara ki'nnuwwina kureena waarummi ammane an ki'nnuwwina hayyo'oominne te'im qooroominne alallaatummoyyo. Mashka'oomim an ki'nnuwwinne hee'ummi ammane saqalamaa lehu Yesuus Kiristoosiinsi bagaan mulluwwa maham la'eena hasoombee'isina murte'aa hee'ummo. An ki'nnuwwinne maqire hee'ummi ammane hoonginne, lobakat baddimminnee huxechchinnee hee'ummo. Qoxxaalli amma'nnaa'n beyyonne qooroo'm woshsha woncoommo; ihukkaarem ka uulli manni qoorooma te'im bi'oo ka uulli gassaa'n qoorooma woncoommoyyo. Neese woncoommi qooroom manniinsi daphphaa maaxamaakkoo Waa'i qoorooma. Oo qooroomim lobakat doolliinsi illageen Waa'i ni lombina gudisaakkoo qoorooma. Ka uulli gassaaniinsi matim ee qoorooma la'ukkoyyo. Ixxuwwi laqqo'oota'n lombaam Moollanna saqaltam hee'llo'oyyo. Ihona bagaan Keesammi Kitaabanne kitaabamukkisam «Manni illi moo'ubee'eka maccim macceesubee'eka wodanim sawwubee'eka Waa'i ixxo iittoo keenina gudisu luwwa» yaa Waa'i ixxi Keesammi Ayyaaninne niina caakkisaakko. Mashka'oomim Keesammi Ayyaan Waa'i sawwitinne yoo xillaalli woshshi hundam saarayyoohane. Mat manchi woronne yoo sawwite ixxi tiiriinsi bagaan ayyim la'ooyyo. Ee'isam Waa'i sawwitenne yookkoka Waa'i Ayyaaniinsi bagaan ayyim la'ooyyo. Waa'i niina uwwu luwwa lanqoommisina kaba neese aa'nnummok Waa'i uwwu Keesammi Ayyaana bagaan ka uulli tiiroyyo. Ee bikkina neese Keesammi Ayyaana aa'llo'i keenina Waa'ina hee'akkam hanqo'i woshsha losinsoommuullak manniinsi lonsummi qooroominnette ihoo'n Waa'i Ayyaaniinsi lonsummi qooroominnette. Waa'i Ayyaan bee'i manchina Keesammi Ayyaaniinsi uwwamu luwwi qawwooma laboo bikkina Waa'i Ayyaaniinsi uwwamu luwwa aa'ooyyo. Oo uwwanchi qoossameena xanookkok Waa'i Ayyaaninnette ihu bikkina eehido'i manchi ee keeno qoossaa la'eena xanooyyo. Ihukkaarem Waa'i Ayyaan yoo manchi hundem luwwam saarayyaa la'ookko bagaan ixxo ayyim saarayyooyyo. Keesammi Kitaabanne «Waa'i wodanonne yookkoka ayyi la'ookko? Ixxo sogeena xanookkodu ayyette?» yamamaa kitaabamaakko. Ihukkaarem Kiristoosik tiir niina yookko. Iyyabbaayyuwwa, hanqo'isam ki'nnuwwina amma'nnubee'i mannisaa Kiristoosanne ciilluwwisaa issaate bagaan Waa'i Ayyaan yoo kee'nnisa issaa kureena xanoommoyyo. Qoxxaalli hurbaata ittakkeena xantakkobee'i bikkina an ki'nnuwwina ciilluwwisa ado amaayyam hee'ummo. Kabad afeebe'em qoxxaalli hurbaata ittakkeena xantakko'oyyo. Mashka'oomim kabad afeebe'em maa'llisinne hee'llakkamuulla. Ki'nnuwwi lambe'enne to'achchii wocanchii kabadem yoo bikkina hee'llakkamok maa'llisayyonnihe? Ki'nnuwwi heechdu amma'nnubee'i mannisayyonnihe? Mashka'oomim ki'nnuwwiinsi mat mat keen «An Phaawuloosane» mullek odim «An Aphphuloosane» yimmi amma'nnubee'i mannisayyonnihe? Eehannata'i Aphphuloos ayyette? Phaawuloosdu ayyette? Neese ki'nnuwwi amma'nnitakkamisa issinummi Waa'ina awwaandoommi keeno. Neese annannichchim Moollanni niina banxona uwwu baxo banxoommi keeno. An kaasummo, Aphphuloos wo'o agisukko. Ihukkaarem Waa'i li'isukko. Ee bikkina horoor baxo baxukkok li'isu Waa'a bagaan kaasukkokim wo'o agisukkokim mahayyome. Kaasukkokii wo'o agisukkokii lamim gudo. Annannichchim baxukkisinne ixxi malaayyika siixxookko. Neese maqirem Waa'ina banxoommi keeno. Ki'nnuwwim Waa'ina abuulla. Odim baxantakko'oo Keesammi Mine. Waa'i eroommi iina uwwamukkisinne mine baxoo qoor manchisa ihaa shooho'o murummo. Mullekim ee shooho'onne baxookko. Ihukkaarem annannichchim eehanni hanenne hinkid baxooda'e qoossaa la'ona. Mashka'oomim mexxokore muramu shooho'iinsi bagaan ayyim mulli shooho'o mureena xanooyyo. Oo shooho'im Yesuus Kiristoosatte. Ee shooho'onne worqinnette ihukko te'im birinnette ihukko te'im bito xee'aalli kininnette ihukko te'im haqqinnette ihukko te'im huqqinnette ihukko te'im gaabinnette ihukko annannichchim mahinne baxuda'e giirinne la'isoo oogaxxi ayyaam waarookko. Ee ayyaamo annannichchikim baxu bax hinkido'anda'e ihukkisa giirinne keenamookko. Ee shooho'onne baxu bax ayyekim shokkoo'n gatulas irifo'o siixxookko. Ayyi manchikim baxu bax giiranne shokkaa bi'uta'n irifo'o siixxooyyo. Ihukkaarem ixxi gagoom gii'l woriinsi xoraa firu manchisa gatookko. Ki'nnuwwi Waa'ina Keesammi Min ikkakko'isaa Waa'i Ayyaan ki'nnuwwi woronne hee'oo'isaa laqqakko'oyyonnihe? Ayyim Waa'ika Keesammi Mine gindulas Waa'im ixxo gindookko. Mashka'oomim Waa'ik Min Keesamma. Oo Keesammi Minim ki'nnuwwi gagame. Ayyim ixxi gaga huushisoone. Ki'nnuwwiinsi ayyim ka uulli mannisinne «An qoora» yaa sawwookkok hee'ulas qawwisa ihona. Ee'isinne ixxi qoor ihookko. Mashka'oomim ka uulli qooroom Waa'i illagenne qawwooma. Keesammi Kitaabanne «Qoor keeno Waa'i ixxuwwi hantaarinnem amadaakko» yamamaakko. Odim mulli beyyonnem «Qoor kee'nnek sawwit awwaad bee'an ihukkisa Moollanni la'ookko» yamamaa kitaabamaakko. Luwwi hundim ki'nnuwwan ihu bikkina ayyim mannanne bakke'oone. Phaawuloosattem ihukko Aphphiloosattem ihukko Keefa'attem ihukko ka uullam ihukko heechcham ihukko lehom ihukko kaba yoo luwwam ihukko waaroo luwwam ihukko luwwi hundim ki'nnuwwane. Ki'nnuwwim Kiristoosane. Kiristoosim Waa'ane. Manni neese Kiristoosina awwaadaan inkummisaa Waa'ika maaxamu woshsha kurimmi yab uwwamu kee'nnisaa issaa xigimmi hasisookko. Oo yab uwwamu keenim amma'nnanto'oo keen ihimmi hasisookko. I bikkina ihulas ki'nnuwwam ikkakko'o te'im mulli keen eesenne oogatuta'n iina mahayyome. An i gagannemakkota'n oogateena xanoommoyyo. Eese acceeqasoo luwwi i tiironne mahim bee'e. Ihukkaarem ookki an muccur ihummisa moo'isooyyo. Eesenne oogatookkok Waa'a. Ee bikkina Moollanni waaroo oogaxxi ayyaam afoo'n ayyennem maham oogattakkotte. Ee ammane ixxi tuunsonne maaxamu luwwa caakkanne fissookko. Manni wodanonne yookkokam la'isookko. Ee ammane annannichchim Waa'iinsi laboo galata siixxookko. Iyyabbaayyuwwa «Kitaabamukkaanniinsi higgitte» yookkok mayyimda'e laqqakkamisina ki'nnuwwi bikkina yaa ee hundinam Aphphuloosaa i gagaa kobi'llishshi issaa hincaa'aammo. Ee bikkina ki'nnuwwiinsi ayyim mat manchonne biranchinne fugamaa mulleka gadoone. At mullaanniinsi lophphitoo'isa issukkok ayyette? At Waa'iinsi aa'lloo'n gatu luwdu maruchcho? Eehaara'i aa'llaattoohan ihulas Waa'iinsi aa'llitbee'i ki gaqqi luchchisa issitaa bakke'lloottok mahinatte? Ki'nnuwwina kaba hassakkam luwwi hundim yookko; lobakata goddaanom ikkakko'ookko; neese bee'em adilluwwi ikkakko'ookko. Adilluwwi ikkakkota'n neesem ki'nnuwwinne maqirem adilluwwi inkam hee'nnummo. Waa'i asse'amaaninaa manninaa uulli hundinam lelli inkaa moo'ammaammo. Mashka'oomim asse'amaan inkummi neese Waa'i hundiinsim lasaanchonne lehina oogatamaa hincoo mannisa issukkoka labisoommuulla. Kiristoos bikkina yinaa neese qawwuwwa; ihukkaarem ki'nnuwwi Kiristoosinne qoolluwwa. Neese hoongaan keeno; ihukkaarem ki'nnuwwi qoxxaalluwwa. Neese gadammaammoo keeno; ihukkaarem ki'nnuwwi lombi yoo keeno. Kabad afeebe'em neese sibaalloommuulla, xeebe'nnoommuulla, kallemalloommuulla, huuntihuuntaa'akkamuullaa mine hoongaa beyyiinsi beyyo do'nnoommuullaa. Ni heechchina hasisoo luwwa siixxineena ni anginnem badalloommuulla. Neese duumakkamaarem maasse'nnoommuulla; lobakata hawwisakkamaarem iyyaqqinoommuulla. Neese game'llakkamaarem eroka daballoommo. Kabad afeebe'em ka uulli manni fissaa darabu haccisa inkaammo. An kaka ki'nnuwwina kitaabummok iittoommi oosisa issaa ki'nnuwwa sogeenatte bagaan tuussiiseenayyo. Ki'nnuwwina Kiristoosinne xigiinsi hanaan ihaakkoo abooyyaan hee'ukkaarem ki'nnuwwina lobakat anno'i bee'e. Mishiraachchi sagara kurimminne Yesuus Kiristoosinne ki'nnuwwina anni anette. Ee bikkina eese labbakkamisina uunxoommo. An Kiristoosinne hee'oommi heechcha beyyi hundannem amma'nnaan hundinam losisummoka kuroo'isina Moollanninne amma'nnamaakkoo iittoommi i beet Ximootoosa ki'nnuwwi beyyo asse'aammo. Ki'nnuwwiinsi mat mat keen an ki'nnuwwi beyyo waaroombee'eka labissa'a birantamuulla. Ihona bagaan Moollanni yukkaare an ki'nnuwwi beyyo qaqqisaa waaraa ee birantam kee'nnek woccam woshshi xale'i ihoo'n ixxuwwika malaayyem la'eena hasoommo. Mashka'oomim Waa'ik adillan moo'amookkok Waa'i malaayyinnette bagaan wocinneyyo. Ki'nnuwwi hassakkamok maruwwa? Ki'nnuwwi beyyo muga amadaa waaronnihe? Te'im ki'nnuwwi beyyo iittinnee maashaalli tiirinnee waaro? Ki'nnuwwi lambe'enne saa'immi yoo'is macceesamoolla. Eehido'i tuussiisoo saa'immi mulli minaadaphphi lambe'ennem hore'em hee'oobee'ane. Mashka'oomim ixxi annare gassaakkoo manchi yookko. Eehido'i tuussiisoo jor baxo baxu mancho ki'nnuwwi lambe'iinsi yaayyimmii kichche'immii hasisukkuuyyi hinkid birantakkamuulla? Ee manchik maar bi'oo'isina wixxitakkam ammane Sheexaanina higissakka'a uwwehe. Eekka issitakkamok Moollanni Yesuus waaroo balla ee manchik foor gatoo'isinatte. Ki'nnuwwi biramimmi eraneyyo. Hofqax ursho'i lobakat qama hufaa'oo'isa laqqakkamoyyonnihe? Haareechchi qa'mmisa ikkakkeena moosir ursho'i'nnoo'i baaxiilo fissitakka'a hoollehe. Hanqinam ki'nnuwwi urshobee'i keeno. Shaashshiqqi Uguxxi gereechchisa Kiristoos ni bikkina kitimamaakko. Ee bikkina boqqoomii jollii exxaakkoo ursho'innette ihoo'n ursho'i exxubee'i qorosho'inne oohim muccuroominnee hanqinnee uguda lonsinona. Kanniinsi illageen kitaabummi assonne «Saa'aaninne mat ikkakkotte» yaa hee'ummo. Eehid yummokim «Ka uulli saa'aaniinsi, mixxam keeniinsi, boggam keeniinsii qophpha'n waa'ina otossitam keeniinsii annanni ikkehe» yimmayyo. Ee'isa yakkota'n ka uulliinsi annanni ihimmi hasisam hee'ukko. Ihukkaarem an kitaaboommok summina amma'nnaanoo yamanta'a «Saa'llam keeniinsi, mixxam keeniinsi, qophpha'n waa'ina otossitam keeniinsi, manna game'llitam keeniinsi, dimbitam keeniinsii boggam keeniinsii annanni ikkehe» yaatette. Eehido'i manchinne hore'em maqire ittakkotte. Amma'nnubee'i keenonne oogateena eese mah aagisaate? Amma'nnaanonne oogattakkeena ki'nnuwwi xantakkamoyyonnihe? Amma'nnubee'i keenonne Waa'i oogatookko. Keesammi Kitaabannem «Jor mancho ki'nnuwwi lambe'iinsi fissehe» yamamaakko. Ki'nnuwwiinsi ayyim amma'nnaanchinne wocamuta'n amma'nnaanonne kasasimmi hasisukkuuyyi amma'nnubee'i mannanne kasaseena hinkid iggukko? Waa'i doo'llu minaadab ka uulli mannanne oogattamisa laqqakkamoyyonnihe? Ka uulli mannanne oogattakkeena xantakkaman ihulas gootto'i luwwanne oogattakkeena xantakkamoyyonnihe? Waa'i asse'amaanonne oogantoommisa laqqakkamoyyonnihe? Waa'i asse'amaanonne oogantoomman ihulas ka uulli woshshanne oogatimmi hinkaa'nna sholle'aalla. Eehido'i woshshi ki'nnuwwi lambe'enne ki'oo ammane amma'nnaa'n beyyonne gadanto'oo keen oogattona mahina doo'llitakkamuulla? An ki'nnuwwa tuussiiseena kaka ki'nnuwwina kuroommo; eehaara'i amma'nnaaniinsi woshsha mureenaa lommanchi iheenaa xanoo tiiraam manchi ki'nnuwwi lambe'enne bee'ennihe? Ihukkaarem amma'nnaanchi amma'nnaancho kasasaa amma'nnubee'i keen oogatona oogaxxi mine massoollayyonnihe? Eehannata'i fit ki'nnuwwi lambe'enne hee'immi ixxi gagoomim ki'nnuwwina shollechcha. Ki'nnuwwi hawwodantakkota'nnii qawwiisantakkota'nnii e'llooyyonnihe? Ihukkaarem ki'nnuwwi gagim ki'nnuwwi abbaayyuwwa hawwoddakkamuullaa qawwiissakkamuullaa. Boqqi keen Waa'i adillanonne aaggambee'isa laqqakkamoyyonnihe? Ee bikkina ki'nnuwwi huushantakkotte. Saa'llam keen, qophpha'n waa'ina otossitam keen, lokko iggaalluwwi, meenti bikkenne gooninne iinse'oo goon te'im goo'n bikkenne meentinne iinse'oo meenti, game'llam keen, mixxam keen, dimbitam keen, game'llantam keenii boggam keenii Waa'i adillanonne aaggamoyyo. Ki'nnuwwiinsim mat mat keen eehido'i keen hee'llakko'o. Ihukkaarem Moollanni Yesuus Kiristoos summinnee Waa'i Ayyaaninnee baaxiiliinsi aanshaqqitakko'ookko. Waa'ina keesantakko'ookkoo muccuttakko'ookkoo. Luwwi hundim iina uwwamaakko. Ihukkaarem oo luwwi hundim iina awwaadooyyo. Luwwi hundim iina uwwamaakko. Ihukkaarem matem luwwinam agishshi ihoommoyyo. Hurbaat godabinatte. Godabim hurbaatinatte. Ihukkaarem Waa'i ee lamom bi'isookko. Orachchi Moollanni awwaadinatte bagaan saa'imminayyo. Moollannim orachchinatte. Waa'i Moollanna lehiinsi ki'isukkisam odim neesem ixxi malaayyinne lehiinsi ki'isookko. Ki'nnuwwik orachchi Kiristoosina qaamafeet ihukkisa laqqakkamoyyonnihe? Eehannata'i Kiristoos qaamafeeta massaa saa'aanchi qaamafeetinne mat issonnihe? Hore'em issoommoyyo. Saa'aanchonne iinse'ookkok isenne mat orachchi ihukkisa laqqakkamoyyonnihe? Mashka'oomim Keesammi Kitaabanne «Lamim mat orachchi ikkamo» yamamaakko. Ihukkaarem Moollanninne mat ihukkok Moollanni Ayyaaninnem mat ihookko. Ee bikkina saa'immiinsi gibbehe. Saa'immiinsi bagaan manni baxoo mulli baaxiil hundim ixxi orachchiinsi annanni ihaakkoohane. Ihukkaarem saa'ookkok ixxi gaqqi orachchonne baaxiilo baxoolla yimma. Ki'nnuwwik orachchi Waa'iinsi aa'llakko'i Keesammi Ayyaan hee'oo Keesammi min ihukkisa laqqakko'oyyonnihe? Ki'nnuwwi orachchi Waa'ane bagaan ki'nnuwwi gaqqaneyyo. Ki'nnuwwi bitaa'antakko'oo keen ikkakko'i bikkina ki'nnuwwi orachchinne Waa'a lonsehe. Ki'nnuwwi iina kitaabbakko'i luwwi bikkina mat manchi meento eebubeeta'n erane. Ihukkaarem saa'immi keenanchanne aagoobee'isina annannichchinam ixxi gaqqi are hee'llona. Ee'isam meentina annannichchonam is gaqqi aro'i hee'immi hasisookko. Aro'i ixxi arena issimmi hasisoo luwwa issona. Ee'isam arem is aro'ina issimmi hasisoo luwwa issitona. Are orachchina hanqi yookkok is aro'inatte bagaan is gaginayyo. Ee'isam aro'i orachchinam hanqi yookkok ixxi arenatte bagaan ixxi gaginayyo. Ayyi la'ukko Waa'a uunxatina iittantakka'a ammanoominatte ihubeelas ki'nnuwwina'i ki'nnuwwi hoo'llantakkotte. Ki'nnuwwi gaga ijaajimma hoogimminne Sheexaan ki'nnuwwa keenoobee'isa ee lasage odim mat ikkehe. Ihukkaarem an kaka ki'nnuwwina kuroommok ijaaccisa ihoo'n sogita'nnisa. Manni hundim i'isa hee'uta'n iittam hee'ummo. Ihona bagaan annannichchinam Waa'iinsi uwwamu annanni ihaakkoo uwwanchi yookko. Matina mat uwwanchi mullaanninam mulli uwwanchi uwwamaakko. Mine issubee'i keeninaa aro'i lehu meentinaa kuroommok ki'nnuwwim i'isam mullam hee'llakkota'n eran hee'ukko. Ihukkaarem gaga ijaajimma xantambee'an ihukkaa'lleensi mine issito'aare erane. Mashka'oomim mixaninne shokkimmiinsi mine issitona. Mine issu keenina uwwoommi ijaaj yookko. Ihukkaarem oo ijaaj iinniinsette ihoo'n Moollanniinsette. Are is aro'iinsi annanni ikkoone. Ayyi la'ukko annanni ikkolas mulli goonanne affoo'n hee'llona te'im is aro'inne iittantona. Ee'isam aro'im ixxi are holloone. Odim mulli keenina kuroommo. Kaka anette bagaan Moollannayyo. Mat amma'nnaanchina amma'nnitobee'i are hee'llota'n ise ixxenne maqire hee'lleena iittito'aare ee are holloone. Ee'isam mat amma'nnaanchi arena amma'nnubee'i aro'i hee'uta'n ixxi isenne maqire hee'eena iittulas ise ixxeensi fittoone. Mashka'oomim amma'nnubee'i aro'i ixxi are kollinne muccuraakko. Ee'isam amma'nnitobee'i arem amma'nnu is aro'i kollinne muccutto'ookko. Eehid ikkobeelas ixxuwwik oos muccurayyo. Ihukkaarem kaba mucculluwwa. Ihukkaarem amma'nnubee'i aro'i ihukko te'im amma'nnitobee'i are, annanni ihameena hasamulas annanni ihamona. Waa'i neese xummina weeshu bikkina eehido'i luwwanne amma'nnaanchi karameena xanooyyo. Amma'nnaanchi are, ayyi la'ukko at amma'nnubee'i ki aro'o gatissooda'e malaqqaate? Ee'isam amma'nnaanchi aro'o, at ki are gatissooda'e malaqqaate? Annannichchim Moollanni ixxena uwwu uwwanchisinnee Waa'i ixxo weeshu ammane hee'ukkisinnee hee'ona. Kuk amma'nnaa'n wixxittuwwina hundinam uwwaammoo ijaajo. Ayyim weeshamu ammane ballachchamaakkoohane ihulas ballachchamu mare'e hooreena yakoone. Odim ayyim weeshamu ammane ballachchamoo'n yoohan ihulas ballachchameena yakoone. Waa'i ijaajo egerimma bagaan ballachchanchi te'im ballachchancha hoogimmi maham awwaadooyyo. Annannichchim weeshamu ammane hee'u duuha'anne hee'ona. At weeshantitti ammane agishshi hee'llittonnihe? Eehannina hawwititte. Ihukkaarem wolabbano siixxitootti gada'i hee'ukkaa'lleensi ee gada'a awwaaxxe. Agishshi ihaa hee'ukkuuyyim Moollanni weeshukkok Moollanniinsi wolabbano siixxaakko. Ee'isam wolabichchi ihaa weeshamukkokim Kiristoosina agishsho. Waa'i ki'nnuwwa bitaa'u bikkina mannina agid ikkakkotte. Iyyabbaayyuwwa, annannichchim weeshamu ammane hee'u duuha'anne Waa'inne hee'ona. Mine issubee'i kee'n bikkina Moollanniinsi iina uwwamu ijaaj bee'e. Ihukkaarem Moollanni qishixxatinne amma'nnamaammoohan ihummi bikkina an sogitano uwwoommo. Eehannata'i kaba yoo hawwi bikkina manchi mine issoo'n eehidim hee'uta'n erane. Meentichcho eebbaatennihe? Meentichcho eebbaattoohan ikkilas ki are holliteena hassitte. Meentichcho eebboo'n yoohan ikkilas eebbeena hassitte. Ihukkaarem meentichcho eebbilas baaxiiloyyo. Baajaam landichchom idootanne affolas baaxiiloyyo. Mine issito'i keenonne ka uulli heechchik lobakat hawwi afookko. Ee hawwiinsi gattakkamisina an mixoommo. Iyyabbaayyuwwa, an kaka ki'nnuwwina kuroommo. Doolli gundaakko; kabadiinsi ki'isaa are yoo keenim arebee'i kee'nnisa ikka'a hee'llona. Wi'llitam keenim wi'llitam bee'i kee'nnisa ikkona, liirantam keenim liiranchi bee'i kee'nnisa ikkona. Bito aa'llam keenim mahimbee'i kee'nnisa ikkona. Ka uulli heechchi duuha'i higoohan ihu bikkina ka uulli amaxxa awwaaxxitam keenim awwaaxxitambee'aannisa ikka'a hee'llona. U'nnantakkoo'n hee'llakkamisina hasoommo. Meento eebubee'ek Moollanna liiranseena hasoo bikkina Moollanni baxina sawwookko. Ihukkaarem meentichcho eebu manchi sawwookkok ka uulli baxinattee ixxi are liiranseenattee. Ee'isinne ixxek sawwit lam ihaakkoohane. Goonanne affobee'i meentichcho te'im ladiisantobee landichcho is maarinnee foorinnee muccutteena yita'a Moollanni baxina sawwitamo. Ihukkaarem goonanne affo'i meentichcho is aro'o liiransiteena yita'a ka uulli luwwa sawwitamo. An kaka ki'nnuwwina kuroommok ki'nnuwwa hara'mmeenatte bagaan karaa amadoo luwwa ki'nnuwwanne isseena hasaateyyo. Ihukkaarem an hasoommok ki'nnuwwi gag hundichchoomam Moollanni awwaadiinsi lasonne gattakkoo'n erokaa gudaanchi luwwaa issitakkamisinatte. Ayyi manchim xeehu landichchonne «Laboobee'isa ihaammo» yaa sawwuta'nnii ixxi mixanim lobakata qoxxaalli ihulasii eebeena hasulas eebaqqanchi baaxiil ihubee'i bikkina eebaqqantona. Ihukkaarem ayyi manchim ixxi xeehu landichcho eeboo'isina u'nnansoo luwbee'an ihulas, ixxi mixano kaa'ulasii eekkam ixxi tiironne murulasii xeehukkisa egeruta'n erane. Ee bikkina xeehu landichcho eebookkok eroka issaakko; landi eebubee'ekim ixxeensi e'lloo'isa issaakko. Are is aro'i foorinne hee'ukkuuyyi eebaqqanchi Seerinne karanto'ookkotane. Ihukkaarem is aro'i lehaa lasage amma'nnaanchi ihona bagaan hasso'oka aagissa'a gatteena hooroo luwwi bee'e. An sawwoommisanne is ee'isam hee'llota'n liiranchinne hee'llamo. Eesenne Waa'i Ayyaan yookkoka labisoommuulla. Qophpha'n waa'ina uwwakko'i hurbaaxxi bikkina niina hundinam lachchi yoo'isa lanqoommo. Eehido'i lachchi bolxisoohane. Ihukkaarem iitti li'isoohane. Ayyim «Mat luchcho la'oommo» yaa sawwuta'n ixxi la'immina hasisooqax lachcha la'oo'n yookko. Ayyim Waa'a iittulas Waa'i ixxo la'ookko. Eehannata'i qophpha'n waa'ina uwwakko'i hurbaata itimmi bikkinatte yakkota'n oo qophpha'n waa'i awwaad bee'i luwwi ihukkisa lanqoommo. Oohim matem Waa'iinsi bagaan mullek bee'e. «Waa'a» yakka'a otossakkam dut qophpha'n waa'uwwii moollanno'ii iimanennettem ihukko te'im uullannem hee'immi hanqame. Ihukkaarem luwwi hundam qooccukkokii neesem ixxena hee'nnoommokii matem Anni Waa'i niina yookko. Ee'isam luwwi hundim ixxenne qooccamukkokii neesem ixxenne hee'nnoommokii mexxo'i Moollanni Yesuus Kiristoos niina yookko. Ihona bagaan oo lachchi hundina bee'e. Ihukkaarem mat mat keen kanniinsi illagenne qophpha'n waa'ina otossitu'uuyyi hee'llo'o. Ee bikkina hanqo'isam «Qophpha'n waa'ina uwwamaakkoo hurbaata» yitu'uuyyi ittam bikkina ixxuwwik tiir hoogimminne haashaaramaakkoohane. Niina Waa'inne yoo mateeyyooma hurbaat qoxxisooyyo. Intumbee'aarem maham hawwodammoommoyyo. Intummaarem maham hara'mmooyyo. Ihona bagaan ki'nnuwwina yoo wolabban amma'nnatonne qacaalli keeno qoloobee'isa ege'llehe. Lachchi yoo at qophpha'n waa'i minenne aaggaa ittittuuyyi amma'nnatonne qacaalli manchi moo'uta'n ee qophpha'n waa'ina uwwakko'i hurbaata iteena iggooyyonnihe? Eehannata'i lachchi yoo ki mashka'inne Kiristoos ixxi bikkina lehu oo qacaalli amma'nnaanchi bi'aakko yimma. Ee'isinne amma'nnaan abbaayyuwwa hawwoddakku'uuyyii ixxuwwika hoongaanchi tiirom omassitakku'uuyyii Kiristoosam hawwoddakkamuulla. Ee bikkina maara itimmi iyyabbaayyo qoloohan ihukkaa'lleensi iyyabbaayyo qoloommaanniinsi hore'em maara itoommoyyo. Iina wolabban bee'ennihe? An asse'amaanchoyyonnihe? An ni Moollanni Yesuusa moo'ummoyyonnihe? Ki'nnuwdu Moollannina i baxinne siidantakko'oo keenoyyonnihe? An mulli keenina asse'amaancho labumbee'aarem Moollannina asse'amaanchi ihummisa moo'isoo koobo'i ki'nnuwwanne yoo bikkina ki'nnuwwina asse'amaancho. Eesenne bido'o fissitam keenina dabaroommi dabachchi kane; Neese ichchaa aggaa siixxinoommi hanqi bee'ennihe? Mulli asse'amaa'nnisa, Moollanni abbaayyuwwisaa Keefa'isaa amma'nnaan ni meento amandaa marimmi hanqi niina bee'ennihe? Ni gaga xanimmina baxo urimmi hasisoobee'ek xale'i Baarnabaasattee anettennihe? Ixxi gaqqi diinatinne gaadookkok ayyette? Te'im woyina kaasaa misha itoobee'ek ayyette? Ado agoobee'uuyyi diinate ho'llookkok ayyette? An kaka manni sawwixxisa wocaatennihe? Seerdu ee'isa yooyyonnihe? Muse'i Seeranne «Hurbaata ganoo mirgo'ika suume kattitte» yamamaakko. Eehaare Waa'i ee'isa yukkok mirgo'inattennihe? Ee'isa yukkok hanqinam ni bikkinayyonnihe? Abuullookkokim soodonne siixxeena sawwukkuuyyi abuullookko. Hurbaata ganookkokim siixxeena sawwukkuuyyi ganookko. Ee bikkina ookki kitaabamukkok hanqinam ni bikkinatte. Neese ki'nnuwwina Keesammi Ayyaa'n wixo winxummaa'lleensi ni maarina hara'mmoo luwwa ki'nnuwwiinsi aa'nnumta'n lobakat luwwannihe? Mulli keen eekka ki'nnuwwiinsi siixxiteena xantam hanqi yoohan ihulas neese ixxuwwiinsi lonsinaa siixximmi hasisooyyonnihe? Ihukkaarem Kiristoos mishiraachchi sagarina qolaan inkoombee'isina hundi luwwam iyyaqqinoommo bagaan ee niina uwwamu hanqa awwaaxxinoommoyyo. Keesammi Minenne baxxam keen Keesammi miniinsi hurbaata siixxitamisa laqqakkamoyyonnihe? Odim kitima kitimakkam beyyonne kitima hincaa'llo'i keenim ee kitimiinsi baxxantamisa laqqakkamoyyonnihe? Ee'isam mishiraachchi sagara kuttam keenim ixxuwwina hasisoo luwwa ee baxiinsi siixxitamisina Moollanni ijaajaakko. An ee iina laboo hanqiinsi matom awwaaxxummoyyo. «I hanqa iina issitakkona» yaa sawwimminne ki'nnuwwina kaka kitaabummoyyo. Ayyim an bakke'oommi luwwa awwaad bee'an issoohaanniinsi an lehumta'n e'llookko. Mishiraachchi sagara kurimmi iina giddi ihu bikkina biramoommoyyo. Mashka'oomim mishiraachchi sagara kurumbeelas iina aayye! An eekka i doo'llinne issumta'n iina irifo'i yookko. I doo'llinne issumbeelas ijaajamummi ijaaj xale'e wonshoommuulla. Eehannata'i iina uwwamoo irifo'i maruwwa? Irifo'im mishiraachchi sagara kurummuuyyi iina laboo hanqa maham siixxoo'n ee mishiraachchi sagara kora'am kurummaarette. An wolabichchi ihaa hee'ummuuyyim «Dut manna gatisoommo» yaa i gaga hundinam agishshi issaammo. Ayihuxxi manna gatiseena Ayihuxxi mannisam ihaammo. An Seeriinsi woroonetti ihumbee'aarem Seeriinsi woroon yo'i keeno gatiseena Seeriinsi woroon yo'i kee'nnisam ihummo. Seerbee'i mulli minaadaba gatiseena seerbee'i manchisa ihummo; oohim an Kiristoos seeriinsi woroonette ihummi bikkina Waa'i seerina ijaajamoombee'ane yimmayyo. Hoongaano gatiseena hoongaanchi ihaammo. Mat mat keeno ayyisinnem gatisoommo yaa manni hundinam hundisam ihaammo. An mishiraachchi saga'lleka maasso siixxoommo yaa ee hundam mishiraachchi saga'l bikkina issoommo. Xoreexxanchanne hundim xoreexxamaa ee xoreexxantam keeniinsi irifo'o siixxookkok mexxo'i manchi ihukkisa laqqakkamoyyonnihe? Ki'nnuwwim irifo'o siixxitakkeena xoreexxammehe. Geellichchanne xoreexxamoo keen hundim orachcho geellichchina erisa losisimmi hasisookko. Eekkam issitamok bi'oo irifo'o siixxiteenatte. Ihukkaarem neese badalloommok bi'oobee'i irifo'o siixxineenatte. Ee bikkina an elellaatbee'i manchisa geeroommoyyo. Hafachchinne gubbamoo manchisam gubbamoommoyyo. Ihukkaarem mulli keenina Waa'i sagara kuraa lasage ubaa gatoombee'isina i orachchi ijaajamoo'isa issoommo. Iyyabbaayyuwwa, niyyanno'i hundim duubiinsi woroon ikko'isaa hundim dambalaqa fitto'isaa laqqakkona hasoommo. Muse'enne mateeyyoom yoo'isa moo'isseena hundim ee duubinnee dambalaqinnee xammaqanto'o. Hundim iimaniinsi uwwamu hurbaata itto'o. Hundim ee iimaniinsi uwwamu aggam aggo'o. Mashka'oomim ixxuwwa awwonam hee'u iimaniinsi uwwamu kiniinsim aggo'o. Oo kinim Kiristoosatte. Ihukkaarem Waa'i ixxuwwiinsi lobakat keenonne liiramubee'i bikkina ixxuwwik leesh udma'anne ubaa gatukko. Ixxuwwi jor mixano mixxo'isa neesem minxoombee'isina oo hundim niina kobi'llishshi ihaakko. Keesammi Kitaabanne «Manni itteenaa aggeenaa afuutto'o. Ee lasage kaddeena ki'llo'o» yamamaa kitaabamukkisam ixxuwwiinsi mat mat keen qophpha'n waa'ina otossito'isa otossinoone. Ixxuwwiinsi mat mat saa'imminne adabi'lla'a mexxo'i ballanne lamiyyii sas kumii leto'i bikkina neesem saa'nnoone. Ixxuwwiinsi mat mat keen Moollanna keento'aare hamashshi qasaa shu bikkina neesem Moollanna keennoone. Ixxuwwiinsi mat mat keen quunquunto'aare sira'iilli bi'isu bikkina neesem qunquunnoone. Oo hundim ixxuwwanne afukkok mulli keen ixxuwwanne xassaqqoo'isinatte. Ookki kitaabamukkokim lasaanchi doollenne hee'nnoommi neese axeereenatte. Ee bikkina uullukkoka labisookkok uboobee'isa ege'llona. Mannanne afu keenanchiinsi annanni ihaakkoo keenanchi ki'nnuwwanne afukkoyyo. Ihukkaarem ki'nnuwwi malaayyiinsi hanaan ihaakkoo keenanchanne aaggakkambee'isa egeroo Waa'i amma'nnamaakkoohane. Keenanchanne aaggakkam ammane iyyaqqitakkam malaayye uwwimminne ee keenanchiinsi fittakkam googo Waa'i gudisookko. Iittantakko'oo iyyabbaayyuwwa, qophpha'n waa'ina otossimmiinsi gibbehe. Qoossitakkam keen ikkakko'i bikkina ki'nnuwwina kuroommo; an wocoommi woshshanne ki'nnuwwi gagim oogattehe. Waa'a galaxxinaa daayyammaa angoommi maasso uwwoo humbulli woyi'n diqaasa Kiristoos xiiginne niina mateeyyoom yoo'isa moo'isoohaneyyonnihe? Iinqaa intoommi qoroshodu Kiristoos maarinne niina mateeyyoom yoo'isa moo'isoohaneyyonnihe? Neese matem qorosho'iinsi mateeyyoomanne baxxammaa intoommi bikkina dut keen inkummaarem mexxo'i orachchome. Huno'o, Isra'ee'l minaadaba sawwi'llehe; ee kitimakko'i luwwiinsi ittam keenina ee kitima hincaa'akka'a awwaadakkam Waa'inne mateeyyoom yoohaneyyonnihe? Eehannata'i an eehid yimmi qophpha'n waa'ina uwwakko'i hurbaatii oo otossakkam luwwii awwaad yoohane yimmannihe? Ee'isayyo! Mulli minaadab kitima hincaa'llamok habusinatte bagaan Waa'inayyo. Ee bikkina ki'nnuwwina habusinne mateeyyoom hee'oo'isina hasoommoyyo. Moollanni humbulliinsii habus humbulliinsii aggakkeena xantakkamoyyo. Odim Moollanni leemaatiinsii habus leemaatiinsii ittakkeena xantakkamoyyo. Te'im ee'isa issimminne Moollanna to'achchinsonnihe? Neese ixxeensi qoxalloommonnihe? Luwwi hundim uwwamaakko. Ihukkaarem oo luwwi hundim awwaadooyyo. Luwwi hundim uwwamaakko. Ihukkaarem hundi luwwi li'isooyyo. Ayyim ixxi ollakkichchina hara'mmoo luwwa hasona bagaan ixxi gagina awwaadoo luwwa hasoone. Meeranne biteesamoo maara hundam ki'nnuwwi tiironne malantakkoo'n ittehe. Mashka'oomim Keesammi Kitaabanne «Uullii uullanne yoo luwwii hundim Moollannane» yamamaa kitaabamaakko. Amma'nnubee'i manniinsi mat manchi ki'nnuwwa hurbaata ittakkona weeshoo ammane mattakkeena hassakkolas ki'nnuwwi tiironne maham malantakkoo'n hincu luwwa ittehe. Ihukkaarem mat manchi ki'nnuwwina «Kuk qophpha'n waa'ina kitim ihaa hincaakkoo luwwa» yaa kuruta'n ee manchi bikkinaa ixxi tii'l bikkinaa yitakka'a ittakkotte. Ee manchi bikkina yaa wocummo bagaan ki'nnuwwi tii'l bikkina wocummoyyo. Eehaara'i mulli manchi tii'l mal i wolabbano hinkid hoorookko? An itoommi hurbaatina Waa'a galaxxoomman ihulas eehaara'i an Waa'a galaxxummi hurbaatina mullek eese acceeqasookkok mahinatte? Ki'nnuwwi ittakku'uuyyattem ihukko te'im aggakku'uuyyattem ihukko te'im mah luwwam issitakko'aare hundem luwwam Waa'i lombina issehe. Ayihuxxi manni ihukko te'im Ayihud ihubee'i manni ihukko te'im amma'nnu Waa'i minaadabam ihukko ixxuwwa qoloo luwwa maham issitakkotte. Anim manni hundim gatoo'isina yaa iina awwaadoo luwwa uraa issoommi luwwi hundinnem manni hundam liiranseena yakaammo. An Kiristoosa labummisam ki'nnuwwim eese labbehe. Hundem luwwannem eese sawwitakkam bikkinaa an ki'nnuwwina losisummi losishsha qoxxitakka'a amaddakko'i bikkinaa ki'nnuwwa galaxxoommo. Kabadem ki'nnuwwi laqqakkona hasoommok goon hundinam horoor Kiristoosatte. Ee'isam meentichchona horoor gooncho. Odim Kiristoosina horoor Waa'a. Goon ayyim horoore gunguu'llaa Waa'a uunxookkok te'im hiraagookkok Kiristoosa sholliisoolla. Ihukkaarem hinte meentichchom is horoore gunguu'llitoo'n Waa'a uunxitamote te'im hiraaggamote is aro'o sholliissamuulla. Oohim is horoor hogoossamukkaannisa issita'a sholliissamuulla. Meentichcho is horoore gunguu'llitambeelas horoore mussiixxitona. Ihukkaarem meentichchona horoore mussiixximmi te'im hogoossiixximmi sholliisoohan ihukkaa'lleensi is horoore gunguu'llitona. Goonchi Waa'ika qooccaa lombaa moo'isoohan ihu bikkina horoore gunguu'llimmi hasisooyyo. Ihukkaarem meentichcho goonchina lombatte. Meentichcho qooccanto'ok goonchiinsette bagaan goonchi meentichchoonsi qooccamukkoyyo. Ee'isam meentichcho qooccanto'ok goonchinatte bagaan goonchi meentichchona qooccamukkoyyo. Ee bikkinaa Waa'i asse'amaa'n bikkinaa meentichcho ijaajantaman ihukkisa moo'isseena is horoore gunguu'llimmi hasisookko. Huno'llehe, ki'nnuwwi gagim oogattehe; meentichcho horoore gunguu'llitoo'n Waa'a uunximmi laboohonnihe? Goonchi ixxi horoore qeeraa'llisaa li'isimmi sholliisoohan ihukkisa qooccanchi ixxi gagoomim kurooyyonnihe? Ihukkaarem meentichchona qeeraa'l horoor hee'immi isena lomba. Qeeraa'l horoor isena uwwamukkokim ise amboo'isinatte. Ayyim eehanni bikkina fitameena hasulas niinaa amma'nnu Waa'i minaadabinaa ee an kurummaanniinsi mulli losan bee'isa tiissiisoommo. Ki'nnuwwi wixxitakkamok er luwwinatte ihoo'n jor luwwinatte ihu bikkina ka ijaajo uwwummuuyyi ki'nnuwwa galaxxoommoyyo. Luxxeka macceesummisam amma'nnaan wixxitakkam ammane ki'nnuwwi lambe'enne annannaatoom yoo'isa macceesoommuulla. Eehannik kolli hanqi ihukkisa amma'nnoommo. Hanqo'i keen la'antamisina annannaatoom ki'nnuwwi lambe'enne ihimmi hasisookko. Ki'nnuwwi wixxitakkam ammane ittakkamok Moollanni hurbaatayyo. Itoo ammane mat mulleka egeroo'n annannichchim ixxi gaqqi hurbaata itoo bikkina matii sibaarookko matii dimbookko. An ki'nnuwwina mayyo? Ittakkeenaa aggakkeenaa ki'nnuwwi gaqqi min bee'ennihe? Waa'a amma'nnu minaadaba sholliissakkamonnihe? Te'im ma'lluchchim bee'i keeno tuussiissakkamonnihe? Eehannata'i ki'nnuwwina mayyoommo? Eehannina ki'nnuwwa galaxxonnihe? Hore'em galaxxoommoyyo. An ki'nnuwwina higisaa uwwummok Moollanniinsi aa'ummane. Moollanni Yesuus higisamaa uwwamu hiimo qorosho'o ki'isaa amadaa Waa'a galaxxaa iiqaa «Kuk ki'nnuwwi bikkina uwwamoo i maara; eese tiittakkeena kaka issehe» yukko. Ee'isam hii'm hurbaatiinsi lasage humbulli woyi'n diqaasa ki'isaa amadaa «Ku woyi'n diqaas i xiiginne aagoommi haareechchi hidiro. Kaka aggakkam ammane hundam eese tiittakkeena issehe» yukko. Ka qorosho'o ittakkam ammanee woyi'n diqaasam agakkam ammanee hundam Moollannika leho ixxi waareebe'i afeebe'e alallaattakkamo. Ee bikkina ayyim laboobee'isinne Moollannika qorosho'o itookkokii woyi'n diqaasam agookkokii ixxonne Moollanni maa'llehii xiiqqehii badan yoohane. Ihukkaarem manni ixxi gaga saarayyaqqaa moo'aa lasage qorosho'ooma itona; woyi'n diqaasam agona. Ayyim qoossaa la'oo'n Moollannika maara itookkokii xiigam agookkokii ixxi gaganne oogato'o eebaqqeena itoollaa agoollaa. Ki'nnuwwiinsi mat mat keen hoongaanoo jabbaanoo ikko'okii odim mat mat keenim leto'okii ee bikkinatte. Ihukkaarem neese hanqo'isinne ni gaganne oogantoomman ihulas neesennem oogatamooyyo. Ka uulli manninne maqire Waa'i neesenne oogatoobee'isina kaba neesenne oogataa guzumo'oolla. Eehannata'i iyyabbaayyuwwa, Moollanni hurbaata ittakkeena wixxitakkam ammane hundim wixxeebe'e ege'llammehe. Ki'nnuwwik wixxit oogato'ina ihoobee'isina ayyi manchim sibaaraakkoohan ihulas ixxi minenne itona. Mulli gatti ogora waaroommi ammane kuroommo. Iyyabbaayyuwwa, Keesammi Ayyaaniinsi uwwamoo uwwanchuwwi bikkina laqqakkamisina hasoommo. Amma'nnitakkoo'n illageen foor bee'i qophpha'n waa'ina otossitakkeena dutisinne massantakko'isa laqqakkamo. Ee bikkina ki'nnuwwi laqqakkona hasoommok Waa'i Ayyaaninne yookkok ayyim «Yesuus duumamaakkoohane» yookkok bee'e. Ee'isam odim Keesammi Ayyaan bee'ek «Yesuus Moollanna» yookkok matim bee'e. Keesammi Ayyaan mato; ihukkaarem ixxi uwwoo uwwanchuwwi annanni annanna. Moollanni mato; ihukkaarem annanni annanni awwaad yookko. Bax ogor duta; ihona bagaan annannichchom hundi baxom baxisookkok mexxo'i Waa'a. Annannichchonnem Keesammi Ayyaa'n bax moo'amookkok hundinam awwaadoo'isinatte. Matina Keesammi Ayyaaniinsi qooroo'm woc uwwamookko. Mullaannina odim ee Keesammi Ayyaaniinsim lachchi yoo woc uwwamookko. Matina odim ee Keesammi Ayyaaniinsi amma'nnat uwwamookko. Matina odim ee matem Keesammi Ayyaaniinsim fayyiisimmi uwwanchi uwwamookko. Mullaannina odim maalalsiisoo baxo baxoo uwwanchi uwwamookko. Mullaannina odim hiraago kurimmi uwwanchi uwwamookko. Mullaannina odim ayyaannuwwa annanni issaa la'oo uwwanchi uwwamookko. Mullaannina odim mulli suuminne wocimmi uwwanchi uwwamookko. Mullaannina odim mulli suuminne wocamu woshsha tiroo uwwanchi uwwamookko. Ee hundam baxisookkok ee mexxo'i Keesammi Ayyaaname. Oo mexxo'i Keesammi Ayyaanim annannichchinam annanni annanni uwwancha ixxi hasukkisinne uwwaakko. Mat orachchonne dut qaamafeet yo'isam oo dut qaamafeetim mat orachchi ihaa baxamukkisam Kiristoosim mexxo'i orachchisa. Ee'isam neesem Ayihuxxi manni inkummo te'im Ayihud inkumbee'i manni inkummo te'im agid inkummo te'im wolab inkummo mexxo'i Ayyaaninne mexxo'i orachchi inkeena xammaqammaammo; neese hundim mexxo'i Keesammi Ayyaana aa'nnaammo. Orachchi dut qaamafeet yoohane bagaan mexxo'i matoyyo. Ayla'ukko lokki «An angayyo; ee bikkina an orachchiinsi matoyyo» yimminne orachchiinsi mat ihimmi gatoohonnihe? Odim maccim «An illeyyo; ee bikkina an orachchiinsi matoyyo» yimminne orachchiinsi mat ihimmi gatoohonnihe? Orachchi hundim illi ihuta'n mahinne macceesakkam hee'akko'o? Orachchi hundim macci ihuta'n mahinne enjeesakkam hee'akko'o? Ihona bagaan orachchi qaamafeet hundam ixxena laboo beyyonne issaa Waa'i doo'llukkisa gudisaakko. Orachchi hundim mexxo'i qaamafeetichchi ihuta'n orachchi hannonne hee'am hee'ukko? Qaamafeet dut ihona bagaan orachchi mexxokkichcho. Illi angina «An keese hasoommoyyo» yeena xanooyyo. Ee'isam horoor lokkina «An keese hasoommoyyo» yeena xanooyyo. Hoongaano labbam orachchonne yo'i qaamafeettuwwi lobakata awwaaddam keeno. Ni orachchi qaamafeettuwwiinsi lombi bee'eka labinsoommaannina lobakat lomba uwwinoommo. «Tuussiisoohane» yinoommi orachchom annannisinne maanxaa ege'llinoommo. Lombi yoo qaamafeettuwwina ookki hasisooyyo. Ihukkaarem lombi bee'eka laboo qaamafeeta Waa'i lobakat lomba uwwimminne amaxxansaakko. Waa'i ee'isa issukkokim qaamafeet hundim mat matina hara'mmantamisinatte bagaan orachchonne annannaatoom hee'oobee'isinatte. Orachchiinsi mat qaamafeetichchi hawwuta'n orachchi hundoomim maqirem hawwookko. Odim mat qaamafeetichchi lomba siixxuta'n hundim ixxenne maqirem liiramookko. Ki'nnuwwi hundim Kiristoos orachcho. Ee orachchinam ki'nnuwwi annannichchim qaamafeettuwwa. Waa'i amma'nnaa'n woronne mat mat keeno luxxeka asse'amaano, la'mmeka odim hiraagaano, saxxeka odim losisaan issaakko. Eehanniinsi odim maalalsiisoo luwwa issitam keeno, fayyiissam keeno, mulli keenina hara'mmitam keeno, gassaanoo annanni suume woccam keenoo issaakko. Ixxuwwi hundim asse'amaanonnihe? Te'im hundim hiraagaanonnihe? Te'im hundim losisaanonnihe? Hundim maalalsiisoo luwwa issitam keenonnihe? Ixxuwwi hundim fayyiisimmi uwwancha siixxita'atennihe? Odim hundim mulli suuminne woccam keenonnihe? Te'im ixxuwwi hundim mulli suuminne wocakko'i luwwa titta'a kuttam keenonnihe? Ki'nnuwwi ee keeniinsi hore'em lophphoo uwwancha siixxitakkeena lonsitakka'a hassehe. Odim hundiinsi lophphoo googo an ki'nnuwwina moo'isoommo. Manni suuminnee Waa'i asse'amaa'n suuminnee wocumta'nnim iitti bee'ulas muunoo doolisaa chilchiyye'oo xaa'llisaa ihaammo. Hiraaqqi uwwanchi hee'uta'nnim, maaxamu luwwi hundam la'umta'nnim, lachchi hundam la'umta'n odim duunnuwwa beyyiinsi ki'isaa hooroo amma'nnatim hee'uta'n iina iitti bee'ulas an awwaad bee'ane. Iina yoo luwwi hundam buxina uwwumta'nnim i orachchim giiranne shokkona higisaa uwwumta'nnim iitti bee'ulas iina maham awwaadooyyo. Iitti iyyaqqoohanee biijaallaa; iitti to'achchoobee'ane, bakke'oobee'anee bolxoobee'anee. Iitti laboobee'eka issoobee'ane. Iitti «Xale'i iina ihona» yooyyo; iitti nadadooyyo; bi'ishsham xigooyyo. Iitti hanqanne liiramoohane bagaan jor woshshanne liiramooyyo. Iitti luwwi hundam iyyaqqoohane; luwwi hundam amma'nnoohane; hundannem neeyyato issoohane; luwwi hundannem xa'nnoohane. Iitti heer heerinam hee'oohane. Hiraaqqi uwwanchim higoohane; mulli suuminne wocimmim gatoohane; lachcham ihuta'n higoohane. Neese lachcham guullinaa lanqoommoyyo. Hiraago guullinaa kulloommoyyo. Ihukkaarem miiqakkambee'i luwwi waaroo ammane miiqakkam luwwi gatookko. An ooshshichchi hee'ummi ammane ooshshichchisam wocam hee'ummo. Ooshshichchisam sawwam hee'ummo. Ooshshichchisam saarayyam hee'ummo. Oosoommano guullaa lasage ee oosoomma'n luwwa uraa urummo. Kaba neese kulkulli gagmoo'ixxanne moo'aqqoo manchisa moo'aqqinoommuulla. Ihukkaarem waaroo ammane ni illinne qoossinaa moo'nnoommo. Kaba guullaa la'umbee'aarem ee ammane eese guullaa la'oo'isa anim guullaa la'oommo. Ee bikkina amma'nnat, neeyyatii iittii hee'llamo. Ihukkaarem ee sasiinsim lophphookkok iitto. Iittina yaki'llehe. Keesammi Ayyaa'n uwwanchuwwa lophphaatim hiraago qoxxitakka'a hassehe. Ayyim mulli suuminne wocookkok manninatte ihoo'n Waa'inatte. Ixxi maaxamu woshsha wocookkokim Keesammi Ayyaaninnette ihu bikkina ayyim ixxi wocookkoka la'ooyyo. Ihukkaarem hiraago kurookkok manna qoxxiseenatte, sogeenattee baqaa'eenattee. Mulli suuminne wocookkokim ixxi gaga qoxxixxookko; ihukkaarem hiraago wocookkok amma'nnaano qoxxisookko. An ki'nnuwwi hundim mulli suuminne woccakkamisina hasoommo. Ihukkaarem hiraago kuttakkamisina lonsaa hasoommo. Amma'nnaan qoxxoo'isina ixxi wocookkoka tiraa kurookkok bee'ulas mulli suuminne wocoohaanniinsi hiraago wocookkok lophphookko. Iyyabbaayyuwwa, an ki'nnuwwina awwaadoo kaalta te'im lachcha te'im hiraagimma te'im losisimma amadaa ki'nnuwwi beyyo waaroo'n mulli suuminne wocummuuyyi waarumta'n ki'nnuwwina maha awwaadoommo? Foorbee'i luwwi oohim gambaabiyyi te'im diitta'i annanni annanni danaam sagara uwwoobee'an ihuta'n ee sagara ayyi la'eena xanookko. Odim xurumbuldu annanni sagarinne fugamubeelas orina ayyi gudookko? Ee'isam ki'nnuwdu manni qoossoobee'i mulli suuminne woccakkota'n hafachchina woccakkaman ihookko bagaan manni hinkid qoossaa la'eena xanookko? Uullanne dut annanni annanni suum yoo'is malbee'ane. Ee keenina hundinam tirat yoohane. Ihukkaarem wocamu suu'mmeka tiratooma la'umbeelas ee suuminne wocoo manchina an mulli uulli manchi ihoommo. Ixxim iina mulli uulli manchi ihookko yimma. Ee'isam ki'nnuwwim Keesammi Ayyaa'n uwwanchuwwa qoxxitakka'a hassakkam keen ikkakko'i bikkina amma'nnaano qoxxisoo uwwanchuwwa siiddakkeena lonsitakka'a yaki'llehe. Ee bikkina mulli suuminne wocookkok ee wocookkoka tiraa kureena xanoo'isina Waa'a uunxona. Mulli suuminne Waa'a uunxoommi ammane i woronne yoo ayyaan uunxookko bagaan i tiir maham qoossooyyo. Eehannata'i an maha isso? An i woronne yoo ayyaaninne Waa'a uunxoommo. Odim i tiirinnem Waa'a uunxoommo. I woronne yoo ayyaaninnem zammaroommo; odim i tiirinnem zammaroommo. Eehid ihubeelas at ki woronne yoo ayyaaninne Waa'a galaxxitootti ammane oo uwwanchi uwwamubee'i manchi at mayyitaa Waa'a galaxxitoolda'e la'ubeelas hinkid ihaa «Aameen» yeena xanoo? At Waa'a erisa galaxxitoohan ihookko. Ihona bagaan oo ki galaxximmi mulli mancho maham qoxxisooyyo. An ki'nnuwwiinsi hundiinsim lonsaa mulli suuminne wocoommi bikkina Waa'a galaxxoommo. Ihukkaarem amma'nnaa'n wixxitenne mulli suuminne tommi kum sagara wocoommaanniinsi mulli keeno losiseena xale'i onti sagachcho i tiiriinsi wocimma iittoommo. Iyyabbaayyuwwa, jor luwwina ciilluwwisa ikkehe bagaan ki'nnuwwi tiironne ciilluwwisa ikkakkotte. Ihukkaarem tiironne qoor keen ikkehe. Keesammi Kitaabanne Moollanni «La'akkambee'i suume wocoo manninnee mulli uulli manni suuminnee ka minaadabina wocoommuulla. Ihona bagaan ixxuwwi an wocummoka macceessamooyyo» yaakko. Eehannata'i mulli suuminne wocimmi mare'i ihookkok amma'nnu keeninatte ihoo'n amma'nnubee'i keeninatte. Ihukkaarem hiraagimmi mare'i ihookkok amma'nnaaninatte bagaan amma'nnubee'i keeninayyo. Ayyi la'ukko amma'nnaan hundim wixxu beyyonne mulli suuminne wocukkuuyyi eekka la'oobee'i manni te'im amma'nnubee'i manni ee mine aaguta'n ki'nnuwwa machchaaraano yooyyonnihe? Ihukkaarem hundim hiraaguta'n amma'nnubee'i manchi te'im eekka la'oobee'i manchi aaguta'n hundim wocoo woshsha macceesaa baaxiilaanchi ihukkisa la'aa ixxi gaga acceeqasookko. Ee'isam ixxi macceesoo sagarinne hundinnem ixxonne oogatamookko. Ixxi wodanonne maaxamu luwwim ixxena caakkaa la'amookko. Ixxim «Hanqinam Waa'i ki'nnuwwi lambe'ennette» yukkuuyyi guruphphaa Waa'ina otossookko. Eehannata'i iyyabbaayyuwwa, ki'nnuwwi mat ikkakka'a wixxitakkam ammane annannichchinam matina zammarimmi, matinam losisimmi, matina kaalta moo'immi, matinam mulli suuminne wocimmi, matina odim mulli suuminne wocakko'oka tirimmi uwwamookko. Oo hundim mulli keeno qoxxisoohan ihona. Mulli suuminne wocookkok hee'ulas lam te'im eehanniinsi lophphukkaare sas ikka'a mat tirukkuuyyi kor korinne woccona. Ihukkaarem tiraa kurookkok hee'ubeelas amma'nnaa'n lambe'enne cawwaa uraa ixxi gaginaa Waa'inaa wocona. Hiraagaan lam te'im sas woccona; mulli keen wocamukkoka saarayyita'a moo'lla'a oogattona. Ayyi la'ukko ee beyyonne afuurukkaannina matina mat luwwi caakkaa la'amukkan ihukkaa'lleensi illageen wocam hee'ukkok cawwihona. Hundim losoo'isinaa qoxxoo'isinaa hiraago woccakkam ammane mat mat ikkakka'a kor korinne woccehe. Hiraagaa'n ayyaan hiraagaanina ijaajamookko. Waa'i xummi Waa'a bagaan hambalaachchi Waa'ayyo. Amma'nnaa'n wixxitenne yoo Waa'i minaadab hundinam losamukkisam amma'nnaa'n wixxitenne meenti wocoobee'isa cawwihona. Seerim «Meenti ijaajamona» yaakko. Amma'nnaa'n wixxixxi lambe'enne meenti wocimmi tuussiisoohan ihu bikkina ayyi la'ukko ixxuwwi laqqeena hassam luwwi hee'uta'n minenne ixxuwwi aro'o xa'mmitona. Waa'i sagar firukkok ki'nnuwwiinsettennihe? Te'im Waa'i sagar afukkok xale'i ki'nnuwwi beyyonnihe? Ayyim ixxi an hiraagaancho te'im Waa'i Ayyaa'n uwwanchi iina yoohane yaa sawwoo ayyim hee'ulas ku kitaaboommi ijaaj Moollanniinsette ihukkisa la'ona. Eekka la'oobee'ek ixxim la'amoone. Ee bikkina iyyabbaayyuwwa, hiraago woccakkeena lonsitakka'a hassehe. Mulli suuminne wocimmam hoottakkotte. Ihukkaarem hundem luwwim laboo'isinnee ogoraamisinnee ihona. Iyyabbaayyuwwa, an ki'nnuwwina kurummaare ki'nnuwwim aa'llakka'a ixxonne qoxxitakka'a uullitakko'i mishiraachchi saga'l bikkina tiissiiseena hasoommo. An ki'nnuwwina kurummi mishiraachchi sagaranne qoxxitakka'a uullitakkolas gattakkamo. Eehid ihubeelas ki'nnuwwik amma'nnat awwaad bee'ane. Hundiinsi horoor woshsha an aa'ummoka ki'nnuwwina higisaa uwwoommo. Oohim Keesammi Kitaabanne kitaabamukkisam Kiristoos ni baaxii'l bikkina lehukko waammamukkoo. Odim Keesammi Kitaabanne kitaabamukkisam saxxi ballanne lehiinsi ki'ukko. Ee lasage Keefa'ana moo'amukko. Odim tomminaa lamem losaaninaa moo'amukko. Odim onti xibbiinsi hanaan ihaakkoo awwonaanina matemaaggem moo'amukko. Ee keeniinsim lophphoo qax ka balli afeebe'e foorinnem yo'o. Ihukkaarem hof qax keen leto'ookko. Ee lasage Yaaqoobina moo'amukko. Ee lasage odim asse'amaanina hundinam moo'amukko. Hundiinsim lasaanchonne amman bee'i qaramaammoo kar iinam moo'amukko. Amma'nnito'i Waa'i minaadaba lobakata hawwisam hee'ummi bikkina an asse'amaan hundiinsim hoffane. Asse'amaancho yamamaa weeshameenam laboombee'an hee'ummo. Ihukkaarem Waa'i eroomminne an anette ihaammo. Iina uwwamu eroommim kora'ayyo. Eehanniinsim odim ixxuwwiinsi ayyeensim lonsaa baximminne badaraammo. Eekkam issummok anette ihoo'n i woronne yoo Waa'i eroomma. Anettem ihummo te'im ixxuwwam ikko'o hinka'isinnem neese kullummaare ki'nnuwwi amma'nnitakko'ookko. Kiristoos lehiinsi ki'ukkisa kulloomman ihulas ki'nnuwwiinsi mat mat keen «Lehu manni ki'ooyyo» yitamok mahinatte? Eehaara'i lehiinsi kichchi bee'an ihulas Kiristoosim lehiinsi ki'ukkoyyo yimma. Kiristoos lehiinsi ki'ubee'an ihulas neese ki'nnuwwina kullummi woshshii ki'nnuwwi amma'nnatii awwaad bee'ane yimma. Lehu keen lehiinsi ki'oobee'an ihulas Kiristoosam lehiinsi Waa'i ki'isukkoyyo yimma. Eehid ihulas «Kiristoosa lehiinsi Waa'i ki'isaakko» yinaa kulloommi keen Waa'i bikkina qophphano kulloomman inkaa siidammaammo. Lehu keen lehiinsi ki'oobee'an ihulas Kiristoosim lehiinsi ki'ukkoyyo yimma. Kiristoos lehiinsi ki'ubee'an ihulas ki'nnuwwik amma'nnat awwaad bee'ane. Ki'nnuwwim kabad afeebe'em baaxiilinnem yoontakke'e yimma. Eehaara'i Kiristoosanne amma'nnita'a leto'i keen bi'llo'ookko yimma. Niina Kiristoosanne yoo neeyyat xale'i ka uulli heechchinatte ihukkaa'lleensi ni heechchi manni hundaanniinsim lophphaa kichche'isoohane yimma. Ihukkaarem Kiristoos lehu keen hundinam won ihaa hanqinam lehiinsi ki'aakko. Mat manchinne leh waarukkisam lehiinsi kichchim mat manchinne waarukko. Mashka'oomim Addaamenne hundim lehoo'isam Kiristoosinne hundim heechcha siixxookko. Ihukkaarem annannichchim lehiinsi ki'ookkok korinnette. Kiristoos hundinam won ihaa lehiinsi ki'aakko. Ee lasage ixxi daba'llaa waaroo ammane ixxan ikko'i keen ki'llamo. Gassaano, gassimmi malaayyi yoo keenoo malaayyaammuwwaa Kiristoos bi'isaa ki'aa adillano ixxi Anni Waa'ina uwwaa lasage lasaanchi ihookko. Waa'i diina'i hundam Kiristoos lokkiinsi woroon isseebe'e Kiristoos gassimmi hasisookko. Lasaanchonne bi'oo diinakkichchim leho. Mashka'oomim Keesammi Kitaabanne «Waa'i hundem luwwam ixxena ijaajamoo'isina ixxi lokkiinsi woroon issaakko» yamamaakko. «Hundem luwwam ixxi lokkiinsi woroon issaakko» yookkok hundem luwwam ixxi lokkiinsi woroon issukkoka edoobee'is la'amaakkoohane. Hundem luwwim ixxena ijaajamaa lasage Waa'i Beet ixxi gagim ixxi lokkiinsi woroon issu Waa'ina ijaajamookko. Ee'isinne Waa'i hundem luwwam gassookko. Leto'i keen lehiinsi ki'llambee'an ihulas leto'i kee'n bikkina xammaqantam manni maha siixxitamo? Eehannata'i leto'i keen lehiinsi hore'oomam ki'llambeelas lehu manni bikkenne manni mahina xammaqamoolla? Neese hundi ammanem u'nnanne hee'nnoommok mahinatte? Iyyabbaayyuwwa, an ballina ballina lehinne gambahoommuulla. Eekkam ki'nnuwwina hanqinam kuroommuullak Moollanni Yesuus Kiristoosanne niina yoo mateeyyoomanne bakke'oommi bikkinatte. Efeesoonanne moochchisa ihaakkoo manninne gubbamummok xale'i ka uulli heechchinatte ihukkaa'lleensi an siixxoommi luwwi maruwwa? Eehannata'i lehu manni lehiinsi ki'oobee'an ihukkaa'lleensi «Soodo lenoommi bikkina intona, angona» yamamukkisayyonnihe? Ki'nnuwwi huushantakkotte; jor beshichchi danaam haalata bi'isookko. Tiiro issehe bagaan od baaxiilo baxxakkotte. Ki'nnuwwiinsi mat mat keen Waa'a laqqambee'i bikkina ixxuwwa tuussiiseena yaa kaka wocoommuulla. Ihukkaarem mat manchi «Leto'i keen hinkid ki'llamo? Hinkido'i orachchindu waattamo?» yeena xanookko. Ate ka qawwi mancho, at wixxittok shamubeelas hinkid ihaa mutookko? At arasa te'im mulli hurbaata wixxoo ammane sirekkichchooma wixxootto bagaan mutaa li'ukkoka wixxittoyyo. Ihukkaarem Waa'i iittukkisinne ee sire'ina orachcho uwwookko. Dut hagar sire'ina annannichchinam ee sire'i haga'l qoocci yoo orachcho uwwookko. Mannik, diinaxxek, cii'ikii qurxumme'ikii hundikim orachchi annanna bagaan matoyyo. Iima'nnekii uulli orachchii yookko. Ihukkaarem iima'n orachchik lombi uulli orachchi lombiinsi annanna. Eelliinchi nuur mato. Odim aga'n nuurim mullane. Boollaankikim nuur mullane. Mat boollaankichchik nuur mulli boollaankichchaanniinsi annanna. Leto'i keen ki'llamokim ee'isame. Bi'oohan ihaa wixamukkok bi'oobee'an ihaa lehiinsi ki'ookko. Lombi bee'eka wixamukkok lombinne ki'ookko. Hoongaanchi ihaa wixamukkokim malaayyaam ihaa ki'ookko. Maa'l orachchi wixamookko. Ayyaa'n orachchim ki'ookko. Maa'l orachchi hee'ulas ayyaa'n orachchim yookko. Keesammi Kitaabannem «Luxxi manchi hee'u Addaam fooraam manchi ihukko» yamamaa kitaabamaakko. Ihukkaarem lasaanchi Addaam foore uwwoo Ayyaana. Ihukkaarem gaassaa waarukkok maa'llane bagaan ayyaa'nnaneyyo. Ee lasage ayyaa'nnek waarukko. Luxxeka qooccamu manchi buchchiinsi qooccamaakkoo buchchame. La'mmek iimaniinsette. Buchchiinsi qooccanto'i keen ee buchchiinsi qooccamu manchisame. Iima'nnan ikko'i manni iimaniinsi waarukkokam labbamo. Buchchiinsi qooccamu manchi hagara edde'nnummisam iimaniinsi waaru manchi hagaram edde'nnoommo. Iyyabbaayyuwwa, an ki'nnuwwina kuroommok maarii xiigii Waa'i adillanonne aagooyyo. Ee'isam bi'ookkok bi'oobee'eka sharad issaa aa'ooyyo. Ku bi'ookkok bi'oobee'eka lehookkokim lehoobee'eka edde'immi hasisookko. Ku bi'ookkok bi'oobee'eka lehookkokim lehoobee'eka edde'oo ammane Keesammi Kitaabanne «Leh kaa'amaa bee'ukko». Odim «Leho, kiikki kaachchi hannonnette? ki qubdu hannonnette?» yamamaa kitaabamukkok wo'mmaakko. Lehik qub baaxiilo. Baaxii'llekim malaayyi Seera. Ihukkaarem ni Moollanni Yesuus Kiristoosinne niina kaachcha uwwu Waa'ina galat ihona. Ee bikkina iittantakko'oo iyyabbaayyuwwa, ki'nnuwwi Moollannina badattakkam badallat kora'i ihubee'isa la'imminne heekke'llakkambee'isa qoxxehe. Moollanni baxinam ki'nnuwwi gaga higissakka'a uwwehe. An Galatiyanne yoo amma'nnaa'n wixxittuwwi amma'nnaanina ango'o uwwitona kurummisam ki'nnuwwim ango'o uwwehe. An waaraa lasage ango'o wixxaa'immi hasisoobee'isina ki'nnuwwiinsi annannichchim ixxi siixxukkisinne saantanne saantanne luxxi ayyaamonne mat luwwa fissaa annanni issaa wixxaa'ona. Ki'nnuwwiinsi laboo manna doo'llitakkamaare an waaraa assi kitaaba kitaabaa uwwoommaare ki'nnuwwi uwwitakko'i luwwa amadda'a Yerusaaleema mattamo. An marimmi hasisoohan ihulas ixxuwwim iinninne maqirem mattamo. An Maqeedoone'inne higeena hasummi bikkina ee Maqeedoona afaa lasage ki'nnuwwi beyyo waaroommo. An maroommi beyyi hundinam mat mat luwwinne hara'mmitakkamisina mat qax ammane ki'nnuwwinne maqire afuuroo'n uroommoyyo. Ayyi la'ukko hagayyem ki'nnuwwinne higiseena xanoommo. Moollanni yukkaare mat qax ammane ki'nnuwwinne maqire higisoommi bikkina kaba higummuuyyi ki'nnuwwi beyyo afeena hasummoyyo. Ihukkaarem Shaashshiqqi Uguxxi ontayyi ayyaam afeebe'e Efeesoonanne afuuroommo. Iinninne uullixxantam dut keen hee'llo'aarem mish yoo baxo baxoommisina iina gooc haraaraa fooqaakko. Ximootoos i'isam Moollanni baxo baxoohan ihu bikkina ki'nnuwwi beyyo waaroo ammane wossoobee'isa aa'llehe bagaan ixxo ayyim gadoone. Abbaayyuwwinne maqirem an ixxo egeroommuulli ihu bikkina ixxi xumminne qaqqisaa daba'llaa waaroo'isina hara'mmehe. Niyyabbaayyi Aphphuloosim abbaayyuwwinne maqirem ki'nnuwwi beyyo maraa moo'oo'isina lobakata uunxaa hee'ummo. Ihukkaarem ixxi kaba mareena xanubee'aarem ixxena makku ammane marookko. Baqi'llehe; amma'nnatonne qoxxitakka'a uullehe; badditakkotte; qoxxehe. Issitakkam luwwi hundam iittinne issehe. Iyyabbaayyuwwa, Isxifaanoos mi'n abaroos Akaaya yakkam uullanne luxxeka gaassita'a amma'nnito'i keen ikko'isaa Waa'i minaadabina hara'mmimminam ixxuwwi gaga higissa'a uwwito'isaa laqqakkamo. Eehido'i keeninaa ixxuwwinnem baxonne badattam keeninaa ijaajantakkamisina ki'nnuwwa uunxoommuulla. Ki'nnuwwi bee'llakko'i beyyonne Isxifaanoos, Fardoonaaxoosii Akkaayqoosii i beyyo waatto'i bikkina liiramaammo. Ixxuwwi ki'nnuwwi tiiro usheexxisso'isam i tiirom usheexxisso'ookko. Eehido'i keeno ki'nnuwwim qoossitakka'a laqqehe. Issiy uullanne yo'i amma'nnaa'n wixxittuwwi xummaato asse'llo'ookko. Odim Aqil, Phirisqilee ixxuwwi minenne wixxitam amma'nnaanii Moollanni summinne lobakat xummaato asse'llo'ookko. Amma'nnaan hundim xummaato asse'aakko. Ki'nnuwwina'i ki'nnuwwim danaamisa suunqantakku'uuyyi xummaatixxammehe. An Phaawuloos i anginnem ka xummaato kitaabaammo. Ayyim Moollanna iittoobee'ek hee'ulas duumamaakkoohan ihona. Ni Moollanna waare! Moollanni Yesuus Kiristoosik eroommi ki'nnuwwinne maqire ihona. I iitti Yesuus Kiristoosinne ki'nnuwwi hundinnem maqir ihona! Aameen. Qorontoos beero'o'n amma'nnaa'n wixxitinaa Akaayanne yoontakke'i Waa'i minaadab hundinamii Waa'i doo'llinne Yesuus Kiristoosina asse'amaanchi ihummi iinniinsi Phaawuloosiinsii niyyabbaayyi Ximootoosiinsii asse'amu asso. Niyyanni Waa'ikii ni Moollanni Yesuus Kiristoosikii eroommii xummii ki'nnuwwina ihona. Ni Moollanni Yesuus Kiristoosina anni ihu Waa'ina oohim qishixxatina anninaa qoxxisimmi hundinam Waa'inaa galat afona. Waa'i neese qoxxisukkisam neesem ihu hawwonnem yoo keeno qoxxinsoommisina hawwonne hundannem neese qoxxisookkok Waa'a. Yesuus Kiristoosika hawwo lobakata baxxammummisam ixxenne qoxximmam lobakata baxxammoommo. Neese hawwinummaarem hawwinoommok ki'nnuwwi gattakkamisinattee qoxxitakkamisinattee. Neese qoxxinoommokim ki'nnuwwi qoxxitakkamisinatte. Oohim neese aa'nnoommi hawwo xa'nnimminne aa'llakka'a iyyaqqitakkamisinatte. Ni hawwo baxxantakko'isam qoxximmam baxxantakkamisa lanqoommi bikkina neese ki'nnuwwi bikkina sawwinoommi sawwit qoxxaalla. Iyyabbaayyuwwa, Issiyanne neesenne afu hawwo laqqakkoo'n gattakkona hansoommoyyo. Hore'em iyyakka'a xanakkambee'i kee'mmaalli hawwi neesenne afu bikkina foore koo'llinaa hee'nnummo. Hore'em neesenne leh oogatamukkaannisa xingaa hee'nnummo. Eehid ihukkokim neese ni gagannette ihoo'n lehu keeno lehiinsi ki'isoo Waa'anne bakke'nnoommisinatte. Ixxi neese lenaammoo beyyiinsi gatisukko. Ka lasagem gatisookko. Odim neese gatisoo'isina ixxo ku'llinaa yoommine. Ki'nnuwwim Waa'a uunximminne niina hara'mmehe. Dutaagge Waa'a uunximminne niina uwwamoo maassinne ki'ukkok lobakat keen ni bikkina Waa'a galaxxitamo. Ni bakkechchi kane, neese ka uullanne lophphaatim ki'nnuwwi beyyonne Waa'iinsi siindummi muccuroominnee xabbeenoominnee hee'nnummisa ni wodan la'ookko. Oohim Waa'i eroomminnette bagaan manni qooroominneyyo. An eekka amma'nnummi bikkina lam gada'a siixxitakkamisina ki'nnuwwi beyyo gaassaa waareena sawwaammo. Maqeedoona marummuuyyi ki'nnuwwa moo'aa higaa daba'llaa waarummuuyyi odim ki'nnuwwi beyyinne waaroommaare hara'mmato uwwitakka'a Yihuxxi uulla geegeessakkamisina hasaammo. Ee'isa isseena sawwummaare lamaankaanchi ihummo yitakka'atennihe? Matemaaggem «Eeyya» yaa odim «A'a'e» yeena gudaakkoo ka uulli mannisa ihummonnihe? Hanqinam Waa'i la'oo'isam neese ki'nnuwwina woncoommi woshshanne «Eeyya» yinaa odim «A'a'e» yimmi hee'ukkoyyo. Sillaas, Ximootoosii anii ki'nnuwwina alallaantummi Waa'i Beet Yesuus Kiristoos beyyonne hundi ammanem xale'i «Eeyya» yimmiinsi bagaan «Eeyya» yakka'a «A'a'e» yimmi bee'e. Waa'i neeyyata aagu luwwi hundim wo'mmookkok Yesuus Kiristoosinnette. Neesem Yesuus Kiristoosinne inkaa «Eeyya» yinaa Waa'i lombina «Aameen» yinoommok ee bikkinatte. Neese ki'nnuwwinne maqirem Yesuus Kiristoosinne qoxxisukkokii doo'llukkokii Waa'a. Waa'i ixxan inkummisa moo'iseena ixxeka koobo'o neesenne issaa ixxeka Keesammi Ayyaanam niina lubbat issaa ni wodanonne dissaakko. An Qorontoos beero'o waarimma hosummok ki'nnuwwa kichche'isimma ceemaatette. Eekka Waa'i la'ona! Amma'nnatonne ki'nnuwwi qoxxitakka'a yoontakke'e. Neese ki'nnuwwinne maqire banxoommok ki'nnuwwa liiransineenatte bagaan ki'nnuwwi amma'nnitakkam luwwa ijaanjeenayyo. Ee bikkina ki'nnuwwa kichche'iseena hasumbee'i bikkina ki'nnuwwi beyyo daba'llaa waaroombee'isa hoseena murte'aammo. Eese liiransitakkamok an kichche'isummi ki'nnuwwa. An ki'nnuwwa kichche'isummaa'lleensi eese ayyi liiransookko? An waaroommi ammane eese liiransoo keenonne kichche'oombee'isina assi kitaaba kitaabaammo. Mashka'oomim «Iikki liiranchi ki'nnuwwi hundinam liiranchi ihukkisa laqqakkamo» yaa amma'nnoommo. An kitaabummok i wodanonne yoo lobakat u'nninne, kichchechchinnee lobakat indiiddinnettee. Oohim ki'nnuwwa kichche'iseen ihoo'n an guullaa ki'nnuwwa iittoommisa laqqakkamisinatte. Manna kichche'isu manchi hee'uta'n kichche'isukkok xale'i eeseyyo. Woshsha baasisimmi ihoone bagaan hunda kichche'isubee'aarem ki'nnuwwiinsi duta kichche'isaakko. Eehido'i mancho ki'nnuwwik lophphitakkam qaxim guzumo'issakko'i guzumo'i ihaakko. Oo manchi kaba lobakat kichchechchinne neeyyata muroobee'isa ki'nnuwwi ixxena haafimmii ixxom qoxxisimmii hasisookko. Ixxo iittitakkamisa moo'issakkamisina an ki'nnuwwa uunxoommo. An ki'nnuwwina kitaabummok hundi luwwannem ki'nnuwwi ijaajantakkamisaa ijaajantakkambee'isaa keenaa la'eenatte. Ki'nnuwwi haafitakko'aannina ayyenam anim haafaammo. Ihu luwwam an haafaammoohaare haafummok Kiristoos illagenne ki'nnuwwi bikkinatte. Oohim Sheexaanchi neesenne issoo hantaaro guullinaa lanqoommi bikkina ixxena beyyo uwwinoombee'isinatte. An Kiristoosika mishiraachchi sagara kureena Xiiroo'aada waarummi ammane Moollanni iina googo fooqaa'aa hee'ukko. Ihukkaarem an iyyabbaayyi Tiito'o ee beyyonne siidumbee'i bikkina iikki tiir usheexxukkoyyo. Ee bikkina «Xumma hee'llehe» yaa Maqeedoona marummo. Kiristoosinne neese hundi ammanem kaachchinne awwonsukkuuyyi enjisa enje'oo Kiristoos bikkina la'imma beyyi hundannem niinninne afisoo Waa'ina galat afona. Mashka'oomim gatoo keeninaa bi'oo keeninaa Kiristoosinne danaam enjisa inkaa Waa'ina hincinaammo. Bi'oo keenina bichchi enja; gatoo keeninam heechcha uwwoo enja. Eehannata'i ka baxina labookkok ayyette? Neese lobakat kee'nnisa Waa'i sagaranne hamaallaa daddalloommi keenoyyo. Ihukkaarem Waa'i asse'ukkaare Kiristoosan inkaa Waa'i illagenne hanqa woncoommo. Odim neese ni gaga galaxximma asheellonnihe? Te'im mat mat keen issitamisa neese ayyetda'e inkummisa la'isoo assi kitaaba ki'nnuwwina te'im ki'nnuwwiinsi hansoommonnihe? Manni hundim la'oo'isinaa qananaa'oo'isinaa ki'nnuwwi gagim neese la'issakkeena ni wodanonne kitaabantakko'oo keeno. Ki'nnuwwim Kiristoos neesenne asse'u assi kitaab ikkakko'isa moo'issakkamuulla. Kitaabamukkokim hee'oo Waa'i Keesammi Ayyaaninnette bagaan qalaminneyyo. Odim kinannette ihoo'n manni wodanonnette. Neese eehid yinoommok Yesuus Kiristoosinne Waa'anne amma'nninoommi bikkinatte. Kinanne fidalinne Seer kitaabamaa uwwamu ammane Waa'ik lombi moo'amaa hee'ukko. Muse'i miinenne belecce'am hee'u caakki limmukkuuyyi maroohan ihukkaarem Isra'ee'l minaadab moo'lleena xanto'oyyo. Ee leho eeboo Seerina eehaa'n lombi hee'ukkaa'lleensi Keesammi Ayyaa'nnek awwaad lophphoo lombi yoohaneyyonnihe? Oogato'o eeboohaannik awwaad eehaa'n lombi yoohan ihukkaa'lleensi muccurooma eeboohaanni awwaadik lombi eehanniinsi lobakata lophphookko. Kaba lasaqqaannik lombi lophphu bikkina eraa'llaannik lombi od bee'e. Oo bi'ukkok lombinne uwwamukkaa'lleensi ka bi'oobee'aannina lobakat lombi yoohane. Niina eehido'i neeyyat yoo bikkina iggimminne woncoommo. Neese ee limmukkuuyyi maroo belecce'am hee'u caakka Isra'ee'l minaadab moo'llambee'isa eddechchinne ille ifiixxu Muse'isayyo. Isra'ee'l minaadab kabad afeebe'em ee eraa'l hidiro qananaa'llam ammane ixxuwwik wodan duudu bikkina oo ifiishshaanchi fooqooyyo. Mashka'oomim oo ifiishshaanchi fooqookkok xale'i Kiristoosinnette. Kaballi afeebe'em ee Muse'i Seera qananaa'akkam ammane ixxuwwi wodanonne oo ifiishshaanchi ifiisamaakko. Ihukkaarem mat manchi Moollanni kollonne daba'lloo ammane oo ifiishshaanchi fooqookko. Moollanni ixxi gagim Keesammi Ayyaana. Moollannik Keesammi Ayyaan yoo beyyonne wolabban yookko. Niihaannonne ifiisamubee'i illenne Moollannik lombi neesenne hundannem moo'amookko. Neesem ixxi hagaranne lombiinsi lombanne daba'llammoommo. Oohim waarookkok Keesammi Ayyaan ihu Moollanniinsette. Ka awwaado Waa'i ixxi eroomminne niina uwwu bikkina baddinoommoyyo. Maaxaqqanne baxakkam tuussiisoo luwwa sambaammo. Hantaarom issinoommoyyo. Waa'i sagaram qophphaninne hamaalloommoyyo. Ihukkaarem hanqo'i caakki woshsha woncummuuyyi ni gaga manni hundinam Waa'i illagenne moo'insoommo. Neese kulloommi mishiraachchi sagar daphphulas daphphukkok xale'i bi'oo keeninatte. Ee kee'nneka tiiro ka uullina Waa'i ihaakko Sheexaanchi tuunsiisu bikkina amma'nnito'oyyo. Waa'i kobi'l ihu lombi yoo Kiristoosika mishiraachchi saga'l caakkam moo'llambee'isa hooraakko. Neese Yesuus bikkina awwaadaan inkummisaa Yesuus Kiristoos Moollanni ihukkisaa ki'nnuwwina kulloommuulla bagaan ni gaqqi bikkina kulloommoyyo. «Tuunsonne caakki caakkona» yukkok Waa'a. Kiristoos miinenne caakku Waa'i lomba lanqoommisina ni wodanonne caakka caakkisookkokim Waa'a. Hundiinsim lophphoo malaayyi Waa'ane bagaan niihan ihubee'isa moo'iseena neesenne ka buchchi mu'utanne lombi yoo lachchi yookko. Kolli hundinnem hawwinoommo; ihukkaarem bi'nnoommoyyo. Mal bi'ookko; ihukkaarem koo'llinoommoyyo. Hawwisakkamo; ihukkaarem uunjammoommoyyo. Aphphisammaa umboommo; ihukkaarem bi'nnoommoyyo. Yesuusik heechchi ni orachchonne la'amoo'isina ixxeka leho ni orachchonne hundi ammanem iyyinoommo. Niihaannonne bi'oo maaranne Yesuusik heechchi la'amoo'isina foorinne yoommine'i qax ammanenne Yesuus bikkina hundi ammanem lehina ni gaga higinsaa uwwinoommo. Ee bikkina neese leh woronne hee'nnummaarem ki'nnuwwi heechcha siixxitakko'ookko. Keesammi Kitaabanne «An amma'nnummi bikkina wocoommo» yamamaa kitaabamukkisam amma'nnaxxi ayyaan neesennem yoo bikkina amma'nninaa woncoommo. Odim Moollanni Yesuusa lehiinsi ki'isu Waa'i neesem Yesuusinne maqirem lehiinsi ki'isaa ki'nnuwwinnem ixxi beyyo massoo'isa lanqaammo. Oo hundim ki'nnuwwi bikkinatte. Oohim Waa'ik eroommi lobakat mannina exxaa uwwamoo ammane lombi yoo Waa'a lobakata galaxxitamisinatte. Ee bikkina neeyyato mulloommoyyo; niikki ha'n orachchi hoogukkaarem woro'l mannoom ballina ballina haareechchookko. Ku ammanoomina neesenne afoo hoffi hawwi keenakkeena xanakkambee'i heer heerina hee'oo lomba niina gudisoolla. Moo'amoo luwwi ammaninatte. Ihukkaarem moo'amoobee'i luwwi heer heerinam hee'oohan ihu bikkina neese moo'amoobee'i luwwa hansoommo bagaan moo'amoo luwwa hansoommoyyo. Neese hee'nnoommi ka uulli dukkaan gindamuta'n manni anginnette ihoo'n Waa'i baxaakkoo heer heerina hee'oo min iimanenne niina yoo'isa lanqoommo. Hanqinam neese kaba keyye hee'nnummuuyyi iima'n ni minenne hee'nneena qulunxummuuyyi qitinnoommuulla. Ee iima'nneka edde'nnoommi ammane leexa'i inkaa siidammoommoyyo. Hofqax ammanina ka uulli dukkaananne hee'nnummuuyyi kichchechchinne u'nnammoommuullak ka maariinsi annanni ihimminnette ihoo'n lehoo orachchi heechchanne aagoo'isina haareechchi orachcho edde'immina minxoommuulla. Eehannina neese gudisukkok Waa'a. Keesammi Ayyaanam niina lubbat issaa uwwaakko. Ee bikkina neese hundi ammanem iggimminne hee'nnoommo. Neese maarinne hee'nnummuuyyi Moollanniinsi qee'llinummisa lanqoommo. Mashka'oomim hee'nnoommok amma'nnatinnette bagaan moo'imminneyyo. Niina lobakat iggimmi yoo bikkina ka maariinsi annanni inkaa iima'n minenne Moollanninne mat inkeena minxoommo. Ee bikkina neese maarinne hee'nnummom hee'nnummoyyom ni sawwit Waa'a liiransimma. Neese hundim eroka te'im jora ni maarinne banxummi baxisa a'llineena Kiristoos illagenne oogato'ina annannichchim uullimmi hasisookko. Waa'a baddimmi mada'e ihukkisa lanqoommi bikkina manni amma'nnoo'isa issinaa kulloommo. Neese ayyetda'e inkummisa Waa'i la'ookko. Odim ki'nnuwwi tiirim la'ookko yaa sawwoommo. Oohim neese ni gaga ki'nnuwwina la'ixxineena hansaammateyyo. Ihukkaarem mat mat keen ixxuwwi wodanonne yoo luwwinnette ihoo'n moo'amoo lombanne bakke'llam bikkina ixxuwwina dabattakkeena xantakkamisina neesenne bakke'llakkona mashka'a gudinseenatte. Neese machchaallummaare Waa'i bikkinatte. Fayya'i inkummaarem ki'nnuwwi bikkinatte. Mat manchi manni hundi bikkem lehukkaare manni hundim lehaakko yinaa amma'nninummi bikkina Kiristoosik iitti neese giddisoolla. Kiristoos hundi bikkem lehukkok foorinne yo'i keen ixxuwwi gagina hee'immi ihoo'n ixxuwwi bikkina lehaa ki'u Kiristoosina hee'llamisinatte. Ee bikkina kaballiinsi ki'insaa ayyi manchom manni sawwixxisa moo'nnoommoyyo. Kiristoosam eraare manni sawwixxisinne moo'nnaammoohaarem ka lasage ee'isinne moo'nnoommoyyo. Ee bikkina ayyi manchim Kiristoosan ihulas oo manchi haareechchi qooccancha; moosir mannoom higaakko. Oono'o! Haareechchi mannoom waaraakko. Ee luwwi hundam Waa'i issukkok Kiristoosinne ihaa neese ixxi gaginne iittansaa niinam iittansimmi awwaado uwwaakko. Kiristoosinne ihaa Waa'i mannika baaxiilo xigoobee'isa haafaa manna ixxi gaginne iittansoolla. Ee iittansimmika asso niina uwwaakko. Ee bikkina Waa'i niinninne ihaa manna weeshoo'isina Kiristoos bikkenne asse'ammaammo keeno. Kiristoos bikkenne inkaa Waa'inne iittammehe yinaa ki'nnuwwa uunxinoommo. Mashka'oomim neese Kiristoosinne Waa'ina mucculluwwi inkoommisina baaxiil bee'i Kiristoosa ni bikkina Waa'i baaxiilaanchi issaakko. 8Waa'iinsi aa'llakko'i eroommi huunshan ihoobee'isa neese Waa'inne maqire banxoommi keen ki'nnuwwa uunxinoommuulla. Waa'im «Ki'nnuwwika woshsha macceesimmi hasisoo ammanenne macceesummo. Gatimmi hasisoo ballannem ki'nnuwwina hara'mmummo» yaakko. Oono'o, macceesimmi hasisoo ammanii gatimmi hasisoo ballii kabadette. Ni awwaadonne miiqakkam luwwi hee'ona hansoombee'i bikkina ayyem qoloo luwwa issineena hansoommoyyo. Ihukkaarem hawwo, u'nnaa kichchechchaa iyyaqqimminne Waa'ina awwaandoommi keen inkummisa hundi kollinnem moo'insoommo. Odim ganakku'uuyyi, karammummuuyyi, manni neesenne ki'ukkuuyyi, badallummuuyyi, diriiro hoongummuuyyii sibaallummuuyyii ee'isam muccuroominne, lachchinne, iyyaqqimminne, maashaalloominne, Keesammi Ayyaaninne, hanqo'i iittinne, hanqo'i woshsha kurimminnee Waa'i malaayyinnee awwaandoommi keen inkummisa moo'insoommo. Neese o'l mu'uxxisa awwaaxxinoommi muccuroom niihaannonne makkannee qeddannee yookko. Lombinne te'im sholle'imminne er sadinne te'im jor sadinne Waa'ina awwaadaan inkummisa moo'insoommo. Neese hanqo'i manni inkaa hee'nnummuuyyim huushisaan inkaa xigammummo. Erisa la'ammaammoo keen inkaa hee'nnummuuyyim la'ammumbee'aannisa xigammummo. Leto'oo keeno yamammummaarem neese fooraammuwwa. Neese aphphisakko'ookko; ihukkaarem lenummoyyo. Kichche'aan inkummaarem hundi ammanem liirammoommi keeno. Bux inkummaarem dut keeno goddaan issinoommo. Ma'lluchchim bee'i keen inkummaarem hundi luchchim niihane. Qorontoosanne yoontakke'i manna, caakkinsaa woncoommo. Niikki wodan ki'nnuwwina haraara. Ki'nnuwwika wodano niina xuqqissakko'o bagaan neese ki'nnuwwina xuqqinsummoyyo. An ki'nnuwwa i oosisa issaa wocoommo, ni wodano ki'nnuwwina fooqaa'nnummisam ki'nnuwwim niina fooqaa'llehe. Amma'nnubee'i manninne laboobee'isinne mat ikkakkotte. Muccuroominaa boqqoominaa mah mateeyyoom yookko? Te'im caakkinaa tuunsinaa mah mateeyyoom yookko? Kiristoosinaa Sheexaanchinaa mah mateeyyoom yookko? Te'im amma'nnu manchinaa amma'nnubee'i manchinaa mah mateeyyoom yookko? Keesammi Mininaa qophpha'n waa'uwwinaa mah mateeyyoom yookko? Neese hee'oo Waa'ina mine. Waa'im «An ixxuwwi woronne hee'oommo. Ixxuwwi woronnem garoommo. Ixxuwwinam Waa'i ihoommo. Ixxuwwim i minaadab ikkamo» yaakko. Ee bikkina Waa'i «Ixxuwwiinsi annanni ikkakka'a fillehe. Haashaassoo luwwam nakkitakkotte. Anim ee ammane ki'nnuwwa aa'oommo. Ki'nnuwwinam anni ihoommo. Ki'nnuwwim iina oos ikkakkamo» yaakko. Iittantakko'oo iyyabbaayyuwwa, niina oo neeyyat yoo bikkina niikka maaraa fooree haashaassoo luwwi hundiinsim ni gaga muccussinona. Waa'a baddimminnem guullinaa keesammaammoo keen inkona. Ki'nnuwwika wodano niina fooqaa'llehe. Neese ayyem hawwondummoyyo. Ayyim bi'oo'isa issinummoyyo. Ayyeensim qawwiinsaa aa'nnummoyyo. An eekka yummok ki'nnuwwa acceeqaseenayyo. Neese lehonnettem ihukko heechchanne ki'nnuwwinne maqire inkoommisina ni wodanonne yoontakke'isa kanniinsi illageenim kuraammo. An ki'nnuwwa lobakata amma'nnoommo, ki'nnuwwannem lobakata bakke'oommo. Iikki tiir lobakata qoxxaakko. Neesenne lobakat hawwi afukkaarem iikki liiranchi gabalbee'ane. Neese Maqeedoona amfummi ammane biirinne qasanchi worinnem baachchi hee'u bikkina hundi kollinnem hawwinaa usheexxato hoongummo. Ihukkaarem kichche'u keeno qoxxisoo Waa'i Tiito'o waarimminne neese qoxxisukko. Neese qoxxisukkok xale'i ixxi waarimmi ihoo'n ki'nnuwwi ixxo qoxxissakko'isa macceesimma. Odim ki'nnuwwi eese moo'llakkeena quluxxakkamisa, eese hawwoddakko'i bikkinam kichche'llakkamisaa i bikkina to'achchitakkamisaa niina kurukkaare an lobakata liiramaammo. An ki'nnuwwina kitaabummi assi kitaab ki'nnuwwa kichche'isaakkoohaarem an gaabboommoyyo. Gaabbaammoohaarem gaabbummok oo assi kitaab ki'nnuwwa hofqax ammanina kichche'isukkisa moo'aatette. An liiramoommok ki'nnuwwi kichche'llakko'i bikkinatte ihoo'n kichche'llakko'oka baaxiilo biiraa yitakkeenatte ihu bikkinatte. Eehido'i kichchechchi Waa'i hasoo kichchechchi ihu bikkina neese ki'nnuwwa maham hawwondummoyyo. Mashka'oomim Waa'i hasoo kichchechchi baaxiilo biiraa yakkamisa issaa gatimmi kollonne woroohane. Ee lasage od gaabbimmi hee'ooyyo. Ihukkaarem ka uulli heechchina kichche'immi leho eebookko. Waa'i hasoo kichchechchi ki'nnuwwi gaga qoxxisimma, jora issitakkobee'isa moo'isimma, gaabbimma, Waa'a baddimma, eese moo'llakkeena quluximma, er luwwina to'achchimmaa jora baxu mancho guzumo'isimmaa ki'nnuwwi woronne eebukkisa moo'llehe. Ki'nnuwwi hundi luwwannem mucculluwwi ikkakko'isa moo'issakko'ookko. Ee bikkina an ee assi kitaaba kitaabummok hawwodukkaanninayyo; te'im hawwodamukkaanninayyo. Ihukkaarem ki'nnuwwi ni bikkina to'achchitakkam er to'achchi Waa'i illagenne ki'nnuwwina caakkoo'isinatte. Ee bikkina neese qoxxinaammo. Eehanniinsim lophphaa Tiito'ok tiir ki'nnuwwanne usheexxu bikkina ixxi liiranchinne neesem lobakata liirammaammo. An ki'nnuwwanne bakke'ummisa Tiito'ona kuraa hee'ummi bikkina ki'nnuwwim eese tuussiissakko'oyyo. Ki'nnuwwina neese kullummi woshshi hundim kullummisam ihaa siidamukkisam Tiito'i illagenne ki'nnuwwanne bakke'nnummi woshshi hanqi ihaakko. Ki'nnuwwika hundikam ijaajanchaa baddimminnee huxechchinnee ixxo aa'llakko'isaa sawwoo ammane ixxek ki'nnuwwina yoo iitti lobakata kee'mmaalla. Anim ki'nnuwwa lobakata amma'nnoommi bikkina liiramaammo. Niyyabbaayyuwwa, Maqeedoonanne yo'i amma'nnaanina Waa'iinsi uwwamu eroommi bikkina laqqakkona hansoommo. Kee'mmaalli hawwii keenanchii ixxuwwanne afukkaarem jor buxoomanne hee'llo'aarem guullita'a liiranta'a lobakat biijoominne uwwito'o. Ixxuwwi malaayqax xale'i ihoo'n ixxuwwi malaayyiinsi hanaan ihaakkookkoka iittita'a uwwito'isa an kuroommo. Amma'nnaano hara'mmakkam hara'mmatiinsi annanni ikkambee'isinam neese qoxxissa'a uunxito'o. Oohim neese egellummis ihoo'n Waa'i yukkisinne ixxuwwi gaga gaassita'a Moollanninaa niinaa uwwito'o. Ee'isam Tiito'o kanniinsi illageen amadukkisinnem ee er baxo ki'nnuwwi beyyonne guulloo'isina uunxinaammo. Amma'nnatonnettem ihukko, wocannettem ihukko, lachchannettem ihukko, Waa'i baxina qoxximmannettem ihukko, neese iittimmannettem ihukko, hundi luchchonnem ki'nnuwwi illag ikkakko'ookko. Kabadem ka eroommi baxonnem illag ikkehe. An kaka yummok ki'nnuwwik iitti hanqo'an ihukkisa mulli kee'n er baxinne keenaa moo'eenatte bagaan ijaajeenayyo. Ni Moollanni Yesuus Kiristoosika eroomma ki'nnuwwim laqqakkamo. Ixxi buxoominne ki'nnuwwi goddaan ikkakkamisina goddaanchi ihaa hee'ukkuuyyim ki'nnuwwi bikkina buxichchi ihukko. Ka woshshanne an ki'nnuwwa sogoommo. Issimmi xale'em ihoo'n mat hiinchiinsi illageenim gaassitakka'a sawwitakko'i woshsha kaba issitakko'aare danaamo. Ee bikkina ki'nnuwwi uwwitakkeena guddakko'i sawwit baxinne moo'amoo'isina ki'nnuwwi malaayqaxa uwwehe. Uwwitakkeenamdu sawwitakkolas mat manchina beelluwwi ihoo'n annichchi malaayqaxa Waa'i aa'ookko. An eehid yummok ki'nnuwwi hundim guddakkamisinatte bagaan mulli keenina sholle'aa ki'nnuwwanne kee'mmoo'isinayyo. Ki'nnuwwina bee'u luwwa ixxuwwina lobakata yoohaanniinsi uwwitamisina kaba ki'nnuwwina lobakata yoohaanniinsi ixxuwwina bee'u luwwa uwwitakkamisinatte. Ee'isinne hundim gudaan ikkakkamo. Keesammi Kitaabannem «Lobakata wixxaa'ukkaannikim gatukkoyyo. Gootto'o wixxaa'ukkaannikim hanqatukkoyyo» yamamaa kitaabamaakko. An ki'nnuwwina lobakata sawwoommisam Tiito'om ki'nnuwwina sawwoo'isa issu Waa'ina galat afona. Ixxi tiirinnem sawwaa lobakat liiranchinne ki'nnuwwi beyyo waaroolla bagaan waaroollak xale'i neese xa'mminummi bikkinayyo. Amma'nnaa'n lambe'enne hundannem mishiraachchi sagara kurimminne la'amaakkoo mat abbaayyom Tiito'onne maqirem asse'nnoommuulla. Xale'i eeqaxam ihoo'n neese banxummuuyyi yoommine'i biijoo'm baxina niinninne maqirem taakke'oo'isinam amma'nnaan doo'llaakko. Oo biijoo'm baxim Moollanni lombaa ni eroommi baxoo moo'isoo'isinatte. Kaba biijoominne uwwitakko'aare wixxaa'imma asheellummi diinaxxi bikkina ayyim acceeqasoobee'isa ni gaga ege'llinoommo. Neese xale'i Waa'i illagennette ihoo'n manni illagennem er baxo banxeena sawwinaammo. Lobakat ammane dut luwwanne hanqo'an ihukkisa keennaa lanqaa niyyabbaayyoom ixxuwwinne maqirem asse'nnoommuulla. Ixxi ki'nnuwwa lobakata amma'nnoo bikkina ka illagee'nnaanniinsim lonsaa hara'mmeena hasoolla. Tiito'i bikkina laqqakkeena hassakkolas ixxi i beshichcho. Iinninne maqire ki'nnuwwina baxoohane. Niyyabbaayyuwwi bikkinam laqqakkeena hassakkolas amma'nnaaniinsi asse'anta'a Kiristoosika lomba la'issam keeno. Ee bikkina ki'nnuwwika iittoo neese ki'nnuwwanne bakke'nnoommi bakkechchaa amma'nnaa'n illagenne ka mannina moo'issehe. Amma'nnaanina uwwakkam tasbo'i bikkina an ki'nnuwwina kitaabimmi hasisookkoka labisoommoyyo. Mashka'oomim guddakko'isa la'oommo. «Akaayanne yo'i manni ludmaaragiinsim ki'issa'a guddo'ookko» yaa Maqeedoonanne yo'i manninam ki'nnuwwanne bakke'imminne kuraammo. Ki'nnuwwa moo'imminne ixxuwwik lobakat keen baqito'ookko. Kaba kannonnem an ki'nnuwwi bikkina bakke'ummi bakkechchi kora'atte ihoobee'isa an yummisanne guddakka'a siidantakkamisina ka niyyabbaayyuwwa ki'nnuwwi beyyo asse'oommuulla. Oohim ayyi la'ukko Maqeedoo'n uulli mannik mat mat keen iinninne maqire ki'nnuwwi beyyo waatta'a guddakkoo'n yoontakke'eka moo'lla'a ki'nnuwwanne lobakata amma'nninummi bikkina neese qannaxammoombee'isinattee ki'nnuwwim tuuttakkambee'isinattee. Ee bikkina an waareena illageenim ki'nnuwwi beyyo niyyabbaayyuwwi matta'a aaggakko'i neeyyaxxi luwwa gudisiissona asse'immi hasisoohan ihukkisa sawwummo. Oohim giddinnette ihoo'n iittinne uwwitakkam luwwi ihoo'isinatte. «Hoffoka wixukkok hoffokam aagisookko. Lobakata wixukkok lobakatam aagisookko» yukkoka sawwi'llehe. Liiramaa uwwoo mancho Waa'i iittoo bikkina annannichchim ixxi wodanonne sawwukkisa uwwona bagaan liiramoo'n te'im manni giddisu bikkina ayyim uwwoone. Ki'nnuwwina hundi luwwim hundi ammanem wo'mmaa hee'oo'isinaa er bax hundinam erisa uwwitakkamisinaa Waa'im er luwwi hundam ki'nnuwwina wonshaa uwweena xanoohane. Keesammi Kitaabannem «Waa'i buxina fuqaa'oohane. Ixxek biijoomim heer heerinam hee'oohane» yamamaa kitaabamaakko. Wixoo mannina sire'e, ichchinam hurbaata uwwoo Waa'i ki'nnuwwinam lobakat amaxxa uwwookko. Ki'nnuwwika muccuroo'm baxom maasse'ookko. Ki'nnuwwi hundi kollinnem tasbo'o uwwitakkeena biijaalluwwi ikkakkamisina Waa'i maasse'ookko. Ee tasbo'om manni ni kollinne a'lloo ammane Waa'a galaxxookko. Eehido'i awwaado awwaadimmi amma'nnaanina hasisoo luwwa uwwimmi xale'i ihoo'n lophphaakkoo galatam Waa'ina uwwisiisoohane. Kiristoosika mishiraachchi sagara aa'llakka'a ijaajantakkam ijaajanchinne ixxuwwinaa mulli keeninaa liirantakka'a uwwitakkam luwwinne ki'nnuwwi awwaaddakkam awwaado manni moo'aa Waa'a galaxxoo'isa issitakkamo. Ixxuwwi Waa'i ki'nnuwwina uwwu lophphaakkoo eroommi bikkina ki'nnuwwa moo'lleena quluxxamuullaa Waa'a uunxitamuullaa. Kurakkeena xanakkambee'i uwwancha uwwu Waa'ina galat afona. Ki'nnuwwi beyyonne hee'ummuuyyi tuullaalli ihummaarem qee'llonne hee'ummuuyyi iggaalli an Phaawuloos i gagim Kiristoos maashaalloominnee eroomminnee ki'nnuwwa uunxoommo. Neese Waa'a amma'nnubee'i mannisa ikkamuulla yitam keenonne moo'isoommi iggimma ki'nnuwwi beyyo waaroommi ammane ki'nnuwwannem moo'isoombee'isina ki'nnuwwa uunxoommo. Neese maham ka uullanne hee'nnummaarem ka uulli mannisa qasammoommoyyo. Neese qasammoommi o'l mu'utim diina'ika girbuwwa hundam gindanseena xanoo Waa'i malaayyi yoohane bagaan ka uullaneyyo. Neesem fitanchaa Waa'i lachchinne uullixxamoo biranchaa bi'insaa mannika sawwit hundam qeefandaa Kiristoosina ijaajamoo'isa issinoommo. Ki'nnuwwi guullitakka'a ijaajantakkam ammane ijaajamoobee'i keeno hundam guzumo'nneena gundaammo. Ki'nnuwwi moo'llakkamok mat luwwika han xale'e. Ayyim Kiristoosan ihukkisa ixxi gaga xigoohan ihulas ixxesam neesem Kiristoosan inkummisa la'ona. Mashka'oomim neese ki'nnuwwa bi'insonatte ihoo'n qoxxinsona Moollanni niina uwwu malaayyenne an lobakata bakke'nnumta'nnim tuussiisooyyo. An kitaabummi assi kitaabanne ki'nnuwwa baddisoommoka labissakkotte. Mashka'oomim mat mat keen «Ixxi kitaaboo assi kitaab kee'mmaallaa qoxxaallaa. Ihukkaarem niinninne maqire hee'u ammane hoongaancho; wocoo woshshim qacaalla» yitamo. Neese ki'nnuwwiinsi annanni inkaa assi kitaabanne kitaambummi woshshi ki'nnuwwinne maqire hee'nnummi ammanem issinoomman ihukkisa oo keen laqqona. Ixxuwwi gaga la'ixxitam mat mat keeninne ni gaga gudinseena te'im keenneena igginoommoyyo. Oo keen ixxuwwi gaga ixxuwwi gaginnem keentu'uuyyaa ixxuwwi gaga gaginnem akeekansitu'uuyyaa qoossitambee'i keeno. Ihukkaarem ki'nnuwwi beyyi afeebe'e Waa'i niina uwwuqax gabalanne banxoommo bagaan eehanniinsi hingaa birammoommoyyo. Ki'nnuwwi ni gaba'l woronne yoontakke'i bikkina Kiristoosika mishiraachchi sagara amandaa ki'nnuwwi beyyo luxxan inkaa waallummi ammane ee gabaliinsi hingaa mallummoyyo. Neese gabala hingaa mulli manni badarukkaannonne birammoommoyyo. Ihukkaarem ki'nnuwwi beyyonne yoo ni bax lobakata lophphoo'isina ni mixan ki'nnuwwik amma'nnat li'ukkuuyyi maroo'isinatte. Ee bikkina mulli manni bax gabalanne aangaa eraarem baxamu baxonne birammoombee'isa ki'nnuwwi uulliinsi hingaa mishiraachchi sagara mulli uullanne alallaantoommo. Keesammi Kitaabannem «Bakke'ookkok hundim Moollannanne bakke'ona» yamamaakko. Mashka'oomim manchi galaxxamookkok Waa'i erane yaa galaxxukkaarette bagaan ixxi gaga gaginnem galaxxeena xanooyyo. An hoffoka qawwaammoohaarem iyyaqqitakkota'n erane. Hay hanqinam iyyaqqehe! An ki'nnuwwa xeehanto'oo muccur baajaam landichchosa issaa Kiristoosina hincaa'eena xeehummi bikkina Waa'i to'achchoo'isa ki'nnuwwina to'achchaammo. Ihukkaarem «Hantaarinne hamashshichchi Heewwaane qawwiisukkisam xabbeenoominnee muccuroominnee Kiristoosina hee'llakkambee'isa ki'nnuwwika sawwite bi'isookko» yaa baddaammo. Mashka'oomim mat manchi waaraa neese kullummi Yesuusiinsi mulleka kurulas te'im eraare aa'llakko'i ayyaaniinsi mulli ayyaana aa'llakkolas te'im eraare aa'llakko'i mishiraachchi sagariinsi mulleka aa'llakkolas cawwitakka'a uttakkamo. Ee «La'ammaammoo asse'amaano» yitam keeniinsi «An goottokkichchom hoffe'oommo» yaa sawwoommoyyo. Wocanne qoor ihumbee'aarem lachchanne ee'isayyo. Neese ki'nnuwwina hundi ammanem hundi luwwannem eekka caakkinsaa la'insaammo. Ki'nnuwwi lomba siixxitakkamisina i gaga hoffiisimminne maham miqqakkoo'nnim Waa'ika mishiraachchi sagara ki'nnuwwina kurimminne baaxiilo baxummonnihe? Ki'nnuwwina awwaadeena mulli amma'nnaaniinsi hara'mmato aa'imminne ixxuwwa hawwodaammo. An ki'nnuwwinne maqire hee'ummi ammane eese hawwisu luwwi hee'ukkaarem ayyennem kee'mmummoyyo. Mashka'oomim Maqeedooniinsi waatto'i abbaayyuwwi iina hasisoo luwwa uwwita'a hee'llo'o. Ayyi luwwannem ki'nnuwwanne kee'mmoombee'isa ege'llaammo; ka lasagem ege'lloommo. Kiristoosik hanqi eesenne yoo bikkina Akaayanne hannonnem ayyim eese bakke'oombee'isa hooreena xanooyyo. Ookki mahinatte? An ki'nnuwwa iittoombee'i bikkinattennihe? Waa'i la'oo'isam an ki'nnuwwa iittoommo. «Neese Phaawuloosaamisam banxoommuulla» yita'a birantam kee'nneka mashka'a hooreena kaba baxummuuyyi yoommi baxo ka lasagem baxoommo. Oo keen Kiristoosina asse'amaano labba'a hincitam qophpha'n asse'amaanoo huushisoo baxo baxxam keenoo. Sheexaanchi ixxi gaga caakki asse'amaanchi issaahim hincaa'oo bikkina ookki neese maalalsiisoohaneyyo. Ee bikkina Sheexaanchina awwaaddam keen Waa'ina awwaaddam keeno labbo'aare maalalsiisoohaneyyo. Ixxuwwik lasaanchi ixxuwwi baxisam ihookko. Ayyim eese qawwa yoobee'isa kabadem edaa kuroommo. Ayyi la'ukko qawwa yitakkolasim hofqaxichchom biramoommisina qawwi issitakka'ahim ullehe. An ka wocoommi luwwa biranchinne iggaa wocoommok Moollanni yukkis ihoo'n qawwi manchisa ihaatette. Lobakat keen ka uulli luwwanne birantam bikkina anim ixxuwwisam biramoommo. Ki'nnuwwi qoor keen ikkakko'isam qawwi keeno cawwitakka'a uttakkamuulla. Mat manchi ki'nnuwwa agid issoohaare te'im bogoohaare te'im hawwodoohaare te'im gadoohaare te'im oobo'inne xabansoohaare cawwitakka'a uttakkamo. Neese eehannina hoogaan keen inkummisa tuurummuuyyim kuroommo. Ihukkaarem an qawwi manchisa wocoommo. Ayyim ihu luwwannem birameena iggulas anim eehannonne birameena iggoommo. Ixxuwwi Ibro'i mannannihe? Anim Ibrokkichcho. Ixxuwwi Abrihaam shumo'onnihe? Anim Abrihaam shumo'o. Ixxuwwi Kiristoosina awwaaddam keenonnihe? Machchaaraanchisa wocoommo; ixxuwwiinsi an lophphoommo. Mashka'oomim Kiristoos bikkina lobakata badaraammo; dut ammanem karamaammo; dut ammane ganakko'ookko. Dut ammanem lehonne afaa hee'ummo. Sorina mat mat halangi hanqatukkuuyyi onti kore Ayihuxxi manni ganto'ookko. Sas ammane biccinne ganakko'ookko. Mat kore lehoommisina kininne aphphisakko'ookko. Sas kore markab iiqamaa mat ko'llaannonne mat ballaa mat hiimoo dambalaqanne hee'ummo. Lobakat ammane taakke'ummuuyyi daajjuwwi aqqimminne afu hawwonne, boggam keen afisso'i hawwonne, i shumo'i afisso'i hawwonne, Mulli manni afisso'i hawwonne, beero'onne afu hawwonne, udma'anne afu hawwonne, dambalaqanne afu hawwonnee qophpha'n amma'nnaan afisso'i hawwonnee hawwaammo. Odim lobakat ammane badallatii hoongii eesenne afaakko. Lobakat ammanem diriiroo'n garaammo. Odim sibaar, xeeb, lobakat ammane itoommi luwwi bee'immi, qiidii leexa'oomii eesenne afaakko. Mulli luwwi hundam edaa xigumbee'aare hundi ammanem eese kichche'isookkok amma'nnaa'n wixxittuwwina sawwimma. Mat manchi hoogoohaare anim edamaa hoogoommo. Mat manchi baaxiilonne uboo'isa issakkamaare an kichche'oommo. An birameena hasumlas biramoommok i hoonga moo'isoo luwwannette. Moollanni Yesuusina Anni Waa'i ixxim heer heerinam maasse'amaakkookkok an qophphanoombee'isa la'ookko. Damaasqo'i beero'onne hee'ummi ammane Arteesa yakkam adiliinsi woroon yoo gassaanchi eese amadiiseena Damaasqo'i beero'o egessiisukko. Ihukkaarem beero'o kululaa'akka'a kininne ootakko'i ooxxi maskootinne sanannanne issakka'a dilliisakko'aare ixxi angiinsi xorummo. An biramimmi hasisookko. Biranchi maham awwaadoobee'an ihukkaarem Moollanni iina moo'isu kaaltaa caakkisu woshshaa kuroommo. Tommiinsii soor hiinchiinsii illageen mat Kiristoosa amma'nnaanchi saxxi iimane massamukkisa la'oommo. Oohim maarinnetda'e te'im maarinneyda'e Waa'i la'ookko bagaan an la'oommoyyo. Oo manchi Gannatta massamukkisa la'oommo. Maarinnetda'e maarinneyda'e Waa'i la'ookko bagaan an la'oommoyyo. Oo manchi manni hore'em wocaa kureena xanoobee'i woshsha macceesukko. An eehido'i manchonne bakke'oommo. Ihukkaarem i gaqqi bikkinatte yakkota'n i hoongiinsi bagaan biramoommoyyo. An hanqa wocoommi bikkina bakke'eena hasumta'nnim huushamummoyyo. Ihukkaarem ayyi manchim iinniinsi macceesukkaanniinsi te'im eesenne moo'ukkaanniinsi lonsaa i bikkina sawwoobee'isina bakke'eena hasoommoyyo. Iina moo'amu lobakat kaaltanne bakke'oombee'isina i maara uttisa qasoo luwwi uwwamukko. Oohim an bakke'oombee'isa hooreena eese hawwisoo Sheexaa'n asse'amaancho. Eekka iinniinsi hooroo'isina sas kore Moollanna uunxummo. Ihukkaarem Moollanni «Iikki eroommi kiina ihookko; ki hoonginne i malaayyi lophphaa moo'amookko» yukko. Kiristoosik malaayyi eesenne ihoo'isina i hoonginne lobakata liiramummuuyyi bakke'oommo. An hoogoommaare qoxxoommi bikkina Kiristoos bikkina hoogoommaare, game'llakkamaare, hawwoommaare, hawwisakkamaaree u'n eesenne afoohaaree liiramoommo. An qawwaammo. Ee'isa issitakko'ok ki'nnuwwa. An maham gadamaammoohan ihummaarem ee la'ammaammoo asse'amaano yitam keeniinsi hore'em hoffe'oombee'i bikkina ki'nnuwwi eese galaxximmi hasisam hee'ukko. Iyyaqqimminne, maalalsiisoo mare'innee malaayyaam baxinnee hundinnem hanqo'i asse'amaa'nnek mare'i ki'nnuwwi lambe'enne i kollinne issamaakko. An ki'nnuwwanne kee'mmummoyyo bagaan mulli amma'nnaanina issamoo luwwik ki'nnuwwina mah hanqatukko? Ookki huushanchi ihulas iina urimma issehe. An ki'nnuwwi beyyo saxxi kore waareena gudaammo. Ki'nnuwwa hasoommo bagaan ki'nnuwwika amaxxa hasoombee'i bikkina ki'nnuwwanne kee'mmeena hasoommoyyo. Mashka'oomim oosina anno'i diinate dissookko bagaan oos anno'ina dissooyyo. An ki'nnuwwi bikkina iina yoo luwwi hundam i fooremakkota'n higisaa uwweena lobakata liiramoommo. An ki'nnuwwa lobakata iittummuuyyi ki'nnuwwi eese hoffoka iittimmi hasisoohonnihe? An ki'nnuwwanne kee'mmumbee'isa laqqakku'uuyyim qooroominne ki'nnuwwa aphphisansaa itummaannisa woccakkamo. An ki'nnuwwi beyyo asse'ummi manni kollinne mat manchi kollinnem ki'nnuwwa hawwodummonnihe? Tiito'o ki'nnuwwi beyyo maroo'isina uunxaa lasage ixxenne maqirem mat amma'nnaanchi abbaayyo asse'aa hee'ummo. Tiitodu ki'nnuwwa hawwodaa hee'ukkonnihe? Anii Tiito'oo mat tiirinne banxummoyyonnihe? Anii ixxii hee'nnummis matoyyonnihe? Neese ni gaga gatixxineena ki'nnuwwi illagenne woncoommisa issitakka'a kabad afeebe'em sawwitakkamuullannihe? Iittantakko'oo iyyabbaayyuwwa, neese Kiristoosinne inkaa Waa'i illagenne woncoommi luwwi hundim amma'nnatonne li'llakkamisa issineenatte. Ayyi la'ukko an ki'nnuwwi beyyo waaraa sawwummisa ikkakka'a ki'nnuwwa siidoommoyyo yaa te'im Ki'nnuwwi sawwitakko'isa ihaa eese siiddakkamoyyo yaa baddoommo. Oohim «Ayyi la'ukko ki'nnuwwi lambe'enne wocanchi, to'achchimmi, quunqi, gaga iittimmi, game'llanchi, ham, biranchii hambalaachchii hee'ookko» yaa baddoommo. Odim an waaroommi ammane i Waa'i ki'nnuwwi illagenne eese sholliisookko yaa baddaammo. Eraare baaxiilo baxxo'i kee'nnek dut keen kabadem haashaarancha, saa'immaa adabi'immaa biiraa yitobee'i bikkina ixxuwwina wi'lloommo yaa baddoommo. Ku kaba an ki'nnuwwi beyyo waaroommok saxxi kore. Keesammi Kitaabanne «Ayyi woshshim lam te'im sas naqaashinne goollamookko» yamamaa kitaabamaakko. Kanniinsi illageen baaxiilo baxxo'i keenoo mulli keenoo hundam la'm kore ki'nnuwwi beyyo waarummi ammane qoxxisaa kuraa hee'ummo. An ki'nnuwwi beyyo od waarumlas ee keeno kora'a uroombee'isa kaba ki'nnuwwiinsi annanni ihaa hee'ummuuyyim kuroommo. Ee'isinne Kiristoos i kollinne ihaa wocoo'isa qoossitakka'a laqqakkamo. Kiristoos ki'nnuwwi lambe'enne baxukkuuyyi malaayyaamo bagaan hoongaanchoyyo. Ixxi hoongaanchi ihaa saqalamukkaarem Waa'i malaayyinne hee'ookko. Neesem ixxenne maqirem hoongaan inkummaarem neese ki'nnuwwana awwaandoommi awwaadonne Kiristoosinne maqirem Waa'i malaayyinne hee'nnoommo. Amma'nnatonne yoontakkeda'e ki'nnuwwi gaga qoossaqqehe; ki'nnuwwi gaga kee'nnehe. Yesuus Kiristoos ki'nnuwwi woronne yoo'isa qoossitakkamoyyonnihe? Hanqinam eekka qoossitakkobeelas keenatonne ubbakko'ookko. Neese keenatonne umbumbee'isa laqqakkamo yaa neeyyato issoommo. Ki'nnuwwi jora issitakkambee'isina Waa'a uunxinoommo. Oo uunxinoommokim neese keenanchanne umboommoka lambummaarem ki'nnuwwi xabbeen luwwa issitakkamisinatte bagaan neese keenanchanne umboombee'an inkaa moo'ammeenayyo. Neese hanqa banxoommo bagaan hanqiinsi annanni ihaakkoo luwwa maham issinoommoyyo. Neese hoongaan inkummaarem ki'nnuwwi qoxalluwwi ikkakkam ammane liirammoommo. Neese Waa'a uunxinoommok ki'nnuwwi miiqakkam luwbeekeen ikkakkamisinatte. An ki'nnuwwiinsi qee'llonne hee'ummuuyyi kaka kitaabummok ki'nnuwwi beyyo waaroommi ammane i malaayye ki'nnuwwanne monginne awwaaxxoombee'isinatte. Ee malaayye Moollanni iina uwwukkok gindoommisinatte ihoo'n axisaa baxoommisinatte. Lasaanchonne an ki'nnuwwina yoommok iyyabbaayyuwwa, xummanne hee'llehe. Hundi luwwannem miiqakkam luwbeekeen ikkehe. I sogitano macceessehe; ki'nnuwwina'i ki'nnuwwim mat tiirinne ikkehe. Iittinnem hee'llehe; iittikii xummikii Moollanni ki'nnuwwinne ihookko. Ki'nnuwwina'i ki'nnuwwim iitto moo'isoo suunqanchinne xummaatixxammehe. Waa'i minaadab hundim ki'nnuwwina xummaato asse'llo'ookko. Moollanni Yesuus Kiristoosik eroommi, Waa'i iittii Keesammi Ayyaa'n mateeyyoomii ki'nnuwwinne hundinnem maqire ihona. Manni doo'llinnette te'im mat manchi kollinnette ihoo'n Yesuus Kiristoosinnee ixxom lehiinsi ki'isu Anni Waa'innee asse'amaanchi ihaa asse'amummi iinniinsi Phaawuloosiinsii iinninne maqire yo'i amma'nnaan hundiinsimii Galatiy uullanne hee'llakkam amma'nnaa'n wixxittuwwina. Niyyanni Waa'iinsii Moollanni Yesuus Kiristoosiinsii eroommii xummii ki'nnuwwina ihona. Ka jor doolliinsi Yesuus Kiristoos neese gatiseena Niyyanni Waa'i doo'llinne ni baaxii'l bikkina ixxi gaga higisaa uwwukko. Ee Waa'ina lombi heer heerinam ihona! Aameen. Kiristoos issu eroomminne weeshu Waa'iinsi kaqaxichchonnem annanni ikkakko'isii mulli mishiraachchi sagaranne daba'llitakko'isii eese lobakata maalalsiisaakko. An eehid yummok Kiristoosika mishiraachchi sagara boqqanne tittu'uuyyi ki'nnuwwa hawwissam keen yo'i bikkinatte bagaan mishiraachchi saga'lleka'i lugumoom matichchome. Ihona bagaan neese ki'nnuwwina kullummi mishiraachchi sagariinsi mulleka neesettem inkummo te'im iimaniinsi waaroo Waa'i asse'amaanim kurulas duumamaakkoohan ihona. Kanniinsi illageen ki'nnuwwina kullummisam kabadem edaa kuroommok neese kullummaare aa'llakko'i mishiraachchi sagariinsi mulleka losisookkok ayyim duumamaakkoohan ihona. An hasoommok eese manni galaxxoo'isinattennii Waa'i galaxxoo'isinatte? Te'im manna liiranseenattennii Waa'a liiranseenatte? Manna liiranseena hasoomman ihuta'n Kiristoosina awwaadaanchi iheena xanam hee'ummoyyo. Iyyabbaayyuwwa, an ki'nnuwwina kurummi mishiraachchi sagar manniinsi waarubee'an ihukkisa laqqakkona hasoommo. Mashka'oomim kaaltinne Yesuus Kiristoos iina la'isukko bagaan an ayyi manchiinsim aa'ummoyyo. Te'im ayyi manchim eese losisukkoyyo. Ayihuxxi manni amma'nnatonne gaassi hee'ummi ammane hinkido'i heechcha hee'umda'e ki'nnuwwi macceessakko'ookko. Yesuusanne amma'nnito'i Waa'i minaadaba bi'iseena lobakat monginne hawwisam hee'ummo. Ayihuxxi mannika amma'nnato egerimmannem lobakat i daraphphi manniinsi lophphoommane hee'ummo. Odim niyyanno'i losa'n bikkinam lobakata to'achchoommane hee'ummo. Ihukkaarem iyyummi godabonne hee'ummuuyyim doo'llaa annanni issu Waa'i ixxi eroomminne eese weeshukko. Mulli minaadabina mishiraachchi sagara kuroommisina ixxi Beeto iina la'iseena iittu ammane ayyi manchinnem a'llamummoyyo. Te'im iinniinsi illageen Yesuusina asse'amaan hee'llo'i keeninne atoorareena Yerusaaleema marummoyyo. Ihukkaarem an gaassaa Araphphi uulla maraa ee beyyiinsim daba'llaa Damaasqo'i beero'o marummo. Odim sas hiinchiinsi lasage Keefa yakkam Pheexiroosinne edameena Yerusaaleema maraa ixxi beyyonne tommoo onti ballaa afuurummo. Ee beyyonne afuurummi ammanem Moollannina abbaayyi Yaaqoobiinsi bagaan asse'amaa'nneka matom moo'ummoyyo. Ku ki'nnuwwina kitaabummok qophphan ihubee'isa Waa'i illagenne hide'oommo. Ee lasage Sooriyaa Kilqe'e yakkam uullaa marummo. Yihuxxi uullanne hee'llam Kiristoosanne amma'nnito'i keen oo amman afeebe'em eese moo'llo'oyyo. Ixxuwwim i bikkina macceessa'a hee'llo'ok «Oo amma'nnaano hawwisam hee'u manchi ee bi'iseena yakam hee'u amma'nnato ixxi gagim kaba mannina alallaatoolla» yoo woshshi hee'ukko. I mashka'innem Waa'a lonsitam hee'llo'o. Tommiinsii soor hiinchiinsii lasage Baarnabaasinne maqirem Yerusaaleema daba'llaa marummuuyyi Tiito'o amadaa marummo. Ee ammane Yerusaaleema marummok Waa'i iina kaaltanne kuru bikkinatte. Ee beyyonne hee'llo'i amma'nnaa'n awwonsaano moqqo'onne dummisaa mulli minaadabina kuroommi mishiraachchi saga'l bikkina ixxuwwina la'isummo. Oohim kanniinsi illageen geerummi geellichchii kabadem geeroommi geellichchii awwaad bee'an ihaa gatoobee'isinatte. Iinninne maqire hee'u Tiito'o Giriikichchi ihukkaarem ballachchamoo'isina hawwisakko'oyyo. Ihukkaarem maaxanta'a ni lambe'enne aaggo'oo mat mat huushsaan amma'nnaan ballachchamoo'isina hawwissa'a hee'llo'o. Ixxuwwi ni lambe'enne luxuunxita'a aaggo'ok Yesuus Kiristoosiinsi siindummi wolabbano doqqita'a neese agiddanonne aagisseena hassa'atette hee'ukko. Ihona bagaan mishiraachchi saga'l hanqo'i woshshi ki'nnuwwanne qoxxaa hee'oo'isina neese winxo'i ammaninam ixxuwwina kaa'amaa anga uwwinummoyyo. Amma'nnaano awwonsaan hee'llo'i keenim an ixxuwwina kuram hee'ummi mishiraachchi sagaranne haareechchi woshsha maham eddo'oyyo. Mannika miine Waa'i moo'oobee'i bikkina anim ee awwonsaan hee'llo'i keeno mulli manniinsi annanni issaa moo'ummoyyo. Ayihuxxi minaadabina mishiraachchi sagara kuroo'isina Pheexiroosa doo'llu Waa'i eesem mulli minaadabina mishiraachchi sagara kuroommisina doo'llukkisa laqqo'o. Ee bikkina Pheexiroosa Ayihuxxi minaadabina asse'amaanchi ihaa awwaadoo'isina issu Moollanni eesem mulli minaadabina mishiraachchi sagara kuroommisina issaakko. Amma'nnaanina utub ikka'a moo'antam hee'llo'i Yaaqoob, Pheexiroosii Yohaannisii Waa'i iina uwwu uwwancha laqqo'i ammanenne niinninne yoo mateeyyooma moo'isseena iikkaa Baarnabaasikaa anga aa'lla'a lasage neese mulli minaadaphphi beyyo malloommisina ixxuwwim Ayihuxxi manni beyyo mattamisina iittammummo. Ixxuwwi niina edda'a yabo uwwito'ok buxa tiilloommisinatte. Oohim an baxeena lobakata iittoommi baxo. Pheexiroos la'amaakkoo huushancha huushamaa hee'u bikkina Anxooke'e yakkam beero'o waaru ammanenne ixxo manni illagenne acceeqasummo. Mashka'oomim mat mat manni Yaaqoob beyyiinsi waattoo'n illageen Ayihud ikkobee'i manninne maqirem itam hee'ukko. Ihukkaarem oo keen waatta'a lasage Ayihuxxi manna baddaa Ayihud ikkobee'i manniinsi annanni ihaa hee'ukko. Kiristoosanne amma'nnito'oo mat mat Ayihuxxi mannim ee ixxi labishsha moo'lla'a Pheexiroosisam labsaan ikko'o. Baarnabaasim gatoo'n ixxuwwi labishshanne exxaa huushamaa hee'ukko. Mishiraachchi saga'l hanqo'i googonne xabbita'a mattobee'isa an moo'ummi ammanenne Pheexiroosina «At Ayihudichchi ikkaa hee'llittuuyyim Ayihuxxi mannisa ihoo'n mulli minaadaphphisa hee'lloolla; eehaara'i mulli minaadab Ayihuxxi mannisa hee'llamisina mahina giddissoolla?» yaa hundi illagennem acceeqasummo. Neese qaranchinne Ayihuxxi manna bagaan baaxiilaano yamantam mulli mannayyo. Ihona bagaan manni baaxiiliinsi gateena xanookkok Yesuus Kiristoosanne amma'nnimminnette bagaan Seera egerimminnette ihubee'isa qoossinaa lanqoommo. Neese ni gagoomim Seera egerimminnette ihoo'n amma'nnatinne ganteena Yesuus Kiristoosanne amma'nninaammo. Mashka'oomim Seera egerimminne ayyi manchim gateena xanooyyo. Kiristoosanne amma'nninaa ganteena hansoommi keen neese ni gagoomim baaxiilo banxoommi keen inkaa siidammumlas Kiristoos baaxiilo banxoommisa issoohanennihe? Hanqinam ee'isayyo. Ihukkaarem an i gagim gindummi See'l ogora dabaraa baxoommuulla ihulas an i gagoomim Seera gindummisa moo'isoommuulla yimma. Mashka'oomim See'llisinne oo Seer eese shu bikkina Waa'ina hee'eena yaa Seerina lehaammo. An Kiristoosinne maqirem saqalamaa lehaammo. Ka lasage eesenne Kiristoos hee'ookko bagaan an hee'oommoyyo. An kaba maarinne hee'oommi heechchi eese iittaa ixxi gaga iina higisaa uwwu Waa'i Beetonne yoo amma'nnatinnette. Waa'ika eroomma uunshan issaa uunjoommoyyo. Mashka'oomim manni gatookkok seera egerimminnette ihulas Kiristoos leh uunshan ihukkoo yimma. Galatiy uullanne hee'llakkam qoossitakkambee'i amma'nnaano, Yesuus Kiristoos saqalamaa lehukkis ki'nnuwwina mare'i ihaa hee'ukkuuyyim gennakko'i manchisa ki'nnuwwa jallaa'ukkok ayyette? An ki'nnuwwa mat luwwa xa'mmoommo. Keesammi Ayyaana aa'llakko'ok Seera egerimminnettennii mishiraachchi sagara macceessakka'a amma'nnimminnette? Ki'nnuwwi kaa'nnam qoossitakkambee'i keenonnihe? Ayyaaninne asheettakka'a maarinne guullitakkamonnihe? Ki'nnuwwi ka luwwi hundam badattakko'ok kora'attemennihe? Hanqinam ee'isa ihookko yoommoyyo. Keesammi Ayyaana Waa'i ki'nnuwwina uwwukkokii maalalsiisoo aganna ki'nnuwwi lambe'enne baxukkokii Seera egettakko'i bikkinattennii mishiraachchi sagara macceessakka'a amma'nnitakko'i bikkinatte? Huno'o, Abrihaama sawwi'llehe; Keesammi Kitaabanne «Abrihaam Waa'anne amma'nnukko. Amma'nnu bikkinam muccur ihaa xigamukko» yamamaa kitaabamaakko. Ee bikkina hanqo'i Abrihaam shumo'o yamantam keen amma'nnitam keen ikko'isa laqqehe. Mulli minaadaba amma'nnatinne Waa'i muccussoo'isa Keesammi Kitaab gaassaatim «Minaadab hundim kiinninne maasse'amookko» yaa mishiraachchi sagara Abrihaamina kuraakko. Eehaara'i Abrihaam Waa'anne amma'nnaa maasse'amukkisam Abrihaamisam amma'nnitam keen hundim maasse'antamo. «Se'l kitaabanne kitaabamukkoka hundam qoxxaa egeroobee'ekii issoobee'ekii duumamaakkoohane» yamamaa Keesammi Kitaabanne kitaabamu bikkina «Seera egellaa gantaammo» yitam keen duumanto'oo keeno. Keesammi Kitaabanne «Manni amma'nnatinne muccuraa heechcha siixxookko» yamamaa kitaabamu bikkina Seera egerimminne ayyim Waa'i illagenne muccuroobee'is la'amaakkoohane. «Seera egerookkok gatookko» yamamaa kitaabamu bikkina amma'nnatiinsi Seer annanna. «Saqalamaa lehookkok hundim duumamaakkoohane» yamamaa Keesammi Kitaabanne kitaabamu bikkina Kiristoos ni bikkenne duumamaakkoohan ihaa neese See'l duunchiinsi gatisaakko. Kiristoos eehid issukkok Abrihaamina uwwamu maassi Yesuus Kiristoosinne mulli minaadabina afoo'isinatte; neesem Keesammi Ayyaa'n neeyyata amma'nnatinne aa'nnoommisinatte. Iyyabbaayyuwwa, ki'nnuwwi laqqakkam kobi'llishshika mato kuroommo. Mat manchi leheena illageen mat luwwa kuruta'n ee kuru luwwanne ayyim edeena te'im gindeena xanooyyo. Waa'i Abrihaaminaa Abrihaam shumo'inaa «Eroomma issoommo» yukkok dutinatte ihoo'n matinatte ihukkisa kureena yaa «Ka shumo'iinsi matina» yukko bagaan dutina yukkaannisa «Ki shumo'ina» yukkoyyo. Oo matim Kiristoosatte. Kabadem an ki'nnuwwina kuroommok Waa'i Abrihaamina «Issoommo» yaa hide'u sagara soor xibbiinsii sad hiinchiinsii lasage uwwamu Seer gatiseena te'im gindeena xanooyyo. Waa'i «Issoommo» yaa hide'u luwwa a'llimmina xansiisookkok Seera egerimminnette yakkota'n Waa'i «Issoommo» yaa hide'u sagar maham awwaadam hee'ukkoyyo. Ihukkaarem Waa'i Abrihaamina eroomma isseena hide'ukko. Eehaara'i Seer uwwamukkok mahinatte? Seer uwwamukkok Waa'i «Eroomma issoommo» yu Abrihaamina shumo'i waareebe'i afeebe'e jor bax mada'e ihukkisa moo'isonatte. Uwwamukkokim Waa'i asse'amaa'n kollinne mat lambe'i manchinnette. Lambe'i manchi hasisookkok lam manchi lambe'ennette bagaan mat manchinayyo. Ihukkaarem Waa'i mexxokkichcho. Eehaare Waa'i aagu neeyyaxxi sagarii Seerii iittantamoyyonnihe? Lobakata iittantamo. Heechcha uwwoo Seer uwwamaakkoohan ihuta'n manni Seera egerimminne muccuram hee'ukko. Ihukkaarem Yesuus Kiristoosanne amma'nnookkok hundim Waa'ika eroomma siixxoo'isina uulli minaadab hundichchim baaxiilinne karamaa yoo'isa Keesammi Kitaab alallaatoolla. Ku amma'nnat waaraa la'ameebe'e Seer neese karaxxi minenne aagisaa karaa hee'ukko. Ee bikkina neese Kiristoosanne amma'nninaa gantoommisina Kiristoos waareebe'e Seer neese awwonsaanchi hee'ukko. Ihukkaarem kaba amma'nnat waaru bikkina ka lasage Seer neese awwonsooyyo. Yesuus Kiristoosanne amma'nnimminne ki'nnuwwi hundichchim Waa'ina ooso. Mashka'oomim Kiristoosanne mat ikkakko'isa moo'issakkeena xammaqantakko'i keen Kiristoosa edde'llakko'ookko. Ki'nnuwwi hundichchim Yesuus Kiristoosinne mat ikkakko'i bikkina Ayihuxxi mannannem Giriik mannannem te'im agidonnem wolabannem te'im goonannem meentonnem annannoom mahim bee'e. Ki'nnuwwimdu Kiristoosan ikkakkolas Abrihaam shumo'o; neeyyaxxi saga'llisannem lagaa'llakkamo. Kabadem an ki'nnuwwina kuroommok annika amaxxa hundam laga'lloo ciilichchi lago a'lloohan ihukkaarem ciilichchi hee'ukkuuyyi agishshiinsi e'llooyyo. Ixxi anni yu ayyaam afeebe'e oo ciilichchi ixxo li'isoo keeniinsii ixxeka amaxxa egeroo keeniinsii woroonette. Ee'isam neesem ciilluwwi hee'nnummi doollenne ka uulli losanina agid hee'nnummo. Ihukkaarem Waa'i yu amman afukkaare ixxi Beeto asse'ukko. Oo ixxi Beetim meentichchoonsi qaramaa Seerina ijaajamaakkoohan ihukko. Waa'i eekka issukkok See'l agiddanonne hee'nnummi keeno wolabbanonne fissaa ixxi oos isseenatte. Ki'nnuwwim Waa'ina oos ikkakko'i bikkina Waa'ina «Abba, niyyanna» yaa laaroo ixxi Beetika Keesammi Ayyaana ni wodanonne issukko. Ee bikkina neese ka lasage Waa'ina ooso bagaan agidoyyo. Waa'ina oos inkumlas ixxeensi sharada a'llinoommo. Ki'nnuwwi gaassi Waa'a laqqakkambee'i doollenne qophpha'n waa'uwwina agid hee'llakko'o. Ihukkaarem kaba Waa'a laqqakka'a eehanniinsim loboka Waa'im ki'nnuwwa la'aa lasage odim daba'llitakka'a ee hoongaanchi gadamaakkoo ka uulli losanina hinkid daba'llitakko'o? Daba'llitakka'a odim ixxuwwina agid ikkakkeena hinkid hassakko'o? Ki'nnuwwi balla, agana, ammanee hiinchoo annanni issitakka'a egettakkamuulla. «An ki'nnuwwina badarummi badallat hundim huunshan ihookko» yaa baddaammo. Iyyabbaayyuwwa, an ki'nnuwwa labummisam ki'nnuwwim eese labbakkamisina uunxoommuulla. Ki'nnuwwi eese mahannem hawwoddakko'oyyo. Luxxeka an mishiraachchi sagara ki'nnuwwina kurummok xissaa ki'nnuwwi beyyonne hee'ummi bikkinatte ihukkisa laqqakkamo. Ee ammane i duuha'i ki'nnuwwina lobakata keenat ihukkaarem ki'nnuwwi eese ceentakkoo'n Waa'i asse'amaa'nnisaa Yesuus Kiristoosisaa issitakka'a aa'llakko'o. Lobakata liirantakka'a hee'llakko'oka kaba ki'nnuwwa mah nakkukko? Xantakko'oohan yakkota'n hanqinam ki'nnuwwika foorem iina uwwitakkeena hassakka'a hee'llakko'o. Eehaara'i an ki'nnuwwina hanqo'i woshsha kurummi bikkina diinakkichchi ihummonnihe? Mulli keen ki'nnuwwa hassamok eroomminatte ihoo'n ki'nnuwwa iinniinsi annanni issita'a ixxuwwi kollonne dabatteena hassa'atette. Kabadem ihukkaare an ki'nnuwwinne maqire hee'oommi ammanem xale'i ihoo'n ki'nnuwwiinsi annanni ihoommi ammanem er sawwitinne qoxximmi erane. I ooso, Kiristoosik qoocci ki'nnuwwanne moo'ameebe'i afeebe'e malaayyaam xuuchchi odim eese amadaakko. An eraa'llaanniinsi annanni ihaakkoo duuha'a ki'nnuwwina moo'iseena ki'nnuwwinne maqire ihaammoota'n eran hee'ukko. Ihona bagaan ki'nnuwwi bikkina iikki mal bi'aakko. Seerina ijaajantakkeena hassakkam keeno mat xa'mmichcha xa'mmoommo. Huno'llehe, kullehe; Seera macceessakkeena hassakkamoyyonnihe? See'l kitaabanne «Abrihaamina agishshoonsii wolabichchoonsii qaranto'i lam oos hee'llo'o» yamamaa kitaabamaakko. Oo agishshoonsi qaramukkok maa'llisinne qaramaakkoohan hee'ukko. Ihukkaarem wolabichchoonsi qaramukkok Waa'i neeyyaxxisinne qaramaakkoohan hee'ukko. Oo lamem meentim lamem hidiro kobi'llitamo. Luxxek agiddanina ooso qatto'i Aggaare Siina'i duunanne ihu hidiro kobi'llitamo. Oo Aggaare Araphphi uullanne yoo Siina'i duunatte. Isem is oosinne maqirem agiddanonne yoo Yerusaaleema kobi'llitamo. Ihukkaarem iima'n Yerusaaleem wolabichchi niyyummatte. Mashka'oomim Keesammi Kitaabanne «Ooso qatbee'i alceenna, at lobakata liirame. Ooso qatteena xuu'llaa laqqibee'aante, at lobakata ‹ilil› yihe. Mashka'oomim goonchi yoohaanteensi goonchi urukkaantek oos lophphaakko» yamamaa kitaabamaakko. Kabadem iyyabbaayyuwwa, neesem Yisaaqisam Waa'i neeyyaxxisinne qarammaammoo keeno. Ihukkaarem ee ammane maa'llisinne qaramukkok Keesammi Ayyaa'nnisinne qaramukkoka hawwisukkisam kabadem ee'isame. Ihukkaarem Keesammi Kitaabanne «Agishshok beet wolabichchi beetinne maqire lago aa'oobee'i bikkina ee agishsho is beetinne maqirem miniinsi fissitaa holle» yamamaa kitaabamaakko. Ee bikkina iyyabbaayyuwwa, neese wolabichchona ooso bagaan agishshona oosoyyo. Kiristoos neese wolabbanonne fissu bikkina ee wolabbano qoxxitakka'a ege'llehe bagaan odim daba'llitakka'a agidda'n gaanjaqqanne aaggakkotte. An Phaawuloos ki'nnuwwina kuroommoka macceessehe; Ballachchanchi gatisookko yitakka'a ballachchantakko'aare Kiristoos ki'nnuwwina maham awwaadooyyo. Ballachchantam keenina hundinam an edaahim kuroommok Seer yookkoka hundam qoxxita'a egettamisinatte. Seera egerimminne muccuttakkeena yakitakkam keen hundim Kiristoosiinsi annanni ikkakka'a Waa'i eroommiinsi ubbakko'ookko. Neese siixxineena neeyyata issinoommi muccurooma Keesammi Ayyaaninne inkaa amma'nnatinne egellaammo. Mashka'oomim Yesuus Kiristoosinne mat inkaa lasage hasamookkok iittinne misha mishoo amma'nnato bagaan ballachchanchi te'im ballachchancha hoogimmi maham awwaadooyyo. Ki'nnuwwi erisa xoreexxantakkam hee'llakko'o. Ihukkaarem kaba hanqina ijaajantakkambee'isa ki'nnuwwa qolaa hoorukkok ayyette? Eehido'i qawwiishshi ki'nnuwwa weeshoo Waa'iinsi waaraakkoohaneyyo. Hoffi ursho'i lobakat qama hufaa'ookko. Ihukkaarem an ki'nnuwwina kurummaanniinsi annanni sawwite aa'llakkambee'isa Moollanninne ki'nnuwwanne amma'nnoommo. Ayyettem ihukkaare ki'nnuwwika tiiro bi'isoohaannonne Waa'i oogatookko. Iyyabbaayyuwwa, an ki'nnuwwina Ballachchammehe yaa kuraammoohan yakkota'n kabad afeebe'e eese mahina hawwisakkam hee'akko'o? Ee'isa ihaakkoohan ihuta'n Kiristoos leh bikkina losisimmi matem hawwom eebam hee'ukkoyyo. Oo ki'nnuwwa hawwissam keen hasso'aare ixxuwwi gagam abaajjaqqitona. Iyyabbaayyuwwa, ki'nnuwwi wolabbanina weeshantakko'i bikkina ee wolabbano xale'i maa'l mixanina awwaaxxitakkeena mashka'i issimma uttakka'a iittinne mat matina awwaaddakkam keen ikkehe. Mashka'oomim See'l kitaabanne kitaabamukkok hundim «Ki beshichcho ki gaqqisa iitte» yoo matem sagaranne wixxaa amadamaakkoohane. Ihukkaarem ki'nnuwwina'i ki'nnuwwim ga'mmamtakka'atii itantakka'atii bi'llakkambee'isa qoxxitakka'a ege'llehe. An ki'nnuwwina kuroommok ki'nnuwwika heechcha Keesammi Ayyaan awwonsona bagaan maa'l mixano wonshitakkotte. Mashka'oomim maa'l mixan Keesammi Ayyaa'n mixaninne iittamooyyo. Odim Keesammi Ayyaa'n mixanim maa'l mixaninne iittamooyyo. Keesammi Ayyaanii maarii iittantambee'i bikkina ki'nnuwwi hassakko'oka issitakkeena xantakkamoyyo. Keesammi Ayyaanimdu ki'nnuwwa awwonsoohan ihulas ki'nnuwwi Seeriinsi woroonetteyyo. Maa'l mixan la'amaakkoohane; oohim saa'imma, haashaassoo luwwa issimma, balale'ancha, qophpha'n waa'ina otossimma, gennimma te'im falimma, maso'ooma, fitancha, to'achchimma, quuqimma, gaga iittimma, annannaatooma, tobbe'imma, mirmimma, dimbimma, jor kajjaa ee keeno laboo luwwi hundame. Kanniinsi illageen ki'nnuwwina ege'llehe yummisam kabadem odim ege'llehe yoommuulla. Eehido'i luwwa issitam keen Waa'i adillanonne aaggamoyyo. Ihukkaarem Keesammi Ayyaa'n mish iitto, liirancha, xumma, xa'nnimma, eroomma, biijooma, amma'nnancha, maashaalloomaa gaga ijaajimmaa. Eehido'i luwwa issimmina hooroo seer bee'e. Yesuus Kiristoosan ikko'i keen ixxuwwika maara jor mixan hundinnem saqalta'a shito'ookko. Keesammi Ayyaaninne hee'nnoomman ihulas Keesammi Ayyaanim neese awwonsona. Neesena'i neesem mat matonne ki'nnaa to'achchimminne awwaad bee'i luwwanne bakke'nnoone. Iyyabbaayyuwwa, mat amma'nnaanchi mah baaxiilonnem ubuta'n amma'nnatonne qoxxitakko'i keen ee mancho maashaalli tiirinne er googonne daballehe. Ihukkaarem ki'nnuwwim eehido'i keenatonne aaggakkambee'isa ki'nnuwwi gaga ege'llehe. Ki'nnuwwina'i ki'nnuwwim hawwo sholliixxantakkeena hara'mmammehe. Ee'isinne Kiristoosika ijaajo wonshitakkamo. Ayyi manchim mulli keeniinsi e'lloo'nnim mulli keeniinsi e'lloohaannisa ihaa sawwuta'n ixxi gaga huushisaakko. Annannichchim ixxi gaqqi baxo saarayyaa moo'ona. Ee lasage ixxi baxo mulli kee'n baxinne atwonnaa moo'aatette ihoo'n ixxi baxonne bakke'eena xanookko. Mashka'oomim annannichchim ixxi gaqqi iyyo iyyimmi hasisookko. Waa'i sagara losoo manchi ixxena yoo luwwi hundam ixxo losisoo manchinne baxxamona. Ki'nnuwwi huushantakkotte! Waa'anne ayyim naaceena xanooyyo. Manchi wixukkoka mu'llookko. Ixxi maa'l mixano wonshookkok maa'l mixaniinsi bichcha muraa wixxaa'ookko. Ihukkaarem Keesammi Ayyaa'nneka mixano wonshookkok heer heerina hee'oo heechcha muraa wixxaa'aqqookko. Neese er luwwa banxeena hoongoone. Er luwwa baximma hoongumbeelas amman afoohaare winxummi luwwa mu'llinoommo. Makka siindumlas xansiisu duuha'i hundinnem manni hundinam lonsinaatim amma'nnaanina eroomma issinona. An i anginnem hinkido'i geejji geejji fidalluwwinne ki'nnuwwina kitaabumda'e moo'llehe. Ki'nnuwwa ballachchammehe yita'a hawwissam keen maarinne er keen ikka'a moo'anteena hassam keeno. Ixxuwwi eehid issitamok Kiristoos leh bikkina hawwi ixxuwwanne afoobee'isinatte. Oo ballachchanto'i keen ixxuwwi gagim Seera egettamoyyo. Ki'nnuwwi ballachchantakkona hassamok ballachchantakkamaare ki'nnuwwam ni manna yita'a birantam luwwa siiddeenatte. Ihukkaarem ni Moollanni Yesuus Kiristoos saqalamu masqaliinsi bagaan an bakke'oommi luwwi iinniinsi qee'llona. Ee masqalanne ku uulli iina saqalamaakko. Anim ka uullina saqalamaammo. Mashka'oomim Kiristoosanne amma'nnakka'a haareechchi qooccanchi ihimmi awwaadookko bagaan ballachchanchi te'im ballachchancha hoogimmi maham awwaadooyyo. Ka ijaajina ijaajantakkam keeninaa Waa'i minaadab ikko'i Isra'eelinaa hundinam Waa'ik xummii qishixxatii ihona. An Yesuusan ihummisa i orachchonne mare'e iyyummi bikkina ka lasage eese ayyim hawwisoone. Iyyabbaayyuwwa, Moollanni Yesuus Kiristoosik eroommi ki'nnuwwinne maqire ihona! Aameen. Waa'i doo'llinne Yesuus Kiristoosina asse'amaanchi ihummi Phaawuloosiinsi Yesuus Kiristoosanne amma'nnitakko'oo Waa'i minaadabina Niyyanni Waa'iinsii Moollanni Yesuus Kiristoosiinsii eroommii xummii ki'nnuwwina ihona. Kiristoos kollinne iima'n uullina hasisoo luwwi hundam niina uwwimminne neese maasse'u ni Moollanni Yesuus Kiristoosina anni Waa'i galaxxamaakkoohan ihona. Keesammaammoo keenoo miiqakkam luwwi bee'i keenoo inkaa ixxi illagenne hee'nnoommisina uulli qooccamoo'n illageenim Kiristoos kollinne neese doo'llukko. Waa'i ixxi sawwitinne doo'llaa Yesuus Kiristoos kollinne ixxena oos inkoommisina gaassaatim iittaa yukkisa issukko. Eehid issukkokim iittoo Beet kollinne kora'am niina uwwu lombi yoo eroommina ixxo galaxxinoommisinatte. Ixxek eroommi gabal bee'an ihu bikkina ixxi Beet xiiginne ni baaxiilo haafaa neese gatisukko. Eekkam ixxaanninne qooroominnee lachchinnee hundinnem neesenne wonshukko. Kiristoos kollinne Waa'i gaassaatim sawwu ixxi sawwixxeka issaa ixxi doo'llika maaxamu woshsha niina la'isukko. Oo ixxi sawwu sawwitim amman afoohaare iimanennee uullannee yoo luwwi hundam mat issaa Kiristoosiinsi woroon isseenatte. Luwwi hundam ixxi sawwaa doo'llukkisa issoo Waa'i gaassaatim sawwukkisinne ixxi oos inkoommisina Kiristoos kollinne neese doo'llukko. Oohim sirannem Kiristoosa ege'llinummi keen ixxi lombina galata uwwinummuuyyi hee'nnoommisinatte. Odim ki'nnuwwa gatisoo hanqo'i mishiraachchi sagara macceessakka'a Kiristoosanne amma'nnitakka'a ixxi uwweena neeyyata aagu Keesammi Ayyaaninnem koobantakko'ookko. Waa'i lombina galat ihoo'isina ixxi minaadabina neeyyata aagu gatimma a'llineembe'i afeebe'e oo Keesammi Ayyaan niina lubbato. Moollanni Yesuusanne yoo ki'nnuwwi amma'nnatoo amma'nnaan hunda iittitakkam iittoo macceesummi bikkina an Waa'a uunxoommi amman hundam ki'nnuwwa tiirummuuyyi Waa'a galaxximma urummi amman bee'e. Waa'a qoossitakka'a laqqakkamisina qoorimmaa kaaltaa uwwoo Keesammi Ayyaana ki'nnuwwina uwwoo'isina ni Moollanni Yesuus Kiristoosina an lombi yoo Waa'a uunxoommo. Waa'i hinkido'i neeyyatina weeshuda'ee ixxi minaadabina ixxi biijoominne uwwoo lombaam heechchaa laqqakkamisina ki'nnuwwik woda'n illi fooqoo'isina odim Waa'a uunxoommo. Ixxonne amma'nninummi neesenne baxukkuuyyi yoo ixxi malaayyi gabal bee'an ihukkisa laqqakkamisinam uunxoommo. Oo gabalbee'i malaayyim Waa'i Kiristoosa lehiinsi ki'isaa iimanenne ixxi makkanne afuussu ammane la'isukkane. Eehanniinsim lobok gassaaniinsi, gassimmi malaayyi yoo keeniinsi, malaayyaammuwwiinsii moollanno'iinsii hundiinsim lophphaakkoo summa siixxaa xale'i ka uullannette ihoo'n waaroo uullannem gassookko. Odim hundem luwwim ixxi lokkiinsi woroonette ihoo'isina issukko. Amma'nnaa'n wixxixxi woronnem hundem luwwannem horoor ihoo'isina issukko. Oo amma'nnaa'n wixxitim Kiristoosina orachcho; Kiristoosim amma'nnaaninnee mulli luwwinnee hundinnem wo'mmaakkoohane. Ki'nnuwwim Waa'ina ijaajancha sabimminnee baaxiilo baximminnee letakko'oo keen hee'llakko'o. Ee ammane ka uulli jor luwwaa hafachchanne ihaa gassoo habus adilaa awwontakku'uuyyi ijaajantakkam hee'llakko'o. Ixxim Waa'ina ijaajantambee'i keenonne kaba baxukkuuyyi yoo habusa. Neese hundim ni maa'l mixa'nnisaa ni tii'llisaa inkummuuyyi hee'nnummi ammane ixxuwwisam hee'nnummo. Qooccammummisinnem mulli kee'nnisam Waa'ik quunqi yoo keen hee'nnummo. Ihukkaarem Waa'i qishixxatii neese iittu iittii lobakat ihu bikkina neese Waa'ina ijaajancha sabimminne ki'ukkok lenaammoo keen inkummaarem Kiristoosinne maqirem heechcha uwwukko. Ki'nnuwwim gattakko'ok Waa'aanninne eroomminnette. Yesuus Kiristoosinne maqirem neese lehiinsi ki'isaa ixxenne maqirem iimanenne afuussukko. Eekkam issukkok gabalbee'i eroomma ixxi biijoominne niina Yesuus Kiristoos kollinne issukkisa waaroo doollenne moo'iseenatte. Yesuus Kiristoosanne amma'nnitakka'a Waa'i eroomminne gattakko'ookko. Oohim Waa'i uwwaakkoohane bagaan ki'nnuwwi baxinneyyo. Ayyi manchim «An gatummok baxummi baxinnette» yaa bakke'oone. Mashka'oomim neese qooccukkok Waa'a. Waa'i gaassaatim gudisu er baxo banxoommisina Yesuus Kiristoos kollinne la'mmaagge qooccukko. Ki'nnuwwi Yihud ikkakkobee'i keen eraare hinkid hee'llakkoda'e sawwi'llehe. Maa'llisinne manni anginne «Ballachchammaammo» yitam Ayihuxxi manni ki'nnuwwa «Ballachchantakkobee'i keeno» yita'a gaddam hee'llo'o. Ee doollenne ki'nnuwwi Kiristoosiinsii Waa'i minaadab hee'llo'i Isra'eeliinsii annanni ikkakka'a hee'llakko'o. Waa'i ixxi minaadabina eroomma isseena hide'u hidirinam koyyi hee'llakko'o. Odim ka uullannem ki'nnuwwina soodbee'i manni ikkakka'a Waa'a laqqakkambee'i keen hee'llakko'o. Ihukkaarem eraare qee'llitakka'a hee'llakko'i keen kaba Yesuus Kiristoos kollinne ixxi xiiginne hincitakko'ookko. Ayihuxxi minaadabaa mulli keenoo annanni issaa hee'u maso'oo'm gortanna gindaa mat issaa niina xumma eebukkok Kiristoosatte. Ee lamem minaadaphphi bikkennem ixxi gaginne haareechchi minaadaba qoocceena yaa Seeranne kitaabamu ijaajoo Ayihuxxi manni seeraa ixxi lehinne gindaa xumma uwwukko. Kiristoos saqalamaa lehimminne lamem minaadaphphi lambe'ennem hee'u maso'ooma hooraa lamem minaadabam mat issaa Waa'inne iittansukko. Ixxim waaraa qee'llitakka'a hee'llakko'i ki'nnuwwinaa hincita'a hee'llo'i keeninaa xummi mishiraachchi sagara kurukko. Neese Ayihuxxi mannii mulli keenii matem Keesammi Ayyaaninne Waa'i kollinne hincineena xannummok Kiristoos kollinnette. Ee bikkina ka lasage ki'nnuwwi Waa'i minaadabinnee Keesammi Mi'n abaroosinnee mato bagaan koyyayyoo waaraanoyyoo. Yesuus Kiristoos utub ihaa asse'amaanii hiraagaanii baxxo'i minenne ki'nnuwwim edantakka'a baxxantakko'ookko. Kininne baxamu mi'nnisa mat issaa amaxxansookkokii Moollannina keesammi ihaakkoo Keesammi Min ihoo'isina li'isookkokii ixxotte. Ki'nnuwwim Kiristoosinne mat ihimminne Waa'i hee'oo min ikkakkeena Keesammi Ayyaaninne ee minenne baxxantakkamuulla. An Phaawuloos Yesuus Kiristoosina karamummok Ayihuxxi manni ikkakkobee'i ki'nnuwwi bikkinatte. An ki'nnuwwina awwaadoommi awwaado Waa'i ixxi eroomminne iina uwwukkisa macceessakkoo'n uttakkamoyyo. Mannina la'isubee'i luwwa Waa'i iina caakkisaa la'isukkisa an gundisaa kitaabaammo. Ki'nnuwwi kaka qananaa'llakkam ammane Kiristoosika maaxamu woshsha an qoossaa la'oommisa laqqakkeena xantakkamo. Gaassi doollenne hee'llo'i mannina Waa'i la'isubee'i luwwa keesammi ikko'i ixxi asse'amaaninaa hiraagaaninaa Keesammi Ayyaa'n kollinne kaba caakkisaakko. Oohim mulli minaadab mishiraachchi sagara macceessa'a Ayihuxxi minaadabinne maqirem Waa'ika maassoo ixxuwwinnem mat orachchi ikka'a Waa'i uwwu neeyyaxxi sagaraa Yesuus Kiristoos kollinne baxxamaan ihimma. An ka mishiraachchi sagarina awwaadaanchi ihummok Waa'i ixxi eroomminne iina uwwu uwwanchinnette. Oohim uwwamukkok eesenne baxoo ixxi malaayyinnette. Anni Waa'i minaadab hundiinsim maham hoffan ihummaarem mulli minaadabina Kiristoosika gabalbee'i eroomma kuroommisina iina uwwamukko. Luwwi hundam qooccu Waa'i sawwixxeka lobakat doollina la'amoo'n maaxamaa hee'u luwwa manni hundinam la'isoommisinam iina uwwamukko. Oohim ka doollenne amma'nnaa'n kollinne iimanenne hee'llam gassaanii malaayyaammuwwii Waa'ika gabalbee'i qoorooma laqqamisinatte. Waa'i eekka issukkok ni Moollanni Yesuus Kiristoos kollinne ixxeka heer heerinam hee'oo sawwite wonsheenatte! Neesem ixxonne amma'nninaa malammoo'n iggimminne Waa'i illage hincineena xannummok Kiristoosinnette. An ki'nnuwwi bikkina hawwoommi hawwi mashka'inne ki'nnuwwi hooggakkambee'isina an ki'nnuwwa uunxoommuulla. Ku an hawwoommi hawwi ki'nnuwwina lomba. Ki'nnuwwik woro'l mannoom qoxxoo'isina ee ixxi lombi yoo goddiinsi Keesammi Ayyaa'n kollinne ki'nnuwwina malaayye uwwoo'isinaa Kiristoos ki'nnuwwi wodanonne amma'nnatinne hee'oo'isinaa Waa'a uunxoommo. Odim Waa'a uunxoommok ki'nnuwwik heechchi iittinne qoxxoohan ihoo'isina Waa'i minaadab hundinnem Kiristoos iittika haraarooma, qeeraa'llooma, uullichchaa xillaalloomaa qoossitakka'a laqqakkeena xantakkamisinatte. Odim Kiristoosika manni lachchiinsi hanaan ihaakkoo iitto laqqamisinatte. Waa'ik qoocci hundoomim ki'nnuwwannem wo'mmoo'isinatte. Kabadem ihukkaare neese xa'mminummaanniinsi te'im sawwinummaanniinsi hundiinsim lobakata lonsaa ni woronne ixxi malaayyinne baxeena xanoo Waa'ina amma'nnaaniinsi Yesuus Kiristoos kollinne qaranchi hundannem heer heerinam lombi ihona! Aameen. Moollannina karamaa yoommi an Phaawuloos ki'nnuwwi weeshantakko'i weeshanchina laboo heechcha hee'llakkamisina uunxoommo. Ki'nnuwwina'i ki'nnuwwim iittinne iyyaqqitakku'uuyyi gag horoore heeshaa'imminne, maashaalloominnee xa'nnimminnee hundinnem hee'llehe. Xumminne mat ikkakka'a Keesammi Ayyaan uwwu mateeyyoomam egettakkeena yaki'llehe. Ki'nnuwwi weeshantakko'i ammane matem neeyyatina weeshantakko'isam mat orachchi, mat Keesammi Ayyaan, mat Moollanni, matem amma'nnat, matem xammaqanchii niina hundinam Anni mexxo'i Waa'ii yookko. Ixxim hundiinsim hanaan yoohane, hundannem baxoohanee hundannem hee'oohanee. Ihukkaarem Kiristoos niina annannichchinam uwweena hasukkisinne eroomma uwwaakko. Oohim Keesammi Kitaabanne «Iimane ixxi firu ammane qeefadanto'i kee'nneka dut keeno awwonsaa marukko. Manninam uwwancha uwwukko» yaakko. Eehaara'i ku «Iimane firukko» yoo sagar mayyimma? Uullaannonne xilli beyyonne aad dillukkisa moo'isoohane. Oo uullaannonne xilli beyyonne dillukkok iima'nnaannonne libo'onne firukkaneme. Oohim hundem luwwannem ixxi wo'mmoo'isinatte. Ixxim mat mat keen asse'amaan ikkamisina, mat mat keen hiraagaan ikkamisina, mat mat keen mishiraachchi sagara kuraan ikkamisina, mat mat keen amma'nnaano allaaraan ikkamisinaa mat mat keen Waa'i sagara losisaan ikkamisinaa uwwancha uwwukko. Eekka issukkok amma'nnaano Waa'ina awwaaddamisina gudisimminne Kiristoos orachchi ihu amma'nnaa'n wixxite li'iseenatte. Ee'isinne neese hundichchim amma'nnatinne mat inkeenaa Waa'i Beeto qoossinaa lanqeenaa xannoommisina Kiristoos hundisinnem wo'm ihukkisam neesem wo'm inkeena li'nnummuuyyi mallona. Kanniinsi eehid biranchinne, qawwiishshinnee huushissam qoor keen gudisso'i huushisoo losishshinnee hundinnem ciilluwwisa inkaa hafachchi massoo luwwisa massammonnihe? Ihukkaarem hanqi woshsha iittinne woncummuuyyi amma'nnaanina horoor ihu Kiristoosa lambeena hundisinnem li'nnona. Orachchi qaamafeet hundim nigginne mat ihaa amaxxamukkisam amma'nnaan hundim mat ihaa amaxxamookkok Kiristoosinnette. Ee bikkina orachchi qaamafeet hundim ixxena uwwamu baxo baxukkuuyyi orachchi hundim li'oo'isina iittinne baxookko. Hanqo'i Waa'a laqqambee'i minaadab ixxuwwi tiironne awwaad bee'i luwwa sawwitu'uuyyi hee'llamisa ka lasage ki'nnuwwi hee'llakkambee'isina Moollanni summinne qoxxisaa uunxoommuulla. Lachcha hoogimminnee wodano duudimminnee ki'ukkok qoossitambee'isa ixxuwwik tiir tuunsaakko. Odim Waa'i uwwoo heechchiinsim annanni ikko'ookko. Ixxuwwanne tuulli hore'em bee'u bikkina ixxuwwi gaga jor mixanina higissa'a uwwita'a jor luwwi hundam edda'a edda'a issitamuulla. Ihukkaarem ki'nnuwwi Kiristoos bikkina lossakko'ok ee'isayyo. Hanqinam Yesuus bikkina macceessakko'ookko. Ixxonne hanqi yoo'isam lossakko'ookko. Ee bikkina jor mixaninne bi'aakkoo gaassi hee'llakkam ebeer mannooma ki'nnuwwiinsi sheelattakka'a hoollehe. Ki'nnuwwik tiirii wodanii haareechchi ihona. Hanqo'isa muccuroominnee keesamimminnee Waa'i hagaranne qooccamaakkoo haareechchi mannooma edde'llehe. Ee bikkina neese hundim mat orachchi inkummi bikkina ki'nnuwwi woriinsi qophpha'n woshsha fissitakka'a hoottakka'a ki'nnuwwina'i ki'nnuwwim hanqo'i woshsha woccehe. Quuqqehe, ihukkaarem baaxiilo baxxakkotte. Quuqqakko'isa hee'llakkonam eelliinchi aagoone Sheexaanchina beyyo uwwitakkotte. Gamaanchi ka lasage od game'oone. Ihukkaarem buxina uwwoo luwwi hee'oo'isina ixxi anginne badaraa eroka baxona. Macceesoo keenina eroomma uwweenaa qoxxiseenaa xanoo er sagar ki'nnuwwiinsi firona bagaan jor sagar firoone. Gatimmi ayyaamina lubbat ihoo'isina ki'nnuwwi woronne Waa'i issu Keesammi Ayyaana kichche'issakkotte. Baado amadimma, quunqa, nadajja, laachcha, game'llanchaa jor woshshaa hundam ki'nnuwwi woriinsi fissitakka'a hoollehe. Ki'nnuwwina'i ki'nnuwwim biijaalluwwaa qishixxantakkam keenoo ikkehe. Waa'i Kiristoos kollinne ki'nnuwwina haafukkisam ki'nnuwwina'i ki'nnuwwim haafaqqammehe. Waa'ina iittantakko'oo oos ikkakko'i bikkina Waa'a labbehe. Kiristoos neese iittaa ixxi foore Waa'ina danaamisa enje'oo kiti'mmisa issaa ni bikkina higisaa uwwukkisam ki'nnuwwim iittinne hee'llehe. Waa'i minaadabanne hee'immina laboobee'i luwwi hundim oohim saa'immi te'im haashaassoo luwwi te'im jor mixan ki'nnuwwi woronne hore'em hee'oone. Waa'ina galata hincaa'llehe bagaan tuussiisoo woshshi ihukko te'im awwaad bee'i woshshi ihukko te'im shigigaa'oo woshshi ihukko ki'nnuwwina laboobee'an ihu bikkina ki'nnuwwiinsi qee'llona. Saa'aanchi te'im jora baxookkok te'im jor luwwa mixookkok Kiristoosaannonnee Waa'aannonnee adillanonne aageena xanoobee'isa qoossitakka'a laqqehe. Oo jor mixan ixxi gagoomim Waa'i bikkenne mulli luwwina otossimma. Ee kee'n mashka'inne ijaajantambee'i kee'n hanenne Waa'i quunqi waaroo bikkina awwaad bee'i wocinne ayyim ki'nnuwwa qawwiisoone. Ee bikkina ee keeninne exxitakkotte. Eraare ki'nnuwwim tuunsi woronne hee'llakko'o. Ihukkaarem kaba Moollanni ki'nnuwwa caakkanne fissu bikkina caakkanne hee'oo kee'nnisa hee'llehe. Mashka'oomim caakkik mish hundim eroomma, xabbeenoomaa hanqaa. Odim Moollanna liiransoo luwwi mada'e ihukkisa qoossitakka'a laqqehe. Ee mishbee'i tuunsi baxo baxxam keeninne exxitakkotte. Ihukkaarem ee kee'n baxo biir issehe. Mashka'oomim ixxuwwi maaxaqqanne issitam luwwi wocakkeenam tuussiisoohane. Caakkanne firu luwwi hundim moo'amoohane. Moo'amoo luwwi hundim caakka. Ee bikkina «Ate, diriittittaanno, diriiriinsi baqihe; lehiinsim ki'e. Kiristoos kiina caakka uwwookko» yamamaakko. Eehannata'i hinkid hee'llakkamda'e qoossitakka'a laqqehe. Qawwi mannisa ihoo'n qoor mannisa hee'llehe. Ku doolli jor ihu bikkina makku amman hundam awwaaxxehe. Ee bikkina Moollannik doo'l mada'e ihukkisa qoossitakka'a laqqehe bagaan qawwuwwi ikkakkotte. Keesammi Ayyaan ki'nnuwwanne wo'mmona bagaan bichchina massoo dimbisoo luwwa aggakka'a dimbitakkotte. Ki'nnuwwina'i ki'nnuwwim Waa'a galaxximminnee lonsimminnee liirantakku'uuyyi wodaninne guullitakka'a Waa'ina zammallehe. Niyyanni Waa'a ni Moollanni Yesuus Kiristoos summinne hundem luwwannem hundem ammanem galaxxehe. Kiristoos lombina yitakka'a ki'nnuwwina'i ki'nnuwwim ijaajammehe. Meento, Moollannina ijaajantakkamisam ki'nnuwwi goonina ijaajammehe. Kiristoos ixxi orachchi ihu amma'nnaanina horooree Gatisaanchoo ihukkisam aro'im ixxi arena horoore. Amma'nnaan Kiristoosina ijaajamoo'isam are is aro'ina hundem luwwannem ijaajantona. Aro'o, Kiristoos amma'nnaano iittaa ixxi foore higisaa uwwukkisam atim ki are iitte. Kiristoos eehid issukkok wo'isa muccussoo ixxi sagarinne amma'nnaano muccussaa keesanto'oo keen isseenatte. Ee'isinne shigigaa'oo luwwik te'im kurakkam luwwik te'im miiqakkam luwwik te'im eehido'i luwwik ma'lluchchim bee'i muccur issaa amma'nnaano ixxi illagenne nuurinne hincaa'eenatte. Ee'isam aro'im ixxi orachcho iittoo'isam ixxi arem iittimmi hasisookko. Ixxi are iittookkok ixxi gagam iittoohane. Keesammi Kitaab «Ee bikkina manchi ixxi amaa annaa uraa ixxi arenne mat ihookko. Lamim mat orachchi ikkamo» yaakko. Kannik woro'l tirat lobakata kee'mmaalla; oohim moo'isookkok Kiristoos bikkinattee amma'nnaa'n bikkinattee. Ihona bagaan ki'nnuwwi annannichchim ki'nnuwwi gaqqi are ki'nnuwwi gaqqisa iittehe; arem is aro'o lonsitona. Ooso, ki'nnuwwina hasisoohan ihu bikkina ki'nnuwwi amo'inaa anno'inaa Moollannina ijaajantakkamisam ijaajammehe. Anno'o! Ki'nnuwwika ooso axeettaku'uuyyii soggakku'uuyyii Moollanni googonne li'issehe bagaan quuqoo'isa issitakkotte. Agido, Kiristoosina ijaajantakkamisam ka uullanne yoo ki'nnuwwi moollanno'ina baddimminne, huxechchinnee xabbeen wodaninnee ijaajammehe. Oohim manni moo'aa liiramonatte ihoo'n Kiristoosina awwaadaa'nnisa Waa'ika doo'lla wonshitakkeena wodaninnem ijaajammehe. Manninatte ihoo'n Moollannina awwaaddakkamisam danaam tiirinne awwaaddehe. Agishshom ihukko wolabichchom ihukko er baxo baxookkok ayyim Moollanniinsi irifo'o gudom siixxoo'isa laqqehe. Moollanno'o, ki'nnuwwim awwaadaanina ee'isa issehe. Mannina golo'oobee'i Moollanni ki'nnuwwinaa ixxuwwinaa iimanenne yoo'isa sawwimminne ki'nnuwwi agido baddissakkotte. Kabadem ihukkaare Moollanni malaayyaam wodinne ixxonne qoxxehe. Sheexaa'nneka hantaaro uullixxantakkeena xantakkamisina Waa'i uwwoo o'l mu'ut hundam edde'llehe. Neese qasammoommok manninnette ihoo'n iimanenne hee'llam keeninne oohim awwonsaaninnette, malaayyaammuwwinnette, tuunsaakkoo ka uulli manna gassitam keeninnettee jor ayyaa'n gogotinnettee. Ee bikkina jor ayyaamonne ki'nnuwwi masokkichchinne uullixxantakkeenaa lasaanchi afeebe'e kaa'llakka'a uullitakkeenaa xantakkamisina Waa'ika o'l mu'ut hundam lade'llehe. Oohim hanqa sabbaxxisa lade'llakka'a, xabbeenoomam o'l eddechchisa edde'llakka'ahii xumma uwwoo mishiraachchi sagaram caamma'isa issitakka'a guddakka'a uullehe. Eehanni hundiinsim gii'llisa aphphukkuuyyi darabamaa waaroo Sheexaa'n bagadduwwi hundam dabattakkeena xantakkam amma'nnato agi'llisa amaddehe. Gattakko'isa moo'isoo o'l qoobe'em ki'nnuwwi horoorenne issaqqehe. Keesammi Ayyaa'n bisa'am amaddehe. Oo bisa'im Waa'i sagara. Hasisoo luwwi hundinam Waa'a uunxitakkam ammane Keesammi Ayyaan awwonsoo'isinne hundi ammanem uunxehe. Ee'isinne baqitakka'a uttakkambee'isa Waa'i minaadab hundinam uunxehe. Maaxamu mishiraachchi sagara iggaa wocoommisina iikka suume fooqaa'aa wocoommi woshsha uwwoo'isina iinam Waa'a uunxehe. Kaba an karamaa hee'ummuuyyim asse'amummok ee mishiraachchi sagarinatte. Ee bikkina mishiraachchi sagara laboo'isinne iggaa wocoommisina Waa'a uunxehe. An kaba hinkid yoomda'ee maha baxoommuulda'ee laqqakkona hundem luwwam kuroo'isina Tiikiiqoosa asse'aammo. Ixxim Moollanni Yesuus Kiristoosina awwaadimmanne amma'nnamaakkoohanee iittamaakkoo niyyabbaayyoo. An ixxo ki'nnuwwi beyyo asse'ummok neese hinkid yoomminda'e laqqakkamisinattee ki'nnuwwikam wodano qoxxisoo'isinattee. Niyyanni Waa'ikii ni Moollanni Yesuus Kiristoosikii xummii iittii amma'nnatinne maqirem niyyabbaayyuwwina ihona. Bi'oobee'i iittinne ni Moollanni Yesuus Kiristoosa iittoo keen hundinnem Waa'ik eroommi ihona. Neese Yesuus Kiristoosina awwaandoommi Phaawuloosii Ximootoosii Yesuus Kiristoosanne amma'nnitakka'a Waa'i minaadab ikkakko'i Filiphphisiyus beero'onne hee'llakkam amma'nnaanina, ki'nnuwwi awwonsaaninaa odim ki'nnuwwi woronne awwaaddam keeninaa kaka kitaamboommuulla. Niyyanni Waa'ikii Moollanni Yesuus Kiristoosikii eroommii xummii ki'nnuwwina ihona. An ki'nnuwwa sawwoommi amman hundam i Waa'a galaxxoommo. Ki'nnuwwi woronne ee er baxo baximma asheeru Waa'i Yesuus Kiristoos ka uulla daba'llaa waaroo ayyaamo guulloo'isa an qoossaa la'aammo. An ki'nnuwwa lobakata iittoommi bikkina ki'nnuwwina hundinam ka'isa sawwimmi hasisookko. Mashka'oomim an karamummi ammane mishiraachchi sagar hanqo'an ihukkisa caakkisaa kuroommi kurimminnee gubbamoommi gubbanchinnee iinninne maqirem hundichchim baxxantakkam gada'i uwwamaakko. Yesuus Kiristoos ki'nnuwwa iittukkisam anim ki'nnuwwa iittoommi bikkina moo'eena quluxoommisa Waa'i la'ookko. Ee'isinne ki'nnuwwik heechchi Yesuus Kiristoos kollinne Waa'i lombinaa galatinaa waaroo er baxinne wo'mmaakkoohan ihona. Iyyabbaayyuwwa, kabadem ihukkaare eesenne afu karanchi mishiraachchi sagara eraa'llaanniinsi haraassimmina awwaadoohan ihukkisa laqqakkona hasoommo. An karamummok Kiristoosina awwaadaanchi ihummi bikkinatte ihukkisa adi'l mine egettam keenii mulli keenii hundim laqqo'ookko. I karaxxi mashka'inne amma'nnaa'nnek dut abbaayyuwwi Moollannanne bakke'llam keen ikko'ookko. Mishiraachchi sagaram badditoo'n kurimmina eraa'llaanniinsi iggimma siixxito'ookko. Ihona bagaan mat mat keen Kiristoos mishiraachchi sagara alallaattamok jor to'achchinnettee gereero'innettee. Ihukkaarem mulli keen hanqo'i er wodaninnette. Oo er wodaninne mishiraachchi sagara kuttam keen an keyye karamummok mishiraachchi sagar hanqo'an ihukkisa caakkisaa kurummi bikkinatte ihukkisa laqqa'a iittinnette. Mulli keen Kiristoos mishiraachchi sagara alallaattamok hanqo'i wodaniinsette ihoo'n i karatonne hawwo eddeena iinninne gereero'lla'atette. Eehid ihukkaarem hawwi bee'e. Hanqo'i sawwitinnette ihukkoo labishshi sawwitinnette ihukkoo ayyi googinnem Kiristoos bikkina alallaattamulli ihu bikkina an eehannonne lobakata liiramoommo. Ku eesenne afu luwwi hundim ki'nnuwwi i bikkina Waa'a uunxitakkam uunxatinne Yesuus Kiristoos uwwu Keesammi Ayyaa'n hara'mmatinne eese gatisimmina ihoo'isa an la'ummi bikkina cawwaa liiramoommo. Kabadem ihukkaare iikki lobakat mixanii sawwitii tuussiisoo luwwa maham issoombee'isinatte. An lehummaarem hee'ummaarem eraa'llisam Kiristoosa i heechchanne lonseena murte'aammo. Mashka'oomim an hee'oommi heechchi Kiristoosinatte. Lehimmi iina erane. An lehoo'n ka uullanne foorinne hee'immi i baxina awwaadoohan ihulas lehiinsii heechchiinsii hinka doo'lloomda'e kureena xanoommoyyo. Oo lamem sawwitim eese hawwisaakko. Kiristoosinne hee'immi iina lobakata eran ihu bikkina i mixan ka uulli heechchiinsi annanni ihaa Kiristoosinne maqire hee'imma. Ihukkaarem an ka uullanne foorinne hee'immi ki'nnuwwina lobakata hasisoohane. Oo sawwit lophphu bikkina amma'nnatinne li'llakku'uuyyii liirantakku'uuyyii mattakkamisina an lehiinsi gataa ki'nnuwwinne hundinnem ihoommisa qoossaa la'oommo. Oohim an ki'nnuwwi beyyo odim waaroommi ammane i mashka'inne Yesuus Kiristoosa lonsitakka'a galaxxitakkamisinatte. An ki'nnuwwa moo'eena waarummom te'im waaroo'n gatummom Yesuus Kiristoos mishiraachchi saga'l amma'nnatinne mat ikkehe. Ki'nnuwwi maso'o hore'em badditakkoo'n mat sawwitinne qoxxitakka'a gubbantakkamisa macceesoommisina mishiraachchi sagar yoo'isinne hee'llehe. Ookki ixxuwwi bi'llam keen ikko'isinaa Waa'i ki'nnuwwa gatisukkisinaa mare'e. Mashka'oomim ki'nnuwwi Kiristoosanne amma'nnimmi xale'e ihoo'n ixxi bikkina hawwo aa'immi gada'im uwwamaakko. Ki'nnuwwanne afu hawwi kanniinsi illageen eesenne afaa moo'llakko'oohanee kabadem hawwi woronne yoommisa macceessakku'uuyyi yontakke'anee. Kiristoosanne yoo mateeyyoom ki'nnuwwa qoxxisaakko. Ixxi iittim ki'nnuwwiinsi kichchechcha hooraakko. Ki'nnuwwina Keesammi Ayyaaninne mateeyyoom yookko. Ki'nnuwwina'i ki'nnuwwim biijaalluwwaa qishixxitakkam keenoo ikkakko'ookko. Odim ki'nnuwwi mat sawwitinne, mat wodaninne, iittinnee mat ihimminnee eese lobakata liiransitakkamisina ki'nnuwwa uunxoommo. Odim gaga iittimminne te'im «Iinniinsi ayyi yookko» yimminne maham issitakkotte. Ihukkaarem ki'nnuwwi gaga hoffiissakka'a mulli keeno ki'nnuwwiinsi e'lloohan issitakka'a xiggehe. Ki'nnuwwi annannichchim ki'nnuwwi gagina liiransoo luwwi ihoo'n mulli keenina liiransoo luwwa sawwi'llehe. Yesuus Kiristoosanne hee'u sawwit ki'nnuwwannem hee'ona. Ixxi Waa'i ihaa hee'ukkuuyyim Waa'inne yoo gudaanchooma malaayyinne masseena hasukkoyyo. Ihukkaarem ixxena yoo malaayyi hundam ixxi doo'llinnem uraa agishshi qooccanne ihaa manchi hagaranne qaramukko. Ixxim manchi qooccanne ihaa ixxi gaga hoffiisimminne lehonne afeebe'em ijaajamaakkoohan ihukko. Oohim masqalanne saqalamaa leheebe'i afeebe'e. Oohim manni hundichchim Yesuus Kiristoos Moollanni ihukkisa wocimminne Anni Waa'ina lomba uwwoo'isinatte. Iittantakko'oo iyyabbaayyuwwa, an ki'nnuwwinne maqire hee'ummi amman xale'e ihoo'n hundi ammanem ijaajantakkam hee'llakko'isam kabadem ki'nnuwwiinsi qee'llaa yoommaannonnem eraa'llaanniinsi lonsitakka'a ijaajammehe. Ee bikkina ki'nnuwwi gattakko'isa moo'isoo baxo baddimminnee huxechchinnee baxxakku'uuyyi mallehe. Mashka'oomim ixxi sawwixxeka mixxakkamisaa issitakkamisaa issukkuuyyi ki'nnuwwi wodanonne baxookkok Waa'a. Ki'nnuwwimdu eehid issitakkolas i baxii i badallatii hundichchim awwaad bee'an ihaa gatubee'isa moo'isoohane. Ee bikkina Kiristoos ka uulla daba'llaa waaroo ayyaamo an ki'nnuwwanne bakke'oommo. Odim durakka'a uwwakkam kiti'mmisa issitakka'a Waa'ina awwaaddakkam amma'nnaxxi kitimanne i xiigim exxaa dunamaakkoohan yakkota'n danaam hee'ukko. Ee'isam odim ki'nnuwwi iinninne maqirem lobakata liirammehe. Ki'nnuwwi bikkina macceesaa liirameena hasummi bikkina Moollanni Yesuus yukkaare Ximootoosa ki'nnuwwi beyyo qaqqisaa asse'eena hasaammo. Ki'nnuwwina eroomma ixxisa hanqo'i wodaninne mixookkok iina matim bee'e. Mulli keen hassamok Yesuus Kiristoosina awwaadoo luwwi ihoo'n xale'i ixxuwwi gagina awwaadoo luwwa. Ihukkaarem Ximootoos mishiraachchi sagara kurimmina annina beet awwaadoo'isa iinninne maqire awwaadukkisinne awwaad yoo manchi ihukkisa ki'nnuwwim laqqakkamo. Ee bikkina i woshshik duuha'a moo'ummisinne ki'nnuwwi beyyo qaqqisaa Ximootoosa asse'eena sawwaammo. Eehanniinsim odim Moollanni yukkaare an i gagim ki'nnuwwi beyyo abbis ammanenne waaroommisa amma'nnoommo. Odim ki'nnuwwi asse'llakko'i Afiroodiixa ki'nnuwwi beyyo dabaraa asse'immi hasisoohan ihukkisa la'aammo. Ixxi iina abbaayyo, beshichcho, iinninne maqirem gaadaanchoo iina hasisoo luwwina awwaadoohanee. Ixxo ki'nnuwwi beyyo asse'oommuullak ki'nnuwwa hundichchom moo'eena quluxu bikkinattee xissukkisa macceessakko'isa la'aa lobakata kichche'u bikkinattee. Ixxo Waa'i fayyiisukko bagaan hanqinam lehooqaxa xissaa hee'ukko. Waa'i ixxo fayyiisukkok xale'e ixxenatte ihoo'n eesenne yoo kichchechchanne kichchechchi exxoobee'isinatte. Ee bikkina ki'nnuwwi ixxo la'mmaagge moo'llakka'a liirantakkamisinaa i kichchechchim sholle'oo'isinaa ixxo ki'nnuwwi beyyo qaqqisaa asse'eena anim lobakata quluxaammo. Moollanninne ixxi ki'nnuwwina abbaayyi ihu bikkina lobakat liiranchinne aa'llehe. Ixxe'nnoo'i keen hundam lonsehe. Mashka'oomim ki'nnuwwi bee'llakko'i beyyonne iina ki'nnuwwi baxxakkam baxo baxaa guulleena yaa ixxi foore Yesuus Kiristoos bikkina higisaa uwwaa lehaa hoogaakko. Iyyabbaayyuwwa, lasaanchonne an ki'nnuwwina kuroommok Moollannanne liirammehe. Mat woshsha ki'nnuwwina dabaraa kitaabeena ceemoommoyyo. Oo woshshim ki'nnuwwa huushanchiinsi egeroohane. «Ballachchammehe» yita'a hawwissam wishi'nnoo'i jor keeno ege'llehe. Mashka'oomim neese Keesammi Ayyaaninne Waa'ina otossinoommi keen, Yesuus Kiristoosanne bakke'nnoommi keenii maaranne bakke'nnoombee'i keenii hanqo'isa ballachchammaammoo keeno. Maaranne bakke'immi hasisoohan ihulas iinam bakke'oommi mashka'i hee'ukko. Mulli mannik ayyim maaranne bakke'oo mashka'i yookkok labisuta'n ixxaanniinsi iikki lophphookko. An qaramummi sadeenti ayyaamonne ballachchamaammoohane. Biiniyaam moolliinsi qaramaammoo Isra'ee'l mancho; Ibro'iinsi qaramaammoo Ibrokkichcho. Ayihuxxi manni seera egerimminattem yakkota'n an Farisaawekkichcho. To'achchimmi bikkinattem yakkota'n Yesuusanne amma'nnu keeno barche'e issaammoohan hee'ummo. Seera egerimminne Waa'i illagenne eran ihimminattem yakkota'n miiqakkam luwbee'an hee'ummo. Ihukkaarem iina awwaadoo luwwi hundichchom Kiristoos bikkina yaa awwaad bee'i luwwisa issaa xigaammo. Eeyya, hanqinam i Moollanni Yesuus Kiristoosa siixximmiinsi lophphoo mulli luwwi bee'isa la'ummi bikkina hundem luchchom awwaadoobee'an issaa xigaammo. Ixxi bikkina yaa hundi luchchom uraa hawwodamaammo. Ixxo siixximmina yummuuyyi hundem luchchom haccisa xigaa uraammo. Oohim Seera egerimminne i gaqqi eroomma uraa Yesuus Kiristoosanne amma'nnimminne Waa'iinsi siidamoo eroomma siixxaa ixxenne maqire hee'eenatte. Odim Kiristoosaa ixxo lehiinsi ki'isu malaayyee i heechchannem lophphaa baxukkuuyyi moo'eena, ixxi hawwikam baxxameenaa lehonnem ixxo labeenaa hasoommo. Xansiisoohan ihulas lehiinsim ki'oommo. Ee hundam an «Siixxaammo te'im afaammo» yeena xanoommoyyo. Ihukkaarem Yesuus Kiristoos eese ixxan issu bikkina anim eekka iihan issaqqeena geeroommo. Iyyabbaayyuwwa, «Ee keeno i gaqqan issaammo» yaa xigoommoyyo. Ihukkaarem mat luwwa issoommo. Oohim higu luwwa xadummuuyyi illageen yoo luwwina yakoommo. Waa'i Yesuus Kiristoos kollinne irifo'i issaa uwweena eese weeshu heechcha siixxeena tungi afeebe'e geeroommo. Neese amma'nnatonne oosoomman bee'i keen hundichchim eehid sawwimmi hasisookko. Ihukkaarem ki'nnuwwina mat luwwanne annanni sawwit hee'ulas eekkam Waa'i ki'nnuwwina caakkisookko. Neese amfummiqax amma'nnatinne li'nnummuuyyi mallona. Iyyabbaayyuwwa, ki'nnuwwi hundichchim eese labbakkam keen ikkehe. Ni kobi'llanne hee'llam keenom qoossitakka'a moo'llehe. Kanniinsi illageen dut ammane ki'nnuwwina kurummisam kabadem odim edaahim indiidda dunummuuyyi kuroommok dut keen Kiristoos saqalamaa lehu lehina maso'i ikko'ookko. Ixxuwwina Waa'i ixxuwwi godabo; tuussiisoo luwwim ixxuwwina lomba; ixxuwwi tiirim ka uulli luwwa ixxuwwikim lasaanchi bichcha. Ihukkaarem niikki uulli iimane; ee beyyiinsim waaroo neese Gatisaanchi Moollanni Yesuus Kiristoosa lobakat qulunxinne ege'lloommo. Ixxim hundem luchchom ixxeensi woroon isseena xanoo ixxi malaayyinne ka gadamaakkoo ni orachchom lombi yoo ixxi orachchisa issookko. Kabadem ihukkaare eese liiransitakkam i kaachchi mare'uwwa; odim an moo'eena quluxoommi iittoommi iyyabbaayyuwwa, Moollannanne qoxxitakka'a uullehe. Annanni issaahim Eewodiyaanee Sinxiikee ki'nnuwwi Moollannanne amma'nnimminne aayyuwwi ikkakko'i bikkina iittantakkamisina uunxoommuulla. Amma'nnantaattoo i beshichcho, oo meenti Qalameenxoosinnee ixxuwwi summi heechchi kitaabanne kitaabamu mulli i beshshuwwinnee maqirem mishiraachchi sagara kurimmanne iinninne maqirem badatto'oo keen ikko'i bikkina ixxuwwa hara'mmitoo'isina an keese uunxoommuulla. Moollanninne yoo mateeyyoomanne ki'nnuwwi hundi ammanem liirammehe! Edaahim kuroommo; Moollannanne liirammehe. Moollanni qaqqisaa waareenatte; ki'nnuwwik maashaalloom wo'mmaakkoo eroommi manni hundinam la'amona. Ki'nnuwwi Waa'a uunxitakkam amman hundam lobakata galaxxitakku'uuyyi ki'nnuwwina hasisoo luwwi hundinam Waa'a xa'mmehe bagaan matem luwwannem kichche'llakkotte. Manni qoossoohaanniinsi hanaan ihaakkoo Waa'ik xummi Yesuus Kiristoos kollinne ki'nnuwwika wodanoo tiiroo egerookko. Iyyabbaayyuwwa, lasaanchonne an ki'nnuwwina kuroommok ki'nnuwwik wodan hanqo'i woshshi hundinne, wolabbaninne, xabbeen woshshi hundinne, danaam woshshi hundinne, liiransoo woshshi hundinnee lomba uwwoo luwwi hundinnee oohim doo'l woshshinnee galatinnee wo'mmaakkoohan ihona. Iinniinsi lossakko'oka, aa'llakko'oka, macceessakko'okaa an issummuuyyi moo'llakko'okaa issehe. Xumma uwwoo Waa'i ki'nnuwwinne maqire ihookko. Lobakat ammaniinsi lasage ki'nnuwwi iina odim sawwimma amaddakko'i bikkina Waa'anne lobakata liiramoommo. Ki'nnuwwina makkimma hoogaate bagaan iina hara'mmitakkeena sawwimma uttakko'oyyo. An eehid yoommok «Iina hanqataakko» yaateyyo. Mashka'oomim siixximmam ihukko, siixximma hoogimma duuha'i hundam losaammo. Hasisoo luwwa siixximmam, siixximma hoogimmam hasisoohaanniinsi hanaan ihaakkoo amaxxa amaxximmam la'aammo. An goddannem, sibaaronnem, lobakat amaxxannem, buxoomannem duuha'i hundannem «Iina yookkok ihookko» yimmi qaanqa losaammo. Kiristoos iina uwwoo malaayyinne hundem luwwam isseena xanoommo. Ihona bagaan ki'nnuwwi i hawwika baxxantakka'a siidanchi lobakata danaamo. Filiphphisiyus beero'onne hee'llakkam amma'nnaano luxxeka mishiraachchi sagara kuraa Maqeedoo'n uulliinsi firummuuyyi ki'nnuwwiinsi bagaan mulli amma'nnaa'n wixxittuwwi uwwimmaannonnee a'llimmaannonnee shallaqqanchanne exxitobee'isa ki'nnuwwi laqqakkamo. Eehanniinsim hanaan Tasalonqe'enne hee'ummuuyyi hawwi eesenne afu ammane mataaggiinsim lamaagge asse'llakko'i hara'mmat iina afaakko. Eehid yummok ki'nnuwwi iina uwwitakkam luwwa hasummi bikkinatte ihoo'n ki'nnuwwina yoo luwwi exxukkuuyyi maroo'isina hasummi bikkinatte. Iina hasisoo luwwaa hasisoohaanniinsi hanaan ihaakkoo luwwaa Afiroodiixanne asse'llakko'oka aa'aammo. Oo asse'llakko'i luwwim danaamisa enje'oo kiti'mmisa Waa'i liiramaa aa'oohane. Ki'nnuwwina hasisoo luwwi hundam i Waa'i gabalbee'i ixxi goddiinsi Yesuus Kiristoos kollinne wonshaa uwwona. Niyyanni Waa'ina heer heerinam lombi ihona! Aameen. Yesuus Kiristoosanne amma'nnimminne Waa'i minaadab ikko'i keenina hundinam xummaato hincaa'llehe. Iinninne maqire yo'i abbaayyuwwii ka beyyonne yo'i Waa'i minaadabii hundim xummaato hincaa'llamuulla. Lophphaatim adi'l mi'n abaroos xummaato hincaa'llamuulla. Yesuus Kiristoosik eroommi ki'nnuwwi hundinnem ihona! Aameen. Waa'i doo'llinne Yesuus Kiristoosina asse'amaanchi hee'ummi iinniinsi Phaawuloosiinsii niyyabbaayyi Ximootoosiinsii Kiristoosan ihimminne Waa'i minaadabaa amma'nnantakko'oo niyyabbaayyuwwaa ikkakka'a Qollaasiyaas beero'onne hee'llakkam keenina Niyyanni Waa'ik eroommii xummii ki'nnuwwina ihona. Neese ki'nnuwwina Waa'a uunxinoommi ammane ni Moollanni Yesuus Kiristoosika Anni Waa'a amman hundam galaxxinoommuulla. Mashka'oomim ki'nnuwwika Yesuus Kiristoosanne yoo amma'nnatoo Waa'i minaadab hundam iittitakkamisa macceensaammo. Oo ki'nnuwwik amma'nnatii iittii shooho'amookkok ki'nnuwwina iimanenne egeramaa yoo neeyyatinnette. Oo neeyyat hanqo'i mishiraachchi sagariinsi luxxeka macceessakko'ane. Oo mishiraachchi sagar ki'nnuwwi beyyo afaa Waa'ik eroommi hanqo'an ihukkisa qoossitakka'a macceessakko'i balliinsi ki'isaa ki'nnuwwi lambe'enne misha mishukkisaa li'ukkisaa uulli hundannem hanqinam misha mishoollaa li'oollaa. Niinninne maqirem awwaadoo neese iittinoommi Eephphaafiriinsi ee woshsha macceessakko'ookko. Ixxi ni bikkenne Kiristoosina amma'nnamaakkoo awwaadaancho. Keesammi Ayyaan ki'nnuwwina uwwu iitti bikkinam ixxi niina kuraakko. Ee bikkina Keesammi Ayyaan uwwoo lachchinnee qoossimminnee Waa'i doo'llu luwwa guullitakka'a laqqakkamisina ee woshsha macceensummi balliinsi ki'insaa ki'nnuwwina Waa'a uunximma ullummoyyo. Uunxinoommokim danaam bax hundam baximminne misha mishshakku'uuyyii Waa'a la'immanne li'llakku'uuyyii Moollanna guullitakka'a liiransitakkeena ixxo laboo heechcha hee'llakkamisinatte. Hundi luchchom malaayyi hundinnee liiranchinnee xantakkamisinaa iyyaqqitakkamisinaa Waa'i ixxaanninne lophphaakkoo lombaam malaayyinne hundinnem ki'nnuwwa qoxxisona. Caakki yoo adillanonne ikka'a ixxi minaadab a'llitam gulumma neesem baxxammoommisina issu Anni Waa'a galaxxehe. Tuunsi agiddaniinsi fissaa iittamaakkoo ixxi Beet adillanonne neese aagisaakko. Niina tisso miqaa ni baaxiilo urukkok ee ixxi Beet kollinnette. Ixxim moo'amoobee'i Waa'ina qoocca. Qooccamu luwwi hundiinsim illageen ixxi hee'ukko. Iimanennee uullannee yoo luwwa moo'amoo luwwaa moo'amoobee'i luwwaa adilluwwam ihuta'n te'im gassaanom ihuta'n te'im daannuwwam ihuta'n te'im gassimmi malaayyi yoo keenom ihuta'n hundem luwwam qooccukkok Waa'i ixxennette. Luwwi hundim qooccamukkok ixxi kollinnettee ixxennettee. Luwwi hundiinsim illageen ixxi hee'ukko. Luwwi hundim ogoranne amaxxamaa yookkok ixxennette. Ixxim ixxi orachchi ihu amma'nnaa'n wixxitina horoore. Luwwi hundinam ixxi luxxane. Luwwi hundinam luxxan iheena lehiinsi gaassaa ki'ukkokim ixxotte. Waa'im ixxek hinat hundim ixxi Beetonne hee'oo'isina iittukko. Ixxim iimanennee uullannee yoo luwwi hundam ixxi gaginne iittansukkok ixxi Beet kollinnette. Masqalanne saqalamaa lehu ixxi Beet xiiginnem xumma eebukko. Ki'nnuwwi eraare jora issimminnee ki'nnuwwi sawwitinnee Waa'iinsi annanni ikkakka'a ixxena maso'i hee'llakko'o. Ihukkaarem kaba Waa'i ixxi illagenne keesantakko'oo keenoo miiqakkam luwwii haashaassoo luwwi bee'i keenoo issaa hincaa'eena ixxi Beet maara edde'aa lehaa iittansoo'isa issukko. Oohim ihookkok mishiraachchi sagaranne macceessakko'i sooxxi eroommiinsi heekke'llakkoo'n amma'nnatonne qoxxitakka'a hee'llakko'aarette. Oo mishiraachchi sagarim uullanne yoo minaadab hundinam kuramaakko. An Phaawuloosim ee mishiraachchi sagarina awwaadaanchi ihummo. Kiristoos ixxi orachchi ihu amma'nnaa'n bikkina hawwu hawwinne guullubee'i luwwa an guulleena yaa ki'nnuwwi bikkina hawwoommi hawwonne liiramoommo. Ki'nnuwwina Waa'i sagara guullaa kuroommisina Waa'i iina ka awwaado uwwukkisam anim amma'nnaa'n wixxitina awwaadaanchi ihummo. Oohim lobakat doollinaa qaranchinaa maaxamaa hee'u luwwa kaba Waa'i ixxi minaadabina la'isukko. Maaxamu lombi yoo maassi mulli minaadaphphi lambe'enne hinkaa'n lombi yoohanda'e ihukkisa Waa'i ixxuwwina la'iseena iittukko. Oo lombi yoo maassim Kiristoos ki'nnuwwi woronne hee'immaa soodonne siixxinoommi lombaa. Manni hundim Kiristoosanne li'oo'isina qooroom hundinnem qoxxinsummuuyyii losinsummuuyyii Kiristoos bikkina hundinam alallaantoommo. An eekka issona Kiristoos iina uwwu malaayyinne hundinnem malaayyaamisa i woronne baxukkuuyyi yoohaanninne yakummuuyyi badaroommuulla. An ki'nnuwwina, Lodooqe'enne yo'i keeninaa eese moo'llobee'i keeninaa hundinam hinkaa'nna badarumda'e laqqakkona hasoommo. Oo an badarummok ixxuwwik tiir qoxxoo'isinatte, iittinne mat ikkamisinattee Waa'ika maaxamu luwwa hanqo'isa guullita'a qoossitamisinattee. Oo maaxamu luwwim Kiristoosatte. Waa'ik qooroo'mmekii lachchikii amaxxi hundim maaxamaa yookkok ixxonnette. An eekka yummok ayyim ki'nnuwwa huushisoo woshshinne qawwiisoobee'isinatte. An maarinne ki'nnuwwinne maqire hee'umbee'aarem sawwitinne ki'nnuwwinne maqire yoommo. Ki'nnuwwika ogoraam heechchaa Kiristoosanne qoxxitakka'a amma'nnitakka'a yoontakke'isaa moo'aa liiramoommuulla. Yesuus Kiristoosa Moollanni issitakka'a aa'llakko'isam ixxonne hee'llehe. Ixxonnem xapha issitakka'atii shooho'antakka'atii lossakko'i losa'nnisam amma'nnatonne qoxxehe. Waa'am lobakata galaxxehe. Ayyim ki'nnuwwa finaqaqinnee awwaad bee'i qawwiishshinnee huushisoobee'isa ege'llehe. Ookki Kiristoosiinsi waaraakkoohan ihoo'n manni losaniinsii ka uulli amaxxiinsii waaraakkoohane. Maara edde'u Kiristoosanne Waa'ik hinat hundoomim yoohane. Ki'nnuwwim ixxeensi wo'm heechcha siixxitakko'ookko. Adilluwwinaa gassaaninaa hundinam horoor ixxotte. Ki'nnuwwim anginnette ihubee'i ballachchancha Kiristoosinne mat ihimminne ballachchantakka'a baaxiilaanchi maariinsi annanni ikkakko'ookko. Xammaqantakko'i ammanem ixxenne maqirem waammantakko'ookko. Kiristoosa lehiinsi ki'isu Waa'i baxu baxinne ixxenne maqirem amma'nnatinne ki'nnuwwim lehiinsi ki'llakko'ookko. Baaxiilo baximminnee ki'nnuwwika baaxiilaanchi maara ballachchancha hoogimminnee letakko'oo keen hee'llakko'o. Ihukkaarem Waa'i Kiristoosinne maqirem heechcha uwwukkok ni baaxiil hundam urimminnette. Neese karaa amadaa uullixxamoo kitaabamu See'l badanchom masqalanne saqalaa bi'isaa hoorukko. Kiristoos saqalanchinne daannuwwiinsii gassimmi malaayyi yoo keeniinsii malaayye hooraa ixxuwwa kaa'aa manni hundim ixxuwwi qeefadanto'isa moo'oo'isa issukko. Ee bikkina ayyi manchim ichchi bikkina, aggi bikkina, uguxxi bikkina, aga'n aaggi bikkinaa Usheexxaxxi Ayyaa'm bikkinaa ki'nnuwwanne oogatoone. Oo keen hanenne waaroo luwwina xale'e kobi'lla. Ihukkaarem hanqo'i orachchoom Kiristoosatte. Ayyim «Ki'nnuwwi gaga hoffiissehe» yukkuuyyi, «Waa'i asse'amaanina otossitehe» yukkuuyyi, «Kaalta moo'oommane» yukkuuyyii qoossamoo'n yoo awwaad bee'i ixxi sawwitenne biramukkuuyyii ki'nnuwwa kora'a gatisoobee'isa ege'llehe. Eehido'i manchi amma'nnaanina horoor ihu Kiristoosanne qoxxoo'n yoohane. Qaamafeet hundim nigginne edamaa mat ihaa li'oo'isam Waa'im ixxi mixa'nnisa amma'nnaa'n wixxitem mat issaa li'isookkok ee'isame. Kiristoosinne maqirem letakka'a ka uulli manni losaniinsi annanni ikkakko'oohan ihulas kabad afeebe'em ka uulli mannisa mahina hee'llakkamuulla? Ka uulli manni ijaajindu mahina ijaajantakkamuulla? Oo ijaajim anginnem suuminnem amaddittee nakkitittee yoohane. Oo hundim moo'isookkok awwaaxxakka'a lasage bi'oohan ihukkisa. Oo keenim xale'i manni ijaajoo losishshaa. Oo ijaajjuwwi gaqqi sawwitinne issakkam luwwanne otossimmanne, awwaad bee'isinne gaga hoffiisimmannee gaqqi orachchom adaraassimmannee qooroom yookkoka labookko. Ihukkaarem maa'l mixano kaa'immina oo keen maham awwaadoobee'ane. Eehannata'i Kiristoosinne maqire lehiinsi ki'llakko'aa'lleensi Waa'i makkanne Kiristoos afuuraa yoo beyyonne iimanenne yoo luwwa hassehe. Ki'nnuwwika tiiro iimanenne yoo luwwanne issehe bagaan uullanne yoo luwwanne issitakkotte. Mashka'oomim ki'nnuwwi letakko'ookko. Ki'nnuwwi foorim Kiristoosinne maqirem Waa'i beyyonne maaxamaakko. Oo niina foore uwwu Kiristoos moo'amoo ammane ki'nnuwwim ixxenne maqirem lombinne moo'antakkamo. Ee bikkina ki'nnuwwi woronne yoo luwwa oohim saa'imma, adabi'imma, saa'immi mixano, jor mixanoo Waa'i bikkenne otossakkam luwwa miximmaa ki'nnuwwi woriinsi fissitakka'a hoollehe. Eehido'i bax xooxinne Waa'ik quunqi waarookko. Ki'nnuwwim eraare ee bax woronne hee'llakko'i ammane eekka issitakkam hee'llakko'o. Ihukkaarem kaba quuqimma, nadadimma, hantaaro, game'llanchaa tuussiisoo woshshaa hundam ki'nnuwwi woriinsi fissitakka'a hoollehe. Moosir mannooma ixxi baxinne sheelattakka'a ubbuussakko'isa laqqakka'a ki'nnuwwina'i ki'nnuwwim qophphano woccakkotte. Qooccaanchi kobi'llanne daba'llukkuuyyi lachchinne haareechchi ihukkuuyyi maroo mannooma edde'llakko'ookko. Eehannonne Giriika yimmi, Yihuda yimmi, ballachchamaakkoohane yimmi, ballachchamubee'ane yimmi, mulli uulli mancho yimmi, allaggichcho yimmi, agido yimmii wolaba yimmii bee'e. Mashka'oomim Kiristoos hundamee hundannettemee. Waa'i ki'nnuwwa keesantakko'oo keenoo iittantakko'oo keenoo issaa doo'llu bikkina qishixxato, eroomma, gaga hoffiisimma, maashaalloomaa iyyaqqimmaa eddechchisa edde'llehe. Moollanni ki'nnuwwika baaxiilo haafukkisam mat mato hawwoduta'n ki'nnuwwina'i ki'nnuwwim iyyaqqimminne haafaqqammehe. Ee hundiinsim loboka hundem luwwam karaa amadoo iitto edde'llehe. Hanqinam ki'nnuwwa mat orachchi issaa Waa'i weeshu bikkina Kiristoos uwwu xummi ki'nnuwwa awwonsona. Waa'am galaxxitakkam keen ikkehe. Kiristoosik sagar ki'nnuwwanne wo'mmaa hee'ona. Ki'nnuwwina'i ki'nnuwwim qooroominne hundinnem losixxammehee soqqammehee. Galaxxi mazmuura, lombi mazmuulluwwaa keesamaakkoo mazmuulluwwaa ki'nnuwwi wodanonne Waa'a galaxxitakku'uuyyi zammallehe. Wocinnette ihukko te'im baxinnette ihukko issitakkam luwwi hundam Moollanni Yesuus summinne issehe. Anni Waa'am ixxi kollinne galaxxehe. Are, Moollannanne amma'nnu keenina laboohan ihu bikkina ki aro'ina ijaajame. Aro'o, ki are iitte bagaan isena mogaalli ikkitte. Ooso, Moollanna liiransoohan ihu bikkina ki'nnuwwi anno'inaa amo'inaa hundi luwwannem ijaajammehe. Anno'o, ki'nnuwwik oos tiiro bi'oobee'isina laboobee'isinne quuqqakkotte. Agido, ka uullanne yo'i ki'nnuwwi moollanno'ina hundem luwwannem ijaajammehe. Ijaajantakkamokim manni moo'aa liiramonatte ihoo'n Moollanna badditakku'uuyyi er wodaninne ijaajammehe. Baxxakkam bax hundam manninatte ihoo'n Moollannina awwaaddakkamaannisa issitakka'a wodaninne baxxehe. Eekka issitakkamok ki'nnuwwi awwaaddakkamok Moollanni Kiristoosatte ihu bikkina Moollanniinsi heechchi irifo'i gulumma a'llitakkamisa laqqehe. Jora baxookkok ee jor baxisam siixxookko. Waa'i ayyenam golo'ooyyo. Moollanno'o, ki'nnuwwinam Moollanni iimanenne yoo'isa laqqakka'a ki'nnuwwi agido hanqo'isinnee laboo'isinnee ijaajjehe. Baqitakka'a Waa'a galaxxitakku'uuyyi muttakka'a uttakkambee'isa Waa'i uunxatonne qoxxehe. An ixxi bikkina karamaa yoommi Waa'i sagara oohim Kiristoosika maaxamu luwwa kulloommisina Waa'i niina googo fooqaa'oo'isina ni bikkina Waa'a uunxehe. Eekkam laboo'isinne caakkisaa kuroommisina iina Waa'a uunxehe. Ki'nnuwwina makku amman hundam awwaaxxitakku'uuyyi amma'nnubee'i manninne qoorimminne hee'llehe. Manni hundinam hinkid dabarimmi hasisooda'e laqqakkamisina hundi ammanem ki'nnuwwik woshshi eran ihaa sooqixxisa xee'ona. Tiikiiqoos ki'nnuwwina i duuha'i hundam kurookko. Ixxi iittamaakkoo abbaayyo, amma'nnamaakkoo awwaadaanchoo Moollannina iinninne maqirem awwaadaanchoo. An ixxo ki'nnuwwi beyyo asse'ummok neese hinkid yoomminda'e laqqakkamisinattee ixxim ki'nnuwwa qoxxisoo'isinattee. Amma'nnamaakkoo iittinoommi niyyabbaayyi Anaasimoosam ixxenne maqirem asse'aammo. Ixxi ki'nnuwwaneme. Ka beyyonne ihu luwwi hundam ixxuwwi ki'nnuwwina kuttamo. Iinninne maqirem karamu Arisxirookoosii Baarnabaasina annabbaayyi beet Maarqoosii xummaato asse'llo'ookko. Ixxi bikkina eraarem kurummi Maarqoosim ki'nnuwwi beyyo waarulas aa'llehe. Odim Yoosxoosa yamamoo Iyyaas xummaato asse'aakko. Waa'i adilla'n bikkina iinninne maqire awwaaddam keen Ayihuxxi manniinsi xale'i ixxuwwa. Ixxuwwim eese qoxxisso'oo keeno. Yesuus Kiristoosina awwaadoo Ephphaafirim xummaato asse'aakko. Ixxi ki'nnuwwaneme. Odim ki'nnuwwi amma'nnatonne qoxxitakka'a hee'llakkamisinaa Waa'i issoo luwwi hundam qoossitakka'a laqqakkamisinaa Waa'a uunxoo amman hundam ki'nnuwwinam edaa wodaninnem uunxoohane. Ixxi ki'nnuwwina, Lodooqe'enne yo'i keeninaa Heerafiloosanne yo'i keeninaa lobakata badarukkisa an kuroommo. Iittamaakkoo akiinchi Luqaasii Deemaasii ki'nnuwwina xummaato asse'llo'ookko. Lodooqe'enne yo'i amma'nnaan abbaayyuwwina, Nimfa'anaa is minenne wixxitam amma'nnaaninaa xummaato kullehe. Ka assi kitaaba ki'nnuwwi qananaa'llakka'a lasage Lodooqe'enne yo'i amma'nnaaninam qanannaatamona. Ki'nnuwwim Lodooqe'enne yo'i amma'nnaanina kitaabamu assi kitaaba qananaa'llehe. «Moollanni kiina uwwu awwaado guulle» yitakka'a Arkiphaasina kullehe. Ka xummaato kitaabummok an Phaawuloos i gagame. An karamummisa xaddakkotte. Waa'ik eroommi ki'nnuwwinne maqire ihona. Niyyanni Waa'annee Moollanni Yesuus Kiristoosannee ikkakko'i Tasalonqe'enne hee'llakkam amma'nnaanina Phaawuloos, Sillaasii Ximootoosii asse'llo'i asso. Ki'nnuwwina eroommii xummii ihona. Neese Waa'a uunxinoommi amman hundam ki'nnuwwi hundi bikkinam hundem ammanem Waa'a galaxxinoommuulla. Ki'nnuwwika amma'nnaxxi baxo, iittinne badattakkam badallatoo ni Moollanni Yesuus Kiristoosanne yoo qoxxaalli neeyyatoo Niyyanni Waa'i illagenne sawwinoommuulla. Waa'i iittoo niyyabbaayyuwwa, Waa'i ki'nnuwwa doo'llukkisa lanqaammo. Neese mishiraachchi sagara ki'nnuwwina amandaa waallummok malaayyinnettee Keesammi Ayyaaninnettee guullinaa amma'nnimminnette bagaan xale'i sagarinne ki'nnuwwi beyyo waallummoyyo. Ki'nnuwwinne maqire hee'nnummi ammane ki'nnuwwi bikkina yinaa hinkid hee'nnumda'e laqqakkamo. Ki'nnuwwanne lobakat hawwi afukkaarem Keesammi Ayyaan uwwu liiranchinne Waa'i sagara aa'llakko'i bikkina neesee Moollannaa labbakkam keen ikkakko'ookko. Ee bikkina ki'nnuwwi Maqeedoonannee Akaayannee yo'i amma'nnaan hundinam kobi'llishshi ikkakko'ookko. Ki'nnuwwi kuttakko'i Waa'ik sagar xale'i Maqeedoonannee Akaayannee uullaa gatukkoyyo. Ihukkaarem Waa'anne yoo ki'nnuwwik amma'nnat beyyi hundam afaakko. Neese ee bikkina maham kurimmi hasisooyyo. Ki'nnuwwi beyyo waallummi ammane ki'nnuwwi neese erisa aa'llakko'isaa Waa'i bikkenne mulluwwina awwaadimma uttakka'a hee'oohaanninaa hanqo'i Waa'inaa awwaaddakkeena daba'llitakko'isaa ki'nnuwwi bikkina kuttamuulla. Odim iimaniinsi waaru Waa'i Beet Yesuusam egettakkamisa kuttamuulla. Ixxim Waa'i lehiinsi ki'isukkanee waaroo Waa'i quunqiinsim gatisukkanee. Iyyabbaayyuwwa, neese ki'nnuwwi beyyo waarimmi kora'atte ihubee'isa ki'nnuwwi gagim laqqakkamo. Ki'nnuwwi laqqakkamisam kanniinsi illageenim neese Filiphphisiyus beero'onne hawwisakko'ookkoo sholliisakko'ookkoo. Ihukkaarem lobakata sabakkonam Waa'ika mishiraachchi sagara ki'nnuwwina kulloommisina Waa'i niina iggimma uwwukko. Neese ki'nnuwwa songummi sogitan huushanchiinsi te'im jor sawwitiinsii qawwiishshiinsii waarubee'ane. Ihona bagaan Waa'i neese amma'nnaa mishiraachchi sagara yabo uwwu bikkina ni wodano saarayyaa moo'oo Waa'a liiransineena woncoommo bagaan manna liiransineena woncoommoyyo. Eekka Waa'im la'oo'isanne qawwiisimminne te'im mat luwwa siixximmi mixano maaximminne hore'em woncumbee'isa laqqakkamo. Neese Kiristoosina asse'amaan inkummisinnem manniinsi oohim ki'nnuwwiinsi te'im mulli keeniinsi lomba siixximmi xansiisoohan hee'ukko. Ihukkaarem siixxineena hansummoyyo. Ooso li'issam meentichcho iseka ooso erisa abooyyitamisam ki'nnuwwa abooyyinummo. Ki'nnuwwa lobakata iittinummi bikkina Waa'ika mishiraachchi sagara kurimmi xale'i ihoo'n ni foorem yakkota'n ki'nnuwwina higinsaa uwwineena gundaa hee'nnummo. Niyyabbaayyuwwa, neese Waa'ika mishiraachchi sagara kullummuuyyi «Ki'nnuwwanne matonnem kee'mminoommoyyo» yimminne ballaa hiimoo badallummuuyyii yakinummuuyyii banxummisa laqqakkamo. Amma'nnitakko'i kee'n beyyonne hinkido'i muccuroominne, xabbeenoominnee miiqakkambee'isinnee hee'nnummisa ki'nnuwwii Waa'ii laqqakkamo. Qachchina anni issoo'isa neesem ki'nnuwwa annannichchom songummuuyyi, qoxxinsummuuyyii ijaanjummuuyyii ixxi adillaninaa lombinaa weeshu Waa'ina laboo heechcha hee'llakkamisa issinummisa laqqakkamo. Neese hundem ammanem Waa'a galaxxinoommi mashka'i kane; Waa'i sagara niinniinsi ki'nnuwwi macceessakko'i ammane hanqo'i Waa'i saga'llisa issitakka'a aa'llakko'o bagaan manni saga'llisa issitakka'a aa'llakko'oyyo. Oohim amma'nnitakko'i ki'nnuwwanne baxukkuuyyi yoohane. Niyyabbaayyuwwa, Yesuus Kiristoosanne amma'nnitakka'a Waa'i minaadab ikko'i Yihuxxi uullanne yo'i amma'nnaano labbakko'ookko. Mashka'oomim ixxuwwi Ayihuxxi manniinsi hawwo aa'llo'isam ki'nnuwwim ki'nnuwwi uulli manniinsi hawwo aa'llakko'ookko. Oo Ayihuxxi manni Moollanni Yesuusaa hiraagaanoo shito'ookko. Odim neesem uulliinsi hollito'ookko. Waa'am kichche'issamuulla. Manni hundinnem uullixxantamuulla. Mulli minaadab gattamisina mishiraachchi sagara kulloombee'isa hoorimminne amman hundam gabal bee'i baaxiilo baxxamuulla. Lasaanchonne Waa'ik quunqi ixxuwwanne dillaakko. Niyyabbaayyuwwa, tiirinnette ihoo'n maarinne hofqax ammanina ki'nnuwwiinsi annanni inkummaanniinsi ki'isaa ki'nnuwwika ille odim moo'nneena lobakata qulunxaammo. Ki'nnuwwi beyyo waalleena hansaa hee'nnummo. An i gag Phaawuloosim ki'nnuwwi beyyo daba'llaa waareena mataagge ihoo'n lobakat ammane hasaa hee'ummo. Ihukkaarem Sheexaanchi waalloombee'isa qolaa hoorukko. Lasaanchonnem neese Moollanni Yesuus waaroo ammane siixxinoommi neeyyat, liiranchii ixxi illagenne bakke'nnoommi kaachchi mare'ii ki'nnuwwayyonnihe? Hanqinam ki'nnuwwi niina lombaa liiranchaa. Kanniinsi eehid iyyaqqineena xannumbee'i bikkina Atee'n beero'onne mullam lasonne ganteena sawwite mullaa amma'nnatonne ki'nnuwwa qoxxisoo'isinaa sogoo'isinaa niinninne maqire Kiristoosika mishiraachchi sagara kurookkoka Waa'ina awwaadaanchi niyyabbaayyi Ximootoosa ki'nnuwwi beyyo asse'nnaammo. Oohim ka hawwonne ayyim heekke'oobee'isinatte. Hawwim niina saam ihukkisa ki'nnuwwi gagim laqqakkamo. Neese ki'nnuwwinne hee'nnummi ammane hawwi neesenne afoo'isa gaassinaatim ki'nnuwwina kullaa hee'nnummo. Ki'nnuwwi laqqakkamisam oo hawwi neesenne afaakko. Ee bikkina lobakat ammane iyyaqqeena xanimma hoogummi bikkina ki'nnuwwika amma'nnato la'eena hasaa ixxo ki'nnuwwi beyyo asse'ummo. Asse'ummokim ayyi la'ukko «Sheexaanchi ki'nnuwwa keenaa niikka badallato kora'i issookko» yaa baddaammatette. Ihukkaarem kaba Ximootoos ki'nnuwwi beyyiinsi ni beyyo waaraa ki'nnuwwi amma'nnaxxi bikkinaa iitti bikkinaa er woshsha niina kuraakko. Odim neese ki'nnuwwa moo'nneena qulunxoommisam ki'nnuwwim hundem ammanem neese moo'llakkeena quluxxakkamisaa eroomminne sawwitakkamisaa kuraakko. Ee bikkina niyyabbaayyuwwa, neesenne afu kichchechchannee hawwonnee hundannem ki'nnuwwi amma'nnatinne ki'ukkok neese qoxxinaammo. Mashka'oomim Moollannanne ki'nnuwwi qoxxitakka'a hee'immi niina heechcha. Ki'nnuwwi bikkina neese Waa'a galaxxinoommo. Galaxxinoommokim Waa'i illagenne niina ki'nnuwwi bikkina yoo liiranchi bikkinatte. Ballaa hiimoo qoxxinaa Waa'a uunxinoommuullakim neese ki'nnuwwa ni illinne moo'nneenattee ki'nnuwwi amma'nnatonnem hanqatu luwwa wonshineenattee. Kaba niyyanni Waa'i ixxi gagii ni Moollanni Yesuus Kiristoosii ki'nnuwwi beyyo waalloommisina ni googo xabbaa'aa awwonsona. Neese ki'nnuwwa iittinoommisam ki'nnuwwina'i ki'nnuwwim iittantakkam iitto manni hundam iittitakkam iitto ni Moollanni edonaa lonsonaa. Ee'isinne ni Moollanni Yesuus ixxi minaadab hundinnem maqirem waaroo ammane ki'nnuwwa qoxxisaa Niyyanni Waa'i illagenne muccuraa miiqakkam luwwi bee'anee issaa uullisookko. Niyyabbaayyuwwa, Waa'a liiransitakku'uuyyi hinkid hee'llakkamda'e niinniinsi lossakko'ookko. Kabadem Moollanni Yesuus summinne ki'nnuwwa uunxinoommokii songoommokii kanniinsi illageen issitakku'uuyyi yoontakke'isam eddakka'a eddakka'a issitakkamisinatte. Mashka'oomim Moollanni Yesuus kollinne inkaa ki'nnuwwina hinkido'i gatti ogora uwwinumda'e laqqakkamo. Waa'ik doo'l saa'immiinsi qee'llitakka'a keesantakkamisinatte. Ki'nnuwwiinsi annannichchim ixxi gaqqi orachcho muccuroominnee lombinnee hinkid egerooda'e la'ona. Waa'a laqqambee'i jor minaadaphphisa ikkakku'uuyyi saa'imma mixxakkotte. Eehido'i woshsha ki'nnuwwina gaassinaatim qoxxinsaa kullummisam ayyim ixxi abbaayyo baaxiilonne ubbuusaakkoohanee huushisaakkoohanee ihulas ee woshshina hundinam Waa'i baado miqisookko. Waa'i neese weeshukkok muccuroominne hee'nnoommisinatte bagaan haashaarammummuuyyi hee'nnoommisinatteyyo. Eehannata'i ka ijaajo sabookkok ayyim manna sabaakkoohan ihoo'n ixxeka Keesammi Ayyaana ki'nnuwwina uwwoo Waa'a sabaakkoohane. Ki'nnuwwina'i ki'nnuwwim iittantakkamisa Waa'iinsi lossakko'i bikkina abbaayyuwwa iittimmi bikkina ki'nnuwwina ayyim kitaabimmi hasisooyyo. Hanqo'isam Maqeedoonanne hundannem yo'i abbaayyuwwi hundam iittitakkamo. Iyyabbaayyuwwa, eddakka'a eddakka'a iittantakkamisina qoxxinsaa songoommo. Odim ishitiggitakka'a hee'llakkamisinaa ki'nnuwwi gaqqi baxom baxxakkeena sawwitakkamisinaa kanniinsi illageen ijaanjummisam ki'nnuwwi anginnem baxxakkamisina songoommo. Ee'isinne amma'nnubee'i kee'n beyyonne lombi yoo keen ikkakkamo. Odim ki'nnuwwina hasisoo luwwina ayyennem bakke'llakkoo'n ki'nnuwwi gaga xantakka'a hee'llakkamo. Niyyabbaayyuwwa, soodbee'i kee'nnisa kichche'llakkambee'isina leto'i kee'n bikkina hanqo'i woshsha laqqakkona hansoommo. Yesuus lehaa lehiinsi ki'ukkisa neese amma'nninoommo. Ee'isam Yesuusanne amma'nnita'a leto'i keenom Yesuusinne maqirem Waa'i worookko. Moollanni ixxi gagim kurukkisam neesem kulloommok kane. Oohim Moollanni waareebe'i afeebe'e foorinne hee'nnoommi keen leto'i keeno gaassinoombee'isa ki'nnuwwina kulloommo. Ee ammane ijaacci sagar, Waa'i asse'amaa'n awwonsaanchi sagarii Waa'i xurumbulli sagarii macceesamookko. Moollanni ixxi gagim iimaniinsi dillookko. Kiristoosanne amma'nnita'a leto'i keenim gaassita'a ki'llamo. Ee lasage neese foorinne hee'nnaa gantummi keen Moollanna hafachchanne aa'nneena ixxuwwinne maqirem duubanne filloommo. Ee'isinne neese hundem ammanem Moollanninne maqirem hee'nnoommo. Ee bikkina ki'nnuwwina'i ki'nnuwwim ee sagarinne qoxxixxammehe. Niyyabbaayyuwwa, oo luwwi hinka'i ammanennee hinka'i doollennee ihooda'e ki'nnuwwina maham kitaabimmi hasisooyyo. Mashka'oomim Moollanni waaroo ayyaam hiimonne waaroo gamaanchisa ihaa waaroo'isa ki'nnuwwi gagim guullitakka'a laqqakkamo. Manni luwwi hundim «Xumma, meegaa meechchaataa» yihonam lamfoor meentichcho xuuchchi amadoo'isa dangonnem bichchi ixxuwwanne ubookko. Ixxuwwi eehanniinsi hore'em xottamoyyo. Iyyabbaayyuwwa, ihukkaarem oo ayyaam ki'nnuwwa gamaanchisa amaadoobee'isa ki'nnuwwi tuunsi woronneyyo. Mashka'oomim ki'nnuwwi hundim caakkinaa ballinaa ooso. Neesem hiimina te'im tuunsina oosoyyo. Ee bikkina neese baqinaa gaga ege'llinona bagaan mulli kee'nnisa diriilloone. Diriittam keen hiimonne diriittamo; dimbitam keenim hiimonne dimbitamo. Ihukkaarem neese caakkiinsette inkummi bikkina gaga ege'llinaa hee'nnona. Amma'nnatoo iittoo biqenne issakkam o'l mu'uxxisa issaqqinona. Gatimmi neeyyatom xaa'l qoobe'isa ni horoorenne issinona. Waa'i neese doo'llukkok bi'iseenatte ihoo'n ni Moollanni Yesuus Kiristoos kollinne gantoommisinatte. Ixxi niina yaa lehukkok neese hee'nnummom te'im lenummom ixxenne maqirem hee'nnoommisinatte. Ee bikkina kaba issitakkamisam ki'nnuwwina'i ki'nnuwwim qoxxixxammehee hara'mmammehee. Niyyabbaayyuwwa, ki'nnuwwi lambe'enne badattam keeno, Moollanni kollinne ikka'a gassitam keenoo soggam keenoo lonsitakkamisina uunxinoommo. Ixxuwwi baxxam bax bikkina yitakka'a iittinne ixxuwwa lobakata lonsehe. Ki'nnuwwi lambe'ennem xummi hee'ona. Niyyabbaayyuwwa, ki'nnuwwa songoommok ceemmaalluwwa axeettakkamisinatte. Badditam keen iggitamisa issitakkamisinatte, hoogu keeno hara'mmitakkamisinattee manni hundikam iyyaqqitakkamisinattee. Ki'nnuwwiinsi ayyim jorina jora dabaroobee'isa ege'llona; ihukkaarem hundem ammanem mat mullaannina eroka issimma hasona. Ee'isam manni hundinam eroomma issitakkeena hassehe. Hundi ammanem liirammehe. Hundi ammanem Waa'a uunxehe. Duuha'i hundinnem Waa'a galaxxehe. Yesuus Kiristoosanne ikkakko'i bikkina Waa'i ki'nnuwwiinsi hasookkok eehane. Keesammi Ayyaa'n baxo ifiissakkotte. Kuramoo Waa'i sagaram gaddakkotte. Ihukkaarem hundem luwwam keentakka'a moo'llakka'a eroka qoxxissakka'a amaddehe. Jor luwwi hundiinsi qee'llehe. Xumma uwwoo Waa'i ixxi gagim ki'nnuwwa hundisinnem muccussona. Moollanni Yesuus Kiristoos waareebe'i afeebe'e ki'nnuwwika tiiro, fooree orachchoo miiqakkam luwwi bee'i muccur issaa egerona. Ki'nnuwwa weeshukkok amma'nnamaakkoohan ihu bikkina eekka issookko. Iyyabbaayyuwwa, niina Waa'a uunxehe. Amma'nnaan hundam er suunqanchinne xummaatissehe. Ka asso amma'nnaanina hundinam qananaa'llakkamisina Moollanni summinne yabo uwwaammo. Ni Moollanni Yesuus Kiristoosik eroommi ki'nnuwwinne maqire ihona. Niyyanni Waa'annee ni Moollanni Yesuus Kiristoosannee ikkakko'i Tasalonqe'enne hee'llakkam amma'nnaanina Phaawuloos, Sillaasii Ximootoosii asse'llo'i asso. Niyyanni Waa'ikii ni Moollanni Yesuus Kiristoosikii eroommii xummii ki'nnuwwina ihona. Niyyabbaayyuwwa, ki'nnuwwik amma'nnat lobakata li'ukkuuyyi maru bikkinaa ki'nnuwwina'i ki'nnuwwim iittantakkam iitti exxukkuuyyi maru bikkinaa neese hundem ammanem Waa'a galaxximmi hasisookko. Eekka issimmim niina laboohane. Ee bikkina neese ni gagim amma'nnaa'n wixxittuwwina ki'nnuwwanne bakke'nnummisa kulloommok ki'nnuwwanne afu lobakat hawwonnee asqachchannee hundannem iyyaqqimminne amma'nnatonne qoxxitakka'a yoontakke'isa. Ee hawwo aa'llakkam Waa'i adillanina labbakkam keen ikkakkamisina moo'isoo Waa'ik oogato'i xabbeena. Waa'i xabbeenisa oogatoohan ihu bikkina ki'nnuwwa hawwissam keeno Waa'i dabaraa ixxuwwam hawwisookko. Hawwo aa'llakkam keeninam Moollanni Yesuus Kiristoos ixxaanninne malaayyaam asse'amaaninne maqirem gii'l labaninne iimaniinsi waaroo ammane niinninne maqirem usheexxato uwwookko. Waa'a laqqambee'i keenoo ni Moollanni Yesuus mishiraachchi sagarina ijaajantambee'i keenoo ee ammane baado miqisookko. Ixxuwwim Moollanni illagiinsii lombi yoo ixxi malaayyiinsii annanni ikka'a doolli hundam hee'oo bichchi woronne hawwitamo. Neese ki'nnuwwina kulloommi woshshi ki'nnuwwi beyyonne amma'nnamaakkoohan ihu bikkina ixxi doo'llu kee'n illagenne lomba siixxeenaa ixxonne amma'nnito'i keen hundi illagenne maalallato siixxeenaa waaroo ammane hawwitamo. Neese hundem ammanem ki'nnuwwina Waa'a uunxinoommuullak ni Waa'i weeshu weeshanina labbakkam keen issoo'isina, ki'nnuwwim er luwwi hundam hassakkamisinaa amma'nnaxxi baxo baxxakkamisinaa ixxi malaayyinne guullaa wonshoo'isinatte. Odim ni Moollanni Yesuusik summi ki'nnuwwanne lomba siixxoo'isinattee ki'nnuwwim ixxeensi lomba siixxitakkamisinattee. Oohim ni Waa'i eroomminnettee Moollanni Yesuus Kiristoos eroomminnettee. Niyyabbaayyuwwa, ni Moollanni Yesuus Kiristoos waa'l bikkinaa ixxenne edammeena wixxinoommi wixxixxi bikkinaa ki'nnuwwa uunxinoommuullak neese Waa'i sagara kullummuuyyi te'im woncummuuyyi te'im niinniinsi kitaabamukkan issitakka'a «Moollanni waaroo ayyaam afaakko» yimminne ki'nnuwwik tiir qaqqisaa heekke'oobee'isinattee muggoobee'isinattee. Ayyim ki'nnuwwa ma'isinnem qawwiisoone. Mashka'oomim gaassaa lasaanchi lagimmi ihoo'nnii ijaajamoobee'i bichchi beet waaroo'nnii oo ayyaam afooyyo. Ixxi odim Waa'a yakkam luwwinnee Waa'ina otossakkam luwwinnee uullixxamukkuuyyi ixxi gaga lobakata iimiimaa'ukkuuyyi Keesammi Minenne maraa afuuraa «An Waa'a» yukkuuyyi alallaatookko. Ki'nnuwwinne maqire hee'ummi ammane eekka kurummisa sawwitakkamoyyonnihe? Ixxena yamamu amman afeebe'e kaba moo'amoobee'isa egedaa hooru luwwi mada'e ihukkisa laqqakkamo. Ihona bagaan ijaajamoobee'ek maaxaqqanne kaba baxukkuuyyi yookko. Baxookkokim ixxi moo'amoobee'isa kaba egedaa hoorookkok googiinsi laa'eebe'i afeebe'e. Ee lasage ijaajamoobee'ek moo'amookko. Ixxom Moollanni Yesuus lombinne moo'amaa suumiinsi firoo fooshshinne duraa bi'isaa hoorookko. Oo ijaajamoobee'ek Sheexaanchi malaayyinne qophpha'n agannuwwaa maalalsiisoo mare'uwwaa hundam issukkuuyyi waarookko. Gatteena hanqa iittimma sabbo'i bikkina bi'llam keenonne jor qawwiishshi hundam eebookko. Ee bikkina ixxuwwi qophpha'n luwwanne amma'nnitamisina huushisoo malaayye Waa'i ixxuwwina asse'ookko. Oohim ihukkok «Hanqanne amma'nninoommoyyo» yita'a baaxiilo baxxeena liirantam keenonne hundannem oogato'i afoo'isinatte. Moollanninne iittantakko'oo niyyabbaayyuwwa, neese ki'nnuwwi bikkina yinaa hundem ammanem Waa'a galaxximmi hasisookko. Mashka'oomim Keesammi Ayyaaninne keesantakka'atii hanqannem amma'nnitakka'atii gattakkamisina Waa'i ki'nnuwwa luxxi keen issaa doo'llaakko. Neese ki'nnuwwina kullummi mishiraachchi saga'l kollinne eehannina weeshaakko. Weeshukkokim ni Moollanni Yesuus Kiristoosika lomba siixxitakkamisinatte. Eehannata'i niyyabbaayyuwwa, qoxxitakka'a uullehe; ni summinnettem ihukko ni assi kitaabinne neese ki'nnuwwina losinsummi losano qoxxissakka'a amaddehe. Ni Moollanni Yesuus Kiristoos ixxi gagii neese iittaa ixxi eroomminne heer heerina hee'oo qoxxishshaa soodonne ihoo er luwwaa uwwu niyyanni Waa'ii ki'nnuwwi wodano er baxinnee sagarinnee hundinnem qoxxisona. Lasaanchonnem niyyabbaayyuwwa, ki'nnuwwi lambe'enne ihukkisam Moollannik sagar qaqqisaa haraaroo'isinaa lomba siixxoo'isinaa niina Waa'a uunxehe. Mishiraachchi sagaranne hundi amma'nnoobee'i bikkina boqqi manniinsii jor manniinsii Waa'i neese gatisoo'isina Waa'a uunxehe. Moollanni amma'nnamaakkoohan ihu bikkina ki'nnuwwa qoxxisookkoo ee joriinsi egerookkoo. Neese ijaanjummi luwwa kaba issitakku'uuyyi yoontakke'isaa ka lasagem issitakkamisaa Moollanni kollinne ki'nnuwwa amma'nninoommo. Moollanni ki'nnuwwika wodano Waa'i iittoo Kiristoos iyyaqqimmaa qoossitakka'a laqqakkamisina issona. Niyyabbaayyuwwa, neese losinsummi losa'nnisa ihoo'n baxo ceemmaalli abbaayyuwwiinsi hundiinsim annanni ikkakkamisina Moollanni Yesuus summinne ijaanjoommuulla. Neese ki'nnuwwinne maqire hee'nnummi ammane ceemmaalluwwi inkumbee'isa laqqakkam bikkina neese labbakka'a hinkid hee'immi hasisooda'e ki'nnuwwi gagim laqqakkamo. Diinate minqoo'n ayyekam hurbaata intummoyyo. Ihukkaarem «Ki'nnuwwanne ayyennem kee'mminoommoyyo» yimminne ballaa hiimoo badallummuuyyii yakinummuuyyii banxam hee'nnummo. Neese eehid issinoommok ki'nnuwwi neese kobi'llitakkamisina hansaatette bagaan ki'nnuwwiinsi hara'mmato siindeena niina hanqi bee'aateyyo. Ki'nnuwwinne maqire hee'nnummi ammanem «Baxoobee'ek ayyim itoone» yinaa ijaanjaammo. Kabadem ihukkaare ki'nnuwwiinsi mat mat keen ceemmaalluwwaa aagisoobee'i luwwanne aaggu'uuyyi baxxoo'n hee'llam keenoo ikko'isa macceensaammo. Eehido'i manni ishitiggita'a baxxu'uuyyi ixxuwwi heechchina hasisoo luwwa siixxitamisina Moollanni Yesuus Kiristoos summinne ijaanjoommoo qoxxinsaa songoommoo. Niyyabbaayyuwwa, er baxo baxxakkeena hooggakkotte. Ayyi la'ukko ayyi manchim ka assi kitaabanne ijaanjummi ijaajo sabookkok hee'ulas ee mancho qoossitakka'a laqqehe. Oo manchi tuuroo'isinam ixxena ki'nnuwwinne mah mateeyyoomim hee'ona. Ihukkaarem ixxo abbaayyisa issitakka'a soggehe bagaan masokkichchisa issitakka'a moo'llakkotte. Xumma uwwoo Moollanni ixxi gagim hundem ammanem hundisinnem ki'nnuwwina xumma uwwona. Moollanni ki'nnuwwinne hundinnem maqire ihona. An Phaawuloos i gagim ka xummaato i anginne kitaabaammo. An kitaabummi assonne hundannem ku mare'i yoohane. An ka'isa kitaabaammo. Ni Moollanni Yesuus Kiristoosik eroommi ki'nnuwwinne hundinnem maqire ihona. Neese Gatisaanchi Waa'ii niina neeyyat ihu Yesuus Kiristoosii ijaajjo'aare Yesuus Kiristoosina asse'amaanchi ihummi iinniinsi Phaawuloosiinsi Anni Waa'ikii ni Moollanni Yesuus Kiristoosikii eroommi, qishixxatii xummii amma'nnatinne hanqo'i i beet ikkitti Ximootoosina ihona. An Maqeedoona marummuuyyi at Efeesoonanne afuuttoo'isina keese uunxoommok mat mat keen niihaanniinsi annanni losano maham losissambee'isa ijaajjoo'isinatte. Odim amma'nnatinne Waa'i baxina maham awwaadoobee'i fitancha eeboo heesso kurimmaa lugumo afakkambee'i shumo'o xigimmaa uttamisina ijaajjoo'isinatte. Neese ijaanjummi ijaaccek horoor woshshi muccur wodaniinsi, er tiiriinsii hanqo'i amma'nnatiinsii firoo iitto mat mat keen eehanniinsi huushanta'a awwaad bee'i fitanchanne daba'llito'ookko. Ixxuwwi woccam luwwi te'im hanqisa issita'a losissam luwwi mada'e ihukkisa laqqoo'nnim Seera losisaano yamanta'a weeshanteena hassamo. Ayyim Seera laboo'isinne awwaaxxulas danaam ihukkisa lanqoommo. Seer uullukkok muccur keeninatte ihoo'n Seera ginditam keeninatte, ijaajantambee'i keeninatte, Waa'a sabbam keeninatte, baaxiilaammuwwinatte, muccuroombee'i keeninatte, haashaarammi keeninatte, annaa amaa shitam keeninatte, manna shitam keeninatte, saa'aaninatte, meenti bikkenne gooninne iinse'llam keeninatte, manna agga'a massitam keeninatte, qophphanaaninatte, qophphanonne hide'llam keeninattee hanqo'i losaninne iittamoobee'i luwwi hundam issitam keeninattee. Oo hanqo'i losanim siidamookkok maasse'amaakkoo Waa'iinsi an kuroommisina iina yabo uwwamu lombaam mishiraachchi sagarannette. An ixxena awwaadoommisina amma'nnamaammoohan issaa doo'llaa iina malaayye uwwu ni Moollanni Yesuus Kiristoosa galaxxoommo. An ixxo eraare game'llaammoohane, hawwisaammoohanee sholliisaammoohanee hee'ummo. Ihukkaarem an amma'nnoo'n illageen lachcha hoonginne issummi bikkina iina haafukko. Yesuus Kiristoosinne yoo mateeyyoominne iina uwwu amma'nnatinnee iittinnee ni Moollannik eroommi iina lobakata lophphukko. «Baaxiilaano gatiseena Kiristoos ka uulla waarukko» yamamukkok hanqame; amma'nnimmim hasisoohane. Baaxiilaaniinsi hundiinsim lophphoommi baaxiilaanchi anette. Ihukkaarem heer heerina hee'oo heechcha siixxiteena Yesuus Kiristoosanne amma'nnitam keenina kobi'l ihoommisina baaxiilaaniinsi hundiinsim lophphoommi baaxiilaanchi eesenne ixxeka gabalbee'i iyyaqqimma la'iseena ixxi iina haafukko. Doolli hundinam adilina lehoobee'aanninaa moo'amoobee'aanninaa mexxo'i Waa'ina galatii lombii heer heerinam ihona! Aameen. I beet Ximootoosa, an keese ijaajoommi ijaaj ki bikkina hiraagaan gaassi kutto'isam ee sagara qoxxitaa awwaaxximminne erisa qasantoo'isinatte. Amma'nnatii er tiirii kiina hee'ona. Mat mat keen ixxuwwi tiir acceeqasonam sabba'a amma'nnatonne hakkammi bee'i faraxxisa ikko'ookko. Ee keeniinsim Waa'a game'llimma uttamisina Sheexaanchina higisaa uwwummi Heemeeniwoosii Alaksaandiroosii yo'o. Hundi luchchiinsim gaassitakka'a ki'nnuwwina hasisoo luwwinaa mulli keeninaa uunximminnee galaxximminnee manni hundinam Waa'a uunxitakkamisina ki'nnuwwa uunxinoommo. Odim neese hundisinnem wocbee'i xumminne Waa'a baddinummuuyyi lombinne hee'nnoommisina adilluwwinaa hundiinsi hanaan yo'i gassaan hundinaa Waa'a uunxehe. Oohim neese Gatisaanchi Waa'i illagenne eranee liiransoohanee. Ixxim manni hundim gatoo'isinaa hanqa la'oo'isinaa hasoohane. Matem Waa'i yookko. Waa'i lambe'ennee manni lambe'ennee yoo lambe'i manchim manchi ihaa waaru mexxo'i Yesuus Kiristoosatte. Manni hundam gatiseena ixxi gaga tissi issaa uwwukkokim ixxotte. Oohim amman afukkaare Waa'i manna gatiseena iittukkisa kuroohane. Anim amma'nnatoo hanqaa alallaateena asse'amaanchoo losisaanchoo ihaa mulli minaadaphphi beyyo asse'amummok ee mashka'innette. An kaka wocummuuyyi hanqa wocoommo bagaan qophphanoommoyyo. Goon quuqimmaa wocanchaa uraa beyyi hundannem muccur mannoominne Waa'a uunxoo'isina hasoommo. Meentim ixxuwwi gaga heeshaa'lla'a laboo eddechcha edde'imminne ixxuwwi gaga wereeggissona bagaan shurubba dadisimminne te'im worqa issaqqimminne te'im bito xee'aalli luwwa issaqqimminne te'im bito xee'aalli eddechcha edde'imminne ixxuwwi gaga wereeggissoone. Ihukkaarem Waa'anne amma'nnu meentina laboo er baxo baxxona. Meenti hundi luwwannem ijaajanchinne woc bee'eka lossona. Meenti losisonaa goona ijaajonaa hasoommoyyo. Issuwwi cawwita'a uttona. Mashka'oomim gaassaa qooccamukkok Addaamatte. Ee lasage Heewwaane qooccanto'o. Meentichcho huushanta'a Waa'i seera gindito'o bagaan Addaam huushamukkoyyo. Ihukkaarem meentichcho amma'nnatinne, iittinne, muccuroominnee laboo'isinnee hee'llolas ooso qarimminne gattamo. «Ayyi manchim amma'nnaanina awwonsaanchi iheena hasulas lombi yoo baxo hasaakko» yoo woshshi hanqame. Amma'nnaano awwonsaanchi miiqakkam luw bee'ane, mat meentichchi aro'o, iyyaqqoohane, gaga ijaajoohane, ogoraamo, koyya aa'oohane, losiseena xanoohane, dimboobee'ane, atanaachcha fissoobee'ane, maashaalla, xummaanchoo diinate iittoobee'anee ihimmi hasisookko. Ixxi mi'n abaroosa erisa gassoohane, ixxi oosim ixxena hundi luwwannem ijaajamoohanee ixxo lonsoohanee ihimmi hasisookko. Ixxi mi'n abaroosa gasseena xanubee'i manchi Waa'i minaadaba hinkid gasseena xanookko? Awwonsaanchi ihoo manchi Sheexaanchi oogatamukkisam biranchinne fugamaa oogatamoobee'isina haareechcho amma'nnaakkoo manchi ihimmi hasisooyyo. Ixxi gaga sholle'aa Sheexaanchaannonne shikkanne aagaa uboobee'isa lophphaatim amma'nnubee'i manni beyyonne er sad yoo manchi ihimmi hasisookko. Odim amma'nnaanina awwaaddam keenim manni lonsoo keeno, lamo woccambee'i keeno, lobakat woyi'n diqaasa agimmik losanbee'i keenoo diinate iittitambee'i keenoo ihimmi hasisookko. Odim caakkaa la'amu amma'nnaxxi hanqo'i woshshanne muccur wodaninne qoxxita'a uullito'oo keen ihimmi hasisookko. Ixxuwwi gaassita'a keenantona. Ixxuwwannemdu miiqakkam luwwi bee'i keen ikkolas awwaaddona. Ee'isam ixxuwwi meentim manni lonsoo keeno, hamtambee'i keeno, iyyaqqitam keenoo hundi luwwannem amma'nnanto'oo keenoo ihimmi hasisookko. Amma'nnaano awwaadoo keen mat meentichchona aro'oo ixxuwwi oosoo ixxuwwi mi'n abaroosaa erisa gassoo keenoo ihimmi hasisookko. Amma'nnaanina erisa awwaaddam keen ixxuwwi gagina lobakat lomba siixxitamo. Yesuus Kiristoosanne yoo amma'nnatonnem lobakat iggimma siixxitamo. «Abbis ammanenne ki beyyo waaroommo» yaa sawwummaarem kiina ka asso kitaabaammo. Ayyi la'ukko dasumta'nnim Waa'i mi'n abaroos hinkid hee'immi hasisooda'e laqqoo'isinatte. Oo Waa'i mi'n abaroosim hanqina utubaa shooho'oo ihu Waa'i minaadaba. Waa'a labimmik maaxammi woshshi lobakata xillaalla. Oohim Kiristoos «Manchi ihaa moo'amukko. Muccur ihukkis Keesammi Ayyaaninne la'amukko. Asse'amaaninam moo'amukko. Uulli minaadab hundinam alallaatamukko. Uulli hundannem amma'nnamukko. Lombinne iimane marukko» yoohane. Lasaanchi doollenne mat mat keen huushisoo ayyaannuwwaa habus losanoo awwontu'uuyyi amma'nnatiinsi ubbamisa Keesammi Ayyaan caakkisaa kuraakko. Eehido'i losan waarookkok labishshinne qophphano woccam bikkina ixxuwwik wodan xaarinne guba'akko'i orachchisa ihaa duudu bikkina ixxuwwi tiir acceeqasoobee'i manniinsette. Oo keen eebaqqancha hoottamo. Waa'anne amma'nnita'a hanqa laqqam keen Waa'a galaxxita'a ittam Waa'i qooccu hurbaatam ittambee'isa hoottamo. Waa'i qooccu luwwi hundim danaam ihu bikkina Waa'a galaxxakku'uuyyi aa'akkolas sabakkam luwwi mahim bee'e. Mashka'oomim Waa'i sagarinnee Waa'a uunximminnee maasse'amaakkoohane. Ee ijaajo amma'nnaanina losissilas at awwontoo amma'nnaxxi sagarinnee hanqo'i losaninnee li'llaattoohan ikkaa Yesuus Kiristoosina er awwaadaanchi ikkootto. Waa'i lombina ihoobee'i awwaad bee'i heessiinsi ki gaga ege'lle. Ihukkaarem Waa'ina ijaajancha lossittuuyyi mare. Orachchina mat mat luwwa losisimmi hoffokam awwaadookko. Ihukkaarem Waa'a baddimmi ka heechchinaa lasaqqi heechchinaa neeyyat yoohan ihu bikkina hundisinnem awwaadookko. Ku woshshi manni hundim amma'nnimmi hasisoo hanqo'i woshsha. Neese hee'oo Waa'anne neeyyato issinummi bikkina badalloommoo gubbammoommoo. Oo hee'oo Waa'i manni hundam lophphaatim amma'nnu keeno gatisoohane. Ka woshsha ijaajee losisee. Ayyim kiikka oosoommano moo'aa gadoone. Ihukkaarem at woccoo wocannee hee'lloo heechchannee iittinne, amma'nnatinnee muccuroominnee amma'nnaanina kobi'l ihe. An waareembe'i mannina Keesammi Kitaaba qananaa'lleena, alallaatteenaa losisseenaa qoxxe. Keesenne amma'nnaa'n lommanni anga issu ammane hiraaqqi sagarinne kiina uwwamu uwwancha gadditte. At li'llittuuyyi mattittisa manni hundim la'oo'isina ee keeno baxinne moo'ise. Ki gagam ee keeno issimmina higissaa uwwe. Ki gagaa at losissitti losishshaa qoxxitaa egere. Eekka issimminne ki gagaa kiinniinsi macceesoo keenoo gatissoo bikkina eehannonne qoxxe. Lommancho kiyyannisa issitaa soge bagaan axeettitte. Harde'i keenom kiyyabbaayyuwwisa issitaa moo'e. Lomma'nnu meentom amo'isaa harde'i meentom aayyuwwisaa issitaa muccuroominne moo'e. Aro'i lehaa mulla hee'oo meento lonsehe. Aro'i lehu meentichchona oos te'im oos oos hee'ulas ixxuwwi gaassita'a ixxuwwi mi'n abaroosina hara'mmimminne amma'nnaan issoo er baxo lossona. Ixxuwwi amanaa anninaa dabatta'a hara'mmitona. Eekka Waa'i iittoohane. Ihukkaarem hara'mmoo manni bee'aa hanqo'isam mullam hee'llamote iseka sawwit hundam Waa'anne ubbuussa'a Waa'i hara'mmoo'isina hiimoo ballaa Waa'i uunximminne hee'llamotane. Ihona bagaan is gaga heellixxitu'uuyyi hee'llamote foorinne hee'llu'uuyyim leto'ookkotane. Miiqakkam luwwi bee'i keen ikkamisina ka ijaajo ixxuwwina kure. Ixxi qarmanna lophphaatim ixxi mi'n abaroosa abooyyoobee'ek ayyim amma'nnatiinsi ubaakkoohane. Oo manchi amma'nnubee'i manchiinsi baasaakkoo jora. Isemdu lohayyi hiinchiinsi hoffe'llambee'etan ikkolasii mexxo'i goonchonne affo'ookkotan ikkolasii busar meenti kitaabamoo amma'nnaa'n doonanne kitaabantona. Isem ooso li'isimminne, koyya aa'imminne, Waa'i minaadaphpheka lokko aanshimminne, hawwu keeno hara'mmimminnee hundisinnem eroka baximmina guddo'ookkotan ihimminnee la'anto'ookkotan ihimmi hasisookko. Harde'i ihu busar meenti idootanne afimmi mixan exxukkuuyyi maroo ammane Kiristoosa utta'a maa'l mixanonne mattam bikkina doonanne kitaabbitte. Ee'isinne illageen aaggo'i hidiro gindita'a oogato'onne aaggamo. Ixxuwwi odim miniinsi mine do'llu'uuyyi bax bee'i keen ihimma lossamo. Bax bee'i keen ihimmi xale'em ihoo'n hamaano, aagisoobee'i woshshanne aaggam keenoo laboobee'i woshsha woccam keenoo ikkamo. Ee bikkina busar ihu harde'i meenti ladiisantamisina, ooso qattamisinaa ixxuwwi mine gassitamisinaa sogoommo. Ee'isinne maso'i neese game'lloobee'isa googo ifiissona. Mashka'oomim kanniinsi illageenim mat mat keen Sheexaancho awwonteena laso daba'llito'ookko. Busar meentina amma'nnito'oo qarmancho hee'llolas ee meento is hara'mmitona bagaan amma'nnaa'n wixxitenne kee'mmamoone. Ee'isinne hara'mmaan bee'i keenina amma'nnaan hara'mmeena xanookko. Amma'nnaano danaamisa gassoo lommannina lophphaatim mishiraachchi sagara kurimminaa losisimminaa badaroo keenina qinqinxaakkoo lomba uwwimmi hasisookko. Mashka'oomim Keesammi Kitaabanne «Hurbaata ganoo mirgo'ika suume kattitte» yamamaa kitaabamaakko. Odim «Badaroo manchinam ixxi malaayyika miqimmi hasisookko» yamamaakko. Amma'nnaa'n lommancho kasasakkam woshshanne lam manchi te'im sas manchi naqqasubeelas ee woshsha aa'llitte. Mulli keen baddoo'isina baaxiilo baxxam keeno manni hundi illagennem axeere. Mahannem mannika ille moo'lloo'nnii golo'lloo'nnii ka ijaajo awwontoo'isina Waa'i illagenne, Yesuus Kiristoos illagennee doo'llamaakkoo Waa'i asse'amaa'n illagennee an keese ijaajoommo. Waa'i baxina manna doo'llitaa anga issiteena gaaggaabbitte. Mulli manni baaxiilonne hamaarantitte. Ki gagam muccuroominne ege'lle. Ki godaphphi xissi bikkinaa keese hundi ammanem xissoo bikkinaa woyi'n diqaasika hoffokam age bagaan ka lasage xale'i wo'o aggitte. Mat mat mannik baaxiil guullaa la'amaakkoohane. Oo baaxiilim ixxuwwanne afoo oogato'o gaassaatim moo'isoohane. Ihukkaarem mat mat kee'nnek baaxiil lasonne la'amoohane. Ee'isam er baxim la'amaakkoohane. La'amoo'n yoohan ihukkaarem hore'em maaxamaa gateena xanooyyo. Waa'i summii neese losinsummi losishshii duumamoobee'isina agiddanonne yo'i keen hundim ixxuwwi moollanno'ina laboo lombi hundam uwwimmi hasisoohan ihukkisa laqqona. Amma'nnu moollanno'i yoo agid amma'nnatinne ixxuwwi abbaayyuwwi ikko'i bikkinaa yita'a ixxuwwi moollanno'o sholliissoone. Ihukkaarem ixxuwwi moollanno'i amma'nnaanoo iittanto'oo keenoo ikko'i bikkina eraa'llaanniinsim lonsita'a awwaaddona. Ka woshsha losisee qoxxissaa kuree. Ayyi manchim ni Moollanni Yesuus Kiristoos hanqo'i sagarinnee amma'nnatinnee iittamoobee'i annanni losishsha losisulas oo manchi biranchinne fugamaakkoohane bagaan maham la'oobee'ane. Eehido'i manchi woca qooccimminaa sagalluwwanne fitanchinaa muxmuxoohane. Eehannikim lasaanchi to'achchimma, wocancha, game'llancha, mannanne jora labimmaa tiir bi'aa hanqiinsi firaakkoo manni lambe'enne beeddoobee'i fitanchaa eeboohane. Ee keenina amma'nnat godda siidisookkoka labaa moo'amookko. «Iina yoo luwwi ihookko» yoohaannina hanqinam Waa'a baddimmi hundi luwwiinsim lophphaakko godda. Neese ka uulla maham amandaa waallummoyyo. Ka uulliinsim maham amandaa malloommoyyo. Eehaara'i niina intoommi luwwii edde'nnoommi luwwii hee'ulas ihookko. Ihukkaarem goddaan ikkeena hassam keen keenanchanne aaggamo. Odim gindanchannee bichchannee massaa hawwodoo dut qawwoo'm mixanonnee qaashi'nnoo'i luwwannee amadantamo. Mashka'oomim diinate iittimmi jolli hundinam lugumo. Mat mat keen godda hollantu'uuyyi amma'nnatiinsi ubba'a ixxuwwa bagaxxisa qasoo lobakat kichchechchanne aaggo'ookko. Ihukkaarem ate, Waa'i mancho! At eehido'nne'i luwwiinsi gibe. Muccurooma, Waa'a baddimma, amma'nnato, iitto, iyyaqqimmaa maashaalloomaa hase. Amma'nnaxxi gubbancha qoxxitaa gubbame. Dut naqaashshuwwi illagenne ki danaam amma'nnato naqqassitti ammane Waa'i keese weeshu heer heerinam hee'oo heechcha qoxxissaa amaxxe. Hundi luwwinam foore uwwoo Waa'i illagennee Pheenxeenaawekkichchi Philaaxoosina hanqo'i woshsha wocu Yesuus Kiristoos illagennee an keese ijaajoommo. Ni Moollanni Yesuus Kiristoos waareebe'e huushanchii miiqakkam luwwii bee'isinne ka ijaajo egere. Adilluwwina Adilii moollanno'ina Moollannii maasse'amaakkoo mexxo'i gassaanchi Waa'i yu amman afoohaare Kiristoos waarookko. Lehoobee'ek, ayyim hinceena xanoobee'i caakkanne hee'ookkok, ayyim hore'em moo'ubee'ekii ayyim moo'eenam xanoobee'ekii xale'i Waa'a. Ixxena lombii heer heerina hee'oo malaayyii ihona! Aameen. Ka uullanne yo'i goddaan birantambee'isa te'im higoo goddanne bakke'llambee'isa ijaaje. Ihukkaarem neese liiranseena niina hasisoo luwwi hundam biijoominne lonsaa uwwoo Waa'anne bakke'llamisina ijaaje. Er baxo baxxamisina, er baxim lophphukkuuyyi maroo'isinaa biijoominne ixxuwwina yoohaanniinsi mulli keenina baxxansitamisinaa kure. Ee'isinne ixxuwwi gagina beeddoobee'i godda soodina wixxaa'llona. Ee lasage hanqo'i heechcha siixxiteena xantamo. Ximootoosa, kiina uwwamu yabo egere! Waa'i iittoobee'i wociinsii qophphanom lachcha yakkam fitanchiinsii qee'lle. Mat mat keen eehido'i lachchi niina yookko yitu'uuyyi amma'nnaxxi googiinsi huushanto'ookko. Waa'ik eroommi kiinninne maqire ihona. Waa'i Yesuus Kiristoos kollinne neeyyatu heechcha alallaatoommisina Waa'i doo'llinne Yesuus Kiristoosina ass'amaanchi ihummi Phaawuloosiinsi iittoommi i beet Ximootoosina niyyanni Waa'ikii ni Moollanni Yesuus Kiristoosikii eroommi, qishixxatii xummii ihona. An Waa'a uunxummuuyyi hiimoo ballaa keese sawwoommi amman hundam muccur wodaninne iyyanno'isam awwaadoommi Waa'a galaxxoommo. An kiikka indiidda sawwoommi bikkina keese moo'aa lobakata liirameena quluxoommuulla. Keesenne yoo hanqo'i amma'nnato tiiroommo. Oo amma'nnat luxxeka kiyyummi amanne Looyisennee ee lasage odim kiyyummanne Eewwonsennee hee'ukkane. Kaba keesennem oo amma'nnat yoo'isa la'aammo. Ee bikkina an keesenne anga issummi ammane Waa'i kiina uwwu ki woronne yoo uwwanchi gii'llisa aphphoo'isa issitoo'isina tiissiisoommo. Waa'i niina malaayyika, iittikaa gaga ijaajimmikaa Keesammi Ayyaana uwwukko bagaan baddimmi ayyaana uwwukkoyyo. Eehannata'i Waa'i uwwoo malaayyinne Yesuus Kiristoos mishiraachchi saga'l bikkina iinninne maqirem hawwo aa'e bagaan Moollanni bikkina kutteena baddititte. Ixxi bikkina karamummi eesem moo'llaa baddititte. Waa'i neese gatisukkokii ixxi minaadab inkoommisina annanni issaa weeshukkokii neese issinummi er baxinnette ihoo'n ixxi sawwu sawwitinnettee Yesuus Kiristoosinne doolli hundiinsim illageen ixxi issu eroomminnettee. Oo eroommim neese Gatisaanchi Yesuus Kiristoos waarimminne kaba caakkaa la'amukko. Ixxim leho bi'isaa heer heerinam hee'oo heechcha uwwukkisa mishiraachchi sagarinne la'isaakko. Ee mishiraachchi sagarinam an alallaataancho, asse'amaanchoo losisaanchoo ihaa doo'llamummo. An ka'isa hawwoommok ee bikkinatte. Ihukkaarem an amma'nnummok ayyetda'e ihukkisa la'oommi bikkina tuuroommoyyo. Iina yabo uwwukkok oo balli afeebe'e egereena xanoo'isam la'oommo. Iinniinsi macceessitti hanqo'i saga'l ogora awwontittuuyyi Yesuus Kiristoosinne siidamoo amma'nnatonnee iittonnee qoxxitaa hee'e. Kiina uwwamu er yabo neesenne hee'oo Keesammi Ayyaaninne egere. Issiyanne yo'i amma'nnaan hundim eese laggo'isa at laqqootto. Ee laggo'i keeninnem Figeeloosii Hermoogeeneesii yo'o. Onisfooroos eese lobakata qoxxisu bikkina ixxi mi'n abaroosa Waa'i maasse'ona. An karamummaarem ixxi baddukkoyyo. Oroo'm beero'o afu ammanem lobakat qulunxinne eese hasaa edamukko. Lasaanch doollenne Waa'i ixxena eroomma issona. Efeesoonanne iina awwaadu awwaad hundam at erisa laqqootto. Eehannata'i i beeto, Yesuus Kiristoosanne yoo eroommanne qoxxe. Dut kee'n illagenne iinniinsi macceessitti woshsha mulli mannina losisseena xantam amma'nnanto'oo keenina atim yabo uwwe. Yesuus Kiristoosina er gaadaanchisa ikkaa keesennem afoo hawwo aa'e. Oramoo gaadaanchi orina ixxo asse'u mancho liiranseena hasookko bagaan ixxi gaqqi quuxonne digaadamooyyo. Xoreexxamoo manchim xoreexxanchi seera laboo'isinne egeraa xoreexxamubeelas kaachchi mare'e siixxeena xanooyyo. Badaraa baxoo abuullaanchim hurbaaxxeka ludo a'llimmi hasisookko. Waa'i keese hundem luwwam qoossitoo'isa issoo bikkina an wocoommi luwwa qoosse. An mishiraachchi sagaranne kurummisam Daawiit shumo'iinsi qaramukkokaa lehiinsim ki'ukkokaa Yesuus Kiristoosa sawwihe. Jora baxu manchisa ihaa xaarinne karamaa hawwoommok ee mishiraachchi saga'l bikkinatte. Ihukkaarem Waa'i sagar karamooyyo. Ee bikkina doo'llanto'i keen Yesuus Kiristoosiinsi uwwamoo gatimma heer heerina hee'oo lombinne maqirem siixxitamisina ixxuwwi bikkina hundi luchchom iyyaqqoommo. «Ixxenne maqire lenummaa'lleensi ixxenne maqirem hee'nnoommo. Iyyaqqinummaa'lleensi ixxenne maqirem adilluwwi inkoommo. Ixxo langumlas ixxim neese lagookko. Neese ixxena amma'nnammumbee'aarem ixxi gaga lageena xanoobee'i bikkina amma'nnamaakkoohan ihaa hee'ookko» yamamu woshshi hanqame. Macceesoo keeno hawwodimmiinsi bagaan maham awwaadoobee'i bikkina sagalluwwanne fitantambee'isa ka woshsha Waa'i illagenne tiissiisee ijaajee. Waa'ika hanqo'i sagara xabbeenisa losissittuuyyi baxxoo baxonne tuuttoobee'i amma'nnantaattoo baxaanchi issitaa ki gaga Waa'ina hincaa'lleena yakihe. Awwaad bee'i luwwanne fitanchi Waa'iinsi qeessukkuuyyi massoo bikkina eehanniinsi ege'lle. Ixxuwwi woccam woshshi fayye'oobee'i madisa edukkuuyyi maroohane. Ee kee'n lambe'ennem Heemeeniwoosii Filixoosii yo'o. Oo keen «Lehiinsi ki'immi gaassim higaakko» yitu'uuyyi hanqo'i losaniinsi annanni ikko'ookko. Mat mat keenoom amma'nnatiinsi ubbussamuulla. Ihukkaarem «Waa'i ixxan ihu keeno la'ookko»; odim «Waa'ika summa weeshoo keen hundim joriinsi qee'llona» yamamaa kitaabamaakkoo Waa'ik heekke'oobee'i qoxxaalli hanqi yookko. Mat geejji minenne hee'ookkok worqiinsii biriinsii baxamu mu'ut xale'i ihoo'n haqqiinsii buchchiinsii baxamu mu'utim hee'ookko. Ee mu'utiinsi mat mato lombina awwaaxxakkamane. Mat mato odim kora'i luwwina awwaaxxakkamane. Ayyim ixxi gaga kora'i luwwiinsi annanni issulas lombina awwaaxxakkam mu'uxxisa ihookko. Ee'isinne Waa'ina annanni ihaakkoo awwaadoo mu'ut ihaa er bax hundinam gudaakkoohan ihookko. Ee bikkina at woraadda'n jor mixaniinsi qee'llitaa muccur wodaninne Moollanna weeshsham keeninne maqirem muccurooma, amma'nnato, iittoo xummaa qoxxitaa hase. Woshsha eeboo'isa laqqoo bikkina awwaad bee'i qawwoo'm fitanchiinsi qee'lle. Moollannina awwaadoo manchi wocamoohan ihimmi hasisooyyo. Ihukkaarem manni hundinam maashaalla, danaamisa losisoohane, iyyaqqoohanee ixxenne uullixxamoo keeno qaphphaa'aa sogoohanee ihimmi hasisookko. Ayyi la'ukko ixxuwwi baaxiilo biiraa yita'a daba'llita'a hanqa laqqamisa Waa'i issoohan ihookko. Ee'isinne ixxi hasu luwwa issitamisina ixxuwwa qeefadaa karaa amadu Sheexaanchi shikkiinsi fissaqqitamo. Lasaanchi doollenne jor doolli waaroo'isa la'e. Manni gaga iittoohane, diinate iittoohane, amaadoohane, bolxoohane, game'lloohane, amo'inaa anno'inaa ijaajamoobee'ane, galaxxoobee'ane, muccuroom bee'ane, manna ha'yyoobee'ane, haafoobee'ane, hamoohane, gaga ijaajoobee'ane, qishixxat bee'ane, er luwwa ha'yyoobee'ane, manna higisaa uwwoohane, gaaggaaboohane, biranchinne fugamoohanee Waa'a iittimmiinsi lonsaa gaga liiranseena iittoohanee ihookko. Biirinne moo'akkamaare amma'nnaano labbo'aarem amma'nnaxxeka malaayye laggamo. Eehido'i manniinsi at gibe. Ixxuwwiinsim mat mat keen annanni annanni mixano awwontu'uuyyi baaxiil wo'mmaakkoo meentika minneewwa luxuunxita'a mattu'uuyyi sawwite hoongaan meento qeefaddam keeno. Eehido'i meenti hundi ammanem macceesseena hassamo. Ihukkaarem hanqa laqqeena hore'em xantamoyyo. Yaaneesii Yaambireesii Muse'e sabbo'isam tiiro bi'llo'oo keenoo amma'nnatiinsi ubbo'oo keenoo ikko'i bikkina oo manni hanqa sabbamo. Ihukkaarem ee lamem mannikim qawwoom manni hundinam caakkaa la'amukkisam ee kee'nnekim gundi ammanenne la'amookko. Kaba at an losisummi losishsha, an hee'ummi heechcha, i sawwite, i amma'nnato, i xa'nnimma, i iitto, i qoxximma, eesenne afu kee'mmaalli hawwoo asqachchaa laqqootto. Anxooke'enne, Iqooniyoomannee Lisxirannee eesenne afu kee'mmaalli hawwo an iyyaqqummisam laqqootto. Ee luwwi hundiinsim Moollanni eese gatisukko. Hanqinam Yesuus Kiristoosanne amma'nnaa Waa'ina garaa hee'eena hasoo keen hundim kee'mmaalli hawwo aa'ookko. Ihukkaarem jor mannii huushisaanii huushissu'uuyyii huushantu'uuyyii baassa'a jottu'uuyyi mattamo. Ihona bagaan at lossittaannonnee qoxxitaa amma'nnittaannonnee hee'e. Mashka'oomim ayyeensi lossitda'e laqqootto. Odim Yesuus Kiristoosanne amma'nnakka'a gatakkam lachcha keese losisu Keesammi Kitaaba oosoommaniinsi ki'issaa laqqootto. Waa'i ixxi Ayyaaninne Keesammi Kitaab hundim kitaabamoo'isa issukko. Oo Keesammi Kitaabim losisimmina, sogakka'a xabbaa'immina, huushamukkoka dabarimminaa muccur heechcha hee'akkamisa losisimminaa awwaadoohane. Ee'isinne Waa'ina awwaadoo manchi er bax hundam baxeena lade'aa gudaakkoohan ihoo'isa issookko. Ixxi adillanonne ihaa foorinne yo'i keenonnee lehu keenonnee oogateena waaroo Yesuus Kiristoos illagennee Waa'i illagennee keese kaka ijaajoommo. Waa'i sagara kure; makku ammanee makkubee'i ammanee hundem ammanem guddaa egere. Manna acceeqassaa dabare, axeeree sogee; iyyaqqimmannee losisimmannee qoxxe. Manni hanqo'i losano saboo amman waarookko. Ihukkaarem ixxuwwina mishisoo luwwa macceesseena muxmuxitu'uuyyi ixxuwwi iittitam luwwa kuttam losisaano ixxuwwi gagina wixxaa'llamo. Hanqo'i woshsha macceesimma utta'a heesso macceesimmanne daba'llitamo. Ihukkaarem at hundi ammanem qoxxe; hawwonnem xa'nne. Mishiraachchi sagara kurimmi baxo baxe. Kiina uwwamu baxom guullitaa baxe. An kitimamoommi amman afaakko. Kaba an ka uulli heechchiinsi annanni ihaa maroommi amman afaakko. An er ora oramaammo. Xoreexxancham guullaammo. Amma'nnatom egeraammo. Ka lasage muccurooma moo'isoo kaachchi mare'i iina gudaakko. Eekkam hanqa oogatoo Moollanni waaroo balla iina irifo'i issaa uwwookko. Xale'i iinatte ihoo'n ixxeka waarimma iittitam keenina hundinam uwwookko. Xansiisukkis hundinnem i beyyo qaqqissaa waare. Deemaas ka uulla iittaa eese lagaa Tasalonqe'e maraakko. Qeerqeesim Galatiya maraakko. Tiito'om Dalmaata maraakko. Iinninne maqire yookkok xale'i Luqaasatte. Maarqoos iina lobakata awwaadoohan ihu bikkina waattoo ammane kiinninne maqirem amaddaa waare. Tiikiiqoosam Efeesoo'n beero'o asse'aammo. At waattoo ammane Xiiroo'aadanne Karphaas beyyonne uraa waarummi Barnoosaa kitaabbuwwaa amaddaa waare. Lophphaatim omachchonne kitaabamu kitaabbuwwa amaddaa waare. Woqqaaccichchi Alaksaandiroos eese lobakata hawwodukko. Waa'i ixxena baxu baxisam miqona. Neese kullummi woshsha hore'em sabu bikkina atim ixxo ege'lle. An luxxeka kasasamaa dabachcha uwwummi ammane hundim iinniinsi annanni ikko'o bagaan matim iina hara'mmukkoyyo. Waa'i eekka ixxuwwanne xigoone. Ihukkaarem mulli manni hundim mishiraachchi sagara macceessamisina ixxeka asso guullaa alallaatoommisina Moollanni iinninne maqire ihaa malaayye uwwukko. Ee bikkina eese hobbi aqiinsi fissukko. Moollanni eese jor luwwi hundiinsim gatisaa iima'n adillanina afisookko. Ixxena heer heerinam lombi ihona! Aameen. Phirisqilena, Aqilinaa Onisfooroos mi'n abaroosinaa xummaato kure. Eraasxoos Qorontoosanne gataakko. Xarfimoosim xissu bikkina Miiliixanne uraammo. Xansiisukkis hundinnem hagayyi aageena illageen i beyyo waare. Eebuloos, Phudees, Liinoos, Qilaawdiyaa amma'nnaan abbaayyuwwii hundim xummaato asse'llo'ookko. Moollanni kiinninne maqire ihona. Eroommi ki'nnuwwina ihona. Waa'ina awwaadaanchiinsii Yesuus Kiristoosina asse'amaanchiinsii Waa'i doo'llu keenom amma'nnatonne qoxxitona hara'mmoommisinaa Waa'a baddimmina awwonsoo hanqa ixxuwwina la'isoommisinaa doo'llamummi Phaawuloosiinsi asse'amu asso. Oo amma'nnatim heer heerina hee'oo heechchi neeyyatanne shooho'amaakkoohane. Ee heechcham uwweena qophphanoobee'i Waa'i hinaxxi doolliinsi illageenim sagara aagaakkoohane. Eeham ixxi qoodu amman afukkaare neese Gatisaanchi Waa'i eese ijaajaa yabo uwwukkaare an alallaatoommi ixxi saga'l kollinne caakkukko. Amma'nnaxxi mateeyyoominne hanqo'i i beet ihu Tiito'ona niyyanni Waa'iinsii neese Gatisaanchi Yesuus Kiristoosiinsii eroommii xummii ihona. An keese Qarxeesanne urummok gatu luwwa taaphansitoo'isinattee an keese ijaajummisam beero'i hundannem amma'nnaano awwonsoo lommanna doo'llitoo'isinattee. Oo doo'llantam lommannim miiqakkam luwwi bee'ane, mexxo'i meentichchona aro'o, ixxi oosim adaba bi'imminnee ijaajancha sabimminnee acceeqasisoobee'i amma'nnaan ihimmi hasisookko. Oo amma'nnaano awwonsoo lommanchi Waa'ika baxo baxoohan ihu bikkina ixxonne miiqakkam luwwi bee'an ihimmi hasisookko. Odim bolxoobee'ane, nadadoobee'ane, dimboobee'ane, atanaachcha fissoobee'anee diinate iittoobee'anee ihimmi hasisookko. Ihukkaarem koyya aa'oohane, er luwwa isseena iittoohane, gaga ijaajoohane, xabbeena, keesammaa gaga ege'lloohanee ihona. Losu hanqo'i sagarannem losukkisinne qoxxaa uullona. Ee hanqo'i losaninne mulli keeno sogeenaa ee losanom sabbam keeno acceeqasaa dabareenaa xanookko. Dut ijaajantambee'i keen lophphaatim ballachchammaammo yitam keeniinsi awwaad bee'i woshsha woccam keenii huushissam keenii yo'o. Oo keen laboobee'i losishsha losissu'uuyyi ixxuwwi gagina awwaadoo luwwa siixxiteena yita'a abaroos hundam amma'nnatiinsi ubbuussam bikkina ixxuwwi suume amaxxitamisa isse. Ixxuwwiinsi mat hee'u ixxuwwi hiraagaanchi hee'ukkok «Qarxees uulli manni hundem ammanem qophphanaano; jor moochchi'nnoo'i keenoo baxo ceenta'a leella'ina hee'llam keenoo» yaa ixxuwwi bikkina wocaa hee'ukko. Oo wocamu woshshi hanqi ihu bikkina er amma'nnat hee'oo'isinaa Ayihuxxi manni heessoo hanqa sabbam manni ijaajoo aa'llambee'isinaa qoxxissaa axeere. Muccur keenina hundem luwwim muccura. Ihukkaarem muccuroom bee'i keeninaa amma'nnat bee'i keeninaa muccur luwwi ma'lluchchim bee'e. Hore'oomam ixxuwwik tiirii wodanii muccuroo'n yoohane. Ixxuwwi «Waa'a lanqoommo» yita'a woccamo. Ihukkaarem baxxam baxinne Waa'a laggamo. Mashka'oomim ixxuwwi shigigaa'oo'isa ikkam keeno, ijaajantambee'i keenoo er luwwa maham issiteena labbambee'i keenoo. Ihukkaarem at hanqo'i losaninne iittamoo losishsha losise. Goo'n lommanni gaga ege'llitamisa, sholle'llambee'isa, gaga ijaajaan ikkamisaa amma'nnatonne, iittonnee iyyaqqimmannee qoxxitamisaa losise. Ee'isam meenti lommannim ixxuwwi gaga Waa'ina annanni issito'oo keeno, hamtambee'i keeno, dimbisoo aggina biteesantobee'i keenoo er luwwa losissam keenoo ikkona losise. Oohim harde'i meenti ixxuwwi goonaa oosoo iittitam keeno, gaga ijaajjam keeno, muccur keeno, ixxuwwi mi'n abaroosina baxxam keeno, biijaalluwwaa ixxuwwi goonina ijaajantam keenoo ikkona losissona. Oohim Waa'i sagar gadamoobee'isinatte. Ee'isam harde'i goonim ixxuwwi gaga ijaajjamisa qoxxissaa soge. Agid ixxuwwi moollanno'ina ijaajanchinne luwwi hundannem liiransitamisina, ixxuwwinne daba'llanta'a woccambee'isinaa game'llambee'isinaa losise. Ihukkaarem ixxuwwi er keenoo guullita'a amma'nnanto'oo keenoo ikkona. Ee'isinne Gatisaanchi Waa'ik losan luwwi hundannem lomba siixxoo'isa issitamo. Waa'i ixxeka eroomma moo'isukkok manni hundam gatiseenatte. Oo eroommim baaxiiloo ka uulli jor mixanoo langaa gaga ijaajimminnee xabbeenoominnee Waa'ina gallaa ka uullanne hee'nnoommisinatte. Lombinne waaroo lob ni Waa'a, oohim neese Gatisaanchi Yesuus Kiristoosika waaro egelloommuulla. Oohim neese egelloommi maasse'amaakkoo neeyyato. Boqqoom hundiinsim neese gatisaa ixxi gagina muccur manni issaa er luwwa issineena minxoommisina ixxi gaga niina higisaa uwwukko. Ee keeno losise. Kiina uwwamu malaayyi hundinnem manna qoxxisee axeeree. Eehannonne ayyim keese gadoone. Manna gassitam keeninaa gassimmi malaayyi yo'i keeninaa amma'nnaan ijaajantamisina tiissiise. Er bax hundam baxxeena guddo'oo keen ikkamisina, ayyennem jora woccambee'isa, wocantambee'isa, maashaalluwwaa manni hundinam guullita'a eroomma moo'issam keenoo ikkamisina tiissiise. Neese ni gagim eraare qoossinoombee'i keeno, ijaajammoombee'i keeno, huushammoommi keenoo annanni annanni jor mixaninaa liiranchinaa agidoo hee'nnummo. Odim jollinnee to'achchinnee hee'nnummuuyyi sabammaammoo keenoo neesena'i neesem iittammoombee'i keenoo hee'nnummo. Ihukkaarem neese Gatisaanchi Waa'ik eroommii biijoom yoo iittii la'amaa lasage neese gantummok banxummi er baxinnette ihoo'n ixxaanninne qishixxatinne la'mmaagge qarammaa aanshaqqimminnettee Keesammi Ayyaaninne haareechchi ihimminnettee. Ee Keesammi Ayyaanam neese Gatisaanchi Yesuus Kiristoosinne Waa'i niina lonsaa uwwukko. Eeham issukkok ixxi eroomminne muccullaa neeyyatinne ege'llinoommi heer heerina hee'oo heechcha a'llinoommisinatte. Kuk amma'nnamaakkoo woshsha. Waa'a amma'nnitam keen er baxonne qoxxitamisina ee woshsha qoxxissaa kuttoo'isina hasoommo. Ookki lobakata eranee manni hundinam awwaadoohanee. Ihukkaarem awwaad bee'i fitanchiinsi, shumo'o xiqqanchiinsi, wocanchiinsii See'l mashka'inne fitanchiinsii qee'lle. Eehido'i luwwi hawwodoohanee awwaad bee'anee. Annannooma qooccoo mancho mataagge te'im lamaagge soggaa lasage ee manchiinsi gibe. Oo manchi boqqi ihukkisa, baaxiilaanchi ihukkisaa ixxi gagannem oogaxxukkisaa la'e. An hagayye Niqophphilaasanne higiseena sawwummi bikkina Arxeemaasa te'im Tiikiiqoosa ki beyyo asse'oommi ammane ihukkisam ikkaa i beyyo waare. Seera la'oo Zeeneesinaa Aphphiloosinaa googonne mahim hanqatoobee'isa issitaa xantittis hundinnem hara'mmitaa geegeese. Ni mannim mishbee'i keen ikka'a gattambee'isa hasisoo luwwa siixxiteena xantamisina er luwwa baximma lossona. Iinninne yo'i keen hundim kiina xummaato asse'llo'ookko. Amma'nnatinne neese iittitam keenina xummaato kure. Waa'ik eroommi ki'nnuwwinne hundinnem maqire ihona. Yesuus Kiristoos bikkina karamummi iinniinsi Phaawuloosiinsii niyyabbaayyi Ximootoosiinsii iittantaattoo niinninne maqire baxxoo Filimoonina ki minenne wixxitam amma'nnaanina, niyyaayya Afiibanaa ee'isam niinninne maqirem mishiraachchi sagarina gaadaa'nnisa ihu Arkiphaasinaa asse'amu asso. Niyyanni Waa'iinsii ni Moollanni Yesuus Kiristoosiinsii eroommii xummii ki'nnuwwinne maqire ihona. Odim neese Kiristoosan inkummi bikkina niina yoo er luwwi hundam erisa laqqaa ki amma'nnato mulli keenina kurimminne qoxxitoo'isina Waa'a uunxoommo. Iyyabbaayyo, keesenne amma'nnaa'n wodan usheexxu bikkina ki iitti eese lobakata liiransaakkoo qoxxisaakkoo. At iina Kiristoosinne abbaayyi ikkitti bikkina at issimmi hasisoo luwwa issitona keese iggimminne ijaajeena xanam hee'ummo. Ihukkaarem an keese iittoommi bikkina malaayyinnette ihoo'n iittinne uunxoommo. Mashka'oomim an lommancho; odim Yesuus Kiristoos bikkina karamaammoohane. An keese uunxoommok karaxxi minenne hee'ummuuyyi Kiristoosinne i qachchi issummi Anaasimoos bikkinatte. Ixxi kanniinsi illageen kiina awwaadam hee'ukkoyyo. Ihukkaarem ka lasage iinam kiinam awwaadookko. Ixxom ki beyyo dabaraa asse'aammo. Ixxo ki beyyo dabaraa asse'ummuuyyi an i gagoomim ki beyyo waarummaannisa xigoommo. An ka beyyonne mishiraachchi saga'l bikkina karamaa yoommaannonne ixxi iina ki bikkenne ihaa hara'mmoo'isina iinninne maqire hee'uta'n iittam hee'ummo. At eese hara'mmitona hasoommok ki doo'llinnette bagaan malaayyinnette ihubee'i bikkina at iittitoo'n maham isseena hasoommoyyo. Ayyi la'ukko Anaasimoos hofqax ammanina kiinniinsi annanni ihukkok ka lasage hundi ammanem kiinninne maqire hee'eenatte ihookko. Ixxi ka lasage kiinninne maqire hee'ookkok agishshisa ihaatette ihoo'n agishshiinsi lophphaa iittamaakkoo abbaayyisa ihaatette. Ixxi iina iittamaakko abbaayyo. Lophphaatim kiina maarinne agishshi ihukkaarem Moollanninne abbaayyo. Ee bikkina at eese ki beshichchi issitaa moo'lloohan ikkilas ixxom i'isa issitaa aa'e. Ixxi keese hawwodu luwwi te'im kiinniinsi liqaayyo aa'u luwwi yoohaare ee badano eesenne yoo'isa issitaa xige. An Phaawuloos ee badano miqeena i anginnem iittamaa kitaabaammo. Ihona bagaan at Kiristoosanne amma'nnitoo'isa issummok anette ihummi bikkina hore'em at ki gagim i bada'n manchi ikkittisa kiina tiissiisimmi hasisooyyo. Iyyabbaayyo, ee bikkina ka er luwwa issitoo'isina Moollanni summinne uunxoommuulla. Neese Kiristoosinne abbaayyuwwi inkummi bikkina i wodano liiranse. An ka kiina kitaabummoka issitoo'isa amma'nnoommo. Hore'em an yummaanniinsi lonsitaa issitoo'isa la'oommo. Odim Waa'i ki'nnuwwi uunxato macceesaa ki'nnuwwi beyyo daba'lloommisa issoo'isa amma'nnoommi bikkina iina koyyina'n mine gudise. Yesuus Kiristoos bikkina iinninne maqire karamaa yoo Ephphaafir xummaato asse'aakko. Odim i bax beshshuwwi Maarqoos, Arisxirookoos, Deemaasii Luqaasii xummaato asse'llo'ookko. Moollanni Yesuus Kiristoos eroommi ki'nnuwwinne maqire ihona. Gaassi doollenne Waa'i niyyanno'ina hiraagaaninne ihaa dut ammane dutisinne kuraa hee'ukko. Ihukkaarem ka lasaanchi doollenne ixxi Beetinne niina wocaakko. Oo ixxi Beetim hundem luwwam lago a'lloo'isina Waa'i doo'llukkanee ixxennem hundi luwwam qooccukkanee. Oo Waa'i Beet Waa'ika lomba belelaa'aa moo'isoohane; Waa'i qoocci hundoonchim ixxonne yoohanee. Odim qooccamu luwwi hundam ixxaanninne malaayyaam sagarinne bakkiisaa amadaakkoohane. Mannikam baaxiilo muccussaa lasage hundem luwwam ijaajoo Waa'aannonne makkanne iimanenne afuuraakko. Ixxim Waa'i asse'amaaniinsi lophphoo summa a'llukkisinnem ixxuwwiinsi lobakata lobane. Waa'i ixxi asse'amaaniinsi matinam «At i beetona'e; an keese kaballa qaraammo» te'im «An kiina anni ihoommo; atim iina qachchi ikkootto» yukkok bee'e. Ihukkaarem Waa'i ixxeka won Beeto ka uulla asse'ukkuuyyi «I asse'amaan hundim i Beetina otossitona» yaakko. Asse'amaa'n bikkinam «Ixxena asse'amaano hafachchisa awwaadaanom gii'l laba'nnisa issaakko» yaakko. Ihukkaarem ixxi Beet bikkina «I Waa'a, kiikki adillan heer heerinam hee'oohane. Atim ki minaadabanne hanqo'isa oogattittuuyyi gassitoohane. Muccurooma iittitaa jolle sabbitti bikkina Waa'i keese doo'llaa ki beshshuwwiinsi lophphoo lombi liirancha uwwaakko» yaakko. Ee'isam «Moollanna! Luxxekam at uulla qooccitaatto. Odim iimanim ki angi baxo. Oo keen bi'llamo. Ihukkaarem at hee'llootto. Ixxuwwi hundim eddechchisa ebeettamo. Atim ixxuwwa weyyakkisa xaaxxootto. Ixxuwwim eddechchisa hagara daba'llitamo. Ihukkaarem at hundi ammanem atetteme. Kiikki doollim hore'em beeddoobee'ane» yaakko. Waa'i ixxi asse'amaaniinsi matinam «Ki maso'o ki lokkiinsi woroon isseembe'i afeebe'e iihaannonne makki kollonne afuure» yukkok bee'e. Eehaara'i asse'amaan hundim Waa'ina awwaaddam keenoo Waa'i uwwoo gatimma a'llitam keenoo hara'mmitamisina Waa'iinsi asse'antam ayyaannuwwa. Ayyi la'ukko neese macceensummi sagariinsi luxuunxinaa umboombee'isa ee macceensummi sagaranne qoxximmi hasisookko. Waa'i ixxi asse'amaa'n kollinne asse'u assi qoxxaalli ihukkaa'lleensi ee assina ijaajantobee'i keenii gindito'i keenii laboo'isanne guzumo'antolas eehaare neese ka kido'i kee'mmaalli gatimma gandumlas Waa'i oogato'iinsi hinkid xolleena xannoommo? Ee gatimmi bikkina gaassaa kurukkok Moollanni ixxi gagame. Ixxi suumiinsi macceesso'i keenim niina qoxxissa'a kutto'o. Waa'im mare'uwwa, maalalsiisoo luwwaa annanni annanni agannuwwaa issimminne ixxi doo'llukkisinnee Keesammi Ayyaa'n uwwanchuwwa baxxansaa uwwimminnee ixxuwwi kutto'i woshshi hanqi ihukkisa caakkisaa la'isaakko. Neese kaba waaroolla yinaa kulloommi haareechchi uulla asse'amaan gassitamisina Waa'i issukkoyyo. Keesammi Kitaabaannonne mat beyyonne «Waa'a! At ixxena kaa'nna sawwiteena manchi maruchcho? Te'im at ixxo qoxxitaa egettoottok manchi beet maruchcho? Atim ixxo hoffi ammaninam ki asse'amaaniinsi hoffiissaatto. Ixxonnem lombikaa galaxxekaa laakka issitto. At qooccitti luwwi hundam ixxi gassoo'isa issitto» yaakko. Hundem luwwam ixxi gassoo'isa issukkuuyyi ixxena ijaajamoobee'isa issu luwwi ma'lluchchim bee'e. Ihukkaarem kaba hundem luwwim ixxena ijaajamukkuuyyi moo'nnummoyyo. Ihona bagaan hoffi ammaninam Waa'i asse'amaaniinsi hoffe'aa hee'u Yesuus Waa'i eroomminne annannichchinam hawwo aa'aa lehu bikkina kaba lombikaa galaxxekaa laakka issaqqaakkoo moo'nnoommuulla. Ixxim lehukkok Waa'i eroomminne manni hundinatteme. Hundem luwwam ixxi gagina qooccu Waa'i lobakat ooso lombanne aagiseena yaa Yesuusa hawwonne aagisaa muccussimmi hasisoohan hee'ukko. Ee mashka'inne Yesuus gatimmi googonne manna awwonsoohan ihukko. Manna baaxiiliinsi muccussookkokii muccutto'i keenii hundim matem anniinsettem ikko'i bikkina ixxuwwa «Iyyabbaayyuwwa» yaa weesheena tuurukkoyyo. Ee bikkina «Ki summa iyyabbaayyuwwina kuroommo. Ixxuwwi wixxixxi lambe'ennem keese mazmuurinne galaxxoommo» yukko. Odim mulli beyyonnem «An Waa'anne amma'nnoommo» yukko. Odim «Anii iina Waa'i uwwu oosii keyye yoommine» yukko. Ee bikkina oos maarii xiigii yoo keen ikko'isam Yesuusim ixxuwwisam manchi ihukko. Oohim lehonne malaayyi yoo Sheexaancho lehinne kaa'eenaa yaatette. Ee'isinne hee'llam doolli hundoomam leho baddimminne ki'ukkok agiddanonne hee'llam keen hundam wolabbanonne fisseenatte. Hanqinam Yesuus waarukkok Waa'i asse'amaano hara'mmeenatte ihoo'n Abrihaam shumo'o hara'mmeenatte. Ee bikkina Waa'i awwaadonnem ixxi niina qishixxoohanee amma'nnamaakkoohanee ihaa hundiinsi lob qeessichchi iheena duuha'i hundinnem ixxi abbaayyuwwa labimmi hasisukko. Oohim mannika baaxiilo shiinshiseenatte. Ixxi gagim hawwo aa'aa keenamaakkoohan ihu bikkina keenamoo keeno hara'mmeena xanookko. Waa'ika weeshano aa'llakko'i keesantakko'oo iyyabbaayyuwwa, ni amma'nnatina hundiinsi lob qeessichchoo asse'amaanchoo ihu Yesuusa qoxxissakka'a sawwi'llehe. Waa'i minenne Muse'e amma'nnamaakkoo awwaadaanchi ihukkisam Yesuusim doo'llu Waa'ina amma'nnamaakkoohane. Mine baxoo manchina miniinsi lophphoo lombi yoo'isam Yesuusina Muse'eensi lobakata lophphoo lombi laboohane. Hundem minem baxukkok yookko. Ihukkaarem luwwi hundam baxukkok Waa'a. Hanenne ihoo luwwina naqqasaanchi ihoo'isina Keesammi Minenne hundannem Muse'e awwaadaanchisa amma'nnamaakkoohan hee'ukko. Ihukkaarem Kiristoos Keesammi Mine gassookkok amma'nnamaakkoo qachchisa. Neesem niina yoo neeyyatonne ni amma'nnatoo ni bakkechchaa qoxxinsumlas Waa'ina mine. Ee bikkina Keesammi Ayyaan yoo'isam «Kaballa Waa'i sagara macceessakkolas udma'i uullanne ijaajancha sabba'a keento'i ammane ixxuwwika wodano duudisso'i ki'nnuwwi anno'isam ki'nnuwwi wodanom duudissakkotte. Ixxuwwi ee beyyonne eese keento'ookko. An baxummi baxom sor hiinchina moo'llo'ookko. Ee bikkina an Waa'i ee qaranchanne lobakata quuqaa ‹Ixxuwwik wodan hundi ammanem huushamoohane; i googom laqqo'oyyo› yummo. Ee bikkina «An uwwoommi usheexxatonne hore'em aaggamoyyo» yaa quunqinne hide'aammo› yaakko» yukko. Iyyabbaayyuwwa, hee'oo Waa'iinsi annanni issaa ubbuusoo amma'nnoobee'i jor wodan ki'nnuwwanne ayyennem hee'oobee'isa ege'llehe. Ee'isinne ki'nnuwwiinsi ayyem baaxiil huushisaa ixxek wodan duudoobee'isa kaballa yoo ayyaam beeddoo'n ballina ballina ki'nnuwwina'i ki'nnuwwim qoxxixxammehe. Mashka'oomim luxxeka niina hee'u amma'nnato lasaanchi afeebe'e qoxxinsaa amandumlas Kiristoosinne maqirem lago a'llinoommo. Oohim Keesammi Kitaabanne «Kaballa Waa'i sagara macceessakkolas ijaajancha sabbo'i keen ixxuwwi wodano duudisso'isa ki'nnuwwika wodano duudissakkotte» yamamukkane. Waa'i sagara macceessa'a ijaajancha sabbo'i keen ayyayyaam hee'llo'o? Gibxi uulliinsi Muse'e awwonsaa fissu keen hundameyyonnihe? Sor hiinchi hundoomam Waa'a quuqisso'i keen ayyayyaam hee'llo'o? Baaxiilo baxxo'i bikkina leesh udma'anne ubu keenoyyonnihe? Odim ixxi usheexxatonne hore'em aaggambee'isa Waa'i hide'ukkok ayyayyaaminatte? Ijaajancha sabbo'i keenoyyonnihe? Eehaara'i ixxuwwi amma'nnimma hooggo'i bikkina aaggeena xantobee'isa neese lanqoommo. Ee bikkina ee Waa'i usheexxatonne aagimmi neeyyat kabad afeebe'em niina yoo bikkina ee usheexxatonne ki'nnuwwiinsi ayyim aagoo'n gatoobee'isina qoxxitakka'a ege'llehe. Ixxuwwina kuramukkisam niinam mishiraachchi sagar kuramaakko. Ihona bagaan macceesso'i sagara amma'nnatinne a'llitobee'i bikkina oo macceesso'i sagar ixxuwwina awwaadukkoyyo. «Waa'i ‹An uwwoommi usheexxatonne hore'em aaggamoyyo› yaa quunqinne hide'ummo» yukko. Ihukkaarem neese amma'nninummi keen Waa'i uwwoo usheexxatonne aangoommo. Eehannina Waa'i uulla qooccukkaanniinsim ki'isaa ixxeka baxo baxaa guullaakko. Keesammi Kitaabanne mat beyyonne lama'l balli bikkina «Waa'i baxam hee'u bax hundiinsim lama'l ballanne usheexxukko» yamamaa kitaabamaakko. Odim mulli beyyonnem «An uwwoommi usheexxatonne ixxuwwi hore'em aaggamoyyo» yamamaa kitaabamaakko. Mishiraachchi sagara gaassita'a macceesso'i keen Waa'i uwwoo usheexxatonne aaggobee'ek ijaajantobee'i bikkinatte. Ihona bagaan ee usheexxatonne aaggam mat mat keen yo'o. «Kaballa Waa'i sagara macceessakkolas ki'nnuwwika wodano duudissakkotte» yummisam Waa'i lobakat doolliinsi lasage Daawiit kollinne Keesammi Kitaabanne «Kaballa» yimminne mat ayyaamo qoodaakko. Waa'i uwwoo usheexxato minaadabina Iyyaas uwwaakkoohan yakkota'n mulli ayyaa'm bikkina Waa'i od wocam hee'ukkoyyo. Ee bikkina Usheexxaxxi Ayyaam Waa'i minaadabina hanennem yookko. Waa'i baxam hee'u baxiinsi usheexxukkisam Waa'i uwwoo usheexxatonne aagookkok ayyim ixxi baxiinsi usheexxookko. Ee bikkina ixxuwwi ijaajancha hoogga'a ubbo'isam neesem Waa'i uwwoo usheexxatonne aagimma hoongaa umboombee'isa qoxxinaa yakinona. Waa'ik sagar fooraamoo baxoohanee. Lamqar bisa'iinsim qare'aalli ihu bikkina foore tiiriinsi nigguwwam miqiinsi annanni issaa muroohane. Woda'n woronne maaxamu sawwitee mixanoo saarayyaa moo'aa oogatoohane. Waa'i illagenne qooccamu luwwi hundim umba'ad ihaa caakkaa moo'amoohane bagaan ixxi illiinsi maaxamu luwwi ma'lluchchim bee'e. Neesem ixxi illagenne uullinaa xa'mmammoommo. Eehaare hundiinsi lob qeessichchi Waa'i Beet Yesuus iimane marukkok niina yoo bikkina ni amma'nnatonne qoxxinona. Oo niina yoo hundiinsi lob qeessichchi neese hoongoommaare qishixxoohane. Ixxi baaxiilo baxukkoyyo bagaan hundisinnem ni'isam keenamaakkoohane. Eehaara'i qishixxatoo eroommaa siixxinoommisina niina hara'mmat hasisoo amman hundam amma'nnatinne Waa'i eroommi adilla'n barcu'm illageen hincinona. Hundiinsi lob qeessichchi ihookkok hundem manni baaxiilinam bikkamaa Waa'ina uwwakkam luwwaa kitimaa amadaa Waa'i illagenne hincaa'oo'isina manni lambe'iinsi doo'llamoo mancho. Ixxi gagoomim hoongaanchi ihu bikkina tunneewwinaa huushantam keeninaa qishixximminne hara'mmeena xanookko. Ixxi gagim baaxiilaanchi ihu bikkina xale'i minaadaphphi baaxii'l bikkinatte ihoo'n ixxi gaqqi bikkinam kitima hincaa'immi hasisookko. Aaroonisa Waa'i weeshukkaanniinsi bagaan ee lomba ayyim ixxi gaginne massaqqookkok bee'e. Ee'isam Waa'i «At i Beeto; an keese kaballa qaraammo» yaa Kiristoosa doo'llukko bagaan Kiristoos hundiinsi lob qeessichchi ihimmi lomba ixxi gaginne massukkoyyo. Odim mulli beyyonnem Waa'i «At Malkaxeedeeq qeessooma'n ogoranne heer heerinam qeessichcho» yaakko. Manchi ihaa Yesuus ka uullanne hee'u doolle ixxo lehiinsi gatiseena xanoo Waa'ina lobakat laachchinnee indiiddinnee worwaataa uunxaa Waa'ina hincaa'ukko. Lobakat maashaalloominnee ijaajanchinnee uunxu bikkina Waa'im ixxi uunxato macceesukko. Ixxi mahaa Waa'ina Beet ihukkaarem ee ixxonne afu hawwiinsi ijaajancha losukko. Ixxi guullaa ijaajamu bikkina ixxena ijaajantam keen hundinam heer heerinam hee'oo heechcha uwwoohan ihukko. Ee bikkina Waa'i ixxo Malkaxeedeeq qeessooma'n ogoranne hundiinsi lob qeessichchi issukko. Ka woshshi bikkina woncoommi dut luwwi hee'ukko. Ihukkaarem ki'nnuwwi qaqqissakka'a qoossitakkambee'i bikkina caakkinsaa kurimmi kee'mmaalla. Ki'nnuwwi kaba mulli keenina losisaan ihimmi hasisukkuuyyi Waa'i saga'lleka asheero'i losano mat manchi losisona hassakkamuulla. Ki'nnuwwi hassakkamuullak ado bagaan qoxxaalli hurbaatayyo. Xale'i ado agukkuuyyi hee'ookkok hundim ciilichchi ihu bikkina hanqo'i woshsha la'oobee'ane. Ihukkaarem qoxxaalli hurbaat hasisookkok li'ino guullita'a erokaa joraa annanni issita'a la'immi losan yoo keeninatte. Ee bikkina neese Kiristoos bikkina lonsummi luxxi losano lasonne ullaa guullinaa li'nnummuuyyi illage mallona. Lehina awwonsaa massoo baaxiilo biiraa yimmaa Waa'anne amma'nnimmaa ki'nnuwwina eraarem losinsummi bikkina la'mmaagge shooho'o murimmi hasisooyyo. Ee'isam xammaqanchi bikkina, hanenne anga issakka'a Waa'a uunximmi bikkina, lehiinsi kichchi bikkinaa heer heerinam hee'oo oogaxxi bikkinaa odim daballaa losinsoommoyyo. Waa'i doo'llamdu ihulas ee keeno odim issinoommo. Kanniinsi illageen Waa'ik caakki caakkaa hee'u keen, iima'n uwwanchuwwika xee'nna moo'lla'a hee'llo'i keenii Keesammi Ayyaa'n uwwancham baxxamaan hee'llo'i keenii daba'llita'a ubbolas ee keeno baaxiilo biiraa yita'a daba'llitamisa issimmi xansiisoobee'ane. Odim ixxuwwi Waa'ik sagar eran ihukkisaa lasaqqi doollenne waaroo malaayyee laqqa'a hee'llo'o. Amma'nnatiinsi ixxuwwi ubbolas Waa'i Beeto la'mmaaggem haqqanne saqaltamuullaa manni illagenne tuussiissamuullaa ihu bikkina baaxiilo biiraa yita'a daba'llitamisa issimmi xansiisoobee'ane. Dut ammane ga'nnoo xeena agaa misha siideena abuulloo keenina awwaadoo misha uwwoo uulla Waa'i maasse'aakkoohane. Ihukkaarem oo uulli uttaa acoongaraa mutisoohan ihulas awwaad bee'anee duumameena gudaakkoohanee. Ee uullik lasaanchoom giirinne shokkimma. Iittantakko'oo iyyabbaayyuwwa, neese ee'isa woncummaarem ki'nnuwwi gattakko'i bikkina e'lloo maassi ki'nnuwwina yoo'isa qoossinaa lanqaammo. Waa'i hanqo'isa oogatoohan ihu bikkina ki'nnuwwika baxo kabad afeebe'em amma'nnaano hara'mmimminne Waa'i bikkinaa yitakka'a issitakko'i luwwa moo'isoo iitto xadooyyo. Ki'nnuwwi a'llinoommo yitakka'a neeyyatinne egettakko'i luwwa a'llitakkeebe'i afeebe'e annannichchim ee yakite lasaanchi afeebe'e moo'issakkamisina minxoommo. Ee bikkina Waa'i neeyyaxxisanne amma'nnatinnee iyyaqqimminnee lago aa'llam keeno labbehe bagaan ceemmaalluwwi ikkakkona neese hansoommoyyo. Abrihaamim iyyaqqimminne egeraa Waa'i uwwu neeyyata siixxukko. Manni mat luwwina hide'oo ammane ixxi gagiinsi lophphoo luwwanne hide'ookko. Oo hidirim fitamu luwwi hundam guullookko. Waa'i ixxeka neeyyaxxi sagara a'llitam keenina ixxi sawwite dabaransoobee'an ihukkisa moo'iseena yaa hide'imminne caakkisaa kurukko. Ee'isinne ee lamem luwwannem Waa'i qophphanoobee'anee ixxi sawwitem dabaransoobee'anee ihukkisa niina la'isaakko. Ganteena ixxi kollonne gimbummi neesem ee ni illagenne yoo neeyyato amandeena lobakat iggimmi yookko. Oo ni foorina yoo neeyyat markaba uullisimmina awwaadoo luwwisa amma'nnamaakkoo luwwisa niina yookko. Oo neeyyat iimanenne yoo Keesammi Mi'n du'm eddechcha higaa hundiinsi keesammi beyyo aagukkane. Yesuus Malkaxeedeeq qeessooma'n ogoranne heer heerinam hundiinsi lob qeessichchi ihaa ni bikkenne ee hundiinsi keesammi beyyo niinniinsi gaassaa aagaakko. Ku Malkaxeedeeq Saalee'm adilaa hundam xanoo Waa'ina qeessichchoo hee'ukko. Ixxim Abrihaam adilluwwinne oramaa kaa'aa daba'llukkuuyyi googonne edamaa maasse'ukko. Abrihaamim ee adilluwwiinsi massu luwwi hundiinsim tommiinsi mato Malkaxeedeeqina uwwukko. Malkaxeedeeqa yimmi «Muccuroo'm Adila» yimma. Odim Saalee'm adila yimmi «Xummina Adila» yimma. Malkaxeedeeqika anna te'im ama te'im qaranchi lugumo la'ookkok ayyim bee'e. Ixxeka qaramu ballaa lehu ballaa la'ookkokim bee'e. Ee bikkina ku Malkaxeedeeq Waa'i Beet kobi'llanne heer heerinam qeessichchi ihaa hee'oohane. Ni lob anni Abrihaam adilluwwa kaa'aa qeefadaa eebu luwwiinsi tommiinsi mato uwwu ku Malkaxeedeeq hinkaa'nna la'amaakkoo manchi ihuda'e sawwi'llehe! Qeessooma'n baxo baxxam Leewi'i shumo'i Isra'ee'l minaadabiinsi oohim ixxuwwi abbaayyuwwiinsi tommiinsi mato aa'llamisina Seer ijaajookko. Oo uwwitam hee'llo'i keenim Abrihaam shumo'o. Ihukkaarem ku Malkaxeedeeq Leewi'i shumo'iinsi qaramubee'aarem Abrihaamiinsi tommiinsi mato aa'aakko; Waa'iinsi neeyyata aa'u Abrihaamam maasse'aakko. Hoffok lobaanniinsi maasso aa'immi la'amaakkoohane. Tommiinsi mato aa'llam hee'llo'i Leewi'i shumo'i mulli mannisam letam keen hee'llo'o. Ihukkaarem tommiinsi mato aa'u Malkaxeedeeq «Heer heerinam hee'oohane» yamamaakko. Tommiinsi mato aa'am hee'u Leewi'im Abrihaam kollinne ihaa tommiinsi mato uwwaakko. Mashka'oomim Malkaxeedeeq Abrihaaminne edamu ammane Leewi'i Abrihaam gubeedonne hee'ukko. Ee Leewi'i qeessooma'nnisanne Isra'ee'l minaadabina Seer uwwamaakko. Leewi'i qeessooma'n bax Waa'i sawwixxeka wonshaakkoohan yakkota'n Aaroon qeessooma'n ogorinnette ihoo'n Malkaxeedeeq qeessooma'n ogoranne mulli qeessichchi ki'immi mahina hasisam hee'ukko? Mashka'oomim qeessooma'n ogor dabassamoo ammane Seerim dabassanchi hasisookko. Ku hundim wocamu ni Moollanni waarukkok ayyim qeessichchi ihaa Waa'ina kitima hincaa'akkam beyyonne hore'em awwaadubee'i shumo'iinsette. Ni Moollanni qaramukkok Yihuxxi shumo'iinsette ihukkis qoossamaa la'amaakkoohane. Qeessuwwi bikkina Muse'e wocu ammane ka Yihuxxi shumo'i bikkina maham wocukkoyyo. Ku woshshi lobakata caakkaa la'amukkok Malkaxeedeeqi'nnoo'i mulli qeessichchi waarukkaarette. Ixxim qeessichchi ihukkok manni see'llisinnette, gatti ogo'llisinnettee ihoo'n heer heerinam hee'oo heechchi malaayyinnettee. Keesammi Kitaabanne ixxi bikkina «At Malkaxeedeeq qeessooma'n ogoranne heer heerinam qeessichcho» yamamaa kitaabamaakko. Mullisinne odim eraa'l ijaaj hoongaanchoo awwaad bee'anee ihu bikkina gataakko. Mashka'oomim seer maham muccussukkoyyo. Ihukkaarem kaba Waa'i kollonne hincinoommisina e'lloo neeyyat niina waaraakko. Eehanniinsim ku qeessooman mulli keen hidir bee'ekam qeessuwwi ikko'is ihoo'n hidirinnette. Yesuus qeessichchi ihukkok hidirinnette. Oohim «Moollanni ‹At heer heerinam qeessichcho› yaa hide'aakko; hide'u sagaram dabarooyyo» yamamaa kuramukkisinnette. Ee hidi'l mashka'inne Yesuus e'lloo hidirina lubbat ihaakko. Eraare awwaaddam hee'llo'i qeessuwwa qeessooma'n awwaadiinsi leh annanni issam hee'u bikkina ixxuwwik xig dut hee'ukko. Ihukkaarem Yesuus heer heerinam hee'oo bikkina ixxi qeessoomano ayyenam higisaa uwwooyyo. Manni bikkina Yesuus Waa'a uunxeena heer heerinam hee'oo bikkina ixxenne ihaa Waa'i kollonne waaroo keeno hundam guullaa gatiseena xanookko. Ee bikkina Yesuus keesamaakkoohane, miiqakkam luwwi bee'ane, muccuraa baaxiilaammuwwiinsi annanni ihaa kaba iimanenne lombinne afuuraa niina hasisoo luwwi hundam wonshoo hundiinsi lob qeessichchoo. Yesuus matemaaggem ixxi gaga kitim issaa hincaa'aa guullu bikkina ee hundiinsi lob qeessuwwisa luxxeka ixxi gaqqi baaxii'l bikkina ee lasage odim minaadaphphi baaxii'l bikkina ballina ballina kitima hincaa'immi hasisooyyo. Hanqinam Seer hoongaan manna hundiinsi lob qeessuwwi ihoo'isina doo'llam hee'ukko. Ihukkaarem See'l lasonne waaru hidi'l sagar heer heerinam Waa'i sawwixxeka wonshoo Waa'i Beeto doo'llukko. Kaba neese woncoommi horoor woshshi kane, Lombi yoo Waa'i adilla'n barcu'm makki kollonne afuuraakkoo kido'i hundiinsi lob qeessichchi iimanenne niina yookko. Ixxim awwaadukkuuyyi yookkok hundiinsi keesammi hanqo'i dukkaanannette. Ee dukkaanam baxukkok Waa'a bagaan mannayyo. Hundiinsi lob qeessi hundim doo'llamookkok doo'llinne uwwakkam luwwaa kitimaa Waa'ina hincaa'eenatte. Ee bikkina ku hundiinsi lob ni qeessichchim Waa'ina hincaa'oo mat luwwi hee'immi hasisookko. See'llisanne Waa'ina uwwakko'i luwwa Waa'ina hincaa'oo qeessuwwi yoo bikkina ixxi ka uullannette ihuta'n hore'em qeessichchi iham hee'ukkoyyo. Ixxuwwi awwaaddam hee'llo'ok iimanenne yoo Keesammi Minina kobi'llaa hafaa hee'ukkaannonnette. Mashka'oomim Waa'i ixxi minaadabinne edamoo dukkaana Muse'e baxeena asheeru ammane «An kiina duunanne moo'isummi dukkaa'nnisa issitaa hundem luwwam baxxeena qoossitaa la'e» yaa ijaajukkisinnette. Ihukkaarem kaba Yesuus lambe'aanchi ihaa uullisu hidir eraa'l hidiriinsi lophphoohane. Mashka'oomim oo hidir shooho'amukkok e'lloo neeyyaxxi sagarannette. Ee'isinne Yesuusik qeessooma'n awwaad ixxuwwaanniinsi lobakata lophphoohane. Luxxi hidironne miiqakkam luwwi ma'lluchchim bee'an ihuta'n la'm hidir hasisam hee'ukkoyyo. Ihukkaarem Waa'i ixxi minaadabanne bi'ishsha siidu bikkina «Isra'ee'l minaadabinnee Yihuxxi minaadabinnee haareechchi hidiro aagoommi doolli waarookko. Oo hidirim ixxuwwika anga amadaa Gibxi uulliinsi fissummi ammane ixxuwwi anno'inne aagummi hidiri'nnoo'i hidiroyyo. Ixxuwwim i hidironne uullitobee'i bikkina anim ixxuwwa gadaa uraa urummo» yoolla. Odim Waa'i «Lasaqqi doollenne Isra'ee'l minaadabinne aagoommi hidir kane, I seeram ixxuwwi tiironne issoommo. Ixxuwwi wodanonnem kitaaboommo. Anim ixxuwwina Waa'i ihoommo. Ixxuwwim i minaadab ikkamo. Hoffaanniinsi ki'isaa lobaannonne afeebe'e hundim eese laqqam bikkina ayyim ixxi beshichcho te'im ixxi abbaayyo ‹Waa'a la'e› yaa losisooyyo. Anim ixxuwwi baaxiilo haafoommo. Ixxuwwi bi'ishsham hore'em sawwoommoyyo» yoolla. Waa'i ka hidiro «Haareechchi» yimminne eraa'l hidiro moosir issaakko. Ebeeru luwwii moosiru luwwii bi'oo amman hincaakko. Luxxi hidirinattem yakkota'n Waa'ina otossakkam siyya'ii uullanne ixxena otossakkam dukkaanii hee'ukko. Ee dukkaanam lam dum yoohan issakka'a baxakko'oohan hee'ukko. Caakka dissakkam mu'ut, xaraphpheezii keesammi qorosho'ii hee'u dukkaa'n luxxi baxxanchi «Keesammi beyyo» yamamam hee'ukko. La'm du'm eddechchiinsi afareen yoo du'm wor «Keesammiinsi keesammi beyyo» yamamam hee'ukko. Ee Keesammiinsi keesammi beyyonne aduruusa wiriissimmina worqiinsi baxamaakkoo mu'utii worqinne goolabamaakkoo saaxinii hee'ukko. Ee saaxi'n woronnem maanna'i hee'u worqiinsi baxamaakkoo mu'ut, lataa buyya eebaakkoo Aaroon biccii tommem ijaajim kitaabamaa hee'u lam ki'n ba'lluwwii hee'ukko. Ee saaxi'n hanennem mannika baaxiilo Waa'i haafoo beyyo kiruubeela yamamoo lombi asse'amaan ladinne ifiissa'a hee'llo'o. Ihukkaarem kaba ee kee'n bikkina guullinaa kulleena xannoommoyyo. Oo luwwi hundim gudaa lasage qeessuwwi awwaaddam awwaado baxxeena ballina ballina ee dukkaa'n luxxi du'm woro aaggam hee'llo'o. Ihukkaarem ee dukkaa'n woronne yoo la'm du'm woro hundiinsi lob qeessichchi xale'i aagam hee'ukko. Ixxim aagam hee'ukkok hiinchonne xale'i mat kor hee'ukko. Aagoo ammanem ixxi gaqqi baaxiilinaa minaadab laqqoo'n baxxo'i baaxiilinaa xiiga amadoo'n aagam hee'ukkoyyo. Ee'isinne luxxi dukkaa'n awwaad hee'u doollenne hundannem keesammiinsi keesammi woro massoo goog ifiisamaa hee'ukkisa Keesammi Ayyaan caakkisaa kuraakko. Oohim kaba ihoo luwwina kobi'lla. Waa'ina uwwakkam luwwii kitimmuwwii Waa'ina otossitam hee'llo'i kee'nneka wodano muccusseena xanukkoyyo. Oo keen awwaaddam hee'ukkok haareechchi gatti ogora Waa'i uulliseebe'i afeebe'e itakkam luwwi bikkina, agakkam luwwi bikkina, aanshaqqakkam ogolluwwi bikkinaa xale'i biireen issakkam losa'n bikkinaa kuroohane. Ihukkaarem Kiristoos kaba issamukkuuyyi yoo er luwwina hundiinsi lob qeessichchi ihaa waaraakko. Ixxim awwaadukkuuyyi yoo dukkaan lobakata lobanee miiqakkam luwwi bee'ane. Oohim manni anginne baxamoo'n yoohanee ka uullanne qooccamu luwwiinsi annanni ihaakkoohane. Kiristoos keesammiinsi keesammi beyyo aagu ammane fella'ikaa labeennuwwikaa xiiga amadaatette ihoo'n ixxi gaqqi xiiginne heer heerinam niina gatimma siidisaa matemaaggem aagukko. Haashaaramu mannanne fella'ikii labeennuwwi xiigii odim kitimakka'a shokkiisakko'i addichchi gii'l buchchii kifakkamaare muccussoohan ihulas heer heerina hee'oo Keesammi Ayyaa'n kollinne miiqakkam luwwi ma'lluchchim bee'i ixxi gaga Waa'ina uwwu Kiristoosik xiig lehaakkoo baxiinsi hee'oo Waa'ina awwaandoommisina niikka tiiro hinkaa'nna lonsaa muccussookko? Ee bikkina oo weeshanto'i keen Waa'i neeyyata uwwu heer heerina hee'oo heechcha siixxitamisina Kiristoos haareechchi hidirina lambe'aancho. Oohim ihukkok luxxi hidiriinsi woroonette ikka'a seera gindimminne baaxiilo baxxo'i keeno lehinne gatiseenatte. Mat manchi lago'i bikkina lago ijaajulas oo woshshi beyyo amadoo'isina ee manchika leho qoossakka'a la'immi hasisookko. Mashka'oomim lago'ina lago ijaaju manchi foorinne hee'ukkuuyyi oo wocu woshshi beyyo amadooyyo. Ihukkaarem oo woshshi beyyo amadookkok oo manchi lehaa lasage. Luxxi hidirom ihuta'n xiig bee'eka beyyo amadukkoyyo. Seeranne yoo ijaaj hundam Muse'e gaassaa manni hundinam kuraakko. Ee lasage labeennuwwikaa fella'ikaa xiiga wo'inne hamaaraa hiisoophphi buyyaa kashar gereechchi oddaa ee xiiganne cefaa ee See'l kitaabannee manni hundannemii kifaakko. Ixxim minaadabina «Waa'i ki'nnuwwina ijaaju hidi'l xiig kane» yukko. Ee'isam odim Waa'i ixxi minaadabinne edamoo dukkaanannee ee dukkaa'n woronne awwaaxxakkam mu'ut hundannee ee xiiqqeka kifaakko. Hanqina See'llisanne hofqax luwwiinsi bagaan hundem luchchim xiiginne muccurookko. Xiig dunamubeelas baaxii'l haafit bee'e. Iimanenne yoo mu'utina kobi'l ihu mu'uttuwwi ee'isinne muccurimmi hasisulas iimanenne yoo mu'ut gagim ee keeniinsi e'lloo kitiminne muccurimmi hasisookko. Kiristoos iiman gagoonchom aagukko bagaan hanqo'aannina kobi'l hee'u manni anginne baxamu hundiinsi keesammi du'm woro aagukkoyyo. Kaba ixxi ni bikkenne ihaa Waa'i illagenne moo'amoolla. Hundiinsi lob qeessichchi hee'ukkok hiinchina hiinchina ixxi gaqqi xiig ihoo'n diinaxxi xiiga amadaa keesammiinsi keesammi woro aagam hee'ukko. Ihukkaarem Kiristoos ixxi gaga dut ammane kitim issaa hincaa'eena aagukkoyyo. Ee'is ihuta'n uulli qooccamukkaanniinsi ki'isaa dut ammane hawwimmi hasisam hee'ukko. Ihukkaarem kaba lasaanchi doollenne mannika baaxiilo shiinshaa hooreena matemaaggem ixxi gaga kitim issaa hincaa'eena waaraakko. Manni hundim mataagge lehimmi hasisookko. Ee lasage oogato'o aa'eena Waa'i illagenne hincookko. Ee'isam Kiristoos dut kee'nneka baaxiilo shiinshaa hooreena mexxo'aagge ixxi gaga kitim issaa uwwaakko. Ixxi la'mmaagge waarookkok ixxo qulunxinne egeroo keeno gatiseenatte bagaan baaxii'l bikkina leheenayyo. Seer lasaqqi doollenne waaroo er luwwina kobi'lla bagaan hanqo'aneyyo. Ee bikkina See'llisanne hiinchina hiinchina uttoo'n kitima amadda'a Waa'i kollonne hincitam keeno muccusseena hore'em xanukkoyyo. Oo kitima amadaa waaraa Waa'ina otossoo keen baaxiiliinsi hanqo'isa muccuraakkoohan yakkota'n ixxuwwi wodan od baaxii'l bikkina acceeqasam hee'ukkoyyo. Kitimam Waa'ina hincaa'imma uttam hee'llo'oyyonnihe? Ihukkaarem oo hiinchina hiinchina hincam hee'u kitim manna ixxuwwi baaxii'l bikkina tiissiisoohan hee'ukko. Mashka'oomim labeennuwwikii fella'ikii xiig baaxiilo muccusseena xanooyyo. Ee bikkina Kiristoos ka uulla waaru ammane Waa'ina «At kitimaa kiina uwwakkam luwwaa hassittoyyo. Ihukkaarem iina orachcho gudissitto. Shokkiisakka'a hincaa'akkam kitimannee baaxii'l bikkina hincoo kitimannee at hore'em liirantooyyo. Ee ammanenne i bikkina Keesammi Kitaabanne ‹I Waa'a! An ki doo'lla isseena waaraammo› yamamaa kitaabamaakko» yaakko. Hanaan «Kitima, kiina uwwakkam luwwa, shokkiisakka'a hincaa'akkam kitimaa baaxii'l kitimaa at hassittoyyo te'im eehannonne liirantittoyyo» yukko. Ihukkaarem ee kitim hundam issakkamok See'llisinnette. Ee lasage odim «Iyyanna! An ki doo'lla isseena waaraammo» yaa e'lloo haareechchi kitima beyyonne uulliseena moosir kitima beyyiinsi bi'isaa hoorukko. Waa'i doo'llisanne Yesuus Kiristoos ixxi gaga matemaaggem kitim issaa Waa'ina hincaa'imminne neese hundim muccullaammo. Qeessi hundim baaxiilo muccusseena xanoobee'i kitima dut ammane ballina ballina dut ammane hincaa'llu'uuyyi uullita'a awwaaddam hee'llo'o. Ihukkaarem Kiristoos heer heerinam ihoo mexxo'i kitima baaxii'l bikkina hincaa'aa lasage Waa'i makkanne afuuraakko. Eehanniinsi kid ixxi maso'i ixxi lokkiinsi woroon iheebe'e eehe'enne egeraakko. Mashka'oomim matem kitiminne guullaa baaxiiliinsi muccussu keeno heer heerinam mucculluwwi issaakko. Odim ixxi «Ixxuwwika baaxiiloo jor baxoo od sawwoommoyyo» yaakko. Oo hundim haafamu bikkina baaxii'l bikkina hincoo kitim od hore'em hasisooyyo. Eehaara'i iyyabbaayyuwwa, Yesuus xiiginne Keesammiinsi keesammi beyyo aangeena xannoommis amma'nnamaakkoohane. Aangeena xannoommokim ee du'm eddechchinne oohim ixxi maarinne fooqaa'u haareechchi heechchi googinnette. Keesammi Minenne niina hundiinsi lob qeessichchi yoo bikkina hanqo'i wodaninne, malbee'i amma'nnatinne, jor sawwitiinsi muccuraakkoo wodaninnee muccur wo'inne aanshamaakkoo orachchinnee Waa'i kollonne hincinona. Neeyyato aagu Waa'i amma'nnamaakkoohan ihu bikkina amma'nninaa kulloommi ee neeyyato qoxxinsaa amandona. Iittinnee er baxinnee mat mulleka baqaa'nneena sawwinona. Mat mat keen mat ihakka'a wixximma losan issita'a sabbo'is ihoo'n neesena'i neesem wixxinaa qoxxixxammona. Hore'em Moollanni waarimmi hincukkisa sawwitakku'uuyyi eraa'llaanniinsi lonsitakka'a wixxi'llehe. Hanqo'i woshsha lanqaa lasage ni doo'llinnem baaxiilo banxumlas ee baaxii'l bikkina hincoo kitim bee'e. Ihukkaarem Waa'ina ijaajantambee'i keeno baddisoo oogato'ii itoo malaayyaam giirii egeroolla. Mat manchi Muse'i Seera gindulas lam te'im sas manchi naqqasoohaare oo manchi qishixxat bee'ekam lehookko. Eehaara'i Waa'i Beeto gadukkaannina, baaxiiliinsi muccussu hidi'l xiigam kora'i luwwisa xigukkaanninaa Waa'i ixxi eroomminne uwwu Keesammi Ayyaanam game'llukkaanninaa hinkido'i kee'mmaalli oogato'i gudaakkoo labissakka'ate? Mashka'oomim «Baado miqisimmi iihane; annannichchinam ixxi baxisam an miqoommo» odim «Moollanni ixxi minaadabanne oogatookko» yaa wocukkok ayyetda'e ihukkisa lanqoommo. Ee bikkina hee'oo Waa'i anganne ubimmi lobakata baddisoohane. Ihukkaarem Waa'ik caakki ki'nnuwwina caakkaa lasage lobakata hawwonne gubbantakko'i eraa'l doolle sawwi'llehe. Mat mat ammane ki'nnuwwa manni illagenne tuussiisakko'ookkoo hawwisakko'ookkoo. Odim mat mat ammanem hawwitam keeninne maqirem hawwitakko'ookko; karanto'i keeninam qishixxitakko'ookko. Odim ki'nnuwwi amaxxam bogakko'i ammane liiranchinne iyyaqqitakko'ok iimanenne ki'nnuwwina lobakat doollina hee'oo e'lloo amaxxi yoo'isa laqqakko'i bikkinatte. Eehannata'i lobakat irifo'o siiddakkam bikkina ki'nnuwwi amma'nnato darabbakka'a uttakkotte. Mashka'oomim Waa'ika doo'lla issitakka'a ixxeka neeyyata a'llitakkeena qoxximmi hasisookko. Keesammi Kitaabanne «Waareena yookkok qaqqisom waarookko bagaan dasooyyo. Muccur manchi amma'nnatinne hee'ookko. Ihukkaarem ixxi amma'nnatiinsi laso daba'lluta'n an ixxonne liiramoommoyyo» yamamaa kitaabamaakko. Ihukkaarem neese lasonne daba'llita'a bi'llam kee'n gaalchi inkoo'n amma'nnita'a gattam kee'n gaalcha. Amma'nnato yimmi «Soodonne siixxinoommo» yinaa neeyyantoommi luwwa siixxinummaannisa issaa malbee'isa la'isoohane. Moo'nnumbee'i luwwam moo'nnummi luwwisa issaa la'isoohane. Gaassi doollenne hee'llo'i manna Waa'i galaxxukkok amma'nnaxxi bikkinatte. Waa'i ixxi sagarinne uulla qooccukkisa amma'nnatinne lanqoommo. Ee bikkina moo'amoo luwwi moo'amoobee'i luwwiinsi qooccamaakko. Aabeel Qaayeelaanniinsi e'lloo kitima Waa'ina hincaa'oo'isa issukkok amma'nnato. Waa'im uwwu luwwa aa'imminne Aabeel muccur ihukkisa ixxi bikkina kuraakko. Aabeel lehaa lasagem ixxi amma'nnaxxi bikkina kabad afeebe'em kuramoolla. Heenook lehoo'nnim iimane massamukkok amma'nnatinnette. Waa'i ixxo massu bikkina siidamukkoyyo. Ixxi iimane massamoo'n illageenim Waa'a liiransukkisa ixxi bikkina kuramaakko. Amma'nnakkoo'n Waa'a liiransakkeena xanakkamoyyo. Mashka'oomim Waa'i kollonne hinceena hasookkok Waa'i yoo'isaa ixxo wodaninne hasoo keenina irifo'o uwwoo'isaa amma'nnimmi hasisookko. Lasaqqi doollenne ihoo luwwi bikkina Waa'i Nohe'ina qoxxisaa kuru ammane Waa'a baddaa ixxi abaroosa gatiseena markaba baxoo'isa issukkok amma'nnato. Ee'isinne uulli minaadabanne oogatamukko. Nohe'i amma'nnatinne Waa'iinsi uwwamoo muccurooma a'llukko. Waa'i Abrihaamina «Gulummi issaa kiina uwwoommo» yu uulla maroo'isina weeshu ammane Abrihaam ijaajamaa maroo'isa issukkok amma'nnato. Ixxim hanno marooda'e la'oo'nnim ixxi uulliinsi firaa marukko. Waa'i uwweena neeyyatu uullanne waaraanchi ihaa hee'ukkok amma'nnatinnette. Ixxesam Waa'i uwweena neeyyatu uulla a'llitam Yisaaqii Yaaqoobii allaggi manni uullanne dukkaananne hee'llo'o. Mashka'oomim Waa'i ixxi gagoomim sheeqqaraa gindamoobee'isa issaa baxaa axisaakkoo beero'o Abrihaam egeram hee'ukko. Abrihaam lomma'nnaakkoohane, Saara'a alceennattee qattam amman higaa lomma'nto'ookkotanee ikko'aarem neeyyatu Waa'i amma'nnamaakkoohan ihukkisa la'u bikkina amma'nnatinne oos anni ihukko. Ee bikkina lehu manchisa ihaa hee'u Abrihaamiinsi iima'n boollaankisaa dambalaq shashsha'llisaa xigakkeena xanakkambee'i shumo'i qaramukko. Oo keen hundim ixxuwwina uwwamu neeyyaxxi sagara a'llitoo'nnim amma'nnatinnem leto'o. Ihukkaarem ka uullanne koyyaa waaraanoo ikko'isa laqqo'i bikkina qee'llonne hee'llu'uuyyim moo'lla'a hashshu yita'a liiranto'o. Ee woshsha wocco'i manni ixxuwwi gaqqi uulla egettu'uuyyi yo'is caakkaa la'amaakkoohane. Ixxuwwim ee utta'a fitto'i uulla daba'llita'a matteena sawwito'oohan yakkota'n daba'llita'a mattam gada'i hee'ukko. Ihukkaarem kaba ixxuwwi iimanenne yoo e'lloo uulla mixxamuulla. Ee bikkina Waa'im ixxuwwina beero'o gudisu bikkina ixxuwwina Waa'a yamamaa weeshamukkaare tuussiisooyyo. Waa'i Abrihaama keenu ammane Abrihaam ixxi beet Yisaaqa Waa'ina kitim issaa uwwoo'isina issukkok amma'nnato. Ee neeyyaxxi sagara egeraa hee'u Abrihaam ixxeka mexxo'i beetichchom Waa'ina kitim issaa uwweena gudaa hee'ukko. Waa'i Abrihaamina «Yisaaq kollinne ki shumo'i weeshamookko» yukkane. Lehu keenom Waa'i lehiinsi ki'iseena xanoo'isa Abrihaam amma'nnaa hee'ukko. Ee bikkina lehiinsi ki'ukkaannisa issaa Yisaaqa dabaraa a'llukko. Lasonne ihoo luwwa Yisaaq sawwimminne Yaaqoobaa Eesa'aa maasse'ukkok amma'nnatinnette. Yaaqoob leheena hincu ammanenne Yooseefika lamem oosom maasse'ookkokii bicco sikke'aa Waa'ina otossukkokii amma'nnatinnette. Yooseefim lehoo amman hincukkaare Isra'ee'l minaadab Gibxi uulliinsi fittamisa kurukkokii ixxeka miqem maha issimmi hasisooda'e ijaajukkokii amma'nnatinnette. Muse'e qaramu ammane lobakata mishisoohan ihukkisa ixxi amaa annii moo'lla'a adi'l ijaajo badditoo'n sas agana maaxxo'ok amma'nnatinnette. Muse'em li'aa lasage «Adi'l landichchi beeto» yamameena sabukkok amma'nnatinnette. Ixxim hoffi ammanenne higoo baaxiilonne liiramimmiinsi Waa'i minaadabinne maqirem hawwo aa'imma doo'llukko. Ixxi lasonne siixxoo irifo'o moo'u bikkina Gibxi uullanne yoo goddiinsi hundiinsim Kiristoos bikkina hawwo aa'immi lophphoo goddi ihukkisa xigukko. Adi'l quunqa baddoo'nnim Gibxi uulliinsi firukkok amma'nnatinnette. Moo'amoobee'i Waa'am moo'ukkaannisa issaa sawwu bikkina laso daba'llimma sabukko. Won ooso shoo'isina ijaajamaa hee'u Waa'i asse'amaanchi Isra'ee'l minaadaphpheka won ooso shoobee'isa Shaashshiqqi Uguda uullisukkokii gereechchi xiiga mi'n goocanne labakkamisa issukkokii amma'nnatinnette. Isra'ee'l minaadab gogaalli uullinne higakkamaannisa ikka'a Ertiira'i Dambalaqa fitto'ok amma'nnatinnette. Ihukkaarem Gibxi uulli manni ixxuwwisam filloommo» yita'a aaggo'aare dambalaq ixxuwwa xuuxukko. Isra'ee'l minaadab lamar balla kululita'a lasage Iyyaarko'i beero'o ootakko'i ki'n oot gindamaa ubukkok amma'nnatinnette. Saa'aanchotte hee'llo'i Ra'aabe Isra'ee'l doqqaano qa'llisa issita'a xumminne aa'llo'i bikkina ijaajantambee'i keeninne maqire bi'lloo'n gatto'ok amma'nnatinnette. Eehaara'i Geedewoon bikkina, Baaraaq bikkina, Samsoon bikkina, Yoofta'i bikkina, Daawiit bikkina, Saamu'eel bikkinaa hiraagaa'n bikkinaa kaba kureena amman bee'i bikkina an maham wocoommoyyo. Amma'nnatinne uulli adilluwwa kaa'llo'o. Hanqo'isa oogattu'uuyyi gassito'o. Waa'i ixxuwwina uwwu neeyyatom siixxito'o. Hobbi suumem ifiisso'o. Malaayyaam giiram xoo'isso'o. Bisa'i qariinsim xotto'o. Hoongaan hee'llo'i keenim qoxxaalluwwi ikko'o. Orannem malaayyaammuwwi ikko'o. Ixxuwwa qasseena waatto'i bii'l diina'am kaa'lla'a guullito'o. Meentim ixxuwwi qarmanni lehiinsi ki'ukkaare a'llito'o. Mat mat keenim e'lloo heechchanne lehiinsi ki'lleena egetta'a hee'llo'i bikkina karatiinsi tirancha sabba'a lobakat asqachchinne leto'o. Mat mat keenom naacakko'ookkoo ganakko'ookkoo. Odim mat mat keenom chimchiminne karakka'a karaxxi minenne aagisakko'ookko. Mat mat keeno kininne aphphisakka'a shakko'ookko. Mat mat keeno magaazinne lam issakka'a diqakko'ookko. Mat mat keeno bisa'inne shakko'ookko. Mat mat keenim fella'ikaa gereebbikaa labasa edde'lla'a beyyiinsi beyyo do'llu'uuyyi hawwito'ookko. Odim buxaa yaayyanto'oo keenoo ikka'a lobakata hawwito'o. Ixxuwwim udma'uwwannee duunneewwannee do'llo'o. Daawwa'uwwannee baalluwwannee maaxanto'o. Ixxuwwina ku uulli laboobee'an ihukko. Ku keen hundim ixxuwwi amma'nnaxxi bikkina galaxxanto'oo keen ikko'aarem ixxuwwina uwwamu neeyyaxxi sagara siixxito'oyyome. Mashka'oomim Waa'i e'lloo sawwite niina gaassaatim sawwu bikkina ixxuwwi niinninne maqirem wo'm keen ikkamo bagaan neese bee'eka wo'm keen ikkamoyyo. Duuphphisa kibbaakkoo dut naqaashshuwwi ni kululleetanne yoo bikkina niina iyyi ihoo luwwi hundaa neese lobakata karaa amadoo baaxiiloo ni haniinsi sheelantaa uunjinaa ni illagenne yoo geellichcha iyyaqqimminne qoxxinaa geellona. Geelloommokim ni amma'nnato asheeraanchoo goollaanchoo ihu Yesuusiinsi ni illi annanni ihoobee'isa ixxo moo'imminnette. Ixxim lasagenne siixxoo liiranchi bikkina yaa haqqanne saqalamaa sholle'aa lehimma mahannem xigoo'n ee hawwo iyyaqqaa Waa'i adilla'n barcu'm makkanne afuuraakko. Kabadem ihukkaare ki'nnuwwanne afoo hawwonne hooggakka'a anga uwwitakkambee'isina baaxiilaan afisu hawwonne lobakata iyyaqqu Yesuusa sawwi'llehe. Kabad afeebe'e baaxiilinne gubbantakkam gubbanchanne ki'nnuwwik xiig dunameebe'i afeebe'e gubbantakko'oyyo. Waa'i ki'nnuwwa ixxi oos issaa «I beeto, Waa'ika axeerimma sholliissitte; keese sogoo ammanem koo'llitaa uttitte. Mashka'oomim Waa'i iittoo keeno axeerookko; ixxi oos issaa aa'oo keenom ganookko» yaa sogukkoka xaddakka'atennihe? Waa'i ixxi oos issaa axeeroo bikkina ixxi axeerimma iyyaqqimminne aa'llehe. Qachchi bi'isoo ammane axeeroobee'i anni ayyette? Waa'i ixxi ooso hundam axeeroohane. Ki'nnuwwimdu axeerantakkobeelas hincarabe'e bagaan hanqo'i qachchoyyo. Eehanniinsim loboka maarinne neese qaru anno'i axeerookko. Neesem ixxuwwa lonsinoommo. Eehaara'i foorinne yoo manni hundinam Anni Waa'ina foorinne hee'nneena hinkaa'nna lonsinaa ijaajanchi hasisoohane? Maarinne neese qaru niyyanno'i ixxuwwina danaamo labaa moo'amukkisinne hoffi ammaninam neese axeerookko. Ihukkaarem Waa'i ixxesam neesem muccur keen inkoommisina ni eroommina axeerookko. Axeerimmi hundim ammanoomina kichche'isoohan ihaa moo'amookko bagaan liiransooyyo. Ihukkaarem axeeranta'a losso'i keenina lasaanchonne xummi wo'mmaakkoo muccuroo'm heechcha siidisookko. Ee bikkina ki'nnuwwika qacu anguwwaa hoogu gurubbuwwaa qoxxissehe. Dim manchi fayye'oo'isinatte bagaan fayye'eena ihukkok beyyo fatakaa iiqamoobee'isina ki'nnuwwi lokkina xabbeen googo hassehe. Manni hundinnem xumminne hee'llakkeena yaki'llehe. Odim keesamubee'ek ayyim Waa'a moo'eena xanoobee'i bikkina keesamimmina yaki'llehe. Ki'nnuwwiinsi matinam Waa'ik eroommi hoffe'oobee'isina qoxxitakka'a ege'llehe. Ee'isam ki'nnuwwi lambe'enne qaraaraalli xaph li'aa ki'nnuwwa hawwisoobee'isinaa dut kee'nnekam heechcha bi'isoobee'isinaa ege'llehe. Ki'nnuwwiinsi ayyim saa'aanchi te'im mexxo'i ammancho itoo hurbaatina wonooma biteesaa haashaaramu Eesa'isa ihoobee'isa qoxxitakka'a ege'llehe. Lasonne Eesa'i annika maasso a'lleena hasu ammane maassi ixxena hooramukkisa laqqakkamo. Ixxi wi'llukkuuyyi maasso lobakata hasukkaarem luxxi huushancha mahinnem gudiseena xanukkoyyo. Anginne amadakkeena xanakkam luwwi oohim aphpham hee'u giir, tuunsi, witiriichchi, hambu'llam, xurumbulli sagarii macceesu manni «Od edamaa wocamoone» yisiisu lobakata baddisam hee'u sagarii hee'u Siina'i duuna ki'nnuwwi affakko'oyyo. Mashka'oomim «Diinatim ee duuna nakkuta'n kininne aphphissakka'a shi'llehe» yoo ijaajo iyyiteena xanto'oyyo. Ee ammane moo'amu luwwi lobakata baddisoohan hee'u bikkina Muse'e «An lobakata baddaa huxe'aammo» yukko. Ihukkaarem ki'nnuwwi Xiyoo'n duuna oohim hee'oo Waa'ina beero'i ihu iima'n Yerusaaleema ixxonnem xigakkeena xanakkambee'i Waa'i asse'amaan liiranchinne wixxu beyyo affakko'ookko. Odim iimanenne summi kitaabamaa Waa'ina won oos ikka'a wixxito'i amma'nnaa'n beyyo, manni hundannem oogatoo Waa'i beyyoo muccurooma siixxito'i xummaan manni foor yoo beyyoo affakko'ookko. Odim haareechchi hidirina lambe'i manchi ihu Yesuus beyyoo Aabeel xiigiinsi lobakata e'lloo'isa wocoo kifamu xiiqqi beyyoo waattakko'ookko. Ee wocoohaanni sagara sabbakkambee'isa ege'llehe. Ka uullanne Waa'i sagara kuroohaanniinsi macceessa'a sabbo'i keen Waa'i oogato'iinsi xottobeelas iimaniinsi kuroohaannika sambumlas hinkid xolleena xannoommo? Ee ammane ixxek sagar uulla heekkeesaakko. Ihukkaarem kaba «Mataagge uulli xale'i ihoo'n iimanem edaa heekkeesoommo» yaa hide'aakko. Ku «Mataagge eddaate» yoo sagar ku qooccamu luwwi heekke'aa bi'oo'isaa heekke'oobee'i luwwi qoxxaa hee'oo'isaa moo'isoohane. Ee bikkina heekke'oobee'i adillano aa'nnoommi bikkina Waa'a galaxxinona. Waa'i liiramoo duuha'anne ixxo lonsimminnee baddimminnee ixxena otossinona. Mashka'oomim ni Waa'i shokkiisoo giira. Abbaayyuwwi iitti ki'nnuwwanne hundi ammanem hee'ona. Mat mat keen koyya aa'nnoommuulla yitu'uuyyim laqqoo'nnim Waa'i asse'amaano aa'llo'i bikkina ki'nnuwwim koyya aa'imma xaddakkotte. Ki'nnuwwim ixxuwwinne maqirem karantakko'aannisa ikkakka'a karanto'i keeno sawwi'llehe. Ee'isam hawwo aa'oo keenom ixxuwwinne maqirem hawwo aa'llakkamaannisa ikkakka'a sawwi'llehe. Mine issimmi manni hundi beyyonnem lombi yoohan ihona. Saa'aanonnee lokko iggaalluwwannee Waa'i oogatoo bikkina aree aro'ii ixxuwwina'i ixxuwwim amma'nnanto'oo keen ihimmi hasisookko. Waa'i «An ki'nnuwwa hore'em uroommoyyoo uunjoommoyyoo» yu bikkina diinate iittimmiinsi gaga ege'llehe. Yooqax niina ihookko yi'llehe. Ee bikkina neese iggimminne «I Waa'i iina hara'mmaancho; an baddoommoyyo. Manni eese ma'issookko?» yinoommo. Luxxeka ki'nnuwwina Waa'i sagara kuru ki'nnuwwi awwonsaano xaddakkotte. Ixxuwwi hee'llo'i heechchaa baxxo'i baxoo sawwitakku'uuyyi ixxuwwi amma'nnato laboo amma'nnat ki'nnuwwinam hee'ona. Yesuus Kiristoos beeballam kaballam heer heerinam daba'llamoobee'ane. Hanqo'i googiinsi haareechchi annanni annanni losan ki'nnuwwa agaa massoobee'isa qoxxitakka'a ege'llehe. «Kaka ite, eekka ittitte» yoo losano egetteena yakitam keeninam maham awwaadu bee'i bikkina niikki woro'l mannoom Waa'i eroomminne qoxxuta'n erane. Waa'i ixxi minaadabinne edamam hee'u dukkaananne awwaaddam hee'llo'i qeessuwwi itteena xantambee'i kitima hincaa'akkam beyyi niina yookko. Hundiinsi lob qeessichchi baaxii'l haafitina kitimakko'i diinaxxi xiiga amadaa hundiinsi keesammi du'm woro aagam hee'ukko. Ee diinaxxeka maara manni gattiinsi biireen fissakka'a shokkiisakkam hee'akko'o. Ee'isam odim Yesuus minaadaba ixxi gaqqi xiiginne muccusseena beero'iinsi biireen hawwo aa'ukko. Neesem gattiinsi biiranne ixxi kollonne fillaa ixxi gadamu gadancha baxxammona. Mashka'oomim ka uullanne heer heerinam hee'oo beero'i niina bee'i bikkina waaroo beero'o egellaammo. Eehaara'i Yesuus kollinne hundi ammanem galaxxi kitima Waa'ina hincaa'nnona. Oohim ixxi summi bikkina suumiinsi firoo galaxxi kitima. Eroka issimmii yoo luwwika mannina baxxansimmii Waa'a liiransoo kitim ihu bikkina ee'isa issimma xaddakkotte. Ki'nnuwwi awwonsaanina ijaajammehe. Ijaajjo'i ijaajom baxonne hosissehe. Mashka'oomim ixxuwwi baxxam baxina xa'mmantam bikkina ki'nnuwwi foorina yakitamuulla. Ki'nnuwwi ijaajantakkolas ixxuwwi baxo liiranchinne baxxamo. Eehidette ihubeelas baxxam bax kichchechchinnette ihu bikkina ki'nnuwwina awwaadooyyo. Ni bikkinam Waa'a uunxehe. Hundem ammanem luwwi hundannem er luwwa issineena hansoommi bikkina neesenne muccur sawwit yoo'isa qoossinaa lanqoommo. An lonsaahim ki'nnuwwa uunxoommuullak Waa'i neese ki'nnuwwi beyyo qaqqisaa dabaraa asse'oo'isina Waa'a uunxitakkonatte. Heer heerinam hee'oo hidi'l xiiginne gereebbina hundiinsi lob allaaraanchi ihu ni Moollanni Yesuusa lehiinsi ki'isu xumma uwwoo Waa'i ixxi doo'lla issitakkamisina ki'nnuwwina hasisoo er luwwa hundam uwwona. Yesuus Kiristoos kollinne ixxo liiransoo luwwa ki'nnuwwi woronne issona. Kiristoosina heer heerinam lombi ihona! Aameen. Iyyabbaayyuwwa, an ki'nnuwwa sogeena kitaabummi assi gundi ihu bikkina iyyaqqimminne macceessakkamisina ki'nnuwwa uunxoommuulla. Niyyabbaayyi Ximootoos karaxxi miniinsi tiramukkisa laqqakkamisina hasoommo. Ixxi qaqqisaa waarulas an ki'nnuwwa moo'eena ixxenne maqirem ki'nnuwwi beyyo waaroommo. Ki'nnuwwa awwonsaan hundinaa amma'nnaan hundinaa ni xummaato kullehe. Xaaliyaa'n uulliinsi waatto'i niyyabbaayyuwwi ki'nnuwwina xummaato asse'llo'ookko. Waa'ik eroommi ki'nnuwwinne hundinnem maqire ihona! Aameen. Waa'inaa Moollanni Yesuus Kiristoosinaa awwaadaanchi ihu Yaaqoobiinsi uulli hundannem binnito'i Waa'i minaadabina asse'amu assechcha. Xummi ki'nnuwwina ihona. Iyyabbaayyuwwa, annanni annanni ihaakkoo keenanchi ki'nnuwwanne afoo ammane lobakata liirammehe. Mashka'oomim ki'nnuwwi amma'nnatonne keenanchi waaroo ammane xa'nnimminne qoxxitakkamisa laqqakkamo. Xa'nnimminne qoxximmi ma'lluwwim hanqatoo'n wo'm muccur keen ikkakkamisina afisoohan ihona. Ki'nnuwwi lambe'iinsi qooroom hoffe'u manchi hee'ukkaare Waa'a uunxona; Waa'im uwwookko. Mashka'oomim ixxi ma'lluwwam hooroo'n hundinam biijoominne uwwoo Waa'a. Ihukkaarem manchi mahannem maloo'n amma'nnatinne uunxona. Maloo manchi hafachchi gafe'aa heekkeesu womoora labookko. Eehido'i manchi Waa'iinsi matem luchchom siidookkoka labisoone. Mashka'oomim lam sawwitenne yoo bikkinattee issoo luwwi hundannem malamoo bikkinattee. Heechchanne gadamu amma'nnaanchi Waa'i ixxo lonsoo ammane liiramona. Goddaanchim Waa'i ixxo hoffiisukkaarem liiramona. Mashka'oomim mannik lombi hix fiitisa giggiroohane. Eelliinchi lobakat iibbinne firoo ammane hixe gokkisookko; fiitoomim giggirookko; hixoomikim dan bi'ookko. Ee'isam amaxxa hasoo manchi ixxi matayyaninnem bi'ookko. Keenanchi afoo ammane qoxxaa uulloo manchi maasse'amaakkoohane. Mashka'oomim Waa'i ixxo iittoo keenina uwweena aagu hidi'l saga'l bikkina uwwoo heechchi laakki irifo'o siixxookko. Ayyi manchim keenamoo ammane «Waa'i eese keenaakko» yoone. Mashka'oomim Waa'i jor luwwinne keenamooyyo; mannam keenooyyo. Ihukkaarem ayyi manchim keenamookkok ixxi gaqqi mixaninne gosaasamaa maroohaarettee qawwiisamoohaarettee. Ee lasage jor mixan siiraa baaxiilo qarookko. Baaxiilim li'aa lasage leho qarookko. Iittantakko'oo iyyabbaayyuwwa, huushantakkotte. Er uwwanchii muccur uwwanchii hundim Waa'iinsette. Ookki hundim waarookkok iima'n eelliinchi haf daba'llamoo'isa daba'llanchibee'i caakki Anni Waa'iinsette. Ixxi qooccanchi hundannem neese won keen inkoommisina doo'llaa hanqo'i sagarinne qarukko. Iittantakko'oo iyyabbaayyuwwa, kaka xaddakkotte. Manni hundim macceesimmina gaaggaabaalli ihaa wocimminaa quuqimminaa ishtiggaakkoohan ihona. Mashka'oomim manni quunqi Waa'i hasoo muccurooma eebeena xanooyyo. Ee bikkina jor losan hundaa boqqi haalataa uttakka'a Waa'i ki'nnuwwi wodanonne kaasu sagara maashaalloominne aa'llehe. Oo sagarim ki'nnuwwi foore gatiseena xanookko. Macceessakko'i Waa'i sagara baxonne hosissehe bagaan xale'i macceesimminne ki'nnuwwi gaga qawwiissakkotte. Waa'i sagara macceesaa baxonne hosisoobee'ek ixxi gaga gagmoo'ixxinne moo'oo manchisa. Mashka'oomim oo manchi ixxi gaga gagmoo'ixxinne danaamisa moo'aqqaa marookko. Ee lasage maha labooda'e xadookko. Ihukkaarem wolabbanonne manna fissoo Waa'i sagara qoossaa moo'ookkoka, qacaallisa losoobee'ekaa eehanniinsi odim Waa'i sagar yookkoka xadoo'n baxonne hosisookkokaa baxoo bax hundannem Waa'i maasse'ookko. Odim ixxi allabo jora wocimmiinsi egeroo'nnim an amma'nnaancho yookkok ixxi gaga qawwiisookko bagaan ixxi amma'nnat awwaad bee'ane. Niyyanni Waa'i illagenne tuulbee'i muccur amma'nnat kane; adaraalluwwa hara'mmimma, busar meento hawwi hundannem hara'mmimmaa ka uulli haashaarammi luchchiinsi gaga ege'llimmaa. Lombaam Moollannanne Yesuus Kiristoosanne amma'nnitakko'oo iyyabbaayyuwwa, manni lambe'enne annannooma moo'issakkotte. Kobi'llishshina lam manchi ki'nnuwwi wixxitakko'i beyyo waattamo. Matii goddaanchi anganne worqi quba'a issaqqaa danaam eddechcha edde'aa waarookko. Odim matii buxichchi beeddaakkoo suusa edde'aa waarookko. Ee ammane danaam eddechcha moo'imminne «Ka danaam beyyonne at afuure» yitakkamo. Ihukkaarem beeddu suusa edde'aa waaru buxichcho «At ee beyyonne uulle» te'im «I lokki beyyonne uullanne afuure» yitakkamo. Eehannata'i ki'nnuwwi ki'nnuwwi lambe'enne annannooma issitakkamisii jollinne oogattakkamisii moo'amooyyonnihe? Iittantakko'oo iyyabbaayyuwwa, macceessehe. Waa'i amma'nnatinne goddaan ikkamisina ixxo iittoo keenina neeyyato aagu ixxi adillano lago aa'llamisina uulli buxxuwwa doo'llukkoyyonnihe? Ihukkaarem ki'nnuwwi bux keeno gaddakkamo. Ki'nnuwwa cogoo keenii oogaxxi minenne gosaasoo keenii goddaan keenoyyonnihe? Weeshantakkam er summa duumimminne bi'isookkodu ixxuwwayyonnihe? «Mulli manna ki gaqqisa iitte» yamamaa kitaabamu Waa'i Seerina ijaajantakko'aare erisa issitakkamuulla. Ihukkaarem bii'l qoocca moo'imminne manni lambe'enne annannooma issitakko'aare baaxiilo baxxakkamuulla. Odim Waa'i seera ginditakkam keen ikkakkam bikkina Waa'i Seer ki'nnuwwa acceeqasookko. Odim ayyim Waa'i Seera hundam wonshaa matooma gindookkok hundam gindukkaannisa xigamookko. Mashka'oomim «Saa'llitte» yu Waa'i ee'isam «Shititte» yaakko. Saa'llitti bee'aarem shitittaare Waa'i Seera ginditaatto. Manna wolabbanonne fissoo Waa'i seerinne mannanne oogatamoo'isa woccehee baxxehee. Mashka'oomim Waa'i oogato'i urimma issoobee'i manchina urimma issooyyo. Ihukkaarem urimmi oogato'o kaa'ookko. Iyyabbaayyuwwa, manchi «Iina amma'nnat yookko» yukkuuyyi ixxi amma'nnato danaam baxinne moo'isubee'aare ixxena maha awwaadoo? Eehido'i amma'nnat ixxo gatiseena xanoohonnihe? Kobi'llishshina edde'amoo luwwii itamoo luwwii bee'i abbaayyuwwii aayyuwwii hee'amukkaare ki'nnuwwi ixxuwwi heechchina hasisoo luwwa uwwitakkoo'nnim «Iibbona, goddehe, xummanne mallehe» yitakko'aare ixxuwwina maha awwaadoo? Ee bikkina danaam baxbee'i xale'i amma'nnat lehaakkoohane. Ihukkaarem at «Iina amma'nnat yookko» yitaa bakke'llittaare «Iinam er bax yookko» yookkok hee'ukkaare «Ki amma'nnato baxiinsi annanni issitaa moo'ise. Anim i baxinne i amma'nnato kiina moo'isoommo» yoommo. At «Mat Waa'i yookko» yitaa amma'nnitootto. Oohim erane; amma'nnimma'i habusim amma'nnookko. Baddimminnem huxe'ookko. Ate, ka qawwa, baxiinsi annanni ihaakkoo amma'nnat mishbee'an ihukkisa laqqooyyonnihe? Niyyanni Abrihaam ixxi beet Yisaaqa kitimakkam beyyonne Waa'ina kitimeena hincaa'u ammane ixxi baxinne muccura yamamukko. Ee bikkina ixxi amma'nnat ixxi baxinne maqire ihaa hee'ukkisinne amma'nnat baxinnem wo'm ihukkisa moo'llooyyonnihe? Waa'i sagarannem «Abrihaam Waa'a amma'nnukko; ixxim Waa'anne amma'nnu bikkina muccur ihaa xigamukko» yamamu sagar wo'mmukko. Abrihaamim Waa'ina beshichcho yamamukko. Ee'isam manni muccurookkok xale'i amma'nnatinnette ihoo'n baxinnem ihukkisa moo'e. Saa'aanchi hee'llo'i Ra'aabe Isra'ee'l asse'amaano is minenne aa'llo'i ammanee mulli googinnem elle'amoo'isa issito'i ammanee isdu is baxinne muccutto'oyyonnihe? Fooriinsi annanni ihu maar lehaakkoohane. Ee'isam baxiinsi annanni ihu amma'nnat lehaakkoohane. Iyyabbaayyuwwa, neese losisaan inkummi keen mulli keeniinsi lophphaakkoo oogato'o aa'nnoommisa laqqakkam bikkina ki'nnuwwiinsi dut keen losisaan ihoone. Mashka'oomim neese hundim lobakat ammane huushammoommi bikkinatte. Ihukkaarem ayyi manchim wocoo woshshi hundannem huushamoobee'ek ixxi gaga ege'lleena xanoo muccur mancho. Farashshi niina ijaajamoo'isina suumenne hakkamma issinoommo. Ee lasage farashshooma hansummi kollonne hundannem maroo'isa issinoommo. Odim markaba sawwi'llehe; markab maham loban ihukkaarem malaayyaam hafachchinne gafe'amoo ammane markaphphi ushe'aanchi hoffi ushe'oo luwwinne hasu kollonne hundannem maroo'isa isseena xanookko. Ee'isam allab hoffi orachchi ihaa lob luwwanne bakke'ookko. Lob doom gootto'i gii'l xoxanqinne shokkookko. Allab gii'l laba'nnisa. Odim allab orachchi lambe'enne siidamoo jolli nigga. Allab orachchi hundam haashaassookko. Giir ixxi gagoomim waarookkok xoo'oobee'i giiriinsette ihu bikkina allab manni heechchi hundam luxxaanniinsi ki'isaa lasaanchi afeebe'e ee gii'llisa shokkiisookko. Moochchi hundim cii'i, uullinne taakke'oo keenii wo'i woronne heekke'oo qooccanchii hund manninne gabbarameena xanamookkomee gabbaramaakkomee. Ihukkaarem ayyi manchim allabo gabbareena xanooyyo. Ixxonne shoo jor qaraar wo'mmaakkoohane. Ixxim usheexxato uwwoobee'i jor luwwa. Ixxennem niyyanni ihu ni Moollanni Waa'a galaxxinoommo. Odim ixxennem Waa'i qooccanne qooccamu manna duummoommo. Matem suumiinsim maassii duunchii firookko. Iyyabbaayyuwwa, eehid ihoone. Matem bu'iinsi xee'aalli wo'ii qaraaraalli wo'ii fireena xanoohonnihe? Iyyabbaayyuwwa, odakkichchi weera misheena xanoohonnihe? Te'im duubaan odakkichchi misha misheena xanoohonnihe? Ee'isam qaraaraalli bu'iinsi xee'aalli wo'i fireena xanooyyo. Ki'nnuwwi lambe'iinsi lachchi yoo qoor manchi ayyette? Ixxi lachchinnee maashaalloominnee baxu baxo er heechchinne moo'isona. Ihukkaarem qaraaraalli to'achchimmii gaga iittimmii ki'nnuwwi wodanonne hee'ukkaare amaaddakkottee hanqanne qophphantakkottee. Mashka'oomim eehido'i qooroom uwwamookkok uulliinsette, maariinsettee habusiinsettee bagaan Waa'iinsetteyyo. To'achchimmii gaga iittimmii yoo beyyonne hambalaachchanchii jor baxii hundim hee'ookko. Ihukkaarem Waa'iinsi uwwamoo qooroom luxxeka muccura, la'mmekam xumma iittaalla, maashaalla, ijaajamoohane, qishixximmi wo'mmaakkoohanee er mish wo'mmaakkoohanee. Golo'immii biranchii bee'ane. Iittansitam keen iitto wixxa'a muccuroo'm misha wixxaa'llamo. Ki'nnuwwi lambe'enne yoo qaxxanchii joranchii hanniinsi waaraakkoohane? Ki'nnuwwi orachchi woronne hundi ammanem qasamoo maa'l mixaniinsetteyyonnihe? Mat luwwa hassakkamo; ihukkaarem hassakko'i luwwa siiddakkeena xantakkambee'i bikkina manna shitakkamo. Odim mat luwwa qoxxaallisa mixxakkamo; ihukkaarem mixxakko'i luwwa siidakkambee'i bikkina orantakkamo. Uunxitakkambee'i bikkinam hassakko'i luwwa siiddakkamoyyo. Waa'a uunxitakko'aarem ki'nnuwwi uunxitakko'i luwwa siiddakkamoyyo. Mashka'oomim uunxitakko'i luwwa maa'l liiranchanne hosissakkeena jor sawwitinne uunxitakkam bikkinatte. Ki'nnuwwi amma'nnitakkambee'i keeno; ka uulli luwwa iittoo keen Waa'ina diina'i ihukkisa laqqakkamoyyonnihe? Ee bikkina ayyi manchim ka uulli luwwa iitteena hasookkok ixxi gaga Waa'ina diinakkichchi issookko. Keesammi Kitaabanne «Waa'i ni woronne gassu foor xale'i ixxena inkoommisina qoxxaallisa to'achchookko» yookkok kora'attennihe? Odim «Waa'i bolxoo keeno sabookko. Ihukkaarem maashaalli keenina Waa'i ixxi iittinne eroomma issookko» yoo bikkina Waa'i issoo eroommi hundiinsim lobane. Ee bikkina ki'nnuwwi Waa'ina ijaajammehe. Sheexaancho sabbehe; ixxim ki'nnuwwiinsi gibookko. Odim Waa'i kollonne hinci'llehe. Ixxim ki'nnuwwi kollonne hincookko. Baaxiilaano, ki'nnuwwi anga jor baxiinsi muccussehe! Malantakkam keeno, ki'nnuwwi wodano jor sawwitiinsi muccussehe! Ki'nnuwwi u'nnantakka'a kichche'llehe. Ki'nnuwwi osachchi wi'llonne. Ki'nnuwwi liiranchim kichchechchanne daba'llona. Waa'i illagenne ki'nnuwwi gaga hoffiissehe. Ixxim ki'nnuwwa lonsookko. Iyyabbaayyuwwa, ki'nnuwwina'i ki'nnuwwim ha'mmantakkotte. Ayyi manchim manna hamookkok te'im mannanne oogatookkok Seera hamookko; Seerannem oogatookko. Seeranne oogattittaare oogataanchi ikkootto bagaan Seera wonshitoohaneyyo. Seera uwwaanchii oogatookkokii matem Waa'a. Gatiseenam bi'iseenam xanookkok xale'i ixxotte. Ee bikkina mannanne oogattoottok at ayyette? Ki'nnuwwi «Kaballa te'im soodo mulli uulla malloommo; eekke'em mat hiincho afuulloommo. Odim daddallaa lobakat diinate siindoommo» yitakkam keen ege'llehe. Mashka'oomim ki'nnuwwi soodonne ihoo luwwa maham laqqakkamoyyo. Ki'nnuwwi foor maruchcho? Hofqax ammanina moo'amaa lasaanchonne bi'oo goollisayyonnihe? Ki'nnuwwi yimmi hasisookkok «Waa'i yaa hee'nnummaare kaka te'im eekka banxoommo» yimmi xale'e. Ihukkaarem ki'nnuwwi eehid yimmi bikkenne bolximminne bakke'antakkamuulla. Eehido'i amaad hundim jora. Ee bikkina er luwwa issimma la'ukkuuyyi issoobee'i manchi issimma hoogimmi ixxena baaxiil ihookko. Kaba odim goddaan keen, macceessehe! Jor hawwi ki'nnuwwanne waaroo bikkina laattakku'uuyyi wi'llehe. Ki'nnuwwi goddi hundim shamaa bi'aakko. Ki'nnuwwi eddechcham bil itaakko. Ki'nnuwwik worqii birii ci'llaakko. Ci'lloomim ki'nnuwwanne dabaraa naqqasoohan ihookko. Oo ci'llim ki'nnuwwi maaram aphphoo gii'llisa itookko. Ka lasaanchi lobakat amaxxa wixxaa'llakko'ookko. Odim ki'nnuwwi abuulli hurbaata muru baxaa'nneka baxxo'i bito uwwitakkobee'i bikkina ixxuwwi laachchi macceesamoolla. Ee hurbaata muru kee'n laachcha gogoxxi Moollanni macceesaakko. Ki'nnuwwi ka uullanne makkannee liiranchannee hee'llakkam bikkina ki'nnuwwi gaga durakkeena xiikkakko'i mirgo'isa geejjissakko'ookko. Muccura shitakkeena ki'nnuwwi oogattakko'o. Ixxenam sabeena malaayyi bee'e. Iyyabbaayyuwwa, Moollanni waaro xa'nnimminne egellehe. Abuullaanchi illagee'nnekaa lasaanchikaa xeena siideebe'i afeebe'e xa'nnimminne uulliinsi er misha egerookko. Ee'isam ki'nnuwwi xa'nnehe. Moollanni waaroo balli hincu bikkina ki'nnuwwi tiiro qoxxissehe. Iyyabbaayyuwwa, ki'nnuwwannem oogatamoobee'isa ki'nnuwwina'i ki'nnuwwim quunquuntakkotte. Oono'o, oogataanchi waaroo amman hincaakko. Iyyabbaayyuwwa, Waa'i summinne hiraaggo'i keen hawwo xa'nnimminne aa'lla'a kobi'llishshi ikko'isa laqqehe. Odim xa'nnimminne qoxxu keeno «Maasse'amaakkoo keeno» yinoommo. Iyyoob hinkid xa'nnimminne qoxxuda'e macceessakko'ookko. Waa'im lasaanchonne ixxena issu er luwwa moo'llakko'ookko. Eehanniinsim Waa'i uroohanee lobakata qishixxoohanee ihukkisa moo'llakko'ookko. Iyyabbaayyuwwa, hundiinsi illageen iimanennee uullannee te'im ayyi luwwannem hide'llakkotte. Ki'nnuwwi woc eeyya yimmi ihukkaa'lleensi hanqinne «Eeyya» yi'llehe. Eehideyyo yimmi ihukkaa'lleensi hanqinne «Eehideyyo» yi'llehe. Oohim Waa'i oogato'onne ki'nnuwwi aaggakkambee'isinatte. Ki'nnuwwi lambe'enne ayyi manchim hawwookkok hee'ukkaare Waa'a uunxona. Ayyi manchim liiramookkok hee'ukkaare Waa'a galaxximminne zammarona. Ki'nnuwwi lambe'enne ayyi manchim xissukkok hee'ukkaare amma'nnaa'n wixxixxi lommanna weeshona. Ixxuwwim xissaanchina Moollanni summinne zayta labamaa Waa'a uunxamona. Eehido'i amma'nnaxxi uunxat xissaancho fayyiisookko. Xissaanchim baxu baaxiil hee'ukkaare haafite siixxookko. Ee bikkina fayye'llakkamisina ki'nnuwwi baaxiilo ki'nnuwwina'i ki'nnuwwim biiraa yaqqanchinne mat mullaannina Waa'a uunxehe. Muccur manchi uunxat lophphaakkoo malaayyi yoohane. Eeliyaas ni'isam manchi hee'ukko. Ihukkaarem xeen ga'nnoobee'isa uunxu ammane sas hiinchinaa kollinaa uullanne xeen ga'nnukkoyyo. Odim Waa'a uunxu ammanenne iimaniinsi xeen ga'nnukko. Uullim misha uwwukko. Iyyabbaayyuwwa, ki'nnuwwiinsi mat hanqi googiinsi firukkaare mulleka hanqo'i googonne dabaruta'n baaxiilaancho huushamu googiinsi dabarookkok baaxiilaanchika foore lehiinsi gatisoo'isaa lobakat baaxiilo haafissiisoo'isa la'ona. Yaayyanchi mashka'inne Phaanxoosanne, Galatiyanne, Qaphaadooqe'enne, Issiyannee Biitaanannee binnitakka'a hee'llakkam Waa'i minaadabina Yesuus Kiristoosina asse'amaanchi ihu Pheexiroosiinsi asse'amu asso. Anni Waa'i gaassaatim sawwaa ki'nnuwwa doo'llukkok Keesammi Ayyaaninne keesantakka'a Yesuus Kiristoos xiiginnem aanshaqqitakka'a muccur keen ikkakkamisinattee ixxena ijaajantakkamisinattee. Ki'nnuwwina eroommii xummii lophphaa ihona. Waa'i Yesuus Kiristoosa lehiinsi ki'isimminne heer heeraxxi neeyyata uwwukko. Ixxaanninne lophphaakkoo qishixxatinne haareechcho qarammoommisa issu ni Moollanni Yesuus Kiristoos Anni Waa'ina galat afona. Ki'nnuwwi a'llitakkam heechchi gulummi bi'oobee'ane, xurbee'anee moosiroobee'anee. Eekka iimanenne ki'nnuwwina gudisaa egeraakko. Lasaanchi doollenne moo'ameena gudaa yoo gatimmina amma'nnaxxi kollinne Waa'i malaayyinne egerantakko'ookko. Ihona bagaan kaba ki'nnuwwi hofqax ammanina annanni annanni keenatinne hawwitakko'aarem eehannonne liirammehe. Bi'oo worqam ihuta'n giiranne issakka'a moo'akkamo; hore'em worqiinsim lophphoo ki'nnuwwi hanqo'i amma'nnatim keenanchi hasisookko. Ee'isinne moo'amu ki'nnuwwi amma'nnat Yesuus Kiristoos waaroo ammane galata, lombaa nuuraa siidisoo'isinatte. Ixxo moo'llakkobee'aarem iittitakko'ookko; ixxo kaba moo'llakkobee'aarem ixxonne amma'nnitakko'ookko. Ee'isinne kurakkeena xanakkambee'i lombi yoo liirancha liirantakkamo. Ixxonne yoo amma'nnatinne ki'ukkok ki'nnuwwi foorina gatimma siixxitakko'ookko. Ki'nnuwwi gattakko'i gatimmi bikkinam hiraagaan qoxxaallisa saarayyita'a hassa'a hee'llo'o. Ixxuwwim ki'nnuwwina uwwamu gatimmi bikkina gaassita'atim kutta'a hee'llo'o. Ixxuwwanne hee'u Kiristoos Ayyaan Kiristoosanne afoo hawwi bikkinaa ee lasagem ixxi siidoo lombi bikkinaa gaassaatim kuraa hee'ukko. Ookki hinki ammane ihooda'ee hinkido'isinne ihooda'ee ixxuwwi laqqeena yakito'ookko. Ixxuwwina moo'amukkok ki'nnuwwina awwaadonatte bagaan ixxuwwi gagina awwaaxxiteenayyo. Ixxuwwi ki'nnuwwina awwaaddo'okim iimaniinsi asse'amu Keesammi Ayyaa'n kollinne kaba mishiraachchi sagara kutto'i mannika caakkissa'a kurimminatte. Eekkam Waa'i asse'amaan moo'lleena mixxam hee'llo'o. Ee bikkina ki'nnuwwika tiiro baqaa'llakka'a baxina guddehe. Yesuus Kiristoos waaroo ammane siixxitakkam eroommina neeyyata issitakka'a ki'nnuwwi gaga gullitakka'a ege'llimminne hee'llehe. Ijaajamoo oosisa ikkakku'uuyyi gaassi lachcha hoonginne hee'llakko'i jor mixano awwontakkotte. Ki'nnuwwa weeshu Waa'i keesamaakkoohan ihukkisam ki'nnuwwi gagim hundisinnem keesantakko'oo keen ikkehe. Mashka'oomim Keesammi Kitaabanne «An keesammi ihummisam ki'nnuwwim keesammi ikkehe» yamamaa kitaabamaakko. Ayyenam golo'oo'n annannichchonnem ixxi baxisam oogatoo Waa'a «Niyyanni Waa'a» yitakka'a weeshshakkaman ihulas ka koyyina'n uullanne hee'llakkam doolli hundam Waa'a baddimminne hee'llehe. Ki'nnuwwi anno'iinsi aa'llakko'i awwaad bee'i heechchiinsi bitaa'antakko'ok bi'oo birinnette te'im worqinnette ihubee'isa laqqakkamo. Ihukkaarem miiqakkam luwwi bee'i muccur gereechchisa ihu lombi yoo Kiristoos xiiginnette. Kiristoos doo'llamukkok uulli qooccameena illageenette; ihukkaarem kaba lasaanchi doollenne ki'nnuwwi bikkina moo'amaakko. Ixxo lehiinsi ki'isaa lomba uwwu Waa'anne ki'nnuwwina ixxi kollinne amma'nnat yoo bikkina ki'nnuwwik amma'nnatii neeyyatii Waa'annette. Hanqina ijaajantakku'uuyyi hanqo'i abbaayyoo'm iittina ki'nnuwwi heechcha muccussitakka'a ki'nnuwwina'i ki'nnuwwim wodaninnem guullitakka'a iittammehe. Ki'nnuwwi haareechcho qarantakko'ok bi'oo shumo'iinsette ihoo'n heer heerinam hee'oo Waa'i sagarinne bi'oobee'i shumo'iinsette. Ee'isam Keesammi Kitaabanne «Manni hundim hixisa; ixxek lombi hundim hix fiitisa; hixim gogookko; fiitim giggirookko. Ihukkaarem Moollanni sagar heer heerinam hee'ookko» yamamaa kitaabamaakko. Oo sagarim ki'nnuwwina kuramu mishiraachchi sagara. Eehannata'i jolle, qawwiisimma, labishsha, to'achchimmaa hamimmaa hundam ki'nnuwwiinsi qeessitakka'a hoollehe. Ee bikkina manni beyyonne sabamaa Waa'i illagenne doo'llamaa lobakat lombi yoo heechcha uwwoo kinchi ihu Kiristoos beyyo waallehe. Ee hee'oo kinchisam ki'nnuwwim Waa'i hee'oo min ikkakka'a baxammehe. Ee'isinne Yesuus Kiristoos kollinne hee'oo er kitima Waa'ina hincaa'immina keesantakko'oo qeessuwwi ikkakkamo. Oohim Keesammi Kitaabanne «Oono'o! An hundiinsim lophphaa awwaadoo doo'llamaakkoo bito xee'aalli kincho Xiyoonanne uullisoommo. Ixxonne amma'nnookkok tuurooyyo» yamamaa kitaabamaakko. Ee bikkina amma'nnitakko'i ki'nnuwwina oo kinchi lobakata awwaadoohane. Ihukkaarem amma'nnitobee'i keenina «Mine baxxam keen ‹Awwaadooyyo› yita'a uunjito'i kinchi hundiinsim lophphaa awwaadoohan ihukko» yamamaa kitaabamaakko. Odim mulli beyyonnem «Oo kinchi manna qoloohane; kinchoomim ixxuwwa ubbuusookko» yamamaakko. Ixxuwwi qolanto'okim Waa'i sagarina ijaajancha sabbo'i bikkinatte. Ixxuwwi eehannina uwwanto'oo keeno. Ihukkaarem ki'nnuwwa tuunsiinsi maalalsiisoo caakkanne fissu Waa'i lomba kuttakkamisina doo'llantakko'oo ixxi shumo'o; adilinam qeessuwwa. Odim keesantakko'oo minaadaba; Waa'inam ixxi gaqqi minaadaba. Eraare ki'nnuwwi Waa'i minaadab hee'llakko'oyyo. Ihukkaarem kaba ki'nnuwwi Waa'i minaadaba. Eraare urimma siixxitakkobee'i keen hee'llakko'o. Ihukkaarem kaba ki'nnuwwi urimma siixxitakko'ookko. Iittantakko'oo iyyabbaayyuwwa, ki'nnuwwi ka uullanne waaraanoo koyyaa ikkakko'i bikkina ki'nnuwwi foorinne uullixxamoo maa'l jor mixaniinsi qee'llitakkamisina uunxoommuulla. Ayyi la'ukko hanqo'i Waa'a laqqambee'i minaadab «Jor issitam keeno» yita'a ki'nnuwwinne uullixxantota'n ki'nnuwwika er baxo moo'lla'a Waa'i oogateena waaroo balla ixxena lomba uwwitamisina ixxuwwi lambe'enne er baxo moo'issehe. Moollanni bikkina yitakka'a gassimmi malaayyi yoo keenina ijaajammehe. Adilam ihuta'n hundiinsim hanaan ihaa gassoohan ihu bikkina ijaajammehe. Jora issitam keeno guzumo'llamisinaa eroka issitam keenom galaxxitamisinaa adiliinsi asse'anto'oo keen ikko'i bikkina gassaanina ijaajammehe. Ki'nnuwwi eroka issimminne qawwuwwi keen woccam lachbee'i woshsha sa'a issiissamisina Waa'i doo'lla. Waa'ina awwaaddam kee'nnisa ikkakka'a wolabbaninne hee'llehe bagaan ki'nnuwwik wolabban jolle maaxoohan ihoone. Manni hundam lonsehe. Amma'nnaanom iittehe; Waa'am baddehe; adilam lonsehe. Agido, biijaalluwwinaa maashaalli moollanno'inaa xale'i ihoo'n mogaalli keeninam hundisinnem lonsimminne ijaajammehe. Waa'i bikkina yaa laboobee'isinne afoo hawwonne iyyaqqoo manchi Waa'iinsi maasso siixxookko. Jora issitakka'a aphphisakkamaare iyyaqqitakkota'n maha awwaadoo? Ihukkaarem eroka issitakka'a iyyaqqimminne hawwo aa'llakko'aare eehannina Waa'iinsi maasso siixxitakkamo. Kiristoos kobi'lla awwontakkamisina ixxi ki'nnuwwi bikkina hawwo aa'aa ki'nnuwwina kobi'llishshi ihaakko. Ki'nnuwwi weeshantakko'okim eehanninatte. Ixxi maham baaxiilo baxukkoyyo. Ixxi suumiinsim jor firukkoyyo. Hanqa oogatoohaannina ixxi gaga higisaa uwwukko bagaan hawwo aa'ukkuuyyim sha'llamukkoyyo. Ixxo game'llakko'aarem dabaraa game'llukkoyyo. Neese baaxiilina lenaa muccuroomina hee'nnoommisina ixxi gagim maarinne haqqanne saqalamaa lehimminne ni baaxiilo iyyukko. Ixxi madinnem ki'nnuwwi fayye'llakko'o. Gereebbisa ki'nnuwwi bi'llakko'oo keen hee'llakko'o; ihukkaarem kaba ki'nnuwwi foore allaaraanchi beyyoo egeraanchi beyyoo daba'llitakka'a waattakko'ookko. Are, ki aro'ina ijaajame; ee'isinne ayyi la'ukko Waa'i sagarina ijaajamoobee'i aro'i hee'uta'n maham wocakkoo'n ixxi areka heechchi ogora moo'aa amma'nneena xanookko. Mashka'oomim ixxi ee kiikka Waa'a lonsoo muccur heechcha moo'ookko. Kiikki dan biireen moo'amoo luwwinne oohim horoore dadisimminne, worqa issitaa wereeggimminnee lobakat bit xee'aalli wereeggi eddechcha edde'imminnee ihoone. Ihukkaarem kiikki dan Waa'i illagenne lobakat lombi yoo mannooma oohim maashaalloomii qaphphaakkoo tiirii yoo bi'oobee'i wereeggi mu'uti'nnoo'i eddechcha edde'aa maaxamu woro'l mannoomii ki wodanonne ihona. Ee'isinne gaassi doollenne ixxuwwi neeyyato Waa'anne issito'oo keesammi meenti ixxuwwi goonina ijaajamimminne ixxuwwi gaga wereeggissa'a hee'llo'o. Saara'a Abrihaamina ijaajanta'a «Moollanna» yita'a weeshsho'o. Ee'isam ki'nnuwwim maham badditakkoo'n eroka issitakko'aa'lleensi Saara'ana landa. Ee'isam goona, meenti hoongaanchi qooccanchi ihukkisa qoossitakka'a la'imminne ki'nnuwwi meentinne mateeyyoominne hee'llehe. Waa'i uwwoo heechcha ki'nnuwwinne maqirem a'llitam bikkina ixxuwwa lonsehe. Ee'isamdu issitakkolas Waa'a uunxitakkam uunxato qoloo luwwi hee'ooyyo. Lasaanchonne ki'nnuwwi hundinam kuroommok ki'nnuwwina mat tiir, hereqqanchi, hanqo'i abbaayyoo'm iitti, qishixxoo tiirii maashaalli wodanii hee'ona. Jora issukkaannina dabattakka'a jora issitakkotte. Game'llukkoka dabattakka'a game'llitakkotte. Ihukkaarem maasso a'llitakkeena weeshantakko'i bikkina eehanni qoodanne maasse'llehe. Keesammi Kitaabanne «Heechcha iittookkokii er doollem moo'eena hasookkokii ixxeka allabo jora wocimmiinsii suuminnem qophphano wocimmiinsii ege'llona. Jora baximma uraa eroka baxona; xummam hasona; ixxom awwonona. Waa'ik illi muccur keenonnette. Ixxek maccim ee muccur kee'nneka uunxato macceeseena fooqaakkoohane. Ihukkaarem jora issitam keeno Waa'i ha'yyooyyo» yamamaakko. Eroka issitakkeena to'achchitakkolas ki'nnuwwa hawwodookkok ayyette? Muccuroomina yitakka'a hawwo aa'llakkolas maasse'antakkamo. Ki'nnuwwi ee keeno badditakkotte; ee keeninam hawwitakkotte. Ihukkaarem Moollanni ihu Kiristoosa ki'nnuwwi wodanonne lonsehe. Ki'nnuwwina yoo neeyyaxxi bikkina ayyim xa'mmoohaare dabattakkeena hundem ammanem guddehe. Eekkam maashaalloominnee lonsimminnee issehe. Kiristoosinne ki'nnuwwina yoo er heechcha game'llitam manni ee woccam jor woshshanne tuuttamisina er sawwit ki'nnuwwanne hee'ona. Waa'i doo'l ihulas jora issakka'a hawwimmiinsi eroka issakka'a hawwimmi erane. Kiristoos neese Waa'inne iittanseena ixxi muccur ihaa hee'ukkuuyyim baaxiilaan kee'n baaxiilina mexxo'aaggem lehaakko. Ixxi maarinne lehukkaarem ayyaaninne fooraam ihukko. Ee'isinne ixxi karanto'i foolluwwi beyyo maraa alallaatukko. Oo karanto'i foolluwwim Nohe'i gaassi markaba baxu doollenne iyyaqqimminne Waa'i egerukkaarem ijaajancha sabbo'i keeno. Ee markabanne aagga'a wo'iinsi gatto'i manni xale'i sadeenti hee'llo'o. Oo wo'i kaba ki'nnuwwa gatisu xammaqanchina kobi'lla. Oo xammaqanchi orachchi xura aanshaqqimmi ihoo'n muccur wodaninne Waa'a uunxakkam uunxato. Oo xammaqanchi gatisookkokim Yesuus Kiristoos lehiinsi kichchinnette. Ixxim iimane maraa Waa'i makkanne yookko. Ixxenam Waa'i asse'amaan, gassitam keenii malaayyaammuwwii ijaajanto'ookko. Maarinne Kiristoos ni bikkina hawwo aa'aakko. Ki'nnuwwim ee ixxeka sawwimminne ki'n gaga qoxxissehe. Mashka'oomim maarinne hawwo aa'ukkok ayyim baaxiilo baximma uraakkoohane. Ka lasage ka uullanne hee'llakkam doollenne Waa'i doo'llina hee'llehe bagaan maa'l mixano wonshitakkotte. Mulli minaadab issitam luwwa issimminne oohim jor balalechchinne, maa'l mixaninne, dimbimminne, kajjinne, agimminnee qophpha'n waa'ina otossimminnee hee'llakko'i doolli ihookko. Kaba ki'nnuwwi ee ixxuwwi abdaadimmi baxinne mat ikkakkobee'i bikkina maalaltamo; game'llitamome. Ihukkaarem hee'oo keenonnee lehu keenonnee oogateena gudu Waa'ina ixxuwwi issito'i luwwa kuttamo. Leto'i keeninam mishiraachchi sagar kuramukkok ee bikkinatte. Ee'isinne ixxuwwim mulli mannisam maarinne oogato'o aa'lla'a Waa'i hee'oo'isa foorinne hee'llamisinatte. Luwwi hundikim lasaanchi afaakko. Ee bikkina ki'nnuwwi Waa'i uunxatina gaga ege'llitakko'oo keenoo baqitakko'oo keenoo ikkehe. Lobakat baaxiilo iitti ifiisoo bikkina hundiinsim lonsitakka'a ki'nnuwwina'i ki'nnuwwim hanqo'i iittinne hee'llehe. Quunquuntakkoo'n ki'nnuwwina'i ki'nnuwwim koyyinano aa'aqqammehe. Annannichchim Waa'iinsi aa'llakko'i annanni annanni uwwancha er gassaanchisa ikkakka'a ki'nnuwwina'i ki'nnuwwim ee uwwancha awwaaxxehe. Ayyim kurimmi uwwanchi yookkok Waa'i sagara kurona. Awwaadookkok luwwi hundannem Yesuus Kiristoos kollinne Waa'i galaxxamoo'isina Waa'i ixxena uwwu malaayyinne awwaadona. Lombii malaayyii heer heerinam ixxena ihona! Aameen. Iittantakko'oo iyyabbaayyuwwa, gii'llisa shokkiisoo hawwi ki'nnuwwa keeneena afoo ammane mat haareechchi luwwi ki'nnuwwanne ihukkaannisa issitakka'a maalaltakkotte. Kiristoosik lombi moo'amoo ammane ki'nnuwwim lobakata liirantakkamisina Kiristoosika hawwo baxxantakkamuulla ihu bikkina liirammehe. Kiristoos bikkina ki'nnuwwa gadakkamulli ihulas Waa'ik lombi yoo Ayyaan ki'nnuwwanne usheexxoo bikkina maassaammuwwa. Ihukkaarem ki'nnuwwiinsi ayyim manna shimminne te'im gaminne te'im jora baximminne te'im manni woshshanne aagimminne hawwo aa'oone. Amma'nnaanchi ihimminne hawwo aa'ookkok Kiristoos bikkina yaa Waa'a galaxxukkuuyyi hawwo aa'ona bagaan tuuroone. Oogato'i Keesammi Mi'n abaroosanne asheeroo amman kaba afaakko. Oo oogato'i neesenne asheeroohan ihulas eehannata'i Waa'i mishiraachchi sagarina ijaajantambee'i kee'nnek lasaanchi maha iheenatte? Keesammi Kitaabanne «Er manchim hawwinne gatoohan ihukkaa'lleensi Waa'a badditambee'i keenii baaxiilaammuwwii maha ikkeenatte» yamamaakko. Ee bikkina Waa'i doo'llinne hawwo aa'llam keen amma'nnamaakkoo qooccaanchina ixxuwwi gaga yabo uwwita'a eroka issimma uttoone. An odim amma'nnaa'n lommanniinsi mat ihummok Kiristoos hawwi bikkinam kuroommok odim waaroo lombiinsim baxxamoommok ki'nnuwwi lambe'enne yoo lommanna sogoommo. Allaattakkamisina Waa'i yabo uwwu Waa'i allaachche allaallehe. Allaattakkamokim malaayyinnette ihoo'n iittinnee Waa'i yukkisinnee ihona. Odim ki'nnuwwi gagina mat luwwa siixximmi mixaninnette ihoo'n awwaad yoo mixaninnette ihona. Allaachchinam kobi'llishshi ikkehe bagaan ki'nnuwwi allaattakkamisina uwwamu allaachche malaayyinne ijaajjakkotte. Allaaraanina gassaanchi ihukkok waaroo ammane lombi yoo bi'oobee'i kaachchi mare'e siixxitakkamo. Ee'isam woraadduwwa, ki'nnuwwim lommannina ijaajammehe. Ki'nnuwwi hundim gaga hoffiissakku'uuyyi maashaallooma eddechchisa edde'llakka'a ki'nnuwwina'i ki'nnuwwim hara'mmammehe. Keesammi Kitaabanne «Waa'i bolxitam keeno saboohane. Ihukkaarem maashaalluwwina ixxeka eroomma uwwoohane» yamamaakko. Ee bikkina Waa'i ixxi ammanenne ki'nnuwwa lonsoo'isina malaayyaam Waa'i angiinsi woroonette ikkakka'a ki'nnuwwi gaga heeshaa'llehe. Waa'i ki'nnuwwina sawwoo bikkina ki'nnuwwa kichche'isoo luwwi hundam ixxonne ubbuussehe. Ki'nnuwwi gaga ege'llehe; baqitakko'oo keenom ikkehe. Ki'nnuwwi diinakkichchi Sheexaanchi liqicookkoka hasukkuuyyi hobbichchisa muunukkuuyyi do'oolla. Uulli hundannem amma'nnatinne ki'nnuwwi abbaayyuwwi eehido'i hawwo aa'llu'uuyyi yo'isa laqqakka'a amma'nnatonne qoxxitakka'a uullitakka'a Sheexaanchinne uullixxammehe. Hofqax ammanina hawwo aa'llakka'a lasage eroommi hundam uwwoo Waa'i heer heerinam hee'oo lombina Kiristoosinne weeshukkok ixxi gagim muccur keen issookko, qoxxisookkoo malaayyem uwwookkoo. Ixxena malaayyi heer heerinam ihona! Aameen. Amma'nnamaakkoo abbaayyo yaa moo'oommi Sillaasinne gundannem ki'nnuwwina ka assi kitaaba kitaabaa asse'aammo. Kitaabummokim ki'nnuwwa sogeenattee kuk hanqo'i Waa'i eroommi ihukkisam kureenattee. Ee bikkina ee eroommanne qoxxitakka'a uullehe. Ki'nnuwwisam doo'llamu Baabiloo'n amma'nnaan xummaato asse'aakko. I beet Maarqoosim xummaato asse'aakko. Amma'nnaa'n iittinne ki'nnuwwina'i ki'nnuwwim suunqammehe; Kiristoosan ikkakko'i keenina hundinam xummi ihona! Aameen. Ni Waa'aanninnee neese Gatisaanchi Yesuus Kiristoosaanninnee muccuroominne neese siindummi lombi yoo amma'nnati'nnoo'i amma'nnato siiddakko'i keenina Yesuus Kiristoosina awwaadaanchoo asse'amaanchoo ihu Pheexiroosa yamamu Simi'ooniinsi asse'amu asso. Waa'aa ni Moollanni Yesuus Kiristoosaa la'imminne eroommii xummii ki'nnuwwina lophphaa ihona. Waa'i ixxi gaqqi lombinnee eroomminnee weeshukkok ixxo lanqummi bikkina heechchaa hanqo'i amma'nnatinne hee'immaa ixxi gaqqi malaayyinne niina hundem luwwam uwwaakko. Ka uulli jor mixaninne waaroo adabi'immiinsi fittakka'a Waa'ik qoocci ki'nnuwwanne hee'oo'isina lobakat lombi yoo neeyyato uwwaakko. Ee bikkina amma'nnatonne eroomma, eroommannem lachcha lachchannem gaga ijaajimma, gaga ijaajimmannem iyyaqqimma, iyyaqqimmannem Waa'a labimma Waa'a labimmannem abbaayyoo'm biijooma, abbaayyoo'm biijoomannem iitto eddakkeena xantakko'is hundinnem yaki'llehe. Oo keen ki'nnuwwina exxukkuuyyi marulas Moollanni Yesuus Kiristoosa laqqakkamisa issookko bagaan baxo tittakko'oo keenoo mish bee'i keenoo ikkakkamoyyo. Ayyim oo keen bee'ek qooqaa xale'i ixxi illagenne yookkoka moo'oohanee bagaan eraa'l baaxiiliinsi muccurukkisa xadaakkoohane. Ee bikkina iyyabbaayyuwwa, ki'nnuwwika weeshanchaa doo'llanchaa qoxxissakkeena lobakata yaki'llehe. Ee'isa issitakkolas hore'em ubbakkamoyyo. Ee'isinne heer heerina hee'oo neese Gatisaanchi ni Moollanni Yesuus Kiristoos adillanonne aaggakkamisina mahim hanqatoo'n uwwamookko. Maham ee keeno laqqakka'a amaddakko'i hanqanne qoxxitakka'a uullitakko'aarem an ee kee'n bikkina hundem ammanem tiissiisimma uroommoyyo. An foorinne hee'ummuuyyi ki'nnuwwina tiissiisimminne baqaa'immi hasisoohan ihukkisa la'oommo. Mashka'oomim ni Moollanni Yesuus Kiristoos iina moo'isukkisinne maarinne ka uullanne hee'oommi heechchiinsi abbis ammanenne annanni ihoommisa la'oommo. An kaba lobakata yakoommok ki'nnuwwiinsi lehinne annanni ihaa lasagem ka woshsha hundem ammanem tiittakkeena xantakkamisinatte. Ni Moollanni Yesuus Kiristoosika malaayyee waaroo'isaa ki'nnuwwina la'insummi ammane ixxeka malaayyaam lomba moo'nnaatette bagaan manni qooroominne qooccamu heesso awwonnaateyyo. Hiraagaa'n sagar hanqi ihukkisa ookki niina caakkisaa kuraakko. Uulli soodeebe'ee soodaraa'l boollaankichchi ki'nnuwwi wodanonne fireebe'ee tuunsonne caakkisakko'i kuraaza egerakkamisa ee sagara egettakko'aare erane. Keesammi Kitaabanne kuramu woshsha ayyi manchim ixxi sawwixxisa tireena xanoobee'isa hundiinsim gaassitakka'a la'immi hasisookko. Mashka'oomim Keesammi Kitaabanne kuramu woshsha manni Keesammi Ayyaan awwonsukkisinne Waa'iinsi waaru woshsha wocukko bagaan manni sawwixxisinne waarubee'ane. «Neese hiraagaano» yitam qophphanaan keen minaadaphphi lambe'enne ki'llo'isam ee'isam ki'nnuwwi lambe'ennem qophpha'n losisaan ki'llamo. Oo keen bi'isoo qophpha'n losano maaxaqqanne eebbamo. Tisso miqaa ixxuwwa gatisu Moollannam laggamo. Ee bikkina ixxuwwi gaganne dangonnem bichcha eebaqqitamo. Odim dut keen ixxuwwika tuussiisoo baxo awwontamo. Ixxuwwi mashka'inne hanqo'i goog duumamookko. Oo qophpha'n losisaan diinate iittimmiinsi ki'ukkok ixxuwwi qooccito'i qophphano kuttu'uuyyi ki'nnuwwa coggam keeno. Ixxuwwanne afoo oogato'im lobakat doolliinsi illageen gudaakkoohane. Ixxuwwik bichchim dasooyyo. Baaxiilo baxxo'i Waa'i asse'amaan gambabbaakkoo tuunsi woronne chimchiminne karanta'a oogaxxi ayyaam afeebe'e oogato'o aa'llam beyyonne egettamisina Waa'i darabukko bagaan ixxuwwina qishixxukkoyyo. Ee'isam baaxiilaan keen hee'llam uullanne bichchi wo'o Waa'i eebu ammane muccurooma alallaatam hee'u Nohe'e mulli lamar manninnem maqire gatisukko bagaan eraa'l uullina qishixxukkoyyo. Odim baaxiilo baxxam keenina hundinam kobi'l ikkamisina Soddomannee Gomorannee Waa'i giira ga'nnisaa gii'l buchchi ikkamisina oogataa bi'isukko. Boqqi keen issitam tuussiisoo luwwanne lobakata hawwukkuuyyi hee'u muccur Looxa gatisukko. Oo muccur manchi ixxuwwi lambe'enne hee'ukkuuyyi ballina ballina moo'amii macceesamii hee'u ixxuwwi jor baxonne ixxek muccur foor u'nnamam hee'ukko. Eehaara'i Moollanni ixxena gatto'i keeno keenanchiinsi hinkid gatisooda'ee baaxiilaan keeno bi'iseena oogaxxi ayyaam afeebe'e hinkid egerooda'ee la'ookko. Lophphaatim ixxuwwika jor haashaassoo maa'l mixano awwontu'uuyyi Waa'ika malaayye gaddam keeno oogateena egeraakko. Oo qophpha'n losisaan iggaalluwwaa yito'i luwwiinsi daba'llitambee'i keenoo ikko'i bikkina iimanenne gassitam keenom game'llimma badditamoyyo. Ixxuwwiinsi lophphoo wodii malaayyii yoo Waa'i asse'amaanom ikkota'nnim Moollanni illagenne ee keeno game'llito'oyyoo oogatto'oyyoo. Ihukkaarem oo keen ikkamis qooccanto'isinne laqqam lachchinne qaashanne amadanta'a leteena qaranto'i bii'l moochchisa. Oo keen qoossita'a laqqobee'i luwwa game'llitamo. Ixxuwwi ee bii'l moochchisam bi'llamo. Ixxuwwi bi'isso'i bi'ishshina hawwo aa'llamo. Ixxuwwik liiranchi balli hundoomam maa'l jor mixano wonshimma. Tuussiisoo luwwaa shigigaa'oo luwwaa baxxam keen ikku'uuyyi ki'nnuwwinne maqire mateeyyoo'm hurbaata ittam ammane maa'l mixano wonshitamo. Ixxuwwik illi xale'i saa'immi baxo moo'oo bikkina baaxiilo baximma hore'em uttamoyyo. Amma'nnatonne qoxxaa uullubee'i keenom huushissam keeno. Ixxuwwina mixano losaakkoo wodan yookko. Ixxuwwi duumanto'oo keeno. Xabbeen googo utta'a huushanchi googonne matto'ookko. Ee'isam jora issimminne diinate siixxeena iittaa huushamu Baasoor beet Baala'aamisa huushanto'ookko. Ihukkaarem ixxi bi'ishshina Waa'i ixxo axeerukko. Woceena xanoobee'i hallichchi mannisa wocaa ee hiraagaanchika machchaalle egedukko. Oo manni xoo'u bu'isaa hambu'llam ki'isaa massoo duuphphisaa. Ixxuwwina gambabbaakkoo tuunsi gudaakko. Mashka'oomim huushanchi woronne hee'llam kee'n woriinsi abbis ammane fitto'i keeno awwaad bee'i woshsha amaadimminne woccu'uuyyi maa'l jor mixaninne huushissamo. Ixxuwwi gagim jor baxina agid ikka'a hee'llu'uuyyim ee keeno «Neese wolabbanonne fissinoommo» yitu'uuyyi ixxuwwina woccamo. Mat manchi ihu luwwinam kaa'amulas ee luwwina agishshi ihaakko. Neese Gatisaanchi ni Moollanni Yesuus Kiristoosa la'imminne ka uulli haashaarammi luwwiinsi fissaqqita'a lasage daba'llita'a eehannonne digaadanta'a kaa'antolas ee kee'nnek illaqqi heechchiinsi lasaqqi heechchi lophphaa jorookko. Mashka'oomim ixxuwwina uwwamu keesammi ijaajo laqqa'a lasage utta'a laso daba'llitamaanniinsi muccuroo'm googo laqqoo'n hee'llota'n eran hee'ukko. Oohim «Wishichchi uwwe'u uwwanne daba'llukko. Ee'isam boonkekkichchim aanshakka'a lasage daba'llaa haranne biqqiiqqukko» yamamu kobi'llishshi ixxuwwanne afukkok hanqame. Iittantakko'oo iyyabbaayyuwwa, kaba an ki'nnuwwina kitaabummok la'm asso. Ee kitaabummi lamem assonnem ki'nnuwwika muccur tiiro tiissiisimminne baqaa'eenatte. Ki'nnuwwina tiissiiseena hasoommok lobakat doolliinsi illageen keesanto'oo hiraagaan kutto'i woshshaa ki'nnuwwi asse'amaa'n kollinne Gatisaanchi Moollanniinsi uwwamu ijaajoo. Lasaanchi doollenne naaccam keen ixxuwwika jor mixano awwontu'uuyyi naacimminne waattamisa ki'nnuwwi gaassitakka'a la'immi hasisookko. Ixxuwwim waattamok «Ixxi ‹Waaroommo› yaakkoollayyonnihe? Eehaare ixxi hannonne yookko? Niyyanno'i woddallam leta'a laaqqo'ookko. Uulli qooccamukkaanniinsi ki'isaa luwwi hundim kabad afeebe'em eraa'llisame» yitamo. Lobakat doolliinsi illageen Waa'i ixxi sagarinne iimanee uullaa qooccaa uullam wo'iinsi wo'innem qooccukkisa laqqeena ha'yyitamoyyo. Ee doollenne hee'u uulli wo'innem xuuxamaa bi'ukko. Ihukkaarem kaba yoo iimanii uullii Waa'i sagarinne giirinne bi'eena gudaa yookko. Oohim Waa'i ixxena ijaajantambee'i keeno oogataa bi'isoo ayyaam afeebe'e. Iittantakko'oo iyyabbaayyuwwa, ka hanqo'i woshsha xaddakkotte. Moollannina kum hiinchi mexxo'i ballisa. Mexxo'i ballim kum hiinchisa. Mat mat keen «Moollanni dasoohane» yita'a sawwitamisa ihoo'n ixxi «Issoommo» yu luwwina dasoobee'ane. Ixxi ki'nnuwwina qishixxoohan ihu bikkina hundim baaxiilo biiraa yaa daba'llona hasookko bagaan ayyim bi'ona hasooyyo. Ihukkaarem Moollanni waaroo ayyaam gamaanchisa. Ee ammane iimanim lobakat sagarinne bi'ookko. Iimanenne yoo qooccanchim giirinne bi'ookko. Uullii uullanne yoo luwwii hundim shokkaa bi'ookko. Eehannah oo luwwi hundim ee'isinne bi'oohan ihulas ki'nnuwwi hinkido'i manni ihimmi hasisookko? Keesantakko'oo keenoo Waa'a badditakko'oo keenoo ihimmi hasisookko. Ee'isinne Waa'i waaroo ayyaamo egettakku'uuyyi ixxi qaqqisaa waaroo'isa issehe. Ee ammane iiman shokkaa bi'ookko. Iimanenne yoo qooccanchuwwim giirinne bukkamaa bi'ookko. Ihukkaarem Waa'i neeyyatukkisanne muccuroom hee'oo haareechchi iimanee haareechchi uullaa egelloommo. Iittantakko'oo iyyabbaayyuwwa, eekka egettakku'uuyyi tuussiisoo te'im miiqisoo luwwik ma'lluchchim bee'i keen ikkakka'a xumminne Waa'inne edantakkeena qoxxehe. Moollanni qishixxukkok ki'nnuwwa gatisimminatte ihukkisa xaddakkotte. Iittamaakkoo niyyabbaayyi Phaawuloosim ixxena uwwamu lachchinne ki'nnuwwina eehanni bikkina kitaabaakko. Ixxi assonne hundannem kurukkok ee'isinnetteme. Ixxi kitaabu assonne qoossakkeena kee'mmoo mat mat luwwi yookko. Oohim lachchi bee'i keenii lamaankuwwii Keesammi Kitaab woshsha boqqissamisam ixxekam boqqissamo. Eehanninne ixxuwwi gaganne bichcha eebaqqitamo. Iittantakko'oo iyyabbaayyuwwa, eekka gaassitakka'atim laqqakko'ookko. Ee bikkina boqqi kee'n huushancha awwontakka'a qoxxitakka'a uullitakko'i beyyiinsi ubbakkambee'isa ege'llehe. Ihukkaarem neese Gatisaanchi ni Moollanni Yesuus Kiristoos eroommannee lachchannee li'llehe. Ixxena kabademii heer heerinamii lombi ihona! Aameen. Neese ki'nnuwwina kitaamboommuullak mahim qooccamoo'n illageenim hee'u heechchi Saga'l bikkinatte. Neesem ixxeensi macceensaammo; ni illinnem ixxo qoossinaa moo'nnaammo; ni anginnem ixxo amandaammo. Ixxim Waa'inne maqire hee'ukkokii ixxi gagam niina la'isukkokii heer heerinam hee'oo heechchi niina moo'amukkaare neesem moo'nnummo. Ee bikkina neese ixxi bikkina woncoommuullaa ki'nnuwwinam alallaantoommuullaa. Niina Anni Waa'innee ixxi Beet Yesuus Kiristoosinnee mateeyyoom yoo'isam ki'nnuwwinam niinninne maqirem mateeyyoom hee'oo'isina ee niina moo'amukkokaa macceesamukkokaa ki'nnuwwina alallaantoommo. Neese kaka ki'nnuwwina kitaamboommuullak neesenne liiranchi wo'mmoo'isinatte. Neese Yesuusiinsi macceensummi assi ki'nnuwwinam alallaantoommok «Waa'i ixxi gagim caakka; ixxonnem tuunsi hore'em bee'e» yoohane. Neese tuunsonne hee'nnummuuyyim «Waa'inne maqire niina mateeyyoom yookko» yinumta'n woncoommi woshshannee banxoommi baxonnee qophphannoommuulla; hanqim neesenne bee'e. Ihukkaarem Waa'i caakkanne hee'oo'isa neesem caakkanne hee'nnumta'n neesennena'i neesennem mateeyyoom hee'ookko. Waa'i Beet Yesuus xiigim neese baaxiil hundiinsim muccussookko. Neesemdu «Neesenne baaxiil bee'e» yinumta'n neese ni gagam huushinsoommuulla; ni woronnem hanqi bee'e. Ihukkaarem ni baaxiilo Waa'ina biiraa yinumta'n Waa'i amma'nnamaakkoohanee hanqo'anee ihu bikkina ni baaxiil hundam haafookko. Odim ixxi neese bi'insummi bi'ishshi hundiinsim muccussookko. Neesemdu «Baaxiilo banxummoyyo» yinumta'n Waa'a qophphanaanchi issinaammo; ixxi sagarim ni woronne bee'e. I ooso, baaxiilo baxxakkambee'isina an kaka ki'nnuwwina kitaaboommuullak ayyi la'ukko niinniinsi ayyi manchim baaxiilo baxuta'n anni beyyonne ni bikkina fitamookkok xummaanchi Yesuus Kiristoos yookko. Waa'im ni baaxiilo haafukkok ixxennette. Baaxii'l haafite siixxinummok xale'i neesette inkoo'n manni hundichchome. Neese ixxi uwwu ijaajo wonshinoommi keen inkumlas ixxo lanqoommisa qoossinaa lanqoommo. Ayyi manchim ixxo la'oommo yukkuuyyi ijaajo gindoohan ihulas ixxi qophphanaancho. Hanqim ixxi woronne bee'e. Ihukkaarem hanqo'isa Waa'a iittookkok ixxi sagarina ijaajamoohane. Waa'im niinninne maqire yoo'isa qoossinaa lanqeena xannoommok eehanninnette. Ayyi manchim Waa'inne maqire hee'eena hasulas Yesuus Kiristoos hee'ukkisa hee'immi hasisookko. Iittantakko'oo i qarmanna, ku an ki'nnuwwina kitaaboommuullak haareechchi ijaaj ihoo'n luxxekam macceessakko'i ki'nnuwwi beyyonne yoo eraa'l ijaajome. Ihukkaarem tuunsi bee'i hanqo'i caakki oohim Kiristoos heechchannee ki'nnuwwi heechchannee moo'amu caakki caakkukkuuyyi yoo bikkina ku an ki'nnuwwina kitaaboommuullak moosiroobee'i haareechchi ijaajo. Ayyi manchim «An hee'oommok caakkannette» yukkuuyyi ixxi abbaayyo sabookkok kabad afeebe'em yookkok tuunsonnette. Ayyim ixxi abbaayyo iittookkok caakkanne hee'ookko. Ixxo qoloo luwwi hore'em hee'ooyyo. Ihukkaarem ixxi abbaayyo sabookkok tuunsonne hee'ookko. Daba'llamookkokim tuunsonnette; tuunsim ixxi ille qooqisu bikkina hanno marooda'em la'ooyyo. Ooso, Waa'i ki'nnuwwi baaxiilo Kiristoos bikkina yaa uru bikkina ki'nnuwwina kaka kitaaboommuulla. Anno'o, mahim qooccamoo'n illageenim yoo Waa'i Beeto laqqakko'i bikkina ki'nnuwwina kaka kitaaboommuulla. Harde'uwwa, ee jora kaa'llakko'i bikkina ki'nnuwwina kaka kitaaboommuulla. Ooso, anni Waa'a laqqakko'i bikkina ki'nnuwwina kaka kitaaboommuulla. Anno'o, mahim qooccamoo'n illageenim yoo Waa'i Beeto laqqakko'i bikkina ki'nnuwwina kaka kitaaboommuulla. Odim harde'uwwa, ki'nnuwwi qoxxaalluwwa, Waa'i sagarim ki'nnuwwi wodanonne yoo keenoo ee joram kaa'llakko'oo keenoo ikkakko'i bikkina ki'nnuwwina kaka kitaaboommuulla. Ku uullii ka uullanne yoo luwwa miximmii hundim higookko; ihukkaarem Waa'i yu luwwa issookkok heer heerinam hee'ookko. I ooso, lasaanchi doolli hincaakko. Kiristoosina diinakkichchi waaroo'isa macceessakko'isam kabadem Kiristoos maso'ik dut keen ki'llo'i bikkina lasaanchi doolli hincukkisa lanqoommo. Ixxuwwi fitto'ok ni lambe'iinsette. Ihukkaarem eraarem ixxuwwina niinninne maqire mateeyyoom bee'i keen hee'llo'o. Niinninne maqire mateeyyoom yoo keen ikkota'n niinninne maqirem qoxxita'a hee'llam hee'llo'o. Ihukkaarem ixxuwwina niinninne maqire mateeyyoom bee'i keen ikko'isa la'isseena ni lambe'iinsi annanni ikka'a fitto'o. Ihukkaarem ki'nnuwwi hundichchonnem Kiristoos labu Keesammi Ayyaan yoo bikkina hanqa laqqakkamo. Ki'nnuwwina kaka kitaaboommuullak hanqa laqqambee'i bikkinayyo. Ihukkaarem ki'nnuwwi hanqa laqqakkamo. Odim hanqannem qophphan bee'isa laqqakkamo. Eehaara'i qophphanaanchi ayyette? Yesuus Kiristoosatte ihukkisa lagookkok ayyim qophphanaancho. Annaa Beetoo lagookkok ixxi Kiristoosina diinakkichcho. Yesuus Kiristoos Waa'i Beet ihukkisa amma'nnoobee'ek Anni Waa'am lagaakkoohane. Beetonne amma'nnookkok Anni Waa'annem amma'nnaakkoohane. Ee bikkina ki'nnuwwi luxxeka macceesakko'i sagaranne qoxxitakka'a hee'llehe. Luxxeka macceessakko'i sagarimdu ki'nnuwwi woronne hee'ulas Waa'innee ixxi Beet Yesuus Kiristoosinnee hee'llakkamo. Yesuus Kiristoos niina uwwu neeyyat heer heerinam hee'oo heechcha. Ki'nnuwwa huushansiteena yakitam keen yo'i bikkina an ki'nnuwwina kaka kitaaboommuulla. Ihukkaarem Kiristoos labu Keesammi Ayyaan ki'nnuwwi woronne yoo bikkina oo ayyaanim ki'nnuwwi woronne hee'imminne qophpha'n woshshi ihoo'n hanqo'i woshshi hundam losisoo bikkina mulli losisaan ki'nnuwwina hasisooyyo. Ee bikkina oo Keesammi Ayyaan losisukkisanne ijaajantakku'uuyyi Kiristoosanne hee'llehe. Kabadem i ooso, Moollanni ka uulla daba'llaa waaroo ammane ixxi illagenne tuulloo'n iggimminne uullinoommisina ixxonne qoxxitakka'a hee'llehe. Kiristoos muccur ihukkisa laqqakkolas muccuroominne hee'ookkok hundim Waa'ina qachchi ihukkisa qoossitakka'a laqqakkamo. Waa'i neese hinkaa'nna iittuda'e sawwi'llehe. Ixxi neese lobakata iittu bikkina Waa'i ooso yamammaa weeshammoommi gada'a siixxinaammo. Eeyya, hanqinam neese Waa'i ooso. Ka uulli manni Waa'a neese laqqambee'i bikkina Waa'am laqqamoyyo. Iittantakko'oo i qarmanna, kaba neese Waa'ina ooso. Ihukkaarem lasage hinkid inkoomda'e qoossinaa lanqoommoyyo. Ihona bagaan Yesuus ka uulla waaroo ayyaamo ixxi gagoomam moo'nnoommi bikkina neesem ixxo lamboommisa lanqoommo. Eekka mixoo hundim Kiristoos muccur ihukkisam muccur ihimmi hasisookko. Baaxiilo yimmi Waa'ina ijaajancha sabimmi ihu bikkina baaxiilo baxookkok hundim Waa'i ijaajo gindaakkoo bi'isichcho. Kiristoos mannika baaxiilo shiinsheena waarukkisa laqqakkamo. Ixxonnem baaxiil bee'ane. Ee bikkina Kiristoosanne hee'ookkok baaxiilo baxooyyo. Ihukkaarem baaxiilo baxookkok ayyim hore'em ixxo moo'ukkoyyo te'im la'ukkoyyo. I ooso, ayyim ki'nnuwwa huushansoone. Kiristoos muccur ihukkisam ayyim muccurooma baxookkok muccura. Siriinsim Sheexaanchi jora issichchi ihu bikkina jora issookkok hundichchim Sheexaanchane. Waa'i Beet waarukkok Sheexaanchika baxo gindeenatte. Waa'iinsi qaramukkaannonne Waa'i qoocci yoo bikkina baaxiilo baxooyyo. Ixxi Waa'i qachchi ihu bikkina baaxiilo baxeena xanooyyo. Waa'i oosoo Sheexaa'n oosoo annanni issinaa lanqeena xannoommok kanninnette. Er baxo baxoobee'ek te'im ixxi abbaayyo iittoobee'ek Waa'ina qachchoyyo. Ki'nnuwwi luxxekam macceessakko'i sagar «Ki'nnena'i ki'nnem iittammehe» yoo sagara. Neese ee joriinsi asse'amaa ixxi abbaayyo Aabeela shu Qaayeela lamboone. Qaayeel ixxi abbaayyo Aabeela shukkok ixxi bax jor ihaa ixxi abbaayyik bax danaam ihu bikkinatte. Ee bikkina iyyabbaayyuwwa, Waa'a laqqambee'i ka uulli minaadab ki'nnuwwa sabbota'n maalaltakkotte. Neese niyyabbaayyuwwa iittinummi bikkina lehiinsi heechchanne filloommisa lanqoommo. Ayyim ixxi abbaayyo iittoobee'ek kabad afeebe'em hee'ookkok leh woronnette. Ixxi abbaayyo iittoobee'ek manna shaakkoohane; manna shukkokim heer heerina hee'oo heechchanne hee'oobee'isa laqqakkamo. Iitti mada'e ihukkisa lanqeena xannoommok Kiristoos ni bikkina lehukkisa la'imminnette. Ee bikkina neesem niyyabbaayyuwwi bikkina ni foore higinsaa uwwimmi hasisookko. Mat ka uulli amaxxi yoo manchidu ixxi abbaayyina mat luwwi hawwisukkisa la'ukkuuyyim ixxi wodanonne ixxi abbaayyina qishixximma sabaa moguta'n Waa'a iitteena hinkid xanoo? I ooso, neese hanqo'isa baxinnem iittammona bagaan xale'i suuminne iittammoone. Eehaara'i neese hanqiinsette inkummisaa Waa'i illage tuulloo'n iggimminne aangoommisaa lanqoommok kanninnette. Ni tiirimdu neese acceeqasoohan ihulas Waa'i ni tiiriinsi lobakata loban ihukkisaa hundi luchchom la'oo'isaa lanqoommo. Iittantakko'oo i qarmanna, ni tiirimdu neese acceeqasoobee'an ihulas Waa'i illage tuulloo'n iggimminne aangoommo. Neese Waa'i ijaajo egelloommi keenoo ixxom liiransoo baxo banxoommi keenoo inkummi bikkina Waa'a xa'mminummi luwwi hundam siixxinoommo. Oo Waa'i ijaajim neese ixxi Beet Yesuus Kiristoosanne amma'nninoommisinatte; odim ixxi neese ijaajukkisam neesena'i neesem iittammoommisinatte. Waa'i ijaajo egettam keen hundim Waa'inne maqire hee'llamo. Waa'im ixxuwwinne maqire hee'ookko. Neesem Waa'i ni woronne yoo'isa lanqoommok ixxi niina uwwu Keesammi Ayyaaninnette. Iittantakko'oo i qarmanna, «Neese hiraagaano» yitam dut qophphanaan uullanne ki'llo'i bikkina Waa'iinsi asse'anto'oo keenda'e te'im asse'antobee'i keenda'e ikko'isa saarayyitakka'a moo'llehe bagaan ayyaan hundam amma'nnitakkotte. Yesuus Kiristoos manchi ihaa waarukkisa amma'nnoo kee'n ayyaan hundim Waa'iinsi waaraakkoo ayyaana. Ki'nnuwwim Waa'iinsi waaru ayyaana eehanninne annanni issitakka'a laqqakkamo. Ihukkaarem Yesuus Kiristoos manchi ihaa waarukkisa amma'nnoobee'i kee'n ayyaan hundim Waa'iinsi ihoo'n ki'nnuwwi waaroo'isa macceessakko'i Yesuus Kiristoosina diinakkichchi ayyaana. Ixxim kabadem ka uullanne yookko. I ooso, ki'nnuwwi Waa'ina oosona'e. Ki'nnuwwi woronne yoo Keesammi Ayyaan ka uulli minaadabanne yoo ayyaaniinsi lobakata loban ihu bikkina ee qophphanaano kaa'llakko'ookko. Oo «Neese Waa'iinsi asse'ammaammoo keeno» yitam qophphanaan woccamok ka uulli luwwa. Ixxuwwi woccamok ka uulliinsetti ihu bikkina ixxuwwi woccamoka ka uulli manni macceessamo. Ihukkaarem neese Waa'iinsette. Waa'iinsi ikko'i keenim niinniinsi macceessamo. Waa'iinsette ikkobee'i keen niinniinsi macceessamoyyo. Neese hanqo'i ayyaanaa qophpha'n ayyaanaa eehanninne annanni issinaa lanqoommo. Iittantakko'oo i qarmanna, iitti waarookkok Waa'iinsette ihu bikkina neesena'i neesem iittammona. Iittamookkok Waa'ina qachcho; Waa'am la'oohane. Waa'i iitti ihu bikkina iittamoobee'ek hundim Waa'a la'ooyyo. Neese heer heerina hee'oo heechcha siixxinoommisina Waa'i ixxeka mexxo'i Beetom ka uulla asse'imminne ixxi iitto niina caakkisaa la'isaakko. Iitto yimmi Waa'i neese iittaa ni baaxiilo shiinshoo'isina ixxi Beeto asse'u iitto bagaan neese Waa'a iittinoommi iittooyyo. Iittantakko'oo i qarmanna, Waa'i neese kaa'nna iittulas neesena'i neesem iittanchi hasisookko. Waa'a moo'ukkok ayyim bee'e. Ihukkaarem neesena'i neese iittammumlas Waa'im ni woronne hee'ookko. Ixxi iittim ni woronne wo'mmookko. Waa'i niina ixxi gaqqi Keesammi Ayyaana uwwu bikkina neese ixxonne hee'nnoommisaa ixxim ni woronne hee'oo'isaa lanqoommo. Waa'i uulli minaadaba gatisaanchi issaa ixxi Beeto asse'ukkisa neese moo'nnaammo; manninam eekka naqqansoommo. Yesuus Waa'i Beeto ihukkisa amma'nnaa naqqasoo hundim Waa'anne hee'ookko. Waa'im ixxonne hee'ookko. Ee bikkina Waa'i neese hinkaa'nna iittuda'e lanqaa amma'nninaammo. Waa'i ixxi gagim iittona'e. Iittinne hee'ookkok hundim Waa'anne hee'ookko. Waa'im ixxonne hee'ookko. Ni woronne iitti wo'mmukkok Waa'i oogaxxi ayyaamonne ixxi illagenne tuulloo'n iggimminne hincinoommisinatte. Ee iggimmam siindeena xannoommok ni heechchi ka uullanne Kiristoos heechcha labaakkoo heechcha hee'nnumlasette. Baddimmi yoo beyyonne guzumo'anchi yoo bikkina ayyim baddoohan ihulas ixxek iitti wo'mmayyo. Wo'm iitti baddimma fissaa uunjoo bikkina iittonne baddimmi bee'e. Waa'i neese gaassaa iittu bikkina neesem iittinoommo. Ayyi manchim «Anni Waa'a iittoommane» yukkuuyyi ixxi abbaayyo saboohan ihulas qophphanaancho. Moo'u ixxi abbaayyo iittubee'ek moo'ubee'i Waa'a hinkid iitteena xanoo? Kiristoos niina uwwu ijaaj «Waa'a iittookkok hundim ixxi abbaayyom iittimmi hasisookko» yoohane. Yesuus Gatisaanchi Kiristoosatte ihukkisa amma'nnookkok hundim Waa'ina qachcho. Anni Waa'a iittookkok hundim Waa'i oosom iittookko. Neese Waa'a iittinaa ixxi ijaajom wonshinumlas Waa'i oosom iittinoommisa lanqoommo. Waa'a iittimmi ixxeka ijaajo wonshimma. Hanqinam ixxek ijaajim kee'mmaallayyo. Mashka'oomim Waa'iinsi qaramukkok hundim ka uullika jor luwwa kaa'ookko. Neesem ka uulli jor luwwa kaa'nneena xannoommok Kiristoosanne amma'nnimminnette. Yesuus Waa'i Beet ihukkisa amma'nnoohaanniinsi bagaan ka uullika jor luwwa kaa'eena xanookkok ayyette? Xammaqancha moo'isoo wo'innee leho moo'isoo xiiginnee waarukkok Yesuus Kiristoosatte. Ixxim waarukkok xale'i wo'innette ihoo'n wo'innettee xiiginnettee. Kukim hanqi ihu bikkina hanqi ihukkisa Keesammi Ayyaan naqqasookko. Sas naqaashshuwwi yo'o. Ixxuwwim Ayyaana, wo'oo xiigaa. Oo sasim kuttam luwwi matome. Waa'i ixxi Beet bikkina kurukkok eehanena'e. Neese manni kurukkoka amma'nninoommi keen inkumlas Waa'i kurukkoka manni kurukkaanniinsi lobakata lonsinaa amma'nnimmi hasisookko. Ee bikkina Waa'i Beetonne amma'nnookkok hundim Waa'i kuru woshsha ixxi wodanonne qoossaa la'ookko. Waa'i Beetonne amma'nnoobee'ek hundim Waa'i ixxi Beet bikkina kuru woshsha amma'nnubee'i bikkina Waa'a qophphanaanchi issaakko. Waa'i niina kurukkok heer heerina hee'oo heechcha ixxi gagim niina uwwukkisa. Ee heechcham siixxineena xannoommok ixxi Beet kollinnette. Ee bikkina Waa'i Beet yoohaannina hundinam heechchi yookko. Waa'i Beet bee'aannina hundinam heechchi bee'e. An kaka kitaaboommuullak Waa'i Beetonne amma'nnukkaannina hundinam heer heerina hee'oo heechchi yoo'isa laqqakkamisinatte. Neese Waa'i doo'llisanne mat luwwa uunxinumlas Waa'i macceesoo'isa qoossinaa lanqummi bikkina ixxi illage iggimminne hincinoommo. Neesemdu uunxinummi luwwa Waa'i macceesoo'isa qoossinaa lanqumlas neese uunxinummi luwwa a'llinummisa lanqoommo. Mat amma'nnaanchi abbaayyi lehonne afisoobee'i baaxiilo baxukkuuyyi ki'nnuwwiinsi ayyim moo'uta'n ee abbaayyi bikkina Waa'a uunxona. Waa'im ee lehonne afisoobee'i baaxiilo baxukkaannina heechcha uwwookko. Ihukkaarem lehonne afisoo baaxiil yookko. Lehonne afisoo baaxiilo baxukkaannina «Waa'a uunxehe» yoommoyyo. Jor bax hundim baaxiilo. Ihukkaarem lehonne afisoobee'i baaxiil yookko. Waa'iinsi qaramukkok hundam Waa'i Beet Yesuus Kiristoos egeroo bikkina Sheexaan nakkeena xanooyyo. Ee bikkina Waa'iinsi qaramukkok baaxiilo baxeena xanoobee'isa lanqoommo. Waa'ina ijaajantambee'i ka uulli minaadab Sheexaa'n anganne hee'llamisaa neese Waa'i oos inkummisaa qoossinaa lanqoommo. Neese hanqo'i Waa'a qoossinaa lanqoommisina qoossimma uwweena Waa'i Beet Yesuus Kiristoos waarukkisa lanqoommo. Neese yoommine'ek hanqo'i Waa'annettee Waa'i Beet Yesuus Kiristoosannettee. Kiristoos hanqo'i Waa'aa heer heerina hee'oo heechchaa. I ooso, qophpha'n waa'ina otossimmiinsi ege'llehe. Waa'i doo'llaakkoo moollamanaa is oosinaa an lommanchi asse'ummi asso. Hanqinam an ki'nnuwwa iittoommo. Iittoommokim xale'i anette ihoo'n hanqa laqqam keen hundim ki'nnuwwa iittitamo. Mashka'oomim ni woronne yoo hanqi doolli hundam niinninne maqire hee'oohane. Niyyanni Waa'iinsii Waa'i Beet Yesuus Kiristoosiinsii eroommi, qishixximmii xummii hanqinnee iittinnee niinninne maqire ihona. Ki oosik mat mat keen niyyanni Waa'i neese ijaaju hanqi googonne qoxxita'a hee'llamoka moo'aa lobakata liiramaammo. Moollama, kabadem ihukkaare ku kiina kitaaboommuullak haareechchi ijaaj ihoo'n «Neesena'i neesem iittammona» yoo gaassiinsim ki'isaa yoo moosir ijaaj ihukkisa laqqona uunxoommuulla. Iitto yimmi Waa'i ijaajina ijaajancha. Oo ijaajim «Iittinne hee'llehe» yoo gaassiinsim macceessakko'i ijaajo. Yesuus Kiristoos manchi ihaa maarinne waarukkisa amma'nnitambee'i dut huushisaan uullanne binnito'ookko. Eehido'i manchi manna huushisaanchoo Kiristoosina diinakkichchoo. Ee bikkina ki'nnuwwi baxxakko'aannik mish mahim bi'oo'n wo'm irifo'o siixxitakkamisina qoxxitakka'a ki'nnuwwi gaga ege'llehe. Kiristoos losisu losishshanne uulloo'n higaa maroohaannonne ayyennem Waa'i bee'ane. Ihukkaarem «Kiristoosik losishshi ihookko» yaa ee losanonne qoxxaa uulloo manchonne Waa'ii Waa'i Beetii lamim yo'o. Ayyi manchim ka losishsha amadoo'n ki'nnuwwi beyyo waaruta'n ki'nnuwwi minenne aa'llakkotte; xummaatissakkotteme. Mashka'oomim ayyi manchim ee mancho xummaatisookkok ee manchi jor baxonne hamaaramookko. Ki'nnuwwina kitaaboommi dut luwwi hee'ukko; ihukkaarem ee hundam woraqatanne kitaaboommaanniinsi ni liiranchi wo'mmoo'isina ki'nnuwwi beyyo waaraa ki'nnuwwinne maqire ihaa atoorallona hasoommo. Oohim ihoo'isa amma'nnoommo. Waa'i doo'llaakkoo kiyyaayyi oosim kiina xummaato hincaa'llamuulla. Hanqinam iittoommi Gaayoosina lommanchi asse'ummi asso. Iittantaattoo iyyabbaayyo, ki foor fayya'i ihukkisa an la'oommo. Odim at fayya'i ikkoo'isinaa hee'lloo heechchi hundim kiina makkoo'isinaa Waa'a uunxoommo. Kiristoosanne amma'nnito'i abbaayyuwwik mat mat keen waatta'a at amma'nnantaattoohan ikkittisaa hanqi googonne qoxxitaa hee'lloo'isaa iina kutto'i bikkina lobakata liiramaammo. Mashka'oomim i oos hanqi googonne qoxxita'a hee'llamisa macceesimmiinsi lophphaa eese liiransoo luwwi bee'e. Iittantaattoo iyyabbaayyo, mahaa koyyi ikko'aarem amma'nnaan abbaayyuwwina hara'mmitoo luwwi hundinnem at amma'nnantaattoohane. At ixxuwwina moo'issitti iitto ka beyyi amma'nnaa'n wixxixxi illagenne kutto'ookko. Kabadem Waa'i awwaadina laboo'isinne ixxuwwina hara'mmitaa geegeessittaare danaamo. Mashka'oomim ixxuwwi Kiristoosina awwaaddeena fittu'uuyyi Kiristoosanne amma'nnitobee'i manniinsi maham hara'mmato siixxiteena hasso'oyyo. Ee bikkina amma'nnaan inkummi keen hanqo'i baxo mat inkaa banxoommisina eehido'i manna hara'mmimmi hasisookko. Kanniinsi illageenim amma'nnaa'n wixxitina mat luwwa kitaabaa hee'ummo. Ihukkaarem ixxuwwi awwonsaanchi iheena hasoo Diyootireefiis i woshsha aa'ukkoyyo. Ee bikkina an ki'nnuwwi beyyo waaroommi ammane ixxi ni summa bi'isukkuuyyii hamukkuuyyii wocu jor woshsha ki'nnuwwina kuroommo. Ixxi baxukkok xale'i eeqax ihoo'n amma'nnaano aa'oobee'ane. Odim aa'eena hasoo mulli keenom amma'nnaa'n mateeyyoomiinsi fissoolla. Iittantaattoo iyyabbaayyo, eroka awwone bagaan jora awwontitte. Er baxo baxookkok hundim Waa'iinsette. Ihukkaarem jor baxo baxookkok Waa'a hore'em la'ooyyo. Dimeexiroos eroomma mannii hanqi ixxi gagimii hundim kuroolla. Anim edaa kuroommo; i naqqasimmim hanqi ihukkisa laqqakkamo. An kiina kitaabeena hasoommok dut luwwi hee'ukko. Ihukkaarem woraqatanne kitaaboommaanniinsi abbis ammanenne keese moo'eena neeyyato issoommi bikkina ee ammane maqirem atooralloommo. Xummi kiinninne maqire ihona; ka beyyonne yo'i amma'nnaan abbaayyuwwi kiina xummaato asse'llo'ookko. Ee beyyonne yo'i amma'nnaan abbaayyuwwi hundinam ni xummaato kure. Anni Waa'i iittoo keenina, weeshu keeninaa Yesuus Kiristoosinnem egeranto'i keeninaa Yesuus Kiristoosina awwaadaanchi ihu Yaaqoob abbaayyi Yihudiinsi asse'amu asso. Qishixxat, xummii iittii ki'nnuwwina lophphaa ihona. Iittantakko'oo iyyabbaayyuwwa, neese hundim gantummi gatimmi bikkina kitaabeena lobakata hasam hee'ummo. Ihukkaarem Waa'i ixxi minaadabina mexxo'aagge guullaa uwwu amma'nnatina qoxxitakka'a gubbantakkamisina kitaabimmi iina hasisoohan ihaa moo'amukko. Lobakat ammaniinsi illageen ixxuwwanne oogato'i kitaabamaa yo'i mat mat keen maaxanta'a ki'nnuwwi lambe'enne aaggo'ookko. Ixxuwwi ni Waa'ika eroomma ixxuwwi jor mixanonne dabattam baaxiilaano. Ixxi xale'i niina Gassaanchoo Moollannaa ihu Yesuus Kiristoosam laggam keeno. Ihona bagaan ki'nnuwwi hundem luwwam guullitakka'a laqqakko'aarem Gibxi uulliinsi Waa'i ixxi minaadaba gatisaa lasage amma'nnitobee'i keeno bi'isukkisa ki'nnuwwina tiissiiseena hasoommo. Ixxuwwina uwwamu gassimmi malaayye sabba'a ixxuwwina laboo beyyo utta'a matto'i Waa'i asse'amaano sawwi'llehe. Ixxuwwa doolli hundinam chimchiminne karaa gambabbaakkoo tuunsi woronne ikka'a lob oogaxxi ayyaamo egettamisina Waa'i dissaakko. Ee'isam Soddom, Gomorii ixxuwwi kululleetanne hee'llo'i beero'uwwii saa'lla'atii shigigaa'oo maa'l mixano issita'atii doolli hundinam xoo'oobee'i giirinne shokkimminne mulli keenina kobi'l ikko'ookko. Ee'isam oo ki'nnuwwi lambe'enne aaggo'i keen haqaawwo awwontu'uuyyi ixxuwwi orachcho haashaaramoo'isa issitamo. Waa'i malaayyem gaddamo. Iimanenne gassitam keenoom game'llitamo. Waa'i asse'amaanina awwonsaanchi ihu Mika'eel Muse'i leesh bikkina Sheexaanchinne fitamu ammane Sheexaanchina «Keese Moollanni axeero'i!» yukko bagaan game'llaxxi sagarinne ixxonne oogateena iggukkoyyo. Ihukkaarem oo manni qoossitobee'i luwwi hundam game'llitamo. Qooccanto'isinne laqqam moochchisa laqqo'aarem ee lachchinnem bi'llamo. Qaayeel googonnem matto'ookko; «Diinate siindoommo» yita'a Baala'aam huushamukkisam ixxuwwi gaga huushisso'ookko. Qoore'e ijaajancha sabukkisam ijaajancha sabba'a bi'llo'i bikkina ixxuwwina aayye! Oo keen iggimminne ki'nnuwwinne maqire iitti maadda ittu'uuyyi shigigaa'oo luwwisa. Ixxuwwi xale'i ixxuwwi gaga ege'llitamo. Odim hafachchi massoo wobee'i umbu'llisa. Fiitti agananne xaphinnem xoqolamaa qallaa gogu mish bee'i haqqisa. Ixxuwwik tuussiisoo baxim lophphaa aqqaa himboo wo'i moo'llisa. Ixxuwwim heer heerinam gambabbaakkoo tuunsina gudda'a do'llam boollaankisa. Addaamina lama'l qaranchi hee'u Heenook «Oono'o! Moollanni ixxaanninne keesanto'oo dut kum asse'amaaninne maqirem waarookko. Waarookkokim manni hundannem oogateenatte. Odim boqqi keen baxxo'i jor bax hundinaa ixxuwwi boqqi baxonne baaxiilaammuwwi Waa'anne wocco'i jor woc hundinaa acceeqaseenatte» yaa ee kee'n bikkina hiraago wocaakko. Ixxuwwi quunquuntam keeno, mannanne huushancha siiddeena yakitam keenoo ixxuwwi gaqqi jor mixano awwontam keenoo. Ixxuwwi woccam woshshim bolximminne wo'mmaakkoohane. Ixxuwwi gagina awwaadoo luwwa siixxiteena yitu'uuyyi manna bittu'uuyyi qawwiissam keeno. Ihukkaarem iittantakko'oo iyyabbaayyuwwa, Moollanni Yesuus Kiristoos asse'amaan illageen kutto'i woshsha sawwi'llehe. Ixxuwwim ki'nnuwwina «Lasaanchi doollenne boqqi keen ixxuwwi jor mixa'nnisa ikku'uuyyi hogooggam keen waattamo» yito'ookko. Oo boqqi keen odim mannaa mannaa annanni issitam keeno, maa'l mixa'nnisa hee'llam keenoo Keesammi Ayyaanim ixxuwwanne bee'i keenoo. Ihukkaarem iittantakko'oo iyyabbaayyuwwa, hundiinsim lophphaa keesamaakkoo amma'nnatonne qoxxitakka'a uullehe. Keesammi Ayyaa'n malaayyinnem uunxehe. Moollanni Yesuus Kiristoos ixxi qishixxatinne uwwoo heer heerina hee'oo heechcha egettakku'uuyyi Waa'i iittonne hee'llehe. Malantam keeno amma'nnissehe. Mat mat keeno gii'l woriinsi fissitakka'a gatissehe. Mat mat keeninam qishixxehe. Ihukkaarem ixxuwwika baaxiilo baddehe. Ixxuwwika baaxiilinne haashaaramaakkoo orachcho nakku eddechchim gatoo'n sabbehe. Ki'nnuwwa ubbakkambee'isa egereenaa miiqakkam luwwi bee'isa issaa liiranchinne ixxi lombi illageen hincaa'eenaa xanoo neese Gatisaanchi mexxo'i Waa'ina ni Moollanni Yesuus Kiristoosinne doolli hundiinsi illageen ki'isaa kabadem heer heerinam lombi, nuur, malaayyii gassimmi malaayyii ihona! Aameen. Waa'i ka hoffi ammanenne ihoo kaalta ixxena awwaaddam keenina moo'isoo'isina Yesuus Kiristoosina uwwukko. Yesuus Kiristoosim Waa'i asse'amaancho asse'aa ixxena awwaadaanchi ihaa yoommi iina Yohaannisina la'isukko. Anim moo'ummoka Yesuus Kiristoos iina caakkisaa kuru Waa'i sagara hundichchom kitaabummo. Ka kaalti kitaabanne kitaabamu woshshi ka hoffi ammanenne wo'mmoohan ihu bikkina sagara fissaa mannina qananaa'ookkoka Waa'i maasse'aakkoohane. Odim ee qanannaatamukkoka macceessa'a ijaajantam keenom Waa'i maasse'aakkoo keeno. Iinniinsi Yohaannisiinsi Issiyanne lamar beyyonne wixxitakkam amma'nnaanina hee'ukkaanniinsi, yoohaanniinsii waaroohaanniinsii ixxi adilla'n barcu'm illagenne yoo lamar ayyaannuwwiinsi, Yesuus Kiristoosiinsi ixxim amma'nnamaakkoo naqaashichchiinsi, lehiinsi luxxeka ki'ukkaanniinsii uullanne yoo adilluwwi hundinam adiliinsii eroommii xummii ki'nnuwwina ihona. Odim neese iittukkaannina, ixxi lehinne ni baaxiiliinsi wolabbanonne fissukkaanninaa ixxi gassoo minaadab issaa ixxi Anni Waa'ina awwaandoommisina qeessuwwi issu Yesuus Kiristoosinaa lombii malaayyii heer heerinam ihona! Aameen. Oono'o! Duubinne waarookko. Manni hundichchim ixxo qasso'i keenim gattoo'n moo'llamo. Uullanne yoo minaadab hundichchim ee bikkina wi'llitamo. Ookkim hanqa! Aameen. Ka illageen hee'ukkok, kabadem yookkokii waarookkokii hundam xanoo Waa'i «Hundi luchchiinsim illageen hee'ummokii hundi luchchiinsim lasagem hee'oommokii anette» yoolla. An ki'nnuwwi abbaayyi Yohaannis Yesuusanne amma'nnimminne hawwo aa'imma, xa'nnimmaa Waa'i adillanonne aagimmaa ki'nnuwwinne maqirem baxxamoommane. Anim Yesuus hanqo'isa caakkisaa la'isu Waa'i sagara alallaatummi bikkina wo'i kibbaakkoo Fiximo yakkam uullanne karamaa hee'ummo. Eekke'e hee'ummisam Moollanni ballanne Keesammi Ayyaan eesenne wo'mmaa yoommaannonne afaree'n kollinne xurumbulli sagara laboo lobakata geejji sagara macceesummo. Oo sagarim «At moo'llittoka kitaabanne kitaabbaa Efeesoonanne, Samirneesanne, Pheergaamoonanne, Tiyaaxiranne, Sardeesanne, Feledelfe'ennee Lodooqe'ennee lamarem uullannem wixxitam amma'nnaanina asse'e» yoohan hee'ukko. Ee lasage anim iinninne wocookkoka moo'eena laso qerephummo. Ee qerephummi ammanenne caakka dissakkam mu'uttuwwika worqiinsi baxamaakkoo lamar mu'uttuwwa moo'ummo. Odim ee caakka dissakkam lamarem mu'uttuwwi lambe'ennem sinxichcho afoo qeeraa'l eddechcha edde'aa biqennem worqiinsi baxamaakkoo sabbata lade'aakkoo Manchi Beeto labookkoka moo'ummo. Ixxi horoorim lobakata qadaalli gereebbi oddisa te'im baraxxisa qadaalli hee'ukko. Ixxi illim gii'l labana laboohan hee'ukko. Odim ixxi lokkuwwim malaayyaam giiranne shokkaa kasharaakkoo naas xaara laboohan hee'ukko. Ixxi sagarim lobakata geejji fo'i saga'llis hee'ukko. Ixxi makki angannem lamar boollaanka amadaa hee'ukko. Ixxi suumiinsim qare'aalli lam qar bisa'i firam hee'ukko. Odim ixxi illi kollim samguxxi eelliinchisa caakkisoohan hee'ukko. Anim ixxo moo'ummi ammanenne lehu manchisa ihaa ixxi lokkiinsi woroon ubummo. Ixxim an ubummi ammanenne ixxi makki anga i hanenne issaa «Baddititte! Hundi luchchiinsim illageen hee'ummokii hundi luchchiinsi lasagem hee'oommokii anette. An heer heerina hee'oommane. Lehaa hee'ummo; ihukkaarem kaba heer heerinam hee'oommane. Lehikii Si'oo'llekii malaayyi i angannette. Kabadem ihukkaare at moo'llitti luwwa ookkim kaba yoo luwwaa ka lasagem ihoo luwwaa kitaabe. I makki anganne moo'llitti lamarem boollaankikii kuraaza dissakkam lamarem mu'uttuwwikii woro'l tirat kane, Lamarem boollaankim lamarem beyyonnem wixxitam amma'nnaa'n beyyo asse'anto'i Waa'i asse'amaano. Kuraazzuwwa dissakkam lamarem mu'uttuwwim lamarem beyyonne wixxitam amma'nnaano» yukko. Yesuus Yohaannisina «Efeesoonanne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Makki anganne lamar boollaanka amadaa caakka dissimmina worqiinsi baxamu lamar mu'uttuwwi lambe'enne daba'llamoommok anette. An ki baxo ookkim ki badallatoo ki xa'nnimmaa la'oommo. Odim asse'antoo'nnim Neese mishiraachchi sagara kulloommisina Yesuusiinsi asse'ammaammoo keeno yitam qophphanaan jor manna saarayyitaa moo'llaa ki woronne amaddaa afuuttibee'isa la'oommo. Odim kiikka xa'nnimma, i summi bikkina qoxxittisaa kaa'antibee'isaa la'oommo. Ihukkaarem an keese gadoommi luwwi yookko. Oohim at eraa'l iitto uttaatto. At hanniinsi ubbida'e sawwihe. Baaxiilo biiraa yihe; eraare baxxam hee'llitti baxom baxe. Baaxiilomdu biiraa yitbeelas kiikka caakka dissitoo mu'uta beyyiinsi ki'isoommo. Ihukkaarem an keese galaxxoommi luwwi yookko. Oohim Niqoolaasa yakkam manchi losisu losano awwontam mannika baxo an sabummisam sabbaatto. Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona. Kaa'ukkaannina heechchina Waa'i gudisaakkoo beyyonne yoo heechcha uwwoo haqqichchiinsi misha itona uwwoommo» yukko. Odim Yesuus Yohaannisina «Samirneesanne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Hundi luchchiinsim illageen hee'ummok, hundi luchchiinsim lasagem hee'oommok, lehaa hee'ummokii lehiinsim ki'ummokii anette. Ki hawwoo ki buxoomaa an la'oommo. Ihona bagaan at lobakata goddaancho. Ayihuxxi mannik mat mat keen ki summa bi'isseena woccam jor woshsha an la'oommo. Ihukkaarem ixxuwwi Sheexaa'n manna. At abbis ammanenne aa'lleena yoonti hawwo aa'imma baddititte. Macceessehe, Sheexaanchi ki'nnuwwiinsi mat mat keeno keeneena karaxxi minenne aagisookko. Ki'nnuwwim tommi ayyaamo hawwo aa'llakkamo. Letakkeebe'i afeebe'e amma'nnantakko'oo keen ikkehe. Anim ki'nnuwwina kaachchi mare'i ihoo heechcha irifoommo. Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona. Kaa'ookkok la'm lehonne hawwodamooyyo» yukko. Odim Yesuus Yohaannisina «Pheergaamoonanne wixxitam amma'nnaa'n beyyo asse'amu Waa'i asse'amaanchina kid yitaa kitaabe. Qare'aalli lam qar bisa'i yookkok anette. At Sheexaa'nnek adilla'n barcum yoo beyyonne hee'lloo'isa an la'oommo. Ihona bagaan at eesenne qoxxitaattoo amma'nnaancho. Ee Sheexaanchi hee'oo beyyonne ki'nnuwwi lambe'enne hee'u iina amma'nnamaakkoo naqqasaanchi Antiphaasa shakko'i doollennettem ihuta'n at eese laggittoyyo. Ihukkaarem an keese gadoommi hoffi luwwim yookko. Oohim Isra'ee'l minaadab qophpha'n waa'ina kitimamu kiti'm maara itta'atii saa'lla'atii qolantamisina Baala'aam Baalaaqa sogukkisam odim ki'nnuwwi lambe'ennem Baala'aam sogitano laboo losishsha losisoo Niqoolaasa yakkam manchi losishsha awwontam keen yo'o. Ee bikkina baaxiilo biiraa yitbeelas an ki beyyo waaraa i suumiinsi firoo bisa'inne keese qasoommo. Qoossaa macceesoo macci yookkok Keesammi Ayyaan amma'nnaa'n wixxittuwwina wocookkoka macceesona. Kaa'ukkaannina maaxamaakkoo maanna'a yakkam hurbaatiinsi uwwoommo. Odim aa'lloo manchiinsi bagaan ayyim la'oobee'i haareechchi summi kitaabamaakkoo qadaalli kinam uwwoommo» yukko. Odim Yesuus Yohaannisina «Tiyaaxiranne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Gii'l labana laboo illii shiinshakko'i naas xaa'llisa belecce'oo lokkuwwii yoo Waa'i Beet anette. An ki baxo ookkim ki iitto, ki amma'nnatoo ki xa'nnimmaa la'oommo. Ki bax hundichchim eraa'llaanniinsi lophphukkisa an la'oommo. Ihukkaarem an keese gadoommi luwwi yookko. Oohim ‹An hiraagaanchotte› yitu'uuyyi iina awwaaddam keeno saa'llamisinaa qophpha'n waa'ina kitimamu kiti'm maara ittamisinaa is losishshinne huushansitam meentichcho Eelzaabeele ki woronne amaddaa afuuttaatto. Saa'imma biiraa yitona an isena ammane uwwaa hee'ummo. Ihukkaarem ise saxxita'a daba'llito'oyyo. Oono'o! An ise dees manchotte issaa ubbuusoommo. Isenne saa'llam keenim ee ixxuwwi baaxiilo biiraa yita'a daba'llitobee'aa'lleensi ixxuwwam jor hawwonne ubbuusoommo. Ee is losano awwontam keenom shaa guulloommo. Ee lasage amma'nnaa'n wixxittuwwi hundim mannika muroo wodanoo saarayyaa moo'oommok anette ihummisa laqqamo. Ki'nnuwwina annannichchinam ki'nnuwwi baxisam uwwoommo. Ihukkaarem mulli keen ‹Sheexaa'n xillaalli woshsha› yitam ee meentichchi jor losano awwontakkoo'n Tiyaaxiranne gattakko'i keenina hundinam mulli iyyo edaa iyyiisoommoyyo. Ihukkaarem an waareembe'e ki'nnuwwina yookkoka qoxxissakka'a ege'llehe. Kaa'aa lasaanchi afeebe'e i baxonne qoxxukkaannina minaadaba gassoo malaayye uwwoommo. Ixxim an Iyyanniinsi malaayye aa'ummisam iinniinsi malaayye aa'aa xaa'l biccinne buchchi mu'uxxisa iiqansukkuuyyi gassookko. Odim soodaraa'l boollaankichchom ixxena uwwoommo. Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko. Yesuus Yohaannisina «Sardeesanne wixxitam amma'nnaa'n beyyo asse'amu Waa'i asse'amaanchina kid yitaa kitaabe. Lamarisinne moo'amu Waa'i Keesammi Ayyaanii lamarem boollaankii yookkok anette. An ki baxo la'oommo; kiikki summi xale'i gataakko bagaan letaatto. Ki bax i Waa'i illagenne danaam ihaa moo'umbee'i bikkina baqihe; lehiinsi gataa ki'aa odim daba'llaa leheena ihu keenom qoxxise. Kabadem lossitti losanoo macceessitti luwwaa sawwihe. Ixxom egere; baaxiilo biiraa yihe. Atimdu baqitbeelas ki beyyo gamaanchisa waaroommo. An ki beyyo hinkido'i ammanenne waaroomda'e at laqqooyyo. Ihukkaarem ixxuwwi eddechcha xussitobee'i kee'nnek Sardeesanne hofqax mannim yo'o. Ixxuwwi iinninne hee'immi laboohan ihu bikkina qadaalli eddechcha edde'lla'a iinninne maqirem hee'llamo. Kaa'ukkokim qadaalli eddechcha edde'ookko. Ixxi summam heechchi kitaabiinsi shiinshoommoyyo. Ixxi iihan ihukkisam Iyyanni illagennee Iyyanni asse'amaa'n illagennee naqqasoommo. Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko. Odim Yesuus Yohaannisina «Filaadalfe'enne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Daawiit adilla'n malaayyi yookkok anette. An fooqaa'ummoka ayyim xufooyyo. Odim an xufummokam ayyim fooqaa'ooyyo. An keesammaa hanqo'anee. An ki baxo la'oommo. Oono'o! An ki illagenne ayyim xufeena xanoobee'i gooca fooqaa'aammo. Ki malaayyi maham hoffan ihukkaarem an yoommi sagara egettaatto. Odim at eese laggittoyyo. Oono'o! Ayihuxxi mannik mat mat qophphanaan Sheexaa'n manni waatta'a ki lokkiinsi woroon ubba'a otossitamisa issoommo. Ixxuwwim an keese iittoommisa laqqamo. At xa'nnitaa an yummi sagara egetti bikkina anim keese ka uullanne yoo minaadab hundam keeneena waaroo keenanchi ayyaamiinsi egeroommo. An qaqqisom waaroommo. At kaa'lloo bikkina uwwoommi lombi mare'e ayyim massoobee'isa kiina yookkoka qoxxissaa amade. Kaa'ukkok i Waa'i mi'n utubbuwwiinsi mat ihoo'isa issoommo. Ixxim ee miniinsi hore'em firooyyo. Ixxonnem i Waa'i summaa i Waa'i beero'i summaa oohim iimaniinsi i Waa'i beyyiinsi dilloo haareechchi Yerusaalee'm summaa i haareechchi summaa kitaaboommo. Qossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko. Odim Yesuus Yohaannisina «Lodooqe'enne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Hanqo'ik, amma'nnamaakkookkok, hanqo'i woshsha kuroommokii Waa'i qooccu luwwi hundam qooccummokii anette. An ki baxo la'oommo. At siggaallayyo te'im iibbaallayyo. At siggaalli te'im iibbaalli ikkaattoota'n eran hee'ukko. Ihukkaarem at siggaalli te'im iibbaalli ikkoo'n longooggi ikki bikkina an keese i suumiinsi tuhaa uroommo. At ‹An goddaancho; iina hasisoo luwwi hundim yookko. Iina hanqatoo luwwi ma'lluchchim bee'e› yitoolla. Ihukkaarem at hawwaancho, ma'lluchchim bee'i adaraachcho, buxichcho, qooqaa umba'adaa ikkittisa laqqittoyyo. Ee bikkina at goddaanchi ikkoo'isina giiranne bukkamaa muccuraakkoo worqa, kiikka tuussiisoo umba'adooma ifiixxiteena qadaalli eddechchaa qoossitaa moo'lloo'isina illi qaraaree iinniinsi bitaa'lloo'isina an keese sogoommo. An iittoommi keeno axeeroommo; guzumo'oommome. Ee bikkina at baqihe; ki baaxiilo biiraa yitaa daba'lle. Oono'o! An goocanne uullaa u'llumma fooqaa'lloo'isina weeshoommuulla. Ayyim i sagara macceesaa u'llumma fooqaa'ulas an ixxi beyyo aagoommo. Ixxenne maqirem hurbaata itoommo. Ixxim iinninne maqire itookko. An kaa'aa Iyyanni adilla'n barcumanne Iyyanninne maqirem afuurummisam kaa'ookkok hundim iinninne maqirem i adilla'n barcumanne afuuroo'isa issoommo. Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko. Ee lasage iimanenne fooqaakkoo gooca moo'ummo. Odim luxxeka xurumbulli sagara laboo sagarinne iinninne wocukkuuyyi macceesummok «Ka lasage ihoo luwwa an kiina moo'isoommo; keyye iim waare» yukko. Ee ammanchom Ayyaan eesenne dillukko. Oono'o! Iimanenne adilla'n barcuma moo'ummo. Ee barcumannem mat afuuraa hee'ukko. Ee afuuraa hee'ukkaannikim hagar belecce'llam bito xee'aalli kuul kinaa bito xee'aalli boobeet kashar kinaa laboohan hee'ukko. Ee adilla'n barcu'm kululleetannem bito xee'aalli shaano'i kina laboo waadamuunchi hee'ukko. Ee'isam odim ee barcu'm kululleetanne lamiyyii soor adilla'n barcummuwwi hee'ukko. Ee barcummuwwannem qadaalli eddechcha edde'lla'a ixxuwwi horoorennem worqiinsi baxamaakkoo kaachchi mare'e issaqqita'a lamiyyii soor lommannii afuutta'a hee'llo'o. Ee adilla'n barcumiinsim banqik belellaat, sagarii gugii firam hee'ukko. Odim ee adilla'n barcu'm illagennem lamar caakkuwwi aphphukkuuyyi caakkisam hee'ukko. Ixxuwwim Waa'ik lamar ayyaannuwwi hee'llo'o. Odim ee barcu'm illagennem gagmoo'ixxi'nnoo'i dambalaqa laboo luwwi hee'ukko. Ee barcu'mmaannonne soorem midaadonnem illageenii lasageenii illi wo'mmaakkoo soor fooraam qooccanchuwwi hee'llo'o. Ee kee'nnekim luxxek hobbichcho laboohan hee'ukko. La'mmek odim mirgo'o laboohan hee'ukko. Saxxaannik illi kolli mannika laboohan hee'ukko. Soo'llek odim bararoo gaaqichcho laboohan hee'ukko. Ixxuwwina annannichchinam loh loh laddeewwi hee'ukko. Ixxuwwaannonnem hanennee woronnee illi wo'mmaa hee'ukko. Ixxuwwim ballaa hiimoo «Hee'llittok, yoontokii waattoottokii Hundam xantoo Moollanni Waa'i keesammaa, keesammaa, keesammaa!» yitam hee'llo'o. Oo soorem fooraam qooccanchuwwim ee adilla'n barcumanne afuuru heer heerina hee'oohaannina lombaa galataa uwwitam amman hundam oo lamiyyii soorem lommannim ee adilla'n barcumanne afuuru heer heerina hee'oohaannina ubba'a otossitam hee'llo'o. Ixxuwwikam kaachchi mare'e ixxi adilla'n barcu'm illagenne dissita'a «Ni Moollanni Waa'a! At hundem luchchom qooccitaatto; hundem luchchim ki doo'llisa ihaa qooccamaakko. Kiina lombi, nuurii malaayyii laboohane» yitam hee'llo'o. Ee adilla'n barcumanne afuurukkaanni makki anganne mat hanennee woronnee kitaabamaa fooqoobee'isa lamar koobo'inne koobamaakkoo kitaaba moo'ummo. Odim Waa'ik mat malaayyaam asse'amaanchi malaayyaam sagarinne «Ee koobo'o fooqaa'eenaa kitaaba biddiqaa'eenaa labookkok ayyette?» yaa shuurukkuuyyi moo'ummo. Ihukkaarem iimanenne te'im uullanne te'im uulliinsi woroon ee kitaaba biddiqaa'eenaa ixxi wororo moo'eenaa labookkok matim hee'ukkoyyo. Anim ee kitaaba biddiqaa'eenaa ixxi wororo moo'eenaa labookkok matim bee'u bikkina shikkaa wi'llummo. Ee lasage woddaa'i lommannik mat «Wi'llititte! Oono'o! Daawiit moollik Yihuxxi shumo'iinsi qaramu hobbichchi kaa'u bikkina ee lamarem koobo'om fooqaa'eenaa kitaaba biddiqaa'eenaa xanookko» yukko. Odim ee lamiyyaannonnee soorem lommannaannonnee lambe'enne yo'i soorem fooraam qooccanchuwwinaa adilla'n barcuminaa lambe'enne mat Gereechchi duramu gereechcho labaa uullaakkoo moo'ummo. Ee Gereechchinam lamar buudii lamar illii hee'ukko. Oo keenim uulli hundam asse'amu Waa'i lamar ayyaannuwwa. Oo Gereechchim maraa ee adilla'n barcumanne afuurukkaanni makki anganne hee'u kitaaba massukko. Ixxim ee kitaaba massukkaare oo soorem fooraam qooccanchuwwii lamiyyii soorem lommannii ee Gereechchi illagenne ubba'a otossito'o. Ixxuwwi annannichchim diitta'aa worqiinsi baxakka'a aduruusa wonshakko'oo muude'ee amadda'a hee'llo'o. Oo aduruusim keesammi keen Waa'a uunxitam uunxato. Ixxuwwim «At durantaa ki xiiginne shumo'i hundiinsi, wocakkam suum hundiinsi, minaadab hundiinsii moolli hundiinsii Waa'ina manna bitaa'l bikkina kitaaba massimmii fooqaa'immii kiina laboohan ikkaatto. Odim at ixxuwwa Waa'i gassoo minaadabaa qeessuwwaa issitaatto. Ixxuwwim ka uulli minaadaba gassitamo» yitu'uuyyi haareechchi mazmuura zammatto'o. Ee lasage odim ee adilla'n barcuma, soorem fooraam qooccanchuwwa, lommannaa kululaa'lla'a uullito'oo lobakat Waa'i asse'amaanoo moo'ummo. Ee asse'amaa'nnekam sagara macceesummo. Ixxuwwikim xig kum ko'l kum afeebe'ee miliyoon ko'l miliyoon afeebe'ee hee'ukko. Ixxuwwim lobakat malaayyaam sagarinne «Duramu Gereechchina malaayyi, amaxxi, qooroom, qoxallan, lombi, nuur, galatii maassii labookko» yitam hee'llo'o. Odim iimanenne, uullanne, uulliinsi woroonii dambalaqannee hee'llam qooccanchi hundim «Adilla'n barcumanne afuurukkaanninaa Gereechchinaa galat, lombi, nuurii malaayyii heer heerinam ihona» yitu'uuyyi macceesummo. Oo soorem fooraam qooccanchuwwim «Aameen» yito'o. Lommannim ubba'a otossito'o. Ee lasage Gereechchi lamarem koobo'iinsem luxxeka fooqaa'ukkuuyyi moo'ummo. Moo'ummuuyyim ee fooraam qooccanchuwwiinsi mat banqi gugi'nnoo'i sagarinne «Waare» yukkuuyyi macceesummo. Oono'o! Qadaalli farashsho moo'ummo. Ee qadaalli farashshonnem saa'llaa hee'ukkok xiyya amadaa hee'ukko. Ixxenam kaachchi mare'i uwwamukkaare kaa'eena murte'aa kaa'ukkuuyyi marukko. Odim Gereechchi la'm koobo'o fooqaa'u ammanenne ee fooraam qooccanchuwwiinsi la'mmek «Waare» yukkuuyyi macceesummo. Oono'o! Mulli baar kashar farashshi firukko. Ee farashshonnem saa'llukkaannina manni ixxuwwina'i ixxuwwim shaqqantamisina uulliinsi xumma hooroo malaayyi uwwamukko. Odim geejji bisa'im uwwamukko. Odim Gereechchi saxxi koobo'o fooqaa'u ammanenne fooraam qooccanchuwwiinsi saxxek «Waare» yukkuuyyi macceesummo. Oono'o! Odim heemachchi farashsho moo'ummo. Ee farashshonnem saa'llukkok hurbaata keenakkam keennaancho amadaa hee'ukko. Ee soorem qooccanchuwwi lambe'iinsi sagari'nnoo'i luwwi «Mat manchi mat balla baxu malaayyina aras ihulas lam burcuqo'i ihona. So'i ihulas loh burcuqo'i ihona. Ihukkaarem zaytaa woyinaa hawwoddakkotte» yukkuuyyi macceesummo. Odim Gereechchi soo'l koobo'o fooqaa'u ammanenne fooraam qooccanchuwwiinsi soo'llek «Waare» yukkuuyyi macceesummo. Oono'o! Shiire'i farashsho moo'ummo. Ee farashshonnem saa'llaa hee'ukkaannik summi leho. Ixxom Si'ool awwonukko. Ixxuwwim uullika soo'l suume bagadinne, sibaarinne, jor jabbinnee moochchinnee shitamisina malaayyi uwwamukko. Odim Gereechchi onti koobo'o fooqaa'u ammanenne Waa'i sagara kutto'i bikkinaa amma'nnanto'oo keen ikko'i bikkinaa shakko'i keeno Waa'ina kitima hincaa'akkam mu'utiinsi woroon moo'ummo. Ixxuwwim sagara iimaa'lla'a «Hundam xantoo Moollanni Waa'a! At keesammaa hanqo'anee. Uullanne hee'llam minaadab neese shito'i bikkina ixxuwwanne oogattaa ni xiiga miqissoobee'ek hinkaa'n balli afeebe'e?» yitu'uuyyi laatto'o. Ee lasage ixxuwwina annannichchinam qeeraa'l qadaalli eddechchi uwwamukko. Ixxuwwisam Waa'ina awwaaddam ixxuwwi besha oohim ixxuwwi abbaayyuwwa shakka'a xigo wonshakkeebe'i afeebe'e hoffi ammanem iyyaqqitamisina kuramukko. Odim Gereechchi loh koobo'o fooqaa'u ammanenne lobakat malaayyaamisa uulli huxe'ukkuuyyi moo'ummo. Eelliinchim xiddi eddechchisa heemachchukko. Aganim xiiqqisa kasharukko. Malaayyaam hafachchi heekkeesoohaare oda'i mish giggiraa uboo'isa iima'n boollaanki uullanne ubukko. Iimanim hirfa'nnisa xaaxamaa beyyiinsi bee'ukko. Odim duunnuwwii wo'i kibbu uullii hundim beyyiinsi laa'ukko. Ee lasage odim uulli adilluwwi, gassaan, gaaxxi manna awwonsaan, goddaan, malaayyaammuwwi, agidii wolabii hundim daawwa'uwwannee duunnuwwannee yoo geejji geejji kinneewwi kolo'uuwwanne maaxanto'o. Ee lasage Waa'i asse'amaa'nnek soor asse'amaan uullaannonne soorem tochchonnem uullito'oo moo'ummo. Ixxuwwim soorem uulli tochchuwwiinsim hafachchoo hafachchi uullanne, dambalaqannee ihu haqqannee hafachchoobee'isa hootto'o. Ee lasage odim hee'oo Waa'ika koobo'o amadaakkoo Waa'i asse'amaanchi eelliinchi firoo kolliinsi waarukkuuyyi moo'ummo. Ixxim uullaa dambalaqaa hawwoddamisina Waa'i malaayye uwwu soorem asse'amaanina sagara iimaa'aa «Ni Waa'ina awwaaddam kee'n miinenne koobo'o issineembe'e uulla, dambalaqaa haqqaa hawwoddakkotte» yukko. Odim Isra'ee'l tommiinsii lamem sulliinsii ixxuwwi miinenne Waa'ik koobo'i issamu kee'n xigo macceesummo. Ixxuwwi xigim xibbee soree soor kum hee'ukko. Isra'ee'l minaadabiinsim miinenne koobo'o issamu keen Yihuxxi moolliinsi tommoo lam kuma. Oroobeel moolliinsi tommoo lam kuma. Gaad moolliinsi tommoo lam kuma. Aseer moolliinsi tommoo lam kuma. Niftaaleem moolliinsi tommoo lam kuma. Minaas moolliinsi tommoo lam kuma. Simi'oon moolliinsi tommoo lam kuma. Leewi'i moolliinsi tommoo lam kuma. Yisaakoor moolliinsi tommoo lam kuma. Zaabiloon moolliinsi tommoo lam kuma. Yooseef moolliinsi tommoo lam kuma. Biiniyaam moolliinsi tommoo lam kum hee'llo'o. Oono'o! Ee lasage odim ayyim xigeena xanoobee'i lobakat manna moo'ummo. Ixxuwwim minaadab hundiinsi, moolli hundiinsi, shumo'i hundiinsii wocakkam suum hundiinsii doo'llanto'oo manni hee'llo'o. Ixxuwwim qeeraa'l qadaalli eddechcha edde'lla'a ixxuwwi angannem dimbaaphphi buyya amadda'a adilla'n barcu'mmaannonnee Gereechchaannonnee illagenne uullito'o. Ixxuwwim sagara iimaa'lla'a shuuttu'uuyyi «Neese gatisukkok adilla'n barcumanne afuuru ni Waa'aa Gereechchoo» yitam hee'llo'o. Odim ee lommanniinsi mat i kollonne daba'llaa «Ku qeeraa'l qadaalli eddechcha edde'llo'i keen ayyayyaamo? Waatto'odu hanniinsette?» yaa eese xa'mmukko. Anim ixxena «I moollanna, at laqqootto» yummo. Ixxim iina dabaraa «Ku keen lobakat hawwiinsi fitta'a waatto'oo keeno. Ixxuwwim ixxuwwi eddechcha Gereechchi xiiginne aanshita'a qadaallisso'ookko. Ee bikkina ixxuwwi Waa'i adilla'n barcu'm illagenne uullita'a ballaa hiimoo Keesammi Minenne ikka'a Waa'ina awwaaddamuulla. Adilla'n barcumanne afuurukkokim ixxuwwinne maqire ihimminne ixxuwwina agir ihookko. Gereechchi lama'l koobo'o fooqaa'u ammanenne mat sa'aaxxi kollo ihooqax ammanina iimanenne saga'llek ma'lluchchim hee'ukkoyyo. Ee lasage Waa'i illagenne uullitam lamar asse'amaano moo'ummo. Ixxuwwinam lamar xurumbulluwwi uwwamukko. Odim aduruusa wiriissimmina worqiinsi baxamaakkoo muude'e amadaakkoo mulli asse'amaanchim waaraa aduruusa wiriissimmina worqiinsi baxamaakkoo mu'uxxi gadanonne uullukko. Oo mu'utim adilla'n barcu'm illagenne hee'ukko. Oo Waa'i asse'amaanchi ee mu'utanne Waa'i doo'llu minaadab Waa'a uunxito'i uunxatinne hamaaroo'isina lobakat aduruus uwwamukko. Waa'i illagenne uullu ee asse'amaanchi angiinsi aduruus wiriirii Waa'i doo'llu minaadaphphi uunxatii iim firukko. Ee lasage oo asse'amaanchim ee muude'e massaa aduruusa wiriissimmina worqiinsi baxamu mu'utiinsi giira wonshaa issaa uullanne darabukkaare banqi gug, belellaat, sagarii uulli huxechchii ihukko. Ee lasage lamar xurumbulluwwa amadda'a hee'llo'i lamarem asse'amaanim xurumbulluwwa fuggeena guddo'o. Ee lamarem asse'amaaniinsim luxxek ixxi xurumbulla fugu ammanenne baradii giirii xiiginne hamaaramaa uullanne ga'nnukko. Uullik saxxi suum, haqqik saxxi suumii hixii hundichchim shokkukko. Ee lasage odim la'm asse'amaanchi ixxi xurumbulla fugukkaare mat lob duuna laboo luwwi aphphukkuuyyi dambalaq wo'onne darabamukko. Dambalaq wo'ikim saxxi suum xiiganne daba'llukko. Dambalaq woronne hee'oo fooraam luwwikim saxxi suum lehukko. Markabbuwwikim saxxi suum bi'ukko. Odim saxxi asse'amaanchim ixxi xurumbulla fugukkaare geejji boollaankichchi xomboo'llisa aphphukkuuyyi wo'i bu'uwwannee daajjuwwi saxxi suumennee ubukko. Ee boollaankichchi summim Geneeno'o yamamoohane. Ixxi ubaa wo'ika saxxi suume qaraassu bikkina dut manni lehukko. Soo'l asse'amaanchim ixxi xurumbulla fugukkaare eelliinchik saxxi suum, aga'nnek saxxi suumii boollaankik saxxi suumii aphphisamukko. Ee bikkina ixxuwwi caakkik saxxi suum tuunsukko. Odim ballik saxxi suum tuunsukko; ee'isam hii'mmekim saxxi suum tuunsukko. Eehanniinsi lasage mat gaaqichchi lobakat geejji sagarinne «Gatto'i sasem asse'amaanim xurumbulluwwa fuggam ammane uullanne hee'llam mannina aayye, aayye, aayye!» yukkuuyyi iima'n lambe'enne bararookkoka moo'ummo. Ee lasage onti asse'amaanchi ixxi xurumbulla fugukko. Anim iimaniinsi uullanne ubaakkoo boollaankichcho moo'ummo. Ee boollaankichchinam tungi bee'i baalle fooqaa'aanchi uwwamukko. Ixxim ee tungi bee'i baalle fooqaa'ukkaare shokki aphphoo ammane firoohaanni'nnoo'i wiriir firukko. Ixxeensim firu wiriir eelliinchoo hafachchaa tuunsiisukko. Ee lasage odim ee wiriiriinsi qawwaawwi firaa uullanne dillukko. Ee qawwaawwinam ginxa yakkam daquuchchaanni'nnoo'i malaayyi uwwamukko. Ixxuwwim xale'i Waa'ik koobo'i miinenne bee'i manniinsi bagaan hix ihukkaare te'im uulliinsi mutaa li'oo ayyi luwwam ihukkaare te'im ihu haqqam ihukkaare hawwoddambee'isa kuramukko. Oo qawwaawwim manna shitambee'isa barche'e issitamisina malaayyi uwwamukkok onti aganinatte. Ixxuwwim barche'e issitamok ginxa yakkam daquuchchi mat mancho qasoo ammane barche'e issoo'isa. Ee doollenne manni leho hasookko. Ihukkaarem siideena xanooyyo. Ixxuwwim leteena mixxamo. Ihukkaarem leh ixxuwwiinsi gibookko. Oo qawwaawwim orina mareena gudu farado laboohan hee'ukko. Ixxuwwi horoorennem worqiinsi baxamaakkoo kaachchi mare'e laboo luwwi hee'ukko. Ixxuwwi illi kollim manni illi kollo laboohan hee'ukko. Ixxuwwi horoo'l saraatim meenti horoo'l saraata laboohan hee'ukko. Odim ixxuwwi inqim hobbi inqe laboohan hee'ukko. Ixxuwwim biqenne xaara laboo o'l eddechcha edde'lla'a hee'llo'o. Barattam ammane ixxuwwi laxxi gug dut farad gaare'uwwa gosaasukkuuyyi orina maroo ammane gugoo'isa gugam hee'ukko. Ixxuwwinam ginxa yakkam daquuchchaanni'nnoo'i sheerim hee'ukko. Ee sheerimonnem qub hee'u bikkina ee sheeriminne manna qassu'uuyyi onti agan afeebe'e barche'e issitam hee'llo'o. Tungi bee'i baalli asse'amaanchim ixxuwwina adil hee'ukko. Ixxi summim Ibro'isinne Abaadoona Giriikisinnem Aphphoolyoona yamamookko. «Aayye» yisiisoo luxxi hawwi higaakko. Oono'o! Odim ka lasage waaroo «Aayye» yisiisoo lam hawwi yookko. Ee lasage loh asse'amaanchi ixxi xurumbulla fugukko. Aduruusa wiriissimmina worqiinsi baxamaa Waa'i illagenne yoo mu'utiinsi waaru mat sagara macceesummo. Oo sagarim xurumbulla amadaa hee'u loh asse'amaanchina «Efiraaxiisa yakkam lob daajjenne karanto'oo soorem asse'amaano tire» yukko. Ee bikkina ee sa'aatina, ee ayyaamina, ee aganinaa ee hiinchinaa gudda'a hee'llo'i soorem asse'amaanim manni shumo'ika saxxi suume shitamisina tiranto'o. Anim faradaa'n gogotik xig lam xibbi miliyoona ihukkisa macceesummo. Ee faradoo faradaanoo kaaltanne moo'ummo. Ee faradaa'n biqenne yoo o'l eddechchim gii'l kashara, cuquluusa laboo kinaa diina yakkam baar luwwaa laboohan hee'ukko. Ee faraxxekim horoor hobbi horoore laboohan hee'ukko. Ixxuwwi suumiinsim giir, wiriirii diina yakkam luwwii firam hee'ukko. Ixxuwwi suumiinsi firu giirinne, wiriirinnee diina yakkam luwwinnee ee sasem boobaninnem manni shumo'ik saxxi suum beeddukko. Mashka'oomim ee faraxxek malaayyi ixxuwwi suumennee sheerimonnee hee'u bikkinatte. Ixxuwwi sheerimim hamashsha laboohan hee'ukko. Ee sheerimonnem horoor hee'ukko. Eehanninnem manna hawwoddam hee'llo'o. Ee boobananne letoo'n gatto'i manni habusina otossimmiinsi saxxita'a daba'llito'oyyo. Odim moo'lleena, macceesseenaa taakke'lleenaa xantambee'i misilluwwa worqiinsi, biriinsi, naasiinsi, kiniinsii haqqiinsii ixxuwwi anginne baxxa'a otossimmiinsi saxxita'a daba'lliteena hasso'oyyo. Ee'isam manna shimma, kiirimma, saa'immaa game'immaa utto'oyyo. Ee lasage duuba weyyakkisa edde'aakkoo malaayyaam mulli asse'amaanchi iimaniinsi dillukkuuyyi moo'ummo. Ixxi horoo'l agannem waadamuunchi hee'ukko. Odim illi kollim eelliincho laboohan hee'ukko. Lokkuwwim gii'l utubbuwwa laboohan hee'ukko. Ixxi angannem mat biddiqaakkoo hoffi kitaabichcho amadaa hee'ukko. Ixxim makki lokkinne dambalaqa qeddi lokkinne uullaa hance'aa hobbichchi sagari'nnoo'i geejji sagarinne shuurukko. Shuuru ammanenne lamar banquwwi guggu'uuyyi wocco'o. Oo lamarem banquwwim wocca'a ki'llo'aare ee wocco'i luwwa kitaabeena ihummo. Ihukkaarem iimaniinsi mat sagar «Lamarem banquwwim wocco'i luwwam koobbaa xufe bagaan kitaabbitte» yookkoka macceesummo. Odim dambalaqaa uullaa hance'aa uullaakkoohaannonne moo'ummi asse'amaanchi ixxi makki anga iim ki'isaa iimanee iimanenne yoo luwwaa, uullaa uullanne yoo luwwaa, dambalaqaa dambalaqanne yoo luwwaa qooccu heer heerina hee'oo Waa'i summinne hide'aa «Ka lasage dasooyyo. Ihukkaarem lama'l asse'amaanchi ixxi xurumbulla fugoo ayyaamo Waa'i ixxena awwaadaan hee'llo'i hiraagaanina kurukkisam Waa'ik misxir wo'mmookko» yukko. Odim iina woddaa'i iimaniinsi wocukkuuyyi macceesummi sagar «Ee dambalaqannee uullannee uullu asse'amaanchi anganne yoo biddiqaakkoo kitaaba mattaa aa'e» yukkuuyyi macceesummo. Ee bikkina anim ee asse'amaanchi beyyo maraa «Kitaabamaa xaaxamu hoffi kitaabichcho iina uwwe» yummo. Ixxim iina «Massitaa ite. Ittoo ammane ki suumenne maraphphisa xee'ookko. Ihukkaarem liqicitoohaare ki godabo qaraassookko» yukko. Anim ee kitaabamaa xaaxamu hoffi kitaabichcho ee asse'amaanchi angiinsi aa'aa itummaare i suumenne maraphphisa xee'ukko. Ihukkaarem liqicaa lasage i godabo qaraassukko. Ee lasage iina «Dut manni bikkina, minaadaphphi bikkina, adilluwwi bikkinaa annanni annanni suuminne wocoo kee'n bikkinaa at odim Waa'i sagara wocimmi hasisookko» yukko. Ee lasage bicco laboo keennaanchi shuuyyi iina uwwamukko. Eesem «Ki'e, Waa'i minee Waa'ina kitima hincaa'akkam beyyoo keene. Odim ee minenne otossitam keenom xige. Ihukkaarem Keesammi miniinsi biireen yoo qash wor mulli minaadabina uwwamu bikkina keentitte. Ixxuwwim keesammi Yerusaalee'm beero'o soree lam aganaa hance'antamo. Ee ammane lamem i naqaashshuwwim xiddi eddechcha edde'lla'a mat kumaa lam xibbee lohayyi ballaa hiraago kuttamisina malaayye uwwoommo» yukko. Oo lamem naqaashshuwwim uullina Moollanni illagenne uullitam zayti firoo lam wee'l haqquwwaa lam caakka dissakkam mu'uttuwwaa. Ayyim ixxuwwa hawwodeena hasuta'n ixxuwwi suumiinsi giir firaa ixxuwwi maso'o itaa urookko. Ixxuwwa hawwoddeena hassam keen hundichchim ee'isinne letamo. Oo keen hiraaggam ammane xeen ga'nnoobee'isa hoottam malaayyi yookko. Odim wo'o xiiganne dabattam malaayyii hasso'i amman hundam ihu booban hundinnem uulla aphphissam malaayyii yookko. Ixxuwwi kuttam luwwa kutta'a guullita'a lasage tungibee'i baalliinsi firoo moochchichchi ixxuwwinne oramaa ixxuwwa kaa'aa shookko. Ixxuwwi leeshim kobi'llishshinne Soddoma te'im Gibxa yamamaa weeshamoo lob beero'i googonne ubookko. Oo beero'im ixxuwwi Moollanni saqalamu beero'o. Annanni annanni moolliinsi, shumo'iinsi, annanni annanni suume woccam keeniinsii minaadabiinsii hee'llo'i manni sas ballaa kolloo ee kee'nneka leesha moo'llamo; leeshim waammamoobee'isa hoottamo. Oo lamem hiraagaanim uulli minaadaba lobakata barche'e issita'a hee'llo'i bikkina ixxuwwi leto'aare uulli minaadab lobakata liiranta'a uguda issita'a irfo'o luwwa uwwaqqantamo. Ihukkaarem sas balliinsii kolliinsii lasage foore uwwoo fooshshi Waa'iinsi waaraa ixxuwwi leeshanne aagukkaare lokkinne uullito'o. Ixxuwwa moo'llo'i mannim lobakata baddito'o. Ee lasage oo lamem hiraagaanim iimaniinsi «Kid iim fillehe» yoo sagara macceesso'o. Ixxuwwim ixxuwwi maso'i moo'llu'uuyyim umbu'llanne ikka'a iimane fitto'o. Ee ammanchom uulli malaayyaamisa huxe'ukkaare beero'ik tommi suum gindamukko. Minaadaphphekim lamar kum lehukko. Eehanniinsi gatto'i manni lobakata baddita'a iima'n Waa'ina lomba uwwito'o. «Aayye» yisiisoo la'm hawwi higaakko. Oono'o! «Aayye» yisiisoo saxxi hawwi qaqqisom waarookko. Ee lasage lama'l asse'amaanchi ixxi xurumbulla fugukko. Iimanenne dut geejji sagar «Kaba uulla gassimmik malaayyi ni Moollannanee ixxi doo'llu Kiristoosanee ihaakko. Ixxim heer heerina gassookko» yukko. Odim Waa'i illagenne ixxuwwi adilla'n barcumanne afuutto'i lamiyyii soor lommannim illillaachcha qubbita'a Waa'ina otossito'o. Otossitu'uuyyim «Hee'llittaannoo yoontaannoo, Hundam xantoo Moollanni Waa'aa! At kiikka lobakat qoxxaalli malaayye aa'llitti bikkinaa adil ikkitti bikkinaa galat kiina ihona. Keese laqqambee'i minaadab lobakata nadaddo'o. Ihukkaarem kiikki malaayyaam quunqi ammanii leto'i keenonne oogattoo ammanii afukko. Odim kiina awwaaddam keenina oohim ki hiraagaanina, ki summa lonsitam keenina, hoffi keeninaa lob keeninaa ki minaadab hundinam irifo'o uwwitoo amman afukko. Odim ka uulla bi'isso'i keenom bi'issoo amman afukko» yitam hee'llo'o. Ee lasage iimanenne yoo Keesammi Min fooqukko. Ee Keesammi Minennem Waa'ik tommi ijaaj yoo saaxin moo'amukko. Odim banqi belellaat, sagar, banqi gug, uulli huxechchii malaayyaam baradii ihukko. Ee lasage moo'akka'a la'akkambee'i maalalsiisoo mare'i iimanenne moo'amukko. Eelliincho edde'lla'a, aganaa is lokkiinsi woroon issita'a, tommoo lam boollaankam is horoorenne adilla'n mare'oomina issita'a mat meentichcho moo'anto'o. Isem lamfoorette hee'llo'o. Qatteena xuuchchi amadu bikkina hawwita'a laattam hee'llo'o. Oono'o! Odim mulli mare'im iimanenne moo'amukko. Oohim lamar horoorii tommi buudii yoo mat geejji kashar xarakkichchi moo'amukko. Ixxi horoolluwwannem adilla'n mare'ik lamar issamaa hee'ukko. Ixxi sheeriminnem iima'n boollaankika saxxi suume hixixaa'aa uullanne ubbuusukko. Ixxim woddaa'i xuu'llam hee'llo'i meentichcho qattam ammane ciilichchooma qatto'isam itaa ureena meentichchi illagenne maraa uullukko. Ee lasage oo meentichcho minaadab hundichchom xaa'l biccinne ijaajaa gassoo goonchi beeto qatto'o. Ihukkaarem oo meentichcho qatto'i beet Waa'i beyyo oohim Waa'i adilla'n barcu'm beyyo dangonnem massamukko. Oo meentichchom udma'anne 1,260 ballinaa abooyyakkamisina Waa'i isena gudisaakkoo beyyo gibba'a matto'o. Ee lasage iimanenne or ki'ukko. Mika'eelii ixxi asse'amaanii xarakkichchinnee xarakkichchi asse'amaaninnee qasanto'o. Ihukkaarem xarakkichchii xarakkichchi asse'amaanii kaa'anto'o. Eehanniinsi lasage ixxuwwina od iimanenne beyyi siidamukkoyyo. Oo lob xarakkichchi aad darabamukko. Ixxim uulli minaadab hundam huushisu Daabuloosa te'im Sheexaancho yamamoo gaassi hamashshichcho. Ixxi asse'amaanim ixxenne maqirem aad uullanne darabanto'o. Ee lasage anim iimaniinsi mat geejji sagar «Oono'o! Ballaa hiimoo niyyabbaayyuwwa ni Waa'i illagenne kasasam hee'u kasasaanchi iimaniinsi darabamu bikkina kaba gatisimmi, malaayyii adillanii ni Waa'an ihaakko. Odim adilla'n malaayyim Kiristoosan ihaakko. Ixxuwwi Yesuusa ‹Langoommoyyo› yita'a ixxuwwi foore qishixxitoo'n lehina higissa'a uwwito'i bikkina Gereechchi xiiginnee Waa'i sagara kurimminnee ixxo kaa'llo'o. Ee bikkina iimanii iimanenne yoontakke'i keenii liirammehe. Ihukkaarem ixxena yoo amman hoffan ihukkisa la'aa Sheexaanchi lobakat nadajjinne ki'nnuwwi beyyo waaru bikkina uullinaa dambalaqinaa aayye!» yukkuuyyi macceesummo. Oo xarakkichchim aad uullanne darabamukkisa la'u ammanenne ee goonchi beeto qatto'i meentichcho hollukkuuyyi laseesukko. Ihukkaarem oo meentichcho ee hamashshichchiinsi gibba'a sas hiinchoo kolloo udma'anne ise abooyyakkam beyyo baratta'a mattamisina geejji gaaqichchi lad uwwamukko. Hamashshichchim ee meentichcho diris agaa maroo'isina ixxi suumiinsi daajji ihooqax wo'o is lasonne gafarukko. Ihukkaarem uulli ee meentichchona hara'mmaa oo xarakkichchi ixxi suumiinsi gafaru wo'o suume fooqaa'aa xuuxaa urukko. Ee lasage oo xarakkichchi ee meentichchonne lobakata nadadaa gatu is shumo'inne orameena marukko. Oo is shumo'im Waa'i ijaajo egettam keenoo Yesuus bikkina naqqassam keenoo. Oo xarakkichchim dambalaq tochchonne yoo shashsharanne uullukko. Ee lasage mat moochchichchi dambalaqiinsi firukkuuyyi moo'ummo. Ee moochchichchinam tommi buudii lamar horoorii hee'ukko. Ee buudduwwannem tommi adilla'n mare'i hee'ukko. Horoolluwwannem Waa'inne game'llamoo summi hee'ukko. Oo an moo'ummi moochchichchim kabeechcho laboohan hee'ukko. Ixxi lokkim tibbekkichchi lokko laboohan hee'ukko. Suumim hobbichchi suume laboohan hee'ukko. Woddaa'i xarakkichchim ee moochchichchina ixxi malaayye, adilla'n barcumaa lobakat gassimmi malaayyee uwwukko. Ee moochchichchi horoolluwwiinsi mat horoor halaalisamaa lehaakkoo moo'ummo. Ihukkaarem oo halaalisamaa lehaa hee'u horoor fayye'ukko. Uulli minaadab hundichchim maalalaa ee moochchichcho awwonukko. Xarakkichchi ee moochchichchina lobakat malaayye uwwu bikkina manni ee xarakkichchina otossukko. Odim «Moochchichchinne gudookkok ayyette? Ixxenne orameena xanookkodu ayyette?» yukkuuyyi moochchichchinam otossukko. Ee moochchichchina lobakat amaaxxi woca woconaa Waa'inne game'llamonaa suum uwwamukko. Ixxenam soree lam aganaa baxoo'isina malaayyi uwwamukko. Oo moochchichchim Waa'inne, Waa'i summinne, Waa'i hee'oo beyyinnee iimanenne hee'llam keeninnee gereero'imminne Waa'a game'llimma asheerukko. Ixxim Waa'i minaadabinne oramaa ixxuwwa kaa'oo'isina malaayyi uwwamukko. Odim ixxena minaadabanne, manni wocoo suumenne, manni shumo'i hundichchonnee uulli hundannee malaayyi uwwamukko. Heer uulli qooccamoo'n illageen duramu Gereechchaannonne heechchi kitaabanne ixxi summi kitaabamubee'ek uullanne hee'ookkok hundim ee moochchichchina otossookko. Qoossaa macceesoo macci yookkok macceesona. Qeefadookkok ayyim qeefadamookko. Bisa'inne shookkok ayyim bisa'innem lehookko. Waa'i minaadaphphek xa'nnimmii amma'nnatii la'amookkok ee ammane. Ee lasage odim mulli moochchim uulliinsi firukkuuyyi moo'ummo. Ixxenam geex gereebbi buudo laboo lam buudduwwi hee'ukko. Ixxim woddaa'i xarakkichchisam wocam hee'ukko. Luxxi moochchichchi malaayyi hundinnem ee luxxi moochchichchi bikkenne ihaa baxam hee'ukko. Uullanne hee'oo minaadab hundichchim halaalisamaa lehaa fayye'u luxxi moochchichchina otossoo'isa issukko. Oo la'm moochchichchi manni illagenne giira iimaniinsi uullanne dilliiseebe'i afeebe'e maalalsiisoo agannuwwa issukko. Ixxim luxxi moochchichchi illagenne issoo'isina uwwamu agannuwwinne uullanne hee'u minaadab hundichchom huushisukko. Uullanne hee'oo minaadab hundim bisa'inne halaalisamaa lehaa fayye'u moochchichchika misila baxxamisina ijaajukko. Ixxim ee moochchichchik misil wocoo'isinaa ixxena otossoobee'i keeno shisiisoo'isinaa luxxi moochchichchi misilina foore uwwoo'isina malaayyi uwwamukko. Odim hoffok, lobok, goddaanchi, buxichchi, wolabichchii agishshii manni hundichchim ixxuwwi makki anganne te'im ixxuwwi miinenne mare'e issitamisina issukko. Ee bikkina ayyim oo mare'i oohim ee moochchichchi summi te'im ee moochchichchi summi xig bee'ek biteeseena te'im bito aa'eena xanooyyo. Ka beyyonne qooroom hasisookko. Tiir yookkok ee moochchichchi xigo shallagona. Oo xigim manchina uwwamaakko xigo. Xigoomim 666. Ee lasage Xiyoo'n duunanne Gereechchi uullaakkoo moo'ummo. Ixxenne maqirem ee Gereechchi summii ixxi anni summii ixxuwwi miinenne kitaabamaakkoo 144,000 manni hee'llo'o. Anim lobakat wo'i sagaraa malaayyaam banqi sagaraa laboo sagara iimaniinsi macceesummo. Oo macceesummi sagarim diitta lellitam keen macceesissam diitta'i sagara laboohan hee'ukko. Oo 144,000 mannii adilla'n barcu'm illagenne, soorem qooccanchuwwi illagennee lommanni illagennee haareechchi mazmuura zammatto'o. Uulliinsi tisso miqakka'a bito aa'akko'i ee 144,000 manniinsii bagaan ee mazmuura ayyim loseena xanukkoyyo. Ixxuwwim woraadduwwi ikko'i bikkina meentinne edanta'a ixxuwwi gaga haashaassitoo'n yo'i keen hee'llo'o. Ixxuwwim Gereechchi maroo beyyi hundam awwonta'a mattam keeno. Oo keen Waa'inaa Gereechchinaa won keen ikkamisina manni shumo'iinsi tisso miqakka'a bitaa'akko'oo keeno. Ixxuwwanne miiqakkam luwwi bee'i keen ikko'i bikkina ixxuwwi suumenne qophphan siidamukkoyyo. Ee lasage mulli asse'amaanchim uullanne hee'oo keenina, minaadabina, manni shumo'ina, manni wocoo suuminaa uulli hundinaa heer heerina hee'oo mishiraachchi sagara kureena amadaa iima'nnaannonne lambe'enne bararukkuuyyi moo'ummo. Ixxim sagara iimaa'aa «Waa'i oogatoo amman afu bikkina Waa'a baddehe; ixxom lonsehe! Iimane, uulla, dambalaqaa wo'i bu'uwwaa qooccu Waa'ina otossi'llehe» yukko. Ee lasage la'm asse'amaanchim «Waa'i quunqa eeboo is saa'immika jor woyi'n diqaasa minaadab hundinam agisso'i lob Baabiloone ubbo'oo! Ubbo'oo!» yukkuuyyi luxxi asse'amaancho awwonukko. Odim saxxi asse'amaanchim lobakat sagara iimaa'aa «Moochchichchinaa moochchichchi misilinaa otossukkokii ee moochchichchi summi mare'em ixxi miinenne te'im ixxi makki anganne issookkokii ayyim hee'ulas qo'anamoo'n Waa'i quunqi humbullonne issamaakkoo woyi'n diqaasa agookko. Odim keesammi asse'amaa'n illagennee Gereechchi illagennee giirinnee diina yakkam luwwinnee barche'e afookko. Ixxuwwa barche'e issoo gii'l wiriirim heer heerinam cawwaa iim firookko. Moochchichchinaa moochchichchi misilinaa otossitam keenina te'im ixxi summi mare'e issito'i keenina hundinam ballaa hiimoo hore'em usheexxat hee'ooyyo» yukkuuyyi ixxuwwa awwonukko. Waa'i ijaajo egetta'a Yesuusanne qoxxita'a amma'nnito'i Waa'i minaadaphphek xa'nnimmi la'amookkok kannonnette. Ee lasage odim iimaniinsi mat sagar «Kaka kitaabe; ka lasage Waa'ina awwaaddu'uuyyi letam keen maassaammuwwa» yukkuuyyi macceesummo. Keesammi Ayyaanim «Eeyya, hanqinam ixxuwwi maassaammuwwa. Ixxuwwim badallatiinsi usheexxitamisina ixxuwwi baxim ixxuwwa awwonookko» yukko. Oono'o! Ee lasage qadaalli umbu'lla moo'ummo. Ee umbu'llannem Manchi Beeto labookkok horoorenne worqiinsi baxamaakkoo kaachchi mare'e issaqqaa odim ixxi angannem qare'aalli jajjara amadaa afuuraa hee'ukko. Odim mulli asse'amaanchim Keesammi Miniinsi firaa umbu'llanne afuuraa hee'ukkaannina lobakat geejji sagarinne «Hurbaata murakkam amman afu bikkina ki jajjara asse'llaa mure. Mashka'oomim uulli hurbaat gogaakko» yaa kurukko. Ee bikkina oo umbu'llanne afuuraa hee'ukkok ixxi jajjara uulla asse'aa uulli hurbaata murukko. Mulli asse'amaanchim iimanenne yoo Keesammi Miniinsi firukko. Ixxenam qare'aalli jajjar hee'ukko. Ee lasage odim giiranne malaayyi yoo mulli asse'amaanchim aduruusa wiriissimmina worqiinsi baxamu mu'utiinsi firukko. Ixxim qare'aalli jajjara amadu asse'amaanchina lobakata geejji sagarinne «Uullanne yoo woyi'n haqqichchi shogguwwik mish loqu bikkina woyi'n shogguwwa hundam mure» yaa shuurukko. Ee bikkina oo asse'amaanchim ixxi jajjara uulla asse'aa uullanne yoo woyi'n haqqichchika shogguwwa murukko. Ee murukkokam Waa'i quunqaannonne woyi'n diqaasa ciinsakkam haraar beyyonne darabukko. Oo woyinim beero'iinsi biireen woyina ciinsakkam beyyonne ciinsamukko. Ee ciinsamu woyiniinsim xillaalloom faraxxi hakkamma afooqax xiig firaa 296 kiilomeetira ihooqax beyyo daadukko. Ee lasage maalalsiisoo mulli malaayyaam mare'e iimanenne moo'ummo. Oo moo'ummokim Waa'i quunqi beeddoo lasaanchi lamar boobannuwwa ubbuussam lamar asse'amaan hee'llo'o. Ee lasage odim gagmoo'ixxi'nnoo'i dambalaqa laboo luwwa giirinne hamaaramaakkookkoka moo'ummo. Odim woddaa'i moochchichchina, moochchichchi misilinaa ee moochchichchi summi xiginaa otossimma sabba'a kaa'llo'i keeno moo'ummo. Ixxuwwim Waa'iinsi uwwamu diitta amadda'a ee gagmoo'ixxi dambalaq gadanonne uullita'a hee'llo'o. Odim ixxuwwi «Hundam xantoo Moollanni Waa'a! Ki bax malaayyaamoo maalalsiisoohanee! Minaadaphphi adila, ki goog xabbeenaa hanqo'anee! Moollanna! Keesammi xale'i atette ikkitti bikkina keese baddoobee'ekii ki summa lonsoobee'ekii ayyette? Hanqo'i ki bax moo'amu bikkina minaadab hundim waatta'a kiina otossitamo» yitu'uuyyi Waa'ina awwaadaanchi Muse'ekaa Gereechchi mazmuuraa zammatto'o. Ee lasage iimanenne Waa'i mi'nnek keesammi beyyi fooqaakkoo moo'ummo. Ee Keesammi Miniinsim woddaa'i lamarem boobannuwwa amadda'a hee'llo'i lamarem asse'amaanim fitto'o. Ixxuwwim talbiinsi baxamaakkoo muccur qadaalli eddechcha edde'lla'atii ixxuwwi biqem worqiinsi baxamaakkoo sabbatinne lade'lla'atii hee'llo'o. Soorem qooccanchuwwiinsim mat heer heerina hee'oo Waa'ik quunqi wo'mmaakkookkoka worqiinsi baxamaakkoo lamar injaffuwwa lamarem asse'amaaninam uwwukko. Ee Keesammi Minennem Waa'i lombiinsii Waa'i malaayyiinsii ki'ukkok wiriir wo'mmukko. Oo lamarem asse'amaanim amaddo'i lamarem boobannuwwim beeddeebe'i afeebe'e ee Keesammi Mine ayyim ageena xanukkoyyo. Ee lasage Keesammi Miniinsi geejji sagar lamarem asse'amaaninam «Mattakka'a injaffuwwanne yoo Waa'i quunqa uullanne dunnehe» yaa kurukkuuyyi macceesummo. Ee bikkina luxxi asse'amaanchi maraa ixxi injaffika uullanne dunukkaare moochchichchi mare'i yoo keenonnee ee moochchichchi misilina otossitam mannannee jorisa bararaa'oo omar firukko. La'm asse'amaanchim ixxi injaffika dambalaqanne dunukkaare dambalaq lehu manchi xiiqqisa ihukko. Dambalaq woronne hee'oo fooraam luwwi hundichchim lehukko. Saxxi asse'amaanchim ixxi injaffika daajjuwwannee wo'i bu'uwwannee dunukkaare oo daajjuwwii wo'i bu'uwwii xiiganne daba'llukko. Wo'onne malaayyi yoo asse'amaanchim «Yoontaannoo hee'llittaannoo, keesamma! ka oogato'o oogatti bikkina at hanqo'ane! Mashka'oomim ki minaadaphphekaa hiraagaa'nnekaa xiiga dunto'i keenina atim xiiga agissaatto. Oohim ixxuwwina laboohane» yaa wocukkuuyyi macceesummo. Odim aduruusa wiriissimmina worqiinsi baxamu mu'utiinsi «Eeyya, Hundam xantoo Moollanni Waa'a! At oogatti oogato'i hanqo'anee xabbeenaa» yoo sagara macceesummo. Ee lasage odim soo'l asse'amaanchi ixxi injaffika eelliinchonne dunukkaare manna gii'llisa shokkiisoo malaayyi eelliinchina uwwamukko. Mannim malaayyaam iibbinne shokkaa ee boobannuwwanne malaayyi yoo Waa'i summa duumukko. Ixxuwwim baaxiilo biiraa yita'a daba'llita'a Waa'ina lomba uwwito'oyyo. Ee lasage odim onti asse'amaanchi ixxi injaffika moochchichchi adilla'n barcumanne dunukkaare oo moochchichchi gassoo beyyi tuunsukko. Mannim barche'e affo'i bikkina ixxuwwi allabo inqinne ga'mmaqqito'o. Odim barche'e affo'i bikkinaa ixxuwwanne firu oma'l bikkinaa iima'n Waa'a qangito'o bagaan baaxiilo biiraa yita'a daba'llito'oyyo. Ee lasage odim loh asse'amaanchi ixxi injaffika Efiraaxiisa daajjenne dunukkaare eelliinchi firoo kolliinsi waattam adilluwwina goog fooqoo'isina daajji wo'i xoo'ukko. Woddaa'i xarakkichchi suumiinsi, moochchichchi suumiinsii «Hiraagaanchi anette» yoo qophphanaanchi suumiinsii luga labbam sas ayyaannuwwi fittu'uuyyi moo'ummo. Oo sasem jor ayyaannuwwim aganna issitam habus ayyaannuwwa. Ixxuwwim hundam xanoo Waa'i lob o'l ayyaamina uullanne hee'llam adilluwwi hundam wixxaa'lleena mattamo. Oono'o! An gamaanchisa waaroommo; umba'ada maraa ixxeka tuulli orachcho manni moo'oobee'isa baqaa ixxi eddechcha ege'llookkok maassaamo. Oo jor ayyaannuwwi Ibro'isinne Armaageedoona yakkam beyyonne adilluwwa wixxaa'llo'o. Ee lasage odim lama'l asse'amaanchi ixxi injaffika hafachchanne dunukkaare Keesammi Minenne yoo adilla'n barcumiinsi «Beeddaakko» yoo geejji sagar firukko. Ee beyyonnem banqi belellaat, sagar, banqi gugii malaayyaam uulli huxechchii ihukko. Uullanne manni qooccamukkaanniinsi ki'isaa eehido'i uulli huxechchi hore'em ihubee'i bikkina ookki hundiinsim lophphaakkoohane. Oo lob beero'im sas beyyi ihaa diqamukko. Minaadaphphi beero'uwwim ubukko. Waa'im Baabiloona yakkam lob beero'o tiiraa ixxi malaayyaam quunqi yoo humbulli diqaasa aggamisa issukko. Wo'i kibbamu uulli hundim beyyiinsi bi'ukko. Ee'isam odim duunnuwwi hundim beyyiinsi bee'ukko. Odim matichchim ontayyi kiilo'o kee'mmoo baraxxi kin iimaniinsi mannanne ga'nnukko. Oo baraxxi booban lobakata kee'mmaalli ihu bikkina manni Waa'a qangukko. Ee lasage lamarem injaffuwwa amadda'a hee'llo'i asse'amaaniinsi mat i beyyo waaraa «Waare! Lobakat wo'uwwanne afuutta'a yo'i la'anto'oo saa'aanchi meentichchonne afoo oogato'o moo'isoommo. Uulli adilluwwi saa'ukkok isennette. Odim uullanne hee'llam keen dimbito'ok is saa'immi woyi'n diqaasinnette» yaa iina kurukko. Ixxim eese Ayyaaninne udma'a massukko. Anim orachchi hundoomannem Waa'inne game'llamoo summi wo'mmaakkoo mat kashar moochchichchonne saa'llito'oo meentichcho moo'ummo. Ee moochchichchinam lamar horoorii tommi buudduwwii hee'ukko. Oo meentichchom biishshi heemachchi eddechchaa kashar eddechchaa edde'lla'a hee'llo'o. Odim worqinne, bito xee'aalli kininnee inqu'u yakkam bito xee'aalli luwwinnee wereeggita'a hee'llo'o. Odim shigigaa'oo luwwii is saa'immik haashaassoo luwwii wo'mmaakkookkoka worqiinsi baxamaakkoo humbullo is anginne amadda'a hee'llo'o. Is miinennem «Saa'aaninaa uullanne yoo haashaassoo luwwi hundinaa ama lob Baabiloone» yoo mat misxir woshshi yoo summi kitaabamaa hee'ukko. Oo meentichchom Waa'i minaadaphphi xiiginnee Yesuus bikkina wocco'aare shakko'i kee'n xiiginnee dimbito'oo moo'ummo. Anim ise moo'ummi ammanenne lobakata maalalummo. Ihukkaarem woddaa'i asse'amaanchi iina «Mahina maalaltoolla? Ee meentichchokaa ise saa'llito'i lamar horoorii tommi buudduwwii yoo moochchichchokaa maaxammi woshsha an kiina kuroommo. At moo'llitti moochchichchi eraare hee'ukko. Kaba bee'e. Lasage tungibee'i baalliinsi firaa bichchina marookko. Uulli qooccamukkaanniinsi ki'isaa heechchi kitaabanne ixxuwwi summi kitaabamubee'i keen uullanne hee'llam minaadab hundim oo moochchichchi illageen hee'aa kaba bee'aa lasage waaroo'isa moo'lla'a maalaltamo. Qoossoo tiir hasisookkok ka beyyonnette. Oo lamarem horoolluwwim meentichcho afuutto'i lamar duunnuwwa. Ee'isam odim oo horoolluwwi lamar adilluwwa. Ixxuwwiinsi ontoom ubaakko. Matoom kabadem yookko. Odim mat waaroo'nnim yookko. Ixxim waaraa hoffi ammanina gassoo'isa Waa'i issookko. Oo hee'u moochchichchi kabadooma bee'ek sadeentane. Ihukkaarem ixxim ee lamariinsi mato. Ixxim bichchina marookko. Oo at moo'llitti tommem buudduwwim adilla'n malaayye aa'lloo'n yo'i tommi adilluwwa. Ihukkaarem moochchichchinne maqirem hoffi ammanina adilluwwi ikkamisina adilla'n malaayye siiddamo. Ee tommem adilluwwikim tiir mato. Ixxuwwim ixxuwwi gassimmi malaayyee daannoomaa ee moochchichchina uwwitamo. Ixxuwwim Gereechcho qassamo. Ihukkaarem Gereechchi moollanno'ina Moollannaa adilluwwina Adilaa ihu bikkina ixxuwwa kaa'ookko. Gereechchinne maqire yo'i keenim weeshanto'i keeno, doo'llanto'i keenoo amma'nnanto'i keenoo» yukko. Odim iina oo asse'amaanchi «Oo saa'aanchi meentichcho afuutta'a moo'llitti wo'uwwi minaadaba, manna, manni shumo'oo manni wocoo suummuwwaa. Oo moochchichchii at moo'llitti tommem buudduwwii ee saa'aanchi meentichcho sabbamo. Ixxuwwim ise bogga'a umba'adatte issitamo. Iseka maaram ittamo, giirannem shokkiissamo. Waa'i yu luwwi wo'mmeebe'i afeebe'e ixxuwwi tiiro mat issimminnee ixxuwwi adilla'n malaayye moochchichchina uwwimminnee ixxi tii'lleka issitamisina eekka ixxuwwi wodanonne issukkok Waa'a. Oo at moo'llitti meentichcho uulli adilluwwa gassitam lob beero'otte» yukko. Ee lasage lobakat malaayyi yoo mulli asse'amaanchim iimaniinsi dillukkuuyyi moo'ummo. Ixxi nuuriinsi ki'ukkok uulli caakkukko. Ixxim lobakat malaayyaam sagarinne «Lob Baabiloone ubbo'oo! Ubbo'oo! Isem habus hee'oo beyyo, jor ayyaan hundim cicciissoo beyyoo moo'akkeena shigigaa'oo jor cii'i hundim garoo beyyoo ikko'o. Mashka'oomim minaadab hundim is jor saa'immi woyi'n diqaasinne ubaakko. Uulli adilluwwim isenne maqirem saa'aakko. Odim ka uulli daddaraanim is mixxam er luwwa isena biteesimminne ki'ukkok goddaan ihaakko» yaa shuurukko. Ise issito'isam issitakka'a baado daballehe. Ise baxxo'i baxika lam suume eddakka'a baado daballehe. Ise diddiffo'i humbullonne lam suume qoxxaalli issitakka'a diddiffehe. Ise is gaga lonsaqqito'i qaxaa heellisso'i qaxaa ise barche'e issehee kichche'issehee. Odim is wodanonne ‹An Adilatte, busaratteyyo. Kichchechchi eesenne hore'em afooyyo› yitam bikkina lehik, kichchechchikii qaanne'ikii booban dangonnem mexxo'i ballannem isenne ubookko. Isenne oogatoo Waa'i malaayyaam ihu bikkina ise giiranne shokkiisookko» yukkuuyyi macceesummo. Isenne maqire saa'imminnee wereeggimminnee hee'llam uulli adilluwwi hundim ise shokkitu'uuyyi firoo wiriira moo'lla'a «Aayye! Aayye!» yitu'uuyyi wi'llitamo. Ixxuwwim isenne afu barche'e moo'lla'a baddito'i bikkina qee'llonne uullita'a «Baabiloone! Aayye! Aayye! Ate ka lob beero'o, malaayyaam beero'o! Oono'o! Keesenne oogato'i matem sa'aatannem afukko» yitamo. Uullanne hee'llam daddaraan iyyiissa'a eebbo'i dadda'l mu'uta bito aa'ookkok od bee'i bikkina is bikkina kichche'llamoo wi'llitamoo. Daddarina eebbam luwwim worqa, bira, bito xee'aalli kina, inqu yakkam bito xee'aalli luwwa, talbiinsi dadamoo danaam eddechcha, biishshi heemachchi eddechcha, haarra yakkam fatirinne dadamaakkoo eddechcha, kashar eddechcha, enje'oo haqqi hunda, daane'i inqiinsi baxamoo mu'ut hundichcho, bito xee'aalli haqqiinsi, naasiinsi, xaariinsii bito xee'aalli kiniinsii baxamu mu'ut hundichcho, enja, qarafa yakkam enja, enje'oo aduruusa, karbe'e yakkam bito xee'aalli enja, aduruusi'nnoo'i aqoomaada, woyi'n diqaasa, zayta, danaam qama, arasa, laro, gereebba, farado, gaare'ee manni fooree oohim agido. Aayye! At mixxitti mish kiinniinsi qee'llaakko. Ki amaxxii ki nuurii hundim bi'aakko. Oo keen ka lasage keesenne hore'em siidamooyyo. Ee mu'ut hundam isena biteessu'uuyyi goddito'i daddaraan hundim isenne afu barche'e moo'lla'a baddito'i bikkina qee'llonne uullitamo. Ixxuwwim geejji sagarinne «Talbiinsi dadamoo eddechcha, biishshi heemachchi eddechchaa kashar eddechchaa edde'llam hee'llittaante! Worqinne, bito xee'aalli kininnee inqu yakkam bito xee'aalli luwwinnee Wereeggitaa hee'llitti lob beero'o Aayye! Aayye! Oo amaxxi hundim matem sa'aatichchonnem bi'aa xa'aakko» yitu'uuyyi kichche'llamoo wi'llitamoo. Markaphphi ushe'aan, markabinne mattam keen, markaphphi woronne baxxam keenii markabinne daddattam keenii hundim qee'llonne uullita'a ise shokkitu'uuyyi firoo wiriira moo'lla'a «Ka lob beero'o laboo mulli beero'i hee'ukkonnihe?» yitu'uuyyi laattamo. Odim ixxuwwi horoorennem dira issaqqita'a «Dambalaqanne markabbuwwi yoo keen hundam is goddinne goddaan issito'i oo lob beero'o matem sa'aatichchonnem bi'llo'i bikkina aayyee! Aayyee!» yita'a laattu'uuyyi kichche'lla'a wi'llito'o. Oono'o! Iiman, Waa'i minaadab, Waa'i sagara kurimmina asse'antakko'i keenii hiraagaanii ki'nnuwwi bikkina Waa'i isenne oogatu bikkina liirammehe. Ee lasage odim mat malaayyaam asse'amaanchi geejji liitimqax kina ki'isaa dambalaqanne darabaa «Lob Baabiloo'n beero'o malaayyaamisa darabanta'a ka'isa ubbamo. Ka lasage od hore'em siidantamoyyo. Diitta lellitam kee'nnek, azmaare'ik, gambaabiyyinne lellitam kee'nnekii xurumbulla fuggam kee'nnekii sagar od keesenne macceesamooyyo. Mah baxom baxxam angi qoor manni ka lasage keesenne od siidantamoyyo. Liitimmi sagarim keesenne od macceesamooyyo. Sha'i caakkim ka lasage keesenne od caakkooyyo. Idaayyichchikii idaayyichchokii sagar keesenne od macceesamooyyo. Ki daddaraan ka uulli adilluwwi hee'llo'o. At gennitti genninne minaadab hundim huushamaakko. Hiraagaa'nnek, Waa'i minaadaphphekii uullanne duranto'i kee'nnekii hundikim xiig ki woronne siidamaakko» yukko. Ee lasage lobakat manni sagara laboo geejji sagar iimanenne «Handa Waa'ina! gatisimmi, lombii malaayyii ni Waa'ane! Ixxek oogato'i hanqo'anee xabbeenaa ihu bikkina is saa'imminne uulla bi'isso'i lob saa'aanchonne oogataakko. Ixxena awwaaddam kee'n xiigam iseensi miqisaakko» yukkuuyyi macceesummo. Odim «Handa Waa'ina! Ise shokkitu'uuyyi wiriir heer heerinam cawwaa firookko!» yukkuuyyi shuurukko. Odim lamiyyii soorem lommannii soorem qooccanchuwwii «Ihona; handa Waa'ina!» yitu'uuyyi adilla'n barcumanne afuuru Waa'i illagenne ubba'a otossito'o. Ee lasage odim adilla'n barcumiinsi «Waa'a badditakkam ixxi awwaadaan hundim hoffokii lobokii ni Waa'a galaxxehe» yoo sagar firukko. Odim lobakat manni sagara, lobakat wo'i sagaraa malaayyaam banqi sagaraa laboo sagar «Handa Waa'ina! Hundam xanoo ni Waa'i adil ihaakko. Gereechchi bollochcho'i afu bikkinaa ixxi idaayyichchom is gaga gudixxito'i bikkinaa liirammona, ixxo lonsinonaa ixxenam galata uwwinonaa. Isem edde'llamisina talbiinsi dadamaakkoo danaam muccur belecce'oo eddechchi uwwamukko» yukkuuyyi macceesummo. Oo talbiinsi dadamu muccur belecce'oo eddechchi Waa'i minaadaphphi muccurooma. Ee lasage woddaa'i asse'amaanchi iina « ‹Gereechchi bollochcho'i hii'm hurbaatina weeshanto'i keen maassaammuwwa› yitaa kitaabe» yukko. Odim «Kuk hanqo'i Waa'i sagara» yukko. Ee lasage an ixxena otosseena ixxi lokkonne ubummo. Ihukkaarem ixxi iina «An kiinninnee Yesuus bikkina naqqassam kiyyabbaayyuwwinnee maqirem awwaadaanchi ihummi bikkina iina otossititte! Waa'ina otossihe» yukko. Yesuus naqqasu hanqo'i woshshi hiraagaan naqqasso'i woshsha. Ee lasage iiman fooqaakkoo moo'ummo. Oono'o! Qadaalli farashsho moo'ummo. Ee farashshonnem saa'llukkok «Amma'nnamaakkoohanee hanqo'anee» yamamoohane. Ixxi hanqo'isa oogatoohanee qasamoohanee. Ixxek illim gii'l labana laboohane. Ixxi horoorennem dut adilla'n mare'uwwi yoohane. Odim ixxi gagiinsi bagaan ayyim la'oobee'i summi ixxi hanenne kitaabamaa hee'ukko. Ixxim xiiganne cefamaakkoo eddechcha edde'aa hee'ukko. Ixxi weeshamoo summim «Waa'i sagara» yamamaatette. Talbiinsi dadamaakkoo qadaalli danaam muccur eddechcha edde'llo'oo iima'n bagadaa'n gogotim qadaalli faradonne saa'llita'a ixxo awwonto'o. Ixxi suumiinsim minaadaba aphphisoo'isina qare'aalli bisa'i firukko. Ixxim minaadaba xaa'l biccinne ijaajaa gassookko. Odim hundam xanoo Waa'ik malaayyaam quunqi woyi'n diqaasa ciinsakkam beyyonne woyina ciinsookko. Ixxi eddechchannee ixxi gubeedonnee «Adilluwwina Adila! moollanno'inam Moollanna!» yoo summi kitaabamaakko. Ee lasage odim eelliinchonne uullaakkoo mat asse'amaancho moo'ummo. Ixxim iima'n lambe'enne bararoo ammarina sagara iimaa'aa «Waa'i gudisaakkoo lob maadda oohim adilluwwika, gaadaano awwonsitam kee'nneka, qoxxaalluwwika, faraxxekaa faradaa'nnekaa manni hundikam oohim wolaphphekaa agixxekaa odim hoffi kee'nnekaa lob kee'nnekaa maara ittakkeena waattakka'a wixxi'llehe» yaa shuurukko. Ee farashshaanchoo ixxi gogotaa qasseena woddaa'i moochchichchii uulli adilluwwii ixxuwwi gogotinnem wixxito'oo moo'ummo. Oo moochchichchi qeefadamukko. Ee moochchichchi illagenne aganna issoo «An hiraagaancho» yoo qophphanaanchim ixxenne maqirem qeefadamukko. Ixxim ee moochchichchi mare'e aa'llo'i keenoo ee moochchichchi misilina otossitam hee'llo'i keenoo agannuwwa issukkuuyyi huushisukkane. Oo lamim foorinnem diina yakkam luwwi aphphoo gii'l dambalaqanne darabanto'o. Gatto'i keenim ee qadaalli farashshonne saa'llukkaanni suumiinsi firoo bisa'inne leto'o. Ixxuwwi maara ammar hundim goddaa itukko. Ee lasage tungi bee'i baalle fooqaa'aanchoo malaayyaam geejji chimchimaa amadaakkoo mat asse'amaanchi iimaniinsi dillukkuuyyi moo'ummo. Ixxim woddaa'i xarakkichcho oohim gassi hamashshichcho amadaa mat kum hiincho kurukko. Oo xarakkichchim Daabuloosatte te'im Sheexaancho. Oo kum hiinchi beeddeebe'i afeebe'e minaadaba od huushisoobee'isina oo asse'amaanchi ee xarakkichcho amadaa tungi bee'i baallenne darabaa koobo'o issaa ifiisukko. Oo kum hiinchi beeddaa lasage hofqax ammaninam ixxi tiramimmi hasisookko. Ee lasage adilla'n barcummuwwa moo'ummo. Ee adilla'n barcummuwwannem daannoom uwwamaakkoo keen afuutta'a hee'llo'o. Odim Yesuus bikkina wocco'i bikkinaa Waa'i sagara kutto'i bikkinaa horoore murakko'i mannika foore moo'ummo. Oo manni ee moochchichchinaa moochchichchi misilinaa otossitobee'i keeno. Ee moochchichchi mare'em ixxuwwi miinenne te'im anganne issitobee'i keeno. Ixxuwwi lehiinsi ki'lla'a Kiristoosinne maqirem kum hiinchina adilluwwi ikko'o. Ee ammane lehiinsi ki'lloo'n gatto'i keen oo kum hiinchi beeddeebe'i afeebe'e lehiinsi ki'llo'oyyo. Oohim lehiinsi kichchina luxxane. Ee luxxi kichchanne lehiinsi ki'immi gada'a siixxitam keen maassaammuwwa. La'm lehik malaayyi ixxuwwanne bee'e. Ihukkaarem oo keen Waa'inaa Kiristoosinaa qeessuwwi ikka'a Kiristoosinne maqirem kum hiincho gassitamo. Oo kum hiinchi beeddoo ammane Sheexaanchi karatiinsi tiramookko. Ixxim uullanne hee'oo minaadab hundam oohim Googaa Maagoogaa huushiseenaa orina wixxaa'eenaa firookko. Ee minaadaphphekim xig dambalaqanne yoo shashsha'llisa. Ixxuwwim uulli hundannem binnita'a Waa'i minaadaphphi gattee iittamaakkoo beero'oo kolli hundinnem kibbito'o. Ihukkaarem giir Waa'i beyyiinsi iimaniinsi dillaa ixxuwwa itaa urukko. Ixxuwwa huushisu Sheexaanchim woddaa'i moochchichchii «An hiraagaancho» yoo qophphanaanchii yo'i diina yakkam luwwi aphphoo gii'l dambalaqanne darabamukko. Ixxuwwi ee beyyonne ballaa hiimoo heer heerinam barche'e affamo. Ee lasage qadaalli geejji adilla'n barcumaa ee barcumanne afuuraakkookkokaa moo'ukko. Uullii iimanii ixxi illagiinsi gibukko. Ee lasage od ixxuwwik beyyim bi'ukko. Leto'i keenim hoffokii lobokii adilla'n barcu'm illagenne uullito'oo moo'ummo. Kitaabbuwwim fooqukko. Mullekim heechchi kitaab fooqukko. Leto'i keenim ee kitaabbuwwanne kitaabamaa yoo ixxuwwi baxisam oogato'o aa'llo'o. Dambalaqim ixxi woronne yo'i leto'i keeno uwwukko. Lehii Si'oolim ixxuwwi beyyonne yo'i leto'i keeno uwwito'o. Hundichchim baxxo'i baxisam oogato'o aa'llo'o. Lehii Si'oolii gii'l dambalaqanne darabanto'o. Oo gii'l dambalaqim la'm leho. Ixxi summi heechchi kitaabanne kitaabamaa siidamubee'i hundim gii'l dambalaqanne darabamukko. Eraa'l iimanii eraa'l uullii higaa hee'u bikkina haareechchi iimanee haareechchi uullaa moo'ummo. Dambalaqim ee lasage od siidamukkoyyo. Odim haareechchi Yerusaalee'm keesammi beero'i is goonchina wereeggita'a guddo'i idaayyichcho labaa iimaniinsi Waa'i beyyiinsi dillukkuuyyi moo'ummo. Odim adilla'n barcumiinsi geejji sagar «Oono'o! Waa'ik heechchi beyyi manni lambe'ennette. Ixxim ixxuwwinne maqire hee'ookko. Ixxuwwim ixxi minaadab ikkamo. Waa'i ixxi gagim ixxuwwinne maqire ihaa ixxuwwina Waa'i ihookko. Waa'im ixxuwwi illiinsi indiiddi hundichchom shiinshookko. Eraa'l luwwi hundim higu bikkina ee lasage od leh hee'ooyyo. Odim kichchechchi te'im wi'llimmi te'im hawwi hee'ooyyo» yukkuuyyi macceesummo. Adilla'n barcumanne afuurukkokim «Oono'o! An hundem luwwam haareechchi issoommo» yukko. Odim «Ku sagar amma'nnamaakkoohanee hanqo'anee ihu bikkina kitaabe» yukko. Ee lasage odim «Beeddaakko; hundi luchchiinsim illageen hee'ummokii hundi luchchiinsi lasagem hee'oommokii anette. Xeebe'ukkaannina heechcha uwwoo wo'i bu'iinsi bit bee'em uwwoommo. Kaa'ukkok eekka laga'llookko; anim ixxena Waa'i ihoommo. Ixxim iina beet ihookko. Woshshi ihukkaarem baddoo kee'nnek, amma'nnoobee'i kee'nnek, haashaarammuwwik, manna shitam kee'nnek, saa'llam kee'nnek, gennitam kee'nnek, qophpha'n Waa'ina otossitam kee'nnekii qophphanaa'nnekii hundikim saam diininne aphphoo gii'l dambalaqanne ihookko. Oohim la'm leho» yukko. Ee lasage lasaanchi lamarem boobannuwwi wo'mmaakkoo lamarem injaffuwwa amaddo'i lamarem asse'amaaniinsim mat i beyyo waaraa «Gereechchina arette ikko'i idaayyichcho moo'isoommo; waare» yukkuuyyi wocukko. Ixxim eese Keesammi Ayyaaninne mat lob qeeraa'l duunanne fissaa keesammi Yerusaalee'm beero'i iimaniinsi Waa'i beyyiinsi dillukkuuyyi moo'isukko. Ee beero'onnem Waa'i lombi hee'u bikkina oo beero'i gagmoo'ixxa laboo lobakata bito xee'aalli belecce'oo ki'nnisa caakkisam hee'ukko. Odim muccur gagmoo'ixxisam belecce'am hee'ukko. Ee beero'inam tommii lam goocii yoo lobakata qeeraa'l qash hee'ukko. Ee tommonnee lamem gooccuwwannem tommii lam asse'amaanii hee'llo'o. Odim ee gooccuwwannem tommikii lamem Isra'ee'l sullikim summi kitaabamaa hee'ukko. Ee gooccuwwikim eelliinchi firinne sas gooc, hanaa'n qarinne sas gooc, woroo'n qarinne sas gooc, eelliinchi aagginne sas gooc hee'ukko. Ee beero'i qashim tommonnee lam kinannee uullaa hee'ukko. Ee kinneewwannem Gereechchi asse'amaa'nnek tommikii lamikim summi kitaabamaa hee'ukko. Ee iinninne wocam hee'ukkaannina ee beero'o, gooccuwwaa qashaa keenoo worqi bicci hee'ukko. Ee beero'ik uullichchii midaadii gudaanchi ihaa soor midaad yoohan hee'ukko. Ixxim ee beero'o ee biccinne keenukkaare uullichchi 2,220 kiilomeetira ihooqax beyyi ihukko. Ixxekim qeeraa'lloom, haraaroomii uullichchii gudaanchi hee'ukko. Odim ee beero'i qasham keenukkaare manchi keennaanchonne mat xibbee soree soor angaa hee'ukko. Oohim ee asse'amaanchaannonnette. Beero'oomim baxamukkok gagmoo'ixxi'nnoo'i muccur worqiinsette hee'ukko. Ihukkaarem qash baxamukkok shaano'i kininnette. Ee beero'i qash uullu kinneewwim lobakata bito xee'aalli kinneewwi hundinnem wereeggaakkoohan hee'ukko. Ee kinneewwikim luxxek gagmoo'ixxa laboo shaano'i kina, la'mmek cuquluusa laboo kina, saxxek heemachchi lab shaano'i kina, soo'llek aduu'n ille laboo kina, ontik haxaraam heemachchi kina, lohik boobeet kashar kina, lama'llek worqa laboo kina, sadeentik shaano'i kina, honsik baar kina, tommik baar shaano'i kina, tommikii matikii sandaab kina, tommikii la'mmekii kuul kin hee'ukko. Oo tommii lam gooccuwwim baxamukkok inqu yakkam tommiinsii lam kiniinsette. Oo gooccuwwi annannichchim ee inqu yakkam kinneewwinne matinne matinnem baxamaakkoohan hee'ukko. Ee beero'i googim burcuqo'isa worinne caakka higisoo muccur worqi hee'ukko. Hundam xanoo Moollanni Waa'ii Gereechchii ee beero'ina Keesammi Min ikko'i bikkina ee beero'onne Keesammi Mine moo'ummoyyo. Ee beero'ina Waa'i lombii Gereechchii caakki ikko'i bikkina ee beero'o caakkisoo'isina eelliinchi te'im agan hasisooyyo. Minaadabim ee beero'i caakkanne daba'llamookko. Uulli adilluwwim ixxuwwi lomba ee beero'o eebbamo. Ee beero'i gooccuwwi ballanne hore'em xufamooyyo. Hiimim ee beero'onne hee'ooyyo. Minaadaphphekam lombaa nuuraa ee beero'i eebbamo. Ihukkaarem Gereechchaannonne heechchi kitaabanne kitaabanto'i keeniinsi bagaan haashaassoo luwwik ma'lluchchim ee beero'o aagooyyo. Odim shigigaa'oo luwwa issitam keenii qophphanaanii ee beero'o hore'em aaggamoyyo. Ee lasage oo asse'amaanchi Waa'aanniinsii Gereechchiinsii adilla'n barcumiinsi firaa daadoo heechcha uwwoo daajji wo'o iina moo'isukko. Oo daajji wo'im gagmoo'ixxa laboo lintaalli hee'ukko. Oo daajjim beero'i bobba'i lambe'inne daadam hee'ukko. Ee daajjaannonne lamem shiinennem hiinchonne tommoo lam koree agana agananne misha mishoo heechcha uwwoo haqqichchi hee'ukko. Ee haqqichchik buyyim minaadab fayya'oominne hee'oo'isa issoohane. Ee beero'onne Waa'ikii Gereechchikii adilla'n barcum hee'ookko bagaan duumamu luwwik ma'lluchchim hee'ooyyo. Ixxena awwaaddam keenim ixxena otossitamo. Ixxi illem moo'llamo. Ixxi summim ixxuwwi miinenne hee'ookko. Ee lasage od hiim hee'ooyyo. Moollanni Waa'i ixxuwwina caakki ihoo bikkina eelliinchi caakkii mulli caakkii od hasisooyyo. Ixxuwwim heer heerina adilluwwi ikkamo. Ee lasage oo asse'amaanchi iina «Ku woshshi amma'nnamaakkoohanee hanqo'anee. Hiraagaa'n ayyaana uwwoo Moollanni Waa'i hoffi ammanenne ihoo luwwa ixxena awwaaddam keenina caakkisona ixxi asse'amaancho asse'aakko» yukko. Yesuus «Oono'o! An qaqqisom waaroommo. Ka kitaabanne kitaabamu hiraaqqi sagarina ijaajamookkok maasse'amaakkoohane» yukko. Ka hundam macceesummokii moo'ummokii an Yohaannisatte. An ee keeno macceesummi ammanee moo'ummi ammanee ee keeno iina moo'isu asse'amaanchina otosseena ixxi lokkiinsi woroon ubummo. Ihukkaarem oo asse'amaanchi «Iina otossititte. An kiinninne, hiraagaan kiyyabbaayyuwwinnee ka kitaab woshshina ijaajantam keeninnee maqirem awwaadaanchi ihummi bikkina Waa'ina otossihe» yukko. Odim ee lasage oo asse'amaanchi iina «Ku hundichchim wo'mmoo amman afu bikkina ka kitaabanne kitaabamu Waa'i sagar fooqoobee'isa koobbitte. Jora baxookkok ka lasagem jora baxona. Haashaarammi ka lasagem haashaaramona. Er manchi ka lasagem eroomma issona. Keesammi ka lasagem keesamaakkoohan ihona» yukko. Odim Yesuus «Oono'o! Annannichchinam ixxi baxu baxisam uwweena irifo'o amadaa qaqqisom waaroommo. Hundem luwwiinsim illageen hee'ummok, hundem luwwiinsim lasagem hee'oommok, luxxek, lasaanchik, asheerii goollo'ii anette» yukko. Heechcha uwwoo haqqichcho afimminaa ee beero'o goocinne aagimminaa labbam keen ikkeena ixxuwwi eddechcha muccussita'a aanshitam keen maassaammuwwa. Wish keen, kiiraan, saa'aan, manna shitam keen, qophpha'n waa'ina otossitam keen, qophphano iittitam keenii qophphano woccam keenii hundim ee beero'iinsi biireen ikkamo. «Amma'nnaa'n wixxittuwwina ka asso naqqasoo'isina i asse'amaancho ki beyyo asse'ummok an Yesuusatte. An Daawiit qaranchi lugumoo shumo'oo. Odim caakkisoo soodaraa'l boollaankichcho» yukko. Keesammi Ayyaanii idaayyichchoo «Waare» yitamo. Macceesookkokim «Waare» yihona. Xeebe'ukkokim waarona. Hasukkokim heechcha uwwoo wo'ika bit bee'em massona. Oono'o! Ka kitaabanne kitaabamu Waa'i sagara macceesookkoka hundam sogoommo. Ayyim kannonne ma'lluchcho edulas ka kitaabanne kitaabamu boobannuwwa Waa'i ixxonnem edookko. Odim ayyim ka kitaabanne kitaabamu Waa'i sagariinsi xa'isulas ka kitaabanne kitaabamu keesammi beero'ikaa heechcha uwwoo haqqichchikaa ixxi qooda Waa'i ixxeensi hoorookko. Ka keeno naqqasookkok «Hanqinam an qaqqisom waaroommo» yoolla. Eeyya, Moollanni Yesuusa, waare! Moollanni Yesuusik eroommi Waa'i minaadab hundinnem maqire ihona! Aameen.